པུ་ཏྲ་གསོ་ཐབས་ཡིད་བཞིན་ནོར་བུ།
ཟབ་ཆོས་པདྨ་དྲག་ཁྲོས་ལས༔ པུ་ཏྲ་གསོ་ཐབས་ཡིད་བཞིན་ནོར་བུ་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ དྲག་པོ་པདྨའི་རྣལ་འབྱོར་པས༔ གཞན་དོན་འགྲོ་ལ་སེམས་བསྐྱེད་ནས༔ སྲིའུ་གསོ་ན་འདི་ལྟར་བགྱིད༔ གནས་ཁང་ གཙང 
་མར་སྟེགས་བུའི་ཁར༔ དྲག་པོའི་འཕྲིན་ལས་གཏོར་མ་བཤམས༔ སྨན་རཀ་གྷ་ན་པཱུ་ཙ་བཤམས༔ རྣལ་འབྱོར་བདེ་བའི་གདན་ལ་འདུག༔ ཆུང་སྲིའི་ལིངྒ་བྲིས་ནས་ཀྱང་༔ ལྷ་དབྱེ་བྱ་ཞིང་བྲུབ་ཁུང་བཅུག༔ ལས་ཀྱི་གཞུང་བསྲང་བདེན་སྟོབས་བརྗོད༔ གནད་ནས་བསྐུལ་ཞིང་ཕོ་ཉ་སྤྲོ༔ ཟ་འདྲེ་དགུག་ཅིང་ལིངྒར་བསྟིམས༔ ཐུན་གྱིས་བརྡེག་ཅིང་བསྒྲལ་ལས་བྱ༔ བཟློག་པ་འདོན་ཅིང་ཟོར་སྣ་གཏད༔ སྐུད་པས་བསྡམས་ཤིང་ཟུར་གསུམ་བཀྱིགས༔ བྱི་ལའི་ཐོད་པའི་ནང་དུ་གཞུག༔ སླར་ཡང་ཧོཾ་ཁུང་ནང་དུ་བཞག༔ དྲག་པོའི་ཏིང་འཛིན་རྩེ་གཅིག་ངང་༔ བདེན་སྟོབས་འགུགས་བསྟིམ་དྲག་ཏུ་བྱ༔ རྩ་སྔགས་ཤམ་བུར་འདི་བཏགས་བཟླ༔ གནོད་བྱེད་ཆུང་སྲིའི་སྲོག་ལ་རྦད་ཡཱ༔ གནོད་བྱེད་ཆུང་སྲིའི་སྲོག་ལ་རྦུད་ཡཱ༔ བླ་སྲོག་དོན་སྙིང་དང་བཅས་པ་མཱ་ར་ཡ་ཛཿཛཿསོད་སོད༔ ཅི་མང་བཟླས་ཤིང་ཐུན་གྱིས་བྲབ༔ མཆོད་རྟེན་རྙིང་པའི་འོག་ཏུ་མནན༔ རོ་གཡམ་རྒྱ་གྲམ་བྲིས་པས་བཀབ༔ སྟེང་དུ་དྲག་པོའི་བྲོ་ཡང་བྱ༔ སྤྱང་ཀི་སྲེ་མོང་བྱི་ལ་སོད༔ ཆུང་སྲི་ཐུབ་པའི་རྟགས་ཡིན་ནོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་ཁྱེའུ་བཙས་མ་ཐག༔ གླ་རྩི་དོམ་མཁྲིས་གི་ཝང་དང་༔ གསེར་དང་བཟང་དྲུག་
གཙང ་མའི་ཁྲག༔ ཆོས་སྨན་དང་བཅས་བཅུ་གཉིས་སྦྱར༔ ཁྲིམས་དང་ལྡན་པའི་དགེ་སློང་ངམ༔ ནུས་ལྡན་དྲི་ཆུས་རིལ་བུ་བྱ༔ རྩ་སྔགས་ཤམ་བུར་འདི་གདགས་སྔགས༔ སུ་ནི་མི་ལི་སུ་ཏྲི་ཀཱ་ཡ་ཝཱཀྐ་ཙིཏྟ་ལ་སྲུངས་ཤིག་ཀུ་རུ་ཡེ་སྭཱ་ཧཱ༔ ཅི་མང་སྔགས་ནས་ཞག་རེ་བཞིན༔ རྐྱེན་ལས་མ་གྲོལ་བར་དུ་སྟེར༔ སྲུང་འཁོར་གདམས་ཤིང་སྔགས་གུལ་བདུག༔ བསྲུང་བའི་འཁོར་ལོ་རྒྱུན་དུ་བསྒོམ༔ སྐབས་སྐབས་ལྷ་བསྲུང་མཆོད་ཅིང་བསངས༔ ས་མ་ཡཱ༔ རྒྱ་རྒྱ་རྒྱ༔ འདི་ལྟར་ཟབ་པའི་གདམས་པ་འདི༔ མ་འོངས་དུས་ཀྱི་ཡང་མཐའ་ལ༔ མི་དགེ་རྒྱས་པས་ཆོས་བརྒྱུད་འཆད༔ གང་ཟག་ཁྱད་འཕགས་བརྒྱུད་པ་དཀོན༔ དེ་དུས་བསྟན་པའི་བཙས་འདིས་བྱེད༔ ཐུགས་ཀྱི་སྲས་དང་འཕྲད་པར་ཤོག༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ སཱུརྱ་ཀཱིརྟིས་ཟབ་བུ་ལུང་ནས་གདན་དྲངས་ཤིང་ཤོག་སེར་ལས་བོད་ཡིག་ཏུ་བསྒྱུར་བའོ། །མངྒ་ལཾ།། །།