རིག་འཛིན་འདུས་པའི་རྩ་རྒྱུད།

བཀའ་རྫོགས་པ་ཆེན་པོ་བླ་མ་བདེ་མཆོག་འཁོར་ལོ་ལས༔ རིག་འཛིན་འདུས་པའི་རྩ་རྒྱུད་བཞུགས་སོ༔ ཨོ་རྒྱན་སྐད་དུ༔ བོད་སྐད་དུ་རིག་འཛིན་འདུས་པའི་རྩ་རྒྱུད༔ དཔལ་ཆེན་པོ་ཧེ་རུ་ཀཿལ་ཕྱག་འཚལ་ལོ༔ འདི་སྐད་བདག་གིས་ཐོས་པ་དུས་ཅིག་ན༔ གནས་ཕུན་སུམ་ཚོགས་པ་རིག་འཛིན་རོལ་པ་ཆེན་པོའི་སྒྱུ་འཕྲུལ་གྱི་བཀོད་པ་ཞེས་བྱ་བ༔ མཐའ་དང་དབུས་མེད་པ༔ ཕྱི་ནང་ཡང་ཀུན་ཏུ་གསལ་བ༔ ཀུན་ཏུ་ཡང་ནང་དུ་གྱུར་པ༔ ཕྱི་ལྟར་བཀོད་པ་ལྷུན་གྲུབ་ཀྱི་ཞིང་ཁམས༔ ནང་ལྟར་གསང་ཆེན་རོལ་པའི་དུར་ཁྲོད༔ གསང་བ་འོག་མིག་སྟུག་པོ་བཀོད་པའི་ཕོ་བྲང་དང་གཉིས་སུ་མེད་པའི་ཞིང་ཁམས་ཀྱི་དབུས་ན༔ རིན་པོ་ཆེ་སྣ་ཚོགས་ལས་གྲུབ་པའི་ཕོ་བྲང་ལ༔ དཀར་པོ་དང་༔ སེར་པོ་དང་༔ དམར་པོ་དང་༔ ལྗང་གུ་དང་༔ མཐིང་ག་ལ་སོགས་པའི་འོད་ཟེར་གྱི་དྲྭ་བས་འབྲེལ་བ༔ ལྟ་ན་སྡུག་པའི་གཞལ་ཡས་ཁང་ཆེན་པོ་དེའི་དབུས་སུ༔ ཉི་མ་དང་༔ ཟླ་བ་དང་༔ པདྨ་དང་༔ དར་ཟབ་སྣ་ཚོགས་བརྩེགས་པའི་ཁྲི་བཀོད་པ་ཕུན་སུམ་ཚོགས་པའི་སྟེང་ན༔ རིགས་འཛིན་ཐམས་ཅད་ཀྱི་སྐུ་དང་༔ གསུང་དང་ཐུགས་དང་ཡོན་ཏན་འཕྲིན་ལས་ཐམས་ཅད་འདུས་པའི་ངོ་བོ༔ གར་གྱི་དབང་ཕྱུག་ཧེ་རུ་ཀཿདཔལ་ཆེན་པོ་ཁྲག་འཐུང་གི་རྒྱལ་པོ་ཐོད་པའི་ཕྲེང་བ་ཅན༔ རིག་འཛིན་འདུས་པ་རྩལ་བདེ་བའི་དབང་ཕྱུག་མཆོག་གི་རྒྱལ་པོ་ཞེས་བྱ་བས༔ ཧེ་རུ་ཀཿའི་ཆས་རྣམས་ཀྱིས་སྤྲས་ཤིང་༔ རང་འོད་ཀྱི་གསལ་མདངས་སུ༔ ཡུམ་གར་གྱི་དབང་མོ་རྩལ་མནྡྷ་རཱ་བ་དང་གཉིས་མེད་དུ་འཁྲིལ་ཞིང་༔ བདེ་སྟོང་དབྱེར་མེད་སྤྲོས་བྲལ་གྱི་ཏིང་འཛིན་ལ་སྙོམས་པར་ཞུགས་སོ༔ སྙོམས་པར་ཞུགས་མ་ཐག་ཏུ་རང་བྱུང་གི་སྒྲ་ལས༔ ཨཱཿཧཱཾ༔ བཛྲ་ངྷརྨཱ་ངྷརྟུ་ཡོ་གི་ནི༔ ཞེས་པའི་སྒྲ་ཆེན་པོ་དེས་ཕྱོགས་བཅུའི་ཞིང་ཁམས་ཐམས་ཅད་ཁྱབ་པས༔ རྣམ་པར་སྨིན་པའི་རིག་འཛིན༔ ས་ལ་གནས་པའི་རིག་འཛིན༔ ལྷུན་གྱིས་གྲུབ་པའི་རིག་འཛིན༔ ཚེ་ལ་དབང་བའི་རིག་འཛིན་༔ ཕྱག་རྒྱ་ཆེན་པོའི་རིག་འཛིན༔ ཡི་དམ་དང་མཁའ་འགྲོ་དང་ཆོས་སྐྱོང་བའི་སྲུང་མ་བསམ་གྱིས་མི་ཁྱབ་པ་སྐད་ཅིག་དེ་ལ་ཞིང་ཁམས་དེ་ཉིད་དུ་འདུས་སོ༔ འདུས་པར་གྱུར་ཏོ༔ རིག་འཛིན་འདུས་པའི་རྩ་རྒྱུད་ལས༔ གླེང་གཞི་གླེང་ལངས་པའི་ལེའུ་སྟེ་དང་པོའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རང་ལས་མི་གཞན་པའི༔ རིག་འཛིན་མཁའ་འགྲོའི་ཚོགས་རྣམས་ཀྱིས༔ དགོངས་པ་གཅིག་གི་ཆོས་ཉིད་ལས༔ རིག་འཛིན་རྡོ་རྗེ་ནུས་འབྱིན་ཞེས༔ སྟོན་པའི་མདུན་དུ་སྤྲུལ་བྱས་ནས༔ བདེ་བའི་འཁོར་ལོར་འདི་སྐད་གསོལ༔ ཀྱེ་ཀྱེ་བཅོམ་ལྡན་བདེ་བའི་མཆོག༔ དུས་གསུམ་རིག་འཛིན་འདུས་པའི་གཙོ༔ མཁའ་འགྲོ་གིང་དང་ལང་ཀའི་བདག༔ ཕུན་སུམ་ཚོགས་པའི་ཞིང་ཁམས་སུ༔ རིག་འཛིན་མཁའ་འགྲོའི་ཕོ་བྲང་དུ༔ རང་འོད་ཡུམ་དང་བཅས་བཞུགས་ཏེ༔ བདེ་སྟོང་ཟུང་འཇུག་ཨཱཿཧཱཾ་སྒྲས༔ ཕྱོགས་བཅུའི་ཞིང་གི་ཁྱོན་གང་བའི༔ བདེ་སྟོང་ཟུང་འཇུག་སྒྲ་དབྱངས་དོན༔ འདུས་པའི་འཁོར་ལ་བཤད་དུ་གསོལ༔ དེ་སྐད་ཅེས་ནི་གསོལ་བ་དང་༔ བཅོམ་ལྡན་བདེ་མཆོག་འཁོར་ལོ་ཡིས༔ འདུས་པའི་འཁོར་ལ་བཀའ་སྩལ་པ༔ ཉོན་ཅིག་རྡོ་རྗེ་ནུས་འབྱིན་རྩལ༔ ང་ཡི་ཞིང་མཆོག་དམ་པ་འདི༔ དངོས་པོ་མ་ཡིན་དངོས་མེད་མིན༔ རྟག་པ་མ་ཡིན་སྟོང་པ་མིན༔ རྒྱུ་ལས་མ་བྱུང་རྐྱེན་ལས་མིན༔ དེ་དབུས་སྣ་ཚོགས་རྒྱན་ལྡན་པའི༔ རིགས་འཛིན་ཡོངས་འདུས་ཕོ་བྲང་ཆེ༔ གྲུ་བཞི་པ་ལ་སྒོ་བཞི་པ༔ རྒྱན་དང་རྟ་བབས་བཞི་བཞིར་ལྡན༔ ལྷ་ཀླུ་གནོད་སྦྱིན་ཀ་གདུང་ལ༔ གཟའ་སྐར་དྲལ་ཕྱམ་ཞིང་ལྤགས་ཐོག༔ རྒྱུ་མའི་དྲ་ཕྱེད་ཙིཏྟའི་ཏོག༔ གདུགས་དང་ཆོས་འཁོར་ཉི་ཟླས་སྤྲས༔ དུར་ཁྲོད་བརྒྱད་ཀྱི་ཁོར་ཡུག་ཚོགས༔ ཐོག་མ་མ་ཡིན་ཐ་མ་མིན༔ དངོས་དང་དངོས་མིན་ལས་འདས་ཤིང་༔ རྒྱུ་དང་རྐྱེན་གྱི་འདུ་འཕྲོ་ཟད༔ ཟད་པ་ཟག་མེད་ཆོས་དབྱིངས་ཀློང་༔ དུས་གསུམ་མཉམ་ཉིད་ཀློང་དུ་བརྡལ༔ དེ་དབུས་སྣ་ཚོགས་བཀོད་ལེགས་ཁྲིར༔ ཉི་མ་འབུམ་གྱི་འོད་འཕྲོ་བའི༔ བདག་ཉིད་བདེ་བའི་ཧེ་རུ་ཀ༔ སྟོང་པའི་རང་རྩལ་ཡུམ་དང་འཁྲིལ༔ ཨཱཿཧཱཾཿསྒྲ་ཡིས་རྒྱལ་དང་སྲས༔ རྟོག་མེད་དབྱིངས་སུ་དགའ་བཞིས་མཆོད༔ ནམ་མཁའི་མཐར་ཐུག་ཁྱོན་བཀང་སྟེ༔ སེམས་ཅན་ཀུན་ཡིད་ཚིམ་པར་བྱེད༔ སེམས་ཅན་ཀུན་གྱི་ཡིད་དགའ་བ༔ གྲུབ་པ་མཐར་ཕྱིན་འཁྲུལ་བ་མེད༔ ནོར་བ་ཐམས་ཅད་རྣམ་པར་སྤངས༔ དུས་གསུམ་སངས་རྒྱས་ལས་བྱེད་པ༔ སངས་རྒྱས་ཐོག་མ་ཐ་མ་མེད༔ ཨཱཿནི་ཀུན་བཟང་ཡུམ་གྱི་མཁའ༔ ཆོས་འབྱུང་འབར་བ་ཨཱཿཡི་ཚུལ༔ རྡོ་རྗེ་བཙུན་མོའི་བྷ་ག་ཆེ༔ བདེ་ཆེན་ཡེ་ཤེས་ཤེས་རབ་མཆོག༔ ཧཱུྃ༔ ནི་བདེ་མཆོག་འཁོར་ལོ་སྟེ༔ ཡེ་ཤེས་མིག་གཅིག་དྲི་མ་མེད༔ རྡོ་རྗེ་ཡེ་ཤེས་རྡོ་རྗེ་མཆོག༔ རང་བྱུང་རྡོ་རྗེ་མཆོག་སྩོལ་བ༔ ཐབས་ཀྱི་སྐུར་སྟོན་དཔའ་བོ་དཔལ༔ བཛྲ་མི་ཤིག་འཇིགས་བྲལ་བ༔ ངྷརྨཱ་ཆོས་རྣམས་སྐྱེ་བ་མེད༔ ངྷརྟུ་འཕོ་འགྱུར་བྲལ་བ་སྟེ༔ ཡོ་གི་ཁམས་གསུམ་ཀུན་ཏུ་རྒྱལ༔ དགའ་བ་དགའ་བྲལ་དགའ་བའི་མཆོག༔ རྟོག་མེད་ཆོས་སྐུ་ལྷུན་གྱིས་གྲུབ༔ སངས་རྒྱས་ཉག་གཅིག་ཆོས་ཀྱི་སྐུ༔ རྒྱུ་དང་རྐྱེན་རྣམས་དབྱིངས་སུ་དག༔ རིག་འཛིན་འདུས་པའི་རྩ་རྒྱུད་ལས༔ བདེ་སྟོང་ཟུང་འཇུག་གི་དོན་བཤད་པའི་ལེའུ་སྟེ་གཉིས་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་བ༔ ཀྱེ་ཀྱེ་བཅོམ་ལྡན་བདེ་བའི་མཆོག༔ བདེ་སྟོང་འབར་བའི་སྒྱུ་འཕྲུལ་ལས༔ རིག་འཛིན་ཡོངས་ཀྱི་རྩལ་འཆང་བའི༔ བདེ་མཆོག་འཁོར་ལོའི་ཏིང་འཛིན་གྱིས༔ གྲོལ་ལམ་འཇུག་ཐབས་ཇི་ལྟར་ལགས༔ བསྐྱེད་པའི་རིམ་པ་གང་ལྟར་བསྒོམ༔ དུས་གསུམ་རིག་འཛིན་དོན་དུ་གསུངས༔ ཅེས་གསོལ་སྟོན་པས་བཀའ་སྩལ་པ༔ ནུས་འབྱིན་རྡོ་རྗེ་མཆོག་ཁྱོད་ཉོན༔ རིག་པ་འཛིན་པ་ཀུན་འདུས་པའི༔ བདེ་མཆོག་བླ་མའི་ཏིང་འཛིན་ལ༔ འཇུག་པར་འདོད་པའི་རྣལ་འབྱོར་པས༔ བསྐྱེད་པའི་རིམ་པ་འདི་ལྟར་བསྒོམ༔ དུར་ཁྲོད་རི་སུལ་ནགས་འདབས་སམ༔ གཡའ་དང་གངས་ཁྲོད་དབེན་གནས་སུ༔ བྱ་བྱེད་འདུ་ཚོགས་གཡེང་བ་སྤངས༔ དཀར་ཕྱོགས་སྲུང་མར་གཙང་གཏོར་འབུལ༔ ནག་ཕྱོགས་བགེགས་རིགས་སྔགས་ཀྱིས་སྦྱང་༔ སྐྱབས་གྱུར་བླ་མེད་དཀོན་མཆོག་ལ༔ བྱང་ཆུབ་བར་དུ་སྐྱབས་གསོལ་འདེབས༔ བདག་གཞན་བསྟན་དང་འགྲོ་དོན་དུ༔ རང་བྱུང་དོན་གྱི་ཆོས་ལ་འཇུག༔ ཧཱུྃ་ལས་བླ་མ་རྡོ་རྗེ་སེམས༔ སྔགས་དང་དམིགས་པས་སྒྲིབ་གཉིས་སྦྱངས༔ ལུས་དང་ལོངས་སྤྱོད་ཐམས་ཅད་ཀུན༔ གཅིག་ཏུ་བསྡུས་ནས་གང་ལ་འབུལ༔ ཚོགས་རྫོགས་སྒྲིབ་སྦྱངས་བླ་མེད་མཆོག༔ ཡན་ལག་བདུན་དང་དམ་བཤགས་འབུལ༔ བརྒྱུད་པར་གསོལ་བ་སྙིང་ནས་འདེབས༔ མོས་གུས་བསྐྱེད་ཅིང་དབང་བཞི་ལེན༔ ཐུན་མོང་སྔོན་འགྲོའི་ལས་རིམ་མོ༔ དངོས་གཞི་ཏིང་འཛིན་རྣམ་པ་གསུམ༔ སྣོད་བཅུད་དུག་གསུམ་རྣམ་པར་སྦྱངས༔ མཁའ་ཀློང་རྣམ་པར་དག་པའི་ངང་༔ ཨེ་ཡཾ་ར་སུཾ་ཀེཾ་རཾ་བྷྲཱུྂ༔ སྟོང་ཉིད་ནམ་མཁའ་མཐའ་དབུས་མེད༔ རླུང་གིས་བཏེག་པའི་གསེར་གྱི་གཞི༔ རིག་འཛིན་རོལ་པའི་དུར་ཁྲོད་དབུས༔ ཕོ་བྲང་གཞལ་ཡས་ལྷུན་གྱིས་གྲུབ༔ ཏི་ར་ཉི་ཟླ་པདྨ་དང་༔ དར་ཟབ་བརྩེགས་པའི་ཁྲི་སྟེང་དུ༔ རྡོ་རྗེ་ཧཱུྃ་གིས་མཚན་པར་བསྒོམ༔ འོད་ཟེར་འཕྲོ་འདུས་དོན་གཉིས་བྱས༔ ཡོངས་གྱུར་ངོ་བོ་རང་རིག་ནི༔ རིག་འཛིན་འཁོར་ལོ་བདེ་མཆོག་ཆེ༔ རྣམ་པ་གསལ་ལ་མ་འདྲེས་པ༔ རྣམ་དག་དྲན་ལ་ཡོངས་སུ་རྫོགས༔ ང་རྒྱལ་རྡོ་རྗེ་ཡེ་ཤེས་སྐུ༔ སྣང་སྟོང་ཆུ་ཡི་ཟླ་གཟུགས་ལྟར་༔ མ་ཡེངས་ངང་ནས་ལྷམ་མེར་གསལ༔ དེ་ཡི་ཕྱི་རིམ་པད་འདབ་ལ༔ ཕྱོགས་བཞི་མཚམས་དང་བརྒྱད་རྣམས་སུ༔ རིགས་འཛིན་བཞི་དང་སློབ་དཔོན་བཞི༔ འོད་ཀྱི་ཀློང་དུ་བཞུགས་པར་བསྒོམ༔ དེ་ཡི་ཕྱི་རིམ་འདབ་བརྒྱད་ལ༔ སྐུ་གསུང་ཐུགས་ཡོན་ཕྲིན་ལས་དང་༔ མ་མོ་མཆོད་བསྟོད་དྲག་སྔགས་ཀྱི༔ རིག་པ་འཛིན་པའི་ཚོགས་ཀྱང་གསལ༔ སྒོ་བ་སྒོ་མ་བཀའ་སྲུང་དང་༔ བྲན་དང་ཕོ་ཉ་བསམ་མི་ཁྱབ་༔ རང་བྱུང་དུར་ཁྲོད་ཆེན་པོ་བརྒྱད༔ པད་རྡོར་མེ་རི་བྲག་ཆེན་བཅས༔ ཕྱི་གསལ་ནང་གསལ་ཟང་ཐལ་ཀློང་༔ དྲི་མེད་ཡེ་ཤེས་རྒྱལ་བའི་གནས༔ རིག་འཛིན་རོལ་པའི་བའི་ཕོ་བྲང་གསལ༔ ཕྱི་ལྟར་རྣམ་དག་བཀོད་པའི་ཞིང་༔ ནང་ལྟར་ཧེ་རུ་ཀཿཡི་གནས༔ གསང་་བ་ཡུམ་གྱི་མཁའ་ཀློང་ཆེ༔ བརྟེན་བཅས་ལྷ་དང་ལྷ་མོར་གསལ༔ སྣང་སྟོང་ཡེ་ཤེས་རོལ་པར་བསྒོམ༔ རིག་འཛིན་འདུས་པའི་རྩ་རྒྱུད་ལས༔ བསྐྱེད་རིམ་བསྟན་པའི་ལེའུ་སྟེ་གསུམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་བ༔ ཀྱེ་ཀྱེ་བཅོམ་ལྡན་བདེ་བའི་མཆོག༔ དེ་ལྟར་བསྐྱེད་རིམ་བསྒོམས་པའི་ལྷ༔ སྤྱན་འདྲེན་བཞུགས་གསོལ་ཕྱག་དང་མཆོད༔ བསྟོད་པ་འཛབ་ཀྱི་རིམ་པ་གསུང་༔ དེ་ནས་སྟོན་པས་བཀའ་སྩལ་པ༔ བླ་མེད་ཆོས་ཀྱི་ནུས་འབྱིན་མཆོག༔ སེམས་དཔའ་རིག་འཛིན་མཆོག་ཁྱོད་ཉོན༔ རང་བཞིན་དག་པ་ཞིང་གི་མཆོག༔ འོག་མིན་སྟུག་པོ་བཀོད་པ་ནས༔ བདེ་བར་གཤེགས་པ་ཆོས་ཀྱི་སྐུ༔ བདེ་མཆོག་བདེ་བའི་རྣམ་པར་སྤྱོད༔ སྣང་བརྙན་སྐུ་ལ་ཐིམ་པར་བསྒོམ༔ དར་ཟབ་བཀོད་ལེགས་ཉི་ཟླའི་དཀྱིལ༔ འོད་ཀྱི་ཀློང་དུ་བཞུགས་པར་བསམས༔ འདུ་འབྲལ་མེད་པའི་ཕྱག་འཚལ་ཞིང་༔ ཕྱི་ནང་གསང་བའི་མཆོད་པས་མཆོད༔ བརྡ་དོན་རྟགས་ཀྱི་རིམ་པས་བསྟོད༔ ཐུགས་ཀར་ཉི་དཀྱིལ་ས་བོན་མཐར༔ སྔགས་ཀྱི་ཕྲེང་བ་འདི་ལྟར་འཁོད༔ ཨཱོཾ་ཨཱཿཧཱུྃ་བཛྲ་མ་ཧཱ་གུ་རུ་སརྦ་ཧྲཱིཿསྭཱ་ཧཱ༔ སྤྲོས་པས་ཕྱོགས་བཅུའི་རྒྱལ་བ་མཆོད༔ བསྡུས་ཏེ་དངོས་གྲུབ་བདག་ལ་བསྟིམ༔ མ་གསལ་བར་དུ་བསྐྱེད་པར་བྱ༔ མ་གྲུབ་བར་དུ་མི་གཏོང་ངོ༔ རིག་འཛིན་འདུས་པའི་རྩ་རྒྱུད་ལས༔ མཆོད་བསྟོད་བསྟན་པའི་ལེའུ་སྟེ་བཞི་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ བདེ་མཆོག་འཁོར་ལོར་འདི་སྐད་གསོལ༔ ཀྱེ་ཀྱེ་སྟོན་པ་བདེ་བའི་རྒྱལ༔ རིག་འཛིན་འདུས་པའི་སྒྱུ་འཕྲུལ་གྱིས༔ ཚོགས་དང་རྗེས་ཆོག་ལས་རིམ་གསུང་༔ འདུས་པའ་ིའཁོར་ལ་བཀའ་སྩོལ་ཅིག༔ དེ་ནས་སྟོན་པས་བཀའ་སྩལ་པ༔ ནུས་འབྱིན་རྡོ་རྗེ་སེམས་དཔའ་ཉོན༔ རིག་འཛིན་སྒྱུ་འཕྲུལ་ཕོ་བྲང་དུ༔ བཟའ་བ་དང་ནི་བཅའ་བ་དང་༔ བདུད་རྩི་ལྔ་དང་ཤ་ལྔ་དང་༔ རི་སྒོག་དང་ནི་ཀླུང་ལས་སྐྱེས༔ སྤང་ལས་སྐྱེས་དང་ནགས་ལས་སྐྱེས༔ བཏུང་བའི་བྱེ་བྲག་སྣ་ཚོགས་པ༔ རྡོ་རྗེ་ལྟ་བུའི་ཏིང་འཛིན་གྱིས༔ ཡེ་གེ་གསུམ་གྱི་བྱིན་གྱིས་བརླབ༔ འདོད་དགུ་རང་བྱུང་ཚོགས་ལ་སྒྱུར༔ ལྷ་ལ་མཆོད་ཅིང་རྣལ་འབྱོར་རོལ༔ ཐུགས་དམ་བསྐང་ཞིང་དབྱིངས་ནས་བསྐུལ༔ ལྷག་མ་སྦྱིན་ཞིང་ཐ་མ་བསྒྲལ༔ ཞལ་དུ་སྟོབ་ཅིང་བཟློག་སྒྱུར་བཅོལ༔ དངོས་གྲུབ་བླང་ཞིང་ཚེ་ཡང་འགུགས༔ བཀྲ་ཤིས་མེ་ཏོག་འཐོར་བར་བྱ༔ འགྲོ་དྲུག་མར་གྱུར་འགྲོ་བ་རྣམས༔ བླ་མེད་འཐོབ་ཕྱིར་བསྔོ་སྨོན་བྱ༔ ཀ་དག་བློ་འདས་ཡེ་རྫོགས་ཀློང་༔ མཐའ་བྲལ་ཆེན་པོ་སྤྲོས་མེད་སྤྱོད༔ ལྷ་དང་དཀྱིལ་འཁོར་ཡེ་རྒྱས་གདབ༔ རིག་འཛིན་འདུས་པའི་རྩ་རྒྱུད་ལས་ཚོགས་དང་རྗེས་ཆོག་བསྟན་པའི་ལེའུ་སྟེ་ལྔ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྟོན་པར་སླར་གསོལ་པ༔ རིག་འཛིན་ཡོངས་འདུས་ཕོ་བྲང་དུ༔ བསྙེན་ཅིང་བསྒྲུབ་སྟེ་མཆོད་པའི་ཚེ༔ ཐུགས་དམ་བསྐང་ན་ཇི་ལྟར་ལགས༔ དེ་ནས་སྟོན་པས་བཀའ་སྩལ་པ༔ སེམས་དཔའ་མཆོག་ཁྱོད་ལེགས་པར་ཉོན༔ ཡར་ངོ་མར་ངོའི་དུས་ཆེན་དང་༔ ཉམས་ཆགས་རྟོག་སྒྲིབ་ནམ་བྱུང་དུས༔ བསྐང་བའི་རིམ་པས་བསྐང་དང་བཤགས༔ ཐུན་མོང་མཆོད་པས་སྐུ་ལ་བསྐང་༔ སྔགས་ཚིག་རོལ་མོས་གསུང་ལ་བསྐང་༔ ཆོས་ཉིད་ཕྱག་རྒྱས་ཐུགས་ལ་བསྐང་༔ དེ་ལྟར་བསྐང་ཞིང་གསོལ་གསོལ་ནས༔ ལས་བཞིའི་འཕྲིན་ལས་བསྒྲུབ་པར་བྱ༔ རིག་འཛིན་འདུས་པའ་ིརྩ་རྒྱུད་ལས༔ བསྐང་བའི་ལེའུ་སྟེ་དྲུག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྟོན་པར་ཡང་གསོལ་བ༔ ཀྱེ་ཀྱེ་སྟོན་པ་བདེ་བའི་རྒྱལ༔ རིག་འཛིན་རོལ་པའི་དཀྱིལ་འཁོར་དུ༔ དམ་ལྡན་སློབ་མ་འཇུག་ཐབས་དང་༔ དབང་གི་སྨིན་གྲོལ་ཇི་ལྟར་སྦྱིན༔ དེ་ནས་སྟོན་པས་བཀའ་སྩལ་པ༔ རིག་འཛིན་ནུས་པའི་རྡོ་རྗེ་ཉོན༔ དམ་ཚིག་གཙང་ལྡན་གཏོང་ཕོད་ཆེ༔ ཤེས་རབ་ཆེ་ཞིང་སྒྲུབ་ལ་བརྩོན༔ ཚེ་འདི་བློས་བཏང་སྐལ་ལྡན་ལ༔ རི་སུལ་དུར་ཁྲོད་དབེན་གནས་སུ༔ ཐོས་བསམ་སྒོམ་སྒྲུབ་དྲོད་རྟགས་ཐོན༔ ཤེས་ཆེ་སྤོབས་པ་མཐོ་བ་དང་༔ བརྒྱུད་ལྡན་མན་ངག་དབང་བསྐུར་ཐོབ༔ རང་གྲོལ་གཞན་དོན་བསྒྲུབ་ནུས་པའི༔ མཚན་ལྡན་བླ་མས་དབང་འདི་སྦྱིན༔ གཙང་མའི་ཆུ་ཡིས་ལས་བུམ་དགང་༔ ཁྲོ་བོའི་སྔགས་བཟླས་ཏིང་འཛིན་བསྐྱེད༔ ཨཱོཾ་བཛྲ་ཀྲོ་ཏ་ཨ་མྲྀཏ་ཀུནྜ་ལི་ཧ་ན་ཧ་ན་ཧཱུཾ་ཕཊ༔ འོད་དུ་ཞུ་ནས་སློབ་མ་བཀྲུ༔ ཡེ་ཤེས་བླ་མེད་ཆུ་རྒྱུན་གྱིས༔ ལས་ཉོན་སྡིག་སྒྲིབ་དག་པར་བསམས༔ གཙང་མའི་གཏོར་མ་རྒྱན་ལྡན་འདི༔ བསྲུང་བ་གཞི་བདག་དཀར་ཕྱོགས་མཆོད༔ ལས་ཀྱི་དངོས་གྲུབ་བདག་ལ་སྩོལ༔ ཧཱུྃ་གདོན་དང་བགེགས་དང་འབྱུང་པོ་དང་༔ བར་དུ་གཅོད་པ་གང་ཡིན་རྣམས༔ འདི་རུ་མ་འདུག་གཞན་དུ་དེངས༔ འབྱུང་པོའི་ཚོགས་རྣམས་མཱ་ར་ཡ་ཕཊ༔ གུ་གུལ་བདུག་ཅིང་ཐུན་གྱིས་བྲབ༔ ལྔ་ལྡན་སྣལ་མའི་སྐུད་པ་ལ༔ ཡི་གེ་གསུམ་གྱི་སྔགས་ཀྱིས་གདབ་༔ རྡོ་རྗེ་འབར་བའི་མདུད་པ་རྒྱབ་༔ གདོན་བགེགས་བསྲུངས་ཤིག་རཀྵ་ཡེ༔ བཀྲ་ཤིས་རྩ་འདི་མཆོག་གི་རྫས༔ བྱིན་གྱིས་བརླབས་ཏེ་སྔས་གདན་སྦྱིན༔ སེང་གེ་བཞིན་ཉོལ་རྨི་ལམ་ཤོད༔ ཨཱོཾ་ཨཱཿཧཱུྃ༔ པྲ་ཏི་ཧ་ཏ༔ བྱང་ཆུབ་ཤིང་གི་སོ་ཤིང་འདི༔ དཀྱིལ་འཁོར་འདིར་འདོར་ལས་སྨོན་དབང་༔ གང་ཡོད་བདག་ལ་གསལ་བར་སྟོན༔ གནས་གསུམ་དྲི་ཡི་ཐིག་ལེ་བྱ༔ སྤོས་སྲེག་རོལ་མོ་དྲག་ཏུ་འབིར༔ བྱིན་འབེབས་མེ་ཏོག་ལྷ་ལ་དབུལ༔ ཚེ་རབས་ལྷ་སྐལ་རང་ངོས་བཟུང་༔ པྲ་ཏིཙྪ་པཱུཙྪ་ཧོ༔ རྡོ་རྗེ་དབང་ཆེན་རཏྣ་འཕྲིན༔ རིགས་མཐུན་དངོས་གྲུབ་སིངྔྷི་ཧོ༔ ཅོད་པན་འདི་ནི་དཔའ་བའི་རྟགས༔ རིན་ཆེན་སྣ་ཚོགས་ལས་གྲུབ་པ༔ ལོངས་སྤྱོད་རྫོགས་པའི་རྟགས་ཀྱི་རྒྱ༔ རལ་པ་མཐོན་མཐིང་དཀྲི་ཞིང་བརྒྱན་༔ ཡེ་ཤེས་འོད་ཀྱི་ཐུར་མ་ཡིས༔ མ་རིག་རྨོངས་པའི་དྲི་མ་བསལ༔ ད་ལ་དཀྱིལ་འཁོར་འདི་ལ་ལྟོས༔ ཙཀྵུ་པྲ་ཝེ་ཤ་ཡ་ཕཊ༔ སྟོང་ཉིད་ངང་ནས་ལྷ་རུ་གསལ༔ རྡོ་རྗེ་ཕག་མོ་གར་དུ་འཁྲབ༔ འོད་ཟེར་འཕྲོས་པས་འོག་མིན་ནས༔ ལྷ་ཚོགས་ཆར་སྤྲིན་བཞིན་དུ་བསམས༔ ཏིཥྛ་བཛྲ་༔ ཧཱུྃ་ཧྲཱི༔ བུམ་པ་ཆོས་དབྱིངས་ཀ་དག་ཆེ༔ ལྷ་མཆོག་དཀྱིལ་འཁོར་ཡོངས་སུ་རྫོགས༔ ལུས་ཀྱི་བག་ཆགས་སྦྱོང་བྱེད་པ༔ སྤྲུལ་པའི་སྐུ་རུ་སྨིན་པར་ཤོག༔ ཧཱུྃ་ཧྲཱི༔ ས་གནས་རིག་འཛིན་ཚེ་དབང་ཕྱག་རྒྱ་ཆེ༔ ལྷུན་གྲུབ་ལ་སོགས་རྣམ་བཞིའི་དབང་སྦྱིན་ཞིང་༔ ཚེ་རབས་སློབ་དཔོན་མན་ངག་དམ་ཚིག་དབང་༔ ཉམས་ཆག་སྐོང་བའི་སློབ་དཔོན་རྣམ་པ་བཞིས༔ སྐལ་ལྡན་བུ་ལ་དབང་མཆོག་སྦྱིན་པར་བྱ༔ སྐུ་གསུང་ཐུགས་ཡོན་འཕྲིན་ལས་རྣམ་པ་ལྔ༔ མ་མོ་མཆོད་བསྟོད་དྲག་སྔགས་རིགས་འཛིན་ཚོགས༔ འདས་དང་མ་བྱོན་ད་ལྟ་དུས་གསུམ་གྱི༔ རིག་འཛིན་རྒྱ་མཚོ་རྣམས་ཀྱིས་དབང་བསྐུར་བས༔ སྨིན་གྲོལ་རབ་འབྱམས་སྐུ་ཡི་དབང་ཐོབ་ཤོག༔ ཧཱུྃ་ཧྲཱི༔ སྒོ་བ་སྒོ་མ་བཀའ་སྡོད་དུར་ཁྲོད་ཆས༔ གནས་ཡུལ་དཔའ་བོ་དཔའ་མོའི་དབང་བསྐུར་བས༔ སྨིན་གྲོལ་ལས་བཞི་ལྷུན་གྲུབ་དབང་ཐོབ་ཤོག༔ མཎྜལ་འབུལ་ཞིང་དམ་ཚིག་བཟུང་༔ ཚོགས་འཁོར་བསྐོར་ཞིང་གླུ་བྲོ་འཁྲབ༔ བདེ་བའི་ཉམས་སྐྱོང་རང་ཞལ་བལྟ༔ དབང་འདི་ཐོབ་པས་མཆོག་ཐུན་འགྲུབ༔ འབྲས་བུ་ཚེ་འདིར་རྫོགས་འཚང་རྒྱ༔ རིག་འཛིན་འདུས་བའི་རྩ་རྒྱུད་ལས༔ སྤྲོས་བཅས་དབང་གི་ལེའུ་སྟེ་བདུན་པའོ༔ ས་མ་ཡཱ་༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་བ༔ སྤྲོས་མེད་དབང་བསྐུར་གང་ལྟར་ལགས༔ འདུས་པའི་འཁོར་ལ་གསུང་དུ་གསོལ༔ དེ་ནས་སྟོན་པས་བཀའ་སྩལ་པ༔ སེམས་དཔའ་རྡོ་རྗེ་ཁྱོད་ཉོན་ཅིག༔ ཡིད་དང་མཐུན་པའི་དབེན་གནས་སམ༔ དུར་ཁྲོད་ནགས་འདབས་ལུང་སྟོང་དུ༔ ཕྱི་ནང་གསང་བའི་མཆོད་པ་བཤམས༔ ངྷཀྐི་མཚན་ལྡན་བདེ་སྟེར་མ༔ བཅུ་དྲུག་ལོ་ལོན་ཡིད་འོང་མཛེས༔ མཚན་དང་ལྡན་པའི་རིག་མ་ལ༔ དབང་བསྐུར་ཁྲུས་བྱས་རྒྱན་གྱིས་སྤྲས༔ ལྟ་དང་འཁྱུད་དང་གཡའ་སྒོག་ཅིང་༔ རིམ་པར་སྦྱོར་ཏེ་བྱང་སེམས་དབབ༔ ཐོད་པར་བླུགས་ནས་བདུད་རྩིར་བསྒྱུར༔ བློ་ཆེ་ཁོག་ཡངས་དམ་ཚིག་གཙང་༔ སྙིང་ནས་སྒྲུབ་ལ་བརྩོན་པའི་བུ༔ ལྔ་གསུམ་བདུན་ལས་མང་མི་བྱ༔ བླ་མ་ཡབ་ཡུམ་དཀྱིལ་འཁོར་ལ༔ མེ་ཏོག་གཏོར་ཞིང་མཎྜལ་དབུལ༔ ཧེ་རུ་ཀཿདཔལ་བླ་མ་ལ༔ གསོལ་བ་གདབ་ཅིང་དབང་ལ་འཇུག༔ མ་དག་སྦྱང་ཕྱིར་ཕག་མོར་བསྒོམ༔ རླུང་སྦྱོར་ལྡན་པས་དཔྲལ་བའི་དཀྱིལ༔ གཡུང་དྲུང་འཁོར་ལ་དམིགས་པ་གཏད༔ རོལ་མོ་འཁྲོལ་ཞིང་ཤ་ཆེན་དང་༔ གྲི་ཀླད་རང་གི་སྐྲ་དང་སེན༔ སྤོས་དཀར་རྣམས་ཀྱི་དུད་པ་བཏང་༔ ཧཱུྃ་ཧྲཱི༔ བདུད་རྩི་འབྱུང་བའི་ཡུལ་ནི་ཡུམ་གྱི་མཁའ༔ བདུད་རྩི་བསྒྲུབ་པའི་སྣོད་ནི་ཀ་པཱ་ལ༔ བདུད་རྩིའི་ལས་ནི་རྣམ་པར་རྟོག་པ་སྦྱང་༔ སྐལ་ལྡན་རྣམས་ལ་དབང་བསྐུར་ཐོབ་གྱུར་ཅིག༔ ངག་སྒྲིབ་དག་ནས་ལོངས་སྤྱོད་རྫོགས༔ རྡོ་རྗེ་འཆང་དང་སྐལ་བ་མཉམ༔ མཚན་ལྡན་གཟུངས་མ་སློབ་མར་སྦྱིན༔ བདེ་བ་བསྐྱེད་ལ་དགའ་བ་བསྒོམ༔ ཐིག་ལེ་ཉམས་ན་དམྱལ་བར་ལྟུང་༔ བླ་མེད་མཆོག་གི་དངོས་གྲུབ་རྫས༔ ཁྱེར་ཅིག་དཔའ་བོ་རྣལ་འབྱོར་ཆེ༔ བུ་དང་ཆུང་མ་ནོར་གྱི་རིགས༔ འཕངས་བསྲི་མེད་པར་ཡོན་དུ་དབུལ་༔ ཚོགས་འཁོར་བསྐོར་ཞིང་བདེ་ཉམས་སྐྱོང་༔ རིག་འཛིན་འདུས་པའི་རྩ་རྒྱུད་ལས༔ གསང་དབང་གི་ལེའུ་སྟེ་བརྒྱད་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྡོ་རྗེ་ནུས་འབྱིན་གྱིས༔ སྟོན་པ་ཉིད་ལ་འདི་སྐད་གསོལ༔ ཀྱེ་མ་སྟོན་པ་འཇིག་རྟེན་འོད༔ ཤིན་ཏུ་སྤྲོས་པ་མེད་པའི་དབང་༔ བསྐུར་བའི་ཆོ་ག་ཇི་ལྟ་བུ༔ བདག་ཅག་རྣམས་ལ་གསུང་དུ་གསོལ༔ དེ་ནས་སྟོན་པས་བཀའ་སྩལ་པ༔ རྡོ་རྗེ་སེམས་དཔའ་ལེགས་པར་ཉོན༔ རབ་ཏུ་དབེན་ཞིང་མཐོ་བའི་སར༔ ཕྱི་ནང་གསང་བའི་མཆོད་རྫས་དང་༔ ཤེལ་དང་མེ་ལོང་རྨ་བྱའི་སྒྲོ༔ ལྟ་གོན་བྱས་ནས་སྣོད་ལྡན་གྱི༔ སློབ་བུས་གསེར་གཡུ་རིན་ཆེན་ནོར༔ མཎྜལ་ཕུལ་ནས་གསོལ་བ་གདབ༔ ཁྲུས་བྱས་གུ་གུལ་དྲི་ཡིས་བདུག༔ བླ་མས་ཧེ་རུ་ཀཿཡི་ཆས༔ སྤྲས་ནས་ཐོད་རྔ་འཁྲོལ་ཞིང་བུར༔ ཧཱུྃ་ཧྲཱི༔ དྲི་མེད་གསལ་ལ་མ་འདྲེས་པ༔ རྒྱལ་དང་རྒྱལ་བའི་སྐུ་འདི་ཡིན་༔ བསྐྱེད་རིམ་མཐར་ཕྱིན་དབང་ཐོབ་ཤོག༔ ཧཱུྃ་ཧྲཱི༔ ཡེ་ཤེས་ལྔ་ལྡན་ལོངས་སྤྱོད་རྫོགས༔ མི་འགྱུར་མཚན་དང་དཔེ་བྱད་འབར་༔ བདེ་གཤེགས་གསུང་དབང་རྨ་བྱའི་སྒྲོ༔ གྲག་སྟོང་བརྗོད་བྲལ་ཨེ་མ་ཧོ༔ ཧཱུྃ་ཧྲཱི༔ ཉོན་ཅིག་སྐལ་ལྡན་རིགས་ཀྱི་བུ༔ མ་སྐྱེས་མི་འགག་དེ་བཞིན་གཤེགས༔ སྐྱེ་མེད་ཆོས་དབྱིངས་སྤྲོས་དང་བྲལ༔ ལྷུན་གྲུབ་འགག་མེད་སྣ་ཚོགས་སྣང་༔ སྐྱེ་བ་མེད་ལས་སྐྱེ་དང་འཕྲུལ༔ ཇི་ལྟར་ནམ་མཁའི་རང་བཞིན་ལྟར༔ འགྲོ་འོང་རེ་དོགས་ཕྱོགས་ལྷུང་མེད༔ བུ་ཁྱོད་རིག་པ་ནམ་མཁར་སྤྲོས༔ ཕྱོགས་བཅུའི་ནམ་མཁའི་ཁམས་ན་སོང་༔ ལྷབས་ལྷབས་འཕུར་དང་ཞུང་ཞུང་འཛུལ༔ ལིངས་ལིངས་མཆོང་བའི་ངང་ནས་སྤྱོད༔ འགྲོ་བར་སྙམ་ཡང་རང་གི་སེམས༔ འགྲོ་བྱེད་ངོ་བོ་གཞི་རྩ་བྲལ༔ མ་ཡེངས་མ་ཡེངས་རང་ལ་ལྟོས༔ བལྟ་མཁན་ཆོས་དབྱིངས་སྐྱེ་བ་མེད༔ མ་ལྟ་མ་ལྟ་གློད་ནས་ཞོག༔ གློད་མཁན་གནས་ལུགས་འགྱུར་བ་མེད༔ བུ་སྒོམས་ཤིག་སྒོམས་ཤིག་ཀ་དག་བསྒོམས༔ བསྒོམས་ཀྱང་བཟང་དུ་སོང་བ་མེད༔ བུ་མ་བསྒོམ་མ་བསྒོམ་བསྐྱུར་ནས་ཐོང་༔ བསྐྱུར་ཡང་ངན་དུ་སོང་བ་མེད༔ ཨེ་མ་རང་བྱུང་ཡེ་ཤེས་ཆེ༔ སྐྱེ་མེད་ནམ་མཁའི་ངོ་བོ་ཉིད༔ ཨཱ་ཨཱ་ཨཱ༔ མཎྜལ་ཚོགས་འཁོར་དབང་ཡོན་འབུལ༔ མཆོག་གི་དངོས་གྲུབ་ལོ་ཟླས་འཐོབ༔ རིག་འཛིན་འདུས་བའི་རྩ་རྒྱུད་ལས༔ ཤིན་ཏུ་སྤྲོས་མེད་ཀྱི་དབང་གི་ལེའུ་སྟེ་དགུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་རྡོ་རྗེ་ནུས་འབྱིན་གྱིས༔ སྟོན་པ་ཉིད་ལ་ཡང་གསོལ་པ༔ ཀྱེ་ཀྱེ་སྟོན་པ་འཇིག་རྟེན་མགོན༔ བསྟན་བའི་སྒྲོན་མེ་ཡེ་ཤེས་འོད༔ རིག་འཛིན་འདུས་པའི་དཀྱིལ་འཁོར་གྱི༔ སྒྲུབ་ཐབས་མན་ངག་གསུང་དུ་གསོལ༔ དེ་ནས་སྟོན་པས་བཀའ་སྩལ་པ༔ རྡོ་རྗེ་སེམས་དཔའ་ཁྱོད་ཉོན་ཅིག༔ འཇིགས་སུ་རུང་བའི་དུར་ཁྲོད་དམ༔ ཚང་ཚིང་འཁྲིགས་པའི་ནགས་ཀྱི་འདབས༔ གཡའ་དང་གངས་རི་ལུང་སྟོང་ངམ༔ གཞན་གྱིས་འཚེ་བ་མེད་པའི་སར༔ ད་ལ་གྱེན་ཐུར་མདའ་གང་པ༔ བ་ཡི་རྣམ་ལྔས་ཆག་ཆག་གདབ༔ སྐྱང་ནུལ་བྱས་ནས་དྲི་བཟང་བྱུག༔ ཚངས་པའི་ཐིག་གདབ་ཆ་ལ་བགོ༔ བཅུ་དྲུག་ཐིག་གི་གྲངས་སུ་བཅད༔ ཆ་ཆེན་དང་པོ་དབུས་ཀྱི་ཆ༔ གཉིས་པར་འདབ་ བརྒྱད་པདྨ་བཀོད༔ ཆ་ཆེན་གསུམ ་པར་པད་འདབ་བརྒྱད༔ མུ་ཁྱུད་ལ་སོགས་མཛེས་པར་བྱ༔ ཆ་ཆེན་བཞི་པ་ཁྱམས་ཀྱི་ཆ༔ ལྔ་བ་ཕྱེད་གདབ་ཕྱི་མ་བསྲེ༔ དྲུག་པ་དབུས་དོར་མཐའ་གཉིས་གདབ༔ བདུན་པ་ཆ་བཞིར་བགོས་ཏེ་གདབ༔ བརྒྱད་པ་དབུས་དོར་མཐའ་གཉིས་གདབ༔ དུར་ཁྲོད་རྡོ་ལ་ཚོན་གྱིས་བསྒྱུར༔ ཨཱོཾ་ཧཱུྃ་ཏྲཾ་ཧྲཱི༔ ཨཱཿབྱིན་གྱིས་བརླབས་ཤིང་ཡེ་ཤེས་བསྟིམ༔ སྦོམ་ཕྲ་མདའ་སྨྱུག་ཙམ་དུ་བླུག༔ ལྷག་ཆད་མེད་པར་མཛེས་པར་བྱ༔ དབུས་སུ་མཉྫིའི་ཁྲིའུ་ཁར༔ མཚན་ལྡན་བུམ་པ་སྨན་དང་བཅས༔ འབྲུ་ལྔ་སྤོས་ལྔ་རིན་ཆེན་ལྔ༔ སྙིང་པོ་ལྔ་དང་སྨན་ལྔ་རྣམས༔ གཙང་མའི་ཆུར་སྦྱར་ནང་དུ་བླུག༔ མགུལ་ཆིངས་རྒྱན་ཞིང་གཟུངས་ཐག་བཏགས༔ ཁྲོ་བོའི་སྔགས་སྦྱངས་ཁ་རྒྱན་བཅས༔ གཞན་ཡང་ཕྱི་ནང་གསང་མཆོད་དང་༔ སྨན་གཏོར་རཀྟ་བཟང་དུ་བཤམས༔ རྣལ་འབྱོར་བདེ་བའི་གདན་ལ་འདུག༔ སྐྱབས་འགྲོ་སེམས་བསྐྱེད་མཆོད་བྱིན་བརླབ༔ ཏིང་འཛིན་ལྷ་བསྐྱེད་མཆོད་ཅིང་བསྟོད༔ འཛབ་ཀྱིས་སྲོག་སྙིང་གནད་ནས་བསྐུལ༔ ཧཱུྃ་ཧྲཱི༔ ཆོས་དབྱིངས་ཡེ་ཤེས་སྐྱེ་འགག་མེད༔ གནས་ལུག་ངོ་བོ་མཚོན་བརྫོད་བྲལ༔ རང་བྱུང་ལྷན་སྐྱེས་ཐུགས་རྗེའི་དཔལ༔ སྐྱེ་མེད་དབྱིངས་ནས་བདེ་མཆོག་རྒྱལ༔ འགག་མེད་དབྱིངས་ནས་རིག་འཛིན་རྩལ༔ ཐུགས་རྗེ་འགྲོ་འདུལ་དཀྱིལ་འཁོར་ལྷ༔ ཡབ་ཡུམ་བདེ་རོལ་སྔགས་ཕྲེང་འོད༔ སྤྲོས་པས་ཕྱོགས་བཅུའི་རྒྱལ་བ་མཆོད༔ བསྡུས་པས་དངོས་གྲུབ་རང་ལ་ཐིམ༔ སྣང་སེམས་ངོ་བོ་ཆོས་དབྱིངས་སྟོང་༔ དུས་གསུམ་རྒྱལ་བའི་ཐུགས་མཆོག་ཆེ༔ རོ་གཅིག་ཆོས་སྐུ་དྲི་མ་མེད༔ རང་བྱུང་རིག་པ་རང་གི་སེམས༔ སྣ་ཚོགས་ཆོས་རྣམས་སྐུ་གསུང་ཐུགས༔ སྣོད་བཅུད་འཁོར་འདས་ཕྱམ་གཅིག་བརྡལ༔ ཡེ་ནས་རང་བྱུང་ཀུན་ཏུ་བཟང་༔ བསྒྲུབ་བྱ་སྒྲུབ་བྱེད་མཐའ་བྲལ་ཆེ༔ འདི་དོན་བླ་མེད་ལྷ་དང་མཇལ༔ ཚོགས་འཁོར་བསྐོར་ཞིང་གླུ་བྲོ་འཁྲབ༔ རྒྱུན་སྤྱོད་བསྔོ་སྨོན་རྒྱ་ཡིས་གདབ༔ ལས་བཞིའི་འཕྲིན་ལས་དོན་གཉིས་བསྒྲུབ༔ རིག་འཛིན་འདུས་པའི་རྩ་རྒྱུད་ལས༔ སྒྲུབ་ཐབས་བསྟན་པའི་ལེའུ་སྟེ་བཅུ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་པ༔ ཀྱེ་ཀྱེ་སྟོན་པ་རྡོ་རྗེ་འཆང་༔ རང་རིག་ཆོས་སྐུར་སྨིན་པའི་ཐབས༔ ཐབས་མང་དཀའ་བ་བྲལ་བ་ཡི༔ གྲོལ་ལམ་ཁྲིད་ཀྱི་བསྒོམ་ཐབས་གང་༔ དེ་ནས་སྟོན་པས་བཀའ་སྩལ་པ༔ སེམས་དཔའ་མཆོག་ཁྱོད་ལེགས་པར་ཉོན༔ ཚེ་གཅིག་གྲོལ་བའི་ཟབ་ལམ་ཆོས༔ བླ་མེད་རྫོགས་པའི་ས་འདོད་ན༔ ཚེ་འདིས་བྱ་བ་བློ་ཡིས་བཏང་༔ དབེན་པའི་རི་ལ་གཅིག་པུར་བསྡད༔ མཚན་དང་ལྡན་པའི་སློབ་དཔོན་ལ༔ སྣོད་དང་ལྡན་པའི་སློབ་མ་ཡིས༔ སྒོ་གསུམ་མཉེས་པའི་ཞབས་ཏོག་བསྒྲུབ༔ ལུས་ངག་ཡིད་གསུམ་བསྲང་དུ་གཅུན༔ སྐྱབས་སུ་འགྲོ་ཞིང་སེམས་ཀྱང་བསྐྱེད༔ ཕྱག་འཚལ་མཆོད་འབུལ་སྡིག་པ་བཤགས༔ ཡི་རང་བསྐུལ་ཞིང་གསོལ་བ་འདེབས༔ དགེ་བ་ཆོས་དབྱིངས་ཀློང་དུ་བསྔོ༔ ཡི་གེ་བརྒྱ་པས་སྒྲིབ་པ་སྦྱངས༔ ཆོས་དབྱིངས་མཎྜལ་རིག་པས་བརྒྱན༔ བླ་མ་ཆོས་སྐུ་དྲི་མེད་མཆོད༔ རང་ལུས་མཎྜལ་དབང་པོས་བརྒྱན༔ བླ་མ་ལོངས་སྐུ་བྱང་སེམས་མཆོད༔ རིན་ཆེན་མཎྜལ་གསེར་གཡུས་བརྒྱན༔ བླ་མ་སྤྲུལ་སྐུ་འགྲོ་འདུལ་མཆོད༔ རང་བྱུང་སེམས་ཀྱི་གནས་ལུགས་ལ༔ རང་ངོར་ཤེས་པར་གསོལ་བ་གདབ༔ འགྲོ་དྲུག་སྡུག་བསྔལ་རྒྱ་མཚོའི་གནས༔ མི་ལུས་ཆོས་ཀྱི་རྟེན་དུ་བཟང་༔ སྐྱེ་འཆིའི་འཇིགས་པ་མཐའ་ཡས་ཤིང་༔ ལས་ཀྱི་འབྲས་བུ་སྟོངས་མཐའ་མེད༔ བདེ་ལྡན་སྡུག་བྲལ་ཐར་པའི་གླིང་༔ དེ་དག་རྣམས་ནི་སྔོན་དུ་འགྲོ༔ ས་མ་ཡཱ༔ རྒྱ་རྒྱ་རྒྱ༔ དངོས་གཞི་ལུས་གནད་ལྡན་པའི་ངང་༔ དང་པོ་སེམས་འདི་བྱུང་ས་འཚོལ༔ མ་རྙེད་ཆོས་དབྱིངས་ངང་དུ་གློད༔ བར་དུ་སེམས་འདི་གནས་ས་འཚོལ༔ མ་རྙེད་རང་བྱུང་རྗེན་པར་བཞག༔ ཐ་མ་སེམས་འདི་འགྲོ་ས་གཞིག༔ སྣང་སེམས་འཁྲུལ་པའི་ཁང་བུ་བཤིག༔ ལུས་འདི་རིགས་དྲུག་རྟེན་ཡིན་པས༔ རིགས་དྲུག་ས་བོན་ཉིད་དུ་གནས༔ ཡི་གེ་གསུམ་གྱི་བཟླས་པ་བྱ༔ སྐུ་གསུང་ཐུགས་ཀྱི་མེ་སྦར་ནས༔ རིགས་དྲུག་ས་བོན་བསྲེག་པར་བྱ༔ རང་ལུས་རྡོ་རྗེའི་འདུག་སྟངས་བཅས༔ འབྲུ་གཅིག་རྒྱལ་བའི་ཐུགས་སྒྲུབ་བཟླས༔ མཉེན་བཙལ་ལམ་ཞུགས་དམིགས་པས་སྒྱུར༔ བར་ཆད་ཞི་དང་རང་ངོ་འཕྲོད༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྣོད་ལྡན་བུ་དེ་ལ༔ རིམ་པ་གསུམ་གྱི་ངོ་སྤྲོད་བྱ༔ དཔེ་ནི་ནམ་མཁའ་སྟོང་པ་སྟེ༔ རྒྱུ་མིན་རྒྱུ་ཡི་རྐྱེན་དང་བྲལ༔ རྐྱེན་མེད་རྐྱེན་གྱི་འབྱུང་ཁུངས་ཟད༔ སྟོང་པ་མ་ཡིན་ངོ་བོས་སྟོང་༔ གཟུགས་སོགས་སྐྱེ་མཆེད་ཡོད་མ་ཡིན༔ དོན་ནི་སྐུ་གསུམ་རང་ལ་ཆས་༔ ཀ་དག་ཆོས་སྐུ་སྐྱེ་མེད་ཆེ༔ གཞི་ལམ་འབྲས་གསུམ་རང་ལ་རྫོགས༔ འཁོར་འདས་ཀུན་འབྱུང་སྤྲུལ་པའི་སྐུ༔ རྟགས་ནི་དབང་པོའི་ཡུལ་ལ་རྫོགས༔ རྣམ་གྲོལ་མཆོག་སྟེ་རྫོགས་འཚང་རྒྱ༔ མ་རིག་འཁྲུལ་བ་རྒྱུ་དྲུག་གོ༔ ས་མ་ཡཱ༔ རྒྱ་རྒྱ་རྒྱ་༔ དེ་ལྟར་སྤྱོད་པའི་སྐལ་ལྡན་ཉིད༔ སྡུག་བསྔལ་མེད་ཅིང་རྣམ་པར་གྲོལ༔ ཁམས་གསུམ་ཀུན་ལས་རྣམ་པར་རྒྱལ༔ རང་བྱུང་སྲིད་ཞིའི་མགོན་པོ་སྟེ༔ རབ་འབྲིང་ཐ་མ་གསུམ་གྱིས་གྲོལ༔ སྐྱེ་མེད་མངོན་གྱུར་ཨེ་མ་ཧོ༔ རིག་འཛིན་འདུས་པའི་རྩ་རྒྱུད་ལས༔ གྲོལ་ལམ་ཁྲིད་ཀྱི་རིམ་པ་བསྟན་པའི་ལེའུ་སྟེ་བཅུ་གཅིག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་གསང་འཛིན་གྱིས༔ སྟོན་པ་ཉིད་ལ་ཡང་གསོལ་པ༔ ཀྱེ་ཀྱེ་ཐུགས་རྗེ་ཆེར་ལྡན་པ༔ འགྲོ་བའི་མགོན་པོ་བདེ་བའི་མཆོག༔ རྩ་རླུང་བསྒོམ་ན་ཇི་ལྟར་ལགས༔ འདུས་པའི་འཁོར་ལ་བསྟན་དུ་གསོལ༔ དེ་ནས་སྟོན་པས་བཀའ་སྩལ་པ༔ རྡོ་རྗེ་གསང་བའི་དབང་ལྡན་ཉོན༔ ལུས་ལ་རྩ་འཁོར་གྲངས་མེད་ཀྱང་༔ འཁོར་ལོ་ལྔ་དང་རྩ་གསུམ་སྟེ༔ འདོད་ཆགས་མོ་རླུང་གཡོན་ནས་རྒྱུ༔ ཞེ་སྡང་ཕོ་རླུང་གཡས་ནས་རྒྱུ༔ གཏི་མུག་རླུང་ནི་དབུས་ནས་རྒྱུ༔ དུག་གསུམ་རྒྱུ་དང་རྟེན་དུ་གནས༔ རྟོག་པས་ཁམས་གསུམ་རླུང་གིས་བསྐྱོད༔ འབྲས་བུ་ངན་སོང་འགྲོ་བ་དྲུག༔ དེ་གྲོལ་སྐུ་གསུམ་མངོན་དུ་འགྱུར༔ དུག་ལ་སྔགས་ཀྱིས་བཏབ་པ་བཞིན༔ ལམ་དུ་སྒྱུར་ཞིང་ཡེ་ཤེས་འཁྱེར༔ རྣལ་འབྱོར་བདེ་བའི་གདན་ལ་འདུག༔ ཕོ་དང་མོ་དང་མ་ནིང་གི༔ རླུང་རོ་ལན་དགུ་དག་གིས་འབུད༔ སྟེང་རླུང་མནན་ཅིང་འོག་རླུང་བསྡམས༔ བུམ་པའི་རང་བཞིན་བསྐྱེལ་ཞིང་ལྡི༔ མདའ་ལྟར་འཕང་ཞིང་དལ་བུས་འཐེན༔ ལྷུག་པར་བསྐྱིལ་ཞིང་བརྩོན་འགྲུས་བྱ༔ ཨ་ཐུང་མེ་ཡི་འཁོར་ལོ་འབར༔ རྩ་གསུམ་འཁོར་ལོ་ཀུན་ཏུ་ཁྱབ༔ ཧཾ་ཡིག་འོད་ཀྱི་བདུད་རྩི་དཀར༔ ཐིགས་པའི་རྣམ་པར་འཛག་པ་ལས༔ བདེ་སྟོང་ངོས་བཟུང་དབབ་ཅིང་ལྡོག༔ རྩ་འདུལ་ལུས་སྦྱོང་རྣམས་ལ་འབད༔ ཉོན་མོངས་ལས་རླུང་རང་སར་དག༔ ངྷུ་ཏིར་རླུང་ཚུད་མཁའ་སྤྱོད་འགྲུབ༔ རྩ་མདུད་གྲོལ་ཞིང་ཡེ་ཤེས་འཆར༔ ཆོས་རྣམས་མ་འདྲེས་སོ་སོར་མཁྱེན༔ རང་ལུས་འབྱོངས་ནས་གཞན་ལུས་བསྟེན༔ བཅུ་དྲུག་ཡིད་འོང་སྐེད་ཕྲ་མ༔ བདེ་བ་འབྱུང་བ་ཡུམ་གྱི་མཁའ༔ ལྟ་དང་འཁྱུད་དང་རིམ་གྱིས་སྤྱོད༔ དགའ་བཞིའི་དབབ་ལྡོག་འདྲེན་ཞིང་དགྲམ༔ བདེ་ཆེན་ཡེ་ཤེས་མངོན་གྱུར་ཚེ༔ འཇའ་ལུས་འགྲུབ་པར་ཐེ་ཚོམ་མེད༔ རིག་འཛིན་འདུས་པའི་རྩ་རྒྱུད་ལས༔ གཏུམ་མོའི་ལེའུ་སྟེ་བཅུ་གཉིས་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་ཡེ་ཤེས་ཀྱིས༔ སྟོན་པ་ཉིད་ལ་ཡང་གསོལ་པ༔ ཀྱེ་ཀྱེ་སྟོན་པ་བདེ་བའི་མཆོག༔ མཆོག་ཐུན་འགྲུབ་པའི་ལས་སྦྱོར་ཞིག༔ གྲོལ་བའི་མྱུར་ལམ་བླ་ན་མེད༔ འདུས་བའི་འཁོར་ལ་གསུང་དུ་གསོལ༔ དེ་ནས་སྟོན་པས་བཀའ་སྩལ་པ༔ ཉོན་ཅིག་རྡོ་རྗེ་གསང་བའི་རྒྱལ༔ འཁོར་འདས་ཆོས་རྣམས་ཀ་ནས་དག༔ ངོ་བོ་ཉིད་ནི་རང་སར་གྲོལ༔ བདུད་རྩི་ལྔ་ཡི་རང་བཞིན་ཏེ༔ རྩ་བ་བརྒྱད་ལ་ཡན་ལག་སྟོང་༔ ཕྱི་དང་ནང་དང་གསང་བར་ཕྱེ༔ ཙན་དན་སྦྲུལ་སྙིང་ཨ་རུ་ར༔ མཆོག་ཆེན་མི་སྟེ་རྣམ་པ་གསུམ༔ ཤ་ལྔ་བདུད་རྩི་རྣམ་པ་ལྔ༔ སྙིང་པོ་དྲི་དང་སྨན་གྱི་རིགས༔ སྲིད་པའི་བྱང་སེམས་དཀར་དམར་དང་༔ ཁ་མངར་སྐྱུར་རྩུབ་སྐྱོབ་ཏུ་སྦྱར༔ ཕྱེ་མར་བཏགས་ནས་ཐོད་པར་བསྒྲུབ༔ དཀྱིལ་འཁོར་དབུས་སུ་བཞག་པར་བྱ༔ གཏོར་ཚོགས་མཆོད་པའི་བྱེ་བྲག་བཤམས༔ སྐུ་གསུང་ཐུགས་ཀྱི་རྟེན་རྣམས་དགྲམ༔ རྒྱལ་པོ་བཞི་ལ་འཕྲིན་ལས་གཞོལ༔ བདུད་རྩི་གསང་བའི་སྲུང་མར་བསྐུལ༔ རིགས་ལྔ་ཡབ་ཡུམ་རྩ་བ་གསུམ༔ སྦྱར་བའི་བདུད་རྩིར་བྱིན་གྱིས་བརླབས༔ ཨཱོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋ༔ བུང་བ་ཚང་ཞུག་ལྟ་བུར་བཟླ༔ འཛབ་དང་གླུ་བྲོ་གར་གྱིས་མཆོད༔ ལོངས་སྤྱོད་སྣ་ཚོགས་ཚོགས་འཁོར་བསྐོར༔ བདུད་རྩི་གྲུབ་ནས་དངོས་གྲུབ་ཞུ༔ རང་གཞན་དོན་དུ་འགྲོ་དོན་སྤྱོད༔ མ་དག་འགྲོ་བ་སྡིག་ལྡན་དང་༔ ཐ་ན་དུད་འགྲོ་ཡིན་ཀྱང་རུང་༔ ཤིག་གི་སྙིང་ཙམ་ཁར་སོང་བ༔ ཚེ་དེས་གྲོལ་འགྱུར་ཐེ་ཚོམ་མེད༔ རིག་འཛིན་འདུས་པའི་རྩ་རྒྱུད་ལས༔ བདུད་རྩི་སྨན་གྱི་ལེའུ་སྟེ་བཅུ་གསུམ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་པ༔ མ་བསྒོམ་གྲོལ་བའི་གདམས་པ་ཞིག༔ འདུས་པའི་འཁོར་ལ་བཤད་དུ་གསོལ༔ དེ་ནས་སྟོན་པས་བཀའ་སྩལ་པ༔ ནུས་འབྱིན་གསང་བའི་རྒྱལ་པོ་ཉོན༔ མ་བསྒོམས་གྲོལ་བའི་ལམ་འདོད་ན༔ སྐྱབས་སེམས་ངང་ནས་གསོལ་བ་གདབ༔ འོད་ཀྱི་སྐུ་ལ་ཧིག་གི་སྒྲས༔ རང་སེམས་སྐྱེ་མེད་དབྱིངས་སུ་སྤར༔ ཡང་ཡང་སྦྱངས་པས་རྟགས་མྱུར་ཐོན༔ སྤྱི་བོ་སྐྲང་དང་ཆུ་སེར་བརྡོལ༔ ཟ་དང་གཡའ་རྣམས་འབྱོངས་པའི་ཚད༔ མི་དགེའི་ལས་ལ་སྤྱོད་པ་དང་༔ མཚམས་མེད་ལྔ་བྱས་འགྲོ་བ་ཡང་༔ གྲོལ་བར་འགྱུར་ལ་གདོན་མི་ཟ༔ སྒོ་དགུ་བཀག་པས་རྒྱུ་དྲུག་ཁེགས༔ འགྲོ་དྲུག་གནས་ལས་རྒྱངས་ཀྱིས་འཕགས༔ སྒོ་གཅིག་འོད་གསལ་རྫོགས་པ་ཆེ༔ མཆོག་གི་དངོས་གྲུབ་འཐོབ་པར་འགྱུར༔ སེམས་བསྐྱེད་ལྡན་པའི་རྣལ་འབྱོར་པས༔ འགྲོ་དྲུག་བག་ཆགས་ཕུང་བོ་ལ༔ རིག་པ་བཅུག་ཅིང་དབྱིངས་སུ་སྤར༔ དམིགས་མེད་ཆོས་དབྱིངས་ངང་དུ་ཀློད༔ རབ་འབྲིང་ཐ་མའི་ཞིང་དུ་འཕོ༔ རིག་འཛིནའདུས་པའི་རྩ་རྒྱུད་ལས༔ འཕོ་བའི་ལེའུ་སྟེ་བཅུ་བཞི་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོ་རྗེ་ཡིས༔ སྟོན་པ་ཉིད་ལ་ཡང་གསོལ་བ༔ ཀྱེ་ཀྱེ་བཅོམ་ལྡན་བདེ་བའི་མཆོག༔ འདི་ལྟར་ཟབ་པའི་རྒྱུད་རྒྱལ་འདི༔ བཅང་ཞིང་འབྲི་ཀློག་ཉན་བཤད་འདོན༔ ཕན་ཡོན་ལ་སོགས་གསུང་དུ་གསོལ༔ དེ་ནས་སྟོན་པས་བཀའ་སྩལ་པ༔ རྡོ་རྗེ་གསང་བའི་མཆོག་ཁྱོད་ཉོན༔ རྒྱུད་རྒྱལ་རིག་འཛིན་ཡོངས་འདུས་འདི༔ བསྟན་པ་གང་ལ་བབས་པ་ཡི༔ རིན་ཆེན་དེ་ཡིས་རིས་སུ་འབྲི༔ ཟ་མ་ཏོག་ཏུ་བཅང་བ་དང་༔ ཉན་དང་འཛིན་དང་ཁ་ཏོན་བྱེད༔ སྒོམ་དང་སྒྲུབ་པ་སུས་བྱེད་པ༔ ཕྱོགས་བཅུའི་ཞིང་གི་སངས་རྒྱས་མཆོག༔ འཁོར་འདས་ཀུན་གྱི་མཆོད་སྡོང་ཆེ༔ ཡུལ་ཕྱོགས་རྒྱལ་ཁམས་དགེ་ལེགས་ཤིས༔ གདོན་དང་འབྱུང་པོ་རིང་དུ་བྲོས༔ ནད་དང་ཉེ་བར་འཚེ་བ་ཞི༔ ཏིང་འཛིན་ལྡན་པའི་རྣལ་འབྱོར་པས༔ ཉི་ཟླ་ལྡོག་གྱུར་སྒྲ་དང་གཡོས༔ ཆོ་འཕྲུལ་གྱི་ནི་དུས་ཆེན་ལ༔ རྒྱུད་འདི་ཀླག་པའི་སྒྲ་ཐོས་པ༔ ཐ་ན་སྲིན་བུ་ཡིན་ཀྱང་གྲོལ༔ རིག་འཛིན་འདུས་པའི་རྩ་རྒྱུད་ལས༔ རྒྱུད་ཀྱི་ཀློག་ཐབས་དང་ཡོན་ཏན་བསྟན་པའི་ལེའུ་སྟེ་བཅོ་ལྔ་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ནུས་འབྱིན་རྡོར་སེམས་ཀྱིས༔ སྟོན་པ་ཉིད་ལ་ཡང་གསོལ་བ༔ ཀྱེ་ཀྱེ་སྟོན་པ་ཐུགས་རྗེའི་འོད༔ རིག་འཛིན་འདུས་པའི་རྒྱུད་མཆོག་འདི༔ བཀའ་ཡི་སྲུང་མ་གང་ལ་བཅོལ༔ དེ་ནས་སྟོན་པས་བཀའ་སྩལ་པ༔ གསང་བའི་རྡོ་རྗེ་ཁྱོད་ཉོན་ཅིག༔ དུར་ཁྲོད་བརྒྱད་ཀྱི་ཞིང་སྐྱོང་ཞིང་༔ གནས་ཡུལ་ཀུན་ཏུ་རྒྱུ་བ་ཡི༔ དཔའ་བོ་རིགས་བཞི་དཔའ་མོ་བཞིར༔ བཀའ་འདི་བཅོལ་ལ་གཉེར་དུ་གཏོད༔ རིག་འཛིན་འདུས་པ་རྩ་རྒྱུད་ལས༔ སྲུང་མར་གཏད་པའི་ལེའུ་སྟེ་བཅུ་དྲུག་པའོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་སྟོན་པས་བཀའ་སྩལ་པ༔ ཨེ་མ་ནུས་འབྱིན་རྡོ་རྗེ་སེམས༔ བཀའ་འདི་ཁྱོད་ཀྱིས་ཡོངས་སུ་སྡུས༔ སྤྲུལ་པའི་མཁའ་འགྲོའི་ཡི་གེར་ཐོབ༔ རབ་འཇིགས་དུར་ཁྲོད་བསིལ་བ་ཚལ༔ རང་བྱུང་མཆོད་རྟེན་ཆེན་པོ་ཡི༔ ཉི་མའི་འཁོར་ལོར་གཏེར་དུ་སྦོས༔ ལས་ཀྱི་དབང་མོར་སྲུངས་ཤིག་བཅོལ༔ རྩོད་ལྡན་ཤཱཀྱའི་བསྟན་པ་ལ༔ རྒྱལ་བའི་སྤྱི་གཟུགས་མཚོ་ལས་སྐྱེས༔ རྡོ་རྗེ་པདྨ་འབྱུང་ལ་གཏོད༔ བསྟན་དང་འགྲོ་བའི་དོན་བྱེད་འགྱུར༔ རིག་འཛིན་འདུས་པའི་རྩ་རྒྱུད་ལས༔ བཀའ་ཡོངས་སུ་གཏད་ཅིང་གཏེར་ལ་སྦས་པའི་ལེའུ་སྟེ་བཅུ་བདུན་པའོ༔ གཏེར་རྒྱ་༔ སྦས་རྒྱ་༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཨེ་མ་བདག་འདྲ་མཚོ་སྐྱེས་རྡོ་རྗེ་ངས༔ རབ་འཇིགས་དུར་ཁྲོད་བསིལ་བའི་ཚལ་དུ་་ནི༔ སྟོན་པ་རྡོ་རྗེ་སེམས་དཔས་ལུང་བསྟན་ཏེ༔ རིག་འཛིན་འདུས་པའི་རྒྱུད་ཀྱི་རྒྱལ་པོ་རྙེད༔ རྒྱ་གར་ཡུལ་གྱི་མཁས་་པ་བརྒྱད་ལ་ཕུལ༔ སྨོན་ལམ་དབང་གིས་བོད་ཀྱི་ཡུལ་དུ་འོང་༔ མངའ་བདག་སོགས་ཏེ་རྗེ་འབངས་ཉེར་ལྔ་ལ༔ མཆིམས་ཕུའི་རྫ་ལ་བཀའ་བརྒྱད་སྨིན་གྲོལ་བསྟན༔ བླ་མའི་མན་ངག་གོ་བདེ་འཁྱེར་སླ་བ༔ བཀའ་བརྒྱད་ཆོས་ཀྱི་སྨིན་གྲོལ་རྒྱ་མཚོ་ནས༔ སྙིང་པོའི་བཅུད་ཕྱུངས་རིག་འཛིན་འདུས་རྒྱུད་ལས༔ སྒྲུབ་ཐབས་བརྩམས་ཏེ་ཉམས་ལེན་ཆོས་ལ་བྱས་༔ མ་འོངས་དོན་དུ་གངས་རིའི་རྒྱལ་པོ་ལ༔ ཡི་གེར་བཏབ་ནས་རིན་ཆེན་གཏེར་དུ་སྦས༔ ཀླུ་དབང་སྐྱེ་མཐའ་ང་ཡི་ཐུགས་ཀྱི་སྲས༔ སྐལ་ལྡན་སྐྱེས་བུ་དེ་དང་འདི་འཕྲད་ཤོག༔ རྡོ་རྗེ་ལེགས་པར་བཀའ་འདི་བཅོལ་ལོ་སྲུངས༔ ལྷ་བཙན་འབར་བས་གཏེར་འདི་སྲུངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཤིང་མོ་ཡོས་ལོ་ཧོར་ཟླ་བཅུ་པའི་ཚེས་བཅོ་ལྔའི་ཐོ་རངས་ཁར་གངས་རིའི་རྒྱལ་པོ་ཏེ་སེའི་བདེ་ཆེན་གསང་བ་ཕུག་ནས་སྤྲང་བན་འགྲོ་འདུལ་གླིང་པས་གདན་དྲངས་ཤིང་ས་ཕོ་རྟ་ལོ་ཧོར་ཟླ་བཅུ་པར་ཤོག་སེར། ཞིང་མཁྱུད་གང་དཀྱུས་མཐོ་དོ་དང་སོར་བཞི་པ་ཞིག་ལས། བོད་ཡིག་ཏུ་ཕབ་པའོ། །སརྦ་མངྒ་ལཾ། །