སྐབས་གཉིས་པའི་ངག་དོན་བཤད་པ།
རྣམ་པ་ཐམས་ཅད་སོགས་ལ། ལམ་ཤེས་ཆོས་ཅན། རྣམ་མཁྱེན་གྱི་འཇུག་ཐོག་ཏུ་འཆད་པའི་རྒྱུ་མཚན་ཡོད་དེ། རྣམ་མཁྱེན་གྱི་རྟོགས་པ་ཐོབ་པ་ལ་ཁྱོད་སྒོམ་དགོས་པའི་ཕྱིར། ལམ་ཤེས་ཉིད་སོགས་ལ། ལམ་ཤེས་འཆད་པའི་ཐོག་མར་དེ་བཞིན་གཤེགས་པའི་རང་བཞིན་གྱི་འོད་ཀྱི་ལྷ་རྣམས་ཀྱི་འོད་མོག་མོག་པོར་མཛད་པ་ཆོས་ཅན། དགོས་པ་ཡོད་དེ། འདོད་གཟུགས་ཀྱི་ལྷ་རྣམས་ཀྱི་ང་རྒྱལ་བཅག་ནས་ལམ་ཤེས་སྐྱེ་རུང་དུ་བྱ་བའི་ཆེད་ཡིན་པའི་ཕྱིར། དེ་ཡང་སོགས་ལ། ལམ་ཤེས་ཆོས་ཅན། དངོས་སུ་སྐྱེ་བའི་ཡུལ་སོ་སོར་ངེས་པ་ཡིན་ཏེ། བྱང་ཆུབ་ཏུ་སེམས་བསྐྱེད་པ་ཁོ་ནའི་རྒྱུ་ལ་དངོས་སུ་སྐྱེ་བའི་ཕྱིར། ཐེག་པ་གསུམ་ནས་ཁྱབ་པའི་བར་ལ། དེ་ཆོས་ཅན། མཐར་ཐུག་ཁྱོད་སྐྱེ་རུང་གི་རིགས་ཀྱི་ཐེག་པ་གསུམ་ཀ་ལ་ཁྱབ་སྟེ། ཐེག་པ་གསུམ་ཀ་ཞུགས་པའི་རྣལ་འབྱོར་པས་མཐར་ཐུག་སངས་རྒྱས་ཐོབ་པའི་ཆེད་དུ་ཁྱོད་སྒོམ་དགོས་པའི་ཕྱིར། དེར་ཐལ། ཐེག་པ་གསུམ་ཀ་ལ་ཞུགས་པའི་རྣལ་འབྱོར་པས་མཐར་ཐུག་སངས་རྒྱས་ཐོབ་པར་འགྱུར་བའི་ཕྱིར། དེར་ཐལ་ཐེག་པ་གསུམ་རྣམ་པར་བཤད་པ་དྲང་དོན་ཡིན་གྱི་ངེས་དོན་མ་ཡིན་པའི་ཕྱིར། བྱང་ཆུབ་ཏུ་སེམས་བསྐྱེད་པ་སོགས་ལ། ཉན་རང་གི་ལམ་ལས་རང་བཞིན་ཁྱད་པར་དུ་འཕགས་པ་ཡིན་ཏེ། གཞན་དོན་དུ་འཁོར་བར་སྐྱེ་བའི་རྒྱུ་ཉོན་མོངས་མི་སྤོང་བའི་རང་བཞིན་ཅན་ཡིན་པའི་ཕྱིར། དེར་ཐལ། འཁོར་བ་ཇི་སྲིད་པར་སེམས་ཅན་གྱི་དོན་བྱེད་པར་ཞུགས་པའི་སློབ་ལམ་ཡིན་པའི་ཕྱིར། དེའི་འོག་ཏུ་སོགས་ལ། ཉན་རང་གི་ལམ་ལས་བྱེད་ལས་ཁྱད་པར་དུ་འཕགས་ཏེ། རྫོགས་སྨིན་མ་སྦྱངས་པར་ཡང་དག་པའི་མཐའ་མངོན་དུ་མི་བྱེད་ཅིང་གདུལ་བྱ་སྨིན་པ་སོགས་བྱེད་པའི་ལས་ཅན་ཡིན་པའི་ཕྱིར། ལམ་ཤེས་ཉིད་ཀྱི་ཚུལ་སོགས་ལ། མི་དམིགས་པའི་ཤེས་རབ་ཀྱིས་ཟིན་པའི་ནས་བདེན་བཞི་མི་རྟག་སོགས་བཅུ་དྲུག་ཏུ་རྟོགས་པའི་བྱང་འཕགས་ལྷ་སྦྱིན་གྱི་མངོན་རྟོགས་ཆོས་ཅན། ཉན་ཐོས་ཀྱི་ལམ་ཤེས་པ་ཡིན་ཏེ། དེ་ལྟ་བུའི་བྱང་འཕགས་ཀྱི་མངོན་རྟོགས་ཡིན་པའི་ཕྱིར། སྡུག་བདེན་ལ་སྡུག་བདེན་ཆོས་ཅན། མི་རྟག་སྡུག་བསྔལ་སྟོང་པ་བདག་མེད་ཀྱི་མཚན་ཉིད་ཅན་ཡིན་ཏེ། རིམ་བཞིན་སྐྱེ་འཇིགས་དང་ལྡན་པ་དང་འཕགས་པ་རྣམས་དང་མི་མཐུན་པ་དང་། དོན་གཞན་གྱི་བདག་གིས་སྟོང་པ་དང་། རང་གི་ངོ་བོ་བདག་ཏུ་མེད་པའི་ཕྱིར། ཀུན་འབྱུང་སོགས་ལ། ཀུན་འབྱུང་གི་མཚན་ཉིད་རྒྱུ་སོགས་བཞི་ཆོས་ཅན། མདོ་ལས། གོ་རིམ་བཞིན། ནད་འབྲས་ཟུག་རྔུ་སྡིག་པ་ཞེས་པའི་རྣམ་གྲངས་ཀྱིས་སྟོན་པའི་རྒྱུ་མཚན་ཡོད་དེ། ནད་དང་འདྲ་བར་སྡུག་བསྔལ་གྱི་རྩ་བར་གྱུར་པའི་ཕྱིར་དང་། འབྲས་དང་འདྲ་བར་སྡུག་བསྔལ་ཀུན་འབྱུང་བའི་ཕྱིར་དང་། ཟུག་རྔུ་དང་འདྲ་བར་སྡུག་བསྔལ་གྱི་རྐྱེན་བྱེད་པའི་ཕྱིར་དང་། སྡིག་པ་དང་འདྲ་བར་སྡུག་བསྔལ་རྒྱུད་མར་འབྱུང་བའི་སྒོ་ནས་ཤིན་ཏུ་འཇོམས་པའི་ཕྱིར་རོ། །ཡིད་འབྱུང་བའི་དང་ཞེས་སོགས་ལ། ཉན་རང་གི་སྦྱོར་ལམ་ཆོས་ཅན། སྡུག་བསྔལ་ཀུན་ལ་ཡིད་འབྱུང་བར་བྱ་བའི་ཕྱིར་ཞུགས་པ་ཡིན་ཏེ། ཁྱོད་ཀྱི་འཇུག་ཐོག་ཏུ་འབྱུང་བའི་མཐོང་ལམ་གྱིས་སྡུག་བསྔལ་ཀུན་ཡིད་འབྱུང་བར་བྱ་བར་མངོན་སུམ་གྱིས་རྟོགས་པའི་ཕྱིར། སྒོམ་ལམ་ཐ་མ་མ་བཏོགས་པའི་ཉན་རང་གི་སྒོམ་ལམ་ཆོས་ཅན། སྡུག་ཀུན་ལ་འདོད་ཆགས་དང་བྲལ་བར་བྱ་བའི་ཕྱིར་ཞུགས་པ་ཡིན་ཏེ། ཁྱོད་ཀྱི་འཇུག་ཐོག་ཏུ་འབྱུང་བའི་སྒོམ་ལམ་གྱིས་སྡུག་ཀུན་མཐའ་དག་ལ་འདོད་ཆགས་དང་བྲལ་བར་བྱེད་པའི་ཕྱིར། ཉན་རང་གི་མི་སློབ་ལམ་ཆོས་ཅན། སྡུག་ཀུན་འགོག་པའི་ཕྱིར་ཞུགས་ཏེ། ཁྱོད་ཀྱི་འཇུག་ཐོག་ཏུ་འབྱུང་བའི་ཕུང་པོ་ལྷག་མེད་མྱང་འདས་སུ་སྡུག་ཀུན་མཐའ་དག་འགོག་པའི་ཕྱིར། སྡུག་བསྔལ་དང་སོགས་ལ། སྡུག་ཀུན་ཆོས་ཅན། ཉན་རང་གི་མཐོང་ལམ་དུ་ཡིད་འབྱུང་བའི་རང་བཞིན་དུ་དམིགས་པར་བྱ་བ་ཡིན་ཏེ། རང་གི་ངོ་བོ་ཕ་རོལ་དང་། འཇིག་པའི་ཆོས་ཅན་གྱི་ཟག་བཅས་ཡིན་པའི་ཕྱིར། སྒོམ་ལམ་དུ་འདོད་ཆགས་དང་བྲལ་བར་བྱ་བའི་རང་བཞིན་དུ་དམིགས་པར་བྱ་བ་ཡིན་ཏེ། རང་གི་ངོ་བོ་གཡོ་བ་དང་རབ་དུ་འཇིག་པའི་མཚན་ཉིད་ཅན་གྱི་ཟག་བཅས་ཡིན་པའི་ཕྱིར། མི་སློབ་ལམ་དུ་འགོག་པའི་རང་བཞིན་དུ་དམིགས་པར་བྱ་བ་ཡིན་ཏེ། རང་གི་ངོ་བོ་འཇིགས་པ་དང་ནད་འགོ་བ་དང་། འཚེ་བའི་རྣམ་པ་ཅན་ཡིན་པའི་ཕྱིར། འགོག་པའི་སོགས་ལ། འགོག་བདེན་ཆོས་ཅན། འགོག་པ་ཞི་བ་གྱ་ནོམ་ངེས་འབྱུང་གི་མཚན་ཉིད་ཅན་ཡིན་ཏེ། རིམ་བཞིན་ཉོན་མོངས་པ་དང་བྲལ་བ་དང་། སྡུག་བསྔལ་རབ་ཏུ་ཞི་བ་དང་། གཙང 
་ཞིང་བདེ་བའི་རང་བཞིན་ཡིན་པ་དང་། རྟག་ཏུ་ཕན་པའི་དངོས་པོ་ཡིན་པའི་ཕྱིར། ལམ་ཤེས་སོགས་ལ། ལམ་བདེན་ཆོས་ཅན། ལམ་རིགས་པ་སྒྲུབ་པ་ངེས་འབྱིན་གྱི་མཚན་ཉིད་ཅན་ཡིན་ཏེ། རིམ་བཞིན་ཐར་པ་སྒྲུབ་པར་བྱེད་པ་དང་། ཉོན་མོངས་པའི་གཉེན་པོ་དང་། སེམས་ཕྱིན་ཅི་མ་ལོག་པར་སྒྲུབ་པ་དང་། རྟག་པའི་གནས་སུ་གདོན་མི་ཟ་བར་འབྱིན་བྱེད་ཡིན་པའི་ཕྱིར་རོ། །འཕགས་པ་ཉན་ཐོས་སོགས་ལ། བྱང་སེམས་ཀྱི་སྦྱོར་ལམ་དྲོད་ཆོས་ཅན། སྐབས་འདིའི་ངེས་འབྱེད་ཆ་མཐུན་དྲོད་ཡིན་ཏེ། གཟུགས་སོགས་ཕུང་པོ་ལྔ་སྟོང་པ་ཉིད་དུ་དབྱེར་མེད་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། བྱང་སེམས་ཀྱི་སྦྱོར་ལམ་རྩེ་མོ་ཆོས་ཅན། སྐབས་འདིའི་ངེས་འབྱེད་ཆ་མཐུན་རྩེ་མོ་ཡིན་ཏེ། གཟུགས་སོགས་ཕུང་པོ་རྣམས་མི་དམིགས་པའི་ཚུལ་གྱིས་གནས་བྱར་མེད་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། བྱང་སེམས་ཀྱི་བཟོད་པ་ཆོས་ཅན། སྐབས་འདིའི་ངེས་ཆ་བཟོད་པ་ཡིན་ཏེ། གཟུགས་སོགས་ཕུང་པོ་ལྔ་རྟག་མི་རྟག་སོགས་དམིགས་པའི་ཚུལ་གྱིས་གནས་པ་བཀག་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། བྱང་སེམས་ཀྱི་ཆོས་མཆོག་ཆོས་ཅན། སྐབས་འདིའི་ངེས་འབྱེད་ཆ་མཐུན་ཆོས་མཆོག་ཡིན་ཏེ། ས་བཅུ་ནས་རྣམ་མཁྱེན་གྱི་བར་ལ་དམིགས་པའི་ཚུལ་གྱིས་མི་གནས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། ས་བཅུ་ནས་རྣམ་མཁྱེན་གྱི་བར་ཆོས་ཅན། གནས་བྱར་མེད་པར་ཐལ། ཀུན་མཁྱེན་གྱི་གནས་བྱར་མ་གཟིགས་པའི་ཕྱིར། ཉན་ཐོས་རྣམས་ལ་སོགས་ལ། རང་རྒྱལ་ལམ་གྱི་ཁྱད་ཆོས་ཆོས་ཅན། རང་རྒྱལ་ལམ་གྱི་དང་པོར་འཆད་པའི་རྒྱུ་མཚན་ཡོད་དེ། ཉན་རང་གི་ལམ་ལ་ཁྱད་པར་མེད་དམ་མཉམ་པའི་དགོས་པ་བསལ་བའི་ཆེད་ཡིན་པའི་ཕྱིར། རང་བྱུང་སོགས་ལ། རང་རྒྱལ་གྱི་རྟོགས་པ་ཆོས་ཅན། ཉན་ཐོས་ལས་རྟོགས་པ་ཟབ་པ་ཡིན་ཏེ། སྲིད་པ་ཐ་མའི་ཚེ་སློབ་དཔོན་གྱི་གདམས་པ་ལ་མི་ལྟོས་པར་རང་བྱུང་གི་ཡེ་ཤེས་མངོན་དུ་འགྱུར་བའི་ཕྱིར། ཁྱབ་སྟེ་ཉན་ཐོས་རྣམས་ནི་གཞན་གྱི་གདམས་པ་ལ་ལྟོས་ནས་རང་གི་བྱང་ཆུབ་རྟོགས་དགོས་པའི་ཕྱིར། ཡེ་ཤེས་ཟབ་པ་ཡིན་ཏེ། གདུལ་བྱ་གཞན་གྱིས་ཆོས་སྟོན་པའི་ངག་གི་རྟགས་ལས་ཤེས་མི་ནུས་པའི་ཕྱིར། ཁྱབ་སྟེ། ཉན་ཐོས་རྣམས་ནི་ཆོས་སྟོན་པའི་ངག་གི་རྟགས་ལས་གཞན་གྱི་རང་གི་ཤེས་པའི་རྩལ་རྟོགས་པའི་ཕྱིར། གང་གང་སོགས་ལ། རང་རྒྱལ་ཆོས་ཅན། སྒྲ་མེད་པར་ཆོས་སྟོན་པ་མི་འགལ་ཏེ། གང་སྟོན་པར་འདོད་པའི་ཆོས་ཀྱི་སྒོ་ནས་བསྟན་པས་ཉན་པ་པོ་རྣམས་ཀྱི་ཤེས་པ་ལ་བསྟན་བྱའི་དོན་དེ་སྣང་བར་འགྱུར་བའི་ཕྱིར། ཁྱབ་སྟེ། ཆོས་བསྟན་པའི་དགོས་པ་ནི། སྨྲ་བ་པོའི་བརྗོད་འདོད་ཀྱི་དོན་ཉན་པ་པོའི་ཤེས་པ་ལ་སྣང་བ་ཡིན་པའི་ཕྱིར། རྟགས་གྲུབ་སྟེ། སྔོན་སློབ་ལམ་གྱི་གནས་སྐབས་སུ་སྒྲ་མེད་པར་ཆོས་སྟོན་པར་གྱུར་ཅིག་ཅེས་སྨོན་ལམ་བཏབ་ཅིང་ཚོགས་བསགས་པའི་ཕྱིར། དེའི་རྒྱུ་མཚན་ཡོད་དེ། རྟོག་དཔྱོད་ཀྱི་ཀུན་ནས་མ་སླད་པར་ཚིག་ཏུ་མི་སྨྲ་ཞིང་ཚིག་ཀྱང་སེམས་རྣམ་པར་གཡེང་བྱེད་དུ་རྟོགས་པའི་ཕྱིར། གཟུང་དོན་སོགས་ལ། རང་རྒྱལ་གྱི་རྟོགས་པ་ཆོས་ཅན། ཉན་ཐོས་ཀྱི་རྟོགས་པ་ལས་ཁྱད་པར་འཕགས་ཏེ། གཟུང་བ་བདེན་ཞེན་གྱི་རྟོག་པ་སྤངས་པའི་ཕྱིར། བྱང་སེམས་ཀྱི་རྟོགས་པ་ལས་དམན་ཏེ། འཛིན་པ་བདེན་འཛིན་གྱི་རྟོག་པ་མ་སྤངས་པའི་ཕྱིར། རྟེན་གྱི་སྒོ་ནས་ཉན་ཐོས་ཀྱི་ལམ་ལས་ཁྱད་པར་འཕགས་ཏེ། རང་བཞིན་གྱི་དབང་པོ་འབྲིང་པོའི་ནང་སྐྱེ་མཆེད་དྲུག་གི་ཆོས་ཉིད་ལ་བརྟེན་པ་དེ་ཡིན་པའི་ཕྱིར། ཁྱད་པར་གསུམ་ལྡན་གྱི་རང་རྒྱལ་གྱི་ལམ་མི་དམིགས་པའི་རྣམ་པས་ཤེས་པའི་བྱང་འཕགས་ལྷ་བྱིན་གྱི་མངོན་རྟོགས་ཆོས་ཅན། རང་རྒྱལ་གྱི་ལམ་ཤེས་པ་ཡིན་ཏེ། དེ་ལྟ་བུའི་བྱང་འཕགས་ཀྱི་མངོན་རྟོགས་ཡིན་པའི་ཕྱིར། བཏགས་པའི་ཆོས་ཉིད་སོགས་ལ། བྱང་སེམས་ཀྱི་སྦྱོར་ལམ་དྲོད་ཆོས་ཅན། སྐབས་འདིའི་ངེས་ཆ་དྲོད་ཡིན་ཏེ། གཟུགས་སོགས་བཏགས་པ་ཙམ་དང་མི་འགལ་བར་སྟོང་པ་ཉིད་ཀྱི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། སྦྱོར་ལམ་རྩེ་མོ་ཆོས་ཅན། སྐབས་འདིའི་ངེས་ཆ་རྩེ་མོ་ཡིན་ཏེ། དོན་དམ་པར་འཕེལ་འགྲིབ་མེད་པ་སོགས་ཀྱི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། སྦྱོར་ལམ་བཟོད་པ་ཆོས་ཅན། སྐབས་འདིའི་ངེས་ཆ་བཟོད་པ་ཡིན་ཏེ། ནང་སྟོང་ཉིད་སོགས་ཀྱི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། སྦྱོར་ལམ་ཆོས་མཆོག་ཆོས་ཅན། སྐབས་འདིའི་ངེས་ཆ་ཆོས་མཆོག་ཡིན་ཏེ། དོན་དམ་པར་སྐྱེ་འགག་མེད་པ་སོགས་ཀྱི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཡིན་པའི་ཕྱིར། བདེན་དང་བདེན་པ་སོགས་ལ། ལམ་ཤེས་ཀྱི་མཐོང་ལམ་ཆོས་ཅན། སྐད་ཅིག་མ་བཅུ་དྲུག་ཏུ་དབྱེར་ཡོད་དེ་བདེན་པ་བཞི་པོ་རེ་རེ་ལ་དམིགས་པའི་ཤེས་བཟོད་སྐད་ཅིག་མ་བཞི་བཞིར་དབྱེར་ཡོད་པའི་ཕྱིར། དེ་བཞིན་ཉིད་ནས་ཁས་མི་ལེན་གྱི་བར་ལ་སྡུག་བདེན་གྱི་དེ་བཞིན་ཉིད་དང་། དེ་རྟོགས་ཀྱི་ཡེ་ཤེས་རྟེན་དང་བརྟེན་པར་མེད་པའི་རྣམ་པས་རྟེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་མཐོང་ལམ་སྡུག་བསྔལ་ཆོས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་དེ་སྐྱེ་བའི་རྒྱུ་མཚན་གྱིས་དེ་ལྟར་བཏགས་པའི་ཕྱིར། ཆེན་པོ་ལ་དོན་དམ་པར་གཟུགས་སོགས་ཆོས་དབྱིངས་ཀྱི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་སྡུག་བསྔལ་ལ་ཆོས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་དེ་སོགས་སྔ་མ་ལྟར་རོ། །
ཚད་མ་མེད་བཅས་ལ། དོན་དམ་པར་གཟུགས་སོགས་ཀྱི་རྣམ་པའི་རྗེས་སུ་བྱེད་པའི་ཚད་མ་མེད་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་སྡུག་བསྔལ་རྗེས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་དེ་སོགས་སྔ་མ་ལྟར་རོ། །ཚད་མེད་དང་སོགས་ལ། གཟུགས་སོགས་དོན་དམ་པར་ནམ་མཁའ་ལྟར་ཚད་མེད་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་སྡུག་བསྔལ་རྗེས་ཤེས་སྟོན་པའི་རྒྱུ་མཚན་ཡོད་དེ་ཁྱོད་ལ་བརྟེན་ནས་དེ་སོགས་སྔ་མ་ལྟར་རོ། །མཐའ་མེད་ཅེས་ལ། དོན་དམ་པར་རྟག་ཆད་སོགས་དང་བྲལ་བའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ཀུན་འབྱུང་ཆོས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་སོགས་སོ། །དེ་ནས་ངེས་འབྱིན་གྱི་བར་ལ། ཀུན་འབྱུང་ཆོས་ཤེས་ལ་གནས་པས་གཟུགས་སོགས་དོན་དམ་པར་ཆོས་དབྱིངས་ཀྱི་སངས་རྒྱས་སུ་རྟོགས་པའི་རྣམ་པ་བདེན་བཞི་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ཀུན་འབྱུང་ཆོས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སྔར་ལྟར་རོ། །བླང་མེད་སོགས་ལ། ཀུན་འབྱུང་རྗེས་བཟོད་ལ་གནས་པ་ཆོས་ཐམས་ཅད་བླང་དོར་མེད་པར་རྟོགས་པའི་རྣམ་པས་ཏེ་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ཀུན་འབྱུང་རྗེས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལས་སོགས་སྔ་མ་ལྟར་རོ། །བྱམས་སོགས་ལ། ཀུན་འབྱུང་རྗེས་ཤེས་ལ་གནས་པ་འགོག་པར་མི་ལྟུང་པའི་ཕྱིར་དུ་ཚད་མེད་བཞི་བསྒོམ་པར་བྱའོ་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ཀུན་འབྱུང་རྗེས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །སྟོང་ཉིད་ཅེས་སོགས་ལ། གཟུགས་སོགས་གདོད་མ་ནས་སྟོང་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་འགོག་པ་ཆོས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སྔ་མ་ལྟར་རོ། །སངས་རྒྱས་ཉིད་ཐོབ་ལ། ཆོས་དབྱིངས་སུ་དངོས་པའི་དགེ་བས་སངས་རྒྱས་ཐོབ་བོ་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་འགོག་པ་ཆོས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །རྣམ་བྱང་ཀུན་བསྡུས་ལ། འགོག་པ་རྗེས་བཟོད་ཀྱི་གཉེན་པོའི་རྣམ་པ་ཐམས་ཅད་བསྡུས་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་འགོག་པ་རྗེས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །ཉམ་ང་བ་དང་ནད་ཀུན་སེལ་ལ། འགོག་པའི་རྗེས་ཤེས་ཀྱིས་ཕྱི་ནང་གི་ཉེར་ཚེ་ཐམས་ཅད་ཞི་བར་བྱེད་དོ། །ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་འགོག་པ་རྗེས་ཤེས་སུ་འདོགས་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །
མྱ་ངན་འདས་འཛིན་ཞི་ཉིད་ལ། ལམ་ལ་ཆོས་བཟོད་ཀྱིས་འཁོར་འདས་ཀྱི་ཆོས་ལ་མངོན་པར་ཞེན་པ་ཞི་བར་བྱེད་དོ་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ལམ་ལ་ཆོས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །སངས་རྒྱས་ཀྱིས་སྲུང་སོགས་ལ། ལམ་ལ་ཆོས་ཤེས་ལ་གནས་པ་ལ། སངས་རྒྱས་རྣམས་ཀྱིས་བསྲུང་བ་སོགས་མཛད་དོ་ཞེས་པའི་རྣམ་པས། བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ལམ་ལ་ཆོས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་སོ། །སྲོག་མི་གཅོད་ནས་འགོད་པའི་བར་ལ། ལམ་ལ་རྗེས་བཟོད་ལ་གནས་པས་བདག་ཉིད་ཀྱི་རྣམ་མཁྱེན་རྒྱུ་ལ་གནས་ནས་གཞན་དག་ཀྱང་དེ་ལ་འགོད་དེ་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ལམ་ལ་རྗེས་བཟོད་སྟོན་པའི་རྒྱུ་མཚན་ཡོད་དེ། ཁྱོད་ལ་བརྟེན་ནས་སོགས་ནས་བསྔོ་བའི་བར་ལ། ལམ་ལ་རྗེས་ཤེས་ལ་གནས་པའི་སྦྱིན་སོགས་རྫོགས་པའི་བྱང་ཆུབ་ཏུ་བསྔོ་བར་བྱེད་དོ་ཞེས་པའི་རྣམ་པས་བདེན་བཞི་ལ་དམིགས་པའི་སྦྱོར་ལམ་ཆོས་ཅན། ཁྱོད་ཀྱི་རྣམ་པའི་མིང་གིས་ལམ་ལ་ངེས་ཤེས་སྟོན་པའི་རྒྱུ་མཚན་ཡོད་དེ། ཁྱོད་ལ་སོགས་སོ། །གཞན་དག་ན་རེ་སོགས་ལ། སྐབས་དང་པོ་གསུམ་གྱི་སྦྱོར་མཐོང་སྟོན་པའི་གཞུང་ཆོས་ཅན། སྦྱོར་མཐོང་གི་མངོན་པར་རྟོགས་པའི་རིམ་པ་ཅུང་ཟད་མ་བསྟན་པར་ཐལ། མཉམ་གཞག་དུ་སྦྱོར་མཐོང་སྒོམ་པའི་རིམ་པ་དང་རྗེས་ཐ ོབ་དུ་དེ་དག་གི་དམིགས་རྣམ་ཡིད་ལ་བྱེད་པའི་རིམ་པ་མ་བསྟན་པའི་ཕྱིར། དེར་ཐལ། སྦྱོར་མཐོང་གི་སྐད་ཅིག་མ་ཙམ་བསྟན་གྱི་དེ་དག་གི་དམིགས་རྣམ་ཅུང་ཟད་ཀྱང་མ་བསྟན་པའི་ཕྱིར། གཞན་ཡང་སོགས་ལ། དམིགས་པ་དང་ནི་རྣམ་པ་དང་ཞེས་པའི་གཞུང་ཆོས་ཅན། བྱང་སེམས་ཀྱི་སྦྱོར་ལམ་ཉན་རང་གི་སྦྱོར་ལམ་ལས་དམིགས་རྣམ་གྱི་ཁྱད་པར་དུ་འཕགས་པར་མ་བསྟན་པར་ཐལ། སྦྱོར་ལམ་གྱི་དམིགས་རྣམ་མ་བསྟན་པའི་ཕྱིར། མཐོང་བའི་ལམ་སོགས་ལ། སྒོམ་ལམ་གྱི་བྱེད་པ་ཆོས་ཅན། སྒོམ་ལམ་གྱི་དང་པོར་སྟོན་པའི་རྒྱུ་མཚན་ཡོད་དེ། གདུལ་བྱ་སྒོམ་ལམ་གྱི་འབྲས་བུ་ལ་བྲོད་པ་བསྐྱེད་པའི་ཆེད་ཡིན་པའི་ཕྱིར། ཀུན་ནས་ཞི་སོགས་ལ་ཐེག་ཆེན་སྒོམ་ལམ་ཆོས་ཅན། རྨུགས་རྒོད་སོགས་ཉེ་བར་ཞི་བའི་བྱ་བ་བྱེད་དེ། དགེ་བའི་དམིགས་པ་ལ་སེམས་བཀོལ་དུ་རུང་བར་བྱེད་པའི་ཕྱིར། ཐམས་ཅད་ལ་འདུད་པའི་བྱ་བ་བྱེད་དེ། ང་རྒྱལ་སོགས་བཅོམ་ནས་ཡོན་ཏན་ཅན་ལ་ཇི་ལྟར་འོས་པའི་ལུས་ངག་གི་སྲི་ཞུ་བྱེད་པའི་ཕྱིར། ཉོན་མོངས་ལས་རྒྱལ་བའི་བྱ་བ་བྱེད་དེ། གཉེན་པོ་ཆུང་འབྲིང་དགུས་སྤང་བྱ་ཆེ་འབྲིང་དགུ་སྤོང་བར་བྱེད་པའི་ཕྱིར། གནོད་པས་མི་རྫི་བའི་བྱ་བ་བྱེད་དེ། རང་རྒྱུད་ལྡན་གྱི་རྣལ་འབྱོར་པའི་ལུས་འགལ་རྐྱེན་གྱིས་མི་ཚུགས་པའི་མཐུ་ལྡན་དུ་བྱེད་པའི་ཕྱིར། བྱང་ཆུབ་ཐོབ་པའི་བྱ་བ་བྱེད་དེ། ཁྱོད་མཐར་ཕྱིན་པ་ན་ཇི་ལྟ་བ་དང་ཇི་སྙེད་པའི་ཡེ་ཤེས་མངོན་དུ་བྱེད་པ་ཐོབ་པའི་ཕྱིར། རྟེན་གྱི་ཡུལ་མཆོད་རྟེན་དུ་བྱེད་དེ། རང་རྒྱུད་ལྡན་གྱི་རྣལ་འབྱོར་པའི་གནས་སྐྱེ་བོ་ཀུན་གྱི་མཆོད་པའི་གནས་ཡིན་པའི་ཕྱིར། བྱེད་པའི་འོག་ཏུ་སོགས་ལ། དབྱེ་ན་གཉིས་སུ་ཡོད་དེ། རྟོག་པའི་ཟག་བཅས་དང་ཟག་མེད་གཉིས་སུ་ཡོད་པའི་ཕྱིར། སྒོམ་ལམ་ཟག་བཅས་ཆོས་ཅན། གསུམ་དུ་ཡོད་དེ། ཆོས་བསྔོ་རྗེས་སུ་ཡི་རངས་གསུམ་དུ་ཡོད་པའི་ཕྱིར། རང་དང་གཉིས་ཀ་དང་སོགས་ལ། སྐབས་འདིའི་དབྱེ་གཞི་སྒོམ་ལམ་མོས་པ་ཆོས་ཅན། འཕགས་ལམ་གྱི་དང་པོར་མངོན་དུ་མི་བྱེད་དེ། ཡུམ་དོན་གསུམ་གྱི་འབྱུང་གནས་སུ་ཇི་ལྟ་བ་བཞིན་མངོན་སུམ་དུ་རྟོགས་པའི་མི་རྟོག་ཡེ་ཤེས་ཀྱི་རྗེས་ལས་བྱུང་བའི་ལམ་ཡིན་པའི་ཕྱིར། དབྱེ་ན་གསུམ་ཡོད་དེ། རང་དོན་གཉིས་དོན་གཞན་དོན་ལ་དམིགས་པ་གསུམ་དུ་ཡོད་པའི་ཕྱིར། མ་དག་ས་བདུན་གྱི་གནས་སྐབས་ཀྱི་སྒོམ་ལམ་མོས་པ་ཆོས་ཅན། རང་དོན་མོས་པ་ཡིན་ཏེ། བསམ་པས་གཞན་དོན་ལ་དམིགས་ནས་སྦྱོར་བས་གཙོ་ཆེར་རང་དོན་བསྒྲུབ་པའི་མོས་པ་ཡིན་པའི་ཕྱིར། ས་བརྒྱད་པ་དང་དགུ་པའི་མོས་པ་ཆོས་ཅན། གཉིས་དོན་མོས་པ་ཡིན་ཏེ། བསམ་པས་གཞན་དོན་ལ་དམིགས་ནས་སྦྱོར་བས་རང་གཞན་གྱི་དོན་རེས་འཇོག་ཏུ་སྒྲུབ་པའི་མོས་པ་ཡིན་པའི་ཕྱིར། ས་བཅུ་པའི་མོས་པ་ཆོས་ཅན། གཞན་དོན་མོས་པ་ཡིན་ཏེ། བསམ་སྦྱོར་གཉིས་ཀས་གཞན་དོན་ཁོ་ན་ལ་འཇུག་པའི་མོས་པ་ཡིན་པའི་ཕྱིར། སྒོམ་ལམ་མོས་པ་ཆོས་ཅན། རྣམ་པས་དབྱེ་ན་ཉེར་བདུན་དུ་ཡོད་དེ། ངོ་བོས་ཕྱེ་ན་གསུམ་དུ་ཡོད་ཅིང་གསུམ་པོ་རེ་རེ་ལ་ཡང་དགུ་དགུར་དབྱེར་ཡོད་པའི་ཕྱིར། དེ་སྒོམ་པའི་སོགས་ལ། ཁྱོད་ཀྱི་གནས་སྐབས་ལ་སངས་རྒྱས་སོགས་ཀྱི་བསྟོད་བཀུར་བསྔགས་པ་མཛད་པ་ལ་དགོས་པ་ཡོད་དེ། ཁྱོད་རྒྱུད་ལྡན་གྱི་བྱང་སེམས་སྤྲོ་བ་བསྐྱེད་པའི་ཆེད་ཡིན་པའི་ཕྱིར། ཇི་ལྟར་མོས་པ་བཞིན་སོགས་ལ། རང་དོན་མོས་པ་ཆོས་ཅན། ཁྱོད་ཆུང་འབྲིང་གི་གནས་སྐབས་དགུ་ལ་སངས་རྒྱས་རྣམས་ཀྱིས་བསྟོད་པ་དགུ་ཚན་མཛད་པའི་རྒྱུ་མཚན་ཡོད་དེ། ཁྱོད་ཀྱི་གནས་སྐབས་ཀྱི་ཡོན་ཏན་ཇི་ལྟ་བ་བཞིན་གཟིགས་ནས་ཐུགས་དགྱེས་པར་འགྱུར་བའི་ཕྱིར། དེ་བཞིན་དུ་གཉིས་དོན་དང་གཞན་དོན་མོས་པ་ཆོས་ཅན་དུ་བྱས་ནས་རིམ་བཞིན་ཁྱོད་ཀྱི་གནས་སྐབས་དགུ་ལ་བཀུར་བ་དང་། བསྔགས་པ་དགུ་ཚན་མཛད་པའི་རྒྱུ་མཚན་ཡོད་དེ། ཞེས་སྦྱར་རོ། །བསྟོད་པ་སོགས་ལ། སྐབས་འདིའི་བསྟོད་བཀུར་བསྔགས་གསུམ་ཆོས་ཅན། བཅམ་བུ་སྒྲའི་ངོ་བོ་མ་ཡིན་ཏེ་མོས་པ་གསུམ་གྱི་ཡོན་ཏན་ཇི་ལྟ་བ་བཞིན་རྟོགས་ནས་སངས་རྒྱས་སོགས་ཐུགས་དགྱེས་པའི་གནས་སྐབས་ཡིན་པའི་ཕྱིར། ཡོངས་སུ་བསྔོ་བ་སོགས་ལ། སྒོམ་ལམ་བསྔོ་བ་ཡིད་བྱེད་ཆོས་ཅན། རྣམ་པ་བཅུ་གཉིས་སུ་ཡོད་དེ། ཁྱད་པར་ཅན་གྱི་བསྔོ་བ་ཡིད་བྱེད་ནས་བསོད་ནམས་ཆེན་པོ་འབྱུང་བའི་བསྔོ་བའི་བར་དུ་ཡོད་པའི་ཕྱིར། ཉན་རང་ལས་ཁྱད་པར་དུ་འཕགས་པའི་བསྔོ་བ་ཡིན་ཏེ། མི་དམིགས་པའི་རྣམ་པས་དགེ་རྩ་བླ་མེད་བྱང་ཆུབ་དུ་བསྔོ་བ་ཡིན་པའི་ཕྱིར། མི་དམིགས་པའི་མིང་ཅན་གྱི་བསྔོ་བ་ཡིན་ཏེ། བསྔོ་བྱ་ཚུལ་ཁྲིམས་ལ་སོགས་པའི་དགེ་བ་རྣམས་མི་དམིགས་པའི་རྣམ་པས་བསྔོ་བ་ཡིན་པའི་ཕྱིར། ཕྱིན་ཅི་མ་ལོག་པའི་མིང་ཅན་གྱི་བསྔོ་བ་ཡིན་ཏེ། བསྔོ་བྱེད་ཀྱི་སེམས་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། བདེན་པའི་མིང་ཅན་གྱི་བསྔོ་བ་ཡིན་ཏེ། བསྔོ་བ་པོ་རང་ཉིད་རྟག་ཅིག་རང་དབང་ཅན་གྱི་བདག་སོགས་སུ་མི་དམིགས་པའི་བསྔོ་བ་ཡིན་པའི་ཕྱིར། སངས་རྒྱས་ཀྱི་བསོད་ནམས་ཀྱི་ཚོགས་དྲན་པའི་མིང་ཅན་གྱི་བསྔོ་བ་ཡིན་ཏེ། དུས་གསུམ་གྱི་སངས་རྒྱས་རྣམས་ཀྱི་དགེ་རྩ་མི་དམིགས་པའི་བསྔོ་བ་ཡིན་པའི་ཕྱིར། ཐབས་ལ་མཁས་པའི་མིང་ཅན་གྱི་བསྔོ་བ་ཡིན་ཏེ། སྦྱིན་སོགས་ཕར་ཕྱིན་དྲུག་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། མཚན་མ་མེད་པའི་མིང་ཅན་གྱི་བསྔོ་བ་ཡིན་ཏེ། སྟོང་ཉིད་དགག་པའི་མཚན་མ་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། སངས་རྒྱས་ཀྱིས་གནང་བའི་མིང་ཅན་གྱི་བསྔོ་བ་ཡིན་ཏེ་བསྔོ་བྱ་བསྔོ་བྱེད་བསྔོ་རྒྱུའི་ལམ་ཐམས་ཅད་མི་དམིགས་པའི་ཚུལ་གྱིས་བསྔོ་བར་བྱེད་པའི་ཕྱིར། ཁམས་གསུམ་ལས་མ་གཏོགས་པའི་མིང་ཅན་གྱི་བསྔོ་བ་ཡིན་ཏེ། ཁམས་གསུམ་མི་དམིགས་པའི་ཚུལ་གྱིས་བསྔོ་བར་བྱེད་པའི་ཕྱིར། བསོད་ནམས་ཆེན་པོ་འབྱུང་ས་ཆུང་ངུའི་མིང་ཅན་གྱི་བསྔོ་བ་ཡིན་ཏེ། སྟོང་གསུམ་གྱི་སེམས་ཅན་དགེ་བཅུ་སོགས་ལ་གནས་པ་ལ་རྗེས་སུ་ཡི་རངས་པའི་དགེ་བ་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། བསོད་ནམས་ཆེན་པོ་འབྱུང་ས་འབྲིང་གི་མིང་ཅན་གྱི་བསྔོ་བ་ཡིན་ཏེ། སྟོང་གསུམ་གྱི་སེམས་ཅན་རྒྱུན་ཞུགས་སོགས་ལ་གནས་པ་ལ་རྗེས་སུ་ཡི་རངས་པའི་དགེ་བ་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། བསོད་ནམས་ཆེན་པོ་འབྱུང་ས་ཆེན་པོའི་མིང་ཅན་གྱི་བསྔོ་བ་ཡིན་ཏེ། སྟོང་གསུམ་གྱི་སེམས་ཅན་བླ་མེད་བྱང་ཆུབ་ལ་གནས་པ་ལ་རྗེས་སུ་ཡི་རངས་པའི་དགེ་བ་མི་དམིགས་པའི་ཚུལ་གྱིས་བསྔོ་བ་ཡིན་པའི་ཕྱིར། ཐེག་པ་གསུམ་གྱི་སོགས་ལ། སྐབས་འདིའི་བསྔོ་བ་བཅུ་གཉིས་ཆོས་ཅན། སྒོམ་ལམ་བསྔོ་བ་ཡིན་ཏེ། བྱང་འཕགས་རྣམས་ཀྱི་སེམས་ཅན་གྱི་དོན་དུ་དགེ་བ་མི་ཟད་པར་བྱ་བའི་ཕྱིར་དུ་མི་དམིགས་པའི་རྣམ་པས་བླ་མེད་བྱང་ཆུབ་དུ་བསྔོ་བའི་ལམ་ཡིན་པའི་ཕྱིར། ཐབས་དང་མི་དམིགས་པ་སོགས་ལ། ས་གསུམ་པ་ལ་གནས་པའི་བྱང་སེམས་ཀྱི་རང་གཞན་གྱི་དགེ་རྩ་ལ་དགའ་བ་སྒོམ་པ་ཆོས་ཅན། རྗེས་སུ་ཡིད་རངས་ཡིད་ལ་བྱེད་པའི་དགེ་བ་ཡིན་ཏེ། རང་གཞན་གྱི་དགེ་རྩ་ལ་བདེན་གཉིས་དང་མི་འགལ་བར་དགའ་བ་བསྒོམ་པའི་བྱང་འཕགས་ཀྱི་ལམ་ཡིན་པའི་ཕྱིར། བསྡུས་པའི་དོན་ནི་སོགས་ལ། སྒོམ་ལམ་མོས་པ་ཆོས་ཅན། བསོད་ནམས་རྒྱ་ཆེན་པོ་སྔར་མེད་གསར་དུ་མངོན་པར་འདུ་བྱེད་དེ། ཤེར་ཕྱིན་ལ་དམིགས་པའི་སྒོ་གསུམ་གྱི་དགེ་བ་བསྐྱེད་པའི་ཕྱིར། སྒོམ་ལམ་བསྔོ་བ་ཆོས་ཅན། དགེ་རྩ་བྱང་ཆུབ་དུ་བསྒྱུར་བར་བྱེད་དེ། དེ་བྱང་ཆུབ་དུ་བསྔོ་བར་བྱེད་པའི་ཕྱིར། སྒོམ་ལམ་རྗེས་སུ་ཡིད་རངས་ཆོས་ཅན། གཞན་གྱི་དགེ་རྩ་དང་མཉམ་པའི་དགེ་བ་འཐོབ་སྟེ། གཞན་རྒྱུད་ཀྱི་དགེ་བ་ལ་རང་གིས་བྱས་པ་དང་འདྲ་བའི་དགའ་བ་སྒོམ་པའི་བྱང་འཕགས་ཀྱི་ཐབས་མཁས་ཡིན་པའི་ཕྱིར། ཟག་པ་དང་བཅས་པའི་ཞེས་སོགས་ལ། ཟག་མེད་སྒོམ་ལམ་ཆོས་ཅན། དབྱེ་ན་གཉིས་ཡོད་དེ། མངོན་པར་གྲུབ་པ་དང་། རྣམ་དག་སྒོམ་ལམ་གཉིས་སུ་ཡོད་པའི་ཕྱིར། དེའི་ངོ་བོ་ཉིད་སོགས་ལ། ཟག་མེད་སྒོམ་ལམ་ཆོས་ཅན། མངོན་པར་སྒྲུབ་པའི་སྒོམ་ལམ་གི་ངོ་བོ་ཡིན་ཏེ། གཟུགས་སོགས་ཀྱི་གནས་ལུགས་ཕྱིན་ཅི་མ་ལོག་པར་མཐོང་བའི་སྒོ་ནས་སྒོམ་སྤང་གི་དངོས་གཉེན་བྱེད་པའི་ཕྱིར། ཕར་ཕྱིན་གཞན་ལྔ་ལས་མཆོག་དུ་གྱུར་པ་ཡིན་ཏེ། ཁྱོད་དང་བྲལ་བའི་སྒོམ་ལམ་གྱིས་བསྡུས་པའི་ཕར་ཕྱིན་གཞན་ལྔས་རྣམ་མཁྱེན་མི་ཐོབ་པའི་ཕྱིར། ཡུལ་ཀུན་ལ་མཐའ་གང་དུའང་རྣམ་པར་མི་རྟོག་པ་ཡིན་ཏེ་ཆོས་ཐམས་ཅད་སྐྱེ་བ་མེད་པར་མངོན་སུམ་དུ་རྟོགས་པའི་ཕྱིར། རང་དང་འདྲ་བའི་ཤེར་ཕྱིན་རྣལ་འབྱོར་པའི་རྒྱུད་ལ་འཇོག་པར་བྱེད་དེ། ཆོས་ཐམས་ཅད་མི་དམིགས་པར་རྟོགས་པའི་ཡེ་ཤེས་རྣལ་འབྱོར་པའི་རྒྱུད་ལ་བསྐྱེད་པར་བྱེད་པའི་ཕྱིར། དོན་ཆེན་པོ་ཅན་ཡིན་ཏེ། སངས་རྒྱས་ཐོབ་བྱེད་ཡིན་པའི་ཕྱིར། སངས་རྒྱས་རྟེན་སོགས་ནས་རྒྱུའི་བར་ལ། སངས་རྒྱས་མཉེས་པར་བྱེད་པ་ཆོས་ཅན། རྣམ་དག་སྒོམ་ལམ་སྐྱེ་བའི་རྒྱུ་ཡིན་ཏེ། དེའི་རྐྱེན་ཡིན་པའི་ཕྱིར། གཞན་གཉིས་ལའང་དེ་བཞིན་དུ་སྦྱར་རོ། །ཆོས་ཀྱིས་ཕོངས་པ་སོགས་ལ། བདུད་ཀྱིས་བར་ཆད་བྱས་པ་ཆོས་ཅན། རྣམ་དག་སྒོམ་ལམ་མི་སྐྱེ་བའི་རྒྱུ་ཡིན་ཏེ། དེ་སྐྱེ་བའི་འགལ་རྐྱེན་ཡིན་པའི་ཕྱིར། གཞན་བཞི་ལའང་དེ་བཞིན་དུ་སྦྱར་རོ། །
འབྲས་བུ་དག་པ་སོགས་ལ། དགེ་སྦྱོང་གི་ཚུལ་གྱི་འབྲས་བུ་བཞི་ཆོས་ཅན། ཁྱོད་རང་གི་མི་མཐུན་ཕྱོགས་ཀྱིས་དག་པ་ན་རང་གི་ཡུལ་གཟུགས་སོགས་ཀྱང་དེའི་དག་པ་ཡིན་ཏེ། ཁྱོད་ཀྱི་རྣམ་དག་དང་གཟུགས་སོགས་ཀྱི་རྣམ་དག་གཉིས་རང་དང་སྤྱིའི་མཚན་ཉིད་ཀྱི་སྒོ་ནས་ཐ་དད་དུ་བརྗོད་དུ་མེད་པའི་ཕྱིར། འདོད་ཆགས་ལ་སོགས་པའི་ཞེས་པ་ལ། ཉན་ཐོས་དགྲ་བཅོམ་པའི་སྤངས་པ་ཆོས་ཅན། ཉན་ཐོས་ཀྱི་རྣམ་དག་ཡིན་ཏེ། ཆགས་སོགས་ཉོན་མོངས་པའི་སྒྲིབ་པ་ཙམ་སྤངས་པས་རབ་ཏུ་ཕྱེ་བའི་རྣམ་གྲོལ་ཡིན་པའི་ཕྱིར། དེ་དང་སོགས་ལ། བསེ་རུ་ལྟ་བུའི་རང་རྒྱལ་གྱི་སྤངས་པ་ཆོས་ཅན། རང་རྒྱལ་གྱི་རྣམ་དག་ཡིན་ཏེ། ཉོན་སྒྲིབ་དང་ཤེས་སྒྲིབ་གཟུང་རྟོག་ཙམ་སྤངས་པས་རབ་ཏུ་ཕྱེ་བའི་རྣམ་གྲོལ་ཡིན་པའི་ཕྱིར། ཐེག་པ་གསུམ་གྱི་སོགས་ལ། ས་བཅུ་པའི་སྤངས་པ་ཆོས་ཅན། བྱང་སེམས་ཀྱི་རྣམ་དག་ཡིན་ཏེ། ཐེག་པ་གསུམ་གྱི་ལམ་གྱི་སྒྲིབ་པ་སྤངས་པས་རབ་ཏུ་ཕྱེ་བའི་རྣམ་གྲོལ་ཡིན་པའི་ཕྱིར། ཉོན་མོངས་པ་དང་ཞེས་སོགས་ལ། ཆོས་དབྱིངས་དང་ཤིན་ཏུ་རྣམ་དག་ཆོས་ཅན། རྫོགས་པའི་སངས་རྒྱས་ཀྱི་རྣམ་དག་ཡིན་ཏེ། སྒྲིབ་གཉིས་བག་ཆགས་དང་བཅས་པ་རྣམས་རྣམ་པ་ཐམས་ཅད་དུ་སྤངས་པའི་རྣམ་གྲོལ་ཡིན་པའི་ཕྱིར། འདོད་པའི་ཁམས་སོགས་ནས་གཅིག་ཤོས་ཀྱི་བར་ལ། སངས་རྒྱས་ཀྱི་རྣམ་དག་ཆོས་ཅན། རྣམ་དག་ཤིན་ཏུ་བ་ཡིན་ཏེ། ཁྱོད་ཀྱི་རྒྱུར་གྱུར་པའི་འདོད་པ་ལ་སོགས་པའི་ས་དགུ་ལ་བརྟེན་པའི་བྱང་སེམས་ཀྱི་སྒོམ་ལམ་ཆུང་འབྲིང་དགུ་པོ་དེ་སྒྲིབ་གཉིས་བག་ཆགས་དང་བཅས་པ་རྣམ་པར་དག་པའི་རྒྱུ་ཡིན་པའི་ཕྱིར། ཉན་ཐོས་ཀྱི་རྣམ་དག་ཆོས་ཅན། རྣམ་དག་ཤིན་ཏུ་བ་ཡིན་ཏེ། ཁྱོད་ཀྱི་རྒྱུར་གྱུར་པའི་ཉན་ཐོས་ཀྱི་སྒོམ་ལམ་ཆུང་འབྲིང་དགུ་པོ་དེ། འདོད་པ་སོགས་དགུའི་ཉོན་སྒྲིབ་ཙམ་རྣམ་པར་དག་པའི་རྒྱུ་ཡིན་པའི་ཕྱིར། གཉེན་པོ་ནས་སྒོ་ནས་ཀྱི་བར་ལ། ཤེས་བྱ་ཆོས་ཅན། གཉེན་པོ་ཆུང་རིམ་ནས་སྐྱེ་ཞིང་སྤང་བྱ་ཆེ་རིམ་ནས་འགག་པ་མི་འཐད་པ་མ་ཡིན་ཏེ། དེ་ལྟར་འཇིག་རྟེན་ན་མཐོང་ཞིང་གྲགས་པའི་ཕྱིར། དེར་ཐལ། གོས་ལ་ཆགས་པའི་དྲི་མ་རགས་པ་འབད་པ་ཆུང་ངུས་སེལ་ཞིང་ཕྲ་མོ་སེལ་བ་ལ་གཙོ་བླག་མཁན་ཆེ་ཐང་དུ་འབད་པ་མཐོང་བའི་ཕྱིར། སྒོམ་པའི་ལམ་སོགས་ལ། སྒོམ་ལམ་ཤིན་ཏུ་བ་ཆོས་ཅན། ཁྱོད་ཀྱི་འབྲས་བུ་སངས་རྒྱས་ཀྱི་རྣམ་དག་ཤིན་ཏུ་བ་ཡིན་ཏེ། ཁམས་གསུམ་གྱི་སྒྲིབ་པ་མཐའ་དག་གི་གཉེན་པོ་ཡིན་པའི་ཕྱིར། དེར་ཐལ། ཁམས་གསུམ་གྱི་རྣམ་པ་ཅན་གྱི་ཤེས་བྱ་དང་ཤེས་པ་མཐའ་དག་རང་བཞིན་མེད་པར་མཉམ་པ་ཉིད་དུ་རྟོགས་པའི་སློབ་ལམ་ཡིན་པའི་ཕྱིར། སྐབས་གཉིས་པའི་ངག་དོན་ནོ།། །།