གཉིས་པ་དགེ་བསྙེན་གྱི་དབྱེ་བ།

གཉིས་པ་དགེ་བསྙེན་གྱི་དབྱེ་བ་ནི།

མཚོ་ཊཱིཀ་ལས། དགེ་བསྙེན་གྱི་དབྱེ་བ་ནི། ཉན་ཐོས་ཀྱི་གཞུང་ནས་བཤད་ཚོད་ཀྱི་དགེ་བསྙེན་བདུན་ཡོད་པ་ལས་མིང་ཆེན་གྱི་མདོ་དང༌། མཛོད་འགྲེལ་ལས་ལྔ་གསུངས་ཏེ། སྐྱབས་གསུམ་འཛིན་པའི་དགེ་བསྙེན་དང༌། སྣ་གཅིག་སྤྱོད་པའི་དང༌། ཕྱོགས་གཅིག་སྤྱོད་པའི་དང༌། ཕལ་ཆེར་སྤྱོད་པ་དང༌། ཡོངས་སུ་རྫོགས་པར་སྤྱོད་པའི་དགེ་བསྙེན། ཞེས་གསུངས་པ་དང༌། ཚངས་པར་སྤྱོད་པའི་དགེ་བསྙེན་དང༌། གོ་མིའི་དགེ་བསྙེན་དང་བདུན་ནོ། །དེ་ལ་སྐྱབས་གསུམ་འཛིན་པའི་དགེ་བསྙེན་ནི། སྡོམ་པ་མ་བླངས་ཀྱང་གསུམ་ལ་སྐྱབས་སུ་འགྲོ་བ་ལ་གནས་པའོ། །༼མིང་ཆེན་འདི་ལྟར་ཁྱིམ་པ་ཞིག་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་འགྲོ་ཞིང་བདག་དགེ་བསྙེན་དུ་བཟུང་དུ་གསོལ་ཞེས་ཚིག་ཏུའང་སྨྲས་ན་འདི་ཙམ་གྱིས་དགེ་བསྙེན་དུ་འགྱུར་རོ། །ཞེས་མིང་ཆེན་གྱི་མདོར་གསུངས་པ་མཛོད་འགྲེལ་དུ་དྲངས་སོ། །༽འདིར་མཛོད་འགྲེལ་ལས། སྐྱབས་སུ་འགྲོ་བ་ཁོ་ནས་དགེ་བསྙེན་དུ་འགྱུར་རམ་ཞེ་ན། ཉི་འོག་པ་རྣམས་ན་རེ་སྡོམ་པ་མེད་ཀྱང་སྐྱབས་གསུམ་འཛིན་པའི་དགེ་བསྙེན་དུ་འགྱུར་རོ་ཞེས་ཟེར་རོ། །ཁ་ཆེ་བ་རྣམས་ན་རེ་སྡོམ་པ་མེད་པར་མི་འགྱུར་རོ་ཞེས་ཟེར་རོ་ཞེའོ། །༼ དེ་ལྟར་ན་སྐྱབས་སུ་འགྲོ་བ་ལ་གནས་པ་ཡང་སངས་རྒྱས་ཀྱི་འཁོར་རྣམ་པ་བཞི་ལ་མ་གཏོགས་པར་ཐལ་བར་འགྱུར་རོ་ཞེ་ན་དཔྱད་དགོས་སོ། །༽ སྣ་གཅིག་སྤྱོད་པའི་དགེ་བསྙེན་ནི་ཉེས་པའི་རྩ་བ་བཞི་པོ་ལས་གང་ཡང་རུང་བ་གཅིག་བསྲུང་བའོ། །ཕྱོགས་གཅིག་སྤྱོད་པའི་དགེ་བསྙེན་ནི་ཉེས་པའི་རྩ་བ་བཞི་ཆང་དང་ལྔ་ལས་གང་ཡང་རུང་བ་གཉིས་བསྲུང་བའོ། །ཕལ་ཆེར་སྤྱོད་པའི་དགེ་བསྙེན་ནི་ལྔ་པོ་དེ་དག་ལས་གང་ཡང་རུང་བ་གསུམ་མམ་བཞི་བསྲུང་བའོ། ། ༼མཛོད་ཊཱིཀ་རྒྱལ་སྲས་མ་ལས་གཉིས་སྤངས་པ་ནི་ཕྱོགས་གཅིག་སྤྱོད་པ་ཡིན་ནོ།།༽སྣ་གཅིག་སྤྱོད་པ་ལ་སོགས་པ་གསུམ་པོ་དེ་དག་ནི་༼གསུམ་མམ་བཞི་སྤངས་པ་ནི་ཕལ་ཆེར་སྤྱོད་པ་ཡིན་ནོ་ཞེས་བཤད་དོ། །མཛོད་ཊཱིཀ་གང་སྤེལ་ལས་ཕྱོགས་གཅིག་སྤྱོད་པ་ནི་གཉིས་སམ་གསུམ་བསྲུང་བའོ། །ཕལ་ཆེར་སྤྱོད་པ་ནི་བཞི་བསྲུང་བའོ་ཞེས་བཤད་ཀྱང་སྔ་མ་ལྟར་གཟུང་སྟེ་ལྔ་དགོས་པ་ལ་གསུམ་ཚང་ན་ཕལ་ཆེར་ཚང་བ་ཡིན་པའི་ཕྱིར་རོ། །༽བྱེ་བྲག་སྨྲ་བ་ལྟར་ན། དང་པོ་ཡོངས་རྫོགས་ཀྱི་དགེ་བསྙེན་གྱི་སྡོམ་པ་བླངས་ནས་བར་དུ་ཉམས་ཏེ་སྣ་གཅིག་བསྲུང་བའམ་ཕལ་ཆེར་བསྲུང་བ་ཡིན་གྱི་ལེན་པའི་ཚེ་ཉིད་ན་སྣ་གཅིག་བསྲུང་བ་ལ་སོགས་པ་བླངས་ན་ཡན་ལག་ངེས་པའི་ཕྱིར་སྡོམ་པ་མི་སྐྱེ་སྟེ། བར་མའི་དགེ་བ་ཙམ་དུ་འདོད་དོ། །མདོ་སྡེ་པ་ལྟར་ན་ཡན་ལག་ངེས་པ་ལ་ཡང་སྡོམ་པ་སྐྱེ་བར་འདོད་ཅིང༌། ལེན་པའི་ཚེ་ཉིད་ནས་སྣ་གཅིག་བསྲུང་བ་ལ་སོགས་པ་བླངས་པས་སྣ་གཅིག་བསྲུང་བའམ་ཕལ་ཆེར་བསྲུང་བའི་སྡོམ་པ་ཐོབ་པར་འདོད་དོ། །༼མདོ་སྡེ་པ།༽ དེ་དང་མཐུན་པར་༼སེམས་ཙམ་པའི་ལུགས་ཀྱིས་ཀྱང༌།༽ འཕགས་པ་ཐོགས་མེད་ཀྱི་རྣམ་པར་གཏན་ལ་དབབ་པ་བསྡུ་བ་ལས། ༼སྲོག་གཅོད་པ་ཕྱོགས་གཅིག་སྤོང་བ་དང༌། ཕལ་ཆེར་སྤོང་བ་དང༌། ཐམས་ཅད་སྤོང་བ་དང༌། ཉིན་མཚན་དང་ཟླ་བའམ་ལོ་གཅིག་སྲོག་གཅོད་སྤོང་བ་ལ་སོགས་པ།༽དགེ་བསྙེན་གྱི་སྡོམ་པ་བརྒྱ་ཐམ་པ་གསུངས་ཏེ། དེ་ཡང་སྣ་གཅིག་སྤྱོད་པ་ལ་སོགས་པ་རྣམས་ཀྱི་བྱེ་བྲག་གི་དབྱེ་བ་ལ་སོགས་པ་ཡིན་ནོ། །ཡོངས་སུ་རྫོགས་པའི་དགེ་བསྙེན་ནི་དགེ་བསྙེན་གྱི་བསླབ་པ་ལྔ་ཆར་ཚང་བས་ཡོངས་སུ་རྫོགས་ པ་ཡིན་ཏེ། མི་ཚངས་སྤྱོད་ཙམ་པོ་མི་བསྲུང་ཡང་ལོག་གཡེམ ་བསྲུང་བའོ། །ཚངས་པར་སྤྱོད་པའི་དགེ་བསྙེན་ནི། ལུང་རྣམ་འབྱེད་ལས། རབ་ཏུ་འབྱུང་མི་ནུས་ན་ལྔ་པ་ཚངས་པར་སྤྱོད་པའི་བསླབ་པའི་གཞི་ལོང་ཞིག ཅེས་གསུངས་སོ། །དེའི་འགྲེལ་པ་ལས། མི་ཚངས་པར་སྤྱོད་པ་གཏན་སྤངས་པ་ཡིན་པས་ལྔ་པ་ཚངས་པར་སྤྱོད་པ་ཞེས་བྱ་སྟེ། ཁྱིམ་སྤངས་པའི་དགེ་བསྙེན་བསླབ་པའི་གཞི་ལྔ་བླངས་པ་ཡིན། ཞེས་པ་དང༌། ཊཱི་ཀ་ལས་ཀྱང༌། ཁྱིམ་པ་ཉིད་ལ་ཡང་ཇི་སྲིད་འཚོའི་བར་དུ་གྲོང་པའི་ཆོས་ལས་ཕྱིར་བཟློག་པའོ། །ཞེས་སོ། །གོ་མིའི་དགེ་བསྙེན་ནི་ཐུབ་པ་དགོངས་རྒྱན་ལས། གསོ་སྦྱོང་གི་སྡོམ་པ་ཁོ་ན་ཇི་སྲིད་འཚོའི་བར་དུ་ལེན་པ་ནི་གོ་མིའི་སྡོམ་པ་ཡིན་ནོ་ཞེས་བྱ་བ་ནི་གདམས་ངག་གོ། །ཞེས་གསུངས་སོ། །སྡོམ་པ་བརྒྱད་པའི་འགྲེལ་པ་ལས་ཀྱང༌། བསྙེན་གནས་ཡན་ལག་བརྒྱད་པ་ཇི་སྲིད་འཚོའི་བར་དུ་བླངས་པ་ནི་གོ་མིའི་སྡོམ་པ་བླངས་པ་ཡིན་ནོ། །ཞེས་གསུངས་ཤིང༌། དེ་ལྟར་སློབ་དཔོན་མཆེ་བའི་སྡེས་ཀྱང་བཤད་དོ། །དེ་ཡང་ཐམས་ཅད་ཡོད་སྨྲའི་སྡེ་བ་ལ་ནི་གོ་མི་མེད་ལ་ཕལ་ཆེན་སྡེ་བ་ལ་པུནྱ་ཤྲཱི་ཡོད་ཅེས་དཱི་པཾ་ཀ་ར་ཤྲཱི་ཛྙཱ་ན་གསུང་ཞིང༌། གནས་བརྟན་པའི་མན་ངག་བརྒྱུད་པ་ལས་ཀྱང་བྱུང་ངོ༌། །གལ་ཏེ་དགེ་བསྙེན་བརྒྱད་ཡོད་པར་རིགས་ཏེ། མདོ་སྡེ་ལས། ནམ་འཚོའི་བར་གྱི་ཁྲིམས་མ་མནོས་ཀྱང་ཡན་ལག་བརྒྱད་པ་མནོས་པ་དེ་ལ་ཡང་དགེ་བསྙེན་ཞེས་བྱའོ། །ཞེས་གསུངས་སོ་ཞེ་ན། དེ་ནི་མིང་དགེ་བསྙེན་ཞེས་བཏགས་ཀྱང་དོན་དགེ་བསྙེན་རང་མཚན་པ་མ་ཡིན་ཏེ། མཛོད་ལས། གཞན་ལའང་བསྙེན་གནས་ཡོད་མོད་ཀྱི་ཞེས་དགེ་བསྙེན་ལས་གཞན་ལ་ཡང་བསྙེན་གནས་ཡོད་ཅེས་དེ་དགེ་བསྙེན་ལས་གཞན་ཡིན་པར་གསུངས་པ་དང༌། བསྙེན་གནས་ནི་ཤན་པ་ལ་སོགས་པ་དག་གིས་ཀྱང་འཐོབ་ལ། དེ་དག་ནི་དགེ་བསྙེན་ཡིན་པར་མི་རིགས་ལ་སངས་རྒྱས་ཀྱི་འཁོར་རྣམ་བཞིར་གཏོགས་པར་མི་རིགས་པའི་ཕྱིར་རོ། །དེ་ལྟར་ན་ཉན་ཐོས་ཀྱི་གྲུབ་མཐའ་ཙམ་ལ་ལྟོས་ནས་དགེ་བསྙེན་བདུན་ཡིན་ལ། ཁྱད་པར་དུ་ཁ་ཆེ་བྱེ་བྲག་ཏུ་སྨྲ་བའི་ལུགས་ཀྱི་དགེ་བསྙེན་མཚན་ཉིད་པ་ནི་ལྔ་པ་དང་དྲུག་པ་སྟེ། དགེ་བསྙེན་དེ་གཉིས་ཁོ་ན་ཡིན་ལ། སྐབས་འདིར་བླང་བ་ནི་ཡོངས་རྫོགས་ཀྱི་དགེ་བསྙེན་གྱི་སྡོམ་པ་སྟེ་གཞི་དང་ཀརྨ་ཤ་ཏཾ་ལས་བསླབ་པ་༼མི་ཚངས་པར་སྤྱོད་པ་སྤངས་ཏེ་ཞེས་མ་གསུངས་ཀྱི་འདོད་པས་ལོག་པར་ གཡེམ་པ ་དང་ཞེས།༽ བརྗོད་པའི་ཆོ་གས་ཤེས་སོ། །ཞེས་གསུངས་སོ། །སྣ་གཅིག་སྲུང་བའི་དགེ་བསྙེན་གྱི་སྡོམ་པ་སོགས་དགེ་བསྙེན་གྱི་སྡོམ་པ་ཡིན་པར་ཐལ། དགེ་བསྙེན་གྱི་སྡོམ་པའི་དབྱེ་བ་ཡིན་པའི་ཕྱིར་ཏེ། རྩ་བར། གལ་ཏེ་ཐམས་ཅད་སྡོམ་ཡིན་ན། །སྣ་གཅིག་སྤྱོད་སོགས་ཇི་ལྟ་བུ། །དེ་སྲུང་བ་ལའང་གསུངས་ཞེས་གྲགས། །ཞེས་དང༌། ས་བཟང་གི་ཀུན་བཏུས་ཀྱི་འགྲེལ་བ་ལས།དགེ་བསྙེན་གྱི་བསླབ་པའི་གཞི་ལྔ་ལས་ཕྱོགས་གཅིག་སྲོག་གཅོད་སྤང་བ་ལྟ་བུ་ལ་སློབ་ན་དགེ་བསྙེན་གྱི་སྡོམ་པ་དང་ལྡན་པ་ཞེས་བྱའམ་ལྡན་པ་མ་ཡིན་པ་ཞེས་བྱ་ཞེ་ན། མིང་ཆེན་གྱི་མདོར། བཙུན་པ་ཇི་ཙམ་གྱིས་ན་སྣ་གཅིག་སྤྱོད་པའི་དགེ་བསྙེན་དུ་འགྱུར་བ་ལགས་ཞེས་སོགས་ཞུས་པའི་ལན་དུ། བསླབ་བྱ་སྣ་གཅིག་སྲུང་ན་སྣ་གཅིག་སྤྱོད་པ་དང༌། གཉིས་སྲུང་ན་ཕྱོགས་གཅིག་སྤྱོད་པ་དང༌། གསུམ་མམ་བཞི་སྲུང་ན་ཕལ་ཆེར་སྤྱོད་པ་དང༌། ལྔ་ཅར་སྲུང་ན་ཡོངས་སུ་རྫོགས་པར་སྤྱོད་པའི་དགེ་བསྙེན་དུ་གསུངས་པས། གང་བླངས་པ་སྲུང་བའི་ཆ་ནས་སྡོམ་པ་དང་ལྡན་པ་ཞེས་བྱ་སྟེ། ལྷག་མ་མི་སྲུང་བའི་ཆ་ནས་ཚུལ་ཁྲིམས་འཆལ་བ་ཞེས་ཀྱང་བྱའོ། །ཞེས་གསུངས་པའི་ཕྱིར། འདོད་མི་ནུས་ཏེ། དེ་ལ་དགེ་བསྙེན་གྱི་སྡོམ་པའི་མཚན་ཉིད་མི་ཚང་བའི་ཕྱིར། དེར་ཐལ། དགེ་བསྙེན་གྱི་སྡོམ་པ་ལ་སྤང་བྱ་ལྔ་སྤོང་པའི་སྡོམ་པ་དགོས་པའི་ཕྱིར། དེར་ཐལ། མཛོད་འགྲེལ་གནད་སྒྲོན་ལས། སྤང་བར་བྱ་བ་ལྔ་པོ་ལས་སླར་ལྡོག་པ་ཡང་དག་པར་བླངས་པས་ནི་དགེ་བསྙེན་གྱི་སྡོམ་པ་དང༌། ཞེས་གསུངས་པའི་ཕྱིར་རོ། །ཡང་སྐྱབས་འགྲོའི་དགེ་བསྙེན་དེ་དགེ་བསྙེན་གྱི་དབྱེ་བ་ཡིན་པར་ཐལ། འདུལ་བ་བདུད་རྩིའི་ཉིང་ཁུ་༤ལས། དགེ་བསྙེན་ལ་སྐྱབས་འགྲོའི་དགེ་བསྙེན། སྣ་གཅིག་སྤོང་བ། སྣ་འགའ་སྤོང་བ། ཕལ་ཆེར་སྤོང་བ། ཡོངས་སུ་རྫོགས་པ། ཚངས་སྤྱོད་ཀྱི་དགེ་བསྙེན། ཡན་ལག་བརྒྱད་ཇི་སྲིད་འཚོ་བར་བསྲུང་བ་གོ་མིའི་དགེ་བསྙེན་དང་བདུན་ལ། ཕ་མ་གཉིས་གཉིས་སོ། །ཞེས་གསུངས་པའི་ཕྱིར་ཟེར་ན་གོང་ནས་བཤད་པ་ལྟར་གྲུབ་མཐའ་སོགས་ཀྱི་སྒོས་ཞིབ་ཆ་བྱེད་དགོས་པར་སྣང་ངོ༌། །རང་འགྲེལ་ལས།གལ་ཏེ་སྡོམ་པ་མེད་པའམ་མ་ཚང་བ་ཡང་དགེ་བསྙེན་དུ་འགྱུར་ན་དགེ་སློང་དང་དགེ་སྦྱོང་དག་ཏུ་ཡང་འགྱུར་རོ། །ཞེས་གསུངས་པ་ལྟར་དགེ་བསྙེན་ཡིན་ན་དགེ་བསྙེན་གྱི་སྡོམ་པ་ཚང་དགོས་སམ་དཔྱད། སྒོ་མང་ཡིག་ཆ་༩༥ལས། དེས་ན་ཁ་ཆེ་བ་རང་ལུགས་ཀྱི་དགེ་བསྙེན་ལྔ་སོགས་དགེ་བསྙེན་མཚན་ཉིད་པ་ཡིན་ཀྱང་སྡོམ་པ་ལེན་དུས་སྣ་གཅིག་སྤྱོད་སོགས་བླངས་པས་ཉི་འོག་པ་དང་མདོ་སྡེ་པ་དང་སློབ་དཔོན་ལྟར་གྱི་སྣ་གཅིག་སྤྱོད་པ་སོགས་དགེ་བསྙེན་མཚན་ཉིད་པར་མི་འདོད་པས་སྔར་བཤད་པ་དང་མི་འདྲ་བའི་ཁྱད་པར་ཤེས་དགོས་སོ། །ཞེས་གསུངས་ལ། འོན་ཀྱང་མཚོ་ཊཱིཀ་ཀི་ལུང་གོང་དུ་བཀོད་པ་དང་མི་མཐུན་ནོ། །པཎ་ཆེན་བསོད་གྲགས་པས་དགེ་བསྙེན་གྱིས་བསྙེན་གནས་ཀྱི་སྡོམ་པ་ལེན་ན་དགེ་བསྙེན་གྱི་སྡོམ་པ་གཏོང་བར་གསུངས་ལ། འཇམ་དབྱངས་བཞད་པས་མི་གཏོང་བར་འདོད་པས་དཔྱད་པར་བྱའོ། །