བརྒྱད་པ་སློབ་པ་ཕྱིར་མི་ལྡོག་གི་མཚན་ཉིད་བཤད་པ།
བརྒྱད་པ་སློབ་པ་ཕྱིར་མི་ལྡོག་གི་མཚན་ཉིད་བཤད་པ་ལ།
སྤྱིར་བསྡུས་ཏེ་བསྟན་པ་དང༌། སོ་སོར་ཕྱེ་སྟེ་བཤད་པ་གཉིས་ལས། དང་པོ་ནི། མདོ་ལས། ཉི་ཁྲིའི་ལེའུ་སོ་དགུ་པར། དེ་བཞིན་ཉིད་ཇི་ལྟ་བ་བཞིན་དུ་ཞུགས་ནས་དོན་དང་ལྡན་པར་སྨྲ་ཞིང༌། ལེགས་བཤད་ཚོལ་བའི་རྣམ་པ་དང་ཚུལ་དང་མཚན་མ་དེ་དག་ལྡན་པའི་བྱང་ཆུབ་སེམས་དཔའ་ཕྱིར་མི་ལྡོག་པ་རིག་པར་བྱའོ། །ཞེས་པའི་དོན། རྩ་བར། ངེས་འབྱེད་ཡན་ལག་ནས་བཟུངས་ཏེ། མཐོང་དང་གོམས་པའི་ལམ་དག་ལ། །བྱང་ཆུབ་སེམས་དཔའ་གང་དག་གནས། །དེ་འདིར་ཕྱིར་མི་ལྡོག་པའི་ཚོགས། །ཞེས་སོ། །དེའི་དོན་མདོ་ལུགས་མ་ལས། ངེ༷ས་པར་འབྱེ༷ད་པའི་ཡ༷ན་ལ༷ག་སྦྱོར་ལམ་ན༷ས་ཐོག་མ་བཟུ༷ངས་ཏེ༷། མཐོ༷ང་བའི་ལམ་ད༷ང༌། སྒོ༷མ་པ་གོམས་པ་བྱེད་པ༷འི་ལ༷མ་ད༷ག་ལ༷་འཆད་འགྱུར་གྱི་རྟགས་འདི་དག་དང་ལྡན་པའི་བྱ༷ང་ཆུ༷བ་སེ༷མས་དཔ༷འ་ག༷ང་ད༷ག་གན༷ས་པ་དེ༷་དག་ནི་སྐབས་འདི༷ར་ཐེག་ཆེན་ལ་སློབ་པའི་ཕྱི༷ར་མི༷་ལྡོ༷ག་པ༷འི་ཚོ༷གས་དགེ་འདུན་དཀོན་མཆོག་ཡིན་ནོ། །ཞེས་གསུངས་སོ། ། དེ་དག་གི་དོན་འཆད་པ་ལ། སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ་མཚན་ཉིད། དབྱེ་བ། ས་མཚམས་དང་གསུམ། ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་ཐེག་ཆེན་པ་དེ། རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད། ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་བྱང་སེམས་དེ། སློབ་པ་རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད། ད་ཕྱིན་ཆད་ཐེག་དམན་དུ་མི་ལྟུང་བར་ངེས་པའི་སྐབས་འདིའི་རྟགས་ཐོབ་པའི་བྱང་སེམས་དེ། འདིར་དངོས་བསྟན་གྱི་སློབ་པ་རྫོགས་བྱང་ལས་ཕྱིར་མི་ལྡོག་པའི་དགེ་འདུན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སློབ་པ་རྫོགས་བྱང་ལས་ཕྱིར་མི་ལྡོག་པའི་ཚོགས་ཏེ་དགེ་འདུན་གྱི་མཚན་ཉིད། ད་ཕྱིན་ཆད་ཐེག་དམན་དུ་མི་ལྟུང་ངེས་པའི་རྟགས་ཐོབ་བའི་བྱང་སེམས་ཏེ་སྦྱོར་མཐོང་སྒོམ་གསུམ་པ་གསུམ་མོ། །ཞེས་གསུངས་པའི་ཕྱིར།དང་པོ་ཉིད་ནས་ཐེག་ཆེན་དུ་རིགས་ངེས་པའི་བྱང་སེམས་ཚོགས་ལམ་པ་དེ་རྫོགས་བྱང་ལས་ཕྱིར་མི་ལྡོག་པའི་དགེ་འདུན་ཡིན་ཅིང་སྐབས་འདིར་བསྟན་གྱི་ཕྱིར་མི་ལྡོག་པའི་རྟགས་མ་ཐོབ་པ་ཡིན་ཏེ། ཚིག་གསལ་ལས། ཐར་པའི་ཆ་དང་མཐུན་པའི་དགེ་བའི་རྩ་བ་འདི་ཡང་ཕྱིར་མི་ལྡོག་པ་བརྗོད་མོད་ཀྱང་རང་གི་རྟོགས་པ་དང་མཚམས་པར་གཞན་ཡིད་ཆེས་པར་བྱེད་པའི་ཡོན་ཏན་རྣམས་འདི་ལ་མེད་པས་ན་དེའི་ཕྱིར་དང་རང་ལ་དངོས་པོ་ངེས་ཀྱང་ངེས་པར་བྱེད་པའི་རྟགས་བཟུང་སླ་བ་ཡང་མེད་པའི་ཕྱིར། ཞེས་གསུངས་པའི་ཕྱིར། ཕྱིར་མི་ལྡོག་པའི་དགེ་འདུན་གྱི་གོ་དོན་ནི། མཐར་ཐུག་བླ་མེད་བྱང་ཆུབ་ཏུ་ངེས་པ་ཙམ་མ་ཡིན་པར་རྫོགས་བྱང་ཐོབ་བྱེད་ལས་ལམ་གཞན་གྱི་བར་མ་ཆད་པར་རྫོགས་བྱང་དུ་ངེས་པའི་དགེ་འདུན་དེ་ཡིན་ལ། དེ་སྒྲུབ་པར་བྱེད་པའི་རྟགས་ཕྱིར་མི་ལྡོག་པའི་རྟགས་ཞེས་བྱ་སྟེ། ཉ་ཊཱིཀ་ལས། ཡང་འདིར་མཐར་ཐུག་ཕྱིར་མི་ལྡོག་ཏུ་བསྒྲུབ་པ་ཙམ་མིན་གྱི་བར་མ་ཆད་པར་ལམ་དམན་པར་མི་འཇུག་པར་རྫོགས་བྱང་དུ་འགྲོ་བར་དཔོག་པའོ། །ཞེས་གསུངས་པའི་ཕྱིར་རོ། །ཐེག་ཆེན་རིགས་ངེས་དབང་པོ་རྣོ་རྟུལ་ཐམས་ཅད་ཐེག་ཆེན་ཚོགས་ལམ་མ་ཟད་ཐེག་ཆེན་ལམ་མ་ཞུགས་ནས་ཀྱང་རྫོགས་བྱང་ལས་ལྡོག་ནས་ཐེག་དམན་དུ་ཞུགས་པ་མི་སྲིད་ལ། གང་ཟག་གི་ཁྱད་པར་འགའ་ཞིག་རིགས་མ་ངེས་པ་ཡིན་ཀྱང་ཐབས་ཤེས་ཀྱི་རྟོགས་པ་བརྟན་པོ་ཐོབ་པས་ཐེག་ཆེན་ལས་ཉམས་པ་མི་སྲིད་པས་དེ་འདྲ་དག་ཚོགས་ལམ་ནས་ཕྱིར་མི་ལྡོག་པའི་དགེ་འདུན་ཡིན་ཀྱང༌། གཞན་དག་གིས་ཕྱིར་མི་ལྡོག་པ་ཡིན་པར་དཔོགས་ནུས་པའི་ལུས་ངག་ཡིད་གསུམ་གྱི་རྟགས་ཁྱད་པར་ཅན་འདྲེན་ནུས་པའི་ཐབས་ཤེས་བརྟན་པོ་ཆེས་ཁྱད་པར་བ་མ་ཐོབ་པས་སྐབས་འདིར་དངོས་བསྟན་གྱི་ཕྱིར་མི་ལྡོག་པའི་རྟགས་ཐོབ་པའི་དགེ་འདུན་དུ་མི་འཇོག་པར་འདྲའོ། ། དེས་ན་སེམས་བསྐྱེད་ཀྱི་སྔོན་ནས་སེམས་ཅན་ཐམས་ཅད་ལ་དམིགས་པའི་སྙིང་རྗེ་ཆེ་བ་དང༌། ཐེག་ཆེན་གྱི་ལམ་རྒྱ་ཆེ་བ་བསྐྱེད་པའི་བཟོད་པའི་བཟོད་པ་རྒྱ་ཆེ་བ་དང༌། ཐེག་ཆེན་གྱི་ལམ་རྒྱ་ཆེན་པོ་ལ་མོས་པ་དང༌། སྦྱིན་སོགས་དགེ་བ་རྒྱ་ཆེ་བ་དང་ལྡན་པ་རྣམས་ཡོད་ཀྱང་ཕྱིར་མི་ལྡོག་པའི་རྟགས་ཐོབ་པར་མི་འཇོག་སྟེ། དེས་ཐེག་ཆེན་གྱི་རིགས་སད་པར་དཔོགས་ཀྱི་རྫོགས་བྱང་ལས་མི་ལྡོག་པའི་དགེ་འདུན་མི་དཔོགས་པའི་ཕྱིར། སྟོང་ཉིད་ཀྱི་གཏམ་ཐོས་པས་མིག་ནས་མཆི་མ་འཁྲུགས་པ་དང་ལུས་ཀྱི་བ་སྤུ་གཡོ་བ་སོགས་ཀྱིས་སྟོང་ཉིད་རྟོགས་པའི་བག་ཆགས་སམ་རིགས་སད་པར་རྟོགས་ནུས་ཀྱི་རྫོགས་བྱང་ལས་མི་ལྡོག་པར་མི་རྟོགས་པ་དང༌། ཡང་འཁོར་བའི་ཉེས་དམིགས་དང་ཐར་བའི་ཕན་ཡོན་དང༌། གང་ཟག་གི་བདག་མེད་ཀྱི་གཏམ་ཐོས་པས་སྤུ་ཟིང་ཞེས་བྱེད་པ་དང་མཆི་མ་འཁྲུགས་པ་སོགས་ཀྱིས་ཀྱང་ཐར་བའི་བག་ཆགས་རྒྱུད་ལ་སྐྱེས་པ་ཙམ་རྟོགས་ཀྱི་རྫོགས་བྱང་ལས་ཕྱིར་མི་ལྡོག་པ་ཡིན་པར་མི་རྟོགས་པས་རྟགས་དེ་གསུམ་ཀྱང་ཕྱིར་མི་ལྡོག་པའི་རྟགས་མ་ཡིན་ཞེས་ཐུབ་བསྟན་དགེ་ལེགས་རྒྱ་མཚོས་གསུངས་ལ།སྐབས་འདིར་བསྟན་གྱི་ཕྱིར་མི་ལྡོག་པའི་རྟགས་ནི། ཐེག་ཆེན་གྱི་རིགས་སད་པ་ལ་སོགས་པ་རྟོགས་བྱེད་ཀྱི་ལུས་ངག་གི་རྣམ་རྟགས་འདྲེན་ནུས་པའི་ཐབས་ཤེས་ཙམ་ཡང་མ་ཡིན་གྱི་ཕྱིར་མི་ལྡོག་པའི་རྟགས་ཀྱི་གཙོ་བོའི་ཐབས་ཤེས་ནི། བསམ་པའི་སྒོ་ནས་རང་ཁོ་ནའི་དོན་དུ་ཐར་བ་དོན་གཉེར་གྱི་བསམ་པ་མངོན་གྱུར་སྐྱེ་བའི་གོ་སྐབས་བཅོམ་པ་དང༌། སྦྱོར་བའི་སྒོ་ནས་སྟོང་ཉིད་རྟོགས་པའི་ཡེ་ཤེས་སོགས་ཤེས་རབ་ཁྱད་པར་ཅན་དང་ཐབས་གཞན་དོན་ཁུར་ཁྱེར་གྱི་སྙིང་རྗེ་སྟེ་ཐབས་ཤེས་ཀྱི་རྟོགས་པ་བརྟན་པོ་ཆེས་ཁྱད་པར་བ། རང་ལས་རྟོགས་པ་དམན་པས་ཀྱང་རང་ཉིད་བླ་མེད་རྫོགས་བྱང་ལས་ཕྱིར་མི་ལྡོག་པའི་དགེ་འདུན་དུ་དཔོག་པར་བྱེད་ཐུབ་པ་ཅན་གྱི་ལུས་ངག་ཡིད་གསུམ་གྱི་རྣམ་འགྱུར་ཆེས་ཁྱད་པར་བ་འདྲེན་ནུས་པ་དེ་སྐབས་འདིར་དངོས་བསྟན་གྱི་ཕྱིར་མི་ལྡོག་པའི་རྟགས་ཡིན་ཏེ། དཔེར་ན་རྟགས་ཞེ་བཞིའི་ནང་གི་དྲོད་ཀྱི་རྟགས་དང་པོ་གཞན་དག་དང་མི་འདྲ་བའི་གཟུགས་སོགས་ལ་བདེན་ཞེན་ཅི་རིགས་པ་ལྡོག་པའི་ཤེས་རབ་ཁྱད་པར་ཅན་དང་ཐབས་སྙིང་རྗེ་ཁྱད་པར་ཅན་ཐོབ་པའི་སྟོབས་ཀྱིས་སྟོང་ཉིད་ཀྱི་གཏམ་ཐོས་པ་ན་ལུས་སྤུ་ཟིང་བྱེད་པ་སོགས་ལུས་ཀྱི་རྟགས་དང༌། དེ་ལ་བསྟོད་བསྔགས་བརྗོད་པ་ཆེས་ཁྱད་པར་བ་ལྟ་བུ་ངག་གི་རྟགས་དང༌།བདེན་མེད་ཉམས་སུ་ལེན་པ་དང་ཡིད་ལ་འཛིན་པ་ལ་དགའ་སྣང་ཆེ་བ་རྟགས་དེ་ལས་གཞན་དག་གིས་ཀྱང་ནང་གི་ཐབས་ཤེས་ཀྱི་རྟོགས་པ་གོ་ནུས་པ་ཅན་འདྲེན་ནུས་པ་སྟེ་དེ་ཡང་འཁོར་བའི་སྡུག་བསྔལ་ཡིད་ལ་ཤར་བ་ཙམ་གྱིས་མིག་ནས་མཆི་མ་འཁྲུགས་པ་སོགས་དྲངས་བ་ལྟ་བུ་ཡང་མ་ཡིན། སྟོང་ཉིད་རྟོགས་པ་ཙམ་དང་ཐབས་ཤེས་ཀྱི་རྟོགས་པ་ཡོད་པ་ཙམ་རྟོགས་བྱེད་ཀྱང་མ་ཡིན་པར་ནམ་ཡང་འགྱུར་ལྡོག་མེད་པའི་ཐབས་ཤེས་ཀྱི་རྟོགས་པ་བརྟན་པོ་ཡོད་པར་དཔོག་ནུས་ཀྱི་རྟགས་ཁྱད་པར་བ་ཡིན་པས་རང་ལས་དམའ་བའི་གང་ཟག་གིས་ཀྱང་ལུས་ངག་ཡིད་གསུམ་གྱི་རྟགས་ཁྱད་པར་ཅན་དེའི་སྒོ་ནས་རྫོགས་བྱང་ལས་མི་ལྡོག་པར་བྱེད་པའི་ཐབས་ཤེས་ཀྱི་རྟོགས་པ་བརྟན་པོ་ཡོད་པར་དཔོག་དེ་དཔོག་པ་ལས་རྫོགས་བྱང་ལས་ཕྱིར་མི་ལྡོག་པར་དཔོག་ནུས་པ་ལྟ་བུ་ནི་སྐབས་འདིར་ཕྱིར་མི་ལྡོག་གི་རྟགས་ཡིན་གྱི། དེ་ལྟར་དཔོག་ནུས་ཀྱི་ལུས་ངག་གི་རྣམ་འགྱུར་འདྲེན་མི་ནུས་པའི་ཐབས་ཤེས་བརྟན་པོ་མི་ལྡོག་པ་ཅན་ཡོད་ཀྱང་དེ་སྐབས་འདིའི་དངོས་བསྟན་གྱི་ཕྱིར་མི་ལྡོག་པའི་རྟགས་སུ་འཇོག་པ་མ་ཡིན་པའི་ཕྱིར། དེས་ན། སྟོང་ཉིད་ཀྱི་གཏམ་ཐོས་པས་མིག་ནས་མཆི་མ་འཁྲུགས་པ་སོགས་ལུས་ངག་གི་རྣམ་འགྱུར་ལའང་ནང་གི་ཀུན་སློང་གི་ཁྱད་པར་གྱིས་སྟོང་ཉིད་རྟོགས་པ་ཙམ་གོ་བྱེད་དང་མི་ལྡོག་པའི་སྟོང་ཉིད་རྟོགས་པའི་ཤེས་རབ་ཁྱད་པར་ཅན་ཡོད་པར་གོ་བྱེད་སོགས་མི་འདྲ་བ་མང་པོ་ཡོད་པར་ཤེས་དགོས་སོ། །དེ་ལྟར་གོ་བྱེད་ཀྱི་རྟགས་ལ་ཞེ་བཞི་ཡོད་ཅིང༌། དེ་རེ་རེ་ལའང་མདོ་ལས། རྣམ་པ་དང༌། རྟགས་དང༌། མཚན་མ་དང༌། གསུམ་རེ་གསུངས་པའི་རྟགས་ཞེ་བཞི་པོ་དེ་དག་གིས་དྲངས་པའི་ལུས་ཀྱི་རྣམ་འགྱུར་ནི་རྣམ་པ་དང༌། ངག་གི་རྣམ་འགྱུར་ནི་རྟགས་དང༌། ལམ་དེ་དག་ལེན་འཛིན་ལ་དགའ་བའི་ཡིད་དང་ཡིད་ཀྱིས་ཉམས་སུ་ལེན་པ་ནི་མཚན་མ་ཡིན་ནོ། །རྟགས་ཞེ་བཞིས་རྟགས་རྒྱུད་ལྡན་གྱི་གང་ཟག་དེ་ཕྱིར་མི་ལྡོག་པར་དཔོག་པ་ལ་འབྲས་རང་གི་རྟགས་གཉིས་ཀྱིས་དཔོག་པར་བྱེད་པ་འགྲེལ་ཆེན་ལས་གསུངས་པ་ནི། ནུས་པའི་མཐུ་ཡིས་འབྲས་སྐྱེ་བར། །ཞེས་སོགས་ལྟར།རང་རྒྱུད་ལྡན་གྱི་གང་ཟག་གིས་རང་རྒྱུད་ཀྱི་གཟུགས་སོགས་ལ་བདེན་ཞེན་ཅི་རིགས་པ་ཆེས་ཁྱད་པར་ཅན་དུ་ལྡོག་པའི་རྟགས་ལས་རང་ཉིད་ཕྱིར་མི་ལྡོག་པ་ཡིན་པར་དཔོག་པ་ལྟ་བུ་ནི་རང་བཞིན་གྱི་རྟགས་ཀྱིས་དཔོག་པ་ཡིན་ཏེ། དཔག་བྱེད་ཀྱི་རྟགས་བདེན་ཞེན་ཅི་རིགས་ལྡོག་པ་དེ་དང་དཔག་བྱ་ཕྱིར་མི་ལྡོག་པའི་གང་ཟག་གཉིས་རང་བཞིན་གཅིག་ཡིན་པའི་ཕྱིར། ཆོས་བཅུ་པའི་མདོ་ལས། དུ་བ་ལས་ནི་མེར་ཤེས་དང༌། ཞེས་སོགས་ལྟར། རྟགས་ཐོབ་པའི་གང་ཟག་གི་རྣམ་རྟགས་མཚན་མའི་རྟགས་ལས་གང་ཟག་གཞན་དག་གིས་གང་ཟག་དེ་ལ་ཐབས་ཤེས་ཀྱི་རྟོགས་པ་བརྟན་པོ་ཡོད་པར་དཔོག དེ་དཔོག་པས་ཕྱིར་མི་ལྡོག་པར་དཔོག་པ་ནི་འབྲས་རྟགས་ཀྱིས་དཔག་པ་སྟེ། ནང་གི་བདེན་ཞེན་ལྡོག་པའི་འབྲས་བུ་ཕྱིའི་ལུས་ངག་གི་རྟགས་ཀྱིས་དཔོག་པ་ཡིན་པའི་ཕྱིར་རོ། །ཕྱི་མ་འདི་ལ་རྣམ་རྟགས་མཚན་མའི་རྟགས་ཀྱིས་ཐབས་ཤེས་བརྟན་པོ་རྟོགས་པ་འབྲས་རྟགས་དང༌། ཐབས་ཤེས་བརྟན་པོའི་རྟགས་ཀྱིས་ཕྱིར་མི་ལྡོག་པར་རྟོགས་པ་རང་བཞིན་གྱི་རྟགས་སུ་སོ་སོར་དབྱེ་ཡང་རུང༌། གཞན་ཡང་རྒྱུད་གཞན་སྒྲུབ་པ་ལས། རང་ལུས་བློ་སྔོན་འགྲོ་བ་ཡི། ཞེས་སོགས་ལྟར་ཕྱིར་མི་ལྡོག་པའི་རྟགས་ཐོབ་པའི་གང་ཟག་གིས། རང་ལ་རྟགས་གང་ཐོབ་པ་དེ་དང་མཐུན་པའི་ལུས་ངག་གི་རྣམ་རྟགས་འབྱུང་བ་རང་གིས་མྱོང་བས་གྲུབ་ནས། རང་དང་མཐུན་པའི་ལུས་ངག་གི་རྣམ་རྟགས་ཡོད་པའི་གང་ཟག་གཞན་དེ། དེའི་རྣམ་རྟགས་ལས་ཕྱིར་མི་ལྡོག་པར་ངེས་པ་ཡང་འབྲས་རྟགས་ཀྱིས་དཔོག་པ་ཡིན་ནོ། །
གཉིས་པ་དབྱེ་ན།
སྤྱིར་རང་ཡིན་གྱི་ཐེག་ཆེན་ཚོགས་ལམ་པ་སོགས་ལམ་ལྔ་ལ་གནས་པ་ཡོད། རྩ་བར། ངེས་འབྱེད་ཡན་ལག་ནས་བཟུངས་ཏེ། །མཐོང་དང་གོམས་པའི་ལམ་དག་ལ། །ཞེས་སོགས་ཀྱིས་དངོས་བསྟན་གྱི་ཕྱིར་མི་ལྡོག་པའི་དགེ་འདུན་ལ་ངེས་འབྱེད་ཡན་ལག་དང་མཐོང་སྒོམ་གསུམ་ལ་གནས་པ་ཡོད་དོ། །ཕྱིར་མི་ལྡོག་པའི་རྟགས་ལ་ལུས་ངག་ཡིད་གསུམ་ཡོད། རང་དོན་གྱི་རྟགས་དང་གཞན་དོན་གྱི་རྟགས་གཉིས་ཡོད།ཡང་ན་འབྲས་རང་གཉིས་ཡོད་དོ། །སྦྱོར་བ་ནི། འབྲས་རང་གི་སྦྱོར་བ་གཉིས་ཡོད། བྱང་སེམས་སྦྱོར་ལམ་པ་ཆོས་ཅན། རང་ཉིད་ཕྱིར་མི་ལྡོག་པ་དེ། གཟུགས་སོགས་འདུ་ཤེས་ལྡོག་པའི་ཐབས་ཤེས་ཀྱི་རྒྱུན་བརྟན་པའི་རྟོགས་པ་ཁྱད་པར་ཅན་ལྡན་པའི་ཆོས་ཡིན་པའི་ཕྱིར་ཞེས་པ་རང་བཞིན་གྱི་རྟགས་སྦྱོར་ཡིན་ལ། ཆོས་ཅན་དང་ཆོས་སྔར་བཞིན་གཟུགས་སོགས་འདུ་ཤེས་ལྡོག་པའི་སྟོབས་ཀྱིས་ཁྱོད་ལ་ལུས་ངག་གི་རྟགས་མཚན་ཁྱད་པར་ཅན་ལྡན་པའི་ཕྱིར་ཞེས་པ་འབྲས་རྟགས་ཀྱི་སྦྱོར་བ་ཡིན་ནོ། །ཡང་ན་བྱང་སེམས་མཐོང་ལམ་རྗེས་ཐོབ་ཆོས་ཅན། རང་ཉིད་ཕྱིར་མི་ལྡོག་པ་ཡིན་ཏེ། སྐད་ཅིག་མ་གཅིག་ལ་ལུས་བརྒྱ་སྤྲུལ་བ་དང་ཆོས་བརྒྱ་སྟོན་ནུས་པའི་ལུས་ངག་གི་རྟགས་མཚན་ཁྱད་པར་ཅན་ཡིན་པའི་ཕྱིར་ཞེས་པ་ལྟ་བུའོ། །གཞན་ལ་རིགས་འདྲའོ། །སྦྱོར་བ་ཉ་ཊཱིཀ་ལས། བྱང་པ་དབང་རྣོན་ངེས་འབྱེད་ཆ་མཐུན་བཞི་ལ་གནས་པ་ཆོས་ཅན། རྫོགས་བྱང་ལས་ཕྱིར་མི་ལྡོག་པའི་སློབ་པའི་ཚོགས་ཏེ་དགེ་འདུན་ཡིན་ནོ། །གཟུགས་སོགས་ལ་བདེན་ཞེན་མངོན་གྱུར་ལྡོག་པ་ལ་སོགས་པ་ཉི་ཤུ་བོ་དེ་རྟོགས་པ་སྟེ་ཐོབ་པའི་སྒོ་ནས་གནས་པས་སོ། །མཐོང་བའི་ལམ་ལ་གནས་པ་དབང་འབྲིང་ནི་རྟགས་བཅུ་དྲུག་པོ་དེ་དང༌། སྒོམ་པའི་ལམ་འོག་ནས་འཆད་པར་འགྱུར་བ་དག་ས་ལ་གནས་པ་ནི་ཟབ་མོ་བརྒྱད་པོ་རྟོགས་པའི་ཚུལ་གྱིས་གནས་པས་སོ་ཞེས་སྦྱར་རོ། །ཞེས་གསུངས་སོ། ། གསུམ་པ་ས་མཚམས་ནི། ཐེག་ཆེན་ཚོགས་ལམ་ནས་སངས་རྒྱས་ཀྱི་སའི་བར་དུ་ཡོད། མངོན་རྟོགས་རྒྱན་གྱི་དངོས་བསྟན་གྱི་ཕྱིར་མི་ལྡོག་པའི་དགེ་འདུན་ཐེག་ཆེན་སྦྱོར་ལམ་ནས་རྒྱུན་མཐའི་བར་ནའོ། །
གཉིས་པ་མཐའ་རགས་ཙམ་དཔྱད་པ་ལ།
ས་བརྒྱད་པ་མ་ཐོབ་པར་དམན་ལམ་དུ་ལྟུང་བ་ཡོད་པར་ཐལ། རྒྱུད་རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་པར། །དེ་སྲིད་ཐེག་པ་དམན་པས་འཇིགས། །ཞེས་དང༌། ཉ་ཊཱིཀ་ལས། ས་བཅུ་བའི་ལུང་དེ་ས་བདུན་པའི་རྟོགས་པ་དང་ཡོན་ཏན་སྟོན་པའི་སྐབས་ཡིན་པས་དེའི་ཆེ་བ་བརྗོད་པ་དང་ས་བདུན་པ་ཐོབ་ནས་རེ་རེ་ཙམ་གནས་སྐབས་ཉན་རང་དུ་ལྟུང་བ་སྲིད་ཀྱི་ཕལ་ཆེར་མི་ལྟུང་ཞིང་དྲུག་པ་མན་དུ་ཉན་རང་དུ་གནས་སྐབས་ལྟུང་བ་མང་བོ་ཡོད་པས་དེ་དག་གིས་ཉན་རང་ཟིལ་གྱིས་གནོན་མི་ནུས། ཞེས་གསུངས་པའི་ཕྱིར་ན་མ་ཁྱབ་སྙམ་སྟེ། ལུང་དེ་དག་གིས་ས་བརྒྱད་པ་མ་ཐོབ་པར་རང་དོན་ལ་གཞོལ་བའི་རྐྱེན་ཙམ་ཉེ་བར་ཡོད་པ་སྲིད་ལ་ས་བརྒྱད་པ་ནས་དེ་མེད་པས་སོ། །གོང་དུ་འདོད་མི་ནུས་ཏེ། ཚོགས་ལམ་འབྲིང་ནས་གསེར་ལྟ་བུའི་སེམས་བསྐྱེད་ཐོབ་པའི་ཕྱིར། ཁྱབ་སྟེ། ཉ་ཊཱིཀ་ལས། ཕྱིན་དྲུག་རྫོགས་པར་བྱེད་པའམ་དྲུག་གིས་བསྡུས་པའི་ཕན་བདེའི་བསམ་པ་དང་ལྡན་པ་ནི། བཞུ་བརྟུལ་ཅི་བྱས་ཡང་རྫས་ཀྱི་ངོ་བོ་མི་འགྱུར་བ་གསེར་བཟང་པོ་ལྟ་བུ་སྟེ། རྫོགས་པའི་བྱང་ཆུབ་ཐོབ་ཀྱི་བར་དུ་སེམས་ཅན་ཐམས་ཅད་ལ་ཕན་བདེ་སྒྲུབ་པ་ལས་མི་འགྱུར་བའི་ཕྱིར་རོ། །མདོ་བྱང་ཆུབ་རྒྱས་བཤད་བཞིན་ནོ། །ཞེས་དང༌། རྒྱན་གྱི་ས་འགྲེལ་ལས། བསམ་པ་དང་མཚུངས་པར་ལྡན་པ་ནི། བསྲེག་གཅད་བརྡར་བ་ལ་སོགས་པས་མི་འགྱུར་བ་བཟང་པོའི་གསེར་དང་འདྲ་བ་སྟེ། སེམས་ཅན་ཐམས་ཅད་ལ་གཏན་དུ་ཕན་པ་དང་འཕྲལ་དུ་བདེ་བར་འདོད་པའི་བསམ་པ་བཟང་པོ་ནམ་ཡང་མི་འགྱུར་བའི་ཕྱིར་རོ། །ཞེས་གསུངས་པའི་ཕྱིར། དེ་ཡང་མི་རིགས་པར་ཐལ། དབང་རྟུལ་ས་བརྒྱད་མ་ཐོབ་པར་ཕྱིར་མི་ལྡོག་པའི་རྟགས་མི་ཐོབ་པའི་ཕྱིར། དེར་ཐལ། རྒྱུད་བླ་ས་འགྲེལ་ལས། དེ་ལ་རིགས་ཀྱི་ཁྱད་པར་ནི། དབང་པོ་རྣོན་པོ་སྦྱོར་ལམ་དང༌། འབྲིང་པོ་མཐོང་ལམ་དང༌། རྟུལ་པོ་སྒོམ་ལམ་ས་བརྒྱད་པ་ནས་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཐོབ་ཅིང་སངས་རྒྱས་སུ་རིགས་སུ་ངེས་ལ། དེ་དག་གི་སྔ་རོལ་དུ་ནི་མ་ངེས་པ་སྟེ། མཐར་ཕྱིན་པའི་བྱང་ཆུབ་ཏུ་འགྲོ་བ་ལ་རྐྱེན་གྱིས་མི་འཕྲོག་པ་དང་རེ་ཞིག་རྐྱེན་གྱིས་འཕྲོག་པ་ལ་གནས་པའོ། །ཞེས་དང༌། རྒྱན་གྱི་ས་འགྲེལ་ལས། ཡུམ་དང་དེའི་རྒྱན་ལས། དབང་པོ་རྣོན་པོས་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་རྟགས་ཐོབ་པར་གསུངས་པ་ལ་སོགས་པ་རྣམས་སོ། །ཞེས་དང༌། ཉི་སྣང་ལས། ཕྱིར་མི་ལྡོག་པར་བཀོལ་བ་ནི་དབང་པོ་རྣོན་པོའི་ལམ་ཁོ་ནས་དེ་ཐོབ་པའི་ཕྱིར། ཞེས་དང༌། ཟླ་ཟེར་ལས། དབང་པོ་འབྲིང་ནི་ས་རབ་ཏུ་དགའ་བ་ལས་ཏེ། ནས། དབང་པོ་རྟུལ་པོ་ནི་ས་མི་གཡོ་བ་ལས་ཏེ། །ཞཻས་གསུངས་པའི་ཕྱིར་ཟེར་ན་ དགོངས་པ་བཙལ་བར་བྱའོ། །ཐེག་ཆེན་མཐོང་ལམ་པ་དང་སྒོམ་ལམ་པ་དབང་རྟུལ་ཞིག་མེད་པར་ཐལ ། ས་དང་པོ་པ་ཡིན་ན་དབང་རྣོན་ཡིན་དགོས་པའི་ཕྱིར་ཏེ།དེ་ཡིན་ན་སྐད་ཅིག་མ་གཅིག་ལ་ཡོན་ཏན་བརྒྱ་ཕྲག་བཅུ་གཉིས་ཐོབ་པའི་ཕྱིར། ཁྱབ་སྟེ།དབང་པོ་རྣོ་རྟུལ་བློའི་འཇུག་པ་མྱུར་བུལ་གྱིས་བཞག་པའི་ཕྱིར། དེས་ན་ཉ་ཊཱིཀ་ལས། ས་ཐོབ་ནས་དབང་བོ་རྣོ་རྟུལ་མེད་ཅིང་ཕྱིར་མི་ལྡོག་ཏུ་ཀ་ཤིས་བཤད་ཅིང་དོན་ལ་གནས་ཞེས། བཅོམ་རལ་ལོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །སློབ་པ་ཕྱིར་མི་ལྡོག་གི་དགེ་འདུན་ཚོགས་སྦྱོར་ནས་འཇོག་མི་རིགས་པར་ཐལ། དེ་ལ་ཐེག་ཆེན་འཕགས་པ་དགོས་པའི་ཕྱིར། དེར་ཐལ། སངས་རྒྱས་མིན་པའི་དགེ་འདུན་དཀོན་མཆོག་གི་མཚན་ཉིད་ལ་ཉ་ཊཱིཀ་ལས། སངས་རྒྱས་མིན་པའི་དེའི་མཚན་ཉིད་ནི་རིག་གྲོལ་གྱི་ཡོན་ཏན་གྱི་འཕགས་པ་སློབ་པ་ཕྱིར་མི་ལྡོག་ཅེས་པའོ། །ཞེས་གསུངས་པའི་ཕྱིར་ཟེར་ན་དགེ་འདུན་དང་དགེ་འདུན་དཀོན་མཆོག་གི་ཁྱད་པར་བྱེད་པ་མི་འཐད་པར་ཐལ། ཐེག་ཆེན་ངེས་འབྱེད་ཆ་མཐུན་ལ་གནས་པ་ལ་དགེ་འདུན་དཀོན་མཆོག་ཡོད་པའི་ཕྱིར་ཏེ། མདོ་ལུགས་མ་ལས། ངེ༷ས་པར་འབྱེ༷ད་པའི་ཡ༷ན་ལ༷ག་སྦྱོར་ལམ་ན༷ས་ཐོག་མ་བཟུ༷ངས་ཏེ༷། མཐོ༷ང་བའི་ལམ་ད༷ང༌། སྒོ༷མ་པ་གོམས་པ་བྱེད་པ༷འི་ལ༷མ་ད༷ག་ལ༷་འཆད་འགྱུར་གྱི་རྟགས་འདི་དག་དང་ལྡན་པའི་བྱ༷ང་ཆུ༷བ་སེ༷མས་དཔ༷འ་ག༷ང་ད༷ག་གན༷ས་པ་དེ༷་དག་ནི་སྐབས་འདི༷ར་ཐེག་ཆེན་ལ་སློབ་པའི་ཕྱི༷ར་མི༷་ལྡོ༷ག་པ༷འི་ཚོ༷གས་དགེ་འདུན་དཀོན་མཆོག་ཡིན་ནོ། །ཞེས་གསུངས་པའི་ཕྱིར་རོ། །ས་མཚམས་ཚོགས་ལམ་ནས་བཤད་པ་མི་འཐད་པར་ཐལ། རྩ་བར། ངེས་འབྱེད་ཡན་ལག་ནས་བཟུང་སྟེ། །ཞེས་སོགས་གསུངས་པའི་ཕྱིར་ན་མ་ཁྱབ་པའོ། །ཡང་རྟོགས་པ་དང་ལུས་ངག་གི་མཚན་མ་གཉིས་ཀ་ལ་ཕྱིར་མི་ལྡོག་པའི་རྟགས་ཡོད་དེ། ཉ་ཊཱིཀ་ལས། འདི་ལ་ཁ་ཅིག གཞན་དཔེར་བྱས་ནས་རང་ལ་དཔོག་པ་དང༌། ཁ་ཅིག་གཞན་ཁོ་ན་ལ་དཔོག་པས་མཉམ་རྗེས་ཀྱི་རྟོགས་པ་རྟགས་སུ་མི་རུང་བས། ལུས་ངག་གི་ཐ་སྙད་ཁོ་ན་རྟགས་ཡིན་ནོ་ཞེས་པ་རྣམས་ནི་ནོར་བ་སྟེ་ངག་ལས་ཤེས་སོ། །ཞེས་པ་ལྟར་ཡིན་ནོ། །ཡང་ཉ་ཊཱིཀ་ལས། ངེས་པའི་དོན་ནི་འདི་ཡིན་ཏེ། དྲོད་ནས་བཟུང་སྟེ་ཇི་སྲིད་རང་ཉིད་གང་དུ་འཚང་རྒྱ་བར་རང་གི་མངོན་ཤེས་སམ་མངོན་སུམ་གྱིས་མི་ཤེས་པ་དེ་སྲིད་དུ་རང་ལའང་གློ་བུར་བའི་རྟགས་ཀྱིས་དཔོག་ཅིང༌། རང་རིག་གིས་གྲུབ་པའི་མཉམ་རྗེས་ཀྱི་རྟོགས་པ་རྟགས་སུ་འགྱུར་ཏེ། ཕྱོགས་ཆོས་རང་གི་རང་རིག་གིས་གྲུབ་ཅིང༌། ཁྱབ་པ་སངས་རྒྱས་ཀྱི་ལུང་གིས་གྲུབ་ནས་སོ། །ཡང་གཞན་སེམས་ཤེས་པའི་མངོན་ཤེས་མེད་པའི་སྐྱེས་བུ་འགས་ཕ་རོལ་བོ་ལ་འདིར་བཤད་མཉམ་བཞག་གམ་རྗེས་ཐོབ་ཀྱི་རྟོགས་པ་ལ་མི་འཁྲུལ་བའི་རྗེས་ཐོབ་ལུས་ངག་གི་རྣམ་རིག་ཁྱད་པར་ཅན་མཐོང་ནས་ཕྱིར་མི་ལྡོག་ཏུ་གཞན་དོན་གྱི་རྟགས་ཀྱིས་དཔོག་སྟེ། ཕྱོགས་ཆོས་གཞན་རིག་གིས་གྲུབ་ཅིང༌། ཁྱབ་པ་སངས་རྒྱས་ཀྱི་ལུང་གིས་ངེས་སོ། །རང་རྒྱུད་ལ་རྟགས་དེ་ལ་ཕྱིར་མི་ལྡོག་གིས་ཁྱབ་པར་ངེས་པའང་ཡོད་མོད་ཀྱི་དེ་ཡང་མཐར་ལུང་ལས་ངེས་པ་ལས་མ་འདས་སོ། །ཞེས་གསུངས་པ་ལྟར་ན་དེ་སྒྲུབ་ཀྱི་བསྒྲུབ་བྱ་ལས་ཁྱབ་པ་རྟོགས་དཀའ་བར་ཐལ། དེ་སྒྲུབ་ཀྱི་བསྒྲུབ་བྱ་དངོས་སྟོབས་རྗེས་དཔག་གི་ཡུལ་གང་ཞིག ཁྱབ་པ་ལུང་ལ་བརྟེན་ནས་རྟོགས་དགོས་པའི་ཕྱིར། དང་པོ་གྲུབ་སྟེ། དེ་སྒྲུབ་ཀྱི་རྟགས་དེ་དངོས་སྟོབས་ཀྱི་རྟགས་ཡང་དག་ཡིན་པའི་ཕྱིར། རྟགས་གཉིས་པ་གྲུབ་སྟེ། ལུང་ལ་བརྟེན་ནས་རྟོགས་དགོས་ན་ཤིན་ལྐོག་ཡིན་དགོས་པའི་ཕྱིར། ཇི་སྐད་དུ། རྗེས་དཔག་རང་གི་སྤྱོད་ཡུལ་ལ། །ལུང་ལ་ལྟོས་པ་མེད་པར་བཤད། །ཅེས་དང༌། གནས་གསུམ་པར་ནི་འཕོས་པ་ན། །ལུང་འདྲེན་པ་ནི་མཁས་པའི་ལུགས། །ཞེས་གསུངས་སོ། །