དང་པོར་སངས་རྒྱས་པའི་ཚུལ།
དང་པོ་ལ། དངོས་ཀྱི་དོན་དང༌། རྩོད་པ་སྤང་བ་དངགཉིས། དང་པོ་ནི། རྩ་བར། གང་ཕྱིར་ནམ་མཁའ་དྲི་མ་མེད་ལ་ཟླ་སྣང་གསལ་བར་འགྱུར་པའི་ཕྱིར། །སྔོན་ཚེ་སྟོབས་བཅུ་བསྐྱེད་པའི་ས་ལ་ཁྱོད་ཀྱིས་སླར་ཡང་འབད་གྱུར་ཅིང༌། །འོག་མིན་དུ་ནི་གང་གི་དོན་དུ་འབད་གྱུར་གོ་འཕང་མཆོག་ཞི་བ། །ཡོན་ཏན་མཐའ་དག་མཐར་ཐུག་མཚུངས་པ་མེད་དེ་ཁྱོད་ཀྱིས་བརྙེས། །ཞེས་རྒྱུ་མཚན་ག༷ང་གི་ཕྱི༷ར་ན་དཔེར་ན་ན༷མ་མཁ༷འ་དྲི༷་མ་མེ༷ད་པ་ལ༷་ཟླ༷་ཟེར་གྱི་འོད་ཀྱི་སྣ༷ང་བས་འགྲོ་བ་རྣམས་ཀྱི་ལུས་གཟུགས་གས༷ལ་བ༷ར་གྱུ༷ར་པ༷འི་ཕྱི༷ར་ན་དེ་བཞིན་དུ། ཁྱོད་ཀྱིས་སྔོ༷ན་ཚེ༷་སངས་རྒྱས་ཀྱི་སའི་སྟོ༷བས་བཅུ༷་དངོས་སུ་སྐྱེ༷ད་པར་བྱེད་པ༷འི་ས༷་བཅུ་པ་ཐོབ་པའི་ཚེ་ལ༷། རང་གིས་སངས་རྒྱས་ཀྱི་ཆོས་བརྙེས་ནུས་པར་མཁྱེན་ནས་ཁྱོ༷ད་ཀྱི༷ས་སླ༷ར་ཡ༷ང་སངས་རྒྱས་ཀྱི་ཆོས་རྣམས་ཐོབ་པའི་ཕྱིར་དུ་ས་བཅུ་པ་ཆོས་ཀྱི་སྤྲིན་གྱི་ཚོགས་གཉིས་བསགས་པ་ལ་འབ༷ད་པར་གྱུ༷ར་པའི་འབྲས་བུ་མཐར་ཐུག་པ་དེ་ཐོབ་ཅི༷ང་བསལ་བར་མངོན་དུ་གྱུར་པའི་ཕྱིར་རོ། །སངས་རྒྱས་བཅོམ་ལྡན་འདས་ཆོས་ཅན། སྔོན་སློབ་ལམ་དུ་འོ༷ག་མི༷ན་དུ༷་ནི༷་སྟེ་འོག་མིན་གྱི་གནས་སུ་འབྲས་བུ་ག༷ང་གི༷་སྟེ་འབྲས་བུ་གང་ཐོབ་པར་བྱ་བའི་དོ༷ན་དུ༷་འབ༷ད་རྩོལ་མཛད་པར་གྱུ༷ར་པའི་གོ༷་འཕ༷ང་མཆོ༷ག་ཞི༷་བ༷། ས་ལམ་གྱི་ཡོ༷ན་ཏ༷ན་མ་ལུས་མཐ༷འ་ད༷ག་གི་མཐ༷ར་ཐུ༷ག་པ་མཚུ༷ངས་པ༷་མེ༷ད་པ་ཡི་བླ་ན་མེད་པའི་ཡེ་ཤེས་དེ༷་ནི་ཁྱོ༷ད་ཀྱི༷ས་བརྙེ༷ས་པ་ཡིན་ནོ། ། ཚིགས་རྐང་གཉིས་པ་འདི་པ་ཚབ་འགྱུར་ལ། སྔོན་ཚེ་སྟོབས་བཅུ་སོགས་ལ། ནག་ཚོའི་འགྱུར་ལས། སླར་ཡང་སྟོབས་བཅུ་བསྐྱེད་པའི་སྟོན་གྱི་ས་དེར་འབད་པ་མཛད་གྱུར་པ། །ཞེས་འབྱུང་བས་འགྱུར་ཅུང་མི་འདྲའོ། །རྩ་བར། ཇི་ལྟར་སྣོད་ཀྱི་དབྱེ་བས་མཁའ་ལ་དབྱེ་བ་མེད་དེ་ལྟར། །དངོས་བྱས་དབྱེ་བ་འགའ་ཡང་དེ་ཉིད་ལ་མེད་དེ་ཡི་ཕྱིར། །རོ་མཉམ་ཉིད་དུ་ཡང་དག་ཐུགས་སུ་ཆུད་པར་མཛད་གྱུར་ན། །མཁྱེན་བཟང་ཁྱོད་ཀྱིས་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ཅེས་ཇི༷་ལྟ༷ར་ཏེ་དཔེར་ན་བུམ་པ་དང་མཁར་གཞོང་ལ་སོགས་པའི་སྣོ༷ད་ཀྱི༷་དབྱེ༷་བ་མི་འདྲ་བ་དུ་མ་ཡོད་ཀྱང༌། སྣོད་ཀྱི་དབྱེ་བ་མི་འདྲ་བ༷ས་སྣོད་རྣམས་ཀྱི་ནང་གི་ནམ་མཁ༷འ་ལ༷་ནི། ཐོགས་རེག་བཀག་ཙམ་དུ་གཅིག་པ་ལས་མི་འདྲ་བའི་དབྱེ༷་བ༷་མེ༷ད་པ་དེ༷་ལྟ༷ར་དུ། སྟོང་གཞི་གཟུགས་དང་ཚོར་བ་ལ་སོགས་པ་ལ་ནི། དངོས་པོ་སྟེ་རང་གི་རྒྱུ་རྐྱེན་གྱིས་མི་འདྲ་བར་བྱས་པའི་དབྱེ་བ་མི་འདྲ་བ་དུ་མ་ཡོད་ཀྱང༌། དངོ༷ས་པོས་བྱ༷ས་པ་སྟེ་རྒྱུ་མི་འདྲ་བར་བསྐྱེད་པའི་མི་འདྲ་དབྱེ༷་བ༷་འག༷འ་ཡ༷ང་དེ་དག་གི་ཆོས་ཉིད་དེ༷་ཁོ་ན་ཉི༷ད་ལ༷་ནི། མེ༷ད་དེ༷་ཡི༷་ཕྱི༷ར་ན་ཆོས་ཐམས་ཅད་ཀྱི་དེ་ཁོ་ན་ཉི༷ད་ནི་རོ་མཉམ་ཡིན་ལ། དེ་འདྲའི་རོ༷་མཉ༷མ་པ་ཉི༷ད་དུ༷་སྟེ་རོ་མཉམ་དེ་ཡང་ཁྱོད་ཀྱིས་མཁྱེན་པའི་སྐད་ཅིག་གཅིག་གིས་ཡ༷ང་ད༷ག་པར་ཐུ༷གས་སུ༷་ཆུ༷ད་པ༷ར་མཛ༷ད་པར་གྱུ༷ར་པ་ཡིན་པས་ན༷། མཁྱེ༷ན་པ་བཟ༷ང་པོ་ཅན་ཁྱོ༷ད་ཀྱི༷ས་སྐ༷ད་ཅི༷ག་གཅིག་གི༷ས་ནི༷་ཤེ༷ས་བྱ༷་མ་ལུས་པ་ཐམསཅད་ཐུ༷གས་སུ༷་ཆུ༷ད་པའི་ཡེ་ཤེས་བརྙེས་པ་ཡིན་པའི་ཕྱིར་རོ། །
གཉིས་པ་རྩོད་པ་སྤང་པ་ལ་གཉིས།
ཕྱོགས་སྔ་མ་འགོད་པ་དང༌། ལུགས་དེ་དགག་པ་དངགཉིས། དང་པོ་ནི། རྩ་བར། གང་ཚེ་ཞི་བ་དེ་ཉིད་ཡིན་ན་དེ་ལ་བློ་གྲོས་འཇུག་མི་འགྱུར། །བློམ་ཞུགས་པར་ཤེས་བྱའི་ཡུལ་ཅན་ངེས་པར་རིགས་པའང་མ་ཡིན་ལ། །ཀུན་ནས་ཤེས་མེད་པནི་ཤེས་པར་ཇི་ལྟར་འགྱུར་ཏེ་འགལ་བར་འགྱུར། །མཁྱེན་པོ་མེད་པར་ཁྱེད་ཀྱིས་གཞན་ལ་འདིལྟའོ་ཞེས་སུ་ཞིག་སྟོན། །ཞེས་ཁོ་ན་རེ། ཁྱེད་དབུ་མ་པས་དེ་ཁོ་ན་ཉིད་འཇོག་པ་ག༷ང་གི་ཚེ༷་རང་བཞིན་གྱིས་སྐྱེ་བ་ཞི༷་བ༷་དེ་དེ༷་ཁོ་ན་ཉི༷ད་ཡི༷ན་པར་འཇོག་ན༷་ནི། དེ་ཁོ་ན་ཉིད་དེ༷་ལ༷་བློ༷་གྲོ༷ས་ཏེ་ཤེས་རབ་འཇུ༷ག་པར་མི༷་འགྱུ༷ར་བར་འགྱུར། ཡུལ་ཅན་གྱི་བློ་དེ་ལ་ཡུལ་དེའི་རྣམ་པ་མ་ཤར་ན་བློ་དེ་ཡུལ་དེ་ལ་མི་འཇུག་པར་འགྱུར་ལ། ཡུལ་ཅན་གྱི་བློ༷་དེ་ཡུལ་དེ་ལ་མ༷་ཞུ༷གས་པ༷ར་ནི་ཤེ༷ས་བྱ༷འི་ཡུ༷ལ་ཅ༷ན་དེ་རང་འཛིན་པའི་བློ་དེས་ངེ༷ས་པའམ་རྟོགས་པ༷ར་རི༷གས་པ༷འ༷ང་མ༷་ཡི༷ན་ལ༷། བློས་ཤེས་པ་མ་ཡིན་པ་ནི། དེ་ཁོ་ན་ཉིད་བློས་ཤེས་སོ་ཞེས་ཇི་ལྟར་འཇོག་རིགས་ཏེ་མི་རིགས་པར་ཐལ། ཡུལགང་ཡིན་ཀྱང་ཡུལ་དེ་རང་འཛིན་པའི་བློས་ཀུ༷ན་ན༷ས་ཤེ༷ས་པ་སྟེ་ཤེས་རྒྱུ་མེ༷ད་པ༷་དེ་ནི༷། བློས་ཤེ༷སཔའམ་རྟོགས་པ་ནི་ཡིན་པ༷ར་ཇི༷་ལྟ༷ར་འགྱུ༷ར་ཏེ༷་མི་འགྱུར་ཏེ། བློས་ཤེས་རྒྱུ་མེད་པ་དེ་བློས་ཤེས་པཡིན་པ་ནི་འག༷ལ་བ༷ར་འགྱུ༷ར་བའི་ཕྱིར་རོ། །སངས་རྒྱས་རྣམས་ནི་དེ་ཁོ་ན་ཉིད་ལ་གཉིས་སྣང་ནུབནས་རྟག་ཏུ་ཞུགས་པ་ཡིན་ན། དེ་ཁོ་ན་ཉིད་རྟོགས་པའི་ཀུན་སློང་དང་དེ་ཁོ་ན་ཉིད་སྟོན་པའི་ཀུན་སློང་གི་རྟོག་པ་མེད་ལ། དེ་མེད་ན་དེ་ཁོ་ན་ཉིད་སྟོན་པའི་གང་ཟག་ཀྱང་མེད་པར་འགྱུར་ལ། དེ་མེད་ན་དེ་ཁོ་ན་ཉིད་མཁྱེ༷ན་པ་པོ༷་སྟེ་སྟོན་པ་པོ་མེ༷ད་པ༷ར་ཁྱོ༷ད་ཀྱི༷ས་གདུལ་བྱ་གཞ༷ན་ལ༷་དེ་ཁོ་ན་ཉིད་ནི་འདི༷་ལྟ༷་བུ༷འོ༷་ཞི༷ས་སུ༷་ཞི༷ག་གིས་སྟོ༷ན་པར་བྱེད་དེ་སྟོན་པ་པོ་མེད་ལ། དེ་མེད་ན་གཞན་གྱིས་བསྟན་པའི་ངག་ལས་གདུལ་བྱས་དེ་ཁོ་ན་ཉིད་རྟོགས་དགོས་པ་ཡིན་གྱི། དེ་ལས་གཞན་དུ་རྟོགསཚུལ་མེད་པས་དེ་ཁོ་ན་ཉིད་རྟོགས་མཁན་མེད་པར་འགྱུར་རོ་ཞེ་ན།
གཉིས་པ་ལུགས་དེ་དགག་པ་ལ་གཉིས།
དེ་ཁོ་ན་ཉིད་མི་འཐད་པའི་རྩོད་པ་སྤང་བ་དང༌། མཁྱེན་པ་པོ་མི་འཐད་པའི་རྩོད་པ་སྤང་བ་དང་གཉིས། དང་པོ་ནི། རྩ་བར། གང་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། །དེ་ཚེ་དེ་རྣམ་བསྟེན་ལས་དེ་ཡིས་དེ་ཉིད་རྟོགས་པ་ལྟ་བུ་སྟེ། །ཇི་ལྟར་སེམས་ནི་གང་གི་རྣམ་པ་ཅན་དུ་འགྱུར་བ་དེ་ཡིས་ཡུལ། །དེ་ཡོངས་ཤེས་པ་དེ་བཞིན་ཐ་སྙད་ཉེ་བར་བརྟེན་ནས་རིག་པ་ཡིན། །ཞེས་ཁྱོད་ཀྱི་རྩོད་པ་དེའི་སྐྱོན་མེད་དེ། དེ་ཁོ་ན་ཉིད་ནི་རང་བཞིན་གྱིས་གྲུབ་པས་སྟོང་པ་ཙམ་ཡིན་ཀྱང་ཐ་སྙད་དུ་བློས་ཤེས་པར་བྱར་ཡོད་པའི་ཕྱིར། དེར་ཐལ། ག༷ང་གི་ཚེ༷་ཆོས་རྣམས་རང་བཞིན་གྱིས་སྐྱེ༷༷་བ་མེ༷ད་པ་ནི་ཡུལ་དེ༷་ཁོ་ན་ཉི༷ད་ཡི༷ན་ཞི༷ང་དེའི་ཡུལ་ཅན་གྱི་བློ༷༷་ཡ༷ང་རང་བཞིན་གྱིས་སྐྱེ༷་བ༷་ད༷ང་བྲ༷ལ་བ༷་སྟེ་སྐྱེ་བ་མེད་པ་དེའི་རྣམ་པ་ཅན་དུ་སྐྱེས་ནས་དེ་གཉིས་ཆུ་ལ་ཆུ་བཞག་དུ་སོང་བ་དེ༷་ཡི་ཚེ༷། ཡུལ་དེ༷་ཡི་རྣ༷མ་པ་བསྟེ༷ན་པསྟེ་རྣམ་པ་འཛིན་པ་ཉིད་ལ༷ས་སྟེ་དེ་བཟུང་བ་ན། ཡུལ་ཅན་གྱི་བློ་དེ༷་ཡི༷ས་དེ༷་ཁོ་ན་ཉི༷ད་རྟོ༷གས་པ༷ལྟ༷་བུ༷་སྟེ༷། ཡང་ཡིན་ཏེ་ཡིན་པར་འཇོག་པའཽ། །འདིར། དེ་ཚེ་དེ་རྣམས་བསྟེན་ལས་དེ་ཡིས་དེ་ཉིདརྟོགས་པ་ལྟ་བུ་སྟེ། ཞེས་པ་ལ་ནག་ཚོའི་འགྱུར་ལས། དེ་ཚེ་དེའི་དེ་ཉིད་རྟོགས་པ་དེའི་རྣམ་པ་འཛིན་པ་ཉིད་ཡིན་ཏེ། ཞེས་པ་ལྟར་ལྟ་བུ་མེད་པ་དག་པར་གསུངས་པ་ཡོད་དོ། །ཇི༷་ལྟ༷ར་དེ་དཔེརན་སེ༷མས་ནི༷་སྔོན་པོ་ལ་སོགས་པའི་ཡུལ་ག༷ང་གི༷་རྣ༷མ་པ༷་ཅ༷ན་དུ༷་སྐྱེ་བར་འགྱུ༷ར་བ༷་ན། སེམས་ཅན་དེཡི༷ས་ཡུ༷ལ་སྔོན་པོ་ལ་སོགས་པའི་ཡུལ་གང་ཡིན་པ་དེ༷་ཡོ༷ངས་ཤེ༷ས་སོ་ཞེས་འཇིག་རྟེན་ན་བརྗོད་པ༷་དེ༷་བཞི༷ན་དུ། དེ་ཁོ་ན་ཉིད་རྟོགས་པའི་ཡུལ་ཅན་གྱི་ཤེས་པ་དེ་ཡུལ་དེ་ཁོ་ན་ཉིད་ཅི་འདྲ་བ་དེ་འདྲ་བའི་རྣམ་པ་ཅན་དུ་སྐྱེ་བ་ན། ཐ༷་སྙ༷ད་ཙམ་དུ་ཉེ༷་བ༷ར་བརྟེ༷ན་ན༷ས་དེ་ཁོ་ན་ཉིད་རི༷ག་པ་སྟེརྟོགས་པ༷་ཡི༷ན་པར་འཇོག་པ་བཞིན་ནོ། །
གཉིས་པ་མཁྱེན་པ་པོ་མི་འཐད་པའི་རྩོད་པ་སྤང་བ་ལ།
དངོས་ཀྱི་དོན་དང༌། དེའི་འཐད་པ་དངོས་བསྟན་པ་དང་གཉིས། དང་པོ་ནི། རྩ་བར། དེ་ཡི་ ལོངས་སྤྱོད་རྫོགས་སྐུ་བསོད་ནམས་ཀྱིས། །ཟིན་དང་སྤྲུལ་པ 
་མཁའ་གཞན་ལས་དེའི་མཐུས། །སྒྲ་གང་ཆོས་ཀྱི་དེ་ཉིད་སྟོན་འབྱུང་བ། །དེ་ལས་འཇིག་རྟེན་གྱིས་ཀྱང་དེ་ཉིད་རིག །ཅེས་ཆོས་སྐུ་དེ་བཞིན་ཉིད་མངོན་སུམ་དུ་མཛད་པའིསངས་རྒྱས་དེ༷་ཡི༷་གཟུགས་ཀྱི་སྐུ་ནི། ཐེག་ཆེན་གྱི་ཆོས་ཀྱི་ལོངས་སྤྱོད་ཀྱི་རྒྱུར་གྱུར་པའི་ལོ༷ངསསྤྱོ༷ད་རྫོ༷གས་པའི་སྐུ༷། བསོ༷ད་ན༷མས་ཀྱི༷ས་ཟི༷ན་པ་སྟེ་བསོད་ནམས་ཀྱི་ཚོགས་བརྒྱ་ཕྲག་དུ་མས་མངོན་པར་བསྐྲུན་པ་ཡིན་པས་ན། བསོད་ནམས་བརྒྱས་བསྐྱེད་པའི་ལོངས་སྐུ་ལས་ཆོས་ཉིད་སྟོན་པའི་སྒྲ་འབྱུང་བ་དང༌། སྤྲུ༷ལ་པ༷་དང༌། ནམ་མཁ༷འ་དང༌། གཞ༷ན་རྩ་དང་ཤིང་དང་རྩིག་པ་དངབྲག་ལ་སོགས་པ་སེམས་མེད་པ་ལ༷ས་ཀྱང་ལོངས་སྐུ་དེའི༷་བྱིན་རླབས་ཀྱིས་མཐུ༷ས་ཆོས་ཀྱི་དེ་ཁོ་ན་ཉིད་སྟོན་པའི་སྒྲ༷་ག༷ང་ཞིག་འབྱུང་བ་དེ་ལས་ཀྱང་ཆོ༷ས་རྣམས་ཀྱི༷་དེ༷་ཁོ་ན་ཉི༷ད་སྟོ༷ན་པའི་སྒྲ་འབྱུ༷ང་བ༷་ཡིན་ལ། དེ་འདྲའི་ཆོས་སྟོན་པའི་སྒྲ་དེ༷་ལ༷ས་འཇི༷ག་རྟེ༷ན་གྱི་གདུལ་བྱ་སྣོད་དུ་གྱུར་པ་རྣམསཀྱི༷ས་ཀྱ༷ང་དེ༷་ཁོ་ན་ཉི༷ད་རི༷ག་པ་སྟེ་རྟོགས་པར་འགྱུར་བས་ན་དེ་ཁོ་ན་ཉིད་རྟོགས་མཁན་མེད་པའིསྐྱོན་མེད་དོ། །
གཉིས་པ་དེའི་འཐད་པ་དངོས་བསྟན་པ་ནི།
རྩ་བར། ཇི་ལྟར་རྫ་མཁན་སྟོབས་ཆེན་ལྡན་པས་འདིར། །ཡུན་རིང་འབད་པས་ཆེས་བསྐོར་འཁོར་ལོ་ནི། །དེ་རྩོལ་ད་ལྟ་སྐྱེས་པ་མེད་བཞིན་དུའང༌། །འཁོར་ཞིང་བུམ་པ་ལ་སོགས་རྒྱུར་མཐོང་ལྟར། །དེ་བཞིན་ད་ལྟ་སྐྱེས་རྩོལ་མེད་བཞིན་དུ། །ཆོས་ཀྱི་བདག་ཅན་སྐུ་ཉིད་ལ་བཞུགས་དེའི། །འཇུག་པ་སྐྱེ་བོའི་དགེ་དང་སྨོན་ལམ་གྱི། །ཁྱད་པར་གྱིས་འཕངས་ལས་ཆེས་བསམ་མི་ཁྱབ། །ཅེས་སངས་རྒྱས་རྣམས་དུས་རྟག་ཏུ་དེ་ཁོ་ན་ཉིད་ལ་རོ་གཅིག་ཏུ་མཉམ་པར་བཞག་པ་ཡིན་པས་ཆོས་སྟོན་འདོད་ཀྱི་རྟོག་པ་མེད་ཀྱང་ཆོས་སྟོན་པ་འཐད་དེ། ཇི༷་ལྟ༷ར་ཏེ་དཔེར་ན་རྫ༷་མཁ༷ན་སྟོ༷བས་ཆེ༷ན་པོ་དང་ལྡ༷ན་པ༷ས་འཇིག་རྟེན་འདི༷ར། ཡུ༷ན་རི༷ང་བོར་འབ༷ད་པ༷ས་ཆེ༷ས་སམ་འབད་པ་ཆེན་པོས་བསྐོ༷ར་བའི་འཁོ༷ར་ལོ༷་ནི༷། རྫ་མཁན་དེ༷་ཡི་འཁོར་ལོ་བསྐོར་བའི་འབད་རྩོ༷ལ་དེ་ད༷་ལྟ༷་ལ་སྐྱེ༷ས་པ༷་སྟེ་ད་ལྟ་འབད་རྩོལ་མེ༷ད་བཞི༷ན་དུ༷འ༷ང༌། འཁོར་ལོ་དེ་འཁོ༷ར་ཞི༷ང་བུ༷མ་པ༷་ལ༷་སོ༷གས་པའི་རྒྱུ༷ར་མཐོ༷ང་བ་ཇི་ལྟ༷ར་དེ༷་བཞི༷ན་དུ་ད༷་ལྟ༷་ལ་སྐྱེ༷ས་བུའི་རྩོལ༷་བ་མེད༷་བཞི༷ན་དུ༷་ཆོ༷ས་སྐུ་དེ་བཞིན་ཉིད་ཀྱི༷་བད༷ག་ཉིད་ཅ༷ན་གྱི་སྐུ༷་ཉི༷ད་ལ༷་ཐུགས་ཆུ་ལ་ཆུ་བཞག་པ་ལྟར་དབྱེར་མེད་རོ་གཅིག་ཏུ་ཞུ༷གས་པའི་སངས་རྒྱས་དེ༷འི་ཆོས་སྟོན་པའི་ཕྲིན་ལས་འཇུ༷ག་པ༷་ནི། གདུལ་བྱའི་སྐྱེ༷་བོ༷འི་སངས་རྒྱས་ལས་ཆོས་ཐོས་པར་འགྱུར་བྱེད་ཀྱི་དགེ༷་བའི་ལས་ཡོངས་སུ་བསགས་པ་ཡོངས་སུ་སྨིན་པ་ད༷ང༌། སངས་རྒྱས་ཀྱིས་ཀྱང་སྔོན་བྱང་སེམས་ཀྱི་སྐབས་སུ་ཐུགས་ཆོས་ཀྱི་དབྱིངས་ལས་གཡོ་བ་མེད་བཞིན་དུ། དུས་ལས་མི་འདའ་བར་གདུལ་བྱ་ལ་ཆོས་སྟོན་པའི་སྨོན་ལམ་བཏབ་པའི་སྨོ༷ན་ལ༷མ་གྱི༷་ཁྱ༷ད་པ༷ར་ཅན་གྱི༷ས་འཕ༷ངས་པའམ་སྨོན་ལམ་ཁྱད་པར་ཅན་དེའི་ཤུགས་ལ༷ས་རྟོག་པ་མེད་པར་ཆོས་སྟོན་པ་འབྱུང་བ་ཡིན་པས་ན། རྟོག་པ་མེད་པར་ཆོས་སྟོན་པ་འདི་ནི་ཆེ༷ས་ཤིན་ཏུ་བས༷མ་གྱིས་མི༷་ཁྱ༷བ་པ་ཡིན་པའི་ཕྱིར་རོ། །གང་ཕྱིར་ནམ་མཁའ་སོགས་ཤོ་ལོ་ཀ་གཉིས་ཀྱིས་ཆོས་སྐུ་མངོན་དུ་བྱསཚུལ་བསྟན་ནས། གང་ཚེ་ཞི་བ་སོགས་ཀྱིས་ཆོས་སྐུ་དེ་བཞིན་ཉིད་དེ་རྣམ་མཁྱེན་གྱིས་གཟིགསཚུལ་ལ་རྩོད་པ་དང་ལན་བསྟན་པ་ཡིན་ནོ། །