ཉིན་གཉིས་པའི་ཆོས་ཁྲིད།
མཆོད་བརྗོད་དུས་གསུམ་སངས་རྒྱས་སོགས་ཉིན་སྔ་མ་བཞིན་གསུངས་ནས།
དེ་ཡང་གཅོད་ཡུལ་ཟབ་དོན་ཐུགས་ཀྱི་སྙིང་པོའི་གཞུང་ལས། ཀུན་མཁྱེན་འདོད་པས་སྐྱབས་སུ་འགྲོ་དང་གསོལ་བ་གདབ། །སེམས་བསྐྱེད་མཆོག་ལྡན་འགྲོ་ཀུན་ཐར་བ་ཐོབ་པའི་ལམ། །ཞེས་གསུངས་པ་ལྟར། སྐྱབས་འགྲོའི་རྨང་གཞི་བརྟན་པོས་གཞི་བཟུང་ནས། ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་དེ་དག་ལམ་འདིའི་ཐོག་མཐའ་བར་གསུམ་ལ་འབྲལ་མི་རུང་བ་ཡིན་ཏེ། ང་མེད་ལ་ང་རུ་ཞེན་ཅིང་། བདག་མེད་ལ་བདག་ཏུ་བལྟས་ནས། སྲིད་པ་ཁམས་གསུམ་འཁོར་བའི་སྡུག་བསྔལ་རྒྱུ་འབྲས་ལ་སྤྱོད་པའི་སེམས་ཅན་སྤྱི་དང་། ཁྱད་པར་དུ་ཆགས་སྡང་ཨ་འཐས་སུ་སོང་། འཁྲུལ་སྣང་དགྲ་རུ་ལྡང་བའི་སྣང་སྲིད་ལྷ་འདྲེའི་རིགས་གྱུར་གྱི། ཕ་མར་གྱུར་པའི་སེམས་ཅན་འདི་དག་ཐམས་ཅད་གནོད་འཚེ་གདུག་པའི་བསམ་སྦྱོར་ཐམས་ཅད་དང་བྲལ་ནས། ཞི་བ་བྱང་ཆུབ་ཀྱི་སེམས་རྒྱུད་ལ་འབྱོངས་ཏེ། གཏན་བདེ་རྫོགས་པའི་སངས་རྒྱས་ཀྱི་གོ་འཕང་དམ་པར་འགོད་པའི་ཆེད་དུ། བདག་གིས་ད་རེས་བཀའ་ཟབ་མོ་ཤེར་ཕྱིན་གྱི་དགོངས་པ། དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པུའི་ལམ། མན་ངག་བདུད་ཀྱི་གཅོད་ཡུལ། གྲུབ་ཐོབ་རྟོགས་ལྡན་ཐམས་ཅད་ཀྱིས་དངོས་གྲུབ་ཐོབ་པའི་གནས། བཀའ་མ་དང་གཏེར་མ། ཕོ་བརྒྱུད་དང་མོ་བརྒྱུད། བཀའ་བརྒྱུད་དང་ཉམས་བརྒྱུད། ཁྲིགས་ཅན་དང་ཁྲིགས་མེད་ཀྱི་རིམ་པ་ཟབ་རྒྱས་ཀྱི་བརྒྱུད་པའི་བཤད་སྲོལ་མཐའ་ཡས་པས་གཅིག་ཏུ་མ་ངེས་ཀྱང་། རྒྱལ་བ་རྫོགས་པའི་སངས་རྒྱས་ནས་རྗེ་བཙུན་བྱམས་པ་མགོན་པོ། ཐོགས་མེད། དབྱིག་གཉེན། སློབ་དཔོན་ཨརྱ་དེ་བ། དེས་ཕ་གཅིག་དམ་པ་སངས་རྒྱས་ནས་མ་གཅིག་ལབ་ཀྱི་སྒྲོན་མ་ལ་རིང་བརྒྱུད་དང་ཉེ་བརྒྱུད་ཀྱིས་བརྒྱུད་པའི་གཅོད་ཀྱི་གདམས་པ་ཐམས་ཅད་གཅིག་ཏུ་བསྡུས་པ། ཕྱི་ལྟར་ན་ཕར་ཕྱིན། ནང་ལྟར་ན་གསང་སྔགས། གསང་བ་ལྟར་ན་བླ་མེད་ཀྱི་རྒྱུད་སྡེའི་གནད་གསང་འདུས་པ། འདི་ཉིད་ཉམས་སུ་བླངས་ཏེ་གྲུབ་རྟགས་ཕྱི་དུས་ལ་མི་རེ་བ། ཚེ་འདིའི་ཐོག་ནས་མཆོག་ཐུན་མོང་གི་དངོས་གྲུབ་ཐོབ་པ་ཞིག་ཅི་ནས་ཀྱང་བྱ་སྙམ་པའི་དགོངས་དོན་བྱང་ཆུབ་མཆོག་ཏུ་ཐུགས་བསྐྱེད་པ་དང་། ཐབས་ཆེན་གསང་བ་སྔགས་ཀྱི་དགོངས་སྤྱོད་དང་མ་བྲལ་པའི་ཀུན་སློང་ཀུན་སྤྱོད་རྣམ་པར་དག་པས་གསན་དགོས། གང་ཞིག་གསན་པར་བྱ་བ་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཆོས་སྡེ་ལས་བྱོན་པའི་གཅོད་ཡུལ་མཁའ་འགྲོའི་གད་རྒྱངས་གསན་བཞེས་ཀྱི་སྐབས་ཡིན་ན། འདི་ཉིད་འཆད་པ་ལ་དོན་གསུམ་གྱིས་བཤད་དེ། སྤྱི་ཁྲིད་དང་། ཉམས་ཁྲིད་དང་། ཞལ་གདམས་ཏེ་གནད་གསུམ་དུ་བཟུང་ནས། སྤྱི་ཁྲིད་ཀློང་ཆེན་དགོངས་པའི་གསང་མཛོད་ཀྱིས་རྒྱབ་སྐྱོར། ཉམས་ཁྲིད་ལག་ལེན་ངོ་མའི་ཁོག་གཞུང་དང་འབྲེལ་ཏེ། ཞལ་གདམས་གེགས་སེལ་བོགས་འདོན་གྱིས་ཟུར་རྒྱན་ནས། སྦྱོར་དངོས་རྗེས་གསུམ་ཚང་བའི་ཆིངས་ཀྱིས་བཅིངས་ནས་བཤད་རྒྱུ་ཡིན། ཁ་རྩང་གོང་དུ་མཚན་སྨྲོས་པ་དང་ཕྱག་འཚལ་བ་སྔོན་དུ་བཏང་ནས་གཅོད་ཡུལ་སྤྱི་ཡི་གོ་དོན་གྱིས་ཁོག་ཕུབ་ནས། བྱེ་བྲག་གདམས་པ་འདི་ཉིད་ཀྱི་དགོས་དོན་ཁྱད་པར་དུ་བཤད་པ་ཡིན་ཏེ། དེ་ཡང་སྦྱོར་བ་བརྟུལ་ཞུགས་སྤྱོད་པའི་ཡོ་བྱད་ཀྱི་ཆས་བསགས་པ་ནས་བཟུང་སྟེ། དངོས་གཞིར་འཇུག་པའི་སྔོན་འགྲོའི་སྐབས་ཀྱི་ཟིལ་གནོན་དམིགས་པ་སྐོར་གསུམ་ལས་སྔ་གནོན་བཤད་པ་ཡན་ཆད་སོང་ཞིང་། བར་གནོན་གྱི་དམིགས་པའི་སྐབས་ནས་རང་ཉིད་གསང་བ་ཡེ་ཤེས་ཀྱི་མཁའ་འགྲོ་མ་ཆེ་ཆུང་སྲིད་པའི་གཏོས་དང་མཉམ་པ་རྣམ་འགྱུར་རྫོགས་པའི་སྐུར་བསྐྱེད་པའི་མཚམས་ནས། དེ་རིང་གཅོད་གཞུང་དངོས་ལ་ཐུག་ཡོད། འདི་ཡང་སྔོན་འགྲོ་དངོས་གཞི་རྗེས་གསུམ་གྱིས་འཆད་དེ། དང་པོ་སྔོན་འགྲོ་ལ་ཡང་བྲོ་བརྡུང་བ། ཅོག་བུ་འབུབས་པ་གཉིས། གཉིས་པ་དངོས་གཞི་ལུས་སྦྱིན་ལའང་ཚོགས་ཞིང་གསལ་འདེབས་པ། སྐྱབས་འགྲོ། སེམས་བསྐྱེད། མཎྜལ། བླ་མའི་རྣལ་འབྱོར་དང་བཅས་ཏེ། རང་ལུས་འདོད་ཡོན་གྱི་ཚོགས་སུ་བྱིན་གྱིས་རླབས་ནས། འགྱེད་བཞིའི་མགྲོན་ལ་མཆོད་སྦྱིན་བྱ་བ། རྗེས་བསྔོ་བ་དང་གསུམ་གྱི་འཆད་པ་ལས། དང་པོ་སྔོན་འགྲོ་བྲོ་བརྡུང་བ་ནི། མི་རྐང་གླིང་བུ་དྲག་ཏུ་འབུདཿ ལྟ་བའི་ངར་བསྐྱེད་བྲོ་བརྡུང་བྱཿ ཞེས་གསུངས་ཏེ། མཆོག་ཆེན་མི་རྐང་གི་གླིང་བུ་དྲག་པོའི་ཤུགས་ཀྱི་འབུད་པ་ལན་གསུམ་སུམ་གློག་གིས་འབུད་དགོས་པས། ཐེངས་དང་པོ་མཐོ་ལ་རིང་བའི་བརྡ་སྐད་ལ་རྔམ་བརྗིད་དཔའ་བོའི་གད་རྒྱངས། ཐེངས་གཉིས་པ་སྙན་ཞིང་འགྱུ་བའི་བརྡ་སྐད་ལ་མ་རྒྱུད་མཁའ་འགྲོའི་འགྱིང་གླུ། ཐེངས་གསུམ་པ་ཤུགས་འབྱུང་བཤུག་པའི་འབོད་བརྡ་ལ་རྣལ་འབྱོར་གསང་བའི་བརྡ་སྐད་ཅེས་བྱ། ཐེངས་གསུམ་འབུད་པ་འདི་དག་དྲང་དོན་དང་སྦྱར་ན། ཐེངས་དང་པོས་ལྷ་འདྲེ་ཟིལ་གྱིས་གནོན། བར་བས་ཐམས་ཅད་དབང་དུ་བསྡུས། གསུམ་པས་ཅི་བགྱིས་བཀའ་ཉན་གྱི་ལས་ལ་བཀོལ་བ་ཡིན། ཡང་ངེས་དོན་དང་སྦྱར་ན། འབུད་ཐེངས་དང་པོའི་རྔམ་བརྗིད་དཔའ་བོའི་གད་རྒྱངས་ཀྱིས་གཞི་བདེན་མེད་དུ་ཤེས་པ་སྟོང་ཉིད་ནམ་མཁའ་ལྟ་བུའི་ཀུན་ལ་ཁྱབ་པ་ཡིན་ལ། འབུད་ཐེངས་གཉིས་པ་མ་རྒྱུད་མཁའ་འགྲོའི་བརྡ་གླུས་ལམ་བྱར་མེད་ཀྱི་རང་རྩལ་ཐབས་མཆོག་བདེ་ཆེན་གྱི་དབྱིངས་ལ་སྦྱོར་བ་བྱས་ཏེ། ཐེངས་གསུམ་པ་རྣལ་འབྱོར་གསང་བའི་བརྡ་སྐད་ཀྱིས་འབྲས་བུ་སྤྲོས་མེད་ཀྱི་རིག་པ། རིག་སྟོང་དབྱིངས་དང་ཡེ་ཤེས་ཁ་སྦྱོར་གྱི་སྒྲོམ་ལས་གཅིག་ཀྱང་འདའ་བ་མེད་པའི་ངང་ལ་འཁོར་འདས་འུབ་ཆུབ་པ་ཡིན་པས། སྣང་ཞིང་སྲིད་པའི་ལྷ་མ་སྲིན་སྡེ་བརྒྱད། འདྲེ་བདུད་འབྱུང་པོ་རྒྱལ་འགོང་འཁྱམ་པོ་ཡན་ཆད། དང་པོ་འབྲོང་ཁྱུ་རྫ་ནས་འདྲོགས་པ་ལྟར་འུར་གྱིས་ཞོགས། བར་དུ་ཤ་རུལ་ལ་སྦྲང་མ་འཁོར་བ་བཞིན་རང་དབང་མེད་པར་འདུས། ཐ་མར་རྒྱལ་ཕྲན་བཙན་པོའི་མངའ་འོག་ལ་མཐོ་དམན་ཐམས་ཅད་ལུས་པོ་འདར་ཆམ་མེ། མགོ་འཕང་དམའ་ཞུམ་མེ་ཡོད་པ་ལྟར་རྣལ་འབྱོར་བའི་བཀའ་ལ་ཉན་ཞིང་འདུམ་པར་བསམ། དེ་ནས་ལྟ་བའི་ངར་བསྐྱེད་དེ་བྲོ་བརྡུང་བར་བྱ་བ་ལ། དང་པོ་བྲོ་ཡི་རྒྱུད་བསྐུལ་ནི། ཕཊཿ འཇིགས་མེད་བརྟུལ་ཞུགས་སྤྱོད་པའི་རྣལ་འབྱོར་ངསཿ འཁོར་འདས་མཉམ་པར་བརྡལ་བའི་དགོངས་སྤྱོད་ཀྱིསཿ བདག་འཛིན་ལྷ་འདྲེའི་སྟེང་དུ་བྲོ་ཞིག་རྡུངཿ གཉིས་འཛིན་འཁོར་བའི་རྣམ་རྟོག་རྡུལ་དུ་རློགཿ རྩ་བརྒྱུད་རིག་འཛིན་བླ་མ་བྲོ་ལ་བྱོནཿ ཡི་དམ་དཔའ་བོ་རྒྱ་མཚོ་བྲོ་ལ་བྱོནཿ མཁའ་འགྲོ་གནས་ཉུལ་མ་ཚོགས་བྲོ་ལ་བྱོནཿ བརྟུལ་ཞུགས་ལམ་དུ་ལོངས་པར་བྱིན་གྱིས་རློབསཿ ཞེས་གསུངས་ཏེ། ཐོག་མར་ཕཊ་ཅེས་པའི་ཡི་གེའི་ཕཊ་སྒྲ་ཞིག་ཡོང་བ་འདི། ཕ་ཐབས་ཆེན་སྟོང་ཉིད་ཀྱི་ཡེ་ཤེས། ཊ་ཤེས་རབ་བདེ་ཆེན་གྱི་རང་གཟུགས། དེ་གཉིས་ཀ་གཅིག་ཏུ་བསྡུས་པའི་ཕཊ་གཉིས་མེད་ཐབས་ཤེས་ཟུང་འཇུག བདེ་སྟོང་མཉམ་པ་ཆེན་པོས་གཟུང་འཛིན་དབྱིངས་སུ་ཞི་ཞིང་། བདག་འཛིན་རྩད་ནས་གཅོད་བྱེད་ཀྱི་ཡི་གེའི་སྒྲ་སྐད་དུ་གྲུབ་པ་ཡིན། ཇི་ལྟར་གྲུབ་ཅེ་ན། གནས་ལུགས་དོན་གྱི་ཡི་གེ་དབྱིངས་དོན་དམ་ཆོས་ཉིད་ཀྱི་ངོ་བོ། ལུས་གནས་རྩ་ཡི་ཡི་གེ་ཐབས་ཤེས་དབྱངས་དང་གསལ་བྱེད་ཀྱི་རྟེན་ལ་གནས་པ་དེ། བརྗོད་པ་སྒྲ་ཡི་ཡི་གེ་རྒྱུ་རྩ་ཡིག་རླུང་གིས་བསྐྱོད་དེ། རྐྱེན་ལྕེ་དང་ཀན་ལ་སོགས་པའི་བྱེད་པས་སྒྲ་ཚིག་ལ་འཕོས་ཏེ། མཐར་ཐུག་འབྲས་བུའི་ཡི་གེ་གྲགས་སྟོང་རང་བྱུང་གི་གསུང་ལ་དབང་བསྒྱུར་བ། དེ་ལྟ་བུའི་ཕཊ་སྒྲ་ཡིས་དབྱིངས་ན་བཞུགས་པའི་རྩ་གསུམ་རྒྱ་མཚོའི་ཐུགས་རྒྱུད་རང་དབང་མེད་པར་བསྐུལ་ཐུབ་པའི། ཐབས་ཆེན་དཔའ་བོའི་དགྱེས་གླུ་མཁའ་འགྲོ་གསང་བའི་བརྡ་སྐད་ཀྱིས་འགོ་བཟུང་སྟེ། ཐུགས་རྒྱུད་བསྐུལ་བའམ་ཚོགས་ཞིང་སྤྱན་འདྲེན་ནམ་བྱིན་འབེབས་པ་འདི་ཉིད་འབྱུང་བ་ཡིན། དེའི་ཚིག་སྔ་མར། འཇིགས་མེད་བརྟུལ་ཞུགས་སྤྱོད་པའི་རྣལ་འབྱོར་ངས། །འཁོར་འདས་མཉམ་པར་བརྡལ་བའི་དགོངས་སྤྱོད་ཀྱིས། །གསུངས་ཏེ། འཇིགས་ཤིང་སྐྲག་པའི་ཡུལ་ནི་བདུད་བཞི་ཡིན་ལ། བདུད་བཞི་ངོས་འཛིན་ཐེག་པ་སྤྱི་སྐད་ལྟར་ན། ཉོན་མོངས་ཕུང་པོ་འཆི་བདག་ལྷས་བུའི་བདུད་བཞི་ཡིན་ཏེ། ཉོན་མོངས་དུག་ལྔའི་བདུད་ཀྱིས་དགེ་བ་ལ་བར་དུ་གཅོད་པར་བྱེད། ཕུང་པོའི་བདུད་ཀྱིས་ལུས་རྒས་པ་དང་ན་བས་རྒུད་པར་བྱེད། འཆི་བདག་གི་བདུད་ཀྱིས་འཆི་བའི་རྐྱེན་ལ་བརྟེན་ནས་གནས་པ་ཚེ་ཡི་བར་དུ་གཅོད་དེ་སྲོག་འཕྲོག་པར་བྱེད། སྐྱེ་འཆི་ཁ་བརྒྱུད་ནས་ཉེར་ལེན་གྱི་ཕུང་པོ་ལ་རྟེན་བཅས་ནས། ཁམས་གསུམ་མམ་སྲིད་གསུམ་གྱི་སེམས་ཅན་ལ། འཇིགས་པ་དེ་བས་ཆེ་མེད་པའི་བདུད་བཞི་ཡིན་ནོ། །ཨ་མ་ཇོ་མོའི་ཆོས་ལུགས་འདིའི་བདུད་བཞིའི་ངོས་འཛིན་ཚུལ་ལ་ཅུང་ཟད་མི་འདྲ་བ་ཡོད་ཀྱང་དོན་ལ་ཁྱད་པར་མེད་དེ། ཐོགས་བཅས་བདུད་དང་ཐོགས་མེད་བདུད། དགའ་བྲོད་བདུད་དང་སྙེམས་བྱེད་བདུད། །ཅེས་གསུངས་ཏེ། ཐོགས་བཅས་ཀྱི་བདུད་གང་ལ་ངོས་འཛིན་ན་འབྱུང་བཞིའི་གནོད་པ། ནད་དང་སྡུག་བསྔལ་གྱི་རྐྱེན། དུག་དང་མཚོན་ཆ། དགྲ་རྐུན་གཅན་གཟན། རི་བྲག་གཡང་ས་ལ་སོགས་པ་མི་འདོད་བཞིན་དུ་རང་དབང་མེད་པར། འཇིག་རྟེན་པའི་ལུས་སེམས་ཀྱི་ཐོག་ལ་ཡོང་བཞིན་པའི། གཙོ་བོ་དབང་པོའི་ཡུལ་དུ་སྣང་བ་རྣམས་ཡིན། ཐོགས་མེད་ཀྱི་བདུད་ནི། ཕྱི་བདུད་ལྷ་འདྲེ་འབྱུང་པོ། ནང་བདུད་ཉོན་མོངས་དུག་ལྔ། གཞན་ཡང་ན་ཚ་སྡུག་བསྔལ་ལ་སོགས་པའི་འབྱུང་རྐྱེན། གཙོ་བོ་ཡུལ་གྱི་མྱོང་ཚོར་ཕྲ་རགས་འདི་དག་ཡིན། དགའ་བྲོད་བདུད་ནི། གཅོད་ཀྱི་གདམས་པ་འདི་ལྟ་བུ་ཉམས་སུ་བླངས་པས། ཕྱི་རྟགས་བདུད་དང་འདྲེ་ཡིས་མི་ཚུགས་ཤིང་ནད་དང་གནོད་པ་ཡང་ཇེ་ཉུང་། ནང་རྟགས་ནུས་པ་བྱིན་རླབས་ཅུང་ཙམ་ཡོད་ཅིང་། བཀུར་སྟི་གུས་འདུད་བྱེད་མཁན་ཇེ་མང་དང་། ཟང་ཟིང་གི་འདུ་བ་དང་བསོད་ནམས་སྙན་གྲགས་ཇེ་དགའ། གསང་རྟགས་ཉམས་རྟོགས་ཀྱི་ཡོན་ཏན་གོང་དུ་འཕར་བྱུང་ཟེར་བ་དཀའ་ཡང་འདི་དང་འདི་བཞིན་བྱས་ན་རེད་ཀྱིན་འདུག ད་དུང་འདི་བཞིན་ཡོན་ཏན་ཡར་གོང་དུ་འཕེལ་ན། འདུ་བ་རྣམ་གསུམ་དབྱར་གྱི་མཚོ་ལྟར་འཁྱིལ། འབར་བ་རྣམ་གསུམ་དུས་མཐའི་མེ་བཞིན་འབར་མ་ཐུབ་རུང་། རང་ཉིད་སྐྱིད་འདུག་ཆོག་འདུག་བསམ་ནས་རེ་བ་འདོད་པ་དང་བཅས། དགའ་བ་བྲོད་པ་དང་བཅས་པས་ཕན་ཡོན་གྱི་འབྲས་བུ་ལ་དམིགས་ནས་གཅོད་བྱེད་པ་དེ་ལ་དགའ་བྲོད་ཀྱི་བདུད་ཅེས་བྱ། སྙེམས་བྱེད་ཀྱི་བདུད་ནི། སྙེམས་བྱེད་ཅེས་པ་ང་བདག་ཞེན་འཛིན་གྱི་མདུད་པ་ནང་ནས་མ་ཁྲོལ་པ་དེ་ཡིན། ང་ད་རེས་དུར་ཁྲོད་ལུང་སྟོང་གཉན་དམིགས་ཀྱི་ས་ལ་སོང་ནས་གཉན་ས་ཞིག་གཅད་ན། ལྷ་དང་བླ་མ་མཆོག་གསུམ་རྩ་གསུམ་གྱིས་སྐྱབས་ནས་ང་ལ་བར་ཆད་ཕལ་ཆེར་མི་འོང་། གལ་ཏེ་ཡོང་ན་ཡང་ཟབ་མོ་གཅོད་ཡུལ་གྱི་གདམས་པ་ཡོད་ཅིང་། ཉམས་ལེན་གོམས་པའི་ཞེ་ཚོད་གང་ལ་གང་འཚམས་ཀྱང་ཡོད་པས། ལུས་སྦྱིན་གྱི་དམིགས་པ་རེ་བྱས་ན། དངོས་སུ་ཟ་འགྲོ་བ་ལྟ་བུའི་གནོད་ཐུབ་རྒྱུ་མ་རེད་བསམ་པ་སྙེམས་བྱེད་ཀྱི་བདུད་ཡིན། དེས་ན་ཐོགས་བཅས་ཀྱི་བདུད་ཚོགས་སྦྱོར་མན་ཆད་ཀྱི་ལམ་པ་ཞིག་ལ་མཚོན་ན། ས་ཐོབ་བདེན་པ་མ་མཐོང་བའི་འཇིག་རྟེན་པའི་ལམ་ཡིན་པས་རྟེན་གདོས་བཅས་ཀྱི་ལུས་འདི་དབང་ཆེ། བརྟེན་པ་སེམས་ལ་དབང་མ་ཐོབ་པས་འབྱུང་བ་བཞི་ལ་ཐོགས་པ་ཡིན། ཐོགས་བཅས་ཀྱི་བདུད་དེ་ཉིད་ཆོད་བཀའ་ཡང་ཚོགས་ཀྱི་ལམ་དང་སྦྱོར་བའི་ལམ་གྱི་རང་སའི་བར་ཆད་མེད་ལམ་སོགས་རིམ་བགྲོད་ཀྱིས་མཐོང་ལམ་ཐོབ་པ་ན། ས་ཐོབ་འཇིགས་པ་ལྔ་དང་བྲལ། །ཞེས་གསུངས་པ་ལྟར་དེའི་དུས་ཐོགས་བཅས་ཀྱི་བདུད་ཀྱང་ཆོད་པ་ཡིན། དེའི་འཇིགས་པ་མེད་པའི་བརྟུལ་ཞུགས་ཀྱི་སྤྱོད་པ་ད་ལྟ་ནས་འཆང་སྟེ། ཐོགས་མེད་ཀྱི་བདུད་ས་མ་ཐོབ་པའི་རྣལ་འབྱོར་པས་ཀྱང་ད་ལྟ་ནས་གཅད་ཆོག་པས་རིམ་བཞིན་བཅད་ནས་ཆོད་དགོས། དགའ་བྲོད་ཀྱི་བདུད་ཡར་སངས་རྒྱས་ཐོབ་པའི་རེ་བ་དང་། མར་ངན་སོང་ལྷུང་བའི་དོགས་པ་མེད་པའི་ཉམས་ལེན་གྱི་གནད་བཟུང་ནས། སྙེམས་བྱེད་རེ་དོགས་དང་བྲལ་བའི་ངང་ནས། འཁོར་འདས་མཉམ་པར་བརྡལ་བའི་དགོངས་སྤྱོད་ཕྱི་འཇིགས་པའི་རྐྱེན་ལ་བརྟེན་ནས་ནང་འཇིགས་མཁན་གྱི་རྩ་བརྡར་ཆོད། སྟོང་པ་ཉིད་ལ་བལྟ་བའི་ཡུལ་མེད་ལྟ་མཁན་གྱི་བྱེད་པོ་མེད། ཡུལ་ཅིར་ཡང་མ་དམིགས་པ་ལ་བློས་གང་དུ་ཡང་མི་འཛིན་པའི་ངང་ལ་བཞག་པས། སྒོམ་དང་བསྒོམ་པ་བྱ་བ་ཞེས་པ་ཞིག་སོ་སོར་མ་གྲུབ། འཁོར་འདས་བཟང་ངན་དུ་བཞག་པའི་གཉིས་ཆོས་ཀྱང་མ་གྲུབ་པའི་ཆོས་ཉིད་ཆོས་སྐུའི་ངང་ལས་མ་འདས་པར། བདག་འཛིན་ལྷ་འདྲེའི་སྟེང་དུ་བྲོ་ཞིག་རྡུངཿ གཉིས་འཛིན་འཁོར་བའི་རྣམ་རྟོག་རྡུལ་དུ་རློགཿ ཅེས་གསུངས་ན། སྤྱིར་ན་སྲིད་རྩ་ངར་འཛིན་གྱི་འགོང་པོ་ནི་ང་དང་ང་ཡིར་འཛིན་པའི་བདག་འཛིན་ཡིན་ན། དེའི་རྩ་བ་མ་ཆོད་པས་འཁོར་བའི་འཁྲུལ་སྣང་འདི་བྱུང་བ་ཡིན། ཁྱད་པར་ཕུང་པོ་གཟན་བསྐྱུར་གྱི་གདམས་པའི་གནད་མ་ཟིན་ནས་ལུས་ལ་གཅེས་པར་འཛིན་པའི་བདག་འཛིན་གྱི་མཁན་པོ་ཡོད་པས། ཕྱི་རོལ་འཇིགས་གཟུགས་ཀྱི་ལྷ་འདྲེར་བཟོས་པའི་བདག་འཛིན་འཁྲུལ་སྣང་གི་ལྷ་འདྲེའི་སྟེང་དུ། ནམ་ཡང་ལྡང་བ་མེད་པའི་རྡོ་རྗེའི་རྟབས་བྲོ་ཞིག་བརྡུང་བས། བདག་གཞན་བཟང་ངན་འཁོར་འདས་ལ་སོགས་པའི་གཉིས་འཛིན་འཁོར་བའི་རྣམ་རྟོག་འཁྲུལ་སྣང་འཁྲུལ་འཛིན་དང་བཅས་པ། བདག་མེད་རོ་སྙོམས་ཆེན་པོའི་བརྟུལ་ཞུགས་ཀྱིས་ཐལ་བའི་རྡུལ་ཕྲན་བཞིན་དུ་དམིགས་མེད་དུ་རློག་པར་འགྱུར་བ་ལ། རྩ་བརྒྱུད་རིག་འཛིན་བླ་མ་བྲོ་ལ་བྱོནཿ ཡི་དམ་དཔའ་བོ་རྒྱ་མཚོ་བྲོ་ལ་བྱོནཿ མཁའ་འགྲོ་གནས་ཉུལ་མ་ཚོགས་བྲོ་ལ་བྱོནཿ ཅེས་གསུངས་ན། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོ་སྟེ་རྩ་བ་གསུམ་དང་། དེའི་ནང་གི་བླ་མ་ལ་མཚོན་ན་རྩ་བ་དང་ཡན་ལག་གི་བླ་མ། གཉིས་ལྡན་དང་གསུམ་ལྡན་ལ་སོགས་པ་བཀའ་དྲིན་གྱི་ངོས་ནས་སྦྱར་བའི་རྣམ་གྲངས་མང་ན། བཀའ་དྲིན་གསུམ་ལྡན་གྱི་བླ་མ་ནི་བསྟན་པ་སྤྱིའི་ལུགས་ལ་སྡོམ་གསུམ་ཐོབ་པ་ལ་གསུངས། བྱེ་བྲག་སྔགས་ལུགས་ལ་དབང་བསྐུར་རྒྱུད་བཤད་མན་ངག་གནང་མཁན་དང་། ཁྱད་པར་དུ་རང་སེམས་ཆོས་སྐུར་ངོ་སྤྲོད་མཁན་དེ་ལ་རྩ་བའི་བླ་མ་ཞེས་བྱ། དེས་ན་མཚོན་བྱེད་རྟགས་ཀྱི་བླ་མ་རྣམ་པ་མི་རུ་བྱོན་ནས་སྣང་སྤྱོད་རང་རེ་དང་མཐུན་པས་འདུལ་བར་མཛད་པ་དེ་ཉིད་ཡིན། མཚོན་བྱ་དོན་གྱི་བླ་མ་ནི་དེ་དག་གི་ཐུགས་མཆོག་དུས་གསུམ་རྒྱལ་བའི་དགོངས་པ་དང་སོ་སོར་མ་ཡིན་ཐ་མི་དད་པ། རང་གི་སེམས་ཉིད་དང་འབྲལ་བ་མེད་པར་བཞུགས་པ་དེ་ཉིད་ཡིན། གཞན་ཡང་རྩ་བའི་བླ་མ་བཀའ་དྲིན་ཅན། བརྒྱུད་པའི་བླ་མ་བྱིན་རླབས་ཅན། འདྲེན་པའི་བླ་མ་ཐུགས་རྗེ་ཅན་སོགས་གསུངས་ཏེ། བརྒྱུད་པའི་བླ་མ་ནི་སྔ་འགྱུར་རང་ལུགས་ལ་དགུ་ལྡན་བརྒྱུད་པའི་བླ་མ་ཞེས་གསུངས་ཏེ། དགོངས་པ་བརྡ་དང་སྙན་བརྒྱུད་གསུམ། ཐུགས་རྗེ་བྱིན་རླབས། མཁའ་འགྲོ་གཏད་རྒྱ། སྨོན་ལམ་དབང་བསྐུར་གྱི་བརྒྱུད་པ་སྟེ་བརྒྱུད་པ་རྣམ་པ་དྲུག་དང་། གཞན་ཡང་ཤོག་སེར་ཚིག་གི་བརྒྱུད་པ། ཟབ་མོ་དག་སྣང་གི་བརྒྱུད་པ། རྟོགས་པ་དོན་བརྒྱུད་ཀྱི་བརྒྱུད་པ་སྟེ་བརྒྱུད་པ་དགུ་ལྡན་གྱི་བླ་མ་དང་། ཐུན་མིན་གཅོད་ཡུལ་བརྒྱུད་པའི་ལུགས་ལྟར་ན། ཕ་བརྒྱུད་ཐབས་ཀྱི་བརྒྱུད་པ། མ་བརྒྱུད་ཤེས་རབ་ཀྱི་བརྒྱུད་པ། སྲས་བརྒྱུད་ཉམས་ཀྱི་བརྒྱུད་པ། ངོ་མཚར་བཀའ་བབས་ཀྱི་བརྒྱུད་པ་ལ་སོགས་པའི་རྩ་བ་དང་བརྒྱུད་པ་བཅས་པའི་བླ་མ། གཞན་ཡང་རྒྱ་བོད་རིག་འཛིན་གྲུབ་བརྙེས། བཀའ་བབས་བརྒྱུད་ལྡན་གྱི་བླ་མ་ཡོད་དོ་ཅོག་དང་། ཡི་དམ་ཞི་ཁྲོའི་དཀྱིལ་འཁོར་སྔགས་རྒྱུད་སྡེ་བཞིའམ་དྲུག་གིས་བསྡུས་པའི་རྒྱུད་སྡེ་གསར་རྙིང་གི་ལྷ་ཚོགས། ཕོ་རྒྱུད་དཔའ་བོ་རྒྱ་མཚོ། མོ་རྒྱུད་དཔའ་མོ་ཌཱཀྐི། ཁྱད་པར་དུ་ཡི་དམ་ཁྲོས་མ་ལྷ་ལྔ། གནས་ཡུལ་ཉི་ཤུ་རྩ་བཞི། མཁའ་སྤྱོད་དང་ས་སྤྱོད་ཀྱི་བདག་པོ། མཁའ་སྤྱོད་དང་ས་སྤྱོད་ལ་དབང་སྒྱུར་བ་བྱེད་པའི་གནས་གསུམ་མཁའ་འགྲོ། གནས་ཉུལ་དབང་ཕྱུག་མ་མོའི་ཚོགས་དང་བཅས་པ་བྲོ་ལ་བྱོན་ཞེས་གསུངས་སོ། །བརྟུལ་ཞུགས་ལམ་དུ་ལོངས་པར་བྱིན་གྱིས་རློབསཿ ཞེས་གསུངས་ཏེ། བདག་གིས་ལམ་ཟབ་མོ་བདུད་ཀྱི་གཅོད་ཡུལ་འདི་ཉམས་སུ་བླངས་ནས། སྣང་བ་དབང་བསྒྱུར། ཕུང་པོ་གཟན་བསྐྱུར། མི་ཕོད་ཐོག་བརྫིས་ཀྱི་རྣལ་འབྱོར་བརྟུལ་ཞུགས་ཀྱི་སྤྱོད་པ་སྐྱོང་བ་ལ། བཀའ་བརྒྱུད་བླ་མ་ཡི་དམ་གྱི་ལྷ་ཚོགས། དཔའ་བོ་མཁའ་འགྲོ་དང་བཅས་པ་ཐམས་ཅད་ཀྱིས། འགལ་རྐྱེན་ལམ་དུ་སློང་། བདེ་སྡུག་རོ་སྙོམས་ཐུབ། ལུས་ཀྱི་བདག་འཛིན་ཐོངས་ནས། གཅོད་ཡུལ་མཐར་ཕྱིན་པར་བྱིན་གྱིས་རློབས། ལམ་འདི་ལ་བརྟེན་ནས་རྫོགས་པའི་བྱང་ཆུབ་ཐོབ། ལྷ་འདྲེས་གཙོ་བྱས་པའི་མར་གྱུར་གྱི་སེམས་ཅན་ཐམས་ཅད། རྒྱལ་བ་སྐུ་བཞིའི་གོ་འཕང་ལ་འགོད་ཐུབ་པར་བྱིན་གྱིས་རློབས་བསམ་པའི་ཚིག་རྗེས་སུ་དོན་དྲན་ནས་དམིགས་མེད་ཀྱི་ལྟ་བའི་ངང་དང་མ་བྲལ་བར་བྱེད་དགོས་པ་རེད། དེ་ལྟར་མ་ཡིན་པར་ཁ་རྩང་བཤད་པ་ལྟར་ང་ལྷ་འདྲེའི་གནོད་པས་ཨེ་གནོད་མི་ཤེས། དཀོན་མཆོག་གི་ཐུགས་རྗེས་སྐྱོབ་འགྲོ་རྒྱུ་རེད་ཨང་། སྐྱོབ་རོགས་མཛོད། ཁྱེད་རྣམ་པས་འདིའི་རྐྱེན་གྱིས་ང་ལ་ནད་དང་གནོད་པ་སྐྲག་སྣང་འཇིགས་སྣང་མེད་པར་བྱིན་གྱིས་རློབས་བསམ་ན་ཡང་དག་པ་མིན། དེ་ལྟར་ལྟ་བའི་ངར་བསྐྱེད་དེ་རྩ་གསུམ་རྒྱ་མཚོ་བྲོ་ལ་བྱོན་པའི་བཞེངས་བསྐུལ་འདོན་པས། སྟེང་གི་ནམ་མཁར་བརྒྱུད་གསུམ་རིག་འཛིན་གྱི་བླ་མ་ཐམས་ཅད་དང་། ཁྱད་པར་གཅོད་ཡུལ་བརྒྱུད་པའི་བླ་མ་ཐམས་ཅད་ཀྱི་སྐུ་རྡོ་རྗེའི་གར་སྟབས་ཤིགས་སེ། གསུང་ཚངས་དབྱངས་ཀྱི་མགུར་གླུ་དིར་རེ། ཐུགས་བདེ་ཆེན་གྱི་ཉམས་སྣང་འུར་ནས། འཇའ་འོད་གུར་ཁྱིམ་གྱི་ཀློང་ན་བྱིན་ཐིབས་སེ་འོད་ཕུང་ངེར་བཞུགས་ཡོད་པར་བསམ། བར་གྱི་ནམ་མཁའ་ལ་ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་ཐམས་ཅད་བསམ་ཡས་སྤྲོ་བསྡུའི་རོལ་གར་དང་བཅས་པ། དེའི་འོག་ན་གནས་གསུམ་མཁའ་འགྲོ་རྒྱ་མཚོ། ཡང་སྒོས་སུ་མ་གཅིག་ཁྲོས་མ་ལྷ་ལྔ། འཁོར་གནས་ཡུལ་དུར་ཁྲོད་ཀྱི་ཞིང་སྐྱོང་མཁའ་འགྲོའི་ཚོགས་ཀྱིས་བསྐོར་བ་དེ་ལྟ་བུ་ཞིག་གསལ་འདེབས་དགོས་རེད། མཁའ་འགྲོའི་ཚོགས་ཞེས་པ་འདི་རིགས་བསྡུས་ན་དབྱིངས་དང་ཡེ་ཤེས་ལས་དང་འཇིག་རྟེན་གྱི་མཁའ་འགྲོ་ཟེར་བ་ཡོད་དེ། ཆོས་སྐུ་དབྱིངས་ཀྱི་མཁའ་འགྲོ། ལོངས་སྐུ་ཡེ་ཤེས་ཀྱི་མཁའ་འགྲོ། སྤྲུལ་སྐུ་ལས་ཀྱི་མཁའ་འགྲོ། ཤ་ཟ་འཇིག་རྟེན་གྱི་མཁའ་འགྲོ་དང་བཅས་པ་རྩ་བ་གསུམ་གྱི་ལྷ་ཚོགས་ཀྱི་མཐའ་སྐོར་ལ། ཡེ་ཤེས་དང་ལས་ལས་གྲུབ་པའི་ཆོས་སྐྱོང་སྲུང་མ་ཐམས་ཅད། ཡང་འཁོར་ཕོ་ཉའི་དམག་ཚོགས་དང་བཅས་པ་རྩ་གསུམ་རྒྱ་མཚོའི་དཀྱིལ་འཁོར་གྱིས་ནམ་མཁའ་དང་ས་གཞི་བར་སྣང་ཐམས་ཅད་གང་བར་བསམ་ནས། མདོར་ན་མ་བཅོས་སྤྲོས་མེད་ཀྱི་ངང་ལ་མཉམ་པར་བཞག་དགོས། དེས་དང་པོ་ཐུགས་བརྒྱུད་བསྐུལ་བའམ་བྱིན་འབེབས་པ་སོང་ངོ་། །དེ་ནས་གཉིས་པ་བྲོ་བརྡུང་བ་དངོས་ནི། བྲོ་བརྡུང་འདི་ལ་ཕྱོགས་བཞི་དབུས་དང་ལྔ་ཡི་བྲོ་ར་སྟེ་གླིང་བཞི་དབུས་ཕྱོགས་ལྷུན་པོ་དང་བཅས་པ་ལ། ཞེ་སྡང་རྒྱལ་པོ། ང་རྒྱལ་གཤིན་རྗེ། འདོད་ཆགས་སྲིན་མོ། ཕྲག་དོག་དམ་སྲི། གཏི་མུག་ཤི་འདྲེ་རྣམས་ཀྱི་མགོ་ལ། ཡེ་ཤེས་ལྔ་མཚོན་གྱི་བརྟུལ་ཞུགས་སྤྱོད་པའི་ཆས་དང་བཅས་པའི་བྲོ་བརྡུང་བ་ལ། དང་པོ་ཤར་ཕྱོགས་ཀྱི་བྲོ་ནི། ཕཊཿ ཤར་ཕྱོགས་ལུས་འཕགས་གླིང་དུ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟླུམ་ལ་འཁྱིལཿ ཞེ་སྡང་རྒྱལ་པོའི་མགོ་ལ་ཆེམས་སེ་ཆེམཿ མེ་ལོང་ཡེ་ཤེས་གླིང་བུ་ཀྱུ་རུ་རུཿ ཧཱུྃ་ཧཱུྃ་ཧཱུྃཿ ཞེས་གསུངས་ཏེ། ཞིང་ཁམས་དང་འཇིག་རྟེན་གྱི་ཆགས་དབྱིབས་ལ་མཐའ་གཅིག་ཏུ་ངེས་པ་དང་ཚད་བཟུང་ཅན་ཞིག་མ་ཡིན། ནམ་མཁས་གར་ཁྱབ་སྣོད་བཅུད་ཀྱི་བཀོད་པ་སྣང་བ་ཡིན་ན། ཡུང་འབྲུ་དང་སྐྲ་རྩེའི་ཁྱོན་ཙམ་ལ་ཡང་མཐའ་ཡས་ཞིང་ཁམས་རྒྱ་མཚོ་སྣང་ཆོག་པའི་རྒྱལ་བའི་ཐུགས་རྗེ་དང་། སེམས་ཅན་གྱི་ལས་སྣང་། ཞིང་དང་གདུལ་བྱའི་བཀོད་པ་དེ་ཉིད་ཚུལ་མཐོང་གི་བློ་གུ་དོག་ཕུར་ཁུང་ལྟ་བུས་དཔོག་ག་ལ་ཐུབ། སྤྱིར་ན་རྒྱལ་བའི་གསུང་འདི་དྲང་ངེས་ལྡེམ་དགོངས་ཀྱིས་དཔྱད་དེ་ཐོས་བསམ་མ་བྱས་ན། དེང་སང་གི་བླུན་པོ་ཤེས་ལྡན། བསམ་བློ་པ་བསམ་མེད། གསར་གཏོད་གསར་བ། གསར་བ་ངོ་མའི་རྗེས་མ་ཆོད་པ་ཚང་མས་བཤད་ཚད་ཀྱི་རྗེས་ལ་བརྒྱུགས་ནས་བསམ་བློ་བཏང་ན། སྤྱིར་རྨོངས་པ་ཡིན་པའི་ཐོག་ལ་རྨོངས་པའི་བཟི་སྨན་གསར་བ་ཞིག་ཟོས་བཏང་ན། རྡོག་ལམ་ཚང་མ་ར་བེ་རིབ་བེ་ཞིག་རེད་མི་འགྲོ་བའི་ཐབས་མེད་པ་ཡིན། དངོས་གནས་བཤད་ན་ཤར་ལྷོ་ནུབ་བྱང་གི་ཕྱོགས་ཀྱང་དོན་དུ་མ་གྲུབ་ལ། འོན་ཀྱང་གདུལ་བྱའི་སྣང་ཚོད་ལ་གོ་བརྡ་སྤྲོད་བྱེད་ཀྱི་ཆེད་དུ་དེ་དང་བསྟུན་དགོས་པ་ནི། གང་འདུལ་དེར་སྟོན་རྒྱལ་བའི་ཕྲིན་ལས་ཀྱི་གོ་དོན་ཕྱོགས་གཅིག་རེད། དེས་ན་འདི་ནས་གླིང་བཞི་ཆགས་དབྱིབས་ཟླུམ་པོའི་གོ་ལ་དང་ཨེ་འགྲིག་བལྟ་བའི་ཚིག་སྣེ་རེར་བློ་གུ་དོག་གིས་འགག་འདུག་དགོས་པ་མ་ཡིན། དོན་ལ་རྟོན་པའི་ཞི་རྒྱས་དབང་དང་དྲག་པོ་མཆོག་དང་ལྔ་ཡི་བྲོ་ར་ལ། ནང་དུག་ལྔ་འདྲེ་གདོན་དུ་ཤར་བའི་འཁྲུལ་སྣང་འཁྲུལ་གཟུགས་ལ་ཡེ་ཤེས་ལྔ་ཡི་བྱིན་ཆེན་གྱི་བྱིན་ཕབས་ནས་ལྡང་བ་མེད་པའི་རྒྱ་ཡིས་གདབ་པས། སྣང་སྲིད་གཞིར་བཞུགས་ཀྱི་ཡེ་དག་ལ་གཞིར་བཞེངས་ཡང་དག་གི་འཁོར་ལོ་ལ། འཁོར་འདས་རོ་སྙོམས་ཐམས་ཅད་དག་པའི་དབྱིངས་གཅིག་ལ་ཟླུམ་པའི་དོན་ཡིན། ཤར་ཕྱོགས་ཞི་བ་ཆེན་པོའི་བྲོ་ར་ཤར་ལུས་འཕགས་གླིང་གི་རྣམ་པ། དཀར་གསལ་འཇའ་འོད་འཁྲིགས་པའི་ཀློང་དུ་བརྡུངས་ཙ་ན། དཔའ་བོ་མཁའ་འགྲོའི་བྲོ་ར་གྲྭ་ཟུར་མེད་པའི་ཟླུམ་ལ་འཁྱིལ་བ། ཕོ་གདོན་ཞེ་སྡང་ཁྲོ་གཏུམ་གྱི་རང་གཟུགས་རྒྱལ་པོའི་རྣམ་པ་ཤར་བའི་མགོ་ལ། བྱམས་པ་ཆེན་པོའི་བྲོ་བརྡུང་ཆེམས་ཆེམས་སུ་བརྡུངས་བས། ཞེ་སྡང་མེ་ལོང་ཡེ་ཤེས་སུ་དག་པའི་བརྡ་མཚོན་ལ་རྣལ་འབྱོར་བའི་ཕྱག་ གཡོན་ན་ཐོག་པའི་མཆོག་ཆེན་གླིང་བུ་སྐད་གདངས་ཀྱུ་རུ་རུ། དེ་དང་མཉམ་དུ 
་རིག་རྩལ་བྱམས་པ་ཆེན་པོའི་ཏིང་འཛིན་དུ་ཤར་བའི་ཧཱུྃ་གི་སྣང་གླུ་སུམ་བསྟུད་དུ་བསྒྲགས་པའོ། །ལྷོ་ཡི་འཛམ་བུ་གླིང་གི་བྲོ་ཇི་ལྟ་བུ་བརྡུངས་ན། ཕཊཿ ལྷོ་ཡི་འཛམ་བུའི་གླིང་ལ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟུར་གསུམ་དབལཿ ང་རྒྱལ་གཤིན་རྗེའི་མགོ་ལ་ཆེམས་སེ་ཆེམཿ མཉམ་ཉིད་ཡེ་ཤེས་ཐོད་རྔ་ཁྲོ་ལོ་ལོཿ ཧཱུྃ་ཧཱུྃ་ཧཱུྃཿ ཞེས་གསུངས་ཏེ། ལྷོ་ཕྱོགས་རྒྱས་པའི་བྲོ་ར་ལྷོ་འཛམ་བུའི་གླིང་གི་རྣམ་པ། སེར་གསལ་འཇའ་འོད་འཁྲིགས་པའི་ཀློང་དུ་བརྡུངས་ཙ་ན། དཔའ་བོ་མཁའ་འགྲོའི་བྲོ་ར་སོག་ཁའི་དབྱིབས་ཅན་གྲུ་གསུམ་དབལ་ཟུར་གྱི་རྣམ་པ་ཅན། མ་རུངས་ང་རྒྱལ་གྱི་རང་གཟུགས་གསོད་བྱེད་གཤིན་རྗེའི་གདོན་ཚོགས་སུ་ཤར་བའི་མགོ་ལ་རྡོག་བྲོ་ཆེམས་ཆེམས་སུ་བརྡུང་པས། ང་རྒྱལ་མཉམ་ཉིད་ཡེ་ཤེས་སུ་དག་པའི་ཕྱག་གཡས་པའི་ཐོད་རྔ་ཁྲོ་ལོ་ལོ་དཀྲོལ་བ་དང་ལྷན་དུ། རིག་རྩལ་སྙིང་རྗེ་ཆེན་པོ་ཧཱུྃ་གི་སྣང་གླུ་གསུམ་བསྟུད་མར་བྱས་ནས་བསྒྲགས། དེ་ནས་ཡང་། ཕཊཿ ནུབ་ཀྱི་བ་ལང་སྤྱོད་ལ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་ཟླ་གམ་འཁྱིལཿ འདོད་ཆགས་སྲིན་མོའི་མགོ་ལ་ཆེམས་སེ་ཆེམཿ སོར་རྟོག་ཡེ་ཤེས་དྲིལ་གཡེར་ཁྲོ་ལོ་ལོཿ ཧཱུྃ་ཧཱུྃ་ཧཱུྃཿ ཞེས་གསུངས་ཏེ། ནུབ་ཕྱོགས་དབང་གི་བྲོ་ར་ནུབ་བ་གླང་སྤྱོད་ཀྱི་རྣམ་པ། དམར་གསལ་འཇའ་འོད་འཁྱིལ་བའི་གུར་ཁྱིམ་ལ་བརྡུངས་ཙ་ན། དཔའ་བོ་མཁའ་འགྲོའི་བྲོ་ར་ཟླ་གམ་དབང་གི་དཀྱིལ་འཁོར་དུ་བསྐྱེད་དེ། འདོད་ཆགས་སྲེད་པའི་རང་གཟུགས་མོ་གདོན་སྲིན་མོ་ཤར་བའི་གདོན་ཚོགས་ཀྱི་མགོ་ལ་ཆེམས་ཆེམས་སུ་བརྡུངས་པས། འདོད་ཆགས་སོར་རྟོག་ཡེ་ཤེས་སུ་དག་པའི་ཕྱག་
གཡོན་གྱི་དྲིལ་བུ་གཡེར་ཁ་དང་བཅས་པའི་རང་སྒྲ་ཁྲོལ་ཁྲོལ་དུ ་ཁྲོལ་བས། རིག་རྩལ་དགའ་བ་ཆེན་པོའི་ཧཱུྃ་ཆེན་གསང་བའི་སྒྲ་སྐད་སུམ་བསྟུད་དུ་བསྒྲགས། དེ་ནས་བྱང་གི་སར། ཕཊཿ བྱང་གི་སྒྲ་མི་སྙན་ལ་བརྡུངས་ཙ་ནཿ དཔའ་བོ་མཁའ་འགྲོ་བྲོ་ར་གྲུ་བཞི་ལམཿ ཕྲག་དོག་དམ་སྲིའི་མགོ་ལ་ཆེམས་སེ་ཆེམཿ བྱ་གྲུབ་ཡེ་ཤེས་ཅོད་པན་པུ་རུ་རུཿ ཧཱུྃ་ཧཱུྃ་ཧཱུྃཿ ཞེས་གསུངས་ཏེ། བྱང་ཕྱོགས་དྲག་པོའི་བྲོ་ར་བྱང་སྒྲ་མི་སྙན་གླིང་གི་དབྱིབས་ཀྱི་རྣམ་པ་ཅན། མཐིང་གསལ་འཇའ་འོད་འཁྲིགས་པའི་གླིང་དུ་བརྡུངས་ཙ་ན། དཔའ་བོ་མཁའ་འགྲོའི་བྲོ་ར་གྲུ་བཞི་ལམ་མེ་བ་བྱང་སྒྲ་མི་སྙན་གྱི་གླིང་དབྱིབས་ཅན། ཕྲག་དོག་གདུག་པའི་རྟོག་ཚོགས་སླུ་བྱེད་དམ་སྲིའི་གདོན་ཚོགས་སུ་ཤར་བའི་མགོ་ལ་ཆེམས་ཆེམས་སུ་བརྡུངས་པས། ཕྲག་དོག་བྱ་གྲུབ་ཡེ་ཤེས་སུ་དག་པའི་རྣལ་འབྱོར་དབུ་ཡི་ཅོད་པན་ལིང་ལིང་དུ་གཡོ་བ་པུ་རུ་རུ་ཞེས་པས། རིག་རྩལ་བཏང་སྙོམས་ཆེན་པོའི་ཧཱུྃ་གླུ་དྲག་པོའི་སྒྲ་སྐད་རི་འགུལ་བ་ཙམ་དུ་ཡང་སུམ་བསྟུད་དུ་བསྒྲགས། དེའི་འཕྲོས་དབུས་ཕྱོགས་ལ། ཕཊཿ དབུས་ཕྱོགས་ལྷུན་པོའི་རྩེ་རུ་བརྡུངས་ཙ་ནཿ དཔའ་བོ་མཁའ་འགྲོའི་བྲོ་ར་བྱིན་རེ་ཆགསཿ གཏི་མུག་ཤི་འདྲེའི་མགོ་ལ་ཆེམས་སེ་ཆེམཿ ཆོས་དབྱིངས་ཡེ་ཤེས་ཧཱུྃ་གླུ་ཀྱུ་རུ་རུཿ ཧཱུྃ་ཧཱུྃ་ཧཱུྃཿ ཞེས་གསུངས་ཏེ། དབུས་ཕྱོགས་ཞི་རྒྱས་དབང་དྲག་མཆོག་དང་ལྔ་པོའི་ནང་གི་མཆོག་གི་བྲོ་ར་དབུས་རི་དབང་ལྷུན་པོའི་རྣམ་པ་ཅན། ཚད་མེད་བཞི་ཡི་རང་འོད་གསལ་ཞིང་བསྡུ་དངོས་བཞི་ཡི་བང་རིམ་བཀྲ་ལ་ཕར་ཕྱིན་དྲུག་གི་ཁ་ཁྱེར་ཡངས་པ། དེ་ལྟར་དབུས་ཀྱི་བྲོ་ར་ལྷུན་པོའི་རྣམ་པ་ཅན་གྱི་རྩེ་རུ་བརྡུངས་ཙ་ན། དཔའ་བོ་མཁའ་འགྲོའི་བྲོ་ར་བྱིན་ཆགས་ལས་བཞི་ཀུན་འདུས་ཀྱི་དཀྱིལ་འཁོར། གཏི་མུག་རྨོངས་པས་བསྐྱེད་པའི་ཀུན་རྟོག་འཁྲུལ་བའི་སྣང་བ་ཇི་སྙེད་ཡོད་པ་ཐམས་ཅད་ཀྱི་རང་གཟུགས་སུ་ཤར་བའི་ཤི་འདྲེ་གསོན་འདྲེ་ཡུལ་འདྲེ་འཁྱམས་པོ་གནས་གདོན་ལུས་གདོན་ལ་སོགས་པ་སྣང་སྲིད་ལྷ་འདྲེ་ཐམས་ཅད་ཀྱི་མགོ་ལ་ཆེམས་ཆེམས་སུ་བརྡུངས་པས། གཏི་མུག་ཆོས་དབྱིངས་ཡེ་ཤེས་སུ་དག་པའི་རྣལ་འབྱོར་ངག་གི་གསུང་སྒྲ་ཆོས་དབྱིངས་རྣམ་པ་དག་པའི་ཧཱུྃ་གླུ་ཀྱུ་རུ་རུ་བསྒྲགས་པས། རིག་རྩལ་བྱང་ཆུབ་སེམས་ཀྱི་རང་གདངས་སྟོང་ཉིད་སྙིང་རྗེ་དབྱེར་མེད་དུ་ཤར་ནས་འཁོར་བ་མྱང་འདས་སུ་དག་པའི་ཧཱུྃ་ཆེན་རྔམ་པའི་སྒྲ་སྐད། སྟོང་ཉིད་མཚན་མེད་སྨོན་མེད་རྣམ་ཐར་སུམ་ལྡན་གྱི་སུམ་བསྟུད་དུ་བསྒྲགས་མ་ཐག་གཟུང་འཛིན་རྩད་ནས་གཅོད་པའི་ཕཊ་སྒྲ་དྲག་པོ་དང་བཅས་ཏེ། གཏན་མེད་མ་བཅོས་སྤྲོས་པ་དང་བྲལ་བའི་ངང་ལ་དལ་གཅིག་མཉམ་པར་བཞག་དགོས། ཕཊཿ ཅེས་བརྡུང་ཤེས་པ་གཏད་མེད་བཏངཿ ཞེས་གསུངས་ན། ཕཊ་ཀྱི་སྒྲ་སྐད་དང་མཉམ་དུ་ཕྱག་གི་ཌཱ་རུ་འུར་ཆེམས་དྲག་བརྡུངས་དང་བཅས་ཏེ་ཤེས་པ་གཏད་མེད་བཏང་ནས། རིག་པ་བཟོ་མེད་ཀྱི་ངང་གདངས་ལ་ལྷོད་ཀྱིས་གློད་ལ་ཞོགས་གསུངས་ཏེ། མ་ཅིག་ལབ་ཀྱི་སྒྲོན་མས། གྲིམ་གྱིས་གྲིམ་ལ་ལྷོད་ཀྱིས་གློད། །དེ་ལ་ལྟ་བའི་གནད་གཅིག་ཡོད། །ཅེས་གསུངས་པའི་ཉམས་ལེན་གྱི་མན་ངག་དེ་དུས་དྲན་པར་བྱ་དགོས། དེ་ཡན་ཆད་ཀྱིས་བྲོ་བརྡུང་སོང་བ་ཡིན། བྲོ་བརྡུང་འདི་དག་གནའ་རིག་གནས་གསར་བརྗེའི་དུས་སྐབས་ཨང་རིམ་བཞི་པའི་མི་ངན་གྱི་སྟེང་ལ་དམར་སྲུང་དམག་མི་ཐོན་པ་ལྟར། ཕར་འབའ་ཞིག་བརྡུང་རྒྱུ་འཁྲབ་རྒྱུ་བརྫི་རྒྱུའི་འདང་རྒྱག་དེ་ལྟ་བུ་མ་ཡིན། འདི་བྲོ་བརྡུང་ཕུར་གདབ་གཉིས་ཀ་ལ། བདག་དང་གནས་དང་ལྷ་འདྲེ་ཟིལ་གྱིས་གནོན་པ་གསུམ་ཚང་བ་ཡིན་ཡང་། གཙོ་ཆེ་བའི་དབང་དུ་བྱས་ནས་བྲོ་བརྡུང་གིས་གཙོ་བོ་ལྷ་འདྲེ་ཟིལ་གནོན་དང་། ཕུར་གདབ་ཀྱིས་གཙོ་བོ་བདག་གནས་གཉིས་ཀ་ཟིལ་གནོན་གྱི་ཁྱད་པར་ཡིན། སྔ་གནོན་བར་གནོན་ཕྱི་གནོན་ཏེ་ཟིལ་གནོན་གྱི་དམིགས་པ་སྐོར་གསུམ་རིམ་ཅན་དུ་བསྟན་པ་ཡིན་ཡང་། འདིའི་བདག་གནས་ལྷ་འདྲེ་ཟིལ་གནོན་གསུམ་པོ་ཟུར་ནས་ལོགས་སུ་བཀར་བ་ཞིག་བཙལ་མི་དགོས་པ་མཉམ་དུ་ཚང་བ་ཡིན། གཉིས་པ་ཅོག་བུ་འབུབས་པ་ལ། དེ་ནས་ཅོག་བུ་འབུབས་པ་ནིཿ ཞེས་གསུངས་ནས་མཚམས་སྦྱར་ཏེ། གཞི་དེའི་ལྷ་འདྲེ་གདུག་པ་ཅནཿ གན་རྐྱལ་བསྒྱེལ་བའི་ཡན་ལག་ལྔརཿ གནམ་ལྕགས་ཕུར་བུ་བཏབ་པར་བསམཿ ཞེས་གསུངས་ན། སླར་ཡང་རང་ཉིད་ཀྱི་ཐུགས་ཀ་ནས། རང་འདྲའི་ལས་བྱེད་ཀྱི་མཁའ་འགྲོ་མ་གྲངས་མེད་དཔག་ཏུ་མེད་པ་མང་པོ། འོད་ཟེར་ཡེ་ཤེས་ཀྱི་མེ་ཡི་དྲྭ་བ་དང་བཅས་པ་འཕྲོས་ནས། གཞི་ས་གནད་གཉན་དམིགས་ཀྱི་གནས་དེའམ། གཞན་ནས་ལྷགས་པའི་གསར་བ། ལྷ་འདྲེ་གདུག་པ་ཅན་ཞི་བས་མི་ཐུལ་པ་དག་འབྲོས་དབང་མེད་པར་བཀུག་སྟེ་དྲག་པོའི་ཚམ་རྔམ་འབར་བའི་སྟབས་ཀྱིས་གན་རྐྱལ་ས་ལ་བསྒྱེལ་བའི་ཡན་ལག་བཞི། མགོ་དང་ལྔ་ལ་གནམ་ལྕགས་ལས་གྲུབ་པའི་ཕུར་བུ་རེ་རེས་བཏབ་ནས་འཆོར་བ་མེད་པར་བྱས་པ་བསམ་སྟེ། ཕཊཿ ཤར་ཕྱོགས་རྡོ་རྗེ་མཁའ་འགྲོ་མསཿ བྱམས་པ་ཆེན་པོའི་ཕུར་པ་ཁྱེརཿ ལྷོ་ཕྱོགས་རིན་ཆེན་མཁའ་འགྲོ་མསཿ སྙིང་རྗེ་ཆེན་པོའི་ཕུར་པ་ཁྱེརཿ ནུབ་ཕྱོགས་པདྨ་མཁའ་འགྲོ་མསཿ དགའ་བ་ཆེན་པོའི་ཕུར་པ་ཁྱེརཿ བྱང་ཕྱོགས་ལས་ཀྱི་མཁའ་འགྲོ་མསཿ བཏང་སྙོམས་ཆེན་པོའི་ཕུར་པ་ཁྱེརཿ དབུས་ཕྱོགས་སངས་རྒྱས་མཁའ་འགྲོ་མསཿ བྱང་ཆུབ་སེམས་ཀྱི་ཕུར་པ་ཁྱེརཿ བདག་འཛིན་ལྷ་འདྲེའི་མགོ་བོ་དངཿ ལྷུ་ཚིགས་བཞི་ལ་བཏབ་པ་ཡིསཿ གཡོ་འགུལ་མེད་པར་གནས་པར་གྱུརཿ ཕཊཿ ཅེས་གསུངས་ཏེ། རྣལ་འབྱོར་པ་དང་པོ་མལ་ནས་བསྐྱོད་པའི་དུས་ནས། གནམ་ལྕགས་ཀྱི་རྡོ་རྗེ་རྩེ་དགུ་པ་ཞིག་གཉན་དམིགས་དེར་ཐོག་ཕབས་པ་ལྟར་བྱས་ནས་སྔ་གནོན་འཕེན་དགོས། དེ་ནས་ལྟ་བའི་གདེང་འགྲོས་ཀྱིས་བརྟུལ་ཞུགས་ལྡན་པའི་གོམ་སྟབས་དང་བཅས་ཏེ། གཉན་གནད་ས་དམིགས་ཀྱི་གནས་དེར་ཐོན་མ་ཐག་ལྷ་འདྲེ་ཀུན་གྱི་རྐང་པ་ནས་རང་འདྲ་རེ་རེས་བཟུང་ཞིང་ཀླད་ལ་བསྐོར་ཏེ་ས་ལ་གདབ་ནས་བར་གནོན་འཕེན་དགོས། དེ་ནས་འདོད་ཁམས་གླིང་བཞིའི་བྲོ་ར་ལ་ཟིལ་གནོན་གྱི་བྲོ་བརྡུངས་ནས་འགུལ་དབང་མེད་པར་བཅུན་པའི་ཕྱི་གནོན་འཕེན་དགོས། འདི་ནས་ཕྱི་ལྟར་རྣལ་འབྱོར་བས་ཅོག་བུ་འབུབས་པ་དང་ཆོས་མཚུངས་པ། ནང་ལྟར་ལྷ་འདྲེ་ཤིན་ཏུ་གདུག་པ་ཅན་ཨར་ལ་གཏད་ཞོར། གསང་བ་བདག་གནས་གཉིས་ཀ་ཟིལ་གྱིས་གནོན་པ་ཡིན། ཕཊ་སྒྲ་དྲག་པོ་སྟོང་གསུམ་འགེང་བ་ཙམ་གྱི་གད་རྒྱངས་སྒྲོག་པས་སྣ་དྲངས་ཏེ། རང་རིག་ཆོས་དབྱིངས་ཡེ་ཤེས་ཀྱི་རང་མདངས་ཤར་ཕྱོགས་རྡོ་རྗེའི་རིགས་ཀྱི་མཁའ་འགྲོ་མ། སྐུ་མདོག་དཀར་མོ་ཞི་འཛུམ་མཛེས་པའི་ཉམས་ཅན་དེས་རིག་རྩལ་བྱམས་པ་ཆེན་པོའི་རང་བཞིན་གྱི་ཕུར་པ་སྟེ། ཞི་བའི་ཕུར་པ་དཀར་པོ་ཟླུམ་པོའི་དབལ་ཅན་ཞིག་ཁྱེར་ནས། བདག་འཛིན་ལྷ་འདྲེའི་ལག་གཡས་པ་ཞེ་སྡང་གི་རང་བཞིན་ཅན་ལ་བཏབ་པས་ཞེ་སྡང་གནོད་སེམས་ཀྱི་རྟོག་པ་ཐམས་ཅད་རྩད་ནས་བཅོམ་པའམ་གཡོ་བ་མེད་པར་བྱས་ནས། མི་གཡོ་བྱམས་པ་ཆེན་པོའི་ཏིང་ངེ་འཛིན་རྒྱུད་ལ་སྐྱེས་པར་བསམ། དེ་བཞིན་དུ་རང་རིག་མཉམ་ཉིད་ཡེ་ཤེས་ཀྱི་རང་མདངས་ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་མ་སྐུ་མདོག་སེར་མོ་དགྱེས་འཛུམ་ཚིམ་པའི་རྣམ་པ་ཅན་དེས་རིག་རྩལ་སྙིང་རྗེ་ཆེན་པོའི་ཕུར་པ་སྟེ། རྒྱས་པའི་ཕུར་པ་སེར་པོ་དབལ་སོ་གྲུ་བཞི་རྩེ་རྣོན་ དུ་བྱས་པ་ཞིག་ཁྱེར་ནས། བདག་འཛིན་ལྷ་འདྲེ་མ་རུངས་པའི་ལག་པ་གཡོན ་པ་ང་རྒྱལ་གྱི་རང་བཞིན་ཅན་ལ་བཏབ་པས། ང་རྒྱལ་རྒྱགས་པའི་འཁྲུལ་རྟོག་རྩད་ནས་བཅོམ་པའམ་གཡོ་བ་མེད་པར་བྱས་ནས། སྙིང་རྗེ་ཆེན་པོའི་ཏིང་ངེ་འཛིན་རྒྱུད་ལ་སྐྱེས་པར་བསམ་དགོས། ཡང་རང་རིག་སོ་སོར་རྟོགས་པའི་ཡེ་ཤེས་ཀྱི་རང་མདངས་ནུབ་ཕྱོགས་པདྨའི་རིགས་ཀྱི་མཁའ་འགྲོ་མ། སྐུ་མདོག་དམར་མོ་བཞད་ཅིང་ཆགས་པའི་ཉམས་ཅན་དེས་རིག་རྩལ་དགའ་བ་ཆེན་པོའི་ཕུར་པ་སྟེ། དབང་གི་ཕུར་པ་དམར་པོ་དབལ་སོ་དབང་རྟགས་ཟླ་གམ་རྩེ་རྣོན་གྱི་དབྱིབས་ཅན་ཞིག་ཁྱེར་ནས། བདག་འཛིན་ཞེན་ཆགས་ཀྱི་འདྲེ་རྒན་དེའི་རྐང་པ་གཡོན་པ་འདོད་ཆགས་ཀྱི་རང་བཞིན་ཅན་ལ་བཏབ་པས། འདོད་ཆགས་ཞེན་པའི་རྟོག་ཚོགས་རྩད་ནས་གཞོམ་པའམ་གཡོ་བ་མེད་པར་བྱས་ནས། དགའ་བ་ཆེན་པོའི་ཏིང་ངེ་འཛིན་རྒྱུད་ལ་སྐྱེས་པར་བསམ། ཡང་རང་རིག་བྱ་གྲུབ་ཡེ་ཤེས་ཀྱི་རང་མདངས་བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་མ། སྐུ་མདོག་ལྗང་མོ་ཁྲོས་འཁྲིགས་རྔམ་པའི་ཉམས་དང་ལྡན་པ་ཞིག་གསལ་དགོས། དེ་ལྟ་བུའི་ཁྲོས་འཁྲིགས་རྔམ་པའི་ཉམས་དང་ལྡན་པ་དེས་རིག་རྩལ་བཏང་སྙོམས་ཆེན་པོའི་ཕུར་པ་སྟེ། དྲག་པོའི་ཕུར་པ་ནག་པོ་དབལ་སོ་གྲུ་གསུམ་རྩེ་རྣོན་མེ་ཡི་ཚ་ཚྭ་འཕྲོ་བ་ཞིག་ཁྱེར་ནས། བདག་འཛིན་གྱི་བདུད་པོ་དེའི་རྐང་པ་གཡས་པ་ཕྲག་དོག་གི་རང་བཞིན་ཅན་དེར་བཏབ་པས། ཕྲག་དོག་འགྲན་སེམས་ཀྱི་རྟོག་པ་རྩད་ནས་གཞོམ་པའམ་གཡོ་བ་མེད་པར་བྱས་ནས། བཏང་སྙོམས་ཆེན་པོའི་ཏིང་ངེ་འཛིན་རྒྱུད་ལ་སྐྱེས་པར་བསམ། རང་རིག་ཆོས་དབྱིངས་ཡེ་ཤེས་ཀྱི་རང་མདངས་དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ། སྐུ་མདོག་མཐིང་ཁ་ཁྲོ་ཆགས་དགྱེས་འཛུམ་གྱི་ཉམས་འགྱུར་ཐམས་ཅད་རྫོགས་པ་ཞིག་གསལ་ནས། དེས་རིག་རྩལ་བྱང་ཆུབ་སེམས་ཀྱི་ཕུར་པ་ཁྱེར་ནས། ལས་བཞི་ཡོངས་སུ་རྫོགས་པའི་ཕུར་པ་ཁ་དོག་མ་ངེས་སྣ་ཚོགས་མདོག་ཅན་ཞིག་བདག་འཛིན་ལྷ་འདྲེ་གཏུམ་པོའི་མགོ་བོ་གཏི་མུག་མ་རིག་པའི་རང་བཞིན་ཅན་དེར་བཏབ་པས། གཟུང་འཛིན་ཨ་འཐས་སུ་གོམས་བའི་འཁྲུལ་རྟོག་རྩད་ནས་བཅོམ་པའམ་གཡོ་བ་མེད་པར་བྱས་ཏེ། སྨོན་འཇུག་བྱང་ཆུབ་སེམས་ཀྱི་ངང་དུ་ལྷམ་མེར་གནས་པའི་ཏིང་འཛིན་རྒྱུད་ལ་སྐྱེས་པར་བསམ། དེ་ལྟར་དུ་དམིགས་པ་གསལ་གདབ་ནས་སླར་ཡང་། ཕཊ་སྒྲ་དྲག་པོ་དང་བཅས་ཏེ། གླིང་བུའི་འགྱུར་ཁུག་དང་ཌཱ་མ་རུའི་རྔམ་སྟབས། དྲིལ་བུའི་དབྱངས་སྙན་རྣམས་ཀྱིས་ཟིལ་གནོན་བཞད་པ་བརྒྱ་ཡི་ཉམས་འགྱུར་དང་བཅས་ཏེ། ཡོན་ཏན་ཤེས་རབ་ཕར་ཕྱིན་གྱི་དགོངས་པ། བདག་གནས་ལྷ་འདྲེ་དང་བཅས་པ། མི་དམིགས་རིག་སྟོང་སྤྲོས་བྲལ་མཉམ་གཞག་གི་ངང་ལ་དལ་གཅིག་གཞག་དགོས། དེའི་དོན་འདི་ཡིན་ཏེ། ཅེས་བརྗོད་བདག་གཞན་ལྷ་འདྲེ་གསུམཿ གང་དུ་མི་དམིགས་མཉམ་པར་གཞགཿ ཅེས་གསུངས་པས་བསྟན་པ་ཡིན་ནོ། །དེ་ཡན་ཆད་ཀྱིས་སྔོན་འགྲོ་ཟིལ་གནོན་སྐོར་གསུམ་སོང་བའོ། །གཉིས་པ་དངོས་གཞི་ལུས་ཀྱི་སྦྱིན་པ་ནི། དེ་ནས་ལྷ་འདྲེ་ངོས་ཟིན་ནསཿ ལུས་སྦྱིན་དངོས་ལ་འཇུག་པ་ནིཿ ཞེས་གསུངས་མཚམས་སྦྱར་བས། ལྷ་འདྲེ་ངོས་ཇི་ལྟར་ཟིན། གལ་ཏེ་ངོས་ཟིན་ན་བདུད་དང་བགེགས་རིགས་ཀྱི་མཚན་ཉིད་ཞོག་ཅེ་ན། རྣམ་རྟོག་གི་གྲངས་དང་མཉམ་པའི་འདྲེ་གདོན་བགེགས་རིགས་ཡོད་པས་ཤིན་ཏུ་མང་ཡང་། གང་ཞིག་དགེ་བ་ལ་བར་དུ་བཅད་ཅིང་ཐར་བར་སྒྲུབ་པའི་གེགས་བྱེད་པ་བདུད་དང་བགེགས་ཀྱི་མཚན་ཉིད་ཅེས་བྱ། འོན་ཏེ་གནོད་བྱེད་འཁྲུལ་སྣང་གི་ལྷ་འདྲེ་ངོས་བཟུང་ན་བདུད་བཞི་ལ་ཐུག དེའི་ནང་གི་རྩ་བ་ནང་བདག་འཛིན་སྙེམས་བྱེད་ཀྱི་བདུད་ལ་ཐུག་ཡོད་པས་དེ་གཅད་དགོས། གལ་ཏེ་བདུད་བཞི་ཐོག་མ་ནས་དག་པ་ཡིན་པས་གཅོད་ལར་དགོས་པ་མ་ཡིན་པས་ཅི་ཞིག་གཅོད་བསམ་ན། བདེན་མོད་ཀྱང་ད་དུང་སྤངས་རྟོགས་ཀྱི་ཡོན་ཏན་མངོན་དུ་མ་གྱུར་བ་ནི་བདུད་བཞི་ཆོད་མེད་པའི་རྟགས་ཡིན། དེས་ན་ཐོགས་བཅས་ཐོགས་མེད་ཀྱི་བདུད་གཉིས་ཀ་མེད་ན་གཅད་བྱ་མེད་པས་གཅོད་སར་ཅི་ལ་འགྲོ། མ་སོང་ན་གཅོད་པའི་བོགས་འབྱིན་གསར་དུ་མི་ཐོབ། ནང་རྟོགས་ཀྱི་ཡོན་ཏན་སོ་མ་མི་སྐྱེ། དགའ་བྲོད་ཀྱི་བདུད་ཡོད་དགོས་ཏེ། དགའ་བྲོད་བྱ་ཡུལ་གྱི་ཡོན་ཏན་ཞིག་ཐོབ་ཏུ་མེད་ན་གཅོད་བྱེད་དུ་སོང་བས་ཅི་ཞིག་བྱ། སྟོན་ཐོག་གི་འབྲས་བུ་མེད་ན་སོ་ནམ་གྱི་ཞིང་ལས་མི་བྱེད་པའི་དཔེ་རུ་བྱས་ནས་གསུངས་ཡོད། སྙེམས་བྱེད་ཀྱང་ཡོད་དགོས་ཏེ་ཉམས་ལེན་དང་གདམས་ངག་གི་ཕོ་ཚོད་གང་ཡང་མེད་ན་ཅི་འདྲ་བྱེད། དཔའ་བོ་ལག་ཆ་མེད་པ་གཡུལ་ལ་མི་ཞུགས་པ་དང་འདྲ་བ་ཡིན། དེས་ན་དང་པོ་ནས་བདུད་བཞི་སྤངས་མེད་ཀྱང་། ནད་གཞི་སྨན་གྱིས་སྤངས། སྨན་ནི་ནད་པ་སོས་ནས་རང་ཤུགས་ཀྱིས་སྤང་བ་དང་འདྲ་བ། ཁྱད་པར་དུ་དགའ་བྲོད་སྙེམས་བྱེད་གཉིས་ཀ་རྟོགས་པ་ཀློང་དུ་གྱུར་དུས་རང་ཤུགས་ཀྱིས་སྤང་བ་ཡིན། འདི་ནས་འདྲེ་ངོས་འཛིན་བྱེད་པ་ལ། འདྲེ་ཕྱི་ལ་ཡོད་པ་མ་ཡིན་ནང་རང་གི་སེམས་ལ་ཡོད་དེ། ནང་འདྲེ་འཛིན་གྱི་རྣམ་རྟོག་དང་བདག་འཛིན་གྱི་འཁྲུལ་བ་དང་། གཅེས་འཛིན་གྱི་ཞེན་པ་ཡོད་པ་དེ་ཐམས་ཅད་འདྲེ་ཡིན་ཏེ། མ་གཅིག་གིས། འདྲེ་ངར་མ་བྱ་བ་ང་འཛིན་ཡིན་སོགས་གསུངས་བ་ལྟར་ཡིན་ནོ། །འོ་ན་ཕྱི་རོལ་ཞིག་ཏུ་སོང་བས་ཅི་བྱ་ཞེ་ན། ཕྱི་འཇིགས་པའི་རྐྱེན་ལ་བརྟེན་ནས་ནང་འཇིགས་མཁན་གྱི་ཤེས་པའི་རྩ་བརྡར་གཅོད་པ་ལ་གཅོད་ཅེས་གསུངས། ནང་གི་འདྲེ་འཛིན་མ་ཞིག་ན་ཕྱིའི་འདྲེ་གདོན་ལ་ཟད་པ་མེད་པས་ཚད་མེད་པ་ཡོད་ཀྱང་། བསྡུ་ན་སྡེ་བརྒྱད་འབྱུང་པོའི་ཁོངས་སུ་འདུས་ཏེ། དཀར་པོ་ལྷ་ཡི་སྡེ། དམར་པོ་བཙན་གྱི་སྡེ། ནག་པོ་བདུད་ཀྱི་སྡེ། སེར་པོ་གནོད་སྦྱིན་གྱི་སྡེ། སྨུག་པོ་སྲིན་པོའི་སྡེ། སྟེང་ཕྱོགས་ཀྱི་དབང་ཆེན་གཟའ། འོག་ཕྱོགས་ཀྱི་དབང་ཆེན་ཀླུ། མདོར་ན་ལྷ་དང་བཙན་དང་བདུད་དང་གནོད་སྦྱིན་དང་སྲིན་པོ་དང་གཟའ་དང་ཀླུ་ཕོ་རྣམས་ལ་ཕོ་གདོན་དང་། དེའི་སྟེང་མོ་རྒྱུད་ཀྱི་འདྲེ་གདོན་སོགས་ཐམས་ཅད་མ་མོ་སྟེ། བརྒྱད་པོ་ལ་སྡེ་བརྒྱད་ཟེར་བ་ཡིན་ནོ། །ནང་བདག་འཛིན་གྱི་རྩ་བ་བཅད་ནས་འཁོར་འདས་ཀྱི་སྟོང་སྲོག་ལ་དབང་མ་འབྱོར་ན། ཕྱིའི་སྡེ་བརྒྱད་མི་མིན་འབྱུང་པོའི་ཆོ་འཕྲུལ་ལ་ཡ་ལན་ཐུབ་པ་མིན་ཏེ། ཅིའི་ཕྱིར་ཞེ་ན། འཆི་བདག་གཤིན་རྗེའི་ཁྲམ་ཁ་དེས་གང་ལ་ཐེབས་ན་རི་དྭགས་རྙི་ལ་བཟུང་བ་ལྟ་བུ་ཞིག་དང་། འདོད་ཁམས་མ་མོའི་ནད་རྐྱལ་གྱི་རིམས་ནད་དྲག་པོ་དེ་འཆི་ནད་ལུས་ལ་ཐེབས་པ་ལྟ་བུ་ཞིག་ཡིན། གདུག་པ་གཟའ་ཡི་ཁ་རླུང་དེ་ནམ་མཁའི་ཐོག་མདའ་མགོ་ལ་བབས་པ་ལྟ་བུ་ཞིག་ཡིན། གླེན་པ་ཀླུ་ཡི་གདུག་རྩུབ་དེ་རྒྱ་དུག་ཁོག་ལ་སོང་བ་ལྟ་བུ་ཞིག་ཡིན་ཞེས་སོགས་གསུངས་ཡོད། ནང་བདག་འཛིན་གྱི་ཞེན་པ་རྩད་ནས་བཅད་དེ་གཅེས་འཛིན་གྱི་བློ་དང་བྲལ་དུ་བཅུག་ན། ནང་སེམས་ཀྱི་འདྲེ་འཛིན་ཆོད་པས་ཕྱི་འདྲེ་ཡི་ཆོ་འཕྲུལ་དང་གནོད་པ་རང་ཞི་རུ་འགྲོ། སྒྱུ་མ་མཁན་པོ་ཁོ་རང་བསད་ན་སྒྱུ་མར་སྤྲུལ་བའི་དམག་སྣ་རང་ཤུགས་ཀྱིས་བཟློག་ཐུབ་པ་ལྟ་བུ་ཡིན་ནོ། །ལུས་སྦྱིན་དངོས་ལ་འཇུག་པ་ལ། ནང་གསེས་སྔོན་འགྲོ་དངོས་གཞི་རྗེས་གསུམ་ལས། དང་པོ་སྔོན་འགྲོ་ལ་ལྔ་སྟེ། ཚོགས་ཞིང་གསལ་གདབ་པ། སྐྱབས་འགྲོ། སེམས་བསྐྱེད། མཎྜལ། བླ་མའི་རྣལ་འབྱོར་དང་ལྔའོ། །དང་པོ་ཚོགས་ཞིང་གསལ་གདབ་པ་ནི། ཕཊཿ རང་སྣང་འོད་གསལ་བདེ་བ་ཆེན་པོའི་དབྱིངསཿ འབད་རྩོལ་སྤྲོས་པ་བྲལ་བའི་ནམ་མཁའ་ལཿ རྩ་བའི་བླ་མ་དྲུག་པ་རྡོ་རྗེ་འཆངཿ དགོངས་བརྡ་སྙན་བརྒྱུད་བླ་མ་ཡི་དམ་ལྷཿ མཁའ་འགྲོ་ཆོས་སྐྱོང་སྲུང་མ་སྤྲིན་ལྟར་གཏིབསཿ མ་འགགས་འཇའ་ཚོན་ཐིག་ལེའི་ཀློང་དུ་གསལཿ ཞེས་གསུངས་ཏེ། རང་སྣང་འོད་གསལ་ཞེས་པས་ཅི་ཞིག་བསྟན་ཅེ་ན། ཡུལ་ཅན་ལྷུན་གྲུབ་རིག་པ་འོད་གསལ་བའི་ཡེ་ཤེས་བསྟན་པ་དང་། བདེ་བ་ཆེན་པོའི་དབྱིངས་ཞེས་པས་ཡུལ་ཆོས་ཀྱི་དབྱིངས་སྟོང་ཉིད་དམིགས་བསམ་བརྗོད་པ་ཐམས་ཅད་ལས་འདས་པ། བདེ་སྟོང་དབྱེར་མི་ཕྱེད་པའི་བདག་ཉིད་ཆོས་ཉིད་མཉམ་པ་ཆེན་པོར་བསྟན་ནས། འབད་རྩོལ་སྤྲོས་པ་བྲལ་ཞེས་པས་དབྱིངས་དང་ཡེ་ཤེས་གཉིས་ཀ་ཟུང་དུ་འཇུག་པ་མངོན་རྟོགས་ཀྱི་རིམ་པས་ཡུལ་ཡུལ་ཅན་གཅིག་འཕྲོས་གཅིག་བཞག་ཀྱང་། དོན་ལ་སྔོན་རྗེས་ཀྱི་གོ་རིམ་ཅན་མིན་པ་གདོད་ནས་དབྱིངས་དང་ཡེ་ཤེས་དབྱེར་མེད་དུ་བཞུགས་པའི་རང་བྱུང་བདེ་བ་ཆེན་པོའི་ཡེ་ཤེས་ཡིན་ན། དེ་ནི་སེམས་ཀྱི་ཆོས་ཉིད་དམ་གཉུག་མ་འོད་གསལ་བའི་སེམས་ཞེས། ཡོད་མེད་ཡིན་མིན་གྱི་མཐའ་ཐམས་ཅད་དང་བྲལ་བ། སྨྲ་བསམ་བརྗོད་འདས་ཀྱི་བདག་ཉིད། ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མ་འགགས་ནམ་མཁའི་ངོ་བོ་ཉིད། །སོ་སོར་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ཞེས་གསུངས་པ་ལྟར། མདོ་རྒྱུད་ཐམས་ཅད་ཀྱི་བསྟན་དོན་གྱི་ཡེ་ཤེས། མཐའ་བྲལ་དབུ་མ་ཆེན་པོ་དང་སྤྲོས་བྲལ་ཕྱག་རྒྱ་ཆེན་པོའི་དགོངས་པ་མཐར་ཐུག་པ། དབང་བཞི་པའི་དོན་གྱི་ལྷན་ཅིག་སྐྱེས་པའི་ཡེ་ཤེས། འོད་གསལ་རྫོགས་པ་ཆེན་པོའི་སྒྲ་འཇུག་ས་ཡང་དེ་ཡིན། དེས་ན་ཕྱི་ལྟར་ན་མདུན་གྱི་ནམ་མཁའ། ནང་ལྟར་ན་རང་སྣང་དག་པ་ཆེན་པོ་ཡིད་ཀྱི་མཁའ། གསང་བ་ལྟར་ན་འཁོར་འདས་དབྱེར་མེད་ཀྱི་ཀློང་། གཞི་འབྲས་གཉིས་སུ་མེད་པ་ཆོས་སྐུ་ཐིག་ལེ་ཉག་གཅིག་གི་དེ་ཁོ་ན་ཉིད་ཀྱི་ནམ་མཁའ་ལ། སྐྱབས་གསུམ་ཀུན་འདུས་རྩ་བའི་བླ་མ། རྩ་གསུམ་ཀུན་འདུས་བྱིན་རླབས་ཀྱི་གཏེར་མཛོད། སྐུ་གསུམ་ཀུན་འདུས་རིགས་བརྒྱའི་ཁྱབ་བདག་དགོངས་བརྒྱུད་གཅིག་ལ་འདུས་པ། དོན་གནས་ལུགས་རིག་སྟོང་གཉིས་མེད་ཐིག་ལེ་ཉག་གཅིག་ལ་འདུས་ཀྱང་། རྣམ་པ་ཟུང་འཇུག་སྣང་བའི་ཆ་ནས་དཀྱིལ་འཁོར་རྒྱ་མཚོའི་སྤྲོ་གཞི་རུ་གྱུར་བ། རིགས་ལྔ་གཅིག་ཏུ་འདུས་པ་རིགས་དྲུག་པ་བླ་མ་རྒྱལ་བ་རྡོ་རྗེ་འཆང་ཆེན་པོ་ལ། རྒྱལ་བ་དགོངས་པའི་བརྒྱུད་པ་ཁྱབ་བདག་རྡོ་རྗེ་འཆང་ཆེན་པོས་རང་མདངས་རིགས་ལྔའི་འཁོར་ལ། དུས་བཞི་འཕོ་འགྱུར་མེད་པའི་དུས་ན། ཆོས་ཟབ་མོ་གསང་སྔགས་རྡོ་རྗེའི་ཐེག་པ་སྒྲ་ཚིག་རང་མཚན་ལས་འདས་པར་གསུངས་པ་དང་། རིག་འཛིན་བརྡ་ཡི་བརྒྱུད་པ་ཉིད་ལས་མི་གཞན་པའི་རྒྱལ་སྲས་རིགས་གསུམ་སེམས་དཔའ་འམ་རིགས་ལྔ་འཁོར་གྱི་མཁའ་འགྲོ། གསང་འཛིན་གསང་བའི་བདག་པོའམ་སྟོན་པ་དྲི་མ་མེད་པ་སོགས་སྣང་སྟེ། བརྡ་ཡིས་གྲོལ་བར་མཛད་པའི་བརྒྱུད་པའོ། །གང་ཟག་སྙན་ཁུང་གི་བརྒྱུད་པ་ལས་ཅན་དབང་པོ་ཡང་རབ་རྟོགས་གྲོལ་དུས་མཉམ་སོང་བ་ནས་གྲུབ་བརྙེས་བརྒྱུད་པའི་རིག་འཛིན་སྐྱེས་འཕགས་སྣ་ཚོགས་པའི་ཚུལ་གྱིས་བྱོན་པའི་ཞལ་ནས་སྙན་དུ་བརྒྱུད་པའི་བརྒྱུད་པ་སྟེ། དེ་ལྟ་བུ་བརྒྱུད་གསུམ་དགོངས་བརྡ་སྙན་བརྒྱུད་ཀྱི་བླ་མ་དང་། ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་ཏེ། འདིར་སྔགས་གསར་རྙིང་ཐུན་མོང་ལྟར་ན་རྒྱུད་སྡེ་བཞི། བྱ་བའི་རྒྱུད་ཀྲི་ཡ་ཏནྟྲ། སྤྱོད་པའི་རྒྱུད་ཨུ་པ་ཏནྟྲ། རྣལ་འབྱོར་རྒྱུད་ཡོ་ག་ཏནྟྲ། རྣལ་འབྱོར་ཆེན་པོའི་རྒྱུད་མ་ཧཱ་ཡོ་ག་ཏནྟྲ། ཡང་ན་རྣལ་འབྱོར་བླ་མེད་ཀྱི་རྒྱུད་དང་བཞི། སྔ་འགྱུར་ཐུན་མིན་གྱི་རྒྱུད་སྡེ་དྲུག་སྟེ། ཕྱི་རྒྱུད་སྡེ་གསུམ་དང་། ནང་རྒྱུད་སྡེ་གསུམ་དང་དྲུག་སྟེ། བྱ་སྤྱོད་རྣལ་འབྱོར་གྱི་རྒྱུད་གསུམ་ལ་ཕྱི་རྒྱུད་གསུམ་དང་། མ་ཧཱ་ཨ་ནུ་ཨ་ཏི་གསུམ་ལ་ནང་རྒྱུད་གསུམ་དང་དྲུག་གོ། །སྔགས་ཕྱི་ནང་ཞེས་པ་ལ་ཁྱད་པར་ཅི་ཞིག་ཡོད་ཅེ་ན། འདིར་གཙོ་བོ་གྲོལ་ལམ་གྱི་དབང་དུ་བྱས་ན། ལྟ་བ་བདེན་གཉིས་དབྱེར་མེད་ཡིན་མིན་དང་། སྒོམ་པ་ལྷ་ཚོགས་ཐབས་ཤེས་མཉམ་སྦྱོར་ཡིན་མིན། སྤྱོད་པ་ཤ་ལྔ་བདུད་རྩི་ལྔ་སོགས་བརྟེན་མི་བརྟེན་གྱི་ཁྱད་པར་ཡོད་པ་དང་། སྨིན་བྱེད་ཀྱི་དབང་དུ་བྱས་ན། དབང་བཞི་ཚང་དང་མི་ཚང་གི་ཁྱད་པར་གྱིས་རིམ་གཉིས་བསྐྱེད་རྫོགས་གཉིས་ཀར་ཁྱད་པར་ཆེ་བ་ཡིན། འོ་ན་གསང་སྔགས་གསར་རྙིང་ལ་ཁྱད་པར་ཅི་ཡོད་ཅེ་ན། འགྱུར་སྔ་ཕྱིའི་དབང་གིས་གསང་སྔགས་གསར་རྙིང་གི་རྣམ་པར་བཞག་པ་ཡིན། དེས་བཞག་པའི་གསང་སྔགས་ཕྱི་འགྱུར་གསར་མ་པ་ཡིན་ན་ཡང་། བླ་མེད་དང་གཙོ་བོ་ཁམས་བདེ་བ་ཆེན་པོ་ལ་བརྟེན་ནས་མཆོག་སྒྲུབ་པ་མ་རྒྱུད། གཙོ་བོ་གསལ་བ་རླུང་གི་ཐབས་ལ་བརྟེན་ནས་མཆོག་སྒྲུབ་པ་ཕ་རྒྱུད། དེ་གཉིས་ཀའི་གྲོགས་རྩ་རླུང་ཁམས་གསུམ་པོ་གནད་དུ་བསྣུན་པ་དང་། དེ་གཉིས་ཀ་གཉིས་མེད་ཟུང་འཇུག་མ་ནིང་གི་རྒྱུད་སྡེ་ཡང་ཡོད། མདོར་ན་སྔགས་གསར་མའི་བདེ་གསལ་མི་རྟོག་པའི་ཏིང་འཛིན་གྱི་ཐབས་ཀྱིས་སྐུ་དང་ཡེ་ཤེས་ཀྱི་གནས་ལུགས་མངོན་དུ་བྱེད་པ་ཡིན་པས། གསང་འདུས་བདེ་མཆོག་དུས་འཁོར་ལ་སོགས་རྒྱུད་སྡེ་མང་ངོ་། །སྔ་འགྱུར་རྙིང་མ་ལ་མཚོན་ན་མ་ཧཱ་ཨ་ནུ་ཨ་ཏི་གསུམ། དེའི་ནང་གི་མ་ཧཱ་ཡོ་གའི་ཏནྟྲ་ལ་རྣལ་འབྱོར་ཆེན་པོ་ཐབས་ཀྱི་རྒྱུད་ཅེས་བྱ་སྟེ། སྣང་སྲིད་ལྷ་དང་གཞལ་ཡང་ཁང་དུ་གསལ་ཞིང་། ཕུང་ཁམས་སྐྱེ་མཆེད་ལ་སོགས་པ་ལྷར་གསལ་བས། རླུང་ལྔ་གཙོ་བོར་གྱུར་བའི་བདེ་གསལ་མི་རྟོག་པའི་ཡེ་ཤེས་གཉིས་མེད་ལམ་དུ་བྱེད་པས་ཚེ་འདི་ལ་གྲོལ་བར་འདོད་པ་ཡིན། ངེས་བྱེད་རྒྱུད་སྡེའི་རྣམ་གྲངས་ལ་རྩ་རྒྱུད་དང་། མན་ངག་གི་རྒྱུད་གཉིས་ལས། རྩ་བའི་རྒྱུད་ལ་དཔལ་གསང་བ་འདུས་པ་ནམ་མཁའ་དང་མཉམ་པའི་རྒྱུད་སོགས་དང་། གདམས་པ་མན་ངག་གི་རྒྱུད་ལ། བར་ཆད་བསྲུང་བ་གཟི་ལྡན་འབར་བ་མཚམས་ཀྱི་རྒྱུད་སོགས་ཡོད་དོ། ། ལུང་ཨ་ནུ་ཡོ་གའི་ཏནྟྲ་ལ་མཚོན་ན། དབྱིངས་བདེ་ཆེན་རྣལ་འབྱོར་གྱི་རྒྱུད་དེ། སྣོད་བཅུད་ལྷའི་རང་བཞིན་དུ་དབྱིངས་ནས་སངས་རྒྱས་པ་ཙམ་དུ་རྟོགས་པའི་ངང་ནས་བསྐྱེད་པ་ཐབས་ཤས་ཆུང་ཞིང་། རྫོགས་པ་རྩ་ཐིག་རླུང་གི་རྣལ་འབྱོར་བདེ་གསལ་མི་རྟོག་པའི་ཡེ་ཤེས་ལམ་དུ་བྱེད་པས་ཚེ་འདིར་གྲོལ་བར་འདོད་པའོ། །དེའི་ངེས་འབྱེད་རྒྱུད་སྡེའི་རྣམ་གྲངས་ལ་མཚོན་ན། རྩ་རྒྱུད་ཐིག་ལེ་འདུས་པ་སོགས་དང་། སྐུའི་རྒྱུད་མེ་ལྟར་འབར་བ། གསུང་གི་རྒྱུད་དབང་ཆེན་འདུས་པ། ཐུགས་ཀྱི་རྒྱུད་པུཎ་ཌ་རཱི་ཀ དེ་བཞིན་དུ་ཡོན་ཏན་ཕྲིན་ལས་ལ་སོགས་པའི་རྒྱུད་མང་བ་ཡིན། རྫོགས་ཆེན་ཨ་ཏི་ཡོ་ག་ལ་མཚོན་ན་ཤིན་ཏུ་རྣལ་འབྱོར་གྱི་རྒྱུད་རེད། དེའི་རྒྱུད་སྡེ་ལ་ནང་གསེས་དང་བཅས་པར་བཤད་ཀྱིས་མི་ལང་བར་ཡོད་ཀྱང་། འདི་ནས་དེ་དག་རྒྱས་བཤད་ཀྱི་སྐབས་མ་ཡིན། སྔགས་གསར་རྙིང་གི་རྒྱུད་སྡེ་ཞེས་པ་འདི་དག་བླ་མེད་ཀྱི་རྒྱུད་ཁོ་ནར་མིན་ཡང་། རྒྱུད་སྡེ་འོག་མ་གསུམ་པོ་ལའང་སྔ་འགྱུར་ཕྱི་འགྱུར་གྱི་རྒྱུད་སྡེའི་ཁྱད་པར་ཡོད་པ་ཡིན། དཔེར་གསར་རྒྱུད་ལ་མཚོན་ན། བྱ་རྒྱུད་ཀྱི་ལེགས་གྲུབ་དང་། བསམ་གཏན་ཕྱི་མ། གསང་བ་སྤྱི་རྒྱུད་སོགས་དང་། སྤྱོད་རྒྱུད་ཀྱི་རྩ་རྒྱུད་རྣམ་སྣང་མངོན་བྱུང་། བཤད་རྒྱུད་ཀུན་འདུས་བཀོད་པ་ལ་སོགས་པ། རྣལ་འབྱོར་རྒྱུད་ཀྱི་རྩ་རྒྱུད་དེ་ཉིད་འདུས་པ། བཤད་རྒྱུད་རྡོ་རྗེའི་རྩེ་མོ། ཆ་མཐུན་གྱི་རྒྱུད་དཔའ་མཆོག་དང་པོ་ལ་སོགས་པ་ཤིན་ཏུ་མང་ལ། དེ་བཞིན་དུ་སྔ་འགྱུར་ལ་མཚོན་ན། བྱ་རྒྱུད་ཀྱི་ལུས་ངག་ཐམས་ཅད་ཀྱི་ཁོག་འབུབ་པ་དཔུང་བཟང་གི་རྒྱུད། རིག་སྔགས་ཐམས་ཅད་ཀྱི་དབང་བསྐུར་བ་ལག་ན་རྡོ་རྗེ་དབང་བསྐུར་བའི་རྒྱུད་སོགས་དང་། སྤྱོད་རྒྱུད་ལ་མཚོན་ན་རྣམ་པར་སྣང་མཛད་མངོན་པ་བྱང་ཆུབ་པའི་རྒྱུད། མེ་རླུང་འབར་བའི་རྒྱུད་སོགས་ཡོད། ཡོ་གའི་རྒྱུད་ལ་མཚོན་ན། རྡོ་རྗེ་དབྱིངས་རྩ་བའི་རྒྱུད་སྟོང་ཕྲག་ལྔ་བ་ལེ་ལག་དང་བཅས་པ་ལ་སོགས་པ་ཤིན་ཏུ་མང་ངོ་། །དེ་ལྟར་བུའི་རྒྱུད་སྡེ་བཞིའམ་དྲུག་གི་དཀྱིལ་འཁོར་བསམ་གྱིས་མི་ཁྱབ་པ་ཡོད་པས། དཀྱིལ་འཁོར་གཅིག་གི་ལྷ་ཚོགས་ཀྱང་སྤྲོ་བསྡུ་བསམ་ཡས་ཀྱི་ལྷ་ཚོགས་ངོ་བོ་དཀྱིལ་འཁོར་གྱི་གཙོ་བོ་གཅིག་ལ་འདུས། དེ་ཡང་བླ་མ་ལ་འདུས་ཏེ། དབང་ནི་ལྷ་ལ་མི་ཞུ་བླ་མར་ཞུ་ཞེས་གསུངས་པ་ལྟར་རོ། །གསང་སྔགས་བླ་མེད་རྒྱུད་ཀྱི་གསར་རྙིང་ལ་མ་ལྟོས་པར། ལྷའི་རྣམ་དག་ཅེས་ཕུང་ཁམས་སྐྱེ་མཆེད་རྩ་རླུང་ཁམས་བྱང་ཆུབ་ཀྱི་སེམས་དང་བཅས་པ་སྔགས་ཀྱི་དཀྱིལ་འཁོར་གསུངས་པ་ཡིན། དེ་བཞིན་དུ་མཁའ་འགྲོ་ཡང་ནང་གི་གནས་ཡུལ་ཉེར་བཞི་རྩ་ཁམས་བདེ་བའི་རང་བཞིན། གདན་གསུམ་ཚང་བའི་ཁམས་དྲུག་ལྡན་བའི་རྣལ་འབྱོར་རྡོ་རྗེའི་ལུས་འདི་ལ་འདུས་ཤིང་མ་ཚང་པ་མེད་པས། ཕྱི་ནང་གཉིས་ཀ་གནད་གཅིག་པའི་དབང་གིས་གདོད་ནས་གྲུབ་པའི་ལྷ་སྐུ་ལྷུན་གྲུབ་སྣང་སྟོང་འགག་མེད། བཀའ་སྡོད་ཆོས་སྐྱོང་སྲུང་མ་དང་བཅས་པ་སྤྲིན་ལྟར་ཐིབས་ཤིང་རླུང་ལྟར་འཕྱོ་བ། དེ་ཡང་རགས་པའི་གཟུགས་སུ་མ་གྲུབ་ཀྱང་སྣང་ཡུལ་དུ་སྟོང་གསལ་མ་འགགས་ཡེ་ཤེས་ཀྱི་སྙིང་པོ་ཅན། ཡེ་ཤེས་འོད་ལྔའི་འཇའ་ཚོན་ཐིག་ལེ་བཀྲ་བའི་ཀློང་དུ་གསལ་གདབ་དགོས། ཞེས་པས་ཚོགས་ཞིང་གསལ་བཏབ་ལཿ ཞེས་དེ་ལྟར་ཚོགས་ཞིང་གི་ལྷ་ཚོགས་གསལ་གདབ་ནས། གཉིས་པ་སྐྱབས་སུ་འགྲོ་བ་ནི། ལྷ་འདྲེས་གཙོ་བྱས་སེམས་ཅན་ཀུནཿ ཁྱེད་ཤེས་བློ་ཡིས་སྐྱབས་འགྲོ་དམིགསཿ ཞེས་གསུངས་ཏེ། སྐྱབས་འགྲོ་འདི་ལ་སྐྱེས་བུ་ཆུང་འབྲིང་ཆེ་གསུམ་གསང་བ་སྔགས་དང་བཅས་པའི་སྐྱབས་སུ་འགྲོ་ཚུལ། འགྲོ་ཡུལ། འགྲོ་ལུགས་ལ་སོགས་པའི་ཁྱད་པར་ཡོད་དེ། དད་པ་རྣམ་དག་སྐྱེས་བུ་ཆུང་བའི་ལམ། །ངེས་འབྱུང་རྣམ་དག་སྐྱེས་བུ་འབྲིང་གི་ལམ། །ལྷག་བསམ་རྣམ་དག་སྐྱེས་བུ་ཆེན་པོའི་ལམ། །ཞེས་གསུངས་པ་ལྟར་ཡིན་པས། སྐབས་འདིར་བཀའ་ཤེས་རབ་ཀྱི་ཕ་རོལ་ཏུ་ཕྱིན་པའི་དགོངས་པ། ཐེག་ཆེན་བྱང་ཆུབ་སེམས་དཔའི་ལམ་ཡིན་པར་མ་ཟད། ནང་གསང་སྔགས་དོན་གྱི་ལྟ་བ་རྣལ་འབྱོར་བླ་མེད་རྒྱུད་ཀྱི་ཉམས་ལེན། ཁྱད་པར་རྫོགས་ཆེན་ཀློང་ཆེན་སྙིང་ཐིག་གི་ཆོས་སྡེ་ལས་བྱོན་པའི་ཕྱག་རྫོགས་གཉིས་མེད་ཀྱི་རྫོགས་རིམ་ཡང་ཡིན་ན། སྐྱབས་སུ་འགྲོ་མཁན་རང་ཉིད་གཅིག་པུས། སྐྱབས་ཡུལ་མཚན་མ་ཅན་གཞན་ཞིག་ལ་དམིགས་ནས། སྐྱབས་འགྲོ་ཉི་ཚེ་བར་བྱས་པ་ལྟར་མ་ཡིན་པར། སྐྱབས་སུ་འགྲོ་མཁན་ཉམ་ཐག་སྡུག་བསྔལ་གྱིས་གཙེས་པའི་སྣང་བ་དགྲ་རུ་ལྡང་བའི་ལྷ་འདྲེ། གནས་གདོན་ལུས་གདོན་ཡུལ་འདྲེ་འཁྱམ་པོ་སོགས་ཀྱིས་གཙོས་པའི་མར་གྱུར་སེམས་ཅན་ཀུན་གྱིས། སྐྱབས་ཡུལ་མཆོག་གསུམ་རྩ་གསུམ་སྐུ་གསུམ་གྱི་ལྷ་ཚོགས་ལ། ཡིད་ཁྱེད་ཤེས་བློ་གཏད་ལིངས་བསྐྱུར་གྱིས་སྐྱབས་སུ་འགྲོ་བ་དམིགས་བཞིན་ངག་གིས། ཕཊཿ རང་བྱུང་གི་རིག་པ་བཅོས་མེད་འདིཿ སྐྱབས་ཡུལ་གྱི་ངོ་བོར་མ་རིག་པསཿ སྡུག་བསྔལ་གྱི་རྒྱ་མཚོར་བྱིངས་པ་རྣམསཿ སྐུ་གསུམ་གྱི་དགོངས་པས་བསྐྱབ་ཏུ་གསོལཿ ཞེས་གསུངས་ཏེ། སློབ་དཔོན་དགའ་རབ་རྡོ་རྗེས་མཛད་པའི་རྡོ་རྗེའི་མཁར་རྫོང་ལས། ཆོས་སྐུ་མི་འགྱུར་ཡུལ་མེད་ཀུན་འབྱམས་ལ། །ཕྱི་ནང་སྣོད་བཅུད་ཤར་བ་ལོངས་སྤྱོད་རྫོགས། །གཟུགས་བརྙན་ལྟ་བུར་སྣང་བ་སྤྲུལ་བའི་སྐུ། །སྐུ་གསུམ་རྒྱན་དུ་མ་རྫོགས་ཆོས་མེད་པས། །ཐམས་ཅད་སྐུ་གསུང་ཐུགས་ལས་ཤར་བ་ཡིན། །ཞེས་གསུངས་པ་ལྟར། རང་བྱུང་གདོད་མའི་རིག་པ་བཅོས་མེད་ཀ་དག་སྟོང་པ་ཆེན་པོའི་ངོ་བོ་ནི་ཆོས་སྐུ་སྤྲོས་པ་དང་བྲལ་བའི་རང་ངོ་སྐུ་གསུམ་ལྷུན་གྲུབ་རྒྱལ་བའི་ཞིང་ཁམས་ཡིན་པས། མ་དག་རིགས་དྲུག་གི་འགྲོ་བ་སྣང་ཡང་སྐུ་གསུམ་གྱི་རང་སྣང་། དག་པ་མྱང་འདས་སུ་སྣང་ཡང་སྐུ་གསུམ་རང་སྣང་། ཐམས་ཅད་གཉིས་མེད་སྐུ་གསུམ་གྱི་འཁོར་ལོ་ལས་མ་འདས་པས་སྐྱབས་ཡུལ་ངོ་བོ་རང་གི་སེམས་འདི་ལ་ཚང་སྟེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་གྲུབ་དགེ་འདུན་ཉིད། ཡིན་ཕྱིར་རང་གི་སེམས་ཉིད་མཆོག །ཅེས་གསུངས་པ་ལྟར་ཡིན། འོན་ཀྱང་དེ་ལྟར་སྐྱབས་ཡུལ་གྱི་ངོ་བོ་ཡིན་པ་ལ་མ་རིག་ཅིང་མ་ཤེས་པས་འཁྲུལ་ནས་རིགས་དྲུག་གི་སྡུག་བསྔལ་གྱི་རྒྱ་མཚོ་ལ་བྱིངས་ཤིང་། རྣམ་པར་འཕྱན་པའི་སྐྱབས་མེད་མགོན་བྲལ་བཤེས་མེད་ལོང་བ་ཐང་དཀྱིལ་དུ་ལུས་པ་ལྟ་བུའི་སེམས་ཅན་རྣམས་ཏེ། སྣང་སྲིད་འཁོར་འདས་ཀྱི་ཆོས་ཐམས་ཅད་ཡིན་ལུགས་ངོ་བོ་སྟོང་པ། རང་བཞིན་གསལ་བ། ཐུགས་རྗེ་སྣ་ཚོགས་སུ་འཆར་བ་སྐུ་གསུམ་གྱི་རང་གདངས་ལྷུན་གྲུབ་ཆེན་པོར་ཡེ་ནས་གནས་པ་ཡིན་པས། འཁོར་བ་ཞེས་བྱ་བའི་སྤང་བྱ་རང་མཚན་པ་ཞིག་ལོག་ན་མ་གྲུབ། མྱ་ངན་ལས་འདས་པ་ཞེས་བྱ་བའི་བླང་བྱ་མཛེས་པ་ཞིག་ཟུར་དུ་མ་གྲུབ། འཁོར་འདས་རིག་ངོ་ན་མཉམ་པའི་མ་བཙལ་ལྷུན་གྲུབ་གྱི་དགོངས་པ་ཆོས་སྐུ་དགོངས་ཀློང་གཅིག་ཏུ་འཁྱིལ་བའི་སྐུ་གསུམ་རང་ལ་ཚང་པའི་གནས་ལུགས་རྡོ་རྗེའི་སྐྱབས་འགྲོ་དང་སྒོ་བསྟུན་པས་དགོངས་ཀློང་མངོན་འགྱུར་ཡོང་བར་བསྐྱབ་ཏུ་གསོལ་ཞེས་སྐྱབས་འགྲོའི་ཚིག་དང་བསྒྲགས་ནས། དེ་ལྟར་སྐྱབས་འགྲོའི་ངག་འདོན་ཡུལ་མཆོག་གསུམ་ལ་ནན་གྱིས་བསྐྱར་བའི་ཚུལ་དུ་ལན་གསུམ་འདོན་དགོས། ལན་གསུམ་དེ་ནས་སེམས་བསྐྱེད་ནིཿ ཞེས་མཚམས་སྦྱར་ནས། གསུམ་པ་སེམས་བསྐྱེད་ནི། ཕཊཿ སྣང་བ་ལ་དངོས་པོར་འཛིན་པའི་སེམསཿ བརྟུལ་ཞུགས་ཀྱི་སྤྱོད་པས་ཚར་བཅད་ནསཿ ཡང་དག་གི་གནས་ལུགས་རྟོགས་བྱའི་ཕྱིརཿ རེ་དོགས་དང་བྲལ་བར་སེམས་བསྐྱེད་དོཿ ཞེས་གསུངས་ཏེ། སྤྱིར་ན་ཐེག་ཆེན་བྱང་ཆུབ་མཆོག་ཏུ་སེམས་བསྐྱེད་པ་ལ་སྨོན་དང་འཇུག་པའི་བདག་ཉིད་ཀུན་རྫོབ་བྱང་ཆུབ་མཆོག་ཏུ་སེམས་བསྐྱེད། སྨོན་པའི་བསླབ་བྱ་ཚད་མེད་བཞི་ལྡན། འཇུག་པའི་བསླབ་བྱ་ཕྱིན་དྲུག་གི་སྤྱོད་པ་མཐར་ཕྱིན་པར་བྱ་བའི་དམ་བཅའ་ལེན་པ་དང་མཉམ་དུ། རང་གཞན་སེམས་ཅན་ཐམས་ཅད་ཀྱི་ཐོག་མ་མེད་པའི་དུས་ནས་ད་ལྟའི་བར་དུ། ཕྱི་སྣང་བའི་ཡུལ་ལ་དངོས་པོ་བདེན་གྲུབ་ཏུ་ཞེན་ཅིང་འཛིན་ནས་དགག་སྒྲུབ་ཆགས་སྡང་གི་དབང་དུ་ཤོར་བའི་འཁྲུལ་བའི་སེམས་འདི། རིག་པ་བརྟུལ་ཞུགས་ཀྱི་སྤྱོད་པས་ཚར་བཅད་ནས། ཡང་དག་པའི་མ་འཁྲུལ་དོན་གྱི་གནས་ལུགས་ཕྱིན་ཅི་མ་ལོག་པ་ཇི་བཞིན་དུ་རྟོགས་པར་བྱ་བའི་ཕྱིར་དུ། རེ་དོགས་གཉིས་འཛིན་དང་བྲལ་བའི་སེམས་བསྐྱེད་པ་ཡིན་ཞེས་ཚིག་གི་འབྲུ་དེད་ན་དེ་ལྟར་རེད། གོང་དུ་སྐྱབས་འགྲོའི་སྐབས་རང་གནས་སྐུ་གསུམ་གྱི་དགོངས་པ་ལ་སྐྱབས་སུ་སོང་བ་ལྟར། སེམས་བསྐྱེད་ཀྱི་སྐབས་འདིར་ཡང་། དེ་ཉིད་རང་གནས་རང་ངོར་ཤེས་པ། བདག་གཞན་སེམས་ཅན་ཐམས་ཅད་ཡེ་ནས་སྐུ་གསུམ་གྱི་ངོ་བོ་ཡིན་པ་ལ། ཡིན་པར་ཤེས་ནས་དེ་ལྟར་མངོན་དུ་གྱུར་པའི་སེམས་བསྐྱེད་པ་ཡིན་པས། མཉམ་བཞག་རིག་སྟོང་ནམ་མཁའ་ལྟ་བུའི་ངང་ལ་བཟོ་མེད་དུ་མཉམ་པར་བཞག་ན། བློ་བྲལ་ཅི་ཡང་མ་གྲུབ་པའི་ངོ་བོ་མཐོང་བ་དེ་ཉིད་མངོན་འགྱུར་མ་ཡེངས་པར་བསྐྱང་ན། སེམས་ཉིད་རང་བཞིན་རྣམ་དག་གློ་བུར་དྲི་མ་འབྲལ་རུང་གི་གཉིས་མེད་ཀྱི་འབྲས་བུ་ཆོས་སྐུ་གཞི་གནས་བཙལ་མི་དགོས་རང་གིས་རྙེད་པ་ཡིན། དེའི་སྟོང་པའི་དབྱིངས་ལས་བདེ་གསལ་མ་འགགས་གསལ་སྟོང་ཟུང་འཇུག་གོམས་པས་མཐར་ཐུག་འབྲས་བུའི་དུས་སུ་སྐུ་མདོག་ཞལ་ཕྱག་དང་རྒྱན་ཆ་ལུགས་ཅན་གྱི་རྣམ་པར་སྣང་ནས་ལོངས་སྤྱོད་རྫོགས་སྐུ་རང་ཆས་རང་ནས་གྲུབ་པ་དང་། རྗེས་ཐོབ་བདེན་མེད་ཀྱི་ངང་ནས་སྤྱོད་པ་མ་གྲུབ་ཀྱང་། བྱ་བ་མ་འགག་པར་ཡེངས་མེད་གོམས་པ་མཐར་ཕྱིན་ཅིར་ཡང་སྤྲུལ་པའི་སྐུར་སྣང་བ་ཡིན་པས། སངས་རྒྱས་སེམས་ཅན་གཉིས་ཀ་གཉིས་སུ་སྣང་ཡང་ངོ་བོ་གཅིག་པ་སེམས་འདི་གཅིག་གི་ཆོ་འཕྲུལ་ཡིན་ཏེ། དཔེར་ན་སོར་མོ་གཅིག་པོ་བརྐྱང་ན་ཐལ་མོ་དང་བསྐུམ་ན་ཁུ་ཚུར་ཡིན་པ་ལྟར་རོ། །དེས་ན་སྐྱབས་ཡུལ་རང་ལ་ཚང་བར་མ་ཤེས་པས་ད་སྔོན་བརྗོད་པ་སྒྲ་ཡི་སངས་རྒྱས་དང་། མཚོན་པ་བརྡ་ཡི་སངས་རྒྱས་ལ་རེ་བཅས་པ་ཡིན་ཡང་། ད་ནི་དེ་ལྟར་མི་རེ་བར་རང་སེམས་ཆོས་སྐུའི་ངོ་བོར་ངོ་ཤེས་པས་རེ་དོགས་ནང་ནས་བྲལ་ཏེ་དོན་དམ་བྱང་ཆུབ་མཆོག་ཏུ་སེམས་བསྐྱེད་པ་ཡིན་ནོ། །བཞི་པ་མཎྜལ་ཡིན་པས། དེ་ནས་མཎྜལ་ནིཿ ཁོག་པ་རི་རབཿ ཡན་ལག་གླིང་བཞིཿ ཉིང་ལག་གླིང་ཕྲནཿ མགོ་བོ་ལྷ་གནསཿ མིག་གཉིས་ཉི་ཟླཿ དོན་སྣོད་ལྷ་མིའི་དཔལ་འབྱོར་དུ་བསམས་ལཿ ཞེས་གསུངས་ཏེ། མཎྜལ་ཞེས་པའི་སྒྲ་ནི། ལེགས་སྦྱར་གྱི་སྐད་དུ་མཎྜ་སྙིང་པོ་དང་ལ་ལེན་པ་ལ་འཇུག་པ་ཡིན་པས། སྙིང་པོ་བསོད་ནམས་དང་ཡེ་ཤེས་ཀྱི་ཚོགས་ལེན་པར་བྱེད་པའི་ཐབས་ཡིན་པས་ཀྱང་སྒྲ་དེའི་དོན་ལ་འཇུག ཡང་མཎྜ་ལ་ཞེས་པ་བརྗིད་ཆགས་པ་དང་གཞི་འཛིན་པ་ལ་འཇུག་པས། དེ་ཡང་གླིང་བཞི་རི་རབ་དང་བཅས་པའི་ངོ་མཚར་གྱི་བཀོད་པའི་མཆོད་པ་ལ་གོ། དཀྱིལ་འཁོར་ལ་ཡང་འཇུག་སྟེ། དཀྱིལ་ལ་འཁོར་གྱིས་བསྐོར་བའི་དོན་ཡིན། དེས་ན་སྒྲ་གཅིག་དོན་མང་ལ་འཇུག་པའི་འགྲེལ་ཚུལ་ཡོད་པ་ཡིན་ཡང་། སྐབས་བབས་མཆོད་པའི་མཎྜལ་ལ་གོ་དགོས་པས། མཎྜལ་ཕུལ་བའི་དགོས་པ་ཚོགས་གཉིས་རྒྱ་ཆེན་པོ་རྩོལ་མེད་དུ་རྫོགས་ནས། གནས་སྐབས་ལྷ་མིའི་དཔལ་འབྱོར་ཕུན་སུམ་ཚོགས་པ་ལ་ལོངས་སྤྱོད་པ་ནས་མཐར་ཐུག་དོན་གཉིས་ལྷུན་གྲུབ་ཆོས་ཀྱི་རྒྱལ་པོའི་གོ་འཕང་མངོན་དུ་བྱ་བའི་ཆེད་དུ་ཡིན། དེའི་ཕྱིར་ན་གྲུབ་ཆེན་ཏེ་ལོ་པས། བུ་སྣང་བ་རྟེན་ཅིང་འབྲེལ་འབྱུང་འདི། །དོན་སྐྱེ་བ་མེད་པ་མ་རྟོགས་བར། ཚོགས་གཉིས་ཤིང་རྟའི་འཕང་ལོ་དང་། །འབྲལ་བར་མ་བྱེད་ན་རོ་པ། །ཞེས་གསུངས། ཚོགས་བསགས་པར་ལོངས་སྤྱོད་དང་ལུས་ཀྱིས་བསགས་དགོས་པ་ཡིན་པས། དེའི་གཅེས་འཛིན་གྱི་ཞེན་པ་སེམས་ནས་དོར་ཏེ་ཡོངས་སུ་དག་པའི་མཆོད་པ་དང་སྦྱིན་པ་བྱེད་རྒྱུ་ལ་འཇུག་དགོས་པ་ཡིན། ལོངས་སྤྱོད་ཅི་ཞིག་ལས་ཀྱང་ལུས་འདི་གཅེས་པར་འཛིན་པ་ཡིན་ཏེ། ལོངས་སྤྱོད་པ་པོའི་ཆེད་དུ་ལོངས་སྤྱོད་གསོག་པ་མ་གཏོགས་ལུས་མེད་ན་ལོངས་སྤྱོད་ཀྱིས་ཅི་བྱ། དེས་ན་ལོངས་སྤྱོད་ལས་ཀྱང་ལུས་གཅེས་པའི་ཕྱིར་ན། གང་གཅེས་པའི་དངོས་པོ་དེ་ཉིད་མཆོད་སྦྱིན་བྱ་བ་ནི་དངོས་པོ་གཞན་གྱི་མཆོད་སྦྱིན་ལས་ལྷག་པར་ཕན་ཡོན་ཆེ་བ་ཡིན། དེས་ན་རང་ལུས་མཎྜལ་གྱི་བཀོད་པ། ལུས་ཀྱི་ཁོག་གཞི་རིའི་རྒྱལ་པོ་རི་རབ། ཡན་ལག་རྐང་ལག་བཞི་པོ་གླིང་བཞི། ཉིང་ལག་སོར་མོ་ཐམས་ཅད་གླིང་ཕྲན། ཡན་ལག་གི་དྭངས་མ་མགོ་བོ་ལྷ་གནས། དབང་པོའི་དྭངས་མ་མིག་གཉིས་ཉི་ཟླ། དོན་སྣོད་ནང་ཁྲོལ་ཐམས་ཅད་ལྷ་དང་མི་ཡི་དཔལ་འབྱོར་དུ་བསམ་ནས་འབུལ་གསུངས། བདག་འཛིན་ནང་ནས་བཤིགས་པའི་ཡོན་ཏན་དང་། གསང་སྔགས་ཐབས་ཀྱིས་ཆེ་བའི་ཁྱད་པར་དེ་དག་མ་ཤེས་ན། ཐབས་དང་ལྟ་བ་ལ་རྨོངས་ནས་འཁོར་བ་ལས་གྲོལ་བའི་དུས་དང་། འཁོར་འདས་རོ་མཉམ་དུ་རྟོགས་པའི་དུས་ཞིག་ཡོད་པ་མིན། དེས་ན་གཞན་དོན་མ་དགོས་རང་དོན་ཙམ་ཡང་དོན་དུ་འགྲུབ་པ་མིན་ཏེ། མ་ཅིག་གི་ཞལ་ནས། ཆགས་མེད་ལུས་སྦྱིན་བྱེད་པ་འདི། །ཚོགས་གཉིས་ཡིན་པར་མ་ཤེས་པས། །ཕུང་པོ་གཉིས་འཛིན་བྱས་པ་དེ། །མ་སྤྲུལ་པའི་སྐུ་ལ་མཐོལ་ལོ་བཤགས། །ཞེས་བཤགས་པར་གསུངས་པ་ལྟར་རོ། །ཕཊཿ གཅེས་འཛིན་གྱི་ཕུང་པོ་སྒྱུ་མའི་ལུསཿ མཎྜལ་གྱི་ཚོམ་བུར་རབ་བཀོད་ནསཿ ཚོགས་ཞིང་གི་ལྷ་ལ་ལྟོས་མེད་འབུལཿ བདག་འཛིན་གྱི་རྩ་བ་ཆོད་པར་ཤོགཿ ཕཊ་ཅེས་གསུངས་ཏེ། དངོས་གཞི་ལུས་སྦྱིན་གཅོད་གཞུང་དངོས་ཀྱི་སྐབས་སུ། བེམས་རིག་ཕྲལ་ནས་པགས་པ་དབང་ཆེན་གསེར་གྱི་ས་གཞིར་བསྒོམ་པ་སོགས་གསུངས་ཀྱང་། འདི་ནས་ལྷག་ཏུ་བེམས་རིག་ཕྲལ་རྒྱུའི་དམིགས་པ་མི་དགོས། ཕཊ་ཅེས་གཟུང་འཛིན་རྩད་ནས་བཅད་བདག་འཛིན་ནང་ནས་བཤིགས་པའི་ཐབས་ཤེས་ཟུང་འབྲེལ་གྱི་བརྡ་སྐད་དྲག་པོ་དེས་ཐ་མལ་འཁྲུལ་རྟོག་གི་ཞེན་འཛིན་སངས་སེ་དག་ནས། གཅེས་འཛིན་དང་ཆགས་ཞེན་བྱེད་སའི་ཕུང་པོ་སྒྱུ་མའི་ལུས་འདི་སྐུ་གསུམ་འདུས་པའི་མཎྜལ་གྱི་ཚོམ་བུར་རབ་ཏུ་བཀོད་དེ། དེ་ཡང་གནས་ཚངས་ཆེན་གྱི་བསྐལ་པའི་ཞིང་ཁམས་སྤྲུལ་སྐུའི་སྟོན་པའི་གདུལ་ཞིང་གི་ཇི་སྙེད་སྣོད་བཅུད་ལྷ་མིའི་འབྱོར་བ་ཕུན་སུམ་ཚོགས་པ་ཡོད་དོ་ཅོག་མཆོད་རྫས་ཀྱི་རྣམ་པ་རེ་རེ་ལས་ཀྱང་གྲངས་མེད་པ་ཚད་ཀྱིས་མི་ལང་པ། གཞལ་དུ་མེད་པའི་ཀུན་ཏུ་བཟང་པོའི་མཆོད་སྤྲིན་གྱི་རང་བཞིན་ལ། ལུས་འདི་ཏིང་ངེ་འཛིན་གྱི་རྣམ་པར་འཕྲུལ་བས་དམིགས་ཏེ་ཚོགས་ཞིང་གི་ལྷ་ལ་ལྟོས་མེད་རེ་དོགས་ཞེན་འཛིན་གྱི་སྣང་བ་ཞིག་པའི་ངང་ནས། གནས་ཚངས་ཆེན་གྱི་བསྐལ་པའི་ཞིང་ཁམས་ལ་བཀོད་དེ་འབུལ་བ་སྤྲུལ་སྐུའི་མཎྜལ་དང་། གནས་ཚངས་པ་རྔ་སྒྲའི་ཞིང་ཁམས་ཀྱི་འོག་མིན་སྟུག་པོ་བཀོད་པའི་རྒྱན་དང་བཀོད་པ་ཡེ་ཤེས་ལྔ་ཡི་རང་མདངས་གསལ་ཞིང་འཚེར་བ་ཟག་མེད་ཀྱི་དགའ་བས་བརྒྱན་པ་ནང་ལོངས་སྐུའི་མཎྜལ། གནས་འོད་གསལ་རྡོ་རྗེ་སྙིང་པོའི་ཞིང་ཁམས་ལ་ཀ་དག་སྤྲོས་བྲལ་གྱི་གཞི་ལ་ལྷུན་གྲུབ་འོད་གསལ་གྱི་སྣང་བ་ལྔ་ལྡན་ཚོམ་བུ་རང་ཤར་དུ་བཀོད་པ་གསང་བ་ཆོས་སྐུའི་མཎྜལ་ཡིན་ནོ། །དེ་ལྟ་བུའི་ཕྱི་ནང་གསང་གསུམ་གྱི་མཆོད་སྤྲིན་འཁོར་འདས་ཀྱི་སྣང་ཆར་ཤར་བ་དེ་དག་ཐམས་ཅད་ཀྱང་། རིག་སྟོང་གཉུག་མའི་ཡེ་ཤེས་ཀྱི་རང་མདངས་ལས་གཞན་དུ་མ་གྲུབ་པའི་རང་བཞིན་ཡིན་པར་ཤེས་ནས་དབྱིངས་རིག་འདུ་འབྲལ་མེད་པའི་ངང་ལ་མཉམ་པར་གཞག་པ་དེ་ཁོ་ན་ཉིད་ཀྱི་མཎྜལ་ཡིན། དེ་ལྟ་བུའི་ཕྱི་ནང་གསང་བ་དེ་ཁོ་ན་ཉིད་དང་བཅས་པའི་མཎྜལ། ལུས་སེམས་གཅིག་ལ་ཚང་བར་ཕུལ་བས། ལྷ་འདྲེས་གཙོས་པའི་བདག་གཞན་ཐམས་ཅད་ཀྱི་མི་འདོད་སྡུག་བསྔལ་གྱི་འབྱུང་རྩ་འཁོར་བར་འཆིང་བྱེད་ཀྱི་ཞགས་པ་བདག་འཛིན་གྱི་རྩ་བ་ཆོད་དེ། བདག་མེད་རྟོགས་པའི་ཤེས་རབ་དམ་པར་དབང་འབྱོར་བར་ཤོག་བསམ་ནས། དམིགས་མེད་དེ་ཁོ་ན་ཉིད་ཀྱི་ལྟ་བའི་ངང་ལ་བཞག་པའི་སྒོམ་པའི་གདེང་དང་མ་བྲལ་བའི་ཐོག་ནས་བདག་འཛིན་རྩ་བ་གཅོད་བྱེད་ཀྱི་ཕཊ་སྒྲ་བསྒྲགས། ལྔ་བ་བླ་མའི་རྣལ་འབྱོར་ཡིན་ཏེ། དེ་ནས་བླ་མའི་རྣལ་འབྱོར་ནིཿ ཞེས་གསུངས་མཚམས་སྦྱར་ཏེ། ཕཊཿ དབྱིངས་ཟག་མེད་ཆོས་སྐུའི་ནམ་མཁའ་ལཿ མདངས་འཇའ་ཟེར་ཐིག་ལེར་འཁྲིགས་པའི་དབུསཿ ཕ་དུས་གསུམ་ཀུན་མཁྱེན་པདྨ་འབྱུངཿ ཚུལ་བརྟུལ་ཞུགས་སྤྱོད་པའི་ཧེ་རུ་ཀཿ མ་མཁའ་འགྲོ་རྒྱ་མཚོའི་ཚོགས་དང་བཅསཿ སྐུ་མཚན་དཔེའི་གཟི་བྱིན་ཏ་ལ་ལཿ གསུང་གང་འདུལ་ཆོས་སྒྲ་འུ་རུ་རུཿ ཐུགས་འོད་གསལ་རྡོ་རྗེ་སྙིང་པོའི་ངངཿ བུ་མོས་གུས་དྲག་པོས་གསོལ་བ་འདེབསཿ ཕྱི་རྣམ་རྟོག་དགྲར་ལངས་ལྷ་འདྲེའི་གཟུགསཿ ནང་རེ་དང་དོགས་པའི་གཉིས་འཛིན་སེམསཿ བར་སྣང་བ་སྣ་ཚོགས་རྐྱེན་ངན་ཀུནཿ ཆོས་ཟབ་མོ་བདུད་ཀྱི་གཅོད་ཡུལ་གྱིསཿ དུས་ད་ལྟ་སྟན་ཐོག་འདི་རུ་ཆོདཿ དབྱིངས་ཆོས་སྐུའི་རྒྱལ་ས་ཟིན་པ་རུཿ ཕ་རྗེ་བཙུན་བླ་མས་བྱིན་གྱིས་རློབསཿ ཕཊཿ ཕཊཿ ཕཊཿ ཅེས་བརྗོད་གསུངས་ཏེ། ངོ་བོ་རང་བཞིན་ཐུགས་རྗེའི་བདག་ཉིད་ཅན་གྱི་སྐུ་གསུམ་ཀུན་འདུས་བླ་མ་ཧེ་རུ་ཀའི་སྐུ་གསུང་ཐུགས་ལ་གསོལ་བ་བཏབ་སྟེ། ཕྱི་ནང་བར་གསུམ་གྱི་རེ་དོགས་གཉིས་འཛིན་ཐམས་ཅད་ཟབ་མོ་བདུད་ཀྱི་གཅོད་ཡུལ་འདིས་བཅད་ནས། ཐུགས་ཡིད་གཉིས་མེད་ཕ་གཅིག་བླ་མའི་ཐུགས་ཀློང་དུ་དབྱེར་མེད་རྒྱལ་ས་ཟིན་པའི་བླ་མའི་རྣལ་འབྱོར་འདིར་གསོལ་འདེབས་བྱིན་ཆེན་འབེབས་པའི་གནད་ཐམས་ཅད་ཚང་བ་ཞིག་ཡིན། ཀ་དག་སྤྲོས་པ་དང་བྲལ་བའི་དབྱིངས་ཉོན་ཤེས་བག་ཆགས་དང་བཅས་པའི་སྒྲིབ་པ་མཐའ་དག་དག་པ་གཉིས་ལྡན་གྱི་ངོ་བོ་ཟད་པའི་ཟག་མེད་ཆོས་སྐུའི་དགོངས་པ་དབྱིངས་དང་ཡེ་ཤེས་འདུ་འབྲལ་མེད་པའི་བདག་ཉིད་ཅན། ཡེ་ཤེས་འོད་གསལ་བའི་དགོངས་པ་ལས་རྟག་ཏུ་མི་གཡོ་མཉམ་པར་གཞག་པ། རྒྱ་ཆད་ཕྱོགས་ལྷུང་དང་བྲལ་བར་ནམ་མཁའི་དཔེ་ཡིས་ཕྱོགས་ཙམ་མཚོན་པ་དང་ལྟོ་སྦྱར་ནས། འདི་ནས་རྣལ་འབྱོར་བའི་གསལ་སྣང་འདེབས་བྱེད་ལ་ཆོས་སྐུ་ནམ་མཁའི་གཟུགས་སུ་བཀོད་ནས། ཀ་དག་ཆོས་སྐུའི་དབྱིངས་ལས་ཤར་བའི་ལྷུན་གྲུབ་ལོངས་སྐུའི་རང་མདངས་ཡེ་ཤེས་ལྔ་ཡི་འོད་ཟེར་འཇའ་འོད་ཐིག་ལེའི་དྲ་བར་འཁྲིགས་པའི་གུར་ཁང་གི་དབུས་ཞེས་ཞིང་དང་གཞལ་ཡས་ཁང་གི་རྣམ་པ་བཀོད་དེ། ཆོས་སྐུའི་དབྱིངས་ལས་ལོངས་སྐུ་ཤར་ནས་དེ་ལས་གང་འདུལ་གདུལ་བྱའི་སྣང་ངོར་སྤྲུལ་སྐུ་ཤར་བ། ཕ་གཅིག་དྲིན་ཆེན་བླ་མ་དང་གཉིས་སུ་མེད་པ། དེ་ཡང་ངོ་བོ་རྩ་བའི་བླ་མ་ལ་མི་རུ་བཟུང་བའི་ལོག་ལྟ་སྤོང་བའི་ཕྱིར་རྣམ་པ་དུས་གསུམ་ཀུན་མཁྱེན་སངས་རྒྱས་གཉིས་པ་པདྨ་འབྱུང་གནས་ཀྱི་སྐུར་གསལ་འདེབས་པ་བླ་མའི་རྣལ་འབྱོར་སྤྱིའི་ལུགས་ལྟ་བུ་ཡིན་ན། བླ་མ་སངས་རྒྱས་དངོས་མཐོང་གི་དད་པ་དངོས་སུ་ཡོད་ན་རྣམ་པ་མ་བསྒྱུར་ཀྱང་ཆོག་པ་ཡིན། སློབ་དཔོན་པདྨ་འབྱུང་གནས་ཞེས་པ་ནི། ཕྱི་དྲང་དོན་ལྟར་ན་མ་ཆགས་པདྨའི་སྡོང་པོ་ལས་རང་བྱུང་བརྫུས་ཏེ་འཁྲུངས་པས་ན་པདྨ་འབྱུང་གནས་ཞེས་དང་། ནང་ངེས་དོན་ལྟར་ན་འབྲས་ཆོས་ཉེར་ལྔའི་བདག་ཉིད་ཟུང་འཇུག་རྡོ་རྗེ་འཆང་ཆེན་པོ་སྐུ་གསུམ་ལྷུན་གྲུབ་རང་བྱུང་དོན་གྱི་པདྨ་ཡེ་ནས་གནས་པ་ལས། རིག་སྟོང་མི་ཤིགས་འཆི་མེད་རྡོ་རྗེ་ལྟ་བུའི་སྐུར་བཞེངས་ཤིང་ཤར་བ་ཡིན་པས་པདྨ་འབྱུང་གནས་ཞེས་བྱ། འདིར་དུས་གསུམ་ཀུན་མཁྱེན་དང་དུས་གསུམ་སངས་རྒྱས་གུ་རུ་རིན་པོ་ཆེ་ཞེས་གསོལ་བ་འདེབས་པའི་ནང་དོན་ལྟར་དུ། དུས་གསུམ་གྱི་སངས་རྒྱས་ཐམས་ཅད་དགོངས་ཀློང་ཆོས་དབྱིངས་གཅིག་ལ་བཟླུམས་པ། ཐ་དད་ཀྱི་དབྱེ་བ་མེད་ཀྱང་དེ་བཞིན་མཁྱེན་པའི་ཡེ་ཤེས་ལ་སྒྲིབ་པ་མི་མངའ་བས་དུས་གསུམ་ཀུན་མཁྱེན་གསུངས་པ་ཡིན། འདིར་རྣལ་འབྱོར་བརྟུལ་ཞུགས་སྤྱོད་པའི་བོགས་འདོན་གྱི་སྐབས་སུ། བླ་མ་ཡང་ངོ་བོ་དུས་གསུམ་རྒྱལ་བ་ཀུན་དང་རྣམ་དབྱེར་མེད་པ་ལ། རྣམ་པའི་ཚུལ་དུ་བརྟུལ་ཞུགས་སྤྱོད་པའི་ཧེ་རུ་ཀའི་ཆས་ཅན། སྐུ་མདོག་མཐིང་ནག་གམ་མཐིང་ག་དམར་བ་ཞིག་གསལ་ཡང་ཆོག་པས་དེ་ལྟར་ཅིར་ཡང་སྒྱུར་ཆོག་པ་ཞིག་གསལ་བཏབ། ཧེ་རུ་ཀའི་ཆས་ནི་དབུ་སྐྲ་རལ་བའི་ཐོར་གཙུག་ཅན། རུས་པའི་རྒྱན་དྲུག་སྐུ་ལ་གསོལ། དབུ་ལ་ཐོད་སྐམ་དང་སྟག་ཤམ་ལ་སོགས་པའི་རྒྱན་གྱིས་བརྒྱན་པ། ཕྱག་གཡས་པས་ཌཱ་མ་རུ་དང་ གཡོན་པས་མཆོག་ཆེན་གྱི་གླིང་བུ་བསྣམས་པ། འཁོར་དུ ་མཁའ་འགྲོ་སྟེ་དབྱིངས་སྒྲིབ་མེད་ཀྱི་མཁའ་ལ་རིག་པ་ཡེ་ཤེས་གྱི་རྩལ་གྱིས་འགག་མེད་དུ་འགྲོ་བའི་མཁའ་འགྲོ་ལ་གོ་ཡི་མཐའ་གཅིག་ཏུ་མོ་རྒྱུད་རྐྱང་བར་གོ་དགོས་པ་མ་ཡིན། སྙན་ངག་མངོན་བརྗོད་ལས་ནམ་མཁའི་བྱ་ལའང་མཁའ་འགྲོ་ཟེར་བའི་སྐབས་སུ་བྱ་རིགས་ཕོ་མོ་ཐམས་ཅད་ལ་གོ་བ་ལྟར་ཡིན། ཡིན་ན་ཡང་སྐབས་འདིར་མ་རྒྱུད་མཁའ་འགྲོའི་ཚོགས་ཀྱིས་གཙོ་བོར་བྱས་པའི་དཔའ་བོ་དང་མཁའ་འགྲོ་རྒྱ་མཚོའི་ཚོགས་དང་བཅས་ཏེ། དེ་ལྟ་བུ་ཚོགས་ཞིང་གཙོ་འཁོར་ཐམས་ཅད་ཀྱང་ཉི་མ་ལས་འོད་ཟེར་འཕྲོས་པ་བཞིན་དུ། བླ་མ་ཧེ་རུ་ཀ་དཔལ་སྐུ་གསུམ་འདུས་པའི་རང་རྩལ་ལས་ཤར་བ། ཆེ་བའི་ཡོན་ཏན་མང་པོའི་ཁྱད་པར་དུ་འཕགས་པ། སྐུ་བསོད་ནམས་ཆེན་པོའི་འདུལ་བ་ཕྲིན་ལས་བཞི་ཡི་ཁ་དོག་ཅན། སྐུ་མཚན་དང་དཔེ་བྱད་ཀྱིས་རྒྱན་ཅིང་མཛེས་པའི་གཟི་བྱིན་ལྷམ་མེར་འབར་ཞིང་། རྣམ་འགྱུར་སྣ་ཚོགས་སུ་འཆར་བ་འགག་པ་མེད་པའི་སྐད་དུ་ཏ་ལ་ལ་ཞེས་གསུངས། གསུང་རྗེས་སུ་སྟོན་པས་འདུལ་བར་གང་འདུལ་ཆོས་ཀྱི་སྒྲ་དབྱངས་ཚངས་པའི་དབྱངས་སུ་སྒྲོག་པ། མ་ཞུམ་མི་འཁྲུགས་ཆུང་ངུ་བྱིས་པའི་སྐད་དོད་ལ་འུ་རུ་རུ་ཞེས་གསུངས། ཐུགས་རིག་པས་འདུལ་བར་འོད་གསལ་རྡོ་རྗེ་སྙིང་པོ་རྟོག་གེའི་རྟགས་དང་གཏན་ཚིགས་ཀྱིས་མི་དཔོག་པ་ཟག་མེད་ནང་གི་མཁྱེན་པ། ཀུན་ཁྱབ་བསམ་གྱིས་མི་ཁྱབ་པའི་ཡེ་ཤེས་གཞི་ལམ་འབྲས་བུ་རོ་གཅིག་པ་དེར། བུ་མགོན་མེད་ཉམ་ཐག་དུས་མཐའི་སྐྱེ་བོ་བདག་གིས་ཕ་བླ་མ་ཁྱེད་ལ་མོས་ཤིང་གུས་པའི་གདུང་ཤུགས་དྲག་པོས་གསོལ་འདེབས་དབྱངས་སུ་གྱེར་བ་ཡིན་པས། ཁྱེད་ཀྱི་ཐུགས་རྗེའི་བྱིན་རླབས་ཀྱིས་གང་གཅད་པར་བྱ་བ། ཕྱིའི་རྣམ་རྟོག་དགྲར་ལངས་ལྷ་འདྲེའི་གཟུགས་སུ་གྲུབ་པ་ཐོགས་མེད་ཀྱི་བདུད་དང་། ནང་རེ་དང་དོགས་པའི་གཉིས་འཛིན་གྱི་སེམས་ཏེ་སྙེམས་བྱེད་དང་དགའ་བྲོད་ཀྱི་བདུད་གཉིས་པོ་དང་། བར་སྣང་བ་སྣ་ཚོགས་རྐྱེན་ངན་ཀུན་ཞེས་པས་ཐོགས་བཅས་ཀྱི་བདུད་སོགས་རྐྱེན་ངན་ལམ་དུ་སློང་མ་ནུས་པའི་དམ་ཆོས་སྒྲུབ་པའི་འགལ་རྐྱེན་ཐམས་ཅད་བསྡུས་ནས། ཆོས་ཟབ་མོ་བདུད་ཀྱི་གཅོད་ཡུལ་གྱིས། །དུས་ད་ལྟ་སྟན་ཐོག་འདི་རུ་ཆོད། །ཅེས་པའི་ཚིག་རྐང་གཉིས་ཀྱིས་གང་གིས་གཅོད་པར་བྱེད་པའི་ཟབ་མོ་གཅོད་ཀྱིས་ཇི་ལྟར་གཅད་པར་བྱ་བའི་ཐབས་དང་མན་ངག་བསྟན་པ་ཡིན། འདི་དག་གི་དོན་འོག་ནས་ཀྱང་འབྱུང་བ་ཡིན། དབྱིངས་ཆོས་སྐུའི་རྒྱལ་ས་ཟིན་པ་རུ། །ཕ་རྗེ་བཙུན་བླ་མས་བྱིན་གྱིས་རློབས། །ཞེས་གསུངས་པའི་ཚིག་རྐང་གཉིས་འདིས་དབང་བཞི་དོན་གྱིས་བླངས་ནས་ཐུགས་ཡིད་དབྱེར་མེད་བསྲེས་པའི་གདམས་པས་འགག་བསྡམས་ནས། གང་གི་བསྐལ་བ་བྱེ་བ་རུ། །ལྷ་སྐུ་འབུམ་ཕྲག་བསྒོམ་པ་ལས། །བླ་མ་སྐད་ཅིག་དྲན་པ་མཆོག །ཅེས་གསུངས་པ་ལྟར་བླ་མ་སངས་རྒྱས་དངོས་མཐོང་གི་འདུ་ཤེས་བཞག་ནས་ཡིད་ཁྱེད་ཤེས་ཀྱི་མོས་གུས་དྲག་པོས་གསོལ་བ་བཏབ་པས། ཐུགས་ཡིད་དབྱེར་མེད་བསྲེས་པའི་སྟོབས་ཀྱིས་བྱིན་རླབས་འཕོས་ནས་རྟོགས་པ་ཁྱད་པར་ཅན་སྐྱེ་བ་ཡིན་གྱི། བླ་མ་ལ་མོས་གུས་མེད་ཅིང་དེའི་སྣང་ཆར་མ་ཤེས་པའི་བསྐྱེད་རྫོགས་ཀྱིས་གྲོལ་བ་ཐོབ་པ་ཞིག་མི་སྲིད་པ་ནི་ཀུན་མཁྱེན་ཆེན་པོའི་བཞེད་པ་དང་། ངེས་དོན་གྱི་སྡེ་སྣོད་ཐམས་ཅད་ཀྱི་དགོངས་པ་ཡང་ཡིན་ནོ། །ཕཊ་སྒྲ་སུམ་བསྟུད་ཀྱིས་སྐུ་གསུམ་དགོངས་པའི་དབྱིངས་སུ་མཉམ་པར་བཞག ཅེས་བརྗོད་པའི་ཚོགས་ཞིང་རང་ལ་བསྟིམཿ གཉིས་མེད་ངང་དུ་མཉམ་པར་གཞགཿ ཞེས་གསུངས་ཏེ། དེ་ལྟར་ཐུགས་ཡིད་དབྱེར་མེད་ཀྱི་མཉམ་པར་བཞག་པའི་ངང་ལས་སླར་ཡང་རིག་རྩལ་ཤེས་རབ་ཀྱི་རྣམ་པར་ཤར་བའི། སྐྱབས་ཡུལ་ཚོགས་ཞིང་གི་ལྷ་ཚོགས་མཐའ་ནས་རིམ་གྱིས་གཙོ་བོ་ལ་ཐིམ་ཞིང་། གཙོ་བོ་ཧེ་རུ་ཀ་དཔལ་ཡང་འོད་དུ་ཞུ་ནས་རང་དང་གཉིས་སུ་མེད་པར་བསམ་དགོས། དེ་ཡན་ཆད་ཀྱིས་སྔོན་འགྲོའི་ཆོས་ཐམས་ཅད་སོང་ནས། ད་ནི་དངོས་གཞིའི་ལུས་སྦྱིན་དངོས་ལ་གསུམ་སྟེ། རང་ལུས་ཚོགས་སུ་བྱིན་གྱིས་བརླབ་པ། མཆོད་སྦྱིན་གྱི་མགྲོན་རྣམས་སྤྱན་འདྲེན་པ། མཆོད་ནས་མགྲོན་རིགས་ཚིམ་པར་བྱ་བ་དང་གསུམ་མོ། དང་པོ་རང་ལུས་ཚོགས་སུ་བྱིན་གྱིས་བརླབ་པ་ནི། ཕཊཿ དེ་ནས་བག་ཆགས་སྙིགས་མའི་ལུསཿ ཚོ་ཞིང་སྣུམ་ལ་ལྟོས་ཆེ་བའིཿ དབུས་ནས་དྭངས་མའི་རིག་པ་ནིཿ ཁྲོས་མའི་རྣམ་པར་ཕཊ་ཅེས་དབྱེཿ ཞལ་གཅིག་ཕྱག་གཉིས་གྲི་ཐོད་ཅནཿ དེ་ཡིས་རང་ལུས་ཐོད་པ་ཕྲལཿ སྟོང་ཁམས་ཁྱབ་པའི་མི་མགོ་ཡིཿ སྒྱེད་བུ་གསུམ་གྱི་ཁར་བཞག་ནངཿ འབྱུང་ལུས་ཚོགས་སུ་བཤམས་པ་དེཿ འབྲུ་གསུམ་འོད་ཀྱིས་བདུད་རྩིར་སྦརཿ ཨོཾ་ཨཱ་ཧཱུྃཿཧ་ཧོ་ཧྲཱིཿ ཅི་མང་བརྗོད་པས་སྦྱང་སྤེལ་བསྒྱུརཿ ཅེས་གསུངས་ཏེ། ཚོགས་ཞེས་པ་བཟའ་བར་བྱ་བའི་རྫས་རྐྱང་པ་ཞིག་གི་དོན་མ་ཡིན་ཏེ། ག་ན་ཙཀྲ་ཞེས་པའི་སྒྲ་ལས་སྐལ་ལྡན་འདུས་པའི་ཚོགས་ཀྱིས་འབྱོར་ལྡན་ཡོ་བྱད་ཀྱི་ཚོགས་འདུ་བྱས་ནས་དངོས་གྲུབ་ལྷའི་ཚོགས་ལ་ཕུལ་བས། བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་པའི་དོན་ཅན་དེ་ལྟ་བུ་ཞིག་ལ་གོ་དགོས། འདི་ནས་ཀྱང་མཆོད་ཡུལ་མཆོག་གསུམ་རྩ་གསུམ་མན་ཆད་ནས། སྦྱིན་ཡུལ་ལན་ཆགས་འདྲེ་གདོན་ཡན་ཆད་ལ་མཆོད་སྦྱིན་འགྱེད་ཆེན་གྱི་རྫས་གང་འདོད་ཅི་སྣང་གི་དངོས་པོ་མ་ཚང་མ་ཚོགས་པ་མེད་པར་བྱས་ནས་ཟད་མེད་ཡིད་བཞིན་གྱི་གཏེར་དུ་སྤྲུལ་ནས་འབུལ་བ་ཡིན། སྔོན་འགྲོའི་སྦྱོར་བ་ཐམས་ཅད་སོང་བའི་རྗེས་དེ་ནས་རང་ཉིད་ཀྱི་བག་ཆགས་སྙིགས་མའི་ལུས། ཉེ་བར་ལེན་པའི་ཕུང་པོ་འབྱུང་བཞི་རྡུལ་ཕྲན་ཚོགས་པའི་རང་བཞིན་ཅན་འདི། མི་གཙང་བའི་རྫས་སོ་དྲུག་གི་བདག་ཉིད་ཅན་འདི་ལྟ་བུ་ཞིག་མ་ཡིན་པར། གཞོན་ཞིང་དར་ལ་བབས་པ་མཛེས་ཤིང་ཡིད་དུ་འོང་བ། ཚོ་ཤིང་སྣུམ་ལ་བཀྲག་མདངས་དང་ལྡན་པ། དེ་ཡང་ལྟོས་ཆེ་བ་སྟོང་གསུམ་གྱི་སྟོང་ཆེན་པོའི་ཁྱོན་ཡོངས་རྫོགས་གང་བ་ཞིག་གསལ་བཏབ་ན་ཏིང་ངེ་འཛིན་གྱི་མཐུ་ཞེས་པ་བསམ་གྱིས་མི་ཁྱབ། སྔགས་དང་བདེན་པའི་མཐུ་ཡང་ནུས་པ་ཆེ་བས་མ་ཚད། ཟག་མེད་ཡེ་ཤེས་ཀྱི་རོལ་བས་གང་འདོད་ཀུན་བཟང་གི་མཆོད་སྤྲིན་ཟད་མེད་དགའ་བདེའི་གཏེར་ཆེན་ལ་བསྒྱུར་ཐུབ་པ་ཡིན། རང་སེམས་དོན་གྱི་རྡོ་རྗེ་རྣལ་འབྱོར་མ་ཡེ་ནས་ཡིན་པའི་ངང་ནས། སླར་ཡང་ཏིང་འཛིན་བརྟན་པའི་ངར་བསྐྱེད་དེ་ལུས་དབུས་སྙིང་ཙིཏྟ་པདྨ་འདབ་བརྒྱད་ཀྱི་ཕོ་བྲང་ན་བཞུགས་པའི་དྭངས་མའི་རིག་པ་མ་ཡུམ་ཆེན་ཁྲོས་མ་ནག་མོའི་རྣམ་པར་བཞུགས་པ་ཉིད་ཕཊ་ཅེས་སྒྲ་གཅིག་གིས་སྤྱི་བོ་ཚངས་པའི་སྒོ་ཆེན་ནས་ལིངས་ཀྱིས་དབྱེ་བའམ་འཕར་ནས། མདུན་གྱི་ནམ་མཁའ་ན་སྐུ་གཟི་བརྗིད་ཤིན་ཏུ་ཆེ་བ། ཁམས་གསུམ་དབང་དུ་སྡུད། སྲིད་གསུམ་ཟིལ་གྱིས་གནོན། སྣང་སྲིད་ཐམས་ཅད་འཁོར་འོག་དུ་ཆུད་པ། ཞལ་གཅིག་ཕྱག་གཉིས་གྲི་གུག་དང་ཐོད་ཁྲག་འཛིན་པ་ཞིག་གསལ་གདབ་སྟེ། ཕྱག་གཡས་པའི་ཕྱག་མཚན་གཟུང་འཛིན་རྩད་ནས་གཅོད་པའི་གྲི་གུག་དེ་ཡིས་རང་ལུས་བེམས་པོའི་ཐོད་པའི་སྨིན་མཚམས་ནས་བྲེགས་ཏེ། ལུས་དང་ཐོད་པ་ཁ་ཕྲལ་ནས་དགར་གྱིས་བཀོག་ཅིང་། སྟོང་ཁམས་ཁྱབ་པའི་རྒྱ་ཆེན་དང་དཔང་ཚད་མཉམ་པ་ཅན་གྱི་མི་མགོ་ཡི་སྒྱེད་པུ་གསུམ་གྱི་ཁར་བཞག་ནས། དེའི་ནང་ལ་འབྱུང་ལུས་ཚོགས་སུ་བཤམས་པ་དེ་འབྲུ་གསུམ་ཨོཾ་ཨཱཿཧཱུྃ་སྐུ་གསུམ་གྱི་ཡི་གེའི་འོད་ཀྱིས་བདུད་རྩིར་སྦར་བ་བསམ་ནས། ཨོཾ་ཨཱཿཧཱུྃ་དང་ཧ་ཧོ་ཧྲཱིཿཞེས་སྔགས་ཅི་མང་བརྗོད་པས་སྦྱང་སྤེལ་སྒྱུར་དགོས། འདི་ནས་དུས་རྒྱུན་ཀུ་ས་ལིའི་ཚོགས་བསགས་ཀྱི་འགྲོས་དང་མཐུན་པར་ཚིག་དེ་ཙམ་གྱི་གནད་བསྡུས་ཏེ་དོན་གྱི་གོ་དོན་ཆ་ཚང་འདུས་པར་བསྟན་པ་ཡིན། རང་ལུས་ཆེ་བ་དེ་ལྟ་བུ་ཐོད་པའི་ནང་དུ་ཆུད་སྲིད་དམ། ལུས་བས་མགོ་ཆེ་བ་ཞིག་དང་པོ་ནས་བསམ་དགོས་པ་ཨེ་ཡིན་ན། མྱི་མགོའི་སྒྱེད་པུ་གསུམ་པོ་སུ་ཡི་མགོ་བཅད་ནས་ཁྱེར་ཡོང་དགོས་པ་རེད་ཅེས་དེ་འདྲའི་གུ་དོག་བསམ་མི་དགོས། ཐམས་ཅད་སྟོང་པ་ཉིད་སྟོང་པ་རྟེན་འབྱུང་གི་ཆོས་སུ་གྲུབ་ན། རྟེན་ཅིང་འབྲེལ་འབྱུང་ལ་སྟོང་ཉིད་ཀྱིས་མ་ཁྱབ་པ་མེད་པས། གང་ལ་སྟོང་པ་ཉིད་རུང་བ་དེ་ལ་ཐམས་ཅད་རུང་བ་ཡིན་པས་ཕྲ་བ་ཡིད་ཀྱི་རྫུ་འཕྲུལ་ལ་ཚད་ཡོད་པ་མ་ཡིན། དེ་བས་ཏིང་ངེ་འཛིན་གྱི་བྱེད་ནུས་བསམ་གྱིས་མི་ཁྱབ། ད་རུང་དམིགས་པ་ལས་རུང་གིས་འདུ་ཤེས་གཞན་དུ་བསྒྱུར་ན་ཁྲོས་མ་རང་དང་འདྲ་བ་གྲངས་མེད་ཁྲོས་པའི་ཕྱག་གི་གྲི་གུག་གིས། ལུས་སེམས་མེད་ཀྱི་བེམ་པོ་དེའི་གཟུགས་བཞི་ལྷུ་བཞི་རུ་ཕྲལ། མགོ་ཡན་ལག་ལྷུ་ཚིགས་རེ་རེ་བཞིན་དུ་དུམ་བུར་གཏུབ། དབང་པོ་རྣམ་ལྔ། དོན་ལྔ་སྣོད་དྲུག་ཐམས་ཅད་པོ་བླངས་ནས་ཤ་ཡི་ཕུང་པོ་སྲིད་པའི་གཏོས་དང་མཉམ་པ། ཁྲག་གི་རྒྱ་མཚོ་ཕྱིའི་རོལ་བའི་མཚོ་ཆེན་དག་ལས་ཀྱང་མང་བ། ཤ་རི་ཁྲག་མཚོ་རུས་པའི་གྲམ་ཁྲོད་དུ་གྱུར་བར་ཆགས་ཞེན་སྤུ་ཙམ་མེད་པའི་བློ་སྐྱེད་དགོས་པ་ཡིན། དེ་ཡང་ལུས་སྦྱིན་འདོན་སྐབས་ཙམ་མ་ཟད་བདག་འཛིན་ཡུལ་ནས་འདོན་ཆུག་མ་བྱ་དགོས། ལུས་འདི་ནི་བྱིན་ཟིན་པ་ཡིན་པས་སྣང་ཙམ་གྱི་ལུས་འདི་སོང་རུང་སྡོད་རུང་བདག་པོ་མེད་པའི་ཁང་སྟོང་ལྟ་བུ་ཞིག་དང་། དུར་ཁྲོད་ནང་གི་མི་རོའམ་ལམ་ཁར་བོར་བའི་ས་རྡོ་ལྟ་བུ། སྣང་མེད་ཞེན་མེད་འཛིན་མེད་ཆགས་མེད་བདེན་མེད་ཀྱི་ངང་ལ་དུས་རྒྱུན་འཇོག་དགོས་པ་ཡིན། དེ་དང་མཉམ་དུ་ཕུང་པོ་གཟན་བསྐྱུར་གྱི་གདམས་པ། ལུས་འདི་ལ་ནད་དང་གནོད་པ་སྨད་སྡིགས་གཤེ་སྐུར་ཅི་བྱེད་ན་བྱེད་དུ་ཆུག ཅི་བྱུང་ཡང་བྱུང་། ངས་ནི་སྔ་ནས་བདག་འཛིན་གྱི་འཁྲུལ་བ་དང་ཞེན་པ་བཏང་ཟིན་པ་ཡིན་བསམ་སྟེ་ཉམས་ལེན་དོན་ཐོག་ལ་ཁེལ་དུ་བཅུག་ནས། ཐུན་རྗེས་ལ་སོགས་པའི་སྤྱོད་ལམ་ཐམས་ཅད་ལ་དེའི་སྣང་བ་རྗེས་ཤེས་དང་མི་འབྲལ་བ་གལ་ཆེ་བ་ཡིན། དེ་ལྟ་བུའི་དམིགས་པའི་རྣམ་འཕྲུལ་རྣལ་འབྱོར་རང་གི་ཏིང་འཛིན་གྱི་རྩལ་དང་བསྟུན་པ་གནད་ཤིན་ཏུ་ཆེ། འབྱུང་ལུས་ཚོགས་སུ་བཤམས་པ་དེ་འབྲུ་གསུམ་འོད་ཀྱིས་བདུད་རྩིར་ཇི་ལྟར་སྦར་ཞེ་ན། འབྲུ་གསུམ་ཨོཾ་ཨཱཿཧཱུྃ་གསུམ་ཡིན་པར་མཁྱེན་བཞིན་པ་རེད། འབྲུ་གསུམ་རྡོ་རྗེའི་བཟླས་པའང་འདི་གསུམ། འབྱུང་འཇུག་སྔགས་ཀྱི་ངོ་བོ་གནས་པའང་འདི་གསུམ། ཁྲིད་ཀྱི་སྐབས་སུ་ཁྲིད་སྦྱོང་བྱེད་པའི་རིགས་དྲུག་བསྲེག་སྦྱོང་ཡང་འདི་གསུམ་ཡིན་པས། འདི་གསུམ་འབའ་ཞིག་ཇི་ལྟར་ཡིན་དགོས་སྙམ་ན། འདི་གསུམ་རྒྱལ་བའི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོ། ཆོས་སྐུ་ལོངས་སྐུ་སྤྲུལ་སྐུ་སྟེ་སྐུ་གསུམ་འདུས་པའི་ཡི་གེ། ངོ་བོ་རང་བཞིན་ཐུགས་རྗེ་སྟེ་ཡེ་ཤེས་གསུམ་དང་དབྱེར་མི་ཕྱེད་པ་ཡིན་པས། འདུས་བྱས་ཟག་བཅས་ཀྱི་རྫས་དེ་ཟག་མེད་ཡེ་ཤེས་ཀྱི་བདུད་རྩིར་སྒྱུར་དགོས་པས་འཁོར་འདས་སྣོད་བཅུད་ཐམས་ཅད་རྒྱལ་བའི་ཡེ་ཤེས་ཀྱིས་ཁྱབ་ཡོད་པ་ཡིན་པས་ན། གསང་བ་གསུམ་གྱི་མངོན་རྟོགས་དེ་ཉིད་ཡི་གེ་འབྲུ་གསུམ་པོ་ལ་འདུས་ཡོད་པ་འདིས་སྦྱང་སྤེལ་སྒྱུར་གསུམ་མ་བྱས་ན་གཞན་གྱིས་བྱེད་ཐབས་ཤིག་མེད། འདི་རྫོགས་པ་ཨ་ནུ་ཡོ་ག་མ་རྒྱུད་ཀྱི་དགོངས་པ་དང་སྦྱར་ནས་བཤད་ན། རྡོ་རྗེའི་ལུས་ཀྱི་རྩ་རླུང་ཐིག་ལེར་གནད་དུ་བསྣུན་ནས་རགས་པའི་འགྱུར་བ་ཐམས་ཅད་འགྱུར་མེད་ཡེ་ཤེས་ཀྱི་དབུ་མའི་དབྱིངས་སུ་བསྟིམ་པ་ཡིན། མཚན་བཅས་རྫོགས་རིམ་ཐམས་ཅད་གནད་མཐར་ཐུག་དེར་ཐུག་པ་སྔགས་གསར་རྙིང་ཐམས་ཅད་བཞེད་པ་མཐུན་པ་ཡིན། ལུས་ཀྱི་དབུས་ན་ཡོད་པའི་རྩ་གཙོ་མོ་གསུམ་གྱི་གཡས་ཐབས་ཀྱི་རྩའི་ཡི་གེ་ཨོཾ། དབུས་ཡང་དག་ཡེ་ཤེས་ཀྱི་རྩའི་ཡི་གེ་ཨཱཿ། གཡོན་ཤེས་རབ་ཀྱི་རྩའི་ཡི་གེ་ཧཱུྃ་གི་རང་བཞིན་གྱིས་མཚོན་པ་ཡིན། ཅི་ལྟར་ཡིན་ན། སེམས་ཉིད་སྐྱེ་བ་མེད་པ་དེ་ཉིད་ཀྱི་ངང་ལས་ཡི་གེ་སྣང་བ་དེ་ལ་ཡོན་ཏན་ལྷུན་གྱིས་གྲུབ་པ་ཡིན། དེ་ལྟ་བུའི་སྣང་སྟོང་གཉིས་སུ་མེད་པའི་ཡི་གེ་དེ་སུས་བྲིས་ཤིང་བཀོད་པ་ཡིན་ཞེ་ན། སེམས་ཉིད་ཡེ་ནས་དག་པ་ཆོས་དབྱིངས་འགྱུར་བ་མེད་པའི་རིག་པའི་ངང་དེར་སྐུ་གསུམ་ལྷུན་གྲུབ་ཏུ་ཡོད་པ་རང་ལ་སྣང་བས། གཞི་སྐྱེ་མེད་རིག་པའི་ངང་དུ་རང་རྩལ་ལྷུན་གྱིས་གྲུབ་པས་གསར་བྱུང་བྱིས་པའི་ཆོས་མ་ཡིན་ཞིང་ལྷུན་གྲུབ་ཡི་གེ་སྤྲིན་གྱི་འཁོར་ལོ། འཁོར་འདས་ཐམས་ཅད་ལ་ཡེ་ནས་རང་ཆས་སུ་ཡོད་པ་ཡིན། འདི་བསྒོམས་ནས་ཉམས་སུ་བླངས་ན་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་མངོན་དུ་འགྱུར་བ་ཡིན། སྙིང་གའི་རྩ་འདབ་བརྒྱད་ཀྱི་གསུམ་ཆོས་ཉིད་ཀྱི་རྩ། གསུམ་ཡེ་ཤེས་ཀྱི་རྩ། གཅིག་རང་རྒྱུད་ཀྱི་རྩ། གཅིག་ཡོན་ཏན་གྱི་རྩ་གནས་པ་ཡིན་པས། དེ་དག་ཀུན་ལ་དག་པ་ཡེ་ཤེས་ཀྱི་བག་ཆགས་གསོག་པའི་རྟེན་འབྲུ་གསུམ་དང་། མ་དག་འཁོར་བའི་བག་ཆགས་གསོག་པའི་རྟེན་ཨ་ནུ་སུ་ཏྲི་ལ་སོགས་པ་རིགས་དྲུག་གི་ས་བོན་ཡི་གེ་དྲུག་གི་རྣམ་ཤེས་ཚོགས་བརྒྱད་དང་བཅས་པའི་རྟེན་གཞི་འཆའ་བ་ཡིན། ཕྱི་རོལ་གྱི་འབྱུང་བ་རགས་པ་ཕྱི་འབྱུང་སྣོད་བཅུད་དུ་གྲུབ་པ་འདི་ཐམས་ཅད། གསང་འབྱུང་ཡེ་ཤེས་ལྔའི་གདངས་དེ་ལས། ནང་འབྱུང་ཕྲ་རགས་ཐམས་ཅད་མཆེད་དེ་རིམ་གྱིས་ཇེ་རགས་སུ་སོང་ནས་སྣང་བ་འདི་བྱུང་བ་ཡིན་པས། མདོར་ན་སྣོད་བཅུད་ཐམས་ཅད་རླུང་སེམས་ཀྱི་ཆོ་འཕྲུལ་ཕྲ་མོ་ལས་ཇེ་རགས་ལ་མཆེད་པ་ཡིན། དེའི་ཕྱིར་ན་འབྱུང་བ་རྣམས་འབྱུང་བ་ལྔ་རྣམ་ཤེས་དང་བཅས་པའི་དང་མ་ཆེན་པོ་དྲུག་གི་ས་ཆུ་གཉིས་ཟུང་དུ་འཇུག་པ་སྐུ་རྡོ་རྗེ། མེ་རླུང་གཉིས་ཟུང་དུ་འཇུག་པ་གསུང་རྡོ་རྗེ། མཁའ་སེམས་གཉིས་ཟུང་དུ་འཇུག་པ་ཐུགས་རྡོ་རྗེར་གསུངས། ཤིན་ཏུ་ཕྲ་བའི་སྒོ་གསུམ་ཞེས་པ་སྐུ་གསུང་ཐུགས་རྡོ་རྗེ་མི་ཤིགས་པ་གསུམ་འདི་ལས་སྣང་བ་མཆེད་ཅིང་བྱུང་བ་ཡིན་པས། དེ་ལྟར་བྱུང་བའི་སྣང་བ་ཐམས་ཅད་སླར་ཕྱིར་འདིའི་དབྱིངས་སུ་འགྲོ་བ་ཡིན། དེས་ན་སྐབས་འདི་ལས་སྒོས་ཆོས་ཨོཾ་ཨཱཿཧཱུྃ་འབྲུ་གསུམ་གྱིས་སྦྱངས་སྤེལ་བསྒྱུར་ནས། ཨོཾ་གྱིས་མ་དག་པའི་དངོས་པོ་སྦྱངས་ཤིང་དག་པར་བྱས། ཨཱཿ་ཡིས་མང་པོར་སྤེལ། ཧཱུྃ་གིས་གང་འདོད་མཆོད་སྦྱིན་གཉིས་ཀའི་དངོས་པོར་བསྒྱུར་ཏེ་འགྲོ་དྲུག་མཉེས་པར་བྱེད་པ་དེ་ལྟར་ཡིན། འབྲུ་གསུམ་འོད་ཀྱིས་བདུད་རྩིར་སྦར་གསུངས་བའི་སྦར་གྱིས་ཅི་བསྟན་ཞེ་ན། འགྱེད་འདི་ལ་དཀར་འགྱེད། དམར་འགྱེད། ནག་འགྱེད། ཁྲ་འགྱེད་སོགས་ཀྱི་དབྱེ་བ་ཡོད། འདི་ནས་ཐུན་མོང་དང་བསྟུན་ཏེ་བདུད་རྩིར་སྒྱུར་བ་ཀུ་ས་ལིའི་ཚོགས་གསོག་དང་མཐུན་པར། འབྲུ་གསུམ་འོད་ཀྱིས་ཡེ་ཤེས་ཀྱི་མེ་སྦར་ནས་བདུད་རྩིར་སྒྱུར་བའི་གོ་དོན་ལྟར་ཡིན། འདི་དག་མཐའ་གཅིག་ཏུ་མཚན་འཛིན་རྟོག་གེ་རིགས་པའི་ཚིག་ལ་འཆེལ་ནས་གཏན་ལ་ཕེབས་རྒྱུ་ཞིག་མ་ཡིན། སྟོང་ཁམས་ཁྱབ་པའི་སྒྱེད་རྡོ་གསུམ་གྱི་སྟེང་ལ་སྟོང་ཁམས་ཁྱབ་པའི་ཐོད་པ་ཞིག་བཙུགས་ནས་དེའི་ནང་སྟོང་ཁམས་ཁྱབ་པའི་བམ་རོ་ཞིག་བཞག་དགོས་ན། ཡང་ན་སྔོན་མ་རྣམས་སྟོང་ཁམས་ཡིན་མི་ལོ་པ། ཡང་ན་སྟོང་ཁམས་ཀྱི་ནང་སྟོང་ཁམས་མང་པོ་མི་ཤོང་པ་ལྟ་བུ་མ་ཡིན་ཏེ། མཉམ་པ་ཉིད་ལ་ཆེ་ཆུང་མེད་པ་ལ། །བདག་དང་གཞན་དུ་ལྟ་བ་ཐང་རེ་ཆད། །ཆེ་ཆུང་གཉིས་སུ་འཛིན་པ་ཉོན་རེ་མོངས། །ཞེས་གསུངས་པ་ལྟར་ཆུང་བྱིས་པ་རིགས་ལམ་སྦྱོང་དུས་སུ་ཅི་ཡིན་ཡིན་བཤད་ཆོག་ཀྱང་། སྔགས་ཀྱི་ལྟ་སྤྱོད་ལ་ཐུག་དུས། མཉམ་ཉིད་བདེ་ཆེན་ཀློང་དུ་བཤགས་པར་བགྱི། །ཞེས་བཤགས་དགོས་སར་ཐུག་པ་ཡིན། གོང་གི་སྟོང་ཁམས་ཀྱི་ཚད་ལ་སོགས་པ་བསམ་གྱིས་མི་ཁྱབ་པ་མང་པོ་གར་འཇོག་འདིར་འཇོག་མེད་པ་འདི་ཆོས་ཀྱི་དབྱིངས་ལ་མི་ཤོང་བས་མ་ཡིན། རང་བློ་གུ་དོག་གི་ནང་ལ་མི་ཤོང་བས་ཡིན་ས་ཨེ་རེད། བདུད་རྩིར་སྒྱུར་གསུངས་པ་འདི་ཡིན་གཅིག་མིན་གཉིས་ཟ་རྒྱུ་འཐུང་རྒྱུ་ཞིག་གམ། ཡང་ན་རྫོགས་ཆེན་ཚང་གི་གཏོར་མ་ལ་བབས་པ་དེ་འདྲ་ལྡག་རྒྱུ་ཞིག་རྐྱང་བ་ལ་བསམ་བློ་བཏང་མི་དགོས་ཏེ། བདུད་རྩིའི་ངེས་ཚིག་བདུད་ཉོན་མོངས་པའི་རྣམ་པར་རྟོག་པ། རྩི་ཡེ་ཤེས་ཀྱི་རང་བཞིན་འདི་དོན་རྟགས་གཉིས་ཀྱི་ཐོག་ནས་འགྲེལ་རྒྱུ་ཡོད། ཇི་ལྟར་འགྲེལ་ཞེ་ན། དོན་མཚོན་བྱ་དོན་གྱི་བདུད་རྩི་སྣང་སྲིད་སྣོད་བཅུད་ཀྱི་ཆོས་ཐམས་ཅད་ཡེ་ནས་རྣམ་པར་དག་པ་བདུད་རྩི་ཆེན་པོ་རང་བྱུང་ཡེ་ཤེས་ཀྱི་བདག་ཉིད་དུ་གནས་པ་དེ་ཉིད་ཡིན། རྟགས་མཚོན་བྱེད་རྟགས་ཀྱི་བདུད་རྩི་རྒུད་པ་ཐམས་ཅད་སེལ་པའི་འཆི་མེད་ཀྱི་རྫས་ལ་གོ་བ་ཡིན་པས། ཨོཾ་ཨཱཿཧཱུྃ་དང་ཧ་ཧོ་ཧྲཱིཿཡིས་ཐད་ཀར་གང་འདོད་མཆོད་སྦྱིན་གྱི་དངོས་པོ་བསྒྱུར་བའམ། ཡང་ན་དཀར་འགྱེད་དང་བསྟུན་པའི་དམིགས་པ་བདུད་རྩི་ཁོལ་བའི་རླངས་པ་ལས། གང་འདོད་མཆོད་སྦྱིན་གྱི་རྫས། ཡར་རྒྱལ་བ་མཆོད་པའི་མཆོད་རྫས། མཆོད་ཡོན། ཞབས་བསིལ། མེ་ཏོག བདུག་སྤོས་ལ་སོགས་པ་དང་། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན་ལ་སོགས་པའི་མཆོད་སྤྲིན་བསམ་གྱིས་མི་ཁྱབ་པ་དང་། མར་རིགས་དྲུག་གི་མགྲོན་ལ་ཡིད་དུ་འོང་བའི་ཁང་བཟང་སྐྱེད་ཚལ་དང་ས་ཕྱོགས་ཉམས་དགའ་བ། གནས་གྲོགས་འདོད་པའི་ཡོན་ཏན་ཅི་བསམ་གང་དགོས་ལ་བསྒྱུར། དེ་བཞིན་དུ་ཤ་ཁྲག་དམར་ཟས་ལ་དགའ་བའི་འདྲེ་གདོན་ལ་སོགས་པ་རེ་རེ་ལ་ལུས་བམ་རོ་ཤ་ཁྲག་གི་ཕུང་པོ་ཆ་ཚང་རེ་རེ་ཐོབ་པ་སོགས་དམིགས་པ་གང་འདོད་ལ་བསྒྱུར་ཏེ། རང་གི་ཤ་ཁྲག་དྲོན་མོ་སྣང་སྲིད་ལྷ་འདྲེའི་ཁ་ཟས་སུ་སྦྱིན་དགོས། བྱིན་དུས་ཤ་མེད་ལ་ཤ་ཐོབ། དྲོད་མེད་ལ་དྲོད་ཐོབ། ཁྲག་མེད་ལ་ཁྲག་ཐོབ། བྱམས་སྙིང་རྗེ་བྱང་ཆུབ་སེམས་ཀྱིས་དེ་ཀུན་གྱི་སྣང་བ་བསྒྱུར་ནས་འཁོར་དུ་འདུས་ཚད་ད་ལྟའི་སངས་རྒྱས་དང་། འབྲེལ་བ་ཐོགས་ཚད་མ་འོངས་པའི་སངས་རྒྱས་སུ་འགྱུར་རྒྱུའི་སྨོན་ལམ་བཏབ་ནས། མཐར་མཆོད་བྱ་མཆོད་བྱེད་མཆོད་ཡུལ་སྦྱིན་བྱ་སྦྱིན་བྱེད་སྦྱིན་ཡུལ་དང་བཅས་ཐམས་ཅད་དམིགས་མེད་མཉམ་པ་ཆེན་པོ་གཉིས་མེད་ཆོས་དབྱིངས་ཀྱི་ཀློང་དུ་བརྡལ་ཐུབ་ན། ནང་སྙེམས་བྱེད་གདོན་གྱི་རྩ་བ་ཆོད་དེ། ལྷ་མེད་འདྲེ་མེད་ལྟ་བའི་གདེང་། །ཡེངས་མེད་འཛིན་མེད་སྒོམ་པའི་གནད། །བླང་དོར་མེད་པ་སྤྱོད་པའི་གནད། །རེ་དོགས་མེད་པ་འབྲས་བུའི་གནད། །ཞེས་གསུངས་པ་ལྟ་བུས་ཟིན་ཏེ། དངོས་གྲུབ་ཀླུ་དང་བདུད་ལས་འབྱུང་། །ཡོན་བདག་བཙན་དང་རྒྱལ་པོས་བྱེད། །ཟས་ནོར་མ་མོ་མཁའ་འགྲོས་སྦྱོར། །སྙན་པ་སྣང་སྲིད་ལྷ་འདྲེས་སྒྲོགས། །ཞེས་གསུངས་པ་ལྟར་ལྷ་འདྲེ་དབང་དུ་འདུས་པའི་རྟགས་ཐོན་པ་ཡིན་པས། ལྷོངས་ཚད་དང་ཚར་ཚད་ཆོད་ནས་འབྲས་བུ་སྨིན་ཡོང་བར་གསུངས་པས། ནད་པ་རེ་བདེ་ཐབས་དང་རང་གཞན་གྱི་འཕྲལ་རྐྱེན་ནད་གདོན་རེ་བཟློག་པ་ཙམ་གྱིས་ཚིམ་པར་མི་བྱེད་ནས། འཁོར་འདས་མཉམ་ཉིད་དུ་རྟོགས་པའི་མཆོག་གི་དངོས་གྲུབ་མ་ཐོབ་ཀྱི་བར་དུ་འབད་པར་བྱས་ནས་ཉམས་སུ་ལེན་དགོས་པ་ཡིན། དེ་རིང་ཡང་ཇི་ལྟར་བྱས་ཀྱང་ཆ་ཚང་འདོན་ཐུབ་མ་ཐལ། སང་ཉིན་འདོན་ཐུབ་ཤག་ཤག་བྱེད་དགོས། དེ་རིང་ང་ཚོས། ཅི་མང་བརྗོད་པས་སྦྱང་སྤེལ་སྒྱུར། །ཞེས་པའི་མཚམས་སུ་བཞག་དགོས་ཐུག་སོང་། སང་ཉིན། ཁྲ་བོར་འགྱེད་ན་དེ་ཉིད་ལས། །གསུངས་ས་ནས་དབུ་འཛུགས་རྒྱུ་བྱེད་ན་བསམ་གི། དེས་ན་ཆུ་ཚོད་ཡུན་རིང་སོང་ཡང་སྔ་དྲོར་ཆོས་ཁྲིད་གཅིག་མ་གཏོགས་ཡོད་པ་མིན། དེ་ལྟར་ཆོས་འཆད་ཉན་བྱས་པའི་དགེ་བའི་རྩ་བ་འདིས་མཚོན་སོགས་གསུངས་ནས་གྲོལ་སོང་ངོ་།། །།