བཞི་བ་རྣལ་འབྱོར་མངོན་སུམ་གྱི་མཐའ་དཔྱད་པ།

བཞི་བ་རྣལ་འབྱོར་མངོན་སུམ་གྱི་མཐའ་དཔྱད་པ་ལ།

ཚད་མ་མདོ་ལས། རྣལ་འབྱོར་རྣམས་ཀྱི་བླ་མས་བསྟན། །མ་འདྲེས་པ་ཡི་དོན་ཙམ་མཐོང༌། །ཞེས་དང༌། མདོའི་རང་འགྲེལ་ལས། རྣལ་འབྱོར་བ་རྣམས་ཀྱིས་ཀྱང་ལུང་ལས་རྣམ་པར་རྟོག་པ་དང་མ་འདྲེས་པའི་དོན་ཙམ་མཐོང་བ་ནི་མངོན་སུམ་མོ། །ཞེས་དང༌། རྣམ་འགྲེལ་ལས། རྣལ་འབྱོར་ཤེས་པ་སྔར་བཤད་པ། །དེ་དག་གི་དེ་གོམས་བྱུང་ཡིན། །ཞེས་དང༌། འགྲེལ་བཤད་རིན་ཆེན་འཕྲེང་བ་༣༡༡ལས། རྣལ་འབྱོར་པའི་ཤེས་པ་ཐམས་ཅད་མངོན་སུམ་མིན་གྱི། སྔར་ལེའུ་གཉིས་པར་བཤད་པའི་བདེན་བཞི་དེ་དག་གི་རྣམ་པ་བཅུ་དྲུག་མངོན་སུམ་གྱིས་མཐོང་བའི་བློ་དེ་ཆོས་ཅན། རྣལ་འབྱོར་མངོན་སུམ་ཡིན་ཏེ། ཡང་དག་པའི་དོན་བསྒོམས་པ་ལས་བྱུང་བའི་འཕགས་པའི་རྟོག་བྲལ་མ་འཁྲུལ་བའི་ཤེས་པ་ཡིན་པའིཕྱིར། ཞེས་གསུངས་པའི་དོན། བློ་རིག་ལས། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་བའི་ཞི་ལྷག་ཟུང་འབྲེལ་གི་ཏིང་ངེ་འཛིན་ལ་བརྟེན་ནས་རང་ཡུལ་ཡང་དག་པའི་དོནལ་རྟོག་བྲལ་མ་འཁྲུལ་བའི་མཁྱེན་པ། རྣལ་འབྱོར་མངོན་སུམ་གི་མཚན་ཉིད། ཅེས་གསུངས་པ་ལ། ཐེག་ཆེན་སྦྱོར་ལམ་མཉམ་བཞག་ཡེ་ཤེས་ཆོས་ཅན། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་བའི་ཞི་ལྷག་ཟུང་འབྲེལ་གི་ཏིང་ངེ་འཛིན་ལ་བརྟེན་ནས་རང་ཡུལ་ཡང་དག་པའི་དོན་ལ་རྟོག་བྲལ་མ་འཁྲུལ་བའི་མཁྱེན་པ་ཡིན་པར་ཐལ། རྣལ་འབྱོར་མངོན་སུམ་ཡིན་པའི་ཕྱིར་ཏེ། ཕར་ཕྱིན་ཉ་ཊིཀ་ལས། ཡེ་ཤེས་ཆོས་ཉིད་གསལ་སྣང་ཅན་ཡིན་པས་རྣལ་འབྱོར་མངོན་སུམ་དུ་ཁས་བླང་དགོས་ཏེ། ཞེས་གསུངས་པའི་ཕྱིར། འདོད་ན། ཐེག་ཆེན་སྦྱོར་ལམ་མཉམ་བཞག་ཡེ་ཤེས་ཆོས་ཅན། རང་གི་ཐུན་མོང་མ་ཡིན་པའི་བདག་རྐྱེན་དུ་གྱུར་བའི་ཞི་ལྷག་ཟུང་འབྲེལ་གྱི་ཏིང་ངེ་འཛིན་ལ་བརྟེན་ནས་རང་ཡུལ་ཡང་དག་པའི་དོན་ལ་རྟོག་བྲལ་མ་འཁྲུལ་བའི་མཁྱེན་པ་མ་ཡིན་པར་ཐལ། རྟོག་བྲལ་མ་འཁྲུལབའི་མཁྱེན་པ་མ་ཡིན་པའི་ཕྱིར་ཏེ། རྟོག་བྲལ་མ་ཡིན་པའི་ཕྱིར། དེར་ཐལ། རྟོག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རང་ཡུལ་ཆོས་ཉིད་བདེན་པ་ལ་རྟོག་མེད་ཡིན་པར་ཐལ། ཆོས་ཉིད་ལ་རྩེ་གཅིག་པའི་མཉམ་བཞག་གང་ཞིག རྟོག་མེད་ཡིན་པའི་ཕྱིར། འདོད་ན། དེ་ཆོས་ཅན། རང་ཡུལ་ཆོས་ཉིད་སྒྲ་སྤྱི་དོན་སྤྱི་བྲལ་བའི་སྒོ་ནས་རྟོགས་པར་ཐལ། དེ་རྟོགས་པའི་རྟོག་མེད་ཡིན་པའི་ཕྱིར། འདོད་ན། དེ་ཆོས་ཅན། རང་ཡུལ་ཆོས་ཉིད་ཀྱི་བདེན་པ་མངོན་སུམ་དུ་རྟོགས་པར་ཐལ། རང་ཡུལ་ཆོས་ཉིད་སྒྲ་སྤྱི་དོན་སྤྱི་བྲལ་བའི་སྒོ་ནས་རྟོགས་པའི་ཕྱིར། རྟགས་ཁས། འདོད་མི་ནུས་ཏེ། དེས་རྗེས་སུ་མཐོང་ལམ་ཐོབ་པ་དེའི་ཚེ་ཆོས་ཉིད་མངོན་སུམ་དུ་གསར་དུ་རྟོགས་པ་ཡིན་པའི་ཕྱིར་ཏེ། མཛོད་ལས། མ་མཐོང་མཐོང་ཕྱིར་མཐོང་བའི་ལམ། །ཞེས་གསུངས་པའི་ཕྱིར། ཡང་གོང་དུ་དེ་རྣལ་འབྱོར་མངོན་སུམ་ཡིན་པར་འདོད་མི་རིགས་ཏེ། སྔོན་མེད་ལེགས་བཤད་ལས། རྣལ་འབྱོར་མངོན་སུམ་གྱིས་རྟོགས་པ་ནི་མ་ཡིན་པ་དང། ཞེས་དང༌། རྣལ་འབྱོར་མངོན་སུམ་གྱི་མཚན་ཉིད་གཏན་ཚིགས་དོན་བསྡུས་ལས། སྒོམ་བྱུང་འཕགས་པའི་ཤེས་པ་རྟོག་བྲལ་མ་འཁྲུལ་བ་ཞེས་པའོ། །ཉན་ཐོས་འཕགས་པའི་རྒྱུད་ཀྱི་སྒོམ་བྱུང་ཤེས་པ་རྟོག་བྲལ་མ་འཁྲུལ་བ་ཞེས་སོགསའདོན་པ་བསྒྱུར་རོ། །ཞེས་སོགས་དང་འགལ་བར་འགྱུར་བར་སྣང་བས་བརྟག་པར་བྱའོ། །ཡང་རྣལ་འབྱོར་མངོན་སུམ་ཡིན་ན་རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིགཔ་ཐམས་ཅད་མངོན་སུམ་དུ་ངེས་པས་ཁྱབ་པར་ཐལ། རྣམ་འགྲེལ་ལས། བློ་གྲོས་ཆེན་པོ་མཐོང་ཉིད་ནས། །རྣམ་པ་ཐམས་ཅད་ངེས་པར་བྱེད། །ཅེས་གསུངས་པའི་ཕྱིར། འདོད་ན། ཉན་རང་དགྲ་བཅོམ་པའི་རྒྱུད་ཀྱི་ཀུན་གཞིའི་རྣམ་ཤེས་མི་རྟག་པ་མངོན་སུམ་དུ་རྟོགས་པའིརྣལ་འབྱོར་མངོན་སུམ་ཆོས་ཅན། རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་ངེས་པར་ཐལ། རྣལ་འབྱོར་མངོན་སུམ་ཡིན་པའི་ཕྱིར། ཁྱབ་པ་ཁས། འདོད་ན། ཉན་རང་དགྲ་བཅོམ་པའི་རྒྱུད་ཀྱི་ཀུན་གཞི་རྣམ་ཤེས་མི་རྟག་པ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཆོས་ཅན། ཀུན་གཞི་རྣམ་ཤེས་ངེས་པར་ཐལ། ཀུན་གཞི་རྣམ་ཤེས་མི་རྟག་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་ངེས་པ་གང་ཞིག ཀུན་གཞིའི་རྣམ་ཤེས་དེ་ཀུན་གཞིའི་རྣམ་ཤེས་མི་རྟག་པ་དང་གྲུབ་བདེ་དབྱེར་མེད་ཀྱི་རྫས་གཅིག་པའི་ཆོས་ཡིན་པའི་ཕྱིར། ཁྱབ་པ་ཁས། འདོད་ན། ཉན་རང་དགྲ་བཅོམ་པ་ཆོས་ཅན། ཁྱོད་ཀྱིས་ཀུན་གཞིའི་རྣམ་ཤེས་རྟོགས་པར་ཐལ། ཁྱོད་ཀྱི་རྒྱུད་ན་ཀུན་གཞིའི་རྣམ་ཤེས་རྟོགས་པའི་བློ་ཡོད་པའི་ཕྱིར། རྟགས་ཁས། འདོད་ན། ཉན་རང་དགྲ་བཅོམ་པ་ཆོས་ཅན། ཁྱོད་ལ་ཀུན་གཞིའི་རྣམ་ཤེས་བསྟན་རིགས་པར་ཐལ། ཁྱོད་ཀྱིས་ཀུན་གཞིའི་རྣམ་ཤེས་རྟོགས་པའི་ཕྱིར། རྟགས་ཁས། འདོད་མི་ནུས་ཏེ། མདོ་སྡེ་དགོངས་པ་ངེས་འགྲེལ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོ་རྒྱུན་བཞིན་འབབ། །བདག་ཏུ་རྟོགས་པར་འགྱུར་ན་མི་རུང་ཞེས། །འདི་ནི་བྱིས་པ་རྣམས་ལ་ངས་མ་བསྟན། །ཞེས་གསུངས་པའི་ཕྱིར། ཁྱབ་སྟེ། རྟོགས་ན་དེ་ལ་བསྟན་ན་མི་རིགས་པའི་རྒྱུ་མཚན་མེད་པའི་ཕྱིར་ཟེར་ན་དཔྱད། ཡང་ཉན་ཐོས་དགྲ་བཅོམ་པའི་རྒྱུད་ཀྱི་ལོངས་སྐུ་མི་རྟག་པ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཆོས་ཅན། རང་ཡུལ་དེ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་ངེས་པར་ཐལ། རྣལ་འབྱོར་མངོན་སུམ་ཡིན་པའི་ཕྱིར། ཁྱབ་པ་ཁས། འདོད་ན། ཉན་ཐོས་དགྲ་བཅོམ་པའི་རྒྱུད་ཀྱི་ལོངས་སྐུ་མི་རྟག་པ་མངོན་སུམ་དུ་རྟོགས་པའི་རྣལ་འབྱོར་མངོན་སུམ་ཆོས་ཅན། ལོངས་སྐུ་ངེས་པར་ཐལ། ལོངས་སྐུ་མི་རྟག་པ་དང་གྲུབ་བདེ་དབྱེར་མེད་ཀྱི་རྫས་གཅིག་པ་ཐམས་ཅད་མངོན་སུམ་དུ་ངེས་པའི་ཕྱིར། ཁྱབ་སྟེ། ལོངས་སྐུ་དེ་ལོངས་སྐུ་མི་རྟག་པ་དང་གྲུབ་བདེ་དབྱེར་མེད་པའི་རྫས་གཅིག་པའི་ཆོས་ཡིན་པའི་ཕྱིར། འདོད་ན། ཉན་ཐོས་དགྲ་བཅོམ་པ་ཆོས་ཅན། ཁྱོད་ཀྱིས་ལོངས་སྐུ་ངེས་པར་ཐལ། ཁྱོད་ཀྱི་རྒྱུད་ན་ལོངས་སྐུ་ངེས་པའི་བློ་ཡོད་པའི་ཕྱིར། རྟགས་ཁས། འདོད་ན། ཉན་ཐོས་དགྲ་བཅོམ་པ་ཆོས་ཅན། ཁྱོད་ཀྱིས་ལོངས་སྐུ་མ་ངེས་པར་ཐལ། ལོངས་སྐུ་ཁྱོད་ཀྱིས་མ་ངེས་པ་ཡིན་པའི་རྒྱུ་མཚན་གྱིས་ཟབ་པ་ཡིན་པར་འཇོག་པ་ཡིན་པའི་ཕྱིར། མ་གྲུབ་ན། དེར་ཐལ། རྣམ་འགྲེལ་ལས། རྟོག་པའི་དྲྭ་བ་རྣམ་བསལ་ཅིང༌། །ཟབ་དང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ། །ཞེས་དང༌། འགྲེལ་བ་རིན་ཕྲེང་༣ལས། ཉན་རང་སོགས་ཀྱི་སྤྱོད་ཡུལ་མིན་པས་ཟབ་ པ་ལོངས་སྤྱོད་རྫོགས ་པའི་སྐུ་དང་ཞེས་གསུངས་པའི་ཕྱིར་ཟེར་ན་དཔྱད་དོ། །ཡང་བློ་རིག་ལས། བརྩེ་བ་དང་བདག་མེད་རྟོགས་པའི་ཤེས་རབ་རེ་རེ་ནས་ཆོས་ཅན། གོམས་རྐྱེན་དང་མ་བྲལ་བར་བསྒོམས་པ་ལས་བསྒོམ་བྱའི་དོན་ལ་གསལ་སྣང་རབ་ཀྱིས་མཐར་ཕྱིན་འབྱུངརུང་ཡིན་ཏེ། རྟེན་བརྟན་པ་གོམས་པར་བྱས་ཟིན་འབད་རྩོལ་བསྐྱར་མ་ལ་མི་ལྟོས་པའི་སེམས་རྒྱུད་ཀྱི་ཆོས་ཡིན་པའི་ཕྱིར། དཔེར་ན། འདོད་ཆགས་བཞིན། ཞེས་དང༌། རྣམ་འགྲེལ་ལས། དེ་ཕྱིར་ཡང་དག་ཡང་དག་མིན། །གང་གང་ཤིན་ཏུ་བསྒོམས་གྱུར་པ། །བསྒོམསཔ་ཡོངས་སུ་རྫོགས་པ་ན། །དེ་གསལ་མི་རྟོག་བློ་འབྲས་ཅན། །ཞེས་དང༌། འགྲེལ་བཤད་རིན་ཕྲེང་༣༡༢ལས། དེ་ཕྱིར་ནས་བློ་འབྲས་ཅན་གྱི་བར་ལ། ཟད་པར་ས་སོགས་སྒོམ་པ་རྫོགས་པའི་སོ་སྐྱེའི་བློ་ཆོས་ཅན། དེ་ལྟར་གོམས་པས་གོམས་ཡུལ་གསལ་བར་སྣང་བ་སྐྱེར་རུང་སྟེ། དེ་ཡི་རྒྱུ་ཚང་བས་སོ། །ཞེས་གསུངས་པ་ལ། དེ་འདྲའི་སྦྱོར་བ་དེ་ཆོས་ཅན། རྣལ་འབྱོར་མངོན་སུམ་སྒྲུབ་བྱེད་ཀྱི་སྦྱོར་བ་མ་ཡིན་པར་ཐལ། དེ་སྒྲུབ་ཀྱི་བསྒྲུབ་བྱ་གྲུབ་ན་རྣལ་འབྱོར་མངོན་སུམ་གྲུབ་མི་དགོས་པའི་ཕྱིར། རྟགས་ཁས། ཁྱབ་སྟེ། སྒྲ་ཆོས་ཅན། བྱས་པ་ཡིན་ཏེ། རྒྱུ་རྐྱེན་ལས་སྐྱེས་བའི་ཕྱིར་ཞེས་པའི་སྦྱོར་བ་དེ་སྒྲ་མི་རྟག་པར་སྒྲུབ་པར་བྱེད་པའི་སྦྱོར་བ་མ་ཡིན་པའི་རྒྱུ་མཚན་ཡོད་པའི་ཕྱིར་ཟེར་ན་དཔྱད། ཡང་འདོད་ཆགས་ཆོས་ཅན། གོམས་རྐྱེན་དང་མ་བྲལ་བར་གོམས་པ་ལས་གོམས་བྱའི་དོན་ལ་གསལ་སྣང་རབ་ཀྱི་མཐར་ཕྱིན་འབྱུང་རུང་ཡིན་པར་ཐལ། དེ་སྒྲུབ་ཀྱི་རྟགས་ཆོས་གཉིས་ལྡན་གྱི་མཐུན་དཔེ་ཡང་དག་ཡིན་པའི་ཕྱིར། རྟགས་ཁས། འདོད་ན། དེ་ཆོས་ཅན། རྟོག་མེད་ཀྱི་ཤེས་པ་ཡིན་པར་ཐལ། རང་ཡུལ་གསལ་བར་སྣང་བའི་བློ་ཡིན་པའི་ཕྱིར། ཁྱབསྟེ། རྣམ་འགྲེལ་ལས། གསལ་བར་སྣང་བ་ཅན་བློ་གང༌། །དེ་ནི་དེ་ལ་རྟོག་མེད་འདོད། །ཅེས་གསུངས་པའི་ཕྱིར། འདོད་མི་ནུས་ཏེ། ཉོན་མོངས་པ་ཡིན་པའི་ཕྱིར། ཁྱབ་སྟེ། ཉོན་མོངས་པ་ཡིན་ན་རྟོག་བཅས་ཡིན་པས་ཁྱབ་པའི་ཕྱིར། མ་གྲུབ་ན། དེར་ཐལ། སྤྱི་དོན་ལས། ཉོན་མོངས་པ་ཡིན་ན་རྟོག་བཅས་ཡིན་པས་ཁྱབ་པའི་ཕྱིར་ཞེས་གསུངས་པའི་ཕྱིར། འདོན་ན། འདོད་ཆགས་ཆོས་ཅན། ཡུལ་གསལ་བར་སྣང་བ་མ་ཡིན་པར་ཐལ། རྟོག་བཅས་ཡིན་པའི་ཕྱིར། རྟགས་ཁས། ཁྱབ་སྟེ། ཚད་མ་རྣམ་འགྲེལ་ལས། རྣམ་པར་རྟོག་དང་རྗེས་འབྲེལ་ནི། །དོན་གསལ་སྣང་བ་ཅན་མ་ཡིན། །ཞེས་དང༌། འགྲེལ་བཤད་རིན་ཕྲེང་༣༡༢ལས། ཤེས་པ་ཆོས་ཅན། གསལ་བར་སྣང་བའི་བློ་ཡིན་ན་རྟོག་མེད་ཡིན་ཏེ། རྣམ་རྟོག་རྗེས་སུ་འབྲེལ་བ་ལས་རྣམ་རྟོག་ཡིན་ན་དོན་གསལ་བར་སྣང་བ་མིན་པས་སོ། །དེར་ཐལ། རྟོག་པའི་ཡུལ་གསལ་བར་སྣང་བ་ཡོད་ན། རྨི་ལམ་ན་ཡང་དྲན་པ་དེ་དང་དེ་འདྲའི་དོན་ལྡན་མིན་པས་ཏེ། རྨི་ལམ་གྱི་དྲན་པ་དེ་དེ་ལྟར་དྲན་དགོས་པ་ལ་མི་གསལ་བར་དྲན་པས་སོ། །ཞེས་གསུངས་པའི་ཕྱིར། འདོད་ན། འདོད་ཆགས་ཆོས་ཅན། ཡུལ་གསལ་བར་སྣང་བ་མེད་པར་ཐལ། འདོད་པའི་ཕྱིར། འདོད་མི་རིགས་ཏེ། ཐོག་མེད་ནས་འདོད་ཆགས་ཀྱིས་ཡུལ་ལ་གོམས་ནས་གོམས་པ་རྫོགས་པ་གང་ཞིག ཡུལ་ཡང་དག་པ་བདེན་བཞི་མི་རྟག་བཅུ་དྲུག་ལྟ་བུ་དང༌། ཡང་དག་མིན་པ་ཆགས་ཡུལ་དང༌། ཟད་པར་གྱི་ཏིང་ངེ་འཛིན་གྱི་ཡུལ་དག་ལ་གོམས་པ་རྫོགས་ན་གསལ་སྣང་བྱུང་བ་སེམས་ཀྱི་ཆོས་ཉིད་ཡིན་པའི་ཕྱིར་ཏེ། ཚད་མ་རྣམ་འགྲེལ་ལས། མི་གཙང་ཟད་པར་ས་ལ་སོགས། །ཡང་དག་མིན་པའང་བསྒོམས་པ་ཡིན། །སྟོབས་ཀྱིས་སྤྲུལ་པ་རྟོག་མེད་དང༌། །གསལ་བར་སྣང་བ་ཅན་དུ་མཐོང༌། །ཞེས་དང༌། འགྲེལ་བཤད་རིན་ཕྲེང་༣༡༢ལས། མི་གཙང་ནས་ཅན་དུ་མཐོང་གི་བར་ལ། མི་བསྡུག་པ་དང་ཟད་པར་ས་ལ་སོགས་པ་མི་བདེན་པའི་དོན་བསྒོམས་པས་གོམས་ཡུལ་གསལ་བར་སྣང་བ་སངས་རྒྱས་པའི་གྲུབ་མཐའ་ལས་བཤད་པས་སོ། །ཞེས་གསུངས་པའི་ཕྱིར། ཟེར་ན་དཔྱད། འོན་ཀྱང་འདོད་ཆགས་ལ་ཡུལ་གསལ་བར་སྣང་ཞེས་པ་དེ་ནི་སྒྲ་སྤྱི་དོན་སྤྱི་བྲལ་བའི་སྒོ་ནས་གསལ་བར་སྣང་བ་མིན་པར་ཆགས་ཡུལ་དེ་མདུནན་ཡོད་པ་ལྟ་བུའི་སྣང་བ་ཤར་བ་ལ་བྱེད་དགོས་པ་འདྲ་སྟེ། བསྡུས་གྲྭའི་སྤྱི་དོན་༣༤༥ལས། དཔེར་ན། འདོད་ཆགས་བཞིན།འདོད་ཆགས་དང་འཇིགས་པ་མྱ་ངན་སོགས་གོམས་པ་ལས་རང་ཡུལ་ལ་གསལ་སྣང་འབྱུང་སྟེ། འདོད་ཆགས་གོམས་པ་ལས་ཆགས་ཡུལ་མདུན་ན་གནས་པ་ལྟ་བུར་མཐོང་ནས་ལག་པས་འཇུ་བ་དང༌། སུ་ཞིག་ཞེས་སྨྲ་བ་དང༌། འཇིགས་པ་གོམས་པས་འཇིགས་པའི་དངོས་པོ་དེ་མཐོང་ནས་མཚོན་ཆ་ལེན་པ་སོགས་དང༌། བུ་ཤི་བའི་མྱ་ངན་ལ་གོམས་པས་བུ་མཐོང་ནས་དེ་ལ་ངག་སྨྲ་བ་སོགས་འབྱུང་བའི་ཕྱིར།རྟགས་རེ་རེ་ནས་ཁྱབ་སྟེ། བློ་ལ་སྣང་བའི་ཡུལ་ལ་ལུས་ངག་གི་བྱེད་པ་འཇུག་པ་ནི་གསལ་བར་སྣང་བའི་ཡུལ་ལ་ཡིན་གྱི་མི་གསལ་བའི་ཡུལ་ལ་ལུས་ངག་གི་བྱེད་པ་འཇུག་པ་མེད་པའི་ཕྱིར། ཟུར་ཕྱི་མ་དེར་ཐལ།རྟོག་པ་ལ་སྣང་བའི་ཡུལ་ཙམ་ལ་ལུས་ངག་གི་བྱེད་པ་འཇུག་པ་མ་མཐོང་བའི་ཕྱིར། ཞེས་དང༌། ཚད་མ་རྣམ་འགྲེལ་ལས། །རྐུན་པོ་རྨི་སོགས་ཀྱིས་བསླད་པས། །མདུན་ན་གནས་པ་བཞིན་དུ་ནི། །ཡང་དག་མིན་པ་མཐོང་བར་འགྱུར། །ཞེས་དང༌། འགྲེལ་བཤད་རིན་ཕྲེང་༣༡༢ལས། ཤེས་བྱ་ཆོས་ཅན། གོམས་པ་གོམས་ཡུལ་གསལ་བར་སྣང་བ་ཡོད་དེ། འདོད་ཆགས་དང་འཇིགས་པ་དང། མྱ་ངན་གྱིས་བརླབས་ཏེ་སྨྱོ་བ་དང། རྐུན་པོ་དང། རྨི་ལམ་ལ་སོགས་ཀྱིས་སེམས་སླད་པས་ཡང་དག་པ་མིན་པའི་གོམས་ཡུལ་མདུན་ན་གནས་པ་བཞིན་དུ་ནི་མཐོང་བ་ཡོད་པས་སོ། །ཞེས་གསུངས་པའི་ཕྱིར། ཡང་གོམས་རྐྱེན་དང་མ་བྲལ་བར་བསྒོམས་པ་ལས་བསྒོམ་བྱའི་དོན་ལ་གསལ་སྣང་རབ་ཀྱིས་མཐར་ཕྱིན་འབྱུང་རུང་ཡིན་ན་སློབ་པ་ལམ་གྱི་སྐབས་སུ་བདག་མེད་དང་བདེན་མེད་སྒོམ་ནས་སངས་རྒྱས་པ་དེའི་ཚེ་གོམས་པ་མཐར་ཕྱིན་ནས་གསལ་བར་སྣང་དགོས་པ་ལ་དེའི་ཚེ་ཀུན་རྫོབ་ཀྱི་སྣང་བ་མཐའ་དག་ནུབ་ནས་ཀུན་རྫོབ་མི་སྣང་བ་ཆོས་ཉིད་འབའ་ཞིགསྣང་བ་ཡིན་པའི་ཕྱིར་ཏེ། སུམ་ཅུ་པ་ལས། དེ་ཚེ་ཆོས་ཉིད་འབའ་ཞིག་ལུས་པར་ཟད། །ཅེས་གསུངས་པ་སོགས་ཀྱིས་སྔར་ལྟར་སངས་རྒྱས་ལ་ཀུན་རྫོབ་སྣང་མིན་དཔྱད་དོ། །