གཉིས་པ་གཉིས་པ་དྲི་མ་མེད་པ་བཤད་པ།

གཉིས་པ་གཉིས་པ་དྲི་མ་མེད་པ་བཤད་པ་ལ། ས་འདིར་ཚུལ་ཁྲིམས་ཡོངས་སུ་དག་པ་བསྟན་པ་དང༌། ཚུལ་ཁྲིམས་ཀྱི་བསྔགས་པ་བསྟན་པ་དང༌། ཚུལ་ཁྲིམས་ཀྱི་མི་མཐུན་ཕྱོགས་དང་མ་འདྲེས་པའི་དཔེ་བསྟན་པ་དང༌། ཚུལ་ཁྲིམས་ཀྱི་ཕར་ཕྱིན་གྱི་དབྱེ་བ་བསྟན་པ་དང༌། སའིཡོན་ཏན་བརྗོད་པའི་སྒོ་ནས་མཇུག་བསྡུ་བ་དང་ལྔ། དང་པོ་ལ། ས་འདིར་ཚུལ་ཁྲིམས་ཕུན་སུམ་ཚོགས་པ་བསྟན་པ། དེ་ལ་བརྟེན་ན་སཡོན་ཏན་ཡོངས་སུ་དག་པར་བསྟན་པ། ས་དང་པོ་ལས་ཚུལ་ཁྲིམས་ལྷག་པར་བསྟན་པ། ཚུལ་ཁྲིམས་ཡོངས་སུ་དག་པའི་རྒྱུ་གཞན་བསྟན་པདང་བཞི།

དང་པོ་ནི། རྩ་བར། དེ་ཚུལ་ཕུན་ཚོགས་ཡོན་ཏན་དག་ལྡན་ཕྱིར། །རྨི་ལམ་དུ་ཡང་འཆལ་ཁྲིམས་དྲི་མ་སྤངས། །ཞེས་ས་གཉིས་པ་ལ་གནས་པའི་བྱང་སེམས་དེ༷་ལ་ཚུ༷ལ་ཁྲིམས་ཕུ༷ན་སུམ་ཚོ༷གས་པའི་ཡོ༷ན་ཏ༷ན་ད༷ག་པ་དང་ལྡ༷ན་པའི་ཕྱི༷ར་སད་དུས་སུ་མ་ཟད་རྨི༷་ལ༷མ་དུ༷་ཡ༷ང་བཅས་པ་དང་རང་བཞིན་གྱི་འཆ༷ལ་བའི་ཚུལ་ཁྲི༷མས་ཀྱི་དྲི༷་མ༷་ཆ་ཕྲ་མོ་ཙམ་ཡང་སྤ༷ངས་པ་ཡིན་པའོ། །རྒྱན་ལས། འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཞེས་དང༌། རིན་ཕྲེང་ལས། གཉིས་པ་དྲི་མ་མེད་ཅེས་བྱ། །ལུས་དང་ངག་དང་སེམས་ཀྱི་ལས། །བཅུ་ཆར་དྲིམ་མེད་པའི་ཕྱིར། །ཞེས་སོ། །

གཉིས་པ་དེ་ལ་བརྟེན་ནས་ཡོན་ཏན་ཡོངས་སུ་དག་པར་བསྟན་པ་ནི།

རྩ་བར། ལུས་ངག་ཡིད་ཀྱི་རྒྱུ་བ་དག་གྱུར་པས། །དམ་པའི་ལས་ལམ་བཅུ་ཆར་གསོག་པར་བྱེད། །ཅེས་བྱང་སེམས་དེ་ཚུལ་ཁྲིམས་ཇི་ལྟར་དུ་ཕུན་སུམ་ཚོགས་པའི་སྟོབས་ཀྱིས་རྒྱུད་ཀྱི་ཡོན་ཏན་རྣམས་དག་པར་འགྱུར་བ་ཡིན་ཞེ་ན། བྱང་སེམས་ས་གཉིས་པ་དེ་ལ་ཚུལ་ཁྲིམས་ཕུན་སུམ་ཚོགས་པའི་སྟོབས་ཀྱིས་ཡོན་ཏན་རྣམས་རྣམ་པར་དག་པ་ཡིན་ཏེ། སད་པ་དང་རྨི་ལམ་གྱི་སྐབས་ཀུན་ཏུ་ལུ༷ས་དང་ང༷ག་ཡི༷ད་ཀྱི༷་རྒྱུ་༷བ༷་ཀུན་སྤྱོད་ཉེས་པའི་རིགས་མ་ལུས་པའི་ཆ་ཕྲ་མོས་ཀྱང་དག༷་པར་གྱུ༷ར་པ༷ས་ད༷མ་པ༷འི་ལ༷ས་ལ༷མ་སྲོག་གཅོད་སྤོང་བ་ཡན་ལག་དང་བཅས་པ་སོགས་ལས་ལམ་བཅུ༷་ཆ༷ར་མ་ཚང་བ་མེད་པར་གསོ༷ག་པ༷ར་བྱེ༷ད་པའི་ཕྱིར་ཏེ། རང་འགྲེལ་ལས། ཇི་སྐད་དུ་བྱང་ཆུབ་སེམས་དཔའི་ས་གཉིས་པ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ས་དྲི་མ་མེད་པ་ལ་གནས་པའི་བྱང་ཆུབ་སེམས་དཔའ་ནི་རང་བཞིན་གྱིས་སྲོག་གཅོད་པ་སྤངས་པ་ཡིན་ཏེ།

ཞེས་པ་ནས། དེ་ལ་དགེ་བའི་ལས་ཀྱི་ལམ་དང་པོ་གསུམ་ནི་ལུས་ཀྱིས་རྫོགས་པར་བྱེད་དོ། །

བར་གྱི་བཞི་ནི་ངག་གིས་སོ། །ཐ་མ་གསུམ་ནི་ཡིད་ཀྱིས་སོ། །དེ་ལྟར་ན་དགེ་བའི་ལས་ལམབཅུ་ཆར་ཡང་གསོག་པར་བྱེད་པ་ཡིན་ནོ། །ཞེས་གསུངས་པའི་ཕྱིར་རོ། །

གསུམ་པ་ས་དང་པོ་ལས་གཉིས་པར་ཚུལ་ཁྲིམས་ལྷག་པར་བསྟན་པ་ནི།

རང་འགྲེལ་ལས། ཡང་ཅི་ལས་ཀྱི་༼དགེ་བའི༽ལམ་འདི་རྣམས་སེམས་དང་པོ་བསྐྱེད་པའི་བྱང་ཆུབ་སེམས་དཔས་མི་སོག་གམ་ཞེ་ན། དེས་ཀྱང་སོག་མོད་ཀྱི་འོན་ཀྱང༌། ཞེས་སོ། །རྩ་བར། དགེ་བའི་ལམ་འདི་ལྟ་ཞིག་བཅུ་ཆར་ཡང༌། །དེ་ལ་ཀླགས་ཏེ་ཤིན་ཏུ་དག་པར་འགྱུར། །ཞེས་ཉེས་སྤྱོད་སྤོང་བའི་དགེ༷་བ༷འི་ལས་ཀྱི་ལ༷མ་འདི༷་ལྟ༷་ཞི༷ག་བཅུ༷་ཆ༷ར་ཡ༷ང་ཡོངས་སུ་རྫོགས་པ་དེ་ས་གཉིས་པ་དེ༷་ལ༷་ཀླ༷གས་ཏེ༷་ཕུལ་དུ་བྱུང་བར་ཤི༷ན་ཏུ༷་ད༷ག་པ༷་གྱུར་བའམ་རྫོགས་པར་འགྱུ༷ར་བ་གང་ཞིག་ས་དང་པོ་ལ་མི་དགེ་བཅུས་གོས་པ་མི་སྲིད་ཀྱང་ལུས་ངག་གི་བྱ་བ་གདུལ་བྱའི་ཡིད་ལ་མི་འཕྲོད་པ་ཕྲན་བུ་ཡོད་པ་ལྟ་བུ་བྱང་སེམས་ཀྱི་ཉེས་སྤྱོད་ཕྲ་བ་འབྱུང་སྲིད་པས་ས་གཉིས་པ་པ་ལྟར་ཚུལ་ཁྲིམས་ཀྱི་ཕར་ཕྱིན་ལྷག་པ་མ་ཐོབ་པའོ། །རྩ་བར། སྟོན་ཀའི་ཟླ་ལྟར་རྟག་ཏུ་རྣམ་དག་སྟེ། །ཞི་འོད་ཆགས་པར་དེ་དག་གིས་རྣམ་མཛེས། །ཞེས་དེ་འདྲ་བའི་ཚུལ་ཁྲིམས་དག་པ་ཅན་གྱི་ས་གཉིས་པ་པ་དེ་སྟོན་ཀའི་ཟླ་བ་ལྟ་བུ་ཡིན་ཏེ། སྟོ༷ན་ཀ༷འི་ཟླ༷་བ་ལ་ཚ་གདུང་སེལ་བར་བྱེད་པ་དང༌།

དཀར་བའི་འོད་ཀྱིས་ལམ་མེར་གསལ་བ་དང་གཉིས་ཡོད་པ་ལྟ༷ར་རྟ༷ག་ཏུ༷་དེ་འདྲའི་ཚུལ་ཁྲིམས་རྣ༷མ་པར་ད༷ག་པ་ལ་གནས་པ་སྟེ༷། དབང་པོའི་སྒོ་བསྡམས་པའི་ཉེ་བར་ཞི༷་བ་དང༌། ཚུལ་ཁྲིམས་ལྡན་པ་རྒྱན་རྣམས་ཀུན་གྱི་མཆོག། ཅེས་པ་ལྟར་དག་པའི་ཚུལ་ཁྲིམས་ཀྱི་སྟོབས་ཀྱིས་གང་ཟག་གཞན་ལས་ལྷམ་མེར་གསལ་བའི་ལུས་ཅན་གྱི་འོ༷ད་ཆ༷གས་པ༷ར་གྱུར་པ་དེ༷་ད༷ག་གི༷ས་སྟོན་ཟླ་ལྟར་རྣ༷མ་པར་མཛེ༷ས་པའི་ཕྱིར་ཏེ། རང་འགྲེལ་ལས། ཞི་བ་ནི་དབང་པོ་བསྡམས་པའོ། །འོདཆགས་པ་ནི་ལྷམ་མེར་གསལ་བའི་ལུས་ཅན་ཉིད་དོ། །ཞེས་གསུངས་སོ། །

བཞི་པ་ཚུལ་ཁྲིམས་ཡོངས་སུ་དག་པའི་རྒྱུ་གཞན་བསྟན་པ་ནི།

རྩ་བར། གལ་ཏེ་དེ་ནི་ཁྲིམས་དག་རང་བཞིན་ལྟ། །དེ་ཕྱིར་དེ་ནི་ཚུལ་ཁྲིམས་དག་མི་འགྱུར། །ཞེས་བྱང་སེམས་ས་གཉིས་པ་པ་དེ་ལ་ཚུལ་ཁྲིམས་རྣམ་པར་དག་པའི་རྒྱུ་གཞན་ཡང་ལྡན་ཏེ། ག༷ལ་ཏེ༷་དགེ་སློང་དེ༷་ནི༷་སོ་ཐར་ལས་བརྩམས་པའི་ཚུལ་ཁྲི༷མས་ཡོངས་སུ་ད༷ག་པ་ཡིན་ཡང་ཆོས་རྣམས་ལ་ར༷ང་བཞི༷ན་གྱིས་གྲུབ་པར་ལྟ༷་བ་སྤོང་བར་མི་བྱེད་ན་ཡིད་ཀྱི་ཉེས་སྤྱོད་བདེན་འཛིན་ཉོན་མོངས་སྤོང་བའི་ཚུལ་ཁྲིམས་དང་འགལ་བ་ཡིན་པ་དེ༷་ཡི་ཕྱི༷ར་ན་དགེ་སློང་དེ༷་ནི༷་འཇིག་རྟེན་ལས་འདས་པའི་ཚུལ་ཁྲིམས་ལ་ལྟོས་པའི་ཚུ༷ལ་ཁྲི༷མས་ད༷ག་པར་མི༷་འགྱུ༷ར་ཏེ། བདེན་འཛིན་གྱི་ལྟ་བ་སྤོང་བའི་ཚུལ་ཁྲིམས་མེད་པ་དེའི་ཕྱིར་ཏེ། རང་འགྲེལ་ལས། ཇི་སྐད་དུ། འཕགས་པ་དཀོན་མཆོག་བརྩེགས་པའི་མདོ་ལས། འོད་སྲུངས་འདི་ལ་དགེ་སློང་ཁ་ཅིག་ཚུལ་ཁྲིམས་དང་ལྡན་པ་ཡིན་ཏེ། སོ་སོར་ཐར་པའི་སྡོམ་པས་བསྡམས་ཤིང་གནས། ཆོ་ག་དང་སྤྱོད་ཡུལ་ཕུན་སུམ་ཚོགས་པ་ཁ་ན་མ་ཐོ་བ་ཕྲ་རབ་རྣམས་ལ་ཡང་འཇིགས་པར་ལྟ་བ། ཡང་དག་པར་བླངས་ཏེ་བསླབ་པའི་གཞི་རྣམས་ལ་སློབ་ཅིང་ལུས་དང་ངག་དང་ཡིད་ཀྱི་ལས་ཡོངས་སུ་དག་པ་དང་ལྡན་པར་གྱུར་པས་འཚོ་བ་ཡོངས་སུ་དག་ཀྱང་བདག་ཏུ་སྨྲ་བ་ཡིན་ཏེ། འོད་སྲུངས་དེ་ནི་ཚུལ་ཁྲིམས་འཆལ་པ། ཚུལ་ཁྲིམས་དང་ལྡན་པ་ལྟར་བཅོས་པ་དང་པོ་ཞེས་བྱ་བ་ནས། འོད་སྲུངས་གཞན་ཡང་འདི་ལ་དགེ་སློང་ཁ་ཅིག་སྦྱངས་པའི་ཡོན་ཏན་བཅུ་གཉིས་ཡང་དག་པར་བླངས་ཀྱང༌། དམིགས་པར་ལྟ་བ་ཡིན་ཏེ། ངར་འཛིན་པ་དང་ང་ཡིར་འཛིན་པ་ལ་གནས་པ་དེ་ནི། འོད་སྲུངས་ཚུལ་ཁྲིམས་འཆལ་པ་ཚུལ་ཁྲིམས་དང་ལྡན་པ་ལྟར་བཅོས་པ་བཞི་པ་སྟེ། ཞེས་བྱ་བའི་བར་དུ་གསུངས་སོ། །ཞེས་གསུངས་པས་སོ། །རྩ་བར། དེ་ཕྱིར་དེ་ནི་རྟག་ཏུ་གསུམ་ཆར་ལའང༌། །གཉིས་བློའི་རྒྱུ་བ་ཡང་དག་བྲལ་བར་འགྱུར། །ཞེས་གཞན་ལ་བདེན་འཛིན་གྱི་ལྟ་བ་སྤོང་བའི་ཚུལ་ཁྲིམས་མེད་པ་རྒྱུ་མཚན་དེ༷་ཡི་ཕྱི༷ར་ན་ས་གཉིས་པ་པ་དེ༷་ནི༷་རྟ༷ག་ཏུ༷་དཔེར་ན་སེམས་ཅན་ལ་སྲོག་གཅོད་པའི་འཆལ་ཚུལ་སྤོང་བ་ལྟ་བུ་ཚུལ་འཆལ་གང་ལ་སྤོང་བའི་ཡུལ་དང༌། སྲོག་གཅོད་ཀྱི་སྤོང་གཉེན་སྲོག་གཅོད་སྤོང་སེམས་ལྟ་བུ་ཚུལ་འཆལ་སྤོང་བའི་གཉེན་པོ་དང༌། གང་ཟག་གང་གིས་སྤོང་བ་དང་ཚུལ་ཁྲིམས་ཀྱི་འཁོར་གསུ༷མ་ཆ༷ར་ལ༷འ༷ང་མཐའ་གཉི༷ས་སུ་འཛིན་པའི་བློ༷འི་རྒྱུ༷་བ༷་ཡ༷ང་ད༷ག་པར་བྲ༷ལ་བ་སྟེ་སྤོང་བ༷ར་བྱེད་པར་འགྱུ༷ར་བའི་ཕྱིར་ན་འཇིག་རྟེན་ལས་འདས་པའི་ཚུལ་ཁྲིམས་དགཔའི་རྒྱུ་བདེན་འཛིན་སྤོང་བར་བྱེད་པ་དང་ལྡན་པའི་ཕྱིར་རོ། །

གཉིས་པ་ས་འདིར་ཚུལ་ཁྲིམས་ཀྱི་བསྔགས་པ་བསྟན་པ་ལ།

སྦྱིན་འབྲས་བདེ་འགྲོར་སྤྱོད་པ་ཚུལ་ཁྲིམས་ལ་རག་ལས་པ། སྦྱིན་འབྲས་སྐྱེ་བ་བརྒྱུད་མར་སྤྱོད་པ་ཚུལ་ཁྲིམས་ལ་རག་ལས་པ། ཚུལ་ཁྲིམས་དང་བྲལ་ན་ངན་འགྲོ་ལས་ཐར་བ་ཤིན་ཏུ་དཀའ་བར་བསྟན་པ། སྦྱིན་པའི་གཏམ་གྱི་རྗེས་སུ་ཚུལ་ཁྲིམས་ཀྱི་གཏམ་མཛད་པའི་རྒྱུ་མཚན། མངོན་མཐོ་དང་ངེས་ལེགསགཉིས་ཀའི་རྒྱུར་ཚུལ་ཁྲིམས་བསྔགས་པ་དང་ལྔ།

དང་པོ་ནི། རྩ་བར། སྦྱིན་པས་ལོངས་སྤྱོད་དག་ནི་འགྲོ་ངན་ནའང༌། །སྐྱེ་བོ་ཚུལ་ཁྲིམས་རྐང་པ་ཉམས་ལ་འབྱུང༌། །ཞེས་སྦྱིན་པའི་འབྲས་བུ་དེ་བདེ་འགྲོའི་རྟེན་ལ་སྨིན་པར་འདོད་པའི་གང་ཟག་གིས་ཚུལ་ཁྲིམས་རྣམ་དག་བསྲུང་དགོས་ཏེ། སྦྱིན་པ་པོ་ཚུལ་ཁྲིམས་དང་ལྡན་པས་སྦྱིན་པ་བཏང་བ་ལས་ལྷ་མིའི་ནང་དུ་ལོངས་སྤྱོད་ཕུན་སུམ་ཚོགས་པ་འབྱུང་རྒྱུ་ཡིན་པ་ལ། སྦྱི༷ན་པ་སྦྱིན་པ༷ས་འབྲས་བུ་ལོ༷ངས་སྤྱོ༷ད་ཕུན་སུམ་ཚོགས་པ་ད༷ག་ནི༷་འགྲོ༷་བ་ང༷ན་པ་ངན་འགྲོ་བར་ལྟུང་བའི་ཉེ་ཚེ་བའི་དམྱལ་བ་དང༌། ཀླུ་ལ་སོགས་པ་དང་ཡི་དྭགས་རྫུ་འཕྲུལ་ཆེན་པོ་ལ་སོགས་པ་ན༷འ༷ང་སྐྱེ༷་བོ༷་ཚུ༷ལ་ཁྲི༷མས་ཀྱི་རྐ༷ང་བ༷་ཉ༷མས་པ་དང་བདེ་འགྲོར་བགྲོད་པའི་རྐང་བ་ལྟ་བུའི་ཚུལ་ཁྲིམས་དང་བྲལ་བ་ལ༷་འབྱུ༷ང་བ་ཡིན་པའོ། །དེས་ན་སྦྱིན་པ་གཏོང་བ་དེ་ཚུལ་ཁྲིམས་དང་བྲལ་ན་སྦྱིན་འབྲས་ལོངས་སྤྱོད་རྣམས་བདེ་འགྲོའི་རྟེན་ལ་མི་སྨིན་པར་ངན་འགྲོའི་རྟེན་ལ་སྨིན་པར་འགྱུར་བས་ཚུལ་ཁྲིམས་འབད་པས་བསྲུང་རིགས་ལ། མངོན་མཐོའི་རྒྱུ་ནི་ཚུལ་ཁྲིམས་ཡིན་པསསྦྱིན་འབྲས་ལྷ་མིའི་རྟེན་ལ་ལོངས་སྤྱོད་པ་ཚུལ་ཁྲིམས་ལ་རག་ལས་པར་གྲུབ་པའོ། །

གཉིས་པ་སྦྱིན་འབྲས་ལ་སྐྱེ་བ་བརྒྱུད་མར་སྤྱོད་པ་ཚུལ་ཁྲིམས་ལ་རག་ལས་པ་ནི།

རྩ་བར། བསྐྱེད་བཅས་དངོས་འདུ་ཡོངས་སུ་ཟད་པས་ན། །ཕྱིན་ཆད་དེ་ལ་ལོངས་སྤྱོད་འབྱུང་མི་འགྱུར། །ཞེས་སྐྱེ་བ་བརྒྱུད་མར་སྦྱིན་པའི་འབྲས་བུ་ལ་ལོངས་སྤྱོད་པར་འདོད་པ་དག་གིས་ཚུལ་ཁྲིམས་རྣམ་དག་མ་བསྲུང་ན་ལོངས་སྤྱོད་ཀྱི་རྩ་བ་སྦྱིན་པ་དང་དེའི་འབྲས་བུ་བསྐྱེ༷ད་ཁ་དང་བཅ༷ས་པའི་དངོ༷ས་པོ་འདུ༷་བ་སྟེ་སྦྱིན་པའི་འབྲས་བུ་ལོངས་སྤྱ ོད་རྣམས་རང་ལ་ཚུར་འདུ་བ་རྣམས་ཐམས་ཅད་ངན་འགྲོའི་རྟེན་དེར་ལོངས་སྤྱོད་ནས་ཡོ༷ངས་སུ༷་ཟ༷ད་པར་འགྱུར་བ་ཡིན་པ༷ས་ན༷་དེཕྱི༷ན་ཆ༷ད་གང་ཟག་དེ༷་ལ༷་ལོ༷ངས་སྤྱོ༷ད་འབྱུ༷ང་བར་མི༷་འགྱུ༷ར་བ་ཡིན་ནོ། །

གསུམ་པ་ཚུལ་ཁྲིམས་དང་བྲལ་ན་ངན་འགྲོ་ལས་ཐར་བ་ཤིན་ཏུ་དཀའ་བར་བསྟན་པ་ནི།

རྩ་བར། གང་ཚེ་རང་དབང་འཇུག་ཅིང་མཐུན་གནས་པས། །གལ་ཏེ་འདི་བདག་འཛིན་པར་མི་བྱེད་ན། །གཡང་སར་ལྷུང་བས་གཞན་དབང་འཇུག་འགྱུར་བ། །དེ་ལས་ཕྱི་ནས་གང་གིས་སློང་བར་འགྱུར། །ཞེས་ཚུལ་ཁྲིམས་ཀྱི་རྐང་བ་ཆག་པས་ན་ལོངས་སྤྱོད་རྒྱུན་དུ་མི་འཕེལ་བ་འབའ་ཞིག་ཏུ་མ་ཟད་ཀྱིས། ངན་འགྲོ་ལ་འགྲོ་ཞིང་དེར་སོང་ན་ནི་ངན་འགྲོ་ནས་ཡར་ཐོན་པ་ཤིན་ཏུ་དཀའ་ཚུལ་ནི། ག༷ང་གི་ཚེ༷་དཔེར་ན་མི་དཔའ་བོ་དགྲས་ཚུར་མི་ཚུགས་པ་ལ་སོགས་པ་མཐུན་པའི་ཡུལ་ན་གནས་པ་དེ་ལྕགས་སྒྲོག་སོགས་ཀྱིས་འཆིང་བ་ལས་གྲོལ་བ་ལྟར་ཚེ་འདི་དང་ཕྱི་མའི་དོན་བསྒྲུབ་པའི་བྱ་བ་ཐམས་ཅད་ལ་གཞན་ལ་རག་ལས་མི་དགོས་པར་རང་གི་ར༷ང་དབ༷ང་དུ་འཇུ༷ག་ཅི༷ང་བྱ་རུང་བ་ལ་མཐུ༷ན་པའི་ཡུལ་ལྷ་མིའི་འགྲོ་བ་ན་གན༷ས་པར་གྱུར་པ༷ས། ག༷ལ་ཏེ༷་གང་ཟག་འདི༷་བད༷ག་ཚུལ་ཁྲིམས་བསྲུང་བའི་སྒོ་ནས་ངན་འགྲོར་ལྟུང་བ་ལས་འཛི༷ན་པ༷ར་མི༷་བྱེ༷ད་ན༷། དཔའ་བོ་བཅིངས་ནས་རི་སུལ་ཆེན་པོར་བཟུང་བ་ལྟར་ངན་འགྲོའི་གཡ༷ང་ས༷ར་ལྟུང་ན་ནི་དེར་ལྷུ༷ང་བ༷ས་བྱ་བ་ཅི་བྱེད་རང་དབང་མེད་པར་སྔོན་ལས་སོགས་ཀྱིས་གཞ༷ན་དབ༷ང་དུ་འཇུ༷ག་པར་འགྱུ༷ར་པ༷་དེའི་ཚེ། ངན་འགྲོ་དེ༷་ལ༷ས་ཕྱི༷་ན༷ས་ཏེ་གཟོད་ག༷ང་གི༷ས་སློ༷ང་བའམ་ཐར་བར་བྱེད་པ༷ར་འགྱུ༷ར་ཏེ་སློང་བར་བྱེད་པ་མེད་པའི་ཕྱིར་ཏེ། གང་ཟག་གཞན་དག་གིས་ནི་སངས་རྒྱས་ཀྱིས་ཀྱང་ཆུས་ཁྱེར་བ་སྐྲ་ནས་བཟུང་སྟེ་འདོན་པ་ལྟར་བྱེད་དུ་མེད་པས་ཆོས་བསྒྲུབ་ཏུ་བཅུག་ནས་ཐར་བར་བྱེད་དགོས་ཀྱང་ངན་འགྲོའི་རྟེན་ལ་ནི་དགེ་བ་བསྒྲུབ་པ་ཤིན་ཏུ་དཀོན་པ་ལ། སྡིག་པ་གསོག་པ་ལ་ཤིན་ཏུ་ཐུ་བས་ངན་འགྲོ་ཁོ་ནར་བརྒྱུད་དགོས་པའིཕྱིར་རོ། །

བཞི་པ་སྦྱིན་པའི་གཏམ་གྱི་རྗེས་སུ་ཚུལ་ཁྲིམས་ཀྱི་གཏམ་མཛད་པའི་རྒྱུ་མཚན་ནི།

རྩ་བར། དེ་ཕྱིར་རྒྱལ་བས་སྦྱིན་པའི་གཏམ་མཛད་ནས། །ཚུལ་ཁྲིམས་རྗེས་འགྲོའི་གཏམ་ཉིད་མཛད་པ་ཡིན། །ཞེས་ཚུལ་ཁྲིམས་འཆལ་པ་ཉེས་པའི་ཚོགས་ཤིན་ཏུ་མང་པོའི་གནས་སུ་གྱུར་པ་དེ༷འི་ཕྱི༷ར་ན། སྡིག་པ་མཐའ་དག་ལས་ཕམ་པར་མཛད་པའི་བདུད་ལས་རྒྱ༷ལ་བ༷ས་སྦྱི༷ན་པ་གཏོང་ཚུལ་གྱི་སྦྱིན་པ༷འི་གཏ༷མ་མཛ༷ད་ན༷ས། དེའི་མཇུག་ཐོགས་སུ་སྦྱིན་སོགས་ཀྱི་ཡོན་ཏན་ཆུད་མི་ཟ་བའི་ཕྱིར་དུ་ཡོན་ཏན་གྱི་གཞི་རྟེན་ཚུ༷ལ་ཁྲི༷མས་སྦྱིན་པའི་རྗེ༷ས་སུ་འགྲོ༷འི་གཏ༷མ་ཉིད་མཛ༷ད་པ་ཡི༷ན་ནོ། །རྒྱུ་མཚན་གང་གིས་ཕྱིར་ན་ལྷ་མིའི་ལུས་རྟེན་ཁྱད་པར་ཅན་ལ་མ་བརྟེན་པར་ཐེག་པ་གསུམ་གྱི་ལམ་དང་ཡོན་ཏན་གང་ཡང་མི་སྐྱེ། ལྷ་མིའི་ལུས་རྟེན་ཁྱད་པར་ཅན་ཡང་ཚུལ་ཁྲིམས་རྣམ་དག་ཁོ་ནའི་རྒྱུ་ལས་ཐོབ་དགོས་པ་འདིས་ཀྱང་ཚུལ་ཁྲིམས་ཡོན་ཏན་ཀུན་གྱི་རྟེན་དུ་བསྒྲུབ་རུང་ཡང༌། ལམ་སྒྲུབ་པའི་སྐབས་སུ་ཡང་ཉེས་སྤྱོད་ཅི་རིགས་སྤོང་བའི་ཚུལ་ཁྲིམས་མེད་པར་ལམ་བསྒྲུབ་པ་ཡང་མེད། སྒྲུབ་ཀྱང་ཉེས་སྤྱོད་ལ་ཉོན་མོངས་པས་དབང་མེད་དུ་བསྐྱོད་ནས་ཇི་བཞིན་པ་མི་འགྲུབ་པ་སོགས་ཚུལ་ཁྲིམས་ཡོན་ཏན་ཀུན་གྱི་གཞི་རྟེན་དུ་གྱུར་པ་ཡིན་ཕྱིར་ཡོན་ཏན་ཀུན་གྱི་ཞིང་ཡིན་ལ། རྩ་བར། ཡོན་ཏན་ཚུལ་ཁྲིམས་ཞིང་དུ་རྣམ་འཕེལ་ན། །འབྲས་བུ་ཉེར་སྤྱོད་ཆད་པ་མེད་པར་འགྱུར། །ཞེས་སྦྱིན་སོགས་ཀྱི་ཡོ༷ན་ཏ༷ན་རྣམས་ཚུ༷ལ་ཁྲི༷མས་ཀྱི་ཞི༷ང་དུ༷་འཕེ༷ལ་བར་འགྱུ༷ར་ན༷་རྒྱུ་སྦྱིན་སོགས་ལ་ཡང་ནམ་ཡང་ཆད་པ་མེད་ལ་འབྲ༷ས་བུ༷་ལྷ་མིའི་ལུས་དང་ལོངས་སྤྱོད་བཟང་པོ་ལ་ཡང་ཉེ༷་བར་སྤྱོ༷ད་པ་ཡང་ཚེ་རབས་ཐམས་ཅད་དུ་རྒྱུན་ཆ༷ད་པ༷་མེ༷ད་པ༷ར་འགྱུ༷ར་བའི་ཕྱིར་ཏེ། ཚེ་གཅིག་ལ་ཡང་ཚུལ་ཁྲིམས་ཀྱིས་ཆགས་སོགས་ཀྱི་དབང་གིས་མི་དགེ་བ་དང་ཉེས་སྤྱོད་ལ་མི་འཇུག་པར་བྱེད་ན་སེམས་རྣལ་དུ་གནས་པ་ཐོབ་ནས་དད་པ་དང་སྦྱིན་པ་ངེས་འབྱུང་བྱང་སེམས་སོགས་སྐྱེ་བ་དང༌། ཚུལ་ཁྲིམས་རྣམ་དག་བསྲུང་ནས་སྨོན་ལམ་གྱིས་མཚམས་སྦྱར་ན་ཕྱི་མར་ཡང་བདེ་འགྲོའི་ལུས་རྟེན་ཐོབ་ནས་རྟེན་དེ་ལ་ཡང་བྱེད་པ་རྒྱུ་མཐུན་དུ་ཚུལ་ཁྲིམས་བསྲུང་བ་དང་སྦྱིན་སོགས་ལ་འཇུག་པ་སོགས་གོང་འཕེལ་དུ་འཇུག་པསྔར་ལྟར་ཡིན་པའི་ཕྱིར་རོ། །

ལྔ་པ་མངོན་མཐོ་དང་ངེས་ལེགས་གཉིས་ཀའི་རྒྱུར་ཚུལ་ཁྲིམས་བསྔགས་པ་ནི།

རྩ་བར། སོ་སོའི་སྐྱེ་བོ་རྣམས་དང་གསུང་སྐྱེས་དང༌། །རང་བྱང་ཆུབ་ལ་བདག་ཉིད་ངེས་རྣམས་དང༌། །

རྒྱལ་སྲས་རྣམས་ཀྱི་ངེས་པར་ལེགས་པ་དང༌། །མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་སོ༷་སོ༷་སྐྱེ༷་བོ༷་ལམ་མ་ཞུགས་རྣ༷མས་ད༷ང༌། ཐུབ་པའི་གསུ༷ང་ལས་སྐྱེ༷ས་པའི་ཉན་ཐོས་རྣམས་ད༷ང༌། ར༷ང་རྒྱལ་གྱི་བྱ༷ང་ཆུ༷བ་ཀྱི་ལམ་ལ༷་བད༷ག་ཉི༷ད་ངེ༷ས་པ་རྣ༷མས་ད༷ང༌། རྒྱ༷ལ་སྲ༷ས་བྱང་སེམས་རྣ༷མས་ཀྱི༷་ཅི་རིགས་པར་ངེ༷ས་པ༷ར་ལེ༷གས་པ༷་བྱང་ཆུབ་ད༷ང༌། མངོ༷ན་མཐོ༷འི་གོ་འཕང་ཐོབ་བྱེད་ཀྱི་རྒྱུ༷་ནི༷་ཚུ༷ལ་ཁྲི༷མས་ལ༷ས་གཞ༷ན་མེ༷ད་དེ། རང་འགྲེལ་ལས། ཚུལ་འདིས་དགེ་བ་བཅུའི་ལས་ཀྱི་ལམ་དེ་དག་མ་གཏོགས་པར་སོ་སོའི་སྐྱེ་བོ་དང༌། ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་ཀྱི་ཅི་རིགས་པར་མངོན་པར་མཐོ་བའི་འཁོར་བའི་བདེ་བ་དང༌། ངེས་པར་ལེགས་པ་བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་རང་བཞིན་ཐར་པའི་མཚན་ཉིད་ཅན་ཐོབ་པའི་ཐབས་གཞན་ཡོད་པ་མ་ཡིན་ནོ། །ཞེས་གསུངས་པའི་ཕྱིར་རོ། །མི་དགེ་བ་བཅུ་ནི་སྐབས་འདིར་རང་འགྲེལ་ལས། ཇི་སྐད་དུ་མི་དགེ་བ་བཅུའི་ལས་ཀྱི་ལམ་འདི་དག་བསྟེན་པ་དང༌། མང་དུ་བྱས་པའི་ཤས་ཆེ་བས་ནི་སེམས་ཅན་དམྱལ་བའི་རྒྱུར་འགྱུར་རོ། །འབྲིང་གིས་ནི་དུད་འགྲོའི་སྐྱེ་གནས་ཀྱི་རྒྱུར་འགྱུར་རོ། །ཆུང་ངུས་ནི་གཤིན་རྗེའི་འཇིག་རྟེན་གྱི་རྒྱུར་འགྱུར་རོ། །དེ་ལ་སྲོག་གཅོད་པས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང་རྣམ་པར་སྨིན་པ་གཉིས་མངོན་པར་སྒྲུབ་སྟེ། ཚེ་ཐུང་བ་དང༌། ནད་མང་བར་འགྱུར་རོ། །མ་བྱིན་པར་ལེན་པས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས་ལོངས་སྤྱོད་ཆུང་བ་དང༌། ཐུན་མོང་གི་ལོངས་སྤྱོད་དུ་འགྱུར་བའོ་ཞེས་བྱ་བའི་བར་དང༌། འདོད་པས་ལོག་པར་གཡེམ་པས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། འཁོར་གཡོག་བརྟན་དུ་མི་རུང་བ་དང༌། དགྲ་ཟླ་དང་བཅས་པའི་ཆུང་མར་འགྱུར་བའོ་ཞེས་བྱ་བའི་བར་དང༌། བརྫུན་དུ་སྨྲ་བས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། སྐུར་པ་མང་བ་དང༌། གཞན་གྱིས་བསླུ་བར་འགྱུར་བའོ་ཞེས་བྱ་བའི་བར་དང༌། ཕྲ་མས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། འཁོར་གཡོག་མི་འདུམ་པ་དང༌། འཁོར་གཡོག་ངན་པར་འགྱུར་རོ་ཞེས་བྱ་བའི་བར་དང༌།

ཚིག་རྩུབ་མོས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། ཡིད་དུ་མི་འོང་བ་ཐོས་པ་དང་འཐབ་མོའི་ཚིག་ཏུ་འགྱུར་བའོ་ཞེས་བྱ་བའི་བར་དང་ཚིག་འཁྱལ་པས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། གཟུང་བར་འོས་པའི་ཚིག་མ་ཡིན་པ་དང༌། མ་ངེས་པའི་སྤོབས་པར་འགྱུར་བའོ་ཞེས་བྱ་བའི་བར་དང༌། བརྣབ་སེམས་ཀྱིས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། ཆོག་མི་ཤེས་པ་དང༌། འདོད་པ་ཆེ་བར་འགྱུར་རོ་ཞེས་བྱ་བའི་བར་དང༌། གནོད་སེམས་ཀྱིས་ནི་སེམས་ཅན་དམྱལ་བར་ཁྲིད་དོ་ཞེས་བྱ་བ་ནས། ཕན་པ་མི་ཚོལ་བ་དང༌། གཞན་གྱིས་གནོད་པ་བྱས་པར་འགྱུར་རོ་ཞེས་བྱ་བའི་བར་དང༌། ལོག་པར་ལྟ་བས་ནི་སེམས་ཅན་དམྱལ་བར་ཁྲིད་དོ། །དུད་འགྲོའི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དོ། །

དེ་ནས་གལ་ཏེ་མི་རྣམས་ཀྱི་ནང་དུ་སྐྱེས་ན་ཡང༌། རྣམ་པར་སྨིན་པ་གཉིས་མངོན་པར་སྒྲུབ་སྟེ། ལྟ་བ་ངན་པར་ལྟུང་བ་དང༌། གཡོ་སྒྱུ་ཅན་དུ་འགྱུར་རོ། །དེ་ལྟར་མི་དགེ་བ་བཅུའི་ལས་ཀྱི་ལམ་འདི་དག་ནི་སྡུག་བསྔལ་གྱི་ཕུང་པོ་ཆེན་པོ་ཚད་མེད་པ་སྡུད་པར་འགྱུར་གྱིས། དགེ་བ་བཅུའི་ལས་ཀྱི་ལམ་ཡང་དག་པར་བླངས་པའི་རྒྱུས་ནི་ལྷ་དང་མིར་སྐྱེ་བ་ལ་སོགས་པ་སྲིད་པའི་རྩེ་མོའིབར་དུ་སྐྱེ་བ་ཡོད་པར་འགྱུར་རོ། །ཞེས་གསུངས་སོ། །

གསུམ་པ་ཚུལ་ཁྲིམས་ཀྱི་མི་མཐུན་ཕྱོགས་དང་མ་འདྲེས་པའི་དཔེས་བསྟན་པ་ནི།

རྩ་བར། ཇི་ལྟར་རྒྱ་མཚོ་རོ་དང་ལྷན་ཅིག་དང༌། །བཀྲ་ཤིས་སྣ་ནག་མ་དང་ལྷན་ཅིག་བཞིན། །དེ་ལྟར་ཚུལ་ཁྲིམས་དབང་བྱས་བདག་ཉིད་ཆེ། །དེ་འཆལ་བ་དང་ལྷན་ཅིག་གནས་མི་འདོད། །

ཅེས་གང་སེམས་བསྐྱེད་པ་གཉིས་པའི་བྱང་ཆུབ་སེམས་དཔའ་དེ་ནི། ཇི༷་ལྟ༷ར་ཏེ་དཔེར་ན་རྒྱ༷་མཚོ༷་ཆེན་པོ་ནི་ཀླུ་ གཙང ་སྦྲ་ཅན་རྣམས་གནས་པའི་མཐུས་རོ་གང་ཡིན་རླབས་ཀྱིས་ཕྱི་རོལ་ཏུ་འཕེན་པས་ན་རོ༷་ད༷ང་ལྷ༷ན་ཅི༷ག་ཏུ་མི་འགྲོགས་པ་ད༷ང༌། བཀྲ༷་ཤི༷ས་པའི་ཕུན་སུམ་ཚོགས་པ་དང༌།

སྣ༷་ན༷ག་མ༷་སྟེ་བཀྲ་མི་ཤེས་པ་ད༷ང་གཉིས་ལྷ༷ན་ཅི༷ག་མི་གནས་པ་བཞི༷ན་དེ༷་ལྟ༷ར་དུ་ཚུ༷ལ་ཁྲི༷མས་ཡོངས་སུ་དག་པའི་དབ༷ང་དུ་བྱ༷ས་པའི་བྱང་སེམས་བད༷ག་ཉི༷ད་ཆེ༷་བ་ས་གཉིས་པ་པ་དེ༷་ཚུལཁྲིམས་འཆ༷ལ་བ༷་ད༷ང་ལྷ༷ན་ཅི༷ག་ཏུ་གན༷ས་པར་མི༷་འདོ༷ད་པ་ཡིན་ནོ། །

བཞི་པ་ཚུལ་ཁྲིམས་ཀྱི་ཕར་ཕྱིན་གྱི་དབྱེ་བ་བསྟན་པ་ནི།

རྩ་བར། ཇི་སྐད་བཤད་པའི་ཚུལ་ཁྲིམས་ལ་ཕ་རོལ་ཏུ་ཕྱིན་པའི་རྣམ་པར་དབྱེ་བ་བཤད་པ་ནི། གང་གིས་གང་ཞིག་གང་ལ་སྤོང་བྱེད་པ། །གསུམ་དུ་དམིགས་པ་ཡོད་ན་ཚུལ་ཁྲིམས་དེ། །འཇིག་རྟེན་པ་ཡི་ཕ་རོལ་ཕྱིན་ཅེས་བཤད། །གསུམ་ལ་ཆགས་པས་སྟོང་དེ་འཇིག་རྟེན་འདས། །ཞེས་གང་ཟག་ག༷ང་གི༷ས་སྤང་བྱ་ག༷ང་ཞི༷ག་སེམས་ཅན་སོགས་ཡུལ་ག༷ང་ལ༷་སྤོ༷ང་བར་བྱེ༷ད་པ༷་ཡི་འཁོར་གསུ༷མ་དུ༷་བདེན་པར་དམི༷གས་པའི་བཅིངས་པ༷་ཡོ༷ད་ན༷་དེ་འདྲའི་ཚུ༷ལ་ཁྲི༷མས་དེ༷་ནི་འཇི༷ག་རྟེ༷ན་པ༷་ཡི༷་ཕ༷་རོ༷ལ་ཏུ་ཕྱི༷ན་པ་ཡིན་པར་གྱུར་ཅེ༷ས་མདོ་ལས་བཤ༷ད་པ་ལ། ཚུལ་ཁྲིམས་དེ་ཚུལ་ཁྲིམས་ཀྱི་འཁོར་གསུ༷མ་ལ༷་བདེན་པར་དམིགས་པའི་ཆ༷གས་པའི་ཞེན་ཡུལ་དུ་གྱུར་པ༷ས་སྟོ༷ང་པར་མངོན་སུམ་དུ་རྟོགས་པའི་ཟག་མེད་ཀྱི་ཤེས་རབ་ཀྱིས་ཟིན་ན་དེ༷་འཇི༷ག་རྟེ༷ན་ལས་འད༷ས་པའི་ཚུལ་ཁྲིམས་ཀྱི་ཕ་རོལ་ཏུཕྱིན་པ་ཡིན་ལ། དེས་ན་ཚུལ་ཁྲིམས་ཀྱི་ཕར་ཕྱིན་ལ་གཉིས་སུ་དབྱེ་བ་ཡོད་པའི་ཕྱིར་རོ། །

ལྔ་པ་སའི་ཡོན་ཏན་བརྗོད་པའི་སྒོ་ནས་མཇུག་བསྡུ་བ་ནི།

རྩ་བར། རྒྱལ་སྲས་ཟླ་བ་ལས་བྱུང་སྲིད་མིན་སྲིད་པ་ཡི། །དཔལ་གྱུར་དྲི་མ་དང་བྲལ་དྲི་མ་མེད་འདི་ཡང༌། །སྟོན་ཀའི་དུས་ཀྱི་ཟླ་བའི་འོད་ནི་ཇི་བཞིན་དུ། །འགྲོ་བའི་ཡིད་ཀྱི་གདུང་བ་སེལ་བར་བྱེད་པ་ཡིན། །ཞེས་ས་གཉིས་པ་དྲི་མ་མེད་པ་དེ་སྟོན་ཀའི་ཟླ་བའི་འོད་དང་འདྲ་ཚུལ་ནི། ས་གཉིས་པའི་རྒྱ༷ལ་སྲ༷ས་ཟླ༷་བ༷་ལྟ་བུ་ལ༷ས་བྱུ༷ང་བ་འདི་འཁོར་བའི་ཁོངས་སུ་མ་གཏོགས་པས་སྲི༷ད་པ་མི༷ན་ཡང་སྲི༷ད་པ༷་ཡི༷་དཔལ་དུ་གྱུར་བའི་ཡོན་ཏན་ཕུན་སུམ་ཚོགས་པ་ཐམས་ཅད་དེའི་རྗེས་སུ་འགྲོ་བ་དང༌། འཆལ་ཚུལ་གྱི་དྲི༷་མ༷་ད༷ང་བྲ༷ལ་བའི་དྲི༷་མ༷་མེ༷ད་པའི་ཚུལ་ཁྲིམས་ཀྱི་ཟླ་འོད་དང་ལྡན་པའི་ས་གཉིས་པ་དྲི་མ་མེད་པ་འདི༷་ཡང༌། སྟོ༷ན་ཀ༷འི་དུ༷ས་ཀྱི༷་ཟླ༷་བའི༷་འོ༷ད་ནི༷་དྲི་མ་དང་བྲལ་བས་སྐྱེ་བོའི་གདུང་བ་སེལ་བ་ཇི༷་ལྟ་བ་བཞི༷ན་དུ༷་སྲོག་གཅོད་སོགས་འཆལ་ཚུལ་གྱིས་བསྐྱེད་པའི་འགྲོ༷་བ༷འི་ཡི༷ད་ཀྱི༷་ཉོན་མོངས་པས་སྨད་པར་བྱས་པའི་གདུ༷ང་བ༷་སེ༷ལ་བ༷ར་བྱེ༷ད་པ༷་ཡི༷ན་པའོ། །བྱང་སེམས་ཀྱི་ཚུལ་ཁྲིམས་ཀྱི་ངོ་བོ་ནི། རང་འགྲེལ་ལས། དེ་ཡང་སྤོང་བ་བདུན་གྱི་མཚན་ཉིད་ཅན་ནོ། །ཞེས་དང༌། ཐེག་བསྡུས་ལས། བྱང་ཆུབ་སེམས་དཔའ་རྣམས་ཀྱིས་ཚུལ་ཁྲིམས་ནི་ལུས་དང་ངག་དང་ཡིད་ཀྱིའོ། །ཉན་ཐོས་རྣམས་ཀྱི་ནི་ལུས་དང་ངག་གིའོ། །དེ་ཉིད་ཀྱི་ཕྱིར་བྱང་ཆུབ་སེམས་དཔའ་རྣམས་སེམས་ཀྱི་ཡང་ལྟུང་བར་འགྱུར་གྱི། ཉན་ཐོས་རྣམས་ཀྱི་ནི་མ་ཡིན་ནོ། །ཞེས་གསུངས་པའི་ཕྱིར་རོ། །ཐེག་བསྡུས་ལས། གང་བྱང་ཆུབ་སེམས་དཔའ་ཐབས་ལ་མཁས་པའི་རྣམ་པ་དེ་ལྟ་བུས་སྲོག་གཅོད་པ་ལ་སོགས་པའི་ལས་རྣམ་པ་བཅུ་སྤྱོད་གང་གིས་ཁ་ན་མ་ཐོ་བར་མི་འགྱུར་ལ། བསོད་ནམས་ཚད་མེད་པ་ཡང་སྐྱེད་ཅིང༌། ཞེས་གསུངས་པའི་དོན་ནི། གཞན་ངོར་གནོད་སེམས་ཅན་གྱི་རྣམ་པར་བསྟན་པ་གདུལ་བྱ་འདུལ་བར་གནང་བ་ཡིན་གྱི་གནོད་སེམས་སོགས་གནང་བ་མ་ཡིན་ཟེར་དགོས་སམ་དཔྱད་པར་ཞུའོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱན་རིན་ཆེན་སྒྲོན་མེ་ཞེས་བྱ་བ་ལ༷ས་དོན་དམ་པའི་སེ༷མས་བསྐྱེ༷ད་པ༷་གཉི༷སཔའི་རྣམ་པར་བཤད་པ༷འོ༷།། །།