གསང་བ་སྙིང་པོའི་སྤྱི་དོན་མཐོང་བས་དོན་རྟོགས། རྒྱལ་སྲས་པདྨ་འགྱུར་མེད་རྒྱ་མཚོ།
དྲྀ ཥྚེ ཎཱ རྠ བུ དྡྷ ན མོ གུ ཧྱ ག རྦྷ སྱ ས མཱ ནྱཱ རྠ བི ཧ ར ཏི སྨ། །
གསང་བ་སྙིང་པོའི་སྤྱི་དོན་མཐོང་བས་དོན་རྟོགས་ཞེས་བྱ་བ་བཞུགས་སོ། །རྒྱལ་སྲས་པདྨ་འགྱུར་མེད་རྒྱ་མཚོ།
དྲྀ ཥྚེ ཎཱ རྠ བུ དྡྷ ན མོ གུ ཧྱ ག རྦྷ སྱ ས མཱ ནྱཱ རྠ བི ཧ ར ཏི སྨ། །
གསང་བ་སྙིང་པོའི་སྤྱི་དོན་མཐོང་བས་དོན་རྟོགས་ཞེས་བྱ་བ་བཞུགས་སོ། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་སྤྱི་དོན་གྱི་ངག་སྒྲོས་གུ་རུའི་ལུགས་སུ་བཀོད་པ་མཐོང་བས་དོན་རྟོགས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དབྱིངས་རིག་ཟུང་དུ་འཇུག་པ་རིག་པའི་གཤིས། །མི་འགྱུར་དོན་དམ་འཕོ་མེད་རྟག་པའི་དངོས། །འདུས་མ་བྱས་པ་མཁའ་ཁྱབ་མཁའི་རྡོ་རྗེ། །གཞི་རྒྱུད་བདེ་གཤེགས་སྙིང་པོར་ཕྱག་བགྱིའོ། །འགྱུར་མེད་སེམས་ཀྱི་གནས་ལུགས་མངོན་འགྱུར་ཕྱིར། །བསྐྱེད་རྫོགས་གཤོག་རླབས་བསྐྱོད་པའི་རྣམ་འཕྲུལ་གྱིས། །ཐབས་གྲོལ་མཁའ་ལས་རྡོ་རྗེའི་སར་བཀྲི་བ། །ཐབས་རྒྱུད་ལམ་གྱི་སྙིང་པོར་དང་བས་འདུད། །རང་སྣང་རིས་མེད་མི་འགྱུར་སྐུ་གསུམ་རྫོགས། །གཞོམ་མེད་ལྷན་ཅིག་སྐྱེས་པ་བདེ་བའི་དངོས། །རྡོ་རྗེ་སེམས་མཆོག་དཔལ་ལྡན་འཁོར་ལོའི་
མགོན། །འབྲས་རྒྱུད་དེ་བཞིན་གཤེགས་ལ་གུས་ཕྱག་འཚལ། །ཤིན་ཏུ་རྟོགས་དཀའ་ཟབ་གསང་སྙིང་པོའི་དོན། །ངག་ཚིག་བརྗོད་པས་འདོམས་ལ་དབང་འབྱོར་བས། །ཆོས་ཀུན་ཟབ་གནད་སྟོན་པའི་བྱེད་པ་པོ། །དཔལ་ལྡན་རྡོ་རྗེ་འཛིན་མཆོག་རྒྱལ་གྱུར་ཅིག །མཆོག་ཏུ་གསང་བ་བརྟན་གཡོའ་དངོས་ཀུན་གཤིས། །དུས་གསུམ་རྒྱལ་བའི་དགོངས་བཅུད་སྙིང་པོའི་དོན། །འཁྲུལ་མེད་དེ་བཞིན་ཉིད་དུ་སྟོན་བྱེད་རྒྱུད། །ངེས་པའི་ཟབ་གནད་དོན་ཀུན་འདིར་གསལ་བྱ། །དེ་ལ་འདིར་གང་བཤད་བྱའི་ཆོས་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་རྩ་བའི་རྒྱུད། དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡིན་ལ། དེ་གང་གིས་འཆད་ན། ལུང་རིགས་མན་ངག་གསུམ་གྱིས་འཆད་དེ། དེ་ལ་ལུང་གིས་ཇི་ལྟར་འཆད་ཅེ་ན། གྲོལ་ལམ་རིམ་ཅིག་ཅར་དུ་སྟོན་པ་རྡོ་རྗེ་མེ་ལོང་དང་། ཡེ་ཤེས་སྙིང་པོ། ཐབས་ལམ་རིམ་ཅིག་ཅར་དུ་སྟོན་པ་རྒྱ་མཚོ་དང་ཐལ་བ་སྟེ། དེ་ལྟར་བཤད་རྒྱུད་སྡེ་བཞི་སོགས་རྒྱུད་རྣམ་པར་དག་པ་རྣམས་ཀྱིས་སོ། །མན་ངག་གིས་ཇི་ལྟར་འཆད་ན། འཕགས་ཡུལ་གྱི་པཎ་གྲུབ་ཆེན་པོ་པདྨ་འབྱུང་གནས་དང་། བི་མ་ལ་མི་ཏྲ་སོགས་སྤྱི་དང་། ཁྱད་པར་སྒེག་རྡོར་གྱི་རྒྱས་འགྲེལ་སྤར་ཁབ་དང་། སངས་རྒྱས་གསང་བའི་སྒྱུ་འཕྲུལ་ལམ་རིམ་སོགས་ལ་བརྟེན་ནས་འཆད། བོད་ཀྱི་མཁས་པ་ཆེན་པོ་སོ་ཟུར་གནུབས་གསུམ། ཁྱད་པར་ཟུར་མེས་དབོན་རྣམ་གསུམ་སོགས་ཀྱི་བསྟན་བཅོས་རྣམ་དག་ལ་བརྟེན་ནས་སོ། །རིགས་པས་ཇི་ལྟར་འཆད་ཅེ་ན། ལུང་མན་ངག་དང་མི་འགལ་བའི་རིགས་པ་རྣམ་པར་དག་པས་སོ། །ཇི་ལྟར་འཆད་པའི་ཚུལ་ལ། སྒེག་རྡོར་གྱིས་རྒྱུད་གསུམ་སྣང་བ་བཞིར་བསྡུས་ནས་གསུངས། ཟུར་ཆུང་ཤེས་རབ་གྲགས་ཀྱིས་ཆོས་ལྔར་བསྡུ་བ་སོགས་འཆད་ཚུལ་གྱི་བཀའ་སྲོལ་དུ་མ་ཡོད་ཀྱང་། འདིར་བི་མ་ལའི་རྗེས་སུ་འབྲངས་ཏེ་འཆད་ན། ཁོག་གཞུང་གསལ་སྒྲོན་དུ། རབ་ལ་མཚན་བསྟན་འབྲིང་ལ་དབྱེ། །ཐ་མར་འབྲུ་གཉེར་དགྲོལ་བའོ། །ཞེས་པས་དོན་གསུམ་སྟེ། འགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ་དང་། དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་བཤད་པ་དང་། དབང་པོ་
ཐ་མ་རྣམས་ལ་འབྲུ་རེ་གཉེར་རེའི་སྒོ་ནས་སྤྲོས་ཏེ་བཤད་པ་དང་གསུམ་ལས། སྐབས་འདིར་ས་བཅད་དང་པོ་གཉིས་སྟོན་ཏེ། དེ་ལ་དང་པོ་མགོ་སྨོས་པས་གོ་བའི་དབང་པོ་ཡང་རབ་རྣམས་ལ་མཚན་བཤད་པ་ལའང་། ཁོག་གཞུང་ལས། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་པས་བསྟན། རབ་ལ་མཚན་བསྟན་པ་དེ་ལའང་ཐ་སྙད་གསུམ་སྟེ། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་པ་རྒྱུད་དང་མཐུན་པའི་མཚན། གསང་བའི་སྙིང་པོ་དེ་ཁོ་ན་ཉིད་ངེས་པ་ཞེས་པ་མན་ངག་དང་མཐུན་པའི་མཚན། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པ་ལུང་དང་མཐུན་པའི་མཚན་ཏེ། གཙོ་ཆེ་བའི་དབང་དུ་མཚན་ཐ་སྙད་གསུམ་དུ་གྲགས་ཤིང་། དེས་རྟོགས་ཚུལ་ནི། སྨན་པས་ལག་གི་རྩ་བལྟས་པས་ལུས་མགོ་མཇུག་གི་ནད་ཤེས་པ་བཞིན་ནོ། །དེ་ལ་མཚན་གྱི་རྣམ་གྲངས་གསུམ་ལས། དང་པོ་རྒྱུད་དང་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་གསུམ་གྱི་མཚན་ཐུན་མོང་དུ་བསྟན་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་སྟེ། དེ་ལ་མཚན་གྱི་ཟུར་གཉིས་ལས། དང་པོ་རྡོ་རྗེ་སེམས་དཔའ་ནི། བཤད་རྒྱུད་མེ་ལོང་ལས། ཆོས་རྣམས་མ་ལུས་གཉིས་མེད་པའི། །རང་རིག་བྱང་ཆུབ་སེམས་ཉིད་དོ། །ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཞེས་དང་། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བརྗོད། །སེམས་དཔའ་ཡེ་ཤེས་ཙམ་ཉིད་དེ། །དེ་དག་བདག་ཉིད་གྲུབ་པ་ནི། །རྡོ་རྗེ་སེམས་དཔའ་ཞེས་བརྗོད་དོ། །ཞེས་པས་རྡོ་རྗེ་ནི་ཤེས་རབ་སྟོང་པ་ཉིད་དོ། །སྟོང་པ་ཉིད་དེ་ལ་ཚུར་མཚན་མའི་ཆོས་གང་གིས་ཀྱང་མི་ཕྱེད་ཅིང་ཕར་མཚན་ཆོས་ཐམས་ཅད་འཇོམས་ནུས་པས་རྡོ་རྗེ་དང་ཆོས་མཚུངས་པའི་ཕྱིར་དེ་ལྟར་བཏགས། སེམས་དཔའ་ནི། ས་ཏྭའི་སྒྲ་ལས་དྲངས་ན། སྤྱིར་ས་ཏྭ་དོན་དྲུག་ལ་འཇུག་སྟེ། སྙིང་སྟོབས་ཏེ་ཞེ་སྡང་དང་། དཔའ་ཞིང་བརྟན་པ་དང་། འདུན་པ་དང་། ཤེས་རིག་དང་། སྲོག་ཆགས་དང་།
བསྡུས་པ་རྣམས་ལ་འཇུག་པ་ལས། སྐབས་འདིར་བརྟན་བསྡུས་རྟོགས་གསུམ་སྟེ། དེ་ལ་བརྟན་པ་ནི། སེམས་ཅན་ཀུན་གྱི་སེམས་གང་ནི། །རྡོ་རྗེ་ཞེས་སུ་བཤད་པ་ཡིན། །བརྟན་པའི་ཕྱིར་ན་སེམས་དཔར་བརྗོད། །ཅེས་དང་། བསྡུས་པ་ནི། རྡོ་རྗེ་སེམས་དཔའ་བསྡུས་པས་ན། །ཞེས་སམ། མི་ཕྱེད་རྡོ་རྗེ་ཞེས་བརྗོད་དོ། །སེམས་དཔའ་སྲིད་གསུམ་གཅིག་པའོ། །འདི་ན་ཤེས་རབ་ལྡན་པ་ཡིས། །རྡོ་རྗེ་སེམས་དཔའ་ཞེས་སུ་བཤད། །ཅེས་དང་། རྟོགས་པ་ནི། སྐྱེ་མེད་ཡེ་ཤེས་རང་གི་དབྱིངས། །མི་འགྱུར་མི་ཤིགས་རྡོ་རྗེའི་དོན། །སེམས་དཔའ་ཡེ་ཤེས་རྡོ་རྗེ་སྟེ། །ཞེས་པས་ཡུལ་ཅན་ཐབས་རང་རིག་པ་བྱང་ཆུབ་ཀྱི་སེམས་ཡུལ་ཤེས་རབ་དབྱིངས་སྟོང་པ་ཉིད་དང་རོ་གཅིག་པའི་ཟུང་འཇུག་རང་བཞིན་གྱིས་རྣམ་པར་དག་པ་དེ་ནི་རྡོ་རྗེ་ལྟར་བརྟན་པའི་ཕྱིར་བརྟན་པའི་རྡོ་རྗེ་སེམས་དཔའ་ཞེས་བྱ་སྟེ་མཆོག་ཏུ་མི་འགྱུར་བའི་ཆ་ནས་བཞག ཟུང་འཇུག་དེའི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་འཁོར་འདས་བཟང་ངན་མེད་པར་མཉམ་པ་ཉིད་དུ་བསྡུས་པ་ནི་བསྡུས་པའི་རྡོ་རྗེ་སེམས་དཔའ་སྟེ་རྣམ་ཀུན་མཆོག་ལྡན་གྱི་ཆ་ནས་བཞག་ཅིང་། དེ་ལྟར་བརྟན་བསྡུས་གཉིས་པོ་དེ་གནས་ལུགས་ཀྱི་ངོས་ནས་བཞག་སྟེ། དེའི་ཕྱིར་གཉིས་པོ་དེ་ལ་གཞི་འབྲས་གཉིས་སུ་མེད་པའི་རྡོ་རྗེ་སེམས་དཔའ་ཞེས་བྱའོ། །དེ་ལྟ་བུའི་གནས་ལུགས་ཀྱི་དོན་གདོད་མ་ནས་རང་ཆས་སུ་བཞུགས་པ་དེ་ཉིད་སྒྲིབ་གཉིས་ཟད་ཅིང་ཚོགས་གཉིས་རྫོགས་པའི་སྐྱེས་བུས་རང་གི་རང་བཞིན་ཇི་ལྟ་བ་བཞིན་མངོན་དུ་རྟོགས་པ་ནི་འབྲས་བུའི་རྡོ་རྗེ་སེམས་དཔའ་སྟེ། སྣང་ལུགས་ཀྱི་ངོས་ནས་བཞག་ལ། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའི་ཕྱིར་དེ་སྐད་ཅེས་བྱའོ། །དེ་ཉིད་མཚོན་བྱེད་མཚན་མའི་ཕྱག་རྒྱར་སྣང་བ་དཀྱིལ་འཁོར་གྱི་གཙོ་བོ་དང་། སྐབས་འདིར་ཐུགས་ཀྱི་སྒྱུ་འཕྲུལ་གྱི་དབང་དུ་བྱས་ཏེ་འཆད་པའི་སྐྱེས་བུ་རྡོ་རྗེ་མི་བསྐྱོད་པ་ལའང་རྡོ་རྗེ་སེམས་དཔའ་ཞེས་བྱའོ། །དེ་ལ་དཀྱིལ་འཁོར་གྱི་གཙོ་བོ་ནི། ལས་དང་པོ་པས་དོན་སྤྱིའི་ཚུལ་དུ་བསྒོམས་པ་བརྟགས་པའི་ལྷ་སྐུ། འབྲས་བུའི་རྫོགས་རིམ་གྲུབ་པའི་ས་མཚམས་སྦྱོར་ལམ་གྱི་དུས་སུ་རླུང་སེམས་ཀྱི་ལྷ་སྐུ་རང་ཤར། མཐོང་ལམ་འོད་
གསལ་གྱི་ལྷ་སྐུ། སློབ་པའི་ཟུང་འཇུག་གི་ལྷ་སྐུ་སྟེ་ལམ་གྱིས་བསྡུས་པའི་དཀྱིལ་འཁོར་གྱི་གཙོ་བོ་དང་། མི་སློབ་པའི་ཟུང་འཇུག་འོག་མིན་དུ་བཞུགས་པའི་དག་པ་གཉིས་ལྡན་གྱི་དཀྱིལ་འཁོར་གྱི་གཙོ་བོ་རྣམས་སོ། །མཚན་གྱི་ཟུར་གཉིས་པ་སྒྱུ་འཕྲུལ་དྲྭ་བ་ནི། རྡོ་རྗེ་ལས། ཐབས་དང་ཤེས་རབ་འབྲེལ་བའི་དོན། ཞེས་པས་སྒྱུ་འཕྲུལ་དྲྭ་བའང་ཐབས་ཤེས་ཟུང་འཇུག་གི་དོན་ཏེ། དེ་ལ་དང་པོ་རྟོག་ཚོགས་སྒྱུ་དྲྭ་ནི། འབྱུང་བ་ལྔ་ཆོས་ཅན། སྒྱུ་མ་ཞེས་བྱ་སྟེ། སྣང་བ་རིས་སུ་མ་ཆད་པའི་ཕྱིར། ཕུང་པོ་ལྔ་ཆོས་ཅན། འཕྲུལ་པ་ཞེས་བྱ་སྟེ། རྒྱུ་འབྱུང་བ་རིས་སུ་མ་ཆད་པའི་རྒྱུས་འབྲས་བུ་ཕུང་པོ་ལྔར་འཕྲུལ་པའི་ཕྱིར། རྒྱུ་འབྲས་གཉིས་པོ་དེ་ཆོས་ཅན། དྲྭ་བ་ཞེས་བྱ་སྟེ། དེ་གཉིས་རྒྱུ་འབྲས་འབྲེལ་པ་ཅན་གྱི་སྒོ་ནས་ཟུང་དུ་འཇུག་པའི་ཕྱིར། གཉིས་པ་ངེས་དོན་སྒྱུ་དྲྭ་ནི། ཤེས་རབ་དབྱིངས་སྟོང་པ་ཉིད་ཆོས་ཅན། སྒྱུ་མ་ཞེས་བྱ་སྟེ། རིས་མེད་ཀུན་ཁྱབ་ཀྱི་ཆོས་ཉིད་ཡིན་པའི་ཕྱིར། ཐབས་རིག་པ་རང་བྱུང་གི་ཡེ་ཤེས་ཆོས་ཅན། འཕྲུལ་པ་ཞེས་བྱ་སྟེ། སྟོང་ཉིད་ཀྱི་རྩལ་སྣང་རིག་པ་རང་བྱུང་གི་ཡེ་ཤེས་སུ་མ་འགགས་པར་འཕྲུལ་པའི་ཕྱིར། དེ་གཉིས་ཟུང་འཇུག་ཆེན་པོ་ཆོས་ཅན། དྲྭ་བ་ཞེས་བྱ་སྟེ། སྟོང་ཉིད་ཀྱི་རྩལ་སྣང་ཡེ་ཤེས་སུ་འཆར་ལ་ཡེ་ཤེས་ཀྱི་རང་བཞིན་སྟོང་པར་གྲོལ་བའི་ཕྱིར། གསུམ་པ་དྲང་དོན་བརྡའི་སྒྱུ་དྲྭ་ནི། གང་དུ་དྲང་ན་ངེས་དོན་གྱི་སྒྱུ་འཕྲུལ་དྲྭ་བ་ལ། གང་དྲང་ན་མཚན་མའི་བློ་ཅན་རྣམས། ཇི་ལྟར་དྲང་ན་སྒྱུ་མ་མཚོན་པ་ལྷ་ཡུམ། འཕྲུལ་པ་མཚོན་པ་ལྷ་ཡབ། དྲྭ་བ་མཚོན་པ་ཡབ་ཡུམ་ཞལ་སྦྱོར་གྱི་བརྡས་སོ། །བཞི་པ་ལྷ་རྟོག་དབྱེར་མེད་ཀྱི་སྒྱུ་དྲྭ་ནི། རྟོག་ཚོགས་ནི་སྒྱུ་མ་སྟེ། སྣང་ལ་རང་བཞིན་མ་གྲུབ་པའི་ཕྱིར། ལྷ་ནི་འཕྲུལ་པ་སྟེ། རྟོག་ཚོགས་ཀྱི་རང་བཞིན་ཆོས་ཉིད་བྱང་ཆུབ་སེམས་ཀྱི་རྩལ་སྣང་ལྷར་སྣང་བའི་ཕྱིར། དྲྭ་བ་ནི་རང་བཞིན་གཉིས་སུ་མེད་པར་འབྲེལ་པ་སྟེ། རྟོག་ཚོགས་ཀྱི་རང་བཞིན་ལྷ་ཡིན་པའི་ཕྱིར། དེ་ལྟར་ཡང་། ལེ་ལག་ལས། ལྔ་ཕུང་སྒྱུ་མའི་ཡེ་ཤེས་ལ། །རང་རིག་ཐབས་ཀྱིས་རིགས་ལྔར་འཕྲུལ། །ཞེས་དང་། བླ་མ་ལས། ཀུན་འབྱུང་དཀྱིལ་འཁོར་སྒྱུ་འཕྲུལ་ཆེ། །མང་ལ་འབྲེལ་བ་དྲྭ་བའི་དོན། །ཞེས་གསུངས། འདི་ཉིད་ཀྱི་ལེའུ་བཞི་པ་ལས་ནི་ཡབ་ལ་
སྒྱུ་འཕྲུལ་དང་། ཡུམ་ལ་དྲྭ་བར་བཤད་དེ། ཋ་ནི་སྒྱུ་འཕྲུལ་རྡོ་རྗེ་ཉིད། སོགས་དང་། ཐ་ནི་དྲྭ་བ་བརྟན་པ་ཉིད། །སོགས་སོ། །དེ་ལྟར་གཞི་དང་འབྲས་བུའི་ཟུང་འཇུག་ལ་མཚན་ཇི་སྐད་དུ་ཐོབ་པའི་ངེས་པས་ལས་ཀྱི་རྒྱུད་དེ་ལའང་དེ་སྐད་ཅེས་བྱ་སྟེ། གཞི་འབྲས་གཉིས་དང་ཤེས་ཐོབ་ཀྱི་བྱ་བྱེད་འབྲེལ་པ་ཅན་དུ་གནས་པའི་ཕྱིར། རྒྱུ་མཚན་དེའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྲར་སྣང་ཞིང་སྒྲར་གྲགས་པའི་རྒྱུད་དང་། བརྡར་བཏགས་གླེགས་བམ་གྱི་རྣམ་པར་བཀོད་པ་འདི་ལའང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བྱའོ། །གཉིས་པ་ཆེ་བ་ལས་མཚན་དུ་བཏགས་པ་ནི། ལུང་གི་སྤྱི་སྟེ། རྡོ་རྗེ་ལས། སོ་སོ་བསྟན་པ་རྒྱ་མཚོའ་རྒྱུད། །འདིར་སྟོན་འདིས་སྟོན་འདི་ཕྱིར་སྟོན། །དོན་ཀུན་འདི་ལ་ཡོངས་རྫོགས་པས། །ལུང་གི་སྤྱི་ཞེས་བཤད་པ་ཡིན། །ཞེས་པས་བསྟན་ཏེ། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱ་སོ་སོའ་བློ་དང་འཚམས་པར་བསྟན་པའི་ཐེག་པའི་རྣམ་གྲངས་ནི་ཟབ་ཅིང་རྒྱ་ཆེ་བས་རྒྱ་མཚོའ་རྒྱུད་ཅེས་བྱ་སྟེ། དེ་ལྟ་བུའི་བསྟན་པ་དང་ཐེག་པ་ཐམས་ཅད་ཀྱི་དོན་འདིའི་ནང་དུ་སྟོན་པས་འདིར་སྟོན་ཞེས་བྱ་སྟེ། བཤད་རྒྱུད་རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །བསྟན་པ་དང་ཐེག་པ་ཐམས་ཅད་རྒྱུད་འདིས་རྫོགས་པར་སྟོན་པས་འདིས་སྟོན་ཞེས་བྱ་སྟེ། ཇི་སྐད་དུ། འདུལ་བ་མདོ་སྡེ་ཆོས་མངོན་དང་། །ཞེས་པ་ནས། འབྱུང་གནས་གཏན་ལ་ངེས་པར་འབེབས། །ཞེས་སོ། །བསྟན་པ་དང་ཐེག་པ་ཐམས་ཅད་ཀྱང་འདི་ཉིད་རྟོགས་པའི་ཐབས་སུ་སྟོན་པས་འདི་ཕྱིར་སྟོན་ཞེས་བྱ་སྟེ། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་སོ། །རྒྱུ་མཚན་དེའི་ཕྱིར་ཐེག་པ་ཐམས་ཅད་ཀྱི་དོན་རྒྱུད་འདི་ལ་ཡོངས་སུ་རྫོགས་པས་ལུང་གི་སྤྱི་ཞེས་བཤད་ལ། དེ་ཡང་གསང་བ་སྤྱི་རྒྱུད་ལྟ་བུ་མིན་པར་བསྟན་པ་དང་ཐེག་པ་ཐམས་ཅད་ཀྱི་ལུང་གི་སྤྱི་ཡིན་ནོ་ཞེས་འཆད་པར་བྱེད་པ་ལ། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་པའི་གཞུང་འདི་བྱུང་བ་ཡིན་
ནོ། །གསུམ་ པ་དོན་རང་གི་ངོ་བོ་ལས་བཏགས་པའི་མཚན་གླེགས་བམ་གྱི་ཀླད་དུ་བཀོད་དགོས 
་ཚུལ་ནི། འགྲེལ་ཆུང་ལས། སྔོན་དུ་འགྲོ་བའི་བདག་ཉིད་པས། །མིང་ཉིད་ཐོག་མར་སྨོས་པ་གཅེས། །ཞེས་པས་གླེགས་བམ་གྱི་ཀླད་དུ་བཀོད་པའི་མཚན་ཏེ། གསང་བའི་སྙིང་པོ་དེ་ཁོ་ན་ཉིད་ངེས་པའོ། །ཞེས་པ་སྟེ། གསང་བ་ནི་གཞི་རྒྱུད་རྟོགས་དཀའ་བ། སྙིང་པོ་ནི་ལམ་གྱི་རྒྱུད་དེ་བསྟན་པ་ཐམས་ཅད་ཀྱི་བཅུད་འདུས་པ། དེ་ཁོ་ན་ཉིད་ནི་གཞི་མི་འགྱུར་བ་དང་ལམ་གྱིས་དེ་རྟོགས་པ་ལ་མི་བསླུ་བ། ངེས་པ་ནི་སྒྲོ་སྐུར་དང་བྲལ་བར་གཏན་ལ་ཕབ་པའི་དོན་ཏེ། རྒྱུད་ཕྱི་མ་ལས། གསང་བ་ཆོས་འབྱུང་ལ་བཤད་དེ། །སྙིང་པོའང་དེ་ཡི་ཐབས་ཅན་ནོ། །གཉིས་པོ་ཕྱིན་ཅི་མ་ལོག་ཕྱིར། །དེ་ཉིད་དོ་འདིར་རྣམ་ངེས་སོ། །ཞེས་སོ། །ཡང་ན། གཞི་རྒྱུད་དེ་བཞིན་ཉིད་དེ་རྟོགས་དཀའ་ཞིང་ཀུན་གྱི་སྙིང་པོར་བཞུགས་པས་གསང་བའི་སྙིང་པོ། ལམ་རྒྱུད་ནི་གཞི་རྟོགས་པ་དང་འབྲས་བུ་ཐོབ་པ་ལ་མི་བསླུ་བས་དེ་ཁོ་ན་ཉིད། འབྲས་བུའི་རྒྱུད་ནི་སྐུ་དང་ཡེ་ཤེས་ཀྱི་དཀྱིལ་འཁོར་དུ་ངེས་པའོ་ཞེས་བཤད་ཀྱང་རུང་སྟེ་རྡོ་རྗེའི་ཚིག་ཡིན་པའི་ཕྱིར། གཉིས་པ་དབང་པོ་འབྲིང་པོ་རྣམས་ལ་སྤྱིའི་དོན་རྣམ་པར་དབྱེ་བས་འཆད་པ་ལ་གཉིས་ཏེ། དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བའོ། །དང་པོ་ལ་ལྔ་སྟེ། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་བསླང་བ། འབྲས་བུ་ཡོངས་སུ་ཤེས་པར་བྱ་བ་རྒྱུད་དོན། རྒྱུད་ཀྱི་
དགོས་འབྲེལ། འཁོར་ལ་གདམས་ཤིང་བསྟན་པ ་གཏད་པའོ། །དང་པོ་ལ་ངོ་བོ་ནི། རྒྱུད་ཕྱི་མ་འགོས་འགྱུར་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་པས་བསྟན། གླེང་གཞི་ཕུན་སུམ་ཚོགས་པ་དེ་ལ། སྟོན་པ་དང་ལ་སོགས་པས། འཁོར་དང་། གནས། ཆོས། དུས་ཕུན་སུམ་ཚོགས་པ་སྟེ་ལྔར་བརྗོད་ལ། དེ་ཡང་། གནས་གང་དུ། སྟོན་པ་གང་། འཁོར་གང་དང་ལྷན་ཅིག་ཚོགས་པ་དེའི་ཚེ་རྒྱུད་དོན་འབྱུང་བར་ངེས་པའི་ཕྱིར་ཕུན་སུམ་ཚོགས་པ་ལྔ་ལྡན་ནི་གླེང་གཞིའོ། །
ངེས་ཚིག་ནི། ཅིའི་ཕྱིར་གླེང་གཞི་ཞེས་བྱ་ཞེ་ན། ལེགས་སྦྱར་གྱི་སྐད་དུ། དཱ་ནའི་སྒྲ་ལས་དྲངས་ན་སྦྱིན་པ་ཞེས་པ་ལ་འཇུག་སྟེ། གང་ལ་ན་བཀའ་ཡིན་མིན་དུ་རྟོག་པའི་ཐེ་ཚོམ་ཅན་དག་ལ་སྦྱིན། ཇི་ལྟར་ན། ཕུན་སུམ་ཚོགས་པ་ལྔའི་ལོ་རྒྱུས་བརྗོད་པས་སོ། །གང་སྦྱིན་ན། ཡིད་ཆེས་ཀྱི་ངེས་པ་སྦྱིན་ནོ། །འོན་ཀྱང་བོད་སྐད་དུ་སྦྱིན་པ་ཞེས་བསྒྱུར་ན་དངོས་པོ་སྦྱིན་པ་ལྟ་བུ་ཕྱོགས་གཅིག་ཏུ་ཆད་འགྲོ་བས་བོད་ཀྱི་བརྡ་དང་སྦྱར་ཏེ་ལོ་ཙཱ་བ་རྣམས་ཀྱིས་གླེང་གཞི་ཞེས་བསྒྱུར་བའི་དབང་དུ་ན། གང་གླེང་བར་བྱ་བ་རྒྱུད་ཀྱི་དོན་འབྱུང་བའི་རྒྱུའམ་གཞིར་གྱུར་པའི་ཕྱིར་རོ། །དབྱེ་ན་ཐུན་མོང་མིན་པའི་གླེང་གཞི་དང་། ཐུན་མོང་གི་གླེང་གཞི་གཉིས། དང་པོ་ལ། ནང་ལྟར་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོས་བཤད་པ་དང་། གསང་བ་ལྟར་འོག་སྒོ་དང་སྦྱར་ཏེ་བཤད་རྒྱུད་ཐལ་བས་བཤད་པའོ། །དང་པོ་ནི། ཇི་སྐད་དུ། དྷརྨ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་དག །མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་པར་བཤད། །ཡེ་ཤེས་ནམ་མཁའི་གཟུགས་སྐྱེས་པ། །པ་ར་མཱརྠ་དོན་ཟབ་མོ། །བདེ་བའི་དུས་ཉིད་སྔ་ཕྱི་བྲལ། །དུས་གསུམ་ཀུན་གྱི་ངོ་བོར་གནས། །ཞེས་པས། གནས་ཕུན་སུམ་ཚོགས་པ་སྙིང་ག་ཆོས་ཀྱི་འཁོར་ལོ། སྟོན་པ་ཕུན་སུམ་ཚོགས་པ་སྲོག་མི་ཤིགས་པའི་ཐིག་ལེ། འཁོར་ཕུན་སུམ་ཚོགས་པ་རྣམ་ཤེས་ཚོགས་བརྒྱད། ཆོས་ཕུན་སུམ་ཚོགས་པ་དོན་དམ་འོད་གསལ་ནམ་མཁའི་གཟུགས་ཅན། དུས་ཕུན་སུམ་ཚོགས་པ་དུས་གསུམ་མཉམ་ཉིད་དོ། །གཉིས་པ་ནི། ཇི་སྐད་དུ། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཝཾ་དབྱིབས་ཐིག་ལེར་བཅས་སྟོན་པའོ། །མ་དཱ་མ་ནུ་སྡོམ་བྱེད་ཡིད། །ལུས་ཅན་རྣམ་ཤེས་དེ་དག་ལ། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡ་ན་ཐེག་ཆེན་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་དེ་མིང་ཞེས་བྱའོ། །ཞེས་པས། གནས་ཕུན་སུམ་ཚོགས་པ་ཡུམ་གྱི་མཁའ་གསང་། སྟོན་པ་ཕུན་སུམ་ཚོགས་པ་ཡབ་
ཀྱི་རྡོ་རྗེ་ཀུན་རྫོབ་བྱང་ཆུབ་ཀྱི་སེམས་དང་བཅས་པ། འཁོར་ཕུན་སུམ་ཚོགས་པ་བྱེད་པ་སྡོམ་པའི་ཐབས་དང་བཅས་པའི་གསང་བའི་རྣམ་ཤེས། ཆོས་ཕུན་སུམ་ཚོགས་པ་རང་བཞིན་ལྷན་ཅིག་སྐྱེས་པའི་ཡེ་ཤེས། དུས་ཕུན་སུམ་ཚོགས་པ་བསམ་གྱིས་མི་ཁྱབ་པའི་དུས་སོ། །འདི་དག་གླེང་གཞིར་འགྱུར་བའི་འཐད་པ་ནི། རྒྱུན་མཐའི་ས་ལ་བཞུགས་པའི་ལྷན་ཅིག་པའི་འཁོར་རྣམས་ལ་སྟོན་པས་འབྲས་དུས་ཀྱི་དབང་བསྐུར་བས་ནང་གི་མངོན་བྱང་ལྔ་ལ་བརྟེན་ནས་ཡང་དག་པའི་མཐའ་མངོན་དུ་མཛད་དེ་སྟོན་འཁོར་དགོངས་པ་དབྱེར་མེད་དུ་གྱུར་པའི་དུས་དེར་སྙིང་ག་དང་གསང་བའི་འོག་མིན་དུ་མངོན་པར་རྫོགས་པར་འཚང་རྒྱ་བའི་རྒྱུ་མཚན་གྱིས་ནང་གསང་གཉིས་གླེང་གཞི་དང་འབྲེལ་བ་ཡིན་ལ། དེའི་ཕྱིར་ཐུན་མོང་མིན་པའི་གླེང་གཞི་ཞེས་ཀྱང་བྱའོ། །གཉིས་པ་ཐུན་མོང་གི་གླེང་གཞི་ལ་གསུམ་ལས། དང་པོ་ལོངས་སྐུའི་གླེང་གཞིའམ་རྒྱུད་འབྱུང་བ་ཁྱད་པར་ཅན་གྱི་གླེང་གཞི་ལ། ཆོས་ཕུན་སུམ་ཚོགས་པ་ནི། འདི་སྐད་བཤད་པ་ཞེས་པས་བསྟན་ཏེ། འདི་སྐད་ཅེས་པ་ཚིག་འཕྲད་དེ་རྒྱུད་དོན་རྫོགས་པར་འཆར་པའི་དོན་ནོ། །དུས་ཕུན་སུམ་ཚོགས་པ་ནི། དུས་ན་ཞེས་པ་རྟག་པ་རྒྱུན་གྱི་འཁོར་ལོའོ། །སྟོན་པ་ཕུན་སུམ་ཚོགས་པ་ལ། སྟོན་པའི་རང་བཞིན་དང་། ངོ་བོ་གཉིས། དང་པོ་ནི། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ་ཞེས་སོགས་ཀྱིས་བསྟན་ཏེ། སྤྱིར་སྟོན་པའི་རང་བཞིན་བདུན་དུ་འདུ་ཞིང་། དེ་ཡང་རིགས་བསྡུ་ན་བཞིར་འདུ་སྟེ། འགྲེལ་ཆུང་ལས། བྱང་ཆུབ་མཆོག་གི་ངོ་བོ་དང་། །ཆོས་རྣམས་རོལ་པར་ལོངས་སྤྱོད་དང་། །ཕྱོགས་དུས་བདེ་གཤེགས་བདག་པོ་དང་། །ཆོས་སོ་ཅོག་དང་དབྱེར་མེད་པའོ། །ཞེས་སོ། །གཉིས་པ་ནི། སྐུ་མདུན་དང་རྒྱབ་མེད་པ་ཐམས་ཅད་དུ་ཞེས་སོགས་ཀྱིས་བསྟན་ཏོ། །གནས་ཕུན་སུམ་ཚོགས་པ་ལ། གནས་ཀྱི་རང་བཞིན་དང་། ངོ་བོ་གཉིས། དང་པོ་ནི། འོག་མིན་གྱི་གནས་མཐའ་དང་དབུས་མེད་པ་ན། ཞེས་པས་བསྟན། དེ་ལ་སྤྱིར་འོག་མིན་ལ། ཆོས་དབྱིངས་དོན་གྱི་འོག་མིན་དང་། རིག་པའི་འོག་མིན་དང་། གསང་བའི་འོག་མིན་དང་། གཙང་རིས་ཀྱི་ལྷ་ལྔའི་ནང་ཚན་འཇིག་
རྟེན་གནས་ཀྱི་འོག་མིན་རྣམས་ལས། འདིར་ནི་འོག་མིན་ཆེན་པོ་བྱ་བ་ལོངས་སྤྱོད་རྫོགས་སྐུའི་ཞིང་ཁམས་ཏེ། རྡོ་རྗེ་ལས། གཙང་མའི་རིས་དག་རྣམ་སྤངས་པའི། །འོག་མིན་ཆེན་པོའི་གནས་མཆོག་ན། །ཞེས་དང་། རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་ཤིན་ཏུ་སྤགས་པ་ན། །ངོ་བོ་མཐའ་གསུམ་ལས་འདས་པ། །མ་སྤངས་རྒྱན་རྫོགས་གཞལ་ཡས་ཁང་། །ཞེས་སོ། །གཉིས་པ་ནི། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ་ཞེས་པས་བསྟན་ཏེ། དེ་དག་གི་དོན་བསྡུ་ན། འགྲེལ་ཆུང་ལས། གཞལ་ཡས་གཞི་དང་རྒྱུ་དང་རྒྱ། །དབྱིབས་དང་གློ་འབུར་རྩེ་མོ་དང་། །རྒྱན་དང་སྒོ་ཁྱུད་རྟ་བབས་དང་། །མཚན་ཉིད་གདན་གྱི་རྣམ་པ་སྟེ། །ཞེས་པ་ལྟར་རོ། །འཁོར་ཕུན་སུམ་ཚོགས་པ་ལ། རང་བཞིན་གཉིས་སུ་མེད་པའི་འཁོར་དང་། རིག་པ་ཁྱད་པར་ཅན་གྱི་འཁོར་གཉིས། དང་པོ་ནི། རིགས་ལྔ་ཡབ་ཡུམ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་དང་། ཞེས་སོགས་ཀྱིས་བསྟན། གཉིས་པ་ལ། རྒྱལ་སྲས་སེམས་དཔའི་འཁོར་དང་། འཇོམས་བྱེད་ཁྲོ་བོའ་འཁོར་གཉིས། དང་པོ་ནི། དེ་ནས་བྱང་ཆུབ་ཆེན་པོ་རྡོ་རྗེ་མཐོང་བ་དང་། སོགས་ཀྱིས་ནང་སེམས་ཡབ་ཡུམ་དང་། བྱང་ཆུབ་ཆེན་པོ་རྡོ་རྗེ་མཐོང་བྱེད་དང་། སོགས་ཀྱིས་ཕྱི་སེམས་ཡབ་ཡུམ་བསྟན། གཉིས་པ་ནི། འཇོམས་པ་ཆེན་པོ་རྡོ་རྗེ་རེག་པ་དང་སོགས་ཀྱིས་བསྟན། གཞན་ཡང་རྒྱུད་མས་སྦྱངས་ཀྱི་ཚོགས་དཔག་ཏུ་མེད་པ་དང་ལྷན་ཅིག་བཞུགས་སོ་ཞེས་སྟོན་པ་ལ། དེ་ལྟ་བུའི་ཚོགས་བརྗོད་ཀྱིས་མི་ལང་བ་དང་གཉིས་སུ་མེད་པར་བཞུགས་སོ། །ཞེས་པས་བསྟན་ཏོ། །ཞར་བྱུང་དོགས་པ་བསལ་བ་ནི། ལེའུ་དང་པོ་ནས་བཤད་པའི་ལོངས་སྐུའི་གླེང་གཞི་འདི་ཉིད་སངས་རྒྱས་རང་སྣང་དང་གདུལ་བྱ་གཞན་སྣང་གང་ཡིན་ཞེ་ན། འོག་མིན་གྱི་གནས་མཐའ་དང་དབུས་མེད་པ་ན་ཞེས་སོགས་གཞུང་དངོས་བསྟན་ལྟར་ཡིན་ལུགས་ནས་རང་སྣང་གི་གླེང་གཞི་ཡིན་མོད། འོན་ཀྱང་གདུལ་བྱ་ལ་ལྟོས་ནས་གཞན་སྣང་གི་གླེང་གཞི་ཡིན་པའང་མི་འགལ་ཏེ། གླེང་བསླང་གི་དུས་སུ་རྒྱུན་མཐའི་བྱང་སེམས་ལ་འབྲས་དབང་བསྐུར་ནས་གནས་དེར་འཚང་རྒྱ་བར་བསྟན་པས་རྒྱུན་
མཐའི་སེམས་དཔའ་དེ་དག་སྟོན་འཁོར་དགོངས་པ་དབྱེར་མེད་དུ་མ་གྱུར་གོང་དུ་གདུལ་བྱ་དེའི་བློ་ངོར་གཞན་སྣང་གི་གླེང་གཞིར་སྣང་བ་ཡང་ཡོད་པའི་ཕྱིར་ཏེ། རྒྱ་མཚོ་ལས། དང་པོ་སངས་རྒྱས་ས་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །བརྗོད་ཀྱིས་མི་ལང་ཚད་མེད་དང་། །རྣམ་གཉིས་ཚུལ་དུ་བཞུགས་པའོ། །ཞེས་གསུངས་པས་སོ། །གཉིས་པ་ཞར་བྱུང་གདུལ་བྱ་ དགོས་ཆེད་དུ་བསྟན་པ ་ཁྲོ་བོའ་གླེང་གཞི་ལ། གནས་ཕུན་སུམ་ཚོགས་པ་ནི། བཟོད་པར་དཀའ་བའི་དུར་ཁྲོད་ཆེན་པོ་སྟེ། དུར་ཁྲོད་ཆེན་པོར་དགྱེས་ནས་སོགས་ཀྱིས་བསྟན། སྟོན་པ་ཕུན་སུམ་ཚོགས་པ་ནི། བཅོམ་ལྡན་འདས་དགྱེས་པ་ཆེན་པོ་དཔལ་ཧེ་རུ་ཀ་སྟེ། དེ་ནས་དེ་བཞིན་གཤེགས་པ་ཐམས་ཅད་ཀྱི་སོགས་ཀྱིས་བསྟན། འཁོར་ཕུན་སུམ་ཚོགས་པ་ལ། གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་གཉིས། དང་པོ་ནི། རུ་ཏྲ་འཁོར་དང་བཅས་པ་སྟེ། དེ་ལ་རུ་ཏྲར་གོལ་ཚུལ་དང་། གོལ་བའི་འབྲས་བུ་སྨིན་ཚུལ་ལོ། །དང་པོ་ནི། དེ་ཅིའི་ཕྱིར་ཞེ་ན། བདག་ཏུ་རྨོངས་པའི་རྟོག་པ་དང་སོགས་ཀྱིས་མ་རིག་པའི་རྒྱུས་སེམས་ཅན་ཐམས་ཅད་སྤྱིར་འཁྲུལ་ཚུལ་བསྟན་ནས། བྱེ་བྲག་ཏུ་རུ་ཏྲ་རང་གི་གོལ་ཚུལ་ནི། གབ་པའི་གསང་བ་མ་རྟོགས་པར་སྦས་པའི་གསང་བ་ལ་མངོན་པར་འཆེལ་ནས། ཞེས་པས་བསྟན་ཏེ། སྔོན་བསྐལ་པ་ཀུན་བཀོད་ཀྱི་དུས་སུ་བྱུང་བའི་དགེ་སློང་ཐར་པ་ནག་པོ་ལྟ་བུ་སྟེ། གོལ་གཞི་ཐུབ་དཀའ་གཞོན་ནུས། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །ཞེས་གསུངས་པ་ལ་སྒྲ་ཇི་བཞིན་པར་སྤྱད་པས་གོལ་བ་བཞིན་ནོ། །གཉིས་པ་ནི། སྲིད་པའི་ས་བོན་རྩུབ་མོས་འཕངས་ནས་སོགས་ཀྱིས་རྣམ་སྨིན་གྱི་འབྲས་བུ་དམྱལ་བ་དང་ཡི་དྭགས་སུ་སྐྱེས་ཚུལ་དང་། དེ་ནས་ལས་ཀྱི་སྒྲིབ་པ་རྩུབ་མོའི་རྣམ་པར་སྨིན་པ་དེ་སོགས་ཀྱིས་རྒྱུ་མཐུན་གྱི་འབྲས་བུ་རུ་ཏྲར་སྐྱེས་ཚུལ་དངོས་བསྟན་ནོ། །གཉིས་པ་འདུལ་བྱེད་གཉེན་པོའི་འཁོར་ནི། ལ་ལ་ནི་དཔལ་ཁྲག་འཐུང་ཆེན་པོར་གྱུར་ཏེ་སོགས་ཀྱིས་རིགས་བཞི་ཡབ་ཡུམ། དཀར་མོའ་ཚོགས་དང་སོགས་ཀྱིས་གནས་
མ་བརྒྱད། སེང་གདོང་ཆེན་མོའ་ཚོགས་དང་སོགས་ཀྱིས་ཡུལ་མ་བརྒྱད། རྡོ་རྗེ་སྲིང་འགྲོ་མའི་ཚོགས་དང་སོགས་ཀྱིས་གདོང་མོ་བཞི། སྲིན་མོ་ཆེན་མོ་མིའི་སྲིན་མོ་དང་སོགས་ཀྱིས་དབང་མོ་ཉེར་བརྒྱད་རྣམས་བསྟན་ཏོ། །སྐབས་འདིར་སྤྱིར་དབང་མོ་རྣམས་གདུལ་བྱའི་འཁོར་ཡིན་ཡང་ངོ་མཚར་ཚོགས་ཀྱི་སྲས་མོ་རྣམས་སྐྱེད་པའི་ཡུམ་ཡིན་པས་འདུལ་བྱེད་དུ་བསྡུས་སོ། །ཆོས་ཕུན་སུམ་ཚོགས་པ་ནི། ཐབས་ལམ་སྦྱོར་སྒྲོལ་གྱི་ཐབས་རྨད་དུ་བྱུང་བ་སྟེ། དེ་ལ་དབྱེ་ན། ཕོ་རྒྱུད་སྒྲོལ་བས་འདུལ་བ། མོ་རྒྱུད་སྦྱོར་བས་འདུལ་བ། དེ་ལྟར་བཏུལ་བའི་འབྲས་བུ་དང་གསུམ་གྱིས་བསྟན་ཏེ། དེ་ནས་དེ་བཞིན་གཤེགས་པ་ཆེ་བའི་རྡོ་རྗེ་བཀོད་པའི་སྒྱུ་འཕྲུལ་དྲྭ་བ་ལས། ཞེས་པ་ནས། མིང་གི་དབང་བསྐུར་ཏེ་དཀྱིལ་འཁོར་གྱི་ཕྱི་རོལ་དུ་བཀོད་དོ། །ཞེས་པའི་བར་གྱིས་བསྟན་ཏོ། །དུས་ཕུན་སུམ་ཚོགས་པ་ནི། དེའི་དུས་སུ་འཇིག་རྟེན་དྲུག་གི་ཕྱོགས་བཅུའི་སྲིད་པ་ཀུན་ཏུ་སོགས་ཀྱིས་བསྟན་ཏོ། །དོགས་སེལ་ནི། ཁྲོ་བོའ་གླེང་གཞི་འདི་ལ་ཞར་བྱུང་ཞེས་བརྗོད་པའི་རྒྱུ་མཚན། རྒྱུན་མཐའི་སེམས་དཔའ་རྣམས་ལ་སྟོན་པས་འབྲས་དབང་བསྐུར་བའི་དུས་དེར་ནང་དུ་སྣང་གསུམ་གྱི་སྒྲིབ་པ་བཅོམ་པའི་བརྡར་ཕྱི་རོལ་དུ་རུ་ཏྲ་འཁོར་དང་བཅས་པའི་སྣང་ངོར་ཁྲོ་བོའ་གླེང་གཞིར་སྣང་བའི་ཕྱིར་དེ་སྐད་ཅེས་སྨོས་ལ། གདུལ་བྱ་ དགོས་ཆེད་དུ་བསྟན་པའི་དོན། སྔོན་བྱུང་དུ་གདུལ་བྱ་གདུག་པ ་ཅན་འདུལ་བ་དང་། མ་འོངས་པའི་གདུལ་བྱ་དབང་རྣོན་བརྟུལ་ཞུགས་ཅན་རྣམས་གསང་སྔགས་ཀྱི་ཉེ་ལམ་སྦྱོར་སྒྲོལ་གྱི་ཐབས་ཁྱད་པར་ཅན་ལ་བཀྲི་བའི་ཆེད་ཡིན་ཞིང་། ཁྱད་པར་རྫོགས་རིམ་གྱི་དུས་སུ་སྐྱོན་ཅན་གྱི་རྩ་དང་ལས་ཀྱི་རླུང་ཐིག་གི་རྒྱུ་བ་བཅོམ་ནས་ཡེ་ཤེས་ཀྱི་རྩ་རླུང་ཐིག་ལེར་སྦྱོར་བའི་གནད་ཁྱད་པར་ཅན་སྟོན་པའི་ཕྱིར་རོ། །གསུམ་པ་སྤྲུལ་སྐུ་འགྲོ་བ་འདུལ་བའི་གླེང་གཞིའམ། བསྟན་པ་སྤྱིའི་གླེང་གཞིར་གྲགས་པ་ལ། གནས་ཕུན་སུམ་ཚོགས་པ་ནི། སྤྱིར་གཙོ་ཆེ་བའི་དབང་དུ་བྱས་ནས། ཕྱོགས་བཞི་སྟེང་འོག་དང་བཅས་པའི་འཇིག་རྟེན་དྲུག་གམ། ཡང་ན་ཡས་ཀྱི་འཇིག་རྟེན་ལྷ་མི། འཕྲེད་བསྟན་གྱི་འགྲོ་བ་དུད་འགྲོ་སྟེ་སྣྲེལ་ཞི། མས་ཀྱི་འཇིག་རྟེན་ཡི་དྭགས་དང་དམྱལ་བའོ། །
མདོར་ན་དེ་དག་གིས་བསྡུས་པའི་སྟོང་གསུམ་གྱི་སྟོང་ཆེན་པོ་གཅིག་སྟེ། སྣྲེལ་ཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་ཡས་མུ་མེད་པའི་སྟོ ང་གསུམ་གྱི་སྟོང་ཆེན་པོ་རེར། ཞེས་པས་བསྟན་ཏོ། །སྟོན་པ་ཕུན་སུམ་ཚོགས་པ་ནི། འཇིག་རྟེན་གྱི་ཁམས་སྟོང་གསུམ་གྱི་སྟོང་ཆེན་པོ་རེ་རེར་མཆོག་གི་སྤྲུལ་སྐུ་རེ་རེས་དོན་མཛད་ཅིང་། དེ་ཡང་འཇིག་རྟེན་དྲུག་གམ། གདུལ་བྱ་རིགས་དྲུག་ལ་ལྟོས་ནས་ཐུབ་པ་དྲུག་སྟེ། རིག་པའི་སྐྱེས་བུ་ཐུབ་པ་དྲུག ཅེས་དང་། ཐུབ་པ་ཆེན་པོ་བཅོམ་ལྡན་འདས་རེ་རེས་ཞེས་པས་བསྟན། འཁོར་ཕུན་སུམ་ཚོགས་པ་ནི། འགྲོ་བ་ལྔའི་དོན་མཛད་དེ། ཞེས་པས། ལྷ་མི་སོགས་ཐེག་པ་ལྔའི་རིས་ཅན་གྱི་གདུལ་བྱ་ལྔའམ། འགྲོ་འདུལ་ཐུབ་པ་དྲུག་ལ་ལྟོས་ནས་ལྷ་མིན་སྟོད་རིས་ལྷ་དང་སྨད་རིས་དུད་འགྲོར་བསྡུས་པའི་རྒྱུད་ལྔའོ། །ཆོས་ཕུན་སུམ་ཚོགས་པ་ནི། འདུལ་བ་རྣམ་པ་བཞིས། ཞེས་པས། སྐུ་བསོད་ནམས་ཆེན་པོས་འདུལ་བ། ཐུགས་མངོན་སུམ་པས། རྫུ་འཕྲུལ་བསམ་གྱིས་མི་ཁྱབ་པས། གསུང་རིག་པས་འདུལ་བ་དང་བཞི། གསུང་རིག་པས་འདུལ་བ་དེ་ལ། ཐེག་པ་ལྔར་ཕྱེ་བས་མདོར་བསྟན། ཆོས་ཕུང་བརྒྱད་ཁྲི་བཞི་སྟོང་དུ་དབྱེ་བས་རྒྱས་པར་བཤད། དེ་ཡང་དབང་པོའི་བྱེ་བྲག་གིས་ལྔར་བསྡུ་བ་དང་གསུམ་གྱིས་བསྟན་ཏེ། བལྟམས་པ་དང་། ཞེས་པ་ནས། གོས་སུ་མེད་པར་སྟོན་པའི་ཐར་ཐུག་གོ །ཞེས་པའི་བར་གྱིས་བསྟན་ཏོ། །དུས་ཕུན་སུམ་ཚོགས་པ་ནི། སྒྲོན་མ་བཀོད་པའི་དུས་ཞེས་བྱ་བ་སངས་རྒྱས་མཆོག་གི་སྤྲུལ་སྐུ་འཇིག་རྟེན་དུ་བྱོན་པའི་དུས་ཏེ། ཤིན་ཏུ་དཀོན་པའི་དུས་ནའོ། །ཞེས་གསུངས་པའི་ཕྱིར་རོ། །དོགས་སྤོང་ནི། སྔར་བཤད་ལེའུ་བཅོ་ལྔ་པ་ཁྲོ་བོའ་གླེང་གཞིར་མ་ཟད། ལེའུ་གསུམ་པའི་གླེང་གཞི་འདི་ཡང་ལེའུ་དང་པོའི་གླེང་གཞིའི་ཞར་བྱུང་དུ་འགྲོ་སྟེ། ལོངས་སྐུ་དངོས་ཀྱི་གདུལ་ཞིང་དུ་མ་གྱུར་པའི་གོ་ཕྱེ་བའི་འཁོར་རྣམས་ལ་འདིའི་ལམ་སྟེགས་ཀྱི་ཐེག་པ་སྤྱི་དང་ཁྱད་པར་རྒྱུད་འདི་སོགས་རང་རང་གི་དབང་པོ་དང་འཚམས་པར་ཆོས་སྟོན་པའི་ཕྱིར། སྟོན་པ་ལོངས་སྐུ་ལས་མ་གཡོས་བཞིན་དུ་གང་འདུལ་གྱི་སྤྲུལ་སྐུར་སྣང་ནས་དོན་མཛད་དེ། ལེའུ་དང་པོར། བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣ་ཚོགས་པ་ཀུན་ཏུ་སྣང་
བ། ཞེས་དང་། ལེའུ་གཉིས་པར། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པ་ལས་འཕྲོས་པས་སོ། །གཉིས་པ་རྐྱེན་གླེང་བསླང་བ་ལ། ངོ་བོ། ངེས་ཚིག དབྱེ་བ་དང་གསུམ་གྱི། ངོ་བོ་ནི། ཐུགས་ཐིག་ལས། སྟོན་པས་གནང་དང་འཁོར་གྱིས་ཞུས། །སྐབས་ལས་གླེང་བསླང་སྟོན་དང་འཁོར། །གནང་འདྲིའི་རྐྱེན་དུ་གང་གྱུར་པ། །དེ་དེས་གསུང་ལ་མ་རེག་པ། །ཞེས་པས་སྟོན་འཁོར་དྲི་ལན་གྱི་སྦྱོར་བས་རྒྱུད་དོན་གདུལ་བྱའི་བློ་དང་འཚམས་པར་འབྱུང་མ་རག་པ་སྟེ། དེ་ཡང་འཇམ་དཔལ་མཚན་བརྗོད་ལྟ་བུ་འཁོར་གྱིས་ཞུས་པ་དང་། མདོ་སྡུད་པ་ལྟ་བུ་སྟོན་པས་མདུན་བསུས་པ་སྟེ། གླེང་བསླང་ཚུལ་གཉིས་སོ། །ངེས་ཚིག་ནི་ཅིའི་ཕྱིར་གླེང་བསླང་ཞེས་བྱ་ཞེ་ན། གང་གླེང་བར་བྱ་བ་ནི་རྒྱུད་དོན་ཡིན་ལ། དེ་ཉིད་གླེང་བར་བསྐུལ་བ་ནི་བསླང་བ་སྟེ། བསྟན་པ་འབྱུང་བའི་རྐྱེན་བྱེད་པའི་ཕྱིར་རོ། །དབྱེ་ན་ཐུན་མོང་མིན་པའི་དང་། ཐུན་མོང་གི་གླེང་བསླང་གཉིས་ལས། དང་པོ་ལ། ལྷན་ཅིག་པའི་འཁོར་ལ་གསང་དབང་བསྐུར་བ་དང་། དབང་གོང་མ་གཉིས་ལྷན་ཅིག་ཏུ་བསྐུར་བའོ། །དང་པོ་ནི། དེ་ནས་བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོ། ཞེས་སོགས་ཀྱིས་ཐབས་ཤེས་ལ་སྦྱོར་ཚུལ་དང་། དེ་ནས་བཙུན་མོ་བྱ་བ་མོ་ཆོས་ཀུན་ཏུ་བཟང་མོས། ཞེས་སོགས་ཀྱི་ཤེས་རབ་ཐབས་སུ་རོལ་ཚུལ་བསྟན། དེ་ལྟར་སྟོན་པ་ཡབ་ཡུམ་གཉིས་སུ་མེད་པར་མཉམ་པར་སྦྱར་བ་ལས། རྒྱུ་ཡབ་ཡུམ་གྱི་བྱང་ཆུབ་ཀྱི་སེམས་དང་རྐྱེན་དེའི་ཚེ། ཨེ་མའོ། །རྡོ་རྗེ་ཕུང་པོ་ཡན་ལག་ནི། ཞེས་སོགས་ཡབ་ཀྱིས་ཐབས་ཀྱི་ཆ་བཟུང་ནས་རྟོག་ཚོགས་ཐམས་ཅད་ཕྱག་རྒྱའི་དཀྱིལ་འཁོར་དུ་དག་ཚུལ་གྱིས་གླེང་བསླང་བས་འཁོར་རྣམས་ཀྱི་རྒྱུད་ལ་ལྷག་པ་ཀུན་རྫོབ་ཀྱི་བདེན་པ་རྟོགས་པར་བྱས། ཀྱེ་མའོ། །ཕྱོགས་བཅུ་སྟོང་ཁམས་ཡེ་ནས་དབེན། །ཞེས་སོགས་ཡུམ་གྱིས་ཤེས་རབ་ཀྱི་ཆ་བཟུང་ནས་དངོས་པོ་བཞིས་བསྡུས་པའི་ཆོས་ཐམས་ཅད་ཆོས་ཉིད་སྐྱེ་བ་མེད་པའི་ངོ་བོར་སངས་རྒྱས་པའོ་ཞེས་གླེང་བསླང་བས་འཁོར་རྣམས་ཀྱི་རྒྱུད་ལ་དོན་དམ་རྟོག་མེད་ཀྱི་ཡེ་ཤེས་མངོན་དུ་བྱས་མོད། འོན་ཀྱང་སྟོན་འཁོར་དགོངས་
པ་དབྱེར་མེད་ཀྱི་ཡེ་ཤེས་ཆེན་པོ་ད་དུང་མ་མྱོང་བའི་ཕྱིར་སྤྱོད་ཡུལ་མིན་པས་གསང་བའི་དབང་ཞེས་བྱའོ། །གཉིས་པ་ལ་དབང་གཉིས་ཀྱི་སྔོན་འགྲོ་ཐུན་མོང་བ་ནི། ཨེ་མའོ་ངོ་མཚར་རྨད་ཀྱི་ཆོས། །ཞེས་སོགས་མཚར་དང་པོ་བཞིས་བསྟན་ཏེ། དེ་ལ་འཁོར་གྱི་རྒྱུན་མཐའི་སེམས་དཔའ་རྣམས་རང་སྣང་ཡེ་ཤེས་ཀྱི་ཕྱག་རྒྱ་དང་སྙོམས་པར་ཞུགས་པའི་ཐབས་ཀྱིས་རྩ་གནས་ནས་ཐིག་ལེ་གཡོས་ཏེ་བདེ་བ་མགོ་ལྡང་བའི་ཚུལ་དུ་སྐྱེས་པ་གཡོ་ལྡང་བྱང་ཆུབ་ཀྱི་སེམས། བདེ་བ་ཕྱི་མ་འཇུག་པའི་ཚེ་སྔ་མ་འཇིག་ཅིང་མཐར་ཐམས་ཅད་འགག་པ་འབྱིན་འཇིགའཇུག་བྱང་ཆུབ་ཀྱི་སེམས། རྟེན་ཅན་གྱི་བདེ་བ་རང་ས་ན་གནས་པའི་ཚུལ་གྱིས་ཐམས་ཅད་གནས་པ་གནས་པ་བྱང་ཆུབ་ཀྱི་སེམས། སྔ་མའི་བདེ་བས་མཚོན་ནས་ཕྱི་མའི་བདེ་བ་ལ་དམིགས་ཤིང་འདུན་པ་སྨོན་པ་བྱང་ཆུབ་ཀྱི་སེམས་ཏེ། དེ་དག་ནི་དབང་གཉིས་ཀྱི་སྔོན་འགྲོའོ། །དངོས་གཞི་ནི། ཨེ་མའོ་སོགས་མཚར་ལྔའི་ཐ་མས་བསྟན་ཏེ། ཉི་ཟླ་བྱང་ཆུབ་ཀྱི་སེམས་ཡས་བབས་འགྲོ་བའི་སྦྱོར་བས་རྡོ་རྗེ་དང་པདྨའི་སྣ་རྩེར་ཞལ་མཇལ་བ་ལས་ཐབས་ཤེས་རབ་ཏུ་སྦྱོར་བ། ཤེས་རབ་ཐབས་སུ་སྦྱོར་བ། ཐབས་ཤེས་གཉིས་མེད་དུ་སྦྱོར་བ་གསུམ་གྱི་སྒོ་ནས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་སྟེ་ཤེས་རབ་ཡེ་ཤེས་ཀྱི་དབང་ཐོབ་ནས་དོན་དམ་འོད་གསལ་གྱི་ཡེ་ཤེས་རྒྱུད་ལ་སྐྱེས་པའོ། །དེ་ཉིད་སླར་ལྡོག་པའི་ཐབས་ཀྱིས་རང་གནས་སུ་འོང་བས་མས་བརྟན་གྱི་དགའ་བ་བཅུ་དྲུག་གི་མཐར་དཀར་དམར་གྱི་ཆ་སྟེང་འོག་ཏུ་ཐིམ་པའི་སྐད་ཅིག་གཉིས་པར་རླུང་ཡང་འགགས་པས་དེ་གསུམ་གྱི་འགྱུར་བ་མྱོང་བའི་ཤེས་རིག་ཀྱང་རྒྱུན་ཆད་དེ་བདེ་བ་ཆེན་པོའི་དབང་ཐོབ་ནས་ལྷག་པ་བདེན་པ་དབྱེར་མེད་ཀྱི་དོན་ཇི་ལྟ་བ་བཞིན་མངོན་དུ་གྱུར་ཏེ་སྟོན་འཁོར་དགོངས་པ་དབྱེར་མེད་དུ་གྱུར་པའོ། །སྔོན་བྱུང་གི་དབང་གསུམ་པོ་འདི་མ་འོངས་གོ་ཕྱེ་བའི་འཁོར་ལ་ལྟོས་ན་རྒྱུད་འབྱུང་བའི་གླེང་བསླང་དུ་འགྱུར་མོད། འོན་ཀྱང་ལྷན་ཅིག་པའི་འཁོར་རྣམས་ཁོ་ན་ལ་ལྟོས་ནས་གླེང་བསླང་བ། དབང་ཐོབ་པ། རྒྱུད་དོན་རྟོགས་པ་གསུམ་ངོ་བོ་གཅིག་ལ་ལྡོག་པ་སོ་སོར་སྣང་བ་ཙམ་ཡིན་ནོ། །གཉིས་པ་ཐུན་མོང་གི་གླེང་བསླང་ནི། འཁོར་
རྣམས་ཀྱི་གཞན་དོན་དུ་གསང་བ་བཞིས་ཆོད་པ་རྣམས་ལ་ཐུགས་རྗེས་བཟུང་བར་རིགས་ཞེས་གསོལ་བ་བཏབ་པ་ལས་སྟོན་པའི་ཐུགས་རྗེ་སྐྱེས་ཏེ་རྒྱུད་འདིས་དངོས་སུ་འདུལ་བའི་ཡུལ་དུ་གྱུར་པ་རྣམས་ལ་རྒྱུད་གསུངས་ཤིང་། གདུལ་བྱ་ཐུན་མོང་བ་རྣམས་ལ་བརྒྱུད་ནས་བསྟན་པར་བྱ་བའི་ཕྱིར་བསམ་གྱིས་མི་ཁྱབ་པའི་སྤྲུལ་སྐུ་ཐུབ་པ་དྲུག་སྤྲོ་བ་སོགས་ཐུགས་རྗེ་ཆེན་པོ་རོལ་པ་རྣམ་པ་སྣ་ཚོགས་སྟོན་པར་མཛད་དེ། དེ་ནས་དེ་བཞིན་གཤེགས་པ་ཐམས་ཅད་བཙུན་མོའ་ཚོགས་དང་བཅས་པས་ཆེད་དུ་བརྗོད་པ་འདི་བརྗོད་དོ། །ཞེས་པ་ནས། བསྟན་ཕྱིར་སྤྲོ་བ་སྣ་ཚོགས་མཛད། །ཅེས་པའི་བར་གྱིས་བསྟན་ཏོ། །གསུམ་པ་འབྲས་བུ་ཡོངས་ཤེས་རྒྱུད་དོན་བཤད་པ་ལ་གཉིས་ཏེ། བརྗོད་བྱ་གཙོ་ཆེ་བའི་དབང་དུ་རྒྱུད་གསུམ་གྱི་རྣམ་བཞག་སྤྱིར་བཤད། རྗོད་བྱེད་གཙོ་ཆེ་བའི་དབང་དུ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པའོ། །དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས་སྤྱིར་རྒྱུན་ཆགས་པའི་དོན་གྱིས་ན་རྒྱུད་ཅེས་བྱ་ལ། དབྱེ་ན། གང་རྟོགས་པར་བྱ་བ་གཞིའམ་རྒྱུའི་རྒྱུད་དང་། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དོ། །དང་པོ་ནི། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་པས། གཞི་འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་གང་ཡིན་པ་སྟེ། དེ་ལ་རྒྱུ་རྒྱུད་ཅེས་བྱ་ལ། དེའི་དོན་བཤད་པ་ནི། རྒྱུ་རྒྱུད་དེ་རྟོགས་མ་རྟོགས་ཀྱི་བྱེད་པས་འཁོར་འདས་ཀྱི་ཆོས་ཐམས་ཅད་ཀྱི་འཆར་གཞིར་གྱུར་པས་ན་གཞི་ཞེས་བྱ་ལ། དེ་ཉིད་གནས་ལུགས་ལ་འཆིང་གྲོལ་ཐམས་ཅད་དང་བྲལ་བ་སྟེ། རྒྱུ་མཚན་འཆིང་བྱེད་འཁྲུལ་པའི་ཆོས་མེད་སྣང་གློ་བུར་བ་ཡིན་པས་བཅིངས་པ་མེད་ལ། བཅིངས་པ་མེད་ན་གྲོལ་བ་མི་འབྱུང་བ་ཆོས་ཉིད་ཡིན་པའི་ཕྱིར་འཆིང་གྲོལ་མེད་པ་ཞེས་བྱ་ཞིང་། སེམས་ཉིད་བདེ་བར་
གཤེགས་པའི་སྙིང་པོ་དེ་གསར་བྱུང་མིན་པར་གདོད་མ་ནས་ཡོངས་གྲུབ་རྟག་པ་འདུས་མ་བྱས་ཀྱི་རང་བཞིན་དུ་བཞུགས་པས་གནས་ལུགས་ཞེས་བྱའོ། །རང་རིག་པ་བྱང་ཆུབ་ཀྱི་སེམས་ཞེས་བྱ་བ་ནི། འཁོར་འདས་ཀྱི་ཆོས་ཐམས་ཅད་སེམས་སུ་འདུ་ལ། དེ་ཡང་རང་རིག་བྱང་ཆུབ་སེམས་ཀྱི་ངོ་བོར་འདུས་པའི་རྒྱུ་མཚན་གྱིས་དེ་ལྟར་དུ་བཏགས། བདེན་པ་དབྱེར་མེད་ཅེས་པའི་དོན། དབྱིངས་སྤྲོས་པ་ཐམས་ཅད་དང་བྲལ་བའི་ཆ་ནས་རང་བཞིན། རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས། དེ་ལས་སྐུ་གསུང་ཐུགས་ཡོན་ཏན་ཕྲིན་ལས་ཏེ་འབྲས་ཆོས་ལྔ་འཆར་རུང་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཆ་ནས་འབྲས་བུ་དོན་དམ་སྟེ་དེ་ལྟར་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེའི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་འཆར་བ་ལྷག་པ་ཀུན་རྫོབ་བདེན་པ་སྟེ། དེ་གཉིས་ངོ་བོ་དབྱེར་མེད་ཟུང་འཇུག་ཡིན་པས་ན་བདེན་པ་དབྱེར་མེད་ཅེས་བྱའོ། །དེ་ལ་བདེན་པ་གཉིས་ཟུང་དུ་འཇུག་ཚུལ་ནི། གཅིག་གིས་གཅིག་མི་གཏོང་བའི་ཟུང་འཇུག་སྟེ། གསེར་དང་གསེར་གྱི་སེར་པོའམ། མར་མེ་དང་མར་མེའི་འོད་བཞིན་དུ་དོན་དམ་གྱི་སྣང་ལྡོག་ཀུན་རྫོབ་ཏུ་རང་ཤར་བའི་ཕྱིར། དེ་ནི་བསམ་བརྗོད་ཀྱི་ཡུལ་ཐམས་ཅད་ལས་འདས་པས་སྤྱོད་ཡུལ་དང་བྲལ་བ་ཞེས་བཏགས་ཤིང་། དེ་ཉིད་བརྟན་གཡོ་འཁོར་འདས་ཀྱིས་བསྡུས་པའི་ཆོས་ཐམས་ཅད་ལ་ཁྱབ་ཆས་སུ་ཡེ་གདོད་མ་ནས་གནས་པ་གང་ཡིན་པ་སྟེ། ཁམས་བདེ་བར་གཤེགས་པའི་སྙིང་པོ་དང་། རང་བཞིན་གྱིས་གནས་པའི་རིགས་དང་། ཀུན་གཞིའི་ཡེ་ཤེས་དང་། དྲི་བཅས་དེ་བཞིན་ཉིད་ལ་སོགས་པའི་ཐ་སྙད་གང་ལ་འཇུག་པའི་གཞིའོ། །དེ་དག་གི་དོན་བཤད་པ་ནི། ཆོས་ཀུན་གྱི་འབྱུང་གནས་སུ་གྱུར་པས་དབྱིངས་སམ་ཁམས། དྲི་མ་དང་འབྲེལ་ཡང་རང་གི་ངོ་བོ་སངས་རྒྱས་ཡིན་པས་བདེ་གཤེགས་སྙིང་པོའོ། །སེམས་ཉིད་སྟོང་ཆ་ནས་ཆོས་སྐུ་དང་སྣང་ཆ་ནས་གཟུགས་སྐུའི་ཡོན་ཏན་རྫོགས་པར་ལྡན་ཡང་དྲི་མ་མ་དག་པར་རང་གི་བྱ་བ་བྱེད་མི་ནུས་པས་རང་བཞིན་གྱིས་གནས་པའི་རིགས་སོ། །རང་གི་ངོ་བོ་རང་བྱུང་གི་ཡེ་ཤེས་ཡིན་ལ་རྟོགས་མ་རྟོགས་ཀྱི་
བྱེད་པས་འཁོར་འདས་ཀུན་གྱི་འཆར་གཞིར་གྱུར་པས་ཀུན་གཞིའི་ཡེ་ཤེས་སོ། །ཆོས་ཉིད་དེ་བཞིན་ཉིད་དེ་སྣང་ལུགས་ལ་དྲི་མའི་སྦུབས་ཀྱིས་བཅིངས་པར་སྣང་བས་དྲི་བཅས་དེ་བཞིན་ཉིད་ཅེས་བྱའོ། །སོགས་ཁོང་ནས་ཀྲི་ཡས་བདག་གི་དེ་ཁོ་ན་ཉིད་དང་། ཨུ་པ་ཡས་བྱང་ཆུབ་ཀྱི་སེམས། ཡོ་གས་ཐོག་མཐའ་མེད་པའི་བྱང་ཆུབ་ཀྱི་སེམས་སམ་བྱང་ཆུབ་ཀྱི་སེམས་ཀུན་ཏུ་བཟང་པོ་དང་། མ་ཧཱ་ཡོ་གས་བྱང་ཆུབ་ཀྱི་སེམས་དབྱེར་མེད་སྤྱོད་ཡུལ་དང་བྲལ་བའམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ། ཨ་ནུས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏིས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་པ་མེད་པའི་གནས་ལུགས་ཡེ་ཤེས་གསུམ་ལྡན་ལ་སོགས་པ་མིང་དུ་མར་གྲགས་སོ། །རྒྱུ་རྒྱུད་དེ་ཉིད་གཞི་ལམ་འབྲས་གསུམ་གྱི་ལྡོག་ཆ་གང་རུང་དང་མ་བསྟུན་པར་སྤྱིར་བཞག་པ་ན་རང་བཞིན་ནམ་གནས་ལུགས་ཞེས་བྱ་སྟེ། གཞི་ལམ་འབྲས་གསུམ་དབྱེར་མི་ཕྱེད་པའི་ཟུང་འཇུག་རང་བཞིན་གསང་བའི་སྙིང་པོའོ། །ལྡོག་ཆ་སོ་སོར་ཕྱེ་སྟེ་གློ་བུར་གྱི་དྲི་མ་སྦྱོང་བ་དང་། དྲི་མ་དེ་ཉིད་ལམ་རྒྱུད་ཀྱིས་བསལ་ཞིང་སྦྱངས་པའི་སྟོབས་ཀྱིས་འབྲས་བུ་ཇི་ལྟ་བ་བཞིན་མངོན་དུ་གྱུར་པ་ལ་ལྟོས་ནས་ལམ་དང་འབྲས་བུར་བཞག་གོ །ཅིའི་ཕྱིར་གཞིའམ་རྒྱུའི་རྒྱུད་དུ་འགྱུར་ཞེ་ན། ཐབས་ལམ་གྱི་རྐྱེན་གྱིས་ཟིན་པ་ལས་མྱང་འདས་དང་མ་ཟིན་པ་ལས་འཁོར་བར་འགྲུབ་པར་བྱེད་པས་ན། འཁོར་འདས་གཉིས་ཀའི་འབྱུང་གཞིའམ་རྒྱུར་གྱུར་པའི་ཕྱིར་དང་། དེ་ཉིད་སེམས་ཅན་ནས་སངས་རྒྱས་ཀྱི་བར་དུ་རང་བཞིན་འགྱུར་བ་མེད་པར་རྒྱུན་ཆགས་སུ་འཇུག་པས་ན་རྒྱུད་དེ། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་དང་། མགོན་པོ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དབྱེ་ན། སློབ་དཔོན་བི་མ་ལས། རིམ་པ་གསུམ་པར། དང་པོ་རྣམ་པ་གཉིས་ཡིན་ཏེ། །ངོ་བོའ་གཞི་དང་བཏགས་པའི་གཞི། །ཞེས་པས། སེམས་ཆོས་ཉིད་གདོད་མ་ནས་རང་བཞིན་གྱིས་རྣམ་པར་དག་པ་རྒྱུ་རྒྱུད་བདེ་བར་གཤེགས་པའི་སྙིང་པོ་ནི་སྐབས་
འདིར་སྦྱང་གཞི་སྟེ་དྲི་མ་སྦྱོང་བའི་གཞི་ཡིན་པའི་ཕྱིར། དཔེར་ན། འདམ་རྫབ་ཀྱི་དབུས་ཀྱི་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའོ། །དེ་ལ་ནི་གནས་ལུགས་ངོ་བོ་ཉིད་ཀྱི་གཞི་ཞེས་བྱ་སྟེ། གཞི་མཚན་ཉིད་པ་ཡིན་ནོ། །ལོག་པའི་ཞེན་སྣང་ཡུལ་དང་བཅས་པ་ནི་སྦྱང་བྱའི་དྲི་མ་འདམ་རྫབ་ལྟ་བུ་སྟེ། མེད་སྣང་གློ་བུར་བ་ཡིན་པས་འཁྲུལ་པ་བཏགས་པའི་གཞི་ཞེས་གསུངས་སོ། །སྐབས་འདིའི་ལོག་ཞེན་ནི། གཉིས་མེད་ལ་གཉིས་སུ་འཛིན་པའི་ལོག་པའི་ཞེན་སྣང་སྟེ། དེ་ལས་ལས་དང་ལོག་རྟོག་གི་བློར་སྣང་བའི་འཁྲུལ་པའི་ཡུལ་དང་བཅས་པའི་རིགས་གནས་སོ། །ཞེན་སྣང་ཉིད་འཁོར་བ་འགྲུབ་བྱེད་ཀྱི་རྒྱུ་དང་། རྣམ་ཤེས་ཀྱི་འཇུག་པ་མ་ཟད་བར་རྒྱུན་ཆགས་པ་ཙམ་ཡིན་པས་རྒྱུ་རྒྱུད་ཀྱི་མིང་ཙམ་ཐོགས་ཀྱང་། སྐབས་འདིའི་རྒྱུ་རྒྱུད་མིན་ཏེ། བཅོས་མ་གློ་བུར་གྱི་ཆོས་ཡིན་པས་འབྲས་བུའི་ཉེར་ལེན་དུ་གྱུར་པའི་རྒྱུ་རྒྱུད་མིན་པའི་ཕྱིར། རིགས་པས་དཔྱད་དོན་གྱི་སྟོང་ཉིད་ཅེས་བྱ་བ་ཀ་བ་ཀ་བའི་ཆོས་ཉིད་དང་། བུམ་པ་བུམ་པའི་ཆོས་ཉིད་ཀྱིས་སྟོངས་པ་ལྟ་བུ་མེད་དགག་གི་སྟོང་ཉིད་ཀྱང་སྐབས་འདིར་རྒྱུ་རྒྱུད་མཚན་ཉིད་པ་མིན་ཏེ། ཉེར་ལེན་གྱི་རྒྱུ་དང་རྒྱུན་གྱི་དོན་གཉིས་ཀ་མི་གནས་པའི་ཕྱིར་ཏེ། མེད་དགག་དེ་ཉིད་སྤྲོས་བྲལ་ཙམ་ཡིན་ཡང་འཁོར་འདས་གཉིས་ཀའི་རྒྱུ་མིན་ལ། འདུས་མ་བྱས་པ་ཙམ་ལས་རྒྱུན་གྱི་དོན་ཡང་མ་ཚང་བའི་ཕྱིར། འོན་ཀྱང་རྒྱུ་རྒྱུད་བཏགས་པ་བར་བཞག་པ་ལ་འགལ་བ་མེད་དེ། དེ་ལ་དམིགས་ན་སྐྱོན་ཡོན་སྐྱེ་བ་དང་གནས་སྐབས་རིག་ངོར་རྒྱུན་ཆགས་པ་ཙམ་ཡིན་པའི་ཕྱིར། གཉིས་པ་གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་ནི། རྒྱུ་རྒྱུད་བདེ་བར་གཤེགས་པའི་སྙིང་པོ་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཏེ། དེ་ཡང་དང་པོར་ཐོས་བསམ་གྱིས་ལྟ་བའི་གནས་ལུགས་དོན་སྤྱིའི་ཚུལ་དུ་ཤེས་པར་བྱས་ནས། དེ་ལྟར་ཤེས་པའི་དོན་ལ་ཉམས་སུ་ལེན་པའི་སྒོ་ནས་འཇུག་པའི་བྱེད་རྩོལ་དང་བཅས་པ་སྟེ། དེ་ཡང་ངོ་བོ་སྐྱེད་བྱེད་ཐོས་བསམ་སྒོམ་པའི་ཤེས་རབ་རྣམ་པ་གསུམ་གྱིས་བསྐྱེད་བྱ་ཐུན་མོང་དང་། མཆོག་གི་སེམས་ལྔ་སྐྱེས་སམ་སྐྱེ་བའོ། །དེ་ལྟར་ཡང་རིམ་གསུམ་ལས། ངོ་བོ་
ཤེས་རབ་རྣམ་གསུམ་གྱིས། །སེམས་ལྔ་སྐྱེས་པར་བསྟན་པ་ཡིན། །ཞེས་སོ། །སྐབས་འདིའི་ཐུན་མོང་གི་སེམས་ལྔ་ནི། ལྷ་མི་གཉིས། ཉན་ཐོས། རང་རྒྱལ། བྱང་སེམས། ཕྱི་རྒྱུད་སྡེ་གསུམ་སྟེ་ཐུན་མོང་གི་ལམ་ལྔ་དང་མཐུན་པའི་སེམས་ལྔ་ཡིན་ལ། མཆོག་གི་སེམས་ལྔ་ནི། མ་ཧཱ་ཡོ་ག་བ་རང་ལུགས་ཀྱི་སེམས་ལྔ་སྟེ། སེམས་ལྔ་པོ་གང་ཞེ་ན། ལམ་ལ་འཇུག་འདོད་ཀྱི་སེམས་དང་པོར་འགོ་ལྡང་བ་གཡོ་ལྡང་བྱང་ཆུབ་ཀྱི་སེམས། དེ་ཐོབ་ན་ཅི་མ་རུང་སྙམ་པ་སྨོན་པ་བྱང་ཆུབ་ཀྱི་སེམས། དེ་ལ་འཇུག་པ་འཇུག་པ་བྱང་ཆུབ་ཀྱི་སེམས། ཞུགས་ནས་གནས་པ་གནས་པ་བྱང་ཆུབ་ཀྱི་སེམས། དེ་དོན་མཐར་ཕྱིན་པ་མཐར་ཕྱིན་བྱང་ཆུབ་ཀྱི་སེམས་སོ། །སེམས་ལྔ་པོ་དེ་དག་གི་སྐྱེ་ཚུལ་ནི། རྒྱ་མཚོ་ལས། གཞི་དང་སྐབས་ནས་སྐྱེ་འགྱུར་པ། །གྲོལ་ཐར་ལམ་དུ་རྣམ་པར་བཤད། །ཅེས་པས་གཞི་ནས་སེམས་བསྐྱེད་པ། ལམ་ནས་སེམས་བསྐྱེད་པ། འབྲས་བུ་ནས་སེམས་བསྐྱེད་པའོ། །དང་པོ་ནི། མུན་པའི་ས་ནས་སེམས་བསྐྱེད་པ་ཞེས་བྱ་སྟེ། ལམ་མ་ཞུགས་ཀྱི་གང་ཟག་ཅིག་ཐོག་མ་ནས་ལམ་འདི་ལ་ཞུགས་ཏེ། རང་འབྲས་མཐར་ཕྱིན་པར་བྱེད་པའོ། །གཉིས་པ་ནི། ལམ་སྟེགས་ཀྱི་ཐེག་པ་གང་རུང་ཞིག་ལ་ཞུགས་ནས་སློབ་བཞིན་པ་ལས་ཁྱད་པར་གྱི་ལམ་འདི་ལ་འཇུག་པ་ལྟ་བུའོ། །གསུམ་པ་ནི། ལམ་སྟེགས་ཀྱི་ཐེག་པ་གང་ཡིན་ཡང་རུང་། རང་ལམ་གྱི་མཐར་ཐུག་གི་འབྲས་བུ་མངོན་དུ་བྱས་ནས་སླར་ཉེ་ལམ་རྨད་དུ་བྱུང་བའི་ལམ་མཆོག་འདི་ལ་འཇུག་པའོ། །ཞར་བྱུང་དེ་དག་གི་དོགས་སེལ་ནི། ལམ་དང་འབྲས་བུའི་ས་ནས་སེམས་བསྐྱེད་པ་གང་ཡིན་ཡང་རུང་། ཉན་རང་མན་ཆད་རང་ལམ་གྱི་མི་སློབ་ལམ་མཐར་ཕྱིན་པར་བསྒྲུབས་ཀྱང་ཐེག་ཆེན་གྱི་ཚོགས་ལམ་རང་ནས་འཇུག་དགོས་ཤིང་། བྱང་སེམས་ཡན་ཆད་ལམ་དང་འབྲས་བུ་གང་ནས་ཞུགས་ཀྱང་ལོ་ཚོད་མཐུན་པའི་ས་ནས་ཞུགས་པས་ཆོག་གོ ། ངེས་ཚིག་ནི། ཅིའི་ཕྱིར་ཐབས་སམ་ལམ་གྱི་རྒྱུད་དུ་འགྱུར་ཞེ་ན། ཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་ལྷན་ཅིག་བྱེད་རྐྱེན་ཡིན་པས་ཐབས་དང་། གང་གིས་གང་དུ་བགྲོད་བྱའི་རྟེན་ཡིན་པས་ལམ་སྟེ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་
ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། མདོའ་དོན་བསྡུས་ལས། བགྲོད་དང་དེ་ཆོས་ལྡན་པ་དང་། །ཞེས་སོ། །ལམ་དེ་ལའང་ཉེ་རིང་གཉིས་ལས། རྣལ་འབྱོར་བླ་ན་མེད་པ་ཁྱད་པར་གྱི་ལམ་འདི་ནི་ཉེ་བའི་ལམ་མམ། ཐབས་ཀྱི་རྒྱུད་ཡིན་ཏེ། ལམ་འདི་མཐར་ཕྱིན་པར་བསྒྲུབས་ནས་ལམ་གཞན་གྱི་བསྣོན་མ་མི་ དགོས་པའི་ཕྱིར། དེ་ལས་གཞན་པ ་ཐུན་མོང་གི་ལམ་ནི། ངན་སོང་ལས་ངེས་པས་འབྱུང་བ་ལྷ་མི། འཁོར་བ་ལས་ངེས་པར་འབྱུང་བ་ཉན་རང་། མཐའ་གཉིས་ལས་ངེས་པར་འབྱུང་བ་བྱང་སེམས་ཏེ་ངེས་འབྱུང་གི་ཐེག་པ་བཞི་དང་། ཕྱི་རྒྱུད་སྡེ་གསུམ་གྱི་ལམ་རྣམས་ནི་སྐབས་འདིར་རིང་བའི་ལམ་ཞེས་བྱ་སྟེ། རང་ལམ་གྱི་འབྲས་བུ་མཐར་ཕྱིན་ནས་ཀྱང་འདི་ལ་འཇུག་ དགོས་པའི་ཕྱིར། ལམ་དེ་ནི་གཞི་ཤེས་པར་བྱེད་པ ་ལ་མར་འབྲེལ། འབྲས་བུ་ཐོབ་པར་བྱེད་པ་ལ་ཡར་འབྲེལ་བས་ཤེས་ཐོབ་ཀྱི་བྱ་བྱེད་དང་འབྲེལ་བའི་ཐབས་བར་མ་ཆད་པས་རྒྱུད་དུ་བཞག་གོ ། ཁྱད་པར་གྱི་ལམ་ལ་དབྱེ་ན། ཐབས་ཀྱིས་ངེས་པའི་ལམ་དང་། ཤེས་རབ་རྣམ་པར་གྲོལ་བའི་ལམ་གཉིས་ཏེ། བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཅེས་སོ། །དེ་ལ་ཐབས་ལམ་ནི། ངོ་མཚར་ངན་འགྲོ་ཐར་པའི་ཐབས། །ཞེས་པས་གཙོ་བོར་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་འགྲུབ་པར་བྱེད་པ་སྟེ། ལམ་ཐབས་གྲོལ་གཉིས་ཕན་ཚུན་ལྟོས་པ་ཅན་ཡིན་པས་གཙོ་ཆེ་བའི་དབང་དུ་བྱས་ཏེ་གཙོ་བོར་ཞེས་སྨོས་ལ། སྤྱིར་ཐབས་ཞེས་བྱ་བ་ལམ་ཐམས་ཅད་ལ་འཇུག་ཀྱང་འདིར་ཐབས་མཁས་ཀྱིས་ཟིན་མ་ཟིན་གྱི་ཁེ་ཉེན་ཆེ་བས་སྤྱི་མིང་བྱེ་བྲག་ལ་སྦྱར་ཏེ་ཐབས་ཀྱི་ཁྱད་པར་ཞེས་བྱ་ཞིང་། འདི་ལྟ་བུའི་སྤྱོད་ཚུལ་ཁྱད་པར་ཅན་དེ་ནི་གང་ཟག་བརྟུལ་ཞུགས་དང་ལྡན་པ་ཁོ་ནའི་སྤྱོད་ཡུལ་ཡིན་པས་དེ་ལྟར་གྲགས་ལ། རྨད་དུ་བྱུང་བ་ཞེས་པ་ཡ་ཤ་བའི་དོན་ཏེ། འཆིང་བྱེད་ཀྱི་ལས་ལ་སྤྱོད་པ་ལྟར་གནང་བས་གྲོལ་བ་འདི་འདྲ་ངོ་མཚར་ཞིང་ངམ་པའོ། །དེས་ནི་འབྲས་བུ་ཕྱི་དུས་སུ་མི་ལུས་པར་མྱུར་དུ་འགྲུབ་པར་བྱེད་པ་སྟེ། དཔེ་མཀྵི་ཀ་བྱ་བ་དངུལ་ཆུ་ལས་བསྒྲུབས་པའི་གསེར་འགྱུར་གྱི་རྩི་སྟེ། དེས་ལྕགས་གསེར་དུ་བསྒྱུར་
བའི་ཚེ་རྩི་དེ་ཉིད་ཀྱིས་ལྕགས་ལ་བཏབ་སྟེ་ཐབས་དང་ལྡན་པས་བསྲེགས་པ་ན་གནས་སྐབས་ལྔས་གསེར་དུ་བསྒྱུར་བ་བཞིན་ཏེ། དེ་ལ་གནས་སྐབས་ལྔ་ནི། དུ་བ་དང་ནི་རྩེག་རྩེག་དང་། །སྦལ་པ་འཆོང་བ་ཉིད་དང་ནི། །འདར་བ་དང་ནི་མི་འདར་བའི། །དངུལ་ཆུ་ཡི་ནི་གནས་སྐབས་ལྔ། །ཞེས་སོ། །མྱུར་བར་མ་ཟད་ཁེ་ཉེན་ཆེ་བའི་དཔེར་ཡང་འགྱུར་ཏེ། བསྲེག་པའི་ཐབས་ལ་མཁས་ན་ལྕགས་གསེར་དུ་འགྱུར་བ་ལ་དཀའ་ཚེགས་མེད་ཅིང་། ཐབས་དང་མི་ལྡན་ན་མེ་ཉིད་དངུལ་ཆུའི་དགྲ་ཡིན་པས་ལྕགས་གསེར་དུ་མི་འགྱུར་བར་མ་ཟད་རྩི་དེ་ཡང་འཐོར་ཏེ་ཆུད་ཟོས་སུ་འགྲོ་བ་བཞིན་ནོ། །དབྱེ་ན། རིམ་གསུམ་ལས། གདམས་ངག་སྟེང་དང་འོག་གི་སྒོ། །ཞེས་པ་ལྟར་གཉིས་ལས་དང་པོ་སྟེང་སྒོ་ནི། འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་རིམ་གྱིས་པ་སྟེ། ཞེས་པས། ལུས་ཀྱི་ལྟེ་བར་རྩ་གསུམ་འཁོར་ལོ་དྲུག་དང་བཅས་པ་གསལ་བཏབ། དེ་ལ་རྩ་གསུམ་ནི་ལུས་ཀྱི་དབུས་སུ་རྩ་དབུ་མ། གཡས་སུ་རོ་མ། གཡོན་དུ་རྐྱང་མ་གསུམ་གྱི་དབུ་མ་ཚངས་བུག་ནས་གསང་གནས་ཀྱི་བར་དྲང་ཐལ་ལེ་བ། རོ་རྐྱང་གཉིས་རྩེ་མོ་གུག་སྟེ་ཡར་སྣ་སྣ་བུག་གཉིས་སུ་ཟུག་པ། མར་སྣ་གསང་གནས་དང་བཤང་སྒོར་ཟུག་པ་སྟེ། དབུ་མའི་མར་སྣ་ལྟེ་འོག་སོར་བཞི་མན་ཆད་དབུ་མ་དང་རྩ་རྒྱུད་གཅིག་ཀྱང་ལས་ཐ་དད་པའི་ཕྱིར་དུང་ཅན་མ་ཞེས་བྱ་ལ། འཁོར་ལོ་དྲུག་ནི། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་སྟེ་རྩ་བའི་འཁོར་ལོ་བཞི། དེ་འོག་སོར་བཞི་གཞལ་བ་ན་མེའི་དཀྱིལ་འཁོར་གྲུ་གསུམ་ཐིག་ལེ་རཾ་གྱིས་མཚན་པ་དང་། དེ་འོག་སོར་བཞི་གཞལ་བ་རྒྱུ་ཞབས་ཀྱི་ཐད་དུ་རླུང་གི་དཀྱིལ་འཁོར་གཞུའི་དབྱིབས་ཅན་ཡཾ་གྱིས་མཚན་པ་སྟེ་རྐྱེན་གྱི་འཁོར་ལོ་གཉིས་རྣམས་གསལ་བཏབ་ནས། རླུང་བུམ་པ་ཅན་སྦྱོར་བ་བཞི་ལྡན་ལ་སོགས་པའི་ཐབས་དང་ལྡན་པས་ཉམས་སུ་བླངས་པ་ལས། བཤང་ཁའི་རླུང་གཡོས། དེས་སྟེང་འོག་གི་མེ་སྦར། འཁོར་ལོ་བཞིའི་
གནས་བརྒྱུད་དེ་དབུ་མའི་ཡར་རྩེར་ཧཾ་ཡིག་བདེ་བ་ཆེན་པོའི་རང་བཞིན་མགོ་བོ་ཐུར་བསྟན་གྱི་ཚུལ་དུ་གནས་པ་ལ་རེག་པས་བདུད་རྩི་བྱང་ཆུབ་ཀྱི་སེམས་བབས་པ་སྤྱི་བོ་ནས་མགྲིན་པར་སླེབས་པས་དགའ་བ། མགྲིན་པ་ནས་སྙིང་གར་སླེབས་པས་མཆོག་དགའ། སྙིང་ག་ནས་ལྟེ་བར་སླེབས་པས་ཁྱད་དགའ། ལྟེ་བ་ནས་གསང་བར་སླེབས་པས་ལྷན་སྐྱེས་ཀྱི་དགའ་བ་ཉམས་སུ་མྱོང་སྟེ་སླར་ཡང་མས་བརྟན་གྱིས་བསྡུས་པའི་དགའ་བཞིའི་ཡེ་ཤེས་ཉམས་སུ་མྱོང་བ་ལས་མཐར་བདེ་གསལ་རྣམ་པར་མི་རྟོག་པའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའོ། །དེ་སྐད་དུ་ཡང་རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་སོ། །དེ་དག་ནི་སྟེང་སྒོ་ཐུན་མོང་བ་ཡིན་ལ། ཁྱད་པར་བ་ནི་འདི་ཉིད་ཀྱི་ལེའུ་བཅུ་གསུམ་པར་བཤད་པ་ལྟར་ཏེ། དེ་ལ། ཀུན་ཏུ་བཟང་པོའི་དང་། ཀུན་ཏུ་བཟང་མོའ་དང་། སྦྱོར་བ་དག་པའི་དང་། ཁྱབ་བརྡལ་ཆེན་པོའི་མན་ངག་གོ །དང་པོ་ནི། དཀྱིལ་འཁོར་ལྡན་པའི་སོགས་ཚིགས་བཅད་གཅིག་སྟེ། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་ཡོད་པ་བཞིར་བསྡུ་སྟེ། མདུན་ཆོས་ཉིད་ཀྱི་རྩ་གསུམ། གཡས་ཡེ་ཤེས་ཀྱི་རྩ་གཅིག གཡོན་ཡོན་ཏན་གྱི་རྩ་གཅིག རྒྱབ་རང་རྒྱུད་ཀྱི་རྩ་གསུམ་མོ། །རྩ་དེ་དག་གི་སྦུབས་ན་འོད་བཞི་དང་། དེའི་ཁྲོད་ན་སྦྱང་བྱ་སྦྱོང་བྱེད་ཀྱི་ས་བོན་རྣམ་ཤེས་དང་བཅས་པའོ། །དེ་དག་གི་དབུས་ན་དྭངས་མ་ལྔ་ལ་བརྟེན་པའི་ཡེ་ཤེས་སྙིང་པོའི་ཐིག་ལེ་སྟོང་གསལ་འགག་མེད་བདེ་བ་ཆེན་པོའི་ངོ་བོར་བཞུགས་པ་ལ། སྤྱི་བོ་ནས་མར་སེམས་གཏད་དེ་བསྒོམས་པས་དེ་ཉིད་འོད་དུ་འབར་བས་སྦྱོང་བྱེད་ཀྱི་ས་བོན་རྣམས་ཀྱང་མེར་སྦར། དེས་རིགས་དྲུག་གི་ས་བོན་གཉིད་དང་བཅས་པ་སྦྱངས། རགས་རླུང་ཐམས་ཅད་དྭངས་མ་ལ་ཐིམ་པས་རྣམ་རྟོག་ཐམས་ཅད་མི་རྟོག་པའི་ཀློང་དུ་ཐིམ་ཞིང་དམིགས་མེད་མཐའ་བྲལ་བདེ་བ་ཆེན་པོར་བྱང་ཆུབ་པའོ། །གཉིས་པ་ནི། གསང་བའི་ཐིག་ལེ་སོགས་ཚིགས་བཅད་གཉིས་ཏེ། ལྟེ་བའི་རྩ་འདབ་ཀྱི་དབུས་ན་དབྱིངས་ཕྱུག་ལྔའི་ཐིག་ལེ་ཨ་ཐུང་གི་རྣམ་པར་གནས་པ་ལ། སྙིང་ག་ནས་མར་སེམས་གཏད་པས་སྙིང་གའི་ཐིག་ལེའི་བདེ་
དྲོད་མར་སོང་བ་ལྟེ་བའི་ཐིག་ལེ་ལ་ཕོག དེ་ཉིད་འོད་དུ་འབར་ཞིང་རྟོག་ཚོགས་སྐུ་དང་ཡེ་ཤེས་སུ་གསལ། དེའི་དྲོད་སླར་ཡང་ཡར་སོང་སྟེ་སྙིང་གའི་དྭངས་མ་ལ་ཐིམ་པས་དྭངས་མའི་བདེ་དྲོད་ཆེར་འབར་བས་རགས་རླུང་གི་རྒྱུ་བ་བཅོམ། ཐིག་ལེ་འགྲོ་འོང་མེད་པར་སྙིང་གའི་གནས་ལས་མི་གཡོ་བར་གནས་པས་མཚན་འཛིན་ཐམས་ཅད་མི་རྟོག་པའི་ཀློང་དུ་ཐིམ་པའོ། །གསུམ་པ་ནི། སྙིང་པོའི་ཐིག་ལེ་སོགས་རྐང་པ་གསུམ་སྟེ། མགྲིན་པའི་རྩ་འདབ་ཀྱི་དབུས་ན་མཁའ་འགྲོ་མ་རྔམ་མ་ཞེས་བྱ་བ་ཡི་གེ་ཨཾ་གི་རྣམ་པར་གནས་པ་ལས། སྙིང་གའི་འོད་ཀྱིས་མགྲིན་པའི་ཐིག་ལེ་ཞུ་བའི་དྭངས་མ་སྙིང་གར་མཆེད། དབུགས་ཐིག་ལེར་ཐིམ་པས་རླུང་དང་རྟོག་པ་འགགས། འཁོར་ལོ་གཉིས་ཞལ་སྦྱོར་བ་ལས་དྲོད་རླུང་རྩ་གསུམ་གཅིག་ཏུ་འདྲེས་པའི་བདེ་གསལ་རྣམ་པར་མི་རྟོག་པའི་ཡེ་ཤེས་སྐྱེས་པའོ། །བཞི་པ་ནི། ཟག་པ་མེད་པའི་སོགས་རྐང་པ་དགུ་སྟེ། སྤྱི་བོ་བདེ་ཆེན་གྱི་འཁོར་ལོའི་དབུས་སུ་ཀུན་ཏུ་བཟང་པོ་ཟླ་བའི་ཐིག་ལེ་ཧཾ་གི་རྣམ་པར་གནས་ཏེ། སྒོམ་ཚུལ་མགྲིན་པའི་ཐིག་ལེའི་དྲོད་ཡར་སོང་། སྤྱི་བོའ་ཐིག་ལེ་ལ་ཕོག་པས་འོད་དུ་ཞུ་ནས་སྤྱི་བླུགས་སུ་གྱུར་པས་བདེ་བ་ཆེན་པོའི་རང་བཞིན་དུ་གྱུར་ཏེ་བདེ་གསལ་རྣམ་པར་མི་རྟོག་པའི་ཡེ་ཤེས་ནམ་མཁའི་གཟུགས་སུ་སྐྱེས་ནས་ཀུན་གྱི་དངོས་པོར་བདག་གྱུར་པ་ཞེས་བྱ་བ་ཆོས་ཀྱི་སྐུར་གྱུར་པའོ། །གཉིས་པ་འོག་སྒོ་ནི། འོག་སྒོ་མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་སྐད་ཅིག་ལ་བདེ་སྟོང་གཉིས་མེད་ཀྱི་ཡེ་ཤེས་བསྐྱེད་པ་ཐབས་ལམ་ཅིག་ཅར་བ་སྟེ། ཞེས་པས་ཕྱག་རྒྱ་མཚན་ཉིད་དང་ལྡན་པ་བརྟག་པ། བཙལ་བ། འགུགས་པ། འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱེད་པ་རྣམས་ནི་བསྙེན་པའི་ཡན་ལག ཡབ་ཡུམ་ལྷར་བསྐྱེད་པ་ལྷའི་འདུ་ཤེས། མཁའ་གསང་རྡོ་རྗེ་དང་པདྨར་བྱིན་གྱིས་བརླབ་པ་སྔགས་ཀྱི་འདུ་ཤེས། ཐབས་འདི་ལ་བརྟེན་ནས་ལྷན་སྐྱེས་ཀྱི་ཡེ་ཤེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ་འདུ་ཤེས་གསུམ་ལྡན་དང་། བརྡའ་བཞིས་བསྣོལ་མར་བསྐུལ་བ་སོགས་ནི་ཉེ་བསྙེན། ཕྱག་རྒྱ་བཞིས་གཉིས་མེད་དུ་རོལ་པ་ན། རྗེས་ཆགས་ཀྱི་རླུང་བསྐྱོད་པས་དམར་
ཆ་འབར་བ་དེས་དཀར་ཆ་ཞུ་བ་ཡས་བབས་ཀྱི་འགྲོས་ཀྱིས་ཕྱིན་པ་ལས་འཁོར་ལོ་བཞིར་དགའ་བཞིའི་རིམ་པས་རྡོ་རྗེ་ནོར་བུའི་རྩེར་འཛག་མེད་དུ་བཟུང་བས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བར་འགྱུར་ཏེ། དེ་ལྟར་དབབ་བཟུང་གི་དགོངས་པ་ནི་སྒྲུབ་པ། ཉི་ཟླ་རྡོ་རྗེའི་ལྕེས་བླངས་ཏེ་བཟློག་པའི་སྦྱོར་བས་གྱེན་དུ་དྲངས་ཏེ་འཁོར་ལོའ་གནས་སོ་སོར་མས་བརྟན་གྱི་དགའ་བ་ཉམས་སུ་མྱོང་མཐར་བྱང་སེམས་རྩ་གནས་ཐམས་ཅད་དུ་ཁྱབ་པར་དགྲམ་པའི་སྦྱོར་བས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི་སྒྲུབ་པ་ཆེན་པོའོ། །དེ་ལྟར་ཡང་རྩ་རྒྱུད་དུ། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་དང་། རྒྱས་པ་ལས། ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་སྦྱིན་པར་བྱེད། །ཅེས་སོ། །གཉིས་པ་གྲོལ་ལམ་ནི། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས་གཙོ་བོར་ཐོས་བསམ་སྒོམ་པས་བསྡུས་པའི་ཤེས་རབ་རྣམ་པ་གསུམ་གྱིས་རང་རྒྱུད་ལ་སྒྲིབ་པར་བྱེད་པའི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། དཔེ་གང་གིས་མཚོན་ན། རིན་པོ་ཆེ་ཀཽསྟུ་བྷ་དང་ལྷན་ཅིག་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་བ་བཞིན་ནོ། །དབྱེ་ན། ལམ་རིམ་ལས། རིང་བའམ་རིམ་དང་ཅིག་ཅར་བའོ། །ཞེས་པས་ཐབས་ལམ་ལ་ལྟོས་ན་གྲོལ་ལམ་རིང་ལམ་དུ་འགྱུར་བས་རིང་བ་ཞེས་སྨོས་ལ། དེ་ལ་རིམ་ཅིག་ཅར་གཉིས་ལས། ཐོག་མར་འཆད་བདེ་བའི་ཕྱིར་ཅིག་ཅར་བ་བཤད་ན། སྐལ་ལྡན་དབང་པོ་ཡང་རབ་ཁ་ཅིག་ལྟ་བ་གཏན་ལ་འབེབས་པའི་སྐབས་སུ་དབྱེར་མེད་ཆིག་ཆོད་དུ་རྟོགས། བར་དུ་བསྒོམ་པ་གོམས་པའི་དུས་སུ་དབྱེར་མེད་ཆིག་ཆོད་དུ་གོམས། མཐར་འབྲས་བུའི་དུས་སུའང་དབྱེར་མེད་ཆིག་ཆོད་དུ་མཐར་ཕྱིན་པར་བྱེད་པ་སྟེ། རྔམ་གློག་ལས། རྒྱུ་ནི་བདེན་གཉིས་ཅིག་ཅར་དུ། །གཅིག་པས་གཅིག་པའི་མཚན་ཉིད་དང་། །སྐུ་གསུང་ཐུགས་ཀྱི་དཀྱིལ་འཁོར་དུ། །ཆོས་ཀུན་རང་བཞིན་རྟོགས་པ་དང་། །སྐྱེ་མེད་དབྱིངས་ཀྱི་བྱིན་རླབས་ལས། །
ཆོས་ཀུན་སྣང་བར་ཤེས་པ་དང་། །དེ་ལྟ་བུ་ཡི་རང་བཞིན་དུ། །གཞན་ལ་མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་དང་། བླ་མ་ལས། ཐིག་ལེ་ཆེན་པོའི་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །ཞེས་སོ། །གཉིས་པ་རིམ་གྱིས་པ་ནི། ཡང་རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། ཞེས་པས་བསྟན་ཏེ། དེ་ཅུང་ཟད་བཤད་ན། འདི་ཉིད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་མཚན་ཉིད་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་འགྱུར་གྱི་འབྲས་བུ་རིག་འཛིན་བཞིའོ། །དང་པོ་ནི། ལམ་རིམ་ལས། གཞི་དང་གཏན་ཚིགས་གྲུབ་པའི་དོན། །ཞེས་པས། གཞལ་བྱ་ཞེན་སྣང་ཉིད་འཇལ་བྱེད་གཏན་ཚིག་རྣམས་ཀྱིས་གཏན་ལ་འབེབས་པ་སྟེ། ཇི་ལྟར་འབེབས་ན། ལམ་རིམ་ལས། དེ་ཉིད་དངོས་ལྔ་ཚུལ་དང་ཚིག །ཅེས་པས། སྔོན་འབྱུང་དངོས་ལྔའི་གཏན་ཚིགས། རྗེས་འཇུག་ཚུལ་ལྔའི་གཏན་ཚིགས། ཚིག་ལྔའི་གཏན་ཚིགས་དང་གསུམ་མོ། །དང་པོ་ནི། སྔོན་བྱུང་དུ་སྟོན་པ་སྐུ་ལྔས་སྟོན་པ་ཆོས་སྐུས་འཁོར་ཡེ་ཤེས་རྒྱ་མཚོ་ལ་སྐྱེ་མེད་དོན་གྱི་གསུང་གིས། ལོངས་སྐུས་སྨིན་པ་རྒྱ་མཚོར་དགོངས་པ་བརྡས། སྤྲུལ་སྐུས་མོས་པ་རྒྱ་མཚོར་བརྗོད་ཚིག་གིས། རྡོ་རྗེའི་སྐུས་དབྱེར་མེད་རྡོ་རྗེའི་འཁོར་ལ་རྡོ་རྗེའི་གསུང་གིས། མངོན་བྱང་གིས་རྒྱལ་བ་རྒྱ་མཚོ་ལ་རིག་པ་བྱིན་རླབས་ཀྱིས་བརྡའ་སྤྲོད་པའོ། །རང་རང་གི་འཁོར་ལྔ་ལ་གསུང་ལྔའི་སྒོ་ནས་ཆོས་ཉིད་ཀྱི་དོན་དངོས་སུ་གཏན་ལ་འབེབས་པར་བྱེད་པ་སྟེ། དེ་ཉིད་ལས། ཡང་དག་རྫོགས་སངས་རྒྱས་སྟོན་པ། །སྐུ་ལྔས་འདུལ་བའི་འཁོར་རྣམས་ལ། །གསུང་ལྔ་བསྟན་པ་དེ་ཁོ་ན། །གཏན་ལ་འབེབས་ཤིང་འཇལ་བྱེད་པའོ། །ཞེས་སོ། །གཉིས་པ་ནི། དབང་རྣོན་མཆོག་རྣམས་ལ་སྣང་གྲགས་ཀྱི་ཆོས་འདི་དག་གིས་མཚོན་ནས། དངོས་ལྔས་གཏན་ལ་ཕབ་པའི་སྐུ་ལྔའི་གསུང་གི་ཚུལ་དུ་རྟོགས་པར་བྱེད་པ་སྟེ། དེ་ཉིད་ལས། རྟོགས་དང་ལྡན་པའི་བློ་རྣམས་ལ། །དངོས་པོ་སྣ་ཚོགས་
སེམས་གསང་སྔགས། །དེས་ལུང་ཡིན་ཕྱིར་ཆོས་ཚུལ་སྟོན། །བརྗོད་དང་འདྲ་བར་བརྡ་སྤྲོད་པས། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་སོ། །གསུམ་པ་ནི། སྔར་གྱི་ཚུལ་ལྔ་ཉིད་ཚིག་ཏུ་དངོས་སུ་བརྗོད་པ་སྟེ། དེ་ཉིད་ལས། ངོ་བོ་སྣང་ཚིག་རང་སྣང་ཚིག །ལྡེམ་དགོངས་ཚིག་དང་བཀྲི་དྲང་ཚིག །འདོད་རྐྱེན་ཚིག་དང་རྡོ་རྗེའི་ཚིག །རང་རིག་མངོན་གསལ་ཚིག་གིས་མཚོན། །ཞེས་སོ། །དེ་དག་ཀྱང་བསྡུ་ན། དཔྱད་དུ་མེད་པས་གོ་བ་སྐུ་བཞིའི་གཏན་ཚིགས་དང་། དཔྱད་དུ་ཡོད་པས་གོ་བ་སྤྲུལ་སྐུའི་གཏན་ཚིགས་གཉིས་ལས། ཕྱི་མ་ལ། ཚིག་དོན་མཐུན་པའི་གཏན་ཚིགས་དང་། མི་མཐུན་པའི་གཏན་ཚིགས་སོ། །དང་པོ་ལ། ཚད་མ་བཀའ་གཞུང་དང་། སྒྲ་མཐུན་དོན་སྤགས་གཉིས། དང་པོ་ལ། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་དང་བཞི། དང་པོ་ནི། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །ཞེས་པས། རྒྱུ་གཅིག་པའི་གཏན་ཚིགས་ནི། འཁོར་འདས་གཉིས་ཆོས་ཅན། རང་བྱུང་གི་ཡེ་ཤེས་སུ་རྒྱུ་གཅིག་པ་ཡིན་ཏེ། རྟོགས་མ་རྟོགས་ཀྱི་བྱེད་པས་འཁོར་འདས་གཉིས་སུ་སྣང་བའི་ཕྱིར། ཡིག་འབྲུའི་ཚུལ་ནི། སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་ལྷའི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་དུ་མེད་པའི་ཡི་གེ་ཨ་ཉིད་མཚོན་བྱེད་ཡི་གེ་དུ་མར་མ་འགག་པར་མཚོན་ནས་རྟོགས་པའི་ཕྱིར། བྱིན་གྱིས་བརླབས་ནི། རང་བཞིན་སྐྱེ་མེད་དང་རོལ་པ་འགག་མེད་གཉིས་ཆོས་ཅན། ལྡོག་པ་སོ་སོར་སྣང་ཡང་ངོ་བོ་དབྱེར་མེད་ཀྱི་བྱིན་རླབས་ཤུགས་ལ་འབྱུང་བ་ཡིན་ཏེ། ལྷག་པ་དོན་དམ་གྱི་སྣང་ལྡོག་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར། མངོན་སུམ་པ་ནི། བདེན་པ་དབྱེར་མེད་ཆོས་ཅན། བློའི་སྤྱོད་ཡུལ་ལས་འདས་པ་ཡིན་ཏེ། རང་རིག་མངོན་སུམ་གྱིས་ཡུལ་མེད་རང་གསལ་དུ་རྟོགས་པའི་ཕྱིར། གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། ཞེས་པས། སྣོད་བཅུད་རྒྱུད་གསུམ་གྱིས་བསྡུས་པའི་ཆོས་ཐམས་ཅད་ཆོས་ཅན། ཡེ་ནས་སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པ་ཡིན་ཏེ།
དག་པ་གསུམ་དང་ལྡན་པའི་ཕྱིར། གསུམ་པ་ནི། མཉམ་གཉིས་ལྷག་པའི་མཉམ་གཉིས་ཀྱིས། །ཞེས་པས། ཤེས་བྱ་ཆོས་ཅན། ཡེ་ནས་སངས་རྒྱས་པ་ཡིན་ཏེ། མཉམ་པ་བཞིས་འཁོར་འདས་གཉིས་མེད་དུ་རྟོགས་པའི་ཕྱིར། དེ་ལ་གཉིས་ལས། ཐེག་ཆེན་ཐུན་མོང་བའི་མཉམ་པ་གཉིས་ནི། མྱུ་གུ་བདག་ལས་སྐྱེ་བ་མེད་པ་ལྟ་བུ་རྣམ་གྲངས་པའི་དོན་དམ་དང་། མཐའ་བཞིའི་སྤྲོས་པ་དང་བྲལ་བ་རྣམ་གྲངས་མིན་པའི་དོན་དམ་གཉིས་ཆོས་ཅན། མཉམ་པ་ཡིན་ཏེ། སྤྲོས་པ་བཀག་པའི་སྟོང་ཉིད་ཙམ་དུ་མཉམ་པའི་ཕྱིར། ཆུ་ཟླ་ལྟ་བུ་ལོག་པའི་ཀུན་རྫོབ་དང་། མཁའ་ཟླ་ལྟ་བུ་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། བདེན་པས་སྟོང་པ་ཙམ་དུ་མཉམ་པའི་ཕྱིར། ཐུན་མོང་མིན་པ་ལྷག་པའི་མཉམ་པ་གཉིས་ནི། རྣམ་གྲངས་པ་མེད་དགག་དང་། རྣམ་:པ་གྲངསམིན་པ་མིན་དགག་གི་སྟོང་ཉིད་གཉིས་ཆོས་ཅན། མཉམ་པ་ཡིན་ཏེ། ལྷག་པ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པའི་ཕྱིར། མ་དག་པ་ལས་སྣང་ལོག་པའི་དང་། དག་པ་ལྷར་སྣང་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། ལྷག་པ་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་པའི་ཕྱིར། བཞི་པ་ནི། འཁོར་འདས་ཀྱི་ཆོས་རྣམས་ཆོས་ཅན། སྣང་ལུགས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པའི་ཕྱིར། གཉིས་པ་སྒྲ་མཐུན་དོན་སྤགས་ནི། ཚིག་མདོ་སྔགས་ཐུན་མོང་དུ་གྲགས་ཤིང་དོན་སྔགས་རང་གཞུང་དུ་གཏན་ལ་འབེབས་པས་ཁྱད་པར་དུ་སྤགས་པ་སྟེ། དབྱེ་ན། རང་སྤྱི། མཐའ་བྲལ། རྣམ་པར་དབྱེ་བ། མཚོན་པའི་གཏན་ཚིགས་དང་བཞིའོ། །གཉིས་པ་ཚིག་དོན་མི་མཐུན་པའི་གཏན་ཚིགས་ནི་བསྒྲུབ་བྱ་སྒྲུབ་༈ ༡ དུག་ལྔ་ཆོས་ཅན། ཡང་དག་པར་མ་གྲུབ་སྟེ། རང་རང་གི་ངོ་བོ་སྟོང་པའི་ཕྱིར། དཔེར་ན་ཐག་ཁྲ་སྦྲུལ་དུ་སྣང་ཡང་གཤིས་ལ་སྦྲུལ་མ་གྲུབ་པ་བཞིན་ནོ། ༢ །སྣང་བ་ཕྱི་ནང་གི་ཆོས་ཐམས་ཅད་ཆོས་ཅན། སྤྲོས་པའི་མཐའ་དང་དེ་ལ་ལྟོས་པའི་དབུས་སོགས་ཅིར་ཡང་མ་དམིགས་པ་སྟེ། ཡང་དག་པར་གཅིག་དང་དུ་མ་དང་བྲལ་བའི་ཕྱིར། ༣ བུམ་པ་ཆོས་ཅན། རང་བཞིན་དུ་ངེས་པ་མིན་ཏེ། དབྱིབས་དང་ཁ་དོག་ཆོས་དུ་མ་དང་ལྡན་པས་ཕྱི་ཡུལ་གྱི་རྣམ་པ་
གཅིག་ཏུ་མ་གྲུབ་པའི་ཕྱིར། གཞུའི་རྒྱུ་ཚོགས་བཞིན་ནོ། ༤ །སེམས་ཉིད་ཆོས་ཅན། ཅིར་ཡང་མ་གྲུབ་སྟེ། གཟུང་དུ་མེད་པའི་ཕྱིར། ནམ་མཁའ་བཞིན་ནོ། ༥ །སེམས་ཉིད་ཆོས་ཅན། ཡང་དག་པར་ཅིར་ཡང་མ་གྲུབ་པས་ཅི་ཡང་མིན་ཏེ། སྣང་ཚོད་དུ་མ་འགགས་པར་རང་སྣང་བས་ཅི་ཡང་ཡིན་པའི་ཕྱིར། བྱེད་གཉིས་ཐ་སྙད་པའི་ངོར་གོ་བཟློག་པའི་ཚུལ་གྱིས་སྟོན་པ་སྟེ། ལམ་རིམ་ལས། དེས་མཚོན་ཅི་ཡང་ཡིན་པའི་ཕྱིར། །སེམས་ཆོས་ཅི་ཡང་མ་ཡིན་ནོ། །དེ་ཕྱིར་མ་ཡིན་ཀུན་ཡིན་པས། །ཅི་ཡང་ཡིན་ནོ་ལྷུན་གྱིས་གྲུབ། །ཅེས་སོ། །དེ་ལྟར་གཏན་ལ་ཕབ་པས་རྟོགས་བྱའི་ལྟ་བ་རང་བཞིན་རྒྱུ་རྒྱུད་གནས་ལུགས་ཀྱི་དོན་དེ་བཞིན་ཉིད་དེ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པ་ནི་གྲུབ་མཐའ་སྟེ། ལམ་རིམ་ལས། རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་བརྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་འགུལ་བར། །ངེས་པར་གདེངས་སུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་གསུངས། རྩོད་སྤོང་ནི། ཁ་ཅིག ལྟ་བ་ཁྱད་པར་འཕགས་པའི་ཕྱིར། རྫོགས་པ་ཆེན་པོ་མཆོག་གོ་ལོ། །སྔགས་ཀྱི་ཁྱད་ཆོས་ལྟ་བ་མིན། །དབུ་མ་ལས་ལྷག་ག་ལ་ཡོད། །ཅེས་ཟེར་བ་ལྟར། གང་དག་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལ་ཐབས་ཁྱད་པར་དུ་འཕགས་པས་ཕྱེ་བ་ཙམ་དུ་བཞེད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་དང་ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བར་མཐུན་ན་ཡང་དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་པའི་ཕྱིར། ཇི་ལྟར་ཞེ་ན། སྔགས་ཀྱི་ཐུན་མོང་མིན་པའི་ལྟ་བ་ནི་བདེན་ པ་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་དགོས ་པའི་རྒྱུ་མཚན་གྱིས་སོ། །གལ་ཏེ་ཁོ་ན་རེ། ཁྱེད་ཅག་གིས་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་ཉིད་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་སྡེ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་པར་མེད་དོ་ཞེ་ན། རིག་པ་འགྱུར་མེད་ལ་རྒྱུ་རྒྱུད་དུ་བྱེད་པ་འཁོར་ལོ་ཐ་མ་ལས་གསུངས་པ་དང་འདྲ་བ་བདེན་མོད་ཀྱང་། ད་དུང་དེས་སྔགས་ཀྱི་ཐུན་མོང་མིན་པའི་ལྟ་བ་གཏན་ལ་འབེབས་
པར་མི་འགྱུར་ཏེ། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་བཅས་བཞེད་པའི་ཕྱིར་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུར་རང་བཞིན་ཡིན། །ཞེས་དང་། དུས་འཁོར་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་གཤེགས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་མིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་གིས་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དོ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཅེས་དང་། བརྟག་གཉིས་ལས། དམྱལ་བ་ཡི་དྭགས་དུད་འགྲོ་ལས། །ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པ། །རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་སོ། །གཞན་ཡང་འཕྲོས་དོན་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེ་དག་གི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པར་གསུངས་པ་ཡང་། ཕུང་སོགས་ཀྱི་སྣང་གཞི་དེ་བཞིན་ཉིད་ཀྱི་རྩལ་གཉུག་མ་སྟེ། ཤིན་ཏུ་ཕྲ་བའི་ཡེ་ཤེས་ཀྱི་རྩ་དང་། ཡེ་ཤེས་ཀྱི་རླུང་དང་། ཡེ་ཤེས་ཀྱི་ཁམས་ཞེས་སམ། ཡང་ན། ས་ཆུ་གཉིས། མེ་རླུང་གཉིས། མཁའ་སེམས་གཉིས་གཉིས་ཟུང་དུ་འཇུག་པ་རྣམས་རིམ་པར་ཡེ་ནས་སྐུ་གསུམ་རྡོ་རྗེ་གསུམ་གྱི་ངོ་བོར་གཞན་གྱིས་མ་བཙལ་བར་ལྷུན་གྱིས་གྲུབ་པ་དང་། ཁམས་ལྔའི་དྭངས་མ་ཡེ་ཇི་བཞིན་པའི་རིགས་ལྔ་དང་། སོགས་ཁོང་ནས་ཡེ་ཤེས་ཀྱི་ཁམས་རིགས་དྲུག་པའི་བདག་ཉིད་དུ་དག་པས་
ལྷའི་བདག་ཉིད་དུ་བཞུགས་པ་གང་ཡིན་པ་སྟེ། སློབ་དཔོན་ཆེན་པོ་སངས་རྒྱས་གསང་བས་ལམ་རིམ་དུ། ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅིར་ཡང་འགྲུབ། །ཅེས་སོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལ། མོས་སྒོམ་དང་། ངེས་རྫོགས་གཉིས། དང་པོ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་། སྤྱིའི་རྣམ་པ་ཙམ་སྒོམ་པ་མོས་སྒོམ་དང་། ཞེས་དང་། ལམ་སོ་སོ་ནས་གཡོ་ཐོབ་གོམས་བརྟན་གྱི་ཉམས་མཐར་ཕྱིན་པར་བསླབ་མ་ནུས་ན་ཡང་། དོན་སྤྱིའི་ཚུལ་ཙམ་དུ་བསྒོམ་པ་ནི་མོས་སྒོམ་སྟེ། དཔེར་ན། ཐུན་གཅིག་ལ་སྲུང་འཁོར་ནས་བཟུང་ཆོ་གའི་བྱ་བ་ཚར་གཅིག་རྫོགས་པར་བསྒྲུབ་པ་ལྟ་བུའོ། །དེ་ལྟར་ཡང་ལམ་རིམ་ལས། ལམ་ཀུན་སྐད་ཅིག་ཆས་བསྒོམ་ན། །སྤྲོས་པའི་འཁོར་ལོ་མོས་སྒོམ་ཞིང་། །ཞེས་སོ། །གཉིས་པ་ནི། ལམ་སོ་སོའ་ཏིང་ངེ་འཛིན་མཐར་ཕྱིན་པར་བསླབ་པ་ནི་ངེས་རྫོགས་ཏེ། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་པས། གཙོ་བོར་རྫོགས་རིམ་གྱི་སྦྱང་བྱ་བསྟན་ཀྱང་། འཆི་བར་སྐྱེ་གསུམ་གྱི་བག་ཆགས་ལ་ཕྲ་རགས་གཉིས་ལས། རགས་པ་སྦྱོང་བྱེད་བསྐྱེད་རིམ་གྱི་དབང་དུ་བྱས་ན། མར་འཆི་བར་སྐྱེ་གསུམ་དང་སྐྱེ་བ་ལའང་དྲི་ཟའི་སེམས་མངལ་དུ་ཞུགས་ནས་ལུས་རིམ་གྱིས་གྲུབ་སྟེ་སྐྱེས་པའི་བར་དང་། སྐྱེས་ནས་བུ་ཚ་འཁོར་འདབ་རྒྱས་པའི་བར་དང་། བློ་གྲོས་ནར་སོན་ནས་བཅད་རིས་དང་ཁེ་གྲགས་སྒྲུབ་པ་སྟེ། སྐྱེས་པའི་རིམ་པ་གསུམ་གྱི་བག་ཆགས་སྦྱོང་། ཡར་སངས་རྒྱས་ཆོས་ལོངས་སྤྲུལ་གསུམ་ཕྲིན་ལས་དང་བཅས་པའི་རྣམ་པ་ལམ་བྱེད་ཀྱིས་རིགས་ཀྱི་ནུས་པ་གསོས་བཏབ་ནས་འབྲས་བུར་རྫོགས་པར་བྱེད། ལམ་གོང་མ་འོད་གསལ་ལས་སྙིང་རྗེ་ཆེན་པོའི་འཕེན་པས་ཟུང་འཇུག་གི་ལྷར་ལྡང་བའི་སྨིན་བྱེད་དུ་འགྲོ་ཞིང་། ཇི་ལྟར་སྒོམ་པའི་ཚུལ་ནི། འདི་ལྟར་སྣང་བའི་ཆོས་ཐམས་ཅད་མི་དམིགས་པར་བསྒོམ་པ་དེ་ཏིང་སྟོང་པ་ཆེན་
པོའི་རྣལ་འབྱོར། དེ་ལྟར་མ་རྟོགས་པའི་སྒྱུ་མ་ལྟ་བུའི་སེམས་ཅན་ལ་དམིགས་པ་མེད་པའི་སྙིང་རྗེ་བསྒོམ་པ་ཀུན་ཏིང་སྙིང་རྗེ་སྒྱུ་མའི་རྣལ་འབྱོར། དེ་ལས་རྒྱུ་ཏིང་རང་རིག་ཨ་དཀར་པོར་བསྒོམས་ནས་ཡི་གེའི་འཕྲོ་འདུ་ལ་སེམས་སྦྱང་བ་ཕྲ་བ་ཡིག་འབྲུ་དང་། དེ་ལས་ཆོ་ག་གསུམ་ལྟ་བུས་ལྷ་ཡབ་ཡུམ་ཡན་ལག་གི་ལྷ་དགུ་དང་བཅས་བསྒོམ་པ་རགས་པ་ལྷ་སྐུལ་བསླབ་པ་སྟེ་ཕྱག་རྒྱ་གཅིག་པའི་རྣལ་འབྱོར་ཡིན་ལ། འོ་ན། རྩ་ལྷ་གཉིས་ལ་ཡན་ལག་གི་ལྷ་དགུ་དང་བཅས་བསྒོམས་པས་ལྷ་ཉི་ཤུར་འགྱུར་བའི་ཕྱིར་ཕྱག་རྒྱ་གཅིག་པར་ཅིའི་ཕྱིར་འགྱུར་སྙམ་ན། མི་འགལ་ཏེ། རྩ་བའི་ལྷ་ཟུང་འཇུག་གི་ལྷ་སྐུ་གཅིག་ལས་མི་འདའ་བའི་ཕྱིར། དཔེར་ན་ཤིང་གི་སྡོང་པོ་བཞིན་ནོ། །ཕྱག་རྒྱ་སྤྲོས་བཅས་ཀྱི་རྣལ་འབྱོར་ལ་བཞི། དཀྱིལ་འཁོར་སྤྲོས་པ། ཚོམ་བུ། གྲངས། ཞལ་ཕྱག་སྤྲོས་པའོ། །དང་པོ་ནི། ཞི་བ་ལ་དཀྱིལ་འཁོར་རྒྱས་པ་རིགས་ལྔ་རིགས་ཆུང་དང་བཅས་པ་ཡབ་ཡུམ་སྟེ་ལྔ་བཅུའི་སྟེང་དུ། སེམས་དཔའ་སེམས་མ་བཅུ་དྲུག སྒོ་བ་ཡབ་ཡུམ། བྱ་བྱེད། ཐུབ་དྲུག་སྟེ་བརྒྱད་ཅུ་རྩ་གཉིས། འབྲིང་པོ་རིགས་ལྔ་ཡབ་ཡུམ། སེམས་དཔའ་སེམས་མ། སྒོ་སྐྱོང་། བྱ་བྱེད། ཐུབ་དྲུག་བཅས་ཞེ་གཉིས། བསྡུས་པ་རིགས་ལྔ་ཡབ་ཡུམ་བཅུ་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །ཁྲོ་བོ་ལ་དཀྱིལ་འཁོར་རྒྱས་པ་ཁྲག་འཐུང་རིགས་ལྔ་ཡབ་ཡུམ་རིགས་ཆུང་བཅས་ལྔ་བཅུའི་སྟེང་། གནས་ཡུལ་སྒོ་མ་དབང་ཕྱུག་ཉེར་བརྒྱད་ཁྲོ་བཅུ་ཡབ་ཡུམ་ཉི་ཤུ་བསྣན་པས་བརྒྱ་དང་བཅོ་བརྒྱད། འབྲིང་པོ་ཁྲག་འཐུང་རིགས་ལྔ་ཡབ་ཡུམ་སྟེང་གནས་ཡུལ་སོགས་སྔར་ལྟར་བགྲངས་པས་དོན་བརྒྱད་བསྡུས་པ་དེ་དག་ལས་ཁྲོ་བཅུ་ཡབ་ཡུམ་ཉི་ཤུ་ཕྲི་བས་ལྔ་བཅུ་རྩ་བརྒྱད་དོ། །གཉིས་པ་ནི། ཞི་བ་ལ་ཚོམ་བུ་གཅིག་གསུམ་ལྔ་པ་གསུམ་སྟེ། མི་བསྐྱོད་པ་ཡབ་ཡུམ་ལ་རྡོ་རྗེ་རིགས་ཀྱི་རིགས་ཆུང་ཟུང་བཞི་དང་། སྒོ་བ་ཡབ་ཡུམ་བརྒྱད་དེ་བཅོ་བརྒྱད་ཀྱི་བདག་ཉིད་ཅན་ནི་ཚོམ་བུ་གཅིག་པ་དང་། སྐུ་གསུང་ཐུགས་ཀྱི་ལྷ་གསུམ་ཡུམ་དང་བཅས་པ་རང་རང་གི་རིགས་ཆུང་གིས་བསྐོར་བ་ལ། ཁྲོ་བོ་བཅུ་ལས་སྟེང་འོག་གི་ཁྲོ་བོ་སྤངས་པའི་ཡབ་ཡུམ་ཟུང་བརྒྱད་བསྣན་པའི་ཞེ་དྲུག་ནི་ཚོམ་བུ་གསུམ་པ། རིགས་ལྔ་ཡབ་ཡུམ་རིགས་ཆུང་
དང་བཅས་པ་ལ་ཁྲོ་བོ་ཡབ་ཡུམ་ཉི་ཤུ་སྟེ་བདུན་ཅུ་ནི་ཚོམ་བུ་ལྔ་པའོ། །ཁྲོ་བོ་ལ་རྩ་རྒྱུད་དུ་ཚོགས་སྒྲུབ་ཙམ་ལས་གསལ་བར་མ་གསུངས་ནའང་། ལམ་རིམ་ལས། དེ་ནས་འཁོར་ལོ་གཅིག་པའམ། གསུམ་དང་ལྔ་རུ་བསྒོམ་པར་བྱ། ཞེས་པས་ཞི་བ་དང་མཚུངས་པར་ཚོམ་བུ་གཅིག་གསུམ་ལྔ་པ་གསུམ་སྟེ། གསུམ་ཀ་ལ་མཚུངས་པར་གནས་ཡུལ་སྒོ་སྐྱོང་དབང་མོ་དང་བཅས་ཡོད་པ་གཞིར་བཞག་ནས། ཚོམ་བུ་གཅིག་པའི་སྐབས་དབུས་སུ་རྡོ་རྗེ་ཁྲག་འཐུང་ཡབ་ཡུམ་ལ་རྡོ་རྗེ་རིགས་ཀྱི་རིགས་ཆུང་གི་ཁྲོ་བོ་ཡབ་ཡུམ་བཞིས་བསྐོར་བ་དང་། མཐའ་བསྐོར་དུ་ཁྲོ་བཅུ་ཡབ་ཡུམ་ཉི་ཤུ་སྟེ་དོན་བརྒྱད། ཚོམ་བུ་གསུམ་པའི་སྐབས་སུ་དེ་རྣམས་ཀྱི་སྟེང་དུ་ཤར་ནུབ་ཏུ་བུདྡྷ་དང་པདྨ་ཁྲག་འཐུང་ཡབ་ཡུམ་རིགས་ཆུང་བཅས་བསྣན་པའི་གོ་བརྒྱད། ཚོམ་བུ་ལྔ་པའི་སྐབས་སུ་དེའི་སྟེང་དུ་རཏྣ་དང་ཀརྨ་ཁྲག་འཐུང་རིགས་ཆུང་བཅས་བསྣན་པའི་བརྒྱ་བཅོ་བརྒྱད་དོ། །གསུམ་པ་ནི། སྣང་བ་རྣམ་འབྱེད་ལ་བསླབ་པ་སྟེ། དེ་ལའང་ཞི་ཁྲོ་གཉིས་ལས། ཞི་བ་ལ། ཚོམ་བུ་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་ལ་བསླབ་པའོ། །དང་པོ་ནི། ཡན་ལག་གི་ལྷ་བཞི་བཅུ་ཐམ་པ་རྩ་ལྷ་ཡབ་ཡུམ་གཉིས་ལ་ལྡན་པར་བསྒོམ་པ་སྟེ། དེ་ཡང་མི་བསྐྱོད་པ་ལ་མཚོན་ན། བདག་ཉིད་མི་བསྐྱོད་པ་ཡབ་ཡུམ་དུ་གསལ་བའི་ཡབ་ཀྱི་ཡན་ལག་ལྔ་ལ་བྱེད་པོ་དང་རྒྱལ་བ་རིགས་བཞི། མིག་རྣ་བ་སྣ་ལྕེ་བཞིའི་གཡས་ཀྱི་ཆ་ལ་ནང་སེམས་དང་། གཡོན་གྱི་ཆ་ལ་ཕྱི་སེམས་བཞི། རྐང་ལག་གི་མཐིལ་བཞིར་སྒོ་བ་བཞི་རྣམས་དང་། ཡུམ་གྱི་གནས་དེ་རྣམས་སུ་སྔར་གྱི་ཡུམ་རྣམས་བསྒོམ། ཡབ་ལ་ལྷག་པོར། མཚོག་མ་ལ་སོགས་པའི་གནས་དྲུག་ཏུ་ཐུབ་པ་དྲུག་སྟེ། དེ་ལྟར་ཡབ་ཡུམ་བསྡོམས་པས་ཡན་ལག་གི་ལྷ་བཞི་བཅུ་ནི་རགས་པ་དང་ཕྱིར་གནས་པའི་ཆ་ནས་ཐབས་ལྷ་ཞེས་བྱའོ། །དེ་རྣམས་ལ་ཤེས་རབ་ཀྱི་ལྷ་ཡེ་ཤེས་སེམས་དཔའ་བཞི་བཅུ། དེ་དག་ལས་ཐབས་ལྷ་བཞི་བཅུ་པོ་རེ་རེ་ལ་སྐུ་གསུང་ཐུགས་ཀྱི་ལྷ་གསུམ་གསུམ་སྟེ་བརྒྱ་ཉི་ཤུ། ཐབས་ལྷ་དང་བྱིན་རླབས་ཀྱི་ལྷ་བསྡོམས་པ་བརྒྱ་དྲུག་ཅུ་པོ་རེ་རེ་ལ་དབང་ལྷ་ལྔ་ལྔ་སྟེ་བརྒྱད་བརྒྱ། ཀུན་དྲིལ་བས་ཆིག་སྟོང་ངོ་། །གཉིས་པ་ནི་མི་བསྐྱོད་པ་ལ་ཇི་ལྟར་
སྒོམ་པ་བཞིན་དུ། རྒྱལ་བ་རིགས་བཞི། རྒྱལ་མཆོག་ཀུན་བཟང་། སེམས་དཔའ་བརྒྱད་དང་། སྒོ་བ་བཞི་སྟེ་ཡབ་ཡུམ་ཟུང་བཅུ་བདུན་དང་། ཐུབ་པ་དྲུག་རེ་རེ་ལ་ཡང་བསྒོམས་པས་ཉི་ཁྲི་བཞི་སྟོང་སྟེ། རྩ་ལྷ་གང་ཡིན་གྱི་རྟོག་པའི་གནས་སུ་བྱེད་པོ་སྤོ་བ་ཁྱད་པར་རོ། །གསུམ་པ་ནི། མི་བསྐྱོད་པས་གཙོ་བོ་བྱས་པའི་དཀྱིལ་འཁོར་ལ་ཡན་ལག་གི་ལྷ་ཇི་ལྟར་སྒོམ་པ་བཞིན་དུ་ཤར་གྱི་གློ་འབུར་ལ་རྣམ་སྣང་གིས་གཙོ་བྱས་པའི་དཀྱིལ་འཁོར་གྱི་འཁོར་ལོ་སྒོམ་པ་སོགས་རིགས་འགྲེ་བས་བསམ་གྱིས་མི་ཁྱབ་པར་སྤྲོ་བའོ། །ཁྲོ་བོ་ལ། སྟོང་བཞི་བརྒྱ་ལྔ་བཅུ། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ། བསམ་ཡས་ལྷུན་གྲུབ་ལ་བསླབ་པ་དང་གསུམ་མོ། །དང་པོ་ནི། ལམ་རིམ་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞེས་པས་གཙོ་བོ་བཛྲ་ཧེ་རུ་ཀའི་ཡན་ལག་ལྔ་ལ་ཁྲག་འཐུང་ཡབ་ལྔ་དང་། ཡུམ་ལ་ཡུམ་ལྔ། ཡབ་ཀྱི་དབང་རྟེན་གྱི་ནང་རྩར་གཽ་རཱི་མ་བརྒྱད། ཕྱི་རྩར་སིངྷ་མ་བརྒྱད། མཐིལ་བཞི་ལ་སྒོ་མ། མཇིང་མཇུག་གི་ཚིགས་བསྣན་པའི་རྒལ་ཚིགས་ཉེར་བརྒྱད་ལ་དབང་མོ་ཉེར་བརྒྱད་དེ་ཐབས་ལྷ་ང་བརྒྱད། དེ་རྣམས་ལ་ཡེ་ཤེས་སེམས་དཔའ་དང་སྐུ་གསུང་ཐུགས་ཀྱི་ལྷ་རྣམས་རེ་རེ་བསྒོམས་པས་ང་བརྒྱད་པ་ཆ་ལྔ་ལ་ཉིས་བརྒྱ་དང་དགུ་བཅུ། དེ་ལས་ཤེས་རབ་ཀྱི་ལྷ་ང་བརྒྱད་ཕྲི་བའི་ལྷག་ཉིས་བརྒྱ་སོ་གཉིས་པོ་རེ་རེ་ལ་དབུ་རྒྱན་གྱི་ལྷ་ལྔ་ལྔ་སྟེ་ཆིག་སྟོང་ཆིག་བརྒྱ་དྲུག་ཅུ་བྱུང་བ་ཉིས་བརྒྱ་དགུ་བཅུ་ལ་བསྣན་པས་སྟོང་བཞི་བརྒྱ་ལྔ་བཅུའོ། །གཉིས་པ་ནི། ཁྲག་འཐུང་རིགས་ལྔ་ཡབ་ཡུམ་ཟུང་ལྔ་ལ་སྔར་ལྟར་དང་། གནས་ཡུལ་སྒོ་སྐྱོང་དབང་མོ་རྣམས་ལ་མགོའ་གཡས་དང་། རྐང་ལག་གཡས་ཀྱི་མདུན་རྒྱབ་ལ་ཡབ་ལྔ་དང་། མགོའ་གཡོན་དང་། རྐང་ལག་གཡོན་གྱི་མདུན་རྒྱབ་ལ་ཡུམ་ལྔ་བཀོད་དེ་ལྷ་རེ་རེ་ལ་སྟོང་བཞི་བརྒྱ་ལྔ་བཅུ་བསྒོམ་པའི་ངེས་པས་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུའོ། །གསུམ་པ་ནི། སྔར་ཞི་བའི་སྐབས་སུ་བཤད་པས་མཚོན་ནོ། །བཞི་པ་ནི། ཞི་ཁྲོ་གཉིས་ཀ་ལ་རྒྱས་འབྲིང་བསྡུས་གསུམ་སྟེ། ཞི་བ་ལ་རྒྱས་པ་བཤད་རྒྱུད་རྡོ་རྗེ་ནས་ཐུབ་དྲུག་དང་ཡུམ་རྣམས་མ་གཏོགས་ཐམས་ཅད་
ཞལ་གསུམ་ཕྱག་དྲུག་པར་བཤད། འབྲིང་པོ་རིགས་ལྔའམ་གཙོ་བོ་ཙམ་ཞལ་གསུམ་ཕྱག་དྲུག་པ། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །ཁྲོ་བོ་ལ་གཙོ་བོ་དབུ་ཕྱག་གྲངས་མེད་པ་དང་། དབུ་དགུ་ཕྱག་བཅོ་བརྒྱད་པ། ཆ་མཐུན་གྱི་རྒྱུད་ལྷ་མོ་སྒྱུ་དྲྭ་ནས་གནས་ཡུལ་གྱི་མ་མོ་སོགས་ཀྱང་ཞལ་གསུམ་ཕྱག་དྲུག་པ་འབའ་ཞིག་བཤད་ཀྱང་། ད་ལྟ་ཕྱག་བཞེས་སུ་རྒྱས་པ་ལ་རིགས་ལྔ་ཞལ་གསུམ་ཕྱག་དྲུག འབྲིང་པོ་གཙོ་བོ་ཙམ་དང་། བསྡུས་པ་ཐམས་ཅད་ཞལ་གཅིག་ཕྱག་གཉིས་པའོ། །ཚོམ་བུ་ཚོགས་སྒྲུབ་ཀྱི་རྣལ་འབྱོར་ལ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་འགྲུབ་པའི་དུས་བསྟན་པ་དང་གསུམ། དང་པོ་ལ་ལྔ་ལས། དང་པོ་གང་དུ་སྒྲུབ་པའི་གནས་ནི། བདག་དབང་བར་ཆད་མེད་པའི་གནས་སུ་ཚོགས་ཀྱི་ཁང་པ་སྟེང་འོག་དང་འཁོར་ཁང་རིམ་པ་སུམ་ལྡན་རྩིག་པ་ལ་ཆུ་ཚོན་གྱིས་ཚོམ་བུ་གང་སྒོམ་གྱི་དཀྱིལ་འཁོར་བྲིས་པའོ། །གཉིས་པ་གང་གི་ཚེ་སྒྲུབ་པའི་དུས་ནི། ཡར་གྱི་ཚེས་བརྒྱད་རྒྱུ་སྐར་རྒྱལ་དང་ལྡན་པ་ལ་སོགས་པ་གཟའ་སྐར་ཤིས་པའི་དུས་ནས་སྒྲུབ་པ་ལ་འཇུག་ཅིང་། འབྲས་བུ་འགྲུབ་པའི་དུས་ནི་འོག་ཏུ་འཆད་དོ། །གསུམ་པ་གང་ལ་བརྟེན་ནས་སྒྲུབ་པའི་ཡོ་བྱད་ནི། འཚོ་བ་ཟས་ཀྱི། རྐྱེན་བཟློག་སྨན་གྱི། སྒྲུབ་པ་རྫས་ཀྱི། མཆོད་པ་རྫས་ཀྱི་ཡོ་བྱད་རྣམས་སྤོགས་ཆོག་ལྡང་ཚོད་དུ་བསག་པའོ། །བཞི་པ་སྒྲུབ་པ་པོ་ལ་གང་གིས་སྒྲུབ་པའི་སྟོན་པ་དང་། གང་དང་ལྷན་ཅིག་སྒྲུབ་པའི་འཁོར་གཉིས། དང་པོ་ནི། ཚོགས་ཀྱི་རྡོ་རྗེ་སློབ་དཔོན་ཡོན་ཏན་བརྒྱད་དང་ལྡན་པ་སྟེ། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །ཞེས་སོ། །གཉིས་པ་ནི། སློབ་དཔོན་དང་དགོངས་པ་མཉམ་པའི་རྡོ་རྗེ་རྒྱལ་ཚབ། སྐད་གདངས་ཆེ་ཞིང་ལས་ཁྲིགས་མཁས་པའི་རྡོ་རྗེ་ལས་མཁན། སྦྱོར་བའི་སྒྱུ་རྩལ་ཤེས་པའི་ལས་བཞིའི་གཟུངས་མ། མི་མ་ཡིན་མཐོང་བའི་མིག་རྣོན་གྱིས་ཉུལ་ལེ་ཤེས་ཤིང་ཏིང་འཛིན་ལས་རུང་གིས་བཟློག་ནུས་པའི་རྡོ་རྗེ་སྤྱན་པ། དྲོད་འཛིན་པའི་རྡོ་རྗེ་
བྱ་རོག སྒྲོལ་བའི་ལས་ལ་མཁས་པའི་རྡོ་རྗེ་གིང་། ཁ་བསྐ་ཞིང་གཡོས་ལ་མཁས་པའི་རྡོ་རྗེ་བྱན་པོ། ཕྱི་ནང་གི་བརྡའ་སྦྱོར་མཁས་པའི་རྡོ་རྗེ་རྡུལ་ཕྱགས་སྐྱེས་བུ་སོགས་ཚོམ་བུར་འབྲེལ་བའི་འཁོར་ལོ། །ལྔ་པ་སྒྲུབ་ཆོས་ཕུན་སུམ་ཚོགས་པ་ནི། སྤྲོས་བཅས་མན་ཆད་ལ་བརྟན་པ་ཐོབ་པ་ཞིག་གིས་འོག་ནས་འབྱུང་བའི་བསྙེན་སྒྲུབ་ཀྱི་སྒོ་ནས་སྒྲུབ་པའི་ཐབས་ཕུན་སུམ་ཚོགས་པའོ། །གཉིས་པ་ནི། སྔར་བཤད་པའི་གནས་སུ་དཀྱིལ་འཁོར་གྱི་ལྷ་གནས་སོ་སོར་རྣལ་འབྱོར་པ་ཕོ་མོ་དང་ལྷ་ཡབ་ཡུམ་བྲང་སྤྲད་དེ་སོ་སོར་འདུག་ནས་རིམ་པ་གཤོམ་དང་འབྲེལ་བར་ནུབ་དང་པོ་མགོ་འཛིན་གྱི་བསྙེན་པ་ནས་བཟུང་བསྙེན་སྒྲུབ་ཡན་ལག་བཞིའི་རིམ་པས་སྒྲུབ་པ་སྟེ། དེ་ཡང་། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་པས། སྐབས་འདིར་བསྐྱེད་རིམ་གྱི་དབང་དུ་བྱས་ཏེ། གཙོ་འཁོར་གང་ཡིན་དེའི་ལྷ་སོ་སོའ་ང་རྒྱལ་བརྟན་པོ་ལ་སེམས་རྩེ་གཅིག་ཏུ་གནས་པ་སོར་བཞག་ནས། ནུབ་དང་པོ་མགོ་འཛིན་གྱི་བསྙེན་པ་དང་། ཇི་ཙམ་སྒྲུབ་པའི་ཞག་གྲངས་ཕྱེད་ཚུན་ཆད་ཉེ་བསྙེན་ཏེ་དེ་གཉིས་ལ་འོད་ཟེར་དཀར་པོའི་འཕྲོ་འདུ་བསྣོལ་མས་རྒྱུད་དག་པར་བྱེད་པ་ཉེ་བསྙེན་དང་། ནུབ་ཐ་མ་མ་གཏོགས་པའི་ཕྱེད་ཕན་ཆད་འོད་ཟེར་དམར་པོའི་འཕྲོ་འདུས་དངོས་གྲུབ་བསྐུལ་ཞིང་བསྡུ་བས་བཅུད་དག་པར་བྱེད་པ་སྒྲུབ་པ་དང་། ནུབ་ཐ་མར་འོད་ཟེར་མཐིང་ག་ཚུར་བསྡུ་བས་རྒྱུད་དག་པར་བྱེད་པའི་སྒོ་ནས་སྲོད་ཀྱི་ཆ་ལས་ལྷ་ལ་དངོས་གྲུབ་བླང་། ནམ་གུང་གི་ཚེ་ཏ་ན་སྒྲོལ་བའི་མཛད་སྤྱོད་ཀྱིས་དགྲ་ལས་དངོས་གྲུབ་བླང་། ཐོ་རེངས་ཡུམ་དང་གཉིས་སུ་མེད་པར་སྦྱོར་བའི་སྒོ་ནས་ཨ་ལིའི་མཛད་སྤྱོད་ཀྱིས་ཡུམ་གྱི་མཁའ་ལས་དངོས་གྲུབ་ལེན་པ་སྒྲུབ་པ་ཆེན་པོ་སྟེ། ཟླ་གཅིག་ལ་དཔེར་མཚོན་ན། ལམ་རིམ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་སྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །ཞེས་སོ། །གསུམ་པ་ནི། དེ་ལྟར་ཟླ་བ་དྲུག་སྤོགས་ཆོག་དང་བཅས་པས་རིག་འཛིན་གྱི་འབྲས་བུ་འགྲུབ་པ་སྟེ། འདི་བསྐྱེད་རིམ་ཡིན་པས་རིག་འཛིན་ཡང་ཐུན་མོང་གི་
དངོས་གྲུབ་ལས་རྒྱ་དང་ཡེ་རྒྱའི་ཁྱད་པར་གྱིས་འདོད་པ་དང་གཟུགས་ཀྱི་ལྷ་དང་སྐལ་བ་མཉམ་པའི་རིག་འཛིན་ལ་སྦྱོར་བའོ། །ད་ནི་ལམ་གྱི་གཞུང་ཤིང་རྫོགས་རིམ་ལྟར་བཤད་ན། འཆི་བ་འོད་གསལ་དང་རྗེས་མཐུན་སྟོང་པ་ཆེན་པོ། བར་དོ་དང་སྙིང་རྗེ་སྒྱུ་མ། སྐྱེས་པའི་རིམ་པ་དང་པོ་དང་ཕྱག་རྒྱ་གཅིག་པ། གཉིས་པ་དང་སྤྲོས་བཅས། གསུམ་པ་དང་ཚོགས་སྒྲུབ་སྟེ་ལྔའོ། །དང་པོ་སྟོང་ཆེན་ནི། ལུས་ཅན་རྣམས་འཆི་བའི་ཚེ་འབྱུང་བ་ལྔ་དང་དཀར་དམར་ནག་པོའི་ལམ་གསུམ་རིམ་པར་ཐིམ་པས་རྣམ་པར་མི་རྟོག་པའི་འོད་གསལ་འཆར་ཏེ། ཐལ་རྒྱུད་ལས། འགྲོ་བ་མ་ལུས་ཐམས་ཅད་དག །གནས་པའི་སྟོབས་ནི་ཟད་པ་ན། །འདུས་པ་ལྔ་ཡི་རིམ་པ་ཡིས། །བག་ཆགས་སྙིགས་མ་རང་ཟད་ནས། །འོད་གསལ་སྟོང་པར་སྣང་བ་ན། །རེ་དོགས་མེད་པ་ནམ་མཁའ་བཞིན། །ཞེས་སོ། །དེའི་བག་ཆགས་སྦྱོང་བའི་ཕྱིར་དེ་དང་རྣམ་པ་མཐུན་པའི་ལམ་སྒོམ་ཚུལ་ཡང་། ལྟ་བ་གཏན་ལ་འབེབས་པ་གཞིར་བཞག་སྟེ། བསམ་གཏན་ལ་ཚེར་མ་མི་འབྱུང་བའི་གནས་སུ་ལུས་གནད་རྣམ་པར་སྣང་མཛད་ཀྱི་ཆོས་བདུན་དང་ལྡན་པས། རིག་པ་མ་བཅོས་པའི་ངང་དུ་སོ་མར་འཇོག་པ་རིག་པ་སྤྱི་བླུགས་དང་། སྔར་ཐོས་བསམ་གྱི་ལྟ་བ་དྲན་པར་བྱས་ནས་དེའི་ངང་དུ་འཇོག་པ་མཐོང་བའི་རྗེས་ལ་འཇོག་པ་སྟེ། འཇོག་ཐབས་གཉིས་གང་རུང་གིས་དོན་དམ་རྣམ་པར་མི་རྟོག་པའི་ཏིང་འཛིན་ལ་མཉམ་པར་འཇོག་པ་ཉིན་མོའ་རྣལ་འབྱོར་དང་། མཚན་མོ་གཉིད་འཐུག་གི་འོད་གསལ་འཛིན་པའི་མན་ངག་ཉིས་སྦྲེལ་ཏེ་ཉིན་མཚན་ཁ་སྦྱོར་དུ་ཉམས་སུ་ལེན་པའི་སྒོ་ནས་ཉམས་ལྔ་མཐར་ཕྱིན་པར་བསླབ་པའོ། །གཉིས་པ་སྙིང་རྗེ་སྒྱུ་མ་ནི། སྔར་གྱི་འཆི་ཁའི་འོད་གསལ་ངོས་མ་ཟིན་པ་ལས་སྣང་གསུམ་དང་འབྱུང་ལྔའི་བགྲོད་པ་གོ་བཟློག་གི་ཚུལ་དུ་ལངས་ཏེ་བར་དོའ་ཡིད་ལུས་སྒྱུ་མ་ལྟ་བུར་གྲུབ་སྟེ། སྔ་མ་ལས། བར་མ་སྒྱུ་མའི་ལུས་ཐོབ་པས། །མ་སྤངས་ལོངས་སྤྱོད་རྫོགས་པར་བཤད། །ཅེས་སོ། །དེའི་བག་ཆགས་སྦྱོང་བའི་ཕྱིར་རྗེས་མཐུན་གྱི་ལམ་སྒོམ་ཚུལ་ཡང་། སྔར་གྱི་སྟོང་ཆེན་འོད་གསལ་གྱི་ངང་དུ་སེམས་འགགས་པས། དུ་བ་དང་། སྨིག་རྒྱུ་དང་། མེ་ཁྱེར་ལྟ་བུ་དང་། མར་མེ་ལྟ་བུ་དང་། དཀར་
དམར་ནག་པོའི་ལམ་གསུམ་ལ་སོགས་པའི་སྟོང་གཟུགས་ཀྱི་སྣང་བ་ཤར་བ་ན་ཉིན་གྱི་རྣལ་འབྱོར་སད་པའི་སྣང་བ་དེ་དག་དང་། མཚན་མོ་རྨི་ལམ་གྱི་སྣང་བ་ཐམས་ཅད་སྒྱུ་མ་ཆུ་ཟླ་ལྟར་མཐོང་བ་ལས་དམིགས་མེད་བདེ་ཆེན་གྱི་སྙིང་རྗེ་མ་འགགས་པར་ཤར་བ་ལ་གོམས་པར་བྱེད་པའོ། །གསུམ་པ་ཕྱག་རྒྱ་གཅིག་པ་ནི། སྐྱེས་པའི་རིམ་པ་དང་པོའི་བག་ཆགས་སྦྱོང་བའི་ཕྱིར་དེ་དང་རྗེས་སུ་མཐུན་པའི་ལམ་སྟེ། སྣང་བ་རིས་མེད་ལས་སྙིང་རྗེ་ཆེན་པོའི་འཕེན་པ་དང་། ཏིང་ངེ་འཛིན་གྱི་རྐྱེན་གྱི་ཆུ་དྭངས་པ་ལ་གཟུགས་བརྙན་ཤར་བ་ལྟར་ཞུ་བདེ་དང་མཚུངས་ལྡན་དུ་བྱུང་བའི་ལྷ་སྐུ་ཕྱག་རྒྱ་གཅིག་པ་རང་ཤར་གྱིས་སྣང་བ་ཐམས་ཅད་ལ་རྒྱས་ཐེབས་པའོ། །བཞི་པ་ཕྱག་རྒྱ་སྤྲོས་བཅས་ནི། སྐྱེས་པའི་རིམ་པ་བར་མའི་བག་ཆགས་སྦྱོང་བའི་ཕྱིར། དེ་དང་རྗེས་མཐུན་གྱི་ལམ་སྟེ། སྔར་གྱི་ལྷ་སྣང་དེ་ལས་ཆེས་ཆེར་འཕེལ་བས་སྣང་བ་ཐམས་ཅད་ཟུང་འཇུག་གི་ལྷ་གཙོ་འཁོར་དང་ཚོམ་བུའི་རྣམ་པར་མངོན་སུམ་དུ་སྤྲོས་ཏེ་མ་འདྲེས་ཡོངས་སུ་འཆར་བ་ལ་གོམས་པར་བྱེད་པའོ། །ལྔ་པ་ཚོམ་བུ་ཚོགས་སྒྲུབ་ནི། སྐྱེས་པའི་རིམ་པ་གསུམ་པའི་བག་ཆགས་སྦྱོང་བའི་ཕྱིར། དེ་དང་རྗེས་མཐུན་གྱི་ལམ་སྟེ། ཚོམ་བུ་གཅིག་གསུམ་ལྔ་པ་གང་རུང་གི་སྒོ་ནས་སྤྲོས་བཅས་བསྐྱེད་རིམ་དང་ཕྱོགས་མཐུན་དུ་སྒྲུབ་པའམ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པའམ། ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་པ་ཉིད་ཁ་སྦྱོར་གྱིས་སྒྲུབ་པ་སྟེ། གང་ལྟར་ཡང་། དབང་པོ་རབ་འབྲིང་ཐ་གསུམ་གྱི་དབྱེ་བས་ཟླ་བ་དྲུག་གམ་ལོ་གཅིག ལོ་གཅིག་དང་ཟླ་བ་གཉིས། ལོ་གཅིག་ཟླ་བ་བཞི་རྣམས་ཀྱིས་ནང་གི་མངོན་བྱང་ལྔ་ལ་བརྟེན་ནས་ཟག་མེད་མཐོང་ལམ་རྣམ་གཉིས་གང་རུང་ལ་སྦྱོར་བར་བྱེད་དེ། ལམ་རིམ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་སོ། །ད་ནི་ཟག་ལྡོག་ཡོད་མེད་ཀྱི་མུ་བཞི་བརྩི་བར་བྱ་སྟེ། དེ་ལ་ཟག་ལྡོག་གཉིས་ཀ་ཡོད་པའི་མུ། ཟག་པ་ཡོད་ལ་ལྡོག་པ་མེད་པའི་མུ། ཟག་པ་མེད་ལ་ལྡོག་པ་ཡོད་པའི་མུ། ཟག་ལྡོག་གཉིས་ཀ་མེད་
པའི་མུའོ། །དང་པོ་ནི། སྟོང་ཆེན། སྙིང་རྗེ་སྒྱུ་མ། ཕྱག་རྒྱ་གཅིག་སྤྲོས་ཏེ་ཚོགས་ལམ་གྱི་རྣལ་འབྱོར་བཞི་སྟེ། ལམ་རིམ་ལས། དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །གཉིས་པ་ནི། སྦྱོར་ལམ་ཚོམ་བུ་ཚོགས་སྒྲུབ་སྟེ། སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་པ་མ་ཡིན་པའི་ཕྱིར། གསུམ་པ་ནི། དམན་ལམ་སྔོན་དུ་སོང་བའི་འཕགས་པ་དགྲ་བཅོམ་པ་སྔགས་ཀྱི་ཚོགས་ལམ་ལ་གནས་པ་ལྟ་བུ་སྟེ། དེ་ནི་རང་དོན་ཡིད་བྱེད་ཀྱི་བསམ་པས་ལྡོག་པ་སྲིད་པའི་ཕྱིར། ལུང་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིག །ཅེས་སོ། །བཞི་པ་ནི། སློབ་པའི་ཟུང་འཇུག་རིག་འཛིན་བཞི་སྟེ། ལམ་རིམ་ལས། ཟག་ཀུན་ཟད་པའི་རིགས་ཆེན་འདི། །ཇི་ལྟར་སྤྱད་ཀྱང་ལྡོག་པ་མེད། །ཅེས་སོ། །འོ་ན་ཟག་པ་ཞེས་བྱ་བ་གང་ལ་ཟེར་ན། སྤྱིར་མངོན་པ་སོགས་ལས་ཟག་པའི་སྒོ་དྲུག་བཤད་ཀྱང་། སྐབས་འདིར་ཟག་པའི་གཙོ་བོ་དང་། ཡན་ལག་གཉིས། དང་པོ་ནི། ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཁམས་གསུམ་དུ་ཟག་ཅིང་འཕོ་བ་སྟེ། སྤར་ཁབ་ལས། དེ་དག་འཇིག་རྟེན་པ་ལ་ཡོད་པ་ནི་འཛིན་པའི་ཕྱིར་ཟག་པར་འགྱུར་ལ། ཞེས་སོ། །གཉིས་པ་ནི། ལུས་རང་དབང་མེད་པར་འདོར་བ་ལུས་ཀྱི་དང་། བདེ་མི་བདེ་རང་དབང་མེད་པར་མྱོང་བ་ཁམས་ཀྱི་དང་། རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པ་དང་གསུམ་མོ། །གསུམ་པ་ལམ་འགྱུར་གྱི་འབྲས་བུ་རིག་འཛིན་བཞི་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པ་རིག་འཛིན་བཞི་སྟེ། དེ་ཡང་མཐོང་ལམ་པ་ལ། ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པ་རྣམ་སྨིན་རིག་འཛིན་དང་། སྦྱོང་བར་ནུས་པས་སྐྱེ་འཇིག་མེད་པ་དྭངས་མའི་ལུས་སུ་གྱུར་པ་ལམ་མཆོག་ཡོངས་སུ་གྱུར་པའི་ཚེ་དབང་གཉིས་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་སོ། །དེ་ལ་རྣམ་སྨིན་རིག་འཛིན་ནི། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ།
ཡིད་འོད་གསལ་གྱི་ལྷ་སྐུར་སྨིན་པ། ཇི་ལྟར་འདོད་པ་བཞིན་ལུས་རྒྱ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ལ་སྦྱོར་ངེས་པ་སྟེ། ཆོས་གསུམ་དང་ལྡན་པ་ཡིན་ནོ། །དེ་ལྟར་ཡང་ལམ་རིམ་ལས། ཡིད་ཀྱིས་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ན། །ཕྱག་རྒྱའི་སྐུ་ཉིད་གསལ་གྱུར་པས། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །སྤྱོད་པ་ནི། བདག་དོན་དུ་བཀོད་པ་དཀྱིལ་འཁོར་གྱི་བྱ་བས་ཚོགས་གཉིས་རྫོགས་པར་བྱེད་ཅིང་། ཕྲིན་ལས་བཞིའི་སྒོ་ནས་གཞན་དོན་རྫོགས་པར་བྱེད། ཟག་མེད་ལྷའི་སྤྱན་རྣམ་པར་དག་པ་ལ་སོགས་པའི་ཡོན་ཏན་དང་ལྡན་ལ། གླིང་བཞི་པའི་འཇིག་རྟེན་ཙམ་དུ་སྐུས་དོན་མཛད་ཅིང་། སྤྲུལ་གཟུགས་སྟོན་ཚུལ་ཚེ་དབང་དང་ཆ་འདྲ་བས་དོན་མཛད་དོ། །ཞར་བྱུང་དོགས་སེལ་ནི། རྣམ་སྨིན་གྱི་ལུས་དྭངས་མའི་སྐུར་བསྒྱུར་མ་ནུས་པས་མཐོང་ལམ་དུ་ཅིའི་ཕྱིར་འགྱུར་ཞེ་ན། སྐྱོན་མེད་དེ། བྱང་ཆུབ་སེམས་དཔའ་དབང་རྟུལ་གྱི་ཟག་བཅས་ཀྱི་ལུས་ས་བདུན་པའི་བར་འགྲོ་བར་མདོ་ལས་བཤད་པ་བཞིན་ནོ། །ཚེ་དབང་རིག་འཛིན་ནི། སེམས་འོད་གསལ་གྱི་ལྷ་སྐུར་སྨིན་ཅིང་ཕྲ་ཡང་ལ་སོགས་པའི་འཇའ་ལུས་ཀྱི་ཡོན་ཏན་ཁྱད་པར་ཅན་དང་ལྡན་པའི་རྡོ་རྗེའི་ལུས་ཅན་ཏེ། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་སྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་འགྱུར་ཚེ་ཡི་རིག །ཅེས་སོ། །སྤྱིར་ཚེ་དབང་ལ། སྨན་གྱི་བཅུད་ལེན་ལ་བརྟེན་པའི་དང་། ཐིག་ལེ་དབབ་བཟུང་སོགས་ལ་བརྟེན་པའི་དང་། སྒྲོལ་མ་རླུང་ལ་བརྟེན་པའི་དང་། ལམ་མཆོག་ཡོངས་སུ་རྫོགས་པའི་ཚེ་དབང་དང་བཞི་ལས། འདི་ནི་ཕྱི་མ་སྟེ། ཟག་མེད་མཐོང་ལམ་གྱི་ཡེ་ཤེས་ཇི་ལྟ་བ་བཞིན་མངོན་སུམ་དུ་མཐོང་བའི་ཕྱིར། སྤྱོད་པ་ནི། བདག་དོན་དུ་ཀུན་འགྲོའི་དྲི་མ་སྦྱོང་ཞིང་། གཞན་དོན་དུ་ཆོ་འཕྲུལ་བཞི་དང་ཕྲིན་ལས་བཞི་སོགས་ཀྱི་དོན་མཛད། ཆ་ལུགས་ནི། མི་དང་འདོད་གཟུགས་ཀྱི་ལྷའི་གཙོ་བོའི་ཆ་བྱད་དུ་སྟོན་པ་སྟེ། སྔ་མ་ལས། ལྷ་མིའི་རྒྱལ་པོའི་སྐྱེ་བ་འཛིན། །ཞེས་སོ། །དེ་ཡང་ལྷ་མི་གཞན་དང་ཁྱད་པར་ཆེ་སྟེ། སྔ་མའི་འཕྲོས་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་
ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །ཞེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱར་དུས་གཅིག་ཏུ་དོན་མཛད་དོ། །སྒོམ་ལམ་པ་ནི། ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་ཏེ། ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །སྒོམ་པ་གང་ཡིན་མངོན་འགྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིག །ཅེས་དང་། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །ཞེས་སོ། །དེ་ལ་ཡང་སྔ་མ་ལས། རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་པས། འདི་ལ་བཤད་ཚུལ་གཉིས་ཏེ། སྔར་རང་ཉིད་ཀྱིས་གང་བསྒོམས་ཀྱི་ལྷག་པའི་ལྷ་རིགས་ལྔ་གང་ཡིན་གྱི་ཆ་ལུགས་འཛིན་པར་འཆད་པའམ། ཡང་ན་བསྒོམ་ལམ་ས་གཉིས་པ་ནས་བཅུ་པ་ཙམ་གྱི་བར་ས་དགུ་ལ་རིམ་པར་སྦྱར་ཏེ། ས་གཉིས་པ་ནས་ལྔ་པའི་བར་བཞི་ལ་རྡོ་རྗེའི་རིག་འཛིན་ཞེས་བྱ་སྟེ། རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་འཇོམས་པའི་ཕྱིར། ས་དྲུག་པར་ཤེར་ཕྱིན་གཙོ་བོར་སྤྱོད་ཅིང་ཆོས་འཁོར་བསྐོར་བའི་ཕྱིར་དང་། ས་བདུན་པའང་ཐབས་མཁས་པ་འཁོར་ལོ་ལྟར་གྱུར་པས་ས་དེ་གཉིས་སུ་འཁོར་ལོའ་རིག་འཛིན་ཞེས་བྱའོ། །བརྒྱད་པར་མི་རྟོག་པའི་ཡེ་ཤེས་ལ་དབང་ཐོབ་པས་རིན་པོ་ཆེའི་རིག་འཛིན་དང་། དགུ་པར་ཆགས་པ་མེད་པས་ཞིང་སྦྱོང་ཞིང་དོན་མཛད་པས་པདྨའི་རིག་འཛིན་དང་། བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་བྱེད་པའི་ཕྱིར་རལ་གྲིའི་རིག་འཛིན་ནོ། །ཆ་བྱད་ཟུང་འཇུག་ལྷའི་སྐུ་མཚན་དཔེ་རྫོགས་པའི་བདག་ཉིད་ཅན་བདག་དོན་དུ་ལྷན་ཅིག་གནས་པའི་དྲི་མ་སྦྱོང་ཞིང་། གཞན་དོན་དུ་རྔོན་པ་དང་སྨད་འཚོང་མ་ལ་སོགས་པ་གང་འདུལ་གྱི་སྤྲུལ་གཟུགས་སུ་སྟོན་པར་བྱེད་དེ། སྔ་མ་ལས། མཉམ་བཞག་ངང་ལས་མ་གཡོས་བཞིན། །ཞེས་དང་། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉེར་ལྔའི་ཡོན་ཏན་དང་ལྡན་པ་ཚེ་དབང་དང་འདྲ་ནའང་། འདིར་གསལ་བརྟན་གྱི་ཁྱད་པར་དུ་བྱས་ཤིང་།
ལོངས་སྐུའི་ཞིང་དང་མཉམ་པར་དོན་བྱེད་དེ། སྔ་མ་ལས། དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་གདུལ་བྱས་སྤགས། །ཞེས་སོ། །དེ་ལྟར་ས་བཅུ་ཙམ་སྒོམ་ལམ་དུ་བསྡུས་ནས་རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང་། ཁྱད་པར་ལམ་ནི་མཐར་ལམ་ལྷུན་གྲུབ་རིག་འཛིན་ཏེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་སྟེ། དྲུག་པའི་རྒྱལ་ཚབ་མཛད་པ་པོ་གསང་བའི་བདག་པོ་བཞིན་ནོ། །སྤྱོད་ཚུལ་ནི་བདག་དོན་དུ་རྡོ་རྗེ་ལྟ་བུའི་ཏིང་ངེ་འཛིན་བྱ་བ་ནང་གི་མངོན་བྱང་གིས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱོང་ཞིང་། གཞན་དོན་རྗེས་ཐོབ་ལ་སངས་རྒྱས་དང་ཆ་འདྲ་བར་འགྲོ་བའི་དོན་མཛད། སྤྲུལ་གཟུགས་ཀྱང་མཛད་པ་བཅུ་གཉིས་སོགས་མཆོག་གི་སྤྲུལ་སྐུ་དང་ཕྱོགས་མཐུན་དུ་སྟོན། མངོན་ཤེས་ཀྱི་ཡུལ་དོན་ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་བའི་ཕྱིར་ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པར་མཛད་དེ། ལམ་རིམ་ལས། དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་ལ་ཉལ་བ་འཇོམས་བྱེད་ཅིང་། །སྐད་ཅིག་ཉིད་ལས་རིག་འཛིན་མཐའོ། །ཞེས་དང་། ཉིད་ཕྱིར་རྡོ་རྗེ་འཛིན་རྫོགས་ལ། །སྐད་ཅིག་དུས་ཀྱིས་བསླབ་རྫོགས་ནས། །ཐ་མའི་བག་ལ་ཉལ་བ་དང་། །བཅོམ་ལྡན་འདས་པར་གྱུར་པ་ཡིན། །དེ་ཚེ་དེ་སྒྲིབ་ཆ་ཡོད་ཀྱང་། །ལྷུན་གྲུབ་རིག་འཛིན་སར་བཞུགས་ནས། །ཞིང་ཁམས་ཐུག་པ་མེད་པ་དག །འདུལ་ཕྱིར་སྤྲུལ་སྐུའི་མཛད་པ་སྟོན། །ཞེས་སོ། །ཞར་བྱུང་རྒྱུའི་ཐེག་པའི་འཕགས་པ་རྣམས་དང་དགོངས་པ་མཉམ་ཚུལ་དང་སའི་:མོ་ལོཚོད་མཐུན་ཚུལ་བཤད་དེ། རྣམ་སྨིན་རིག་འཛིན་དང་། རྒྱུའི་ཐེག་པའི་མཐོང་ལམ་རབ་དགའ་ལ་གནས་པའི་སེམས་དཔའ་གཉིས་དགོངས་པ་མཉམ་ཞིང་། དེ་ལས་གཞན་པ་ཚེ་དབང་སོགས་གསུམ་ནི་རྒྱུའི་ཐེག་པའི་ས་དང་པོ་དང་། བརྒྱད་པ་དང་། བཅུ་པ་ཙམ་དུ་སྐལ་བ་མཉམ་པ་སྟེ་ལམ་གྱི་ལ་ོཚོད་མཚུངས་མོད། འོན་ཀྱང་
དགོངས་སྤྱོད་ཀྱིས་རྒྱུའི་ཐེག་པའི་ས་དེ་དག་གི་བྱང་སེམས་ལས་ཁྱད་པར་དུ་གྱུར་པ་ཡིན་ཏེ། རྒྱུའི་ཐེག་པའི་སྒོམ་ལམ་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པའི་ས་ཀུན་ཏུ་འོད་དང་ལྷུན་གྲུབ་རིག་འཛིན་རྣམས་མཉམ་པར་བཞེད་པའི་ཕྱིར། དེ་ལྟར་ཡང་ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། ཀུན་ཏུ་འོད་བསྟི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །ད་ནི་ཐོད་རྒལ་འབྱུང་མི་འབྱུང་གི་ས་མཚམས་འཆད་དེ། རྣམ་སྨིན་རིག་འཛིན་གྱི་དངོས་འབྲས་རྒྱ་ཆེན་དུ་ངེས་པའི་ཕྱིར། མཐོང་ལམ་གཉིས་པོ་ལམ་མཐར་ཆགས་ཀྱི་སྐབས་སུའང་རིམ་པར་བགྲོད་པ་མི་སྲིད་ཅིང་། རྣམ་སྨིན་ནས་ཐོད་རྒལ་དུ་བགྲོད་པ་ཡང་མི་འབྱུང་སྟེ། ཐོད་རྒལ་འབྱུང་བའི་ཆོས་གསུམ་མ་ཚང་བའི་ཕྱིར། གང་མ་ཚང་ན། མཁས་པ་དག་ཀྱང་། ངང་གིས་བློ་ཆུང་བས་ཐོད་རྒལ་མི་འབྱུང་ངོ་ཞེས་བཞེད་པ་ཡོད་མོད། དེ་ནི་སྐབས་འདིར་དགོངས་པ་མཉམ་པར་མ་བཞག་པར་མངོན་ཏེ། དེ་ལྟ་ན་ཕྱག་རྒྱ་གཅིག་སྤྲོས་གཉིས་ནས་ཐོད་རྒལ་འབྱུང་ངམ་མི་འབྱུང་། འབྱུང་ན། རིག་འཛིན་གྱི་ས་ལ་བཞུགས་པའི་བྱང་སེམས་འཕགས་པ་ལས་བློ་ཆེ་བའི་སོ་སྐྱེ་ཡོད་པར་ཐལ། ཕྱག་རྒྱ་གཅིག་སྤྲོས་དང་རྣམ་སྨིན་གཉིས་ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པར་ཕྱོགས་མཚུངས་པ་གང་ཞིག གཅིག་སྤྲོས་ལ་ཐོད་རྒལ་འབྱུང་ཞིང་རྣམ་སྨིན་ལ་མི་འབྱུང་བའི་ཕྱིར། མི་འབྱུང་ན། ཟག་བཅས་ཀྱི་ལམ་པ་ཐོད་རྒལ་དུ་བགྲོད་པ་མི་སྲིད་པར་ཐལ། ཁས་བླངས་དེའི་ཕྱིར། རྒྱུ་མཚན་དེས་ན། འཕགས་པ་ཇི་ལྟར་དབང་པོ་རྟུལ་ཡང་སོ་སྐྱེས་འགྲན་པར་ནུས་པ་མིན་ཏེ། དེའི་ཕྱིར་རྣམ་སྨིན་ནི། རང་གི་དངོས་འབྲས་ཕྱག་ཆེན་ཉིད་དུ་ངེས་པའི་ཕྱིར་ལམ་གཞན་བར་ནས་བོར་དུ་མེད་པས་ཐོད་རྒལ་མི་འབྱུང་བ་ཡིན་ནོ། །ཞེས་བཤད་ན་ལེགས་སོ། །གཞན་དུ་ན་ཅིག་ཅར་རིགས་མིན་པའི་ལམ་པ་བློ་ཆེ་བ་
འགའ་ཞིག་ཕྱག་རྒྱ་གཅིག་སྤྲོས་གཉིས་ནས་སྦྱོར་མཐོང་དང་། ཚེ་དབང་ནས་ལྷུན་གྲུབ་རིག་འཛིན་ཚེ་དབང་དང་རྒྱ་ཆེན་གཉིས་ནས་རྫོགས་པའི་སངས་རྒྱས་ཀྱི་སར་ལམ་གཞན་བར་ནས་བོར་ལ་ཐོད་རྒལ་དུ་སྦྱོར་བ་སྲིད་པ་ཡིན་ཏེ། དེ་དག་ལ་ངང་གིས་བློ་ཆེ་བ་དང་། ཟུང་འཇུག་གི་ལམ་སྒོམ་པ་དང་། ལམ་གཞན་བར་ནས་བོར་དུ་ཡོད་པ་སྟེ་ཐོད་རྒལ་འབྱུང་བའི་ཆོས་གསུམ་པོ་ཚང་བའི་ཕྱིར་རོ། །དེ་ལྟར་ན་ཚོགས་སྒྲུབ་ནས་ཀྱང་ཐོད་རྒལ་འབྱུང་བ་སྲིད་དམ་སྙམ་ན་མིན་ཏེ། ལམ་རིམ་ལས། ལམ་མཆོག་དབྱེ་ས་གཅིག་ཡིན་ནོ། །ཞེས་ཟག་མེད་ཀྱི་ལམ་གྱི་འདུས་དང་དབྱེ་ས་མཐོང་ལམ་ཡིན་པར་གསུངས་པས་ལམ་གཞན་བར་ནས་བོར་དུ་མེད་པའི་ཕྱིར་རོ། །གསུམ་པ་གང་དུ་མཐར་ཕྱིན་འབྲས་བུའི་རྒྱུད་ནི། སྒྱུ་འཕྲུལ་བྱེ་བྲག་བསྟན་པ་ལས། གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང་། །བཏགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་པས་དེ་ལ་སྦྱང་གཞི་ནི། རྒྱུ་རྒྱུད་བདེ་བར་གཤེགས་པའི་སྙིང་པོ་གདོད་མ་ནས་རང་ཆས་སུ་བཞུགས་པ་སྟེ། འདམ་གྱི་དབུས་ན་བཞུགས་པའི་ནོར་བུ་རིན་པོ་ཆེ་བཞིན་ནོ། །སྦྱང་བྱ་ནི། མེད་སྣང་གློ་བུར་གྱི་དྲི་མ་ཕྲ་ཞིང་ཕྲ་བ་དང་བཅས་པ་སྟེ། ནོར་བུ་ལ་སྒྲིབ་པར་བྱེད་པའི་འདམ་རྫབ་བཞིན་ནོ། །སྦྱོང་བྱེད་ནི། རིམ་པ་གཉིས་ཀྱིས་བསྡུས་པའི་ལམ་རྣམས་ཏེ། བཀྲུ་བྱེད་ཀྱི་ཆུ་དང་འདག་རྫས་བཞིན་ནོ། །སྦྱངས་འབྲས་ནི། དེ་ལྟར་ལམ་གྱི་དྲི་མ་སྦྱངས་པ་ལས་གཞི་ལ་ཇི་ལྟར་ཡོད་པའི་ཡོན་ཏན་མངོན་དུ་གྱུར་པ་མཐར་ཐུག་པ་སྟེ། འདམ་རྫབ་ལས་གྲོལ་བའི་ཡིད་བཞིན་གྱི་ནོར་བུ་རིན་པོ་ཆེ་ལས་འདོད་རྒུའི་ཆར་འབེབས་པ་བཞིན་ནོ། །ངེས་ཚིག་ནི་ཅིའི་ཕྱིར་འབྲས་བུའི་རྒྱུད་དུ་འགྱུར་ཞེ་ན། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། ཅེས་པས་བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པས་ན་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་དོ། །དབྱེ་ན། ཁོག་གཞུང་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །
དེ་ཡང་སྐབས་ཀྱིས་ལྔ་ལྔ་སྟེ། །ཞེས་པས་སྐུ་གསུང་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་ལྔ་ལྔར་ཕྱེ་བས་འབྲས་ཆོས་ཉི་ཤུ་རྩ་ལྔར་འགྱུར་ཏེ། དེ་ལ་སྐུ་ལྔ་ནི་ཆོས་སྐུ། ལོངས་སྐུ། སྤྲུལ་སྐུ། མངོན་བྱང་གི་སྐུ། རྡོ་རྗེའི་སྐུ་དང་ལྔའོ། །གསུང་ལྔ་ནི། ཆོས་སྐུ་བརྗོད་མེད་དོན་གྱི་གསུང་། ལོངས་སྐུ་དགོངས་པ་བརྡའི་གསུང་། སྤྲུལ་སྐུ་བརྗོད་པ་ཚིག་གི་གསུང་། མངོན་བྱང་རིག་པ་བྱིན་རླབས་ཀྱི་གསུང་། དབྱེར་མེད་རྡོ་རྗེའི་གསུང་དང་ལྔའོ། །ཐུགས་ལྔ་ནི། ཆོས་ཀྱི་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མཉམ་ཉིད་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མངོན་བྱང་གི་ཐུགས་མེ་ལོང་ལྟ་བུའི་ཡེ་ཤེས། རྡོ་རྗེའི་ཐུགས་སོ་སོར་རྟོག་པའ་ིཡེ་ཤེས་དང་ལྔའོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས་ཁང་། གསལ་ཞིང་དག་པའི་འོད་ཟེར། ཁྱད་པར་དུ་འཕགས་པའི་གདན་ཁྲི། དགྱེས་རྒུར་སྤྱོད་པའི་ལོངས་སྤྱོད་དང་ལྔའོ། །ཕྲིན་ལས་ལྔ་ནི། ཞི་བ། རྒྱས་པ། དབང་། དྲག་པོ། ལྷུན་གྱིས་གྲུབ་པ་སྟེ་ལྔའོ། །དེ་དག་ཀྱང་། རྟེན་སྐུ་དང་། བརྟེན་པ་ཡེ་ཤེས་དང་། མཛད་པ་ཕྲིན་ལས་གསུམ་དུ་འདུ་བ་ཡིན་པས། དང་པོ་རྟེན་སྐུ་ནི། གསུམ་མམ་ལྔ་སྟེ། དབྱིངས་རྣམ་དག་གི་ཐོག་ཏུ་རིག་པའི་ཡེ་ཤེས་སྒྲིབ་པ་ལས་གྲོལ་བས་ཟུང་འཇུག་སྐུ་གསུང་ཡེ་རྫོགས་མཚན་འཛིན་གྱི་སྤྲོས་པ་ཐམས་ཅད་དང་བྲལ་བའི་བདག་ཉིད་དུ་བཞུགས་པ་ཆོས་ཀྱི་སྐུ་དང་། དེ་ལས་མ་གཡོས་བཞིན་དུ་ས་བཅུ་རྒྱུན་མཐའ་ལ་བཞུགས་པའི་བྱང་སེམས་རྣམས་ལ་མཚན་དཔེའི་རྣམ་པར་སྣང་བའི་གཟུགས་བརྙན་ལོངས་སྐུ་དང་། སོ་སྐྱེ་རྣམས་ལ་སོ་སོའ་མོས་པ་དང་མཐུན་པར་མཆོག་གི་སྤྲུལ་སྐུ་དང་། བཟོ་དང་སྐྱེ་བ་སོགས་གང་ལ་གང་འཚམས་པར་སངས་རྒྱས་ཀྱི་གཟུགས་བརྙན་ཅི་རིགས་སུ་སྣང་བ་སྤྲུལ་པའི་སྐུ་སྟེ་སྐུ་གསུམ་མོ། །ཡང་ན། སྐུ་གསུམ་སྣང་ཆ་མ་འདྲེས་པར་སྣང་བའི་ལྡོག་ཆ་ནས་མངོན་བྱང་དང་། སྐུ་གསུམ་པོ་ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། །སྐབས་འདིར་ཟུར་པ་རྣམས་ཆོས་ལོངས་སྤྲུལ་གསུམ་སྐུ་མཚན་ཉིད་པ་དང་། མངོན་བྱང་དང་རྡོ་རྗེའི་སྐུ་གཉིས་ཏེ་གསུམ་གྱི་རྣམ་པའི་ལྡོག་ཆ་དང་། ངོ་བོ་དབྱེར་མི་ཕྱེད་པའི་
ཆ་ནས་བཞག་པས་སྐུ་བཏགས་པ་བ་ཡིན་གསུང་། ཀུན་མཁྱེན་ཆེན་པོ་ནི། ཆོས་སྐུ་དང་། མངོན་བྱང་། རྡོ་རྗེའི་སྐུ་གསུམ་པོ་སངས་རྒྱས་རང་སྣང་གི་སྐུ་ཡིན་པས་མཚན་ཉིད་པ་ཡིན་ལ། སྐབས་འདིའི་ལོངས་སྐུ་དང་སྤྲུལ་སྐུ་གཉིས་གདུལ་བྱ་གཞན་སྣང་ཡིན་པས་སྐུ་བཏགས་པ་བའོ་ཞེས་གསུངས་ཏེ་ལེགས་སོ། །གཉིས་པ་བརྟེན་པ་ཡེ་ཤེས་ནི། དེ་ལྟར་སྐུ་ལྔ་མངོན་དུ་བྱས་པ་དེའི་ཚེ་རྣམ་པར་ཤེས་པའི་ཚོགས་བརྒྱད་གནས་སུ་དག་པ་ཡེ་ཤེས་ལྔ་སྟེ། ཀུན་གཞི་འབྱེད་པ་མེད་པའི་ཆ་ནས་དེ་ཉིད་གནས་སུ་དག་པ་ཅིར་ཡང་མི་དམིགས་པས་སྤྲོས་པའི་མཐའ་ཐམས་ཅད་ལས་འདས་པ་ཆོས་དབྱིངས་ཡེ་ཤེས་དང་། ཀུན་གཞིའི་རྣམ་ཤེས་གསལ་ལ་རྣམ་པར་མི་རྟོག་པའི་ཆ་ནས་དེ་ཉིད་གནས་སུ་དག་པ་མེ་ལོང་ངོས་གཉིས་པ་ལྟར་རང་བཞིན་གྱིས་ཆོས་རྣམས་གསལ་ལ་སྤུ་རིས་འབྱེད་པར་མི་མཛད་པ་མེ་ལོང་ལྟ་བུའི་ཡེ་ཤེས་དང་། ཉོན་ཡིད་ཀྱི་ཕྱི་ནང་གི་ཆོས་རྣམས་ལ་བླང་དོར་བྱེད་པའི་ཆ་ནས་དེ་ཉིད་གནས་སུ་དག་པ་འཁོར་འདས་བཟང་ངན་མེད་པར་མཉམ་ཉིད་དུ་གཟིགས་པས་སྲིད་ཞིའི་མཐའ་གཉིས་ལ་མི་གནས་པ་མཉམ་ཉིད་ཡེ་ཤེས་དང་། རྣམ་ཤེས་དྲུག་འགགས་མ་ཐག་པའི་ཡིད་ཀྱིས་དཔྱོད་པ་མེད་པར་རྟོག་པའི་ཆ་ནས་དེ་ཉིད་གནས་སུ་དག་པ་ཆོས་ཅན་མ་ལུས་པ་མངོན་སུམ་དུ་མ་འདྲེས་ཡོངས་རྫོགས་སུ་ས་ལེར་གཟིགས་པ་སོ་སོར་རྟོག་པའི་ཡེ་ཤེས་དང་། སྒོ་ལྔའི་རྣམ་ཤེས་ཀྱིས་བྱ་བ་ཐམས་ཅད་སྒྲུབ་པའི་ཆ་ནས་དེ་ཉིད་གནས་སུ་དག་པ་འགྲོ་བའི་དོན་མཛད་པ་ལ་ཐོགས་པ་མེད་པའི་ཕྲིན་ལས་འཇུག་པ་བྱ་གྲུབ་ཡེ་ཤེས་ཏེ་ལྔའོ། །དེ་དག་ཡེ་ཤེས་གཉིས་སུ་བསྡུ་ཚུལ་ནི། ཟུར་པ་རྣམས་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་རྟེན་བརྟེན་པའི་ཆ་ནས་ཇི་སྙེད་པ་མཁྱེན་པའི་ཡེ་ཤེས་སུ་འདུའོ། །ཞེས་གསུངས། ཀུན་མཁྱེན་ཆེན་པོ་ནི། ཆོས་དབྱིངས་དང་། མཉམ་ཉིད་གཉིས་གནས་ལུགས་གཟིགས་པའི་ཆ་ནས་ཇི་ལྟ་བ་དང་། གཞན་གསུམ་འཆར་གཞི་དང་ཡུལ་གཟིགས་པ་དང་དེའི་དོན་མཛད་པའི་ཆ་ནས་ཇི་སྙེད་པའི་ཡེ་ཤེས་སོ། །ཞེས་གསུངས་ཏེ་ཇི་ལྟར་བཤད་ཀྱང་ཁྱད་པར་མེད་དོ། །གསུམ་པ་མཛད་པ་ཕྲིན་ལས་ནི། དེ་ལྟར་ན་ཉོན་སྒྲིབ་དང་ཤེས་སྒྲིབ་
ཀྱིས་བསྡུས་པའི་མེད་སྣང་གློ་བུར་གྱི་སྒྲིབ་གཉིས་བག་ཆགས་སྣང་གསུམ་གྱི་དྲི་མ་དང་བཅས་པ་མཐའ་དག་སྤངས་ཤིང་། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཀྱིས་ཤེས་བྱའི་ཆོས་ཐམས་ཅད་མངོན་སུམ་དུ་གཟིགས་པའི་སྒོ་ནས་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ཅིང་། དེའི་མཐུ་ལས་གདུལ་བྱ་སོ་སོའ་སྐལ་བ་དང་འཚམས་པར་ཞི་བ་དང་། རྒྱས་པ་དང་། དབང་དང་། དྲག་པོ་ལ་སོགས་ཏེ་གང་ལ་གང་གིས་ཇི་ལྟར་འདུལ་བའི་ཕྲིན་ལས་ཀྱི་སྒོ་མཐའ་ཡས་དུས་ལས་ཡོལ་བ་མེད་ལ། འབད་རྩོལ་མེད་པར་ལྷུན་གྱིས་གྲུབ་པ་ནི། ནམ་མཁའ་ཇི་སྲིད་པ་དེ་སྲིད་དུ་རྒྱ་ཆེན་རྒྱུན་མི་ཆད་པར་འབྱུང་བ་སྟེ། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་ཆད་པར་འདོད། །ཅེས་སོ། །གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པ་ནི། ལྟ་སྤྱོད་དཀྱིལ་འཁོར་དབང་དམ་ཚིག །མཆོད་སྔགས་ཏིང་འཛིན་ཕྲིན་སྒྲུབ་ཀྱི། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར་བཅུ་སྟེ། དེ་ཁོ་ན་ཉིད་ལྟ་བ། ལ་དོར་བ་སྤྱོད་པ། བཀོད་པ་དཀྱིལ་འཁོར། རིམ་པ་བགྲོད་པ་དབང་། མི་འདའ་བ་དམ་ཚིག རོལ་པ་ཕྲིན་ལས། དོན་དུ་གཉེར་བ་སྒྲུབ་པ། མི་གཡོ་བ་ཏིང་འཛིན། གནས་སུ་སྟོབ་པ་མཆོད་པ། འཆིང་ཟློས་སྔགས་དང་ཕྱག་རྒྱའོ། །དང་པོ་ལྟ་བ་ལ་གསུམ་སྟེ། ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས་སྤྲོས་པའི་མཐའ་གང་དུ་ཡང་མ་རེག་པའི་ཆ་ནས་དབུ་མ་པ་དང་། ཆོས་ཐམས་ཅད་སེམས་ཀྱི་རང་རྩལ་ཙམ་དུ་འདུ་བའི་ཆ་ནས་སེམས་ཙམ་པ་དང་ཕྱོགས་མཚུངས་ཀྱང་། སྔགས་ཀྱི་ལྟ་བ་ནི། དེ་དག་ལས་ཁྱད་པར་དུ་གྱུར་པ་སྟེ། དེ་ཡང་ཡེ་གདོད་མ་ནས་དབྱིངས། ཡེ་ཤེས། སྐུ་གསུང་ཐུགས་ཡོན་ཏན་ཕྲིན་ལས་ཏེ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་རྒྱལ་བའི་དཀྱིལ་འཁོར་དུ་རང་སྣང་བས་འཁོར་
འདས་བཟང་ངན་མེད་པར་མཉམ་པ་ཉིད་དུ་རྫོགས་པ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་ཕྱོགས་སུ་ལྷུང་བ་མིན་པར་ལྷག་པ་བདེན་གཉིས་ཟུང་འཇུག་ངོ་བོ་དབྱེར་མི་ཕྱེད་པར་མཉམ་ཉིད་དུ་གནས་ཤིང་། དེར་འཛིན་གྱི་བསམ་བརྗོད་ལས་ཀྱང་ཡང་དག་པར་འདས་པ་ན་ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་མིང་ཙམ་དུ་བཏགས་ཏེ། དེ་ལས། རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མིན་ཞེན་པ་དགྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་གསུངས་ཤིང་། ལྷག་པ་ཞེས་པའི་སྒྲ་ཡང་། ཁྱད་པར་དུ་འཕགས་པའི་དོན་ཏེ། ཕར་ཕྱིན་ཐེག་པ་ནས་དོན་དམ་བདེན་ངོར་འཁོར་འདས་མཉམ་ཉིད་དུ་བཞེད་པ་ཙམ་ཕྱོགས་མཐུན་ཡང་། སྔགས་ལུགས་འདིར་ནི་ཀུན་རྫོབ་ཏུ་ཡང་ཆོས་ཐམས་ཅད་ལ་མི་གཉིས་པའི་བསམ་བརྗོད་དང་ལྡན་པས་ན་རྒྱུའི་ཐེག་པ་ལས་ཁྱད་པར་དུ་འཕགས་པའི་ཕྱིར་དེ་སྐད་དུ་བརྗོད་པ་སྟེ། དེ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །ངེས་ཚིག་ནི། དྲྀཥྚའི་སྒྲ་ལས་དྲངས་ན། དྲྀ་ཤིར་ལྟ་བ་ལའོ་ཞེས་པའི་བྱིངས་དོན་གྱིས་བསྒྲུབས་པས་ལྟ་བ་ཞེས་བྱ་བ་ལ་འཇུག་སྟེ། གནས་ལུགས་ཀྱི་དོན་ལ་དེ་དང་རྗེས་སུ་མཐུན་པའི་ཤེས་རབ་ཀྱིས་གཏན་ཚིགས་ལ་སོགས་པའི་སྒོ་ནས་སྒྲོ་འདོགས་གཅོད་པའི་དོན་གྱིས་ན་ལྟ་བ་ཞེས་བྱའོ། །དབྱེ་ན་དབང་པོ་ཡང་རབ་ལ་གཏན་ཚིགས་ཀྱིས་རྟོགས་པར་བྱ་བ་སྟེ། རྒྱལ་པོ་ཛཿའི་ལམ་རྣམ་བཀོད་དུ། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་སྤངས་ཏེ། །སྒྲ་ཚིག་རྟེན་འབྲེལ་ཞེན་ཙམ་མིན། །ཡུལ་མིན་རང་རིག་བདེན་དབྱེར་མེད། །བློའི་གཏིང་གོ་བ་མངོན་སུམ་ཡུལ། །ཞེས་སོ། །དབང་འབྲིང་ལ་རང་བཞིན་དང་འབྲས་བུའི་རྟགས་ལ་བརྟེན་ནས་རྟོགས་པར་བྱ་བ་སྟེ། ཤེས་རབ་སྤྱན་འབྱེད་ལས། དང་པོ་རང་གི་རིག་པ་ཡི། །
ཆོ་འཕྲུལ་སྣང་བའི་འབྱུང་བ་དང་། །ཕྱོགས་དང་ཁ་དོག་ལ་སོགས་ཀྱིས། །མཚོན་ནས་ཇི་བཞིན་ཉིད་རྟོགས་བྱེད། །ཅེས་རང་བཞིན་དང་། འབྲས་བུ་ནི། དེ་ལས། ཅིག་ཤོས་མཐར་ཕྱིན་ཡེ་ཤེས་ཀྱི། །དཀྱིལ་འཁོར་རྟེན་དང་བརྟེན་ཅན་ལྟར། །ཞེས་སོ། །དབང་རྟུལ་ལ་བརྒྱུད་དེ་རྟོགས་པར་བྱ་བ་ཉེ་རིང་གཉིས་ལས། ཉེ་བ་ནི། སྔ་མ་ལས། དམན་ལ་རྒྱ་གསུམ་གོམས་པ་ཡི། །བརྟན་ནས་བརྟག་དཔྱད་ཀླུང་ཞུགས་མཐོང་། །བསྒོམ་པའི་ལམ་དུ་བསྟན་པར་བྱ། །རིམ་པར་སྐྱེ་ལ་ཐེ་ཚོམ་མེད། །ཅེས་སོ། །རིང་བ་ནི། རྣམ་བཀོད་ལས། དེ་མིན་རྒྱུ་ཙམ་གསོག་བྱེད་པ། །རྒྱུད་ལས་འདི་སྐད་གསུངས་པ་སྟེ། །ཆོས་ཉིད་རྟེན་ཅིང་འབྲེལ་བྲིས་ན། །ཆོས་ཉིད་དོན་རྣམས་རྟོགས་འགྱུར་ཏེ། །ཞེས་སོ། །གཉིས་པ་སྤྱོད་པ་ལའང་གསུམ་སྟེ། ངོ་བོ་ནི། རིམ་གསུམ་ལས། ཏིང་འཛིན་ཁྱད་པར་འབྱུང་བའི་ཕྱིར། །རྗེས་མཐུན་སྤྱོད་པ་གཞུང་བཞིན་སྤྱད། །ཅེས་པས། གསང་སྔགས་དང་རྗེས་མཐུན་གྱི་ཐབས་ཤེས་ཁྱད་པར་ཅན་གྱིས་ཟིན་པའི་ལམ་པའི་སྒོ་གསུམ་གྱི་བྱ་བར་གྱུར་པ་གང་ཡིན་པ་སྟེ། སྤྱིར་ལམ་གྱི་ཉམས་ལེན་ཐམས་ཅད་ལྟ་སྤྱོད་གཉིས་སུ་འདུ་ནའང་། གཙོ་ཆེ་བའི་དབང་དུ་སྤྱི་མིང་བྱེ་བྲག་ལ་བཏགས་ནས་མཉམ་བཞག་དང་རྗེས་མཐུན་ཐུན་མཚམས་ཀྱི་བྱ་བ་ལ་སོགས་པའོ། །ངེས་ཚིག་ནི། ཙའི་སྒྲ་ལས་དྲངས་ན་ཙ་ར་སྤྱོད་པའི་བྱིངས་དོན་གྱིས་བསྒྲུབས་པས་སྤྱོད་པ་ཞེས་བྱ་བ་ལ་འཇུག་སྟེ། གང་སྤྱད་བྱའི་ཡུལ་ལ་དུས་ཚོད་དང་འབྲེལ་བས་ཚུལ་བཞིན་དུ་སྤྱོད་པར་བྱེད་པའི་དོན་གྱིས་ན་སྤྱོད་པའོ། །དབྱེ་ན། སྤྱིར་ལུས་ངག་ཡིད་གསུམ་ཡོངས་སུ་དག་པར་བྱ་བ་ཡིན་ལ། དེ་ཡང་། སྤྱོད་པ་དུས་ཚོད་དང་འབྲེལ་བར་བསླབ་སྟེ། ལས་དང་པོ་པའི་དུས་སུ་གཟབས་ཤིང་བག་ཡོད་པ་དགེ་སྦྱོང་གཞོན་ནུའི་སྤྱོད་པ་ལྟ་བུ། དེ་ལས་ཅུང་ཟད་གོམས་ཏེ་མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། བརྟན་པ་ཆེར་ཐོབ་ནས་རྟོགས་པ་བྲི་གང་མེད་པར་གྱུར་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱོད་ཚུལ་གསུམ་མོ། །བྱེ་བྲག་ཏུ་ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་
བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལའང་། དང་པོར་ལྟ་བ་གཏན་ལ་འབེབས་པའི་དུས་སུ་དད་བརྩོན་གྱི་སྤྱོད་པ་སྤྱད་དེ། སྤྱིར་དད་པ་ལ། དང་བའི་དད་པ། འདུན་པའི་དད་པ། ཡིད་ཆེས་ཀྱི་དད་པ་དང་གསུམ་མོ། །དེ་ལྟ་བུའི་དད་པས་ཀུན་ནས་བསླངས་ཏེ་ཐོས་བསམ་ལ་ཞུགས་ནས་བརྩོན་འགྲུས་ཐང་ལྷོད་མེད་པས་དེ་དོན་མཐར་ཕྱིན་པར་སྤྱོད་པའོ། །གཉིས་པ་སྟོང་ཆེན་གྱི་དུས་སུ་ཤེས་རབ་དང་མཐུན་པ་སྟེ། མཉམ་བཞག་ཏུ་སྟོང་ཆེན་རྣམ་པར་མི་རྟོག་པའི་འོད་གསལ་བསྒོམ་ཞིང་། རྗེས་ཐོབ་རྗེས་ཤེས་ཀྱི་གནས་སྐབས་སུ་ཡང་དེའི་ངང་ལས་མི་གཡོ་བར་སྤྱོད་པའོ། །དེ་ལྟར་ཡང་། ལམ་རིམ་ལས། སྤྱོད་དགུ་དོར་བའི་ཅིག་ཅར་སྤང་། །མི་དམིགས་མཐུན་པར་སྤྱོད་ཅེས་བྱ། །ཞེས་སོ། །གསུམ་པ་སྙིང་རྗེ་སྒྱུ་མའི་སྐབས་སུ་ཐབས་དང་མཐུན་པ་སྟེ། མཉམ་བཞག་ཏུ་དམིགས་པ་མེད་པའི་སྙིང་རྗེ་རྩོལ་མེད་ཤུགས་འབྱུང་དུ་འཆར་བ་ལ་བསླབ་ཅིང་རྗེས་ཐོབ་རྗེས་ཤེས་ལའང་དེའི་ངང་བསྐྱང་བའོ། །དེ་ཡང་། ལམ་རིམ་ལས། སྙིང་རྗེ་ཆེན་པོའི་རྣལ་འབྱོར་པས། །སྲིད་གསུམ་སྒྱུ་མ་འདྲ་བར་ནི། །ཞེས་སོ། །བཞི་པ་ཕྱག་རྒྱ་གཅིག་པའི་སྐབས་སུ་ཕྱོགས་གཅིག་པ་སྟེ་མཉམ་རྗེས་གཉིས་ཀར་ཟུང་འཇུག་ཕྱག་རྒྱ་གཅིག་པའི་རྣལ་འབྱོར་ཁོ་ན་ལ་སྤྱོད་པའོ། །དེ་ཡང་སྔ་མ་ལས། རྒྱུ་འབྲས་མཚམས་སྦྱོར་བར་སྐབས་སུ། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཡང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །ཞེས་སོ། །ལྔ་པ་ཕྱག་རྒྱ་སྤྲོས་བཅས་ཀྱི་སྐབས་སུ་སྤྲོས་པ་དང་བཅས་པ་སྟེ། མཉམ་རྗེས་གཉིས་ཀར་སྤྱོད་ཡུལ་ཐམས་ཅད་ལྷའི་རོལ་མོར་འཆར་བ་ལ་བསླབ་པའོ། །དེ་ཡང་། སྔ་མ་ལས། སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་པ། །མ་ཉམས་དེ་ཡི་དབྱིངས་ན་གནས། །ཤེས་རབ་མཆོག་གིས་རྟག་ཏུ་སྤྱད། །ཅེས་སོ། །དྲུག་པ་ཚོགས་སྒྲུབ་ཀྱི་སྐབས་སུ་ཚོགས་ཀྱི་སྤྱོད་པ་སྟེ། མཉམ་རྗེས་གཉིས་ཀར་ཡོ་བྱད་ལྔ་ལ་ཆགས་མེད་དུ་སྤྱོད་པའོ། །དེ་ཡང་། སྔ་མ་ལས། སྤྱོད་ལམ་ཡོ་བྱད་ལྔ་སྤྱོད་ཅིང་། །དངོས་སུ་མཆོད་པ་རྣམ་གཉིས་སོ། །ཞེས་སོ། །བདུན་པ་ཟག་མེད་སློབ་པའི་ལམ་རིག་འཛིན་བཞིའི་
སྐབས་སུ་རྫུ་འཕྲུལ་གྱི་སྤྱོད་པ་སྟེ། བདག་དོན་དུ་རང་སའི་དྲི་མ་ཕྲ་བ་རྣམས་སྦྱོང་ཞིང་གཞན་དོན་རྫུ་འཕྲུལ་གྱི་བཀོད་པས་སྤྲུལ་པ་མ་འགགས་པར་སྟོན་ཅིང་གདུལ་བྱའི་དོན་མཛད་པའོ། །དེ་ཡང་སྔ་མ་ལས། དཀྱིལ་འཁོར་རོལ་པའི་ཚུལ་སྤྱོད་པས། །ཚོགས་གཉིས་རྫོགས་པ་བདག་གི་དོན། །སྨིན་པས་ཕྲིན་ལས་རྫོགས་བྱེད་པ། །མི་འདོར་འགོད་པ་གཞན་གྱིའོ། །ཞེས་རྣམ་སྨིན་དང་། དཀྱུས་སར་ཕྱིན་པའི་ཅང་ཤེས་བཞིན། །ཀུན་ཏུ་འགྲོ་བ་བདག་པོའི་དོན། །རྫུ་འཕྲུལ་ཆོས་སྣང་རྗེས་སྟོན་བརྗོད། །ཅེས་ཚེ་དབང་དང་། མཉམ་བཞག་ངང་ལས་མ་གཡོས་བཞིན། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་ཕྱག་ཆེན་དང་། ཉིད་ཕྱིར་རྡོ་རྗེ་འཛིན་རྫོགས་ལ། །ཞེས་སོགས་དང་། གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བ་མཛད་པ་དང་། །ཞེས་པས་ལྷུན་གྲུབ་རིག་འཛིན་ཏེ་དེ་ལྟར་རིག་འཛིན་གྱི་སྤྱོད་པ་རྣམས་གསུངས་སོ། །དེ་ལྟར་རིམ་གྱིས་པའི་སྤྱོད་པ་བདུན་བཤད་ནས། ཅིག་ཅར་བའི་སྤྱོད་པ་ནི། ཆོས་ཐམས་ཅད་ལ་བླང་དོར་མེད་པར་སྤྱོད་པ་སྟེ། ཀུན་འདུས་ལས། མི་དམིགས་པ་ལས་རྣམ་པར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་དེ་སྤྱོད་མཆོག་ཉིད། །ཅེས་སོ། །གསུམ་པ་དཀྱིལ་འཁོར་ལའང་གསུམ་སྟེ། ངོ་བོ་ནི། ཐུགས་ཐིག་ལས། གནས་སྐབས་བདུན་དུ་སྙིང་པོ་ལེན། །བཀོད་པ་གང་རྫོགས་དེ་ངོ་བོ། །ཞེས་པས་བཀོད་པ་ལྷའི་འཁོར་ལོ་རྫོགས་པར་སྣང་བའོ། །ཇི་ལྟར་ན། ཕྱི་ལྟར། ནང་ལྟར། གསང་བ་ལྟར། ཡང་གསང་ལྟར་འགོད་པ་དང་བཞིའོ། །ངེས་ཚིག་ནི། མཎྜ་ལའི་སྒྲ་ལས་དྲངས་ན། མཎྜ་ནི་སྙིང་པོའམ་བཅུད་དང་། ལ་ནི་འཛིན་པའམ་ལེན་པ་སྟེ། སྙིང་པོའི་ཡོན་ཏན་གྱི་གཞི་འཛིན་པས་ན་སྙིང་པོ་ལེན་པ་ཞེས་དང་། ཡང་མཎྜལ་ཞེས་པའི་མཎྜ་དང་ལ་སོ་སོར་མ་ཕྱེ་བར་སྒྲ་གཟུགས་ཟླུམ་པོའམ་བསྐོར་བའི་དོན་ལ་འཇུག་པས་ན་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་རོ། །དབྱེ་ན། སངས་རྒྱས་གསང་བས་ཆོས་དོན་དུ། དབྱེ་བ་རང་བཞིན་ཏིང་འཛིན་
དང་། །གཟུགས་བརྙན་དཀྱིལ་འཁོར་རྣམ་པ་གསུམ། །ཞེས་པ་ལྟར་རམ། ཡང་ན། རྒྱུད་ཕྱི་མ་ལས། སྐུ་གསུང་ཐུགས་ཀྱི་དབྱེ་བ་ལས། །དཀྱིལ་འཁོར་རྣམ་པ་གསུམ་འདོད་དེ། །ཞེས་གསུམ་དུ་དབྱེ་བ་དང་། འགྲེལ་ཆུང་ལས། དཀྱིལ་འཁོར་རྣམ་པ་བཅུ་གཉིས་ཏེ། །དེ་བཞིན་ཉིད་དང་རང་བཞིན་དང་། །ཐུགས་རྗེ་འདུལ་བའི་དཀྱིལ་འཁོར་དང་། །ཏིང་ངེ་འཛིན་དང་གཟུགས་བརྙན་དང་། །ལྷག་པའི་ཏིང་འཛིན་གཟུགས་བརྙན་དང་། །བྱང་ཆུབ་སེམས་དང་ལྷག་བྱང་སེམས། །ཚོགས་དང་ལྷུན་གྲུབ་དཀྱིལ་འཁོར་རོ། །ཞེས་བཅུ་གཉིས་སུ་དབྱེ་བ་སོགས་ཡོད་པ་ལས། སྐབས་འདིར་རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཅེས་གསུངས་པ་ལྟར་བདུན་དུ་ཕྱེ་ནས་བཤད་དེ། དང་པོ་རང་བཞིན་དཀྱིལ་འཁོར་ལ། རང་བཞིན་ཉིད་ཀྱི་དཀྱིལ་འཁོར་དང་། རང་བཞིན་འབྲས་བུ་མཐར་ཕྱིན་གྱི་དཀྱིལ་འཁོར་གཉིས། དང་པོ་ནི། ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པ་གནས་ལུགས་ཀྱི་དཀྱིལ་འཁོར་ཏེ། ཁོག་གཞུང་ལས། ཆོས་ཉིད་རང་བཞིན་སྤྲོས་བྲལ་ཏེ། །དངོས་པོ་ཀུན་ཀྱང་དེ་བཞིན་པས། །རང་བཞིན་ཉིད་ཀྱི་དཀྱིལ་འཁོར་རོ། །ཞེས་སོ། །གཉིས་པ་ནི། རང་གི་ཡེ་ཤེས་མངོན་སུམ་དུ་གྱུར་པས་འོག་མིན་ཆོས་ཀྱི་དབྱིངས་སུ་སྐུ་དང་ཡེ་ཤེས་འདུ་འབྲལ་མེད་པའི་དཀྱིལ་འཁོར་དུ་བཞུགས་པ་སྟེ། དེ་ལས། འབྲས་བུ་མཐར་ཕྱིན་འོག་མིན་ན། །བཞུགས་པ་དཀྱིལ་དང་འཁོར་གྱི་ཚུལ། །ཞེས་སོ། །གཉིས་པ་གཟུགས་བརྙན་གྱི་དཀྱིལ་འཁོར་ནི། དོན་དམ་པའི་གཟུགས་བརྙན་ཀུན་རྫོབ་ལྷའི་དཀྱིལ་འཁོར་དུ་རང་ཤར་བ་སྟེ། རྒྱས་པ་ལས། གཟུགས་བརྙན་དཀྱིལ་འཁོར་ཡང་དག་ནི། །ཆེན་པོ་རགས་པ་ཐབས་སུ་རྟོགས། །སོ་སོའི་མཚན་ཉིད་ཤེས་རབ་རྟོགས། །གཉིས་མེད་འབྲེལ་བ་ཐབས་ཆེན་ཡིན། །ཞེས་སོ། །གསུམ་པ་ལྷག་པ་གཟུགས་བརྙན་གྱི་དཀྱིལ་འཁོར་ནི། རྡོ་རྗེ་ལས་རིམ་ལས། ས་གཞི་མཉམ་དང་ཚད་ཐིག་དང་། །ཚོན་དང་བྲི་དང་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་
ཏན་ནོ། །ཞེས་དོན་བཅུ་ལས། དང་པོ་ས་གཞི་མཉམ་པ་ནི། དེ་ཉིད་ལས། གཞི་དང་རང་མཚན་བླང་དབང་དང་། །སྦྱང་བྱིན་བསྲུང་དང་བཟུང་བ་ནི། །དང་པོའི་ཉིང་ལག་ཉིད་དུ་བཤད། །ཅེས་སོ། །གཉིས་པ་ཚད་ནི། རྩ་རྒྱུད་དུ། དཀྱིལ་འཁོར་ཁྲུ་གང་ཚད་དུ་བྱ། །ཡང་ན་ལུས་གང་ཚད་དུ་སྟེ། །ཡང་ན་ལུས་ནི་གསུམ་གྱི་ཚད། །ཅེས་དང་། ཡང་ན་ཁྲུ་ནི་བཅུ་དྲུག་གམ། །ཉི་ཤུའམ་ཉི་ཤུ་རྩ་ལྔར་བྱ། །ཞེས་ལྷག་པ་གཟུགས་བརྙན་གྱི་དཀྱིལ་འཁོར་གྱི་ཚད་དངོས་བཤད་ནས། ཞར་བྱུང་ལྷག་ཏིང་གི་ཚད་ནི། ཡང་ན་རྒྱང་གྲགས་དཔག་ཚད་དམ། །ནམ་མཁའི་དབྱིངས་ནི་བསམ་ཡས་པར། །སངས་རྒྱས་དཀྱིལ་འཁོར་སྣ་ཚོགས་བསྒོམ། །ཞེས་སོ། །གསུམ་པ་ཐིག་ནི། འདི་ཉིད་ལས། རིག་པས་ཐིག་ནི་གདབ་པར་བྱ། །ཞེས་དང་། ཕུར་བུ་སྲད་བུ་ཚོན་ཕྱེ་དང་། །གོས་རྒྱན་མཛེས་པའི་ཡིད་འོང་གྲོགས། །ཐིག་གདབ་ཆོ་ག་ཕུན་སུམ་ཚོགས། །མཁས་ལྡན་ཆེན་པོས་བསྒྲིམས་ཏེ་བྱ། །ཞེས་སོ། །བཞི་པ་ཚོན་ནི། འདི་ཉིད་ལས། རིགས་ཀྱི་དཀྱིལ་འཁོར་ལྔ་རྣམས་བསྒོམ། །ཞེས་དང་། མ་མཐོང་རྨོངས་ལ་བསྟན་ཕྱིར་དང་། །ཁ་དོག་ཉི་ཤུ་རྩ་ལྔའམ། །ལྔ་ཡི་ཚོན་གྱིས་བྲི་བར་བྱ། །འདུལ་བའི་ཆོ་ག་བཞིན་དུ་དགྱེ། །ཞེས་སོ། །ལྔ་པ་བྲི་བ་ནི། ལྟེ་བ་རྩིབས་དང་ལྡན་པ་ཡི། །རྩིབས་བཞི་འཁོར་ལོ་མུ་ཁྱུད་བཅས། །གྲུ་ཆད་བཞི་དང་གྲུ་བཞི་པའི། །བར་ཁྱམས་སྒོ་ཁྱུད་ལྡན་པར་བྱ། །ཞེས་པ་ལྟར་དཀྱིལ་འཁོར་རྒྱས་འབྲིང་བསྡུས་གསུམ་གང་གིས་འདུལ་བའི་ཆོ་ག་བཞིན་དུ་བྲིའོ། །དྲུག་པ་རྣམ་པ་དགོད་པ་ནི། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་པའམ། ཡང་ན་གཙོ་འཁོར་གྱི་འགྲོས་སྦྱར་ཏེ། རྔམ་གློག་ལས། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་པ་དག་ལ་ཡིག་འབྲུས་སོ། །ཞེས་སོ། །བདུན་པ་རབ་གནས་ལ། ནུབ་གཉིས་པའི་ལས་རིམ་སྤྱིར་བཤད་པ་དང་། སྐབས་ཐོབ་ཀྱི་ལས་རིམ་དཀྱིལ་འཁོར་རབ་གནས་སོ། །དང་པོ་ནི། ཡན་ལག་གི་རབ་གནས། ལས་བུམ། རྡོར་དྲིལ། ཐོད་ཆུ། ཐིག་ཚོན་རབ་གནས་རྣམས་དང་། ཡན་ལག་ཅན་ལ། བུམ་པ། སློབ་མ། ལྷ་སྟ་གོན་གསུམ་གྱིས་བསྟན་ཏོ། །གཉིས་པ་ནི། ལས་ཁྲིགས་རྣམ་པ་དགུ་ལ་སོགས་པའི་སྒོ་ནས་
བྱ་བ་སྟེ། འདི་ཉིད་ལས། བཅོས་བུའི་རས་ནི་སྣ་ཚོགས་དང་། ཞེས་སོགས་དང་། ལུས་ངག་སེམས་དང་ཆོས་ཐམས་ཅད། །ཅེས་སོགས་འཁྲུགས་སྡེབས་ཀྱི་སྒོ་ནས་བསྟན་ཏོ། །བརྒྱད་པ་སྦྱིན་སྲེག་ནི། སྐབས་ཐོབ་ཀྱི་དབང་གིས་ལས་བཞི་སྟེ། འདི་ཉིད་ལས། དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བུས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་སོ། །དགུ་པ་དཀྱིལ་འཁོར་དུ་འཇུག་པ་ནི། སྒྲུབ་མཆོད་ལ་སོགས་པ་སྔོན་དུ་འགྲོ་བའི་སྒོ་ནས་དང་པོར་སློབ་དཔོན་རང་ཉིད་ཞུགས་རྗེས་སློབ་མ་དཀྱིལ་འཁོར་དུ་འཇུག་པར་བྱ་བ་སྟེ། འདི་ཉིད་ལས། ཀུན་བྱས་དབང་ཕྱུག་རིག་པས་འཇུག །དེ་ནས་སློབ་མ་གཞུག་པར་བྱ། །ཞེས་དང་། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །སྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡི་ཡན་ལག་རྫོགས་པར་འགྱུར། །ཞེས་སོ། །བཅུ་པ་ཞུགས་པའི་ཡོན་ཏན་ནི། བདེ་བ་ཆེན་པོའི་དཀྱིལ་འཁོར་ནི། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་དང་། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་སྔོན་དུ་མཐོང་བ་ཡིས། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་སོ། །བཞི་པ་ཏིང་ངེ་འཛིན་གྱི་དཀྱིལ་འཁོར་ནི། རང་བཞིན་གྱི་དཀྱིལ་འཁོར་ཉིད་ཏིང་ངེ་འཛིན་གྱི་ཡུལ་དུ་བྱས་ནས་རང་རིག་མ་བཅོས་པའི་དོན་ལ་མཉམ་པར་བཞག་པས་རྣམ་པར་མི་རྟོག་པའི་རང་རྩལ་ཡེ་ཤེས་ལྔར་འགག་པ་མེད་པར་འཆར་བ་སྟེ། འདི་ཉིད་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །ཞེས་སོགས་ཤོ་ལོ་ཀ་གཅིག་དང་། རྒྱས་པ་ལས། དེ་བཞིན་ཏིང་འཛིན་དཀྱིལ་འཁོར་གྱི། །ཐམས་ཅད་དབྱིངས་སུ་བསྡུས་ནས་ནི། །ཉིད་ཀྱི་ཐུགས་ལ་ཐིམ་བྱས་ཏེ། །ཐམས་ཅད་ཆོས་སྐུའི་ཕྱག་རྒྱ་ཆེ། །ཞེས་སོ། །ལྔ་པ་ལྷག་པ་ཏིང་ངེ་འཛིན་གྱི་
དཀྱིལ་འཁོར་ནི། ཁོག་གཞུང་ལས། ལྷག་པ་ཏིང་འཛིན་རྣམ་པ་གཉིས། །གདུལ་བའི་དོན་ཕྱིར་ཞི་ཁྲོ་སྟེ། །ཞེས་གསུངས་པ་ལྟར། ཐུགས་རྗེ་ཞི་བའི་དཀྱིལ་འཁོར་དང་། བདུད་འདུལ་ཁྲོ་བོའ་དཀྱིལ་འཁོར་གཉིས་ལས། ཞི་ཁྲོ་གཉིས་ཀ་ལ་མཚུངས་པར། སྔོན་འགྲོ་ལས་བདུན་སྔོན་དུ་འགྲོ་བས། དངོས་གཞི་ལ། ཞི་བ་དང་། ཁྲོ་བོ་གཉིས། དང་པོ་ནི། བདག་དང་མཐའ་ཡས་སོགས་ཀྱིས་ཁྱད་པར་གྱི་སྦྱོར་བ་སེམས་བསྐྱེད། ཆོས་ཐམས་ཅད་སྟོང་ཉིད་དེ་བཞིན་ཉིད་དུ་བསྒོམ་པ་དེ་ཏིང་། དེ་མ་རྟོགས་པ་རྣམས་ལ་དམིགས་མེད་ཀྱི་སྙིང་རྗེ་བསྒོམ་པ་ཀུན་ཏིང་། སྟོང་ཉིད་སྙིང་རྗེ་ཟུང་དུ་འཇུག་པའི་རང་རྩལ་རྒྱུའི་ཡི་གེ་ཨ་དཀར་པོར་བསྒོམ་པ་རྒྱུ་ཏིང་དང་། དེ་ལས་ཡི་གེ་ཕྲ་མོའ་འཕྲོ་འདུ་ལ་སེམས་སྦྱངས་ནས། འབྱུང་ལྔའི་ཞེན་རྟོག་སྦྱང་ཕྱིར་དབང་ཆེན་གྱི་དཀྱིལ་འཁོར་བསྐྱེད་པ་དང་། མ་དག་པ་སྣོད་ཀྱི་ཞེན་པ་སྦྱོང་ཕྱིར་ས་བོན་བྷྲཱུྃ་ལས་གཞལ་ཡས་ཁང་དང་། དེའི་ནང་དུ་བཅུད་ཀྱི་ཞེན་རྟོག་སྦྱང་ཕྱིར་བདག་སྲས་གཞན་སྲས་སམ། ཆོ་ག་གསུམ་བསྐྱེད་ལྟ་བུས་རྒྱལ་བའི་དཀྱིལ་འཁོར་གསལ་བཏབ་པ་ལ་རང་རིགས་ཀྱིས་དབང་བསྐུར་ཞིང་། སྐུ་གསུང་ཐུགས་རྡོ་རྗེར་བྱིན་གྱིས་བརླབ་པ་རྣམས་བྱ་སྟེ། དེའི་མཐར་སྙན་གསན་དབབ་ཅིང་སྤྱན་དྲང་བ། མེ་ཏོག་དོར་ཞིང་དབྱེར་མེད་དུ་བསྟིམ་པ། ཕྱག་མཆོད་བཤགས་པ་བྱ་བ། དངོས་གྲུབ་གསོལ་ཞིང་དམ་བཅའ་བ། འཛབ་ཁང་ཕྱེ་ནས་འཕྲོ་འདུ་གསུམ་གསལ་བས་འཛབ་བཟླས་སྐབས་ཀྱི་མཇུག་བསྡུ་དང་བཅས་བྱའོ། །གཉིས་པ་ནི། འཛིན་པའི་དབང་གིས་ཞེས་སོགས་ཀྱིས་ཁྱད་པར་གྱི་སྦྱོར་བ་ཏིང་ངེ་འཛིན་གྱི་ དགོས་ཆེད་བསྟན་པ ་སྔོན་དུ་འགྲོ་བས་དེ་ཏིང་དང་། ཀུན་ཏིང་གཉིས་ཀྱི་མཐར་རང་རིག་ཧཱུྃ་ལས་ཆོ་ག་གསུམ་གྱིས་རྒྱུའི་ཧེ་རུ་ཀར་བསྐྱེད་པ་རྒྱུ་ཏིང་སྟེ་ཏིང་འཛིན་རྣམ་གསུམ་དང་། དེའི་ཐུགས་ཀ་ནས་ས་བོན་སྤྲོས་ཏེ་འབྱུང་བ་རིམ་བརྩེགས་གཞལ་ཡས་ཁང་། བརྟེན་པ་ལྷའི་དཀྱིལ་འཁོར་དང་བཅས་བསྐྱེད་ཚུལ་ཆོ་ག་གཉིས་ལྟ་བུས་ཞི་བ་དང་འདྲ་བར་བསྒོམ་ཞིང་། དབང་བསྐུར། བྱིན་བརླབ། སྙན་གསན་དབབ་པ་སོགས་ལས་ཀྱི་རིམ་པའི་ཏིང་ངེ་འཛིན་རྣམས་ཞི་བ་དང་ཕྱོགས་མཚུངས་པར་བྱ་བའོ། །མཇུག་གི་ཆོ་ག་ནི། གོ་བགོ་ལུས་བསྲུང་གི་བར་
དོན་ལྔས་བསྟན་པ་བཞིན་ནོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ནི། སྤྱན་འགྲེལ་ལས། བྱང་སེམས་ཕྱི་ནང་གསང་བ་ཡང་། །གནས་བཞི་ཁམས་གསུམ་ཡེ་ཤེས་ཆེ། །ཞེས་པས། ཕྱི་བྱང་ཆུབ་ཀྱི་སེམས་རྩ་དང་རླུང་། ནང་བྱང་ཆུབ་ཀྱི་སེམས་ཐིག་ལེ། གསང་བ་བྱང་ཆུབ་ཀྱི་སེམས་བདེ་བའི་ཡེ་ཤེས་དང་གསུམ་མོ། །དང་པོ་ནི། སྒྱུ་འཕྲུལ་སྙིང་པོ་བཀོད་པའི་རྒྱུད་ལས། སྲིད་གསུམ་སེམས་ཅན་ཐམས་ཅད་ལ། །སྲོག་ཤིང་གསུམ་དང་འཁོར་ལོ་བཞི། །ཞེས་རྩ་དང་། རླུང་ལ། སྦྱང་གཞི་ཡེ་ཤེས་ཀྱི་རླུང་དང་། སྦྱང་བྱ་ལས་ཀྱི་རླུང་གཉིས། ཕྱི་མ་ལ་རྩ་བ་དང་ཡན་ལག་གིས་བསྡུས་པའི་རླུང་བཅུ། སྣར་རྒྱུ་བའི་རླུང་དང་བཅས་པའོ། །གཉིས་པ་ནི། སྙིང་ག་ན་སྲོག་མི་ཤིགས་པའི་ཐིག་ལེ་སོགས་ཡེ་ཤེས་ཀྱི་ཐིག་ལེ་དང་། རྣམ་ཤེས་ཀྱི་ཐིག་ལེ་དྭངས་སྙིགས་ལ་སོགས་པའོ། །གསུམ་པ་ནི། སྟེང་འོག་གི་སྒོ་ལ་བརྟེན་ནས་བདེ་ཆེན་གྱི་ཡེ་ཤེས་བསྐྱེད་པ་སྟེ། དགྱེས་རྡོར་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་ཉིད་དུ་བརྗོད། །ཅེས་སོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། ཞི་ཁྲོ་གཉིས་ཀ་ལ་ཚོམ་བུ་གཅིག་གསུམ་ལྔ་པ་གསུམ་སྟེ། ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། །ཚོམ་བུ་གཅིག་གསུམ་ལྔ་པའོ། །ཞེས་སོ། །བཞི་པ་དབང་ལའང་གསུམ་སྟེ་ངོ་བོ་ནི། ཐུགས་ཐིག་ལས། རྒྱུ་གཉིས་རྐྱེན་བཞིས་ཡན་ལག་བསྙད། །དྲུག་ལ་གནས་པའི་འཐོབ་བྱ་དེ། །ངོ་བོ་ཉིད་ཅེས་རྣམ་པ་བཤད། །ཅེས་པས་སྤྱིར་དབང་ལ་རྒྱུ་གཉིས་དང་རྐྱེན་བཞིའོ། །དང་པོ་ལ། མཚུངས་ལྡན་གྱི་རྒྱུ་ནི། དབང་གི་རྒྱུ་གདོད་མ་ནས་རང་ལ་རང་ཆས་སུ་བཞུགས་སོ། །ལྷན་ཅིག་བྱེད་རྒྱུ་ནི། དབང་རྫས་རབ་གནས་ཀྱི་བྱིན་གྱིས་རློབ་པ་ཅན་ནོ། །གཉིས་པ་ལ་རྒྱུའི་རྐྱེན་ནི། ཕན་ནུས་ཟབ་མོའ་དབང་གསུམ་བསྐུར་དུ་རུང་བའི་སྣོད་ལྡན་གྱི་སློབ་མའོ། །བདག་པོའི་རྐྱེན་ནི། དབང་གསུམ་བསྐུར་ནུས་པའི་རྡོ་རྗེ་སློབ་དཔོན་ཚད་ལྡན་ནོ། །དམིགས་པའི་རྐྱེན་ནི། རྫས་སྔགས་ཏིང་འཛིན་གསུམ་འཛོམ་པའི་ནུས་པ་ཁྱད་པར་ཅན་ནོ། །དེ་མ་ཐག་རྐྱེན་ནི། དབང་སྔ་མས་གོ་ཕྱེ་ནས་
ཕྱི་མ་འབྱུང་བའོ། །དེ་ལྟར་རྒྱུ་གཉིས་རྐྱེན་བཞི་སྟེ། དྲུག་པོ་ཚོགས་པ་ལ་བརྟེན་ནས་གོ་འཕང་གི་ཆོས་དབང་གི་ཡེ་ཤེས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ་ནི་དབང་གི་ངོ་བོའོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན། ཨ་བྷི་ནི་མངོན་པ། ཥིཉྩ་ནི་གཏོར་བའམ་བླུགས་པ་སྟེ། དབང་གིས་སྒོ་གསུམ་གྱི་དྲི་མ་འཁྲུད་པའི་ཆ་ནས་མངོན་པར་གཏོར་བ་དང་། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་རྒྱུད་ལ་འཇོག་པའི་ཆ་ནས་མངོན་པར་བླུགས་པ འི་དོན་གྱིས་ན་དབང་ངོ་། །དབྱེ་ན། སྤྱིར་གཞི་དང་། ལམ་དང་། འབྲས་བུའི་དབང་གསུམ་དུ་འགྱུར་བ་ལས། དང་པོ་ནི། རྩ་རྒྱུད་དུ། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་དང་། ཁོག་གཞུང་ལས། དད་དང་བརྩོན་འགྲུས་གསུམ་ལྡན་དང་། །བརྟུལ་ཞུགས་གསུམ་ལྡན་སློབ་མ་ལ། །ཞེས་པས་གང་ཟག་རིམ་གཉིས་ཀྱི་ལམ་ཉམས་སུ་ལེན་པར་མི་ནུས་ན་ཡང་དད་པ་ཅན་ལ་ཕན་དབང་ཙམ་བསྐུར་བ་དང་། དེའི་སྟེང་དུ་ནུས་དབང་ལྔ་ལས། རྒྱུད་ལ་ཐོས་བསམ་བྱེད་ནུས་ཀྱི་གང་ཟག་ལ་ཉན་དབང་། བསྐྱེད་རིམ་གྱི་ལམ་རྣམས་དང་རྫོགས་རིམ་རྗེས་མཐུན་ཙམ་ཉམས་སུ་ལེན་ནུས་ལ་སྒོམ་དབང་སྟེ་བདག་དོན་ནུས་པའི་བརྩོན་འགྲུས་ཅན་དང་། དེའི་སྟེང་དུ་ཞི་རྒྱས་སོགས་ཕྲིན་ལས་ཀྱི་སྦྱོར་བས་གཞན་དོན་བྱེད་ནུས་ལ་ཕྲིན་ལས་ཀྱི་དབང་དང་། རྒྱུད་འཆད་ནུས་ལ་འཆད་དབང་སྟེ་གཞན་དོན་ནུས་པའི་བརྩོན་འགྲུས་ཅན་དང་། དེའི་སྟེང་དུ་རབ་གནས་དང་སློབ་མ་ལ་དབང་བསྐུར་བ་སོགས་རྡོ་རྗེ་སློབ་དཔོན་མཆོག་ཏུ་འོས་པ་རང་གཞན་གཉིས་ཀའི་དོན་ནུས་པ་རྣམས་ལ་བདག་པོའི་དབང་སྟེ་ནུས་དབང་ལྔ། སྤྱོད་རིགས་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའ་དབང་གསུམ་བསྐུར་བ་ལྟ་བུ་སྟེ་སྤྱིར་བཞག་པ་ཡིན་ལ། དོན་དུ་ན། ཁྱད་པར་ཅན་གྱི་ལམ་འདི་སོགས་ལ་སྔོན་དུ་མ་ཞུགས་པ་གཅིག་དང་པོར་དཀྱིལ་འཁོར་དུ་བཅུག་ནས་དབང་གིས་སྨིན་པར་བྱེད་པའོ། །གཉིས་པ་ནི། སྔོན་དུ་དབང་ཐོབ་བསྐྱེད་རྫོགས་གང་རུང་གི་ལམ་ཉམས་སུ་ལེན་
བཞིན་པའི་གང་ཟག་ལྟ་བུ་ལམ་ཞུགས་གཅིག་ལ། དེའི་རྒྱུད་ཀྱི་སྔགས་སྡོམ་ཇེ་དག་ཇེ་བཟང་དུ་འགྱུར་བ་ལ་སོགས་པའི་ཆེད་དུ་བླ་མ་རྡོ་རྗེ་སློབ་དཔོན་གྱིས་དཀྱིལ་འཁོར་དུ་བཅུག་སྟེ་དབང་བསྐུར་བའམ། རང་ཉིད་ཀྱིས་བདག་འཇུག་བྱེད་པ་ལྟ་བུ་ནི་ལམ་དབང་སྟེ། དོན་དུ་ན་ཐེག་པ་མཆོག་གི་ལམ་ལ་བགྲོད་བཞིན་པའི་གང་ཟག་གིས་བླ་མའི་བདག་འཇུག་གང་རུང་ལས་དབང་ལེན་པའོ། །གསུམ་པ་ནི། ཕ་རོལ་ཏུ་ཕྱིན་པའི་ལམ་གྱིས་བསྒྲུབ་པའི་མི་སློབ་ལམ་དང་། སྔགས་རང་ལུགས་ཀྱི་མཐར་ལམ་ལྷུན་གྲུབ་རིག་འཛིན་གྱི་ས་ལ་བཞུགས་པའི་གང་ཟག་རྣམས་ལ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ཆེན་པོར། སྟོན་པ་ལོངས་སྤྱོད་རྫོགས་པ་རིགས་དྲུག་པ་དཔལ་ཀུན་ཏུ་བཟང་པོས་ནང་གི་མངོན་བྱང་ལ་བརྟེན་ནས་གསང་བ་ཟབ་མོའ་དབང་གསུམ་བསྐུར་བས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱངས་ནས་རང་གི་ཡེ་ཤེས་ཇི་ལྟ་བ་མངོན་དུ་བྱེད་པའི་སྒོ་ནས་སྟོན་འཁོར་དགོངས་པར་དབྱེར་མེད་དུ་སྒྲུབ་པ་ནི་འབྲས་དབང་སྟེ། དོན་དུ་ན། སྟོན་པ་རྫོགས་པའི་སངས་རྒྱས་ཀྱིས་རྒྱུན་མཐའི་བྱང་སེམས་ལ་འོག་མིན་དུ་དབང་བསྐུར་བའོ། །བྱེ་བྲག་ཏུ་དབྱེ་ན། རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་པས་བཞིར་གསུངས་ཤིང་། དེ་ལས་ཀྱང་བུམ་དབང་ལ་ཕན་ནུས་གཉིས་སུ་ཕྱེ་བས་ལྔར་འགྱུར་ཏེ། རྡོ་རྗེ་ལས། དང་པོ་ས་བོན་འཇོག་པ་སྟེ། གཉིས་པ་ནུས་པ་བསྐྱེད་པ་ཡིན། །གསུམ་པ་ཉམས་མྱོང་བསྐྱེད་པའོ། །བཞི་པས་དེ་ཉིད་བརྟན་པར་བྱེད། །ལྔ་པས་བརྟན་པ་ཉམས་ལོན་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་པས། དང་པོ་ཕན་དབང་གི་སྣོད་རུང་དུ་སྨིན་པར་བྱེད་པའི་སྒོ་ནས་འདི་ཕྱི་གང་རུང་དུ་བསྐྱེད་རྫོགས་ཀྱི་ལམ་ལ་འཇུག་པའི་སྐལ་ལྡན་དུ་བྱེད་པའི་ས་བོན་གསོས་འདེབས་པ་དང་། གཉིས་པ་ནུས་དབང་གིས་ད་ལྟ་ནས་རང་གཞན་གྱི་དོན་བྱེད་པའི་ནུས་པ་བསྐྱེད་པ་དང་། གསུམ་པ་གསང་དབང་གིས་བདེ་ཆེན་གྱི་ཁྱད་པར་དུ་བྱས་པའི་ཉམས་མྱོང་བསྐྱེད་པ་དང་། བཞི་པ་ཡེ་ཤེས་རང་གནས་ཀྱིས་ཁམས་འཛིན་འགྲེམ་ལ་སོགས་པའི་སྒོ་ནས་དེ་ཉིད་བརྟན་པར་བྱེད་པ་དང་། ལྔ་པ་བདེ་བ་ཆེན་པོས་བརྟན་པ་དེའི་དོན་ཉམས་
སུ་ལེན་ཏེ་རང་བཞིན་ལྷན་ཅིག་སྐྱེས་པའི་ཡེ་ཤེས་སུ་ལ་བཟླ་བར་བྱེད་པའོ། །དེ་ཡང་ཞི་བ་ལ་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད། དེ་ལ་ཕན་དབང་བཅུ་ནི། སྡོམ་ཚིག་ཏུ་བྱེད་ན། སྙིང་པོ་ལྔ་དང་དབུ་རྒྱན་དང་། །བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །ཞེས་སོ། །ནུས་དབང་ལྔ་ནི། ཉན་དབང་། བསྒོམ་དབང་། ཕྲིན་ལས་ཀྱི་དབང་། འཆད་དབང་། རྡོ་རྗེ་རྒྱལ་པོ་བཀའ་རབ་འབྱམས་ཏེ་ལྔའོ། །ཟབ་དབང་གསུམ་ནི། གསང་དབང་། ཡེ་ཤེས་རང་གནས། བདེ་བ་ཆེན་པོའི་དབང་དང་གསུམ་མོ། །ཁྲོ་བོ་ལ། གདན་དང་ལྷ་དབང་ཕྱག་མཚན་དང་། ཆས་བཅུ་སྒྲུབ་རྫས་བཅོ་ལྔ་སྟེ། ཞེས་པ་ལྟར་ཕན་དབང་ལ་ཉེར་བརྒྱད་དུ་ཕྱེ་བས་སུམ་ཅུ་རྩ་དྲུག་སྟེ། ཐུགས་ཐིག་ལས། བསྒྱུར་བ་ལྔ་ལ་སུམ་ཅུ་དྲུག །ཅེས་སོ། །ལྔ་པ་དམ་ཚིག་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་པས་གང་བསྲུང་བྱའི་དོན་ཁྱད་པར་ཅན་ནི་འོག་ཏུ་འབྱུང་བའི་རྩ་བ་དང་ཡན་ལག་གི་དམ་ཚིག་རྣམས་ཡིན་ལ། དེ་དག་ལས་ནམ་ཡང་མི་འདའ་བར་སྡོམ་པར་བྱེད་པའི་སེམས་དཔའ་རྒྱུན་ཆགས་དང་། གཉིད་དང་སེམས་ཡེངས་པ་ལ་སོགས་པའི་གནས་སྐབས་སུ་ཡང་ཚིག་སྡོམ་པའི་ས་བོན་དང་བཅས་པའོ། །ངེས་ཚིག་ནི། ས་མ་ཡའི་སྒྲ་ལས་དྲངས་ན། ས་མ་ཡ་ནི་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་སྟེ། སྔོན་རང་གིས་ཇི་ལྟར་དམ་བཅས་པ་ལས་འདའ་བར་བྱ་བ་མིན་པའི་ཕྱིར་དམ་ཚིག་གོ །དེ་ལྟར་ཡང་། ཇི་སྐད་དུ། དམ་པ་སྐུ་གསུང་ཐུགས་ཡིན་ཏེ། །དེ་ལས་འདས་ན་ཚིག་པར་འགྱུར། །ཞེས་སོ། །དབྱེ་ན། རྩ་བའི་དམ་ཚིག་ལྔ། ཡན་ལག་གི་དམ་ཚིག་ལྔ་ཚན་གཉིས། སྤྲོ་ན་སུམ་བརྒྱ་དྲུག་ཅུར་དབྱེ་བ་དང་གསུམ་མོ། །དང་པོ་ནི། འདི་ཉིད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །སྒྲུབ་དང་བསྲུང་བའི་དམ་ཚིག་མཆོག །ཅེས་པ་ལྟར་ལྔ་ལས། དང་པོ་
བླ་མེད་མི་སྤང་བ་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པ་བདེན་གཉིས་མི་སྤང་བ་སྟེ། ཇི་ལྟར་མི་སྤང་ན། ལྷག་པའི་བདེན་གཉིས་དབྱེར་མེད་དུ་རྟོགས་ནས་སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཟོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །གཉིས་པ་བླ་མ་བཀུར་བ་ནི། སྔ་མ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་དྲུག ། ཅེས་པ་ལྟར་སློབ་དཔོན་དྲུག་པོ་བཀུར་ཐབས་དྲུག་གི་སྒོ་ནས་བཀུར་ཏེ། སྔ་མ་ལས། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་བསྟན་ཏེ། །ཞེས་སོ། ཁྱད་པར་དུ་ཡང་། དབང་བསྐུར། རྒྱུད་བཤད། མན་ངག་ནོད་པ་གསུམ་ནི་ལྷག་པར་ཡང་བཀུར་བའི་ཡུལ་ཏེ། བདེ་འདུས་ཞི་རྒྱུད་ལས། རྒྱུད་འགྲོལ་དབང་བསྐུར་དེ་ཉིད་བསྟན། །ཞེས་སོ། །གསུམ་པ་སྔགས་རྒྱ་རྒྱུན་མི་བཅད་པ་ནི། ཡུལ་སྔགས་གསུམ་དང་ཕྱག་རྒྱ་བཞི་སྟེ། དེ་དག་ཉམས་སུ་ལེན་ཚུལ་ནི། གསལ་བཀྲ་ལས། རབ་ཀྱི་ཆུ་བོའ་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞིའི་བར་དུ་མི་བཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བཙོན་པས་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའ་འོ། །ཞེས་སོ། །བཞི་པ་མཆེད་ལ་བྱམས་པ་ནི། སྔ་མ་ལས། མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མེད་དང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནི། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་
པ། །ཞེས་སོ། །དེས་མཚོན་པའི་རྡོ་རྗེའི་མཆེད་རྣམས་དང་བྱང་ཆུབ་བར་དུ་མི་འབྲལ་བའི་ལྷག་བསམ་རྒྱུན་མི་ཆད་པར་བྱེད་པའོ། །ལྔ་པ་གསང་བ་མི་སྨྲ་བ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་གང་ལ་གསང་བྱའི་ཡུལ་བསྟན་ནས། གང་གསང་ན། དེ་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་པས། སྤྱིར་གསང་བཞི། བར་གསང་བཞི། གསང་བར་འོས་པ། གསང་བ་གཉེར་གཏད་པ་རྣམས་སོ། །ཇི་ལྟར་གསང་ན། སྤྱིར་གསང་བཞི་ལས་ལྟ་ཟབ་ནི་ཐེག་དམན་སོགས་བློ་འཕང་དམའ་བ་རྣམས་དང་། སྤྱོད་པ་ནི་མ་འདྲེས་པ་ཐམས་ཅད་ལ་གསང་། ཡི་དམ་གྱི་ལྷ་སྔགས་དང་གྲུབ་རྟགས་ནི་མ་འདྲེས་པ་ལ་བསྟན་ན་དམ་ཚིག་ཉམས་ཤིང་། འདྲེས་པ་ལ་བསྟན་ན་ཡང་དངོས་གྲུབ་ཉམས་པར་འགྱུར་བས་གསང་བར་བྱའོ། །བར་གསང་བཞི་ནི། སྒྲུབ་པ་ཇི་ཙམ་བྱེད་པའི་བར་དེ་ཉིད་དུ་གསང་ངོ་། །གསང་བར་འོས་པ་ནི། གང་མཐོང་བ་ལས་མ་དད་པར་འགྱུར་བ་ལ་སོགས་པའི་ཆ་ཐམས་ཅད་དོ། །གསང་བ་གཉེར་གཏད་པ་ནི། སློབ་དཔོན་དང་མཆེད་ཀྱིས་གསང་བར་གདམས་པ་རྣམས་སོ། །གཉིས་པ་ལ་མི་སྤང་བ་ལྔ་དང་། མི་འདོར་བ་ལྔའོ། །དང་པོ་ནི། འདི་ཉིད་ལས། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་པ་ལྟར་ལྔ་ཡིན་ལ། དེ་ལ་དབྱེ་ན་བསལ་བཀྲ་ལས། མི་སྤང་དམ་ཚིག་བཤད་བྱ་བ། །ཡང་དག་དུག་ལྔ་ལོག་དུག་ལྔ། །ཞེས་ཡང་ལོག་གཉིས་གཉིས་སོ། །གཉིས་པ་ནི། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་སོ། །གསུམ་པ་ནི། འདི་ཉིད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་པས་རྩ་བའི་དམ་ཚིག་ལྔ་པོ་རེ་རེ་ལ་ཐབས་ཤེས་གཉིས་གཉིས་སུ་ཕྱེ་བས་བཅུ་དང་། ཡང་རྩ་བ་ལྔ་པོ་རེ་རེ་ལ་སུམ་ཅུ་རེར་ཕྱེ་བས་ཆིག་བརྒྱ་ལྔ་བཅུ་སྟེ། སྔར་གྱི་བཅུ་དང་བསྡོམས་པས་བརྒྱ་དྲུག་ཅུའོ། །ཡན་ལག་གི་དམ་ཚིག་བཅུ་པོ་རེ་རེ་ལ་ཉི་ཤུ་ཉི་ཤུར་ཕྱེ་བས་ཉིས་བརྒྱ་
སྟེ། སྔར་གྱི་བརྒྱ་དྲུག་ཅུ་དང་བསྡོམས་པས་སུམ་བརྒྱ་དྲུག་ཅུའོ། །དེ་དག་གི་རྣམ་བཞག་རྒྱས་པར་ཕྲ་རྒྱས་ལས་ཤེས་པར་བྱའོ། །དྲུག་པ་ཕྲིན་ལས་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ཞེས་པས། སེམས་ཅན་ཐམས་ཅད་རང་གི་ཕ་མར་ཤེས་པའི་བྱམས་པ། དེ་དག་རིགས་དྲུག་གི་གནས་ན་སྡུག་བསྔལ་གྱི་ཡོ་ལང་ལ་སྤྱོད་པ་སྙིང་རྗེ། སེམས་ཅན་འགའ་ཞིག་ལྷ་མིའི་འདོད་ཡོན་གྱིས་འབྱོར་པ་སོགས་བདེ་བར་གནས་པ་ལ་དགའ་བ། ཉེ་རིང་ཆགས་སྡང་དང་བྲལ་བའི་བཏང་སྙོམས་ཏེ། དེ་ལྟ་བུའི་ཚད་མེད་པ་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་། འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་གཙོ་བོར་གཞན་དོན་སྒྲུབ་པ་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨ་ཞེས་པའི་སྒྲ་ལས་ལུས་ངག་ཡིད་གསུམ་སྟེ་སྒོ་གསུམ་གྱིས་བསྡུས་པའི་བྱ་བའི་མཚན་ཉིད་ཅན་ནི་ལས་དེ་བྱེད་པ་པོར་འདོད་པའོ། །དབྱེ་ན། ཕྱི་མ་འགོས་འགྱུར་ལས། ཞི་བ་ལ་སོགས་རབ་དབྱེ་བས། །ལས་ནི་རྣམ་པ་བཞིར་བསྡུས་སོ། །ཞེས་པས་ནད་གདོན་སོགས་མི་མཐུན་ཕྱོགས་ཞི་བ་དང་། ཚེ་དཔལ་སོགས་མཐུན་ཕྱོགས་རྒྱས་པ་དང་། ལོག་ལྟ་ཅན་དབང་དུ་བསྡུ་བ་དང་། གདུག་པ་ཅན་ཚར་གཅོད་པ་དྲག་པོའི་ཕྲིན་ལས་ཏེ་བཞིའོ། །དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ་ནི། མེ་དང་། རྫས་དང་། ལུ་གུ་རྒྱུད་དང་། མཆོད་རྟེན་དང་། ཕྱག་རྒྱའི་སྒོ་ནས་བྱ་བ་རྣམས་ཏེ། ཁོག་གཞུང་ལས། བདག་གཞན་དོན་སྒྲུབ་ཕྲིན་ལས་ནི། །མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་སོ། །དེ་ལ་མེའི་སྒོ་ནས་ལས་བྱ་བ་ནི། སྦྱིན་སྲེག་རྩ་བ་ལས། གནས་རྫས་ཐབ་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་བུ་ལྷ་དུས་ལས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཞེས་པ་ལྟར་ལས་བཞི་ཀ་ལ་དོན་ཚན་བཅུ་གཅིག་གི་སྒོ་ནས་སྟོན་ཅིང་། འདི་ཉིད་ལས། འབར་བ་གཏུམ་ཆེན་རྔམས་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །ཅེས་སོགས་ཕྲིན་ལས་བཞི་སོ་སོ་ལ་མེའི་སྒོ་ནས་ལས་བྱ་ཚུལ་ཕན་ཡོན་དང་
བཅས་བསྟན་ཏོ། །གཉིས་པ་རྫས་ཀྱི་སྒོ་ནས་ལས་བྱ་བ་ནི། ལིངྒ་བཅའ་བ། དཀྱིལ་འཁོར་བསྐྱེད་པ། བསྒྲུབ་བྱའི་ལས། མཆོད་སྦྱིན་བྱ་བ་ཡོན་ཏན་དང་བཅས་པ་སྟེ། བདུད་རྩི་ལྔའམ་ཟས་ལྔ་ལ། །མཚན་མ་མིང་དུ་བཅས་པར་བྱ། །བཀུག་ནས་རྡོ་རྗེ་ཕུར་བུས་གདབ། །རྡུལ་དུ་བྱས་ནས་ཚོགས་ལ་དབུལ། །ཞེས་སོ། །གསུམ་པ་ལུ་གུ་རྒྱུད་ཀྱི་སྒོ་ནས་ལས་བྱ་བ་ནི། བྲོའི་སྒོ་ནས་ཕྲིན་ལས་བཞི་སྒྲུབ་པ་སྟེ། ཨེ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྦྲེལ་བསྡམས་ནས། །བཅིངས་གྱུར་སྤྱོད་ནས་ཕྱོགས་བཅུར་གཡོ། །མྱོས་ནས་གས་ཏེ་འཚིག་པར་འགྱུར། །ཞེས་པ་ལ་སོགས་པས་ཕྲིན་ལས་བཞི་སོ་སོའ་བྲོ་ཕན་ཡོན་དང་བཅས་པ་དང་། ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཞེས་སོགས་ཀྱིས་སྤྱིར་བསྟན་ཏོ། །བཞི་པ་མཆོད་རྟེན་གྱི་སྒོ་ནས་ལས་བྱ་བ་ནི། བདག་ཉིད་ཞི་བའི་ལས་ལ་རྣམ་སྣང་། རྒྱས་པར་རིན་འབྱུང་། དབང་ལ་རྟ་མགྲིན། དྲག་པོ་ལ་བཛྲ་ཧེ་རུ་ཀར་བསྐྱེད་ནས་རིགས་སོ་སོའ་སྔགས་ཀྱིས་མཆོད་རྟེན་དཀར་པོ་ཟླུམ་པོ་སོགས་ལས་མཐུན་དུ་བཏབ་པའི་བུམ་ནང་དུ། རིགས་མཐུན་གྱི་ལྷ་བསྐྱེད། དེའི་འོད་ཀྱིས་བསྒྲུབ་བྱ་གང་ཡིན་བཀུག་ནས་མཆོད་རྟེན་གྱི་འོག་ཏུ་གནས་པ་ལ། འོད་དེས་རེག་པས་ཞི་རྒྱས་དབང་དྲག་གི་ལས་གང་ཡིན་འགྲུབ་པར་བསམ་པ་སྟེ། རྒྱས་པ་ལས། དྲག་པོ་གཏུམ་པོ་འདུལ་བའི་ཕྱིར། །བདག་ཉིད་དྲག་པོར་བསྒོམས་ནས་ནི། །ཆོས་སྐུ་ནག་པོ་འོད་འབར་གྱིས། །བགེགས་ཀྱི་ལིངྒ་མནན་པར་བྱ། །ཞེས་སོགས་སོ། །དེ་ལྟར་ས་ལ་དངོས་སུ་འདེབས་པའམ། ཏིང་ངེ་འཛིན་གྱིས་འབྱུང་བ་གཞན་ལ་འདེབས་པའང་རུང་སྟེ། སྤྱན་འགྲེལ་ལས། མཆོད་རྟེན་འབྱུང་བ་གང་ལ་འདེབས་ཀྱང་། ཞེས་དང་། འཇིམ་པ་ལ་དངོས་སུ་མི་འདོད་པའང་མིན་ཏེ། ཞེས་སོ། །ཡང་ན་རྒྱུད་ཕྱི་མ་ལས་གསུངས་པ་བཞིན་དངོས་སུ་བཞེངས་ནས་ཐབ་ཁུང་དུ་བྱས་ཏེ་ལས་བཞིའི་སྦྱིན་སྲེག་བྱ་བར་ཡང་བཤད་དོ། །ལྔ་པ་ཕྱག་རྒྱའི་སྒོ་ནས་ལས་བྱ་བ་ལ། ཕྱག་རྒྱ་བཅའ་བའི་སྒོ་ནས་དང་། བསྒྱུར་བའི་སྒོ་ནས་ལས་བྱ་བའོ། །དང་པོ་ནི་དཔལ་ཧེ་རུ་ཀའི་ལས་བཞིའི་ཕྱག་རྒྱ་བཅའ་བ་སྟེ། རྒྱས་པ་ལས། ཡན་ལག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །
ལས་རྣམས་སོ་སོར་རབ་ཏུ་སྒོམ། །ཞེས་སོ། །གཉིས་པ་ནི། རྒྱས་པ་ལས། རྡོ་རྗེ་ལན་གསུམ་གསོར་བ་ཡིས། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །ཞེས་ཀུན་བཟང་ཡབ་ཡུམ་ཁྲོས་པའི་སྐུར་བསྐྱེད་ལ། གཟུངས་མ་དམ་ཅན་དབང་དུ་བྱ་བ་དང་། དེ་བཞིན་དུ་རིགས་ཀྱི་ཧེ་རུ་ཀ་བཞིར་བསྐྱེད་ནས་སོ་སོའ་ཕྱག་རྒྱ་བསྒྱུར་བས་ལས་བཞི་སྒྲུབ་པའོ། །བདུན་པ་སྒྲུབ་པ་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ཁ་ཆེའི་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་པ་ལྟར་ཐབས་ཁྱད་པར་ཅན་བསྐྱེད་རིམ་གྱིས་བསྒྲུབ་བྱ་ཐུན་མོང་དང་། ཐབས་ཁྱད་པར་ཅན་རྫོགས་རིམ་གྱིས་བསྒྲུབ་བྱ་མཆོག་གི་དངོས་གྲུབ་སྟེ། དེ་ལྟར་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ལས་གང་འདོད་དོན་དུ་གཉེར་བ་ཞིག་གོ །ངེས་ཚིག་ནི། སིདྡྷིའི་སྒྲ་ལས་དྲངས་ན་དངོས་གྲུབ་སྟེ་བསྒྲུབ་བྱ་དང་། སཱ་དྷ་ནའི་སྒྲ་ལས། ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་ཞེས་བྱའོ། །དབྱེ་ན། ཐུན་མོང་དང་། མཆོག་གི་སྒྲུབ་པའོ། །དང་པོ་ལ། བཤད་རྒྱུད་རྒྱས་པའི་ལེའུ་སོ་སོས་བསྟན་ཚུལ་གྱིས་སྤྱིར་བསྟན་པ་དང་། དེ་དག་རྩ་གཞུང་གི་བཤད་ཚུལ་དང་སྦྱར་ཏེ་བྱེ་བྲག་ཏུ་བཤད་པ་གཉིས། དང་པོ་ནི། ཁོག་གཞུང་ལས། རོ་ལངས་ཚེ་དང་པྲ་སྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་སྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་སྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་པས། རོ་ལངས་ཏེ་རྡོ་རྗེ་ཞིང་ཆེན་སྒྲུབ་པ་ལེའུ་བདུན་ཅུ་པ། ཚེ་སྒྲུབ་པ་ཞི་ཁྲོ་གཉིས་སོགས་ཆོ་ག་དང་བཅས་པའི་སྒོ་ནས་སྒྲུབ་ཚུལ་དྲུག་ཅུ་རེ་བཞི་པ། པྲ་སེ་ན་དབབ་པ་ལེའུ་དྲུག་ཅུ་རེ་ལྔ་པ། ལྷ་ཆེན་པོ་མ་ཧཱ་དེ་ཝ་སྒྲུབ་པ་དང་རྒྱལ་པོ་ཆེན་པོ་སྡེ་བཞི་སྒྲུབ་པ་དྲུག་ཅུ་རེ་དྲུག་པ། གནོད་བྱེད་གདུག་པའི་ཀླུ་གདོན་འདུལ་བ་བཞི་བཅུ་
ཞེ་དྲུག་པ། རྒྱལ་པོ་དང་བློན་པོའི་ཆུང་མ་དབང་དུ་བྱ་བ་གཉིས་བཞི་བཅུ་ཞེ་ལྔ་པ། ཡུལ་ཁམས་དབང་དུ་བྱ་བ་སུམ་ཅུ་སོ་བརྒྱད་པ། ལྕེ་སྤྱང་ཞེས་བྱ་བ་རྡོ་རྗེ་རིགས་ཀྱི་རྐང་མགྱོགས་བྱེ་བྲག་ཏུ་སྟོན་པ་བཞི་བཅུ་ཞེ་གཅིག་པ། རྐང་མགྱོགས་ཀྱི་དངོས་གྲུབ་སྤྱིར་སྒྲུབ་པ་དང་། དགྲ་བགེགས་སོགས་ཡུལ་གཞན་དུ་བསྐྲད་པ་དང་། མི་སྣང་བའི་གཟུགས་སྒྲུབ་པ་དང་། ལྷ་མོ་དང་ཀླུ་མོ་ཕྱག་རྒྱར་འགུག་ཅིང་དབང་དུ་བྱ་བ་རྣམས་སུམ་ཅུ་སོ་བརྒྱད་པ། རྒྱལ་པོ་དང་བློན་པོ་སྒྲུབ་པ། དམག་དཔོན་མཐུ་ཆེན་དང་ཞང་བློན་སྒྲུབ་པ་རྣམས་བཞི་བཅུ་ཞེ་གཅིག་པ་རྣམས་ཀྱིས་བསྟན་ཏེ། ལས་དེ་རྣམས་ཀྱིས་རང་འབྲས་མཆོག་གི་འབྲས་བུ་མངོན་དུ་བྱེད་མི་ནུས་པའི་རྒྱུ་མཚན་གྱིས་ཚེ་འདིའི་ཆེད་ཕྱིར་འཇིག་རྟེན་པ་ཞེས་ཐུན་མོང་གི་སྒྲུབ་པར་བསྟན་ཏོ། །གཉིས་པ་ལ། ཡོན་ཏན་འབྱུང་བའི་དངོས་གྲུབ་དྲུག འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་བརྒྱད་དོ། །དང་པོ་ནི། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱོང་། །ཅི་ཡང་གཞན་དུ་འགྱུར་བ་འགྲུབ། །ཅེས་པས། ཟས་དུག་ཅན་ལ་ཡི་གེ་བཀོད་དེ་འཇུ་འདུལ་གྱི་ལས་ཀྱིས་སྨན་མཆོག་བདུད་རྩིར་འགྱུར་བ་ལ་སོགས་པ་ཡི་གེའི་འཕྲོ་འདུས་ནད་ཞི་བ་སོགས་དེ་ཐམས་ཅད་འགྲུབ་པའོ། །གཉིས་པ་ནི། ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྟུང་བར་འགྱུར། །ཞེས་པས་ནམ་མཁའ་ལ་ཧཱུྃ་ཞེས་རྡོ་རྗེའི་སྐས་བསམ་ན་མངོན་སུམ་དུ་འབྱུང་བ་ལ་སོགས་པ་དང་། གཞན་ཡང་འབྱུང་བ་ལ་ཐོགས་པ་མེད་པའི་རྫུ་འཕྲུལ་སྟོན་པར་ནུས་པ་སྟེ། རྒྱས་པའི་སོ་བརྒྱད་པ་ལས། མི་གནས་ནམ་མཁའི་མཐའ་ཀླས་པར། །གོམས་པར་འདོད་པས་འགྲོ་བ་དང་། །ཆུ་ལ་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚངས་པའི་རླུང་གིས་བཏེག་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་འགྱུར། །ཞེས་སོ། །གསུམ་པ་ནི། དགུག་དང་བཏང་དང་བཅིང་དང་དགྲོལ། །གསོ་དང་བསད་དང་ཕམ་དང་རྒྱལ། །ཏིང་འཛིན་འདི་ཡིས་བྱེད་པར་འགྱུར། །
ཞེས་སོ། །གཉིས་པ་མཆོག་གི་སྒྲུབ་པ་ལ། བཤད་རྒྱུད་ལས་བསྟན་ཚུལ་དང་། མཆོག་གི་དངོས་གྲུབ་སྤྱིར་བཤད་པ་གཉིས། དང་པོ་ནི། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་པས། ཡི་གེ་སྒྱུ་འཕྲུལ་ནི་རྩ་བའི་རྒྱུད་ཀྱི་ལེའུ་བཞི་པ་ལ་སོགས་པས་བསྟན། ཚོམ་བུ་ཚོགས་ཀྱི་སྒྲུབ་པ་དེའི་ལེའུ་བཅུ་གཅིག་པ་དང་བཅུ་གཉིས་པ་ལ་སོགས་པས་བསྟན། རྒྱས་པའི་ལེའུ་ཉེར་གཉིས་པར་རྡོར་སེམས་ཕྱག་རྒྱ་གཅིག་པའི་སྒྲུབ་པ་དང་། དོན་བཞི་པས་རྡོ་རྗེ་སེམས་དཔའ་ཞལ་མཐོང་གི་ལེའུ་བསྟན། ལེའུ་བཞི་བཅུ་པར་བདུད་རྩི་སྨན་གྱི་སྒྲུབ་པ་དང་། ལེའུ་སོ་དགུ་པར་དེ་བཞིན་གཤེགས་པ་རིགས་ལྔ། ཞེ་གཉིས་པར་ཡུམ་ལྔ། ཞེ་བཞི་པར་སེམས་དཔའ་སྒྲུབ་ཅིང་བྱིན་དབབ་པ་རྣམས་བསྟན་ཏེ། རང་གི་འདོད་འབྲས་མཐར་ཐུག་གི་དོན་གཙོ་ཆེ་བའི་དབང་དུ་བྱས་ནས་མཆོག་གི་དངོས་གྲུབ་ཅེས་བྱའོ། །གཉིས་པ་ལ། བསྟན་བཤད་གཉིས་ལས། དང་པོ་ནི། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །གཉིས་པ་ནི། དུས་གསུམ་རྒྱལ་བས་ཐུགས་ཆུད་པའི། །དངོས་གྲུབ་མཆོག་གི་སྙིང་པོ་ནི། །ཟད་པའི་དུས་མེད་ཡིད་བཞིན་མཛོད། །འཕེལ་འགྲིབ་མེད་པར་འབྱུང་བ་སྟེ། །དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །ཞེས་སོ། །ཇི་ལྟར་སྒྲུབ་པའི་ཚུལ་ནི། ཞི་ཁྲོའི་ཆོ ག་གཞུང་ལ་སོགས་པས་མཚོན་བྱེ་བྲག་སོ་སོའ་སྒྲུབ་ཐབས་གུད་དུ་ཕྱུང་བ་རྣམས་དང་། གཙོ་བོར་སྟོན་པ་ནི་ཚོམ་བུ་ཚོགས་ཀྱི་སྒྲུབ་པ་སྟེ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་སྒྲུབ་པའི་དུས་བཤད་པ་དང་གསུམ་གྱིས་བསྟན་ཏོ། །བརྒྱད་པ་ཏིང་ངེ་འཛིན་ལའང་གསུམ་སྟེ། ངོ་བོ་ནི། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། །ཞེས་པས། བསྒོམ་བྱའི་དོན་
ཁྱད་པར་ཅན་བསྐྱེད་རྫོགས་ཀྱི་ཏིང་ངེ་འཛིན་ལས་མི་གཡོ་བར་གནས་པའི་སེམས་རྩེ་གཅིག་པའོ། །ངེས་ཚིག་ནི། ས་མ་དྷཱིའི་སྒྲ་ལས་དྲངས་ན་མཉམ་པའི་བློ་སྟེ། ས་མ་ནི་མཉམ་པ། དྷཱི་ནི་བློ་ལ་འཇུག་པས། གང་བསྒོམ་བྱའི་དོན་ལ་སེམས་རྩེ་གཅིག་ཏུ་ཟིན་པའི་དོན་གྱིས་ན་ཏིང་ངེ་འཛིན་ནོ། །དབྱེ་ན། ཕྱི་མ་ཁ་ཆེ་འགྱུར་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པས་ཀུན་བཏགས་བསྐྱེད་རིམ་གྱི་རྣལ་འབྱོར་དང་། ཡོངས་གྲུབ་རྫོགས་རིམ་གྱི་རྣལ་འབྱོར་གཉིས་ལས། དང་པོ་ལའང་། དེ་ལས། བསྐྱེད་རིམ་ལ་བརྟེན་སྐྱེ་གནས་ཏེ། །མངལ་སྐྱེས་ལ་སོགས་དབྱེ་བ་ཡིས། །དེ་ཡང་རྣམ་པ་བཞི་རུ་འདོད། །ཅེས་པས་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ཏེ་སྒོམ་ཚུལ་བཞི་སྟེ། ཇི་སྐད་དུ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་དང་སྤྲོས་མེད་པ། །ཤིན་ཏུ་སྤྲོས་པ་མེད་བཞིའོ། །ཞེས་པས་རྒྱས་པ་སྒོང་སྐྱེས། འབྲིང་པོ་མངལ་སྐྱེས། བསྡུས་པ་དྲོད་གཤེར་སྐྱེས། ཤིན་ཏུ་བསྡུས་པ་བརྫུས་སྐྱེས་ཏེ། དེ་ལྟར་སྐྱེ་གནས་བཞིའི་བག་ཆགས་སྦྱོང་ཕྱིར། སྤྲོས་པ་རྒྱས་པ་དཀྱིལ་འཁོར་གྱི་འཁོར་ལོ་བདག་སྲས་གཞན་སྲས་གཉིས་ཀྱི་སྒོ་ནས་སྒོམ་པ་དང་། གཞན་ཡང་མངོན་བྱང་ལྔ་བསྐྱེད་དང་། རྡོ་རྗེའི་ཆོ་ག་བཞི་བསྐྱེད་ལ་སོགས་པ་དང་། འབྲིང་པོ་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་ཏེ་ཆོ་ག་གསུམ་གྱི་སྒོ་ནས་བསྐྱེད་པ་དང་། བསྡུས་པ་ཨ་ནུ་ཡོ་ག་བའི་སྒོམ་ཚུལ་ལྟར་ས་བོན་ཙམ་ལས་བསྐྱེད་པའམ། བསྐྱེད་སྔགས་བརྗོད་པའི་རྐྱེན་ཙམ་གྱིས་བསྐྱེད་པ་དང་། ཤིན་ཏུ་བསྡུས་པ་ཨ་ཏི་ཡོ་ག་བའི་སྒོམ་ཚུལ་ལྟར་ཆུ་ལས་ཉ་ལྡང་གི་ཚུལ་དུ་སྐད་ཅིག་དྲན་རྫོགས་ཀྱིས་ལྷའི་སྐུར་བསྐྱེད་པ་སྟེ་སྒོམ་ཚུལ་བཞིའམ། ཡང་ན་ལམ་རིམ་ལྟར་སྲིད་པ་མངལ་སྐྱེས་རྫུས་སྐྱེས་གཉིས་དང་བསྟུན་ཏེ་སྒོམ་ཚུལ་གཉིས་སུ་བསྡུས་ནས་གསུངས་ཏེ། ཅིའི་ཕྱིར་ན། གསང་སྔགས་རྡོ་རྗེ་ཐེག་པའི་ལམ་འདིའི་ཆེད་དུ་བྱ་བའི་གདུལ་བྱའི་གཙོ་བོ་ནི་ཁམས་དྲུག་ལྡན་གྱི་མི་ལུས་ཡིན་ཏེ། སྔོན་སྦྱངས་པ་ཅན་མིན་པའི་གང་ཟག་ཅིག་ལམ་
འདིར་དང་པོར་ཞུགས་ནས་ཚེ་གཅིག་ལུས་གཅིག་གིས་ཟུང་འཇུག་སྒྲུབ་པའི་རྟེན་གྱི་མཆོག་ཏུ་ངེས་པའི་ཕྱིར། དེ་ལྟ་བས་ན་མིའི་རྟེན་ཅན་ཕལ་ཆེར་མངལ་སྐྱེས་རྫུས་སྐྱེས་གཉིས་སུ་འགྱུར་བས་སམ། ཡང་ན་ཆེད་དུ་བྱ་བའི་གདུལ་བྱ་དེ་ལ་རིམ་གྱིས་པ་དང་ཅིག་ཅར་བ་གཉིས་ཡོད་པས་དེ་ལྟར་བསྡུས་སོ། །རྫོགས་རིམ་ལ། སྟེང་སྒོ་འཇུ་འདུལ་དང་། འོག་སྒོ་ཁམས་གསུམ་རོལ་པ་སྟེ་ཐབས་ལམ་སྟེང་འོག་གི་སྒོ་ལ་བརྟེན་པ་དང་། གྲོལ་ལམ་ཟུང་འཇུག་གི་རྣལ་འབྱོར་རིམ་ཅིག་ཅར་གཉིས་ཀྱིས་བསྡུས་པ་རྣམ་པར་མི་རྟོག་པའི་ཏིང་ངེ་འཛིན་ནོ། །འོ་ན་ཐབས་ལམ་སྟེང་སྒོ་ལ། རྩ་འཁོར་གསལ་འདེབས་པ་སོགས་དང་། དེས་མཚོན་འོག་སྒོ་ལ། ཡབ་ཡུམ་ལྷར་བསྐྱེད་པ་ལ་སོགས་པ་ཀུན་བརྟགས་ཀྱི་ཆ་འདྲེས་པས་རྫོགས་རིམ་དུ་ཅིའི་ཕྱིར་འགྱུར་སྙམ་ན། བསྐྱེད་རྫོགས་གཉིས་ལམ་ཕན་ཚུན་ལྟོས་པ་ཅན་ཡིན་པའི་ཕྱིར་ཐོག་མར་ཀུན་བརྟགས་བསྐྱེད་རིམ་གྱིས་རང་ལམ་གྱི་ཉམས་མྱོང་གཏན་ལ་འབེབས་པ་ལ་བཀྲི་བ་ཙམ་ལས་རང་གི་ངོ་བོ་རང་བཞིན་ལྷན་སྐྱེས་ཀྱི་ཡེ་ཤེས་ངོ་སྤྲོད་པར་བྱེད་པའི་ཐབས་རྣམ་པར་མི་རྟོག་པས་བསྡུས་པ་ཡོངས་གྲུབ་རྫོགས་རིམ་དུ་འགྱུར་བ་ཡིན་པས་སྐྱོན་མེད་དོ། །དགུ་པ་མཆོད་པ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བྱ་བྱེད་བྱ་བ་བྱེད་འདུས་པས། །དགྱེས་ཚིམ་གྱུར་པའི་དངོས་པོ་ཉིད། །ཅེས་པས་མཆོད་པའི་ཡུལ་དུ་གྱུར་པ་རྣམས་བཀུར་ཞིང་མཆོད་པའི་བསམ་པས་སྒོ་གསུམ་གྱིས་མཉེས་པ་སྒྲུབ་པ་དང་། ད་ལྟ་ཡོངས་གྲགས་ལྟར་སྤྱི་མིང་བྱེ་བྲག་ལ་བཏགས་ཏེ་ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའོ། །ངེས་ཚིག་ནི། པཱུ་ཛའི་སྒྲ་ལས་དྲངས་ན། པཱུརྦ་ནི་སྔོན་དང་། ཛ་ཏ་བསྐྱེད་པ་ལ་འཇུག་པས་དེའི་སྒྲ་བསྡུས་ཏེ་བྱ་བ་གང་སྒྲུབ་པ་རྣམས་ཀྱི་སྔོན་དུ་འགྲོ་བའི་རྒྱུ་མཚན་གྱིས་སྔོན་དུ་བསྐྱེད་པ་དང་། ཡང་། པུ་ན་ནར་ནི་ཡང་དང་ཡང་། ཛ་ཏ་བསྐྱེད་པ་སྟེ་དེའི་སྒྲ་བསྡུས་པས་པཱུ་ཛ་ཞེས་ཡང་དང་ཡང་དུ་དགྱེས་པ་བསྐྱེད་པ་དང་། པཱུ་ཛའི་སྒྲ་གཟུགས་པོའི་དབང་དུ་བྱས་ནས་བཀུར་བའི་དོན་གྱི་གནས་སུ་སྟོབ་པའི་ཕྱིར་མཆོད་པའོ། །དབྱེ་ན། སྤྱིར་འཇིག་རྟེན་དང་། འཇིག་རྟེན་ལས་འདས་པའི་མཆོད་པ་གཉིས། དེ་གཉིས་ཀ་ལ་མཚུངས་
པར། དམིགས་ཡུལ་ཞིང་གི་ཁྱད་པར། འབྲས་བུ་ལ་དམིགས་པའི་ཁྱད་པར། ཡོངས་སུ་བསྔོ་བའི་ཁྱད་པར། མཆོད་རྫས་དངོས་པོའི་ཁྱད་པར་དང་བཞི། དང་པོ་ནི། བླ་མ་དང་དཀོན་མཆོག་གསུམ་ལ་སོགས་པ་འཇིག་རྟེན་ལས་འདས་པ། ཚངས་པ་དང་བརྒྱ་བྱིན་ལ་སོགས་པ་འཇིག་རྟེན་པའི་མཆོད་ཡུལ་ལོ། །གཉིས་པ་ནི། གང་བསྒྲུབས་པའི་མཆོད་པ་དེ་ཉིད་མཐར་ཐུག་མྱང་འདས་ཀྱི་རྒྱུར་འགྱུར་བ་ཐར་པ་ཆ་མཐུན་གྱི་ཆ་ཐམས་ཅད་འཇིག་རྟེན་ལས་འདས་པ་དང་། ཚེ་འདི་དང་ཕྱི་མར་ལྷ་མིའི་བདེ་འབྲས་ཐོབ་པའི་རྒྱུར་འགྱུར་བ་བསོད་ནམས་ཆ་མཐུན་གྱི་ཆ་ཐམས་ཅད་འཇིག་རྟེན་པའོ། །གསུམ་པ་ནི། མཆོད་པ་དེ་ཉིད་མྱང་འདས་ཐོབ་པའི་ཆེད་དུ་བསྔོ་བ་འཇིག་རྟེན་ལས་འདས་པ་དང་། ཚེ་འདི་དང་ཕྱི་མའི་བདེ་འབྲས་ཙམ་གྱི་ཆེད་དུ་བསྔོ་བ་ལྟ་བུ་འཇིག་རྟེན་པའོ། །བཞི་པ་ནི། ཐོས་བསམ་སྒོམ་གསུམ་ལ་སོགས་པ་འཇིག་རྟེན་ལས་འདས་པ་དང་། ཟས་ནོར་སྟེར་བ་ལ་སོགས་པ་འཇིག་རྟེན་པའོ། །ད་ནི་དེ་དག་ལ་དཔྱད་དེ། དེ་ཡང་སྤྱི་ཙམ་དུ། ཡུལ། དམིགས་པ། བསྔོ་བ། རྫས་ཏེ་བཞི་ཀ་ལ་འཇིག་རྟེན་དང་། འཇིག་རྟེན་ལས་འདས་པ་གཉིས་གཉིས་སུ་འགྱུར་ཚུལ་སྔར་བཤད་པ་ལྟར་ཡིན་མོད། འོན་ཀྱང་མཐའ་གཅིག་ཏུ་མ་ངེས་ཏེ། དཔེར་ན། ཡུལ་བླ་མ་དང་སངས་རྒྱས་ལྟ་བུ་ཞིག་ལ་དངོས་པོ་ཁྱད་པར་ཅན་ཐོས་བསམ་སྒོམ་གསུམ་གྱིས་མཉེས་པ་སྒྲུབ་པ་ལྟ་བུ་ཞིག་ཡིན་ཡང་། འདི་ཉིད་ཚེ་འདིའི་བདེ་འབྱོར་སྙན་གྲགས་དང་། ཕྱི་མར་ལྷ་མིའི་གོ་འཕང་ངམ། ངན་སོང་གི་སྡུག་བསྔལ་ལས་ཐར་པའི་ཆེད་དུ་བསྔོས་ཤིང་། དེ་ལ་བརྟེན་ནས་བསོད་ནམས་ཆ་མཐུན་གྱི་དགེ་བར་འགྱུར་ཏེ། དེ་ལྟ་བུ་ནི་འཇིག་རྟེན་པའི་མཆོད་པའོ། །ཡང་། ཡུལ་དམན་པ་སྲང་མདོར་རྒྱུ་བའི་ཁྱི་ལྟ་བུ་ཞིག་ལ་དངོས་པོ་དམན་པ་ཟན་ཁམ་གཅིག་ཙམ་བྱིན་ནས། སྦྱིན་པ་དེ་ཉིད་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་ཆེད་དུ་བསྔོས་ཤིང་དེ་ལ་བརྟེན་ནས་ཐར་པ་ཆ་མཐུན་གྱི་དགེ་བར་འགྱུར་ཏེ། དེ་ལྟ་བུ་ནི་འཇིག་རྟེན་ལས་འདས་པའི་མཆོད་པའོ། །དོན་དུ་ན་ཞིང་དང་དངོས་པོ་བཟང་ངན་གཙོ་མི་ཆེ་ཞིང་དམིགས་ཡུལ་དང་བསྔོ་བའི་ཁྱད་པར་
གཙོ་ཆེ་བ་ཡིན་ནོ། །བྱེ་བྲག་ཏུ་ཕྱི་ཉེར་སྤྱོད། ནང་དམ་རྫས་བདུད་རྩི། གསང་བ་སྦྱོར་སྒྲོལ་ཟབ་མོ་སྟེ། དེ་ལ་ཉེར་སྤྱོད་ནི། མེ་ཏོག་དང་བདུག་སྤོས་ལ་སོགས་པ་སྟེ། དེ་དག་ལ་ཕྱི་ཞེས་ཟེར་བ་ནི་མདོ་སྔགས་གཉིས་ཀར་ཡོངས་སུ་གྲགས་པར་མ་ཟད། འཇིག་རྟེན་དུ་ཡང་ཡོ་བྱད་ཀྱི་ཁྱད་པར་བཟང་ངན་མ་གཏོགས་རྒྱལ་པོ་ནས་སྤྲང་པོའི་བར་ཐམས་ཅད་ཀྱི་ལོངས་སྤྱོད་དུ་ དགོས་པས་དེ་ལྟར་སྨོས་ལ། དམ་རྫས་བདུད་རྩིའི་མཆོད་པ ་ནི། སྤྱི་མིང་གཙོ་ཆེ་བའི་ངོས་ནས་བཞག་པ་སྟེ། བདུད་རྩི། རཀྟའི་མཆོད་པ་ལ་སོགས་པའོ། །ནང་ཞེས་བྱ་བའི་རྒྱུ་མཚན། མདོར་མ་གྲགས་པར་མ་ཟད། ཀྲི་ཡོག་སོགས་ཀྱི་ཕྱི་རྒྱུད་དུ་ཡང་མ་གྲགས་པས་ནང་པ་ཁོ་ནའི་ཁྱད་ཆོས་ཡིན་པའི་ཕྱིར་དང་། གསང་བ་སྦྱོར་སྒྲོལ་ཟབ་མོ་ནི། ཏ་ན་དང་ག་ཎའི་སྤྱོད་པ་རྨད་དུ་བྱུང་བ་སྟེ། འདི་དག་ལ་གསང་བ་ཞེས་ཐ་སྙད་འདོགས་པ་ནི་ཀྲི་ཡོག་སོགས་སུ་མ་གྲགས་པར་མ་ཟད་དེ་དག་ལ་ཤིན་ཏུ་གསང་བའི་སྒོ་ནས་སྤྱོད་དགོས་པས་སོ། །སྐབས་དོན་ཉེ་བར་འབྲེལ་བ་ཞི་ཁྲོའི་ཆོག་གཞུང་གི་དབང་དུ་བྱས་ན། ཞི་བ་ལ་ལྷག་ཏིང་དང་། ཁྲོ་བོ་ལ་དེ་ཚབ་རཀྟ་ཚར་གསུམ་གྱིས་བྱས་པའི་མཉེས་པ་ཕྱག་གི་མཆོད་པ་ལ་སོགས་པ་བཅུ་བཞི་སྟེ། གུས་པ་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །ཞེས་སོ། །དེ་ལ་སོགས་པ་མཆོད་པའི་རྣམ་གྲངས་ཇི་སྙེད་པ་རྣམས་སོ། །བཅུ་པ་སྔགས་དང་ཕྱག་རྒྱ་ལའང་གསུམ་སྟེ། ངོ་བོ་ནི། ཐུགས་ཐིག་ལས། ཡི་གེ་འདུས་པ་གྲུབ་པ་བཞི། །མཐུ་ཅན་རེད་པ་གང་ཡིན་པ། །བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་པས། ཐབས་ཤེས་ཀྱི་ཡི་གེ་ཨ་ལི་ཀ་ལིར་འདུས་ཤིང་གྲུབ་པ་བཞིས་བྱིན་གྱིས་བརླབས་པས་ནུས་པ་མཐུ་ཅན་དུ་གྱུར་པ་ནི་སྔགས་ཀྱི་ངོ་བོ་དང་། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ་ནི་ཕྱག་རྒྱའི་ངོ་བོའོ། །ངེས་ཚིག་ནི། མནྟྲའི་སྒྲ་ལས་དྲངས་ན་ཡིད་ཤེས་བདེ་མྱུར་དུ་སྐྱོབ་པའི་དོན་གྱིས་སྔགས་ཏེ། དེ་
ལ་བདེ་བའི་སྒོ་ནས་སྐྱོབ་པ་ནི། འདོད་ཡོན་ལམ་བྱེད་ཀྱིས་འབྲས་བུ་མངོན་དུ་བྱེད་པའི་རྒྱུ་མཚན་གྱིས་དེ་ལྟར་བཞག་ལ། མྱུར་བ་ནི། གྲངས་མེད་གསུམ་ལ་སོགས་པར་ཚོགས་བསག་མི་དགོས་པར་ཚེ་གཅིག་སོགས་ཀྱིས་འབྲས་བུ་འགྲུབ་ནུས་པས་སོ། །མུ་དྲའི་སྒྲ་ལས་དྲངས་ན་འདེབས་ཤིང་མཚོན་པར་བྱེད་པའམ། ཕྱག་རྒྱ་བཞིས་རྒྱས་བཏབ་པ་ལས་འདའ་བར་དཀའ་བའི་ཕྱིར་མཚན་མའི་དོན་གྱིས་ན་ཕྱག་རྒྱའོ། །དབྱེ་ན། སྔགས་ལ་སྤྱིར། གསང་སྔགས། རིག་སྔགས། གཟུངས་སྔགས་གསུམ་ལས། དང་པོ་ནི། ཐབས་དང་ཤེས་རབ་ཀྱི་བདག་ཉིད། དེའི་སྒོ་ཡིག་འབྲུར་སྣང་བས་གསང་སྟེ་ངག་ཏུ་བརྗོད་པར་བྱེད་པ་དང་བཅས་ཤིང་ཤེས་སྐྱོབ་ཀྱི་ལས་ཀྱིས་ལོག་རྟོག་གི་གཉེན་པོར་གྱུར་པའོ། །གཉིས་པ་ནི། ཤེས་རབ་དང་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རྟོགས་པའི་གཉེན་པོར་གྱུར་པའོ། །གསུམ་པ་ནི། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པའོ། །དེ་གསུམ་མཚོན་པའི་རྟགས་ལྷར་སྣང་ཚུལ་ཡང་། གསང་སྔགས་རྣམས་ལྷ་ཕོའ་དབྱིབས་དང་། ཕྱི་མ་གཉིས་ལྷ་མོའ་གཟུགས་སུ་བཞུགས་ཞེས་འབྱུང་ངོ་། །བྱེ་བྲག་ཏུ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། ཞེས་པས་རྒྱུ་མ་ནོར་བ་རྩ་བའི་སྔགས། སྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་དང་གསུམ། དང་པོ་ནི། གཞལ་ཡས་ཁང་སྐྱེད་པའི་ས་བོན་བྷྲཱུཾ་ཡིག་དང་། ལྷ་བསྐྱེད་པ་ལ། ཞི་བར། ཨ། ཀ་ཁ་ག་གྷ་ང་ལ་སོགས་པ་ཡི་གེ་འཁོར་ལོའ་ས་བོན་དང་། ཧཱུཾ་མཱུཾ་ལ་སོགས་པ་རིགས་ཀྱི་ས་བོན་གཉིས། ཁྲོ་བོ་ལ། ཧཱུཾ་ཧ་ཧེ་ཕཊ་བྷྱོ། ཞེས་པའོ། །གཉིས་པ་ནི། ས་བོན་བོར་བའི་སྐྱེད་སྔགས་རྐྱང་པ་སྟེ། བཛྲ་དྷྲིཀ་སོགས་དང་། བཛྲ་ཤྲཱི་ཧེ་རུ་ཀ་ཧཱུཾ་ཞེས་སོགས་ལྟ་བུའོ། །གསུམ་པ་ནི། རྩ་སྔགས་སྐྱེད་སྔགས་བསྒྲིལ་ནས་ཛཔ་ཏུ་བཟླ་བའོ། །དེ་དག་རྫོགས་རིམ་དང་སྦྱར་ཏེ་བཤད་ན། ཐིག་ལེ་ཆེན་པོ་བདེ་ཆེན་གྱི་རང་བཞིན་གདོད་མ་ནས་རང་ཆས་སུ་བཞུགས་པ་ནི་རྒྱུ་མ་ནོར་བ་རྩ་བའི་སྔགས། དེ་ལྟར་བཞུགས་པ་ལ་གནད་དུ་བསྣུན་པའི་ཐབས་ཀྱི་བྱེད་རྩོལ་གྱི་གནད་ཁྱད་པར་ཅན་ནི་སྐྱེད་པ་རྐྱེན་གྱི་སྔགས། དེ་ལ་
བཟླ་ཞིང་སྒོམ་པ་བཟླས་པ་ལས་ཀྱི་སྔགས་སོ། །ཕྱག་རྒྱ་ལའང་སྤྱིར་རྟོག་ཚོགས་ཐམས་ཅད་ཡེ་གདོད་མ་ནས་ལྷའི་དཀྱིལ་འཁོར་དུ་གནས་པ་རང་བཞིན་གྱི་ཕྱག་རྒྱ་དང་། དེ་ལ་ངེས་ཤེས་ཁྱད་པར་ཅན་སྐྱེས་པའི་སྒོ་ནས་དེ་མངོན་དུ་རྟོགས་པ་ལྟ་བའི་ཕྱག་རྒྱ་དང་། རང་འབྲས་ཇི་བཞིན་མངོན་དུ་གྱུར་པས་འོག་མིན་ན་རྒྱལ་བ་ཞི་ཁྲོའི་དཀྱིལ་འཁོར་ཆེན་པོར་བཞུགས་པ་འབྲས་བུའི་ཕྱག་རྒྱ་སྟེ་གསུམ་མོ། །བྱེ་བྲག་ཏུ་ལྷག་པ་ཏིང་ངེ་འཛིན་གྱི་དབང་དུ་བྱས་ན། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པས་ཕྱག་རྒྱ་བཞི་ལྡན་ནམ། ནང་གསེས་སུ་དབྱེ་ན་ཕྱག་རྒྱ་བདུན་ལྡན་དུ་འགྱུར་བ་ཡིན་ནོ། །དེ་ལ་ཞི་ཁྲོ་གཉིས། དང་པོ་ལ་ཕྱག་རྒྱའི་རྒྱུ་དང་། དེ་ལས་བྱུང་བ་རིགས་ལྔ་སྤྱིའི་དམ་རྒྱ། དེ་ལས་འཕྲོས་པ་ལྷ་སོ་སོའ་ཕྱག་རྒྱའོ། །དང་པོ་ནི། འགྲེལ་ཆུང་ལས། དབུ་ནི་བདེ་གཤེགས་རིགས་ཉིད་དེ། །ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའི་རིགས། །རྐང་གཡོན་ཆོས་ཀྱི་སེམས་དཔའ་སྟེ། །རྐང་གཡས་ལས་ཀྱི་སེམས་དཔའ་འོ། །ཞེས་ལུས་ཀྱི་ཡན་ལག་ལྔ་དང་། ཉིང་ལག་གི་གུང་མོ་རྡོ་རྗེའི་རིགས་ཡིན་པ་སོགས་ངེས་པར་བྱས་ཏེ། མི་བསྐྱོད་པའི་རིགས་ལག་གཡས་ཀྱི་སོར་མོར་ཉི་དཀྱིལ་ལ་ཧཱུཾ་ཨཱོཾ་སྭཱ་ཨཱཾ་ཧཱ་རྣམས་དང་། རིན་ཆེན་རིགས་གཡོན་གྱི་སོར་མོར་ཟླ་དཀྱིལ་ལ་མཱུཾ་ལཱཾ་མཱཾ་པཱཾ་ཏཱཾ་རྣམས་བཀོད་དེ་ཐལ་མོ་སྦྱར་བའོ། །འདི་ལ་ཕྱག་རྒྱའི་རྒྱུ་རྡོ་རྗེ་ཐལ་མོ་ཞེས་བྱའོ། །གཉིས་པ་ནི། ༀ་དང་མཱུཾ་གཉིས་རྩེ་སྦྱར་ཏེ། །ཞེས་སོགས་ཀྱིས་བསྟན་ཏེ། དེ་ཡང་ཐབས་ཞགས་ལས། སོར་མོ་ནང་དུ་བསྣོལ་ནས་བཀན། གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བསྐྱེད་དེ། །སྲིན་ལག་གཤིབས་སྦྲེང་དམ་ཚིག་རྒྱ། །ཞེས་དང་། རྔམ་གློག་ལས་ཀྱང་། ཨཱོཾ་དང་མཱུཾ་གཉིས་རྩེ་སྤྲད་ལ། །དེ་བཞིན་ཧཱུཾ་དང་ལཱཾ་དུ་སྦྱར། །ཧཱ་དང་པཱཾ་ཡང་དེ་བཞིན་ཏེ། །ཨཱཾ་དང་ཏཱཾ་དུ་སྦྱར་བ་ལས། །རྒྱབ་སྦྱར་སྭཱ་དང་མཱཾ་སྦྲེང་བ། །འདི་ནི་ཡབ་ཀྱི་སྤྱི་རྒྱ་ཡིན། །ལག་པ་ཐལ་མོ་སྦྱར་བ་ལས། །ཨཱོཾ་དང་མཱུཾ་སྦྱར་ཧཱུཾ་དང་ནི། །ལཱཾ་སྦྱར་སྭཱ་དང་པཱཾ་དུ་སྦྱར། །ཨཱཾ་དང་མཾ་སྦྱར་ཧཱ་ཏཱཾ་སྒྲེང་། །ཡུམ་གྱི་སྤྱི་རྒྱ་ཡིན་པར་བཤད། །ཅེས་སོ། །གསུམ་པ་ལ་ལྔ་ལས། དང་
པོ་རིགས་ལྔའི་ཕྱག་རྒྱ་ནི། གཙོ་བོ་མི་བསྐྱོད་པ་ལ་སྦྱར་ན། བདག་ཉིད་མི་བསྐྱོད་པར་སྒོམ་པ་ཕྱག་ཆེན། དེའི་ངང་ལས་ལག་གཡས་ཀྱི་ཡིག་འབྲུ་གཞན་བཞི་སྦས་ནས་གུང་མོ་ཐུགས་ཀར་བཀན་ཐབས་སུ་སྒྲེང་བ་བཅའ་བ་དམ་རྒྱ། དེའི་རྩེ་མོར་ཧཱུཾ་སྒོམ་པ་བསམ་པ་ཆོས་རྒྱ། དེ་ཞུ་བ་ལས་རྡོ་རྗེར་གྱུར་པ་བསམ་པ་དམ་རྒྱ། ལག་གཡོན་པའི་ཟླ་བ་ལྔ་ནང་དུ་བརྟུལ་བའི་ཁུ་ཚུར་གྱིས་དྲིལ་བུ་གསིལ་ཞིང་ཡུམ་ལ་འཁྲིལ་བའི་ཚུལ་གྱིས་བརླ་གཡོན་ལ་བརྟེན་པ་བཅའ་བ་ལས་རྒྱ། དེ་ལྟར་བསྒོམ་པ་བསམ་པ་ལས་རྒྱ། དེ་ནས་ཕྱག་རྒྱ་གཡས་སུ་བཅས་པ་མདུན་དུ་བསྒྱུར་ནས་གཡོན་དུ་ཡུམ་གྱི་ཐུགས་ཀར་སེ་གོལ་དང་བཅས་ཧཱུཾ་བཛྲ་དྷྲིཀ་ཅེས་བརྗོད་ཅིང་དགྲོལ་བ་བརྗོད་པ་ཆོས་རྒྱ་སྟེ་ཤེས་རབ་ལ་ཐབས་ཀྱིས་རྒྱས་འདེབས་པའོ། །དེས་མཚོན་ཡུམ་གྱི་ཕྱག་རྒྱ་དང་། རིགས་གཞན་རྣམས་ལ་དེ་དག་གིས་རིགས་འགྲེའོ། །གཉིས་པ་སེམས་དཔའ་ཡབ་ཡུམ་གྱི་ཕྱག་རྒྱ་ནི། མཐེ་བོང་སྤངས་པའི་སོར་མོ་རྣམས་ལ་རང་རང་གི་ས་བོན་སྔར་ལྟར་སྒོམ་པའི་ངེས་པས་ཕྱག་རྒྱ་བདུན་ལྡན་རིགས་ལྔའི་སྐབས་བཞིན་ནོ། །གསུམ་པ་སྒོ་བ་ཡབ་ཡུམ་གྱི་ཕྱག་རྒྱ་ནི། སྔ་མས་མཚོན་ནོ། །བཞི་པ་ཐུབ་དྲུག་གི་ཕྱག་རྒྱ་ནི། གདུལ་བྱ་མ་ངེས་པ་འདུལ་བའི་ཕྱིར་སྣ་ཚོགས་ཏེ། དེ་ཡང་བསྡུ་ན་དྲུག་ཏུ་འདུའོ། །ལྔ་པ་ཀུན་བཟང་ཡབ་ཡུམ་གྱི་ཕྱག་རྒྱ་ནི། ཡབ་ཀུན་བཟང་ཕྱག་གཡས་སྟེང་དུ་བྱས་པའི་མཉམ་བཞག་ལས་ཡེ་ཤེས་ལྔའི་འོད་ཟེར་འཕྲོ་བ་དང་། ཡུམ་ཀུན་ཏུ་བཟང་མོ་ཕྱག་གཡོན་སྟེང་དུ་བྱས་པའི་མཉམ་བཞག་གམ། ཡང་ན་ཡབ་ཀུན་བཟང་བཞིན་ནམ་རྡོ་རྗེ་ཐལ་མོ་ཐུགས་ཀར་སྦྱར་བའོ། །གཉིས་པ་ཁྲོ་བོའ་ཕྱག་རྒྱ་ནི། རྣམ་པར་གྲོལ་བ་མཚོན་པའི་ཕྱིར། དབུས་ཀྱི་ཁྲོ་བོའ་ཕྱག་རྒྱ་ནིི། ཞེས་སོགས་རྒྱུད་གཞན་ལས་ཇི་སྐད་གསུངས་པ་ལྟར་རིགས་ལྔ། གནས་ཡུལ། སྒོ་སྐྱོང་། དབང་ཕྱུག་མ་དང་བཅས་པའི་ཕྱག་རྒྱ་བྱ་བ་སྟེ། རྒྱས་པ་ལས། དབུས་ཀྱི་ཧེ་རུ་ཀའི་ཕྱག་རྒྱ་ནི། ཞེས་སོགས་དང་། གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །མ་མོ་རྣམས་ཀྱི་ཕྱག་རྒྱ་ནི། །འཇིག་རྟེན་འདས་མདོ་ཆེ་ལས་བཤད། །ཅེས་སོ། །དེ་དག་ཀྱང་ཕྱག་རྒྱ་བཞི་ལྡན་ཏེ། ལྷ་སྐུར་གསལ་
བ་ཕྱག་ཆེན། ཐུགས་ཀར་རང་རང་གི་ས་བོན་གསལ་ཞིང་ངག་ནས་ཚིག་བརྗོད་པ་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་དམ་རྒྱ། ཕྱག་རྒྱ་བཅའ་ནས་མདུན་དུ་བསྒྱུར་ཏེ་འགྲོལ་བ་ལས་རྒྱའོ། །དེ་ལྟར་ཡང་ཧེ་རུ་ཀ་གལ་པོ་ལས། སྐུ་ནི་ཕྱག་རྒྱ་ཆེན་པོ་དང་། །གསུང་ནི་ཆོས་ཀྱི་ཕྱག་རྒྱ་དང་། །ཕྲིན་ལས་ལས་ཀྱི་ཕྱག་རྒྱ་དང་། །ཐུགས་ནི་དམ་ཚིག་ཕྱག་རྒྱའོ། །ཞེས་སོ། །ཕྱག་རྒྱ་བཞི་རྫོགས་རིམ་དང་སྦྱར་ཏེ་བཤད་ན། སྟེང་སྒོ་གཏུམ་མོ་ཙཎྜ་ལཱི་ནི་དམ་ཚིག་གི་ཕྱག་རྒྱ། འོག་སྒོ་ཕྱག་རྒྱ་གསུམ་ནི་ལས་ཀྱི་ཕྱག་རྒྱ། སྒྱུ་ལུས་སྙིང་རྗེ་ཆེན་པོ་ནི་ཆོས་ཀྱི་ཕྱག་རྒྱ། རྣམ་པར་མི་རྟོག་པ་རང་བཞིན་འོད་གསལ་གྱི་ཡེ་ཤེས་ནི་ཕྱག་རྒྱ་ཆེན་པོའོ། །བཞི་ པ་རྒྱུད་ཀྱི་དགོས ་འབྲེལ་ལའང་གསུམ་སྟེ། ངོ་བོ་ནི། ཐུགས་ཐིག་ལས། བརྗོད་འབྲེལ་ དགོས་པ ་ཡང་དགོས་དང་། །རྒྱུ་རྐྱེན་ཡན་ལག་བཞི་རུ་འགྱུར། །ཞེས་པས། བརྗོད་བྱ། རྗོད་བྱེད། དགོས་པ ། ཉིང་དགོས་དང་བཞི། དང་པོ་ནི། མཚོན་བྱ་རང་བཞིན་གཞིའི་རྒྱུད་སེམས་ཅན་ཐམས་ཅད་ཀྱི་རྒྱུད་ལ་གདོད་མ་ནས་རང་ཆས་སུ་བཞུགས་པ་ནི་བརྗོད་པར་བྱ་བ་སྟེ། ཁོག་གཞུང་ལས། མཚོན་བྱ་རང་བཞིན་གཞི་ཡི་རྒྱུད། །ཅེས་སོ། །གཉིས་པ་ནི། རང་བཞིན་རྒྱུད་དེ་ཁོང་དུ་ཆུད་པར་བྱ་བའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྱུ་འཕྲུལ་དྲྭ་བ་སྒྲར་སྣང་ཞིང་སྒྲར་གྲགས་པའི་བདག་ཉིད་ཅན་བརྡར་བཏགས་ཀྱི་རྟེན་གླེགས་བམ་དང་བཅས་པ་ནི་རྗོད་པར་བྱེད་པ་སྟེ། དེ་ཉིད་ལས། སྒྲོ་སྐུར་མེད་པར་བསྟན་པ་ནི། །མཚོན་བྱེད་སྒྱུ་འཕྲུལ་དྲྭ་བ་སྟེ། །ཞེས་སོ། །གསུམ་པ་ནི། རྗོད་བྱེད་ལ་ཐོས་བསམ་བྱས་པ་ལ་བརྟེན་ནས་བརྗོད་བྱའི་དོན་དམིགས་ཡུལ་དོན་སྤྱིའི་ཚུལ་དུ་ཤེས་པ་ནི་ དགོས་པ ་སྟེ། དེ་ཉིད་ལས། མཛུབ་མོས་རི་བོང་ཅན་བཞིན་ནོ། །ཞེས་སོ། །བཞི་པ་ནི། དེ་ལྟར་ཤེས་པའི་དོན་སྒོམ་པ་བསྐྱེད་རྫོགས་གཉིས་གང་རུང་གིས་ཉམས་སུ་བླངས་པས། རོ་ལངས་ཚེ་ལ་སོགས་ཏེ་ཐུན་མོང་གི་དངོས་གྲུབ་ཐོབ་ པ་ཉིང་དགོས ་ཕྲ་མོ་དང་། སློབ་པའི་ཟུང་འཇུག་རིག་འཛིན་བཞི་དང་། མི་སློབ་པའི་ཟུང་འཇུག་རྫོགས་པའི་སངས་རྒྱས་ཏེ་དེ་ལྟར་མཆོག་གི་དངོས་གྲུབ་མངོན་
དུ་གྱུར་ པ་ནི་ཉིང་དགོས ་མཆོག་སྟེ། དེ་ཉིད་ལས། དགོས་པའི་ དགོས་པ ་འབྲས་བུ་ཉིད། །ཅེས་སོ། །དེ་དག་གི་འབྲེལ་བཤད་ནི། དེ་ཡང་བརྗོད་བྱ་དང་རྗོད་བྱེད་གཉིས་ཤེས་བྱ་ཤེས་བྱེད་དང་། རྗོད་བྱེད་དང་ དགོས་པ ་གཉིས་ཐབས་ལས་ཐབས་བྱུང་དང་། དགོས་པ ་དང་ཉིང་དགོས་གཉིས་དེ་ལས་དེ་བྱུང་དང་། ཉིང་དགོས་དང་བརྗོད་བྱ་གཉིས་ངོ་བོ་བདག་གཅིག་གི་འབྲེལ་བ་ཡིན་ནོ། །ངེས་ཚིག་ནི། ཅིའི་ཕྱིར་རྒྱུད་ཀྱི་དགོས་འབྲེལ་ཞེས་བྱ་ཞེ་ན། དགོས་སོགས་ཆོས་བཞི་པོ་དེ་དག་སྔར་བཤད་པ ་ལྟར་ཕན་ཚུན་འབྲེལ་བ་ཅན་དུ་གྲུབ་པའི་ཕྱིར་ཏེ། ཐོབ་བྱ་མཐར་ཐུག་གི་འབྲས་བུ་སྒྲུབ་པ་ལ་མེད་ན་མི་འབྱུང་གི་འབྲེལ་བ་གྲུབ་པའི་ཕྱིར་རོ། །དབྱེ་ན། གྲོལ་ལམ་དབང་བཙན་དུ་བྱས་པ་དང་། ཐབས་ལམ་དབང་བཙན་དུ་བྱས་པ་གཉིས། དང་པོ་ནི། སྔར་ངོ་བོའ་སྐབས་སུ་བཤད་པ་ལྟར་ཡིན་ལ། གཉིས་པ་ནི། ལྷན་ཅིག་སྐྱེས་པའི་ཡེ་ཤེས་གདོད་མ་ནས་རང་ལ་བཞུགས་པ་ནི་མཚོན་བྱ་རང་བཞིན་གཞིའི་རྒྱུད་དོ། །དེ་ཉིད་རྟོགས་བྱེད་ཀྱི་མན་ངག་ཐིག་ལེ་ཆེན་པོ་ཐབས་དང་བཅས་པ་ནི་མཚོན་བྱེད་ལམ་རྐྱེན་ཡི་གེའི་རྒྱུད་དོ། །དེའི་དོན་ཉམས་སུ་བླངས་པས་བདེ་ཆེན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་ པ་ནི་དགོས ་པའོ། །དེ་ལ་གོམས་པར་བྱས་པས་མཆོག་ཏུ་མི་འགྱུར་བའི་ཡེ་ཤེས་ཆེན་པོ་མངོན་དུ་བྱས་པ་ནི་ཉིང་ དགོས་སོ། །ལྔ་པ ་འཁོར་ལ་གདམས་ཤིང་བསྟན་པ་གཏད་པ་ལའང་གསུམ་སྟེ། ངོ་བོ་ནི། བསྟན་པའི་སྙིང་པོ་རང་བཞིན་གསང་བའི་སྙིང་པོ་མཚོན་བྱེད་ལམ་རྐྱེན་གྱི་རྒྱུད་དང་བཅས་པ་འདི་ཉིད་མི་ཉམས་ཤིང་བསྲུང་བའི་ཆེད་དུ་འཁོར་རྣམས་ལ་གདམས་ཤིང་གཏད་པའོ། །ངེས་ཚིག་ནི། ཅིའི་ཕྱིར་གདམས་གཏད་ཅེས་བྱ་ཞེ་ན། རང་བཞིན་གཞིའི་རྒྱུད་ཀྱི་དོན་ལས་མི་འགྱུར་བར་གདམས་པའང་ཡིན་ལ། ལམ་གྱི་རྒྱུད་དེ་གཞི་རྟོགས་བྱེད་ཀྱི་ཐབས་སུ་མི་ནུབ་པར་ཟུངས་ཤིག་ཅེས་གཏད་པའང་ཡིན་པའི་ཕྱིར་གདམས་གཏད་ཅེས་བྱའོ། །དབྱེ་ན་གཉིས་ལས། དང་པོ་གདམས་པ་ལ་བཞི་སྟེ། གཞི་རང་བཞིན་གྱི་སྣང་བ་རྟོགས་བྱར་གདམས་པ། ལོག་རྟོག་འཁྲུལ་པའི་སྣང་བ་དག་བྱར་གདམས་པ། གདུལ་བྱ་ལམ་གྱི་སྣང་བ་བགྲོད་བྱར་
གདམས་པ། འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པའོ། །དང་པོ་ནི། ཀྱཻ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །གཉིས་པ་ནི། གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ཞེས་སོ། །གསུམ་པ་ནི། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོའི་འགྲོ་བའི་ལམ། །ཞེས་སོ། །བཞི་པ་ནི། ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་སོ། །མདོར་ན། སྦྱང་གཞི་གཞི་རྒྱུད་རྟོགས་བྱ། སྦྱང་བྱ་གློ་བུར་གྱི་དྲི་མ་དག་བྱ། སྦྱོང་བྱེད་ཐུན་མོང་དང་ཁྱད་པར་གྱིས་བསྡུས་པའི་ལམ་བགྲོད་བྱ། སྦྱང་འབྲས་སྐུ་གསུམ་གྱི་འབྲས་བུ་ཐོབ་བྱར་གདམས་པ་སྟེ། རྒྱུ་མཚན་དེས་ན་རྒྱུད་ཀྱི་དོན་ཐམས་ཅད་སྣང་བ་བཞིར་བསྡུས་ནས་གསུངས་པའི་ཕྱིར། རལ་གྲི་ལྟར་ཡུ་བ་ནས་བཟུང་སྟེ་བཤད་པ་ཞེས་བྱའོ། །གཉིས་པ་གཏད་པ་ལ། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་སོགས་ལའོ། །ཞེས་གསུངས་པ་ལྟར་གསུམ་ལས། དང་པོ་སྡུད་པ་པོ་ལ་གཏད་པ་ནི། དེ་བཞིན་གཤེགས་པ་ཐམས་ཅད་ཀྱི་བཀའི་བསྡུ་བ་པོ་གསང་བའི་བདག་པོ་ལག་ན་རྡོ་རྗེ་ལ་གཏད་པ་སྟེ། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བ་ཡི། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་སོ། །གཉིས་པ་ཕྱི་རབས་ཀྱི་གང་ཟག་ལ་གཏད་པ་ལ་གཉིས་ཏེ། གང་ཟག་ཆོས་མིག་ཅན་ལ་གཏད་པ་དང་། ངེས་པར་ལུང་བསྟན་པའི་སྒོ་ནས་གཏད་པའི་འཐད་པ་དང་བཅས་པའོ། །དང་པོ་ནི། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་སོ། །གཉིས་པ་ནི། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡི། །ས་རབ་རིག་པ་འཛིན་ལ་གནས། །ཞེས་དང་། སྒྱུ་འཕྲུལ་རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱོང་སེམས་དཔའ་བསྐྱེད་དུ་མེད། །བདེ་
གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུར་ལུང་ཐོབ་པའོ། །ཞེས་སོ། །གསུམ་པ་མ་མོ་དང་མཁའ་འགྲོ་རྣམས་ལ་གཏད་པ་ནི། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་མཛོད་འབྱོར་བཀའ་ཡི་གནས། །བསྟན་པ་འཛིན་པར་ནུས་པ་ལ། །གསང་བའི་སྙིང་པོ་མཆོག་ཏུ་གཏད། །ཅེས་མ་མོ་དང་མཁའ་འགྲོ་རྣམས་ལ་བསྟན་པ་སྐྱོང་ཞིང་ཕྱོགས་བཅུར་སྤེལ་བར་གཉེར་གཏད་པའོ། །གཉིས་པ་ཚིག་གི་རྣམ་གྲངས་རྣམ་པར་དབྱེ་བ་ལའང་གསུམ་སྟེ། ངོ་བོ་ནི། རྒྱུད་ཕྱི་མ་ལས། གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་པས་བརྗོད་བྱ་འཆད་པར་བྱེད་པ་ནི་རྗོད་བྱེད་དེ། སྒྲར་སྣང་ཞིང་སྒྲར་གྲགས་པའི་བདག་ཉིད་ཅན་སྒྲའི་རྒྱུད་དམ་གླེགས་བམ་དུ་སྣང་བ་ཡི་གེའི་རྒྱུད་དུ་གྲགས་པ་གང་ཡིན་པའོ། །དེ་ཡང་ངོ་བོ་ཚོགས་པ་གསུམ་ལྡན་ཏེ། གདུང་འདེགས་ཀྱི་ཤིང་ལ་ཀ་བ་ཞེས་འདོགས་པ་ལྟ་བུ་ཆོས་གང་ལ་སྒྲ་གང་ཞིག་དེ་ཉིད་ཡིན་པ་ལྟ་བུར་བཏགས་ནས་བརྗོད་པ་ནི་མིང་ཡིན་ལ། མིང་དེ་མང་པོ་འདུས་པ་ནི་མིང་གི་ཚོགས་ཏེ། མངོན་བརྗོད་ཀྱི་བསྟན་བཅོས་ལྟ་བུའོ། །མིང་དེ་ཉིད་སྤྱིར་ཡན་དུ་མ་བཅུག་པར་དང་པོ་ངོ་བོ་ཙམ་སྟོན་པ། གཉིས་པ་ལས་སུ་བྱ་བ་ལ་སོགས་པ་རྣམ་དབྱེ་རྣམས་ཀྱི་བྱེ་བྲག་སོ་སོར་ཕྱེ་ནས་ཆོས་དེ་དང་དེའི་དོན་གྱི་ཁྱད་པར་སྟོན་པ་ནི་ཚིག་ཡིན་ཏེ། རྟ་བབས་ཀྱི་སྟེང་ན་ཆོས་འཁོར་གདུགས་དང་བཅས་པའི་གཡས་གཡོན་དུ་རི་དྭགས་ཕོ་མོས་བརྟེན་པ་ཞེས་པ་ལྟ་བུའོ། །མིང་ཚིག་དེ་དག་གསལ་བར་བྱེད་པའི་འབྲུ་ལ་ནི་ཡི་གེ་ཞེས་བྱ་སྟེ། ཨ་དང་ཀ་ལ་སོགས་པ་དབྱངས་གསལ་གྱི་ཡི་གེ་རྣམས་སོ། །དེ་ལྟར་ན། ཡི་གེ་འདུས་པ་ལས་མིང་འབྱུང་སྟེ། ཀ་འ་བ་འ་ཞེས་གསལ་བྱེད་བཞི། དབྱངས་ཨ་གཉིས་རྣམས་འདུས་པས་ཀ་བ་ཞེས་གྲུབ་པ་ལྟ་བུའོ། །མིང་འདུས་པ་ལས་ཚིག་འབྱུང་སྟེ། ཀ་བ་དང་། གདུང་མ། རིན་པོ་ཆེ། ཕྲ་ཚོམས་ཞེས་སོགས་མིང་དུ་མ་འདུས་པ་རྣམ་དབྱེས་མཚམས་སྦྱར་བས། ཀ་བས་བཏེགས་པའི་གདུང་མ་རིན་པོ་ཆེའི་ཕྲ་ཚོམས་ཀྱིས་མཛེས་པ། ཞེས་གྲུབ་
པ་ལྟ་བུའོ། །དེ་འདུས་པ་ལས་ཚིགས་སུ་བཅད་པ་དང་། ལྷུག་པ་དང་། ལེའུ་ལ་སོགས་པའི་རིམ་པས་གླེགས་བམ་གྱི་བར་དུ་རྒྱུན་ཆགས་པ་ལས་གཞུང་ཚོགས་ཡི་གེའི་རྒྱུད་དམ། བརྗོད་བྱ་དོན་གྱི་རྒྱུད་མཚོན་པར་ནུས་པའི་རྗོད་བྱེད་སྒྲའི་རྒྱུད་གྲུབ་པ་ཡིན་ཏེ། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་གསུངས་པའི་ཕྱིར་རོ། །དེ་ལ་བཅད་ལྷུག་སྤེལ་མ་གསུམ་གྱི་མཚན་ཉིད་ནི། སྤྱིར་མདོ་ལས། བྲམ་ཟེ་ཆུ་ལ་ཇི་ཙམ་ཞིག །ཅེས་དྲིས་པའི་ལན་དུ། མི་ཡི་བདག་པོ་པུས་ནུབ་ཙམ། ཞེས་ཚིགས་སུ་བཅད་པ་ལྟ་བུ་རྐང་པ་གཅིག་ལ་ཚིགས་བཅད་དུ་བཞག་པས་མཚོན་མངོན་པ་ཀུན་ལས་བཏུས་སུ་གསུངས་པ་ལྟར། རྐང་པ་གཅིག་པ་ནས་བདུན་པའི་བར་དང་། ཁྱད་པར། སྙན་ངག་མེ་ལོང་དང་། སྡེབ་སྦྱོར་རིན་འབྱུང་དུ། ཚིགས་བཅད་རྐང་བཞི་དེ་ཡང་ནི། །ཞེས་རྐང་པ་བཞིར་བཅད་ཅིང་རྐང་པ་བཞི་ཚོགས་པའི་བདག་ཉིད་ཅན་ཚིགས་བཅད། ཚིག་ལྷུག་པ་རྒྱུན་ཆགས་སུ་སྤེལ་བའི་ཚིག་ལྷུག བཅད་ལྷུག་སྤེལ་བ་སྤེལ་མའི་མཚན་ཉིད་དོ། །དེ་དག་ཀྱང་དཔྱད་ན། སྟོན་པའི་ཡེ་ཤེས་ཀྱི་རྣམ་པར་འཕྲུལ་པ་ལས་ལོངས་སྐུ་དགོངས་པ་བརྡའི་ཚིག་མི་གསུང་བ་གསུང་བ་ཆེན་པོའི་སྒོ་ནས་དངོས་ཀྱི་འཁོར་འབྲས་དབང་ཐོབ་པས་སྟོན་འཁོར་དགོངས་པ་དབྱེར་མེད་དུ་གྱུར་པ་རྣམས་ཀྱི་ཡིད་ལ་རྒྱུད་དོན་རང་སྣང་བའམ། དེ་ཉིད་མ་འོངས་པའི་གདུལ་བྱ་གོ་ཕྱེ་བའི་འཁོར་རྣམས་ཀྱི་ཡིད་ལའང་རྒྱུད་དོན་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེ་གསུམ་ཚོགས་པའི་རྒྱུད་གཞུང་སྟེ་སྒྲར་སྣང་བའི་རྒྱུད་དང་། དེ་དང་མཐུན་པའི་སྒྲ་བརྗོད་འདོད་ཀྱི་དབང་གིས་སྤྱི་བོ་ལ་སོགས་པའི་གནས་དང་། ལྕེ་མཆུའི་སྦྱོར་བ་ལ་སོགས་པའི་བྱེད་པ་སོགས་འཕྲད་པ་ལས་ངག་ཏུ་བརྗོད་པ་ནི་སྒྲར་གྲགས་པའི་རྒྱུད་དང་དེ་བརྗོད་པའི་རྟེན་ཕྱི་རོལ་དུ་ཡི་གེའི་གཟུགས་བརྙན་གླེགས་བམ་ལ་བཀོད་པ་ནི་བརྡར་གྱུར་པའི་རྒྱུད་གཞུང་སྟེ། རྗོད་བྱེད་ཀྱི་སྒོ་ནས་ཕྱེ་ན་དེ་ཙམ་མོ། །ངེས་ཚིག་ནི། ཅིའི་ཕྱིར་སྒྲའི་རྒྱུད་ཅེས་བྱ་ཞེ་ན། བརྗོད་བྱའི་དོན་ཉིད་རྟོགས་བྱེད་ཀྱི་ཐབས་རྗོད་བྱེད་ཀྱི་སྒྲར་སྣང་ཞིང་སྒྲར་གྲགས་པའི་དོན་གྱིས་ན་སྒྲ་དང་། ཚིགས་སུ་བཅད་པ་སོགས་གཞུང་གི་ཚོགས་རྒྱུན་ཆགས་པའམ། གླེང་གཞི་ལ་
སོགས་པ་ལྔ་རྒྱུ་རྐྱེན་འབྲས་བུའི་ཚུལ་དུ་འབྲེལ་བས་ན་རྒྱུད་དོ། །གཞན་དུ་ན་བརྗོད་བྱ་ལ་རྒྱུད་ཀྱི་མིང་ཐོབ་པས་དེ་རྗོད་བྱེད་ལའང་རྒྱུད་ཅེས་བཏགས་སོ། །དབྱེ་ན། འཆད་གཞིར་གྱུར་པ་རྩ་བའི་རྒྱུད་དང་འཆད་བྱེད་དུ་གྱུར་པ་བཤད་པའི་རྒྱུད་གཉིས་སམ། རྩ་བའི་རྒྱུད་ཉིད་ལའང་ཚིག་གི་ཚོགས་པ་ལེའུ་ཉི་ཤུ་རྩ་གཉིས་སུ་བཅད་དེ་གནས་ལ། དེ་ཡང་ལེའུ་དང་པོས་ལོངས་སྐུའི་གླེང་གཞི། གསུམ་པའི་སྟོད་ཀྱིས་སྤྲུལ་སྐུ་འགྲོ་བ་འདུལ་བའི་གླེང་གཞི། བཅོ་ལྔ་པས་ཁྲོ་བོའ་གླེང་གཞི་སྟེ་དེ་རྣམས་ཀྱིས་རྒྱུ་གླེང་གཞིའི་རྣམ་བཞག་བསྟན། ལེའུ་གཉིས་པས་རྐྱེན་གླེང་བསླང་བ། ལེའུ་གསུམ་པའི་སྨད་ནས་ཉེར་གཅིག་ པ་ཡན་ཆད་ཀྱིས་འབྲས་བུ་ཡོངས་ཤེས་རྒྱུད་དོན་དང་། དེ་དག་ལ་ཁྱབ་བྱེད་དུ་རྒྱུད་ཀྱི་དགོས ་འབྲེལ་དང་། ལེའུ་ཐ་མས་གདམས་གཏད་རྣམས་སྟོན་ཅིང་། ཡོངས་སུ་ཤེས་པར་བྱ་བ་རྒྱུད་དོན་ལའང་རྒྱུད་ཀྱི་དངོས་པོ་བཅུའི་སྟོན་ཚུལ་ནི། ལེའུ་གསུམ་པའི་སྨད་དང་བཅུ་གཅིག་པའི་དབུར་ལྟ་བ་གཏན་ལ་འབེབས་ཚུལ་བསྟན་པ་སོགས་ལེའུ་དུ་མ་ནས་དུམ་ཆ་དུམ་ཆས་དང་པོ་ལྟ་བའི་རྣམ་གཞག་སྟོན་པ་ལ་སོགས་ཏེ། ལེའུ་གང་དང་གང་གིས་རྒྱུད་ཀྱི་དངོས་པོ་བཅུ་ཇི་ལྟར་བསྟན་ཚུལ་གཙོ་ཆེ་ཆུང་གི་སྒོ་ནས་གཞུང་ཉིད་ལ་ཞིབ་མོར་དཔྱད་པས་ཤེས་པར་འགྱུར་ཞིང་། ཞི་ཁྲོ་སྤྱི་བྱེ་བྲག་གི་ཆོས་རྣམས་ལེའུ་གང་དང་གང་གིས་སྟོན་ཚུལ་ཡང་ཞི་བ་སྟོན་པའི་ལེའུ་དགུ། ཁྲོ་བོ་སྟོན་པའི་ལེའུ་ལྔ། ཞི་ཁྲོ་ཐུན་མོང་དུ་སྟོན་པའི་ལེའུ་བརྒྱད་དེ། དེ་དག་གི་ཚུལ་བློ་གྲོས་དང་ལྡན་པ་རྣམས་ཀྱིས་སྤྲོ་ན་ཞིབ་ཏུ་བསྙད་པས་ཆོག་གོ །དེ་དག་གིས་སྤྱི་དོན་གྱི་རྣམ་པར་དབྱེ་བ་བཤད་ཟིན་ཏོ། །སྨྲས་པ། བསིལ་ལྡན་ཆུ་ལས་ལེགས་འཐོན་པདྨ་ལྟར། །དྲི་མས་བཅིངས་ཀྱང་ཉེས་པས་གོས་མིན་པའི། །རང་སེམས་འགྱུར་མེད་འདུས་མ་བྱས་པའི་ཁམས། །དཀྱིལ་འཁོར་རྒྱ་མཚོའ་སྙིང་པོ་ཉིད་དུ་གྲུབ། །དེ་ཕྱིར་པད་འབྱུང་བི་མ་རྨ་གཉགས་སོགས། །གྲུབ་བརྙེས་ཐུགས་བཅུད་སྙིང་པོ་གསང་བའི་རྒྱུད། །རང་སེམས་འགྱུར་མེད་རྟོགས་པའི་ཐབས་ཚུལ་དུ། །གསལ་ཕྱིར་ལེགས་བཤད་རྒྱ་མཚོའ་དགའ་སྟོན་སྤྲོས། །པད་རྩ་ལྟར་དཀར་རྣམ་ཀུན་
དགེ་བ་གང་། །མ་གྱུར་འགྲོ་ཀུན་མཐར་ཐུག་སྙིང་པོའི་དཔྱིད། །མི་འགྱུར་ཟག་མེད་དག་པ་གཉིས་ལྡན་དངོས། །རྒྱལ་བ་རྒྱ་མཚོའ་གོ་འཕང་ཐོབ་ཕྱིར་བསྔོ། །ཤེས་རབ་གསུམ་གྱི་ཉམས་སྟོབས་མི་ལྡན་ཞིང་། །བརྩོན་འགྲུས་འགྲོས་ཀྱི་ཟློས་གར་བྱང་མིན་པས། །མཐོང་བས་དོན་ཀུན་རྟོགས་པར་འབོད་པའི་རྟ། །ཉེས་བཤད་འཕྲང་ལས་བརྒལ་བར་མ་ནུས་དོགས། །དེ་ཕྱིར་འཕགས་མཆོག་ཐུགས་རྗེའི་སྲབ་སྐྱོགས་ཀྱིས། །གཅུན་ལས་བཟོད་པའི་ལྕག་གིས་ལེགས་བསྐུལ་ནས། །དད་བརྩོན་གོས་རྒྱན་འཆང་བའི་ཤེས་ལྡན་ཀུན། །མཁས་པའི་མདུན་སར་བཀྲི་བའི་བཀའ་དྲིན་སྩོལ། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་སྤྱི་དོན་གྱི་རིམ་པ་རྣམ་པར་ཕྱེ་བ་མཐོང་བས་དོན་རྟོགས་ཞེས་བྱ་བ་འདི་ནི་མཁན་ཆེན་ལོ་ཙཱ་བས་མཛད་པའི་སྙིང་འགྲེལ་གསང་བདག་དགོངས་རྒྱན་གྱི་དབུའི་སྤྱི་དོན་ཉིད་རྩ་བའི་བཤད་གཞིར་བཟུང་། དེ་ལས་འཕྲོས་པའི་བཤད་ཚོམས་ཟིན་བྲིས་སུ་བསྡུས་ཏེ་ཁྱབ་བདག་བླ་མ་གཏེར་ཆེན་ཆོས་ཀྱི་རྒྱལ་པོ་གཏེར་བདག་གླིང་པ་དང་། མཁན་ཆེན་ལོ་ཙཱ་བ་ཆེན་པོ་དྷརྨ་ཤྲཱིའི་བཀའ་དྲིན་ལ་བརྟེན་ནས་བློ་གྲོས་ཀྱི་པདྨོ་ཅུང་ཟད་བཞད་པ་སྨྱོས་བན་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེ་དཔལ་བཟང་པོས་རང་ལོ་བཅུ་གཉིས་པའི་ཐོག་ས་བོན་ཟིན་བྲིས་ཙམ་དུ་བཀོད་པ་བློ་གྲོས་ཀྱི་ནུས་ པ་ཆུང་བས་དགོས ་དོན་ཆེ་བ་མ་བྱུང་བར་བརྟེན། སླར་རང་ལོ་ཉི་ཤུ་རྩ་གསུམ་པ་ཀུན་འཛིན་གྱི་ལོར་ཅུང་ཟད་རྒྱས་པར་ཕྱེ་སྟེ་དག་པར་བཀོད་པའི་དགེ་བ་འདིས་ཀྱང་འགྲོ་ཀུན་བདེ་གཤེགས་སྙིང་པོའི་རང་ཞལ་མཇལ་བའི་རྒྱུར་གྱུར་ཅིག། །།