ལེའུ་གསུམ་པ་བྱང་སེམས།

༈ ན་མཿསརྦ་བུདྡྷ་བོ་དྷི་ས་ཏྭ་བྷྱཿ སྲས་བཅས་ཕྱོགས་བཅུའི་རྒྱལ་བ་མ་ལུས་ཀུན། །སྟོང་ཉིད་སྙིང་རྗེ་ཟུང་འཇུག་སེམས་ལས་འཁྲུངས། །དེ་ཕྱིར་བྱང་ཆུབ་སེམས་དང་དེ་སྟོན་པའི། །ལམ་མཁན་དགེ་བའི་བཤེས་ལ་ཕྱག་བགྱིའོ། །རྟག་ཆད་མཐར་འཛིན་གཅོང་རོང་མ་འགྲིམས་པར། །ལུང་རིགས་དབུ་མའི་འཇུག་ངོགས་བདེ་བ་ལས། །ལེགས་བཤད་ལྷུང་ལྷུང་འབབ་པ་བདུད་རྩིའི་རྒྱུན། །སྐལ་བཟང་འཆི་བ་མེད་པའི་དགའ་སྟོན་བྱ། །

གཉིས་པ་བྱང་སེམས་ཀྱི་སྡོམ་པ་བཤད་པ་ལ་གསུམ་སྟེ། སྟོན་པས་ཕ་རོལ་ཏུ་ཕྱིན་པའི་སྡེ་སྣོད་ཇི་ལྟར་གསུངས་ཚུལ། དེ་བསྡུས་ནས་བཤད་སྒྲུབ་ཀྱིས་ཇི་ལྟར་བཟུང་ཚུལ། དེ་ལྟར་བཟུང་བའི་བརྗོད་བྱ་གཏན་ལ་དབབ་པའོ། །དང་པོ་ནི། བསྐལ་བཟང་འགྲོ་བའི་འདྲེན་པ་ཐུབ་ཆེན་དེས། །བྱ་རྒོད་ཕུང་སོགས་ཐེག་ཆེན་རིགས་ཅན་ལ། །ཤིན་ཏུ་རྒྱས་པའི་སྡེ་སྣོད་དཔག་ཡས་གསུངས། །ཞེས་པ་སྟེ། སྟོན་པ་འདི་སྔོན་བསྐལ་པ་གྲངས་མེད་བསམ་གྱིས་མི་ཁྱབ་པའི་སྔ་རོལ་དུ་སངས་རྒྱས་སུ་ཟིན་ཀྱང་བསྐལ་པ་བཟང་པོ་འདི་ལ་ཞིང་འདིའི་འགྲོ་བ་རྣམས་སྡུག་བསྔལ་ལས་འདྲེན་པའི་ཆེད་དུ། སླར་ཡང་མཛད་པ་བཅུ་གཉིས་ཀྱི་སྒོ་ནས་བླ་ན་མེད་པའི་བྱང་ཆུབ་ཆེན་པོ་བརྙེས་པའི་ཚུལ་བསྟན་ཏེ། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ཞེས་པ་ནས། ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་པའི་བར་གསུངས་པའི་ཕྱིར། དེ་ལྟར་སངས་རྒྱས་ནས་ཆོས་ཀྱི་འཁོར་ལོ་རིམ་པ་གསུམ་གདུལ་བྱའི་བློ་ལ་ལྟོས་ཏེ་དུས་རིམ་གྱིས་སམ་ཅིག་ཅར་དུ་སྣང་བར་མཛད་དེ། མདོ་སྡེ་ཡོན་ཏན་བཀོད་པའི་རྒྱལ་པོ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བརྡལ་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་ཅན་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམ་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་སོ། །ཁྱད་པར་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའི་སྡེ་སྣོད་ཇི་ལྟར་གསུངས་པའི་ཚུལ་ནི། སྟོན་པ་ཐུབ་པ་ཆེན་པོས་འཁོར་སྤྱིར་ཐེག་པ་ཆེན་པོའི་རིགས་ཅན་དུ་གྱུར་པ། བྱེ་བྲག་འཁོར་རྣམ་པ་བཞི་དང་། ལྷ་དང་ཀླུ་དང་ལྷ་མ་ཡིན་དང་དྲི་ཟ་སོགས་ཐུན་མོང་བའི་འཁོར་དང་ཐུན་མོང་མ་ཡིན་པའི་འཁོར་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་དཔག་ཏུ་མེད་པ་ལ། གནས་བྱ་རྒོད་ཕུང་རིར་ལྷག་པ་སེམས་ཀྱི་བསླབ་པ་གཙོ་བོར་སྟོན་པ་ལས་བརྩམས་ཏེ། མདོ་སྡེའི་འདུལ་བ་བྱང་སེམས་ཀྱི་སྡོམ་པའི་མཚམས་རྣམ་པར་བཞག་པ་དང་། མདོ་སྡེའི་མདོ་སྡེ་ཏིང་ངེ་འཛིན་ཟབ་ཅིང་རྒྱ་ཆེ་བ་དང་། མདོ་སྡེའི་མངོན་པ་ས་ལམ་དང་གཟུངས་ཏིང་གི་རབ་དབྱེ་ཇི་སྙེད་པ་རྣམས་སྟོན་པ་བཀའ་བར་པ་མཚན་ཉིད་མེད་པའི་ཆོས་ཀྱི་རྣམ་གྲངས་དང་། ཡང་གནས་གཅིག་ཏུ་མ་ངེས་པར་ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པ་མངོན་པའི་ནང་ཚན་གྱི་སྡེ་སྣོད་གསུམ་སྟེ། ཚེགས་ཆུང་ཞིང་ཐབས་སླ་བས་ཉོན་མོངས་པ་འདུལ་བའི་ཐབས་སྟོན་པ་མངོན་པའི་འདུལ་བ་དང་། དེ་ཁོ་ན་ཉིད་ཟབ་མོའི་དོན་ལ་འཇུག་པའི་ཚུལ་སྟོན་པ་མངོན་པའི་མདོ་སྡེ་དང་། རྒྱ་ཆེ་བ་ཕུང་ཁམས་སྐྱེ་མཆེད་སོགས་དང་ཁྱད་པར་དེ་བཞིན་གཤེགས་པའི་སྙིང་པོའི་ཁམས་གཏན་ལ་འབེབས་པ་མངོན་པའི་མངོན་པ་སྟེ། བཀའ་ཐ་མ་ངེས་པ་དོན་གྱི་རྣམ་གྲངས་སྟོན་པ་ལེགས་པ་རྣམ་པར་ཕྱེ་བའི་ཆོས་འཁོར་ཏེ། དེ་ཡང་འཁོར་ལོ་གསུམ་གྱི་དང་པོར་ཀུན་རྫོབ་ཀྱི་བདེན་པ་གཙོ་བོར་བསྟན་པས་དྲང་དོན་ཡིན་པར་ཐམས་ཅད་མཐུན་ལ། བར་ཐ་གཉིས་དྲང་ངེས་གང་ཡིན་ལ་བཞེད་པ་མི་མཐུན་པ་མང་ཡང་། བར་པ་ངེས་དོན་དང་ཕྱི་མ་དྲང་དོན་དུ་གསལ་བར་སྟོན་པའི་མདོ་སྡེའི་ལུང་མེད་ཅིང་། ནད་པའི་སྨན་དང་ཡི་གེ་སློབ་པའི་དཔེའི་དགོངས་དོན་དང་ཡང་འགལ་བས། རང་ལུགས་ནི་བར་པ་དྲང་ངེས་ཕྱེད་མའམ་གནས་སྐབས་པའི་ངེས་དོན་དང་། ཐ་མ་ཉིད་ངེས་དོན་དུ་འདོད་དེ། མདོ་སྡེ་དགོངས་པ་ངེས་འགྲེལ་དང་མྱང་འདས་ཆེན་པོ་དང་། སོར་ཕྲེང་གི་མདོ་སོགས་ལས་གསལ་བར་བཤད་པའི་ཕྱིར། དེ་ལྟར་ཡང་དགོངས་པ་ངེས་འགྲེལ་དུ། འཁོར་ལོ་བསྐོར་བ་དེ་ཡང་། བླ་ན་མཆིས་པ། སྐབས་མཆིས་པ། དྲང་བའི་དོན། རྩོད་པའི་གཞིའི་གནས་སུ་གྱུར་པ། ཞེས་འཁོར་ལོ་དང་པོ་གཉིས་ཀྱི་སྐབས་སུ་གསུངས་ཤིང་། ཐ་མའི་སྐབས་སུ། ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ། འཁོར་ལོ་བསྐོར་བ་འདི་ནི། བླ་ན་མ་མཆིས་པ། སྐབས་མ་མཆིས་པ། ངེས་པའི་དོན་ལགས་ཏེ། རྩོད་པའི་གཞིའི་གནས་སུ་གྱུར་པ་མ་ལགས་སོ། །ཞེས་དང་། མྱང་འདས་དང་གཟུངས་དབང་གིས་ཞུས་མདོར། འོ་མའི་སྨན་གྱི་དཔེ་དང་། ནོར་བུ་སྦྱོང་བའི་དཔེ་སོགས་ཀྱིས་གང་ཟག་བཀྲི་ཚུལ་གྱི་རིམ་པ་དང་སྦྱར་ནས་གསུངས་པའི་ཕྱིར་རོ། །

གཉིས་པ་ནི། འཇམ་དབྱངས་བཀའ་བསྡུས་ཀླུ་སྒྲུབ་སོགས་ཀྱིས་བཀྲལ། །ཞི་བ་ལྷས་སྤེལ་ཟབ་མོ་ལྟ་བའི་ལུགས། །བྱམས་པས་བཀའ་བསྡུས་ཐོགས་མེད་སྐུ་མཆེད་བཀྲལ། །ཇོ་བོ་རྗེས་སྤེལ་རྒྱ་ཆེན་སྤྱོད་པའི་སྲོལ། །པདྨའི་རིང་ལུགས་ནཱ་གརྫུ་ན་མཐུན། །ཞེས་པ་སྟེ། སྤྱིར་བཀའ་བསྡུ་ལ་ཐུན་མོང་བ་ནི་བཀའ་བསྡུ་རིམ་པ་གསུམ་སྔར་བཤད་ལྟར་ཡིན་ལ། ཐེག་ཆེན་ཐུན་མོང་མ་ཡིན་པ་ལྟར་ན། རྟོག་གེ་འབར་བ་ལས། ཐེག་པ་ཆེན་པོ་སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པ་པོ་ཀུན་ཏུ་བཟང་པོ་དང་། འཇམ་དཔལ་དང་། གསང་བའི་བདག་པོ་དང་། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །ཞེས་པ་ལྟར་རྒྱལ་པོའི་ཁབ་ཀྱི་ལྷོ་ཕྱོགས་བི་མ་སཾ་བྷ་བའི་རི་ལ་རྒྱལ་སྲས་འབུམ་ཕྲག་བཅུ་འདུས་ཏེ། བྱམས་པ་འཇམ་དབྱངས་གསང་བདག་གསུམ་གྱིས་སྡེ་སྣོད་གསུམ་བསྡུས་པར་བཤད་དོ། །འདིར་ཁྱད་པར་བ་ཤིང་རྟ་ཆེན་པོའི་སྲོལ་གཉིས་ཀྱི་དབང་དུ་བྱས་ན། ཐེག་པ་ཆེན་པོའི་སྡེ་སྣོད་རྣམས་ལས། ཟབ་མོ་ལྟ་བའི་ཕྱོགས་རྣམས་རྗེ་བཙུན་འཇམ་དབྱངས་དང་། རྒྱ་ཆེན་སྤྱོད་པའི་ཕྱོགས་རྣམས་རྒྱལ་ཚབ་བྱམས་པ་མགོན་པོས་བཀའ་བསྡུས་ཏེ། དེ་དང་དེས་རྗེས་སུ་བཟུང་བའི་ཐེག་པ་ཆེན་པོའི་སློབ་དཔོན་ནི་མགོན་པོ་ཀླུ་སྒྲུབ་དང་། འཕགས་པ་ཐོགས་མེད་གཉིས་ཡིན་ཞིང་། དེ་གཉིས་ཀའང་དབུ་མ་ཆེན་པོ་ངེས་དོན་འཆད་པ་ལ་འཁྲུལ་མེད་ཉིད་དུ་རྒྱལ་བས་ལུང་བསྟན་པ་ཡིན་ཏེ། ཇི་སྐད་དུ། དགེ་སློང་དཔལ་ལྡན་ཞེས་གྲགས་པ། །དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་བྱེད། །ང་ཡི་ཐེག་པ་འཇིག་རྟེན་ཏུ། །བླ་མེད་ཐེག་པ་རབ་བསྒྲུབས་ནས། །ཞེས་དང་། ཐོགས་མེད་ཅེས་བྱའི་དགེ་སློང་ནི། །བསྟན་བཅོས་དེ་ཡི་དོན་ལ་མཁས། །མདོ་སྡེ་དྲང་དོན་ངེས་པའི་དོན། །རྣམ་པ་མང་པོ་རབ་ཏུ་འབྱེད། །ཅེས་གསུངས་སོ། །གང་དག་བྱམས་མགོན་གྱིས་གཞན་སྟོང་གི་སྲོལ་ཕྱེ་བ་བཞིན་དུ་འཇམ་དབྱངས་ཀྱིས་རང་སྟོང་སྲོལ་འབྱེད་ཀྱི་བསྟན་བཅོས་མཛད་དོ་ཞེས་སྨྲ་བ་ནི་མི་འཐད་དེ། དེས་རང་སྟོང་སྟོན་བྱེད་ཀྱི་བསྟན་བཅོས་མཛད་པ་མི་སྣང་ཞིང་། འཇམ་དཔལ་ཞལ་ལུང་དང་ལྟ་འདོད་མདོར་བསྟན་ལས་ནི་གཞན་སྟོང་གི་ཚུལ་གསལ་བའི་ཕྱིར་རོ། །དེས་ན་ཤིང་རྟའི་སྲོལ་འབྱེད་པ་པོ་ནི། བྱམས་མགོན་དང་སློབ་དཔོན་ཀླུ་སྒྲུབ་གཉིས་ཏེ། དགོངས་འགྲེལ་མཛད་པ་པོ་གཞན་དག་འདི་གཉིས་ཀྱི་བསྟན་བཅོས་ལ་བརྟེན་ནས་འཇུག་པའི་ཕྱིར། དེ་ཡང་ཀླུ་སྒྲུབ་ཞབས་ཀྱིས་འཁོར་ལོ་བར་པའི་དགོངས་འགྲེལ་དུ་ཆོས་ཐམས་ཅད་རང་སྟོང་དུ་གཏན་ལ་འབེབས་བྱེད་དབུ་མ་རིགས་ཚོགས་དང་། འཁོར་ལོ་ཐ་མའི་དགོངས་འགྲེལ་གཞན་སྟོང་དུ་གཏན་ལ་འབེབས་བྱེད་བསྟོད་ཚོགས་སོགས་ཀྱིས་བཀའི་དགོངས་པ་ལེགས་པར་བཀྲལ་ཞིང་། དེ་དང་དེའི་སྲོལ་འཛིན་རིམ་བཞིན་ངོ་བོ་ཉིད་མེད་པར་སྨྲ་བའི་ཐལ་རང་གི་སློབ་དཔོན་རྣམས་དང་། འཇིགས་མེད་ཆོས་སྐྱོང་ཞབས་ཡིན་ལ། སེམས་བསྐྱེད་ཀྱི་ཕྱག་བཞེས་ནི་ཞི་བ་ལྷ་དང་ཛེ་ཏཱ་རི་སོགས་ཀྱིས་རྒྱ་ཆེར་སྤེལ་ལོ། །ཡང་སྲོལ་འབྱེད་གཉིས་པ་ནི། རྒྱལ་ཚབ་མི་ཕམ་མགོན་གྱིས་གཞན་སྟོང་དུ་གཏན་ལ་འབེབས་པའི་བསྟན་བཅོས་བྱམས་ཆོས་སྡེ་ལྔ་མཛད་དེ་འཕགས་པ་ཐོགས་མེད་ལ་བསྟན་པ། སྐུ་མཆེད་གཉིས་ཀྱིས་ལེགས་པར་བཀྲལ་བའི་སྲོལ་དེ་ཉིད་ཕྱོགས་གླང་ཆོས་གྲགས་དང་ཙནྡྲ་གོ་མི་ལ་སོགས་པས་བཟུང་ཞིང་། སེམས་བསྐྱེད་ཀྱི་ཕྱག་བཞེས་དེ་བོད་ཡུལ་འདིར་ཇོ་བོ་ཨ་ཏི་ཤས་སྤེལ་བར་མཛད་དོ། །རིན་ཆེན་འབྱུང་གནས་ཞི་བའི་ཞབས་ཀྱིས་ནི་ཀླུ་སྒྲུབ་དང་ཐོགས་མེད་རྣམ་གཉིས་གྲུབ་མཐའ་གཅིག་པར་བཀྲལ་ཏེ། དེས་མཛད་པའི་དབུ་མ་རྒྱན་ལས། བྱམས་པ་ཐོགས་མེད་ཀྱིས་གསུངས་ཤིང་། །ཀླུ་སྒྲུབ་ཀྱང་ནི་བཞེད་པ་ཡི། །ཚད་མ་ལུང་དང་ལྡན་གྱུར་པའི། །བདེན་པ་གཉིས་པོ་འདིར་བཤད་བྱ། །ཞེས་འབྱུང་ཞིང་། ཞི་བ་འཚོ་ལ་སོགས་པ་རྣམས་ཀྱང་འདི་དང་དགོངས་པ་ཕྱོགས་མཐུན་པར་སྣང་ངོ་། །དེ་ལྟར་ལུགས་སྲོལ་གཉིས་ཀྱི་སེམས་བསྐྱེད་ཀྱི་ཆོ་ག་ལ། མཁས་མཆོག་སྔ་མ་རྣམས་དབུ་སེམས་ཀྱི་ལུགས་སོ་སོར་བཞེད་ཅིང་། དེ་གཉིས་ལྟ་བ་ཐ་དད་པའི་བྱེ་བྲག་གིས་སྡོམ་པ་ལེན་པའི་སྣོད་ལ་རྒྱ་ཆེ་ཆུང་གི་རྣམ་བཞག་སོགས་ཁྱད་པར་དུ་མ་ཡོད་པར་གསུངས་ཏེ། རབ་དབྱེ་ལས། ཐེག་པ་ཆེན་པོའི་སེམས་བསྐྱེད་ལ། །དབུ་མ་སེམས་ཙམ་རྣམ་པ་གཉིས། །དེ་གཉིས་ལྟ་བ་ཐ་དད་པས། །ཆོ་ག་ཡང་ནི་ཐ་དད་ཡིན། །ཞེས་གསུངས་པའི་ཕྱིར། དེ་ལྟར་ན་འདིར་ཐོགས་མེད་སྐུ་མཆེད་དབུ་མ་པར་བཤད་ནས། དེའི་ཕྱག་ལེན་བྱང་སར་གསུངས་པའི་སེམས་བསྐྱེད་ཀྱི་ཆོ་ག་སེམས་ཙམ་པའི་ལུགས་སུ་འདོད་པ་མི་འགལ་ལམ་སྙམ་ན། དབུ་མ་པའི་གང་ཟག་གིས་གྲུབ་མཐའ་འོག་མའི་ཆོ་གས་གདུལ་བྱ་རྗེས་སུ་འཛིན་པའི་ཕྱག་བཞེས་མཛད་པ་ལ་འགལ་བ་མེད་དེ། ཅིའི་ཕྱིར་ན། ཐེག་ཆེན་གྱི་གང་ཟག་གིས་ཉན་ཐོས་དང་ཐུན་མོང་པའི་ཆོ་གས་དགེ་སློང་གི་སྡོམ་པ་འབོགས་པ་དང་། གསང་སྔགས་བླ་མེད་ཀྱི་རྣལ་འབྱོར་པས་བྱ་སྤྱོད་ཀྱི་ཆོ་གའི་སྒོ་ནས་གཞན་རྗེས་སུ་འཛིན་པ་ཡོད་པའི་ཕྱིར་དང་། གཞན་དུ་ན་སྟོན་པ་དང་རྒྱལ་ཚབ་བྱམས་མགོན་ཡང་སེམས་ཙམ་པར་ཐལ་བ་བཟློག་ཏུ་མེད་དོ། །འོན་ཀྱང་འདིར་ནི་དེ་འདྲའི་འགལ་སྤོང་སྨྲ་མི་དགོས་ཏེ། གཞུང་འདིར་སྲོལ་གཉིས་ཀྱི་སེམས་བསྐྱེད་ལ་དབུ་སེམས་ཀྱི་ཐ་སྙད་མ་མཛད་པའི་རྒྱུ་མཚན་གྱིས་སོ། །དེ་ཡང་སྤྱིར་གསང་སྔགས་ཀྱི་རྒྱུད་སྡེ་རྣམས་ལས་གསུངས་པའི་བྱང་སྡོམ་ཐོབ་ཚུལ་དང་། དེའི་བསླབ་བྱའི་རྐང་གྲངས་ཀྱང་ཕལ་ཆེར་ཀླུ་སྒྲུབ་ཀྱི་ལུགས་དང་མཐུན་པར་འབྱུང་བའི་གནད་ཀྱིས་རང་ཅག་སློབ་དཔོན་ཆེན་པོ་པདྨ་སཾ་བྷ་ཝའི་རྗེས་སུ་འཇུག་པ་སྔ་འགྱུར་གྱི་རིང་ལུགས་པ་རྣམས་ཀྱི་སེམས་བསྐྱེད་ཀྱི་ཆོ་གའི་ཕྱག་བཞེས་ཀྱང་ནཱ་གརྫུ་ན་དང་མཐུན་པར་སྣང་མོད། འོན་ཀྱང་ལྟ་བ་ནི་དེར་མ་ངེས་ཏེ། ཀླུ་སྒྲུབ་ཀྱི་བསྟོད་ཚོགས་དང་མི་འགལ་ཡང་གཙོ་བོར་ཐོགས་མེད་སྐུ་མཆེད་ཀྱིས་ཇི་ལྟར་བཀྲལ་བ་དང་མཐུན་ཏེ། རྣམ་གྲངས་མ་ཡིན་པའི་དོན་དམ་མེད་དགག་ལ་མི་བྱེད་པར་མ་ཡིན་དགག་གི་སྟོང་ཉིད་ལ་བྱེད་པའི་ཕྱིར་དང་། འཁོར་ལོ་ཐ་མ་ངེས་དོན་དུ་བཞེད་པའི་ཕྱིར་རོ། །འདིར་རང་གི་སྐལ་བས་ཇི་ལྟར་ཐོབ་པའི་སེམས་བསྐྱེད་སྡོམ་རྒྱུན་ཀུན་མཁྱེན་ཆེན་པོ་ལས་བརྒྱུད་པ་ལ་གསུམ་སྟེ། དང་པོ་སྟོན་པ་སངས་རྒྱས། རྒྱལ་སྲས་འཇམ་དཔལ། མགོན་པོ་ཀླུ་སྒྲུབ། ཟླ་བ་གྲགས་པ། རིག་པའི་ཁུ་བྱུག །ཀུ་སཱ་ལ་ཆེ་ཆུང་། བལ་ཡུལ་གྱི་སྠཾ་བི་ཧ་རར་བཞུགས་པའི་ཇོ་བོ་ཐང་པ་ཛ་སྟེ་མཚན་དངོས་ཛྙཱ་ནཱ་ཀཱ་ར། བྱང་སེམས་ཟླ་རྒྱལ། གྲོ་ལུང་པ། སྤྱི་བོ་ལྷས་པ། རྨ་ཤཱཀྱ་སེང་གེ །མཆིམས་ནམ་མཁའ་གྲགས། སྨོན་ལམ་ཚུལ་ཁྲིམས། བྱང་ཆུབ་གྲུབ། གཞོན་ནུ་རྡོ་རྗེ། དེས་ཀུན་མཁྱེན་དྲི་མེད་འོད་ཟེར་ལའོ། །འདིར་ཇོ་བོ་ཐང་པ་ཛ་ལ་ཡིག་སྐྱོན་གྱིས། ཇོ་བོ་རྗེ། བལ་པོ་ཐང་པ་ཛ། ཨ་བྷ་ཡ་ཀཱ་ར་ཞེས་བླ་མ་གསུམ་དུ་འཁྲུལ་བ་དང་། མཆིམས་ཀྱི་ཡིག་རྙིང་ལས། གྲོ་ལུང་པའི་ཚབ་ཏུ་དགེ་བཤེས་རྗེ་ལུང་པ། ཞེས་དང་། དེ་དང་སྤྱི་བོ་ལྷས་པའི་བར་ཏུ་དགེ་བཤེས་གྲགས་པ་ཞེས་སྣང་བས་དཔྱད་པར་བྱ་ཞིང་། འགའ་ཞིག་ཟླ་གྲགས་ཀྱིས་ཀླུ་སྒྲུབ་ཀྱི་ཞབས་མ་ཟིན་གསུང་ཡང་ཐེག་ཆེན་གྱི་སྐབས་འདིར་ཡེ་ཤེས་ཀྱི་སྐུས་རྗེས་སུ་བཟུང་བའང་མི་འགལ་བ་མ་ཟད། ཇོ་བོའི་བདེན་གཉིས་ལས། ཀླུ་སྒྲུབ་སློབ་མ་ཟླ་གྲགས་ཡིན། །དེ་ལས་བརྒྱུད་པའི་མན་ངག་གིས། །ཆོས་ཉིད་བདེན་པ་རྟོགས་པར་འགྱུར། །ཞེས་པས་ཟིན་པ་འཐད་དོ། །གཉིས་པ་ཐུབ་དབང་། རྒྱལ་ཚབ་བྱམས་པ། འཕགས་པ་ཐོགས་མེད། མཁས་མཆོག་དབྱིག་གཉེན། འཕགས་པ་རྣམ་གྲོལ་སྡེ། བཙུན་པ་གྲོལ་སྡེ། མཆོག་གི་སྡེ། དུལ་བའི་སྡེ། རྣམ་པར་སྣང་མཛད། སེང་གེ་བཟང་པོ། སངས་རྒྱས་ཡེ་ཤེས་ཞབས། ཡོན་ཏན་བཤེས་གཉེན། རིན་ཆེན་རི་བོ། ཟླ་བ་བཟང་པོ། འབུམ་ཕྲག་གསུམ་པ། རྔོག་ལོ་ཆེན་པོ། འབྲེ་ཤེས་རབ་འབར། ཨར་བྱང་ཆུབ་ཡེ་ཤེས། ཁུ་གཞོན་བརྩོན། དཀར་ཆུང་རིང་མོ་བ། ཞང་གཡེ་བ། གཉལ་ཞིག །རྒྱ་འཆིང་རུ་བ། ཆུ་མིག་པ་སེང་གེ་དཔལ། ལྷོ་བྲག་པ། དེས་བཙན་དགོན་པ་བ་དང་དབེན་དགེ་བ། གཉིས་ཀས་བླ་བྲང་པ་དང་ཆོས་གྲགས་གཉིས་ལ། དེ་གཉིས་ཀ་ལ་ཀུན་མཁྱེན་ཆེན་པོས་གསན་ནོ། །གསུམ་པ་འཇམ་དཔལ། ཀླུ་སྒྲུབ། ཞི་བ་ལྷའམ། ཉེ་བརྒྱུད་འཇམ་དཔལ་ནས་ཞི་བ་ལྷ། ཨེ་ལ་དྷ་རི། མ་ཧཱ་ཤྲཱི་རཏྣ། བྷ་བ་བཛྲ། གསེར་གླིང་པ། ཇོ་བོ་དཱི་པཾ་ཀཱ་ར། སུ་མ་ཏི། རྔོག་ལོ། ཞང་ཚེ་སྤོང་། ཕྱཱ་བ་ཆོས་སེང་། དན་ཕག་པ་སྨྲ་སེང་། དར་མ་བཀྲ་ཤིས། ཤེས་རབ་བློ་གྲོས། ཤེས་རབ་དབང་ཕྱུག །སངས་རྒྱས་བརྩོན་འགྲུས། དབེན་དགེ་བ་ཤཱཀ་སེང་། བླ་བྲང་པ་ཆོས་དཔལ་རྒྱལ་མཚན། དེས་ཀུན་མཁྱེན་ཆེན་པོའོ། །དེ་ལྟར་བརྒྱུད་ཚུལ་གསུམ་ཀ་ཀུན་མཁྱེན་ཆོས་རྗེ་ནས། ཁྱབ་བརྡལ་ལྷུན་གྲུབ། གྲགས་པ་འོད་ཟེར། སངས་རྒྱས་དབོན་པོ། ཟླ་བ་གྲགས་པ། ཀུན་བཟང་རྡོ་རྗེ། ཀུན་དགའ་རྒྱལ་མཚན་དཔལ་བཟང་། སྣ་ཚོགས་རང་གྲོལ། བསྟན་འཛིན་གྲགས་པ། མདོ་སྔགས་བསྟན་འཛིན། རིག་འཛིན་ཕྲིན་ལས་ལྷུན་གྲུབ། བཀའ་དྲིན་མཉམ་མེད་གཏེར་ཆེན་ཆོས་ཀྱི་རྒྱལ་པོ་འགྱུར་མེད་རྡོ་རྗེ། དེ་ལ་བདག་གིས་སྲོལ་གཉིས་ཀྱི་སེམས་བསྐྱེད་ལན་མང་དུ་ནོད་ཅིང་། བརྒྱུད་པ་དེ་དང་མཐུན་པའི་མན་ངག་གཞུང་བཤད་དང་བཅས་པ་ཡོངས་རྫོགས་དང་། བརྒྱུད་པ་གཞན་ལས་བྱུང་བའི་བློ་སྦྱོང་གི་གདམས་པ་སོགས་ཀྱང་ལེགས་པར་ཐོབ་བོ། །སེམས་བསྐྱེད་ཀྱི་བརྒྱུད་པའི་ཁྱད་པར་གཞན་ཡང་སྣ་ཚོགས་རང་གྲོལ་གྱིས་ཀླུ་སྒྲུབ་ལུགས་ཛེ་ཏཱ་རི་ནས་ས་ལུགས་ལ་བརྒྱུད་པ་དང་། ཨཱཪྱ་དེ་བ་ནས་པཎ་ཆེན་ནགས་རིན་ལ་བརྒྱུད་པ། ཐོགས་མེད་ལུགས་ཇོ་བོ་རྗེ་ནས་བརྒྱུད་པ་རྣམས་ཤ་མི་དཔལ་འབྱོར་བཟང་པོ་ལ་གསན་པ་དང་། ཡང་རྗེ་བླ་མས་སྲོལ་གཉིས་ཇོ་བོ་ཨ་ཏི་ཤའི་ལུགས་ཤ་ར་བ་ནས་དུས་མཁྱེན་ལ་བརྒྱུད་པ་ཡབ་རྗེ་དང་། རྒྱ་ལྕགས་རི་བ་ནས་དྭགས་པོ་ཟླ་འོད་གཞོན་ནུ་ལ་བརྒྱུད་པ་བཟང་པོའི་མཚན་ཅན་ལ་དང་། ཐོགས་མེད་ལུགས་ཤ་ར་བ་ནས་སྣར་ཐང་པ་ལ་བརྒྱུད་པ་རིག་འཛིན་ཆེན་པོ་པདྨ་ཕྲིན་ལས་ལ་གསན་པ་རྣམས་སོ། །གཞན་ཡང་བདག་གིས་ཛི་ཏཱ་རི་ནས་བརྒྱུད་པ་ས་པཎ་གྱི་སེམས་བསྐྱེད་ཆེན་མོ་དང་ཤངས་ལུགས་དབང་གི་སྔོན་འགྲོའི་ཡི་གེ་ལས་ཆོས་སྐྱོང་རྒྱལ་མཚན་ལ་ཞུས་ཤིང་། ཇོ་བོ་ཨ་ཏི་ཤའི་སྐྱེས་བུ་གསུམ་གྱི་ལམ་རིམ་ལྟར་སེམས་བསྐྱེད་གདམས་ངག་དང་བཅས་པ་རྗེ་ཐམས་ཅད་མཁྱེན་པ་ལྔ་པ་ཆེན་པོ་ལས་བརྒྱུད་དེ་བླ་མ་དམ་པའི་སྐུ་གསུང་ཐུགས་ཀྱི་སྲས་མཆོག་པདྨ་འགྱུར་མེད་རྒྱ་མཚོ་ལས་ཐོབ་པ་ཡིན་ནོ། །ཞར་བྱུང་ཕར་ཕྱིན་གྱི་བཤད་པའི་བརྒྱུད་པ་ནི། བྱམས་པ་ནས་ལྷོ་བྲག་པའི་བར་སྔར་ལྟར་ལས། དེ་ནས་བསོད་ནམས་མགོན། བུ་སྟོན་རིན་ཆེན་གྲུབ། རིན་ཆེན་རྣམ་རྒྱལ། གཡག་རོང་རྣམ་གཉིས། དམར་ཁམ་པ། ཀུན་མཁྱེན་སངས་རྒྱས་འཕེལ། འཇམ་དབྱངས་ཀུན་དགའ་ཆོས་བཟང་། དེ་ལས་གཞུང་བརྒྱ་པ་ནས་སངས་རྒྱས་ཡར་འཕེལ་གྱི་བར་སྟོད་བརྒྱུད་དང་། ནོར་བུ་ཕུན་ཚོགས་ནས་བཀྲ་ཤིས་རྒྱལ་མཚན་བར་སྨད་བརྒྱུད་དེ། དེ་གཉིས་ལ་ལུང་རིགས་སྨྲ་བའི་བཤེས་གཉེན་སངས་རྒྱས་ཆོས་དར་གྱིས་གསན། དེ་ལ་བདག་གིས་ཐོབ་བོ། །སྔ་འགྱུར་གྱི་བརྒྱུད་ལུགས་ལྟར་ན། ཛི་ན་མི་ཏྲ་ལ་སྐ་ཅོག་ཞང་གསུམ་གྱིས་གསན། དེ་ནས་སྦས་རྒྱལ་བ་ཡེ་ཤེས། གྲུམ་རྒྱལ་བའི་ཡེ་ཤེས། གྲུམ་མཆོག་གི་ཡེ་ཤེས། གྲུམ་གྱིི་མཁན་བུ་སེ་བཙུན་དབང་ཕྱུག་གཞོན་ནུ། དེ་ལ་འབྲེ་ཤེས་རབ་འབར་གྱིས་གསན་པ་སྟེ། དེབ་སྔོན་ལས། ཁོང་གི་བཤད་པ་དེ་ནི་བསྟན་པ་སྔ་དར་གྱི་ཕ་རོལ་ཏུ་ཕྱིན་པའི་བཤད་རྒྱུན་ཁམས་སུ་འཕོས་པ་ལས་བྱུང་བ་ཡིན་ནོ། །ཞེས་གསུངས་ཤིང་། འབྲེ་ཆེན་པོས་ཕྱིས་རྔོག་ལོ་ལའང་མཁས་ཉན་མཛད་པས་དེ་མན་ཆད་བརྒྱུད་པ་གཅིག་ཏུ་འདྲེས་པ་ཡིན་ནོ། །གཞན་ཡང་གུང་ཐང་པཎ་ཆེན་ལ་དབུ་མའི་བཤད་པ་གཞི་ལམ་འབྲས་གསུམ་གྱི་སྟོང་ཐུན་ཙམ་ཞིག་དང་། གྲུབ་པ་རྡོ་རྗེ་ལ་བཀའ་བར་ཐའི་མདོའི་ལུང་མང་པོ་དང་། བྱམས་ཆོས་ལྔ། སྤྱོད་འཇུག །རིག་འཛིན་མཆོག་གི་སྤྲུལ་བའི་སྐུ་པདྨ་ཕྲིན་ལས་ལ་བཤེས་སྤྲིངས། སངས་རྒྱས་ཆོས་དར་ལ་དབུ་མ་རྩ་འཇུག་བཞི་གསུམ། འགྲེལ་ཆུང་དོན་གསལ། ཐུབ་པ་དགོངས་གསལ། ལུང་རིགས་རྒྱ་མཚོ། ཀུན་དགའ་དར་རྒྱས་ལ་དབུ་མའི་བསྟོད་ཚོགས་སྐོར། སྡོམ་པ་ཉི་ཤུ་པ། ལམ་སྒྲོན་སོགས་ཇོ་བོའི་ཆོས་ཆུང་རྣམས་ཀྱང་ལེགས་པར་ཐོས་སོ། །

གསུམ་པ་དེ་ལྟར་བཟུང་བའི་བརྗོད་བྱ་གཏན་ལ་དབབ་པ་ལ་བདུན་ཏེ། འཐོབ་བྱའི་ངོ་བོ། དེའི་དབྱེ་བ། མ་ཐོབ་པ་འཐོབ་པར་བྱེད་པ། ཐོབ་པ་མི་ཉམས་པར་བསྲུང་བ། སྐྱེ་བའི་རྟེན། ཉམས་པ་གསོ་ཚུལ། བསྲུངས་པའི་ཕན་ཡོན་ནོ། །དང་པོ་ནི། ངོ་བོ་བྱམས་དང་སྙིང་རྗེས་རྒྱུད་བརླན་ཞིང་། །གཞན་གྱི་དོན་དུ་བྱང་ཆུབ་ཐོབ་འདོད་པས། །སྒོ་གསུམ་ཉེས་པ་སྤོང་བའི་སེམས་པའོ། །ཞེས་པ་སྟེ། དེ་ལ་སེམས་བསྐྱེད་སྤྱིའི་མཚན་ཉིད་ནི། གཞན་དོན་དུ་རྫོགས་བྱང་གི་སྒྲུབ་པ་ཁྱད་པར་ཅན་གྱི་མཁྱེན་པའོ། །འདི་ལ་ཆེད་དུ་བྱ་བ་གཞན་དོན་ཡིན་པར་འདྲ་ཡང་། དམིགས་ཡུལ་རྫོགས་བྱང་ལ་ཆོས་ཉིད་དང་ཆོས་ཅན་གྱི་ཁྱད་པར་ལས། དོན་དམ་དང་ཀུན་རྫོབ་ཀྱི་སེམས་བསྐྱེད་གཉིས་སོ། །འོ་ན་སངས་རྒྱས་སའི་སྒྲིབ་པ་དག་པའི་སེམས་བསྐྱེད་ལ་མ་ཁྱབ་བོ་ཞེ་ན། རྫོགས་བྱང་གི་སྒྲུབ་པ་ཁྱད་པར་བ་དེ་བསྒྲུབ་བྱ་ལ་སྒྲུབ་པར་བཏགས་པའི་ཕྱིར་སྐྱོན་མེད་དོ། །ཁྱད་པར་བརྡ་ལས་བྱུང་བའི་སེམས་བསྐྱེད་ཀྱི་མཚན་ཉིད་ནི། གཞན་དོན་དུ་རྫོགས་བྱང་ལ་དམིགས་པའི་སྒྲུབ་པ་ཁྱད་པར་ཅན་གང་ཞིགདེའི་མི་མཐུན་ཕྱོགས་སྒོ་གསུམ་གྱི་ཉེས་པ་སྤོང་བའི་སེམས་པ་རྒྱུན་ཆགས་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེ་ལ་གཞན་དོན་གྱི་སེམས་ནི། ཚད་མེད་པའི་སེམས་ཅན་ཐམས་ཅད་མས་བུ་གཅིག་པ་ལྟར་ཡིད་དུ་འོང་བར་མཐོང་བའི་བྱམས་པས་དྲངས་ཏེ། དེ་ཐམས་ཅད་སྡུག་བསྔལ་སྣ་ཚོགས་ཀྱིས་གཟིར་བ་ལ་མི་བཟོད་པའི་སྙིང་རྗེ་ཤུགས་དྲག་པོས་རྒྱུད་བརླན་པ་ལས་གཞན་གྱི་སྡུག་བསྔལ་བསལ་འདོད་ཀྱི་བློ་སྐྱེ་བའི་ཕྱིར། སྙིང་རྗེས་སེམས་ཅན་ལ་དམིགས་པ་ཡིན་ལ། དེ་ལས་གཞན་གྱི་དོན་དུ་བླ་ན་མེད་པའི་བྱང་ཆུབ་ཐོབ་པར་འདོད་པའི་འདོད་པ་དང་མཚུངས་ལྡན་གྱི་སེམས་ཁྱད་པར་ཅན་སྐྱེ་བའི་ཕྱིར། ཤེས་རབ་ཀྱིས་རྫོགས་བྱང་ལ་དམིགས་པའོ། །དེ་ལྟར་ཐབས་ཤེས་ཟུང་དུ་འཇུག་པའི་སེམས་སྨོན་འཇུག་གིས་བསྡུས་པ་ཕྱིན་དྲུག་གི་ངོ་བོར་གྱུར་བའི་སྒྲུབ་པ་ཁྱད་པར་བ་སྟེ། དེའི་མི་མཐུན་ཕྱོགས་ནི་གཞན་ལ་ཕན་པའི་གེགས་དང་རང་གི་རྫོགས་བྱང་ཐོབ་པ་ལ་བར་ཆད་དུ་གྱུར་བ་ཉིད་ཡིན་པས་ན། སྒོ་གསུམ་གྱི་ཉེས་པ་མ་ལུས་པ་སྤོང་བའི་སེམས་པ་ནི་བྱང་སྡོམ་གྱི་ངོ་བོའོ། །དེ་ལྟར་ཡང་སྤྱོད་འཇུག་ལས། སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སོ། །དེ་ཡང་འཕགས་སེང་གཉིས་ལྟར་ན། གཞན་དོན་དུ་རྫོགས་བྱང་ལ་དམིགས་པའི་གཙོ་སེམས་དང་། དེ་ཡང་ཡིད་ཤེས་ཉིད་བཟུང་གི་གཞན་ནི་མ་ཡིན་ཏེ། གཞན་དོན་དང་བྱང་ཆུབ་ལ་དམིགས་མི་ནུས་པའི་ཕྱིར་སྙམ་དུ་དགོངས་སོ། །ཐོགས་མེད་སྐུ་མཆེད་གཉིས་ཀ་སེམས་བྱུང་དུ་བཞེད་དེ། བྱང་སར། བྱང་ཆུབ་སེམས་དཔའི་སྨོན་ལམ་གྱི་མཆོག་ནི་སེམས་བསྐྱེད་པ་སྟེ། ཞེས་དང་། རྒྱན་ལས། དོན་གཉིས་ལྡན་པའི་སེམས་བྱུང་བ། །ཞེས་པའི་འགྲེལ་པར་དབྱིག་གཉེན་ཞབས་ཀྱིས། དོན་གཉིས་ལ་དམིགས་པའི་སེམས་པ་ནི་སེམས་བསྐྱེད་པའོ། །ཞེས་གསུངས་པའི་ཕྱིར། དེས་ན་འདིར་སེམས་རང་གིས་བསྐྱེད་པར་བྱ་བས་ན་སེམས་བསྐྱེད་ཅེས་པ་བྱ་བ་ལ་བཤད་ན་གཙོ་སེམས་དང་། སེམས་བསྐྱེད་པར་བྱེད་པས་ན་སེམས་བསྐྱེད་ཅེས་བྱེད་པ་ལ་བཤད་ན་སེམས་བྱུང་ཡིན་པས། གཉིས་ཀ་ལ་སེམས་བསྐྱེད་ཀྱི་སྒྲ་བཤད་དུ་ཡོད་ཅེས་རོང་སྟོན་ཆེན་པོས་གསུངས་ཤིང་། ཀུན་མཁྱེན་ཆེན་པོ་ནི། སེམས་ནི་དོན་གྱི་ངོ་བོ་རིག་པ་ཡིན་ལ། སེམས་བྱུང་དེའི་ཁྱད་པར་ལ་དཔྱོད་པས་ན། འདིར་ངོ་བོ་བསྐྱེད་པས་ཁྱད་པར་ཞར་ལ་བསྐྱེད་པར་འགྱུར་ཏེ། འདུན་པ་སེམས་བསྐྱེད་ལ་སོགས་པ་ཞར་ལ་ཐོབ་པ་བཞིན་ནོ། །ཞེས་གསུངས་སོ། །

གཉིས་པ་དབྱེ་བ་ལ་བསྟན་བཤད་བསྡུ་གསུམ་ལས། དང་པོ་མདོར་བསྟན་ནི། དབྱེ་བ་ཀླུ་སྒྲུབ་ཐོགས་མེད་སྲོལ་གཉིས་གྲགས། །རེ་རེ་གཅིག་ནས་དྲུག་བར་གཉིས་གཉིས་ཏེ། །ཞེས་པས་སྲོལ་གཉིས་རེ་རེ་ལ་གཅིག་ནས་དྲུག་ཚན་གྱི་བར་དང་། དེ་ཡང་དབྱེ་གཞི་ལ་ལྟོས་ནས་སམ་སྨོན་འཇུག་གི་དབྱེ་བས་གཉིས་གཉིས་སོ། །

གཉིས་པ་རྒྱས་བཤད་ལ། གཅིག་ནས་དྲུག་ཚན་བར་གྱི་དང་། ས་མཚམས་ཀྱི་དབྱེ་བའོ། །དང་པོ་ནི། དང་པོ་སྟོང་ཉིད་སྙིང་རྗེའི་སྙིང་པོ་ཅན། །ཚོགས་གཉིས་བསླབ་པ་ཀུན་རྫོབ་དོན་དམ་གཉིས། །ཚུལ་ཁྲིམས་ཏིང་འཛིན་ཤེས་རབ་བསླབ་གསུམ་དང་། །ཚོགས་སྦྱོར་མོས་པས་སྤྱོད་པའི་སེམས་བསྐྱེད་དང་། །མ་དག་ས་བདུན་ལྷག་བསམ་དག་པ་དང་། །དག་པ་ས་གསུམ་རྣམ་པར་སྨིན་པ་དང་། །ཐུགས་རྗེ་ཆེན་པོ་སྒྲིབ་ཀུན་སྤངས་པ་ནི། །སངས་རྒྱས་ས་ཡི་སེམས་བསྐྱེད་དག་དང་བཞི། །ལྔ་ནི་ལམ་ལྔ་དྲུག་ནི་ཕར་ཕྱིན་དྲུག །ཅེས་པ་ལྟར་ཚན་པ་དྲུག་ལས། དང་པོ་གཅིག་ཚན་ནི། སྟོང་ཉིད་རྟོགས་པའི་ཤེས་རབ་ཀྱིས་དེ་མ་རྟོགས་པ་ལ་སྙིང་རྗེས་དྲངས་པའི་བྱང་ཆུབ་ཀྱི་སེམས་སྐྱེས་པ་ལ་ལྟོས་ནས་སྟོང་ཉིད་སྙིང་རྗེའི་སྙིང་པོ་ཅན་གྱི་སེམས་བསྐྱེད་ཅེས་བྱའོ། །གཉིས་ཚན་ནི། བསོད་ནམས་དང་ཡེ་ཤེས་ཀྱི་ཚོགས་ཀྱི་བསླབ་པ་ལ་ལྟོས་ནས་གཉིས་སམ། རགས་པ་བརྡའ་ལས་བྱུང་བ་དང་ཕྲ་བ་ཆོས་ཉིད་ཀྱིས་ཐོབ་པའི་ཁྱད་པར་ལས་ཀུན་རྫོབ་དང་དོན་དམ་གྱི་སེམས་བསྐྱེད་གཉིས་ཏེ། མྱང་འདས་ལས། ཀུན་རྫོབ་དོན་དམ་དབྱེ་བ་ཡིས། །བྱང་ཆུབ་སེམས་དེ་རྣམ་པ་གཉིས། །ཞེས་སོ། །གསུམ་ཚན་ནི། དག་པར་བྱེད་པ་ཚུལ་ཁྲིམས། གནས་པར་བྱེད་པ་ཏིང་འཛིན། གྲོལ་བར་བྱེད་པ་ཤེས་རབ་ཀྱི་བསླབ་པ་གསུམ་ལ་ལྟོས་ནས་སེམས་བསྐྱེད་གསུམ་དང་། གཞན་ཡང་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་ལ་ལྟོས་ནས་ཀྱང་གསུམ་དུ་དབྱེར་ཡོད་དོ། །བཞི་ཚན་ནི། ཚོགས་སྦྱོར་དང་། མ་དག་ས་བདུན་དང་། དག་པ་ས་གསུམ་དང་། སངས་རྒྱས་ཀྱི་ས་རྣམས་ན་རིམ་པར་མོས་པས་སྤྱོད་པའི་སེམས་བསྐྱེད་སོགས་བཞི་ཡོད་དེ། མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་བའོ། །ཞེས་སོ། །ལྔ་ཚན་ནི། ཚོགས་སྦྱོར་མཐོང་སྒོམ་མི་སློབ་པའི་ལམ་དང་ལྔའི་སེམས་བསྐྱེད་པ་ལྔ་སྟེ། ཉི་ཁྲི་ལས། ལས་དང་པོ་པའི་སེམས་བསྐྱེད་པ་དང་། ཡོངས་སུ་སྦྱང་བ་བྱས་པའི་སེམས་བསྐྱེད་པ་དང་། ཆོས་མཐོང་བའི་སེམས་བསྐྱེད་པ་དང་། རྣམ་པར་གྲོལ་བའི་སེམས་བསྐྱེད་པ་དང་། བསམ་གྱིས་མི་ཁྱབ་པའི་སེམས་བསྐྱེད་པ་སྟེ། ཞེས་སོ། །དྲུག་ཚན་ནི། ཕ་རོལ་ཏུ་ཕྱིན་པ་དྲུག་ལ་ལྟོས་ནས་སེམས་བསྐྱེད་དྲུག་སྟེ། དེ་ལས། ཕ་རོལ་ཏུ་ཕྱིན་པ་དྲུག་དང་ལྡན་པའི་སེམས་བསྐྱེད་པ་དྲུག་པོ་གང་དང་ལྡན་པས། ཞེས་སོ། །

གཉིས་པ་ནི། ས་གསེར་ཟླ་བ་མེ་སོགས་ཉེར་གཉིས་ནི། །ས་མཚམས་ཀྱིས་ཕྱེ་ས་བཅུའི་བར་དུའོ། །ཞེས་པ་སྟེ། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང་། །ཡིད་བཞིན་ནོར་བུ་ཉི་མ་ཀླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །ཞེས་དཔེ་ཉེར་གཉིས་ཀྱིས་མཚོན་པའི་དོན་ནི་རིམ་པ་ཇི་ལྟ་བར། འདུན་པ་དང་། བསམ་པ་དང་། ལྷག་པའི་བསམ་པ་དང་། སྦྱོར་བ་དང་། སྦྱིན་པ་ནས་ཡེ་ཤེས་ཀྱི་བར་ཕར་ཕྱིན་བཅུ་དང་། མངོན་ཤེས་དང་། བསོད་ནམས་དང་ཡེ་ཤེས་དང་། བྱང་ཕྱོགས་དང་མཐུན་པའི་ཆོས་དང་། སྙིང་རྗེ་དང་ལྷག་མཐོང་དང་། གཟུངས་སྤོབས་དང་། ཆོས་ཀྱི་དགའ་སྟོན་དང་། བགྲོད་པ་གཅིག་པའི་ལམ་དང་། ཆོས་ཀྱི་སྐུ་དང་ལྡན་པ་རྣམས་ཏེ། འདུན་པ་ས་ལྟ་བུ་ནས་ཆོས་སྐུ་དང་མཚུངས་པར་ལྡན་པ་སྤྲིན་ལྟ་བུའི་བར་དུ་སྦྱར་རོ། །དེ་ལ་ས་མཚམས་ནི། འདུན་པ་སོགས་གསུམ་ཚོགས་ལམ་གསུམ་ནའོ། །སྦྱོར་བ་ནི་སྦྱོར་ལམ་ནའོ། །སྦྱིན་པ་ནས་ཡེ་ཤེས་ཀྱི་བར་བཅུ་ནི་མཐོང་སྒོམ་གྱིས་བསྡུས་པའི་ས་བཅུ་ནའོ། །མངོན་ཤེས་ནས་གཟུངས་སྤོབས་ཀྱི་བར་ལྔ་ནི་ཁྱད་པར་གྱི་ལམ་དག་པ་ས་གསུམ་ཀ་ལ་ཁྱབ་པར་ཡོད་དོ། །ཆོས་ཀྱི་དགའ་སྟོན་སོགས་གསུམ་ནི་སངས་རྒྱས་ཀྱི་ས་ཞེས་ཐེག་ཆེན་དགྲ་བཅོམ་ཞུགས་པའི་ས་སྟེ་ས་བཅུ་བའི་སྦྱོར་དངོས་རྗེས་གསུམ་ན་ཡོད་དོ། །མདོ་སྡེ་རྒྱན་ལས། རྒྱལ་སྲས་རྣམས་ཀྱི་སེམས་བསྐྱེད་པ། །སྤྲིན་དང་འདྲ་བར་བསྟན་པ་ཡིན། །ཞེས་སོ། །དེ་ཡང་ས་སོགས་དཔེ་དང་། འདུན་པ་སོགས་གྲོགས་དང་། ཆོས་མཐུན་ནི། འགྲེལ་བར། ཆོས་དཀར་པོ་ཐམས་ཅད་ཀྱི་གཞིའི་དངོས་པོ་དང་། ཞེས་པ་ནས། དགའ་ལྡན་གྱི་གནས་ན་བཞུགས་པ་ལ་སོགས་པ་ཀུན་ཏུ་སྟོན་པར་རུང་བ་ཉིད་ཀྱི་གྲངས་བཞིན་ནོ། །ཞེས་པའི་བར་གསུངས་ཤིང་། དཔེ་གྲོགས་ཆོས་གསུམ་སྦྱོར་ཚུལ་ནི། གྲོགས་བྱང་ཆུབ་དོན་གཉེར་གྱི་འདུན་པ་དང་མཚུངས་པར་ལྡན་པའི་སེམས་བསྐྱེད་ཆོས་ཅན། དཔེ་ས་ལྟ་བུ་ཡིན་ཏེ། ཆོས་དཀར་པོ་ཐམས་ཅད་བསྐྱེད་པའི་གཞིའི་དངོས་པོ་བྱེད་པས་ཆོས་མཐུན་པའི་ཕྱིར། ཞེས་ཐམས་ཅད་ལ་འགྲེ་ཤེས་པར་བྱའོ། །འོ་ན་སངས་རྒྱས་ཀྱི་ས་ན་སེམས་བསྐྱེད་ཡོད་དམ་མེད་སྙམ་ན། ཆོ་གའི་བརྡ་ལས་ཐོབ་པའི་སེམས་བསྐྱེད་ནི་མེད་དེ། ཁས་བླངས་པའི་དུས་ལས་འདས་པའི་ཕྱིར། དོན་དམ་སེམས་བསྐྱེད་ནི་ཡོད་དེ། ཆོས་ཉིད་ཀྱིས་ཐོབ་པའི་སེམས་བསྐྱེད་ཐོབ་ལ་མ་ཉམས་པ་གོང་འཕེལ་དུ་ཡོད་པའི་ཕྱིར་དང་། ཐུགས་རྗེ་ཆེན་པོ་སྒྲིིབ་པ་དང་བྲལ་བའི་སེམས་བསྐྱེད་ཀྱིས་དོན་མཛད་པ་ཡོད་པའི་ཕྱིར་རོ། །

གསུམ་པ་དོན་བསྡུ་བ་ནི། ཀུན་ཀྱང་བསྡུ་ན་སྨོན་འཇུག་རྣམ་པ་གཉིས། །དེ་ཡང་བསམ་པས་སྨོན་དང་སྦྱོར་བས་ཁྱབ། །འགྲོ་བར་འདོད་དང་འགྲོ་བ་ཇི་བཞིན་ནོ། །ཞེས་པ་སྟེ། དབྱེ་སྒོ་བདུན་གྱི་སྒོ་ནས་བཤད་པའི་སེམས་བསྐྱེད་དེ་དག་ཀུན་ཀྱང་མདོར་བསྡུ་ན་སྨོན་འཇུག་གཉིས་གཉིས་སུ་འདུས་ཏེ། དེ་ཡང་བསམ་པས་སྨོན་པའི་ཆ་ནི་སྨོན་པ་སེམས་བསྐྱེད་དེ། གཞན་དོན་དུ་བྱང་ཆུབ་ཐོབ་པར་འདུན་པ་ཙམ་ཡིན་པའི་ཕྱིར་སྐྱེས་བུ་ལམ་དུ་འགྲོ་འདོད་པ་བཞིན་ནོ། །སྦྱོར་བས་ལག་ལེན་ལ་ཁྱབ་པར་བྱེད་པའི་ཆ་ནི་འཇུག་པ་སེམས་བསྐྱེད་དེ། བྱང་ཆུབ་ཀྱི་ཆེད་དུ་དེའི་ཆོས་ཕ་རོལ་ཏུ་ཕྱིན་པ་དྲུག་ལ་འཇུག་པས་སྤྱོད་པའི་ཕྱིར། ལམ་དུ་ཞུགས་ནས་འགྲོ་བཞིན་པ་ལྟ་བུའོ། །དེ་ལྟར་ཡང་སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། །ཞེས་སོ། །དེ་ལ་ལམ་དུ་ཞུགས་པའི་ཚེ་ཡང་འགྲོ་འདོད་མི་འདོར་བ་ལྟར་འཇུག་པ་ཕྱིན་དྲུག་ལ་སློབ་པ་ནའང་སྨོན་པ་སེམས་བསྐྱེད་ནི་ཡོད་དེ། འཇུག་སྡོམ་བླངས་པས་སྨོན་པ་འཕེལ་བར་འགྱུར་བའི་ཕྱིར། ལམ་སྒྲོན་ལས། འཇུག་སེམས་བདག་ཉིད་སྡོམ་པ་མ་གཏོགས་པར། །ཡང་དག་སྨོན་པ་འཕེལ་བར་འགྱུར་མ་ཡིན། །ཞེས་པ་ལྟར་རོ། །མཚན་ཉིད་ནི། སྨོན་པ་དང་འཇུག་པ་གང་རུང་གི་བྱང་ཆུབ་ཀྱི་མཆོག་ཏུ་སེམས་བསྐྱེད་ནས། དེ་དང་དེའི་བསླབ་བྱ་ལ་སློབ་པར་ཁས་བླངས་པའི་སེམས་པ་རྒྱུན་ཆགས་པ། རིམ་བཞིན་སྨོན་འཇུག་གི་སྡོམ་པའི་མཚན་ཉིད། དེ་ཡང་སྨོན་སེམས་ཙམ་ནི་བྱང་ཆུབ་ཏུ་སྨོན་པའི་སེམས་བསྐྱེད་མ་ཐག་ནས་ཡོད་ལ། འཇུག་སེམས་ནི་འཇུག་སྡོམ་བཟུང་བ་ནས་རྒྱུན་མཐའི་བར་དུ་ཡོད་དོ། །གལ་ཏེ་པཎྜི་ཏ་ཡེ་ཤེས་གྲགས་ཀྱིས། འདུན་སོགས་གསུམ་གྱི་དབྱེ་བ་ཡིས། །སྨོན་པའི་སེམས་ནི་རྣམ་པ་གསུམ། །འཇུག་པ་ཞེས་བྱའི་བདག་ཉིད་ནི། །བཅུ་དགུ་དག་ཏུ་ཤེས་པར་བྱ། །ཞེས་ཐེག་ཆེན་ཚོགས་ལམ་པའི་རྒྱུད་ཀྱི་སེམས་བསྐྱེད་གསུམ་སྨོན་པ་དང་། སྦྱོར་ལམ་ཡན་ཆད་ཀྱི་སེམས་བསྐྱེད་འཇུག་པར་བཞེད་ཅིང་། དཾ་ཥྚ་སེ་ན་སོགས་ཐེག་ཆེན་གྱི་འཕགས་ལམ་མ་ཐོབ་པར་སྨོན་པ་དང་། ཐོབ་ནས་འཇུག་པར་བཞེད་པ་རྣམས་ནི་མི་འཐད་དེ། ཀུན་དཀྲིས་ཆེན་པོས་བཅད་པའི་རྩ་ལྟུང་གིས་འཇུག་སྡོམ་ལས་ཉམས་པ་མི་སྲིད་པར་འགྱུར་བའི་ཕྱིར་དང་། སྨོན་འཇུག་གཉིས་ཀྱང་ཆོ་གས་བསྐྱེད་པ་ལས་དེ་དང་དེའི་སེམས་བསྐྱེད་དང་སྡོམ་པར་འགྱུར་ནའང་། བྱང་སེམས་ཀྱི་རྩ་ལྟུང་རྣམས་བསྲུང་བའི་སྡོམ་ལྡན་དུ་འགྱུར་བ་འཇུག་སེམས་བསྐྱེད་པ་ལ་ལྟོས་དགོས་པས་ཀྱང་གནོད་པའི་ཕྱིར་ཏེ། བསླབ་བཏུས་ལས། འཇུག་སེམས་བྱང་ཆུབ་སེམས་དཔའི་སྡོམ་པ་དང་དོན་གཅིག་པར་གསུངས་པའི་ཕྱིར་རོ། །

གསུམ་པ་མ་ཐོབ་པ་འཐོབ་པར་བྱེད་པ་ལ་གཉིས་ཏེ། ཀུན་རྫོབ་སེམས་བསྐྱེད་སྐྱེ་བའི་ཆོ་ག་བཤད། དོན་དམ་སེམས་བསྐྱེད་ཐོབ་པ་ཆོ་ག་ལ་ལྟོས་མི་དགོས་པར་བསྟན་པའོ། །དང་པོ་ལ་བསྟན་བཤད་གཉིས་ལས། མདོར་བསྟན་ནི། དང་པོ་སྡོམ་པ་མ་ཐོབ་འཐོབ་ཚུལ་ནི། །ལེན་ཚུལ་ཞེས་པས་མདོར་བསྟན་ནས།

གཉིས་པ་རྒྱས་བཤད་ལ། སྤྱིར་བསྐྱེད་བྱའི་མཚན་ཉིད་ནི། གཞན་དོན་དུ་རྫོགས་བྱང་ལ་དམིགས་པའི་ཐེག་ཆེན་སློབ་པའི་སེམས་བསྐྱེད་གང་ཞིག །བྱང་འཕགས་ཀྱི་མཉམ་བཞག་གི་ངོ་བོར་གྱུར་བའི་སེམས་བསྐྱེད་རྣམ་པར་བཅད་པའོ། །མཚན་གཞི་ནི། ཐེག་ཆེན་ཚོགས་སྦྱོར་བའི་རྒྱུད་ཀྱི་སེམས་བསྐྱེད་རྣམས་དང་། བྱང་འཕགས་ཀྱི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་ལྟ་བུའོ། །དབྱེ་ན། གྲོགས་དགེ་བའི་བཤེས་གཉེན་གྱི་སྟོབས་དང་། རྒྱུ་རིགས་སད་པའི་སྟོབས་དང་། དགེ་རྩ་རྒྱས་པའི་སྟོབས་དང་། ཐེག་ཆེན་གྱི་སྡེ་སྣོད་ཐོས་པའི་སྟོབས་དང་། ཐོས་པ་མང་དུ་གོམས་པས་བསྐྱེད་པ་དང་ལྔ་ལས། དང་པོ་གྲོགས་ལ་རག་ལས་པས་མི་བརྟན་པའི་སེམས་བསྐྱེད་དང་། ཕྱི་མ་བཞི་མི་མཐུན་ཕྱོགས་ཀྱིས་ཉམས་དཀའ་བས་བརྟན་པའི་སེམས་བསྐྱེད་དེ། མདོ་སྡེ་རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་གསུངས་པ་ལྟར། གཙོ་བོར་གཞན་གྱི་མཐུ་ལས་བྱུང་བ་ཀུན་རྫོབ་སེམས་བསྐྱེད་ལེན་ཚུལ་ལ་བཞི་སྟེ། གང་ལས་བླང་བའི་སློབ་དཔོན། གང་གིས་ཇི་ལྟར་ལེན་པའི་ཆོ་ག །རྟེན་ལས་ཀྱང་ལེན་རུང་བའི་དམིགས་བསལ། སྡོམ་པའི་ཐོབ་མཚམས་ངོས་བཟུང་བའོ། །དང་པོ་ནི། སྡོམ་གནས་དགེ་བའི་བཤེས་གཉེན་ལ། །ཞེས་པས་སྲོལ་གཉིས་མཐུན་པར་བླང་ཡུལ་བྱང་སེམས་ཀྱི་སྡོམ་པ་ལ་གནས་ཤིང་། དེ་འབོགས་པའི་ཆོ་ག་དང་བསླབ་བྱ་ལ་བཀྲི་མཁས་པའི་དགེ་བའི་བཤེས་གཉེན་མཚན་ཉིད་དང་ལྡན་པ་ལས་ལེན་ཏེ། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་བཏང་ངོ་། །ཞེས་དང་། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་སོ། །དེ་ཡང་བྱང་ཆུབ་བཟང་པོས་ལེན་པ་ལ་བླ་མ་ཡོད་མེད་གང་རུང་གིས་ཆོག་ཀྱང་ཕྱིས་ཉམས་པ་གསོ་བ་ལ་བླ་མ་ངེས་པར་དགོས་ཞེས་གསུངས་མོད། ཞི་བ་འཚོ་ལེན་གསོ་གཉིས་ཀའི་དབང་དུ་མཛད་པ་ལེགས་སོ། །གཉིས་པ་ལ། ཀླུ་སྒྲུབ་དང་། ཐོགས་མེད་ཀྱི་ལུགས་གཉིས་ལས། དང་པོ་ལ། གང་གིས་བླང་བའི་གང་ཟག་དང་། ཇི་ལྟར་ལེན་པའི་ཆོ་གའོ། །དང་པོ་ནི། ཐེག་ཆེན་སྣོད་གྱུར་དད་ལྡན་སློབ་མ་ཡིས། །ཞེས་པ་སྟེ། ཀླུ་སྒྲུབ་ཀྱི་ལུགས་ལ་བརྡའ་ཤེས་ཤིང་སྡོམ་པ་ལེན་འདོད་ཡོད་ན་དལ་འབྱོར་གྱི་ལུས་རྟེན་ཁོ་ན་དགོས་པར་མ་ངེས་ཏེ། རྫོགས་བྱང་དོན་གཉེར་གྱི་བསམ་པ་དངོས་སུ་སྐྱེ་རུང་དུ་ཡོད་པའི་སེམས་ཅན་ཀུན་ཐེག་ཆེན་སེམས་བསྐྱེད་ཀྱི་སྣོད་དུ་བཞེད་པའི་ཕྱིར། །

གཉིས་པ་ནི། ཡན་ལག་བདུན་མཐར་སྨོན་འཇུག་སྟབས་གཅིག་ཏུ། །ལེན་ཞིང་རང་གཞན་དགའ་བ་བསྒོམ་པ་རྣམས། །ཀླུ་སྒྲུབ་ལུགས་ཡིན། ཞེས་པ་སྟེ། མཚན་ཉིད་ནི། བྱང་ཆུབ་སེམས་དཔའི་སྡོམ་པ་གང་ཞིག །སྨོན་འཇུག་གི་སྡོམ་པ་གཉིས་སྟབས་གཅིག་ཏུ་ལེན་པའི་ཆོ་གས་ཐོབ་པའི་སྡོམ་པའོ། །འོ་ན་སྨོན་འཇུག་གི་སེམས་བསྐྱེད་དང་སྡོམ་པ་གཉིས་ཀྱི་ཁྱད་པར་གང་ཞེ་ན། གཞན་དོན་དུ་རྫོགས་བྱང་དོན་གཉེར་གྱི་བློ་དང་དེ་ཉིད་མི་ཉམས་པར་བསྲུང་བའི་བློ་ནི་རིམ་བཞིན་སྨོན་འཇུག་གི་སེམས་བསྐྱེད་དང་། བྱང་སེམས་ཀྱི་བསླབ་པ་མཐའ་དག་འཛིན་པར་ཁས་ལེན་པའི་སེམས་པ་དང་ཇི་ལྟར་བཟུང་བ་བཞིན་ཉམས་སུ་ལེན་པར་ཁས་ལེན་པའི་་སེམས་པ་ནི་རིམ་བཞིན་སྨོན་སྡོམ་དང་འཇུག་པའི་སྡོམ་པའོ། །དེ་ཡང་ཛེ་ཏཱ་རི་ནི་སེམས་བསྐྱེད་གཉིས་སྟབས་གཅིག་ཏུ་ལེན་ཞིང་། དེའི་རྗེས་སུ་སྡོམ་པ་གཉིས་སྟབས་གཅིག་ཏུ་ལེན་པར་མཛད་མོད། འདིར་འཕགས་མཆོག་ཀླུ་སྒྲུབ་དང་ཞི་བ་ལྷའི་ཕྱག་བཞེས་ལྟར་སེམས་བསྐྱེད་དང་སྡོམ་པ་སྟབས་གཅིག་ཏུ་ཆོ་གས་ལེན་ཏེ། འདི་ལ་སྦྱོར་དངོས་རྗེས་གསུམ་ལས། སྦྱོར་བ་ནི། གདམས་ངག་ཁྱད་པར་ཅན་འཁོར་བའི་མཐའ་ལ་སྐྱ་ོབ་བསྐྱེད་ཅིང་ཞི་བའི་མཐའ་ལ་ཞེན་པ་བཀག་ནས་མཐའ་གཉིས་སྤངས་པའི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པའི་ཐབས་གསུམ་གྱིས་བློ་བཅོས་པ་སྔོན་དུ་འགྲོ་བས། ཡུལ་ཁྱད་པར་ཅན་སློབ་དཔོན་ལ་མཎྜལ་ཕུལ་ནས་གསོལ་བ་བཏབ་རྗེས། རྟེན་ཁྱད་པར་ཅན་དཀོན་མཆོག་གསུམ་ལ་སྐྱབས་འགྲོ་བྱ་ཞིང་། ཐབས་ཁྱད་པར་ཅན་ཡན་ལག་བདུན་པའི་ཚོགས་བསགས་པ་རྣམས་སོ། །དངོས་གཞི་ལ། བློ་སྦྱང་བ་དང་། དམ་བཅའ་བ་གཉིས་ལས། དང་པོ་ནི། སེམས་ཅན་ཐམས་ཅད་རང་གི་ཕ་མ་དྲིན་ཅན་ཡིན་ལ། དེ་ཐམས་ཅད་སྡུག་བསྔལ་གྱིས་གཟིར་བ་ལ་སྙིང་རྗེའི་ཤུགས་དྲག་པོས། དེ་དག་གི་གནས་སྐབས་དང་མཐར་ཐུག་གི་ཕན་བདེའི་རྒྱུར་རང་གི་བདེ་དགེ་ཐམས་ཅད་གཏོང་ཞིང་སྡུག་བསྔལ་ཐམས་ཅད་དང་དུ་བླང་བར་བྱའོ་སྙམ་དུ་ཞེ་ཐག་པ་ནས་བློ་སྦྱོང་བ་སྟེ། ཞི་བ་ལྷས། ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་སྒྲུབ་ཕྱིར། །ཕོངས་པ་མེད་པར་བཏང་བར་བྱ། །ཞེས་སོ། །གཉིས་པ་ནི། དགོངས་གསོལ་སྔོན་དུ་འགྲོ་བས། ཇི་ལྟར་སྔོན་གྱི་བདེ་གཤེགས་ཀྱིས། །ཞེས་སོགས་སྤྱོད་འཇུག་ལྟར་ཚིགས་སུ་བཅད་པ་གཉིས་པོ་ལན་གསུམ་བཟླས་པས་བླང་ངོ་། །དེ་ལ་ཚིགས་བཅད་དང་པོས་ནི་སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཐུགས་བསྐྱེད་ཚུལ་བསྟན་ནས། ཚིགས་བཅད་གཉིས་པས་དེ་དག་གིས་ཇི་ལྟར་བསླབ་པ་དེ་བཞིན་དུ་བདག་གིས་ཀྱང་བསླབ་བོ་ཞེས་དམ་འཆའ་བས་སྨོན་འཇུག་གཉིས་ཀྱི་སེམས་བསྐྱེད་དང་སྡོམ་པ་ལེན་པར་བྱེད་པ་ཡིན་ཏེ། དེ་ལྟར་ཡང་། དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །ཞེས་པས་སྨོན་པ་དང་འཇུག་པའི་སེམས་བསྐྱེད་དང་། དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་པའི་སྨོན་འཇུག་གི་སྡོམ་པ་ལེན་པའི་ཆོ་ག་གསལ་བོར་བསྟན་ཏོ། །རྗེས་ལ། རང་དགའ་བ་བསྒོམ་པ་དང་། གཞན་དགའ་བ་བསྒོམ་དུ་གཞུག་པ་གཉིས་ལས། དང་པོ་ནི། དེང་དུས་བདག་ཚེ་འབྲས་བུ་ཡོད། །ཅེས་སོགས་དང་། གཉིས་པ་ནི། བདག་གིས་དེ་རིང་སྐྱོབ་པ་ཐམས་ཅད་ཀྱི། །ཞེས་སོགས་བརྗོད་ནས། གཏང་རག་དབུལ་ཞིང་བསླབ་བྱ་མདོ་ཙམ་བཤད་པ་རྣམས་སོ། །

གཉིས་པ་ཐོགས་མེད་ལུགས་ལ། གང་གིས་བླང་བའི་གང་ཟག་དང་། ཇི་ལྟར་ལེན་པའི་ཆོ་གའོ། །དང་པོ་ནི། ཐོགས་མེད་བཞེད་པ་ནི། །སྨོན་སེམས་ལེན་ལ་སོ་ཐར་མི་དགོས་ཀྱང་། །ཡང་དག་བླངས་པ་རིགས་བདུན་སྔོན་སོང་ནས། །ཞེས་པ་སྟེ། འདིར་སྨོན་སེམས་ཀྱི་རྟེན་ལ་སོ་ཐར་མི་དགོས་ཀྱང་། འཇུག་སྡོམ་མ་ཐོབ་པ་འཐོབ་པར་བྱེད་པའི་རྟེན་ལ་སོ་ཐར་རིགས་བདུན་གང་རུང་གི་སྡོམ་པ་སྔོན་དུ་འགྲོ་དགོས་ཏེ། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་སོ། །གཉིས་པ་ནི། བར་ཆད་དྲི་དང་བསླབ་པ་ཁས་ལེན་སོགས། །སྨོན་འཇུག་ཆོ་ག་སོ་སོའི་སྒོ་ནས་ལེན། །ཞེས་པ་སྟེ། མཚན་ཉིད་ནི། བྱང་ཆུབ་སེམས་དཔའི་སྡོམ་པ་གང་ཞིག །སྨོན་སེམས་དང་ཉེས་སྤྱོད་སྡོམ་པའི་ཚུལ་ཁྲིམས་སྔོན་དུ་བཏང་ནས། དེའི་འཇུག་སྡོམ་ལེན་པའི་ཆོ་གས་ཐོབ་པའི་སེམས་པ་རྒྱུན་ཆགས་སོ། །འདི་ལེན་པའི་ཆོ་ག་ལ་སྤྱིར་འཕགས་པ་ཐོགས་མེད་དང་ཙནྡྲ་གོ་མི་སོགས་ཀྱི་གཞུང་དུ་སྨོན་སེམས་ཟུར་དུ་ལེན་པའི་འགྲོས་མི་གསལ་ནའང་། ཇོ་བོ་རྗེས་མཛད་པའི་ཆོ་གར་འཇུག་སྡོམ་གྱི་སྔོན་དུ་སྨོན་སེམས་ལེན་ཆོག་བཤད་ཅིང་། དེ་ཉིད་བྱམས་མགོན་གྱི་མན་ངག་ཏུ་ཡོད་པ་ཇོ་བོས་གསལ་བར་མཛད་ཅེས། དམ་པ་རྣམས་གསུངས་པའི་ཕྱིར། དོན་ལ་ཐོགས་མེད་ཀྱི་ཡང་དགོངས་པར་འགྱུར་ཏེ། བྱམས་པ་ནས་ཇོ་བོའི་བར་སྙན་བརྒྱུད་ཀྱི་གདམས་པ་ཡིན་པར་བཤད་པའི་ཕྱིར། དེས་ན་འདིའི་ཆོ་ག་ལ་དོན་གསུམ་སྟེ། རྟེན་ངེས་པར་བྱ་བ། སྦྱོར་བ་རྗེས་སུ་བསྒྲུབ་པ། རང་བཞིན་གཏན་ལ་དབབ་པའོ། །དང་པོ་ནི། སྔར་ལྟར་མཐའ་གཉིས་ཀྱི་ཞེན་པ་བཀག་ནས་བྱང་སེམས་ལ་སྤྲོ་བ་བསྐྱེད་པའོ། །གཉིས་པ་ལ། སྨོན་པ་དང་། འཇུག་པའོ། །དང་པོ་ལ་སྦྱོར་དངོས་རྗེས་གསུམ་ལས། སྦྱོར་བ་ནི། ཡུལ་ཁྱད་པར་ཅན་ལ་མཎྜལ་ཕུལ་ནས་གསོལ་འདེབས་དང་། རྟེན་ཁྱད་པར་ཅན་ལ་སྐྱབས་འགྲོ་བྱས་ནས། ཐབས་ཁྱད་པར་ཅན་ཚོགས་བསག་པ་ལ་སྡོམ་པ་ཉི་ཤུ་པར། ཕྱོགས་བཅུའི་སངས་རྒྱས་ཐམས་ཅད་ལ། །གུས་པས་ཕྱག་འཚལ་ཅི་ནུས་མཆོད། །ཅེས་པས་ཕྱག་མཆོད་ཙམ་གྱིས་ཆོག་པར་བཞེད་པ་སྣང་ཡང་། ཕྱག་ལེན་ལ་ཇོ་བོའི་རྗེས་སུ་འབྲང་ནས་ཡན་ལག་བདུན་པ་ཚང་བར་མཛད་དོ། །དངོས་གཞི་ལ། རང་སྟོབས་རིགས་སད་པ། གཞན་སྟོབས་རྫོགས་བྱང་གི་ཕན་ཡོན་མཐོང་བ་ལ་སོགས་པ། སྦྱོར་བའི་སྟོབས་འདུ་ཤེས་གསུམ་བསྐྱེད་དེ། ཕྱོགས་བཅུ་ན་ཞེས་སོགས་ཀྱི་དགོངས་གསོལ་སྔོན་དུ་འགྲོ་བས། བདག་མིང་འདི་ཞེས་བགྱི་བ་སྐྱེ་བ་འདི་དང་། ཞེས་པ་ནས། མྱ་ངན་ལས་འདའ་བར་བགྱིའོ། །ཞེས་པའི་བར་ལན་གསུམ་བཟླས་པས་བླང་ངོ་། །རྗེས་སྤྲོ་བ་བསྐྱེད་པ། བསླབ་བྱ་བསྟན་པ། བཏང་རག་བཏང་བ་རྣམས་སོ། །གཉིས་པ་འཇུག་སྡོམ་ནི། སོ་ཐར་རིགས་བདུན་གང་རུང་བླངས་ནས་བྱང་སེམས་ཀྱི་སྡེ་སྣོད་ལ་སྦྱངས་པས་དད་ཅིང་སྒྲུབ་པར་ནུས་པ་ན་དེ་བླང་བའི་ཆོ་ག་ལ་སྦྱོར་དངོས་རྗེས་གསུམ་ལས། སྦྱོར་བ་ནི་གསོལ་བ་གདབ་པ། བསམ་པ་བརྟག་པ། མྱུར་དུ་སྤྱོན་པར་གསོལ་བ་འདེབས་པ། བར་ཆད་དྲི་བ། བསླབ་པའི་གནས་གོ་བར་བྱས་ནས་སྤྲོ་བ་དྲི་བ་རྣམས་སོ། །དངོས་གཞི་ནི། སློབ་དཔོན་གྱིས། རིགས་ཀྱི་བུ་མིང་འདི་ཞེས་བྱ་བ་ཁྱོད། ཅེས་པ་ནས། སེམས་ཅན་གྱི་དོན་བྱེད་པའི་ཚུལ་ཁྲིམས་ནོད་དམ། ཞེས་ལན་གསུམ་བརྗོད་ཅིང་། སློབ་མས་ཀྱང་ནོད་ལགས་ཞེས་ཁས་བླངས་པས་སྡོམ་པ་ཐོབ་པར་འགྱུར་རོ། །རྗེས་ཆོག་ལ། མཁྱེན་པར་གསོལ་བ། ཕན་ཡོན་བསྟན་པ། གསང་བར་གདམས་པ། བསླབ་བྱ་བསྟན་པ། བཏང་རག་འབུལ་བ་རྣམས་སོ། །གསུམ་པ་ནི། སྨོན་འཇུག་གི་རྒྱུ་དང་། ངོ་བོ་དང་། དབྱེ་བ་དང་། ཕན་ཡོན་རྣམས་ཤེས་པར་བྱ་བ་སྟེ། དེ་ལས་ཆོ་གའི་སྐབས་འདིར་ཕན་ཡོན་བརྗོད་པ་ཙམ་ཞིག་མཛད་དོ། །

གསུམ་པ་ནི། རྒྱལ་བའི་རྟེན་ལའང་རུང་བར་སྲོལ་གཉིས་མཐུན། །ཞེས་པ་སྟེ། སྤྱིར་བླ་མ་ལས་བླངས་ན་ངོ་ཚ་ཁྲེལ་ཡོད་ཀྱི་རྟེན་དུ་འགྱུར་བ་ལ་སོགས་པའི་དགོས་པ་ཡོད་མོད། གལ་ཏེ་བླ་མ་མཚན་ཉིད་དང་ལྡན་པ་མ་རྙེད་ན། སྲོལ་གཉིས་ཀ་དགོངས་པ་མཐུན་པར་རྒྱལ་བའི་སྐུ་གཟུགས་ཀྱི་རྟེན་གྱི་དྲུང་དུ་བདག་ཉིད་ཀྱིས་བླངས་ཀྱང་རུང་བར་བཤད་ཀྱང་། རང་སྟོབས་ཀྱི་ནུས་པ་ཡོད་ན་འཇམ་དཔལ་ཞིང་གི་ཡོན་ཏན་བཀོད་པའི་མདོ་ལས་གསུངས་པ་ལྟར། རྒྱལ་བ་སྲས་བཅས་མདུན་གྱི་ནམ་མཁར་བློས་བསམ་པ་ལས་ལེན་པར་གནང་སྟེ། ལམ་སྒྲོན་ལས། གལ་ཏེ་བླ་མ་མ་རྙེད་ན། །དེ་ལ་གཞན་སྡོམ་ནོད་པ་ཡིས། །ཆོ་ག་ཡང་དག་བཤད་པར་བྱ། །དེ་ལ་སྔོན་ཚེ་འཇམ་པའི་དཔལ། །ཨམྦ་རཱ་ཛར་གྱུར་པ་ཡིས། །ཇི་ལྟར་བྱང་ཆུབ་ཐུགས་བསྐྱེད་པ། །འཇམ་དཔལ་གྱི་ནི་སངས་རྒྱས་ཞིང་། །རྒྱན་གྱི་མདོ་ལས་བཤད་པ་ལྟར། །དེ་བཞིན་འདིར་ནི་རབ་གསལ་བྲི། ། མགོན་པོ་རྣམས་ཀྱི་སྤྱན་སྔ་རུ། །རྫོགས་པའི་བྱང ་ཆུབ་སེམས་བསྐྱེད་ཅིང་། །འགྲོ་བ་ཐམས་ཅད་མགྲོན་དུ་གཉེར། །དེ་དག་འཁོར་བ་ལས་བསྒྲལ་ཏོ། །གནོད་སེམས་ཁྲོ་བའི་སེམས་ཉིད་དང་། །སེར་སྣ་དང་ནི་ཕྲག་དོག་ཉིད། །དེང་ནས་བཟུང་སྟེ་བྱང་ཆུབ་མཆོག །ཐོབ་ཀྱི་བར་དུ་མི་བྱའོ། །ཚངས་པར་སྤྱོད་པ་སྤྱད་བྱ་ཞིང་། །སྡིག་དང་འདོད་པ་སྤང་བར་བྱ། །ཚུལ་ཁྲིམས་སྡོམ་པ་ལ་དགའ་ཞིང་། །སངས་རྒྱས་རྗེས་སུ་བསླབ་པར་བྱ། །བདག་ཉིད་མྱུར་བའི་ཚུལ་གྱིས་ནི། །བྱང་ཆུབ་ཐོབ་པར་མི་སྤྲོ་ཞིང་། །སེམས་ཅན་གཅིག་གི་ཕྱིར་ཡང་ནི། །ཕྱི་མའི་མུ་མཐར་གནས་པར་བགྱི། །ཚད་མེད་བསམ་གྱིས་མི་ཁྱབ་པའི། །ཞིང་དག་རྣམ་པར་སྦྱང་བར་བྱ། །མིང་ནས་བཟུང་བ་བྱས་པ་དང་། །ཕྱོགས་བཅུ་དག་ཏུ་རྣམ་པར་གནས། །བདག་གི་ལུས་དང་ངག་གི་ལས། །ཐམས་ཅད་དུ་ནི་དག་པར་བྱ། །ཡིད་ཀྱི་ལུས་ཀྱང་དག་བྱ་སྟེ། །མི་དགེའི་ལས་རྣམས་མི་བྱའོ། །ཞེས་གསུངས་པ་ལྟ་བུའི་ཚུལ་གྱིས་སེམས་བསྐྱེད་བླང་བར་བྱའོ། །

བཞི་པ་ནི། ཐོབ་མཚམས་བརྗོད་པ་གསུམ་གྱི་མཐའ་ལའོ། །ཞེས་པ་སྟེ། སྡོམ་པ་ཐོབ་མཚམས་ལ་རྒྱ་མཚོའི་སྤྲིན་ལས། དེ་ལ་བརྗོད་པ་དང་པོ་དང་གཉིས་པ་དང་གསུམ་པ་དག་གིས་སྨོན་པ་དང་འཇུག་པ་དང་གཉིས་ཀ་ནས་བསྟན་པའི་མཆོག་ཉིད་ཐོབ་པར་འགྱུར་ཏེ། ཞེས་གསུངས་པའང་སྣང་མོད། འོན་ཀྱང་སྨོན་འཇུག་སོ་སོར་ལེན་པའི་ཆོ་ག་ལ་དེ་འདྲ་མི་རུང་བའི་ཕྱིར། དེས་ན་རང་གི་རྗེ་བླ་མས་མཛད་པའི་ཆོ་ག་རྒྱལ་སྲས་ལམ་བཟང་དུ་འདིར་གསུངས་པ་དང་མཐུན་པར་འབྱུང་བ་ཉིད་ལེགས་པས། སྲོལ་གཉིས་གང་ཡིན་ཡང་རུང་སྟེ། དངོས་གཞི་འབོགས་ཆོག་ལན་གསུམ་བཟླས་པའི་བརྗོད་པ་ཐ་མ་ལ་ཐོབ་པ་ཡིན་ནོ། །

གཉིས་པ་ནི། དོན་དམ་སེམས་བསྐྱེད་ཆོ་གས་བླང་ཐོབ་པ། །གསང་སྔགས་ལུགས་ཡིན་མདོ་ལས་བཤད་སྲིད་ན། །དམ་བཅའ་ཉིད་ཡིན་སྒོམ་པའི་སྟོབས་ལས་སྐྱེ། །ཞེས་པ་སྟེ། འདི་ལ་དོན་དམ་སེམས་བསྐྱེད་ངོས་བཟུང་བ་དང་། དེ་བསྐྱེད་ཚུལ་ལ་དཔྱད་པའོ། །དང་པོ་ལ། མཚན་ཉིད་ནི། རྣམ་པར་མི་རྟོག་པའི་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་གང་ཞིག །བྱང་འཕགས་ཀྱི་མཉམ་བཞག་གི་ངོ་བོར་གྱུར་བའི་དང་སངས་རྒྱས་སའི་མཉམ་རྗེས་དབྱེར་མེད་ཀྱི་ངོ་བོར་གྱུར་པའི་སེམས་བསྐྱེད། དབྱེ་ན་ཐེག་ཆེན་མདོ་སྔགས་ཀྱི་ཁྱད་པར་ལས་ངོས་འཛིན་མི་འདྲ་བ་གཉིས་བྱུང་སྟེ། ཕར་ཕྱིན་ཐེག་པའི་སྐབས་འདིར་དོན་དམ་ཆོས་དབྱིངས་དང་། སེམས་བསྐྱེད་པ་ནི་དེ་མངོན་སུམ་དུ་རྟོགས་པའི་ཡེ་ཤེས་ལ་བཤད་ཅིང་། འདི་ལ་མདོ་སྡེ་རྒྱན་ལས་ཡོངས་འཛིན་དང་རྗེས་སྒྲུབ་དང་རྟོགས་པ་སྟེ་དམ་པ་གསུམ་གྱིས་ཟིན་པའི་སེམས་བསྐྱེད་ཅེས་བཤད་དེ། ཚོགས་སྦྱོར་གྱི་གནས་སྐབས་སུ་བདག་རྐྱེན་རྫོགས་པའི་སངས་རྒྱས་མཉེས་པར་བྱས་ཤིང་། རྒྱུ་བསོད་ནམས་དང་ཡེ་ཤེས་ཀྱི་ཚོགས་བསྐལ་པ་གྲངས་མེད་གཅིག་ཏུ་བསགས་པའི་སྟོབས་ཀྱིས། ས་དང་པོར་ཆོས་ཀྱི་བདག་མེད་མངོན་སུམ་དུ་རྟོགས་པའིི་ཡེ་ཤེས་རང་གི་ངང་གིས་སྐྱེས་པ་ལ་དོན་དམ་སེམས་བསྐྱེད་དུ་འཇོག་པའི་ཕྱིར་ཏེ། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་དང་། མདོ་སྡེ་རྒྱན་གྱི་འགྲེལ་པ་ལས་ཀྱང་། དོན་དམ་པའི་སེམས་བསྐྱེད་པ་དེ་ཡང་ས་དང་པོ་རབ་ཏུ་དགའ་བ་ལ་ཡིན་པས། ཞེས་ས་མཚམས་ཀྱང་གསུངས་སོ། །སྔགས་ཀྱི་ཐེག་པར་ནི། དོན་དམ་བྱང་ཆུབ་ཀྱི་སེམས་ཞེས་པ་གཟུང་འཛིན་གཉིས་མེད་ཀྱི་ཡེ་ཤེས་ལ་བཞེད་དེ། སྒྱུ་དྲྭ་ལས་ཨེ་མ་མཚར་ལྔ་དང་། གསང་འདུས་རྩ་རྒྱུད་ལས། དངོས་པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་སྤངས་པ། །ཆོས་བདག་མེད་པར་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་སོ། །གཉིས་པ་ནི། སྒྱུ་དྲྭ་དང་། སྣམ་སྣང་མངོན་བྱང་དང་། བྱང་ཆུབ་སེམས་འགྲེལ་དང་། རིམ་པ་ལྔ་པ་སོགས་ལས་དོན་དམ་སེམས་བསྐྱེད་བླང་བའི་ཆོ་ག་བཤད་པ་རྣམས་གསང་སྔགས་ལུགས་ཡིན་པས། འབྲས་བུ་ཡེ་ཤེས་ཀྱི་རྣམ་པ་ལམ་བྱེད་དུ་བྱས་ནས་དེའི་རྟེན་འབྲེལ་སྒྲིག་བྱེད་ཙམ་དུ་རྗེས་མཐུན་ཀུན་རྫོབ་ཀྱི་རྣམ་པས་བསྐྱེད་པ་སྟེ། བྱང་ཆུབ་སེམས་འགྲེལ་ལས། བྱང་ཆུབ་སེམས་དཔའ་གསང་སྔགས་ཀྱི་སྒོར་སྤྱད་པ་སྤྱོད་པ་རྣམས་ཀྱིས་དེ་ལྟར་ཀུན་རྫོབ་ཀྱི་རྣམ་པས་བྱང་ཆུབ་ཀྱི་སེམས་སྨོན་པའི་རང་བཞིན་ཅན་བསྐྱེད་ནས། དོན་དམ་པའི་བྱང་ཆུབ་ཀྱི་སེམས་བསྒོམས་པའི་སྟོབས་ཀྱིས་བསྐྱེད་པར་བྱ་བ་ཡིན་ཏེ། ཞེས་པས་སྔགས་ལུགས་ཀྱི་ཆོ་ག་དེ་ཡང་སྒོམ་བྱུང་ལ་མ་ལྟོས་པར་ཆོ་ག་རྐྱང་པས་བསྐྱེད་ནུས་པ་མ་ཡིན་པའི་ཕྱིར་མཚན་ཉིད་པ་མ་ཡིན་ལ། གལ་ཏེ་སྤང་སྐོང་ཕྱག་བརྒྱ་པར། དོན་དམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱའོ། །ཞེས་གསུངས་པ་ལྟར་མདོ་ལས་བཤད་པ་སྲིད་ནའང་། དེ་འདྲ་དེ་དམ་བཅའ་ཙམ་དུ་ཟད་ཀྱི། ཆོ་གའི་སྒོ་ནས་བསྐྱེད་པ་མ་ཡིན་ཏེ། གཞན་དུ་ན་བརྡ་ལས་བྱུང་བའི་སེམས་བསྐྱེད་དུ་ཐལ་བར་འགྱུར་རོ། །དེ་ལྟར་ཡང་རབ་དབྱེ་ལས། དོན་དམ་སེམས་བསྐྱེད་ཅེས་བྱ་བ། །སྒོམ་པའི་སྟོབས་ཀྱིས་སྐྱེ་མོད་ཀྱི། །ཆོ་གའི་སྒོ་ནས་འདི་མི་སྐྱེ། །གལ་ཏེ་ཆོ་གས་སྐྱེ་ན་ནི། །བརྡ་ལས་བྱུང་བའི་སེམས་བསྐྱེད་འགྱུར། །འདི་ནི་དོན་དམ་ཆོས་ཉིད་ཀྱིས། །ཐོབ་པ་ཞེས་བྱའི་སེམས་བསྐྱེད་ཡིན། །ཞེས་དང་། དོན་དམ་སེམས་བསྐྱེད་བྱའོ་ཞེས། །གལ་ཏེ་རྒྱ་ལ་གསུངས་སྲིད་ཀྱང་། །དམ་བཅའ་ཡིན་གྱི་ཆོ་ག་མིན། །ཞེས་སོ། །དེས་ན་དོན་དམ་སེམས་བསྐྱེད་མཚན་ཉིད་པ་ནི་སྒོམ་པའི་སྟོབས་ལས་ངང་གིས་སྐྱེ་བ་ཡིན་ཏེ། དགོངས་པ་ངེས་འགྲེལ་ལས། དོན་དམ་པ་བྱང་ཆུབ་ཀྱི་སེམས་དེ་ནི་འཇིག་རྟེན་ལས་འདས་པ། སྤྲོས་པ་མཐའ་དག་དང་བྲལ་བ། ཤིན་ཏུ་གསལ་བ། དོན་དམ་པའི་སྤྱོད་ཡུལ། དྲི་མ་མེད་པ། མི་གཡོ་བ། རླུང་མེད་པའི་མར་མེའི་རྒྱུན་བཞིན་དུ་མི་གཡོ་བའོ། །དེ་འགྲུབ་པ་ནི་རྟག་ཏུ་གུས་པས་ཞི་གནས་དང་ལྷག་མཐོང་གི་རྣལ་འབྱོར་གོམས་པ་ལས་འགྱུར་རོ། །ཞེས་ཀ་མ་ལ་ཤཱི་ལས་སྒོམ་རིམ་དུ་དྲངས་པ་ལྟར་རོ། །

བཞི་པ་ཐོབ་པ་མི་ཉམས་པར་བསྲུང་བའི་ཚུལ་ལ། བསྟན་བཤད་བསྡུ་གསུམ་ལས། དང་པོ་མདོར་བསྟན་ནི། བར་དུ་མི་ཉམས་བསྲུང་བའི་ཐབས་བཤད་པ། །བྱང་ཆུབ་སེམས་དཔའི་ཚུལ་ཁྲིམས་གསུམ་ཡིན་ཏེ། །ཉེས་སྤྱོད་སྡོམ་དང་དགེ་བ་ཆོས་སྡུད་དང་། །སེམས་ཅན་དོན་བྱེད། ཅེས་པ་སྟེ། དེ་ལྟར་སྡོམ་པ་ཐོབ་ནས་མི་ཉམས་པར་བསྲུང་དགོས་པས། དེའི་ཐབས་བཤད་པ་ལ། ཇི་ལྟར་བསྲུང་ཚུལ་དང་། གང་བསྲུང་བྱའི་ཚུལ་ཁྲིམས་གཉིས་ལས། དང་པོ་ནི། བསླབ་བཏུས་ལས། བྱང་ཆུབ་སེམས་དཔའི་སྡོམ་པ་ནི། །རྒྱས་པར་ཐེག་པ་ཆེ་ལས་འབྱུང་། །ཞེས་དང་། དགེ་བའི་བཤེས་གཉེན་མི་བཏང་ཞིང་། །མདོ་སྡེ་དག་ལ་རྟག་བལྟ་བས། །ཞེས་པས་བྱང་ཆུབ་སེམས་དཔའི་བསླབ་པའི་གཞི་རྣམས་ཤེས་པར་བྱ་བའི་ཕྱིར། བདག་རྐྱེན་ཐེག་པ་ཆེན་པོའི་དགེ་བའི་བཤེས་གཉེན་མི་གཏོང་བར་གུས་པས་བསྟེན་ཅིང་། དམིགས་པའི་རྐྱེན་སྤྱིར་ཐེག་པ་ཆེན་པོའི་མདོ་སྡེ་རྣམས་དང་ཁྱད་པར་བྱང་ས་དང་བསླབ་བཏུས་སོགས་བྱང་སེམས་ཀྱི་བསླབ་པའི་གནས་རྒྱ་ཆེར་སྟོན་པའི་མདོ་དང་བསྟན་བཅོས་དྲི་མ་མེད་པ་རྣམས་ལ་ཐོས་བསམ་གྱི་སྒོ་ནས་སྒྲོ་འདོགས་བཅད་དེ་མཁས་པར་བྱའོ། །དེ་ལྟར་མཁས་པར་བྱས་པ་དེས་ཀྱང་། ཤེས་པ་ཙམ་དུ་མ་བཞག་པར་རང་ནུས་ཅི་ཡོད་ཀྱིས་འབད་དེ་ཚུལ་བཞིན་དུ་སྒྲུབ་དགོས་ཀྱི། གཞན་དུ་ན་བླང་དོར་གྱི་གནས་ལ་མ་རྨོངས་པར་ཤེས་པ་དོན་མེད་དུ་འགྱུར་པའི་ཕྱིར་རོ། །དེ་ལྟར་ཡང་སྤྱོད་འཇུག་ལས། ལུས་ཀྱིས་འདི་དག་སྤྱད་པར་བྱ། །ཚིག་ཙམ་བརྗོད་པས་ཅི་ཞིག་འགྲུབ། །སྨན་དཔྱད་ཀླགས་པ་ཙམ་གྱིས་ནི། །ནད་པ་དག་ལ་ཕན་འགྱུར་རམ། །ཞེས་གསུངས་པས་ཕྱིར་རོ། །ཇི་ལྟར་བསྲུང་བའི་ཁྱད་པར་ལ་གཉིས་ཏེ། འགལ་རྐྱེན་རང་གཞན་གྱི་སྤྱོད་པ་ཉམས་པའི་རྒྱུ་བདུན་སྤོང་བ་དང་། མཐུན་རྐྱེན་མི་ཉམས་པའི་རྒྱུ་དང་འཕེལ་བའི་རྐྱེན་ལ་བསླབ་པའོ། །དང་པོ་ལ། རང་དོན་ཤེས་རབ་ཀྱི་གེགས་གསུམ་དང་། གཞན་དོན་སྤྱོད་པའི་སྐྱོན་བཞི་སྤོང་བའོ། །དང་པོ་ནི། ཐོས་པ་ལ་མི་མོས། བསམ་པ་ལ་གཡེལ། སྒོམ་པ་ལ་ལྷོད་པ་གསུམ་སྤོང་བའོ། །གཉིས་པ་ནི། སྦྱོར་བ་ལེ་ལོ་ཆེ་བ། སྤྱོད་པ་གཞན་མི་དད་པ་ལ་སྦྱོར་བ། ཀུན་སློང་སྙིང་རྗེ་མེད་པ། བྱེད་ལས་ཕྱིན་ཅི་ལོག་སྒྲུབ་པ་བཞི་སྤོང་བའོ། །གཉིས་པ་ལ། མི་ཉམས་པའི་རྒྱུ་གསུམ་དང་། འཕེལ་བའི་རྐྱེན་དགུ་ལ་བསླབ་པའོ། །དང་པོ་ལ་གསུམ་ལས། དང་པོ་ཚེ་འདིར་མི་ཉམས་པའི་རྒྱུ་ནི། དྲན་པ་གསུམ་སྟེ། སེམས་བསྐྱེད་སྐྱེས་པའི་ཕན་ཡོན། ཉམས་པའི་ཉེས་དམིགས། རྙེད་པར་དཀའ་བ་ཡང་ཡང་དྲན་པར་བྱེད་པའོ། །གཉིས་པ་ཕྱི་མར་མི་ཉམས་པའི་རྒྱུ་ནི། ཕྱིན་ཅི་མ་ལོག་པའི་ཐབས་གསུམ་སྟེ། དུས་གསུམ་དུ་ཡན་ལག་བདུན་པ་བྱེད་པ། རྒྱལ་བ་སྲས་བཅས་ལ་གསོལ་བ་འདེབས་པ། ཆོས་དང་འགལ་བའི་བདུད་ལས་སྤོང་བའོ། །གསུམ་པ་འདི་ཕྱི་གཉིས་ཀར་མི་ཉམས་པའི་རྒྱུ་ནི། གཅེས་པ་ལྔ་སྟེ། བསྒྲུབ་བྱ་སེམས་ཅན་ལ་རང་བས་གཅེས་པ། སྒྲུབ་བྱེད་ཆོས་ལ་ནོར་བས་གཅེས་པ། གཙོ་བོ་བྱང་སེམས་ལ་སྙིང་བས་གཅེས་པ། བདག་རྐྱེན་བཤེས་གཉེན་ལ་ཕ་མ་བས་གཅེས་པ། འཐོབ་བྱ་སངས་རྒྱས་ལ་ལོངས་སྤྱོད་བས་གཅེས་པ་ལྔ་ལ་བསླབ་པར་བྱའོ། །

གཉིས་པ་ལ། དྲན་པ་ལྔ་དང་། བྱ་བ་བཞི་སྟེ། འདུས་བྱས་ཀྱི་གཡོ་བ། སྡུག་བསྔལ་གྱི་མཐའ། ཆོས་ཀྱི་ཕན་ཡོན། སྟོན་པའི་ཆེ་བ། བྱང་སེམས་ཀྱི་ཕན་ཡོན་དྲན་པ་ལྔ་དང་། ཤེས་བཞིན་གྱི་མིག་གིས་བལྟ་བ། བརྩོན་འགྲུས་ཀྱི་རྟ་མཆོག་གིས་འགྲོ་བ། ངེས་འབྱུང་གི་ལྕག་གིས་བསྐུལ་བ། ཐར་པའི་གྲོང་ཁྱེར་ཡིད་ལ་བྱ་བ་བཞིའོ། །མདོར་ན་ཀུན་མཁྱེན་ཆེན་པོས། རྟག་ཏུ་དྲན་དང་ཤེས་བཞིན་བག་ཡོད་ཀྱིས། །མི་དགེ་སྤང་ཞིང་དགེ་ཆོས་རྒྱ་མཚོ་སྒྲུབ། །ཅེས་གསུངས་པ་ལྟར་དྲན་པ་དང་བག་ཡོད་དང་ཤེས་བཞིན་གསུམ་མི་ཉམས་པར་བསྐྱེད་དེ། འཆད་འགྱུར་གྱི་རྩ་བ་དང་ཡན་ལག་གི་ལྟུང་བས་མི་གོས་པར་བྱ་བ་དང་། ཉིན་མཚན་དུས་དྲུག་ཏུ་རྒྱུན་བཤགས་བྱ་ཞིང་སེམས་བསྐྱེད་ཆོ་ག་བཞིན་དུ་བླང་བའམ། ཡང་ན་མཚན་མོ་གཉིད་ཐམས་ཅད་ཐབས་ཤེས་གང་རུང་གི་དགེ་བའི་གཉིད་དུ་བཏང་ནས་ཉིན་པར་གྱི་དུས་ལ་ཆ་དྲུག་ཏུ་བཅད་ནས་དེ་ལྟར་བསླབ་བོ། །འོ་ན་ལས་དང་བོ་པ་རྣམས་ཀྱིས་མདོ་སྡེ་དག་ལས་གསུངས་པའི་བྱང་སེམས་ཀྱི་བསླབ་བྱ་རྣམས་ལས་ཇི་ཙམ་ཞིག་བསླབ་པར་བྱ་ཞེ་ན། ལས་དང་པོ་པས་མགོ་གཏོང་བ་སོགས་ནུས་པ་མེད་བཞིན་དུ་སྒྲུབ་པ། སྟོན་པས་དངོས་སུ་བཀག་པ་ལས་སྤྱད་པས་ལྟུང་བར་བཤད་པ་དང་། མ་བཀག་ཀྱང་ལས་དང་པོ་པའི་སྐབས་སུ་ཉམས་སུ་བླང་མི་རུང་བ་གཉིས་མ་གཏོགས་པ། བྱང་སེམས་ཀྱི་བསླབ་བྱ་ནུས་པའི་ཡུལ་དུ་གྱུར་བ་མཐའ་དག་ལ་བསླབ་དགོས་ཏེ། བསླབ་བཏུས་ལས། མདོར་ན་རང་གི་ནུས་པའི་ཡུལ་མ་ཡིན་པའི་བྱ་བ་རྣམས་ལ་ལྟུང་བ་མེད་དེ། དོན་མེད་པ་ཉིད་ཀྱིས་དེ་ལ་བསླབ་པ་བཅས་པ་མེད་པའི་ཕྱིར་རོ། །གཞན་ལ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་ཉིད་དུ་བཟུང་བ་ཁོ་ནའོ། །རང་གི་ནུས་པའི་ཡུལ་མ་ཡིན་པ་གང་ཞིག་ལ་བརྩོན་པར་བྱེད་ན་ལྟུང་བར་འགྱུར་ཏེ། དེ་ནི་བསམ་མི་དགོས་པར་སྤྱིར་སྡིག་པ་བཤགས་པའི་ཁོངས་སུ་འདུས་པས་དེ་ལས་གྲོལ་བར་འགྱུར་རོ། །དེ་དག་ནི་མདོར་ན་བྱང་ཆུབ་སེམས་དཔའི་བསླབ་པའི་ཁོག་པ་ཡིན་ཏེ། རྒྱས་པར་ནི་བསྐལ་བ་དཔག་ཏུ་མེད་པ་མཐའ་ཡས་པར་བཤད་དུ་ཡོད་དོ། །ཞེས་སོ། །གཉིས་པ་གང་བསྲུང་བའི་ཚུལ་ཁྲིམས་ལ་ལྔ་སྟེ། དབྱེ་གཞི། དབྱེ་ང ོ་། གྲངས་ངེས། གོ་རིམ། བསླབས་པའི་ཕན་ཡོན་ནོ། །དང་པོ་ནི། བྱང་སེམས་ཀྱི་སྡོམ་པ་ཙམ་མོ། །གཉིས་པ་ནི། ཚུལ་ཁྲིམས་གསུམ་སྟེ། དཀོན་བརྩེགས་ལས། འོད་སྲུང་། དེ་ལ་བྱང་ཆུབ་སེམས་དཔའི་ཚུལ་ཁྲིམས་ནི་རྣམ་པ་གསུམ་སྟེ། སྡོམ་པའི་ཚུལ་ཁྲིམས་དང་། དགེ་བའི་ཆོས་རྣམས་སྡུད་པའི་ཚུལ་ཁྲིམས་དང་། སེམས་ཅན་གྱི་དོན་སྒྲུབ་པའི་ཚུལ་ཁྲིམས་སོ། །ཞེས་གསུངས། དེ་གསུམ་ཡང་ངོ་བོ་གཅིག་ལ་ལྡོག་པས་ཕྱེ་བ་ཙམ་དུ་ཟད་དེ། དཔེར་ན་ནོར་བུ་གཅིག་ཉིད། མུན་པ་སེལ་བ། འདོད་དགུའི་ནོར་སྡུད་པ། རིམས་ནད་ལ་ཕན་པ་བཞིན་ནོ། །གསུམ་པ་ནི། བྱང་ཆུབ་སེམས་དཔའ་རྣམས་ཀྱི་བྱ་བ་ལ་རང་གཞན་གྱི་དོན་གཉིས་སུ་ངེས་པ་ལས། སེམས་ཅན་དོན་བྱེད་ཀྱིས་གཞན་རྒྱུད་དང་། སྡོམ་སྡུད་གཉིས་ཀྱིས་རང་རྒྱུད་སྨིན་པར་བྱེད་པའི་ཕྱིར། གསུམ་དུ་གྲངས་ངེས་སོ། །བཞི་པ་ནི། སྡོམ་པའི་ཚུལ་ཁྲིམས་དང་པོར་སྨོས་ཏེ། ཚུལ་ཁྲིམས་གཞན་གཉིས་ཀྱི་གཞི་རྟེན་དུ་འགྲོ་བའི་ཕྱིར། དེའི་འོག་ཏུ་དགེ་བ་ཆོས་སྡུད་དང་སེམས་ཅན་དོན་བྱེད་གཉིས་རིམ་པར་བཞག་སྟེ། རང་རྒྱུད་ལ་དགེ་ཆོས་མ་བསྡུས་པར་སེམས་ཅན་གཞན་གྱི་དོན་བྱེད་མི་ནུས་པའི་ཕྱིར་རོ། །ལྔ་པ་ནི། ཚུལ་ཁྲིམས་འདི་གསུམ་ལ་ལེགས་པར་བསླབས་པས་ནམ་ཞིག་འཚང་རྒྱ་བའི་ཚེ། སྤངས་རྟོགས་ཕྲིན་ལས་དང་བཅས་པ་འཐོབ་པར་བྱེད་དེ། སྡོམ་པའི་ཚུལ་ཁྲིམས་ཀྱིས་སྤངས་པ་ཕུན་ཚོགས། དགེ་བ་ཆོས་སྡུད་ཀྱིས་རྟོགས་པ་ཕུན་ཚོགས། སེམས་ཅན་དོན་བྱེད་ཀྱིས་ཕྲིན་ལས་ཕུན་ཚོགས་འཐོབ་པའི་རྒྱུར་འགྲོ་བ་ཡིན་ནོ། །

གཉིས་པ་རྒྱས་པར་བཤད་འདོད་ནས། གསུམ་ལས་དང་པོ་ནི། །ཞེས་སྨོས་ཏེ། འདི་ལ་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་གསུམ་དུ་ཡོད་པ་ལས། དང་པོ་ཉེས་སྤྱོད་སྡོམ་པའི་ཚུལ་ཁྲིམས་ལ། མཚན་ཉིད་དང་། དབྱེ་བ་གཉིས། དང་པོ་ནི། བྱང་སེམས་ཀྱི་སྤང་བྱ་ཉེས་སྤྱོད་ཆ་དང་བཅས་པ་གཞན་དོན་དུ་སྤོང་བའི་སེམས་པ་རྒྱུན་ཆགས་པའོ། །

གཉིས་པ་ལ། སྲོལ་གཉིས་ཀྱི་ལུགས་སོ་སོར་བཤད་པ་དང་། དེ་གཉིས་ཀྱི་ཁྱད་པར་ལ་དཔྱད་པའོ། །དང་པོ་ལ། ནམ་མཁའི་སྙིང་པོ་དང་ཐབས་ལ་མཁས་པའི་མདོའི་རྗེས་སུ་འབྲང་བ་ཀླུ་སྒྲུབ་ལུགས་ཞི་བ་ལྷས་བསླབ་བཏུས་སུ་ཕྱེ་བ་དང་། ཐོགས་མེད་ཀྱི་བྱང་སའི་ལུགས་ཙནྡྲ་གོ་མིས་སྡོམ་པ་ཉི་ཤུ་པར་ཕྱེ་བའོ། །དང་པོ་ལ། རྩ་ལྟུང་གི་རྣམ་བཞག་བསྟན་པ་དང་། ཡན་ལག་གི་ཉེས་པ་གཞན་དུ་ཞལ་འཕངས་པའོ། །དང་པོ་ལ། རྩ་ལྟུང་བཅོ་བརྒྱད་སོ་སོའི་དབྱེ་བ། རྟེན་དང་ལྟུང་བའི་དབྱེ་བསྡུ། ཐུན་མོང་སྨོན་འཇུག་སྤངས་པ་རྩ་ལྟུང་དུ་བསྟན་པའོ། །དང་པོ་ལ་གསུམ་སྟེ། རྒྱལ་པོ་ལ་ངེས་པ་ལྔ། བློན་པོ་ལ་ངེས་པ་ལྔ། ཕལ་བ་ལ་ངེས་པ་བརྒྱད་དོ། །དང་པོ་ནི། དཀོན་མཆོག་དཀོར་འཕྲོག་དང་ནི་ཆོས་སྤོང་ལས། །ཚུལ་ལྡན་ཚུལ་འཆལ་ཁྲིམས་གཅོད་བསླབ་འབེབས་སོགས། །མཚམས་མེད་ལས་བྱེད་ལོག་ལྟ་ལྔ་རྒྱལ་པོ། །ཞེས་པ་སྟེ། རྩ་ལྟུང་དང་པོ་དཀོན་མཆོག་གི་དཀོར་འཕྲོག་པ་ནི། སངས་རྒྱས་ཀྱི་མཆོད་རྟེན་ནམ་སྐུ་གཟུགས་ཀྱི་རྫས་དང་། དམ་པའི་ཆོས་ཀྱི་གླེགས་བམ་དང་ཆོས་སྨྲ་བའི་ཆ་རྐྱེན། དགེ་འདུན་རིས་སུ་ཆད་པའམ་མ་ཆད་པ་ལ་བསྔོས་ཤིང་འདུ་བའི་རྫས་ཞིང་ལ་སོགས་པ་གང་ཡང་རུང་བ། རིན་ཐང་མ་ཚང་ཡང་འདྲ་སྟེ། ཀུན་སློང་དྲག་པོས་འཕྲོག་པ་དང་རྐུ་བར་བྱེད་དམ། གཞན་བྱེད་དུ་བཅུག་ཀྱང་ཕམ་པར་འགྱུར་ཞིང་། དགེ་འདུན་ལས་རྐུ་ན་བདག་ཉིད་དེའི་གྲངས་སུ་གཏོགས་པར་ཤེས་ན་ལྟུང་བ་མེད་དོ། །རྩ་ལྟུང་གཉིས་པ་དམ་ཆོས་སྤོང་བ་ནི། ཐེག་པ་གསུམ་གང་ཡང་རུང་བའི་ལུང་གི་ཆོས་སྡེ་སྣོད་གསུམ་དང་། རྟོགས་པའི་ཆོས་བསླབ་པ་གསུམ་ལས་གང་རུང་དུ་གཏོགས་པའི་དགེ་བ་རྣམས་སྟོན་པའི་བཀའ་དང་ཐར་པ་ཐོབ་པའི་ཐབས་མ་ཡིན་ནོ་ཞེས་རང་གིས་སྤོང་བར་བྱེད་དམ་གཞན་སྤོང་དུ་འཇུག་པའོ། །རྩ་ལྟུང་གསུམ་པ་དགེ་སྦྱོང་ལ་ཆད་པས་གཅོད་པ་ནི། བསླབ་པ་བཟུང་མ་བཟུང་གི་རབ་བྱུང་ངམ། ཚུལ་ཁྲིམས་འཆལ་མ་འཆལ་གྱི་དགེ་སློང་གང་ཡིན་ཡང་རུང་སྟེ་རབ་བྱུང་གི་ཆ་ལུགས་འཛིན་པ་ལ། ཀུན་སློང་ཞེ་སྡང་བས། དེའི་ངུར་སྨྲིག་གི་གོས་འཕྲོག་གམ། བརྡེག་གམ། བཙོན་དུ་འཇུག་གམ། ཁྱིམ་སར་འབེབས་སམ། གསོད་པར་བྱེད་པ་ལས་གང་རུང་རེ་རེའམ་མང་དུ་བྱས་སམ་བྱེད་དུ་བཅུག་པའོ། །རྩ་ལྟུང་བཞི་པ་མཚམས་མེད་ལྔ་བྱེད་པ་ནི། ཕ་མ་དགྲ་བཅོམ་གསུམ་གསོད་པ། དགེ་འདུན་གྱི་དབྱེན་བྱེད་པ། སངས་རྒྱས་ལ་ངན་སེམས་ཀྱིས་ཁྲག་འབྱིན་པ་སྟེ་མཚམས་མེད་པའི་ལས་ལྔ་ལས་གང་ཡང་རུང་བ་བྱེད་པའོ། །རྩ་ལྟུང་ལྔ་པ་ལོག་ལྟ་འཛིན་པ་ནི། ལས་རྒྱུ་འབྲས་མེད་ཅེས་ལོག་པར་ལྟ་བས་མི་དགེ་བ་བཅུ་ལས་གང་ཡང་རུང་བ་ཞིག་བྱེད་དམ་བྱེད་དུ་བཅུག་པ་སྟེ། འདི་ནི་སེམས་ཀྱི་ལས་ཡིན་པས་སྐྱེས་ཙམ་ཉིད་ནས་དགེ་རྩ་ཆད་པས་ལྟུང་བར་འགྱུར་མོད། མི་དགེ་བའི་ལས་ལ་སྤྱོད་པའི་ཡན་ལག་གཞན་ཚང་ན་ཤིན་ཏུའང་ལྕི་བར་འགྱུར་རོ། །དེ་དག་ཀྱང་བསླབ་བཏུས་ལས། དཀོན་མཆོག་གསུམ་གྱི་དཀོར་འཕྲོག་པ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་ཐུབ་པས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལའང་། །ངུར་སྨྲིག་འཕྲོག་དང་རྡེག་པ་དང་། །བཙོན་རར་འཇུག་པར་བྱེད་པ་དང་། །རབ་ཏུ་བྱུང་བ་འབེབས་པ་དང་། །མཚམས་མེད་ལྔ་བོ་བྱེད་པ་དང་། །ལོག་པར་ལྟ་བ་འཛིན་པ་དང་། །ཞེས་སོ། །གཉིས་པ་ནི། གྲོང་ལྗོངས་གྲོང་ཁྱེར་གྲོང་བརྡལ་ཡུལ་འཁོར་རྣམས། །འཇོམས་པར་བྱེད་པའང་བློན་པོར་ངེས་པ་ལྔ། །ཞེས་པ་སྟེ། གྲོང་ནི་ཁྱིམ་གཅིག་པ་ལ་སོགས་པ་དང་། ལྗོངས་ནི་མི་རིགས་བཞི་གནས་པའི་ཕྱོགས་དང་། གྲོང་ཁྱེར་ནི་བཟོ་སྣ་བཅོ་བརྒྱད་ཡོད་པའི་གནས་དང་། གྲོང་བརྡལ་ནི་ཚོང་བ་མང་པོ་འདུ་བའི་གནས་དང་། ཡུལ་འཁོར་ནི་ཙམ་པ་ཀ་སོགས་ཡུལ་ཆེན་པོ་རྣམས་ལས་གང་ཡང་རུང་བ་ཞེ་སྡང་གིས་མེ་ལ་སོགས་པས་འཇོམས་པར་བྱེད་པའོ། །འང་གི་སྒྲ་ནི་སྡུད་པར་བྱེད་པ་སྟེ། ལོག་ལྟ་དོར་བའི་སྔར་གྱི་རྩ་ལྟུང་དང་པོ་བཞི་དང་། དེའི་སྟེང་དུ་གྲོང་སོགས་འཇོམས་པ་ལྔ་པོ་གཅིག་ཏུ་བགྲངས་པའང་རྩ་ལྟུང་ཡིན་པས་བློན་པོར་ངེས་པ་ལྔ་སྟེ། དེ་ལས་གྲོང་ལ་སོགས་པ་འཇིག་པ་ཡང་། །རྩ་བའི་ལྟུང་བར་རྒྱལ་བས་གསུངས། །ཞེས་སོ། །གསུམ་པ་ནི། མ་སྦྱངས་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་ལྡོག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པས་ཆགས་སོགས་མི་ཟློག་པས། །དེ་ཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་སྟིའི་ཆེད་དུ་བདག་འཚོང་དང་། །དགེ་སློང་ཆད་པས་གཅོད་འཇུག་སུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་བྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །ཅེས་པ་སྟེ། ལས་དང་པོ་པའི་རྩ་ལྟུང་ལ་བརྒྱད་ལས། །དང་པོ་ནི། བློ་མ་སྦྱངས་བའི་སེམས་ཅད་ལ་སྣོད་མ་བརྟགས་པར་ཟབ་མོ་སྟོང་པ་ཉིད་བསྟན་པས་སྐྲག་ནས་བྱང་ཆུབ་ཀྱི་སེམས་བཏང་སྟེ་ཉན་རང་གི་བྱང་ཆུབ་ཏུ་སྨོན་ན་སྟོན་པ་པོ་ལ་ལྟུང་བར་འགྱུར་ཞིང་། གལ་ཏེ་ཡུལ་ཡང་འཇུག་སྡོམ་དང་ལྡན་ན་དེ་ལའང་ལྟུང་བ་འབྱུང་ངོ་། །ལྟུང་བ་གཉིས་པ་ནི། སངས་རྒྱས་སྒྲུབ་པའི་ལམ་དུ་ཞུགས་པ་ལ་དེར་ཤེས་བཞིན་དུ་ཁྱོད་ཀྱིས་རྒྱུ་ཕྱིན་དྲུག་ལ་སྤྱོད་པ་དང་འབྲས་བུ་སངས་རྒྱས་ཐོབ་པར་མི་ནུས་པས་ཉན་ཐོས་སམ་རང་རྒྱལ་དུ་སེམས་སྐྱེད་ཅིག་དང་། དེས་ཁྱོད་འཁོར་བ་ལས་ངེས་པར་འབྱུང་བར་འགྱུར་རོ་ཞེས་རྫོགས་བྱང་ལས་ཕྱིར་ལྡོག་པར་བྱེད་པའོ། །ལྟུང་བ་གསུམ་པ་ནི། ཉན་ཐོས་ཀྱི་རིགས་ཅན་སོ་སོ་ཐར་པ་ལ་སློབ་པའམ། རབ་ཏུ་བྱུང་མ་ཟིན་ཀྱང་སློབ་པར་འདོད་པ་དག་ལ། དགོས་པ་ཁྱད་པར་ཅན་མེད་པར་ཁྱོད་སོ་ཐར་ལ་བསླབས་པས་ཅི་ཞིག་བྱ་སྟེ། རྫོགས་བྱང་དུ་སེམས་སྐྱེད་ལ་ཐེག་པ་ཆེན་པོ་ལྷོགས་ཤིག་དང་། དེས་ཉེས་པར་བྱས་པའི་ལས་རྣམས་བྱང་ཆུབ་ཀྱི་སེམས་ཀྱི་མཐུས་འཇོམས་སོ་ཞེས་ཐེག་ཆེན་ལ་སློབ་ཏུ་འཇུག་པའོ། །ལྟུང་བ་བཞི་པ་ནི། ཉན་ཐོས་ཀྱི་ཐེག་པས་ཆགས་སོགས་ཉོན་མོངས་པ་སྤོང་མི་ནུས་པས་ཐེག་ཆེན་ཉིད་ལ་སློབས་ཤིག །ཅེས་ཉན་ཐོས་ལ་ཐར་ལམ་མེད་པར་རང་འཛིན་ཅིང་། དགོས་པ་ཁྱད་པར་ཅན་མེད་པར་གཞན་ཡང་འཛིན་དུ་འཇུག་པའོ། །ལྟུང་བ་ལྔ་པ་ནི། རྙེད་བཀུར་གྱི་ཕྱིར་རྙེད་བཀུར་ཅན་གྱི་བྱང་སེམས་གཞན་ལ་ཕྲག་དོག་གིས་དེའི་སྐྱོན་བདེན་པའམ་རྫུན་པ་གང་རུང་བརྗོད་པས་སྨོད་ཅིང་། བདག་ཉིད་ལ་མི་ཆོས་བླ་མའི་ཡོན་ཏན་མེད་ཀྱང་ཡོད་པར་བསྒྲགས་པ་གཞན་གྱིས་གོ་བའོ། །ལྟུང་བ་དྲུག་པ་ནི་རྙེད་བཀུར་གྱི་ཕྱིར་མ་རྟོགས་བཞིན་དུ་བདག་གིས་ཆོས་ཟབ་མོ་སྟོང་པ་ཉིད་མངོན་སུམ་དུ་རྟོགས་སོ་ཞེས་མི་ཆོས་བླ་མའི་རྫུན་ལོག་པར་སྨྲས་པ་གཞན་གྱིས་གོ་བའོ། །ལྟུང་བ་བདུན་པ་ནི། རྒྱལ་རིགས་ལྟ་བུ་དབང་པོ་ཆེ་དང་། ཆོས་འདི་པའི་དགེ་སྦྱོང་ཕྲ་མས་ཕྱེ་ནས། དབང་པོ་ཆེའི་ཕྱོགས་ལ་བརྟེན་ཏེ། དགེ་སྦྱོང་ལ་ནོར་གྱི་ཆད་པས་གཅོད་དུ་འཇུག་པ་དང་། དེའི་རྐྱེན་གྱིས་དགེ་སྦྱོང་གིས་དཀོན་མཆོག་གི་དཀོར་བརྐུས་ནས་ཕྲ་མ་བྱེད་པ་ལ་ཕག་སུག་ཏུ་ཕུལ་བ། དེ་དག་ཕྲ་མ་བྱེད་པ་རང་གིས་ལེན་ནམ། དབང་པོ་ཆེ་ལ་བྱིན་པས་ནོར་བདག་གིར་བྱས་ན་དེ་གཉིས་ཀ་ལ་ལྟུང་བར་འགྱུར་རོ། །ལྟུང་བ་བརྒྱད་པ་ནི། ཆོས་ལྡན་དགེ་སྦྱོང་ལ་གནོད་པའི་ཁྲིམས་ངན་བཅས་ཏེ། ཞི་གནས་ཀྱིས་མཚོན་པའི་རྣལ་འབྱོར་འདོར་དུ་འཇུག་པ་དང་། དགེ་སློང་སྤོང་བ་བསམ་གཏན་པའི་ལོངས་སྤྱོད་ཕྲོགས་ནས་ཀློག་པ་ཁ་ཏོན་པ་ལ་སྟེར་བའམ་སྟེར་དུ་འཇུག་པ་སྟེ། ལེན་པ་པོ་ཡང་ཕྲོག་པ་པོའི་ཕྱོགས་སུ་གཏོགས་ན་རྩ་ལྟུང་འབྱུང་ངོ་། །དེ་དག་ཀྱང་། བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང་། །སངས་རྒྱས་ཉིད་ལ་ཞུགས་པ་དག །རྫོགས་པའི་བྱང་ཆུབ་ལྡོག་པ་དང་། །སོ་སོ་ཐར་པ་ཡོངས་སྤངས་ཏེ། །ཐེག་པ་ཆེ་ལ་སྦྱོར་བ་དང་། །སློབ་པའི་ཐེག་པས་ཆགས་ལ་སོགས། །སྤོང་བར་འགྱུར་བ་མིན་ཞེས་འཛིན། །ཕ་རོལ་དག་ཀྱང་འཛིན་འཇུག་དང་། །རང་གི་ཡོན་ཏན་བརྗོད་པ་དང་། །རྙེད་པ་དང་ནི་བཀུར་སྟི་དང་། །ཚིགས་བཅད་སྒྱུ་ཡིས་གཞན་སྨོད་དང་། །བདག་ནི་ཟབ་མོ་བཟོད་པའོ་ཞེས། །ལོག་པ་ཉིད་ནི་སྨྲ་བ་དང་། །དགེ་སྦྱོང་ཆད་པས་གཅོད་འཇུག་དང་། །དཀོན་མཆོག་གསུམ་གྱི་སྦྱིན་བྱེད་དང་། །སྦྱིན་པ་ལེན་པར་བྱེད་པ་དང་། །ཞི་གནས་འདོར་བར་བྱེད་པ་དང་། །ཡང་དག་འཇོག་པའི་ལོངས་སྤྱོད་རྣམས། །ཁ་ཏོན་བྱེད་ལ་སྦྱིན་པ་རྣམས། །དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་སོ། །

གཉིས་པ་ནི། དེ་དེར་འབྱུང་ཉེའི་བཞག་གིས་ཀུན་ལ་ཀུན། །མིང་དུ་བཅོ་བརྒྱད་རྫས་སུ་བཅུ་བཞི་སྟེ། །ཞེས་པས་འདིར་རྒྱལ་པོ་དང་། བློན་པོ་དང་། ལས་དང་པོ་པའི་ལྟུང་བ་ཞེས་སྨོས་པ་ནི། གཙོ་བོར་དེ་དང་དེ་ལ་འབྱུང་ཉེ་བས་བཞག་པ་སྟེ། དཔེར་ན་ལྟུང་བའི་རྟེན་བྱང་སེམས་ཀྱི་སྡོམ་ལྡན་ཡིན་ཕྱིན་འདིར་མི་དང་མི་མ་ཡིན་ལ་ངེས་པ་མེད་ཀྱང་བསླབ་བཏུས་ཀྱི་ལས་དང་པོ་པའི་ལྟུང་བའི་མཚམས་སྦྱོར་དུ། རིགས་ཀྱི་བུའམ་རིགས་བུ་མོ་ཞེས་འབྱུང་ཉེ་བའི་དབང་དུ་མཛད་ནས་ཕོ་མོ་གང་རུང་དངོས་སུ་སྨོས་པ་བཞིན་ནོ། །དེས་ན་བྱང་ཆུབ་སེམས་དཔའ་སྤྱོད་པ་ལ་ཞུགས་པ་ཡན་ཆད་ལ་རྩ་ལྟུང་འབྱུང་བ་མི་སྲིད་པས། སོ་སོ་སྐྱེ་བོའི་གང་ཟག་མི་དང་གནོད་སྦྱིན་སོགས་གང་ཡང་རུང་བ་བྱང་ཆུབ་སེམས་དཔའི་སྡོམ་པ་དང་ལྡན་པའི་ལས་དང་པོ་པ་ཀུན་གྱི་ལྟུང་བ་ཡིན་པར་གསུངས་ཏེ། བསླབ་བཏུས་ལས། གང་དག་ལ་མང་དུ་འབྱུང་བ་དེ་དག་ལ་དེ་རང་གི་མིང་གིས་སྨོས་ཏེ་བསྟན་པ་འཇིགས་པ་བསྐྱེད་པའི་ཕྱིར་བཟློག་གོ །ཐམས་ཅད་ཀྱིས་ཀྱང་ཕན་ཚུན་དུ་ལྟུང་བ་སྤང་བར་བྱའོ། །ཞེས་སོ། །དེ་ལྟར་བཅོ་བརྒྱད་པོ་དེ་རྣམས་མིང་གི་སྒོ་ནས་སམ་དོན་གྱི་སྒོ་ནས་ཕྱེ་བ་གང་ཡིན་ཞེ་ན། མདོ་ལས་མིང་བཅོ་བརྒྱད་དུ་ཕྱེ་ཡང་དོན་གྱི་སྒོ་ནས་རྫས་བཅུ་བཞིར་འདུ་སྟེ། བློན་པོའི་རྩ་ལྟུང་དང་པོ་བཞི་རྒྱལ་པོའི་རྩ་ལྟུང་དང་པོ་བཞི་ལས་ལྟུང་བ་ཐ་དད་མེད་པའི་ཕྱིར་རོ། །

གསུམ་པ་ནི། སྨོན་འཇུག་སེམས་བཏང་དེ་རྣམས་རྩ་ལྟུང་ཡིན། །ཞེས་པ་སྟེ། ཐེག་པ་དམན་པར་སེམས་བསྐྱེད་པའམ། སེམས་ཅན་བློས་སྤངས་ན་སྨོན་སེམས་བཏང་བ་སྟེ། གསང་ཆེན་ཐབས་ལ་མཁས་པའི་མདོ་ལས། རིགས་ཀྱི་བུ་བྱང་ཆུབ་སེམས་དཔའ་ཉན་ཐོས་དང་རང་སངས་རྒྱས་ཡིད་ལ་བྱེད་པས་གནས་པ་འདི་ནི་བྱང་ཆུབ་སེམས་དཔའི་རྩ་བའི་ལྟུང་བ་ལྕི་བའོ། །ཞེས་པས་སྔར་གྱི་རྩ་ལྟུང་བཅོ་བརྒྱད་ཀྱི་སྟེང་དུ་སྨོན་པ་བཏང་བས་བཅུ་དགུ་དང་། དེའི་སྟེང་དུ་དཀོན་བརྩེགས་ལས་བཤད་པ་ལྟར་འཇུག་སེམས་སྤངས་ཏེ་དགེ་ལ་མི་སྦྱོར་བ་བསྣན་པས་རྩ་ལྟུང་ཉི་ཤུར་འགྱུར་རོ། །དེ་ཡང་བྱང་ཆུབ་སེམས་དཔའ་དབང་པོའི་རིམ་པས་ཕྱེ་ན་བསླབ་བྱ་གསུམ་སྟེ། ནམ་མཁའི་སྙིང་པོའི་མདོ་དང་བསླབ་བཏུས་ལས་གསུངས་པའི་བཅོ་བརྒྱད་དམ་བཅུ་བཞི་ནི་དབང་རྣོན་གྱི་ཐུན་མོང་མ་ཡིན་པའི་རྩ་ལྟུང་ཡིན་ལ། དབང་འབྲིང་ཡན་ཆད་ཀྱི་བསླབ་བྱ་ལ་བཞིར་བསྟན་ཏེ། ཐབས་ལ་མཁས་པའི་མདོའི་དོན་བསླབ་བཏུས་ལས། བྱང་ཆུབ་སེམས་ནི་ཡོངས་འདོར་དང་། །ཆགས་དང་སེར་སྣ་མི་ཟད་པས། །སློང་ལ་སྦྱིན་པར་མི་བྱེད་དང་། །བསྒྲིམས་ཏེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་པས། །ཁྲོས་པས་སེམས་ཅན་རྡེག་པ་དང་། །ཉོན་མོངས་པ་དང་གནས་མཐུན་པས། །ཆོས་ལྟར་བཅོས་པ་སྟོན་པའོ། །ཞེས་སོ། །དབང་རྟུལ་ལ་བསླབ་བྱ་གཅིག་ཏུ་བསྟན་པ་ནི། བཤད་མ་ཐག་པའི་སྨོན་སེམས་མི་འདོར་བ་ལ་བསླབ་པ་ཉིད་ཡིན་ལ། འདི་ནི་བྱང་སེམས་དབང་པོ་རྣོ་རྟུལ་འབྲིང་གསུམ་མཐའ་དག་གིས་ངེས་པར་སློབ་དགོས་པའི་བསླབ་བྱ་སྟེ། གཞན་དོན་དུ་རྫོགས་བྱང་དོན་གཉེར་གྱི་སྨོན་སེམས་ཉམས་ན། བྱང་སེམས་ཀྱི་སྡོམ་པ་ལས་ཉམས་བྱེད་ཀྱི་རྩ་ལྟུང་ཤིན་ཏུ་ལྕི་བ་ཡིན་པའི་ཕྱིར། དེ་ལྟར་ཡང་རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ། ཁྱོད་ནི་འདི་ལྟར་བྱ་བ་མང་བ། བྱེད་པ་མང་བ་སྟེ། ཐམས་ཅད་ཀྱིས་ཐམས་ཅད་དུ་སྦྱིན་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་བསླབ་པར་མི་ནུས་ཀྱིས། དེ་བས་ན་རྒྱལ་པོ་ཆེན་པོ་ཁྱོད། ཡང་དག་པར་རྫོགས་པའི་བྱང་ཆུབ་ལ་འདུན་པ་དང་། དད་པ་དང་། དོན་དུ་གཉེར་བའི་སྨོན་པ་དང་གསུམ་འགྲོ་ཡང་རུང་། འདུག་ཀྱང་རུང་། ཉལ་ཡང་རུང་། སད་ཀྱང་རུང་། ཟ་ཡང་རུང་། བཏུང་ཡང་རུང་། རྟག་པར་རྒྱུན་དུ་དྲན་པས་ཡིད་ལ་བཟུང་སྟེ་སྒོམས་ཤིག །གཞན་གྱི་དགེ་བ་ལ་རྗེས་སུ་ཡི་རང་བར་གྱིས་ཤིག །རྗེས་སུ་ཡི་རང་ནས་ཀྱང་། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཐམས་ཅད་ལ་ཕུལ་ཅིག །ཕུལ་ནས་སེམས་ཅན་ཐམས་ཅད་དང་ཐུན་མོང་དུ་གྱིས་ཤིག །དེ་ནས་སེམས་ཅན་ཐམས་ཅད་ཀྱིས་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་བར་ཉིན་གཅིག་བཞིན་དུ་བླ་ན་མེད་པའི་བྱང་ཆུབ་ཏུ་བསྔོས་ཤིག །རྒྱལ་པོ་ཆེན་པོ། དེ་ལྟར་ན་རྒྱལ་སྲིད་ཀྱང་བྱེད་ལ། རྒྱལ་པོའི་བྱ་བ་ཡང་ཉམས་པར་མི་འགྱུར་ལ། བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ། །ཞེས་དང་། སྡུད་པ་ལས་ཀྱང་། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་ལ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་སོ། །འོ་ན་དབང་པོའི་ཁྱད་པར་གྱིས་བྱང་སེམས་ཀྱི་བསླབ་བྱ་ལ་མང་ཉུང་སོ་སོར་སྟོན་པའི་འཐད་པ་གང་སྙམ་ན། སྔར་སྡོམ་པ་ལེན་ཆོག་ཏུ། ཀླུ་སྒྲུབ་ལུགས་ལ་སྨོན་འཇུག་སྟབས་གཅིག་ཏུ་ལེན་པར་བཤད་པ་དེ་ཡང་མཐའ་གཅིག་ཏུ་ཡོངས་རྫོགས་ལེན་པར་མ་ངེས་ཏེ། སྨོན་པའི་བསླབ་བྱ་རྫོགས་བྱང་བར་ངེས་པར་བླང་དགོས་ཀྱང་། འཇུག་པའི་བསླབ་བྱ་གང་ཟག་གི་བློ་རིམ་དང་བསྟུན་ནས་ཇི་ཙམ་བསྲུང་ནུས་པ་ཙམ་ཞིག་བླངས་ནས་བསླབ་རུང་བར་བཤད་པའི་ཕྱིར་དེ་ལྟར་ཡང་བསླབ་བཏུས་ལས། བསླབ་པ་གཅིག་སྒྲུབ་པ་ན་བསླབ་པ་བཞན་བསྲུང་མ་ནུས་ཀྱང་ལྟུང་བར་མི་འགྱུར་ཏེ། ཞེས་དང་། སྡོམ་པ་བདག་ཉིད་ཀྱི་སྟོབས་དང་ཡང་སྦྱར་ཏེ་བླངས་ནས་སྡོམ་པ་བཟུང་བར་བྱའོ། །ཞེས་སོ། །དེས་ན་གཞན་དོན་དུ་རྫོགས་བྱང་ཐོབ་འདོད་ཀྱི་སྨོན་སྡོམ་བཟུང་བ་དེས། འཇུག་པ་ལ་ཇི་ཙམ་ནུས་བློའི་སྟོབས་དང་རིམ་གྱིས་སྦྱར་ནས། བློའི་མཐུས་ཉམས་འོག་ཏུ་ཆུག་པ་དང་ལེན་པ་ནི་གདུལ་བྱ་བཀྲི་ཚུལ་གྱི་ཐབས་ལ་མཁས་པ་ཡིན་ནོ། །

གཉིས་པ་ནི། ཡན་ལག་ཉེས་བྱས་བརྒྱད་ཅུ་ལ་སོགས་པ། །ཕྲ་ཕྱིར་འདིར་ནི་མ་བཤད་བསླབ་བཏུས་བལྟ། །ཞེས་པ་སྟེ། བསླབ་བཏུས་ལས། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ད་ལྟར་དང་། མ་འོངས་པའི་སྡུག་བསྔལ་དང་། ཡིད་མི་བདེ་བ་ཐམས་ཅད་ཞི་བར་བྱ་བ་དང་། ཞེས་སོགས་གསུངས་པ་ལྟར། ཡན་ལག་གི་ཉེས་བྱས་བརྒྱད་ཅུ་སྟེ། བདེ་སྡུག་ཡལ་བར་འདོར་བ་ཉི་ཤུ་རྩ་བཞི། སྒྲུབ་པ་ཡལ་བར་འདོར་བ་བཅུ་དྲུག །དེ་དག་ལས་ཕྱེ་བས་བརྒྱད་ཅུའོ། །དང་པོ་ནི། གཞན་གྱི་སྡུག་བསྔལ་དང་ཡིད་མི་བདེ་བ་ཞི་བར་ནུས་བཞིན་དུ་ཞི་བར་མི་བྱེད་པ་དང་། བདེ་བ་དང་ཡིད་བདེ་བ་བསྐྱེད་ནུས་བཞིན་དུ་བསྐྱེད་པར་མི་བྱེད་པ་གཉིས་ཏེ་དབྱེ་གཞིའོ། །དེ་གཉིས་ལ་ལུས་དང་སེམས་ཀྱི་རྟེན་སོ་སོས་ཕྱེ་བས་བཞི། དེ་ལ་ད་ལྟ་དང་མ་འོངས་པའི་དུས་ཀྱིས་ཕྱེ་བས་བརྒྱད། དེའི་ཆེད་དུ་སྒོ་གསུམ་མི་བརྩོན་པ་དང་། ཕན་པའི་རྒྱུ་རྐྱེན་མི་ཚོལ་བ་དང་། གཉེན་པོའི་ཕྱོགས་ལ་མི་འབད་པ་སྟེ། དེ་ལྟར་རྗེས་སྒྲུབ་ཀྱི་སྒོ་གསུམ་པོ་དེས་ཕྱེ་བས་ཉི་ཤུ་རྩ་བཞིའོ། །གཉིས་པ་ནི། སྡུག་བསྔལ་དང་ཡིད་མི་བདེ་བ་ཆེན་པོའི་གཉེན་པོར་ཆུང་ངུ་མི་བསྐྱེད་པ་གཞིར་བཞག་ནས། དེ་གཉིས་ལ་འདི་དང་ཕྱི་མའི་སྐྱེ་བས་ཕྱེ་བས་བཞི། རང་དང་གཞན་གྱི་རྒྱུད་ཀྱིས་ཕྱེ་བས་བརྒྱད། ཡང་བདེ་བ་དང་ཡིད་བདེ་བ་ཆེན་པོའི་ཕྱིར་ཆུང་ངུ་ཉམས་པར་མི་བྱེད་པ་གཞིར་བཞག་ནས། སྔར་ལྟར་སྐྱེ་བ་དང་རྒྱུད་ཀྱིས་ཕྱེ་བས་བརྒྱད་དེ་བཅུ་དྲུག་གོ །གསུམ་པ་ནི། དེ་ལྟར་བཞི་བཅུ་པོ་རེ་རེ་ལའང་། རེ་ཞིག་ཡལ་བར་འདོར་བ་དང་། གཏན་དུ་ཡལ་བར་འདོར་བ་གཉིས་གཉིས་སུ་ཕྱེ་བས་བརྒྱད་ཅུའོ། །སོགས་ཁོངས་ནས་ནི་ཕྱོགས་མཐུན་གྱི་ཉེས་པ་ཐེག་ཆེན་གྱི་མདོ་སྡེ་སྣ་ཚོགས་སུ་ཐོར་བུར་བཤད་པ། མི་དགེ་བ་བཅུ་དང་། འཇིག་རྟེན་གྱི་ཆོས་བརྒྱད་དང་། ལོག་པའི་རྟོག་པ་བརྒྱད་དང་། ལོག་འཚོ་ལྔ་དང་། སྤྱོད་ཡུལ་མིན་པ་ལྔ་དང་། སྡིག་གྲོགས་དང་། སྡིག་ལྟ་འཛིན་པ་སོགས་བདུད་ཀྱི་ལས་རྣམས་དང་། ལྟ་བས་གཟིངས་པ་དང་། དགེ་བ་འཛད་པའི་རྒྱུ་བཞི་ལ་སོགས་པ་རྣམས་སྤང་བར་བྱ་ཞིང་། ཡན་ལག་གི་ལྟུང་བ་གཞན་ཡང་། རྩ་བར་མ་གཏོགས་པའི་ལུས་ངག་ཡིད་ཀྱི་དགག་པ་དང་སྒྲུབ་པའི་བསླབ་བྱ་རྣམས་ལས་ཉམས་པ་སྟེ། དོན་མེད་པའི་རྒྱུག་མཆོང་ལ་སོགས་པ་དང་། བྲེ་མོའི་གཏམ་སྨྲ་བ་ལ་སོགས་པ་དང་། ཆགས་སྡང་མི་སྤོང་བ་སོགས་དགག་པའི་བསླབ་བྱ་ལས་ཉམས་པ་དང་། མིག་ཕབ་སྟེ་བལྟ་བར་བྱ་བ་ལ་སོགས་པ་དང་། ལེགས་པར་འོངས་སོ་ཞེས་བྱ་བ་ལ་སོགས་པ་དང་། བྱམས་སྙིང་རྗེ་སྒོམ་ཞིང་དྲན་པ་དང་ཤེས་བཞིན་དང་བག་ཡོད་བསྟེན་པ་སོགས་སྒྲུབ་པའི་བསླབ་བྱ་ལས་ཉམས་པ་སྟེ། དེ་རྣམས་ཀྱི་ནང་དུ་དབང་པོ་འབྲིང་རྟུལ་གྱི་ཉེས་པ་ཐམས་ཅད་ཀྱང་འདུ་བར་གསུངས་སོ། །

གཉིས་པ་ཐོགས་མེད་ཀྱི་ལུགས་ལ་གཉིས་ཏེ། སྨོན་པའི་བསླབ་བྱ་དང་། འཇུག་པའི་བསླབ་བྱའོ། །དང་པོ་ལ། སྤྱིར་བཏང་བ་དང་། དཀར་ནག་ཆོས་བརྒྱད་བྱེ་བྲག་ཏུ་བཤད་པའོ། །དང་པོ་ནི། ཐོགས་མེད་ལུགས་ཀྱི་སྨོན་པའི་བསླབ་བྱ་ལ། །སེམས་ཅན་བློས་མི་བཏང་དང་ཕན་ཡོན་དྲན། །ཚོགས་བསག་བྱང་སེམས་སྦྱོང་ལ་བརྩོན་པ་དང་། །དཀར་ནག་ཆོས་བརྒྱད་བླང་དོར་སྨོན་པའི་ཡིན། །ཞེས་པ་ལྟར་ལྔ་ལས། རྩ་བའི་བསླབ་བྱ་སྨོན་སེམས་མི་འཆོར་བའི་ཐབས་ནི། སེམས་ཅན་བློས་མི་གཏོང་བ་སྟེ། སེམས་ཅན་གང་ཡང་རུང་བས་རང་གི་སེམས་སུན་ཕྱུང་བ་ལ་བརྟེན་ནས། ད་ནི་ཁྱོད་ལ་ཕན་ཐོགས་པའི་དུས་བྱུང་ཡང་མི་གདགས། གནོད་པ་བཟློག་པའི་དུས་བྱུང་ཡང་མི་བཟློག་སྙམ་པ་ནི་སེམས་ཅན་དེ་ཉིད་བློས་སྤངས་པ་སྟེ། དེ་ལས་བཟློག་ནས་རང་གིས་ཕན་བཏགས་པ་ལ་ལན་དུ་གནོད་པ་བྱས་ནའང་ཡང་ལན་སྙིང་རྗེས་སློན་པ་ནི་སེམས་ཅན་བློས་མི་གཏོང་བ་སྟེ། མ་དྲོས་པས་ཞུས་པའི་མདོ་ལས། བྱང་ཆུབ་སེམས་དཔའ་ཆོས་གཅིག་དང་ལྡན་ན་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏོ། །ཆོས་གཅིག་པུ་གང་ཞེ་ན། སེམས་ཅན་བློས་ཡོངས་སུ་མི་བཏང་བའོ། །ཞེས་སོ། །རྟག་ཏུ་བྱང་སེམས་ཀྱི་ཕན་ཡོན་དྲན་པས་གཅེས་པར་འཛིན་པ་ནི་མི་ཉམས་པའི་ཐབས་ཏེ། ལམ་སྒྲོན་ལས། དེ་ལྟར་སྨོན་པའི་སེམས་དག་ནི། །བསྐྱེད་པའི་ཡོན་ཏན་གང་ཡིན་པ། །དེ་ནི་སྡོང་པོ་བཀོད་པ་ཡི། །མདོ་ལས་བྱམས་པས་རབ་ཏུ་བཤད། །ཅེས་པའི་སྡོང་པོ་བཀོད་པའི་མདོར་དཔེ་ཉིས་བརྒྱ་དང་སུམ་ཅུས་བཤད་པ་རྣམས་ལེགས་པར་བལྟས་ལ་དྲན་པར་བྱའོ། །དགེ་བའི་འདུན་པ་སྔོན་དུ་བཏང་སྟེ། སྦྱིན་སོགས་བསོད་ནམས་ཀྱི་སྤྱོད་པ་དང་། དེ་ཡང་འཁོར་གསུམ་མི་རྟོག་པས་ཟིན་པ་ཡེ་ཤེས་ཀྱི་ཚོགས་ཏེ། ཚོགས་གཉིས་ཟུང་འབྲེལ་དུ་བསགས་པ་ནི། སེམས་དེའི་སྟོབས་བསྐྱེད་པ་སྟེ། ཚོགས་ཀྱི་གཏམ་ལས། དེ་རིང་བདག་གིས་བསོད་ནམས་དང་། །ཡེ་ཤེས་ཚོགས་ནི་གང་བྱ་དང་། །སེམས་ཅན་ཕན་པ་གང་བྱ་ཞེས། །བྱང་ཆུབ་སེམས་དཔས་རྟག་ཏུ་བསམ། །ཞེས་སོ། །ཡང་ཡང་བྱང་ཆུབ་ཀྱི་སེམས་སྦྱང་བ་ལ་བརྩོན་པ་ནི། འཕེལ་བའི་ཐབས་ཏེ། རྒྱུ་ལ་སྦྱང་བ་བྱམས་སྙིང་རྗེ་སྒོམ་པ། སེམས་དངོས་སྦྱང་བ་ཉིན་མཚན་ཐུན་དྲུག་ཏུ་སེམས་བསྐྱེད་བླང་བ། བྱང་སེམས་ཀྱི་སྤྱོད་པ་སྦྱང་བ་རང་གི་བདེ་དགེ་སེམས་ཅན་ལ་བསྔོ་ཞིང་གཞན་གྱི་སྡིག་སྡུག་བདག་ལ་ལེན་པའི་གཏོང་ལེན་སྦྱོང་བ་སྟེ། ལམ་སྒྲོན་ལས། བྱང་ཆུབ་སྨོན་པའི་སེམས་དག་བསྐྱེད་ནས་ནི། །འབད་པ་མང་པོས་ཀུན་ཏུ་འཕེལ་བྱ་ཞིང་། །ཞེས་སོ། །བྱང་ཆུབ་ཀྱི་སེམས་མི་བརྗེད་པའི་ཐབས་སུ་ཀུན་མཁྱེན་ཆེན་པོས། མདོར་ན་ནག་པོའི་ཆོས་བཞི་སྤང་བྱ་ཞིང་། །དཀར་པོའི་ཆོས་བཞི་དག་ལ་ནན་ཏན་བྱ། །ཞེས་པའི་དཀར་ནག་གི་ཆོས་བརྒྱད་ལ་བླང་དོར་མ་ནོར་བར་བྱའོ། །དེ་དག་ཀྱང་རྗེ་བཙུན་སྒམ་པོ་པས། སེམས་ཅན་བློས་མི་བཏང་བ་དང་། །སེམས་དེའི་ཕན་ཡོན་དྲན་བྱ་དང་། །ཚོགས་གཉིས་བསག་པར་བྱ་བ་དང་། །ཡང་ཡང་བྱང་སེམས་སྦྱང་བ་དང་། །དཀར་ནག་ཆོས་བརྒྱད་བླང་དོར་ཏེ། །ལྔ་པོས་སྨོན་པའི་བསླབ་བྱ་བསྡུས། །ཞེས་གསུངས་པ་ལྟར་རོ། །

གཉིས་པ་ནི། མཆོད་འོས་བསླུ་དང་འགྱོད་མེད་འགྱོད་པ་བསྐྱེད། །དམ་པར་སྐུར་འདེབས་འགྲོ་ལ་གཡོ་སྒྱུ་སྤྱོད། །ནག་པོའི་ཆོས་བཞི་སྤང་ཞིང་ལྡོག་པ་ནི། །དཀར་པོའི་ཆོས་བཞི་ཡིན་པས་ཀུན་ཏུ་སྤྱད། །ཅེས་པ་སྟེ། རྫུན་གྱིས་བླ་མ་དང་མཁན་སློབ་ཀྱི་དབུ་བསྐོར་བ་སོགས་ནག་པོའི་ཆོས་བཞི་སྤང་བར་བྱ་སྟེ། དཀོན་བརྩེགས་ཀྱི་འོད་སྲུང་གིས་ཞུས་པའི་ལེའུ་ལས། འོད་སྲུང་། ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་འགྱུར་ཏེ། བཞི་གང་ཞེ་ན། བླ་མ་དང་མཆོད་པར་འོས་པ་བསླུ་བ་དང་། གཞན་འགྱོད་པའི་གནས་མ་ཡིན་པ་ལ་འགྱོད་པ་བསྐྱེད་པ་དང་། སེམས་བསྐྱེད་པའི་བྱང་ཆུབ་སེམས་དཔའ་ལ་སྡང་སེམས་ཀྱིས་སྐྱོན་ནས་བརྗོད་པ་དང་། སེམས་ཅན་ལ་གཡོ་དང་སྒྱུས་སྤྱོད་པའོ། །ཞེས་སོ། །དེ་བཞི་ལས་ལྡོག་པ་ནི། དཀར་པོའི་ཆོས་བཞི་ཡིན་པས་བསྒྲུབ་པར་བྱ་སྟེ། དེ་ཉིད་ལས། འོད་སྲུང་ཆོས་བཞི་དང་ལྡན་ན་བྱང་ཆུབ་ཀྱི་སེམས་བརྗེད་པར་མི་འགྱུར་ཏེ། བཞི་གང་ཞེ་ན། ཤེས་བཞིན་དུ་རྫུན་དུ་མི་སྨྲ་བ་དང་། བྱང་ཆུབ་སེམས་དཔའ་ལ་སྟོན་པའི་འདུ་ཤེས་བསྐྱེད་པ་དང་། སེམས་ཅན་ལ་གཡོ་སྒྱུ་མེད་པར་ལྷག་པའི་བསམ་པས་གནས་པ་དང་། སེམས་ཅན་ཐམས་ཅད་ཐེག་པ་ཆེན་པོ་ལ་ཡང་དག་པར་འགོད་པའོ། །ཞེས་སོ། །

གཉིས་པ་འཇུག་པའི་བསླབ་བྱ་ལ། རྩ་ལྟུང་བཤད་པ་དང་། ཡན་ལག་གི་ཉེས་པ་གཞན་དུ་ཞལ་འཕངས་པའོ། །དང་པོ་ནི། རྙེད་བཀུར་ལྷག་ཞེན་བདག་བསྟོད་གཞན་སྨོད་དང་། །སེར་སྣས་ཟང་ཟིང་ནོར་དང་ཆོས་མི་སྟེར། །ཁྲོ་བས་གཞན་འཚེ་ཤད་སྦྱང་གིས་མི་ལྡོག །གཡོམ་ལས་ཆོས་ལྟར་བཅོས་མོས་སྟོན་པ་བཞི། །རྩ་ལྟུང་བཞི་སྟེ་འཇུག་པའི་བསླབ་བྱའོ། །ཞེས་པ་སྟེ། རྩ་ལྟུང་བཞི་པོ་འདི་དག་མདོ་སྡེ་ན་འཐོར་ནས་བཞུགས་པ་འཕགས་པ་ཐོགས་མེད་ཀྱིས་བྱང་སར་བསྡུས་པ་ཡིན་ཏེ། དེ་ཉིད་ལས། བཅོམ་ལྡན་འདས་ཀྱིས་མདོ་སྡེ་གཞན་དེ་དང་དེ་དག་ཏུ་འཐོར་བུར་གསུངས་པ་དེ་དག །བྱང་ཆུབ་སེམས་དཔའི་སྡེ་སྣོད་ཀྱི་མ་མོ་འདིར་ཚང་བར་བཤད་དོ། །ཞེས་སོ། །དེ་ལ་ཆགས་པ་དང་། སེར་སྣ་དང་། ཞེ་སྡང་དང་། གཏི་མུག་ལས་གྱུར་བའི་དབྱེ་བས་རྩ་ལྟུང་བཞི་སྟེ། འདི་ལྟར་རྙེད་པ་ཡོན་འབུལ་བའམ། བཀུར་སྟི་གདན་སྟོབ་པ་སོགས་ལ་ལྷག་པར་ཞེན་པའི་ཀུན་དཀྲིས་ཆེན་པོས་རྙེད་བཀུར་ཐོབ་ཕྱིར་བདག་ལ་བསྟོད་པའམ། རྙེད་བཀུར་ཅན་གཞན་ལ་སྨོད་པ། ཕ་རོལ་པོ་གང་ཡང་རུང་བས་གོ་ན་བྱང་སེམས་ཀྱི་ཕམ་པའི་གནས་ལྟ་བུའི་ཆོས་དང་པོའོ། །སྡུག་བསྔལ་བ་དང་བཀྲེན་པ་དང་མགོན་མེད་པའི་སློང་བ་པོ་ལ་སེར་སྣའི་ཀུན་དཀྲིས་ཆེན་པོས་ཟང་ཟིང་འདོད་པ་ལ་ནོར་ཅུང་ཟད་ཙམ་མམ། སྣོད་དུ་གྱུར་ཀྱང་དམ་པའི་ཆོས་མི་སྟེར་བ་ནི་གཉིས་པའོ། །གཞན་གྱིས་བྱ་བ་མི་རིགས་པ་བྱས་པ་ཤད་ཀྱིས་སྦྱངས་ཀྱང་འཁོན་ཞེ་ལ་བཟུང་བའི་ཀུན་དཀྲིས་ཆེན་པོས་མི་ལྡོག་པའམ། ཁྲོ་བས་ཚིག་རྩུབ་སྨྲས་པ་ཙམ་གྱིས་མི་ཚིམ་པར་གཞན་ལ་བརྡེག་ཅིང་འཚོག་པས་འཚེ་བར་བྱེད་པ་ནི་གསུམ་པའོ། །གཏི་མུག་གི་ཀུན་དཀྲིས་ཆེན་པོས་བྱང་ཆུབ་སེམས་དཔའི་སྡེ་སྣོད་ལ་བཀའ་མ་ཡིན་ཞེས་པ་ལྟ་བུའི་སྐུར་འདེབས་ཀྱིས་སྤོང་བའམ། རང་ངམ་གཞན་དག་གི་གཡོམ་ལས་ཆོས་ལྟར་བཅོས་པ་ལ་མོས་ནས་དམ་པའི་ཆོས་མ་ཡིན་པ་ཆོས་སུ་བཅོས་ཏེ་སྟོན་པར་བྱེད་ན་བཞི་པའོ། །དེ་ལྟར་ཡང་སྡོམ་པ་ཉི་ཤུ་པ་ལས། ཉོན་མོངས་དྲག་ལས་བྱུང་བ་ཡིས། །སྡོམ་པ་ཞིག་པར་གང་གྱུར་པ། །དེ་ཡི་ཉེས་པ་བཞི་པོ་ནི། །ཕམ་པར་འདྲ་བ་དགོངས་པ་ཡིན། །རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་བ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོས་པས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་སོ། །འདིར་ཕམ་འདྲ་ཞེས་པ་ནི། བྱང་སེམས་ཀྱི་ཕམ་འདྲར་བཞེད་པ་ནི་མ་ཡིན་ཏེ། ཉན་ཐོས་ཀྱི་དགེ་སློང་ལ་ཕམ་པ་ལྕི་བ་དང་འདྲ་བར་འདི་བཞི་པོ་བྱང་སེམས་ལ་ཉེས་པ་ལྕི་བའི་རྩ་ལྟུང་ཡིན་པར་སྟོན་པའོ། །དེ་ལྟར་ཆགས་པ་ལས་གྱུར་པ་སོགས་བསམ་པའི་སྒོ་ནས་རྩ་ལྟུང་བཞི་ཡིན་ཡང་། སྦྱོར་བའི་སྒོ་ནས་བཞི་པོ་རེ་རེ་ལ་གཉིས་གཉིས་སུ་ཕྱེ་ནས་བརྒྱད་དུ་འགྱུར་བར་ཇོ་བོ་རྗེ་བཞེད་དེ། བདག་བསྟོད་གཞན་སྨོད་གཉིས་དང་། ཆོས་དང་ནོར་མི་སྟེར་བ་གཉིས་དང་། ཉེས་པ་ཤད་སྦྱངས་བྱས་ཀྱང་མི་ཉན་པ་དང་གཞན་ལ་འཚོག་པ་གཉིས་དང་། ཐེག་ཆེན་སྤོང་བ་དང་དམ་ཆོས་འདྲར་སྣང་སྟོན་པ་གཉིས་ཏེ་བརྒྱད་དོ། །བྱང་ས་ལས་ཀྱང་། ཁྲོས་པས་སེམས་ཅན་རྡེག་པ་དང་། །གཞན་གྱིས་བཤགས་ཀྱང་མི་ཉན་དང་། །ཞེས་རྩ་ལྟུང་སོ་སོར་བྱས་སོ། །

གཉིས་པ་ནི། ཉེས་བྱས་ཕྲ་བ་ཞེ་དྲུག་གཞན་དུ་ཤེས། །ཞེས་པས། སྡོམ་པ་ཉི་ཤུ་པར་ཉེས་བྱས་ཕྲ་བ་བཞི་བཅུ་རྩ་དྲུག་གསུངས་ཏེ། དགེ་བ་ཆོས་སྡུད་དང་འགལ་བ་སོ་བཞི་དང་། སེམས་ཅད་དོན་བྱེད་དང་འགལ་བ་བཅུ་གཉིས་སོ། །དང་པོ་ལ་སྡེ་ཚན་དྲུག་ལས། སྦྱིན་པ་དང་འགལ་བ་བདུན་ནི། དཀོན་མཆོག་གསུམ་ལ་གསུམ་མི་མཆོད། །འདོད་པའི་སེམས་ཀྱི་རྗེས་སུ་འཇུག །རྒན་པ་རྣམས་ལ་གུས་མི་བྱེད། །དྲིས་པ་ལ་ནི་ལན་མི་འདེབས། །མགྲོན་པོས་བདག་གིར་མི་བྱེད་ཅིང་། །གསེར་ལ་སོགས་པ་ལེན་མི་བྱེད། །ཆོས་འདོད་པ་ལ་སྦྱིན་མི་བྱེད། །ཅེས་སོ། །ཚུལ་ཁྲིམས་དང་འགལ་བ་དགུ་ནི། ཚུལ་ཁྲིམས་འཆལ་རྣམས་ཡལ་བར་འདོར། །ཕ་རོལ་དད་ཕྱིར་སློབ་མི་བྱེད། །སེམས་ཅན་དོན་ལ་བྱ་བ་ཆུང་། །སྙིང་བརྩེར་བཅས་ན་མི་དགེ་མེད། །འཚོ་བ་ལོག་པ་དང་དུ་ལེན། །འཕྱར་ཞིང་རབ་ཏུ་རྒོད་པ་སོགས། །འཁོར་བ་གཅིག་པུས་བགྲོད་པར་སེམས། །གྲགས་པ་མ་ཡིན་མི་སྤོང་བ། །ཉོན་མོངས་བཅས་ཀྱང་འཆོས་མི་བྱེད། །ཅེས་སོ། །བཟོད་པ་དང་འགལ་བ་བཞི་ནི། གཤེ་ལ་ལན་དུ་གཤེ་ལ་སོགས། །ཁྲོས་པ་རྣམས་ནི་ཡལ་བར་འདོར། །ཕ་རོལ་ཤད་ཀྱིས་འཆགས་པ་སྤོང་། །ཁྲོས་པའི་སེམས་ཀྱིས་རྗེས་སུ་འཇུག །ཅེས་སོ། །བརྩོན་འགྲུས་དང་འགལ་བ་གསུམ་ནི། རྙེད་བཀུར་འདོད་ཕྱིར་འཁོར་རྣམས་སྡུད། །ལེ་ལོ་ལ་སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་བརྟེན། །ཞེས་སོ། །བསམ་གཏན་དང་འགལ་བ་གསུམ་ནི། ཏིང་ངེ་འཛིན་གྱི་དོན་མི་འཚོལ། །བསམ་གཏན་སྒྲུབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་བལྟ། །ཞེས་སོ། །ཤེས་རབ་དང་འགལ་བ་བརྒྱད་ནི། ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་བརྩོན། །བརྩོན་མིན་ཕྱི་རོལ་བསྟན་བཅོས་བརྩོན། །བརྩོན་པར་བྱས་ཀྱང་དེ་ལ་དགའ། །ཐེག་པ་ཆེན་པོ་སྤོང་བར་བྱེད། །བདག་ལ་བསྟོད་ཅིང་གཞན་ལ་སྨོད། །ཆོས་ཀྱི་དོན་དུ་འགྲོ་མི་བྱེད། །དེ་ལ་སྨོད་ཅིང་ཡི་གེར་རྟོན། །ཞེས་སོ། །

གཉིས་པ་ལ་སྡེ་ཚན་གསུམ་ལས། གཞན་དོན་ལས་ཉམས་པའི་ཉེས་པ་བཞི་ནི། དགོས་པའི་གྲོགས་སུ་འགྲོ་མི་བྱེད། །ནད་པའི་རིམ་གྲོ་བྱ་བ་སྤོང་། །སྡུག་བསྔལ་སེལ་བར་མི་བྱེད་དང་། །བག་མེད་པ་ལ་རིགས་མི་སྟོན། །ཅེས་སོ། །གཞན་ལ་ཕན་མི་འདོགས་པའི་ཉེས་པ་དྲུག་ནི། བྱས་ལ་ལན་དུ་ཕན་མི་འདོགས། །གཞན་གྱི་མྱ་ངན་སེལ་མི་བྱེད། །ནོར་འདོད་པ་ལ་སྦྱིན་མི་བྱེད། །འཁོར་རྣམས་ཀྱི་ནི་དོན་མི་བྱེད། །གཞན་གྱི་བློ་དང་མཐུན་མི་འཇུག །ཡོན་ཏན་བསྔགས་པ་སྨྲ་མི་བྱེད། །ཅེས་སོ། །ངན་པ་ཚར་མི་གཅོད་པའི་ཉེས་པ་གཉིས་ནི། རྐྱེན་དང་འཚམས་པར་ཚར་མི་གཅོད། །རྫུ་འཕྲུལ་སྡིག་ལ་སོགས་མི་བྱེད། །ཅེས་སོ། །དེ་ལྟར་བཞི་བཅུ་ཞེ་དྲུག་པོ་འདི་དག་ཅི་རིགས་པར་གསུམ་གསུམ་དུ་ཕྱེ་ནས་བཤད་དེ། འགྲེལ་པར། གལ་ཏེ་མ་གུས་པ་དང་སྙོམས་ལས་དང་ལེ་ལོས་ཉེས་པ་བྱུང་ན་ནི་ཉོན་མོངས་པ་ཅན་གྱི་ཉེས་པར་འགྱུར་རོ། །གལ་ཏེ་བརྗེད་པས་ཉེས་པ་བྱུང་ན་ནི་ཉོན་མོངས་ཅན་མ་ཡིན་པའི་ཉེས་པར་འགྱུར་ལ། སེམས་འཁྲུགས་པ་ལ་ནི་ཉེས་པ་མེད་དོ། །ཞེས་སོ། །འོ་ན་ཉེས་སྤྱོད་སྡོམ་པ་དང་འགལ་བའི་ཉེས་པ་གང་ཞེ་ན། དེ་འདིར་བཤད་མི་དགོས་ཏེ། བྱང་ས་ལས། བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི་སོ་སོ་ཐར་པའི་སྡོམ་པ་རིགས་བདུན་པོ་གང་ཡིན་པ་སྟེ། ཞེས་པས་ཕལ་ཆེར་ཉན་ཐོས་དང་མཐུན་པའི་ཕྱིར། རྟེན་རབ་བྱུང་ཡིན་ན་སོ་ཐར་གྱི་ཕམ་བཞི་འདིར་ཡང་རྩ་ལྟུང་དང་། དེར་མ་གཏོགས་པའི་ཉེས་ལྟུང་རྣམས་བྱང་སེམས་ཀྱི་ཡན་ལག་གི་ཉེས་པར་འགྱུར་མོད། འོན་ཀྱང་རབ་བྱུང་གི་བཅས་ལྟུང་རྣམས་བསླབ་བཏུས་ལ་སོགས་པར་བྱང་སེམས་ཀྱི་ལྟུང་བ་ཉིད་དུ་མི་བགྲང་བ་ནི་ཁྱིམ་པ་བྱང་ཆུབ་སེམས་དཔའ་འགའ་ཞིག་ལ་ལྟུང་བར་མ་ངེས་པའི་ཕྱིར་སྙམ་དུ་དགོངས་སོ། །

གཉིས་པ་སྲོལ་གཉིས་ཀྱི་ལྟུང་བའི་ཁྱད་པར་ལ་དཔྱད་པ་ནི། རྩ་ལྟུང་བཅོ་བརྒྱད་དང་རྩ་ལྟུང་བཞིར་གསུངས་པ་གཉིས་མི་འགལ་ལམ་ཞེ་ན། འདི་ལ་བཞེད་ལུགས་མི་འདྲ་བ་གསུམ་ལས། དང་པོ་སློབ་དཔོན་བྱང་ཆུབ་བཟང་པོ་ནི། བྱང་སའི་བཞི་པོ་རྩ་ལྟུང་དངོས་ཡིན་ལ། དེ་ལས་གཞན་པ་རྩ་ལྟུང་བཅོ་བརྒྱད་པོ་ནི་སྔར་བསྐྲུན་པའི་དགེ་རྩ་རྣམ་པར་གཅོད་པ་ལས་སྡོམ་པ་འཇིག་པའི་རྒྱུ་མ་ཡིན་པས་རྩ་ལྟུང་བཏགས་པ་བའོ་ཞེས་སྡོམ་པ་ཉི་ཤུ་པའི་འགྲེལ་བར་བཤད་དོ། །གཉིས་པ་སློབ་དཔོན་ཨ་བྷ་ཡཱ་ཀ་རའི་བཞེད་པ་ནི། ཐུབ་པ་དགོངས་རྒྱན་ལས་སྡེ་སྣོད་ལས་གསུངས་པའི་བཞི་པོ་ཉིད་ཀྱིས་གཞན་འདི་རྣམས་ཡང་དག་པར་བསྡུས་པས་སོ། །ཞེས་པས་བྱང་ཆུབ་སེམས་དཔའི་རྩ་ལྟུང་ནི་བྱང་ས་ལྟར་བཞི་པོ་ཉིད་ཡིན་ལ། ནམ་མཁའི་སྙིང་པོའི་མདོ་ལས་གསུངས་པ་དེ་རྣམས་རྩ་ལྟུང་མཚན་ཉིད་པ་ཡིན་ཡང་བཞི་པོའི་ཁོངས་སུ་འདུས་པར་བཞེད་དོ། །ཇི་ལྟར་ན། རྒྱལ་བློན་གྱི་རྩ་ལྟུང་གཉིས་པ་དམ་པའི་ཆོས་སྤོང་བ་དང་། ལས་དང་པོ་པའི་རྩ་ལྟུང་དང་པོ་བློ་མ་སྦྱངས་པར་སྟོང་ཉིད་སྟོན་པ། ཐབས་ལ་མཁས་པའི་མདོར་གསུངས་པའི་བྱང་ཆུབ་ཀྱི་སེམས་འདོར་བ་གསུམ་ཐེག་ཆེན་སྤོང་བ་དང་། རྒྱལ་པོའི་རྩ་ལྟུང་ལྔ་པ་ལོག་ལྟས་གཞན་མི་དགེ་བ་བཅུ་ལ་དགོད་པ། ལས་དང་པོ་པའི་རྩ་ལྟུང་གཉིས་པ་རྫོགས་བྱང་ལས་ལྡོག་པ་གཉིས་དམ་ཆོས་འདྲར་སྣང་སྟོན་པས། དེ་ལྟར་ལྔ་དང་མཚམས་མེད་ཀྱི་ནང་ཚན་དགེ་འདུན་དབྱེན་དང་དྲུག་བྱང་སའི་རྩ་ལྟུང་བཞི་པར་འདུའོ། །ལས་དང་པོ་པའི་རྩ་ལྟུང་གསུམ་པ་དང་བཞི་པ་ནི་གཞན་སྨོད་དང་། དྲུག་པ་བདག་བསྟོད། ལྔ་པ་བདག་བསྟོད་གཞན་སྨོད་གཉིས་ཀ་ཡིན་པས། དེ་ལྟར་བཞི་ནི་བྱང་སའི་རྩ་ལྟུང་དང་པོར་འདུའོ། །རྒྱལ་བློན་གྱི་རྩ་ལྟུང་གསུམ་པ་ལས་རབ་བྱུང་ལ་རྡེག་པ་སོགས་བྱེད་པ་དང་། དབྱེན་མ་གཏོགས་པའི་མཚམས་མེད་གཞན་བཞི་པོ་དང་། བློན་པོའི་གྲོང་སོགས་འཇོམས་པ་གསུམ་ནི་བྱང་སའི་རྩ་ལྟུང་གསུམ་པར་འདུའོ། །རྒྱལ་བློན་གྱི་རྩ་ལྟུང་དང་པོ་དང་། གསུམ་པ་ལས་ངུར་སྨྲིག་འཕྲོག་པ་དང་། ལས་དང་པོ་པའི་རྩ་ལྟུང་བདུན་པ་དཀོན་མཆོག་གི་དཀོར་རྐུར་འཇུག་ཅིང་རྐུ་བ་གཉིས་དང་། བརྒྱད་པ་ཞི་གནས་པའི་ནོར་ཁ་ཏོན་པ་ལ་སྟེར་བ་དང་། ལེན་པ་སྟེ་དྲུག་ནི་ནོར་གྱི་སེར་སྣ་དང་། ཞི་གནས་འདོར་འཇུག་ཆོས་ཀྱི་སེར་སྣ་ཡིན་པས། དེ་ལྟར་བདུན་པོ་བྱང་སའི་རྩ་ལྟུང་གཉིས་པར་འདུ་སྟེ། དེས་ན་རྩ་ལྟུང་བཞི་པོ་ལས་གཞན་མེད་དོ་ཞེས་བཞེད། འདིར་མཁས་པ་དག །ལས་དང་པོ་པའི་རྩ་ལྟུང་གསུམ་པ་དང་བཞི་པས་ཐེག་ཆེན་གྱི་ཕྱོགས་གཅིག་སྡོམ་པའི་ཚུལ་ཁྲིམས་སྤོང་པ་དང་། བརྒྱད་པ་དམ་ཆོས་འདྲར་སྣང་སྟོན་པར་བྱས་ནས་བྱང་སའི་རྩ་ལྟུང་བཞི་པར་བསྡུས་ཤིང་། ལས་དང་པོ་པའི་རྩ་ལྟུང་བདུན་པ་བྱང་སའི་གསུམ་པར་བསྡུས་པའང་སྣང་སྟེ་གང་ལྟར་ཡང་མི་འགལ་ལོ། །

གསུམ་པ་སློབ་དཔོན་ཆེན་པོ་ཞི་བ་ལྷའི་དགོངས་པ་ནི། བསླབ་བཏུས་ལས་རྩ་ལྟུང་བཅོ་བརྒྱད་གསུངས་ཏེ། ནམ་སྙིང་གི་མདོ་ལྟར་དབང་རྣོན་གྱི་རྩ་ལྟུང་རྫས་སུ་བསྡུས་པ་བཅུ་བཞི་དང་། ཐབས་ལ་མཁས་པའི་མདོ་ལྟར་དབང་འབྲིང་ཡན་ཆད་ཀྱི་རྩ་ལྟུང་བཞི་སྟེ་བཅོ་བརྒྱད་པོ་ཐམས་ཅད་རྩ་ལྟུང་མཚན་ཉིད་པར་བཞེད་ཅིང་། བྱང་སའི་རྩ་ལྟུང་བཞི་ལས། ཕྱི་མ་གསུམ་གྱི་ནང་ཚན་ཐེག་ཆེན་སྤོང་བ་མ་གཏོགས་པ་རྣམས་ནི་བསླབ་བཏུས་ཀྱི། ཆགས་དང་སེར་སྣ་མི་ཟད་པ། །ཞེས་སོགས་ཀྱིས་བསྟན་ལ། དང་པོ་མ་སྨོས་པ་ནི་ལས་དང་པོ་པའི་རྩ་ལྟུང་ལྔ་པར། རང་གི་ཡོན་ཏན་བརྗོད་པ་དང་། །རྙེད་པ་དང་ནི་བཀུར་སྟི་དང་། །ཚིགས་བཅད་སྒྱུ་ཡིས་གཞན་སྨོད་དང་། །ཞེས་དང་། བཞི་པའི་ནང་ཚན་ཐེག་ཆེན་སྤོང་བ་ནི་རྒྱལ་བློན་གྱི་རྩ་ལྟུང་གཉིས་པ་དམ་ཆོས་སྤང་བ་ཉིད་ཡིན་ནོ། །དེས་ན་རྩ་ལྟུང་དེ་ཐམས་ཅད་དབང་པོའི་ཁྱད་པར་གྱིས་སོ་སོའི་སྡོམ་པའི་གཏོང་རྒྱུར་བཞེད་དེ། ཇི་སྐད་དུ། རྩ་བའི་ལྟུང་བ་དེ་དག་གིས་དགེ་བའི་རྩ་བ་སྔོན་བསྐྱེད་པ་ཐམས་ཅད་ཐལ་བར་རློག་གོ །ཞེས་པའི་སྤྱིར་དགེ་བ་ཐམས་ཅད་ཐལ་བར་རློག་ན་བྱེ་བྲག་སྡོམ་པའང་ཐལ་བར་རློག་པར་འགྱུར་བས་སོ། །ཞེས་བཞེད་དོ། །དེ་ལྟར་གསུམ་ལས་འདིར་པཎྜི་ཏ་གཞན་གཉིས་ཀྱི་དགོངས་པ་བཏང་སྙོམས་སུ་བྱས་ཏེ། སློབ་དཔོན་ཞི་བ་ལྷས་བསླབ་བཏུས་ཀྱི་རྩ་ལྟུང་བསྡུ་བར་རྩ་ལྟུང་བཅོ་བརྒྱད་ཚིགས་བཅད་དུ་བསྡུས་པའི་རྗེས་སུ་འབྲང་བར་བྱའོ། །

གཉིས་པ་དགེ་བ་ཆོས་སྡུད་ཀྱིི་ཚུལ་ཁྲིམས་ལ་བསྟན་བཤད་གཉིས་ལས། དང་པོ་མདོར་བསྟན་ནི། དགེ་བ་ཆོས་སྡུད་ཕར་ཕྱིན་དྲུག་སློབ་སྟེ། །ཞེས་པ་སྟེ། དེ་ལ་སྤྱིར་ཐུན་མོང་གི་རང་བཞིན་ལ། མཚན་ཉིད། སྒྲ་དོན། དབྱེ་བ། གྲངས་ངེས། གོ་རིམ། སྒྲུབ་ཚུལ། ཕན་ཡོན་དང་བདུན། དང་པོ་ནི། བྱང་སེམས་ཀྱི་སྒྲུབ་པའི་བསླབ་བྱ་གང་ཞིག །ཁྱད་ཆོས་བཞིི་དང་ལྡན་པའི་ཕ་རོལ་ཏུ་ཕྱིན་པ་དྲུག་གིས་བསྡུས་པའི་དགེ་བ་མཐའ་དག་སྒྲུབ་པའི་སེམས་པ་མཚུངས་ལྡན་དང་བཅས་པའོ། །ཁྱད་ཆོས་བཞི་ནི། རང་རང་གི་མི་མཐུན་ཕྱོགས་དང་བྲལ་བ། གྲོགས་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བྱེད་ལས་གཞན་གྱི་འདོད་དོན་རྫོགས་པར་བྱེད་པ། དེ་ལྟར་བྱས་ནས་ཆོས་བསྟན་པས་གདུལ་བྱའི་རྒྱུད་སྐལ་བ་དང་འཚམས་པར་བྱང་ཆུབ་གསུམ་དུ་སྨིན་པར་བྱེད་པ་སྟེ། མདོ་སྡེ་རྒྱན་ལས། སྦྱིན་པ་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་དང་། དེ་བཞིན་དུ། ཚུལ་ཁྲིམས་མི་མཐུན་ཕྱོགས་ཉམས་དང་། །ཞེས་ལྷག་མ་ལྔ་ལའང་སྦྱར་རོ། །རང་རང་གི་མི་མཐུན་ཕྱོགས་རིམ་པར། སེར་སྣ་ཚུལ་འཆལ་ཁོང་ཁྲོ་དང་། །ལེ་ལོ་རྣམ་གཡེང་ཤེར་འཆལ་དྲུག །བྱེད་ལས་ནི། ཟང་ཟིང་སོགས་སྦྱིན་ཡིད་དང་བ། །གཞན་གནོད་བཟོད་ཅིང་ཕན་གྲོགས་བརྩོན། །རྫུ་འཕྲུལ་བླང་དོར་རྣམ་འབྱེད་པ། །གཞན་གྱི་འདོད་པ་ཡོངས་རྫོགས་བྱེད། །ཅེས་སྨྲས་སོ། །གཉིས་པ་ནི། པ་ར་མ་ཕ་རོལ་དང་། ཨི་ཏ་ཕྱིན་པ་སྟེ། འཇིག་རྟེན་པ་དང་ཉན་རང་གི་དགེ་བ་ཀུན་ལས་ཕུལ་དུ་བྱུང་བའི་ཕ་རོལ་ཏུ་འགྲོ་བས་ན་ཕ་རོལ་ཏུ་ཕྱིན་པའོ། །གསུམ་པ་ནི། སྦྱིན་སོགས་ཕར་ཕྱིན་དྲུག་སྟེ། ཀུན་མཁྱེན་ཆེན་པོས། རྒྱལ་སྲས་རྣམས་ཀྱིས་ཀུན་ལ་བསླབ་བྱ་སྟེ། །གཙོ་བོར་ཕ་རོལ་ཕྱིིན་པ་དྲུག་ལ་བསླབ། །ཅེས་སོ། །དྲུག་པོ་རེ་རེ་ལའང་སྦྱིན་སོགས་དྲུག་རེར་དབྱེ་ན། གཞན་ཕ་རོལ་ཏུ་ཕྱིན་པ་དྲུག་ལ་འགོད་པ་སྦྱིན་པའི་སྦྱིིན་པ་སོགས་སོ་སོའི་སྦྱིན་པ། དེ་བཞིན་དུ་རང་རང་གི་མི་མཐུན་ཕྱོགས་ཀྱིས་མ་གོས་པར་སྤྱོད་པ་སོ་སོའི་ཚུལ་ཁྲིམས། རང་རང་གི་དཀའ་སྤྱད་བཟོད་པས་སྤྱོད་པ་སོ་སོའི་བཟོད་པ། དགའ་སྤྲོ་དང་བཅས་པས་སྤྱོད་པ་སོ་སོའི་བརྩོན་འགྲུས། དེ་ལྟར་བརྩོན་པས་སེམས་ཟིན་ཏེ་གཞན་དུ་མི་གཡེང་བས་སྤྱོད་པ་སོ་སོའི་བསམ་གཏན། འཁོར་གསུམ་མི་རྟོག་པའི་སྒོ་ནས་ཕྱིན་དྲུག་ལ་སྤྱོད་པ་སོ་སོའི་ཤེས་རབ་སྟེ་སུམ་ཅུ་རྩ་དྲུག་ཏུ་འགྱུར་རོ། །དེ་ལྟར་ཡང་མངོན་རྟོགས་རྒྱན་ལས། དེ་དག་སོ་སོར་སྦྱིན་ལ་སོགས། །རྣམ་པ་དྲུག་ཏུ་བསྡུས་པ་ཡི། །གོ་ཆའི་སྒྲུབ་པ་གང་ཡིན་དེ། །དྲུག་ཚན་དྲུག་གིས་ཇི་བཞིན་བཤད། །ཅེས་སོ། །བཞི་པ་ནི། བྱང་སེམས་ཀྱི་སྒྲུབ་པའི་ཆོས་ཐམས་ཅད་བསླབ་པ་གསུམ་དུ་འདུ་བ་ལ་ལྟོས་ནས་ཕ་རོལ་ཏུ་ཕྱིན་པ་དྲུག་ཏུ་གྲངས་ངེས་པ་ཡིན་ཏེ། སྦྱིན་པས་ལོངས་སྤྱོད་ལ་ཆགས་པ་དང་བྲལ་བ་ལས་ཚུལ་ཁྲིམས་ཕུན་སུམ་ཚོགས་པར་འགྱུར་ལ། དེ་ལས་དགེ་སྦྱོང་དུ་བྱེད་པའི་ཆོས་བཞི་དང་ལྡན་པར་འགྱུར་བས་བཟོད་པ་སྟེ། དེ་གསུམ་ནི་རྒྱུ་དང་ངོ་བོ་དང་ཁྱད་པར་གྱི་སྒོ་ནས་ལྷག་པ་ཚུལ་ཁྲིམས་ཀྱི་བསླབ་པར་བསྡུས་སོ། །བསམ་གཏན་ནི་ཏིང་ངེ་འཛིན་གྱི་བསླབ་པ་དང་། ཤེས་རབ་ནི་ལྷག་པ་ཤེས་རབ་ཀྱི་བསླབ་པར་བསྡུས་ལ། བརྩོན་འགྲུས་ནི་དེ་ཐམས་ཅད་ཀྱི་གྲོགས་སུ་འགྱུར་བ་ཡིན་ཏེ། མདོ་སྡེ་རྒྱན་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱིས་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་སོ། །ལྔ་པ་ནི། སྔ་མ་སྔ་མ་ལས་ཕྱི་མ་ཕྱི་མ་འབྱུང་བས་རྒྱུ་འབྲས་དང་། སྔ་ཕྱི་དམན་མཆོག་དང་རགས་ཕྲའི་ཕྱིར་གོ་རིམ་དེ་ལྟར་དུ་བཞག་སྟེ། དེ་ཉིད་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པས་བསྟན་པ་ཡིན། །ཞེས་སོ། །དྲུག་པ་ནི། ལན་དང་རྣམ་སྨིན་ལ་མི་རེ་བའི་སྒོ་ནས་སྦྱིན་པ་གཏོང་བ། ཡང་སྲིད་བདེ་འགྲོ་ལ་རེ་སྨོན་དང་བྲལ་བའི་ཚུལ་ཁྲིམས་བསྲུང་བ། སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་སྒོམ་པ། རང་གཞན་གྱི་དགེ་ཆོས་མཐའ་དག་སྡུད་པ་ལ་ངང་གིས་སྤྲོ་བའི་བརྩོན་འགྲུས་བརྩོན་པ། བསམ་གཟུགས་ཀྱི་སྙོམས་འཇུག་བསལ་བའི་བསམ་གཏན་ལ་མཉམ་པར་འཇོག་པ། ཐབས་སྙིང་རྗེ་ཆེན་པོ་དང་མ་བྲལ་བའི་ཤེས་རབ་སྒྲུབ་པར་བྱེད་པ་སྟེ། དེ་ཉིད་ལས། རེ་བ་མེད་པའི་སྦྱིན་པ་དང་། །ཡང་སྲིད་མི་འདོད་ཚུལ་ཁྲིམས་དང་། །ཐམས་ཅད་ལ་ནི་བཟོད་པ་དང་། །ཡོན་ཏན་ཀུན་སྡུད་བརྩོན་འགྲུས་དང་། །དེ་བཞིན་བསམ་གཏན་གཟུགས་མེད་མིན། །ཤེས་རབ་ཐབས་དང་ལྡན་པ་ཡིས། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱིས་ཡང་དག་སྦྱོར། །ཞེས་སོ། །དེ་ཐམས་ཅད་ཀྱང་དམ་པ་དྲུག་དང་ལྡན་པར་ཉམས་སུ་བླང་དགོས་ཏེ། རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཕྱོགས་རེ་མ་ཡིན་པར་གཞི་ཐམས་ཅད་ལ་འཇུག་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་བསྔོ་བ། རྣམ་དག་དམ་པ་སྒྲིབ་གཉིས་ཀྱི་དངོས་གཉེན་དུ་སྤྱོད་པ་རྣམས་སོ། །བདུན་པ་ལ། ཕྱིན་དྲུག་སོ་སོའི་ཡོན་ཏན་དང་། དེ་ཉམས་སུ་བླངས་པའི་འབྲས་བུའོ། །དང་པོ་ནི། རྣམ་པ་བཞི་སྟེ། གཞན་དོན་དུ་རྫོགས་བྱང་ལ་དམིགས་པས་རྒྱ་ཆེ་བ་དང་། ལན་དང་རྣམ་སྨིན་ལ་རེ་བ་སོགས་སོ་སོའི་མི་མཐུན་ཕྱོགས་དང་བྲལ་བས་ཟང་ཟིང་མེད་པ་དང་། སེམས་ཅན་ཐམས་ཅད་མངོན་མཐོ་དང་ངེས་ལེགས་བྱང་ཆུབ་གསུམ་ལ་འགོད་པས་དོན་ཆེ་བ་དང་། རེ་རེ་བཞིན་ཡང་སྟོང་ཉིད་སྙིང་རྗེ་ཟུང་འཇུག་གི་ཐབས་དང་བསྔོ་བས་ཟིན་པས་གོང་ནས་གོང་དུ་འཕེལ་བའི་ཕྱིར་མི་ཟད་པ་སྟེ། དེ་ཉིད་ལས། རྒྱ་ཆེ་བ་དང་ཟང་ཟིང་མེད། །དོན་ཆེ་བ་དང་མི་ཟད་པ། །སྦྱིན་པ་ལ་སོགས་ཐམས་ཅད་ཀྱི། །ཡོན་ཏན་བཞིར་ནི་ཤེས་པར་བྱ། །ཞེས་སོ། །གཉིས་པ་ལ་གཉིས་ཀྱིི། གནས་སྐབས་ཀྱི་འབྲས་བུ་ནི། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །ཞེས་སོ། །མཐར་ཐུག་གི་འབྲས་བུ་ནི། ཕར་ཕྱིན་དྲུག་གིས་བསྡུས་པའི་བསོད་ནམས་ཀྱི་ཚོགས་ཀྱིས་སངས་རྒྱས་ཀྱི་གཟུགས་སྐུ་དང་། ཡེ་ཤེས་ཀྱི་ཚོགས་ཀྱིས་ཆོས་སྐུའི་རྒྱུ་བྱེད་པ་སྟེ། མདོ་སྡེ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་ནི་གཉིས་ཆར་ལ་ཡང་གཏོགས། །ལྔ་ཆར་ཡང་ནི་ཡེ་ཤེས་ཚོགས། །ཞེས་དང་། རིན་ཆེན་ཕྲེང་བར། གཟུགས་ཀྱི་སྐུ་ནི་མདོར་བསྡུ་ན། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་སོ། །

གཉིས་པ་རྒྱས་བཤད་ལ་ཕ་རོལ་ཏུ་ཕྱིན་པ་དྲུག་ལས། དང་པོ་སྦྱིན་པ་ནི། དབུལ་བ་སེལ་ཕྱིར་ཆོས་ནོར་མི་འཇིགས་སྦྱིན། །ཞེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་གཏོང་སེམས་དགེ་བ་ས་བོན་དང་བཅས་པའོ། །སྒྲ་དོན་ནི། དཱ་ན་ཞེས་པའི་སྒྲ་ལས་སྦྱིན་པ་སྟེ། དཱ་རི་དྲ་ངན་པར་འགྲོ་བའི་བྱིངས་ལས་དབུལ་བ་དང་། ནཱ་ཤ་ཡ་འདོར་བའམ་སེལ་བ་ལ་འཇུག་པས། ཕ་རོལ་གྱི་དབུལ་བ་འདོར་བའི་དོན་གྱིས་ན་སྦྱིན་པའོ། །དབྱེ་ན། མདོ་སྡེ་རྒྱན་ལས། དེ་ཡང་སེར་སྣ་མེད་ལྡན་དང་། །ཆོས་དང་མི་འཇིགས་ཟང་ཟིང་གཏོང་། །སྦྱིན་པ་དེ་འདྲ་ཡོངས་ཤེས་ནས། །མཁས་པས་ཡང་དག་སྒྲུབ་པར་བྱེད། །ཅེས་པ་ལྟར་གསུམ་ལས། ཟང་ཟིང་གི་སྦྱིན་པ་ནི། སྤྱོད་འཇུག་ལས། ཚོད་མ་ལ་སོགས་སྦྱིན་པ་ལ། །འདྲེན་པས་ཐོག་མར་སྦྱོར་བར་མཛད། །དེ་ལ་གོམས་ནས་ཕྱིས་ནས་ནི། །རིམ་གྱིས་རང་གི་ཤ་ཡང་གཏོང་། །ཞེས་པས་སྦྱིན་མི་ནུས་པ་ལས་བཟློག་པའི་ཆེད་དུ་ཐོག་མར་ཆུང་ངུ་སྟེར་བ་ནས་རིམ་པར་བསླབས་ཏེ། མཐར་གང་ལ་ཅི་འདོད་གཏོང་བས་ཕན་འདོགས་པའོ། །དེ་ཡང་ཟས་གོས་རྟ་དང་ཤིང་རྟ་སོགས་ཟང་ཟིང་དངོས་སྟེར་བ་ནི་གཏོང་བ། བུ་དང་ཆུང་མ་སོགས་སྟེར་བ་ནི་གཏོང་བ་ཆེན་པོ། མགོ་དང་མིག་དང་རྐང་ལག་སོགས་བྱ་དཀའ་བའི་གནས་སྟེར་བ་ནི་ཤིན་ཏུ་གཏོང་བ་སྟེ། དེ་ཉིད་ལས། སྙིང་རྗེའི་བསམ་པ་མ་དག་པས། །ལུས་འདི་གཏང་བར་མི་བྱ་སྟེ། །ཅི་ནས་འདི་དང་གཞན་དོན་དུ། །དོན་ཆེན་འགྲུབ་པའི་རྒྱུར་བཏང་ངོ་། །ཞེས་སོ། །མི་འཇིགས་པའི་སྦྱིན་པ་ནི། གནས་སྐབས་ནད་གདོན། ཆོམ་རྐུན། གཅན་གཟན། རྒྱལ་པོ་སོགས་ཀྱི་འཇིགས་པ་དང་། མཐར་ཐུག་འཁོར་བ་དང་ངན་སོང་གི་འཇིགས་པ་ལས་རང་ནུས་ཅི་ཙམ་ཡོད་པས་བསྲུང་ཞིང་སྐྱོབ་པར་བྱེད་པའོ། །ཆོས་ཀྱི་སྦྱིན་པ་ནི། སྣོད་བརྟགས་ཏེ་སྙིང་རྗེ་ཆེན་པོས་གདུལ་བྱའི་སྐལ་བ་དང་འཚམས་པར་ལེགས་བཤད་ཀྱི་དགའ་སྟོན་འགྱེད་པ་སྟེ། འོད་སྲུང་གི་མདོ་ལས། དག་ཅིང་ཟང་ཟིང་མེད་པའི་སེམས་ཀྱིས་སུ། །ཆོས་ཀྱི་སྦྱིན་བྱེད་རྒྱལ་བས་རབ་ཏུ་བསྔགས། །ཞེས་སོ། །དེ་ཡང་བྱང་སེམས་ཁྱིམ་པས་ཟང་ཟིང་དང་རབ་ཏུ་བྱུང་བས་ཆོས་སྦྱིན་གཙོ་བོར་གཏོང་བར་བཤད་ཅིང་། རྒྱལ་སྲིད་དང་བུ་དང་ཆུང་མ་དང་མགོ་དང་རྐང་ལག་སོགས་གཏོང་བ་ནི་མི་སྐྱེ་བའི་ཆོས་ལ་བཟོད་པ་ཐོབ་པའི་སྤྱོད་ཡུལ་ཏེ། ཡུམ་ལས། ཐབས་ལ་མཁས་པས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ན་འཁོར་ལོས་སྒྱུར་བ་ལ་སོགས་པའི་ལུས་བླངས་ཏེ། ང་ལས་ཡོ་བྱད་རྣམས་ལོངས་ལ་སྦྱིན་པ་ཐོངས། ཚུལ་ཁྲིམས་སྲུངས། ཞེས་བྱ་བ་ནས། ང་ནི་ནང་གི་ལུས་ལའང་ཆགས་པ་མེད་ན་ཕྱིའི་ལོངས་སྤྱོད་ལ་ལྟ་ཅི་སྨོས། ཞེས་སོགས་གསུངས་པ་ལྟར་རོ། །

གཉིས་པ་ཚུལ་ཁྲིམས་ནི། སྤོང་བའི་སེམས་ཀྱིས་ཚུལ་ཁྲིམས་རྣམ་གསུམ་སྤྱད། །ཅེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་སྤོང་སེམས་དགེ་བ་ས་བོན་དང་བཅས་པའོ། །སྒྲ་དོན་ནི། ཤཱི་ལའི་སྒྲ་ལས་ཚུལ་ཁྲིམས་ཏེ། ཤི་ཏ་བསིལ་བ་དང་། ཌུ་ལ་བྷ་ཥ་ཐོབ་པའི་བྱིངས་དོན་ལས། ཡུལ་གྱི་གདུང་བས་མི་བརྫི་བར་བསིལ་བ་ཐོབ་པར་བྱེད་པས་ན་ཚུལ་ཁྲིམས་སོ། །དབྱེ་ན་ཀུན་མཁྱེན་ཆེན་པོས། སྡོམ་དང་ཆོས་སྡུད་སེམས་ཅན་དོན་བྱེད་དེ། །རྒྱལ་སྲས་རྣམས་ཀྱིས་ཚུལ་ཁྲིམས་གསུམ་རྟག་བསྲུང་། །ཞེས་པ་ལྟར་གསུམ་ལས། ཉེས་སྤྱོད་སྡོམ་པའི་ཚུལ་ཁྲིམས་ནི། བྱང་སར་སོ་ཐར་རིགས་བདུན་ལ་བཤད་པས། དེ་དག་གང་རུང་གི་སྟེང་དུ་སྨོན་འཇུག་གི་སེམས་བསྐྱེད་ནས་རང་རྒྱུད་ཉེས་སྤྱོད་ལས་སྡོམ་པའི་ཚུལ་ཁྲིམས་ཏེ། དེ་ཡང་རིགས་བདུན་སྔོན་དུ་སོང་མ་སོང་གང་ཡིན་ཡང་རུང་སྟེ་བྱང་སེམས་ཀྱི་སྡོམ་པ་དེའི་ལྡོག་པ་ལས་གཞན་གནོད་གཞི་བཅས་སྤོང་བའི་ཆ་ནི་སོ་ཐར་དང་། གཞན་ལ་ཕན་པ་སྒྲུབ་པའི་ཕྱིར་ཉེས་སྤྱོད་སྤོང་བའི་ཆ་ནི་བྱང་སྡོམ་མོ། །དགེ་བ་ཆོས་སྡུད་ཀྱི་ཚུལ་ཁྲིམས་ནི། ཚོགས་གཉིས་དང་ཕྱིན་དྲུག་གིས་བསྡུས་པའི་དགེ་ཆོས་རང་རྒྱུད་ལ་མ་སྐྱེས་པ་བསྐྱེད་ཅིང་སྐྱེས་པ་སྤེལ་བའི་ཕྱིར་མི་དགེ་བའི་ཆོས་གཞི་བཅས་སྤོང་བའི་སེམས་པའོ། །སེམས་ཅན་དོན་བྱེད་ཀྱི་ཚུལ་ཁྲིམས་ནི། བསམ་སྦྱོར་ཐམས་ཅད་སེམས་ཅན་གྱི་དོན་དུ་སྤྱོད་པའི་ཐབས་མཁས་ཀྱིིས་དངོས་སམ་བརྒྱུད་པས་གཞན་དོན་སྒྲུབ་པའི་ཕྱིར་དེ་དང་འགལ་བ་གཞི་བཅས་ལས་བསྲུང་བའི་སྤོང་སེམས་སོ། །དེ་ཡང་གཞན་དོན་དུ་འགྱུར་ན་རང་གི་སྡོམ་སྡུད་ཀྱི་ཚུལ་ཁྲིམས་དང་འགལ་བ་ལྟར་སྣང་ཡང་སྤྱོད་པར་གནང་སྟེ། དེད་དཔོན་སྙིང་རྗེ་ཆེན་པོ་དང་བྲམ་ཟེའི་ཁྱེའུ་སྐར་མ་བཞིན་ནོ། །

གསུམ་པ་བཟོད་པ་ནི། ཁོང་ཁྲོ་ཟབ་མོ་སྡུག་བསྔལ་བཟོད་པར་བྱ། །ཞེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་མི་འཁྲུགས་པའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། ཀྵནྟིའི་སྒྲ་ལས་བཟོད་པ་སྟེ། ཀྵ་མུ་དཀའ་བ་ལ་སྟེ་བཟོད་པ་ལ་ཡང་ངོ་ཞེས་པའི་བྱིངས་དོན་ལས། སྡུག་བསྔལ་སོགས་ལ་སྲན་ཚུགས་པས་ན་བཟོད་པའོ། །དབྱེ་ན་གསུམ་ལས། སྡུག་བསྔལ་དང་དུ་ལེན་པའི་བཟོད་པ་ནི། ཕུགས་ཀྱི་བདེ་བ་བླ་ན་མེད་པའི་དོན་དུ་འཕྲལ་གྱི་སྡུག་བསྔལ་ཆོས་སྒྲུབ་པའི་དཀའ་སྤྱད་ཀྱིས་མི་སྐྱོ་བར་དང་དུ་ལེན་པ་དང་། ནད་ཀྱི་ཟུག་རྔུ་འབྱིན་པའི་ཕྱིར་སྤྱད་བསྟེན་པ་བཞིན་ནོ། །དེ་ལྟར་ཡང་སྤྱོད་འཇུག་ལས། གསད་བྱའི་མི་ཞིག་ལག་བཅད་དེ། །གལ་ཏེ་ཐར་ན་ཅིས་མ་ལེགས། །གལ་ཏེ་མི་ཡི་སྡུག་བསྔལ་གྱིས། །དམྱལ་བ་བྲལ་ན་ཅིས་མ་ལེགས། །ཞེས་སོ། །གནོད་བྱེད་ལ་ཇི་མི་སྙམ་པའི་བཟོད་པ་ནི། བདག་གམ་བདག་གི་ཡིད་དུ་འོང་བ་ལ་ཕ་རོལ་གྱིས་རྡེག་པ་དང་གཤེ་བ་སོགས་གནོད་འཚེ་བྱས་པ་ལ། དཔེར་ན་མེ་ཆུང་ངུས་རྩྭ་ཕུང་ཆེན་པོ་སྲེག་པ་ལྟར་ཁོང་ཁྲོ་གཅིག་གིས་བསྐལ་པ་སྟོང་དུ་བསགས་པའི་ལེགས་སྤྱད་རྣམས་འཛད་འགྱུར་གྱི་ཉེས་དམིགས་ཤེས་པས། སེམས་མི་འཁྲུགས་པ་དང་། ཕྱིར་གནོད་ལན་མི་བྱེད་པ་དང་། འཁོན་ཞེ་ལ་མི་འཛིན་པས་བཟོད་པར་བྱ་སྟེ། དེ་ཉིད་ལས། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་དུ། །སྣ་ཚོགས་ཚུལ་གྱིས་བསྒོམ་པར་བྱ། །ཞེས་པ་ལྟར་ཐབས་དུ་མའི་སྒོ་ནས་བཟོད་པའི་དཀའ་ཐུབ་ཀྱིས་སྲན་ཚུགས་པ་ལ་སྦྱར་བར་བྱའོ། །ཆོས་ལ་ངེས་རྟོག་གི་བཟོད་པ་ནི། སྙིང་རྗེས་གཞན་དོན་ལ་མི་སྐྱོ་ཞིང་། ཤེས་རབ་ཀྱིས་ཆོས་ཟབ་མོ་སྟོང་པ་ཉིད་ཀྱི་དོན་ལ་མི་སྐྲག་པའི་བཟོད་པའོ། །

བཞི་པ་བརྩོན་འགྲུས་ནི། གོ་ཆ་དགེ་སྡུད་གཞན་ཕན་བརྩོན་འགྲུས་བརྩམ། །ཞེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་སྤྲོ་བའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། བཱིར་ཡའི་སྒྲ་ལས་བརྩོན་འགྲུས་ཏེ། བཱི་ར་རྣམ་པར་གནོན་པ་ལའོ་ཞེས་པའི་བྱིངས་དོན་ལས། སྙིང་སྟོབས་མ་ཞུམ་པས་མཆོག་གི་གནས་ལ་སྦྱོར་བས་ན་བརྩོན་འགྲུས་སོ། །དབྱེ་ན་གསུམ་ལས། བསམ་པ་གོ་ཆ་ཆེན་པོ་བགོས་པའི་བརྩོན་འགྲུས་ནི། བདུད་ཀྱིས་མི་བརྫི་བའི་རྒྱུ་སེམས་ཅན་ཐམས་ཅད་རྫོགས་བྱང་ལ་མ་འཁོད་བར་དུ་བདག་གིས་བརྩོན་པ་འདོར་བར་མི་བྱའོ་སྙམ་དུ་ཞེ་ཐག་པ་ནས་བསམ་པའོ། །སྦྱོར་བ་ལག་ལེན་ལ་འདེབས་པའི་བརྩོན་འགྲུས་ནི། ལམ་ལྔ་དང་ས་བཅུ་རྫོགས་པར་བྱེད་པའི་རྒྱུ་སྤངས་རྟོགས་ཀྱི་ཡོན་ཏན་འཐོབ་འགྱུར་ལ་སྤྲོ་དགའ་དང་བཅས་པས་དགེ་ཚོགས་སྡུད་པ་ལ་འཇུག་ཅིང་། ཞུགས་ནས་ཀྱང་སྒྲུབ་པ་ལ་དཔའ་མི་ཞུམ་པ་དང་། ཡོན་ཏན་ཅུང་ཟད་ཙམ་གྱིས་མི་ངོམས་པ་དང་། གཞན་རྐྱེན་གྱིས་མི་ལྡོག་པའི་སྒོ་ནས་གུས་རྟག་གི་སྦྱོར་བས་འབད་པར་བྱ་སྟེ། ལུང་ལས། བརྩོན་ལ་བྱང་ཆུབ་འདི་གནས་ཏེ། །མི་བརྩོན་པ་ལ་གནས་མ་ཡིན། །བརྩོན་པས་དགེ་བ་ཐམས་ཅད་སྡུད། །བརྩོན་པས་ཡོན་ཏན་རྣམ་པར་འཕེལ། །ཞེས་སོ། །གཞན་དོན་ལ་སྤྲོ་བའི་བརྩོན་འགྲུས་ནི། དོན་གཉིས་འགྲུབ་པའི་རྒྱུ་སེམས་ཅན་གྱི་དོན་བྱེད་པ་ལ་སྤྲོ་བའི་བརྩོན་འགྲུས་སོ། །དེ་ཡང་སྤྱོད་འཇུག་ལས། ལེ་ལོ་ངན་ལ་ཞེན་པ་དང་། །སྒྱིད་ལུག་བདག་ཉིད་བརྙས་པའོ། །ཞེས་པ་ལྟར་བརྩོན་འགྲུས་ཀྱི་མི་མཐུན་ཕྱོགས་ལེ་ལོ་གསུམ་སྤངས་ནས་འབད་རྩོལ་གྱི་བརྩོན་པ་ལ་ཡང་དག་པར་བསླབ་པར་བྱ་སྟེ། མདོ་སྡེ་རྒྱན་ལས། མགོ་ལ་སེམས་ཅན་ཁུར་ཆེན་ཁྱེར་བ་ཡི། །བྱང་སེམས་མཆོག་ནི་དལ་གྱིས་འགྲོ་མི་མཛེས། །བདག་གཞན་སྣ་ཚོགས་འཆིང་བས་རབ་བཅིངས་པས། །བརྩོན་པ་བརྒྱ་འགྱུར་དུ་ནི་བྱ་བའི་རིགས། །ཞེས་སོ། །

ལྔ་པ་བསམ་གཏན་ནི། འཇིག་རྟེན་འཇིག་རྟེན་འདས་པའི་བསམ་གཏན་བསྒོམ། །ཞེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་དམིགས་པ་ལ་རྩེ་གཅིག་པའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། དྷྱཱ་ན་ཞེས་པའི་སྒྲ་ལས་བསམ་གཏན་ཏེ། དྷྱཻ་སེམས་པ་ལའོ་ཞེས་པའི་བྱིངས་དོན་ལས། སེམས་པའི་རྒྱུན་གཞན་དུ་མི་གཡེངས་པར་འཛིན་པས་ན་བསམ་གཏན་ནོ། །དབྱེ་ན། འཇིག་རྟེན་པའི་བསམ་གཏན་ནི། ཕྱི་རོལ་པ་དང་ཐུན་མོང་པར་གྱུར་བའི་བསམ་གཟུགས་ཀྱི་སྙོམས་འཇུག་བརྒྱད་དང་། འཇིག་རྟེན་ལས་འདས་པའི་བསམ་གཏན་ནི། འདས་ལམ་གྱིས་ཐོབ་པའི་མཐར་གནས་སྙོམས་འཇུག་དགུའམ་ཐེག་གསུམ་སོ་སོའི་བསམ་གཏན་ནོ། །དེ་ཡང་ལངྐར་གཤེགས་པ་ལས། བྱིས་པ་ཉེར་སྤྱོད་བསམ་གཏན་དང་། །དོན་རབ་འབྱེད་པའི་བསམ་གཏན་དང་། །དེ་བཞིན་གཤེགས་དགེའི་བསམ་གཏན་ཏེ། །ཞེས་གསུངས་ཤིང་། དེ་དག་གི་ས་མཚམས་ནི་ས་སྡེ་ལས་རིམ་པར། ལམ་མ་ཞུགས་ཀྱི་རྒྱུད་ཀྱི་བསམ་གཟུགས་ཀྱི་ཏིང་ངེ་འཛིན་དང་། ལམ་ཞུགས་ཚོགས་སྦྱོར་གྱི་ཏིང་ངེ་འཛིན་དང་། མཐོང་ལམ་ཡན་ཆད་འཕགས་པའི་ཏིང་ངེ་འཛིན་རྣམས་ལ་བཤད་དོ། །བསམ་གཏན་ཇི་ལྟར་བསྒོམ་པའི་ཚུལ་ནི། གནས་གྲོགས་ལོངས་སྤྱོད་སོགས་ཀྱི་འདུ་འཛི་དང་སེམས་ཀྱི་རྣམ་གཡེང་སྤང་ནས། དབེན་པར་སྟན་ལ་སྐྱིལ་ཀྲུང་མཉམ་བཞག་དང་ལྡན་པས་འདུག་སྟེ། དམིགས་པ་ལ་ནི་སེམས་གཏད་ནས། །དེ་རྒྱུན་རྣམ་པར་གཡེང་མི་བྱ། །ཞེས་པ་ལྟར་དགེ་བའི་དམིགས་ཡུལ་གང་ཡང་རུང་བ་ཞིག་ལ་སེམས་གཏད་དེ་རྣམ་པར་རྟོག་པས་མི་གཡོ་བར་མཉམ་པར་བཞག་པས། ཡུལ་སྣང་མ་འགགས་ལ་དེར་འཛིན་གྱི་རྟོག་པ་ཞི་བའི་ཏིང་ངེ་འཛིན་སྐྱེ་ཞིང་། དེ་ལས་ལངས་པའི་རྗེས་ཐོབ་ཏུ་ས་བདུན་པ་ཚུན་ཆད་དུ་གཟུང་འཛིན་གྱི་ཞེན་པ་དང་བཅས་པ་ཡོད་ལ། དེ་ཕན་ཆད་དུ་མཉམ་རྗེས་ངོ་བོ་སོ་སོ་བ་མེད་དེ། རྒྱུད་བླར། བྱ་བ་སྒྲུབ་ལ་རྟག་ཏུ་བློ། །མེ་བཞིན་དུ་ནི་འབར་བ་དང་། །ཞི་བའི་བསམ་གཏན་སྙོམས་འཇུག་ལའང་། །རྟག་ཏུ་སྙོམས་པར་འཇུག་པ་ཡིན། །ཞེས་སོ། །དེ་ལྟར་བསྒོམས་པས་སྤྲོས་པའི་སྣང་བ་ནུབ་སྟེ། ནང་དུ་བསམ་གཏན་ལས་སྐྱེས་པའི་དགའ་བདེ་ཐོབ་པ་ནི་མཐོང་བའི་ཆོས་ལ་བདེ་བར་གནས་པའི་བསམ་གཏན་དང་། ཕྱིན་དྲུག་སོགས་དགེ་ཚོགས་སྒྲུབ་དུས་སེམས་རྩེ་གཅིག་པའི་ཆའམ་ཟད་པར་ཟིལ་གནོན་སོགས་དང་རྣམ་ཐར་གཟུངས་སྤོབས་རྒྱ་མཚོ་སྒྲུབ་པ་ནི་ཡོན་ཏན་སྒྲུབ་པའི་བསམ་གཏན་དང་། སེམས་ཅན་གྱི་དོན་ལ་རྩེ་གཅིག་པའམ་བསམ་གཏན་གྱི་དངོས་གཞིའི་སེམས་ལ་རྫུ་འཕྲུལ་འདོད་དགུར་སྒྱུར་བའི་བཀོད་པས་གདུལ་བྱ་འདུལ་བ་ནི་སེམས་ཅན་དོན་བྱེད་ཀྱི་བསམ་གཏན་ནོ། །

དྲུག་པ་ཤེས་རབ་ནི། ཐོས་བསམ་སྒོམ་པའི་ཤེས་རབ་ཟབ་མོ་སྤྱད། །ཅེས་པའི་དོན་ལ་གསུམ་ལས། ངོ་བོ་ནི། ཁྱད་ཆོས་བཞི་ལྡན་གྱི་ཆོས་རབ་རྣམ་པར་འབྱེད་པའི་སེམས་པ་དགེ་བ་ས་བོན་དང་བཅས་པའོ། །སྒྲ་དོན་ནི། པྲ་ཛྙཱ་ཞེས་པའི་སྒྲ་ལས་ཤེས་རབ་སྟེ། ཉེར་བསྒྱུར་པྲ་སྔོན་མའི་ཛྙཱ་ཁོང་དུ་ཆུད་པའམ་རྟོགས་པ་ལའོ་ཞེས་པའི་བྱིངས་དོན་ལས། རབ་ཏུ་རྟོགས་པའམ་རབ་ཏུ་ཁོང་དུ་ཆུད་པ་སྟེ། རྟོགས་བྱའི་ཡུལ་ནི་དོན་དམ་པ་ཡིན་ལ། དེའི་དམ་པ་ནི་འཕགས་རྒྱུད་ཀྱི་མཉམ་བཞག་ཡེ་ཤེས་དང་། དོན་ནི་དེའི་སྤྱོད་ཡུལ་དུ་གྱུར་བ་སྟེ་དེ་ཉིད་རྟོགས་པའམ་ཁོང་དུ་ཆུད་པས་ན་ཤེས་རབ་བོ། །དབྱེ་ན། ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལ་སྒོམ་པ་ཡང་ནི་རབ་ཏུ་འབྱུང་། །ཞེས་གསུངས་པ་ལྟར་གསུམ་ལས། ཐོས་པ་ལས་བྱུང་བའི་ཤེས་རབ་ནི། གང་ལ་ཐོས་པ་བྱ་བའི་ཡུལ་རྒྱལ་བའི་གསུང་རབ་དགོངས་འགྲེལ་དང་བཅས་པ་ནང་རིག་པ་དང་། དེ་དག་གི་གདུལ་བྱ་རྗེས་སུ་འཛིན་པའི་ཡན་ལག་ཏུ་ཐུན་མོང་གི་རིག་གནས། གཞན་དག་ཚར་གཅོད་པའི་རིག་པ་སྒྲ་ཚད་དང་། གཞན་དག་རྗེས་སུ་འཛིན་པའི་རིག་པ་བཟོ་གསོ་གཉིས་ཏེ་བཞི་ལའང་བསླབ་དགོས་ཏེ། ཐམས་ཅད་མཁྱེན་པའི་གོ་འཕང་ཐོབ་པར་བྱ་དགོས་པའི་ཕྱིར། དེ་ལྟར་ཡང་། རིག་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་མི་འགྱུར་ཏེ། དེ་ལྟ་བས་ན་གཞན་དག་ཚར་བཅད་རྗེས་བཟུང་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་རྩོན་བྱ། །ཞེས་དང་། རྒྱལ་སྲས་རྣམས་ཀྱིས་མི་སློབ་པ། །དེ་ནི་གང་ནའང་ཡོད་མ་ཡིན། །ཞེས་སོ། །ཁྱད་པར་གསུང་རབ་ཀྱི་དོན་རྣམས་དཔྱིས་ཕྱིན་པ་ཁོང་དུ་ཆུད་པར་བྱེད་པ་ལ། དྲང་ངེས་དང་དགོངས་ལྡེམ་དགོངས་ལ་སོགས་པའི་ཐབས་ཀྱིས་འཇལ་དགོས་ནའང་དེ་དག་གཞན་དུ་ཤེས་པར་བྱ་ཞིང་། འདིར་ཤེས་རབ་ནི་ལྷག་མཐོང་སྟེ། དོན་དམ་པའི་བདེན་པ་ཡིན་ལ། དེ་ཉིད་གཏན་ལ་འབེབས་པར་བྱེད་པའི་རིགས་པ་ལ་གཏན་ཚིགས་ཆེན་པོ་ལྔ་སྟེ། ངོ་བོ་ལ་དཔྱོད་པ་གཅིག་དུ་བྲལ། རྒྱུ་ལ་དཔྱོད་པ་རྡོ་རྗེ་ཟེགས་མ། འབྲས་བུ་ལ་དཔྱོད་པ་ཡོད་མེད་སྐྱེ་འགོག །རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག་དང་བཞི་ནི་ཡོད་པ་སྒྲོ་འདོགས་ཀྱི་མཐའ་སེལ་བའི་རིགས་པའོ། །གཞན་ལ་རག་ལས་པའི་ཕྱིར་ངོ་བོ་ཉིད་ཀྱིས་མ་གྲུབ་ལ་ཐ་སྙད་དུ་མེད་པ་མ་ཡིན་པས་ཡོད་མིན་གཉིས་ཀའི་སྤྲོས་པ་གཅོད་པ་རྟེན་འབྲེལ་གྱི་རིགས་པ་སྟེ། དེ་ལྟར་གཏན་ཚིགས་ཆེན་པོ་ལྔས་ཆོས་ཐམས་ཅད་མཐའ་བྲལ་དབུ་མར་གཏན་ལ་འབེབས་པ་ཡིན་ནོ། །དེ་ཡང་སྤྲོས་པ་གཅོད་ལུགས་ལ། རང་སྟོང་དང་། གཞན་སྟོང་གཉིས་ལས། རང་སྟོང་ནི། ཆོས་ཅན་ཇི་ལྟར་སྣང་བ་འདི་དག་སྣང་ཙམ་ཉིད་ནས་རང་རང་གི་ངོ་བོས་སྟོང་པས་མེད་དགག་གི་སྟོང་ཉིད་དོན་དམ་པར་བཞེད་ཅིང་། ངོ་བོ་ཉིད་མེད་པར་སྨྲ་བའི་དབུ་མ་པ་ལ་དོན་དམ་དུ་ཐ་དད་མེད་ཀྱང་། ཀུན་རྫོབ་ཏུ་གྲུབ་པ་སྒྱུ་མ་ལྟར་ཞེས་རང་རྒྱུད་ཀྱི་དམ་བཅའ་འགོད་པ་དང་། ཐལ་འགྱུར་ཁོ་ན་འཕེན་པས་ཁས་ལེན་པའི་ཀུན་རྫོབ་ཙམ་ཡང་འགོག་པའི་སྲོལ་གཉིས་སྣང་ངོ་། །གཞན་སྟོང་དུ་གཏན་ལ་འབེབས་པའི་དབུ་མ་པ་རྣམས་ལ། ཤེས་བྱ་ཐམས་ཅད་མཚན་ཉིད་གསུམ་དུ་འདོད་པ་དང་། ཀུན་བརྟགས་དང་ཡོངས་གྲུབ་གཉིས་སུ་བསྡུ་བའི་ཁྱད་པར་ལས། ཆོས་ཅན་ངོས་འཛིན་ཚུལ་མི་འདྲ་བ་གཉིས་བྱུང་སྟེ། རྣལ་འབྱོར་སྤྱོད་པའི་གཞུང་དུ། སྟོང་གཞི་གཞན་དབང་དགག་བྱ་ཀུན་བཏགས་ཀྱིས་སྟོང་བའི་ཡོངས་གྲུབ་ཏུ་བཤད་པ་དང་། རྒྱུད་བླ་མ་སོགས་ལས་ཆོས་ཉིད་ཡོངས་གྲུབ་དགག་བྱ་ཀུན་བརྟགས་ཀྱིས་སྟོང་པར་གསུངས་སོ། །དེས་ན་ཡོངས་གྲུབ་སེམས་ཀྱི་ཆོས་ཉིད་དོན་དམ་པའི་དབྱིངས་འདིའི་ངོ་བོ་ལ་དོར་བྱའི་དྲི་མ་དང་སྔར་མེད་ཀྱི་ཡོན་ཏན་གསར་དུ་སྒྲུབ་ཏུ་མེད་དེ། ཡེ་ནས་རང་བཞིན་གྱིས་རྣམ་པར་དག་ཅིང་ཡོན་ཏན་ལྷུན་གྲུབ་ཡིན་པའི་ཕྱིར། སྐྱོན་ཡོན་གྲུབ་བསལ་ལས་འདས་པས་དོན་དམ་གྱི་དབྱིངས་དེ་ཁོ་རང་ཁོ་རང་གི་ངོ་བོས་སྟོང་པ་མ་ཡིན། གློ་བུར་འཁྲུལ་སྣང་གི་ཆོས་གཟུང་འཛིན་སྤྲོས་པའི་ཆ་རྣམས་གཤིས་ལ་མ་གྲུབ་པས་ཀུན་རྫོབ་རང་གི་ངོ་བོས་སྟོང་པ་ཡིན་ལ། དེ་འདྲ་དེ་དོན་དམ་ཆོས་ཉིད་ལས་གཞན་ཡིན་པས་དོན་དམ་གཞན་གྱི་ངོ་བོས་སྟོང་བ་ཞེས་བཤད་དེ། རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་སོ། །མདོར་ན་ཀུན་རྫོབ་ཀྱི་ཕྱོགས་ནས་གཞལ་ན་མེད་དགག་དང་མ་ཡིན་དགག་གི་སྟོང་ཉིད། དོན་དམ་དབྱིངས་ཀྱི་ཕྱོགས་ནས་གཞལ་ན་རང་ལས་གཞན་རྟོག་པའི་ཡུལ་གྱིས་སྟོང་པའོ། །འོ་ན་དོན་དམ་རང་གི་ངོ་བོས་སྟོང་པ་ལྟར་གསུངས་པའི་དགོངས་པ་གང་སྙམ་ན། དོན་དམ་ལ་དམིགས་ནས་བློས་བཟུང་བ་ལྟར་མ་གྲུབ་པ་ལ་དགོངས་པ་ཡིན་ནོ། །དེ་དག་ནི་སོ་སོ་སྐྱེ་བོའི་སར་ཐོས་བྱུང་གི་ཤེས་རབ་གལ་ཆེ་བས་གཏན་ལ་འབེབས་ཚུལ་གྱི་སྒོ་ཙམ་བསྟན་པ་སྟེ། མ་ཐོས་པར་བསམ་སྒོམ་མི་ནུས་པའི་ཕྱིར། དེ་ལྟར་ཡང་། ཤེས་རབ་མཆོག་ཡིན་དེའི་གཞི་ནི། །ཐོས་པ་དེ་ཕྱིར་ཐོས་པ་མཆོག །ཅེས་སོ། །བསམ་བྱུང་གི་ཤེས་རབ་ནི། ཐོས་པ་ཙམ་དུ་མ་བཞག་པར་དེའི་དོན་ངེས་པར་བསམ་པ་ལ་རག་ལས་པའི་ཕྱིར། བསམ་པའི་ཤེས་རབ་བསྐྱེད་པར་བྱ་སྟེ། ཡིད་བཞིན་མཛོད་ལས། དེ་ལྟར་ཐོས་པ་དམ་པས་བརྒྱན་རྗེས་སུ། །བསམ་པའི་ཤེས་རབ་ངེས་པར་རྒྱུད་ལ་བསྐྱེད། །ཅེས་སོ། །དེ་ཡང་ཇི་སྐད་ཐོས་པའི་དོན་ལ་ཉེ་བར་དཔྱོད་པས་ནང་དུ་སེམས་པར་འཇུག་པ་ན། དོན་སྤྱི་ཙམ་དུ་མ་ལུས་པར་བྱེ་བྲག་འབྱེད་པའི་བསམ་ཤེས་ཀྱིས། རེ་རེ་ནས་ཚིག་དང་དོན་གྱི་རིམ་པ་རྣམས་ནོར་མ་ནོར་བསམ་པས་བརྟག་ཅིང་ངེས་པར་བྱ་བ་སྟེ། ཡེ་ཤེས་སྙིང་པོ་ཀུན་ལས་བཏུས་ལས། བསྲེགས་བཅད་བརྡར་བས་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ཞེས་པའི་དཔེས་མདོ་རྒྱུད་ཀྱི་ཚིག་དོན་རྣམས་ལ་དད་པས་འཇུག་པ་ཙམ་མ་ཡིན་པར་ཡིད་ཆེས་བསྐྱེད་པའི་ལུང་དང་། དངོས་སྟོབས་ཀྱི་རིགས་པ་དང་། སྔ་ཕྱི་མི་འགལ་བ་གསུམ་གྱིས་བརྟགས་ནས་བླང་བར་བྱ་བ་སྟེ། བཞི་བརྒྱ་པ་ལས། དོན་གང་ལུང་དང་རིགས་པ་ཡིས། །ལེགས་པར་མངོན་པར་བརྗོད་པ་དང་། །སྔ་ཕྱི་འགལ་བ་མེད་པ་སྟེ། །དམ་པ་རྣམས་ཀྱིས་ཡོངས་སུ་བཟུང་། །ཞེས་སོ། །གཞན་དག་ཤེས་བྱ་གནས་གསུམ་ལུང་རིགས་གཉིས་ཀྱིས་བརྟག་པར་འཆད་དོ། །སྒོམ་བྱུང་གི་ཤེས་རབ་ནི། ཡིད་བཞིན་མཛོད་ལས། དེ་ལྟར་བསམ་བྱ་ཡོངས་སུ་རྫོགས་པ་ན། །སྒོམ་བྱུང་ཤེས་རབ་རྒྱུད་ལ་བསྐྱེད་པར་བྱ། །ཞེས་པས་སྤྱིར་ཇི་ལྟར་ངེས་པའི་དོན་རྣམས་བླང་དོར་གྱི་སྒོ་ནས་སྒྲུབ་ཅིང་ཉམས་སུ་ལེན་པ་དང་། ཁྱད་པར་ལྷག་མཐོང་གི་ཤེས་རབ་རྣམ་པར་མི་རྟོག་པའི་ཡེ་ཤེས་བསྒོམ་པ་ལ་འཇུག་སྟེ། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱ་སྟེ། །ཞེས་སོ། །དེ་ལ་སྒོམ་པས་ཉམས་སུ་མྱོང་བྱའི་ལྟ་བ་ལ། འཁོར་ལོ་བར་པའི་དངོས་བསྟན་རིགས་ཚོགས་སུ་བཀྲལ་བ་ལྟར་ན། ངེས་དོན་མེད་དགག་ལ་བཞེད་པས། ཅི་ཡང་མི་སྒོམ་པ་ལ་སྟོང་ཉིད་སྒོམ་པ་དང་། ཅི་ཡང་མ་མཐོང་བ་ལ་དེ་ཁོ་ན་ཉིད་རྟོགས་པར་འཆད། འཁོར་ལོ་ཐ་མའི་དགོངས་པ་བྱམས་ཆོས་ཀྱི་གཞུང་ཐོགས་མེད་སྐུ་མཆེད་ཀྱིས་བཀྲལ་བ་དང་ཀླུ་སྒྲུབ་ཞབས་ཀྱིས་བསྟོད་ཚོགས་སུ། གཟུང་འཛིན་གཉིས་མེད་ཀྱི་ཡེ་ཤེས་ཉིད་སྒོམ་པས་ཉམས་སུ་མྱོང་བྱར་བཤད་ཅིང་། དེ་ཉིད་གསང་སྔགས་ཀྱི་རྒྱུད་སྡེ་ཟབ་མོ་རྣམས་དང་ཡང་དགོངས་པ་མཐུན་པ་ཡིན་ནོ། །དེས་ན་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ཞབས་ཀྱིས་ཀྱང་། གྲུབ་མཐའ་མཛོད་དང་ཡིད་བཞིན་མཛོད་རྩ་འགྲེལ་ལ་སོགས་པའི་གསུང་རབ་རྣམས་སུ་ཐོས་པས་གཏན་ལ་དབབ་བྱ་ངོས་འཛིན་པའི་སྐབས་སུ་དབུ་མ་ཐལ་འགྱུར་བ་རྒྱུའི་ཐེག་པ་ཆེན་པོའི་རྩེ་མོར་སྒྲུབ་པར་མཛད་ཅིང་། སྒོམ་པ་ཉམས་མྱོང་གིས་གཏན་ལ་འབེབས་པའི་སྐབས་རྣམས་སུ་མྱོང་བྱ་གཟུང་འཛིན་གཉིས་དང་བྲལ་བའི་སོ་སོ་རང་རིག་པའི་ཡེ་ཤེས་ལ་བཞེད་པ་གཉིས་མི་འགལ་ལམ་སྙམ་ན། མི་འགལ་ཏེ། སོ་སྐྱེའི་སར་ལྟ་བ་ཐོས་བསམ་གྱིས་གཏན་ལ་འབེབས་པའི་ཚེ་བློའི་མཚན་འཛིན་གཞིག་དཀའ་བས། དེ་ཐོས་བསམ་ལས་བྱུང་བའི་ཤེས་རབ་ཀྱིས་འགོག་པར་བྱེད་པ་ལ། སྒྲོ་འདོགས་གཅོད་བྱེད་ཀྱི་རིགས་པ་ཐལ་འགྱུར་བ་རྣོ་བའི་ཕྱིིར་དང་། ཡང་སྒོམ་བྱུང་ཉམས་མྱོང་གིས་གཏན་ལ་འབེབས་པའི་སྐབས་སུ་འཁོར་ལོ་ཐ་མར་གསུངས་པའི་དབུ་མའི་ལྟ་བ་དེ་ཉིད་ཟབ་ཅིང་ཆེས་བཟང་བ་ཡིན་ཏེ། དབྱིངས་རང་བཞིན་གྱིས་རྣམ་པར་དག་པ་དོན་དམ་པའི་བདེན་པ་རང་བྱུང་གི་ཡེ་ཤེས་དེ་ཉིད་ཆོས་ཐམས་ཅད་ཀྱི་གདོད་མའི་གནས་ལུགས་ཡིན་པ་གང་ཞིག །གསང་སྔགས་ཀྱི་རྒྱུད་སྡེ་ཟབ་མོ་རྣམས་ནས་བཤད་པའི་ལྟ་བའི་ཉམས་ལེན་དང་ཡང་མཐུན་པའི་ཕྱིར་སྙམ་དུ་དགོངས་སོ། །དེས་ན་སྙིང་པོའི་མདོ་སྡེ་རྣམས་ཀྱི་དགོངས་པ་རྒྱུད་བླ་མ་དང་དབུ་མ་ཆོས་དབྱིངས་བསྟོད་པར་གསུངས་པ་ལྟར། དེ་བཞིན་གཤེགས་པའི་སྙིང་པོའི་ཚུལ་ཁོང་དུ་ཆུད་པར་བྱས་ལ། རིགས་ཅན་དེས་བྱང་ཆུབ་མཆོག་ཏུ་སེམས་བསྐྱེད་ནས། གནས་ལུགས་ཁམས་ཀྱི་དོན་དེ་ཉིད་མངོན་དུ་འགྱུར་བའང་རྣམ་པར་མི་རྟོག་པའིི་ཏིང་ངེ་འཛིན་གྱི་སྒོ་ལ་རག་ལས་པས་ན། སྟན་བདེ་བ་ལ་སྐྱིལ་མོ་ཀྲུང་བཅས་ཏེ། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །ཞེས་པ་ལྟར་རྣམ་རྟོག་གི་མཚན་མ་དང་དམིགས་པ་གང་ཡང་ཡིད་ལ་མི་བྱེད་པར། གང་ཤར་གྱི་རང་ངོ་ལ་བསལ་བཞག་མེད་པར་སལ་ལེ་སིང་ངེ་ངོས་བཟུང་ཐམས་ཅད་དང་བྲལ་བའི་རང་ཞལ་ལ་རྩེ་གཅིག་ཏུ་མཉམ་པར་བཞག་པས། སེམས་དང་སེམས་བྱུང་གི་སྤྲོས་པ་ཐམས་ཅད་འགགས་ནས་གཟུང་འཛིན་གཉིས་དང་བྲལ་བའི་རྣམ་པར་མི་རྟོག་པའི་ཡེ་ཤེས་སོ་སོ་རང་གི་རིག་པའི་ངོ་བོ་ཉིད་དུ་མཐོང་བར་འགྱུར་ཏེ། རྒྱུད་བླ་མ་ལས། ནང་གི་བདག་ཉིད་ཆོས་སྐུ་ནི། །ཡེ་ཤེས་མིག་གིས་མཐོང་བར་འགྱུར། །ཞེས་དང་། ཆོས་དབྱིངས་བསྟོད་པར། མིག་དང་གཟུགས་ལ་བརྟེན་ནས་ནི། །དྲི་མ་མེད་པའི་སྣང་བ་འབྱུང་། །ཞེས་དང་། སྒྲ་གཅན་འཛིན་གྱིས་ཡུམ་ལ་བསྟོད་པ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་སོ། །དེ་ཡང་སྤྲིན་དེངས་པས་ཉི་མའི་དཀྱིལ་འཁོར་གསལ་བ་ལྟར་མཉམ་བཞག་གི་རིག་ངོ་ན་ངོས་བཟུང་གང་དུའང་མ་གྲུབ་པའི་བློ་བྲལ་གྱི་ཡེ་ཤེས་རང་གསལ་རྗེན་པར་གནས་པ་ནི་སེམས་རང་བཞིན་གྱིས་འོད་གསལ་བའི་ཡེ་ཤེས་ཁོང་ནས་རིག་པ་སྟེ། སྤྱོད་འཇུག་ལས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་སོ། །དེ་ལྟར་སྙིང་པོའི་དོན་ལ་སྒོམ་བྱུང་གིས་ངེས་པ་རྙེད་པའི་ཚེ། རང་གནས་ཀྱི་ཡེ་ཤེས་མ་རྟོགས་པའི་སེམས་ཅན་རྣམས་ལ་སྙིང་རྗེའི་ཤུགས་ཆེན་པོས་བླ་ན་མེད་པའི་བྱང་ཆུབ་ཀྱི་གོ་འཕང་ལ་སྦྱོར་བའི་སྙིང་སྟོབས་བཅོས་མ་མ་ཡིན་པར་སྐྱེ་ཞིང་། དེའི་རྒྱུར་རྣམ་པར་མི་རྟོག་པའི་ཏིང་ངེ་འཛིན་སྒོམ་པ་ལ་ངང་གིས་འཇུག་པ་འབྱུང་བས་ཟབ་མོའི་རྒྱུ་འབྲས་ཀྱི་འབྲེལ་བ་འཁོར་ལོ་ལྟར་འཁོར་བར་འགྱུར་རོ། །མདོར་ན་མཉམ་བཞག་ཏུ་རྣམ་པར་མི་རྟོག་པའི་ཡེ་ཤེས་བསྒོམ་ཞིང་། དེ་ལས་ལངས་ཏེ་རྗེས་ཐོབ་ཏུ་སྣང་བ་ཐམས་ཅད་སྒྱུ་མ་ལྟར་སྣང་ལ་རང་བཞིན་མ་གྲུབ་པར་བལྟས་ནས། སྒྱུ་མ་ལྟ་བུའི་སེམས་ཅན་གྱི་དོན་དུ་བསྔོ་བ་བྱ་བ་ཡིན་ནོ། །དེ་ལྟར་ཕ་རོལ་ཏུ་ཕྱིན་པ་དྲུག་པོ་ཀུན་ཀྱང་སྦྱོར་བ་བྱང་ཆུབ་ཀྱི་སེམས་ཀྱིས་ཟིན་པ། དངོས་གཞི་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། རྗེས་དགེ་བ་རྫོགས་བྱང་དུ་བསྔོ་བས་ཟིན་པ་སྟེ། སྦྱོར་དངོས་རྗེས་གསུམ་ཚང་བས་སྲིད་ཞིའི་ཕ་རོལ་ཏུ་ཕྱིན་པར་འགྱུར་རོ། །

གསུམ་པ་སེམས་ཅན་དོན་བྱེད་ཀྱི་ཚུལ་ཁྲིམས་ལ། དོན་བྱེད་ཀྱི་ཚུལ་ཁྲིམས་དངོས་དང་། ཚུལ་ཁྲིམས་གསུམ་ཀ་དང་འབྲེལ་བའི་བསླབ་སྤྱོད་བཤད་པའོ། །དང་པོ་ལ་བསྟན་བཤད་གཉིས་ལས། མདོར་བསྟན་ནི། སེམས་ཅན་དོན་བྱེད་ཚུལ་ཁྲིམས་བསྡུ་དངོས་བཞི། །ཞེས་པ་སྟེ། དགེ་བ་ཆོས་སྡུད་ཀྱིས་རང་རྒྱུད་སྨིན་ནས་གཞན་རྒྱུད་སྨིན་ཕྱིར་སེམས་ཅན་དོན་བྱེད་ཀྱི་ཚུལ་ཁྲིམས་བསྡུ་དངོས་བཞི་ལ་འཇུག་གོ །

གཉིས་པ་རྒྱས་བཤད་ནི། ཐོག་མར་སྦྱིན་པས་གདུལ་བྱ་རབ་བསྡུས་ནས། །སྙན་པར་སྨྲ་བའི་གཏམ་གྱིས་ཡིད་རབ་དྲངས། །ཐེག་པ་རིམ་དགུར་བཀྲི་བ་དོན་སྤྱོད་དེ། །དེ་དག་འདྲེན་ཕྱིར་རང་ཡང་དོན་དེ་སྤྱོད། །ཅེས་པ་ལ། མཚན་ཉིད། དབྱེ་བ། གྲངས་ངེས། བསྡུ་ཚུལ་དང་བཞི། དང་པོ་ནི། བྱང་སེམས་ཀྱི་སྒྲུབ་པའི་བསླབ་བྱ་གང་ཞིག །སེམས་ཅན་ཡོངས་སུ་སྨིན་པར་བྱ་བའི་ཆེད་དུ་ཐབས་ལ་མཁས་པས་གཞན་ལ་ཕན་པ་ལྷུར་ལེན་པར་འདོད་པའི་སེམས་པ་མཚུངས་ལྡན་དང་བཅས་པའོ། །དབྱེ་ན། སྦྱིན་པ། སྙན་པར་སྨྲ་བ། དོན་སྤྱོད་པ། དོན་མཐུན་པ་དང་བཞི། དང་པོ་ནི། གདུལ་བྱ་འཁོར་དུ་མ་འདུས་པ་བསྡུ་བར་བྱ་བའི་ཕྱིར་ཐོག་མར་ཟང་ཟིང་གི་སྦྱིན་པས་མགུ་བར་བྱེད་པ་སྟེ། པདྨ་སྤུངས་པ་ལས། སྦྱིན་པའི་གཡབ་མོས་ལེགས་བོས་ཏེ། །ཞེས་སོ། །གཉིས་པ་ནི། འཁོར་དུ་འདུས་ནས་སྙན་པར་སྨྲ་བའི་གཏམ་གྱིས་བློ་རིམ་གྱིས་དྲངས་ཏེ་དམ་པའི་ཆོས་བསྟན་པས་དེ་སྒྲུབ་པ་ལ་དོན་གཉེར་གྱི་མོས་འདུན་དང་སྤྲོ་བ་བསྐྱེད་དུ་འཇུག་པ་སྟེ། དེ་ཉིད་ལས། སྙན་པར་སྨྲ་བའི་ཚིག་གིས་བསུ། །ཞེས་སོ། །གསུམ་པ་ནི། བྱིས་པ་ཁ་ཟས་འཇམ་རྩུབ་ཀྱིས་རིམ་པར་གསོ་བ་ལྟར་ཆོས་གཅིག་གིས་བློ་རིས་ཐ་དད་སྨིན་པར་མི་ནུས་པས་གདུལ་བྱའི་བློ་དང་འཚམས་པའི་ཆོས་ལ་སྤྱོད་དུ་འཇུག་པ་སྟེ། བློ་ཐ་མའི་ཆུང་འབྲིང་ཆེ་གསུམ་ནི་ཉན་རང་བྱང་སེམས་གསུམ་དང་། འབྲིང་གསུམ་ནི་བྱ་སྤྱོད་རྣལ་འབྱོར་གསུམ་དང་། རབ་གསུམ་ནི་བསྐྱེད་པ་དང་རྫོགས་པ་དང་རྫོགས་པ་ཆེན་པོ་གསུམ་སྟེ། ཐེག་དགུ་ལ་བློའི་རིམ་པ་ལྟར་བཀྲི་བ་སོགས་དངོས་དང་བརྒྱུད་པའི་སྒོ་ནས་སེམས་ཅན་གྱི་ཕན་བདེ་སྒྲུབ་པའི་ཐབས་ལ་མཁས་པར་བྱ་བ་སྟེ། ཞི་བ་ལྷས། དམན་ལ་མཆོག་གི་ཆོས་མི་སྟོན། །རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་དང་། སྔ་མ་ལས། དོན་སྤྱོད་གྲོས་ཆེན་གདབ་པར་བྱ། །ཞེས་སོ། །བཞི་པ་ནི། སེམས་ཅན་དེ་དག་དམ་པའི་ཆོས་དང་དགེ་བའི་སྤྱོད་པ་ལ་འདྲེན་པའི་ཕྱིར་རང་ཡང་དོན་དེ་ལ་མཐུན་པར་སློབ་དགོས་ཏེ། རང་གིས་མ་བསྒྲུབས་ན་མཛེ་ཕོའི་བྱ་ཁྱུང་གི་སྒྲུབ་ཐབས་ལྟར་གཞན་ལ་འཇུག་ལྡོག་གི་བསླབ་བྱ་འདོམས་ཀྱང་ཉན་དུ་མི་འདོད་པའི་ཕྱིར། དེ་ཉིད་ལས། དོན་མཐུན་པ་ཡིས་བག་ཕབ་སྟེ། །ཞེས་སོ། །

གསུམ་པ་གྲངས་ངེས་ནི། གདུལ་བྱ་ལ་གནས་སྐབས་སུ་ཕན་པའི་ཕྱིར་ཟང་ཟིང་དང་། མཐར་ཐུག་གི་ཕན་པའི་རྒྱུར་ཆོས་འཛིན་པ་དང་། དེའི་དོན་ལ་འཇུག་པ་དང་། དོན་དེ་ལ་ཡང་ནས་ཡང་དུ་རྗེས་སུ་འཇུག་པའི་ཕྱིར་ཕྱི་མ་གསུམ་སྟེ་བཞིར་གྲངས་ངེས་སོ། །དེ་ལྟར་ཡང་མདོ་སྡེ་རྒྱན་ལས། སྦྱིན་མཚུངས་དེ་སྟོན་ལེན་འཇུག་དང་། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང་། །དོན་མཐུན་ཉིད་དུ་འདོད་པ་ཡིན། །ཞེས་དང་། ཕན་པར་བྱེད་པའི་ཐབས་དང་ནི། །འཛིན་དང་འཇུག་པར་བྱེད་པ་དང་། །དེ་བཞིན་རྗེས་སུ་འཇུག་བྱེད་པས། །བསྡུ་བའི་དངོས་པོ་བཞིར་བཤད་དོ། །ཞེས་སོ། །ཡང་ཆོས་ཀྱི་སྣོད་རུང་དུ་སྒྲུབ་པ་དང་། མོས་པ་དང་། སྒྲུབ་པ་དང་། མཐར་ཕྱིན་པར་བྱ་བའི་ཕྱིར་ཡང་བཞིར་ངེས་ཏེ། དེ་ལས། དང་པོས་སྣོད་གྱུར་དངོས་པོ་སྟེ། །གཉིས་པ་ཡིས་ནི་མོས་པ་ཡིན། །གསུམ་པ་ཡིས་ནི་སྒྲུབ་པ་སྟེ། །བཞི་པས་རྣམ་པར་སྦྱོང་བའོ། །ཞེས་སོ། །དེས་ན་འདས་མ་འོངས་ད་ལྟར་གསུམ་གྱིས་བསྡུས་པའི་སེམས་ཅན་སྨིན་བྱེད་ཀྱི་ཐབས་ཐམས་ཅད་འདིར་འདུ་སྟེ། དེ་ཉིད་ལས། བསྡུས་དང་བསྡུད་པར་འགྱུར་བ་དང་། །གང་དག་ད་ལྟར་སྡུད་བྱེད་པ། །དེ་ཀུན་དེ་འདྲ་དེ་ལྟ་བས། །འདི་ནི་སེམས་ཅན་སྨིན་བྱེད་ཐབས། །ཞེས་སོ། །བཞི་པ་ནི། སེམས་བསྐྱེད་ཀྱིས་ཟིན་པའི་སྒོ་ནས་སེམས་ཅན་ལ་དངོས་སམ་བརྒྱུད་པས་ཕན་བདེ་སྒྲུབ་པ་ཐམས་ཅད་ཡིན་ཡང་། བསྡུ་ན་བཞི་པོ་དེར་འདུ་ཞིང་། དེ་ཡང་འཁོར་དུ་མ་འདུས་པ་བསྡུ་བ་དང་། འདུས་པ་སྨིན་པར་བྱེད་པ་གཉིས་སུ་བསྡུར་རུང་ངོ་། །གཞན་ལས་དོན་བྱེད་ཚུལ་བཅུ་གཉིས་སུ་བསྡུས་པའང་སྣང་སྟེ། བྱང་ས་ལས། བྱ་བ་དོན་དང་ལྡན་པ་ལ་གྲོགས་སུ་འགྲོ་བ་དང་། སེམས་ཅན་སྡུག་བསྔལ་བ་རྣམས་ཀྱི་སྡུག་བསྔལ་སེལ་བ་དང་། །ཐབས་མི་ཤེས་པ་རྣམས་ལ་རིག་པ་སྟོན་པ་དང་། བྱས་པ་བཟོ་ཞིང་ཚོར་ཏེ་ལན་དུ་ཕན་འདོགས་པ་དང་། འཇིགས་པ་རྣམས་ལ་བསྲུང་བ་དང་། སྡུག་བསྔལ་བ་རྣམས་ཀྱི་མྱ་ངན་སེལ་བ་དང་། ཡོ་བྱད་མེད་པ་རྣམས་ལ་ཡོ་བྱད་སྟོབ་པ་དང་། ཆོས་ཀྱི་འཁོར་ལེགས་པར་སྡུད་པ་དང་། སེམས་དང་མཐུན་པར་འཇུག་པ་དང་། ཡང་དག་པའི་ཡོན་ཏན་གྱིས་དགའ་བར་བྱེད་པ་དང་། ལེགས་པར་ཚར་གཅོད་པ་དང་། རྫུ་འཕྲུལ་གྱིས་སྐྲག་པ་དང་འདུན་པར་བྱེད་པའོ། །ཞེས་གསུངས་ཏེ་སྔར་གྱི་བཞི་པོའི་ཁོག་ཏུ་དངོས་ཤུགས་གང་རུང་གིས་འདུས་སོ། །

གཉིས་པ་ལ། ཕྱོགས་གཉིས་ལ་ལྟོས་ནས་སྤང་བླང་བྱ་བ། འཇུག་ལྡོག་གི་ཐབས་དྲན་ཤེས་བག་ཡོད་གསུམ་ལ་སྦྱར་བ། སྤྱོད་ལམ་ཐམས་ཅད་དགེ་བས་དུས་འདའ་བ་ལ་བསླབ་པའོ། །དང་པོ་ནི། མཐུན་ཕྱོགས་ཀུན་སློབ་མི་མཐུན་མཐའ་དག་སྤང་། །ཞེས་པ་སྟེ། སྤྱིར་བསླབ་བཏུས་ལས། གང་གིས་ལྟུང་བར་མི་འགྱུར་པ། །གནད་ཀྱི་གནས་རྣམས་འདིས་རིག་བྱ། །ཞེས་བྱང་ཆུབ་སེམས་དཔའི་བསླབ་གཞི་རྒྱ་ཆེན་རྣམས་ཀྱི་གནད་ཀྱི་གནས་གང་ཞེ་ན། དེ་ཉིད་ལས། བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བ་སྐྱེས་པ་རྣམས། །སེམས་ཅན་ཀུན་ལ་བཏང་བ་དང་། །དེ་བསྲུང་དག་པ་སྤེལ་བའོ། །ཞེས་པས་གཞི་གསུམ་བཏང་བ་དང་། བསྲུང་བ་དང་། དག་པ་དང་། སྤེལ་བ་བཞིས་བྱང་སེམས་ཀྱི་སྡོམ་པ་མཐའ་དག་བསྡུས་པར་བཤད་ཅིང་། ཇི་ལྟར་སྒྲུབ་ཚུལ་ཡང་ལས་དང་པོ་པས་བསྲུང་བ། མོས་སྤྱོད་པས་དག་པ། མ་དག་ས་བདུན་ལ་གནས་པས་བཏང་བ། དག་པ་ས་གསུམ་ལ་གནས་པས་སྤེལ་བ་གཙོ་བོར་སྒྲུབ་པར་བཤད་དེ། རྒྱས་པར་བསླབ་བཏུས་ཉིད་དུ་བལྟ་བར་བྱ་ཞིང་། འདིར་ནི་དེ་རྣམས་ཀྱི་སྒྲུབ་པ་མཐར་ཕྱིན་པར་འགྲུབ་པའི་མན་ངག་བསྡུས་པ་སྟེ། དེ་ཉིད་ལས། འགྲུབ་པ་ཡང་དག་སྤོང་རྣམས་ཏེ། །ཞེས་པས་རྫོགས་བྱང་སྒྲུབ་པའི་མཐུན་ཕྱོགས་སུ་གྱུར་བ་དགེ་བའི་ཆོས་ཀུན་མ་སྐྱེས་པ་རྣམས་བསྐྱེད་པ་དང་། སྐྱེས་པ་རྣམས་གནས་པ་དང་འཕེལ་བའི་ཕྱིར་དང་པོར་འདུན་པ་དྲག་པོ་བསྐྱེད་ནས་སྒོ་གསུམ་འབད་པར་བྱེད། ཕྱི་བཤོལ་མེད་པའི་བརྩོན་འགྲུས་བརྩོམ། དགེ་བའི་དམིགས་པ་མ་བརྗེད་པར་སེམས་འཛིན་ཅིང་ཡང་དག་པར་འཇོག་པ་ལ་བསླབ་པར་བྱའོ། །དེ་བཞིན་དུ་རྫོགས་བྱང་སྒྲུབ་པའི་མི་མཐུན་ཕྱོགས་སུ་གྱུར་པ་སྡིག་པ་མི་དགེ་བའི་ཆོས་མཐའ་དག་མ་སྐྱེས་པ་མི་བསྐྱེད་ཅིང་སྐྱེས་པ་སྤང་བའི་ཕྱིར་འདུན་པ་སོགས་དེ་ལྟར་བྱེད་པ་སྟེ། དབུས་མཐའ་རྣམ་འབྱེད་ལས། མི་མཐུན་ཕྱོགས་དང་གཉེན་པོ་རྣམས། །རྣམ་པ་ཐམས་ཅད་ཡོངས་ཤེས་ནས། །དེ་དག་སྤང་ཕྱིར་བརྩོན་འགྲུས་ནི། །རྣམ་པ་བཞི་དག་རབ་ཏུ་འབྱུང་། །ཞེས་སོ། །གཞན་ཡང་བྱང་ཆུབ་ཀྱི་སེམས་སྐྱེས་པ་དེ་ཉིད་བཟུང་དག་སྤེལ་གསུམ་གྱི་ཐབས་ལ་བརྩོན་པས་བསྐྱང་བར་བྱ་སྟེ། སྤྱོད་འཇུག་ལས། དེ་ལྟར་བདག་གི་སེམས་འདི་ནི། །ལེགས་བཟུང་ལེགས་པར་བསྲུང་བར་བྱ། །སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་སོ། །དེ་ཡང་སེམས་དེ་ཉིད་མི་ཉམས་པར་བཟུང་བ་ནི། སྨོན་འཇུག་གི་རང་བཞིན་ལ་སེམས་གནས་པ་སྟེ། མཐུན་ཕྱོགས་བསླབ་པར་བྱ་བའི་གནས་སོ། །སེམས་དེའི་དྲི་མ་དག་པར་བྱེད་པ་ནི། ཉེས་སྤྱོད་ཐམས་ཅད་ལས་བཟློག་པར་བྱེད་པ་སྟེ། མི་མཐུན་ཕྱོགས་སྤོང་བའི་བསླབ་བྱའོ། །དགེ་བ་སྤེལ་བའི་ཐབས་ནི། བདག་གི་བདེ་བ་དང་གཞན་གྱི་སྡུག་བསྔལ་བརྗེ་བ་ལ་སྤེལ་མར་སྦྱོང་སྟེ། མཐུན་ཕྱོགས་ཀྱི་བསླབ་བྱའོ། །དེ་ལྟར་ཡང་སྤྱོད་འཇུག་ལས། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་སོ། །

གཉིས་པ་ནི། རྟག་ཏུ་དྲན་དང་ཤེས་བཞིན་བག་ཡོད་བསྟེན། །ཅེས་པ་སྟེ། བསླབ་བཏུས་ལས། བག་ཡོད་པ་དང་མ་བྲལ་ཞིང་། །དྲན་པ་དང་ནི་ཤེས་བཞིན་དང་། །ཚུལ་བཞིན་དུ་ནི་སེམས་པས་སོ། །ཞེས་པ་ལྟར་དུས་རྟག་ཏུ་བསྲུང་སེམས་མི་བརྗེད་པའི་དྲན་པ་དང་། རང་རྒྱུད་ལ་ཉེས་པ་བྱུང་མ་བྱུང་རྟོག་པའི་ཤེས་བཞིན་དང་། འཇུག་ལྡོག་གི་གནས་ལ་གཟོབ་པ་ལྷུར་ལེན་པའི་བག་ཡོད་དང་གསུམ་བསྟེན་པས་སེམས་བསྲུང་བར་བྱ་སྟེ། སྤྱོད་འཇུག་ལས། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །སྲོག་ལ་བབ་ཀྱང་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཞེས་དང་། བཤེས་སྤྲིངས་ལས། བག་ཡོད་བདུད་རྩིའི་གནས་ཏེ་བག་མེད་པ། །འཆི་བའི་གནས་སུ་ཐུབ་པས་བཀའ་སྩལ་ཏེ། །དེ་བས་ཁྱོད་ཀྱིས་དགེ་ཆོས་སྤེལ་སླད་དུ། །གུས་པས་རྟག་ཏུ་བག་དང་ལྡན་པར་མཛོད། །ཅེས་སོ། །

གསུམ་པ་ནི། འགྲོ་འདུག་ཟ་ཉལ་སྤྱོད་ལམ་རྣམ་པ་བཞིར། །སྤྱོད་ཡུལ་ཡོངས་སུ་དག་པའི་མདོ་སྡེ་ལྟར། །གང་བྱེད་རིགས་མཐུན་ཚིག་གིས་སྨོན་ལམ་འདེབས། །ཞེས་པ་སྟེ། སྤྱིར་སྤྱོད་ལམ་རྣམ་བཞིའི་དུས་ཐམས་ཅད་དུ་སྒོ་གསུམ་གྱི་སྤྱོད་པ་ལ་བརྟགས་ནས་དྲན་ཤེས་མ་ཉམས་པས། འགྲོ་བའི་ཚེ་མིག་གཉའ་ཤིང་གང་ཙམ་དུ་བལྟ་ཞིང་། གཞན་དང་ཕྲད་ན་འཛུམ་པའི་མདངས་ཀྱིས་ལེགས་པར་འོངས་སོ་ཞེས་བསུས་ཏེ། སྙན་པའི་གཏམ་གྱིས་ཕ་རོལ་པོའི་ཡིད་དགའ་བར་བྱ་བ་དང་། འདུག་པའི་ཚེ་སྐྱིལ་ཀྲུང་དྲང་པོར་བསྲངས་ཏེ། འཆད་ཉན་དང་སྒོམ་པ་སོགས་ཆོས་སྤྱོད་བཅུའི་སྒྲུབ་པ་ཅི་རིགས་པ་ལ་འཇུག་པ་དང་། ཟས་ཟ་བའི་ཚེ་དཀོན་མཆོག་གསུམ་རྗེས་སུ་དྲན་པས་ཕུད་དང་གཏོར་མ་ཕུལ་ལ་ཆགས་སྲེད་སྤངས་ཏེ། ལུས་གསོ་བ་དང་སྲིན་བུའི་རིགས་ལ་ཕན་པའི་བློས་ཁམས་དང་ཏིང་ངེ་འཛིན་ལ་ཇི་ཙམ་འཕྲོད་པ་ཙམ་དུ་ལོངས་སྤྱད་དེ་ཟས་ཀྱི་བསྔོ་བ་བྱ་བ་རྣམས་དང་། མཚན་མོ་ཉལ་བའི་ཚེ་གཞོགས་གཡས་ཕབ་ལ་མགོ་བྱང་དུ་བསྟན་ནས་ཉལ་ཏེ། འཆི་བ་དྲན་པ་དང་། དཀོན་མཆོག་གསུམ་སྔས་སུ་དྲན་པ་དང་། དགེ་བའི་བྱ་བ་ལ་ལྡང་བ་དང་སྣང་བའི་འདུ་ཤེས་བཞག་ནས་ཆོས་ཉིད་ཀྱི་ངང་དུ་བློ་གནས་པས་ཉལ་ཞིང་། ནངས་པར་ལྡང་བ་ན་དཀོན་མཆོག་གསུམ་དང་བྱང་ཆུབ་ཀྱི་སེམས་དྲན་པས་ལངས་ཏེ། རྨི་ལམ་དུ་སྡིག་པ་མཐོང་ན་འཕྲལ་ཏུ་བཤགས་ཤིང་དགེ་ན་ཡི་རང་བ་ཙམ་བྱས་ནས། རང་གཞན་ལ་ཕན་པར་འགྱུར་བའི་ཆོས་སྤྱོད་ཀྱིས་དུས་འདའ་བར་བྱ་སྟེ། མདོ་སྡེ་རྒྱན་ལས། རྒྱལ་སྲས་སྤྱོད་ཚེ་ཇི་ལྟ་ཇི་ལྟ་བུར། །དབང་པོའི་སྤྱོད་ཡུལ་སྣ་ཚོགས་འཇུག་འགྱུར་བ། །དེ་ལྟ་དེ་ལྟར་རིགས་ཤིང་མཐུན་ཚིག་གིས། །སེམས་ཅན་ཕན་ཕྱིར་དེ་མངོན་འདུ་བྱེད་དོ། །ཞེས་སོ། །ཁྱད་པར་ཕལ་པོ་ཆེའི་སྤྱོད་ཡུལ་ཡོངས་སུ་དག་པའི་མདོ་སྡེ་ལས་ཇི་སྐད་གསུངས་པ་ལྟར། བྱང་ཆུབ་སེམས་དཔའ་ཁང་པའི་ནང་དུ་འཇུག་པའི་ཚེ་སེམས་ཅན་ཐམས་ཅད་ཀྱིས་ཐར་པའི་གྲོང་ཁྱེར་ཐོབ་པར་གྱུར་ཅིག་སྙམ་དུ་སེམས་བསྐྱེད་དོ། །ཉལ་བའི་ཚེ་སངས་རྒྱས་ཀྱི་ཆོས་སྐུ་ཐོབ་པར། རྨི་ལམ་རྨི་བ་ན་ཆོས་ཐམས་ཅད་རྨི་ལམ་ལྟ་བུར་རྟོགས་པར། གཉིད་སད་པ་ན་མ་རིག་པ་ལས་སད་པར། ལྡང་བ་ན་སངས་རྒྱས་ཀྱི་གཟུགས་སྐུ་ཐོབ་པར། གོས་གྱོན་པ་ན་ངོ་ཚ་དང་ཁྲེལ་ཡོད་ཀྱི་གོས་གྱོན་པར། སྐ་རགས་འཆིང་བ་ན་དགེ་བའི་རྩ་བ་དང་འབྲེལ་བར། སྟན་ལ་འདུག་པ་ན་རྡོ་རྗེའི་གདན་ཐོབ་པར། རྒྱབ་བརྟེན་པ་ན་བྱང་ཆུབ་ཀྱི་ཤིང་ཐོབ་པར། མེ་གཏོང་བ་ན་ཉོན་མོངས་པའི་བུད་ཤིང་བསྲེག་པར། འབར་བ་ན་ཡེ་ཤེས་ཀྱི་མེ་འབར་བར། གཡོས་ཟིན་པ་ན་ཡེ་ཤེས་ཀྱི་བདུད་རྩི་ཐོབ་པར། ཁ་ཟས་བཟའ་བ་ན་བསམ་གཏན་གྱི་ཟས་ཐོབ་པར། ཕྱིར་འགྲོ་བ་ན་འཁོར་བའི་གྲོང་ལས་ཐར་བར། སྐས་ལ་འབབ་པ་ན་སེམས་ཅན་གྱི་དོན་ལ་འཁོར་བར་འཇུག་པར། སྒོ་འབྱེད་པ་ན་ཐར་པའི་གྲོང་གི་སྒོ་འབྱེད་པར། སྒོ་གཅོད་པ་ན་ངན་སོང་གི་སྒོ་གཅོད་པར། ལམ་དུ་འཇུག་པ་ན་འཕགས་པའི་ལམ་དུ་འཇུག་པར། གྱེན་ལ་འགྲོ་བ་ན་སེམས་ཅན་ཐམས་ཅད་མཐོ་རིས་ཀྱི་བདེ་བ་ལ་འགྲོ་བར། ཐུར་ལ་འབབ་པ་ན་ངན་སོང་གསུམ་རྒྱུན་གཅོད་པར། སེམས་ཅན་དང་འཕྲད་པ་ན་སངས་རྒྱས་དང་མཇལ་བར། རྐང་པ་འཇོག་པ་ན་སེམས་ཅན་ཐམས་ཅད་ཀྱི་དོན་ལ་འགྲོ་བར། རྐང་པ་འདེགས་པ་ན་འཁོར་བ་ནས་འདོན་པར། རྒྱན་དང་ལྡན་པ་མཐོང་ན་མཚན་དཔེའི་རྒྱན་ཐོབ་པར། རྒྱན་མེད་པ་མཐོང་ན་སྤངས་པའི་ཡོན་ཏན་དང་ལྡན་པར། སྣོད་གང་བ་མཐོང་ན་ཡོན་ཏན་གྱིས་གང་བར། སྟོང་པ་མཐོང་ན་སྐྱོན་གྱིས་སྟོང་པར། སེམས་ཅན་དགའ་བ་མཐོང་ན་ཆོས་ལ་དགའ་བར། མི་དགའ་བ་མཐོང་ན་འདུས་བྱས་ཀྱི་དངོས་པོ་ལ་མི་དགའ་བར། སེམས་ཅན་བདེ་བ་མཐོང་ན་སངས་རྒྱས་ཀྱི་བདེ་བ་ཐོབ་པར། སྡུག་བསྔལ་བ་མཐོང་ན་སེམས་ཅན་གྱི་སྡུག་བསྔལ་ཐམས་ཅད་ཞི་བར། ནད་པ་མཐོང་ན་ནད་ལས་གྲོལ་བར། དྲིན་དུ་གཟོ་བ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དྲིན་ལན་ལྡོན་པར། དྲིན་དུ་མི་གཟོ་བ་མཐོང་ན་ལྟ་བ་ལོག་པ་ལ་དྲིན་དུ་མི་བཟོ་བར། རྒོལ་བ་མཐོང་ན་ཕས་ཀྱི་རྒོལ་བ་ཐམས་ཅད་ཚར་གཅོད་ནུས་པར། བསྟོད་པ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བསྟོད་པར། ཆོས་ཀྱི་གཏམ་བྱེད་པ་མཐོང་ན་སངས་རྒྱས་ཀྱི་སྤོབས་པ་ཐོབ་པར། སྐུ་གཟུགས་མཐོང་ན་སངས་རྒྱས་ཐམས་ཅད་མཐོང་བ་ལ་སྒྲིབ་པ་མེད་པར། མཆོད་རྟེན་མཐོང་ན་འགྲོ་བ་ཐམས་ཅད་ཀྱི་མཆོད་རྟེན་དུ་འགྱུར་བར། ཚོང་བྱེད་པ་མཐོང་ན་འཕགས་པའི་ནོར་བདུན་ཐོབ་པར། ཕྱག་འཚལ་བ་མཐོང་ན་ལྷ་དང་བཅས་པའི་འཇིག་རྟེན་གྱིས་སྤྱི་གཙུག་བལྟར་མི་མངོན་པ་ཐོབ་པར་གྱུར་ཅིག་སྙམ་དུ་སེམས་བསྐྱེད་པར་བྱའོ། །ཞེས་སོ། །

གསུམ་པ་དོན་བསྡུ་བ་ལ། མཁས་པའི་བཞེད་པ་ཟློས་པ་དང་། རང་བཞེད་འགོད་པའོ། །དང་པོ་ནི། མཁྱེན་རབ་དབང་ཕྱུག་ཀློང་ཆེན་རབ་འབྱམས་ནི། །སྨོན་པའི་བསླབ་བྱ་ཚད་མེད་བཞི་བསྒོམ་ཞིང་། །འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱོད། །བསྡུ་ན་དཀར་ནག་ཆོས་བརྒྱད་འདུ་ཞེས་གསུངས། །ཞེས་པ་སྟེ། ཚད་མེད་བཞིས་བློ་སྦྱངས་ནས་སེམས་ཅན་གྱི་ཕན་བདེ་སྙིང་ཁོང་དུ་ཆུབ་པ་ནི་སྨོན་པའི་བསླབ་བྱའི་གནད་བསྡུས་པ་སྟེ། བྱང་ཆུབ་ཀྱི་སེམས་མི་འདོར་བ་ཉིད་སྨོན་པ་མི་འཆོར་བའི་བསླབ་བྱར་བཤད་པའི་ཕྱིར། འཇུག་པའི་བསླབ་བྱ་ཕྱིན་དྲུག་ཏུ་འདུ་ཚུལ་ནི་སྔར་བཤད་པའི་དཀྱུས་ཀྱིས་གོ་བར་འགྱུར་རོ། །དེ་དག་ཀྱང་སེམས་ཉིད་ངལ་གསོ་ལས། སྨོན་པའི་བསླབ་བྱ་ཚད་མེད་བཞི་པོ་བསྒོམ། །དེ་ཡི་མི་མཐུན་ཕྱོགས་སྤང་སེམས་བསྲུང་བྱ། །འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱད། །དེ་ཡི་མི་མཐུན་ཕྱོགས་སྤང་བརྩོན་པར་བྱ། །ཞེས་པས་བསྟན་ཏོ། །ནག་པོའི་ཆོས་བཞི་སྤྱད་ནས་ཐུན་ཚོད་འདས་ན་སྨོན་སེམས་གཏོང་བར་བཤད་ལ། དེ་བཏང་ན་འཇུག་སེམས་ཀྱང་འཆོར་ཏེ། འཇུག་སེམས་ཀྱི་རྟེན་སྨོན་སེམས་ཡིན་པས། གྱང་མེད་ན་རི་མོ་མེད་པ་བཞིན་ནོ་སྙམ་དུ་དགོངས་ནས། འདིར་བསྡུ་ན་ཆོས་བརྒྱད་དུ་འདུ་བར་འཕངས་ནས་མཛད་པ་སྟེ། ཚིག་གི་དངོས་བསྟན་ལ། མདོར་ན་ནག་པོའི་ཆོས་བཞི་སྤང་བྱ་ཞིང་། །དཀར་པོའི་ཆོས་བཞི་དག་ལ་ནན་ཏན་བྱ། །ཞེས་པའི་སྐབས་ཀྱི་འགྲེལ་བའི་མཚམས་སྦྱོར་དུ། ད་ནི་སྨོན་འཇུག་སོ་སོའི་བསྲུང་ཚུལ་བཤད་དེ། དེ་ཡང་དང་པོར་སྨོན་པ་བསྲུང་ཚུལ་ལའང་། སྤང་བླང་གི་སྒོ་ནས་བསྲུང་བ་ནི། བསླབ་པ་ཇི་སྙེད་པའི་ཕྱོགས་དེ་དག་གི་རིམ་པ། ཞེས་འབྱུང་བས་འཇུག་པ་གསལ་བར་མ་བསྡུས་མོད། དེ་ལྟ་ནའང་གྲུབ་མཐའ་མཛོད་དུ་སྲོལ་གཉིས་ཀྱི་རྩ་ལྟུང་གི་དབྱེ་བ་བཤད་ནས། དེ་ཇི་ལྟར་བསྲུང་ཚུལ་འཆད་པའི་སྐབས་སུ། དྲན་དང་ཤེས་བཞིན་མ་ཉམས་པས་ནག་པོའི་ཆོས་བཞི་དོར་ནས། དཀར་པོའི་ཆོས་བཞི་སྤྱོད་པ་ལ་བསླབ་པར་བྱའོ། །ཞེས་པ་འདིས་བསྟན་པར་དགོངས་ནས་དེ་སྐད་ཅེས་འགྲེལ་པར་མཛད་དོ། །

གཉིས་པ་ནི། འདིར་ནི་ཕན་དང་བདེ་བ་རྣམས་བྱ་ཞིང་། །འདིར་ཡང་མི་ཕན་ཕྱི་མར་གནོད་པ་སྤང་། །སྲོལ་གཉིས་བསླབ་བྱར་མ་འདུས་མེད་ཅེས་སྨྲ། །ཞེས་པ་སྟེ། འདིར་ནི་སེམས་ཅན་ལ་རྗེས་སུ་ཆགས་པའི་བྱམས་པས་ཀུན་ནས་བསླངས་ཏེ། གང་ཅི་སྤྱོད་ཀྱང་རུང་། དེ་ཐམས་ཅད་གནས་སྐབས་སུ་རང་གཞན་ལ་ཕན་ཞིང་མཐར་ཐུག་བདེ་བ་སྒྲུབ་པའི་ཐབས་མཁས་སུ་འགྲོ་བའི་ཕྱིར་བླང་བར་བྱ་ཞིང་། ཞེ་སྡང་གིས་ཀུན་ནས་བསླངས་ཏེ་ཁྲོ་རྩོད་ཀྱིས་ནི་ཕན་ཚུན་གཉིས་ཀའི་རྒྱུད་མ་རུངས་པར་བྱས་པས་ཚེ་འདིར་ཡང་རང་གཞན་གཉིས་ཀ་ལ་མི་ཕན་ཏེ་གནོད་པའི་ཕྱིར་དང་། ཕྱི་མར་ནི་ངན་སོང་རྣམས་ལས་སྡུག་བསྔལ་ཆེ་ཤོས་དམྱལ་བར་འཕེན་པས་གནོད་པའི་ཕྱིར་སྤང་དགོས་པར་མ་ཟད། འདིར་བདེ་བ་ལྟར་སྣང་ཡང་ཕྱི་མར་གནོད་ན་ནུས་པ་ཅི་ཡོད་ཀྱིས་འབད་དེ་སྤང་དགོས་སོ། །དེ་ལྟར་ཡང་བྱང་ས་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཉེས་པ་ནི་ཕལ་ཆེར་ཞེ་སྡང་ལས་འབྱུང་གིའདོད་ཆགས་ལས་འབྱུང་བ་ནི་མ་ཡིན་པར་རིག་པར་བྱའོ། །ཞེས་གང་གསུངས་པ་དེ་ལ་དགོངས་པ་ནི་འདི་ཡིན་པར་བལྟ་བར་བྱ་སྟེ། བྱང་ཆུབ་སེམས་དཔའ་སེམས་ཅན་ལ་རྗེས་སུ་ཆགས་ཤིང་སེམས་ཅན་ལ་བྱམས་པའི་དབང་དུ་བྱས་ནས། གང་ཅི་སྤྱོད་ཀྱང་རུང་། དེ་ཐམས་ཅད་ནི་བྱང་ཆུབ་སེམས་དཔའི་བྱ་བ་ཡིན་ཏེ། མི་བྱ་བ་མ་ཡིན་ལ། བྱ་བར་རིགས་པ་བྱེད་པ་ནི་ཉེས་པར་འགྱུར་བ་མི་རིགས་སོ། །བྱང་ཆུབ་སེམས་དཔའ་སེམས་ཅན་རྣམས་ལ་སྡང་བ་ནི་བདག་དང་གཞན་རྣམས་ལ་ཕན་པར་སྤྱོད་པ་མ་ཡིན་ལ། དེ་ཡང་བྱང་ཆུབ་སེམས་དཔའི་བྱ་བ་མ་ཡིན་ཏེ། དེ་ལྟར་བྱ་བ་མ་ཡིན་པ་བྱེད་པ་ནི་ཉེས་པར་འགྱུར་བར་རིགས་སོ། །ཞེས་གསུངས། དེ་དག་ཇི་ལྟར་སློབ་པའི་ཐབས་ནི་ཤིང་རྟའི་སྲོལ་གཉིས་ཀྱི་བསླབ་བྱ་སྔར་བཤད་པ་ལ་མ་འདུས་པ་མེད་དོ། །

ལྔ་པ་སྐྱེ་བའི་རྟེན་ནི། སྐྱེ་བའི་རྟེན་ནི་ལྷ་ཀླུ་འཕྲོག་མ་སོགས། །སྡིག་ཅན་ལ་ཡང་སྐྱེ་བར་ཀླུ་སྒྲུབ་བཞེད། །ཐོགས་མེད་དེའི་རྟེན་སོ་ཐར་དགོས་ཞེས་གསུངས། །སྤྱིར་ན་སངས་རྒྱས་ཆོས་ལ་དད་བྱེད་ཅིང་། །འབྲས་བུ་བླ་མེད་བྱང་ཆུབ་ལ་དད་དང་། །རྒྱལ་སྲས་སྤྱོད་པ་རྒྱ་མཚོར་དད་བྱེད་ན། །བྱང་སེམས་སྐྱེ་བར་དཀོན་མཆོག་ཏཱ་ལར་གསུངས། །ཞེས་པ་སྟེ། ཀླུ་སྒྲུབ་ཀྱི་ལུགས་ལྟར་ན། བརྡ་ཤེས་དོན་གོ་ལ་ལེན་འདོད་ཡོད་ན་འགྲོ་བ་མཐའ་དག་ལ་སྐྱེ་བས་རྟེན་གྱི་གང་ཟག་རྒྱ་ཆེ་སྟེ། སྡིག་ཅན་སོགས་ལེན་པ་པོ་ཇི་ལྟར་དམན་ཡང་སྨོན་པའི་སེམས་བསྐྱེད་ཙམ་ཞིག་ངེས་པར་སྐྱེ་བ་ལ་དགོངས་པའི་ཕྱིར། དཀོན་མཆོག་བརྩེགས་པ་ལས། དེའི་ཚེ་ཆོས་ཀྱི་རྣམ་གྲངས་འདི་བཤད་པ་ན་ལྷ་དང་ཀླུ་དང་ལྷ་མ་ཡིན་དང་ནམ་མཁའ་ལྡིང་དང་ལྟོ་འཕྱེ་ཆེན་པོ་བགྲང་བ་ལས་འདས་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་སོ། །འཕགས་པ་ཐོགས་མེད་ཀྱི་ལུགས་ལྟར་ན། འཇུག་སྡོམ་མ་ཐོབ་པ་འཐོབ་པར་བྱེད་པའི་རྟེན་གླིང་གསུམ་གྱི་སྐྱེས་པ་བུད་མེད་མཚན་དོན་བྱེད་ནུས་པ་ཡིན་དགོས་ཏེ། སོ་ཐར་རིགས་བདུན་གང་རུང་དང་ལྡན་པའི་རྟེན་ལ་སྐྱེ་བར་བཤད་པའི་ཕྱིར། ལམ་སྒྲོན་ལས། སོ་སོ་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་གསུངས་ཏེ། བྱང་སའི་ལུགས་འདིར་བསླབ་པའི་གྲངས་དང་སློབ་པའི་དུས་རྒྱུད་ཚོད་དང་སྦྱར་བའི་འཇུག་སྡོམ་ཉི་ཚེ་བ་མ་བཤད་པས་སྡོམ་པ་རྒྱ་ཆུང་བ་ལྟར་རྟེན་ཡང་རྒྱ་ཆུང་བ་ཡིན་པར་མངོན་ནོ། །དེ་ལྟ་ནའང་སྲོལ་གཉིས་པོ་དོན་ལ་གནད་གཅིག་སྟེ། རིགས་བདུན་སྔོན་དུ་སོང་མ་སོང་གང་ཡིན་ཡང་རུང་། སྣ་གཅིག་སྤོང་སེམས་ཙམ་ཡང་མེད་ན་བྱང་སྡོམ་མི་སྐྱེ་བས། དོན་ལ་ཉེས་སྤྱོད་སྤོང་བར་དམ་འཆའ་ནུས་པ་ཞིག་ངེས་པར་དགོས་པའི་ཕྱིར་ཏེ། གཞན་དུ་ན་སེམས་བསྐྱེད་ཀྱི་བསླབ་བྱ་དང་འགལ་བའི་ཕྱིར་རོ། །དེ་བས་བཞེད་པ་སྤྱིར་བཤད་ན་གང་ལེན་པ་པོའི་འགྲོ་བའི་ས་པས་བསྡུས་པ་ནི་ལུས་རྟེན་ཡིན་ལ། འདིར་གཙོ་བོ་ནི་བསམ་པའི་རྟེན་ཏེ། དད་སོགས་ཀྱི་བློ་ཁྱད་པར་ཅན་དངོས་སུ་སྐྱེར་རུང་བ་ཉིད་དོ། །དེ་ལྟར་ཡང་དཀོན་མཆོག་ཏཱ་ལའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །བྱང་ཆུབ་བླ་ན་མེད་ལའང་དད་གྱུར་ལ། །རྒྱལ་སྲས་རྣམས་ཀྱི་སྤྱོད་ལ་དད་བྱེད་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་གསུངས་པའི་ཕྱིར། གནས་པའི་རྟེན་ནི། གང་ལ་སྐྱེས་པའི་རྟེན་དེའམ་ཚེ་བརྗེས་པའི་རྟེན་གཞན་ལའང་རུང་སྟེ། གཏོང་བྱེད་ཀྱི་རྒྱུ་གང་ཡང་མ་བྱུང་ན་ཚེ་བརྗེས་ཏེ་འགྲོ་བ་གང་དུ་སྐྱེས་ཀྱང་བྱང་སྡོམ་མི་གཏོང་བས། དེའི་དབང་གིས་རང་བཞིན་གྱིས་ཉེས་སྤྱོད་ལ་མཛེམ་ཞིང་དགེ་བ་ལ་ངང་གིས་སྤྲོ་བར་འགྱུར་བ་དང་ཚེ་འཕོས་པས་བརྗེད་ནའང་ཚེགས་ཆུང་ངུས་དགེ་བའི་བཤེས་གཉེན་དང་འཕྲད་ནས་སྔར་ཡོད་དྲན་གསོའི་ཚུལ་དུ་སྡོམ་པ་ནོད་པར་འགྱུར་གྱི། གསར་དུ་ཡང་དག་པར་ལེན་དགོས་པ་ནི་མ་ཡིན་ཏེ། གཏོང་བྱེད་ཀྱི་རྒྱུ་མ་བྱུང་ན་རྫོགས་བྱང་གི་བར་དེ་སྲིད་དུ་མི་གཏོང་བའི་ཕྱིར་རོ། །

དྲུག་པ་ཉམས་པ་གསོ་ཚུལ་ལ་བསྟན་བཤད་གཉིས་ལས། མདོར་བསྟན་ནི། ཐ་མར་ཉམས་ན་གསོ་བའི་ཚུལ་བཤད་པ། །ཞེས་པ་སྟེ། སྨོན་འཇུག་གི་བསླབ་བྱ་ཇི་སྙེད་པ་ཐམས་ཅད་ཤེས་པར་བྱས་ནས་མི་ཉམས་པར་བསྲུང་ཞིང་། གལ་ཏེ་ཉམས་ན་གསོ་བ་ལ་འབད་པར་བྱའོ། །

གཉིས་པ་རྒྱས་བཤད་ལ་གསུམ་སྟེ། ལྟུང་བའི་རྣམ་གཞག་མུ་བཞིར་བསྟན་པ། གནང་བཀག་ཤེས་ནས་བསླབ་ཚུལ། ཕྱིར་བཅོས་དངོས་བཤད་པའོ། །དང་པོ་ནི། གང་གིས་རིགས་དང་མི་རིགས་མ་བརྟགས་པར། །རྩོམ་མམ་ལྡོག་གམ་བཏང་སྙོམས་འཇོག་ཀྱང་རུང་། །འོས་ལས་འདས་བྱེད་ཐམས་ཅད་ལྟུང་བའི་སྡེ། །དོན་ཆེན་བསྒྲུབ་ལ་ཆུང་བཏང་གཟུགས་བརྙན་ཏེ། །ནུས་པའི་ཡུལ་མིན་ཐམས་ཅད་ལྟུང་བ་མེད། །མི་ནུས་དེར་བརྩོན་དེ་ཡི་གཟུགས་བརྙན་ཡིན། །ཞེས་པ་སྟེ། གང་ཟག་གང་གིས་བྱ་བ་གང་ལའང་བློའི་ནུས་པ་ཅི་ཡོད་ཀྱིས་རུང་མི་རུང་བརྟག་དགོས་པ་ལས། དགག་སྒྲུབ་རིགས་པ་དང་མི་རིགས་པ་མ་བརྟགས་པར། ལྡོག་པར་བྱ་བའི་གནས་ལ་བརྩོན་པའམ། བརྩམ་པར་བྱ་བ་ལས་ལྡོག་པའམ། འཇུག་ལྡོག་གི་གཞི་ལ་བཏང་སྙོམས་སུ་འཇོག་ཀྱང་རུང་སྟེ་ལྟུང་བ་དང་བཅས་པ་ཡིན་ལ། དེ་ཡང་མུ་བཞི་སྟེ། བརྟགས་བཞིན་དཔྱད་པས་ཤེས་བཞིན་དུ་བྱ་བར་འོས་པ་ལས་འདས་ཏེ། མནར་སེམས་ཀྱིས་སྲོག་གཅོད་པ་ལྟ་བུ་མི་རིགས་པ་བྱེད་པ་དང་། སེར་སྣས་མི་སྦྱིན་པ་ལྟ་བུ་རིགས་པ་མི་སྒྲུབ་པ་ཐམས་ཅད་ལྟུང་བའི་སྡེ་ཡིན་ལ། དོན་ཆེན་བསྒྲུབ་ཕྱིར་དོན་ཆུང་གཏོང་བ་དཔེར་ན་སྦྱིན་པ་བྱས་པས་ཚུལ་ཁྲིམས་འཆོར་ན། དཀོན་བརྩེགས་ལས། གང་ཞིག་དགའ་བའི་ཡིད་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །གང་གིས་ཉིན་གཅིག་ཚུལ་ཁྲིམས་དག །བསྲུངས་པ་དེ་ནི་ཁྱད་པར་འཕགས། །ཞེས་པ་ལྟར་སྦྱིན་པ་ལས་ཚུལ་ཁྲིམས་མཆོག་ཡིན་པས། དེའི་ཚེ་སྦྱིན་པ་གཏོང་བ་བཏང་སྙོམས་སུ་འཇོག་པ་ལྟ་བུའམ། སྡུག་བསྔལ་དང་ཡིད་མི་བདེ་བ་ཆུང་ངུས་དེ་དང་དེ་ཆེན་པོའི་གཉེན་པོར་འགྲོ་བ་བྱིས་པ་གཡང་ཁར་འཕྱན་པ་མས་བརྡུང་བ་ལྟ་བུ་རྣམས་ནི་ལྟུང་བའི་གཟུགས་བརྙན་ཏེ་དོན་ལ་ལྟུང་བ་མེད་པ་ཡིན་ནོ། །ལས་དང་པོ་པས་མགོ་དང་མིག་སོགས་མི་གཏོང་བ་ལྟ་བུ་རང་གིས་ནུས་པའི་ཡུལ་མིན་པས་མི་སྒྲུབ་པའམ་ནུས་པའི་ཡུལ་ལ་འཇུག་ལྡོག་མ་ནོར་བར་སྒྲུབ་པ་ཐམས་ཅད་ལྟུང་མེད་དོ། །ལས་དང་པོ་པས་མགོ་སྟེར་བ་ལྟ་བུ་རང་གིས་ནུས་པའི་ཡུལ་མིན་ཡང་དེར་བརྩོན་པར་བྱེད་པའམ་ཀུན་སློང་གནག་ན་སྦྱོར་བ་དཀར་ཡང་ལྟུང་བ་མེད་པའི་གཟུགས་བརྙན་ཏེ་དོན་ལ་ལྟུང་བ་ཡིན་ནོ། །དེ་དག་ཀྱང་ཚུལ་ཁྲིམས་གསུམ་ལ་དཔེ་སྦྱར་ན། སྡོམ་པའི་ཚུལ་ཁྲིམས་ལ། ཞེ་སྡང་གིས་སྲོག་གཅོད་པ་ལྟུང་བ། ཕན་སེམས་ཀྱིས་གསོད་ན་ལྟུང་བའི་གཟུགས་བརྙན། སྙིང་རྗེས་མི་གསོད་པ་ལྟུང་མེད། གཞན་ལ་ཕན་ཡང་མི་གསོད་པ་ལྟུང་མེད་ཀྱི་གཟུགས་བརྙན་ནོ། །དགེ་བ་ཆོས་སྡུད་ལ། སེར་སྣས་མི་སྦྱིན་པ་ལྟུང་བ། ཕན་སེམས་ཀྱིས་མི་སྟེར་བ་ལྟུང་བའི་གཟུགས་བརྙན། བསམ་པ་དག་པས་སྟེར་བ་ལྟུང་མེད། གཞན་ལ་གནོད་ཕྱིར་སྟེར་བ་ལྟུང་མེད་ཀྱི་གཟུགས་བརྙན་ནོ། །སེམས་ཅན་དོན་བྱེད་ལ། ནད་གཡོག་མ་བྱས་པ་ལྟུང་བ། དོན་ཆེན་སྒྲུབ་ཕྱིར་ནད་གཡོག་མ་བྱས་པ་ལྟུང་བའི་གཟུགས་བརྙན། བརྩེ་བས་ནད་གཡོག་བྱེད་པ་ལྟུང་མེད། ནད་གཡོག་གཞན་ཡོད་བཞིན་དུ་རང་གི་ཀློག་སྤོང་སོགས་དོན་ཆེན་དོར་ནས་ནད་གཡོག་བྱས་ན་ལྟུང་མེད་ཀྱི་གཟུགས་བརྙན་ནོ། །

གཉིས་པ་ནི། གཞན་ཕྱིར་ཕན་ན་ལུས་ངག་གི་མི་དགེ་བདུན། །གནང་བའི་སྐབས་ཡོད་དོན་ལ་དགེ་བ་ཡིན། །ཞེས་པ་སྟེ། གཞན་ལ་ཕན་པའི་ཐབས་སུ་འགྱུར་ན། རང་གི་མི་དགེ་བཅུའི་ཉེས་སྤྱོད་སྡོམ་པ་ལས་ལུས་ངག་གི་བདུན་གནང་བའི་སྐབས་ཡོད་དེ། འདི་ལྟར་མང་པོའི་སྲོག་སྐྱོབ་ཕྱིར་གཤེད་མ་གསོད་པ་ལྟ་བུ་སྲོག་གཅོད་དང་། བཀྲེས་པས་སྲོག་ལ་ཉེན་པ་སྐྱོབ་ཕྱིར་འབྱོར་ལྡན་ལས་བརྐུས་ནས་སྟེར་བ་ལྟ་བུ་མ་བྱིན་ལེན་དང་། བུད་མེད་འདོད་པས་གདུངས་ཏེ་འཆི་ངེས་སྐྱོབ་ཕྱིར་དེར་སྤྱོད་པ་ལྟ་བུ་འདོད་ལོག་དང་། གསོད་ངེས་ཀྱི་སྐྱེས་བུ་ཐར་ཕྱིར་སྦ་བ་ལྟ་བུ་རྫུན་དང་། སྡིག་གྲོགས་ཀྱིས་བསླུས་ནས་ངན་འགྲོར་ཁྲིད་པ་ལས་ལྡོག་ཕྱིར་དེ་གཉིས་འབྱེད་པ་ལྟ་བུ་ཕྲ་མ་དང་། མྱ་ངན་གྱིས་ནོན་པ་བསང་བའམ་གཏམ་ལ་དགའ་བས་ཆོས་ལ་འཇུག་པའི་དགོས་པ་མཐོང་ན་སྒྲུང་དང་གཏམ་རྒྱུད་སོགས་སྨྲ་བ་ངག་འཁྱལ་དང་མི་དགེའི་བྱ་བ་ལས་ལྡོག་ཕྱིར་གཤེ་བ་ལྟ་བུ་ཚིག་རྩུབ་སྟེ། དེ་རྣམས་མི་དགེ་བ་ལྟར་སྣང་ཡང་དོན་ལ་དགེ་བ་ཡིན་པས་བྱ་བར་གནང་སྟེ། སེམས་ཀྱི་འཕེན་པ་ལས་གཞན་པའི་དགེ་སྡིག་ཡོད་པ་མ་ཡིན་པའི་ཕྱིར། དེ་ལྟར་ཡང་བཞི་བརྒྱ་པ་ལས། བསམ་པས་བྱང་ཆུབ་སེམས་དཔའ་ཡི། །དགེའམ་ཡང་ན་མི་དགེ་བ། །ཐམས་ཅད་དགེ་བ་ཉིད་འགྱུར་ཏེ། །གང་ཕྱིར་སེམས་ཏེ་གཙོ་བོའི་ཕྱིར། །ཞེས་དང་། སེམས་ཀྱི་སྒྲིབ་སྦྱོང་ལས། དགེ་སློང་རང་གིས་ཕ་རྒན་ལ། །མྱུར་འདོང་ཞེས་ནི་བསྐུལ་གྱུར་ནས། །ཕུལ་བས་དེ་ནི་ཤི་གྱུར་ཀྱང་། །མཚམས་མེད་སྦྱོར་བ་མ་ཡིན་ནོ། །བསམ་པ་བཟང་པོས་མཆིལ་ལྷྭམ་ཞིག །ཐུབ་པའི་དབུ་ལ་བཞག་པ་དང་། །དེ་བཞིན་གཞན་གྱིས་བསལ་བྱས་པ། །གཉིས་ཀས་རྒྱལ་སྲིད་འཐོབ་པར་འགྱུར། །དེ་ཕྱིར་བསམ་པའི་རྩ་བ་ལ། །བསོད་ནམས་སྡིག་པ་རྣམ་པར་གནས། །ཞེས་དང་། སྡོམ་པ་ཉི་ཤུ་པ་ལས། སྙིང་རྗེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་སོ། །དེས་ན་དགེ་སྡིག་གི་ལས་ནི་སེམས་ཀྱི་འཕེན་པ་ཉིད་ལ་རག་ལས་པའི་ཕྱིར་ཡིད་ཀྱི་ལས་གསུམ་ནི་ནམ་ཡང་གནང་བ་མེད་དོ། །

གསུམ་པ་ལ་སྲོལ་གཉིས་ལས། མགོན་པོ་ཀླུ་སྒྲུབ་ཀྱི་ལུགས་ནི། ཐུན་འདས་ཉམས་ན་འཕགས་པ་ནམ་སྙིང་ལ། །ཐོ་རངས་གསོལ་བཏབ་རྨི་ལམ་ལྟུང་བ་འཆགས། །ལྷག་མ་ཕུང་པོ་གསུམ་པ་ཉིན་མཚན་དུ། །ལན་གསུམ་འདོན་པས་གཞིལ་བ་ཀླུ་སྒྲུབ་ལུགས། །ཞེས་པ་སྟེ། སྤྱིར་བྱང་སེམས་ཀྱི་སྡོམ་པའི་གཏོང་རྒྱུ་ནི། རྟེན་གཞི་སྨོན་སེམས་བཏང་བ། འགལ་ཟླ་རྩ་ལྟུང་བྱུང་བ། སྤོང་རྐྱེན་སྡོམ་པ་ཕུལ་བ་གསུམ་དུ་འདུ་བ་ལས། དེ་ཡང་སྔར་བཤད་ཀྱི་རྩ་ལྟུང་བཅོ་བརྒྱད་དམ་ཉི་ཤུ་པོ་ཐམས་ཅད་སྤོང་བ་ནི་དབང་རྣོན་གྱི་ཡུལ་ཡིན་པས་དབང་པོ་འབྲིང་རྟུལ་གཉིས་ལ་ནི། རང་བློའི་སྟོབས་དང་སྦྱར་བའི་སོ་སོའི་བསླབ་བྱ། དེ་དག་བསྲུངས་པས་བྱང་སེམས་ཀྱི་བསླབ་པ་ལས་ཉམས་པར་མི་འགྱུར་ཏེ། སྡོམ་ཆོག་ཏུ། བྱང་ཆུབ་སེམས་ནི་བསྐྱེད་བགྱི་ཞིང་། །ཞེས་སྨོན་པ་བླངས་ནས། དེ་བཞིན་དུ་ནི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་འཇུག་པ་བློའི་ནུས་ཚོད་དང་སྦྱར་ཏེ་རིམ་གྱིས་བསླབ་པ་ལས། ཐོག་མ་ཉིད་ནས་བསླབ་བྱ་ཐམས་ཅད་ལ་སློབ་པར་དམ་མ་བཅས་པའི་ཕྱིར་རོ། །ཉམས་པའི་ཉེས་དམིགས་ནི། ལྟུང་བ་སྤྱིའི་ཉེས་དམིགས་ལ་གསུམ་ལས། དང་པོ་ཁས་བླངས་ཉམས་པས་སྨད་པའི་གནས་སུ་འགྱུར་ཏེ། སྟོན་པ་སངས་རྒྱས་བསླུས་པའི་སངས་རྒྱས་མི་མཉེས། ཡུལ་སེམས་ཅན་བསླུས་པས་དེ་དག་མི་མགུ། རང་བསླུས་པས་རང་དོན་ཉམས་ཤིང་ཀུན་གྱིས་སྨད་པའི་གནས་སུ་འགྱུར་བའི་ཕྱིར་རོ། །གཉིས་པ་མིང་དོན་ཤོར་བས་མི་འདོད་པ་ཐམས་ཅད་འདུ་སྟེ། རྒྱལ་པོ་རྒྱལ་སྲིད་ཉམས་པ་ལྟར་ཚེ་འདིར་བཀྲ་མི་ཤིས་ཤིང་འཆི་ཁར་མྱ་ངན་གྱིས་གདུང་བར་གསུངས་པའི་ཕྱིར་རོ། །གསུམ་པ་ཉེས་པ་ལྕི་བས་ཕྱི་མ་ངན་འགྲོར་ལྟུང་ཞིང་དེ་ལས་ཐར་དཀའ་སྟེ། བསླབ་བཏུས་ལས། རྫོགས་སངས་རྒྱས་ཀྱིས་གསུངས་ཚུལ་དུ། །འབད་པ་མེད་ན་ངན་འགྲོར་འགྲོ། །ཞེས་གསུངས་པའི་ཕྱིར་རོ། །ཁྱད་པར་རྩ་ལྟུང་གི་ཉེས་དམིགས་ནི། སྔོན་བསྐྱེད་པའི་བྱང་སེམས་ཀྱི་དགེ་རྩ་ཐམས་ཅད་ཐལ་བར་རློག་པ་དང་། དེ་ཉིད་ཀྱིས་ནི་དཀོན་མཆོག་ལྷ་དང་བཅས་པ་བསླུས་པ་དང་། དེས་ནི་སྤྱིར་ངན་འགྲོ་དང་ཁྱད་པར་སེམས་ཅན་དམྱལ་བ་ཆེན་པོར་སྐྱེ་བར་འགྱུར་ཏེ། དེ་ལས་དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་སོ། །སྡོམ་པ་ཕུལ་བ་ནི། སོ་ཐར་ལས་བསྲུང་མི་ནུས་ན་འབུལ་བ་བསླབ་བྱར་གནང་མོད། བྱང་སྡོམ་ཕུལ་ན་ནི་ཉེས་པ་ཆེས་ལྕི་བར་འགྱུར་ཏེ། རྒྱལ་བ་སྲས་བཅས་ཀྱི་སྤྱན་སྔར་འགྲོ་བའི་ཕན་བདེ་སྒྲུབ་པར་དམ་བཅས་པ་ཉིད་བཏང་བའི་ཕྱིར། སྤྱོད་འཇུག་ལས། བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཅི་ག་འགྲོ་འགྱུར་རམ། །ཞེས་དང་། སེམས་ཅན་གཅིག་གི་བདེ་བ་ཡང་། །བཤིག་ན་བདག་ཉིད་ཉམས་འགྱུར་ན། །ནམ་མཁའ་མ་ལུས་མཐའ་ཀླས་པའི། །ལུས་ཅན་བདེ་བཤིག་སྨོས་ཅི་དགོས། །ཞེས་སོ། །དེ་ལྟར་ཉེས་དམིགས་བསམ་ནས་ལྟུང་བས་མ་གོས་པར་བྱ་བ་ལ་འབད་དུ་ཟིན་ཀྱང་། མི་ཤེས་པ་དང་། བག་མེད་པ་དང་། ཉོན་མོངས་པ་མང་བ་དང་། མ་གུས་པ་སྟེ་རྒྱུ་བཞིས་ལྟུང་བ་བྱུང་ན་ཕྱིར་བཅོས་པའི་སྒོ་ནས་ཉེས་པ་ལས་ལྡང་བར་བྱའོ། །དེ་ལ་ཐུན་འདས་ཞེས་པ་ནི། ཉིན་ལ་ཆ་གསུམ་མཚན་ལ་ཆ་གསུམ་སྟེ་ཐུན་དྲུག་ཏུ་ཕྱེ་བའི་ཉིན་ཞག་གི་དྲུག་ཆའི་མཇུག་ཏུ་གཉེན་པོས་སླེབས་ན་དེའི་ཚུལ་ཁྲིམས་རྒྱུན་མི་ཆད་ཅིང་རྣམ་པར་དག་པར་འགྱུར་རོ། །དེ་ལ་སྔ་དྲོ་ལྟ་བུ་ཐུན་སྔ་མའི་ཐོག་ཐ་བར་གསུམ་གང་རུང་ལ་ལྟུང་བ་བྱུང་ན། གུང་ཚིགས་ལྟ་བུ་དེ་མ་ཐག་གི་ཐུན་ཕྱི་མའི་ཐོག་ཐ་བར་གསུམ་གང་རུང་དེ་དང་དེའི་དུས་སུ་བྱང་ཆུབ་ཀྱི་སེམས་དང་མ་བྲལ་བ་ཉིད་ཀྱིས་བཤགས་པས་སོར་ཆུད་པའི་དོན་ནོ། །དེ་ལྟར་བཤགས་ཚད་ལས་མ་འདས་ན་རྩ་ལྟུང་ཡང་ཡང་བྱུང་ཡང་བཤགས་པས་སོར་ཆུད་པར་འགྱུར་བས་ཕྱིར་བཅོས་སུ་ཡོད་པ་ཡིན་ལ། གལ་ཏེ་བཤགས་ཚད་ལས་འདས་ན་ནི་ཚུལ་ཁྲིམས་གཏུགས་པ་ཡིན་པས་ཕྱིར་བཅོས་ཀྱིས་གསོ་བར་མི་ནུས་ཀྱི། བཤགས་བསྡམས་སྔོན་དུ་འགྲོ་བས་སླར་ཆོ་ག་བཞིན་དུ་བླང་བར་བྱ་ཞིང་། གྲངས་ངེས་པ་མེད་དོ། །དེ་ལྟ་ནའང་འདིར་སྡོམ་པ་བསྐྱར་བར་མ་བཤད་པ་ནི། སླར་སྐྱེ་བས་ཤོར་ཡང་སླའོ་སྙམ་དུ་ནན་ཏན་མི་བྱེད་པ་སྤང་ཕྱིར་བསླབ་བཏུས་སུ་དངོས་སུ་མ་གསུངས་པ་བཞིན་དུ་འདིར་ཡང་དེ་ལྟར་མཛད་ལ། འོན་ཀྱང་དེར་ཉེ་བ་འཁོར་གྱི་མདོ་དྲངས་ནས་ཉན་ཐོས་དང་བྱང་སེམས་ཀྱི་རྩ་ལྟུང་བྱུང་བ་བཅོས་སུ་ཡོད་མེད་ཀྱི་ཁྱད་པར་བཤད་པས་དོན་གྱིས་གསུངས་པར་མངོན་ཏེ། བཅོས་སུ་ཡོད་པའང་ཉེས་པ་བཤགས་པ་དང་སྡོམ་པ་ལེན་པ་ལས་མ་འདས་པའི་ཕྱིར་རོ། །དེས་ན་ཕྱིར་བཅོས་ཚུལ་ལ་དབང་པོའི་ཁྱད་པར་གྱིས་གསུམ་ལས། དབང་འབྲིང་ལྷའི་རྣལ་འབྱོར་ལ་ནན་ཏན་དུ་བྱེད་པ་དག་གིས། རང་གི་ཡི་དམ་གྱི་ལྷའི་མདུན་དུ་ཡན་ལག་བདུན་པ་བྱས་ལ་བཤགས་པས་ལྡང་མོད། རིག་སྔགས་སྤྱིའི་ལྷ་འཕགས་པ་ནམ་མཁའི་སྙིང་པོའི་མདུན་དུ་བཤགས་པར་འདོད་ན། ཉིན་མཚན་གྱིས་བར་མ་ཆོད་པར་བཤགས་པར་བྱ་སྟེ། གང་གི་ཚེ་ལྟུང་བ་བྱུང་ནས་བཟུང་ཁྲུས་དང་གཙང་སྦྲ་བྱ། སྤོས་བཏུལ་ཏེ། འཕགས་པ་ནམ་མཁའི་སྙིང་པོའི་མཚན་ནས་བརྗོད་ཅིང་ཕྱག་འཚལ་བ་དང་། འཕགས་པས་བདག་ལ་ཞལ་བསྟན་ཏེ་སྡིག་པ་དག་པར་མཛད་དུ་གསོལ། ཞེས་གསོལ་བ་དྲག་ཏུ་བཏབ་པས། དངོས་སམ་རྨི་ལམ་དུ་སྐལ་བ་དང་འཚམས་པར་དེ་ཉིད་ཀྱི་གཟུགས་སམ་མི་ནས་བྱའི་བར་ཅི་རིགས་པའི་གཟུགས་ཀྱིས་ལྟུང་བ་ལས་འབྱིན་པའི་ཐབས་སྟོན་པར་འགྱུར་ལ། གལ་ཏེ་སྟོན་པར་མི་བྱེད་ན་ཐོ་རངས་ལངས་ལ་གཙང་སྦྲ་དང་བཅས་པས་ཤར་ཕྱོགས་སུ་བལྟས་ཏེ། སྤོས་བཏུལ་བས་མཆོད་ཅིང་། སྐྱ་རེངས་སྐྱ་རེངས་སྙིང་རྗེ་ཆེན་པོ་ལེགས་པ་ཆེན་པོ་ཁྱོད་ཛམྦུའི་གླིང་དུ་ཤར་མ་ཐག་ཏུ་བདག་ལ་ཐུགས་རྗེས་ཁྱབ་པར་མཛོད་ཅིག །ནམ་མཁའི་སྙིང་པོ་སྙིང་རྗེ་ཆེན་པོ་དང་ལྡན་པ་ལ་ཡང་བདག་གི་ཚིག་གིས་མྱུར་དུ་བསྐུལ་ཏེ། ཐབས་གང་གིས་ལྟུང་བ་མྱུར་དུ་འཆགས་པར་འདོད་པ་དང་། ཐེག་པ་ཆེན་པོའི་འཕགས་པ་ལ་ཐབས་དང་ཤེས་རབ་འཐོབ་པར་འགྱུར་པའི་ཐབས་དེ་བདག་གི་རྨི་ལམ་དུ་བསྟན་དུ་གསོལ། ཞེས་བརྗོད་ནས་ཉལ་བས་སྐྱ་རེངས་འཆར་བའི་ཚེ་རྨི་ལམ་དུ་ནམ་སྙིང་གི་གཟུགས་སྐལ་བ་བཞིན་སྟོན་པས་ལྟུང་བ་འཆགས་སུ་འཇུག་གོ །དབང་པོ་དམན་པ་དག་གིས་ནི་སྟོབས་བཞིའི་སྒོ་ནས་བཤགས་པར་བྱའོ། །དེ་ལ་རྟེན་གྱི་སྟོབས་ནི་གཉིས་ཏེ། བཤགས་ཡུལ་གྱི་རྟེན་དགེ་བའི་བཤེས་གཉེན་ནམ་དེ་བཞིན་གཤེགས་པའི་རྟེན་ཁྱད་པར་ཅན་མཆོད་པའི་དབུས་སུ་སྤྱན་དྲང་ཞིང་དམིགས་པས་ཀྱང་མདུན་གྱི་ནམ་མཁར་རྒྱལ་བ་སྲས་བཅས་བསམ་པའོ། །རང་རྒྱུད་ཀྱི་རྟེན་ནི་སྐྱབས་སེམས་ཡིན་པས་སེམས་ཅན་ཐམས་ཅད་སྒྲོལ་འདོད་ཀྱི་སྙིང་རྗེས་རྫོགས་བྱང་གི་སེམས་དང་ལྡན་པས་སྐྱབས་འགྲོ་སྤྱི་དང་། ཁྱད་པར་གཙོ་རྒྱལ་མས་འཇིགས་པ་ལས་སྐྱོབ་པར་གསོལ་བ་འདེབས་པའོ། །རྣམ་པར་སུན་འབྱིན་པའི་སྟོབས་ནི། སྡིག་ལྟུང་དྲན་ཞིང་འགྱོད་པ་དྲག་པོས་ལྟུང་བ་གང་དང་གང་བྱུང་དེ་དང་དེའི་མིང་ནས་བརྗོད་དེ་བཤགས་པའོ། །གཉེན་པོ་ཀུན་ཏུ་སྤྱོད་པའི་སྟོབས་ནི། སངས་རྒྱས་དང་བྱང་སེམས་ཀྱི་མཚན་བཟུང་བ། སྐུ་གཟུགས་དང་མཆོད་རྟེན་བཞེངས་པ། རྟེན་ལ་ཕྱག་མཆོད་དང་བསྐོར་བ་བྱ་བ། མདོ་རྒྱུད་ཟབ་མོ་ཀློག་པའམ་ཁ་ཏོན་བྱ་བ། དེ་བཞིན་གཤེགས་པའི་ཡིག་བརྒྱ་སོགས་སྡིག་སྦྱོང་ལ་བསྔགས་པའི་གཟུངས་སྔགས་བཟླས་བརྗོད་བྱ་བ། སྟོང་པ་ཉིད་ལ་མོས་པ་ཞེས་སྡིག་པའི་ངོ་བོ་ལ་ཇི་ལྟ་བུ་གང་ན་གནས་སོ་སོར་བརྟགས་ནས་མི་དམིགས་པའི་ངང་ལ་མཉམ་པར་འཇོག་པ་སྟེ། དེ་དག་ལ་གཉེན་པོ་ཀུན་དུ་སྤྱོད་པའི་སྒོ་དྲུག་ཅེས་གྲགས་སོ། །སོར་ཆུད་པའི་སྟོབས་ནི། ཕྱིན་ཆད་སྲོག་ལ་བབ་ཀྱང་སྡིག་པའི་ལས་འདི་དག་མི་བྱའོ་ཞེས་དམ་བཅས་ནས་ཉེས་སྤྱོད་ཀྱི་ལས་མི་བྱེད་པའོ། །གཞན་ཡང་ཡུལ་གྱི་ཁྱད་པར་སེམས་ཅན་ལ་གནོད་པའི་ཞེ་སྡང་གི་དང་ཆོས་ལ་གནོད་པའི་གཏི་མུག་གི་ཀུན་དཀྲིས་ལྕི་བ་གཉིས་དང་། དེ་ལས་གཞན་པའི་ཆགས་སེམས་དང་ཞེ་སྡང་ཙམ་གྱི་ཀུན་དཀྲིས་རྣམས་རིམ་པར་ཐེག་ཆེན་གྱི་སྡོམ་ལྡན་བཅུ་ཚོགས་དང་ལྔ་ཚོགས་དང་གང་ཟག་གཅིག་གམ་གཉིས་ལ་བཤགས་པར་བྱའོ། །གལ་ཏེ་དེ་ལྟ་བུའི་ཡུལ་མ་རྙེད་ན་ཐམས་ཅད་དཀོན་མཆོག་གི་དྲུང་དུ་བཤགས་སོ། །ཁྱད་པར་ཉིན་མཚན་དུས་དྲུག་ཏུ་སངས་རྒྱས་སོ་ལྔ་ལ་ཕྱག་བྱས་ནས་བཤགས་པ་ཡི་རང་བསྔོ་བའི་ཕུང་པོ་གསུམ་གྱི་མདོ་ཁ་ཏོན་དུ་བྱས་པས་རྩ་བ་ལས་གཞན་པའམ། བརྗེད་ངས་དང་ཤེས་བཞིན་གྱིས་མ་ཟིན་པས་ཕྱིར་བཅོས་མ་གྲུབ་པའི་ལྟུང་བའི་ལྷག་མ་རྣམས་བྱང་ཞིང་སོར་ཆུད་པར་འགྱུར་ཏེ། སྤྱོད་འཇུག་ལས། ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་འདོན་བྱ་ཞིང་། །རྒྱལ་དང་བྱང་ཆུབ་སེམས་བསྟེན་ན། །ལྟུང་བའི་ལྷག་མ་དེས་ཞི་བྱ། །ཞེས་སོ། །དབང་རྣོན་གྱི་གང་ཟག་དམ་པ་ཁ་ཅིག་གིས་ནི། ཐོག་མར་སྒྱུ་མ་རྨི་ལམ་ལྟ་བུའི་ཚུལ་གྱིས་མཁའ་ཁྱབ་ཀྱི་རྒྱལ་བ་སྲས་དང་བཅས་པའི་སྤྱན་སྔར་ཚིག་གིས་བཤགས་རྗེས། ཉེས་པ་དེ་ཉིད་ཀྱི་ངོ་བོ་ལ་བརྟགས་ཤིང་དཔྱད་པས་དམིགས་མེད་ནམ་མཁའ་ལྟ་བུའི་རང་བཞིན་དུ་ཤེས་པའི་ངང་ལ་མཉམ་པར་བཞག་པས་ཉེས་ལྟུང་ཐམས་ཅད་ལས་གྲོལ་བར་འགྱུར་ཏེ། ཕྱོགས་བཅུ་རྒྱས་པའི་མདོ་ལས། གང་ཞིག་འགྱོད་ཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །དེ་ནི་འགྱོད་ཚངས་མཆོག་ཡིན་ནོ། །ཞེས་སོ། །དེ་ལྟར་དབང་པོའི་ཁྱད་པར་གྱིས་ཕྱིར་བཅོས་གསུམ་དུ་བསྡུས་པ་འདི་ནི་ནག་པོ་པའི་དགོངས་པ་སྟེ། ཇི་སྐད་དུ། དམན་པ་ཁ་ཅིིག་ནི་དངོས་པོར་འཛིན་པའི་དབང་གིས་འགྱོད་ཅིང་ཡིད་ལ་གཅགས་པས་གཞན་གྱི་དྲུང་དུ་ཉེས་པ་འཆགས་ཤིང་། ཕྱིས་སྡོམ་པས་རིམ་གྱིས་ཉེས་པ་དེ་ལས་རིང་ཞིག་ན་ལྡང་བ་ཡོད་དོ། །བར་མ་ཁ་ཅིག་ནི་རིག་སྔགས་དང་གསང་སྔགས་ཀྱི་ལྷ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པ་མཉེས་པར་བྱས་ཏེ་ལྷས་རྗེས་སུ་གནང་བ་ཐོབ་པས་ལྟུང་བ་ལས་ལྡང་ངོ་། །དམ་པ་ཁ་ཅིག་ནི་གང་གིས་ལྟུང་བར་བརྗོད་པ་དེ་ཉིད་ལ་བྱང་ཆུབ་ཀྱི་སེམས་སུ་ཤེས་པས་ཚེགས་མེད་པར་གནས་ཏེ་ཇི་ལྟར་འཕགས་པའི་ཆོས་ཐམས་ཅད་འབྱུང་བ་མེད་པར་བསྟན་པ་ཞེས་བྱ་བ་ཐེག་པ་ཆེན་པོའི་མདོ་ལས་གསུངས་པ། འཇམ་དཔལ། བྱང་ཆུབ་སེམས་དཔའ་གང་གིས་ལས་མེད་ཅིང་རྣམ་པར་སྨིན་པ་མེད་པར་ཤེས་པ་དེས་ལས་ཀྱི་སྒྲིབ་པ་རྣམ་པར་དག་པ་ཐོབ་བོ། །ཞེས་གསུངས་པ་ལྟར་རོ། །

གཉིས་པ་འཕགས་པ་ཐོགས་མེད་ཀྱི་ལུགས་ལ། གཏོང་རྒྱུ་ངོས་བཟུང་བ་དང་། ཉེས་ལྟུང་ཕྱིར་བཅོས་ཚུལ་ལོ། །དང་པོ་ནི། སྨོན་པའི་སེམས་ནི་ནག་པོའི་ཆོས་བཞི་སྤྱད། །སེམས་ཅན་སྙིང་ནས་བློས་བཏང་དེ་གཏོང་འགྱུར། །རྒྱུན་མི་ཆད་སྤྱོད་ངོ་ཚ་ཁྲེལ་མེད་དང་། །དེས་མགུ་དགའ་དང་དེ་ཉིད་ཡོན་ཏན་དུ། །ལྟ་བ་ཀུན་དཀྲིས་ཆེན་པོས་སྡོམ་པ་འཇོམས། །ཕམ་པ་ཞེས་བརྗོད་ཆུང་དང་འབྲིང་ལ་མིན། །ཞེས་པ་སྟེ། རྩ་བ་སེམས་ཅན་བློས་བཏང་བ་དང་། ཡན་ལག་ནག་པོའི་ཆོས་བཞི་སྤྱད་ན་རྟེན་གཞི་སྨོན་སེམས་གཏོང་ལ། དེ་བཏང་བས་བརྟེན་པ་འཇུག་སེམས་ཀྱང་བཏང་བར་འགྱུར་རོ། །རྙེད་བཀུར་གྱི་ཕྱིར་བདག་བསྟོད་གཞན་སྨོད་སོགས་ཕམ་པའི་གནས་ལྟ་བུའི་ཆོས་བཞི་རྒྱུན་མི་ཆད་དུ་སྤྱོད་པ་དང་། ངོ་ཚ་དང་ཁྲེལ་ཡོད་ཆུང་ངུ་ཙམ་ཡང་མི་བསྐྱེད་པ་དང་། དེས་མགུ་ཞིང་དགའ་བར་བྱེད་པ་དང་། དེ་ཉིད་ལ་ཡོན་ཏན་དུ་བལྟ་བ་སྟེ་ཡན་ལག་བཞི་ཚང་ན་ཀུན་དཀྲིས་ཆེན་པོའི་ལྟུང་བ་སྟེ། སྡོམ་པ་འཇོམས་པར་བྱེད་པས་ན་ཕམ་པ་ཞེས་བརྗོད་པར་བྱའོ། །ཡན་ལག་གང་རུང་ཚང་ལ་ངོ་ཚ་དང་ཁྲེལ་ཡོད་ཅུང་ཟད་སྐྱེ་ཞིང་གཞན་གྱིས་བསྐུལ་བས་ལྡོག་ན་ཀུན་དཀྲིས་འབྲིང་དང་། ཡན་ལག་གང་རུང་དེ་ལ་ངོ་ཚ་ཆེར་བསྐྱེད་ཅིང་གཞན་རྐྱེན་ལ་མ་ལྟོས་པར་རང་ཉིད་ཀྱིས་དེ་ལས་མྱུར་དུ་ལྡོག་པར་བྱེད་ན་ཀུན་དཀྲིས་ཆུང་ངུ་སྟེ། དེ་གཉིས་ཀྱིས་སྡོམ་པ་གཏོང་བ་མ་ཡིན་ནོ། །འོ་ན་གཏན་ལ་དབབ་པ་བསྡུ་བར། གཏོང་བྱེད་དེ་གཉིས་གཅིག་ཏུ་བྱས་པའི་སྟེང་དུ་བཟློག་ཟླ་སྡོམ་མིན་སྐྱེས་པ། སྡོམ་པ་ཕུལ་བ། ཀུན་དཀྲིས་འབྲིང་ཡན་ཆོད་ཀྱི་བཞི་ཚང་བ་རྣམས་བསྣན་ནས་གཏོང་བྱེད་བཞིར་གསུངས་པ་དང་འགལ་ལོ་ཞེ་ན། མི་འགལ་ཏེ། འདིར་བཤད་ཀྱི་གཏོང་བྱེད་གཉིས་ནི་བྱང་སའི་དགོངས་པ་ལྟར་དབང་པོ་འབྲིང་རྟུལ་གྱི་དབང་དུ་བྱས་པ་རགས་པའི་རྣམ་གཞག་སྟེ། ཐབས་མཁས་ཀྱི་མདོ་ལྟར་བསླབ་བཏུས་ཀྱི་རྩ་ལྟུང་བཞི་པོ་དབང་འབྲིང་གི་རྩ་ལྟུང་ཡིན་པ་ལྟར། དེ་དང་ཆ་འདྲ་བ་བྱང་སའི་བཞི་ཡང་དབང་འབྲིང་གི་རྩ་ལྟུང་དུ་དོན་གྱིས་ཐོབ་པའི་ཕྱིར་རོ། །དེས་ན་བསྡུ་བར་ཟག་པ་འབྲིང་པོས་སྤྱད་པ་གཏོང་བྱེད་དུ་བཞེད་པ་ནི་དབང་རྣོན་གྱི་དབང་དུ་མཛད་པ་སྟེ། འདིས་འཕགས་པ་ཐོགས་མེད་ཀྱི་ལུགས་ལའང་དབང་རྣོན་གྱི་སྡོམ་པ་བཞེད་པར་མངོན་ནོ། །

གཉིས་པ་ནི། ཕས་ཕམ་བྱུང་ན་སླར་བླང་འབྲིང་ནི་གསུམ། །ཐ་མ་གཅིག་མདུན་དངོས་པོ་བརྗོད་པས་བཤགས། །མཐུན་པའི་གང་ཟག་མེད་ན་ཡིད་ཀྱིས་བསྡམ། །རྒྱ་ཆེན་སྤྱོད་པའི་རིང་ལུགས་ཟླ་མེད་དོ། །ཞེས་པ་སྟེ། སྨོན་སེམས་བཏང་བ་དང་། ཀུན་དཀྲིས་ཆེན་པོས་ཕམ་པའི་གནས་ལྟ་བུའི་རྩ་ལྟུང་གིས་གཏོང་བས། དེ་དག་བྱུང་ན་བཤགས་བསྡམས་དང་བསག་སྦྱངས་ལ་ནན་ཏན་བྱས་ལ། སྡོམ་པ་སླར་བླང་བར་བྱ་ཞིང་། གྲངས་ནི་གསུམ་ལས་ལྷག་པ་བསྐྱར་དུ་མེད་པར་བྱང་ས་ལས་བཤད་ཅེས་ཀུན་མཁྱེན་ཆེན་པོས་གསུངས་སོ། །ཀུན་དཀྲིས་འབྲིང་གིས་སྤྱད་པའི་ཕམ་འདྲ་རྣམས་ནི་གང་ཟག་གསུམ་ཡན་ཆད་དང་། ཀུན་དཀྲིས་ཆུང་ངུས་སྤྱད་པའི་རྩ་ལྟུང་དང་། དེ་ལས་གཞན་པའི་ཉེས་བྱས་ཞེ་དྲུག་ལ་ཀུན་སློང་གི་དབང་གིས་ཉོན་མོངས་ཅན་ཡིན་མིན་དང་ལྟུང་མེད་དུ་འགྱུར་བའང་ཡོད་པས། དེ་དག་གང་བྱུང་གང་ཟག་གཅིག་ཡན་ཆད་ཀྱི་དྲུང་དུ་བཤགས་ཤིང་བསྡམས་པས་དག་པར་འགྱུར་ཏེ། སྡོམ་པ་ཉི་ཤུ་པ་ལས། སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་སོ། །དེ་ཐམས་ཅད་ལ་བཤགས་ཡུལ་མཐུན་པའི་གང་ཟག་མེད་ན་རྒྱལ་བ་སྲས་བཅས་ཡིད་ཀྱིས་བསམ་པའི་སྤྱན་སྔར་བཤགས་ཤིང་བསྡམ་པར་བྱའོ། །དེ་ཡང་ལམ་སྒྲོན་འགྲེལ་བར། དུམ་བུ་དང་པོར་ལེགས་པར་གསོ་བྱེད་པ། །སྐྱེས་བུ་རབ་ཡིན་འབྲིང་ནི་གཉིས་ལའོ། །དུམ་བུ་ཐ་མར་གསོ་བ་ཐ་མ་སྟེ། །ཞེས་སྤྱིར་དུས་དྲུག་དང་ཁྱད་པར་དུས་རེ་རེ་ལ་ཆ་གསུམ་གསུམ་དུ་ཕྱེ་ནས། དེ་དང་དེར་གཉེན་པོས་སླེབ་པ་གང་ཟག་རབ་འབྲིང་ཐ་གསུམ་གྱི་གསོ་ཚུལ་ཡིན་པར་བཤད་དོ། །

བདུན་པ་ཕན་ཡོན་ལ། བསོད་ནམས་རྒྱུན་ཆགས་སུ་འབྱུང་བའི། སངས་རྒྱས་ཀྱི་སྲས་སུ་འགྱུར་བའི། བླ་ན་མེད་པའི་བྱང་ཆུབ་ཐོབ་པའི་ཕན་ཡོན་ནོ། །དང་པོ་ནི། འདི་འདྲའི་བྱང་ཆུབ་སེམས་ཀྱི་རྩིས་ཟིན་ན། །གཉིད་སོགས་བག་མེད་གྱུར་ལའང་བསོད་ནམས་ཤུགས། །རྒྱུན་མི་ཆད་འབྱུང་། ཞེས་པ་སྟེ། རེ་ཞིག་སྨོན་པ་སེམས་བསྐྱེད་ཀྱི་དབང་དུ་བྱས་ན། འདིའི་འབྲས་བུ་སངས་རྒྱས་ཉིད་དུ་འགྱུར་བ་ལྟ་ཞོག་གིགནས་སྐབས་སུའང་འཁོར་ལོས་སྒྱུར་བ་དང་ལྷའི་དབང་པོ་སོགས་མཐོ་རིས་ཀྱི་འབྲས་བུ་ལན་གྲངས་དུ་མར་མྱོང་ཡང་། མངོན་མཐོའི་འབྲས་བུ་འབྱིན་པའི་ནུས་པ་ནམ་ཡང་ཟད་པར་མི་འགྱུར་ཏེ། སྤྱོད་འཇུག་ལས། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་སོ། །འཇུག་སེམས་ཀྱི་རྩིས་ཟིན་ན་ནི་འབྲས་བུ་མི་ཟད་པ་འབྱུང་བར་མ་ཟད། འབྲས་བུའི་རྒྱུ་བསོད་ནམས་ཀྱང་རྒྱུན་མི་ཆད་དུ་འབྱུང་བས་སྨོན་པ་དང་ཁྱད་ཞུགས་པ་ཡིན་ཏེ། དེ་ལས། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །གང་ནས་བཟུང་སྟེ་སེམས་ཅན་ཁམས། །མཐས་ཡས་རབ་ཏུ་བསྒྲལ་བྱའི་ཕྱིར། །མི་ལྡོག་པ་ཡི་སེམས་ཀྱིས་ནི། །སེམས་ཏེ་ཡང་དག་བླང་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པར་དུ་མ་ཞིག །ནམ་མཁའ་མཉམ་པར་རབ་ཏུ་བྱུང་། །ཞེས་དང་། ཕན་པར་བསམ་པ་ཙམ་གྱིས་ཀྱང་། །སངས་རྒྱས་མཆོད་ལས་ཁྱད་འཕགས་ན། །སེམས་ཅན་མ་ལུས་ཐམས་ཅད་ཀྱི། །བདེ་དོན་བརྩོན་པ་སྨོས་ཅི་དགོས། །ཞེས་སོ། །

གཉིས་པ་ནི། རྒྱལ་བའི་སྲས་སུ་འགྱུར། ཞེས་པ་སྟེ། བྱང་ཆུབ་ཀྱི་སེམས་སྐྱེས་མ་ཐག་ནས་རྒྱལ་བ་རྣམས་ཀྱི་སྲས་ཞེས་མིང་འཕོ་ཞིང་ཕྱག་བྱ་བའི་གནས་སུ་གྱུར་པ་སྟེ། དེ་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོ། །གལ་ཏེ་ཉེས་པ་འགའ་ཞིག་བྱུང་ཡང་སྨོན་སེམས་མ་བཏང་ན་རིགས་ཀྱི་སྒོ་ནས་ཉན་རང་དགྲ་བཅོམ་ཟིལ་གྱིས་གནོན་ཅིང་། བྱང་སེམས་ཀྱི་མིང་ཡང་མི་འདོར་བ་ཡིན་ཏེ། བྱམས་པའི་རྣམ་ཐར་ལས། རིགས་ཀྱི་བུ་འདི་ལྟ་སྟེ། དཔེར་ན་རྡོ་རྗེ་རིན་པོ་ཆེ་ནི་ཆག་ཀྱང་གསེར་གྱི་རྒྱན་ཐམས་ཅད་ཟིལ་གྱིས་གནོན་ཅིང་། རྡོ་རྗེ་རིན་པོ་ཆེའི་མིང་ཡང་མི་འདོར་ལ། དབུལ་བ་ཡང་རྣམ་པར་བཟློག་གོ །དེ་བཞིན་དུ་རྣམ་པ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པ་ོཆེ་ནན་ཏན་དང་བྲལ་ཡང་། ཉན་ཐོས་དང་རང་སངས་རྒྱས་ཀྱི་ཡོན་ཏན་ཐམས་ཅད་ཟིལ་གྱིས་གནོན་ཅིང་། བྱང་ཆུབ་སེམས་དཔའི་མིང་ཡང་མི་འདོར་ལ། འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ །ཞེས་སོ། །

གསུམ་པ་ནི། གྲངས་མེད་གསུམ་བདུན་སོ་གསུམ་བྱང་ཆུབ་ཐོབ། །ཅེས་པ་སྟེ། བྱང་ཆུབ་སེམས་དཔའ་ལའང་དབང་པོའི་རིམ་པས་གྲོལ་ཚུལ་གསུམ་སྟེ། རྒྱལ་པོ་ལྟ་བུའམ་འདོད་ཆེན་པོའི་སེམས་བསྐྱེད་ཅེས་རང་གྲོལ་ནས་གཞན་སྒྲོལ་བར་འདོད་པའི་བྱང་སེམས་དབང་རྟུལ་རྣམས་ནི། བསྐལ་པ་གྲངས་མེད་སུམ་ཅུ་རྩ་གསུམ་ཐོགས་ཏེ། ཚོགས་སྦྱོར་དུ་གསུམ་དང་། ས་བཅུ་རེ་རེ་ལ་གསུམ་གསུམ་མོ། །མཉན་པ་ལྟ་བུའམ་ཡེ་ཤེས་དམ་པའི་སེམས་བསྐྱེད་ཅེས་རང་དང་འགྲོ་བ་མཉམ་དུ་ཐར་བར་འདོད་པ་བྱང་སེམས་དབང་འབྲིང་རྣམས་ནི་གྲངས་མེད་བདུན་ཐོགས་ཏེ། ཚོགས་སྦྱོར་གཉིས་སུ་གཉིས་རེ། མཐོང་ལམ་དུ་གཅིགསྒོམ་ལམ་དུ་གཉིས་སོ། །རྫི་བོ་ལྟ་བུའམ་དཔེ་མེད་པའི་སེམས་བསྐྱེད་ཅེས་སེམས་ཅན་ཐམས་ཅད་བསྒྲལ་ནས་རང་ཉིད་གྲོལ་བར་འདོད་པ་བྱང་སེམས་དབང་རྣོན་རྣམས་ནི་གྲངས་མེད་གསུམ་ཐོགས་པ་ལས། དང་པོ་ལ་མོས་སྤྱོད་ཀྱི་ས་ཚོགས་སྦྱོར་གཉིས་རྫོགས་ཏེ། ཚོགས་ལམ་གསུམ་དུ་དྲན་པ་ཉེར་བཞག་བཞི། ཡང་དག་སྤོང་བཞི། རྫུ་འཕྲུལ་རྐང་པ་བཞི་རྣམས་བསྒོམས་པས་ཚོགས་ལམ་ཆེན་པོར་གནས་སྐབས་ཀྱི་ཡོན་ཏན་མངོན་ཤེས་ལྔ་དང་ཁྱད་པར་གྱི་འབྲས་བུ་ཆོས་རྒྱུན་གྱི་ཏིང་ངེ་འཛིན་ཐོབ། དེ་ནས་སྒོམ་བྱུང་གཙོ་བོར་གྱུར་པ་སྦྱོར་ལམ་དུ་ངེས་འབྱེད་ཡན་ལག་བཞི་སྟེ། དྲོད་ཀྱིས་ཀུན་ནས་ཉོན་མོངས་པ་དང་རྩེ་མོས་རྣམ་བྱང་གི་གཟུང་རྟོག །བཟོད་པས་གང་ཟག་རྫས་ཡོད་དང་ཆོས་མཆོག་གིས་བཏགས་ཡོད་བཞི་སྤོང་ཞིང་། དང་པོ་གཉིས་སུ་དབང་པོ་ལྔ་དང་། ཕྱི་མ་གཉིས་སུ་དེ་གོམས་པས་མི་མཐུན་ཕྱོགས་ཀྱིས་མི་བརྫི་བའི་སྟོབས་ལྔ་སྒོམ་མོ། །དེ་ནས་འཕགས་ལམ་ལ་ས་བཅུ་ལས། གྲངས་མེད་གཉིས་པས་མ་དག་ས་བདུན་དང་། གསུམ་པས་དག་པ་ས་གསུམ་རྫོགས་པར་བྱེད། དེའང་ས་དང་པོ་མཐོང་བའི་ལམ་དུ་ཆོས་ཉིད་ཀྱི་བདེན་པ་མངོན་སུམ་དུ་མཐོང་བས་ཀུན་བརྟགས་གློ་བུར་གྱི་སྒྲིབ་པ་ཐམས་ཅད་བཅོམ་ནས་སྐད་ཅིག་གཅིག་ལ་སངས་རྒྱས་ཀྱི་ཞིང་བརྒྱ་བགྲོད་པ་སོགས་ཡོན་ཏན་བརྒྱ་ཕྲག་བཅུ་གཉིས་ཐོབ། དེས་བྱང་ཆུབ་ཀྱི་ཡན་ལག་བདུན་ཉམས་སུ་ལེན་ཞིང་སྦྱིན་པའི་ཕར་ཕྱིན་ལ་གཙོ་བོར་སྤྱོད། མཐོང་བའི་དོན་དེ་སྤང་བྱ་ལྷན་སྐྱེས་སྤོང་བའི་གཉེན་པོར་རྒྱུན་གོམས་པར་བྱེད་པས། ས་གཉིས་པ་ནས་བཅུ་པའི་བར་གྱི་སྒོམ་ལམ་ས་དགུར་རང་སྐལ་གྱི་སྒྲིབ་པ་ལས་གྲོལ་བའི་གློ་བུར་རྣམ་དག་གི་ཆ་རེ་ཐོབ་པས་སྔར་མཐོང་ལམ་གྱི་ཡོན་ཏན་དེ་ཉིད་སྟོང་འགྱུར་སོགས་གོང་ནས་གོང་དུ་འཕེལ་ཞིང་། དེ་རྣམས་སུ་སྤྱིར་འཕགས་ལམ་ཡན་ལག་བརྒྱད་སྒོམ་ལ། བྱེ་བྲག་སོ་སོར་ཚུལ་ཁྲིམས་ནས་ཡེ་ཤེས་ཀྱི་བར་གྱི་ཕྱིན་བཅུ་ལ་གཙོ་བོར་སྤྱོད་དོ། །དེ་ལྟར་གྲངས་མེད་གསུམ་གྱིས་སློབ་ལམ་རྫོགས་ནས་སྒྲིབ་གཉིས་བག་ཆགས་དང་བཅས་པ་མི་སྐྱེ་བའི་ཆོས་ཅན་དུ་བྱས་པས་དེའི་གཉེན་པོ་ལ་སློབ་མི་དགོས་པར་མི་སློབ་ལམ་དུ་ཕྱིན་ཏེ་བླ་ན་མེད་པའི་བྱང་ཆུབ་བརྙེས་པ་ཡིན་ནོ། །དེ་ལྟར་ཡང་སེམས་ཉིད་ངལ་གསོ་ལས། དེ་ལྟར་བྱང་ཆུབ་ཕྱོགས་ཆོས་སུམ་ཅུ་བདུན། །སློབ་པའི་ལམ་བཞིར་སྒོམ་པའི་རྗེས་ཐོགས་སུ། །མི་སློབ་ས་ལ་མི་གནས་ངན་འདའ། །ཞེས་སོ། །དེ་ལ་འདིར་དབང་རྣོན་གྱི་གྲངས་མེད་གསུམ་ཡང་སེམས་སྟོབས་ཤིན་ཏུ་ཆེ་བས་སྐད་ཅིག་རེ་རེ་ལ་བསྐལ་པ་མང་པོའི་ཚོགས་བཟླུམས་པར་བཤད་པས་གྲངས་ཇི་ལྟ་བ་བཞིན་དུ་གསོག་མི་དགོས་པར་མ་ཟད། མཐོང་ལམ་ཐོབ་ནས་ནི་རང་དབང་འབྱོར་བའི་ཕྱིར། ཅི་དགར་གྲོལ་བར་ནུས་ཏེ། ཡུམ་བར་མ་ལས། ཆོས་རྣམས་ལ་ཆོས་ཀྱི་མིག་རྣམ་པར་དག་པ་ཐོབ་པའི་བྱང་ཆུབ་སེམས་དཔའ་ཆེན་པོའི་དེས་འདོད་ན་ཞག་བདུན་གྱིས་ཀྱང་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ། ཞེས་སོ། །དེ་དག་ཀྱང་དཀོན་མཆོག་བརྩེགས་པ་ལས། དེ་ལ་འདོད་ཆེན་པོའི་སེམས་བསྐྱེད་པས་ནི་གྲངས་མེད་སུམ་ཅུ་རྩ་གསུམ་གྱིས་འཁོར་བ་ལས་ཐར་བ་ཡིན་ནོ། །ཡེ་ཤེས་དམ་པའི་སེམས་བསྐྱེད་པས་ནི་གྲངས་མེད་པ་བདུན་གྱིས་ཚར་ཕྱིན་པ་ཡིན་ནོ། །དཔེ་མེད་པའི་སེམས་བསྐྱེད་པས་ནི་གྲངས་མེད་པ་གསུམ་གྱིས་མངོན་པར་རྫོགས་པ་བྱང་ཆུབ་པ་ཡིན་ནོ། །དེ་ཅིའི་ཕྱིར་ཞེ་ན། སེམས་སྟོབས་ཆུང་ངུ་དང་། འབྲིང་དང་། ཆེན་པོར་གྱུར་པའི་ཕྱིར་ཏེ། འདི་དག་དཔེར་བྱ་ན། འཁོར་ལོས་སྒྱུར་བའི་རྒྱལ་པོ་དང་། གྲུའི་ཁ་ལོ་པ་དང་། སྐྱོང་བྱེད་ལྟ་བུའོ། །ཞེས་གསུངས་སོ། །

དེ་ལྟར་བཤད་ཟིན་ནས་ལེའུའི་སྐབས་བསྡུ་བ་ནི། བྱང་ཆུབ་སེམས་དཔའི་སེམས་བསྐྱེད་ཀྱི་བསླབ་བྱ་བཤད་པའི་རིམ་པར་ཕྱེ་བ་སྟེ་གསུམ་པའོ། །ཞེས་པ་སྟེ། བསྟན་བཅོས་འདི་ལ་ལེའུ་ལྔ་ལས། ཐེག་ཆེན་ཕ་རོལ་ཏུ་ཕྱིན་པ་དང་ཐུན་མོང་པའི་བསྟན་པའི་ཉམས་ལེན་བྱང་ཆུབ་སེམས་དཔའི་སེམས་བསྐྱེད་ཀྱི་བསླབ་བྱ་སྲོལ་གཉིས་ཀྱི་རིང་ལུགས་ལྟར་བཤད་པའི་རིམ་པར་ཕྱེ་བ་སྟེ་ལེའུ་གསུམ་པའི་འགྲེལ་པའོ།། །།

འདིར་སྨྲས་པ། ཉེས་སྤྱོད་རྙོག་བྲལ་རྒྱ་མཚོ་བསྲུབས་ལས་འཐོན། །ལེགས་སྤྱོད་དགེ་བའི་ཆ་ཤས་ཡོངས་སུ་རྫོགས། །གཞན་དོན་སྤྱོད་པའི་རྒྱུ་སྐར་ཕྲེང་བས་མཛེས། །རྒྱལ་སྲས་སྤྱོད་མཆོག་སྟོན་བྱེད་རྨད་བྱུང་གཞུང་། །ལེགས་པར་འགྲེལ་པའི་ངག་ཚིག་ཀུནྡཱའི་གཉེན། །ལྷ་དབང་ཕྱོགས་ཀྱི་ས་འཛིན་རྩེར་འཛེགས་ནས། །ཆོས་དཀར་བདུད་རྩིའི་དཔལ་འདིས་འགྲོ་ཀུན་གྱི། །སྲིད་ཞིའི་གདུང་སེལ་བླ་ན་མེད་གྱུར་ཅིག། །།