མཁན་ཆེན་མཁྱེན་བརྩེ་ནོར་བུའི་གསུང་ཐོར་བུའི་སྐོར།
མཁན་ཆེན་མཁྱེན་བརྩེ་ནོར་བུའི་གསུང་ཐོར་བུའི་སྐོར།
རིག་འཛིན་ཐུགས་ཐིག་གི་སྔོན་འགྲོ་གསུངས་དུས་ཀྱི་ཟིན་བྲིས། བདག་ཅག་གི་སྟོན་པས་མདོ་སྔགས་ཀྱི་ཐེག་པ་གང་གསུངས་པ་རྣམས་ཀྱི་བརྗོད་བྱའི་སྙིང་པོ་མཐར་ཐུག་པ་ནི་ཨ་ཏི་ཡོ་ག་ཡིན་ལ། དེ་ལ་དྲང་ཐད་དུ་དཀྲི་བ་ནི་རང་བཞིན་གྱི་དབང་རྣོན་དང་སྦྱངས་པ་སྔོན་སོང་ཅན་ལྟ་བུ་མིན་ན་ཆོས་དང་གང་ཟག་ཡ་འཛོལ་ཏེ། བླ་སློབ་གཉིས་ཀར་ཕན་པ་ལས་གནོད་ཚབ་ཆེ་བའི་ཕྱིར་མཐོ་སྙེགས་ཀྱིས་མི་ཕན་པས། སྐལ༵་ལྡ༵ན་ཞེས་སྣོད་དང་ལྡན་མི་ལྡན་དབང་པོའི་རིམ་པ་དང་འཚམས་པར་ལམ་ལ་དཀྲི་དགོས་པའི་དོན་ཡིན། དེ་ལས་སྔགས་ཀྱི་གདུལ་བྱ་ནི། བློ་ཆེན་བྱང་སེམས་ཕལ་ལ་ཡོད་པའི་སེམས་བསྐྱེད་ཡོད་ཙམ་གྱིས་ཀྱང་མི་ཆོག་པར་མྱུར་བ་ཚེ་འདི་ལ་སངས་རྒྱས་ནས་སེམས་ཅན་སྡུག་བསྔལ་ལས་སྒྲོལ་འདོད་ཀྱི་སེམས་བསྐྱེད་སྟོབས་དང་ལྡན་པ་ཞིག་ཅི་ནས་དགོས་མ་གཏོགས། ཆོས་རྫོགས་ཆེན་ཡིན་ཀྱང་། གང་ཟག་རྫོགས་པ་ཆེན་པོར་མ་སོང་ན་ཡ་འཛོལ་ལོ། །ཁྲིད་ཅེས་དཔེར་ན་ལོང་བ་གཡང་ཁར་འཕྱན་པ་ཞིག་མིག་ལྡན་གྱིས་ལམ་ངན་ལས་བསྒྲལ་ཏེ་བདེ་བར་བསྐྱལ་བ་ལྟར། ཐོག་མེད་ནས་མ་རིག་ལིང་ཐག་གིས་མིག་ཟུམ་པའི་སེམས་ཅན་རྨོངས་པ་རྣམས། ཁམས་གསུམ་འཁོར་བའི་སྡུག་བསྔལ་རྒྱུ་འབྲས་ཀྱི་གཡང་ས་ལས་སྐྱོབ་པའི་ཆེད་དུ་ལམ་མ་ནོར་བ་སྟོན་པའི་སྒོ་ནས་སངས་རྒྱས་ཀྱི་ས་ལ་ཁྲི༵ད་པ་ལ་ཟེར། དེ་ཡང་ལམ་ཐོས་པ་དང་ཤེས་པ་ཙམ་གྱིས་གཡང་ས་ལས་མི་གྲོལ་བས་ལ་ཆུ་འཕྲང་རྣམས་རིམ་བཞིན་བགྲོད་ནས་བདེ་བར་མ་སླེབ་པར་ལམ་དེ་བོར་མི་རུང་བ་བཞིན། ཆོས་ཐོས་པ་ཙམ་གྱིས་ཆོག་པར་བཟུང་མི་རུང་ཞིང་བླ་མ་བཀའ་དྲིན་ཅན་གྱིས་སྤང་བླང་གི་གནད་ཇི་སྐད་བསྟན་པ་ལྟར་ལག་ཏུ་བླངས་ནས་མཐར་ཕྱིན་པ་ཞིག་མ་བྱུང་ན་ཁྲིད་ཐོས་ཐོས་དང་ཐོབ་ཐོབ་མང་
པོས་ནི་ཅི་ཡང་ཕན་མི་ཐོགས་པས་དེ་ཙམ་གྱིས་འཚང་རྒྱ་ཐབས་ནི་མེད་དོ། །ཁྲིད་ཚུལ་དངོས་ལ། ལམ་གྱི་སྣོད་རུང་བྱ་བ་སྔོན་འགྲོ། ལམ་གྱི་གཞི་མ་བསྐྱེད་རྫོགས། ལམ་གནད་མཐར་ཐུག་ཀ་དག་གི་ཁྲིད་རྣམས་ཡིན་པས་རིམ་བཞིན་ཉམས་འོག་ཏུ་ཆུད་དགོས། སྔོན་འགྲོ་ལའང་མདོ་དང་ཐུན་མོང་། སྔགས་ལམ་ཐུན་མིན་དེ་ལའང་ཐུན་གྱི་སྔོན་འགྲོ་དང་ཁྲིད་ཀྱི་སྔོན་འགྲོ་གཉིས་ལས་དང་པོ་ནི། བསམ་གཏན་ཞེས་པ་དགེ་བའི་ལས་ལ་སེམས་ཅི་འདོད་འདོད་དུ་བཀོལ་དུ་གཏུབ་པ་ཞིག་ལ་ཟེར་བས་དེའི་ཚེར་མ་གཞི་ཁྱིམ་དང་ཉེ་དུ་སོགས་ཆགས་སྡང་གི་ཡུལ་ལས་བྲོས་ཏེ་གནས་རི་ཁྲོད་དབེན་པར་བརྟེན། ནང་བག་ཆགས་ངན་གོམས་ཀྱི་རྣམ་རྟོག་ཐམས་ཅད་ཐབས་སྣ་ཚོགས་ཀྱིས་སྤངས། ཐུན་ལ་འཇུག་པའི་ཐོག་མར་སྟན་བདེ་བར་ལུས་སྐྱིལ་ཀྲུང་། མཉམ་བཞག །རྒལ་ཚིག་བསྲང་། མིག་སྣ་རྩེའི་ཐད། ལྟོ་བ་ཕྱིར་བརྒྱང་། མཆུ་སོ་མ་རེག་ཙམ། དཔུང་པ་བརྒྱང་པའམ་ལྕེ་རྐན་ལ་སྦྱར་བ་གང་རུང་དང་བདུན་པོ་བཅའ་བས་ལུས༵་རྣལ༵་དུ༵་དབ༵བ། རླུང་རོ་དགུ་ཕྲུགས་སམ་གསུམ་བསལ་བའི་དང་པོ་ལག་གཡོན་པའི་སྲིན་ལག་གིས་སྣ་བུག་བཀག་གཡས་པ་ནས་བྱང་ཆུབ་སྒྲུབ་པའི་བར་ཆད་སྤྱི་དང་ཁྱད་པར་དེའི་གེགས་སུ་གྱུར་པའི་ནད་ཐམས་ཅད་རྣག་ཁྲག་གི་རྣམ་པས་ཕྱིར་ཐོན་པར་བསམ་ལ་རླུང་རོ་གསུམ་མམ། དེ་གོ་ལྡོག་དུས་དམིགས་པ་བར་ཆད་སྤྱི་དང་ཁྱད་པར་སྟེང་གདོན་འོག་གདོན་སོགས་གདོན་རིགས་ཐམས་ཅད་སྦལ་སྦྲུལ་སྡོམ་སྡིག་སྲོག་ཆག་ཀྱི་རྣམ་པར་ཕྱིར་ཐོག་པར་བསམ། སྣ་བུག་གཉིས་ཀ་ནས་ལས་ཉོན་སྡིག་སྒྲིབ་ཐམས་ཅད་དུད་ཁུ་སོལ་ཁུའི་རྣམ་པར་ཐོན་པར་བསམ་པ་ང༵ག་རྣལ༵་དབ༵བ། སེམས་གནད་མཚོན་བཀྱེ་བ་ལ་རས་དཀར་དྲི་མེད་དགོས་པ་ལྟར་ངན་གོམས་ཀྱི་རྣམ་རྟོག་འཕྲོ་འདུ་རྦད་ཀྱིས་བཅད་ནས་དམིགས་པ་གར་གཏད་དུ་བཀོལ་རུང་བར་བྱ་བ་སེམ༵ས་རྣལ༵་དབ༵བ་པའི་སྟེང་། ༼དམིགས་རྣམས་ཀྱི་ངོ་བོ་གོ་རིམ་གྲངས་ངེས་དང་བཅས་པའི་ལུས་རགས་པ་ཞིག་ཡིད་ཡུལ་དུ་བྱས་ཏེ། བདག་གི་ཚུལ་འདི་ལས་གཞན་དུ་ནམ་ཡང་མི་བཏང་སྙམ་པའི་འཕེན་པ་ཤུགས་དྲག་བཏང་། ༽མདོ་ལས། ཡིད་གཙོ་ཡིད་ནི་རབ་ཏུ་མགྱོགས་པ་སྟེ། །ཆོས་རྣམས་ཀུན་གྱི་སྣ་ལ་དེ་འགྲོའོ། །ཞེས་པ་ལྟར་ཀུན་སློང་བཅོས་པ་གལ་
ཆེ་བ་དེས་ན། བླ་མ་ས་སྐྱ་བ་ལ་རྗེ་བཙུན་འཇམ་པའི་དབྱངས་ཀྱིས་གདམས་པའི་ཚེ་འདི་ལ་ཞེན་ན་སོགས་ཚིག་རྐང་བཞི་ལ་བསམ་ན་མདོ་སྔགས་གཉིས་ཀྱི་ཀུན་སློང་རྣམ་དག་ཅིག་འོང་། དེ་ཡང་ཚེ་འདི་སྣང་གི་བློ་སྣ་མ་བསྟུང་ན། ཆོས་གང་སྒྲུབ་ཚེ་འདིའི་ལག་ཆ་རུ་འགྲོ་བས་ཕན་པ་ལས་གནོད་པ་ཆེ། ཕྱི་མའི་དོན་ཞིག་གཉེར་ནའང་གཉེར་བྱ་འཁོར་བའི་ཕུན་ཚོགས་ལྷ་མིའི་འབྱོར་པ་ལ་རེ་བ་ནི། ཟད་སླ་ཞིང་བདེ་བ་ལྟར་སྣང་བ་ཡིན་པས་ཕན་པ་མེད། གཏན་བདེ་འདོད་ཀྱང་རང་གཅིག་པུ་ཐར་འདོད་ཀྱི་བློ་ནི་འབྲས་བུ་དམན་པས་བྱང་ཆུབ་ཆེན་པོ་མི་ཐོབ། དངོས་བསྟན་གྱིས་སྤང་བྱའི་ཀུན་སློང་དང་། ཚིག་རྐང་དང་པོ་གསུམ་བཟློག་དོན་གྱིས་བསམ་པ་རྒྱ་ཆེ་བ་བྱང༵་ཆུབ༵་སེམ༵ས་ཀྱི༵་ཀུན༵་སློང༵་བསྟན། རྒྱས་པ་སེམས་བསྐྱེད་སྐབས་དང་ཁྲིད་ཡིག་གཞན་དུ་གསལ། དེ་ལ་འཆད་ཉན་སྒོམ་སྒྲུབ་གང་ཡིན་ཀྱང་འདི་སྣང་གི་བློ་སྣ་རྦད་ཀྱིས་བཅད། མཁའ་ཁྱབ་སེམས་ཅན་ལ་དམིགས་པའི་སྙིང་རྗེས་མྱུར་བ་ཚེ་འདིར་སངས་རྒྱས་ཀྱི་གོ་འཕང་བསྒྲུབས་ནས་སེམས་ཅན་སྡུག་བསྔལ་ལས་བསྒྲལ་བར་བྱའོ་སྙམ་དུ་བློ་རྒྱ་བསྐྱེད། དང་པོ་ནས་བཅོས་མིན་སྐྱེ་དཀའ། ཡང་ཡང་བཅོས་པས་རིམ་གྱིས་ཡར་སྐྱེད་ཐོན་པར་བྱ། ཀུན༵་སློང༵་ནི་སེམས་དང་། ཀུན༵་སྤྱོད༵་གཙོ་བོ་ལུས་ངག་ཡིན་པས། ཀུན་སློང་རྣམ་པར་དག་ན་ཀུན་སྤྱོད་རང་ཤུགས་ཀྱིས་བཟང་པོར་འགྲོ། དེས་ན་ཀུན་སློང་དག་མ་དག་སེམས་བསྐྱེད་ཀྱིས་ཟིན་མ་ཟིན་ལས་དགེ་རྩ་ཆེ་ཆུང་འགྲོ་བ་ལས། གྲངས་མང་ཉུང་། ཡུན་རིང་ཐུང་ལ་མི་ལྟོས་པས་ལྟར་སྣང་གི་དགེ་བ་ལ་གཙིགས་སུ་མི་བྱ་བའི་གནད་འདི་གོ་དགོས་པ་རང་ཅག་གིས་ལོ་ཟླ་མང་པོ་ཆོས་སྒྲུབ་ལོ་བྱས་ཀྱང་ཡར་སྐྱེད་སྤུ་ཙམ་མེད་པ་འདི་དགེ་བའི་གཟུགས་བརྙན་དུ་ཤོར་བས་ཡིན། ད་ད་སྔོན་ལྟར་རང་མགོ་རང་གིས་གཡོགས་ནས་མི་ཚེ་ཟད་དུ་མི་འཇུག་པར་རྒྱ་ཆེ་ཆུང་ཡུན་རིང་ཐུང་། ཉི་མ་ནམ་ཙམ་ལ་ཚོད་མི་འཇོག་པར་དགེ་སྦྱོར་གནད་ཐོག་འགྲོ་མི་འགྲོ་ལ་ཚད་བཞག་ནས་ཐུན་བཅད། གནད་དུ་མ་སོང་ན་རྒྱ་འབྱམས་མི་གཏང་བར་བསྔོ་སྨོན་བཟང་པོས་རྒྱས་འདེབས་བྱས་ནས་ཐུན༵་གས༵ར་དུ༵་བཅ༵ད། ཡུན་ཐུང་གྲངས་མང་ལ་བསླབ། གནད་ཐོག་སོང་ན་ཐུན་ཅི་ཙམ་རིང་ཡང་དགེ་སྦྱོར་འཕེལ་བས་རང་རྒྱུད་
ལ་ཚད་འཛིན་པ་ལས་ཕྱི་ནས་ཁྲིམས་འཇོག་ལྟ་བུ་འདིས་ནི་དགེ་སྦྱོར་ལད་འགྲོ། ཀུན་སློང་དེ་ཡང་ཐུན་མགོར་དུམ་བུ་ཞིག་ལས་མི་དགོས་པ་མ་ཡིན་ཏེ། སངས་མ་རྒྱས་བར་དུ་མཁོ་བས། ཐུན་དང་ཐུན་མཚམས་ཐོག་མཐའ་བར་གསུམ་ཀུན་ཏུ་བསམ་པ་དེ་ལས་བློ་གཞན་གྱིས་མི་འཕྲོག་པ་ཞིག་འོང་བ་ལ་བསླབ་བོ། །དེ་ནས་མདུན་མཁར་སེང་གེ་ཆེན་པོ་བརྒྱད་ཀྱིས་བཏེགས་པའི་ཁྲི་ལ་སྣ་ཚོགས་པདྨ་འདབ་མ་སྟོང་ལྡན་ཟེའུ་འབྲུའི་རྒྱ་ཁྱོན་དང་མཉམ་པའི་ཉི་ཟླའི་གདན་ལ། ངོ་བོ་དྲིན་ཆེན་རྩ་བའི་བླ་མ་ལ། རྣམ་པ་གུ་རུ་མཚོ་སྐྱེས་རྡོ་རྗེར་བསྒོམ། གུ་རུའི་ཆ་ལུགས་མི་འདྲ་བ་མང་ཡང་ཟ༵་ཧོར༵་མ༵་འདི་གྲགས་ཆེ་བ་དང་། སྐུའི་ཆ་ལུགས་དྲན་པ་ཙམ་གྱིས་བར་ཆད་ཞི་ཞིང་བྱིན་རླབས་ཞུགས་པ་སོགས་གསུངས་པས་དེ་ཉིད་གསལ་བཏབ། དུས་གསུམ་སངས་རྒྱས་ཀྱི་ངོ་བོ་གུ་རུ་དང་བླ་མ་དབྱེར་མེད་ལ་མོས་གུས་ཤུགས་དྲག་བསྐྱེད་ནས་བློ་འགྱུར་ཐུབ་པ་ཞིག་དགོས། གསོལ་འདེབས་ཀྱི་དོན། ལམ་གྱི་ཡོན་ཏན་སྤྱི་དང་ཁྱད་པར་ཐུན་དངོས་གཞི་ཉམས་ལེན་གང་ཡིན་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་ཕྱིར་གནད་དུ་འགྲོ་བའི་གསོལ་བ་བཏབ། དེའི་ཚེ་མདུན་དུ་ཡོད་པ་ནི་རང་གིས་དམིགས་པ་ཙམ་ཡིན་གྱི་གུ་རུ་ནི་རྔ་ཡབ་གླིང་ན། བླ་མ་ནི་ག་ཤེད་ན་བཞུགས་ཡོད་སྙམས་པའི་རྟོག་ངན་ཤར་ན། གང་ཞིག་སངས་རྒྱས་ཡིད་བྱེད་པ། དེ་ཡི་མདུན་ན་ཐུབ་པ་བཞུགས། །ཞེས་པ་ལྟར་དད་མོས་སུ་ཡོད་ཀྱི་གོ་ས་ན་རྒྱལ་བ་སྲས་བཅས་ཉེ་རིང་མེད་པར་བཞུགས་ཡོད་པ་ལས། རྒྱུད་ཐ་མལ་པ་ལྟ་བུ་ཕྱོགས་དང་རིས་སུ་མ་ཆད་པས་ཐེ་ཚོམ་མེད་པ་གལ་ཆེ། ཁྱད་པར་གུ་རུ་རིན་པོ་ཆེ་ནི་བོད་ལ་ལྷག་པར་བརྩེ་བས་གསོལ་འདེབས་རང་གིས་ཐུབ་ན་བྱིན་རླབས་མྱུར་དུ་འཇུག་པར་གདོན་མི་ཟ་ཡིས། དད་པ་ཅན་ལ་པད་འབྱུང་སྒོ་ཉལ་ཡོད། །ཅེས་མོས་གུས་ཅན་གྱི་དད་པའི་མཁར་སྒོར་བཞུགས་ཡོད་པ་ཞལ་གྱི་བཞེས་པ་ཡིན་པས། སྐབས་འདིར་བསྐྱེད་རིམ་ལྟ་བུ་རྣམ་འགྱུར་ཆ་ལུགས་གསལ་རུང་མ་གསལ་རུང་། དོན་ལ་བླ་མ་དང་གུ་རུ་དབྱེར་མེད་ཡིན་པར་ཐག་བཅད། དེ་མདུན་མཁར་མངོན་སུམ་བཞུགས་པར་ཐག་བཅད། དེ་ལ་བློ་གཏད་ལིང་བསྐྱུར་གྱི་མོས་གུས་གདུང་ཤུགས་དྲག་པོས་གསོལ་
འདེབས་བྱ། དེ་ཡང་ཁ་ནས་གསོལ་བ་འདེབས། བྱིན་གྱིས་རློབས་ཞེས་ཚིག་ཙམ་ཟློས་པ་མ་ཡིན་པར། མིག་ནས་མཆི་མ་གཡོ། ལུས་ཀྱི་བ་སྤུ་ལྡང་། བློ་སྣ་བླ་མས་འཕྲོག་ཐུབ་པ་ཞིག་དགོས། འདི་དག་ཐུན་ཐམས་ཅད་ཀྱི་སྔོན་དུ་འགྲོ་དགོས། གསོལ་འདེབས་སྐབས་དམིགས་བསལ་སྐབས་དོན་ཉམས་ལེན་གྱི་རྟོགས་པ་རྒྱུད་ལ་སྐྱེ་ཕྱིར་གསོལ་བ་འདེབས་པ་ཙམ་ཁྱད་པར་རོ། །གཉིས་པ་ལ་ལྔ་ལས། དང་པོ་དལ་འབྱོར་རྙེད་དཀའ་ནི། ངོ་བོ་དང་གྲངས་ངེས་རྒྱས་པ་གཞན་དུ་ཤེས། འདིར་སྒོམ་ཚུལ་གྱི་ལག་ལེན་ཙམ་བཤད་ན། སྒོམ་དེ་ལའང་རྒྱུ་མཚན་མང་པོས་ཡང་ནས་ཡང་དུ་བརྟགས་དཔྱད་བྱས་ནས་སྒྲོ་འདོགས་གཅོད་པ་དཔྱད༵་སྒོམ༵། དམིགས་པ་གཅིག་ལ་ཐབས་སྣ་ཚོགས་ཀྱིས་སེམས་གནས་སུ་བཅུག་པ་ལ་འཇོ༵ག་བསྒོམ༵་དང་གཉིས་ལས། འདི་སྐོར་ལ་སྔ་མ་གཙོར་ཆེ། དེ་ལ་བློ་ལྡོག་ཅེས་གང་ལས་ན་ཚེ་འདིའི་སྣང་བ་ལས། གང་གིས་ན་དལ་འབྱོར་རྙེད་དཀའ་བསྒོམ་པས། སྒོམ་ཚུལ་ཇི་ལྟར་ན། དལ་འབྱོར་ངོས་བཟུང་། རྙེད་དཀའ་བ་དོན་ཆེ་བ་གདམས། ཆོས་སྒྲུབ་པ་ལ་བར་དུ་གཅོད་ངེས་པའི་འགལ་རྐྱེན་དང་བྲལ་བ་དལ༵། དེའི་སྟེང་ཆོས་སྒྲུབ་པ་ལ་མཁོ་བའི་ཆ་རྐྱེན་རྣམས་ཚང་བ་ལ་འབྱོར། དེ་གཉིས་དང་ལྡན་པའི་མིའི་ལུས་རྟེན་ལ་དལ་འབྱོར་གྱི་རྟེན་དེ་ཤིན་ཏུ་ཐོབ་དཀའ་བས་རྙེད་དཀའ། ཐོབ་ན་ཕན་ཡོན་ཆེན་པོ་དང་ལྡན་པས་དོན༵་ཆེ༵་བ༵འོ། དང་པོ་ནི། རྟེན་གཞན་གྱིས་ཆོས་ཀྱི་སྣོད་དུ་མི་རུང་། གལ་སྲིད་མི་ལུས་ཐོབ་ཀྱང་དགེ་བའི་བཤེས་གཉེན་དང་མི་འཕྲད། བསྟན་པ་དང་མི་མཇལ། དེ་དག་འཛོམས་ཀྱང་ཟས་གོས་སོགས་མི་རྙེད། གཞན་ཡང་ལུས་ལ་ནད་མང་བ། སེམས་ལ་ཉོན་མོངས་མང་བས་བླ་མ་བརྒྱ་ལ་ཆོས་ཞུས་ཀྱང་བློ་འགྱུར་མི་ཐུབ་པའི་དྲེད་པོ། གལ་སྲིད་ཐེངས་རེ་འགྱུར་ཡང་རྐྱེན་ཁར་འཆོར་བ། ཆོས་ལ་མོས་ཀྱང་ཤེས་རབ་རྨོངས་པ་རྣམས་ཡིན་པས་ད་ལྟ་རང་ལ་བརྟགས་པས་འགལ་རྐྱེན་ཆེས་རགས་པ་རྣམས་ནི་མེད་ཙམ་དུ་འདུག །ད་སྐབས་སངས་རྒྱས་ཀྱི་བསྟན་པ་ནི་ཁོལ་བུ་གནས། རང་རྒྱུད་ལོག་ལྟས་བསླད་པས་བླ་མ་སངས་རྒྱས་དངོས་མི་མཐོང་ཡང་། ཐར་
ལམ་མ་ནོར་བ་སྟོན་པ་དང་། ཟ་ལུགས་འཐུང་ལུགས་ཡན་ཆད་འདི་འདྲ་གྱིས་ཞེས་གདམས་པའི་བཤེས་གཉེན་དང་ནི་འཕྲད། སྒོམ་ཆེན་གཡང་ལ་མ་ལྷུང་ན། སྙན་གོང་གྱེན་ལ་འདྲིལ་འོང་ཟེར་བ་ལྟར། གསོག་འཇོག་ཕུགས་ནོར་ལ་མ་བསམ་ན་ལྟོ་གོས་སྐྱོབ་ཙམ་ནི་རྙེད་སླ། དབང་པོ་ལ་སྐྱོན་མེད་ཤེས་རབ་ཆེ་ཆུང་རེ་ཡོད་ཀྱང་དུད་འགྲོ་ལྟ་བུའི་རྨོངས་པ་ནི་རྒྱ་ལམ་མ་གཏོགས་མེད་ལ། དུད་འགྲོ་ཅང་ཤེས་པས་ཀྱང་མ་ཎི་ཚིག་གཅིག་འདོན་མི་ཤེས། ཤེས་ཀྱང་དེས་ཕན་གནོད་མི་གོ །བོད་སྤྱན་གཟིགས་ཀྱི་གདུལ་ཞིང་ཡིན་པས་བྱིས་པ་ལོ་བརྒྱད་པས་ཀྱང་རང་ལ་ཕན་དུ་རེ་ནས་མ་ཎི་འདོན་པ་སོགས་རྟེན་གཞན་ལས་ཤིན་ཏུ་འཕགས། དེས་ན་ཆོས་སྒྲུབ་མོས་ཡོད་ན། རྒྱལ་བ་ཐབས་མཁས་ཐུགས་རྗེ་ཅན་དེས། མཁས་བླུན་མཆོག་དམན་གང་ལའང་སྒྲུབ་རྒྱུས་མི་ཕོངས་པ་མཛད་ནས་ཡོད་པ་ལ་སྤྲོ་བ་བསྐྱེད། ནད་དང་ཉོན་མོངས་མང་བ་སོགས་ནི་ལམ་ཁྱེར་ཤེས་ན་ཆོས་ཀྱི་ཕྱོགས་སུ་འགྲོ་ལུགས་ཀྱང་ཡོད། གཉིས་པ་ནི། རྟེན་གཞན་ལས་བཟང་ཡང་མང་པོ་ཐོབ་པས་དྲག་སྙམས་པའི་བློ་སྐྱེ་ན། ད་ལྟའི་མི་རྣམས་ལ་ཆོས་འཇིག་རྟེན་གང་ཡིན་ཡང་འདོད་པ་ཙམ་གྱིས་མི་འགྲུབ་པར་ཆེ་ཐང་དུ་འབད་དགོས། ཕལ་ཆེ་བས་འབད་ཀྱང་ངལ་བ་འབྲས་མེད་དུ་འགྱུར་བ་འདི་ནི། ཚེ་རབས་སྔ་མ་དེའི་རྒྱུ་ཚོགས་བསགས་ཡོད་མེད་ཀྱིས་ཡིན། ཐམས་ཅད་བཙན་ཕྱུག་འབྱོར་བ་ཅན་ལ་རེ་བ་བྱས་ཀྱང་མཐོ་དམན་སྣ་ཚོགས་སུ་འགྲོ་བ་དང་། འགའ་ཞིག་ཆོས་སྒོར་ཞུགས་ཙམ་ནས་ལམ་དུ་མི་འགྲོ་ཞིང་བར་ཆད་མང་བ་དང་། རེ་ཟུང་ནི་བསམ་ཚད་ལམ་དུ་འགྲོ་བ་སོགས་སྣ་ཚོགས་པ་ནི་སྔོན་གྱི་བསགས་པ་ཆེ་ཆུང་གིས་ཡིན་ནོ། །དེས་ན་དལ་རྟེན་འདི་འདྲ་ཐོབ་པ་རྒྱུ་གྲོགས་མཚམས་སྦྱོར་མང་པོ་ཞིག་ལ་ལྟོས་དགོས་ཀྱང་དེ་དག་ནི་རང་གིས་སྔར་སྒྲུབ་པ་མེད། རྙེད་དཀའ་བའི་རྟགས་མངོན་སུམ་པ་མི་དང་དུད་འགྲོའི་གྲངས་ལ་བལྟས་ན་གོ་བས་རྒྱུ་མཚན་གཞན་མི་དགོས། གསུམ་པ་ནི། གནས་སྐབས་ཀྱི་འདོད་བྱ་མངོན་མཐོའི་རྟེན་དང་མཐར་ཐུག་གི་ཐོབ་བྱ་འཁོར་བ་ལས་གཏན་དུ་ཐར་པའི་གོ་འཕང་ངམ། བྱང་ཆུབ་ཆེན་པོ་དེ་ཡང་ཚེ་ལུས་འདི་ལ་ཐོབ་
འདོད་ཡོད་ཀྱང་རང་གིས་གོ་ཆོད་ན་རྟེན་གྱི་སྒོ་ནས་སྒྲུབ་རུང་བས་དེ་གསར་དུ་འཚོལ་མི་དགོས་པར་རང་གིས་ཁུར་ནས་ཡོད། ད་སྔོན་དལ་འབྱོར་གྱི་སྙིང་པོ་ཅི་ལོན་བལྟས་ན་ཅི་ཞིག་འདུག །ཞུས་ཚད་ཐོབ་ཚད་ཀྱི་གྲངས་དང་གོ་རིམ་ལ་བསམ་ན་ལམ་མཐར་ཕྱིན་ཚོད་དུ་འདུག་ནའང་དེ་ཕར་ཞོག །ལོ་ཟླ་ཞག་ཡུན་ཕར་ཞོག་མ་མཐའ་ཐུན་གཅིག་ལ་གནད་དུ་སོང་བའི་ཆོས་ཤིག་སྒྲུབ་ཨེ་ཡོད་ལྟོས་དང་། འདོན་ལོ་སྒོམ་ལོ་མང་པོ་ནི་རང་གཞན་ཀུན་ལ་ཡོད་མོད་གནད་དུ་ཕོག་པ་ནི་སྣེ་གཅིག་མི་འདུག །སྙིང༵་པོ༵་ཅི༵་ལོ༵ན་དགོ༵ས་པ༵་རབ་ཚེ་འདིར་སངས་རྒྱས་པ་དང་། འབྲིང་ཐར་ལམ་ཟིན་པ། ཐ་ནའང་ངན་འགྲོར་མི་ལྟུང་བ་ཞིག་མ་བྱུང་ན་དུད་འགྲོ་མགོ་ལ་རྭ་ཅོ་འབྱར་བ་དང་ཅི་ཁྱད། ཁྱད་པར་རང་ཅག་བླ་སེར་རྣམས་ཅུང་དྲག་དགོས་ཁུལ་འདུག་མོད་ཆོས་སྒྲུབ་ཚད་ཚེ་འདིའི་ལག་ཆ་ཁོ་ནར་སོང་ལ། འཁོར་བའི་བྱ་བ་ནི་ནམ་བཞག་ན་ཟིན་པ་མ་གཏོགས་མཐར་ཕྱིན་དུས་མི་འོང་ངེས་པས་ད་ཕྱིན་ཆད་ཚེ་ལྷག་ཅུང་ཟད་ཡོད་རིང་ལ་ཚེ་འདིའི་ཞེན་པ་མ་ཆོད་ན་ཆོས་རྣམ་དག་སྣ་གཅིག་འགྲུབ་ཐབས་མེད་ཐག་ཆོད་ཡིན། སྟོན་པ་ཐུགས་རྗེ་ཅན་དང་། རྗེ་བཙུན་མི་ལ། གྲུབ་ཆེན་མཁའ་མཉམ་གླིང་པ་སོགས་དམ་པ་རྣམས་རང་ཅག་ལས་བློ་ཐབས་ལྷག་ཙམ་ཡོད་ཚོད་རེད་ཀྱང་ཚེ་འདི་ཕྱི་མཉམ་དུ་སྒྲུབ་ཐབས་མ་བྱུང་ནས་སྤངས་དགོས་པ་ཡིན་པས་འཇིག་རྟེན་སྒྲུབ་ན་ཆོས་དང་བསྲེ་དོན་མེད། ཆོས་སྒྲུབ་བསམ་ན་རང་མགོ་རང་གིས་མ་གཡོགས་སྣ་རེ་ནས་ཚུལ་བཞིན་ཨེ་འགྲུབ་ལྟོས། དེ་ལྟར་བསམ་ནས་བློ་ལྡོག་པའི་ཚད་ནི། དོན་མེད་ཀྱི་བྱ་བས་ཅུང་ཟད་ཡེངས་ཀྱང་ཕང་སྣང་སྐྱེ་བ་ནི་ལམ་དུ་སོང་བའི་ཚད་ཡིན། སྔར་བཤད་ལྟར་ཐུན་ལམ་དུ་མ་སོང་ན་གཉིད་དམ་བསམ་མཐའ་དེད་པ་གང་ལས་མི་འོང་བས་གྲོལ། ཐུན་མཚམས་རྒྱ་ཡན་དུ་མི་བཏང་བར་ཐུན་སྐབས་ཀྱི་སྒོམ་དོན་དྲན་པ་དང་། དེའི་རྩི་དང་མ་བྲལ་བ་ཞིག་དགོས། ད་ལྟ་རང་རེའི་ཆོས་སྒྲུབ་ལུགས་འདི་གྲུབ་ཐོབ་ཞིག་གིས་སྣང་བ་ཅི་ཤར་འགོག་མེད་དུ་གཏོང་བ་ལྟ་བུ་མགོ་དྲན་དུས་མགོ །མཇུག་དྲན་དུས་མཇུག །སྒོམ་དྲན་དུས་སྒོམ། སྦྱང་དྲན་དུས་སྦྱང་པ་སོགས་གང་ཤར་གདོང་དེད་བྱེད་པ་ཤ་སྟག་ཡིན་པས། ཕན་ཆད་བློ་ནུས་དང་བསྟུན་པའི་
དམ་བཅའ་དང་། ནངས་པར་ཡར་ལངས་དུས་དེ་རིང་གི་ཉི་མ་འདི་ལ་དོན་མེད་ཀྱི་བྱ་བ་འདི་སྣང་གི་བློ་བསྐྱེད་པ་རྣམས་བསྐྱུར་ནས་དལ་འབྱོར་སྙིང་པོ་ཅི་ལོན་མི་བྱེད་རེ། ཁྱད་པར་ཐུན་སྔ་ཕྱི་རྣམས་སུ་འདི་དང་འདི་ལྟར་བགྱིའོ་སྙམ་པའི་འཕེན་པ་ཤུགས་དྲག་བཏང་། ཐུན་མཐར་དང་ནུབ་མོ་ཉལ་ཁར་དམ་བཅས་པ་ལྟར་གནད་ཐོག་ཨེ་སོང་ལྟོས་དང་། སྟབས་ཉེས་ན་ཕྱི་མའི་དོན་སྣ་གཅིག་ཀྱང་མ་འགྲུབ་ནས་ཉི་མ་ཟད། བཟང་ཡང་ཧྲ་ལེ་ཧྲི་ལེ་ལྟ་བུར་འགྲོ་ངེས་པས་ཕན་ཆད་དེ་འདྲ་མི་བྱེད་སྙམ་པའི་དམ་བཅའ་དང་། ལམ་དུ་སོང་ན་དགའ་བ་སྒོམ་པ་དེ་ལས་ལྷག་ཙམ་ཨི་འོང་བལྟ་སྙམ་དུ་བློ་བསྐྱེད། དུས་རྒྱུན་དུ་རང་སེམས་ལ་རང་གིས་བྱ་ར་མ་ཐུབ་ན་ཉམས་སུ་བླང་མཁན་སེམས་ཡིན་པས་ཅི་ཞིག་ཉམས་སུ་ལེན། འཁོར་བ་ལས་ཐར་དགོས་པ་ལ་གཞན་ལ་རེ་ཆེ་བས་མི་འོང་བའི་རྒྱུ་མཚན། ང་ལ་འདིར་དང་པོར་ཁྲིད་མཁན་གཞན་སུ་ཡང་མིན། རང་གི་ལས་ཀྱིས་དེད་པ་ཡིན། ལས་ཀྱི་རྩ་བའང་ང་ང་ཞེས་བདག་འཛིན་དེ་ལ་ཐུག །དེ་རྩད་ནས་གཅོད་པ་ལ་ཆོས་ཉམས་སུ་ལེན་པ་ལས་ཐབས་གཞན་མེད་པས་ཆོས་ཟབ་མོ་དང་འཕྲད་དགོས། དེའི་གནད་སྟོན་པ་ལ་བླ་མ་དགེ་བའི་བཤེས་གཉེན་ལ་རགས་ལས། བླ་མས་གདམས་ངག་བསྟན་ཞེས་པའང་ཁོང་གི་ཐུགས་སུ་ཆུད་པའི་ཆོས་དེ་སྣོད་ནས་སྣོད་དུ་བྱོ་བ་ལྟར་གབ་སྦས་མེད་པར་བསྟན་པ་ལས་ཐབས་གཞན་ཅི་ཡང་མེད། ཆོ༵ས་བྱེ༵ད་དབ༵ང་ཡོ༵ད་མེ༵ད་ཟེར་བའང་ཁྱིམ་གྱི་སོ་ཚིས་ལྟ་བུ་ཁོམ་མིན་ཅུང་ཟད་ལ་མི་ཟེར། ངན་སོང་གསུམ་སོགས་སུ་སྐྱེས་ཏེ་སྡུག་བསྔལ་གྱིས་རྟག་པར་མནར་བ་ཆོས་བྱ་ཐབས་བྲལ་བ་ལ་ཟེར་བས་ད་ལྟ་འཛོམ་དཀའ་བ་ཐམས་ཅད་དུས་གཅིག་ལ་འཛོམ་པའི་དུས་དབུལ་པོས་གཏེར་རྙེད་པ་ལྟར་དགའ་སྤྲོ་དང་བཅས་པས་འཕྲལ་ཡུན་གྱི་དབུལ་བ་སེལ་དགོས། ད་རེས་སྙིང་པོ་མ་ལོན་ན་སླན་ཆད་དལ་འབྱོར་ཐོབ་པ་ལ་རྒྱུ་མི་དགེ་བཅུ་སྤོང་གི་ཚུལ་ཁྲིམས་དག་པ། རྐྱེན་སྦྱིན་སོགས་དགེ་བ་རྒྱ་ཆེན་སོགས་དགོས་པ་ཡིན་ན། རང་ལ་བལྟས་ན་ཕྱི་མ་མི་ལུས་ཐོབ་པའི་རྒྱུར་འགྲོ་བའི་ཟན་གོང་གཅིག་གི་སྦྱིན་པ་རྣམ་དག་ཡོད་མེད་བསམ་ན་དཀའ། དེས་ན་ཕྱི་མ་ཕན་པའི་ཆོས་གཤའ་མ་ཞིག་སྒྲུབ་དགོས། གཤའ་
མ་ཞེས་རྣལ་མའམ་ངོ་མ་ཟེར་བ་སྟེ། གང་ནས་བརྟགས་ཀྱང་གཟུགས་བརྙན་དུ་མ་སོང་བའི་ཆོས་རྣམ་དག་ལ་གོ་དགོས་པ་གནད་ཆེ། རྟེན་གཞན་ལ་དལ་འབྱོར་ཚང་མིན་བརྟགས། དེས་རང་རྒྱུད་འགལ་རྐྱེན་མཐུན་རྐྱེན་གང་འདུག་དཔག་དགོས། དེ་ཡང་འཇིག་རྟེན་པས་ཐེ་ཚོམ་གྱི་གནས་སུ་གྱུར་པའི་སྟོན་ཐོག་ལའང་སོ་ནམས་འབད་པས་བརྩོན་ན། འབྲས་བུ་མི་བསླུ་བའི་ཆོས་རྣམ་དག་ལ་འབད་རྩོལ་ལོས་བྱེད་སྙམས་དུ་སྒྲུབ་དགོས། དེ་ལྟར་ཕྱི་ནང་གི་འདུས་བྱས་གང་མཐོང་ཡང་སྐབས་སུ་བབས་པའི་དམིགས་ཁྲིད་གྲོགས་སུ་འགྲོ་བ། མི་དང་དུད་འགྲོའི་མང་ཉུང་མཐོང་བས་དལ་འབྱོར་རྙེད་དཀའ་བ། དུས་ཀྱི་འགྱུ་བ་དང་གཞན་ཤི་བས་རང་ཉིད་ཀྱང་མི་རྟག་པར་ཤེས་པ་ལྟ་བུ་བྱུང་ན་སྣང་བ་བླ་མར་ཤར་ཟེར་མ་གཏོགས། བླ་མ་ཞེས་སྐུ་གཟུགས་ཁོ་ན་ལ་གོ་རྒྱུ་མིན། དམིགས་སྐོར་གཉིས་པ། སྔོན་མ་གཞིར་བཞག་གི་སྟེང་ཁ་སྣོན་བྱ་བ་ལས་སྐྱུར་ཆོག་པ་མ་ཡིན་པས་སྒོ་གསུམ་རྣལ་དབབ། གུ་རུར་གསོལ་བ་བཏབ་པ་སོགས་སྔར་ལྟར་ལས། དལ་འབྱོར་རྙེད་དཀའ་བས་སྙིང་པོ་ལོན་དགོས་ཀྱང་ལོ་ཤས་ཚེ་འདིའི་འཚོ་ཆས་བསྒྲུབས་ནས་གཟོད་ཆོས་སྒྲུབ་ན་ཆོག་སྙམ་ན་འཆི་བ་མི་རྟག་པའི་ཁྲིད་དམིགས་བསྒོམ། དེ་ཡང་ལུས་སེམས་ཡ་མི་བྲལ་བར་བྱེད་པའི་ཆོས་ལ་སྲོག༵་ཟེར། དེ་ཟད་ནས་ལུས་སེམས་ཡ་བྲལ་དུ་འགྲོ་བ་ལ་འཆི༵་བ༵། དེའང་ནམ་འཆི་ནི་ངེས་པ་བརྟན་པོ་མེད་པས་མི༵་རྟག༵་པ༵། དེས་གང་ལས་བློ་ལྡོག་ན་རྟག༵་འཛི༵ན་ལས༵། གང་གིས་ན་ཚེ་མི༵་རྟག༵་པ༵ར་བསྒོམ་པས། བསྒོམ་ཚུལ་ཇི་ལྟར་ན། ༼ངེས་པར་འཆི་བ་ལ་གསུམ། འཆི་བདག་ངེས་པར་འོང་ལ་དེ་ཡང་རྐྱེན་གྱིས་བཟློག་ཏུ་མེད་པ་དང་། ཚེ་ལ་སྣོན་པ་མེད་ཅིང་འབྲིད་བྱེད་བར་མ་ཆད་དུ་ཡོད་པ་དང་། གསོན་པའི་ཚེ་ཆོས་བྱ་ལོང་མེད་པར་ངེས་པར་འཆི་བ་སོམས། གཉིས་པ་ནམ་འཆི་ཆ་མེད་ལ་གསུམ། འཛམ་བུ་གླིང་བའི་ཚེ་ལ་ངེས་པ་མེད་པ་དང་། འཆི་རྐྱེན་མང་ཞིང་གསོན་རྐྱེན་ཉུང་བ་དང་། ལུས་ཤིན་ཏུ་ཉམ་ཆུང་བས་ནམ་འཆི་ལ་ངེས་པ་མེད། གསུམ་པ་འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན་པ་ནི། ལུས་ལོངས་སྤྱོད་གཉེན་བཤེས་རྣམས་ཀྱིས་མི་ཕན། ༽རྩ་བ་གསུམ། རྒྱུ་མཚན་དགུ། ཐག་བཅད་པ་གསུམ་དུ་འདུ་བ་གསར་རྙིང་ཐམས་ཅད་འདྲ། མེ་ཚྭ་བའི་རང་བཞིན་དུ་དང་པོ་ནས་གྲུབ་
པ་ལྟར། སྐྱེས་པའི་ནང་མོ་ནས་འཆི་བའི་ངོ་བོར་མ་གྲུབ་པའི་འགྲོ་བ་མེད། སྤྱིར་འཆི་བ་ཞིག་ཡོད་པ་དང་མཐར་འཆི་བ་ཡོད་པ་ནི་དུད་འགྲོས་ཀྱང་ཤེས། བྱ་དང་རི་དྭགས་མི་ལ་བྲོས་པའང་འཆི་བའི་དོགས་པས་ཡིན། འཆི་རྐྱེན་དང་གསོན་རྐྱེན་མང་ཉུང་ལ་བརྟག་ན་གསོན་རྐྱེན་ལྟར་སྣང་བའང་འཆི་བའི་རྐྱེན་དུ་འགྲོ་བ་མང་ཞིང་། འཆི་རྐྱེན་གསོན་པའི་རྐྱེན་དུ་འགྲོ་བ་ནི་གཅིག་ཀྱང་མི་སྲིད། དེ་ལྟར་འཆི་ངེས་ཤིང་ནམ་འཆི་ངེས་པ་མེད་ན། ད་ལྟར་ཡུལ་གཞན་ཞིག་དུ་འགྲོ་དགོས་ངེས་ན་སྔོན་ནས་ཟས་གོས། ཞྭ་ལྷམ་གྲོགས་ལག་ཆ་རྣམས་ཆས་མ་བསྒྲིགས་ན་འགྲོ་ཐབས་མེད་ལ། དེ་བས་ཀྱང་ཤིན་ཏུ་ཐག་རིང་ཞིང་ཕྱིར་མི་སླེབ་པའི་འཇིག་རྟེན་ཕ་རོལ་ཏུ་འགྲོ་བ་ནི་སྔ་ཕྱི་མ་གཏོགས་འགྲོ་ངེས་པ་ཡིན་ན། ཆས་ལྟ་ལོས་བསྒྲིགས། ཆས་དེའང་ཟས་གོས་གྲོགས་མ་ཟད་རང་གི་ལུས་ཀྱང་འདོར་དགོས་པས་དེ་འདྲས་ནི་མི་ཕན། ཆས་ངོ་མ་དགེ་སྡིག་གི་སྤངས་བླང་ཡིན་པས་གནོད་བྱེད་ཀྱི་ཆས་ད་སྤངས་ནས་ཕན་བྱེད་ཀྱི་ཆས་ད་བསྒྲིགས་བསམ་ན་ཆོས་ལས་གཞན་མེད། རྒྱུ་མཚན། ཚེ་འདིར་ཕན་སྣང་ཤར་ནས་ལུས་ལོངས་སྤྱོད་ཉེ་དུར་རེ་ནའང་འཆི་ཁར་མི་ཕན་པ་དངོས་སུ་མཐོང་བ་ལྟར་ཡིན། དེས་ན། ཕན་ངེས་པའི་ཆོས་ཤིག་རང་ལ་ཨེ་འདུག་ཞིབ་ཏུ་ལྟོས། དེ་ཡང་དེ་རིང་འཆི་ནད་དྲག་པོས་ཐེབས། སྨན་གཏོ་གང་གིས་མི་ཕན་ནས་འཆི་ངེས་སུ་ཐག་ཆོད། ཉེ་དུ་རྣམས་ཀྱིས་ལྐོག་ནས་ཤི་ཆས་ཀྱི་གྲབ་བསྒྲིགས། བཟའ་བཏུང་ལ་སྤྱོད་མི་ནུས་མགོ་ཡང་མི་ཁྱོགས། སྐད་ཆའང་མི་ཐོན་པ་ཞིག་ད་ལྟ་ཤར་བའི་ཆག་བཞག་ནས། དེ་དུས་རང་སེམས་ལ་འཆི་བ་ལ་མི་སྐྲག་པའི་གདེངས་ཅི་འདུག་བལྟས་ན། ཚེ་གང་བླ་མ་ལ་གསོལ་འདེབས་བྱས་པས་མི་བསླུ་སྙམ་པའི་ཕོ་ཚོད། ཐེག་ཆེན་བློ་སྦྱོང་ལ་གོམས་པས་སྐྱེད་ཚལ་ནས་སྐྱེད་ཚལ་དུ་རྒྱུ་བ་ལྟ་བུའི་འ༵དུ་ཤེས༵། བསྐྱེད་རིམ་གྱི་སྣང་ཆ་རྫོགས་རིམ་འོད་གསལ་དུ་བསྡུ་བའི་ནུས༵་པ༵། རྫོགས་ཆེན་ཀ་དག་གི་ཉམས་ལེན་ལ་གོམས་ཡོད་མེད་ལྟོས་དང་། རིམ་པ་ལྟར། འདི་ཕྱིའི་བློ་གཏད་བཅོལ་བའི་སྔར་འདྲེས་ཞིག་ནི་མེད། འཕྲལ་དུ་དོ་གལ་ལ་ཐུག་པའི་སྐྱབས་འགྲོས་ནི་དེ་མ་ཐག་ཕན་དཀའ་སྟེ། ལྷས་སྦྱིན་སྟོན་པ་ཐུགས་རྗེ་ཅན་གྱི་སྤྱན་སྔར་ལུས་མ་བོར་བར་མནར་མེད་དུ་
སྐྱེས་ནས། འཕྲལ་དུ་སྙིང་ཁུང་རུས་པའི་གཏིང་ནས་སངས་རྒྱས་ལ་སྐྱབས་སུ་སོང་ཡང་ཐོག་བབས་མི་བྱེད་ཀ་མེད་དེས་ཅི་ཡང་མ་ཕན་པ་ལྟ་བུ་དང་། ད་ལྟར་འཆི་ངེས་པ་དེ་ལྡོག་ཐབས་ཅིག་ཡོད་ན་ཁ་ཕོར་པ་ནས་སྦྱིན་ཐུབ་བསམ་པ་ནི་བློ་སྦྱོང་མེད་རྟགས། ཚེ་འདིར་ཆོས་སྣ་གཅིག་མགོ་མ་ནོན་ན་འཆི་ཁར་སྐྱེ་འཆིའི་རེ་དོགས་དང་། གཉིས་འཛིན་གྱི་འཆིང་བ་རྣམས་ལན་གཅིག་དྲན་པ་ཙམ་གྱིས་སང་མི་ཐུབ། མི་བརྟན་པའི་སྤྲིན་བར་སྣང་ལ་གནས་པའང་རླུང་ཤུགས་དྲག་པོས་མ་གཏོགས་གཏོར་མི་ནུས་ན། ཐོག་མེད་ནས་གོམས་པའི་གཉིས་འཛིན་སོགས་ཀ་དག་ལ་གོམས་འདྲིས་མེད་ཀྱང་བློ་ཁ་ཕྱོགས་ཙམ་གྱིས་སང་དུ་རེ་བ་ནི་རང་མགོ་རང་གིས་གཡོག་པ་རེད། ཡིན་ལུགས་ལ་ཐམས་ཅད་འཆི༵་བ༵འི་ཆོས༵་ཅན༵། དེ་ཡང་ན༵མ་འཆི༵་ངེ༵ས་མེ༵ད། འཆི༵་རྐྱེན༵་མ༵ང་ཞིང༵་གསོ༵ན་རྐྱེན༵་ཉུང༵་བ་ཡིན་པ་གོ་ནའང་། ད་དུང་ང་འཆིའམ་མི་འཆི། མི་འཆི་ཤས་ཆེ་སྙམ་དུ་འཛིན་པ་ནི་བློས་མི་འཆི་བའི་ཕྱོགས་སུ་ཆག་བཞག་ཆེས་སོང་བས་ལན། ཤི་ཁར་བླ་མ་སོགས་ལ་ང་ཅི་མཛད་ཁྱེད་ཀྱིས་ཤེས་སོགས་ཁྱིམ་པ་ཕོ་མོས་ཟེར་རྒྱུ་དེ། བླ་སེར་དང་ཁྱད་པར་ཆོས་པ་རྣམས་ཀྱིས་ཟེར་དགོས་ན་ཅི་འདྲ་སོམས་དང་དེ་ཐམས་ཅད་མི་རྟག་པ་མ་དྲན་པས་ཡིན། རྗེ་བཙུན་མི་ལ་ལ་ལོ་ཟླ་མང་པོའི་བར་དུ་མཉམ་བཞག་ཐུན་གཅིག་གིས་འདའ་ནུས་པའི་རྟོགས་པ་རྙེད་པའི་དུས་སུ་ཡང་། ལྷོ་བྲག་མར་པས་མི་རྟག་དྲན་པར་བསྐུལ་བྱེད་ཕ་ཡུལ་དུ་བལྟར་མངགས་པས་སྒྲུབ་པ་སྔར་ལས་བོགས་སྐྱེད་ཆེར་སོང་བ་སོགས་ལ་སོམས། དེང་སང་མི་རྟག་འདི་བླ་མས་བཤད་དུས་ཀྱང་ཡན་ལག་ཞིག་ཡིན་པ་དང་། སློབ་མས་བསྒོམ་དུས་ཀྱང་དེ་ལྟར་བཟུང་ནས་ད་དུང་མཐོན་པོ་མ་ཞིག་ཡོད་མདོག་མདོག་བྱེད་པ་རང་གཞན་སུས་ཀྱང་ཡིན་མོད། རྟོགས་པ་འདི་བཟང་ན་ཆོས་པ་བཟང་། འདི་ངན་ན་ཆོས་པ་ངན། ལམ་གཞན་གྱི་རྟོགས་པ་སྐྱེ་མི་སྐྱེ་འདི་ཁོ་ན་ལ་རགས་ལས་པས་གནད་ཆེ། དེ་ལྟར་ཡང་ཡང་དཔྱད་ནས་ངེས་ཤེས་བཟང་པོ་རེ་སྐྱེས་ཚེ་ཡལ་དུ་མི་འཇུག་པར་རྒྱུན་བསྐྱངས་སླར་ཡང་བསྔོ་སྨོན་གྱིས་ཁ་བསྒྱུར། ཐུན་མཚམས་ལའང་བསམ་པ་རྒྱ་ཡན་དུ་མི་བཏང་བར་མི་རྟག་པ་ཁོ་ནར་བསམ་པ་བས༵མ་ལུག༵ས། དུས་ཀྱི་འགྱུར་བ། ཉི་ཟླའི་
འཆར་ནུབ། རྒས་གཞོན་བར་མ། གནས་གཅིག་ཏུ་མི་སྐྱེ་ཤི་ཅི་ཙམ་བྱེད་སོགས་ལ་དཔག་ནས་དེའི་རེས་མོ་རང་ལ་འཁོར་ངེས་པ་ལ་ངེས་ཤེས་བསྐྱེད། དེ་ཡང་སྟབས་ལེགས་ན་ལོ་ཤས། ཉེས་ན་དོ་ནུབ་ནང་སྔ་མི་འཆི་བའི་ངེས་པ་མེད་པར་བསམ། ཐུན་མགོར་མི་རྟག་པ་བློ་སྣ་འགྱུར་ངེས་རེ་མ་དྲན་ན། ཐུན་དེ་ཕྱི་མའི་ཆོས་སུ་མི་འགྲོ། ནང་པར་ལངས་དུས་ཀྱང་ནི་བསྒོམ་རྒྱུ་མི་བརྗེད་བསམ། དོ་ནུབ་ཨེ་བརྗེད་བལྟ་བ་སོགས་ཐོག་མཐའ་ཀུན་ཏུ་དྲན་དགོས། སྤྱིར་ཁྲིད་ཁྲིད་ཅེས་པ་སེམས་ཁྲིད་དགོས་ཀྱི་ལུས་ཁྲིད་པས་མི་ཕན། ངག་ཁྲིད་པས་མི་ཕན་པས་སེམས་བཅོས་པ་གནད་ཆེ་ལ། ཆོས་གང་སྒྲུབ་དང་ཐུན་ནམ་བཅད་ལ་ད་རེས་འདི་ལ་བརྟེན་ནས་ཤི་སོང་ཡང་ནི་གོ་ཆོད་པ་ཞིག་བྱེད་མ་གཏོགས་ཕྱིར་མི་ལྡོག་སྙམས་པའི་དམ་བཅའ་དགོས། ཆོས་སྒྲུབ་བསམ་པ་མང་ཡང་མཐར་ཕྱིན་པ་ཉུང་བ་ནི་བརྩོན་འགྲུས་དམན་ཞིང་ཕྱིར་ལྡོག་འདིས་ཡིན་པས་རང་རྐྱེན་གཞན་རྐྱེན་གང་གིས་ཀྱང་མི་ལྡོག་པ་ཞིག་དགོས། ཆོས་ཞུ་བ་དེ་ཁྲིམས་ཀྱིས་བཞག་པ་ལྟ་བུ་མ་ཡིན་པས་བློ་སྣ་གཞན་ལ་མི་གཏོད་པར་རང་གི་སྣ་ཐག་རང་གི་མགོ་ལ་བཏགས་ནས་མི་དང་མི་བསྟུན། ཡང་དཔེར་ན་ལོ་ཤས་ཚུན་དགྲ་ཆེན་པོ་ཞིག་འོང་ངེས་ན། ཐབས་དཔུང་ཤེད་སོགས་འདི་ལྟར་བྱེད་སྙམ་དུ་གློ་བུར་དུ་དགྲ་ཕོག་ཀྱང་འཐབ་མ་རག་དགོས་པ་ལྟར། འཆི་བ་ལའང་དེ་དང་འདྲ་བས། ང་དོ་ནུབ་ཤི་སོང་ན་ཤི་ལུགས་འདི་འདྲ་བྱེད་རྒྱུ་ཡིན་བསམ་པའི་བློ་གཏད་ཞིག་ཡོད་དགོས། དེ་ཡང་མཐོ་སྙེགས་ཁོ་ནས་མི་འོང་བས་རྒྱུད་ཚོད་ལ་དཔག་པའི་གསོལ་འདེབས། བློ་སྦྱང་། བསྐྱེད་རྫོགས་ལྟ་བུའི་ཉམས་ལེན་གང་ཡིན་ཀྱང་མཚན་རྨི་ལམ་དུའང་མི་བརྗེད་ཚོད་ཀྱི་གོམ་པ་ཞིག་མེད་ན། འཆི་སེམས་ཤིན་ཏུ་མི་གསལ་ཞིང་ཤི་ནད་དྲག་པོས་གདུང་བའི་སྐབས། ཕན་བྱེད་གདམས་པ་གནད་ཐོག་འགྲོ་བ་ཞིག་གསར་དུ་དྲན་མི་ཐུབ་ངོ་མ་ཡིན། འཆི་ཁའི་གནད་གཅོད་བཟོད་ཨི་ཐུབ། ད་ལྟ་ཉི་མ་གཅིག་ལ་ཀླད་པ་གཟེར་བ་ན་དེས་དགེ་སྦྱོར་ལ་བཟང་ངན་བཏང་ཨི་ཐུབ་ལྟོས་དང་ཤེས། ཚེ་འདིའི་བྱ་བ་ལ་ནི་རང་ནུས་མེད་ཀྱང་གྲོགས་གཞན་སྦྲན་ཆོག་འཆི་བ་འདི་ལ་གྲོགས་སུ་ཡང་མེད་པ་རང་ཁེར་རྒྱུག་དགོས་པས། ཕོ་ཨི་རྒོད་མི་
རྒོད་མགོ་ཨི་བདེ་མི་བདེ་བལྟ་ན་འདི་ལ་བལྟ་དགོས། སྒེག་མོའི་མགོ་ལ་མེ་ཤོར་ན་ལས་ཀ་གང་ཡིན་ཐགས་སེ་བཞག་ནས་མེ་བསད་པའི་དཔེ་ནི་འཁོར་བའི་བྱ་བ་ཟིན་དུས་མེད་པས་བྱེད་འཕྲོ་བཞག་དགོས་པའི་དོན་ཡིན། མགྲོན་པོའི་མགྲོན་ཁང་དུ་སང་གནང་གི་སྡོད་ཚིས་མི་བྱེད་པའམ། ནད་པ་འཆི་ཁ་སང་གི་སྡོད་ཚིས་མི་བྱེད་པ་ལྟ་བུའི་བློ་ཤར་ན་མི༵་རྟག༵་རྒྱུད༵་ལ༵་སྐྱེས༵་པ༵འི་ཚ༵ད་ཡིན། ཆོས་ཐོབ་མི་ཐོབ་ཟེར་བ་དེ་སེམས་ལ་ཕན་ཐོགས་མི་ཐོགས་ལ་ཟེར་དགོས་པས་མདོ་རྒྱུད་མང་པོ་ཉམས་ལེན་དུ་དྲིལ་ཤེས་ན་ཅི་བཤད། མིན་ཀྱང་མདོ་སྔགས་གཉིས་ཀའི་ལམ་ཡོངས་སུ་རྫོགས་པ་སྔོན་འགྲོ་དངོས་གཞིའི་ནང་དུ་འདུ་བ་ཉམས་ལེན་གྱི་གནད་ཟིན་ན་མང་བཤད་མི་དགོས། འདི་དག་ངག་འདོན་འདོན་པའི་ཚེ་ངག་ཙམ་མ་ཡིན་པ་ངག་གི་རྗེས་སེམས་ཡང་འགྲོ་བའི་འདོན་བསྒོམ་ཟུང་འབྲེལ་མ་བྱུང་ན་དོན་མེད། ༼མཆན། བསྡུ་བ་དང་སའི་དངོས་གཞི་དང་བཤེས་སྤྲིང་རྣམས་སུ་ལྕི་ཡང་གི་ཁྱད་པར་སྡོམ་དྲུག་ལ། དུས་རྟག་ཏུ་བྱས་པའི་ལྕི་བ་དང་། མངོན་པར་འདུ་བྱེད་པས་ལྕི་བ་དང་། སྦྱོར་བས་ལྕི་བ་དང་། གཉེན་པོ་མེད་པས་ལྕི་བ་དང་། གཞི་ལས་ལྕི་བ་དང་། ངོ་བོ་ཉིད་ཀྱིས་ལྕི་བའོ། །སྟོབས་ལྡན་ལ་བཞི་ལས། ཞིང་གི་སྒོ་ནས་སྟོབས་ཆེ་བ་དང་། རྟེན་གྱི་སྒོ་སྣ་ཚོགས་པས་སྟོབས་ཆེ་བ་དང་། དངོས་པོའི་སྒོ་ནས་སྟོབས་ཆེ་བ་དང་། བསམ་པའི་སྒོ་ནས་སྟོབས་ཆེ་བའོ། །༽ དམིགས་སྐོར་གསུམ་པ། ལས་འབྲས་དང་འཁོར་བའི་ཉེས་དམིགས་གཉིས་རྒྱུ་འབྲས་ཡིན་པས་གཅིག་ཏུ་བསྡུས། དང་པོ་ལས༵་འབྲས༵་ལ༵། གང༵་ལས༵་ན༵། སྤང་བླང་ཕྱིན་ཅི་ལོག་ཏུ་སྤྱོད་པ་ལས་བློ་ལྡོག །གང༵་གིས༵་ན༵། ལས་འབྲས་བསམ་པས། ཚུལ༵་ཇི༵་ལྟ༵ར་ན༵། ལས་དང་འབྲས་བུ་སྤང་བླང་བྱ་ཚུལ་གསུམ་ཤེས་པའི་སྒོ་ནས། དེ་ཡང་འཆི་བའི་ཚེ་ཆོས་མ་གཏོགས་ཅིས་ཀྱང་མི་ཕན་པའི་གནད། འཆི་ཚེ་ལུས་སེམས་མཉམ་དུ་མི་ཞིག་པར་ཡང་སྲིད་ཕྱི་མའི་ལུས་ཤིག་ལེན་དགོས། དེ་ཡང་རང་གིས་འདོད་པ་ལྟར་གྱི་སྐྱེ་བ་ལེན་པའམ། གཞན་དབང་ཆེན་པོ་ཞིག་གིས་བདེ་བའི་སར་བཞག་ཐབས་ནི་མེད། སྔར་བྱས་ཀྱི་ལས་ཁོ་ནའི་རྗེས་སུ་འགྲོ་དགོས་པས། སྤྱིར་ལས་ལ་གསུམ་ཡོད་ཀྱང་ཕན་གནོད་གཏོང་བྱེད་ཀྱི་ལས་ཁྱད་པར་བ་ངོས་བཟུང་ན་དཀར་ནག་གཉིས་སུ་གྲངས་ངེས། རྣམ་སྨིན་ཡིད་དུ་འོང་བ་འབྱིན་བྱེད་ཀྱི་
གཙོ་བོ་སེམས་པ་དང་དེའི་ཀུན་ནས་སློང་བའི་ལུས་ངག་དང་བཅས་པ་ལ་དཀ༵ར་པོ༵་ད༵གེ་བ༵འི་ལས༵། ལྡོག་ཕྱོགས་དེ་མི༵་དགེ༵་བ༵འི་ལ༵ས། སྟོང་ཉིད་རྟོགས་པ་ལས་འབྲས་ཕྲ་མོ་ངེས་དཀའ་བས་སྟོང་ཉིད་བྱང་སེམས་ཀྱིས་རྟོགས་ཤིང་། ལས་འབྲས་ཕྲ་ཞིབ་ཐམས་ཅད་མཁྱེན་པ་ཁོ་ནའི་སྤྱོད་ཡུལ་ལས་གཞན་པས་ཤེས་དཀའ་བ་ཡིན། དེ་གཉིས་ཀྱི་འབྲས་བུ་ནི་བདེ་སྡུག་གཉིས་ཡིན། དང་པོ་མི༵་ད༵གེ་བ༵འི་ལས༵་ངོས་ཟིན་ན། ལྡོག་ཕྱོགས་ཞོར་ལ་ཤེས། དབྱེ་ཚུལ་མང་ཡང་སྒོའི་སྒོ་ནས་དབྱེ་ན་ལུས་ངག་ཡིད་ཀྱི་ལས་གསུམ་ཡོད། དེ་ཡང་སྡོམ་པ་རྒྱུད་ལྡན་ཡིན་མིན་སོགས་ཀྱི་ཞིབ་ཆ་མང་ཡང་སྤྱིར་བཏང་ཙམ་སྲོག་དང་ལྡན་པའི་སེམས་ཅན་ཞིག་རང་གི་རྐྱེན་གྱིས་སྲོག་གི་དབང་པོ་འགག་པར་བྱས་པ། ཕ་རོལ་པོས་རང་ལ་མ་བྱིན་ཅིང་རང་དང་ཐུན་མོང་མ་ཡིན་པའི་ནོར་རྫས། ཐབས་ཤེས་གང་རུང་གིས་བདག་བྱེད་པ། ལྕོག་པ་ཆགས་པའི་ཡུལ་ལ་གཡེམ་ཞེས་སྤྱད་པ་སྟེ་ལུས་ཀྱི་ལས་གསུམ། འདི་ལ་ངག་སེམས་གཉིས་ལའང་འབྱུང་མོད་གཙོ་བོ་ལུས་ཀྱི་ལས་སུ་འབྱུང་ཉེ་བས་ཡིན། མི་བདེན་པའི་ཚིག་བརྗོད་པའི་སྒོ་ནས་ཕ་རོལ་པོ་བསླུ་བ་རྫུན་ཆེ་ཆུང་ཐམས་ཅད། གྲལ་མགོར་འདུག་པ་སོགས་ལུས་ཀྱི་རྣམ་འགྱུར་ལས་འབྱུང་བའང་མང་། མཐུན་མི་མཐུན་གང་ཡང་སོ་སོར་ཕྱེ་བའི་ཚིག་ཕྲ་མ། ཕ་རོལ་པོའི་ཞེ་ལ་ཕོག་པའི་ཚིག །ངག་འཁྱལ་ཞེས་འཆལ་བ་སྟེ་ཆོས་དང་མི་ལྡན་པའི་གཏམ་སྨྲ་ཚད། ཀུན་སློང་བཟང་པོ་མེད་ན་ཆོས་བཤད་པའང་དེར་འགྲོ། ཕ་རོལ་པོ་ལ་ཕུན་སུམ་ཚོགས་པའི་དངོས་པོ་ཟག་བཅས་ཀྱི་རིགས་རང་གིས་བདག་གིར་བྱ་འདོད་བརྣབ་སེམ༵ས། གནོད་སྐྱེལ་ཐུབ་མི་ཐུབ་གང་ཡིན་ཀྱང་བསམ་ངན་འཆང་བ་གནོ༵ད་སེམ༵ས། ལོ༵ག་ལྟ༵་ལ་ལས་འབྲས་མེད་པར་ལྟ་བ་ཆེན་པོ་དང་། ཆུང་བ་འདི་ཕྱི་གཉིས་ལས་འདི་གཙོ། ཕྱི་མ་ཞོར་ལ་སྒྲུབ་འདོད་པ་ནི་ཕྱི་མ་ལ་ཡིད་ཆེས་པོ་རང་མེད་པས་ཡིན་པས་ལོག་ལྟའི་ཕྱོགས་མཐུན་ལྟ་བུར་འགྲོ་སྙམ། མི་དགེ་བ་ཐམས་ཅད་འདི་བཅུའི་ནང་དུ་འདུས་པ་མིན་ཀྱང་། བསྲུང་ན་གཞན་རྣམས་ཀྱི་སྒོ་ཁེགས་ནུས་པ་ལ་དགོངས་ནས་བཅུར་བསྡུས་པ་ཡིན། དགེ་བའི་ལས་ནི། མི་དགེ་བ་མིན་པ་ཙམ་མ་ཡིན་པར་དངོས་སུ་མ་ཟད་ཀུན་སློང་
ཙམ་ཡང་སྐྱེ་མི་རུང་བས་སྤོང་སྙམ་པའི་སེམས་པ་དང་། སྤོང་བའི་ཐབས་དང་བཅས་པ་ལ་འདུ། མི་དགེ་བཅུ་གྲ་མ་ཉམས་པར་བཞག་ནས་དགེ་བ་རླབས་ཆེན་ཞིག་སྒྲུབ་མདོག་བྱེད་པ་ནི་རང་མགོ་རང་གཡོག་ཡིན་པས་རང་རེས་གསར་དུ་དགེ་ཚོགས་རྒྱ་ཆེན་ཞིག་མ་འགྲུབ་རུང་། སྔར་བསགས་ཀྱི་ཉེས་པ་བྱང་ཐབས་དང་། ཕྱིས་འབྱུང་གི་ཉེས་པ་ཁེགས་པའི་ཐབས་རེ་ལ་བརྩོན་ན་ཆོས་པ་ཟེར་དགོས། ད་ལྟ་འདི་ཙམ་ནི་རྒན་རྒོན་གྱི་ཆོས་དང་། དེ་ལས་མཐོ་མཐོ་མ་ཞིག་ཡོད་རློམ་བྱེད་པ་མང་ཡང་རྫོགས་པ་ཆེན་པོ་མན་ཆད་ལམ་གྱི་ཉམས་ལེན་གནད་འདི་ལས་མེད་པས་གཟབ་དགོས་ཏེ་ཁྱིམ་པ་ལ་བཅུར་བགྲང་བ་ནི་རགས་རགས་ཞིག་དང་། དེ་ལས་སོར་བྱང་སྔགས་ཀྱི་སྡོམ་པ་བླང་རིམ་བཞིན། རྩ་བ་མི་དགེ་བཅུ་བསྲུང་ཚུལ་ལ་ཞིབ་ཆ་ཇེ་ཆེར་གཏོང་བ་ཡིན་པར་ཤེས་དགོས། བྱེད་མི་རུང་བ་ཤ་སྟག་བྱས་པའི་འབྲས་བུ་བདེ་བ་སྒུག་རྒྱུ་ཡོད་པར་བསམ་པ་ལ༵ས་ངེས༵་པ༵འི་ཚུལ༵་མ་ཤེས་པའི་རྟགས་རེད། ཡང་ཆེ་ས་ནས་མ་ཉམ་ན་ཆུང་ངུ་རྣམས་སྤྱད་ཏུ་རུང་སྙམ་པ་དང་། དགེ་བ་ཆུང་ངུ་ཞིག་གིས་མི་ཕན་བསམ་ནས་སྟོན་པའི་བཀའ་ལ་རང་གིས་ཚོད་འཇོག་པ་ནི་ལ༵ས་འཕེ༵ལ་ཆེ༵་བ༵་མ་ཤེས་པའི་རྟགས། སྔོན་དབུལ་པོས་གསེར་གྱི་དོང་ཚེ་སྟོན་པ་ལ་ཕུལ་བའི་ལོ་རྒྱུས་ལྟར་འཕེལ་བར་བསམ། རང་ལ་མི་འདོད་པ་ཅི་བྱུང་ཡང་འདི་ཡིན་དེ་ཡིན་གྱི་ཁག་ཟེར་མ་རག་ལྟ་བུར་ཡོད་པ་དེ་ལས༵་མ༵་བྱས༵་པ༵་དང༵་མི༵་ཕྲད༵་པའི་ཚུལ་མ་ཤེས་པའི་རྟགས། སྟོན་པ་ཐུགས་རྗེ་ཅན་ལྟ་བུའི་མདུན་ཡིན་ན་རང་བྱས་ཡིན་པ་ཤེས་ནུས་ཕ་མ་ལྟ་བུའི་ཆེད་དུ་སྡིག་པ་བྱས་པ་ལ་ཉེས་པ་མེད་སྙམ་པ་བྱས༵་པ༵་ཆུད༵་ཟོ༵ས་མེ༵ད་ཚུལ་མ་ཤེས་པའི་རྟགས། ལས་དེའི་འབྲས་བུ་སྨིན་ཚུལ། ཀུན་སློང་ཤུགས་དྲག་པོ་དང་སྦྱོར་བ་ཚབ་ཆེན་པོས་བྱས་པའི་ལས་ལ་ཆེན་པོ། བར་མ་ལ་འབྲིང་། དམན་པ་ལ་ཆུང་ངུར་བྱས་ནས། མི་དགེ་བ་ཚབ་ཆེན་པོས་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོ། དགེ་བ་ཚབ་ཆེན་གྱི་སྟེང་ཏིང་ངེ་འཛིན་གོམ་པས་ཁམས་གོང་མ། འབྲིང་འདོད་ལྷ། ཆུང་ངུས་གླིང་བཞིའི་མི། མི་ལུས་དེའང་མི་ལུས་ཙམ་ཞིག་གི་དལ་རྟེན་རྙེད་པ་ལ་དགེ་བ་ཚབ་ཆེན་ཤུགས་དྲག་པོ་དགོས་སོ། དེ་འདྲའི་
དགེ་བ་དེ་ནི་འཁོར་བར་འཕེན་བྱེད་ཡིན་པས་སྤང་བྱ་མི་དགེ་བའི་ཕྱོགས་ཡིན། ཐར་པའི་རྒྱུར་མི་འགྲོ། དེ་ལྟར་བསོ༵ད་ནམ༵ས་ཆ་མཐུན༵་ཙམ་ལའང་ཚེ་འདི་དང་སྤུ་ཙམ་མ་འདྲེས་པ་ཞིག་དགོས། དེས་ཀྱང་འདོད་ཡོན་གྱི་བདེ་བ་དང་། ཏིང་འཛིན་བདེ་བ་ཙམ་འབྱུང་། འཆི་ཁར་ཕན་པའི་ཆོས་ནི་ཐར་པའི་རྒྱུར་འགྲོ་བའི་དགེ་བ་རང་བཞིན་མེད་རྟོགས་ཀྱི་ཤེས་རབ་ཀྱིས་ཟིན་པ་ཞིག་ངེས་པར་དགོས། དེའང་བསྒྲུབ་བྱ་དགེ་བ་བཅུ་ལོགས་སུ་བཞག་ནས་གཞན་ཞིག་སྒྲུབ་རྒྱུ་མེད་ཀྱང་། རྒྱུ་གཅིག་ལ་མགར་བའི་བཟོ་ཁྱད་ལྟར་སྒྲུབ་བྱེད་ཀུན་སློང་གི་བཟོ་ཁྱད་ཀྱིས་ཆུང་ངུས་འཁོར་བ། འབྲིང་གིས་ཐར་པ། ཤིན་ཏུ་ཆེན་པོས་ཐམས་ཅད་མཁྱེན་པ་ཐོབ། དེས་ན་ཐར༵་པ༵་ཆ༵་མཐུན༵་གྱི་དགེ་བ་ལ། རང་བཞིན་མེད་རྟོགས་སྔོན་དུ་འགྲོ་དགོས་ཏེ། འཁོར་བ་ནི་མེད་བཞིན་སྣང་བ་སྨིག་རྒྱུ་དང་གཟུགས་བརྙན་གཟུགས་སུ་འཕྲུལ་བ་ལྟ་བུའི་མཚང་མ་ཤེས་ན་ངེས་འབྱུང་མི་སྐྱེ། དེ་མེད་ན་ཐར་ལམ་གྱི་དྲི་མི་བྲོ། ཟག་བཅས་ནི་མཐོ་རིས་ལ་ཆགས་པས་ཀུན་ནས་སློང་བས་རྒྱུ་ཉོན་མོངས་པས་བསྐྱེད། དེའི་རྩ་བ་འཚོལ་ན་བདག་འཛིན་ལ་ཐུག །དེ་ལོག་རྟོག་ཡིན་པར་ཤེས། བདག་འཛིན་འདིས་འཁོར་བར་འཕེན་པའི་མཚང་རིག་ནས། དེས་བསྐྱེད་པའི་འཁོར་བ་ལ་དོན་གཉེར་གྱི་བསམ་པ་སྤངས་ནས་གཏན་དུ་སྐྱེ་མི་དགོས་པའི་རྒྱུར་དམིགས་པའི་དགེ་བ་ནི་ཐར་པ་ཆ་མཐུན། ཐེག་ཆེན་སེམས་བསྐྱེད་ཀྱིས་ཟིན་ན་ཐམས་ཅད་མཁྱེན་པའི་རྒྱུ་རུ་འགྲོ། ཆོས་པ་ཞིག་ཡིན་ནས་བཟུང་། ལས་འབྲས་ཀྱི་རྣམ་བཞག་རགས་རིམ་ཞིག་ནི་མ་ཤེས་ཐབས་མེད་ཡིན་ཏེ། དེང་སང་རང་རེའི་ཆོས་སྒྲུབ་ལུགས་འདི་ནི་སྲན་མ་རྨོས་པས་འབྲས་སཱ་ལུ་སྐྱེ་འདོད་པ་ལྟ་བུ་རྣམ་པ་ཙམ་ལ་སྐབས་རེ་སྒྲུབ་པ་དམན་པའི་རྒྱུས་འབྲས་བུ་རྒྱ་ཆེན་པོ་འདོད་པ་ནི་དེ་དང་འདྲ་བས། སྟོན་པ་མཆོག་གིས་སྡེ་སྣོད་རིན་པོ་ཆེར་གསུངས་པ་དང་མི་མཐུན་ལ། དེ་ལྟར་གསུངས་པ་རྣམས་ཀྱང་གདུལ་བྱ་ལ་གོ་བརྡ་ཅི་འཕྲོད་ཀྱི་ཉུང་བསྡུས་ཙམ་གསུངས་པ་ལས་རྒྱས་པར་གསུངས་མེད་པས་ལོ་ཟླ་ཅི་ཐོགས་ཀྱང་འདི་མ་ཤེས་ཐབས་མེད་ཡིན། དེ་དག་ལག་ལེན་དུ་འདེབས་ལུགས། ཐུན་དངོས་ཀྱི་སྐབས་ཡན་ཆད་ཀྱི་དམིགས་རྣམ་རྐྱང་བ་སྔོན་དུ་བཏང་
ནས། དཀར་ནག་གི་ལས་ལ་བསམ་པ། དེའི་འབྲས་བུ་ལ། བླང་དོར་བྱ་བའི་ཚུལ་ལ་བསམ་པ་གསུམ་གྱི་ཁོངས་སུ་བསྡུས་ནས་དཔྱད་སྒོམ་བྱ། ཐུན་མཚམས་ལ་དྲན་ཤེས་བརྟེན་པས། མི་དགེ་བ་རགས་པ་ཕར་ཞོག །ཕྲ་བ་ཀུན་སློང་ཙམ་ཡང་སྤང་དགོས། དེ་ཡང་སྤང་བླང་རྣམས་ཉིན་རེའམ་ཐུན་རེ་བཞིན་རྩིས་བགྲང་གིས་རྒྱུན་དུ་མི་བརྗེད་པ་ནི་དྲན་པ། སེམས་སྤང་བླང་གང་གི་ཕྱོགས་སུ་འགྲོ་བཞིན་འདུག་བལྟ་མཁན་ཤེས་བཞིན་ཡིན་པས་འདི་གཉིས་པོ་གལ་ཆེ། རང་རེས་སྤང་བླང་བྱེད་ལུགས་ནི་སྟབས་ལེགས་ཉེས་ཤིག་ཡིན། ལེགས་ན་རེ་ཟུང་ཞིག་སྤང་བླང་དང་། སྟབས་ཉེས་ན་མི་དགེ་བ་རྩིས་མི་ཐེབས་པ་སོགས་ནས་ཉིན་གཅིག་ལ་དྲན་ཤེས་ཡིད་ལ་ཡང་མི་ཤར་དེ་ནི་ཐོག་མེད་ནས་བག་ཆགས་ངན་གོམས་སོགས་ཆེ་བས་ཡིན། དེས་ན་ངེས་འབྱུང་སོགས་དང་པོ་བཅོས་མ་ལས་མི་འབྱུང་ཡང་། རིམ་བཞིན་གོམས་ན་ཉོན་མོངས་བཅོས་མིན་སྐྱེ་བ་ལྟར། བླང་བྱའི་ཕྱོགས་རྣམས་ལའང་བཅོས་མིན་གྱི་བློ་སྐྱེ་ངེས་པ་ཡིན། ལས་འབྲས་ལ་དབང་ཡོད་དང་། ཕོ་ཤེད་བྱེད་ས་མེད་པས་རང་གིས་རང་ལ་ལེགས་པར་བསམས་ནས་རབ་ཉེས་ལྟུང་གིས་མ་གོས་པ། གོས་ཀྱང་ཉེས་ལྟུང་དང་ཞག་ཏུ་མི་འགྲོགས་ཤིང་བཤགས་པས་དག་པ་རེ་བྱུང་ན་ཕོ་རབ་ཡིན། ལྷ་གཅིག་ཇོ་བོ་ལྟ་བུ་དགོས། རང་རེས་སྡོམ་པ་གསུམ་མ་བླངས་བསམ་པ་གཅིག་མེད་པ་འདི་ལུགས་གཅིག་ཏུ་ལེགས་ཀྱང་། བསྲུང་རྒྱུ་སྣ་གཅིག་མེད་སོང་བ་འདི་ནི་རང་གི་རྐང་པ་ལ་རང་གིས་ཐག་པ་བཏགས་པ་ཡིན་པས་ཕན་དུ་རེ་ན་རྒྱུད་དག་པ་རེ་གལ་ཆེ། ལ་ལས་སྔགས་སྡོམ་ཁོག་ཡངས་པར་འདོད་ཀྱང་། ཐ་མལ་གྱི་རྟོག་པ་སྐད་ཅིག་ཙམ་ཤར་ན་སྔགས་སྡོམ་ལ་སྐྱོན་ཞུགས་པ་ཡིན། ༼རྣམ་སྨིན་གྱི་ཡོན་ཏན་བརྒྱད་ནི་སྔོན་གྱི་འཕེན་པ་བཞིན་ཚེ་རིང་དུ་གནས་པ་རང་དང་། གཞན་གྱི་དོན་དུ་ཡུན་རིང་པོར་དགེ་བ་རྒྱ་ཆེན་པོ་གསོག་པར་བྱེད་པ་དང་༡། གཟུགས་བཟང་བས་མཐོང་བ་ཙམ་གྱིས་གདུལ་བྱ་དགའ་ནས་འདུ་ཞིང་དེའི་ཚིག་ཉན་པ་དང་། རིགས་མཐོན་པོར་སྐྱེས་པས་གཞན་རྣམས་ཆོས་ལ་བསྐུལ་བའི་ཕྱིར་ཇི་ལྟར་བསྒོ་བ་ལས་མི་འདའ་བར་སྒྲུབ་པ་དང་། ལོངས་སྤྱོད་དང་གཉེན་འཁོར་རྒྱ་ཆེ་བ་སྦྱིན་པས་སེམས་ཅན་རྣམས་འཁོར་དུ་བསྡུས་ཏེ་སྨིན་པར་བྱེད་པ་དང་༣། ཚིག་བཙུན་པས་སྙན་པར་སྨྲ་བ་སོགས་ཀྱིས་སེམས་ཅན་སྡུད་ཅིང་སྨིན་པར་བྱེད་པ་དང་༥། ཡོན་ཏན་དང་ལྡན་ཞིང་
ཆེན་པོ་རྣམས་ཀྱི་མཆོད་གནས་སུ་གྱུར་པས་གཞན་གྱི་བྱ་བ་ཐམས་ཅད་ཀྱི་གྲོགས་བྱས་པས་དྲིན་གཟོའི་ཕྱིར་བསྒོ་བ་མྱུར་དུ་ཉན་པ་དང་། ༦སྐྱེས་པར་གྱུར་པས་ཡོན་ཏན་ཐམས་ཅད་ཀྱི་སྣོད་དང་འཁོར་དུ་མི་འཇིགས་པས་ཡོན་ཏན་ཅན་མང་པོ་དང་ལྷན་ཅིག་འགྲོ་བའམ་དབེན་པར་གནས་པ་ལ་གེགས་བྱེད་མེད་པ་དང་། ༧རང་བཞིན་གྱིས་གནོད་པ་ཆུང་ཞིང་ནད་མེད་ལ་ཚེ་འདིར་དོན་གང་བརྩམ་འགྲུབ་པའི་རྐྱེན་ལས་སྤྲོ་བ་ཚང་བའི་ལུས་སེམས་ཀྱི་སྟོབས་ཐོབ་པས་རང་གཞན་གྱི་དོན་གང་ལའང་མི་སྐྱོ་ཞིང་སྤྲོ་ཤུགས་ཆེ་ལ་བརྟན་པའི་དབང་གིས་ལུས་སེམས་ལས་རུང་དང་མངོན་ཤེས་མྱུར་དུ་འགྲུབ་པ་རྣམས་སོ། ༽༼རྣམ་སྨིན་གྱི་རྒྱུ་བརྒྱད་ལས་དང་པོ་ནི། གཞན་གྱི་སྲོག་ལ་གནོད་པ་བྱེད་པ་དང་མི་མཛའ་བ་ཤི་བ་ལ་དགའ་བ་སོགས་ཚེ་ཐུང་བའི་རྒྱུ་རྣམས་སྤང་ཞིང་། སེམས་ཅན་ལ་སྙིང་བརྩེ་བའི་བསམ་པས་བཀྲེན་པ་ལ་ཟས་སྦྱིན་པ་དང་གསོད་པར་ཚུད་པའི་སྲོག་སྐྱོབ་པ་སོགས་ཚེ་རིང་བའི་རྒྱུ་རྣམས་བསྒྲུབ་པའོ། །གཉིས་པ་ནི། གཞན་ལ་གཟུགས་ཀྱི་སྐྱོན་བརྗོད་པ་དང་དཀོན་མཆོག་གི་རྟེན་བཞེངས་པའི་བར་ཆད་བྱེད་པ་སོགས་འགལ་རྐྱེན་སྤང་བ་དང་། བཟོད་པ་བསྒོམ་ཞིང་དེ་བཞིན་གཤེགས་པའི་སྐུ་དང་མཆོད་རྟེན་བཞེངས་པ་དང་། དཀོན་མཆོག་ལ་མཆོད་པ་འབུལ་བ་དང་། གཞན་ལ་མར་མེའི་སྣང་བ་དང་གོས་གསར་པ་དང་རྒྱན་ཆ་སྦྱིན་པ་སོགས་གཟུགས་མཛེས་པའི་རྒྱུ་རྣམས་ལ་ནན་ཏན་བྱ་བའོ། །གསུམ་པ་ནི། རིགས་ངན་དུ་སྐྱེ་བའི་རྒྱུ་ང་རྒྱལ་བསྐྱུངས་ནས་རིགས་དང་ན་སོ་དང་ཡོན་ཏན་གྱིས་རྒན་པ་དང་བླ་མ་དང་མཆོག་གསུམ་ལ་ཤིན་ཏུ་གུས་པ་བྱ་བའོ། །བཞི་པ་ནི། སེར་སྣ་དང་མ་བྱིན་ལེན་དང་ཕྲ་མ་སོགས་འགལ་རྐྱེན་སྤང་ཞིང་སློང་བ་ལ་ཟས་སོགས་སྦྱིན་པ་དང་། ཕ་མ་ལ་སོགས་པ་ཕན་འདོགས་པའི་ཞིང་དང་། ནད་པ་དང་བཀྲེན་ཕོངས་དང་བཤུལ་ཐག་རིང་པོ་ནས་ཡོང་བ་སོགས་སྡུག་བསྔལ་བའི་ཞིང་དང་། ཆོས་སྨྲ་བ་དང་བྱང་སེམས་དང་བླ་མ་སོགས་ཡོན་ཏན་གྱི་ཞིང་རྣམས་ལ་ཡོ་བྱད་གང་མཐོང་སྦྱིན་པའོ། །ལྔ་པ་ནི། རྫུན་སོགས་ངག་གི་མི་དགེ་བ་བཞི་སྤོང་བ་དང་། བདེན་ཚིག་དང་འཁོན་པ་འདུམ་པའི་ཐབས་སོགས་སྨྲ་བའོ། །དྲུག་པ་ནི་ཚེ་རབས་ཕྱི་མ་རྣམས་སུ་རང་རྒྱུད་ལ་ཡོན་ཏན་སྣ་ཚོགས་འབྱུང་བར་སྨོན་ལམ་འདེབས་ཤིང་། དཀོན་མཆོག་གསུམ་དང་ཕ་མ་དང་ཉན་རང་དང་བླ་མ་ལ་གུས་པས་མཆོད་པར་བྱེད་པའོ། །བདུན་པ་ནི་ཡུལ་ཁྱད་པར་ཅན་ལ་བརྙས་ཐབས་ཀྱིས་བུད་མེད་ཀྱི་མིང་གིས་འབོད་པས། ཕྱུགས་ཀྱི་བྱ་བ་བྱེད་པ་སོགས་བུད་མེད་དུ་སྐྱེ་བའི་རྒྱུ་སྤང་བ་དང་། སྐྱེས་པའི་ཡོན་ཏན་ལ་དགའ་ཞིང་བུད་མེད་ལ་མི་དགའ་བར་ཉེས་དམིགས་སུ་བལྟ་བ་དང་བུད་མེད་ཀྱི་ལུས་འདོད་པ་རྣམས་འདུན་པ་བཟློག་པ་དང་། ཕོ་དབང་གཅོད་པ་རྣམས་ཐར་པར་བྱེད་པ་དང་། ཡེ་ཤེས་བླ་མ་འོད་ཀྱི་ཏོག །དེ་བཞིན་སྨོན་ལམ་བློ་གྲོས་དང་། །དབང་པོ་ཚང་དང་འཇམ་དབྱངས་ལ། །བདག་ནི་གུས་པར་ཕྱག་འཚལ་ལོ། །ཞེས་བྱང་སེམས་ཆེན་པོ་དེ་རྣམས་ཀྱི་མཚན་བརྗོད་པ་སྟེ་སྐྱེས་པར་འགྱུར་བའི་རྒྱུ་རྣམས་ལ་བསླབ་པའོ། །བརྒྱད་
པ་ནི། གཞན་ལ་བརྡུང་བརྡེག་བྱེད་པ་དང་། མི་མཛའ་བ་ན་བ་ལ་དགའ་བ་དང་། དཀོན་མཆོག་གི་རྟེན་ལ་དུད་པས་བདུག་པ་སོགས་ནད་མང་བའི་རྒྱུ་རྣམས་སྤང་ཞིང་། བཀྲེས་པ་ལ་བཟའ་བཏུང་སྦྱིན་པ་དང་ནད་པའི་ནད་གཡོག་དང་སྨན་ཉིད་སྦྱར་བ་སོགས་ནད་མེད་པའི་རྒྱུ་སྒྲུབ་པ་དང་། རིན་ཆེན་ཕྲེང་བར། བུ་རམ་ཞུན་མར་སྦྲང་རྩི་ཏིལ་མར་ལན་ཚ་སྟེ་སྙིང་པོ་ལྔ་བྱིན་པ་དང་། སྐྲག་པ་རྣམས་ལ་མི་འཇིགས་པ་བྱིན་པས་སྟོབས་པོ་ཆེར་འགྱུར་བར་གསུངས་པའོ། །མཆན༽ འཁོར་བའི་ཉེས་དམིགས་གང་ལས་བློ་ལྡོག་ན། འཁོར་བའི་ཕུན་ཚོགས་ལྷ་མིའི་བདེ་འབྲས་དོན་གཉེར་གྱི་བསམ་པ་ལས། གང་གིས་ན། འཁོར་བའི་སྡུག་བསྔལ་བསམ་པས། ཇི་ལྟར་ན། འཁོར་བའི་སྡུག་བསྔལ་སྤྱི་དང་། བྱེ་བྲག་རིགས་དྲུག་སོ་སོའི་སྡུག་བསྔལ་བསམ་པའི་སྒོ་ནས། འཁོར་བ་ཞེས་ཤིང་རྟའི་འཕང་ལོ་དང་། ཟོ་ཆུན་ལྟར་སྲིད་པ་འདིར་མཐོ་དམན་མ་ངེས་པར་ཉེར་ལེན་གྱི་ཕུང་པོ་ཡང་ནས་ཡང་དུ་ལེན་པ་ལ་འཁོར་བ། དེ་ལྟར་འཁོར་མཁན་གྱི་གང་ཟག་ལ་འཁོར་བ་པ། དེ་འདྲའི་ལུས་ཞིག་བླངས་ནས་བཟུང་ཉེས་པའི་རང་བཞིན་ཡིན་ལུགས་རྣམས་ཤེས་ནས་བསམ་པ་ལ་འཁོར་བའི་ཉེས་དམིགས་སྒོམ་པ་ཟེར། སྤྱིའི་སྡུག་བསྔལ་ནི། སྡུག་བསྔལ་གསུམ། སྡུག་བསྔལ་དེ་དུད་འགྲོ་ལྟ་བུའི་རྨོངས་པ་ཞིག་གིས་མྱོངས་ཀྱང་སྡུག་བསྔལ་དུ་ཤེས་པ་ལུས་མཚོན་གྱིས་བཅད་པ་ལྟ་བུ་ནི་སྡུག་བསྔལ་གྱི་སྡུག་བསྔལ། མྱོང་ཙམ་ནས་ངོ་མི་ཤེས་ཀྱང་། བདེ་བ་ལྟར་སྣང་བ་དེ་ཉིད་ཤུགས་ཇེ་ཆེར་སོང་བ་ན་མཐར་སྡུག་བསྔལ་ཡིན་པར་ཤེས་འོང་བ་གྲང་བས་ཉི་མ་ལ་བསྲོ་བ་ལྟ་བུར་དེ་ལ་འགྱུར་བའི་སྡུག་བསྔལ་ཟེར། མཐར་བསྲེགས་པ་ན་སྡུག་བསྔལ་དང་པོ་ཡིན། སྲིད་པའི་གནས་རིས་ཀུན་ལ་ཆེ་ཆུང་མེད་པ་ཁྱབ་བྱེད་དུ་འཇུག་པ། འདུ་བྱེད་ལས་ཉོན་གྱི་གཞན་དབང་དུ་གྱུར་ནས་རང་དབང་སྤུ་ཙམ་མེད་པ་ནི། ཁྱབ་པ་འདུ་བྱེད་ཀྱི་སྡུག་བསྔལ། དེ་དག་མྱོང་མཁན་གྱི་གཙོ་བོ་དང་པོ་ངན་སོང་གསུམ། འདོད་པའི་ལྷ་མི། གཉིས་པ། འདོད་པའི་ལྷ་མི། གསུམ་པ་སྲིད་རྩེ་ནས་མནར་མེད་པར་ཆེ་ཆུང་མེད། སོ་སོའི་སྡུག་བསྔལ། དྲན་ཉེ་ལས། སེམས་ཅན་དམྱལ་བ་དམྱལ་མེས་ཉམས། །ཡི་དྭགས་བཀྲེས་ཤིང་སྐོམ་པས་ཉམས། །དུད་འགྲོ་གཅིག་ལ་གཅིག་ཟས་ཉམས། །མི་རྣམས་འཚོ་བ་ཉམས་པས་ཉམས། །ལྷ་རྣམས་བག་མེད་
པ་ཡིས་ཉམས། །ཞེས་སྡུག་བསྔལ་གྱི་གཙོ་བོ་ཙམ་ཡིན། ཁམས་གོང་མ་གཉིས། ཏིང་ངེ་འཛིན་ལ་དང་པོར་འཇུག་དུས་དེ་ལས་གཏན་དུ་མི་ལྡང་བསམ་ནས་མཉམ་པར་བཞག་ཀྱང་། འདུ་བྱེད་ལས་ཉོན་གྱི་གཞན་དབང་ཅན་ཡིན་པས་སྔར་གྱི་རྒྱུའི་ནུས་པ་ནམ་ཟད་པ་ན་གནས་རིས་འོག་མར་ལྟུང་། མདའ་ནམ་མཁའ་ལ་འཕངས་པ་ཤུགས་ཟད་དུས་སླར་ས་ལ་ལྷུང་བ་ལྟ་བུ་ཡིན། ཁྲིད་ཕལ་ཆེར་འཕོ་ལྟུང་གི་སྡུག་བསྔལ་མེད་པ་ལྟ་བུར་གསུངས་པ་ནི་རང་གི་སས་བསྡུས་ཀྱི་སྡུག་བསྔལ་མེད་ལ། འཆི་ཁར་འོག་མའི་སེམས་མངོན་དུ་གྱུར་ནས་འཕོ་ལྟུང་གི་སྡུག་བསྔལ་མྱོང་བ་ཡིན་པས་དེར་དགོངས། ཁྱད་པར་ལྷའི་གནས་ལུས་ལོངས་སྤྱོད་ཐམས་ཅད་བདེ་བ་ཁྱད་པར་ཅན་སྐྱེད་ནུས་པ་ཡིན་པས་བསྐལ་པ་མང་པོ་མྱོང་ཡང་རྨི་ལམ་ཐུན་གཅིག་གི་ཡུན་ལས་མེད། རྒྱུ་ཟག་བཅས་ཡིན་མིན་ཙམ་ལས་བདེ་བ་ཅན་གྱི་སྣོད་བཅུད་དང་གཞན་འཕྲུལ་དབང་བྱེད་ལྷ་ལ་ཁྱད་མེད་པ་ཙམ་ཡོད་ཀྱང་འཆི་ཁར་འོག་མའི་གནས་རིས་མངོན་ཤེས་ཀྱིས་མཐོང་བས། ལུས་ལྷ་ཡུལ་ན་ཡོད་ཀྱང་འཆི་ལྟས་བྱུང་ཚེ་སེམས་ངན་སོང་དུ་ལྷུང་ཚར་བ་དང་འདྲ། བསད་ལ་ཁད་ཀྱི་བཙོན་པ་ལྟ་བུ་ཡིན། སྔར་གྱི་བདེ་བ་སྟོབས་ཆེ་བས་གཅེར་བུ་ཚེར་དོང་དུ་ལྷུང་བ་ལྟ་བུའི་སྡུག་བསྔལ་ཡོད། སྡུག་བསྔལ་མྱོང་མཁན་སེམས་ཡིན་པས་ལུས་ཚོར་ཁོ་ནའི་རྗེས་སུ་མི་འགྲོ་བས་ལྷ་རྣམས་འཆི་ལྟས་ཀྱི་སྡུག་བསྔལ་ལྟ་བུ་ནི་དམྱལ་བའི་སེམས་ཅན་ལའང་མེད་པར་གསུངས། མཐོ་རིས་ཟག་བཅས་ཀྱི་བདེ་བ་ངན་སོང་ལས་མཚང་ཆེ་བ་ཤེས་དགོས་ཏེ། དོན་མ་ཡིན་པའི་བྱ་བ་ཁོ་ནས་གཡེངས་ཤིང་དལ་རྟེན་སྟོང་ཟད་དུ་གཏོང་བ་དང་། ངན་སོང་གི་སྡུག་བསྔལ་བཟོད་དཀའ་བ་འབྱུང་བའི་རྒྱུ་ཡིན་པས། ལུས་ལོངས་སྤྱོད་རྣམས་རང་ཉིད་ཕུང་བའི་རྒྱུ་ཁོ་ན་ཡིན། བདེ་བ་ལྟར་སྣང་ཙམ་ལས་དོན་ལ་བདེ་བ་མེད། དེ་ལ་ཅི་ཙམ་སྤྱད་ཀྱང་ངོམ་རྒྱུ་གཏན་མེད་པས་ཡིད་སྨོན་བྱེད་པ་དོན་མེད། ད་དུང་འདོད་པ་ཇེ་འཕེལ་གྱི་རྒྱུར་འགྲོ། དུད་འགྲོ་གཅིག་ལ་གཅིག་ཟ་དང་། བཀོལ་སྤྱོད་ཀྱིས་རྟག་པར་མནར། རང་ནད་ཀྱིས་ཤི་བ་ནི་སྲིད་མཐའ་ཙམ་ཡིན་པས། ད་ལྟ་གསོན་བཞིན་པའི་སྐབས་ན་རྐང་ལག་ཐག་པས་བཀྱིག་ནས་ལྤགས་དམར་བཤུས་
བཏང་ནས་དུད་འགྲོ་ལྟར་གསོད་པ་དང་། མི་ཁྱོགས་བཞིན་དུ་ཁུར་ཆེན་ཁྱེར་ནས་ཐག་རིང་པོར་ངལ་བསོ་མི་ཆོག་པར་འགྲོ་དགོས་ན་ཅི་འདྲ་ལ་བསམ། ཡི་དྭགས་བཀྲེས་སྐོམ་སོགས་ཀྱི་སྡུག་བསྔལ་ལ་དཔག་ན་ཉིན་གཅིག་འཚོ་མི་ནུས་པར་ལྟོག་གྲིར་ཤི་ངེས་ཀྱང་། ལས་དབང་གིས་ཤི་མི་ཐུབ་པར་ལོ་ཟླ་མང་པོའི་བར་དུ་མྱོང་དགོས་པས་ད་ལྟར་ཇ་འཐུང་སྔ་ཕྱི་ལ་ཡིད་མི་བདེ་གྲོགས་ལ་ཚིག་པ་ཟ་བ་སོགས་འབྱུང་བ་ལ་དཔག་ན་བཟོད་ཨི་ཐུབ། དམྱལ་བར་སྐྱེ་བའི་ལས་ཚབ་ཆེ་བས། ལུས་གཅིག་ལ་སྡུག་བསྔལ་གྱི་བྱེ་བྲག་བསམ་གྱིས་མི་ཁྱབ་པ་ཡོད་པ་དང་། ཤ་རུས་སོ་སོར་འཐོར་བའི་ཚལ་པ་དང་རྣག་ཁྲག་གི་རྒྱུན་ཚུན་ཆད་སེམས་ཀྱིས་བཟུང་ནས་ཚོར་བ་མྱོང་དགོས། དམྱལ་བའི་སྡུག་བསྔལ་ཆ་ཙམ་ལས། དངོས་དྲན་ཉེར་མ་བསྟན་པར་གསུངས། བསམ་པའི་གོ་རིམ་བློ་ལ་གོམས་ཆ་ཅུང་ཟད་ཐོན་ཚེ་དམྱལ་བ་ནས་ཡས་རིམ་ལ་མི་བསམ་པར། གཟུགས་མེད་ནས་དམྱལ་བའི་བར་སྡུག་བསྔལ་ཇེ་ཆེ་ཡིན་པ་ལ་རིམ་བཞིན་བསམ་ན་ངེས་འབྱུང་མྱུར་དུ་སྐྱེ། འདི་དག་སྒྲུང་ཉན་པ་ལྟ་བུར་མ་སོང་བར་རང་ཐོག་བླངས་ནས་དངོས་སུ་བབས་པའི་ཚུལ་གྱིས་བསམ་དགོས། ཁ་ཅིག་གིས་དམྱལ་བ་རང་སྣང་ཙམ་ཡིན་པས་དོན་ལ་མེད་ཟེར་ཡང་དམྱལ་བ་རང་སྣང་ཡིན་པར་མ་ཟད་སྣོད་བཅུད་འདི་དག་དང་། དེས་བསྐྱེད་པའི་ན་ཚ་སྡུག་བསྔལ་སོགས་རང་སྣང་རྨི་ལམ་དང་འདྲ་བར་ཁྱད་མེད་ཀྱང་། སྲ་ཞིང་འཐས་པ་ལྟར་སྣང་ཞིང་ཚོར་བ་དངོས་སུ་མྱོང་དགོས་པ་ལ་ཁྱད་མེད་ཕྱིར་རང་སྣང་ཡིན་པས་ཕན་པ་མེད། དེ་ལྟར་ཡང་ཡང་བསམ་པས་བརྒྱ་བྱིན་གྱི་འབྱོར་བ་ཐོབ་ནའང་ཤིན་ཏུ་འབར་བའི་མེར་ཚུད་པ་ལྟ་བུའི་འདུ་ཤེས་ནམ་སྐྱེས་ཚེ། ངེས་འབྱུང་རྒྱུད་ལ་སྐྱེ་བའི་སྣེ་ཟིན་པ་ཡིན། དམིགས་སྐོར་བཞི་པ་དེ་ལ་བཞི། རྒྱུ་གང་གིས་སྐྱབས་སུ་འགྲོ་བ། གང་ལ་སྐྱབས་སུ་འགྲོ་བའི་ཡུལ། ཇི་ལྟར་སྐྱབས་སུ་འགྲོ་བའི་ཚུལ། སྐྱབས་སུ་སོང་ནས་བཟླས་པར་བྱ་བའི་རིམ་པའོ། །ཁྲིད་གཞན་འགར་སྐྱབས་འགྲོ་ནས་མདོ་དང་ཐུན་མིན་ཀྱི་སྔོན་འགྲོ་བཤད་ཅིང་སྐྱབས་འགྲོ་ཡང་སྔགས་ལུགས་གཙོར་འདོན་དང་། འདིར་མདོ་དང་ཐུན་མོང་བ་གསུངས་
པ་སྤྱིར་བཏང་དབང་བཙན་མཛད་པ་ཡིན། གང་ལྟར་ཐེག་པ་ཆེ་ཆུང་གི་ཉམས་ལེན་ཐམས་ཅད་སྐྱབས་འགྲོའི་ར་བ་ལས་འདའ་མི་རུང་ཞིང་སངས་མ་རྒྱས་བར་མཁོ་བ་ལས་ཐུན་མགོ་དུམ་གཅིག་ལྟ་བུའམ་ཚིག་ཤར་འདོན་ཙམ་གྱི་ནི་སྐྱབས་འགྲོ་མིན། དང་པོ་ནི། བི་མ་ལའི་ཡན་ལག་དྲུག་པར། འཇིགས་དང་ཡོན་ཏན་དྲན་པས་འགྲོ། །ཞེས་རྒྱུ་གཉིས་ལས། དང་པོ། ཁམས་གསུམ་འཁོར་བའི་ཉེས་དམིགས་དྲན་ནས་འཇིགས་སྐྲག་གི་བློ་དང་། གཉིས་པ་དེ་ལས་སྐྱོབ་ངེས་པ་དཀོན་མཆོག་གསུམ་གྱི་ཡོན་ཏན་ཤེས་པའི་སྒོ་ནས་ཡིད་ཆེས་པའི་བློ། དེས་ན་ངེས་འབྱུང་སྐྱེ་བ་ལ་འཁོར་བ་ལས་ཐར་འདོད་དང་། ཐར་པ་ཐོབ་འདོད་ཀྱི་བློ་གཉིས་ཚོགས་དགོས་པས་ཕྱི་མ་ལ་ཐར་པ་ངོ་མ་ཞིག་ཐོབ་ནུས་སུ་མ་ཤེས་ན་ཐོབ་འདོད་སྐྱེ་བ་མེད་པས་བདག་མེད་རྟོགས་པ་སྔོན་དུ་འགྲོ་དགོས་པའི་རྒྱུ་མཚན་དེ་ཡིན། རང་མཉམ་དང་དམན་པ་ལ་སྐྱབས་སུ་འགྲོ་བས་སྐྱོབ་མི་ནུས་ཕྱིར་ཡུལ་ཁྱད་པར་ཅན་ལ་བརྟེན་དགོས་པ། དཔེར་ན་ད་ལྟ་མི་ཉམ་ཆུང་འཇིགས་པས་མནར་བ་ཞིག་གིས་སྐྱབས་འཚོལ་ན། སྐྱོབ་ནུས་པའི་དཔོན་བརྟེན་པ་ལྟ་བུ་ལའང་རྒྱུ་འདི་གཉིས་ཚང་དགོས་པ་བཞིན་ནོ། །སྐྱོབ་ནུས་པའི་ཡོན་ཏན་ནི། སངས་རྒྱས་རང་གཞན་དོན་གཉིས་མཐར་ཕྱིན་པས་རང་འཇིགས་པ་ལས་གྲོལ་བའི་ཕྱིར་གཞན་སྐྱོབས་པའི་ཐབས་སྟོན་ནུས། ཆོས་ལུང་གི་ཆོས་ཐོས་བསམ་དང་། རྟོགས་པའི་ཆོས་སྒོམ་སྒྲུབ་བྱས་པས་སྒྲུབ་པ་པོ་དེ་ཉིད་འཁོར་བའི་འཇིགས་པ་ལས་དངོས་སུ་སྐྱོབ་ནུས། དགེ་འདུན་འགྲོགས་ན་རང་རྒྱུད་སྔར་ལས་སྐྱོན་ཇེ་འགྲིབ་དང་། ཡོན་ཏན་གསར་དུ་འགོ་ནུས་པ་རྣམས་ལ་དེ་དང་དེར་ཡིད་ཆེས་པས་སྐྱབས་སུ་འགྲོ་དགོས། རྒྱུ་འདི་གཉིས་མ་ཚང་ན་སྐྱབས་འགྲོ་ཁ་ཙམ་ཡིན། གཉིས་པ་ཡུལ། སངས་རྒྱས་བྱང་སེམས་སོགས་ཀྱི་སྐུ་གཟུགས་བྲིས་འབུར་དང་གླེགས་བམ་ལྟ་བུའི་འདུན་བཞག་གི་རྟེན་ཙམ་ཡུལ་དུ་བཟུང་བའམ། རྒྱ་གར་དུ་བྱོན་པའི་སངས་རྒྱས་དངོས་སམ། དེའི་དུས་ཀྱི་ཆོས་དང་། ཤཱ་རིའི་བུ་སོགས་ཀྱི་དགེ་འདུན་ལྟ་བུ་ལ་མཐོ་སྙེགས་བྱེད་པ་ཁོ་ནར་མ་སོང་བར། ད་ལྟ་རང་ཉིད་འཁོར་བ་ལས་ཐར་བའི་ཐབས་སྟོན་པ་
པོ་དེ་སངས་རྒྱས། རང་རྒྱུད་འཁོར་བ་ལས་གྲོལ་བྱེད་ཀྱི་རྒྱུར་འགྲོ་བའི་སྒྲ་ཚིག་གི་ལུང་དང་། དེའི་དོན་ནི་རྟོགས་པའི་ཆོས། རང་དེ་དང་འགྲོགས་ན་རྒྱུད་ཇེ་བཟང་དུ་འགྲོ་བ་ལས་ཆུད་ཟོས་མི་བཏང་མཁན། རང་ཉིད་ལྟར་ལམ་ཞུགས་ཀྱི་གང་ཟག་བཟང་པོ་རྣམས་དགེ་འདུན་ཡིན། ཀུན་མཁྱེན་ཆེན་པོས་རྒྱུ་ལམ་བྱེད་མདོ་ལུགས་ཀྱི་སྐྱབས་ཡུལ་རྒྱུ་སྐྱབས་དང་། འབྲས་བུ་ལམ་བྱེད་སྔགས་ལུགས་ཀྱི་སྐྱབས་ཡུལ་ལ་འབྲས་སྐྱབས་སུ་གསུངས་པ་སྔགས་ཐུན་མིན་གྱི་ལུགས་ཡིན་པས། སྤྱི་བཏང་གཞན་རྒྱུད་ལ་བྱོན་ཟིན་པའི་སྐྱབས་གསུམ་ལ་རྒྱུའི་སྐྱབས་ཡུལ་དང་། མ་འོངས་པ་ན་རང་རྒྱུད་ལ་འགྲུབ་རུང་གི་མཆོག་གསུམ་ནི་འབྲས་བུའི་སྐྱབས་ཡུལ་ཡིན། དེས་ན་འབྲས་སྐྱབས་དེ་འགྲུབ་པའི་ཕྱིར་གཞན་རྒྱུད་ལ་བྱོན་ཟིན་པའི་མཆོག་གསུམ་ལ་སྐྱབས་སུ་འགྲོ་བ་ཡིན། གསུམ་པ་སྐྱབས་སུ་འགྲོ་ཚུལ། ཡུལ་དེ་དག་སངས་རྒྱས་ལ་ཐར་ལམ་སྟོན་མཁན། ཆོས་སྒྲུབ་རྒྱུའི་ལམ་དངོས། དགེ་འདུན་ལམ་གྱི་གྲོགས་སུ་རེ་ལྟོས་སྙིང་ནས་བཅའ་ཞིང་། དེ་ལས་སྐྱབས་གནས་གཞན་མི་འཚོལ་བར་སྐྱབས་ཡུལ་གྱི་ཕྱོགས་སུ་སེམས་འགྲོ་བའམ། དེའི་རྗེས་སུ་སེམས་སྙེགས་པ་ལ་སྐྱབས་འགྲོ་ཟེར། བསམ་པ་འདི་ཡོད་ན་ཚིག་འདོན་པ་དང་ཐལ་མོ་སྦྱར་བ་ཡན་ཆད་སྐྱབས་འགྲོ་རྣམ་དག་ཏུ་འགྲོ། བཞི་པ་བསླབ་བྱ་མང་ཡང་། མདོར་བསྡུས་ཙམ། སྐྱབས་ཡུལ་ལ་གསུམ་ཡོད་པ་ལྟར་བསྲུང་བྱའང་གསུམ། སངས་རྒྱས་ལ་སྐྱབས་སུ་སོང་ནས་དགེ་བའི་བཤེས་གཉེན་རྣམ་དག་རེ་བསྟེན། ཆོས༴འཁོར་བའི་འཇིགས་སྐྲག་ལས་ཐར་བའི་ཐབས་སྤང་བླང་ལ་བརྩོན། དགེ་འདུན༴ཡོན་ཏན་འགོ་ནུས་པའི་གྲོགས་བཟང་པོ་རྙེད་ན་འགྲོགས། མེད་ན་མཁའ་འགྲོ་དང་དཀར་ཕྱོགས་པ་རྣམས་འགོ་བས་དེས་རུང་། མདོར་ན་བླ་མ་ལ་སོགས་གསུངས་བ་ལྟར། ཐུགས་སྐྱོན་ཟད་ཡོན་རྫོགས་སངས་རྒྱས། གསུང་བརྗོད་བྱ་རྗོད་བྱེད་ལུང་རྟོགས། སྐུ་སྙིགས་མའི་གདུལ་བྱར་བཤེས་གཉེན་ཚུལ་བཟུང་བ་དགེ་འདུན། མཆོག་གསུམ་ཀུན་འདུས་ཡིད་བཞིན་ནོར་བུ་ཡིན་པ་སྟོན་པ་དངོས་དང་འདྲ་བ་ལ་བསམ་སྦྱོར་དག་པས་བསྟེན་ནས་ཅི་གསུང་
སྒྲུབ་ན་དེས་ཆོག །དེས་ན་མཆོག་གསུམ་གང་ཟག་གསུམ་ལྟ་བུ་ཐ་དད་དུ་འཛིན་མི་རུང་། སྐྱབས་སྡོམ་མེད་ན། བར་སྣང་གི་ཁང་ལས་ལྟར་དགེ་བསྙེན་གྱི་སྡོམ་པ་ཙམ་ཡང་སྐྱེ་ཐབས་མེད། དེས་ན་སྡོམ་པ་ཐོབ་དགོས་པ་ཐོབ་ནས་བསྲུང་མི་དགོས་པའི་སྡོམ་པ་ཞིག་ནི་ཡོད་མི་སྲིད་པས་ཐ་ནའང་འདི་གསུམ་མ་བསྲུང་ཐབས་མེད། དཔེར་ན་ནད་པ་ནད་ཀྱིས་ཉེན་པ་ལ་སྨན་པ་མཁས་པ། སྨན་བཅོས་ནད་གཡོགས་བཞིན། སྤྱིར་སྟོན་པ་ཐུགས་རྗེ་ཅན་གྱིས་གདུལ་བྱའི་རྒྱུད་ཚོད་ལ་ལྟོས་པའི་ཆོས་སྒོ་གྲངས་མེད་གསུངས་པས་མི་གཅིག་གིས་ཐམས་ཅད་ཉམས་སུ་ལེན་དགོས་པའི་དོན་མིན་པས་རང་ཉམས་ལ་དཔག་པའི་ཆོས་ཞུ་བ་ལས། དམ་སྡོམ་ཁས་ལེན་མང་མི་རུང་། ཁས་བླངས་ནས་བཟུང་བླ་མའི་མདུན་ནས་ཁས་བླང་པ་ལྟར་མ་སྒྲུབ་ན་བདེ་གཤེགས་བཀའ་འདས་ཀྱི་རྩ་ལྟུང་མནར་མེད་ཀྱི་རྒྱུར་འགྲོ་ངེས་པས། ཆོས་དེ་དང་པོ་ཉན་ལུགས། བར་དུ་བསམ་ལུགས། ཐ་མ་སྒྲུབ་ལུགས་ལེགས་ན་འཚེངས། ནུས་པ་མེད་བཞིན་འཇུག་ཉེས་ན་ཕན་མི་ཐོགས་པའི་སྟེང་དུ་ངན་སོང་གི་རྒྱུ་ཡིན། དེས་ན་བླ་མའི་བཀའ་བཞིན་སྒྲུབ་ན་རྔ་མ་བརྡུང་། དུང་མ་བུས་ཀྱང་མཁའ་འགྲོ་ཆོས་སྐྱོང་ལུས་དང་གྲིབ་བཞིན་འཁོར་ནས་སྡོང་གྲོགས་མཛད། བཀའ་ལས་འདས་ཤིང་སྡོམ་པ་ཉམས་ན་སྣོད་བཅུད་གཏོར་མར་བཤམས་ནས་བསྒྲུབས་ཀྱང་མཁའ་རྒྱུའི་ཡི་དྭགས་ཕྲ་མོ་འདྲ་མ་གཏོགས་སྐྱབས་ནུས་པའི་ལྷ་ཡེ་ཤེས་པ་ནི་ཐག་ཇེ་རིང་ལ་འགྲོ་བའི་རྒྱུར་གསུངས་པས་བདག་ལེགས་སུ་འདོད་ན་སྐྱབས་སུ་སོང་བ་ལས་བསླབ་བྱ་བསྲུང་བ་གལ་ཆེ། སྐྱབས་ཡུལ་གསལ་འདེབས་སྐབས། དབུས་སུ་བླ་མ་དང་གུ་རུ་གཉིས་མོས་གུས་གང་ལ་ཆེ་བའི་རྣམ་པ་དང་། མདུན་དུ་ཁྱད་པར་གྱི་སངས་རྒྱས་ཞེས། ཡི་དམ་གྱི་ལྷ་ནི་སྔགས་ཐུན་མིན་གྱི་སངས་རྒྱས་ཡིན་པས་ཐོད་ཕྲེང་རྩལ་ལྷ་བསྐྱེད་སྐབས་ལྟར། བྱང་སེམས་ཀྱི་གཙོ་བོ་སྤྱན་གཟིགས་སྒོམ་པ་ནི། ཁ་བ་ཅན་པ་ལ་འབྲེལ་ཆེ་བས་ཡིན། ཆོས་སྐྱོང་གཙོ་བོ་གཏེར་སྲུང་ཞལ་བཞི་པ། རིགས་དྲུག་གི་སེམས་ཅན་དལ་འབྱོར་མི་ལུས་ཀྱི་རྣམ་པ་ཅན་བསྒོམ་པ་ནི་སྐྱབས་འགྲོའི་རྣམ་འགྱུར་འོང་དགོས་ཆེད་ཡིན། ཐུན་མགོར་རྣལ་དབབ་ནས་བློ་ལྡོག་བཞི། མཐར་ངོ་བོ་བྱིན་རླབས་
ལ་རྣམ་པ་འོད་ཟེར་དཀར་པོ་འཕྲོས་པས་བདག་གཞན་རྣམས་ལ་ཕོག །སྒྲིབ་པ་བྱང་ནས་ཚོགས་ཞིང་ལ་ཐིམ་པ་ནི་དག་ཞིང་སྐྱེ་བའི་དོན་ཚང་། ཚོགས་ཞིང་བསྡུས་ནས་གཙོ་བོར་རང་ལ་བསྟིམ། བསྔོ་སྨོན། ཐུན་མཚམས་ཚོགས་ཞིང་སྔར་ལྟར་གསལ་ནས་རྒྱུ་གཉིས་དྲན། ཅི་ཟ་ཅི་འཐུང་གི་ཕུད་ཀྱིས་མཆོད། གོས་གསར་པ་སོགས་ཀྱང་མཆོད་ནས་དངོས་གྲུབ་ཞུ། འགྲོ་དུས་ཕྲག་གཡས་ཐད་དམིགས་ན་བསྐོར་བ་ཡིན། ཉལ་དུས་སྔས་མགོར་དམིགས་ནས་དྲན་བཞིན་གཉིད། ནང་པར་ལངས་མ་ཐག་གསལ་ཐེབས་ངེས་བྱ། རྒྱུན་དུ་ཉི་མ་དྲོ་བ་ཙམ་བྱུང་ཡང་དཀོན་མཆོག་གི་བཀའ་དྲིན་དུ་བསམ། ཚིག་མི་སྙན་པ་ཐོས་ཀྱང་ལས་ངན་ཟད་པའི་ཕྱིར་དཀོན་མཆོག་གི་ཕྲིན་ལས་ཡིན་སྙམ། སྐྱིད་སྡུག་གང་བྱུང་དང་། ཁྱད་པར་སྡུག་བསྔལ་ལམ་ཁྱེར་བྱས་པས་འཆི་ཁའི་ཉམ་ཐག་ལམ་ཁྱེར་ནུས་པ་དང་དཀོན་མཆོག་དྲན་པའི་རྒྱུར་འགྲོ་བ་སོགས་ཡོན་ཏན་མང་ངོ་། །དམིགས་སྐོར་ལྔ་པ་སེམས་བསྐྱེད། སྐྱབས་འགྲོ་སོང་མ་ཐག་ཡོད་དགོས་པའི་གནད་བླ་མ་བསྟེན་ནས་བཀའ་བཞིན་སྒྲུབ་དགོས་པ་ལ། བསྒྲུབ་རྒྱུ་སྤང་བླང་གཉིས་སུ་འདུས། དེ་དག་མཐར་ཕྱིན་པ་ལ། དགེ་བ་རྒྱ་ཆེན་པོ་ཞིག་སྒྲུབ་དགོས་པས་དགེ་བ་རྒྱ་ཆེན་པོར་འགྱུར་བྱེད་ཀྱི་ཐབས་ནི་སེམས་བསྐྱེད་ཡིན། དེས་ན་དེ་སྒྲུབ་པ་པོའི་རྟེན་དང་སྒྲུབ་རྒྱུའི་དགེ་བ་ཆེ་ཆུང་གིས་མ་ཡིན་ཞིང་བསམ་པ་ཀུན་སློང་རྒྱ་ཆེ་ཆུང་དབང་གིས་ཡིན། རང་རེས་དབང་ཞིག་ཞུས་ནས་ཡི་དམ་སོགས་མང་པོ་ལ་བརྩོན་པ་མདོ་སྔགས་ཀྱི་ཉམས་ལེན་ཁ་ཚང་ལྟ་བུར་འདུག་རུང་། མཐོ་རིས་ཀྱི་རྒྱུ་ཙམ་མམ། རང་ཉིད་ཐར་འདོད་ཙམ་ལས་མེད་ན་ཐེག་ཆེན་གྱི་དྲི་མི་བྲོ་བས། ཟན་གོང་གཅིག་སྟེར་བ་ཡན་ཆད་ལ་རང་འདོད་སྐད་ཅིག་ཙམ་མེད་པའི་བསམ་པ་འདི་འདྲ་བསམ་ན་ཐམས་ཅད་མཁྱེན་པའི་རྒྱུར་འགྲོ། སེམས་ཅན་གྱི་དོན་དུ་རང་ཉིད་སངས་རྒྱས་སྒྲུབ་པ་འདི་རང་དོན་འདྲ་ཞིག་ཡོད་ཀྱང་། དོན་ལ་རང་ངོས་ནས་སེམས་ཅན་གཅིག་གི་སྡུག་བསྔལ་བསལ་བ་ལ་མནར་མེད་དུ་བསྐལ་མང་གནས་དགོས་ཀྱང་སྤྲོ་བས་འཇུག་ནུས་པ་ལ་གཞན་ངོས་ནས་ཤིན་ཏུ་རིངས་པར་སངས་རྒྱས་འདོད་པ་ཞིག་
དགོས་ཏེ་སངས་རྒྱས་ཐོབ་ན་སེམས་ཅན་ཐམས་ཅད་ཀྱི་སེམས་ཀྱི་བྱེ་བྲག་སྐད་ཅིག་ལ་མཁྱེན། དེ་འདུལ་བའི་ཐབས་མཁྱེན། དེ་དུས་ལས་མི་ཡོལ་བར་འཇུག་ནུས་པའི་ཕྱིར། སེམས་ཅན་ལ་མཐའ་མེད་པས་ཁ་མི་བྲི་བ་ལྟར་སྣང་ཡང་སངས་རྒྱས་རྣམས་ཀྱིས་སྤྱན་འབྱེད་བཙུམ་གཅིག་གི་ཡུན་ལའང་སེམས་ཅན་གྲངས་མེད་ཐར་ལམ་ལ་བཀོད་པ་ངེས་དོན་གྱི་སྡེ་སྣོད་དུ་མར་གསུངས་པ་ལྟ་བུའི་གཞན་དོན་ནི་རྒྱུན་མཐའི་སེམས་དཔས་ཀྱང་མི་ནུས་པ་རྒྱ་མཚོ་དང་བ་གླང་གི་རྨིག་རྗེས་ཀྱི་ཆུ་ཙམ་དུ་ཁྱད་ཡོད་པའི་ཕྱིར་བྱང་ཆུབ་ཆེན་པོ་སྒྲུབ་དགོས་ཤིང་། དེ་ལ་ཐོག་མར་བྱང་ཆུབ་ཀྱི་སེམས་རང་རྒྱུད་ལ་སྐྱེ་བ་གལ་ཆེ། འདི་མ་སྐྱེས་པའི་དགེ་བ་རྒྱ་ཆེན་ལོ་ཟླ་མང་པོ་སྒྲུབ་པ་ལས་འདི་དང་ལྡན་པའི་དགེ་བ་སྐད་ཅིག་ཙམ་སྒྲུབ་པ་རྒྱ་ཆེ་ཞིང་། སེམས་ཅན་དམན་པ་སུའི་རྒྱུད་ལ་སེམས་འདི་སྐྱེས་ཀྱང་ཁམས་གསུམ་གྱི་མཆོད་གནས་སུ་འགྱུར་ལ། དེ་འདྲའི་སེམས་ཅན་ངོས་བཟུང་ན། མཁའ་མཉམ་སེམས་ཅན་ཐམས་ཅད་ཀྱི་དོན་དུ་རང་ཉིད་སངས་རྒྱས་ཀྱི་གོ་འཕང་ཐོབ་འདོད་ནི་སྨོན་སེམས། དེའི་ཆེད་དུ་དགེ་བ་རྒྱ་ཆེར་སྒྲུབ་པ་ལ་འཇུག་འདོད་ནི་འཇུག་སེམས། དེ་ཡང་དམིགས་ཡུལ་སེམས་ཅན་ཚད་མེད་ལ་དམིགས་པས་ཡུལ་གྱི་སྒོ་ནས་དང་། སྐྱོན་ཟད་ཡོན་ཏན་ཀུན་རྫོགས་སངས་རྒྱས་ཀྱི་ཤེས་རབ་ཕུང་པོ་ལྟ་བུ་གཅིག་ལའང་ཚད་བཟུང་དུ་མེད་པས་ཐོབ་བྱའི་སྒོ་ནས་སེམས་འདི་རྒྱ་ཆེ་བ་ཡིན། དེ་རང་རྒྱུད་ལ་མ་སྐྱེས་པ་སྐྱེ་བའི་རྒྱུ་དང་། སྐྱེས་པ་གོང་འཕེལ་དུ་འགྲོ་བའི་བོག་འདོན་གཉིས་ཀ་ཚད་མེད་བཞི་ལ་བློ་སྦྱོང་དགོས་པས། དང་པོ་སྦྱང་ལུགས། ཚད་མེད་ཅེས་གསུངས་པས་ཕ་མ་ལྟ་བུ་རིས་ཆད་མ་ཡིན་པར་སེམས་ཅན་ཐམས་ཅད་ལ་དགྲ་གཉེན་རིས་སུ་མ་ཆད་པ་སེམས་སྙོམས་དགོས། རྒྱུ་མཚན་རང་ངོས་ནས་བདེ་བ་འདོད་པ་དང་སྡུག་བསྔལ་མི་འདོད་པ་ཐམས་ཅད་མཉམ། རང་ངོས་ནས་སྤྱིར་དགྲ་གཉེན་བར་མ་ཡོད་པ་ལྟར་སྣང་ཡང་། བརྟགས་ན་ཚེ་སྔ་ཕྱི་ཙམ་མ་ཟད། ལོ་ཟླའི་སྟོད་སྨད་ལའང་དགྲས་གཉེན། གཉེན་གྱིས་དགྲ་བྱེད་པ་སོགས་བློས་འཛིན་ཚུལ་ཙམ་མ་གཏོགས་དོན་ལ་ངེས་པ་མེད་ཐག་ཆོད་ནའང་། ད་དུང་མི་འདི་ནི་དགྲ་འདི་ནི་གཉེན་ཞེས་བཟང་མདོག་བྱས་པས་
ཆགས་སྡང་སོགས་ལས་ངན་བསོགས་པའི་སྐྱོན་མ་གཏོགས་དགོས་པ་མེད་ངེས་ཡིན་པས་ཐམས་ཅད་ལ་མཉམ་པའི་བློ་ཨི་སྐྱེ་བལྟ། དང་པོ་བར་མ་ཞིག་ལ་བློ་སྦྱོང་ན་སྐྱེས་སླ། མཐར་སེམས་ཅན་ཐམས་ཅད་ལ་བློ་སྦྱོང་ནས་ཚད་མེད་ཕྱི་མ་གསུམ་ལ་གོ་རིམ་མཐའ་གཅིག་ཏུ་མ་ངེས། བདེ་བ་དང་མི་ལྡན་པའི་སེམས་ཅན་ལ་དམིགས་ནས་བདེ་བ་རྒྱུ་འབྲས་དང་ལྡན་ན་སྙམ་པ་བྱམས་པ། སྡུག་བསྔལ་ཅན་རྣམས་སྡུག་བསྔལ་རྒྱུ་འབྲས་དང་འབྲལ་འདོད་སྙིང་རྗེ། ད་ལྟར་བདེ་བ་རྒྱུ་འབྲས་ལ་སྤྱད་དུ་ཡོད་པ་ལ་དམིགས་ནས་དགའ་བ་བསྒོམས། སྒོམ་ལུགས་ད་ལྟའི་མ་འདི་རང་ལ་ཆེས་ཡིད་དུ་འོང་ཞིང་བློ་འདི་དག་ངམ་ངམ་ཤུགས་ཀྱིས་འབྱུང་བས་སེམས་ཅན་ཐམས་ཅད་ལའང་རང་གི་མ་ཡིན་པ་དང་། དེ་དག་དྲིན་ཆེ་བ་དང་། དྲིན་ལན་བསབ་དགོས་པར་བསམ་ན་ཚད་མེད་སྐྱེས་སླ། མ་ཡིན་ཚུལ་ཤེས་པ་ལ། རང་གི་སྐྱེ་བ་ལ་ཐོག་མ་མེད་པས་གྲངས་མ་མཆིས། དེ་དག་གི་སྐྱེ་བ་ཕལ་ཆེ་བ་མངལ་སྒོང་ཡིན་པས་ཕ་མ་ལ་བརྟེན། ཕ་མ་གཅིག་ཁོ་ན་ལན་གྲངས་བརྒྱུད་ནས་བྱེད་མི་ཤེས་པས་ཕ་མ་ལ་གྲངས་བཟུང་དུ་མེད་པ་ཤེས་དགོས། འདི་ལ་ཡིད་མི་ཆེས་པ་སྐྱེ་བ་འདིའི་ཕ་མ་ནི་འདིའོ་ཞེས་རང་ཅག་གིས་མ་གོ་བས་ཡིན་མོད། ཕ་མ་ཙམ་མ་ཟད་སེམས་ཅན་གཅིག་གི་ཁམས་དབང་བསམ་པ་ཅིག་ཆར་ཐམས་ཅད་མཁྱེན་པ་དེས་ལན་དུ་མར་སྡེ་སྣོད་རྣམས་སུ་གསུངས་པ་ལ་ཡིད་ཆེས་བསྐྱེད། རང་མགོ་རང་གཡོགས་ཀྱིས་ཐེག་ཆེན་པར་འགྱུར་དཀའ་བས་འདི་དག་ཞིབ་ཏུ་སྦྱངས་ནས་བསམ། དྲིན་དྲན་པ། བུའི་ཆེད་དུ་ཁྲེལ་སྡིག་གཏམ་ངན་ལ་མ་འཛེམ་པར་ཟས་གོས་ནོར་རང་གིས་སྤྱད་མི་བྲ་བ་དག་ཀྱང་བུ་རྒྱུད་ཀྱི་ལག་པར་སྟེར་བ་ལ་ཕངས་སེམས་སྤུ་ཙམ་མི་བྱེད་དེ་ད་དུང་འདི་ལས་ཆེ་བ་ཞིག་རྙེད་ཀྱང་སྟེར་སྙམ་པ་དང་། གཅན་ཟན་གདུག་པ་ཅན་གྱི་རིགས་ཡིན་ཀྱང་རང་གི་ཤེས་ནུས་ཅི་ཡོད་ཀྱིས་ཕན་མ་བཏགས་པ་གཅིག་ཀྱང་མེད། དྲིན་གཟོ་བ། དྲིན་ལན་མ་སོད་ན་ཆོས་སུ་མ་ཟད་འཇིག་རྟེན་ན་ཡ་རབ་ཀྱི་ལུགས་ཙམ་ཡང་མི་འགྱུར། དྲིན་གསོ་ལུགས་ཀྱང་། སྡིག་ཟས་ཀྱིས་མཚོར་འཇུག་པ། ཕ་མའི་ཆེད་དུ་རང་གི་ཆོས་སྐལ་བཅད་པ་སོགས་ཀྱི་དྲིན་ལན་ལོག་འཇལ་ལག་སྦྲེལ་གཡང་མཆོང་དང་
འདྲ། སྟོན་པ་ཉན་ཐོས་ཀྱི་འཁོར་དང་བཅས་པ་སུམ་ཅུ་རྩ་གསུམ་ན་དབྱར་ཟླ་གསུམ་དུ་ཆོས་གསུངས་པ་མ་ལ་དྲིན་ལན་བསབས་པ་ཁོ་ནའི་ཆེད་ཡིན་པས། འཁོར་བའི་བདེ་བས་ཕན་ཐོགས་ན་བཅོམ་ལྡན་འདས་རྒྱལ་སྲིད་བཟུང་ནས་ཕ་མ་བསྐྱང་རིགས་ཀྱི་རབ་ཏུ་བྱུང་མི་རིགས། དེས་ན་ཕར་ལ་ཡང་ཤེས་ནུས་ཅི་ཡོད་ཀྱིས་ཕན་བཏགས་དགོས་དུས། ད་ལྟར་ལུས་རྟེན་དང་སེམས་རྟེན་གཉིས་ཀ་སེམས་ཅན་ཐམས་ཅད་ལ་ཕན་ཐོགས་ནུས་པའི་སངས་རྒྱས་ཀྱི་གོ་འཕང་སྒྲུབ་ནས་ཡོད་པའི་སྐབས་འདིར་ཕན་བྱེད་ཀྱི་ཐབས་མཆོག་ཏུ་གྱུར་པ་སྒྲུབ་ན་ལེགས། དེ་ཡང་ཆོས་སྒྲུབ་ཙམ་ནས་ཟས་གོས་སྟེར་བ་ལྟ་བུ་དངོས་སུ་ཕན་མི་ནུས་ཀྱང་། ཕ་མ་ལ་འབྲེལ་ཤིན་ཏུ་ཆེ་བའི་ཕྱིར་སངས་རྒྱས་ཐོབ་པ་ན་འབྲེལ་གང་ཆེ་སྔོན་དུ་གདུལ་བྱར་འགྱུར་བ་ཡིན། དེ་ལྟར་སྦྱངས་པས་སེམས་ཅན་རྣམས་གཅེས་པ་ལ་འཕང་པའི་རྣམ་པ་ཅན་དུ་མཐོང་བའི་ཡིད་འོང་བྱམས་པ་རྒྱུད་ལ་སྐྱེས་པ་དེའི་ཚེ་བྱམས་སྙིང་སོགས་ལ་བློ་སྦྱོངས་དགོས། དེའི་ཚུལ་ཡང་། ཕན་བྱེད་བདེ་བ་རྒྱུ་འབྲས། གནོད་བྱེད་སྡུག་བསྔལ་རྒྱུ་འབྲས་ཡིན་པས་བདེ་བ་དང་ལྡན་འདོད། སྡུག་བསྔལ་དང་བྲལ་འདོད་ཀྱི་བློ་དང་། དེའི་ཐབས་རང་གིས་བྱ་བསམ་པའི་འདུན་པ་ནི་བྱམས་སྙིང་རྗེ་གཉིས་ཡིན་པས་དགྲ་གཉེན་གང་རུང་གི་སེམས་བྱེ་བྲག་པ་དམིགས་ཡུལ་ཟུར་དུ་བཀར་ནས། མི་དགེ་བ་བཅུ་སོགས་དང་འབྲས་བུ་མནར་མེད་ནས་ཤེས་སྒྲིབ་ཕྲ་བ་དང་། ཡིད་འདུས་བར་སྡུག་བསྔལ་རྒྱུ་འབྲས་ཕྲ་རགས་དང་། དགེ་བ་ཕྲ་མོ་དང་། ཡིད་བདེ་ཙམ་ནས་ཟག་མེད་ཀྱི་དགེ་བ་དང་། སངས་རྒྱས་ཀྱི་བདེ་བའི་བར་བདེ་བ་རྒྱུ་འབྲས་ཕྲ་རགས་རྣམས་འདི་དང་འདི་ཞེས་ངོས་བཟུང་བའི་སྒོ་ནས་བསྒོམ། དེ་བསྒོམ་པས། དང་པོ་འདུན་པ་ཙམ་རེ་འབྱུང་། དེ་ནས་ཉེས་བྲལ་ལེགས་འབྱུང་དེ་བདག་གིས་བྱའོ་སྙམ་པ་དང་། མཐར་གཞན་ལ་མི་ལྟོས་རང་ཉིད་གཅིག་པུས་སྒྲུབ་སྙམ་པའི་བློ་བཅོས་མིན་སྐྱེས་འོང་དེ་ལ་ནི་ལྷག་བསམ་ཟེར། བློ་དེ་འབྱོངས་ཚེ་དེ་འདྲའི་ནུས་པ་ད་ལྟ་རང་ལ་མེད་པ་དང་། སངས་རྒྱས་ལ་ཡོད་པར་མཐོང་ནས་གཞན་དོན་སངས་རྒྱས་ཐོབ་འདོད་ཀྱི་སྨོན་སེམས་བསྐྱེད། དེའང་རྒྱུ་མེད་རྐྱེན་མེད་ལས་མི་སྐྱེ་ཞིང་། བསགས་
སྦྱང་རྒྱ་ཆེན་པོ་ལ་འཇུག་དགོས་པར་ཤེས་པས་འཇུག་སེམས་བསྐྱེད། སྔར་སྐྱབས་ཡུལ་མ་བསྡུས་པ་འམ་བསྡུས་ཀྱང་སེམས་བསྐྱེད་ཀྱི་དཔང་པོ་སྐྱབས་ཡུལ་ལྟར་གསལ་ནས་སེམས་དེ་གཉིས་ལ་བསླབ་ཅེས་དམ་བཅའ་བ་ནི་སྡོམ་བཟུང་དང་བྱང་ཆུབ་ཀྱི་སེམས་ཆོ་གས་བཟུང་བ་ཡིན། སེམས་བསྐྱེད་འདི་ནི་ཡིད་འཁུལ་བ་གལ་ཆེ་ཕྱིར་བློ་༼སྦྱང་༽བ་ལས་འདོན་པ་གྲངས་གསོག་པ་གལ་ཆུང་། ཇོ་བོའི་རྣམ་ཐར་ལས་བླ་མ་གསེར་གླིང་པའི་བསྟོད་བསྔགས་གསུངས་པ་ལྟར་རང་རེ་རྣམས་ཀྱི་རྒྱུད་ལ་དང་པོ་ནས་མཐོན་པོ་མ་སྐྱེ་མ་ཐུབ་ཀྱང་། ཆོས་ཀྱི་རྩ་བ་བསམ་པ་བཟང་པོ་ཡིན། ཆོས་ཀྱི་འཇུག་སྒོ་རྣམ་དག་ཐོས་པ་ཡིན། སོགས་ལྟར་བསམ་པ་བཟང་པོ་སྣ་རེ་སྐྱེ་བ་གལ་ཆེ། དེ་ལའང་རྒྱ་ཆེ་ཆུང་མང་བས། ཁྱིམ་དང་གྲོགས་སོགས་རིས་སུ་ཆད་པའི་བསམ་བཟང་ནི་ཆགས་སྡང་ཡིན་པས། སྙིང་རྗེ་དང་ཆགས་པ། དད་པ་དང་དགའ་བ་རྣམས་བློའི་རྣམ་པ་ཙམ་འདྲ་བས་ནོར་པས་ཆེ། བསམ་པ་བཟང་པོ་སྣ་གཅིག་མ་སྐྱེས་བཞིན་བྱང་སེམས་དུ་ཁས་འཆེ་བ་ནི་ཕོ་ཤེད་ཀྱི་བྱང་ཆུབ་སེམས་དཔའ་ཡིན། བྱང་ཆུབ་སེམས་རྒྱུད་ལ་སྐྱེས་པའི་རྗེས་ཚད་མེད་བཞི་ལ་བློ་སྦྱོང་ན་གོང་འཕེལ་དུ་འགྲོ་བས་བདེ་སྡུག་གཏོང་ལེན་ལ་བསླབ། འདི་ལ་བྱམས་དང་སྙིང་རྗེའི་ཉམས་ལེན་གྱི་གནད་ཚང་བ་ཡིན་ལ། དེའི་ཚུལ། འཇིག་རྟེན་འདིར་སྡིག་དང་སྡུག་བསྔལ་སོགས་མི་ཉན་སྣ་དགུ་ཐམས་ཅད་ང་ཞེས་བདག་གཅེས་པར་འཛིན་པའི་བློ་ལས་འབྱུང་། བདེ་སོགས་ལེགས་དགུ་ཐམས་ཅད་སེམས་ཅན་གཅེས་པར་འཛིན་པ་ལས་འབྱུང་བ་ནི། སྟོན་པ་སངས་རྒྱས་ཐོག་མར་རང་རེ་རྣམས་དང་ཁྱད་མེད་པ་ལ་རང་ཅག་གིས་རང་གཅེས་འཛིན་དོར་མ་ཐུབ་པས་ད་དུང་འཁོར་བ་ལས་མ་ཐར་ཞིང་སྡུག་བསྔལ། སྟོན་པས་རང་ཡལ་བར་དོར་ཏེ་སེམས་ཅན་གཅེས་འཛིན་ལ་བསླབ་པས་ཐམས་ཅད་ཀྱི་སྐྱབས་གནས་སུ་གྱུར་པ་ཡིན། རང་རེས་གཅེས་འཛིན་བྱས་པའི་ཡུན་ཙམ་དུ་སེམས་ཅན་ལ་སྤོ་ཐུབ་ན་གནའ་སྔ་ནས་སངས་རྒྱས་ཚར་ངེས། དེ་འདྲའི་ཕན་ཉེས་ལ་བསམ་ནས་བློ་སྦྱོང་དགོས། གཏོང་ལེན་དབུགས་འཇུག་དང་སྦྱར་བ་འདི་བྱམས་པ་སྙིང་རྗེ་སོ་སོར་མྱོང་བ་ཐོན་ནས་གོམས་པས་དབུགས་ཐེངས་རེ་ལ་ཉམས་
ལེན་ཚར་རེ་འགྲོ་བའི་ཆེད་ཡིན་པས། ལས་དང་པོ་པས་མོས་པ་ཙམ་ཡིན། དེའི་ཚུལ་དབུགས་ཕར་གཏོང་དུས་རང་གི་ལུས་ལོངས་སྤྱོད་དུས་གསུམ་གྱི་དགེ་རྩ་བཅས་དབུགས་དང་འགྲོགས་ནས་སེམས་ཅན་ཐམས་ཅད་ལ་ཕོག །རྒྱལ་བ་སྲས་བཅས་ཀྱི་བྱིན་རླབས་བདེན་མཐུས་སེམས་ཅན་རེ་རེ་བཞིན་བདེ་བ་རྒྱུ་འབྲས་གང་དང་གང་གིས་ཕོངས་པ་དག་ཟག་བཅས་ཟག་མེད་ཀྱི་བདེ་བ་མཐའ་ཡས་ཐོབ་པར་བསམ། ཚུར་རྔུབ་དུས། སྡུག་བསྔལ་ཕྲ་རགས་རྒྱུ་འབྲས་དང་བཅས་པ་རང་ལ་ཐིམ་པས་སེམས་ཅན་ཐམས་ཅད་སྡུག་བསྔལ་དང་བྲལ་སོང་སྙམ་པའི་དགའ་བ་བསྒོམ་སྦྲག་མ་ལན་ཉེར་གཅིག་ཡན་ཆད་ཅི་ལྕོག་བྱ། མཐར་མི་དམིགས་པར་བཞག །ཐུན་མཚམས་རྫོགས་བྱང་ཐོབ་འདོད་ཀྱི་བློ་དང་མི་འབྲལ་ཞིང་། སེམས་ཅན་གང་མཐོང་དམིགས་ཡུལ་བཟུང་བའི་བྱམས་སྙིང་རྗེ་བསྒོམ། གསོག་པ་སྡིག་ཕྱོགས་སུ་གཏོགས་པ་སོགས་སྡུག་བསྔལ་གྱི་རྒྱུ་ལ་སྤྱོད་པ་རྣམས་ལ་ལྷག་པར་བློ་སྦྱོང་། བདེ་བ་སྣ་གཅིག་ཡོད་པ་ལ་དགའ་བ་བསྒོམ་པ་སོགས་མི་བརྗེད་པར་བྱ། ཐུན་རེའམ་ཉིན་རེ་བཞིན་སྤང་བླང་གནད་སོང་མ་སོང་བརྟག །བསླབ་བྱ་ཡང་རྩ་བའི་བསླབ་བྱ་མ་ཉེས་ན་ཉེས་པ་གཞན་ཁེག་སླ་བས། སྨོན་སེམས་དངོས་སུ་བཏང་བའམ། སེམས་ཅན་གང་རུང་བློས་བཏང་བ་སྤང་། ཁམས་གསུམ་གྱི་སེམས་ཅན་དུས་གཅིག་དུ་བསད་པ་ལས་སྨོན་སེམས་བཏང་བའི་ཉེས་པ་ལྕི་བ་གསུངས་པས་གཟབ། སྤྱོད་པའི་གཙོ་བོ་ཕྱིན་དྲུག་ཉམས་ལེན་བྱ་བ་སྟེ། དེ་ཡང་རྫོགས་བྱང་གི་རྒྱུར་འགྲོ་བའི་དགེ་བ་གང་བྱས་ལ་ཕྱིན་དྲུག་ཚང་དགོས། ཕྱག་འཚལ་བ་ལྟ་བུ་ལ་མཚོན་ན། མཇུག་གི་བསྔོ་བ་དང་། བླ་མས་གསུངས་པ་ལྟར་བསྒྲུབ་པ་བཀའ་བཞིན་སྒྲུབ་པའི་མཆོད་པ་སྟེ་སྦྱིན་པའི་མཆོག །བསམ་སྦྱོར་གཉིས་ཀར་ལོག་པའི་སྐྱོན་རྣམས་སྤོང་བའི་སེམས་པ། དཀའ་ཚེགས་འདི་དོན་དང་ལྡན་ནོ་སྙམ་དུ་མི་བཟོད་པ་སྤང་བ་སྤྲོ་བཞིན་པས་འཇུག་པ། དཀོན་མཆོག་གི་ཡོན་ཏན་སྙིང་ནས་དྲན་པ་ལ་སེམས་རྩེ་གཅིག་ཏུ་གཏད་ཅིང་ལུས་ངག་དེའི་རྗེས་སུ་འགྲོ་བ། དེ་དག་བདག་མེད་རྟོགས་པའི་ཤེས་རབ་འཁོར་གསུམ་རང་ངོས་ནས་མ་གྲུབ་ཀྱང་མེད་བཞིན་སྣང་བ་ལ་བློ་བཞག་པའམ། སྤང་བླང་གི་མཚམས་ཕྱེད་
པས་འཚོལ་བ་ཤེས་རབ་སྟེ། དེ་དག་བྱང་ཆུབ་སེམས་ཀྱིས་རྩིས་ཟིན་ན་ཕ་རོལ་ཕྱིན་དྲུག་མཚན་ཉིད་པ་ཡིན་པས། མ་ཎི་རྡོག་གཅིག་འདོན་པ་ཡན་ཆད་ལ་ཚང་དགོས། ཐུན་མིན་གྱི་སྔོན་འགྲོ། མདོ་དང་ཐུན་མིན་སྔོན་འགྲོ་ལ་གསུམ་ལས་དམིགས་སྐོར་དང་པོ་ནི། སྐྱབས་འགྲོའི་ཉམས་ལེན་བསགས་སྦྱང་གཉིས་སུ་འདུ་བའི་ཐོག་མར་སྒྲིབ་སྦྱང་གཙོ་ཆེ་སྟེ། རང་གི་སེམས་འདི་ཚེ་འདི་སྣང་ཕྱོགས་ལ་བསྐོར་ན། ཤེས་སླ་འགྲུབ་སླ། དཀའ་ཚེགས་མེད་ཅིང་། དགེ་བའི་ཕྱོགས་ལ་བསྐོར་ན་ཆོས་ལན་བརྒྱར་ཞུས་ཀྱང་གོ་ལོ་ཐོས་ལོ་ཙམ་ལས། ཉན་ན་མི་གོ །བསམ་ན་མི་ཤེས། བསྒྲུབ་ན་མི་འགྲུབ་པ་འདི་ཚོ་སྒྲིབ་པ་ཆེ་བའི་སྐྱོན་ཡིན་པས། དེ་སྦྱོང་དགོས། བཅུད་བླུག་པ་ལ་སྣོད་བཀྲུ་བཤལ་དང་འདྲ། དེ་ལ་གསུམ་ལས་སྦྱང་བྱ་ལ་སྡིག་ལྟུང་སྒྲིབ་པ་གསུམ་ཡོད་པའི་སྡིག་པ་ནི་སུས་སྤྱད་ཀྱང་ངན་སོང་གི་རྒྱུར་འགྲོ་བ་མི་དགེ་བཅུ་ལྟ་བུ། ལྟུང་བ་སྡོམ་ལྡན་གྱིས་སྤྱད་ན་ཉེས་པར་འགྱུར་བ། ཕྱི་དྲོའི་ཁ་ཟས། ཆོས་གོས་འབྲལ་ལྟུང་ལྟ་བུ། བྱང་སྔགས་གཉིས་ཀྱང་དེས་འགྲེས། སྒྲིབ་པ་ལ་གཉིས། གཙོ་བོ་ཐར་པ་ལ་བར་དུ་གཅོད་པའི་གེགས་ཉོན་སྒྲིབ། རྩ་བ་བདག་འཛིན་དང་དེ་ལས་བྱུང་བའི་རྩ་ཉོན་དང་ཉེ་ཉོན་ལྟ་བུ། གཙོ་བོ་ཐམས་ཅད་མཁྱེན་པ་ལ་གེགས་བྱེད་ཤེས་སྒྲིབ་གཟུང་འཛིན་གཉིས་སུ་སྣང་བ་དང་། གཉིས་སུ་འཛིན་པའི་རྟོག་པ་ཐམས་ཅད་དང་། དེ་དག་ཕྲ་རགས་ས་བོན་དང་བཅས་པ། སྦྱོང་བྱེད་ཀྱི་གཉེན་པོའི་ཐབས། སྟོབས་བཞིའི་བཤགས་སྡོམ་ལ་འདུ་བས་དང་པོ་གསུམ་སྔར་བྱས་ཀྱི་ཉེས་ལྟུང་དག་བྱེད་དང་། བཞི་པ། ཕྱིན་ཆད་ཉེས་པས་མི་གོས་པའི་ཐབས། དེ་ལས་ཀྱང་། དང་པོས་སྡིག་པའི་འཕེལ་སྐྱེད་བཅད་ཅིང་མགོ་སྨད། ཕྱི་མ་གཉིས་ཀྱིས་ཉེས་ལྟུང་དངོས་རྩར་ནས་འདག་པར་བྱེད། རྟེན་སྟོབས་གཉེན་པོ་ཀུན་སྤྱོད་ནང་འདུས་ཀྱང་ཟུར་དུ་བགྲང་བའི་དགོས་པ་འདི་མེད་ན་བྱིན་རླབས་མཐུ་ནུས་ཆུང་ཞིང་ཡོད་ན་གཉེན་པོ་སྟོབས་ལྡན་དུ་བྱེད་པ་ཡིན། སྟོབས་བཞི་ནི། སུན་འབྱིན་པའི་སྟོབས་ནི། ཐོག་མེད་ནས་བསགས་པའི་ཉེས་པ་གྲངས་མེད་ཅིང་ཚེ་འདིར་ཡང་བརྩི་མི་ཤེས་པ་ཞིག་བསགས་ཚར་བས་སྡིག་ལྟུང་སྣ་གཅིག་ལ་སྤྱད་པའི་འབྲས་བུ་ལ་བསམ་ན་ངན་སོང་
མཐའ་མེད་དུ་སྐྱེ་བའི་རྒྱུ་ཤ་སྟག་ཡིན་པ། ཀླུ་ཨེ་ལའི་འདབ་མ་ཅན་གྱི་གཏམ་རྒྱུད་ལྟ་བུའོ། །དེ་འདྲའི་ཉེས་པ་རྣམས་རྐྱེན་དང་སྟབས་ལེགས་ཉེས་ཀྱིས་སྒྲུབ་རྒྱུར་མ་སོང་ན་ལེགས། དེ་མིན་མ་བྱས་པ་སྣ་གཅིག་མེད་པ་འདི་མ་རུང་སྙམས་པའི་འགྱོད་པ་ཤུག་དྲག་བསྐྱེད་པ། རྟེན་གྱི་སྟོབས། སྐྱབས་སེམས་གཉིས་ཏེ། རང་གཞན་སེམས་ཅན་ཐམས་ཅད་ཀྱི་ཉེས་ལྟུང་དག་པའི་སྐྱབས་བླ་མ་རྡོར་སེམས་དབྱེར་མེད་ལ་ཞུ་བ་དང་དགེ་རྩ་རྒྱ་ཆེར་གཏོང་བྱེད་སེམས་བསྐྱེད་ཀྱིས་ཟིན་པ་གཉེན་པོ་ཀུན་སྤྱོད་ཀྱི་སྟོབས། སྤྱི་བོར་རྡོར་སེམས་སྔགས་ཕྲེང་དང་བཅས་པ་གསལ་བཏབ། ཡིག་བརྒྱ་གསོལ་འདེབས་ཀྱི་ཚུལ་དུ་བཟླས་མཐར་བདུད་རྩི་འབེབས་སྦྱོང་བྱ་བ། ཕྱིན་ཆད་སྡོམ་པའི་སྟོབས། འདི་མེད་ན་སྔར་བྱས་དག་ཀྱང་ཕྱིས་འབྱུང་ཉེ་བས་ད་ནི་ཉེས་པ་ལ་ཉེས་པ་མཐོང་བས་རགས་པ་དངོས་སུ་སྤྱད་པ་ལྟ་ཞོག །ཕྲ་བ་ཀུན་སློང་ཙམ་ཡང་མི་སྐྱེ་སྙམ་པའི་ཁ་ཙམ་མ་ཡིན་པའི་དམ་བཅའ་བརྟན་པོ་འགྱུར་ལྡོག་མེད་པ་ཞིག་བཟུང་བ་དེ་ལ་ཟེར། སྒྲིབ་སྦྱོང་སྡིག་ལྟུང་གི་གཉེན་པོར་འགྲོ་བའི་རེ་བ་ཡོད་ན་འདི་བཞི་མ་ཚང་ཐབས་མེད་ཡིན། སྦྱོང་ཚུལ་བསྒོམ་བཟླས། གདན་ཡན་ཆད་ལ་མཚོན་དོན་མེད་ན་བསྐྱེད་རིམ་གྱི་དྲི་མི་བྲོ་བས་སྤྱི་ལྟར་ལ། ཁྱད་པར། ཆོས་སྐུ་མཚོན་བྱེད་ཞལ་གཅིག །ཐབས་ཤེས་ཀྱི་ཕྱག་གཉིས། དེའི་རང་རྟགས་རྡོར་དྲིལ། ཞབས་གཡས་ཅུང་ཟད་བརྐྱང་པ་སེམས་སྐྱིལ། བླ་མའི་ཐུགས་རྣམ་ཀུན་མཆོག་ལྡན་གྱི་སྟོང་ཉིད་ཡུམ་གྱི་རྣམ་པར་ཤར་བ་སྙེམས་མ་དཀར་མོ། སྲིད་རྩ་གཅོད་བྱེད་གཡས་གྲི་གུག །སྒྲུབ་པ་པོ་ལ་དངོས་གྲུབ་སྩོལ་བྱེད་གཡོན་ཐོད་པ་བདུད་རྩི། སྙིང་ཁའི་རྡོ་རྗེ་ནས་ཙམ་དང་། ཧཱུྃ་ཡིག་ཡུངས་འབྲུ་ཙམ་གསུངས་ཀྱང་གསལ་ཅི་ཐེབས་དེ་ཉིད་ཐུགས་རྣམ་པར་མི་རྟོག་པའི་ཡེ་ཤེས་ཆེན་པོ་མཚོན། ཡིག་བརྒྱ་སྦྲུལ་འཁྱིལ་ལྟར་ གཡོན་བསྐོར་དུ 
་བཀོད་པ་རང་སྒྲ་བཅས། འབེབས་སྦྱང་སྔགས་བརྒྱ་སྐོར་རེའམ་ཐུན་མཐར་མགོ་མཇུག་མཉམ་དུ་དལ་བར་གཡས་སུ་འཁོར་ཞིང་། མཐར་མྱུར་དུ་འཁོར་བས་ངོ་བོ་ཐུགས་རྗེའི་ཡེ་ཤེས་ལ་རྣམ་པ་བདུད་རྩིའི་ཆུ་རྒྱུན་འོད་ཟེར་གྱི་རྣམ་པར་འཕྲོས་རང་གཞན་སེམས་ཅན་ཐམས་ཅད་ཀྱི་ལུས་ལ་ཞུགས་པས་སྒྲིབ་སྦྱོང་གི་དམིགས་པ་བྱེད་བཞིན་
བཟླས། མཐར་རང་ལ་བསྟིམ་ནས་སྦྱང་བྱའི་སྡིག་པ། སྦྱོང་བྱེད་རང་ཉིད། སྦྱོང་ཚུལ་གསུམ་མི་དམིགས་པར་བཞག །སྤྱིར་ཐུན་མཐའ་ཐམས་ཅད་དུ་མི་དམིགས་པར་བཞག་ཅེས་པ་སྔར་ཡོད་ཕྱིས་མེད་དུ་བསམ་པ་ལ་མི་གོ །ལྟ་བའི་རང་ས་ཟིན་ནས་མཉམ་པར་བཞག་པའི་ཚེ་རྟོག་པའི་དམིགས་པ་མེད་པ་ཟེར་དེ་འདྲའི་མཛུབ་མོ་འཛུགས་ས་རེ་ཡོད་ན་དེ་ལ་བཞགམེད་ན་རྗེས་སེམས་དངས་གསལ་མི་རྟོག་པའི་ངང་ལ་ཅི་གནས་རེ་བཞག་ན་དོན་དམ་རྟོགས་པའི་རྒྱུར་འགྲོ་ཞིང་། སེམས་ལས་སུ་རུང་བས་ཏིང་འཛིན་འགྲུབ་པའི་རྒྱུར་ཡང་འགྲོ་བ་ཡིན། ཐུན་མཚམས་སྤྱི་བོར་བླ་མ་བསྒོམ་བཞིན་པས་ཡིག་བརྒྱ་བཟླ་བའོ། །མཚན་འབུམ་རྒྱས་པའམ། བསྡུས་པ་གང་ལྕོག །སཙྪ་འདེབས་པ་སོགས་དགེ་བ་གང་བྱས་སྡིག་སྦྱོང་དུ་དམིགས་པ་ཐུན་དངོས་གཞིའི་བོག་འདོན་དུ་འགྲོ་བའི་ཐབས་ལ་འབད། དམིགས་སྐོར་གཉིས་པ་མཎྜལ། ཚོགས་བསོག་གི་སྒོ་ཁྱད་པར་ཅན་ཡིན་པས་འབུལ་ཡུལ་སྐྱབས་འགྲོའི་སྐབས་ལྟར་གསལ། སྒྲུབ་པའི་མཎྜལ་བཤམས་ན་ཚོམ་བུ་ལྔ་བཀོད་པ་དེར་དམིགས། མེད་ཀྱང་རུང་། མཎྜལ་གྱི་རྒྱུ་དང་། ཚོམ་བུ་རིན་ཆེན་སྨན་འབྲུ། དབྱར་ཁའི་མེ་ཏོག་སོགས་འབྱོར་བ་དང་བསྟུན། འབྲུ་སྨན་རིགས་གུར་གུམ། རྒ་སེར་ལྟ་བུ་ཚོན་གྱིས་བསྒྱུར། ལག་ཏུ་བཟུང་རྒྱུ་མ་འབྱོར་ན་ས་གཞི་བྱི་དོར་བྱས་པར་མེ་ཏོག་སོགས་བཀྲམ་པས་ཀྱང་དམིགས་རྟེན་རུང་། ཆག་ཆག་གི་རྒྱུ། བ་དམར་སེར་གྱི་མགྲིན་པར་དག་བྱེད་ཀྱི་རྫས་ཡོད་པར་གྲགས་པས་རི་མཐོ་ས་གཙང་གི་སྨན་རྩྭ་ཟོས་པའི་གཤང་གཅི་གཉིས། འོ་ཞོ་མར་དང་ལྔ་ལ་བ་བྱུང་དང་། ག་བུར་གུར་གུམ་སོགས་དྲི་བཟང་གི་རིགས་འདུ་བྱ། འབུལ་དུས་ཁ་ལག་དག་པར་དཀྲུས་ནས་མཎྜལ་ལག་གཡོན་གྱིས་བཟུང་བ། གཡས་པའི་མཁྲིག་མས་ཕྱི་བ་ནི་དེར་མངོན་ཤེས་འཆར་བའི་རྩ་ཡོད་པ་དག་ནས་ཁ་ཕྱེ་བས་མངོན་ཤེས་སོགས་ཡོན་ཏན་སྐྱེ་བའི་དགོས་པ་ཡོད། ཕྱི་དུས་ཆོས་ཀྱི་འགལ་རྐྱེན་སྤྱི་དང་ཁྱད་པར་སེམས་ཀྱི་གནས་ལུགས་བླ་མར་ངོ་སྤྲོད་ཀྱི་དོན་ལ་དོགས་པ་སྒྲིབ་བྱེད་ཀྱི་དྲི་མ་དག་པར་བསམ། དང་པོ་བ་བྱུང་དང་དེ་ནས་དྲི་བཟང་བྱུག །རྒྱས་པ་ཚོམ་བུ་སོ་བདུན། འབྲིང་ཉེར་གསུམ་ཆུང་བ་
བདུན་མ་ལས་འདིར་རྒྱས་བསྡུས་གཉིས་འབུལ་བའི་སྲོལ་ཡོད་པ། རི་རབ་ཀྱི་ངོས་དང་བང་རིམ་རྣམས་སུ་ལྷའི་གྲོང་ཁྱེར་འབྱོར་པ་དང་བཅས་པ་བསམ་ལས་འདས་པ། བྱང་གསེར། གླིང་བཞི་ཟླ་གམ། སོག་ཁ། ཟླུམ་པོ། གྲུ་བཞིའི་དབྱིབས། ལྷ་དང་མིའི་དཔལ་འབྱོར་སོགས་ཀྱི་སྐབས་ཚོམ་བུ་ཆེན་པོ་ཞིག་སྤུངས་དུས་སུམ་ཅུ་རྩ་གསུམ་གྱི་སྣོད་བཅུད་དང་མཚམས་རྣམས་སུ་ནོར་བུའི་རི། བདུད་རྩིའི་མཚོ། སྐྱེད་མོས་ཚལ་གྲངས་མེད་ཀྱིས་གཏམས་པ། དེ་དག་ད་ལྟར་དངོས་སུ་སྣང་བ་ལྟར་གྱི་སྣོད་བཅུད་ངན་པ་མ་ཡིན་པར་ལྷ་དང་མིའི་ཁྱད་པར་ས་དང་ནམ་མཁའ་ལ་གནས་པའི་ཁྱད་ཙམ་མ་གཏོགས་ལོངས་སྤྱོད་འབྱོར་བ་ལ་ཁྱད་མེད་ཅིང་བདེ་བ་ཅན་གྱི་སྣོད་བཅུད་ལྟ་བུས་གང་བར་བསམ་ཏེ་འབུལ། བསྡུས་པ་ལ། ཚོམ་བུ་བདུན་འགོད་པ་ཙམ་ལས་དམིགས་པ་ལ་རྒྱས་བསྡུས་མེད། དེ་དག་རྣམ་པ་ལྷ་མིའི་ཡོ་བྱད་ལ་ངོ་བོ་རང་གི་ལུས་ལོངས་སྤྱོད་དགེ་ཚོགས་རྣམས་ཡིན་པ་ངེས་པར་བསམ་དགོས། མཆོད་པ་ཐམས་ཅད་ལས་མཆོག་ཡིན་པའི་གནད་འདི་ལ་ཕལ་པོ་ཆེ་ལས་གསུངས་པའི་བླ་ན་ཡོད་མེད་གཉིས་དང་། སྤྱོད་འཇུག་ལས་བསྟན་པའི་བདག་པོས་ཡོངས་སུ་བཟུང་མ་བཟུང་གཉིས། ལུས་འབུལ་བ། བསྟོད་པ་དབྱངས་ཀྱི་མཆོད་པ་སོགས་ཐམས་ཅད་ཚངས་བས་ཡིན། བླ་མེད་ཀྱི་མཆོད་པ་སྤྲོ་ཚུལ། ཚོགས་ཞིང་རེ་རེའི་མདུན་དུ་ཡང་ཞིང་ཁམས་ཀྱི་བཀོད་པ་གྲངས་མེད་སྤྲུལ་ནས་འབུལ་དགོས་པ་ཡིན། དེ་ནི་ཕྱི་སྤྲུལ་སྐུའི་མཎྜལ། ལོངས་སྐུའི་མཎྜལ་ནི། ཚངས་པ་རྔ་སྒྲ་ཞེས་མི་མཇེད་ཀྱི་འཇིག་རྟེན་དང་བདེ་བ་ཅན་ཟེར་བ་ལྟ་བུའི་ལོངས་སྐུའི་ཞིང་གི་མིང་ཡིན་ལ་མདོ་ལས་སྟོང་གསུམ་གྱི་གྲངས་རྒྱ་ཇེ་ཆེར་བརྩི་ཚུལ་མང་དུ་ཡོད། སྟོན་པ་ལོངས་སྤྱོད་རྫོགས་སྐུའི་ཐུགས་ཡེ་ཤེས་རང་སྣང་གི་ཞིང་ཁམས་གཞལ་ཡས། སྟོན་འཁོར། མཆོད་སྤྲིན་འདོད་རྒུ་འབྱུང་བ་རྣམས་ཐིག་ལེ་ཐིན་ཕྲན་ཞེས་རྒྱུ་མིང་འབྲས་བཏགས་མཛད་པའི་དགོས་པ་ལམ་པའི་ཉམས་ལེན་གྱི་འོད་གསལ་གྱི་སྣང་ཆ་གོང་དུ་འཕེལ་ནས་དེ་དང་དེར་རྫོགས་པ་ལ་དགོངས། ཆོས་སྐུའི་མཎྜལ། དབྱིངས་ཀ་དག་སྟོང་པ་ཆེན་པོ་དང་། ཡེ་ཤེས་དྲི་བྲལ་གྱི་རིག་པ་ཟུང་དུ་འཇུག་པ་དེ་ཉིད་སྒྲིབ་པ་ཡེ་བྱང་། ཡོན་ཏན་ཡེ་ཆུབ། བེམ་སྟོང་
ལྟ་བུ་མ་ཡིན་པས་སེམས་ཞེས་གསུངས། དེ་ལ་ཞིང་གི་མིང་འདོགས་པ་ནི་སངས་རྒྱས་ཐམས་ཅད་གཞུགས་གནས་ཀྱི་སྙིང་པོ་དེའི་ངང་ལས་དུས་གསུམ་ཆ་གཡོས་མི་གཡོ་གཡོ་བར་མི་འགྱུར་བའི་ཕྱིར་རོ། །འབུལ་ཚུལ་ཀ་དག་ཅེས་འཁོར་གསུམ་གྱི་དམིགས་པ་ཡེ་ནས་མ་གྲུབ་ཅིང་ལམ་པའི་གང་ཟག་གིས་གསར་དུ་རྩོལ་རྟོག་མེད་པར་ཡེ་དག་ཡེ་གྲོལ་གྱི་དགོངས་པ་ཀློང་གཅིག་ཏུ་མཉམ་པར་བཞག་པའི་སྒོ་ནས་འབུལ་བ། འདི་གསུམ་རེས་འཇོག་མ་ཡིན་པ་ནི་དཔལ་སྤྲུལ་རིན་པོ་ཆེས། སྣང་ཚུལ་སྤྲུལ་སྐུའི་མཎྜལ། གནས་ཚུལ་ལོངས་སྐུའི། ཁྱབ་བྱེད་ཆོས་སྐུའི་མཎྜལ་ཞེས་རྡོ་རྗེའི་གསུང་སྟེ། དང་པོ། སེམས་ཅན་སྤྱི་མཐུན་གྱི་སྣང་བ་ལྟར་གཙོར་བཟུང་ནས། རི་གླིང་སོགས་མང་པོར་སྤྲུལ་ནས་འབུལ། གཉིས་པ་དེ་དག་ལ་ལོངས་སྐུའི་བཀོད་པས་མ་ཁྱབ་པ་སྐྲའི་རྩེ་མོ་ཙམ་མེད་པས་སྣང་དུས་ནས་གར་ཡང་མ་སོང་། གཞི་གཅིག་ལ་འདུ་ཡང་གོ་ས་ན་མི་ཤོང་བའང་མེད་པའི་གནས་ཚུལ་ཤེས་ནས་དེ་འབུལ་བ་ཡིན། གསུམ་པ། ཁྱབ་བྱེད་ཅེས། རིག་པ་བྱང་ཆུབ་ཀྱི་སེམས་དེ་ཉིད་འཁོར་འདས་ཐམས་ཅད་ཀྱི་སྲོག་གམ་རང་བཞིན་ཡིན་པས་གནས་སྣང་གཉིས་ཀའི་ངོ་བོ་དབྱིངས་རིག་ཟུང་འཇུག་གི་ངང་ལས་ཅུང་ཟད་འདའ་མ་མྱོང་བས་དེའི་ཚུལ་རྟོགས་ནས་འབུལ་བའོ། །དེ་དག་ཀྱང་དཔེར་ན་ཆུ་གཅིག་ལ་མཐོང་ཚུལ་སྣ་ཚོགས་སྣང་ཡང་བདུད་རྩི་མཐོང་ཚེ་ཆུ་མེད། ཆུ་མཐོང་ཚེ་གཞན་ག་ཤེད་ན་སོང་བ་མིན་ཡང་རང་རང་གི་སྣང་ཚུལ་གོ་མ་འགགས་པ་ཡོད་ཆོག་པ་ལྟ་བུའོ། །སྤྱིར་མཎྜལ་འདི་ཞིང་སྦྱོང་གི་ཉམས་ལེན་ཡིན་པས། དང་པོ་སྤྲུལ་སྐུའི་མཎྜལ་ལ་བརྩོན་ན་སྒྲིབ་པ་དག་རིམ་བཞིན་དག་སྣང་ཇེ་འཕེལ་འགྲོ་བ། བླ་མ་གོང་མ་རྣམས་ཀྱིས་ཞིང་ཁམས་མང་པོ་གཟིགས་པའི་ལོ་རྒྱུས་བཞིན། དེ་ལ་མཎྜལ་སྐུ་གསུམ་གྱི་ཚུལ་དུ་ཕུལ་བས། མ་འོངས་པ་ན་སྐུ་གསུམ་གྱི་ཞིང་ལ་དབང་བའི་རྒྱུར་འགྲོ་བ་འོད་དཔག་མེད་པས་ལམ་དུས་སུ་ཞིང་སྦྱོང་མཛད་པ་ལྟ་བུ་ཡིན། མཐར་ཚོགས་ཞིང་བསྡུས་ནས་ཧཱུྃ་ཡིག་རྣམ་པ་རང་ལ་བསྟིམ་པ་ནི། ཧཱུྃ་ཡིག་དེ་བསྡུ་བའི་ཡི་གེ་ཡིན་པ་དང་། ཐུགས་ཀྱི་ས་བོན་ཡིན་པས་ཚོགས་ཞིང་གི་ཐུགས་རྒྱུད་ཀྱི་བྱིན་རླབས་རང་ལ་བསྡུ་བའི་དོན་ཡིན། ཐུན་མཚམས་ཚོགས་
བསགས་ལ་གཙོ་བོར་བཟུང་། དེའི་སྒོ་ཤིན་ཏུ་མང་བས་མཆོད་པ་འབུལ་བ་སོགས་གང་ཡང་ཚོགས་ངན་གྱི་རྒྱུར་མི་འགྲོ་ཞིང་ཚོགས་རྫོགས་པའི་ཐབས་ལ་སྒོ་ཀུན་ནས་འབད། སྤྱི་སངས་རྒྱས་ལ་དམིགས་ནས་མེ་ཏོག་གཅིག་ནམ་མཁའ་ལ་གཏོར་བ་ལའང་དགེ་རྩ་ཚད་མེད་པ་སྙིང་རྗེ་པད་དཀར་ལས་གསུངས་པས་ན། དཔེར་ན་ཞིང་ས་བཟང་པོ་ལོ་གཅིག་རྨོ་མ་གྲུབ་ན་བློ་འགྱོད་ཚར་བྱེད་དགོས་ནའང་གྱོང་ཆུང་ལ། ཚོགས་ཀྱི་ཞིང་ཡོད། ཚོགས་བསགས་པའི་སྒོ་ཚང་། ལུས་རྟེན་དང་ཡོ་བྱད་འཛོམ་པའི་དུས་འདིར་སངས་རྒྱས་ཀྱི་ཡོན་ཏན་རྒྱ་མཚོ་ལྟ་བུ་འབྱུང་བའི་ཞིང་ཁྱད་པར་ཅན་ལ་ཚོགས་བསགས་བྱེད་པའི་སྒོ་ནས་བེད་མ་ཆོད་ན་གྱོང་ཤིན་ཏུ་ཆེ་བ་ལ་གཟབ་དགོས་ཚོད་འདུག་རུང་། འབྲུག་པ་ཀུན་ལེགས་ཀྱིས་ཆུ་ཆེ་ཆུང་ལ་ལྷམ་ཕུད་ཚུལ་གྱི་ལོ་རྒྱུས་ལྟར་རང་རེའི་བསམ་སྤྱོད་ཐམས་ཅད་གོ་ལོག་ནས་དོན་ཆེ་ཆུང་ནོར་འདུག་པས། ཟས་གོས་ལ་བག་མེད་དུ་སྤྱོད་པ་ནི་ཁེ་ཆུང་ལ། ལུས་ལོངས་སྤྱོད་བསགས་སྦྱང་གིས་བེད་ཆོད་ན་སྙིང་པོ་མེད་པ་ལ་སྙིང་པོ་ལེན་པ་ཡིན་པས་ཆུད་ཟོས་སུ་མ་སོང་བ་ལ་གཟབ། དམིགས་སྐོར་གསུམ་པ་བླ་མའི་རྣལ་འབྱོར་ལ། ངག་འདོན་ལ་གསོལ་འདེབས་ཙམ་ལས་མ་གསུངས་ཀྱང་། བླ་རྣམ་བྱིན་རླབས་ཆར་འབེབས་འདི་ཐུགས་ཐིག་གི་ཆར་གཏོགས་ཡིན་པ་དང་། ལེའུ་བདུན་གྱི་རྟེན་བསྐྱེད་ལ་འགྲོ་བས་དེ་ལྟར་བཤད་པ་ལ། དེ་ལ་གོམ་དགོས་པའི་རྒྱུ་མཚན། སྒོམ་ཚུལ་དངོས་ལ་རྟེན་བསྐྱེད། མཆོད་པ། གསོལ་འདེབས། དབང་བཞི་ལེན་པ་དང་ལྔ་ལས། དང་པོ་རྒྱུ་མཚན་ནི། མཐའ་གཅིག་ཏུ་བླ་མའི་རྣལ་འབྱོར་ལ་བརྩོན་དགོས་པའི་རྒྱུ་མཚན། རང་རྒྱུད་ལ་མདོ་སྔགས་ཀྱི་ལམ་གང་བསྒོམས་ཀྱང་ལམ་གྱི་ཡོན་ཏན་དད་སོགས་ཆེ་ཆུང་ཅི་སྐྱེ་བ་ཐམས་ཅད་བླ་མའི་བྱིན་རླབས་སེམས་ལ་ཞུགས་པའི་མཐུ་ཉག་གཅིག་ཡིན་པ་དང་། ལམ་གང་ཡང་སེམས་ཀྱི་གནས་ལུགས་དྲི་མ་མེད་པ་དེ་དངོས་སམ་བརྒྱུད་ནས་རྟོགས་པའི་ཐབས་ཁོ་ན་ཡིན་པས། དེ་བཅོས་མ་མ་ཡིན་པ་རྟོགས་པ་ལ་བླ་མའི་ཐུགས་ཀྱི་དགོངས་པ་རང་ལ་འཕོ་ཐུབ་མི་ཐུབ་ལ་རགས་ལས་པའི་ཕྱིར་དང་། གཞན་
ཡང་སེམས་ཅན་གྱི་རྒྱུད་ལ་དགེ་སེམས་སྐད་ཅིག་མ་སྐྱེ་བ་ཡན་ཆད་སངས་རྒྱས་ཀྱི་ཕྲིན་ལས་ཡིན་དགོས་ན། རྫིང་ཆུ་ཞིང་ལ་དྲང་བའི་ཡུར་བ་ལྟ་བུའི་མཚམས་སྦྱོར་ནི་བླ་མ་ཁོ་ན་ལ་ལྟོས་དགོས་པས་ཀྱང་ཡིན་ནོ། །དེ་ལ་བླ་མ་ལ་མ་བསྟེན་ཡང་དད་དང་སྙིང་རྗེ་སོགས་དགེ་སེམས་ཅན་ཡོད་པས་མ་ངེས་སོ་སྙམ་ན། དགེ་སྡིག་གང་ཡང་བག་ཆགས་གོམས་ཆེ་ཆུང་ལས་འབྱུང་བ་ལ་ཚེ་རབས་སྔ་མ་རྣམས་སུ་བླ་མ་རེ་ལ་བསྟེན་ནས་དེ་དང་དེ་ལ་གོམ་པའི་ཤུགས་ཡིན་པ་ཤེས་དགོས། ཁྱད་པར་གསང་སྔགས་ཀྱི་ལམ་སྤྱི་དང་ཡང་སྒོས་ཐེག་མཆོག་ཨ་ཏི་ཡོ་གའི་གནས་ལུགས་སེམས་ཀྱི་གནད་གསང་རྟོགས་པ་ལ་ནི་བླ་མ་ལ་མོས་གུས་སྦྱངས་པས་དོན་བརྒྱུད་དགོངས་པའི་བྱིན་རླབས་འཕོས་པ་ལས། གཞན་མཚན་ཉིད་ཀྱི་གྲལ་དུ་ལོ་མང་སྦྱང་པ། ཚེ་གཅིག་འདག་སྦྱར་གྱི་གླེན་སྒོམ། ཡི་དམ་གྱི་ལྷ་ལྟ་བུ་བསྒྲུབས་ནས་རྟོགས་ཐབས་མེད་པ་ནི་བླ་མ་གོང་མ་རྣམས་ཀྱི་རྣམ་ཐར་ལ་བལྟས་ན་ཤེས། སོ་སྐྱེས་ཐ་མལ་པ་དང་། ལམ་དུས་སུ་མ་ཟད་བྱང་ཆུབ་མངོན་བརྙེས་པས་ཀྱང་བརྟེན་ཚུལ་མཛད་པ་སྟེ། ལྷ་བསྐྱེད་རྗེས་དབང་ལྷས་དབང་བསྐུར་ནས་རིགས་བདག་གིས་དབུ་བརྒྱན་པས་ཀྱང་ཤེས་སོ། །གཉིས་པ་རྟེན་བསྐྱེད་ནི། རང་ཉིད་ཐ་མལ་དུ་གནས་པའི་ས་ཕྱོགས་བདེ་ཆེན་ཞིང་གི་བཀོད་པ་ལྟ་བུའི་དབུས་སུ། རང་གི་མདུན་གྱི་ནམ་མཁར་ངོ་བོ་ཡེ་ཤེས་ལྔ་ལ་རྣམ་པ་འོད་ལྔའི་གུར་ཁྱིམ་འཁྲིགས་པའི་ཀློང་། མི་འཇིགས་བཞི་ཐོབ་པའི་སེང་གེ་བརྒྱད་ཀྱིས་བཏེགས་པའི། འདོད་རྒུ་འབྱུང་བའི་རིན་ཆེན་ཁྲི་ལ། འཁོར་བའི་ཉེས་སྐྱོན་གྱིས་མ་གོས་པ་པདྨ། ཐབས་ཤེས་ཀྱི་ཉི་ཟླ་བརྩེགས་པའི་སྟེང་། ཆ་ལུགས་བླ་མ་དངོས་སམ་དེ་ཉིད་གུ་རུ་དང་དབྱེར་མེད་ཡིན་པའི་གནད་ཀྱིས་སློབ་དཔོན་ཆེན་པོ་བསྒོམ་པར་གསུངས། འཁོར་བའི་ཉེས་པས་མ་གོས་པ་མཚོན་བྱེད་སྐུ་མདོག་དཀར་ལ། སྙིང་རྗེས་སྲིད་པ་མི་གཏོང་བའི་ཆགས་པ་མཚོན་བྱེད་དམར་མདངས་ཆགས་པ༡། གཡས་གསེར་གྱི་རྡོ་རྗེ། གཡོན་བདུད་རྩིའི་ཐོད་པ། ༢གྲུ་གཡོན་ཁ་ཊཾ་རྩེ་གསུམ་མི་མགོ་གསུམ་སྣ་ཚོགས་རྡོ་རྗེས་ཁ་བཅད་པའི་བུམ་པ། དར་དཔྱང་། ཅང་ཏེའུ། དྲིལ་གཡེལ་བཅས༣། དབུ་ལ་ཤེའུའི་མཉེན་ཞུ་ཞེས་པད་ཞྭ་འདབ་མ་ལྔ་ལྡན་སྒྲོ་དར་
རྡོ་རྗེ་ཕྱེད་པས་མཚན་པ་བཞི་གུ་རུའི་ཐུགས་རྒྱུད་ལ་བུམ་གསང་ཤེར་ཚིག་བཞི་ཡོངས་སུ་རྫོགས་པའི་བརྡ་དང་། རྗེས་འཇུག་གི་དོན་མཛད་ཚུལ་གྱི་དབང་དུ་ན། རྡོ་རྗེས་དངོས་གྲུབ་སྒྲུབ་པའི་བར་ཆད་སེལ། ཐོད་པས་བདེ་སྟོང་དབྱེར་མེད་ཀྱི་བྱིན་རླབས་སྩོལ་བ་མཚོན། ཟ་ཧོར་རྒྱལ་ཁམས་རྗེས་སུ་བཟུང་ཕྱིར་གསོལ་བའི་རྒྱལ་པོའི་ཆས་གསང་གོས་དཀར་པོ། འདུང་མ་དམར་པོ། སྔགས་ཀྱི་ཆས་ཕོད་ཁ་སྔོ་འབྱམས། རབ་བྱུང་ཆས་སྣམ་སྦྱར་དམར་པོ་གསེར་གྱི་མེ་ཏོག་བཀྲ་བ། ཟ་འོག་གི་སེར་སྨུག་ཟླ་གམ་དུ་གྲགས་པ་རྣམས་ལ་འདོད་རྒུར་བསྒྱུར་བའི་ཆ་ལུགས་ཞེས་གྲགས། སྐུའི་ཆ་ལུགས་འདྲ་མིན་མང་ཡང་དབུ་ལ་པད་ཞྭ་ཁོ་ན་གསོལ་བ་པདྨའི་རིགས་ཡིན་པས་རིགས་རྟགས་ཀྱི་ཅོད་པཎ་ཡིན། གདུལ་བྱ་རྗེས་སུ་འཛིན་པའི་ཞལ་འཛུམ། སྤྱན་གྱིས་ལྟ་སྟངས་བཅས་པས་རང་ལ་གཟིགས་པ། རྡོར་སྐྱིལ་མཐའ་གཉིས་ལ་མི་གནས་པ་མཚོན། སྤྱི་བོ་དུང་ཁང་དབུས་ༀ་དཀར་པོ། མགྲིན་པའི་ལྕེ་རྩར་ཨཱཿདམར་པོ། ཐུགས་དབུས་ཧཱུྃ་མཐིང་ག །ངོ་བོ་སྐུ་གསུང་ཐུགས་རྡོ་རྗེ་འདུས་པའི་བདག་ཉིད་དུ་བསྒོམ། འདི་མེད་ན་ལྷ་ཅི་བསྐྱེད་སྲོག་མེད་པའི་རོ་དང་འདྲ། དབུ་གཙུག་ནས་བརྒྱུད་པའི་བླ་མ་རྣམས་ཐོ་བརྩེགས་སུ་སྣང་མཐའི་བར་རྒྱན་ཆས་མ་འདྲེས་པར་བསྒོམ། མཐར་སྐོར་ཐོད་ཕྲེང་གིས་གཙོས་པའི་ཡི་དམ་རྒྱུད་སྡེ་དྲུག །དེའི་ཕྱི་རོལ་དུ་བདག་ཅག་གི་སྟོན་པ་སོགས་ཕྱོགས་དུས་ཀྱི་སངས་རྒྱས། དེའི་ཕྱིར་སྤྱན་གཟིགས་གཙོས་བྱང་སེམས། དེའི་ཕྱིར་ཉན་རང་། དེའི་ཕྱིར་ཞལ་བཞི་གཙོས་སྲུང་མ་ཡེ་ཤེས་པ། དཔའ་བོ་མཁའ་འགྲོ་ཐམས་ཅད་ཀྱང་སྐུ་མཚན་དཔེའི་གཟི་མདངས་ཅན། གསུང་ཆོས་ཀྱི་སྒྲ་གདངས་ཅན། ཐུགས་ཏིང་འཛིན་ལ་མཉམ་པར་བཞག་པ་འོད་དང་འོད་ཟེར་གྱི་ཕུང་པོ་དུ་མ་འཕྲོ་བས་ཡིད་འཕྲོག་ནུས་པ། གཙོ་འཁོར་གྱི་རྣམ་པ་ཙམ་དུ་ཤར་ན་ཡང་། བླ་མའི་ཐུགས་དགོངས་དང་དབྱེར་མེད་པས་དོན་ལ་མཐོ་དམན་དང་ཐ་དད་མེད་པ་མཉམ་ཉིད་རོ་གཅིག་ཏུ་བསྒོམ། གསུམ་པ་མཆོད་པ་ནི། གོང་གི་མཎྜལ་གྱིས་སྤྱིར་འཐུས་ཀྱང་། འདིར་ཡང་དགོས་པའི་དབང་གིས། ངོ་བོ་ལུས་ལོངས་སྤྱོད་དགེ་ཚོགས་བཅས་རྣམ་པ་ཕྱི་ནང་གསང་བ་དེ་ཉིད་ཀྱི་མཆོད་པ་བཞི་སྤྲོ་བའི། དང་པོ། རང་གི་
སྙིང་ག་ནས་ཉེར་སྤྱོད། འདོད་ཡོན་རྫས་རྟགས་སོགས་མཆོད་པར་འོས་པའི་ལྷ་མིའི་འབྱོར་བ་རྣམས་ཕྱག་ན་ཐོགས་པའི་ལྷ་མོ་གྲངས་མེད་སྤྲོས། ཚོགས་ཞིང་རེ་རེའི་མདུན་མཆོད་རྫས་ཐོགས་པའི་ལྷ་མོ་ཆ་ཚང་རེས་མེ་ཏོག་དབུ་ལ་འབུལ་བ་སོགས་མཆོད་པས་མཉེས་པར་བྱ། མཐར་ལྷ་མོ་རྣམས་ཀྱང་གནས་དེ་དང་དེར་བསྟིམ་པར་བསམ་ནས་ཀུན་བཟང་སྒྱུ་འཕྲུལ་སོགས་ཀྱང་བརྗོད། འདི་ནི་ཕྱི་འཇིག་རྟེན་གྱི་ཉེར་སྤྱོད་དང་མཚུངས་པས་ཕྱི་མཆོད་ཅེས་གྲགས། གཉིས་པ། ཡང་རང་གི་སྙིང་ཁ་ནས་ངོ་བོ་དབྱིངས་རིག་དབྱེར་མེད་བྱང་ཆུབ་སེམས་ལ་རྣམ་པ་རྡོ་རྗེ་རྣལ་འབྱོར་མ་དཀར་མོ་རུས་རྒྱན་ཅན་གྲི་ཐོད་འཛིན་པ་ཞིག་སྤྱི་བོ་ནས་རྒྱང་ངེ་ཐོན། དེས་རང་ལུས་ཀྱི་སྨིན་མཚམས་ནས་གྲི་གུག་ཚད་པས་ཐོད་པ་བྲེག །རྒྱ་ཁྱོན་ཚད་ལས་འདས་པར་གྱུར་ནས་རང་བྱུང་གི་མི་མགོ་གསུམ་གྱི་སྟེང་བཙུག །ལུས་ཆེ་ཚོ་སྣུམ་བརྗིད་དང་ལྡན་པར་བསམས་ལ་གྲི་གུག་གིས་ཐོད་པའི་ནང་ཏུ་གཏུབ་ཅིང་སྤུང་། འོག་གི་ཡཾ་ལས་རླུང་གཡོས་ཤིང་རཾ་ལས་མེ་འབར་བས་ཐོད་པ་དྲོས་ཤ་ཁྲག་རུས་གསུམ་འོད་དུ་ཞུ་བའི་རླངས་པ་འོད་ཟེར་ལྔ་ལྡན་ཞིང་ཁམས་ཀུན་ལ་སྤྲོས་པས་རྒྱལ་བ་སྲས་བཅས་ཀྱི་བྱིན་རླབས་བདུད་རྩི་ལྔའི་རྣམ་པར་བསྡུས་ནས་བསྟིམས་ལ་འབྲུ་དྲུག་ལན་མང་བརྗོད་པའམ་དམིགས་པས་ཀྱང་ཆོག །དེ་ནས་རྣལ་འབྱོར་མ་གྲངས་མེད་
དུ་སྤྲོས་པའི་ཕྱག་གཡོན ་ཐོད་པས་བདུད་རྩི་བཅུས་ཤིང་ཚོགས་ཞིང་ལ་ཕུལ་བས། མཉེས་པར་བསམ་ནས་རང་རིག་སོགས་བརྗོད། མཐར་རྣལ་འབྱོར་མ་མི་དམིགས་པའི་ངང་ལ་བཞག །འདི་ནི་རང་ལུས་ཀྱི་མཆོད་པ་ཡིན་པས་ནང་མཆོད་གསུངས། གསུམ་པ། ཐུགས་ཀ་ནས་ངོ་བོ་སེམས་ཀྱི་རང་བཞིན་དབྱིངས་སྟོང་ཉིད་ལ་རྣམ་པ་ཤེས་རབ་མ་གཟུགས་དང་ལང་ཚོ་རྫོགས་པ་མཆོད་ཡུལ་གྲངས་མཉམ་སྤྲོས་ནས་འཁྲིལ་སྦྱོར་མཛད་པས་དགའ་བཞིའི་རོས་མཉེས་པར་བསམ་ལ་བརྒྱད་གཉིས་ལང་ཚོའི་སོགས་བརྗོད། བཞི་བ། གོང་གི་མཆོད་པའི་སྐབས་ཀྱི་འཁོར་གསུམ་ག་རང་སེམས་དབྱིངས་རིག་དབྱེར་མེད་ཀྱི་ཀློང་ན་མ་གྲུབ་བཞིན། རྣམ་པ་གོ་མ་འགགས་པར་སྣང་བའི་ཚུལ་ལ་བློ་བཞག་ནས། མཆོད་བྱ་མཆོད་བྱེད་སོགས་བརྗོད། མཆོད་པ་ཐམས་ཅད་ཀྱི་སྙིང་
པོའི་མཐར་ཐུག་ཡིན་པས་དེ་ཁོ་ན་ཉིད་ཀྱི་མཆོད་པ་ཞེས་གསུངས། འདིར་མཆོད་པ་རྒྱས་པར་བཤད་པ་ནི་གཞུང་གཞན་གྱི་རྒྱས་འགེབ་ལྟ་བུར་འགྱུར་བས་དགོས་པ་མེད་དོ་སྙམ་ན། དགོས་པ་སོ་སོར་ཡོད་དེ། སྤྱིར་དབང་མཚན་ཉིད་དང་ལྡན་པ་ཐོབ་ན་མ་མཐའ་དབང་སོ་སོའི་ལྟ་བ་ལ་གོ་བ་རྣམ་དག་ངེས་པར་སྐྱེ་དགོས་ལ། དེས་ན་དབང་བཞི་ལ་རྟོགས་པ་ཁྱད་པར་ཅན་མི་འདྲ་བ་བཞི་རང་རྒྱུད་ལ་སྐྱེ་དགོས་པས། བུམ་དབང་གི་རྟོགས་པ་ཁྱད་པར་ཅན་རང་རྒྱུད་ལ་སྐྱེ་བའི་འགལ་རྐྱེན་གྱི་གེགས་ཞི་བ་དང་། མཐུན་རྐྱེན་གྱི་དཔུང་བསྐྱེད་པའི་ཕྱིར་ཕྱིའི་མཆོད་པ། དེ་བཞིན་དུ་གསང་དབང་བ་ནང་མཆོད། ཤེར་དབང་ལ་གསང་མཆོད། དེ་ཁོ་ན་ཉིད་ལ་མཆོད་པ་ཕུལ་བའོ། །བཞི་པ་གསོལ་བ་འདེབས་པ་ལ་ཡོན་ཏན་དང་བཀའ་དྲིན་རྗེས་སུ་དྲན་པ་དང་། དེ་ལྟར་དྲན་པའི་སྒོ་ནས་གསོལ་འདེབས་དངོས་དང་གཉིས། དང་པོ་ལའང་། རང་གི་རྩ་བའི་བླ་མའི་ཡོན་ཏན་དང་བཀའ་དྲིན་དྲན་པ། གུ་རུ་སོགས་བརྒྱུད་པའི་བླ་མའི་བཀའ་དྲིན་དྲན་པ། དེ་ལྟར་དྲན་པའང་བླ་མའི་བཀའ་དྲིན་དྲན་པ་ཁོ་ནར་འགྲོ་ཚུལ་ཤེས་པ་དང་གསུམ། དང་པོ་ལའང་། ཡོན་ཏན་དྲན་པ། བཀའ་དྲིན་དྲན་པ་གཉིས་ལས། དང་པོ་ནི། བླ་མ་དཀོན་མཆོག་ཀུན་འདུས་ཡིན་ཚུལ་སྐྱབས་འགྲོའི་སྐབས་ནས་བསྟན། རྩ་གསུམ་ཀུན་འདུས་ཡིན་ཚུལ་ལ། གདུལ་བྱའི་རྒྱུད་བྱིན་གྱིས་རློབས་པ་པོ་ནི་བླ་མ། མཆོག་ཐུན་དངོས་གྲུབ་སྟེར་མཁན་ནི་ཡི་དམ། ལམ་གྱི་འགལ་རྐྱེན་སེལ་བ་དང་མཐུན་རྐྱེན་སྒྲུབ་པ་པོ་ནི་མཁའ་འགྲོ་ཡིན་པས་བླ་མའི་བྱིན་རླབས་ནི་ཉེ་རིང་དང་ཕྱོགས་རིས་མེད་པར་འཇུག་པ་ཞིག་ཡིན། དེས་ན་གདུལ་བྱ་རང་ངོས་ནས་སྐལ་བ་མ་ཆད་ན་རྩ་བའི་བླ་མའི་ངོས་ནས་བྱིན་གྱིས་རློབས་པའི་ནུས་པ་ཡོད་པས་ཕྱོགས་རིས་མེད་ལ། དེ་ཞུགས་ན། བླ་མ་ཐམས་ཅད་ཀྱི་བྱིན་རླབས་དུས་གཅིག་ཏུ་ཞུགས་པ་ཡིན་ཚུལ་རིགས་པས་གྲུབ། མདོར་ན་ཕྱོགས་དུས་ཀྱི་བླ་མ་ཐམས་ཅད་ངོ་བོ་ཐ་དད་མེད་པར་ཐུགས་རྒྱུད་གཅིག་ཡིན་པར་ཐག་བཅད། འཇུག་རྒྱུའི་བྱིན་རླབས་ལའང་། མངོན་ཤེས་གྲུབ་རྟགས་འདྲེ་འདུལ་སོགས་ཕལ་པ་ཡིན། རང་སེམས་སྔར་དང་
མི་འདྲ་བ་འགྱུར་ནས་བློ་ཆོས་ལ་མོས་པ་དང་། ཉོན་མོངས་ཤུགས་ཆུང་བ་སོགས་ནི་མཆོག་ཡིན་པས་དེ་ནི་རང་གི་བླ་མ་ལ་བརྟེན་ན་འབྱུང་ནུས་པས་བྱིན་རླབས་ཀྱི་མཆོག་སྩོལ་བ་ཡིན། དངོས་གྲུབ་ཅེས་མཆོག་ཐུན་གཉིས་ལས་རང་སེམས་སངས་རྒྱས་ཀྱི་ངོ་བོར་ཡེ་ནས་གནས་པ་དེ་རང་མགོ་རང་གཡོག་ཙམ་མིན་པ་ད་ལྟ་ནས་མངོན་སུམ་དུ་མཇལ་བ་ནི་བླ་མ་ཁོ་ནའི་ཐུགས་རྗེ་ལ་ལྟོས་པ་མཆོག་གི་དངོས་གྲུབ་དང་། ཐུན་མོང་ཕྲིན་ལས་བཞི་ལའང་། ནད་གདོན་ཞི་བ། ཚེ་བསོད་རྒྱས་པ། ཕ་རོལ་དབང་དུ་བསྡུ་བ། དགྲ་བགེགས་ཚར་བཅད་པ་སོགས་ནི་ཐབས་ཕྲན་ཚེགས་ཀྱིས་ཀྱང་འགྲུབ་པས་ཕལ་པ་ཡིན་ལ། གཙོ་བོ་འགྲུབ་དཀའ་བ་ནི། ཐོག་མེད་ནས་གོམས་པའི་བདག་འཛིན། དེས་དྲངས་བའི་ཉོན་མོངས་ཤུགས་དྲག་རྣམས་དང་། རྟག་འཛིན་གཅེས་འཛིན་ལ་སོགས་ཕྱིན་ཅི་ལོག་གི་བློ་ཐམས་ཅད་ཞི་བ། ཐུན་མོངས་ཐེག་པའི་དལ་འབྱོར་རྙེད་དཀའ་ནས་གསང་སྔགས་རྫོགས་པ་ཆེན་པོའི་བར་ལམ་གྱི་རྟོགས་པ་ཡོན་ཏན་ཚད་མེད་པ་རྒྱས་པ། རང་སེམས་སྐད་ཅིག་ཀྱང་མི་སྡོད་པར་གཞན་དབང་དུ་ཤོར་ནས་ཡོད་པ་འདི་དགེ་བ་ལ་བཀོལ་ནས་རང་དབང་དུ་འདུས་པ། གཉེན་པོས་ཐུལ་དཀའ་ཞིང་དཔུང་ཆེ་བའི་ཉོན་མོངས་དྲག་པོ་རྣམས་ཀྱང་གདོང་བཟློག་ཏུ་ཚར་བཅད་ནུས་པས་དྲག་པོའི་ལས་དང་བཞི་ཀ་བླ་མའི་ཐུགས་རྗེ་ལས་འབྱུང་། ལས་འདི་དག་འགྲུབ་ན་ཡི་དམ་གྱི་ལྷ་འགྲུབ་ཚར་བ་ཡིན་གྱི། འདི་དང་འགལ་བ་ཉོན་མོངས་རང་གཟུགས་སུ་ཤར་བའི་ཁ་གདངས་མིག་བགྲད་དང་། ཁྲ་ཁྲ་ཤིག་ཤིག་སོགས་ཞི་ཁྲོ་མང་པོ་མཐོང་ཡང་དགོས་པ་མེད། བླ་མའི་སྐུ་གསུང་ཐུགས་ཀྱི་ཡོན་ཏན་རང་ལ་ཞུགས་ན་བྱིན་རླབས་ལྷའི་རྣམ་པར་ཤར་བ་དེ་འགྲུབ་པས་དེས་འཚེངས། གལ་སྲིད་ཡི་དམ་གྱི་ལྷ་རེ་བསྒྲུབ་ནའང་བླ་མའི་ངོ་བོར་ཤེས་དགོས་ཏེ། སྔོན་གཉག་གིས་སློབ་དཔོན་ཆེན་པོ་ལ་དབང་ཞུས་པའི་ལོ་རྒྱུས་བཞིན་ལྷ་དང་བླ་མ་བཟང་ངན་ཐ་དད་དུ་བཟུང་ན་བསྐལ་པར་བསྒྲུབས་ཀྱང་ལྷ་དངོས་མི་འགྲུབ། ད་ལྟ་ཡི་དམ་སྣ་མང་པོ་ལ་འབད་འདོད་པ་བླ་མའི་ངོ་བོར་མ་ཤེས་པའི་སྐྱོན་དང་། ལྷ་གཅིག་གིས་བསམ་པ་མི་བདེ་བར་ལྷ་རེས་ལས་རེ་སྒྲུབ་རྒྱུ་རེ་ནས་ཞི་དྲག་མང་པོ་
བརྟེན་པ་ནི་ངོ་བོ་ཐ་དད་དུ་བཟུང་བའི་སྐྱོན་ཡིན། དེ་ལས་ཀྱང་ཁྲོ་བོ་སྒྲུབ་པ་རྣམས་ཕལ་ཆེར་ཚེ་འདིའི་ཆེད་དུ་དམིགས་པ་མང་བས་དེས་ཡེ་ཤེས་ཀྱི་ལྷ་ནི་གཏན་ནས་མི་འགྲུབ། དེས་ན་བློ་སྣ་མི་མང་བར་ཡི་དམ་རེ་ཟུང་ལ་བརྟེན་པ་དེའང་ངོ་བོ་རྩ་བའི་བླ་མ་ཡིན་པ་ཐག་ཆོད་དགོས། ཁྱད་པར་དབང་མ་ཐོབ་བཞིན་སྒྲུབ་པ་ནི་དམྱལ་བའི་རྒྱུ་ཡིན། བསྒྲུབས་ནས་བཟུང་སྤང་ལེན་མི་བྱ་བར། འདི་ནས་བྱང་ཆུབ་མ་ཐོབ་བར་དུ་ཡི་དམ་དེ་ལ་བརྟེན་པའི་དམ་བཅའ་དང་མོས་པ་བརྟན་པོ་ངེས་པར་དགོས། རྣལ་འབྱོར་པའི་འགལ་རྐྱེན་བསལ། མཐུན་རྐྱེན་སྒྲུབ་པ་པོ་དེ་ལ་ནི་དཔའ་བོ་མཁའ་འགྲོ་དང་ཆོས་སྐྱོང་སྲུང་མ་ཟེར་བ་ཡིན་པས། ཆོས་སྐྱོང་གང་ལ་བསྟེན་ཀྱང་། ཕྲིན་ལས་དེ་དག་བསྒྲུབ་པའི་ཆེད་དུ་བླ་མ་དེ་དང་དེའི་རྣམ་རོལ་དུ་བསྟན་པ་ཤེས་བཞིན་པས་བསྒྲུབ་ན་ཤིན་ཏུ་མྱུར་བས་ཐམས་ཅད་བླ་མའི་ངོ་བོ་ཡིན། དེ་ལྟར་མ་ཤེས་ནས་ཡི་དམ་དཔོན་དང་། ཆོས་སྐྱོང་བྲན་གཡོག་ལྟ་བུར་རང་རྒྱུད་པར་བཟུང་ན་མི་འགྲུབ་ཅིང་། འགྲུབ་ནའང་ལོག་པ་ཁོ་ནར་འགྲོ། མདོར་ན་རྩ་བའི་བླ་མ་གཅིག་པུ་ལ་བརྟེན་ནས་བཀའ་བཞིན་བསྒྲུབས་ན་བྱིན་རླབས་དངོས་གྲུབ་ཕྲིན་ལས་ཐམས་ཅད་འགྲུབ་ངེས་པས་རྩ་གསུམ་ཀུན་འདུས་ཡིན་པར་ཐག་བཅད། གཉིས་པ་ནི། རང་རེས་ད་ལྟར་བླ་མ་ལ་ཆོས་ཞུས་པས་ཁ་རྗེ་མཐོ་བ་དང་། ལོངས་སྤྱོད་ཆེ་བ་སོགས་བླ་མའི་བཀའ་དྲིན་ཞེས་བསྔགས་འདུག་པ་འདི་ནི་བཀའ་དྲིན་དངོས་མ་ཡིན་པས་གཙོ་ཕལ་ནོར་བ་ཡིན། གཙོ་བོ་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན། །སོགས་ཀྱི་གསོལ་འདེབས་ལྟར། དལ་འབྱོར་ནས་ཨ་ཏིའི་བར་ལམ་ཡོངས་རྫོགས་དང་། ཁྱད་པར་རང་ལ་ཡེ་ནས་གནས་ཤིང་ཀུན་གྱིས་ཤེས་འདོད་ཡོད་ཀྱང་ཐབས་གཞན་གྱིས་རྟོགས་མི་ནུས་པ་གབ་པའི་གསང་བས་ཆོད་པའི་གནས་ལུགས་ཅེར་མཐོང་དུ་ངོ་སྤྲད། དང་པོ་ལུས་མི་གཟུགས་ཙམ་ཡིན་པ་མ་གཏོགས་སེམས་དུད་འགྲོ་དང་ཁྱད་མེད་པ་སྤང་བླང་སྣ་གཅིག་མི་ཤེས་རྒྱུ་འབྲས་འཆོལ་ཉོག་བྱུང་རྒྱལ་དུ་སྤྱད་པས་ཤི་མ་ཐག་ངན་སོང་དུ་འགྲོ་ངེས་ཐག་ཆོད་ནས་ཡོད་པའི་སྐབས་ན། ལམ་ལ་རིམ་པ་བཞིན་ཁྲིད་པ་བུ་ཆུང་མས་གསོས་པ་ལྟར་ཐབས་མཁས་ཐུགས་རྗེའི་བྱིན་རླབས་
ཀྱིས་རྒྱུད་ཆུད་ཟོས་སུ་མ་བཏང་བར་གཟུངས་འཛིན་འཁྲུལ་བས་བསྐྱེད་པའི་སྡུག་བསྔལ་རྒྱུ་འབྲས་ཐམས་ཅད་རང་སངས་རང་གྲོལ་དུ་དེངས། རང་སེམས་ཆོས་སྐུའི་ངོ་བོར་མངོན་དུ་གྱུར་ནས་ཚེ་ལུས་འདི་ལ་སངས་རྒྱས་པར་མཛད་པའི་བཀའ་དྲིན་ཡང་ཡང་བསམ་དགོས་ཏེ། འཇིག་རྟེན་ན་ལྟོག་དུས་ཟས་ལན་གཅིག་སྦྱིན་པ་ལའང་དྲིན་ཆེན་དུ་བལྟས་ནས་ཡུན་རིང་བརྗེད་མི་རུང་ན་བླ་མའི་བཀའ་དྲིན་བསམ་ལོས་དགོས། སྟོང་གསུམ་ནོར་གྱིས་བཀང་ནས་རང་ལ་བྱིན་པ་ལས་མི་རྟག་པ་ལྟ་བུའི་གདམས་ངག་སྣ་གཅིག་བྱིན་པའི་རིན་ཆེ། དེ་ལྟར་ཡོན་ཏན་དྲན་པས་རེ་ལྟོས་བཅའ་དགོས་པར་ཤེས། བཀའ་དྲིན་དྲན་པས་བླ་མ་ཁོ་ན་ལ་གསོལ་བ་བཏབ་པས་འཚེང་བར་ཤེས། གཉིས་པ་ནི། བརྒྱུད་པའི་བླ་མ་རྣམས་ཀྱི་རྣམ་ཐར་ལ་བལྟ། ཁྱད་པར་རང་རེ་གསང་སྔགས་རྙིང་མ་བ་དང་ཆོས་འདིའི་དབང་དུ་ན་གུ་རུའི་བཀའ་དྲིན་དང་ཡོན་ཏན་དྲན་དགོས་པས། ཡོན་ཏན་མདོ་མཚོན་ཕྱོགས་དུས་ཀྱི་སངས་རྒྱས་རྒྱལ་བ་ཞི་ཁྲོ་དཀོན་མཆོག་ཀུན་འདུས་ཡིན་ཚུལ་ཆོས་དབང་གསང་འདུས་ལས། ང་བསྒྲུབ་སངས་རྒྱས་ཐམས་ཅད་འགྲུབ། །ང་མཐོང་སངས་རྒྱས་ཐམས་ཅད་མཐོང་། །ང་ནི་བདེ་གཤེགས་འདུས་པ་ཡིན། །ཞེས་དང་། བཀའ་ཐང་ལས། །སྔོན་ཚེ་སྣང་བ་མཐའ་ཡས་འོད་དཔག་མེད། །རི་བོ་ཏ་ལར་མགོན་པོ་སྤྱན་རས་གཟིགས། །དྷ་ན་ཀོ་ཤར་པདྨ་འབྱུང་གནས་གསུམ། །མཚོན་ཚུལ་ཙམ་ལ་གསུམ་དུ་སྣང་གྱུར་ཀྱང་། །དོན་ལ་དབྱེར་མེད་སོ་སོར་ཐ་མི་དད། །ཆོས་དབྱིངས་གནས་སུ་ཀུན་དུ་བཟང་པོ་དང་། །སྟུག་པོ་བཀོད་པར་རྡོ་རྗེ་འཆང་ཆེན་པོ། །རྡོ་རྗེ་གདན་དུ་ཐུབ་པ་ཆེན་པོ་ཉིད། །གཉིས་མེད་པདྨ་ང་རུ་ལྷུན་གྱིས་གྲུབ། །འགྲོ་དོན་ཀུན་ལས་བྱིན་རླབས་རྨད་པོ་ཆེ། །ཞེས་པདྨ་ང་ཡིན་སོགས་ཞལ་གྱིས་བཞེས་པ་རྣམས་ལ་ཡིད་ཆེས་བསྐྱེད། བཀའ་དྲིན་དྲན་ཚུལ་བཞི་ལས། དང་པོ། གདུལ་བྱ་དུས་སུ་བབས་ན་སྐད་ཅིག་ཀྱང་མི་གཡེལ་བར་ཐུགས་རྗེ་ཉེ་རིང་མེད་པར་འཇུག་པས་སྤྱིར་ཁམས་གསུམ་གྱི་སེམས་ཅན་ལ་དྲིན་ཆེ། གཉིས་པ་སྟོན་པ་མཆོག་དང་། འཁོར་སྟོན་པ་དང་ངོ་མཉམ་པ་སྐར་ཚོགས་༼ལྟ་བུ་རྣམས་༽བྱོན་
ཀྱང་མྱུར་ལམ་གསང་སྔགས་ཀྱི་ཆོས་ནི་ཨིནྡྲ་བྷུ་ཏི་སོགས་སྐལ་ལྡན་འགའི་སྤྱོད་ཡུལ་ལས་ཁྱབ་བདལ་དུ་སྤེལ་བར་མ་མཛད། གུ་རུས་གླིང་འདིས་མཚོན་ལྷ་ཀླུ་མིའི་འཇིག་རྟེན་ཀུན་དུ་སྔགས་ཀྱི་ཆོས་དར་ཞིང་རྒྱས་པར་མཛད། སྣོད་དང་མི་ལྡན་པ་རྣམས་ཀྱང་ཐབས་དང་ཐུགས་རྗེས་སྣོད་ལྡན་དུ་བྱིན་གྱིས་བརླབས་ནས་བཏང་སྙོམས་སུ་མ་བཞག་པས། ཟ་ཧོར་ཡུལ་གྱི་སྲོག་ཆགས་ཕྲ་མོ་ཡན་ཆད་རིག་འཛིན་གྱི་ཁྱུ་ཚོགས་སུ་བྱིན་གྱིས་རླབས་པས་མཚོན། མདོར་ན། སེམས་ཅན་མ་སྨིན་པ་ནི་གཅིག་ཀྱང་མེད༔གསུངས་པ་ལྟར་འཛམ་གླིང་འདི་ལ་བཀའ་དྲིན་ཆེ། གསུམ་པ། ཁ་བ་ཅན་པ་ལ་བཀའ་དྲིན་ཆེ་ཚུལ་ནི། ཞིང་འདི་དང་པོ་མི་མིན་གྱིས་བཟུང་ཞིང་ནག་ཕྱོགས་སྡིག་ལ་དགའ་བ་མི་དང་ལྷ་འདྲེ་ཤན་མི་ཕྱེད་པ་ལྟ་བུའི་མཐའ་འཁོབ་ཏུ་གྱུར་པས། སྔོན་དུ་ཆོས་དར་བའི་རྟེན་འབྲེལ་ཙམ་རེ་ལས་སྤེལ་མ་ནུས་པར། བསྟན་པ་ཉི་མ་ལྟར་གསལ་བར་མཛད་པའི་ཚུལ་ནི། ཆོས་རྒྱལ་དང་མཁན་ཆེན་ཞལ་འཛོམས་ནའང་གཙུག་ལག་ཞིག་ཀྱང་མ་འགྲུབ་ནས་གུ་རུ་ལ་གསོལ་བ་བཏབ་པས་བོད་འདིར་སེམས་ཅན་བདེ་སྐྱིད་འབྱུང་བ་ལ་སངས་རྒྱས་ཀྱི་བསྟན་པ་ཚུག་དགོས་པར་མཁྱེན། དེའི་འགལ་རྐྱེན་ཚར་བཅད། མཐུན་རྐྱེན་འདུ་མཛད། བསྟན་པ་ཉིད་གསལ་བར་མཛད་ཚུལ་གསུམ་གྱི་སྒོ་ནས་བསྟན་པ་བཙུགས། དང་པོ་ལྷ་སྲིན་གདུག་པ་ཅན་རྣམས་དམ་ལ་བཏགས། བོད་འདིར་དེ་དུས་ཡོད་པ་དང་། མཐའ་འཁོབ་གཞན་ན་ཡོད་པའི་བསྟན་པའི་གནོད་བྱེད་ཐམས་ཅད་ཐབས་ཀྱིས་བཏུལ། མ་འོངས་པར་བསྟན་པའི་འགལ་རྐྱེན་མཐའ་དམག་སོགས། ཚར་གཅོད་བྱེད་དྲག་སྔགས་མང་པོ་གཏེར་དུ་སྦས། གཉིས་པ། བསམ་ཡས་ཀྱིས་མཚོན་པའི་གཙུག་ལག་ཁང་མང་པོ་དང་། སྐུ་གསུང་ཐུགས་རྟེན་ཚད་མེད་བཞེངས་རབ་གནས་མངའ་གསོལ་མཛད་ནས་མཐོང་ཐོས་དྲན་རེག་གི་རྒྱུད་ལ་ཐར་པའི་ས་བོན་འཇོག་ནུས་པར་མཛད། རི་བྲག་མཚོ་གླིང་ཐམས་ཅད་ལ་ཞབས་ཀྱིས་བཅག་སྒྲུབ་པ་མཛད། གཏེར་སྦས་པ་སོགས་ཀྱིས་ནུབ་ཕྱོགས་ཨོ་རྒྱན་གྱི་ཡུལ་དང་ཁྱད་མེད་པའི་གནས་ཁྱད་པར་ཅན་དུ་བྱིན་གྱིས་བརླབས། ཁྱད་པར་རྗེས་འཇུག་རྣམས་ལ་ཆོས་ཀྱི་ཆ་རྐྱེན་ཚེ་ནོར་སྒྲུབ་པ་སོགས་གཏེར་དུ་སྦས། གསུམ་
པ། བཻ་རོ་སོགས་རྗེ་འབངས་ཐམས་ཅད་ལ་ལམ་ཐུན་མོང་ནས་རྫོགས་ཆེན་གྱི་བར་དབང་བསྐུར་རྒྱུད་བཤད། མན་ངག་གནང་བའི་སྒོ་ནས་རྗེས་སུ་བཟུང་སྟེ་ཚེ་འདིར་གུ་རུ་དང་ངོ་མཉམ་པའི་རྟོགས་པ་སྐྱེས་གྲུབ་པའི་རྟགས་ཐོན་པ་གྲངས་མེད་བྱུང་བས་ལུང་རྟོགས་ཀྱི་བསྟན་པ་དར་རྒྱས་སུ་མཛད། བཞི་པ། ལྷག་པར་དུས་སྙིགས་མའི་འགྲོ་བ་ལ་བཀའ་དྲིན་ཆེ་ཚུལ་ནི། སྙིགས་མའི་སེམས་ཅན་ལ་ནི་མ་དང་འདྲ་བ་བཀའ་དྲིན་ཆེ་ཚུལ། གསོལ་འདེབས་བསམ་པ་ལྷུན་འགྲུབ་ལས། དུས་ངན་སྙིགས་མའི་མཐའ་ལ་སོགས་ལྟར་ལྔ་བརྒྱ་ཐ་མ་པ་རྣམས་ཉོན་མོངས་ཤུགས་ཆེ། ལས་ངན་པས་རྒྱལ་བ་གཞན་སུས་ཀྱང་མ་ཐུལ། སངས་རྒྱས་དང་དེའི་རྗེས་འཇུག་སངས་རྒྱས་དང་འདྲ་བ་རྣམས་ཀྱི་ཞབས་མ་ཟིན་ནས་འཁོར་བར་ལུས་ཡོད་པ་རྣམས་ལ་ནི། གུ་རུ་རིན་པོ་ཆེ་སྔོན་སྨོན་ལམ་དང་ཐུགས་བསྐྱེད་ཀྱི་མཐུས་དུས་ཇེ་སྙིགས་བཞིན་ཐུགས་རྗེ་ཇེ་ཆེ། ལས་ཇེ་ངན་བཞིན་ཕྲིན་ལས་ཇེ་མྱུར། སྐུ་དངོས་མཇལ་བའི་སྐལ་བ་མེད་པ་རྣམས་ལ་བཀའ་གཏེར་གསར་རྙིང་གི་ཆོས་སྒོ་འབྱེད་པའི་བླ་མ་དགེ་བའི་བཤེས་གཉེན་གྱི་ཚུལ་བཟུང་ནས་སྤྲུལ་པ་རྒྱུན་ཆད་མེད་པ་བྱོན་ཏེ་སྐུ་རྔ་ཡབ་གླིང་ན་བཞུགས་ཀྱང་ཐུགས་རྗེ་བོད་ཁམས་ཀྱི་སེམས་ཅན་ལ་གཟིགས་པ་སྐད་ཅིག་ཀྱང་མི་ཡོལ་བར་བཞུགས། དེ་ཡང་བོད་ཀྱི་རྗེ་འབངས་རྣམས་ལ་གཟིགས་པ་མི་འདོར་བའི་དབུ་བསྙུང་བཞེས་པ་ཡིན་པས་ཡིད་ཆེས་དགོས། ཁྱད་པར་ཟབ་གཏེར་སྦ་བའི་ཕྲིན་ལས་མཛད་པ་འདི་ནི་སྙིགས་མའི་སེམས་ཅན་རྗེས་སུ་བཟུང་བའི་ཐབས་མཁས་ཆེ་ཤོས་ཞིག་ཏེ། དེ་ཡང་གདུལ་བྱ་ལ་དགོངས་ནས་བོད་གསར་ངས་ཆེ་བ་མི་གཤིས་ཡིན་པ་དང་། ཆོས་ལ་དགོངས་ནས་རྙིང་པ་རྣམས་ཉམས་སུ་ལེན་པ་པོས་དམ་ཚིག་མི་ཐུབ་པས་སེལ་ཞུགས། ཉམས་ལེན་བྱིན་རླབས་ཀྱི་བརྒྱུད་པ་ལྷད་མེད་ཆད་ནས་གཟུགས་བརྙན་དུ་སོང་། རང་བཟོའི་བསྲེ་བསླད་བྱས་པས་བྱིན་ནུས་ཡལ་བ་ལ། སྨོན་ལམ་དུས་སུ་སད་པའི་ཟབ་གཏེར་རྣམས་ལ་དེ་ལས་ལྡོག་པའི་ཡོན་ཏན་ཡོད་པས་སྒྲུབ་པའི་དངོས་གྲུབ་མྱུར་དུ་ཐོབ་པ་ལ་དགོངས་ནས་སྐལ་ལྡན་གྱི་རྗེ་འབངས་སོ་སོར་དུས་དེ་དང་དེར་ཕན་ཐོགས་པའི་བཀའ་གཏད། དབང་བསྐུར་སྨོན་ལམ་དང་བཅས་
ཏེ་གཏེར་དུ་སྦས་པ་བཞིན་དུས་སུ་ལོངས་སྤྱད་དུ་ཡོད་པས་ད་ལྟ་བསྟན་པའི་མཐའ་ལ་ཐུག་དུས་ཀྱི་སྙིགས་མར་སོང་ཡང་། ལས་ཅན་གྱི་གདུལ་བྱ་རྣམས་ཆོས་འབྲས་བུའི་བསྟན་པ་ལ་ལོངས་སྤྱོད་དུ་ཡོད་པ་ནི་གུ་རུ་ཁོ་ནའི་བཀའ་དྲིན་ཡིན། དེར་མ་ཟད་རང་རེ་ཆོས་སྒོར་ཞུགས་འདོད་རྣམས་ལ་གུ་རུ་ཉིད་དགེ་བའི་བཤེས་གཉེན་རྣམ་ཀྱི་ཚུལ་བཟུང་ནས་ལ་ལས་དབང་བསྐུར། ལ་ལས་ཁྲིད་བཏབ་པ་སོགས་བསྡོམས་པས་མངོན་མཐོ་ངེས་ལེགས་ཀྱི་ཡོན་ཏན་ཡོངས་རྫོགས་རྒྱུད་ལ་སྟེར་བར་མཛད་པ་སོགས་རྒྱས་པ་བཀའ་ཐང་རྣམས་སུ་གསལ་བ་ལ་བལྟ། ཐུགས་བསྐྱེད་ལ་ལྟོས་པའི་མཛད་རྣམས་ཀྱང་རྒྱ་ཆེ་བས་སོ་སྐྱེས་བློ་གྲོས་ཆུང་བའི་ཁབ་མིག་ཏུ་ཤོང་དཀའ་བ་ཡིན། དེས་ན་བོད་དུ་བྱོན་པའི་ས་དགེ་ཀར་འབྲུག་གི་སྐྱེས་ཆེན་སུའི་རྣམ་ཐར་ལ་ཇི་ཙམ་བལྟས་ཀྱང་གུ་རུ་ཉིད་ཀྱི་ཡོན་ཏན་དང་བཀའ་དྲིན་རྗེས་དྲན་གྱི་གསོས་སུ་འགྲོ་བ་ནི་ང་འདྲ་བ་ལ་ཡང་འདུག་པས་རང་རེ་སྔོན་གྱི་ལས་འཕྲོ་དང་འཕྲལ་རྐྱེན་བཟང་པོ་འཛོམ་ནས་སྔ་འགྱུར་རྙིང་མའི་ཆོས་སྒོར་ཞུགས། གུ་རུའི་བསྟན་པའི་སྙིང་པོ་དང་མཇལ་བའི་དུས་འདིར། ཆོས་ལ་བརྟག་དཔྱད་ཀྱིས། གང་ཟག་ལ་དག་སྣང་སྦྱོངས་ཞེས་གྲགས་པ་ཚིག་རྩ་ཆེ་བས་རང་ལུགས་ཉམས་ལེན་གྱི་སྙིང་པོ་གསང་སྔགས་སྔ་འགྱུར་བའི་ཟབ་ཆོས་རེ་ལ་མཐའ་གཅིག་ཏུ་བློ་ཕུགས་གཏད་དགོས་ཀྱི་ཉ་དང་ཉུང་མ་བསྲེ་བ་ལ་དགོས་པ་མེད་ཀྱང་། བསྟན་འཛིན་སྤྱི་དང་བྱེ་བྲག་ལ་དག་སྣང་ཕྱོགས་མེད་དུ་སྦྱོང་དགོས་ཀྱི་བློ་མིག་ཞར་བས་ཡིན་མིན་ཕྱོགས་རིས་སུ་བཟུང་བ་ནི་གུ་རུ་ཉིད་ལ་དད་ལོག་ཏུ་འགྲོ་བ་སྔར་བཤད་པའི་རྒྱུ་མཚན་གྱིས་ཤེས་པས་འདི་གནད་ཆེ། སྤྱིར་ཡང་གསར་རྙིང་གི་མཁས་པ་རྒྱུ་མཚན་ཤེས་ཤིང་ཐུགས་གཟུ་བོར་གནས་པའི་ཆེན་པོ་རྣམས་ནི་གུ་རུ་རིན་པོ་ཆེ་ཚད་མར་མི་འཛིན་མཁན་སུ་ཡང་མེད་པའི་ཚུལ། འཇམ་མགོན་ས་པཎ་གྱིས། བརྟུལ་ཞུགས་གྲུབ་པ་པདྨ་སཾ་བྷ་ཝ་ཞེས་སོགས་དང་། ཇོ་བོ་རྗེ་ལྷ་གཅིག་གིས། ད་ལྟ་བོད་ན་བསྟན་པ་ཡོངས་སུ་རྫོགས་པ་དུས་གཅིག་ཏུ་དར་བ་འདི་ལྟ་བུ་ནི་རྒྱ་གར་ནའང་མ་བྱུང་ལ་དེ་གུ་རུ་པདྨའི་བཀའ་དྲིན་ཉག་གཅིག་རེད་སོགས་དང་། རྗེ་བདག་ཉིད་ཆེན་པོའི་བྱང་ཆུབ་ལམ་
རིམ་གྱི་དབུར། པདྨ་སཾ་བྷ་ཝ་ཆེན་པོས་བོད་དུ་བསྟན་པ་ཡོངས་སུ་རྫོགས་པའི་སྲོལ་བཙུག་ནས་ཞེས་སོགས་གུ་རུ་རིན་པོ་ཆེས་སངས་རྒྱས་ཀྱི་བསྟན་པ་ཡོངས་རྫོགས་ཉི་འོད་ལྟར་གསལ་བར་མཛད་པ་ཞལ་གྱིས་བཞེས་པ་ལས། གུ་རུའི་དྲིན་ལ་མ་ལྟོས་པར་རང་སྟོབས་ཀྱིས་བསྟན་པ་རྒྱ་ཆེར་གསལ་བར་རྒྱས་པ་ཡིན་ཞེས་གསུངས་མཁན་སུ་ཡང་མེད། རྒྱུ་མཚན་མི་ཤེས་པས་དང་། བློ་འཁྱོགས་པོར་སོང་བའི་གང་ཟག་ཕལ་པས་རང་ཕྱོགས་ལ་ཡིན། གཞན་ཕྱོགས་ལ་མིན་ཞེས་སྡང་ཞེན་ཁོ་ནས་སྨྲ་བ་ནི་རང་གཞན་སུ་ལའང་མང་བ་ཚང་མར་མི་རུང་སྟེ་དགག་གིས་ཀྱང་མི་ལོང་བས་དེ་དག་གི་ལད་མོ་བྱ་བ་སྐྱུར་ན་ལེགས། དེ་ལྟར་གུ་རུའི་ཡོན་ཏན་དང་བཀའ་དྲིན་དྲན་པའང་རང་གི་བླ་མའི་བཀའ་དྲིན་དྲན་པར་འགྲོ་ཚུལ་ཤེས་དགོས། གང་དྲན་ཀྱང་གནད་གཅིག་ཏུ་འགྲོ་བས་རྒྱུད་ཐ་དད་པར་བཟུང་མི་རུང་། དེ་ལྟ་བུའི་སྒོ་ནས་མོས་གུས་ཀྱི་གསོལ་འདེབས་ཉམས་ལེན་མཐིལ་དུ་བཟུང་ན་ལམ་གོལ་ས་དང་ནོར་འཆུག་མེད་པས་རང་རེའི་ལྷག་པར་བརྩོན་དགོས། གཉིས་པ་དེ་ལྟར་དྲན་པའི་སྒོ་ནས་གསོལ་བ་འདེབས་པ་དངོས་ནི། དེ་ཡང་དོན་མ་ཡིན་པ་ཞིག་ལ་གསོལ་བ་འདེབས་པ་ཐག་མཁན་རྐང་ལག་བརྒྱད་པའི་རྣམ་ཐར་ལྟ་བུ་དང་ཤིན་ཏུ་སྣེ་མང་པོ་བསང་འབོད་བྱེད་པ་ལྟ་བུ་གཉིས་ཀས་མི་འོང་བས། དོན་གྱི་གནད་གསུམ་དུ་བསྡུ་ནས་གསོལ་བ་ནི་ཞུ་བ། འདེབས་པ་ནི་འབུལ་བ་སྟེ་ཞུ་བ་འབུལ་དགོས། དེ་ནི་འདི་ནས་བཟུང་སྟེ་བྱང་ཆུབ་མ་ཐོབ་བར་དུ་བླ་མ་ཁྱེད་དང་འབྲལ་བ་མེད་པ་དང་། དེ་ལ་བརྟེན་ནས་དལ་འབྱོར་རྙེད་དཀའ་ནས་བཟུང་སྟེ། ཐེག་མཆོག་ཨ་ཏི་ཡོ་གའི་བར་ལམ་ཡོངས་རྫོགས་ཀྱི་རྟོགས་པ་རྒྱུད་ལ་སྐྱེ་བ་དང་། ཁྱད་པར་སེམས་ཀྱི་གནས་ལུགས་རྗེེན་པར་མཐོང་བ་ལ་ཐུགས་ཀྱི་དགོངས་པ་འཕོ་བ་ཁོ་ན་ལ་ལྟོས་པས་དོན་བརྒྱུད་ཀྱི་རྟོགས་པ་ཁྱད་པར་ཅན་དེ་ཉིད་སྟན་ཐོག་འདི་རུ་ད་ལྟ་ཉིད་དུ་འཕོ་བར་ནུས་པར་མཛད་དུ་གསོལ་ཞེས་ཞུ་ཞིང་། གསོལ་འདེབས་ཀྱི་ཚིག་ལེའུ་བདུན་༼མ་༽འདོན་པ་ལ་སྤྱི། བྱེ་བྲག་གཉིས་ལས། དང་པོ་སྐུ་གསུམ་གསོལ་འདེབས་བླ་མ་ནམ་དྲན་དུས་འདོན་རྒྱུ་གསུངས་པ་དང་། བྱེ་བྲག་ཏུ་སྤྲོ་ཞིང་ནུས་ན་ཉིན་མཚན་དུས་དྲུག་སོ་སོར། ཐོ་རངས་ཀྱི་དུས་
སུ་རྔ་ཡབ་དཔལ་རིའི་ཞིང་དང་སྟོན་འཁོར་བརྒྱའི་ཡོན་ཏན་དྲན་བཞིན་པས་འདི་ནས་ཉི་མ་ལྷོ་ནུབ་མ་མཚོ་རྒྱལ་ལ་གདམས་པ་དང་། སྔ་དྲོ་བརྒྱུད་པའི་བླ་མ་དང་གུ་རུ་དབྱེར་མེད་དྲན་བཞིན། སྤྲོས་བྲལ་བདེ་ཆེན་མ་ནམ་སྙིང་ལ་གདམས་པ། ཉིན་གུང་གུ་རུ་ཉིད་ཡིད་བཞིན་ནོར་བུ་ལྟར་འདོད་རྒུ་ཐམས་ཅད་འབྱུང་བར་ཤེས་པས། གུང་ཐང་རྒྱལ་པོ་དང་བོད་འབངས་སྤྱི་ལ་གདམས་པའི་བསམ་ལྷུན། ནུབ་མོ་རྒྱ་བོད་ཀུན་ཏུ་སྐུ་གཅིག་ལ་མཚན་བརྒྱད་དུ་གྲགས་པ་སོགས་མཛད་པའི་གཙོ་བོ་རྣམས་ཡོད་པའི་གུ་རུའི་རྣམ་ཐར་དྲན་པས་སྔགས་པ་རྡོ་རྗེ་བདུད་འཇོམས་ལ་གདམས་པའི་ལྷོ་ནུབ་རྔ་ཡབ་མ། སྲོད་ལ་གུ་རུ་ཉིད་རྒྱལ་བ་ཞི་ཁྲོ་རབ་འབྱམས་ཡིན་པར་ཡིད་ཆེས་པས་རྒྱལ་པོ་ཁྲི་སྲོང་ལ་གདམས་པའི་སངས་རྒྱས་བསྟན་པ་རྨད་བྱུང་མ། ནམ་ཕྱེད་གུ་རུའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཡོན་ཏན་དྲན་པས་ལྷ་སྲས་ལ་གདམས་པའི་སིནྡྷུ་རྒྱ་མཚོ་ཆུང་བ་ཞེས་ནུབ་ཕྱོགས་བདེ་བ་རྣམས་དང་། དེ་ཙམ་དཀའ་ན། སྔ་དྲོ་ཉི་མ་ལྷོ་ནུབ་མ་དང་སྤྲོས་བྲལ་བདེ་ཆེན་གཉིས། ཉིན་གུང་བསམ་ལྷུན་ཕྱི་དྲོ་ལྷོ་ནུབ་རྔ་ཡབ་མ། སྲོད་ལ་སངས་རྒྱས་བསྟན་པ། སིནྡྷུ་རྒྱ་མཚོ་ཆུང་བ་གཉིས་སྦྲེལ་བ་ཐུན་བཞི་བྱ་བའི་ཁོངས་མཆོད་པའི་འཕྲོར་སྐུ་གསུམ་གསོལ་འདེབས་དང་བྱེ་བྲག་སོ་སོ་འཛུད་པའམ་དེ་ཙམ་མ་ཁོམས་ན་ལེའུ་བདུན་པ་སྦྲེལ། གང་ལྟར་ཡང་མཐར། ཚིག་བདུན་གསོལ་འདེབས་མ་མཐའ་བརྒྱ་རེ་ཡན་གྲངས་གསོག །སྤྱིར་ན་ངག་འདོན་ཐམས་ཅད་ཀྱི་དུས་དང་ཁྱད་པར་གསོལ་འདེབས་སྐབས་ཚིག་ཙམ་མང་ཉུང་ལ་མ་ལྟོས་པར་སེམས་གཏད་པ་གལ་ཆེ་བ་གཞིར་བཞག་ནས་འདོན་ལུགས་ཀྱང་། པི་ཝཾ་གླིང་བུའི་གདངས་ལྟར་ཞེས་སོགས་ལྟར་དབྱངས་ཀྱི་གདངས་དང་བཅས་མ་སྟོར་བའི་བུ་ཕྲུག་གིས་སྨྲེ་སྔགས་འབོད་པའམ་ལོང་ཁྲིད་སྟོར་བའི་ལོང་བས་བོས་པ་ལྟར་སྐད་ལ་ཉམ་ཐག་པའི་ཉམས་ཆགས་པ་ཞིག་དགོས། ཚིག་བདུན་མ་འདི་རྡོ་རྗེའི་གསུང་བྱིན་རླབས་ཅན་གཏེར་ཆོས་ཐམས་ཅད་ལ་འབྱུང་བས་གསོལ་འདེབས་གཞན་ལས་ཤིན་ཏུ་ཟབ། དེས་ན་འདིིའི་དོན་བཀྲལ་བ་ལ། ཞིབ་ཏུ་ན་འཇམ་མགོན་མི་ཕམ་རིན་པོ་ཆེའི་འགྲེལ་བཤད་ལྟར་ཤེས་དགོས་ཀྱང་གོ་སླ་ཉན་
༼བདེ་༽ཙམ་འགྲེལ་ན། ཧཱུྃ༔ཞེས་དོན་ཞུ་བའི་ཐོག་མར་སྙན་གསན་དབབ་ནས། གླིང་འདིའི་ཕྱོགས་སོ་སོར་ཤར་འཇམ་དཔལ་གྱི་གནས་རི་བོ་རྩེ་ལྔ། ལྷོར་ཐུགས་རྗེ་ཆེན་པོའི་བཞུགས་གནས་གྲུ་འཛིན། ནུབ་དཔའ་བོ་མཁའ་འགྲོ་འདུ་བའི་ཨོ་རྒྱན་གྱི་ཡུལ། བྱང་རིགས་ལྡན་སྤྲུལ་པའི་གདུལ་ཞིང་ཤམ་བྷ་ལ་སྟེ་ས་སྤྱོད་ཀྱི་ཞིང་ཁམས་ངོ་མཚར་བ་བཞི་ཡོད་པའི་ནུབ་ཕྱོགས་ཨོ༵་རྒྱ༵ན་ཡུལ༵་གྱི༵་ཐད་ནས་གཞལ་བའི་ནུབ༵་བྱང༵་མཚ༵མས་ན་དྷ་ན་ཀོ་ཥའི་མཚོ་ཆེན་པོ་ཡོད་ལ། མཚོ་དེའི་གླིང་མེ་ཏོག་པདྨ་རབ་ཏུ་མང་པོ་ཡོད་པའི་དབུས་ཀྱི་མེ་ཏོག་གི་ཟེའུ་འབྲུའམ་གེ༵་ས༵ར་ཤིན་ཏུ་རྒྱས་པའི་སྡོང༵་པོ༵་ལ༵། སྐུ་བརྫུས་སྐྱེས་སུ་འཁྲུངས་པའི་ཚེ་ཕྱོགས་བཅུའི་སངས་རྒྱས་ཀྱིས་དབང་བསྐུར། ལྷ་དང་ལྷ་མོས་བསྟོད་བསྔགས་བརྗོད། དཔའ་བོ་མཁའ་འགྲོས་བྱིན་རླབས་མཛད། མི་དང་མི་མིན་གྱི་འགྲོ་བས་ཕྱག་འཚལ་ཞིང་མཆོད་པ་སོགས་ཡ༵་མཚ༵ན་གྱི་ལྟས་དཔག་མེད་པ་དང་བཅས་པས་འཁྲུངས་སོ། །དོན་དུ་ལམ་མས་སྦྱང་ཞིག་མ་ཡིན་པར་བསྐལ་པ་མང་པོའི་གོང་རོལ་ནས་སངས་རྒྱས་སྣང་བ་མཐའ་ཡས་ཀྱི་ངོ་བོར་བྱང་ཆུབ་མཆོ༵ག་གི༵་དངོ༵ས་གྲུབ༵་དམ་པ་བརྙེས༵་སུ་ཟིན་ཀྱང་སྙིགས་དུས་ཀྱི་གདུལ་བྱ་འདུལ་བའི་ཕྱིར་དུ་སླར་ཡང་བྱོན་པ་ལ་མཚན་པ༵དྨ་འབྱུང༵་གན༵ས་ཞེས༵་གསུང་པདྨའི་རིགས་ཡིན་པ་དང་། པདྨ་ལས་འཁྲུངས་པས་དེ་སྐད་དུ་ཞིང་ཁམས་ཐམས་ཅད་ན་ཡོངས་སུ༵་གྲག༵ས་སོ། དང་པོ་རྒྱ་གར་གྱི་ཡུལ་དང་དེ་ནས་བོད་ཀྱི་འགྲོ་བ་རྣམས་ཀྱི་དོན་མཛད་ནས་མཐར་རྔ་ཡབ་གླིང་གི་ལྟེ་བ་མཐིང་ཞུན་རྒྱ་མཚོའི་དབུས་སུ་དཔལ་རིའི་རྩེ་མོར་པདྨ་འོད་ཀྱི་གཞལ་མེད་ཁང་ངོ་མཚར་བའི་ནང་ན་འཁོ༵ར་དུ༵་དཔའ་བོ་དང་མཁ༵འ་འ༵གྲོ་མ༵ང་པོ༵ས་ཡོངས་སུ་བསྐོ༵ར་ནས་ཐུགས་རྗེས་བོད་ཀྱི་སེམས་ཅན་ལ་དགོངས་བཞིན་ད་ལྟར་ཡང་དངོས་སུ་བཞུགས་པ་དེ་ལ་སངས་རྒྱས་ཀུན་འདུས་ཀྱི་ངོ་བོར་མོས་གུས་དྲག་པོ་བསྐྱེད་ལ། ཁྱེ༵ད་ཀྱི༵་རྗེས༵་སུ༵་ཞུགས་ནས་བསྐྱེད་རྫོགས་སོགས་ལམ་མཐོན་པོ་བློར་མ་ཚུད་ཀྱང་གསོལ་འདེབས་ཀྱི་སྒོ་ནས་བད༵ག་གིས་སྒྲུབ༵་པར་བྱེད་ཀྱི༵། ཐུགས་བརྩེ་བས་དགོངས་ཏེ་བདག་གི་ཆོས་ཀྱི་འགལ་རྐྱེན་མཐའ་དག་ཞི་བ་དང་། མཐུན་རྐྱེན་ལེགས་ཚོགས་འཕེལ་ཞིང་བསམ་ཚད་ཆོས་དང་མཐུན། བྱེད་
ཚད་ཆོས་ལ་འགྱུར་བར་བྱིན༵་གྱིས༵་རླབ༵ས་པའི་ཕྱིར༵་གཤེག༵ས་སུ༵་གསོ༵ལ་ཞེས་པའོ། གུ༵་རུ༵་ནི་ལྕི་བའི་དོན་ཏེ་བླ་མའི་ཐུགས་ཡོན་ཏན་གྱིས་ལྕི་བས་དེ་སྐད་བརྗོད། པདྨ༵་ནི་མཚན་གྱི་ཆ་ཤས་ནས་བོས་ཏེ་སིདྡྷི་ནི་དངོས་གྲུབ་སྟེ་མཆོག་ཐུན་གྱི་དངོས་གྲུབ་མ་ལུས་པ་ཧཱུ༵ྃ་ཞེས་སྩོལ་ཅིག་གི་དོན། དེ་ཡང་སྔོན་གུ་རུའི་ཐུགས་རྗེ་ཉེ་རིང་མེད་པས་སྤྱན་གྱིས་མ་གཟིགས་ཐུགས་ཀྱིས་མ་དགོངས་ནས་དོར་སོང་བ་མ་ཡིན་ཀྱང་རང་ངོས་ནས་ཁ་ཙམ་མ་ཡིན་པའི་སྙིང་ཐག་པ་ནས་གསོལ་འདེབས་མ་ཐུབ་པས་བྱིན་རླབས་རུང་བའི་ཡུལ་དུ་མ་གྱུར་ལ། ད་ལྟ་དེ་འདྲའི་ཕན་ཉེས་ཤེས་ནས་རྒྱུ་རྐྱེན་འཛོམས་ན་ཉམས་རྟོགས་ཡོན་ཏན་ཐམས་ཅད་དབྱར་མཚོ་ལྟར་རྒྱས་པ་ཐེ་ཚོམ་མེད་པ་ལ་བློ་བཞག །འཇིག་རྟེན་ན་ཡ་རབ་ཏུ་གྲགས་པ་ལའང་རེ་ལྟོས་སྙིང་ནས་བཅས་ན་ཕན་ཐོགས་དུས་འདི་ཕྱིའི་དོན་ཐམས་ཅད་སྒྲུབ་ནུས་པའི་བླ་མ་གུ་རུ་རིན་པོ་ཆེ་ལ་བརྟེན་ན་ཕན་ཐོགས་ངེས་པ་ལ་ཡིད་གཉིས་ཐེ་ཚོམ་མེད་པས་ཐག་ཆོད་པའི་ཡིད་ཆེས་དང་བློ་གཏད་ལིང་བསྐྱུར་དགོས་ཀྱི། བྱིན་རླབས་ཀྱི་སྒོ་བཀག་བྱེད་ཐེ་ཚོམ་འདི་ཡིན་པས་ནམ་ཡང་སྤངས་ནས་གསོལ་བ་བཏབ་ན་འདོད་དོན་ཇི་བཞིན་འགྲུབ་པའི་གེགས་སྔོན་ལས་ངན་པ་ཞི། འཕྲལ་གློ་བུར་གྱི་རྐྱེན་བཟློག་ངེས་པ་ཡིན། ད་ལྟ་ནད་མེད་ཤེས་པ་གསལ། བསམ་མནོ་གཏོང་ཐུབ་པའི་དུས་འདིར་གསོལ་འདེབས་ལ་བརྩོན་ནས་བྱིན་རླབས་རྒྱུད་ལ་ཞུགས་པའི་རྟགས་མཚན་ཞིག་ངེས་པར་མཐོང་དགོས་པས་ད་ནས་བཟུང་ཉིན་རེ་བཞིན་མ་ཆག་པར་འདྲིས་སུ་བཅུག་དགོས་ཀྱི། སྡུག་ཧུར་ཐུག་དུས་ཤི་ཁ་མ་ཎི་ཚ་འདོན་བྱེད་པས་ནི་གནད་དུ་འགྲོ་དཀའ་བར་ངེས། གོམས་འདྲིས་བཏང་ལུགས་དེའང་འགྲོ་ཞོར་འདུག་ཞོར་དང་འདི་སྣང་གྱི་བྱ་བ་དང་བསྒྲག་ནས་རང་མགོ་རང་གཡོག་གི་དགོས་པ་མེད་པས་གནས་དབེན་པ་ཁོ་ནར་བརྟེན། དེའང་ལུས་དབེན་ཙམ་མ་ཡིན་པར་སེམས་ཆགས་སྡང་རྨོངས་གསུམ་སོགས་ཀྱི་དབང་དུ་མ་སོང་བར་གསོལ་འདེབས་ཁོ་ནའི་རྗེས་སུ་འགྲོ་བ་ལ་ཡང་ཡང་བསླབ་ནས་འདྲིས་སུ་བཅུག །དུས་དེ་ཙམ་ན་ཟས་གོས་ཀྱི་ཕོངས་པ་གཏམ་སྙན་གྲགས་ཉམས་པ་སོགས་སྐྱིད་སྡུག་ཅི་ལྟར་བྱུང་ཡང་བློ་རྐྱེན་དབང་དུ་མི་ཤོར་བའི་ཐབས་
སུ་རེ་དོགས་མེད་པའི་སེམས་རྒྱ་ཆེན་པོ་བསྐྱེད། ཆོས་ཀྱི་བར་ཆད་དང་གེགས་ཐམས་ཅད་རེ་དོགས་འདི་ལ་ཐུག་པས་རྦད་ཀྱིས་བཅད། རྗེ་མི་ལས་རྩམ་པ་ཁལ་གསུམ་བསྣམས་ནས་བྲག་དཀར་རྟ་སོ་ལ་ལོ་དགུ་བཞུགས་པའི་དམ་བཅའ་མཐར་ཕྱིན་པས་ཡུལ་ཀུན་ཏུ་མཚན་སྙན་པས་ཁྱབ་པ་བྱུང་། སྐྱིད་གསོག་ནས་བཞུགས་ཡོད་ན་ད་ལྟ་སུ་ཡིན་ཡང་མི་ཤེས་པའི་ཕལ་པ་ཞིག་ཡིན་ཚུལ་སོགས་ལ་བསམ་ནས་སྔོན་གྱི་སྡུག་ཐམས་ཅད་དོན་མེད་དུ་སོང་བས་ཚེ་ལྷག་ཅུང་ཟད་ཡོད་པ་འདིར་ན་ན་ན་གོ་ཆོད་པ། ཤི་ན་ཤི་གོ་ཆོད་པ་ཞིག་བྱ་སྙམ་པའི་བློ་ཐག་ཆོད་དགོས། དེས་ན་ཆེ་བཞག་ཆུང་བསྐྱུར་གྱི་གསོལ་འདེབས་ལ་མོས་གུས་ཆིག་དྲིལ་དུ་བརྩོན་པས་རང་ཡིད་རང་ལ་ཆེས་པ་ཞིག་མ་འོང་བར་ཕོ་ཨི་རྒོད་མི་རྒོད་བློ་ཨི་རྣོ་མི་རྣོ་ལྟ་ས་འདི་ཡིན། སྐབས་རེར་གློ་བུར་དུ་དད་མོས་དྲག་པོ་སྐྱེ་བ་མིག་མཆི་མ་འཁྲུག་ཙམ་རེ་འབྱུང་ན་ཡང་རྒྱུན་མ་བརྟན་ན་དེ་མོས་གུས་སྐྱེས་པ་མི་ཟེར། སྐྱིད་སྡུག་ཟ་ཉལ་འགྲོ་འདུག་ཀུན་ཏུ་ཆུ་བོའི་རྒྱུན་ལྟ་བུ་ཞིག་སྐྱེས་ཙ་ན་མོས་གུས་བཅོས་མིན་ཡིན་པས་གོམས་པའི་རྟག་དུ་གཟུང་། དེ་ལྟར་ལོ་ཟླ་མང་པོར་འབད་པས་ད་དུང་མོས་གུས་མ་སྐྱེ་ན། རང་གཏེར་མཚོ་རྒྱལ་སྙན་བརྒྱུད་ནས་གསུངས་པ་ལྟར་བོག་འདོན། རི་ཤིན་ཏུ་མཐོན་པོའི་རྩེ། ཐང་ཡངས་པའི་དཀྱིལ། མི་མེད་ཀྱི་ལུང་སྟོང་རྣམས་སུ་ཕྱིན་ནས་གཅིག་པུར་འདུག་ཏེ་འཁོར་བའི་ཉེས་དམིགས་དྲན་པས་སེམས་སྐྱོ་སེང་ངེ་བ་འབྱུང་། དུས་དེར་ཡོན་ཏན་དང་བཀའ་དྲིན་སྙིང་ནས་དྲན་པའི་གསོལ་འདེབས་ཤུགས་དྲག་བྱས་ན་གནད་དུ་འགྲོ་བ་དཔེར་ན་བུ་ཆུང་དེར་བཞག་ན་ཁྱིམ་དྲན་ལ་མི་མང་གསེབ་ཏུ་བཞག་ན་གཡེངས་ནས་དྲན་མི་ཤེས་པ་ལྟ་བུ་ཡིན་གསུངས། གསོལ་འདེབས་དེ་ཡང་སྐད་དྲག་ཏུ་འབོད་ལ་མགོ་བོ་འགས་པའི་ཚོད་ཙམ་དུ་སྙིང་ཐག་པ་ནས་བྱ། དེའི་ཚེ་བསམ་རྒྱུ་བླ་མ་ལས་མེད་པ། ཕར་ཐིམ་ཕོད་པ། ཚུར་འབྲལ་མི་ཕོད་པ་ལྟ་བུའི་དབང་མེད་དུ་བློ་སྣ་འགྱུར་བ་བྱུང་ན་དེ་དུས་སེམས་ལྷོད་ཕབ་ནས་རང་བབས་སུ་བཞག་པས་མོས་གུས་ཀྱི་བློ་མ་འགགས་བཞིན་སེམས་གཤིས་ཐོག་ཏུ་ཕེབས་པ་དེ་ལ་བླ་མ་ཆོས་སྐུར་བལྟ་བའི་མོས་གུས་ཞེས་བྱ། དེ་ལྟར་བརྩོན་པ་རེས་མོས་བྱས་པས་
ལས་སྒྲིབ་ཚན་པོ་ཆེ་རྣམས་ཀྱང་མྱུར་དུ་དག་འགྲོ་བར་གསུངས། དེང་སང་དད་པ་མོས་གུས་འདི་ཁྱིམ་པ་ཕོ་མོའི་ཆོས་སྐལ་ལྟ་བུ་དང་ལམ་ཞུགས་ལ་དེ་བས་དྲག་ཞིག་ཡོད་ཁུལ་བྱེད་ནས་རྩིས་མེད་བཏང་བ་མང་ཡང་། ལམ་ཉམས་ལེན་གྱི་ཐོག་མཐའ་བར་གསུམ་དུ་གལ་ཆེ་བ་ས་ར་ཧས། དོན་དམ་ལྷན་ཅིག་སྐྱེས་པའི༴གསུངས་པ་སོགས་ལ་བསམ་ནས་གནས་ལུགས་རང་ངོ་ཨི་འཕྲོད་ཀྱི་རེ་བ་ཡོད་དེ་རྗེན་ཅེར་དུ་རྟོགས་པའི་ཐབས་མཆོག་བོར་ནས་གཞན་ཡན་ལག་ཕལ་པ་ཞིག་ལ་བརྩོན་མདོག་བྱེད་པ་དོན་མེད། འདི་ནི་ཀུན་གོ་གཅིག་གིས་ཆོད་པ་ཡིན་ཚུལ། བླ་མའི་སྐུའི་རྣམ་པ་ལ་གསལ་སྣང་བཏོན་པས་བསོད་ནམས་ཀྱི་ཚོགས་རྫོགས། གཟུགས་སྐུའི་ཉེ་རྒྱུ་བསྐྱེད་རིམ་དུ་འགྲོ། དབང་བཞིའི་མཐར་རིག་ངོ་བསྐྱང་བས་ཡེ་ཤེས་ཀྱི་ཚོགས་རྫོགས། ཆོས་སྐུའི་ཉེ་རྒྱུ་རྫོགས་རིམ་གྱི་གནད་ཚང་བས་བསྐྱེད་རྫོགས་གཉིས་དང་། སྤྱི་བོའི་བླ་མ་ལ་གསོལ་འདེབས་བྱ་བ་བསྙེན་པ༵། དེས་བྱིན་རླབས་ཞུགས་ནས་བླ་མའི་ཐུགས་དང་རོ་གཅིག་ཏུ་སྒྲུབ་པ་ལ་སྒྲུབ༵་པ༵། དེའི་མཐུས་བྱ་བ་གང་བརྩམ་གཞན་དོན་བསྟན་འགྲོ་འབའ་ཞིག་གི་དོན་དུ་འགྲོ་བས་ལས་སྦྱོར་དང་གསུམ་ཡང་ཚང་། ཡང་གསོལ་འདེབས་བསྙེན༵་པ༵། རྟགས་མཚན་མཐོང་བ་ཉེ༵་བསྙེན༵། བྱིན་རླབས་ཞུགས་ནས་རང་སེམས་དང་དབྱེར་མེད་དུ་སྒྲུབ༵་པ༵། སྒྲུབ་འབྲས་མངོན་དུ་ཐོབ་པ་སྒྲུབ༵་ཆེ༵ན་ཏེ་ཡན་ལག་བཞི་ཀ་ཚང་། ཐུན་མོང་གི་ལས་རབ་འབྱམས་གང་སྒྲུབ་དགོས་ཀྱང་སེམས་ཉིད་ངལ་གསོའི་བླ་རྣམ་སྐབས་ཀྱི་རྩ་འགྲེལ་ལས་གསུངས་པ་ལྟར། ཚོགས་ཞིང་སྐུ་མདོག་དང་འོད་ཟེར་ལས་མདོག་སྤྲོ། སིདྡྷི་བཟླས་མཐར་ཤིནྟཾ་ཀུ་རུ་སྭཱ་ཧཱ་སོགས་བཏགས་པ་བཟླ་ཚེ་དཀར་སེར་གྱིས་ཞི་རྒྱས་འོད་དམར་ལྕགས་ཀྱུའི་དབྱིབས་ཀྱིས་དབང་། འོད་ཟེར་སྔོན་པོའི་ཀློང་ནས་མཚོན་ཆ་སྤྲོས་པས་དྲག་པོའི་ལས་སྒྲུབ་ཚུལ་ཡོད་པས་ལས་གང་དགོས་བླ་མ་ལ་བརྟེན་ནས་སྒྲུབ་པ་བཟང་ལ་མྱུར། སྣ་མང་པོ་ལ་ཞུགས་པས་འགྲུབ་དུས་མི་འོང་སྟེ། ཉམས་ལེན་གཅིག་གིས་ཀུན་གོ་མ་ཆོད་ན་རྣམ་མཁྱེན་གྱི་རྒྱུར་ཡང་མི་འགྲོ། དེ་ནས་ཚིག་བདུན་མཐར། བརྒྱུད་འདེབས་རྗེས་སིདྡྷི་ཅི་ནུས་བཟླ།
ལྔ་པ་དབང་བཞི་ལེན་པ་ནི། དབང་གནང་བར་བསྐུལ་བའི་ཁྱད་པར་གྱི་གསོལ་འདེབས་སྐུ་བཞིའི་དབང་ཕྱུག་བརྗོད་སྐབས་འཁོར་གྱི་ལྷ་དང་བརྒྱུད་རིམ་རྣམས་འོད་དུ་ཞུ་ནས་བླ་མ་ལ་ཐིམ་པས་སྐྱབས་གནས་ཀུན་འདུས་ཀྱི་ངོ་བོར་མོས་གུས་བཟོད་མེད་ཀྱིས་དབང་ལེན་དགོས། དབང་གི་སྒྲ་དོན་གཏོར་བླུག་ལ་འཇུག་པས་དྲི་མ་རེ་སྦྱངས་ཤིང་སྔར་མེད་ཀྱི་ནུས་པ་གསར་བ་རེ་བཞག་པ་ལ་ཟེར། དེས་ན་དབང་ཞེས་པའང་དབང་བཞི་སོ་སོའི་ཡེ་ཤེས་དེ་དང་དེར་མངོན་སུམ་དུ་རྟོགས་པའམ་གོ་བ་རྣམ་དག་མ་སྐྱེས་ན་ཐོབ་པའི་དོན་མེད་དོ། སྔར་གསལ་བའི་སྤྱི་བོའི་ༀ་ལས་འོད་དཀར་ཆུ་ཤེལ་ཞུ་བ་ལྟ་བུ་མང་པོ་འཕྲོས་པའི་རྩར་ཁྲོ་བོའི་ལྷ་སྐུ་ཆེ་ཆུང་གྲངས་མེད་པ་བཅས་རང་གི་སྤྱི་བོར་ཐིམ། གདན་གསུམ་ལྷ་ཡི་འཁོར་ལོར་རྟོགས་པའི་སྒོ་ནས་བུམ་དབང་ཐོབ། དེ་ཐོབ་ནས་བཟུང་བསྐྱེད་རིམ་ལ་རྒྱུན་དུ་ཉམ་ལེན་དགོས་ཤིང་མ་ཐུབ་ན་དམ་ཚིག་དང་འགལ། དབང་དེ་ཐོབ་ནས་བསྐྱེད་རིམ་སྒོམ་པ་ལ་དབང་ཞིང་། མ་ཐོབ་ན་དེ་ལ་མི་དབང་བས་དབང་ཡང་ཟེར། ལུས་ཀྱི་སྒོ་ནས་བསགས་པའི་སྲོག་གཅོད་སོགས་གསུམ་གྱིས་མཚོན་པ་དང་། ཁྱད་པར་བླ་མའི་སྐུའི་དམ་ཚིག་ཉམས་ཆགས་ཉེས་ལྟུང་རྣམས་དག་པར་མོས། མ་འོངས་པ་ན་སངས་རྒྱས་སྤྲུལ་པའི་སྐུ་ཐོབ་པའི་སྐལ་བའམ་ནུས་པ་ཁྱད་པར་ཅན་སེམས་ལ་བཞག་པར་བསམ་མོ། །བུམ་པ་མགོ་ཐོག་བཞག་ནས་བུམ་ཆུ་འཐུང་བ་སོགས་ནི་མཚོན་བྱེད་ཙམ་ཡིན་གྱི་དབང་དངོས་མ་ཡིན། མགྲིན་པའི་ཨཱཿལས་འོད་ཟེར་པད་རག་ལྟར་དམར་བ་འཕྲོས་པའི་སྣེར་དབྱངས་ཡིག་དམར་པོ་གསལ་བྱེད་དཀར་པོ་གྲངས་མེད་རྩ་སྔགས་བཛྲ་གུ་རུ་རྣམས། མགྲིན་པར་ཐིམ་པས། གསལ་སྟོང་ཟུང་འཇུག་གི་ཡེ་ཤེས་རྒྱུད་ལ་སྐྱེས་པའི་སྒོ་ནས་གསང་དབང་ཐོབ། ཉམས་ལེན་རྩ་རླུང་བསྒོམ་པ་ལ་དབང་། ངག་གི་ལས་བཞི་དང་བླ་མའི་གསུང་གི་དམ་ཚིག་སྐོང་། འབྲས་བུ་ལོངས་སྐུའི་ནུས་པ་བཞག །ཐུགས་ཀའི་ཧཱུྃ་ལས་འོད་སྔོན་བཻཌཱུཪྱའི་མདོག་གི་སྣ་ལ་རིགས་ལྔ་སོགས་ཀྱི་ཕྱག་མཚན་གྲངས་མེད་བཅས་སྙིང་ཁར་ཐིམ་པས། བདེ་སྟོང་ཟུང་འཇུག་གི་ཡེ་ཤེས་རྒྱུད་ལ་སྐྱེས་པས་ཤེར་དབང་ཐོབ། ཐིག་ལེ་བསྒོམ་པ་ལ་དབང་། ཡིད་ཀྱི་ལས་
གསུམ་དང་བླ་མའི་ཐུགས་ཀྱི་དམ་ཚིག་སྐོང་། འབྲས་བུ་ཆོས་སྐུ་ཐོབ་པའི་ནུས་པ་བཞགསླར་ཡང་འོད་ཟེར་གསུམ་དུས་ཅིག་ཆར་སྤྲོས་པ་གནས་གསུམ་དུ་ཐིམ་པས། རིག་སྟོང་གི་རྟོགས་པ་ཁྱད་པར་ཅན་རྒྱུད་ལ་སྐྱེས་པའི་སྒོ་ནས་དབང་བཞི་པ་ཐོབ། ཀ་ལྷུན་བསྒོམ་པ་ལ་དབང་། སྣང་གསུམ་གི་བག་ཆགས་ཞེས་པ་འཆི་བའི་ཚེ་སྣང་མཆེད་ཐོབ་གསུམ་འོད་གསལ་བར་ལུགས་འབྱུང་དུ་འགགས་ཀྱང་སླར་ལུགས་ལྡོག་ཏུ་ལྡང་བས་འཁྲུལ་བ་ཡིན། དེས་ན་ལུགས་ལྡོག་ཏུ་འབྱུང་བའི་ནུས་པ་སེམས་སྟེང་ན་ཡོད་པ་དེ་བཅོམ་པ་ན་སངས་རྒྱས་པ་ཡིན་པས་བཞི་པའི་དབང་གི་སྦྱང་བྱ་ནི་དེ་ཡིན། འབྲས་བུ་ངོ་བོ་ཉིད་སྐུ་ཐོབ་པའི་ནུས་པ་ཁྱད་པར་བ་རྒྱུད་ལ་བཞག་པར་མོས། སླར་ཡང་སྙིང་ཐག་པ་ནས་གསོལ་བ་དྲག་ཏུ་བཏབ་ཅིང་ངག་ཏུ་སྐྱབས་གནས་ཀུན་གྱི་ལན་གསུམ་མཐར་བླ་མའི་འོད་ཀྱི་སོགས་གོང་བུ་རང་ལ་བསྟིམ་པ་དང་སྙིང་ཁར་ཞུ་བའི་ལུགས་གཉིས་འདམ་ཁ་ཡིན་པས་རྗེས་མ་ལྟར་དེའི་རྐྱེན་གྱིས་བླ་མ་ཉིད་སྐུ་ཇེ་ཆུང་སོགས་རིམ་གྱི་གཟི་བྱིན་ཇེ་ཆེ་རེ་སོང་བ་མདུན་གྱི་ནམ་མཁའ་ནས་སྤྱི་བོར་བྱོན། ཚངས་བུག་ཁ་ཕྱེ་དབུ་མ་ནས་བརྒྱུད། སྙིང་པད་མ་དམར་པོ་འདབ་མ་བརྒྱད་པ་ཁ་འབུས་ཀྱི་ཟེའུ་འབྲུར་བཞུགས་པ་བསམ་ལ་ཤེས་པ་རྩེ་གཅིག་པའི་གསལ་སྣང་ཡུན་རིང་དུ་སྦྱོང་། མཚམས་དེར་མཆོད་བསྟོད་ཀྱི་ཚུལ་དུ་སིདྡྷི་ཅུང་ཟད་བཟླས་ན་གསང་འདུས་ལས་གསུངས་པ་ལྟར་སྒྲུབ་པར་འགྲོ། མཐར་བླ་མ་འོད་དུ་ཞུ་ནས་རང་སེམས་དང་དབྱེར་མེད་རོ་གཅིག་ཏུ་འདྲེས་པར་བསམ་ནས་རིག་ངོ་བསྐྱང་། ཐུན་བསྡུ་བ་ན། ཉམས་ལེན་གྱི་ཐུན་འདིས་མཚོན་པའི་རང་གཞན་རྣམས་ཀྱིས་དུས་གསུམ་དུ་བསགས་པའི་དགེ་རྩ་ཐམས་ཅད་སེམས་ཅན་གྱི་དོན་དུ་ལམ་ཟབ་མོ་འདི་ལ་བརྟེན་ནས་བླ་མ་སངས་རྒྱས་ཀྱི་གོ་འཕང་ཚེ་འདིར་འགྲུབ་པའི་རྒྱུར་བསྔོ་ཞིང་། དེའི་མཐུས་སངས་རྒྱས་ནས་མཁའ་ཁྱབ་ཀྱི་སེམས་ཅན་རང་ཉིད་གཅིག་པུའི་མཐུས་བླ་མ་མཆོག་གི་གོ་འཕང་ལ་བཞག་ནུས་པར་ཤོག་ཅིག་སྙམ་པའི་སྨོན་ལམ་བཏབ། གོང་གི་གསོལ་བ་འདེབས་རྒྱུའི་དོན་དང་བསྔོ་སྨོན་གྱི་འདུན་ཡུལ་ཕྱོགས་འདྲ། དགེ་བ་འདི་ཡིས་སོགས་བརྗོད། ཐུན་མཚམས། སྤྱི་བོའི་ཚོགས་ཞིང་གསལ།
སྐབས་སུ་གསོལ་འདེབས་རེ་དང་། ནམ་དྲན་དུས་སྐུ་གསུམ་གསོལ་འདེབས་སམ་ཚིག་བདུན་མ། སིདྡྷི་ཚར་རེ་ཡན་འདོན་ནས་མོས་གུས་བྱ། སྐྱིད་སྡུག་སོགས་ཅི་བྱུང་ཡང་ལམ་དུ་ཁྱེར། སྐྱིད་ན་བླ་མའི་བཀའ་དྲིན་དང་། སྡུག་ན་འཁོར་བ་འདི་ལ་སྡུག་བསྔལ་མ་གཏོགས་མེད་པས་དེའི་ཉེས་དམིགས་སེམས་ལ་དེ་ལས་ཐར་བའི་ཐབས་ལམ་ཟབ་འདི་ལ་བརྩོན་ནས་ལུས་བོར་མ་ཐག་རྔ་ཡབ་དཔལ་རིའི་ཞིང་དུ་འགྲོ་གྲབ་ཀྱིས་ཞེས་གདམས་པའི་བརྡ་རེད་སྙམ་དུ་བསམ། ཐུན་བཞི་སོགས་གཅོད་ན། ཐུན་དང་པོ་རྣལ་དབབ་ནས་སྔོན་འགྲོ་ངག་འདོན་གཤར་སྒོམ་མཐར་ཆགས་རེ་དང་རྗེས་མ་རྣམས་ལ་རྣལ་དབབ་རྗེས་སྐྱབས་སེམས་ནས་བླ་རྣམ་ལ་འཇུག །འདི་ལ་བརྟེན་ནས་འཕོ་བ་སྤྱོངས་འདོད་ན། གོང་དུ་དབང་བཞི་རྫོགས་ནས་སྐྱབས་གནས་ཀུན་འདུས་མའི་མཐར། སླར་ཡང་བླ་མའི་ཐུགས་ཀ་ནས་ངོ་བོ་བྱིན་རླབས་ལ་རྣམ་པ་ཐུགས་རྗེ་ཆགས་པའི་འོད་ཟེར་དམར་པོ་ལྕགས་ཀྱུའི་དབྱིབས་ཅན་དྲོད་དང་བཅས་པ་སྤྲོས། རང་གི་སྙིང་དབུས་རེག་མ་ཐག་སྒོ་གསུམ་གྱི་སྙིགས་མ་སྦྱང་། དྭངས་མ་སྲན་ཕོད་ཙམ་དཀར་ལ་དམར་མདངས་ཆགས་པ་ཞིག་ཏུ་གྱུར་ནས་འོད་དེས་མྱུར་བར་དྲངས་ཐུགས་ཀར་ཐིམ་པས་བླ་མའི་ཐུགས་དང་རང་གི་སྒོ་གསུམ་དབྱེར་མེད་རོ་གཅིག་ཏུ་འདྲེས་པར་བསམ། ཡང་སྐྱབས་ཀུན་མའི་གསོལ་འདེབས་ནས་དབྱེར་མེད་དུ་བསྲེ་བའི་བར་བདུན་ཡན་ཆད་ཅི་ནུས་སུ་སྦྱངས་བའི་མཐར་བླ་མ་སྤྱི་བོར་དྲངས་ནས་སྙིང་དབུས་བསྟིམ་པ་སོགས་སྔར་ལྟར། འདིས་ལུས་སེམས་ཁ་མ་ཕྲལ་བས་འཕོ་རབ་ཚེ་ཐུང་བའི་ཉེས་པའང་མེད། ཉལ་བའི་དུས་སེང་གེའི་ཉལ་སྟབས་སུ་བྱས་ནས། སྔར་གྱི་ཚོགས་ཞིང་བླ་མ་ལ་བསྡུ་བླ་མ་སྤྱི་བོ་ནས་སྙིང་དབུས་བྱོན་འོད་ཀྱི་གོང་བུའི་ཀློང་ན་བཞུགས་པར་བསམ། སྐུ་དེ་ལས་འོད་ཟེར་དཔག་མེད་འཕྲོས། རང་ལུས་འོད་ཀྱིས་གང་། དེ་ལས་ཕྱིར་འཕྲོས་སྣོད་བཅུད་ཐམས་ཅད་ལ་ཁྱབ་པས་འོད་དུ་ཞུ་བ་རང་གི་ལུས་ལ་ཐིམ། ལུས་ཞུ་བ་བླ་མ་ལ་ཐིམ་པས་བླ་མ་ཇེ་ཆུང་ལ་སོང་ནས་སྐྲ་རྩེ་ཙམ་འོད་ཀློང་བཞུགས་པ་ལ་སེམས་གཏོད་བཞིན་གཉིད་ལོག་ན་གཉིད་འོད་གསལ་གྱི་འཁོར་ལོར་སྦ་པའི་ཐབས་མཆོག་ཅིག་ཡིན། ཤིན་ཏུ་ཕྲ་བ་
མ་གསལ་ན་ཡུངས་འབྲུ་འམ་ཚོན་གང་ཙམ་གང་བདེ་གསལ། སད་དུས་རྟོག་པ་རྒྱ་འབྱམས་མི་གཏོང་བར་དམིགས་པ་སྔ་མའི་འཕྲོ་མཐུད་ལ་གཉིད། དེས་རྨི་ལམ་གྱི་བག་ཆགས་སྦྱངས། ཐོ་རངས་སད་མ་ཐག་ཚངས་བུག་ནས་བྱོན་མདུན་མཁར་དགྱེས་བཞིན་བཞུགས་པར་བསམ་ལ་ལངས་ནས་རྣལ་དབབ་སོགས་སྔོན་འགྲོའི་ཉམས་ལེན་ནས་སྔར་ལྟར་བསྐྱང་། མདོར་ན། ལས་དང་པོ་པས་གང་ཤར་གདོང་དེད་ཀྱིས་ཅི་ཡང་མི་འོང་བས་ཉམས་ལེན་གང་བྱེད་ཐུན་དང་ཐུན་མཚམས་ཀྱི་ངེས་པ་བཟུང་ནས་ཐུན་ལ་ངག་འདོན་སོགས་མ་མཐའ་གཤར་གོམ་རེ་ཚང་བ་དང་མྱོང་ཁྲིད་ཀྱི་བརྒྱུད་པ་ཡོད་ན། བསམ་མནོ་བཏང་བའི་འགག་རེ་ལའང་དོན་གནད་མང་པོ་ཚང་བས་ཉམས་ལེན་རྒྱུད་ཐོག་ཏུ་འགེལ་བ་ལ་གལ་ཆེ་ཐུན་གྱི་ཉམས་ལེན་དང་སྔགས་སོགས་གང་འདོན་ཐུན་མཚམས་ལའང་བརྩོན་དགོས་པ་ཡིན་ཀྱང་། ཟ་ཞོར་འགྲོ་ཞོར་གྱི་སྔགས་བཟླས་དེ་རྩ་བའི་གྲངས་སུ་བརྩི་མི་རུང་ཞིང་། རྒྱུན་གྱི་ཉམས་ལེན་གང་ཡང་ལུས་མལ་སར་བསྡད་ནས་བྱ་བ་ལས། མི་མང་ཁྲོད་དང་། བཤད་ཞོར་བརྩོན་པ་ལྟ་བུས་ནི་དགེ་སྦྱོར་ལ་སྐྱེད་མེད་ཅིང་ལད་འགྲོ་བས་གཟབ། སྔོན་འགྲོའི་ཆོས་རྣམས་ལ་རྐང་མ་ཚུགས་ན་གཞན་ལམ་མཐོ་སྙེགས་ལ་དགའ་ཆེ་བ་ནི་རང་ཉིད་ཕུང་བའི་རྒྱུ་ཡིན་ཞིང་། ཁྱད་པར་ལམ་ཟབ་མོ་བླ་མའི་རྣལ་འབྱོར་འདི་ནི་སྤྱིར་ཆོས་སྒོར་ཞུགས་པ་སྒོས་ཐེག་མཆོག་ཨ་ཏི་ལ་མོས་པ་རྣམས་ཀྱི་འཆུག་མེད་ཀྱི་ཉེ་ལམ་ཡིན་པ་དང་ཁོ་བོའི་བློ་རྩ་འདུན་པ་གཏོད་ས་ནི་འདི་ཉིད་ཡིན། ཁྱེད་རྣམས་ལ་བསྐྱེད་རྫོགས་ཀྱི་རྟོགས་པ་མཐོན་པོ་ཡོད་ན་ཅི་བཤད། དེ་འདྲ་མེད་བཞིན་ལམ་གནད་རེ་ཨེ་ཉན་གྱི་རེ་བ་རྣམ་དག་གིས་ཉམས་ལེན་གྱི་རྩ་བ་འདི་ཉིད་བཟུང་ན་འཕྲལ་ཡུན་ཀུན་ཏུ་བདེ་ལེགས་རྒྱ་ཆེར་འབྱུང་ངེས་པ་ཡིན་ནོ་ཞེས་ངག་ལ་ཉན་འདོད་པ་རྣམས་ཀྱིས་སེམས་ལ་ནན་དུ་ཞོག །ཅེས་སོགས་རྒྱ་ཆེར་གསུངས་པ་ཤ་ཟིན་སྤུ་ཟིན་དུ་བྲིས་པ་ལགས། །མཁྱེན་ནོར་གསུངས་པ་སྐྱེ་མེད་ནས་བྲིས་སོ། །