ཆོས་ཀྱི་ལོ་རྒྱུས།

དམ་ཆོས་བདུད་རྩིའི་ཐིགས་པ་ལས་ཆོས་ཀྱི་ལོ་རྒྱུས་བཞུགས་སོ། །གུ་རུ་རིན་པོ་ཆེའི་བཀའ་བཞིན་བདག་ལོ་ཙཱ་བས་བྲིས་པའི་ཤོག་དྲིལ། བཅོམ་ལྡན་འདས་དེ་བཞིན་གཤེགས་པ་བདུན་ལ་ཕྱག་འཚལ་ལོ། །དེ་ཡང་ཆོས་འདིའི་ལོ་རྒྱུས་མདོ་ཙམ་ཞིག་བརྗོད་ན། བདག་བོད་ཀྱི་རབ་ཏུ་བྱུང་བ་སྔ་ཕྱི་རྣམས་ཀྱིས་དེ་བཞིན་གཤེགས་པ་བདུན་མཆོད་པ་མཁན་པོ་རིན་པོ་ཆེ་ལྟར་སྤྱོད་བའི་དུས་སུ། གྲོགས་ནམ་སྙིང་དང་བཻ་རོ་གཉིས་ལ་བདག་ཀླུ་དབང་བསྲུང་གིས་དམ་པའི་ཆོས་འདི་ཡོངས་སུ་མི་ནུབ་པར་བྱ་བའི་ཕྱིར་དང་། རྒྱལ་པོ་དུད་འགྲོའི་མིང་གིས་བསྟན་པ་དར་ནུབ་སོགས་འབྱུང་བར་གསུངས་པས་མི་འཇིག་པའི་ཐབས་དང་། དེ་བཞིན་གཤེགས་པ་བདུན་གྱི་སྨོན་ལམ་གྱི་མདོ་མཆོད་ཆོག་རྣམས་སྒྲུབ་གནས་ཤིག་ཏུ་གཏེར་ལ་གཞུག་ཅིང་སྨོན་ལམ་འདེབས་སམ་སྨྲས་པས། གྲོགས་པོ་བཻ་རོས་དེ་བཞིན་ལེགས་པས་སློབ་དཔོན་ཆེན་པོར་ཞུས་པ་འཐད་གསུང་། དེ་བཞིན་གསེར་གྱི་མཎྜལ་དང་བཅས་སློབ་དཔོན་ཆེན་པོ་ལ་ཞུས་པས། སྤྲེའུ་ཟླ་བའི་ཚེས་བཅུ་ལ་རྟེན་འབྲེལ་རྣམས་གོ་མ་ལོག་པ་བྱེད་གསུངས་པའི་ཚེ། མཆིམས་ཕུ་དགེའུའི་ཁྲི་ལ་སློབ་དཔོན་ཆེན་པོའི་གདན་དང་མཆོད་པ་རྣམས་བཤམས་ནས། རྒྱལ་པོ་ཡབ་སྲས་མཁན་པོ་རྗེ་འབངས་དད་ལྡན་རྣམས་འཁོད་བའི་དུས་སུ་སློབ་དཔོན་ཆེན་པོས་ཁྱེད་རྣམས་ཀྱིས་དེ་བཞིན་གཤེགས་པ་བདུན་གྱི་སྔོན་གྱི་ཡང་དག་པའི་སྨོན་ལམ་ཡིད་ལ་དྲན་བཞིན་ཤར་ཕྱོགས་ལོགས་སུ་ཕྱག་ཀྱང་བྱ་ཞིང་། སེམས་ཅན་རྣམས་ལ་བརྩེ་བ་ཡང་བསྐྱེད་དང་། བདག་གིས་ཀྱང་དེ་བཞིན་གཤེགས་པ་བདུན་གྱི་སྨོན་ལམ་ཡང་དག་པར་བསྐུལ་བར་བྱའོ། །གསུང་ཞིང་སློབ་དཔོན་ཏིང་ངེ་འཛིན་ལ་བཞུགས་པ་དང་། མཁན་པོ་ཆོས་རྒྱལ་ཡབ་སྲས་བདག་ཅག་རྣམས་ཀྱིས་བཀའ་བཞིན་སྤྱད་པས། སྐད་ཅིག་དེ་ཉིད་ལ་ནམ་མཁའི་མཐོངས་ལས་འཇའ་ཚོན་བཀྲ་བ་ལྟར་དེ་བཞིན་གཤེགས་པ་བདུན་སྐྱབས་གྲོལ་དང་། འཇམ་དཔལ་དབྱངས་དང་། ཕྱག་ན་རྡོ་རྗེ་སོགས་བྱང་ཆུབ་སེམས་དཔའི་འཁོར་མང་པོ་དང་བཅས་མངོན་སུམ་དུ་མཐོང་ཞིང་མཇལ་བས་རང་རང་གི་ལུས་རྒྱན་རྣམས་བཀྲོལ་ནས་ཕྱོགས་སུ་གཏོར་ཞིང་སྡིག་བཤགས་སྒྲིབ་སྦྱང་གི་གསོལ་སྨོན་མང་པོ་བཏབ། ཁྱད་པར་མཁན་པོས་སངས་རྒྱས་རྗེས་དྲན་ངེས་འབྱུང་གི་སྨྲེ་སྔགས་མང་པོ་དབྱངས་སུ་གྱེར། རང་རང་གི་གདོང་ཡང་མཆི་མས་གཡོགས་བཞིན་གདུང་ཤུགས་ཀྱིས་གསོལ་བ་བཏབ་པའི་ཚེ། སློབ་དཔོན་ཆེན་པོས་ཕྱག་གཡས་ནམ་མཁར་གདེངས་ནས་ཨཱཿཨཱཿཕེཾ་ཕེཾ་གསུངས་པ་དང་། འཁོར་རྣམས་གཙོ་བོ་ལ་ཐིམ་གཙོ་བོ་སློབ་དཔོན་ཆེན་པོའི་དབུ་གཙུག་ཏུ་འོད་སྔོན་པོ་ཞིག་ཏུ་གྱུར་ནས་ཐིམ་པ་དང་། མཁན་པོ་ཞི་བ་འཚོས་སློབ་དཔོན་ཆེན་པོ་ལ་འདི་སྐད་ཞུས་སོ། །སློབ་དཔོན་ཆེན་པོ་བདག་ནི་ཆུང་ནས་ཆོས་ལ་སྦྱངས་ཤིང་ཁྱད་པར་དེ་བཞིན་གཤེགས་པ་བདུན་གྱི་མཆོད་ཆོག་མདོ་སྡེ་ལྟར་ཉམས་སུ་བླངས་ཀྱང་། སངས་རྒྱས་ཀྱི་ཞལ་མངོན་སུམ་དེ་རིང་མ་གཏོགས་མ་མཇལ། དེ་རིང་དེ་བཞིན་གཤེགས་པ་འཁོར་བཅས་མཇལ་བ་སློབ་དཔོན་རིན་པོ་ཆེ་ཁྱེད་ཀྱི་སྐུ་དྲིན་དུ་ཚོར། ད་སྟེ་བདག་སྐྱེ་བ་འདི་ནས་འཕོས་མ་ཐག་གཞན་གྱིས་བར་མ་ཆོད་པར་སྨན་པའི་རྒྱལ་པོའི་ཞིང་དུ་སྐྱེ་བའི་སྨོན་ལམ་བཏབ་པ་དེ་བཞིན་དུ་སློབ་དཔོན་ཐུགས་རྗེ་དང་ལྡན་པ་ཁྱེད་ཀྱི་མཐུས་ཀྱང་འགྲུབ་པར་གྱུར་ཅིག །ཅེས་ཞུས་པས་སློབ་དཔོན་ཆེན་པོས། བོ་དྷི་ས་ཏྭ་ཁྱེད་བྱང་ཆུབ་སེམས་དཔའ་བསྟན་འགྲོའི་དོན་ལ་སྐྱེ་བ་བཞེས་པ་ཡིན་པས་དག་པའི་ཞིང་ལ་མ་སྨོན། ངན་སོང་གི་གནས་ལ་མ་འཇིགས་ནམ་མཁའི་མཐར་ཐུག་གི་འགྲོ་དྲུག་གི་དོན་དང་། ཁྱད་པར་རང་རེ་གཉིས་ཀྱི་གདུལ་ཞིང་བོད་འབངས་ཀྱི་འགྲོ་དོན་དུ་ཡང་སྨོན་ལམ་རྒྱ་མ་ཆུང་། ད་ལྟ་ཇི་ལྟར་བཏབ་པའི་སྨོན་ལམ་དེ་རྣམས་འགྲུབ་ནས་བཻཌཱུརྱའི་འོད་ཀྱི་ཞིང་དུ་ཁྱེད་སྐྱེས་པའི་དུས་སུ། ད་ལྟའི་བོད་ཁམས་རྗེ་འབངས་རྣམས་ཀྱང་མཁྱེན་བཞིན་རྒྱུན་ཆད་མེད་པར་སྐྱོང་མཛོད་གསུང་། དེ་ནས་བདག་འཁོན་པ་ཀླུ་དབང་གིས་རིན་པོ་ཆེའི་རིགས་མང་པོའི་མཎྜལ་གྱིས་མཆོད་ཅིང་། ཀྱེ་སློབ་དཔོན་རིན་པོ་ཆེ་བདག་ཅག་བོད་ཀྱི་རབ་བྱུང་རྣམས་དང་། ཁྱད་པར་བདག་གིས་མཁན་ཆེན་པོའི་བཀའ་ཐོབ་ནས་དེང་གི་བར་དེ་བཞིན་གཤེགས་པ་བདུན་གྱི་མཆོད་ཆོག་ཉམས་སུ་བླངས་ཀྱང་། རྨི་ལམ་གྱི་དག་སྣང་ཙམ་ཡང་དཀའ་བར་བྱུང་། དེ་རིང་གུ་རུ་རིན་པོ་ཆེ་ཁྱེད་ཀྱི་ཐུགས་རྗེས་དེ་བཞིན་གཤེགས་པ་འཁོར་བཅས་མཇལ་བ་ངོ་མཚར། ཇི་ལྟར་མཇལ་བའི་ལྷ་རྣམས་སློབ་དཔོན་ཆེན་པོ་ཁྱེད་ལ་ཐིམ་པས། ཁྱེད་ནི་སྔོན་བདག་ཅག་གི་སྟོན་པ་ཤཱཀྱ་ཐུབ་པ་དང་གཉིས་སུ་མེད་པར་མདོ་སྡེ་མྱ་ངན་འདས་ཆེན་པོ་སོགས་ལས་མང་དུ་གསུངས་པ་དོན་མཚུངས་པས་རྗེས་སུ་ཡི་རང་། སྔོན་བཅོམ་ལྡན་འདས་ཀྱི་དུས་ཀྱང་དེ་བཞིན་གཤེགས་པ་འཁོར་བྱང་སེམས་ཐམས་ཅད་མངོན་སུམ་དུ་མཇལ་བ། སངས་རྒྱས་ཀྱི་མཐུ་དང་དེ་རིང་ཇི་ལྟར་མཇལ་བ་ཐམས་ཅད་ཁྱེད་ཀྱི་མཐུ་ལགས་པས་རྗེས་སུ་ཡི་རང་བས་དུས་གསུམ་ཀུན་ཏུ་རིགས་དྲུག་ནམ་མཁའི་མཐར་ཐུག་གི་སེམས་ཅན་ཐམས་ཅད་འདྲེན་པར་མཛད་དུ་གསོལ། སྐྱོབ་པར་མཛད་དུ་གསོལ། སྨིན་པར་མཛད་དུ་གསོལ། ཁྱད་པར་བདག་གི་དཔེ་འདི་རྣམས་བྱིན་གྱིས་བརླབས་པའི་གནས་ཤིག་ཏུ་སེམས་ཅན་ལ་ཕན་པའི་ཕྱིར་གཏེར་དུ་སྦ་བ་དང་སྨོན་ལམ་མཛད་དུ་གསོལ། ཞེས་ཞུས་པས་སློབ་དཔོན་རིན་པོ་ཆེའི་ཞལ་ནས་འདི་སྐད་གསུངས་སོ། །བུ་ལོ་ཙྭ་བ་རིགས་ཀྱི་བུ་ལེགས་པར་ཉོན་ཅིག སངས་རྒྱས་ཐམས་ཅད་ཀྱི་སྐྱེ་བརྒྱུད་ནི་དྲང་ངེས་གཉིས་ཡིན། དྲང་དོན་བདག་ཅག་གི་སྟོན་པའི་སྐྱེས་རབས་སོགས་འགྲོ་འདུལ་སྤྲུལ་སྐུ་རྣམས་ཀྱི་རྣམ་ཐར་ལྟར་དང་། ངེས་དོན་རྒྱལ་བ་ཀུན་ཏུ་བཟང་པོ་དང་གསང་སྔགས་ཀྱི་གཞུང་རྒྱུད་ལུང་ལྟ་བུ་སྟེ། བདག་ཅག་གི་སྟོན་པ་བདག་ཉིད་པདྨ་སངས་རྒྱས་སྨན་རྒྱལ་སོགས་སོ་སོ་མ་ཡིན་ཐ་མི་དད་། རིགས་ཀྱི་བུ་ཁྱོད་ཀྱི་སྨོན་ལམ་དང་གོ་ཡུལ་སོགས་བཟང་། དཔེ་གཏེར་དུ་སྦ་བ་ཡང་དེ་བཞིན་བགྱིད་དེ ། དེ་བཞིན་གཤེགས་པ་བདུན་གྱི་མདོ་འདི། ཆོས་འདིའི་རྩ་བ་ལ་མཆོད་པའི་ཆོ་ག་འདི། ཆོས་དང་ཐེག་པའི་བྱེ་བྲག་གི་ཁྱད་ཆེ་བས་མཁན་ཆེན་ལྟར་འཇམ་དཔལ་གཞོན་ནུར་གྱུར་པ་ལས་བརྒྱུད་པ་འདི་དེང་སང་རྩོད་ལྡན་གྱི་བསྐལ་བའི་ཡར་ངོ་ཡིན་པས་འདི་བཞིན་ལེགས། ད་ནས་བཟུང་རིམ་གྱིས་སངས་རྒྱས་ཀྱི་བསྟན་པ་སེམས་ཅན་གྱི་བསོད་ནམས་བྲི་བཞིན་དུས་ཀྱི་ཐ་མ་བསྐལ་བའི་སྙིགས་མ། སངས་རྒྱས་བསྟན་པ་ལུང་གི་ལྷག་མ་ལ་ཉེ་བའི་དུས་སུ་ལས་ངན་གྱི་དབང་བཙན་པས་བོད་ཁམས་གྱི་ཆོས་གཟུགས་འཆང་བ་རྣམས་ཀྱང་ཕལ་ཆེར་འཆོལ་ཉོག་ཏུ་སྤྱོད་ངན་ཁོ་ནར་སྤྱོད་པའི་དུས་འོང་བས། དེ་དུས་བྱ་སྤྱོད་གྱི་ལྷ་བསྒྲུབ་མཆོད་བྱས་ཀྱང་བསོད་ནམས་ཀྱི་ཚོགས་རྫོགས་པ་ལས་ཟག་པ་གསོག་ཅིང་ཉེས་ལྟུང་མང་བའི་རྒྱུ་ཁོ་ན་ཏེ། ཅིའི་ཕྱིར་ན། མདོ་རྒྱུད་མང་པོ་ལས་བསམ་པའི་བྱེ་བྲག་ཉེས་པ་ཙམ་ཡང་ཆོས་ལམ་ལས་འགལ་བར་གསུངས་ན། སྡིག་དང་འདྲེས་པ་སོགས་ཀྱིས་ཚོགས་གསོག་པ་དང་། སྒྲིབ་པ་འདག་པར་དཀའ་ཞིང་། ཁྱད་པར་སྙིགས་མའི་དུས་ཕྱི་མའི་ཡང་ཕྱི་མར་གྱུར་པ་ན་ཆོས་ཚུལ་འཆང་བཞིན་སྤྱོད་པ་ཆོས་ལ་རྒྱབ་འགལ་ནས། རབ་ཏུ་བྱུང་བ་རྣམས་ཀྱིས་འབྲུ་ཡང་གསོག་ཅིང་ཞིང་ཡང་ལས་ཏེ། བ་ལང་དང་དུད་འགྲོ་ཡང་འཆང་། ཁྲིམས་ཀྱང་མནོས་ནས་གྲོང་པའི་ཞྭ་གོས་ཀྱང་བགོ །མཚོན་ཆ་རྣམས་ཀྱང་རྒྱན་གྱི་ཚུལ་དུ་འཆང་། མ་ཧཱ་བྷོ་དྷི་རྟེན་གསུམ་གཙུག་ལག་ཁང་གི་མཆོད་པ་དང་། པྲ་ཏི་ཧ་ན་དུས་ཀྱི་མཆོད་པ་སོགས་ཀྱི་ཕྱིར་དུ་ཁྲལ་གྱི་ཟས་དང་སེམས་ཅན་གྱི་སྲོག་ལ་འབགས་པ་སྣ་ཚོགས་ཀྱིས་གཡོ་རྒྱུས་ཆོས་བྱེད་ཟེར་ཡང་། ཆོས་ལས་རིང་དུ་རྒྱབ་ཀྱིས་ཕྱོགས་ནས་འབྲེལ་ཐོག་ལྟུང་བ་ལས་མ་འདས་པའི་དུས་ངན་འབྱུང་བས། དེ་བཞིན་གཤེགས་པ་བདུན་གྱི་ངོ་བོ་ཆོས་ཀྱི་དབྱིངས་ལ་གཙང་དམེར་འཛིན་པའི་མཐའ་དང་བྲལ་ཡང་། འཇམ་དཔལ་གཞོན་ནུར་གྱུར་པ་ལས་བརྒྱུད་པ་བྱ་སྤྱོད་ལ་འགྲོ་ཞིང་། ལག་ན་རྡོ་རྗེ་ལས་བརྒྱུད་པ་གསང་སྔགས་ཕྱི་ནང་གི་སྐབས་ལྷའི་ངོ་བོ་ལྟར་ལགས་པས། དུས་སྙིགས་མ་སེམས་ཅན་རྣམས་ཀྱིས་མཆོད་བསྟོད་བསྙེན་སྒྲུབ་གསང་སྔགས་ལྟར་གསུངས་པས། བདག་ཉིད་པདྨས་གསང་བའི་བདག་པོ་ལས་བླངས་ནས་བརྒྱུད་པའི་གསང་སྔགས་ཕྱི་པ་ལྟར་གྱི་མཆོད་ཆོག་དང་སྒྲུབ་དབང་སོགས་བཀོད་ནས་གཏེར་དུ་སྦ་བར་རིགས་སོ། །ཅེས་གསུངས་པ་དང་དེར་ཚོགས་པ་ཐམས་ཅད་ཀྱིས་འགྲོ་བ་འདུལ་བའི་དུས་དང་མཐུན་པའི་གདམས་པ་རྣམས་སྨན་པའི་རྒྱལ་པོ་དང་གུ་རུ་རིན་པོ་ཆེ་དབྱེར་མ་མཆིས་པས་བརྩེ་བས་རྗེས་སུ་བཟུང་དུ་གསོལ། བཀའི་གནང་བ་ཞིབ་ལ་རྒྱས་པ་སྩལ་དུ་གསོལ། ཞེས་ཞུས་ཤིང་ཕྱག་དང་མཎྜལ་སྐོར་བས་མཆོད་དོ། །དེའི་ཚེ་རྒྱལ་པོ་ཁྲི་སྲོང་ལྡེའུ་བཙན་གྱིས་སློབ་དཔོན་རིན་པོ་ཆེ། འཇམ་དཔལ་གཞོན་ནུར་གྱུར་པ་ལས་བརྒྱུད་པ་བྱ་སྤྱོད། ཕྱག་ན་རྡོ་རྗེ་ནས་བརྒྱུད་པ་གསང་སྔགས་གསུངས་པ་བརྒྱུད་པའི་བྱང་སེམས་ཀྱི་ཁྱད་ལས། ཐེག་པ་གཅིག་ལ་བྱ་སྤྱོད་དང་གསང་སྔགས་ཀྱི་བྱེ་བྲག་གཉིས་སུ་འགྱུར་བའི་དོན་ཇི་ལྟར་ལགས་ཞུས་པས། གུ་རུ་རིན་པོ་ཆེའི་ཞལ་ནས། རྒྱལ་པོ་ཆོས་ཀྱི་ཐེག་པ་གཅིག་ལས་མེད་ཀྱང་འགྲོ་བའི་ཤེས་རྒྱུད་དང་མཐུན་པར་ཐེག་པ་སྣ་ཚོགས་སུ་སྟོན་དགོས་བྱུང་བས། དེར་མཐུན་བྱང་ཆུབ་སེམས་དཔའི་སོ་སོའི་ངོ་སྐལ་གྱི་ཐེག་པ་འཛིན་པ་སངས་རྒྱས་དང་ཆོས་ཀྱི་སྲོལ་ལམ་མི་ནུབ་པའི་བརྡའ་དང་རྟེན་འབྲེལ་དུ་མཚོན་པ་ཡིན། དེ་ལ་འཛམ་གླིང་ལས་ཀྱི་ས་པ་འདིར་འགྲོ་བའི་རིགས་མང་བས་ཆོས་ཀྱི་ཐེག་པ་མང་ཡང་། ཁྱད་པར་འཛམ་གླིང་ཡུལ་གྱི་ལྟེ་བ་སངས་རྒྱས་འཕགས་པ་རྣམས་རིམ་གྱིས་བྱོན་གནས་རྒྱ་གར་ཡིན་པས་ཡུལ་དེ་ཉིད་དུ་རྒྱལ་པོ་རྗེའུ་བྲམ་ཟེ་གདོལ་བ་སོགས་མི་རིགས་བཞི་སྤྱོད་པ་སོ་སོར་སྤྱོད་དེ། རང་རང་གི་སྤྱོད་པ་དེ་ལས་ལོག་པའི་ཐབས་མེད་པས་སངས་རྒྱས་ཆོས་ཀྱི་ཐེག་པ་ཡང་ཕལ་ཆེར་དེར་མཐུན་ལ་སྤྱོད་པ་ཡིན། ཁྱེད་བོད་ཁམས་ཀྱི་འགྲོ་བ་ལ་ཤེས་རྒྱུད་མང་ཡང་མི་རིགས་བཞིའི་དབྱེ་བསལ་མེད་དེ། ཕལ་ཆེར་གདོལ་བའི་ལས་སྤྱོད་ཁོ་ན་མཐའ་འཁོབ་ཀྱི་དབང་གིས་སོ། འཕགས་པ་ཉེ་སྲས་ བྱང་སེམས་སྤྱི་དང་ཁྱད་པར་རིགས་གསུམ་མགོན་པོ ་རྣམས་གང་འདུལ་ཚུལ་སྟོན་སྤྲུལ་སྒྱུར་མཛད་པ་ལ་སངས་རྒྱས་འཕགས་པ་རྣམས་དང་ཁྱད་པར་མེད་ཅིང་། བྱེ་བྲག་ཏུ་མེད་ཀྱང་གསང་བའི་བདག་པོ་གདུལ་བྱ་གདུལ་དཀའ་འདུལ་བྱེད་ཀྱི་གཉེན་པོ་མི་རིགས་བཞིའི་ནང་ནས་གདོལ་བ་མཐའ་འཁོབ་ཆོས་ཀྱི་ལམ་ལ་སྤྱོད་པའི་སྨིན་བྱེད་ཀྱི་མཛོད་འཛིན་ཡིན་པས། བོད་ཁམས་གདོལ་བའི་འཇིག་རྟེན་འདུལ་བྱེད་ཆོས་ཀྱི་གཉེར་འཛིན་གསང་བདག་ལས་བརྒྱུད་ནས་དེ་བཞིན་གཤེགས་པ་བདུན་དང་། བདག་ཅག་གི་སྟོན་པ་བཅས་བདེ་བར་གཤེགས་པ་བརྒྱད་ཀྱི་སྨོན་ལམ་གྱི་མཐུ་དང་བྱིན་རླབས་ཀྱི་ནུས་པ་མཐའ་འཁོབ་བོད་ཀྱི་ཕྱི་མའི་ཡང་ཕྱི་མར་གྱུར་པ་ན། གྲོལ་བའི་ཆེད་དུ་ཡི་གེར་འདེབས་ནས་གནས་མཆོག་དམ་པ་ཀློང་ཐང་སྒྲོལ་མར་གཏེར་དུ་བཅོལ་བར་བྱ་ཞིང་། ལོ་ཙཱ་བའི་སྐྱེ་བས་དུས་ལ་བབས་དུས་འགྲོ་བར་ཕན་པའི་སྨོན་ལམ་དུ་བྱའོ་གསུངས་པས་རྒྱལ་པོས་ཞུས་པ། བདེ་བར་གཤེགས་པ་བདུན་ལ་བདག་ཅག་གི་སྟོན་པ་བརྒྱད་ཀྱི་གྲངས་སུ་རྩི་བའི་དོན་ཇི་ལྟར་ལགས། ཞིང་འདིའི་སྟོན་པ་དང་གང་གའི་ཀླུང་གི་བྱེ་མ་སྙེད་བཅུ་འདས་པའི་སྟོན་པ་དཀྱིལ་འཁོར་གཅིག་ཏུ་ཇི་ལྟར་འགྱུར་ལགས། ཅེས་ཞུས་པས་གུ་རུ་རིན་པོ་ཆེའི་ཞལ་ནས། རྒྱལ་པོ་ལེགས་པར་ཉོན་ཅིག བདག་ཅག་རྣམས་ཀྱི་བླ་མ་ནི་སངས་རྒྱས་བཅོམ་ལྡན་འདས་ལགས་སོ། །དེ་བས་ན་སངས་རྒྱས་ཤཱཀྱ་ཐུབ་པའི་ཐུགས་རྗེ་རྩོད་ལྡན་ཚེ་ལོ་བརྒྱ་པ་སངས་རྒྱས་གཞན་གྱི་སྨོན་ལམ་ཆད་པའི་དུས་ཀྱི་སེམས་ཅན་སྐྱབས་མགོན་མེད་པ་རྣམས་ཀྱི་སྐྱབས་མགོན་དུ་བྱོན་པ་འདིའི་བཀའ་དྲིན་གྱིས་སངས་རྒྱས་གཞན་ལས་སྨོན་ལམ་ཁྱད་པར་འཕགས་པ་དེ་བཞིན་གཤེགས་པ་བདུན་གྱི་མདོ་གསུངས་ཤིང་། ལྷའི་བུ་སོགས་ཤེས་རབ་ཆུང་བའི་འགྲོ་བ་རྣམས་ཡིད་དབྱུང་ཞིང་དད་པ་འཐོབ་པར་བྱ་བའི་ཆེད་དུ། སྨོན་ལམ་གྱི་མཐའ་བསྐུལ་ནས་དེ་བཞིན་གཤེགས་པ་རྣམས་སྣང་བར་མཛད་པ་དང་བཅས། བདག་ཅག་གི་འདྲེན་པ་མཉམ་མེད་ཀྱི་དྲིན་ལས་བྱུང་བ་ཤེས་བཞིན་དེ་བཞིན་གཤེགས་པ་བདུན་གྱི་དཀྱིལ་འཁོར་གྱི་གཙོ་བོ་བླ་མ་བཅོམ་ལྡན་འདས་མཆོད་པར་བྱས་ན། སངས་རྒྱས་སྟོང་ལ་མཆོད་པ་ཕུལ་བ་ལས་དྲིན་ཆེ་བའི་བླ་མའི་བ་སྤུའི་ཁུང་གཅིག་མཆོད་པ་བསོད་ནམས་ཆེ་བའི་དགེ་རྩ་དང་དེ་བཞིན་གཤེགས་པ་བདུན་གྱི་ཁྱད་པར་འཕགས་པའི་སྨོན་ལམ་དང་བཅས་པ་བསམ་འཕེལ་ནོར་བུར་གསོལ་བ་བཏབ་པ་ལྟར་བསོད་ནམས་ཀྱི་ཚོགས་གོང་ནས་གོང་དུ་འཕེལ་ཞིང་འདོད་འབྱུང་ནོར་བུར་དངོས་གྲུབ་ཐོབ་པ་བཞིན་མངོན་དུ་སྤྱོད་པར་འགྱུར་རོ། །ཞིང་ཁམས་ཐམས་ཅད་ཆོས་དབྱིངས་ཉག་གཅིག་ལས་རྒྱལ་བ་རྣམས་ལ་རིས་སུ་གྲུབ་པའི་འཛིན་པ་དང་ཉེ་རིང་མི་མངའ་འོ། །ཞེས་གསུངས། སླར་ཡང་རྒྱལ་པོས་ཞུས་པ། སློབ་དཔོན་རིན་པོ་ཆེ་འོ་ན་མཁན་པོའི་མཆོད་ཆོག་ཏུ་ཐུབ་པ་དཀྱིལ་འཁོར་གྱི་གཙོ་བོར་མ་མ ཆིས་པ་ཇི་ལྟར་ལགས། ཞེས་ཞུས་པས། རྒྱལ་པོ་རིན་པོ་ཆེ་མཁན་པོའི་མཆོད་ཆོག་ཏུ་དཀྱིལ་འཁོར་གྱི་གཙོ་བོར་ཐུབ་པ་མངའ་མ་གསོལ་བ་མདོ་ཆོག་གི་གཞུང་སོར་སྟོན་ཙམ་ཡིན་འདུག སངས་རྒྱས་སྟོང་ལས་དྲིན་ཆེ་བའི་བླ་མ་གཉན་པ་བཅོམ་ལྡན་འདས་ནི་དཀྱིལ་འཁོར་གྱི་གཙོ་བོ་ལ་མཆོད་དགོས་གསུངས་སོ། །ཡང་རྒྱལ་པོས་ཞུས་པ། གུ་རུ་སྤྲུལ་པའི་སྐུ་མདོ་སྡེ་འདི་དང་མཆོད་ཆོག་རྣམས་གནས་ཆེན་པོ་གླང་ཐང་སྒྲོལ་མར་གཏེར་དུ་བཞུགས་སུ་གསོལ་ན་གཏེར་འདི་འབྱིན་པའི་གང་ཟག་ཕྱོགས་གང་ནས་འོང་། ས་རྟགས་སོགས་འབྱུང་ངམ་མི་འབྱུང་། དེ་དུས་བོད་ཁམས་ཀྱི་འགྲོ་བ་ལ་བདེ་སྐྱིད་ཅི་འདྲ་འབྱུང་། ལྷ་ས་བསམ་ཡས་ཀྱི་གཙུག་ལག་ལ་དར་གུད་ཅི་འདྲ་འོང་ཆོས་གཏེར་འདིའི་འགྲོ་དོན་ཇི་ཙམ་འབྱུང་། ཞེས་ཞུས་པས། གུ་རུ་རིན་པོ་ཆེའི་ཐུགས་ཀ་ནས་འོད་ཟེར་སྣ་ལྔ་ཤར་ཕྱོགས་ཀྱི་ནམ་མཁར་སྤྲོས་ཤིང་ནམ་མཁའི་ཁམས་ཡོངས་སུ་ཁྱབ་པར་གྱུར་པའི་ཚེ། འོད་ཐམས་ཅད་ནམ་མཁར་འདུས་ནས་ཤེལ་གྱི་མེ་ལོང་ཕུབ་ཙམ་དུ་གྱུར། དེ་ཤེལ་གྱི་རྡོ་རྗེ་རྩེ་ལྔ་པ་ཁྲུ་ཚད་ཙམ་དུ་གྱུར་ནས་གུ་རུ་རིན་པོ་ཆེའི་ཐུགས་ཀར་ཐིམ་པ་དང་། བདག་ཅག་རྗེ་འབངས་རྣམས་ཀྱིས་ཚོགས་ཀྱི་འཁོར་ལོ་སོགས་དངོས་འབྱོར་ཡིད་སྤྲུལ་མང་པོས་མཆོད་ཅིང་གུས་པའི་ཕྱག་དང་སྐོར་བ་བྱས་པའི་ཚེ། གུ་རུ་རིན་པོ་ཆེ་སྐུ་མདོག་བཻཌཱུརྱའི་འོད་ལྟར་འཚེར་བ་ལ་ཤ་བའི་སྙན་ཞུ་བཞེས་པ་འོད་ལྔ་འཁྱིལ་བའི་ཀློང་དུ་བཞུགས་པ། ཕྱག་ཆོས་འཆད་ཀྱི་ཕྱག་རྒྱ་སྒྱུར་ཞིང་འདི་སྐད་གསུངས་སོ། །རྒྱལ་པོ་ཆེན་པོས་དབུ་མཛད་སྐལ་ལྡན་རྣམས་ཉོན་ཅིག ཟབ་མོའི་ཆོས་ཀྱི་གདམས་སྐོར་འདི་རྣམས་རིགས་བཞི་མཁའ་འགྲོས་ཁྱེར་ལ་གནས་ཆེན་པོ་ཀློང་ཐང་སྒྲོལ་གྱི་བྱང་། སྒྲོལ་མ་སྔོན་མོའི་མཁལ་ཁུང་གཡོན་དུ་སྦོས་ལ། ཡུལ་དེའི་སྲུང་མ་གནོད་སྦྱིན་ཁོལ་པོ་ཁ་ལ་བཅོལ་དང་། དུས་ཀྱི་མཐའ་ལ་འཁོན་པ་ཀླུ་དབང་གི་སྐྱེ་བ་མདོ་ཁམས་མཆོད་རྟེན་དཀར་པོའི་ཉེ་ལོགས་ནས་འབྱུང་ཞིང་གདམས་པ་འདི་དང་འཕྲད་དེ་འགྲོ་བའི་དོན་ཡང་བྱེད་པ་འགྱུར་རོ། །ས་རྟགས་ནི་གནས་མཆོག་ཆེན་པོ་ཁམས་ཀྱི་ཀློང་ཐང་སྒྲོལ་མ་འདི་སྔོན་བདུད་པོ་མ་ཊཾ་རཱུ་ཏྲའི་མིག་འབྲས་གཡས་པ་ནམ་མཁར་འཕངས་པ་ཀློང་ཐང་དུ་བབས་པའི་མིག་ཆུ་ལ་སྒྲོལ་མ་མཆེད་གཉིས་རང་བྱོན་དུ་བཞུགས་པས་གླང་ཐང་སྒྲོལ་མ་རང་བྱོན་དུ་གྲགས་ཤིང་། བོད་ཁམས་སྲིན་མོ་གན་རྐྱལ་འདྲ་བའི་ལག་མཐིལ་གཡས་པར་རུ་བཞིའི་ལོག་གནོན་དུ་སྤྲུལ་པའི་རྒྱལ་པོ་སྲོང་བཙན་པས་ལྷ་ཁང་བཏབ་ཅིང་ད་དུས་ཀྱི་བར་བཞུགས་པ་འདི་ལ། མ་འོངས་པའི་དུས་ན་ཀླུ་གོང་དང་བཙུན་མོ་དམར་རྒྱན་མའི་སྤྲུལ་པ་གནས་དེའི་ཕྱོགས་སུ་ལན་གསུམ་འབྱུང་ཞིང་གནས་ཀྱི་བྱིན་རླབས་ཉམས་པའི་རྐྱེན་མང་པོ་བྱེད། དེ་ལ་གནས་པའི་སྐྱེ་འགྲོ་དྲུག་ཅུ་ཁ་རལ་ལྔ་བཅུར་ཉེ་བའི་དུས་སུ། ཡུལ་དེ་ཉིད་དུ་ཨ་གཉན་ཁྲི་ཆེན་ཟེར་བའི་མི་སྐྱེ་འགྲོ་གཞན་ལས་གཟུགས་བྱད་བཟང་བ། ལུས་རྩལ་ཆེ་ཞིང་མི་དགེ་བའི་ཕྱོགས་ལ་དཔའ་བ་ཞིག་འབྱུང་བས། ཡུལ་ཁམས་དེ་དག་དབང་དུ་བསྡུ་ཞིང་ཁྲིམས་ཀྱི་ལུང་རྒྱུག །མི་དགེ་སྣ་ཚོགས་སྤྱོད་ཅིང་ཁྱད་པར་ཀློང་ཐང་གནས་ཀྱི་དབུ་རྩེ་རིན་པོ་ཆེའི་གདུགས་ལྟ་བུར་བཞུགས་པའི་རྩེ་མོ་ལ་ཁོའི་ཕོ་བྲང་རྩིག །ཀློང་ཐང་ལྷ་ཁང་མཐའ་རྣམས་བཤུས་ནས་ཁོའི་རྫོང་ལ་འགེབས། དབུ་རྩེའི་གསེར་འཕྲུ་བླངས་ཏེ་རྫོང་གི་རྩེ་རྒྱན་བྱེད། དེའི་དུས་ཁོའི་སྲིང་མོ་གཟུགས་བྱད་དངས་ཤིང་སྒོ་ཤིན་ཏུ་ལེགས་པ་ཞིག་འབྱུང་བ་ཁོའི་ཆུང་མ་བྱེད་པས་གནས་ལ་ནལ་གྲིབ་འཕོག །དབུ་རྩེར་ཕོ་བྲང་བཟོས་པས་ས་སྒྲོན་གནམ་ལ་ལྡང་། དེའི་དབང་གིས་མདོ་ཁམས་ཀྱི་སྐྱེ་འགྲོ་རྣམས་ལ་མི་དགེ་བའི་ལྟས་ངན་སྣ་ཚོགས་སྡང་། ནད་མུག་མཚོན་གསུམ་གྱི་བསྐལ་པ་འུར་ཟིང་ལང་། མཐའི་མི་བཞི་དབུས་སུ་ལྷུད། འདྲེ་རྒོད་འབྱུང་པོས་ཚག་རག་གཏོང་། །མི་རུང་སྣ་དགུའི་བྱུར་གྱིས་བོད་ཁམས་འགེངས། དེ་ནས་བོད་ཁམས་ཐམས་ཅད་རེས་བདེ་རེས་འཚུབ་དར་གུད་མང་པོ་འབྱུང་། གནས་དང་གཙུག་ལག་ཉམས་པས་ཆུ་གསར་མང་པོ་རྡོལ་སྒྲོལ་མ་རང་བྱོན་ས་གཡོས་ཀྱིས་གནོན། ལྷ་ཁང་ཡང་གོག་པོར་འགྲོ་ཞིང་སྐུ་འདྲ་དང་གསུང་རབ་ཐམས་ཅད་སྤྲང་ཕྲུག་གི་རྩེད་ཆས་བྱེད། ལུགས་མ་རྣམས་ལ་བུད་མེད་ཀྱི་སལ་སིལ་བཟོ། །དེ་ནས་བསྐལ་པ་དུས་ངན་སྤྱོད་ཚན་གཅིག་ཡོལ་བ་དང་། བདུད་སྤྲུལ་གྱི་རྒྱལ་པོ་ལོག་ལྟ་ཅན་ཞིག་མདོ་ཁམས་སུ་འབྱུང་ཞིང་མདོ་ཁམས་སྒང་དྲུག་ཡོས་ལྟར་བརྔོ། །དགེ་མེད་ཁྲིམས་ཀྱི་སྡིག་ལས་སྤྱོད། །སངས་རྒྱས་ཆོས་ཀྱི་བསྟན་ལ་སྡང་། །བླ་དཔོན་ཕལ་ཆེར་གྲི་ལ་བཀུམ་པའི་དུས་སུ་ཀློང་ཐང་རི་དགོན་སིལ་བུར་འཐོར་ཞིང་བོན་དགོན་འདེབས། དེའི་དབང་གིས་བོད་ཁམས་ཡོངས་ལ་ནད་མཚོན་མུ་གེའི་བསྐལ་བ་ལྡང་ཞིང་སེམས་ཅན་ཐམས་ཅད་དམྱལ་ཐག་གཅོད། །མཐའི་དམག་གིས་མདོ་དབུས་ཀྱི་རྒྱལ་བློན་བཀུམ། །ཆོས་ཀྱི་དད་པ་ཡལ་བཟོད་པའི་གོ་ཆ་འཆོར། །དགེ་བའི་ཁྲིམས་རལ་མི་དགེ་བའི་གྲུབ་མཐའི་རྩོད་པ་སོགས་མི་འདོད་སྣ་ཚོགས་འབྱུང་བའི་དུས་སུ་ཀློང་ཐང་དུའང་མི་རོ་ལུད་ལྟར་སྤུངས། །དམེ་ཁྲག་མཚོ་ལྟར་བསྐྱིལ་བ་སོགས་འབྱུང་བའི་དུས་སུ་ཆོས་ཀྱི་རྒྱལ་པོའི་སྨོན་ལམ་མཐུ་བཙན་པས། མཐའ་དབུས་ཀྱི་དྲེགས་པ་ཅན་རྣམས་ཐབས་ཀྱིས་འདུལ་ཞིང་ཆོས་ཀྱི་བསྟན་པ་འཛིན་ཀྱང་དུས་ཀྱི་དབང་གིས་དཀར་ནག་ཕྱེད་མར་འབྱུང་། བོད་ཁམས་མཐའ་དབུས་ཀྱི་ལྷ་ཁང་མཆོད་རྟེན་ཞིག་རལ་བསུབ་པ་སོགས་ཀྱི་རྟེན་འབྲེལ་གྱིས་བོད་སྤྱིའི་བསོད་ནམས་ཡར་ལྡན་དུ་འཕེལ་ཡང་ཀློང་ཐང་རྒུད་པས་ཤར་གྱི་ལས་སྒོ་དང་ཁམས་ཕྱོགས་འགྲོ་ལ་དར་གུད་སྣ་ཚོགས་འོང་། དེ་དུས་བློན་པོ་ཏ་རའི་སྤྲུལ་པ་ཡུལ་དེའི་དཔོན་ལ་འབྱུང་བས་སའི་ཁ་འཛིན་བྱེད་དེ། ཀློང་ཐང་རི་དགོན་མི་དར་བའི་རྐྱེན་ངན་སྣ་ཚོགས་བྱེད་པས་ཁམས་ཕྱོགས་བདེ་བའི་གོ་སྐབས་མེད། ལོ་ཙཱ་བའི་སྐྱེ་བས་ད་ལྟའི་གཏེར་ལ་དེ་དུས་སྤྱོད་ཀྱང་བདུད་དབང་བཙན་པས་འགྲོ་དོན་འབྱུང་བར་དཀའ། སྲོང་བཙན་སྤྲུལ་པའི་བྱང་ཆུབ་སེམས་དཔའ་ཡི། །རྡོ་རྗེ་གདན་གསུམ་རུ་བཞིའི་གཙུག་ལག་དང་། །ཁྱད་པར་ཁམས་ཀྱི་ཀློང་ཐང་སྒྲོལ་མ་ན། །བདུད་ཁང་བརྩེགས་པའི་ས་སྒྲོན་སྒྱེལ་བ་དང་། །རི་ལ་སྒྲུབ་སྡེ་ཐང་ལ་དགོན་བཏབ་ནས། །བཤད་སྒྲུབ་རྒྱས་ན་ཤར་ཕྱོགས་འགྲོ་བ་བདེ། །མཐའི་དུཿཁ་རྣམས་ཀྱང་རང་སར་ཞི། །ལས་སྒོ་དར་ཞིང་ཤར་དང་བྱང་རྣམས་འཇམ། །བདུད་དང་བར་ཆད་དབང་དུ་སོང་བ་ན། །མི་དགེ་སྣ་ཚོགས་ཤར་དང་བྱང་ནས་ལང་། །སྨིན་དྲུག་འོག་གིས་མཚོན་རྩེ་ནུབ་ལ་བརྡར། །ས་ལ་མདའ་འཛུགས་ནུབ་ཀྱི་སྟག་ལ་བརྔམ། །ཉི་ཟླ་གཉིས་ལ་བར་དབྱེན་རླུང་དམར་ལྡང་། །རུས་པ་བཙས་ཟོས་འོད་ལ་སྐར་མདའ་འཆད། །མི་སྲིད་སྣ་ཚོགས་སྲིད་པའི་གཡོས་མང་ཚེ། །ཚེས་བཅུ་བཟུང་ལ་ང་ལ་གསོལ་བ་ཐོབ། །མང་ཡུལ་བྱམས་སྤྲིན་བྱང་གི་པྲ་དུན་རྩེ། །ཁམས་ཀྱི་ཀློང་ཐང་ཀོང་གི་བུ་ཆུ་སོགས། །རུ་བཞིའི་ལྷ་ཁང་བཞི་ལ་ཆོས་འདི་ཚུགས། །བདེ་གཤེགས་བརྒྱད་ཀྱི་འདྲ་འབག་ཚད་ལྡན་བཞེངས། །རབ་ཏུ་གནས་ཞིང་མཆོད་བསྟོད་འབུང་གསུམ་ཐོན། །འགྲོ་ལ་བདེ་སྐྱིད་མཐོངས་ཀའི་ཉི་ཞུར་ཙམ། །མ་འོངས་ཕྱི་མའི་དུས་སུ་འབྱུང་ཡང་སྲིད།། །།