ཞིང་མཆོག་བདེ་བ་ཅན་དུ་སྐྱེ་བའི་རྒྱུ་བཞི་སྒྲུབ་ཚུལ་ཀྱི་ཆོ་ག་ལམ་བཟང་སྒྲོན་མེ།
ཞིང་མཆོག་བདེ་བ་ཅན་དུ་སྐྱེ་བའི་རྒྱུ་བཞི་སྒྲུབ་ཚུལ་ཀྱི་ཆོ་ག་ལམ་བཟང་སྒྲོན་མེ་ཞེས་བྱ་བ་བཞུགས་སོ། །
ན་མོ་གུ་རུ། ཞིང་མཆོག་བདེ་བ་ཅན་དུ་སྐྱེ་བའི་རྒྱུ་བཞི་སྒྲུབ་ཚུལ་ཀྱི་ཆོ་ག་བྱེད་པ་ལ། བདེ་བར་གཤེགས་པའི་སྣང་བརྙན་དང་འོད་མདོའི་གླེགས་བམ་སོགས་རྟེན་གསུམ་གྱི་མདུན། འབྱོར་བ་དང་བསྟུན་པའི་མཆོད་པ་གང་འབྱོར་བཤམས། སྐྱབས་འགྲོ་སེམས་བསྐྱེད་བསྒོམ་པ་ནི། དཀོན་མཆོག་གསུམ་ལ་སྐྱབས་སུ་མཆི། །འགྲོ་ཀུན་རྫོགས་པའི་བྱང་ཆུབ་ཐོབ་པ་དང༌། །ནུབ་ཕྱོགས་བདེ་ལྡན་ཞིང་དུ་སྐྱེ་བའི་ཕྱིར། །བདེ་ཆེན་ཞིང་གི་རྒྱུ་ཚོགས་སྒྲུབ་པར་བྱ། །སྲས་བཅས་རྒྱལ་བའི་ཐུགས་བསྐྱེད་བླ་མེད་དང༌། །དྲི་མེད་ཆོས་དབྱིངས་ཟབ་མོའི་བདེན་མཐུ་ཡིས། །ཕྱོགས་འདིར་ནམ་མཁའི་མཛོད་ཀྱི་དཔལ་ཡོན་ལྟར། །མཆོད་སྤྲིན་རྒྱ་མཚོས་གང་ཞིང་མཛེས་གྱུར་ཅིག །སྤྲིན་གཟུངས་ལན་གསུམ་བརྗོད། མ་བརྗོད་ཀྱང་ཆད་ལྷག་མེད་དོ། །ནུབ་ཕྱོགས་བདེ་ལྡན་དུ་སྐྱེ་བའི་འདུན་པ་དང་མོས་གུས་བྱས་ཏེ་ཞིང་ཁམས་ཀྱི་རྣམ་པ་ཡིད་ལ་བྱ་བ་ནི།ཨེ་མ་ཧོ། མི་མཇེད་འཇིག་རྟེན་འདི་ཡི་ནུབ་ཕྱོགས་སུ། །སངས་རྒྱས་ཞིང་མང་འདས་པའི་ཕ་རོལ་ན། །རྒྱལ་སྲས་སྨོན་ལམ་གངྒཱའི་རྡུལ་སྙེད་དང༌། །རྒྱ་ཆེན་བསོད་ནམས་ཡེ་ཤེས་ཕུང་བོ་ལས། །གྲུབ་པའི་ཞིང་མཆོག་ཕུལ་བྱུང་བདེ་བ་ཅན། །ལག་མཐིལ་ལྟར་མཉམ་ཐ་གྲུ་ཀུན་ནས་ཡང༌། །རིན་ཆེན་རི་བོ་ནོར་བུའི་ནགས་ཚལ་དང༌། །ལྷ་རྫས་མེ་ཏོག་ཚལ་དང་བདུད་རྩིའི་མཚོ། །དབྱངས་སྙན་སྤོས་ཆུས་ཆུ་ཀླུང་འབབ་པ་དང༌། །ནམ་མཁར་རྒྱུ་བའི་ཞལ་མེད་ཁང་བ་སོགས། །གཞན་འཕྲུལ་འཆི་མེད་དགའ་བའི་གྲོང་ཁྱེར་ལྟར། །ངོ་མཚར་བཀོད་པའི་ཁྱད་པར་འབྱམས་ཀླས་པའི། །སྙིང་པོ་བྱང་ཆུབ་ཤིང་གི་མཛེས་པའི་དྲུང༌། །རིན་ཆེན་རྨ་བྱ་པདྨས་བརྒྱན་པའི་སྟེང༌། །ས་གསུམ་ཆོས་ཀྱི་རྒྱལ་པོ་ཉག་གཅིག་པུ། །སྙན་གྲགས་ཆོས་ཀྱི་དབྱིངས་མཐར་ཁྱབ་པ་ཡི། །མགོན་པོ་འོད་ཟེར་དཔག་མེད་ཚེ་མཐའ་ཡས། །ལྟ་བས་མི་ངོམས་མཚན་དཔེའི་དཔལ་འབར་ཞིང༌། །རི་རབ་རྒྱ་མཚོ་ཆེ་ལས་ཐོན་པ་བཞིན། །རྣམ་མང་འཁོར་གྱི་ནང་ནས་མངོན་འཕགས་ཏེ། །བསོད་ནམས་ཉི་མ་བརྒྱ་བའི་གཟི་བརྗིད་ཀྱིས། །རབ་འབྱམས་ཞིང་གི་དཀྱིལ་འཁོར་འགེང་བཞིན་དུ། །དྲུག་ཅུ་རྩ་བཞིའི་ཡན་ལག་ཡོངས་རྫོགས་པ། །ཚངས་པའི་དབྱིངས་ཀྱི་ཡན་ལག་ཀུན་མནན་ནས། །སྤྱན་རས་གཟིགས་དང་མཐུ་ཆེན་ཐོབ་པ་སྟེ། །རྒྱལ་སྲས་འཁོར་གྱི་གཙོ་བོ་རྣམ་གཉིས་སོགས། །ཞིང་དེར་པདྨོའི་སྐྱེ་གནས་བཟུང་བ་དང༌། །སངས་རྒྱས་ཞིང་མང་དག་ནས་ལྷགས་པ་ཡི། །དག་པའི་འཁོར་ལ་གདམས་ངག་སྟོན་ཅིང་བཞུགས། །གཟུགས་སྐུ་བདེ་ཆེན་ཞིང་ནས་མི་གཡོ་བཞིན། །མཁྱེན་བརྩེ་རིས་མེད་གདུལ་བྱའི་རྗེས་ཞུགས་པའི། །རྒྱལ་དང་དེ་སྲས་སྤྱོད་ཡུལ་བསམ་མི་ཁྱབ། །དཔང་དུ་བགྱིས་ནས་གསོལ་འདེབས་བརྩེ་བས་དགོངས། །ཞེས་ཞིང་ཁམས་ཀྱི་རྣམ་པ་ཡིད་ལ་གསལ་བར་བྱས་ནས་མོས་གུས་སྒོམ། དེ་ནས་འོད་དཔག་མེད་མགོན་ཕྱག་འཚལ་མཆོད་པ་འབུལ། །སྡིག་ལྟུང་མཐོལ་བཤགས་རྗེས་སུ་ཡི་རིང་དང༌། །མྱ་ངན་མི་འདའ་ཆོས་འཁོར་བསྐོར་དུ་གསོལ། །རྣམ་དཀར་བདེ་ཆེན་ཞིང་མཆོག་སྐྱེ་ཕྱིར་བསྔོ། །ཞེས་ཡན་ལག་བདུན་པ་བརྗོད། འོད་དཔག་མེད་ཀྱི་མཚན་བརྗོད་པ་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཅི་ནུས་སུ་བཟླའོ། །ཨོཾ་ཨཱ་མི་དྷེ་ཝ་ཧྲཱིཿདེ་ཡང་སྐབས་འདིར་བཟླ་འདོད་ན་བྱའོ། །དེ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཉེ་བའི་སྲས་ཆེན་བརྒྱད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །ཞེས་པ་ཡང་ལན་བདུན་སོགས་ཅི་ནུས་བཟླའོ། ། མགོན་པོ་སྟོབས་བཅུ་མངའ་བ་སྲས་བཅས་ཀྱི། །མཚན་མཆོག་བརྗོད་དང་ཕྱག་འཚལ་མཆོད་པའི་མཐུས། །གང་ཞབས་དྲན་པས་བྱང ་ཆུབ་མཐའ་བར་དུ། །དབང་པོ་ཚང་ཞིང་རིགས་མཐོར་སྐྱེ་བ་དང༌། །བུད་མེད་མི་འགྱུར་འཇིག་རྟེན་ཀུན་གྱིས་བཀུར། །འཆི་ཚེ་བདེ་གཤེགས་འཁོར་བཅས་མདུན་བཞུགས་ཤིང༌། །སྐྱེ་བ་ཀུན་ཏུ་ཚངས་སྤྱོད་དངོས་པོ་ཐོབ། །རྟག་པར་བྱང་ཆུབ་སྤྱོད་ལ་དགའ་བ་དང༌། །གཟུངས་དང་ཏིང་འཛིན་བཟོད་ལ་ཡང་དག་སྦྱོར། །ཕྱིར་མི་ལྡོག་པའི་ས་བོན་འཇོག་པ་སོགས། །མདོར་ན་རྒྱལ་སྲས་ཆོས་ཀྱི་འབྱུང་གནས་ཀྱིས། །བཅོམ་ལྡན་འཇིག་རྟེན་དབང་ཕྱུག་རྒྱལ་བོའི་དྲུང༌། །ཞལ་བཞེས་སྨོན་ལམ་མངོན་དུ་གྱུར་བར་སྨོན། །ཤུགས་དྲག་བཅོས་མ་མིན་པའི་ཐར་འདོད་དང༌། །གཞན་ཕན་སྙིང་རྗེས་དྲངས་བའི་སེམས་བསྐྱེད་དང༌། །འཁྲུལ་མེད་ངེས་དོན་རྟོགས་པའི་ལྟ་བ་སོགས། །ཐེག་ཆེན་ལམ་གནད་རྫོགས་པར་རྙེད་པ་དང༌། །ཚེ་འཕོས་བདེ་ལྡན་ཞིང་དུ་སྐྱེ་བ་སོགས། །ཇི་ལྟར་སྨོན་པའི་རེ་འབྲས་ཡིད་བཞིན་དུ། །གེགས་མེད་འཕྲལ་དུ་ཐོབ་པར་བྱིན་གྱིས་རློབས། །དེ་ནས། འདི་ནི་ནུབ་ཀྱི་ཕྱོགས་རོལ་ན། །འོད་དཔག་མེད་པའི། ཞེས་སོགས་བསྔོ་བ་སྨོན་ལམ་བྱའོ། །ཞེས་ཞིང་མཆོག་བདེ་བ་ཅན་དུ་སྐྱེ་བའི་རྒྱུ་བཞི་སྒྲུབ་ཚུལ་ཀྱི་ཆོ་ག་ལམ་བཟང་སྒྲོན་མེ་འདི་ནི་རྒྱལ་རོང་ཞིང་སྒྲུབ་ཆེན་མོའི་ངག་འདོན་གྱི་ཆེད་དུ་མཁན་དབང་རྒྱལ་དང་མཁན་རབ་གསལ་གཉིས་ཀྱིས་བསྐུལ་ངོར་ངག་དབང་དངོས་གྲུབ་དཔལ་གྱིས་སྦྱར་བའོ། །དགེའོ། །སརྦ་མངྒ་ལཾ།། །།འོད་དཔག་མེད་ཀྱི་སྒོམ་བཟླས་བཞུགས་སོ།།སྐྱབས་སེམས་སྔོན་དུ་བཏང་ནས།རང་གི་སྤྱི་བོར་པདྨ་ལ་བའི་སྟེང༌། །སྐྱབས་གནས་ཀུན་འདུས་རྩ་བའི་བླ་མ་དང༌། །དབྱེར་མེད་བཅོམ་ལྡན་རྒྱལ་བ་འོད་དཔག་མེད། །བདག་གི་མགོན་དང་སྐྱབས་སུ་བཞུགས་པར་ཞུ། །ཕྱག་འཚལ་མཆོད་འབུལ་སྡིག་ལྟུང་ཉེས་ཀུན་བཤགས། །རྟག་པར་བཞུགས་གསོལ་དགེ་ཚོགས་བྱང་ཆེན་བསྔོ། །གསང་གསུམ་མཎྜལ་བཀོད་ལ་འབུལ་གྱིས་བཞེས། །ཞིང་མཆོག་བདེ་བ་ཅན་དུ་ཁྲིད་དུ་གསོལ། །རང་གཞན་དོན་དུ་རྫོགས་སངས་མྱུར་ཐོབ་ཤོག །འོད་མཚན་ཅི་མང་བཟླ། རང་སེམས་ཐིག་ལེ་བླ་མའི་ཐུགས་ཀར་བསྲེས། །ཐུགས་ཀར་ཟླ་སྟེང་ཧྲཱི༔ཡིག་དམར་པོའི་མཐར། །སྔགས་ཕྲེང་འོད་ཀྱིས་འགྲོ་ཀུན་སྡིག་སྒྲིབ་སྦྱངས། །འོད་དཔག་མེད་པའི་གོ་འཕང་ཐོབ་པར་ཤོག།ཨོཾ་ཨཱ་མི་དྷེ་ཝ་ཧྲཱི༔ཅེས་ཉིན་རེ་བཞིན་ཚར་རེ་མ་ཆག་ན་ཤི་འཕོས་མ་ཐག་ཏུ་བདེ་བ་ཅན་དུ་སྐྱེ་བར་འགྱུར་བ་དཀོན་མཆོག་བརྩེགས་པའི་མདོ་ན་གསུངས་སོ། །སརྦ་མངྒ་ལཾ།།