ཉིན་གསུམ་པའི་ཆོས་ཁྲིད།
ནམ་མཁའི་མཐའ་དང་མཉམ་པའི་མར་གྱུར་འགྲོ་བ་སེམས་ཅན་ཐམས་ཅད། འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་སྔོན་དང་ཕྱི་མའི་མཐའ་རྒྱ་མི་དཔོག་པ། སྐྱེ་རྒ་ན་དང་འཆི་བ་སོགས་ཀྱི་སྡུག་བསྔལ་བརྒྱད་དང་། འགྱུར་བའི་སྡུག་བསྔལ་ལ་སོགས་པའི་གནོད་པ་བརྒྱ་ཕྲག་གི་སྡུག་བསྔལ་དང་ལྡན་པའི་ཆུ་སྲིན་སྡུག་པ་ཅན་མང་པོས་གང་བའི་དུག་གི་མཚོ་ཆེན་ལྟ་བུ་འདི་ལས་བསྒྲལ་ནས། རྣམ་མཁྱེན་བྱང་ཆུབ་དམ་པ་གཏན་བདེ་ཐར་བའི་འགྲམ་ངོགས་རྗེས་སུ་ནམ་ཡང་འཁོར་བའི་སྡུག་བསྔལ་མི་མྱོང་བའི་ས་རུ་ཕྱིན་པ་ཞིག་ངེས་པར་བྱ། དེའི་ཆེད་དུ་བདག་གིས་ད་རེས་དམ་པའི་ཆོས་ཟབ་མོ་ཐོས་བསམ་སྒོམ་པའི་རིམ་པས་ཉམས་སུ་བླངས་ཏེ། འགྲོ་བ་སྡུག་བསྔལ་ལས་སྐྱོབ་པའི་ནུས་པ་དང་ལྡན་པ་ཞིག་བྱའོ་སྙམ་པའི་ཐུགས་བསྐྱེད་དང་། ཐུགས་བསྐྱེད་དེ་དང་མཐུན་པའི་ཆོས་གསན་པའི་ཀུན་སྤྱོད་བླང་བར་བྱ་བ་དག་ཀྱང་ཚུལ་དང་མཐུན་པར་མཛད་པའི་སྒོ་ནས་གསན་དགོས་པས་ན། དམ་པའི་ཆོས་གསན་པའི་ཀུན་སློང་ཀུན་སྤྱོད་སྤྱི་དང་། ཁྱད་པར་དུ་རྨད་བྱུང་འབྲས་བུའི་ཐེག་རྩེ་རྫོགས་པ་ཆེན་པོའི་ཟབ་ཁྲིད་གསན་པའི་གནས་སྐབས་སུ། གདོད་ནས་གཞི་རྫོགས་འཕོ་འགྱུར་དང་བྲལ་བ་འོག་མིན་ཆོས་ཀྱི་དབྱིངས་ཀྱི་ཞིང་ཁམས་ནས། ཆོས་སྐུའི་བསྟན་པ། སྟོན་འཁོར་དུས་དང་བཅས་པ་ཐུན་མིན་ཀུན་ཏུ་བཟང་པོའི་དགོངས་སྤྱོད་ལས་གཞན་དུ་མ་གྱུར་པའི་ངང་ལས་གཡོ་བ་མེད་པའི་དགོངས་ཉམས་ལ་བཞག་ནས་གསན་དགོས་པ་ནི་མཁྱེན་བཞིན་པས་སྨྲོས་མ་དགོས་ལ། གང་ལྟར་བཤད་ཀྱང་ལམ་ལ་སློབ་པའི་གང་ཟག ཐོག་མར་སེམས་བརྒྱུད་འཆོས་པའི་ཚུལ་ལས་བརྩམས་ཏེ་སློབ་པ་ཞིག་ལ་མཚོན་ན། དེའི་ཐད་ལ་ཡང་འདེང་མི་རྒྱག་ཐབས་མེད་ཡིན་པས། རང་རེ་ཆོས་གྲོགས་རྣམ་པ་ཉི་མ་རེ་རེ་བཞིན་དུ་ཐེངས་རེ་རེ་གཉིས་རེར་འདི་ལྟར་མཇལ་འཛོམས་བྱུང་ནས། དམ་པའི་ཆོས་ཀྱི་དགའ་སྟོན་ལ་ཐུན་མོང་མཉམ་དུ་ལོངས་སུ་སྤྱོད་དུ་ཡོད་པའི་བགོ་སྐལ་བཟང་པོ་ཐོབ་པ་འདི་ལ་བསམ་བློ་ཞིག་བཏང་ན། འདི་སྟབས་ལེགས་སྟེས་དབང་གིས་གང་བྱུང་ཅི་ཐོད་ལ་བྱུང་བ་ཞིག་མ་ཡིན་པར། ཚེ་སྔོན་བསོད་ནམས་བསགས་པའི་མཐུ་དང་། ལས་སྨོན་གཅིག་ཏུ་འབྲེལ་བའི་སྟོབས་བཙན་པོ་ཞིག་གིས་བསྡུས་པ་ཡིན་པ་ནི་གོར་མ་ཆག་ཅིང་། ད་ལྟའི་སྐབས་ཀྱི་དུས་བསྐལ་པ་བཟང་པོ་དམ་ཆོས་སྤྱོད་པའི་ལས་དབང་ཅན་དེ་རིང་ལྟ་བུ་དེ་ཚེས་ཡོད་ནའང་། འདིའི་རྗེས་ཀྱི་མ་འོངས་འབྱུང་འགྱུར་སང་ཉིན་ལྟ་བུ་དེའི་ལས་དང་བྱ་བ་ལ་ཡང་། ཆག་འཆར་གཞིའི་བསམ་བློ་ཞིག་མི་བཏང་ཀ་མེད། དཔེར་ན་གོམ་པའི་འདེགས་འཇོག་བསྒྱུར་ནས་ལམ་ལ་འགྲོ་བཞིན་པའི་གང་ཟག་ཅིག་གི་རྐང་པ་ཡ་གཅིག་གནམ་ལ་བཀྱགས་པའི་རྗེས་སུ་འདིར་བརྫིའོ་སྙམ་ནས་རྡོག་སྣེའི་རྒྱ་ལམ་ལ་གཅིག་མི་བལྟ་བའི་ཐབས་མེད་པ་ལྟ་བུ་ཞིག་ཡིན། དེས་ན་མི་ཚེའི་ཉི་མ་འདི་དང་འགྲོགས་པའི་དུས་ཞེས་པ། གཅིག་ཏུ་བརྟན་པ་མིན་པར་སྐད་ཅིག་སྐད་ཅིག་གིས་གཡོ་ཞིང་འགྱུར་བའི་མཚན་ཉིད་ཅན་འདིའི་དབང་འོག་ཏུ་ཚུད་ནས་མཐར་ཁྱུར་མིད་བྱས་ནས་མིང་མེད་དུ་མ་སོང་བ་ཞིག་སྲིད་པ་འདིར་གཅིག་ཀྱང་ཡོད་མ་མྱོང་ཞིང་། གཡོ་བ་བཅུད་ཀྱི་སེམས་ཅན་ལ་རྟག་པ་བརྟན་པ་ཅི་ཡོད་དེ། སྐྱེས་ཚད་འཆི་བའི་རང་བཞིན་ཡིན། སྲོག་ཆགས་འགའ་རེའི་ཚེ་ཚད་ཉིན་རེ་ཙམ་ལས་མེད་པ་དང་། འགའ་རེ་ཟླ་གྲངས་ཙམ་དང་། ཡང་ལ་ལ་ཞག་གྲངས་ཙམ་ཐུབ་པ་དང་། ཡང་དུད་འགྲོ་འགའ་རེ་ནི་མི་ལས་ཀྱང་ཚེ་རིང་བར་ཡང་བཤད་ཅིང་། གང་ལྟར་ཡང་སྐྱེ་བའི་རྗེས་སུ་འཆི་བ་ནི་ལུས་ཅན་ཐམས་ཅད་ལ་ཁྱད་མེད་དུ་འབྱུང་བ་ཡིན། བརྟན་པ་སྣོད་ཀྱི་འཇིག་རྟེན་ཡང་དང་པོར་ཆགས་པའི་ཕྱིར་ན་ཐ་མར་འཇིག་པ་ཟློག་ཏུ་མེད་པ་ནི་འདུས་བྱས་ཀྱི་མཚན་ཉིད་ཡིན་པས་ཏེ། དེ་ནི་ཆོས་པ་ཡིན་མིན་ཚང་མས་ཧ་གོ་ཞིང་། འུ་ཚོ་འཛམ་བུ་གླིང་གི་ད་ལྟ་མཐོང་བཞིན་པའི་ས་སྒང་རིལ་མོ་འདིའི་ཐོག་གི་མི་ལ་མཚོན་ན། ཚེ་ཚད་རིང་ཐུང་སྣ་ཚོགས་པ་ཡོད་ཅིང་། གློ་བུར་ཡེ་འདྲོག་གི་རྐྱེན་དབང་ལ་སོང་བ་ཡང་གྲངས་ཀྱིས་མི་ཆོད་པ་ཡོད་པ་ཡིན། རང་རེ་ཡོད་སའི་ཁོར་ཡུག་གི་དེང་སྐབས་ཀྱི་འཚོ་ཆས་འཕྲོད་བསྟེན་ཅུང་ཟད་མ་སྐྱོན་པའི་དབང་དུ་བཏང་དུས། མིའི་ཆ་སྙོམས་ཀྱི་ཚེ་ཚད་ལོ་བདུན་ཅུ་དོན་གྲངས་ལ། ཚན་རིག་པས་དབྱེ་ཞིབ་བྱས་ཡོད་ཀྱང་། འུ་ཚོས་དེ་ལྟར་ཆ་ཚད་རིང་མོར་བཞག་ཀྱང་འཕྲལ་རྐྱེན་ཞིག་གིས་ཐང་རྩ་བསྡམ་རན་ནས་ཡོད་ནའང་ལ་ཐང་མེད་པས། སྔུན་ན་ཡོད་པའི་ཚེ་ཡི་རིང་ཐུང་དང་མི་ཚེའི་འདུག་ཡུན་ཇི་ཙམ་ཞིག་ཡོད་པ་ནི་མི་ཤེས་ན་ཡང་། དེ་སྔོན་འདས་པའི་དུས་ཚོད་ད་སྔ་ཡོང་སའི་ཕྱོགས་དེ་རྗེས་དྲན་གྱིས་ཤེས་རྒྱུ་ཅན་ཞིག་ཡིན་པས། སྐྱེས་ནས་འཆི་བ་ལ་མ་ཐུག་བར་གྱི་དུས་ཚོད་ཀྱི་རིང་ཐུང་དེ། ལམ་ཐག་ལེ་བར་ཁ་གྲངས་ངེས་པ་ཅན་གྱི་ལམ་ཞིག་ལ་ཞུགས་ནས་འགྲོ་བཞིན་པ་ལྟ་བུ་ཞིག་ལ་མཚོན་ན། སྔུན་ལ་ཡོད་རྒྱུའི་རྒྱང་ཐག་གི་ལེ་བར་དུ་ཡོད་པ་ནི་དེ་སྔོན་འགྲོ་མ་མྱོང་བའི་རྒྱུས་མེད་ཀྱི་ལམ་ལ་མངོན་ཤེས་མེད་པའི་མི་ཡི་མིག་རྒྱང་གིས་མི་མཐོང་མོད། ད་སྔོན་སོང་ཤུལ་གྱི་ལམ་ལ་ཕྱི་བལྟས་བྱས་ན་སྔུན་གྱི་ལམ་ཐག་རིང་ཐུང་ཡང་ཤེས་པ་བཞིན་དུ། ད་ལྟ་ནམ་འཆིའི་ཚེ་ཚད་དང་། སྔུན་ན་སྐྱིད་སྡུག་ཅི་ཞིག་གིས་སྒུག་ཡོད་པ་མ་ཤེས་རུང་། སྐྱེས་ནས་ད་ལྟའི་བར་གྱི་ལོ་ཟླ་བའི་ཁ་གྲངས་དང་། དེའི་ཚེ་ལ་ཅི་བྱས་གང་བྱས་དང་ཅི་ཡོང་གང་ཡོང་ཐམས་ཅད་ཞེ་ན་ཨ་ཁྲིགས་སེ་ངེས་པ་ཡིན། གང་ཟག་སོ་སོའི་མི་ཚེའི་སྐྱེལ་སྟངས། བྱས་པའི་ལག་རྗེས། བསམ་བློའི་འདུ་ཤེས། བདེ་སྡུག་གི་སྣང་ཚུལ་སོགས་བྱུང་ནས་ཡལ་བའི་འདས་དུས་ཀྱི་ལོ་རྒྱུས་རིང་ཐུང་ལ་སོགས་པ་དེ་ཕྱིར་ཡོང་མེད་ཅིང་། དབང་པོ་གཟུགས་ཅན་པ་མིག་ལ་སོགས་པས་མངོན་སུམ་མྱོང་བའི་ཡུལ་དུ་མ་གྲུབ་ཀྱང་། འདས་དོན་ཡིད་ཀྱི་དྲན་པའི་ཡུལ་དུ་གྱུར་ནས། ད་སྔོན་གྱི་བྱུང་བ་ཆུང་བྱིས་པའི་དུས་དང་ཚུན་ཆོད་ཀྱི་རང་རང་གི་མི་ཚེའི་ལོ་རྒྱུས་ལ་ཁ་ཕྱིར་འཁོར་རྒྱུ་ཡོད་ལུགས་ནི་ཚང་མ་འདྲ་འདྲ་ཡིན། ཕྱིས་འབྱུང་གི་མི་ཚེའི་ཚོད་དེ་མངོན་ཤེས་མེད་པ་ཞིག་ལ་མཚོན་ན་མུན་ནག་ནང་གི་ལག་རྙོབ་ཏུ་སོང་ནས། སྔུན་ལ་ཡོད་པའི་སྐྱིད་སྡུག་གི་ལས་དབང་རྡོག་ལམ་དེ་བདེ་གཟར་ཅི་ཞིག་ལ་ཁེལ་ཡོད་པ་མི་ཤེས་ཀྱང་། སྔར་སོང་འདས་པའི་ལོ་རྒྱུས་ནི་ད་ལྟ་ཡིད་ལ་གསལ་བས་དེས་བེད་ཅིག་སྤྱད་དགོས་པ་ཡིན་པས། འདས་པའི་མི་ཚེའི་དུས་ཚོད་ལ་མི་རང་རང་གི་ངོས་ནས་བརྟགས་ཤིང་དཔྱད་ན། བྱ་བ་བཟང་པོ་རང་གཞན་འདི་དང་ཕྱི་མར་ཕན་པའི་བྱ་ལས་ཤིག་བསྒྲུབས་ཡོད་པའམ། བྱ་བ་ངན་པ་རང་གཞན་འཕྲལ་ཕུགས་གཉིས་ལ་གནོད་ཚབས་ཅན་གྱི་བྱ་བཞག་ཅིག་བསྒྲུབས་ཡོད་པའམ། ཡང་ན་བར་མིན་མདོ་མིན་ལུང་མ་བསྟན་གྱིས་མི་ཚེ་ནམ་ཟླ་སྟོང་ཟད་ལ་བརྒལ་ཡོད་པ་ལྟ་བུ་གང་ཡིན་ཡང་། དེ་དག་བསྐྱར་དུ་ལོག་ནས་ཚུར་ཡོང་ཐབས་མེད་པ་ནི་ཁ་རྩང་གི་བྱ་བ་དང་མདང་གི་རྨི་ལམ་གཉིས་ཀ་དེ་རིང་མེད་ལུགས་འདྲ་འདྲ་དང་། དེ་རིང་གི་བྱ་བ་དང་དོ་དགོང་གི་རྨི་ལམ་གཉིས་ཀ་སང་ཉིན་མེད་ལུགས་འདྲ་འདྲ་བྱས་ནས། ཕྲ་བ་སྐད་ཅིག་ཐང་ཅིག རགས་པ་ཞག་དང་ལོ་ཟླའི་འགྲོས་ལ་འགྲོགས་ནས་མི་ཚེའི་ཉི་མ་སྐད་ཅིག་ལ་མི་སྡོད་པར་འགྲོ་དང་འགྲོ་བཞིན་པ་ཡིན། འོ་ན་སྔར་སོང་འདས་པའི་བྱ་བཞག་ད་ལྟ་ཚུར་ལ་ཡོད་རྒྱུ་མེད་པ་དེས་བེད་ཅིག་ཇི་ལྟར་སྤྱད་དགོས་སྙམ་ན། དེའི་ཉམས་མྱོང་དངོས་མའི་བྱ་རིམ་གྱི་ནང་དུ་རང་ཉིད་དངོས་སུ་བརྒྱུད་ནས་ཡོང་བ་ཡིན་པས། གཞན་ལ་རྒྱང་བལྟས་བྱས་པ་དང་། གཞན་གྱིས་བཤད་པ་ཉན་པ་ལྟ་བུ་ཞིག་མ་ཡིན་པར་དེའི་མངར་སྐྱུར་ཁ་གསུམ་གྱི་བྲོ་བ་རང་གིས་མྱངས་ནས་ཡོད་པ་དེ་ལ་བརྟེན་ནས། ད་ཕྱིན་ཆད་ཀྱི་འགྲོ་ལམ་གྱི་བསམ་བློ་གཏོང་ཕྱོགས། སྤྱོད་ལམ་ཡག་ཉེས་ཀྱི་ཚད་གཞིའི་ཐིག་ཚད། ཉམས་སུ་མྱོང་བའི་དཔེ་རིས་ཤིག་གི་གོ་ཞིག་ཆོད་པ་ཞིག་བྱེད་ཤེས་དགོས། སྔོན་ནས་ད་ཡི་བར་དུ་འཕྲོ་བརླག་ལ་སོང་བའི་མི་ཚེའི་འདས་པའི་དུས་ཚོད་དེ་ཕྱིར་མི་ལོན་ཡང་། དེའི་གསེང་གི་ཕན་ཐོགས་ཅན་གྱི་རིན་ཐང་དེ་ལེན་ཤེས་དགོས་པ་ཡིན། མི་ཞིག་ཡིན་དུས་བྱ་བ་ཞིག་ལོས་སྒྲུབ། བྱ་བ་གང་དང་གང་ལ་འཐམ་ཡོད་ན་དེ་ལ་དམིགས་འདུན་ཞིག་ཡོད་པ་དེ་འགྲུབ་དགོས་པ་ཡིན་པས། ད་ལྟའི་སྐབས་ལ་རང་རེ་ཆོས་གྲོགས་རྣམ་པ་ལ་མཚོན་ན། ཆོས་ཐེག་ཆེན་མདོ་དང་སྔགས་ཀྱི་སྨིན་བྱེད་ཀྱི་དབང་། གྲོལ་བྱེད་ཀྱི་ཁྲིད། གདམས་ཟབ་མང་པོ་ཞིག་ཞུས་པ་འདིའི་དགོས་དོན་ངོ་མ་ནི་ནང་སེམས་རྒྱུད་ཀྱི་འགྱུར་བ། སྔར་དང་མ་འདྲ་བ་ཞིག་ལ་གོ་འཕོ་མ་ཐུབ་དུས་ཆོས་བསྒྲུབས་པའི་གོ་ཆོད་མེད་པ་ཡིན། ཆོས་པའི་གཟུགས་བརྙན་འཆང་བ་མང་པོ་ཞིག་ད་སྔོན་དེ་ལྟར་བྱས་ནས་སྟོང་ལོག་ཁུར་ཡོད་ཅིང་། ངས་ཀྱང་དེ་སྔོན་ཆོས་དང་དབང་ཞུས་ནས་མི་ལོ་གྲངས་ཀ་ཅན་ཏེ། ད་སྔོན་གྱི་མི་ཚེ་ཆ་ཚང་དེ་ལ་བཏང་བ་ཡིན་ཞེས་བརྗོད་ནའང་ཆོག་པར་ཆགས་ཡོད། འོན་ཀྱང་ད་དུང་གཤིས་རྒྱུད་སྔར་ལས་སོར་གང་གིས་མ་འཕགས་ཤིང་། ད་རུང་འདི་བཞིན་སོང་ན་ལོ་རེའི་རྒྱབ་ཀྱི་དུས་ཚོད་ནི་འགྲོ་ཇེ་མགྱོགས་ཡིན་པ་ནི་བཅོས་སུ་མེད་ཅིང་། ང་ཡང་བསྐྱར་ལམ་དེར་ཞུགས་པར་བྱས་ན་དེ་ལས་མི་འདའ་བ་ནི་སྔུན་ལ་ཡོད་པ་འདི་རེད། གཞན་རྐྱེན་རྐྱང་པ་ལ་བློ་གཏད་བྱས་པས་ཀྱང་མི་ཡོང་བར་འདུག་སྟེ། སྤྱིར་ན་བྱིན་རླབས་ས་དང་རྡོ་ཡིན་ཡང་ཞུགས་སུ་ཡོད་དེ། རྒྱལ་བའི་ཐུགས་རྗེའི་ཡེ་ཤེས་ཀྱིས་སྣོད་བཅུད་ཀུན་ལ་ཁྱབ་ཅིང་འཇུག་པ་ཡིན། འོན་ཀྱང་གདུལ་བྱ་རང་ལ་ཡོད་པའི་རིགས་སམ་ནུས་པ་རང་སྟོབས་ཀྱིས་སད་བྱེད་ཀྱི་མ་མཐའི་ཆ་རྐྱེན་དད་དང་སྙིང་རྗེ་ཐུན་མོང་མ་ཡིན་པ་ཞིག་རང་རྒྱུད་ནས་སྐྱེ་མ་ནུས་ཚེ། བྱིན་བརྒྱུད་ཀྱི་དགོངས་པ་བཙན་ཐབས་སུ་བརྙེས་ཞེས་པ་དེ་ཡང་གཞི་ལམ་འབྲས་གསུམ་འབྲེལ་མི་དགོས་ཤིང་ཚོགས་གཉིས་རྫོགས་སྟོབས་སྔོན་ལ་གཏན་ནས་འགྲོ་མི་དགོས་པའི་གོ་བ་ཞིག་ག་ལ་ཡིན། གལ་ཏེ་དེ་ཡིན་དུ་ཆུགས་ཀྱང་། ཐེག་རིམ་འོག་མ་ཐམས་ཅད་ལམ་ནོར་དང་། ཡང་མིན་ན་སངས་རྒྱས་སྒྲུབ་པ་ལ་དགོས་མེད་དུ་ཐལ་བས། དེ་ལྟར་མིན་པ་ནི་འོག་མའི་དགོས་པ་ཐམས་ཅད་ཡར་ལྡན་དུ་རྫོགས་པའི་ཐེག་རྩེའི་མྱུར་ལམ་ཐབས་མང་དཀའ་བ་མེད་པ་ལ་སོགས་པའི་འཕགས་ཚུལ་བསྟན་པས་ཀྱང་ཤེས་ཤིང་། མྱུར་ལམ་དེ་ཡང་མྱུར་ལམ་ཡིན་པའི་ཟབ་ཁྱད་དེ་ཆོས་རྐྱང་པའི་སྟེང་ནས་འཇོག་ཏུ་མེད་པར། དེ་ཉམས་སུ་ལེན་པའི་གང་ཟག་རང་གི་ཤེས་རྒྱུད་ཀྱི་སྟེང་ནས་ཀྱང་སྣོད་དུ་རུང་བས་མ་ཚད་བཅུད་དུ་སྨིན་པ་ཞིག་དགོས་པས། ཆོས་དང་རང་རྒྱུད་གཉིས་ཀ་གཅིག་ཏུ་འདྲེས་ཐབས་ལ་རང་ཉིད་ཀྱིས་མ་འབད་དུས། ཆོས་ཀྱི་ཁ་ཚོད་མཐོན་པོ་ཐེག་ཆེན་གྱིས་མི་ཚད་གསང་སྔགས། གསང་སྔགས་ཀྱིས་མི་ཚད་ཐེག་དགུའི་ཡང་རྩེ་སོགས་ཇི་འདྲའི་ཆེན་པོ་མཐོན་པོ་བཤད་ཀྱང་། དོན་རང་རྒྱུད་རང་དོན་ཞི་བདེ་དོན་གཉེར་གྱི་འདུན་པ་ཅན་གྱི་གང་ཟག་གི་བདག་འཛིན་ལས་ལྡོག་པའི་ཕྱོགས་ཙམ་ལ་ཡང་མ་སོང་དུས། སྔགས་ལམ་མ་དགོས་མདོ་ལམ། ཐེག་ཆེན་མ་དགོས་ཐེག་དམན་ཉན་ཐོས་ཀྱི་ཐེག་པའི་ཐར་བ་ཙམ་ལ་ཡང་ཉེ་རུ་མེད་ཅིང་། དེ་ལྟར་རང་རྒྱུད་རང་གིས་ཞིབ་བཤེར་དང་། རང་གི་ནང་ཆ་རང་གིས་བསློག་ཡོང་དུས་ཅི་ཡང་འགྲུབ་མེད་པའི་ཡུལ་ཁ་དེ་མཐོང་ནས་སྐབས་བབས་དགོས་པའི་ཡོ་བྱད་ཇི་ལྟ་བུ་ཞིག་བེད་སྤྱད་ན་དྲག་སྙམ་པ་བྱུང་ན། དེ་སྔོན་ཚེ་སྟོད་ཀྱི་གཡེངས་པའི་བྲེལ་ཟིང་གི་བྱ་བ་གཅིག་གིས་ཀྱང་ལ་མ་བརྒལ་བར་ལུས་ཤིང་། དེས་གྱོང་བཏབ་རབས། ཕམ་ཁ་ཁུར་ལུགས། ཚེ་སྟོད་སྔ་དྲོའི་ཉི་མ་འདྲ་འདྲའི་བཟང་ས་ཡག་ས་དེ་ཅི་ཡང་མ་འགྲུབ་པར་ཆུད་ཟོས་ལ་སོང་ཚུལ། ད་དུང་ཡང་དེའི་ངན་གཤིས་ལ་བསྙེགས་ནས་དེའི་དབང་དུ་ཤོར་བའི་ལམ་ལོག་ཏུ་ཁྲིད་ཉེན་ཡོད་པ་རྣམས་ངོས་ཟིན་པར་བྱས་ནས། དེ་འདྲའི་ད་སྔའི་ཕམ་ཁའི་ཕྱོགས་ཀྱི་མྱོང་བ་དངོས་མའི་འདྲ་དཔེ་དེ་ཁྱེར་ཡོང་ནས། ད་རུང་དེ་འདྲའི་ཉེན་ཁ་ཅན་གྱི་ཕྱོགས་ལ་མི་ལྷུང་བའི་ཟོན་ཞིག་བྱེད་པའི་དོགས་འཛེམ་གྱི་ནུས་པ་ལ་ཤུགས་སྣོན་བརྒྱབ་སྟེ་དགག་ཕྱོགས་ཀྱི་སློབ་གཞི་ཞིག་ལ་བཟུང་བ་དང་། དེ་ལྟ་བུའི་དེ་སྔོན་རིན་བྲལ་གྱི་དུས་ཚོད་བཟང་པོ་འཕྲོ་བརླག་ལ་ཤོར་བའི་ཉེན་ཚབས་ཅན་གྱི་བྱ་བཞག་ལ་འདེང་ཕོག་པའི་བློ་སྣ་དྲག་པོ་དགྲ་གཤེད་མའི་ལག་ནས་གཉིད་ཚ་སད་བྱུང་བ་ལྟ་བུ་ཞིག་དགོས་པ་ལས། འདི་ལྟར་དུ་ཡ་ལེ་ཡོ་ལེའི་སྒོ་ནས་དབྱར་དགུན་སྟོན་དཔྱིད་ཀྱི་དུས་བཞི་འགྱུར་བའི་ལོ་ཟླ་བརྩིས་ཏེ། མི་ཚེའི་དུས་ཚོད་དེ་ལ་ཁའི་རི་དྭགས་བཞིན་དུ་ཟ་ཉལ་གཉིས་ལས་གཞན་པའི་འདེང་རྒྱག་ཆེ་ཞིག་མི་ཤེས་པའི་འདུན་པ་ལས་མེད་དུས། དུད་འགྲོ་ཕལ་དང་ཁྱད་པར་འབྱེད་ཆོས་མ་བྱུང་བ་རེད་སྙམ་པའི་བློ་སྦྱོང་སྟེ། དེ་འདྲའི་སྔ་བསམ་ཕྱི་འདེང་ཞིག་མ་ཕོག་ཚེ་མི་ལུས་བླངས་པའི་དོན་གོ་ཆུང་ཞིང་། ཆོས་ཞུས་ནས་ཉི་མ་ནམ་ཟླ་ལོ་དང་ཟླ་བ་སོང་བ་དེས་གོ་ཆེ་ཞིག་ཆོད་མེད་པ་རེད། དེས་ན་གཞི་ཅི་ཡང་མ་ཡིན་པ་ལས་ཅིར་ཡང་འཁྲུལ་ཞིང་མཐའ་མེད་པའི་འཁོར་བའི་སྡུག་བསྔལ་མྱོང་བ་འདི་ལས་མ་འདས་ཤིང་། དེ་ཡང་རང་ཅི་འདྲ་རོགས་ཀྱང་ཡིན་པས། སྡུག་བསྔལ་མྱོང་བའི་སེམས་ཅན་འདི་དག་ཐོག་མེད་ནས་ཕ་མ་རུ་འབྲེལ་ཞིང་། སྐྱབས་དང་སྐྱོབ་པ་དང་རེ་ས་རེ་ལྟོས་མེད་པར་སྡུག་བསྔལ་མྱོང་ཚུལ་ཡང་། སྔར་རང་གི་ལུས་སེམས་ཀྱི་ཐོག་ལ་ཡོང་མྱོང་བ་དང་། མ་ཚད་དེ་བས་ཀྱང་ཚབས་ཆེ་བ་དང་། ཁྱད་པར་ངན་སོང་གི་འགྲོ་བའི་སེམས་ཅན་ལ་བསམ་ན་དེ་ཚོའི་སྡུག་བསྔལ་གྱི་ཆ་ཤས་ཙམ་ཡང་བཟོད་ཐབས་མེད་པ། ད་ལྟ་ངན་སོང་ལ་སྐྱེས་མེད་རུང་སྐྱེ་བར་ཕྱོགས་པ་སྟེ། དེར་སྐྱེ་བའི་ལས་བསགས་ཟིན་གྱི་རང་རེ་ཚེ་འདིའི་གྲོགས་དགའ་མཛའ། ཕ་མ་མིང་སྲིང་ལ་སོགས་པའི་གཉེན་ཚན་འདི་དག་ནས་བརྩམས་ཏེ་མཐར་སེམས་ཅན་ཐམས་ཅད་ལ་ཁྱབ་པའི་སྙིང་རྗེ་དྲག་པོ་ཤས་མི་བཟོད་པ་ཞིག་བསྐྱེད་དེ། ད་རེས་ཆོས་ཟབ་མོ་རྫོགས་ཆེན་གྱི་ཆོས་དང་འཕྲད། ལམ་མྱུར་མོ་རང་མ་ཞན་ན་ལོ་དང་ཟླ་བས་ཀྱང་འཁོར་བ་ལས་གྲོལ་བའི་ཐར་བ་མཆོག་གི་གོ་འཕང་ལག་ལ་ལོན་དུ་ཡོད་པའི་དུས་འདིར། འཁྲུལ་བ་འདི་དང་པོའི་གཞི་ལ་ཕྱིར་གཏུགས་ནས། མ་འཁྲུལ་དོན་གྱི་གནས་ལུགས་རང་གནས་ཆོས་སྐུའི་དགོངས་པ་མངོན་དུ་གྱུར་པ་ཞིག་བྱ་སྙམ་པའི་ཆོད་སེམས། དེ་ཡང་སད་དེ་སུད་དེ་ཞིག་མ་ཡིན་པར་རྡོ་གོར་མོ་ཆག་པ་འདྲ་འདྲའི་བཅོས་སུ་མེད་པའི་བློ་སྣ་བརྟན་པོ་ཞིག་རང་རྒྱུད་ལ་འགེལ་ཐུབ་ན་ཐོག་མའི་སྦྱོར་བ་སེམས་བསྐྱེད་དོན་དང་ལྡན་པ། ནམ་མཁའི་མཐའ་དང་མཉམ་པའི་སེམས་ཅན་གཞན་དོན་ཟེར་ནས་བཏོན་པ་དེ་ཁ་ཟེར་བཤད་སྒྲོས་ཙམ་ལ་མ་སོང་ཚེ། ཆོས་ཁྲིད་ཐུན་གཅིག་ཞུས་པའི་ཕན་ཡོན་ཡང་བསམ་གྱིས་མི་ཁྱབ་པས་མ་ཚད་པར། སྦྱོར་དངོས་རྗེས་གསུམ་ཚང་པའི་དངོས་གཞིའི་ཉམས་ལེན་གྱི་གནད་དང་སྦྱར་ན། ཐར་བ་དམ་པ་རང་ལག་ལ་ཡོད་པ་དང་། གཞན་དོན་ངང་གིས་འབྱུང་ཞིང་ཆོས་གསན་བསམ་ཉམས་བཞེས་གཟུགས་བརྙན་ལ་མ་སོང་བའི་དོན་གོ་ཆོད་ཚུལ་གསར་བུ་ཅུང་ཟད་ལས་དང་པོ་པའི་རིགས་ཅན་གྱི་དགོས་དོན་ལ་དམིགས་ནས། རང་ཉམས་དང་སྦྱར་བའི་ཐུགས་གསོས་ཞུས་པ་དང་མཉམ་དུ་གང་ཞིག་འཆད་ཉན་བྱ་བའི་ཆོས་ཀྱི་རིམ་པ་ནི། ཇི་སྐད་དུ། གཞུང་བཟང་འདི་འདྲ་འཕགས་ཚོགས་ཀུན་གྱི་ཐུགས། །དུས་གསུམ་སྔ་ཕྱིའི་རྒྱལ་སྲས་འཕགས་རྣམས་ཀྱི། །རྟོགས་པའི་ཡེ་ཤེས་འདི་ལས་མ་འདས་ཏེ། །འཕགས་པའི་ཡེ་ཤེས་འདི་ལས་ཡོད་རེ་ཀན། །ཞེས་པ་ལ་སོགས་པ་དཔལ་སྤྲུལ་ཚང་གིས་འགག་མང་པོ་ཞིག་མཛད་ནས་གསུངས་པའི་མདོ་སྔགས་ལེགས་བཤད་ཀྱི་གཞུང་ལུགས་ཐམས་ཅད་ཀྱི་བརྗོད་བྱའི་སྙིང་པོ་གཅིག་ཏུ་དྲིལ་བའི་གདམས་པ། ཕྱོགས་བཅུ་དུས་གསུམ་གྱི་བྱོན་བཞུགས་འབྱོན་འགྱུར་གྱི་རྒྱལ་བ་ཐམས་ཅད་ཀྱི་ཐུགས་ཀྱི་གསང་བ་ཟབ་མོ་སྟོན་པའི་མན་ངག ལམ་གཞན་དག་ནི་རྒྱུ་བསྒྲུབས་ནས་འབྲས་བུ་ནམ་ཞིག་ལ་ཐོབ་པའི་དུས་ལ་ལྟོས་ཤིང་སེམས་ལམ་བྱེད་རིང་བའི་ལམ་ཡིན་ཡང་། འདི་ནི་འབྲས་བུའི་རང་གནད་རྟོགས་པའི་ཡེ་ཤེས་རྗེན་ཅེར་ལ་སྟོན་པའི་ཆོས་སྐུའི་བསྟན་པ་མངོན་སུམ་དུ་སྟོན་པའི་ཀུན་ཏུ་བཟང་པོའི་ཐུགས་བཅུད། འདི་དོན་རྟོགས་པ་ལས་གཞན་དུ་འཕགས་པའི་ཡེ་ཤེས་མེད་ཅིང་། འཕགས་པའི་ཡེ་ཤེས་བརྗོད་བྲལ་ཚིག་ལས་འདས་པ་དེ་བརྗོད་འདས་རྡོ་རྗེའི་བརྡ་ཡིས་ཉེ་བར་སྟོན་པ། འཕགས་པའི་ཡེ་ཤེས་མངོན་སུམ་མཇལ་དུ་ཡོད་པའི་ཆོས་སྐུའི་རིང་བསྲེལ་གྱི་ཕུང་པོ། ཆོས་དབྱིངས་རིན་པོ་ཆེའི་མཛོད་འདི་ལྟ་བུའི་ཟབ་ཆོས་འཆད་ཉན་གྱི་སྐལ་བཟང་མངོན་དུ་གྱུར་པ་ལ་སླར་ཡང་དད་ཅིང་འདུན་པའི་སྒོ་ནས། དགོངས་པ་བརྗོད་བྱའི་དོན་རྒྱལ་བའི་གསང་བ་ཟབ་མོའི་ཀློང་ལས་གཡོ་བ་མེད་པའི་ཐུགས་འདུན་དང་བཅས་ཏེ་གསན་པའི་སྐབས་ལས། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ལས། ཐོག་མར་དགེ་བ་ཀླད་ཀྱི་དོན་དང་། རང་འགྲེལ་ལུང་གི་གཏེར་མཛོད་འདི་ཉིད་ཀྱི་འགྲེལ་བ་བཤད་པ་ལ་འཇུག་པའི་རྒྱུ་བརྗོད་པ་ལ་སོགས་པ་དང་། འཇུག་ཡུལ་ལུས་ཀྱི་དོན་དངོས་རྒྱ་ཆེར་བཤད་པ་ལ་ལེའུ་བཅུ་གསུམ་ཡོད་པའི་ལེའུ་དང་པོ་འཁོར་འདས་དབྱིངས་ལས་མ་གཡོས་པའི་རང་བཞིན་བསྟན་པའང་སོང་ནས། དེ་རིང་ལེའུ་གཉིས་པ་སྣང་སྲིད་ཞིང་ཁམས་སུ་ཤར་བའི་ལེའུ་བཤད་པའི་སྐབས་ཏེ།
ལེའུ་གཉིས་པ་སྣང་སྲིད་ཞིང་ཁམས་སུ་ཤར་བར་བསྟན་པའི་འགྲེལ་པ།
ལེའུ་དང་པོས་རིག་པ་སྐུ་གསུམ་ལྷུན་གྲུབ་ཆེན་པོའི་ངང་ལས་འཁོར་འདས་སུ་ཤར་ཡང་དབྱིངས་ལྷུན་གྲུབ་ལས་མ་གཡོས་པར་བསྟན་པ་དང་། ཆོས་ཐམས་ཅད་རང་བྱུང་གི་ཡེ་ཤེས་སུ་འདུས་པས་རང་སྣང་ཤར་དུས་ཉིིད་ནས་བྱར་མེད་མཉམ་པ་ཆེན་པོར་ཕྱམ་གདལ་ཚུལ་དང་། སྐུ་དང་ཡེ་ཤེས་རིག་པའི་ངང་དུ་རྫོགས་པས་རྒྱལ་བའི་ཞིང་དང་མཁྱེན་པའི་སྤྱོད་ཡུལ་ཡང་རིག་པའི་ངང་དུ་རྫོགས་ཚུལ་གྱི་འཁོར་འདས་དབྱིངས་ལས་མ་གཡོས་པར་བསྟན་པ་སྟེ། དེ་ལྟར་དབྱིངས་ཀྱི་རང་བཞིན་འཆར་གཞིར་གཏན་ལ་ཕབ་ནས། ད་ནི་དབྱིངས་དང་དབྱིངས་སྣང་ཞིང་ཁམས་སུ་ཡེ་ནས་རང་ཤར་བའི་དོན་རྒྱ་ཆེར་བསྟན་པ་ལས། ཞེས་པ་སྟེ། སྣང་སྲིད་ཞིང་ཁམས་སུ་ཤར་བའི་ལེའུ་འདི་ལ། དབྱིངས་དང་དབྱིངས་སྣང་ཞིང་ཁམས་སུ་ཡེ་ནས་རང་ཤར་བའི་དོན་རྒྱ་ཆེར་བསྟན་པ་དང་། ལྷུན་གྲུབ་རྡོ་རྗེ་དབྱིངས་ཀྱི་ཞིང་ཁམས་སུ་ཆོས་ཉིད་འཕོ་འགྱུར་མེད་པར་ངང་གཅིག་པར་བསྟན་པ་དང་། དེ་ལྟ་བུའི་ངང་དུ་ཆོས་ཐམས་ཅད་རྫོགས་པར་བསྟན་པས་འགག་བསྡུ་བ་དང་། དེ་དག་གི་དོན་མཉམ་པ་ཆེན་པོའི་ཚུལ་རྡོ་རྗེ་དབྱིངས་སུ་བསྡུ་བ་དང་བཞི་ལས།
༼ཀ༽དབྱིངས་དང་དབྱིངས་སྣང་ཞིང་ཁམས་སུ་ཡེ་ནས་རང་ཤར་བའི་དོན་རྒྱ་ཆེར་བསྟན་པ།
དང་པོ་དབྱིངས་དང་དབྱིངས་སྣང་ཞིང་ཁམས་སུ་ཡེ་ནས་རང་ཤར་བའི་དོན་རྒྱ་ཆེར་བསྟན་པ་ལ། གདལ་བ་ཆེན་པོའི་ཀློང་ནམ་མཁའ་ལྟ་བུར་བརྗོད་པ་དང་གཅིག སྟོང་པའི་རིག་དབྱིངས་ལས་འཁོར་འདས་སྟོང་པའི་རང་གཟུགས་སུ་ཤར་བ་དང་གཉིས། ཤར་ཡང་ལྷུན་གྲུབ་འགྲོ་འོང་ལས་འདས་པའི་དགོངས་པར་བསྟན་པ་དང་གསུམ། དེ་ཉིད་མཁའ་མཉམ་ཀློང་གཟེར་ཆེན་པོར་བསྟན་པ་དང་བཞི། རང་བཞིན་དག་མཉམ་ཆེན་པོའི་དབྱིངས་ཀྱི་དགོངས་པས་དོན་བསྡུ་བ་དང་རྣམ་པ་ལྔ་ལས།
༼ཀ དང་པོ་གདལ་བ་ཆེན་པོའི་ཀློང་ནམ་མཁའ་ལྟ་བུར་བརྗོད་པ།
དེར་ཐོག་མར་གདལ་བ་ཆེན་པོའི་ཀློང་ནམ་མཁའ་ལྟ་བུར་བརྗོད་པ་ནི།
དབྱིངས་ཀྱི་རང་བཞིན་གདོད་ནས་ལྷུན་གྲུབ་ལ།།
ཕྱི་དང་ནང་མེད་ཀུན་ཏུ་ཁྱབ་པར་གདལ།།
མཐའ་ཡི་མུ་མེད་སྟེང་འོག་ཕྱོགས་མཚམས་འདས།།
ཡངས་དོག་གཉིས་མེད་རིག་པ་མཁའ་ལྟར་དག།
དམིགས་བསམ་སྤྲོས་དང་བྲལ་བའི་ཀློང་ཉིད་དོ།།
ཞེས་གསུངས་ཏེ། མཁའ་མཉམ་བྱང་ཆུབ་ཀྱི་སེམས་ཡེ་ནས་རྣམ་པར་དག་པའི་ངོ་བོ་ལ། ཕྱི་ནང་དང་། ཕྱོགས་ཆ་དང་། ཡངས་དོག་དང་། ངོ་བོ་དང་། ངོས་གཟུང་གི་ཆོས་སུ་གྲུབ་པ་ཅུང་ཟད་ཀྱང་མེད་པས། ནམ་མཁའི་རང་བཞིན་དང་ཕྱོགས་ཙམ་འདྲ་བའི་དཔེ་དོན་སྦྱར་བ་ནི། ཀུན་བྱེད་ལས། སེམས་ནི་ཇི་བཞིན་པ་ཡི་ངོ་བོ་སྟེ། །ཇི་བཞིན་གཉིས་མེད་བདེ་བ་ཆེན་པོ་ལ། །རྣམ་པ་ཀུན་ལྡན་རྣམ་པ་ཡོངས་ཀྱིས་མེད། །སྤྲོས་བྲལ་ནམ་མཁའ་བཞིན་དུ་ཡེ་གནས་ལ། །དམིགས་པའི་ཡུལ་མེད་གཅིག་ཅེས་བགྲང་དུ་མེད། །ཅེས་སོ། །ཞེས་གསུངས་པ་སྟེ། དེ་ཡང་མཁའ་ཁྱབ་ཀུན་དང་མཉམ་པའི་དབྱིངས་ཀྱི་རང་བཞིན་བྱང་ཆུབ་ཀྱི་སེམས། ཡེ་ནས་རྣམ་དག་གདོད་ནས་ལྷུན་གྲུབ་ཀྱི་ངོ་བོ་ལ། ཡུལ་གྱི་སྣང་བ་ཐམས་ཅད་སྟོང་པའི་རང་གཟུགས། རྡུལ་ཕྲན་དང་ཆ་ཤས་ཀྱང་མེད་པས་ཕྱི་དང་ནང་དང་། ཕྱོགས་ཆའི་དངོས་པོ་རུ་མ་གྲུབ་པར། སེམས་གང་ཤར་སྐད་ཅིག་ཆ་མེད་ངོ་བོ་རང་གིས་སྟོང་པའི་རིག་སྟོང་རང་བྱུང་གི་ཡེ་ཤེས་ལས་མ་འདས་པས། ཡངས་དོག་དང་། མཐོ་དམན་དང་། ངོ་བོ་ངོས་བཟུང་མེད་པ་ནམ་མཁའ་ལྟར་དག་ཅིང་། མཐའ་ཡི་མུ་མེད་སྟེང་འོག་ཕྱོགས་མཚམས་ལས་འདས་པའི་སེམས་ཀྱི་ཡིན་ལུགས་ཡེ་ཇི་བཞིན་པ། རྣམ་མེད་སྤྲོས་བྲལ་ཡེ་གནས་ལ་ངོ་བོ་ངོས་བཟུང་གི་དམིགས་པའི་ཡུལ་མེད་པ། ཕྱོགས་ཡོངས་ནས་ནམ་མཁས་ཀྱང་མཚོན་དུ་མེད་པའི་ཆོས་ཉིད་དོན་གྱི་ནམ་མཁའ་ཀུན་ཁྱབ་ཀུན་ལ་གདལ་བའི་ཀློང་ཆེན་པོ་བསམ་བརྗོད་ལས་འདས་པར་བསྟན་པའོ།།
༼ཁ གཉིས་པ་སྟོང་པའི་རིག་དབྱིངས་ལས་འཁོར་འདས་སྟོང་པའི་རང་གཟུགས་སུ་ཤར་བ།
དེ་ལྟར་རིག་པ་སྟོང་པའི་དབྱིངས་ནས། འཁོར་འདས་སྟོང་པའི་རང་གཟུགས་ཤར་བར་བསྟན་པ་ནི།
སྐྱེ་མེད་དབྱིངས་ལས་སྐྱེ་བའི་ཆོ་འཕྲུལ་རྣམས།།
ཅིར་ཡང་མ་ངེས་གར་ཡང་རྒྱ་ཆད་མེད།།
འདི་ཞེས་མི་མཚོན་དངོས་པོའི་མཚན་མ་མེད།།
ཕྱོགས་འབྱམས་ནམ་མཁའ་འདྲ་བའི་རང་བཞིན་ལ།།
སྐྱེ་མེད་ལྷུན་གྲུབ་སྔ་ཕྱི་ཐོག་མཐའ་བྲལ།།
ཞེས་གསུངས་ཏེ། རིག་པ་གདོད་མ་ནས་སྐྱེ་བ་མེད་པའི་ངང་ལས། སྐྱེ་བ་ལ་སོགས་པ་ཅི་སྣང་ཡང་སྐྱེ་བ་མེད་པའི་རོལ་བ་སྟེ། རྒྱ་ཆད་དང་ཕྱོགས་ལྷུང་ལས་འདས་པ་ནི། སེང་གེ་རྩལ་རྫོགས་ལས། རྫོགས་ཆེན་ང་ཡི་བྱང་ཆུབ་སེམས། །རིག་པའི་ངོ་བོ་རྟོག་མེད་ལ། །ཅི་ཡང་མེད་པས་ཅི་ཡང་འབྱུང་། །ཞེས་པ་དང་། ཀུན་བྱེད་ལས། ནམ་མཁའ་ལྟ་བུའི་ཆོས་ཉིད་ལ། །ནམ་མཁའ་ལྟ་བུའི་དཔེ་ཡིས་མཚོན། །དམིགས་སུ་མེད་པའི་ཆོས་ཉིད་ལ། །དམིགས་སུ་མེད་པས་མཚོན་ཏེ་བསྟན། །ཚིག་ཏུ་བརྗོད་དུ་མེད་པ་ལ། །བརྗོད་དུ་མེད་པའི་ཚིག་བརྗོད་དེ། །དམིགས་མེད་དོན་གྱི་ངོ་བོར་བསྟན། །ཞེས་སོ། །དེ་ཡང་གདོད་ནས་སྐྱེ་བ་མེད་པའི་སྐྱེ་མེད་རིག་པའི་དབྱིངས་ཀྱི་ངང་དེ་ལས། སྐྱེ་བའི་ཆོ་འཕྲུལ་རང་སྣང་རྒྱན་གྱི་འཁོར་ལོ། གཅིག་ལས་ཀུན་འབྱུང་སྣོད་བཅུད་འཁོར་འདས་ཀྱི་རོལ་བ་ཅི་ཤར་ཡང་། ཅི་ཡང་མེད་པ་ལས་ཅིར་ཡང་བྱུང་བ་ཡིན་པས། སྐྱེས་པ་ཉིད་ནས་སྐྱེ་བ་མེད་པའི་རང་བཞིན་འཁོར་འདས་ཀྱི་སྟོང་གཟུགས་སུ་ཤར་བས་ཅིར་ཡང་མ་ངེས་ཤིང་གར་ཡང་རྒྱ་ཆད་མེད་པ། མཚོན་བྱ་མིན་པས་ཚིག་གིས་མི་མཚོན། མཚན་མ་མེད་པས་མཚན་ཉིད་སྨྲ་རུ་མི་བཏུབ་པའི་དམིགས་མེད་དོན་གྱི་ངོ་བོ་སྐྱེ་བ་མེད་པའི་ངང་ལས་ལྷུན་གྲུབ་མ་འགགས་པར་སྣང་ཞིང་། སྣང་དུས་ཉིད་ནས་ཀྱང་སྔ་ཕྱི་ཐོག་མཐའ་དང་བྲལ་བའོ།།
༼ག གསུམ་པ་ཤར་ཡང་ལྷུན་གྲུབ་འགྲོ་འོང་ལས་འདས་པའི་དགོངས་པར་བསྟན་པ།
དེ་ལྟ་བུའི་ལྷུན་གྲུབ་འགྲོ་འོང་ལས་འདས་པའི་དགོངས་པར་བསྟན་པ་ནི།
འཁོར་འདས་ཀུན་གྱི་ངོ་བོ་བྱང་ཆུབ་སེམས།།
མ་བྱུང་མ་སྐྱེས་མ་ངེས་ལྷུན་གྲུབ་ནི།།
གང་ནས་མ་འོངས་གར་ཡང་སོང་བ་མེད།།
སྔ་ཕྱི་རིས་མེད་བྱང་ཆུབ་སེམས་ཀྱི་ཀློང་།།
འགྲོ་དང་འོང་མེད་ཀུན་ཏུ་ཁྱབ་པར་གདལ།།
ཞེས་གསུངས་ཏེ། རིག་པའི་ངོ་བོ་ལྷུན་གྲུབ་བརྗོད་གཞི་ལས་འདས་པ་འཁོར་འདས་ཀྱི་དབྱིངས་སུ་བསྟན་པ་སྟེ། ཀུན་བྱེད་ལས། ཆོས་ཀུན་རྩ་བ་བྱང་ཆུབ་སེམས་སུ་གཅིག །སངས་རྒྱས་སེམས་ཅན་སྣང་སྲིད་སྣོད་བཅུད་ཀུན། །ཐམས་ཅད་འབྱུང་བའི་སྙིང་པོ་བྱང་ཆུབ་ལ། །གཅིག་ཏུ་མེད་ལ་བགྲངས་ན་བརྗོད་མི་ལང་། །སངས་རྒྱས་སྐུ་གསུང་སེམས་ཅན་ལུས་ངག་ཀྱང་། །བྱང་ཆུབ་སེམས་ཡིན་ཡེ་ནས་གཟུང་འཛིན་བྲལ། །ཞེས་སོ། །རིག་པ་བྱང་ཆུབ་ཀྱི་སེམས་ལྷུན་གྲུབ་ཕྱོགས་མེད་མཐའ་འདས་ཀྱི་ངོ་བོ་དེའི་ངང་ནས་འཁོར་འདས་ཐམས་ཅད་སྣང་ན་ཡང་ཀུན་ཁྱབ་རིས་མེད་མཉམ་པ་ཆེན་པོར་གདལ་བས། སྔ་ཕྱི་མེད་པས་མ་བྱུང་ཞིང་མ་སྐྱེས། རིས་མེད་ཡིན་པས་གཅིག་ཏུ་མ་ངེས། ཡེ་ནས་གཟུང་འཛིན་དང་བྲལ་བའི་ཆོས་ཀུན་རྩ་བ་བྱང་ཆུབ་ཀྱི་སེམས་གཅིག་པུ་དེ་ལས་འགྲོ་འོང་ལྟར་དུ་སྣང་ན་ཡང་འགྲོ་འོང་མེད་པ་ཀུན་ཁྱབ་གདལ་བ་ཡིན་པའི་རྒྱུ་མཚན་གྱིས་ལྷུན་གྲུབ་བརྗོད་གཞི་ལས་འདས་པའི་དབྱིངས་ཀྱི་དགོངས་པའོ།།
༼ང བཞི་བ་དེ་ཉིད་མཁའ་མཉམ་ཀློང་གཟེར་ཆེན་པོར་བསྟན་པ།
དེ་ཉིད་མཁའ་མཉམ་ཀློང་གཟེར་ཆེན་པོར་བསྟན་པ་ནི།
ཐོག་མཐའ་དབུས་མེད་ཆོས་ཉིད་དེ་བཞིན་ཉིད།།
ཕྱམ་གདལ་མཁའ་མཉམ་དག་པའི་རང་བཞིན་ལ།།
ཐོག་མཐའ་མེད་དེ་སྔ་ཕྱི་ཡུལ་ལས་འདས།།
སྐྱེ་འགག་མེད་དེ་དངོས་པོ་མཚན་མར་མེད།།
འགྲོ་འོང་མེད་དེ་འདི་ཞེས་མཚོན་དང་བྲལ།།
རྩོལ་ཞིང་བསྒྲུབ་མེད་བྱ་བའི་ཆོས་ཀྱིས་སྟོང་།།
ཕྱོགས་ཆ་དབུས་མེད་དེ་བཞིན་ཉིད་ཀྱི་གཞི།།
དམིགས་མེད་རྒྱུན་ཆད་མེད་པས་མཉམ་པའི་ཀློང་།།
ཞེས་གསུངས། འདི་ལྟར་རིག་པ་གང་དུའང་མ་གྲུབ་པས་འདི་དང་འདིའོ་ཞེས་མཚོན་དཔེ་དང་རང་བཞིན་ཐམས་ཅད་ལས་འདས་པའི་ཕྱིར། ཐོག་མཐའ་མེད་པ། སྐྱེ་འགག་མེད་པ། འགྲོ་འོང་མེད་པ། རྩོལ་སྒྲུབ་མེད་པ། མཐའ་དབུས་མེད་པ་ལ་སོགས་པའི་སྒྲས་བརྗོད་དེ། ཀློང་དྲུག་པ་ལས། མཚོན་ཚིག་དུ་མའི་སྤྲོས་དང་བྲལ། །སྔགས་ལས་མ་སྐྱེས་ཡེ་རྫོགས་ཉིད། །རྒྱུ་དང་རྐྱེན་རྣམས་ཡོངས་སུ་བྲལ། །ལྟ་སྒོམ་དྲི་མ་ཀུན་དང་བྲལ། །མཐའ་མེད་དབུས་སུ་དམིགས་པ་མེད། །རྣམ་པ་མེད་ཅིང་ཡུལ་རྣམས་མེད། །ལྷ་མེད་སྔགས་ཀྱང་ཡོད་མ་ཡིན། །ཆོས་མེད་བཏགས་པ་ཀུན་ལས་འདས། །དགྲ་མེད་བཤེས་ཀྱང་ཡོད་པ་མིན། །ལུས་མེད་དབང་པོར་སྣང་བ་མེད། །ཆོས་ནི་བསམ་པས་མི་སྣང་སྟེ། །གང་མེད་གང་དུ་འཛིན་པ་མེད། །ང་མེད་ང་ཡི་འཁོར་ཡང་མེད། །དབྱིངས་མེད་རིག་པའི་སྐུ་ཡང་མེད། །དགེ་མེད་སྡིག་པའི་རྣམ་སྨིན་མེད། །སྲོག་མེད་བཅད་པའི་དམིགས་ཡུལ་མེད། །ཚོགས་མེད་བསགས་པའི་ཡུལ་ཡང་མེད། །སངས་རྒྱས་མེད་ཅིང་སེམས་ཅན་མེད། །གནས་མེད་སྟོང་པ་ཉིད་ཀྱང་མེད། །ཐབས་མེད་ཉན་པའི་འཁོར་ཡང་མེད། །ཡུལ་མེད་དུས་གསུམ་ཉིད་ཀྱང་མེད། །དུས་གསུམ་ཚོགས་པའང་ཡོད་པ་མིན། །ཅེས་སོ། །ཡེ་སྟོང་གདོད་ནས་དག་པའི་ཆོས་ཉིད་དེ་བཞིན་ཉིད་དེ། གང་དུ་ཡང་མ་གྲུབ་པས་ཕྱམ་ཕྱལ་ཡངས་པ་ཆེན་པོར་ངང་གིས་གདལ་བ་ཡིན་ཞིང་། མཁའ་མཉམ་མཁའ་ལྟར་དག་པའི་རང་བཞིན་ལ། མཚོན་ཚིག་དང་བསམ་བརྗོད་ཀྱིས་མཚོན་པའམ་དམིགས་པ་བྱེད་པ་ལས་འདས་པ་ཡིན་པའི་ཕྱིར་ན་ཐོག་མཐའ་དང་། སྔ་ཕྱི། སྐྱེ་འགག འགྲོ་འོང་། རྩོལ་སྒྲུབ་ལ་སོགས་པ་བྱར་མེད་པས་ན་མེད་པའི་རང་བཞིན་ནམ་མཁའི་དགོངས་པ་ལྟ་བུ་སྟེ། ནམ་མཁའི་ཆིངས་ཀྱིས་སྣོད་བཅུད་བཅིངས་པ་ལྟར་དུ་ཆོས་ཐམས་ཅད་དམིགས་མེད་རྒྱུན་ཆད་མེད་པར་མཉམ་པའི་ཀུན་ཏུ་བཟང་པོའི་ཀློང་གི་གཟེར་རམ་འཛེར་མས་འགྱུར་བ་མེད་པར་བསྡོམས་པའོ།།
༼ཅ ལྔ་བ་རང་བཞིན་དག་མཉམ་ཆེན་པོའི་དབྱིངས་ཀྱི་དགོངས་པས་དོན་བསྡུ་བ།
དེ་ལྟ་བུའི་རང་བཞིན་དབྱིངས་དག་མཉམ་ཆེན་པོའི་དགོངས་པ་ཉིད་དོ་ཞེས་བསྟན་པས་དོན་བསྡུ་བ་ནི།
ཐམས་ཅད་ཆོས་ཉིད་མཉམ་པའི་རང་བཞིན་པས།།
མཉམ་པའི་ཀློང་ན་མི་གནས་གཅིག་ཀྱང་མེད།།
གཅིག་མཉམ་ཀུན་མཉམ་བྱང་ཆུབ་སེམས་ཀྱི་ངང་།།
མ་སྐྱེས་མཁའ་མཉམ་ཡངས་པར་ཕྱམ་གདལ་བས།།
མཉམ་ཉིད་ངང་ལས་རྒྱུན་ཆད་མེད་པའི་ཕྱིར།།
ཞེས་གསུངས་ཏེ། རིག་པ་བྱང་ཆུབ་སེམས་ཀྱི་ངང་ན་ཐམས་ཅད་མ་སྐྱེས་པ་དང་། མི་འགག་པ་དང་། མི་གནས་པར་མཉམ་པས། འགྲོ་འོང་མེད་པའི་དགོངས་པ་ལས་གཞན་དུ་གཡོས་པ་ཅུང་ཟད་ཀྱང་མེད་དེ། ཀུན་བྱེད་ལས། མི་རྟོག་མཉམ་ཉིད་དེ་བཞིན་ཉིད་འདི་ལ། །ཉིད་ལ་ཉིད་ཀྱིས་བསྟན་པ་རྡུལ་ཙམ་མེད། །ཅེས་པ་དང་། ཀློང་དྲུག་པ་ལས། ང་ནི་མ་ཕྱེ་མི་འབྱེད་སྣང་། །ང་ལས་འདས་པ་ང་ཡི་ཡུལ། །མཛད་དང་སྤྱོད་པར་མ་ཕྱེ་བས། །དུས་གསུམ་མཉམ་པ་ཉིད་དུ་སྟེ། །ང་ཡི་ཡུལ་མེད་གཞི་བསམ་བྲལ། །ཞེས་སོ། །ཐོག་མཐའ་དབུས་དང་བྲལ་བའི་དམིགས་མེད་མཉམ་པའི་ཀློང་ཆེན་པོ་རིག་པ་བྱང་ཆུབ་སེམས་ཀྱི་ངང་དེ་ན། གང་སྣང་གང་ཤར་ཐམས་ཅད་ཕྱམ་གདལ་མཁའ་མཉམ་དག་པའི་རང་བཞིན་ཡིན་པས། མཉམ་པའི་ཀློང་ཆེན་པོའི་དགོངས་པ་དེར་མི་གནས་ཤིང་དེ་ལས་གཞན་དུ་གཡོས་པ་ཅུང་ཟད་ཀྱང་མེད་པར། གཅིག་མཉམ་པའི་རྒྱུ་མཚན་གྱིས་ཀུན་མཉམ་པ། ཀུན་མཉམ་བྱང་ཆུབ་སེམས་ཀྱི་ངང་དེར་འཁོར་འདས་ཀྱི་ཆོས་ཐམས་ཅད་མ་སྐྱེས་པས་ན་མ་འགགས་པར་ཕྱམ་གདལ་བ། གཟུང་འཛིན་བྲལ་བའི་མཉམ་ཉིད་རྒྱུན་ཆད་མེད་པའི་ཕྱིར་ན་དབྱིངས་དག་མཉམ་ཆེན་པོ་གཅིག་གི་དགོངས་པ་ལས་མ་འདས་པར་གཏན་ལ་ཕེབས་པའོ། །དེ་ཡིས་དབྱིངས་གདལ་ཁྱབ་སྟོང་པ་ལྷུན་གྲུབ་མཁའ་མཉམ་དག་པ་ཆེན་པོ་ལས་མ་འདས་པ་དེ་བསྟན་ཟིན་ནས།
༼ཁ༽གཉིས་པ་ལྷུན་གྲུབ་རྡོ་རྗེ་དབྱིངས་ཀྱི་ཞིང་ཁམས་སུ་ཆོས་ཉིད་འཕོ་འགྱུར་མེད་པར་ངང་གཅིག་པར་བསྟན་པ།
དེ་ལ་ཡེ་ནས་རིག་པ་རྡོ་རྗེ་སྙིང་པོའི་རྫོང་བཅས་པར་མདོར་བསྟན་པ་དང་། དེ་ཉིད་རྒྱས་པར་བཤད་པ་གཉིས་ལས།
༼ཀ དང་པོ་ཡེ་ནས་རིག་པ་རྡོ་རྗེ་སྙིང་པོའི་རྫོང་བཅས་པར་མདོར་བསྟན་པ།
ཚུལ་དེ་ཉིད་མཉམ་པ་ཆེན་པོའི་ལྷུན་གྲུབ་རྡོ་རྗེ་དབྱིངས་ཀྱི་ཞིང་ཁམས་སུ་ཆོས་ཉིད་འཕོ་འགྱུར་མེད་པར་ངང་གཅིག་པས། ཡེ་ནས་རིག་པ་རྡོ་རྗེ་སྙིང་པོའི་རྫོང་བཅས་པར་བསྟན་པ་ནི།
ལྷུན་གྲུབ་ཕྱོགས་མེད་ཀུན་ཁྱབ་གདལ་བའི་རྫོང་།།
སྟེང་འོག་བར་མེད་ཡེ་ཀློང་ཡངས་པའི་རྫོང་།།
ཕྱོགས་མེད་ཀུན་ཤོང་སྐྱེ་མེད་ཆོས་སྐུའི་རྫོང་།།
མི་འགྱུར་ལྷུན་གྲུབ་རིན་ཆེན་གསང་བའི་རྫོང་།།
སྣང་སྲིད་འཁོར་འདས་ཡེ་རྫོང་ཕྱམ་གཅིག་རྫོགས།།
ཞེས་གསུངས་ཏེ། ཐམས་ཅད་རིག་པ་རྣམ་དག་རང་བྱུང་གི་ཡེ་ཤེས་སུ་ཡེ་ནས་གནས་པས། གཞན་དུ་གྱུར་པའི་ཆོས་རྡུལ་ཙམ་ཡང་མེད་དེ། འཁྲུལ་བ་དང་བདེ་སྡུག་གི་རང་བཞིན་ཀུན་ནས་ཉོན་མོངས་པ་དང་། ལས་དང་རྣམ་པར་སྨིན་པའི་དགྲ་ལས་འདས་ཏེ། བདུད་དང་གོལ་སའི་ཡུལ་མེད་པས། ཆོས་ཐམས་ཅད་ཡེ་ནས་སངས་རྒྱས་པའི་ཚུལ་མཉམ་པ་ཆེན་པོ་རྡོ་རྗེའི་དབྱིངས་སུ་རྫོང་བཅས་པ་ནི། རྩལ་རྫོགས་ལས། ཡངས་པ་ཆེན་པོའི་བྱང་ཆུབ་སེམས། །མི་འགྱུར་བསམ་དང་བརྗོད་མེད་པས། །རྫོང་དུ་རྡོ་རྗེའི་མཁར་བརྩིགས་ཏེ། །ཅིས་ཀྱང་མི་ཤིགས་སྐྱོན་དང་བྲལ། །ཞེས་པ་དང་། རང་རིག་རྡོ་རྗེ་ཀུན་ཏུ་འབར། །མཚན་མེད་རྡོ་རྗེ་རང་སྣང་འབར། །འབར་བ་འཇིགས་བྲལ་རྡོ་རྗེ་སྟོང་པ་ཆེ། །ཕྲ་རགས་དྲི་མེད་རྡོ་རྗེ་རབ་ཏུ་འབར། །སྟོང་པ་ཀུན་ཁྱབ་རྡོ་རྗེ་ཅོད་པན་ཆེ། །མཐའ་ཡས་རྡོ་རྗེ་མ་བསྐུར་རང་བཞིན་རྫོགས། །ཞེས་པ་དང་། ཀུན་བྱེད་ལས། རྒྱུ་ཉིད་རྡོ་རྗེ་རྐྱེན་དང་འདྲ། །མ་སྐྱེས་པས་ན་འཇིག་པ་མེད། །གདོད་ནས་སྙིང་པོ་བྱང་ཆུབ་ལ། །བཙལ་བའི་བསམ་པས་དབྱིངས་མི་བསྐྱོད། །ཅེས་སོ། །རྡོ་རྗེ་ནི་མི་ཤིགས་བདུན་ལྡན་གྱི་བདག་ཉིད། འགྱུར་བ་མེད་པའི་ཆོས་ཀྱི་དོན་ལ་གསུངས་ཤིང་། འཁོར་འདས་སྣང་སྲིད་ཀྱི་ཆོས་ཐམས་ཅད་དབྱིངས་མཉམ་པ་ཆེན་པོའི་ཞིང་ཁམས་སུ་ཆོས་ཉིད་འཕོ་འགྱུར་མེད་པའི་རིག་པ་དག་མཉམ་རང་བྱུང་གི་ཡེ་ཤེས་ལ་ཡེ་ནས་གནས་པས་མི་ཤིགས་པའི་རྫོང་དུ་གྲུབ་པ་ཡིན། དེའི་མཉམ་པ་ཆེན་པོ་དེ་ལྷུན་གྲུབ་སྟོང་པ་ཀུན་ཁྱབ་ཡིན་པས་ན་ཀུན་ཁྱབ་གདལ་བའི་རྫོང་དང་། སྣང་སྲིད་ཀྱི་ཆོས་ཐམས་ཅད་མེད་པ་གསལ་སྣང་། སྣང་བཞིན་དག་པར་མཉམ་པ། སྟེང་འོག་བཟང་ངན་ལ་སོགས་པའི་གཉིས་སྣང་འཛིན་པའི་བར་མེད་པ་དེ་ཡེ་ཀློང་ཡངས་པའི་རྫོང་དང་། སྣང་སྟོང་རིས་མེད་ཉག་གཅིག་ཐིག་ལེའི་ཀློང་དུ་ཕྱོགས་མེད་བཟང་ངན་མཉམ་པར་ཀུན་ཤོང་བ་ནི་སྐྱེ་མེད་ཆོས་སྐུའི་རྫོང་དང་། ཐམས་ཅད་དབྱིངས་གཅིག་ལས་འགྱུར་བ་མེད་པའི་འགྱུར་མེད་འདོད་དགུ་ལྷུན་གྲུབ་ཀྱི་རང་བཞིན་ནི་རིན་ཆེན་གསང་བའིི་རྫོང་དང་། ཐམས་ཅད་ཀུན་འདུས་སྣང་སྲིད་འཁོར་འདས་ཡེ་ནས་བདེ་ཀློང་གཅིག་ཏུ་འཁྱིལ་བའི་རྫོང་ལ་ཕྱམ་གཅིག་ཏུ་རྫོགས་པ་སྟེ། ངེས་བརྗོད་ཀྱིས་མདོར་བསྟན་པའོ།།
༼ཁ གཉིས་པ་རིག་པ་ཉིད་རྒྱལ་པོ་ཕུན་སུམ་ཚོགས་པའི་ཡུལ་ཁམས་དང་ཆོས་མཐུན་པར་སྦྱར་བས་རྒྱས་པར་བཤད་པ།
དེ་ལ་དབྱེ་ན་ཆོས་ཉིད་དབྱིངས་ཀྱི་ས་གཞི་ལ་རང་བྱུང་སྙིང་པོའི་ཕོ་བྲང་བཀོད་པ་དང་གཅིག ཕོ་བྲང་དེའི་རྒྱན་དང་བཀོད་པ་བསྟན་པ་དང་གཉིས། རིག་པའི་གཏན་ཡུལ་ངེས་པ་དང་གསུམ། ཆོས་ཉིད་བྱང་ཆུབ་ཀྱི་སེམས་སུ་བདེ་ཀློང་གཅིག་ཏུ་འཁྱིལ་བར་བསྟན་པ་དང་བཞི། རིག་པའི་ངོ་བོ་བྱང་ཆུབ་ཀྱི་སེམས་སུ་ཆོས་ཐམས་ཅད་རོ་གཅིག་པར་བསྟན་པ་དང་ལྔ་ལས།
ཀ༽དང་པོ་ཆོས་ཉིད་དབྱིངས་ཀྱི་ས་གཞི་ལ་རང་བྱུང་སྙིང་པོའི་ཕོ་བྲང་བཀོད་པ།
དེ་ལྟ་བུའི་རིག་པ་ཉིད་རྒྱལ་པོ་ཕུན་སུམ་ཚོགས་པའི་ཡུལ་ཁམས་དང་ཆོས་མཐུན་པར་སྦྱར་བ་ལས། ཆོས་ཉིད་དབྱིངས་ཀྱི་ས་གཞི་ལ་རང་བྱུང་སྙིང་པོའི་ཕོ་བྲང་བཀོད་པ་ནི།
ཕྱོགས་མེད་ཀུན་ཁྱབ་གདལ་བའི་ས་གཞི་ལ།།
འཁོར་འདས་རིས་མེད་བྱང་ཆུབ་སེམས་ཀྱི་མཁར།།
ཆོས་ཉིད་ཀློང་ཡངས་རྩེ་མོ་ལྷུན་མཐོ་ཞིང་།།
མ་བྱས་རང་བཞིན་ཕྱོགས་བཞི་ཡངས་པའི་དཀྱིལ།།
རིམ་རྩོལ་བྲལ་བའི་འཇུག་སྒོ་ཤིན་ཏུ་ཡངས།།
ཞེས་གསུངས་ཏེ། དབྱིངས་རང་བཞིན་གྱིས་དག་པའི་ངོ་བོ་ལ་གྲུབ་བསལ་དང་བཅོས་བསླད་མེད་ཅིང་ཐམས་ཅད་བརྟེན་པའི་ཕྱིར་ས་གཞི་དང་ཆོས་མཐུན་ལ། འཁོར་བ་དང་མྱ་ངན་ལས་འདས་པ་གང་དུའང་རྒྱ་ཆད་ཕྱོགས་ལྷུང་མེད་པས་རང་བྱུང་མུ་མཐའ་དང་བྲལ་བའི་ཕོ་བྲང་དང་མཚུངས་ཏེ། ཆོས་ཉིད་དཀྱིལ་ཡངས་ལ་ཚད་དང་ངོས་གཟུང་མེད་པས་ལྷུན་མཐོ་བ་ཙམ་དུ་བརྗོད་ཅིང་། ཡེ་ནས་བྱ་རྩོལ་དང་རྟག་ཆད་ལ་སོགས་པ་མུ་བཞི་ལས་འདས་པ་ནི་ཕྱོགས་བཞི་ཡངས་པའི་ངོས་དང་ཆ་སྦྱར་བ་དེའི་རང་བཞིན་དུ། བློ་ཡང་རབ་རྣམས་འཇུག་པའི་སྒོ་ནི་རིམ་རྩོལ་རྒྱུ་འབྲས་ལས་འདས་པའི་སྒོ་འཕར་ཡེ་ནས་རང་བཙུགས་པ་ནི་ཆོས་ཉིད་བྱང་ཆུབ་སེམས་ཀྱི་ཕོ་བྲང་ཞེས་བྱའོ། །དེ་དག་གི་རང་བཞིན་ནི། ཀློང་དྲུག་པ་ལས། ཡེ་ཤེས་མ་བཅོས་རྣམ་དག་པ། །ཁ་དོག་མ་བཅོས་མ་འདྲེས་གསལ། །གཉིས་མེད་མ་བཅོས་སྟོང་པའི་ངང་། །རང་བྱུང་མ་བཅོས་རིག་པའི་ཀློང་། །ཞེས་པ་དང་། ཀུན་བྱེད་ལས། སྒོ་ནི་བཙལ་དུ་མེད་པའི་སྒོ་ནས་འཇུག །ཅེས་སོ། །རྟེན་ཆོས་ཉིད་ཀྱི་དབྱིངས་རང་བཞིན་གྱིས་དག་པའི་ངོ་བོ་ཕྱོགས་དང་རིས་སུ་མ་ཆད་པའི་ཀུན་ཁྱབ་ཡངས་ཤིང་གདལ་བའི་གཞི། འཁོར་འདས་སྣང་སྲིད་ཀྱི་ཆོས་ཐམས་ཅད་ཀྱི་རྟེན་གཞི་ཡིན་པས་ས་གཞི་ལྟ་བུ་དེའི་སྟེང་ལ། འཁོར་འདས་མཉམ་པ་ཉིད་རང་བྱུང་མུ་དང་མཐའ་མེད་པའི་རིག་པ་བྱང་ཆུབ་སེམས་ཀྱི་མཁར་ཕོ་བྲང་རྒྱ་ཆེ་བ་དང་ཆོས་མཚུངས་པ་སྟེ། དེ་ཡང་ཆོས་ཉིད་ཀློང་ཡངས་པ་ལ་ཚད་མེད་པ། སྟེང་དང་འོག་ཏུ་ལྟ་བ་ཐང་རེ་ཆད། །ཅེས་གསུངས་པ་བཞིན་དུ་ངོས་བཟུང་མེད་པར་རྩེ་མོ་ལྷུན་མཐོ་བའི་ཚིག་གིས་གོ་བ་བྱས་ཤིང་། གྲུ་བཞི་ཕྱོགས་བཞི་རྒྱ་ཚད་ཀྱིས་གཞལ་དུ་མེད་པའི་ཕྱོགས་བཞི་ཡངས་པའི་ཚིག་གིས་རྟག་ཆད་སྐྱེ་འགག་འགྲོ་འོང་ལ་སོགས་པ་མཚན་མའི་ཆོས་ཀྱི་མུ་བཞི་ལས་འདས་པར་བསྟན་ནས། དེ་ལྟ་བུའི་མཐའ་དབུས་འདས་པའི་ཆོས་ཉིད་དབྱིངས་ཀྱི་ཕོ་བྲང་ཆེན་པོའི་དཀྱིལ་དབུས་ལ་འཇུག་དགོས་ན། སྒོ་ནས་འཛུལ་ཏེ་སྐས་ཐེམ་བརྒྱུད་དེ་རིམ་གྱིས་དཀྱིལ་དུ་ཐོན་པར་བྱེད་དགོས་པ་དེ་ལྟ་བུ་མ་ཡིན་ཏེ། དེ་ཡང་སྤྱིར་ཐེག་རིམ་སྣ་ཚོགས་ལ་ལམ་སྒོམ་ཚུལ་ཡང་ཐ་དད་པར་ཡོད་ཀྱང་། འདིར་ནི་གཞན་དང་མི་འདྲ་བར་ཆོས་ཉིད་ལམ་དུ་བྱེད་པ་ཡིན་པས་འོག་མའི་ལམ་ནས་གདོད་ཞུགས་ཏེ་ས་ལམ་སྦྱང་བགྲོད་མི་དགོས་པས་རིམ་རྩོལ་བྲལ་བའི་འཇུག་སྒོ་ཤིན་ཏུ་ཡངས་པར་བསྟན་པ་སྟེ། ཀུན་བྱེད་ལས། མ་བསྒྱུར་མ་སྦྱངས་རིག་པ་ལྷུན་རྫོགས་སོ། །ཞེས་པ་དང་གོ་དོན་གཅིག་པའོ།།
ཁ༽གཉིས་པ་ཕོ་བྲང་དེའི་རྒྱན་དང་བཀོད་པ་བསྟན་པ།
ཕོ་བྲང་དེའི་རྒྱན་དང་བཀོད་པ་ནི།
ལྷུན་གྲུབ་འབྱོར་པའི་བཀོད་པས་བརྒྱན་པ་དེར།།
རང་བྱུང་ཡེ་ཤེས་རྒྱལ་པོ་གདན་ལ་བཞུགས།།
འདུ་འཕྲོར་སྣང་བ་ཡེ་ཤེས་རྩལ་རྣམས་ཀུན།།
བློན་པོར་གྱུར་པས་ཡུལ་ལ་དབང་བསྒྱུར་ཞིང་།།
རང་གནས་བསམ་གཏན་བཙུན་མོ་དམ་པ་དང་།།
དགོངས་པ་རང་ཤར་སྲས་དང་བྲན་གཡོག་བཅས།།
བདེ་ཆེན་ཀློང་འཁྱིལ་རང་གསལ་རྟོག་པ་མེད།།
ཞེས་གསུངས་ཏེ། དེ་ལྟ་བུའི་འབྱོར་བས་རྒྱན་པའི་ཕོ་བྲང་ཆེན་པོ་དེ་ལ་རྒྱལ་བློན་བཙུན་མོ་སྲས་འཁོར་དང་བཅས་པ་བཞུགས་ཚུལ་བསྟན་པ་ནི། དེ་ལ་རང་བྱུང་ལྷུན་གྲུབ་ཀྱི་རིག་པ་ནི་ཕོ་བྲང་གི་བཀོད་པ་སྟེ། སྐུ་དང་ཡེ་ཤེས་འདུ་འབྲལ་མེད་ཅིང་ཆོས་ཐམས་ཅད་རྫོགས་པ་སྟེ། ཡི་གེ་མེད་པ་ལས། ང་ལ་ཕྱི་དང་ནང་མེད་པས། །གསལ་བའི་ཆོས་ནི་ཡོངས་སུ་རྫོགས། །ང་ལ་སྟོང་དང་དངོས་མེད་པས། །སྣང་བའི་ཆོས་ནི་ཡོངས་སུ་རྫོགས། །ཞེས་སོ། །དེ་ལྟར་ལྷུན་གྱིས་གྲུབ་པའི་སྙིང་པོའི་ངོ་བོ་ནི་རང་བྱུང་གི་ཡེ་ཤེས་ཏེ་རྒྱལ་པོ་ཁྲི་ལས་མི་གཡོ་བ་ལྟ་བུའོ། །དེའི་ངོ་བོ་ལ་རང་གནས་རང་བཞིན་གྱི་བསམ་གཏན་ནི་རིག་པ་དང་བྲལ་མ་མྱོང་བས་བཙུན་མོ་ལྟ་བུའོ། །དེའི་དོན་རྟོགས་ནས་དགོངས་པའི་དྲོད་རང་ཆས་སུ་གྲུབ་པ་ནི་སྲས་དང་བྲན་གཡོག་ལྟ་བུའོ། །རིག་པའི་ངང་ནས་རང་རྩལ་ཡུལ་ཐོག་ཏུ་འཕྲོ་བའི་ཤེས་པ་ནི་བློན་པོ་ཡུལ་འཁོར་ལ་དབང་བསྒྱུར་ནས་འདོད་པ་བསྒྲུབས་པ་ལྟ་བུའོ། །འདིའི་ཁྱད་པར་མ་ཕྱེད་ན་སྨྱོན་པ་རྡོལ་ཐབས་སུ་སྨྲ་བ་དང་ཁྱད་མེད་པའི་ཕྱིར། རང་བྱུང་གི་ཡེ་ཤེས་དུས་ཐམས་ཅད་པ་ན་རང་གནས་ལྷུན་གྲུབ་ཀྱི་ངོ་བོ་ཡུལ་ལ་མི་ལྟོས་པ་དང་། རིག་བྱེད་རྩལ་གྱི་ཡེ་ཤེས་ཡུལ་ཐོག་ཏུ་འཆར་བ་ཡུལ་ལ་ལྟོས་པ་ཅན་ཏེ། གློད་མ་ཤེས་ན་རྐྱེན་རྟོག་པ་རང་ག་མ་གཉིས་ཁྱད་པར་ཤིན་ཏུ་ཆེ་བས་ན། ནང་རང་བྱུང་ལ་ངོས་ཟིན་ནས་རྩལ་གཞི་ཐོག་ཏུ་གྲོལ་བར་འགྱུར་ཏེ། ཀ་དག་ཆོས་ཟད་ཀྱི་ངང་དུ་ལ་བཟླ་ལ། མ་ཟིན་ན་རང་བྱུང་གི་ཆ་དེ་ལུང་མ་བསྟན་ལས། རྩལ་རྟོག་པ་ཡུལ་ལ་འཇུག་པའི་ཕྱིར། དགོངས་པ་བར་མཚམས་མེད་པ་རང་བཞིན་གྱི་བསམ་གཏན་དང་བཅས་པ་རང་ངོ་ཤེས་པ་གཅེས་སོ། །འདིའི་ངོ་བོ་དང་ཁྱད་པར་ནི། ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག ཡེ་ཤེས་ཡེ་ཤེས་ཞེས་བྱ་བ། །ཡེ་ཤེས་ཡེ་ནས་ཤེས་པ་ཡིན། །རང་བྱུང་ཡེ་ཤེས་ཡེ་ནས་ཤེས། །ཡུལ་ལ་རྟོག་པའི་ཡེ་ཤེས་དེ། །ཡུལ་ལས་བྱུང་བའི་རང་བྱུང་མིན། །ཡུལ་མེད་ཙམ་ན་གསལ་མི་བྱེད། །དེས་ན་རང་བྱུང་ཡེ་ཤེས་དེས། །ཡེ་ནས་ཤེས་པའི་ཡེ་ཤེས་ཏེ། །ཡེ་ཤེས་ཞེས་ནི་དེ་ལ་བྱ། །འཁོར་གྱི་སྟོན་པའི་ཡེ་ཤེས་ནི། །ཡུལ་ལ་བརྟགས་པའི་ཡེ་ཤེས་དེས། །གང་དུ་ཡུལ་ལ་རྟོག་བྱེད་པ། །དེ་ནི་རིག་བྱེད་ཡེ་ཤེས་ཡིན། །རིག་པར་བྱ་བའི་ཡུལ་དེ་ནི། །བྱང་ཆུབ་སེམས་ལས་བྱུང་བའི་ཕྱིར། །དེ་ནི་ཡུལ་མེད་བྱང་ཆུབ་སེམས། །ཡེ་ཤེས་རང་ལས་བྱུང་བའི་ཕྱིར། །དེ་ལ་ཏིང་འཛིན་སྒོམ་མི་བྱེད། །ཏིང་འཛིན་སྒོམ་པ་མི་བྱེད་པས། །ཏིང་འཛིན་བག་ཆགས་སོག་མི་འགྱུར། །བག་ཆགས་མེད་པའི་ཆོས་ཉིད་དེ། །དུས་གསུམ་སངས་རྒྱས་དགོངས་པར་བཤད། །དུས་གསུམ་སངས་རྒྱས་ཐམས་ཅད་ཀྱི། །དགོངས་པ་ཡུལ་ལ་མི་རྟོག་སྟེ། །མཉམ་པ་ཉིད་དུ་ཡེ་ནས་གནས། །ཞེས་སོ། །རང་བྱུང་གི་ཡེ་ཤེས་ཡུལ་ལ་མི་རྟོག་པ་དེ་ལ་རང་གནས་ཀྱི་བསམ་གཏན་མ་བྱས་ལྷུན་གྲུབ་ཏུ་ཡོད་པ་ཉིད་རྣལ་འབྱོར་པའི་བསམ་གཏན་ཡིན་ལ། ཡུལ་རྩེ་གཅིག་ཏུ་ཡིད་ལ་བྱེད་པའི་ཞི་ལྷག་འཇིག་རྟེན་བྱིས་པའི་བསམ་གཏན་ཡིན་པས། བག་ཆགས་སོག་མི་སོག་གི་ཁྱད་ཡོད་དོ། །རིག་པ་རང་གནས་ཀྱི་ངོ་བོ་ནི་བྱང་ཆུབ་ཀྱི་སེམས་ཡིན་ལ། ཆོས་ཉིད་ཀྱི་དགོངས་པ་ཞེས་བྱའོ། །ཡུལ་ལ་འཆར་བའི་ཤེས་པ་ནི་འཁོར་བའི་སེམས་ཞེས་བྱ་བས། འཛིན་པ་དང་གཟུང་བའི་རྣམ་ལྡན་དུ་སྐྱེ་བའོ། །དེ་ཡང་ངོས་ཟིན་ནས་ངང་ལ་གློད་ཤེས་དུས་རང་བྱུང་གི་རྩལ་གཞི་ལ་ཐིམ་པས། དགོངས་པ་ཆོས་ཉིད་དུ་འཆར་བའོ། །དོན་འདི་གཉིས་ཤིན་ཏུ་ཁྱད་ཆེ་བས་ཡང་བཤད་པ་ནི། དེ་ཉིད་ལས། ཀྱེ་སེམས་དཔའ་ཆེན་པོ་ཉོན་ཅིག དུས་གསུམ་སངས་རྒྱས་ཐམས་ཅད་ཀྱི། །རང་བྱུང་ཡེ་ཤེས་ཐུགས་དེ་ལ། །ཡེ་ནས་རྟོག་པ་མེད་པའི་ཕྱིར། །སངས་རྒྱས་དགོངས་པ་མི་མཛད་དེ། །རྟོག་པའི་ཡུལ་ནི་ཀུན་དང་བྲལ། །ཤིན་ཏུ་རྣལ་འབྱོར་གང་ཟག་གང་། །སུ་ཡང་རུང་བ་དེ་ཡིས་ནི། །རྟོག་པ་མེད་ལ་གནས་གྱུར་ན། །དེ་ནི་སངས་རྒྱས་དགོངས་པ་མཛད། །རང་བྱུང་ཡེ་ཤེས་ཡུལ་ལ་མི་རྟོག་པས། །རྣམ་པར་རྟོག་པའི་བག་ཆགས་གོས་མི་འགྱུར། །ཞེས་སོ། །ཞེས་གསུངས་ཏེ། ཉི་མ་གྲུབ་དུས་འོད་གསལ་བ་ཟུར་ནས་བསྒྲུབ་མི་དགོས་པ་ལྟར་རིག་པ་གྲུབ་དུས་ཆོས་སྐུར་གྲུབ་ཟིན་པས་གསར་དུ་འབད་རྩོལ་གྱིས་ཕྱིས་བསྒྲུབ་མི་དགོས་ཏེ། སྣང་སྲིད་འཁོར་འདས་ཀྱི་ཆོས་ཐམས་ཅད་ངོ་བོ་སྟོང་། རང་བཞིན་གསལ། ཐུགས་རྗེ་སྣ་ཚོགས་སུ་འཆར་བ་སྐུ་གསུམ་གྱི་རང་གདངས་ལྷུན་གྲུབ་ཆེན་པོར་གནས་ལ། རིག་པའི་ངོ་བོ་རང་བཞིན་ཐུགས་རྗེ་གསུམ་གཞིའི་སྐུ་གསུམ་ལྷུན་གྲུབ་ཏུ་གནས་པའི་དབྱིངས་དང་རིག་པ་སྐུ་དང་ཡེ་ཤེས་འདུ་འབྲལ་མེད་པར་རྫོགས་པའི་ཕྱོགས་མེད་དབྱིངས་ཀྱི་ས་གཞི་ལ་རིས་མེད་རིག་པ་རང་གསལ་གྱི་མཁར་ཞིག་གྲུབ་པ་དེའི་ནང་ན། སྙིང་པོ་མ་བཙལ་ལྷུན་གྲུབ་རང་བྱུང་གི་ཡེ་ཤེས་ཏེ་རྒྱལ་པོ་ཁྲི་ལས་མི་གཡོ་བ་ཕོ་བྲང་གི་སྙིང་བཅུད་དུ་བཞུགས་པ་ལྟ་བུ་དང་། གདན་ལ་འབྲལ་མེད་དུ་བཞུགས་པའི་རང་གནས་རང་བཞིན་གྱི་བསམ་གཏན་ནི། རིག་པའི་ངོ་བོ་དང་འབྲལ་མི་ཤེས་པས་བཙུན་མོ་དང་མཚུངས་ཤིང་། དེའི་ངོ་བོའི་དོན་ཇི་བཞིན་དུ་རྟོགས་ནས། གནས་ཀྱང་རིག་པའི་ངང་། འཕྲོས་ཀྱང་རིག་པའི་ངང་། རིག་པའི་ཡེ་ཤེས་གཅིག་གི་ངང་ལས་མ་འདས་པ་ཡིན་པས་ན། འདུ་འཕྲོ་སྣང་བའི་ཡེ་ཤེས་ཀྱི་དྲོད་རང་ཆས་སུ་གྲུབ་པ་ནི་སྲས་དང་བྲན་གཡོག་ལྟ་བུའོ། །རིག་པའི་ངང་ནས་རང་རྩལ་ཡུལ་ཐོག་ཏུ་འཕྲོ་བའི་ཤེས་པ་ནི་ཡུལ་ཁམས་སྣ་ཚོགས་ལ་དབང་སྒྱུར་བར་བྱེད་པའི་བློན་འཁོར་གྱིས་རྒྱལ་པོའི་བྱ་བ་བྱེད་པ་བཞིན་དུ་དགོངས་པ་བར་མཚམས་མེད་པའི་ཡེ་ཤེས་གཅིག་གི་རང་ངོ་ལས་མ་འདས་པ་ལ་རྒྱལ་སྲིད་འབྱོར་བས་བརྒྱན་པའི་དགོས་དགུ་ཆ་ཚང་བའི་ལྷུན་གྲུབ་ཀྱི་ཡེ་ཤེས་དེ་བསྟན་པའོ། །ཐ་མལ་རང་ག་མའི་རྣམ་རྟོག་ཡུལ་རྗེས་སུ་འབྲངས་ནས་འཁྲུལ་བ་དང་། རང་བཞིན་གྱི་བསམ་གཏན་ནང་རང་བྱུང་གི་ཡེ་ཤེས་ངོས་ཟིན་པའི་རྩལ་ཆོས་ཉིད་ཀྱི་དགོངས་པ་ལས་མ་འདས་པ་གཉིས་ཀ ཡུལ་རྗེས་སུ་འབྲངས་མ་འབྲངས་དང་། གཟུང་འཛིན་གྱི་འཁྲུལ་རྟོག་ཡིན་མིན་གྱི་ཁྱད་པར་ཆེ་ཞིང་། དེའི་དོན་འདིར་ལུང་གི་རྒྱབ་རྟེན་དང་བཅས་པས་གསལ་བར་གསུངས་པས་སེམས་རིག་གི་ཁྱད་པར་ཡང་འདིས་འབྱེད་པ་དེས་ན་འདིའི་དོན་ཐམས་ཅད་བདེ་ཆེན་ཀློང་འཁྱིལ་རང་གསལ་རྟོག་པ་མེད། །ཅེས་པ་འདིས་དོན་གྱི་འགག་བཀྲོལ་ནས་བསྟན་པའོ།།
ག༽གསུམ་པ་རིག་པའི་གཏན་ཡུལ་ངེས་པས་འགག་བསྡམས་ཏེ་བསྟན་པ།
དེ་ལྟར་དབྱིངས་འཕོ་འགྱུར་མེད་པའི་དགོངས་པ་རིག་པའི་གཏན་ཡུལ་ངེས་པ་ནི།
མི་གཡོ་བསམ་བརྗོད་འདས་པའི་ངང་ཉིད་ལས།།
སྣང་སྲིད་སྣོད་བཅུད་ཀུན་ལ་མངའ་དབང་བསྒྱུར།།
ཆོས་དབྱིངས་ཡངས་པའི་ཡུལ་ཁམས་རྒྱ་ཆེའོ།།
ཞེས་བྱ་བ་ནི་དོན་བསྡུ་བ་སྟེ། རང་བྱུང་གི་ཡེ་ཤེས་རང་གནས་ཀྱི་ངང་དང་། ངང་ལས་ཤར་བའི་དབང་པོ་ལྔའི་ཤེས་པ་རང་སངས་རང་གྲོལ་ལ་སོང་བ་ཡང་ཆོས་ཉིད་ལས་མ་གཡོས་པས། སྣང་སྲིད་ཆོས་སྐུའི་ཞིང་ཁམས་སུ་ཤར་བ་སྟེ། འདས་རྗེས་ལས། ཡིན་པ་གྲུབ་པ་མེད་པའི་རིག་པ་འདི། །རང་སྣང་འཆར་ཚུལ་ཅིར་ཡང་མ་འགགས་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་པ་དང་། ཀུན་བྱེད་ལས། མི་རྟོག་པ་ཡི་རང་བྱུང་ཡེ་ཤེས་ལྔ། །སེམས་ཀྱི་རང་བཞིན་དབང་པོ་སྒོ་ལྔར་བཤད། །རང་བྱུང་ཡེ་ཤེས་དེ་ལ་འགག་པ་མེད། །བྱང་ཆུབ་སེམས་ཀྱི་ངོ་བོ་མངོན་སྣང་ལ། །རང་བྱུང་ཡེ་ཤེས་མི་འགག་སོ་སོར་གསལ། །ཞེས་སོ། །ནམ་མཁའ་ལ་སྣོད་བཅུད་ཤོང་བ་བཞིན་དུ་རིག་ངོ་ལ་འཁོར་འདས་ཤོང་བས། མི་གཡོ་བསམ་བརྗོད་ལས་འདས་པའི་རང་བྱུང་ཡེ་ཤེས་རང་གནས་ཀྱི་ངང་དྲན་རྟོག་བསམ་བརྗོད་དང་བྲལ་བའི་མི་རྟོག་ནམ་མཁའི་དཀྱིལ་ལྟ་བུ་ལ་ཅོག་བཞག་བྱས་པས་རིག་པ་སྟོང་གསལ་ཆེན་པོ་ལྷུན་གྱིས་གྲུབ་ནས། སྣོད་བཅུད་ཀུན་ལ་མ་ཁྱབ་པར་མེད་པའི་མངའ་དབང་བསྒྱུར་ཚེ་རིག་པ་སྐུ་གསུམ་ལྷུན་གྲུབ་ཆེན་པོའི་ངང་དེ་ལས་འཁོར་འདས་ཀྱི་ཆོས་ཐམས་ཅད་མ་གཡོས་པས་ན། ཆོས་དབྱིངས་ཡངས་པའི་ཡུལ་ཁམས་སམ་ཀུན་ཏུ་བཟང་པོ་བྱ་བྲལ་ལྷུན་གྱིས་གྲུབ་པའི་དབྱིངས་རྒྱ་ཆེ་བའོ། །སྤྱིར་རིག་པའི་རང་ངོ་གང་དུའང་མ་གྲུབ་པ། གང་དུའང་མི་རྟོག་པ། གང་ལའང་མི་གནས་པ་སྟེ། འདི་ལ་བྱང་ཆུབ་ཀྱི་སེམས་དང་། དོན་དམ་པའི་བདེན་པ་དང་། རང་བྱུང་གི་ཡེ་ཤེས་དང་། ཆོས་ཀྱི་སྐུ་ལ་སོགས་པར་མིང་མང་པོ་བཏགས་ཏེ། གསལ་བ་དང་། སྟོང་པ་ལ་སོགས་པའི་ཆའི་ལྡོག་པ་ཕྱོགས་རེ་ལ་ཕྱེ་བར་ཟད་དོ། །དོན་ལ་རིག་པ་གྲུབ་བསལ་མེད་པ་སྟེ། རྒྱུད་དེ་ཉིད་ལས། ཀུན་བྱེད་ང་ཡི་རང་བཞིན་གཅིག་པུ་ལ། །འཁོར་གྱི་འདོད་པ་རྣམས་ཀྱིས་མིང་བཏགས་པ། །ལ་ལས་བྱང་ཆུབ་སེམས་སུ་མིང་བཏགས་ལ། །ལ་ལས་ནམ་མཁའི་ཁམས་སུ་མིང་ཡང་བཏགས། །ལ་ལས་རང་བྱུང་ཡེ་ཤེས་མིང་ཡང་བཏགས། །ལ་ལས་ཆོས་ཀྱི་སྐུ་རུ་མིང་ཡང་བཏགས། །ལ་ལས་ལོངས་སྤྱོད་རྫོགས་པར་མིང་ཡང་བཏགས། །ལ་ལས་སྤྲུལ་པའི་སྐུ་རུ་མིང་ཡང་བཏགས། །ལ་ལས་ཐམས་ཅད་མཁྱེན་པར་མིང་ཡང་བཏགས། །ལ་ལས་རྣམ་པ་ཐམས་ཅད་མིང་ཡང་བཏགས། །ལ་ལས་ཡེ་ཤེས་བཞི་དང་གསུམ་དུ་བཏགས། །ལ་ལས་ཡེ་ཤེས་ལྔ་རུ་མིང་ཡང་བཏགས། །ལ་ལས་དབྱིངས་དང་ཡེ་ཤེས་མིང་བཏགས་པ། །རང་བྱུང་བྱང་ཆུབ་སེམས་ནི་གཅིག་ལ་བཏགས། །རང་བྱུང་ང་ལ་མཐོང་ཚོད་སྨྲས་པ་ཡིན། །ཞེས་སོ། །འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་པ་ལྟར་དུ་རིག་པ་བསལ་བཞག་བྱ་རྩོལ་བྲལ་བའི་ངོ་བོ་དེ་འདི་ཞེས་མཚོན་ཐབས་མེད་ཅིང་མཚོན་པར་བྱར་མེད་པ་དེ་བརྗོད་མེད་རྗོད་པའི་སྒྲ་ཡིས་མཚོན་པར་བྱས་ཏེ་ཕྱོགས་ཆ་རེ་རེ་ནས་བཏགས་པའི་མིང་གི་བརྡ་ཆད་ཀྱིས་མཚོན་པར་བྱེད་ཀྱང་། དོན་དུ་མཚན་མ་གང་དུ་ཡང་མ་གྲུབ་པ། རྣམ་པ་གང་དུ་ཡང་མི་རྟོག་པ། ཡུལ་གང་ལ་ཡང་མི་གནས་པ་ཡིན་པར་བསྟན་ཏོ།།
ང༽བཞི་བ་ཆོས་ཉིད་བྱང་ཆུབ་ཀྱི་སེམས་སུ་བདེ་ཀློང་གཅིག་ཏུ་འཁྱིལ་བར་བསྟན་པ།
དེ་ལྟ་བུའི་དོན་དེ་ཆོས་ཉིད་བྱང་ཆུབ་ཀྱི་སེམས་སུ་བདེ་ཀློང་གཅིག་ཏུ་འཁྱིལ་བར་བསྟན་པ་ནི། ཞེས་མཚམས་སྦྱར་ནས།
ཡུལ་དེར་གནས་ན་ཀུན་ཀྱང་ཆོས་ཀྱི་སྐུ།།
རང་བྱུང་ཡེ་ཤེས་གཅིག་ལས་མ་གཡོས་པར།།
མ་བྱས་ཡེ་ཟིན་རྩོལ་སྒྲུབ་འདས་པ་ཉིད།།
གྲྭ་ཟུར་མེད་པའི་ཐིག་ལེ་ཟླུམ་པས་ན།།
ཇི་བཞིན་དབྱེ་བསལ་མེད་པའི་ཀློང་དུ་འཁྱིལ།།
ཞེས་གསུངས་ཏེ། རིག་པ་དྲི་མ་མེད་པའི་ངོ་བོ་ནི་ཆོས་སྐུ་ཐིག་ལེ་ཉག་གཅིག་ཏུ་ཡེ་ནས་གནས་པ་སྟེ། བྱ་རྩོལ་བསམ་ཡུལ་ལས་འདས་པའི་ཆོས་ཉིད་རང་བྱུང་གི་ཡེ་ཤེས་སུ་བསྟན་པ་ནི། མུ་ཏིག་ཕྲེང་བ་ལས། ཀུན་གཞི་ཆོས་སྐུར་རང་ཤར་བས། །བརྒྱུད་པའི་རྩ་བ་རྩད་ནས་བཅད། །ཡིད་བཞིན་དགོངས་པར་ཡེ་གནས་པས། །འགྱུ་བྱེད་རྣམས་ནི་རང་གཞག་ཡིན། །དབུགས་ནི་ཡེ་ནས་རྒྱུན་ཆད་པས། །སྐྱེ་ཤི་གདོད་ནས་ཡོད་པ་མིན། །འདོད་པའི་ཡོན་ཏན་ཡེ་རྫོགས་པས། །ཞེན་པའི་མཐའ་ནི་སྒོམ་པ་ཉིད། །ཡན་ལག་མ་བསྐྱོད་ཡེ་ཕྱིན་པས། །འགྲོ་བའི་ལམ་ཉིད་ཡེ་ནས་བགྲོད། །སྨྲས་པའི་ངག་ནི་བརྗོད་མེད་པས། །ཡེ་ནས་སྨྲ་བསམ་ཡུལ་ལས་འདས། །བསམ་པའི་འཕྲོ་འདུ་ཡེ་སྟོང་པས། །ཡེ་ནས་བསམ་གཏན་ཆེན་པོར་གནས། །དྲི་མ་རྣམས་ནི་རང་དག་པས། །དྲི་མེད་ཟང་ཐལ་ཆེན་པོར་གནས། །བྱས་པ་བྱུང་བ་མེད་པའི་ཕྱིར། །ཐོག་མ་ཉིད་ནས་བྱ་བྱེད་བྲལ། །གཞི་ནས་གཞན་བྱུང་ཆོས་མེད་པས། །གདོད་ནས་རང་བྱུང་ཉག་གཅིག་གོ །གཅིག་དང་གཉིས་ཀྱི་གྲངས་ཟད་པས། །ཐིག་ལེ་ཟླ་དང་བྲལ་བ་ཉིད། །མུན་པ་གདོད་ནས་རྣམ་དག་པས། །རིག་པའི་སྣང་བ་འོད་གསལ་ཁྱབ། །འཁོར་བ་འགྱུར་མེད་འགགས་ཟིན་པས། །ཡེ་ནས་ལྷུན་རྫོགས་སངས་རྒྱས་པ། །མཚན་མའི་དངོས་པོ་སྟོང་སངས་པས། །བདག་འཛིན་བློ་ནི་ཡེ་ནས་ཟད། །ཅེས་སོ། །གོང་དུ་བསྟན་པའི་ཆོས་དབྱིངས་ཡངས་པའི་ཡུལ་ཁམས་རྒྱ་ཆེ་བ་ཕྱོགས་དང་རིས་སུ་མ་ཆད་པ་དེར། དབྱིངས་རིག་ཐ་མི་དད་པ་རོ་གཅིག་ཏུ་གནས་པ། སྟོང་པ་རིག་པའི་སྙིང་པོ་ཅན་སྟོང་གསལ་འགག་མེད་རང་ཆས་སུ་བཞུགས་པའི་ཆོས་སྐུའི་ཡེ་ཤེས་རང་བྱུང་ལྷུན་གྱིས་གྲུབ་པ། གཅིག་པུ་གཉིས་སུ་མེད་པ་དེའི་ངང་ལས་མ་གཡོས་པ་དེ་ཉིད། བྱས་ཆོས་བྱ་བ་ལ་མ་ལྟོས་པའི་མ་བྱས་ཡེ་ཟིན་རྩོལ་སྒྲུབ་ལས་འདས་པ་ཡིན་ལ། གལ་ཏེ་ཕྱོགས་ཀྱི་གྲྭ་དང་མཐའ་ཡི་ཟུར་ཡོད་ན་དངོས་པོ་དང་མཚན་མ་ལས་མ་འདས་ཤིང་། དངོས་པོ་དང་མཚན་མའི་ཆོས་ཐམས་ཅད་ནི་རྩོལ་སྒྲུབ་ལས་མ་འདས་པས། ཆོས་ཀྱི་དབྱིངས་སྟོང་གསལ་ཐིག་ལེ་ཉག་གཅིག་གི་ཀློང་དུ་ཟླུམ་པས་ན། གདོད་ནས་དག་པའི་དབྱིངས་གཅིག་གི་ངང་དུ་ཇི་བཞིན་དབྱེ་བསལ་མེད་པའི་བདེ་ཀློང་གཅིག་ཏུ་འཁྱིལ་བ་ཡིན་པས། ཆོས་ཀུན་རྩ་བ་བྱང་ཆུབ་སེམས་སུ་འདུས་པར་བསྟན་པའོ།།
ཅ༽ལྔ་བ་རིག་པའི་ངོ་བོ་བྱང་ཆུབ་ཀྱི་སེམས་སུ་ཆོས་ཐམས་ཅད་རོ་གཅིག་པར་བསྟན་པ།
རོ་གཅིག་པར་དོན་བསྡུས་པས་རིག་པའི་ངང་དུ་འཁོར་འདས་འུབ་ཆུབ་པར་བསྟན་པས་སེམས་ཉིད་སྐུ་གསུམ་དུ་འགག་བསྡམས་ཤིང་འགྲོ་དྲུག་ཞིང་སྣང་དུ་ཤར་བ་སྤྲོས་བྲལ་ཐིག་ལེ་ཉག་གཅིག་ཏུ་བསྡམས་པ་སྟེ། དེ་ལྟར་རིག་པའི་ངོ་བོ་བྱང་ཆུབ་ཀྱི་སེམས་སུ་ཆོས་ཐམས་ཅད་རོ་གཅིག་པར་བསྟན་པ་ནི།
འགྲོ་དྲུག་གནས་དང་སངས་རྒྱས་ཞིང་ཁམས་ཀྱང་།།
གཞན་ན་མེད་དེ་ཆོས་ཉིད་ནམ་མཁའི་ངང་།།
རང་གསལ་བྱང་ཆུབ་སེམས་སུ་རོ་གཅིག་པས།།
རིག་པའི་ངང་དུ་འཁོར་འདས་འུབ་ཆུབ་བོ།།
ཞེས་གསུངས་ཏེ། རྨི་ལམ་གཉིད་དུ་ངང་གཅིག་པ་ལྟར་ཆོས་སོ་ཅོག་རིག་པའི་ངང་དུ་རོ་གཅིག་པས། རྩ་བ་བྱང་ཆུབ་ཀྱི་སེམས་སུ་འདུས་པར་བསྟན་པ་ནི། དེ་ཡང་ལུང་གིས་གོ་བར་མཛད་པ་ནི། ཀུན་བྱེད་ལས། ཆོས་ཀུན་རྩ་བ་ཀུན་བྱེད་བྱང་ཆུབ་སེམས། །ཇི་ལྟར་སྣང་བ་ང་ཡི་ངོ་བོ་ཡིན། །ཇི་ལྟར་བྱུང་བ་ང་ཡི་ཆོ་འཕྲུལ་ཡིན། །སྒྲ་ཚིག་ཇི་ལྟར་གྲགས་པ་ཐམས་ཅད་ཀུན། །ང་ཡི་དོན་ཉིད་ཚིག་སྒྲར་ཕྱུང་བ་ཡིན། །སངས་རྒྱས་སྐུ་དང་ཡེ་ཤེས་ཡོན་ཏན་དང་། །སེམས་ཅན་ལུས་དང་བག་ཆགས་ལ་སོགས་པ། །སྣང་སྲིད་སྣོད་བཅུད་བསྡུས་པ་ཐམས་ཅད་ཀུན། །བྱང་ཆུབ་སེམས་ཀྱི་ངོ་བོ་ཡེ་ནས་ཡིན། །ཞེས་སོ། །རིག་པ་སྟོང་གསལ་ནམ་མཁའ་ལྟ་བུ་རྣམ་པ་ཀུན་ལྡན་གྱི་སྟོང་ཆེན། རྣམ་ཀུན་མཆོག་ལྡན་གྱི་འོད་གསལ། གདོད་ནས་དག་པ་ཆོས་སྐུའི་ངང་ལས། རང་སྣང་གི་རྩལ་མ་དག་པ་ལྟར་ཤར་བ་འཁོར་གནས་འགྲོ་བ་རིགས་དྲུག་དང་། དག་པ་ལྟར་ཤར་བ་སངས་རྒྱས་ཀྱི་ཞིང་ཁམས་ཏེ་བཟང་ངན་ཅིར་སྣང་ཡང་། གཞི་སྣང་རིག་པའི་ངང་ལས་གཡོས་པ་མེད་པས་རྨི་ལམ་བཟང་ངན་ཐམས་ཅད་གཉིད་གཅིག་གི་ངང་ལས་མ་འདས་པ་བཞིན་དུ། རྩ་བ་རང་གསལ་བྱང་ཆུབ་ཀྱི་སེམས་རིག་པའི་ངང་དུ་འཁོར་འདས་གཉིས་ཀ་ཆུ་བརྒྱ་ཟམ་འོག་གཅིག་ལ་འདུས་པ་ལྟར་དུ་ཐ་དད་རོ་མཉམ་གཅིག་ཏུ་འུབ་ཏུ་འདུས་ནས་ཆུབ་པའོ།།
༼ག༽བཞི་བ་དེ་ལྟ་བུའི་ངང་དུ་ཆོས་ཐམས་ཅད་རྫོགས་པར་བསྟན་པས་འགག་བསྡུ་བ།
དེ་ལ་མྱ་ངན་ལས་འདས་པའི་ཆོས་རྣམས་ཀྱང་མ་བཙལ་ལྷུན་གྲུབ་ཆེན་པོར་གནས་པ་དང་གཅིག བྱང་ཆུབ་སེམས་ཀྱི་དབྱིངས་ན་འགྲོ་དྲུག་ཞིང་སྣང་དུ་ཤར་བ་སྤྲོས་བྲལ་ཐིག་ལེ་ཉག་གཅིག་ཏུ་ཟླུམ་པ་དང་གཉིས་ལས།
༼ཀ དང་པོ་མྱ་ངན་ལས་འདས་པའི་ཆོས་རྣམས་ཀྱང་མ་བཙལ་ལྷུན་གྲུབ་ཆེན་པོར་གནས་ཚུལ་བསྟན་པ།
དེ་ལྟ་བུའི་ངང་དུ་ཆོས་ཐམས་ཅད་རྫོགས་པའི་ཕྱིར། མྱ་ངན་ལས་འདས་པའི་ཆོས་རྣམས་ཀྱང་མ་བཙལ་ལྷུན་གྲུབ་ཆེན་པོར་གནས་ཏེ།
ཐམས་ཅད་ཀུན་འབྱུང་ཆོས་དབྱིངས་མཛོད་འདི་ན།།
འདས་པ་མ་བཙལ་ཡེ་ནས་ལྷུན་གྲུབ་པས།།
ཆོས་སྐུ་མི་འགྱུར་ཡུལ་མེད་ཀུན་འབྱམས་ལ།།
ཕྱི་ནང་སྣོད་བཅུད་སྣང་བ་ལོངས་སྤྱོད་རྫོགས།།
གཟུགས་བརྙན་ལྟ་བུར་རང་ཤར་སྤྲུལ་པའི་སྐུ།།
སྐུ་གསུམ་རྒྱན་དུ་མ་རྫོགས་ཆོས་མེད་པས།།
ཐམས་ཅད་སྐུ་གསུང་ཐུགས་ཀྱི་རོལ་བར་ཤར།།
བདེ་གཤེགས་ཞིང་ཁམས་མ་ལུས་གྲངས་མེད་ཀྱང་།།
ཉིད་ལས་བྱུང་བས་སེམས་ཉིད་སྐུ་གསུམ་ཀློང་།།
ཞེས་གསུངས་ཏེ། འདི་ལྟར་ཆོས་ཐམས་ཅད་ནི་ཡེ་ནས་སྟོང་པ་ཆེན་པོའི་ཆོས་ཀྱི་སྐུ་དང་། རང་སྣང་བ་ལོངས་སྤྱོད་རྫོགས་པའི་སྐུ་དང་། སྣ་ཚོགས་སུ་མ་འགགས་པར་ཤར་བ་སྤྲུལ་པའི་སྐུ་དང་། དག་པའི་ཞིང་ནས་སེམས་ཅན་གྱི་དེད་དཔོན་དམ་པར་བྱོན་པ་རྣམས་ཀྱང་སྐུ་གསུམ་གྱི་རང་བཞིན་ཏེ། རིག་པ་བྱང་ཆུབ་ཀྱི་སེམས་སུ་རང་རྫོགས་པའི་ཕྱིར་ན། མ་བཙལ་ལྷུན་གྱིས་གྲུབ་པའི་ངོ་བོར་གནས་པ་ནི། ལུང་གིས་གསལ་བ་བྱེད་པ། ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག ཀུན་བྱེད་བྱང་ཆུབ་ང་ཡི་རང་བཞིན་ལས། །མ་བཙལ་རང་བཞིན་ལྷུན་གྱིས་གྲུབ་པ་ཡི། །རྒྱལ་བ་ཀུན་གྱི་སྙིང་པོ་སྐུ་གསུམ་སྟེ། །ང་ཡི་རང་བཞིན་མ་བཅོས་ཆོས་སྐུར་གྲུབ། །ང་ཡི་ངོ་བོ་མ་བཅོས་ལོངས་སྤྱོད་རྫོགས། །ང་ཡི་ཐུགས་རྗེ་མངོན་ཕྱུང་སྤྲུལ་སྐུ་སྟེ། །བཙལ་ནས་གྲུབ་པའི་འབྲས་བུ་བསྟན་པ་མིན། །སྐུ་གསུམ་ཀུན་བྱེད་ང་རུ་བསྡུས་པ་དེ། །ཇི་ལྟར་སྣང་བའི་ཆོས་རྣམས་ཐམས་ཅད་ཀུན། །རང་བཞིན་ངོ་བོ་ཐུགས་རྗེ་མ་བཅོས་གསུམ། །སྐུ་གསུམ་ང་ཡི་དེ་བཞིན་ཉིད་དུ་བསྟན། །ང་དང་ང་ཡི་དེ་བཞིན་ཉིད་ལས་ནི། །སངས་རྒྱས་ཞེས་བྱའི་ཡོན་ཏན་སྒྲོས་ཀྱང་མེད། །སེམས་ཅན་ཞེས་བྱའི་སྐྱོན་གྱིས་སྐུར་བ་མེད། །མི་རྟོག་མཉམ་པ་ཉིད་དུ་དེ་བཞིན་གནས། །འདི་ལས་མ་གཏོགས་པ་ནི་གཞན་མེད་པས། །སངས་རྒྱས་རྣམས་ཀྱིས་འདི་ལས་ལྷག་པ་ཡི། །ཀུན་བྱེད་ང་ལ་དེས་ལུང་མནོས་པ་མེད། །ཅེས་སོ། །ནོར་བུ་བཻཌཱུརྱ་གཅིག་ཉི་མ་དང་ཟླ་བ་ཤར་བའི་རྐྱེན་སོ་སོའི་མེ་དང་ཆུར་འབྱུང་བ་ལྟར། རིག་པ་གཅིག་ཉིད་རང་ངོ་མ་ཤེས་པས་འཁོར་བ་དང་ཤེས་པས་མྱ་ངན་ལས་འདས་པའི་སྣང་བ་སོ་སོར་ཤར་ཡང་། རིག་པ་གཅིག་གི་རོལ་བའམ་འཆར་ཚུལ་ལས་ངོ་བོ་ཐ་དད་པ་མེད་པའི་ཆོས་དབྱིངས་ཀྱི་མཛོད་འདི་ན། འདས་པའི་དུས་ཤིག་ལ་བསྒྲུབས་པའི་བྱ་རྩོལ་གྱི་ཆོས་ཅན་མ་ཡིན་པར་མ་བཙལ་བཞིན་དུ་ཡེ་ནས་ལྷུན་གྲུབ་ཏུ་ཡོད་པ་ནི་ཆོས་ཐམས་ཅད་ཡེ་ནས་སྟོང་པ་ཆེན་པོའི་ཆོས་ཀྱི་སྐུ་ཡུལ་མེད་ཀུན་ཁྱབ་ཡེ་ཤེས་ཀྱི་སྐུ་ཅན། ཕྱི་ནང་སྣོད་བཅུད་དུ་སྣང་བ་ནི་རང་སྣང་འགག་མེད་རིག་པ་འོད་ཀྱི་སྐུ་ཅན་སྟོང་པ་གསལ་བའི་སྙིང་པོ་ཅན་དུ་རང་ཤར་བ་ལོངས་སྤྱོད་རྫོགས་སྐུ། སྣ་ཚོགས་མ་འགགས་གཟུགས་བརྙན་ལྟ་བུ་རང་ཤར་བ་གདུལ་བྱའི་སྣང་ངོར་གང་འདུལ་ཆུ་སྣོད་ལ་ཟླ་གཟུགས་ཤར་བ་ལྟར་དུ་སྣང་བ་སྤྲུལ་བའི་སྐུ་སྟེ། འདི་ལྟར་སྣང་བའི་ཆོས་ཐམས་ཅད་སྐུ་གསུམ་གྱི་རང་བཞིན་དག་པའི་ཞིང་དུ་ཤར་བའི་སྐུ་གསུམ་གྱི་རང་བཞིན་ཡིན་པས་མ་ཚད། འཁོར་བ་ཤར་བའི་གནས་སྐབས་ན་ཡང་སྐུ་གསུམ་མམ་སྐུ་གསུང་ཐུགས་ཀྱི་རོལ་བ་ཡིན་ཕྱིར་ཐམས་ཅད་སྐུ་གསུམ་དུ་འདུས་པའོ།།
༼ཁ གཉིས་པ་བྱང་ཆུབ་སེམས་ཀྱི་དབྱིངས་ན་འགྲོ་དྲུག་ཞིང་སྣང་དུ་ཤར་བ་སྤྲོས་བྲལ་ཐིག་ལེ་ཉག་གཅིག་ཏུ་ཟླུམ་པ།
དེ་ལྟར་བྱང་ཆུབ་སེམས་ཀྱི་དབྱིངས་ན་འགྲོ་དྲུག་ཞིང་སྣང་དུ་ཤར་བ་སྤྲོས་བྲལ་ཐིག་ལེ་ཉག་གཅིག་ཏུ་ཟླུམ་པ་ནི།
འཁོར་བའི་རང་བཞིན་འགྲོ་དྲུག་གྲོང་ཁྱེར་ཀྱང་།།
ཆོས་དབྱིངས་ངང་ནས་གཟུགས་བརྙན་ཤར་བ་ཙམ།།
སྐྱེ་ཤི་བདེ་སྡུག་སྣ་ཚོགས་སྣང་བ་ཡང་།།
སེམས་ཉིད་ཀློང་འདིར་སྤྲུལ་པའི་ལྟད་མོ་བཞིན།།
མེད་ལ་ཡོད་ལ་སྣང་ལ་གཞི་མེད་པས།།
མཁའ་ལ་སྤྲིན་བཞིན་གློ་བུར་རྐྱེན་འབྱུང་ཙམ།།
ཡོད་མིན་མེད་མིན་རང་བཞིན་མཐའ་འདས་པས།།
སྤྲོས་བྲལ་ཐིག་ལེའི་ངང་དུ་འུབ་ཆུབ་བོ།།
ཞེས་གསུངས་ཏེ། སྣང་ཞིང་སྲིད་པའི་ཆོས་དང་། ཁྱད་པར་དུ་འཁྲུལ་སྣང་འགྲོ་བ་རིགས་དྲུག་གི་རང་བཞིན་འདི་དག་རང་བཞིན་མེད་པའི་སྟོང་གཟུགས་རྨི་ལམ་གྱི་དུས་ན་སྒྱུ་མའི་ལྟད་མོ་མཐོང་བ་ལྟར་མ་རྟོགས་པའི་སྐྱེ་བོ་ལ་ཉིང་འཁྲུལ་དུ་སྣང་བ། རྣལ་འབྱོར་པ་ལ་སྒྱུ་མ་ཙམ་དུ་ཤར་བ་སྟེ། མེད་པ་གསལ་སྣང་གློ་བུར་བའི་རང་བཞིན་འདི་མ་རྟོགས་པའི་རྐྱེན་ཅུང་ཟད་ཀྱིས་ཤར་ཡང་། ངོ་བོ་དང་རང་བཞིན་མེད་པ། མིག་སྔགས་ལས་མིག་འཕྲུལ་དུ་སྣང་བའི་གཟུགས་བརྙན་ལྟ་བུ་སྟེ། མ་བརྟགས་གཅིག་པུར་ཉམས་དགའ་བ་ཉིད། བརྟགས་ན་ངོ་བོ་ཉིད་ཀྱིས་དབེན་པ་ནི། ལུང་གིས་འགྲེལ་བ། ཁྱུང་ཆེན་ལས། རྒྱུ་མེད་རྐྱེན་དང་བྲལ་བའི་རང་སྣང་སྒྲིབ་མེད་ཉིད། །རྩོལ་བྲལ་ཉག་གཅིག་སུས་ཀྱང་མ་བྱས་པའི། །ཡེ་རྫོགས་སྙིང་པོ་ལྷུན་གྲུབ་ཡུལ་ལ་རོལ། །སྒྱུ་མའི་ཆུ་སྟེ་གཟུགས་ལས་བྱུང་བ་ཡི། །སྙིང་པོ་བརྒྱ་དང་བརྟག་དཔྱད་ཡིད་ཟད་དོ། །ཞེས་པ་དང་། ཀུན་བྱེད་ལས། འགྲོ་བ་དྲུག་ཅེས་མིང་ཙམ་བཏགས་པས་སྟོང་། །ཞེས་སོ། །གསེར་གྱི་ངོ་བོ་གཅིག་ལ་སྐུ་གཟུགས་བྱས་པ་ངོ་མཚར་བ་དང་། རྒྱན་དང་གདུ་བུར་བྱས་པས་མཛེས་པ་དང་། ཆོལ་ཟངས་ཀྱི་སྣོད་དུ་བྱས་པས་བཙོག་པར་འཛིན་ཀྱང་། ངོ་བོ་ལ་གསེར་གྱི་དབྱིངས་སུ་གཅིག་སྟེ། གསེར་གྱི་ཁམས་ལ་བཟང་ངན་མེད་པ་ལྟར། གཅིག་ལས་ཀུན་འབྱུང་ལྷུན་གྲུབ་རིན་པོ་ཆེའི་གཞི་དག་པ་ཆེན་པོ་གཅིག་ལས། འཆར་ཚུལ་དྲུག སྒོ་གཉིས་དང་བརྒྱད་ཀྱི་ཚུལ་དུ་བྱུང་བའི་སྐབས་སུ་རང་སྣང་ཡིན་ལུགས་གཅིག་ལ་ལྟ་ལུགས་མ་འདྲ་བའི་མཐོང་སྣང་གིས་འཁོར་འདས་ཀྱི་ལམ་སོ་སོར་གྱེས་པ་བཞིན་དུ། ད་ལྟ་སྣང་བཞིན་པའི་འགྲོ་དྲུག་གི་གྲོང་ཁྱེར་འདི་དག་ཀྱང་། མ་དག མ་དག་དག་པ་དང་། ཤིན་ཏུ་དག་པའི་གཟིགས་ཚུལ་ལྟར་དུ་སྣང་ལུགས་འཁྲུལ་དང་མ་འཁྲུལ་སྣ་ཚོགས་སུ་སྣང་ཡང་། དོན་དུ་ཆོས་དབྱིངས་ཀྱི་ངང་ལས་གཟུགས་བརྙན་ཤར་བ་ཙམ་དུ། སྐྱེ་ཤི་བདེ་སྡུག་ལ་སོགས་པའི་སྣང་བ་ཐམས་ཅད་ཀྱང་། སེམས་ཉིད་ཆོས་སྐུའི་དགོངས་པའི་ཀློང་ནས་གཞལ་ཡོང་ན་སྤྲུལ་བའི་ལྟད་མོ་དང་སྒྱུ་མའི་སྣང་བ་བཞིན་དུ་མེད་ལ་ཡོད་ལ་སྣང་ལ་གཞི་མེད་པས་ནམ་མཁའི་འཇའ་ཚོན་དང་བར་སྣང་གི་སྤྲིན་བཞིན་དུ་མཐའ་བཞི་འམ་བརྒྱད་ཀྱི་སྤྲོས་པ་ལས་འདས་པས་སྤྲོས་བྲལ་ཐིག་ལེ་ཉག་གཅིག་ཆོས་དབྱིངས་གཅིག་གི་ངང་དུ་ཡང་འུབ་ཆུབ་པར་བསྟན་པའོ། །སེམས་ཅན་དུ་འཇོག་པའང་ལས་དང་ཉོན་མོངས་པ་ཡིན་ཏེ། དེ་ཡང་དཔྱད་ན་གཞི་མེད་པས་གཅིག་དང་དུ་མའི་མཐའ་དང་བྲལ་ཞིང་། ངོ་བོ་ཉིད་ཀྱིས་དབེན་པ་སྟེ། ཁྱུང་ཆེན་ལས། གཞི་ནས་འདོད་པ་མི་སྲིད་སེམས་འདི་ལ། །རྣམ་སྨིན་བག་ཆགས་གཞི་མེད་སུ་ལ་བརྟེན། །ནམ་མཁའི་མེ་ཏོག་སྐྱེ་བའི་གནས་མེད་རྟེན་བྲལ་ལྟར། །ལུས་ལ་སེམས་ཀྱི་གནས་མེད་བག་ཆགས་རྟེན་མི་སྲིད། །ཅེས་པ་དང་། མུ་ཏིག་ཕྲེང་བ་ལས། སེམས་ཅན་ཉོན་མོངས་ལྔ་ཉིད་ནི། །དོན་ལ་ཡོད་པ་མ་ཡིན་ཏེ། །ནམ་མཁའ་ལ་ནི་སྤྲིན་བཞིན་དུ། །གློ་བུར་རྐྱེན་དང་བཅས་པ་ཉིད། །སྤྲིན་དེ་ནམ་མཁའ་ཉིད་ལས་བྱུང་། །དེ་བཞིན་ནམ་མཁར་ཐིམ་ཤེས་ན། །དབྱེར་མེད་གཅིག་གི་ངང་ཞེས་བྱ། །དེ་བཞིན་ཉོན་མོངས་དྲི་མ་ཉིད། །རང་བྱུང་རང་ཞི་ཉིད་ཤེས་ན། །སེམས་ཅན་འཆིང་བར་ག་ལ་འགྱུར། །ཞེས་པ་དང་། རྣམ་འགྲེལ་ལས་ཀྱང་། སེམས་ཀྱི་རང་བཞིན་འོད་གསལ་བ། །དྲི་མ་རྣམས་ནི་གློ་བུར་བ། །ཞེས་བཤད་པ་ལྟ་བུའོ། །སེམས་ཅན་ཞེས་པ་ཡང་གཞི་གཅིག་ལས་གཞི་སྣང་ཤར་དུས་ང་མེད་ལ་ང་དང་བདག་མེད་ལ་བདག་ཏུ་བཟུང་ནས། སྲིད་རྩ་བདག་འཛིན་མ་རིག་པའི་དབང་གིས་གཟུང་འཛིན་རྒྱང་ཆད་དུ་སོང་། ཆགས་སྡང་རྨོངས་གསུམ་གྱིས་འཁྲུལ་བའི་གཞན་དབང་དུ་གྱུར་པ་ཙམ་ཞིག་ཡིན་པས། ལས་དང་ཉོན་མོངས་པ་ཡང་དཔྱད་ན་གཞི་མེད་པ། དུག་ལྔ་ཡེ་ཤེས་ལྔ་ཡི་རྩལ་ལས་ཤར་བ་གཞི་མེད་གློ་བུར་གྱི་རྐྱེན་བྱུང་། གཅིག་དང་དུ་མའི་མཐའ་དང་བྲལ་བ། བཅིངས་པ་ཡེ་ནས་མེད་པས་ན་དགྲོལ་བ་གསར་དུ་མ་དགོས་པ་ལྟ་བུ་ཡིན་ནོ།།
༼ང༽དེ་དག་གི་དོན་མཉམ་པ་ཆེན་པོའི་ཚུལ་རྡོ་རྗེ་དབྱིངས་སུ་བསྡུ་བ།
དེ་ཡན་ཆད་ཀྱིས་སྣང་སྲིད་ཞིང་ཁམས་སུ་ཤར་བའི་ལེའུའི་དབྱིངས་དང་དབྱིངས་སྣང་ཞིང་ཁམས་སུ་ཤར་བའི་ནང་གསེས་ཀྱི་དབྱེ་བ་འགག་བསྡུ་བ་དང་བཅས་པ་སོང་ནས། ད་ནི་དེ་དག་གི་དོན་མཉམ་པ་ཆེན་པོའི་ཚུལ་རྡོ་རྗེ་སྙིང་པོའི་དབྱིངས་སུ་བསྡུ་བ་ནི།
སེམས་ཉིད་བྱང་ཆུབ་སེམས་ཀྱི་རང་བཞིན་ཏེ།།
མཁའ་ལྟར་དག་པས་སྐྱེ་ཤི་བདེ་སྡུག་མེད།།
དངོས་པོ་རིས་མེད་འཁོར་འདས་ཆོས་ལས་གྲོལ།།
འདི་ཞེས་མི་མཚོན་མཁའ་ཀློང་རབ་ཡངས་པས།།
མི་འགྱུར་མི་འཕོ་ལྷུན་གྲུབ་འདུས་མ་བྱས།།
འོད་གསལ་རྡོ་རྗེ་སྙིང་པོར་སངས་རྒྱས་པས།།
ཐམས་ཅད་ཀུན་ཀྱང་རང་བྱུང་བདེ་བའི་ཞིང་།།
ལྷུན་མཉམ་བྱང་ཆུབ་མཆོག་གི་ངང་ཉིད་དོ།།
ཞེས་གསུངས་ཏེ། རིག་པའི་ངོ་བོ་ནམ་མཁའ་ལྟ་བུའི་རང་བཞིན་འཕོ་འགྱུར་མེད་པ་ནི་ཇི་བཞིན་པའི་ངོ་བོ་སྟེ། དེའི་ངང་དུ་འཁོར་འདས་ཡེ་ནས་གྲོལ་ཟིན་པས། རྡོ་རྗེ་སྙིང་པོར་སངས་རྒྱས་ཏེ། ལྷུན་མཉམ་བྱང་ཆུབ་མཆོག་གི་རང་བཞིན་དུ་བསྟན་པ་ནི། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུ་ཡང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པར་ལྷུན་གྱིས་གྲུབ། །ཅེས་པ་དང་། སེམས་ནི་ཇི་བཞིན་པ་ཡི་ངོ་བོ་སྟེ། །ཆོས་རྣམས་ཐམས་ཅད་དེ་བཞིན་ཉིད་དུ་གྲུབ། །ཇི་བཞིན་པ་ལ་འཆོས་པར་མ་བྱེད་ཅིག །ངོ་བོ་ཉིད་ལས་གཞན་དུ་མ་སྒྲུབས་ཤིག །བཙལ་ན་རྒྱལ་བས་དབྱིངས་ནས་རྙེད་མི་འགྱུར། །སྔར་བྱས་ཟིན་པས་ད་ནི་བྱེད་མི་དགོས། །སྔར་གྲུབ་ཟིན་པས་ད་སྒྲུབ་མ་བྱེད་པར། །མི་རྟོག་ཅིར་མི་དགོངས་ལ་མཉམ་པར་ཞོག །ཅེས་སོ། །རྒྱུད་འདིར་ནི་སེམས་ཉིད་རང་བྱུང་གི་ཡེ་ཤེས་སྤྲོས་པའི་མཐའ་དང་བྲལ་བ་ལ་བྱང་ཆུབ་ཀྱི་སེམས་ཟེར་ལ། ཚིགས་སུ་བཅད་པ་བསྡེབས་པའི་ངོར་སེམས་ཞེས་ཀྱང་བཤད་དེ། སེམས་ལས་མ་གཏོགས་པ་ཡི་སངས་རྒྱས་ནི། །ཀུན་བྱེད་ང་ཡིས་བསྟན་པར་གྱུར་པ་མེད། །ཅེས་པ་བཞིན་ནོ། །ཡུལ་ལ་འཕྲོ་བའི་སེམས་ནི་རིག་བྱེད་རྩལ་ལམ་རོལ་བའི་སེམས་ཞེས་བྱའི། བྱང་ཆུབ་ཀྱི་སེམས་དངོས་མ་ཡིན་པས། འདི་གཉིས་ཀྱི་བྱེ་བྲག་ཤེས་པ་གལ་ཆེའོ། །ཆོས་དབྱིངས་རིན་པོ་ཆེའི་མཛོད་ལས། སྣང་སྲིད་ཞིང་ཁམས་སུ་ཤར་བ་སྟེ། ལེའུ་གཉིས་པའི་འགྲེལ་པའོ།། །།སེམས་ཀྱི་ཆོས་ཉིད་དམ་རིག་པའི་ངོ་བོ་བྱང་ཆུབ་སེམས་ཀྱི་རང་བཞིན་དེ་ཉིད་སྟོང་གསལ་ཆོས་ཉིད་ཡངས་པ་ཆེན་པོ། ཕྱོགས་དང་རིས་མེད་པའི་ནམ་མཁའ་ལྟ་བུ་དག་ཅིང་འཕོ་འགྱུར་མེད་པ་ཡིན་པས་ན། འཁྲུལ་སྣང་འཁོར་བའི་གྲོང་ཁྱེར་གྱི་སྐྱེ་ཤི་བདེ་སྡུག་སྣ་ཚོགས་སུ་སྣང་བ་ཡང་དོན་ལ་མེད་པས། འཁོར་བ་མེད་ལ་མྱང་འདས་ཀྱང་མེད་ལ། འཁོར་འདས་ཡེ་ནས་དབྱིངས་རྡོ་རྗེ་སྙིང་པོར་གྲོལ་ཟིན་དུ་ཡོད་པའི་རང་བཞིན། ཀུན་བྱེད་ལས་བྱང་ཆུབ་སེམས་ཞེས་གསུངས་པ་འདི་སེམས་ཉིད་རང་བྱུང་གི་ཡེ་ཤེས་སྤྲོས་མཐའ་ཐམས་ཅད་དང་བྲལ་བ་དེ་ལ་གོ་དགོས་ཤིང་། སྐབས་རེར་ཚིག་སྦྱོར་སྡེབ་པའི་ཚིག་སྡུད་ཀྱིས་སེམས་རྐྱང་པར་གསུངས་ནས་གོ་བར་མཛད་པའང་ཡོད་ལ། སེམས་ཆེན་པོ་ཞེས་སངས་རྒྱས་ཀྱི་ཡེ་ཤེས་མཚོན་པར་བྱེད་པའི་སྐབས་མདོ་རྒྱུད་གཉིས་ཀའི་ནང་ནའང་ཡོད་ཅིང་། གང་ལྟར་ཡང་དངོས་པོའི་རིས་མེད་པ་འཁོར་འདས་གཉིས་ཀྱིས་ཆོས་ལས་གྲོལ་བ་ལ་ཚིག་གིས་མཚོན་ཐབས་ཅི་ཡོད། དེ་ལྟ་བུའི་འཕོ་འགྱུར་བྲལ་བའི་མཁའ་ཀློང་ཡངས་པ་ལྷུན་གྲུབ་འདུས་མ་བྱས་དབྱིངས། སྟོང་པ་ཕྱང་ཆད་མ་ཡིན་པར་འོད་གསལ་རྡོ་རྗེ་ལྟ་བུའི་འགྱུར་བ་མེད་པའི་སྙིང་པོར་ཡེ་ནས་སངས་རྒྱས་སུ་ཡོད་པས་ན། འཁོར་འདས་སྣང་སྲིད་སྣོད་བཅུད་ཐམས་ཅད་ལྷུན་མཉམ་བྱང་ཆུབ་མཆོག་གི་བདེ་བའི་ཀློང་གཅིག་གི་ངང་ཉིད་དུ་མདོར་དྲིལ་བའོ། །འདི་ཡན་ཆད་ཀྱི་ལེའུ་འཁོར་འདས་དབྱིངས་ལས་མ་གཡོས་པ་དང་། སྣང་སྲིད་ཞིང་ཁམས་སུ་ཤར་བ་གཉིས་ཀྱིས། གཞི་ལམ་འབྲས་གསུམ་དུ་ཕྱེ་བའི་གཞི་གཙོ་བོར་བསྟན་ནས། དེ་རིང་གི་ཆོས་མཚམས་འདིའི་མཚམས་ཆེ་བ་འདི་ནས་བཞག་སྟེ་སང་ཉིན་ཕན་ཆད་འབྱུང་འགྱུར་བར་གྱི་ལེའུ་བདུན་ཏེ། བྱང་ཆུབ་སེམས་ཀྱི་མཚོན་དཔེ་དང་། ངོ་བོ་དང་། ཇི་ལྟར་ཉམས་སུ་བླངས་ཏེ་དེའི་ངང་དུ་ལ་ཟློ་ཚུལ་སོགས་ཀྱིས་ལམ་གྱི་ཆོས་གཙོ་བོ་བསྟན་ཞིང་། དེའི་འཕྲོས་ཀྱི་ཐ་མ་གསུམ་གྱིས་འབྲས་བུའི་མཚོན་ཚུལ་རྩོལ་སྒྲུབ་མེད་པ་ཡང་སངས་རྒྱས་པའི་བསྐོར་ནས་བསྟན་པའི་ས་བཅད་བཞག་ནས་རིམ་པས་དགོངས་པ་འགྲོལ་དགོས། རང་རེས་ཐེངས་འདིའི་ཁྲེགས་ཆོད་ཀྱི་ཐུན་བཅད་ནས་ཉི་མ་གཉིས་སོང་ནས་དེ་རིང་ཉི་མ་གསུམ་པ་རེད། འདིའི་ནང་གི་མང་ཆེ་བ་ཉམས་ལེན་པ་རྙིང་པ་ཏག་ཏག་ལོ་གསུམ་དང་ལོ་དྲུག་ལ་སོགས་པར་རྫོགས་པ་ཆེན་པོ་ཉམས་ལེན་དམ་མཚམས་བཅད་རྒྱ་བྱས་ཏེ་བཞུགས་ཚར་མཁན་དང་བཞུགས་བཞིན་པ་ཡང་མང་པོ་ཡོད་པ་དང་། མ་ཚད་མངོན་སུམ་འོད་གསལ་གྱི་སྒོ་མཐོང་། རིག་སྟོང་ཀ་དག་སྤྲོལ་བྲལ་གྱི་ལྟ་བའི་གདེང་རྙེད་ནས། ལྷུན་གྲུབ་སྣང་བཞིའི་ཚད་རྫོགས་པ་ལ་གང་ལ་གང་འཚམས་ཀྱི་གོ་མྱོང་རྟོགས་གསུམ་གྱི་ནང་ནས་མྱོང་བ་དང་། རྟོགས་པའི་ས་ཚོད་ལ་ཐོན་ཞེས་པ་ནི་དཀའ་བ་ལྟར་དུ་སྣང་ནའང་། གོ་བ་རྣལ་མ་གོལ་ཤོར་ནོར་བའི་འཕྲང་ལ་མི་ཐོགས་མཁན་ནི་གྲངས་ཀ་ཅན་ཞིག་འདིའི་ནང་དུ་ཡོད་ངེས་པ་ཡིན་པ་དང་། ཡང་འགའ་རེ་ཞིག་ཚིག་གི་ཐོག་ནས་ཐོས་པའི་མཐའ་རྒྱ་ད་སྔོན་བཅད་མ་མྱོང་བས། བཤད་དགོས་ན་ཟེར་སྒྲོས་གཙང་མ་འདི་རེད་བསམ་རྒྱུ་ཞིག་བཤད་རྒྱུ་མེད་ཀྱང་། ཡིད་ཆེས་དང་མོས་གུས་གདེང་དུ་བྱས་ནས་རྩེ་གཅིག་ཕུར་ཚུགས་ཀྱི་དད་དང་དག་སྣང་སྟོབས་སུ་གྱུར་པའི་བརྩོན་འགྲུས་བྱས་པའི་དད་པ་ཅན་ལ་སྦྱོར་བའི་དངོས་གྲུབ་ཐོབ་ནས། བརྒྱུད་པའི་བྱིན་རླབས་དད་མོས་ཀྱིས་དྲངས་ཏེ་དགོངས་བརྒྱུད་ཀྱི་བྱིན་རླབས་ཐོབ་སོང་བ་ཡང་ཡོད་ངེས་ཤིང་། རེ་གཉིས་ཉུང་ཤོས་ཤིག་ཡར་གྱི་ཤྭ་རྗེས་མ་ཆོད། ཐོས་པ་སློབ་གཉེར་གྱིས་ལ་མ་བརྒལ། མི་ཤེས་མཁན་ཞིག་རེད་ཟེར་རྒྱུ་མེད་པ་ཁྱབ་མཐའ་འདྲ་ཞིག་འགོད་ཁུལ་བྱེད་ཅིང་། གཞུང་བཀའ་པོད་ལྔ་བོ་ལ་ཐུག་ཙམ་རེག་ཙམ་དུ་ཡོད་པ། ཤེས་མཁན་ཞིག་རེད་ཟེར་ན་གཞུང་ཁེ་རུ་ཞིག་གི་དཀའ་གནད་ཀྱང་མི་ཁྲོལ་མཁན། མར་གྱི་ཤེའུ་རྗེས་ཀྱང་མ་ཆོད་པར། རྒྱུ་འབྲས་བསླུ་བ་མེད་པའི་འཇིག་རྟེན་ཡང་དག་གི་ལྟ་བ་དང་གཅིག ཅི་མཛད་ལེགས་མཐོང་གིས་བློ་གཏད་ལྷ་དང་བླ་མ་ལས་ལིང་བསྐྱུར་བྱེད་པ་སོགས་ཀྱི་སྒོམ་པ་དང་གཉིས། དགེ་སྡིག་སྤང་བླང་དགག་སྒྲུབ་འདོར་ལེན་གྱི་སྤྱོད་པ་དང་གསུམ་པོ་ཁྱིམ་ན་གནས་པའི་དགེ་བསྙེན་དྲ་མ་ཞིག་གི་རྗེས་སུ་ཡང་མ་ཟིན་པས་མ་ཚད། བཅོམ་ལྡན་འདས་ཀྱིས་ཆོས་འདུལ་བ་དང་པོ་གསུངས་དུས་སུ་ངེས་པར་འབྱུང་བའི་ཚུལ་ཁྲིམས་ཀྱིས་རྒྱུད་བསྡམས་ཏེ་ཞེས་གསུངས་པའི་ངེས་འབྱུང་ཞིག་ཀྱང་སྐྱེ་མེད་ན་སོ་ཐར་གྱི་སྡོམ་པ་ཐོབ་ཡོད་དམ་སྙམ་པའང་དོན་མི་འགྱུར་གྱི་ཐེ་ཚོམ་ལ་འགྲོ་བ། ལར་དཀོན་མཆོག་གསུམ་ངོས་ཡང་དག་པར་ཟིན་པའི་སྐྱབས་སྡོམ་ཡང་དག་པ་ཞིག་རྒྱུད་ལ་མེད་ན། སྡོམ་པ་ཐམས་ཅད་ཀྱི་རྨང་གཞི་མེད་པས་སོ་བྱང་སྔགས་གསུམ་ཡར་ལྡན་དུ་རྫོགས་པ་ནི་ཕར་ཚད་རེད། ད་རུང་ཡང་ལྟ་བྱེད་དུས་ཆོས་ཕྱོགས་མ་དགོས་འཇིག་རྟེན་གྱི་ཕྱོགས་ཀྱི་མི་ངོ་མ་ཡ་རབས་སྤྱོད་བཟང་། དཔལ་སྤྲུལ་ཚང་གིས་གསུངས་པའི་མྱི་རབ་རེ་རེའི་ཡུལ་ཁམས་སྡེ་འབངས་སྤྱི་ཡི་དོན་བྱེད་པ་ཅན་པོ་མ་རེད་ཀྱང་། བར་མ་དོ་གོ་རྒྱུ་རིག་རྒྱུ་མེད་པ་བྱས་ནས་བསྡད་བཞག་ན་ཕན་མེད་ནའང་གནོད་ཅང་མེད་ཀྱང་། མི་ངན་རེ་རེས་ཡུལ་སྡེ་དཀྲུག་ནི་ཡང་ཡོད་གསུང་རྒྱུ་དེ་རེད་སོང་ན། ཅི་སྡུག་གང་སྡུག་དེ་འདྲའི་ལས་མཐའ་ལོག་པ་དང་། རྒྱུད་མ་རུང་པ་ལ་བཅོས་ཐབས་མེད་པའི་ཀུན་སྤྱོད་ངན་པ་ཅན་རྐུ་ཐབས་སུ་གནས་པ་ཡང་དགེ་འདུན་གྱི་བཞུགས་གྲལ་ནང་དུ་དུས་སྡུག་པའི་སྐབས་སུ་མེད་མི་སྲིད་པ་མིན་ཞིང་། དེས་ན་གྲྭ་སར་གསར་ཞུགས་ཀྱི་བཙུན་ཆུང་ཚོས་དང་པོ་ཉིད་ནས་གྲོགས་བཟང་པོ་འགྲོགས་བཤེས་ཆོག་ས་ཞིག་བརྟེན་རྒྱུ་གལ་ཆེ་བ་ཡིན། དེ་ལྟར་ན་ཡར་ཀའི་ཤྭ་རྗེས་དབང་རྣོན་ཐུགས་དམ་བསམ་སྒོམ་ལ་དྲིལ་མཁན་ལ་ཡང་མ་ཟིན། མར་ཀའི་ཤྭེའུ་རྗེས་དད་པ་དག་སྣང་གིས་མ་ཆོག་ནས་བར་མིན་མདོ་མིན་ན་ཡོད་པའི་གསར་རུ་མགོ་འཁྲེབ་སྐད་ཆ་ཞིག་བཤད་ན། གཏམ་གྱི་མགོ་གླེང་དུས་ནས་ཡང་མིན་ན་དཀོན་མཆོག་གསུམ་དེ་དཔང་ལ་གཅིག་ཨེ་བཙུགས། ཡང་མིན་ན་ཡུམ་དུམ་པ་བཅུ་གཉིས་ཀྱི་མནའ་ཞིག་ཨེ་བསྐྱལ། མདོར་ན་མནའ་ཞིག་གི་ཆེ་རྒྱུ་ཆུང་རྒྱུ་མེད་ནི་ཞིག་མགོ་དེ་ན་བསྐྱལ་ནས། སྒོམ་ཞེས་པ་དེ་ཅི་ཞིག་རེད་ཅི་ཞིག་དྲན་ནས་འདུག་དགོས་པ་རེད། ཡང་དེའི་མཚམས་ནས་མནའ་དེའི་ཆེ་མེད་པ་གཅིག་བསྐྱལ་ནས། དེའི་ཐུན་དེའི་ནང་ན་འདུག་ཚོད་ཀྱང་མི་འདུག གཅིག་ངོ་གཅིག་ལྟ་བྱས་ཏེ་བསྒོངས་བསྡད་དུས་དགོད་ཁ་འདྲ་ཞིག་ཀྱང་ཤོར་ཡོང་བར་འདུག་ཟེར་བ་ཡོད་སྲིད་ཀྱང་། དེ་དག་ལ་ཐ་མལ་གྲོང་ཚིག་གི་ཕལ་སྐད་ངོ་མ་ཡིས་གོ་བརྡ་ཞིག་སྤྲད་ན། སྒོམ་ཟེར་རྒྱུ་དེ་སངས་རྒྱས་ཀྱི་ཐུགས་བསྒོམ་དགོས་ཤིང་། སངས་རྒྱས་ཀྱི་ཐུགས་ཨེ་ཤེས་བལྟས་ཏེ་སྦྱངས་སྦྱངས་པའི་མཐར་ཤེས་ནས་ལོབས་ཏེ་བྱང་ཆ་ཡག་པ་ཞིག་ཕོག་ནས་བྱང་ཡག་རེད་སོང་དུས་སངས་རྒྱས་སུ་འགྱུར་བ་ཡིན། ད་ལྟ་དེ་ལྟར་ཨེ་འགྲུབ་ལྟ་བཞིན་ཡོད་པ་ཡིན། འོ་ན་སངས་རྒྱས་སུ་འགྱུར་སོང་ན་ཅི་ཞིག་ཕན་ཐོགས་ཡོད་པ་ཡིན་སྙམ་ན། སངས་རྒྱས་སུ་འགྱུར་སོང་དུས་རང་སྡུག་བསྔལ་དང་བྲལ་བས་མི་ཚད། གཞན་སྡུག་བསྔལ་ལས་སྐྱོབ་ཐུབ་པའི་ནུས་པ་དང་ལྡན་པ་ཡིན། འདིའི་སྐད་ཆ་འདི་ཆོས་སྐད་ཀྱི་ཐོག་ནས་བཤད་ན། འབྲས་བུ་དེ་རྒྱུའི་རྗེས་སུ་བྱེད་པ་ཉིད་ཀྱི་ཕྱིར་ན། འབྲས་བུ་དང་རྗེས་སུ་མཐུན་པའི་ལམ་ལ་བསླབ་དགོས་པར་གསུངས་ཤིང་། སངས་རྒྱས་ཞེས་པ་དེ་ཡར་མཐོ་ས་སྤྲིན་དཀར་པོ་འགྲོ་སའི་ཡན་དང་ཡན་གྱི་ཉི་ཟླ་གཉིས་ཀྱི་ཁ་མཚམས་ཤིག་ལ་ཡོད་པ་དང་། སེམས་ཅན་ཟེར་རྒྱུ་བོ་མར་མན་ཆོད་ས་དོག་མོའི་མན་ལ་གནས་པ་ཞིག་ཏུ་ཡོད་ནས། དེ་གཉིས་ཀྱི་བར་ལ་རྒྱང་ཐག་གིས་ཕྱེས་སོང་བའི་འཁོར་འདས་ལྟེ་ཆད་སོང་བ་དེ་འདྲ་ཞིག་ག་ལ་ཡིན། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་གསུངས་པ་བཞིན་དུ་དཀོན་མཆོག་གསུམ་རང་གི་སེམས་ཉིད་གཅིག་ལ་ཚང་། དཀོན་མཆོག་གསུམ་ཡང་མཐར་གཏུགས་ན་སངས་རྒྱས་ཆོས་ཀྱི་སྐུ་ལ་འདུས་པས་ན། ཁམས་བདེ་གཤེགས་སྙིང་པོ་དྲི་མ་ཡེ་དག་དང་། སངས་རྒྱས་ཀྱི་ས་བོན་རང་ལ་ཡོད་པ་ཡིན་པས་ན་བསྒོམས་ན་སངས་རྒྱས་རང་ལས་འགྲུབ་ཏུ་ཡོད་པ་ཡིན། སེམས་ཅན་སྡུག་བསྔལ་བ་ལ་མི་བཟོད་པའི་བློ་མ་ལག་རྡུམ་མའི་བུ་ཆུས་ཁྱེར་བ་ལྟ་བུ་ཞིག་སྐྱེས་པ་ཡིན་ན་ཐེག་པ་ཆེན་པོའི་རིགས་སད་པ་ཡིན། ཆོས་ཟབ་མོའི་སྣོད་དུ་གྱུར་པའི་གདུལ་བྱའི་ཆ་རྐྱེན་ཚང་ཡོང་བ་རེད། བསྒོམས་ན་སངས་རྒྱས་འགྲུབ་པར་བཤད་ཡོང་དུས། ཚོགས་མ་བསགས་སྒྲིབ་པ་མ་སྦྱངས་ན་སངས་རྒྱས་ཐོབ་ཟེར་རྒྱུ་ཞིག་གོ་མ་མྱོང་ཡང་སྙམ་སྲིད་ཀྱང་། ཐབས་མང་དཀའ་བ་མེད་པའི་མྱུར་ལམ་ནས། དམིགས་བཅས་བསྐྱེད་རིམ་གྱིས་བསོད་ནམས་ཀྱི་ཚོགས་རྫོགས། དམིགས་མེད་རྫོགས་རིམ་གྱིས་ཡེ་ཤེས་ཀྱི་ཚོགས་རྫོགས། རྩོལ་མེད་བྱ་བྲལ་རྫོགས་ཆེན་གྱི་ལམ་ནས་ཀུན་ཏུ་བཟང་པོས་དགེ་བ་སྣ་གཅིག་མ་བྱས་པར་རང་རིག་རང་ངོ་ཤེས་པས་སྐད་ཅིག་ལ་གྲོལ་ཞེས་པ་དེ། ཟག་མེད་རང་ངོ་ཤེས་པའི་དགེ་ཚོགས་ཀྱིས་ཚོགས་གཉིས་སྟབས་གཅིག་ཏུ་རྫོགས་པའི་དོན་རེད། རང་འདོད་ཡིད་བྱེད་ཀྱི་བློ་དང་མ་བྲལ་བའི་ཟག་བཅས་དཀར་པོའི་ཕྱོགས་ཀྱི་འདུས་བྱས་ཀྱི་དགེ་རྩ་ཞིག་སྒྲུབ་ཁུལ་བྱེད་པ་དེ་འཁོར་བ་སྒྲུབ་པའི་རྒྱུ་ཙམ་ཞིག་ལ་མི་འདའ། རྫོགས་ཆེན་གྱི་མ་བཅོས་རང་བཞག་གི་ཆོས་སྐུའི་དགོངས་པ། རིག་སྟོང་སྤྲོས་པ་དང་བྲལ་བ། སྟོང་གསལ་འགག་མེད། ཡིད་དཔྱོད་ལས་འདས་པའི་ཐོག་ལ་ཞོག་ཅེས་བརྗོད་དུས་ཀྱང་སྒོམ་དེ་འདྲ་ཞིག་མ་བདེའོ་སྙམ་ན། དཔེ་ཆའི་ཤོག་སྣེ་རེ་འཕུར་མྱོང་མཁན་ཞིག་ཡིན་ན་ཉེས་པ་ལྔ་སྤོང་འདུ་བྱེད་བརྒྱད་བསྟེན་པའི་སེམས་གནས་ཀྱི་ཐབས་ལ་བསླབ་དགོས་པས། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང་། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་པའི་ཉེས་པ་ལྔ་དེ་སྤངས་ནས། དད་འདུན་རྩོལ་བ་ཤིན་སྦྱངས་དང་། །དྲན་པ་ཤེས་བཞིན་སེམས་པ་དང་། །བཏང་སྙོམས་འདུ་བྱེད་བརྒྱད་ཡིན་ནོ། །ཞེས་པའི་སྤོང་བྱེད་དེ་དག་བསྟེན་ནས། འཇོག་དང་རྒྱུན་འཇོག་བླན་ཏེ་འཇོག །ཉེར་འཇོག་དུལ་བྱེད་ཞི་བར་བྱེད། །རྣམ་ཞི་རྩེ་གཅིག་མཉམ་པར་འཇོག །སེམས་གནས་པ་ཡི་ཐབས་དགུའོ། །ཞེས་པའི་ཐབས་དེ་དག་ལ་བརྟེན་ནས། དང་པོར་སེམས་གནས་བསྒོམས་ན། དེ་ནས་ཞི་ལྷག་ཟུང་དུ་འབྲེལ་བའི་ལམ་ཡང་དག་པ་ཞིག་རྙེད་དེ། སྟོང་ཉིད་སྤྲོས་བྲལ་བྱར་མེད་གཅིག་གི་ཀློང་ན། སྣང་སྟོང་ཐབས་ཤེས་ཟུང་འཇུག་གི་རྒྱལ་བ་དགྱེས་པའི་ལམ་བཟང་རྙེད་རྒྱུ་ཡང་ཡོད་སྲིད་ཅིང་། སྤྱིར་ན་བསམ་གཏན་གྱི་གནས་སྐབས་ཀྱི་གནས་ལུགས་སེམས་ཀྱི་ལམ་བྱེད་འདི་དང་། ཤེས་རབ་ཀྱི་གནས་སྐབས་ཀྱི་རིག་ཐོག་ལ་སྤྲོས་པ་རང་ཞིག་ཏུ་སོང་བ་འདི་གཉིས་ཀའི་ཁྱད་པར་སྒོམ་པ་གསར་རྙིང་ཚང་མས་འབྱེད་དགོས་པ་ཞིག་ཡིན། གྲུབ་མཐས་བློ་མ་བསྒྱུར་བ་ཞེས་པ་དེ་མིན་ཡང་ཐོས་བསམ་གྱིས་ཅི་ཡང་སྦྱོང་མ་མྱོང་བའི་དད་པ་ཅན་ཞིག་ཡིན་ན་སྒོམ་ཅུང་བདེ་བའང་ཡོད། འོ་ན་དང་པོའི་དུས་སུ་སྒོམ་ཇི་ལྟར་བྱེད་ཅེ་ན། མཆོག་གསུམ་ལྷ་དང་བླ་མ་ལ་དད་པ་མི་ཕྱེད་པ་དང་གཅིག སེམས་ཅན་སྡུག་བསྔལ་ཅན་ལ་མི་བཟོད་པའི་སྙིང་རྗེ་སྒོམ་པ་དང་གཉིས། ཡེངས་མེད་འཛིན་པ་བྲལ་བའི་སྒོམ་གྱི་ངོ་བོ་སྐྱོང་བ་དང་གསུམ་པོ་དེ་དབྱེར་མེད་གཅིག་འདྲེས་བྱས་ནས་སྡོད་ཤོག་དང་། གོམ་པ་རིམ་བགྲོད་ཀྱི་རིམ་པས་བླ་མའི་མན་ངག་དང་བསྟུན་ནས། ངོ་ཤེས། ཐག་ཆོད། གདེང་ཐོབ་ནས་ངེས་ཤེས་རང་ལས་རྙེད་པའི་ས་ཞིག་ལ་ཐོན་དུ་ཡོད་པ་ཡིན། གོང་ནས་བཤད་པའི་དང་པོར་འདོད་སེམས་རྩེ་གཅིག་པ་ཞིག་ནས་མགོ་བཟུང་སྟེ། བསམ་གཏན་དང་པོའི་ཉེར་བསྡོགས་མི་ལྕོགས་མེད་ནས་དངོས་གཞི་ཙམ་ཁྱད་སོགས་ཀྱི་ས་དྲུག་དང་། གཟུགས་མེད་སྔ་མ་ གསུམ་པོ་བསྣན་པའི་བསམ་གཏན་ས་དགུ་དང་། འགོག་སྙོམས་སོགས་ཀྱི་རིམ་པ་ལས་བརྒལ་ནས་ཚོགས་བརྒྱད 
་སེམས་ལས་འདས་པའི་ཡེ་ཤེས་མཐའ་གཉིས་སྤངས་པའི་མྱང་འདས་ཀྱི་ཡེ་ཤེས་སྒྲུབ་རྒྱུ་ལ་བློ་ཁ་ཕྱོགས་དགོས་པ་ཡིན། མདོར་ན་ཐམས་ཅད་ཀྱིས་ངས་ནི་ཤེས་མི་འོང་སྙམ་པ་དང་། ངས་ནི་དེ་ལྟར་འགྲུབ་པའི་རེ་བ་མེད་དོ་སྙམ་དུ་མི་སེམས་པར་བརྩོན་འགྲུས་གྱིས་དང་ཉིན་རེ་བཞིན་དུ་བསྐྱེད་རྒྱག་རྒྱུ་ཡོད་པ་ཡིན། མ་བསྒོམས་སངས་རྒྱས་རྒྱལ་བས་མ་གསུངས་སོ། །ཞེས་གསུངས་པ་ཡིན་པས་མ་བསྒོམས་པར་སངས་རྒྱས་ཐོབ་ཐབས་ཤིག་དང་། མ་བསྒོམས་པར་སྡུག་བསྔལ་ལས་གྲོལ་ཐབས་ཤིག་མེད་པས་བསྒོམ་དགོས་སོ། །ཅི་བྱས་ཀྱང་འགྲུབ་པར་མི་འདུག་པས་ད་ནི་རེ་བ་མི་འདུག་གོ་སྙམ་མཁན་ཡང་ཡོད་སྲིད་ན། དེ་དག་གིས་སྐབས་གཅིག་གི་རིང་ལ་ལམ་ཆུང་བའི་སྟངས་བྱས་ནས་སྒྲིབ་སྦྱོང་ལ་འབད་དགོས། འུ་ཚོ་ལ་མཆིལ་ལྷམ་སྒྲོག་གུ་ཅན་དབྱི་རྒྱུ་མེད་ཀྱང་། དགེ་འདུན་འདུས་པའི་གཙུག་ལག་ཁང་ལ་བྱི་དོར་དང་། སྐོར་ལམ་འཕྱག་རྒྱུ་དང་བདེ་བར་གཤེགས་པའི་སྐུ་གཟུགས་དང་དགེ་འདུན་ལ་ལུས་ཀྱི་བསྙེན་བཀུར་གྱིས་དང་། བསམ་པ་དག་ན་རྡུལ་དང་དྲི་མ་དག་ནས་ཉིན་ཞིག་ལ་རིགས་སད་པའི་རེ་བ་ཡོད་པ་ཡིན། དེ་ཡང་བརྙས་སུ་ག་ལ་ཡོད་དེ། ཆུ་ཀློང་ཆེན་པོའི་རྒྱུད་ལས། དོན་དམ་ལྷན་ཅིག་སྐྱེས་པའི་ཡེ་ཤེས་ནི། །ཚོགས་བསགས་སྒྲིབ་པ་དག་པའི་ལག་རྗེས་དང་། །རྟོགས་ལྡན་བླ་མའི་བྱིན་རླབས་ཁོ་ན་ལས། །ཐབས་གཞན་བསྟེན་པ་རྨོངས་པར་ཤེས་པར་བྱ། །ཞེས་གསུངས་ཡོད་པ་ཡིན། གནངས་གཞེས་ཤིག་ལ་ལུས་སྦྱོང་རན་པ་ཡིན། རྣམ་པ་ཚང་མ་དང་། ཁྱད་པར་དུ་ན་གཞོན་གྱི་རིགས་དང་། ལུས་ཁམས་བདེ་ཐང་ཅན་ཚོས་ཨང་རག་དང་འབེབ་གདན་ད་ལྟ་ནས་གྲ་སྒྲིག་མཛོད། ལུས་སྦྱོང་གི་མི་ཚད་རྩ་རླུང་ལའང་དགོས་པ་ཡིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་ཏེ་རང་གཞན་གྱི་དུས་གསུམ་བསགས་ཡོད་ཀྱི་དགེ་རྩ་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་པའི་མཐུས། སྤྱིར་སངས་རྒྱས་ཀྱི་བསྟན་པ་རིན་པོ་ཆེ་ལུང་དང་རྟོགས་པའི་བདག་ཉིད་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་གོང་དུ་འཕེལ་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་དམ་པ་སྔ་རབས་གཤེགས་པ་རྣམས་ཀྱི་དགོངས་པ་ཡོངས་སུ་རྫོགས། ད་ལྟར་བཞུགས་པ་རྣམས་ཀྱི་སྐུ་ཚེ་ཞབས་པད་ཡུན་རིང་དུ་བརྟན། དགེ་འདུན་འདུས་པའི་སྡེ་ཐམས་ཅད་ཐུགས་མཐུན། ཁྲིམས་གཙང་། བསླབ་པ་གསུམ་གྱི་ཡོན་ཏན་གོང་ནས་གོང་དུ་འཕེལ། འཇིག་རྟེན་གྱི་ཁམས་ཀུན་ཏུ་ཆར་ཆུ་དུས་སུ་འབེབས། ལོ་ཕྱུགས་རྟག་ཏུ་ལེགས། མི་ནད་དང་ཕྱུགས་ནད་འཁྲུག་རྩོད་ཐམས་ཅད་རྒྱུན་ཆད། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པའི་ཕྱིར་དང་། བདག་ཅག་རྣམས་ཀྱི་ཚེ་འདིའི་ཕ་མ་གཉིས་དང་། དགྲ་བགེགས་གཉིས་ཀྱི་གཙོ་བྱས་པའི་བཟང་འབྲེལ་ངན་འབྲེལ་ཐོགས་པའི་མཐའ་ཡས་སེམས་ཅན་ཐམས་ཅད་མཐར་ཐུག་རྣམ་པ་ཐམས་ཅད་མཁྱེན་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པ་དང་། དེ་མ་ཐོབ་ཀྱི་བར་དུ་ཡང་མཐོ་རིས་ཡོན་ཏན་བདུན་དང་ལྡན་པའི་ལུས་རྟེན་ཁྱད་པར་ཅན་ཞིག་རྙེད་ནས་ཐེག་པ་ཆེན་པོའི་ཆོས་ལ་ཚུལ་བཞིན་དུ་སྤྱོད་པའི་སྐལ་བ་དང་ལྡན་པའི་ཕྱིར་དུ་རྗེ་བཙུན་འཇམ་དཔལ་དབྱངས་དང་འཕགས་པ་ཀུན་ཏུ་བཟང་པོ་ལ་སོགས་པས་འགྲོ་བའི་དོན་དུ་ཇི་ལྟར་བསྔོས་པ་བཞིན་དུ་བསྔོ་བའི་ཐུགས་འདུན་གནང་བར་ཞུ། །བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་རླབས་འཁྲུགས་པ་ཡི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག།