གཡོ་སྒྱུ་ཅན་ལ་གཟབ་པར་འཚལ།
གཡོ་སྒྱུ་ཅན་ལ་གཟབ་པར་འཚལ།
ཀུན་ལ་ཉེ་རིང་མེད་པ་ལེགས་མོད་ཀྱང༌། །དྲིན་ཅན་དྲིན་བཟོ་མེད་པ་ཡི་རེ་མུག། ཀུན་ལ་དག་སྣང་སྦྱོང་བ་བཟང་མོད་ཀྱང༌། །བཟང་ངན་ཁྱད་པར་མི་ཤེས་ཉོན་རེ་མོངས། །བླ་མ་མང་པོར་བསྟེན་པ་བཟང་ན་ཡང༌། །མིང་ཆེན་ཁོག་སྟོང་བསྟེན་ན་ནམ་ཀུན་ཕོངས། །ཐབས་མཁས་ཐུགས་རྗེ་ཆེ་བ་ལེགས་ན་ཡང༌། །གཡོ་སྒྱུའི་ཆབ་སྲིད་ཅན་ལ་ཆོས་དྲི་མེད། །འཁོར་སློབ་ཚུལ་བཞིན་སྐྱོང་བ་བཟང་ན་ཡང༌། །ལྟ་བ་མཐོ་མདོག་གཞན་མགོ་སྐོར་བ་མཚང༌། །དམ་ཆོས་ལམ་སྟོན་གནང་བ་བཟང་ན་ཡང༌། །ལུང་ཙམ་འདོན་པས་ཡོན་ཏན་སྐྱེ་མི་འགྱུར། །འདོད་ཆུང་ཆོག་ཤེས་སྐྱེས་བུ་བཟང་ན་ཡང༌། །སྙིགས་དུས་བསོད་ཆུང་རྣམས་ཀྱིས་བརྙས་བཅོས་བྱེད། །དྲང་བདེན་ཅན་གྱི་མི་ཞིག་ཆེས་མཛེས་ཀྱང༌། །གཡོ་སྒྱུ་ཅན་ལ་ཕྲད་དུས་གཟབ་པར་འཚལ། །གཞན་ལ་ཐོས་སྒོམ་བཤད་པ་བཟང་ན་ཡང༌། །རང་གིས་མི་སྒྲུབ་ཁ་དང་ལག་ལེན་འགལ། །ཆོས་ལུགས་རིས་མེད་བྱེད་ན་བཟང་མོད་ཀྱང༌། །རང་ལ་རང་ལུགས་མེད་པ་ཨེ་མ་མཚར། དཀོར་ཟས་ཉེས་པ་སྟོན་པ་བཟང་ན་ཡང༌། །རྒྱུན་དུ་དཀོར་ལ་རེམ་པ་ཡི་རེ་མུག། ནམ་རྒྱུན་རིག་གནས་དགོས་པར་གྱེར་ན་ཡང༌། །རང་གིས་མི་སྦྱང་མི་ཤེས་ཐབས་རེ་སྐྱོ། །ཀུན་ལ་གུས་ཞབས་བྱེད་དགོས་སྨྲ་ན་ཡང༌། །བླ་མ་ཕ་མ་གུས་ཞབས་མེད་པ་ངན། །འཛམ་གླིང་ཞི་བདེ་བྱེད་དགོས་ཟེར་ན་ཡང༌། །གཉེན་ཉེ་ཆོས་གྲོགས་ཞི་བདེ་མེད་པ་ངན། །དད་པ་རྣམ་དག་ཤིན་ཏུ་གལ་ཆེ་ཡང༌། །རྨོངས་དད་ངང་ནས་ཆོས་མི་སློབ་པ་བླུན། །དགོན་པ་གྲྭ་ཚང་སྒྲིག་ལམ་བརྩི་དགོས་མོད། །གྲྭ་སར་མི་འགྲོ་མི་ཚེ་དོན་མེད་འཛད། །རེ་ཞིག་ངན་གཡོས་གཞན་མགོ་བསྐོར་ནུས་ཀྱང༌། །ནམ་ཞིག་ལས་འབྲས་དྲང་བོས་ཐག་གཅོད་ངེས། །ནམ་གཡེང་བྱེད་པ་སྐྱིད་པོ་ཡིན་བརློམས་ཀྱང༌། །རང་གིས་རང་ཉིད་བསླུ་བ་དེ་ལས་མེད། །གྲྭ་རྐྱང་དངོས་གྲུབ་དཔལ་གྱིས། འཕྲོད་བསྟེན་རྩ་བ་ཟས་སྤྱ ོད་དང༌། །སེམས་ཁམས་སྙོམ་སྒྲིག་བྱེད་པ་གལ། །འཕྲོད་བསྟེན་ཡོད་ན་བདེ་ཐང་ཡོད། །བདེ་ཐང་ཡོད་ན་དོན་ཀུན་འགྲུབ། །དངོས་གྲུབ་དཔལ་ནས། རིན་པོ་ཆེ། ཁྱེད་ཀྱིས་གྲྭ་རྒྱབ་ན་མི་ཚེ་གཅིག་གི་ཆོས་བསྒྲུབ་པའི་རིམ་པ་ཞིག་གསུངས་ཡོད་ལ། ཡིན་ན་ལས་དང་པོ་པས་ཐོས་བསམ་བྱེད་པའི་གཞུང་གི་རིམ་པ་ཞིག་གསུང་རོགས་ཞུ་ཞུ། བདུད་འདུལ་རྡོ་རྗེས་གུས་པའི་ཕྱག་བཅས། ཞེས་པའི་གསུང་ལན་དུ། དང་པོར་བློ་སྦྱོང་ལམ་རིམ་སྡོམ་གསུམ་གསན། །རང་རྒྱུད་ཆོས་དང་འདྲེས་པའི་དགོས་པ་ཡོད། །གཞུང་ཆེན་ཐོག་མ་ཚད་མའི་རིགས་ལམ་སྦྱང༌། །གཞུང་ནི་རིགས་པའི་རྗེས་འབྲང་ཡིན་པས་གལ། །དེ་ནས་ཕར་ཕྱིན་གཞུང་ལུགས་རྒྱ་ཆེར་སྦྱང༌། །ནང་བའི་ཐུན་མིན་ལམ་ཀུན་ཤེས་པའི་གནད། །སྤྲོས་བྲལ་དབུ་མའི་གཞུང་ལུགས་ལེགས་བསླབ་ན། །མཐའ་བྲལ་ཟབ་མོ་དབུ་མའི་ལྟ་བ་རྙེད། །དེ་དག་ཆོས་འཁོར་བར་མཐའི་དགོངས་འགྲེལ་གཏོགས། །དམ་ཆོས་འདུལ་བ་སྟོན་པའི་ཚབ་ཡིན་པས། །ལེགས་པར་སྦྱང་ལ་ལག་ལེན་ཚུལ་བཞིན་འབད། །མངོན་མཛོད་གཞུང་ཆེན་ དགོངས་འགྲེལ་དམ་པ 
་མཆོག། །ལེགས་པར་སྦྱངས་ན་དང་པོའི་དགོངས་ཆེན་རྙེད། །གསང་ཆེན་རྒྱུད་སྡེ་བཞི་ཡི་རྣམ་དབྱེ་དང༌། །ཁྱད་པར་དཔལ་ལྡན་དུས་ཀྱི་འཁོར་ལོ་ཡི། །རིམ་གཉིས་རྣམ་བཞག་ཐོས་བསམ་སྒོམ་པ་གནད། །སྦྱང་བའི་གོ་རིམ་ཆེར་མ་མཆིས་མོད་ཀྱང༌། །དབང་བོ་རབ་འབྲིང་ཐ་མའི་ཁྱད་པར་དང༌། །བརྩོན་འགྲུས་རབ་འབྲིང་ཐ་གསུམ་ལས་དབང་གིས། །རྒྱས་འབྲིང་བསྡུས་གསུམ་ཅི་རིགས་སྦྱང་བ་གནད། །མ་མཐའ་དེ་དག་བསྡུས་ཙམ་མ་བསླབ་ན། །ནང་བའི་རྒྱུན་ཤེས་ཙམ་ཡང་མེད་པར་འགྱུར། །སྔོན་བྱོན་དམ་པ་གོང་མའི་རྣམ་ཐར་བཞིན། །ཐོས་བསམ་སྒོམ་པས་མི་ཚེ་དོན་ལྡན་དགོས། །ཞེས་པ་འདི་མདོ་སྨད་ཇོ་ནང་བསྟན་པའི་མངག་བདག་ཛམ་ཐང་དགོན་ཆེན་གྱི་བསྟན་བདག་ཚ་ཁོ་རྡོ་རྗེ་དཔལ་བཟང་གི་སྐུ་ཚ་མཆོག་སྤྲུལ་བདུད་འདུལ་རྡོ་རྗེས་བསྐུལ་ངོར་ངག་དབང་དངོས་གྲུབ་དཔལ་གྱིས་གུས་ཕྱག་དང་བཅས་ཏེ་ཕུལ་བ་དགེའོ། །