ཉིན་དགུ་བའི་ཆོས་ཁྲིད།
ཇི་ལྟར་ནམ་མཁའི་ཁམས་ལྟར་དུ་ཟད་པའི་ཕ་མཐའ་གཟུང་དུ་མེད་ཅིང་། ཇི་སྙེད་ནམ་མཁའི་རྒྱ་ཁྱོན་དེ་སྙེད་ཀྱིས་ཁྱབ་པའི་མ་གྱུར་འགྲོ་བ་སེམས་ཅན་མཐའ་ཡས་པ་ཡོད་ཚད་པོའི་སྡུག་བསྔལ་རྒྱུ་དང་བཅས་པ་བྲལ་བ་དང་། བདེ་བ་རྒྱུ་དང་བཅས་ཐོབ་པའི་ཆེད་དང་། དེ་ལྟར་བྱེད་ཐུབ་པའི་ཐབས་དང་ནུས་པ་དང་ལྡན་པ་རྫོགས་པའི་བྱང་ཆུབ་ཆེན་པོ་བསྒྲུབ་པར་བྱའོ་སྙམ་པའི་སེམས་བསྐྱེད། སྨོན་དང་འཇུག་པ་གཉིས་འབྲེལ་གྱི་བདག་ཉིད། ཐེག་ཆེན་མདོ་སྔགས་གཉིས་ཀྱི་ལམ་གྱི་གཞུང་རྟ། ཡོད་ན་སངས་རྒྱས་སྒྲུབ་ལ་དེས་ཆོག མེད་ན་སངས་རྒྱས་སྒྲུབ་ལ་ཐབས་ཆག་པའི་རྣམ་དག་བྱང་ཆུབ་ཀྱི་སེམས་མཆོག་རིན་པོ་ཆེ་དེ་ཉིད་སྙིང་པོར་བཟུང་སྟེ། ཕྱིན་དྲུག་ཚང་པའི་སྒོ་ནས་འཆད་ཉན་སྒོམ་སྒྲུབ་བགྱི་བ་ལ། གང་ཐར་བའི་ལམ་ལ་ཞུགས་པའི་ལམ་གྱི་འཁྲུལ་བ་སེལ་བའི་ཆོས་ཚུལ། ཐུན་མོང་། ཁྱད་པར། བླ་མེད་དང་གསུམ་གྱི་རྣམ་དབྱེ་ཡོད་པའི་ཚིག་མགོ་ཞིག་བླངས་བས་མི་ཚད། ཁ་རྩང་ཐེག་ཆེན་མདོ་སྔགས་ཐུན་མོང་གི་ལམ་ཆེན། ཚད་མེད་རྣམ་བཞི་སྔོན་དུ་འགྲོ་བའི་བྱང་ཆུབ་མཆོག་ཏུ་སེམས་བསྐྱེད་པ་དང་། གཉིས་འཛིན་དེ་འཁྲུལ་བའི་སྲོག་ཏུ་བརྩིས་ནས། ཆོས་དང་གང་ཟག་དང་གི་བདག་མེད་རྣམ་གཉིས་གཏན་ལ་ཕབ་པའི་བདག་མེད་རྟོགས་པའི་ཤེས་རབ་ཀྱིས། འཁོར་འདས་གཉིས་མེད་སྣང་སྟོང་བདེན་པ་དབྱེར་མེད་སྤྲོས་བྲལ་རྟེན་ཅིང་འབྲེལ་འབྱུང། མཚན་ཉིད་རྒྱུ་ཡི་ཐེག་པའི་ལམ་ནས་ལམ་གྱི་འཁྲུལ་བ་སེལ་ཚུལ་ཕྱོགས་ཙམ་ཞིག་གླེང་ནས། དེ་རིང་ལམ་གྱི་འཁྲུལ་བ་སེལ་ཚུལ་གཉིས་པ་དེ་གང་ཡིན་ན། ཁྱད་པར་གྱི་ལམ་གསང་སྔགས་ཕྱི་ནང་གི་སྐོར་ལ་བློ་ཁ་ཞིག་ཕྱོགས་ན། བསྐྱེད་དང་རྫོགས་པའི་རིམ་གཉིས་ལམ་གྱི་རིམ་པ་ཟུང་དུ་འཇུག་པའི་ཐབས་དང་འཇུག་སྒོ་དཔག་ཏུ་མེད་པ་སྣ་ཚོགས་པའི་རིམ་པས་འཁྲུལ་བ་སྦྱོང་བར་བྱེད་པ་དེ། གསང་སྔགས་སྤྱིའི་མཚན་ཉིད་ལྟ་བུ་ཞིག་ཡིན་ལ། གསང་སྔགས་ཕྱི་བ་གསུམ་གྱིས་དག་པ་གཙོ་བོར་བཟུང་ནས་སྤང་བླང་རེས་འཇོག་གི་སྒོ་ནས་དྲི་མ་གཉེན་པོས་སེལ་བ་ཡིན། དེ་ཡང་བྱ་རྒྱུད་པས་གཞུང་ཀྲཱི་ཡ་སྡེ་དྲུག་གི་དགོངས་པ་གཙོ་བོར་བཟུང་ནས་དངོས་གྲུབ་སྒྲུབ་པར་བྱེད་ཅིང་། ལྟ་བ་དོན་དམ་པར་ཆོས་ཐམས་ཅད་རང་བཞིན་གྱིས་དག་པའི་སྟོང་པ་ཉིད་དང་། ཀུན་རྫོབ་ཡོངས་སུ་དག་པ་བདག་དང་ལྷ་གཉིས་རྗེ་ཁོལ་གྱི་ཚུལ་དུ་བསྒྲུབས་ནས་ལྷའི་གསང་གསུམ་གྱི་མཚན་མ་དག་པ་མངོན་དུ་བྱེད་པའི་དག་པ་གསུམ་གྱིས་འཇུག་པ་དང་། སྒོམ་པ་ཀྲཱི་ཡ་ལྷ་དྲུག་གི་བཟླས་དམིགས་དང་བསྟུན་ཏེ། སྤྱོད་པ་ཁྲུས་གསུམ་གཙང་སྦྲ་གསུམ་གྱི་ཆོ་གའི་ཡན་ལག་ལ་བརྩོན་པར་བྱེད་པ་ཡིན། ཨུ་པས་གཞུང་ཨུ་པ་སྡེ་བཞིའི་ལུང་ལ་བརྟེན་ནས་ཆོས་དབྱིངས་རིག་པའི་ཡེ་ཤེས་ཀྱི་བྱིན་རླབས་སྒྲུབ་པ་བདག་དང་ལྷ་གཉིས་ཀ་བདག་མདུན་སྤུན་གྲོགས་ཀྱི་ཚུལ་གྱིས་བསྒྲུབས་ནས། ལྟ་བ་ཆོས་དབྱིངས་མཐའ་བྲལ་གྱི་ཡེ་ཤེས་དང་། སྒོམ་པ་མངོན་བྱུང་ལྔ་ཡི་ཡེ་ཤེས་ཀྱི་བསྐྱེད་བཟླས་ཀྱི་སྟེང་ནས། སྤྱོད་པ་ཁྲུས་དང་གཙང་སྦྲ་གྲོགས་ཙམ་དང་ནང་གི་ཏིང་འཛིན་གཙོ་བོར་བྱེད་པ་ཡིན། འདི་དག་ལ་བྱ་སྤྱོད་ཆ་མཉམ་གྱི་རྒྱུད་དུ་གྲགས་པ་དང་། རྣལ་འབྱོར་ཡོ་གའི་རྒྱུད་ཀྱིས་ཡོ་ག་ལུང་གི་རྒྱུད་བཞིའི་དགོངས་པ་ལ་བརྟེན་ནས། དོན་དམ་མཐའ་བྲལ་གྱི་དབྱིངས་སུ་ཆོས་ཐམས་ཅད་མཉམ་པ་ཉིད་ཡིན་ན་ཡང་། ཀུན་རྫོབ་རྟེན་འབྱུང་བསླུ་མེད་ཀྱི་སྣང་ངོར་དམ་ཚིག་ཡེ་ཤེས་གཉིས་མེད་ཀྱི་ཚུལ་གྱིས་བཟླས་སྒོམ་ལ་བརྟེན་ནས་དངོས་གྲུབ་སྒྲུབ་པ་དང་། ལྟ་བ་ལྷ་དང་རྣལ་འབྱོར་གཉིས་མེད་དང་། སྒོམ་པ་ཕྱག་རྒྱ་བཞི་ཡི་སྒོ་ནས། སྤྱོད་པ་ཕྱིའི་ཀུན་སྤྱོད་ལ་མི་ལྟོས་པར་ནང་གི་ཏིང་འཛིན་ཟབ་མོ་གཅིག་པུར་གཙོ་བོར་བྱེད་པ་ཡིན་པ་དང་། ཕྱི་རྒྱུད་སྡེ་གསུམ་གྱི་འབྲས་བུ་དེ་རིམ་པ་བཞིན་དུ། རིགས་གསུམ། རིགས་བཞི། རིགས་ལྔའི་སངས་རྒྱས་སུ་སྒྲུབ་པའི་སྒོ་ནས་ལམ་གྱི་འཁྲུལ་བ་སེལ་ཐབས་བྱས་ཏེ་འབྲས་བུའི་ས་ལ་བགྲོད་པར་བྱེད་པའོ། །སྔགས་ནང་རྒྱུད་གསུམ་ནི་ནང་བ་བླ་མེད་ཀྱི་གྲུབ་མཐའ་ཡིན་ལ། འདི་རྒྱུ་ཕར་ཕྱིན་ཐེག་པས་མི་ཚད་སྔགས་ཕྱི་བ་ལས་ཀྱང་འཕགས་པའི་མྱུར་ལམ། ཐབས་ཆེ། ཐབས་སླ། ཐབས་མང་། ཐབས་མྱུར་བ་དང་བཞིའི་ཁྱད་ཆོས་ལྡན་པའི་སྟབས་ཀྱིས་སྔ་འགྱུར་ཐུན་མིན་གྱི་ལུགས་ལ་བསྐྱེད་དང་རྫོགས་དང་རྫོགས་ཆེན་ གསུམ་དུ་བསྟན་པ་ཡིན། དེ་ལས་བསྐྱེད་པ་མ་ཧཱ་ཡོ་ག་ནི་ཏནྟྲ་ཆེན་པོ་སྡེ་བཅོ་བརྒྱད 
་ཀྱི་དགོངས་དོན་རྩལ་དུ་བཏོན་ནས་བཀྲལ་ཏེ་རྒྱུད་སྡེ་དང་སྒྲུབ་སྡེ་གཉིས་སུ་དབྱེ་ཞིང་། དེ་གཉིས་ཐུན་མོང་གི་ལྟ་བ་ཀུན་རྫོབ་ཀྱི་ཆོས་ཐམས་ཅད་དག་མཉམ་བདེན་པ་དབྱེར་མེད་ལྷའི་དཀྱིལ་འཁོར་དུ་བལྟས་ནས། སྒོམ་པ་ཏིང་འཛིན་རྣམ་གསུམ་ཡན་ལག་དང་བཅས་པས་བསྐྱེད་རིམ་ལམ་དུ་བྱེད་པ་གཙོ་བོར་བྱས་ནས། སྤྱོད་པ་བླང་དོར་མེད་པ་སྦྱོར་སྒྲོལ་ཐབས་མཁས་ཀྱི་ཚུལ་ལ་སོགས་པ་དང་དུ་བླངས་ནས་འབྲས་བུ་ཚེ་འདིའི་སྟེང་ནས་རིག་འཛིན་བཞི་ཡི་མྱུར་ལམ་བགྲོད་དེ། ཡི་གེ་འཁོར་ལོ་ཚོགས་ཆེན་གྱི་སར་སངས་རྒྱས་པར་འདོད་པ་དང་། རྫོགས་པ་ཨ་ནུ་ཡོ་གས་གཙོ་བོར་ནང་རླུང་གི་སྐོར་ལ་གཞི་བཟུང་ནས་ལྟ་བ་སྣང་ཆ་ཡེ་ནས་དག་པ་ཀུན་ཏུ་བཟང་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། སྟོང་ཆ་ཀུན་ཏུ་བཟང་མོ་ཡེ་ཇི་བཞིན་པའི་དཀྱིལ་འཁོར་གཉིས་ཀ དབྱིངས་རིག་དབྱེར་མེད་སོ་སོར་མ་ཡིན་ཐ་མི་དད་པ། སྲས་བདེ་བ་ཆེན་པོ་བྱང་ཆུབ་སེམས་པའི་དཀྱིལ་འཁོར་ཏེ། དཀྱིལ་འཁོར་རྣམ་པ་གསུམ་གྱི་སྟེང་ནས་སྒོམ་པ་དབང་བཞི་དང་རྗེས་སུ་འབྲེལ་བའི་ཡེ་ཤེས་བཞི། ཁྱད་པར་དུ་གསང་དབང་དང་ཤེར་དབང་གི་ཉམས་ལེན་གནད་དུ་བསྣུན་ནས་རྩ་རླུང་ཐིག་ལེའི་བྱེད་པ་ཡིས་འཕོ་མེད་ལྷན་ཅིག་སྐྱེས་པའི་ཡེ་ཤེས་མངོན་དུ་གྱུར་བར་བྱས་ཏེ། སྤྱོད་པ་ཞི་བདེར་རྗེས་ཆགས་ཀྱི་ཉམས་ལེན་གཙོ་བོར་གྱུར་པའི་ཐབས་མཁས་ཟབ་མོ་ཡིས། འབྲས་བུ་ཚེ་འདིའི་ཐོག་ནས་ཨ་ནུ་རང་ལུགས་ཀྱི་ལམ་ལྔ་དང་ས་བཅུ་གཅིག་པོ་ནང་གི་ཐབས་མཁས་ཀྱིས་བགྲོད་ནས་སྐུ་བཞི་ཡེ་ཤེས་ལྔའི་བདག་ཉིད་བདེ་བ་ཆེན་པོ་རྡོ་རྗེ་འཆང་གི་སྐུར་སྒྲུབ་པར་བྱེད་པའོ། །རྫོགས་ཆེན་ཨ་ཏི་ཡོ་ག་ལ་ནང་གསེས་ཀྱི་སེམས་ཀློང་མན་ངག་གི་སྡེ་གསུམ་དུ་དབྱེ་བའི། ཐུན་མོང་སྤྱིའི་དབང་དུ་བྱས་ན་དེའི་རྒྱུད་སྡེ་སོ་སོ་ལ་བརྟེན་ནས་གང་གཏན་ལ་དབབ་བྱ་ལྟ་བ་སེམས་ཉིད་རང་བྱུང་གི་ཡེ་ཤེས་དེ་ཀ་དག་ལྷུན་གྲུབ་དབྱེར་མེད་དང་། ངོ་བོ་རང་བཞིན་ཐུགས་རྗེའི་ཡེ་ཤེས་གསུམ་གྱིས་བཤད་དེ། ངོ་བོ་སྟོང་པ་ཉིད་དམིགས་མཚན་དང་བྲལ་བས་ཀ་དག་དང་། རང་བཞིན་གསལ་བ་ཡོངས་ལ་ཁྱབ་པ་སྐྱེ་འགག་གནས་དམིགས་ལས་འདས་པ་ཡིན་པས་ན་ལྷུན་གྱིས་གྲུབ་པ་དང་། ཐུགས་རྗེ་ཀུན་ཁྱབ་ཆོས་ཉིད་ཀྱི་རང་རྩལ་འཁོར་འདས་ཐམས་ཅད་འཆར་བའི་བདག་ཉིད་དུ་བཞུགས་པ་སྟེ། དེ་གསུམ་དབྱེར་མེད་ཡེ་ཤེས་འོད་གསལ་མཆོག་ཏུ་མི་འགྱུར་བ་དེ་ཉིད་བསྐྱེད་རྫོགས་མཚན་བཅས་ཀྱི་ཐབས་ལ་མི་ལྟོས་པར། དོན་བརྒྱུད་འཕོ་བའི་བྱིན་རླབས་སེམས་ཉིད་རང་ངོ་སྤྲོད་པའི་མན་ངག་གིས་བསལ་བཞག་མེད་པའི་ཆོས་ཉིད་ངོས་བཟུང་ནས་རིག་པ་འགྱུར་མེད་མཉམ་པ་ཉིད་ཀྱི་ངང་དེ་ལས་ནམ་ཡང་མི་གཡོ་བར་བྱེད་པ་དང་། སྒོམ་པ་ཞི་གནས་དང་ལྷག་མཐོང་ཟུང་དུ་འབྲེལ་བ་རིག་པ་རང་བྱུང་གི་ཡེ་ཤེས། ཆོས་ཐམས་ཅད་ཀྱི་དེ་བཞིན་ཉིད། གནས་ལུགས་མཐར་ཐུག་གི་ངོ་དེ་ཁོ་ན་ཉིད་དེའི་སྟེང་ལ་རང་བབ་ལྷུན་གྲུབ། སྒོམ་དུ་མེད་ལ་ཡེངས་སུ་མེད་པའི་རང་བཞིན་རང་བབ་ཀྱི་བསམ་གཏན། རྩོལ་མེད་རང་ཤར་རང་གྲོལ་གྱི་དགོངས་པར་དབང་སྒྱུར་བ་དང་ཆབས་ཅིག་ཏུ། སྤྱོད་པ་དགག་སྒྲུབ་མེད་པར་ཤུགས་འབྱུང་གིས་སྤྱད་ནས། འབྲས་བུ་རིག་པའི་གཞི་ལ་སྐུ་གསུམ་གྱི་ཡོན་ཏན་མ་བཙལ་ལྷུན་གྱིས་གྲུབ་ནས་ཡོད་པའི་ངོ་བོ་ཉིད་ཇི་བཞིན་མངོན་དུ་གྱུར་པའོ། །དེ་ཡང་མ་ཧཱ་ཡོ་གས་བསྐྱེད་རིམ་གྱི་རྣལ་འབྱོར་གཙོ་བོར་བྱས་ནས་ཏིང་འཛིན་གྱི་རྩལ་རྫོགས་ཚེ། མཚན་བཅས་ཀྱི་རྫོགས་རིམ་དང་དེའི་དྲངས་པའི་རྫོགས་རིམ་ཆེན་པོས་ལམ་གྱི་འཁྲུལ་བ་སེལ། ཨ་ནུ་ཡོ་གས་བདེ་བའི་ཐབས་ཀྱིས་དྲངས་པའི་དོན་གྱི་ཡེ་ཤེས་ལྷན་སྐྱེས་བདེ་སྟོང་དབྱེར་མེད་པའི་ཉམས་ལེན་དེས་ལམ་གྱི་འཁྲུལ་བ་སེལ། ཨ་ཏི་ཡོ་གས་མཚན་བཅས་རྩ་རླུང་ཐིག་ལེའི་བྱེད་བཅིངས་སོགས་ཀྱི་རྫོགས་རིམ་ལ་མི་ལྟོས་པར་འབྲས་བུ་ལྷུན་གྱིས་གྲུབ་པའི་ཡེ་ཤེས་ཉིད་ལ་དབང་འབྱོར་བ་བྱས་ནས་ལམ་གྱི་འཁྲུལ་བ་གཞི་ལ་དག་ཚུལ་གྱི་རྣམ་གཞག་སྟེ། དེ་ལྟ་བུའི་འབྲས་བུ་གསང་སྔགས་རྡོ་རྗེའི་ཐེག་པ་ལམ་སྤྱིའི་གནད་དང་སྦྱར་བའི་གོ་དོན་མདོ་ཙམ་ཞིག་ཞོར་དུ་གླེང་སློང་དང་། དེ་ལྟ་བུའི་རིམ་པ་དང་ལམ་གྱི་མྱུར་ཁྱད་གཞི་ལམ་འབྲས་གསུམ་དང་ལྟ་སྒོམ་སྤྱོད་པའི་དབྱེ་རིམ་གྱི་ཚུལ་ལས་འཕྲོས་པའི་དོན་གྱི་མདོ་འགག་བློ་ཆོས་སུ་འགྲོ་བའི་སྟེང་དེ་ནས། ཆོས་ལམ་དུ་འགྲོ་བ་ནས་བརྒྱུད་དེ། ལམ་གྱི་འཁྲུལ་བ་སེལ་བའི་ཚུལ་གྱི་སྤྱིའི་མདོ་ཆིངས་ལྟ་བུའི་ཚུལ་ཙམ་ཞིག་བཤད་པ་དང་བཅས་ཏེ། སྐབས་སུ་བབ་པ་གང་ཞིག་འཆད་ཉན་བྱ་བའི་ཆོས་ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་འདི་ཉིད་ཀྱི་འགྲེལ་ཊཱིཀ་པདྨ་དཀར་པོ་འདི་ཉིད་འཆད་པ་ལ། ཐོག་མར་དགེ་བ་ཀླད་ཀྱི་དོན་སོང་བ་དང་། བར་དུ་དགེ་བ་གཞུང་གི་དོན་ལས། རྡོ་རྗེའི་གནས་དང་པོ་འཁོར་བའི་རང་བཞིན་སྤང་བྱར་བསྟན་པ་ལེའུ་བདུན་པ་ཡན་ཆད་ཀྱིས་སོང་ནས། རྡོ་རྗེའི་གནས་གཉིས་པ་མྱ་ངན་ལས་འདས་པའི་རང་བཞིན་བླང་བྱར་བསྟན་པ་བཤད་པའི་སྐབས་སུ་ཁེལ་ཞིང་། དེ་ལ་སྦྱོང་བྱེད་ལམ་དང་། སྦྱང་བྱ་འབྲས་བུ་བཤད་པ་དང་གཉིས་ལས། དང་པོ་ལའང་ཐོག་མར་ཐོས་པ་ནས་འཇུག་དགོས་པ་དང་། ཐོས་པ་དེ་ཡང་དགེ་བའི་བཤེས་གཉེན་ལ་རག་ལས་པའི་ཚུལ། བཤེས་གཉེན་གྱི་མཚན་ཉིད། དེ་ཇི་ལྟར་བསྟེན་ཚུལ་སོགས་བཤད་དང་འཆད་བཞིན་པའི་སྐབས་ལས། མཉེས་པས་བསྟེན་པར་བྱ་བ་དེ་ལའང་གསུམ་ལས། གཉིས་པ་སྤྱོད་པས་མཉེས་པར་བྱ་བའི་སྐབས་ཀྱི། ལུས་ངག་ཡིད་གསུམ་གྱིས་མཉེས་པར་བྱ་བའི་ཚུལ་གསུམ་ལས། གསུམ་པ་ཡིད་ལ། བླང་བྱ་སྤང་བྱ་གཉིས། དང་པོ།
ཡིད་ཀྱི་བླང་བྱ་བསྟན་པ།
སེམས་ཀྱི་སྒོ་ནས་ཀྱང་གུས་པས་བསྒྲུབ་པ་དང་། ཕྱིན་ཅི་ལོག་ཏུ་སེམས་པ་དོར་བ་གཉིས་ལས། དང་པོ་ནི། ཡིད་ཀྱིས་བླ་མའི་ཡོན་ཏན་དྲན་བྱ་ཞིང་། །དད་གུས་ཆེན་པོས་འཕྲད་དཀའི་བློ་སྐྱེད་ལ། །རྗེས་གཟུང་འགྲོ་བ་གཞན་ལའང་གུས་པར་བྱ། །ཞེས་གསུངས་ཏེ། མཆོག་ཏུ་དད་པའི་ཡིད་ཀྱིས་བླ་མའི་ཡོན་ཏན་དྲན་པར་བྱས་ལ། འཕྲད་པར་དཀའ་བའི་བློས་དད་གུས་བསྐྱེད་ལ་བསྟེན་པར་བྱའོ། །བླ་མ་མཉེས་པར་བྱ་བ་དེ་ལའང་ཟང་ཟིང་གིས་མཉེས་པར་བྱེད་པ་དང་། སྤྱོད་ལམ་གྱིས་མཉེས་པར་བྱེད་པ་དང་། སྒྲུབ་པས་མཉེས་པར་བྱེད་པ་གསུམ་གྱིས་བསྟན་པ་ལས། སྤྱིར་སྤྱོད་ལམ་ཞེས་པ་ལུས་ཀྱི་བྱ་སྤྱོད་ཀྱི་ཆ་ནས་གཙོ་བོར་བཏགས་པ་ཞིག་ཡིན་ཀྱང་། ངག་ཡིད་ཀྱང་དེ་དང་འབྲེལ་བ་ཅན་ཡིན་པས་ན། འདིར་མཉེས་པ་གསུམ་གྱི་སྐབས་སུ་ཟང་ཟིང་གིས་མཉེས་པར་བྱེད་པ་སྒྲུབ་པའི་ཁོངས་སུ་མི་འདུ་བས་དེ་ལྟར་བསྟན་པའོ། །དེའང་བླ་མ་ནི་གསང་སྔགས་ཀྱི་སྐབས་འདིར་དཀོན་མཆོག་བཞི་པར་བལྟ་བས་སངས་རྒྱས་དང་མཉམ་པའམ། བཀའ་དྲིན་གྱི་ངོས་ནས་སངས་རྒྱས་ལས་ཀྱང་ལྷག་པར་མོས་པས། བླ་མ་དམ་པ་དེ་ཉིད་ཀྱི་མཚན་ཐོས་པ་དང་། ཞལ་མཐོང་ཞིང་མཇལ་བ་དང་། ལས་འབྲེལ་ཡོད་པའི་བླ་མའི་མཚན་ཙམ་ཐོས་པས་ཀྱང་ལུས་ཀྱི་བ་སྤུ་ལྡང་བ་སོགས་གཞན་དང་མི་འདྲ་བའི་སྔོན་གྱི་སྨོན་ལམ་གྱི་དབང་གིས་མཇལ་བ་དང་། རང་ཉིད་ཀྱིས་འབད་པས་བཙལ་བས་རྙེད་པ་དང་། གསུང་ཐོས་པ་དང་། སྤྱི་བོར་ཕྱག་གིས་རེག་པ་ཙམ་ལའང་དགའ་བ་ཆེན་པོ་བསྐྱེད་དེ། བདག་ལྟ་བུ་བསྐལ་བ་ཐ་མའི་ལས་ངན་སེམས་ཅན་གྱིས། དགེ་བའི་བཤེས་གཉེན་དམ་པ་འདི་ལྟ་བུ་ལ་དངོས་སུ་འཕྲད་དུ་ཡོད་པ་རེ་དགའ་སྙམ་དུ་རྙེད་པར་དཀའ་བ་བློས་བསམས་ལ། ཐབས་སྣ་ཚོགས་པས་མཉེས་པ་བསྒྲུབ་ཅིང་། དམ་པ་དེ་ཉིད་འཇིག་རྟེན་དུ་འབྱུང་དཀའ་ལ། བདག་དང་འཕྲད་པའང་རྙེད་དཀའ་ཞིང་། ནམ་འབྲལ་མི་ཤེས་པའི་བློས་བསྟེན་ཞིང་། བླ་མ་དེས་རྗེས་སུ་བཟུང་བའི་འགྲོ་བ་གཞན་ཐམས་ཅད་ཀྱང་ཆོས་ཀྱི་མཆེད་རྡོ་རྗེའི་སྤུན་གྲོགས་ཡིན་པས་དེ་དག་ལའང་གུས་པས་སྲི་ཞུ་དང་། ཕྱག་འཚལ་བ་དང་། བསྙེན་བཀུར་བ་ལ་སོགས་པའི་མོས་གུས་དང་དག་སྣང་བྱའོ། །དེ་ལྟར་ཡིད་ཀྱིས་བླ་མའི་ཡོན་ཏན་དྲན་པར་བྱས་ཏེ་དད་གུས་ཆེན་པོས་བསྙེན་བསྐུར་བྱས་པ་དེས་ནི་འདི་དང་ཕྱི་མའི་ལེགས་པ་ཐམས་ཅད་འགྲུབ་པ་ཡིན་ནོ། །འཕགས་པ་དཀོན་མཆོག་སྤྲིན་ལས། ས་ཕྱོགས་གང་ན་ཆོས་སྨྲ་བ་གནས་པ་དེ་ལ་མཆོད་རྟེན་གྱི་འདུ་ཤེས་དང་། ཆོས་སྨྲ་བ་ལ་བླ་མ་དང་། དགེ་བའི་བཤེས་གཉེན་དང་། སྟོན་པའི་འདུ་ཤེས་བསྐྱེད་དེ་མཐོང་ན་དགའ་བ་དང་། རངས་པ་བསྐྱེད་དོ་ཞེས་པ་དང་། སྲེད་མེད་ཀྱི་བུས་ཞུས་པའི་མདོ་ལས་ཀྱང་། བྱང་ཆུབ་སེམས་དཔའ་མཁན་པོ་དང་། སློབ་དཔོན་ལ་བཀའ་བློ་བདེ་བས་བླ་མར་བྱེད་པའི་སྲི་ཞུ་དང་། གུས་པ་དང་། ཕངས་པ་དང་། གཅེས་པར་འཛིན་པའི་སེམས་བསྐྱེད་པར་བྱའོ་ཞེས་པ་དང་། ད་ལྟར་གྱི་སངས་རྒྱས་མངོན་སུམ་པའི་ཏིང་ངེ་འཛིན་ལས། དེས་བླ་མ་ལ་ཁྲེལ་ཡོད་པ་དང་། བྱས་པ་གཟོ་བར་བྱས་ན། དེ་ཡང་དགེ་བའི་ཆོས་ཡུན་རིང་དུ་གནས་ཤིང་རྨོངས་པ་མེད་པར་འགྱུར་རོ་ཞེས་པ་དང་། སྡོང་པོ་བཀོད་པའི་དགེ་བསྙེན་མ་མི་གཡོ་བའི་རྣམ་པར་ཐར་པ་ལས་ཀྱང་། དགེ་བའི་བཤེས་གཉེན་ཡིད་ལ་བྱེད་པ་དང་མ་བྲལ་བ་ལས་དོན་ཐམས་ཅད་འགྲུབ་པར་འགྱུར་རོ་ཞེས་པ་དང་། དགོངས་འདུས་ལས། དོན་དང་ལྡན་པའི་བླ་མ་ལ། །དུས་གསུམ་ཕྱོགས་བཅུའི་རྒྱལ་བ་དང་། །རྒྱལ་སྲས་ལྷ་དང་མི་དག་དང་། །དེ་བཞིན་ཀླུ་དང་གནོད་སྦྱིན་དང་། །སྲིན་པོ་ལོག་ལྟ་ཅན་དག་གི། རིག་པ་འཛིན་པ་ཀུན་འདུས་ནས། །མེ་ཏོག་གཏོར་ཞིང་བསྟོད་པས་འདུད། །དཔེར་ན་མ་ཡིས་བུ་བསྐྱེད་ལྟར། །རྒྱལ་བ་སྲས་དང་རིག་འཛིན་རྣམས། །དམ་པ་ལས་བྱུང་ཤེས་པར་གྱིས། །ཞེས་སོ། །གཉིས་པ།
ཡིད་ཀྱི་སྤང་བྱ་བསྟན་པ།
དོར་བྱ་ནི་ཡིད་ཀྱི་སྒོ་ནས། མ་དད་ལོག་པར་ལྟ་དང་ཁོང་ཁྲོ་དང་། །རྟག་ཏུ་སྐྱོན་ལ་སེམས་དང་བརྙས་སེམས་དང་། །འགྲན་སེམས་གནོད་འཚེའི་སེམས་དང་ང་རྒྱལ་སེམས། །མཛད་སྤྱོད་འགལ་བར་འཛིན་དང་མ་དད་སེམས། །བརྣབ་སེམས་གནོད་སེམས་ལོག་ལྟའི་སེམས་རྣམས་སྤང་། །ཞེས་གསུངས་ཏེ། ཡང་དག་པ་དགེ་བའི་བཤེས་གཉེན་ལ་ཡིད་ཀྱིས་མ་དད་པ་དང་། ཁོང་ཁྲོ་བ་དང་། སྐྱོན་ཇི་ལྟ་བུ་འདུག་སྙམ་དུ་བརྟག་པ་དང་། དུས་སྙིགས་མའི་སེམས་ཅན་རྣམས་ནི། བཟང་ལ་མི་དགའ་ངན་ལ་དགའ་བ། ཡག་ལ་མི་དགའ་སྡུག་ལ་དགའ་བ་དང་། སྤྱིར་ན་མི་གཞན་གྱི་ཡོན་ཏན་མི་མཐོང་བར་སྐྱོན་གདགས་རྒྱུར་དགའ་བ་ཡིན་པས། བཤད་བཤད་ཟིན་དུས་མེད་པའི་ཆགས་སྡང་གི་རུ་མ། །མཚར་མཚར་ཡག་ཡག་འདྲ་ཡང་གཞན་སྐྱོན་རྗེས་ཟློས། །ཞེས་པ་ལྟར་དུ། རྩེད་མོ་ཧ་རྒོད་བྱེད་དུས་སུའང་མི་སྐྱོན་ཏག་ཏག་བཤད་ནས་དེ་ཡག་སྣང་འཆར་བ་ཡིན་ཀྱང་། ཟུར་དེ་ནས་མཁས་པ་རྣམ་དཔྱོད་ཅན་ཞིག་གིས་མཐོང་ན་དེ་ནི་རང་སྐྱོན་ལྷང་ལ་ཕུད་པའི་ཁྲེལ་རྒྱུ་ཞིག་ལ་ཆགས་ཡོད། བླ་མ་ཞིག་མཇལ་དུས་སྐྱོན་ལ་རྟོག་ནས་ཅི་ཟེར་རྒྱུ་མ་ལོན་རུང་ཁ་ཆེ་བ་སྣ་རིང་བ་སུ་ཞིག་སུ་གོ་མ་ལ་འདྲ་འདུག་པ་སོགས་ཟེར་ནས་སྐྱོན་འདོགས་པ་དེ་ལྟར་མི་རུང་ངོ་། །གཞན་ཡང་རིགས་དང་གཟུགས་དང་ལོངས་སྤྱོད་དམན་པ་ལ་བརྙས་པ་དང་། རྒྱུ་དང་འབྱོར་བ་ཡོད་པ་ལ་ལྐོག་ནས་སྨད་པ་དང་། རྒྱུ་དང་འབྱོར་བ་མེད་པ་ལ་ངོས་ནས་བརྙས་པ་བྱེད་པ་ནི་སྤྱིར་དུས་ངན་གྱི་སེམས་ཅན་དང་། ཁྱད་པར་དུ་མི་ཐ་ཆད་པ་རྣམས་ཀྱི་ལས་ཡིན་པས་སྤང་བར་བྱའོ། །བླ་མར་གང་ཅིའི་ཐད་ནས་འགྲན་པར་སེམས་པ་དང་། བཤེས་གཉེན་དམ་པ་དེ་དང་དེའི་ཉེ་འཁོར་ན་གནས་པ་དག་ལ་གནོད་སེམས་དང་། འཚེ་བ་དང་། ཁོང་ཁྲོ་བ་དང་། ང་རྒྱལ་གྱིས་སུན་འབྱིན་པར་སེམས་པ་དང་། བླ་མའི་ནོར་རྫས་ལ་བརྣབ་སེམས་དང་ཞེས་པ་སྟེ་བླ་མའི་ཕྱག་རྫས་མཐོང་དུས་ང་དེ་ཡོད་ན་སྙམ་པ་དང་། ངན་པར་གྱུར་ན་དགའ་བའི་གནོད་སེམས་དང་། ལོག་པར་ལྟ་བས་ངན་དུ་སེམས་པ་དང་། མཛད་སྤྱོད་གང་ལའང་འགལ་བར་འཛིན་པས་སྐྱོན་དང་ལོག་པར་ལྟ་བར་མི་བྱ་སྟེ། བླ་མ་ནི་སེམས་ཅན་གང་ལ་གང་འདུལ་གྱི་ངོར་སྐུ་གསུང་ཐུགས་ཀྱི་སྤྱོད་པས་དེ་ལ་ཕན་པ་མཛད་པས་སྣ་ཚོགས་པ་གང་དུའང་འབྱུང་སྟེ། རེ་ཞིག་བསྡུ་ན་ཞི་རྒྱས་དབང་དང་དྲག་པོའི་ལས་བཞིའི་དབང་གིས་རིམ་པ་བཞིར་མཐོང་བ་ཡིན་ནོ། །ཀརྨ་ཞེས་པའི་སྒྲ་ལས་དྲངས་ན་ལས་སམ་ཕྲིན་ལས་སྣ་ཚོགས་ཀྱང་བསྡུ་ན་བཞི་བོ་འདིར་འདུས་པའོ། །དེ་ལ་གང་དག་ངང་རྒྱུད་ཞི་བས་འདུལ་བ་དེ་ལ་དེ་ལས་ཀྱང་ཞི་བའི་སྐུ་གསུང་ཐུགས་ཀྱི་རྣམ་པར་སྣང་བས་ལེགས་པར་འདོམས་པ་དང་། སྙན་པར་སྨྲ་བ་ལ་སོགས་པར་སྟོན་ཅིང་། སེམས་ཅན་གང་དག་སྦྱིན་པས་བསྡུ་བ་འོས་པ་རྣམས་ལ་ནི། རྒྱས་པའི་རིགས་ཀྱིས་ཡོ་བྱད་རྣམས་ལ་མ་ཆགས་པར་འགྱེད་ཅིང་སྦྱིན་པའི་རབ་སྟོན་ལ། དབང་དུ་བྱ་བས་འདུལ་ན་འགྲོ་བ་རྣམས་བསྡུས་ཏེ་ཆོས་ལ་སྦྱོར་བ་དང་། དྲག་པོས་འདུལ་བ་ལ་བརྡེག་པ་དང་། འཚོག་པ་དང་། ཚམ་རྔམ་དང་། ཚིག་འབྲུ་དྲག་པོ་འགལ་བ་དུ་མར་སྟོན་ཏོ། །ལས་བཞི་དང་རིགས་བཞི་དང་སྦྲེལ་ཡོང་ན། རང་བཞིན་དུའང་བླ་མ་ནི། རྡོ་རྗེའི་རིགས་ཐམས་ཅད་ཞི་བ་ཡིན་པས། སྐུ་གསུང་ཐུགས་ཞི་བར་སྣང་ལ། རིན་ཆེན་རིགས་རྣམས་རྒྱས་པའི་རིགས་ཡིན་པས་སྒེག་པས་གོས་དང་རྒྱན་དང་ལོངས་སྤྱོད་ཀྱིས་འབྱོར་ཞིང་། པདྨའི་རིགས་དབང་གི་ཡིན་པས་པདྨའི་རིགས་ལ་འགྲོ་བ་འདུལ་ཞིང་ཡུམ་དང་བཅས་པ་དང་། ལས་ཀྱི་རིགས་དྲག་པོ་སྟེ་བླ་མ་དང་བཤེས་གཉེན་དམ་པ་དེ་དག་ཀྱང་སྐུ་གསུང་ཐུགས་དྲག་ཤུལ་ཆེ་བས་གཏུམ་རྔམས་ཆེ་ཞིང་གདུག་པར་སྣང་བས་འགྲོ་བ་འདུལ་བའི་ཕྱིར་གཅིག་ཏུ་མ་ངེས་པས། བླ་མས་ལྟར་སྣང་དུ་མཛད་པ་གང་དང་གང་མཛད་ཀྱང་། བརྟགས་ནས་བསྟེན་ཟིན་ཚེ་དག་སྣང་དང་མོས་གུས་ཆེན་པོས་སྲི་ཞུ་བྱའོ། །དམ་པ་རྣམས་ནི་རྟག་ཏུ་སེམས་ཅན་གཞན་ལ་ཕན་བདེ་བྱེད་པ་ནི་རང་གཤིས་སམ་རང་བཞིན་ཡིན་པས་མཛད་པ་གང་དང་གང་གིས་ཀྱང་གདུལ་བྱ་སྐྱོབ་པ་ཡིན་ལ། དམ་པ་མ་དགོས་ཕལ་བ་དག་ཀྱང་བརྟག་དཀའ་ཡང་། དམ་པའི་རང་བཞིན་ནི་གཞན་ལ་ཕན་བདེ་བྱེད་པ་དེ་ཡིན་པས་དངོས་སམ་བརྒྱུད་ནས་གཞན་ལ་ཕན་པ་མ་ཡིན་པའི་བྱ་བ་སྒྲུབ་མཁན་དེ། ལྟར་སྣང་ཇི་ལྟར་བཟང་ཡང་། དམ་པ་མིན་པའི་རྟགས་སུ་འཛིན་ཆོག་པའི་གོ་དོན་ཤུགས་ཀྱིས་བསྟན་པ་ཡིན། སྐུའི་ཆ་ལུགས་ནི་གཅིག་ཏུ་མ་ངེས་ཤིང་། གསུང་ཡང་འཇམ་པོ་དང་རྩུབ་མོ་ལ་སོགས་པ་གཅིག་ཏུ་མ་ངེས་པས། སྐྱོན་ལྟར་སྣང་ཡང་། སྐྱོན་དུ་སེམས་པར་མི་རུང་སྟེ། ཐུགས་དགོངས་གང་ཡིན་མི་ཤེས་པས་སོ། །དེས་ན་བླ་མ་འདི་ནི་ནོར་རྫས་ལ་སྲེད་པ་ཆེ་སྙམ་པ་དང་། འདོད་པ་ཆེ་སྙམ་པ་དང་། བརྣབ་སེམས་ཆེ་སྙམ་པ་དང་། ཁོང་ཁྲོ་དང་གདུག་པ་ཆེ་སྙམ་པ་དང་། ཉོན་མོངས་པ་རགས་སྙམ་པ་དང་། སེར་སྣ་ཆེ་སྙམ་པ་དང་། ང་རྒྱལ་ཆེ་སྙམ་པ་དང་། ཡུམ་དང་བཅས་སྙམ་པ་དང་། རིགས་གཟུགས་ངན་སྙམ་པ་དང་། ཅི་ཡང་མི་ཤེས་སྙམ་པ་ལ་སོགས་པ་མི་སེམས་ཏེ། རང་ལ་མངོན་ཤེས་མེད་པས་ཐུགས་དགོངས་མི་རྟོགས་པའི་ཕྱིར་རོ། །ཁྱད་པར་དུ་ཐོས་རྟགས་ཞི་ཞིང་དུལ་བ། སྒོམ་རྟགས་ཉོན་མོངས་མེད་པ་དང་ས་ལམ་གྱི་ཡོན་ཏན་སོགས་གསང་བའི་རིགས་གང་ཡང་མི་འདུག་སྙམ་པ་དང་། དེ་ལྟར་མ་མཐོང་བ་ལ་མི་འདུག་སྙམ་ན་རང་གི་སྐྱོན་ཡིན། སངས་རྒྱས་ཀྱི་ཡོན་ཏན་དང་མི་ལྡན་སྙམ་དུ་མི་བསམ་སྟེ། སྐུ་གསུང་ཐུགས་ཀྱི་གསང་བ་ཤིན་ཏུ་སྦས་པ་ནི་མི་མངོན་པའི་ཕྱིར་དང་། གསང་བའི་ཡོན་ཏན་དག་ནི་ལས་མ་དག་པས་མཐོང་པ་མིན་པས་རང་གི་སྒྲིབ་པས་བལྟ་བར་མི་མངོན་པའི་ཕྱིར་དང་། ཡོན་ཏན་ཐམས་ཅད་དངོས་སུ་སྣང་བ་ནི་ལས་དག་པ་དགོས་ལ། གཅིག་ཏུ་ན་དེ་ལྟ་བུའི་དངོས་སུ་ཡོན་ཏན་སྣང་བ་དག་རང་གི་སྤྱོད་ཡུལ་མི་མཚུངས་པས་སྟོན་དུ་མེད་པ་ལ་སོགས་པར་འགྱུར་བ་ཡིན་ནོ། །ད་ལྟར་གྱི་སངས་རྒྱས་མངོན་སུམ་པའི་ཏིང་ངེ་འཛིན་ལས། གལ་ཏེ་དེས་ཆོས་སྨྲ་བ་དེ་ལ་མནར་སེམས་པའམ། ཐ་བ་སྟེ་མ་དུལ་བའམ། སྡང་བའི་སེམས་ཀྱིས་གནས་སམ། སྟོན་པ་སངས་རྒྱས་ཀྱི་འདུ་ཤེས་མི་བསྐྱེད་ན། དེ་དག་གི་ཡོན་ཏན་ཐོབ་པ་ནི་གནས་མེད་དོ། །མ་ཐོབ་པའི་ཆོས་ཐོབ་པའམ། ཐོབ་པ་ཆུད་མི་ཟ་བ་ནི་གནས་མེད་དོ། །མ་གུས་པས་ཆོས་ནུབ་པར་འགྱུར་རོ་ཞེས་པ་དང་། སྙོམས་འཇུག་གསང་བའི་རྒྱུད་ལས། བླ་མ་དག་ལ་འགྲན་སེམས་དང་། །ཡི་དམ་རྒྱལ་བའི་ལྷ་སྤངས་པས། །བོང་འཐེང་ཞོན་ནས་མཚོ་བསྐོར་ལྟར། །ཞེས་པ་སྟེ་བླ་མ་ལ་འགྲན་སེམས་ཀྱི་མ་རུང་བའི་སེམས་རྒྱུད་ལ་སྐྱེས་ན། ཡི་དམ་ཡང་བླ་མ་ལས་ལོགས་སུ་མ་གྱུར་པས་བླ་མ་ཡི་དམ་དང་བཅས་པ་སྤངས་བ་ཡིན་པས་བོང་བུ་འཐེང་པོ་ཞིག་ཞོན་ནས་མཐའ་ཡི་མཚོ་ཆེན་པོ་ལ་བསྐོར་བ་བྱས་ན་ཐོན་དུ་མེད་པ་ལྟར་དུ་བླ་མ་ལ་བརྙས་ན་ཡི་དམ་རྒྱལ་བའི་ལྷ་སྤངས་བ་ཡིན་པས་སངས་རྒྱས་འགྲུབ་བའི་དུས་མི་སྲིད་ཅེས་པའི་དོན་ཏོ། །རྒྱལ་བའི་སངས་རྒྱས་འགྲུབ་མི་སྲིད། །བླ་མའི་དཀོར་ལ་བརྣབ་སེམས་པ། །བསྐལ་པ་གཉིས་སུ་ཡི་དྭགས་གནས། །ཞེས་པ་དང་། དཔུང་རྣམ་པར་བཟློག་པའི་རྒྱུད་ལས། བླ་མ་དང་ནི་དེ་ཡི་འཁོར། །ཁྲོ་བས་ཞེ་འགྲས་སུན་འབྱིན་པ། །བསྐལ་པ་ཞིང་གི་རྡུལ་སྙེད་དུ། །མནར་མེད་གནས་སུ་འཚེད་པའོ། །ཞེས་པ་དང་། བྱང་ཆུབ་བདེ་བའི་དཔུང་བསྐྱེད་ནས། །རྡོ་རྗེ་བླ་མ་སྨད་མི་རུང་། །འདོད་ཆགས་ཞེ་སྡང་ལ་སོགས་པ། །ལྔ་པོ་ལྡན་ཞེས་བསམ་མི་བྱ། །དེ་བསམས་མནར་མེད་ས་གཞིར་བསྲེག །ཅེས་པ་དང་། གཞུང་རྒྱ་མཚོ་ལས། རྡོ་རྗེ་ཡིད་བཞིན་རྒྱལ་པོ་ལ། །ཟས་སྐོམ་ནོར་ལ་སྲེད་སྙམ་པས། །རབ་མཐའ་བཅུ་ཡི་དམྱལ་བར་འཚེད། །གསང་མཆོག་སྨྲ་བྱེད་རྒྱལ་པོ་ལ། །ཤེས་པ་ཅན་གྱི་ཡིད་སྒོ་ནས། །ང་རྒྱལ་ཆེ་བའི་ཡིད་མི་བསམ། །དེ་སྐྱོན་ཁ་འཐབ་གནས་སུ་ལྟུང་། །ཞེས་པ་དང་། དུ་མ་འདུས་པའི་རྒྱུད་ལས། བདག་གི་དྲིན་ལ་གནས་བསམ་པས། །མནར་མེད་པར་ཡང་རབ་ཏུ་སྐྱེ། །སློབ་དཔོན་སྐྱོན་ལ་གང་སེམས་པ། །དགེ་བསགས་དོན་མེད་ལྷ་སྤངས་པས། །ལྷ་ཀླུ་གདུག་པ་ལ་སོགས་ཀྱིས། །མྱུར་དུ་སྲོག་གཅོད་དམྱལ་བར་ལྟུང་། །ཞེས་པ་དང་། སྙིང་པོ་རྣམ་པར་ལེན་པའི་རྒྱུད་ལས། མཆོག་ཏུ་སྔགས་ལ་ཞུགས་པ་ལ། །གནོད་པར་བྱེད་པའི་སེམས་འཆང་ན། །གྲང་བའི་དམྱལ་བར་ངེས་པར་ལྟུང་། །ཞེས་གསུངས་སོ། །དེས་ན་དུས་ནམ་ཡང་བླ་མའི་སྐྱོན་ལ་མི་བསམ་ཞིང་། གལ་ཏེ་དབྱེན་སྦྱོར་ཕྲ་མ་མཁན་གྱི་མི་འགས་དབྱེན་བཅོས་ཏེ་བླ་སློབ་གཉིས་ཀྱི་བར་དུ་འགལ་བ་གཏུགས་ནས་བླ་མས་སྡང་བར་མངོན་ན་ཡང་། ཉེས་མེད་ཀྱང་མ་ཉེས་པའི་བཤགས་པ་བྱ་ཞིང་། བླ་མས་དཀའ་བཀྱོན་གནང་བ་རང་གི་སྡིག་པ་ཟད་པའི་རྒྱུར་བསམས་ཏེ་གུས་པས་ཡོན་ཏན་ལ་བསམས་ཏེ་བསྟེན་པར་བྱའོ། །གསུམ་པ།
སྒྲུབ་པས་མཉེས་པར་བྱ་བ།
དེ་ནས་བསྒྲུབ་པའི་མཆོད་པས་མཉེས་པར་བྱེད་པ་ཡང་། གསུང་བཞིན་རྗེས་སུ་བསྒྲུབ་པས་མཆོད་པ་ནི། །ཐོས་པ་དམ་པའི་དོན་རྣམས་བསམ་བྱ་སྟེ། །ནགས་མཐར་སོང་ལ་སྙིང་པོའི་དོན་ལ་འབད། །སྒྲུབ་པས་དུས་འདའ་གོང་མའི་གདུང་འཚོབ་བཟུང་། །ཞེས་གསུངས་ཏེ། བླ་མ་དམ་པས་སྒྲུབས་ཤིག་ཅེས་བསྒོ་བའི་གསུང་བཞིན་རྗེས་སུ་བསྒྲུབ་པ་ནི། མི་ལས་མར་པའི་བཀའ་བསྒྲུབས་པ་ལྟ་བུ་ཡིན། མཆོད་པ་རྣམས་ཀྱི་ནང་ནས་མཆོག་ཡིན་ལ། སངས་རྒྱས་ནས་རིམ་པར་བྱོན་པའི་བླ་མ་རྣམས་ཀྱིས་ཆོས་བསྟན་ཅིང་འཇིག་རྟེན་དུ་བྱོན་པའི་དགོས་པའང་བླ་མའི་བཀའ་བཞིན་བསྒྲུབས། དེའི་ཐུགས་མཛོད་དགོངས་བའི་བྱིན་རླབས་འཕོས་ནས་དངོས་གྲུབ་ཐོབ་པ་དེ་ཉིད་ཡིན་པས། ཇི་སྐད་ཐོས་པ་རྣམས་ལེགས་པར་བླང་དོར་གྱི་དམིགས་ལེགས་པར་ཕྱེད་པས་བསྒྲུབ་པར་བྱའོ། །ཐོས་པ་དེ་ཡང་རྒྱུ་བདེ་གཤེགས་སྙིང་པོ་། རྐྱེན་དགེ་བའི་བཤེས་གཉེན་ཞེས་པ་ལྟར་དུ། རྐྱེན་བླ་མ་དམ་པ་ལ་རག་ལས་པས། དམ་པ་མང་དུ་བསྟེན་ཐོས་པ་ཕྱོགས་མེད་དུ་བཙལ་ནས་བསྒྲུབ་ལ། དེ་ཡང་བསམ་པ་ཕྱིན་ཅི་མ་ལོག་པར་བྱས་ནས་བསྒྲུབ་ཅིང་། ཤེས་ལོ་དང་གོ་ལོ་ཐོས་ལོ་ཙམ་དུ་མི་བཞག་པར་ཐོས་དོན་བསམ། བསམས་དོན་སྒོམ་པས་ཉམས་སུ་བླངས་ལ་བསྒྲུབ་བོ། །ཉམས་སུ་ལེན་པ་ཡང་གཟུགས་བརྙན་དུ་མ་སོང་བར་ཆོས་དང་རང་རྒྱུད་བསྲེས་ལ་བསྒྲུབ་ཅིང་། རང་རེས་ཀྱང་ཆོས་དང་རང་རྒྱུད་འདྲེས་ཐབས་སུ། བློ་ཆོས་སུ་འགྲོ་དགོས། ཆོས་ལམ་དུ་འགྲོ་དགོས། ལམ་གྱི་འཁྲུལ་བ་སེལ་དགོས། ལ་སོགས་པ་ཨ་འོར་ཡང་འོར་གྱིས་རྣར་འཇག་བཅུག་པ་ལྟར་དུ་རེད། དེ་ཡང་ཐབས་སྙིང་རྗེ་ཆེན་པོ་དང་ཤེས་རབ་སྟོང་བ་ཉིད་ཀྱི་དོན་ཟུང་དུ་འཇུག་པས་བླ་མའི་དགོངས་པ་དང་གཉིས་སུ་མིན་པའི་ཐུགས་རྒྱུད་དགོངས་པའི་ཀློང་དང་རང་སེམས་གཉིས་ཀ་འདྲེས་པ་ཡིད་སྨོན་ཙམ་ལ་མ་ལུས་པར་རང་ཉིད་དེ་ལྟ་བུར་དངོས་སུ་འགྱུར་བར་བརྩོན་པས་བསྒྲུབས་ན་བསྒྲུབ་ནས་འགྲུབ་བོ་ཞེས་པའོ། །དེ་ལྟར་བསྒྲུབས་པས་བླ་མ་དང་སངས་རྒྱས་སྲས་བཅས་ཐམས་ཅད་མཉེས་པའི་མཆོད་པར་འགྱུར་ཏེ། སྐྱེས་བུ་དམ་པ་ནི་སྐྱེས་བུ་དམ་པའི་སྤྱོད་པས་མཉེས་པས། ཆོས་དང་རང་རྒྱུད་འདྲེས་པ་བྱེད་རྒྱུ་ནི་སྐྱེས་བུ་དམ་པའི་སྤྱོད་པ་ཡིན་པའི་ཕྱིར་རོ་ཞེས་སྒྲུབ་བྱེད་བཀོད་པའོ། །མངོན་རྟོགས་རྒྱན་ལས། སངས་རྒྱས་དགྱེས་པའི་སྤྱོད་པ་སྟེ། །ཞེས་པ་དང་། ཡུམ་བར་མ་ལས། གང་དགེ་བའི་བཤེས་གཉེན་གྱིས་ཡོངས་སུ་གདམས་པ་དེ་བསྒྲུབ་པར་བརྩོན་པ་ལ་ནི་སངས་རྒྱས་ཐམས་ཅད་ཀྱིས་བསྔགས་སོ། །བསྟོད་དོ། །བཀུར་རོ། །ཞེས་སོ། །དེ་ལྟར་བླ་མ་སྒྲུབ་པས་མཉེས་པར་བྱས་པའི་ཕན་ཡོན་གཞན་ཡང་ཚད་མེད་དེ། ལུང་གིས་བསྟན་ན། རེ་ཞིག་བྱང་ཆུབ་སེམས་དཔའི་སྡེ་སྣོད་ལས། བདག་གི་བཀའ་བློ་བདེ་ཞིང་སློབ་དཔོན་གྱིས་བསྟན་པ་དང་མཐུན་པར་འཛིན་པས། འཕགས་པའི་ནོར་བདུན་ཁོང་དུ་ཆུད་པར་བྱས་ཏེ། དེ་ལ་བླ་མས་ཆོས་རྒྱ་ཆེར་སྟོན་ཅིང་། གསལ་བར་བྱེད་པས་དབུལ་བ་རྣམ་པར་ཆད་པ་ན་བླ་ན་མེད་པའི་བྱང་ཆུབ་ཁོང་དུ་ཆུད་པར་འགྱུར་རོ། །ཡང་དེས་འཁོར་ལོས་སྒྱུར་བ་མཐའ་བཞིར་རྣམ་པར་རྒྱལ་བའི་རིན་པོ་ཆེ་སྣ་བདུན་དང་། བུ་སྟོང་དང་། གླིང་བཞི་དང་ལྡན་པས་སློབ་དཔོན་སྐར་མཁན་དང་། ཡུལ་གྱི་མི་ལ་སོགས་པར་གུས་པ་དང་། འདོད་པའི་ཡོན་ཏན་ལ་མི་ཆགས་པར་དད་པས་རབ་ཏུ་བྱུང་སྟེ། མྱུར་དུ་མངོན་པར་ཤེས་པ་ལྔ་ཐོབ་ནས། མི་དང་མི་མ་ཡིན་པ་རྣམས་གུས་པར་བྱེད་པ་དང་། གང་དུ་སྐྱེས་པའི་སྐྱེ་བ་ཐམས་ཅད་དུ་བློ་དང་ཤེས་རབ་དང་སྤོབས་པ་མཆོག་གིས་གྲགས་ཤིང་། འགྲོ་བ་ཐམས་ཅད་གུས་པ་དང་། སངས་རྒྱས་ནས་ཀྱང་འགྲོ་བ་ཐམས་ཅད་ལ་ཚུལ་ཁྲིམས་དང་ཏིང་ངེ་འཛིན་དང་རྣམ་པར་གྲོལ་བའི་བདེ་བ་སྟེར་ཞིང་། འཇིག་རྟེན་ཐམས་ཅད་ལས་མངོན་པར་འཕགས་པར་འགྱུར་རོ་ཞེས་པ་དང་། དགོངས་འདུས་ལས། སྔོན་གྱི་དམ་པ་བདེ་གཤེགས་རྣམས། །དེད་དཔོན་དམ་པ་མཉེས་བྱས་ནས། །ཀུན་སྤངས་དགོན་པའི་མཐར་གཤེགས་ཏེ། །སྒྲུབ་པས་ཡང་དག་ཐར་པ་མཉེས། །དེ་བས་དེ་ལྟར་རྗེས་སློབ་ན། །རྒྱལ་བའི་རྣམ་གྲོལ་གདུང་འཚོབ་བོ། །དེ་བས་དམ་པ་དྲིན་ཆེན་ལ། །སྐྱོ་དུབ་མེད་པའི་དད་པ་དང་། །གྱོང་ཁེངས་མེད་པའི་མཉེན་ལྕུག་དང་། །སེར་སྣ་མེད་པའི་ཟང་ཟིང་དང་། །སོམ་ཉི་མེད་པའི་སྲི་ཞུ་དང་། །གཡོ་སྒྱུ་མེད་པའི་དྲང་སྐད་དང་། །ཁ་གསག་མེད་པའི་རང་རྒྱུད་དང་། །རྨོངས་པ་མེད་པའི་ཤེས་རབ་དང་། །དྲི་མ་མེད་པའི་ལྷག་སེམས་བརྒྱད། །དམ་པ་དེ་ལ་རྫོགས་པར་འབུལ། །ཞེས་སོ། །དེ་ལྟར་ན་བསྒྲུབ་པའི་མཆོད་པས་ཐོས་པ་དང་བསམ་པའི་དགོས་པ་འགྲུབ་ཅིང་། སྒོམ་པའི་དོན་རྫོགས་པར་བྱེད་པས་བླ་མ་གྲུབ་ཐོབ་གོང་མ་རྣམས་ཀྱིས་རྗེས་སུ་སྙེགས་ཤིང་། སངས་རྒྱས་དང་བྱང་ཆུབ་སེམས་དཔའི་གདུང་འཚོབ་པས་ན། འཁོར་བའི་གནས་སྤངས་ཏེ་གཅིག་པུ་ཞི་བའི་ནགས་སུ་སྒྲུབ་པ་སྙིང་པོར་བྱེད་པ་ལ་འབད་པར་བྱའོ། །བླ་མ་ནི་དཀོན་མཆོག་བཞི་བའམ་དཀོན་མཆོག་ཀུན་འདུས་ཡིན་པས་བླ་མ་མཆོད་ན་རང་ཉིད་ཀྱི་ཚོགས་གཉིས་རྫོགས་པ་དང་། མཆོད་པ་ཐམས་ཅད་ཀྱི་མཆོག་ནི་སྒྲུབ་པའི་མཆོད་པ་ཡིན་ལ། སྒྲུབ་པའི་མཆོད་པའང་དམ་པའི་ཆོས་དང་། བླ་མའི་མན་ངག་ལ་ཐོས་བསམ་སྒོམ་གསུམ་བྱེད་པ་དེའི་ནང་དུ་འདུས་འདུག་པ་ཡིན། དང་པོ་གང་བསྒྲུབ་རྒྱུའི་ཆོས་གདམས་ངག་དེ་ཐོས། དེ་ནས་ཐོས་དོན་བསམ། བསམས་དོན་སྒོམ། བསྒོམས་དོན་ཡོངས་སུ་རྫོགས་པར་བྱས་ན། བླ་མ་གྲུབ་ཐོབ་གོང་མའི་རྗེས་བསྙེགས་པ་ཡིན། རྒྱལ་བ་སྲས་དང་བཅས་པས་གདུང་འཚོབ་ནས་བརྒྱུད་པ་ཟིན་པ་ཡིན་པས། གང་མཚམས་ཤིག་ནས་འཁོར་གནས་ཀྱི་འདུ་འཛིའི་རྣམ་གཡེང་གི་གཞི། ཆོས་
བརྒྱད་དཀར་ནག་ཁྲ་གསུམ ་གྱི་འཆིང་ཐག་བཅད་ནས། ཞི་བའི་ནགས་སུ་དབེན་གསུམ་གྱི་རྒྱལ་ས་བསྙེགས་ནས། སྒྲུབ་འབྲས་ཚེ་འདི་ཉིད་ལ་མངོན་དུ་བྱེད་པ་ནི་སྒྲུབ་བའི་མཆོད་པའི་ནང་གི་གཙོ་བོ། རང་གཞན་འཕྲལ་ཡུན་གྱི་དགོས་དོན་ཚང་མ་མ་ལུས་པ་མེད་པ་འདུས་པའི་གོ་བའོ། །དེ་ལྟར་སྒྲུབ་བའི་མཆོད་པ་བྱས་པ་དེའི་ཕན་ཡོན་ནི་བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས། བླ་མས་གདམས་པ་དེ་ཉིད་ཉམས་སུ་ལེན་པ་ལ་ཞུགས་པའི་ཕན་ཡོན་ནི་གང་ཟག་དེའི་ལྷག་པའི་བསམ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྗོད་དུ་མེད་པའམ་གྲངས་ཀྱིས་མི་ལང་པ་བཅུ་ཡོངས་སུ་སྤྱོད། ཁྱད་པར་ཅན་གྱི་དབང་པོ་དེ་སྙེད་ཅིག་འཕེལ། བྱིན་རླབས་དེ་སྙེད་ཅིག་འབྱུང་། སྒྲིབ་པ་དེ་སྙེད་ཅིག་འདག བདུད་ཀྱི་བར་ཆད་ཀྱིས་མི་ཚུགས་པར་བདུད་སྡེ་དེ་སྙེད་ཅིག་ལས་འདའ། ཆོས་ཀྱི་སྒོ་དེ་སྙེད་ཅིག་ལ་འཇུག ཚོགས་དེ་སྙེད་ཅིག་རྫོགས། སྤྱོད་པ་དེ་སྙེད་ཅིག་རྣམ་པར་དག སྨོན་ལམ་དེ་སྙེད་ཅིག་འགྲུབ། ཡོན་ཏན་དེ་སྙེད་ཅིག་ཐོབ་ཅེས་པའི་དེ་སྙེད་ནི་གོང་གི་ཐོག་མའི་གསལ་བྱེད་བྱེ་བ་ཁྲག་ཁྲིག་བརྒྱ་སྟོང་ཕྲག་བརྗོད་དུ་མེད་པ་བཅུའོ། །མདོར་ན་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པ་ནི། བླ་མ་ལ་རག་ལས་ཤིང་བླ་མ་ལས་བྱུང་བའོ་ཞེས་སོ། །དེས་ནི་སྤྱིར་སྒྲུབ་བའི་མཆོད་པ་བྱ་བ་བསྟན་ནས། བྱེ་བྲག་བླ་མ་དམ་པ་དེའི་རྣམ་ཐར་ལ་སློབ་དགོས་པ་གདམས་པ་ནི། མཛད་སྤྱོད་དམ་པའི་རྗེས་སུ་བསྒྲུབས་པས་མཉེས་པར་བྱ་བ་ཡང་། འགྲོ་བའི་མགོན་པོ། དཔལ་ལྡན་བླ་མའི་རྣམ་ཐར་སྒྲུབ་པ་ཡང་། །སྐུ་གསུང་ཐུགས་ཀྱི་ཡོན་ཏན་བསམས་བྱས་ལ། །བདག་ཀྱང་དེང་ནས་དེ་འདྲའི་རྗེས་བསླབས་ཏེ། །དམ་པའི་གོ་འཕང་ཐོབ་པར་བྱེད་དོན་དུ། །ཐོས་བསམ་སྒོམ་པའི་ཚུལ་ལ་ནན་ཏན་བྱ། །ཞེས་གསུངས་ཏེ། འདི་ལྟར་བླ་མ་དམ་པ་དེ་ནི་སྡེ་སྣོད་དག་ལས་གང་ལ་གང་འདུལ་གྱི་སྒོ་ནས་སངས་རྒྱས་ཀྱི་སྤྲུལ་བར་བཤད་ལ། རྒྱུད་སྡེ་དག་ལས་ཀྱང་དཀྱིལ་འཁོར་གྱི་གཙོ་བོ་སངས་རྒྱས་དངོས་ཡིན་པས་སངས་རྒྱས་ཀྱི་སྤྲུལ་བ་ཆེན་པོར་གསུངས་པའི་ཕྱིར། དེའི་རྣམ་པར་ཐར་པ་བཞིན་བསྒྲུབས་པས་སངས་རྒྱས་ཀྱི་རྣམ་པར་ཐར་པ་ལ་བསླབ་པར་འགྱུར་བའི་ཕྱིར། སྐུ་གསུང་ཐུགས་ཀྱི་ཡོན་ཏན་སངས་རྒྱས་དང་མཉམ་པར་བལྟས་ལ། བདག་གིས་ཀྱང་དེ་ཁོ་ན་འདྲ་བ་ཞིག་བྱའོ་སྙམ་དུ་སེམས་པས་བླ་མའི་མཛད་སྤྱོད་ལ་སློབ་ཅིང་། རྣམ་དཔྱོད་དང་བློ་གྲོས་ཤིན་ཏུ་ཆེ་བ་མིན་ཀྱང་དོན་ཆུང་འཇིག་རྟེན་གྱི་བྱ་བས་མི་གཡེང་བར། བརྩོན་པ་བརྒྱ་ཕྲག་གི་ཐོག་ནས་ཐོས་པ་དང་། བསམ་པ་དང་། སྒོམ་པས་དུས་འདའ་བར་བྱས་ན་གཞན་དང་མི་མཚུངས་པར་ནམ་ཞིག་མཆོག་དང་ཐུན་མོང་གི་དངོས་གྲུབ་ཐོབ་པས་མ་ཚད། བརྩོན་འགྲུས་ཅན་དེས་དངོས་གྲུབ་མྱུར་དུ་ཐོབ་པ་ཉིད་དེ། ཡེ་ཤེས་རྒྱ་མཚོའི་རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཀོན་མཆོག་བསམ་པའི་ཡུལ། །བླ་མ་མི་སྤང་བླ་མ་བཀུར། །མོས་དང་བསམ་པའི་བྱེ་བྲག་གིས། །བླ་མ་འགྲུབ་འགྱུར་ཐེ་ཚོམ་མེད། །བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་ལྟའོ། །དེ་ལས་བྱུང་བའི་དངོས་གྲུབ་ནི། །རྣལ་འབྱོར་པ་ཡིས་བཟའ་བར་བྱ། །དེ་ཡིས་དཔལ་ལྡན་རྫོགས་སངས་རྒྱས། །དངོས་གྲུབ་ཀུན་གྱི་ལས་ཀྱི་མཐའ། །བླ་མ་མཉེས་པ་ཉིད་ལས་འབྱུང་། །ཞེས་སོ། །དེ་བཞིན་དུ། བླ་མའི་རྣམ་ཐར་བསྐྱངས་ནས་བླ་མ་མཉེས་པར་བྱས་པའི་ཕན་ཡོན་གཞན། ཐེ་ཚོམ་ཐམས་ཅད་སེལ་བ་དང་། ཉམས་རྟོགས་པ་རྒྱུད་ལ་འཆར་བ་དང་། རྣམ་པར་རྟོག་པའི་དྲ་བ་གཅོད་པ་དང་། སྡུག་བསྔལ་གྱི་ཆུ་ཀླུང་སྐེམ་པ་དང་། འཁོར་བའི་འདམ་ལས་འབྱིན་པ་དང་། སྲིད་པའི་མཚོ་ལས་བསྒྲལ་བ་དང་། མ་རིག་པའི་མུན་པ་སེལ་བ་དང་། ཡོན་ཏན་གྱི་གཏེར་ཁུང་རྡོལ་བ་དང་། དངོས་གྲུབ་ཀྱི་བཅུད་ཐོབ་པ་དང་། བླང་དོར་གྱི་དམིགས་ངེས་པ་དང་། ཡེ་ཤེས་ཀྱི་སྣང་བ་ཕྱེད་པ་དང་། སངས་རྒྱས་ཀྱི་ཞིང་ཁམས་སྦྱོང་བ་དང་། དག་པའི་ཞིང་དུ་བགྲོད་པ་དང་། མངོན་ཤེས་དང་རྫུ་འཕྲུལ་སྒྲུབ་པ་དང་། སྐྱེ་བ་ཐམས་ཅད་དུ་དགེ་བའི་བཤེས་གཉེན་དང་འཕྲད་པ་དང་། སངས་རྒྱས་ཀྱི་སྣང་བ་མཐོང་བར་འདོད་པས་བླ་མ་ལ་གུས་པའི་སྒོ་ནས་སྲི་ཞུས་མཉེས་པར་བྱས་ན་འགྲུབ་པའི་ལུང་བསམ་གྱིས་མི་ཁྱབ་པར་གསུངས་སོ། །གཉིས་པ།
ཕན་ཡོན་བསྟན་པ།
ཇི་སྐད་བཤད་པའི་ཚུལ་གྱིས་བླ་མ་བསྟེན་པའི་ཕན་ཡོན་མཐའ་ཡས་ཏེ། དེ་ལྟར་སྣ་ཚོགས་ཐབས་མང་ཉིད་སྒོ་ནས། །བླ་མ་བསྟེན་པའི་ཡོན་ཏན་མཐའ་ཡས་ཏེ། །ཡང་དག་ལམ་ཆུད་བླང་དོར་དམིགས་རྣམ་ཕྱེད། །ཚོགས་རྫོགས་སྒྲིབ་བྱང་བར་ཆད་རབ་ཞི་ཞིང་། །རང་ཡང་སྐྱེ་བོ་དམ་པའི་གནས་ཐོབ་ནས། །མྱུར་དུ་ཐར་པའི་གྲོང་དུ་ཕྱིན་པའོ། །ཞེས་གསུངས་ཏེ། ཐར་པ་བགྲོད་པར་འདོད་པ་རྣམས་ཀྱིས་བླ་མ་དགེ་བའི་བཤེས་གཉེན་བསྟེན་དགོས་ཏེ། དེ་ལ་བསྟེན་པས་ངན་པའི་གཡང་ལས་སྐྱོབ་ཅིང་ཡང་དག་པའི་ལམ་སྲོལ་དུ་ཆུད་པ་དང་། བླང་དོར་གྱི་དམིགས་ཕྱེད་ཅིང་ལྟ་སྤྱོད་མི་ནོར་པ་དང་། ཚོགས་རྫོགས་ཤིང་སྒྲིབ་པ་བྱང་བར་འགྱུར་བ་དང་། བགེགས་དང་བར་དུ་གཅོད་པ་ཞི་བ་དང་། མ་འོངས་པ་ན་རང་ཡང་སྐྱེས་བུ་དམ་པ་རྒྱལ་སྲས་འཕགས་པའི་ས་ཐོབ་ནས། མྱུར་དུ་བྱང་ཆུབ་འགྲུབ་སྟེ། ལང་ཀའི་མདོ་ལས། དགེ་བའི་བཤེས་གཉེན་ལ་བསྟེན་པས་ནི་སྲེད་པ་དང་མི་ཤེས་པའི་རྒྱུ་ལས་བྱུང་བའི་ཆུ་བོ་ཐམས་ཅད་སྐེམ་པར་འགྱུར་རོ། །ཡེ་ཤེས་ཀྱི་ཉི་མ་མཐོང་བར་འགྱུར་རོ་ཞེས་པ་དང་། མེ་ལྕེ་འཁོར་ལོའི་རྒྱུད་ལས། འདི་ལས་ཡོན་ཏན་གྱུར་པ་ནི། །སྟོང་གསུམ་འཇིག་རྟེན་གཞལ་མེད་པའི། །རྡུལ་ཕྲན་གྲངས་དང་མཉམ་ནུས་མིན། །དེ་ཕྱིར་བླ་མ་ཉིད་སྨོས་སོ། །ཞེས་པ་དང་། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། རྫོགས་པ་ཆེན་པོ་ཨ་ཏི་ལས། བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་སོ། །ཞར་ལ་བླ་མ་མ་བསྟེན་པའི་སྐྱོན་བསྟན་པ་ནི། བླ་མ་དམ་པ་མ་བསྟེན་ན་ལམ་སྟོན་གྱི་བཤེས་གཉེན་མེད་པ་ཡིན་པས། ཐར་པའི་ལམ་སྣ་མི་ཟིན་པ་དང་། ཡོན་ཏན་གྱི་ཚོགས་དང་མི་འཕྲད་པ་དང་། ལེགས་པའི་ཆོས་ལས་ཉམས་པ་དང་། སྡུག་བསྔལ་གྱི་དྲ་བར་ཚུད་པ་དང་། འཁོར་བའི་འདམ་དུ་བྱིང་བ་ལ་སོགས་པ་དཔག་ཏུ་མེད་དེ། ད་ལྟར་གྱི་སངས་རྒྱས་མངོན་སུམ་པའི་ཏིང་ངེ་འཛིན་ལས། བླ་མ་ལ་མ་བསྟེན་ཞིང་མ་གུས་པ་རྣམས་ཀྱིས་ནི་ཡོན་ཏན་གྱི་ཆོས་ཐོབ་པའང་ཉམས་པར་འགྱུར་ན། མ་ཐོབ་པ་ཐོབ་པར་འགྱུར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཆོས་འཛིན་པ་ནི། ཆོས་ལས་ཐ་མི་དད་པས་ན། དེས་དགེ་བའི་བཤེས་གཉེན་དང་ཆོས་སྤོང་བའི་སྡིག་པའི་ལས་ཤིན་ཏུ་ལྕི་བ་བསགས་པའི་ཕྱིར། ངན་སོང་གསུམ་དུ་ཡུན་རིང་མོར་ལན་མང་དུ་འཁོར་བས་སྡུག་བསྔལ་བར་འགྱུར་ཞིང་། གལ་ཏེ་དེ་དག་ལས་ཐར་ནས་བརྒྱ་ལམ་མིར་སྐྱེས་ནའང་། དཀོན་མཆོག་གསུམ་གྱི་སྒྲ་མི་གྲགས་པའི་ཞིང་དུ། དམུས་ལོང་དང་། འོན་པ་དང་། ལྐུགས་པ་དང་། དབང་པོ་མ་ཚང་བར་སྐྱེ་བར་འགྱུར་རོ་ཞེས་པ་དང་། དགོངས་འདུས་ལས། སློབ་མར་གྱུར་ནས་ངན་སེམས་ཀྱིས། །དམ་པ་དེ་ལ་བརྙས་བྱེད་གང་། །སངས་རྒྱས་ཀུན་ལ་བརྙས་པས་ན། །དེ་དག་སྤྱི་ཚུགས་དམྱལ་བར་འགྲོ། །བཀའ་བཅག་ལུང་བོར་ཐུགས་འགལ་ན། །རྡོ་རྗེ་དམྱལ་བར་དེ་འགྲོ་སྟེ། །མི་བཟད་སྡུག་བསྔལ་མྱོང་བར་འགྱུར། །ཚེ་འདིར་རྒྱལ་པོའི་ཆད་པ་སོགས། །ཉེས་པ་ཐམས་ཅད་དེ་ལ་འབྱུང་། །ཞེས་སོ། །དེས་ན་སྐྱོན་ཡོན་ལ་བླང་དོར་ཤེས་པའི་སྒོ་ནས་བླ་མ་དམ་པ་བསྟེན་ཅིང་། མཉེས་པ་སྒྲུབ་པ་ལ་འབད་པར་བྱའོ། །ཞེས་དོན་མདོར་བསྡུས་ནས་ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། དགེ་བའི་བཤེས་གཉེན་བསྟེན་པའི་ལེའུ་སྟེ་བརྒྱད་པའི་རྒྱ་ཆེར་འགྲེལ་པའོ།། །། ༈ གཉིས་པ་མི་དགེ་བའི་བཤེས་གཉེན་སྤང་བ་ལ། མཚམས་སྦྱོར་ཏེ་མདོར་བསྟན། དེ་དག་རྒྱས་པར་བཤད་པ་གཉིས། དང་པོ།
མཚམས་སྦྱོར་ཏེ་མདོར་བསྟན་པ།
དེ་ལྟར་དགེ་བའི་བཤེས་གཉེན་བསྟེན་པའི་སྐྱེས་བུ་རྣམས་ཀྱིས་དེའི་མི་མཐུན་ཕྱོགས་སྡིག་པའི་གྲོགས་པོ་སྤང་བ་ལ་ནན་ཏན་གྱིས་བསླབ་པར་གདམས་པ་ནི། ཞེས་མཚམས་སྦྱར་ནས། དེ་ལྟར་དགེ་བའི་བཤེས་གཉེན་ལེགས་བསྟེན་ནས། །སྡིག་པའི་བཤེས་གཉེན་གྲོགས་དང་བཅས་པ་སྤངས། །ཞེས་གསུངས་ཏེ། སྣང་བ་དང་མུན་པ་ལྟར་ཕན་ཚུན་སྤངས་ཏེ་འགལ་བའི་མཚན་ཉིད་ཀྱིས། དགེ་བའི་བཤེས་གཉེན་དང་སྡིག་པའི་བཤེས་གཉེན་གྲོགས་དང་བཅས་པ་ཡང་ལྷན་ཅིག་མི་གནས་པའི་ཚུལ་དུ་རིག་ནས། དགེ་བ་འདོད་པས་སྡིག་པའི་ཕྱོགས་ལ་མི་བརྟེན་པར་གདམས་པ་ཉིད་དེ། སྤང་བྱ་མི་མཐུན་པའི་ཕྱོགས་སྤངས་ནས་ཐར་པ་ལ་གཞོལ་དགོས་པའི་ཕྱིར་རོ། །སྡོང་པོ་བཀོད་པ་ལས། རིགས་ཀྱི་བུ་དགེ་བའི་རྩ་བ་མངོན་པར་འདོད་པས་དགེ་བའི་བཤེས་གཉེན་ལ་བསྟེན་པར་བྱའི། སྡིག་པའི་གྲོགས་པོ་དག་ལ་ནམ་ཡང་བསྟེན་པར་མི་བྱའོ། །དེ་ཅིའི་ཕྱིར་ཞེ་ན། དེ་དག་གིས་དགེ་བའི་ཕྱོགས་ལ་བར་དུ་གཅོད་པའི་ཕྱིར་རོ་ཞེས་སོ། །གཉིས་པ་ལ། མི་དགེ་བའི་བཤེས་གཉེན་གྱི་མཚན་ཉིད། དེ་སྤང་དགོས་པའི་རྒྱུ་མཚན། དེ་ལྟར་སྤངས་བའི་ཕན་ཡོན་གསུམ། དང་པོ།
མི་དགེ་བའི་བཤེས་གཉེན་གྱི་མཚན་ཉིད།
དེ་ཡང་སྡིག་པ་མི་དགེ་བའི་ཕྱོགས་འཕེལ་བའི་བཤེས་དང་གཉེན་བྱེད་པས་སྡིག་པའི་བཤེས་གཉེན་ཏེ། གང་དག་ཆོས་ལྟར་བཅོས་པའི་མཁན་པོ་དང་། སློབ་དཔོན་དང་བླ་མའི་གཟུགས་སུ་སྣང་བ་རྣམས་དང་། སྡིག་པའི་གྲོགས་བྱེད་ཅིང་དགེ་བ་ལ་བར་དུ་གཅོད་པའི་ཕྱིར། བདག་ལ་ཤ་ཚ་ཞིང་སྙིང་ཉེ་བ་ལྟར་བཅོས་པའི་གྲོགས་སུ་སྣང་བ་ཁྱིམ་པ་དང་། རབ་ཏུ་བྱུང་བའི་ཕྱོགས་ལ་བརྟེན་པ་རྣམས་ཀྱི་མཚན་ཉིད་དང་། རང་བཞིན་ཇི་ལྟ་བུ་ཞེ་ན། དེ་མི་ཤེས་པ་རྣམས་ལ་བསྟན་པའི་ཕྱིར་འདིར་བཤད་པ་ནི། དེ་ཡང་ཉོན་མོངས་ཤས་ཆེ་རང་རྒྱུད་ངན། །ཚེ་འདི་དོན་གཉེར་སྲིད་ལས་ཡིད་མ་དབྱུང་། །ཐོས་བསམ་རྒྱ་ཆུང་ཤེས་བྱའི་གནས་ལ་རྨོངས། །དད་བརྩོན་མི་ལྡན་དགེ་ཚོགས་རིང་དུ་བྱེད། །ཅེས་གསུངས་ཏེ། སློབ་དཔོན་ནམ་གྲོགས་གང་ཡང་རུང་བ་དག་ལ་ཡོད་པ་སྡིག་པའི་རང་བཞིན་འཆད་པ་ཉིད་ནི་འདི་ཡིན་ཏེ། མ་རིག་འདོད་ཆགས་ཁོང་ཁྲོ་དང་། །ང་རྒྱལ་ཐེ་ཚོམ་ལྟ་བ་ལ། །རྩ་བའི་ཉོན་མོངས་དྲུག་ཅེས་བྱ། །ཞེས་པའི་རྩ་བའི་ཉོན་མོངས་པ་དྲུག་ཤས་ཆེ་བས་རང་རྒྱུད་ངན་པ་དང་། འཁོར་བ་ལ་ཡིད་མ་བྱུང་པའམ་ངེས་འབྱུང་མ་སྐྱེས་བས་ཚེ་འདིའི་ཆེ་ཐབས་འབའ་ཞིག་སྒྲུབ་པ། ཐོས་བསམ་གྱི་ནོར་གྱིས་ཕོངས་པས་ཤེས་བྱའི་དོན་ལ་རྨོངས་པ། ཐར་ལམ་ལ་དད་བརྩོན་མེད་པས་རང་རྒྱུད་དགེ་སྦྱོར་དང་མི་འགྲོགས་པའོ། །དེས་མི་ཚད་ད་དུང་གཞན་ཡང་ཡོད་དེ་འདི་ལྟར། སྒོ་གསུམ་མ་དུལ་ཁེངས་དང་བཅོས་མའི་ཚུལ། །གཞན་ལ་གཤེ་ཞིང་དག་སྣང་མོས་གུས་མེད། །ཟས་སྐོམ་ནོར་དང་ལོག་པའི་ཆོས་ལ་སྲེད། །ཅེས་གསུངས་ཏེ། རང་རྒྱུད་ཆོས་དང་འཛོལ་བས་སྒོ་གསུམ་ཉེ་བར་མ་ཞི་བ། ང་རྒྱལ་གྱི་རི་བོ་མཐོ་བས་ཁེངས་པའི་འགྱིང་ཁྱིམ་ཆེ་བ། གཞན་སྣང་ཐབས་ཀྱིས་བསླུ་བས་ཚུལ་འཆོས་ཀྱི་ཟོལ་ཟོག་སྟེ་གཡོ་སྒྱུ་དང་ཁྲམ་ལ་མཁས་པ། བཅོས་མའི་ཚུལ་ཅན་བཟང་པོ་ལྟར་འཆོས་པའི་ངན་སེམས་ཁོག་ཏུ་འཆང་ཞིང་། གཞན་སྣང་སླུ་ཐབས་ལ་མཁས་པ་ཞིག་ལ་གསུངས་པའོ། །ཕྲག་དོག་གི་རླུང་དམར་འཚུབ་པས་རང་མིན་པ་གཞན་ལ་གཤེ་སྐུར་འདེབས་པ་དང་སྨོད་པ། ཕྱོགས་འཛིན་དང་ཆགས་སྡང་ཆེ་བས་གང་ལའང་དག་སྣང་མེད་པ་འཇིག་རྟེན་ན་རང་མིན་བཟང་པོ་གཅིག་ཀྱང་མེད་པའི་སྣང་བ་ཅན། ཡོན་ཏན་དང་ཉམས་མྱོང་མེད་པས་དད་པ་དང་མོས་གུས་མེད་པས་མ་ཚད་དད་མོས་ཇི་ལྟར་བྱེད་དགོས་ཚུལ་ཙམ་ཡང་མི་ཤེས་པ། ཏིང་ངེ་འཛིན་གྱི་བརླན་གྱིས་མ་གོས་པས་ཟས་སྐོམ་ལ་སྲེད་པ་ལྷག་པོར་ཆེ་བ། གཏིང་ནས་ཆོག་ཤེས་མེད་པས་ནོར་རྫས་ལ་ཆགས་ཞེན་ཆེ་བ་འཚེང་རྒྱུ་རྒྱག་རྒྱུ་གང་རྒྱུ་མེད་པའི་སྤྱང་རྟ་ཟན་ཁོག་པ་ལུག་རོས་མི་རྒྱགས་མཁན། ཐར་ལམ་དང་ལས་འབྲེལ་མེད་པས་ཕྱིན་ཅི་ལོག་པའི་ཆོས་ལ་རྣམ་རིག་ལྷག་པར་བཀྲ་ཞིང་དེ་ལ་མོས་པ། ཡང་དག་གི་བླ་མ་མེད་པས་བརྒྱུད་པའི་བྱིན་རླབས་མ་ཞུགས་པའོ། །གཞན་ཡང་། སྡོམ་དང་དམ་ཚིག་འཆལ་ཞིང་རང་རྒྱུད་འཚུབ། །འགྲོགས་ཚད་ཉོན་མོངས་ལོག་པའི་ལམ་ལ་འགོད། །མི་དགེ་འཕེལ་ཞིང་དགེ་ལེགས་འགྲིབ་པ་སྟེ། །སྡིག་པའི་བཤེས་གཉེན་གྲོགས་བཅས་མཚན་ཉིད་ལགས། །ཞེས་གསུངས་ཏེ། ངོ་ཚ་དང་གཉེན་པོ་ཆུང་བས་སོ་ཐར་གྱི་སྡོམ་པ་དང་གསང་སྔགས་ཀྱི་དམ་ཚིག་འཆལ་བ། ཞི་དུལ་གྱིས་སྤྱོད་ལམ་མ་བསྡམས་པ་དང་བཟོད་པ་མ་བསྒོམས་ནས་བཟོད་པའི་གོ་ཆ་མེད་པས་རྐྱེན་ཅུང་ཟད་མཐོང་ནས་སམ་མཐོང་ན་ཡང་རང་རྒྱུད་འཚུབ་པ། ཀུན་སྤྱོད་བཙོག་པ་དང་སྐལ་བ་ངན་པས་ངན་མའི་དྲི་མ་ཤུགས་ཀྱིས་འགོས་ཏེ་འགྲོགས་ཚད་ལ་ཉོན་མོངས་འགོ་བ། ཐོས་བསམ་ཀྱི་ཡོན་ཏན་དམན་པ་དང་བསོད་ནམས་ཀྱི་བསགས་པ་ཆུང་བས་རང་གཞན་ལོག་པའི་ལམ་ལ་འགོད་པ། སེམས་ལ་བདུད་དང་བགེགས་ཆེན་ཞུགས་པས་རང་གཞན་ལ་བཀྲ་མི་ཤིས་པ་སྟེ་ནམ་ཡིན་ཀྱང་མི་འདོད་པ་བྱུང་ན་དེ་ཉིད་བདུད་སྤྲུལ་ལམ་ཡང་ན་དེའི་ཁོག་ལ་བགེགས་ཆེན་ཞུགས་ཡོད་པའི་རྟགས་ཡིན་པ་དང་། གོམས་པ་ཉོན་མོངས་ལ་ཆེ་བས་མི་དགེ་སྡིག་སྤྱོད་འཕེལ་བ། ལེགས་པའི་ཆོས་དང་རྒྱང་བསྲིངས་ཤིང་ཐག་རིང་བས་བཀྲ་ཤིས་དགེ་ལེགས་མེད་པ། ཐེག་དམན་གྱི་བློ་དང་མ་བྲལ་བས་ཐེག་ཆེན་གྱི་གཞུང་ལམ་སྤོང་བ། ཉམས་རྟོགས་ཡོན་ཏན་གྱི་ཕྱི་ནང་གསང་བའི་རྩལ་གསུམ་མ་རྫོགས་པས་ནང་ན་ཉམས་ལེན་གྱི་ལྟ་དགོངས་མེད་དུས། ཕྱིར་ལམ་རྟགས་ཀྱི་ཡོན་ཏན་ཞིག་གང་ན་ཡོད་དེ་ལམ་རྟགས་ཀྱི་ཡོན་ཏན་དང་བྲལ་བ་སྟེ། མདོར་ན་གང་དང་འགྲོགས་པ་དགེ་བ་ལས་ཉམས་ཤིང་སྡིག་པ་འཕེལ་བ་ནི་མི་དགེ་བའི་བཤེས་གཉེན་སྟེ་དེའི་རང་བཞིན་ཡིན་ནོ། །ཇི་སྐད་དུ་འཕགས་པ་དཀོན་མཆོག་བརྩེགས་པའི་མདོ་ལས། སྡིག་པའི་གྲོགས་པོ་དེ་ནི་མི་དགེ་བའི་ཕྱོགས་འཕེལ་བར་བྱེད་པ། དགེ་བ་ལས་རིང་དུ་བྱེད་པ། ལེགས་པ་ལས་ཉམས་པར་བྱེད་པ། ཐར་པའི་ལམ་པོ་ཆེ་ལས་ཟློག་པར་བྱེད་པ། འཁོར་བའི་གྲོང་ཁྱེར་ཉེ་བར་སྟོན་པར་བྱེད་པ། ཐམས་ཅད་དུ་ཉེས་པ་ཀུན་སྡུད་པའི་རང་བཞིན་ཅན་ནོ་ཞེས་སོ། །གཉིས་པ་ལ། དེ་དག་དང་འགྲོགས་པའི་ཉེས་པ་དང་། དེས་ན་དེ་སྤང་བར་གདམས་པ་གཉིས། དང་པོ་ལ་སྤྱི་བྱེ་བྲག་གཉིས། དང་པོ།
དེ་དག་དང་འགྲོགས་པའི་ཉེས་པ་སྤྱིར་བསྟན་པ།
སྡིག་པའི་གྲོགས་པོ། དེ་དང་འགྲོགས་པའི་ཉེས་པ་ཚད་མེད་དེ། །རང་རྒྱུད་ངན་ཅིང་དག་སྣང་ཆུང་བ་དང་། །ཕྱོགས་རིས་ཁེངས་ཤིང་རང་ཕྱོགས་མཆོག་ཏུ་འཛིན། །བདག་བསྟོད་གཞན་སྨོད་ཡང་དག་ཆོས་སྤོང་ཞིང་། །ཐེག་ཆེན་དགེ་བའི་བཤེས་ལ་སྐུར་པ་འདེབས། །ཞེས་གསུངས་ཏེ། འདི་ལྟར་མི་གཙང་བའི་འདམ་དང་ཉེ་བ་རྣམས་དྲི་ངན་པས་ཁྱབ་ཅིང་མི་གཙང་བའི་རྫས་དེའི་ཉེས་པ་འགོ་བ་ལྟར། ངན་པ་དག་ལ་བསྟེན་པའང་དེའི་ཉེས་པས་དེ་དག་ལ་གོས་པར་འགྱུར་བ་ནི་ཆོས་ཉིད་ཡིན་ལ། མི་དགེ་བའི་བཤེས་གཉེན་ལ་བསྟེན་པའང་དེ་ལ་ཅི་ཡོད་པའི་སྐྱོན་ཆེར་འགོ་བས་ཉེས་པ་ཚད་མེད་ལ། རེ་ཞིག་བསྡུ་ན། སློབ་དཔོན་ནམ། བླ་མའམ། གྲོགས་ལ་སོགས་པ་གང་ཡང་རུང་བའི་རང་བཞིན་ལ། དག་སྣང་ཆུང་བ་དང་། རང་རྒྱུད་དམ་མི་གཤིས་ངན་པ་དང་། ཕྱོགས་རིས་ངན་ཞེན་གྱིས་རྒྱུད་ཁེངས་པ་དང་། རང་གི་ལྟ་བ་དང་ཆོས་ལ་མཆོག་ཏུ་འཛིན་པ་ངའི་འདི་ཡིན་ཟེར་བ་དང་། གཞན་ལ་སྨོད་པ་དང་། བདག་ལ་བསྟོད་པ་དང་། རང་གི་ཆོས་བརྒྱུད་མ་ཡིན་པའི་ཆོས་རིགས་གཞན་ལ་ཟུར་གྱིས་སྨོད་ཅིང་སྤོང་བ་དང་། བླ་མ་དགེ་བའི་བཤེས་གཉེན་གཞན་དོན་གྱི་ཁུར་བསྣམས་པ་དག་ལ་ཕྲག་གིས་དོག་པའི་ཀུན་སློང་གིས་སྨོད་པའི་རིགས་ཅན་དེ་དག་དང་འགྲོགས་པ་ན། རང་ཡང་དེའི་ཕྱོགས་དང་མཛའ་བཤེས་དང་འབྲེལ་འདྲིས་ཉེར་བར་བསྟེན་པས་དེའི་ཉེས་པ་མི་འགོ་ཞེས་རུང་ཞོར་ལ་འགོ་བ་ཡིན་ཏེ། ནག་ཅན་རྫ་མའི་དྲི་ནག་དེ། །གང་ལ་འགོས་ན་ནག་པོ་ཡིན། །ཞེས་པའི་གཏམ་དཔེའི་ནང་བཞིན་ཡིན་པས། དང་པོར་འདི་དག་བློ་གཟུ་བོར་མི་གནས་ཤིང་སྐྱོན་ཆགས་པའོ་སྙམ་ཡང་། ཅི་ཞིག་ཙམ་ན་དེ་དག་གིས་མང་དུ་བརྗོད་པ་དེས་ཡིད་འགྱུར་ནས། དེའི་ཕྱོགས་ལ་ཡིད་གཏོད་ཅིང་བླ་མ་ལ་དག་སྣང་ཆུང་བ་ལ་སོགས་པའི་སྐྱོན་ཆགས་པར་འགྱུར་བ་ལ་ཐེ་ཚོམ་མི་ཟ་བའི་ཕྱིར། དང་པོ་ནས་སྡིག་པ་འཕེལ་བའི་སློབ་དཔོན་དང་། གྲོགས་ལ་བརྟེན་འདྲིས་མི་བྱ་བ་ནི་གནད་ཀྱི་གདམས་པ་ཡིན་ནོ། །ཞེས་པ་རེད། འུ་ཚོའི་དུས་རྒྱུན་གྱི་མི་ཕལ་བ་ཞིག་གི་སྤྱོད་སྟངས་ལ་བསམ་བློ་བཏང་ན། དམ་བའི་བཤེས་གཉེན་དང་འཕྲད་པ་དང་། དེའི་ཞལ་ནས་གདམས་ངག་ཐོབ་པ་ནི་རྒྱ་ལམ་རེས་འགའ་ཡིན་ལ། དུས་རྒྱུན་གྱི་དུས་ཚོད་མང་ཆེ་བ་ནི་འཇིག་རྟེན་ཐ་མལ་གྱི་ཆགས་སྡང་རྨོངས་གསུམ་དང་འབྲེལ་བའི་གཏམ་གླེང་བ་དང་། ལས་བྱེད་པ་འབའ་ཞིག་དང་འབྲེལ་བའི་ཐོག་མེད་ཀྱི་གོམས་ཤུགས་ཆེ་བས་མ་ཚད། ད་ལྟའི་སྐབས་སུ་ཡང་། རྐྱེན་བཟང་པོ་བས་ངན་པ་བརྒྱ་འགྱུར་སྟོང་འགྱུར་གྱིས་མང་པ་ཡིན་པས། ལས་ངན་གྱི་མཚོ་ཆེན་རྡོལ་ནས། གྲོགས་པོ་ངན་པ་དེའི་ཕྱོགས་སུ་སོང་བའི་དབང་གིས། ངེས་འབྱུང་སད་སུད་དང་། དད་མོས་ཆུང་ཆུང་ཞིག་ཡོད་པ་དེའང་སྟོབས་ཞན་ནས་ངན་པའི་ཕྱོགས་སུ་རང་ཤུགས་ཀྱིས་ཤོར་ངེས་ཡིན། དེས་ན་ཕ་མ་ཡིན་ཀྱང་སྡིག་གྲོགས་དང་མི་དགེ་བའི་བཤེས་ཀྱི་མཚན་ཉིད་ཚང་ན་རྒྱང་སྲིང་དགོས་པའོ། །ཡུམ་བར་མ་ལས། རབ་འབྱོར་དེ་ལ་སྡིག་པའི་གྲོགས་པོའི་སུག་བར་ལྷུང་བའམ་རྐང་འོག་ཏུ་ནུབ་པའམ་རྐང་རྗེས་སུ་འབྲངས་བ་དེ་དག་གིས་དགེ་བའི་ཕྱོགས་ཐམས་ཅད་ཀྱང་ཉམས་པར་འགྱུར་རོ། ཞེས་པ་ལ་སོགས་པ་གསུངས་སོ། །དེས་ན་དབང་འོག་ཏུ་འདུག་པར་མི་བྱའོ་ཞེས་པའི་དོན་ཏོ། །སྡིག་པ་འཕེལ་བའི་སློབ་དཔོན་དང་གྲོགས་ངན་དེ་དག་གི་སྐྱོན་གཞན་ཡང་། ནོར་རྫས་སྲེད་ཅིང་ཆགས་སྡང་དུག་མདའ་འཕེན། །ཚེ་འདིའི་དབང་གྱུར་ཐར་ལམ་རྒྱབ་ཀྱིས་ཕྱོགས། །དགེ་ལེགས་འགྲིབ་ཅིང་མི་དགེ་འཕེལ་བ་ཡིན། །ཅེས་གསུངས་ཏེ། གོང་ནས་བཤད་པའི་སྐྱོན་དེ་དག་ལས་གཞན་འདོད་ཡོན་ལ་ཆགས་པས་ནོར་རྫས་ལ་སྲེད་པ་ཆེ་བ། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སྟེ་ཉོན་མོངས་པ་དུག་ལྔ་རགས་ཅིང་རྩུབ་པས་ཆགས་སྡང་དང་གདུག་རྩུབ་ཆེ་བ། འདིར་སྣང་འཁོར་བའི་སྣོད་བཅུད་དང་དེའི་འདོད་ཡོན་ལ་ཆགས་པས་ཚེ་འདིའི་བྱ་བ་རྐྱང་བ་ལ་བརྩོན་པ། བདུད་དང་ཉོན་མོངས་ཀྱི་དབང་དུ་སོང་བས་ཐར་ལམ་ལ་རྒྱབ་ཀྱིས་ཕྱོགས་པ། ང་དང་ང་ཡིར་བཟུང་ནས་བདག་དང་གཉེན་གྱི་ཕྱོགས་ལ་ཆགས། དགྲ་དང་དེའི་ཕྱོགས་ལ་སྡང་ནས། འཁྲུལ་སྣང་ངན་བའི་བག་ཆགས་ལ་ཨ་འཐས་ནས། གཟུང་འཛིན་དང་ཉོན་མོངས་ཆེ་བས་དགེ་བ་ཆུང་ཐོག་ཏུ་མར་མར་ཇེ་ཆུང་དུ་འགྲིབ་ཅིང་མི་དགེ་བ་ཆེ་ཐོག་ཏུ་ཡར་ཡར་འཕེལ་བའི་རིགས་ཅན་རྣམས་ལ་བསྟེན་ན། དེ་བས་ཀྱང་ཆེས་ངན་པར་འགྱུར་ཏེ། འདུལ་བ་ལུང་ལས། མི་ཡི་མདུན་ན་ཉ་རུལ་ལ། །ཀུ་ཤ་ཉིད་ཀྱིས་དམ་དཀྲིས་པ། །དེ་ནི་རིང་པོར་མི་ཐོགས་པར། །ཀུ་ཤ་ཉིད་ཀྱང་དེ་འདྲར་འགྱུར། །དེ་བཞིན་སྡིག་པའི་གྲོགས་བསྟེན་པས། །ཀུན་ཏུ་དེ་འདྲར་འགྱུར་བ་ཉིད། །ཅེས་ཤ་རུལ་བ་ལྕིབས་བྱེད་དང་བཅས་ལ་རུལ་དྲི་བྲོ་བ་བཞིན་དུ་འགྱུར་བ་ཡིན་གསུངས་པ་བཞིན་ནོ། །གཉིས་པ།
དེ་དག་དང་འགྲོགས་པའི་ཉེས་པ་བྱེ་བྲག་ཏུ་བཤད་པ།
རྣམས་གྲང་། གཞན་ཡང་གང་དང་འགྲོགས་པ་དེ་འགོ་སྟེ། །གཏི་མུག་ཅན་བསྟེན་ཐོས་བསམ་ཤེས་རབ་འགྲིབ། །ཞེ་སྡང་ཅན་ལས་མ་རུངས་རང་རྒྱུད་ངན། །འདོད་ཆགས་ཅན་ལས་ཡུལ་ལ་སྲེད་པ་འཕེལ། །ང་རྒྱལ་ཤས་ཆེ་ཕྱོགས་རིས་གཉིས་འཛིན་འགོ །ཕྲག་དོག་ཤས་ཆེ་འགྲན་སེམས་ཟུག་རྔུ་ཉིད། །སྤེལ་མ་དང་འགྲོགས་ཉེས་ཀུན་སྤེལ་མར་འགོ །ཞེས་གསུངས་ཏེ། རྒྱུན་དུ་འགྲོགས་པའི་གྲོགས་གང་གི་རྒྱུད་ལ་ཡོད་པའི་སྤྱོད་པ་དེ་ནི་འཕྲལ་དུ་རང་ཉིད་ལ་འགོ་བར་སླ་བ་ནི་ཆོས་ཉིད་ལ། གྲོགས་སམ་བླ་མའི་རིགས་གཏི་མུག་ཤས་ཆེ་བ་དང་འགྲོགས་ན་དེའི་ཤན་ཞུགས་ནས་ཐོས་བསམ་གྱི་ཤེས་རབ་འགྲིབ་པའི་ཉེས་པ་འགོ། ཞེ་སྡང་ཤས་ཆེ་བ་དང་འགྲོགས་ན་རྒྱུད་གཏུམ་ཞིང་སྤྲོ་ཐུང་གདུག་རྩུབ་ཀྱི་ཉེས་པ་འགོ། འདོད་ཆགས་ཤས་ཆེ་བ་དང་འགྲོགས་ན་དེས་དེ་ཤ་སྟག་བཤད་པས་ཡུལ་ལ་འདོད་སྲེད་ཀྱི་ཉེས་པ་འགོ། ཟ་འཐུང་མིན་པའི་བསམ་རྒྱུ་མེད་པའི་བཟའ་འཚོལ་མུ་ཏོ་པ་སློང་ཟས་ཀྱིས་འཚོ་མཁན། ཡང་བྱིན་ན་ཡང་སློང་བ། མེད་མུག་ཁ་ནས་འདོན་པ་སྒོར་མོ་ཁྲི་ཚོ་ཁ་ཤས་རུམ་དུ་བཅུག་ནས། ད་རུང་རྒྱ་སྲང་ནས་དམར་འབལ་ལེ་གོན་ནས། ཨ་ཁུ་ཚེ་རིང་ལོ་བརྒྱ། ཨ་ནེ་མ་ཟེར་བཞིན་མཐེ་མོ་བཙོང་ནས་གོར་རྡོག་སློང་མཁན་དེ་དག་དང་འགྲོགས་ན་བཟའ་བཏུང་རྙེད་ཚོལ་གྱི་ཉེས་པ་འགོ། ནོར་སྲེད་འཇུར་འགེགས་དང་འགྲོགས་ན་བཏང་དགོས་ས་རུ་བཏང་མི་ཕོད་པར་སྤར་མོ་འཁུམས་འདུག་པའི་སེར་སྣ་སྡུག་འཁུམས་ཀྱི་ཉེས་པ་འགོ གཡེང་གསེབ་རླུང་ཁྱེར་དང་འགྲོགས་ན་མོ་སྲེད་སྒེག་ཆོས་ཀྱི་ཉེས་པ་འགོ ང་རྒྱལ་ཤས་ཆེ་བ་དང་འགྲོགས་ན་ཕྱོགས་རིས་གཉིས་འཛིན་གྱི་ཉེས་པ་འགོ ཕྲག་དོག་ཤས་ཆེ་བ་དང་འགྲོགས་ན་འགྲན་སེམས་ཁོང་ཁྲོའི་ཉེས་པ་འགོ སེར་སྣ་ཤས་ཆེ་བ་དང་འགྲོགས་ན་བསོག་བྲུན་འཛིན་ཆགས་ཀྱི་ཉེས་པ་འགོ ཞེས་འདོད་ཆགས་ཞེ་སྡ་གཏི་མུག་གསུམ་དང་། ང་རྒྱལ་ཕྲག་དོག་སེར་སྣ་གསུམ་སྟེ་དྲུག་པོ་གང་ཤས་ཆེ་བའི་མི་དང་འགྲོགས་ན། དེ་དང་དེའི་ཉེས་པ་རང་ཤུགས་ཀྱིས་འགོ་བ་ཡིན་པར་བསྟན་ཏོ། །ཉོན་མོངས་པ་དྲུག་ཀ་ཤས་ཆེ་བ་དང་འགྲོགས་ན་ཉེས་པ་ཐམས་ཅད་འགོ་བས་དེ་ལྟ་བུའི་གྲོགས་དང་བཤེས་གཉེན་བསྟེན་ན་སྡིག་པའི་རྩ་ལག་ཅེས་གྲགས་སོ། །གོང་དུ་བཤད་པའི་དུག་ལྔ་སེར་སྣ་དང་དྲུག་ནི། རྩ་བའི་ཉོན་མོངས་པ་དྲུག་ཅེས་བྱའོ། །དྲན་པ་ཉེ་བར་གཞག་པ་ལས། འདོད་ཆགས་དང་། ཞེ་སྡང་དང་། གཏི་མུག་ཐམས་ཅད་ཀྱི་རྩ་བར་གྱུར་པ་ནི་སྡིག་པའི་གྲོགས་པོ་ཡིན་པས། དེ་ནི་དཔེར་ན་དུག་གི་སྡོང་པོ་ལྟ་བུར་ཉེས་པ་ཆེའོ་ཞེས་སོ། །དེས་ནི་རྩ་བའི་ཉོན་མོངས་པ་དྲུག་ཤས་ཆེ་བ་དང་འགྲོགས་ན་དེའི་ཉེས་པ་འགོ་བ་བསྟན་ནས། འཁོར་བར་ངེས་འབྱུང་མ་སྐྱེས་པའི་མི་དང་འགྲོགས་པའི་ཉེས་པ་ནི་གཞན་ཡང་འཁོར་བ་ལས་ཡིད་མ་བྱུང་བ་རྣམས་དང་འགྲོགས་པའི་ཉེས་པ་ཡང་འདི་ལྟར། ངེས་འབྱུང་མེད་དང་ཚེ་འདིར་མངོན་དགའ་དང་། །འདུན་གྲོས་མཁན་དང་རྩེ་འཇོ་འཇོ་སྒེག་ཅན། །ཆེ་བཙན་ནོར་ལ་སྲེད་དང་ཁེ་སྤོགས་མཁན། །ལས་བྱེད་ལ་སོགས་གང་དང་འགྲོགས་གྱུར་དེའི། །ཀུན་སྤྱོད་སྐལ་བ་ངན་པ་འགོས་པར་འགྱུར། །ཞེས་གསུངས་ཏེ། མི་ཆོས་ཁྱིམ་ཐབ་པ་དང་འགྲོགས་ན་སོ་ནམ་དང་བསོག་འཇོག་འགོ་བའི་ཉེས་པ་ཡོད་དོ། །ཁྱིམ་ནི་ཉེས་པ་སྣ་ཚོགས་ཀྱི་འབྱུང་ཁུངས་ཡིན་པས། ཤཱཀྱའི་རྗེས་འཇུག་གི་རབ་བྱུང་ཐམས་ཅད་ཁྱིམ་ནས་ཁྱིམ་མེད་པར་རབ་ཏུ་བྱུང་དགོས་པ་ནི་ཁྱིམ་གྱི་ཉེས་པ་མི་འགོ་བའི་ཆེད་ཡིན། དེང་སང་གི་ཁ་སྐད་དུ་ཆབ་སྲིད་པ་ཞེས་པ་སྟེ། སྲིད་དོན་པ་མཆོག་གྱུར་རེ་གཉིས་མ་གཏོགས་མང་ཆེ་བ་བསམ་ངན་གཡོ་སྒྱུ་ཅན་ཡིན་པས་བློན་པོ་གཙོ་ཆེན་རྣམས་དང་འགྲོགས་ན་འདུན་གྲོས་བསམ་ངན་འགོ་བའི་ཉེས་པ་ཡོད། ན་གཞོན་རྩེ་དགའ་པ་དང་འགྲོགས་ན་གླུ་བྲོ་དམན་སྤྱོད་འགོ་བའི་ཉེས་པ་ཡོད། ཁེ་སྤོགས་ནོར་འཚོལ་བ་རྣམས་དང་འགྲོགས་ན་ཡས་ནས་བཅད་རྒྱུ་ཞིག་དང་། མས་ནས་ཟ་རྒྱུ་ཞིག་ཨེ་རག་བསམ་སྙམ་པའི་ཟས་ནོར་རྙེད་འཚོལ་འགོ་བའི་ཉེས་པ་ཡོད། དེ་ཡང་སུ་ཞིག་སུ་གོ་མས་ཚོང་ཅི་ཞིག་འདྲ་ཞིག་བརྒྱབ་ནས་སྒོར་ཅི་ཞིག་འདྲ་ཞིག་ཁེ་ཐོབ་རབས་དང་། བུན་སྐྱེད་བཏང་ཚུལ་སོགས་འབའ་ཞིག་བཤད་ནས་འདོད་རྔམ་ཇེ་ཆེར་འགྱུར་བའི་ཉེས་པ་འགོ་བ་དང་། རྒྱལ་པོ་ཆེ་བཙན་པ་དང་འགྲོགས་ན་ང་རྒྱལ་ཆེ་དྲག་འགོ་བའི་ཉེས་པ་ཡོད། མ་ཆེ་རུང་ཆེ་འགྱིང་བྱས་དུས་ལྷག་པར་དུ་ལྷང་ལ་བུད་པའི་རྟགས་ཅན་མི་མཛེས་པ་ཞིག་ཡིན། ཆེན་པོ་ངོ་མའི་ཆེ་ཉམས་དང་། དམན་པའི་རང་མཐོང་གི་འགྱིང་ཉམས་གཉིས་ཁ་ཁར་བྱེ་འདུག་པ་དེ་ལྟར་རོ། །རྐུ་འཕྲོག་འཐབ་རྩོད་པ་དང་འགྲོགས་ན་ཞེ་སྡང་བརྡུང་བསད་འགོ་བའི་ཉེས་པ་བརྒྱབ་རབས་བརྐུས་རབས་བཤད་ནས་བར་ཞིག་དེ་ལག་ལེན་དུ་འདེབས་རྒྱུའི་ཉེས་པ་འགོ་བ་ཡོད་པས་སྤང་དགོས་ཏེ། སའི་སྙིང་པོའི་མདོ་ལས། མཁས་པ་རྣམས་ཀྱིས་སྨོན་ལམ་བཏབ་པ། རྒྱལ་པོ་ཆེན་པོ་ཡུལ་གྱི་རྒྱ་ཕྲན་དང་། དེའི་ཕྱི་ནང་གི་བློན་པོ་དང་། ཡུལ་སྡེའི་གཙོ་བོ་དང་། མི་ཆེན་གྱི་གམ་ཅར་མཁན་གསོལ་གཟིམ་དྲུང་གསུམ་ལ་སོགས་པའི་མདུན་ན་འདོན་དང་། ཤ་ར་བ་ལིངས་པའམ་རྔོན་པའི་དཔོན་པོ་དང་། རྒྱ་མཚོར་འགྲོ་བའི་སྣེ་ཁྲིད་ཀྱི་དེད་དཔོན་དང་། མཁན་པོ་ལ་ས་མཁན་རྡོ་མཁན་ཤིང་མཁན་ལ་སོགས་པ་ཡོད་པས་ལས་རིགས་འགའ་འམ་སྣེ་རེ་གཉིས་ལ་མཁས་པའི་མཁན་པོ་དང་། དགེ་སློང་རྣམ་ལ་དབང་བྱེད་ཀྱི་བདག་པོ་དགེ་སྦྱོང་གཙོ་བོ་དང་། རྒྱལ་པོའི་མཛོད་ཁང་གི་བདག་པོའམ་ཁབ་སོ་བ་དང་། དེ་དག་ལ་སོགས་པ་བསྟེན་པ་ལས་ལས་ངན་ཤིན་ཏུ་མི་ཟད་པ་འཕེན་པ་ཐམས་ཅད་ཐོབ་པར་མ་གྱུར་ཅིག་ཅེས་པ་དང་། ཀླུའི་དབང་པོས་ཀྱང་། མཐོ་རིས་མི་ཡི་ལུས་སུ་སྐྱེས་ནས་ཀྱང་། །སྡིག་སྤྱོད་རྒྱལ་པོར་མ་སྐྱེ་བློན་པོ་དང་། །དམག་དཔོན་ཞལ་ལྕེ་གཅོད་པར་བདག་མ་སྐྱེ། །དགེ་སློང་རྣམས་ལ་དབང་བྱེད་བདག་པོ་དང་། །གནས་བརྟན་ལས་བྱེད་པ་དང་ནང་ཁྲིམས་པ། །དགེ་བསྐོས་གཙང་སྦྱོར་བ་དང་དམ་བཞག་པ། །གང་ཟག་ལས་བྱེད་རྣམས་སུ་བདག་མ་སྐྱེ། །ཞེས་གསུངས་སོ། །དེ་ལྟར་སྡིག་པའི་ཕྱོགས་ལ་བསྟེན་པའི་ཉེས་པ་ཚད་མེད་པ་ལས་ཕྱོགས་དང་པོ། རྨོངས་པ་དག་དང་འགྲོགས་པའི་ཉེས་པ་ཡང་། །ཤེས་བྱའི་གནས་ལ་རྨོངས་དང་ཕྱོགས་རེས་ཁེངས། །ཐར་ལམ་མི་ཤེས་ལོག་པའི་ལམ་བགྲོད་འགྱུར། །ཞེས་གསུངས་ཏེ། དེ་ལ་སྡིག་གྲོགས་ཀྱི་ཕྱོགས་མང་པོ་ཡོད་པའི་ནང་ནས་གང་དང་འགྲོགས་ན་ལྷག་པར་དུ་ཉེས་པ་ཆེ་ན། རྨོངས་པ་དག་དང་འགྲོགས་པ་ཉེས་པ་ཆེ་སྟེ། མི་འདོད་སྣ་དགུ་ཐམས་ཅད་ཀྱི་ཁུངས་སམ་ཕུག་པོ་དེད་སོང་ན། མི་ཤེས་མི་མཁས་པའི་རྨོངས་པ་འདི་ཡིན་པས། རང་དང་པོ་ནས་རྨོངས་པ་ཡིན་པ་ལ། གཞན་རྨོངས་པའི་གྲོགས་དང་འགྲོགས་དུས། རྨོངས་པ་ཁྱུ་གཅིག་ཏུ་འགྱུར་བ་ཡིན། རྨོངས་པ་ཁྱུ་གཅིག་ཏུ་གྱུར་དུས་འུག་རྒན་ཁྱུ་གཅིག་གིས་ཉིན་མཚན་དང་མཚན་ཉིན་མོ་ཡིན་སྣང་འཆར་བ་བཞིན་དུ་མགོ་འཁོར་བ་ཡིན་ཏེ། སྤྱིར་འཁོར་བར་འཁྱམས་པའང་རྨོངས་པ་མི་ཤེས་པའི་སྲིད་རྩའི་གདོན་ཆེན་མ་རིག་པ་ལས་བྱུང་ལ། ལས་དང་ཉོན་མོངས་པའང་མ་རིག་པ་དེ་ལས་རིམ་གྱིས་མཆེད་ཅིང་བྱུང་བའི་ཕྱིར་དང་། བྱེ་བྲག་ཏུ་ཐར་ལམ་བྱང་ཆུབ་སྒྲུབ་པ་ལ་སློབ་དཔོན་ནམ། བླ་མ་རང་གིས་ཀྱང་ཐར་ལམ་གང་ཡིན་མི་ཤེས་པ་ཁོ་ན་བསྟེན་པ་སྒོ་གྱོང་ངམ་གྱོང་སྒོ་ཆེ་སྟེ་གྲོལ་བ་ཐོབ་ཏུ་རེ་ནས་དེའི་རྗེས་སུ་ཞུགས་པས་དེས་ལམ་ཕྱིན་ཅི་ལོག་ཏུ་ཁྲིད་ཚེ། དང་པོའི་སྐབས་སུ་ལམ་བཟང་མ་རྙེད་ཀྱང་ལོག་པར་སོང་མེད་ལ། ད་ལྟར་ལོག་པར་སོང་ནས་ཚེ་རབས་གཏན་གྱི་འདུན་མ་འཆུག་པས་གྱོང་ཆེ་སྟེ། ལམ་མ་ཡིན་པ་ལ་སྦྱར་ནས་གྲོལ་བ་ཐོབ་ཏུ་རེ་བ་ཁ་ནུབ་ཏུ་འཁོར་ནས་ཤར་དུ་ཨེ་ཐོན་གྱི་རེ་སྟོང་འཆང་བ་ལྟ་བུ་ཡིན་བའི་ཕྱིར་རོ། །ལམ་མ་ཡིན་པའང་ལྟར་སྣང་བློ་སྣ་ཆུང་བ་འབྲིད་ཕྱིར་དུ་ཆོས་ལྟར་བཅོས་པ་སྟེ། ཐོས་བསམ་ཚིག་གི་དུག་གིས་སངས་རྒྱས་མི་ཐོབ་ཅེས་རྒྱལ་བའི་བཀའ་ལུང་ལ་སྐུར་པ་འདེབས། བྱས་ཆོས་ཀྱིས་འཁོར་བ་སྒྲུབ་བ་ཡིན་པས་ན་བྱར་མེད་ནམ་མཁའ་ལྟ་བུ་སྒོམས་ཤིག་དང་དེས་ཆོག་པ་ཡིན་ཅེས་ལམ་ཚོགས་གཉིས་གསོག་པ་ལ་སྐུར་པ་འདེབས་པར་བྱས་ནས་ཚོགས་གཉིས་བསག་མི་དགོས་པ་བསྟན་པ་དང་། སངས་རྒྱས་དང་བྱང་ཆུབ་སེམས་དཔའི་ས་ན་སྟོབས་དང་། མི་འཇིགས་པ་དང་། སྐུ་དང་། ཡེ་ཤེས་དང་། ཞིང་གི་རྒྱན་བཀོད་པ་བཤད་པ་རྣམས་དྲང་དོན་ཡིན་གྱིས། དོན་ལ་ཅི་ཡང་མེད་ཅེས་འབྲས་བུ་ལ་སྐུར་པ་འདེབས། གནས་ལུགས་བདེ་བར་གཤེགས་པའི་སྙིང་པོ་ཡོན་ཏན་ལྷུན་གྲུབ་འོད་གསལ་དུ་གསུངས་པ་ལ། དེ་ཉིད་དྲང་དོན་བྱིས་པའི་ཆོས་སུ་འདོད་པས། ད་ལྟའི་འཁྲུལ་རྟོག་རང་ག་མ་སོ་མ་ཉམས་པ་འདི་གནས་ལུགས་སུ་འདོད་པས་གཞི་ལ་སྐུར་པ་འདེབས། ས་དང་། ལམ་དང་། ཏིང་ངེ་འཛིན་གྱི་ཚོགས་དྲང་བའི་དོན་ཙམ་སྟེ། དོན་ལ་མེད་ཅེས་རྣམ་པར་གྲོལ་བའི་ཡོན་ཏན་ལ་སྐུར་པ་འདེབས་པ་སྟེ། དེང་སང་གི་དུས་ན་མདོ་རྒྱུད་མན་ངག་ལུང་རིགས་གང་དང་ཡང་མི་མཐུན་པའི་ཕར་བལྟས་བླ་མའི་གཟུགས་བརྙན་དུ་བྱེད་བའི་རྫིག་ཉམས་ཅན་མང་པས། གཞན་སེམས་ཅན་གྱི་འདྲེན་པར་ཁས་འཆེ་བ་དུས་མཐའི་བླ་གཟུགས་སུ་བྱོན་པ་རྣམས་ནི། ཐོས་བསམ་རྒྱ་ཆེན་པོ་ལ་རང་ཉིད་ཀྱིས་བློ་མ་སྦྱངས་པའི་དབང་གིས་གཞན་ལ་ཡང་ཐོས་བསམ་མི་དགོས་པར་སྒྲོག་པའི་རྨོངས་པ། བདེ་བར་གཤེགས་པའི་སྙིང་པོ་ལ་སྐུར་བ་འདེབས་པ་དང་། འཁྲུལ་རྟོག་གནས་ལུགས་སུ་འདོད་པ་སོགས་བསྟན་པའི་བདུད་ཚིག་རྔམས་པོ་ཆེར་སྨྲ་བ་མང་སྟེ། དད་ལྡན་ཐར་པ་བགྲོད་པའི་ལམ་གྱི་གེགས་སུ་བདུད་རིགས་ཀྱི་མི་མ་ཡིན་གྱིས་ཆེད་དུ་བཀོད་ནས་འཁོར་དང་ལོངས་སྤྱོད་མངའ་ཐང་དང་བསོད་ནམས་དང་ལྡན་པར་བྱིན་གྱིས་བརླབས་པ་ཉིད། མྱ་ངན་ལས་འདས་པ་ཆེན་པོའི་མདོ་ལས། ཀུན་དགའ་བོ་ང་ཡོངས་སུ་མྱ་ངན་ལས་འདས་པའི་འོག་ཏུ། དམ་པའི་ཆོས་མིན་པ་ཆོས་ལྟར་བཅོས་པ་མང་དུ་འབྱུང་སྟེ། ཁ་ཅིག་ནི་འགྲོ་བ་འདི་དག་སྟོང་པའོ་ཞེས་བསོད་ནམས་དང་ཡེ་ཤེས་ཀྱི་ཚོགས་ལ་ཉེ་བར་མི་བསྟེན། ཁ་ཅིག་ནི་རང་བཞིན་གྱིས་རྒྱུ་མེད་དོ་ཞེས་ལས་དང་ལས་ཀྱི་འབྲས་བུ་ལ་སྐུར་པ་འདེབས། ཁ་ཅིག་ནི་ངོ་བོ་ཉིད་ཀྱི་བདག་མེད་ཅེས་གང་ཡང་སྤང་བ་དང་བླང་བར་མི་བྱེད། ཁ་ཅིག་ནི་ཀུན་ནས་ཉོན་མོངས་པ་དེ་ཉིད་རྣམ་པར་བྱང་བའོ་ཞེས་ཉོན་མོངས་པ་རང་དགར་སྤྱོད། ཁ་ཅིག་ནི་ཆོས་ཐམས་ཅད་ནི་སྟོང་པའོ་ཞེས་རྣམ་པར་གྲོལ་བའི་ཡོན་ཏན་མེད་པར་འཛིན་ཏོ། །མི་གཏི་མུག་ཅན་དེ་དག་ནི་བདུད་ཀྱིས་བྱིན་གྱིས་བརླབས་པའོ། །དམ་པའི་ཆོས་ལྟར་བཅོས་པའོ་ཞེས་གསུངས་སོ། །དེ་ལྟ་བུའི་བླ་མའི་དྲུང་དུ་ཕྱིན་པ་ལས། དང་པོ་ཡང་དག་པའི་ཆོས་ཅུང་ཙམ་ཤེས་མཁན་ཞིག་ཡིན་ཀྱང་རིམ་གྱིས་བརྗེད་པར་འགྱུར་ན། ཕྱིས་ཡོན་ཏན་གསར་དུ་སྐྱེ་བ་ལྟ་ཅི་སྨོས་ཏེ་གནས་མེད་དོ། །དེས་ནི་སྤྱིར་རྨོངས་བའི་བཤེས་གཉེན་དང་འགྲོགས་པའི་ཉེས་པ་བསྟན་ནས། བྱེ་བྲག་ཏུ་ཤེས་བྱའི་གནས་ལ་རྨོངས་པ་དེ་དག་དང་འགྲོགས་པའི་ཉེས་པ་ནི། སྒྲ་རིག་པའི་གནས་ལ་རྨོངས་པ་དང་འགྲོགས་པས། སྒྲ་དོན་གྱི་འགྲེལ་པ་མི་ཤེས་པའི་ཉེས་པ་འགོ་བར་གྱུར་ནས་བསྔོ་ཡིག་འབྱོར་ལན་ཞིག་གི་གོ་བརྡ་མི་འཕྲོད་པར་འགྱུར་བ་དང་། གསོ་བ་རིག་པའི་གནས་ལ་རྨོངས་པ་དང་འགྲོགས་པས་འདུ་བའི་ནད་སེལ་བ་མི་ཤེས་པའི་ཉེས་པ་འགོ་བར་གྱུར་ནས་འཕྲོད་བསྟེན་ཕལ་བའི་ཤེས་བྱ་ཡང་མི་ཤེས་པར་གྱུར་བ་དང་། གཏན་ཚིགས་རིགས་པའི་གནས་ལ་རྨོངས་པ་དང་འགྲོགས་པས་བླང་དོར་རིགས་པ་དང་མི་རིགས་པའི་རིམ་པ་མི་ཤེས་པའི་ཉེས་པ་འགོ བཟོ་རིག་པའི་གནས་ལ་རྨོངས་པ་དང་འགྲོགས་པས་གནས་སྐབས་ཉེ་བར་མཁོ་བའི་དོན་མི་ཐོབ་པའི་ཉེས་པ་འགོ ནང་རིག་པའི་གནས་སྡེ་སྣོད་གསུམ་ལ་རྨོངས་པ་དང་འགྲོགས་པས་མངོན་པར་མཐོ་བ་གནས་སྐབས་མཐོ་རིས་ཀྱི་བདེ་བ་དང་། མཐར་ཐུག་ལེགས་པ་ངེས་པར་ལེགས་པ་ཐར་པ་བྱང་ཆུབ་ཀྱི་ལམ་བཟང་སྒྲུབ་མི་ཤེས་པའི་ཉེས་པ་ཆེ་བ་དེ་འགོ ཕྱོགས་རེའི་གཞུང་ལུགས་ལ་ཞེན་པ་དང་འགྲོགས་ན་གྲུབ་མཐའ་ཕྱོགས་འཛིན་གྱི་ཉེས་པ་འགོ་བས་མཐའ་དག་བློར་མི་ཤོང་བར་རང་ཕྱོགས་དེ་མ་བཟང་ཡང་བསྟོད་པ་དང། གཞན་ཕྱོགས་བཟང་ཡང་སྨད་པའི་སྐྱོན་འགོས་ནས་རང་གིས་མི་ཤེས་ཤིང་གཞན་གྱིས་ཁྲེལ་བའི་རྒྱུ་རུ་འགྱུར་བ་དང་། ཐོས་བསམ་ཕྱོགས་མེད་དུ་མ་སྦྱངས་པ་དང་འགྲོགས་ན་ཐོས་རྒྱ་ཆུང་བ་ཁྲོན་པའི་སྦལ་བ་ལྟ་བུར་གྱུར་ནས་ཐར་ལམ་བྱང་ཆུབ་ཡང་དག་གི་ལམ་མི་རྙེད་པས། ཚེ་གཅིག་ཡུན་ལ་ཕན་པའི་གཏན་གྱི་འདུན་མ་འཆུག་པའི་ཉེས་པ་ཡོད་པའི་ཕྱིར། ཐར་བ་མ་འདོད་ན་མ་འདོད་པ་རེད་མ་གཏོགས་ཐར་པ་འདོད་ན་བླ་མ་མཁས་པ་མདོ་རྒྱུད་ཀྱི་དགོངས་པ་ཁྲོལ་བ་ལ་བསྟེན་པར་བྱའོ། །བསྟེན་དགོས་པའི་ཚུལ་ནི། སའི་སྙིང་པོའི་མདོ་ལས། སྡིག་པའི་གྲོགས་པོ་ལ་བསྟེན་ན། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། རྣམ་པར་འཁྲུལ་པ་དང་། རྣམ་པར་རྨོངས་པར་འགྱུར་རོ་ཞེས་པ་དང་། སངས་རྒྱས་ཀྱི་མཛོད་ཀྱི་མདོ་ལས། རང་གི་ལས་ཀྱང་མི་ཤེས་པར་གཞན་ལ་ཆོས་སྟོན་པ་ནི་སེམས་ཅན་དམྱལ་བར་ལྟུང་ངོ་། །དགྲས་ཕྲོགས་པ་ནི་ལུས་གཅིག་པུ་གཏོར་བ་ཙམ་དུ་ཟད་ཀྱིས། འདི་ལྟ་བུའི་གཏི་མུག་ཅན་གྱིས་ཆོས་བཤད་པ་མི་གཙང་བས་ནི་བསྐལ་པ་སྟོང་ཕྲག་ཁྲི་འབུམ་གྱི་བར་དུ་སེམས་ཅན་དམྱལ་བ་ཆེན་པོ་རྣམས་ཀྱི་རྐུན་པོས་མྱ་ངན་བྱས་སོ། །མི་གང་ཞིག་གིས་སྟོང་གསུམ་གྱི་སེམས་ཅན་རྣམས་ཀྱི་སྲོག་འཕྲོག་པའི་སྡིག་པ་བས། ཆོས་འཆད་པ་མི་གཙང་བ་སྡིག་པ་ཆེའོ་ཞེས་པ་དང་། དེ་ལས་ལྡོག་པ་ཆོས་འཆད་པ་གཙང་བ། འཆད་པ་པོ་སོ་སོའི་རྒྱུད་ཚོད་ཀྱི་སྤོབས་པ་དང་ཤེས་རབ། ཐོས་རྒྱ་ཆེ་ཆུང་སོགས་མ་འདྲ་ན་ཡང་། གཞན་ལ་ཕན་པའི་བསམ་པ་དག་པས་ཆོས་ཚིག་བཞི་ཞིག་གིས་དོན་རང་གིས་འཛིན་ཅིང་གཞན་ལ་སྟོན་པའི་བསོད་ནམས་དཔག་ཏུ་མེད་ཚུལ་ཤུགས་ཀྱིས་གོའོ། །ཁྱུང་ཆེན་ལས། སློབ་དཔོན་ཚད་མར་མ་གྱུར་སྤྲེའུ་འདྲའི་ལུང་། །བསྟེན་པས་ལམ་ནོར་རྟོགས་པས་ཟིན་ཏ་རེ། །ཞེས་སོ། །དེ་བས་ན་ཐར་ལམ་བྱང་ཆུབ་ཀྱི་གེགས་སུ་བླ་མའམ། སློབ་དཔོན་ངན་པ་ཆེ་བས་བརྟགས་ཤིང་དཔྱད་པ་སྔོན་དུ་སོང་བ་གྱིས་ལ་ངན་པ་དེ་དག་སྤང་ངོ་། །ཕྱོགས་གཉིས་པ། དད་བརྩོན་མེད་དང་འགྲོགས་པས་དགེ་བ་འགྲིབ། །སྒྲུབ་ལ་གཡེལ་ཞིང་མོས་གུས་ཉམས་པར་བྱེད། །ཅེས་གསུངས་ཏེ། ཐར་པའི་ལམ་ལ་དད་བརྩོན་མེད་པའི་བཤེས་གཉེན་དང་འགྲོགས་པའི་ཉེས་པ་ནི། བླ་མ་དང་ཆོས་ལ་མི་དད་པ་དང་འགྲོགས་ན་རིམ་གྱིས་རིམ་གྱིས་དེ་རྣམས་ཀྱི་དྲི་མས་གོས་ནས་བྱིན་རླབས་ཀྱི་ན་བུན་ཡལ་བས་ཐར་པའི་ལམ་དང་བྲལ་བའི་ཉེས་པ་ཡོད། སོས་དལ་རང་གར་སྡོད་པར་དགའ་བའི་ལེ་ལོ་ཅན་དང་འགྲོགས་ན་དེའི་གཤིས་རྒྱུད་དེ་འགོས་ནས་དགེ་བ་འགྲིབ་ཅིང་མི་དགེ་བ་འཕེལ་བའི་ཉེས་པ་ཡོད། ཡར་དཀོན་མཆོག་ལ་དད་བརྩོན་གྱིས་མཆོད་པ་ནང་བ་སངས་རྒྱས་པའི་བསྟན་པའི་སྤྱིར་སྲོལ་ཡིན་ཀྱང་། དེ་མི་བྱེད་པ་དང་འགྲོགས་ན་བསྟན་པའི་སྤྱི་སྲོལ་ཉམས་ནས་མཆོད་པ་མཆོད་མེ་སོགས་བྱེད་དགོས་ཙམ་ཡང་བསམ་མི་ཤེས་པར་འགྱུར་པའི་ཉེས་པ་ཡོད། ཆོས་ལ་དད་བརྩོན་གྱིས་སྒྲུབ་པ་མི་བྱེད་པ་དང་འགྲོགས་ན་བསྐྱེད་རྫོགས་ཐུན་བཞིའི་རྣལ་འབྱོར་ཆད་མེད་ལ་མི་བརྩོན་པ་སྨོས་ཅི་དགོས་ཁ་ཏོན་ཆོས་སྤྱོད་ཙམ་དང་མ་ཎི་རྡོག་གཅིག་ཙམ་འདོན་པ་ལ་མི་འབད་པའི་ཚོགས་གཉིས་ཀྱི་འཕེལ་སྒོ་ཆད་པའི་ཉེས་པ་ཡོད། དགེ་འདུན་ལ་དད་བརྩོན་གྱིས་མི་བསྟེན་པ་དང་འགྲོགས་ན་དགེ་སློང་བཞི་སྡེ་ཡན་ཆོད་ཚོགས་པ་ལ་དགེ་འདུན་ཞེས་བྱ་ལ། དེ་ལྟ་བུའི་དགེ་འདུན་ནི་མཆོག་གསུམ་དད་པའི་ཞིང་ས་ཡིན་ཀྱང་། དེའི་འདུ་ཤེས་མེད་པར་ཁོ་རེ་དང་སྤུན་ཡ་ཞེས་འབོད་པ་ལས་ཞེ་སའི་ཚིག་ཙམ་ཡང་འཆད་མི་ཤེས་པའི་ཐ་མལ་གྱི་ཉེས་པས་ནོན་པའི་ཉེས་པ་ཡོད། ཡི་དམ་ལ་དད་བརྩོན་གྱིས་སྒྲུབ་པ་མི་བྱེད་པ་དང་འགྲོགས་ན་བསྐྱེད་རིམ་ལྷའི་ཏིང་འཛིན་གྱི་གསལ་སྣང་མེད་ཅིང་། རྫོགས་རིམ་སྣང་བཅས་དང་སྣང་མེད་ཀྱི་གོ་དོན་ཙམ་ཡང་ཞེ་ལ་མ་ཤར་བཞིན་དངོས་གྲུབ་ཡིད་སྨོན་ལ་རེ་བའི་ཉེས་པ་ཡོད། མཁའ་འགྲོ་ལ་དད་བརྩོན་གྱིས་མཆོད་སྒྲུབ་མི་བྱེད་པ་དང་འགྲོགས་ན་འཕྲིན་ལས་ཀྱི་ཕོ་ཉ་མི་འགྲུབ་པའི་ཉེས་པ་འགོ་བས་སྤང་བར་གདམས་ཏེ། དྲན་པ་ཉེ་བར་གཞག་པའི་མདོ་ལས། དགེ་བའི་ཆོས་ཐམས་ཅད་ཀྱི་བར་དུ་གཅོད་པའི་གཙོ་བོ་ནི་སྡིག་པའི་གྲོགས་པོ་ཡིན་ལ། དེ་དང་ལྷན་ཅིག་འགྲོགས་པའམ། གཏམ་སྨྲ་བའམ་གྲིབ་མས་ཕོག་པ་ཙམ་ཡང་སྤང་བར་བྱའོ་ཞེས་སོ། །དམ་ཉམས་ཀྱི་གྲིབ་མ་ཕོག་པ་ཙམ་ལ་འཛེམ་དགོས་པས་མ་ཚད། སྡིག་པའི་གྲོགས་པོ་ཡང་དེ་བཞིན་དུ་ཆོས་སྙིང་ནས་ཨེ་འགྲུབ་བསམ་མཁན་ཞིག་གིས་འཛེམ་དགོས་སོ། །ཕྱོགས་གསུམ་པ། ཐེག་དམན་དང་འགྲོགས་གཅིག་པུ་ཞི་ལ་མོས། །སེམས་སྟོབས་ཆུང་ཞིང་གཞན་དོན་སྙིང་རྗེ་མེད། །ཐེག་མཆོག་དོན་དང་འགལ་བའི་ཉེས་མང་ལྡན། །ཞེས་གསུངས་ཏེ། ཉན་རང་གི་རིགས་ཅན་རང་གཅིག་པུ་འཁོར་བ་ལས་ཐར་པར་འདོད་ནས། ཅི་སྤྱོད་ཀྱང་རང་དོན་འབའ་ཞིག་ཏུ་སྒྲུབ་པའི་རིམ་པ་དང་འགྲོགས་ན། ཐེག་ཆེན་གྱི་སྙིང་རྗེ་མེད་པས་ལམ་དམན་པར་ལྟུང་བའི་ཉེས་པ་འགོ་སྟེ། ཇི་ལྟར་འགོ་བའི་ཚུལ་བློ་གྲོས་རྒྱ་མཚོས་ཞུས་པའི་མདོ་ལས། དགེ་བའི་བཤེས་གཉེན་ལྟར་བཅོས་པའི་སྡིག་པའི་གྲོགས་པོ་ནི། ཉན་ཐོས་དང་རང་སངས་རྒྱས་དང་ལྡན་པའི་ཆོས་སྟོན་ཅིང་། བསོད་ནམས་ཀྱི་ཚོགས་ལས་འདུན་པ་ཟློག་པ་དང་། རབ་ཏུ་དབེན་པར་སྟོན་ཅིང་བྱ་བ་ཉུང་བ་ལ་སྦྱོར་བ་དང་། ཐེག་པ་ཆེན་པོའི་དོན་དང་ལྡན་པའི་བཀའ་མཆིད་མི་བསྟན་པ་ལ་བརྟེན་ཅིང་བསྙེན་བཀུར་བྱེད་པ་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པ་ལས་འདུན་པ་ཟློག་པ་དང་། དམ་པའི་ཆོས་ཡོངས་སུ་བཟུང་བ་ལས་འདུན་པ་ཟློག་པའོ་ཞེས་སོ། །ཚོགས་གསོག་མཆོད་འབུལ་གྱིས་ཅི་བྱེད་དེ་ནི་ཆོས་དངོས་མ་ཡིན། དེ་བས་ག་ཤེད་ཅིག་ལ་སྒུར་སྡོད་དང་དེས་ཆོག་ཅེས་པ་འདི་ཉིད་དེང་སང་གི་བླ་མ་རྟོགས་ལྡན་ཆེན་པོ་དག་ཕྱག་བཞེས་སུ་མཛད་དེ། སློབ་མ་ཅི་ཡང་མི་ཤེས་པ་དག་དེ་བས་ཀྱང་བློ་རྨོངས་སུ་འཇུག་ཅིང་ཚོགས་གཉིས་གསོག་པའི་སྒོ་འགོག་ལ། ཡང་དག་པའི་ཆོས་ནི། ཀུན་མཁྱེན་གྱིས། གཞན་དོན་བརྩོན་པས་གོ་བགོས་ཏེ། །ཚོགས་གཉིས་ཤིང་རྟའི་ལམ་ཞུགས་ནས། །ཆོས་ཀུན་མཁའ་ལྟར་རྣམ་དག་པས། །བྱང་སེམས་ཐེག་པ་ལྷུན་གྱིས་གྲུབ། །ཅེས་པ་དང་། རྣལ་འབྱོར་གྱི་དབང་ཕྱུག་ཏེ་ལོ་བའི་ཞལ་ནས། །བུ་སྣང་བ་རྟེན་ཅིང་འབྲེལ་འབྱུང་འདི། །དོན་སྐྱེ་བ་མེད་པར་མ་རྟོགས་པར། །ཚོགས་གཉིས་ཤིང་རྟའི་འཕང་ལོ་དང་། །འབྲལ་བར་མ་བྱེད་ན་རོ་པ། ཅེས་པ་ལྟར་དུ་ཚོགས་གཉིས་ཤིང་རྟའི་འཕང་ལོ་ཁ་འབྲལ་ཐབས་མེད་པ་ཞིག་ཡིན་པ་དེ་ལ་སྐུར་བ་འདེབས་པའི་ཕྱིར་རོ། །སྒྲིབ་པ་འདི་ནི་བསྟན་པ་དམ་པའི་ཆོས་སྤོང་བ་ཡིན་པས་ཤིན་ཏུ་ལྕི་བའི་ཕྱིར་སྤང་བར་བྱ་བ་ལ་གདམས་སོ། །གང་ཚེ་གླང་ཆེན་བསྒྱིངས་པ་ཅན་དག་རང་ཉིད་རྨོངས་པའི་མཚོར་ཞུགས་ནས། །གཞན་ཡང་ལམ་དེར་འཇུག་ལ་མངོན་བརྩོན་གཏི་མུག་རོལ་པའི་ཤུགས་ཆེན་སྟོབས། །མེ་ཏོག་མདའ་ཅན་དཔུང་རྣམས་འདེགས་ལ་ཐེ་ཚོམ་གྱུར་ཞེས་གང་སླད་བརྩོན། །འདི་ནི་སྔོན་མེད་ཐར་པའི་གེགས་གྱུར་གངས་ཅན་འོངས་པར་འགྱུར་ཞེས་གྲགས། །ཚུལ་འདི་ནི་ཐུབ་པ་བཅོམ་ལྡན་འདས་ཀྱིས་ཀྱང་གསལ་པོར་གསུངས་ཏེ། འཕགས་པ་བློ་གྲོས་རྒྱ་མཚོས་ཞུས་པའི་མདོ་ལས། བྱང་ཆུབ་སེམས་དཔའ་དགོན་པ་པར་གྱུར་ནས་བས་མཐར་གནས་ཏེ་མངོན་པར་དགའ་ཞིང་འདོད་པ་ཆུང་ལ་ཆོག་ཤེས་པ། ཁྱིམ་པ་དང་རབ་ཏུ་བྱུང་བ་རྣམས་དང་མི་འདྲེ་ལ། དོན་དང་བྱ་བ་ཉུང་བར་གནས་ཀྱང་མང་དུ་ཐོས་པ་མི་འཚོལ། སེམས་ཅན་ཡོངས་སུ་སྨིན་པར་མི་བྱེད། ཆོས་ཉན་པ་ལ་མི་བརྩོན། ཆོས་ཀྱི་གཏམ་རྒྱུན་གཅོད། ཡོངས་སུ་འདྲི་བར་མི་བྱེད། དོན་རྣམ་པར་ངེས་པའི་གཏམ་རྒྱུན་གཅོད། དགེ་བ་ཅི་ཡིན་ཞེས་འཚོལ་བ་ལ་མི་བརྩོན་པར། བདག་གཅིག་པུ་དགོན་པ་ན་གནས་པས་ཉོན་མོངས་པ་ཆུང་ཞིང་། ཉོན་མོངས་མངོན་གྱུར་དེ་ཉིད་ཀུན་ནས་ལྡང་བ་ནོན་པ་ཙམ་གྱིས་དགའ་བ་ཐོབ་ཅིང་བག་ལ་ཉལ་སྤང་བའི་སླད་དུ་ལམ་སྒོམ་པར་མི་བྱེད། བདག་དང་གཞན་གྱི་དོན་ལ་མི་བརྩོན་པ་འདི་ནི། དགོན་པ་ལ་གནས་པའི་བདུད་ཀྱི་ལྕགས་ཀྱུ་སྟེ། དགེ་བའི་བཤེས་གཉེན་ལྟར་བཅོས་པའི་སྡིག་པའི་གྲོགས་པོའོ་ཞེས་སོ། །རང་དོན་ཞི་བདེ་གཅིག་པུའི་ཆེད་དུ་འདུ་འཛི་སྤངས་ནས་དགོན་པར་གནས་པ་ལའང་སྙིང་པོ་མེད་པར་ཉན་རང་ཞི་བདེར་གཞོལ་བའི་ལམ་དང་འདྲ་བ་ཡིན་པ་དང་། བྱང་ཆུབ་སེམས་པའི་རླབས་ཆེན་གྱི་སྤྱོད་པ་ཕར་ཕྱིན་དྲུག་དང་བསྡུ་བའི་དངོས་པོ་བཞི་ལ་སོགས་པ་ལ་མི་བརྩོན་པར་ཐོས་བསམ་སྒོམ་པར་རྒྱབ་ཀྱིས་ཕྱོགས་ནས་ཉལ་བ་ནི་མི་རིགས་ཏེ། བྱ་རི་དྭགས་རྣམས་དབེན་པའི་གནས་སུ་ཡོད་ཀྱང་རང་གཞན་གྱི་དོན་ཆེན་འགྲུབ་པ་མེད་པ་ལྟ་བུ་ཡིན་པའི་ཕྱིར། དེས་ན་ཚོགས་གཉིས་མཉམ་དུ་བསགས་ཏེ་གང་དང་གང་དུ་མཆིས་ཀྱང་དམ་བའི་ཆོས་བཟུང་ནས་གཞན་དོན་རྒྱུན་མ་ཆད་པར་བྱེད་དགོས་སོ་ཞེས་པའི་དོན་ཏོ། །ཕྱོགས་བཞི་པ། ལྟ་དང་ཏིང་འཛིན་མེད་དང་བསླབ་པ་འཆལ། །ཐ་མལ་རིག་ཤེས་སྐྱོང་དང་རྙེད་པ་འཚོལ། །གནད་མེད་གཅིག་པུར་ཞེན་དང་སྟོང་ལྟ་ཅན། །ཉམས་མེད་ཐ་སྙད་མཁན་དང་འགྲོགས་ན་ཡང་། །དེ་དག་བྱུར་འགོ་དོན་མེད་ཚིག་ཕྱིར་འབྲང་། །ནེ་ཙོའི་འདོན་པ་འདྲ་བར་གྱུར་པ་ཡིན། །ཅེས་གསུངས་ཏེ། ལྟ་སྒོམ་གྱི་དགོངས་པ་མེད་པ་དང་འགྲོགས་ན་ཁ་བཤད་ཇི་ལྟར་མཁས་ཀྱང་དགོངས་བརྒྱུད་ཀྱི་བྱིན་རླབས་འཕོ་རྒྱུ་མེད་པས། ཇི་ཙམ་བསྟེན་ཀྱང་ཆོས་ཉིད་དོན་ལས་རིང་བར་འགྱུར་བའི་ཉེས་པ་འགོ་བ་ཡིན། དམ་ཚིག་དང་སྡོམ་པ་འཆལ་བའི་བཤེས་གཉེན་དང་འགྲོགས་ན་དེའི་ཉམས་གྲིབ་ཀྱིས་གོས་ནས་རང་ཉིད་ཀྱི་སྲུང་སྡོམ་འཆོར་བའི་ཉེས་པ་འགོ བཤེས་གཉེན་རྙེད་འཚོལ་བ་དང་འགྲོགས་ན་ལྟོ་གོས་ཀྱི་ཁོལ་པོའམ་གཡོག་པོར་འཆོར་བའི་ཉེས་པ་འགོ སྤྱིར་ཆོས་པ་རབ་བྱུང་པ་དགེ་ འདུན་པའི་བཞུགས་གྲལ་དུ་ཡོད་པའམ་གཞན་སུ་ཡང་རུང་སྟེ། ལྟོ་གོས་ཀྱི་གཡོག་པོར་འགྱུར་ཤོར་མི་རུང་། ལྟོ་གོས་ཀྱིས་ཚུར་ཞབས་འདེགས་བྱེད་དགོས་པ་ལས་རང་ཕར་ལྟོ་གོས་ཀྱི་བྲན་ཁོལ་འགྱུར་དུ་འཇུག་མི་རུང་སྟེ། མི་འཚོ་བའི་ཆེད་དུ་ལྟོ་གོས་སྒྲུབ་པ་ལས་ལྟོ་གོས་སྒྲུབ་བའི་ཆེད་དུ་མི་འཚོ་བ་མིན་པའི་ཕྱིར། གནད་མེད་དབེན་པར་དགའ་བ་དང་འགྲོགས་ན་སངས་རྒྱས་ཀྱི་ཆོས་ལས་ཉམས་པའི་ཉེས་པ་འགོ་ཞེས་རི་ཁྲོད་དུ་འདུག་དོན་ཧ་མ་གོ་དུས་དེས་གནད་མི་ཟིན་ནས་ཆོས་ལས་ཉམས་པ་ཡིན་ཞེས་པའོ། །གོང་ནས་གསུངས་བའི་སྟོང་པ་ཁ་འབྱམས་སུ་སྨྲ་བ་དང་འགྲོགས་ན་རྒྱུ་འབྲས་ཁྱད་དུ་གསོད་པའི་ཉེས་པ་འགོ ཉམས་ལེན་གྱི་གནད་དང་བྲལ་ནས་མེད་པའི་ཐ་སྙད་མཁན་དང་འགྲོགས་ན་དོན་མེད་ཚིག་ལ་དགའ་བའི་ཉེས་པ་འགོ རྟོག་གེ་ཐ་སྙད་པ་དང་འགྲོགས་ན་ཉམས་ལེན་དྲེད་པོར་འཆོར་ནས་ཆོས་རྒྱུས་མཁན་ཆོས་ཀྱིས་མི་ཐུལ་པར་འགྱུར་བའི་ཉེས་པ་འགོ སེམས་བསྐྱེད་བསླབ་བྱ་མེད་པའི་མི་བྱང་ཆུབ་མཆོག་ཏུ་སེམས་མ་བསྐྱེད་པའམ། བསྐྱེད་ཀྱང་མ་སྐྱེས་པའི་མི་དང་འགྲོགས་ན་བསྡུ་དངོས་སྦྱིན་དང་སྙན་སྨྲ་དོན་མཐུན་དོན་སྤྱོད་བཞི་མེད་ན་གཞན་དོན་མི་འབྱུང་བས་གཞན་དོན་མེད་པའི་ཉེས་པ་འགོ རྒྱུ་འབྲས་དག་གྲོལ་དུ་འཛིན་པ་དང་འགྲོགས་ན་གསང་སྔགས་ཁྱད་དུ་གསོད་པའི་ཉེས་པ་འགོ བློ་ཆུང་མཚན་བཅས་ལ་ཞེན་པ་དང་འགྲོགས་ན་ཟབ་མོའི་ཆོས་ཉིད་ལས་རིང་བའི་ཉེས་པ་འགོ་སྟེ། དོན་དང་མ་འབྲེལ་བའི་ཆོས་ཕལ་བ་དང་གང་ཟག་དེ་དང་མཚུངས་པ་དག་གིས་རང་རྒྱུད་བསླུས་པ་མང་ལ། ཚིག་མ་གོ་བའི་དོན་མུན་པའི་རྫས་ལ་གཞལ་བ་སྟེ་སྨག་རུམ་ནང་ནས་ལག་བསྙབས་བྱས་ནས་ཅ་ལག་ཨེ་རྙེད་ལྟ་བ་དང་མཚུངས་པའོ། །དོན་མ་གོ་བའི་ཚིག་ནེ་ཙོའི་འདོན་པ་ལྟ་བུ་སྟེ། ནེ་ཙོ་ལ་སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །ཅེས་པ་དེ་བསླབས་པར་བྱས་ན་དེས་དེ་འདོན་བཞིན་དུ་འབུ་སྲིན་ཟ་བ་དང་མཚུངས་པར་འགྲོ་བས། ཚིག་དོན་གང་གི་ཆ་ནས་སྦྱར་ཡང་ལེགས་བཤད་དང་གདམས་པ་ཁྱད་པར་ཅན་རྒྱུད་ལ་འབྱོར་བའི་བླ་མ་མཆེད་གྲོགས་བཟང་པོ་དང་འགྲོགས་པ་གཅེས་ལ། དེའི་མི་མཐུན་ཕྱོགས་སྡིག་གྲོགས་སྤོང་བ་ཁོ་ན་གལ་ཆེ་སྟེ། བློ་གྲོས་རྒྱ་མཚོས་ཞུས་པའི་མདོ་ལས། དགེ་བའི་བཤེས་གཉེན་བསྟེན་པས་མི་དགེ་བའི་བཤེས་གཉེན་སྤང་བ་ལ་ནན་ཏན་བྱའོ་ཞེས་སོ། །གང་ཞེ་ན་ཡུམ་བར་མ་ལས། ཐམས་ཅད་དམིགས་པའི་ཚུལ་ལམ་གཉིས་འཛིན་མཚན་མ་ཅན་དུ་ཉམས་ལེན་ལག་ལེན་དང་མ་འབྲེལ་བར་ཆོས་སྟོན་པ་ནི་སྡིག་པའི་གྲོགས་པོའོ་ཞེས་པ་དང་། སོར་ཕྲེང་གི་མདོ་ལས། རྩོད་པའི་དུས་ཀྱི་སེམས་ཅན་ལྟ་བ་དམན་པ་དགེ་སྦྱོང་ལྟར་བཅོས་ནས་ཐེག་པ་ཆེན་པོ་ལ་སྐུར་པ་འདེབས་པ་དེ་ནི་ཚུལ་དུ་འཆོས་པ། སློང་མོ་བ་སྡིག་ཏོ་མི་དགེ་བའི་སེམས་ཅན། བདུད་ཀྱིས་བྱིན་གྱིས་བརླབས་པ། མུ་སྟེགས་ཀྱིས་དཀྲུགས་པ། ལོག་པའི་ཕྱོགས་འཛིན་པ་ཞེས་བྱའོ་ཞེས་པ་དང་། འཕགས་པ་བདེ་བྱེད་ཀྱིས་ཞུས་པ་ལས། རིགས་ཀྱི་བུ་གང་སུ་དག་ཆོས་ཐམས་ཅད་སྤྲུལ་བ་ལྟ་བུར་སྣང་ལ་རང་བཞིན་མེད་པར་ཤེས་པར་མི་འདོད་པར། དམིགས་པ་ཅན་གྱི་དགེ་བའི་རྩ་བ་འབའ་ཞིག་ལ་བརྩོན་པ་ནི་དགེ་སྦྱོང་མ་ཡིན། གཡོ་ཅན་ཞེས་བྱའོ་ཞེས་པ་དང་། དཀོན་མཆོག་བརྩེགས་པ་ལས། དགེ་སློང་གང་ལ་གཉིས་སུ་འཛིན་པའི་སེམས་ཡོད་པ་དེ་ནི་བདུད་ཀྱིས་བྱིན་གྱིས་བརླབས་པའོ། །ཞེས་གཉིས་འཛིན་འཁོར་བའི་རྩ་བ་ཡིན་པའི་གནད་ཀྱིས་སོ། །ཐེག་པ་ཆེན་པོ་ལ་མི་མོས་པའི་དམན་ལམ་ཅན་རང་ཉིད་ཞི་བདེར་གཞོལ་བ་དེ་ནི་བདུད་ཀྱིས་བསླུས་པ་ཞེས་བྱའོ་ཞེས་སོ། །གཉིས་པ་ལ། དངོས་དང་། བརྟགས་ནས་སྤང་དགོས་པའི་འཐད་པ་དཔེས་འགོད་པ་གཉིས། དང་པོ།
དེས་ན་དེ་སྤང་བར་གདམས་པ་དངོས་བསྟན་པ།
སྤང་དགོས་པར་གདམས་པའང་འདི་ལྟར། དེ་དག་དང་འགྲོགས་ཐར་ལམ་བར་དུ་གཅོད། །དགེ་འགྲིབ་བདེ་འགྲོའི་གནས་ཀྱང་མི་འགྲུབ་ན། །ཞི་བདེའི་བྱང་ཆུབ་འགྲུབ་པ་སྨོས་ཅི་དགོས། །དེས་ན་སྡིག་པའི་གྲོགས་པོ་སྤང་བར་བྱ། །ཞེས་གསུངས་ཏེ། སྡིག་པའི་གྲོགས་སམ་བླ་མ་ངན་པ་བསྟེན་པས་དགེ་བ་འགྲིབ་ཅིང་མི་དགེ་བ་འཕེལ་ཏེ། གནས་སྐབས་ལྷ་མིའི་བདེ་འབྲས་ཀྱང་མི་འགྲུབ་ཀྱི་སྟེང་དུ་ཐར་ལམ་ལ་བར་དུ་གཅོད་པས། མཐར་ཐུག་ཞི་བདེའི་བྱང་ཆུབ་འགྲུབ་པ་ལྟ་ཅི་སྨོས་ཏེ་གནས་སམ་གཞི་ཙམ་ཡང་མེད་དོ། །ཆེད་དུ་བརྗོད་པའི་ཚོམས་ལས། དད་པ་མེད་ཅིང་འཇུངས་པ་དང་། །རྫུན་དུ་སྨྲ་དང་ཕྲ་མ་ཅན། །མཁས་པས་བཤེས་པར་མི་བྱ་ཞིང་། །སྡིག་ཅན་མི་དང་འགྲོགས་མི་བྱ། །བསྟེན་བྱ་མ་ཡིན་བསྟེན་པའི་མི། །དེ་ཡི་སྐྱོན་གྱིས་སྐྱོན་ཅན་འགྱུར། །དོང་པར་རམ་མདའ་ཤུབ་ཏུ་དུག་བསྐུས་པའི་མདའ་བཅུག་པས། །དུག་མ་བསྐུས་པའི་མདའ་ལའང་གོས་པ་བཞིན། །ཞེས་སོ། །གཉིས་པ་ལ། ཆོམ་རྐུན་གྱི་དཔེས་བཤེས་གཉེན་ངན་པ་སྤང་བར་གདམས་པ་དང་། སྐྱེལ་མ་དང་ཉོ་ཚོང་གི་དཔེས་སྟོན་པ་དང་ཆོས་ལྟར་སྣང་སྤང་བར་གདམས་པ་གཉིས། དང་པོ།
ཆོམ་རྐུན་གྱི་དཔེས་བཤེས་གཉེན་ངན་པ་སྤང་བར་གདམས་པ།
གནོད་པ་ལ་བལྟས་ཏེ་སྤང་དགོས་པའི་འཐད་པ་འགོད་པ་ནི་དཔེ། ཇི་ལྟར་ལམ་འཕྲང་བགྲོད་པའི་མགྲོན་པོ་དག །ཆོམ་རྐུན་འཇིགས་པས་བཅོམ་ལའང་འཇིགས་ལྟ་ན། །དེ་ཡིས་ཚེ་འདིའི་ནོར་དང་སྲོག་འདོར་གྱི། །གཏན་གྱིི་བདེ་བ་འཕྲོག་པར་ཡོང་མི་ནུས། །ཞེས་གསུངས་ཏེ། འདི་དག་ནི་འཇིག་རྟེན་དུ་ཡང་གསལ་བ་ཡིན་པའི་དཔེར་བཀོད་ནས། དེ་བས་ཆེས་འཇིགས་པའི་དགྲ་ལ་མ་བརྟེན་པར་བག་ཟོན་སྐྱེད་ཅིག་ཅེས་གདམས་པ་ནི། མི་དགེའི་བཤེས་གཉེན་བསྟེན་པའི་འགྲོ་བ་རྣམས། །དམ་པས་བརྙས་ཤིང་དཀར་ཕྱོགས་ལྷས་འདོར་བས། །གནོད་མང་སྡུག་བསྔལ་འབྱུང་གནས་འདིར་ཡང་ཕུང་། །ཕྱི་མར་ངན་འགྲོ་གཏན་དུ་སྲིད་མཚོར་འཁྱམ། །བདེ་བའི་ནོར་མཆོག་བྲལ་ལ་མི་འཇིགས་པའི། །སྐྱེ་བོ་དེ་ནི་བདུད་ཀྱིས་བསླུས་པ་ལགས། །ཞེས་གསུངས་ཏེ། མི་དགེའི་བཤེས་ལ་བསྟེན་ན་སྐྱེ་བོ་དམ་པས་སྨད་པ་མཛད་ཅིང་ཐུགས་སྐྱོ་བ་དང་། དཀར་ཕྱོགས་སྲུང་བའི་ལྷས་འདོར། ལྟ་སྤྱོད་མ་དག་པ་དང་དེས་བསྐྱེད་པའི་ལས་ཀྱིས་གནོད་འཚེ་དང་སྡུག་བསྔལ་མང་བ་དང་། འདོད་པ་ཐོག་ཏུ་མི་ཁེལ་ཞིང་མི་འདོད་པ་ཐམས་ཅད་ཐོག་ཏུ་བབས་པས་མཐོང་བའི་ཆོས་སམ་ཚེ་འདིར་མི་འདོད་པའི་རྐྱེན་ངན་ཐོག་ལ་བབ་པའི་ཉེས་པ་མང་བར་མ་ཟད། སྐྱེ་བ་ཕྱི་མ་ལ་ངན་སོང་གསུམ་དུ་འགྲོ་ཞིང་། དུས་རྟག་ཏུ་འཁོར་བར་འཁྱམས་པས་ན་ཐ་མལ་གྱི་དགྲས་ཚེ་འདིའི་ཐོག་གི་གནོད་ཕྲན་བུ་ཞིག་ལས་སྐྱེད་ཐུབ་པ་མིན་ལ། དགྲས་ལོག་བསྒྲུབས་བྱས་ཀྱང་ད་དུང་ཐུགས་དམ་གྱིི་བོགས་འདོན་དུ་གྱུར་ནས་བཟང་དུ་འགྱུར་བའང་ཡོད་པས་ཐ་མལ་གྱི་དགྲ་ལས་ཐར་པའི་བློ་བསྐྱེད་པའི་ཚོད་བརྩིས་ནས་ཐ་མལ་གྱི་དགྲ་ལས་ལྡབ་མང་པོའི་གནོད་ཚབས་ཆེ་བ་ཡིན་པས་ན་སྡིག་པའི་གྲོགས་ལས་རིང་དུ་འབྲོས་པར་གདམས་ཏེ་རྒྱུ་མཚན་ཅིའི་ཕྱིར་ན་འདི་ཕྱི་ཚེ་རབས་གཏན་གྱི་ལེགས་པ་ལས་ཉམས་པར་འགྱུར་དུ་འོང་བའི་ཕྱིར་རོ། །དེ་སྐད་དུ་ཇི་ལྟར་བཤད་ཅིང་བསྟན་ཡང་འཇིགས་པར་མི་བྱེད་ཀྱི་སྟེང་དུ་སླར་ཡང་སྡིག་གྲོགས་སྔར་བཞིན་དུ་བསྟེན་ན་མི་དེ་བདུད་ཀྱིས་བསླུས་པར་རེ་ཞིག་ལྡོག་ཐབས་མེད་པར་རིག་པར་བྱའོ། །གཞན་ཡང་སྡིག་གྲོགས་ལ་སྐྲག་དགོས་པའི་དཔེ་ཞིག་བཞག་ན་རི་དྭགས་རྔོན་པ་ལ་སྐྲག་པ་དང་། བྱེའུ་ཁྲ་ལ་སྐྲག་པ་དང་། བྱི་ཆུང་འམ་ཙིག་ཕྲུག་བྱི་ལ་ལ་སྐྲག་པ་དང་། གསད་བྱ་ཉེས་ཅན་གསོད་པའི་གཤེད་མ་ལ་སྐྲག་པ་དང་། གླང་པོ་ཆེ་སྨྱོན་པ་ལ་སྐྲག་པ་ལྟར་སྤང་དགོས་ཏེ། འཕགས་པ་མྱ་ངན་ལས་འདས་པའི་མདོ་ལས། བྱང་ཆུབ་སེམས་དཔའ་སྡིག་པའི་གྲོགས་པོ་ལ་འཇིགས་པ་ལྟར། གླང་པོ་ཆེ་སྨྱོས་པ་ལ་མི་འཇིགས་ཏེ། གླང་པོས་ནི་ཚེ་འདིའི་ལུས་ཙམ་འཇིག་པ་ལས་མི་བྱེད་ལ། སྡིག་པའི་གྲོགས་པོས་ནི་གཏན་གྱི་དགེ་བའི་ལུས་དང་སྲོག་འཇིག་པར་བྱེད་དོ་ཞེས་སོ། །གཉིས་པ།
སྐྱེལ་མ་དང་ཉོ་ཚོང་གི་དཔེས་སྟོན་པ་དང་ཆོས་ལྟར་སྣང་སྤང་བར་གདམས་པ།
བརྟག་པ་དང་དཔྱད་པ་ཆེར་བྱས་པ་ཉིད་ཀྱིས་སྤང་བར་འོས་པའི་དཔེ་སྒྲུབ་པ་ནི།
འདི་ལྟར་འཇིག་རྟེན་ན་ཡང་རབ་རྟོག་དཔེ། །སྐྱེལ་མའི་ཡུལ་དེ་བཟང་ངན་རྟོག་ཅིང་འདྲི། །ཐར་པ་འདོད་ལ་བཤེས་གཉེན་དྲི་རྟོག་མེད། །བློ་གྲོས་བླུན་པོ་དངོས་སུ་བདུད་སྡེས་བཅོམ། །ཞེས་གསུངས་ཏེ། འདི་ལྟར་འཇིགས་བཅས་ཀྱི་ལམ་འཕྲང་བགྲོད་པ་ན། སྐྱེལ་མ་འཚོལ་ལ་དེ་ཡང་སྐྱེལ་མ་དེས་སྐྱོབ་ཐུབ་མི་ཐུབ་རང་གིས་ཀྱང་རྟོག་གཞན་ལའང་འདྲི་བ་འཇིག་རྟེན་ན་ཡོད་པ་ནི་ཉིན་གཅིག་ཙམ་གྱི་དོན་སྒྲུབ་པ་ལའང་མཐོང་ན། གཏན་གྱི་བདེ་བ་ཐར་པ་བགྲོད་པ་ལ་བླ་མའི་སྐྱེལ་མ་དགོས་ལ། སྐྱེ་བ་ཚེ་རབས་གཏན་གྱི་ཐར་བའི་ལམ་ལ་བགྲོད་པའི་སྐྱེལ་མ་བླ་མ་དེ་མཚན་ཉིད་དང་ལྡན་མི་ལྡན་མི་རྟོག་པར་གང་བབས་སུ་འཇུག་ཅིང་། ཉིན་ཞིག་འགྲོ་སའི་ལམ་གྱི་སྐྱེལ་མ་ལ་ནི་རྟོག་ཅིང་ཞིབ་མོ་བྱེད་པ་དང་། མཁས་པ་གཞན་ལ་མི་འདྲི་བར་འབར་རྒྱུགས་སུ་འམ་ཁ་འབར་ལུས་རྒྱུགས་འུར་གྱིས་ཞོགས་ཤིང་གནད་ལ་མི་བལྟ་བར་བླུན་པོ་འཁོར་བསོད་ཅན་ནམ་དབང་འབྱོར་ཅན་ལ་བསྟེན་པ་འདི་ནི་ཕུང་བ་འགྱུར་བའི་ཉེན་ཁའི་ཁམས་ཤིན་ཏུ་ཚབས་ཆེ་བ་ཡིན་ཏེ། དེང་སང་ཤིན་ཏུ་མང་བར་སྣང་ངོ་། །ཀུན་མཁྱེན་ཆེན་པོའི་དུས་སུ་དེ་ལྟར་ཡོད་ན་དེང་སང་དེ་ལས་ལོ་བདུན་བརྒྱ་ཙམ་སྙིགས་པའི་སྐབས་སུ་ཇི་ལྟར་མེད་དེ་ལྷག་པར་མང་ངོ་། །དེ་ཡང་ཐར་པ་ལས་བསླུ་བའི་བདུད་ཀྱིས་དངོས་སུ་བཅོམ་པ་ཞེས་བྱའོ། །སྡེབ་གྲངས་ཀྱི་ཚད་ཀྱིས་འདིར་བཞག་ན་ཆོག་འདུག ད་དེ་རིང་གི་བཤད་བྱའི་གཙོ་བོ་དེ་གང་ཡིན་པ་རེད་ཟེར་ན། ཁ་རྩང་བཤེས་གཉེན་དམ་པ་མཉེས་པ་གསུམ་གྱིས་ཇི་ལྟར་བསྟེན་པར་བཤད་པའི་མུ་དེ་ཉིད་དང་འབྲེལ་ནས། སྒོ་གསུམ་གྱི་སྤྱོད་ལམ་གྱི་ནང་ནས་ཡིད་ཀྱི་སྒོ་ནས་གུས་པས་སྒྲུབ་པ་དང་ནི་ཕྱིན་ཅི་ལོག་ཏུ་སེམས་པ་དོར་བ་གཉིས་ཀ་བཤད་ཅིང་། དེ་ནས་སྒྲུབ་པས་མཉེས་པར་བྱ་ཚུལ་དེ་ཡང་སྤྱི་དང་བྱེ་བྲག་གི་ཚུལ་གྱིས་བཤད་པ་དང་། དགེ་བའི་བཤེས་གཉེན་བསྟེན་ཅིང་མཉེས་པར་བྱས་པའི་ཕན་ཡོན་དང་། ཞོར་དུ་བླ་མར་མ་བསྟེན་པའི་སྐྱོན་ཆ་རྣམས་བསྟན་ནས། ལེའུ་བརྒྱད་པའི་སྐབས་ཀྱི་སྦྱོང་བྱེད་ལམ་གྱི་སྐབས་ནས། ཐོས་བསམ་སྒོམ་པས་ལམ་བགྲོད་པ་དང་། གང་ལས་ཐོས་པ་བྱ་བའི་ཡུལ། མཐུན་ཕྱོགས་དགེ་བའི་བཤེས་གཉེན་བསྟེན་པར་གདམས་པ་དེ་དག་སོང་ནས། ལེའུ་དགུ་བའི་དབུ་ནས་མི་མཐུན་ཕྱོགས་སྡིག་གྲོགས་སྤང་བར་ནན་གྱིས་བསླབ་པ་བསྟན་ཅིང་། དེ་ནས་མི་དགེ་བའི་བཤེས་གཉེན་གྱི་མཚན་ཉིད་དེ་གསལ་བོར་བསྟན་པ་དང་། དེ་སྤང་དགོས་པའི་རྒྱུ་མཚན། དེ་ལྟར་སྤངས་པའི་ཕན་ཡོན་དང་རྣམ་པ་གསུམ་གྱིས་གསུངས་པ་ལས། མི་དགེ་བའི་བཤེས་དང་གྲོགས་ཀྱི་མཚན་ཉིད་བཤད་པའི་སྐབས་ཀྱི་སྤྱི་དང་བྱེ་བྲག་གི་དབྱེ་བ་དང་། ཁྱད་པར་དུ་འཁོར་བ་ལས་ཡིད་མ་ཕྱུང་བའི་གྲོགས་དང་འགྲོགས་པའི་ཉེས་པ། སྡིག་པའི་ཕྱོགས་བསྟེན་པའི་ཉེས་པ་མང་བའི་ནང་གི་རྨོངས་པ་དང་འགྲོགས་པའི་ཉེས་པ་དང་། དད་བརྩོན་མེད་པ་དང་འགྲོགས་པའི་ཉེས་པ་དང་། ལྟ་སྒོམ་ཏིང་འཛིན་མེད་པའི་བསླབ་འཆལ་དང་འགྲོགས་པའི་ཉེས་པ་དེ་དག་བསྟན་ནས་སྤང་དགོས་ལུགས་དཔེས་བསྟན་པ་ཡན་ཆད་བཤད་ཟིན་ལ། ད་གོང་ནས་གསུངས་པ་ལྟར་དུ་དགེ་བའི་བཤེས་གཉེན་དང་། སྡིག་པའི་གྲོགས་གཉིས་ཀ་ཕན་ཚུལ་སྤང་འགལ། སྣང་བ་དང་མུན་པ་འདྲ་ཞིག་ཡིན་པར་གསུངས་ལ། དེ་གཉིས་ཀ་ལྷན་གཅིག་གནས་མི་རུང་ཞིང་། གནས་མི་སྲིད་པ་ཉི་མ་ཤར་ན་མུན་པ་མེད་པ་དང་། མུན་རུབ་དུས་ཉི་མའི་འོད་ཟེར་གྱི་སྣང་བ་མེད་པ་ལྟ་བུ། གཅིག་ཡོད་གཅིག་མེད་ཀྱི་སྣང་ཚུལ་ཅན། གང་ཤས་ཆེ་ན་དེས་ཕྱོགས་ལ་འགྲོ་རྒྱུ་ཉག་གཅིག་དང་། གཅིག་ཤོས་ལུས་ནས་དེའི་ཕྱོགས་སུ་འདྲུད་འགྲོ་བ་ཡིན་པར་གསུངས་འདུག དེས་ན་འུ་ཚོ་སྤྱིར་བོད་ཁམས་ཀྱི་ཆོས་པའམ་ཆོས་དད་པ་ཡིན་པ་དང་། ཁྱད་པར་དུ་འདིར་ཡོད་མང་ཆེ་བ་དེ་རབ་བྱུང་ངུར་སྨྲིག་གི་སྡེ་དང་། དགེ་བསྙེན་ཕོ་མོ་སོ་ཐར་གྱི་སྡོམ་ལྡན་ཤཀྱཱའི་བསྟན་པའི་རྗེས་སུ་ཞུགས་ནས་ཐར་ལམ་དོན་གཉེར་ཅན་ཡིན་པས་མ་ཚད། ཐེག་ཆེན་མདོ་སྔགས་ཀྱི་ལམ་ནས་གཞན་དོན་རྫོགས་བྱང་ཐོབ་པའི་དོན་གཉེར་གྱི་འདུན་པ་ཅན་འབའ་ཞིག་ཡིན་ལ། དེའི་ལམ་གྱི་བར་ཆད་མང་ཆེ་བ་དེ་སྡིག་པའི་གྲོགས་པོའི་ཁུངས་ནས་ཡོང་བ་ཡིན་པས། དགེ་བ་སྒྲུབ་པའི་ཆོས་པས་རང་གི་ཡན་དུ་ཡོད་པའི་དགེ་བའི་གྲོགས་པོ་དང་། དགེ་བའི་བཤེས་གཉེན་བསྟེན་པ་དང་། འགྲོགས་པ་དང་། དེ་དང་འབྲེལ་བ་བྱེད་པ་ལས། རང་རྒྱུད་ཀྱི་མི་དང་། རང་ཁྱིམ་གྱི་མི་དང་། གཉེན་ཉེ་བ་ཤ་ཕུ་ནུ་ཡིན་ཀྱང་། དེ་དག་ལ་སྡིག་གྲོགས་ཀྱི་མཚན་ཉིད་ཚང་ཡོད་ཚེ་ལྷག་ཏུ་གནོད་པ་ཡིན་པ་དང་། དེས་མི་ཚད་ཆོས་ལྟར་བཅོས་པའི་བླ་མ་གྲྭ་བའི་རྣམ་པ་ཅན་ཡིན་ཀྱང་། ཕྱི་ཚུལ་ལ་བལྟ་རྒྱུ་ཡོད་པ་མ་རེད། དོན་དུ་སྡིག་པ་དང་ཉེས་པ་། ཚུལ་མིན་ཡིད་བྱེད་ཀྱི་ཀུན་རྟོག་འཕེལ་བའི་རྐྱེན་བྱེད་པ་ཞིག་ཡིན་ནས་བཟུང་སྟེ་སྡིག་གྲོགས་ཡིན་པར་གསུངས་པ་ཡིན་པས་སྤང་དགོས་པ་ཡིན། སྡིག་གྲོགས་ཀྱི་མཚན་ཉིད་གོང་དུ་མང་རབ་གསུངས་ཀྱང་། སྤྱིར་ན་སོ་སོའི་སྐྱེ་བོ་ལས་ཉོན་གྱི་འཆིང་བ་ཅན་གྱི་ནང་ནས་དམིགས་བསལ་དུ་རྩ་བའི་ཉོན་མོངས་པ་དྲུག་སྟེ། མ་རིག འདོད་ཆགས། ཁོང་ཁྲོ། ང་རྒྱལ། ཐེ་ཚོམ། ལྟ་བ་ངན་པ་རྣམས་ལྷག་པར་བདོ་ཞིང་སྨིན་པ། ཚེ་འདིའི་ཆེ་ཐབས་གྲགས་ཐབས་ཤིག་ལས་བསམ་རྒྱུ་མེད་པ། ཐོས་བསམ་ཀྱི་ནོར་གྱི་ཐད་ནས་དབུལ་པོ་ཡིན་པ། ཤེས་བྱའི་དོན་ལ་རྨོངས་པའི་མ་རབས་ཀྱི་ཀུན་ཏུ་སྤྱོད་པ་ཞིག་ལ་ཐུག་དུས་ནམ་སྐྱ་མོ་གྱེན་དུ་ལངས་སོང་བ་ལྟ་བུ། ཐར་བའི་ལམ་ལ་དད་པ་དང་བརྩོན་འགྲུས་རྩ་བ་ནས་མེད་པ། རང་རྒྱུད་ལ་དགེ་སྦྱོར་ཞིག་བྱེད་དགོས་བསམ་རྒྱུའི་དྲི་མ་མི་བྲོ་བ། སྒོ་གསུམ་ཉེ་བར་མ་ཞི་བས་ལུས་ཀྱི་སྤྱོད་ལམ་བཙོག་ཅིང་། ངག་གི་གཏམ་ཞིག་བཤད་ནའང་དེ་དང་ཆ་མཚུངས་པ། སེམས་རྒྱུད་གྱོང་པོ་གཡག་རྭ་འདྲ་འདྲ་དགེ་བའི་ཕྱོགས་སུ་བཅོས་རྒྱུ་མེད་པ། ཅི་ཡང་མེད་པའི་ང་རྒྱལ་དང་རང་སྣང་མཐོན་པོ་ཅན། བསླུ་ཐབས་ཀྱི་གཡོ་སྒྱུ་ཞིག་རན་དུས་གཞན་ལས་མཁས་པ། དེས་མ་ཚད་ཕྲག་དོག་གི་རླུང་དམར་འཚུབས། ཆགས་སྡང་གི་རི་བོ་མཐོ། ཡོན་ཏན་དང་དད་པ་མོས་གུས་ཆུང་བ། བྱམས་སྙིང་རྗེའི་བརླན་ཞིག་རྒྱུད་དེར་མེད་པ། ནོར་ལ་རྔམ། ཟས་ལ་སྲེད ངོ་ཚ་ཆུང་། རང་རྒྱུད་རྩུབ། ཀུན་སྤྱོད་ངན། འགྲོགས་ཚད་འབྲེལ་ཚད་ཐམས་ཅད་ལོག་པའི་ལམ་ལ་འཁྲིད་འགྲོ་མཁན། གར་སོང་སར་ལམ་མི་ཡག གར་སྡོད་སར་བཀྲ་མི་ཤིས་པ་དེ། རང་གཞན་སུ་དང་འབྲེལ་བའི་མི་ཡིན་ཀྱང་སྡིག་པའི་གྲོགས་པོ་ཡིན། ང་ལྟ་བུའི་སོ་སོའི་སྐྱེ་བོ་ཞིག་ལ་མཚོན་ན། གྲོགས་ངན་གྱི་བསམ་སྤྱོད་བགྲང་ཡོང་དུས་རང་ཉིད་ཀྱི་ཕྱི་ནང་གསང་བའི་རྣམ་ཐར་བཤད་པ་དང་འདྲ་བར། དེ་ཡང་ང་དང་འདྲ་བ་ལ། དེའང་ང་དང་ཨ་ན་མ་ན་རེད་བསམ་རྒྱུ་ཞིག་རེད། དེ་ལོས་ཡིན་ད་སྔོན་ད་ལྟའི་བར་དུ་བཟང་པོའི་ལམ་ལ་མ་བཞག་ཅིང་། བཟང་པོའི་ཕྱོགས་ཀྱི་ལམ་སྟོན་བྱེད་པ་ཞིག་ཡོད་མ་མྱོང་བས་རེད། སྤྱིར་བཏང་གི་དགེ་སྡིག་རྒྱུ་འབྲས་ཀྱི་ཆོས་རེ་གོ་མ་མྱོང་བ་མིན་ཀྱང་། རང་རྒྱུད་ངན་པའི་ཀུན་སྤྱོད་དང་བསམ་པ་ལྷང་ལ་ཕུད་ཅིང་མཚང་ནས་འདོན་པའི་མན་ངག་རྒྱས་པ་འདི་ལྟ་བུ་ཆེར་ཞིག་འཕྲད་མ་མྱོང་བ་དང་། འཕྲད་ཀྱང་གཞན་སྐྱོན་བལྟ་བའི་མིག་དང་ཐུར་མར་འཛིན་པ་ལས། རང་སྐྱོན་བལྟ་བའི་མེ་ལོང་དུ་བཟུང་ནས་རང་སྐྱོན་རང་གིས་ཐེར་ལ་ཕུད་མ་མྱོང་བའི་དབང་གིས་རེད། འདི་ནས་གྲོགས་ངན་དེ་རང་ཆེ་རང་འགྱིང་ཆེ་བར་གསུངས་པ་དང་། རང་སྐྱོན་རང་གིས་མི་རིག མར་མེའི་སྡོང་རྩར་མི་གསལ། ཞེས་འཇིག་རྟེན་གཏམ་གྱི་དཔེར་གྲགས་པ་བཞིན་དུ། རང་གི་སྐྱོན་སྐྱོན་ཡིན་སྣང་མི་ཤར་ཞིང་། གཞན་གྱི་ཡོན་ཏན་དེ་ཡོན་ཏན་ཡིན་པར་མི་རིག་པར་འཁྲུལ་སོང་དུས། རང་སྐྱོན་ངན་པ་འདི་ལ་འདོར་རྒྱུ་ཞིག་དང་། བཟང་པོའི་ཡོན་ཏན་འདི་ལ་འགོས་རྒྱུ་ཞིག་མེད་པར་གྱུར་ནས། ཇི་ལྟར་བཤད་ཇི་ལྟར་ཉན་ཡང་རྡོ་བཙོས་ནས་ཁུ་བ་བུད་རྒྱུ་མེད་པ་འདི་འདྲར་ཆགས་པ་རེད། དེ་ལ་རིགས་མཐོ་མ་མཐོ། རུས་ཆེ་མ་ཆེ། རྒྱུ་ཕྱུག་མ་ཕྱུག དཔང་བཙན་མ་བཙན་ཡོད་པ་མ་རེད། གྲོགས་ངན་དེ་ཅན་པོ་དང་འབྲེལ་འདྲིས་བྱས་ན་ཉིན་ཅིག་མར་ལ་འདྲུད་ཤག་ཤག་ཡིན་པས། དེ་ཅན་པོའི་ཕྱོགས་དེར་ཉེ་མི་རུང་མ་གཏོགས་དེ་རྣམས་ཀྱིས་བཅོས་ནས་རིམ་གྱིས་ལྟ་སྤྱོད་དེ་རྣམས་དང་ཨ་ན་མ་ན་རེད་ནས་འགྱུར་འགྲོ་བ་ཡིན་གསུངས་པ་ཡིན། གལ་ཏེ་དེ་ལྟར་འགྱུར་སོང་ན་ཇི་ལྟར་འགྲོ་བ་ཡིན་ཟེར་ན། ཚེ་འདིའི་མི་འདོད་པ་སྣ་ཚོགས་ཀྱི་བྱུར་གྱི་སྣ་འདྲེན་བྱེད་ནས། གྱོད་ཁ་མཆུ་ཞིག་དང་། ཟེར་གནད་གཏམ་སྡུག་ཅིག་ལ་འཁོར་ནས་སྙིང་འདྲེ་གདིང་ནས་བསླངས་ཏེ། མཎ་རྡོག་ག་ཏོན་ལམ་ལ་འགྲོ་རུ་མི་འཇུག་མཁན་དེ་ལྟར་འགྱུར་བ་ཡིན། དེ་ལྟར་འགྱུར་བ་ཡང་ལས་སླ་བ་ཡིན་ཏེ། ཆུ་རྐ་ཚུར་ལ་བསྒྱུར་བ་དེ་ཕར་ལ་བསྒྱུར་དུས་སྔོན་གྱི་ཤུལ་ཀ་དེད་སླ་བ་ལྟར་དུ། ངན་གོམས་ཀྱི་བག་ཆགས་ཤུགས་བཙན་ཞིང་། ཐོག་མེད་ནས་ད་ལ་མ་ཐུག་གི་བར་དུ་ངན་གོམས་ཀྱི་དབང་དུ་སོང་བས་སོ། །བཟང་གོམས་ཆེ་ཞིག་ཅི་འདྲ་བྱས་ཀྱང་མེད་པའི་སྟབས་ཀྱིས། ད་སྔའི་ངན་གོམས་ཀྱི་ཕྱོགས་ལ་ཤོར་དུས་འདི་མེད་ཕྱི་མེད་ངན་སོང་ངན་འགྲོའི་གཡང་སར་ལྷུང་རྒྱུ་ཡིན་པས། སོ་སོའི་སྐྱེ་བོའི་གང་ཟག་ཐར་བ་འདོད་མཁན་རང་ཉིད་ཡག་ན་བཟང་ན་བསམ་པ་ཞིག་ཡིན་ན། སྡིག་པའི་གྲོགས་པོ་ངན་པ་དེ་དུག་ལྟར་སྤངས་ནས། དགེ་བའི་བཤེས་གཉེན་ལེགས་པའི་ལམ་སྟོན་དང་། གྲོགས་བཟང་པོ་བསྟེན་པ་ནི་ཤིན་ཏུ་གནས་ཀྱང་གལ་ཆེ་བ་ཡིན་ནོ། །དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱིས་དུས་གསུམ་བསག་དང་ཡོད་པའི་དགེ་བའི་རྩ་བ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས། བསྟན་འཛིན་གྱི་སྐྱེས་བུ་གང་ན་སུ་བཞུགས་ཐམས་ཅད་ཀྱི་སྐུ་ཚེའི་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན་ཁྲིམས་གཙང་བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཐམས་ཅད་བདེ་སྐྱིད་རྫོགས་ལྡན་གྱི་དཔལ་ལ་སྤྱོད་དེ་མཐར་ཐུག་སེམས་ཅན་ཐམས་ཅད་བླ་མེད་རྫོགས་པའི་བྱང་ཆུབ་ཀྱི་གོ་འཕང་རིན་པོ་ཆེར་འགོད་པའི་ཕྱིར་དུ། རྗེ་བཙུན་འཇམ་པའི་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་ཟབ་མོ་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱས་ནས། །སྐྱེ་རྒ་ན་འཆི་རྦ་བརླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་གྲོལ་བར་ཤོག།