དྲི་བ་བརྒྱད་པ་ནི།རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་སྐབས་ནས་བསྟན་པའི་དགོས་སོགས་ཆོས་བཞིའམ་ལྔ་གང་ཡིན་ངོས་འཛིན།
དྲི་བ་བརྒྱད་པ་ནི།རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་སྐབས་ནས་བསྟན་པའི་དགོས་སོགས་ཆོས་བཞིའམ་ལྔ་གང་ཡིན་ངོས་འཛིན་དང༌།
དྲི་བ་བརྒྱད་པ་ནི།རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་སྐབས་ནས་བསྟན་པའི་དགོས་སོགས་ཆོས་བཞིའམ་ལྔ་གང་ཡིན་ངོས་འཛིན་དང༌།དེ་དག་སྔ་ཕྱི་རྒྱུ་འབྲས་ཀྱི་འབྲེལ་བ་དགོས་སམ་ཅི་ཞེས་པའི་ལན།
རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་སྐབས་ནས་བསྟན་པའི་དགོས་སོགས་ཆོས་བཞིའམ་ལྔ་གང་ཡིན་ངོས་འཛིན་དང༌། དེ་དག་སྔ་ཕྱི་རྒྱུ་འབྲས་ཀྱི་འབྲེལ་བ་དགོས་སམ་ཅི་ཞེས་པའོ། །དེའི་ལན་ནི། རྣམ་པ་ཐམས་ཅད་མཁྱེན་ཉིད་ལམ་ཞེས་སོགས་ཀྱིས་སྐབས་ནས་བསྟན་པའི་དགོས་སོགས་ལྔ་ཡོད་དེ།ཡུམ་གྱི་ཚིག་དོན་རྣམས་བརྗོད་བྱ་དང༌། བསྟན་བཅོས་མངོན་རྟོགས་རྒྱན་གྱི་སྐབས་བརྒྱད་རྗོད་བྱེད་དང༌། འབྲེལ་བ་དང༌། དགོས་པ་དང༌། དགོས་པའི་དགོས་པ་དང་ལྔ་ཡོད་དེ། མདོ་ལུགས་མ་༢༢ལས། འདི་ལ་བརྗོད་པར་བྱ་བ་དང༌། རྗོད་པར་བྱེད་པ་དང༌། འབྲེལ་བ་དང༌། དགོས་པ་དང། དགོས་པའི་དགོས་པ་སྟེ་རྣམ་པ་ལྔའོ། །དེས་ན་སེམས་བསྐྱེད་པ་ལ་སོགས་པའི་རིམ་པས་གསུང་བར་འགྱུར་བའི་དོན་དངོས་པོ་བརྒྱད་ཀྱི་ངོ་བོ་ཉིད་ཀྱིས་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་བརྗོད་པར་བྱ་བའོ། །འདི་སྟོན་པར་བྱེད་པའི་ལེའུའི་ཚོགས་ཀྱི་མདོ་རྣམས་ནི་རྗོད་པར་བྱེད་པའོ། །བརྗོད་བྱ་དང་རྗོད་བྱེད་འདི་དག་ཕན་ཚུན་བརྗོད་བྱ་རྗོད་བྱེད་ཀྱི་མཚན་ཉིད་ནི་འབྲེལ་པའོ། །དེ་ནས་ཆོས་སྤྱོད་བཅུའི་རིམ་པས་ལམ་ལ་འཇུག་ཅིང་སློབ་པ་ནི་དགོས་པའོ། །སྦྱོར་བ་བཞིའི་ངོ་བོ་ཤེར་ཕྱིན་ཟབ་མོའི་རྣལ་འབྱོར་རྣམ་པར་མི་རྟོག་པའི་ཡེ་ཤེས་ལ་བརྟེན་ནས་སྒྲིབ་པ་ཐམས་ཅད་དང་བྲལ་བའི་འབྲས་བུ་ཆོས་ཀྱི་སྐུ་ཐོབ་ཅིང༌། མཛད་པའི་འཕྲིན་ལས་དང་བཅས་པ་ལྷུན་གྱིས་གྲུབ་པ་ནི་དགོས་པའི་དགོས་པའོ། །ཞེས་དང༌། ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། བརྗོད་པར་བྱ་བ་དང༌། རྗོད་པར་བྱེད་པ་དང༌། འབྲེལ་བ་དང༌། དགོས་པ་དང༌། དགོས་པའི་དགོས་པ་སྟེ་ལྔར་གསུངས་པས་དངོས་པོ་ལ་གྲུབ་པའི་གྲངས་དང་གོ་རིམ་ངེས་པ་མེད་ཅིང༌། ཞེས་དང༌། འགྲེལ་ཆེན་དྲི་མེད་འོད་ལས། བཅོམ་ལྡན་འདས་དུས་ཀྱི་འཁོར་ལོ་ནི་འདིར་བརྗོད་པར་བྱ་བའོ། །འདི་སྟོན་པར་བྱེད་པའི་ལེའུའི་ཚོགས་རྒྱུད་ཀྱི་རྒྱལ་པོ་ནི་རྗོད་པར་བྱེད་པའོ། །ཞེས་དང༌། བརྗོད་བྱ་རྗོད་བྱེད་ཀྱི་འབྲེལ་བའོ། །ཞེས་སོགས་གསུངས་སོ། །དེ་ལ་འདུལ་བ་མཚོ་ཊཱིཀ་ལས། དགོས་འབྲེལ་ཡན་ལག་བཞིར་གྲངས་ངེས་སྟེ། ཞེས་པ་ནས། ལོག་རྟོག་ཙམ་ལས་གཞན་རྟོགས་ལྡན་བསྟན་བཅོས་ལ་འཇུག་པའི་གེགས་སུ་འགྱུར་ངེས་ཀྱི་ལོག་རྟོག་བཞིར་གྲངས་ངེས་པ་དེ་དག་སེལ་བ་ལ་དགོས་འབྲེལ་ཡན་ལག་བཞིར་གྲངས་ངེས་སོ། །ཞེས་དང༌། རྣམ་ངེས་ལས། བརྡ་ཇི་ལྟ་བ་བཞིན་དོན་དུ་རྟོགས་པའི་ཕྱིར་དང་སྒྲ་སྦྱོར་བའི་དགོས་པ་དེ་ཙམ་དུ་ཟད་པའི་ཕྱིར།ཞེས་གསུངས་པས་ཅུང་ཟད་དཔྱད་རྒྱུ་སྣང་ངོ༌། །གཞུང་དུ་མར་དགོས་སོགས་ཆོས་བཞི་གསུངས་ཏེ། ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། བསྟན་བཅོས་ལ་དགོས་འབྲེལ་བཞི་ཡོད་པར་རྟོགས་ཤིང༌།ཞེས་དང༌། ཉ་ཊཱིཀ་ལས། དེའི་བརྗོད་བྱ་གང་ན། བྱམས་པ་རང་གི་བསྟན་བཅོས་རྒྱལ་བའི་ཡུམ་མངོན་པར་རྟོགས་པའི་རིམ་པ་སྟོན་པ་ཐམས་ཅད་གྱི་མན་ངག་གི་ཚིག་ལེའུར་བྱས་པ་འདིའི་བརྗོད་པར་བྱ་བ། རྒྱལ་ཡུམ་མངོན་རྟོགས་ཀྱི་རིམ་པ་སྟོན་པ་ཐམས་ཅད་དེ་འོག་ཏུ་ཡུམ་རྣམ་པ་གསུམ་ཅར་ཞེས་སྨྲོས་པ་ནི་ཉེ་བར་མཚོན་པའི་དོན་ཙམ་མོ་ཞེས་ཆོས་བཤེས་ཏེ། འགྲེལ་བའི་སྐབས་སུ་ཡུམ་གྱི་དོན་ལ་བཤད་པས་མངོན་རྟོགས་སྟོན་པའི་རྒྱལ་ཡུམ་གསུམ་བརྗོད་བྱ་དང་བཅས་པ་འདིའི་བརྗོད་བྱ་དང༌། རྒྱན་ལ་བརྟེན་ནས་ཡུམ་དོན་ལེགས་པར་རམ་བདེ་བླག་ཏུ་རྟོགས་པ་དགོས་པ་དང༌། རྟོགས་པ་ལྟར་སྒྲུབས་པས་ས་དང་པོ་ནས་མི་གནས་པའི་མྱང་འདས་ཐོབ་པའི་བར་དགོས་པའི་ཡང་དགོས་པ་དང༌། རྗོད་བྱེད་བསྟན་བཅོས་རྒྱུ་དང་བརྗོད་བྱ་ཡུམ་དོན་རྟོགས་ཤིང་ཐོབ་པའི་དགོས་པ་གཉིས་འབྲས་བུར་འབྲེལ་བ་ནི་འདིའི་འབྲེལ་བ་སྟེ། ཞེས་གསུངས་སོ། །དེ་ལྟར་དགོས་སོགས་བཞི་བཤད་ལ་མདོ་ལུགས་མ་ལས། དེ་ལ་དེང་སང་ཡིག་ཆ་ཕལ་ཆེ་བ་རྣམས་སུ་དགོས་འབྲེལ་གྱི་ཆོས་བཞིར་གྲགས་ཤིང༌། འཆད་ལུགས་ཀྱང་ཅི་རིགས་པར་མཐོང་བའི་ཕྱིར། ཡིད་ཆེས་པའི་གནས་སུ་མི་འཛིན་ཏོ། །གཞུང་འདི་ནི་ས་བཅུ་པས་མཛད་པ་ཡིན་པའི་ཕྱིར། དགོས་འབྲེལ་ཡང་ས་བཅུ་པ་རྣམས་ཀྱི་རྗེས་སུ་འབྲང་སྟེ་བསྟན་པར་བྱ་དགོས་སོ། །ཞེས་པས་དཔྱད་པར་བྱ་དགོས་སོ། །བསྟན་བཅོས་ཀྱི་དགོས་སོགས་གསུངས་པའི་དགོས་པ་ནི། ཉ་ཊཱིཀ་༨༧ལས། དགོས་འབྲེལ་ངག་ལས་བསྟན་བཅོས་ཀྱི་ལུས་ལ་དགོས་སོགས་ཆོས་བཞི་ཡོད་པར་ངེས་པའམ་བསྟན་བཅོས་དགོས་པ་གཉིས་ཀྱི་རྒྱུར་ངེས་པ་སྟེ་དེ་ཡང་དབང་རྟུལ་གྱི་དབང་དུ་བྱས་ན་འཐད་དོ། །དེ་ལྟར་ན་བསྟན་བཅོས་རྩོམ་པའི་སྐབས་སམ་བྱ་བ་འགོག་པ་བཟློག་པ། གཞུང་བཀོད་པ་མཛེས་པ།དབང་རྣོན་ལ་དེ་འདྲའི་དོན་འགྱུར་བསྐྱེད་པ། དབང་རྟུལ་ལ་དེ་འདྲའི་ངེས་པ་སྐྱེས་པ།བསྟན་བཅོས་ལ་དགོས་མེད་ཀྱི་ལོག་རྟོག་བཟློག་པ། འབྲེལ་མེད་སོགས་ཀྱི་ལོག་རྟོག་བཟློག་པ། དུལ་ལྷས་སུམ་ཅུ་པའི་འགྲེལ་བཤད་དུ་བཤད་པ་ལྟར་ཉན་པ་པོ་སྤྲོ་བ་བསྐྱེད་པ་ཐམས་ཅད་དེའི་དགོས་པའམ་བྱ་བའི་འབྲས་བུ་ཡིན་ལ། དེ་ལས་རྟོགས་ལྡན་བསྟན་བཅོས་ལ་ཐོས་སོགས་ཀྱིས་འཇུག་པ་ཉིང་དགོས་སམ་བྱ་བའི་འབྲས་བུའི་འབྲས་བུ་ཡིན་ནོ། །ཞེས་དང༌། ས་བཟང་ཀུན་བཏུས་འགྲེལ་བ༢༡ལས། དབང་པོ་རྟུལ་པོས་ཡིད་ཆེས་པའི་ཚུལ་གྱིས་རྟོགས་ལ་རྣོན་པོས་དོན་འགྱུར་གྱི་ཐེ་ཚོམ་ཚུལ་གྱི་རྟོགས་པ་ལ་སོགས་པའི་དོན་དུའོ། །ཞེས་པ་ནས། དེ་ལ་ཚིག་ཙམ་གྱི་ལོག་རྟོག་ཟློག་པར་མི་རིགས་སོ་ཞེ་ན། སྐྱོན་མེད་དེ། འདི་ལས་ཚུལ་ གསུམ་པའི་རིགས་པ་བརྒྱུད 
་ནས་སྐྱེ་སྲིད་པའི་ཕྱིར་དང༌།དེ་དག་གི་ལོག་རྟོག་ནི་བརྗོད་བྱ་བདེན་ལྡན་དུ་སྟོན་པའི་ངག་གིས་ཀྱང་ཟློག་པར་ནུས་པའི་ཕྱིར། ཞེས་དང༌། འདུལ་བ་མཚོ་ཊཱིཀ་ལས། ངག་གི་ཐོས་བྱུང་ཤེས་རབ་ཀྱི་བློ་ཡུལ་དུ་ལོག་རྟོག་བསལ་ནུས་པས། ཞེས་པ་ནས། ཚད་མས་བསྡུས་པའི་བློ་ཡུལ་དུ་ལོག་རྟོག་བསལ་མི་ནུས་པས། དགོས་སོགས་ཆོས་བཞི་ཡོད་སྟོན་གྱི་ངག་ཆོས་ཅན། ངག་གི་དོན་ལ་ངེས་ཤེས་བསྐྱེད་མི་ནུས་པར་ཐལ། ངག་དང་དོན་ལ་འབྲེལ་བ་མེད་པའི་ཕྱིར་རོ་ཞེ་ན།ཚད་མས་བསྡུས་པའི་ངེས་ཤེས་བསྐྱེད་མི་ནུས་པར་ཐལ་ཟེར་རམ། ཐོས་བྱུང་གི་ངེས་ཤེས་བསྐྱེད་མི་ནུས་པར་ཐལ་ཟེར་དང་པོ་ལྟར་ན་འདོད་ཅིང་གཉིས་པ་ལྟར་ན་ཁྱབ་བ་མ་གྲུབ་བོ། །ཞེས་དང༌། ཆོས་མཆོག་གི་ཚད་མ་བརྟག་པ་ལས། གང་ཕྱིར་དོན་གཉེར་འཇིག་རྟེན་འདི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་སོགས་སོ། །དེ་དག་ལ་ཡང་རྣམ་འགྲེལ་ལས། བསྒྲུབ་པར་བྱ་བ་བརྗོད་པ་ཡིས། །
བརྒྱུད་པ་ཡིས་ཀྱང་ནུས་པ་མེད། །ཅེས་དང༌། ནང་གི་ཡན་ལག་ནུས་པ་ནི། །ཚུལ་གསུམ ་དག་ལ་ཡང་དག་གནས། །དེ་ལ་དྲན་པ་བསྐྱེད་པ་ནི། །དེ་ཉིད་ཚིག་ལ་ཡང་དག་གནས། །ཞེས་སོགས་ཀྱིས་དཔྱད་པར་བྱའོ། །སྐབས་འདིའི་འབྲེལ་བ་ཡང་བརྗོད་བྱ་རྗོད་བྱེད་ཀྱི་འབྲེལ་བ་དང་ཐབས་ཐབས་བྱུང་གི་རྒྱུ་འབྲས་ཀྱི་ཚུལ་དུ་འབྲེལ་བ་གཉིས་ཡོད་པར་སྣང་སྟེ། མདོ་ལུགས་མ་ལས། བརྗོད་བྱ་དང་རྗོད་བྱེད་འདི་དག་ཕན་ཚུན་བརྗོད་བྱ་རྗོད་བྱེད་ཀྱི་མཚན་ཉིད་ནི་འབྲེལ་པའོ། །ཞེས་དང༌། ཉ་ཊཱིཀ་ལས། རྗོད་བྱེད་བསྟན་བཅོས་རྒྱུ་དང་བརྗོད་བྱ་ཡུམ་དོན་རྟོགས་ཤིང་ཐོབ་པའི་དགོས་པ་གཉིས་འབྲས་བུར་འབྲེལ་བ་ནི་འདིའི་འབྲེལ་བ་སྟེ། དེ་འདྲའི་འབྲེལ་བ་དེ་ཆེད་དུ་མ་བྱས་ཀྱང་ཤུགས་ཉིད་ཀྱིས་རང་དབང་མེད་པར་འབྲེལ་བས་ན་ཁོང་ན་ཡོད་པ་སྟེ་དེས་ན་འབྲེལ་བས་ནི་ཐབས་ཡིན་པར་ཡིད་ཆེས་པར་བྱེད་པའོ་ཞེས་ཆོས་བཤེས་སོ། །ཆོས་བཤེས་ནི་རྗོད་བྱེད་དང་བརྗོད་བྱར་འབྲེལ་བ་ལའང་བཤད་པར་མངོན་ནོ། །ཞེས་དང༌། ཡང་ན་བསྟན་བཅོས་འདི་རྗོད་བྱེད། ཡུམ་གསུམ་བརྒྱད་དང་བཅས་པ་འདིའི་བརྗོད་བྱར་འབྲེལ་བ་ནི་འདིའི་འབྲེལ་བའོ། །ཞེས་དང༌། མངོན་པ་ཀུན་བཏུས་ས་འགྲེལ་ལས། བསྟན་བཅོས་ལ་འཇུག་པ་དགོས་སོགས་ཡོད་པར་རྟོགས་པ་ལས་བྱུང་ཞིང་དེའང་དགོས་འབྲེལ་གྱི་ངག་ལས་བྱུང་བ་ནི་འབྲེལ་བའོ། །ཞེས་གསུངས་སོ། །རྩ་བའི་དགོས་འབྲེལ་ངག་གིས་དགོས་སོགས་ཆོས་བཞི་བསྟན་ཚུལ་ཉ་ཊཱིཀ་ལས། དངོས་སུ་ཟིན་པའི་ཆོས་གསུམ་ཤུགས་ཀྱིས་འཕངས་པའི་ཆོས་གཅིག་གོ ། ཞེས་དང༌། ཨ་བྷ་ཡ་སྟེ། ཆོས་བཤེས་ལྟར་ན་བརྗོད་བྱ་དེའི་ཆེ་བ་ནི་བྱང་སེམས་ལས་གཞན་གྱིས་མྱོང་བ་སྟེ་ཁོང་དུ་ཆུད་པ་མ་ཡིན་པ་ཞིག་གོ་ཞེས་རྐང་བ་དང་པོ་གསུམ་གྱིས་བརྗོད་བྱ་བསྟན་ཏོ་ཞེས་ཏེ་འགྲེལ་བར་ཡང་དེ་སྐད་སྦྱར་རོ། །ཨ་བྷ་ཡ་ནི་དགོས་པ་ལ་ཕྱིར་སྦྱོར་བར་གསལ་ལོ། །གཉིས་པ་ནི། ཆོས་བཤེས་ཀྱིས་ཆོས་སྤྱོད་ནས་བློ་དང་ལྡན་པས་རྟོགས་འགྱུར་ཞེས་པའི་བར་རྐང་པ་གསུམ་གྱིས་ཉིང་དགོས་བསྟན། བདེ་བླག་ཏུ་ནི་རྟོགས་འགྱུར་བ་ནས་ཡིན་གྱིས་དགོས་པ་བསྟན། ཞེས་པ་ལྟར་གསུངས་ལ། དེ་ལྟར་གསུངས་པ་དང༌། མདོ་ལུགས་མ་ལས། ཆོས་སྤྱོད་བཅུའི་རིམ་པས་ལམ་ལ་འཇུག་ཅིང་སློབ་པ་ནི་དགོས་པའོ། །ཞེས་དང༌། ཚུལ་ཇི་ལྟར་ཞེ་ན། རྣམ་པ་ཐམས་ཅད་མཁྱེན་པ་ཉིད་ཀྱི་ལམ་སྟོན་པ་སངས་རྒྱས་ཀྱིས་ཤེར་ཕྱིན་གྱི་མདོ་འདི་ལས་བཤད་པའི་དོན་གང་ཡིན་པ་བྱང་ཆུབ་སེམས་དཔའ་ལས་གཞན་མཚན་མ་ལ་སྤྱོད་ཅིང་དམིགས་པའི་འདུ་ཤེས་ཅན་གྱིས་མྱོང་ཞིང་རྟོགས་པ་མ་ཡིན་པ་དེ་གང་ཡིན་ན། ཆོས་སྤྱོད་བཅུའི་བདག་ཉིད་ཀྱི་མདོའི་དོན་ཡིན་ལ། ཚིག་ལེའུར་བྱས་པ་འདི་ཐོས་པ་ལས་དཀའ་ཚེགས་ཆུང་ངུས་མདོའི་དོན་དེ་མི་བརྗེད་པའི་དྲན་པ་ལ་བཞག་ནས་བློ་དང་ལྡན་པ་བྱང་ཆུབ་སེམས་དཔས་མདོ་རྣམས་མཐོང་བ་ཙམ་གྱིས་མདོའི་དོན་རྟོགས་པར་འགྱུར་བའི་ཕྱིར། མདོའི་དོན་བདེ་བླག་ཏུ་ནི་རྟོགས་པ་ཞེས་བྱ་བ་གང་ཡིན་པ་དེ་ཚིག་ལེའུར་བྱས་པ་འདི་རྩོམ་པའི་དགོས་པ་ཡིན་པའི་ཕྱིར་དགོས་པ་མེད་པར་མི་འགྱུར་རོ། །ཞེས་གསུངས་པ་གཉིས་ཀྱི་ཚིག་ཟིན་ལ་དགོས་པ་འཇོག་ཚུལ་དང་བློ་དང་ལྡན་པས་མཐོང་ཞེས་པའི་མཐོང་ཚུལ་ལ་དཔྱད་དགོས་སོ། །མངོན་རྟོགས་རྒྱན་ལ་བརྟེན་ནས་ཐོབ་པའི་དགོས་པ་དང་མངོན་རྟོགས་རྒྱན་དུས་མཉམ་དུ་ཡོད་མེད་སོགས་ཀྱི་སྒོ་ནས་རྒྱུ་འབྲས་དུས་མཉམ་ཡོད་མེད་སོགས་དཔྱད་ན་ཡང་ཚིག་གི་སྒོ་ནས་དཔྱད་པའི་སྒོའོ། །