ལེའུ་བཞི་པ་སྔགས་སྡོམ།
༈ ན་མོ་བྷཊནཱ་ར་ཀ་ཤྲཱི་མཱཾ་གུ་ར་ཝེ། རང་རིག་ཡེ་ཤེས་གཟུང་འཛིན་འཆིང་བ་ལས། །རྣམ་པར་གྲོལ་བའི་མི་འགྱུར་མཆོག་བདེའི་གར། །གྲངས་མེད་རྒྱལ་བའི་འཁོར་ལོར་སྒྱུར་བ་པོ། །ཁྱབ་བདག་རྡོ་རྗེ་སློབ་དཔོན་ལ་བཏུད་ནས། །རྣམ་དག་ལུང་གི་ཉི་མ་འོད་པོ་ཆེ། །རྣམ་དཔྱོད་རིག་པའི་ཤིང་རྟ་ལ་ཆིབས་པ། །རྣམ་འཕྲུལ་མན་ངག་རྟ་བདུན་གྱིས་དྲངས་ནས། །རྣམ་གྲོལ་སྣང་བ་མཆོག་གི་དགའ་སྟོན་སྤྲོ། །
གསུམ་པ་སྔགས་ཀྱི་སྡོམ་པ་བཤད་པ་ལ་གསུམ་སྟེ། སྟོན་པས་གསང་སྔགས་ཀྱི་རྒྱུད་སྡེ་ཇི་ལྟར་གསུངས་ཚུལ། དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ། དེ་ལྟར་བཟུང་བའི་བརྗོད་བྱ་གཏན་ལ་དབབ་པའོ། །དང་པོ་ནི། ཀུན་བཟང་རྡོ་རྗེ་འཆང་དབང་སྟོན་པ་དེས། །འོག་མིན་ཆེན་པོར་རྒྱུད་སྡེ་རྒྱ་མཚོ་གསུངས། །ཕྱིས་ནས་འབྲས་སྤུངས་སོགས་སུ་བཟླས་ཏེ་བསྟན། །ཅེས་པ་སྟེ། བདག་ཅག་གི་སྟོན་པ་འདི་ཉིད་གཞི་གདོད་མའི་དབྱིངས་སུ་རིག་པའི་ཡེ་ཤེས་གྲོལ་བས་མངོན་པར་བྱང་ཆུབ་སྟེ། སྐུ་དང་ཡེ་ཤེས་འདུ་འབྲལ་མེད་པའི་ངང་ལ་དུས་གསུམ་གྱི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་པ་ལས། རང་སྣང་ཤིན་ཏུ་རྣམ་པར་དག་པ་རྡོ་རྗེའི་ཞིང་ཁམས་འོག་མིན་ཆེན་པོར། སྟོན་པ་ལོངས་སྤྱོད་རྫོགས་པའི་སྐུ་དཔལ་ཀུན་ཏུ་བཟང་པོ་རྡོ་རྗེ་འཆང་ཆེན་པོ་ཉིད་རྒྱལ་ཚབ་ཞི་ཁྲོ་རིགས་ལྔའི་རྣམ་པ་དང་བཅས་པར་སྣང་བས། ཉིད་ལས་མི་གཞན་པའི་རང་སྣང་གི་འཁོར་རྒྱལ་བ་ཞི་ཁྲོའི་དཀྱིལ་འཁོར་ཚད་མེད་པས་ཡོངས་སུ་བསྐོར་བའི་དབུས་ན། ཆོས་ཡེ་ཤེས་འོད་གསལ་བའི་དགོངས་པ་བརྗོད་དུ་མེད་པ་ཉིད། དུས་གཞི་རྫོགས་འཕོ་འགྱུར་མེད་པའི་དབྱིངས་སུ་རང་ཤར་བའི་ཚུལ་གྱིས་སྣང་བར་གྱུར་ཏོ། །དེ་ཉིད་ཀྱི་ངང་ལས་ས་བཅུ་རྒྱུན་མཐའ་ལ་སྣང་བའི་གཞན་སྣང་ལོངས་སྤྱོད་རྫོགས་པའི་ཞིང་ཁམས་ཁྱད་པར་ཅན་གྱི་འོག་མིན་དུ་སྟོན་པ་རིགས་དྲུག་པའི་རྣམ་པས་འཁོར་ས་མཐའི་བྱང་ཆུབ་སེམས་དཔའ་རིག་པ་འཛིན་པ་མཆོག་རྣམས་ལ་གསང་སྔགས་ཀྱི་རྒྱུད་དཔག་ཏུ་མེད་པ་དགོངས་པ་བརྡའི་གསུང་གིས་འགྲོ་སྒྲོལ་གྱི་བར་དུ་རྒྱུན་མི་ཆད་པར་སྟོན་ཏེ། གསང་སྙིང་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །ཅེས་སོ། །དེ་བཞིན་དུ་བྱང་སེམས་ས་དགུ་པ་ལ་སྣང་བའི་འོག་མིན་ཙམ་པོ་དང་། ས་བརྒྱད་པ་ལ་སྣང་བའི་བཏགས་པའི་འོག་མིན་རྣམས་སུའང་ཚུལ་དེ་དང་ཆ་འདྲ་བས་རྒྱུད་གསུང་ཞིང་། དེ་དག་གི་ཚེ་དྲག་པོ་འཇིགས་བྱེད་སོགས་གདུལ་བྱ་གདུག་པ་ཅན་རྣམས་ཀྱི་དོན་དཔལ་ཧེ་རུ་ཀའི་རྣམ་པར་སྣང་བས་ཁྲོ་བོའི་དཀྱིལ་འཁོར་སྤྲུལ་བཤད་ཀྱིས་དོན་མཛད་པ་དང་། ཞིང་ཁམས་དེ་རྣམས་སུ་བགྲོད་པར་མི་ནུས་པའི་གདུལ་བྱ་དག་པ་རྣམས་ལ་བདེ་བ་ཅན་སོགས་རང་བཞིན་སྤྲུལ་བའི་དག་ཞིང་རང་དབང་ཅན་རྣམས་དང་། གདུལ་བྱ་དག་མ་དག་སྣ་ཚོགས་པའི་ངོར་འགྲོ་འདུལ་སྤྲུལ་པའི་ཞིང་རྣམས་སུ་དུས་གསུམ་དུ་བཤེགས་བཞུགས་འབྱོན་པའི་རྡོ་རྗེ་འཆང་གང་འདུལ་ཞི་ཁྲོའི་རོལ་པ་མ་འགགས་པར་སྣང་བས་དུས་དང་ཚད་མ་ངེས་པར་གསུངས་པ་ནི་དཔག་ཏུ་མེད་པ་ཡིན་ཏེ། དེ་ལས། དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ལས་མ་གཡོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་དང་། འཇམ་དཔལ་སྒྱུ་དྲྭ་ལས། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་དང་ཡང་དུ་གསུངས་བ་གང་། །ཞེས་སོ། །དེ་ལྟར་ཐོག་མ་མེད་པའི་དུས་ནས་འོག་མིན་ལ་སོགས་པར་བསྟན་པའི་རྒྱུད་རྣམས་ཕྱིས་བཟླས་ཏེ་གསུངས་པའང་མང་སྟེ། འདི་ལྟར་དུས་འཁོར་བ་རྣམས་ནི། སྟོན་པ་ཤཱཀྱ་ཐུབ་པ་ཞིང་འདིར་འཚང་རྒྱ་ཚུལ་བསྟན་ནས་ཐེག་པ་གསུམ་བསྟན་པའི་རྗེས་སུ་དཔྱིད་འབྲིང་ནག་པའི་ཉ་ལ་དཔལ་ལྡན་འབྲས་སྤུངས་ཀྱི་མཆོད་རྟེན་དུ། འོག་ཏུ་ཆོས་དབྱིངས་གསུང་དབང་དང་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་སྤྲུལ་ཏེ་འདུས་པའི་འཁོར་ལ་དབང་བསྐུར་ནས་རྣལ་འབྱོར་དང་རྣལ་འབྱོར་མའི་རྒྱུད་སྡེ་མཐའ་དག་བསྟན་པར་བཞེད་དེ། དམ་པ་དང་པོའི་རྒྱུད་ལས། སྟོན་པས་བྱ་རྒོད་ཕུང་པོ་རུ། །ཤེས་རབ་ཕ་རོལ་ཕྱིན་ཚུལ་བཞིན། །ཆོས་བསྟན་དཔལ་ལྡན་འབྲས་སྤུངས་སུ། །དེ་བཞིན་གསང་སྔགས་ཚུལ་རབ་གསུངས། །ཞེས་སོ། །ཡང་སྙིང་པོའི་འགྲེལ་པ་ཉི་འོད་སེང་གེས་མཛད་པར་རྒྱལ་བུ་དོན་འགྲུབ་ཀྱིས་བཏགས་པའི་ལུས་དཀའ་ཐུབ་ཀྱི་གནས་ནཻ་རཱཉྫ་ནའི་འགྲམ་དུ་བཞག་ནས། ཡེ་ཤེས་ཀྱི་ལུས་འོག་མིན་དུ་གཤེགས་པ་ལ་དེ་བཞིན་གཤེགས་པ་ཐམས་ཅད་ཀྱིས་མངོན་བྱང་ལྔས་བྱིན་གྱིས་བརླབས་པས་རྡོ་རྗེ་དབྱིངས་ཆེན་པོར་སངས་རྒྱས་ཏེ། རི་རབ་ཀྱི་རྩེ་རྡོ་རྗེ་ནོར་བུའི་ཁང་པ་དང་། རྒྱ་མཚོའི་འགྲམ་དུ་རིམ་པར་བྱོན་ནས་ཡོ་གའི་རྒྱུད་རྣམས་གསུངས། དེ་ནས་ཨོ་ཌཱི་ཡ་ན་དང་ས་ཧོ་རའི་ཡུལ་དུ་གཤེགས་ཏེ་ཨིནྡྲ་བྷུ་ཏི་སོགས་ལ་གསང་བའི་རྒྱུད་སྡེ་ཐམས་ཅད་བསྟན་ནས། སླར་བཏགས་པའི་ལུས་ལ་ཞུགས་ཏེ་རྡོ་རྗེ་གདན་དུ་འཚང་རྒྱ་ཚུལ་བསྟན་པར་བཞེད་ཅིང་། ཡང་ཁ་ཅིག་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏིས་སྟོན་པའི་ཉན་ཐོས་མཁའ་ལ་འཕུར་ཏེ་འགྲོ་འོང་བྱེད་པ་གཟིགས་པ་ན་ཐག་རིང་བས་ཆ་མ་ཕྱེད་དེ། བློན་པོ་ལ་བྱ་དམར་པོའི་ཁྱུ་འདི་དག་ཅི་ཡིན་དྲིས་པ་དང་། དེ་རྣམས་ན་རེ། འདི་ནི་བྱ་མ་ལགས་ཏེ། སངས་རྒྱས་ཀྱི་ཉན་ཐོས་ལགས་སོ་བྱས་པས། རྒྱལ་པོ་སངས་རྒྱས་བལྟ་འདོད་ནས་གསོལ་བ་བཏབ་པས། ནངས་པར་ཝཱ་ར་ཎ་སཱི་ནས་བཅོམ་ལྡན་འདས་འཁོར་དགྲ་བཅོམ་པ་ལྔ་བརྒྱ་དང་བཅས་པ་རྫུ་འཕྲུལ་གྱིས་བྱོན། དེར་རྒྱལ་པོས་མཆོད་ནས་འཚང་རྒྱ་བའི་ཐབས་ཞུས་པས། རབ་ཏུ་བྱུང་ལ་བསླབ་པ་གསུམ་རྒྱུད་ལ་བསྟེན་ཅིག་གསུངས་པས། ཛམྦུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་སླའི། །འདོད་ཡོན་སྤངས་པའི་ཐར་པ་ནི། །ནམ་ཡང་མི་འདོད་གཽ་ཏ་མ། །ཞེས་ཞུས་པ་དང་། སྐད་ཅིག་ལ་ཉན་ཐོས་ཀྱི་ཚོགས་རྣམས་མི་སྣང་བར་གྱུར་ཏེ། འདི་ན་གང་ཟག་བརྒྱད་མེད་ཅིང་། །ཉན་ཐོས་རང་རྒྱལ་འགའ་ཡང་མེད། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་དག་དེ་ཡི་གཟུགས་སུ་སྤྲུལ། །ཞེས་ནམ་མཁའ་ནས་སྒྲ་འབྱུང་བ་དང་། དེར་ཡེ་ཤེས་ཀྱི་དཀྱིལ་འཁོར་སྤྲུལ་ནས་རྒྱལ་པོ་ལ་དབང་བསྐུར་བས། དེ་ཉིད་དུ་ཟུང་འཇུག་གི་སྐུ་འགྲུབ་སྟེ། དེ་ལ་སྟོན་པས་རྒྱུད་ཐམས་ཅད་གཏད་པར་བཞེད་དོ། །གཞན་ཡང་རི་བོ་བྱ་རྐང་ཅན་དང་བསིལ་བ་ཚལ་དང་། ལངྐའི་བདག་པོ་སྒྲ་སྒྲོགས་ཀྱི་གནས་ལ་སོགས་པར་སྟོན་པ་ཉིད་དཀྱིལ་འཁོར་གྱི་བདག་པོའི་རྣམ་པར་བསྒྱུར་བའམ། མ་བསྒྱུར་བ་ཆགས་བྲལ་གྱི་རྣམ་པ་ཅི་རིགས་པས་རྒྱུད་སྡེ་མང་དུ་གསུངས་སོ། །དེས་ན་རྒྱུད་གཞུང་གཅིག་ལའང་གདུལ་བྱའི་སྣང་བས་གླེང་གཞི་ཐ་དད་པ་འབྱུང་བ་མི་འགལ་ཏེ། འཇམ་དཔལ་སྒྱུ་དྲྭའི་བཤད་རྒྱུད་ལས། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །ཛམྦུའི་གླིང་འདིར་གྲགས་པ་ཡིན། །བྱང་ཆུབ་སེམས་དང་ལྷ་རྣམས་དང་། །མི་རྣམས་ཀྱི་ནི་དོན་དུ་གསུངས། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོ་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །དེས་ནི་གདུལ་བྱ་འདུལ་བའི་ཚེ། །འཁོར་རྣམས་འདུས་པའི་དུས་དེར་གསུངས། །ཞེས་སོ། །
གཉིས་པ་ནི། ཕྱག་རྡོར་དང་ནི་ཞུ་བའི་འཁོར་གྱིས་བསྡུས། །གྲུབ་ཆེན་བརྒྱད་སོགས་རྒྱ་བོད་མཁས་པས་བཀྲལ། །སྔ་འགྱུར་རིང་ལུགས་བཀའ་གཏེར་གྲགས་པ་དང་། །གསར་མའི་བཞེད་སྲོལ་དཔག་ཏུ་མེད་ན་ཡང་། །རྒྱུད་སྡེ་སྤྱི་ཡི་དམ་ཚིག་འདིར་འཆད་དོ། །ཞེས་པ་སྟེ། སྤྱིར་གསང་སྔགས་རྡོ་རྗེ་ཐེག་པའི་རྒྱུད་རྣམས་ཕྱག་ན་རྡོ་རྗེས་བསྡུས་ཏེ། སཾ་སྐྲྀ་ཏ་དང་། པྲཱ་ཀྲི་ཏ་དང་། ཨ་བ་བྷྲཾ་ཤ་དང་། ཌཱ་ཀི་ནིའི་སྐད་དང་། ཀླ་ཀློའི་སྐད་ལ་སོགས་པ་སྐད་རིགས་དང་ཡིག་རིགས་སྣ་ཚོགས་པས་གླེགས་བམ་ལ་བཀོད་པར་བཤད་དེ། ཡེ་ཤེས་ཐིག་ལེའི་རྒྱུད་ལས། མ་འོངས་པའི་དུས་སུ་གསང་བའི་རྒྱུད་སྐལ་བ་དང་ལྡན་པའི་སེམས་ཅན་ལ་སུས་འཆད་པར་བྱེད། བཀའ་སྩལ་པ། ཕྱག་ན་རྡོ་རྗེ་མགོན་པོས་བཤད་པར་བྱེད་དོ། །ཞེས་དང་། ཨིནྡྲ་བྷུ་ཏིས་མཛད་པའི་བདེ་མཆོག་རྩ་རྒྱུད་ཀྱི་འགྲེལ་པ་ལས། ཕྱི་དུས་རིམ་པར་ལུང་བསྟན་སྡུད་པ་པོས། །རི་བོ་མཆོག་རབ་བྱང་ཤར་ལྷ་གནས་མཆོག །ལྕང་ལོ་ཅན་གྱི་ཕོ་བྲང་ཆེན་པོར་ནི། །རྒྱུད་རྣམས་མ་ལུས་སེམས་དཔའ་ཆེན་པོའི་ཚོགས། །བྱེ་བ་ཕྲག་ནི་དགུ་བཅུ་རྩ་དྲུག་སོགས། །འདུས་ཏེ་རྗེ་བཙུན་གསང་བའི་བདག་པོ་ལ། །གསོལ་བ་བཏབ་ཚེ་འདི་སྐད་བདག་ཐོས་ཞེས། །རབ་ཏུ་གསུངས་པ་གསེར་གྱི་གླེགས་བུ་ལ། །བཻ་ཌཱུཪྱ་ཡི་ཞུན་མས་ཡི་གེར་བཀོད། །ཅེས་སོ། །ཁྱད་པར་རྒྱུད་ཀྱི་ཞུ་བ་པོ་གང་ཡིན་དང་། མཇུག་ཏུ་གང་ལ་གཏད་པ་དེ་ཉིད་སྡུད་པ་པོ་ཡིན་པ་ཤས་ཆེ་སྟེ། རྡོར་སེམས་སྒྱུ་དྲྭ་ལྟ་བུ་གང་ལ་གཏད་པ་དེས་བསྡུས་པར་རྒྱ་མཚོ་ལས། འཁོར་གྱི་ནང་ན་སྐལ་མཆོག་ལྡན། །འདུལ་བའི་དུས་བབ་གསང་བའི་བདག །ལག་ན་རྡོ་རྗེས་བསྡུ་བ་མཛད། །ཅེས་སོ། །དེ་བཞིན་དུ། དུས་འཁོར་རྩ་རྒྱུད་ཟླ་བ་བཟང་པོས། བརྟག་གཉིས་རྡོ་རྗེ་སྙིང་པོས། སྡོམ་འབྱུང་ཕྱག་རྡོར་གྱིས། རྡོ་རྗེ་མཁའ་འགྲོ་ཕག་མོས་བསྡུས་པ་ལྟར་རོ། །དེ་ལྟར་སྟོན་པ་པོ་དང་སྡུད་པ་པོ་ཐ་དད་དུ་བསྟན་ཀྱང་། ངེས་པའི་དོན་ལ་སྟོན་འཁོར་རྒྱུད་ཐ་དད་དུ་གྱུར་པ་མ་ཡིན་ཏེ། བདེ་འདུས་ཞི་བ་འདུས་པ་རྩ་བའི་རྒྱུད་ལས། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཞེས་དང་། གསང་བ་གྲུབ་པ་ལས། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་གསུངས་པའི་ཕྱིར། གལ་ཏེ་མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་འགྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་ཞུས་པའི་ལན་དུ། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ན། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་པའི་རྒྱུའི་ཐེག་པའི་སྡེ་སྣོད་གསུམ་སྟོན་པས་དངོས་སུ་ཞལ་ནས་གསུངས་པའི་བཀའ་དང་། འབྲས་བུའི་ཐེག་པ་རིག་པ་འཛིན་པའི་སྡེ་སྣོད་རྗེས་སུ་གནང་བའི་བཀའོ། །ཞེས་མཁས་པ་དག་གསུངས་ཀྱང་། དང་པོ་ལ་ཤེས་རབ་སྙིང་པོའི་མདོ་ལྟ་བུས་མ་ངེས། ཕྱི་མ་ལ་མཚན་བརྗོད་དུ། དེ་ནས་བཅོམ་ལྡན་ཤཱཀྱ་ཐུབ། །རྫོགས་པའི་སངས་རྒྱས་རྐང་གཉིས་མཆོག །ཉིད་ཀྱི་ཞལ་ནས་ལྗགས་བཟང་བ། །ཞེས་སོགས་ཀྱིས་མ་ངེས་པ་རང་ལུགས་གདུལ་བྱ་དབང་རྣོན་སྐལ་བ་མཆོག་ཏུ་གྱུར་པ་རྣམས་ལ་ཐུབ་པའི་དབང་པོས་མིའི་འཇིག་རྟེན་དུའང་རྒྱུད་མང་དུ་གསུངས་མོད། དེ་ལྟ་ནའང་འདིར་མ་གསུངས་པ་ལྟར་བཤད་པ་ནི། རེ་ཞིག་གསང་སྔགས་ཀྱི་སྒྲ་མིའི་འཇིག་རྟེན་དུ་ཕལ་ལ་མ་གྲགས་པའི་དབང་དུ་མཛད་ཅིང་། ཕྱིས་འབྱུང་བར་ལུང་བསྟན་པ་ནི་ཡོངས་སུ་གྲགས་པ་ལ་དགོངས་པའོ། །འོ་ན་ལྷ་མིའི་འཇིག་རྟེན་དུ་ཇི་ལྟར་གྲགས་ཚུལ་ནི། གསང་སྔགས་སྔ་འགྱུར་བ་ལྟར་ན། རྒྱུད་སྡེ་དང་། སྒྲུབ་སྡེ་གཉིས་ལས། དང་པོ་ནི། སྤྱི་མདོ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ཅན་དེ། །རྒྱལ་པོ་ཛཿཞེས་བྱ་བ་ལ། །སྔོན་དུ་ལྟས་སྣང་སྣང་གྱུར་ཏེ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལངྐའི་བདག་པོ་ལ་སོགས་པར། །ལག་ན་རྡོ་རྗེས་སྣང་བར་འགྱུར། །ཞེས་པ་ལྟར་ཐུབ་པའི་དབང་པོ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན། དམ་པའི་རིགས་ཅན་དྲྭ་མ་ལྔ་ལངྐའི་ཡུལ་གྱི་རི་བོ་མ་ལ་ཡའི་རྩེར་རང་རང་གི་མངོན་ཤེས་དང་རྫུ་འཕྲུལ་གྱིས་འདུས་ཏེ། གདུང་ཚིག་ཉི་ཤུ་རྩ་གསུམ་བཏོན་པས་གསང་བདག་མངོན་སུམ་དུ་བྱོན་ནས་རིགས་ཅན་ལྔ་སོགས་རིག་འཛིན་འདུས་པ་ཕལ་མོ་ཆེ་ལ་སྔོན་འོག་མིན་དང་། དགའ་ལྡན་དང་། སུམ་ཅུ་རྩ་གསུམ་རྣམས་སུ་གྲགས་པའི་གསང་བའི་ཐེག་པ་ཉིད་སྟོན་པར་མཛད་ཅིང་། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻཌཱུཪྱའི་ཞུན་མས་བྲིས་ནས་དགོངས་པའི་རྩལ་བདུན་གྱིས་ནམ་མཁའ་ལ་སྦས་སོ། །དེའི་ཚེ་དེའི་བྱིན་རླབས་ཀྱིས་ས་ཧོ་རའི་རྒྱལ་པོ་ཛཿལ་རྨི་ལྟས་ངོ་མཚར་བ་བདུན་རྨིས་པ་ལ་བརྟེན་ནས་སྒྲུབ་པ་མཛད་པས། རྨི་ལྟས་དང་མཐུན་པར་རྒྱུད་སྡེའི་གླེགས་བམ་རྣམས་མི་ཡུལ་དུ་དངོས་སུ་བབས་ཏེ། ཀྲི་ཡའི་རྒྱུད་རྣམས་ཝཱ་ར་ཎཱ་སཱི། ཡོ་ག་རྣམས་མེ་རུ་འབར་བའི་རྩེ་མོར། མ་ཧཱ་ཡོ་ག་རྣམས་ས་ཧོར་གྱི་ཡུལ་རྒྱལ་པོ་ཛའི་ཁང་སྟེང་། ཨ་ནུ་ཡོ་ག་རྣམས་ལངྐའི་ཡུལ་དུ་གྲགས་པ་སིངྒ་ལའི་གླིང་གི་ནགས་ཚལ་དུ་གླེགས་བམ་དང་བཅས་བབས་ཤིང་། ཨ་ཏི་ཡོ་ག་རྣམས་ནི་ནུབ་ཕྱོགས་ཨོ་ཌཱི་ཡ་ནའི་ཡུལ་དུ་སློབ་དཔོན་ཆེན་པོ་དགའ་རབ་རྡོ་རྗེས་དཔལ་རྡོ་རྗེ་སེམས་དཔའམ་ཕྱག་ན་རྡོ་རྗེ་ལ་དངོས་སུ་གསན་པ་ལྟར་བསྡུ་བ་མཛད་དེ་གླེགས་བམ་ལ་བཀོད་པར་བཤད་དོ། །སྒྲུབ་སྡེ་ནི་སྔོན་འོག་མིན་གསང་བ་མཆོག་གི་གནས་སུ་སྟོན་པ་ཀུན་བཟང་ཆེ་མཆོག་ཧེ་རུ་ཀས་ཆོས་ཉིད་ཀྱི་རང་སྒྲས་གསུངས་པའི་རྒྱུད་རྣམས་གསང་བདག་རྡོ་རྗེ་ཆོས་ཀྱི་རང་ཉིད་ཚོམ་བུ་དགུའི་དཀྱིལ་འཁོར་གྱི་ནང་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་ལ་བཀོད་དེ་དགོངས་འགྲེལ་དུ་ལུང་ལྔ་ཡང་མཛད་ནས་མཁའ་འགྲོ་མ་ལས་ཀྱི་དབང་མོ་ཆེ་ལ་གཏད། དེས་སྤྱི་དང་བྱེ་བྲག་གི་རྒྱུད་རྣམས་ཕྱེས་ནས་རིན་པོ་ཆེའི་སྒྲོམ་སོ་སོར་བཅུག་སྟེ་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པ། ནམ་ཞིག་གི་ཚེ་གྲུབ་པ་ཐོབ་པའི་སློབ་དཔོན་བརྒྱད་ཀྱིས་ གཏེར་སྲུང 
་རྣམས་ལ་བཀའ་བསྒོས་པས། མཁའ་འགྲོ་མས་བཀའ་བྱེ་བྲག་གི་སྒྲོམ་བུ་བརྒྱད་པོ་བཀའ་བབས་ཀྱི་སློབ་དཔོན་བརྒྱད་ལ་གཏད། སྤྱི་རྒྱུད་ཀྱི་སྒྲོམ་བུ་རིན་པོ་ཆེ་སྣ་བརྒྱད་ལས་བྱས་པ་རྒྱ་མ་ཁྲོལ་བས་སླར་དེ་ཉིད་དུ་སྦས། ཕྱིས་ཀུན་འདུས་རིག་འཛིན་སློབ་དཔོན་ཆེན་པོ་པདྨ་སམ་བྷ་བས་སྤྱན་དྲངས་ཏེ། རྗེ་འབངས་སྙིང་གི་བུ་དགུའམ་ཉི་ཤུ་རྩ་ལྔ་ལ་ལེགས་པར་གདམས་སོ། །གསང་སྔགས་གསར་མའི་གྲགས་ཚོད་ལྟར་ན་ཨོ་རྒྱན་གྱི་རྒྱལ་པོ་ཨིནྡྲ་བྷུ་ཏིས་རྒྱུད་རྣམས་གླེགས་བམ་དུ་བྱས་ཤིང་། སྐྱེ་བོ་རྣམས་ལ་བསྟན་པས་ཡུལ་དེའི་སྲོག་ཆགས་ཕྲ་མོ་ཡན་ཆད་ཐམས་ཅད་ཀྱིས་དངོས་གྲུབ་ཐོབ་སྟེ་འཇའ་ལུས་སུ་སོང་། དེ་ནས་ཨོ་རྒྱན་གྱི་ཡུལ་སྟོངས་པ་མཚོར་གྱུར་ཏེ་ཀླུས་གང་བ་ལ་གསང་བདག་གིས་རྒྱུད་སྡེ་རྣམས་གཏད་ཅིང་སྨིན་པར་མཛད་པས། དེ་དག་རིམ་གྱིས་མིར་གྱུར་ནས་མཚོ་འགྲམ་དུ་གྲོང་བཅས་ཏེ་ཉམས་སུ་བླངས་པས་གྲུབ་པ་ཐོབ། དེ་རྣམས་ཀྱི་བུ་དང་བུ་མོ་རྣམས་མཁའ་འགྲོ་དང་མཁའ་འགྲོ་མར་གྱུར་པའི་ཨོ་རྒྱན་མཁའ་འགྲོའི་གླིང་ཞེས་གྲགས། མཚོ་དེ་ཡང་བསྐམས་ཏེ་ཧེ་རུ་ཀའི་ལྷ་ཁང་རང་བྱུང་ཞིག་ཀྱང་བྱུང་བས། དེའི་དཀོར་མཛོད་དུ་རྒྱུད་ཀྱི་གླེགས་བམ་རྣམས་བཞུགས་པ་ལས། ཕྱིས་རྒྱལ་པོ་བ་སུ་ཀལྤ་དང་། ཀླུ་སྒྲུབ་དང་། ཀུ་ཀུ་རི་པ་སོགས་གྲུབ་ཐོབ་རྣམས་ཀྱིས་རྒྱུད་ཤས་ཆེ་བ་ཞིག་དེ་ནས་བླངས། དེ་བཞིན་དུ་ཤམྦྷ་ལ་སོགས་ཡུལ་གཞན་དག་ནས་ཀྱང་བླངས་ཏེ་རིམ་གྱིས་དར་རོ་ཞེས་འདོད་དོ། །དེ་ལ་གསར་རྙིང་གི་ཁྱད་པར་ནི། རྒྱ་གར་ན་སོ་སོར་ཕྱེ་བ་མེད་ནའང་བོད་འདིར་འགྱུར་སྔ་ཕྱིས་གྲགས་པ་སྟེ། སྔོན་གྱི་པཎྜི་ཏ་སངས་རྒྱས་གསང་བ་དང་། བོ་དྷི་ས་ཏྭ་དང་། ཨོ་རྒྱན་གྱི་སློབ་དཔོན་པདྨ་འབྱུང་གནས་དང་། པཎ་ཆེན་བི་མ་ལ་མི་ཏྲ་ལ་སོགས་པ་དང་། ལོ་ཙཱ་བ་བཻ་རོ་ཙ་ན་རྨ་གཉགས་སྐ་ཅོག་ཞང་གསུམ་སོགས་ཀྱིས་བསྒྱུར་བ་ནས་བཟུང་པཎྜ་ིཏ་སྨྲྀ་ཏི་བྱོན་པ་ཡན་ཆད་ལ་བསྒྱུར་བའི་མདོ་རྒྱུད་དགོངས་འགྲེལ་དང་བཅས་པ་ཐམས་ཅད་ལ་རྙིང་མའམ་སྔ་འགྱུར་ཞེས་བྱ་ལ། ལོ་ཆེན་རིན་ཆེན་བཟང་པོའི་འགྱུར་མགོ་ཚུགས་པ་ནས་བཟུང་ལོ་ཆེ་ཆུང་མར་མལ་འགོས་འབྲོག་ར་འབྲོ་སོགས་ཀྱིས་རྒྱ་བལ་གྱི་པཎྜི་ཏ་ཅི་རིགས་སྤྱན་དྲངས་ཏེ་བསྒྱུར་བ་རྣམས་ལ་གསར་མའམ་ཕྱི་འགྱུར་ཞེས་གྲགས་སོ། །འགྱུར་འདི་གཉིས་ལ་གོ་དཀའ་སླ་དང་དབྱིངས་འཇལ་བ་ལ་རླབས་ཆེ་ཆུང་འབྱུང་བ་ནི། སྔོན་གྱི་ལོ་པཎ་རྣམས་སངས་རྒྱས་བྱང་སེམས་ཀྱི་རྣམ་འཕྲུལ་ཤ་སྟག་ཡིན་པས་དོན་ཇི་ལྟ་བ་བཞིན་དུ་གཏན་ལ་ཕབ་ནས་བསྒྱུར་བས་ཚིག་གོ་སླ་ཞིང་དབྱིངས་འཇལ་བ་ལ་རླབས་ཆེ། ཕྱིས་འགྱུར་གྱི་ལོ་ཙཱ་བ་དུས་དེར་བོད་དུ་གྲགས་ཆུང་བའི་ཆོས་རེ་ལ་འདོད་པའི་དམིགས་བཙུགས་ཏེ་རྒྱ་བལ་ཐེངས་འགའ་རེ་བསྐོར་ནས་སྦྱངས་པའི་མཁས་པ་རྣམས་གྱིས་དོན་ཇི་ལྟ་བ་བཞིན་དུ་མ་ལྷོངས་ཏེ་སྒྲ་འགྱུར་གཙོ་བོར་བཏོན་པས་ཚིག་སྒྲིམ་ཞིང་གོ་དཀའ་དབྱིངས་འཇལ་བ་ལ་རླབས་ཆུང་བ་ལྟར་སྣང་བ་ཡིན་ཏེ། དཔེར་ན་གསང་བ་སྙིང་པོའི་རྒྱུད་རྨ་གཉགས་ཀྱི་འགྱུར་དང་ཐར་ལོའི་འགྱུར་ལ་བལྟས་པས་འགྱུར་སྔ་ཕྱིའི་ཁྱད་པར་ཤེས་པར་འགྱུར་རོ། །དེར་མ་ཟད་སྔ་འགྱུར་ནི་སྔོན་འཕགས་ཡུལ་དུ་བསྟན་པ་གྲྭ་མ་ཉམས་པའི་དུས་སུ་བསྒྱུར་བས་ཐར་ལོའི་གསར་འགྱུར་བཅུ་གསུམ་ཙམ་མ་གཏོགས་མདོ་ཐམས་ཅད་དང་བྱ་རྒྱུད་ཤས་ཆེ་བའི་ཕྱི་རྒྱུད་དང་འཇམ་དཔལ་སྒྱུ་དྲྭ་གསང་འདུས་མཉམ་སྦྱོར་སོགས་གསར་མ་དང་ཐུན་མོང་པའི་རྒྱུད་ཀྱང་མང་དུ་འགྱུར་ལ། རྒྱུད་སྡེའི་བྱུང་ཚུལ་གྱི་བབས་ཀྱང་མི་འདྲ་བ་མེད་པར་གཅིག་ཏུ་བབ་ཅིང་། ཕྱིས་ཀྱི་ལོ་པཎ་རྣམས་ཀྱི་སྤྱོད་ཡུལ་དུ་མ་གྱུར་པའི་ལུང་ཨ་ནུ། མན་ངག་ཨ་ཏི། སྒྲུབ་སྡེ་དང་བཅས་པའི་རྒྱུད་མཐའ་ཡས་པ་ཞིག་ཀྱང་གངས་ལྗོངས་ཀྱི་གདུལ་བྱའི་དཔལ་དུ་བྱོན་ལ། ཕྱི་འགྱུར་རྣམས་ནི་ཕྱིས་རྒྱ་གར་དུའང་དར་ནུབ་ཅི་རིགས་བྱུང་བས་སླད་ཀྱི་ཡུལ་ཐ་དད་ནས་གྲུབ་ཐོབ་འགའ་རེས་དཔེ་གསར་དུ་བླངས་ཏེ་སྤྱད་པས་ལོ་རྒྱུས་མི་མཐུན་པ་སྣ་ཚོགས་དང་ཆོས་ཀྱང་བྱ་སྤྱོད་ཅི་རིགས་ལས་གཙོ་བོར་རྣལ་འབྱོར་ཕྱི་ནང་ཐུན་མོང་བ་ཙམ་དུ་སྣང་ངོ་། །ཡང་རྙིང་མ་བཀའ་གཏེར་གྱི་ཁྱད་པར་ནི། བཀའ་མ་ལྟར་ན། ཕྱི་རྒྱུད་སྡེ་གསུམ་ཀ་སློབ་དཔོན་སངས་རྒྱས་གསང་བའི་ལུགས་གཙོ་ཆེ་ཞིང་སྔོན་བཤད་སྒྲུབ་ཀྱི་སྲོལ་ཤིན་ཏུ་དར་བར་བྱུང་ངོ་། །རྣལ་འབྱོར་ནང་པ་ལ་གསུམ་གྱི། མ་ཧཱ་ཡོ་ག་ལས་ཐུན་མོང་མ་ཡིན་པ་སྒྱུ་དྲྭའི་སྐོར་རྣམས། རྒྱལ་པོ་ཛཿནས་སྲས་མོ་གོ་མ་དེ་ཝཱིའི་བར་སྤྱོད་པའི་ཉེ་རྒྱུས་རང་རང་གི་ཚོམ་བུ་དང་བཅས་པ་རྡོ་རྗེ་འཆང་གི་སར་གཤེགས་ནས། སྲས་མོའི་སློབ་མ་སངས་རྒྱས་གསང་བས་བི་མ་ལ་མི་ཏྲ་ལ་བཤད། དེ་ལ་ལོ་ཙཱ་བ་རྨ་གཉགས་གཉིས་ཀྱིས་གསན་ནས་རིམ་པར་གནུབས་དང་ཟུར་ལ་བབས་སོ། །ལུང་ཨ་ནུ་ཡོ་ག་རྣམས་ནི་གནུབས་ཆེན་སངས་རྒྱས་ཡེ་ཤེས་ཀྱིས་རྒྱ་བལ་གྲུ་ཤའི་ཡུལ་གྱི་ལོ་པཎ་རྣམས་ལ་གསན་ཡིན་ལ། ཨ་ཏི་ཡོ་ག་རྣམས་ནི། སྤྲུལ་པའི་སྐུ་དགའ་རབ་རྡོ་རྗེས་རྗེས་སུ་བཟུང་བ་འཇམ་དཔལ་བཤེས་གཉེན་ཡིན། དེས་ཤྲཱི་སིང་ཧ་ལ་བཤད། དེའི་སློབ་མ་ཨོ་རྒྱན་སངས་རྒྱས་གཉིས་པ། པཎ་ཆེན་བི་མ་ལ་མི་ཏྲ། ལོ་ཆེན་བཻ་རོ་ཙ་ན་གསུམ་ལས་རྒྱ་ཆེར་འཕེལ་ལོ། །དེ་ཐམས་ཅད་ཀྱང་སྤྱི་མདོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་རིག་རྣ་བར་བརྒྱུད་པ་སྟེ། །གང་ལ་ཐུག་གི་བར་དུའོ། །ཞེས་པ་ལྟར་བརྒྱུད་པའི་བབས་ལུགས་གསུམ་དུ་བསྡུས་ནས་འཆད་དོ། །གཏེར་མ་ལྟར་ན། ཇི་སྐད་དུ། ཤིན་ཏུ་ཟབ་པའི་མཐར་ཐུག་སྙིང་པོ་རྣམས། །སྤྱིར་ཡང་བོད་རྣམས་གསར་ངས་ཆེ་བ་དང་། །སྙིགས་མའི་འགྲོ་ལ་ལྷག་པར་སྙིང་རྗེ་བས། །མཐའ་དབུས་ཐམས་ཅད་གཏེར་གྱིས་བཀང་ནས་བཞག །ལས་ཅན་བུ་དང་འཕྲད་པའི་སྨོན་ལམ་བཏབ། །ཅེས་པ་ལྟར་མ་འོངས་པའི་སྐལ་ལྡན་རྣམས་ཀྱི་དོན་དུ་བླ་རྫོགས་ཐུགས་གསུམ་དང་སྒྲུབ་སྡེ་བརྒྱད་སྤྱི་བྱེ་བྲག་གི་ཟབ་ཆོས་རྣམས་གཏེར་གནས་སོ་སོར་
གཏེར་སྲུང ་ལ་གཉེར་གཏད་དེ་སྦས་པ་ལོ་པཎ་རྗེ་འབངས་ས་ཆེན་པོ་ལ་བཞུགས་པ་རྣམས་དབང་འབྱོར་བའི་གང་འདུལ་སྤྲུལ་པའི་སྐུར་བསྟན་པས་རིམ་པར་སྤྱན་དྲངས་ཏེ་དུས་བབས་ཀྱིས་འགྲོ་དོན་མཛད་ཅིང་། བརྒྱུད་པའི་བབས་ལུགས་ཀྱང་སྔར་ལྟར་གསུམ་གྱི་སྟེང་དུ། བཀའ་བབས་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱ་སྟེ་གསུམ་བསྣན་པས་བརྒྱུད་པ་དྲུག་ལྡན་གྱི་ཐ་སྙད་བྱུང་བ་ཡིན་ནོ། །དེ་ལ་སྤྱིར་རྒྱུད་སྡེ་རྣམས་དབང་ཐོབ་པའི་བྱང་ཆུབ་སེམས་དཔའ་དང་། དཔའ་བོ་དང་། རྣལ་འབྱོར་མ་དང་། འཛམ་བུ་གླིང་གི་གདོད་ནས་གྲུབ་པའི་དུར་ཁྲོད་བརྒྱད་དུ་གྲུབ་པ་ཐོབ་པའི་གདོད་ནས་གྲུབ་པའི་ལྷའི་སློབ་དཔོན་བརྒྱད་སོགས་ཀྱིས་བཟུང་ནས་གནས་སོ་སོར་དར་ཞིང་སྤྱོད་ལ། དེ་དག་ལས་མིའི་འགྲོ་བའི་བསོད་ནམས་སུ་ཆ་ཤས་ཙམ་སྣང་བ་ལ་རིག་འཛིན་གྱི་ས་མཆོག་བརྙེས་པའི་གྲུབ་ཆེན་བརྒྱད་དང་གྲུབ་ཐོབ་བརྒྱད་ཅུ་སོགས་རྒྱ་བོད་ཀྱི་མཁས་གྲུབ་དུ་མས་དོན་ལ་རྟོན་པའི་དགོངས་འགྲེལ་གྱིས་ལེགས་པར་བཀྲལ་ཞིང་བཤད་སྒྲུབ་ཀྱིས་ཇི་ལྟར་བསྐྱངས་ཚུལ་དང་། བྱེ་བྲག་གསར་རྙིང་གི་བཞེད་སྲོལ་ཡང་མཐའ་ཡས་པ་ཞིག་འཆད་དུ་ཡོད་ནའང་། འདིར་སྐབས་དོན་རྒྱུད་སྡེ་སྤྱིའི་དམ་ཚིག་ཉིད་བཤད་བྱའི་གཙོ་བོར་སྣང་བས། དེ་དག་གི་རྣམ་དབྱེ་ཧ་ཅང་མང་ན་གཙོ་བོའི་དོན་ལ་སྒྲིབ་ཅིང་ཡི་གེས་ཀྱང་འཇིགས་པས་དེ་ཙམ་མོ། །དེ་ལྟར་རྡོ་རྗེ་ཐེག་པའི་ཆོས་སྒོ་བསམ་གྱིས་མི་ཁྱབ་པ་ལས། རང་གི་སྐལ་བས་ཇི་ཙམ་ཞིག་ཐོབ་པ་ནི། བཀའ་མ་མདོ་སྒྱུ་སེམས་གསུམ་དང་ཡང་ཕུར་གཤིན་རྗེ་གཤེད་ཀྱི་སྐོར་སོ་སོའི་ནང་གསེས་ཐ་དད་པ་རྣམས་ཀྱི་དབང་ལུང་མན་ངག་བཤད་སྲོལ་དང་བཅས་པ་དེང་སང་རྒྱུན་ཡོད་དོ་ཅོག་ལྟ་བུ་དང་། གཏེར་མ་བླ་རྫོགས་ཐུགས་གསུམ་སྒྲུབ་སྡེ་བརྒྱད་སྤྱི་བྱེ་བྲག་གི་དབང་ལུང་མན་ངག་རྒྱུན་བཞུགས་པ་ཕལ་མོ་ཆེ་དང་། དེ་ཐམས་ཅད་ཀྱི་རྩ་བ་རྒྱུད་འབུམ་དང་བཅས་ཏེ། རྙིང་མ་བཀའ་གཏེར་གྱི་ཆོས་ཚུལ་ཟབ་རྒྱས་རྒྱ་མཚོ་ལྟ་བུ་རྣམས་ནི། རྗེ་བླ་མ་དམ་པ་བཀའ་དྲིན་མཚུངས་པ་མེད་པ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་མཆོག་གི་ཞབས་པད་དད་པའི་སྤྱི་བོས་རྟག་ཏུ་བསྟེན་པའི་བཀའ་དྲིན་ཁོ་ན་ལས་ནོད་པ་ཡིན་ལ། གསར་མ་ནི་རྗེ་བླ་མ་དམ་པ་ལས་ཀྱང་མང་ཞིག་ཐོབ་མོད། གཞན་དུ་ན་བསྟན་པའི་རྩ་ལག་རིག་འཛིན་མཆོག་གི་སྤྲུལ་པའི་སྐུ་ཀུན་བཟང་པདྨ་ཕྲིན་ལས། མཁས་གྲུབ་ཆོས་སྐྱོང་རྒྱལ་མཚན། དིང་རི་ཀུན་སྤངས་པ་བློ་གྲོས་བརྟན་པ། གྲུབ་པའི་དབང་ཕྱུག་བློ་གྲོས་རྒྱ་མཚོ། ཡོངས་ཀྱི་བཤེས་གཉེན་ངག་དབང་བསྟན་འཛིན། ཀུན་དགའ་བསྟན་པ་དར་རྒྱས་སོགས་ལས་དབང་རྗེས་གནང་ལུང་མན་ངག་དང་བཅས་པ་མང་དུ་ནོས་སོ། །
གསུམ་པ་དེ་ལྟར་བཟུང་བའི་བརྗོད་བྱ་གཏན་ལ་དབབ་པ་ལ་བདུན་ཏེ། འཐོབ་བྱའི་ངོ་བོ། དེའི་དབྱེ་བ། མ་ཐོབ་པ་འཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། སྐྱེ་བའི་རྟེན། ཉམས་པ་གསོ་ཚུལ། བསྲུངས་པའི་ཕན་ཡོན་ནོ། །དང་པོ་ནི། ངོ་བོ་སྒོ་གསུམ་ཐབས་ཤེས་ཀྱིས་ཟིན་པར། །བསྡམས་པའི་ཚུལ་ཁྲིམས་སོ་སོའི་རིང་ལུགས་བཞིན། །ཞེས་པ་སྟེ། སྔགས་སྡོམ་གྱི་ངོ་བོ་ལ། མཚན་ཉིད་ནི། སྡོམ་བྱེད་ཐབས་ཤེས་ཁྱད་པར་ཅན་གྱིས་ཟིན་པའི་བདེ་བ་ཆེན་པོའི་ཡེ་ཤེས་ཀྱིས། བསྡམ་བྱ་སྒོ་གསུམ་ཕྲ་བའི་བག་ཆགས་དང་མཚན་འཛིན་གྱི་རྟོག་པ་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག །རང་རྒྱུ་དབང་བསྐུར་བ་ལས་གསར་དུ་ཐོབ་པའི་ཚུལ་ཁྲིམས་སོ། །དེ་ལྟར་ཡང་གུར་ལས། དེ་ཕྱིར་དཀྱིལ་འཁོར་འཁོར་ལོ་ཞེས། །ཐབས་ནི་བདེ་བའི་སྡོམ་པ་སྟེ། །ཞེས་སོ། །དེ་ལ་རྒྱུད་སྡེ་བཞི་སོ་སོའི་ལུགས་ལྟར་དབྱེ་ན་གཉིས་ཏེ། རྒྱུད་སྡེ་འོག་མ་གསུམ་གྱི་དང་། གོང་མའི་སྔགས་སྡོམ་མོ། །དང་པོ་ལ། བྱ་བ། སྤྱོད་པ། རྣལ་འབྱོར་རྒྱུད་གསུམ་གྱི་སྡོམ་པའི་མཚན་ཉིད་རིམ་པ་བཞིན། བལྟས་པའི་བདེ་བ། དགོད་པའི་བདེ་བ། ལག་བཅངས་ཀྱི་བདེ་བ་གང་རུང་ལམ་དུ་བྱས་པའི་སྒོ་ནས་ཆགས་པ་དེ་དང་དེ་དག་པར་བྱེད་པའི་ཡེ་ཤེས་རང་རྒྱུད་ལ་འཛིན་པའི་ཐབས་ཤེས་ཁྱད་པར་ཅན་གྱིས་སྒོ་གསུམ་གྱི་བག་ཆགས་དང་མཚན་རྟོག་སྡོམ་པར་བྱེད་པའི་སེམས་པ་ས་བོན་དང་བཅས་པ་གང་ཞིག །རང་རྒྱུ་རྒྱུད་སྡེ་རང་ལ་ལྟོས་པའི་དབང་ལས་ཐོབ་པའི་ཚུལ་ཁྲིམས། ཁྱད་པར་བླ་མེད་ཀྱི་སྔགས་སྡོམ་ལ། དབང་པོ་གཉིས་སྦྱོར་གྱི་བདེ་བ་ལམ་དུ་བྱས་པའི་སྒོ་ནས་ཆགས་པ་དེ་དག་པར་བྱེད་པའི་སོགས་གང་ཞིག །རང་རྒྱུ་བླ་མེད་ཀྱི་དབང་ལས་ཐོབ་པའི་ཚུལ་ཁྲིམས། དབྱེ་ན་གཉིས་ཏེ། བུམ་དབང་ལས་ཐོབ་པའི་དང་། དབང་གོང་མ་ལས་ཐོབ་པའི་སྡོམ་པའོ། །དང་པོའི་མཚན་ཉིད། སྦྱོར་བའི་དུས་སུ་རིགས་ལྔ་སྤྱི་དང་བྱེ་བྲག་གི་དམ་ཚིག་ཁས་བླངས་ཤིང་། དངོས་གཞིའི་དུས་སུ་བུམ་དབང་འཁོར་བཅས་བསྐུར་བ་ལས་གསར་ཐོབ་ཀྱི་ཚུལ་ཁྲིམས་གང་ཞིག །ཐབས་ཤེས་ཁྱད་པར་ཅན་བསྐྱེད་རིམ་གྱིས་ཐ་མལ་སྣང་ཞེན་གྱི་མཚན་རྟོག་སྡོམ་པར་བྱེད་པའི་སེམས་པ། དབྱེ་ན། བཏགས་པ་བ་བརྗོད་པ་ཁས་བླངས་ཀྱིས་དང་། མཚན་ཉིད་པ་བསྒོམ་བྱ་དབང་ལས་ཐོབ་པའོ། །གཉིས་པའི་མཚན་ཉིད། རང་འཐོབ་བྱེད་ཀྱི་རྒྱུ་དབང་གོང་མ་གང་རུང་བསྐུར་བ་ལ་བརྟེན་ནས་མངོན་དུ་གྱུར་པ་གྱ་ནོམ་ལྷར་ཞེན་གྱི་མཚན་རྟོག་ལས་སྐྱོབ་པའི་ཚུལ་ཁྲིམས་གང་ཞིག །ཐབས་ཤེས་ཁྱད་པར་ཅན་རང་བྱིན་བརླབས་པས་སེམས་གསལ་སྟོང་གི་ངོ་བོར་སྡོམ་པའི་སེམས་པ་གསང་དབང་གིདེ་གང་ཞིག །ཐབས་ཤེས་ཁྱད་པར་ཅན་ཀུན་རྫོབ་ཞུ་བདེས་མཚོན་བྱེད་དཔེའི་ཡེ་ཤེས་བདེ་སྟོང་གི་ངོ་བོར་སྡོམ་པའི་སེམས་པ་ཤེར་དབང་གིདེ་གང་ཞིག །ཐབས་ཤེས་ཁྱད་པར་ཅན་འཕོ་མེད་བདེ་ཆེན་གྱིས་ཟུང་འཇུག་ལྷན་ཅིག་སྐྱེས་པའི་ཡེ་ཤེས་མཚོན་བྱ་དོན་དམ་པའི་ངོ་བོར་སྡོམ་པ་དབང་བཞི་པའི་སྔགས་སྡོམ་གྱི་མཚན་ཉིད། དེ་བས་ན་དགྱེས་རྡོར་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཨེ་ཝཾ་རྣམ་པའི་བདེ་ཆེན་པོ། །དབང་ལས་ཡང་དག་ཤེས་པར་བྱ། །ཞེས་ཨེ་ཝཾ་གྱིས་མཚོན་པའི་རྣམ་ཀུན་མཆོག་ལྡན་གྱི་སྟོང་གཟུགས་ཕྱག་རྒྱ་ཆེན་མོས་ཞུ་བདེ་དྲངས་པས། འདོད་ཆགས་ཆེན་པོའི་ཐིག་ལེའི་འགྲོས་ལས་ཤར་བའི་ལྷན་ཅིག་སྐྱེས་པའི་བདེ་བ་སྟོང་གཟུགས་དང་ངོ་བོ་གཅིག་ཏུ་གྱུར་པ་ནི་ཟུང་འཇུག་གི་ཡེ་ཤེས་མི་འགྱུར་བའི་བདེ་བ་ཆེན་པོ་ཞེས་སངས་རྒྱས་ཀུན་གྱི་སྡོམ་པ་སྟེ། དེས་སྤང་བྱ་འཛག་བདེ་འཕོ་བའི་བག་ཆགས་དང་མཚན་རྟོག་ལས་ཡིད་བདེ་མྱུར་གྱི་སྒོ་ནས་སྐྱོབ་པའི་ཕྱིར་ན་དབང་བཞི་པའི་སྡོམ་པ་ཡིན་ལ། བུམ་གསང་ཤེར་དབང་གསུམ་ཡང་མཚན་རྟོག་ལས་ཡིད་སྐྱོབ་པར་བྱེད་པའི་བདེ་ཆེན་གྱི་ཡེ་ཤེས་དེ་འདྲེན་བྱེད་ཀྱི་ཐབས་རིང་བ་དང་ཉེ་བ་དང་ཤིན་ཏུ་ཉེ་བ་གསུམ་དུ་རིམ་པར་འགྱུར་བ་ཡིན་ནོ། །འོ་ན་ལྷན་ཅིག་སྐྱེས་པའི་ཡེ་ཤེས་དེ་གདོད་མ་ནས་ལུས་ཅན་ཐམས་ཅད་ལ་གནས་པ་མ་ཡིན་ནམ་ཞེ་ན། ཡིན་མོད། འོན་ཀྱང་རང་གནས་ཀྱི་ཡེ་ཤེས་དེ་ངོས་ཟིན་པ་དང་འཆལ་ཚུལ་གྱི་གཉེན་པོར་འགྲོ་བ་དབང་གོང་མ་ལ་ལྟོས་དགོས་ཏེ། དེ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་། །བདག་གི་བསོད་ནམས་ལས་རིག་བྱ། །ཞེས་གསུངས་པའི་ཕྱིར། ཡང་སྦྱོར་བའི་དུས་རིགས་ལྔའི་སྡོམ་བཟུང་ལན་གསུམ་བཟླས་པའི་བརྗོད་པ་གསུམ་པའི་ཆ་ཐ་མ་ལ་གང་བཟུང་བའི་སྡོམ་པ་དེ་ཉིད་ཐོབ་བམ་མི་ཐོབ་ཅེ་ན། དངོས་གཏགས་མ་ཕྱེ་བའི་དབང་དུ་བྱས་ན་ཐོབ་སྟེ། རྡོ་རྗེ་རྩེ་མོ་ལས། སྡོམ་པ་གསུམ་ལ་ལེགས་བཀོད་ནས། །དེ་ལ་དཀྱིལ་འཁོར་བསྟན་པར་བྱ། །ཞེས་དང་། རོང་ཟོམ་ཆེན་པོས་མཛད་པའི་སྡོམ་ཆོག་ལས་ཀྱང་། ཐུན་མོང་བའི་སྡོམ་པ་ནོས་ནས། དེ་ནས་ཁྱད་པར་གྱི་སྡོམ་པ་ནོས་ཏེ། དཀྱིལ་འཁོར་དུ་ཞུགས་ནས་དབང་ཐོབ་པར་བྱས་ལ། དངོས་གྲུབ་ཀྱི་སྣོད་དུ་གྱུར་བར་བྱའོ། །ཞེས་གསུངས་པའི་ཕྱིར། གལ་ཏེ་མི་ཐོབ་ན། སོ་བྱང་གི་སྡོམ་ཆོག་ལས་ཀྱང་དེ་དང་དེའི་སྡོམ་པ་མི་སྐྱེ་བར་མཚུངས་ཏེ། དེ་དང་དེ་ལ་སྐྱེ་བའི་ནུས་པ་ཡོད་པ་དང་། འདི་ལ་མེད་པའི་ལུང་རིགས་ཚད་མ་མེད་པའི་ཕྱིར་རོ། །གཞན་དུ་ན་རྒྱལ་བས་སྡོམ་ཆོག་གསུངས་པའང་དོན་མེད་དུ་ཐལ་ལོ། །ཁོ་ན་རེ། དབང་མ་ཐོབ་པར་རིགས་ལྔའི་སྡོམ་པ་བཟུང་བ་ཙམ་གྱིས་སྔགས་སྡོམ་ཐོབ་ན། གང་ཟག་དེ་འདྲ་དེ་ཆོས་ཅན། ཁྱོད་ལ་སློབ་དཔོན་སྨད་པ་ལ་སོགས་པའི་རྩ་ལྟུང་འབྱུང་བ་སྲིད་པར་ཐལ། སྔགས་སྡོམ་རྒྱུད་ལྡན་གྱི་གང་ཟག་ཡིན་པའི་ཕྱིར། འདོད་མི་ནུས་ཏེ། འགྲེལ་ཆེན་དྲི་མེད་འོད་ཀྱི་རྩ་ལྟུང་སྟོན་པའི་སྐབས་ལས། གང་དག་རྡོ་རྗེ་ཐེག་པར་གནས་པ་རྣམས་ལ་སྟེ། དབང་བསྐུར་བ་རྣམས་ལའོ། །ཞེས་པ་རྡོ་རྗེ་འཛིན་པའི་ངེས་པའོ། །ཞེས་གསུངས་པའི་ཕྱིར་ཟེར་ན། སྐྱོན་མེད་དེ། སྨོན་པ་སེམས་བསྐྱེད་ཀྱི་སྡོམ་པ་ཐོབ་པ་དེ་བྱང་སྡོམ་རྒྱུད་ལྡན་ཙམ་ཡིན་ཡང་། དེ་འདྲ་དེས་སྨོན་སེམས་མ་བཏང་ན་རྒྱལ་པོ་ལ་ངེས་པ་ལྟ་བུའི་རྩ་ལྟུང་བཅུ་བཞི་གང་རུང་ལ་སྤྱད་ཀྱང་སྨོན་སྡོམ་མི་གཏོང་བ་བཞིན་ནོ། །དེས་ན་རིགས་ལྔའི་སྡོམ་བཟུང་གི་སྐབས་སུ་དམ་ཚིག་ལ་གནས་པར་སྨོན་པ་ཙམ་ཡིན་པས། དངོས་གཞི་ལ་ལྟོས་ནས་བསྲུང་བར་དབང་བའི་དམ་ཚིག་རྣམས་རིགས་ངེས་པ་ཁས་བླངས་ཀྱིས་ཐོབ་པ་སྟེ། སྔགས་སྡོམ་བཏགས་པ་བ་ཡིན་ལ། སླར་དབང་བསྐུར་བས་ཡེ་ཤེས་ཁོང་ཆུད་ཀྱིས་ཐོབ་པ་ནི་སྔགས་སྡོམ་མཚན་ཉིད་པའོ། །དེ་ཡང་དབང་བསྐུར་བས་རང་གནས་ཀྱི་ཡེ་ཤེས་གསོས་ཐེབས་ནས་ནུས་པ་མཐུ་ཅན་དུ་གྱུར་པ་དེས་གཉེན་པོའི་ཕྱོགས་བཟུང་ནས། རང་དང་ལྷན་ཅིག་གནས་པའི་སྦྱང་བྱ་དང་ནུས་པ་འགྲན་པའི་ཚུལ་གྱིས་སུན་འབྱིན་པར་བྱེད་ལ། གལ་ཏེ་དབང་དུས་སུ་ཡེ་ཤེས་དངོས་སུ་མ་སྐྱེས་ཀྱང་སྐྱེ་རུང་གི་ནུས་པ་བཞག་པ་དེས་དྲི་མ་སྦྱོང་བ་དང་ཡོན་ཏན་སྐྱེ་བའི་མགོ་རྩོམ་པ་ཡིན་པས་རྒྱུད་འགྱུར་བའི་ཁྱད་པར་ཏེ། དེ་ལ་རྒྱུད་སྨིན་པ། དབང་ཐོབ་པ། དམ་ཚིག་དང་སྡོམ་པ་ཐོབ་པ་ཞེས་པའི་ཐ་སྙད་ཐོབ་ཅིང་། ཆོ་གས་སེམས་རྒྱུད་ཀྱི་ཡོན་ཏན་དགེ་བའི་ས་བོན་གསོས་བཏབ་པའི་ཆ་དེ་སངས་རྒྱས་ཀུན་གྱི་གསང་བའི་རྡོ་རྗེ་གསུམ་འཛིན་པའི་ཆ་ནས་དམ་ཚིག་ཀྱང་ཡིན་ལ། རང་རྒྱུད་སྡོམ་པའི་ཆ་ནས་སྡོམ་པའང་ཡིན་པའི་ཕྱིར་ཏེ། དཔེར་ན་བུམ་པ་ཉིད་བྱས་པའང་ཡིན་ལ་མི་རྟག་པའང་ཡིན་པ་བཞིན་ནོ། །དེ་ལྟར་ཡང་གསང་སྙིང་གི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད་། །ཅེས་དང་། ཕྲ་རྒྱས་ལས། དེ་ལྟར་སུམ་བརྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་གཏོང་སྡོམ་པའི་དངོས། །ས་གཞི་ལྟ་བུར་གསུངས་པ་ཡིན། །ཞེས་སོ། །ཡང་སྒྱུ་འཕྲུལ་ཞི་ཁྲོ་ལྟ་བུའི་དབང་ཐོབ་ལ་མ་ཉམས་པའི་གང་ཟག་གིས། སླར་དེ་ཉིད་དམ་སངས་རྒྱས་མཉམ་སྦྱོར་ལྟ་བུའི་དབང་ཐོབ་པའི་ཚེ་སྔགས་སྡོམ་གསར་ཐོབ་ཡོད་དམ་མེད་ཅེ་ན། གསར་ཐོབ་ཀྱི་ཆ་ནི་ཡོད་དེ། དེ་འདྲ་དེ་ལ་བླ་མས་དབང་བསྐུར་རམ། སྡོམ་ལྡན་རང་ཉིད་ཀྱིས་དབང་བླངས་ཀྱང་རུང་སྟེ། སྔར་རྒྱུད་ལ་ཡོད་པའི་སྔགས་སྡོམ་གྱི་རྒྱུན་དེ་ཉིད་ཕྱིས་དབང་བསྐུར་རེ་རེ་ཐོབ་པའི་ཚེ་གོང་འཕེལ་དུ་འགྲོ་བས་ན། ཇི་ཙམ་འཕེལ་བའི་ཆ་དེ་གསར་ཐོབ་ཡིན་མོད། འོན་ཀྱང་འཐོབ་བྱ་དབང་གི་ངོ་བོ་རིགས་མཐུན་ཕྱིན་ཆད་སྡོམ་པ་རིགས་མི་འདྲ་བ་དང་ངོ་བོ་ཐ་དད་དུ་འཇུག་པའང་མེད་པས་སྡོམ་པ་དངོས་གཞི་གསར་ཐོབ་མེད་པའི་ཕྱིར་དབང་དང་པོ་དེ་ལ་སྨིན་བྱེད་ཀྱི་དབང་ཞེས་སྔགས་སྡོམ་གསར་དུ་འཐོབ་བྱེད་ཀྱི་དབང་ཡིན་ཞིང་། ཕྱི་མ་རྣམས་ལའང་རང་སྐལ་གྱིས་སྨིན་པར་བྱས་པའི་ཆ་རེ་ཡོད་ཀྱང་སྨིན་བྱེད་དང་སྡོམ་པ་གསར་ཐོབ་ཀྱི་ཐ་སྙད་མི་སྦྱོར་ཏེ། སྨིན་ཚུལ་དེ་ཙམ་ཞིག་སངས་རྒྱས་མ་ཐོབ་པའི་བར་དུ་འབྱུང་བའི་ཕྱིར་རོ། །སྤྱིར་གཞི་ལམ་འབྲས་གསུམ་ལ་ལྟོས་ནས་ཀྱང་སྔགས་སྡོམ་གསུམ་དུ་བཤད་དེ། ཆོས་ཐམས་ཅད་ཀྱི་རང་བཞིན་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་སྡོམ་པ་ནི་གཞི་རྒྱུད་ཀྱི་སྔགས་སྡོམ་སྟེ། རྔམ་གློག་ལས། ཆོས་ཀུན་ཡེ་ནས་དག་པའི་ཕྱིར། །ལོག་རྟོག་ཡེ་ནས་རྣམ་པར་དག །དེ་བས་སྡོམ་པ་རྣམ་པར་དག །ཅེས་དང་། རྒྱུད་གཞན་ལས་ཀྱང་། རང་བཞིན་ལྷན་ཅིག་སྐྱེས་ཞེས་བརྗོད། །རྣམ་པ་ཐམས་ཅད་སྡོམ་པ་གཅིག །ཅེས་སོ། །དེ་ཉིད་རྟོགས་པའི་ཐབས་ཁྱད་པར་ཅན་སྨིན་གྲོལ་གྱི་ལམ་གྱིས་མཚན་རྟོག་སྡོམ་པར་བྱེད་པ་ལམ་རྒྱུད་ཀྱི་སྔགས་སྡོམ་སྟེ། དེ་ཕྱིར་དཀྱིལ་འཁོར་འཁོར་ལོ་ཞེས། །ཐབས་ནི་བདེ་བའི་སྡོམ་པ་སྟེ། །ཞེས་སོ། །ཆོས་ཐམས་ཅད་རང་སྣང་གི་ཡེ་ཤེས་ཀྱི་ངོ་བོར་སྡོམ་པ་འབྲས་རྒྱུད་ཀྱི་སྔགས་སྡོམ་སྟེ། དེ་ནས་ཆོས་ཀུན་སྡོམ་གཅིག་པའི། །རྡོ་རྗེ་སེམས་དཔའ་ཞེས་བྱར་བཤད། །ཅེས་སོ། །དེ་ལྟར་གསུམ་གྱི་དང་པོ་བཏགས་པ་བ་དང་། ཕྱི་མ་གཉིས་མཚན་ཉིད་པར་བཞེད་དེ། ཞར་ལས་འཕྲོས་པའོ། །
གཉིས་པ་དབྱེ་བ་ལ་གཉིས་ཏེ། རྒྱུད་སྡེ་བཞིའི་ལུགས་སྤྱིར་དབྱེ་བ་དང་། བླ་མེད་ཀྱི་ལུགས་བྱེ་བྲག་ཏུ་དབྱེ་བའོ། །དང་པོ་ནི། དབྱེ་བ་བྱ་སྤྱོད་རྣལ་འབྱོར་བླ་མེད་བཞིར། །རྩ་ལྟུང་བཅུ་བཞི་སོ་སོར་གྲངས་ངེས་པར། །དུས་ཀྱི་འཁོར་ལོར་བཤད་པ་གཞན་དུ་བལྟ། །ཞེས་པ་སྟེ། འདིར་གང་དག །བྱ་སྤྱོད་གཉིས་སུ་རྩ་ལྟུང་མ་བཤད་པས་བྱང་སེམས་ཀྱི་སྨོན་འཇུག་བསླབ་བྱ་ལས་གཞན་པའི་བསྲུང་རྒྱུ་མེད་དོ་གསུངས། དེ་ལྟར་ན། འཇམ་དཔལ་རྩ་རྒྱུད་ལས། ལྔ་པོ་འདི་ནི་རྩ་བའི་ལྟུང་བ་ཡིན་པར་བསྟན་ཏེ། ཞེས་རྩ་ལྟུང་ལྔ་བཤད་པ་དང་། རྣམ་སྣང་མངོན་བྱང་ལས། ལྟུང་བའི་རྩ་བ་བཞི་ནི་སྲོག་གི་ཕྱིར་ཡང་ཡོངས་སུ་ཉམས་པར་མི་བྱའོ། །ཞེས་རྒྱས་པར་བཤད་པ་རྣམས་ཀྱང་བྱང་སེམས་ཀྱི་རྩ་ལྟུང་ཡིན་པར་འགྱུར་ལ། དེ་ཡིན་ན་བྱང་སེམས་ཀྱི་ལྟུང་བའི་གྲངས་ངེས་ཀྱང་ཉམས་པ་དང་། བྱ་སྤྱོད་གཉིས་སུ་རྩ་ལྟུང་མེད་ན་ཡན་ལག་གི་ལྟུང་བའང་འབྱུང་མི་རིགས་ལ། དེ་ཡང་འདོད་ན། མངོན་བྱང་དང་ལེགས་གྲུབ་ལས་སྔགས་ཀྱི་འདུལ་བ་གསུངས་པ་དང་ཡང་འགལ་བར་འགྱུར་རོ། །དེར་མ་ཟད་བྱ་སྤྱོད་གཉིས་ཀྱི་དབང་བསྐུར་བ་ལ་བརྟེན་ནས་དེ་དང་དེའི་སྔགས་སྡོམ་ཐོབ་པ་མེད་པར་འགྱུར་ཞིང་། འདོད་ན། རྒྱུད་སྡེ་གོང་མ་གཉིས་ལའང་སྔགས་སྡོམ་སྐྱེ་བའི་ནུས་པ་མེད་པར་འགྱུར་ཏེ། དེ་དང་དེའི་དབང་ལ་སྔགས་སྡོམ་སྐྱེ་བའི་ནུས་པ་ཡོད་མེད་འགྲོ་ལྡོག་མཚུངས་པའི་ཕྱིར་རོ། །དེས་ན་དུས་འཁོར་འགྲེལ་ཆེན་ལས་རྒྱུད་སྡེ་བཞི་ཀ་ཡང་རྩ་ལྟུང་བཅུ་བཞི་པ་ཅན་དུ་གྲངས་འདྲ་བར་གསུངས་པ་ལྟར་བཤད་པར་བྱ་བ་ཡིན་ཏེ། དེ་ལ་བཞི་ལས། བྱ་རྒྱུད་ཀྱི་རྩ་ལྟུང་ནི། གསང་བ་སྤྱི་རྒྱུད་ལས། དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །གསང་སྔགས་རིག་སྔགས་ཚོགས་རྣམས་ལ། །དད་པ་རབ་ཏུ་བརྟན་པར་བྱ། །རྟག་པར་ཐེག་པ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་དང་མཛའ་བོ་དང་། །བླ་མ་ལ་ཡང་གུས་པར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་དག་ཏུ་མཆོད་པར་བྱ། །སྟོན་པ་གཞན་གྱི་གཞུང་མི་མཆོད། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་ཀུན་ལ་བྱམས་པའི་སེམས། །རབ་ཏུ་བརྟན་པ་ཉེ་བར་གཞག །ཐེག་ཆེན་ལ་ནི་དགའ་རྣམས་ཀྱིས། །བསོད་ནམས་དག་ལ་ནན་ཏན་སྐྱེད། །བཟླས་བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་བསྲུང་ཞིང་། །དེ་ཡང་བདག་གིས་རྟོགས་པར་བྱ། །ཞེས་གསུངས་པ་ལྟར་བཅུ་བཞི་སྟེ། དཀོན་མཆོག་ལ་དད་པ། སྔགས་ལ་དད་པ། ཐེག་ཆེན་ལ་མོས་པ། བླ་མ་དང་མཆེད་གྲོགས་ལ་གུས་པ། འདས་མ་འདས་ཀྱི་ལྷ་གཞན་ལ་མི་སྡང་བ། རང་གི་ལྷ་དུས་ཚིགས་སུ་མཆོད་པ། གཞུང་གཞན་མི་མཆོད་པ། གློ་བུར་བའི་མགྲོན་མཆོད་པ། བྱམས་པ་མི་གཏོང་བ། སེམས་ཅན་གྱི་དོན་ལ་བརྩོན་པ་མི་འདོར་བ། བཟླས་བརྗོད་ལ་བརྩོན་པ། དམ་ཚིག་གཞན་ཡང་ཅི་ནུས་བསྲུང་བ། སྣོད་མིན་ལ་སྔགས་རྒྱ་མི་སྦྱིན་པ། རང་གི་སྔགས་རྒྱུད་བསྲུང་ཞིང་རྟོགས་པར་བྱ་བ་རྣམས་སོ། །དེ་དག་གི་ལྡོག་ཕྱོགས་རྩ་ལྟུང་དུ་འགྱུར་བའང་། དེ་ཉིད་ལས། ཇི་སྐད་བཤད་པའི་དམ་ཚིག་རྣམས། །གལ་ཏེ་ཉམས་པར་གང་གྱུར་པ། །དེ་ནི་རང་རིགས་སྙིང་པོའི་སྔགས། །ཆིག་འབུམ་དུ་ནི་བཟླས་བརྗོད་བྱ། །ཡང་ན་མེས་རྨོངས་བྱེད་པའི་གཟུངས། །སྟོང་དུ་བཟླས་བརྗོད་བྱས་ཀྱང་རུང་། །ཡང་ན་ཞི་བའི་སྦྱིན་སྲེག་བྱ། །ཡང་ན་དཀྱིལ་འཁོར་དུ་ཡང་འཇུག །ཅེས་གསུངས་པའི་ཕྱིར་རོ། །
གཉིས་པ་སྤྱོད་རྒྱུད་ཀྱི་རྩ་ལྟུང་བཅུ་བཞི་ནི། མི་དགེ་བ་བཅུ་དང་། རྩ་བ་བཞི་སྤང་བ་སྟེ། དང་པོ་ནི། མངོན་བྱང་ལས། བཅུ་པོ་འདི་དག་བྱང་ཆུབ་སེམས་དཔའ་གསང་སྔགས་ཀྱི་སྒོར་སྤྱོད་པའི་བསླབ་པ་ཐམས་ཅད་ཀྱི་རྩ་བ་ཡིན་པས་གཞི་ཞེས་བྱའོ། །ཞེས་སོ། །གཉིས་པ་ནི། དེ་ལས། རྩ་བའི་ལྟུང་བ་བཞི་ནི་སྲོག་གི་ཕྱིར་ཡང་ཡོངས་སུ་ཉམས་པར་མི་བྱའོ། །ཞེས་གསུངས་ཤིང་། བཞི་གང་ཞེ་ན། དེ་ཉིད་ལས། དེ་རིང་ཕྱིན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །ཡོངས་སུ་བཏང་བར་མི་བྱའོ། །ཁྱོད་ཀྱི་སེར་སྣ་དང་ནི་གང་། །སེམས་ཅན་གནོད་པ་མི་བྱའོ། །དམ་ཚིག་འདི་དག་སངས་རྒྱས་ཀྱི། །བརྟུལ་ཞུགས་བཟང་པོ་ཁྱོད་ལ་བཤད། །ཅེས་པས་དེ་བཞིའི་ལྡོག་ཕྱོགས་དམ་ཆོས་སྤོང་བ་སོགས་བཞིའོ། །འོ་ན་མི་དགེ་བཅུ་སྤོང་ནི་ལྷ་མིའི་ཐེག་པ་དང་ཉན་རང་ལའང་ཡོད་པས་སྔགས་ཀྱི་ཁྱད་པར་གྱི་རྩ་ལྟུང་དུ་ཅིའི་ཕྱིར་འཇོག་ཅེ་ན། འདིར་བྱང་སེམས་སྔགས་ཀྱི་སྒོར་སྤྱོད་པ་རྣམས་ཀྱིས་འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་བཟུང་ནས་དེའི་དམ་ཚིག་ཏུ་བཅུ་པོ་བཟུང་བས་ན་ཁྱད་པར་ཡོད་དེ། དེ་ལས། གང་དག་འདས་དང་མ་བྱོན་དང་། །གང་ཡང་ད་ལྟའི་མགོན་པོ་རྣམས། །ཐབས་དང་ཤེས་རབ་ལྡན་པ་ལ། །བསླབས་ནས་བླ་མེད་བྱང་ཆུབ་ནི། །འདུས་མ་བྱས་པ་དེ་ཐོབ་བོ། །ཐབས་དང་མི་ལྡན་ཡེ་ཤེས་དང་། །བསླབ་པ་དག་ཀྱང་བཤད་པ་ནི། །དཔའ་བོ་ཆེན་པོས་ཉན་ཐོས་རྣམས། །དེ་ལ་གཟུད་པའི་ཕྱིར་བཤད་དོ། །ཞེས་སོ། །
གསུམ་པ་རྣལ་འབྱོར་རྒྱུད་ཀྱི་རྩ་ལྟུང་བཅུ་བཞི་ནི། ཇི་ལྟར་དུས་གསུམ་མགོན་པོ་རྣམས། །ཞེས་སོགས་རིགས་ལྔའི་སྡོམ་བཟུང་གི་སྐབས་སུ་གསུངས་པ་ལྟར། དེ་བཞིན་གཤེགས་པའི་རིགས་ཀྱི་དམ་ཚིག་ལ་དཀོན་མཆོག་གསུམ་སྐྱབས་གནས་སུ་འཛིན་པ་སྟེ་གསུམ། རྡོ་རྗེའི་རིགས་ལ་རྡོ་རྗེ། དྲིལ་བུ། ཕྱག་རྒྱ། སློབ་དཔོན་བཟུང་བ་སྟེ་བཞི། རིན་ཆེན་རིགས་ལ་སྦྱིན་པ་རྣམ་བཞི་གཏོང་བ་སྟེ་བཞི། པདྨའི་རིགས་ལ་དམ་ཆོས་མ་ལུས་པ་འཛིན་པ་སྟེ་གཅིག །ལས་ཀྱི་རིགས་ལ་སྔར་གྱི་སྡོམ་པ་རྣམས་ཅི་ནུས་འཛིན་པ་དང་། མཆོད་པའི་ལས་ལ་འབད་པ་སྟེ་གཉིས་དེ་རྣམས་སྒྲུབ་པའི་བསླབ་བྱ་ཡིན་ལ། དེ་ལས་གཞན་པ་བཅུ་བཞི་ནི། ཕས་ཕམ་པར་ནི་རབ་ཏུ་བཤད། །སྤོང་བ་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དོ། །ཞེས་པ་ལ་ངོས་འཛིན་མི་མཐུན་པ་མང་ཡང་། འདིར་སྒྲུབ་པའི་བསླབ་བྱ་བཅུ་བཞི་པོ་དེ་ལས་གཞན་པ་སྟེ། དེའི་ལྡོག་ཕྱོགས་བཅུ་བཞི་པོ་དེ་ཉིད་རྩ་ལྟུང་དུ་སློབ་དཔོན་ཀུན་དགའ་སྙིང་པོ་བཞེད་པ་ཡིན་ཏེ། དེ་ཉིད་སྣང་ཆེན་ལས། དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཞེས་བྱ་བ་ལ་སོགས་པར་ཕས་ཕམ་པ་བཅུ་བཞི་ལས་ལྡོག་པའི་མཚན་ཉིད་ཅན་ནོ། །ཞེས་དང་། དཔལ་མཆོག་འགྲེལ་ཆེན་ལས་ཀྱང་། ཕྱག་རྒྱ་ལ་སོགས་པ་འདི་དག་གིས་ཅི་ཞིག་བྱ། ཞེས་བྱ་བས་འདི་ཡོངས་སུ་སྤངས་ན་ཕམ་པར་འགྱུར་རོ། །ཞེས་གསུངས་པའི་ཕྱིར་རོ། །བཞི་པ་རྣལ་འབྱོར་བླ་མེད་ཀྱི་རྩ་ལྟུང་བཅུ་བཞི་ནི། ཀུན་ལ་གྲགས་པ་ལྟར་ཏེ་འཆད་པར་འགྱུར་རོ། །
གཉིས་པ་བླ་མེད་ཀྱི་ལུགས་བྱེ་བྲག་ཏུ་དབྱེ་བ་ནི། བླ་མེད་ལུགས་ལ་བརྟུལ་ཞུགས་ཉི་ཤུ་ལྔ། །རིགས་ལྔའི་སྡོམ་པ་རྩ་ལྟུང་བཅུ་བཞི་དང་། །སྦོམ་པོ་དང་ནི་རྫོགས་པ་ཆེན་པོའི་སྲོལ། །ཞེས་པ་སྟེ། རྒྱུད་སྡེ་འོག་མ་གསུམ་གྱི་དབང་ལས་ཐོབ་པའི་སྔགས་སྡོམ་ཡང་ཡོད་མོད་ཀྱི། བསྟན་བཅོས་འདིར་ཁྱད་པར་དུ་འཕགས་པ་བླ་མེད་ཀྱི་དབང་ལས་ཐོབ་པའི་སྔགས་སྡོམ་སྟོན་པ་ཡིན་པས། འདི་དག་འོག་ཏུ། ཐོག་མའི་བརྟུལ་ཞུགས་དུས་ཀྱི་འཁོར་ལོ་ལས། །ཞེས་སོགས་ཀྱིས་རྒྱས་པར་འཆད་པའི་ཕྱིར། འདིར་མ་བཀྲོལ་ལོ། །
གསུམ་པ་མ་ཐོབ་པ་འཐོབ་པར་བྱེད་པ་ལ། བསྟན་བཤད་གཉིས་ལས། མདོར་བསྟན་ནི། དང་པོ་མ་ཐོབ་འཐོབ་པའི་ཚུལ་བཤད་པ། །ཞེས་པས་བསྟན་ཏོ། །དེ་ལ་འདིར་སློབ་མ་ཇི་ལྟར་བཀྲི་ཚུལ་གྱི་སྤྱི་དོན་མདོ་ཙམ་ཞིག་བཤད་པར་བྱ་སྟེ། རྒྱུད་དག་པའི་ཕྱིར་དཀྱིལ་འཁོར་དུ་འཇུག་པ་དང་འབྲེལ་བར་དམ་ཚིག་དང་སྡོམ་པ་འཛིན་ཚུལ། རྒྱུད་དག་པའི་རྟེན་ལ་སྨིན་བྱེད་ཀྱི་དབང་བསྐུར་བའི་རིམ་པས་དམ་ཚིག་དང་སྡོམ་པ་ཐོབ་ཚུལ། དམ་ཚིག་དང་སྡོམ་པས་རྒྱུད་བསྡམས་ནས་ལམ་ཇི་ལྟར་བསྒོམ་ཚུལ་ལོ། །དང་པོ་ནི། རྒྱུད་སྡེ་བཞིའི་དམ་ཚིག་དང་སྡོམ་པ་འཛིན་པ་དབང་དང་འབྲེལ་བ་ལ་ངེས་པར་ལྟོས་པས། ཐོག་མར་བྱ་རྒྱུད་ལྟར་ན། སངས་རྒྱས་དང་བྱང་ཆུབ་སེམས་དཔའ་ལ་དགོངས་གསོལ་སྔོན་དུ་འགྲོ་བས། བདག་འབུལ་བ། བདག་ལ་བྱིན་གྱིས་བརླབ་པར། དམ་ཚིག་ཆེན་པོའི་དངོས་གྲུབ་སྩོལ་བར་གསོལ་བ་འདེབས་པའི་སྒོ་ནས་འཛིན་པར་དམ་ཚིག་གསུམ་བཀོད་ལས་གསུངས་སོ། །སྤྱོད་རྒྱུད་དུ་བདག་འབུལ་བའི་སྡོམ་པ་སྔར་ལྟར་བླངས་པའི་རྗེས་སུ་གཉིས་མེད་ཀྱི་ཡེ་ཤེས་ངོ་ཤེས་པར་བྱས་ནས་འཛིན་པ་དུས་གསུམ་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་ཞེས་བྱ་བ་དེ་འཛིན་པར་མངོན་བྱང་ལས་བཤད་དོ། །དེ་ཡང་བྱ་སྤྱོད་ཀྱི་སྡོམ་ཆོག་དེ་ལ་ཐམས་ཅད་རྣལ་འབྱོར་དུ་སེམས་བསྐྱེད་པའི་དོན་ཡང་ཚང་ཞིང་། ཇི་ལྟར་འཛིན་པའང་བྱ་རྒྱུད་དུ་དེ་ལ་འཇུག་པའི་ཚུལ་དང་སྤྱོད་རྒྱུད་དུ་གནས་པའི་ཚུལ་གྱིས་འཛིན་པར་བཞེད་དོ། །ཡོ་གའི་རྒྱུད་དུ་གང་འཛིན་རྒྱུའི་སྡོམ་པ་བསྒྲགས་ཏེ། ཇི་ལྟར་དུས་གསུམ་མགོན་པོ་རྣམས། །ཞེས་སོགས་ཀྱིས་ལེན་པ་ཡིན་ལ། རྣལ་འབྱོར་བླ་མེད་ཀྱི་རྒྱུད་དུ་འཛིན་ཚུལ་དེ་དང་འདྲ་བ་ལ། ཁྱད་པར་དུས་ཀྱི་འཁོར་ལོར་ཐོག་མར་བརྟུལ་ཞུགས་ཉེར་ལྔ་དང་། དེ་ནས་དེ་བཞིན་གཤེགས་པ་རིགས་དྲུག་གི་སྡོམ་པ་འཛིན་པར་བཤད་ཅིང་། རྒྱུད་གཞན་རྣམས་སུ་རིགས་དྲུག་པ་ལྔ་པའི་ཁོངས་སུ་གཏོགས་པར་བྱས་ཏེ། དོན་གྲུབ་ལ་སྡོམ་པ་ཐམས་ཅད་འཛིན་པར་བཤད་དོ། །ཁ་ཅིག་ཡོ་གའི་སྡོམ་པ་བཟུང་བས་བླ་མེད་ཀྱི་སྡོམ་པའང་ཐོབ་སྟེ། དེ་གཉིས་རིགས་ལྔའི་སྡོམ་བཟུང་གི་ཆོ་ག་འདྲ་བའི་ཕྱིར་ཟེར་བ་མ་བརྟགས་པ་སྟེ། རིགས་ལྔའི་སྡོམ་བཟུང་གི་ཚིག་ཙམ་འདྲ་ཡང་དོན་མི་འདྲ་བའི་ཕྱིར། འདིའི་དོན་འོག་ཏུ་བླ་མེད་ཀྱི་དམ་ཚིག་འཆད་པ་ལས་རྟོགས་པར་འགྱུར་རོ། །
གཉིས་པ་ནི། རྒྱུད་སྡེ་བཞི་ལ་དབང་གི་བབས་མི་འདྲ་བ་བཞི་ཡོད་དེ། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་པའི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་གསུངས་པས་བྱ་རྒྱུད་ལ་འཇིག་རྟེན་ལས་འདས་པའི་རིགས་གསུམ་གང་རུང་གི་དཀྱིལ་འཁོར་དུ་ཞུགས་ནས། གཟུངས་དང་དབང་སྔགས་བཟླ་བཞིན་པར་དབང་བུམ་གྱིས་ཆུའི་དབང་དང་། རིགས་གང་ཡིན་གྱི་དམ་ཚིག་གི་ཕྱག་རྒྱས་ཅོད་པན་གྱི་དབང་། མཐའ་རྟེན་བཟླས་ལུང་། བྱབ་བཀྲུ་བསྲུང་གསུམ། བཀྲ་ཤིས་རྫས་བརྒྱད་བྱིན་པ་རྣམས་ཀྱིས་དབང་བསྐུར་བའོ། །སྤྱོད་རྒྱུད་ལ་དཀྱིལ་འཁོར་དུ་བཅུག་ནས། ཆུ་དང་ཅོད་པན་གྱི་སྟེང་དུ། རྡོ་རྗེ། དྲིལ་བུ། མིང་དབང་རྣམས་དང་། མེ་ལོང་། ཐུར་མ། ཆོས་འཆད་ཀྱི་རྗེས་གནང་སོགས་ཀྱི་དབང་འཁོར་བཅས་བསྐུར་བའོ། །རྣལ་འབྱོར་གྱི་རྒྱུད་དུ། སློབ་མའི་དབང་ལྔ་དང་། སློབ་དཔོན་གྱི་དབང་དྲུག་སྟེ་བཅུ་གཅིག་ལས། དང་པོ་ལ་ལྔའི་ཆུ་དབང་ནི། དཀྱིལ་འཁོར་དུ་ཞུགས་ལ་དམ་ཚིག་དང་སྡོམ་པ་བཟུང་། ཡེ་ཤེས་པ་ཕབ། མེ་ཏོག་དོར་བས་ལྷག་པའི་ལྷ་ངེས་པར་བྱས་ནས། གང་བུམ་གྱི་ཁྲུས་སྔོན་དུ་འགྲོ་བས། ལྷག་པའི་ལྷའི་བུམ་པ་དང་རྣམ་རྒྱལ་སོགས་ལྷ་བུམ་གྱི་ཆུའི་དབང་དང་། རྡོ་རྗེ་རིན་པོ་ཆེའི་ཅོད་པན་སོགས་རིགས་གང་ཡིན་གྱི་ཅོད་པན་དང་། དེ་བཞིན་གཤེགས་པའི་རྡོ་རྗེ་སོགས་རིགས་ཀྱི་རྡོ་རྗེ་དང་། དེ་རྣམས་ཀྱིས་མཚན་པའི་དྲིལ་བུ། ལྷག་པའི་ལྷ་དང་མཐུན་པའི་མིང་དབང་སྟེ་ལྔའོ། །སློབ་དཔོན་གྱི་དབང་དྲུག་ནི། ཕྱིར་མི་ལྡོག་པ་དམ་ཚིག་གསུམ་བཟུང་བ། གསང་དཀྱིལ་དུ་གསང་བའི་འཇུག་པས་ཞུགས་ཤིང་མཐོང་བ། ལྷ་དང་དཀྱིལ་འཁོར་གྱི་དེ་ཁོ་ན་ཉིད། སློབ་དཔོན་གྱི་ལས་རིམ་རྣམས་ཤེས་པར་བྱ་བ། ཐུན་མོང་མ་ཡིན་པའི་ཆོས་འཆད་རྗེས་གནང་དང་། ལུང་བསྟན། དབུགས་དབྱུང་། གཟེངས་བསྟོད་དེ་བཅུ་གཅིག་གོ །རྣལ་འབྱོར་བླ་མེད་ཀྱི་དབང་ནི། ས་བོན་འདེབས་པ་ལ་ཞིང་ས་སྦྱོང་དགོས་པ་ལྟར་རྡུལ་ཚོན་སོགས་རྒྱུ་རྟེན་གྱི་དཀྱིལ་འཁོར་བཞིར་བཅུག་ནས། འབྲས་བུ་སྐུ་བཞིའི་རྟེན་འབྲེལ་སྒྲིག་པའི་ཕྱིར་དབང་བཞི་བསྐུར་ཏེ། གསང་བ་སྙིང་པོའི་རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་གསུངས། དེ་ཡང་ཅུང་ཟད་ཕྱེ་ན། བུམ་དབང་ལ་རིག་པའི་དབང་ལྔ་དང་། དྲུག་པ་རྡོ་རྗེ་འཆང་གི་དབང་སྟེ་སློབ་མའི་དབང་དྲུག་གི་སྟེང་། རྡོ་རྗེ་སློབ་དཔོན་གྱི་དབང་དང་བཅས་པས་བུམ་དབང་དངོས་གཞི་ལ་བདུན་དང་། དེའི་ཡན་ལག་རྗེས་གནང་། ལུང་བསྟན། དབུགས་དབྱུང་། གཟེངས་བསྟོད་དེ་བཅུ་གཅིག །མཆོག་དབང་གོང་མ་གསུམ་དང་བཅུ་བཞིའོ། །དེ་ལྟར་ཡང་བཤད་རྒྱུད་རྡོར་ཕྲེང་ལས། དང་པོའི་དབང་ནི་གཙོ་བོ་སྟེ། །གཉིས་པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞི་པ་དོན་ནི་དམ་པའོ། །གཙོ་བོའི་དབྱེ་བ་བཅུ་གཅིག་སྟེ། །བཅུ་གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་བསྐུར་རེ་རེ་ས་རེའོ། །རྣམ་པ་གསུམ་ནི་རྒྱུ་ཡི་དབང་། །བཞི་པ་འབྲས་བུར་ཤེས་པར་བྱ། །ཞེས་སོ། །ཡང་ཡེ་ཤེས་ཐིག་ལེ་ལས། རྣལ་འབྱོར་རྒྱུད་ལ་མོས་པ་ལ། །དབང་བརྒྱད་ཕྱེ་ལ་བྱིན་པར་བྱ། །རྣལ་འབྱོར་བླ་མ་ལ་མོས་ལ། །བཅུ་གཅིག་བདག་ཉིད་བྱིན་པར་བྱ། །ཞེས་པ་ལྟར་བུམ་དབང་ལ་བརྒྱད་དུ་ཕྱེ་ནས་བཅུ་གཅིག་ཏུ་བསྡུས་པའམ། དུས་འཁོར་ལས་བྱིས་འཇུག་གི་དབང་བདུན་དང་། དབང་གོང་མ་ལ་འཇིག་རྟེན་པ་གསུམ་དང་། འཇིག་རྟེན་ལས་འདས་པའི་བཞི་པ་སྟེ་བཅུ་གཅིག་ཏུ་བསྡུས་པའོ། །དེ་ལྟར་ཡང་རྩ་རྒྱུད་ལས། ཆུ་དང་ཅོད་པན་དར་དང་ནི། །རྡོ་རྗེ་དྲིལ་བུ་བརྟུལ་ཞུགས་དང་། །མིང་རྒྱལ་དབང་ནི་རྣམ་པ་བདུན། །བྱིས་པ་རྣམས་ནི་བཟུང་ཕྱིར་ཡིན། །གསུམ་པ་འཇིག་རྟེན་ཀུན་རྫོབ་དང་། །བཞི་པ་དོན་གྱི་དམ་པའོ། །བུམ་པ་གསང་བའི་དབང་དང་ནི། །ཤེས་རབ་ཡེ་ཤེས་ཞེས་བྱ་དང་། །དེ་ནས་ཤེས་རབ་ཆེན་པོ་ཡི། །ཡེ་ཤེས་ཞེས་བྱ་རྫོགས་པ་དག །འགྱུར་དང་མི་འགྱུར་བར་ཆད་ཅན། །བར་ཆད་མེད་པ་དེ་ལས་གཞན། །ཞེས་སོ། །གཞན་ཡང་སམྦུ་ཊིའི་རྒྱུད་ཕྱི་མར་རིག་པའི་དབང་གི་སྐབས་སུ་གོས་ཀྱི་དབང་། མི་གཡོ་བླ་མེད་ལས་གྲི་ཞགས་ཀྱི་དབང་སོགས་གྲངས་དང་རྣམ་པ་མི་འདྲ་བ་མང་དུ་འབྱུང་སྟེ་བརྗོད་པར་མི་ལང་ཞིང་། ཁྱད་པར་སྔ་འགྱུར་བླ་མེད་ཀྱི་རྒྱུད་ཐུན་མོང་མ་ཡིན་པའི་ལུགས་ལ། རྒྱུད་ལུང་མན་ངག་སྒྲུབ་སྡེ་བཞིའི་དབྱེ་བས། རྒྱུད་སྒྱུ་འཕྲུལ་དྲྭ་བ་ལྟར་ན། སྙིང་པོ་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་བྱིན་པར་བྱ། །ཞེས་པ་ལྟར་དད་པ་ཅན་ལ་དབུ་རྒྱན་ཅོད་པན་སོགས་ཕྱི་ཕན་པའི་དབང་བཅུ། བརྩོན་འགྲུས་ཅན་ལ་གསུམ་གྱི། བདག་དོན་ནུས་པ་ལ་ཉན་སྒོམ། གཞན་དོན་ནུས་པ་ལ་འཆད་ཕྲིན། གཉིས་ཀའི་དོན་ནུས་པ་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་སྟེ་ནུས་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་གསུམ་ལ་ཟབ་མོའི་དབང་གསུམ་བསྐུར་བའོ། །ཡང་ལུང་ཨ་ནུ་ཡོ་ག་ལ། ཀུན་འདུས་ལས། ཕྱི་ཡི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་པའི་དོན་རྒྱུད་དང་མན་ངག་གི་ལུགས་ལྟར་བསྐུར་ཚུལ་གཉིས་ཏེ། རང་བཞིན་གྱིས་སྣོད་དུ་གྱུར་པ་ཟབ་མོའི་དོན་ལ་མོས་པའི་སློབ་མ་ཁྱད་པར་ཅན་ལ་མདོ་རྩ་བའི་དཀྱིལ་འཁོར་དུ་རྒྱུད་ཀྱི་དངོས་བསྟན་ལྟར་ཆུ་བོ་བཞི་རྫོགས་ཀྱི་དབང་སུམ་ཅུ་རྩ་དྲུག་བསྐུར་བ་དང་། སྦྱངས་པས་སྣོད་དུ་གྱུར་པ་རྒྱ་ཆེ་བ་ལ་མོས་པའི་སློབ་མ་ཐུན་མོང་པ་ལ་མདོ་ཡོངས་རྫོགས་ཀྱི་ལུགས་ཡན་ལག་གི་དཀྱིལ་འཁོར་སོ་སོར་ཕྱེ་ནས་བདེ་བ་གསལ་མཛད་གྱི་ལས་ཐོ་ལྟར་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་བ་གཉིས་ལས། དེང་སང་བླ་མ་རྣམས་ཀྱི་ཕྱག་བཞེས་སུ་རྒྱུད་དང་མན་ངག་གི་ལུགས་དེ་གཉིས་འདོར་ལེན་གྱི་གནད་ཀྱིས་གཅིག་ཏུ་དྲིལ་ནས་བསྐུར་བར་མཛད་ཅིང་། དེ་ལྟར་མཛད་པས་གནས་སྐབས་སུ་བྱ་སླ་ཞིང་། བརྒྱུད་ནས་ལུགས་གཉིས་གཅིག་གིས་གཅིག་མི་ནུབ་པར་ཆབས་ཅིག་ཏུ་འཕེལ་བའི་དགོས་པ་ཁྱད་པར་ཅན་ཡོད་དོ། །ལུགས་དེ་གཉིས་ཀས་ཡོ་ག་བཞི་རྫོགས་དང་། ཐེག་དགུའི་དབང་རྫོགས་པ་ལ་འདྲ་བ་ཡིན་ཏེ། དབང་དོན་རྣམ་པར་འབྱེད་པ་ལས། བཅུ་ཡིས་བྱང་ཆུབ་རིགས་ཅན་འགྱུར། །བཅུ་གཅིག་གསང་བ་ནང་པར་འགྱུར། །བཅུ་གསུམ་བླ་མ་ཆེན་པོར་གྲགས། །གཉིས་ཀྱིས་ཐེག་དགུའི་དབང་རྫོགས་པའོ། །ཞེས་གསུངས་ལ། དེས་ན་མདོ་ཡོངས་རྫོགས་ཀྱི་ལུགས་དེ་ཡང་ཐེག་བརྒྱད་སྒོས་ཀྱི་ཆོ་ག་སོ་སོ་ནས་བཏུས་ཏེ་སྤྱིའི་ཆོ་གར་བྱས་པ་ནི་མ་ཡིན་གྱི། འདིར་མདོ་རང་ལུགས་ཀྱི་ས་དང་པོ་འགྱུར་བ་མ་ངེས་པ་ནས། ས་བཅུ་པ་རྫོགས་པ་ཅིར་ཆིབ་ཀྱི་བར་ནོན་པར་བྱ་བའི་ཆེད་དུ་ལྷ་མི་ནས་བརྩམས་ཏེ་ཨ་ནུ་རང་ལུགས་ཀྱི་རྫོགས་རིམ་མཐར་ཐུག་པ་ཨ་ཏིའི་བར་ལ་བྱ་སྤྱོད་སོ་སོར་གྲངས་པས་དབང་རིམ་བཅུ་བྱུང་བ་དེ་ཉིད་བྱ་སྤྱོད་གཅིག་ཏུ་བསྡུས་ནས་ཐེག་དགུ་དང་ཚུལ་འདྲ་བས་ཐེག་དགུའི་དབང་ཞེས་གྲགས་ཤིང་། དེ་ལྟ་བུའི་ལམ་སྟེགས་ཀྱི་ཐེག་པ་རྣམས་སོ་སོའི་ལམ་དང་འདྲ་རུང་དུ་བྱུང་ཡང་། དོན་ལ་སྔགས་ཀྱི་ཐབས་མཁས་ཀྱིས་ཟིན་པས་ཐེག་པ་རང་རང་གི་སྤངས་ཐོབ་དང་རིགས་འདྲའི་ཡོན་ཏན་དེ་དང་དེ་སྐྱེ་བའི་མྱུར་ལམ་དུའང་འགྲོ་བ་ཡིན་ནོ། །མན་ངག་ཨ་ཏི་ཡོ་གའི་དབང་རྣམས་ནི། དབང་གསུམ་པའི་དཔེའི་ཡེ་ཤེས་ལ་ལྟོས་མི་དགོས་པར་ཐོག་མ་ནས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་འཇུག་རུང་བའི་སྐལ་ལྡན་ལ་རྫོགས་པ་ཆེན་པོ་རིག་པའི་རྩལ་དབང་བསྐུར་བ་སྟེ། སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་འཇམ་དཔལ་སྒྱུ་དྲྭའི་ཁོག་དོན་ལས། ཟབ་པ་དོན་གྱི་དབང་མཆོག་ནི། །རིག་པའི་རྩལ་དབང་ཐོབ་པ་སྟེ། །ཆོས་ཉིད་རྟོགས་པས་དབང་ཞེས་བྱ། །ཡེ་ཤེས་དབང་བསྐུར་ཅོད་པན་ཅན། །ཞེས་གསུངས་པ་ལྟར་རོ། །ཁྱད་པར་མན་ངག་གི་སྡེ་ལྟར་ན། རྫོགས་པ་རང་བྱུང་ལས། སྤྲོས་བཅས་སྤྲོས་པ་མེད་པ་དང། །ཤིན་ཏུ་སྤྲོས་མེད་རབ་སྤྲོས་མེད། །དབང་ནི་རྣམ་པ་བཞི་ཡིས་ཀྱང་། །སྐལ་བ་ལྡན་པ་སྨིན་པར་བྱ། །ཞེས་པའི་དབང་བཞིས་རིམ་པ་ལྟར། ལུས་ངག་ཡིད་གསུམ་དང་ཤེས་བྱ་ལ་རྨོངས་པའི་སྒྲིབ་པ་སྦྱོང་། སྐུ་གསུང་ཐུགས་དང་རང་བྱུང་འོད་གསལ་གྱི་ནུས་པ་འཇུག །བསྐྱེད་རིམ་དང་། གཏུམ་མོ་སྒོམ་པ། བདེ་སྟོང་ཟུང་འཇུག་སྒོམ་ཞིང་ཀ་དག་གི་ཡེ་ཤེས་རྟོགས་པ་དང་། མངོན་སུམ་ལྷུན་གྲུབ་ཀྱི་དོན་ཉམས་སུ་ལེན་པ་བཞི་ལ་དབང་བ་ཡིན་ནོ། །འདི་ནི་དབང་གོང་མ་ཉིད་ལ་དབང་བཞིར་ཕྱེ་བ་ཡིན་པས་བླ་མེད་ཐུན་མོང་པའི་དབང་བཞི་དང་གྲངས་འདྲ་ཡང་དོན་མི་འདྲ་བར་ཤེས་དགོས་ཤིང་། དེར་མ་ཟད། བླ་མེད་ཐུན་མོང་གི་དབང་བཞི་པའི་སྔགས་སྡོམ་རྒྱུད་ལྡན་ཞིག་གིས་འདི་ཉིད་ཐོབ་ན་སྡོམ་པ་སྔར་མེད་གསར་ཐོབ་ཀྱང་འདོད་དགོས་ཏེ། བླ་མེད་ཀྱི་ཆོ་ག་གཞན་རྣམས་རྒྱས་བསྡུས་དང་རྣམ་གྲངས་མི་འདྲ་བ་ཙམ་ལས་ཕན་ཚུན་གཅིག་གི་དོད་གཅིག་གིས་ཐུབ་པས་མཚུངས་པའི་ཕྱིར། དེ་དག་སོ་སོ་ལས་ཐོབ་པའི་སྡོམ་པ་རྣམས་ཀྱང་ངོ་བོ་གཅིག་ཏུ་འགྱུར་མོད། ཞུ་བདེ་ལྷན་སྐྱེས་ཀུན་རྫོབ་པ་དཔེའི་ཡེ་ཤེས་ཙམ་ལ་ངོ་སྤྲད་པའི་བཞི་པ་བཏགས་པ་བ་དེས་དོན་དམ་ལྷན་སྐྱེས་ཟུང་འཇུག་གི་ཡེ་ཤེས་ལ་འཇུག་པའི་ཐབས་བཞི་པ་མཚན་ཉིད་པ་འདིའི་དོད་མི་ཐུབ་པས་མཚུངས་པ་མ་ཡིན་པའི་ཕྱིར་རོ། །སྒྲུབ་སྡེ་ལ་སྤྱི་བཀའ་བདེ་འདུས་ལྟར་ན། མདོ་བྱང་ཊཱི་ཀ་ལས། ཕྱི་དབང་ནང་དབང་གསང་དབང་དང་། །ཐེག་པ་ལྟ་བ་སྤྱི་འབྱམས་དབང་། །རིམ་གྱིས་དབང་ནི་རྫོགས་པར་བསྐུར། །ཞེས་པ་ལྟར་ཕྱི་ནང་གསང་བ་དེ་ཁོ་ན་ཉིད་ཀྱི་དབང་དང་བཞི་ལས། གདུལ་བྱ་ཞེ་སྡང་ཅན་སྒྲོལ་བ་ལམ་དུ་ཁྱེར་བའི་ཕྱིར་བུམ་པ་སོགས་ཕྱི་ནང་གི་རྫས་བརྒྱ་རྩ་བརྒྱད་ལ་བརྟེན་ནས་ཕྱི་དབང་བསྐུར་བ། ང་རྒྱལ་ཅན་ལྷ་ལམ་དུ་ཁྱེར་བའི་ཕྱིར་ནང་དབང་ལུས་ལ་བརྟེན་ནས་བསྐུར་བ། འདོད་ཆགས་ཅན་སྦྱོར་བ་ལམ་དུ་ཁྱེར་བའི་ཕྱིར་གསང་དབང་ཡུམ་ལ་བརྟེན་ནས་བསྐུར་བ། གཏི་མུག་ཅན་རྣམ་རྟོག་ལམ་དུ་ཁྱེར་བའི་ཕྱིར་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་དང་བཞི་ཡིན་ནོ། །སྒྲུབ་སྡེའི་དགོས་བཀའ་ཡང་ཕུར་སོགས་ལ་ཐུན་མོང་བ་བླ་མེད་སྤྱི་བཀའ་ལྟར་དབང་བཞི་བསྐུར་བ་དང་། ཟབ་ཁྱད་སྒྲུབ་དབང་གི་ལུགས་སུ་བསྐུར་བ་སོགས་མང་སྟེ་ཐམས་ཅད་བརྗོད་པར་མི་ནུས་ཤིང་། སྤྱི་ལྡོག་ནས་བླ་མེད་ཀྱི་དབང་ཐམས་ཅད་དབང་བཞིར་འདུ་བ་ཡིན་ནོ། །
གསུམ་པ་ལ་བཞི་ལས། དང་པོ་བྱ་བའི་རྒྱུད་ནི། དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས་ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་སྟེ། སློབ་དཔོན་སངས་རྒྱས་གསང་བས་སྒྱུ་འཕྲུལ་ལམ་རིམ་དུ། གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །རེས་བསྒོམ་བྱ་བ་ལས་ཀྱི་ས། །ཞེས་སོ། །དེའི་ལམ་གྱི་ཁྱད་པར་ལ། དཔུང་བཟང་འགྲེལ་པར་སྤྱོད་པའི་སྒོ་བཞིས་བསྡུས་ཏེ། འཇུག་པའི་སྤྱོདཔ་ནི། དབང་གིས་སྣོད་རུང་དུ་བྱེད་པ། སྦྱོར་བའི་སྤྱོད་པ་ནི། རིགས་གསུམ་གང་རུང་གི་ལྷ་བསྙེན་པ། སྒྲུབ་པའི་སྤྱོད་པ་ནི། མཚན་མ་མཐོང་ནས་རྫས་དང་སྔགས་གཡོག་འཛོམ་པས་བརྩོན་འགྲུས་བར་མ་ཆད་པར་བཟླས་བརྗོད་བྱ་བ། གྲུབ་པའི་མཐའ་འབྲས་བུའི་སྤྱོད་པ་ནི། དེ་ལྟར་བསྒྲུབས་པས་རྫས་ལུས་ལོངས་སྤྱོད་རྣམས་འདོད་པའི་ལྷ་དང་སྐལ་བ་མཉམ་པའི་རིག་འཛིན་ནམ་མཁའ་སྤྱོད་འགྲུབ་ནས། རྟེན་དེ་ལ་བརྟེན་ནས་སྔགས་ཀྱི་ཕྱིན་དྲུག་གི་སྤྱོད་པ་སྤྱད་པས་མཐར་ཐུག་གི་འབྲས་བུ་རྒྱུད་སྡེ་འདིར་བཤད་པའི་སྐུ་གསུང་ཐུགས་ཀྱི་མཚན་ཉིད་ཅན་གྱི་བྱང་ཆུབ་རིགས་གསུམ་རྡོ་རྗེ་འཛིན་པའི་ས་མངོན་དུ་བྱེད་པར་འདོད་དེ། ཧེ་རུ་ཀ་གལྤོ་ལས། མི་ཚེ་བདུན་ན་སངས་རྒྱས་ས། །རིགས་གསུམ་མགོན་པོས་འགྲོ་བ་འདུལ། །ཞེས་འབྱུང་། འདིའི་མི་ཚེ་བདུན་ཡང་རིག་འཛིན་གྲུབ་པས་རིང་པོར་འཚོ་བའི་དབང་དུ་བྱས་པ་སྟེ། གཞན་ལས་བྱ་རྒྱུད་རང་ལམ་གྱི་བསྐལ་ཆེན་བརྒྱད་ནས་འབྲས་བུ་ལ་སྦྱོར་བར་བཤད་པ་དང་མི་འགལ་བར་ཤེས་དགོས་སོ། །དེ་ལྟར་ངེས་པར་བྱས་ནས་རྣལ་འབྱོར་གྱི་ངོ་བོ་ཉམས་སུ་ལེན་ཚུལ་ལ། བྱ་རྒྱུད་ཙམ་པོ་རྣམས་སུ་བདག་ལྷར་བསྐྱེད་པ་མེད་པས། མདུན་དུ་ལྷ་སྤྱན་དྲངས། རང་དེའི་འཁོར་དུ་གཏོགས་པ་ཙམ་གྱི་འདུ་ཤེས་བཞག་སྟེ། ཁྲུས་དང་གཙང་སྦྲ་སོགས་ཕྱིའི་བྱ་བ་གཙོ་བོར་གྱུར་པས་བསྙེན་པ་བྱ་བ་སྟེ་ཡེ་ཤེས་རྡོ་རྗེ་ཀུན་ལས་བཏུས་ལས། བདག་ཉིད་ལྷ་ཡི་སྙེམས་པ་མེད་པ་དང་། །ཞེས་སོ། །འོན་ཀྱང་བྱ་རྒྱུད་ཁྱད་པར་ཅན་ལས་བདག་ཉིད་ལྷར་བསྐྱེད་པ་བཤད་དེ། ཇི་ལྟར་ན་། དེ་ཁོ་ན་ཉིད་བཞི་ལས། བདག་གི་དེ་ཁོ་ན་ཉིད་ནི། རྒྱུད་འདིར་གང་ལྟ་བས་གཏན་ལ་དབབ་པར་བྱ་བའི་གཞི་སེམས་ཉིད་དོན་དམ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བའི་ཆོས་ཉིད་དུ་རྟོགས་པའི་ཡོན་ཏན་ཀུན་རྫོབ་ཡོངས་སུ་དག་པའི་ལྷའི་མཚན་ཉིད་དུ་ལྟ་བ་སྟེ། ལ་ཤན་ལས། རང་སེམས་མཐའ་བཞི་ཡོངས་བྲལ་བ། །རིག་ཕྱིར་ཡེ་ཤེས་གཞན་ལས་མིན། །རྐྱེན་བསླང་སྣང་བའི་ཡེ་ཤེས་ཀྱིས། །སྣང་བའི་དངོས་པོ་མཐོ་འཇམ་རྩུབ། །དྲུག་སྤྱོད་རིགས་ཀྱི་དཀྱིལ་འཁོར་དུ། །མཐོང་བ་རྣམ་པར་དག་ཅེས་བྱ། །ཞེས་སོ། །ལྷའི་དེ་ཁོ་ན་ཉིད་ནི། སངས་རྒྱས་གསང་བས། དང་པོ་ཁྲུས་བྱས་རྣལ་འབྱོར་པས། །རྡོ་རྗེའི་གདན་ལ་འདུག་ནས་ནི། །མཆོད་དང་གསོལ་བས་ལྷ་དྲུག་བསྒོམ། །སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ནོ། །ཞེས་པས་བདག་གི་དེ་ཁོ་ན་ཉིད་སྒོམ་པ་སྟོང་པའི་ལྷ། དེ་ཉིད་ཀུན་རྫོབ་ཟླ་དཀྱིལ་གྱི་རྣམ་པར་སྒོམ་པ་ཡི་གེའི་ལྷ། དེའི་སྟེང་དུ་བཟླ་བྱའི་སྔགས་གཟུགས་རང་སྒྲ་སྒྲོག་པ་སྒྲའི་ལྷ། སྔགས་དེ་ཉིད་ཟླ་དཀྱིལ་ལ་འདྲེས་ནས་སླར་ཡང་སྔགས་ཕྲེང་བཀོད་པ་ལས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ཏེ། ཟླ་བ་སྔགས་ཕྲེང་དང་བཅས་པ་ཡོངས་སུ་གྱུར་པ་ལས་རིགས་གསུམ་གྱི་ལྷ་དེ་དང་དེའི་གཟུགས་སུ་སྒོམ་པ་གཟུགས་ཀྱི་ལྷ། དེ་ལ་རིགས་གང་ཡིན་དེ་དང་དེའི་དམ་རྒྱས་འདེབས་པ་ཕྱག་རྒྱའི་ལྷ། གནས་སྐབས་ཀུན་ཏུ་ཏིང་ངེ་འཛིན་གྱིས་ལྷའི་འདུ་ཤེས་དང་མི་འབྲལ་བར་བྱེད་པ་མཚན་མའི་ལྷ་སྟེ། རང་གི་ལྷ་སྒོམ་པའི་རྣལ་འབྱོར་དྲུག་གོ །དེ་ནས་རང་ཤར་ལས། ལྷ་དང་རྣལ་འབྱོར་དག་པ་གཉིས། །རྗེ་དང་འབངས་ཀྱི་ཚུལ་དུ་བལྟ། །ཞེས་པ་ལྟར་རང་གི་མདུན་དུ་ཡང་དག་པའི་སྨོན་ལམ་གྱི་སྟོབས་ལས་བྱུང་བའི་ཞིང་ཁམས་ཕོ་བྲང་དང་བཅས་པ་གསལ་བཏབ་པའི་ནང་དུ་ཡེ་ཤེས་ཀྱི་ལྷ་སྤྱན་དྲངས་ནས་བཞུགས་སུ་གསོལ་བ་རྗེ་དང་། རང་ཉིད་ལྷར་བསྐྱེད་པ་བྲན་གྱི་ཚུལ་དུ་བལྟས་ཏེ། མཆོད་བསྟོད་དང་རྒྱུན་བཤགས་བྱ་བའོ། །བཟླས་བརྗོད་ཀྱི་དེ་ཁོ་ན་ཉིད་ནི། རིགས་གསུམ་སོ་སོའི་བགྲང་ཕྲེང་ཆོ་ག་བཞིན་དུ་འདུ་བྱས་པ་བཟུང་སྟེ། བདག་མདུན་གཉིས་ཀའི་ཐུགས་ཀར་ཟླ་དཀྱིལ་ལ་བཟླ་བྱའི་སྔགས་ཕྲེང་རང་སྒྲ་སྒྲོག་པ་བཀོད་པ་ལ་དམིགས་ཏེ། སྲོག་རྩོལ་བསྡམས་ནས་བཟླ་བ་སྤྱི་དང་། ཁྱད་པར་བ་ནི། གཞི་བདག་མདུན་ལྷར་བསམ་པ། སེམས་ནི་ཐུགས་ཀར་ཟླ་དཀྱིལ་བསམ་པ། སྒྲ་ནི་དེའི་སྟེང་སྔགས་ཀྱི་སྒྲ་གདངས་བསམ་ལ། སྲོག་རྩོལ་བསྡམས་ནས་མདུན་གྱི་ལྷ་ཟླ་བ་སྔགས་བཅས་ལ་དམིགས་ནས་བཟླ་བ་དང་། ཡང་སྲོག་དབྱུང་བའི་ཚེ་རང་གི་ལྷ་ཟླ་བ་སྔགས་ཕྲེང་ལ་དམིགས་པ་དང་། སྔགས་བཟླ་བའང་སྐྱོན་དང་བྲལ་བར་མ་ཉམས་པར་བཟླ་ཞིང་། དེས་སྐྱོ་ན་མི་རྟོག་པའི་ངང་དུ་ངལ་གསོ་བ་སྟེ། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་གསོས་ཤིག །ཅེས་སོ། །བསམ་གཏན་གྱི་དེ་ཁོ་ན་ཉིད་ནི། དེ་ལས། གསང་སྔགས་མེར་གནས་དངོས་གྲུབ་སྟེར། །སྒྲར་གནས་རྣལ་འབྱོར་སྟེར་བར་དྲན། །སྒྲ་མཐས་ཐར་པ་སྟེར་བར་བྱེད། །ཅེས་པས་རང་ལྷར་གསལ་བའི་སྙིང་གར་མེ་འབར་བའི་ནང་དུ་ཟླ་བ་ལ་སྔགས་བཀོད་ནས་སྲོག་བསྡམ་པའི་སྦྱོར་བས་བསླབ་པ་མེར་གནས་ཏེ། ཞི་སོགས་ལས་སྒྲུབ་པའི་གཞིའོ། །དེ་ལས་སྔགས་ཀྱི་ཡེ་གེ་རྣམས་རང་སྒྲ་དྲིལ་བུའི་སྒྲ་ལྟར་གྲགས་པར་བསམ་ནས་སྲོག་བསྡམ་པ་ནི་སྒྲར་གནས་ཏེ། ཞི་གནས་སྐྱེ་བའི་བརྟེན་གཞིའོ། །སྔགས་ཀྱི་སྒྲ་ཙམ་དེ་ཡང་དཔྱད་ཅིང་གཞིགས་ནས་རྣམ་པར་མི་རྟོག་པའི་ཡེ་ཤེས་ཀྱི་ངང་ལ་མཉམ་པར་འཇོག་པ་སྒྲ་མཐའ་སྟེ། དེ་ལས་ལྷག་མཐོང་འཆར་ཞིང་ཐར་པའི་ཉེར་ལེན་དུ་གྱུར་པའོ། །གཉིས་པ་སྤྱོད་རྒྱུད་ནི། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལ། །སྤྱོད་པ་ཀྲི་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་དང་། ལྟ་ཕྲེང་ལས། གཉིས་ཀ་ལ་བརྟེན་པ་ལས་གྲུབ་པའོ། །ཞེས་དང་། ལྟ་རིམ་སྣང་བ་བཅུ་བདུན་པ་ལས། གཉིས་ཀ་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཞེས་པས་ལྟ་བ་ཡོ་ག་ལྟར་བལྟ་ཞིང་། སྤྱོད་པ་ཀྲི་ཡ་ལྟར་གཙང་སྦྲ་ལ་གནས་པའི་སྒོ་ནས། བསྒོམ་བྱ་མངོན་པར་རྟོགས་པའི་ཁྱད་པར་ལ། འཇུག་པའི། སྦྱོར་བའི། གྲུབ་པའི་སྤྱོད་པ་གསུམ་ལས། འཇུག་པ་ལ་གཉིས་ཀྱི། ཕྱིའི་འཇུག་པའི་སྤྱོད་པ་ནི། དབང་གིས་སྣོད་རུང་དུ་བྱེད་པ། ནང་གི་འཇུག་པའི་སྤྱོད་པ་ལ། མཚན་བཅས་དང་། མཚན་མེད་ཀྱི་རྣལ་འབྱོར་གཉིས་གསུངས་པའི་ཚུལ་གྱིས་བསྒོམ་བྱའི་ལྷ་ལ་རྒྱུད་ལས། ཡི་གེཕྱག་རྒྱ། གཟུགས་ཀྱི་ལྷ་དང་གསུམ་བཤད་པའི་རེ་རེ་ལའང་གཉིས་གཉིས་ཏེ། ཡི་གེ་ལ་བྱང་ཆུབ་ཀྱི་སེམས་དང་སྒྲའི་ལྷ། ཕྱག་རྒྱ་ལ་འཁོར་ལོ་སོགས་དབྱིབས་བཅས་དང་ཆོས་འབྱུང་ཐལ་ཁས་མཚོན་པའི་སྟོང་ཉིད་གཟུགས་དབྱིབས་མེད་པ། གཟུགས་ལ་ཡོངས་སུ་དག་པ་སྙིང་པོའི་དོན་རང་རིག་མངོན་སུམ་གྱིས་མཐོང་བ་དང་། ཡོངས་སུ་མ་དག་པ་ཞལ་ཕྱག་ལ་སོགས་པའི་གཟུགས་སུ་རྣམ་པར་རྟོག་པས་བསྒོམ་པའོ། །དེ་ལྟར་ཤེས་པར་བྱས་ནས་མཚན་བཅས་ཀྱི་རྣལ་འབྱོར་སྒོམ་པའི་རིམ་པ་ནི། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་ཉིད། །ཤིན་ཏུ་བསྡམས་པས་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་པ་ལྟར་བདག་གནས་རྣལ་འབྱོར་བསྲུང་བ་སོགས་སྔོན་དུ་འགྲོ་བས། ཡི་གེ་དང་པོ་དོན་དམ་བྱང་ཆུབ་ཀྱི་སེམས་སྟོང་ཉིད་ཀྱི་ངང་ལས། དེའི་སྣང་ཆ་ཀུན་རྫོབ་ཟླ་དཀྱིལ་གྱི་རྣམ་པར་བསྒོམ་པ། ཡི་གེ་གཉིས་པ་དེའི་སྟེང་དུ་བཟླ་བྱའི་སྔགས་རང་སྒྲ་སྒྲོག་པ། དེ་ཐམས་ཅད་ཡོངས་སུ་གྱུར་པ་ལས་གཞི་དང་པོ་བདག་ཉིད་ལྷར་བསྐྱེད་པ་ལ་སྔགས་རྒྱ་ལ་སོགས་པས་བྱིན་གྱིས་བརླབས། དེ་ནས་གཞི་གཉིས་པ་རང་གི་མདུན་དུ་ལྷ་བསྐྱེད་པའི་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་ནས། སྲོག་བསྡམ་ཞིང་རྩེ་གཅིག་པའི་སྦྱོར་བས་ཏིང་ངེ་འཛིན་བརྟན་པར་བྱེད་པའོ། །གཉིས་པ་མཚན་མེད་ཀྱི་རྣལ་འབྱོར་ནི། ཕུང་སོགས་ཆོས་ཐམས་ཅད་ལ་མཐའ་བཞིས་རྣམ་པར་དཔྱད་པས་སྐྱེ་མེད་དུ་རྟོགས་པ་འཇུག་པའི་སེམས། དེ་རྣམ་པར་མི་རྟོག་པའི་ངོ་བོར་མངོན་དུ་གྱུར་པ་གནས་པའི་སེམས། དེ་ལྟར་མ་རྟོགས་པ་ལ་སྙིང་རྗེ་ཆེན་པོས་རྗེས་སུ་འཇུག་པ་ལྡང་བའི་སེམས་ཏེ། འཇུག་གནས་ལྡང་གསུམ་གྱིས་ཁྱད་པར་དུ་བྱས་པའི་དོན་དམ་བྱང་ཆུབ་ཀྱི་སེམས་བསྒོམ་པའོ། །དེ་ལྟར་རྣལ་འབྱོར་གཉིས་ལ་གོམས་པ་ལས། མཚན་མ་དང་བཅས་པའི་དང་། མཚན་བཅས་མཚན་མེད་གཉིས་ཀའི་དངོས་གྲུབ་འགྲུབ་པའོ། །གཉིས་པ་སྦྱོར་བའི་སྤྱོད་པ་ལ་ཕྱི་ནང་གཉིས་ལས། ཕྱི་ནི་བཟླས་བརྗོད་ཡན་ལག་བཞི་ལྡན་གྱི་སྒོ་ནས་མཚན་མའམ་གྲངས་ཀྱི་བསྙེན་པ་བྱེད་པ་ཡིན་ལ། ནང་ནི། རང་ཉིད་ཤཱཀྱ་ཐུབ་པར་གསལ་བའི་ཐུགས་ཀར་ཟླ་བ་ལ་རྣམ་སྣང་བསྒོམས་པའི་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་དེ། སྲོག་བསྡམ་ཞིང་བཟླས་བརྗོད་རྩེ་གཅིག་པའི་མཚན་ཉིད་ཅན་གྱི་ཞི་ལྷག་ཟུང་འབྲེལ་གྱི་ངོ་བོར་སྒྲུབ་པའོ། །གསུམ་པ་གྲུབ་པའི་སྤྱོད་པ་ལ། ཐུན་མོང་བ་བསྙེན་པ་མཐར་ཕྱིན་ནས་རྫས་སྔགས་ལ་བརྟེན་པའི་རིག་འཛིན་སྒྲུབ་པ་དང་། ཐུན་མོང་མ་ཡིན་པ་འབྱུང་བཞིའི་དཀྱིལ་འཁོར་ལ་བརྟེན་ནས་རླུང་གིི་སྦྱོར་བ་བསྒོམས་པ་ལས། རྫུ་འཕྲུལ་དང་མངོན་ཤེས་བསྒྲུབས་ཏེ་རིག་པ་འཛིན་པའི་ནང་དུ་འགྲོ་བ་སོགས་གནས་སྐབས་ཀྱི་འབྲས་བུ་གྲུབ་ཅིང་། རྟེན་དེ་ལ་བརྟེན་ནས་སྔགས་ཀྱི་སྤྱོད་པ་སྤྱད་པས་མི་ཚེ་ལྔའམ་ཇི་ལྟར་འགོར་ནའང་བསྐལ་པ་གསུམ་མམ་གཅིག་གིས་མཐར་ཐུག་གི་འབྲས་བུ་རིགས་བཞི་རྡོ་རྗེ་འཛིན་པའི་ས་མངོན་དུ་བྱེད་པར་འདོད་དེ། གལྤོ་ལས། རིགས་བཞི་རྡོ་རྗེ་འཆང་སར་གནས། །ཞེས་དང་། ཀུན་བྱེད་ལས། གཉིས་སུ་མེད་ལ་མི་ཚེ་ལྔས་སྒྲིབ་གོལ། །ཞེས་སོ། །གསུམ་པ་རྣལ་འབྱོར་རྒྱུད་ནི། དོན་དམ་པར་ཆོས་ཐམས་ཅད་སྤྲོས་པའི་མཚན་མ་དང་བྲལ་བའི་རང་བཞིན་འོད་གསལ་སྟོང་པ་ཉིད་དུ་རྟོགས་པའི་ཡེ་ཤེས་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བཏགས་ཏེ། རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པར་འདོད་པ་སྟེ། ལམ་རིམ་ལས། ལྷུན་གྲུབ་མཉམ་པ་མ་རྟོགས་པས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་རླབས་རྡོ་རྗེ་དབྱིངས་སྤྲུལ་ལྷ། །བླང་དོར་བྱེད་པ་ལས་ཀྱི་ས། །ཞེས་སོ། །དེའི་བསྒོམ་བྱ་ལམ་གྱི་ཁྱད་པར་ལ། བསྙེན་སྒྲུབ་གཉིས་ལས། དང་པོ་ལ། རྟེན་གྱི་གང་ཟག་བྱང་ཆུབ་ཏུ་སེམས་བསྐྱེད་པ། རྒྱུད་ལ་ཡིད་ཆེས་པ། བཀའ་བཞིན་དམ་ཚིག་སྒྲུབ་པ། ལམ་དང་ལམ་གྱི་སྟོན་པ་སོགས་ལ་དད་པ་དང་ལྡན་པ་དེས་ཇི་ལྟར་བསྒོམ་པའི་ལམ་གྱི་ཆིངས་ནི། འཐོབ་བྱའི་འབྲས་བུ་ལ་དམིགས་ནས། དེའི་ཉེར་ལེན་གྱི་རྒྱུ་ནི། ཐོག་མཐའ་མེད་པའི་བྱང་ཆུབ་ཀྱི་སེམས་འོད་གསལ་བ་སོ་སོ་རང་གི་རིག་པའི་བདག་ཉིད་ལྷ་སྔགས་དཀྱིལ་འཁོར་ཕྱག་རྒྱ་ཐམས་ཅད་ཀྱི་འཆར་གཞིར་གྱུར་པའི་སེམས་ཀྱི་དེ་ཁོ་ན་ཉིད་རྒྱུའི་རྒྱུད་ཅེས་བྱ་བ་དེ་ཉིད་ཡིན་ལ། རྒྱུ་དེ་ལས་འབྲས་བུ་མངོན་དུ་བྱ་བའི་ཐབས་ཀྱི་གཙོ་བོ་ནི་གཉིས་ཀྱིས་བསྡུས་ཏེ། ཐབས་དང་། ཤེས་རབ་བོ། དང་པོ་ནི། ཕྱག་རྒྱ་བཞི་དང་འབྲེལ་བའི་ལྷའི་རྣལ་འབྱོར་བསྒོམ་པ་འཁོར་བཅས་ཏེ། དེ་ཡང་སྐུ་ཕྱག་རྒྱ་ཆེན་པོ། ཐུགས་དམ་ཚིག་གི་ཕྱག་རྒྱའི། གསུང་ཆོས་ཀྱི་ཕྱག་རྒྱའི། ཕྲིན་ལས་ལས་ཀྱི་ཕྱག་རྒྱའི་རྣལ་འབྱོར་དང་བཞིས་རིམ་པར། ཀུན་གཞིའི་རྣམ་ཤེས། ཉོན་ཡིད། ཡིད་ཤེས། སྒོ་ལྔ་རྣམས་ཀྱི་གློ་བུར་གྱི་འཁྲུལ་པ་བསལ་ནས། རང་བཞིན་མེ་ལོང་ལྟ་བུ། མཉམ་ཉིད། སོར་རྟོག །བྱ་གྲུབ་ཡེ་ཤེས་བཞི་མངོན་དུ་བྱེད་ཅིང་། ཆོས་དབྱིངས་ཡེ་ཤེས་ནི་དེ་ཐམས་ཅད་ཀྱི་རང་བཞིན་དུ་གནས་པ་ཡིན་ནོ། །དེ་ལྟ་བུའི་ལྷའི་རྣལ་འབྱོར་སྒོམ་པའི་རིམ་པ་ལ། དབང་རྣོན་རྣམས་སྔོན་བྱུང་སྟོན་པ་སངས་རྒྱས་ནས་དཀྱིལ་འཁོར་སྤྲུལ་བཤད་དང་ཕྲིན་ལས་མངོན་པར་འདུ་མཛད་ཚུལ་དང་མཐུན་པར་རྗེས་འཇུག་ལའང་། དང་པོའི་སྦྱོར་བ། དཀྱིལ་འཁོར་རྒྱལ་མཆོག །ལས་རྒྱལ་མཆོག་སྟེ་ཏིང་ངེ་འཛིན་གསུམ་ལ་བརྟེན་ནས་ཉམས་སུ་ལེན་པ་དང་། དབང་རྟུལ་རྣམས་བདག་ཉིད་རང་རིགས་ཀྱི་ལྷ་དམ་ཚིག་པར་བསྒོམ་པ་རྣལ་འབྱོར། དེ་ལ་ཡེ་ཤེས་པ་བཅུག་སྟེ་རོ་གཅིག་ཏུ་བྱ་བ་རྗེས་སུ་རྣལ་འབྱོར། བརྟན་གཡོ་ཐམས་ཅད་རང་རིགས་ཀྱི་ལྷའི་རྣལ་འབྱོར་དུ་བྱ་བ་ཐམས་ཅད་རྣལ་འབྱོར། དེ་གསུམ་སྔོན་དུ་སོང་བ་ལས་སེམས་རྩེ་གཅིག་པའི་ཏིང་ངེ་འཛིན་མངོན་དུ་གྱུར་བ་ཤིན་ཏུ་རྣལ་འབྱོར་ཏེ། རྣལ་འབྱོར་བཞི་ལ་བརྟེན་ནས་ཉམས་སུ་ལེན་པའོ། །གཉིས་པ་ཤེས་རབ་ནི། སེམས་ཀྱི་དེ་ཁོ་ན་ཉིད་མངོན་དུ་རྟོགས་པ་སོ་སོ་རང་རིག་པའི་ཡེ་ཤེས་ཏེ། དེ་ཉིད་དབང་རྣོན་བྱིན་བརླབས་དང་སྒོམ་བྱུང་གི་སྟོབས་ཀྱིས་མངོན་དུ་བྱེད་པ་དང་། དབང་རྟུལ་ཐོས་སོགས་ཀྱིས་བརྒྱུད་དེ་མངོན་དུ་བྱེད་པའི་ཚུལ་ལོ། །གཉིས་པ་སྒྲུབ་པའི་རིམ་པ་ལ་གཉིས་ཏེ། གཙོ་བོར་ཏིང་ངེ་འཛིན་ལ་བརྟེན་ནས་འདས་པའི་དངོས་གྲུབ་དང་། བཟླས་བརྗོད་ལ་བརྟེན་ནས་དངོས་གྲུབ་གཉིས་ཀ་སྒྲུབ་པའོ། །དང་པོ་ནི། ཏིང་ངེ་འཛིན་གསུམ་དང་རྣལ་འབྱོར་བཞི་གང་ལ་བརྟེན་ཀྱང་རུང་། རང་གི་ལྷ་འཁོར་གསུམ་ཡོངས་དག་གི་མཆོད་པས་མཉེས་པར་བྱས་ནས། གཞན་དོན་དུ་ཕྱག་རྒྱ་སྒྲུབ། དེ་གྲུབ་ནས་ཕྱག་རྒྱའི་ལས་རབ་འབྱམས་ལ་སྦྱར། དེ་ནས་མངོན་ཤེས་བསྒྲུབས་ཏེ་རང་རིགས་ཀྱི་འཁོར་ལོ་དང་མཐུན་པའི་ཚོགས་ཁང་དུ་ལྷ་གྲངས་དང་མཉམ་པའི་སྒྲུབ་པ་པོས་དཀྱིལ་འཁོར་གྱི་རྣམ་པར་བྱས་ཏེ། འདོད་ཡོན་གྱི་རོལ་པ་གཉིས་སུ་མེད་པའི་ཏིང་ངེ་འཛིན་གྱི་ཡན་ལག་ཏུ་སྤྱད་པས་ལྷ་མཉེས་ཤིང་དབང་དུ་གྱུར་པའི་ཚུལ་གྱིས་འགྲུབ་ལ། གལ་ཏེ་མ་འགྲུབ་ན་བསྐྱར་བ་དང་དཔོགས་ཆོག་ལ་བརྟེན་ནས་འགྲུབ་པའོ། །གཉིས་པ་ལ། རྡོར་བཟླས་དང་། ཚིག་བཟླས་གཉིས་ལས། དང་པོ་ནི། བདག་ཉིད་ལྷར་བསྐྱེད་པའི་མདུན་དུའང་ལྷ་བསྐྱེད་དེ། སྲོག་དང་དབང་པོ་ནང་དུ་བསྡུས་ནས་སྙིང་པོ་ཡིད་བཟླས་བྱ་ཞིང་། རླུང་ཕྱིར་དབྱུང་བ་ན་མདུན་གྱི་ལྷ་ལ་དམིགས་ཏེ་བཟླ། ནང་དུ་འཇུག་པ་ན་བདག་དང་ལྷ་ཐ་མི་དད་པར་བྱས་ལ་བཟླ་བ་ནི་ཀུན་རྫོབ་དམིགས་བཅས་དང་། བདག་དང་ལྷ་སྔགས་ཀྱིས་མཚོན་པའི་ཆོས་ཐམས་ཅད་སྟོང་ཉིད་ནམ་མཁའ་ལྟ་བུར་དག་པའི་ངང་ནས་ཡིད་བཟླས་དང་། ཕྱིར་དབྱུང་བ་ན་ལྷའི་མཚན་མ་ཙམ་དྲན་པར་བྱ་ཞིང་། སླར་སྲོག་རྩོལ་ནང་དུ་བསྡུས་ཏེ་སེམས་རྩེ་གཅིག་པའི་ངོ་བོར་རོ་གཅིག་ཏུ་བྱ་བ་དོན་དམ་དམིགས་མེད་ཀྱི་རྡོར་བཟླས་ཏེ། དེ་གཉིས་དབང་རྣོན་གྱི་བཟླ་ལུགས་སོ། །གཉིས་པ་ཚིག་བཟླས་ནི། དབང་རྟུལ་གྱི་བཟླ་ལུགས་ཏེ། རང་རིགས་ཀྱི་ལྷའི་སྐྱིལ་ཀྲུང་བཅས་ལ། རིགས་གང་ཡིན་གྱི་ཁུ་ཚུར་བཅས་པའི་ལག་གཡོན་གྱིས་རང་རིགས་ཀྱི་ཕྱག་མཚན་བཟུང་ལ་གོས་ཀྱིས་གཡོགས་གཡས་པས་རིགས་དང་མཐུན་པའི་བགྲང་ཕྲེང་བླངས་ཏེ། རིགས་གང་ལ་ཤིས་པའི་སྒྲ་གདངས་ཀྱིས་བཟླ་བའོ། །དེ་ལྟར་རྡོར་བཟླས་ཀྱིས་འཇིག་རྟེན་ལས་འདས་པའི་དངོས་གྲུབ་དང་། ཚིག་བཟླས་ཀྱིས་རྫས་དང་མཁའ་སྤྱོད་ཀྱི་རིག་འཛིན་སོགས་འཇིག་རྟེན་པའི་དངོས་གྲུབ་བསྒྲུབས་ནས་འདས་པའི་དངོས་གྲུབ་ལ་སྦྱོར་ཞིང་། མཐར་ཐུག་མི་ཚེ་གསུམ་མམ་བཅུ་དྲུག་གིས་ཕྱག་རྒྱ་ཆེན་པོ་གྲུབ་ནས་རིམ་གྱིས་རིགས་ལྔ་སྟུག་པོ་བཀོད་པའི་སར་མངོན་བྱང་ལྔའི་ཐབས་ཀྱིས་ཡེ་ཤེས་ལྔའི་ངོ་བོར་འཚང་རྒྱ་བར་འདོད་དེ། ཀུན་བྱེད་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཅེས་སོ། །ཡང་ཡོ་གའི་ཉམས་ལེན་གྱི་སྐབས་འདིར་ཐུན་ཁྱད་གཉིས་འབྱུང་སྟེ། སྤྱོད་འཇུག་དང་ཐུན་མོང་བའི་དབང་དུ་བྱས་པ་རང་ཤར་ལས། ལྷ་དང་རྣལ་འབྱོར་བདག་ཉིད་ཀྱང་། །སྤུན་དང་གྲོགས་པོའི་ཚུལ་དུ་འདོད། །ཅེས་པ་ལྟར་ཟུར་ལུགས་ཀྱི་སྙིང་པོའི་ཁོག་དབུབ་རྣམས་སུ་ཡོ་གའི་བཀོལ་མདོར་སྨོས་པ་བཞིན་ནོ། །ཡོ་ག་ཁྱད་པར་བའི་དབང་དུ་བྱས་ན་བདག་ཉིད་ལྷའི་རྣལ་འབྱོར་དུ་བསྒོམས་པ་ལ། ཡེ་ཤེས་པ་དགུག་བསྟིམ་གཉིས་མེད་དུ་བྱེད་པ་སྟེ། རྡོ་རྗེ་འབྱུང་བ་ལས། གཉིས་སུ་མེད་པའི་ཆོས་དབྱིངས་ངང་། །བླ་མེད་དངོས་གྲུབ་དམ་པ་བླང་། །ཞེས་གསུངས་པ་བཞིན་ནོ། །བཞི་པ་རྣལ་འབྱོར་བླ་མེད་ཀྱི་རྒྱུད་ཀྱི་ཉམས་ལེན་ནི། སློབ་དཔོན་ཡེ་ཤེས་གྲགས་པས། གཞན་དོན་ཕུན་ཚོགས་སངས་རྒྱས་ཀྱི། །འབྲས་བུ་གཙོ་བོ་ཡིན་པར་འདོད། །ཅེས་པ་ལྟར་གསང་སྔགས་ཀྱི་སྒོར་སྤྱད་པ་སྤྱོད་པའི་གང་ཟག་རྣམས་ཀྱིས་འདོད་དོན་གཉེར་བྱའི་གཙོ་བོ་ནི་གཞན་དོན་ཕུན་ཚོགས་ཡིན་ལ། དེའི་རྟེན་ནི་རང་དོན་ཕུན་ཚོགས་ཏེ། དེ་ལྟར་དོན་གཉིས་མཐར་ཕྱིན་པའི་བྱང་ཆུབ་ནི་འཐོབ་བྱ་འབྲས་བུའི་རྒྱུད་དོ། །དེ་མངོན་དུ་བྱེད་པ་ཡང་ཉེར་ལེན་གྱི་རྒྱུ་དང་། ལྷན་ཅིག་བྱེད་རྐྱེན་ཚང་བ་ལ་རག་ལུས་པས། དང་པོའི་དབང་དུ་བྱས་ནས་གཞིའམ་རྒྱུའི་རྒྱུད་བཞགགཉིས་པའི་དབང་དུ་བྱས་ནས་ཐབས་སམ་ལམ་གྱི་རྒྱུད་བཞག་སྟེ། གསང་སྙིང་གི་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་དང་། གསང་འདུས་ཀྱི་རྒྱུད་ཕྱི་མ་ལས་ཀྱང་། རྒྱུད་ནི་རྒྱུན་ཆགས་ཞེས་བྱ་སྟེ། །རྒྱུན་དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང་། །མི་འཕྲོག་པ་ཡི་རབ་དབྱེ་བས། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོག་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་གསུངས་པའི་ཕྱིར། དེ་ལ་སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་བདེ་བར་བཤེགས་པའི་སྙིང་པོ་ནི་དྲི་མ་སྦྱོང་བའི་གཞི་སྟེ། རྟོགས་མ་རྟོགས་ཀྱི་བྱེད་པས་འཁོར་འདས་གཉིས་ཀའི་གཞི་འམ་རྒྱུར་གྱུར་ཅིང་། རང་བཞིན་འགྱུར་བ་མེད་པར་རྒྱུན་ཆགས་པས་ན་གཞིའམ་རྒྱུའི་རྒྱུད་ཅེས་བྱའོ། །དེ་ལ་མིང་གི་རྣམ་གྲངས། འཆིང་གྲོལ་མེད་པའི་དོན་གྱི་གནས་ལུགས། འབྲས་ཆོས་རྣམས་གཞི་ལ་ཡེ་ནས་ཚང་བས་བདེ་གཤེགས་སྙིང་པོ། སེམས་ཀྱི་ཆོས་ཉིད་དེའི་སྟོང་ཆ་ལས་ཆོས་སྐུ་དང་སྣང་ཆ་ལས་གཟུགས་སྐུའི་ཡོན་ཏན་རྫོགས་པར་ལྡན་ཡང་དྲི་མ་ལས་མ་གྲོལ་བར་སངས་རྒྱས་སུ་མི་འབྱུང་བས་རང་བཞིན་གནས་རིགས་དང་། ཁམས་དང་། དྲི་བཅས་དེ་བཞིན་ཉིད། དྲི་མ་དང་འབྲེལ་ཡང་རང་གི་ངོ་བོ་ལ་གོས་མ་མྱོང་བས་རང་བཞིན་རྣམ་དག་གམ་བྱང་ཆུབ་ལ་སོགས་པའི་ཐ་སྙད་བཏགས་ཤིང་། ཁྱད་པར་སྔགས་ཀྱི་ཐེག་པ་འདིར། ཕྱི་རྒྱུད་དུ་བདག་གི་དེ་ཁོ་ན་ཉིད་དང་། ཐོག་མཐའ་མེད་པའི་བྱང་ཆུབ་ཀྱི་སེམས་ལ་སོགས་པ་དང་། ནང་རྒྱུད་དུ་མ་ཧཱ་ཡོ་ག་བས་རང་རིག་པ་བྱང་ཆུབ་ཀྱི་སེམས་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བའམ། བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ། ཨ་ནུ་ཡོ་ག་བས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏི་ཡོ་ག་བས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་མེད་ཀྱི་གནས་ལུགས་ཡེ་ཤེས་གསུམ་ལྡན་དུ་ཡེ་ནས་བཞུགས་པའོ། །དེ་ཡང་བླ་ན་མེད་པའི་རྒྱུད་རྣམས་སུ་ལུས་ཅན་རྣམས་ཀྱི་སྙིང་ག་ཆོས་ཀྱི་ཕོ་བྲང་དུ་རྒྱུ་རྒྱུད་ཀྱི་རྟེན་དྭངས་མ་ལྔའི་དབུས་ན་བརྟེན་པ་སེམས་ཉིད་འོད་གསལ་བའི་ཆོས་སྐུ་བྱང་ཆུབ་ཀྱི་སེམས་བཞུགས་པར་བཤད་ཅིང་། འབྱུང་ལྔ་སེམས་དང་བཅས་པའི་དྭངས་མ་དྲུག་ཀྱང་གཉིས་གཉིས་རོ་གཅིག་ཏུ་འཇུག་པའི་དོན་གྱི་ཤིན་ཏུ་ཕྲ་བའི་སྒོ་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་གྱི་ལྷའི་བདག་ཉིད་དུ་གནས་པ་སྟེ། སྒྱུ་འཕྲུལ་རྡོ་རྗེ་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དཔེ་ཆུང་རང་གནས་ལས། མི་ཤིགས་ཡེ་ཤེས་ཐིག་ལེ་ནི། །སྐུ་གསུང་ཐུགས་ཀྱི་རྡོ་རྗེའི་བདག །གཅིག་དང་དུ་མ་རྣམ་སྤང་པ། །སྣ་ཚོགས་སྣང་ལ་མཚོན་དུ་མེད། །ཅེས་དང་། རང་ཤར་ལས། ལུས་ལ་ཡེ་ཤེས་ཆེན་པོས་ཁྱབ། །ཏིལ་འབྲུ་ལ་ནི་མར་བཞིན་དུ། །ལུས་ཀྱི་བཀྲག་དང་གཟི་མདངས་ནི། །ཡེ་ཤེས་རླན་གྱིས་ཁྱབ་པར་བྱེད། །ཅེས་དང་། བརྟག་གཉིས་ལས་ཀྱང་། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་སོ། །དེས་ན་སེམས་ཀྱི་རང་བཞིན་འོད་གསལ་བ་དེའང་ཁྱད་ཆོས་བཞི་ལྡན་ཏེ། ཞིང་དང་སྐུ་དང་ཡེ་ཤེས་སོགས་འབྲས་བུའི་ཆོས་མཐུན་པའི་ཁྱད་པར་ཅན། རང་བཞིན་བདེ་བ་ཆེན་པོ། རྒྱུན་ཆད་མེད་པ། ཆོས་ཉིད་ཀྱིས་ཐོབ་པའོ། །དེ་ཉིད་ཀྱིས་འཁོར་འདས་ཐམས་ཅད་ལ་ཁྱད་པར་མེད་པར་ཁྱབ་པས་གྲོལ་གཞི་ལྷུན་གྲུབ་ཀྱི་ཆོས་ཉིད་རང་ལ་ཡོད་པ་ནི་འབྲས་རྒྱུད་ཀྱི་ཉེར་ལེན་གྱི་རྒྱུར་ངེས་པ་སྟེ། མན་ངག་སྙེ་མ་ལས། དངོས་པོ་རྣམས་ཀྱི་སྟོང་པ་ཉིད་ཀྱི་ངོ་བོ་ནི་རང་བཞིན་དང་རྣམ་པ་ཞེས་པ་དོན་གཞན་མ་ཡིན་ཏེ། རང་གི་ངོ་བོ་ཞེས་པའི་དོན་ནོ། །དེ་རྒྱུ་སྟེ། ཉེ་བར་ལེན་པའི་བྱེད་པ་པོའི་རྡོ་རྗེ་འཛིན་པ་སྟེ། གང་འདི་རྣམས་ཀྱི་ཐོག་མ་མེད་པའི་དྲི་མས་མ་གོས་པའི་ངོ་བོ་ཉིད་ཀྱིས་གྲུབ་པའི་སངས་རྒྱས་ཉིད་དེ། དེ་ཁོ་ན་ནི་དྲི་མ་མེད་པ་ཉིད་ཐོབ་པའི་མཚན་ཉིད་ཅན་སངས་རྒྱས་ཉིད་ཀྱི་རྒྱུའོ། །ཞེས་པའི་དོན་ཏོ། །ཞེས་སོ། །རྒྱུ་རྒྱུད་རྒྱུན་ཆགས་པ་དེ་ལ་རྡོ་རྗེ་རྩེ་མོར་རྩ་བའི་རྒྱུད་ཅེས་བྱ་བ་དང་། འབྲས་རྒྱུད་ནི་རྒྱུ་རྒྱུད་དེ་ལས་བྱུང་ཞིང་། དེའི་ཕ་རོལ་ཏུ་སོན་པའི་ས་མཐར་ཕྱིན་པའི་རྒྱལ་བ་སྟེ་རྒྱུད་ཕྱི་མ་ཞེས་བཤད་དོ། །དེ་ལྟར་ཡང་རྩེ་མོར། ཅིའི་ཕྱིར་འདིར་ནི་རྒྱུད་ཕྱི་མ། །རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །ཕྱི་མ་ཞེས་བྱ་ཕ་རོལ་ཏེ། །རྒྱུད་ནི་ཕྱི་མར་བརྗོད་པ་ཡིན། །རྒྱུད་ནི་རྒྱུན་ཆགས་ཞེས་བྱ་སྟེ། །ཕྱི་མ་སྔ་མ་ལས་བྱུང་བའི། །དེ་ཉིད་གསང་བ་སྦས་ཞེས་པ། །རྒྱུད་ནི་ཕྱི་མར་བརྗོད་པ་ཡིན། །ཅི་ཕྱིར་རྒྱུད་དང་ཕྱི་མ་ཡིན། །ས་མཐར་ཕྱིན་པའི་རྒྱལ་བ་མཆོག །སྲིད་པའི་བཙོན་ར་ལས་བརྒལ་ཡིན། །ཡང་ན་གང་ཞིག་བརྒལ་གྱུར་པ། །རྒྱུད་ནི་ཕྱི་མ་ཡིན་པར་བཤད། །ཅེས་སོ། །དེ་ལྟར་རྒྱུ་རྒྱུད་གནས་ལུགས་ཀྱི་དོན་དེ་ཉིད་རྟོག་གེ་རྣམ་པར་འཁྱམས་པའི་ལུང་རིགས་ཀྱིས་གཏན་ལ་མི་ཕེབས་ཏེ། ཐ་སྙད་ཀྱི་ཤེས་ངོ་ལས་འདས་པའི་ཕྱིར་རོ། །དེ་སྐད་དུ། སྤྱི་མདོ་ལས། དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ཏེ། །དམུས་ལོང་མཁའ་ལ་མཐོ་འཇལ་འདྲ། །ཞེས་དང་། དགོངས་པ་ངེས་འགྲེལ་ལས། སོ་སོ་རང་རིག་མཚན་མེད་སྤྱོད་ཡུལ་ནི། །བརྗོད་དུ་མེད་ཅིང་ཐ་སྙད་ཡོངས་ཆད་པས། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེའི་ཡུལ་ལས་འདས་པའོ། །ཞེས་སོ། །འོ་ན་གང་གིས་གཏན་ལ་དབབ་པར་བྱ་ཞེ་ན། སྒྱུ་འཕྲུལ་ལམ་རིམ་ལས། བྱེ་བྲག་བསྡུས་པས་ཀུན་ཁྱབ་གསུམ། །ཞེས་པས་ཤིན་ཏུ་ལྐོག་གྱུར་གྱི་དོན་དེ་ཉིད་འཇལ་ནུས་པ་ནི། ཀུན་ཁྱབ་ཀྱི་ཚད་མ་གསུམ་ལས་གཞན་མེད་དེ། རྡོ་རྗེ་མེ་ལོང་གི་རྒྱུད་ལས། ལུང་དང་རིགས་པ་མན་ངག་གི །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་གསུངས་པ་ལྟར། རྒྱལ་བའི་བཀའ་དྲི་མ་མེད་པའི་ལུང་ཚད་མ་དང་། མཁས་པས་མཛད་པའི་མན་ངག་ཚད་མ་དང་། དེ་གཉིས་དང་རྗེས་སུ་མཐུན་པར་སྐྱེས་པའི་རིགས་པ་ཚད་མ་གསུམ་གྱིས་གཞལ་བས། རྟོགས་བྱའི་ལྟ་བ་རྒྱུ་རྒྱུད་གནས་ལུགས་ཀྱི་དོན་དེ་ཉིད་གཏན་ལ་ཕེབས་པ་ནི་སྔགས་རང་གཞུང་གི་གྲུབ་མཐའོ། །དེ་ལ་ཕྱི་འགྱུར་བའི་མཁས་པ་ཕལ་ཆེ་བ་ཞིག །བརྟག་གཉིས་ལས། རང་བཞིན་གདོད་ནས་མ་སྐྱེས་པ། །རྫུན་མིན་བདེན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པས་རྣལ་འབྱོར་མ་ཤེས་གྱིས། །ཞེས་པའི་དགོངས་པ་འགྲེལ་ཚུལ་ལས་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པས་ཕྱེ་བའོ་ཞེས་བཞེད་མོད། འདིར་སྔ་འགྱུར་གྱི་རང་སྐད་དུ་ཐབས་བཞིན་དུ་ལྟ་བའང་ལྷག་སྟེ། དོན་དམ་པར་སྐྱེ་འགག་མེད་པ་དང་། ཀུན་རྫོབ་ཏུ་ཆོས་ཐམས་ཅད་སྒྱུ་མ་ཙམ་དུ་ལྟ་བ་དབུ་མ་པ་དང་མཐུན་ནའང་། སྔགས་ཀྱི་ཁྱད་པར་ཀུན་རྫོབ་སྒྱུ་མ་ལྟ་བུ་དེ་ཡང་ཡོངས་སུ་དག་པའི་ལྷའི་མཚན་ཉིད་དུ་ལྟ་བ་དང་། བདེན་པ་གཉིས་ཀྱང་དབྱེར་མེད་པར་ལྟ་བས་ཁྱད་པར་དུ་བྱས་པའོ། །དེ་ལྟར་ཡང་ཀུན་མཁྱེན་ཆེན་པོའི་ཡིད་བཞིན་མཛོད་དུ། དེ་ལ་དང་པོ་གནས་ལུགས་ཤེས་པ་གཅེས། །ཐེག་པའི་དབང་གིས་རྣམ་པ་མང་ན་ཡང་། །ངེས་པའི་སྙིང་པོ་བདེན་པ་དབྱེར་མེད་དེ། །སངས་རྒྱས་རྣམས་ཀྱི་གསང་བའི་མཛོད་ཁང་ཡིན། །ཞེས་གསུངས། ཀུན་རྫོབ་ཏུ་ལྷར་ལྟ་བའང་། བྱ་རྒྱུད་པས་དག་པ་ཆོས་ཉིད་ཀྱི་ལྷ་དང་། ཡོ་ག་བས་དེའི་སྟེང་དུ་མི་གནས་པའི་ཡེ་ཤེས་ཆེན་པོས་བྱིན་གྱིས་བརླབས་པའི་ལྷ་དང་། རྣལ་འབྱོར་བླ་ན་མེད་པས་དེ་གཉིས་ཀའི་སྟེང་དུ་ལྷུན་གྱིས་གྲུབ་པའི་དཀྱིལ་འཁོར་དུ་ལྟ་བས་ཕྱིར་ན་བདེན་པ་ཐ་དད་དུ་འཛིན་པ་དོར་ནས། དོན་དམ་བདེན་ངོར་མ་ཟད། ཀུན་རྫོབ་ཏུའང་སྣོད་བཅུད་དག་མཉམ་ཆེན་པོར་གཏན་ལ་འབེབས་པས་འཁོར་འདས་དབྱེར་མེད་ཀྱི་ལྟ་བ་ཞེས་རྒྱུའི་བླ་མེད་ཀྱི་ཐེག་པ་དབུ་མ་པ་ལས་ཐབས་ཀྱི་ཐེག་པ་སྔགས་ཀྱི་ལྟ་བ་འདི་ཉིད་ཆེས་འཕགས་པ་ཡིན་ཏེ། སྒྱུ་འཕྲུལ་རྒྱས་པའི་རྒྱུད་ཚིག་སངས་རྒྱས་གསང་བས་ལམ་རིམ་དུ་དྲངས་པ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས་པའི་ཕྱིར་རོ། །དེ་བས་ན་ཆོས་ཐམས་ཅད་ངེས་དོན་འབའ་ཞིག་གི་སྙིང་པོར་གཏན་ལ་ཕབ་ནས། ལྷུན་གྲུབ་སྙིང་པོ་ཁམས་ཀྱི་དྲི་མ་བསལ་བ་ཙམ་ལས་རྒྱུ་འབྲས་ཐ་དད་དུ་མི་འདོད་པས་འདུས་མ་བྱས་རང་སྣང་བའི་དཀྱིལ་འཁོར་དུ་ཤེས་པར་བྱས་ནས། དེ་དང་རྗེས་སུ་མཐུན་པའི་ལམ་བསྒོམ་ཞིང་བསྟེན་པས་སྦྱང་བྱའི་དྲི་མ་གཞི་ཐོག་ཏུ་གྲོལ་ཏེ། སྦྱང་གཞི་སྙིང་པོའི་དོན་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པ་ནི་འབྲས་བུའི་རྒྱུད་དོ། །དེ་ལ་གཞིའི་སྟེང་གི་དྲི་མ་སྦྱོང་བྱེད་ཐབས་སམ་ལམ་གྱི་རྒྱུད་དེ་གང་ཞེ་ན། སྨིན་གྲོལ་གཉིས་ལས། སྨིན་བྱེད་ཀྱི་དབང་ནི། བླ་མེད་ཀྱི་སྐབས་འདིར་དབང་བཞི་རྫོགས་པར་བསྐུར་བ་སྟེ། སྔར་བཤད་ཅིང་འཆད་པ་ལས་ཀྱང་ཤེས་པར་འགྱུར་རོ། །གྲོལ་བྱེད་ལམ་གྱི་ངོ་བོ་ནི། གཞི་སྒྲིབ་བྲལ་དུ་བྱེད་པའི་ཐབས་ཁྱད་པར་ཅན་ཏེ། སྦྱང་གཞི་སྙིང་པོ་ཉིད་སྒྲིབ་བྱེད་དུ་གྱུར་བའི་སྦྱང་བྱ་གློ་བུར་གྱི་དྲི་མ་སྦྱོང་བར་བྱེད་པའི་ལམ་དེ་ཡང་། འཁྲུལ་པའི་ཆོས་ལས་ཉོན་སྡུག་བསྔལ་གྱི་རྣམ་པར་ཤར་བའི་རིགས་རྒྱུད་དེ་ཉིད་ལམ་བདེ་བ་ཆེན་པོར་བསྒྱུར་ཏེ་བསྒོམ་པའི་དོན་ནོ། །བསྒྱུར་ཚུལ་ཡང་གང་ཤར་གྱི་རང་ངོ་ལ་བསལ་བཞག་མེད་པར་བསྐྱངས་པས་དེའི་རང་བཞིན་དག་སྣང་དུ་འཆར་བའི་གནད་ཀྱིས་ཏེ། དེའི་ཕྱིར་སྔགས་ཀྱི་ཐེག་པ་འདིར་ཀུན་འབྱུང་བདེན་པའི་རང་བཞིན་ལམ་བདེན་དང་། སྡུག་བསྔལ་བདེན་པའི་རང་བཞིན་འགོག་བདེན་དུ་སྣང་བས་འབྲས་བུ་ལམ་དུ་བྱེད་པའི་ཕྱིར་སྤོང་འགེགས་སྦྱོང་བའི་ལམ་ལས་ཁྱད་པར་དུ་འཕགས་སོ། །དེ་ལ་དབྱེ་ན། སྦྱང་བྱ་འཁྲུལ་བ་གློ་བུར་བ་ཀུན་བརྟགས་དང་། ས་བོན་གྱི་ཆ་གཉིས་ལ་ལྟོས་ནས་སྦྱོང་བྱེད་བསྐྱེད་རྫོགས་གཉིས་གསུངས་ཏེ། བསྐྱེད་རིམ་ནི། ཨུཏྤཏྟི་ཀྲ་མའི་སྒྲ་ལས་དྲངས་ན། ཨུཏྤཏྟི་ཞེས་པ་བཅོས་པའམ་བརྟགས་པ་ལ་འཇུག་ལ། གང་ལས་བཅོས་ཤིང་བརྟགས་པའི་གཞི་ནི་རྫོགས་རིམ་སྟེ། དེའི་སྐད་དོད་ནིཥྤནྣ་ཀྲ་མ་ཞེས་པའི་ནིཥྤནྣ་ནི་མ་བཅོས་པའམ་གྲུབ་པ་དང་རྫོགས་པ་ལ་འཇུག་ཅིང་། གཉིས་ཀའི་ཀྲ་མ་ནི་རིམ་པ་སྟེ་ཐབས་སམ་ལམ་གྱི་གོ་རིམ་དུ་གྱུར་བས། བཅོས་ཤིང་བརྟགས་པ་རྗེས་དཔག་གི་ལྷའི་རྣལ་འབྱོར་འཁོར་བཅས་ལ་བསྐྱེད་རིམ་དང་། བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་གྱི་ལམ་འཁོར་བཅས་ལ་རྫོགས་རིམ་ཞེས་བྱ་སྟེ། གསང་སྙིང་གི་རྒྱུད་ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་སོ། །མཚན་ཉིད་ནི། སྐྱེ་འཕགས་གཉིས་ཀྱི་ལམ་གྱི་གནས་སྐབས་ལས། སོ་སྐྱེའི་དུས་སུ། དྲི་བཅས་དེ་བཞིན་ཉིད་ཀྱི་སྣང་བ་གང་ཞིག་ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་སྣང་སྟོང་། དབྱེ་ན་བསྐྱེད་རྫོགས་གཉིས་ལས། དང་པོ། དེ་གང་ཞིག །ཞུ་བདེ་དང་མཚུངས་ལྡན་དུ་གྱུར་པ་བཅོས་ཤིང་བརྟགས་པ་ལས་བྱུང་བའི་ལྷ་སྐུ་སྣང་སྟོང་བསྐྱེད་རིམ་གྱི་མཚན་ཉིད། དེ་ཡང་ཁྱད་པར་གྱི་ཆོས་བཞི་ལྡན་ཏེ། ཆོ་གའི་ཁྱད་པར་རྒྱུད་ལས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བའོ། །རྫོགས་རིམ་གྱི་མཚན་ཉིད་ནི། དེ་གང་ཞིག །ཞུ་བདེ་དང་མཚུངས་ལྡན་དུ་གྱུར་བའི་བཅོས་མིན་གྱི་ལྷ་སྐུ་སྣང་སྟོང་མི་བརྟན་པ་རྒྱུའི་རྫོགས་རིམ་གྱི་དང་། དེ་བརྟན་པ་འབྲས་བུའི་རྫོགས་རིམ་གྱི་མཚན་ཉིད། དེ་ཡང་རྫོགས་རིམ་ནི་ཁྱད་པར་གྱི་ཆོས་གསུམ་ལྡན་ཏེ། རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་བྱེད། རྣམ་པའི་ཁྱད་པར་ལྷན་སྐྱེས་ཀྱི་བདེ་བ་སྟོང་གཟུགས་དང་ངོ་བོ་གཅིག་ཏུ་གྱུར་བའི་བདེ་སྟོང་ངོ་། །རྫོགས་རིམ་རྒྱུད་ལ་སྐྱེས་ཟིན་ནས་བསྐྱེད་རིམ་ལ་སློབ་མི་དགོས་པའི་ཕྱིར། འཕགས་ལམ་གྱི་དུས་ཀྱི་བསྐྱེད་རིམ་ཞེས་པ་མི་འབྱུང་བས། རྫོགས་རིམ་ཟུང་འཇུག་ཡེ་ཤེས་ཀྱི་མཚན་ཉིད་ལ། སློབ་པ་དང་། མི་སློབ་པའི་ཡེ་ཤེས་གཉིས། དང་པོ་ནི། འཕགས་རྒྱུད་ཀྱི་ཡེ་ཤེས་གང་ཞིག །ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་ཁ་སྦྱོར། གཉིས་པ་ནི། དག་པ་གཉིས་ལྡན་གྱི་ཡེ་ཤེས་མཐར་ཐུག་གང་ཞིག །ཁ་སྦྱོར་ལ་སོགས་པའི་ཡན་ལག་བདུན་ལྡན་ཏེ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཅེས་པའི་དོན་དེ་བ་ཙནྡྲས་ཤེས་རབ་ཡེ་ཤེས་གསལ་བར། ལོངས་སྤྱོད་རྫོགས་པ་ནི་རྣམ་པ་ཐམས་ཅད་པའོ། །ཁ་སྦྱོར་ནི་སྟོང་ཉིད་སྙིང་རྗེ་ཟུང་འཇུག་གོ །བདེ་ཆེན་ནི་གཟུང་འཛིན་གྱི་རྟོག་པ་མེད་པའོ། །རང་བཞིན་མེད་པ་ནི་སྐྱེ་བ་མེད་པའོ། །སྙིང་རྗེས་ཡོངས་གང་ནི་མི་འགྱུར་བའི་བདེ་བའོ། །རྒྱུན་མི་ཆད་པ་ནི་རྒྱུན་གྱི་རྟག་པའོ། །འགོག་པ་མེད་པ་ནི་ཆད་པ་མེད་པའོ། །ཞེས་པ་ལྟར་རོ། །འདིར་འབྲས་བུའི་རྫོགས་རིམ་ཡིན་པ་ཙམ་གྱིས་གཞི་ལམ་འབྲས་གསུམ་གྱི་ཟླས་ཕྱེ་བའི་འབྲས་བུ་ཡིན་པས་མ་ཁྱབ་སྟེ། འཕགས་པ་སློབ་པ་རྣམས་དང་། ཡེ་ཤེས་ཀྱི་སྐུ་འགྲུབ་པའི་སོ་སྐྱེའི་ལམ་གྱི་རྫོགས་རིམ་བཞིན་ནོ། །རིམ་པ་གཉིས་ཀྱི་དགོས་པ་ནི། སྣོད་བཅུད་ཐ་མལ་དུ་འཛིན་པ་སྤང་ཞིང་། ལམ་མ་དག་ས་བདུན་དང་འབྲས་བུ་གཟུགས་སྐུའི་རྟེན་འབྲེལ་སྒྲིག་པ། ཁྱད་པར་རང་གི་དངོས་འབྲས་ཐུན་མོང་གི་དངོས་གྲུབ་འགྲུབ་པར་བྱེད་པ་ནི་བསྐྱེད་རིམ་དང་། འཕོ་བའི་བག་ཆགས་ཀྱི་དྲི་མ་སྤོང་ཞིང་། ལམ་དག་པ་ས་གསུམ་དང་འབྲས་བུ་ལྷན་ཅིག་བྱེད་སྐུའི་རྟེན་འབྲེལ་སྒྲིག་པ། ཁྱད་པར་རང་གི་དངོས་འབྲས་མཆོག་གི་དངོས་གྲུབ་འགྲུབ་པར་བྱེད་པ་ནི་རྫོགས་རིམ་གྱི་དགོས་པ་སྟེ། སྙིང་པོའི་རྒྱུད་ཕྱི་མ་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་སོ། །གལ་ཏེ་བུམ་དབང་དང་དེའི་ལམ་བསྐྱེད་རིམ་གྱིས་ཀྱང་མཆོག་གི་དངོས་གྲུབ་ཐོབ་པར་འགྱུར་ཏེ། དེ་དང་དེ་ས་བདུན་དང་གཟུགས་སྐུའི་རྟེན་འབྲེལ་སྒྲིག་བྱེད་དུ་བཤད་པའི་ཕྱིར་ཞེ་ན། དེ་ལྟར་བཤད་ཀྱང་དེས་དེ་དངོས་སུ་ཐོབ་མི་དགོས་ཏེ། དཔེར་ན་དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས་ཆོས་སྐུ་ཐོབ་པའི་རྟེན་འབྲེལ་བསྒྲིགས་ཀྱང་། དེ་ཙམ་གྱིས་ཆོས་སྐུ་ཐོབ་པར་མི་འགྱུར་བ་བཞིན་ནོ། །དེས་ན་བསྐྱེད་རིམ་གྱིས་ས་བདུན་དང་གཟུགས་སྐུའི་རིང་རྒྱུ་ཙམ་བྱེད་ཀྱང་དངོས་རྒྱུ་བྱེད་པ་མི་སྲིད་ཅིང་། བརྒྱུད་རྒྱུ་ལའང་མེད་ན་མི་འབྱུང་བའི་རྒྱུ་མ་ཡིན་ནོ། །གྲངས་ངེས་ནི། སྐྱེ་བ་ཀུན་རྫོབ་དང་འཆི་བ་དོན་དམ་བདེན་པ་ལམ་དུ་བྱས་ནས་དེ་དང་དེ་རྫོགས་པར་སྦྱོང་བ་ལ་ལྟོས་ནས་བསྐྱེད་རིམ་དང་རྫོགས་རིམ་བསྟན་ཏེ། ཡེ་ཤེས་རྡོ་རྗེ་ཀུན་ལས་བཏུས་ལས། སྐྱེ་བ་ཀུན་རྫོབ་བདེན་པ་ཞེས་བྱ་སྟེ། །འཆི་བ་ཡང་ནི་དོན་དམ་བདེན་པ་ཡིན། །བདེན་གཉིས་འདི་ལ་རྣམ་པར་ངེས་བྱས་ནས། །བཤད་པ་གཉིས་ཀྱི་དབྱེ་བ་གསུངས་པ་ཡིན། །ཞེས་སོ། །ཡང་གནས་ལུགས་ཀྱི་ལམ་ལ་འཇུག་པའི་སྔོན་དུ་རྒྱུད་སྦྱང་བ་དང་། བྱང་ནས་གནས་ལུགས་དངོས་སྒོམ་པ་ལ་ལྟོས་ནས་ཀྱང་བསྐྱེད་རྫོགས་གཉིས་སུ་བསྟན་ཏེ། རྡོ་རྗེ་སྙིང་འགྲེལ་ལས། རྣམ་རྟོག་བག་ཆགས་ཀྱིས་བཅིངས་ལ། །ཐོག་མར་རྟོག་པའི་ཆོ་ག་བསྟན། །རྣམ་རྟོག་རང་བཞིན་ཤེས་པ་ན། །མི་རྟོག་པ་ལ་འཇུག་པར་བྱ། །ཞེས་དང་། རིམ་ལྔ་ལས། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་སོ། །
ད་ནི་རིམ་པ་གཉིས་ཀྱི་ལམ་ཇི་ལྟར་ཉམས་སུ་ལེན་ཚུལ་གྱི་སྒོ་མདོ་ཙམ་ཞིག་བསྟན་པར་བྱ་སྟེ། དེ་ལ་བསྐྱེད་རིམ་ནི། སྦྱང་བྱ་འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བ་བླངས་པ་ལ་བརྟེན་ནས་འཆར་བས་འཁོར་བའི་ཆོས་ཀྱི་གཙོ་བོ་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ནས། བསྐྱེད་རིམ་སྒོམ་ཚུལ་བཞི་སྟེ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་པས་སྒོང་སྐྱེས་སྦྱོང་བ་ནི། །དབང་རྟུལ་སྤྲོས་པ་ཅན་གྱི་དབང་དུ་བྱས་ཏེ། དཀྱིལ་འཁོར་གྱི་འཁོར་ལོ་བདེ་ཆེན་བྱང་ཆུབ་སེམས་ཀྱི་ངོ་བོར་ཞུ་བའི་འོད་ཀྱི་ཐིག་ལེ་ལས་ཞུ་བ་གླུས་བསྐུལ་གྱིས་སླར་བཞེངས་ཏེ་དཀྱིལ་འཁོར་གྱི་འཁོར་ལོ་སྤྲོ་བ་བདག་སྲས་གཞན་སྲས་ཀྱི་ཆོ་ག་ལྟ་བུ་དང་། ཉི་ཟླ་གའུ་ཁ་སྦྱོར་གྱི་ནང་དུ་རང་ལྷའི་ཕྱག་མཚན་ས་བོན་དང་བཅས་པ་ཞུ་ཞིང་འདྲེས་པ་ལས་སྤྲོ་བསྡུས་ལྷར་བསྐྱེད་པ་མངོན་བྱང་ལྔའི་ཆོ་ག་ལྟ་བུའོ། །དེ་ལྟར་ཡང་། སྒྱུ་འཕྲུལ་རྒྱ་མཚོ་ལས། རང་བྱུང་དངོས་དང་མི་འགལ་ཞིང་། །འབྲས་བུ་ཉིད་ལ་ལམ་ཤེས་པས། །མ་ལུས་དཀྱིལ་འཁོར་ཐིག་ལེ་རྣམས། །བདག་གི་སྲས་སུ་བསྒོམ་པར་བྱ། །ཞེས་པས་བདག་སྲས་དང་། གང་གིས་གང་ལ་གསོལ་བཏབ་པས། །ཐུགས་རྗེས་བྱིན་བརླབས་སྦྱངས་བྱས་ནས། །ཐུགས་ཞུགས་འདྲེས་པར་དབྱེར་མེད་ན། །སྲས་གྱུར་དགོངས་པ་ཅི་ལ་གནས། །ཞེས་པས་གཞན་སྲས་བསྟན་ཏོ། །མངོན་བྱང་ལྔ་ནི་དགྱེས་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། །ཞེས་སོ། །མངལ་སྐྱེས་སྦྱོང་བ་ནི། དབང་འབྲིང་དང་སྤྲོས་པ་འབྲིང་གི་དབང་དུ་བྱས་ཏེ། ཧེ་རུ་ཀ་གལྤོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་བསྡུ་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་བ་ལ་ནི་ཡི་གེ་དགོད། །ཅེས་འཆི་སྲིད་བར་དོ་དང་བཅས་པ་དང་། དྲི་ཟའི་སེམས་ཁུ་ཁྲག་གི་དབུས་སུ་ཞུགས་པ། དེ་ལས་ལུས་གྲུབ་པ། བཙས་ནས་དབང་པོ་ཡུལ་ལ་སད་པའི་རིམ་པ་ལྟར་རྡོ་རྗེ་བཞིའི་ཆོ་གས་བསྐྱེད་པ་སྟེ། འདུས་པའི་རྒྱུད་ཕྱི་མ་ལས་ཀྱང་འདི་དང་ཚིག་དོན་འདྲ་བར་འབྱུང་ཞིང་། ཡང་དེ་ལས་བསྡུས་པ་ཆོ་ག་གསུམ་བསྐྱེད་དང་། ལྷ་མངལ་འབྱིན་གྱིས་བསྐྱེད་པ་གཞན་སྲས་ཀྱི་འཁོར་སྤྲོ་བ་ལྟ་བུ་ལ་སོགས་པའོ། །དེ་ལྟར་སྒོང་སྐྱེས་དང་མངལ་སྐྱེས་སྦྱོང་བའི་སྒོམ་ཚུལ་གཉིས་པོ་འདི་ནི་གཙོ་བོར་མ་ཧཱ་ཡོ་གའི་དཀྱིལ་འཁོར་རིམ་བསྐྱེད་ཀྱི་ལུགས་སོ། །དྲོད་གཤེར་སྐྱེས་སྦྱོང་བ་ནི། དབང་རབ་སྤྲོས་མེད་ཀྱི་དབང་དུ་བྱས་ཏེ། བསྐྱེད་སྔགས་བརྗོད་པ་ཙམ་གྱིས་སྣོད་བཅུད་དཀྱིལ་འཁོར་གྱི་འཁོར་ལོར་གསལ་ལ་མ་འདྲེས་པར་བསྒོམ་པ་སྟེ། འདི་ནི་བང་མཛོད་འཕྲུལ་ལྡེ་ལས། ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་པས། །མ་བསྐྱེད་རྫོགས་པའི་ལྷ་རུ་སྒོམ། །ཞེས་པ་ལྟར་གཙོ་བོར་ཨ་ནུ་ཡོ་གའི་བསྐྱེད་ཚུལ་དང་མཐུན་པའོ། །རྫུས་སྐྱེས་སྦྱོང་བ་ནི། དབང་པོ་ཡང་རབ་ཤིན་ཏུ་སྤྲོས་མེད་ཀྱི་དབང་དུ་བྱས་ཏེ། ལྷ་སྐད་ཅིག་དྲན་རྫོགས་སུ་བསྐྱེད་པའོ། །འདི་ནི་གཙོ་བོར་ཨ་ཏི་ཡོ་གའི་སྣང་སྲིད་གཞིར་བཞེངས་ཀྱི་དཀྱིལ་འཁོར་བསྒོམ་ཚུལ་དང་མཐུན་ཏེ། རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལས། །ཐ་དད་བློ་ཡི་རིམ་པ་ཡིས། །སྤྱན་དྲངས་གཤེགས་གསོལ་འདིར་མི་དགོས། །ཞེས་སོ། །དེ་ལྟར་བསྒོམ་ཚུལ་བཞིས་སྐྱེ་གནས་རང་རང་གི་བག་ཆགས་སྦྱོང་བ་གཙོ་བོ་ཡིན་ནའང་། གང་རུང་རེ་རེས་གཞན་གསུམ་གྱི་བག་ཆགས་ཀྱང་ཞར་ལ་སྦྱོང་བར་ནུས་ཏེ། དཔེར་ན་མངལ་སྐྱེས་སྦྱོང་བྱེད་ཆོ་ག་གསུམ་བསྐྱེད་ལྟ་བུ་ལ་མཚོན་ན། གདན་གྱི་ཉི་ཟླ་ནི་ཁུ་རྡུལ། ས་བོན་ནི་ཁུ་ཁྲག་གི་དབུས་སུ་དྲི་ཟའི་སེམས་འཇུག་པར་ཕྱོགས་པ། ཕྱག་མཚན་ནི་ཕ་མའི་འདུ་འཕྲོད་ཀྱི་འགྱུར་བས་ལུགས་ལྡོག་གི་ཁམས་ལྔ་མྱོང་བའི་རིམ་པས་འཇུག་ཅིང་ཁུ་རྡུལ་སེམས་གསུམ་འདྲེས་པ། སྤྲོ་བསྡུ་ནི་འབྱུང་ལྔས་ལུས་རིམ་གྱིས་གྲུབ་པ། སྐུ་རྫོགས་པ་ནི་དབང་པོ་རྒྱས་ནས་བཙས་པ་རྣམས་ཏེ་གཙོ་བོར་མངལ་སྐྱེས་སྦྱོང་བྱེད་ཡིན་ཡང་། ཞར་ལ་སྒོང་སྐྱེས་ཀྱི་དུས་སུ་གཞན་འདྲ་བ་ལས། ཁྱད་པར་སྤྲོ་བསྡུས་ཡོངས་སུ་གྱུར་པའི་འོད་ཀྱི་གོང་བུ་ནི་སྒོ་ང་། དེ་ལས་ལྷར་བསྐྱེད་པ་ནི་སྒོང་ཁྱིམ་བརྡོལ་ནས་སྐྱེ་བ། དེ་བཞིན་དུ་ཉི་ཟླ་དྲོད་གཤེར། ས་བོན་ཕྱག་མཚན་བར་དོའི་རླུང་སེམས། སྤྲོ་བསྡུ་དང་སྐུ་རྫོགས་པ་དེ་གསུམ་འདུས་པ་ལས་དྲོད་གཤེར་གྱི་དབུས་ནས་འབྱུང་བཞིའི་ལུས་གྲུབ་པ། རྫུས་སྐྱེས་ལ་གདན་སྐྱེ་གནས། ས་བོན་ཕྱག་མཚན་བར་དོའི་རླུང་སེམས། སྤྲོ་བསྡུ་ནི་གནས་ལུས་ལ་སྲེད་ལེན། སྐུ་རྫོགས་པ་ནི་ལུས་སྐད་ཅིག་གིས་འགྲུབ་པ་མཚོན་ནོ། །དེ་ལྟར་བཅུད་ཀྱི་སེམས་ཅན་སྐྱེ་རིམ་བཞི་དང་མཐུན་པར་ལྷ་བསྒོམ་པ་བཞིན་དུ་སྣོད་ཀྱི་འཇིག་རྟེན་ཆགས་རིམ་དང་བསྟུན་ནས་རྟེན་གཞལ་ཡས་ཁང་བསྒོམ་པར་གསུངས་ཏེ། གལ་ཕྲེང་ལས། སྣོད་ཀྱི་རིམ་པ་བྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། །ཅེས་སོ། །དེས་ན་ཡར་སངས་རྒྱས་ཀྱི་སྐུ་དང་ཞིང་ཁམས་ཀྱི་རྣམ་པ་ལམ་བྱེད་དང་། མར་འཁོར་བའི་སྣོད་བཅུད་ཀྱི་དྲི་མ་སྦྱོང་ཚུལ་དུ། དེ་དང་དེའི་རྣམ་པ་དང་མཐུན་པའི་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་རྫོགས་པར་བསྒོམ་པ་ཡིན་ལ། དེ་ལྟར་དག་པ་ལྷའི་རྣམ་པར་བསྒོམས་པས་མ་དག་པའི་སྣང་བ་དབྱིངས་སུ་སྦྱོང་བར་བྱེད་པ་སྟེ། སྒྲུབ་ཐབས་ཀུན་ཏུ་བཟང་པོ་ལས། ཐ་མལ་རྣམ་རྟོག་རྒྱུན་ལས་གཞན་པ་ཡི། །སྲིད་པའི་སྡུག་བསྔལ་ཅི་ཡང་ཡོད་མ་ཡིན། །དེ་དང་རྣམ་པ་འགལ་བར་གྱུར་བའི་སེམས། །འདིས་ནི་མངོན་སུམ་དུ་ནི་རྟོགས་པར་འགྱུར། །ཞེས་གསུངས་པ་བཞིན་ནོ། །དེ་དག་ཀྱང་གུར་ལས། སངས་རྒྱས་གནས་གཞི་རྫོགས་བྱས་ནས། །ཀུན་ཏུ་བཟང་པོའི་བདེ་བ་དངོས། །རྣམ་པ་ལྔ་པོ་བསྒོམས་བྱས་ཏེ། །རང་ལྷག་ལྷ་ཡི་སྒྲུབ་ཐབས་བྱ། །དེ་བཞིན་དཀྱིལ་འཁོར་རྣམ་བཀོད་ལ། །མཆོད་བསྟོད་བདུད་རྩི་མྱང་སོགས་པ། །རིམ་པ་འདི་ཡིས་བསྒོམས་བྱས་ན། །ཡན་ལག་དྲུག་གི་སྦྱོར་བར་འདོད། །ཅེས་པ་ལྟར་ཡེ་ཤེས་ལྔ་བྱང་སེམས་དང་དྲུག་སངས་རྒྱས་ཀྱི་སར་མཐར་ཕྱིན་པར་བྱ་བའི་དོན་དུ། ཕོ་བྲང་རྣམ་སྣང་། རྗེས་ཆགས་རྡོ་རྗེ་འཆང་། དབང་བསྐུར་མི་བསྐྱོད་པ། མཆོད་པ་དོན་གྲུབ། བསྟོད་པ་རིན་འབྱུང་། བདུད་རྩི་མྱང་བ་འོད་དཔག་མེད་དེ་ཡན་ལག་དྲུག་རྫོགས་བསྒོམ་པར་བཞེད་དོ། །བསྐྱེད་རྫོགས་གཉིས་ཀྱིས་སྐྱེ་འཆི་སོ་སོར་སྦྱོང་བར་བཤད་པ་ཡང་བསྐྱེད་སྡུད་ཀྱི་རིམ་པའི་དབང་དུ་བྱས་པ་སྟེ། གཞན་དུ་ན་ལམ་རིམ་ལས། སྲིད་པ་རིམ་པར་སྨིན་ཚུལ་དུ། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་པས་གཙོ་བོར་རྫོགས་རིམ་གྱི་སྦྱང་བྱ་བསྟན་ཀྱང་། འཆི་བར་སྐྱེ་གསུམ་གྱི་བག་ཆགས་ལ་ཕྲ་རགས་གཉིས་ལས། རགས་པ་དེ་བསྐྱེད་རིམ་གྱིས་སྦྱོང་བར་བྱེད་པའང་ཡིན་པས་འདི་ལྟར། སྟོང་པ་ཆེན་པོ་དང་། སྙིང་རྗེ་སྒྱུ་མ་དང་། ཕྱག་རྒྱ་གཅིག་པ་ཕྲ་རགས་དང་། ཕྱག་རྒྱ་སྤྲོས་བཅས་དང་། ཚོགས་སྒྲུབ་སྟེ་སྦྱོང་བྱེད་ཆོ་ག་ཡན་ལག་ལྔས། མར་འཆི་བར་སྐྱེ་གསུམ་དང་། སྐྱེ་བ་ལའང་དྲི་ཟའི་སེམས་མངལ་དུ་ཞུགས་ཏེ་ལུས་ཆགས་ནས་སྐྱེས་པ་དང་། ལུས་རྫོགས་ནས་བུ་ཚ་འཁོར་འདབ་རྒྱས་པ། བློ་གྲོས་སྨིན་ནས་བཅད་རིས་དང་ཁེ་གྲགས་སྒྲུབ་པ་སྟེ། སྐྱེས་པའི་རིམ་པ་གསུམ་གྱིས་བག་ཆགས་སྦྱོང་། ཡར་སངས་རྒྱས་ཆོས་ལོངས་སྤྲུལ་གསུམ་ཕྲིན་ལས་དང་བཅས་པའི་རྣམ་པ་ལམ་བྱེད་ཀྱིས་རིགས་ཀྱི་ནུས་པ་གསོས་བཏབ་ནས་འབྲས་བུར་རྫོགས་པར་བྱེད། ལམ་གོང་མ་འོད་གསལ་ལས་སྙིང་རྗེ་ཆེན་པོའི་འཕེན་པས་ཟུང་འཇུག་གི་ལྷར་ལྡང་བའི་སྨིན་བྱེད་དུ་འགྲོ་ཞིང་། དམ་ཚིག་པ་ལ་ཡེ་ཤེས་པ་བཅུག་སྟེ་གཉིས་སུ་མེད་པར་བྱས་པས་ནི། ཚོར་བ་དང་འདུ་ཤེས་རྫོགས་ནས་རྒན་རབས་རྣམས་དང་བློ་ནུས་འདྲ་བར་བྱས་ཤིང་སངས་རྒྱས་ཐམས་ཅད་ཡེ་ཤེས་མཉམ་ཉིད་དུ་གྱུར་པ་དང་ལམ་གོང་མའི་ཚེ་ལྟ་བ་འཁོར་འདས་དབྱེར་མེད་དང་རྗེས་སུ་མཐུན་པའི་ཉམས་ལེན་དུ་འགྱུར་ལ། དེ་ལྟར་མཉམ་བཞག་ཏུ་དཀྱིལ་འཁོར་གྱི་འཁོར་ལོ་བསྒོམ་པ་དེའང་། ཐ་མལ་གྱི་སྣང་བ་ལྡོག་པའི་དོན་དུ་ལྷའི་རྣམ་པ་དང་། ཐ་མལ་གྱི་ཞེན་པ་ལྡོག་པའི་དོན་དུ་ལྷའི་ང་རྒྱལ་ལ་བསླབ་ཅིང་། ང་རྒྱལ་དེ་ཡང་གཟུང་འཛིན་གྱི་སྣང་བ་ལས་འདས་ཏེ་ཡང་དག་པའི་ཡེ་ཤེས་སུ་སྒྱུར་བའི་དོན་དུ་སྒྱུ་མ་ལྟ་བུར་འཆར་བ་ལ་བསླབ་དགོས་སོ། །བླ་མེད་ཀྱི་ལུགས་འདིར་བདག་བསྐྱེད་ཀྱི་ཡེ་ཤེས་པ་མི་གཤེགས་པས་མཐར་དམ་ཡེ་དབྱེར་མེད་ཀྱི་དཀྱིལ་འཁོར་འོད་གསལ་དུ་བསྡུ་ཞིང་ལྡང་བས་ནི། འཕྱིས་ཉིང་མཚམས་སྦྱོར་བ་ལ་ལྟོས་པའི་སྲིད་པ་ཕྱི་མ་རྣམས་ཀྱི་བག་ཆགས་ཐམས་ཅད་སྦྱོང་བ་དང་རང་བཞིན་ཆོས་སྐུའི་ངང་ནས་འགྲོ་དོན་མཛད་པ་མཚོན་ནོ། །དེ་ལྟར་བསྐྱེད་རིམ་དེ་ཉིད་ལམ་གྱི་གཙོ་བོ་ཡིན་ལ། དེས་སྐྱོ་ན་ངག་གི་ཞེན་པ་ལྡོག་ཅིང་ལྷའི་ཐུགས་རྒྱུད་བསྐུལ་བའི་ཕྱིར་བཟླས་པ་བྱའོ། །དེ་ཡང་ལམ་རིམ་ལས། སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །ཞེས་པའི་སྐྱོན་བཅུ་ནི། རྔམ་གློག་ལས། སྒྲ་ཆེན་མ་ཡིན་ཆུང་བར་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པར་མིན། །ཡེངས་པས་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པ་མིན། །ཞེས་སོ། །རྣམ་པ་གསུམ་ནི་བཟླ་ཚུལ་ཏེ། གསལ་བ་གསུམ་དང་། ཕྱི་ནང་གསང་གསུམ་དང་། ཕྲ་མོ་གསུམ་གྱི་བཟླ་ལུགས་སོ། །གཞན་ལས་ནི་ངག་གི་དང་། གཟུགས་ཀྱི་དང་། རྣལ་འབྱོར་གྱི་དང་། རྡོ་རྗེ་བཟླས་པ་དང་བཞི་བཤད་དེ། དང་པོ་ནི། སྤྲོ་བསྡུའམ་དམ་ཚིག་གི་དང་། ཁྱོགས་ཀྱི་དང་། ཁྲོ་བོའི་བཟླས་པའོ། །གཉིས་པ་ནི་ལྷའི་རྣམ་པ་དྲན་པས་སོ། །གསུམ་པ་ནི། དེ་ཁོ་ན་ཉིད་ཙམ་སེམས་པས་སོ། །བཞི་པ་ནི། བརྗོད་པ་དང་ནི་དམིགས་པ་དང་། །བརྡར་གྱུར་དང་ནི་དོན་དམ་མོ། །ཞེས་པ་ལྟར་རོ། །གྲངས་ཚད་ནི་སྤྱིར་བཏང་གཙོ་བོ་ལ་འབུམ་དང་འཁོར་ལ་ཁྲི་བཤད་པ་མང་ཡང་། སྡོམ་འབྱུང་ལས། རྫོགས་ལྡན་དུས་ན་གཅིག་བཟླས་པ། །གསུམ་ལྡན་དུས་ན་ཉིས་འགྱུར་བཟླས། །གཉིས་ལྡན་དུས་ན་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླས། །སྔགས་ཀྱི་གྲངས་ནི་བཞི་པོ་ཡིས། །རྒྱུན་མི་ཆད་པར་གསང་སྔགས་བཟླ། །ཞེས་པ་ལྟར་དམིགས་བསལ་མེད་པ་རྣམས་ལ་དུས་འགྱུར་བརྩིས་ནས་བཟླ་བའོ། །གཞན་ཡང་ལས་སྒྲུབ་ཅིང་བར་ཆད་ཞི་བའི་ཕྱིར་གཏོར་མ་དང་། ཟས་ཀྱི་བྱ་བ་བསོད་ནམས་ཀྱི་ཚོགས་སུ་བསྒྱུར་བའི་ཕྱིར་བཟའ་བའི་རྣལ་འབྱོར་དང་། སྤྱོད་པ་རྣམ་པར་དག་པའི་ཕྱིར་ཐུན་མཚམས་ཀྱི་རྣལ་འབྱོར་དང་། གཉིད་དགེ་བར་བསྒྱུར་བའི་ཕྱིར་ཉལ་ལྡང་གི་རྣལ་འབྱོར་ཏེ། དེ་རྣམས་ནི་མཉམ་བཞག་ལས་ལངས་པའི་དུས་ཀྱི་བྱ་བ་ཡིན་ཞིང་། དེར་མ་ཟད། རབ་གནས་དང་། སྦྱིན་སྲེག་དང་། ལས་ཚོགས་སྒྲུབ་པ་སོགས་གཙོ་བོར་ཕྱི་ལ་གཞོལ་བའི་གང་ཟག་གིས་ཉམས་སུ་བླང་བྱའོ། །དེ་དག་གིས་བསྐྱེད་རིམ་གྱི་ལུས་བསྟན་ནས། ཡན་ལག་ནི། དམ་ཚིག་དང་། སྤྱོད་པ་ཡིན་ལ། དེ་ཡང་བསྐྱེད་རིམ་སྤྲོས་བཅས་མཐར་ཕྱིན་པ་ཞིག་གིས་ཚོགས་ཀྱི་སྤྱོད་པའི་ཉེ་རྒྱུ་ལ་སྤྱད་ན་འཇིག་རྟེན་པའི་དངོས་གྲུབ་ཆེན་པོ་འདོད་པ་དང་གཟུགས་ཀྱི་རིག་པ་འཛིན་པ་མཆོག་གི་བར་དུ་འགྲོ་བར་འགྱུར་རོ། །གཉིས་པ་རྫོགས་རིམ་ནི། སྤྱིར་ཕ་རྒྱུད་དུ་རིམ་ལྔ། མ་རྒྱུད་དུ་ཕྱག་རྒྱ་བཞི། གཉིས་མེད་ཀྱི་རྒྱུད་དུ་ཡན་ལག་དྲུག་ཅེས་གྲགས་པ་ལས། དང་པོ་ནི། ངག་དབེན་རྡོ་རྗེའི་བཟླས་པས་རླུང་སྦྱངས་ཤིང་། སེམས་དབེན་གྱིས་སེམས་སྦྱངས་ནས། བདག་བྱིན་བརླབས་པའི་རིམ་པ་རླུང་སེམས་ཙམ་ལས་གྲུབ་པའི་མ་དག་པའི་སྒྱུ་ལུས་བསྒོམ་ཞིང་། དེ་ཉིད་རིལ་འཛིན་དང་རྗེས་གཞིག་གིས་འོད་གསལ་དུ་སྦྱངས་ནས། དེ་ལས་དག་པའི་སྒྱུ་ལུས་ཟུང་འཇུག་གི་སྐུར་མངོན་དུ་ལྡང་བ་སྟེ། ཧེ་རུ་ཀ་གལྤོ་ལས། རྡོ་རྗེ་བཟླས་དང་སེམས་ལ་དམིགས། །བདག་བྱིན་རློབས་དང་འོད་གསལ་དང་། །ཟུང་དུ་འཇུག་པ་འདི་ལྔ་ལ། །ཞེས་དང་། བཀའ་བརྒྱད་ཡོངས་རྫོགས་ལས་ཀྱང་། སྔགས་སེམས་སྒྱུ་ལུས་འོད་གསལ་དང་། །ཟུང་འཇུག་རྫོགས་རིམ་འབྲས་བུའོ། །ཞེས་གསུངས་ཤིང་། སྒྲུབ་སྡེའི་བདེ་གཤེགས་འདུས་པ་ལས་ནི། སྣང་བ་ལྷ། གཡོ་བ་རླུང་། བཀོད་པ་བྱང་ཆུབ་ཀྱི་སེམས་ལྟ་སྒོམ་སྤྱོད་འབྲས་བཞིས་སྒོ་གསུམ་སྦྱངས་ནས། རྟེན་རྩ་དང་། བཅུད་ཐིག་ལེའི་རྫོགས་རིམ་སྟེ་ལྔ་ལ་རིམ་ལྔར་བཤད་པས་འདི་དང་སྒོམ་ཚུལ་རྣམ་པ་མི་འདྲའོ། །གཉིས་པ་ནི། རླུང་ལ་དབང་ཐོབ་པས་པདྨ་ཅན་སོགས་ཕྱི་ལུས་ཀྱི་ཕྱག་རྒྱ། ནང་དམ་ཚིག་གི་ཕྱག་རྒྱ་གཏུམ་མོ། སྣང་བ་ཆོས་ཀྱི་ཕྱག་རྒྱ་སྒྱུ་ལུས། ཕྱག་རྒྱ་ཆེན་པོ་འོད་གསལ་དང་ལྷན་ཅིག་སྐྱེས་སྦྱོར་རོ། །ཆོས་དྲུག་གི་དབང་དུ་བྱས་ན། རྨི་ལམ་སྒྱུ་ལུས་ཀྱི་ཡན་ལག །འཕོ་བ་དང་བར་དོ་གཉིས་ཕྱི་མའི་མཚམས་སྦྱོར་ཏེ། རྩ་བ་བཞི་ལས་ཡན་ལག་གསུམ་དུ་ཕྱེ་བའོ། །འདིར་དམ་རྒྱ་གཏུམ་མོ་ལ་བྱེད་པ་ནཱ་རོ་པ་སོགས་ཀྱི་དགོངས་པ་སྟེ། མངའ་བདག་མཻ་ཏྲི་པ་འབྲས་བུ་ཟུང་འཇུག་ལ་དམ་རྒྱར་བཞེད་པ་ལྟར་ན་སོ་སྐྱེའི་གནས་སྐབས་སུ་མེད་པར་འདོད་དགོས་སོ། །གཞན་ཡང་མ་རྒྱུད་དུ་མཆོག་གི་དབྱིབས་སྔགས་ཆོས་གསུམ་དང་། བདག་བྱིན་བརླབ་པ། སྣ་ཚོགས་རྡོ་རྗེ། ནོར་བུ་འགེངས་པ། ཛ་ལནྡྷ་ར། བསམ་མི་ཁྱབ་ཀྱི་རིམ་ལྔ་དང་། དཔྱིད་ཐིག་ལ་སོགས་པའི་རྫོགས་རིམ་མཐའ་ཡས་སོ། །གསུམ་པ་ནི། ཉིན་མཚན་གྱི་རྣལ་འབྱོར་ལ་བརྟེན་ནས་ཤེས་པ་ཡུལ་ལ་འཇུག་པ་འགགས་པས་རྟགས་བཅུའི་སྟོང་གཟུགས་མངོན་དུ་གྱུར་པ་སོར་སྡུད། གསལ་ལ་ངོས་བཟུང་མེད་པའི་སྟོང་གཟུགས་ཀྱི་རང་ཞལ་རིག་པ་ཤེས་རབ་དང་། དེ་ལས་རྟགས་སྣང་རང་སེམས་སུ་མྱོང་བའི་རྟོག་པ་དང་། དེ་ཉིད་མཚན་མེད་དུ་རིག་པའི་དཔྱོད་པ་དང་། དེ་ལས་ལུས་སེམས་ལ་དགའ་བདེ་དང་། ཡུལ་རིག་འདྲེས་པའི་བདེ་བ་སྟེ་ཡན་ལག་ལྔ་དང་ལྡན་པའི་བསམ་གཏན། གཡས་གཡོན་དང་སྟེང་འོག་གི་རླུང་རོ་གཅིག་ཏུ་བསྲེ་བ་སྲོག་རྩོལ། འཁོར་ལོ་ལྔར་བུམ་ཅན་གྲུབ་ནས་རླུང་སེམས་དབུ་མའི་ཐིག་ལེར་ཐིམ་པར་བྱེད་པ་འཛིན་པ། ཕྱག་རྒྱ་གསུམ་གང་རུང་ལ་བརྟེན་ནས་བྱང་སེམས་འདུལ་སྦྱོང་གིས་དབང་པོའི་སྒོར་མི་འཛག་པ་རྗེས་དྲན། འཕོ་མེད་གསུམ་གྱིས་ལས་རླུང་ཉི་ཁྲི་ཆིག་སྟོང་དྲུག་བརྒྱ་རིམ་གྱིས་འགགས་པའི་དབྱེ་བས་མི་འགྱུར་བའི་བདེ་བའང་དེ་སྙེད་ཐོབ་པ་ནི་ཏིང་ངེ་འཛིན་གྱི་ཡན་ལག་སྟེ། དུས་འཁོར་རྩ་རྒྱུད་དང་གསང་འདུས་ཀྱི་རྒྱུད་ཕྱི་མ་ལས། སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་དང་། ཀལྤོ་ལས་ཀྱང་། སྦྱོར་བ་ཡན་ལག་དྲུག་གིས་བསྙེན། །ཞེས་སོ། །རྒྱུད་འདིར། འཁོར་འདས་ཐུན་མོང་འཆམ་དང་འདས། །འཇིག་རྟེན་པ་དང་འཁོར་ལོ་བསྐོར། །འཁོར་འདས་ཐུན་མོང་ལམ་བཤད་ན། །སྣང་བ་གསུམ་དུ་བསྟན་པའི་ལམ། །ཀུན་གཞི་ལུས་དང་ཕྱག་རྒྱ་ཆེ། །རྒྱུ་རྒྱུད་ཐབས་དང་འབྲས་བུའི་རྒྱུད། །ཅེས་སྣང་བ་གསུམ་དང་རྒྱུད་གསུམ་གྱིས་དཀྲི་ཚུལ་སོགས་ལམ་འབྲས་ཀྱི་རྩ་ཐོ་ཡང་རྒྱས་པར་བཤད་ཅིང་། ཁྱད་པར་ཚངས་པའི་ཐོག་གི་ལམ་སྦྱང་བའི་ཐབས། རླུང་གི་གཞུ་ལ་མེ་ཡི་མདའ། །བྱང་སེམས་ཧཾ་གི་འབེན་ལ་བརྡེག །མྱུར་དུ་ཡེ་ཤེས་འཆར་བར་འགྱུར། །བསྐྱར་བའི་སྦྱོར་བ་མེད་པའོ། །ཞེས་པ་འདིའང་ཁྲིད་ཡིག་རྣམས་སུ་བླ་མའི་གསུང་གིས་ཞེས་ལུང་ཁུངས་མ་སྨོས་ཀྱང་། རྒྱུད་འདིའི་བརྟག་པ་བཅུ་བཞི་པ་ནས་འབྱུང་བ་ཡིན་ནོ། །གཞན་ཡང་མ་མོའི་རྒྱུད་ལུང་དང་གླང་པོ་ཆེ་རབ་འབོགས་ཀྱི་བཀོལ་རྒྱུད་སོགས་ལས་ལམ་འབྲས་ཀྱི་གདམས་པའི་གནད་གསལ་བར་བཤད་པ་ལྟ་བུ་ནི་དགྱེས་རྡོར་རང་གི་རྒྱུད་དེང་སང་བོད་འདིར་གྲགས་པ་རྣམས་ཀྱི་དངོས་བསྟན་ལས་གསུངས་པ་མ་མཐོང་ངོ་། །ཁྱད་པར་ཐུན་མོང་མ་ཡིན་པ་སྔ་འགྱུར་ལ། རྒྱུད་སྒྱུ་འཕྲུལ་དྲྭ་བ་ལྟར་ན། བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཅེས་པས་ཤེས་རབ་རྣམ་པར་གྲོལ་བའི་ལམ་དང་། ཐབས་ཀྱི་ངེས་པའི་ལམ་གཉིས་ལས། དང་པོ་ནི། རྩ་རྒྱུད་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་རྒྱུ་རྒྱུད་དེ་བཞིན་ཉིད་ཀྱི་དཀྱིལ་འཁོར་ངོས་བཟུང་ནས། གཞི་དེ་ལྟར་ཡིན་པར་ཡིད་ཆེས་པར་བྱས་ལ་ཏིང་ངེ་འཛིན་གྱིས་བསྒྲུབས་པས། གཞི་ཇི་ལྟ་བ་བཞིན་མངོན་དུ་སྣང་བར་འགྱུར་རོ། །དེའི་ཐབས་ནི། ལམ་རིམ་ལས། རང་བཞིན་ཡེ་ཤེས་རང་གནས་དང་། །དེ་མཐོང་དེར་འཇུག་རྣལ་འབྱོར་བཞི། །བར་ཆད་མེད་སྒྲུབ་རྣམ་པར་སྨིན། །དབང་སྒྱུར་ཕྱག་རྒྱ་ལྷུན་གྲུབ་ལམ། །མངོན་བྱས་རིམ་པ་བརྗོད་པར་བྱ། །ཞེས་པས་གཞི་རྒྱུད་རང་གནས་ཀྱི་ཡེ་ཤེས་ཉིད་གཏན་ཚིགས་རྣམས་ཀྱིས་གཏན་ལ་ཕེབས་པས། དེར་མཐོང་གི་རྒྱུ་ཤེས་པའི་མཚན་ཉིད་ལྟ་བ། དེ་ལྟར་རྟོགས་ནས་རྐྱེན་འཇུག་པའི་མཚན་ཉིད་ཏིང་ངེ་འཛིན་བསྒོམ་སྟེ། སྒོ་གསུམ་གྱི་བྱ་བ་བཏང་ནས། འཇོག་ཐབས་གཉིས་གང་རུང་གིས་དོན་དམ་འོད་གསལ་རྣམ་པར་མི་རྟོག་པའི་ཏིང་ངེ་འཛིན་མཚན་མོའི་གཉིད་འཐུག་གི་འོད་གསལ་དང་སྦྲེལ་ཏེ། མཉམ་པར་འཇོག་པ་སྟོང་པ་ཆེན་པོའི་རྣལ་འབྱོར། འོད་གསལ་དེའི་ངང་དུ་སེམས་འགགས་པས་སྟོང་གཟུགས་ཀྱི་སྣང་བ་ཤར་བ་ནི་ཉིན་དུས་སད་པའི་སྣང་བ་དང་མཚན་མོའི་རྨི་ལམ་གྱི་སྣང་བ་ཐམས་ཅད་སྒྱུ་མ་ཆུ་ཟླ་ལྟར་མཐོང་བ་ལས་དམིགས་མེད་བདེ་ཆེན་གྱི་སྙིང་རྗེ་མ་འགགས་པར་ཤར་བ་སྙིང་རྗེ་སྒྱུ་མའི་རྣལ་འབྱོར་དང་། སྣང་བ་རིས་མེད་ལས་སྙིང་རྗེ་ཆེན་པོའི་འཕེན་པ་དང་ཏིང་ངེ་འཛིན་གྱི་རྐྱེན་གྱིས་ཞུ་བདེ་དང་མཚུངས་ལྡན་དུ་བྱུང་བའི་བཅོས་མིན་ཟུང་འཇུག་གི་ལྷ་སྐུ་ཕྱག་རྒྱ་གཅིག་པ་དང་། དེ་ལས་མཆེད་དེ་སྣང་བ་ཐམས་ཅད་ཟུང་འཇུག་གི་ལྷར་མངོན་སུམ་དུ་སྤྲོ་བ་སྤྲོས་བཅས་ཀྱི་རྣལ་འབྱོར་ལ་བརྟན་པ་ཐོབ་ནས། ཉེ་རྒྱུའི་སྤྱོད་པ་གསུམ་གང་རུང་སྤྱད་པས་ཟག་མེད་རིག་པ་འཛིན་པའི་ལམ་ལ་སྦྱོར་བར་བྱེད་དོ། །གཉིས་པ་ནི། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་དགའ་བཞིའི་ཡེ་ཤེས་བསྐྱེད་པ་སྟེང་སྒོ་ཐུན་མོང་པ་དང་། སྙིང་ག་ལྟེ་མགྲིན་སྤྱི་བོའི་འཁོར་ལོ་བཞིར། ཀུན་ཏུ་བཟང་པོའི། ཀུན་ཏུ་བཟང་མོའམ་བདེ་ཆེན་ཐིག་ལེའི། སྦྱོར་བ་དག་པའི། ཁྱབ་བརྡལ་ཆེན་པོའི་མན་ངག་བཞི་རྩ་རྒྱུད་ལེའུ་བཅུ་གསུམ་པ་ལས་བྱུང་བ་ལྟར་བསྒོམས་པས། དྭངས་མའི་དྭངས་མ་རྣམས་འཁོར་ལོ་བཞིའི་ལྟེ་བའི་དྭངས་མ་གཡོ་བྱེད་དང་བྲལ་བའི་འོད་གསལ་ལ་ཚུར་ཐིམ་པས། བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ་གཅིག་དང་དུ་མ་མེད་པའི་ཆོས་ཉིད་མཆོག་ཏུ་མི་འགྱུར་བའི་འོད་གསལ་གྱི་ངོ་བོར་འཆར་ཏེ། སྟེང་སྒོ་འཇུ་འདུལ་གྱི་མན་ངག་ཁྱད་པར་ཅན་ནོ། །འོག་སྒོ་ཁམས་གསུམ་རོལ་བའི་མན་ངག་ནི། མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་དགའ་བཞི་ལུགས་འབྱུང་ལྡོག་གིས་བདེ་སྟོང་གི་ཡེ་ཤེས་སྐྱེད་པར་བྱེད་པའོ། །ལུང་ཨ་ནུ་ཡོ་ག་ལས། ཀུན་རྫོབ་བྱང་སེམས་ཀྱི་ཉམས་ལེན་སྟེང་འོག་གི་སྒོ་ལ་བརྟེན་ནས་ལྷན་སྐྱེས་ཀྱི་ཡེ་ཤེས་འདྲེན་པའི་ཐབས་རྒྱུད་དང་བབས་འདྲ་བ་ལས། ཐབས་ལམ་རང་གི་སེམས་བཅུ། སྐབས་བཅུ། དཔེ་བཏགས་བཅུ་དང་སྦྱར་ནས་འབྲས་བུ་ལ་བགྲོད་པར་སྤྱི་མདོའི་ལྗོན་ཤིང་གི་ལེའུ་ལས་གསུངས་ཤིང་། དོན་དམ་བྱང་སེམས་ཀྱི་ཉམས་ལེན་རྟེན་ཅན་སྙིང་གའི་ཐིག་ལེ་ལ་རླུང་སེམས་ཀྱི་དྭངས་མ་ཐམས་ཅད་ཐིམ་སྟེ་དབྱིངས་རིག་གཉིས་མེད་བདེ་ཆེན་གྱི་ཡེ་ཤེས་འཆར་བས་ཁམས་གསུམ་བདེ་བ་ཆེན་པོར་གྲོལ་བར་བྱེད་པ་དང་། རྟེན་མེད་མི་གཡོ་གསུམ་ལྡན་གྱིས་རྣམ་པར་མི་རྟོག་པའི་ངང་བསྐྱངས་པས། ཡུལ་ཆོས་ཉིད་དོན་གྱི་ཡེ་ཤེས་དང་། ཡུལ་ཅན་ཆོས་སྐུ་གཞིའི་ཡེ་ཤེས་དབྱེར་མེད་པའི་རིག་པ་དབྱིངས་དང་ཡེ་ཤེས་ཟུང་འཇུག་རྩ་བ་བྱང་ཆུབ་སེམས་ཀྱི་དཀྱིལ་འཁོར་མངོན་དུ་རྟོགས་པའི་ཐབས་དོན་གྱི་རྗེས་སུ་འཇུག་པའི་རྣལ་འབྱོར་རྒྱས་པར་བཤད་པ་རྣམས་སོ། །ཐེག་པ་ཐམས་ཅད་ཀྱི་རྩེ་མོ་ཨ་ཏི་ཡོ་ག་ནི། བླ་མེད་ཀྱི་རྒྱུད་ཐམས་ཅད་ཀྱི་དབང་བཞི་པའི་རྫོགས་རིམ་མཐར་ཐུག་པ་ཉིད་རྩལ་དུ་བཏོན་པས་སྐལ་ལྡན་ཤིན་ཏུ་དབང་རྣོན་གྱི་སྤྱོད་ཡུལ་ཏེ་འདི་ལྟར་སྣང་སྲིད་སྣོད་བཅུད་ཀྱི་སྣང་བ་ཐམས་ཅད་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་ཀྱི་སྐུར་གཏན་ལ་ཕབ་ནས་བསལ་བཞག་མེད་པར་སྐྱོང་བ་སེམས་སྡེ། རང་བྱུང་གི་ཡེ་ཤེས་དང་དེ་ལས་ཤར་བའི་ཆོས་ཐམས་ཅད་ཡེ་གྲོལ་རང་དག་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པར་གཏན་ལ་ཕབ་ནས་ཆོས་ཉིད་དམིགས་མེད་བྱ་རྩོལ་དང་བྲལ་བའི་ངང་དུ་སྐྱོང་བ་ཀློང་སྡེ། ཁྱད་པར་མན་ངག་གི་སྡེ་ལ་ཕྱི་ནང་གསང་བ་ཡང་གསང་བཞི་ལས། འདིར་ཡང་གསང་བླ་མེད་ཀྱི་དབང་དུ་བྱས་ཏེ། སེམས་གཞི་མེད་རྩ་བྲལ་ཀ་དག་ཏུ་གཏན་ལ་ཕབ་ནས། སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོ་ཁྲེགས་ཆོད་ཀྱིས་ཉམས་སུ་ལེན་པ་དང་། ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེ་ནས། རང་གནས་ཀྱི་ཡེ་ཤེས་འོད་གསལ་ལྷུན་གྲུབ་ཀྱི་དཀྱིལ་འཁོར་དུ་ཞལ་ལྟ་བ་ཐོད་རྒལ་སྣང་བཞིའི་ལམ་བསྒོམས་པས། ཆོས་ཉིད་ཟད་པའི་ཚེ་ཕུང་ཁམས་སྐྱེ་མཆེད་ཐམས་ཅད་རང་དག་ནས་ཐོབ་པ་གསུམ་གྱི་གཟེར་ཐེབས་པས་ཤེས་རབ་རང་བྱུང་གི་སྒྲོན་མ་མངོན་དུ་འགྱུར་བ་ཡིན་ནོ། །མདོར་ན་དེ་ཐམས་ཅད་ཀྱང་རྫོགས་རིམ་དངོས་དང་བཏགས་པ་བ། མཚན་བཅས་དང་མཚན་མེད། ཁྱབ་བྱ་དང་ཁྱབ་བྱེད་རྣམས་དང་། དེ་ཡང་རང་བྱིན་བརླབས་ཀྱི་རིམ་པ་རྩ་རླུང་སེམས་གསུམ་ལ་བརྟེན་པ་དང་། དེ་དག་གི་རྒྱས་གདབ་ཏུ་གྱུར་པ་བརྗོད་མིན་ལྷན་ཅིག་སྐྱེས་པའི་རིམ་པ་ཕྱག་རྫོགས་ཀྱི་རྣལ་འབྱོར་རྣམས་སུ་འདུ་བ་ཡིན་ནོ། །དེ་རྣམས་ཀྱི་རྫོགས་རིམ་གྱི་ལུས་བསྟན་པ་སྟེ། གོ་བའི་ཆིངས་ཙམ་ལས་རྩ་རླུང་ཐིག་ལེའི་གནས་ལུགས་དང་ཉམས་སུ་ལེན་པའི་མན་ངག་གི་གནད་རྣམས་ནི་ཟབ་དོན་གསང་སྒྲོགས་སུ་འགྱུར་གྱི་དོགས་ནས་འདིར་ཞིབ་པར་མ་སྨོས་སོ། །ཡན་ལག་ལ་གཉིས་ལས། དམ་ཚིག་ནི། ཁྱོད་ཀྱིས་སྲོག་ཆགས་གསད་པར་བྱ། །ཞེས་སོགས་དགོངས་ཏེ་གསུངས་པ་དང་། མེད་པ་དང་། ཕྱལ་བ་སོགས་ལྟ་བའི་དམ་ཚིག་དང་། བཟའ་བའི་དམ་ཚིག་ལ་སོགས་པའོ། །སྤྱོད་པ་ནི། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་དམ། ཡང་ན་གཉིས་སྤངས་དང་། ཀུན་བཟང་དང་། ཕྱོགས་ལས་རྣམ་རྒྱལ་གྱི་སྤྱོད་པ་སོགས་མིང་དང་དབྱེ་སྒོ་མང་ཡང་དོན་འདྲའོ། །དེ་ལྟར་སྡོམ་པ་འཛིན་ཚུལ་དང་། ཐོབ་ཚུལ་དང་། ལམ་བསྒོམ་ཚུལ་གསུམ་གྱི་སྒོ་ནས་སོ་སོའི་དབྱེ་བ་ཕྱེད་པའི་ཕྱིར། རྒྱུད་སྡེ་བཞི་རང་རང་གི་སྨིན་གྲོལ་གྱི་ལམ་ལ་ཇི་ལྟར་བཀྲི་བའི་ཁོག་མདོ་ཙམ་འཕྲོས་དོན་དུ་བཀོད་ནས། ད་ནི་གཞུང་གི་དཀྱུས་ཉིད་ལ་འཇུག་པར་བྱའོ། །དེ་ཡང་འདིར་རྣལ་འབྱོར་བླ་མེད་ཀྱི་རྣམ་བཞག་ཉིད་སྟོན་ཏེ། འཆད་པ་ལས་ཤེས་པར་འགྱུར་བ་ཡིན་ནོ། །
གཉིས་པ་རྒྱས་བཤད་སྔགས་སྡོམ་འཐོབ་བྱེད་དབང་སྐུར་གྱི་ཆོ་ག་ལ། གང་དུ་བསྐུར་བའི་དཀྱིལ་འཁོར། གང་བསྐུར་བྱ་དབང་བཞིའི་རྣམ་བཞག །དེ་ལྟར་བསྐུར་བའི་བྲལ་ཐོབ་ཀྱི་ཡོན་ཏན། སྔགས་སྡོམ་ཐོབ་མཚམས་ངོས་བཟུང་བ། དམ་ཚིག་ཁས་བླངས་པ་སོགས་རྗེས་ཀྱི་བྱ་བའོ། །དང་པོ་ནི། རྡུལ་ཚོན་དང་ནི་དེ་བཞིན་བྷ་ག་དང་། །ཀུན་རྫོབ་དོན་དམ་བྱང་སེམས་དཀྱིལ་འཁོར་བཞིར། །ཞེས་པ་སྟེ། དེ་ལ་མཎྜ་ལའི་སྒྲ་ལས། མཎྜ་ནི་སྙིང་པོའམ་བཅུད་དང་། ལ་ནི་འཛིན་པའམ་ལེན་པ་སྟེ། སྙིང་པོའི་ཡོན་ཏན་གྱི་གཞི་འཛིན་ཅིང་ལེན་པར་བྱེད་པས་ན་དཀྱིལ་འཁོར་རོ། །དབྱེ་ན། རྒྱུད་ཚོད་དང་སྦྱར་བའི་དཀྱིལ་འཁོར་བཞི་དང་། དེ་ལས་སྐབས་དོན་དེང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་རོ། །དང་པོ་ལ། རང་བཞིན་ཡེ་ཤེས་ཀྱི་དཀྱིལ་འཁོར་དང་། ལྷག་པ་ཏིང་ངེ་འཛིན་གྱི་གཟུགས་བརྙན་ནམ་སྤྲུལ་པའི་དཀྱིལ་འཁོར་དང་། རིག་པ་ཉམས་ཀྱི་དཀྱིལ་འཁོར་དང་། ལྷག་པ་གཟུགས་བརྙན་གྱི་དཀྱིལ་འཁོར་དང་བཞི་ལས། དང་པོ་གསུམ་ནི་རིམ་པར་སློབ་དཔོན་རྫོགས་པའི་སངས་རྒྱས་དང་། མཐར་ལམ་པ་དང་། མཐོང་སྒོམ་ལ་གནས་པས། སློབ་མ་ས་མཐའི་བྱང་སེམས་དང་། མཐོང་སྒོམ་དང་ཚོགས་སྦྱོར་གྱི་ཡོན་ཏན་མཐར་ཕྱིན་པ་རྣམས་ལ་གང་དུ་དབང་བསྐུར་བའི་དཀྱིལ་འཁོར་དུ་སྒྱུ་འཕྲུལ་རྡོ་རྗེ་ལས་བཤད་པས་འཕགས་པ་རྣམས་ཀྱི་སྤྱོད་ཡུལ་ཡིན་ཞིང་། དེ་ལས་འདིར་སྤྲུལ་བའི་དཀྱིལ་འཁོར་ལ་ལྷག་པ་ཏིང་ངེ་འཛིན་གྱི་གཟུགས་བརྙན་ཞེས་པ་ནི་སྒྱུ་འཕྲུལ་བའི་རང་སྐད་དེ། རྡོ་རྗེ་ལས་རིམ་ལས། སློབ་དཔོན་མཐར་ཉེའི་ལམ་གནས་པས། །བཞི་བཅུ་རྩ་གཉིས་གསུམ་འཕྲོ་ཞིང་། །སངས་རྒྱས་སྟོང་གི་དཀྱིལ་འཁོར་སོགས། །རྡོ་རྗེའི་ཐིག་ཚད་དོན་ཙམ་གྱིས། །རྒྱང་གྲགས་ལ་སོགས་མཚན་མ་ཡི། །དཀྱིལ་འཁོར་ཕྱག་རྒྱ་གསལ་ལྡན་པས། །ཏིང་འཛིན་ལྷག་པའི་གཟུགས་བརྙན་ཡིན། །ཞེས་གསུངས་པའི་ཕྱིར། བཞི་པ་ནི། ཏིང་ངེ་འཛིན་ལ་བརྟན་པ་རྗེས་མཐུན་ཙམ་ཐོབ་པ་ཡན་ཆད་ཀྱི་སློབ་དཔོན་མཚན་ཉིད་དང་ལྡན་པས། སྐལ་ལྡན་གྱི་སློབ་མ་ལྷག་པ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བ་ཡིན་ལ། དེ་ལའང་གདུལ་བྱའི་དབྱེ་བས། སྐལ་དམན་འཇུག་པ་ལ་རྡུལ་ཚོན། འབྲིང་རས་བྲིས། རབ་ཚོམ་བུ་ལྟ་བུ་དམིགས་རྟེན་ཅུང་ཟད་ཙམ་ལ་བརྟེན་ནས་བསྐུར་རུང་བ་ཡོད་དེ། བཀའ་བརྒྱད་བདེ་འདུས་ཀྱི་དབང་ཆོག་རྩ་བར། དཀྱིལ་འཁོར་གང་དུ་དབང་བསྐུར་ན། །རབ་འབྲིང་ཐ་མར་གསུངས་པ་ཡི། །མེ་ཏོག་བྲིས་སྐུ་རྡུལ་ཚོན་གསུམ། །དཀྱིལ་འཁོར་གསུམ་དུ་དབང་བསྐུར་རོ། །ཞེས་སོ། །དེ་ལས་ཀྱང་བློ་ཆེ་བའི་སྐལ་ལྡན་ཁ་ཅིག་ཐོག་མ་ནས་སློབ་དཔོན་གྱི་ལུས་དཀྱིལ་དུ་འཇུག་རུང་བའང་ཡོད་དེ། །ལུས་དཀྱིལ་ལ་དཀྱིལ་འཁོར་དུ་འདུ་ཤེས་པའི་གང་ཟག་མཁས་པ་དེས་ཕྱི་དཀྱིལ་བསྟེན་དགོས་པའི་ངེས་པ་མེད་པའི་ཕྱིར། དེ་ལྟར་ཡང་སློབ་དཔོན་དྲིལ་བུ་པས། བཅོས་མ་གཉིས་ཀྱི་དཀྱིལ་འཁོར་གང་། །དེ་ནི་གདུལ་བྱའི་དབང་ལས་འདོད། །མཁས་པས་བསྒྲུབ་བྱ་དེ་མ་ཡིན། །ཞེས་གསུངས། དེ་ལྟ་བུའི་མཁས་པ་དེས་བསྒྲུབ་བྱའི་ཡུལ་ནི། དེ་ལས། འགྲོ་བ་འདི་ཀུན་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་དོ། །ཞེས་གསུངས་པའི་ཕྱིར་དང་། དོང་སྤྲུགས་ཀྱི་འཇུག་པའི་མེ་ཏོག་དོར་བའི་སྐབས་སུའང་། སློབ་དཔོན་སྐུ་ཡི་དཀྱིལ་འཁོར་དུ། །ཞེས་གསུངས་པས་སོ། །དེའང་སྤྱིར་གང་ཟག་གི་ཁྱད་པར་གྱིས་ལྟོས་ས་གཉིས་ལ་ལྟོས་ནས་འཇུག་ཚུལ་གཉིས་སུ་འགྱུར་ཏེ། རྐྱེན་སད་ཚུལ་ལ་ལྟོས་ནས་གང་ལ་མོས་པ་དེར་ཐོག་མ་ནས་འཇུག་རུང་བ་ཡོད་ཅིང་། ཞུགས་ནས་དེ་དང་མཐུན་པའི་ལམ་བསྒོམ་པ་དང་། རྒྱུད་སྨིན་ཚུལ་ལ་ལྟོས་ནས་གང་ཟག་ཐམས་ཅད་རིམ་གྱིས་པ་ཡིན་ལ། དེ་ཡང་ཚེ་འདི་ཁོ་ན་ལ་བརྩེག་དགོས་པའི་ངེས་པ་མི་སྣང་ཡང་། འདིར་སྐལ་དམན་རིམ་འཇུག་གི་གང་ཟག་སྔར་རྒྱུད་མ་སྨིན་པ་སྨིན་པར་བྱེད་པའི་དབང་དུ་མཛད་ནས། ད་ལྟར་གྱི་བླ་མ་དམ་པ་རྣམས་ཀྱི་ཕྱག་བཞེས་སུ་རྡུལ་ཚོན་དང་རས་བྲིས་ཀྱི་དཀྱིལ་འཁོར་གང་རུང་དུ་དབང་བསྐུར་བར་བཞེད་དོ། །དེ་ལ་རས་བྲིས་སུ་སྨིན་བྱེད་ཀྱི་དབང་བསྐུར་རུང་བའི་ཁུངས་ནི། མི་གཡོ་བླ་མེད་ཀྱི་རྒྱུད་ལས། ཡང་ན་དཀྱིལ་འཁོར་བྲི་བྱ་བ། །རས་བྲིས་ཚུལ་དུ་བྲི་བར་བྱ། །དཀྱིལ་འཁོར་སྔར་བཞིན་བྲིས་བྱས་ནས། །དབུས་སུ་མི་གཡོ་མཐིང་ནག་བྲི། །ཞེས་སོགས་རས་བྲིས་ཀྱི་དཀྱིལ་འཁོར་བཤད་ནས། དེ་དང་འབྲེལ་བ་ཉིད་དུ་སློབ་མ་དབང་བསྐུར་གྱི་ཆོ་ག་རྒྱས་པར་གསུངས་པའི་ཕྱིར་དང་། སློབ་དཔོན་ཛ་ཡ་སེ་ནས་ཀྱང་། རྡུལ་ཚོན་བྲི་བར་མ་ནུས་ན། །དཀྱིལ་འཁོར་དང་མཉམ་རས་ལ་ནི། །ངེས་པར་བཅོམ་ལྡན་ཧེ་རུ་ཀ །ཕྱག་རྒྱའི་གཟུགས་དང་བཅས་པ་བྲི། །ཞེས་སོ། །གཉིས་པ་སྐབས་དོན་དེང་སང་གི་གང་ཟག་ཕལ་ཆེར་སྨིན་བྱེད་དུ་རུང་བའི་དཀྱིལ་འཁོར་ནི། དབང་བཞི་ལ་ལྟོས་ནས་རྒྱུ་རྟེན་གྱི་དཀྱིལ་འཁོར་བཞི་སྟེ། བུམ་དབང་ལ་ཕྱི་ལྷག་པ་གཟུགས་བརྙན་གྱི་དཀྱིལ་འཁོར་རྡུལ་ཚོན་ནམ། དེའི་ཟླས་དྲངས་པའི་ཆུ་ཚོན་རས་བྲིས་ཀྱི་དཀྱིལ་འཁོར། མཆོག་དབང་གསུམ་ལ་སྤྱིར་བདག་གི་དེ་ཁོ་ན་ཉིད་ནང་ལུས་རྩའི་དཀྱིལ་འཁོར་དང་། ཁྱད་པར་གསང་དབང་ལ་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དཀྱིལ་འཁོར། ཤེར་དབང་ལ་ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར། དབང་བཞི་པ་ལ་ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་ཀྱི་སེམས་སྙིང་པོ་ཡེ་ཤེས་རླུང་གི་དཀྱིལ་འཁོར་རོ། །དེ་ལྟར་ཡང་དྲིལ་བུ་པས། རི་མོར་གནས་པའི་ལས་དང་ནི། །ཐིག་དང་ཚོན་དགྱེའི་རིམ་པ་བསྟན། །ཅེས་དང་། གསང་འདུས་ལས། བྷ་ག་དཀྱིལ་འཁོར་ཞེས་བྱར་བཤད། །བྱང་ཆུབ་སེམས་ཀྱང་དཀྱིལ་འཁོར་ཉིད། །ལུས་ནི་དཀྱིལ་འཁོར་ཉིད་དུ་བརྗོད། །དཀྱིལ་འཁོར་གསུམ་དུ་གསུངས་པ་ཡིན། །ཞེས་དང་། གསང་བའི་དབང་པོ་ཐིག་ལེའི་རྒྱུད་ལས། ཡན་ལག་ཀུན་གྱི་སྒོམ་ལས་འདས། །རྟོག་པས་བརྟགས་པ་རྣམ་པར་སྤངས། །ཐིག་ལེ་ཡི་གེའི་ཆ་ལས་འདས། །དེ་ནི་དཀྱིལ་འཁོར་བླ་ན་མེད། །ཅེས་དང་། དགྱེས་རྡོར་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདས་པ་དཀྱིལ་འཁོར་ཉིད་དུ་བརྗོད། །ཅེས་སོ། །དེ་ལྟར་དཀྱིལ་འཁོར་བཞི་ལས། ཕྱི་མ་གསུམ་ནི་མཆོག་དབང་གསུམ་གང་དུ་བསྐུར་བའི་དཀྱིལ་འཁོར་ཡིན་ཡང་། དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་སྔོན་ལ་དཀྱིལ་འཁོར་དུ་བཅུག་ནས་དབང་བསྐུར་བར་གསུངས་པའི་གང་དུ་གཞུག་བྱའི་དཀྱིལ་འཁོར་ནི་དང་པོ་ཉིད་གཙོ་ཆེའོ། །
གཉིས་པ་གང་བསྐུར་བྱ་དབང་བཞིའི་རྣམ་བཞག་ནི། བུམ་པ་གསང་བ་ཤེས་རབ་བཞི་པའི་དབང་། །མཚན་ཉིད་ལྡན་པའི་སློབ་བུར་རིམ་པར་བསྐུར། །ཞེས་པའི་དོན་ལ་ལྔ་སྟེ། དབང་བསྐུར་བའི་དགོས་པ། དབང་གི་ངོ་བོ། སྒྲ་དོན། དབྱེ་བ། བསྐུར་ཚུལ་ལོ། །དང་པོ་ནི། རྡོ་རྗེ་ཐེག་པའི་ལམ་གྱི་སྣོད་རུང་དུ་སྒྲུབ་པའི་ཕྱིར་རོ། །གཉིས་པ་ནི། བྱ་བྱེད་ལས་གསུམ་གྱིས་ཤེས་པར་བྱ་བ་སྟེ། བྱེད་པ་པོ་རྡོ་རྗེ་སློབ་དཔོན་གྱིས། ལས་ནི་རྒྱུད་སྦྱངས་པའི་སློབ་བུ་སྣོད་ལྡན་ལ། བྱེད་པ་རྫས་སྔགས་ཏིང་འཛིན་གསུམ་འཛོམ་པའི་ཆོ་ག་ཁྱད་པར་ཅན་གྱིས། བྱ་བ་སློབ་བུའི་རྒྱུད་བྱིན་གྱིས་བརླབས་པའི་ཁྱད་པར་ལས་སེམས་རྒྱུད་ལ་གནས་པའི་རང་སྐལ་གྱི་དྲི་མ་ཅི་རིགས་དག་པའམ་ཉམས་སྨད་པར་བྱས་ཤིང་། འཐོབ་བྱ་རང་གནས་ཀྱི་ཡེ་ཤེས་ཅི་རིགས་གསོས་ཐེབས་པའི་མཐུས་ལམ་རིམ་པ་གཉིས་ཀྱི་ཡེ་ཤེས་མངོན་དུ་སྐྱེས་སམ་སྐྱེ་ངེས་ཀྱི་ནུས་རུང་དུ་སྨིན་པར་བྱས་པས་རྒྱུད་འགྱུར་བའི་ཁྱད་པར་གང་ཡིན་པའོ། །དེ་ལྟར་ཡང་ཧེ་རུ་ཀ་འདུས་པའི་རྒྱུད་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་སོ། །གལ་ཏེ་དབང་དུས་དེར་ཡེ་ཤེས་དངོས་སུ་མ་སྐྱེས་ཀྱང་། དབང་གིས་སྨིན་པའི་ཚད་དུ་འགྲོ་བའི་འཐད་པ་ནི། མདོ་སྡེ་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་སྤྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པར་བསྟན། །ཅེས་ཕར་ཕྱིན་ཐེག་པར་རྟེན་དེ་ཉིད་ལ་མཐོང་སྤང་སྤང་རུང་དང་། མཐོང་ལམ་སྐྱེ་རུང་ལ་སྨིན་པའི་ཚད་དུ་འཇོག་པ་ལྟར། སྔགས་བླ་མེད་ཀྱི་ཐེག་པ་འདིར་ཞུགས་ནས་བར་ཆད་མེད་པར་བསྒྲུབས་པའི་དབང་དུ་བྱས་ན། ཚེ་འདི་ཉིད་ལ་སྤང་བྱ་སྤང་རུང་དང་འཐོབ་བྱ་མཆོག་གི་དངོས་གྲུབ་ཐོབ་རུང་གི་ནུས་པ་ཐོབ་པའི་ཕྱིར། དེས་ན་དབང་ཐོབ་པ་ཉིད་རྒྱུད་སྨིན་པའི་ཚད་དེ། ཆུ་ལུད་དྲོད་གཤེར་འཛོམ་དུས་ཞིང་ལ་ས་བོན་ཐེབས་པ་བཞིན་ནོ། །
གསུམ་པ་ནི། ཨ་བྷི་ཥིཉྩའི་སྒྲ་ལས། མངོན་པར་གཏོར་བའམ་བླུགས་པས་ན་དབང་སྟེ། སྦྱང་བྱའི་དྲི་མ་གཏོར་ཞིང་། ལམ་སྒོམ་རུང་དང་འབྲས་བུ་འཐོབ་རུང་གི་ནུས་པ་འཇོག་པའི་ཕྱིར་ཏེ། དགྱེས་རྡོར་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་སོ། །
བཞི་པ་ལ་རྒྱུ་ལམ་འབྲས་བུའི་དབང་གསུམ་ལས། རྒྱུ་དུས་ཀྱི་དབང་ནི་དང་པོོར་བླ་མ་ལས་དངོས་སུ་བླང་དགོས་ཏེ། དེ་སྨིན་བྱེད་ཀྱི་དབང་གང་ཞིག །དེ་ཡིན་ན་ལམ་བསྒོམ་པའི་སྔོན་དུ་ཐོབ་དགོས་པའི་ཕྱིར་རོ། །ལམ་དུས་ཀྱི་དབང་ནི། ཕྱིས་བླ་མ་ལས་སམ་སྡོམ་ལྡན་རང་ཉིད་ཀྱིས་བླངས་ཀྱང་རུང་སྟེ། སྔར་རྒྱུད་སྨིན་ཟིན་པའི་དབང་གི་རྒྱུན་དེ་ཉིད་གོང་འཕེལ་དུ་བྱེད་པའི་དབང་ཡིན་པའི་ཕྱིར། འབྲས་དུས་ཀྱི་དབང་ནི། སློབ་ལམ་རྫོགས་པའི་རྒྱུན་མཐའི་དུས་སུ་བསྐུར་ཏེ། དེས་མཐར་ཐུག་གི་འབྲས་བུར་སྦྱོར་བྱེད་ཀྱི་དབང་ཡིན་པའི་ཕྱིར། རྒྱུ་དུས་ཀྱི་དབང་ལའང་བཞིར་ངེས་པ་ཡིན་ཏེ། སྦྱང་བྱ་དྲི་མ་བཞི་དང་། སྦྱོང་བྱེད་བསྐྱེད་རྫོགས་བཞི་དང་། སྦྱང་འབྲས་སྐུ་བཞིར་ངེས་པའི་ཕྱིར། གང་དག་ལམ་སྒྲོན་ལས། གསང་བ་ཤེས་རབ་དབང་བསྐུར་ནི། །ཚངས་པར་སྤྱོད་པས་བླང་མི་བྱ། །ཞེས་དགོངས་པ་ཅན་གྱི་གསུང་སྒྲ་ཇི་བཞིན་པར་བཟུང་ནས་རབ་བྱུང་ལ་དབང་དེ་དང་དེ་མི་བསྐུར་ཟེར་བ་མི་རིགས་ཏེ། རབ་བྱུང་ཐམས་ཅད་བླ་མེད་ཟབ་ལམ་གྱི་སྣོད་མ་ཡིན་པར་ཐལ་བའི་ཕྱིར་རོ། །དེའང་འདོད་ན། དུས་འཁོར་ལས་སྔགས་ཀྱི་རྟེན་མཆོག་དགེ་སློང་ཡིན་པར་གསུངས་པ་དང་འགལ་ལོ། །
ལྔ་པ་བསྐུར་ཚུལ་ལ། གང་གིས་བསྐུར་བའི་སློབ་དཔོན། གང་ལ་བསྐུར་བའི་སློབ་མ། ཇི་ལྟར་བསྐུར་བའི་ཆོ་གའོ། །དང་པོ་ནི། སྤྱི་མདོ་ལས། སློབ་དཔོན་མཚན་ཉིད་བརྟག་པ་ནི། །ཡེ་ཤེས་སྙིང་པོ་ཁྱོད་ཉོན་ཅིག །བརྟན་ཞིང་དུལ་ལ་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་རྣམས་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཞེས་སོ། །དེ་ཉིད་བཅུ་ནི། རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་འབྱེད་པའི་ཆོ་ག་དང་། གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟངས་སྟབས་འདུག་སྟངས་བཟླས་བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་ཡང་སྡུད་པའི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་ནང་དང་ཕྱིའི་དེ་ཉིད་བཅུ་གསུངས་པ་བླ་མེད་དང་རྒྱུད་སྡེ་འོག་མའི་སློབ་དཔོན་གྱིས་ཤེས་དགོས་པ་ལ་སྦྱར་རོ། །ཁྱད་པར་རྔམ་གློག་ལས། དུས་དང་གྲངས་དང་མཚན་མ་ཡི། །བསྙེན་པ་རབ་ཏུ་རྫོགས་པ་གཅེས། །ཞེས་མཚན་དུས་གྲངས་གསུམ་གང་རུང་གི་བསྙེན་པ་ཁ་སྐོང་གི་སྦྱིན་སྲེག་དང་བཅས་པ་སྔོན་དུ་སོང་བའི་སློབ་དཔོན་ལ་སློབ་བུས་གསོལ་བ་འདེབས་ན་སྣོད་བརྟགས་ཏེ་རུང་ན་གེགས་སྦྱང་ཞིང་བསྲུངས་བར་བྱས་ལ། རྒྱུད་སྦྱོང་བའི་མན་ངག་ཀྱང་བསྟན་ནས། རང་ཉིད་ལྷ་ལ་གནང་བ་ཞུ་བའི་དོན་དུ་བསྙེན་པ་ཁ་གསོ་བ་ལ་འཇུག་སྟེ། འདི་ནི་གཞན་དོན་གཉེར་བའི་སློབ་དཔོན་གྱིས་འདའ་མི་རུང་བའི་དམ་ཚིག་གོ །
གཉིས་པ་ནི། དད་བརྩོན་ཤེས་རབ་གཏོང་ཕོད་ཆེ་ཞིང་སྒོམ་སྒྲུབ་དང་དམ་ཚིག་ལ་ཡིད་རྟོན་པ་ལ་སོགས་པའི་ཡོན་ཏན་དང་ལྡན་པ་སྟེ། སྒྲུབ་དང་སྒོམ་ལ་དགའ་བ་དང་། །རྟག་ཏུ་བླ་མ་ལ་གུས་ཤིང་། །དུས་གསུམ་བླ་མ་མཆོད་བྱེད་པ། །ཡོན་ཏན་དང་ལྡན་སློབ་མ་ཡིན། །ཞེས་དང་། མན་ངག་གསང་བ་ལས། དད་བརྩོན་བརྟུལ་ཞུགས་ལྡན་པ་སྣོད། །ཅེས་སོ། །
གསུམ་པ་ནི། ཧེ་རུ་ཀ་འདུས་པའི་རྒྱུད་ལས། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །ཞེས་པ་ལྟར། ནུབ་དང་པོ་སའི་ཆོ་གགཉིས་པ་སྟ་གོན། གསུམ་པ་དངོས་གཞིའི་ཆོ་གའོ། །དང་པོ་ལ་བཞི་ལས། བརྟག་པ་ནི། སྤྱིར་གནམ་ས་བར་གསུམ་གྱི་དཔྱད་དེ་སའི་གཞི་ལ་བརྟག་པ་དང་། བྱེ་བྲག་ལྟོ་འཕྱེའི་ལྟོ་བའི་ཐད་ནས་བརྐོས་ལ་ཟུག་རྔུ་བསལ་བ་སོགས་ཀྱིས་ས་རང་གི་མཚན་ཉིད་ལ་བརྟག་པའོ། །བསླང་བ་ནི། བརྟགས་པས་རུང་བར་མཐོང་ན་སྣང་བ་དང་མི་སྣང་བའི་ས་བདག་ལ་རིན་འཇལ་ཞིང་བདེན་པ་བརྗོད་པས་བསླང་ངོ་། །སྦྱོང་བ་ནི། རྡོ་རྗེ་ལས་རིམ་ལས། སྦྱང་བ་ལས་མེ་སྔགས་ཕྱག་རྒྱ། །ཏིང་ངེ་འཛིན་གྱིས་དག་པར་འགྱུར། །ཞེས་སོ། །བཟུང་བ་ནི། དཀྱིལ་འཁོར་གྱི་འཁོར་ལོ་བསྒོམས་ཏེ། ཕྱོགས་བཞིའི་སློབ་མའི་གསོལ་གདབ་དང་། སློབ་དཔོན་གྱིས་མཁའ་ཁྱབ་ཏུ་སད་པའི་དེ་བཞིན་གཤེགས་པ་རྣམས་བསྐུལ་ཞིང་བསྡུས་ནས། ཁྲོ་བོའི་སྙེམས་པས་བགེགས་ལ་བཀའ་བསྒོ་ཞིང་འབར་བའི་སྤྱན་དང་རྡོ་རྗེའི་འགྲོས་ཀྱིས་བསྐྲད་དེ་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབས་པའོ། །བསྲུང་བ་ནི། རྔམ་གློག་ལས། སེང་ལྡེང་ཕུར་བུ་སོར་བརྒྱད་པ། །ཁྲོ་བོར་བྱིན་བརླབས་གདབ་པར་བྱ། །ཞེས་པས་ཁྲོ་བཅུའི་ཕུར་བུ་ཕྱོགས་མཚམས་བརྒྱད་དང་། སྟེང་འོག་གཉིས་ཤར་གྱི་ཤར་དང་ནུབ་ཀྱི་ནུབ་ཏུ་གདབ་པའོ། །དེ་ལ་དཀྱིལ་འཁོར་ཁང་པ་རྙིང་པར་རྡུལ་ཚོན་ལ་བརྟེན་པའི་ཕྱོགས་ལའང་ས་ཆོག་མེད་པས་ཆོག་མོད། གནས་ཁང་གསར་པར་ནི་རས་བྲིས་ལའང་ས་ཆོག་བྱས་ན་ལེགས་ཏེ། ས་ཆོག་ནི་ས་གཞི་ལ་དཀྱིལ་འཁོར་བྲི་བ་ཁོ་ནའི་ཆེད་མ་ཡིན་གྱི། ཕྱི་ནང་གི་བདུད་དང་བར་ཆད་གཞོམ་པའི་ཆེད་ཡིན་པའི་ཕྱིར། དེས་ན་རས་བྲིས་ཀྱི་ཕྱོགས་ལ་ས་ཆོག་མཐའ་གཅིག་ཏུ་མི་དགོས་པར་འདོད་པ་ལ་སྙིང་པོ་མེད་དོ། །
གཉིས་པ་ལ་ལྷ་བུམ་སློབ་མའི་སྟ་གོན་གསུམ་ལས། ལྷ་སྟ་གོན་ནི། ལྷ་གནས་སོ་སོར་དྲིའི་ཐིག་ལེ་ཚོམ་བུ་དང་བཅས་པ་བཀོད་ལ་ལྷར་བསྐྱེད་བསྟིམ་མཆོད་བསྟོད་དང་སྙན་གསན་དབབ་སྟེ་ནམ་མཁར་བཏེགས་ནས་བཞུགས་སུ་གསོལ་བའོ། །འདི་ནི་རྡུལ་ཚོན་དུ་མ་ཟད་རས་བྲིས་ཀྱི་ཕྱོགས་ལའང་འགྲུབ་ན་ལེགས་ཏེ། སྙན་གསན་དབབ་པ་ནི་དཀྱིལ་འཁོར་བྲི་བ་ཁོ་ནར་མ་ཟད་སྒྲུབ་པའི་ཕྱིར་ཡང་ཡིན་པས་སོ། །དེ་ལྟར་གྱི་ཚེ་མཎྜལ་ལྟ་བུར་ཚོམ་བུ་འགོད་པའི་ཕྱག་བཞེས་ལ་འབྲེལ་མེད་ཆེན་པོའོ་ཞེས་གསུངས་པའང་དོན་གྱི་གནད་འདི་མ་རྟོགས་པས་ནོངས་པ་ཡིན་ནོ། །བུམ་པ་སྟ་གོན་ནི། མཚན་ཉིད་དང་ལྡན་པའི་བུམ་པ་ལྷ་གྲངས་དང་མཉམ་པའམ་རྣམ་རྒྱལ་དང་ལས་བུམ་གཉིས་སུ་བསྡུས་ཀྱང་རུང་སྟེ། ཆས་སུ་བཅུག་ལ་བུམ་རྫས་དང་དྲིའི་ཆུས་བཀང་བ་བཀོད་ནས། རང་རང་གི་ལྷའམ་རྣམ་རྒྱལ་དུ་དཀྱིལ་འཁོར་ཡོངས་རྫོགས་དང་། ལས་བུམ་དུ་ལས་ཀྱི་ལྷ་གང་ཡིན་བསྐྱེད་བསྟིམ་མཆོད་བསྟོད་བཟླས་པ་བྱས་མཐར་འོད་ཞུ་བྱ་བའོ། །འདིར་བླ་མེད་སྤྱིའི་དབང་དུ་བྱས་ལ། གཞན་དུ་སྔ་འགྱུར་གྱི་མདོ་སྒྱུ་ལ་སོགས་པར་ལས་བུམ་ནི་རྡོར་དྲིལ། ཐོད་ཆུ། ཐིག་ཚོན་དང་བཅས་ཏེ་ཡན་ལག་རབ་གནས་ཀྱི་ཆོ་ག་ཟུར་དུ་མཛད་དོ། །སློབ་མ་སྟ་གོན་ནི། ཡོལ་བའི་ཕྱི་རོལ་དུ་སློབ་བུས་མཎྜལ་ཕུལ་ནས་གསོལ་བ་བཏབ་པ་ལ། སྤྲོ་བ་བསྐྱེད་ཅིང་ཉན་པར་བསྐུལ་ནས། ཇི་ལྟར་རིགས་པའི་སྡོམ་པ་བཟུང་བ་རྣམས་ལྷར་བསྐྱེད་དེ་སྐུ་གསུང་ཐུགས་བྱིན་གྱིས་བརླབས་པ་ལ་མཆོད། དེ་ནས་དངོས་གྲུབ་ཀྱི་མཚན་ལྟས་བརྟག་པའི་ཕྱིར་སོ་ཤིང་དོར་བ་དང་། རྨི་ལམ་བརྟག་པ་གཉིས་ལས། ཕྱི་མའི་སྔོན་འགྲོར་ཁྱོར་ཆུ། སྲུང་སྐུད། ཀུ་ཤའི་སྔས་སྟན་རྣམས་བྱིན་ལ། མི་ལྡོག་པའི་དོན་དུ་ཆོས་ཀྱང་བཤད་ནས། དངོས་གཞི་རྨི་ལམ་བརྟག་ལ་ངན་ན་ནངས་པར་བཟློག་པའི་ཆོ་ག་བྱ་བ་རྣམས་སོ། །
གསུམ་པ་ལ་དཀྱིལ་འཁོར་བྲི་བ། རྒྱན་དགྲམ་པ། སྒྲུབ་ཅིང་མཆོད་པ། དེར་འཇུག་པ། དབང་བསྐུར་བའོ། །དང་པོ་ལ་གཉིས་ལས། ཐིག་གིས་བྲི་བ་ནི། སྲད་བུ་རིང་ཐུང་དཀྱིལ་འཁོར་གྱི་ཉིས་འགྱུར་ལ་སྦོམ་ཕྲ་སྒོའི་ཉི་ཤུ་ཆ་དང་ལྡན་པ་གཉིས་ཡེ་ཤེས་དང་ལས་ཀྱི་ཐིག་སྐུད་དུ་བྱིན་གྱིས་བརླབས་ལ། ཐིག་གཡོག་ཡུམ་དུ་གསལ་བ་ལ་གཏད་ནས། ཐིག་ཆེན་བརྒྱད་བསྐོར་འདུག་གི་ཕྱོགས་མ་འཁྲུལ་བས་སྟེང་གི་ནམ་མཁར་ཡེ་ཐིག་གདབ། དེ་བཞིན་དུ་ས་ལ་ལས་ཐིག་ཆ་དབྱེ་བ་ཟླུམ་སྐོར་ཕྱི་ནང་དང་བཅས་པ་ཆོ་ག་བཞིན་དུ་བྲིའོ། །ཚོན་གྱིས་བྲི་བ་ནི། རྡུལ་ཚོན་དང་ལག་པ་བྱིན་གྱིས་བརླབས་ཏེ་ཐོག་མར་དབུས་ཀྱི་ཕུར་ཁུང་དགང་། དེ་ནས་དབང་ལྡན་ནས་བརྩམས་ཏེ་རྩིག་པ་སྒོ་ཚད་གཅིག་ཙམ་བྲིས་པ་འཕྱིས་སྦྲེལ་བའི་ཚེ་པྲ་བརྟག་པའི་ཕྱིར་སྦས་ཏེ། ཐིག་ཇི་ལྟར་བཏབ་པའི་གཞི་ལ་ཚོན་རིམ་པར་དགྱེེ་ཞིང་། ལྷ་གནས་རྣམས་སུ་རང་རང་གི་གདན་ལ་སོ་སོའི་སྐུ་ཕྱག་རྒྱ་ཆེན་པོ། གསུང་ཡིག་འབྲུ། ཐུགས་ཕྱག་མཚན་ནམ་རང་མདོག་དང་མཚུངས་པའི་ཐིག་ལེ་གང་རུང་། ཡང་ན་རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་པའི་རིམ་པ་ལྟར་བྲིས་འབུར་གང་རིགས་འཇོག་པའམ་ཚོན་གྱིས་བྲི་བར་བྱའོ། །གཉིས་པ་ནི། དཀྱིལ་འཁོར་རྒྱན་གྱིས་ལེགས་པར་བརྒྱན་ལ་དབང་རྫས་དང་མཆོད་རྫས་རྣམས་ཚུལ་བཞིན་དུ་བཤམ་པའོ། །གསུམ་པ་ལ། སྦྱོར་བ་དཀྱིལ་འཁོར་རབ་གནས་དང་། སྒྲུབ་མཆོད་དངོས་གཉིས་ལས། དང་པོ་ནི། རྔམ་གློག་ལས། དཀྱིལ་འཁོར་ལ་སོགས་གང་བྱས་ཀྱང་། །རབ་གནས་ཡེ་ཤེས་མི་ལྡན་ན། །ཚོགས་དང་བྲི་བའི་ནུས་པ་མེད། །ཅེས་པ་ལྟར་རྡུལ་ཚོན་དུ་མ་ཟད། རས་བྲིས་ཀྱི་ཕྱོགས་ལའང་དཀྱིལ་འཁོར་གསར་པ་ཡིན་ན་རབ་གནས་བྱ་དགོས་སོ། །གཉིས་པ་ལ། བདག་མདུན་ཐ་དད་པའི་སྒྲུབ་ཚུལ་དང་། ཐ་མི་དད་པའི་སྒྲུབ་ཚུལ་གཉིས་ལས། དང་པོ་ནི། བདག་མདུན་སོ་སོར་བསྒོམས་ནས་མི་བསྲེ་བར་ཐ་དད་དུ་སྒྲུབ་པ། གཉིས་པ་ལ། ཐོག་མར་བདག་མདུན་སོ་སོར་བསྒོམས་པ་བསྲེས་ནས་བུམ་པ་སྒྲུབ་པ་དང་། ཐོག་མ་ནས་བདག་མདུན་བུམ་གསུམ་དམ་ཚིག་གི་དཀྱིལ་འཁོར་གཅིག་གིས་བསྡུས་ཏེ་བསྒོམས་ལ། བཟླས་པའི་ཚེ་ཛཔ྄་ཁང་དབྱེ་བའི་ཆོ་གས་སོ་སོར་ཕྱེ་ནས་བཟླ་ཞིང་། ཁྱད་པར་བུམ་པ་ལ་གཟུངས་ཐག་གཏད་དེ་བཟླས་མཐར་འོད་ཞུ་བྱ་བ་ཡིན་ནོ། །ཡང་བདག་མདུན་སོ་སོར་བསྲེ་བའི་ཕྱོགས་ལ་བདུན་བསྲེས་དང་དྲུག་བསྲེས་སོགས་ཀྱི་ཐ་སྙད་འབྱུང་མོད། རང་ལུགས་སྔ་འགྱུར་བའི་ཕྱོགས་ལ་ཐོག་མ་ནས་ཐ་མི་དད་དུ་སྒོམ་པ་ལ་ཕྱག་ལེན་མཛད་པ་གཙོ་ཆེ་ཞིང་། དཀྱིལ་འཁོར་གསར་པ་ཡིན་ན་རབ་གནས་ཀྱི་ཚེའམ། རས་བྲིས་རྙིང་པ་ལྟ་བུ་རབ་གནས་མི་དགོས་པའི་ཕྱོགས་ལ་དངོས་གཞིའི་ཉིན་དང་པོའི་དུས་སུ། ཏིང་འཛིན་དམ་ཚིག་གི་དཀྱིལ་འཁོར་ལ། རང་བཞིན་ཡེ་ཤེས་ཀྱི་དཀྱིལ་འཁོར་དང་། སྔར་སྟ་གོན་གྱི་དཀྱིལ་འཁོར་ནམ་མཁར་བཏེགས་པ་གཉིས་བསྟིམ་ནས་གསུམ་བསྲེས་ཀྱི་ཐ་སྙད་མཛད་དེ། སྤྱི་མདོའི་འགྲེལ་པ་ལུང་བསྟན་མ་ལས། དེ་ནས་ལེའུ་བཅུ་གཉིས་པ་ཚོགས་ཆེན་འདུས་པའི་ལུགས་ཀྱི་དཀྱིལ་འཁོར་བྲི་བ་དང་། རྒྱན་དགྲམ་པ་དང་། སྔོན་དུ་འགྲོ་བ་བྱས་ལ། དཀྱིལ་འཁོར་གསུམ་བསྲེ་བ་དང་། མཆོད་པ་ལ་སོགས་པ་བྱའོ། །ཞེས་གསུངས་པའི་དོན་ནོ། །གང་ལྟར་ཡང་རྣལ་འབྱོར་པའི་ཏིང་ངེ་འཛིན་གྱི་སྣང་ངོ་དེར་མ་དག་པའི་སྣོད་བཅུད་ཀྱི་སྣང་བ་ནུབ་སྟེ། རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་འཆར་ཞིང་ཞེན་པས་མ་བསླད་པར་སློབ་པའི་གནད་ཀྱིས་ཏིང་ངེ་འཛིན་བསྒོམས་ལ། མཆོད་པ་དང་བསྟོད་པ་སོགས་ཅི་རིགས་པར་བྱ་བ་སྟེ། དེ་དག་ནི་དཀྱིལ་འཁོར་སྒྲུབ་ཅིང་མཆོད་པའི་ཆོ་གའོ། །བཞི་པ་ལ། སློབ་དཔོན་དང་། སློབ་མ་གཉིས་ལས། དང་པོ་ནི། ཧེ་རུ་ཀ་འདུས་པ་ལས། ནུས་དང་ལྡན་པའི་ལྟས་ཐོབ་ནས། །རྣལ་འབྱོར་བདག་ཉིད་འཇུག་པར་བྱ། །ཞེས་པས་སློབ་མ་ཇི་ལྟར་འཇུག་པའི་ཆོ་གས་བདག་ཉིད་ཞུགས་ཏེ་དབང་བླང་བའམ། ཡང་ན་གསང་སྙིང་ལས། ཀུན་བྱས་དབང་ཕྱུག་རིག་པས་འཇུག །ཅེས་པ་ལྟར་རང་སྣང་གི་དཀྱིལ་འཁོར་དུ་འཇུག་པའི་ཚུལ་གྱིས་རིག་པའི་མེ་ཏོག་དོར་བས་ཀྱང་བདག་ཉིད་འཇུག་པའི་གོ་ཆོད་དོ། །གཉིས་པ་ནི། དེ་ལས། དེ་ནས་སློབ་མ་གཞུག་པར་བྱ། །ཞེས་པའི་དོན་ལ་གཉིས་ཏེ། ཕྱི་ལྷག་པ་གཟུགས་བརྙན་གྱི་དཀྱིལ་འཁོར་དུ་གཞུག་པ་དང་། ནང་ཡེ་ཤེས་ཀྱི་དཀྱིལ་འཁོར་དུ་གཞུག་པའོ། །དང་པོ་ནི། སློབ་བུ་རྣམས་དཀྱིལ་འཁོར་ཁང་པའི་ཕྱི་རོལ་ལམ་ཡོལ་བའི་ཕྱི་རོལ་དུ་ཁྲུས་བྱས། ཕྱག་དང་མཎྜལ་སྔོན་དུ་འགྲོ་བས་གདོང་གཡོགས་ཏེ་མེ་ཏོག་གི་ཕྲེང་བ་ཐོགས་ལ་གསོལ་བ་གདབ། འདོད་དོན་དྲི་ཞིང་ལན་གསོལ། ཐུན་མོང་དང་ཁྱད་པར་གྱི་སྡོམ་པ་བྱིན་ཏེ། བདེན་གཉིས་ཟུང་འཇུག་གི་སེམས་བསྐྱེད་ཅིང་བརྟན་པར་བྱས་ནས། དཀྱིལ་འཁོར་ཁང་པའམ་ཡོལ་བའི་ནང་དུ་དྲང་བའི་ཚེ་སྔགས་རྒྱས་སྒོ་བཞི་ཕྱེ་ནས་ལས་ཀྱི་རྡོ་རྗེས་ཁྲིད་དེ་ཚད་མེད་བཞིའི་འཇུག་པས་ཞུགས་ལ་ཕྱག་བྱ་བ་རྣམས་སོ། །གཉིས་པ་ནི། སྦྱོར་བ་དམ་ལ་བཞག་པ་བཞིས་རྒྱུད་བསྡམས་ནས། དངོས་གཞི་ཡེ་ཤེས་དབབ་པས་བདེ་སྟོང་གི་ཡེ་ཤེས་དངོས་སམ་སྣེ་ཅུང་ཟད་རྙེད་པ་དེ་ཉིད་བརྟན་པར་བྱ་ཞིང་། དེ་ནས་ལྷག་པའི་ལྷ་ངོས་འཛིན་པའི་ཕྱིར་མེ་ཏོག་དོར་བ་དེ་ཉིད་མགོ་བོར་བཅིངས་པས་རིགས་ཀྱི་ལྷ་ལ་གཏད་དེ། མིག་ཕྱེ་ནས་དཀྱིལ་འཁོར་བསྟན་པར་བྱའོ། །དེ་དག་ནི་འཇུག་པའི་ཆོས་ཏེ། ལྷ་དང་སྐལ་པ་མཉམ་པར་བྱས་པའོ། །དེ་ལྟར་ཡང་མཉམ་སྦྱོར་ལས། འཁོར་ལོ་སྔོན་དུ་མཐོང་བ་ཡི། །བསོད་ནམས་རྟག་པ་གང་ཡིན་པ། །འཕྱིས་བྱས་པའང་དེ་བཞིན་ནོ། །ཞེས་སོ། །གལ་ཏེ་དམ་ཚིག་དང་སྡོམ་པ་མི་འཛིན་པ་སོགས་ཀྱིས་དབང་བསྐུར་དུ་མི་རུང་བའི་གང་ཟག་ཡིན་ནའང་དཀྱིལ་འཁོར་དུ་འཇུག་པ་ཙམ་ཞིག་བྱ་བར་གནང་སྟེ། རྩེ་མོ་ལས། གལ་ཏེ་དེ་ནི་སྣོད་མིན་ན། །དེ་ལ་གཞུག་པ་བྱིན་པར་བྱ། །ཞེས་དང་། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་གྱི་རྒྱལ་པོ་ཆེན་པོ་འདིར་ནི་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་འཇུག་ཏུ་རུང་ངོ་། །སྣོད་དང་སྣོད་མ་ཡིན་པ་ཡོངས་སུ་བརྟག་པར་མི་བྱ་སྟེ། གཞུག་པ་ཙམ་ལ་མངོན་པར་ཞེན་པས་ཡོངས་སུ་གཟུང་བར་བྱའོ། །དེ་ཅིའི་ཕྱིར་ཞེ་ན་སེམས་ཅན་ཐམས་ཅད་ཀྱིས་མཐོང་བ་ཙམ་གྱི་མོད་ལ་ཕྱིར་མི་ལྡོག་པ་ཉིད་དུ་འགྱུར་རོ། །དད་པ་མེད་པ་དང་། དགེ་བའི་རྩ་བ་མ་བསགས་པ་དང་། རྒྱུད་ཡོངས་སུ་མ་སྨིན་པ་དང་། མོས་པ་མེད་པ་མང་དུ་ཟིན་ཀྱང་མཐོང་བ་ཙམ་གྱིས་སོ། །ཞེས་གསུངས་པའི་ཕྱིར་རོ། །ལྔ་པ་ལ། བུམ་པ། གསང་བ། ཤེས་རབ་ཡེ་ཤེས། དབང་བཞི་པའོ། །དང་པོ་ནི། ཞུགས་པའི་དཀྱིལ་འཁོར་དེར་དབང་བསྐུར་བར་མཎྜལ་སྔོན་འགྲོས་གསོལ་བ་གཏབ་ལ། དཀྱིལ་འཁོར་གྱི་ཤར་ཕྱོགས་སུ་དབང་སྟེགས་ལ་སློབ་བུ་བཀོད་དེ། གང་གིས་བསྐུར་ན། སྐུ་རྡོ་རྗེ་སྤྲུལ་སྐུའི་ངོ་བོ་བླ་མ་དང་གཉིས་སུ་མེད་པའི་དཀྱིལ་འཁོར་གྱི་ལྷ་དང་། དེ་ལས་སྤྲུལ་པའི་ལྷ་དང་། རང་བཞིན་གྱི་གནས་ནས་སྤྱན་དྲངས་པའི་ལྷ་སྟེ། དེ་ཐམས་ཅད་ཀྱང་གདན་གསུམ་ཚང་བའི་རྣམ་པར་བཞུགས་པ་རྣམས་ཀྱིས་སོ། །གང་ལ་བསྐུར་ན། སློབ་མའང་དབང་རྫས་ལྟར་རིགས་ཀྱི་ལྷ་སོ་སོར་བསྐྱེད་པའམ། ཡང་ན་ཐམས་ཅད་ལ་ལྷག་པའི་ལྷ་གང་ཡིན་གྱི་རྣམ་པར་བསྐྱེད་པ་གཉིས་ལས། སྔ་འགྱུར་གྱི་དབང་རྣམས་སུ་ཕྱི་མ་ལྟར་མཛད་པ་ཤས་ཆེ། ཇི་ལྟར་བསྐུར་ན། སློབ་བུའི་ཕུང་ལྔ་དང་ཉོན་མོངས་པ་ལྔ་དག་པ་རིགས་ལྔ་ཡེ་ཤེས་ལྔར་བྱིན་གྱིས་བརླབ་པའི་ཕྱིར། དབང་སྐུར་བ་པོ་རྣམས་ཀྱིས་བུམ་པ་སོགས་དམ་ཡེ་དབྱེར་མེད་ཀྱི་རིགས་ལྔར་བསྐྱེད་པ་དབང་རྫས་སོ་སོའི་རྣམ་པར་གྱུར་པ་ཉིད་ཐོགས་ཏེ། སྔགས་རྒྱ་ཏིང་འཛིན་གསུམ་དང་ལྡན་པས། བུམ་ཆུ་སྤྱི་བོར་གཏོར་ཞིང་བླུགས་པ་དང་། དབུ་རྒྱན་རིགས་ལྔ་མགོ་ལ་བཅིངས་པ་དང་། རྡོ་རྗེ་ལག་གཡས་སུ་བྱིན་པ་གསོར་ཞིང་སྙིང་གར་གཏོད་པ་དང་། དྲིལ་བུ་གཡོན་དུ་གཏད་པ་དཀྲོལ་ཞིང་དཀུར་འཛིན་དུ་འཇུག་པ་དང་། མེ་ཏོག་ཕོག་པའི་རིགས་ཀྱི་མིང་འདོགས་པ་སྟེ། རིག་པའི་དབང་ལྔ་དང་། དྲི་བཅས་ཡེ་ཤེས་ཀྱི་ཁམས་ཐབས་རྡོ་རྗེ་སེམས་དཔའི་ངོ་བོར་བྱིན་གྱིས་བརླབ་པའི་ཕྱིར་ཐ་མལ་གྱི་སྤྱོད་པ་བརྟུལ་ནས་རྡོ་རྗེ་སེམས་དཔའི་ཚུལ་ལ་འཇུག་པ་རྡོ་རྗེ་བརྟུལ་ཞུགས་ཀྱི་དབང་ཐུན་མོང་དང་། ཁྱད་པར་སྤྱོད་པའི་བརྟུལ་ཞུགས་ཀྱི་དབང་ཡོད་པའི་ཕྱོགས་ལ་དེའང་བསྐུར་ཏེ་སློབ་མའི་དབང་དྲུག་གོ །དེ་ནས་ཐབས་བྱུང་རྒྱལ་བ་རྡོ་རྗེ་འཆང་གི་བྱིན་གྱིས་བརླབས་ཏེ་གཞན་དོན་གྱི་མཐུ་དང་ལྡན་པར་བྱ་བའི་ཕྱིར་རྡོ་རྗེ་ཐུགས། དྲིལ་བུ་གསུང་། ཕྱག་རྒྱ་སྐུའི་དམ་ཚིག་གསུམ་བྱིན་པས་ཕྱི་ནང་གི་རྡོར་དྲིལ་ཁ་སྦྱོར་ལས་བྱུང་བའི་བདེ་སྟོང་རྡོ་རྗེ་སློབ་དཔོན་གྱི་དབང་སྟེ་བུམ་དབང་གི་དངོས་གཞི་བདུན་དང་། དེའི་ཡན་ལག་ཏུ་རྗེས་སུ་གནང་བ་ལ་སོགས་པའི་བྱིན་པའོ། །དེ་ཡང་ཉོན་མོངས་པ་ལྔའི་དྲི་མ་རགས་པ་སྦྱངས་པས་ཡེ་ཤེས་ལྔ་ཐོབ་པར་མོས་ནས། ཕུང་པོ་ལྔ་གནས་གྱུར་ཐོབ་པས་འབྲས་བུ་རིགས་ལྔའི་སྤངས་རྟོགས་ཀྱི་ནུས་པ་ཁྱད་པར་ཅན་རྣམས་རིག་པའི་དབང་ལྔའི་ངོ་བོ་དང་། ཡེ་ཤེས་དང་རྡོ་རྗེ་ལུས་མི་ཤིགས་པའི་དྲི་མ་རགས་པ་སྦྱངས་ནས་གཟུང་འཛིན་དང་གཟུང་འཛིན་རིགས་གསུམ་གནས་གྱུར་ཐོབ་པས་ཐབས་རྡོ་རྗེ་སེམས་དཔའ་དང་ཐབས་བྱུང་རྡོ་རྗེ་འཆང་གི་སྤངས་རྟོགས་ཀྱི་ནུས་པ་ཁྱད་པར་ཅན་དག་བརྟུལ་ཞུགས་དང་རྡོ་རྗེ་སློབ་དཔོན་གྱི་དབང་གི་ངོ་བོའོ། །དེ་རྣམས་ཀྱི་སྐབས་ཀུན་ཏུ་བུམ་ཆུའི་བྱ་བ་རྗེས་སུ་འགྲོ་བས་བུམ་པའི་དབང་ཞེས་བྱ་ཞིང་། བླ་མེད་ཐུན་མོང་བའི་རིག་དབང་ལྔ་དང་རྡོ་རྗེ་སློབ་དཔོན་གྱི་དབང་འདི་དག །སྒྱུ་འཕྲུལ་བའི་ལུགས་ཀྱི་ཕན་དབང་དང་ནུས་དབང་ཕྱི་མ་གསུམ་དང་རིམ་པར་དོད་མཚུངས་པ་ཙམ་ཡིན་མོད། འོན་ཀྱང་དེ་དང་དེའི་དོད་ཐུབ་པ་ནི་མ་ཡིན་ཏེ། བླ་མེད་ཐུན་མོང་བའི་ལུགས་འདིའི་བུམ་དབང་གི་སྦྱང་བྱ་ཕུང་ལྔ་དང་ཉོན་མོངས་ལྔ་སོགས་ཐེག་པ་སྤྱི་ལ་གྲགས་པ་ལྟར་ཡིན་ལ། སྒྱུ་འཕྲུལ་བའི་ལུགས་ནི་ལམ་རིམ་ལས། གནས་རྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །ཞེས་ཕན་ནུས་གཉིས་ཀྱང་ཟབ་དབང་ལྟར་རླུང་སེམས་རྩ་དང་ཐིག་ལེ་ལ་བརྟེན་པའི་ལུས་དཀྱིལ་ཟབ་མོ་དང་འབྲེལ་བས་ཁྱད་པར་ཆེའོ། །གཉིས་པ་གསང་དབང་ནི། ནམ་ཕྱེད་ཀྱི་དུས་སུ་དཀྱིལ་འཁོར་གྱི་ལྷོར་མཎྜལ་དང་རིག་མ་མཚན་ལྡན་ཕུལ་ལ་གསོལ་བ་བཏབ་ནས། གསུང་རྡོ་རྗེ་ལོངས་སྤྱོད་རྫོགས་སྐུའི་ངོ་བོ་བླ་མ་ཡབ་ཡུམ་གྱི་ལུས་དང་ཡི་གེ་བྷ་གའི་དཀྱིལ་འཁོར་དུ་སངས་རྒྱས་ཐམས་ཅད་སྤྱན་དྲངས་ཏེ་བཅུག་པ་རྗེས་ཆགས་ཀྱིས་ཞུ་བ་རྡོ་རྗེ་ནོར་བུ་ནས་བྱོན་པའི་བདུད་རྩི་བྱང་ཆུབ་ཀྱི་སེམས་དཀར་དམར་ནི་སྐལ་མེད་ལ་བསྟན་དུ་མི་རུང་བས་གསང་བ་ཞེས་བྱ་ལ། དེ་ཉིད་སློབ་བུའི་ལྕེ་ཐོག་ཏུ་བྱིན་པ་ནི་དབང་བསྐུར་བ་སྟེ། སྟེར་ལུགས་ཡབ་ཡུམ་གྱི་མཁའ་གསང་ལས་དངོས་སུ་ལེན་པ་ཐབས་དང་ཤེས་རབ་ཀྱི་གསང་དབང་། ཡུམ་གྱི་མཁར་ལྷུངས་པ་ཡབ་ཀྱི་ལྕེས་བླངས་པ་ལས་སམ། མི་ནུས་ན་མེ་ལོང་ཡུ་བ་ཅན་གྱིས་བླངས་ཏེ་བདུད་རྩི་དང་སྦྱར་ནས་སྟེར་བ་ནི་གཉིས་མེད་ཀྱི་གསང་དབང་ཏེ། དེ་མགྲིན་པ་ནས་འཕེལ་བས་ལུས་གང་། ཆན་ལ་ཕབས་ཀྱིས་ཐེབས་པ་ལྟར་བྱིན་གྱིས་བརླབས་པས། ངག་མི་ཤིགས་པའི་དྲི་མ་རགས་པ་སྦྱངས། གསུང་རྡོ་རྗེའི་སྤངས་རྟོགས་ཀྱི་ནུས་པ་ཁྱད་པར་ཅན་བཞག་སྟེ། སེམས་གསལ་སྟོང་བརྗོད་བྲལ་གྱི་ཡེ་ཤེས་སུ་རྟོགས་པས་དབྱིབས་ལ་ལྷར་ཞེན་གྱི་རྟོག་པ་དང་བྲལ་བ་ནི་གསང་དབང་ཐོབ་པའོ། །གསུམ་པ་ཤེས་རབ་ཡེ་ཤེས་ཀྱི་དབང་ནི། ཐོ་རངས་དཀྱིལ་འཁོར་གྱི་ནུབ་ཕྱོགས་སུ་མཎྜལ་དང་གསོལ་བ་བཏབ་ནས། བླ་མ་དང་ལྷ་གཉིས་སུ་མེད་པ་ཆོས་ཀྱི་སྐུ་ཐུགས་རྡོ་རྗེ་ཡབ་ཡུམ་ཁ་སྦྱོར་གྱི་ངོ་བོར་བཞུགས་པ་ལས། ཀུན་རྫོབ་བྱང་སེམས་ཀྱི་དཀྱིལ་འཁོར་དུ་རྟེན་ཤེས་རབ་མ་གཏད་ནས། སངས་རྒྱས་ཐམས་ཅད་སློབ་མ་ཡབ་ཡུམ་ལ་བཅུག་སྟེ་སྙོམས་པར་ཞུགས་པས་བརྟེན་པ་ཁམས་ཞུ་བའི་བྱང་ཆུབ་ཀྱི་སེམས་རྒྱུན་ཡས་འབབ་དགའ་བཞིའི་འགྲོས་ཀྱིས་ཕྱིན་པ་རྡོ་རྗེ་ནོར་བུའི་བུམ་པར་འཛག་མེད་དུ་བཟུང་སྟེ་ཞུ་བདེ་ཉམས་སུ་མྱོང་བའི་རྐྱེན་ལས་སྣང་མཆེད་ཐོབ་གསུམ་གྱི་རིམ་པས་རང་བཞིན་ལྷན་ཅིག་སྐྱེས་པའི་འོད་གསལ་བདེ་བ་ཆེན་པོའི་ངོར་ཤར་བས་ཡིད་བྱིན་གྱིས་བརླབས་ཏེ། ཐུགས་རྡོ་རྗེའི་སྤངས་རྟོགས་ཀྱི་ནུས་པ་ཁྱད་པར་ཅན་ཐོབ་པ་ནི་དབང་གི་ངོ་བོ་སྟེ། རྟེན་ཤེས་རབ་མ་ལས་བརྟེན་པ་དགའ་བཞིའི་ཡེ་ཤེས་བསྐྱེད་པས་ན་ཤེས་རབ་ཡེ་ཤེས་ཀྱི་དབང་ཞེས་བྱའོ། །དབང་བཞི་པ་ཚིག་དབང་རིན་པོ་ཆེ་ནི། བླ་མ་ངོ་བོ་ཉིད་སྐུ་ཡེ་ཤེས་རྡོ་རྗེའི་བདག་ཉིད་ཅན་ལས་དོན་དམ་བྱང་སེམས་ཀྱི་དཀྱིལ་འཁོར་དུ་བསྐུར་ཏེ། དེའང་སྔར་དབང་གསུམ་པའི་དུས་ཀྱི་ཡས་བབས་ཀྱི་དགའ་བཞི་རྫོགས་ནས་ཐབས་ཀྱིས་ལྡོག་པ་ལས་མས་བརྟན་གྱི་དགའ་བཞིའི་མཐར་ཉམས་སུ་མྱོང་བའི་ཡེ་ཤེས་དང་། རང་སེམས་ལྷན་ཅིག་སྐྱེས་པའི་ཡེ་ཤེས་རོ་གཅིག་ཏུ་ཚིག་ཙམ་གྱི་བརྡས་ངོ་སྤྲད་པ་ཚིག་གི་བཞི་པ། བསམ་གྱིས་མི་ཁྱབ་པའི་ལྷན་ཅིག་སྐྱེས་པའི་དེ་ཁོ་ན་ཉིད་སྐུ་དང་ཡེ་ཤེས་ཟུང་དུ་འཇུག་པ་དབྱེར་མེད་བདེ་བ་ཆེན་པོ་མཆོག་གི་ཏིང་ངེ་འཛིན་རྒྱུད་ལ་སྐྱེས་པ་དོན་གྱི་བཞི་པ། ཡེ་ཤེས་ངོས་མ་ཟིན་ན་ལས་རྒྱ་ལ་བརྟེན་ནས་ཉམས་མྱོང་འདྲེན་པ་བརྟེན་ཅན་གྱི་བཞི་པ། དེ་ལམ་དུ་གོམས་པར་བྱེད་པ་ལམ་གྱི་བཞི་པ། དགའ་བཞིའི་འགྲོས་རེ་རེ་ལའང་དགའ་ཆུང་བཞི་བཞིར་ཕྱེ་བའི་བཅུ་དྲུག་གིབཞིས་ཚོགས་ལམ། དེ་ནས་རེ་རེས་སྦྱོར་མཐོང་དང་། དགུས་སྒོམ་ལམ། ཐ་མ་བཅུ་དྲུག་པ་མི་སློབ་ལམ་སྟེ། ཡས་བབས་རྒྱུ་དང་མས་བརྟན་འབྲས་བུའི་ས་ལམ་དང་སྦྱར་ཏེ། མས་བརྟན་གྱི་དགའ་བ་བཅུ་དྲུག་པའི་མཐར་ཁུ་རྡུལ་སྟེང་འོག་ཏུ་ཐིམ་པའི་སྐད་ཅིག་ལ་རླུང་འགགས་པས། དེ་གསུམ་གྱི་འགྱུར་བ་མྱོང་བའི་ཤེས་རིག་ཀྱང་རྒྱུན་ཆད་དེ། སྐུ་བཞི་མངོན་དུ་བྱེད་པ་ནི་འབྲས་བུའི་བཞི་པའོ། །དེ་ལྟར་ཡང་རྡོ་རྗེ་ལས་རིམ་ལས། གནས་ནི་ཡེ་ཤེས་བཅུ་དྲུག་པོ། །ཚོགས་སྦྱོར་ལ་སོགས་དང་པོ་ནས། །མཐར་ཕྱིན་སངས་རྒྱས་ས་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་གཉིས་པ་རབ་དགའ་སོགས། །ཕ་རོལ་ཕྱིན་དང་ས་མཚན་ཉིད། །མཚུངས་ཕྱིར་རྫོགས་པར་བཤད་པ་ཡིན། །ཞེས་སོ། །
གསུམ་པ་དེ་ལྟར་བསྐུར་བའི་བྲལ་ཐོབ་ཀྱི་ཡོན་ཏན་ནི། སད་རྨི་གཉིད་འཐུག་སྙོམས་འཇུག་གནས་སྐབས་བཞིས། །བསྐྱེད་པའི་སྒོ་གསུམ་ཤེས་བྱའི་དྲི་མ་སྦྱང་། །བསྐྱེད་རིམ་གཏུམ་མོ་དཔེ་དོན་ཡེ་ཤེས་གཉིས། །སྒོམ་དང་སྐུ་བཞི་ཐོབ་པའི་ནུས་རུང་བྱ། །ཞེས་པ་སྟེ། དབང་བཞི་བསྐུར་བས་དྲི་མ་གང་དག་ན། བུམ་དབང་གིས་གནས་སྐབས་བཞི་ལས། སད་པའི་གནས་སྐབས་དང་། དེའི་སྣང་བ་ལུས་ཕུང་སོགས་རགས་པའི་ཆོས་ཡིན་པས་སྒོ་གསུམ་ལས་ལུས་ཀྱི་ཐིག་ལེའི་སྒྲིབ་པ་དག་ཅིང་། བདུད་བཞི་ལས་ཕུང་པོའི་བདུད་འཇོམས་པར་བྱེད་དོ། །དེ་བཞིན་དུ་གསང་དབང་གིས་རྨི་ལམ་གྱི་གནས་སྐབས་དང་། དེ་ཡིད་ངོར་སྣང་བས་ཕྲ་ཞིང་། དེ་ཉིད་ཐིག་ལེ་རླུང་གིས་བསྐྱོད་པ་ལས་སྣང་བའམ་བརྗོད་འདོད་ཀྱི་རྟོག་པ་དང་འབྲེལ་བས་ངག་གི་ཐིག་ལེ་དང་ཉོན་མོངས་པའི་བདུད། ཤེར་དབང་གིས་གཉིད་འཐུག་གི་གནས་སྐབས་དང་། དེ་ཚོགས་དྲུག་རགས་པ་འགགས་པའི་རྣམ་རྟོག་ཡིན་པས་ཡིད་ཀྱི་ཐིག་ལེ་དང་། འཆི་བདག་གི་བདུད། དབང་བཞི་པས་སྙོམས་འཇུག་གི་གནས་སྐབས་དང་། དེ་འཛག་བདེའི་སྲེད་པ་ཡིན་པས། ཤེས་སྒྲིབ་ཆེས་ཕྲ་བ་འཕོ་བའི་ཐིག་ལེའི་སྒྲིབ་པ་དང་ལྷའི་བུའི་བདུད་དེ། དེ་དང་དེ་དག་ཅིང་འཇོམས་པར་བྱེད་དོ། །གཞན་ཡང་གསེར་འོད་དམ་པ་ལས། ཉོན་མོངས་པའིི་སྒྲིབ་པ་དག་པས་ལོངས་སྤྱོད་རྫོགས་པའི་སྐུར་སྣང་བར་འགྱུར་རོ། །ལས་ཀྱི་སྒྲིབ་པ་རྣམ་པར་དག་པས་སྤྲུལ་པའི་སྐུར་སྣང་བར་འགྱུར་རོ། །ཡེ་ཤེས་ཀྱི་སྒྲིབ་པ་རྣམ་པར་དག་པས་ཆོས་ཀྱི་སྐུར་སྣང་བར་འགྱུར་རོ། །ཞེས་གསུངས་ཏེ། འཐོབ་བྱ་སྐུ་བཞིའི་ངོ་བོའི་སྒོ་ནས་དབྱེར་མེད་ཀྱང་། དག་པའི་ལྡོག་ཆ་ནས་དེ་དང་དེར་དག་པ་ལྟར་ན། བུམ་དབང་གིས་ལས་སྒྲིབ། གསང་དབང་གིས་ཉོན་སྒྲིབ། ཡེ་ཤེས་ཏེ་ཤེས་བྱའི་སྒྲིབ་པ་ལ་ཕྲ་རགས་གཉིས་ལས། ཤེར་དབང་གིས་ཤེས་སྒྲིབ་རགས་པ། དབང་བཞི་པས་ཤེས་སྒྲིབ་ཕྲ་བ་འཕོ་བའི་བག་ཆགས་ཀྱི་སྒྲིབ་པ་རྣམས་གཙོ་བོར་སྦྱོང་བར་བྱེད་ཅིང་། དེར་མ་ཟད་དབང་དང་པོ་གསུམ་གྱིས་སྒོ་གསུམ་སོ་སོར་སྦྱངས་ནས། བཞི་པས་ཆ་མཉམ་སྦྱོང་བར་བཤད་པའང་སྣང་སྟེ། དེའི་ཆ་མཉམ་ནི་ཁུ་རྡུལ་རླུང་གསུམ་ལས་འཁོར་བའི་ལུས་ངག་ཡིད་གསུམ་དང་བདེ་སྡུག་བཏང་སྙོམས་རྣམས་འཆར་བས་དཀར་དམར་རླུང་ལ་ཆ་མཉམ་དུ་འཇུག་པའི་སེམས་དང་བཅས་པར་འཕོ་བའི་བག་ཆགས་ལ་འཇོག་དགོས་པས་གནད་གཅིག་གོ །ལམ་གང་བསྒོམ་པ་ལ་དབང་ན། བུམ་དབང་གིས་ཕྱི་ནང་གི་བསྐྱེད་རིམ་ལས་ཚོགས་དང་བཅས་པ་བཤད་སྒྲུབ་ཉན་པ་ལ་དབང་ཞིང་ཡུལ་སྣང་སྟོང་ཟུང་འཇུག་ཏུ་འཆར་བའི་ཉམས་སྐྱེ་བར་བྱེད། དེ་བཞིན་དུ་གསང་དབང་གིས་རང་བྱིན་བརླབས་པ་གཏུམ་མོ་དང་སྒྱུ་ལུས་བསྒོམ་པ་ལ་དབང་ཞིང་སེམས་གསལ་སྟོང་གི་ཉམས་སྐྱེ། ཤེར་དབང་གིས་ལས་དང་ཡེ་ཤེས་ཀྱི་ཕྱག་རྒྱ་ལ་བརྟེན་པའི་དཔེའི་ཡེ་ཤེས་བསྒོམ་པ་ལ་དབང་ཞིང་ཞུ་བདེས་ལུས་བདེ་སྟོང་གི་ཉམས་སྐྱེ། དབང་བཞི་པས་དོན་གྱི་ཡེ་ཤེས་ཕྱག་རྫོགས་བསྒོམ་པ་ལ་དབང་ཞིང་། ཆོས་ཐམས་ཅད་ཀྱི་རང་བཞིན་དོན་དམ་འོད་གསལ་མཆོག་ཏུ་མི་འགྱུར་བའི་བདེ་བ་ཆེན་པོ་རང་རིག་གི་ངོ་བོར་པྲ་ཕབ་པ་ལྟར་མཐོང་བའི་ཉམས་སྐྱེ་བར་འགྱུར་རོ། །འབྲས་བུ་གང་ཐོབ་ན། དབང་གི་ས་བོན་རྒྱུད་ལ་ཐེབས་པ་དེ་ལམ་རིམ་པ་གཉིས་ཀྱིས་བསྐྱངས་པས་དངོས་བརྒྱུད་ཅི་རིགས་ཀྱི་སྒོ་ནས་མཐར་ཐུག་གི་འབྲས་བུ་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་སྐུ་བཞི་ཐོབ་པའི་ནུས་རུང་དུ་བྱས་པ་ཡིན་ནོ། །
བཞི་པ་སྔགས་སྡོམ་ཐོབ་མཚམས་ངོས་བཟུང་བ་ནི། དང་པོ་གནས་གསུམ་རྡོ་རྗེ་གསུམ་བསྐྱེད་ནས། །ཐ་མ་དབང་བཞི་ཡོངས་སུ་རྫོགས་པའི་ཚེ། །རིག་འཛིན་སྡོམ་པ་ཐོབ་ཅིང་། ཞེས་པ་སྟེ། སྡོམ་པ་སྐྱེ་བའི་དང་པོ་ནི། སློབ་མའི་ལུས་ངག་ཡིད་གསུམ་རྡོ་རྗེ་གསུམ་དུ་བྱིན་གྱིས་བརླབས་པའི་དུས་ནས་མགོ་བརྩམས་ཏེ། སྐྱེས་ཟིན་པའི་ཐ་ནི་རྒྱུད་སྡེ་བཞི་རང་རང་གི་དབང་གི་མཐའ་རྟེན་རྫོགས་ཟིན་པའི་དུས་དེ་ཁོ་ན་སྟེ། རྒྱུད་སྡེ་འོག་མ་གསུམ་ལ་རང་གི་དབང་དངོས་གཞིའི་ཆོ་ག་གྲུབ་པ་ན་རང་རང་ལ་ལྟོས་པའི་སློབ་དཔོན་དུ་དབང་བསྐུར་བ་རྫོགས་པས་དེ་དག་གི་མཐའ་དང་། བླ་མེད་ལ་བུམ་དབང་གི་མཐར་བསྐྱེད་རིམ་གྱི་སྔགས་སྡོམ་སོགས་དབང་བཞི་ཡོངས་སུ་རྫོགས་པར་ཐོབ་པའི་ཚེ་བསྐྱེད་རྫོགས་རང་རང་ལ་ལྟོས་པའི་སྡོམ་པ་མཐའ་དག་ཐོབ་ཟིན་པ་ཡིན་ཏེ། དེའི་ཚེ་དེ་འདྲ་བ་དེ་དབང་རང་རང་ལ་ལྟོས་པའི་རྩ་ལྟུང་དེ་དང་དེ་བསྐྱེད་པའི་རྟེན་དུ་རུང་བའི་ཕྱིར་རོ། །གང་དག་བླ་མེད་ཀྱི་སྔགས་སྡོམ་ཡོངས་རྫོགས་བུམ་དབང་དངོས་གཞིའི་དུས་སུ་ཐོབ་ཟིན་པས། དབང་གོང་མ་གསུམ་ལ་དམ་ཚིག་གསར་ཐོབ་རེ་རེ་ལས་སྡོམ་པ་གསར་ཐོབ་མེད་དོ་ཞེས་གསུངས་པ་ནི། རབ་དབྱེ་ལས། བླ་མ་བཙལ་ལ་དབང་བཞི་བླང་། །དེ་ཡིས་སྡོམ་པ་གསུམ་ལྡན་འགྱུར། །ཞེས་པ་དང་འགལ་བ་སྤང་དཀའོ། །
ལྔ་པ་དམ་ཚིག་ཁས་བླང་བ་སོགས་རྗེས་ཀྱི་བྱ་བ་ནི། དེ་ཡི་རྗེས། །ཁས་བླངས་སྡོམ་དང་དམ་ཚིག་བསླབ་ལ་འབད། །ཅེས་པ་སྟེ། དེ་ལྟར་སྣོད་དང་འཚམས་པར་དབང་ཇི་ཙམ་ཞིག་བསྐུར་བ་དེ་དང་དེས་ཆོ་ག་རྫོགས་པའི་མཐའ་རྟེན་དུ་དམ་ཚིག་རྒྱས་པར་བསྒྲགས་ནས། བསྡུས་ཏེ་ཁས་བླང་བས་བཟུང་བ་དང་། བཟུང་ནས་ཀྱང་སྡོམ་པ་དང་དམ་ཚིག་གི་བླང་དོར་རྣམས་ཚུལ་བཞིན་དུ་བསླབ་པ་ལ་འབད་པར་བྱ་ཞིང་། གཞན་ཡང་ཡོན་སྟོབ་པ་དང་དཀྱིལ་འཁོར་གཤེགས་བསྡུ་སོགས་རྗེས་ཀྱི་བྱ་བ་རྣམས་སོ་སོའི་ཆོ་ག་བཞིན་དུ་བྱ་བ་ཡིན་ནོ། །
བཞི་པ་ཐོབ་པ་མི་ཉམས་པར་བསྲུང་བ་ལ། བསྟན་བཤད་བསྡུ་གསུམ་ལས། དང་པོ་མདོར་བསྟན་ནི། བར་དུ་མི་ཉམས་བསྲུང་བའི་ཐབས་བཤད་པ། །ཞེས་པས་སྔགས་སྡོམ་དང་པོར་ཐོབ་པ་ཙམ་གྱིས་མི་ཆོག་གི །དེ་བར་དུ་མི་ཉམས་པར་བསྲུང་བའི་ལྷག་བསམ་ཁྱད་པར་ཅན་གྱིས་བསྲུང་བར་བྱ་དགོས་ཏེ། དམ་ཚིག་དང་སྡོམ་པ་ནི་སྔགས་ཀྱི་བསླབ་པ་ཐམས་ཅད་ཀྱི་གཞི་རྟེན་ཡིན་པས། དེ་ཉམས་ན་བསླབ་པ་ཐམས་ཅད་དོན་མེད་པར་འགྱུར་བའི་ཕྱིར། དཔེར་ན་སྲོག་གི་དབང་པོ་འགགས་ན་དབང་པོ་ཐམས་ཅད་འགགས་པར་འགྱུར་བ་བཞིན་ནོ། །དེ་བས་ན་གསང་སྙིང་ལས། སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །ཞེས་གསུངས་སོ། །དེ་ཡང་བསྲུང་ཐབས་ཤེས་པ་ལ་རག་ལས་པས་འདིར་དེ་བཤད་པར་བྱའོ། །
གཉིས་པ་རྒྱས་བཤད་ལ་ལྔ་སྟེ། བརྟུལ་ཞུགས་ཉི་ཤུ་རྩ་ལྔ། རིགས་ལྔའི་སྡོམ་པ། རྩ་བའི་ལྟུང་བ་བཅུ་བཞི། ཡན་ལག་སྦོམ་པོའི་ལྟུང་བ། ཁྱད་པར་སྔ་འགྱུར་རྫོགས་པ་ཆེན་པོའི་ལུགས་བཤད་པའོ། །དང་པོ་ལ་བསྟན་བཤད་གཉིས་ལས། མདོར་བསྟན་ནི། ཐོག་མའི་བརྟུལ་ཞུགས་དུས་ཀྱི་འཁོར་ལོ་ལས། །ཞེས་པ་སྟེ། ཐོག་མར་དམ་ཚིག་དང་སྡོམ་པ་ཐམས་ཅད་ཀྱི་གཞི་རྟེན་དུ་གྱུར་པ་རྡོ་རྗེ་སེམས་དཔའི་དམ་ཚིག་གི་ཡན་ལག་བརྟུལ་ཞུགས་ཉེར་ལྔ་པོ་འདི་ནི་དུས་ཀྱི་འཁོར་ལོ་ལས་གསུངས་ཏེ། འདི་སྐད་དུ། འཚེ་དང་མི་བདེན་གཞན་གྱི་བུད་མེད་སྤང་བར་བྱ། །ཞེས་པ་ནས། དེ་ལྟར་སྲིད་པའི་བདག་པོ་དག་གི་བརྟུལ་ཞུགས་ཉི་ཤུ་ལྔ་། །ཞེས་པའི་བར་རོ། །འདི་དག་ཡེ་ཤེས་ཕབ་པའི་རྗེས་སུ་སྟེར་བ་ནི་དབང་དངོས་གཞི་མ་ཐོབ་ནའང་ཡེ་ཤེས་འབེབས་པའི་རིམ་པ་དངོས་དང་མོས་སྒོམ་གང་ཐོབ་ཀྱང་བསྲུང་དགོས་པའི་དོན་ནོ། །
རྒྱས་བཤད་ལ་ལྔ་ཚན་ལྔ་ལས། དང་པོ་སྡིག་པ་ལྔ་སྤང་པ་ནི། གསོད་རྫུན་རྐུ་དང་འདོད་ལོག་ཆང་འཐུང་བ། །སྤང་བྱ་བསླབ་པའི་གཞི་ལྔ་སྤང་ཞེས་གསུངས། །ཞེས་པ་སྟེ། སྲོག་ཆགས་ཕྲ་མོ་ཡན་ཆད་ཀྱི་སྲོག་གཅོད་པ་ལྟ་ཅི་སྨོས་སྐད་ཅིག་ཙམ་མནར་སེམས་པས་འཚེ་བར་བྱེད་པ་དང་། རང་འདོད་ཀྱིས་གཞན་བསླུ་བའི་བསམ་པས་རྫུན་སྨྲ་བ་དང་། དུད་འགྲོ་ཡན་ཆད་ཀྱིས་བདག་ཏུ་བཟུང་བའི་གཞན་ནོར་རྐུ་བ་དང་། གཞན་གྱིས་བདག་ཏུ་བཟུང་བའི་བུད་མེད་བསྟེན་པ་སོགས་འདོད་པས་ལོག་པར་གཡེམ་པ་དང་། ཉེས་པ་བསྐྱེད་པའི་གཞི་ཆང་གི་བཏུང་བས་མྱོས་པར་བྱེད་པ་དང་ལྔ་ནི་འཁོར་བའི་གནས་སུ་འཆིང་བྱེད་དམ་པོ་རྡོ་རྗེའི་ཞགས་པ་དང་མཚུངས་ཤིང་རང་གཞན་གྱི་བདེ་དགེ་ཐམས་ཅད་འཇོམས་པར་བྱེད་པས་ན་དེ་རྣམས་ཕྱོགས་མཐུན་ཆར་གཏོགས་དང་བཅས་པ་སྤང་བར་བྱ་དགོས་ལ། དེ་ལྔ་བསྲུང་ནུས་ཤིང་འདོད་ན་བརྟུལ་ཞུགས་ལྷག་མ་ཉི་ཤུ་སྦྱིན་པར་བྱ་བ་ཡིན་པས་བསླབ་པའི་གཞི་ལྔ་ཞེས་གསུངས་སོ། །གཉིས་པ་ཉེ་བའི་སྡིག་པ་ལྔ་སྤང་བ་ནི། ཆོ་ལོ་ཁ་ན་མ་ཐོའི་ཟས་ཟ་དང་། །ངན་ཚིག་འབྱུང་པོ་ལྷ་མིན་ཆོས་བསླབ་པ། །རྣམ་པ་ལྔ་ནི་བྱ་བ་མིན་ལྔ་འོ། །ཞེས་པ་སྟེ། ཤོ་དང་མིག་མང་སོགས་ཆོ་ལོ་རྩེ་བ་དང་། བཟའ་བ་དང་རིན་གྱི་དོན་དུ་བསད་པའི་ཤ་སོགས་ཁ་ན་མ་ཐོ་བ་ཆོས་དང་མི་མཐུན་པའི་ཟས་ཟ་བས་འཚོ་བ་དང་། ཉོན་མོངས་པ་ཅན་གྱིས་ཀུན་ནས་བསླངས་པའི་དམག་འཁྲུག་དང་ཚོང་གི་གཏམ་སོགས་ངག་འཁྱལ་སྣ་ཚོགས་པའི་ཚིག་ངན་སྨྲ་བ་དང་། རིག་བྱེད་ལས་བརྗོད་པའི་ཕ་མེས་ཀྱི་མཚུན་གསོལ་བ་སོགས་ཀྱིས་སྤྱོད་པ་དང་གྲོལ་བར་ལྟ་བ་དང་ཕྱུགས་ཀྱིས་མཆོད་སྦྱིིན་བྱ་བ་འབྱུང་པོའི་ཆོས་དང་། རང་གིས་བསད་པའི་ཤ་མ་གཏོགས་ལས་ཀྱིས་ཤི་བའི་ཤ་མི་ཟ་ཞིང་གོས་དཀར་པོ་དང་བྱ་གག་གི་བཏུང་བ་འབའ་ཞིག་བསྟེན་པ་སོགས་ལྷ་མིན་གྱི་ཆོས་ལུགས་ཀླ་ཀློའི་ཆོས་ཏེ། བྱ་བ་ངན་པ་དེ་རྣམས་ཀྱིས་དུས་འདས་ན་དགེ་བའི་ཕྱོགས་ཉམས་པར་བྱེད་པའི་ཕྱིར། ཉེ་བའི་སྡིག་པ་ལྔ་ཞེས་གྲགས་པ་བྱ་བར་རིགས་པ་མ་ཡིན་པས་དེ་རྣམས་མི་བྱའོ། །གསུམ་པ་གསོད་པ་ལྔ་སྤང་བ་ནི། བ་ལང་བྱིས་པ་སྐྱེས་པ་བུད་མེད་དང་། །མཆོད་རྟེན་བསྣུན་པ་གསོད་པ་ལྔ་རུ་གྲགས། །ཞེས་པ་སྟེ། རྐང་པ་དང་པོའི་གསོད་པ་བཞི་པོ་འདི་རྣམས་སྔར་གྱི་འཚེ་བའི་ནང་དུ་འདུ་ནའང་འདིར་ལོགས་སུ་དགར་ཏེ་འཆད་པ་ནི། མུ་སྟེགས་བྱེད་མང་པོ་ཞིག་སྤྱིར་འཚེ་བ་སྡིག་པ་ཡིན་ཡང་དགེ་བར་འདོད་པའི་སྐབས་ཡོད་པ་དགག་པའི་ཕྱིར་ཏེ། ཇི་ལྟར་ན། མཐོ་རིས་འདོད་པའི་མཆོད་སྦྱིན་གྱི་དོན་དུ་བ་ལང་གསོད་པ་དང་། མ་མོ་མཆོད་པ་ལ་བྱིས་པ་གསོད་པ། མིའི་མཆོད་སྦྱིན་སྐྱེས་པའི་དོན་དུ་སྐྱེས་པ་དང་། བུད་མེད་ཀྱི་དོན་དུ་བུད་མེད་གསོད་པ་དང་། ལྷ་མིའི་བླ་མ་གསོད་པ་ཞེས་སངས་རྒྱས་སྲས་བཅས་ཀྱི་སྐུ་གཟུགས་དང་བཀའི་གླེགས་བམ་དང་མཆོད་རྟེན་རྣམས་བསྣུན་ཏེ་བཤིག་པ་ལ་གསོད་པའི་སྒྲས་བཏགས་པ་འདི་ནི་ཀླ་ཀློ་རྣམས་ཆོས་སུ་འདོད་པ་དགག་པའི་དོན་དུ་མ་ཟད་ཤིན་ཏུ་སྡིག་ཆེ་བས་སྨོས་པ་སྟེ། དེ་ལྟར་གསོད་པ་ལྔ་ལས་ལྡོག་པར་བྱའོ། །བཞི་པ་འཁུ་བ་ལྔ་སྤང་བ་ནི། དགེ་གྲོགས་རྗེ་བོ་སངས་རྒྱས་དགེ་འདུན་དང་། །བླ་མར་ཁོང་ཁྲོ་སྒོམ་རྣམས་འཁུ་བ་ལྔ། །ཞེས་པ་སྟེ། ཆོས་དང་འཇིག་རྟེན་གང་རུང་གིས་སྦྲེལ་བའི་མཉམ་པོར་འགྲོགས་པའི་དགེ་གྲོགས་དང་། ལུགས་གཉིས་ཀྱིས་བཀུར་བར་འོས་པའི་རྗེ་བོ་རྒན་རབས་སོགས་དང་། ལྷ་མིའི་བླ་མ་སངས་རྒྱས་དང་། དགེ་སློང་གི་དགེ་འདུན་དང་། ཡིད་བརྟན་པར་འོས་པའི་ཡུལ་མཁན་སློབ་སོགས་བླ་མ་སྟེ། ཡུལ་ལྔ་པོ་དེ་ལ་ཁོང་ཁྲོ་སྒོམ་ཞིང་འཁང་པ་ནི་འཁུ་བ་ལྔ་སྟེ་སྤང་བར་བྱའོ། །དེ་ལྟར་སྡིག་པ་དང་། ཉེ་བའི་སྡིག་པ་དང་། གསོད་པ་དང་། འཁུ་བ་ལྔ་ལྔ་སྟེ་ཉི་ཤུ་པོ་འདི་རྣམས་ནི་འཕྲལ་སྤྱོད་ལམ་གྱི་སྒོ་ནས་སྤང་ཞིང་ལྡོག་པ་ལ་འབད་པར་བྱ་བ་ཡིན་ནོ། །ལྔ་པ་ཆགས་པ་ལྔ་སྤང་བ་ནི། གཟུགས་སྒྲ་དྲི་རོ་རེག་བྱ་ཡུལ་ལྔ་ལ། །མིག་དང་རྣ་བ་སྣ་ལྕེ་ལུས་དབང་ལྔ། །ཞེན་པར་མི་བྱེད་བརྟུལ་ཞུགས་ཉེར་ལྔའོ། །ཞེས་པ་སྟེ། མིག་གི་དབང་པོ་ཡུལ་གཟུགས་ལ་ཆགས་པ་ནས་ལུས་དབང་རེག་བྱ་ལ་ཆགས་པའི་བར་ཏེ། དབང་ཤེས་ཀྱི་རྗེས་སུ་འབྲང་བའི་རྣམ་རྟོག་ཡུལ་ལྔ་ལ་ཞེན་པས་ཆགས་པའོ། །དེ་རྣམས་ནི་ཡང་སྲིད་འཕེན་ནུས་ཀྱི་ལས་སུ་རྫོགས་པས་སྤང་བར་བྱ་དགོས་མོད། འོན་ཀྱང་སོ་སྐྱེ་འདོད་ཁམས་པས་རྩ་བ་ནས་ལྡོག་པར་མི་ནུས་ནའང་། ཉིན་རེ་བཞིན་ཐུན་གསུམ་ལ་སོགས་པར་བཅད་ནས་གཉེན་པོ་བསྒོམ་པ་ལ་འབད་པར་བྱ་ཞིང་། གཉེན་པོའང་བསྐྱེད་རིམ་གྱིས་ཡུལ་དབང་ལྷ་སྐུར་བསྒྱུར་བ་དང་། རྫོགས་རིམ་སོ་སོར་སྡུད་པའི་རྣལ་འབྱོར་གྱིས་དབང་པོ་ལྔ་ཡུལ་ལྔ་ལ་འཇུག་པ་གཅོད་པའོ། །དེ་ལྟར་བརྟུལ་ཞུགས་ཀྱི་གཙོ་བོ་ཆགས་པ་ལྔ་སྤོང་ཐབས་ནི་སོར་སྡུད་ཡིན་ལ། རྡོ་རྗེ་སེམས་དཔའི་ལམ་དུ་བཤད་པ་ལྟར་འདིར་ཡང་སྲིད་པའི་བདག་པོ་རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་ཞེས་རྒྱུད་འགྲེལ་ལས་གསུངས་ཏེ། དེ་དག་ལས་འདའ་བར་བྱ་བ་མ་ཡིན་པས་དམ་ཚིག་དང་། སྒོ་གསུམ་དེའི་ངོ་བོར་སོན་པ་ཉིད་ཀྱིས་ན་བརྟུལ་ཞུགས་སོ། །
གཉིས་པ་རིགས་ལྔའི་སྡོམ་པ་ལ་གཉིས་ཏེ། ཐུན་མོང་དང་། ཁྱད་པར་བའོ། །དང་པོ་ལའང་བསྟན་བཤད་གཉིས་ལས། མདོར་བསྟན་ནི། ཐུན་མོང་གྱུར་པ་རིགས་ལྔའི་སྡོམ་པ་ལྔ། །ཞེས་པ་སྟེ། འདི་དག་རྣལ་འབྱོར་ཕྱི་པའི་གཞུང་དུ་བཤད་པ་ལས་དོན་འཕགས་ཀྱང་སྒྲ་མཐུན་པར་འབྱུང་ཞིང་། དེར་མ་ཟད་སྨོན་འཇུག་གི་སེམས་བསྐྱེད་དང་ཚུལ་ཁྲིམས་གསུམ་སོགས་ཐེག་པ་ཆེན་པོ་སྤྱིའི་བསླབ་བྱ་དང་ཡང་འདྲ་བར་བྱུང་བས་ན་ཐུན་མོང་པ་སྟེ། གཞི་དེ་ལས་འདིར་རྡོ་རྗེ་ཐེག་པ་མཆོག་གི་དགོངས་པ་ལྟར་འཆད་པར་བྱའོ། །དེ་ལ་རིགས་བྱེ་བྲག་པའི་རྣལ་འབྱོར་པས་ཀྱང་རིགས་ལྔ་ཀའི་སྡོམ་པ་བསྲུང་དགོས་མོད། དེ་ལྟར་ནའང་རང་རིགས་གང་ཡིན་གྱི་སྡོམ་པ་ལ་གཙོ་བོར་བསླབ་དགོས་པས་རིགས་ལྔ་སོ་སོའི་སྡོམ་པའམ་དམ་ཚིག་ཏུ་གྲགས་སོ། །གཉིས་པ་རྒྱས་པར་བཤད་པ་ནི། སྨོན་འཇུག་གཉིས་དང་ཚུལ་ཁྲིམས་རྣམ་པ་གསུམ། །སློབ་པ་སངས་རྒྱས་རྣལ་འབྱོར་སྡོམ་པའོ། །རྡོར་དྲིལ་ཕྱག་རྒྱ་བླ་མ་བཟུང་རྡོ་རྗེ། །ནོར་ཆོས་མི་འཇིགས་བྱམས་སྦྱིན་རིན་ཆེན་འབྱུང་། །ཕྱི་ནང་གསང་བའི་ཐེག་འཛིན་པདྨའི་རིགས། །མཆོད་གཏོར་ལས་རིམ་འཛིན་པ་ལས་ཀྱི་འོ། །ཞེས་པ་སྟེ། དེ་ལ་ཐོག་མར་དེ་བཞིན་གཤེགས་པའི་རིགས་རྣམ་སྣང་གི་སྡོམ་པ་ནི། ཕྱི་ལྟར་བཤད་ན། སྨོན་པ་དང་འཇུག་པའི་སེམས་བསྐྱེད་ནས། ཉེས་སྤྱོད་སྡོམ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་རྣམས་སོ་སོའི་མཚན་ཉིད་ཚང་བར་བརྟན་པོར་བཟུང་ཞིང་། དེ་ཐམས་ཅད་ཀྱི་རྟེན་དུ་ཐུན་མོང་མ་ཡིན་པའི་དཀོན་མཆོག་གསུམ་ལ་སྐྱབས་སུ་འགྲོ་བ་སྟེ། སངས་རྒྱས་རྣམ་པར་སྣང་མཛད་ནི་གཙོ་བོར་སྐུའི་རིགས་ཡིན་ལ། སྐུ་ནི་འབྲས་ཆོས་ཐམས་ཅད་ཀྱི་རྟེན་ཡིན་པ་ལྟར། སྤྱིར་ཚུལ་ཁྲིམས་ནི་ཡོན་ཏན་ཀུན་གྱི་རྟེན་གང་ཞིག །སྡོམ་པ་དེ་ཐམས་ཅད་ཀྱི་རྟེན་ནི་སྐྱབས་འགྲོ་ཡིན་པའི་ཕྱིར་རོ། །དེ་སྐད་དུའང་། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོ་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་བྱུང་བའི། །སྡོམ་པ་དེང་ནས་བརྟན་པོར་བཟུང་། །ཞེས་ཁས་བླང་བར་གསུངས་པའི་ཕྱིར་རོ། །ནང་ལྟར་སྦས་དོན་ནི། བདེ་སྟོང་དབྱེར་མེད་ཀྱི་བྱང་སེམས་དང་སེམས་ཉིད་གདོད་ནས་རྣམ་པར་དག་པ་དཀོན་མཆོག་གསུམ་གྱི་རང་བཞིན་དུ་བཟུང་བའོ། །དེ་ཡང་རྣལ་འབྱོར་ཕྱི་པ་མན་ཆད་དམ་རྡོ་རྗེ་སློབ་དཔོན་གྱི་དབང་མི་བསྐུར་ན་རྡོ་རྗེའི་རིགས་སོགས་རིགས་གཞན་གྱི་ཆོ་ག་མེད་ཀྱང་རུང་བར་ཨ་བྷ་ཡཱ་ཀ་ར་བཞེད་དོ། །དེ་ནས་རྡོ་རྗེའི་རིགས་མི་བསྐྱོད་པའི་སྡོམ་པ་ནི། ཕྱི་རྫས་ཀྱི་རྡོ་རྗེ་དང་དྲིལ་བུ་ཚད་དང་ལྡན་པ་བཟུང་ནས་རང་ཉིད་ལྷ་སྐུ་ཕྱག་རྒྱ་ཆེན་པོར་འཛིན་པ་སྟེ། དེ་ཉིད་འདུས་པ་ལས། དེ་ཉིད་ཀྱིས་ནི་རྡོ་རྗེ་བཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་པ་ལྟར་རོ། །ནང་གི་རྡོར་དྲིལ་ནི་ཐབས་ཡབ་ཀྱི་ནོར་བུ་རྡོ་རྗེ་དང་ཤེས་རབ་ཡུམ་གྱི་པདྨ་དྲིལ་བུ་སྟེ་ཕྱག་རྒྱ་ནི་ཕན་ཚུན་རྒྱས་བཏབ་ནས་མཉམ་པར་སྦྱོར་བའོ། །དེ་བཞིན་དུ་གསང་བ་ཁམས་དཀར་དམར་གཉིས་འབར་འཛག་གིས་ཟུང་དུ་འཇུག་པ་དང་། དེ་ཁོ་ན་ཉིད་མི་འགྱུར་བའི་བདེ་ཆེན་དང་རྣམ་ཀུན་མཆོག་ལྡན་གྱི་སྟོང་ཉིད་ནི་རྡོར་དྲིལ་དང་། དེ་དག་ཟུང་དུ་འཇུག་པའི་ཡེ་ཤེས་ཀྱི་སྐུ་ནི་ཕྱག་རྒྱ་ཆེན་པོའོ། །དེ་ལྟར་ཕྱི་ནང་གསང་བ་དེ་ཁོ་ན་ཉིད་ཀྱི་རྡོ་རྗེ་དང་དྲིལ་བུ་དང་ཕྱག་རྒྱ་གསུམ་འཛིན་ཅིང་། དེ་དག་གི་དེ་ཁོ་ན་ཉིད་ཕྱིན་ཅི་མ་ལོག་པར་སྟོན་པར་བྱེད་པའི་རྡོ་རྗེ་སློབ་དཔོན་ཡང་བསྙེན་བཀུར་ལ་སོགས་པས་ཆོས་ཀྱི་དོན་དུ་ཡང་དག་པར་བཟུང་ཞིང་བསྟེན་པར་བྱ་སྟེ། རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །ཞེས་གསུངས་ཤིང་། མི་བསྐྱོད་པ་གཙོ་བོར་ཐུགས་ཀྱི་རིགས་ཡིན་ལ། ཐབས་ཤེས་ཁྱད་པར་ཅན་དང་། དེ་སྟོན་བྱེད་ནི་བྱང་ཆུབ་སེམས་ཀྱི་ངོ་བོ་དང་། དེའི་ལྷན་ཅིག་བྱེད་རྐྱེན་ཡིན་པས་འདི་ལས་ནམ་ཡང་མི་གཡོ་བའི་ཕྱིར་མི་བསྐྱོད་པའི་དམ་ཚིག་ཏུ་བཞག་གོ །རིན་ཆེན་རིགས་རིན་འབྱུང་གི་དམ་ཚིག་ནི། ཕྱི་ལྟར་ན་ཟང་ཟིང་གི་ནོར་གྱི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་དང་། དེའི་རྩ་བ་སེམས་ཅན་ཐམས་ཅད་ཀྱིས་བླ་ན་མེད་པའི་བདེ་བ་འཐོབ་པར་གྱུར་ཅིག་སྙམ་པ་བྱམས་པ་ཆེན་པོའི་སྦྱིན་པ་དང་བཞི་པོ་ཉིན་རེ་བཞིན་ཡང་དུས་དྲུག་ཏུ་སྦྱིན་པར་བྱ་བ་དང་། ནང་ལྟར་ན་སྦས་དོན་རྗེས་ཆགས་ཀྱི་མེས་བྱང་སེམས་དབབ་ལྡོག་གི་དགའ་བཞིའི་ཡེ་ཤེས་སྦྱིན་པ་སྟེ། རིན་ཆེན་རིག་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་སོ། །དེ་ཡང་རིན་འབྱུང་ནི་གཙོ་བོར་རིན་ཆེན་རིགས་ཡིན་ལ། རིན་པོ་ཆེ་ལས་དགོས་འདོད་འབྱུང་བ་ལྟར་སྦྱིན་པ་བཞི་ཡང་དགོས་འདོད་སྟེར་བའི་ངོ་བོ་ཡིན་པས། དེ་ཉིད་རིན་འབྱུང་གི་སྡོམ་པར་བཞག་གོ །པདྨའི་རིགས་འོད་དཔག་མེད་ཀྱི་དམ་ཚིག་ནི། དངོས་བསྟན་ལྟར་ན་ཕྱི་ཉན་རང་བྱང་སེམས་ཀྱི་ཐེག་པ་དང་། ནང་བྱ་སྤྱོད་རྣལ་འབྱོར་གྱི་ཐེག་པ་དང་། གསང་བ་བསྐྱེད་རྫོགས་གསུམ་གྱི་ཐེག་པ་དམ་པའི་ཆོས་མ་ལུས་པ་འཛིན་ཞིང་། སྦས་དོན་རླུང་དབུ་མར་བཅིངས་པས་གཞོམ་མེད་ཀྱི་གསུང་སྒྲུབ་པ་སྟེ། བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ཞེས་སོ། །དེ་ཉིད་པདྨའི་རིགས་ཀྱི་སྡོམ་པར་འཇོག་སྟེ། འོད་དཔག་མེད་གསུང་གི་རིགས་ཡིན་པ་ལྟར་དམ་པའི་ཆོས་ཀྱང་དང་པོར་ལུང་ལས་བརྩམས་པས་གསུང་གི་ངོ་བོ་ཡིན་པའི་ཕྱིར་རོ། །ལས་ཀྱི་རིགས་དོན་གྲུབ་ཀྱི་དམ་ཚིག་ནི། ཕྱི་ལྟར་ན་སྔར་གྱི་སྡོམ་པ་དེ་ཐམས་ཅད་དང་ལྡན་པའི་སྟེང་དུ་ཕྱི་ནང་གསང་བའི་མཆོད་པ་དང་གཏོར་མ་སྦྱིན་སྲེག་སོགས་ལས་ཀྱི་རིམ་པ་ཐམས་ཅད་ཀྱང་ཅི་ནུས་སུ་འཛིན་ཅིང་། སྦས་དོན་དེ་ཐམས་ཅད་ཟུང་འཇུག་ཨེ་ཝཾ་གྱི་སྡོམ་པས་རྒྱས་འདེབས་པ་དང་ཞུ་བདེས་ཕུང་ཁམས་དབང་ཡུལ་གྱི་ལྷ་རྣམས་ཚིམ་པར་མཆོད་པ་སྟེ། ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཞེས་གསུངས་ཤིང་། དེ་ཉིད་དོན་གྲུབ་ཀྱི་སྡོམ་པར་འཇོག་སྟེ། དོན་ཡོད་གྲུབ་པ་ནི་ལས་ཐམས་ཅད་པ་དང་ལས་རིགས་ཡིན་པའི་ཕྱིར་རོ། །དེ་དག་ཀྱང་དུས་ཀྱི་འཁོར་ལོར་རིགས་དྲུག་ཏུ་ཕྱེ་སྟེ། བསྡུས་རྒྱུད་ལས། འདོད་པའི་རྡོ་རྗེ་ལ་ནི་རྡོ་རྗེ་དྲིལ་བུ་ཕྱག་རྒྱ་བླ་མ་དག་ཀྱང་བཟུང་བར་བགྱི། །རིན་ཆེན་ལ་ནི་སྦྱིན་པ་སྦྱིན་བགྱི་འཁོར་ལོ་འདི་ལ་རྒྱལ་བ་མཆོག་གི་དམ་ཚིག་བསྐྱང་བར་བགྱི། །རལ་གྲི་ལ་ནི་མཆོད་པ་བགྱི་སྟེ་གསལ་བར་ཆུ་སྐྱེས་རིགས་ལ་སྡོམ་པ་དག་ནི་བསྐྱང་བར་བགྱི། །སེམས་ཅན་རྣམས་ནི་ཐར་པའི་སླད་དུ་རྒྱལ་བ་བསྐྱེད་མཛད་རིགས་ལ་བྱང་ཆུབ་བདག་གིས་བསྐྱེད་པར་བགྱི། །ཞེས་པ་ལྟར་རྣམ་སྣང་དང་འོད་དཔག་མེད་མ་གཏོགས་ཕལ་ཆེར་འདྲ་སྟེ། མི་བསྐྱོད་པའི་དམ་ཚིག་གསུམ་བཟུང་བ་རྩ་བར་བཞག་ནས། ལྷག་མ་རྣམས་ཚོགས་གསུམ་གྱིས་བསྡུས་ཏེ་བསོད་ནམས་ཀྱི་ཚོགས་ནི་ཡུལ་དམན་པ་ལ་བརྟེན་པ་རིན་ཆེན་རིགས་ཀྱི་སྦྱིན་པ་བཅུ་སྟེར་བ་དང་། ཡུལ་མཆོག་ལ་བརྟེན་པ་ལས་རིགས་ཀྱི་མཆོད་པ་སྒྲུབ་པའོ། །ཚུལ་ཁྲིམས་ཀྱི་ཚོགས་ནི་པདྨའི་རིགས་ལ་འཛག་མེད་ཀྱི་ཚུལ་ཁྲིམས་སྒྲུབ་པ་དངོས་དང་། དེའི་རྒྱུར་རྣམ་སྣང་གི་རིགས་ལ་ཤ་ལྔ་བདུད་རྩི་བསྟེན་པའོ། །ཡེ་ཤེས་ཀྱི་ཚོགས་ནི་རྡོ་རྗེ་སེམས་དཔའི་རིགས་ཀྱི་སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་བསྐྱེད་པའོ། །འོ་ན་རྡོ་རྗེའི་རིགས་ཚོགས་གསུམ་གང་དུ་འདུ་ཞེ་ན། དམ་ཚིག་གསུམ་ལ་བསྐྱེད་རྫོགས་ཀྱི་ལུགས་སོ་སོར་ཕྱེ་བ་རིམ་པར་བསོད་ནམས་དང་ཡེ་ཤེས་ཀྱི་ཚོགས་དང་། སློབ་དཔོན་གྱི་དམ་ཚིག་ནི་ཚོགས་གསུམ་ཀ་ལ་སྦྱར་རོ། །
གཉིས་པ་ཁྱད་པར་གྱི་རིགས་ལྔའི་སྡོམ་པ་ནི། ཁྱད་པར་སྲོག་གཅོད་རྡོ་རྗེའི་རིགས་ཡིན་ཏེ། །ཞིང་བཅུ་ཚང་དང་རླུང་དང་རྟོག་པ་ཡིན། །རིན་ཆེན་རིགས་ལ་མ་བྱིན་ལེན་པ་ནི། །ནོར་དང་བུད་མེད་ཐེག་ཆེན་ཟབ་མོའི་ཆོས། །རང་དང་གཞན་དོན་སྒྲུབ་ལ་དགོངས་པས་གསུངས། །པདྨའི་རིགས་ལ་ལས་ཆོས་དམ་ཚིག་དང་། །ཕྱག་རྒྱ་ཆེ་སྟེ་བུད་མེད་བསྟེན་པར་གསུངས། །ལས་ཀྱི་རིགས་ལ་རྫུན་དུ་སྨྲ་གསུངས་པ། །བདག་དང་སེམས་ཅན་མི་དམིགས་བདེན་མེད་སྟོན། །འཁོར་ལོའི་རིགས་ལ་ཆང་དང་ཤ་ལྔ་དང་། །ཡུལ་ཀུན་བསྟེན་གསུངས་ཕྱི་ནང་གསང་བའི་ཐེག །རིམ་པ་མ་ཉམས་སྤྱོད་པ་བླ་མེད་ལུགས། །ཞེས་པ་སྟེ། འདི་ནི་ཐུན་མོང་མ་ཡིན་པ་རྣལ་འབྱོར་བླ་མེད་ལ་གནས་པ་རྣམས་ཀྱི་དམ་ཚིག་སྟེ། རྟེན་གྱི་གང་ཟག་རིགས་ལྔ་སོ་སོའི་རྣལ་འབྱོར་ལ་བརྟན་པ་ཐོབ་ཅིང་ནུས་པ་རྙེད་ནས་རང་གཞན་གྱི་དོན་དུ་འགྱུར་ན་སྒྲ་ཇི་བཞིན་པར་སྤྱོད་པ་དྲང་དོན་བསྐྱེད་རིམ་པའི་དམ་ཚིག་དང་། སྒྲ་བསྒྱུར་ཏེ་དགོངས་པ་ཅན་དུ་གསུངས་པའི་དོན་དེ་ཉིད་སྒྲ་ཇི་བཞིན་མ་ཡིན་པ་ངེས་དོན་གྱི་གསལ་བྱར་བྱས་ཏེ་དབང་གོང་མའི་དམ་ཚིག་དང་སྡོམ་པ་རྫོགས་རིམ་ལ་སྦྱར་བར་བྱ་བ་ཡིན་པས་ན་ཁྱད་པར་ཞེས་བསྟན་ཏོ། །འདིར་སྲོག་གཅོད་པ་ནི་ཞེ་སྡང་རྣམ་པར་དག་པ་རྡོ་རྗེའི་རིགས་མི་བསྐྱོད་པའི་དམ་ཚིག་སྟེ། དེ་ལ་གསུམ་ལས། དྲང་དོན་ལྟར་ན་ཞིང་བཅུ་ཚང་བའི་དགྲ་བོ་དྲག་པོའི་ལས་ཁོ་ནས་མ་གཏོགས་འདུལ་བར་མི་ནུས་པ་རྣམས་ཀྱི་ལས་ངན་གྱི་རྒྱུན་གཅོད་ཕྱིར་མངོན་སྤྱོད་ཀྱི་ལས་ཀྱིས་གསད་པར་བྱ་སྟེ། ངེས་བརྗོད་ལས། སངས་རྒྱས་བསྟན་ལ་གནོད་བྱེད་དང་། །བླ་མར་སྨོད་བརྩོན་མ་རུངས་དང་། །རྟག་ཏུ་སེམས་ཅན་གནོད་བརྩོན་པ། །མཁས་པས་བསྒྲིམས་ཏེ་གསད་པར་བྱ། །ཞེས་གསུངས་ཤིང་། དེ་འདྲ་དེ་སྲོག་བཅད་པ་ལྟར་སྣང་ཡང་རྟོགས་གོམས་ཀྱི་བློ་ངོར་གཅད་བྱ་གཅོད་བྱེད་བཅད་དོ་བའི་འདུ་ཤེས་མ་གྲུབ་པས་ཉེས་པས་གོས་པར་མི་འགྱུར་ཏེ། གསང་སྙིང་ལས། ཡོད་མེད་དབུ་མ་མི་དམིགས་ཤིང་། །སྒྱུ་མ་མིག་ཡོར་ལྟ་བུའི་ཚུལ། །སྲོག་མེད་སྲོག་ཀྱང་བཅད་དུ་མེད། །སྲོག་དང་སྐྱེས་བུ་ལོག་རྟོག་ཙམ། །ཞེས་སོ། །ངེས་པའི་དོན་དུ་སྲོག་ནི་རོ་རྐྱང་གི་རླུང་ཡིན་ལ། དེ་བཅད་པ་ནི་བུམ་ཅན་ལ་སོགས་པའི་ཐབས་ཀྱིས་བཀག་པས་དབུ་མར་སྲོག་རེངས་པ་མཐར་ཐུག་གཙུག་ཏོར་དུ་རླུང་སེམས་བརྟན་པ་སྟེ། དགྱེས་རྡོར་འབུམ་ལྔ་ལས། སྲོག་རླུང་ངེས་པར་འགགས་པ་ན། །བྱང་ཆུབ་སེམས་ནི་འགག་པའོ། །བྱང་ཆུབ་སེམས་ནི་འགགས་པ་ཡིས། །འཕོ་བ་ངེས་པར་འགག་པའོ། །འཕོ་བའི་སྐད་ཅིག་འགགས་པ་ཡིས། །རྣལ་འབྱོར་པ་ཀུན་སངས་རྒྱས་ཉིད། །ཅེས་སོ། །ཡང་ན་སྲོག་ནི་རྣམ་པར་རྟོག་པ་དང་བཅས་པའི་སེམས་ཡིན་ལ། དེ་སྐྱེ་བ་མེད་པར་བྱས་པ་ནི་བསད་པ་སྟེ། བརྟག་གཉིས་ལས། སེམས་གཅིག་སྲོག་ཆགས་གསོད་པ་ནི། །གང་ཕྱིར་སྲོག་ནི་སེམས་སུ་བརྗོད། །ཅེས་སོ། །མ་བྱིན་པར་ལེན་པ་ནི་ང་རྒྱལ་རྣམ་པར་དག་པ་རིན་པོ་ཆེའི་རིགས་རིན་ཆེན་འབྱུང་ལྡན་གྱི་དམ་ཚིག་སྟེ། དེ་ལ་གསུམ་ལས། དྲང་དོན་གཞན་ལ་ཕན་པར་འགྱུར་ན་སྔགས་ཀྱི་མཐུས་གཞན་ནོར་འཕྲོག་པར་བྱ་སྟེ། རྡོ་རྗེ་ལས། འཇུངས་པ་རྣམས་ལས་ནོར་བླངས་ལ། །སེམས་ཅན་བཀྲེན་ལ་སྦྱིན་པར་བྱ། །དེ་ཕྱིར་མི་ཡི་བདག་པོ་དང་། །ཕྱུག་པོ་རྣམས་ཀྱི་ནོར་འཕྲོག་གོ །ཞེས་སོ། །དེ་ལྟར་མ་བྱིན་པར་བླངས་པ་ལྟར་སྣང་ཡང་རྟོགས་གོམས་ཀྱི་བློ་ལ་ལྟོས་ནས་ཉེས་པས་གོས་པར་མི་འགྱུར་ཏེ། འཕྲུལ་དགའི་ལྷའི་ལོངས་སྤྱོད་ལྟར་རྫས་དང་ནོར་བདག་ཀྱང་བདག་ཉིད་ལས་དོན་ལ་ཐ་དད་མ་ཡིན་པའི་ཕྱིར། གསང་སྙིང་ལས། བདེན་པ་གཉིས་ཀ་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །གཞན་དང་མ་བྱིན་མེད་པའི་ཕྱིར། །བླངས་མེད་ཐམས་ཅད་ཉིད་ཀྱི་དབྱིངས། །ཞེས་སོ། །ངེས་དོན་ལ་སྔགས་ཀྱི་ཡེ་ཤེས་བསྒྲུབ་པའི་ཕྱིར་པ་ར་སྟྲིའི་སྒྲ་ལས་མཆོག་གམ་གཞན་ནམ་ཕ་རོལ་གྱི་བུད་མེད་དགུག་པའི་ཐབས་ཀྱིས། ཕྲོག་པ་ལས་བྱང་ཆུབ་ཀྱི་སེམས་དཀར་དམར་ཡང་རླུང་གི་སྟོབས་ཀྱིས་མ་བྱིན་པར་བླངས་ཏེ། བརྟག་གཉིས་ལས། བཙུན་མོའི་ཁུ་བ་མ་བྱིན་བླང་། །གཞན་གྱི་བུད་མེད་རང་མཚུངས་མཛེས། །ཞེས་སོ། །ཡང་ན་དོན་དམ་པའི་བཙུན་མོ་སྟོང་པ་ཉིད་ཡིན་ལ། དེའི་ཁུ་བ་གཉིས་མེད་ཀྱི་ཡེ་ཤེས་ཉིད་གཞན་གྱིས་མ་བྱིན་པར་རང་གིས་ལམ་བསྒོམས་པའི་སྟོབས་ཀྱིས་ཐོབ་པས་ཐེག་ཆེན་ཟབ་མོའི་ཆོས་དོན་གཉིས་སྒྲུབ་པ་ལ་མངའ་དབང་འབྱོར་བ་སྟེ། མདོ་ལས། གང་ཕྱིར་ཐེག་པ་ཆེན་པོ་འདི། །གང་གིས་ཀྱང་ནི་བྱིན་མ་ལགས། །དེ་ཉིད་རྟོགས་པས་མ་བྱིན་བླང་། །ཞེས་སོ། །ཕྱག་རྒྱ་བཞི་བསྟེན་པ་ནི་འདོད་ཆགས་རྣམ་པར་དག་པ་པདྨའི་རིགས་འོད་དཔག་མེད་ཀྱི་དམ་ཚིག་སྟེ། དེ་ལ་བཞི་ལས། འཛག་མེད་ཀྱི་ཡེ་ཤེས་བསྒྲུབ་པའི་ཕྱིར་རྡོ་རྗེ་ལས། སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །གསང་སྔགས་རིགས་པས་སྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །ཞེས་པས་མཆོག་གམ་ཕ་རོལ་ལམ་གཞན་གྱི་བུད་མེད་ཀྱི་སྒྲ་ཕྱག་རྒྱ་བཞི་ཀ་ལ་འཇུག་པས། རྟོགས་གོམས་ཀྱི་གདེང་དང་ལྡན་པའི་གང་ཟག་གིས་གཉིས་མེད་དུ་ཤེས་པའི་ལྟ་བ་དང་། འདུ་ཤེས་གསུམ་ལྡན་གྱི་སྒོམ་པ་དང་། ཐབས་ཀྱི་སྤྱོད་པ་གསུམ་གྱིས་ཟིན་པའི་སྒོ་ནས་དངོས་རིག་ལས་ཀྱི་ཕྱག་རྒྱ་བསྟེན་པ་སྟེ། གསང་སྙིང་ལས། མ་ཆགས་པ་ལ་ཆགས་པ་དང་། །ཆགས་པ་ཉིད་ན་ཆགས་པ་མེད། །དེ་ནི་ཚངས་མཆོག་རྒྱལ་པོ་སྟེ། །ཤིན་ཏུ་ཆགས་པ་ཆེན་པོ་ཡིན། །ཞེས་སོ། །དེ་བཞིན་དུ་ཡིད་རིག་ཆོས་ཀྱི་ཕྱག་རྒྱ་དང་། གཏུམ་མོ་དམ་ཚིག་གི་ཕྱག་རྒྱ་སྟེ། དེ་གསུམ་ལ་བརྟེན་ནས་ཞུ་བདེ་དཔེའི་ཡེ་ཤེས་ཀྱིས་འཛག་མེད་སྒྲུབ་པ་གསུམ་ལ་དྲང་ངེས་གཉིས་ཀའི་ཆ་ཡོད་ཅིང་། མཆོག་གི་བུད་མེད་རྣམ་ཀུན་མཆོག་ལྡན་གྱི་སྟོང་ཉིད་དང་མི་འགྱུར་བའི་བདེ་ཆེན་ཁ་སྦྱོར་ལས་ལྷན་སྐྱེས་མཆོག་གི་བདེ་སྟོང་དོན་གྱི་ཡེ་ཤེས་སྒྲུབ་པ་ནི་ངེས་དོན་ཉིད་དོ། །དེ་ལྟར་ཡང་རྒྱུད་ལས། རྣམ་པ་ཀུན་གྱི་མཆོག་ལྡན་མ། །སྟོང་ཉིད་ཤེས་རབ་མཛེས་མ་ཉིད། །རྒྱལ་བ་ཐམས་ཅད་བསྐྱེད་པའི་ཡུམ། །དེ་ཉིད་མ་བསྟེན་འཚང་མི་རྒྱ། །ཞེས་སོ། །རྫུན་སྨྲ་བ་ནི། ཕྲག་དོག་རྣམ་པར་དག་པ་ལས་ཀྱི་རིགས་དོན་ཡོད་གྲུབ་པའི་དམ་ཚིག་སྟེ། དེ་ལ་གསུམ་ལས། དྲང་དོན་གཞན་ལ་ཕན་པར་འགྱུར་ན་རྫུན་སྨྲ་བར་བྱ་སྟེ། རྡོ་རྗེ་ལས། སེམས་ཅན་རྣམས་ལ་ཕན་སྤྱོད་པ། །རྟག་ཏུ་དམ་ཚིག་བླ་མའི་ནོར། །སེམས་ཅན་སྲོག་ནི་བསྲུང་བའི་ཕྱིར། །རྫུན་དུ་ཡང་ནི་སྨྲ་བར་བྱ། །ཞེས་སོ། །དེ་ལྟར་རྫུན་སྨྲས་པ་ལྟར་སྣང་ཡང་རྟོགས་གོམས་ཀྱི་བློ་ལ་ལྟོས་ནས་ཉེས་པས་གོས་པར་མི་འགྱུར་ཏེ། བདག་དང་སེམས་ཅན་མི་དམིགས་པས་ཆོས་ཐམས་ཅད་བཏགས་པ་ཙམ་ལས་བདེན་པར་མ་གྲུབ་པར་རྟོགས་པ་ན་དེ་ལ་ལྟོས་པའི་རྫུན་པའང་མ་གྲུབ་པའི་ཕྱིར། གསང་སྙིང་ལས། ཆོས་རྣམས་སྒྱུ་མ་ལྟ་བུ་ལ། །མིང་དང་ཚིག་ཏུ་བཏགས་པ་རྫུན། །རྫུན་ཉིད་ལ་ནི་རྫུན་སྤྱོད་པས། །རྫུན་ཞེས་བཏགས་ཙམ་ཡོད་མ་ཡིན། །ཞེས་སོ། །ངེས་དོན་དུ་སེམས་ཅན་ཐམས་ཅད་འཁོར་བ་ལས་བསྒྲལ་བར་བྱའོ་ཞེས་པ་ནི་རྫུན་ཚིག་སྨྲ་བ་སྟེ། བསྒྲལ་བྱ་སེམས་ཅན་དང་སྒྲོལ་བར་བྱེད་པ་པོ་བདག་ཀྱང་དོན་དམ་པར་མ་གྲུབ་པའི་ཕྱིར། དེ་ལྟར་ཡང་བརྟག་གཉིས་ལས། འཇིག་རྟེན་བསྒྲལ་བ་ཞེས་བྱ་བ། །རྫུན་གྱི་ཚིག་ནི་རབ་ཏུ་བསྒྲག །ཅེས་དང་། འཇམ་དཔལ་གྱིས་བསྟན་པའི་མདོ་ལས། བདག་དང་སེམས་ཅན་མི་དམིགས་ལ། །འཁོར་བ་ལས་སྒྲོལ་རྫུན་གྱི་ཚིག །ཅེས་སོ། །ཡང་སེམས་འགྲེལ་རྣམས་ལས་ནི། སྙིང་གའི་འཁོར་ལོར་རླུང་ཐིམ་པས་རང་སྣང་ལ་གཞོམ་མེད་ཀྱི་སྒྲ་རྣམ་པ་ཐམས་ཅད་པར་ཤར་བ་ངེས་དོན་དང་། དེ་ལས་གཞན་སྣང་དུ་སེམས་ཅན་རྣམས་ལ་ཆོས་སྒོ་སྣ་ཚོགས་པ་ཅིག་ཅར་དུ་སྟོན་པ་དྲང་དོན་དུ་གསུངས་པའང་ཡོད་དེ། རྡོ་རྗེ་སྙིང་འགྲེལ་ལས། གང་གི་སྲོག་རླུང་ཟོས་པ་ན། །ཅིག་ཅར་འགྲོ་ཀུན་སྐད་ཀྱིས་ནི། །གང་དང་གང་ལ་དེ་དང་དེ། །མཐུན་པའི་ཆོས་སྟོན་རྫུན་པའི་ཚིག །ཅེས་སོ། །ཤ་ལྔ་དང་ཆང་དང་ཡུལ་ཀུན་བསྟེན་པ་ནི་གཏི་མུག་རྣམ་པར་དག་པ་དེ་བཞིན་གཤེགས་པའི་རིགས་རྣམ་སྣང་གི་དམ་ཚིག་སྟེ། དེ་ལ་གསུམ་ལས། དྲང་དོན་དུ་རིགས་ཀྱི་དྲེགས་ཤིང་ང་རྒྱལ་དང་གཙང་དམེའི་རྟོག་པ་གཞིག་པའི་སླད་དུ་ཡུལ་དབུས་སུ་བཟའ་བའི་དོན་དུ་གསོད་པར་མི་བྱེད་པའི་ཤ་ལྔ་གནང་བ་ལྟར་རང་གི་ལས་ཀྱིས་ཤི་བའི་ཤ་རྣམས་དམ་ཚིག་གི་རྫས་སུ་རུང་བས་བཟའ་བར་བྱ་ཞིང་། མྱོས་པའི་སྐྱོན་མེད་ན་ཆང་ཡང་བཏུང་སྟེ། བརྟག་གཉིས་ལས། དེ་ལ་ག་བུར་རྒྱུ་ཡི་ཕྱིར། །ཤ་ནི་བཟའ་བ་ཉིད་དུ་བྱ། །ཁྱད་པར་དུ་ཡང་ཆང་ཉིད་དོ། །ཞེས་སོ། །དེ་བཞིན་དུ་བདུད་རྩི་ལྔ་དང་གཟུགས་སོགས་ཡུལ་རྣམས་ལ་ཅི་དགར་སྤྱོད་པའི་བདེ་བ་བསྟེན་པ་རྗེས་སུ་གནང་བ་ཡིན་ནོ། །ངེས་དོན་དུ་ཤ་ལྔ་བཟའ་བ་ནི་དབང་པོ་ལྔའི་དྭངས་མ་འཆིང་བ། ཆང་འཐུང་བ་ནི་ཡས་འབབ་ཀྱི་ལྷན་སྐྱེས་ཞུ་བདེ་འཛག་མེད་དུ་འཆིང་བ། བདུད་རྩི་ལྔ་ནི་འབྱུང་ལྔའི་དྭངས་མ་བཅིངས་པ་ལས་ཞུ་བའི་ཐིག་ལེ་རྡུལ་ཕྲ་རབ་ཀྱི་ཚོགས་དག་པར་བྱེད་པ་དང་། ཡུལ་ཀུན་བསྟེན་པ་ནི་བཤང་གཅི་ཁུ་བའི་དྭངས་མ་ལྟེ་བར་ལུགས་ལྡོག་ཏུ་བརྟན་པའོ། །ཡང་ན་དེ་དག་བསྟེན་པ་ནི་རྣམ་པར་རྟོག་པ་ཐམས་ཅད་མཉམ་པ་ཉིད་ཀྱི་དབྱིངས་སུ་རོ་གཅིག་ཏུ་བྱེད་པ་སྟེ། ཇི་སྐད་དུ། རྣམ་རྟོག་དང་ནི་ཀུན་རྟོག་གི །དངོས་དང་དངོས་མེད་སོགས་འཁྲུལ་པ། །རྣམ་རྟོག་དྲྭ་བའི་ས་བོན་ཚོགས། །རྣམ་པར་མི་རྟོག་པ་ཡིས་བཟའ། །སྙིང་རྗེའི་སྣོད་ཀྱི་མཆོག་ཏུ་ནི། །ཡེ་ཤེས་ཆེན་པོ་མཉམ་བཞག་ནས། །བཏུང་ཞིང་རྟག་ཏུ་བཏུང་བར་བྱ། །ཕྱག་རྒྱའི་དམ་ཚིག་ཅེས་སུ་བཤད། །ཅེས་སོ། །དེ་དག་ཀྱང་དུས་འཁོར་ལས། ངེས་པར་རྡོ་རྗེའི་རིགས་ལ་སྲོག་གཅོད་བྱ་སྟེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་ལ་ནི་གཞན་ནོར་འཕྲོག་བྱ་མཆོག་གི་པདྨའི་རིགས་ཉིད་ལ་ཡང་གཞན་གྱི་བུད་མེད་འཕྲོག །ཆང་དང་སྒྲོན་མ་སངས་རྒྱས་རྣམས་དང་བཟང་པོའི་ཡུལ་རྣམས་མཐའ་དག་འཁོར་ལོ་ལ་ནི་བསྟེན་པར་བྱ། །གཡུང་མོ་ལ་སོགས་མཐའ་དག་བུད་མེད་རྣམས་ནི་གྲི་གུག་ལ་ཡང་མཁའ་ཡི་པདྨ་སྨད་མི་བྱ། །སེམས་ཅན་དོན་གྱི་སླད་དུ་ནོར་དང་བཅས་པའི་ལུས་འདི་སྦྱིན་པར་བྱ་སྟེ་ཁྱོད་ཀྱིས་བསྲུང་མི་བྱ། །ཞེས་དྲང་ངེས་ཕྱེ་ནས་གསུངས་པ་སྟེ། འདིར་གྲི་གུག་གི་རིགས་ལ་དྲང་དོན་བུད་མེད་ལ་མི་སྨོད་ཅིང་རང་ལུས་བཏོང་བ་དང་། དེ་ངེས་དོན་དུ་འཛག་མེད་ཀྱི་ཚངས་སྤྱོད་ལ་གནས་པར་བཤད་པ་མ་གཏོགས་གཞན་ལྔ་པོ་ཕལ་ཆེར་དོན་འདྲའོ། །དེ་ལྟར་དམ་ཚིག་དང་སྡོམ་པ་དེ་རྣམས་ཀྱི་གོ་རིམ་ཡང་། ཐོག་མར་བརྟུལ་ཞུགས་ཉེར་ལྔ་བསྟན་ཏེ། དེའི་ལྔ་ཚན་དང་པོ་བཞི་སེམས་ཅན་ལ་གནོད་པ་ཤས་ཆེ་བ་དང་ལྔ་པ་ཡུལ་ལ་དབང་པོ་ཞེན་པའང་ཉོན་མོངས་པ་སྐྱེ་བའི་རྒྱུ་ཡིན་པས་ཕྱི་མཚན་ཉིད་དང་ནང་ཀྲི་ཡོག་སྡེ་གསུམ་གྱི་ཐེག་པས་ཀྱང་དོན་ལ་སྤང་དགོས་པའི་ཕྱིར། དེ་རྗེས་རིགས་ལྔའི་དམ་ཚིག་ཐུན་མོང་པ་བསྟན་ཏེ། དེའི་དངོས་བསྟན་ཕྱི་བཤད་ལྟར་ན་རྣལ་འབྱོར་རྒྱུད་ཀྱི་ཐེག་པ་དང་སྒྲ་མཐུན་པའི་ཕྱིར། དེ་རྗེས་ཁྱད་པར་གྱི་རིགས་ལྔའི་དམ་ཚིག་རྣམས་བསྟན་ཏེ། དེའི་དྲང་ངེས་ཀྱི་བཤད་ཚུལ་གཉིས་ཀ་གསང་བ་བླ་ན་མེད་པ་རྡོ་རྗེ་ཐེག་པའི་ཁྱད་ཆོས་ཡིན་པའི་ཕྱིར། དེས་ན་གདུལ་བྱ་རྣམས་ལ་འཇུག་པའི་གོ་རིམ་མ་ཉམས་པའི་སྒོ་ནས་དཀྲི་ཞིང་སྤྱོད་པ་ནི་རྣལ་འབྱོར་བླ་མེད་ཀྱི་ལུགས་སུ་ཤེས་པར་བྱའོ། །
གསུམ་པ་རྩ་བའི་ལྟུང་བ་བཅུ་བཞི་ལ་བསྟན་བཤད་གཉིས་ལས། མདོར་བསྟན་ནི། རྩ་བའི་ལྟུང་བ་བཅུ་བཞི་བསྟན་པ་ནི། །ཞེས་པ་སྟེ། དེ་ལ་སྤྱིར་ཐུན་མོང་གི་རང་བཞིན་ལ། ལྟུང་བའི་ངོ་བོ། སྒྲ་དོན། ཡན་ལག་གི་དབྱེ་བ། གྲངས་ངེས། གོ་རིམ། དབང་བཞི་སོ་སོ་ལ་ལྟོས་པའི་རྩ་ལྟུང་ངོས་བཟུང་བ་དང་དྲུག་གོ །དང་པོ་ནི། ལུས་ངག་ཡིད་གསུམ་གྱི་ནང་ནས་ཡིད་གཙོ་བོར་གྱུར་པ་ཡིན་ཏེ། མི་དགེ་བ་གཟུགས་ཅན་དུ་འདོད་པ་ཤཱཀྱའི་སྲས་མ་ཡིན་པར་གསུངས་པའི་ཕྱིར་རོ། །འོན་ཀྱང་ལུས་ངག་གྲོགས་སུ་དགོས་པའི་ལྟུང་བའང་ཡོད་པས་སྒོ་གསུམ་གྱི་བསྲུང་བྱ་ཞེས་བྱ་སྟེ། ཐུགས་ཐིག་ལས། གསང་སྒོར་ཞུགས་པ་ཐམས་ཅད་ཀྱིས། །སྒོ་གསུམ་རང་གི་བསྲུང་བྱ་ལ། །རྒྱལ་པོའི་བཀའ་རྟགས་ཇི་ལྟ་བར། །མི་འབྲལ་སྡོམ་པ་དེ་ངོ་བོ། །ཞེས་སོ། །མཚན་ཉིད་ནི། སྔགས་བླ་མེད་ཀྱི་སྡོམ་པའི་མི་མཐུན་ཕྱོགས་ཀྱི་ཉེས་པ་གང་ཞིག །སྤྱད་ན་གང་བླངས་པའི་སྡོམ་པ་རྩ་བ་ནས་ལྟུང་བྱེད་ཀྱི་རིགས་གནས་སོ། །གཉིས་པ་ནི། མཱུ་ལ་པཏྟིའི་སྒྲ་ལས་རྩ་བའི་ལྟུང་བ་ཞེས་པ་ལྗོན་ཤིང་གི་རྩ་བ་དང་འདྲ་སྟེ། བརྟན་ན་ཡལ་ག་ལོ་འདབ་རྒྱས་ཤིང་བཏོན་ན་ཐམས་ཅད་བསྐམ་པར་འགྱུར་བ་ལྟར། བསྲུངས་ན་ལམ་དང་འབྲས་བུའི་ཡོན་ཏན་ཐམས་ཅད་བསྐྱེད་པའི་རྩ་བ་ཡིན་ཞིང་། མ་བསྲུངས་ན་ངན་འགྲོར་ལྟུང་བས་སྡུག་བསྔལ་གྱི་ཡང་རྩ་བར་གྱུར་བའི་ཕྱིར་ཏེ། ཁོག་གཞུང་གསལ་སྒྲོན་ལས། ངེས་ཚིག་སྐྱོན་ཡོན་སྐབས་ཀྱིས་སྒྱུར། །ཞེས་སོ། །གསུམ་པ་ལ། རྟེན་གྱི། ཡུལ་གྱི། རྒྱུའི། དུས་སྐབས་ཀྱི། བསམ་པའི་ཡན་ལག་དང་ལྔ། དང་པོ་ནི། གང་ཟག་སྔགས་ཀྱི་སྡོམ་པ་དང་ལྡན་ཞིང་ཤེས་པ་རང་བཞིན་དུ་གནས་པ་ཞིག་དགོས་ཏེ། སྡོམ་པ་དང་མི་ལྡན་ན་རང་བཞིན་གྱི་ཁ་ན་མ་ཐོ་བ་ཙམ་ལས་བཅས་ལྟུང་མི་བསྐྱེད་པའི་ཕྱིར་དང་། དྲན་པ་ཉམས་ན་ལྟུང་བ་མི་བསྐྱེད་པར་ཐེག་པ་ཐམས་ཅད་དགོངས་པ་མཐུན་པའི་ཕྱིར་རོ། །གཉིས་པ་ནི། རྩ་ལྟུང་བཅུ་བཞི་པོ་གང་ལ་བརྟེན་ནས་འབྱུང་བའི་ཡུལ་ཏེ། རྩ་ལྟུང་དང་པོའི་ཡུལ་བླ་མ་དམ་པ་ཡིན་པ་བཞིན་ནོ། །གསུམ་པ་ནི། ལྟུང་བ་འབྱུང་བའི་སྒོ་བཞིའམ་རྒྱུ་དྲུག་སྟེ། རྩ་བའི་ས་བཅད་དྲུག་པར་འཆད་དོ། །བཞི་པ་ནི། རྩ་ལྟུང་བཞི་པོ་གང་རུང་ཡན་ལག་ཚང་བར་སྤྱོད་ན། ཡིད་ཁོ་ནས་རྩ་ལྟུང་དུ་འགྱུར་བ་རྣམས་ཐུན་མཚམས་གཅིག་གི་ནང་དུ་གཉེན་པོས་མ་སླེབས་པ་དང་། ངག་དང་འབྲེལ་བ་རྣམས་ཕ་རོལ་པོ་གང་ཡང་རུང་བས་གོ་བ་དང་། ལུས་དང་འབྲེལ་བ་རྣམས་བྱ་བ་དེ་བྱས་ཟིན་པ་ན་རྩ་ལྟུང་དུ་འགྱུར་བ་ཡིན་ལ། སྒོ་གསུམ་གང་རུང་གཅིག་ལ་ལྟོས་པའི་རྩ་ལྟུང་གཅིག་བྱུང་ཟིན་ནས་འཕྱིས་ཅིག་ཤོས་དེ་བྱས་ཀྱང་རྩ་ལྟུང་གཉིས་པར་མི་འགྱུར་མོད། ཉེས་པ་ལྕི་བའི་ཡན་ལག་ཏུ་ནི་འགྲོ་བ་ཡིན་ནོ། །ལྔ་པ་ནི། ལྟུང་བ་སོ་སོའི་ཡུལ་དེ་ལ་དེ་ཡིན་པར་འདུ་ཤེས་མ་འཁྲུལ་བའོ། །བཞི་པ་ནི། རྩ་བའི་ལྟུང་བ་བཅུ་བཞི་སྟེ། དེ་ལས་མང་མི་དགོས་ཤིང་ཉུང་ན་མི་འདུ་བའི་ཕྱིར། ལྔ་པ་ནི། སྔགས་ཀྱི་དངོས་གྲུབ་ཀྱི་རྩ་བ་བླ་མ་དང་། དེ་ལ་བརྟེན་ནས་ལུང་གི་ཆོས་དང་། ཆོས་སྒྲུབ་པའི་གྲོགས་སྤངས་པ་སོགས་གཉེན་པོ་སྔགས་ཀྱི་གོ་རིམ་དང་། སྔ་མ་སྔ་མ་ལྕི་ཞིང་ཕྱི་མ་ཕྱི་མ་ཡང་བས་ལྕི་ཡང་གི་གོ་རིམ་ཡང་ཡིན་ནོ། །དྲུག་པ་ནི། རྩ་ལྟུང་བཅུ་བཞི་ལས་གཙོ་ཆེ་བའི་དབང་དུ་བྱས་ཏེ། ལྟུང་བ་བཅུ་གསུམ་པ་དང་ལྔ་པ་རྒྱུ་འབྲས་སུ་བྱས་ནས་གསང་དབང་དང་ཤེར་དབང་གི་དང་། ཁྱད་པར་ཤེར་དབང་གི་བཅུ་བཞི་པ། དགུ་པ་དང་བཅུ་གཅིག་པ་དབང་བཞི་པའི། ལྷག་མ་དགུ་པོ་བུམ་དབང་དང་འགལ་བའ་ིརྩ་ལྟུང་ཡིན་ཞིང་། དབང་ཕྱི་མ་ཕྱི་མའི་ཚེ་ན་སྔ་མ་སྔ་མ་ཐུན་མོང་དང་དབང་རང་སྐབས་ཀྱི་དེ་ཉིད་ཐུན་མིན་དུ་འགྱུར་རོ། །དེས་ན་བུམ་དབང་ཙམ་ཐོབ་པས་རང་གི་དགུ་པོ་སྤྱད་ན་རྩ་ལྟུང་དུ་འགྱུར་གྱི། དེ་ལས་གཞན་པ་ལྔ་ལ་སྤྱད་ཀྱང་རྩ་ལྟུང་དངོས་སུ་མི་འགྱུར་ཏེ། དེ་དག་སྤོང་བའི་སྡོམ་པ་མ་ཐོབ་པའི་ཕྱིར་རོ། །
གཉིས་པ་རྒྱས་བཤད་ལ་བཅུ་བཞི་ལས། རྩ་ལྟུང་དང་པོ་ནི། སློབ་དཔོན་རྣམ་གསུམ་སྙིང་ནས་སྨོད་པ་དང་། །བརྙས་དང་ཐུགས་དཀྲུགས་ལྟུང་བའི་སྒོ་ཀུན་ལས། །ཤིན་ཏུ་ལྕི་ཕྱིར་འདི་ཉིད་དང་པོར་བཤད། །ཅེས་པ་སྟེ། སྤྱིར་སློབ་དཔོན་དྲུག་བཤད་པ་སོགས་ཡོད་པས་ལྟུང་བ་བྱེད་པོ་རང་ཉིད་སྔགས་སྡོམ་དང་ལྡན་པ་དགོས་ཀྱི། ཡུལ་བླ་མའི་ངོས་ནས་སྔགས་ཆོས་ཁོ་ནས་སྦྲེལ་བ་ཞིག་མི་དགོས་ཀྱང་འདིར་ཁྱད་པར་གྱི་སློབ་དཔོན་ནི་རྣམ་པ་གསུམ་སྟེ། བདེ་བདུས་ཞི་བ་འདུས་པ་རྩ་བའི་རྒྱུད་ལས། རྒྱུད་དགྲོལ་དབང་བསྐུར་དེ་ཉིད་བསྟན། །ཞེས་པས་དབང་བསྐུར། རྒྱུད་བཤད། མན་ངག་བྱིན་པའི་བཀའ་དྲིན་གསུམ་ལྡན་ནམ། གཉིས་ལྡན་ནམ་གཅིག་ལྡན་གང་རུང་ལ། ཞེ་སྡང་ངམ་ཕྲག་དོག་གི་དབང་གིས་སྙིང་ཐག་པ་ནས་སྨ་འབེབས་པར་འདོད་པས་ངག་གི་འཁུ་ཞིང་འཕྱ་བའི་སྒོ་ནས་སྨོད་པ་དང་། བཀུར་སྟི་མི་བྱེད་པར་བརྙེས་པ་སོགས་ཀྱིས་ཐུགས་འཁྲུགས་ཏེ་མི་མཉེས་པར་བྱས་པ་དེ་ནི་རྩ་ལྟུང་དང་པོ་སྟེ། རྡོ་རྗེ་སློབ་དཔོན་ནི་སངས་རྒྱས་ཐམས་ཅད་ཀྱི་ངོ་བོ་ཡིན་པས་ཡུལ་གཉན་པར་མ་ཟད། རང་ཉིད་ཀྱི་ལམ་དང་འབྲས་བུའི་ཡོན་ཏན་ཐམས་ཅད་དེ་ཉིད་མཉེས་པས་རྗེས་སུ་བཟུང་བ་ལ་རག་ལས་པའི་ཕྱིར། རྩ་ལྟུང་བཅུ་བཞིའི་ནང་ནས་ཉེས་པ་ཤིན་ཏུ་ལྕི་བས་དང་པོར་བཞག་སྟེ། གང་ཕྱིར་རྡོ་རྗེ་འཛིན་པ་ཡིས། །དངོས་གྲུབ་སློབ་དཔོན་རྗེས་འབྲང་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོར་བཤད། །ཅེས་སོ། །དེས་ན་ཅི་མཛད་ཡོན་ཏན་དུ་ལྟ་བ་དང་ཅི་མཉེས་སྒྲུབ་པའི་སྤྱོད་པ་ལ་བསླབ་པར་བྱའོ། །གཉིས་པ་ནི། བླང་དོར་གནས་སྟོན་བདེ་བར་གཤེགས་པའི་བཀའ། །བླ་མས་གསུངས་ཤིང་རང་གིས་གོ་གཞིན་དུ། །ཁྱད་གསོད་མི་མཐུན་སྤྱོད་འབྲེལ་བཀའ་འདས་གཉིས། །ཞེས་པ་སྟེ། གདུལ་བྱ་ལ་བླང་དོར་གྱི་གནས་སྟོན་པ་སྡེ་སྣོད་གསུམ་དང་རྒྱུད་སྡེ་བཞིའམ་དྲུག་གིས་བསྡུས་པའི་བདེ་བར་གཤེགས་པའི་བཀའ་ཐམས་ཅད་དང་། དེ་དང་རྗེས་སུ་མཐུན་པའི་འཇུག་ལྡོག་གི་བསླབ་བྱ་བླ་མ་དམ་པས་རང་ལ་འདོམས་པར་མཛད་པ་གང་ཡིན་ཡང་རུང་སྟེ། དེ་དང་དེས་གསུངས་པའི་དོན་གོ་བཞིན་དུ་ཁྱད་གསོད་ཀྱི་བློས་བཀའ་ལས་འདས་ཏེ་མི་མཐུན་པར་སྤྱོད་པའམ། དེ་དང་འབྲེལ་བ་གཞན་ལ་བཤད་ཀྱང་རུང་སྟེ། དངོས་གྲུབ་ཐམས་ཅད་སངས་རྒྱས་དང་བླ་མའི་བཀའི་རྗེས་སུ་འགྲོ་ཞིང་། དེ་ལས་འདས་པ་ན་བླ་མ་ལ་བརྙས་པའི་འོག་ནས་ཉེས་པ་ཆེ་བས་རྩ་ལྟུང་གཉིས་པར་བཞག་གོ །གསུམ་པ་ནི། སྤྱི་རིང་ཉེ་དང་ནང་འདྲེས་སྤུན་ལ་ཁྲོས། །འཁོན་འཛིན་ཕྲག་དོག་བརྙས་སོགས་གསུམ་པའོ། །ཞེས་པ་སྟེ། ཡུལ་ནི་སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་སངས་རྒྱས་ཀྱི་བསྟན་པ་ལ་ཞུགས་སོ་ཅོག །ཉེ་བའི་མཆེད་སྔགས་ཀྱི་ཐེག་པར་ཞུགས་པ། དེ་ལས་ཀྱང་ཁྱད་པར་ནང་འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དེའི་ཤུགས་ཀྱིས་དཀྱིལ་འཁོར་གཅིག་གིས་བསྡུས་པ་མ་གཅིག་པའི་སྤུན་ཏེ། དེ་བཞིན་སྔ་མ་སྔ་མ་ལས་ཕྱི་མ་ཕྱི་མ་ཉེ་ཞིང་། ཁྱད་པར་ནང་འདྲེས་ལའང་མ་གཅིག་པ་ལས་ཕ་གཅིག་པ་དང་། དེ་གཉིས་ཀ་གཅིག་པ་ལའང་དབང་ཐོབ་པའི་དུས་སྔ་ཕྱི་ཡོད་ན་སྤུན་རྒན་གཞོན་དང་། དུས་གཅིག་པ་མཚེ་མ་ལྟ་བུ་རྣམས་ཕྱི་རིམ་གྱིས་ཉེ་ལ། དེ་ཡང་དབང་བཞི་ཀ་རྫོགས་པར་ཐོབ་པའི་སྤུན་རྣམས་ཤིན་ཏུ་ཉེ་བ་ཡིན་ནོ། །དེ་ལྟར་ཡང་གསལ་བཀྲ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མེད་ཅིང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནོ། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་དང་། ཡེ་ཤེས་གྲུབ་པ་ལས། སེམས་ཅན་ཀུན་གྱི་ཡིད་ཁྱབ་པར། །རྡོ་རྗེ་སེམས་དཔའ་རང་ཉིད་བཞུགས། །དེ་ལྟར་བསམ་ནས་རྣལ་འབྱོར་གྱི། །དབང་པོས་གང་ལའང་བརྙས་མི་བྱ། །ཞེས་དང་། སངས་རྒྱས་ཡེ་ཤེས་ཞབས་ཀྱིས་རིམ་པ་རྣམ་པར་བཞག་པ་ལས། བསྟན་དང་རྡོ་རྗེའི་ཐེག་པ་ལ། །ཞུགས་པ་ཐམས་ཅད་སྤུན་དུ་བརྗོད། ཀུན་ཀྱང་ཡེ་ཤེས་ལྡན་པས་ན། །རྡོ་རྗེ་སེམས་དཔའི་རྡོ་རྗེའི་སྤུན། །དཀྱིལ་འཁོར་སློབ་དཔོན་རིག་མ་གཅིག །དབང་བཞི་དག་གི་བྱེ་བྲག་གིས། །ཉེ་དང་ཁྱད་པར་བྱེ་བྲག་གོ །ཞེས་སོ། །དེ་ལྟར་སྤུན་དེ་རྣམས་ལ་ཡིད་ཀྱིས་ཁྲོས་ཤིང་འཁོན་ཞེ་ལ་འཛིན་པ་དང་ཕྲག་དོག་གི་བསམ་པས་ལུས་ངག་གིས་བརྙས་པ་དང་། སྐྱོན་བརྗོད་པས་དེའི་སེམས་སུན་ཕྱུང་ན་རྩ་ལྟུང་གསུམ་པའོ། །དེའང་ནང་འདྲེས་པའི་སྤུན་ཡིན་ན་རྡོ་རྗེ་ནང་དམེ་ཡིན་པས་ཤིན་ཏུ་ལྕི་ཞིང་སྦྱང་དཀའ་བའི་རིགས་སོ། །བཞི་པ་ནི། སེམས་ཅན་བདེ་བ་ཀུན་དང་བྲལ་ན་བསམ། །སྙིང་ནས་བྱམས་པ་བཏང་བ་བཞི་པའོ། །ཞེས་པ་སྟེ། ཡུལ་སེམས་ཅན་གང་ཡང་རུང་བ་བདེ་བ་དང་བྲལ་ཞིང་སྡུག་བསྔལ་དང་འཕྲད་ན་ཅི་མ་རུང་སྙམ་དུ་ཁྲོ་བའི་བསམ་པས་སྙིང་ཐག་པ་ནས་བྱམས་པ་བཏང་བ་རྩ་ལྟུང་བཞི་པའོ། །ལྔ་པ་ནི། འདོད་ཆགས་སེམས་ཀྱིས་གནས་སྐབས་མ་ཡིན་པར། །བསམ་ཞིང་ཁུ་བ་འབྱིན་དང་སེམས་ཅན་ལ། །བྱང་ཆུབ་སེམས་བསྐྱེད་བཏང་བ་ལྔ་པ་འོ། །ཞེས་པ་སྟེ། བསྐྱེད་རིམ་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་དོན་གཉེར་གྱི་སྨོན་སེམས་བཏང་བ་དང་། དེ་མ་བཏང་ནའང་འཇུག་པའི་རྩ་ལྟུང་ཐུན་མོང་བ་སྤྱད་པས་འཇུག་སེམས་བཏང་བ་སྤྱི་དང་། ཁྱད་པར་གསང་དབང་གི་ལམ་པས་སྐྱུག་བྲོའི་དབང་གིས་ཐབས་ཤེས་ཀྱི་ཁུ་ཁྲག་སྤངས་པ་དང་། ཤེས་རབ་ཡེ་ཤེས་ཀྱི་ལམ་པས་གསང་དབང་བསྐུར་བའི་རྫས་དང་བདུད་རྩི་རིལ་བུ་སྒྲུབ་པའི་ཆེད་སོགས་གནང་བའི་གནས་སྐབས་བདུན་མ་ཡིན་པར་མི་འགྱུར་བའི་བདེ་བ་ལ་མ་དད་ཅིང་ཞུ་བདེ་འགྱུར་མེད་ལ་དགོས་མེད་དུ་བསམ་ནས་འདོད་ཆགས་སམ་བསླབ་པ་ཁྱད་གསོད་ཀྱིས་བསམ་བཞིན་དུ་ཁུ་བ་འབྱིན་པས་ནོར་བུའི་ཕྱིར་ལྷུང་ན་རྩ་ལྟུང་ལྔ་པའོ། །དེ་ལ་གནང་བའི་གནས་སྐབས་བདུན་ནི། གསང་བའི་དབང་དང་གསུམ་པ་དང་། །རོ་མཉམ་པ་དང་ལྷ་མཆོད་དང་། །རིགས་བརྒྱུད་སྤེལ་དང་རིལ་བུ་དང་། །འཆི་ལྟས་བརྟག་པའི་དུས་ཡིན་ཏེ། །ཞེས་པ་ལྟར་རོ། །དྲུག་པ་ནི། ལམ་འཚོལ་མུ་སྟེགས་ལམ་ཞུགས་ཉན་རང་དང་། །ལམ་ཆེན་ཐེག་ཆེན་གྲུབ་མཐར་སྨོད་ན་དྲུག །ཅེས་པ་སྟེ། མུ་སྟེགས་ཀྱི་གྲུབ་མཐར་བཤད་པའི་དཀར་ཆོས་རྣམས་ཀྱང་ལམ་གྱི་རྟེན་མཐོ་རིས་སྒྲུབ་པས་ངན་འགྲོ་ལས་ངེས་འབྱུང་གི་ལམ་འཚོལ་བའི་ཕྱིར་དང་ནང་པ་སངས་རྒྱས་པ་ལས་ཉན་རང་ནི་འཁོར་བ་ལས་ངེས་པར་འབྱུང་བའི་ལམ་ལ་ཞུགས་པ་དང་། མཐའ་གཉིས་ལས་ངེས་པར་འབྱུང་བའི་ལམ་ཆེན་པོ་ལ་ཞུགས་པ་ཐེག་ཆེན་ཕ་རོལ་ཏུ་ཕྱིན་པ་སྟེ། དེ་ཐམས་ཅད་ཀྱང་གསང་སྙིང་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སྔགས་ཀྱི་ཐེག་པའི་ལམ་སྟེགས་སུ་འགྱུར་བས་མཐར་ཐུག་ཐེག་པ་གཅིག་ཏུ་གྲུབ་པའི་ཕྱིར། ཐེག་པ་གོང་མ་ལ་དྲང་བའི་ཆེད་སོགས་མ་ཡིན་པར་མཆོག་དམན་དུ་བཟུང་ནས་སྡང་སེམས་ཀྱིས་སྨད་ན་རྩ་ལྟུང་དྲུག་པའོ། །དེ་ལ་འདིར་གཞན་གྱི་གྲུབ་མཐའ་མུ་སྟེགས་པའི་དཀར་ཆོས་ལ་ངོས་འཛིན་པ་ནི། སྤྱིར་མུ་སྟེགས་པའི་གཞུང་དཀར་ཆོས་མ་ཡིན་ཡང་། དེར་བཤད་པའི་དཀར་ཆོས་ནི་སངས་རྒྱས་པའི་ཡང་དཀར་ཆོས་ཡིན་པས་སྨད་ན་ལྟུང་བར་འགྱུར་དགོས་ཏེ། རྣམ་སྣང་མངོན་བྱང་ལས། རྣམ་པར་སྣང་མཛད་རིང་བའི་རྒྱུ། །མུ་སྟེགས་ཅན་ལ་སྨད་མི་བྱ། །ཞེས་དང་། འཇམ་དཔལ་གྲགས་པས། གྲུབ་པའི་མཐའ་ཡི་བློ་བསྐྱེད་ཕྱིར། །ཕྱི་རོལ་པ་ཡང་ལམ་འཚོལ་ཞུགས། །དེ་ཕྱིར་དེ་ལ་སྨད་མི་བྱ། །ལམ་ཞུགས་ཉན་ཐོས་སྨོས་ཅི་དགོས། །ཞེས་སོ། །བདུན་པ་ནི། སྣོད་དང་ཆོ་ག་མ་བྱས་མ་རྫོགས་དང་། །ཉམས་དང་ཟབ་མོས་འཇིགས་ལྔར་གསང་སྒྲོགས་བདུན། །ཞེས་པ་སྟེ། སྣོད་ཀྱིས་མ་སྨིན་པ་ལོག་སྲེད་ཅན་དང་། ཆོ་ག་མ་བྱས་པས་མ་སྨིན་པ་བུམ་དབང་མ་ཐོབ་པ་དང་། ཆོ་ག་མ་རྫོགས་པས་མ་སྨིན་པ་མཆོག་དབང་གསུམ་མ་ཐོབ་པ་དང་། ཉམས་པས་མ་སྨིན་པ་རྩ་ལྟུང་བྱུང་ནས་འགྱོད་པས་ཕྱིར་མི་འཆོས་དང་། ཟབ་མོས་འཇིགས་པ་ཉན་རང་སོགས་དབང་པོ་མ་སྨིན་པས་ཟབ་དོན་ལ་སྐྲག་པ་སྟེ། དེ་ལྟར་ཡུལ་རྣམ་པ་ལྔ་ལ་འདུལ་བའི་དུས་དང་བསྟན་བྱ་དེ་ལ་ལྟོས་པའི་སྣོད་ཀྱི་སྐབས་མ་ཡིན་པར་གསང་སྔགས་ཀྱི་ཐུན་མོང་མ་ཡིན་པའི་རྫས་དང་སྤྱོད་པ་དང་ཆོས་ཟབ་དོན་གྱི་གསང་བ་བསྒྲགས་པ། དེས་ཀྱང་གོ་བཞིན་མ་དད་པ་སྐྱེས་ན་རྩ་ལྟུང་བདུན་པའོ། །བརྒྱད་པ་ནི། ཕུང་ལྔ་སངས་རྒྱས་ལྔ་ལ་བརྙས་པ་ཡིས། །སྨོད་དང་གདུང་བ་བསྐྱེད་ན་བརྒྱད་པ་ཡིན། །ཞེས་པ་སྟེ། རྡོ་རྗེ་ཕུང་པོ་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་པ་ལྟར་ཕུང་པོ་ལྔའི་རང་བཞིན་རིགས་ལྔའི་སངས་རྒྱས་ཡིན་པ་ལྟར་དབང་དུས་སུ་ངོ་སྤྲད་ནས། དེ་འདོད་ཡོན་གྱིས་མཉེས་པར་མཆོད་པས་རྟེན་བདེ་བ་འཕེལ། དེས་བརྟེན་པ་ཡེ་ཤེས་མངོན་དུ་འགྱུར་བ་ཡིན་པ་ལས། ཕུང་པོ་ཀུན་འབྱུང་གི་གཙོ་བོར་བཟུང་སྟེ། ལྷའི་ཁྱད་པར་སྒྲུབ་པ་སོགས་ཀྱི་དགོས་པ་མེད་པར་རང་ལུས་མི་གཙང་ངོ་ཞེས་ངག་གིས་སྨོད་ཅིང་སེམས་ཀྱིས་དེ་ལྟར་བཟུང་ནས་བརྙས་པའམ་ཡན་ལག་གཅོད་པ་སོགས་ཀྱི་དཀའ་སྤྱད་དང་སྨྱུང་གནས་སོགས་དཀའ་ཐུབ་ཀྱིས་ལུས་ལ་གདུང་བ་བསྐྱེད་པར་བྱེད་ན་རྩ་ལྟུང་བརྒྱད་པའོ། །དགུ་པ་ནི། གཞི་ལམ་འབྲས་བུའི་རང་བཞིན་དག་པ་ལ། །དཀྲི་བར་ཐེ་ཚོམ་ཟ་བ་དགུ་པར་བཤད། །ཅེས་པ་སྟེ། གཞི་ལམ་འབྲས་བུའི་ཆོས་ཐམས་ཅད་རང་བཞིན་གྱིས་རྣམ་པར་དག་པས་དབྱེར་མི་ཕྱེད་པའི་ཟུང་འཇུག་འོད་གསལ་བྱང་ཆུབ་ཀྱི་སེམས་བདེ་བར་གཤེགས་པའི་སྙིང་པོ་གདོད་མའི་གནས་ལུགས་སུ་བཞུགས་པར་བཤད་པ་ནི་ལམ་ལ་དཀྲི་བའི་ཆེད་དུ་སྤྲོ་བ་བསྐྱེད་པ་ཙམ་ལས་དོན་ལ་དེ་ལྟར་མ་ཡིན་སྙམ་དུ་ཐེ་ཚོམ་ཟ་བས་ཡིད་མ་ཆེས་ཏེ་མ་དད་ན་རྩ་ལྟུང་དགུ་པའོ། །བཅུ་པ་ནི། བསྒྲལ་བའི་ཞིང་བཅུ་ཚང་བར་ནུས་བཞིན་དུ། །མི་སྒྲོལ་བ་དང་བྱམས་པར་བྱེད་ན་བཅུ། །ཞེས་པ་སྟེ། དེ་ལ་ཡུལ་ནི་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་ཀྱིས་དང་དུ་བླང་། །ཞེས་པས་སྤྱིར་བསྟན་པ་ལ་གནོད་པར་བྱེད་པའི་དཀོན་མཆོག་གསུམ་གྱི་སྐུ་དགྲ་དང་། ཁྱད་པར་བླ་མའི་སྐུ་དགྲ་དང་། སྔགས་ཀྱི་དམ་ཚིག་ཉམས་ནས་གསོ་བར་མི་བྱེད་པ་དང་། སྔགས་ཀྱི་ཐེག་པར་ཞུགས་པ་ལས་ཕྱིར་ལོག་སྟེ་སྤང་པ་དང་། བླ་མ་དང་མཆེད་ལ་ཞེ་སྡང་བས་འཁུ་བ་དང་། སྔགས་སྤྱོད་ལ་འདུ་བར་མི་དབང་བཞིན་དུ་རྐུ་ཐབས་ཀྱིས་འདུས་པའི་ནང་དུ་འོང་པ་དང་། སེམས་ཅན་ཡོངས་ལ་གནོད་པའི་ལས་བྱེད་པ་དང་། དམ་ཚིག་དང་ལྡན་པའི་དགྲར་གྱུར་པ་དང་། མི་དགེ་བའི་ལས་འབའ་ཞིག་ལ་འཇུག་པའི་སྤྱོད་པ་ངན་པའི་ངང་ཚུལ་ཅན་ཏེ་སྡུག་བསྔལ་གྱི་རྒྱུ་ལ་སྤྱོད་པ་དགུ་དང་། སྡུག་བསྔལ་དངོས་ལ་སྤྱོད་པ་ངན་སོང་གསུམ་པོ་གཅིག་ཏུ་སྡོམ་པས་བཅུ་སྟེ། དེ་ལྟར་བསྒྲལ་བའི་ཞིང་དུ་གྱུར་པ་དེ་རྣམས་མངོན་སྤྱོད་ཀྱི་ལས་ཀྱིས་སྒྲོལ་བར་ནུས་བཞིན་དུ་ཡལ་བར་དོར་ནས་མི་སྒྲོལ་བ་དང་། དེ་ལས་ཀྱང་ཁྱད་པར་བླ་མ་དང་བསྟན་འགྲོར་འཚེ་བའི་གདུག་པ་ཅན་དེ་དག་ལོག་པའི་སྲེད་པས་རང་གི་མཛའ་བོར་བྱས་ནས་ཐ་མལ་པའི་བྱམས་པ་བྱེད་ན་རྩ་ལྟུང་སྟེ། དེས་ན་ལུས་ངག་གི་བྱམས་པ་མི་བྱེད་པར་མ་ཟད། འཕྲལ་དུ་བཟོད་པ་བསྒོམ་པའང་མི་བྱ་སྟེ། གདོང་དྲུག་གི་རྒྱུད་ལས། གདུག་པ་རྣམས་ལ་བཟློག་སྟེ་བྱ། །དངོས་སམ་ཡང་ན་སྔགས་དང་གཞན། །འཁྲུལ་འཁོར་དང་ནི་ཏིང་ངེ་འཛིན། །སྨན་གྱིས་ཀྱང་ནི་བྱ་བ་སྟེ། །ཞེས་གསུངས་པའི་ཕྱིར་རོ། །དེར་མ་ཟད་གཡོ་སྒྱུས་བྱམས་པ་ལྟར་སྟོན་པ་ཁ་འཇམ་ལ་ཞེ་གདུག་པ་ལྟར་བྱེད་ནའང་རྩ་ལྟུང་དུ་འགྱུར་བར་དུས་འཁོར་ལས་བཤད་དོ། །བཅུ་གཅིག་པ་ནི། མིང་སོགས་བྲལ་ལ་དངོས་དང་དངོས་མེད་རྟོག །རྟོག་གེས་འཇལ་བར་བྱེད་ན་བཅུ་གཅིག་པའོ། །ཞེས་པ་སྟེ། མིང་སོགས་མཚན་མ་ཐམས་ཅད་དང་བྲལ་བའི་དོན་དམ་བདེན་པ་དང་། དེ་རྟོགས་པའི་ཐབས་རྣམ་པར་མི་རྟོག་པའི་ལམ་ལ་ཐེ་ཚོམ་ཟ་བས་སོ་སོ་རང་རིག་ལས་གཞན་དུ་རྟོག་གེའི་རིག་པས་དངོས་པོའམ་དངོས་མེད་གང་རུང་དུ་སྒྲོ་འདོགས་པས་རྟོག་ཅིང་ཞེན་པར་བྱེད་ན་རྩ་ལྟུང་བཅུ་གཅིག་པ་སྟེ། གུར་ལས། ཆོས་ཉིད་ཚད་ནི་བཟུང་མི་བྱ། །ཞེས་དང་། ཤཱནྟི་པས། ཆོས་ལ་ཚད་མས་གཞལ་མི་བྱའོ། །ཞེས་སོ། །བཅུ་གཉིས་པ་ནི། དད་གསུམ་ལྡན་པའི་སེམས་ཅན་དོན་མི་བྱེད། །སེམས་མི་བསྲུང་དང་བསླུ་བ་བཅུ་གཉིས་པ། །ཞེས་པ་སྟེ། བླ་མ་དང་དཀོན་མཆོག་གི་ཡོན་ཏན་ལ་དང་བ་དང་འདོད་པ་དང་ཡིད་ཆེས་ཀྱི་དད་པ་གསུམ་དང་ལྡན་པའི་སེམས་ཅན་ཆོས་འདོད་ཅིང་སྦྱིན་དུ་རུང་བ་ལ་མི་སྟེར་བ་ལྟ་བུ་དེའི་དོན་བྱེད་ནུས་ཀྱང་མི་བྱེད་པས་སམ། དེའི་སེམས་དང་འགལ་བ་མི་བསྲུང་བར་མི་དད་པར་རིགས་པའི་སྤྱོད་པ་བསྟན་པ་དང་ཆགས་སྡང་གི་སྐྱོན་བརྗོད་པའམ་གཡོ་སྒྱུས་བསླུས་ཀྱང་རུང་སྟེ། དེ་ཉིད་ཀྱི་སེམས་སུན་བྱུང་ནས་དད་འདུན་ལོག་ན་རྩ་ལྟུང་བཅུ་གཉིས་པའོ། །བཅུ་གསུམ་པ་ནི། སྐབས་བབས་ཡོ་བྱད་ལོངས་སྤྱོད་དམ་ཚིག་རྫས། །དུས་ཚོད་འབྲེལ་ཡང་མི་བསྟེན་བཅུ་གསུམ་པ། །ཞེས་པ་སྟེ། སྔགས་ཀྱི་སྤྱོད་པའི་དུས་སུ་ཚོགས་འཁོར་རམ་དཔའ་བོ་དང་དཔའ་མོའི་སྟོན་མོ་གང་ཡིན་ཡང་རུང་སྟེ། དེ་དང་དེའི་ཚེ་བསྟེན་པ་སྐབས་སུ་བབས་པའི་དམ་ཚིག་གི་རྫས་རྡོར་དྲིལ་གོས་རྒྱན་སོགས་བཅང་བའི་ཡོ་བྱད་དང་། ཕྱི་ནང་གི་ཤ་ལྔ་བདུད་རྩི་ལྔ་ཆང་སོགས་བཟའ་བཏུང་གི་ལོངས་སྤྱོད་དང་། བྲོ་གར་གླུ་ཚིག་རིག་མ་སོགས་སྤྱོད་པ་དུས་ཚོད་དང་འབྲེལ་ཡང་། ཉན་ཐོས་ཀྱི་བརྟུལ་ཞུགས་ལ་འཆེལ་བ་ལ་སོགས་པས་ཐེ་ཚོམ་ཟ་བའམ། མི་གཙང་བ་དང་ཉེས་དམིགས་ཀྱི་བསམ་པས་མི་བསྟེན་ཞིང་སྤངས་ན་རྩ་ལྟུང་བཅུ་གསུམ་པའོ། །བཅུ་བཞི་པ་ནི། སྤྱི་དང་བྱེ་བྲག་ལ་ལྟོས་ཤེས་རབ་མ། །ངོས་ལྐོག་སྙིང་ཚིམ་སྨད་གོ་བཅུ་བཞི་པ། །ཞེས་པ་སྟེ། ཡུལ་བུད་མེད་གཅིག་གམ་དུ་མའང་རུང་སྟེ་རིགས་འདོད་པའི་སྒོ་ནས་སྤྱི་དང་། བྱེ་བྲག་སྤྱོད་པའི་དུས་ཡིན་ན་རང་གི་བསྟེན་བྱར་འགྱུར་ངེས་ལ་ལྟོས་པའི་བུད་མེད་ཤེས་རབ་ཆོས་འབྱུང་གི་རང་བཞིན་ཅན་དེ་དག་ལ་དངོས་སམ་ལྐོག་ཏུ་ཞེ་ཐག་པ་ནས་སྙིང་ཚིམ་པས་བརྙས་ཐབས་དང་སྨོད་ཚིག་བརྗོད་པ་གཞན་གྱིས་གོ་ན་རྩ་ལྟུང་བཅུ་བཞི་པའོ། །དེ་ཡང་འདིར་ཡུལ་གྱི་བུད་མེད་བླ་མེད་ཀྱི་སྡོམ་ལྡན་མ་ཡིན་པ་ཞིག་དགོས་ཏེ། སྔགས་སྡོམ་དང་ལྡན་པའི་བུད་མེད་ནི་རང་གི་བླ་མའམ་སྤུན་ལས་མི་འདའ་བས་རྩ་ལྟུང་དང་པོ་དང་གསུམ་པར་འགྱུར་པའི་ཕྱིར་རོ། །
བཞི་པ་ཡན་ལག་སྦོམ་པོའི་ལྟུང་བ་ལ་བསྟན་བཤད་བསྡུ་གསུམ་ལས། མདོར་བསྟན་ནི། ད་ནི་ཡན་ལག་སྦོམ་པོའི་ལྟུང་བ་བཤད། །ཅེས་པ་སྟེ། འདི་ལ་མཚན་ཉིད། སྒྲ་དོན། དབྱེ་བའོ། །དང་པོ་ནི། སྔགས་བླ་མེད་ཀྱི་སྡོམ་པའི་མི་མཐུན་ཕྱོགས་ཀྱི་ཉེས་པ་གང་ཞིགསྤྱད་ན་སྡོམ་པའི་ཡན་ལག་ཉམས་བྱེད་ཀྱི་རིགས་གནས་སོ། །གཉིས་པ་ནི། རྩ་བ་བཅུ་བཞི་དང་རྗེས་སུ་མཐུན་པས་ཡན་ལག་དང་། སྡོམ་པ་གཏོང་བྱེད་ཀྱི་ཕམ་པ་མ་ཡིན་ཡང་། དངོས་གྲུབ་མྱུར་དུ་འགྲུབ་པ་ལ་གེགས་བྱེད་པའི་ཕྱིར་ལྕི་བས་སྦོམ་པོ་ཞེས་བྱ་སྟེ། ཤིང་གི་ཡལ་ག་ཆད་ན་སྡོང་པོ་ཉམས་པས་སླར་མི་སྐྱེ་བ་མ་ཡིན་པ་བཞིན་ནོ། །གསུམ་པ་ནི། སྦོམ་པོའི་ལྟུང་བ་བརྒྱད་ལས། ཐོག་མ་གསུམ་རང་རྒྱུད་སྨིན་བྱེད་ཀྱི་ཡན་ལག་དང་། ཕྱི་མ་ལྔ་གཞན་རྒྱུད་སྨིན་བྱེད་ཀྱི་ཡན་ལག་གོ །
གཉིས་པ་རྒྱས་བཤད་ལ། སྦོམ་པོ་བརྒྱད་བཤད་པ་དང་། འཆད་ཚུལ་གཞན་རྣམ་གྲངས་སུ་འཕྲོས་པའོ། །དང་པོ་ནི། དབང་དང་དམ་ཚིག་མ་སྨིན་རིག་མ་བསྟེན། །ཚོགས་ཀྱི་འཁོར་ལོའི་དུས་སུ་ལུས་ངག་རྩོད། །མ་གསུངས་རིག་མར་རང་སྟོབས་བདུད་རྩི་ལེན། །སྣོད་ལྡན་སློབ་མར་གསང་སྔགས་མི་སྟོན་དང་། །དད་ལྡན་ཆོས་འདྲི་བ་ལ་ཆོས་གཞན་སྟོན། །ཉན་ཐོས་ནང་དུ་ཞག་བདུན་ལོང་པར་བསྡད། །རྣལ་འབྱོར་ཡེ་ཤེས་མི་ལྡན་སྔགས་པར་རློམ། །སྣོད་མིན་ལ་བཤད་ཡན་ལག་ལྟུང་བ་བརྒྱད། །ཅེས་པ་སྟེ། དབང་གིས་རྒྱུད་མ་སྨིན་ཅིང་དམ་ཚིག་དང་མི་ལྡན་པའི་རིག་མ་བསྟེན་པ་ཙམ་ལས་དང་པོའོ། །ཚོགས་ཀྱི་འཁོར་ལོའི་གྲལ་དུ་བླ་མའམ། རྡོ་རྗེ་སྤུན་ལ་མནར་སེམས་མེད་པར་ལུས་ངག་གིས་རྩོད་རྡེག་དང་ཁ་ཤགས་ཙམ་བྱས་ན་གཉིས་པའོ། །རྒྱུད་ལས་གསུངས་པའི་མཚན་ཉིད་མ་ཚང་བའི་རིག་མ་ཕལ་པ་ལས་རིལ་བུའམ་བདེ་བའི་རྒྱུར་བདུད་རྩི་ཆོ་ག་བཞིན་དུ་མ་ཡིན་པར་རང་སྟོབས་ཀྱིས་ལེན་པ་གསུམ་པའོ། །སྣོད་རུང་དོན་དུ་གཉེར་བའི་སློབ་མར་གསང་སྔགས་ཀྱི་ཆོས་དཔེ་མཁྱུད་ཀྱིས་མི་སྟོན་པ་བཞི་བའོ། །དད་ལྡན་ཆོས་དོན་གཉེར་གྱི་དུས་སུ་འདྲི་བ་ལ་ཆོས་དེ་མི་སྟོན་པར་གཞན་སྟོན་པ་ལྔ་པའོ། །སྔགས་ཀྱི་ལྟ་སྤྱོད་ལ་བསྐུར་བ་འདེབས་པའི་ཉན་ཐོས་དངོས་སམ་རྟོག་གེ་བའི་ནང་དུ་ཞག་བདུན་ལོངས་པར་བསྡད་པ་དྲུག་པའོ། །གསང་སྔགས་ཀྱི་རྣལ་འབྱོར་དེ་ཁོ་ན་ཉིད་ཀྱི་ཡེ་ཤེས་དང་མི་ལྡན་པར་རང་ཉིད་སྔགས་འཆང་རྡོ་རྗེ་འཛིན་པར་སྨྲ་ཞིང་རློམ་པ་ནི་བདུན་པའོ། །ནང་གི་སྣོད་མ་ཡིན་པའི་གང་ཟག་འདོད་ཅིང་དོན་དུ་གཉེར་བ་ཚོགས་བཤད་བསྟན་བྱའི་ཡུལ་ལ་ཟབ་དོན་དུས་མ་ཡིན་པར་བཤད་པ་བརྒྱད་པའོ། །དེ་དག་ཀྱང་སློབ་དཔོན་དཔའ་བོས། རབ་ཏུ་བདེ་བ་འཕྲོག་བྱེད་པ། །ཡན་ལག་ཉེས་པ་ང་ཡིས་བཤད། །དམ་ཚིག་དག་དང་མི་ལྡན་པའི། །རིག་མ་བསྟེན་པར་དགའ་བ་ནི། །ཡན་ལག་ཉེས་པ་དང་པོ་ཡིན། །ཞེས་སོགས་གསུངས་པ་ལྟར་རོ། །གཉིས་པ་ནི། བསྙེན་སོགས་མ་བྱས་དབང་རབ་ལས་སོགས་འཇུག །ཕྱི་ཆོས་མོས་ལ་ལུས་ཀྱི་ཕྱག་རྒྱ་བསྟན། །སྡོམ་པ་གཉིས་ཀྱི་བཅས་ལས་དགོས་མེད་འདའ། །ཞེས་པ་སྟེ། བསྙེན་སྒྲུབ་མ་བྱས་པར་སློབ་མ་ལ་དབང་བསྐུར་བ་དང་རབ་གནས་དང་སྦྱིན་སྲེག་གི་ལས་ལ་བསམ་པས་འཇུག་ཅིང་སྦྱོར་བས་ཞུགས་པ་དང་། ཟབ་མོ་སྐྲག་པའི་རིགས་མ་ཡིན་ཡང་ཕྱིའི་ཆོས་ལ་མོས་པའི་གང་ཟག་ལ་དགོས་པ་མེད་པར་ལུས་ཀྱི་ཕྱག་རྒྱ་བསྟན་པ་དང་། སྡོམ་པ་འོག་མ་སོར་བྱང་གཉིས་ཐོབ་པའི་སྔགས་པས་ཕྱི་དྲོའི་ཁ་ཟས་ཟ་བ་ལྟ་བུ་དེ་དང་དེའི་བཅས་པ་ལས་ཚོགས་འཁོར་དང་སྦྱིན་སྲེག་སོགས་དགོས་པ་ཁྱད་པར་ཅན་མེད་པར་འདའ་བར་བྱེད་པ་སྟེ། དེ་སོགས་སྦོམ་པོའི་ངོས་འཛིན་དང་གོ་རིམ་མི་གཅིག་པ་མང་དུ་སྣང་མོད། གཞུང་འདིར་བསྡུ་བར་མཛད་པའི་སྦོམ་པོ་བརྒྱད་ནི་འཇིགས་བྲལ་དཔའ་བོ་དང་དམ་ཚིག་རྒྱ་མཚོ་ལ་སོགས་པའི་དགོངས་པ་དང་མཐུན་ལ། རྗེ་བཙུན་རིན་པོ་ཆེའི་འཁྲུལ་སྤོང་ལས་ནི་བཤད་མ་ཐག་པའི་གསུམ་པོ་རིམ་པར་སྦོམ་པོ་བརྒྱད་པ་དང་བདུན་པ་དང་དགུ་པར་མཛད་དོ། །དེས་ན་འཁྲུལ་སྤོང་གི་དགོངས་པའི་ངོ་བོ་དང་གོ་རིམ་ནི་འདི་ཡིན་ཏེ། ཇི་སྐད་དུ། ཡན་ལག་དམ་ཚིག་ཅེས་བྱ་བ། །དམ་ཚིག་དང་ནི་མི་ལྡན་པའི། །རིག་མ་བསྟེན་པར་དགའ་བ་དང་། །ཚོགས་ཀྱི་འཁོར་ལོར་རྩོད་པ་དང་། །གསང་བའི་ཆོས་ནི་སྟོན་པ་དང་། །སེམས་ཅན་དད་དང་ལྡན་པ་ལ། །དམ་ཆོས་གཞན་དུ་སྟོན་པ་དང་། །ཉན་ཐོས་དག་དུ་རློམ་བྱེད་པའི། །ནང་དུ་ཞག་བདུན་གནས་པ་དང་། །སྦྱོར་བ་ངེས་པར་མ་བྱས་པར། །སྐལ་མིན་གསང་བ་སྟོན་པ་དང་། །གང་ཞིག་ཕྱག་རྒྱ་མི་མཁས་པ། །ལུས་ཀྱི་ཕྱག་རྒྱ་སྟོན་པ་དང་། །བསྙེན་སོགས་དག་པར་མ་བྱས་པར། །དཀྱིལ་འཁོར་ལས་ལ་འཇུག་པ་དང་། །སྡོམ་པ་གཉིས་ཀྱི་བཅས་པ་ལ། །དགོས་པ་མེད་པར་འདའ་བ་རྣམས། །ཞེས་སོ། །
གསུམ་པ་དོན་བསྡུ་བ་ནི། ཞེས་སོགས་སྦོམ་པོའི་ལྟུང་བ་དུ་མ་རྣམས། །ཡོད་ཀྱང་ཉེས་པ་ཆུང་ཞེས་དུས་འཁོར་བཤད། །ཅེས་པ་སྟེ། དེ་སོགས་སྦོམ་པོའི་ལྟུང་བ་གྲངས་མཐའ་གཅིག་ཏུ་མ་ངེས་པ་དུ་མ་དང་། ཡན་ལག་གང་རུང་མ་ཚང་བའི་ཉེས་བྱས་སོགས་མང་དུ་ཡོད་ཀྱང་ཉེས་པ་ཆུང་བར་བཤད་པས་འདིར་བཏང་སྙོམས་སུ་མཛད་དེ། དུས་འཁོར་འགྲེལ་ཆེན་ལས། ལྟུང་བ་སྦོམ་པོ་རྣམས་ནི་དུ་མ་སྟེ། དེ་རྣམས་ལ་ཆད་པ་ཤིན་ཏུ་ཆུང་བར་འགྱུར་རོ། །ཞེས་པ་ནི་ངེས་པའོ། །ཞེས་གསུངས་པའི་ཕྱིར་རོ། །
ལྔ་པ་ཁྱད་པར་སྔ་འགྱུར་རྫོགས་པ་ཆེན་པོའི་ལུགས་བཤད་པ་ལ། བསྟན་བཤད་གཉིས་ལས། མདོར་བསྟན་ནི། ཁྱད་པར་སྔ་འགྱུར་རྫོགས་པ་ཆེན་པོའི་སྲོལ། །ཞེས་པ་སྟེ། བསྐྱེད་རྫོགས་གསུམ་ལས། མ་ཧཱ་ཡོ་ག་མན་ཆད་དུ་བཤད་པའི་གསར་རྙིང་ཐུན་མོང་པའི་དམ་ཚིག་རྣམས་བསྟན་ཟིན་ནས། ད་ནི་གསར་མའི་རྒྱུད་རྣམས་སུ་མ་གྲགས་པས་ཁྱད་པར་བ་སྟེ། རྫོགས་པ་ཆེན་པོ་གཙོ་བོར་བྱས་པའི་སྔ་འགྱུར་གྱི་རྒྱུད་རྣམས་སུ་གསུངས་པའི་ལུགས་སྲོལ་དག་འཆད་པར་བྱའོ། །དེ་ལ་ཐོག་མར་སྤྱིའི་དོན་ཅུང་ཟད་བཤད་ན། དམ་ཚིག་གི་ངོ་བོ་དང་། སྒྲ་དོན་དང་། དབྱེ་བའོ། །དང་པོ་ནི། བསྲུང་བྱའི་དོན་སྔགས་ཀྱི་བརྟུལ་ཞུགས་བཟང་པོ་ལས་མི་འདའ་བར་སྡོམ་པའི་ལྷག་བསམ་ཁྱད་པར་ཅན་ས་བོན་དང་བཅས་པ་གང་ཞིག །སྤྱི་དང་ཁྱད་པར་ལྷག་པ་གསུམ་གྱིས་བསྡུས་པའི་རིགས་གནས་སོ། །གཉིས་པ་ནི། ས་མ་ཡའི་སྒྲ་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་པས་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པས་དམ་ཚིག་སྟེ། ཀུན་འདུས་ལས། འདའ་དཀའ་རྡོ་རྗེ་དམ་ཚིག་གཏན་གྱི་གཉེར། །ཞེས་སོ། །དེ་ལ་བསྲུངས་མ་བསྲུངས་ཀྱི་ཁེ་ཉེན་གྱིས་དམ་ཚིག་ཏུ་བཞག་པའང་ཡོད་དེ། ཧེ་རུ་ཀ་འདུས་པའི་རྒྱུད་ལས། མི་འདའ་དམ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། །ཅེས་སོ། །གསུམ་པ་ལ། བསྲུང་དུ་མེད་པ་ཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གོ །དང་པོ་ནི། ཆོས་ཐམས་ཅད་ཡེ་ནས་བླང་དོར་མེད་པར་རྟོགས་པས་སྤང་བླང་བསྲུང་མཚམས་ལས་འདས་པའི་དམ་ཚིག་སྟེ། ཀུན་བྱེད་རྒྱལ་པོ་ལས། ཀྱེ། ཀུན་བྱེད་ང་ཡི་དགོངས་པའི་དམ་ཚིག་ནི། །མ་ཡེངས་དྲན་པས་དངོས་པོ་ཡེ་ཤེས་སུ། །མ་བཅོས་སུས་ཀྱང་མ་བྱས་རང་བྱུང་སྟེ། །རིག་པས་དབང་སྒྱུར་བསྲུང་དང་མི་བསྲུང་མེད། །ཅེས་དང་། སྤྱི་མདོ་ལས། བསྲུང་བྱ་བསྲུང་དུ་མེད་པ་ནི། །ཆོས་ཉིད་དམ་ཚིག་དམ་པ་ཡིན། །ཞེས་སོ། །གཉིས་པ་ནི། དེ་ལས། དམ་ཚིག་འདི་ནི་རྨད་པོ་ཆེ། །ཀུན་གྱི་ཐུན་མོང་མ་ཡིན་ཕྱིར། །མོས་པ་ཆུང་ངུ་ཐམས་ཅད་ལ། །བསྲུང་བའི་མཚམས་དག་བཟུང་བར་བྱོས། །ཞེས་གསུངས། དེ་ལ་དབྱེ་ན། བདེ་འདུས་ཞི་རྒྱུད་ལས། ཉོན་ཅིག་འདུས་པའི་འཁོར་ཚོགས་རྣམས། །དཀྱིལ་འཁོར་འདིར་ནི་གང་ཞུགས་པས། །བསྲུང་ཞིང་བསྡམ་པར་བྱ་བ་དང་། །སྤྱི་དང་ཁྱད་པར་ལྷག་པ་ཡི། །རྣམ་པར་དབྱེ་བས་བཟུང་བྱ་སྟེ། །ཞེས་པས་སྤྱི་དང་། ཁྱད་པར་དང་། ལྷག་པའི་དམ་ཚིག་གསུམ། དང་པོ་ནི། སོ་བྱང་དང་ཕྱི་རྒྱུད་ཀྱི་སྡོམ་པའི་བསྲུང་མཚམས་སུ་གྲགས་པའི་དམ་ཚིག་རྣམས་ཏེ། དེ་ལས། སོ་སོ་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །གཉིས་པ་ནི། རྩ་བ་སྐུ་གསུང་ཐུགས་ཀྱི་དམ་ཚིག་དང་། །ཡན་ལག་ལྔ་ཚན་ལྔ་སྟེ། སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང་། །མི་འདོར་ཤེས་བྱ་སྒྲུབ་པ་དང་། །ཞེས་ཉི་ཤུ་རྩ་བརྒྱད་གསུངས་པ་ནི། གཞུང་དོན་རྒྱས་བཤད་ཀྱི་སྐབས་སུ་འཆད་འགྱུར་ལས་ཤེས་པར་བྱའོ། །གསུམ་པ་ནི། ཞི་རྒྱུད་ལས། གཞུང་དོན་ལྷག་པའི་དམ་ཚིག་ནི། །རབ་ཏུ་ལྷག་པར་བསྲུང་བར་བྱ། །གཅན་གཟན་རྒྱལ་པོའི་ཁྲི་མི་ཞིག །ཟ་མ་ཏོག་ཏུ་དུག་མི་བླུག །རིན་ཆེན་ལྕུག་ཕྲན་མི་འབྲེག་ཅིང་། །ཞུན་ཁོལ་ལྟ་བུ་མི་བཏུང་སྟེ། །པདྨའི་ཟེའུ་འབྲུ་ཁ་མི་གསེང་། །བུག་བརྡོལ་སྣོད་དུ་བཅུད་མི་བླུག །དོན་དང་མི་ལྡན་རྫས་མི་བསྟེན། །ཤེལ་སྒོང་འདམ་དུ་བསུབ་མི་བྱ། །མ་དག་སྣོད་དུ་དག་པ་མིན། །ཡིད་བཞིན་ནོར་བུ་མི་འབྲེག་སྟེ། །ཁྱུང་ཆེན་གཤོག་པ་ཡ་མི་འབྲལ། །གནམ་ལྕགས་ངུར་མོའི་མཚོན་མི་རྡེག །གཅན་གཟན་རོལ་པའི་ལྷག་མི་སྤྱད། །རྡོ་རྗེ་བྲག་ཆེན་མི་གཞིག་ཅིང་། །ར་བ་དྲྭ་བའི་མཚམས་མི་འདྲལ། །སྒྲོན་མེ་རླུང་གིས་བསད་པ་མིན། །ཡེ་ཤེས་ཆུ་རྒྱུན་གཅོད་པ་སྤང་། །བཀའ་རྟགས་ཕྱག་རྒྱ་མི་དབྱི་ཞིང་། །རྡོ་རྗེ་ཕ་ལམ་མཁར་མི་ལྡོག །གཙུག་གི་ནོར་བུ་དམའ་མི་དབབ། །འདི་དག་བསྲུང་བར་བྱ་བ་སྟེ། །ལྷག་པར་གཅེས་པའི་དམ་ཚིག་ཡིན། །ཞེས་སྤྱི་དང་ཁྱད་པར་གྱི་དམ་ཚིག་ལ་གནས་པའི་རྣལ་འབྱོར་པས་སྒྲུབ་པ་ལ་སོགས་པའི་སྐབས་སུ་བསྲུང་བ་ལྷག་པར་བསྟན་པའི་དམ་ཚིག་ཉི་ཤུ་ལྡེམ་དགོངས་ཀྱི་སྒྲས་བཤད་པ་སྟེ། རིམ་པ་ལྟར། རྡོ་རྗེ་སློབ་དཔོན་གྱི་སྐུ་ལ་མི་འཚེ་ཞིང་བཀའ་མི་གཅོག་པ་དང་། བླ་མའི་ཡུམ་ལ་མི་སྤྱོད་པ་དང་། དད་པ་ཅན་གྱི་ཚོགས་མི་བཅག་པ་དང་། དཀོན་མཆོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་འཐུང་བ་དང་། རྡོ་རྗེ་སྤུན་གྱི་ཡུམ་ལ་མི་སྤྱོད་པ་དང་། མཚན་ངན་གྱི་གཟུངས་མ་མི་བསྟེན་པ་དང་། མཚན་ཉིད་དང་མི་ལྡན་པའི་དམ་རྫས་མི་བསྟེན་པ་དང་། མཁས་པའི་ཡོན་ཏན་ལ་མི་སྨོད་པ་དང་། སྣོད་མིན་ལ་གསང་ཆོས་མི་སྟོན་པ་དང་། མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་པ་དང་། དོན་བདེ་སྟོང་དང་རྟགས་ཡབ་ཡུམ་མི་འབྲལ་བ་དང་། མཆེད་བཀྱལ་ཁ་ཙམ་དུའང་ནང་འཐབ་མི་བྱེད་པ་དང་། གཞན་གྱིས་སྤྱད་པའི་ལྷག་མི་སྤྱོད་པ་དང་། བླ་མའི་གདན་ས་མི་རློམ་པ་དང་། རང་གཞན་གྱི་མཚམས་མི་འདྲལ་བ་དང་། ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏོང་བ་དང་། བཟླས་པ་དང་ཆོ་ག་མི་ཚིག་གིས་བར་མི་གཅོད་པ་དང་། དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗེད་པར་བྱ་བ་དང་། རྣལ་འབྱོར་པའི་དཀྱིལ་འཁོར་མི་དཀྲུག་ཅིང་སྐྱེ་བོའི་མཐུ་ལྡོག་མི་བྱེད་པ་དང་། སློབ་དཔོན་གཙུག་ཏུ་འཁུར་བ་ལས་ཉམས་པར་མི་བྱ་བ་རྣམས་སོ། །
གཉིས་པ་རྒྱས་བཤད་ལ། ངོ་བོ་དང་། དབྱེ་བ་གཉིས། དང་པོ་ནི། བསྲུང་བྱའི་དོན་ཁྱད་པར་ཅན་ལས་མི་འདའ་བར་སྡོམ་པའི་སེམས་པ་ས་བོན་དང་བཅས་པ་གང་ཞིག །རྩ་བ་དང་ཡན་ལག་གིས་བསྡུས་པའི་རིགས་གནས་སོ། །དེ་ལྟར་ཡང་གསང་སྙིང་གི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་སོ། །
གཉིས་པ་ལ། རྩ་བའི་དམ་ཚིག་དང་། ཡན་ལག་གི་དམ་ཚིག་གོ །དང་པོ་ནི། རྩ་བ་བླ་མའི་སྐུ་གསུང་ཐུགས་གསུམ་ལ། །དགུ་དགུར་ཕྱེ་བ་ཉི་ཤུ་རྩ་བདུན་དང་། །ཞེས་པ་སྟེ། རྩ་བ་རྡོ་རྗེ་གསུམ་གྱི་དམ་ཚིག་ལ་བླ་མ་ཞེས་སྦྱར་བ་ནི་རང་གི་སྒོ་གསུམ་སངས་རྒྱས་ཀུན་འདུས་བླ་མའི་རྡོ་རྗེ་གསུམ་དང་དབྱེར་མི་ཕྱེད་པར་སྡོམ་པས་སམ། ཡང་ན་གུ་རུའི་སྒྲ་ལས་ལྕི་བ་སྟེ་ཉམས་ན་སྦྱང་དཀའ་བའི་དོན་ནོ། །འདི་ནི་རང་བཞིན་རྫོགས་པ་ཆེན་པོ་མན་ངག་སྡེའི་ལུགས་ཀྱི་དམ་ཚིག་རྣམ་པར་བཞག་པ་ཡིན་པས། རྫོགས་པ་ཆེན་པོའི་དམ་ཚིག་ནི་བསྲུང་མཚམས་ལས་འདས་པའི་ཕྱིར་ན་འདའ་ཉམས་མེད་ཀྱང་། ལམ་ཉམས་སུ་ལེན་པའི་གང་ཟག་ལས་དང་པོ་པ་རྣམས་ཀྱིས་རང་རྒྱུད་དག་པར་བྱ་ཕྱིར་སྒོ་གསུམ་རྡོ་རྗེ་གསུམ་གྱི་དམ་ཚིག་ལས་མི་འདའ་བར་བྱ་བའོ། །དེ་ལ་དབྱེ་ན། དམ་ཚིག་རྣམ་པར་བཀོད་པ་ལས། འགྲོ་བའི་སྨིན་སོ་གསུམ་དག་ལས། །སྔགས་ཀྱི་དམ་ཚིག་གསུམ་དུ་བཤད། །དེ་ལ་ཁྱད་པར་ངེས་ཕྱེ་བ། །སྐུ་དང་གསུང་དང་ཐུགས་དག་ལས། །རེ་རེ་ལ་ཡང་དགུ་དགུ་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་པས། རྩ་བ་སྐུ་གསུང་ཐུགས་ལ་ཕྱི་ནང་གསང་གསུམ་དང་། དེ་རེ་རེ་ལའང་གསུམ་གསུམ་དུ་ཕྱེ་བས་ཉི་ཤུ་རྩ་བདུན་ལས། དང་པོ་སྐུའི་དམ་ཚིག་གསུམ་ཚན་གསུམ་གྱི། ཕྱིའི་ཕྱི་ནང་གསང་གསུམ་ནི། རིམ་པར་མ་བྱིན་ལེན། མི་ཚངས་སྤྱོད། སྲོག་གཅོད་གསུམ་སྤོང་བའོ། །ནང་གི་གསུམ་ནི། ཕ་མ་རྡོ་རྗེ་སྤུན་སྲིང་དང་རང་ལུས་ལ་སྨོད་པ། ཆོས་དང་གང་ཟག་ལ་སྨོད་པ། རང་ལུས་ལ་བརྡེག་འཚོག་དང་དཀའ་ཐུབ་ཀྱིས་བརྙས་ཤིང་གདུང་བ་རྣམས་སྤང་བའོ། །གསང་བའི་གསུམ་ནི། རྡོ་རྗེ་སྤུན་སྲིང་གི་ལུས་ལ་བརྡེག་པར་གཟས་ཤིང་རྒྱན་ལ་སྨོད་པ། རྡོ་རྗེ་མཆེད་ལྕམ་ལ་བརྡེག་པ་དང་བླ་མའི་ཡུམ་ལ་གཙེས་པ། བླ་མའི་གྲིབ་མར་འགོངས་པ་དང་སྤྱན་སྔར་ལུས་ངག་གི་སྤྱོད་པ་བག་མེད་རྣམས་སྤང་བའོ། །གཉིས་པ་གསུང་གི་དམ་ཚིག་གསུམ་ཚན་གསུམ་གྱི། ཕྱིའི་གསུམ་ནི། རྫུན་ཚིག །ཕྲ་མ། གཞན་གྱི་ཞེར་འདེབས་ཀྱི་ཚིག་སྨྲ་བ་རྣམས་སྤང་པའོ། །ནང་གི་གསུམ་ནི། ཆོས་ཀྱི་ཚིག་སྨྲ་བ། དོན་ཡིད་ལ་བསམ་པ། གནས་ལུགས་སྒོམ་པར་བྱེད་པ་རྣམས་ལ་གཤེ་སྐུར་འདེབས་པ་སྤང་པའོ། །གསང་བའི་གསུམ་ནི། རྡོ་རྗེ་སྤུན་སྲིང་གི་ཚིག །བླ་མའི་ཕྱག་རྒྱ་དང་ཉེ་འཁོར་གྱི་ཚིག །བླ་མའི་གསུང་རྣམས་ལ་བརྙས་ཤིང་གཅོག་པ་རྣམས་སྤང་བའོ། །གསུམ་པ་ཐུགས་ཀྱི་དམ་ཚིག་གསུམ་ཚན་གསུམ་གྱི། ཕྱིའི་གསུམ་ནི། གནོད་སེམས། བརྣབ་སེམས། ལོག་ལྟ་གསུམ་སྤང་བའོ། །ནང་གི་གསུམ་ནི། སྤྱོད་པ་ལོག་པ་བག་མེད། སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་འཐར་འཛིན་རྣམས་སྤང་བའོ། །གསང་བའི་གསུམ་ནི། ཉིན་ཞག་གི་ཐུན་རེ་རེ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ། བླ་མའི་རྣལ་འབྱོར་དང་མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་རྣམས་སྤང་བའོ། །དེ་དག་གི་གཞུང་དོན་དངོས་བསྟན་བཀྲལ་ཟིན་ནས། ད་ནི་འཕྲོས་དོན་རྒྱུད་ལུང་གཉིས་སུ་ཇི་ལྟར་གསུངས་པའི་རྩ་བའི་དམ་ཚིག་གསུམ་མདོ་ཙམ་བཤད་པར་བྱ་སྟེ། དེ་ལ་སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་། ཞེས་གསུངས་ཤིང་། གསང་སྙིང་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །སྒྲུབ་དང་བསྲུང་བའི་དམ་ཚིག་མཆོག །ཅེས་གསུངས་པའི་ལྔ་པོའང་རྩ་བ་གསུམ་དུ་འདུ་སྟེ། འདི་དག་མ་ཉམས་ན་ཡན་ལག་ཉམས་ཀྱང་རིམ་གྱིས་སོར་ཆུད་པར་འགྱུར་བས་རྩ་བ་དང་། དེ་ཡང་བླ་མ་དང་མཆེད་ལ་བསྲུང་བ་ནི་ཕན་འདོགས་པ་དང་གནོད་པ་སྤང་བའི་གཞིའི་གཙོ་བོ་ལུས་ཡིན་པས་སྐུའི་དམ་ཚིག་དང་། སྔགས་རྒྱ་རྒྱུན་མི་གཅོད་པ་ནི་བཟླས་བརྗོད་ཀྱི་ཡན་ལག་ཏུ་གཏོགས་པས་གཙོ་བོར་ངག་ཡིན་པའི་ཕྱིར་གསུང་དུ་བསྡུས་པར་རྒྱུད་དང་སྒྲུབ་སྡེ་གཉིས་ཀ་དགོངས་པ་མཐུན་ཞིང་། སྒྱུ་འཕྲུལ་བ་གསང་བཅུ་མི་སྨྲ་བ་ངག་ཡིན་ཡང་གང་གསང་བ་ནི་ཐུགས་ལ་གནས་པས་གཙོ་བོ་སེམས་ཀྱི་ཆོས་ཡིན་པའི་ཕྱིར་ཐུགས་སུ་བསྡུ་ནའང་། བདེ་འདུས་ཞི་རྒྱུད་དུ། གསང་བར་བྱ་བ་འདི་རྣམས་ཀྱང་། །སྐུ་གསུང་ཐུགས་ཀྱི་དམ་ཚིག་གོ །ཞེས་གསུམ་ཀས་བསྡུས་པར་གསུངས་པ་དང་། བྱང་ཆུབ་སེམས་གསུམ་སྒོམ་པ་ནི། །རྡོ་རྗེ་ཐུགས་ཀྱི་དམ་ཚིག་གོ །ཞེས་བྱང་སེམས་ཐུགས་སུ་བསྡུ་བར་གསུངས་སོ། །དེ་ལས་འདིར་བྱང་སེམས་དང་གསང་བ་མི་སྨྲ་བ་གཉིས་ཀ་ཐུགས་ཀྱི་དམ་ཚིག་ཏུ་བསྡུས་ན་བདེ་སྟེ། རྩ་བའི་དམ་ཚིག་གསུམ་དུ་བསྡུ་བའི་སྐབས་ཡིན་པའི་ཕྱིར་རོ། །དེ་ཡང་གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་པ་ལྟར་ལས། དང་པོ་སྐུའི་དམ་ཚིག་གི་ཡུལ་ནི་གཉིས་ཏེ། ཞི་རྒྱུད་ལས། རྒྱུད་དགྲོལ་དབང་བསྐུར་དེ་ཉིད་བསྟན། །བླ་མ་ཉིད་དང་ལྷན་ཅིག་གྲོགས། །ལུས་ངག་ཡིད་ཀྱིས་བཀུར་བ་ནི། །རྡོ་རྗེ་སྐུ་ཡི་དམ་ཚིག་གོ །ཞེས་སོ། །དེ་ལས་བླ་མ་བཀུར་བ་ལ། ཡུལ་གྱི་དབྱེ་བ་ལ་སྤྱིར་ཀུན་གྱིས་དམ་པར་བཀུར་ཞིང་བཀའ་དྲིན་ཐོབ་པ་སྤྱིའི་སློབ་དཔོན། རབ་བྱུང་གི་མཁན་པོ་ལྟ་བུ་ཆོས་སྒོར་འདྲེན་པའི་སློབ་དཔོན། དམ་ཚིག་འབོགས་ཤིང་དབང་སྐུར་བ་པོ་དམ་ཚིག་དབང་གི་སློབ་དཔོན། ཉེས་ལྟུང་བཤགས་ཡུལ་དུ་གྱུར་པ་ཉམས་ཆག་སྐོང་བའི་སློབ་དཔོན། ཆོས་འཆད་པའི་སློབ་དཔོན་ལྟ་བུ་ཤེས་རྒྱུད་འགྲོལ་བའི་སློབ་དཔོན། ཟབ་མོའི་གདམས་པ་སྟོན་པའི་བླ་མ་ལྟ་བུ་མན་ངག་ལུང་གི་སློབ་དཔོན་དང་དྲུག་སྟེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ཞེས་པའི་སློབ་དཔོན་དྲུག་ཇི་ལྟར་བཀུར་ཚུལ་གྱི་དཔེ་ཡང་རིམ་བཞིན་དེ་ཉིད་ལས། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་བལྟས་ཏེ། །ཞེས་དང་། ཁྱད་པར་ཞི་རྒྱུད་ལས་གསུངས་པ་ལྟར་དབང་བསྐུར། རྒྱུད་བཤད། མན་ངག་ནོད་པའི་སློབ་དཔོན་གསུམ་ནི། སངས་རྒྱས་ལས་ལྷག་པའམ། མཉམ་པའམ། དཀོན་མཆོག་བཞི་པར་བལྟ་བ་གང་རུང་གིས་སྒོ་གསུམ་གཡོ་ཟོལ་མེད་པས་ཐུགས་ཅི་མཉེས་དང་བཀའ་ཅི་གསུང་སྒྲུབ་པའི་སྒོ་ནས་བཀུར་བར་བྱའོ། །གཉིས་པ་མཆེད་ལ་བྱམས་པར་བྱ་བ་ནི། སྔར་བཤད་པ་ལྟར་སྤྱི་རང་ཉེ་བ་འདྲེས་པའི་མཆེད་བཞི་དང་། དེ་རྣམས་ལས་ཀྱང་ཡང་དག་ལམ་དུ་ཞུགས་པའི་མཆེད་ཕྱི་མ་གསུམ་དང་། དེའི་ནང་ནས་ཀྱང་འདྲེས་པའི་མཆེད་ལྷག་པར་ཡང་གཉན་པར་ཤེས་པའི་རིམ་པས་རྟག་ཏུ་མི་འབྲལ་ཞིང་ཕན་འདོགས་པའི་ལྷག་བསམ་གྱིས་བརྩེ་ཞིང་གདུང་བས་བྱམས་པར་བྱ་སྟེ། རྔམ་གློག་ལས། རྡོ་རྗེ་སྤུན་ལ་གདུང་སེམས་ཀྱང་། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །རྔན་དང་བཅས་པའི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་སྒྲུབ། །ཅིའི་ཕྱིར་རྡོ་རྗེ་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མེ་མར་འོད་དང་སྡོང་བུ་འདྲ། །ཞེས་སོ། །གཉིས་པ་གསུང་གི་དམ་ཚིག་ནི། ཞི་རྒྱུད་ལས། རང་གི་ཡི་དམ་ལྷ་མཆོག་གི །སྔགས་དང་ཕྱག་རྒྱ་རབ་འཛིན་པས། །དུས་ཀུན་ཏུ་ནི་རྒྱུན་མི་གཅོད། །རྡོ་རྗེ་གསུང་གི་དམ་ཚིག་ཡིན། །ཞེས་དང་། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པས་ཡུལ་སྔགས་གསུམ་དང་ཕྱག་རྒྱ་བཞི་བརྩོན་པ་རབ་ཀྱིས་ཆུ་བོའི་རྒྱུན་བཞིན་ནམ་ཉིན་མཚན་གྱི་ཐུན་ལ་གནས་པ་དང་། འབྲིང་གིས་ཟླ་བ་ངོ་རེར་དུས་དྲུག་གམ་བཞི་ལ་སོགས་པ་དང་། ཐ་མས་ཀྱང་ལོ་ཟླའི་དུས་མཆོད་ཀྱི་རྒྱུན་མ་ཆག་པར་བྱ་སྟེ། དེ་ཉིད་ལས། རང་གི་སྒོ་གསུམ་ཡི་དམ་གྱི། །སྐུ་གསུང་ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུངས་ལ་ཞུགས་པ་ཡིན། །རབ་ཀྱིས་ཆུ་བོའི་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞིའི་བར་དུ་མི་གཅད་ཅིང་། །ཐ་མར་བརྩོན་པའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའོ། །ཞེས་སོ། །གསུམ་པ་ཐུགས་ཀྱི་དམ་ཚིག་ལ་གཉིས་ལས། བླ་ན་མེད་པའི་བྱང་ཆུབ་ཀྱི་སེམས་མི་སྤང་བའི་དམ་ཚིག་ནི། ཡུལ་ལྷག་པ་དོན་དམ་དང་ལྷག་པ་ཀུན་རྫོབ་ཀྱི་བདེན་པ་གཉིས་ཡིན་ལ། དེ་མི་སྤོང་བའི་ཚུལ་ནི། ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བའི་གནས་ལུགས་རྟོགས་པ་ལྟ་བུ་དམ་ཚིག །དེ་ཉིད་སྤང་ཐོབ་མེད་པར་མངོན་དུ་གྱུར་བའི་འབྲས་བུ་ལ་དམིགས་པ་སྨོན་པ་དང་། དེ་སྒྲུབ་པའི་ཕྱིར་རང་གནས་ཀྱི་ཡེ་ཤེས་དང་རྗེས་སུ་མཐུན་པའི་སྒོ་གསུམ་སྤྱོད་ཡུལ་དང་བཅས་པའི་སྣང་བ་དང་ཐམས་ཅད་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བས་གང་ཤར་དག་པའི་སྣང་བར་ལམ་དུ་ཁྱེར་བ་འཇུག་པའི་སེམས་ལ་བསླབ་པར་བྱ་བ་སྟེ། ཞི་རྒྱུད་ལས། ཇི་ལྟར་སྨོན་དང་འཇུག་པ་ཡིས། །བྱང་ཆུབ་སེམས་གསུམ་སྒོམ་པ་ནི། །ཞེས་དང་། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཟོས་པ་ཐ་མས་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །གཞན་ལས་བླ་ན་མེད་པའི་དཀོན་མཆོག་གསུམ་མི་སྤང་བར་བཤད་པ་དང་ཡང་གནད་གཅིག་སྟེ། དཀོན་མཆོག་འགྲེལ་ལས། འདི་ལྟར་སངས་རྒྱས་དང་དགེ་འདུན་ནི་ཡེ་ཤེས་ཀྱི་བྱེ་བྲག་ཡིན་ལ། ཆོས་ནི་དེའི་ཆོས་ཉིད་ཡིན་པས། དེ་བས་ན་ཡེ་ཤེས་དང་ཆོས་ཉིད་ནི་ཀུན་རྫོབ་ཙམ་དུ་ཆོས་དང་ཆོས་ཅན་བདག་ཉིད་གཅིག་པ་ཡིན་པ་དང་། དོན་དམ་པར་སྤྲོས་པ་ཞི་བའི་ཕྱིར་གཉིས་སུ་མེད་དེ། དེ་ལྟ་བུའི་དོན་གྱིས་བྱང་ཆུབ་ཀྱི་སེམས་ཡིན་ནོ། །དེའི་རྟགས་ཀྱི་ཕྱག་རྒྱ་ནི་ལྷའི་སྐུ་སྟེ་དེ་བས་ན་ལྷ་གཅིག་པུ་བསྒོམས་པས་གཞུང་ལས། དཀོན་མཆོག་གསུམ་དང་བྱང་ཆུབ་སེམས། །ལྷ་དང་བླ་མ་དེ་བཞིན་ཏེ། །ཞེས་གང་གསུངས་པའི་བླ་མ་མ་གཏོགས་པ་གསུམ་འདུས་པར་གྱུར་པ་ཡིན་ནོ། །ཞེས་སོ། །གཉིས་པ་གསང་བ་མི་སྨྲ་བ་ལ། ཡུལ་ནི་ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་པས་གང་གསང་བྱ་ལ་ལྟོས་ནས་དེ་རྣམས་ཀྱི་བྱེ་བྲག་དབྱེ་ཤེས་པར་བྱའོ། །ཇི་ལྟར་གསང་བ་ནི། དེ་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་པ་ལས། སྤྱིར་གསང་བཞི་ནི། གསལ་བཀྲ་ལས། ལྟ་ཟབ་སྤྱོད་པ་བརླང་པོ་དང་། །ལྷའི་མིང་གཟུངས་དང་གྲུབ་རྟགས་རྣམས། །སྤྱི་གསང་རྣམ་པ་བཞི་ཡིན་ནོ། །ཞེས་པའི་ལྟ་བ་ཟབ་མོ་ནི་བློ་དམན་དབང་པོ་མ་སྨིན་པ་རྣམས་དང་། སྤྱོད་པ་ནི་གསར་དུ་ཞུགས་པ་རྣམས་ལ་གསང་ངོ་། །ཡི་དམ་གྱི་ལྷའི་མཚན་དང་། དེའི་སྔགས་དང་དེ་གྲུབ་པའི་རྟགས་རྣམས་ནི་མ་འདྲེས་པ་ལ་བསྟན་ན་དམ་ཚིག་ཉམས་ཤིང་། འདྲེས་པ་ལའང་རང་དགར་བསྟན་ན་དངོས་གྲུབ་ཉམས་པར་གསུངས་པས་ཐམས་ཅད་དུ་གསང་བར་བྱའོ། །བར་གསང་བཞི་ནི་དེ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པས་གང་དུ་འདུ་བའི་གནས་དང་། འདུ་བའི་དུས་སོགས་ཚོགས་སྒྲུབ་གསང་བའི་སྤྱོད་པ་ལ་ཞུགས་པའི་བར་དེ་སྲིད་དུ་གསང་ངོ་། །གསང་བར་འོས་པ་ནི། ཐུན་མོང་མ་ཡིན་པའི་སྔགས་ཀྱི་སྤྱོད་པ་དང་དམ་རྫས་མཆེད་ཀྱི་ངན་སྤྱོད་སོགས་མཐོང་ཐོས་སུ་མི་རུང་བ་རྣམས་དང་། གཉེར་གཏད་པ་ནི། བླ་མ་དང་མཆེད་ཀྱིས་གསང་བར་བཀའ་རྒྱས་བཏབ་པ་རྣམས་སོ། །དེ་ལྟར་ཡང་ཞི་རྒྱུད་ལས། གཞན་ཡང་སློབ་དཔོན་མཆེད་ལྕམ་གྱིས། །གསང་བར་བསྒྲགས་དང་གནས་སྐབས་སུ། །དེ་ལྟར་འོས་པ་ཤིན་ཏུ་གསང་། །ཞེས་སོ། །དེ་ལྟར་གསང་བ་བཅུ་པོ་རང་རང་གི་ཡུལ་དང་དུས་ཀྱི་དམིགས་ངེས་པས་ཤིན་ཏུ་གསང་བར་བྱའོ། །དེ་ཡང་བྱང་སེམས་དང་སྔགས་རྒྱ་གཉིས་ཡོན་ཏན་ཁྱད་པར་ཅན་སྒྲུབ་པའི་དམ་ཚིག་ཡིན་ལ། བླ་མ་བཀུར་ཞིང་མཆེད་ལ་བྱམས་པ་གཉིས་ནི་ཐུགས་དང་འགལ་བ་བསྲུང་བ་དང་། གསང་བ་མི་སྒྲོག་པ་དེའི་གྲོགས་སུ་བསྲུང་བར་བྱ་བ་གཙོ་ཆེ་བས་བསྲུང་བའི་དམ་ཚིག་གོ་ཞེས་རོང་ཟུར་གྱི་བཀའ་སྲོལ་ལས་འབྱུང་ཞིང་། ཀུན་མཁྱེན་ཆེན་པོ་ནི་དངོས་གྲུབ་ཀྱི་རྩ་བ་བླ་མ་ཡིན་ལ། དེ་མཉེས་ན་དངོས་གྲུབ་འབྱུང་བས་བླ་མ་བསྟེན་པ་སྒྲུབ་པའི་དམ་ཚིག་སྟེ། མཉམ་སྦྱོར་ལས། སྒྲུབ་པའི་དམ་ཚིག་ཆེན་པོ་ནི། །ལྷ་དང་བླ་མ་མི་སྤང་ཞིང་། །སྔགས་དང་ཕྱག་རྒྱ་རྒྱུན་མི་གཅད། །ཅེས་གསུངས་པས་སོ་ཞེས་བཞེད། དེ་ལྟར་སྐུ་གསུང་ཐུགས་རེ་རེ་ལའང་གསུམ་གསུམ་དུ་གྱུར་ཏེ། བླ་མ་བཀུར་བ་ལྟ་བུ་ལ་ལུས་ཀྱིས་བཀུར། ངག་གིས་བསྟོད། ཡིད་ཀྱིས་གུས་པར་བྱ་བ་བཞིན་དུ་གཞན་ལའང་རིགས་འགྲེ་བའི་ཕྱིར་རོ། །མདོར་ན་འགྲོ་བ་ཐམས་ཅད་གདོད་མ་ནས་རང་བཞིན་གྱིས་རྣམ་པར་དག་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་དབྱེར་མི་ཕྱེད་པ་རྡོ་རྗེའི་བདག་ཉིད་ནི་ཆོས་ཀུན་གྱི་སྲོག་དང་བསླབ་པ་ཐམས་ཅད་ཀྱི་གཞིར་གྱུར་པ་མཉམ་པ་ཆེན་པོའི་དམ་ཚིག་སྟེ། དེ་ཉིད་ཤེས་རབ་དང་ཏིང་ངེ་འཛིན་གྱིས་རྟོགས་ཤིང་གོམས་པར་བྱས་པ་ལས་དངོས་གྲུབ་ཐམས་ཅད་འབྱུང་བའི་ཕྱིར་ཤིན་ཏུ་བརྩོན་པས་བསྲུང་བར་བྱའོ། །དེ་ལྟར་ཡང་སྙིང་པོ་ལས། དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་དང་། མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་སོ། །
གཉིས་པ་ཡན་ལག་གི་དམ་ཚིག་ལ་བསྟན་བཤད་གཉིས་ལས། མདོར་བསྟན་ནི། ཡན་ལག་དམ་ཚིག་ཉི་ཤུ་རྩ་ལྔ་ནི། །ཞེས་པས་རྩ་བའི་གྲོགས་སམ་ཐབས་སུ་གྱུར་པ་ཡན་ལག་གི་དམ་ཚིག་ལྔ་ཚན་ལྔར་ཕྱེ་བས་ཉི་ཤུ་རྩ་ལྔ་སྟེ། སྤྱི་མདོ་ལས། སྤྱད་དང་ཡིད་འོང་དང་། །མི་འདོར་ཤེས་བྱ་སྒྲུབ་པ་དང་། །ཞེས་དང་། གསལ་བཀྲ་ལས། སྤྱད་པ་ལྔ་དང་མི་སྤང་ལྔ། །དང་དུ་བླང་དང་སྒྲུབ་དེ་བཞིན། །ཤེས་བྱ་ལྔ་རྣམས་ཐུན་མིན་བཤད། །ཅེས་སོ། །རྒྱས་བཤད་ལ་ལྔ་ཚན་ལྔ་ལས། དང་པོ་སྤྱད་པར་བྱ་བ་ལྔ་ནི། ཏ་ན་ག་ཎ་མ་བྱིན་ལེན་དང་རྫུན། །ངག་འཁྱལ་རྣམས་ནི་སྤྱད་པར་བྱ་བ་ལྔ། །ཞེས་པ་སྟེ། འདི་དག་རང་དོན་གྱི་ཞེན་འཁྲིས་མེད་ཅིང་ཐབས་ལ་མཁས་པས་གཞན་དོན་དུ་འགྱུར་ན་སྤྱད་པར་བྱ་སྟེ། ཞིང་བཅུ་སྒྲོལ་བའི་ཕྱིར་སྲོག་གཅོད་པ་ནས། སློབ་བུ་མ་རུངས་པའི་རྒྱུད་འཆོས་པའི་ཕྱིར་ངག་འཁྱལ་ལས་ཞེ་གཅོད་ཀྱི་བརླང་ཚིག་སྨྲ་བའི་བར་གནང་བའི་ཕྱིར་ཏེ། ཞི་རྒྱུད་ལས། སྦྱོར་སྒྲོལ་མ་བྱིན་ལེན་པ་དང་། །རྫུན་དང་ངག་བརླང་བརྗོད་པ་རྣམས། །ཐབས་མཆོག་ངེས་པས་ཟིན་པ་ཡིས། །གནས་སྐབས་དག་ཏུ་ཤེས་པར་བྱ། །ཞེས་དང་། བྱང་ཆུབ་སེམས་དཔའི་སྡེ་སྣོད་ལས་ཀྱང་། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་གསུངས་པའི་ཕྱིར། སྦས་དོན་དུ་སྲོག་ནི་རླུང་སྟེ་དབུ་མར་འགོག་པའམ་གཟུང་འཛིན་རྟོག་པའི་སྲོག་རང་རིག་པའི་ཡེ་ཤེས་ཀྱིས་གཅོད་པ། བཙུན་མོའི་ཤུ་ཏྲ་མ་བྱིན་པར་ལེན་པ། ཁ་སྦྱོར་ལས་ཞུ་བདེ་འགྱུར་མེད་སྒྲུབ་པའི་འདོད་སྤྱོད། འཁོར་བ་མེད་སྣང་ལས་འགྲོ་བ་སྒྲོལ་བའི་རྫུན་ཚིག །བརྗོད་མེད་རྟོགས་པས་གབ་སྦས་མེད་པར་སྨྲ་བའི་བརླང་ཚིག་རྣམས་སོ། །གཉིས་པ་མི་སྤང་བ་ལྔ་ནི། འདོད་ཆགས་ཞེ་སྡང་གཏི་མུག་ང་རྒྱལ་དང་། །ཕྲག་དོག་ལྔ་ནི་མི་སྤང་དམ་ཚིག་ལྔ། །ཞེས་པ་སྟེ། འདི་ལ་གསལ་བཀྲ་ལས། ཡང་དག་དུག་ལྔ་ལོག་དུག་ལྔ། །ཞེས་ཡང་ལོག་གཉིས་སུ་བཤད་པ་ལས། ལོག་པའི་དུག་ལྔ་ནི། དུག་ལྔ་རང་མཚན་པ་རྣམས་ཡིན་ལ། དེ་ཡང་ཉན་ཐོས་པ་ལྟར་དགྲར་བལྟས་ནས་མི་སྤོང་ངོ་། །ཅིའི་ཕྱིར་ན། ཆོས་ཐམས་ཅད་རང་རང་གི་ངོ་བོས་སྟོང་པས་སྤང་བྱའི་རྫས་མ་གྲུབ་པའི་ཕྱིར་མི་སྤང་སྟེ། སྨིག་རྒྱུ་ལ་ཆུ་རགས་མི་དགོས་པ་བཞིན་ནོ། །དེ་ལྟར་ཡང་རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གིས་མི་རྟག་རང་བཞིན་ཤེས་པས་གྲོལ། །ཞེས་སོ། །ཡང་ཐབས་ཀྱིས་ཟིན་ན་སྤྱད་ཀྱང་མི་འཆིང་བར་མ་ཟད་རྣམ་པར་གྲོལ་བའི་མྱུར་ལམ་ཡིན་པས་ཀྱང་མི་སྤང་སྟེ། རྣ་བར་ཆུ་ཞུགས་པ་ཆུས་འགུགས་པ་བཞིན་ནོ། །རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་སོ། །ཉོན་མོངས་པ་ལྔ་ཡེ་ནས་རིགས་ལྔ་ཡེ་ཤེས་ལྔའི་རང་བཞིན་ཡིན་པས་ཀྱང་མི་སྤང་སྟེ། སྣུམ་འདོད་པས་ཏིལ་འབྲུ་སྒྲུབ་པ་བཞིན་ནོ། །ཐབས་ཞགས་ལས། གཏི་མུག་ཞེ་སྡང་ང་རྒྱལ་དང་། །འདོད་ཆགས་ཕྲག་དོག་ཆེན་པོ་ནི། །བསྲུང་བ་མེད་པའི་སྡོམ་པ་ཅན། །དེ་ནི་དམ་ཚིག་རྡོ་རྗེ་ཡིན། །ཞེས་པའི་འགྲེལ་བར་སློབ་དཔོན་ཆེན་པོ་པདྨས། གཏི་མུག་ནི་རྣམ་པར་སྣང་མཛད་ཀྱི་དམ་ཚིག་སྟེ། ཅིའི་ཕྱིར་ཞེ་ན། མ་རིག་པ་ནི་སྤང་དུ་མེད། རིག་པ་ནི་སྒྲུབ་ཏུ་མེད་དེ། ཆོས་ཀྱི་དབྱིངས་སུ་རོ་གཅིག་པའི་ཕྱིར་རོ། །ཞེས་སོགས་རྒྱས་པར་གསུངས་པ་དང་། ཞི་རྒྱུད་ལས་ཀྱང་། རང་བཞིན་ཤེས་པས་མི་སྤང་སྟེ། །རང་རིག་ཡེ་ཤེས་ཉིད་ཡིན་ནོ། །ཞེས་སོ། །སྦས་དོན་ཡང་དག་པའི་དུག་ལྔ་སྟེ། ཆོས་ཐམས་ཅད་མཉམ་པ་ཉིད་དུ་རྫོགས་པས་ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་འབྱེད་པ་མེད་པའི་གཏི་མུག །དེ་ལྟར་མ་རྟོགས་པ་ལ་དམིགས་པ་མེད་པའི་སྙིང་རྗེ་ཆེན་པོས་རྗེས་སུ་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་། མཉམ་ཉིད་རྟོགས་པའི་ལྟ་བ་གཤོངས་སུ་མི་འབེབས་པའི་ང་རྒྱལ། གཉིས་འཛིན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་རྟོགས་གོམས་ཀྱི་ཐབས་ཀྱིས་མི་སྤོང་བའོ། །གསུམ་པ་དང་དུ་བླང་བ་ལྔ་ནི། དྲི་ཆེན་དྲི་ཆུ་རཀྟ་མཱཾ་ས་དང་། །རྡོ་རྗེ་ཟིལ་བ་དང་དུ་བླང་བ་ལྔ། །ཞེས་པ་སྟེ། དམ་རྫས་བདུད་རྩི་ལྔ་ནི། ཆོས་ཉིད་རང་བཞིན་དང་། རང་གི་ངོ་བོ་དང་། མཐུ་དང་། བྱིན་གྱིས་བརླབས་ཀྱིས་གྲུབ་པའི་རྫས་ཁྱད་པར་ཅན་ཡིན་པས་མི་དོར་བར་དང་དུ་བླང་བར་བྱའོ། །ཅིའི་ཕྱིར་ཞེ་ན། ཆོས་ཐམས་ཅད་ཡེ་ནས་བླང་དོར་མེད་པའི་ཆོས་ཉིད་ཀྱི་རོལ་པ་ཡིན་པས་གཙང་དམེའི་རྟོག་པ་མེད་པའི་ཕྱིར་དང་དུ་བླང་སྟེ། ལེ་ལག་ལས། བདུད་རྩི་ཡེ་ནས་དག་པའི་ཆོས། །བླང་དོར་མེད་པ་ཀུན་ལས་འདས། །ཡེ་བསྲུང་ཆེན་པོའི་དམ་ཚིག་ཏུ། །མཁས་པས་དང་དུ་བླང་བར་བྱ། །ཞེས་སོ། །ནད་ལྔ་སེལ་ཞིང་ཐུན་མོང་གི་ཡོན་ཏན་ལྔ་འབྱུང་བ་དང་རིགས་ལྔ་ཡེ་ཤེས་ལྔ་སྒྲུབ་པའི་དམ་རྫས་ཁྱད་པར་ཅན་ཡིན་པས་ཀྱང་དང་དུ་བླང་སྟེ། བྱང་སེམས་དཀར་པོས་ཚ་བའི་ནད་སེལ་བ་དང་མི་བརྗེད་པའི་གཟུངས་ཐོབ་པའི་ཡོན་ཏན་འབྱུང་ཞིང་རྡོ་རྗེའི་རིགས་མེ་ལོང་ལྟ་བུའི་ཡེ་ཤེས་འགྲུབ་པར་བྱེད་དོ། །དེ་བཞིན་དུ་རཀྟས་གྲང་ནད་སེལ། བཀྲགས་མདངས་གསལ། པདྨའི་རིགས་སོར་རྟོག །དྲི་ཆེན་གྱིས་དུག་ནད་སེལ། ཚེ་རིང་། བུདྡྷའི་རིགས་ཆོས་དབྱིངས། དྲི་ཆུས་གག་པ་སེལ། སྐད་སྙན། ལས་རིགས་བྱ་གྲུབ། ཤ་ཆེན་གྱི་དྭངས་མས་མཛེ་ནད་སེལ། མཐུ་ཆེ། རིན་ཆེན་རིགས་མཉམ་ཉིད་ཡེ་ཤེས་སོ། །དེ་ལྟར་ཡང་གསལ་བཀྲ་ལས། ནད་ལྔ་བསལ་ཕྱིར་བླང་བ་དང་། །གཙང་དམེའི་རྟོག་པ་སྦྱོང་ཕྱིར་དང་། །ཐུན་མོང་དགོས་པ་ལྔ་ཕྱིར་དང་། །རིགས་ལྔ་གྲུབ་པའི་ཡོན་ཏན་དང་། །སྡུག་བསྔལ་ལས་གྲོལ་དངོས་གྲུབ་ཐོབ། །ཅེས་སོ། །སྦས་དོན་དུ་ཕུང་ལྔའི་དྭངས་མ་འཛག་མེད་འཆང་བས་དང་དུ་བླང་བའོ། །བཞི་པ་ཤེས་པར་བྱ་བ་ལྔ་ནི། ཕུང་ལྔ་འབྱུང་ལྔ་ཡུལ་ལྔ་དབང་པོ་ལྔ། །ཁ་དོག་ལྔ་རྣམས་ལྷ་རུ་ཤེས་པ་ལྔ། །ཞེས་པ་སྟེ། ཆོས་ཐམས་ཅད་ཡེ་ནས་སངས་རྒྱས་པས་ཕུང་པོ་ལྔ་དེ་བཞིན་གཤེགས་པ་ཡབ་ལྔ། འབྱུང་བ་ལྔ་ཡུམ་ལྔ། དབང་པོ་དང་དབང་ཤེས་ལྔ་སེམས་དཔའ། ཡུལ་ལྔ་སེམས་མ། ཁ་དོག་ལྔ་རིགས་ལྔ་ཡེ་ཤེས་ལྔ་སོགས་ལྔ་ཚན་གྱི་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཤེས་རབ་ཀྱིས་སྒྲོ་འདོགས་བཅད་ནས་ཤེས་པར་བྱེད་པ་སྟེ། དམ་ཚིག་གསུམ་བཀོད་ལས། དང་པོར་ཤེས་པར་བྱ་བའི་དམ་ཚིག་ནི། ཕུང་པོ་ལྔ་དང་འབྱུང་བ་རྣམ་པ་ལྔ། །རྣམ་ཤེས་དབང་པོ་ཡུལ་ལ་སོགས་པ་རྣམས། །ལྷ་དང་དཀྱིལ་འཁོར་རང་བཞིན་ཤེས་པར་བྱ། །ཞེས་སོ། །ལྔ་པ་བསྒྲུབ་པར་བྱ་བ་ལྔ་ནི། དེ་བཞིན་གཤེགས་དང་རྡོ་རྗེ་རིན་པོ་ཆེ། །པདྨ་ལས་རིགས་བསྒྲུབ་བྱ་ལྔ་རྣམས་ནི། །དུས་ཚོད་འབྲེལ་བའི་སྤྱོད་པས་དགོངས་པ་བླང་། །ཞེས་པ་སྟེ། ཤེས་པར་བྱ་བའི་དམ་ཚིག་ལྔ་པོ་དེ་རྟོགས་གོམས་ཀྱི་སྦྱོར་བས་རང་རྒྱུད་ལ་ཚུལ་བཞིན་དུ་སྒྲུབ་པའི་ཐབས་ལ་བརྩོན་པར་བྱེད་པ་སྟེ། ཞི་རྒྱུད་ལས། སངས་རྒྱས་རྡོ་རྗེ་སེམས་དཔའ་དང་། །རིན་ཆེན་འབྱུང་ལྡན་འོད་དཔག་མེད། །དོན་ཡོད་པ་དང་རྣམ་སྣང་མཛད། །ཡེ་ཤེས་ལྔ་ཡི་རང་བཞིན་ཏེ། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་ལྔ་ཡིས་རབ་ཏུ་སྒྲུབ། །ཅེས་སོ། །དེ་ལ་ཤེས་པར་བྱ་བའི་ལྟ་བའི་དམ་ཚིག །དེ་ལྟར་རྟོགས་ནས་སྒྲུབ་པར་བྱེད་པ་སྒོམ་པའི་དམ་ཚིག །སྤྱད་དང་མི་སྤང་དང་དུ་བླང་བ་གསུམ་པོ་ཕྱི་བཤད་ལྟར་ན་སྤྱོད་པའི་དམ་ཚིག་གཙོ་ཆེ་བ་ཡིན་ལ། དེ་བས་ན་ལས་དང་པོ་པ་དང་། ཉམས་མྱོང་ཅུང་ཟད་སྐྱེས་པ་སོགས་ལྟ་དགོངས་ཀྱི་གདེང་དང་ཚོགས་དབེན་ལ་སོགས་པའི་ཡུལ་དུས་ཀྱི་གནས་སྐབས་བརྩིས་ནས་དུས་ཚོད་དང་འབྲེལ་བའི་དགོངས་པ་བླངས་ཏེ་རིམ་པ་མ་ནོར་བར་སྤྱད་པར་བྱ་བ་ཡིན་ནོ། །
གསུམ་པ་དོན་བསྡུ་བ་ནི། དེ་སོགས་དམ་ཚིག་རྣམ་བཞག་མང་གསུངས་པ། །རྩ་བ་ཡན་ལག་བཅས་འདིར་མ་འདུས་མེད། །མདོར་ན་རང་ལུས་རྡོ་རྗེ་གསུམ་ཤེས་ན། །སྔགས་ཀྱི་དམ་ཚིག་ས་ཡ་འབུམ་སྡེ་འདུས། །ཞེས་པ་སྟེ། གོང་དུ་ཇི་སྐད་བཤད་པ་དེས་མཚོན་ཏེ་སོགས་ཁོངས་ནས། སྒྱུ་འཕྲུལ་རྩ་རྒྱུད་སྙིང་པོ་ལས་རྩ་བ་དང་ཡན་ལག་གི་དམ་ཚིག་བཅོ་ལྔ་ལས་རྣམ་གྲངས་སུམ་བརྒྱ་དྲུག་ཅུར་སྤྲོས་པ་དང་། བྱ་རྒྱུད་རྒྱས་པའི་ལེའུ་དོན་གཉིས་པར་སྤོང་བ་རྡོ་རྗེ་ལ་སོགས་པའི་གཙོ་བོར་ཤེས་པར་བྱ་བའི་དམ་ཚིག་དགུ་བཅུ་རྩ་བདུན་དང་། སྤྱི་མདོའི་ལེའུ་རེ་དྲུག་པར། གལ་མདོ་ངེས་པའི་དམ་ཚིག་བཞི། ཐུན་མོང་གི་ཉི་ཤུ་རྩ་བརྒྱད། ལྷག་པའི་དམ་ཚིག་བཞི། བརྟུལ་ཞུགས་ཀྱི་ཉེར་གསུམ། སྒྲུབ་པའི་ཉི་ཤུ། སྤྱོད་ལམ་རྒྱུན་གྱི་བཞི། བདུད་ལྔ་སྤོང་བ། དགྲ་བཞི་གཞོམ་པ། ལྟ་བའི་དམ་ཚིག་སྟེ་དགུར་ཕྱེ་བ་དང་། གཞན་ཡང་རྒྱུད་སྡེ་སོ་སོར་རྩ་བ་དང་ཡན་ལག་གིས་བསྡུས་པའི་སྲུང་བའི་དམ་ཚིག་དང་། ཏིང་ངེ་འཛིན་དང་སྤྱོད་ལམ་དང་བཟའ་བའི་དམ་ཚིག་དང་། མི་འབྲལ་བའི་ཡོ་བྱད་ཀྱི་དམ་ཚིག་སོགས་དམ་ཚིག་གི་རྣམ་བཞག་མང་པོ་ཞིག་གསུངས་ནའང་། དེ་ཐམས་ཅད་རྩ་བ་དང་ཡན་ལག་གི་དམ་ཚིག་ཏུ་མ་འདུས་པ་མེད་དེ། གང་སྤྱད་ན་སྔགས་སྡོམ་གཏོང་བའི་རིགས་དང་། མི་གཏོང་ནའང་ཡན་ལག་ཉམས་པར་བྱེད་པའི་རིགས་གཉིས་སུ་འདུས་པའི་ཕྱིར་རོ། །འོ་ན་གསར་རྙིང་ཐུན་མོང་པའི་རྩ་ལྟུང་བཅུ་བཞི་དང་སྔ་འགྱུར་བའི་ཁྱད་པར་གྱི་རྩ་བའི་དམ་ཚིག་ལྔ་པོ་མི་འགལ་ལམ་སྙམ་ན། མི་འགལ་ཏེ། བཅུ་བཞི་པོ་ལྔ་པོའི་ཁོངས་སུ་འདུས་པའི་ཕྱིར། ཇི་ལྟར་འདུས་ན། བླ་མ་བཀུར་བའི་ནང་དུ་རྩ་ལྟུང་དང་པོ། གཉིས་པ། དྲུག་པ་རྣམས་འདུས་ཏེ། བླ་མ་ལ་བརྙས་པ་ནི་བཀུར་བའི་མི་མཐུན་ཕྱོགས་དང་། བཀའ་འདས་ནི་དེའི་གསུང་ལས་འགོངས་པ་དང་། རང་གཞན་གྱི་གྲུབ་མཐའ་ལ་སྨོད་པའང་བཀའ་འདས་ཀྱི་ནང་ཚན་ཡིན་པའི་ཕྱིར། མཆེད་ལ་བྱམས་པའི་ནང་དུ་གསུམ་པ། བཞི་པ། བཅུ་པ། བཅུ་གཉིས་པ། བཅུ་བཞི་པ་རྣམས་འདུས་ཏེ། རྡོ་རྗེ་སྤུན་ལ་ཁྲོས་པ་ནི། མཆེད་བྱེ་བྲག་པ་ལ་བྱམས་པའི་མི་མཐུན་ཕྱོགས་དང་། སེམས་ཅན་ལ་བྱམས་པ་སྤོང་བ། སེམས་སུན་འབྱིན་པ། བུད་མེད་ལ་སྨོད་པ་རྣམས་སྤྱིའི་མཆེད་ལ་བྱམས་པ་སྤོང་བའི་མི་མཐུན་ཕྱོགས་དང་། བཅུ་པའང་ཐ་མལ་གྱི་བྱམས་པ་ལྟར་སྣང་བས་དོན་ལ་འདུལ་ནུས་ནའང་མི་འདུལ་བས་བྱམས་པ་བཏང་བ་ཡིན་པའི་ཕྱིར། བླ་ན་མེད་པའི་བྱང་ཆུབ་ཀྱི་སེམས་མི་སྤོང་པ་རྟོགས་གོམས་ཀྱི་དམ་ཚིག་དང་། སྔགས་རྒྱ་རྒྱུན་མི་བཅད་པའང་དེའི་སྒོམ་པའི་དམ་ཚིག་ཇི་ལྟར་སྒྲུབ་པའི་ཐབས་ཡིན་པས་དེ་གཉིས་ཀྱི་ནང་དུ། ལྔ་པ། བརྒྱད་པ། དགུ་པ། བཅུ་གཅིག་པ་རྣམས་འདུས་ཏེ། རང་བཞིན་དག་པའི་ཆོས་ལ་ཐེ་ཚོམ་ཟ་བ། མིང་སོགས་བྲལ་བ་དེར་རྟོག །ཕུང་ལྔ་སངས་རྒྱས་ཡིན་ཚུལ་ནས་ལྟ་བའི་དམ་ཚིག་དང་། ཕྱི་མ་གཉིས་ཀྱི་ཕྱོགས་གཅིག་རྣམ་པར་མི་རྟོག་པའི་ལམ་ལ་རྟོག་པ་དང་། ཡེ་ཤེས་སྐྱེ་བའི་རྒྱུ་ཕུང་པོ་ལ་མི་མཆོད་པ་གཉིས་དང་། བསྐྱེད་རྫོགས་སོ་སོའི་ལམ་པས་ཆོས་ཀྱི་རྩ་བ་བྱང་ཆུབ་ཀྱི་སེམས་སྤྱི་དང་ཁྱད་པར་བ་སྤོང་བ་རྣམས་སྒོམ་པའི་དམ་ཚིག་ཡིན་པའི་ཕྱིར་རོ། །གསང་བའི་དོན་ཕྱིར་མི་སྨྲ་བའི་ནང་དུ། བདུན་པ་མ་སྨིན་པ་ལ་གསང་བ་སྒྲོག་པ་དངོས་སུ་འདུ་ཞིང་། བཅུ་གསུམ་པ་དམ་རྫས་ཇི་བཞིན་མི་བསྟེན་པའང་། གསང་སྤྱོད་ཀྱིས་བསྟེན་བྱ་ཡིན་པའི་ཕྱོགས་ནས་གསང་བར་འོས་པའི་ནང་དུ་འདུ་བས་འདིར་བསྡུ་བའམ། ཡང་ན་བཅང་བ་དང་བཟའ་བ་དང་གླུ་གར་སོགས་སྤྱོད་པའི་ཡོ་བྱད་རྣམས་སྒོམ་པའི་གྲོགས་སུ་བསྟེན་བྱ་ཡིན་པས་སྔགས་རྒྱུའི་ཁོངས་སུ་བསྡུས་ཀྱང་མི་འགལ་ལོ། །དེ་ཐམས་ཅད་མདོར་བསྡུ་ན། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །ཞེས་སོགས་གསུངས་པ་ལྟར་རང་གི་རྡོ་རྗེའི་ལུས་གཉུག་མའི་རྩ་རླུང་ཐིག་ལེ་ཡེ་ཤེས་དང་བཅས་པ་གདོད་མ་ནས་སྐུ་གསུང་ཐུགས་དབྱེར་མེད་ཡེ་ཤེས་རྡོ་རྗེའི་བདག་ཉིད་དུ་བཞུགས་པ་ཉིད་ཤེས་རབ་ཀྱིས་སྒྲོ་འདོགས་ཆོད་དེ་རྟོགས་པར་གྱུར་པ་ན་སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང་། །མི་འདོར་ཤེས་བྱ་བསྒྲུབ་པ་དང་། །མེད་དང་ཕྱལ་བ་གཅིག་པུ་དང་། །ལྷུན་གྱིས་གྲུབ་པ་རྣམ་པ་བཅུ། །རྩ་བ་འདི་ལས་འབུམ་ཕྲག་འབྱུང་། །ཞེས་འཕྲོ་གཞི་རྩ་བ་བཅུ་ལས་ས་མ་ཡ་འབུམ་སྡེར་སྤྲོས་པ་དང་། སྙིང་པོ་ལས། དམ་ཚིག་འདི་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་སྤྲོ། །ཞེས་བསམ་གྱིས་མི་ཁྱབ་པར་སྤྲོས་པ་དེ་ཐམས་ཅད་འདུས་ཤིང་རྣམ་པར་དག་པར་འགྱུར་བ་ཡིན་ནོ། །
ལྔ་པ་སྐྱེ་བའི་རྟེན་ནི། སྐྱེ་བའི་རྟེན་ནི་ཉིན་བཞིན་བྲམ་ཟེ་གསོད། །མཚམས་མེད་ལྔ་བྱེད་ལ་སོགས་ཀུན་ལའོ། །ཞེས་པ་སྟེ། རྡོ་རྗེ་ཐེག་པའི་ལམ་གྱིས་གསར་དུ་བསྒྲུབས་པས་མཆོག་འགྲུབ་པའི་རྟེན་ནི། གཙོ་བོར་ཁམས་དྲུག་ལྡན་གྱི་མི་ཡིན་པར་བཤད་དེ། དྲི་མེད་འོད་ལས། སྐྱེ་བ་འདིའི་ཞེས་པ་མིའི་སྐྱེ་བ་ལ་སངས་རྒྱས་ཉིད་ཀྱི་འབྲས་བུ་རབ་ཏུ་སྟེར་བ་རྒྱུད་ཀྱི་རྒྱལ་པོའོ། །ལྷ་ལ་སོགས་པ་འགྲོ་བ་ལྔའི་སྐྱེ་བ་ལ་ནི་མ་ཡིན་ནོ། །ཞེས་སོ། །འོ་ན་ཚོགས་གཉིས་བསགས་པ་སྔོན་དུ་སོང་བའི་མིའི་རྟེན་ཅན་ཞིག་གི་དབང་དུ་བྱས་པ་ཡིན་ནམ་སྙམ་ན། མ་ཡིན་ཏེ། མཚོན་རྟུལ་པོས་ཤིང་སྡོང་ཆོད་པ་ལ་ཡུན་རིང་ཐོགས་པ་དེ་མཚོན་རྣོན་པོས་སྐད་ཅིག་ལ་ཆོད་པ་ལྟར་མཚན་ཉིད་ཐེག་པས་ཚེ་རབས་མང་པོར་ཚོགས་བསགས་ནས་འབྲས་བུ་སྒྲུབ་དགོས་པ་དེ་སྔགས་ཀྱི་ཐེག་པ་འདིར་སྔོན་བསགས་རྒྱབ་ཅན་མ་ཡིན་པར་མ་ཟད། ཐེག་པ་གཞན་དུ་སྤང་པའི་གདུལ་བྱ་མཚམས་མེད་སོགས་སྡིག་པ་རྔམ་པོ་ཆེའི་ལས་བྱེད་བཞིན་པ་ཞིག་ཡིན་ཡང་། དབང་རྣོན་སེམས་སྟོབས་ཆེ་ན་སྔགས་ལམ་གྱིས་སྐྱེ་བ་འདི་ལ་སངས་རྒྱས་ཉིད་འགྲུབ་སྟེ། ཐབས་ཟབ་ཅིང་མང་བའི་གནད་ཀྱིས་སོ། །དེ་ལྟར་ཡང་དམ་པ་དང་པོའི་རྒྱུད་ལས། གདོལ་པ་སྨྱིག་མཁན་ལ་སོགས་དང་། །མཚམས་མེད་ལྔ་ནི་བྱེད་པ་རྣམས། །སྔགས་ཀྱི་སྤྱོད་པ་རྗེས་སྤྱད་ན། །ཚེ་འདི་ཉིད་ལ་སངས་རྒྱས་འགྱུར། །ཞེས་དང་། གདན་བཞི་ལས། ཉིན་བཞིན་བྲམ་ཟེ་གསོད་པ་དང་། །མཚམས་མེད་ལྔ་ནི་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་རོ། །ཞེས་དང་། འདུས་པ་ལས་ཀྱང་། སེམས་ཅན་མཚམས་མེད་ལ་སོགས་པའི། །སྡིག་པ་ཆེན་པོ་བྱེད་པ་ཡང་། །རྡོ་རྗེ་ཐེག་པ་རྒྱ་མཚོ་དེར། །ཐེག་པ་མཆོག་ནི་འདི་ལ་གྲུབ། །སྙིང་ནས་སློབ་དཔོན་སྨོད་པ་དག །བསྒྲུབས་ཀྱང་འགྲུབ་པར་ཡོངས་མི་འགྱུར། །ཞེས་གསུངས་པའི་ཕྱིར་རོ། །འོན་ཀྱང་སྐལ་ལྡན་ལས་འཕྲོ་ཅན་བསགས་པ་ཡང་རབ་ཡིན་ན་ནི། མིའི་རྟེན་ཅན་ཁོ་ན་དགོས་པའི་ངེས་པ་མེད་དེ། རྒྱུད་སྡེ་རྣམས་ལས་ལྷ་དང་ལྷ་མིན་སོགས་རྒྱུད་མཉན་པའི་སྣོད་དུ་བསྡུས་པ་དང་། གསང་བདག་གིས་སྔགས་ཀྱི་ཐེག་པ་གསུངས་པའི་གདུལ་བྱའི་གཙོ་བོ་དྲྭ་མ་ལྔ་ལས་ལི་ཙ་བཱི་མ་གཏོགས་གཞན་བཞི་པོ་མིའི་རྟེན་ཅན་མ་ཡིན་པའི་ཕྱིར་དང་། ཨོ་རྒྱན་གྱི་གནས་སུ་ཀླུ་རྣམས་ལ་དབང་བསྐུར་བས་གྲོལ་བར་བཤད་པའི་ཕྱིར་དང་། ཉན་རང་དགྲ་བཅོམ་ལྷག་མེད་དུ་ཞུགས་པ་རྣམས་ཀྱང་སྐུ་ཚེའི་འདུ་བྱེད་བཏང་སྟེ་ཡིད་ལུས་ཀྱིས་སྔགས་ཀྱི་ཐེག་པར་འཇུག་པ་ཡོད་དགོས་པའི་ཕྱིར་རོ། །
དྲུག་པ་ཉམས་པ་གསོ་ཚུལ་ལ་བསྟན་བཤད་གཉིས་ལས། མདོར་བསྟན་ནི། ཐ་མར་ཉམས་ན་གསོ་བའི་ཚུལ་བཤད་པ། །ཞེས་པ་སྟེ། རྩ་བ་དང་ཡན་ལག་གི་དམ་ཚིག་རྣམས་མ་ཉམས་པར་བསྲུངས་ཤིང་། གལ་ཏེ་ཉམས་ན་གསོ་བ་ལ་འབད་དགོས་པས་དེའི་ཚུལ་བཤད་ཅེས་སྦྲེལ་ལོ། །
གཉིས་པ་རྒྱས་བཤད་ལ་གཉིས་ཏེ། ཕྱིར་བཅོས་བྱ་ཚུལ་དང་། མ་བྱས་པའི་ཉེས་པའོ། །དང་པོ་ལའང་ལྔ་སྟེ། ལྟུང་བའི་རྒྱུ་གཉེན་པོ་དང་བཅས་པ། ལྟུང་བ་ལྕི་ཡང་གི་ལྡང་ཚད། ལྟུང་མེད་ཀྱི་རྒྱུ། བཤགས་ཚད་འདས་པ་གསོར་རུང་མི་རུང་གི་དབྱེ་བ། ཕྱིར་བཅོས་བྱ་ཚུལ་དངོས་སོ། །དང་པོ་ནི། ལྟུང་མཚམས་མི་ཤེས་བླ་མ་སོགས་མི་གུས། །བག་མེད་སྤྱོད་ཅིང་ཉོན་མོངས་མང་བ་བཞི། །ལྟུང་བ་འབྱུང་བའི་སྒོ་བཞིར་ཐོགས་མེད་བཞེད། །དེ་ཡི་གཉེན་པོར་བསླབ་བྱར་བསླབ་པ་དང་། །ཀུན་ལ་གུས་བྱེད་རྟག་པར་དྲན་ཤེས་བསྟེན། །ཉོན་མོངས་གང་ཆེའི་གཉེན་པོར་འབད་དེ་བསླབ། །སྤང་བྱ་བཞིའི་སྟེང་བརྗེད་ངས་དྲན་མི་གསལ། །གཉིས་བསྣན་དམ་ཚིག་ཉམས་པའི་རྒྱུ་དྲུག་ཅེས། །དཔལ་ལྡན་སྡོམ་པའི་རྒྱུད་ལས་གསལ་བར་གསུངས། །ཞེས་པ་སྟེ། འདུལ་བ་བསྡུ་བ་ལས། ལྟུང་བའི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པའོ། །ཞེས་པ་ལྟར། དམ་ཚིག་ལ་བསླབ་པར་འདོད་ཀྱང་ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་དང་། ཤེས་ཀྱང་བླ་མ་དང་དེས་འདོམས་པའི་བསླབ་བྱའི་གནས་ལ་མ་གུས་པས་འཇུག་པར་མི་བྱེད་པ་དང་། སྤྱིར་གུས་ཀྱང་ཉེས་དམིགས་མ་མཐོང་པའམ་དྲན་ཤེས་མེད་པའི་འཛེམ་བག་མི་བྱེད་པར་སྤྱོད་པ་དང་། འཛེམ་བག་ཅུང་ཟད་སྐྱེས་ཀྱང་དུག་གསུམ་ཤས་ཆེ་བས་སེམས་ཉོན་མོངས་པའི་དབང་དུ་ཐལ་བ་ཉོན་མོངས་པ་མང་བ་སྟེ། ལྟུང་བ་འབྱུང་བའི་སྒོ་བཞི་དང་། དེའི་སྟེང་དུ་བརྗེད་ངས་དང་དྲན་པ་མི་གསལ་བ་གཉིས་བསྣན་པས་དྲུག་སྟེ། མཁའ་འགྲོ་སྡོམ་པའི་རྒྱུད་ལས། མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་དང་། །བརྗེད་ངས་དྲན་པ་མི་གསལ་བ། །འདི་དྲུག་དམ་ཚིག་ཉམས་པའི་རྒྱུ། །ཞེས་སོ། །དེ་དག་གི་གཉེན་པོ་ཇི་ལྟར་བསྟེན་ཚུལ་ནི། ལྟུང་བའི་མཚན་ཉིད་མི་ཤེས་པའི་གཉེན་པོར་བསླབ་བྱ་རྣམས་ལེགས་པར་བསླབས་ཏེ་བླང་དོར་གྱི་གནས་རྣམས་ཤེས་པས་བསྲུང་བ་དང་། མ་གུས་པའི་གཉེན་པོར་ཕན་ཡོན་ལ་བྲོད་པ་དང་བཅས་ཏེ་བླ་མ་དང་དེས་འདོམས་པའི་བསླབ་བྱ་ཀུན་ལ་གུས་པ་བསྐྱེད་ནས་བསྲུང་བ་དང་། བག་མེད་ཀྱི་གཉེན་པོར་དགྲ་ཉེན་ཆེ་སར་ཟོན་བྱེད་པ་ལྟར་ཉེས་དམིགས་ལ་འཇིགས་པའི་སེམས་བསྒྲིམས་ཏེ་བསྲུང་བ་དང་། ཉོན་མོངས་པ་གང་སྐྱེས་དེ་དང་དེའི་ཕྱི་ནང་གི་གཉེན་པོ་བསྐྱེད་ནས་བསྲུང་བ་དང་། བརྗེད་ངས་ཀྱི་གཉེན་པོར་གནང་བཀག་གི་མཚམས་མི་བརྗེད་པར་ཡིད་ལ་བྱེད་པའི་དྲན་པ་ཉིན་མཚན་དུ་སེམས་ཤིང་བཤགས་བསྡམས་བྱེད་པ་དང་། དྲན་པ་མི་གསལ་བའི་གཉེན་པོར་དམ་ཚིག་ལས་འདས་མ་འདས་རྟོག་དཔྱོད་ཀྱིས་བླང་དོར་ལ་འཇུག་པའི་ཤེས་བཞིན་གྱི་བྱ་ར་འཛུགས་པ་རྣམས་དང་། གཞན་ཡང་ཉམས་ན་བདག་ཉིད་ངན་ནོ་སྙམ་དུ་རང་ལ་བརྟེན་ནས་འཛེམ་པས་ངོ་ཚ་ཤེས་པ་དང་། ཉམས་ན་གཞན་ཁྲེལ་ནས་སྨད་པའི་གནས་སུ་འགྱུར་རོ་སྙམ་དུ་གཞན་ལ་བརྟེན་པའི་ཁྲེལ་ཡོད་སོགས་ཀྱི་སྒོ་ནས་འབད་པས་བསྲུང་བར་བྱ་སྟེ། སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབས་ཀྱང་སླའི། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་པའི་ཕྱིར་རོ། །
གཉིས་པ་ནི། ཀུན་ལ་ཡུལ་བསམ་སྦྱོར་བ་མཐར་ཐུག་གམ། །ཀུན་སློང་ཉོན་མོངས་གང་འགལ་དེར་ཤེས་དང་། །ལུས་ངག་སྦྱོར་བྱས་དངོས་གཞི་བར་ཆོད་པ། །མ་འཁྲུལ་སྤྱད་དང་འགྱོད་མེད་བཤགས་ཚད་འདས། །ཕམ་པ་ཞེས་བརྗོད་དངོས་གཞི་མ་ཚང་ན། །ཐུན་འདས་ལྟུང་བ་ཞེས་བརྗོད་ལྷག་མ་ལྟར། །རིམ་པས་དམན་ན་སྦོམ་པོ་ལྟུང་བྱེད་དང་། །ཉེས་བྱས་ལྟུང་བའི་གཟུགས་བརྙན་ཤེས་པར་བྱ། །ཞེས་པ་སྟེ། ལྟུང་བ་ཀུན་ལ་ཡན་ལག་བཞི་ལྡན་ནམ་བདུན་ལྡན་ཏེ། དེ་ཡང་གང་ལ་ལྟུང་བ་འབྱུང་བའི་ཡུལ་དང་། དེ་ཡིན་ལ་དེར་འདུ་ཤེས་པའི་བསམ་པ་དང་། སྤུན་ལ་ཁྲོ་བ་ལྟ་བུ་ལ་ཞུགས་པའི་སྦྱོར་བ་དང་། སྒོ་གསུམ་གང་གིས་གྲུབ་པའི་ལས་ལམ་རྫོགས་པར་སྤྱོད་པ་མཐར་ཐུག་སྟེ་ཡན་ལག་བཞི་ལྡན་ནམ། ཡང་ན། ཀུན་སློང་ཉོན་མོངས་པ་དྲག་པོས་བསླང་བ་དང་། གང་ལ་བརྟེན་ནས་དམ་ཚིག་དང་འགལ་བར་འགྱུར་པའི་ཡུལ་དེ་ལ་དེར་ཤེས་པ་དང་། རྩ་ལྟུང་བཅུ་བཞི་ལས་ལྔ་པ་ཁྱད་པར་བ་ཀུནྡ་འདོར་བ་ལྟ་བུ་ལུས་ཀྱི་སྦྱོར་བའི་གྲོགས་ལ་ལྟོས་པས་བྱ་བ་དེ་ཟིན་པ་དང་། བདུན་པ་གསང་སྒྲོག་ལྟ་བུ་ངག་གི་སྦྱོར་བས་གྲོགས་ལ་ལྟོས་པས་བརྗོད་ཅིང་དེ་ཕ་རོལ་གྱིས་གོ་ན་དངོས་གཞི་སྟེ་རྩ་ལྟུང་དུ་གྲུབ་པ་དང་། དགུ་པ་ལྟ་བུ་ཡིད་ཀྱིས་འགྲུབ་པ་རྣམས་ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབས་པར་ཐུན་ཚོད་ཀྱིས་བར་ཆོད་པ་དང་། འདུ་ཤེས་མ་འཁྲུལ་བས་སྤྱད་པ་དང་དེས་མགུ་བས་འགྱོད་པ་མེད་པ་དང་། བཤགས་ཚད་རང་རང་གི་དུས་ལས་འདས་པ་སྟེ། དེ་ལྟར་ཡན་ལག་བདུན་ཚང་བར་སྤྱད་ན་སྔགས་སྡོམ་གཏོང་བས་ཤིན་ཏུ་ལྕི་ཞིང་མི་མཐུན་ཕྱོགས་ཀྱིས་གཉེན་པོ་བཅོམ་པས་ཕམ་པ་ཞེས་བརྗོད་དོ། །ཡང་རྩ་ལྟུང་གང་རུང་གཉེན་པོ་དང་སྤེལ་ནས་སྐྱེས་པ་ལྟ་བུ་དངོས་གཞི་མ་ཚང་ཞིང་མ་བཤགས་པར་ཐུན་ཚོད་འདས་ན་ལྟུང་བ་ཞེས་བརྗོད་དེ་སོ་ཐར་གྱི་དགེ་འདུན་ལྷག་མ་ལྟར་ཕམ་པའི་འོག་ནས་ལྕི་བའོ། །དེ་བཞིན་དུ་རིམ་པས་ཉེས་པ་དམན་ན་ཞེས་སྦྱར་ཏེ། ཕམ་པའི་སྡེར་གཏོགས་ཡན་ལག་མ་ཚང་བ་ཉོན་མོངས་པ་ཅན་ནི་སྦོམ་པོ་དང་། ཡན་ལག་གི་ལྟུང་བ་གཞན་ཐམས་ཅད་ནི་ལྟུང་བྱེད་དང་། ཕྱོགས་མཐུན་གྱི་ཉེས་པ་ཕྲ་མོ་རྣམས་ནི་ཉེས་བྱས་དང་འདྲའོ། །གལ་ཏེ་རྡོ་རྗེའི་མཆེད་ལ་ཕན་པའི་སེམས་ཀྱིས་ཁྲོས་པ་ལྟ་བུ་ནི་ལྟུང་བའི་གཟུགས་བརྙན་ཏེ་དོན་ལ་ལྟུང་མེད་དོ། །དེ་ལྟར་ཡང་སློབ་དཔོན་མཚོ་སྐྱེས་ཀྱི་རྣམ་ཐར་བསྡུས་པ་ལས། དངོས་གྲུབ་ཐམས་ཅད་གཞིར་གྱུར་པ། །རྩ་བ་དང་ནི་ཡན་ལག་གོ །རྩ་བ་དུས་འདས་ཕམ་པ་འདྲ། །ཚད་ལྡན་ལྟུང་བར་བཤད་པ་ཡིན། །ཡན་ལག་གཙོ་བོར་དུས་འདས་པ། །ལྕི་བ་ཞེས་ནི་བཤད་པ་སྟེ། །སྦྱོར་བ་མ་རྫོགས་སྦོམ་པོའོ། །ཡན་ལག་ཕྲ་བ་ཉེས་བྱས་སོ། །ཕྲ་མོའི་ཕྲ་མོ་དཀྱིལ་འཁོར་གཅིག །ཅེས་པ་ལྟར་རོ། །
གསུམ་པ་ནི། ན་དང་དབང་ཉམས་བྱ་བ་གཞན་གྱིས་དང་། །དོན་ཆེན་སྐྱེ་མེད་བརྟན་དང་དགོས་ལྡན་དང་། །ནུས་རྙེད་གནང་དང་བཀའ་བསྒོ་བར་ཆད་ལས། །ཉེས་པ་མེད་ཅེས་སྙིང་པོ་རྒྱན་ལས་གསུངས། །ཞེས་པ་སྟེ། དེ་དག་ཀུན་ལ་རང་ཉིད་ན་བ་དང་། དབང་ཉམས་ཞེས་པས་རང་དབང་ཉམས་པའམ་དབང་ཐོབ་པ་ལས་ཉམས་པ་དང་། བྱ་བ་གཞན་དོན་དེ་བས་ཆེ་བར་འབྱུང་བ་དང་། གཞན་དོན་དུ་འགྱུར་བའམ་དོན་ཆེན་པོ་མཐོང་བ་དང་། སྐྱེ་བ་མེད་པའི་དོན་བརྟན་པ་དང་། གཞན་དྲང་པ་སོགས་ཀྱི་དགོས་པ་དང་ལྡན་པ་དང་། རྟོགས་གོམས་ཀྱི་ནུས་པ་རྙེད་པ་དང་། ལྷག་པའི་ལྷ་ལྟ་བུ་ཡུལ་ཁྱད་པར་ཅན་གྱིས་གནང་བ་ཐོབ་པ་དང་། བཀའ་བསྒོ་བ་སྟེ་བླ་མའི་ལུང་དང་། སྲོག་གི་བར་ཆད་འབྱུང་བ་ལ་ཉེས་མེད་དུ་བསྟན་ཏེ། སྙིང་པོ་རྒྱན་ལས། ན་དང་དབང་ཉམས་བྱ་བ་དང་། །གཞན་གྱི་དོན་དང་དོན་ཆེན་དང་། །སྐྱེ་མེད་བརྟན་པ་དགོས་ལྡན་དང་། །ནུས་པ་རྙེད་དང་གནང་བ་དང་། །བཀའ་བསྒོ་བ་དང་བར་ཆད་ལས། །ཉེས་པ་མེད་པར་ཤེས་པར་བྱ། །ཞེས་སོ། །
བཞི་པ་ནི། དེ་ལྟར་ཉིན་མཚན་ཐུན་ལ་ལན་དྲུག་ཏུ། །སྤང་བླང་དམ་ཚིག་གནས་ལ་བསྒྲིམས་ཏེ་དཔྱད། །དྲུག་ཆ་འདས་ན་ཐུན་ཚོད་འདས་ཞེས་བྱ། །ཞག་གཅིག་ཟླ་གཅིག་ལོ་གཅིག་ལོ་གཉིས་འདས། །འགལ་ཉམས་འདས་རལ་ཞེས་བརྗོད་དེ་དག་ཀྱང་། །སྙིང་ནས་བཤགས་ན་གསོར་རུང་ཕྱི་རིམ་ལྕི། །ལོ་གསུམ་འདས་ན་གསོར་མི་རུང་བ་ཡིན། །ཞེས་པ་སྟེ། དེ་ལྟར་ཉིན་ཞག་གི་དྲུག་ཆའི་ཐུན་རེ་རེ་བཞིན་ཡང་སྤང་བྱ་དང་བླང་བྱའི་དམ་ཚིག་གི་གནས་རྣམས་ལས་འགལ་ལམ་མ་འགལ་ལེགས་པར་བསྒྲིམས་ཏེ་བརྟག་དཔྱད་བྱས་པས། ཉིན་མཚན་གྱི་དྲུག་ཆའི་ནང་དུ་གཉེན་པོས་མ་སླེབས་ན་ཐུན་ཚོད་འདས་པ་ཞེས་བྱ་བ་དང་། ཞག་གཅིག་གིས་བར་མ་ཆོད་ན་འགལ་བ་དང་། ཟླ་བས་བར་མ་ཆོད་པ་ཚུན་ཆད་ཉམས་པ་དང་། ལོ་གཅིག་ཚུན་ཆད་འདས་པ་དང་། ལོ་གཉིས་སམ་གསུམ་ཚུན་ཆད་རལ་པ་ཞེས་དུས་ལ་ལྟོས་ནས་ཉེས་པ་ཕྱི་རིམ་གྱིས་ལྕི་བ་སྟེ། དེ་ཚུན་ཆད་སྙིང་ནས་བརྩོན་པ་ཆེན་པོས་བཤགས་ན་ལྡང་ལ། ལོ་གསུམ་འདས་པ་ཕན་ཆད་ནི་གསོར་མི་རུང་བ་ཡིན་ཏེ། དམ་ཚིག་བཀོད་པའི་རྒྱུད་ལས། སྤྱིར་ན་དམ་ཚིག་ཁྱད་པར་ལ། །དུས་ལས་ཁྱད་པར་ངེས་ཕྱེ་བ། །དམ་ལས་འགལ་ཞེས་ཉེས་བྱས་གང་། །ཞག་གིས་བར་མ་ཆོད་པར་ནི། །དམིགས་པའི་ཡིད་ལ་བཤགས་བྱས་ན། །དེས་ནི་སོར་ཡང་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པས་སོ། །དམ་ལས་འདས་པ་ལོ་དག་གིས། །བར་དུ་མ་ཆོད་བཤགས་པས་སོ། །ལོ་ནི་གཉིས་དང་གསུམ་དག་ལས། །དམ་ཚིག་རལ་པ་ཞེས་བྱ་བ། །མཆོག་ཏུ་དྲག་ན་གསོ་རུ་རུང་། །ལོ་གསུམ་དག་ལས་འདས་པ་ནི། །དེ་ནས་གསོ་རུ་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལ། །རྒྱུན་དུ་སྤྱོད་པ་ཁོ་ནའོ། །ཞེས་སོ། །དེ་ཡང་ངོ་བོ་ལ་ལྟོས་པ་རྩ་བ་དང་ཡན་ལག་གི་དམ་ཚིག་ཉམས་པ་དང་། དུས་ལ་ལྟོས་པ་ཐུན་འདས་འགལ་ཉམས་སོགས་ཀྱིས་བཤགས་བྱའི་ལྕི་ཡང་ཤེས་པར་བྱའོ། །ཞར་བྱུང་སྤྱི་མདོ་ལས། ལངྐའི་བདག་པོ་གང་འདི་ལས། །ཉམས་པར་གྱུར་པ་གང་ཞེ་ན། །ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པའི་ཀུན་ཏུ་ཉམས་པ་ནི་ཡུལ་ཆེས་གཉན་པ་ལ་ཀུན་དཀྲིས་དྲག་པོས་སྤྱད་པའམ་ལན་གྲངས་མང་དུ་བྱུང་བ་དང་དུས་འདས་རལ་ལ་སོགས་པ་ཡིན་ལ། ཟླས་ཉམས་ནི་ཉམས་པ་དང་འགྲོགས་པའི་ཉེས་པ་དང་། ཞར་ཉམས་ནི་གཞན་གྱི་ངོ་དགར་ཐལ་བའི་ཉེས་པའོ། །
ལྔ་པ་ཕྱིར་བཅོས་བྱ་ཚུལ་དངོས་ལ་བཞི་སྟེ། དབང་བཞི་ལ་ལྟོས་པའི་གསོ་ཐབས། དུས་འདས་ལ་ལྟོས་པའི་གསོ་ཐབས་། སྙིང་པོ་རྒྱན་ལས་བཤད་པའི་ཕྱིར་བཅོས་ཉེར་ལྔ། ཡོ་ག་གསུམ་ཀའི་རྣལ་འབྱོར་སྤྱི་ཁྲུས་ཀྱིས་གསོ་བའོ། །དང་པོ་ནི། དབང་བདུན་ཐོབ་ལ་ལྷ་གྲངས་རེ་རེ་ལ། །བཟླས་པ་སུམ་ཁྲི་དྲུག་སྟོང་བྱས་པས་སྦྱང་། །བུམ་གསང་ཐོབ་ཉམས་སྔོན་དུ་ཆད་ལས་སྦྱང་། །དེ་རྗེས་དཀྱིལ་འཁོར་ཞུགས་ལ་དབང་བཞི་ལེན། །ཤེར་དབང་ཚིག་དབང་ཐོབ་ཉམས་བསྐྱེད་རིམ་དང་། །འཕོ་མེད་ཚུལ་ཁྲིམས་རྫོགས་པའི་རིམ་པ་དང་། །རང་རྒྱུད་བྱིན་བརླབས་མ་གཏོགས་གཞན་མི་འདག །ཅེས་པ་སྟེ། དེ་ཡང་དབང་ཐོབ་མཚམས་ཐ་དད་པའི་དབང་གིས། དེ་ལ་ལྟོས་པའི་ལྟུང་བ་སྦྱོང་བའི་ཐབས་ཀྱང་ཐ་དད་དུ་དུས་ཀྱི་འཁོར་ལོར་གསུངས་ཏེ། འདི་ལྟར་བུམ་དབང་བདུན་ཙམ་ཐོབ་པས་དཀྱིལ་འཁོར་གྱི་ལྷ་གྲངས་རེ་རེའམ་གཙོ་བོའི་བཟླས་པ་སྟོང་ཕྲག་སུམ་ཅུ་རྩ་དྲུག་གིས་སྦྱང་ཞིང་། བུམ་གསང་ཐོབ་པས་ནི། དེའི་སྟེང་དུ་སློབ་དཔོན་གྱིས་གསུངས་པའི་ཆད་ལས་ཀྱི་བརྟུལ་ཞུགས་སྤྱད་པས་སྦྱོང་། ཤེར་དབང་ཡན་ཆད་ཐོབ་པས་དབེན་པའི་གནས་སུ་བསྐྱེད་རྫོགས་བསྒོམ་པ་འབའ་ཞིག་གིས་རང་རྒྱུད་བྱིན་གྱིས་བརླབས་པས་སྦྱང་སྟེ། དེ་གསུམ་ཀས་ཀྱང་སྦྱང་པ་ལས་དག་པའི་མཚན་མ་མཐོང་བ་ན་སླར་དཀྱིལ་འཁོར་དུ་ཞུགས་ཏེ་སྡོམ་པ་བཟུང་ཞིང་དབང་བླང་བར་བྱ་བ་ཡིན་ལ། དེའི་ཚེ་སྔར་གྱི་དབང་ཐོབ་པའི་བསླབ་གྲལ་དང་རྙེད་བཀུར་ལེན་པ་སོགས་མི་བྱ་བར་གསུངས་སོ། །གཉིས་པ་ནི། འགལ་ན་ཚོགས་འཁོར་ཉམས་ན་བདོག་པས་བསྐང་། །འདས་ན་བུ་དང་ཆུང་མ་ནོར་སོགས་དང་། །རལ་ན་རང་གི་སྲོག་གིས་གསོ་བར་བཤད། །ཅེས་པ་སྟེ། དམ་ཚིག་རྣམ་བཀོད་ལས། འགལ་ན་ཚོགས་ཀྱི་འཁོར་ལོས་བཤགས། །ཉམས་ན་རང་གི་བདོག་པས་བསྐང་། །འདས་ན་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་ན་རང་གི་སྲོག་གིས་བསྐང་། །ཞེས་པའི་དགོངས་པ་སྟེ། རལ་བ་ལ་སྲོག་གིས་བསྐང་བ་ནི། བླ་མ་དང་བསྟན་པ་ལྟ་བུའི་ཆེད་དུ་རང་སྲོག་བློས་བཏང་བའི་བརྩོན་པ་དྲག་པོས་བསྐང་ཞིང་། དེ་ཐམས་ཅད་ཀྱི་རྗེས་སུ་ཚོགས་འཁོར་དང་འབྲེལ་བར་སྤྱིར་བླ་མ་དང་ཁྱད་པར་བླ་མའམ་སྤུན་ལས་ཉམས་ན་གང་ལས་ཉམས་པ་དེའི་དྲུང་དུའམ་དེ་དག་མེད་ན་སྐུ་གཟུགས་ལ་སོགས་པའི་མདུན་དུ་འགྱོད་སེམས་དང་བཅས་པས་བཤགས་ཤིང་ཕྱིས་སྡོམ་པའི་བརྟུལ་ཞུགས་ལ་གནས་པར་བྱའོ། །གཞན་ཡང་སྤྱི་མདོ་ལས། ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་བསྐང་ཐབས་ལྔར་བཤད་པའི་ལས་ཀྱིས་བསྐང་བ་ནི། སྦྱིན་སྲེག་གམ་བཟླས་བརྗོད་ཀྱིས་བསྐང་བ་སྟེ། གྲངས་ནི་ཀུན་ཏུ་ཉམས་པ་ལ་ཁྲི་ཕྲག་བཅུ་གསུམ། རྩ་བ་ཉམས་པར་སྟོང་ཕྲག་ལྔ་བཅུ་ང་གསུམ། ཡན་ལག་ལ་བརྒྱ་ཕྲག་ང་གསུམ། ཟླས་ཉམས་ལ་ལྔ་བརྒྱ་དང་སུམ་ཅུ། ཞར་ཉམས་ལ་ལྔ་བཅུ་རྩ་གསུམ་མོ། །རྫས་ཀྱིས་བསྐང་བ་ནི། རིགས་ལྔ་གང་གི་དམ་ཚིག་ཉམས་པའི་ཁྱད་པར་ལས། ཡུལ་རྙེད་ན་དམངས་གདོལ་སོ་སོར་ཕྱེ་བའི་མི་རིགས་ལྔའི་བླ་མ་དངོས་སམ་མོས་པ་དེ་བཞིན་གཤེགས་པ་ལྔའི་རང་བཞིན་ཅན་ལ་རྫས་རིན་ཆེན་ལྔ་ལས་རིགས་དང་མཐུན་པའི་རིན་པོ་ཆེ་ཕོངས་པ་མེད་པར་སྟོབ་པས་སྐོང་ཞིང་། འདུན་པས་བསྐང་བ་ནི། དང་བ་དང་འདོད་པའི་དད་པས་ཉེས་བྱས་ལ་གནོང་འགྱོད་དྲག་པོས་གདུང་བས་ང་རོ་དང་བཅས་པས་བཤགས་ཏེ། གལྤོ་ལས། མི་དག་སྡིག་པའི་བག་ཆགས་རྣམས། །གདུང་བའི་གླུ་དང་བཅས་ཏེ་བཤགས། །ཞེས་སོ། །ཏིང་ངེ་འཛིན་གྱིས་བསྐང་བ་ནི། སྟོབས་བཞི་ཚང་བའི་སྒོ་ནས་བཤགས་པའི་ཡུལ་གྱི་གནས་གསུམ་ལས་འོད་ཟེར་རང་ཉིད་ལ་ཕོག་པས་སྡིག་སྒྲིབ་ཉམས་ཆག་ཐམས་ཅད་སྦྱང་བར་བསམ་པ་སྟེ། དེ་ཡང་ཏིང་ངེ་འཛིན་གྱིས་མེས་སྲེག་པ་དང་། བྱང་ཆུབ་སེམས་ཀྱི་འོད་ཟེར་གྱིས་མུན་པ་བསལ་བ་དང་། སྤྱོད་པ་རླབས་པོ་ཆེའི་ཆུས་བཀྲུ་བ་ལ་སོགས་པའོ། །དེ་ཁོ་ན་ཉིད་ཀྱིས་བསྐང་བ་ནི། ཀུན་འདུས་ལས། ཤེས་རབ་ཆེན་པོས་རྒྱུད་ཀྱི་བག་ཆགས་ཐམས་ཅད་རང་བཞིན་མེད་པར་ཤེས་པ་དང་། ཞེས་པས་འཁོར་གསུམ་མི་དམིགས་པའི་ཤེས་རབ་སྒོམ་པ་ནི་སྡིག་སྦྱོང་རྣམས་ཀྱི་ནང་ནས་ཕུལ་དུ་བྱུང་བའོ། །ཁྱད་པར་རྩ་བ་དང་ཡན་ལག་སོ་སོའི་བསྐང་ཐབས་ཀྱང་། རྔམ་གློག་ལས། དམ་ཚིག་ཉམས་པར་གྱུར་བ་ན། །མགོན་བཙུན་མཉམ་པའི་དོན་རྟོགས་ན། །དེ་ཉིད་སྐོང་བའི་གནས་སུ་འགྱུར། །བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་ཉེས་བྱས་ཏེ། །མཐོལ་བཤགས་དྲག་པོས་འགྱོད་བྱས་ན། །དེ་ནི་སྐོང་བའི་མཆོག་ཏུ་འགྱུར། །གལ་ཏེ་བདག་གམ་བླ་མ་སྤུན། །མ་བསྐང་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམས་ཏེ། །ཐ་ཚིག་གང་བཀླགས་འབུམ་འབུམ་འདོན། །ཐུགས་ཀྱི་དམ་ཚིག་རལ་གྱུར་ན། །རྡོ་རྗེ་སེམས་དཔར་བདག་བསྒོམས་ལ། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བ་རབ་ཏུ་བྱ། །ཡན་ལག་ཐ་ཚིག་རལ་གྱུར་ན། །སོ་སོ་རང་རང་རིགས་ཀྱིས་བསྐང་། །ཞེས་རང་གི་སྒོ་གསུམ་དང་སྦྱར་ནས་སྐུ་གསུང་ཐུགས་ཀྱི་ཉམས་ཆག་སྐོང་ཚུལ་གསུངས་སོ། །གསུམ་པ་ནི། སྙིང་པོ་རྒྱན་ལས་གསོ་བའི་ཆོ་ག་ནི། །ཚོགས་ཞིང་ལ་བཤགས་དྲལ་བའི་སྔགས་རྒྱ་དང་། །བཀྲུ་བའི་རིམ་པ་བཏུམ་མོའི་མེས་སྲེག་དང་། །མི་དམིགས་བསྒོམ་དང་དབང་བཞི་བླང་བ་དང་། །ཚོགས་སུ་ཞུ་དང་རྟེན་ལ་སྨྲེ་བ་དང་། །མཎྜལ་འབུལ་དང་མཆོད་རྟེན་བྱ་བ་དང་། །མེ་ལ་སྦྱང་དང་གཏོར་མ་གཏོང་བ་དང་། །གསང་སྔགས་བཟླ་དང་ཟབ་མོའི་བསམ་གཏན་དང་། །སྲོག་སྐྱོབ་བཀའ་ཀློག་བླ་མ་བསྟེན་པ་དང་། །བདག་འཇུག་རྒྱལ་བའི་ཡིག་བརྒྱ་དུས་བཟང་བཟླ། །ཕུང་པོ་གསུམ་པ་རྡོར་སེམས་བླ་མ་དང་། །ཐིག་ལེ་ཕྲ་མོའི་རྣལ་འབྱོར་བསྒོམས་པས་གསོ། །ཞེས་པ་སྟེ། ཚོགས་ཞིང་སྤྱན་དྲངས་པའི་དྲུང་དུ་བཤགས་སྡོམ་བྱ་བ་དང་། ཡོ་གར་བཤད་པའི་དྲལ་བའི་སྔགས་རྒྱས་སྦྱོང་བ་དང་། ཕྱི་བུམ་ཆུ་དང་ནང་ནམ་མཁའི་དབང་ལྷ་ལས་རིག་དབང་ལྔ་ལེན་པ་སོགས་བཀྲུ་བའི་རིམ་པ་དང་། གཏུམ་མོའི་མེས་ལྟེ་བའི་ཀཾ་ཡིག་སྲེག་པ་དང་། འཁོར་གསུམ་མི་དམིགས་པའི་ཤེས་རབ་བསྒོམ་པ་དང་། བླ་མ་ལས་སམ་བདག་འཇུག་གིས་དབང་བཞི་བླང་བ་དང་། ཚོགས་འཁོར་རམ་དཔའ་བོ་དཔའ་མོའི་སྟོན་མོས་མཆོད་ནས་བཤགས་སྡོམ་བྱ་བ་དང་། རྟེན་གསུམ་རབ་གནས་ཅན་གྱི་དྲུང་དུ་ཡན་ལག་བདུན་པ་སྔོན་དུ་འགྲོ་བས་སྨྲེ་སྔགས་ཀྱིས་བཤགས་པ་དང་མཎྜལ་གྱིས་མཚོན་ཏེ་ལུས་ལོངས་སྤྱོད་དགེ་ཚོགས་ཐམས་ཅད་ཕུལ་ལ་བཤགས་པ་དང་། མཆོད་རྟེན་ཚད་ལྡན་བཞེངས་པའམ་སཱཙྪ་གདབ་པ་དང་། ཞི་བའི་སྲེག་བླུགས་རྒྱས་པའམ་ཟ་བྱེད་རྡོ་རྗེ་མཁའ་འགྲོའི་སྦྱིན་སྲེག་ལྟ་བུ་མེས་སྦྱང་བ་དང་། གཏོར་མ་སྦྱངས་རྟོགས་སྦར་གསུམ་གྱིས་བྱིན་གྱིས་བརླབས་པ་འཁོར་འདས་ཐམས་ཅད་འཁོར་ལོའི་དབང་ཕྱུག་གི་རྣམ་པར་སད་པ་ལ་དབུལ་ཞིང་འདོད་དོན་གསོལ་བ་དང་། རང་གི་ལྷག་པའི་ལྷའི་གསང་སྔགས་བཟླ་བ་དང་། ཟབ་མོའི་བསམ་གཏན་ཞི་ལྷག་གི་ཏིང་ངེ་འཛིན་བསྒོམ་པ་དང་། སྲོག་བླུ་ཉེའུ་འདོན་པ་དང་། མདོ་རྒྱུད་ཟབ་མོའི་བཀའ་ཀློག་པ་དང་། བླ་མ་གཙུག་གི་ནོར་བུ་ལྟར་བསྟེན་པ་དང་། སྙིང་གར་དམ་ཚིག་རྡོ་རྗེ་དོན་གྲུབ་ཡབ་ཡུམ་བསྒོམ་པའི་ཐུགས་ཀའི་ས་བོན་ལས་བདུད་རྩིའི་རྒྱུན་བབས་སྡིག་སྒྲིབ་སྦྱོང་བར་བསམ་ལ་ༀ་ཨཱཿཁཾ་ཧཱུྃ་ཞེས་པས་བསྙེན་པ་སྔོན་དུ་འགྲོ་བའི་ལུས་དཀྱིལ་ལམ་ཞི་དཀྱིལ་གང་རུང་དུ་བདག་འཇུག་བླང་བ་དང་། རྟེན་བྱིན་ཅན་ལ་སྐོར་བ་བྱེད་པའམ་དྲུང་དུ་འདུག་ནས་དེ་བཞིན་གཤེགས་པའི་ཡིག་བརྒྱ་སྟོང་ཕྲག་ལྔ་བཟླ་བ་དང་། ཡར་ངོའི་བརྒྱད་དང་བཅོ་ལྔའི་དུས་བཟང་པོ་ལ་སྡིག་སྦྱོང་ལ་བསྔགས་པའི་གཟུངས་སྔགས་བྱིན་ཅན་མང་དུ་བཟླ་བ་དང་། ཕུང་པོ་གསུམ་པའི་མདོ་ཉིན་མཚན་དུས་དྲུག་ཏུ་འདོན་པ་དང་། སྤྱི་བོར་བླ་མ་རྡོ་རྗེ་སེམས་དཔའ་བསྒོམ་ལ་སྡིག་སྒྲིབ་བཀྲུ་བའི་དམིགས་པས་ཡི་གེ་བརྒྱ་པ་བཟླ་བ་དང་། རང་གཉུག་མའི་ལྷར་གསལ་བའི་སྤྱི་བོར་བླ་མ་རྡོ་རྗེ་འཆང་བསྒོམས་པའི་གནས་གསུམ་དུ་འབྲུ་གསུམ་གསལ་བ་ལ་དམིགས་ནས་སྲོག་རྩོལ་བསྡམས་ཏེ་འབྲུ་གསུམ་གྱི་ཡིད་བཟླས་བྱ་བ་བླ་མའི་རྣལ་འབྱོར་དང་། རང་ལུས་ལྷར་གསལ་བ་ལ་རྩ་འཁོར་གསལ་བཏབ་སྟེ་རླུང་བུམ་ཅན་དང་སྦྱར་ནས་དཔྱིད་ཐིག་གི་འབར་འཛག་བསྒོམ་པ་ཐིག་ལེའི་རྣལ་འབྱོར་དང་། རྩ་འཁོར་ལྔའི་ལྟེ་བར་རིགས་ལྔའི་ཕྱག་མཚན་ཕྲ་མོ་གསལ་བ་ལ་སེམས་བཟུང་སྟེ་མགོན་པོ་ལྔའི་རླུང་གཅུན་པ་ཕྲ་མོའི་རྣལ་འབྱོར་བསྒོམ་པའོ། །བཞི་བ་ནི། གླང་ཆེན་རབ་འབོགས་རྒྱུད་ལས་གསུངས་པ་ཡི། །རྣལ་འབྱོར་སྤྱི་ཁྲུས་འགྱོད་ཚངས་དོང་སྤྲུག་གི །བཤགས་པས་མི་འདག་མེད་ཕྱིར་ཉམས་སུ་བླང་། །ཞེས་པ་སྟེ། གླང་པོ་ཆེ་རབ་འབོག་གི་རྒྱུད་ལས་རྟོག་པ་གཅིག་ཁོལ་དུ་ཕྱུང་བ་ཀལྤ་དུམ་བུའི་རྒྱུད་དྲི་མེད་བཤགས་རྒྱུད་ལས་ཇི་སྐད་གསུངས་པ་ལྟར། ཡོ་ག་རྣམ་པ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བའི་སྤྱི་ཁྲུས་རྨད་དུ་བྱུང་བ་ན་རཀ་དོང་སྤྲུག་གི་མན་ངག་ལ་བརྟེན་ནས། ཕྱི་ཡོ་བྱད་ཚོགས་ཀྱི། ནང་ཕུང་པོ་རྟེན་གྱི། གསང་བ་བྱང་ཆུབ་སེམས་ཀྱི་བསྐང་བཤགས་གསུམ་ཉ་སྟོང་ཚེས་བརྒྱད་ལ་བྱས་ན་དེ་ཚུན་ཆད་ཀྱི་ཉམས་ཆག་ཐམས་ཅད་སོས་པར་གསུངས་ཤིང་། དེ་ལྟར་མ་གྲུབ་ནའང་ཕྱག་གི་བཀོལ་བྱང་ཙམ་རྒྱུན་དུ་ཡི་དམ་དུ་བགྱིས་པས་ཀྱང་ཉམས་ཆག་ཐམས་ཅད་འདག་པར་འགྱུར་ཏེ། ཇི་སྐད་དུ། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་བཙལ་ན། །ཉམས་ཆག་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང་། །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། གོང་གི་དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་ཀྱིས་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་བསྐངས་ཏེ། ཞེས་སོ། །མདོར་ན་རྨི་ལམ་དུ་བླ་མ་དང་ལྷས་ལེགས་སོ་སྟེར་བ་དང་། ཁྲུས་བྱས་པ་དང་། གོས་དཀར་པོ་གྱོན་པ་དང་། རི་བོ་ཆེན་པོའི་རྩེར་འཛེགས་པ། ཉི་ཟླ་ཤར་བ་སོགས་སྡིག་ལྟུང་དག་པའི་རྟགས་མ་བྱུང་གི་བར་དེ་སྲིད་དུ་སྟོབས་བཞི་ཚང་བའི་བཤགས་པ་ལ་འབད་པར་བྱ་ཞིང་། དེ་ཡང་ཡན་ལག་ཚང་བའི་རྩ་ལྟུང་ནི་བཤགས་པས་དག་པའི་རྟགས་བྱུང་བ་དང་སླར་དཀྱིལ་འཁོར་དུ་ཞུགས་ནས་དབང་བླང་བར་བྱ་བ་ཁྱད་པར་རོ། །
གཉིས་པ་ཕྱིར་བཅོས་མ་བྱས་པའི་ཉེས་པ་ནི། མ་བཤགས་ཚེ་འདིར་ཡིད་མི་འོང་བས་མནར། །ཕྱི་མ་རྡོ་རྗེ་དམྱལ་བ་ཞེས་བྱ་བ། །མནར་མེད་དོ་ཟླ་མེད་པའི་གནས་སུ་སྐྱེ། །ཞེས་པ་སྟེ། རྩ་བའི་དམ་ཚིག་ཉམས་པ་མ་བཤགས་ན་ཚེ་འདིར་ཡང་དབང་སྡུད་བསྒྲུབས་པས་ཡུལ་དགྲར་ལྡང་བ་ལྟར་སྒྲུབ་པ་ཐམས་ཅད་ལོག་པར་འགྱུར་བ་སོགས་མི་འདོད་པ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་ལེན་པ་བཞིན་དུ་འདུ་ཞིང་། ཕྱི་མ་རྡོ་རྗེའི་དམྱལ་བར་ལྟུང་ནས་བསྐལ་པ་དུ་མར་འཇིག་རྟེན་གྱི་ཁམས་བརྒྱུད་ཅིང་སྡུག་བསྔལ་གྱིས་ཉམ་ཐག་པར་འགྱུར་ཏེ། གསང་སྙིང་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་དང་། སྤྱི་མདོ་ལས། གལ་ཏེ་ཉམས་པར་གྱུར་པ་ན། །ཆད་པའི་སྐྱེ་གནས་དམྱལ་ཆེན་བརྒྱད། །མི་བཟད་སྡུག་བསྔལ་དྲག་པོ་ཡིས། །མཚོན་ཆའི་འཁོར་ལོ་བཞིན་དུ་འཁོར། །ཞེས་དང་། གསལ་བཀྲ་ལས། རྩ་ཀུན་ཉམས་པའི་འཆལ་པ་དག །གསོ་ལ་ཉེ་བར་མི་རྩོན་པ། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམས་པས་ནི། །དེ་ཡི་འབུམ་གྱི་ཆར་མི་ཕོད། །སངས་རྒྱས་སྟོང་གི་འོད་ཟེར་དང་། །བྱང་ཆུབ་སེམས་དཔའི་ཕྲིན་ལས་ཀུན། །རྒྱུན་དུ་མཛད་ཀྱང་ཕན་མི་འགྱུར། །བསྐལ་པ་ཐེར་འབུམ་ལ་སོགས་སུ། །དེ་ནི་འཐོན་པར་མི་འགྱུར་རོ། །འཇིག་རྟེན་འཇིག་ན་གཞན་དུ་འཕོ། །སེ་གོལ་གཅིག་གིས་ཕྱིན་པར་བྱེད། །དེ་བས་ཤིན་ཏུ་ནན་ཏན་གྱིས། །ཞེས་དང་། རྩ་ལྟུང་གི་གཞུང་ལས་ཀྱང་། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་བཟུང་བར་འགྱུར། །དེ་ནས་སྡུག་བསྔལ་མྱོང་འགྱུར་ཞིང་། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །རྩ་ལྟུང་ཅན་དེས་རང་ཉིད་ཉམས་པར་མ་ཟད་གཞན་ལ་ཟླས་ཉམས་ཀྱི་ཉེས་པའང་ངང་གིས་སྟེར་བར་བྱེད་པ་སྟེ། གསང་སྙིང་ལས། རྩ་བ་ཉམས་པའི་འཆལ་པ་དག །གསོ་ལ་ཉེ་བར་མི་བརྩོན་དང་། །སྐད་ཅིག་ཡུད་ཙམ་སྨྲ་མ་བྱེད། །ཉམས་གྱུར་ཉེས་པ་བརྗོད་མི་ལང་། །ཞེས་དང་། ཀུན་འདུས་ལས་ཀྱང་། ཇི་ལྟར་འོ་མ་རུལ་བ་དག །རུལ་བས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་སོ། །དེར་མ་ཟད་རྨི་ལམ་དུ་ཉེས་པ་བྱས་པ་དང་། གཞན་ཅི་ཟེར་བརྟག་པའམ་གཞན་གྱི་ངོ་དགར་ཐལ་བའི་ཞོར་ཉམས་བྱུང་ཡང་དེ་མ་ཐག་མ་བཤགས་ན་ཉེས་པ་ཆེན་པོར་འགྱུར་ཏེ། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲས་ཚིག་གི་ཟུར་ཙམ་ཡང་། །བརྡ་འམ་དངོས་པོར་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །ཡན་ལག་གི་དམ་ཚིག་ཉམས་པའི་ཉེས་པ་ནི། ཚེ་འདིར་དངོས་གྲུབ་མི་འགྲུབ་ཅིང་ཕྱི་མ་ངན་འགྲོར་ལྟུང་སྟེ། གསང་སྙིང་ལས། ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་དང་། རྡོ་རྗེ་སྙིང་རྒྱན་ལས། དེ་ལས་སྔགས་པས་ཡོངས་འདས་ན། །ངེས་པར་བདུད་དང་འཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྟིར་མེད་སྤྱིའུ་ཚུགས་དམྱལ་བར་འགྲོ། །སྦོམ་པོ་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །ཞེས་རྩ་བ་དང་ཡན་ལག་གི་ལྟུང་བ་གཉིས་ཀས་དམྱལ་བར་སྐྱེ་བ་འདྲ་བ་ལྟ་བུར་གསུངས་ནའང་། སྡུག་བསྔལ་ཆེ་ཆུང་དང་མནར་ཡུན་རིང་ཐུང་གི་ཁྱད་པར་ཆེའོ། །
བདུན་པ་ཕན་ཡོན་ནི། མ་ཉམས་རིང་མཐའ་སྐྱེ་བ་བཅུ་དྲུག་གམ། །མྱུར་ན་ཚེ་འདིའམ་འཆི་ཁ་བར་དོ་རུ། །ཐུན་མོང་གྲུབ་པ་བརྒྱད་དང་དབང་ཕྱུག་བརྒྱད། །མཆོག་གི་དངོས་གྲུབ་ཁ་སྦྱོར་བདུན་ལྡན་ཐོབ། །དེ་ཕྱིར་རང་གཞན་དོན་གཉིས་ལྷུན་གྱིས་གྲུབ། །ཅེས་པ་སྟེ། སྤྱིར་དམ་ཚིག་ནི་ཡོན་ཏན་ཐམས་ཅད་སྐྱེ་བ་དང་གནས་པའི་གཞི་རྟེན་དུ་གྱུར་པ་སྟེ། སྤྱི་མདོ་ལས། ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་བུ་སྨིན་པར་གྱུར་པ་ཡིས། །གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་སོ། །ཁྱད་པར་གནས་སྐབས་སུའང་བསམ་པའི་དོན་ཐམས་ཅད་ཇི་ལྟ་བ་བཞིན་དུ་འགྲུབ་པ་དང་། ཀུན་གྱི་ཡིད་དུ་འོང་བ་དང་། འཇིག་རྟེན་གྱི་ལྷ་ཆེན་པོ་རྣམས་ཀྱི་བཀུར་གནས་ཐོབ་པ་དང་། སངས་རྒྱས་དང་བྱང་ཆུབ་སེམས་དཔའ་དཔའ་བོ་རྣལ་འབྱོར་མ་རྣམས་ཀྱིས་སྲས་དང་སྤུན་དུ་དགོངས་པས་བྱིན་གྱིས་བརླབ་པ་དང་། དེ་བཞིན་གཤེགས་པ་ཉིད་ཀྱི་སྤྱོད་ཡུལ་ལ་ཞུགས་པས་རིག་པ་འཛིན་པའི་ས་ལ་རིམ་གྱིས་སྦྱོར་བར་བྱེད་པ་སྟེ། སྒྱུ་འཕྲུལ་རྩ་རྒྱུད་ལས། རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་བརླབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་དང་། དམ་ཚིག་གསུམ་བཀོད་ལས། གསང་སྔགས་རྡོ་རྗེའི་དམ་ལ་གནས། །དེ་ཡིས་སྨོན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་བསྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པར་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་སོ། །དེ་ཡང་དམ་ཚིག་རྣམ་པར་དག་ཅིང་། ལམ་རིམ་པ་གཉིས་ལ་འབད་པས་དབང་པོ་རྣོན་པོ་ཚེ་འདིར་མཆོག་གི་དངོས་གྲུབ་ཐོབ་པར་འགྱུར་ཏེ། རྡོ་རྗེ་གསང་བའི་རྒྱུད་ལས། བླ་མེད་སྔགས་ཀྱི་དངོས་གྲུབ་གང་། །ཤིན་ཏུ་བརྩོན་པས་གང་བསྒྲུབས་པ། །ཚེ་འདི་ཉིད་ལ་སངས་རྒྱས་ཏེ། །གདུལ་བྱའི་ཞིང་དུ་མཛད་པ་སྟོན། །གྲངས་མེད་རྡོ་རྗེ་འཆང་རྣམས་ཀྱི། །ཟབ་མོའི་ཉེ་ལམ་མཐར་ཐུག་པའོ། །ཞེས་སོ། དབང་པོ་འབྲིང་པོ་རྣམས་ནི། འཆི་ཁར་དོན་གྱི་འོད་གསལ་མངོན་དུ་བྱས་ནས་བར་དོར་ཟུང་འཇུག་གི་སྐུར་ལྡང་སྟེ། དེ་ཡང་རྟེན་གྱི་གང་ཟག་དེ་དཔེའི་འོད་གསལ་མངོན་དུ་གྱུར་པ་ཞིག་ཡིན་ན། དེ་འཆི་ཁའི་གཞི་དུས་ཀྱི་འོད་གསལ་དང་འཕྲད་པས་དོན་གྱི་འོད་གསལ་དུ་གྱུར་ནས་སློབ་པའི་ཟུང་འཇུག་གི་སྐུར་ལྡང་ལ། གལ་ཏེ་དོན་གྱི་འོད་གསལ་མངོན་དུ་གྱུར་པ་ཞིག་ཡིན་ན། དེ་གཞི་དུས་ཀྱི་འོད་གསལ་དང་འདྲེས་པས་ཡང་དག་པའི་མཐའ་མངོན་དུ་བྱས་ཏེ་མི་སློབ་པའི་ཟུང་འཇུག་གི་སྐུར་ལྡང་བའི་སྒོ་ནས་འཚང་རྒྱ་བ་ཡིན་ཞིང་། ཐ་མ་བར་དོ་ནས་རང་བཞིན་སྤྲུལ་སྐུའི་ཞིང་དུ་དབུགས་དབྱུང་སྟེ་གྲོལ་བར་འགྱུར་རོ། །གལ་ཏེ་ཚེ་འདིར་ལམ་རིམ་པ་གཉིས་ལ་འབད་པར་མ་བྱས་ཀྱང་དམ་ཚིག་མ་ཉམས་ན། སྐྱེ་བ་ཕྱི་མའམ། བདུན་ནམ་ཇི་ལྟར་འགོར་ནའང་སྐྱེ་བ་བཅུ་དྲུག་ལས་མི་འགྱངས་པར་འགྲུབ་སྟེ། རྒྱུད་གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་དང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ལ་ནི། །མ་བསྒོམས་པར་ཡང་དངོས་གྲུབ་ཐོབ། །གལ་ཏེ་དམ་ཚིག་སྡོམ་ལ་གནས། །སྐྱེ་འདིར་ལས་དབང་གིས་མ་གྲུབ། །སྐྱེ་བ་གཞན་དུ་དངོས་གྲུབ་ཐོབ། །ཅེས་དང་། པདྨ་བཛྲ་གྱི་དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ལ་འགྲུབ། །ཅེས་གསུངས་པ་ལྟར་རོ། །འོ་ན་བསྒྲུབ་བྱའི་དངོས་གྲུབ་དེ་གང་ཞེ་ན། འདི་ལ་གཉིས་ཏེ། ཐུན་མོང་དང་། མཆོག་གི་དངོས་གྲུབ་བོ། །དང་པོ་ལའང་ཆུང་འབྲིང་ཆེ་གསུམ་ལས། ཆུང་ངུ་ནི་ལས་ཆེན་བརྒྱད་དེ། དགྱེས་རྡོར་ལས། དབང་དང་། མངོན་སྤྱོད་དང་། དགྲའི་སྡེ་འཇིག་པ་དང་། བསྐྲད་པ་དང་། བསད་པ་དང་། དགུག་པ་དང་། ཞི་བ་དང་། རྒྱས་པ་ཡང་དག་པར་འགྲུབ་པར་འགྱུར་རོ། །ཞེས་སོ། །འབྲིང་ནི་གྲུབ་པ་བརྒྱད་དེ། གུར་ལས། གང་ཕྱིར་དེས་ནི་དཀའ་བ་མིན། །མིག་སྨན་དང་ནི་རྐང་མགྱོགས་དང་། །རལ་གྲི་དང་ནི་ས་འོག་གྲུབ། །རིལ་བུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །གང་ཕྱིར་དེས་ནི་རྡོ་རྗེ་འཛིན། །མཉེས་པར་བྱས་ལས་མྱུར་དུ་ཐོབ། །ཅེས་སོ། །ཆེན་པོ་ནི་དབང་ཕྱུག་གི་ཡོན་ཏན་བརྒྱད་དེ། ཇི་སྐད་དུ། གཟུགས་ཕྲ་རགས་པ་ཡང་བ་དང་། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བརྟན་པ། །དབང་ཕྱུག་ཉིད་དང་འདོད་དགུར་སྒྱུར། །ཞེས་སོ། །འདི་དག་ལ་ཐུན་མོང་གི་དངོས་གྲུབ་ཅེས་བྱ་སྟེ། འདུས་པ་ལས། མིག་སྨན་ལ་སོགས་དངོས་གྲུབ་རྣམས། །ཐ་མལ་པ་ཞེས་བཤད་པ་ཡིན། །ཞེས་པས་ཕྱི་རོལ་པ་ལའང་ཡོད་ཅིང་། བསྐྱེད་རིམ་ཁོ་ནས་ཀྱང་འཇིག་རྟེན་པའི་དངོས་གྲུབ་མཆོག་འོག་མིན་གྱི་སྲིད་པའི་མཐར་ཐུག་པའི་བར་ཐོབ་ནུས་པའི་ཕྱིར་རོ། །དེ་ཡང་སྔགས་སམ་ཏིང་ངེ་འཛིན་ཙམ་གྱི་མཐུས་ཆང་གི་རོ་སྒྱུར་བ་དང་དུག་ཞི་བ་ལ་སོགས་པའི་དྲོད་མ་ཐོབ་པ་དེ་སྲིད་དུ་ལས་དང་པོ་པ་ཞེས་བྱ་སྟེ། ལས་ཕྲན་ཚེགས་ཀྱི་སྒོ་ནས་ཇི་ལྟར་རིགས་པའི་གཞན་དོན་བྱེད་པ་ནི་ཡོད་དོ། །བསྐྱེད་རིམ་ལ་བརྟན་པ་ཅུང་ཟད་ཐོབ་ནས་སྔགས་ཀྱིས་རྫས་བྱིན་གྱིས་བརླབ་པར་ནུས་པའི་དྲོད་ཚད་རྙེད་པ་དེས་རལ་གྲི་སོགས་རྫས་ཀྱི་རིག་འཛིན་བསྒྲུབས་པས་གྲུབ་པ་ན། ལས་དེ་ཉིད་ཀྱིས་ལྷ་དང་མིའི་གནས་རྣམས་སུ་ལུས་མངོན་དུ་སྣང་བས་རྒྱུ་ཞིང་རིག་སྔགས་ཀྱིས་དོན་བྱེད་པ་དང་། བསྐྱེད་རིམ་བརྟན་པས་སྤྱོད་པའི་ཉེ་རྒྱུ་ལས་ཀྱི་ཕྱག་རྒྱ་ལ་བརྟེན་ནས་འདོད་པའི་ལྷ་དང་སྐལ་པ་མཉམ་པ་ཕྲ་ཡང་གི་ཡོན་ཏན་བརྒྱད་ལྡན་ཐོབ་པ་འདོད་པའི་རིག་པ་འཛིན་པ་དང་། ཡེ་རྒྱ་ལ་བརྟེན་ནས་དབང་པོ་རྣོ་རྟུལ་གྱིས་མིའི་རྟེན་རགས་པའམ་འདོད་པའི་རིག་འཛིན་གྱི་རྟེན་ལས་གཟུགས་ཀྱི་རིག་འཛིན་དུ་གནས་སྒྱུར་བར་བྱེད་ཅིང་། འདོད་པའི་རིག་འཛིན་ནི་མི་རྣམས་ཀྱི་ནང་དུ་འོང་ཡང་མི་མཐོང་ལ། གཟུགས་ཀྱི་རིག་འཛིན་ནི་འོང་བའང་མེད་མོད། འོན་ཀྱང་སྤྲུལ་པ་དུ་མས་སེམས་ཅན་གྱི་དོན་བྱེད་ཅིང་། རང་ཉིད་ཀྱང་རྟེན་དེས་རྫོགས་རིམ་ལ་ཞུགས་ནས་མཆོག་གི་དངོས་གྲུབ་འགྲུབ་པར་བྱེད་དོ། །དེས་ན་རྫོགས་རིམ་གྱི་རྟོགས་པ་སྐྱེས་རུང་མ་སྐྱེས་རུང་བསྐྱེད་རིམ་བརྟན་ན་ཚོགས་ལམ་བགྲོད་ཅིང་། བསྐྱེད་རིམ་མ་བསྒོམས་པར་རྫོགས་རིམ་གྱིས་ཚོགས་ལམ་དང་དྲོད་འབྲིང་ཙམ་བགྲོད་ནའང་། དྲོད་ཆེན་པོ་ཐོབ་པ་ལ་རིམ་གཉིས་ཟུང་འཇུག་ཏུ་བསྒོམ་པ་གཅེས་པ་ཡིན་ནོ་ཞེས་བཞེད་དོ། །གཉིས་པ་ནི་ཡིད་བཞིན་མཛོད་ལས། འཁོར་ལོ་བཞི་པོའི་རླུང་སེམས་ལས་རུང་ཚེ། །ལམ་བཞིའི་ཡོན་ཏན་རིམ་གྱིས་འཆར་བ་སྟེ། །དབུ་མའི་མདུད་པ་གཉིས་གཉིས་གྲོལ་བ་ལས། །ས་བཅུའི་ཡོན་ཏན་ནང་ནས་འཆར་བར་བཞེད། །ཅེས་ལྟེ་བ་སྤྲུལ་པའི་འཁོར་ལོ་ལ་སོགས་ཏེ་འཁོར་ལོ་བཞིའི་རླུང་སེམས་ལས་སུ་རུང་པ་ལས་ཚོགས་སྦྱོར་མཐོང་སྒོམ་གྱི་ལམ་བཞིའི་ཡོན་ཏན་འཆར་ཞིང་། དབུ་མ་ལ་རོ་རྐྱང་གི་མདུད་པ་ཉི་ཤུ་རྩ་གཅིག་ཡོད་པའི་གཉིས་གཉིས་གྲོལ་བ་ན་ས་བཅུ་པོ་རེ་རེའི་ཡོན་ཏན་འཆར་ལ། ཐ་མ་གྲོལ་བས་སངས་རྒྱས་ཀྱི་ས་འགྲུབ་པར་བཞེད། དུས་འཁོར་དུ་ལས་རླུང་བརྒྱ་ཕྲག་བཅོ་བརྒྱད་པ་རེ་རེ་འགགས་པ་ལས་མི་འགྱུར་བའི་སྐད་ཅིག་མ་དེ་སྙེད་རེ་མངོན་དུ་བྱེད་ལ། གང་གི་ཚེ་རླུང་ཉི་ཁྲི་ཆིག་སྟོང་དྲུག་བརྒྱ་འགགས་པས་རྩ་ཐམས་ཅད་གྲོལ་ནས་ཐིག་ལེ་རྣམ་པ་ཀུན་གྱི་མཆོག་དང་ལྡན་པ་ནམ་མཁའ་དང་མཉམ་པ་ན་ས་བཅུ་གཉིས་པའི་དབང་ཕྱུག་ཆེན་པོ་འགྱུར་པར་གསུངས། དེ་ལྟར་བཤད་པའི་ས་བཅུའི་རྣམ་བཞག་དེ་དག་མཁས་པ་ཕལ་ཆེར་འཕགས་པའི་ས་མཚན་ཉིད་པར་བཞེད་པ་དང་། ཡང་མཁས་མཆོག་འགའ་ཞིག །དབང་ཐོབ་པའི་བྱང་ཆུབ་སེམས་དཔའ་དང་སྐལ་པ་མཉམ་པའི་ཡེ་ཤེས་ཀྱི་སྐུ་འགྲུབ་པ་ལ། དེའི་སྔ་ལོགས་སུ་དུས་སྦྱོར་བཅུ་གཉིས་འགགས་ཟིན་པ་ཞིག་དགོས་པས་འཕགས་ལམ་གྱི་ས་བཅུ་མ་ཡིན་མོད། འོ་ན་གང་ཞེ་ན། མི་འགྱུར་བའི་ཡེ་ཤེས་ཀྱི་སྐད་ཅིག་མ་ཉི་ཁྲི་ཆིག་སྟོང་དྲུག་བརྒྱ་པོ་ཐམས་ཅད་རིམ་ལྔའི་རིམ་པ་བཞི་པའི་འོད་གསལ་དང་། སྦྱོར་དྲུག་གི་ཏིང་ངེ་འཛིན་གྱི་ས་ཞེས་བཤད་པ་དེ་ཉིད་ཡིན་ལ། དེ་ལས་འཕགས་ལམ་མངོན་དུ་བརྙེས་པ་ནི་ཟུང་འཇུག་གམ་ཡེ་ཤེས་ཀྱི་སྐུ་སྟེ། དེ་ལ་སངས་རྒྱས་ཞེས་བཏགས་པའོ་ཞེས་གསུངས་སོ། །གང་ལྟར་ཡང་ལམ་རིམ་པར་བགྲོད་ཚུལ་ནི། ཡེ་ཤེས་ཕེབས་པ་དང་། ཡེ་ཤེས་ལ་ཆེས་དབང་བ་དང་། དེ་ཉིད་སྤྱོད་པས་མཐར་ཕྱིན་ནས་ལྟ་སྟངས་རྣམས་ཐོགས་མེད་དུ་གྲུབ་ཅིང་ཆོས་རྒྱུན་གྱི་ཏིང་ངེ་འཛིན་ཐོབ་པས་སངས་རྒྱས་སྤྲུལ་པའི་སྐུ་ལས་མངོན་དུ་གདམས་ངག་ཉན་པ་རྙེད་དེ། དེ་དག་རིམ་པར་དྲན་པ་ཉེར་བཞག །ཡང་དག་སྤོང་བ། རྫུ་འཕྲུལ་རྐང་པ་ཅན་བཞིས་བསྡུས་པའི་ཚོགས་ལམ་ཆུང་འབྲིང་ཆེ་གསུམ་ཡིན་ལ། དེ་ནས་རྫོགས་རིམ་དངོས་ཀྱི་ཞི་བདེ་མཐར་ཐུག་པ་དབང་པོ་ལྔའི་རང་བཞིན་དྲོད་རྩེ་དང་སྟོབས་ལྔའི་རང་བཞིན་བཟོད་པ་ཆོས་མཆོག་སྟེ་སྦྱོར་ལམ་བཞི་ལས། ཕྱི་མ་གསུམ་དུ་དག་པའི་ཡེ་ཤེས་ཀྱི་སྐུ་མ་ཐོབ་ཀྱང་། ཉིན་མཚན་གྱི་སྣང་བ་དང་མཉམ་རྗེས་ཀུན་ཏུ་སྣང་སྟོང་སྒྱུ་མ་ལྟ་བུའི་ལྷ་སྐུ་ཁོར་ཡུག་ཏུ་འབྱུང་བས་སྒྱུ་ལུས་རླུང་སེམས་ཙམ་གྱི་སྐུ་མངོན་དུ་མཛད་པ་ཡིན་ཏེ། དེ་དག་ནི་མོས་པས་སྤྱོད་པའི་སའོ། །དེ་ནས་སྒྱུ་ལུས་རླུང་སེམས་ཀྱི་སྐུ་ཡང་སྤྱོད་པའི་ཉེ་རྒྱུ་ལ་བརྟེན་ནས་མཐོང་ལམ་གྱི་མངོན་བྱང་ལྔའི་འོད་གསལ་དུ་བཅུག་སྟེ། དོན་དམ་སོ་སོ་རང་རིག་བདེ་སྟོང་གི་འོད་གསལ་མངོན་སུམ་དུ་མཐོང་བ་ནི་དང་པོར་བྱང་ཆུབ་ཡན་ལག་མཐོང་བའི་ལམ་རབ་ཏུ་དགའ་བའི་ས་སྟེ། རྣམ་པ་དགའ་བའི་རང་བཞིན་བདེན་པ་བཅུ་དྲུག་གོ །འདི་ལ་སྒྱུ་འཕྲུལ་ཟུར་ལུགས་ཀྱི་བླ་མ་རྣམས་ཀྱི་བཤད་སྒྲོས་ལ། ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་འོད་གསལ་ཡེ་ཤེས་ཀྱི་མེས་སྦྱོང་བར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཇིག་མེད་པ་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་རྫོགས་པ་ཚེ་དབང་རིག་འཛིན་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་བཤད་པའི་ཕྱིར་ཞེས་གསུངས་ལ། ཀུན་མཁྱེན་ཆོས་ཀྱི་རྒྱལ་པོ་ནི། ལུས་ཐ་མལ་དང་སེམས་ལྷར་སྨིན་པ་རྣམ་སྨིན་རིག་འཛིན་ཚོགས་སྦྱོར་ལ་གནས་པ་སྟེ། དེས་ཆེ་མཆོག་མ་ཐོབ་པར་འདས་ན་བར་དོར་ཕྱག་རྒྱ་ཆེན་པོ་ཐོབ་སྟེ། ལུས་དོར་བ་དང་སེམས་ལྷ་སྐུར་སྨིན་ཟིན་པའི་ཕྱིར། གལ་ཏེ་རྟེན་དེས་ཆོས་མཆོག་ཐོབ་ན་ཚེ་དབང་རིག་འཛིན་ལ་དངོས་སུ་སྦྱོར་ཏེ། ལུས་ཆོས་མཆོག་གི་རྟེན་གང་ཡིན་པའི་རྣམ་པ་དེ་ཉིད་དྭངས་མའི་ལུས་རྡོ་རྗེའི་སྐུར་འགྱུར་ཅིང་སེམས་མཐོང་ལམ་སྐྱེས་པའོ་ཞེས་གསུངས་སོ། །དེ་ལ་རང་གི་ཡི་གེ་སྔ་མ་རྣམས་སུ་ལམ་རིམ་ཆེ་ཆུང་གི་དངོས་བསྟན་དང་སྦྱར་ནས་ཟུར་ལུགས་ལྟར་བཀོད་པ་ཡིན་ཏེ། དེའི་བཀའ་སྲོལ་འཆད་པའི་ཚེ་དེའི་ལུགས་སུ་འཆད་དགོས་པའི་ཕྱིར་རོ། །འོན་ཀྱང་མདོ་སྔགས་སྤྱི་གཞུང་གི་བཤད་སྒྲོས་དང་བསྟུན་ན་ལུགས་ཕྱི་མ་འདི་ཉིད་འཆད་བདེ་བར་སྣང་ངོ་། །དེ་ནས་མཐོང་ལམ་འོད་གསལ་དེ་ལས་ལངས་པའི་ཟུང་འཇུག་ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་གྱིས་བསྡུས་པ་སློབ་པའི་ཟུང་འཇུག་རྣམ་པ་དགུ་ནི་དྲི་མ་མེད་པ་སོགས་ས་ལྷག་མ་དགུ་སྟེ་སྒོམ་པའི་ལམ་མོ། །དེ་ལྟར་ཡང་ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་མངོན་དུ་གྱུར་པའི་ལྷ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་པས་ས་གཉིས་པ་ནས་ལྔ་པའི་བར་བཞི་ལ་རྡོ་རྗེའི་རིག་འཛིན་ཞེས་བྱ་སྟེ། རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་འཇོམས་པའི་ཕྱིར་རོ། །ས་དྲུག་པར་ཤེར་ཕྱིན་གཙོ་བོར་སྤྱོད་ཅིང་ཆོས་འཁོར་བསྐོར་བའི་ཕྱིར་དང་། ས་བདུན་པའང་ཐབས་མཁས་པ་འཁོར་ལོ་ལྟར་གྱུར་པས་ས་དེ་གཉིས་སུ་འཁོར་ལོའི་རིག་འཛིན་ཞེས་བྱའོ། །བརྒྱད་པར་མི་རྟོག་པའི་ཡེ་ཤེས་ལ་དབང་ཐོབ་པས་རིན་པོ་ཆེའི་རིག་འཛིན་དང་། དགུ་པར་ཆགས་པ་མེད་པའི་ཞིང་སྦྱོང་ཞིང་དོན་མཛད་པས་པདྨའི་རིག་འཛིན་དང་། བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་བྱེད་པའི་ཕྱིར་རལ་གྲིའི་རིག་འཛིན་ནོ། །དེ་ཡང་ས་བཅུ་ཙམ་སྒོམ་ལམ་ཕྱག་རྒྱའི་རིག་འཛིན་དུ་བསྡུས་ནས། རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང་། ཁྱད་པར་ལམ་ནི་མཐར་ལམ་ལྷུན་གྲུབ་རིག་འཛིན་ཏེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །དེ་ལྟར་སྒོམ་ལམ་རྒྱུན་མཐའ་དང་བཅས་པ་འཕགས་ལམ་ཡན་ལག་བརྒྱད་ཀྱི་རང་བཞིན་ཡིན་ལ། ས་བཅུ་པོ་དེ་རྣམས་སུ་ཕ་རོལ་ཏུ་ཕྱིན་པ་བཅུ་ལ་སྤྱོད་པ་དང་། ཡོན་ཏན་བརྒྱ་ཕྲག་བཅུ་གཉིས་ལ་སོགས་པ་ནི་མདོ་སྡེ་བཞིན་དུ་ཤེས་པར་བྱའོ། །དེ་ལ་ས་བཅུ་རྒྱུན་མཐའི་སྔ་ལོགས་ཀྱི་བར་དུའང་བེམ་ཆོས་ལས་འདས་པའི་དཀར་དམར་རླུང་གསུམ་དང་། དེ་གསུམ་ཆ་མཉམ་དུ་འདྲེས་པའི་ཡིད་དང་བཅས་ཤེས་པ་ཙམ་དུ་རིག་པ་ཡོད་པའི་ཕྱིར་ན་གཉིས་སྣང་མ་འགགས་པས། དེ་སྦྱོང་བྱེད་ས་བཅུ་རྒྱུན་མཐར་འདོད་ཆགས་ཆེན་པོའི་ལམ་གྱི་འབྲས་བུའི་དབང་བསྐུར་ཏེ། དབང་གསུམ་པ་དང་བཞི་པའི་རྗེས་ཆགས་ལས་མཐར་ཐུག་འབྲས་བུའི་མངོན་བྱང་ལྔས་ཁུ་རྡུལ་རླུང་གསུམ་འགགས་པ་ན་འགྱུར་བདེ་མྱོང་བའི་ཤེས་རིག་ཀྱང་རྒྱུན་ཆད་དེ། སྐུ་བཞི་ཡེ་ཤེས་ལྔའི་བདག་ཉིད་མི་སློབ་པའི་ཟུང་འཇུག་མངོན་དུ་བརྙེས་པའོ། །དེ་ལྟར་ཟུང་འཇུག་གི་སྐུ་ཉིད་ལ་ལྡོག་ཆས་ཕྱེ་ན་ཁ་སྦྱོར་ཡན་ལག་བདུན་ལྡན་ཏེ། ཟུང་འཇུག་སྒྲུབ་པ་ཐམས་ཅད་དང་བྲལ་བ་ཡང་དག་པར་རྫོགས་པའི་སངས་རྒྱས་དེའི་གསུང་རྣམ་པ་ཐམས་ཅད་པ་ནི་ལོངས་སྤྱོད་རྫོགས་པ་དང་། སྐུ་རྣམ་པ་ཐམས་ཅད་པ་ཤེས་བྱའི་སྣང་བརྙན་ཡོད་དགུར་འཆར་བ་ནི་ཁ་སྦྱོར་དང་། བདེ་ཆེན་ནི་གཟུང་འཛིན་གྱི་རྟོག་པ་མེད་པའི་ཟག་མེད་མི་འགྱུར་བའི་བདེ་ཆེན་ལ་རོལ་པ་དང་། རང་བཞིན་མེད་པ་ནི་མེད་དགག་གི་མཚན་ཉིད་ཅན་གྱི་དཔྱད་མཐའ་ལས་རྣམ་པར་གྲོལ་བའི་རང་བཞིན་ལྷན་ཅིག་སྐྱེས་པ་སོ་སོ་རང་རིག་པའི་མཚན་ཉིད་ཅན་དང་། སྙིང་རྗེས་ཡོངས་གང་ནི་ཡིད་བཞིན་གྱི་ནོར་བུ་ལྟར་གཞན་གྱི་དོན་འབད་མེད་ལྷུན་གྲུབ་ཏུ་འབྱུང་བ་དམིགས་པ་མེད་པའི་ཐུགས་རྗེ་དང་། རྒྱུན་མི་ཆད་པ་ནི་ཐུགས་རྗེ་ཆེན་པོ་དེ་ཉིད་ནམ་དུའང་རྒྱུན་ཆད་པ་མེད་པར་འཇུག་པས་རྟག་པ་དང་། འགོག་པ་མེད་པ་ནི་སེམས་ཅན་སོ་སོའི་མོས་པ་དང་དབང་པོ་ཇི་ལྟ་བ་བཞིན་དུ་གཟུགས་སྐུའི་སྣང་བརྙན་དང་ཆོས་ཀྱི་སྒོ་མཐའ་ཡས་པ་འགོག་པ་མེད་པར་འཆར་བའོ། །དེ་ཡང་དང་པོ་བཞིས་རང་དོན་ཕུན་ཚོགས་དང་། ཕྱི་མ་གསུམ་གྱིས་གཞན་དོན་ཕུན་ཚོགས་རྫོགས་པར་བསྟན་པས་ན་དོན་གཉིས་མ་བཙལ་བར་ལྷུན་གྱིས་གྲུབ་པའི་ཕྱིར། བླ་ན་མེད་པ་མཆོག་གི་འབྲས་བུ་མཐར་ཕྱིན་པར་གྱུར་པ་སྟེ། སྙིང་པོའི་ཁོག་གཞུང་གསལ་སྒྲོན་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་གསུངས་པའི་ཕྱིར། དེ་ལ་དབྱེ་ན། རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་ཀྱི་རྣམ་བཞག་རྒྱས་པར་བཤད་དུ་ཡོད་ཀྱང་། མདོ་ཙམ་ལེའུ་དང་པོར་བཤད་ཟིན་པས་འདིར་ཟློས་ཏེ་མ་བརྗོད་དོ། །
དེ་ལྟར་བཤད་ནས་ལེའུའི་སྐབས་བསྡུ་བ་ནི། གསང་སྔགས་རིག་འཛིན་སྡོམ་པའི་རིམ་པར་ཕྱེ་བ་སྟེ་བཞི་པའོ། །ཞེས་པ་སྟེ། བསྟན་བཅོས་འདི་ལ་ལེའུ་ལྔ་ལས། རྡོ་རྗེ་ཐེག་པ་ཐུན་མོང་མ་ཡིན་པའི་བསྟན་པའི་ཉམས་ལེན་གསང་སྔགས་རིག་པ་འཛིན་པའི་སྡོམ་པའི་དོན་རྣམ་པར་བཞག་པ་བསླབ་བྱ་དང་བཅས་པ་བཤད་པའི་རིམ་པར་ཕྱེ་བ་སྟེ་ལེའུ་བཞི་པའི་འགྲེལ་པའོ། །འདིར་སྨྲས་པ། ལེགས་གསུང་རྒྱུད་སྡེའི་དགོངས་དོན་ཇི་ལྟ་བར། །ལེགས་ལམ་གསལ་བར་སྟོན་པའི་གཞུང་བཟང་གང་། །ལེགས་པར་ཕྱེ་བའི་རྣམ་འགྲེལ་ཆུ་འཛིན་ལས། །ལེགས་བཤད་བདུད་རྩིའི་ཆར་རྒྱུན་ཅི་ཡང་འབབ། །རྒྱུད་ལུང་མན་ངག་ཆུ་གཏེར་སྲུབ་ལས་ཐོན། །དབང་བཞིའི་དཀྱིལ་འཁོར་རིམ་གཉིས་འོད་སྟོང་ཅན། །ཆོས་དབྱིངས་ཡངས་པའི་མཁའ་ལ་རྟག་འཆར་བས། །ལྷན་སྐྱེས་བདེ་ཆེན་སྣང་བའི་དཔལ་འབར་ཤོག། །།