བཀའ་བརྒྱད་ཁྲོ་བོ་རོལ་པའི་གཏོར་བཟློག་བསྡུས་པ་དགྲ་བགེགས་དཔུང་འཇོམས།
བཀའ་བརྒྱད་ཁྲོ་བོ་རོལ་པའི་གཏོར་བཟློག་བསྡུས་པ་དགྲ་བགེགས་དཔུང་འཇོམས་བཞུགས་སོ། །
ན་མོ་གུ་རུ་ཤྲཱི་ཧེ་རུ་ཀཱ་ཡ༔ འདིར་གཏོར་བཟློག་བསྡུས་པ་བྱ་བར་འདོད་པས་ལྕགས་སྣོད་སོགས་སུ་དཔལ་གཏོར་གྲུ་གསུམ་ཆེ་བ་གཅིག་ལ་འཁོར་རང་འདྲ་བརྒྱད་ཀྱིས་བསྐོར་བ་མཐེབ་ཀྱུ་གང་མང་དང་ཤ་ཁྲག་སྨན་དང་མེ་ཏོག་སྣ་ཚོགས་པས་བརྒྱན་ལ། དེའི་མདུན་དུ་ཟན་གྱི་ཉ་བོ་སོགས་དང་གདབ་ཕུར་ཐུན་ལ་སོགས་པ་བཤམས། ལས་བྱང་གཞུང་བསྲངས་ལ་ཚོགས་ཐ་མའི་སྐབས་སུ། ཨོཾ་བཛྲ་མཎྜལ་ཧཱུྃ། ཞེས་བརྗོད་པས། ཕྱི་སྣོད་ཀྱི་འཇིག་རྟེན་ཐམས་ཅད་གྲུ་གསུམ་མཐིང་ནག་འབར་བའི་གཞལ་ཡས་ཁང་དུ་གྱུར། ཨོཾ་བཛྲ་ཤྲཱི་ཧེ་རུ་ཀ་ཀྲོ་ཏཱི་ཤྭ་རི་ཧཱུྃ་ཕཊཿ ཅེས་བརྗོད་པས། ནང་བཅུད་ཀྱི་སེམས་ཅན་ཐམས་ཅད་ཁྲག་འཐུང་རོལ་པའི་ལྷའི་དཀྱིལ་འཁོར་ཆེན་པོར་གྱུར། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་
ཧཱུྃ་ཕཊ༔ སརྦ་ཀརྨ་ཡཀྵ་བྷྱོ་ཛཿ ཞེས་བརྗོད་པས། སྣོད་བཅུད་ལྷའི་དཀྱིལ་འཁོར་དུ་གྱུར་པ་ཐམས་ཅད་སྔོན་གྱི་ཐུགས་དམ་ཆེན་པོ་ལས་བཞེངས་ནས་དམག་དཔུང་གོ་བསར་བྱེད་པ་བཞིན་དུ་རྔམ་པའི་ཧཱུྃ་སྒྲ་ལྡིར་གྱིས་ལངས་པར་བསམས༔ ཕུད་འཐོར་ཞིང་དཔང་གཟུགས་པ་ནི༔ ཧཱུྃ༔ ཕྱོགས་བཅུ་ནམ་མཁའ་ཡངས་པའི་དཀྱིལ་འཁོར་ནས༔ བླ་མ་རིག་འཛིན་རྒྱལ་བ་སྲས་དང་བཅས༔ ཡི་དམ་ཞི་ཁྲོ་བཀའ་བརྒྱད་ལྷ་ཚོགས་རྣམས༔ བརྩེ་བའི་ཐུགས་རྗེས་བདག་ལ་དགོངས་སུ་གསོལ༔ བདག་ནི་རིག་འཛིན་རྣལ་འབྱོར་སྒྲུབ་པ་པོ༔ སྔགས་འཆང་སྒྲུབ་པ་པོ་ལ་དགྲ་བྱུང་ན༔ བདག་གིས་མ་ཉེས་མ་ཡོ་སྲུང་མ་མཁྱེན༔ གཟུ་དང་དཔང་
དུ་དཀོན་མཆོག་བཞུགས༔ ཞལ་ལྕེ་སྣང་སྲིད་ལྷ་འདྲེས་མཛོད༔ དམ་ཉམས་དགྲ་བོ་སྡིག་ཅན་འདིས༔ དང་པོ་སངས་རྒྱས་བསྟན་པ་བཤིག༔ བར་དུ་དཀོན་མཆོག་དབུ་འཕང་སྨད༔ ཐ་མ་གསང་སྔགས་སྙིང་པོ་ཕྲལ༔ ད་ལྟ་རྣལ་འབྱོར་བདག་ལ་བརྡོས༔ དགེ་བ་བཅུ་ནི་ཁྱད་དུ་བསད༔ མི་དགེ་བཅུ་ནི་དང་དུ་བླངས༔ མཚམས་མེད་ལྔ་ཡི་འབྲས་བུ་སྨིན༔ འདི་ནི་བསྒྲལ་བའི་ཞིང་ཡིན་པས༔ རྒྱལ་བ་བཞི་ཁྲོའི་ལྷ་ཚོགས་འཁོར་དང་བཅས༔ ཆོས་ཉིད་ཞི་བའི་ངང་ལས་མ་གཡོས་ཀྱང་༔ རྔམ་བརྗིད་ཁྲོ་བོའི་ཚུལ་དུ་སྐུར་བཞེངས་ལ༔ བསྒྲལ་བའི་ཞིང་བཅུ་འདུལ་བའི་དུས་ལ་བབ༔ མ་གཡེལ་མ་གཡེལ་རྒྱལ་བ་ཞི་ཁྲོའི་ཚོགས༔ དམ་ཉམས་དགྲ་བོ་སྒྲོལ་བའི་ཕྲིན་ལས་མཛོད༔ དེ་ནས། ཨེ་ཛྭ་ལ་མཎྜལ་ཞེས་བརྗོད་པས། བྲུབས་ཁྲུང་གྲུ་གསུམ་འབར་བའི་ནང་དུ་ནྲྀ་དང་ཏྲི་ལས་དགྲ་བགེགས་གང་ཡིན་པ་མངོན་སུམ་བཞིན་དུ་གསལ་བར་གྱུར༔ རུ་ཏྲ་སརྦ་ཤ་ཏྲུྃ་མཱ་ར་ཡ་ནྲྀ་ཛ༔ ན་མོ། རྗེ་བཙུན་སོགས། བདེན་པ་བདར་ལ་དགུག །དེ་ནས་ཐུགས་དམ་བསྐུལ་བ་ནི། ཧཱུྃ༔ ཨེ་ཡི་ཚོགས་ཀྱི་དཀྱིལ་འཁོར་དུ༔ འབར་བ་གཏུམ་ཆེན་རྔམ་པ་ལ༔ ཁྲོས་པའི་ཡིད་ཀྱིས་མཆོད་སྦྱིན་བྱ༔ སངས་རྒྱས་བསོད་ནམས་སྐུ་ཡང་འཇིག༔
བདུད་རྩི་ལྔའམ་ཟག་རྫས་ལ༔ གཟུགས་དང་མིང་རུས་བཅས་པ་དེར༔ ཕོ་ཉས་བཀུག་སྟེ་ཕུར་བུས་གདབ༔ རྡུལ་དུ་བྱས་ཏེ་ཚོགས་སུ་འབུལ༔ ཁྲག་འཐུང་རྡོ་རྗེ་འཁོར་བཅས་ཀྱིས༔ ཁམས་གསུམ་སྲིད་གསུམ་ཐམས་ཅད་ཀུན༔ རྡུལ་ཕྲན་བཞིན་དུ་བརླག་ནས་ཀྱང་༔ དྲག་པོའི་ཕྲིན་ལས་གྲུབ་པར་མཛོད༔ ཧཱུྃ༔ བློ་ལྡན་ཚོགས་ནི་ཉི་ཟླའི་འོད༔ ཧེ་རུ་ཀ་ལ་ཕྱག་འཚལ་ལོ༔ སངས་རྒྱས་བསྟན་པ་བཤིག་པ་དང་༔ དཀོན་མཆོག་དབུ་འཕང་སྨད་པ་དང་༔ སློབ་དཔོན་སྐུ་ལ་བརྙས་བྱེད་དང་༔ རྡོ་རྗེའི་སྤུན་ལ་འཁུ་བ་དང་༔ བདག་ལ་བར་དུ་གཅོད་པ་ཡི༔ གཟུགས་ཅན་དགྲ་དང་གཟུགས་མེད་བགེགས༔ ཁྲག་འཐུང་ལྷ་ཚོགས་ཐམས་ཅད་ཀྱིས༔ དབང་དུ་སྡུས་ལ་རྡུལ་དུ་རློག༔ ཅེས་བྱས་ལ། དེ་ནས་ལྷ་དང་ཕྲལ་བ་ནི༔ ཧཱུྃ༔ དམ་ཉམས་དགྲ་བོ་སྡིག་ཅན་ལ༔ འགོ་བར་བྱེད་པའི་ལྷ་ཁྱོད་ཉོན༔ དམ་ཉམས་དགྲ་བགེགས་སྡིག་ཅན་འདིས༔ དང་པོ་སངས་རྒྱས་བསྟན་པ་བཤིག༔ བར་དུ་དཀོན་མཆོག་དབུ་འཕང་སྨད༔ ཐ་མ་གསང་སྔགས་སྙིང་པོ་དྲལ༔ དགེ་བ་བཅུ་ནི་ཁྱད་དུ་བསད༔ མི་དགེ་བཅུ་ནི་དང་དུ་བླངས༔ མཚམས་མེད་ལྔ་ཡི་འབྲས་བུར་སྨིན༔ འདི་ནི་བསྒྲལ་བའི་ཞིང་
ཡིན་ཕྱིར༔ འདི་ཡི་མགོན་སྐྱབས་མ་མཛད་པར༔ ཡེ་ཤེས་ལྷ་ནི་རང་བཞིན་གནས་སུ་གཤེགས༔ འཇིག་རྟེན་ལྷ་ནི་རང་རང་གནས་སུ་གཤེགས༔ གལ་ཏེ་མི་འགྲོ་མགོན་དང་སྐྱབས་མཛད་ན༔ ཡེ་ཤེས་ལྷ་ནི་ཐུགས་དམ་ཉམས་པར་འགྱུར༔ འཇིག་རྟེན་ལྷ་ནི་རྡུལ་དུ་ག་པར་འགྱུར༔ དེ་བས་འདི་ཡི་མགོན་སྐྱབས་མ་མཛད་ཅིག༔ ཧཱུྃ་ཧཱུྃ་བི་ཤྭ་ཀྲོ་ཏ་ཛྭ་ལ་མཎྚ་ལ་ཧཱུྃ་ཕཊ༔ ཅེས་བརྗོད་པས་བདག་དང་མདུན་གྱི་ལྷ་རྣམས་ལས་ཕོ་ཉའི་ཚོགས་འཕྲོས་པས་མཚོན་ཆ་སྣ་ཚོགས་ཕར་ འཕེན 
་ཚུར་
འཕེན ་གྱི་འུར་སྒྲ་དང་ཐུག་ཆོམས་ཀྱིས་འཇིག་རྟེན་གྱི་ཁམས་ཐམས་ཅད་བྱ་སྤུ་རླུང་གིས་གཏོར་བ་བཞིན་བརྡས་པས་ཡེ་ཤེས་ཀྱི་ལྷ་རྣམས་ལུས་ཀྱི་གོས་ཕུད་པ་ལྟར་བྱོལ་ནས་རང་བཞིན་གྱི་གནས་སུ་གཤེགས༔ འཇིག་རྟེན་གྱི་ལྷ་རྣམས་བྱེའུའི་སྟེང་དུ་ཁྲ་བབ་པ་ལྟར་སྐྲགས་ནས་འཇིག་རྟེན་གྱི་ཁམས་གཞན་དུ་བྲོས་ཏེ་དམ་ཉམས་དེ་མགོན་སྐྱབས་བྱེད་པའི་ལྷ་ཐམས་ཅད་དང་བྲལ་ནས་དྲན་པ་སྟོར་ཞིང་བརྒྱལ་ནས་འགྱེལ་བར་བསམས༔ སླར་ཡང་ཕོ་ཉ་བཏང་སྟེ་དྲག་ཏུ་དགུག་པ་ནི༔ ཧཱུྃ༔ དམ་ཚིག་ཆེན་པོའི་དུས་ལ་བབ༔ བཀའ་བརྒྱད་ལྷ་ཚོགས་དུས་ལས་བབ༔ སྤྲུལ་པ་འགྱེད་པའི་དུས་ལ་བབ༔ དགྲ་བགེགས་དགུག་པའི་དུས་ལ་བབ༔ གང་ལ་བྱ་བ་ཁྱོད་ཀྱིས་ཤེས༔ ཡིད་ལ་བརྣག་པའི་དགྲ་བགེགས་འདི༔ རང་
དབང་མེད་པར་འདི་རུ་ཁུག༔ དབང་དུ་སྡུས་ལ་རྡུལ་དུ་རློག༔ ཧཱུྃ༔ ཁྲག་འཐུང་སྐུ་ལས་སྤྲུལ་པའི་ཕོ་ཉ་ནི༔ ལྕགས་ཀྱུ་དཀར་མོའི་ཚོགས་ནི་སྐར་ལྟར་འཁྲུགས༔ ཞགས་པ་སེར་མོའི་ཚོགས་ནི་སྤྲིན་ལྟར་གཏིབས༔ ལྕགས་སྒྲོག་དམར་མོའི་ཚོགས་ནི་གློག་ལྟར་འཁྱུག༔ དྲིལ་བུ་ལྗང་གུའི་ཚོགས་ནི་ཐོག་ལྟར་འབེབ༔ ཁྱེད་རྣམས་དཔལ་གྱི་ཕོ་ཉ་སྟེ༔ རྦད་ཅིང་བཏང་བ་ང་ཡིས་བྱེད༔ འགུག་ཅིང་བསྟིམ་པ་ཁྱོད་ཀྱིས་མཛོད༔ གང་ལ་བྱ་བ་ཁྱོད་ཤེས་ཀྱི༔ ཡིད་ལ་བརྣག་པའི་དགྲ་བགེགས་རྣམས༔ ལྕགས་ཀྱུ་ཅན་གྱིས་སྙིང་ནས་དྲོངས༔ ཞགས་པ་ཅན་གྱིས་མགུལ་ནས་སྡོམས༔ ལྕགས་སྒྲོག་ཅན་གྱིས་དབང་པོ་ཆིངས༔ དྲིལ་བུ་ཅན་གྱིས་རྒྱབ་ནས་ཕུལ༔ རང་དབང་མེད་པར་འདིར་ཁུག་ལ༔ གཟུགས་དང་ལིང་ག་འདི་ལ་བསྟིམ༔ མིང་བྱང་འདི་ལ་གནས་པར་མཛོད༔ ཨོཾ་བཛྲ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ དགྲ་བགེགས་གནོད་བྱེད་བཛྲ་ཨངྒུ་ཤ་ཛཿརཏྣ་པཱ་ཤ་ཧཱུྃཿཔདྨ་སྥོ་ཊ་བྃཿཀརྨ་གནྜེ་ཧོཿ དེ་ལྟར་སྔགས་དང་ཕྱག་རྒྱ་ཏིང་ངེ་འཛིན་གྱིས་ལན་གསུམ་མམ་ལྔའམ་བདུན་གྱིས་བཀུག་པས་ཁུག་རྟགས་ལ། རབ་སྙིང་རྗེ་བའམཿ འབྲིང་བག་དྲོ་བ་དང་༔ ཐ་མ་ཞེ་སྡང་སྐྱེ་བ་ལ་སོགས་པ་བྱུང་བ་དང་༔ ཉེས་པ་བསྒྲགས་
པ་ནི༔ ཧཱུྃ༔ སེམས་ཅན་ཆེན་པོ་ཁྱོད་ཉོན་ཅིག༔ ཁྱོད་ནི་གཏི་མུག་དབང་གྱུར་པས༔ ལས་དགེ་བ་སྤངས་ནས་མི་དགེ་བསྒྲུབ༔ ཁྱོད་ནི་ཞེ་སྡང་དབང་གྱུར་པས༔ སྙིང་རྗེ་མེད་པར་གསོད་ལ་དགའ༔ ཁྱོད་ནི་ང་རྒྱལ་དབང་གྱུར་པས༔ བདག་བསྟོད་གཞན་གྱི་ཡོན་ཏན་སྨོད༔ ཁྱོད་ནི་འདོད་ཆགས་དབང་གྱུར་པས༔ མ་བྱིན་ལེན་དང་མི་ཚངས་སྤྱོད༔ ཁྱོད་ནི་ཕྲག་དོག་དབང་གྱུར་པས༔ དུས་གསུམ་སངས་རྒྱས་ཡོན་ཏན་སྨོད༔ ལས་དགེ་བ་བཅུ་ནི་ཁྱད་དུ་བསད༔ མི་དགེ་བཅུ་ནི་དང་དུ་བླང་༔ མཚམས་མེད་ལྔ་ཡི་འབྲས་བུ་སྨིན༔ དང་པོ་སངས་རྒྱས་བསྟན་པ་བཤིག༔ བར་དུ་དཀོན་མཆོག་དབུ་འཕང་སྨད༔ ཐ་མ་གསང་སྔགས་སྙིང་པོ་དྲལ༔ དེ་ནས་སློབ་དཔོན་སྐུ་ལ་བརྡོས༔ ཁྱོད་ནི་བསྒྲལ་བའི་ཞིང་ཡིན་པས༔ ཐུགས་རྗེ་ཐབས་ཀྱིས་བསྒྲལ་བར་བྱ༔ ཞེས་བྱས་ལ་ཁྲག་འཐུང་ལྷ་ཚོགས་ཐམས་ཅད་ཅེ་སྤྱང་ཤ་ལ་རྔམས་ཤིང་ཁྲག་ལ་དགའ་བ་ལྟར་ཞིང་བཅུ་སྒྲོལ་བའི་ལས་ལ་རྔམས་པར་བསམས་ནས༔ དུག་སྣ་ཁྲག་སྣ་སྐེ་ཚེ་ཤང་ཚེ་ཉུངས་ཀར་ཉུངས་ནག་ཟི་ར་ནག་པོ་ལྕགས་ཕྱེ་ཟངས་ཕྱེ་རྡོ་ཕྱེ་རྣམས་ཀྱི་ཐུན་བྲབས་ལ༔ ཧཱུྃ༔ སྤྲོས་མེད་རྟོག་བྲལ་མཁའ་དབྱིངས་དག་པ་ནས༔ སྐྱེ་མེད་རྡོ་རྗེའི་སྐུ་གསུང་ཐུགས་མངའ་བ༔ འགྲོ་དོན་རང་བྱུང་བཅོམ་ལྡན་ཐུགས་རྗེའི་ལྷ༔ སྒྲུབ་
ཆེན་བཀའ་བརྒྱད་ལྷ་ཚོགས་འཁོར་དང་བཅས༔ སྟོང་ཉིད་དབྱིངས་ལས་ཐུགས་དམ་རྒྱུད་བསྐུལ་གྱིས༔ སྤྲུལ་པ་དབྱིངས་ནས་རོལ་ཞིང་གཤེགས་སུ་གསོལ༔ བསྟན་པ་གཉན་ལ་དགྲ་དར་ན༔ མི་མངོན་དབྱིངས་ནས་སྐུར་བཞེངས་ལ༔ རྣལ་འབྱོར་བདག་གི་ར་མདའ་མཛོད༔ གནས་འདིར་དྲག་པོའི་ཐུན་ལ་རྒྱུག༔ ཆེ་མཆོག་ཡོན་ཏན་ལྷ་ཚོགས་ཀྱིས༔ དགྲ་བགེགས་འགུགས་པའི་ཕྲིན་ལས་མཛོད༔ ཡང་དག་ཐུགས་ཀྱི་ལྷ་ཚོགས་ཀྱིས༔ དགྲ་བགེགས་མཐུ་དང་རྫུ་འཕྲུལ་ཕྲོག༔ འཇམ་དཔལ་སྐུ་ཡི༴ དགྲ་བགེགས་ལྷ་དང་དབྱེ་བར་མཛོད༔ པདྨ་གསུང་གི༴ དགྲ་བགེགས་རྣམ་ཤེས་རྟེན་ལ་ཕོབ༔ ཕུར་པ་ཕྲིན་ལས༴ དགྲ་བགེགས་ལུས་སེམས་བྱད་དུ་ཆུག༔ མ་མོ་རྦོད་གཏོང་༴ དགྲ་བགེགས་རྣམ་ཤེས་སྨྱོ་རུ་ཆུག༔ འཇིག་རྟེན་མཆོད་བསྟོད༴ དགྲ་བགེགས་ལུས་སེམས་རྡུལ་དུ་རློགས༔ དམོད་པ་དྲག་སྔགས་ལྷ་ཚོགས་ཀྱིས༔ དགྲ་བགེགས་ཤ་ཁྲག་ཚོགས་སུ་རོལ༔ ཡིད་ལ་བརྣག་པའི་དགྲ་བགེགས་རྣམས༔ དྲག་པོའི་ལས་ཀྱིས་མྱུར་དུ་སྒྲོལ༔ ཞེས་བརྗོད་ལ་ལྷ་ཚོགས་རྣམས་ལས་ཕོ་ཉ་དང་ནད་མཚོན་འཇིགས་པའི་ཆོ་འཕྲུལ་སྣ་ཚོགས་ཀྱི་ཆར་དགྲ་བགེགས་ཀྱི་སྟེང་དུ་བབ་པར་བསམས་
ལ༔ ཁྲོ་རྒྱལ་སྟོབས་འདུས་ཀྱི་དྲག་སྔགས་སོ་ལྔ་པ་དང་། མཱ་ར་ཡ་ཐུན་ཡ་རྦད༔ ཅེས་བཟླས་ལ་ཐུན་བྲབས་སོ། །དེ་ནས་གདབ་ཕུར་ལག་ཏུ་བླངས་ལ། རང་གི་གཡས་གཡོན་གྱི་སོར་མོ་རིགས་ལྔ་ཡབ་ཡུམ་བཅུར་གསལ་བའི་བར་དུ་ཧཱུྃ་མཐིང་ནག་ལས་འོད་ཟེར་འཕྲོ་འདུས་སྲས་མཆོག་ཀཱི་ལ་ཡ་སྐུ་སྟོད་མཐིང་དཀར་དམར་བའི་ཞལ་གསུམ་དང་ཕྱག་དྲུག་གི་གཡས་དང་པོ་གཉིས་ན་རྡོ་རྗེ་རྩེ་དགུ་དང་དགྲ་སྟྭ་གཡོན་གཉིས་མེ་དཔུང་དང་ཁ་ཊཱཾ་ཐ་མ་གཉིས་ན་རི་རབ་ཕུར་བུ་འདྲིལ་དུར་ཁྲོད་ཀྱི་ཆས་ཀྱིས་བརྒྱན་པ་རྡོ་རྗེའི་གཤོག་པ་ཅན། སྐུ་སྨད་ཕུར་བུ་འབར་བ་མགར་གྱི་སོལ་མལ་ནས་དྲངས་པ་ལྟ་བུའི་རྣམ་པ་ཅན་ཆུ་སྲིན་ཁ་ནས་སྦྲུལ་གྱི་ཆུན་པོ་འཕྱང་བ། དེའི་རྒྱ་མདུད་གོང་མར་ཞི་བ་དང་ཆང་ཟུང་ལ་ཁྲག་འཐུང་ལྷ་དགུའི་ཕོ་བྲང་དང་བཅས་པ། རྒྱ་མདུད་འོག་མར་དཔལ་གྱི་བཀའ་སྡོད་དང་རྩེ་མོར་མཚོན་ཆ་སྣ་ཚོགས་ཀྱི་ཚྭ་ཚྭ་འཕྲོ་བ། བསྒྲིལ་བ་ཙམ་གྱིས་སྲིད་གསུམ་འདར་བ། ཕྱར་བ་ཙམ་གྱིས་ཁམས་གསུམ་སྔངས་པ། བཏབ་པ་ཙམ་གྱིས་སྟོང་གསུམ་བརླག་ནུས་པར་བསྐྱེད་ལ། ཨོཾ་བཛྲ་ཀཱི་ལི་ཀཱི་ལ་ཡ་ཀཱ་ཡ་ཝཀྩི་ཏྟ་ཨ་བྷི་ཥིཉྩ་ཨོཾ་ཨཱཿཧཱུྃ༔ ཞེས་པས། སྐུ་གསུང་ཐུགས་ཀྱི་བྱིན་གྱིས་བརླབས་པས་ཁམས་གསུམ་དུས་གཅིག་ལ་སྒྲོལ་ནུས་པར་བསམས། དེ་ནས་ཕུར་པ་བསྒྲིལ་ཞིང་འདི་སྐད་དོ། །ཧཱུྃ༔ བདག་ཉིད་ཁྲག་འཐུང་ཧེ་རུ་ཀ༔ གཡས་པ་ཐབས་ཀྱི་རང་བཞིན་ལ༔ རིགས་ལྔ་ཡབ་ལྔའི་ངོ་བོར་གསལ༔
གཡོན་པ་ཤེས་རབ་རང་བཞིན་ལ༔ རིགས་ལྔ་ཡུམ་ལྔའི་ངོ་བོར་གསལ༔ ཐབས་དང་ཤེས་རབ་སྦྱོར་བ་ལས༔ མཐིང་ནག་ཧཱུྃ་ལས་བསྐྱེད་པའི་ལྷ༔ སྲས་མཆོག་བཛྲ་ཀཱི་ལ་ཡ༔ ལྟེ་བ་ཡན་ཆད་སྐུ་སྟོད་ནི༔ དབུ་གསུམ་ཕྱག་དྲུག་རྡོར་གཤོག་ཅན༔ དུས་གསུམ་བདེ་གཤེགས་འདུས་པའི་སྐུ༔ ལྟེ་བ་མན་ཆད་སྐུ་སྨད་ནི༔ ཡེ་ཤེས་ཕུར་པ་དཔལ་དང་ལྡན༔ དུག་ལྔ་འཇོམས་མཛད་མགོ་བོ་རྒྱ་མདུད་ནི༔ སྲིད་གསུམ་བླ་མེད་གནས་སུ་སྒྲོལ་བའི་ཕྱིར༔ ཞི་བའི་དཀྱིལ་འཁོར་བཞུགས་པར་མངའ་གསོལ་ནས༔ མ་བཅོས་ལྷུན་གྱིས་གྲུབ་པར་གཟི་བརྗིད་བསྐྱེད༔ ཆང་ཟུང་ཟུར་བརྒྱད་དུར་ཁྲོད་བརྒྱད་ཀྱི་ངང་༔ རྣམ་ཤེས་ཚོགས་བརྒྱད་དབྱིངས་སུ་སྒྲོལ་བའི་ཕྱིར༔ ཁྲོ་བོའི་དཀྱིལ་འཁོར་བཞུགས་པར་མངའ་གསོལ་ནས༔ བཅུ་དྲུག་རོལ་པ་ཆེན་པོར་གཟི་བརྗིད་བསྐྱེད༔ རྐེད་པ་རྒྱ་མདུད་ཕྲིན་ལས་བཞི་ཡི་ངང་༔ ཆུ་སྲིན་ཁ་ནས་སྦྲུལ་གྱི་ཆུན་པོས་བརྒྱན༔ འཁོར་བ་ཆོས་ཀྱི་དབྱིངས་སུ་སྒྲོལ་བའི་ཕྱིར༔བཀའ་སྲུང་ཕོ་ཉ་བཞུགས་པར་མངའ་གསོལ་ནས༔ མཁའ་དབྱིངས་ཡུམ་གྱི་བྷ་གར་གཟི་བརྗིད་བསྐྱེད༔ རྩེ་མོ་ཟུར་གསུམ་མངོན་སྤྱོད་དྲག་པོ་ཡིས༔ དུག་གསུམ་སྐུ་གསུམ་
དབྱིངས་སུ་སྒྲོལ་བའི་ཕྱིར༔ མཐུ་རྩལ་རྨད་དུ་བྱུང་བར་མངའ་གསོལ་ནས༔ འབྲས་བུ་སྐུ་གསུམ་དབྱིངས་སུ་གཟི་བརྗིད་བསྐྱེད༔ ཕྲིན་ལས་རྫོགས་པའི་རྡོ་རྗེ་ཕུར་པ་ནི༔ བསྒྲིལ་བ་ཙམ་གྱིས་སྲིད་པ་གསུམ་ཡང་འདར༔ ཕྱར་བ་ཙམ་གྱིས་ཁམས་གསུམ་སྔངས་པར་བྱེད༔ བཏབ་པས་ཁམས་གསུམ་སྐད་ཅིག་ཙམ་ཡང་བརླག༔ གནོད་བྱེད་དགྲ་བགེགས་རྣམས་ལ་སྨོས་ཅི་དགོས༔ གདུག་པ་འདུལ་མཛད་བཛྲ་ཀཱི་ལ་ཡ༔ ལས་རྣམས་དོན་དུ་གཉེར་ཅིག་བཛྲ་ཀཱི་ལ་ཡ༔ འཕངས་ནས་ཕྱིར་མ་ལྡོག་ཅིག་བཛྲ་ཀཱི་ལ་ཡ༔ སྲོག་དབུགས་ལུས་དང་ཕྱེས་ཤིག་བཛྲ༴ རྣམ་ཤེས་ལུས་དང་ཕྱེས་ཤིག་བཛྲ༴ དགྲ་བགེགས་རྡུལ་དུ་རློགས་ཤིག་བཛྲ་ཀཱི་ལ་ཡ༔ ཕཊ་ཕཊ༔ ན་མཿས་མནྟ་བུདྡྷཱ་ནཾ༔ ཀཱ་ཡ་ཝཀྩི་ཏ་བཛྲ་ཀཱི་ལ་ཡ་ཕཊ་ཕཊ༔ བཛྲ་ཀཱི་ལི་ཀཱི་ལ་ཡ་བཛྲ་དྷ་རོད་ཨ་ཛྙཱ་པ་ཡ་ཏི་གནོད་བྱེད་བིག་ནཾ་བཾ་ཧཱུྃ་ཕཊ༔ ཞེས་བཏབ་ཅིང་བསྒྲིལ་ལ༔ ཕྱོགས་བཅུའི་བདེ་གཤེགས་རྣམས་འོད་དུ་ཞུ་ནས་ཕུར་པ་ལ་ཐིམ་པས་གཟི་བརྗིད་དང་ལྡན་པར་བསམས༔ ཡང་ཕུར་པ་ཕྱོགས་ཐམས་ཅད་དུ་བཏབ་ཅིང་བསྒྲིལ་བས་གནོད་བྱེད་རྣམས་འོད་དུ་ཞུ་ནས་ཕུར་པ་ལ་ཐིམ་པས་རྫུ་འཕྲུལ་དང་ལྡན་པར་བསམས༔ དེ་ནས་དགྲ་བགེགས་ཀྱི་རྣམ་ཤེས་སྤར་བ་ནི། ཨེ་མ་ཁམས་གསུམ་སེམས་
ཅན་རྣམསཿ མ་རྟོགས་འཁྲུལ་པ་སྙིང་རེ་རྗེཿ སྙིང་རྗེས་བསྒྲལ་བའི་དམ་ཚིག་ནིཿ བསད་ཅིང་མནན་པ་མ་ཡིན་ཏེཿ ཐུགས་རྗེའི་ཐབས་ཀྱིས་བསྒྲལ་བ་ལསཿཕུང་པོ་རྒྱལ་བའི་ཞིང་དུ་གསལཿ གཟུགས་ཀྱིས་ལྷ་རྣམས་མཆོད་པར་བྱཿ རྣམ་ཤེས་ཡུམ་གྱི་མཁའ་ལ་སྤརཿ ཁྱོད་ནི་རྒྱལ་བའི་སྲས་སུ་བསྐྱེདཿ ཨོཾ་བཛྲ་ཀཱི་ལི་ཀཱི་ལ་ཡཿཨེ་རཾ་བཾ་རཾ་བོདྷི་ཙིཏྟ་ཧྲིཿ སཾ་ཧ་ར་ཎཿཕཊཿ ཨོཾ་བཛྲ་མ་ཧཱ་ཀྲོ་ཏ་ལན་གསུམ་བསྒྲིལ་པདྨ་ཀྲོ་དྷཱི་ཤྭ་རི་ཀླད་ལ་ལན་གསུམ་གཡུག་བཛྲ་ཀཱི་ལི་ཀཱི་ལ་ཡ་རྐེད་པར་གཡོན་སྐོར་གསུམ་མ་ཧཱ་ཡཀྵ་ཀ་ལ་རཱུ་ལ་ཕོ་རྒྱུད་བསྐུལ་ཕྱིར་གཡས་སུ་ཚོམ་རྔམས་བྱ། ཀརྨ་རཾ་རཾ་ཛྭ་ལ་རཾ་མོ་རྒྱུད་བསྐུལ་ཕྱིར་གཡོན་དུ་ཚོམ་རྔམས་བྱ། གནོད་བྱེད་འབྱུང་པོའི་སྙིང་ལ་མཱ་ར་ཡ་ཧཱུྃ་ཕཊཿ གཟས་པོའི་སྙིང་གར་གདབ། ཞེས་ཕུར་པ་དེ་དམིགས་བྱའི་སྙིང་གར་བཏབ་ཅིང་བསྒྲིལ་བས་ཁོའི་སྙིང་གི་དཀྱིལ་ན་རླུང་གི་དྭངས་མ་སྔོ་སྐྱ་བྱེའུའི་རོ་ཙམ་གནས་པའི་ནང་ན་ཁྲག་གི་དྭངས་མ་དམར་པོ་རྒྱ་སྲན་གྱི་གྭའུ་ཙམ་པ་དེའི་དཀྱིལ་ན་རྣམ་པར་ཤེས་པའི་རྟེན་ཐིག་ལེ་དཀར་པོ་ཡུངས་འབྲུ་ཙམ་ཞིག་གནས་པ་དེ་ལ་ཕུར་པ་བཏབ་ཅིང་བསྒྲིལ་བས་རླུང་གི་དྭངས་མ་དེ་ན་བུན་རླུང་གིས་གཏོར་བ་ལྟར་གཏོར། ཁྲག་གི་དྭངས་མ་དེ་ལྕགས་སྲེག་མར་ལ་ཕོག་པ་ལྟར་ཞུ་ཞིང་བསྐམ་ཐིག་ལེ་དཀར་པོ་དེ་ཕུར་པའི་རྩེ་མོར་འུབ་ཀྱིས་འདུས་པ་ཁོང་སེང་ནས་ཡར་དྲངས་ཏེ་ཆང་ཟུང་
གི་ཕོ་བྲང་ན་ཧེ་རུ་ཀ་ཡབ་ཡུམ་བཞུགས་པའི་ཐུགས་ཀར་ཐིམ་པས་ཁོའི་ལུས་སེམས་དང་བྲལ་ནས་ཟླ་བ་གཟས་ཟིན་པ་ལྟར་བཀྲག་མདངས་ཉམས་པར་བསམས་ལ། བདག་ཕུར་གཟས་གསུམ་དབྱེར་མེད་པ་ཆོས་ཉིད་ཀྱི་དགོངས་པ་ལ་བཞག་གོཿ དེ་ནས་ཕུར་པ་བསྐོར་ཞིང་བཏབ་སྟེ༔ ཧཱུྃ༔ ལྕགས་སམ་ནག་པོའི་ཤིང་རྣམས་ལ༔ མངོན་སྤྱོད་དྲག་པོའི་ཕུར་པ་བྱས༔ མགོ་བོ་རྒྱ་མདུད་གྲུ་བཞི་པ༔ ཆང་ཟུང་ཟུར་བརྒྱད་ལོགས་བརྒྱད་དེ༔ རྐེད་པ་རྒྱ་མདུང་ཆུ་སྲིན་ཁ༔ རྩེ་མོ་ཟུར་གསུམ་དཔལ་དང་ལྡན༔ ཕྱི་ནི་དུར་ཁྲོད་གཞལ་ཡས་ཁང་༔ ནང་ན་ཞི་ཁྲོའི་ལྷ་བསྒོམས་ཏེ༔ དགྲ་དང་བགེགས་ལ་བཏབ་པའི་ཚེ༔ བདུན་བརྒྱུད་རྩད་ནས་གཅོད་པར་བྱེད༔ དམ་ཉམས་དགྲ་བགེགས་སྡིག་ཅན་ཁྱོད༔ རུས་ནི་ཞེ་སྡང་ཕ་ལས་བྱུང་༔ ཤ་ཁྲག་འདོད་ཆགས་མ་ལས་གྲུབ༔ རིགས་ནི་གཏི་མུག་ལས་ཀྱིས་དེད༔ འཁོར་བ་མ་ཡི་མངལ་དུ་ཞུགས༔ ཉོན་མོངས་ལྔ་ཕུང་གཟུགས་སུ་གྲུབ༔ ལྔ་ཕུང་རྩད་ནས་བཅད་པའི་ཕྱིར༔ ལྟེ་བའི་དཀྱིལ་དུ་ཀཱི་ལ་ཡ༔ རྣམ་ཤེས་རྟེན་དང་བྲལ་བའི་ཕྱིར༔ སྙིང་གི་དཀྱིལ་དུ༴ གཟུགས་ཀྱི་འདུ་ཤེས་བྲལ་བའི་ཕྱིར༔ མིག་གི་དཀྱིལ་དུ༴ ཉན་པ་སྒྲ་ཡི་འདུ་ཤེས་བཤིག་པའི་ཕྱིར༔ རྣ་བའི་དཀྱིལ་དུ༴ སྣམ་
པ་དྲི་ཡི་འདུ་ཤེས་བཤིག་པའི་ཕྱིར༔ སྣ་ཡི་དཀྱིལ་དུ༴ མྱོང་བ་རོ་ཡི་འདུ་ཤེས་བཤིག་པའི་ཕྱིར༔ ལྕེ་ཡི་དཀྱིལ་དུ༴ འཛིན་པ་ལག་གི་འདུ་ཤེས་བཤིག་པའི་ཕྱིར༔ དཔུང་པའི་དཀྱིལ་དུ༴ རིགས་བརྒྱུད་འཁོར་བའི་འདུ་ཤེས་བཤིག་པའི་ཕྱིར༔ གསང་བའི་དཀྱིལ་དུ༴ ང་རྒྱལ་བདག་འཛིན་འདུ་ཤེས་བཤིག་པའི་ཕྱིར༔ ཀླད་པའི་དཀྱིལ་དུ་ཀཱི་ལ་ཡ༔ ཨོཾ་བཛྲ་མ་ཧཱ་ཀྲོ་ཏ་ཤྲཱི་ཧེ་རུ་ཀ་ཧཱུྃ་ཕཊ༔ གནོད་བྱེད་དགྲ་བགེགས་མཱ་ར་ཡ་ན་ཤ་ཡ་བྷན་དྷ་ཡ་ཧཱུྃ་ཧཱུྃ་ཕཊ༔ ཅེས་ཕུར་པ་དམིགས་བྱའི་གནས་དེ་རྣམས་སུ་གདབ་པ་དྲག་པོ་བྱས་པས་དེའི་ལུས་ངག་ཡིད་གསུམ་བརླག་པར་བསམ་མོ༔ དེ་ནས་སྲས་མཆོག་གིས་གཏུབ་སྟེ༔ ཧཱུྃ༔ ང་ནི་དུས་གསུམ་བཞུགས་པ་ཡི༔ སངས་རྒྱས་ཀུན་གྱི་ཡེ་ཤེས་སྐུ༔ ཡེ་ཤེས་རྣོ་བའི་མཚོན་ཆ་ཡིས༔ ལོག་རྟོག་འཁོར་བ་རྒྱུན་ཆོད་ཅིག༔ ཨོཾ་མནྟྲ་སུཾ་བྷ་ནི་བཛྲ་ཛྭ་ལ་ཧཱུྃ༔ ཨོཾ་བྷྲཱུྃ་ཧཱུྃ་བྷྲཱུྃ་ཏྲྃ་བྷྲཱྃ་ཧྲཱི་བྷྲཱུྃ་ཧཱ་བྷྲཱུྃཿ ཚལ་པ་ཚལ་བ༔ མཱ་ར་ཡ་ཛ་ཛཿཞེས་བརྗོད་པས་ཕུར་བུའི་དབལ་ལས་མཚོན་ཆའི་ཆར་བབ་པས་གཟུགས་ཕུང་ཕྱེ་མར་སོང་བར་བསམ་མོ༔ དེ་ནས་གཏུན་དུ་བརྡུང་བ་ནི༔ ཧཱུྃ༔ བརྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་ཀུན༔ རྡོ་རྗེ་མཚོན་ཆས་བསྒྲལ་
ནས་ཀྱང་༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུང་བྱས་ནས༔ ལྷ་ཡང་རུང་སྟེ་བརླག་པར་བྱེད༔ དགྲ་དང་བགེགས་ལ་སྨོས་ཅི་དགོས༔ ཨོཾ་བཛྲ་པདྨ་ཨ་ཀྲོ་ཏ་ཡ་ཁ་ཐཾ༔ ཞེས་གཏུན་ཁུང་ཤེས་རབ་ཀྱི་མཁར་ཐོ་བ་ཡབ་ཀྱི་རྡོ་རྗེས་བརྡུངས་བས་གང་ལ་བྱ་བའི་གཟུགས་ཕུང་༔ ཏིལ་གཏུན་དུ་བརྡུངས་བ་ལྟར་ཤ་རུས་དམར་མྱོག་གིས་བཏང་བར་བསམས༔ དེ་ནས་བསྟབས་པ་བྱ་ཕྱིར་ལས་ཀྱི་སྒྲོལ་གིང་གིས་ཉ་བོ་དང་གདབ་ཕུར་བཟུང་ལ་གཤིན་རྗེའི་རྔམས་འགྲོས་ཀྱིས་བསྟབས་པས་དཀྱིལ་འཁོར་གྱི་ལྷ་ཚོགས་དཔལ་གྱི་བཀའ་སྡོད་བཅས་པ་དགྱེས་པའི་ཚུལ་གྱིས་རྐན་སྒྲ་དང་བཅས་ཏེ་གསོལ་བས་དགྲ་བགེགས་ཀྱི་དུག་གསུམ་གནས་སྟོང་བར་བསམས༔ སྒྲུབ་པ་པོ་རྣམས་ཀྱིས་ཀྱང་རོལ་མོ་དང་བཅས་སྟེ་ཁྲག་འཐུང་གི་འགྱིང་འགྲོས་བཅས༔ ཧཱུྃ༔ ཕྱེས་ཤིག་ཕྱེས་ཤིག་ཞལ་ཕྱེས་ཤིག༔ དོན་དམ་ཆོས་ཉིད་ཞལ་ཕྱེས་ཤིག༔ ཁམས་གསུམ་འཁོར་བ་ཞལ་དུ་བསྟབ༔ སྐུ་ལྔ་ཡེ་ཤེས་ཞལ་ཕྱེས་ཤིག༔ ཉོན་མོངས་དུག་ལྔ་ཞལ་དུ་བསྟབ༔ དཀྱིལ་འཁོར་ལྷ་ཚོགས་ཞལ་ཕྱེས་ཤིག༔ བསྒྲལ་བའི་ཞིང་བཅུ་ཞལ་དུ་བསྟབ༔ ཕྱེ་ཞིག་ཕྱེ་ཞིག་ཞལ་ཕྱེས་ཤིག༔ རྒྱལ་བ་ཞི་ཁྲོའི་ལྷ་ཚོགས་ཞལ་ཕྱེས་ཤིག༔ དམ་ཉམས་དགྲ་བགེགས་བསྒྲལ་བ་ཡི༔ ཤ་ཁྲག་རུས་པའི་མཆོད་པ་
དང་༔ དབང་པོ་ནང་རོལ་བཅས་པ་རྣམས༔ ཞལ་དུ་བསྟབས་སོ་ཁ་རཾ་ཁཱ་ཧི༔ མགུལ་དུ་བསྟིམ་མོ་ཨ་ར་ལི༔ དབྱིངས་སུ་བསྒྲལ་ལོ་ས་མ་ཡ༔ བཞེས་ཤིག་ལྷག་མ་མེད་པར་མཛོད༔ མ་ཧཱ་མཱཾ་ས་ཁཱ་ཧི༔ མ་ཧཱ་རཀྟ༔ མ་ཧཱ་ཙིཏྟ༔ མ་ཧཱ་ཀེང་ནི་རི་ཏི༴ མ་ཧཱ་བ་སུ་ཏ༔ མ་ཧཱ་གོ་རོ་ཙ་ན༴ དབང་པོ་རྣམ་ལྔ་ཁཱ་ཧི༔ སྐྱེ་མཆེད་དྲུག་ཁཱ་ཧི༔ རྣམ་ཤེས་ཚོགས་བརྒྱད་ཁཱ་ཧི༔ ཞེས་བསྟབས་པས་དགྱེས་ནས་ཅི་བཅོལ་བའི་ཕྲིན་ལས་མཛད་པར་བསམ༔ དེ་ནས་བཟློག་པའི་ཕྲིན་ལས་བཅོལ་བ་ལ་དཀྱིལ་འཁོར་གྱི་ལྷ་རེ་རེ་བཞིན་ཡང་བསྐུལ་བའི་མཇུག་ཏུ་ཉ་བོ་བསྒྲལ་བའི་ཕུང་པོ་བསྟབ༔ རཀྟ་ཕྱར་ཞིང་བཟློག་བྱང་སྦྱར༔ ཕུར་སྐོར་བྱ༔ བྷྱོས་གདབ་ཅིང་༔ དམོད་བཅོལ་བྱ་སྟེ༔ ཐུགས་དམ་བསྐུལ་བ་ནི༔ ཧཱུྃ༔ ཞི་བ་དབྱིངས་ཀྱི་དཀྱིལ་འཁོར་ཆེན་པོ་ནས༔ བཅོམ་ལྡན་དཔལ་ཆེན་ཀུན་བཟང་ཧེ་རུ་ཀ༔ གཉིས་མེད་ཡུམ་ཆེན་ཀུན་ཏུ་བཟང་མོ་དང་༔ སེམས་དཔའ་སེམས་མ་བརྒྱད་དང་ཐུབ་པ་དྲུག༔ སྒོ་བ་སྒོ་མ་ལ་སོགས་ཞི་ཁྲོའི་ཚོགས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཧཱུྃ༔ འཇིག་རྟེན་སྣོད་བཅུད་གཏོར་མར་བཅས༔ མཆོག་ཆེན་མཆོག་ཕྲན་མཚན་ལྡན་དང་༔ ཤ་ལྔ་བདུད་རྩི་རྣམ་པ་ལྔ༔ གཟུགས་
སྒྲ་དྲི་རོ་རེག་བྱ་ཆོས༔ སྣང་སྲིད་མཆོད་པའི་ཡོ་བྱད་ཀུན༔ མཛེས་ཤིང་བཀྲ་བར་བཤམས་ནས་སུ༔ བཅོམ་ལྡན་ཞི་བའི་ལྷ་ཚོགས་ལ༔ གཉིས་སུ་མེད་པའི་ཚུལ་གྱིས་འབུལ༔ སྣོད་རྣམས་གཞལ་ཡས་ཁང་དུ་བསྒྱུར༔ བཅུད་རྣམས་ལྷ་དང་ལྷ་མོར་བསྒྱུར༔ འཁོར་བ་མྱང་འདས་ཆེན་པོར་བཟློག༔ སེམས་ཅན་སངས་རྒྱས་ཉིད་དུ་བཟློག༔ དུག་ལྔ་ཡེ་ཤེས་ལྔ་རུ་བཟློག༔ ཕུང་ལྔ་རྒྱལ་བ་རིགས་ལྔར་བཟློག༔ འབྱུང་ལྔ་ཡུམ་ལྔའི་ངང་དུ་བཟློག༔ དབང་ཤེས་སེམས་དཔའ་བརྒྱད་དུ་བཟློག༔ ཡུལ་དུས་སེམས་མ་བརྒྱད་དུ་བཟློག༔ མཐའ་བཞི་སྒོ་བ་བཞི་རུ་བཟློག༔ རིགས་དྲུག་ཐུབ་པ་དྲུག་ཏུ་བཟློག༔ ཐ་མལ་རང་རྒྱུད་འཁྲུལ་རྟོག་ཀུན༔ ཆོས་དབྱིངས་སྐྱེ་མེད་ངང་དུ་བཟློག༔ སྣང་སྲིད་བདེ་བ་ཆེན་པོར་བཟློག༔ བཟློག་ཅིག་སྒྱུར་ཅིག་ས་མ་ཡ༔ དེ་ནས་ཁྲོ་བོའི་ཐུགས་དམ་བསྐུལ་བ་ནི༔ ཧཱུྃ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཁྲོ་བོ་རོལ་པའི་དུར་ཁྲོད་ཆེན་པོ་ནས༔ ཤིན་ཏུ་མི་བཟད་རབ་འཇིགས་སྐུར་སྟོན་པ༔དཔལ་ཆེན་ཡོངས་རྫོགས་དྲག་པོའི་ཕྲིན་ལས་མཛོད༔ ཧཱུྃ༔ ཡོན་ཏན་ལྷུན་གྱིས་གྲུབ་པའི་དཀྱིལ་འཁོར་ནས༔ བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ༔ གཉིས་མེད་ཡུམ་ཆེན་ཁྲོ་མོ་
གནམ་ཞལ་མ༔ རིགས་བཞི་ཧེ་རུ་ཀ་དང་ཡུམ་བཞི་དང་༔ ཁྲོ་བོ་བཅུ་དང་ཡུམ་བཅུ་སྒོ་བ་བཞི༔ ཅེ་སྤྱང་མ་བརྒྱད་ཆེ་མཆོག་སྣ་ཚོགས་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ འདི་བཟློག་བྱང་དང་སྔགས་སྦྱར། ཧཱུྃ༔ ཡང་དག་ཐུགས་ཀྱི་དཀྱིལ་འཁོར་ཆེན་པོ་ནས༔ བཅོམ་ལྡན་དཔལ་ཆེན་བཛྲ་ཧེ་རུ་ཀ༔ གཉིས་མེད་ཡུམ་མཆོག་ཀྲོ་ཏི་ཤྭ་རི་མ༔ཁྲག་འཐུང་རིགས་བཞི་ཡབ་ཡུམ་ཀཽ་རི་བརྒྱད༔ སེང་ཧ་མ་བརྒྱད་སྒོ་མ་བཞི་རྣམས་དང་༔ བསྟན་པ་སྲུང་བའི་དབང་ཕྱུག་ཉི་ཤུ་བརྒྱད༔ ཡང་དག་ཐུགས་ཀྱི་ལྷ་ཚོགས་མ་ལུས་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ འཇམ་དཔལ་སྐུ་ཡི་དཀྱིལ་འཁོར་ཆེན་པོ་ནས༔ བཅོམ་ལྡན་དཔལ་ཆེན་གཤིན་རྗེ་གཤེད་པོ་དང་༔ གཉིས་མེད་ཡུམ་མཆོག་ཟ་བྱེད་བེ་ཏཱ་ལི༔ སྦྱོར་བའི་ཡུམ་མཆོག་ཨེ་ཀ་ཛ་ཏི་མ༔ རིག་འཛིན་གཤེད་ཆེན་བཞི་པོ་ཡུམ་དང་བཅས༔ ཕྱོགས་སྐྱོང་བཅུ་གཉིས་ཡབ་ཡུམ་གིང་བཞི་དང་༔ ཁྲམ་ཐོགས་བདུད་བཞི་ཤོད་ཐོགས་རྩིས་པ་བཞི༔ བཤན་པ་ལྔ་སོགས་སྐུ་ཡི་ལྷ་ཚོགས་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར༔ ཧཱུྃ༔ པདྨ་གསུང་གི་དཀྱིལ་འཁོར་ཆེན་
པོ་ནས༔ བཅོམ་ལྡན་དཔལ་ཆེན་རྟ་མགྲིན་དབང་གི་སྐུ༔ གཉིས་མེད་ཡུམ་མཆོག་པདྨ་གཟི་ལྡན་མ༔ ཕྲ་མེན་ཡབ་ཡུམ་ཟིལ་གནོན་ཁྲོ་བོ་བརྒྱད༔ ཡེ་ཤེས་དཔལ་གྱི་ཁྱི་བརྒྱད་སྤྱང་བརྒྱད་དང་༔ སྒོ་བ་བཞི་དང་ཁམས་རྒྱ་དམུས་ལོང་སོགས༔ པདྨ་གསུང་གི་ལྷ་ཚོགས་མ་ལུས་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ ཕྲིན་ལས་ལྷུན་གྱིས་གྲུབ་པའི་དཀྱིལ་འཁོར་ནས༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་༔ གཉིས་མེད་ཡུམ་མཆོག་འཁོར་ལོ་རྒྱས་འདེབས་མ༔ རིགས་ཀྱི་སྲས་བཞི་ཁྲོ་བོ་ཡབ་ཡུམ་བཅུ༔ ཟ་གསོད་ཉི་ཤུ་སྒོ་མ་ཆེན་མོ་བཞི༔ བསེ་མོ་བཞི་དང་རེ་ཏི་མཆེད་བཞི་དང་༔ ཤོ་ན་མུ་ཁ་བསེ་ལྕགས་དུང་སྐྱེས་བུ༔ བཞི་གསུམ་བཅུ་གཉིས་ལ་སོགས་ཕུར་པ་ཡི༔ ལྷ་ཚོགས་བདུན་ཅུ་རྩ་གཉིས་བཞི་འདྲ། ལ་སོགས་ཁོང་འབྱུང་སེར་སོགས། རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ མ་མོ་རྦོད་གཏོང་ལྷུན་གྲུབ་དཀྱིལ་འཁོར་ནས༔ བཅོལ་ལྡན་དཔལ་ཆེན་བླ་མེད་ཧེ་རུ་ཀ༔ གཉིས་མེད་ཡུམ་མཆོག་ཉིད་གཞི་མུ་ཁ་ལེ༔ དབྱིངས་ཀྱི་ཡུམ་ཆེན་རྟག་པའི་རྒྱལ་མོ་ལྔ༔ རྒྱ་མཚོ་ལ་སོགས་རྗེ་མོ་བཅུ་བཞི་དང་༔ སྨན་མོ་ཉེར་བཞི་སྲིན་མོ་ཉི་
ཤུ་བརྒྱད༔ སྒོ་མ་བཞི་དང་ཡང་གབ་རྒྱལ་མོ་བཞི༔ སྦས་པའི་མ་བཞི་གདོང་མོ་མཆེད་བཞི་དང་༔ རོ་ཁ་མ་གསུམ་ལ་སོགས་དངོས་བསྟན་ལྟར། དགུ་བཅུ་གཉིས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ རིག་འཛིན་ལྷུན་གྱིས་གྲུབ་པའི་དཀྱིལ་འཁོར་ནས༔ རོ་ལངས་བདེ་བ་རྡོ་རྗེ་ཐོད་ཕྲེང་རྩལ༔ ཡང་དག་ཐུགས་ཀྱི་རིག་འཛིན་ཆེན་པོ་དང་༔ འཇམ་དཔལ་སྐུ་ཡི་རིག་འཛིན་ཆེན་པོ་དང་༔ པདྨ་གསུང་གི༴ ཕུར་པ་ཕྲིན་ལས༴ བདུད་རྩི་སྨན་གྱི༴ མ་མོ་རྦོད་གཏོང་༴ འཇིག་རྟེན་མཆོད་བསྟོད༴དྲག་སྔགས་རིག་འཛིན་རིགས་ཀྱི་རིག་འཛིན་དང་༔ སློབ་དཔོན་སྡེ་བཞི་ལ་སོགས་རིག་འཛིན་དང་༔ མཁའ་འགྲོ་སྡེ་བཞི་དཔའ་བོ་གིང་ཆེན་བཞི༔ དེ་ལ་སོགས་ཏེ་དཔའ་བོ་དཔའ་མོའི་ཚོགས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ མཆོད་བསྟོད་ལྷུན་གྱིས་གྲུབ་པའི་དཀྱིལ་འཁོར་ནས༔ ཡབ་གཅིག་ལྷ་མཆོག་དྲེགས་པ་ཀུན་འདུལ་དང་༔ གཉིས་མེད་ཡུམ་མཆོག་ཁམས་གསུམ་སྤྱི་འདུལ་མ༔ དབང་ཕྱུག་ཆེན་པོ་ཨུ་མ་དེ་བི་དང་༔ ཡ་མ་རཱ་ཛ་སྒྲོལ་བྱེད་ནག་མོ་དང་༔ རྐོས་རྗེ་དྲང་དཀར་ནག་མོ་རེ་མ་ཏི༔
རཀྴ་གློག་ཕྲེང་སྦལ་མགོ་ཁྲག་མིག་དང་༔ ཡཀྴ་མེ་དབལ་མོན་མོ་ནག་མོ་དང་༔ རཱ་ཧུ་ལ་དང་ཐོག་གི་བུ་ཡུག་མ༔ ཀླུ་བདུད་ནག་པོ་ཡག་ཤ་ནག་མོ་དང་༔ ལྷ་རབས་ཤམ་པོ་རྒྱལ་པོ་གུ་རུམ་རྩེ༔ གནམ་ཐེའུ་དཀར་པོ་ཨེ་ཀ་ཛཱ་ཊི་དང་༔ རྡོ་རྗེ་ཡུམ་ཆེན་འབྱུང་བ་ལྔ་ཡི་བདག༔ ཅེས་གདུགས་པ་སྲིད་རྒྱལ་མ་ཡིན་ནམ་སྙམ་བརྟག ནག་མོ་མགྱོགས་བྱེད་རྡོ་རྗེ་བདུད་འདུལ་དང་༔ སྲོག་ཟན་ཡམ་ཤུད་ཀཱ་ལ་ནག་པོ་དང་༔ བཀྲག་མེད་བི་ན་ཡ་ག་ཚངས་པ་དང་༔ དགྲ་བླ་བེ་ཧར་སྐུ་ལྷ་གསང་བ་དང་༔ མགོན་པོ་ནག་པོ་ལྷ་སྲིན་སྡེ་བརྒྱད་སོགས༔ བསྟན་པ་སྲུང་མཛད་མཐུ་རྩལ་མངའ་བ་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ དྲག་སྔགས་ལྷུན་གྱིས་གྲུབ་པའི་དཀྱིལ་འཁོར་ནས༔ ཡབ་གཅིག་སྟོབས་མཆོག་སྟོབས་ལྡན་ནག་པོ་དང་༔ གཉིས་མེད་ཡུམ་མཆོག་འབྱུང་བ་ལྔ་ཡི་བདག༔ འཆི་བདག་གཤིན་རྗེ་སྐྱེ་འགྲོའི་སྲོག་བདག་དང་༔ མེ་ཡི་ཁ་རླངས་བདུད་མོ་ཁྲག་འཛག་དང་༔ སྲིན་པོ་གསོད་བྱེད་སྲིན་མོ་གསོད་བྱེད་དང་༔ གང་བ་བཟང་པོ་ཤ་ཟ་རལ་གཅིག་དང་༔ ཁྱབ་འཇུག་ཆེན་པོ་མ་ཧཱ་དེ་བ་དང་༔ ཐར་པ་ནག་པོ་ཁུ་ལེ་ལག་དགུ་དང་༔ ༧དམུ་རྗེ་བཙན་པོ་མུ་སྟེགས་ཀཱ་ལ་ནག༔ ལི་བྱིན་ཧར་ལེགས་ཀླུ་རྒྱལ་
སོག་མ་མེད༔ རྡོ་རྗེ་ལེགས་པ་ཡམ་ཤུད་དམར་པོ་དང་༔ གོ་རིམ་ལྟར་ན། ཐར་པ་ནག་པོ་དམུ་རྗེ་བཙན་པོ་དང་། མུ་སྟེགས་ནག་པོ་ཀླུ་རྒྱལ་སོག་མ་མེད། ལི་བྱིན་ཧར་ལེགས་ཁུ་ལེ་ལག་དགུ་དང་། རྡོ་རྗེ་ལེགས་པ་ཡམ་ཤུད་དམར་པོ་དང་། འདྲ་སྟེ་དཔེ་གཞན་བལྟ་དགོས་སོ། །གཤིན་རྗེ་ལྷ་དང་བདུད་དང་གཟའ་ཆེན་དང་༔ བཤན་པ་ལ་སོགས་དྲག་སྔགས་ལྷ་ཚོགས་རྣམས༔ ཐུགས་དམ་རྒྱུད་བསྐུལ་བཅོལ་པའི་ཕྲིན་ལས་མཛོད༔ བཟློག་བྱང་སྦྱར། ཧཱུྃ༔ གཞན་ཡང་སྒྲུབ་པ་བཀའ་བརྒྱད་དཀྱིལ་འཁོར་གྱི༔ ཕོ་ཉ་ལས་མཁན་གསོད་བྱེད་དྲེགས་པའི་ཚོགས༔ དབང་ཕྱུག་ཆེན་མོ་ཉི་ཤུ་རྩ་བརྒྱད་དང་༔ མཁའ་འགྲོ་སོ་གཉིས་གིང་ཆེན་བཅོ་བརྒྱད་དང་༔ ལངྐ་དུར་ཁྲོད་བདག་མོ་རྣམ་བརྒྱད་དང་༔ མ་བདུན་སྲིང་བཞི་འབར་མ་ཆེན་མོ་བརྒྱད༔ དཔལ་གྱི་བཀའ་སྡོད་ཕོ་ཉ་དྲུག་ཅུ་བཞི༔བོད་ཁམས་སྐྱོང་བའི་བསྟན་མ་བཅུ་གཉིས་སོགས༔ ས་བདག་ཆེན་མོ་སུམ་ཅུ་རྩ་གཉིས་དང་༔ འབུམ་ཕྲག་ཡངས་པའི་མཁའ་འགྲོ་གིང་ཆེན་སོགས༔ ཕོ་ཉ་སྲོག་གཅོད་ཤན་པ་ལ་སོགས་རྣམས༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཅེས་བསྐུལ་གྱི་མཇུག་ཏུ་བཟློག་བྱང་དང་སོ་སོའི་བཟློག་སྔགས་སྦྱར་བར་བྱ་ཞིང་༔ དེའི་དུས་སུ་སྣོད་ཐམས་ཅད་མཐིང་
ནག་གྲུ་གསུམ་འབར་བའི་གཞལ་ཡས་ནས་ལྷ་ཚོགས་རྣམས་ཁྲོས་འཁྲུགས་རྔམ་པའི་ཚུལ་གྱིས་ཁྲོ་བོ་ཁྲོ་མོ་སྤྲུལ་པ་ཡང་སྤྲུལ་ཕྱག་མཚན་མཚོན་ཆ་སྣ་ཚོགས་ཐོགས་པས་ནམ་མཁའི་ཁམས་བཀང་ནས༔ དགྲ་བགེགས་ཕོ་མོ་རྣམས་བཟུང་སྟེ་སྙིང་འབྱིན་ལྷུ་དྲལ་ནང་རོལ་འདྲེན་པ་སོགས་དྲག་པོའི་ལས་ཀྱིས་ཤ་ཟོས་ཁྲག་འཐུང་རུས་པ་འཆོས་ནས་གཏན་མེད་དུ་བརླག་སྟེ༔ ཞི་རྒྱས་དབང་དྲག་བཟློག་པ་སོགས་བདག་གིས་ལས་གང་བཅོལ་བ་བསྒྲུབ་པར་བསམ་མོ༔ ལྟས་ངན་དམིགས་ཀྱིས་བཟློག་ན་ཟོར་གྱི་རྩེར་བྱ་ཁྱུང་གི་གཟུགས་བཀོད་ལ་ཁྱུང་བཟློག་སྦྱར་བས་གྲུབ་བོ༔ ༈ མཐར་གཏོར་མ་ཟོར་དུ་ འཕེན ་པ་ལ་ཐོག་མར་གསེར་སྐྱེམས་མཆོད་དེ་ཟོར་ལམ་དབྱེ་བ་ནི༔ ཧཱུྃ༔ གཟུ་དང་དཔང་དུ་དཀོན་མཆོག་བཞུགས༔ མ་ཉེས་ཞལ་ལྕེ་ལྷ་འདྲེས་ཆོད༔ རྣལ་འབྱོར་དབང་ཕྱུག་ཟོར་ འཕེན ་ནོ༔ ཕྱོགས་མཚམས་སྟེང་འོག་ཐམས་ཅད་ན༔ སྣང་སྲིད་ལྷ་འདྲེ་གནས་པ་ཀུན༔མཐོ་བ་རྣམས་ཀྱི་ཞབས་སྐུམས་ཞིག༔ དམའ་བ་རྣམས་ཀྱི་དབུ་ཆུམས་ཞིག༔ བར་མ་རྣམས་ཀྱི་སྐུ་ཟུར་ཅིག༔ དབུ་ཞབས་སྐུ་ལ་ཕོག་སྲིད་པས༔ སོ་སོའི་ཕོ་བྲང་སྒོ་སྡོམས་ཞིགཿ སྟེང་གི་ལྷ་ལ་ཟོར་མི་འཕེན༔ འོག་གི་ཀླུ་ལ་ཟོར་མི་འཕེན༔ བར་གྱི་གཉན་ལ་ཟོར་མི་འཕེན༔ ལྷ་སྲིན་སྡེ་བརྒྱད་ཐམས་ཅད་ཀྱང་༔ གསེར་སྐྱེམས་དམ་པ་
འདི་བཞེས་ལ༔ དྲག་པོ་གཏོར་མའི་ལམ་ཕྱེས་ཤིག༔ ཁྲག་འཐུང་ཕུར་པ་གཏོར་ཟོར་བཅས༔ གནོད་བྱེད་དགྲ་བགེགས་རྣམས་ལ་འཕེན༔ ཟ་འདྲེ་ཕུང་འདྲེ་རྣམས་ལ་འཕེན༔ བྷྱོ་བྷྱོ་སྡང་བའི་དགྲ་ལ་བྷྱོ༔ ཟོར་ཟོར་དགྲ་བགེགས་རྣམས་ལ་ཟོར༔ ཞེས་བྱས་ལ་ཟོར་ འཕེན ་པ་ནི། ཧཱུྃ༔ ང་ནི་དཔལ་ཆེན་ཧེ་རུ་ཀ༔ ང་ནི་བདེ་གཤེགས་ཀུན་གྱི་གཙོ༔ ང་ནི་མ་མོ་ཀུན་གྱི་ཡབ༔ ང་ནི་གཤིན་རྗེ་ཀུན་གྱི་གཤེད༔ ང་ནི་མཁའ་འགྲོ་ཀུན་གྱི་གཙོ༔ མཁའ་འགྲོ་འབུམ་ནི་སྤུངས་སེ་སྤུང་༔ ཞུབ་ཅན་སྟོང་ནི་སི་ལི་ལི༔ འཁོར་གྱི་ཆོས་སྐྱོང་དམ་ལ་འདུས༔ དམ་ཅན་རྒྱ་མཚོ་དམག་ལ་ཆོས༔ ལྷ་འདྲེའི་དམག་དཔུང་ཆི་ལི་ལི༔ དར་གྱི་རུ་མཚོན་ལྷབས་སེ་ལྷབ༔ མཚོན་གྱི་དབལ་རྩེ་ཡེ་རེ་རེ༔ ཉུངས་ཀར་གཞུ་བརྡུང་ཁུགས་སེ་ཁུག༔ མཚེ་ཡི་མདའ་ འཕེན ་ཏ་ལ་ལ༔ གཏོར་མའི་སྒྱོགས་ཆེན་སྒོ་རོ་རོ༔ ཁྲག་གི་ཐུན་ཆེན་ཆིལ་ལི་ལི༔ བྷྱོ་བྷྱོ་སྡང་བའི་དགྲ་ལ་བྷྱོ༔ ཟོར་ཟོར་དགྲ་བགེགས་རྣམས་ལ་ཟོར༔ ཧཱུྃ༔ སྡང་བའི་དགྲ་བོ་དམ་ཉམས་འདི༔ དང་པོ་ཞེ་སྡང་ཕ་ཡིས་བསྐྱེད༔ དེ་ནས་འདོད་ཆགས་མ་ཡི་མངལ༔ དེ་ནས་ལྔ་ཕུང་ཡན་ལག་རྒྱས༔ ལྔ་ཕུང་རྩད་ནས་བཅད་པའི་ཕྱིར༔ ཞེ་སྡང་སྙིང་ལ་
གཏོར་ཟོར་ཡ༔ གཏི་མུག་ཤ་ལ་གཏོར་ཟོར་ཡ༔ འདོད་ཆགས་ཁྲག་ལ་གཏོར་ཟོར༴ ཕྲག་དོག་དབུགས་ལ༴ ཕུང་པོ་ལྔ་ལ༴ རྡོ་རྗེ་སློབ་དཔོན་སྐུ་དགྲ་དང་༔ མཆེད་དང་ལྕམ་དྲལ་སྤྱི་དགྲ་དང་༔ རྣལ་འབྱོར་བདག་གི་སྒོས་དགྲ་དང་༔ གཟུགས་མེད་དམ་སྲི་འབྱུང་པོ་ལ༔ དྲག་པོ་གཏོར་མའི་ཟོར་རྒྱོབ་ལ༔ ལྔ་ཕུང་ཡན་ལག་རྡུལ་དུ་རློག༔ དཔལ་ཆེན་རྔམས་པའི་ཞལ་དུ་བསྟབ༔ འཁོར་གྱི་ཆོས་སྐྱོང་མཆོད་པར་བཞེས༔ མ་མོ་མཁའ་འགྲོས་རྔམ་ཟས་མཛོད༔ སེམས་ཉིད་རྒྱལ་བའི་གནས་སུ་སྤོར༔ དྲག་སྔགས་སོ་ལྔ་པ་དང་། རྦོད་ཟོར་སརྦ་བྷྱོ་བཟློག༔ ཅེས་བརྗོད་ལ་ཟོར་འཕངས་པས་དགྲ་བགེགས་ཀྱི་སྟེང་དུ་ཁྲག་འཐུང་ལྷ་ཚོགས་ཐམས་ཅད་ཀྱིས་ནད་རིམས་ཀྱི་ན་བུན་འཐུལ་ཞིང་༔ སྐུ་ལས་མཚོན་ཆ་སྣ་ཚོགས་ཀྱི་ཆར་འབེབས༔ ཕོ་ཉ་དང་ཕྱག་མཚན་ཐུན་ཟོར་སྣ་ཚོགས་བུ་ཡུགས་ལྟར་འཚུབ་ཅིང་དྲག་སྔགས་དང་ཐུག་ཆོམ་དྲག་པོ་རི་རབ་བསྙིལ་བ་ཙམ་གྱི་སྒྲ་དང་བཅས་ཏེ༔ ནམ་མཁའ་བར་སྣང་ས་གཞི་ཐམས་ཅད་གང་བས༔ སྣང་སྲིད་ཐམས་ཅད་ས་གཡོས་པ་ལྟར་འགུལ་ཞིང་འུར་ཆོམ་གྱིས་གཡོས་ནས་དགྲ་བགེགས་གང་ཡིན་པའི་སྲུང་བའི་གུར་དྲལ༔ མགོན་སྐྱབས་ཀྱི་ལྷ་བྲེད་དེ་གཏོར༔ ལུས་ངག་ཡིད་གསུམ་རྡུལ་དུ་བརླག་པའི་ཤ་ཁྲག་ལ་ཁྲག་འཐུང་གི་ལྷ་ཚོགས་ཅེ་སྤྱང་ཤ་ལ་རོལ་བའམ་དུར་བྱས་ཤ་རྙེད་པ་ལྟར་
ཆེམ་ཁྲོལ་གྱིས་གསོལ་ནས་ཏིལ་འབྲུ་ཙམ་ཡང་མ་ལུས་པར་བསམ་ཞིང་༔ མཐར་མཉམ་ཉིད་ཀྱི་ལྟ་བས་རྒྱས་འདེབས་པ་དེ་ལྟ་བུའི་དམིགས་པ་གསལ་པོར་བྱའོ༔ དེ་རྗེས་བཤལ་ཆུས་བརྟན་མ་སྐྱོང་བ་དང་བྲོ་སོགས་སྤྱི་ལྟར་གཞུང་ནས་བླངས་ཏེ་བྱའོ༔ འདི་ནི་བསྡུས་པ་ལ་མོས་ཤིང་ལག་ལེན་རྒྱས་པར་མི་ལྕོགས་པ་དག་གི་ཆེད་དུ༔ བདེ་གཤེགས་འདུས་པའི་གཞུང་ལས་གུད་དུ་བཀོལ་པ་པོ་ནི་འཇམ་དཔལ་དགྱེས་པའི་རྡོ་རྗེ་སྟེ་ལྕགས་ཡོས་གདུག་པའི་ཟླ་བ་དགུ་པའི་ཚེས་བཞི་ལ་སྒྲུབ་ཁང་བདུད་ལས་རྣམ་རྒྱལ་དུ་བྲིས་པ་འདིས་ཀྱང་དངོས་གྲུབ་ཇི་ལྟར་བསམ་པ་ཐོབ་པར་གྱུར་ཅིག༔ མངྒ་ལཾ༔