ཡང་སྲིད་མྱུར་འབྱོན་གྱི་གསོལ་འདེབས་དད་གསུམ་གསེར་གྱི་ཤིང་རྟ།
རབ་འབྱམས་རྒྱལ་བའི་གསང་གསུམ་གཅིག་བསྡུས་དཔྱིད།།
སྙིགས་དུས་བསྟན་འགྲོའི་མགོན་དུ་ཡོངས་ཤར་བ།།
མཉམ་མེད་བླ་མ་དྲིན་ལྡན་ཆོས་ཀྱི་རྗེས།།
བརྩེ་ཆེན་ཐུགས་རྗེས་སླར་ཡང་ཉེར་དགོངས་ཤིག།
ཤིན་ཏུ་ཟབ་ཞི་སྤྲོས་པ་བྲལ་བའི་ཀློང་།།
ཐོག་མཐའ་དབུས་མེད་ཆོས་ཉིད་མཉམ་པའི་དབྱིངས།།
འཕོ་མེད་རྒྱལ་བའི་དགོངས་པར་རོ་གཅིག་པའི།།
ཁྱོད་ཐུགས་ཡེ་ཤེས་ཆེན་པོས་རྟག་ཏུ་སྐྱོངས།།
འདི་ན་ལས་ཉོན་དྲག་པོས་ཡིད་དབྱུང་བའི།།
ངལ་བརྒྱས་དུབ་གྱུར་ཉམ་ཐག་སློབ་ འབངས་ཚོགས།།
འབྲལ་མེད་བརྩེ་བས་རྟག་ཏུ་མི ་བསྐྱང་བར།།
ཁྱེད་སྐུ་མྱ་ངན་འདའ་བ་ཅང་བདེན་ནམ།།
གང་ཁྱོད་དམ་པའི་མགོན་གྱིས་རྗེས་བཟུང་པའི།།
བཤེས་མེད་ལམ་སྟོར་གཡང་སར་འཕྱན་པ་དག།
གསུང་གི་བདུད་རྩིས་རྟག་ཏུ་བསྐྱང་མིན་པར།།
ཆོས་ཁྲི་སྟོངས་ལ་གྱུར་འདི་ཀྱེ་མ་ཧུད།།
རིས་བྲལ་རྒྱལ་བསྟན་ཀེ་ལ་ཤ་ཡི་སྤོར།།
ཟླ་བྲལ་སྨྲ་བའི་དབང་ཕྱུག་གདོང་ལྔ་པ།།
ཁྱོད་གཅིག་མི་འཇིགས་ཁྲི་ལ་བརྟན་མིན་པའི།།
མི་སྙན་སྒྲ་ཡིས་བདག་ཡིད་བློང་པོར་བྱས།།
མགོན་ཁྱོད་ཐོག་མེད་དུས་ནས་དམ་བཅས་པའི།།
བརྩེ་ཆེན་ཐུགས་རྗེའི་གཡར་དམ་བརྟན་གྱུར་ན།།
བདག་སོགས་གདུལ་བྱའི་ལྷག་མ་ཡོངས་བོར་ཏེ།།
དཔའ་ཁྱོད་ཞི་བར་མནལ་བ་བཟོད་ལགས་སམ།།
གྱི་ནས་སྲོག་འཚོ་དམན་པའི་སར་གནས་ཀྱང་།།
མཁས་པའི་རྩལ་རྫོགས་དམ་པའི་ཡོན་ཏན་ལྡན།།
རྒྱལ་བསྟན་ས་ཆེན་དཔུང་པས་འདེགས་པའི་སྟོབས།།
བདག་གིར་བཞེས་ཁྱོད་འཛམ་གླིང་མཛེས་པའི་རྒྱན།།
གང་གི་གསལ་སྣང་བརྟན་པོའི་ཏིང་འཛིན་མཐུ།།
རིག་འཛིན་སྙིང་པོའི་བཟླས་པས་ཉེར་བསྐུལ་བས།།
སྙིང་དབུས་མི་ཤིགས་དྭངས་མའི་ངོ་བོ་རུ།།
ནཱ་དའི་སྲོག་གི་སྙིང་པོར་རྟག་ཏུ་བཞུགས།།
མཐའ་ཡས་བརྒལ་དཀའ་ཤེས་བྱ་རྒྱ་མཚོའི་ཁྱོན།།
ཕ་མཐའ་མི་མངོན་ལོག་པར་འཕྱན་གྱུར་ན།།
ཁྱོད་གསུང་རྡོ་རྗེ་རྣོན་པོའི་རལ་གྲིའི་མཐུས།།
ཆོས་རབ་རྣམ་འབྱེད་སྣང་བའི་ཤེས་རབ་སྩོལ།།
སྲིད་འབྱོར་ལྷ་མིའི་འདོད་ཡོན་འབུམ་ཕྲག་གིས།།
མཚོན་པ་མིན་པའི་སྒྲུབ་པའི་མཎྜལ་ལ།།
རྩེ་གཅིག་གཞོལ་བའི་ཆོ་ག་ཉེར་འགོད་ན།།
མི་འབྲལ་རྗེས་བརྩེས་རྟག་ཏུ་བསྐྱང་བར་མཛོད།།
འཛེར་བཅས་གདུང་བའི་དབྱངས་ཀྱི་ང་རོ་བཅས།།
སྒོ་གསུམ་རབ་གུས་སྙིམ་པའི་གའུ་ཆུང་།།
སྤྱི་བོར་འགོད་པའི་བརྟུལ་ཞུགས་ལ་གནས་ན།།
དགོངས་བརྒྱུད་རྟོགས་པའི་ཕ་ཕོགས་དེང་སྩོལ་ཅིག།
ཁྱེད་ཐུགས་དགོངས་པའི་ཡེ་ཤེས་ཀློང་ཡངས་པར།།
མཁྱེན་རབ་ནོར་བུའི་ཉི་མ་སྟོང་འབར་བའི།།
མི་ཟད་སྤོབས་པའི་གཏེར་དང་རྣམ་དཔྱོད་གཟིས།།
བདག་བློའི་གཏི་མུག་མུན་ཚོགས་གཏན་འཇོམས་ཤོག།
བདག་ཅག་དེང་ནས་སྐྱེ་བའི་རབས་ཀུན་ཏུ།།
གང་ཁྱོད་དམ་པའི་མགོན་གྱིས་རྗེས་བཟུང་ཞིང་།།
མཁས་བཙུན་བཟང་པོའི་དཔལ་གྱིས་ལེགས་མཛེས་པའི།།
རྣམ་ཐར་མཆོག་གི་རྗེས་སུ་རྟག་འགྲོ་ཤོག།
ཡོངས་རྫོགས་རྒྱལ་བསྟན་ཕྱི་མོ་སྔ་འགྱུར་པ།།
ཟབ་དོན་རྫོགས་ཆེན་བརྒྱུད་པའི་མེས་པོའི་སྲོལ།།
གྲགས་པའི་མུ་ཁྱུད་གླིང་བཞིའི་མཐར་བསྙེགས་པའི།།
དགེ་མཚན་སྣང་བ་དཀར་པོས་རྟག་ཁྱབ་ཤོག།
ཅེས་པ་འདི་མཁན་ཆེན་ཟླ་བའི་འོད་ཟེར་རིན་པོ་ཆེ་དགོངས་པ་ཆོས་དབྱིངས་སུ་ཐིམ་པའི་གསོལ་དགོངས་ནང་རྫོགས་ཆེན་པདྨ་སྐལ་བཟང་དེས་བྲིས་པའོ།།