ཟབ་ཆོས་རིག་འཛིན་བདེ་འདུས་ཀྱི་ལམ་ཁྲིད་སྐལ་ལྡན་འཇུག་ངོགས།

༄༅། །ཟབ་ཆོས་རིག་འཛིན་བདེ་འདུས་ཀྱི་ལམ་ཁྲིད་སྐལ་ལྡན་འཇུག་ངོགས་ཞེས་བྱ་བ་བཞུགས་སོ། །བཅོམ་ལྡན་འདས་སྐུ་བཞི་ཡེ་ཤེས་ལྔ་ཡི་བདག་ཉེད་ཆེན་པོ་ཞིང་འདིའི་རྣམ་འདྲེན་བཞི་བ་མཉམ་མེད་སྟོན་པ་ཤཱཀྱ་སེང་གེའི་ཞབས་ཀྱི་རྡུལ་དྲི་མ་དང་བྲལ་བ་ལ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་པར་མཛད་དུ་གསོལ། གང་གི་རང་བཞིན་འོད་གསལ་ཆོས་སྐུ་ལས། །མ་གཡོས་བཞིན་ཏུ་མཆོག་དམན་གདུལ་བྱའི་ངོར། །ལོངས་སྤྱོད་ཆེན་པོ་ཉིད་དང་སྤྲུལ་པའི་སྐུ། །སོ་སོར་སྟོན་མཛད་ཐུབ་དབང་མཆོག་དེར་འདུད། །འདིར་ནི་ཐུབ་པའི་བསྟན་ལ་དད་ཕྱིར་དང་། །སྐལ་ལྡན་དམ་པས་བསྐུལ་བ་དོན་ཡོད་ཕྱིར། །ཟབ་མོ་གཏེར་ལས་བྱུང་བའི་མན་ངག་གི །ལག་ཁྲིད་ཅུང་ཟད་ཡེ་གེའི་ལམ་དུ་འགོད། །དེ་ཡང་འདིར་བདག་ཅག་གི་སྟོན་པ་ཐབས་ལ་མཁས་ཤིང་ཐུགས་རྗེ་ཆེན་པོ་དང་ལྡན་པ་གང་ཞིག་ཉིད་ཀྱི་རང་བཞིན་སྤྲོས་པ་ཐམས་ཅད་དང་བྲལ་བའི་ངོ་བོ་ཉིད་སྐུ་དང་སྟོབས་སོགས་ཡོན་ཏན་རྒྱ་མཚོའི་བདག་ཉིད་ཡེ་ཤེས་ཆོས་ཀྱི་སྐུ་ཟུང་དུ་འཇུག་པ་རྒྱལ་བ་ཐམས་ཅད་ཀྱི་སྤྱི་གཟུགས་ཀུན་ཏུ་བཟང་པོའི་ངང་ལས་མ་གཡོས་བཞིན་དུ་རྒྱུད་ཡོངས་སུ་དག་པའི་གདུལ་བྱ་ས་ཆེན་པོ་ལ་གནས་པ་རྣམས་ཀྱི་སྣང་ངོར་ལོངས་སྤྱོད་རྫོགས་པའི་སྐུ་རྣམ་པར་སྣང་མཛད་གངས་ཆེན་མཚོ་ལ་སོགས་པའི་རྣམ་པར་བསྟན་ནས་ཉིད་ཀྱི་གསང་བ་ཆེན་པོ་རྣམས་ཞལ་དང་ལྗགས་ཀྱི་བྱེད་རྩོལ་ལ་མ་ལྟོས་པར་སྐུའི་བརྡ་ཐབས་ཙམ་གྱིས་འཁོར་རྣམས་ལ་གོ་བར་མཛད་པ་ཉིད་དང་། གདུལ་བྱ་ཐུན་མོང་བ་རྣམས་ཀྱི་ངོར་མཚན་དཔེས་སྤྲས་པའི་མཆོག་གི་སྤྲུལ་པའི་སྐུ་མཛད་པ་ཡོངས་སུ་རྫོགས་པའི་བདག་ཉིད་ཅན་དང་། སྐྱེ་བ་སྣ་ཚོགས་པར་སྤྲུལ་པ་ལ་སོགས་པར་སྣང་བར་མཛད་ནས་ཐུན་མོང་གི་ཐེག་པ་བསམ་གྱིས་མི་ཁྱབ་པ་ཞིག་དངོས་སམ་བརྒྱུད་ནས་གསུངས་པར་མཛད་པ་ལས། འདིར་ནི་ཐུབ་དབང་ཉིད་མི་མཇེད་ཀྱི་ཞིང་འདིར་ཡང་རྡོ་རྗེའི་ཐེག་པ་སྤེལ་བར་བྱ་བའི་ཕྱིར། རྡོ་རྗེ་འཆང་ཆེན་པོའི་རྒྱལ་ཚབ་ཨོ་རྒྱན་རྡོ་རྗེ་འཆང་ཞེས་བྱ་བ་ཞིག་ཏུ་སྤྲུལ་ཏེ་ལྷ་དང་། མི་དང་། གནོན་སྦྱིན་དང་། ཀླུ་ལ་སོགས་པ་སོ་སོའི་བསམ་པ་དང་མཐུན་པར། རེ་འགའ་ནི་དཀྱིལ་འཁོར་གྱི་གཙོ་བོ་དང་། རེ་འགའ་ནི་གྲུབ་པའི་རིག་འཛིན་དང་། རེ་འགའ་ནི་གྲུབ་པའི་རྣལ་འབྱོར་མ་ལ་སོགས་པའི་རྣམ་པར་སྣང་བའི་ཆོ་འཕྲུལ་ཆེན་པོ་འགྱེད་བཞིན་དུ་ཉིད་ཀྱིས་འོག་མིན་ལ་སོགས་པར་གསུངས་པའི་ཏནྟྲ་ཆེན་པོ་དཔག་ཏུ་མེད་པ་ཞིག་སླར་ཡང་སྟོན་པར་མཛད་པ་སྟེ་ཚུལ་འདི་ནི་རྡོ་རྗེ་ཡང་རྩེའི་རྒྱུད་ལ་སོགས་གསང་བའི་ཏནྟྲ་དུ་མ་ལས་གསལ་བར་བསྟན་ཏོ། །དེས་ན་གཞུང་དེ་དག་ལས་བྱེ་བྲག་ཏུ་གྱུར་པ་འདི་ནི། འཇམ་པའི་དབྱངས་ཀྱི་སྤྲུལ་པ་ཆོས་སྐྱོང་བའི་རྒྱལ་པོ་ཁྲི་སྲོང་ལྡེའུ་བཙན་ཞེས་བྱ་བ་དེ་ཉིད་ཀྱིས་གངས་རིའི་ལྗོངས་འདིར་ཨོ་རྒྱན་རིན་པོ་ཆེ་དེ་ཉིད་སྤྱན་དྲངས་ནས་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལས་ཁང་ལ་སོགས་པ་བཞེངས་ཏེ། དམ་པའི་ཆོས་དཔག་ཏུ་མེད་པ་སྒྱུར་བར་མཛད་པའི་སྐབས་ཤིག་ན། རྒྱལ་པོ་ཉིད་ཀྱིས་གུ་རུ་རིན་པོ་ཆེ་ལ་གསང་བའི་རྒྱུད་སྡེ་རྣམས་ལས་མན་ངག་ཁོལ་དུ་འབྱིན་པར་གསོལ་བ་བཏབས་བཞིན། གུ་རུས་ཞལ་གྱིས་བཞེས་ཏེ། རྡོ་རྗེ་ཐེག་པའི་རྒྱུད་དུ་གབ་པའི་གདམས་པ་ཇི་སྙེད་ཅིག་མངོན་དུ་ཕྱུང་བར་མཛད་དེ། སླར་ཡང་སྙིགས་མའི་འགྲོ་བ་སྐལ་བ་དང་ལྡན་པ་རྣམས་ཀྱིས་དོན་དུ་གཏེར་གནས་སོ་སོར་སྦ་བར་མཛད་ནས་གཏེར་བདག་རྣམས་ལ་གཉེར་གཏད་དེ་མ་འོངས་པའི་གང་ཟག་ལས་སྐལ་དང་ལྡན་པ་རྣམས་ལ་སྨོན་ལམ་གཏད་རྒྱ་དང་བཅས་པ་མཛད་པའི་ནང་གསེས་མཆིམས་ཕུ་བློན་པོ་མགུལ་དུ་སྦས་པའི་སྡེ་ཚན་ཟབ་ཆོས་རིག་འཛིན་བདེ་འདུས་སུ་གྲགས་པ་ཉིད་ཡིན་ནོ། །དེ་ལྟ་བུའི་གདམས་པ་དེ་ཡང་བཅོམ་ལྡན་འདས་ཉིད་ཀྱི་བཀའ་བསོད་ནམས་ཐམས་ཅད་བསྡུས་པའི་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར། རི་དང་། རི་སུལ་དང་། ཤིང་དག་གི་ནང་དུ་བཅུག་པ་དག་ཡོད་དོ། །གཟུངས་དང་ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཞེས་གསུངས་པ་ལྟར་ཕྱིས་སུ་དུས་རྟགས་རྟེན་འབྲེལ་མངོན་དུ་གྱུར་པ་ན་གུ་རུ་རིན་པོ་ཆེའི་ལུང་གིས་བསྐུལ་ཏེ། གཏེར་གནས་དེ་ཉིད་ནས་སྤྲུལ་པའི་གཏེར་སྟོན་ཟླ་བའི་འོད་ཟེར་རམ་ཏིང་འཛིན་རྒྱལ་པོར་འབོད་པས་སྤྱན་དྲངས་ཏེ་སྤེལ་བར་མཛད་པ་ཡིན་ནོ། །འདི་ནི་གཞུང་འདིས་མཚོན་པའི་ཟབ་ཆོས་གཏེར་མ་རྣམས་ཇི་ལྟར་འབྱུང་བའི་ཚུལ་བཅོམ་ལྡན་འདས་ཀྱིས་ལུང་བསྟན་པ་དཔང་པོར་བགྱིས་ཏེ་བརྗོད་པ་སྟེ། དེས་ན་གཏེར་མ་རྣམས་ལ་ཡང་དག་དང་ལྟར་སྣང་གི་རྣམ་དབྱེ་མི་བགྱིད་པར་སྤྱིར་བཏང་དུ་ས་འོག་ནས་བྱུང་བའི་ཆོས་དང་། རྡོ་འོག་ནས་བྱུང་བའི་ཆོས་ཞེས་ཡང་དག་པ་མ་ཡིན་པར་འཛིན་ཅིང་ཆོས་སྤང་གི་ལས་གསོགས་པ་རྣམས་རེ་ཞིག་བག་ཡངས་སུ་སྡོད་ཅིག འདིར་སྒྲུབ་བྱེད་ལུང་རིགས་དང་གང་ཟག་གི་དཔང་པོ་གཞན་ཡང་དཔག་ཏུ་མེད་པ་ཡོད་མོད་དེ་སྐབས་འདིར་དེ་ཉིད་བརྗོད་བྱའི་གཙོ་བོ་མ་ཡིན་པའི་ཕྱིར་དེ་ཙམ་མོ། །ད་ནི་དཀྱུས་ཉིད་ལ་འཇུག་པར་བྱ་སྟེ། དེ་ཡང་སྟོན་པ་བཅོམ་ལྡན་འདས་ཉིད་ཀྱི་གསུང་ནི་དེ་ལྟར་བསམ་གྱིས་མི་ཁྱབ་པ་ཞིག་ཡིན་མོད་དེ། འདིར་ནི་རང་རེ་གངས་ཅན་པ་རྣམས་ཀྱི་དབང་དུ་བྱས་པའི་རྒྱལ་བསྟན་སྔ་འགྱུར་དུ་གྲགས་པ་ལ་ནང་གསེས་སྡེ་སྣོད་གསུམ་དང་རྒྱུད་སྡེ་དྲུག་གི་རྣམ་པར་གཞག་པ་ཉིད། གང་ཟག་གཅིག་འཚང་རྒྱ་བའི་ལམ་གྱི་ཆ་རྐྱེན་དུ་དྲིལ་ནས་ཁྲིད་ཀྱི་ལུགས་སུ་འདེབས་པ་སྟེ་འདི་ནི་གཞུང་འདིར་ཡང་ངེས་པར་བྱེད་དགོས་པ་ཁོ་ནའོ། །དེ་ལྟར་ན་ཐོག་མར་དགེ་བ་རྒྱལ་བསྟན་རིན་པོ་ཆེའི་གཞུང་ངམ་ལུས་རྣམ་པར་བཞག་པ་ལྟ་བུ་རྒྱུ་མཚན་ཉིད་ཀྱི་ཐེག་པའི་ཁྲིད་དང་། བར་དུ་དགེ་བ་གཞུང་དེ་ཉིད་ཀྱི་མན་ངག་གསང་ཆེན་རྡོ་རྗེའི་ཐེག་པ་ཐུན་མོང་གི་ཁྲིད་དང་། ཐ་མར་དགེ་བ་མན་ངག་དེ་ཉིད་ཀྱིའང་སྦས་དོན་དུ་གྱུར་པ་འོད་གསལ་རྫོགས་པ་ཆེན་པོའི་ཁྲིད་དེ་གསུམ་ལས། དང་པོ་ནི་རྒྱུ་མཚན་ཉིད་ཀྱི་ཐེག་པའི་མཚན་གཞི་སྡེ་སྣོད་རིན་པོ་ཆེ་རྣམ་པ་གསུམ་ཡིན་ལ། དེའི་བརྗོད་དོན་ཡང་ལྷག་པའི་བསླབ་པ་གསུམ་དུ་འདུ་བ་ཡིན་ཏེ། དེ་ཡང་བྱང་ཆུབ་ཀྱི་སེམས་རིན་པོ་ཆེ་གཅིག་པུ་བསྒོམ་པའི་སྦྱོར་དངོས་རྗེས་གསུམ་ཙམ་ལས་ཐ་དད་པ་མེད་དོ། །དེས་ན་འདིར་དེ་ཉིད་འཆད་པ་ལ། སྤྱིར་བྱང་ཆུབ་ཀྱི་སེམས་ཙམ་ལ། ཉན་ཐོས་ཀྱི་བྱང་ཆུབ་དང་། རང་སངས་རྒྱས་ཀྱི་བྱང་ཆུབ་དང་། རྫོགས་པའི་བྱང་ཆུབ་སྟེ་གསུམ་པོ་སོ་སོའི་རྗེས་སུ་སེམས་བསྐྱེད་པའི་ལྡོག་པས་དབྱེ་བ་གསུམ་དུ་འགྱུར་ཞིང་། དེ་གང་གི་སྐབས་སུའང་བྱང་ཆུབ་ནི་རང་རང་གི་ཐོབ་བྱའི་འབྲས་བུ་མཐར་ཐུག་པ་དེ་ཡིན་ལ། དེ་དང་རྗེས་སུ་མཐུན་པའི་སེམས་ནི་དེ་དང་དེ་མངོན་དུ་བྱེད་འདོད་ཀྱི་བསམ་པའོ། །རྒྱུ་མཚན་དེའི་ཕྱིར་དེ་གསུམ་གང་ལའང་རང་རང་དང་མཐུན་པའི་རྒྱུ་འབྲས་ཀྱི་ཟླས་དབྱེ་བའི་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་གཉིས་སུ་འགྱུར་ནའང་། འདིར་བསྒྲུབ་བར་བྱ་བ་ནི་བྱང་ཆུབ་མཆོག་གི་སེམས་སྟེ་རྫོགས་པའི་བྱང་ཆུབ་ཉིད་ཡིན་ནོ། །དེ་མངོན་དུ་བྱེད་འདོད་ཀྱི་བསམ་པ་ཡང་ཉན་རང་ལྟར་རང་འདོད་ཡིད་བྱེད་ཙམ་གྱིས་མ་ཡིན་པར། མ་སེམས་ཅན་ཐམས་ཅད་ཀྱི་དོན་དུ་གོ་འཕང་དེ་སྒྲུབ་འདོད་ཀྱི་བསམ་པ་ཐུན་མོང་མ་ཡིན་པ་དགོས་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཞེས་གསུངས་པའི་ཕྱིར། འོ་ན་བྱང་ཆུབ་ཀྱི་སེམས་དང་། སེམས་བསྐྱེད་གཉིས་ལ་ཁྱད་པར་ཅི་ཡོད་ཅེ་ན་བསྐྱེད་བྱ་དང་། དེ་བསྐྱེད་པའི་བྱ་བ་ལ་ཞུགས་པ་གཉིས་ཀྱི་ཁྱད་པར་ཏེ། དཔེར་ན་ལྗོན་ཤིང་དང་། དེ་ལ་ཆུ་འདྲེན་པ་གཉིས་ཀྱི་དཔེའི་སྒོ་ནས་ཤེས་པར་བྱའོ། །འོན་ཀྱང་སེམས་བསྐྱེད་དེ་ཀུན་རྫོབ་བྱང་ཆུབ་སེམས་ཀྱི་བསྐྱེད་རྒྱུ་དང་། དོན་དམ་བྱང་ཆུབ་སེམས་ཀྱི་གསལ་རྒྱུར་ཤེས་དགོས་ཏེ། དེའི་ཕྱིར་ཀུན་རྫོབ་བྱང་ཆུབ་ཀྱི་སེམས་དེ་དོན་དམ་པའི་བྱང་ཆུབ་སེམས་ཀྱི་གསལ་རྒྱུའི་བྱེ་བྲག་ཉེ་བའི་རྒྱུ་དང་། སེམས་བསྐྱེད་པའི་སེམས་བྱུང་དེ་དག་དེའི་ཡང་རིང་རྒྱུར་ཤེས་དགོས་སོ། །འདི་དག་ལ་བདེན་གཉིས་ཀྱི་འཇོག་ཚུལ་དང་། སེམས་གཙོ་འཁོར་གྱི་བསྐྱེད་ལུགས་སོགས་གྲུབ་མཐའ་སོ་སོའི་འདོད་ལུགས་གཞན་ཡང་ཡོད་མོད་དེ། འདིར་རེ་ཞིག་དེ་ཙམ་མོ། །དེ་ལྟར་ན་བསྐྱེད་རྒྱུ་དང་གསལ་རྒྱུ་རྣམ་དབྱེ་མ་བརྗོད་པར་སྤྱི་ཙམ་དུ་སྨོས་ན། དོན་དམ་བྱང་ཆུབ་སེམས་ཀྱི་རྒྱུ་ཀུན་རྫོབ་བྱང་ཆུབ་ཀྱི་སེམས་དང་། དེའི་རྒྱུ་སེམས་བསྐྱེད་པའི་བསམ་སྦྱོར་ཏེ། དེ་ཡང་བསམ་པ་དེ་ལྡན་གྱིས། སྦྱོར་བ་བྱང་ཆུབ་ཀྱི་སེམས་དང་ལྡན་པའི་དགེ་བའི་བཤེས་གཉེན་ལས་བྱང་ཆུབ་སེམས་དཔའི་བསླབ་སྡོམ་བླངས་ཏེ། དེའི་བསླབ་པ་ལའང་ཁ་ཙམ་མ་ཡིན་པར་སྙིང་ཐག་པ་ནས་སློབ་པ་ཞིག་དགོས་པའི་ཕྱིར། བསམ་པ་དེ་སྐྱེ་བའི་ཆེད་དུ་མར་ཤེས་དྲིན་དྲན་ལ་སོགས་པས་མདུན་བསུས་པའི་མ་སེམས་ཅན་ཐམས་ཅད་བདེ་བ་ལ་སྦྱོར་འདོད་ཀྱི་བྱམས་པ། སྡུག་བསྔལ་དང་འབྲལ་འདོད་ཀྱི་སྙིང་རྗེ། སྡུག་བསྔལ་མེད་པའི་བདེ་དགའ་དང་མ་བྲལ་ན་ཨང་སྙམ་པའི་དགའ་བ་དང་། ཉེ་རིང་ཆགས་སྡང་མེད་པའི་གཏང་སྙོམས་སྟེ་ཚད་མེད་པ་རྣམ་པ་བཞི་འབད་པས་བསྒོམས་ཏེ་བློ་སྦྱོང་བ་དང་། སྦྱོར་བ་དེ་ལ་འཇུག་པའི་ཕྱིར་ཚོགས་གསོགས་པའི་ཐབས་ཀྱི་སྒོ་བསམ་གྱིས་མི་ཁྱབ་པ་རྣམས་ཡན་ལག་བདུན་དུ་བསྡུས་ཏེ། དེ་ཉིད་སྔོན་དུ་འགྲོ་བ་ཅན་གྱི་སྐྱབས་འགྲོ་མཚན་ཉིད་པས་གཞི་འཆའ་བ་དང་བཅས་སྲོལ་གཉིས་གང་རུང་གི་བསླབ་སྡོམ་ལེན་པའི་ཆོ་ག་ལ་བརྟེན་ནས་ལེན་དགོས་སོ། །དེས་ན་སྐྱབས་འགྲོ་མཚན་ཉིད་པ་དེ་རྒྱུ་གང་ལས་སྐྱེ་ན། རྒྱུ་གཉིས་སུ་འཆད་པའང་ཡོད་དེ། འདི་ལྟར་འཁོར་བའི་ཉེས་དམིགས་མཐོང་བའི་སྐྱོ་ཤེས་དང་། དཀོན་མཆོག་གི་ཡོན་ཏན་རྗེས་སུ་དྲན་པའི་དད་པའོ། །ཡང་ཐེག་ཆེན་གྱི་སྐྱབས་འགྲོ་ཐུན་མོང་མ་ཡིན་པའི་རྒྱུ་དེའི་སྟེང་དུ་སྙིང་རྗེ་བསྣན་པས་རྒྱུ་གསུམ་དུ་བཞག་པའང་ཡོད་མོད་དེ། འདིར་རེ་ཞིག་སྐྱབས་འགྲོའི་རྒྱུ་ནི་ངེས་འབྱུང་གི་དད་པ་རྣམ་པར་དག་པའོ་ཞེས་འཆད། དང་པོ་ལ་སྤྱིར་དབྱེ་བ་མང་རུང་། འདིར་སྐྱབས་འགྲོའི་རྒྱུ་རུ་བཤད་པའི་ངེས་འབྱུང་གི་དད་པ་དེ་ནི་རྒྱུ་བཞི་ལས་སྐྱེ་སྟེ། འདི་ལྟར་བླ་མ་དགེ་བའི་བཤེས་གཉེན་བསྟེན་པ་དང་། གྲོགས་དགེ་བའི་གྲོགས་པོ་དང་འགྲོགས་པ་དང་། འཁོར་བ་ལ་སྙིང་པོ་མེད་པའི་ཉེས་དམིགས་མཐོང་བ་དང་། དཀོན་མཆོག་གི་ཡོན་ཏན་རྗེས་སུ་དྲན་པ་སྟེ་བཞིའོ། །དེས་ན་དེ་ཡན་ཆད་ཀྱིས་སྔོན་འགྲོའམ་ཐོག་མར་དགེ་བའི་ཁྲིད་སྤྱིའི་གོ་རིམ་ངེས་པར་གཏན་ལ་ཕབས་ནས་ད་ནི་ཡན་ལག་གི་དོན་ལ་འཇུག་པར་བྱ་སྟེ། དེ་ཡང་རྣམ་པར་གྲོལ་པ་དོན་དུ་གཉེར་བ་ཙམ་དུ་མ་ཟད། འཇིག་རྟེན་ན་ནོར་རྫས་ཕྲན་བུ་དོན་དུ་གཉེར་བའི་མགྲོན་པོ་ལམ་རྒྱུས་མེད་པ་དག་རང་འདོད་ཀྱི་ལམ་དུ་འཇུག་པ་ནའང་། ཐོག་མར་ས་ལམ་རྒྱུས་ཡོད་ཀྱི་མི་ལ་མ་བརྟེན་པར་རང་སྟོབས་ཀྱི་ས་ལམ་མ་ནོར་བ་ཉིད་བགྲོད་པར་རྔོ་མི་ཐོགས་ན། རང་ཅག་ཚེ་རབས་ཀུན་ཏུ་ཕྱིན་ཅི་ལོག་གི་གནས་མལ་དུ་ཉལ་བ་ལས། ཡང་དག་པའི་ལམ་ལ་གོམ་པའི་འདེགས་འཇོག་གམ། ཐོས་བསམ་སྒོམ་པའི་ཤེས་རབ་ཀྱི་མིག་ལྤགས་གདེངས་བ་ཙམ་ཡང་བྱེད་མ་མྱོང་བ་དག་བཤེས་གཉེན་ལ་མ་བརྟེན་པར་ཇི་ལྟར་རྣམ་པ་ཐམས་ཅད་མཁྱེན་པའི་གོ་འཕང་བདེ་བླག་ཏུ་བགྲོད་པར་འགྱུར། དེའི་ཕྱིར་ལམ་ཀུན་གྱི་རྩ་བའམ། ཐོག་མ་ཉིད་དུ་ནི་དགེ་བའི་བཤེས་གཉེན་དང་། དགེ་བའི་གྲོགས་པོར་བསྟེན་པའི་བསམ་སྦྱོར་ཁོ་ན་ལ་འཇུག་དགོས་ཏེ། དེ་སྐད་དུའང་། མདོ་ལས་ཀུན་དགའ་བོས་བཅོམ་ལྡན་འདས་ལ་གསོལ་བ། བཅོམ་ལྡན་འདས་དགེ་བའི་བཤེས་གཉེན་དང་། དགེ་བའི་གྲོགས་པོ་ནི་ཚངས་པར་སྤྱོད་པ་ཕྱེད་ལགས་སོ། །བཅོམ་ལྡན་འདས་ཀྱིས་བཀའ་སྩལ་བ། ཀུན་དགའ་བོ་ཁྱོད་དེ་ལྟར་དགེ་བའི་བཤེས་གཉེན་དང་དགེ་བའི་གྲོགས་པོ་ནི་ཚངས་པར་སྤྱོད་པ་ཕྱེད་ལགས་སོ་ཞེས་མ་སྨྲ་ཞིག དེ་ཅིའི་ཕྱིར་ན་དགེ་བའི་བཤེས་གཉེན་དང་དགེ་བའི་གྲོགས་པོ་ནི་ཚངས་པར་སྤྱོད་པ་ཡོངས་སུ་རྫོགས་པ་ཡིན་པའི་ཕྱིར་ཞེས་གསུངས་པ་ལྟར་ངེས་པའི་ཕྱིར་རོ། །དེས་ན་འདིར་དགེ་བའི་བཤེས་གཉེན་དང་དགེ་བའི་གྲོགས་པོ་བསྟེན་འདོད་ཀྱི་བསམ་པའི་ཁྱད་པར་ལ་ཀུན་སློང་དང་། སྦྱོར་བ་ལ་ཀུན་སྤྱོད་ཅེས་གྲགས་པའི་དོན་མདོ་ཙམ་བརྗོད་ན། སྤྱིར་ཀུན་སློང་ཞེས་བྱ་བ་ནི་བློ་བག་ཉལ་དུ་གནས་པ་ལས། དགེ་སྡིག་གང་རུང་བསྒྲུབ་པའི་སྦྱོར་བ་ཀུན་ནས་སློང་བའི་སེམས་བྱུང་ཐོག་མ་དེ་ཡིན་ལ། དེ་ལ་ཡང་དགེ་བ་དང་མི་དགེ་བའི་ཀུན་སློང་གཉིས་ལས། མི་དགེ་བའི་ཀུན་སློང་སེམས་བྱུང་གི་བྱེ་བྲག་དུག་གསུམ་གང་རུང་གིས་ཀུན་ནས་བསླངས་ཡོད་ཚེ་བསམ་པ་དེ་མ་བཅོས་ན་དེས་ཀུན་ནས་བསླང་བའི་སྦྱོར་བ་དེ་དག་ཀྱང་དགེ་བར་མི་འགྱུར་བས་དེ་ཉིད་དད་པ་ལ་སོགས་པའི་སེམས་བྱུང་དགེ་བར་བསྒྱུར་པ་གལ་ཆེའོ། །འདིར་དགེ་བའི་ཀུན་སློང་ལའང་རང་དོན་དང་གཞན་དོན་ལ་དམིགས་པའི་ཁྱད་པར་གྱིས་ཐེག་པ་ཆེ་ཆུང་གི་ཀུན་སློང་གཉིས་སུ་ཡོད་ཀྱང་སྔོན་སྦྱངས་ཀྱི་ལས་འཕྲོ་ཅན་ཁ་ཅིག་སྲིད་མཐའ་མ་བཀག་པ་ལས། ཐུན་མོང་དུ་དགེ་བའི་བཤེས་གཉེན་གྱི་གདམས་ངག་བསྒོམས་པ་ལ་མ་བརྟེན་པར་སོ་སོའི་སྐྱེ་བོའི་བློ་ལྷན་སྐྱེས་ལ་ཐེག་ཆེན་གྱི་ཀུན་སློང་ཐུན་མོང་མ་ཡིན་པ་སྐྱེ་བ་དཀའོ། །དེ་ལྟར་ནའང་ཐོག་མ་ནས་ཤེས་རྒྱུད་ལ་བསམ་པ་བཟང་པོའི་བག་ཆགས་བགོ་བ་ལ་དགོས་པ་མེད་པའང་མ་ཡིན་ནོ། །འདིར་དགེ་བའི་ཀུན་སློང་ཐུན་མོང་བ་དེ་ཡང་དགེ་བའི་བཤེས་དང་གྲོགས་ཀྱིས་བསྐུལ་བའམ། དཀོན་མཆོག་གི་ཡོན་ཏན་དང་འཁོར་བའི་སྐྱོན་ཉི་ཚེ་བ་རེ་མཐོང་བས་རྐྱེན་བྱས་པའི་ངེས་འབྱུང་གི་དད་པ་རྗེས་མཐུན་པ་རེ་ལས་སྐྱེ་ཡང་། དད་པ་དེ་མཚན་ཉིད་པ་ནི་དགེ་བའི་བཤེས་གཉེན་ལས་གདམས་ངག་ཞུས་ཏེ་བློ་ལྡོག་གི་ཆོས་རྣམས་བསྒོམས་པ་ལས་གདོད་སྐྱེ་བར་འགྱུར་བ་ཡིན་ནོ། །དེས་ན་དེ་ལྟ་བུའི་དད་པས་ཀུན་ནས་བསླངས་ཏེ། ཐར་བ་བསྒྲུབ་འདོད་ཀྱི་བློ་འདོད་རྒྱལ་བ་དེས་དགེ་བའི་བཤེས་གྲོགས་བསྟེན་པའི་སྦྱོར་བ་ལ་ཞུགས་ཏེ། དེས་བསླབ་པ་རྣམས་ཚུལ་བཞིན་མཉན་ན་རིམ་བཞིན་དད་པའི་ངོ་བོ་ཡང་ཇེ་བཟང་དུ་འགྲོ་ལ་བཤེས་གཉེན་བསྟེན་འདོད་ཀྱི་བློ་དང་། དེ་བསྟེན་པའི་སྦྱོར་བ་ལ་བརྩོན་པའང་ཇེ་ཆེར་སོང་ནས་མཐར་བླ་མ་དང་གྲོགས་ལ་མིག་འབྲས་ལྟར་བརྩེ་ཞིང་དེ་དག་གི་ཆེད་དུ་རང་གི་ལུས་སྲོག་འདོར་བ་ལའང་བག་མི་ཚ་བ་འབྱུང་བ་ཡིན་ནོ། །ད་ལྟར་ན་དགེ་བའི་བཤེས་གཉེན་བསྟེན་པའི་ཀུན་ཏུ་སྤྱོད་པ་ལ་སྤྱིར་དབྱེ་བ་མང་དུ་ཡོད་ཀྱང་མདོར་བསྡུ་ན་ཆོས་ཉན་པའི་ཕ་རོལ་ཏུ་ཕྱིན་པ་དྲུག་གི་ཚུལ་ལ་མ་འདུས་པ་མེད་པའི་ཕྱིར་འདིར་དེ་འཆད་པ་ལ། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། མེ་ཏོག་སྟན་སོགས་རབ་དབུལ་ཞིང་། །ས་ཕྱོགས་སྤྱོད་ལམ་སྡོམ་པ་དང་། །སྲོག་ཆགས་ཀུན་ལ་འཚེ་མི་བྱེད། །བླ་མ་ལ་ནི་གསོལ་བ་འདེབས། །མ་ཡེངས་བླ་མའི་གདམས་ངག་ཉན། །དོགས་སེལ་ཕྱིར་ན་སྐྱོན་ཚིག་འདྲི། །སྒྲོལ་མ་ཡན་ལག་དྲུག་དང་ལྡན། །ཞེས་གསུངས་པ་ལྟར་ཏེ། ས་བཅད་དྲུག་པོ་འདིས་ནི་སྔར་སྨོས་པའི་ཀུན་སློང་དེས་ཀུན་ནས་བསླང་བའི་ལུས་ངག་ཡིད་གསུམ་གྱིས་བཤེས་གཉེན་བསྟེན་ཚུལ་གྱི་ཀུན་ཏུ་སྐྱོད་པ་མཐའ་དག་བསྡུས་པ་ཡིན་ནོ། །དེ་ཡང་རིམ་པ་ལྟར་ཆོས་ཞུ་བའི་ཡོན་མེ་ཏོག་དང་མཎྜལ་གནས་མལ་དང་གདན་ཁྲི་སོགས་འབུལ་བ་ནི་ཆོས་ཉན་པའི་སྦྱིན་པ། ཆོས་འཆད་པའི་ས་ཕྱོགས་སྤྱི་དང་ཁྱད་པར་གཙུག་ལག་ཁང་ལ་སོགས་པའི་གནས་ཁང་དངོས་བྱི་དོར་ལེགས་པོར་བྱས་ནས་དྲི་བཟང་གི་ཆག་ཆག་གདབ་པ་དང་། སྐུ་གསུང་ཐུགས་ཀྱི་རྟེན་དང་མཆོད་བཤམས་སོགས་ཡིད་དུ་འོང་བར་བྱས་ནས་རང་གི་སྒོ་གསུམ་གྱི་སྤྱོད་ལམ་རྣམས་ཀྱང་མ་གུས་པ་སྤངས་ནས་གུས་པ་ཁོ་ན་ལྷུར་ལེན་དགོས་ཏེ། དེའི་ཚུལ་སྨྲོས་པ་ལ་ལུས་ངག་ཡིད་གསུམ་གྱི་ཀུན་སྤྱོད་གསུམ་ལས། དང་པོ་ལུས་ཀྱི་ཀུན་སྤྱོད་ནི། གཙོ་བོར་འཆད་པ་པོའི་དབང་དུ་བྱས་ཏེ་དམ་པའི་ཆོས་འདུལ་བ་ལས་ཆོས་སྟོན་སྡེ་ཉེར་དྲུག་བཤད་པ་རྣམས་ཀྱང་འཆད་ཡུལ་སློབ་མའི་དབང་དུ་བྱས་ན་དེས་ཆོས་ཉན་པའི་ཀུན་ཏུ་སྤྱོད་པའང་ཡིན་པའི་ཕྱིར་དེ་དག་རྣམས་དང་། གཞན་ཡང་བླ་མ་ལྔ་བཅུ་བ་ལ་སོགས་པ་ནས་བཤད་པའི་བཤེས་གཉེན་བསྟེན་ཚུལ་གྱི་ཀུན་སྤྱོད་ཐུན་མོང་བ་རྣམས་ལའང་བླང་དོར་བྱེད་དགོས་པ་ཉིད་དོ། །འདིར་དེ་དག་གི་ཞིབ་བཤད་མ་སྤྲོས་སོ། །གཉིས་པ་ངག་གི་སྒོ་ནས་ཀྱང་ཕན་ཚུན་གཏམ་སྨྲ་བ་དང་། བཞད་གད་དང་། ཀུ་ཅོ་དང་གློ་ལུ་བ་སོགས་བག་མེད་པའི་བྱུང་རྒྱལ་གྱི་སྒྲའི་གླག་ཅོར། བླ་མས་མ་གནང་བཞིན་དུ་ཤག་དང་རྩོད་པ་འགྱེད་པ་སོགས་མདོར་ན་དགོས་པ་ཁྱད་པར་ཅན་མེད་བཞིན་བླ་མའི་མདུན་དུ་འཇིག་རྟེན་པའི་ངག་གི་བརྗོད་པ་ཐམས་ཅད་སྤང་བར་བྱ་བ་ཉིད་ཡིན་ན་ཆོས་འཆད་པའི་དུས་སུ་མ་གུས་པའི་ངག་གི་བརྗོད་པ་མཐའ་དག་སྤོང་དགོས་པ་ནི་སྨྲོས་ཅི་དགོས། དེ་ལྟར་སྤངས་ནས་ངག་ཞི་དལ་གྱིས་གུས་པའི་གསོལ་ཚིག་སྔོན་དུ་འགྲོ་བས་གཉན་པར་བྱའོ། །གསུམ་པ་ཡིད་ཀྱི་ཀུན་སྤྱོད་ལའང་སྤྱིར་རྣམ་དབྱེ་མང་རུང་། འདིར་སྤང་བླང་གི་ཕྱོགས་གཉིས་ལས། དང་པོ་སྤང་བྱ་ལ་སྐྱོན་གསུམ་དྲི་མ་དྲུག་མི་འཛིན་པ་ལྔ་རྣམས་དང་བླང་བྱ་འདུ་ཤེས་བཞི་སྟེ། དེ་དག་ལ་སྐྱོན་གསུམ་ནི། མདོ་ལས། དགེ་སློང་དག་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་པར་བྱའོ། །ཞེས་གསུངས་པའི་ལེགས་པར་ཞེས་པས་དུག་ཅན་གྱི་སྐྱོན་སྤང་དགོས་པར་གདམས་པ་དང་། རབ་ཏུ་ཉོན་ལ་ཞེས་པས་རྣ་བ་མི་གཏད་པའི་སྐྱོན་སྤང་དགོས་པར་གདམས་པ་དང་། ཡིད་ལ་ཟུངས་ཤིག་དང་ཞེས་པས་ཡིད་ལ་མི་འཛིན་པའི་སྐྱོན་སྤང་དགོས་པར་གདམས་པ་སྟེ་གསུམ་མོ། །གཉིས་པ་དྲི་མ་དྲུག་ནི་སློབ་དཔོན་དབྱིག་གཉེན་གྱི་རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ཡིད་སྡུད་དང་། །སྐྱོ་བས་ཉན་པ་དྲི་མ་ཡིན། །ཞེས་གསུངས་པ་ལྟར་ཏེ་འདི་དག་ནི་རྫས་དྲི་མས་སྦག་པ་བཞིན་དུ། ཐོས་པའི་ཆོས་ཉིད་བསླད་པར་བྱེད་པའི་རང་རྒྱུད་ཀྱི་དྲི་མ་ཡིན་པའི་ཕྱིར་སྤང་བར་གདམས་པའོ། །གསུམ་པ་མི་འཛིན་པ་ལྔ་ནི། ཚིག་བཟུངས་ཀྱང་དོན་མི་འཛིན་པ་དང་། དོན་བཟུངས་ཀྱང་ཚིག་མི་འཛིན་པ་དང་། གོ་བརྡའ་འཕྲོད་ངེས་སུ་མི་འཛིན་པ་དང་། དོན་གྱི་གོ་རིམ་གོ་མ་ལོག་པར་མི་འཛིན་པ་དང་། དབུ་ཞབས་ཆ་ཚང་པར་མི་འཛིན་པ་རྣམས་སྟེ། འདི་དག་ནི་ཡིད་ལ་མི་འཛིན་པའི་སྐྱོན་ཏེ་སྤང་དགོས་པར་གདམས་པའོ། །དེ་དག་ཀྱང་བསྡུ་ན་སྐྱོན་གསུམ་དུ་འདུ་སྟེ། འདི་ལྟར་དྲི་མ་དྲུག་ནི་སྣོད་དུག་ཅན་གྱི་བྱེ་བྲག་ཡིན་ལ། མི་འཛིན་པ་ལྔ་ནི་ཡིད་ལ་མི་འཛིན་པའི་བྱེ་བྲག་ཡིན་པའི་ཕྱིར་རོ། འོ་ན་རྣ་བ་མི་གཏད་པ་ཡིད་ཀྱི་ཀུན་སྤྱོད་དུ་ཅིས་འགྱུར་སྙམ་ན། འདིར་རྣ་བ་མི་གཏད་ཅེས་པ་ནི་རྣ་བའི་རྣམ་འགྱུར་གཏོད་མིན་ལ་ལྟོས་ནས་བཞག་པ་མ་ཡིན་ཏེ། རྣ་བའི་དབང་ཤེས་ཡུལ་ལ་གཏོད་མིན་གྱི་སྒོ་ནས་བཞག་པའི་ཕྱིར་ཕྱོགས་སྔ་ཇི་བཞིན་དུ་འདོད་དགོས་སོ། །དེས་ན་ཡིད་ཀྱི་སྤང་བྱའི་ཀུན་སྤྱོད་དེ་དག་སྤངས་ནས་བླང་བྱ་འདུ་ཤེས་བཞི་བསྟེན་པར་བྱ་སྟེ། དེ་ཡང་མདོ་སྡོང་པོས་བརྒྱན་པའི་ལེའུ་ལས། རིགས་ཀྱི་བུ་ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཆོས་ལ་སྨན་གྱི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྨན་པ་མཁས་པ་ལྟ་བུའི་འདུ་ཤེས་བསྐྱེད་པར་བྱའོ། །ཞེས་སོགས་བཞི་ཚན་དུ་མའི་སྒོ་ནས་གསུངས་པ་རྣམས་ཏེ་འདི་དག་ནི་ངེས་པར་དང་དུ་བླང་ནས་ཡང་ཡང་བསམ་པ་གལ་ཆེའོ། །བསྡུ་བའི་དབང་དུ་ན་ཚུལ་འདི་སྤང་བྱའི་ཀུན་སྤྱོད་ཀྱི་ནང་ཚན་དུག་ཅན་གྱི་སྐྱོན་དྲུག་སྤང་བའི་ལྡོག་ཆོས་ཙམ་ཡིན་ཏེ་ཅི་རིགས་པར་སྦྱར་དུ་ཡོད་དོ། །དེ་དག་ནི་ཆོས་ཉན་པའི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་སྟེ་ཉེས་སྤྱོད་སྡོམ་པ་དང་དགེ་བ་ཆོས་སྡུད་སོ་སོར་སྦྱར་བར་འདོད་ན་སྤང་བླང་གི་ཕྱོགས་ནས་བསྙད་པར་བྱའོ། །དེ་བཞིན་དུ་ཆོས་ཉན་པའི་དུས་དེར་ཕ་རོལ་སྲོག་ཆགས་མཆོག་དམན་སུ་ཞིག་གིས་རང་ཅག་ལ་གནོད་པ་བྱས་ཀྱང་། དེ་ལ་འཁོན་འཛིན་དང་། གནོད་ལན་མི་བྱེད་པར་གཉེན་པོའི་གོ་ཆ་བགོས་ཏེ་བཟོད་པར་བྱེད་པ་ནི་བཟོད་པའི་ཕ་རོལ་ཏུ་ཕྱིན་པ། ཆོས་ཅུང་ཟད་རེ་ཐོས་པས་ཆོག་ཤེས་པར་མི་བགྱིད་པར་བླ་མ་ལ་ཆོས་ཀྱི་འཁོར་ལོ་བསྐོར་བར་ཡང་ནས་ཡང་གསོལ་བ་བཏབས་ཏེ། ཇི་སྲིད་བྱང་ཆུབ་མ་ཐོབ་ཀྱི་བར་དུ་དགེ་བའི་བཤེས་གཉེན་ལས་གདམས་པ་ཉན་འདོད་ཀྱི་བརྩོན་པ་བསྐྱེད་པ་ནི་བརྩོན་འགྲུས་ཀྱི་ཕ་རོལ་དུ་ཕྱིན་པ། སེམས་གཞན་དུ་མ་ཡེངས་པ་གཞིར་བཞག་གི་ཕུན་སུམ་ཚོགས་པ་ལྔ་ལྡན་གསལ་བཏབས་ནས་བླ་མ་ལ་རྫོགས་པའི་སངས་རྒྱས་དངོས་ཀྱི་འདུ་ཤེས་དང་། མཆེད་གྲོགས་ལ་ས་ཆེན་པོ་ལ་གནས་པའི་བྱང་ཆུབ་སེམས་དཔའ་ཁོ་ནའི་འདུ་ཤེས་བཞག་སྟེ་དག་སྣང་དེ་གའི་ངང་ནས་བླ་མས་ཆོས་གསུངས་པའི་ལྗགས་དཀྱིལ་ནས་འོད་ཟེར་འཕྲོས་ཏེ་རང་ཉིད་ཀྱང་འཁོར་གྱི་སེམས་དཔའ་གང་རུང་དུ་གསལ་བའི་སྙིང་གར་ཕོག་པའི་མོད་ལ་ཆོས་ཀྱི་ཚིག་དོན་མ་ལུས་པ་ཤེས་བྱུང་སྙམ་པའི་མོས་གུས་དང་བཅས་པའི་སེམས་བླ་མའི་གསུང་ལ་རྩེ་གཅིག་ཏུ་གཏོད་པ་ལས་རྣམ་རྟོག་གཞན་གྱི་བར་དུ་མི་གཅོད་པ་ནི་བསམ་ཏན་གྱི་ཕ་རོལ་ཏུ་ཕྱིན་པ། གལ་ཏེ་ཐེ་ཚོམ་གྱི་རྟོག་པ་སྐྱེས་ན་སྐྱོན་ཅན་གྱི་ཚིག་དེ་ཉིད་ཀྱི་སྒྲོ་འདོགས་འཕྲལ་དུ་གཅོད་པར་བྱ་བའི་ཕྱིར། གང་ལས་ཐེ་ཚོམ་སྐྱེས་གཞི་དེ་ལས་གླེང་བསླང་སྟེ་བླ་མ་དང་མཆེད་གྲོགས་ལ་དྲིས་ནས་ཐེ་ཚོམ་གཅོད་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་སྟེ་འདི་དག་ནི་དགེ་བའི་བཤེས་གཉེན་བསྟེན་པའི་ཚུལ་གྱི་སློབ་མའི་ཆོས་ཡན་ལག་དྲུག་གོ །འོ་ན་དེ་དག་ཐམས་ཅད་ལ་ཕ་རོལ་ཏུ་ཕྱིན་པའི་སྒྲས་བསྙད་པ་ལ་འགལ་བ་ཡོད་པ་མ་ཡིན་ནམ་ཞེ་ན། འདིར་སྒྲ་བཤད་ཀྱི་ངེས་པའི་སྒོ་ནས་བཞག་ན་གོ་བ་གཞན་ཡང་འོང་མོད་དེ། མཚུངས་ཆོས་སྦྱར་བའི་སྒོ་ནས་དེ་ལྟར་བཤད་པ་ལ་འགལ་བ་མེད་དེ། དཔེར་ན་མདོ་སྡེ་སྐལ་བ་བཟང་པོའི་ཕ་རོལ་དུ་ཕྱིན་པའི་ལེའུ་ལས། ས་དང་ལམ་གྱི་རྣམ་པར་བཞག་པའི་ཆོས་ཐམས་ཅད་ལ་ཕ་རོལ་ཏུ་ཕྱིན་པ་དྲུག་རེ་སྦྱར་ནས་གསུངས་པ་དང་མཚུངས་པའི་ཕྱིར་རོ། །དེ་ལྟ་ན་ཐུན་མོང་གི་ལམ་སྟོན་དགེ་བའི་བཤེས་གཉེན་ཐོག་མར་བསྟེན་ནས་ཆོས་ཞུ་བའི་ཚུལ་མདོ་ཙམ་འཆད་གྲུབ་བོ། །ད་ནི་བཤེས་གཉེན་དེ་ལས་ཐོབ་པའི་གདམས་ངག་སྒོམ་པ་ལ་ཐོག་མར་འཁོར་བའི་ཉེས་དམིགས་བསམ་ནས་སྐྱོ་ཤེས་བསྐྱེད་པ་དང་། དཀོན་མཆོག་གི་ཡོན་ཏན་དྲན་པས་ངེས་འབྱུང་བསྐྱེད་པའི་ཚུལ་ཅུང་ཟད་ཅིག་བརྗོད་པར་བྱ་སྟེ། དེ་ཡང་འཁོར་བའི་ཉེས་དམིགས་མ་བསམ་ན། དེ་ལས་ཐར་བ་དོན་གཉེར་གྱི་བློ་དང་། དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པའང་འབྱུང་དཀའ་སྟེ། དཔེར་ན་ནད་ཀྱིས་ཉེས་དམིགས་མ་མཐོང་བར་ནད་ལས་གྲོལ་པའི་བདེ་བ་ལ་སྤྲོ་བ་དང་། སྨན་དང་སྨན་པའི་ཡོན་ཏན་རྗེས་སུ་དྲན་པའང་མི་འབྱུང་བ་དང་འདྲའོ། །དེའི་ཕྱིར་ཉེས་དམིགས་དེ་བསམ་ནས་ངེས་འབྱུང་བསྐྱེད་པ་ལ་ཐོག་མར་གང་ལས་ངེས་པ་འབྱུང་བའི་ཡུལ་ཤེས་པར་བྱ་དགོས་ཏེ། དེ་འཆད་པ་ལ་འཁོར་བ་ཞེས་བྱ་བ་ནི་བདག་འཛིན་ལྷན་ཅིག་སྐྱེས་པས་རྒྱུ་བྱས་ཏེ་གཟུང་འཛིན་གྱི་རྟོག་པ་རགས་པར་མཆེད་ནས་དབང་པོའི་ཡུལ་ལ་མངོན་པར་རྒྱུག་པའི་དབང་གིས་འགྲོ་བའི་གནས་རིགས་ལྔའམ་དྲུག་གི་བདག་ཉིད་ཅན་འདིར་འགལ་མེའི་འཁོར་ལོ་བཞིན་ཡང་ནས་ཡང་དུ་འཁོར་བ་འདི་ཡིན་ལ་དེར་འཁོར་བ་པོའང་འཁོར་བ་པའོ། །དེ་ལྟ་བུའི་འཁོར་བ་དེ་ཡང་སྤྱིར་སེམས་ཅན་སོ་སོའི་འཁྲུལ་བའི་སྣང་བར་རྨི་ལམ་གྱི་ཡུལ་གཟུགས་བཞིན་གྲུབ་པ་ཡིན་པའི་ཕྱིར་འདི་ན་ཡོད་ཀྱིས་དེ་ན་མེད་ཅེས་བརྗོད་དུ་མི་རུང་མོད་དེ། འོན་ཀྱང་ཐུན་མོང་གི་སྣང་བ་དང་མཐུན་པར་ཐ་སྙད་བདེན་པའི་དབང་དུ་བྱས་ནས་སྐུ་གསུམ་སྟོན་པའི་ཞིང་ཁམས་འཆད་པའི་སྐབས་སུ། སྤྱིར་རིགས་ལྔ་གངས་ཅན་མཚོའི་ཞིང་བཀོད་སོགས་མཁའ་ཁྱབ་ཀྱི་རྒྱལ་བའི་ཞིང་ཁམས་རྣམས་དང་། ཁྱད་པར་རྣམ་སྣང་གངས་ཅན་མཚོའི་ཕྱག་མཚན་ལ་བརྟེན་པའི་སྟོང་གསུམ་ཉི་ཤུ་རྩ་ལྔ་ལ་སོགས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་སྤྱི་དང་། བྱེ་བྲག་མི་མཇེད་ཐུགས་ཀྱི་ཞིང་འདི་ལ་སོགས་པའི་བཀོད་པ་སྤྱིར་བཏང་ངེས་སུ་བཅུག་ནས། གནས་སྐབས་སུ་ཞིང་འདིས་མཚོན་ཏེ་ཤེས་པར་བྱ་བ་ལས། དང་པོ་རྟེན་བརྟེན་པའི་གྲུབ་ཚུལ་ནི་སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་བོ་བརྟེན། དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། ཞེས་གསུངས་པ་ལྟར་ཏེ་འདིའི་རང་བཞིན་རྒྱས་པར་ཤེས་འདོད་ན་ཡིད་བཞིན་རིན་པོ་ཆེའི་མཛོད་ཀྱི་རིམ་ཁང་དྲུག་པ་ཡན་གྱི་རྩ་འགྲེལ་ལ་བལྟ་བར་བྱའོ། །དེ་ཡང་སྤྱིར་བཏང་ཙམ་དུ་དེ་དག་ཐོག་མ་ཇི་ལྟར་ཆགས་ཚུལ། བར་དུ་ཇི་ལྟར་གནས་ཚུལ། ཐ་མ་ཇི་ལྟར་འཇིག་ཅིང་སྟོང་བའི་ཚུལ་རྣམས་དང་། སྣོད་མས་ནས་ཡར་ཆགས་པ་དང་མཉམ་དུ་བཅུད་ཡས་ནས་མར་འཁྲུལ་བའི་རྟེན་འབྲེལ་ལྷན་ཅིག་ཏུ་ཚོགས་པ་ལས་གནས་རིགས་ཀྱི་རྟེན་འབྲེལ་གྲུབ་ཅིང་དེ་ཡང་རང་རང་གི་ལས་ཀྱི་བྱེད་པས་བདེ་བ་དང་སྡུག་བསྔལ་སོ་སོར་སྨིན་པ་ལས་རིགས་མཐུན་ཚོགས་པའི་དབང་གིས་འགྲོ་བ་རིགས་དྲུག་ཏུ་བཞག་པ་སོ་སོའི་བདེ་སྡུག་གི་རྣམ་པ་ལ་སོགས་པའང་ངེས་དགོས་ཏེ། དེས་ན་འདིར་དེའི་ཚུལ་ཅུང་ཟད་ཙམ་སྨོས་པ་ལ་མས་ནས་རིམ་བཞིན་འཆད་པའི་ཐོག་མར་ས་འོག་དང་། རྒྱ་མཚོའི་ཀློང་དང་གླིང་བཞིའི་ཕྱི་རོལ་གྱི་ལྕགས་རིའི་འགྲམ་རྣམས་ལ་བརྟེན་པ་ནི་ངན་སོང་གི་འགྲོ་བ་ཡིན་ལ། དེ་ལས་ཀྱང་དང་པོ་དམྱལ་བའི་འགྲོ་བ་ལ་ཚ་དམྱལ་བརྒྱད། གྲང་དམྱལ་བརྒྱད། ཉི་ཚེ་ཉེ་འཁོར་གཉིས་ཏེ་བཅོ་བརྒྱད་ཡོད་པར་འཆད་པའི་ལུགས་ལྟར་ན། དང་པོ་ཚ་དམྱལ་བརྒྱད་ཀྱི་སྤྱི་མཐུན་དུ་གཞི་དང་ཁོར་ཡུག་ཐམས་ཅད་ལྕགས་བསྲེག་གི་རང་བཞིན་ལས་སའི་རྣམ་པ་ལག་མཐིལ་ཙམ་ཡང་མི་མངོན་པའི་གནས་དེར་ཞེ་སྡང་གི་ཀུན་ནས་བསླང་བའི་མི་དགེ་བའི་ལས་བསགས་པའི་སྐྱེ་བོ་ཐམས་ཅད་སྐད་ཅིག་ལ་རྫུས་ཏེ་སྐྱེས་ནས་རང་རང་གི་ལས་ཀྱི་དབང་གིས་སྐྱེས་མ་ཐག་ཏུ་གཟུགས་ལང་ཚོ་ལ་བབ་ཅིང་། སྟོབས་ཀྱིས་དྲེགས་པའི་ང་རྒྱལ་དང་ཕ་རོལ་མཐོང་ཚད་ལ་ཞེ་སྡང་བའི་བསམ་པས་རྒོལ་བར་སེམས་ཤིང་། ལག་ན་མཚོན་ཆ་སྣ་ཚོགས་རང་གྲུབ་ཏུ་ཡོད་པ་ཞིག་ཏུ་འགྱུར་རོ་ཞེས་ཐོས་སོ། །དེ་ལས་ཀྱང་བྱེ་བྲག་ཡང་སོས་པ་རྣམས་ནི་ཕན་ཚུན་གསོད་རེས་འབའ་ཞིག་པས་སྲོག་དང་བྲལ་བ་ན། ནམ་མཁའ་ནས་ཡང་སོས་པར་གྱུར་ཅིག་ཅེས་པའི་སྒྲ་གྲགས་པའི་མོད་ལ་སླར་ཡང་སོས་པར་གྱུར་ཏེ་སྔར་བཞིན་གསོད་པའི་སྡུག་བསྔལ་ལས་ཟད་ཀྱི་བར་དུ་མྱོང་བའོ། །དེ་བཞིན་དུ་ཐིག་ནག་ནི་གནས་དེར་འགལ་དུམ་བཞིན་དུ་འགྱེལ་བའི་ཡན་ལག་རྣམས་ལ་ལྕགས་ཀྱི་གཟེར་བུ་བཏབས་ནས་དམྱལ་སྲུང་འཇིགས་སུ་རུང་བ་དག་གིས་དེའི་ལུས་ལ་ཐིག་ནག་པོ་བརྒྱད་དང་བཅུ་དྲུག་ལ་སོགས་པ་བཏབ་པའི་ཤུལ་ནས་ལྕགས་ཀྱི་སོག་ལེ་རྣོན་པོ་མེ་འབར་བས་གཤོག་ཅིང་དེ་མ་ཐག་སོས་པ་ལས་སླར་ཡང་གཤོག་པས་སྡུག་བསྔལ་བའོ། །བསྡུས་འཛོམས་ནི་ལྕགས་ཀྱི་རི་བོ་རྣམས་དུད་འགྲོའི་མགོ་བརྙན་གྱི་རྣམ་པར་སྣང་བའི་བར་དུ་ལུས་ཕྱེ་མར་འཐག་ཅིང་སླར་ཡང་སོས་པ་དང་། ལྕགས་གཏུན་ཡུལ་ལྗོངས་ཙམ་པར་རྡུང་བ་ལ་སོགས་པས་སྡུག་བསྔལ་བའོ། །ངུ་འབོད་ནི་ལྕགས་ཁྱིམ་མེ་འབར་བར་བསྲེགས་ཅིང་ཁར་ལྕགས་ཞུན་བསྐོལ་མ་བླུགས་པས་ཤིན་ཏུ་ཉམ་ཐག་པའི་སྡུག་བསྔལ་བས་འོ་དོད་རྒྱུན་མི་འཆད་པར་འབོད་པའོ། །ངུ་འབོད་ཆེན་པོ་ནི་ལྕགས་ཁྱིམ་འབར་བ་ཉིས་རིམ་དུ་ཚུད་པས་སྡུས་བསྔལ་བཟོད་དཀའ་ཞིང་འོ་དོད་སྔ་མ་ལས་ཀྱང་ཆེས་ཆེ་བར་འབོད་པའོ། །ཚ་བ་ནི་ལྕགས་ཀྱི་གསལ་ཤིང་མེ་འབར་བས་ལུས་ཐམས་ཅད་ཕར་ཐལ་ཚུར་ཐལ་དུ་གོ་མཚམས་མེད་པར་འབིག་པའོ། །བར་ཏུ་ཚ་བ་ནི་མདུང་ཐུང་མེ་འབར་བ་རྩེ་གསུམ་པས་ལུས་ཀྱི་གཞུང་ནས་འབིགས་ཤིང་ཕྱི་རོལ་ནས་ལྕགས་སྲེག་གི་སྣམ་བུ་ལེབ་མོས་དཀྲིས་པའི་སྡུག་བསྔལ་བཟོད་པར་དཀའ་བའོ། །མནར་མེད་པ་ནི་ལུས་ཀྱི་དངོས་པོ་བལྟར་མི་མངོན་པར་མེ་དང་ལུས་དབྱེར་མེད་དུ་འབར་བ་སྟེ་དེ་ལས་ཕར་མནར་དུ་མེད་པའོ། །དེ་ལྟ་བུའི་ཚ་དམྱལ་བརྒྱད་པོའང་སྔ་མ་དག་ལས་ཕྱི་མ་རྣམས་སྡུག་བསྔལ་བདུན་འགྱུར་གྱིས་ཆེ་བའོ། །དེ་ནས་གྲང་དམྱལ་བ་རྣམས་ནི་སྤྱི་མཐུན་དུ་གཞི་དང་ཁོར་ཡུག་ཐམས་ཅད་གངས་དང་ཆབ་རོམ་གྱི་ཁྲོད་འབའ་ཞིག་ལས་ས་རང་མཚན་པ་རྐང་མཐིལ་བཞག་ས་ཙམ་ཡང་མེད་པའི་གནས་དེར་ལུས་གཅེར་བུར་གོས་ཀྱི་རྣམ་པ་ལྷན་པ་ཙམ་ཡང་མེད་པར་སྐྱེས་པ་ནི་ཉིན་མཚན་གྱི་དབྱེ་བ་མེད་པར་རྟག་ཏུ་བུ་ཡུག་འབའ་ཞིག་སྦྲེབས་པས་ལུས་གྲང་ཆེས་ཏེ་ཆུ་བུར་ཐོལ་གྱིས་བྱུང་བ་ནི་ཆུ་བུར་ཅན་ནོ། །ཆུ་བུར་དེ་རྡོལ་ནས་རྨར་སོང་བས་ན་ཆུ་བུར་བརྡོལ་བའོ། །ཨ་ཆུའི་སྨྲེ་སྔགས་རྒྱུན་མི་འཆད་པར་འདོད་པས་ན་ཨ་ཆུ་ཆུའོ། །དེ་ཙམ་ཡང་བརྗོད་མི་ནུས་པར་སྐད་ཀྱི་གདངས་ཆགས་པས་ན་ཀྱེ་ཧུད་འདོན་པའོ། །ཁ་འགྲིགས་ནས་སོ་འཐམ་པས་ན་སོ་ཐམ་ཐམ་པའོ། །ལྤགས་པ་ཁ་དོག་སྔོན་པོ་ཉིད་ཚལ་བར་གས་པས་ན་ཨུཏྤལ་ལྟར་གས་པའོ། །དེ་ཡང་རླུང་གིས་སྤུར་ཏེ་ཤའུ་དམར་པོ་ཐོན་པ་ཉིད་བརྒྱད་ཚལ་དུ་གས་པས་ན་པདྨ་ལྟར་གས་པའོ། །སླར་ཡང་དེ་ཉིད་བཅུ་དྲུག་དང་གྲངས་མེད་པའི་བར་གས་པའི་རྨ་ནང་དུ་སྲོག་ཆགས་ལྕགས་ཀྱི་མཆུ་ཅན་དག་ཞུགས་ནས་ཟ་བར་བྱེད་པས་ན་པདྨ་ཆེན་པོ་ལྟར་གས་པ་སྟེ་བརྒྱད་དོ། །དེ་ནས་ཉི་ཚེ་བ་ནི་གནས་ལ་ངེས་པ་མེད་པས་ལུས་ཀྱི་རྣམ་པ་སྡོང་དུམ་དང་། ཐབ་ཁ་དང་། ཐག་པ་དང་། སབ་མ་དང་། ཀ་བ་སོགས་པའི་རྣམ་པར་སྣང་ཞིང་སྡུག་བསྔལ་བའོ། །ཉེ་འཁོར་བ་ནི་ཚ་དམྱལ་བརྒྱད་ཀྱི་འཁོར་དུ་ཡོད་པར་བཤད་ཅིང་ཕྱོགས་འདི་སོ་སོ་ན། མེ་མ་མུར་གྱི་འོབས། རོ་མྱགས་ཀྱི་འདམ་རྫབ། སྤུ་གྲིའི་ནགས་ཚལ། ཆུ་བོ་རབ་མེད་སྟེ་བཞི་བཞི་བཅུ་དྲུག་རེ་དང་། མཚམས་བཞིར་ཤལ་མ་ལིའི་རི་རེ་རེ་ཡོད་པར་བཤད་དོ། །འདི་དག་ལ་བཤད་སྲོལ་གཞན་ཡང་སྣང་སྟེ། འདིར་སྨྲོས་པའི་ཉི་ཚེ་བའི་སྐབས་སུ་དེའི་ལུས་སྡོང་དུམ་སོགས་སུ་འདུ་ཤེས་པ་ཙམ་མ་ཡིན་པར་དེ་དང་དེར་དངོས་སུ་སྣང་བ་ནི་འདུལ་བ་ལས། རྣ་བ་བྱེ་བ་རིའི་ལོ་རྒྱུས་དང་། དགྲ་བཅོམ་པ་དགེ་འདུན་འཚོ་རྒྱ་མཚོར་ཕྱིན་པ་དང་མོའུ་གལ་གྱི་བུ་རྒྱ་མཚོའི་འགྲམ་དུ་ཕྱིན་པ་སོགས་ཀྱིས་གསལ། ཉེ་འཁོར་ནི་མནར་མེད་ཙམ་དུ་མ་ཟད་ཚ་དམྱལ་བརྒྱད་ཀའི་འཁོར་དུ་བཅུ་དྲུག་རེ་ཡོད་པ་མདོ་དུ་མ་དང་བཤེས་སྤྲིང་རྩ་འགྲེལ་སོགས་ལས་གསལ་བོར་བཤད་པས་འདིར་ཡང་དེ་ལྟར་བཤད་དོ། །གཞན་དུ་ཡང་སྤུ་གྲིའི་ཐང་དང་། རལ་གྲི་ལོ་མའི་ནགས་ཚལ་ཞེས་གཉིས་སུ་ཕྲལ་བ་དང་། མེ་མུར་གྱི་འོབས་དང་ཐལ་ཚན་གྱི་ཆུ་བོ་རབ་མེད་ཅེས་གཉིས་སུ་བཤད་པ་སོགས་ཡོད་ཀྱང་། སྔ་མ་གཉིས་ནི་དེར་འགྲོ་བའི་ལམ་དང་ནགས་ཚལ་དངོས་ཀྱི་ཁྱད་པར་ལས་བརྗོད་དོན་ཐ་དད་མ་ཡིན་པར་གསུངས་ལ། ཕྱི་མ་གཉིས་ཀྱང་དོན་གཅིག་པར་གསུངས་སོ། །འདིར་བཤད་པའི་ཆུ་བོ་རབ་མེད་ནི་ཆུ་ཚན་གྱི་ནང་དུ་མཚོན་ཆ་སྣ་ཚོགས་གཟེང་བར་བཤེས་སྤྲིང་སོགས་ལས་བཤད་པ་ལྟར་ཡིན་ནོ། །གཉིས་པ་ཡི་དྭགས་ལ་བྱིང་གནས་དང་མཁའ་རྒྱུ་གཉིས་ལས། དང་པོ་ལའང་ནང་གསེས་ཕྱི་ཡི་སྒྲིབ་པ་ཅན་དང་། ནང་གི་སྒྲིབ་པ་ཅན་དང་། སྒོས་ཁུར་གྱི་སྒྲིབ་པ་ཅན་ཏེ་གསུམ་ལས། དེ་གསུམ་ཁའི་སྤྱི་མཐུན་དུ་པགས་རུས་གཉིས་ཀྱི་བར་ན་ཤ་མེད་པས་སྐེམ་ཞིང་རིད་པ་དང་། མགོ་བོ་ཁྲོ་རྫ་ཙམ་ལ་ཁ་ཁབ་མིག་ཙམ་དང་མགྲིན་པ་རྟ་རྔ་ཙམ་ལས་མེད་པ་དང་། གསུས་པ་ཡུལ་ལྗོངས་ཙམ་ལ་ཡན་ལག་འཇག་མ་ཙམ་ལས་མེད་པ་དང་། ཕྱིན་ཅི་ལོག་བཞིའི་སྣང་བ་རྟག་པར་འཆར་བ་རྣམས་ནི་ཐུན་མོང་ཡིན་ལ། བྱེ་བྲག་གི་ཁྱད་པར་ནི། ཕྱིའི་སྒྲིབ་པ་ཅན་དག་གིས་ཟས་སྐོམ་ལ་སོགས་པ་མཐོང་བའི་མོད་ལ་མེད་པར་འགྱུར་པ་སོགས་ཕྱི་རོལ་གྱི་གནོད་པ་ཅན་དང་། ནང་གི་སྒྲིབ་པ་ཅན་དག་གིས་ནི། ཟས་སྐོམ་ཅུང་ཟད་རྙེད་ནས་བཟའ་བཏུང་བགྱིས་རུང་དེ་མ་ཐག་དེ་དག་ལས་མེ་འབར་དེ་དོན་སྣོད་མཐའ་དག་བསྲེག་པར་བྱེད་པས་ནང་གི་གནོད་པ་ཅན་ཏེ། འདིའི་མིང་ལ་མེ་ལྕེའི་འཁོར་ལོ་ཅན་ཡང་ཟེར་རོ། །སྒོས་ཁུར་གྱི་སྒྲིབ་པ་ཅན་ནི་ཡི་དྭགས་ཆེན་པོ་རེ་རེའི་ལུས་ལ་ཆུང་དུ་དཔག་ཏུ་མེད་པས་ཚང་འཆའ་བ་སོགས་སྡུག་བསྔལ་དཔག་ཏུ་མེད་དོ། །གཉིས་པ་མཁའ་ལ་རྒྱུ་བ་ནི། བདུད་བཙན་སྲིན་པོ་ལ་སོགས་མི་མ་ཡིན་ཕ་རོལ་ལ་འཚེ་བ་རྣམས་ཏེ། འདི་དག་ཀྱང་མངོན་ཤེས་རྫུ་འཕྲུལ་ལོངས་སྤྱོད་ལ་སོགས་པ་ཅུང་ཟད་ཡོད་ཀྱང་མི་བརྟན་པ་དང་། ཕ་རོལ་རིགས་སྔགས་མཁན་ལ་སོགས་པས་མནན་བསྲེགས་ཀྱི་སྦྱོར་བས་སྡུག་བསྔལ་རྒྱུན་མི་འཆད་པ་དང་། རྟག་ཏུ་བསམ་སྦྱོར་ངན་པ་བསྐྱེད་པས་ཕྱི་མའི་སྡུག་བསྔལ་འདུ་བྱེད་པ་སོགས་སྡུག་བསྔལ་གྱི་རྣམ་པ་དཔག་ཏུ་མེད་དོ། །འདིར་དུད་འགྲོ་དང་ཡི་དྭགས་གཉིས་ཀྱི་སྔོན་ལ་ཡི་དྭགས་བཤད་པ་ནི་ད་ལྟའི་ཁྲིད་ཡིག་རྣམས་ཀྱི་འགྲོས་དང་བསྟུན་གྱི་གཞན་དུ་ན་མདོ་སྡེ་དྲན་པ་ཉེ་བར་བཞག་པ་དང་། བཤེས་སྤྲིང་སོགས་ལས། དུད་འགྲོ་ཉིད་སྔོན་ལ་བཤད་ཅིང་སྡུག་བསྔལ་ཡང་དེ་ཉིད་ཆེ་བར་བཤད་དོ། །གསུམ་པ་དུད་འགྲོ་ལ་ཁ་འཐོར་དང་བྱིང་གནས་གཉིས་ལས། དང་པོ་ལའང་མིས་བདག་ཏུ་བཟུང་བ་དང་མ་བཟུང་བ་གཉིས་ལས་དང་པོ་ནི། མི་ལ་བརྟེན་པའི་རྟ་ཁལ་ར་ལུག་ལ་སོགས་པ་རྣམས་ཏེ་དེ་དག་ལ་ནི། ཁལ་འགེལ་བ་དང་། སྣ་འབིགས་པ་དང་། བྱ་གཅོད་པ་དང་། ཞོ་བཞོ་བ་དང་། གསོན་ཁྲག་འབྱིན་པ་དང་། གསོད་པ་ལ་སོགས་པའི་སྡུག་བསྔལ་དཔག་ཏུ་མེད་ལ། མི་ལ་མ་བརྟེན་པའི་གཅན་གཟན་རི་དྭགས་ལ་སོགས་པ་རྣམས་ནི་ཕ་རོལ་གྱིས་གསོད་པའི་གཡོ་ཐབས་མེ་མདའ་དང་། ལག་རྙི་དང་། མདའ་མོ་ཆེ་དང་། ཐག་རྒྱ་ལ་སོགས་པ་དུ་མས་སྲོག་དང་འབྲལ་བར་བགྱིད་པའི་ཕྱིར་སྤང་ལྗོངས་ལས་སྐྱེས་པའི་རྩ་སྔོན་ཁམ་གཅིག་ཟ་ནའང་། ཕྱོགས་ཀུན་ཏུ་བྱ་ར་བགྱིད་བཞིན་བཟའ་བ་ལས་བག་ཕབ་ནས་ཟ་མི་ཕོད་པ་སོགས་འདི་དག་གི་སྡུག་བསྔལ་མཐོང་བའི་ཆོས་ལ་གྲུབ་པའི་ཕྱིར་སྨོས་མ་དགོས་སོ། །གཉིས་པ་བྱིང་ན་གནས་པ་ནི་གླིང་བར་མུན་ནག་གི་རྒྱ་མཚོའི་ཀློང་རྣམས་དང་ཆུ་གཏེར་ཆེན་པོ་བཞིའི་ཁྱོན་ལ་གནས་པ་སྟེ། དེ་ཡང་སྔོན་གྱི་གཏི་མུག་ལ་གོམས་པའི་མཐུས་གླེན་རྨོང་གི་སྡུག་བསྔལ་ཡོད་པ་གཞིར་བཞག་ལ། བྱེ་བྲག་ཏུ་ཚ་གྲང་བཀྲེས་སྐོམ་ལ་སོགས་དཔག་ཏུ་མེད་ཅིང་། ཕན་ཚུན་ཆེན་པོས་ཆུང་དུ་བཟའ་བ་དང་། ཆུང་ངུས་ཆེན་པོ་འབིགས་པ་དང་། རང་ཤ་རང་གིས་བཟའ་བ་ལ་སོགས་པ་བསམ་གྱིས་མི་ཁྱབ་བོ། །དེ་ལྟར་ངན་སོང་གསུམ་གྱི་འགྲོ་བ་ལ་ནི་སྔུག་བསྔལ་ཁོ་ནའི་རང་བཞིན་ལས་བདེ་བར་བསྟི་བའི་སྐབས་ཆེར་མེད་ལ། དེར་དཔག་ནས་མཐོ་རིས་ཀྱི་འགྲོ་བ་རྣམས་ལ་བདེ་བ་ཅུང་ཟད་རེ་ཡོད་པར་བརྩིས་ནས་བདེ་འགྲོ་ཞེས་བསྙད་པའོ། །དེ་དག་ཀྱང་རི་རབ་ཀྱི་ཁོངས་སེང་དང་བང་རིམ་བཞི་དང་། གླིང་གླིང་ཕྲན་རྣམས་ལ་བརྟེན་པའི་འགྲོ་བ་སྟེ། དེའི་ཚུལ་འཆད་པ་ལའང་གསུམ་ལས། དང་པོ་མིའི་འགྲོ་བ་ནི་རྫོགས་ལྡན་ལ་སོགས་པའི་བྱེ་བྲག་གིས་སྐྱེ་བ་རྣམ་པ་བཞིར་སྣང་ཡང་། ད་ལྟ་ཕལ་ཆེར་མངལ་ལས་སྐྱེ་བ་ལྟར་བརྗོད་ན། སྤྱིར་སྡུག་བསྔལ་གྱི་སྡུག་བསྔལ། འགྱུར་བའི་སྡུག་བསྔལ། ཁྱབ་པ་འདུ་བྱེད་ཀྱི་སྡུག་བསྔལ་སྟེ་གསུམ་དང་བྱེ་བྲག་ཡན་ལག་གི་སྡུག་བསྔལ་བརྒྱད་ལ། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། འཆི་བའི་སྡུག་བསྔལ་སྟེ་བཞིའི་སྟེང་དུ། ལང་ཚོ་དར་བའི་ཆ་ལ་རེ་ཞིག་བདེ་བ་ལྟར་སྣང་རུང་། དེས་རྟག་མི་ཐུབ་པར། དགྲ་སྡང་བ་དང་ཕྲད་ཀྱིས་དོགས་པའི་སྡུག་བསྔལ། གཉེན་བྱམས་པ་དང་བྲལ་གྱིས་དོགས་པའི་སྡུག་བསྔལ། འདོད་པ་ཐོག་ཏུ་མི་ཁེལ་བའི་སྡུག་བསྔལ། མི་འདོད་པ་ཐོག་ཏུ་འབབ་པའི་སྡུག་བསྔལ་སྟེ་བཞི་བསྣན་པའི་བརྒྱད་པོ་དེས་རྟག་ཏུ་མནར་ལ་གཞན་ཡང་ནོར་རྫས་ལ་སོགས་པ་འབྱོར་ན་ནི། དེ་ཉིད་བསྲུང་བ་དང་། སྤེལ་བ་དང་། འཚོ་སྐྱོང་ལ་སོགས་པའི་བྱེད་ལས་ཀྱིས་སྒོ་གསུམ་དུབ་པར་བྱེད་ཅིང་། གལ་ཏེ་རྒུད་ན་ནི། ཕ་རོལ་གྱིས་བརྙེས་ཤིང་སུན་འབྱིན་པ་དང་། ཟས་གོས་སོགས་འཚོལ་བའི་འབད་རྩོལ་གྱིས་གདུང་བར་བྱེད་ལ། གཞན་དུ་དམ་པའི་ཆོས་བསྒྲུབ་པར་བྱས་ན་རྟེན་དེ་ལ་རྫོགས་པའི་བྱང་ཆུབ་འགྲུབ་པའི་ནུས་པ་ཡོད་པའི་ཕྱིར་འགྲོ་བ་གཞན་ལས་ཁྱད་པར་དུ་འཕགས་པའང་ཡིན་ནོ། །གཉིས་པ་ལྷ་མ་ཡིན་རྣམས་ནི་རྒྱུ་ཕྲག་དོག་དང་ལྟ་བས་ཀུན་ནས་བསླངས་པའི་ལས་ཀྱིས་གནས་རིགས་དེར་སྐྱེས་བའི་ཕྱིར། ཐོག་མ་ཉིད་ནས་ཕ་རོལ་དང་འཐབ་རྩོད་བྱེད་པའི་བསམ་པ་ཁོ་ནས་གནས་པའི་སྟེང་། ལྷ་རྣམས་ཀྱི་དཔལ་འབྱོར་ཕུན་སུམ་ཚོགས་པ་ལ་མི་བཟོད་པའི་སེམས་ཀྱིས་གཡུལ་གྱི་བྱ་བ་ཁོ་ན་ལ་ཞུགས་པ་ན་སྔོན་གྱི་བསོད་ནམས་ཀྱི་ཁྱད་པར་ལས་ལྷ་རྣམས་ཀྱི་སྟོབས་དང་ནུས་པ་ལ་རྒོལ་མ་ཐུབ་པར་རང་ཉིད་ཕམ་པའི་གནས་འབའ་ཞིག་ཏུ་གྱུར་པས་མགོ་དང་ཡན་ལག་བཅད་པའི་ཚོར་བ་རྩུབ་མོ་དེས་རྟག་ཏུ་གདུང་བ་དང་། ནང་ཕན་ཚུན་དུའང་ཁ་སྨྲས་དང་གླེང་བརྗོད་ཀྱི་རྩོད་པ་རྒྱུན་མི་འཆད་པ་སོགས་མདོར་ན་འཐབ་ཅིང་རྩོད་པའི་སྡུག་བསྔལ་དཔག་ཏུ་མེད་ལ། གནས་རིགས་དེར་འབྱོར་བ་དང་ཤེས་རབ་ལྡན་པ་འགའ་ཞིག་སྲིད་རུང་བདེན་པ་མཐོང་བའི་རྒྱུ་རྐྱེན་ཚོགས་པ་ནི་ཤིན་ཏུ་དཀའ་འོ། །གསུམ་པ་ལྷ་ལའང་ནང་གསེས་ཁམས་གསུམ་ལས། འདོད་ཁམས་པ་རྣམས་ནི་ལོངས་སྤྱོད་དང་དགའ་བདེ་ཆེ་རུང་དེ་ཉིད་ལ་བག་མེད་པར་སྤྱོད་པའི་ངང་དུ་ཚེ་ཡི་འདུ་བྱེད་ཕལ་ཆེར་ཟད་ནས་འཆི་བར་ཉེ་བ་དང་། ལྷ་རང་གི་འཆི་ལྟས་ཐུན་མོང་མ་ཡིན་པ་ལྔ་འབྱུང་ཞིང་དེ་དག་མཐོང་བའི་མོད་ལ་བྲེད་ཅིང་དངངས་པར་གྱུར་པ་ན། ལྷ་གྲོགས་ཟླ་བོ་རྣམས་ཀྱིས་ཀྱང་རིང་དུ་སྤངས་ནས་ལེགས་སྨོན་གསོལ་བ་ཙམ་བགྱིད་ལ། སྐབས་དེར་ནི་སྟོབས་དང་ནོར་གྱིས་བསླུ་པ་ལ་སོགས་པའི་ཐབས་དང་བྲལ་ནས་འཆི་བར་འགྱུར་བ་དང་། ཤི་ནས་ཀྱང་ལས་ཀྱི་ཕྱི་བཞིན་འབྲངས་ཏེ་ངན་སོང་ལ་སོགས་པར་སྐྱེ་བར་འགྱུར་བའི་ཚུལ་རང་གི་མངོན་ཤེས་ཀྱིས་མཐོང་སྟེ་ཤིན་ཏུ་སྡུག་བསྔལ་བའི་ཚོར་བ་མྱོང་བཞིན་ལྷའི་ཞག་བདུན་དུ་གནས་དགོས་པ་སྟེ། དེ་ནི་སུམ་ཅུ་རྩ་གསུམ་པ་ལྟ་བུར་མཚོན་ན་མི་ལོ་བདུན་བརྒྱའི་ཡུན་ཚད་ཡིན་པའི་ཕྱིར་རབ་ཏུ་ཡུན་རིང་ཞིང་བཟོད་པར་དཀའ་འོ། །དེ་ལས་ཀྱང་ས་ལ་བརྟེན་པའི་གནས་རིགས་གཉིས་ནི་ལྷ་མ་ཡིན་དང་རྩོད་པའི་སྡུག་བསྔལ་ལྡན་པ་ཅན་ཡང་ཡིན་ནོ། །ཁམས་གོང་མ་གཉིས་ནི་རེ་ཞིག་བསམ་གཏན་གྱི་བདེ་བ་དང་། སྤྲུལ་པའི་ལོངས་སྤྱོད་ཀྱིས་འཚོ་ཡང་། དེའི་འཕེན་བྱེད་ཀྱི་རྒྱུ་ཟག་བཅས་ཀྱི་དགེ་བ་དང་། འཇིག་རྟེན་པའི་བསམ་གཏན་ཡིན་པའི་ཕྱིར་ལས་དེ་དག་ཟད་པ་ན་སླར་གནས་རིགས་འོག་མར་ལྟུང་བར་འགྱུར་བའི་སྡུག་བསྔལ་དང་ལྡན་པ་ཡིན་ལ། བདག་མེད་རྟོགས་པའི་ཤེས་རབ་ཀྱིས་མ་ཟིན་པའི་བསམ་གཏན་ལུང་མ་བསྟན་དང་རྗེས་སུ་འབྲེལ་བའི་བག་ལ་ཉལ་གྱི་གཏི་མུག་ཀྱང་མཚུངས་ལྡན་དུ་གནས་པའི་དབང་གིས་དུད་འགྲོ་ལ་སོགས་པར་འཕེན་པའི་ཁྱབ་པ་འདུ་བྱེད་ཀྱི་སྡུག་བསྔལ་དང་ལྡན་པའང་ཡིན་ནོ། །དེ་དག་ལས་གཟུགས་ཁམས་ཀྱི་གནས་རྣམས་སུ་ནི་སྤྱིར་ཡང་འཕགས་པའི་རིགས་ཀྱི་གང་ཟག་དག་མེད་པ་མ་ཡིན་ལ། ཁྱད་པར་གཙང་གནས་ལྔར་ནི་འཕགས་པ་ཁོ་ནས་སྤྱོད་པའི་ཕྱིར་དག་ཞིང་དུ་བཤད་པའང་ཡོད་དོ། །དེ་ལྟར་ནའང་གང་ཟག་རྒྱུད་དག་པ་ཉི་ཚེ་ཞིག་སྲིད་པ་ཙམ་གྱིས་ནི་གནས་དེ་ཁྱད་པར་ཅན་དུ་འཆད་མི་ནུས་ཏེ། དེ་འདྲ་བ་དེ་འགྲོ་བ་གཞན་ལའང་སྲིད་པའི་ཕྱིར་རོ། །དེའི་ཕྱིར་འདི་དག་ནི་དམིགས་ཀྱིས་བསལ་བ་སྟེ་མ་གཏོགས་པའོ། །དེ་ཡན་ཆད་ཀྱིས་གང་ལས་ངེས་པར་འབྱུང་བའི་ཡུལ་ངོས་བཟུང་བ་སོང་ནས། །ད་ནི་དེ་ལས་ངེས་པར་བྱིན་བའི་ཐབས་བློ་སྦྱོང་ཆེད་དུ་སྒོམ་པའི་ཚུལ་ཅུང་ཟད་ཅིག་བརྗོད་པར་བྱ་སྟེ། །འདི་ནི་དེ་ལས་ངེས་པར་འབྱུང་བའི་བསམ་པ་བསྐྱེད་པའོ། །དེ་ལའང་བློ་ལྡོག་གི་ཆོས་བཞི་ཞེས། དལ་འབྱོར་རྙེད་དཀའ་དང་ཚེ་མི་རྟག་པ་གཉིས་བསམ་པས་ཚེ་འདིའི་འདུན་མ་སྒྲུབ་པའི་བློ་སྣ་ལྡོག་པར་བྱེད་ཅིང་། །ལས་འབྲས་བསླུ་མེད་དང་། འཁོར་བའི་ཉེས་དམིགས་གཉིས་བསམ་པས་ནི་ཚེ་ཕྱི་མར་ཡང་སྲིད་པའི་བདེ་འབྲས་སྒྲུབ་པའི་འདུན་མ་ལྡོག་པར་བྱེད་པ་སྟེ། དེས་ན་ཐབས་འདི་དག་བསྒོམས་པས་ཚེ་འདི་ཕྱི་གང་དུའང་སྲིད་པའི་ཕུན་ཚོགས་ལ་མངོན་པར་ཞེན་པའི་སྣང་ཤེས་ལོག་ནས་ཐར་བ་ཁོ་ན་དོན་དུ་གཉེར་བའི་བློ་མཚན་ཉིད་པ་དེ་སྐྱེ་བར་འགྱུར་རོ་ཞེས་འཆད་དོ། །དེའི་ཚུལ་ལ་དམ་པ་གོང་མ་རྣམས་ཀྱི་ཁྲིད་ཡིག་དག་ལས་གོ་རིམ་མ་ངེས་པར་གསུངས་ཏེ། ཁ་ཅིག་ལས་ནི་ཇི་ལྟར་བཤད་པའི་རིམ་པ་འདིར་བཀོད་པ་ལྟར་གསུངས་ལ། ཁ་ཅིག་ཏུ་ནི་ཐོག་མར་འཁོར་བའི་ཉེས་དམིགས་དང་ལས་འབྲས། དེ་ནས་དལ་འབྱོར་རྙེད་དཀའ་དང་མི་རྟག་པ་བསྒོམ་པར་བཤད་དོ། །ལ་ལ་དག་དལ་འབྱོར་རྙེད་དཀའ་སྔོན་དུ་འགྲོ་བ་ཅན་ལས། ལས་འབྲས་དང་འཁོར་བའི་ཉེས་དམིགས་གོ་ལྡོག་ནས་འཆད་དེ། དེ་དག་གང་ལའང་རང་རང་གི་ལུགས་ལྟར་འཐད་ཆོས་རེ་རེ་སྒྲུབ་ཏུ་ཡོད་པས་མཐའ་གཅིག་ཏུ་ཁ་ཚོན་བཅད་པར་མི་བྱའོ། །འདིར་ནི་ཐོག་མའི་དམ་བཅའ་ལྟར་འགོད་པ་ལ་བཞི་ལས། དང་པོ་དལ་འབྱོར་རྙེད་དཀའ་བསམ་པ་ལའང་། ཁྲིད་ཡིག་བྱང་ཆུབ་ལམ་བཟང་དུ་ས་བཅད་བཅུའི་སྒོ་ནས་བསྒོམ་པར་གསུངས་པ་ལྟར་བྱེད་དགོས་ཀྱང་འདིར་རེ་ཞིག་བསྡུས་ཏེ་འདོམས་པ་ལ། ངོ་བོ་དལ་བ་ལ་བསམ་པ། ཁྱད་པར་གྱི་འབྱོར་བ་ལ་བསམ་པ། རྙེད་དཀའི་དཔེ་ལ་བསམ་པ། གྲངས་ཀྱི་ཁྱད་པར་ལ་བསམ་པ་སྟེ་བཞི་ལས། དང་པོ་ནི། ངན་སོང་གསུམ་དང་ལྷ་ཚེ་རིང་བོར་སྐྱེས་ན་ནི་གོང་དུ་བཤད་པའི་རང་རང་གི་སྡུག་བསྔལ་དེ་དང་དེས་མནར་བས་ཆོས་བྱེད་མི་ཁོམས། ལྷ་མིན་ནི་སྟོད་རིས་ལྷ་དང་། སྨད་རིས་དུད་འགྲོའི་རིགས་སུ་བསྡུས་པས་འདིར་ཐ་དད་དུ་མེད་ལ། མིར་སྐྱེས་ཀྱང་མཐའ་འཁོབ་ཏུ་སྐྱེས་ན་སངས་རྒྱས་ཀྱི་བསྟན་པ་མི་དར། དབང་པོ་མ་ཚང་ན་ཆོས་སྒྲུབ་པའི་གེགས་སུ་འགྲོ། ལོག་ལྟ་ཅན་ལ་སྐྱེས་ན་རྒྱལ་བསྟན་ལ་མི་གུས། མུན་བསྐལ་དུ་སྐྱེས་ན་སངས་རྒྱས་དང་ཆོས་ཀྱི་སྒྲ་ཙམ་ཡང་མི་ཐོས་དེ། དེའི་ཕྱིར་དེ་དག་ནི་བར་ཆད་ཀྱི་ཆོས་དེ་དང་དེས་ཆོས་རྣམ་པར་དག་པ་སྒྲུབ་མི་ཁོམས་པའི་རྐྱེན་བྱེད་པའི་ཕྱིར། མི་ཁོམས་པའི་གནས་བརྒྱད་ཅེས་བྱའོ། །དེ་དག་ཏུ་མ་སྐྱེས་པ་ལ་རེ་ཞིག་དལ་བའི་སྒྲས་སྨོས་ཏེ། དེས་ན་རང་གི་ངོ་བོ་ནས་དལ་བའི་ལུས་རྟེན་དེ་ཐོབ་པ་ལ་ཡིད་བཞིན་གྱི་ནོར་བུ་ལག་ཏུ་ལོན་པ་ལས་ཀྱང་ལྷག་པའི་དགའ་བ་ཁྱད་པར་ཅན་བསྒོམ་པར་བྱའོ། །གཉིས་པ་ནི་མི་ཁོམས་པའི་གནས་བརྒྱད་དུ་མ་སྐྱེས་པའི་ཁྱད་པར་གྱི་ལྡོག་པ་ལས་སྨོས་པ་ཙམ་སྡེ་འདི་ལྟར། མི་མ་ཡིན་གྱི་མི་ཁོམས་པའམ། ཕྱིའི་མི་ཁོམས་པ་བཞིར་མ་སྐྱེས་པའི་ཁྱད་པར་གྱི་ལྡོག་པ་ནི་མིར་གྱུར་པ་ཉིད་དོ། །དབང་པོ་མ་ཚང་པ་ལས་ལྡོག་པ་ནི་དེ་ཚང་བའོ། །ཡུལ་མཐའ་འཁོབ་ལས་ལྡོག་པ་ནི་ཡུལ་དབུས་སོ། །ལོག་ལྟ་ཅན་ལས་ལྡོག་པ་ནི་དད་པ་ཅན་ཏེ་ལས་མཐའ་མ་ལོག་པའང་དེའི་ཁྱད་པར་གྱི་ཆོས་སོ། མུན་བསྐལ་ལས་ལྡོག་པ་ནི་སྒྲོན་མེའི་བསྐལ་བ་སྟེ་དེའི་ཁྱད་པར་གྱི་ཆོས་ནི་སངས་རྒྱས་བྱོན་པ་དང་དེས་ཆོས་གསུངས་པ་དང་། བསྟན་པ་གནས་པ་དང་། གདུལ་བྱ་དེའི་རྗེས་སུ་འཇུག་པ་དང་། དེ་ལ་བླང་དོར་སྟོན་པའི་བཤེས་གཉེན་ཡོད་པ་རྣམས་ཡིན་ཏེ། འདིར་སངས་རྒྱས་འཇིག་རྟེན་དུ་བྱོན་ཕྱིན་དེས་ཆོས་མི་གསུངས་པ་མི་སྲིད་པ་སོགས་འོག་མ་རྣམས་ལའང་སྦྱར་བར་བྱའོ། །དེས་ན་བསམ་པར་བྱ་བ་ནི་རང་གི་སྒོར་དལ་བའི་ངོ་བོ་ལ་འབྱོར་བཅུའི་ཁྱད་པར་གྱི་ཆོས་རྣམས་ཚང་བའི་མི་ལུས་རིན་པོ་ཆེ་འདི་ལྟ་བུ་འདི་རྙེད་པར་གྱུར་པ་ངོ་མཚར་རེ་ཆེ། འདི་ལ་སྙིང་པོ་དམ་པའི་ལྷ་ཆོས་བཤའ་མ་ཞིག་ཅི་ནས་ཀྱང་བླང་བར་བགྱིའོ་སྙམ་པ་དེ་ཡིན་ནོ། །གསུམ་པ་ནི། རྒྱ་མཚོའི་གཏིང་གི་རུས་སྦལ་ལོང་བ་དང་གཉའ་ཤིང་གི་བུག་པའི་དཔེ་དང་། གྱང་ལོགས་དང་སྲན་མའི་དཔེ་དང་། ཁབ་རྩེ་དང་ཡུངས་འབྲུའི་དཔེ་རྣམས་ཡིན་ནོ། །བཞི་བ་ནི། ཉིན་མཚན་གྱི་སྐར་མའི་མང་ཉུང་དང་། །ས་ཆེན་པོའི་རྡུལ་དང་སེན་མོའི་རྡུལ་གྱི་མང་ཉུང་དང་། འབྲུའི་ཕུང་བོ་ཆེན་པོའི་རྩ་རྩེའི་བྱེ་བྲག་གི་གྲངས་མང་ཉུང་རྣམས་ལ་ལེགས་པར་དཔག་ནས། སྤྱིར་མཐོ་རིས། ཁྱད་པར་མི་ལུས། ཡང་དགོས་དལ་འབྱོར་རྙེད་པར་དཀའ་བ་ལ་ལེགས་པར་བསམ་ནས་ཚེ་འདིར་འབྲས་བུ་མངོན་དུ་སྒྲུབ་པའི་འདུན་མ་ཡང་ཡང་བསྐྱེད་དོ། །གཉིས་པ་ཚེ་མི་རྟག་པ་བསྒོམ་པ་ནི། དེ་ལྟ་བུའི་དལ་འབྱོར་ཕུན་སུམ་ཚོགས་པ་རྙེད་རུང་། སྐྱེས་ཙམ་ཉིད་ནས་འཆི་བའི་སྟ་གོན་ལ་གནས་པའི་ཕྱིར་ད་བར་མ་ཤི་བ་བླ་མ་དཀོན་མཆོག་གི་ཐུགས་རྗེ་དང་སྔོན་བསགས་རྣམ་པར་དཀར་བའི་འབྲས་བུ་རུ་འདུག་ཀྱང་ད་ལྟ་རང་མི་འཆི་བའི་གདེང་ཡེ་མེད་པ་ལ་ལེགས་པར་བསམ་ནས་མགོའམ་གོས་ལ་མེ་ཤོར་ན་དེ་ཉིད་གསོད་པའི་སྦྱོར་བ་ལ་མྱུར་དུ་འཇུག་པ་ལྟར་ཟས་ཟ་འཕྲོ་དང་གོས་གྱོན་ཕྲོ་ཚུན་ཆད་བརྟགས་དཔྱད་མེད་པར་བཞག་ནས་ད་ལྟ་ཉིད་དུ་ཆོས་ལ་འཇུག་པ་ཞིག་དགོས་ཏེ། འདི་ལྟར་མགོ་མེ་འབར་བཞིན་དུ་ཡང་ཟས་ཟ་བ་སོགས་བགྱིད་པ་ནི་དེའི་ཚུལ་མ་ཡིན་པ་ལྟར། འཆི་བདག་བྱུང་བའི་དུས་སུ་ནི་ཟས་གོས་ཀྱི་འཕྲོ་རྣམས་ལ་བསམ་གཞིག་བཏང་ནས་སྡོད་པའི་དབང་ཡོད་པ་མ་ཡིན་ཏེ། དེས་ན་ཙམ་གྱིས་འཇོག་པ་མཉམ་པོ་ལ་ད་ལྟ་རང་དབང་ཡོད་དུས་བཞག་ནས་ཆོས་ལ་འབད་ན་འདི་ཕྱི་ཕན་པའི་དོ་རྒྱ་ཆེན་པོ་འགྲུབ་པ་ལ་སྙིང་ནས་བསམ་པར་བྱའོ། །འདིའི་ཚུལ་ལའང་ས་བཅད་མང་དུ་བྱས་པ་ཡོད་དེ་བསྡོམས་ན། ཕྱི་སྣོད་ཀྱི་འཇིག་རྟེན་ལ་བསམ་སྟེ་མི་རྟག་པ་བསྒོམ་པ་དང་། ནང་བཅུད་ཀྱི་སེམས་ཅན་ལ་བསམ་སྟེ་མི་རྟག་པ་བསྒོམ་པ་སྟེ་གཉིས་ལས། དང་པོ་ལའང་གནས་སྐབས་དུས་བཞིའི་འགྱུར་ལྡོག་ལ་བསམ་སྟེ་མི་རྟག་པ་བསྒོམ་པ་དང་། མཐར་ཐུག་བསྐལ་བའི་མེ་བདུན་ཆུ་གཅིག་གིས་འཇིག་ཚུལ་ལ་བསམ་སྟེ་མི་རྟག་པ་བསྒོམས་པ་སྟེ་གཉིས་ཡོད། ཕྱི་མ་ལའང་དམ་པའི་སྐྱེས་བུ་ལ་བསམ་སྟེ་མི་རྟག་པ་བསྒོམ་པ་དང་། སྐྱེ་དགུའི་བདག་པོ་ལ་བསམ་སྟེ་མི་རྟག་པ་བསྒོམ་པ་དང་། འཆི་བའི་རང་བཞིན་ལ་བསམ་སྟེ་མི་རྟག་བསྒོམ་པ་དང་། དཔེ་དོན་སྣ་ཚོགས་ལ་བསམ་སྟེ་མི་རྟག་པ་བསྒོམ་པ་སྟེ་བཞི་ཡོད་པ་རྣམས་ལ་སོ་སོར་བསམ་ནས་བློ་སྣ་བསྟུང་ཏེ་ད་ལྟ་ནས་ཆོས་ལ་འཇུག་དགོས་པའི་ཕྱིར། རང་བཞིན་དེ་དག་དྲན་བཞིན་པར་ངག་ཏུའང་། ཀྱེ་མ་ཀྱེ་མ་བླ་མ་རིན་པོ་ཆེ༔

ཞེས་པ་ནས། གདམས་པའི་སྙིང་པོ་ལོན་པར་བྱིན་གྱིས་རློབས༔ ཞེས་པའི་བར་བརྗོད་ནས་དོན་ལའང་བསམ་མོ། །གསུམ་པ་ལས་འབྲས་བསླུ་མེད་ལ་བསམ་པ་ནི། སྤྱིར་རང་བཞིན་གྱི་ཁ་ན་མ་ཐོ་བའི་དབང་དུ་བྱས་ཏེ་སྐྱེས་བུའི་སྒོ་གསུམ་དང་འབྲེལ་བའི་མི་དགེ་བའི་ལས་ལམ་བཅུ་དང་། དེ་དག་ལས་ལྡོག་པ་དགེ་བའི་ལས་ལམ་བཅུར་ཡོད་པ་ལས། དང་པོ་ནི་ལུས་ཀྱི་སྒོ་ནས་སྲོག་གཅོད་མ་བྱིན་ལེན་ལོག་གཡེམ་སྟེ་གསུམ། ངག་གི་སྒོ་ནས་རྫུན་ཕྲ་མ་ཚིག་རྩུབ་ངག་འཁྱལ་སྟེ་བཞི། ཡིད་ཀྱི་སྒོ་ནས་བརྣབ་སེམས་གནོད་སེམས་ལོག་ལྟ་སྟེ་གསུམ་རྣམས་བསྡོམས་པས་བཅུ་བོ་དེ་དག་གི་རྣམ་སྨིན་གྱི་འབྲས་བུར། མི་དགེ་བའི་ཀུན་སློང་དུག་གསུམ་གང་རུང་གིས་ཀུན་ནས་བསླང་བའི་བྱེ་བྲག་གིས་ངན་སོང་གསུམ་གང་རུང་དུ་སྐྱེ་བ་དང་། རྒྱུ་མཐུན་ལ་གཉིས་ལས་བྱེད་པ་རྒྱུ་མཐུན་གྱི་འབྲས་བུར་སྔ་མའི་བྱེད་རྒྱུའི་རྣམ་པ་དང་མཐུན་པའི་དངོས་པོ་ལ་འཇུག་པར་སྤྲོ་བ་དང་། མྱོང་བ་རྒྱུ་མཐུན་གྱི་འབྲས་བུར་དེ་ཉིད་གོ་ལྡོག་གི་ཚུལ་དུ་སྨིན་པ་སྟེ། དཔེར་ན་ཕར་སྲོག་བཅད་པས་ཚུལ་རང་ཉིད་ཚེ་ཐུང་ལ་ནད་མང་བ་ལ་སོགས་པའི་ཚུལ་གྱིས་འོག་མ་རྣམས་ལའང་ལས་རེ་རེར་འབྲས་བུ་གཉིས་གཉིས་སྨིན་པའི་ཚུལ་དུ་སྦྱར་བར་བྱའོ། །དབང་འབྲས་སམ་བདག་འབྲས་ནི་ཡུལ་ལ་སྨིན་པ་སྟེ། ལས་མི་དགེ་བ་བཅུ་གང་བསགས་ཀྱང་། དེ་དང་ཆ་འདྲ་བའི་ཡུལ་ལ་དབང་བྱེད་པས་མས། དེ་དང་འདྲ་བའི་ཡུལ་ལ་བདག་པོ་བྱེད་པས་ན་དེ་སྐད་ཅེས་གྲགས་ཏེ། དེ་ཡང་དཔེར་མཚོན་ན་གཞན་གྱི་སྲོག་བཅད་པ་ལས་གཅན་གཟན་དང་མི་རྒོད་ཆོམ་རྐུམ་ལ་སོགས་རང་གི་སྲོག་ལ་རྒོལ་བའི་འཇིགས་པ་ཡོད་སར་སྐྱེ་བ་ལྟ་བུ་དང་། གཞན་འབྱོར་བ་དང་ཕྲལ་ནས་དབུལ་བར་བྱས་པས། རང་ལ་འབྱོར་བ་དབུལ་ཞིང་ཅུང་ཟད་ཡོད་པའང་རྐུན་པོ་དང་འབྲེལ་བ་ལྟ་བུའི་མུ་གེ་ཅན་གྱི་ཡུལ་དུ་སྐྱེ་བ་སོགས་གཞན་དག་ལའང་ཇི་རིགས་པར་སྦྱར་ཤེས་པར་བྱའོ། །སྐྱེས་བུ་བྱེད་པའི་འབྲས་བུ་ནི་ལས་འཕེལ་བའི་ཆ་ནས་བཞག་པ་སྟེ། གཞན་དུ་བྱེད་པ་རྒྱུ་མཐུན་དང་ཕྱོགས་གཅིག་ཏུ་བྱས་ནས་བཤད་པའང་ཡོད་དོ། །ལས་འབྲས་ཀྱི་རྣམ་གཞག་འདི་དག་ནི་ཤིན་ཏུ་ནས་ཀྱང་རྟོགས་པར་དཀའ་བའི་གནས་ཏེ་འདིར་མིང་གི་རྣམ་གྲངས་རག་པ་ཙམ་ཞིག་སྨོས་པར་ཟད་དོ། །དེ་ལ་དཔྱིས་ཕྱིན་པར་ཤེས་པར་འདོད་པ་དག་སྤྱིར་རྟེན་ཅིང་འབྲེལ་འབྱུང་གི་རྒྱུ་དང་འབྲས་བུའི་གྲུབ་ཚུལ་རྣམས་དང་། བྱེ་བྲག་རྒྱུ་དྲུག་དང་རྐྱེན་བཞིས་འབྲས་བུ་ཇི་ལྟར་བསྐྱེད་ཚུལ་དང་། ལས་འབྲས་རང་ལའང་ལས་བྱས་ཤིང་མ་བསགས་པ་ལ་སོགས་པའི་མུ་བཞི་དང་། ལྟར་སྣང་དགེ་ཡང་ངོ་བོ་སྡིག་པ་ལ་སོགས་པའི་མུ་བཞི་ཡོད་པ་སོགས་ལ་ལྟོས་ནས། སྨིན་པར་ངེས་པ་དང་མ་ངེས་པའི་ལས་གཉིས་སུ་བཞག་པ་སོགས་ཕྲ་ཞིབ་ཀྱི་རྣམ་པར་མདོ་སྡེ་དང་བསྟན་བཅོས་ཆེན་པོ་དག་ལས་ཇི་ལྟར་བཤད་པ་བཞིན་རྟོགས་པར་བྱས་ནས་སྤང་བླང་ཚུལ་བཞིན་བྱའོ། །གཉིས་པ་དགེ་བའི་ལས་འབྲས་ནི། ཕལ་ཆེར་རྒྱུ་མི་དགེ་བ་ལས་ལྡོག་པ་ཉིད་དང་། འབྲས་བུ་མི་དགེ་བའི་འབྲས་བུ་ལས་ལྡོག་པ་ཉིད་ཡིན་པའི་ཕྱིར་སྨྲོས་མ་དགོས་ཀྱང་། རྣམ་སྨིན་གྱི་འབྲས་བུ་མཐོ་རིས་གསུམ་དང་ཐར་བ་གང་རུང་དུ་སྐྱེ་བ་སོགས་བསམ་སྦྱོར་གྱི་ཁྱད་པར་ལས་བསོད་ནམས་ཆ་མཐུན་གྱི་དགེ་བ་དང་། ཐར་བ་ཆ་མཐུན་གྱི་དགེ་བ་གཉིས་སུ་འགྱུར་བ་འདི་ཤེས་དགོས་སོ། །དེ་ཡང་བསམ་པ་མཐོ་རིས་ཀྱི་བདེ་བ་དོན་དུ་གཉེར་བའི་བློས་སྦྱོར་བ་དགེ་བའི་ལས་བཅུ་ཆུང་འབྲིང་ཆེན་པོར་སྤྱད་པས་མཐོ་རིས་གསུམ་གང་རུང་དུ་སྐྱེ་བ་སྟེ། དེ་ལ་ཡང་ཚུལ་ཁྲིམས་དང་ཏིང་ངེ་འཛིན་གྱི་ཁྱད་པར་ལས་ལྷ་གནས་གོང་མའི་བྱེ་བྲག་འབྱེད་ཅིང་། ཚུལ་ཁྲིམས་ལའང་སྤྱིར་བཏང་ངེས་འབྱུང་དང་བསམ་གཏན་དང་ཟག་མེད་ཀྱི་ཁྱད་པར་རྣམས་དང་། ཏིང་ངེ་འཛིན་ལའང་ཚངས་གནས་བཞིའི་ཏིང་ངེ་འཛིན་དང་། བསམ་གཏན་བཞིའི་ཏིང་ངེ་འཛིན་དང་། གཟུགས་མེད་བཞིའི་ཏིང་ངེ་འཛིན་ལ་སོགས་པའི་ཁྱད་པར་ཡོད་པ་རྣམས་ཤེས་པར་བྱས་ནས་སྐབས་འདིར་བསམ་གཏན་གྱི་བྱེ་བྲག་ལས་ལྷ་དང་མིའི་ཐེག་པའི་ཁྱད་པར་འབྱེད་པའང་གོ་དགོས་ཏེ། འདི་དག་ནི་བསོད་ནམས་ཆ་མཐུན་གྱི་དགེ་བའོ། །དེ་བཞིན་དུ་བསམ་པ་མྱང་འདས་གསུམ་གང་རུང་ལ་དམིགས་པའི་བློས་སྦྱོར་བ་དགེ་བཅུ་སྤྱི་དང་། ཁྱད་པར་ངེས་འབྱུང་གི་ཚུལ་ཁྲིམས་དང་ལྡན་པས། མཐར་གྱི་གནས་པའི་སྙོམས་འཇུག་དགུ་ལ་སོགས་ཏིང་ངེ་འཛིན་གྱི་བྱེ་བྲག་དང་། བདག་མེད་རྟོགས་པའི་ལྟ་བས་ཟིན་པའི་དགེ་ཚོགས་རྣམས་ཏེ་འདི་དག་ལ་ནང་གསེས་ཟག་པ་ཡོད་མེད་ཀྱི་སྒོ་ནས་དབྱེ་བ་དང་། འཇིག་འདས་ཀྱི་སྒོ་ནས་དབྱེ་བ་སོགས་དུ་མ་ཡོད་ཀྱང་རེ་ཞིག་དེ་ཙམ་མོ། །མདོར་ན་རང་གཞན་ཐར་བའི་བསམ་སྦྱོར་དང་ལྡན་པའི་དགེ་བ་འདི་དག་ཐར་བ་ཆ་མཐུན་གྱི་དགེ་བ་ཡིན་ཏེ། དེས་འབྲས་བུ་ཡང་མྱ་ངན་ལས་འདས་པ་ཉིད་མངོན་དུ་བྱེད་པ་ཡིན་ནོ། །དོན་བཞི་བ་འཁོར་བའི་ཉེས་དམིགས་ལ་བསམ་པ་ནི། དེ་ལྟར་ལས་འབྲས་ཀྱི་སྤང་བླང་ཚུལ་བཞིན་མ་བྱས་ན། ལས་ནི་དོན་མེད་དུ་ཆུད་འཛའ་བའམ་གཞན་ལ་འཕོ་བ་མི་སྲིད་ཏེ། རང་ཉིད་ཁོ་ནའི་ཟག་བཅས་ཀྱི་ཕུང་བོ་འབའ་ཞིག་པའི་སྟེང་དུ་སྨིན་པར་འགྱུར་བའི་ཕྱིར་རང་བཞིན་དུ་སེམས་ལ་གང་དྲན་བྱས་པས་འོང་བ་མེད་དེ་ད་ལྟ་རང་རེ་ཚོའི་ལུས་ལ་མེ་སྟག་ཕྲ་མོས་རེག་པའམ། ཐ་ན་ཚེར་མ་ཙམ་ཞིག་ཟུག་ནའང་དེ་མ་ཐག་མི་བཟོད་པར་དེ་ཉིད་བསལ་བའི་ཐབས་ལ་བརྩོན་པར་བྱེད་ན། མི་དགེ་བའི་ལས་ཀྱི་འབྲས་བུར་ངན་སོང་གསུམ་གྱི་གནས་སུ་སྐྱེས་པར་གྱུར་ན་དེའི་སྡུག་བསྔལ་ཇི་ལྟར་བཟོད། འདི་ལྟར་མི་དགེ་བ་བཅུའི་ལས་ཀྱི་རྣམ་པར་སྨིན་པའི་འབྲས་བུར་ངན་སོང་གསུམ་གང་རུང་དུ་སྐྱེ་བར་འགྱུར་ཚུལ་ནི་གོང་དུ་སྨྲོས་པ་ལྟར་ཏེ། དེས་ན་ཀུན་སློང་ཞེ་སྡང་གིས་ཀུན་ནས་བསླང་བའི་མི་དགེ་བའི་ལས་ཀྱིས་དམྱལ་བར་སྐྱེས་ན་དེའི་ཚ་གྲང་གི་སྡུག་བསྔལ་ལ་ལེགས་པར་སོམས་ཤིག་དང་། ཚ་དམྱལ་བརྒྱད་ལ་སྐྱེས་ན་ནི་དེ་འདྲ། གྲང་དམྱལ་བརྒྱད་ལ་སྐྱེས་ན་ནི་དེ་འདྲ། ཉི་ཚེ་ཉེ་འཁོར་དག་ལ་སྐྱེས་ན་ནི་དེ་འདྲ་སྟེ་ལས་དེའི་བསམ་སྦྱོར་དག་རང་ཅག་དང་ཡང་ཤིན་ཏུ་འབྲེལ་ཟབ་པའི་ཕྱིར་མི་འདོད་བཞིན་དུ་དེ་དག་གི་བསྡུག་བསྔལ་དག་ཀྱང་མྱོང་བར་འགྱུར་བ་སྨྲོས་མ་དགོས་པའི་ཚུལ་ལ་བསམ་སྟེ་སྐྱོ་བ་བསྐྱེད་པར་བྱའོ། །དེ་བཞིན་དུ་འདོད་ཆགས་ཀྱིས་ཀུན་ནས་བསླང་བའི་མི་དགེ་བའི་ལས་ཀྱང་རང་རེས་ཇི་ལྟར་བསགས་པ་ལ་ལེགས་པར་སོམས་ཤིག་དང་། དེའི་རྣམ་སྨིན་གྱི་འབྲས་བུར་ཡི་དྭགས་སུ་སྐྱེས་ན་ཕྱིའི་སྒྲིབ་པ་ཅན་རྣམས་ནི་དེ་འདྲ། ནང་གི་སྒྲིབ་པ་ཅན་རྣམས་ནི་དེ་འདྲ། དགོས་ཁུར་གྱི་སྒྲིབ་པ་ཅན་རྣམས་ནི་དེ་འདྲ། མཁའ་རྒྱུ་རྣམས་སུ་སྐྱེས་ནའང་བདེ་བར་བསྟི་བའི་སྐབས་ནི་ཅུང་ཟད་ཙམ་ཡང་མེད་དེ་དེས་ན་གནས་རིགས་དེ་དག་ཏུ་སྐྱེས་ནས་སྡུག་བསྔལ་དེ་རྣམས་ལ་སྤྱོད་དུས་ཇི་ལྟར་བཟོད་སྙམ་དུ་སྐྱོ་ཤེས་བསྐྱེད་བར་བྱའོ། །གཞན་ཡང་གཏི་མུག་གིས་ཀུན་ནས་བསླང་བའི་མི་དགེ་བའི་ལས་བསགས་པ་ལའང་ཚད་མེད་ན། དེའི་རྣམ་པར་སྨིན་པས་དུད་འགྲོར་སྐྱེས་ན་བྱིང་གནས་པ་རྣམས་ནི་དེ་འདྲ། ཁ་འཐོར་བ་རྣམས་ནི་དེ་འདྲ་སྟེ། དེ་དག་རེ་རེའི་སྡུག་བསྔལ་གྱི་ཕུང་བོ་བརྒྱར་བགོས་པའི་ཆ་གཅིག་ཙམ་ཞིག་ད་ལྟ་རང་རེས་དང་དུ་བླངས་ནའང་བཟོད་པར་འདུག་གམ་ལེགས་པར་སོམས་ཤིག་དང་། ཉིན་གཅིག་གི་ཁུར་འཁུར་བའམ་ཞག་ཁ་ཤས་ཀྱི་ལྟོ་གཅོག་པ་ལའང་དཀའ་ལས་ཅི་ཙམ་ཞིག་འདུག གནས་ཚུལ་འདིར་བསམ་ན་ད་ལྟ་རང་དབང་ཡོད་དུས་ཀྱི་སྡུག་ལས་ཕྲ་མོ་རེས་དཀའ་ལུགས་འདིས་ཕྱི་མའི་དུས་སུ་དབང་མེད་མི་འདོད་བཞིན་དུ་ངན་སོང་གི་སྡུག་བསྔལ་དེ་དག་ཇི་ལྟར་བཟོད་སྙམ་དུ་སྐྱོ་ཤེས་སྙིང་རླུང་ལངས་པ་ཙམ་དུ་ལྡང་བར་འགྱུར་བ་ཡིན་ནོ། །དེ་ནས་རིམ་བཞིན་མཐོ་རིས་ཀྱི་འགྲོ་བ་རྣམས་ལའང་བདེ་བ་མེད་པའི་ཚུལ་ལེགས་པར་བསམ་ནས་ཞེན་པ་བཟློག་སྟེ། ད་ནི་ངེས་པར་འགྲོ་བ་རིགས་དྲུག་པོ་ལས་ཐར་བའི་གོ་འཕང་ཞིག་སྒྲུབ་དགོས་པར་འདུག་གོ་སྙམ་དུ་བསམ་པའི་ཚེ་དཀོན་མཆོག་ཡོན་ཏན་རྗེས་སུ་དྲན་དགོས་ཏེ། དེ་ཡང་འཇིག་རྟེན་ན་ལྷ་ཆེན་པོ་ཚངས་པ་དང་། དབང་ཕྱུག་དང་། ཁྱབ་འཇུག་ལ་སོགས་པ་མཐུ་དང་རྫུ་འཕྲུལ་དཔག་ཏུ་མེད་པས་རང་རང་གི་གནས་རིས་སྲུང་བར་བྱེད་པ་རྣམས་དང་། ཕྱི་རོལ་པའི་དྲང་སྲོང་ཆེན་པོ་མངོན་ཤེས་ལྔ་དང་ལྡན་པ་དག་གིས་མཚོན་རིག་བྱེད་ཀྱི་རྣམ་གྲངས་ལ་མཁས་པའི་རྩེ་མོར་སོན་པ་རྣམས་དང་། མིའི་དབང་པོ་འཁོར་ལོས་བསྒྱུར་པའི་རྒྱལ་པོ་ལ་སོགས་འགྲོ་བ་གཞན་དག་གིས་ཀྱང་རུང་སྟེ། རང་རང་གིས་བསྔགས་པའི་ཡོན་ཏན་ཆེན་པོའི་ཆེན་པོ་དང་ལྡན་པར་རློམས་པ་རྣམས་ཀྱང་། རང་ཉིད་སྲིད་པའི་གོ་འཕང་ལས་མ་ཐར་བ་ཙམ་དུ་མ་ཟད། སྲིད་པའི་སྐྱེ་འཇུག་ལ་རང་དབང་མེད་པར་ལས་ཀྱི་ཕྱི་བཞིན་དུ་འབྲངས་ནས་ཕྱི་མའི་སྡུག་བསྔལ་མུ་མེད་པ་ལ་སྤྱོད་དགོས་ན། གཞན་དག་སྲིད་པའི་སྡུག་བསྔལ་ལས་སྒྲོལ་བའི་མཐུ་མེད་པ་སྨོས་ཅི་དགོས། དེས་ན་རང་ཉིད་སྲིད་པའི་སྡུག་བསྔལ་གྱི་འཕྲང་ལས་ཐར་ཏེ་འགྲོ་བ་གཞན་ཡང་སྡུག་བསྔལ་དེ་ལས་སྒྲོལ་བའི་མཐུ་དང་ཐུགས་རྗེར་ལྡན་པ་ནི་རྫོགས་པའི་སངས་རྒྱས་བཅོམ་ལྡན་འདས་ཉག་གཅིག་སྟེ། དེའི་ཕྱིར་རང་རེ་ཐར་བ་དོན་དུ་གཉེར་བ་རྣམས་ཀྱི་སྐྱབས་གནས་སུ་འོས་པ་ནི་འདི་ཁོ་ནའོ་སྙམ་དུ་བསམ་པ་ནི་ལམ་གྱི་རྨིང་རྡོ་ལྟ་བུ་ཡིན་ནོ། །དེ་བཞིན་དུ་སངས་རྒྱས་དེས་གསུངས་པའི་ཆོས་ནི་སྐྱོབས་པའི་ཐབས་ཡིན་ལ། དགེ་འདུན་རྣམས་ནི་ཐབས་དེ་སྒྲུབ་པའི་གྲོགས་ཡིན་ནོ། །དེ་དག་སོ་སོའི་ཡོན་ཏན་ཀྱང་རིམ་པ་བཞིན། དཀོན་མཆོག་གསུམ་རྗེས་སུ་དྲན་པ་ལས། འདི་ལྟར་སངས་རྒྱས་བཅོམ་ལྡན་འདས་དེ་བཞིན་གཤེགས་པ་ཞེས་པ་ནས་འདི་དག་ནི་སངས་རྒྱས་བཅོམ་ལྡན་འདས་ཀྱི་སྐུ་ཆེ་བའི་ཡོན་ཏན་ཡང་དག་པ་རྣམས་སོ། །ཞེས་པའི་བར་གྱིས་སངས་རྒྱས་ཀྱི་ཡོན་ཏན་དང་། དམ་པའི་ཆོས་ནི་ཐོག་མར་དགེ་བ་ཞེས་པ་ནས། རྒྱུ་བ་བཅད་པའོ། །ཞེས་པའི་བར་གྱིས་ཆོས་ཀྱི་ཡོན་ཏན་དང་། ཐེག་པ་ཆེན་པོའི་དགེ་འདུན་ནི། ལེགས་པར་ཞུགས་པ། ཞེས་པ་ནས་ཀུན་ཏུ་ཡང་སྦྱིན་པའི་གནས་སུ་གྱུར་པ་ཆེན་པོའོ། །ཞེས་པའི་བར་གྱིས་དགེ་འདུན་གྱི་ཡོན་ཏན་བསྟན་པ་ལྟར་རོ། །དེ་ལྟར་ན་རང་རེ་ནང་བ་སངས་རྒྱས་པ་ཞིག་ཡིན་ཕྱིན་ཆད། དེའི་སྐྱབས་གནས་སུ་གྱུར་པའང་། སྐྱབས་སྟོན་པ་པོ་དང་། སྐྱབས་དངོས་དང་། སྐྱབས་ལ་འགྲོ་བའི་གྲོགས་ཀྱི་ཟླས་ཕྱེ་བའི་གསུམ་པོ་དེ་ལས་མི་འདའ་འོ། །འདིར་ཁ་ཅིག་ན་རེ། །གཞུང་དེར་ནི་རྩ་བ་གསུམ་གྱིས་མཚོན་པས་གསང་སྔགས་ཀྱི་སྐྱབས་གནས་ཐུན་མོང་མ་ཡིན་པ་རྣམས་མ་འདུས་སོ་ཞེ་ན། བཤད་པ། དེ་ནི་འདིར་འདུ་སྟེ། འདི་ལྟར་ལུགས་དེར་བཤད་པའི་བླ་མ་ནི་སྐྱེ་འཕགས་གང་རུང་ལས་མ་འདས་པའི་ཕྱིར་སངས་རྒྱས་དང་དགེ་འདུན་གང་རུང་ལས་མི་འདའ་ལ། རྣམ་པ་གཞན་དུ་ན་གུ་རུའི་སྒྲ་ལྕི་བ་ལ་བཤད་པ་འདིར་ཡོན་ཏན་གྱི་ཁུར་གྱིས་ལྕི་བར་འཆད་པས། དེ་ནི་དཀོན་མཆོག་གསུམ་ག་ལ་འཇུག་སྟེ། དཔེར་ན་དཀོན་མཆོག་གསུམ་ལ་བླ་མར་བྱེད་དོ། །རི་མོར་བྱེད་དོ། །ཞེས་པ་ལྟ་བུས་མཚོན་ནོ། །དེ་བཞིན་དུ་ཡི་དམ་ནི་རང་སྡེའི་ལུགས་སུ་སྤྱིར་བཏང་ཡེ་ཤེས་པ་གཅིག་ཡིན་པར་འདོད་དགོས་ལ། བྱེ་བྲག་རྣམ་འགྱུར་གྱི་སྒོ་ནས་ཞི་ཁྲོ་གང་རུང་ལས་མ་འདས་སྟེ། དེས་ན་དེ་ནི་སངས་རྒྱས་སུ་འདུའོ། །དཔའ་བོ་མཁའ་འགྲོ་ནི་རིག་འཛིན་ནང་གི་དགེ་འདུན་དུ་གཤིན་རྗེ་གཤེད་ཀྱི་རྒྱུད་ལ་སོགས་པ་ནས་གསལ་བོར་གསུངས་ཕྱིར་དེར་འདུ་ལ། གཞུང་དུ་སྐུ་གསུམ་ལ་སྐྱབས་སུ་འགྲོ་བར་བཤད་པ་ནི་སངས་རྒྱས་ཀྱི་བྱེ་བྲག་དང་། རྩ་ཐིག་རླུང་གསུམ་དང་། ངོ་བོ་རང་བཞིན་ཐུགས་རྗེ་གསུམ་ལ་སྐྱབས་སུ་འགྲོ་བར་བཤད་པ་ནི། རྩ་སྤྲུལ་སྐུ། རླུང་ལོངས་སྐུ། ཐིག་ལེ་ཆོས་སྐུར་སྦྱར་ནས་གསུངས་པ་དང་། ངོ་བོ་ཆོས་སྐུ། རང་བཞིན་ལོངས་སྐུ། ཐུགས་རྗེ་སྤྲུལ་སྐུར་སྦྱར་ནས་གསུངས་པའི་ཕྱིར་འདི་དག་ཀྱང་དེ་ལས་མ་འདས་སོ། །གལ་ཏེ་རྩ་ཐིག་རླུང་གསུམ་སོགས་རང་རྒྱུད་དུ་བཟུང་ནས་དེ་ལ་སྐྱབས་སུ་འགྲོ་ན་ནི་དེ་ཉིད་སྐྱབས་འགྲོ་ཡང་དག་པའང་མ་ཡིན་ནོ། །འོན་ཀྱང་བྱེ་བྲག་དེ་ལྟར་བཤད་པ་ལ་དགོས་པ་མེད་པའང་མ་ཡིན་ཏེ། དེ་དང་དེའི་རང་བཞིན་ཤེས་པར་བྱས་ནས། དག་སྣང་བསྐྱེད་པའི་ཕྱིར་དང་། ཁྱད་པར་རྩ་བ་གསུམ་ལྟ་བུར་མཚོན་ན། སྤྱིར་བཏང་བླ་མ་རྣམས་སངས་རྒྱས་དང་དགེ་འདུན་གང་རུང་ལས་མ་འདས་ཀྱང་། བྱེ་བྲག་རང་གི་སྒོར་སྨིན་གྲོལ་གྱི་གདམས་པ་དངོས་སུ་སྦྱིན་པའི་བླ་མ་དེ་ལྷག་པར་བཀའ་དྲིན་ཆེ་བའི་དབང་དུ་བྱས་ཏེ་སྐུ་དྲིན་གསོ་བའི་ཆེད་དང་དེ་ཉིད་བྱིན་རླབས་ཀྱི་རྩ་བར་ཤེས་པའི་ཕྱིར་སྐྱབས་སུ་འགྲོ་བ་དང་། ཡི་དམ་ཞི་ཁྲོ་ཐམས་ཅད་སངས་རྒྱས་ལས་མ་འདས་མོད་དེ། རང་གི་མེ་ཏོག་གང་ལ་ཕོག་པའི་ཚེ་རབས་སྔོན་གྱི་ལས་འབྲེལ་ཡོད་པའི་ལྷ་དེ། དངོས་གྲུབ་ཐམས་ཅད་ཀྱི་རྩ་བར་ཤེས་ནས་ལྷག་པའི་ལྷར་འཛིན་པ་དང་། དཔའ་བོ་མཁའ་འགྲོ་ཐམས་ཅད་རིག་འཛིན་ནང་གི་དགེ་འདུན་དུ་ཤེས་ནས་སྐྱབས་སུ་སོང་བ་ཡིན་ཡང་། རང་ལ་ལྷག་པར་ཉེ་ཞིང་འགོ་བ་དེ་བར་ཆད་སེལ་བའི་རྩ་བར་ཤེས་ནས་བསྒྲུབ་ཅིང་མཆོད་པ་སྟེ། འདི་དག་ནི་སྤྱི་ལས་བྱེ་བྲག་ཏུ་བྱས་པའོ། །དེས་ན་བརྗོད་པའི་བྱེ་བྲག་ཙམ་མ་གཏོགས་སྔར་སྨྲོས་པའི་སྐྱབས་གསུམ་ཉིད་ལ་མ་འདུས་པའི་མཐར་ཐུག་གི་སྐྱབས་མེད་པས་ན་དེ་ཉིད་ནི་སྐྱབས་དང་། མགོན་དང་། གླིང་དང་། དཔུང་གཉེན་ཉིད་དུ་ཤེས་པས་སྙིང་ཐག་པ་ནས་སྐྱབས་གནས་དམ་པར་འཛིན་དགོས་ཏེ། དེ་ལྟར་མ་བཟུང་ན་རང་ཅག་སྲིད་པ་ལས་སྒྲོལ་བའི་དེད་དཔོན་གཞན་མེད་པའི་ཕྱིར་རོ། །དེ་ལྟར་ན་དགེ་བའི་བཤེས་གྲོགས་བསྟེན་པ་དང་། འཁོར་བའི་ཉེས་དམིགས་བསམ་ནས་སྐྱོ་ཤེས་བསྐྱེད་པ་དང་། དཀོན་མཆོག་གི་ཡོན་ཏན་རྗེས་སུ་དྲན་ནས་དེ་ཉིད་སྐྱབས་གནས་མཆོག་ཏུ་ངེས་ཤེས་རྙེད་པ་སྟེ། ཐབས་འདི་དག་ལ་བརྟེན་ནས་ངེས་འབྱུང་གི་དད་པ་རྣམ་པར་དག་པ་དེ་སྐྱེ་ལ། དད་པ་དེའི་རྒྱུ་ལས་སྐྱབས་འགྲོ་མཚན་ཉིད་པ་འབྱུང་ངོ་ཞེས་སྔར་བཤད་པ་ལྟར་རོ། །དེས་ན་ཚུལ་དེ་དག་ཀྱང་ཡིད་ལ་ངེས་པར་བྱས་ན་ངེས་འབྱུང་གི་བསམ་པ་གསལ་འདེབས་པའི་ཕྱིར་ངག་ཏུ། འདི་ལྟར་ཁམས་གསུམ་རིགས་དྲུག་སྣང་བ་ཀུནཿ ཞེས་པ་ནས། འགྲོ་ཀུན་རྣམས་མཁྱེན་ས་ལ་འགོད་པར་བྱཿ ཞེས་པའི་བར་བརྗོད། དེ་ནས་བསམ་པ་དེ་ལྡན་གྱིས་སྐྱབས་སུ་འགྲོ་བ་ལ། ཚོགས་ཞིང་གསལ་འདེབས་པ་དང་། སྐྱབས་སུ་འགྲོ་བ་དངོས་བཤད་པ་དང་། ཕན་ཡོན་བསམ་པ་སྟེ་གསུམ་ལས། དང་པོ་ནི། སྤྱིར་སྐྱབས་ཡུལ་གོང་དུ་ངོས་བཟུང་བ་ལྟར་ཡིན་པའི་ཕྱིར། འདིར་ཚོགས་ཞིང་དུ་དམིགས་པ་ནའང་གཙོ་འཁོར་གྱི་རིམ་པ་དེ་ལྟར་འཐད་མོད་དེ་རེ་ཞིག་རྩ་བའི་དོན་ལ་འཇུག་པར་བྱའོ། །དེ་ལ་རང་ཐ་མལ་དུ་གནས་པའི་མདུན་དུ་རྟེན་གྱི་རྣམ་པར་རང་ཚིག་གིས་གསལ་བ་ལྟ་བུའི་དབུས་སུ་སྐྱབས་གནས་ཀུན་འདུས་མ་ཧཱ་གུ་རུ་ལ་ཉིད་ཀྱི་གསང་བ་གསུམ་གྱི་རྣམ་པར་རོལ་པ་རྩ་བ་གསུམ་སོགས་སྐྱབས་ཡུལ་རྒྱ་མཚོའི་རྣམ་པར་སྣང་བས་བསྐོར་བ་སྤྲིན་ཕུང་འཁྲིགས་པ་བཞིན་གསལ་ལུགས་འདོན་སྒོམ་ཟུང་དུ་འཇུག་པའི་ངང་ནས་ངག་ཏུ། ཨེ་མ་ཧོཿ འོད་གསལ་ལྷུན་གྲུབ་བདེ་བ་ཆེན་པོའི་ཞིངཿ སོགས་ནས། མ་འདྲེས་གསལ་སྟོང་ཆུ་ཟླའི་ངོ་བོར་བཞུགསཿ ཞེས་པ་ཡན་བརྗོད་ཅིང་གསལ་གདབ་པར་བྱའོ། །གཉིས་པ་སྐྱབས་སུ་འགྲོ་བ་དངོས་ལའང་། ཐེག་ཆེན་གྱི་སྐྱབས་འགྲོ་ཐུན་མོང་མ་ཡིན་པའི་དབང་དུ་བྱས་ནས་འདིར་སྙིང་རྗེ་ཆེན་པོས་ཀུན་ནས་བསླངས་ཏེ་རང་ཉིད་གཅིག་པུ་འཁོར་བ་ལ་འཇིགས་པ་དང་དཀོན་མཆོག་གི་ཡོན་ཏན་དྲན་པས་ཐར་བ་དོན་དུ་གཉེར་བ་ཙམ་ཁོ་ན་མ་ཡིན་པར། མ་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པ་བསྒྲུབ་པའི་བློས་སྐྱབས་སུ་འགྲོ་བ་སོགས་སྐྱེས་བུ་གསུམ་གྱི་བློས་རིམ་པས་སློབ་ཚུལ་ཇི་སྙེད་ཅིག་མཆིས་པ་དང་། སྐྱབས་སེམས་སྦྲེལ་བའི་དབང་དུ་བྱས་ཏེ་ཚད་མེད་པ་རྣམ་པ་བཞིས་བློ་སྦྱང་བ་དང་། ཚོགས་བསགས་ཡན་ལག་བདུན་པ་འབུལ་བ་སོགས་སྐབས་འདིར་བྱེད་དགོས་ཀྱང་གཞུང་འདི་ན་མི་གསལ་བའི་ཕྱིར་མ་སྤྲོས་སོ། །འོན་ཏེ་ལམ་ལ་ཚུལ་བཞིན་སློབ་འདོད་པ་རྣམས་གཞུང་གཞན་ནས་བཤད་པ་ལྟར། མ་སེམས་ཅན་ཐམས་ཅད་ཀྱི་དོན་དུ་དམིགས་པའི་ཚད་མེད་པ་རྣམ་པ་བཞི་སྔོན་དུ་འགྲོ་བ་ཅན་གྱི་ཚོགས་བསགས་ཡན་ལག་བདུན་པ་བཟང་སྤྱོད་ནས་བྱུང་བ་བཞིན་བཏང་ནས་གདོད་སྐྱབས་སེམས་སྦྲེལ་ནས་བྱས་ན་དོན་ལ་གནས་སོ། །འོན་ཀྱང་བྱང་སྡོམ་ལེན་པའི་ཚིག་ཟིན་མེད་པར་སེམས་བསྐྱེད་པ་ཙམ་ལ་ནི་དེས་ཁྱབ་པ་མེད་དོ། །འདིར་སྐྱེས་བུ་གསུམ་གང་རུང་གི་བློ་ནུས་དང་སྦྱར་བའི་བསམ་པ་སྔོན་དུ་འགྲོ་བས་མ་ཧཱ་གུ་རུ་ཉིད་སྐྱབས་གསུམ་ཀུན་འདུས་སུ་ཤེས་བཞིན་སྐྱབས་འགྲོ་ལ་བརྩོན་པ་དང་། ཚད་མེད་བཞིའི་སྦྱོར་བ་ལས་སྐྱེས་པའི་མ་སེམས་ཅན་ཐམས་ཅད་ཀྱི་དོན་དུ་འབྲས་བུ་སངས་རྒྱས་སྒྲུབ་འདོད་ཀྱི་སྨོན་སེམས་དང་། འབྲས་བུ་དེའི་ཆེད་དུ་རྒྱུ་ཕར་ཕྱིན་དྲུག་ལ་བརྩོན་འདོད་ཀྱི་འཇུག་སེམས་སྟེ། དེ་ལྟ་བུའི་སྨོན་འཇུག་གི་སེམས་བསྐྱེད་དང་ལྡན་པས་སྐྱབས་སེམས་སྟབས་གཅིག་ཏུ་བྱེད་འདུན་དང་བཅས་ངག་ཏུ། ན་མོཿ མཆོག་གསུམ་རྩ་གསུམ་སོགས་ནས། སེམས་བསྐྱེད་དོཿ ཞེས་པའི་བར་གནས་སྐབས་སུའང་གང་ནུས་དང་། སྤྱིར་བཏང་འབུམ་ཐེར་གཅིག་བཟླ་དགོས་པ་ཡིན་ནོ། །གསུམ་པ་ཕན་ཡོན་བསམ་པ་ནི། རང་གཞུང་ལས་འབུམ་ཕྲག་འབད་ན་རྟགས་ཚད་སྣ་རེ་ཐོབཿ ཞེས་པ་སོགས་བཤད་པ་དང་། ཐུན་མོང་དུ། སྐྱབས་སོང་འདི་ལ་གཟུགས་མཆིས་ན། །ནམ་མཁའ་དག་ཀྱང་སྣོད་དུ་ཆུང་། །རྒྱ་མཚོ་ཆེན་པོའི་ཆུ་ཡི་གཏེར། །ཕུལ་ལ་གཞལ་བས་ཟད་མི་འགྱུར། །ཞེས་སོགས་ཕན་ཡོན་བསམ་གྱིས་མི་ཁྱབ་པར་གསུངས་སོ། །འདིར་དེ་ཙམ་ལས་ཐོག་མར་དགེ་བའི་ཁྲིད་ཀྱི་དངོས་གཞི་བྱང་ཆུབ་ཀྱི་སེམས་བསྐྱེད་པའི་ཚུལ་རྣམས་རྒྱས་པར་མ་བཤད་མོད། དེ་ལྟ་ནའང་འདུན་པ་བཅོས་པ་ཙམ་ལ་དེ་དང་དེ་མཚན་ཉིད་པ་འོང་བའི་ཁྱབ་པ་མེད་པའི་ཕྱིར། སྐྱབས་འགྲོའི་སྐབས་སུའང་སྦྱོར་བ་ཐུན་མོང་མ་ཡིན་པ་སྔོན་དུ་བཤད་པ་རྣམས་ལ་གཞི་བཅས་ནས། དངོས་གཞི་དགེ་བའི་བཤེས་གཉེན་ལས་སྐྱབས་སྡོམ་བླངས་ཏེ། དེ་ནས་སྐྱབས་འགྲོ་ལ་བརྩོན་ན་ལྷག་པར་ཕན་ཡོན་ཆེ་བ་དང་། རྗེས་ལ་སྐྱབས་འགྲོའི་བསླབ་བྱ་དགུ་པོ་དག་ལ་བརྩོན་པའང་གལ་ཆེ་ཞིང་། དེར་མ་ཟད་སྔ་འགྱུར་རིང་ལུགས་ལ་འདི་སྐབས་སུ་སོ་སོར་ཐར་བ་རིགས་བདུན་གང་རུང་གི་སྡོམ་པ་ཞུས་ནས་རང་རྒྱུད་ཡོན་ཏན་གྱི་རྟེན་ཅན་དུ་བྱས་ནས་དགེ་ཚོགས་གང་སྒྲུབ་མཐའ་དག་བར་མ་དགེ་བ་ཙམ་དུ་མི་བཞག་པར་ཐར་བ་ཆ་མཐུན་འབའ་ཞིག་ཏུ་འགྲོ་བར་བྱེད་པའང་ཤེས་དགོས་ལ། བསླབ་པ་བླངས་ནས་མི་བསྲུང་བའང་བཅས་པའི་ཁ་ན་མ་ཐོ་བ་ལྷག་པར་མཐུ་ཆེ་བའི་ཚུལ་མ་ཤེས་པའི་སྐྱོན་དུ་སྣང་ཕྱིར་འབད་པ་དྲག་པོ་དང་བཅས་པས་བསླབ་པ་རྣམས་ལ་མཁས་པར་བསླབ་ནས་དྲན་ཤེས་བཞིན་བག་ཡོད་དང་ལྡན་པས་ལྟུང་བ་འབྱུང་བའི་སྒོ་བཞི་བོ་དག་གཉེན་པོས་བཀག་སྟེ། བསླབ་པའི་ངོ་བོ་ཉིད་མིག་འབྲས་བཞིན་བསྲུང་བ་ལ་བརྩོན་པར་བྱའོ། །དེ་ནས་དེའི་སྟེང་དུ་བྱམས་པ་ལ་སོགས་པ་སྒོམ་པ་དང་། གནས་ཡོ་བྱིན་རླབས་སྔོན་དུ་འགྲོ་བས་ཚོགས་ཞིང་སྤྱན་འདྲེན་པའང་རྟེན་གསུམ་གྱི་བརྙན་པོའང་རུང་སྟེ། དེ་ཉིད་ལ་དཀོན་མཆོག་དངོས་ཀྱི་འདུ་ཤེས་བཞག་ནས་ཚོགས་བསགས་ཀྱི་རིམ་པ་མུ་མེད་པ་ལ་འཇུག་བཞིན། དགོངས་གསོལ་དང་སྐྱབས་འགྲོ་སྔོན་དུ་འགྲོ་བས་སྨོན་འཇུག་སྟབས་གཅིག་ཏུ་ལེན་པའམ། སོ་སོར་ལེན་ཡང་རུང་སྟེ། རང་རང་གི་ལུགས་ལྟར་གྱི་དམིགས་དོན་དང་བསླབ་པའི་གོ་རིམ་སོ་སོར་ངེས་དགོས་སོ། །དེ་ལྟ་བུའི་བྱང་ཆུབ་ཀྱི་སེམས་དེ་ལ་རང་གི་ངོ་བོའི་སྒོ་ནས་སྟོང་ཉིད་སྙིང་རྗེའི་སྙིང་པོ་ཅན་ཞེས་གཅིག་ཏུ་བཤད་པ་དང་། ཀུན་རྫོབ་དང་དོན་དམ་གྱི་ཟླས་སྐྱེ་འཕགས་ཀྱི་སེམས་བསྐྱེད་གཉིས་སུ་དབྱེ་བ་དང་། བསླབ་གསུམ་གྱིས་དབྱེ་བས་གསུམ། ཚོགས་སྦྱོར་གྱི་ལམ་ན་མོས་པས་སྤྱོད་པའི་སེམས་བསྐྱེད་སོགས་བཞི། ཚོགས་ལམ་གྱི་དུས་སུ་ལས་དང་པོ་བའི་སེམས་བསྐྱེད་སོགས་ལམ་ལྔའི་རྗེས་འགྲོ་ལྔ། ཕར་ཕྱིན་གྱི་གྲངས་དང་བསྟུན་ནས་དྲུག་གམ་བཅུ། ས་མཚམས་ཀྱི་སྒོ་ནས་ཉི་ཤུ་རྩ་གཉིས་སོགས་སུ་དབྱེ་བ་རྣམས་ཀྱི་གོ་དོན་ངེས་པར་བྱེད་པའང་གལ་ཆེ་ལ། ཁྱད་པར་བསླབ་བྱའི་གནས་ཐམས་ཅད་ཕར་ཕྱིན་དྲུག་ཏུ་བསྡུས་ཏེ་ཡང་བསླབ་པ་གསུམ་དུ་བསྡུས་ནས། དེའི་ཚུལ་ཁྲིམས་ཀྱི་བསླབ་པའི་བྱེ་བྲག་ཉེས་སྤྱོད་སྡོམ་པའི་ཚུལ་ཁྲིམས་ཀྱི་ཁོང་ནས་རྩ་བ་དང་ཡན་ལག་གི་ལྟུང་བ་རྣམས་ངེས་པར་བྱ་བ་དང་། ཏིང་ངེ་འཛིན་གྱི་བསླབ་པའི་ཁོང་ནས་མཐར་གྱི་གནས་པའི་སྙོམས་པར་འཇུག་པ་དགུ་དང་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་སོགས་ངེས་པར་བྱ་བ་དང་། ཤེས་རབ་ཀྱི་བསླབ་པའི་ཁོང་ནས་ཕུང་ཁམས་སྐྱེ་མཆེད་སོགས་འཁོར་འདས་ལམ་གསུམ་གྱིས་བསྡུས་པའི་ཐ་སྙད་ཀྱི་བདེན་པའི་གཞི་རྣམས་དང་། དེ་དག་གི་གནས་ལུགས་དོན་དམ་པའི་བདེན་པ་གཏན་ལ་འབེབ་ཚུལ་གྱི་སྒོ་ནས་ལྟ་གྲུབ་རྣམ་པ་བཞི་ལ་སོགས་པའང་ངེས་པར་བྱེད་དགོས་ཏེ། འདི་ནི་ལམ་གྱི་ལུས་རྣམ་པར་གཞག་པ་ཉིད་ཡིན་པའི་ཕྱིར་གལ་ཆུང་དང་དེས་ཆོག་བྱེད་མི་རུང་སྟེ། འདི་ནས་ས་ལམ་གྱི་རྣམ་གཞག་ལ་ངེས་པ་མ་བྱུང་ན། སླད་ནས་སྔགས་ཀྱི་ས་ལམ་ལའང་གོ་བ་མཚན་ཉིད་པ་མི་སྐྱེ་ལ། འདི་ནས་ལྟ་གྲུབ་ཐུན་མོང་ལ་ངེས་པ་མ་རྙེད་ན། སླད་ནས་སྔགས་ཀྱི་ལྟ་བའི་ཁྱད་ཆོས་ཀྱང་འཇོག་མི་ཤེས་པ་གོ་དགོས་ལ། དེ་ལྟར་མ་ཤེས་པས་ལམ་ཞུགས་ཕལ་ཆེར་ལྟ་སྤྱོད་ཕྱོགས་རེར་ལྷུང་ནས་ལམ་གོལ་ལམ་ནོར་འབའ་ཞིག་སྒྲུབ་པ་དེ་བྱུང་བ་ཡིན་ནོ། །དེ་ལྟར་ན་ཐོག་མར་དགེ་བའི་ཁྲིད་མདོ་ཙམ་འཆད་གྲུབ་བོ། །དོན་གཉིས་པ་གསང་སྔགས་རྡོ་རྗེའི་ཐེག་པ་ཐུན་མོང་གི་ལམ་བར་དུ་དགེ་བའི་ཁྲིད་འཆད་པ་ལ། དེ་ལྟར་ཐོག་མར་དགེ་བའི་ཁྲིད་རྫོགས་པར་ཐོབ་པའི་གང་ཟག་དེ་རྟེན་གཞི་སོ་ཐར་གྱི་སྡོམ་པའི་བྱེ་བྲག་ལ་ལྟོས་ནས་ཁྱིམ་པའམ་རང་བྱུང་གང་རུང་གི་བྱང་ཆུབ་སེམས་དཔའི་ངོ་བོར་གནས་པ་དེ་ཉིད་སླར་ཡང་རྡོ་རྗེ་ཐེག་པའི་དཀྱིལ་འཁོར་ཆེན་པོར་ཞུགས་ནས་དབང་བཞི་རྫོགས་པར་ནོས་ཏེ་གསུམ་ལྡན་རྡོ་རྗེ་འཛིན་པའི་ངོ་བོར་སྒྲུབ་པར་བྱེད་པ་ལ། ཐོག་མར་ཕན་དབང་ཙམ་གྱིས་གོ་ཕྱེ་ནས་རང་རྒྱུད་དག་པར་བྱ་བའི་ཕྱིར་བླ་མ་རྡོ་རྗེ་སེམས་དཔའི་སྒོམ་བཟླས་ལ་བརྩོན་པ་དང་། ཚོགས་གསོག་ཐུན་མོང་མ་ཡིན་པ་ཕྱི་ནང་གསང་བའི་མཎྜལ་འབུལ་བ་དང་། བྱིན་རླབས་ཀྱི་སྒོ་འབྱེད་པའི་ཕྱིར་བླ་མའི་རྣལ་འབྱོར་ལ་འབད་པ་རྣམས་ལམ་འདིའི་ཐུན་མོང་མ་ཡིན་པའི་སྦྱོར་བའམ་སྔོན་འགྲོའང་ཡིན་ནོ། །དེས་ན་དེའི་ཚུལ་ཅུང་ཟད་ཅིག་འཆད་པ་ལ། དང་པོ་དབང་བསྐུར་བ་ལ་སོགས་པའི་སྔོན་དུ་སློབ་དཔོན་དང་སློབ་མའི་མཚན་ཉིད་ཀྱི་འབྲེལ་བ་བརྟགས་དགོས་ཏེ། དེ་ཡང་སྔར་ཐུན་མོང་གི་ལམ་སྟོན་པའི་སློབ་དཔོན་དེར་རྡོ་རྗེ་ཐེག་པའི་དབང་ལ་སོགས་པ་སྦྱིན་ནུས་པའི་མཚན་ཉིད་དང་ལྡན་ན་ནི་དེས་འཐུས་ལ། གལ་ཏེ་མི་ལྡན་ཕྱིན་སློབ་དཔོན་གཞན་ཚོལ་དགོས་ཀྱི་ཕྱོགས་ཞེན་ཙམ་གཙོ་བོར་བྱས་པས་ནི་རང་གཞན་གཉིས་ཀ་ཕུང་བའི་རྒྱུ་ལས་དགོས་པ་གཞན་མེད་པའི་ཕྱིར་དེ་ལྟར་མི་བྱའོ། །མཚན་ཉིད་དེ་ཡང་རང་རང་གི་འདོད་ཞེན་གྱིས་སྦྱར་བ་ཙམ་མ་ཡིན་པར་གསང་ཆེན་རྡོ་རྗེ་ཐེག་པའི་རྒྱུད་སྡེ་ནས་བཤད་པའི་སློབ་དཔོན་གྱི་མཚན་ཉིད་རང་བཞིན་བརྒྱད་ལྡན་ནམ། དེ་ཉིད་བཅུ་ལྡན་ལྟ་བུ་དང་། སློབ་མའི་མཚན་ཉིད་ཆོས་དྲུག་ལྡན་ལྟ་བུ་ཞིག་དགོས་སོ། །དེས་ཀྱང་དེ་ཉིད་བསྟེན་པའི་ཚུལ་ཐུན་མོང་དུ་གྱུར་པ་རྣམས་གོང་དུ་སྨྲོས་པ་ལྟར་དང་། ཐུན་མོང་མ་ཡིན་པ་རྣམས་ཀྱང་ཅི་རིགས་པར་ངེས་པར་བྱས་ནས་དམ་པ་གོང་མ་རྣམས་ཀྱི་རྣམ་ཐར་བཞིན་རྡོ་རྗེ་སློབ་དཔོན་གྱི་ཐུགས་སྐད་ཅིག་ཀྱང་མི་དཀྲུག་པ་བསྟེན་དགོས་ཀྱི། རང་བཞིན་དུ་བག་མེད་པ་བྱས་ན་ནི་ལམ་འདི་ཁེ་ཉེན་གཉིས་ཀ་ཆེ་བའི་ལམ་ཡིན་པའི་ཕྱིར་དངོས་གྲུབ་ཐོབ་པ་ལྟ་ཅི་སྨོས་ཏེ། ངན་སོང་དུ་འགྲོ་བ་ལའང་ཚེགས་ཡོད་པ་མ་ཡིན་ནོ། །དེས་ན་བྱ་སྤྱོད་གང་ཡང་དྲན་པས་ཟིན་བཞིན་བྱེད་དགོས་ཏེ། དེ་ཡང་དབང་ལ་སོགས་པའང་འཕྲལ་རྫོགས་མི་བགྱིད་པར་སྔོན་ནས་སྙན་གསན་དབབ་ཏེ་རིམ་བཞིན་ཞུ་བ་དང་། དབང་སོ་སོའི་དབང་དོན་གྱི་ཡེ་ཤེས་ངོ་འཕྲོད་ངེས་བྱེད་པ་དང་། དབང་སྲོག་དམ་ཚིག་གི་འཛིན་པའི་ཕྱིར་རྩ་བ་དང་ཡན་ལག་གི་དམ་ཚིག་རྣམས་ཤེས་པར་བྱས་ནས་ཚུལ་བཞིན་བསྲུང་བ་རྣམས་ནི་ལམ་འདིའི་སྲོག་ཤིང་ལྟ་བུ་ཡིན་པས་སྤོམ་ཡོར་དུ་མ་སོང་བ་ཞིག་གལ་ཆེའོ། །དེ་ནས་གོང་དུ་སྨྲོས་པའི་ཡན་ལག་གི་དོན་ལ་འཇུག་པ་ལས། དང་པོ་རྡོ་རྗེ་སེམས་དཔའི་སྒོམ་བཟླས་ལ་གནད་རྣམ་པ་བཞི་ཡོད་དེ། རྡོ་རྗེ་སེམས་དཔའི་མངོན་རྟོགས་བཞིན་བཤགས་པ་བྱེད་པའི་ཡུལ་དཔང་པོའི་ཚུལ་དུ་སྒོམ་པ་ནི་གཉེན་པོ་རྟེན་གྱི་སྟོབས། དེའི་ཐུགས་ཀར་སྔགས་ཕྲེང་འཁོར་བ་ལས་འོད་ཟེར་སྤྲོ་བསྡུས་དོན་གཉིས་བྱས་ཏེ་སླར་ཡང་བདུད་རྩི་འོ་མའི་རྒྱུན་བཞིན་བབས་པས་རང་བཞན་རྣམས་ཀྱིས་དུས་གསུམ་དུ་སྒོམ་གསུམ་དང་འབྲེལ་བའི་མི་དགེ་བའི་ལས་ཅི་བསགས་པ་རྣམས་ཀྱི་སྡིག་སྒྲིབ་དང་རྣམ་སྨིན་ནད་གདོན་ལ་སོགས་པ་དང་བཅས་ཏེ་དྲི་མ་ཆུས་བཀྲུས་པ་བཞིན་དུ་སྦྱང་བར་བསམ་པ་ནི་གཉེན་པོ་ཀུན་ཏུ་སྤྱོད་པའི་སྟོབས་དང་། རྟེན་གྱི་དྲུང་དུ་རང་གིས་བསགས་པའི་ཉེས་ལྟུང་རྣམས་ལ་ཁོག་ཏུ་དུག་སོང་བ་ལྟ་བུའི་གནོང་འགྱོད་དྲག་པོ་དང་བཅས་ཏེ་མ་གསང་མི་སྦེད་པར་ཉེས་པའི་དངོས་པོ་བརྗོད་དེ་བཤགས་པ་ནི་ཉེས་བྱས་སུན་འབྱིན་གྱི་སྟོབས། སྔོན་ཆད་ནི་བདག་ཅག་གིས་མ་ཤེས་པའི་དབང་དུ་སོང་ནས་ཉེས་པ་དེ་དག་སྤྱད་ལགས་ཀྱང་དེང་ཕྱིན་ཆད་སྲོག་ལ་བབས་ཀྱང་སྡིག་པའི་ལས་དེ་ལྟ་བུ་མ་བགྱིད་དོ་སྙམ་པ་ནི་ཕྱིན་ཆད་སྡོམ་པའི་སྟོབས་སམ། སོར་ཆུད་པའི་སྟོབས་ཉིད་ཡིན་ཏེ་ཕྱི་མ་འདི་ཉིད་ཤིན་ཏུ་གལ་ཆེ་བའི་ཕྱིར་མེད་དུ་མི་རུང་ངོ་། །དེས་ན་ཚུལ་འདི་དག་ཡིད་ལ་ངེས་པར་བྱས་ནས་ངག་ཏུ། ཨཱཿ བདག་ཉིད་ཐ་མལ་སྤྱི་བོ་རུཿ སོགས་ནས། བྱང་ཞིང་དག་པར་མཛད་དུ་གསོལ། །ཞེས་པའི་བར་གཞུང་ལྟར་བརྗོད། སྐབས་འདིར་ཡི་གེ་བརྒྱ་བ་འབུམ་ཐེར་བཟླ་བའང་འདིར་མི་གསལ་ཡང་གོང་མའི་ཕྱག་རྒྱུན་ལྟར་སྒྲུབ་དགོས་པ་ཡིན་ནོ། །གཉིས་པ་སྐུ་གསུམ་གྱི་མཎྜལ་འབུལ་བ་ལ་སྤྱིའི་ཚུལ་འདི་དང་མི་འདྲ་ཙམ་ཡོད་ཅིང་། རྣམ་དབྱེ་རྒྱས་པ་རྒྱ་བོད་ཀྱི་རྣམ་བཤད་ཆེན་མོ་རྣམས་ལ་བལྟ་མ་ནུས་ཀྱང་ཁོ་བོས་བྱས་པའི་རྣམ་བཤད་ཉུང་ངུ་དེ་ཙམ་ཞིག་ཅི་ནས་ཀྱང་ངེས་དགོས་ལ། འདིར་སྐུ་གསུམ་གྱི་མཎྜལ་གསུམ་ལས། དང་པོ་ནི། མཎྜལ་གྱི་གཞི་རབ་གསེར་དངུལ། འབྲིང་ཟངས་ལྕགས། ཐ་མས་ཀྱང་རྡོ་ཤིང་ལ་སོགས་པའི་སྟེགས་ཁོད་སྙོམས་པར་བྱི་དོར་ལེགས་པར་བྱས་ཏེ་བ་བྱུང་དང་། དྲི་བཟང་གིས་ཆག་ཆག་བཏབ་པར། རབ་གཡུ་བྱུ་རུ་ལ་སོགས་རིན་པོ་ཆེ། འབྲིང་ཨ་བར་སྐྱུར་གསུམ་སོགས་སྨན་འབྲས། ཐ་མས་ཀྱང་ནས་འབྲས་སོགས་འབྲུ་ཚོམ་བགོད་པ་དམིགས་རྟེན་དུ་བྱས་ནས་བསམ་པར་བྱ་བ་ནི་ཚངས་པའི་གནས་ནས་མནར་མེད་ཡན་ཆད་མཐའི་ལྕགས་རི་ཚུན་ཆད་ཀྱི་འཇིག་རྟེན་འདི་ལ་གླིང་བཞི་བའི་འཇིག་རྟེན་གཅིག་ཅེས་གྲགས་ཏེ། དེ་འདྲ་བ་སྟོང་ལ་སྟོང་དང་པོ་སྤྱི་ཕུད་ཀྱི་འཇིག་རྟེན། དེ་འདྲ་སྟོང་ལ་སྟོང་གཉིས་བར་མའི་འཇིག་རྟེན། དེ་སྟོང་ལ་སྟོང་གསུམ་གྱི་སྟོང་ཆེན་པོ་མི་འཇེད་ཀྱི་འཇིག་རྟེན་ཞེས་བྱ་སྟེ་སོ་སོར་ཕྱེ་ན་གླིང་བཞི་བའི་འཇིག་རྟེན་བྱེ་བ་ཕྲག་བརྒྱ་སྟེ། ཐེར་འབུམ་གཅིག་ཡོད་པ་ཡིན་ནོ། །དེ་དག་འབུལ་བ་ནི་ཕྱིའི་ཞིང་ཁམས་མཎྜལ་དུ་འབུལ་བ་ཡིན་སྟེ། འབུལ་ཡུལ་ཀྱང་སྤྲུལ་པའི་སྐུ་ཡིན་པའི་ཕྱིར་སྤྲུལ་སྐུའི་མཎྜལ་ཞེས་བྱའོ། །དེ་བཞིན་དུ་གཉིས་པ་ནི། ནང་རང་གི་ཕུང་ཁམས་སྐྱེ་མཆེད་མཎྜལ་དུ་འབུལ་བ་སྟེ། དེ་ལ་ཕུང་ཁམས་ཀྱི་གོ་བ་སྤྱིར་བཏང་གི་སྟེང་ནས་དཔྱད་ན་རྣམ་དབྱེ་རྒྱ་ཆེ་བ་ཞིག་འབྱུང་ཡང་། འདིར་རང་ལུས་ཙམ་ལ་སྦྱར་བའི་ཕྱིར། དེ་ལྟར་སྨྲོས་ན། ལྤགས་པ་དབང་ཆེན་གསེར་གྱི་ས་གཞི། ཁྲག་དྲི་བཟང་གི་ཆག་ཆག ཡན་ལག་བཞི་གླིང་བཞི། ཉིང་ལག་རྣམས་གླིང་ཕྲན། མིག་གཉིས་ཉི་ཟླ། དབང་ཡུལ་གཞན་རྣམས་མཆོད་པའི་ལྷ་མོ་རྣམས་སུ་མོས་ནས་ཁ་ཙམ་མ་ཡིན་པར་བློས་ལིང་བསྐྱུར་གྱིས་འབུལ་བར་བྱ་སྟེ། འབུལ་ཡུལ་ཡང་གཙོ་བོར་ལོངས་སྐུའི་ལྷ་ཚོགས་རྣམས་ལ་དེ་ཉིད་འཐོབ་པའི་ཕྱིར་འབུལ་བ་ཡིན་པས་ན་ལོངས་སྐུའི་མཎྜལ་ཞེས་བྱའོ། །གསུམ་པ་ནི། གསང་བ་ཆོས་དབྱིངས་གདོད་མའི་གཞི་ལ་རིག་པའི་སྣང་ཆ་ཡེ་ཤེས་ལྔ་ལ་སོགས་པའི་ཚོམ་བུ་བཀོད་དེ་དབྱིངས་དང་ཡེ་ཤེས་ཟུང་དུ་འཇུག་པའི་སངས་རྒྱས་ཆོས་ཀྱི་སྐུ་ལ་གཉིས་སུ་མེད་པའི་ཚུལ་གྱིས་འབུལ་བ་སྟེ་རྒྱུ་མཚན་དེའི་ཕྱིར་ཆོས་སྐུའི་མཎྜལ་ཞེས་བྱའོ། །དེ་ལྟར་ན་སྐུ་གསུམ་གྱི་དབྱེ་བ་དེ་ལྟར་ངེས་པར་བྱས་ནས་འཁོར་གསུམ་མི་དམིགས་པའི་སེམས་བསྐྱེད་ཀྱི་འཕེན་པ་དང་བཅས་ངག་ཏུ། ཨོཾ་ཨཱཿཧཱུྃ། སྟོང་གསུམ་མི་མཇེད་བྱེ་བ་ཕྲག་བརྒྱའི་ཞིང་། སོགས་ནས། སྐུ་གསུམ་ཡོངས་རྫོགས་དངོས་གྲུབ་སྩལ་དུ་གསོལཿ ཞེས་པའི་བར་བརྒྱ་སྟོང་ཁྲི་འབུམ་སོགས་གང་ནུས་སུ་བསགས་པར་བྱའོ། །གསུམ་པ་བླ་མའི་རྣལ་འབྱོར་ལ། ཚོགས་ཞིང་གསལ་བཏབ་ནས་སྤྱན་འདྲེན་པ་དང་། ཡན་ལག་བདུན་པ་ཕུལ་ནས་གསོལ་བ་ཕུར་ཚུགས་སུ་འདེབས་པ་དང་། མཐར་དབང་བཞི་བླང་ནས་ཚོགས་ཞིང་བསྡུ་བ་སྟེ་གསུམ་ལས། དང་པོ་ལའང་གཉིས་ལས་ཚོགས་ཞིང་གསལ་བ་ནི། ཨེ་མ་ཧོཿ སྲིད་ཞི་སྟོང་གསལ་ཆོས་ཀྱི་དབྱིངས་ཆེན་པོཿ སོགས་ནས། མ་བསྐྱེད་ཡེ་རྫོགས་ཆུ་ཟླ་ལྟ་བུར་གསལ། །ཞེས་པའི་བར་གྱི་དམིགས་དོན་ལྟར་འདོན་སྒོམ་ཟུང་དུ་ཆུད་པར་བྱེད་པ་སྟེ། དེ་ཡང་མ་ཧཱ་གུ་རུ་པདྨ་སམ་བྷ་ཝ་ཉིད་དུས་གསུམ་གྱི་རྒྱལ་བ་མ་ལུས་པ་འདུས་པའི་སྤྱི་གཟུགས་ཉིད་དུ་ཤེས་པ་དང་། དེའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ་དཀོན་མཆོག་གསུམ་འདུས་སུ་ཤེས་པ་དང་། རྒྱུད་སྡེ་མ་ལུས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱང་གང་གི་ཡེ་ཤེས་ཆེན་པོའི་རྣམ་པར་རོལ་པའི་བྱེ་བྲག་ལས་ཐ་དད་པ་མེད་པའི་ཕྱིར་དཀྱིལ་འཁོར་ཀུན་གྱི་དབང་ཕྱུག་དམ་པར་ཤེས་པ་སྟེ། ཚུལ་དེ་ལྟ་བུའི་གུ་རུ་རིན་པོ་ཆེ་གང་གི་སྐུའི་ཐ་གྲུ་རྣམས་སུ་རྒྱ་བོད་ཀྱི་རིག་འཛིན་རྣམས་དང་། དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་པ་རྣམས་ཀྱང་བཀྲ་ལམ་གྱིས་གསལ་བའི་ལྷ་ཚོགས་ཐམས་ཅད་ཀྱི་གནས་གསུམ་གྱི་ཡི་གེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམ་པ་དང་འདྲ་བའི་ཡེ་ཤེས་པ་སྤྱན་དྲངས་ཏེ་རྒྱ་མཚོ་ཆེན་པོ་ལ་ཁ་ཆར་བབས་པ་བཞིན་དབྱེར་མེད་དུ་འདྲེས་པར་བསམ་སྟེ། གཉིས་པ་སྤྱན་འདྲེན་དངོས་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམསཿ སོགས་ནས། དངོས་གྲུབ་སྩོལ་གྱི་བར་ཏེ་ཚིག་དོན་ཡ་མ་བྲལ་བར་འདོན་སྒོམ་བྱ་བའོ། །གཉིས་པ་ལའང་གཉིས་ལས། དང་པོ་ཡན་ལག་བདུན་པ་འབུལ་བ་ནི། ཐུན་མོང་དུ་རང་ལུས་དཔག་མེད་དུ་སྤྲུལ་ནས་ཕྱག་འཚལ་བ་དང་། དངོས་བཤམས་ཡིད་སྤྲུལ་གྱི་མཆོད་ཚོགས་འབུལ་བ། སྒོམ་གསུམ་གྱི་ཉེས་ལྟུང་བཤགས་པ། རང་གཞན་གྱི་དགེ་རྩ་ལ་རྗེས་སུ་ཡི་རང་པ། རྒྱལ་བ་སྲས་བཅས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ། དེ་རྣམས་སྐུ་མྱ་ངན་ལས་མི་འདའ་བར་འགྲོ་ངོར་རྟག་པར་བཞུགས་པའི་གསོལ་བ་འདེབས་པ། དུས་གསུམ་གྱི་དགེ་ཚོགས་འགྲོ་བའི་དོན་དུ་བསྔོ་བ་སྟེ་གོ་དོན་འདི་ལྟར་ངེས་དགོས་ཤིང་། འདི་གའི་ཐུན་མོང་མ་ཡིན་པ་རང་གཞུང་ན་གསལ་བ་ལྟར་ཏེ། དེས་ན་དོན་ལ་བསམ་བཞིན་ངག་ཏུ། ཞིང་རྡུལ་གྲངས་མཉམ་གུས་ཕྱལ་འཚལཿ སོགས་ནས། འཚང་རྒྱ་ཤོག ཅེས་པའི་བར་གང་ནུས་བརྗོད། དེ་ནས་གཉིས་པ་གསོལ་བ་གདབ་པ་ནི། གུ་རུ་རིན་པོ་ཆེ་ལ་བློ་ལིངས་ཀྱིས་བཀལ་ཏེ། སྐྱིད་སྡུག་ལེགས་ཉེས་ཅི་མཛད་ཁྱེད་རང་མཁྱེན་སྙམ་པའི་ངང་ནས། ཀྱཻ་བླ་མ་རིན་པོ་ཆེཿ སོགས་ནས། བདག་གྱུར་ཅིགཿ ཅེས་པའི་བར་གང་ནུས་དང་གཙོ་བོར་གསོལ་འདེབས་ཀྱི་བསྙེན་པ་ཉིད་ཆུ་བོའི་རྒྱུན་བཞིན་བར་མ་ཆད་དུ་བཟླ་བར་བྱའོ། །གསུམ་པ་ལའང་གཉིས་ལས། དང་པོ་དབང་བཞི་ལེན་པའི་དམིགས་པ་ནི། གུ་རུའི་སྐུའི་ངོ་བོ་སྤྱི་བོའི་ཨོཾ་ལས་བདུད་རྩི་དཀར་པོའི་རྒྱུན་ཟླ་བ་ཞུན་མ་ལྟ་བུ་བབས། རང་གི་སྤྱི་བོ་ནས་ཞུགས་ཏེ་ལུས་ཐམས་ཅད་མེར་གྱི་ཁེངས་པས་ལུས་ཀྱི་ནད་གདོན་སྡིག་སྒྲིབ་ཐམས་ཅད་དག་ནས། བུམ་པའི་དབང་ཐོབ་ཏེ་རྩ་ཁམས་བླ་མའི་སྐུ་དག་པར་བསམ། དེ་བཞིན་དུ་གུ་རུའི་གསུང་གི་ངོ་བོ་མགྲིན་པའི་ཨཿལས་བདུད་རྩི་དམར་པོ་མཚལ་ཞུན་ལྟ་བུ་བབས། རང་གི་མགྲིན་པར་ཞུགས་པ་སོགས་སྔར་ལྟར་ལས། ངག་གི་སྒྲིབ་པ་དག གསང་དབང་ཐོབ། རླུང་ཁམས་བླ་མའི་གསུང་དུ་དག་པར་བསམ་ཡང་གུ་རུའི་ཐུགས་ཀྱི་ངོ་བོ་ཧཱུྃ་ཡིག་སྔོན་པོ་ལས་བདུད་རྩི་མཐིང་ཞུན་ལྟ་བུ་བབས་པ་སོགས་སྔར་ལྟར་ལས་ཡིད་ཀྱི་སྒྲིབ་པ་དག་ནས་ཤེར་དབང་ཐོབ་ཏེ་ཐིག་ལེའི་ཁམས་བླ་མའི་ཐུགས་ཀྱི་ངོ་བོར་གྲོལ་བར་བསམ། སླར་ཡང་སྐུའི་ཆ་ཐམས་ཅད་ནས་བདུད་རྩི་འོད་ཟེར་དང་བཅས་པ་ཁ་དོག་སྣ་ལྔ་བབས་པས་རང་གི་ལུས་ཁེངས་པས། སྒོ་གསུམ་དུ་འཛིན་པའི་ཤེས་སྒྲིབ་དག་ནས་ཚིག་དབང་ཐོབ་ཏེ། སྣང་གསུམ་ཕྲ་བའི་བག་ཆགས་ཀྱི་ཁམས་ངོ་བོ་ཉིད་སྐུར་གྲོལ་བར་བསམ་པ་སྟེ། དེ་ལྟ་བུའི་དོན་དྲན་བཞིན་ངག་ཏུ། གུ་རུའི་སྐུ་ལས་བདུད་རྩིའི་རྒྱུནཿ སོགས་ནས། སྐུ་བཞི་རྣམ་ཀུན་མཆོག་ལྡན་ཐོབཿ ཞེས་པའི་བར་བརྗོད། གཉིས་པ་ནི། དེ་ནས་བླ་མ་ཡང་འོད་དུ་ཞུ་སྟེ་རང་སེམས་དང་དབྱེར་མེད་དུ་གྱུར་པར་བསམ་ལ་ཅི་གནས་སུ་མཉམ་པར་འཇོག་ཅིང་མཐར་རྗེས་ཐོབ་ཀྱི་ཆ་ལ་སྣང་སྲིད་ཐམས་ཅད་བླ་མའི་དཀྱིལ་འཁོར་གྱི་ལམ་ཁྱེར་དང་མ་བྲལ་བར་བྱ་བ་དང་། བསྔོ་སྨོན་རྣམ་པར་དག་པས་རྒྱས་འདེབས་པ་ནི་གནད་གལ་པོ་ཆེའོ། །འདི་ཙམ་གྱི་གཞུང་འདིར་བཤད་པའི་ཐུན་མོང་མ་ཡིན་པའི་སྔོན་འགྲོ་རྣམས་གྲུབ་ལ། གཞན་དུ་སྔ་འགྱུར་རང་ལམ་ལྟར་ན། ཉན་ཐོས་ཀྱི་དབང་ནས་རྣལ་འབྱོར་རྒྱུད་དབང་མན་འདུས་མདོའི་གཞུང་ལྟར་བསྐུར་པའམ། དེ་ལྟར་མི་ནུས་པས་ཀྱང་གོང་སྨོས་ལྟར་སྒྱུ་འཕྲུལ་གྱི་ཕན་དབང་ཙམ་བསྐུར་བའི་རྗེས་ཐོག་དེར། བྱ་སྤྱོད་རྣལ་འབྱོར་གསུམ་གྱི་བསྙེན་པའང་ཅི་རིགས་པར་བཏང་ནས། མངོན་རྟོགས་སོགས་ཀྱི་ཁྱད་པར་རྣམས་ཡིད་ལ་ངེས་པར་བྱས་ཏེ། དེའི་ཁོངས་སུ་འདིར་བཤད་པའི་ཐུན་མོང་མ་ཡིན་པའི་སྔོན་འགྲོ་རྣམས་ཀྱང་རྫོགས་པར་བགྱིས་ནས། སླར་ཉན་སྒོམ་སོགས་ནང་ནུས་པའི་དབང་རྣམས་ཅི་རིགས་པར་བསྐུར་ཏེ། བླ་མེད་ཀྱི་བསྐྱེད་རིམ་ཐུན་མོང་མ་ཡིན་པའི་ལམ་ཁྲིད་གདབ། དེ་ནས་ཟབ་དབང་གསུམ་དང་རྗེས་སུ་འབྲེལ་བའི་རྫོགས་རིམ་ཐུན་མོང་དང་། ཐུན་མོང་མ་ཡིན་པ་རྣམས་རིམ་བཞིན་སྟོན་པ་ནི་སྤྱིར་ཤེས་པར་བྱ་བའི་གནས་སོ། །དེ་བཞིན་དུ་ཁྲིད་རྒྱབ་ལུང་གིས་སྐྱོར་བའི་ལག་ལེན་ལྟར། དབང་ཁྲིད་དེ་དག་བྱེད་པ་ན་མདོ་རྒྱུད་ཀྱི་གཞུང་དེ་དང་དེ་དགོངས་འགྲེལ་དང་བཅས་པའི་བཀླག་ལུང་ཡང་ཞར་ལ་ཁྲིད་ལུང་སྦྲག་མའི་ལུགས་སུ་བྱས་ཏེ། སྨིན་ཁྲིད་རྫོགས་པའི་དུས་སུ་མདོ་རྒྱུད་མ་ལུས་པའི་དབང་ལུང་ཁྲིད་དང་བཅས་པ་རྫོགས་པར་འགྱུར་པའི་ལུགས་ཉིད་དུ་བྱས་ན་བསྟན་པ་རིན་པོ་ཆེ་སྤྱི་ལ་ཕན་ཞིང་རང་གི་རྒྱུད་འཛིན་རྣམས་ཀྱང་བླུན་པོ་ཉི་ཚེ་བར་མི་ལུས་པའི་དགོས་པ་ཡོད་དོ། །མདོར་ན་སྔོན་འགྲོའི་རིམ་པ་དེ་དག་རྒྱས་བསྡུས་གང་ལྟར་ཡང་དངོས་གཞི་བསྐྱེད་རྫོགས་ཀྱི་ཁྲིད་ཉིད་མེད་དུ་མི་རུང་སྟེ། དེས་ན་དེ་སྨྲོས་པ་ལ་གཉིས་ལས། དང་པོ་བསྐྱེད་པའི་རིམ་པ་ལ། སྤྱིར་རྒྱུ་མ་ནོར་བ་བསྐྱེད་རིམ་ལ་འཇུག་པའི་གཞི་རྐྱེན་མ་འཁྲུལ་བ་ཇི་ལྟར་སྒོམ་པའི་ལམ། འབྲས་བུ་རྣམ་པར་དག་པ་ཟུང་འཇུག་གི་གོ་འཕང་ལ་སྦྱོར་ཚུལ་ཏེ་གསུམ་གྱི་སྒྲོམ་ནས་འཆད་དགོས་ཀྱང་། འདིར་མདོར་བསྡུས་ནས་འཆད་པ་ལ་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་སྟེ་གསུམ་ལས། དང་པོ་ནི་བསྐྱེད་རིམ་གྱི་ལག་ཁྲིད་དངོས་ཡིན་ལ། ཕྱི་མ་གཉིས་ནི་དེའི་ཡང་འགལ་སྤོང་མཐུན་སྒྲུབ་ཀྱི་སྒོ་ནས་བཞག་པའི་ཡན་ལག་ལྟ་བུར་ངེས་དགོས་སོ། །དེས་ན་དང་པོ་ལའང་ནང་གསེས་ཀྱི་ཡན་ལག་བདུན་དུ་ཡོད་དེ། འདི་ལྟར་ལྷ་ལ་སེམས་བཟུང་བ། འགྱུར་བའི་སྐྱོན་བཅོས་པ། ལྷ་དབྲལ་པ། ལྷ་ལམ་དུ་སློང་བ། ལྷ་རང་སེམས་དང་བསྲེ་བ་སྟེ་ལྔའི་ཁོང་ནས་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔ་མངོན་དུ་བྱེད་པ་ནི་སྔོན་འགྲོའི་ས་བཅད་ལྔ་དང་། ཏིང་འཛིན་རྣམ་གསུམ་སྔོན་དུ་འགྲོ་བ་ཅན་གྱི་ལྷ་དོན་ལ་སྦྱར་བ་ནི་དངོས་གཞིའི་ས་བཅད་གཅིག་དང་། ཤེས་བྱ་བཅུ་དང་དམ་ཚིག་གི་གནས་དྲུག་ཏུ་བཞག་པའི་རྗེས་ཀྱི་ས་བཅད་དེ་བསྡོམས་པས་བདུན་ནོ། །དེ་དག་ཀྱང་རིམ་པ་བཞིན་བྲིས་སྐུ་ལ་སོགས་པའི་སྣང་བརྙན་མདུན་དུ་བཞག་ནས་དེ་ལ་སེམས་མ་ཡེངས་པར་གཏད་དེ་ཡིད་ལ་བྱེད་པ་ནི་དང་པོ་དང་། སྤྱིའི་སྐྱོན་བདུན་དང་བྱེ་བྲག་ཏུ་འགྱུར་བའི་སྐྱོན་བཅུ་གཉིས་པོ་སོ་སོའི་གཉེན་པོ་ཐུན་མོང་མ་ཡིན་པ་བསྟེན་པའི་སྒོ་ནས་སྒོམ་པ་ནི་གཉིས་པ་དང་། རེ་འགའ་ལྷ་དང་། རེ་འགའ་སེམས་ཉིད་ཀྱི་དོན་ལ་མཉམ་པར་འཇོག་པ་སྟེ། དེ་གཉིས་རེས་མོས་སུ་སྒོམ་པ་ནི་གསུམ་པ་དང་། ལྷ་དེ་ལངས་འདུག་འབྱོན་བཞུད་སོགས་སྤྱོད་ལམ་སྣ་ཚོགས་མཛད་པར་སྒོམ་པ་ནི་བཞི་བ་དང་། བསྒོམ་བྱའི་ལྷ་དང་སྒོམ་བྱེད་ཀྱི་སེམས་ཐ་དད་དུ་མེད་པར་ཤེས་ནས་ལྷ་དང་རང་གི་དེ་ཁོ་ན་ཉིད་རོ་གཅིག་པ་ལ་མཉམ་པར་འཇོག་པ་ནི་ལྔ་བ་སྟེ། སྔོན་དུ་ངེས་པར་བྱ་བའི་ཡན་ལག་ལྔའོ། །དེ་ནས་ས་བཅད་དྲུག་པ་ནི་སྒྲུབ་པ་ལ་སོགས་པར་འཇུག་པའི་དུས་དངོས་སུ་ཉེ་བར་མཁོ་བའི་ཡོ་བྱད་རྣམས་སྟ་གོན་བྱེད་གྲུབ་པ་ན་སྔོན་འགྲོ་རྣམས་ཇི་རིགས་པར་བཏང་སྟེ། མཚམས་དམ་པོར་བཅད་ནས། ཐོག་མར་རང་དང་མདུན་རྟེན་གྱིས་མཚོན་པའི་ཕྱི་ནང་གི་ཆོས་ཐམས་ཅད་ལ་དངོས་པོ་དང་མཚན་མར་འཛིན་པའི་བློ་དེ་བཞིན་ཉིད་ཀྱི་ཏིང་ངེ་འཛིན་གྱིས་བཤིགས་ཏེ། དེ་ནས་དེ་ལྟ་བུའི་དོན་མ་རྟོགས་པའི་སེམས་ཅན་ཐམས་ཅད་ལ་དམིགས་མེད་ཀྱི་སྙིང་རྗེ་ཆེན་པོ་ཀུན་སྣང་གི་ཏིང་ངེ་འཛིན་སྒོམ་ཞིང་། དེའི་རྗེས་སུ་ཆོས་གཟུགས་ཀྱི་སྐུ་གཉིས་མངོན་དུ་བྱེད་པའི་རྒྱུ་ཐུན་མོང་མ་ཡིན་པ་དེ་གཉིས་དབྱེར་མི་ཕྱེད་པའི་རང་རིག་ཉིད་ཐུགས་སྲོག་ཧཱུྃ་དང་ཧྲཱིཿལ་སོགས་པའི་རྣམ་པར་བསྒྱུར་ནས་སྒོམ་པ་ནི། འབྲས་བུ་རྒྱུའི་ཏིང་ངེ་འཛིན་ནམ། ཕྱག་རྒྱ་གཅིག་པའི་ནང་གསེས་ཕྲ་བ་ཡིག་འབྲུ་ལ་བསླབ་པའམ། རྒྱུའམ་རྩ་བའི་ཐབས་ཞེས་བྱ་བའོ། །དེ་ཡོངས་སུ་གྱུར་པ་ལས་རང་དང་མདུན་རྟེན་དབྱེར་མེད་པ་ཉིད་ལྷག་པའི་ལྷའི་དཀྱིལ་འཁོར་གྱི་འཁོར་ལོར་བསྒོམ་ནས་མཐར་ལས་རབ་འབྱམས་བསྒྲུབ་པའི་བར་དུ་སྟེ། དེའི་ཚུལ་ལ་བསྙེན་སྒྲུབ་ཡན་ལག་བཞི་དང་། དེ་དག་གི་མན་ངག་སྲོག་སྡོམ་གཟེར་བཞི་ཤེས་དགོས་ཏེ། རིམ་པ་ལྟར་བསྙེན་པའི་ཡན་ལག་ཏིང་ངེ་འཛིན་གྱི་གཟེར་དང་། ཉེ་བསྙེན་གྱི་ཡན་ལག་སྙིང་པོ་སྔགས་ཀྱི་གཟེར་དང་། སྒྲུབ་པའི་ཡན་ལག་དགོངས་པ་མི་འགྱུར་བའི་གཟེར་དང་། སྒྲུབ་པ་ཆེན་པོའི་ཡན་ལག་འཕྲོ་འདུའི་གཟེར་རྣམས་ཡིན་ལ། འདི་དག་ཇི་ལྟར་སྒོམ་ཚུལ་རྒྱས་པ་དང་། གསང་སྔགས་སྟོན་པའི་བླ་མ་ལ་གདུང་བ་མི་བཅད་པ་སོགས་ས་བཅད་བདུན་པའི་དོན་བཅས་རྒྱས་པར་ཤེས་འདོད་ན་བསྐྱེད་རིམ་རྣམ་བཤད་འོག་མིན་བགྲོད་པའི་ཐེམ་སྐས་ཀྱི་སྤྱི་དོན་གཉིས་པའི་སྐབས་སུ་བལྟ་བར་བྱའོ། གཉིས་པ་རྣམ་དག་དྲན་པ་ནི། དེ་ལྟར་ལྷ་དོན་ལ་སྦྱར་ཏེ་བསྒོམ་པ་ན་རྣམ་འགྱུར་གྱི་ཆ་དང་ཞལ་ཕྱག་ལྷའི་གྲངས་ངེས་སོགས་ལ་བློས་བདེན་འཛིན་ཞུགས་ཏེ་སྒོམ་མ་བདེ་ན། ལྷའི་རྣམ་པ་དེ་དག་ནི་རེ་ཞིག་དྲངས་པའི་དོན་དུ་དེ་ལྟར་གསུངས་ཀྱི། རྣམ་པར་གཞན་དུ་ན་གདུལ་བྱའི་རྒྱུད་ཀྱི་རྟོག་པ་འདུལ་བའི་གཉེན་པོར་རིགས་བརྒྱ་དང་རིགས་གཅིག་ལ་སོགས་པ་ཇི་རིགས་པར་གསུངས་པའི་ཕྱིར་གང་ལྟར་ཡང་འགལ་བ་མེད་ལ། ཁྱད་པར་རང་ཅག་སྐྱེ་བ་བཞིས་བསྡུས་ཀྱི་འགྲོ་བ་རྣམས་ཀྱི་བག་ཆགས་སྦྱོང་བའི་ཕྱིར་དེ་དང་དེར་བསྟུན་པའི་བསྐྱེད་ཚུལ་རྣམས་གསུངས་པ་ཡིན་ནོ་སྙམ་དུ་ཤེས་ནས། དེའི་ཚུལ་ལ་སྐྱེ་གནས་བཞིའི་བག་ཆགས་སྦྱོང་ཕྱིར་བསྐྱེད་རིམ་ཀྱང་བསྡུས་འབྲིང་རྒྱས་དང་རྒྱས་པ་ཆེན་པོ་བཞི་སོ་སོའི་སྦྱང་གཞི་ནི་འདི་དང་འདིའོ། །སྦྱོང་བྱེད་ནི་འདི་དང་འདིའོ། སྦྱང་འབྲས་ནི་འདི་དང་འདིའོ་སྙམ་དུ་སོ་སོར་དྲན་པས་སྔ་མའི་བློའི་འཛིན་སྟངས་དེ་ཞིག་ནས་བསྐྱེད་རིམ་སྤྲུལ་པ་ལྟ་བུ་དེ་གང་ལྟར་བསྒྱུར་ཀྱང་མི་འགལ་བར་ཤེས་ན་ལྷ་རང་རྒྱུད་དུ་འཛིན་པའི་གོལ་ས་ལས་ལྡོག་པ་ཡིན་ནོ། །འདིའི་ཚུལ་ཡང་བསྐྱེད་རིམ་རྣམ་བཤད་ཀྱི་སྤྱི་དོན་དང་པོའི་སྐབས་ལས་རྟོགས་པར་བྱའོ། །གསུམ་པ་ང་རྒྱལ་བརྟེན་པ་ནི། བསྐྱེད་རིམ་རྒྱས་བསྡུས་དེ་གང་སྒོམ་ཡང་ཚོགས་དྲུག་གི་སྣང་ཡུལ་ཐ་མལ་གྱི་སྣོད་བཅུད་ལ་སོགས་པར་འཆར་བ་དེའི་ང་རྒྱལ་འཕོ་དགོས་ཏེ། དེ་ཡང་སྤྱིར་བཏང་དུ་སྣོད་བཅུད་ཀྱི་སྣང་བ་ལྷར་སྣང་དུ་འཕོ་བ་དང་། སྣོད་བཅུད་ཀྱི་སྣང་བ་དེ་དང་དེར་བདེན་འཛིན་གྱི་ཞེན་པ་ལྷར་ཞེན་དུ་འཕོ་བ་ཞིག་དགོས་ལ། བྱེ་བྲག་བསྐྱེད་རིམ་གྱི་དག་བྱ་དག་འབྲས་ངེས་པའི་སྒོ་ནས་རྟོག་པའི་ཡན་ལག་རེ་རེ་བཞིན་གྱི་སྣང་ཞེན་རང་རང་གི་དག་འབྲས་ཐུན་མོང་མ་ཡིན་པ་དེ་དང་དེར་ང་རྒྱལ་འཕོས་ནས་དེའི་སྟེང་དུ་ཏིང་ངེ་འཛིན་གྱིས་རྩེ་གཅིག་ཏུ་བཟུངས་ཏེ་བསྒོམས་པས་ཇི་ཞིག་ན་སྣང་བ་ལྷའི་དཀྱིལ་འཁོར་དུ་ལམ་ལམ་འཆར་བ་ཡིན་པས་འདིའི་དུས་སུ་ལྷར་སྣང་སྒྱུ་མའི་སྣང་ཞེན་དེ་འོད་གསལ་གྱི་དབྱིངས་སུ་བསྡུ་བའི་ཕྱིར་རྫོགས་རིམ་ལ་གཙོ་བོར་འདོན་པ་ཡིན་ནོ། །དེ་ཡང་ལུགས་གཞན་དག་ལས་མ་དག་པའི་སྣང་བ་སྒྱུ་མའི་རང་བཞིན་དུ་སྔར་ཐོག་མར་དགེ་བའི་ཁྲིད་ཀྱི་ཤེས་རབ་ཀྱི་སྐབས་སུ་གཏན་ལ་ཕབ་ནས་སྒོམ་པ་དེ་སྤྱི་དོན་གྱི་སྒྱུ་ལུས་དང་། འདི་སྐབས་སུ་མ་དག་སྒྱུ་མའི་སྣང་ཞེན་དག་པའི་ལྷར་སྣང་དུ་འཕོས་ནས་སྣོད་བཅུད་ལྷར་སྣང་སྒྱུ་མར་སྒོམ་པ་ལྟ་བུ་ལ་དེ་དང་དེའི་ཁྱད་པར་གྱི་སྒྱུ་ལུས་སུ་བཤད་ནས་རྫོགས་རིམ་གྱི་ཁོངས་སུ་བསྡུས་ཀྱང་། སྔ་འགྱུར་རང་ལུགས་ལ་ཇི་ལྟར་བཤད་པའི་གཞུང་ཉིད་ཀྱི་གོ་རིམ་ལ་ངེས་པ་རྙེད་དགོས་སོ། །འདི་ལྟ་བུའི་བསྐྱེད་རིམ་ལ་བརྟན་པ་ལེགས་པོར་ཐོབ་ན་སླད་ནས་རྫོགས་རིམ་རྣམས་སྒོམ་པའི་དུས་སུ་ཚེགས་མེད་པར་འགྱུར་ཏེ་རིམ་བཞིན་དཔྱད་པས་ཤེས་སོ། །དེ་དག་གིས་རིམ་པ་དང་པོ་མདོ་ཙམ་སྨོས་ནས། ད་ནི་གཉིས་པ་རྫོགས་པའི་རིམ་པ་ས་བཅད་ཙམ་འཆད་པ་ལ་རྫོགས་རིམ་དངོས་བཤད་པ་དང་། དེའི་བོགས་འདོན་སྤྱོད་པ་སྐྱོང་ཚུལ་བཤད་པ་སྟེ་གཉིས་ལས། དང་པོ་ནི། སྤྱིར་རིམ་པ་གཉིས་ཀྱི་ཟླས་ཕྱེ་བའི་རྫོགས་རིམ་ལའང་ནང་གསེས་རིམ་པ་ལྔར་དབྱེ་བ་དང་། རྩ་ཐིག་རླུང་གསུམ་རེ་རེར་དེ་དང་དེ་སྦྱོང་བྱེད་ཀྱི་ཡན་ལག་གཉིས་གཉིས་ཀྱི་སྒོ་ནས་དབྱེ་བའི་སྦྱོར་བ་ཡན་ལག་དྲུག་ཏུ་བསྟན་པ་དང་། ལམ་གྱི་རྩ་བ་གཏུམ་མོའི་གདམས་པ། ལམ་གྱི་གཞི་མ་སྒྱུ་ལུས་ཀྱི་གདམས་པ། ལམ་གྱི་སྙིང་པོ་འོད་གསལ་གྱི་གདམས་པ། ལམ་གྱི་དྲོད་ཚད་རྨི་ལམ་གྱི་གདམས་པ། ལམ་གྱི་སུན་མ་བར་དོའི་གདམས་པ། ལམ་གྱི་གློ་ཆོད་འཕོ་བའི་གདམས་པ་སྟེ། ཟབ་མོའི་ཆོས་དྲུག་ཏུ་བཤད་པ་དང་། རིམ་ལྔ་ལའང་རྡོ་རྗེའི་བཟླས་པ་ནས་ཟུང་འཇུག་གི་བར་དུ་ལྔར་བཤད་པ་དང་། ནོར་བུ་དགང་བའི་རིམ་པ་སོགས་ལྔར་བཤད་པ་ཇི་རིགས་པ་དང་། གཞན་ཡང་ལམ་འབྲས་ཀྱི་སྐབས་སུ་བཤད་པའི་རྫོགས་རིམ་སོགས་དབྱེ་བསྡུའི་རྣམ་པ་མང་རུང་འདིར་སྔ་འགྱུར་རང་ལུགས་སུ་ནི། ཧེ་རུ་ཀ་གལ་བོ་ལྟ་བུའི་རྒྱུད་སྡེ་རེ་རེར་ཡང་དེ་དག་ཐམས་ཅད་རྫོགས་པར་བསྟན་ལ། དེ་ཡང་ཉམས་སུ་ལེན་པའི་སྐབས་སུ་སྐྱེ་འཆི་བར་དོ་གསུམ་སྦྱོང་བའི་མན་ངག་གསུམ་དུ་བསྡུས་ནས་ཉམས་སུ་ལེན་པར་བཞེད་དེ། དེའི་བསྡུ་ཚུལ་ཡང་། སྦྱོར་བ་ཡན་ལག་དྲུག་དང་། བདེ་མཆོག་གི་རྒྱུད་སོགས་ལས་བཤད་པའི་རིམ་ལྔ་ནི་གཏུམ་མོའི་གདམས་ངག་གི་ཁོངས་སུ་བསྡུ་ལ། རྨི་ལམ་སྒྱུ་མ་དང་བར་དོ་སྒྱུ་མ་དག་ནི་སྒྱུ་ལུས་སུ་བསྡུ། འཕོ་བ་ལ་སྐུ་གསུམ་གྱི་འཕོ་བ་གསུམ་གྱི་རྣམ་གཞག་ཡོད་པ་ནི་དེ་དང་དེའི་གདམས་ངག་གི་ཡན་ལག་ཉིད་དུ་བསྡུ་བར་བྱ་སྟེ། དེས་ན་གཏུམ་མོ་སྒྱུ་ལུས་འོད་གསལ་གསུམ་ནི། རྫོགས་རིམ་གྱི་མཐིལ་བོ་ཡིན་ནོ། །འདིར་གཏུམ་མོ་ལ་ཕྱི་ནང་གསང་གསུམ་སོགས་ཀྱིས་དབྱེ་བ་དང་། སྒྱུ་ལུས་ལ་ཉིན་སྣང་བར་དོ་རྨི་ལམ་གསུམ་སོགས་ཀྱི་སྒོ་ནས་དབྱེ་བ་དང་། འོད་གསལ་ལ་ཡུལ་ཡུལ་ཅན་ནམ་གཞི་ལམ་འབྲས་གསུམ་སོགས་ཀྱི་སྒོ་ནས་དབྱེ་བ་སོགས་མང་དུ་ཡོད་ཀྱང་དེ་དག་གི་རྣམ་དབྱེའི་སྤྲོས་པ་རེ་ཞིག་བཏང་སྙོམས་སུ་བཞག་ནས་སྒོམ་ཚུལ་དངོས་མདོ་ཙམ་སྨྲོས་པ་ལ། གོང་དུ་ཇི་ལྟར་བཤད་པ་བཞིན་གྱི་རིམ་པ་དང་པོའི་ལམ་ཉིད་སྟོང་ཆེན་ནས་ཕྱག་རྒྱ་སྤྲོས་བཅས་ཀྱི་བར་དྲན་པ་གཅིག་པའི་ཏིང་ངེ་འཛིན་རྣམས་ལ་ངེས་པ་རྙེད་རྙེད་དུ་བསྒོམ་ཏེ། ཐུན་མཐའ་རྣམས་སུ་དེ་ཉིད་ཀྱི་ཕྲ་ཐིག་གི་རྣལ་འབྱོར་ཐུགས་སྲོག་ལ་འདུན་པ་རྩེ་གཅིག་ཏུ་བཏད་པས་སམ། ཡབ་ཡུམ་སྙོམ་འཇུག་གི་བདེ་བ་ལ་བློ་བཞག་པ་གང་རུང་གི་རྐྱེན་ལས་དཀྱིལ་འཁོར་གྱི་འཁོར་ལོ་རྟེན་དང་བརྟེན་པར་བཅས་པ་རིལ་འཛིན་དང་རྗེས་གཞིག་ཇི་རིགས་པའི་ཚུལ་གྱིས་དེ་ཏིང་དང་ངོ་བོ་གཅིག་ཏུ་གྱུར་པའི་འོད་གསལ་རྗེས་མཐུན་པར་བསྡུས་ལ། སླར་ཡང་དེ་ཉིད་ལས་སྒྱུ་མའི་ལྷ་སྐུ་ཙམ་པོ་བ་ཕྱག་རྒྱ་གཅིག་པའི་རྣམ་པར་ལངས་ཏེ། དེའི་སྐུ་དབུས་སུ་རྩ་འཁོར་གསལ་ནས་གཏུམ་མོ་བསྒོམ་པ་དང་། སྲོག་རྩོལ་བསྡམས་ཏེ་འོད་གསལ་དང་། སྒྱུ་ལུས་སུ་འཇུག་ལྡང་བྱེད་པ་རྣམས་ལ་རིམ་བཞིན་སློབ་དགོས་པ་ཡིན་ནོ། །དེ་ཡང་སྤྱིར་རྫོགས་རིམ་གྱི་ལྷར་སྣང་ལ། ཚོགས་ལམ་གྱི་དུས་སུ་མོས་སྤྱོད་ཀྱི་ལྷ་སྐུ། སྦྱོར་ལམ་གྱི་དུས་སུ་རླུང་སེམས་ཀྱི་ལྷ་སྐུ། མཐོང་ལམ་གྱི་དུས་སུ་འོད་གསལ་གྱི་ལྷ་སྐུ། སྒོམ་ལམ་གྱི་དུས་སུ་སློབ་པའི་ཟུང་འཇུག་གི་ལྷ་སྐུ། སངས་རྒྱས་ཀྱི་ས་ན་མི་སློབ་པའི་ཟུང་འཇུག་གི་ལྷ་སྐུ་རྣམས་ཡོད་པར་གྲགས་ཏེ། དེས་ན་གོང་དུ་སྨོས་པའི་རིམ་པ་དང་པོའི་རྗེས་སུ་བྱུང་བའི་སྒྱུ་མའི་ལྷ་སྐུ་ཙམ་པོ་བ་དེ་ཡང་མོས་སྤྱོད་ཀྱི་ལྷ་སྐུར་ངོས་བཟུངས་དགོས་སོ། །དེར་ཡང་མ་ཟད་སྒྱུ་ལུས་མཚན་ཉིད་པ་ནི། སྲོག་རྩོལ་བསྡམ་པ་ལས་རླུང་སེམས་དབུ་མར་ཞུགས་གནས་ཐིམ་གསུམ་བྱས་པ་དང་། དེས་དྲངས་པའི་རླུང་སེམས་ཙམ་ལས་གྲུབ་པའི་སྒྱུ་མའི་སྐུ་ཡིན་པའི་ཕྱིར། དེ་འདྲ་བ་དེ་ནི་གཏུམ་མོའི་གདམས་པ་ལ་བརྟེན་ནས་རླུང་སེམས་ལས་སུ་རུང་བ་ཞིག་ཡིན་ན་མ་གཏོགས། རྩ་རླུང་ལ་གོམས་འདྲིས་ཆུང་བ་དག་གིས་འགྲུབ་པ་ཤིན་ཏུ་དཀའ་བའི་ཕྱིར། ལས་དང་པོ་བ་དག་གིས་རླུང་སེམས་དང་། འོད་གསལ་དང་། ཟུང་འཇུག་གང་གི་ལྷ་སྐུ་བསྒོམ་རུང་མོས་སྤྱོད་ཀྱི་ལྷ་སྐུ་ལས་འདའ་མི་ནུས་སོ། །རྒྱུ་མཚན་དེའི་ཕྱིར་དེ་དང་དེ་མཚན་ཉིད་པ་འགྲུབ་པར་བྱེད་པར་ནི་གཏུམ་མོའི་གདམས་ངག་ཁོ་ན་ལ་རག་ལས་པའི་ཕྱིར་ཐོག་མར་དེ་ཉིད་ལ་བརྩོན་པ་གལ་ཆེའོ། །འདིར་གཏུམ་མོ་ལ་སོགས་པའི་སྔོན་དུ་རིམ་པ་དང་པོའི་སྐབས་ཐུགས་སྲོག་དང་སྙོམ་འཇུག་གི་བདེ་བ་ལ་སོགས་པར་སེམས་བསྡུ་བ་དང་། འོད་གསལ་རྗེས་མཐུན་པར་འཇུག་ལྡང་བྱེད་པ་རྣམས་ནི་རིམ་པ་གཉིས་པའི་ཁོངས་སུ་བསྡུ་བྱ་ཡིན་ནམ་སྙམ་ན་དེ་མ་ཡིན་ཡང་། དེ་དང་དེར་ཆ་འདྲ་བ་ལམ་དུ་བྱས་པས་དེ་དང་དེའི་སྨིན་བྱེད་དུ་འགྲོ་བ་ཡིན་ཏེ། དེའི་ཕྱིར་བསྐྱེད་རིམ་གྱི་དག་རྫོགས་སྨིན་གསུམ་འཆད་པ་ན་རིམ་པ་དང་པོ་རིམ་པ་གཉིས་པའི་སྨིན་བྱེད་དུ་འགྲོའོ་ཞེས་གསུངས་པའི་དོན་ཡང་འདི་ལྟ་བུར་དགོངས་པ་ཤེས་དགོས་སོ། །དེས་ན་འདིར་དེ་ལྟ་བུའི་རྫོགས་རིམ་དེ་འཆད་པ་ལ་གསུམ་ལས། དང་པོ་གཏུམ་མོ་ལའང་སྟོང་ར་སྦྱང་བ། རྩ་སྦྱང་བ། རླུང་སྦྱང་བ། ཐིག་ལེ་སྦྱང་བ། ལུས་སྦྱང་བ་སྟེ་ལྔས་རླུང་མ་ཟིན་པ་ཟིན་པར་བྱེད་པ་དང་། དེ་ནས་གཏུམ་མོའི་མེ་དམིགས་སྦར་བས་ཟིན་པ་བརྟན་པར་བྱེད་པ་དང་། སླར་ཡང་དྲོད་བོགས་དབྱུང་། བདེ་བ་བོགས་དབྱུང་། མི་རྟོག་པ་བོགས་དབྱུང་གསུམ་གྱིས་བརྟན་པ་བོགས་དབྱུང་བར་བྱས་ནས་གཏུམ་མོའི་དུས་གསུམ་དུ་དྲོད་བཞི་ལ་སོགས་པའི་དབང་དུ་མ་གཏང་བར་བསྒོམས་པས་རྟགས་བཅུ་དང་ཡོན་ཏན་བརྒྱད་ལ་སོགས་པ་རིམ་བཞིན་འཆར་བར་འགྱུར་བ་སྟེ། དེའི་ཚུལ་གྱི་དམིགས་དོན་བསྡུས་ནས་སྟོན་པ་ལ། གོང་སྨོས་ལྟར་སྔོན་འགྲོ་སྤྱི་དང་རིམ་པ་དང་པོ་བསྒོམས་པའི་རྗེས་ཀྱི་ལྷ་སྐུ་ཕྱག་རྒྱ་གཅིག་པ་དེའི་སྐུའི་ནང་ཐམས་ཅད་སྟོང་བར་སྒོམ་སྟེ། དེ་ཡང་སྟབས་གཅིག་ཏུ་མི་གསལ་ན་རིམ་པས་དབུ་ལ་སོགས་པ་ཆ་ཤས་ནས་སྟོང་བར་བསྒོམས་ཏེ་མཐར་སྐུའི་རྣམ་པ་དེ་ཆེ་ཆུང་སྣ་ཚོགས་སུ་བསྒོམ་ནས་དེ་དང་དེའི་ནང་སྟོང་བར་སྒོམ་མོ། །དེ་ནས་སྐུ་དེའི་ནང་དབུས་དྲང་བོར་རྩ་དབུ་མ་མཚན་ཉིད་བཞི་ལྡན་རྩ་འཁོར་བཞི་མ་གཡས་གཡོན་དུ་རོ་རྐྱང་གཉིས་དང་བཅས་པ་གསལ་ནས་རླུང་རོ་བསལ་བ་སྔོན་དུ་འགྲོ་བས་རླུང་སྦྱོར་བ་བཞི་ལྡན་འཛིན་ཚུལ་ལག་ཁྲིད་ལྟར་བགྱིད་པ་དང་། དབུ་མའི་ནང་རྩ་འཁོར་བཞིའི་དབུས་སུ་ཐིག་ལེ་གསལ་བའི་འགྲོ་འོང་ལ་སེམས་འཛིན་པ་དང་། ལྟེ་འོག་རྩ་གསུམ་གྱི་འདུས་མདོར་ཨ་ཤད་མཚན་ཉིད་བཞི་ལྡན་ཤིན་ཏུ་ཕྲ་བ་ལ་སེམས་འཛིན་པ་ནས་རིམ་པར་དམིགས་པ་སྤར་ཏེ་མཐར་སྤྱི་བོའི་ཧཾ་ཡིག་ལ་རེག་པ་ལས་བདེ་བ་གཡོས་ཏེ་བདུད་རྩི་བབ་པས་དགའ་བཞི་འབྱུང་ལྡོག་ལ་སེམས་འཛིན་པ་རྣམས་དང་བསྒྲགས་ནས་ལུས་ཀྱི་འཕྲུལ་འཁོར་རྣམས་ཀྱང་མཐོང་བརྒྱུད་ལྟར་བྱའོ། །དེ་ཡང་སྤྱིར་བཏང་ལུས་ཀྱི་གནད་དྲུག་ལས། ནོར་བུའི་སྦུབ་དང་སྙིང་ག་ནི་གཉིད་འཐུག་གི་རྣལ་འབྱོར་སྒོམ་པའི་གནད་དང་། མགྲིན་པ་དང་གསང་གནས་ནི་རྨི་ལམ་སྒོམ་པའི་གནད་དང་། སྤྱི་བོ་དང་ལྟེ་བ་ནི་སད་པའི་གནས་སྐབས་ཀྱི་རྣལ་འབྱོར་སྒོམ་པའི་གནད་དུ་བཤད་པའི་ཕྱིར་འདིར་སྤྱིར་བོའི་ཧཾ་དང་། ལྟེ་བའི་ཨ་ཤད་ལ་སེམས་འཛིན་པ་ནི་གནད་མ་ནོར་བར་བསྣུན་པ་ཉིད་ཡིན་ནོ། །གཉིས་པ་འོད་གསལ་ལ་འཇུག་པ་ནི། གོང་ལྟར་སྲོག་རྩོལ་བསྡམས་ཏེ། དབུ་མའི་ནང་གི་དམིགས་རྟེན་ལ་སེམས་རྩེ་གཅིག་ཏུ་དྲིལ་བས། དབུ་མར་རླུང་ཞུགས་པའི་རྟགས་སུ་སྣ་སྒོར་རླུང་མཉམ་པོར་རྒྱུ་བ་རེ་འགའ་ཙམ་མ་ཡིན་པར་ངེས་ཅན་དུ་འབྱུང་བ་དང་། གནས་པའི་རྟགས་སུ་རྒྱུ་བ་རང་འགགས་པ་དང་། རླུང་ལྔ་ཐིམ་པའི་རྟགས་རིམ་བཞིན། ས་རླུང་ཐིམ་པས་དུ་བ་ལྟ་བུ། ཆུ་རླུང་ཐིམ་པས་སྨིག་རྒྱུ་ལྟ་བུ། མེ་རླུང་ཐིམ་པས་སྲིན་བུ་མེ་ཁྱེར་ལྟ་བུ། རླུང་གི་རླུང་ཐིམ་པས་སྒྲོན་མེ་འབར་བ་རླུང་གིས་མ་བསྐྱོད་པ་ལྟ་བུ། ནམ་མཁའི་རླུང་ཐིམ་པས་ནམ་མཁའ་ལྟ་བུའི་སྣང་བ་སྟེ་ལྔ་ཅི་རིགས་པར་འཆར་ལ། རླུང་ལྔ་རྣམ་ཤེས་ལ་ཐིམ་པའི་རྗེས་ཐོག་དེར་རྣམ་ཤེས་སྣང་བ་ལ་ཐིམ་པས་སྟོང་བ་དང་པོ་དང་ཉམས་དཀར་ལམ་འཆར་བ་ནས་ཉེར་ཐོབ་འོད་གསལ་ལ་ཐིམ་པའི་བར་གྱིས་སྟོང་བཞིའི་འགྲོས་ཀྱིས་ཉམས་བཞི་རིམ་པར་ཤར་ཏེ་དུག་གསུམ་ལས་གྱུར་པའི་རྟོག་པ་བརྒྱད་ཅུ་འགགས་ནས་འོད་གསལ་འབའ་ཞིག་ཏུ་གྱུར་པ་ན། དེའི་རང་བཞིན་སྟོན་གནམ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་དེ་ངོ་འཕྲོད་པར་བྱས་ནས་དེ་གའི་ངང་དུ་མ་བཅོས་པར་འཇོག་པ་གནད་དོ། །འདི་ཉིན་དུས་སུའང་སྒོམ་པ་ནི་གཉིད་སྐབས་དང་། འཆི་ཁ་ཟིན་སླ་བའི་ཆེད་དུ་ཡིན་ཏེ། དེས་ན་དམིགས་རྟེན་ཡང་སྙིང་གའི་རྩ་འཁོར་གྱི་དབུས་ཀྱི་དབུ་མའི་ནང་དེར་པདྨ་འདབ་བཞིའི་ལྟེ་བ་ཧཱུཾ་དང་འདབ་མར་ཨ་ནུ་ཏ་ར་གསལ་ཏེ་ཐིམ་རིམ་བཞིན་དམིགས་པ་མདུན་ནས་གཡས་སྐོར་གྱིས་སྤྲོས་ཏེ་མཐར་དབུས་ཀྱི་ཧཱུྃ་ཁོ་ན་ལ་གཏད་པར་གསུངས་ཤིང་འདི་ནི་འཆི་བ་ཆོས་སྐུར་གྲོལ་པའི་གདམས་ངག་སྟེ། དེས་ན་འཆི་དུས་དང་དེའི་ཚད་འཛིན་གཉིད་ཀྱི་སྐབས་སུ་ནི་ངོས་མི་ཟིན་པ་མ་གཏོགས་འགྲོ་བ་ཐམས་ཅད་ལ་གཞིའི་འོད་གསལ་འདི་ལྟར་འཆར་བ་ཡིན་པའི་ཕྱིར་གདམས་ངག་ད་ལྟ་ན་གོམས་པོ་ཡོད་ཕྱིན་དེའི་དུས་སུ་གྲོལ་པར་སླ་བ་ཡིན་ནོ། །གསུམ་པ་དེ་ལས་སྒྱུ་མའི་ལྷ་སྐུར་ལྡང་བ་ནི་གཞི་དུས་སུའང་འོད་གསལ་ལས་ལུགས་ལྡོག་ཏུ་ཆོས་ཉིད་ཀྱི་སྣང་བ་ཡུན་རིང་ཐུང་མ་ངེས་པ་ཞིག་འཆར་བས་མཚམས་སྦྱར་ནས་སྲིད་པའི་བར་དོའམ་དེའི་ཚད་འཛིན་རྨི་ལམ་གྱི་ཡིད་ལུས་འགྲུབ་པ་ཡིན་ཏེ། དེས་ན་དེ་དག་ཏུ་གྲོལ་པ་མངོན་དུ་བྱེད་པའི་ཕྱིར། འོད་གསལ་དེ་ཉིད་ལས་ལྡང་བར་རྩོམ་པ་ན་ཐ་མལ་གྱི་སྣོད་བཅུད་ལ་སོགས་པའི་དོད་དུ་རླུང་སེམས་ཙམ་གྱི་འཕེན་པ་ལ་གྲུབ་པའི་སྒྱུ་མ་ལྟ་བུའི་ལྷ་སྐུ་རྟེན་དང་བརྟེན་པར་བཅས་པའི་རྣམ་པར་ལྡང་ཞིང་། དེ་ལས་ཐ་མལ་གྱི་སྣང་ཞེན་འཆར་ན་སླར་ཡང་འོད་གསལ་དུ་འཇུག་ལྡང་བྱ་བ་ལ་བརྩོན་པ་སྟེ་འདི་ནི་ཉིན་སྣང་སྒྱུ་ལུས་སུ་སྦྱོང་ཚུལ་དང་། དེའི་མཚོན་ནས་མཚན་མོའང་རྨི་ལམ་འཛིན་པའི་གནད་མགྲིན་པའི་རྩ་འཁོར་གྱི་དབུས་སུ་སྔར་བཞིན་པད་འདབ་བཞིའི་དབུས་སུ་ཨོཾ་དང་འདབ་བཞིར་ཨ་ནུ་ཏ་ར་བསྒོམས་ཏེ་དེ་ལ་དམིགས་པ་འཛིན་ཚུལ་ཀྱང་འདྲ་བ་ལས། བསམ་པའི་ཁྱད་པར་འདི་ལྟར་སྣང་བ་ཐམས་ཅད་རྨི་ལམ་སྒྱུ་མ་ཡིན་ནོ་ཞེས་ཉིན་མོའི་དུས་སུའང་ཡང་ཡང་བསམ་ཞིང་ཁྱད་པར་གཉིད་དུ་འགྲོ་ཁ་དེར་ནན་ཏན་བྱས་ནས་རྨི་ལམ་འཛིན་པའི་འདུན་པ་བཏང་སྟེ། མ་ཡེངས་པར་བྱེད་པ་གལ་ཆེའོ། །དེ་ནས་ཟིན་ན་གདོད་སྦྱང་བསྒྱུར་སྤེལ་བའི་འདུན་པ་སོ་སོར་བསྒྱུར་ནས་སྦྱང་དགོས་ཏེ་འདི་དག་གི་ཚུལ་དང་འགལ་སྤང་མཐུན་སྒྲུབ་ཀྱི་སྤྱོད་ལམ་རྣམས་ནི་རེ་ཞིག་བཏང་སྙོམས་སུ་བཞག་གོ །དེ་ལྟར་གཉིད་འཐུག་སྲབ་ཀྱི་འོད་གསལ་ལས་རྨི་ལམ་དུ་ལྡང་བར་རྩོམ་པ་ན། དེའི་དོད་དུ་སྒྱུ་མའི་ལྷ་སྐུར་ལྡང་བའམ། རྨི་ལམ་གྲུབ་ཟིན་རྟིང་གདོད་ངོ་ཤེས་ནས་འོད་གསལ་དུ་འཇུག་ལྡང་བྱེད་པ་གང་ཡིན་ཀྱང་རྨི་ལམ་སྐབས་དེར་སྒྱུ་མའི་ལྷ་སྐུར་ལྡང་འཇུག་བྱེད་ནུས་པ་ཞིག་ཡོད་ཕྱིན་བར་དོར་ཡང་ཚུལ་དེ་ལྟ་བུའི་སྒོ་ནས་ལྡང་འཇུག་བྱས་ནས་གྲོལ་བ་ཡིན་པས་འདིའི་མན་ངག་ཟུར་དུ་མ་བཤད་དོ། །མདོར་ན་ཚུལ་དེ་དག་བར་དོ་ལོངས་སྐུར་གྲོལ་བའི་གདམས་པ་ཡིན་པས། གདམས་ངག་འདི་དག་ལ་ད་ལྟ་རང་བྱན་ཚུད་པ་ཡོད་ཕྱིན་བར་དོ་གྲོལ་བ་ལའང་ཐེ་ཚོམ་ཡོད་པ་མ་ཡིན་ནོ། །འདིར་སྒྱུ་ལུས་ཀྱི་སྔོན་དུ་འོད་གསལ་ལ་འཇུག་པར་བཤད་པ་ཡང་རྨི་ལམ་གྱི་སྔོན་དུ་གཉིད་འཐུག་གི་འོད་གསལ་འཛིན་པའི་ཆེད་དུ་ཡིན་གྱི་གཞན་དུ་ན་སྒྱུ་ལུས་གྲུབ་ནས་གཟོད་འོད་གསལ་འགྲུབ་དགོས་པའི་ཕྱིར་འོད་གསལ་གྱི་སྔོན་སྒྱུ་མའི་ལྷ་སྐུར་ལྡང་བ་ཡིན་པའང་ཤེས་པར་བྱའོ། །དེ་ནས་རྨི་ལམ་ལས་སད་པར་རྩོམ་པ་ན་ཆོས་སྐུ་ལས་ལོངས་སྐུ་དང་། ལོངས་སྐུ་ལས་སྤྲུལ་སྐུའི་ཚུལ་གྱིས་སད་པ་དང་མཉམ་དུ་ཉིན་སྣང་བསྐྱེད་རིམ་གྱི་ལྷ་སྐུའི་བྱེ་བྲག་གཉུགས་མའི་ཧེ་རུ་ཀར་ལངས་ཏེ་གོ་བགོ་ལུས་བསྲུང་གྲུབ་པ་དང་། ཐུན་མོང་གི་སྔོན་འགྲོ་སེམས་བསྐྱེད་སྡོམ་བཟུང་ནས་བརྩམ་རིམ་པ་དང་པོ་སྒོམ་པ་དང་རྗེས་འབྲེལ་དུ་སྔར་བཞིན་གཏུམ་མོ་ལ་ནན་ཏན་བྱ་སྟེ། འདི་ནི་སྐྱེ་སྲིད་སྤྲུལ་སྐུར་གྲོལ་བའི་གདམས་པ་ཡིན་ཕྱིར་གལ་ཏེ་བར་དོར་གྲོལ་བ་མ་ཐོབ་ཀྱང་སྐྱེ་བ་བརྒྱུད་ནས་གྲོལ་བའི་ཐབས་དམ་པའོ། །དེས་ན་གདམས་ངག་གསུམ་པོ་དེ་ནི་གཉིད་འཐུག་དང་འཆི་བ་ཆོས་སྐུར་བསྲེ་བ། རྨི་ལམ་དང་བར་དོ་ལོངས་སྐུར་བསྲེ་བ། ཉིན་སྣང་དང་སྐྱེ་བ་སྤྲུལ་སྐུར་བསྲེ་བ་སྟེ་བསྲེ་བ་སྐོར་གསུམ་ཀྱང་ཡིན་ལ། འཆི་སྲིད་འོད་གསལ་ཆོས་སྐུར་འཕོ་བ་བར་སྲིད་སྒྱུ་ལུས་ལོངས་སྐུར་འཕོ་བ། སྐྱེ་སྲིད་ལྷར་སྣང་སྤྲུལ་སྐུར་འཕོ་བ་སྟེ་འཕོ་བ་སྐོར་གསུམ་ཀྱང་ཡིན་པའི་ཕྱིར་བསྲེ་འཕོ་སྐོར་གསུམ་མམ། བསྲེ་འཕོ་སྐོར་དགུར་གྲགས་པ་རྣམས་ཡིན་ནོ། །འདི་དག་ནི་གཙོ་བོར་དཔལ་སྒྱུ་འཕྲུལ་དྲ་བ་ཆེན་པོ་དང་། ཡང་དག་ཧེ་རུ་ཀའི་རྒྱུད་དང་། རྟ་མཆོག་རོལ་པ་དྲེགས་པ་གཟན་ལ་འབེབ་པའི་རྒྱུད་རྣམས་ཀྱི་དགོངས་པ། ཨིནྟྲ་བྷུ་ཏིའི་རིམ་པ་གཉིས་པ་སོགས་ཀྱིས་བཀྲལ་བའི་དོན་མ་ནོར་བ་ཉིད་ཡིན་ལ། འདིར་རྒྱས་པར་སྤྲོ་མ་ནུས་ཀྱང་གཞན་ཞིག་ཏུ་འགོད་པར་སེམས་སོ། །དེ་དག་གིས་གསང་ཆེན་རྡོ་རྗེའི་ཐེག་པའི་ལམ་གྱི་དངོས་གཞི་རྫོགས་པའི་རིམ་པ་མདོ་ཙམ་སྨྲོས་ནས། གཉིས་པ་ལམ་དེའི་བོགས་འདོན་སྤྱོད་པའི་སྐྱོང་ཚུལ་འཆད་པ་ལ། སྤྱིར་ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་སྟེ་གཉིས་སུ་བཤད་པ་དང་། བྱེ་བྲག་རིམ་གྱིས་པའི་དབང་དུ་བྱས་ནས་ལས་དང་པོ་བའི་དུས་སུ་དགེ་སྦྱོང་གཞོན་ནུ་ལྟ་བུའི་སྤྱོད་པ་ནས། རྣལ་འབྱོར་དབང་ཕྱུག་གི་སྤྱོད་པའི་བར་བདུན་དུ་བཤད་པ་དང་། རྫོགས་ཆེན་གྱི་རྒྱུད་ལས་བུང་བ་ལྟ་བུའི་སྤྱོད་པ་སོགས་བདུན་དུ་བཤད་པ་རྣམས་ཡིན་མོད་དེ། འདིར་མདོར་བསྡུས་ནས་སྟོན་པ་ལ། ཐོག་མར་དགེ་བའི་ཁྲིད་རྣམས་སྐྱོང་བའི་དུས་སུ་ནི་བག་ཡོད་ཀྱི་སྤྱོད་པ་བྱེད་ཚུལ་རང་རང་གི་སྐབས་སུ་ཇི་ལྟར་བཤད་པ་རྣམས་དང་མི་འགལ་བར་བྱེད་དགོས་ལ། བར་ཏུ་དགེ་བའི་ཁྲིད་ཀྱི་སྐབས་འདིར་ཡང་སྤྱིར་བཏང་སྡོམ་པ་གསུམ་ལྡན་དུ་བསྲུང་ཚུལ་སྔ་འགྱུར་རང་ལུགས་སུ་གྲགས་པའི་སྡོམ་པའི་ཁྱད་ཆོས་དྲུག་ལྟར་ངེས་པར་བྱས་ནས། དེའི་བྱེ་བྲག་དུས་སྐབས་གཙོར་སྤྱད་ཅེས་གྲོང་ཡུལ་སོགས་སུ་འདུལ་བའི་ཀུན་སྤྱོད་གཙོ་བོར་འདོན་པ་དང་། དབེན་པར་གསང་སྔགས་ཀྱི་སྤྱོད་པ་རྣམས་རང་ནུས་དང་དཔག་ནས་ཇི་རིགས་པར་ཉམས་སུ་ལེན་པ་སྟེ། དེ་ལས་འདིར་ནི་སྔོན་འགྲོ་ཐུན་མོང་བ་རྣམས་ཚད་དུ་འཁྱོལ་ནས་བསྐྱེད་རིམ་ལ་བརྟན་པ་ཐོབ་ཏེ། རྫོགས་རིམ་ལ་ངེས་པ་ཇི་རིགས་པ་རྙེད་པའི་གང་ཟག་དེས་ལམ་དེ་དག་གི་ཡོན་ཏན་གོང་དུ་འཕེལ་བར་བྱ་བའི་ཕྱིར་དང་། འབྱུང་འགྱུར་ཐ་མ་དགེ་བའི་ཁྲིད་ལ་འཇུག་པར་བྱ་བའི་ཕྱིར་འཁོར་འདས་རུ་ཤན་འབྱེད་པའི་སྤྱོད་པ་ཉིད་བརྩམས་པར་བྱ་སྟེ། འདིར་ནི་རྫོགས་རིམ་ཐུན་མོང་གི་ལམ་ལ་ལྟོས་ནས་རྗེས་ཀྱི་སྤྱོད་པ་སྐྱོང་ཚུལ་དང་། རྫོགས་པ་ཆེན་པོ་ཐུན་མོང་མ་ཡིན་པའི་ལམ་ཁྲེག་ཆོད་དང་ཐོད་རྒལ་ལ་ལྟོས་ནས་དེའི་སྔོན་འགྲོར་བཤད་པའི་ཕྱིར་གང་དུ་སྦྱར་ཀྱང་མི་འགལ་མོད་དེ་འདིར་རེ་ཞིག་སྐབས་འདིར་བཤད་པར་བྱའོ། །དེ་ལ་ཡང་གདམས་ངག་གི་རྣམ་གྲངས་ལ་ལྟོས་ནས་ཕྱིའི་འཁོར་འདས་རུ་ཤན་ལུས་ངག་ཡིད་གསུམ་སྦྱོང་བའི་སྒོ་ནས་དབྱེ་བ་དང་། ནང་གི་འཁོར་འདས་རུ་ཤན་རིགས་དྲུག་གི་ས་བོན་སྲེག་པའི་སྒོ་ནས་དབྱེ་བ་སྟེ་གཉིས་སུ་བཤད་པ་དང་། ཆ་མཐུན་གྱི་མན་ངག་གཞན་གཅོད་ཡུལ་དང་། ཞི་བྱེད་དང་། རོ་སྙོམས་སུ་གྲགས་པ་རྣམས་ཀྱི་དོན་ཡང་འདིར་འདུ་བར་བྱས་ནས་ཉམས་སུ་ལེན་དགོས་ཏེ། དེའི་ཚུལ་ཡང་གཅོད་གྱི་སྐབས་ལྟ་བུར་མཚོན་ན། སྔོན་འགྲོ་རྣམས་ནི་ཚོགས་ཞིང་གི་རྣམ་འགྱུར་དང་། ངག་འདོན་གྱི་བྱེ་བྲག་ཙམ་ལས་འདིར་བཤད་པ་དང་དོན་གཅིག་ཡིན་ལ། འདུན་པ་སྐབས་སུ་སྒྱུར་བ་ཙམ་ནི་མ་ངེས་པའོ། །དངོས་གཞི་ལ་གཉིས་ལས་ཡུམ་དོན་ངོ་སྤྲད་པ་ནི་ཤེར་ཕྱིན་གྱི་སྐབས་སུ་ལྟ་བ་ངོ་སྤྲད་པ་དང་དོན་གཅིག་པའི་ཕྱིར། འདིའི་ཁྱད་པར་གྱི་ཆོས་ནི་ཐུན་མོང་མ་ཡིན་པའི་བདུད་བཞི་དབྱིངས་སུ་གཅོད་པ་དེ་དང་རྗེས་ལ་གཉན་སར་ཕུང་བོའི་མཆོད་སྦྱིན་བགྱིད་བཞིན་རོ་སྙོམ་གྱི་སྤྱོད་སྐྱོང་པ་དེ་ཡིན་ནོ། །ཞི་བྱེད་ཀྱང་དམིགས་པའི་བྱེ་བྲག་ཙམ་མ་གཏོགས་དེར་མཚུངས་ལ། རོ་སྙོམས་ཡང་དེར་གནད་གཅིག་གོ དེས་ན་འདིར་མདོར་བསྡུ་ན། ལུས་ཀྱི་སྤྱོད་པ་གང་དྲན་བྱེད་པ་དང་། ངག་གི་བརྗོད་པ་གང་དྲན་སྨྲ་བ་དང་། སེམས་ཀྱི་དྲན་རྟོག་གང་དྲན་སློང་བ་རྣམས་ནི། རང་རྒྱུད་དང་ལྷན་ཅིག་བདུད་བཞི་བག་ཉལ་དུ་གནས་པ་དེ་མངོན་གྱུར་དུ་ལྷོང་བའི་རྒྱུ་ཡིན་ལ། གཉན་ས་སོགས་འགྲིམས་པས་འཇིགས་སྣང་སྐྱེས་པས་མཚོན་ཚོགས་དྲུག་གི་ཡུལ་རྐྱེན་རྣམས་ཀྱང་དེ་ལྷོང་བའི་རྐྱེན་ཡིན་ནོ། །ལྷོང་བ་དེ་ལ་རྟེན་ནས་འཁྲུལ་པའི་སྣང་བར་བདེན་འཛིན་ཞུགས་ཏེ་འཇིགས་སྐྲག་ཆགས་སྡང་ཐེ་ཚོམ་སོགས་སྐྱེས་པ་དེ་ནི་གཅད་བྱའི་བདུད་དམ། རུ་ཤན་དབྱེ་བའི་གཞི་ཉིད་ཡིན་ཏེ། དེས་ན་ཆགས་སྡང་དེས་ཉེ་བར་བླང་བའི་འཇིག་རྟེན་ཆོས་བརྒྱད་དག་འདོར་ལེན་བགྱིད་པར་སེམས་པ་ན་དེ་དག་ཕཊ་དོན་ཐབས་ཤེས་ཟུང་འཇུག་གི་དབྱིངས་སུ་བཅད་ནས་རོ་བསྙམས་ཏེ་འཁོར་འདས་རུ་ཤན་འབྱེད་དགོས་ལ། དེ་ཡང་འདི་ལྟར་སྣང་བའི་ཡུལ་ཤེས་མཐའ་དག་རང་ངོ་ནས་རང་བཞིན་གྱིས་བདེན་པར་གྲུབ་བོ་སྙམ་དུ་བདེན་པར་འཛིན་ཞིང་ཞེན་པའི་བདག་འཛིན་དེས་བསྐྱེད་དང་བཅས་པ་འདི་ནི་འཁོར་བའི་རུ་ཡིན་ལ། དེ་དག་ལ་བདེན་པར་གྲུབ་པའི་བདག་རང་བཞིན་གྱིས་གྲུབ་པ་མེད་པའི་གནས་ལུགས་ནི་མྱང་འདས་ཀྱི་རུ་སྟེ། དེ་གཉིས་ཤན་འབྱེད་པའི་ཐབས་ནི་ཆགས་སྡང་རོ་སྙོམས་པའི་སྒོ་ནས་བདག་འཛིན་རྩད་ནས་གཅོད་པའི་གདམས་པ་དེའོ། །དེས་ན་འདིར་སྤྱོད་པ་བསྐྱང་བའི་དགོས་པའི་གཙོ་བོ་དེ་ཤེས་པར་བྱས་ནས་དེའི་ཡན་ལག་ཏུ། ཚོགས་བསགས་ཐུན་མོང་མ་ཡིན་པ་ཕུང་པོའི་མཆོད་སྦྱིན་ལ་འབད་པ་དང་། ལམ་ཁྱེར་ཐུན་མོང་མ་ཡིན་པ་ན་དགའ་ཤི་སྐྱིད་དང་བདེ་སྡུག་གཏོང་ལེན་པ་ལ་བརྩོན་པ་དང་། སྒྲིབ་སྦྱོང་ཐུན་མོང་མ་ཡིན་པ་རིགས་དྲུག་སྲེག་སྦྱང་རྣམས་ལ་གནད་དུ་སྣུན་དགོས་ཤིང་། དེ་དག་སོ་སོའི་རྣམ་དབྱེ་དང་བྱེ་བྲག་གི་དགོས་པ་སོགས་མང་ཞིག་མཆིས་རུང་རེ་ཞིག་དེ་ཙམ་མོ། །འོན་ཀྱང་རིགས་དྲུག་སྲེག་སྦྱང་གི་སྐབས་སུ་བསྲེག་བྱ་རིགས་དྲུག་གི་ས་བོན་རྣམས་ངོས་མ་ཟིན་ན་ནད་ངོས་མ་ཟིན་པའི་སྨན་ལྟར་དོན་དུ་མི་འགྱུར་ཕྱིར་དེ་བཤད་ན། སྤྱིར་འཁོར་བའི་རྩ་བའམ་ས་བོན་ནི་བདག་འཛིན་གློ་བུར་བ་ཉིད་ཡིན་པར་གོང་དུ་བཤད་པ་ལྟར་ལ་བྱེ་བྲག་འདི་སྐབས་སུ་འགྲོ་བ་རིགས་དྲུག་ཏུ་སྣང་བའི་ཆ་ནས་བཞག་དགོས་པའི་ཕྱིར་བདག་འཛིན་དེས་བསྐྱེད་པའི་རྩ་བའི་ཉོན་མོངས་པ་དྲུག་པོ་འཁོར་དང་བཅས་པ་རྣམས་ཡིན་ནོ། །དེ་ཡང་རིམ་པ་བཞིན་ལྷའི་ས་བོན་ང་རྒྱལ་ཏེ་དེ་ལ་དབྱེ་ན་བདུན། ལྷ་མིན་གྱི་ས་བོན་ལྟ་བ་སྟེ་དེ་ལ་དབྱེ་ན་ལྔ། མིའི་ས་བོན་ཐེ་ཚོམ། དུད་འགྲོའི་ས་བོན་གཏི་མུག་གམ་མ་རིག་པ་སྟེ་འདི་གཉིས་དོན་གཅིག་པར་མདོ་ལས་བཤད་དོ། །ཡི་དྭགས་ཀྱི་ས་བོན་འདོད་ཆགས། དམྱལ་བའི་ས་བོན་ཁོང་ཁྲོའམ་ཞེ་སྡང་སྟེ། དེ་དག་གི་འཁོར་ནི་ཁྲོ་བ་ལ་སོགས་པ་ཉེ་ཉོན་རྣམས་ལས་ཅི་རིགས་པར་སྦྱར་བ་རྣམས་སོ། །དེས་ན་གང་ཟག་གཅིག་གི་རྒྱུད་ལའང་འདི་དྲུག་ཀ་མངོན་ལྐོག་གང་རུང་གི་ཚུལ་དུ་ཡོད་པའི་ཕྱིར་དེ་ཉིད་འཕེན་པའི་ལས་ཀྱི་རྐྱེན་དང་འཕྲད་ན་རིགས་དྲུག་དེ་དང་དེར་སྐྱེ་བར་འགྱུར་བའི་རྒྱུ་མཚན་ཡང་དེ་ཡིན་ནོ། །དེ་དག་ཀྱང་འགྲོ་བའི་ལུས་དང་འབྲེལ་བའི་སྐབས་ན་ལུས་ཀྱི་གནས་དྲུག་སོ་སོར་དེ་དང་དེའི་རྟེན་བྱེད་པའི་རྩ་གནས་ཀྱི་ཡི་གེ་ཨ་ལ་སོགས་པའི་རྣམ་པར་གནས་པའི་ཕྱིར་རྟེན་དང་བརྟེན་པའི་སྒོ་ནས་དབྱེ་བ་གཉིས་གཉིས་སུ་འགྱུར་རོ། །འདིར་ངེས་པ་རྙེད་ནས་སྦྱོང་བྱེད་ཀྱི་གཉེན་པོ་སྒོམ་པ་ནའང་བརྟེན་པའི་ས་བོན་དྲུག་པོ་དེ་བདག་མེད་རྟོགས་པའི་ཤེས་རབ་ཀྱི་མེས་སྲེག་པ་དང་། རྟེན་གྱི་ས་བོན་དྲུག་པོ་དེ་ཡི་གེ་གསུམ་ལས་འཕྲོས་པའི་འོད་ཟེར་གྱི་མེས་སྲེག་པ་སྟེ། དེ་ལྟ་བུའི་རིགས་དྲུག་སྲེག་སྦྱོང་བྱས་ན་དོན་ལ་གནས་པ་ཡིན་ནོ། །དེས་ན་ཕྱི་ནང་གི་འཁོར་འདས་རུ་ཤན་དབྱེ་བའི་སྤྱོད་པ་སྐྱོང་བའི་ཚུལ་འདི་ནི་སྐབས་འདི་དང་གཞན་དག་ཏུའང་ཇི་རིགས་པར་ཉམས་སུ་བླང་བར་བྱའོ། །དེ་ལྟར་ན་བར་དུ་དགེ་བའི་ཁྲིད་ས་བཅད་ཙམ་འཆད་གྲུབ་བོ། ། དོན་གསུམ་པ་ཐ་མར་དགེ་བ་འོད་གསལ་རྫོགས་པ་ཆེན་པོའི་རྣམ་བཞག་འཆད་པ་ལ། སྤྱིར་ལམ་འདིའི་ལུས་ཡོངས་སུ་རྫོགས་པ་རྡོ་རྗེའི་གནས་བཅུ་གཅིག་གི་བསྡུས་པའི་ཚུལ་ཀུན་མཁྱེན་ཆེན་པོས་ཚོགས་དོན་རིན་པོ་ཆེའི་མཛོད་དུ། གཞི་དང་འཁྲུལ་ཚུལ་ཁྱབ་ཚུལ་དང་། །གནས་དང་ལམ་དང་སྒོ་དང་ཡུལ། །ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་ཐེག་པའི་རྒྱལ་པོ་འདིའི་ཁྱད་པར་གྱི་ཆོས་ཐམས་ཅད་ས་བཅད་དེ་དག་གིས་བསྡུས་པར་རྒྱུད་སྡེ་དཔང་པོར་བཞག་ནས་གསུངས་པ་ལྟར་ངེས་དགོས་ཀྱང་འདིར་བསྡུ་ན། གཞི་ནས་ཡུལ་གྱི་བར་ས་བཅད་བདུན་པོ་རྣམས་ནི། གཞི་ཉིད་ཀྱི་ཁོངས་སུ་འདུ་ལ། ཉམས་ལེན་ཚད་དང་བར་མ་དོ་གསུམ་ནི་ལམ་དང་། གྲོལ་ས་ནི་འབྲས་བུ་སྟེ། དེས་ན་གཞི་ལམ་འབྲས་གསུམ་དུ་འདུ་བར་འཆད་དོ། །དེ་ཡང་ཐུན་མོང་གི་གཞི་ལམ་འབྲས་བུའི་རྣམ་གཞག་རྣམས་ལས་འདིར་བཤད་པ་ཉིད་ཁྱད་པར་དུ་གང་གིས་འཕགས་པའི་ཁྱད་པར་གྱི་ཆོས་རྣམས་ངེས་དགོས་ཏེ། དེའི་ཕྱིར་དེ་ཉིད་མདོ་ཙམ་འཆད་པ་ལ། སྤྱིར་རང་ཅག་རྣམས་འཁོར་བར་འཁྱམས་པའི་དུས་སུའང་འཁོར་བའི་འཁྲུལ་སྣང་འགྲུབ་པའི་རྟེན་གཞི་དང་། མྱ་ངན་ལས་འདས་པའི་སྐབས་སུ་དེའི་ཡོན་ཏན་སྐུ་དང་ཡེ་ཤེས་རྣམས་འགྲུབ་པའི་བསྒྲུབ་གཞིར་གྱུར་པ་དེ་ལ་གཞི་ཞེས་བྱ་ཏེ། དེ་རང་གི་མཚན་གཞི་འཇོག་པ་ནི་ཐེག་པའི་བྱེ་བྱག་དང་གང་ཟག་གི་བློ་རིམ་གྱིས་འཇོག་ཚུལ་མི་གཅིག་པ་མང་དུ་བྱུང་བ་ནི། རིམ་པ་བཞིན་ཉན་ཐོས་པ་རྣམས་ཀྱིས་ནི་རང་གིས་བདེན་གཉིས་ཀྱི་རྣམ་གཞག་ཙམ་འདོད་པ་ཡོད་ཀྱང་ཐེག་ཆེན་པ་རྣམས་ཀྱིས་བརྟགས་ན་ཐ་སྙད་ཀྱི་བདེན་པ་ཁོ་ནའི་སྒོ་ནས་དེ་བཞག་པར་སྣང་སྟེ། དཔེར་ན་ཤེས་བྱའི་གཞི་ལྔ་ལྟ་བུའོ། །འདིར་བྱེ་མདོ་གཉིས་ཀྱི་མི་འདྲ་བའི་ཁྱད་པར་ཀྱང་ཇི་རིགས་པ་ཡོད་དོ། །ཐེག་ཆེན་ལའང་གཉིས་ལས། རྣལ་འབྱོར་སྤྱོད་པ་རྣམས་ཀྱིས་ནི་སྤྱིར་ཤེས་བྱ་ཐམས་ཅད་དོན་བཅུར་བསྡུས་ནས་འཆད་པ་ན། ཤེས་བྱའི་གནས་ཀུན་གཞི་རྣམ་ཤེས་དང་། མཚན་ཉིད་ཀུན་བཏགས་གཞན་དབང་ཡོངས་གྲུབ་གསུམ་གྱི་སྒོ་ནས་འཆད་དེ་འདིས་གཞི་ལ་བདེན་གཉིས་ཀྱི་རྣམ་བཞག་དོན་གྱིས་འདོད་པར་སྣང་ཡང་དབུ་མ་བ་དང་འཇོག་ཚུལ་མི་འདྲའོ། །དབུ་མ་པ་ནི་གཞིའི་ཆོས་རྣམས་བདེན་པ་གཉིས་ཀྱི་སྒོ་ནས་གཏན་ལ་འབེབས་ཏེ། དཔེར་ན་གཞི་དབུ་མ་བདེན་གཉིས་ཟེར་བ་ལྟ་བུའོ། །འདིར་ཁ་ཅིག་དབུ་མ་པའི་ལུགས་ལ་བདེ་གཤེགས་སྙིང་པོ་ཞེས་བྱ་བ་ཞིག་མེད་པར་འདོད་པ་དང་། ཡང་ཁ་ཅིག་ཕུང་པོ་ཁམས་དང་སྐྱེ་མཆེད་རྣམས་ཀྱི་རང་བཞིན་བདེན་པ་གཉིས་སུ་གཏན་ལ་ཕབས་པ་དེ་ལས་གུད་ན་བདེ་གཤེགས་སྙིང་པོ་ཞེས་བྱ་བ་ཞིག་ཡོད་པར་འདོད་པ་རྣམས་ནི། གཞུང་ཆེན་པོ་རྣམས་མ་མཐོང་བའི་སྐྱོན་དང་། བདེ་བཤེགས་སྙིང་པོ་ཞེས་བྱ་བ་ཉིད་ཀྱི་མཚན་དོན་ལེགས་པར་ཁོང་དུ་མ་ཆུད་པའི་སྐྱོན་དག་ཏུ་སྣང་ངོ་། །དེ་བཞིན་ཏུ་གསང་སྔགས་ཀྱི་རྒྱུད་སྡེ་རྣམས་ནི་སྤྱིར་བཏང་དུའང་སྡེ་སྣོད་རིན་པའི་ཆེ་རྣམ་པ་གསུམ་གྱི་གཞུང་གི་མན་ངག་ཉིད་ཡིན་པའི་ཕྱིར་རྣམ་པར་གཞག་པ་ཕལ་ཆེར་མཚུངས་མོད་དེ་བྱེ་བྲག་ཁྱད་པར་གྱི་ཆོས་ཇི་རིགས་པ་རྣམས་མ་གཏོགས་པ་དབུ་མ་དང་ཤིན་ཏུ་ཉེའོ། །དེས་ན་འདིར་ཡང་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ནི་མིང་གི་རྣམ་གྲངས་ཙམ་མ་གཏོགས་དབུ་མའི་རྣམ་བཞག་ལྟར་བཤད་དེ། འདི་ལྟར་དོན་དམ་སྤྲོས་བྲལ་གྱི་དབྱིངས་ལ་ཆོས་ཉིད་ངོ་བོ་ཉིད་ཀྱི་གཞི་ཞེས་དང་། ཐ་སྙད་བདེན་པ་སྣང་བའི་ཆ་ནས་འཁྲུལ་པ་བརྟགས་པའི་གཞི་ཞེས་གཉིས་སུ་གསུངས་པའི་ཕྱིར་རོ། །འོན་ཀྱང་འདིའི་ཁྱད་པར་གྱི་ཆོས་ནི་ལྷག་པའི་བདེན་པ་དབྱེར་མེད་བློས་སྤྱོད་ཡུལ་དང་བྲལ་བ་ཞེས་བྱ་བ་ཉིད་ཡིན་ཏེ་གཞན་དུ་གསལ་ལོ། །ཁྱད་གཞི་དེ་དག་ལས་ཐེག་པའི་རྒྱལ་པོ་འདིའི་ཁྱད་པར་གྱི་ཆོས་ནི་ཐེག་པ་འདིའི་ལུགས་ཀྱིས་གཞི་ལ་སྤྱིར་བཏང་ཡེ་གཞི། སྤྱི་གཞི། གྲོལ་གཞི། འཁྲུལ་གཞི་ཞེས་བཞི་རུ་དབྱེ་བ་དང་། བྱེ་བྲག་ཡེ་གཞི་ལའང་གཞི་ཀ་དག་ཏུ་འདོད་པ་དང་། ལྷུན་འགྲུབ་ཏུ་འདོད་པ་དང་། མ་ངེས་པར་འདོད་པ་དང་། ངེས་པ་དོན་དུ་འདོད་པ་དང་། ཅིར་ཡང་བསྒྱུར་དུ་བཏུབ་པ་འདོད་པ་དང་། ཅིར་ཡང་ཁས་ལེན་བཏུབ་པ་འདོད་པ་དང་། གཞི་མ་ངེས་པའམ་ཁྲ་བོར་འདོད་པ་སྟེ་བདུན་ལས་གཞན་དག་ཅི་རིགས་པར་བཀག་ནས་རང་ལུགས་ལ་ཀ་དག་ལྷུན་འགྲུབ་ཟུང་འཇུག་གམ་ཀ་དག་ཆེན་པོའི་གྲུབ་མཐའ་ཉིད་འཆའ་སྟེ། དེའི་མཚན་གཞི་ནི་ལྷུན་གྲུབ་མ་སྤང་བའི་ཀ་དག་སྟེ། དཔེར་ན་རྣམ་ཀུན་མཆོག་ལྡན་གྱི་སྟོང་བ་ཉིད་ཟེར་བ་ལྟ་བུའོ། །དེས་ན་གཞི་བདུན་པོ་དག་གནད་གཅིག་ཏུ་བསྡུ་མ་ཤེས་པར་ཕྱོགས་རེར་ཞེན་ན་གོལ་སར་བསྟན་ནས་དགགས་ཀྱི་འདིའི་བཀག་བྱ་ཉིད་རྣམ་གྲངས་ཙམ་གྱི་བྲེ་བྲག་དེ་དང་དེ་བཀག་པ་ནི་མི་ཡིན་པ་གོང་གསལ་ལྟར་རོ། །དེས་ན་གདོད་མའི་གནས་ལུགས་སམ། ཡེ་གཞི་ཀ་དག་སྤྲོས་པ་ཐམས་ཅད་དང་བྲལ་བ་དེས་ལྷུན་གྲུབ་རྟེན་འབྱུང་གི་ཆ་མ་སྤང་བའི་ལྷུན་གྲུབ་ཀྱིས་འཁོར་འདས་སུ་མཆེད་པའི་གཞི་བྱེད་པས་ན་སྤྱི་གཞི་ཞེས་བྱ་ལ། དེ་ལས་ཀྱང་ལྷུན་གྲུབ་ཀྱི་སྣང་བ་ལ་ལྷན་སྐྱེས་དང་ཀུན་ཏུ་བརྟགས་པའི་བདག་འཛིན་དག་གིས་བདག་དང་བདག་གིར་བཟུང་བ་ལས་འགྲོ་བའི་གནས་རིགས་དྲུག་ཏུ་རྨི་ལམ་གྱི་ཡུལ་གཟུགས་ལྟར་འཁྲུལ་སྣང་གློ་བུར་བར་སྣང་བ་ཡིན་པས་ན་རྟེན་འབྱུང་བདེན་འཛིན་གྱི་བསླད་པ་དང་བཅས་པ་འདི་དག་དང་མཚུངས་པར་ལྡན་པའི་ལུང་མ་བསྟན་གྱི་ཆ་ལ་འཁྲུལ་གཞིའམ་ཀུན་གཞི་ཞེས་བྱ་སྟེ། འདིར་དབྱེ་སྒོ་གཞན་ཡེ་དོན་གྱི་ཀུན་གཞི། སྦྱོར་བ་དོན་གྱི་ཀུན་གཞི། བག་ཆགས་ལུས་ཀྱི་ཀུན་གཞི། བག་ཆགས་སྣ་ཚོགས་པའི་ཀུན་གཞི་སྟེ་བཞིར་བྱས་པའང་ཡོད། ལྷུན་གྲུབ་ཀྱི་སྣང་བ་ལ་བདག་དང་བདག་གི་བ་དེ་དག་རང་བཞིན་གྱིས་མ་གྲུབ་པར་ཤེས་པའི་རིག་པའི་ཡེ་ཤེས་སམ་རྣམ་པར་མི་རྟོག་པའི་ཡེ་ཤེས་ལྷན་སྐྱེས་སུ་ཤར་བ་དེ་ལ་གྲོལ་གཞི་ཞེས་བྱ་སྟེ། འདི་ལའང་དབྱེ་ན། གཞི་ལས་འཕགས་དང་རང་ངོར་སྣང་། །བྱེ་བྲག་ཕྱེད་དང་ཕྱེད་ཐོག་གྲོལ། །གཞན་ལས་མ་བྱུང་རང་སར་གནས། །འདི་ནི་ཁྱད་ཆོས་དྲུག་ལྡན་ནོ། །ཞེས་པ་ལྟར་ཀུན་ཏུ་བཟང་པོའི་ཁྱད་ཆོས་དྲུག་ཏུ་དབྱེ་བ་ཡོད་དེ། འདིའི་ཚུལ་ལེགས་པར་རྟོགས་ན་དུས་གསུམ་གྱི་སངས་རྒྱས་ཐམས་ཅད་ཀྱང་གནས་འདི་ཁོ་ནས་གྲོལ་པར་ཤེས་ལ། རང་ཉིད་ཀྱི་བྱང་ཆུབ་མངོན་དུ་བྱེད་པ་ཡང་ཐོག་མའི་འཇུག་སྒོ་གང་ལ་ཞུགས་ཀྱང་མཐར་གནས་འདི་ཁོ་ནར་འཇུག་དགོས་པ་ཉིད་རྟོགས་པར་འགྱུར་བ་ཡིན་ནོ། །མདོར་ན་གཞིའི་ཆོས་དེ་དག་ཐམས་ཅད་བདེན་པ་གཉིས་སུ་འདུ་སྟེ་ཀ་དག་སྤྲོས་བྲལ་དོན་དམ་པའི་བདེན་པ་དང་། ལྷུན་གྲུབ་རྟེན་འབྱུང་ཐ་སྙད་ཀྱི་བདེན་པའི་ཕྱོགས་སུ་བཞག་ཅིང་དེ་ཡང་ངོ་བོ་དབྱེར་མེད་དུ་འདོད་པའི་ཕྱིར་རོ། །འདིར་རིགས་དང་བདེ་བར་གཤེགས་པའི་སྙིང་པོར་གསུངས་པ་རྣམས་ཀྱང་གཞིའི་རྒྱུད་འདི་ཁོ་ན་སྟེ། དེ་དག་གང་ཡང་བདེན་པ་གཉིས་ཀའི་སྒོ་ནས་བཞག་པར་བྱ་བ་ལས་ཕྱོགས་གཅིག་ཙམ་བཞག་པ་ནི་གོ་བ་རྒྱ་ཆུང་བར་ཟད་དེ། འདིའི་རང་བཞིན་རྒྱས་པ་ནི་སྙིང་པོའི་མདོ་དང་། མྱ་ངན་ལས་འདས་པ་ཆེན་པོའི་མདོ་ལས་རྒྱ་ཆེར་འབྱུང་ཞིང་། དེ་ཡང་རྣམ་གྲངས་དབྱེ་བ་རྣམས་ནི་བརྟེན་ཆོས་ཀྱི་སྒོ་ནས་དབྱེ་བར་ཟད་ཀྱི། རྟེན་གཞི་ཀ་དག་རང་ངོས་ནས་ནི་དབྱེ་བ་མེད་ཅིང་མཐར་ཐུག་གི་གྲོལ་སའི་ངོ་བོ་ཉིད་སྐུ་དང་ཡང་ཁྱད་པར་ཅུང་ཟད་ཀྱང་མེད་དོ། །འོ་ན་ད་ལྟའི་གནས་ལུགས་དེ་བཞིན་ཉིད་ལའང་ངོ་བོ་ཉིད་སྐུ་ཞེས་ཟེར་རམ་ཞེ་ན། སྐབས་འགར་དེ་ལྟར་སྨོས་པའང་ཡོད་མོད་དེ་འོན་ཀྱང་། དེ་ནི་འདི་ལྟར་ཡིན་ཏེ། དཔེ་ཁང་བ་ལྟ་བུར་མཚོན་ན། རྟེན་གཞི་ཁང་བ་གཅིག་ལ་བརྟེན་པ་རྒྱལ་པོ་ལྟ་བུ་གནས་སྐབས་རྒྱལ་ཁང་ངམ་རྒྱལ་པོའི་ཕོ་བྲང་ཞེས་སྨྲ་བ་དང་། ཚོང་བ་ལྟ་བུ་གནས་སྐབས་ཚོང་ཁང་དང་། མགར་བ་ལྟ་བུ་གནས་སྐབས་མགར་ཁང་ཞེས་སྨྲས་ཀྱང་། ཁང་བ་རང་ངོས་ནས་འགྱུར་བའམ་ཁྱད་པར་དུ་བྱས་པ་ཅུང་ཟད་ཀྱང་མེད་པ་ལྟར། བརྟེན་ཆོས་ཀྱི་སྒོ་ནས་མིང་གཞན་དུ་འགྱུར་བ་ཙམ་སྟེ། དེ་སྐད་དུའང་མགོན་པོ་བྱམས་པས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བརྗོད། །ཅེས་དང་། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་དང་། རྫོགས་ཆེན་རང་གཞུང་ལས། གྲོལ་ས་ཐོག་མ་གང་ཡིན་པའོ། །ཞེས་སོགས་གསུངས་པ་ལྟར་ཏེ་འདི་ནི་རིགས་གཉིས་སུ་དབྱེ་བ་ལྟར་ན་རང་བཞིན་གནས་རིགས་ཀྱི་ཕྱོགས་ནས་སྨོས་པ་ཡིན་ནོ། །དེས་ན་གོང་སྨོས་ལྟར་རྒྱས་འགྱུར་གྱི་རིགས་ལ་ནི་མཚན་ཉིད་དེ་ལྟར་བརྗོད་དུ་མེད་དེ། དེའི་ཕྱིར་སྤྱིར་རིགས་ཙམ་འཆད་པའི་ཚེ་ན་བདེན་པ་གཉིས་ཀའི་སྒོ་ནས་འཇོག་དགོས་ཏེ། རྫོགས་ཆེན་རང་གཞུང་ལས་ཀྱང་། འཁོར་བར་འཁྲུལ་རུང་མས་སྤངས་པའི་གནས་སྐབས་ལ་གཞིའི་ལྷུན་གྲུབ་དང་། འཁྲུལ་རུང་ཇི་རིགས་པ་སྤངས་པའི་གནས་སྐབས་ལ་ལམ་གྱི་ལྷུན་གྲུབ་པ་དང་། འཁྲུལ་རུང་ཡོངས་སུ་སྤངས་པའི་གནས་སྐབས་ལ་འབྲས་བུའི་ལྷུན་གྲུབ་ཅེས་བརྗོད་ནས། གནས་སྐབས་དེ་དང་དེའི་ལྷུན་གྲུབ་དེ་དག་དང་ངོ་བོ་དབྱེར་མེད་དུ་གྱུར་པའི་ཀ་དག་ལ་ནི་བརྟེན་ཆོས་ལ་ལྟོས་པའི་མིང་གི་དབྱེ་བ་ཙམ་ལས་འགྱུར་བའི་གནས་སྐབས་དེ་དག་ཡོད་པར་མི་འཆད་པའི་ཕྱིར་རོ། །དེ་དག་གིས་གཞིའི་གོ་བ་སྤྱིར་བཏང་གི་ཁྱད་པར་ཅུང་ཟད་སྨྲོས་ནས་བྱེ་བྲག་འཁོར་བའི་ལུས་དང་འབྲེལ་བའི་གནས་དང་ལམ་དང་སྒོ་ཡུལ་གྱི་ཁྱད་པར་རྣམས་ཀྱང་ངེས་དགོས་ཏེ། འདི་དག་མ་རྟོགས་པར་འོད་གསལ་དང་ཟུང་འཇུག་སོགས་ཀྱི་ཁྱད་པར་འཆད་པ་རྣམས་ནི་ལུས་ཀྱི་གནས་དེ་དང་དེར་སྲོག་རྩོལ་བསྡམས་པ་ལས་ཡོན་ཏན་དེ་དང་དེ་འཆར་བའི་རྒྱུ་མཚན་ཐུན་མོང་མ་ཡིན་པ་གཞུང་ན་གབ་པ་ཉིད་མ་རྟོགས་བཞིན། ཤར་བའི་ཡོན་ཏན་ཉིད་ལ་ཉམས་དགས་བསྔགས་བརྗོད་བྱས་པ་ཙམ་དུ་ཟད་དོ། །དེས་ན་གཞུང་འདིར་གཞུང་གཞན་གྱི་སྦས་དོན་ཐམས་ཅད་དངོས་སུ་བསྟན་ཅིང་། མཆོག་གི་འོད་གསལ་དང་ཟུང་འཇུག་འགྲུབ་པའི་ཐབས་ཐུན་མོང་མ་ཡིན་པའང་ལམ་གྱི་བརྗོད་བྱའི་གཙོ་བོར་བསྟན་པའི་ཕྱིར་ཐེག་པ་ཀུན་གྱི་མཐར་ཐུག་སྙིང་པོའི་དོན་དུ་བསྟན་པའང་དོན་ལ་གནས་པ་ཡིན་ནོ། །གཉིས་པ་ལམ་གྱི་ཁྱད་པར་ཅུང་ཟད་འཆད་པ་ལ། འདིར་ཡང་ལམ་སྟོན་དགེ་བའི་བཤེས་གཉེན་ནི་རྫོགས་ཆེན་རང་ལམ་གྱི་སྣང་བཞི་མཐར་ཕྱིན་པ་སོགས་ལམ་འདིར་གོམས་འདྲིས་ཡོད་པའི་རྡོ་རྗེ་སློབ་དཔོན་ཐུན་མོང་མ་ཡིན་པ་ཉིད་དགོས་ཀྱི་ཐེག་པ་ཐུན་མོང་ལ་མཁས་པ་ཙམ་གྱིས་ནི་ལམ་འདི་སྒྲ་ཇི་བཞིན་པར་འཆད་ནུས་པ་མ་ཡིན་ནོ། །དེས་ན་སྔར་གསང་སྔགས་ཐུན་མོང་གི་གདམས་པ་ཞུ་ཡུལ་གྱི་བླ་མ་དེ་ལ་གདམས་ངག་འདི་ཉིད་སྟོན་པའི་མཚན་ཉིད་ཚངས་ན་དེ་ཉིད་དང་། མིན་ན་སློབ་དཔོན་གཞན་བཙལ་ལ་བསྟེན་ཚུལ་སློབ་མའི་མཚན་ཉིད་ཐུན་མོང་མ་ཡིན་པ་རྣམས་ཀྱང་འདིར་བཤད་པ་ལྟར་ངེས་པར་བྱས་ནས། འཇུག་སྒོ་སྤྲོས་བཅས་བུམ་དབང་སོགས་འདི་གའི་དབང་བཞི་ཐུན་མོང་མ་ཡིན་པ་རྣམས་ལེགས་པར་ནོས་ཏེ། དེ་དང་རྗེས་འབྲེལ་དུ་ལམ་དངོས་སྒོམ་པ་ལ་ཀ་དག་ཁྲེག་ཆོད་དང་། ལྷུན་འགྲུབ་ཐོད་རྒལ་གྱི་གདམས་པ་གཉིས་ལས། དང་པོ་ལ་རྫོགས་ཆེན་སྤྱི་གཞུང་ལྟར་ན། སྔོན་འགྲོ་སེམས་ཀྱི་ཁང་བུ་བཤིག་པ། དངོས་གཞི་རིག་པ་རང་ངོ་སྤྲད་པ། རྗེས་སྣང་ཉམས་ཀྱི་སྐྱོང་ཐབས་བསྟན་པ་སྟེ་སྦྱོར་དངོས་རྗེས་གསུམ་གྱི་ས་བཅད་གསུམ་གྱིས་ཁོག་ཕུབས་ནས་འཆད་པ་ལས། དང་པོ་ལའང་སྐྱེ་འགགས་གནས་གསུམ་ལ་བརྟགས་པ། གཅིག་དང་ཐ་དད་པ་ལ་བརྟགས་པ། རང་ངོ་ཅེར་མཐོང་ལ་བརྟགས་པ་ཞེས་གསུམ་ལས། དང་པོ་ལའང་ཡུལ་ལ་བརྟགས་པ་དང་། ཡུལ་ཅན་ལ་བརྟགས་པ་གཉིས་ཏེ། དེ་དག་གི་སྒོ་ནས་དངོས་པོའི་གནས་ལུགས་སྐྱེ་འགགས་གནས་གསུམ་དང་བྲལ་བའི་སྟོང་ཉིད་སྤྲོས་པ་ཐམས་ཅད་དང་བྲལ་བ་ཉིད་དོན་སྤྱིའི་ཚུལ་དུ་གཏན་ལ་ཕབ་པ་དང་། སླར་ཡང་རིག་པ་གནས་ཐོག་ཏུ་ངོ་སྤྲོད་པ་ཡིན་ཡང་འདིར་སྤྲོས་བྲལ་གྱི་ལྟ་བ་ཤེར་ཕྱིན་གྱི་སྐབས་སུ་ངོ་འཕྲོད་པ་དང་སྔགས་ཀྱི་ལྷན་སྐྱེས་དབང་དུས་སུ་ངོ་འཕྲོད་པའི་ལུགས་སུ་བྱས་ཏེ། སྐབས་འདིར་གཞུང་འདི་གའི་ཁྱད་ཆོས་ཙམ་སྨོས་པ་ལ། ཀུན་གཞི་དང་ཆོས་སྐུའི་དབྱེ་བ། སེམས་དང་ཡེ་ཤེས་ཀྱི་དབྱེ་བ། ཡིད་དང་ཤེས་རབ་ཀྱི་དབྱེ་བ་རྣམས་ལེགས་པར་ཕྱེ་ནས། ཆོས་ཀྱི་སྐུ་དང་། དེའི་གདངས་ཡེ་ཤེས་དང་། དེའི་རྩལ་སོ་སོར་རྟོག་པའི་ཤེས་རབ་རྣམས་ཀྱི་རང་གནད་ངེས་པར་བྱས་ནས་སྐྱོང་དགོས་པ་ལས། དང་པོ་ཀུན་གཞི་དང་ཆོས་སྐུའི་དབྱེ་བ་ནི། སྤྱིར་ཀུན་གཞི་ཞེས་པ་ལ་འདོད་ཚུལ་མི་གཅིག་པ་མང་དུ་ཡོད་ཀྱང་འདིར་གོང་དུ་གཞིའི་སྐབས་སུ་བཤད་པ་ལྟར། མ་རིག་པ་དང་མཚུངས་ལྡན་ལུང་མ་བསྟན་ལ་ཡེ་དོན་གྱི་ཀུན་གཞི་ཟེར་བ་སོགས་ཀུན་ནས་ཉོན་མོངས་ཕྱོགས་ཀྱི་རྟེན་འབྱུང་རྣམས་དང་མཚུངས་ལྡན་ལུང་མ་བསྟན་གྱི་ཆ་ལ་སྤྱིར་བཏང་ཀུན་གཞི་ཞེས་བྱ་སྟེ། དཔེར་ན་ས་གཞི་ལ་བརྟེན་ནས་ས་བོན་ལས་མྱུ་གུ་ལ་སོགས་པར་རིམ་བཞིན་སྨིན་པས་ན། ས་བོན་དང་མཚུངས་པར་ལྡན་པའི་ས་གཞི་ལ་ཞིང་ས་ཞེས་ཟེར་བ་ལྟ་བུ་སྟེ། འདིར་ས་གཞི་ནི་རེ་ཞིག་རྟེན་གྱི་རྣམ་པར་གནས་པ་ལས་ས་བོན་ནས་འབྲས་བུའི་བར་གང་དུའང་ལུང་དུ་བསྟན་པར་བྱ་བ་མ་ཡིན་པ་བཞིན་ནོ། །ཆོས་ཀྱི་སྐུ་ནི་ཀུན་གཞི་རྟེན་འབྱུང་དང་བཅས་པ་དེ་དག་རང་བཞིན་གྱིས་མ་གྲུབ་པའི་སྟོང་བ་ཉིད་མཐར་ཐུག་གི་ངོ་བོ་ཉིད་སྐུའི་བྲལ་རྒྱུ་སྤྲོས་པ་ཐམས་ཅད་དང་བྲལ་བ་དེ་དང་། སེམས་སྟོང་བའི་རང་བཞིན་འོད་གསལ་བ་མཐར་ཐུག་གི་ཡེ་ཤེས་ཆོས་སྐུར་འགྱུར་རུང་གི་ཆོས་སམ་ཡེ་ཤེས་ཆོས་སྐུའི་བསྐྱེད་རྒྱུར་གྱུར་པ་དེ་གཉིས་ཟུང་དུ་འཇུག་པ་རིག་སྟོང་དབྱེར་མེད་དམ། དབྱིངས་ཡེ་ཟུང་འཇུག་ཏུ་གྲགས་པ་དེ་ཡིན་ཏེ། འདིར་ཡང་སྤྱིར་བཏང་གཞི་དུས་ཀྱི་སྐུ་གསུམ་དང་ལམ་དུས་ཀྱི་སྐུ་གསུམ་དང་། འབྲས་དུས་ཀྱི་སྐུ་གསུམ་སྟེ། གཞི་ལམ་འབྲས་བུའི་དུས་ཀྱི་སྐུ་གསུམ་སོ་སོར་སྨྲོས་པ་ལས། འདི་ནི་གཞི་དུས་ཀྱི་ཆོས་སྐུ་ལམ་གྱི་ཡུལ་དུ་བྱས་པ་དེ་ཡིན་ནོ། །དེ་ཡང་ཐོག་མར་ངོ་སྤྲོད་པའི་སྐབས་སུ་གོང་དུ་རྫོགས་རིམ་ཐུན་མོང་གི་སྐབས་སུ་བཤད་པ་ལྟར། སྲོག་རྩོལ་བསྡམས་པ་ལས་རླུང་དབུ་མར་ཞུགས་གནས་ཐིམ་གསུམ་བྱས་པས་སྟོང་བཞིས་དྲངས་པའི་མཐའི་འོད་གསལ་སྟོན་གནམ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་དེ་ཉིད་གཉུག་མའི་འོད་གསལ་དུ་ངོ་སྤྲད་ནས་སྐྱོངས་སུ་འཇུག་པ་སྟེ། དེ་ཉིད་ངོ་སྤྲོད་པའི་ཐབས་ནི་འདི་གའི་རིག་པའི་རྩལ་དབང་གི་སྐབས་སུ་བཤད་པའི་ཡེ་གྲོལ་ཚངས་པའི་དབང་དང་། སྤྱི་བླུགས་ཚངས་པའི་དབང་དག་གིས་ངོ་སྤྲོད་པའི་ལུགས་དེ་དང་ངོ་སྤྲོད་ཉེར་གཅིག་ཏུ་གྲགས་པ་རྣམས་ཡིན་ནོ། །དེར་ཡང་སྲོག་རྩོལ་སྡོམ་མིན་གྱི་ཆོ་གའི་རྣམ་གཞག་ཅི་རིགས་པར་བྱུང་བ་ནི་འདི་ལྟར་ཡིན་ཏེ། སྤྱིར་ཕྲ་རགས་གི་རྣམ་པས་ངོས་ཟིན་དཀའ་སླ་ཙམ་མ་གཏོགས། གཞི་དུས་སུ་འཆི་བ་དང་གཉིད་ཀྱི་སྐབས་སུ་སྟོང་བཞི་འཆར་བ་ལྟར། ལམ་དུས་སྲོག་རྩོལ་བསྡམས་པ་ལས་ཀྱང་འཆར་ལ། དེས་མཚོན་ནས་ཕོ་མོ་སྙོམ་འཇུག་གི་སྐབས་དང་སྦྲིད་པ་ལ་སོགས་པ་བྱུང་བའི་དུས་དང་། རྟོག་པ་སྔ་མ་འགགས་ནས་ཕྱི་མ་མ་ཤར་བའི་བར་དེར་ཡང་སྟོང་བཞི་ཕྲ་བ་འཆར་བར་གསུངས་པའི་ཕྱིར། རྒྱུ་མཚན་དེར་དགོངས་ནས་འབྲེལ་མེད་ཀྱི་གཏམ་སོགས་མང་དུ་དྲིས་པ་ནི་སློབ་མས་ཅི་ཟེར་ཆ་མེད་དུ་ལུས་པའི་སྐབས། དེར་ངོ་སྤྲོད་པ་ལ་སོགས་པའི་ཐབས་འདི་དག་གསུངས་པ་ཡིན་ཏེ། དེས་ན་འདིར་ཡང་ཐབས་དེ་དག་ལ་བརྟེན་ནས་སྟོང་བཞིའི་མཐའི་འོད་གསལ་སྟོན་གནམ་སློང་བྱེད་རྐྱེན་གསུམ་དང་བྲལ་བ་ལྟ་བུ་དེ་ཉིད་ངོ་འཕྲོད་དགོས་ཀྱི། རང་བཞིན་དུ་ཧད་དེ་ལུས་པ་ཙམ་ཞིག་འོད་གསལ་ཆོས་ཀྱི་སྐུར་ངོ་སྤྲོད་པ་ནི་དོན་ལ་གནས་པ་མ་ཡིན་ནོ། །འོད་གསལ་དེ་ཡང་རྒྱུན་ཆད་མེད་པ་གཉུག་མའི་འོད་གསལ་ཡིན་པའི་ཕྱིར་ངོ་འཕྲོད་ཟིན་ནས་རྣམ་རྟོག་ཤར་མིན་ལ་མ་ལྟོས་པར་རྒྱུན་ཏུ་སྐྱོང་དུ་ཡོད་པར་ཤེས་དགོས་ཀྱི། སྐབས་དེར་ཤར་ནས་ངོ་སྤྲད་དེ་སླར་དེ་ལས་ལྡང་བ་ན་མེད་པར་གྱུར་པ་ལྟ་བུ་ནི་མ་ཡིན་ནོ། །འོ་ན་ཐབས་དེར་ལྟོས་ཅི་དགོས་ཞེ་ན། དགོས་ཏེ། དཔེར་ན་སྐྱེས་བུའི་ལུས་ཐམས་ཅད་ལ་ཁྲག་གིས་རྒྱུན་དུ་ཁྱབ་པར་གནས་མོད་དེ། དེ་ལྟ་མ་རྟོགས་པ་ལ་ཚུལ་དེ་སྨྲས་པས་ཡིད་མི་ཆེས་པར་འགའ་ཞིག་སྨན་པ་མཁས་པས་ལུས་ཀྱི་རྩ་གནད་དུ་ཁྲག་གཏར་ནས་བསྟན་པས་ཡིད་ཆེས་པར་གྱུར་པ་བཞིན་ཏེ། འདི་ནི་ཤེས་པར་བྱ་བའི་གནས་གལ་ཆེ་བ་ཞིག་གོ །གཉིས་པ་སེམས་དང་ཡེ་ཤེས་ཀྱི་དབྱེ་བ་ནི། སྤྱིར་སེམམ་ཞེས་པ་ཙམ་ལ། གང་ལ་སེམས། གང་གིས་སེམས། གང་སེམས་པར་བྱེད་པས་ན་སེམས་སོ། །ཞེས་པའི་དོན་ལྟར་སེམས་ཡིད་རྣམ་ཤེས་རྣམས་ཀྱང་མིང་གི་རྣམས་གྲངས་སུ་འཆད་པ་ཡོད་མོད་དེ། འདིར་ནི་ཀུན་གཞི་ལ་བརྟེན་པའི་ཤེས་པ་གསལ་ལ་མི་རྟོག་པ་ཐུན་མོང་དུ་ཀུན་གཞི་རྣམ་ཤེས་སམ་ལེན་པའི་རྣམ་ཤེས་ཞེས་གྲགས་པ་དེ་ལ་སེམས་དང་། དེ་ལས་མཆེད་པའི་ཡིད་ཀྱི་རྣམ་ཤེས་དང་། ཉོན་མོངས་པ་བཞི་དང་མཚུངས་པར་ལྡན་པའི་ཡིད་གཉིས་སོ་སོར་མ་ཕྱེད་པའི་སྤྱི་ཚོགས་ཙམ་ལ་ཡིད་དང་། དེ་ཉིད་ཡུལ་ལ་ཞུགས་པའི་འཇུག་ཤེས་ལྔ་ལ་རྣམ་པར་ཤེས་པ་ཞེས་གསུམ་དུ་དབྱེ་ནས་དེ་དག་ལས་ཡེ་ཤེས་ཀྱི་རང་གནད་འབྱེད་པ་ཡིན་ཏེ། འདིར་ཡང་ཐུན་མོང་དུ་ཐེག་ཆེན་རྣལ་འབྱོར་སྤྱོད་པ་དག་གིས་རྣམ་པར་ཤེས་པའི་ཚོགས་བརྒྱད་དུ་འདོད་པ་དང་། བྱེ་མདོ་གཉིས་དང་། དབུ་མ་པ་ཁ་ཅིག་གིས་རྣམ་ཤེས་ཚོགས་དྲུག་ཏུ་འདོད་པའི་ཁྱད་པར་གྱིས་ཀུན་གཞི་རྣམ་ཤེས་ཁས་མི་ལེན་པ་སོགས་ཡོད་ཀྱང་། སྐབས་འདིར་སེམས་ཀུན་གཞི་རྣམ་ཤེས་ལས་ཡེ་ཤེས་ཁྱད་པར་དུ་འབྱེད་པའི་ཕྱིར་སེམས་ཙམ་བསྒྲུབ་བྱའི་གཙོ་བོ་མ་ཡིན་པས་ན་ཤེས་པ་དབྱེ་བསྡུའི་རྣམ་གྲངས་འགོད་པ་ཙམ་ལ་ནི་འགལ་བ་ཡོད་པར་མ་མཐོང་བའི་ཕྱིར་ཆེད་དུ་སྒྲུབ་མ་དགོས་ཀྱང་། སྤྱི་དོན་དུ་བཤད་ན། དབུ་མ་ཐལ་འགྱུར་པའི་ལུགས་ཀྱིས་ཡིད་ཀྱི་རྣམ་ཤེས་ལ་ཕྲ་རགས་གཉིས་སུ་དབྱེ་བའི་ཡིད་ཤེས་ཕྲ་བ་དེ་དང་། རྣལ་འབྱོར་སྤྱོད་གཞུང་ལས་བཤད་པའི་ཀུན་གཞི་རྣམ་ཤེས་དེ་གཉིས་བྱེད་ལས་གཅིག་པར་སོང་བའི་ཕྱིར་ཐལ་འགྱུར་པའི་ལུགས་ཀུན་གཞི་རྣམ་ཤེས་མི་འདོད་པར་སྨྲ་བ་འདི་ཡང་མིང་གི་རྣམ་གྲངས་ལས་གནས་སྐབས་སུ་དམ་འཆའ་བ་ཙམ་དུ་ཟད་དོ། དེ་ཡང་ཡིན་ཏེ་ལུགས་དེས་དེ་ཉིད་སྒྲུབ་པའི་ལུང་ཁུང་དུ་མདོ་སྡེ་དགོངས་པ་ངེས་འགྲེལ་ལས། ལེན་པའི་རྣམ་པར་ཤེས་པ་ཟང་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །ངས་འདི་བྱིས་པ་རྣམས་ལ་ཡོངས་མ་བསྟན། །ཞེས་པ་གྲངས་ནས་དེའི་དོན་འཆད་པ་ན་ལས་འབྲས་ཆུད་མི་འཛའ་བར་ཉེ་བར་ལེན་པའི་ཤེས་རྒྱུན་ལ་བཤད་པའི་ཕྱིར། དབུ་མ་པའི་ལུགས་ལ་དེ་འདྲ་དེ་གཏན་ནས་མི་འདོད་ན་ལས་འབྲས་ཀྱི་རྟེན་འབྱུང་རྒྱུན་ཆད་པ་ཞིག་འདོད་དགོས་པར་སྣང་བའི་ཕྱིར་ཧ་ཅང་ཐལ་ལོ། །དེས་ན་སེམས་དེ་ལས་ཡེ་ཤེས་ཀྱི་ཁྱད་པར་འབྱེད་པ་ལ། སྤྱིར་བཏང་དུ་གནས་དང་། ལམ་དང་། སྒོ་དང་། ཡུལ་དང་། དཔེ་ལ་སོགས་པའི་སྒོ་ནས་ཁྱད་པར་འབྱེད་ཚུལ་མང་ཡང་། འདིར་རེ་ཞིག་ཤེས་པ་ཡུལ་ལ་འཇུག་ཚུལ་གྱི་སྒོ་ནས་རྣམ་པར་དབྱེ་ན། སེམས་ནི་ཀུན་གཞི་ལ་ལྷན་སྐྱེས་དང་ཀུན་བརྟགས་ཀྱི་བདག་འཛིན་ཞུགས་པ་ལས་ཡུལ་ལ་རྣམ་པར་འཛིན་པའི་ཤེས་པ་སྟེ་སྲིད་པའི་རྟེན་འབྱུང་གི་ལམ་དུ་གྱུར་པའོ། །ཡེ་ཤེས་ནི་དེ་ལས་ལྡོག་སྟེ་འོད་གསལ་ཆོས་ཀྱི་སྐུ་ལས་ཡུལ་ལ་གཡོ་བ་ནའང་། ཡུལ་གྱི་རྣམ་པར་སྣང་བ་དང་ལྷན་ཅིག་ཉིད་དུ་ཡུལ་ལ་བདག་དང་བདག་གིར་བདེན་པར་གྲུབ་པས་སྟོང་བ་ཉིད་གང་ཞིག་ཡུལ་དུ་བྱས་ཏེ་ཡུལ་སྟོང་བ་ཉིད་དང་། ཡུལ་ཅན་ཡེ་ཤེས་ཆེན་པོ་ཉིད་ཟུང་འཇུག་ཏུ་ཆུ་ལ་ཆུ་བཞག་པ་བཞིན་ལྷན་ལྷན་འགྲོ་བ་ཡིན་ཏེ། དེ་ལྟར་འགྲོ་བའི་རྒྱུ་མཚན་ཡང་གོང་དུ་གཉུག་མའི་འོད་གསལ་ངོ་འཕྲོད་ནས་དེ་ཉིད་ལམ་དུ་བྱས་པ་ལས་བྱུང་བ་ཡིན་པའི་ཕྱིར། གནད་འདིར་རིང་དུ་གོམས་པར་གྱུར་ན་གསེར་གླིང་དུ་ཕྱིན་པས་ས་རྡོ་རང་གཞན་པ་མི་རྙེད་པའི་དཔེ་ལྟར་གང་སྣང་ཐམས་ཅད་འོད་གསལ་འབའ་ཞིག་གི་སྣང་བར་འཆར་བ་ཡིན་པས་སྤང་བླང་བྱེད་དུ་མེད་དེ། དེ་སྐད་དུའང་རིག་འཛིན་དགའ་རབ་རྡོ་རྗེས། ཤར་བའི་དུས་ན་མཉམ་ཤར་བཟང་ངན་མེད། །གྲོལ་པའི་དུས་ན་མཉམ་གྲོལ་བཟང་ངན་མེད། །ཞེས་གསུངས་པ་ཡིན་ནོ། །དེས་ན་སེམས་ཀྱི་ཆོས་ཉིད་རྟོགས་པ་ལས་གུད་ན་རིག་པའི་ཡེ་ཤེས་མེད་མོད་ཀྱང་སེམས་ཡེ་ཤེས་མ་ཡིན་པར་རྟོགས་ཏེ་དེ་དག་གི་ཁྱད་པར་ལེགས་པར་ཕྱེས་ནས་རིག་པའི་ཡེ་ཤེས། སྲིད་པའི་རྩ་བ་མ་རིག་པ་གཞི་ནས་བཟློག་པས་དེ་ལ་བརྟེན་པའི་འདུ་བྱེད་དང་རྣམ་ཤེས་སོགས་ཀྱང་ལྷན་ཅིག་འགག་པར་འགྱུར་བ་ཡིན་པས་ན། རྣམ་བྱང་ཕྱོགས་ཀྱི་རྟེན་འབྱུང་སྒོམ་པའི་ལམ་གྱི་དངོས་གཞིར་ཡང་ཞར་ལ་གྲུབ་པ་ཡིན་ཏེ། ཚུལ་འདི་ནི་ཐུན་མོང་གི་མདོ་ལས་ཀྱང་རྟོན་པ་བཞིའི་ནང་ཚན་རྣམ་ཤེས་ལ་མི་རྟོན་ཡེ་ཤེས་ལ་རྟོན་ཞེས་པའི་སྐབས་སུ་རྒྱ་ཆེར་འབྱུང་བ་ཡིན་ནོ། །འདི་དག་སྒོམ་པའི་དམིགས་གནད་ཐུན་མོང་མ་ཡིན་པ་རྣམས་ནི་འོད་གསལ་ཆེན་པོ་ཐོད་རྒལ་གྱི་སྐབས་སུ་འབྱུང་སྟེ་འོག་ནས་འཆད་དོ། །གསུམ་པ་ཡིད་དང་ཤེས་རབ་ཀྱི་དབྱེ་བ་ནི། འདིར་ཡིད་ཀྱི་གོ་བ་སྤྱིར་བཏང་གོང་དུ་སྨྲོས་ནས་བྱེ་བྲག་གི་དོན་འཆད་པ་ལ། སྒོ་ལྔའི་ཤེས་པ་ཡུལ་ལ་སྐྱེ་བའི་སྐབས་སུ་དེ་དང་དེ་སྐྱེ་བའི་རྒྱུའི་རྐྱེན་དུ་གནས་པའི་གཙོ་སེམས་དེ་ཡིད་ཤེས་ཡིན་ཡང་། དེ་ཉིད་གནས་དང་པོ་ནས་སྐྱེས་པ་དང་ལྷན་ཅིག་ཉོན་མོངས་པ་བཞིས་དྲི་མ་ཅན་དུ་བྱས་པས་ན་དེ་དང་མཚུངས་པར་ལྡན་པའི་ཡིད་དུ་གྱུར་པ་ཡིན་ཏེ། དེའི་ཚུལ་ཡང་མ་རིག་པས་དངོས་པོའི་དེ་ཁོ་ན་ཉིད་སྒྲིབ་པ་ཉིད་འཇིག་ཚོགས་ལ་ལྟ་བས་བདག་དང་བདག་གིར་བཟུངས་ཏེ། ང་འོ་སྙམ་པའི་ང་རྒྱལ་གྱིས་དེ་ཉིད་བརྟན་པར་བྱས་ནས་བདག་ལ་མངོན་པར་ཆགས་པས་དེ་ཉིད་ཀྱི་མཐུན་ཕྱོགས་སྒྲུབ་ཅིང་མི་མཐུན་ཕྱོགས་སྤང་བའི་ཕྱིར་ཡུལ་ལ་འདོར་ལེན་བགྱིས་ནས་ལས་གསོགས་པ་ལ་འཇུག་སྟེ་མདོར་ན་ཡུལ་གྱི་རྣམ་པར་སྣང་བ་ལ་རྣམ་པ་ལྟར་བདེན་པར་རྟོག་ཅིང་དཔྱོད་པའི་བློའོ། །དེ་ཡང་མདུན་གྱི་དམིགས་པ་མིག་ཤེས་ཀྱི་གཟུང་ཡུལ་ཀ་བ་ཆོས་ཅན་ལྟ་བུར་མཚོན་ན། ཀ་བ་དམིགས་རྐྱེན་དང་མིག་དབང་བདག་རྐྱེན། ཡིད་ཤེས་རྒྱུའི་རྐྱེན་རྣམས་ཚོགས་པའི་དེ་མ་ཐག་གཟུང་ཡུལ་ངེས་བྱེད་ཀྱི་མིག་ཤེས་སྐྱེ་བ་ཡིན་ཞིང་། སྐབས་དེར་ཡུལ་རང་བཞིན་གྱིས་མ་གྲུབ་པར་རྟོགས་པའི་ཤེས་པ་ལྷན་སྐྱེས་མེད་ཕྱིན་ཡུལ་ལ་བདེན་འཛིན་གྱི་རྟོག་པ་འཇུག་སྟེ། དེས་ཡུལ་འདོར་ལེན་བྱེད་པ་ལ་སོགས་སྔ་མ་ལྟར་རོ། །སོ་སོར་རྟོག་པའི་ཤེས་རབ་ནི་རང་ཡུལ་སྟོང་ངེས་བྱེད་ཀྱི་ཤེས་པ་ཡིན་པའི་ཕྱིར་ཡེ་ཤེས་ཀྱི་སྩལ་ཏེ། དེས་ན་སྒོ་ལྔའི་ཡུལ་གྱི་རྣམ་པ་གང་ཞིག་སྣང་ནའང་སྣང་བ་ཙམ་ཉིད་ལས་དེ་ལ་བདེན་པར་མི་འཛིན་ཞིང་། རྣམ་པར་སྣང་རྐྱེན་ཉིད་ཀྱིས་རྣམ་པ་དེ་རང་བཞིན་གྱིས་མ་གྲུབ་པའི་ངོ་བོ་སྟོང་བ་ཉིད་ལ་སོ་སོར་རྟོག་གོ །དེ་ཡང་རྣམ་པར་མི་རྟོག་པའི་ཡེ་ཤེས་ལས་ཡུལ་གྱི་རྣམ་པར་སྣང་བ་ལ་སོ་སོར་རྟོག་པའི་ཤེས་རབ་ཏུ་གཡོ་བ་ནའང་ཡུལ་གྱི་རང་བཞིན་ལ་རྨོངས་པའི་མ་རིག་པ་ལ་སོགས་ཉོན་མོངས་པ་བཞི་དང་ལྡན་པའི་ཕྱིར་དང་། སོ་སོར་རྟོག་པའི་ཤེས་རབ་དེའི་སྔ་ལོགས་ལས་བྱུང་བའི་ཤེས་རྒྱུན་དོན་དམ་པའི་རང་བཞིན་སྤྲོས་པ་ཐམས་ཅད་དང་བྲལ་བའི་འོད་གསལ་ཆོས་ཀྱི་སྐུ་དང་ངོ་བོ་དབྱེར་མེད་དུ་གྱུར་པའི་རྣམ་པར་མི་རྟོག་པའི་ཡེ་ཤེས་ཡིན་པའི་ཕྱིར་དང་། དེ་རྣམས་ལ་བདེན་པར་འཛིན་བྱེད་ཀྱི་ཤེས་པ་མ་ཡིན་པའི་ཕྱིར་རོ། །དེ་ཡང་དཔེར་ན་སྒྱུ་མ་མཁན་གྱིས་སྤྲུལ་པའི་རྟ་གླང་ལ་སོགས་པར་སྒྱུ་མའི་རང་བཞིན་མ་རྟོགས་པའི་སྐྱེ་བོ་གཞན་དག་གིས་རྟ་གླང་ལ་སོགས་པའི་རྣམ་པ་དེ་དང་དེར་འཛིན་པའི། སྒྱུ་མ་མཁན་པོ་རང་གིས་དེ་ལྟར་སྣང་དུས་ཉིད་ནས་དེར་དེ་དག་མ་གྲུབ་པར་ཤེས་པ་ལྟ་བུའམ། སེང་གེའི་གསོབ་ལ་སེང་གེར་འཁྲུལ་བའི་གང་ཟག་གིས་དེ་སེང་གེ་དངོས་སུ་རྟོག་པར་བྱེད་ཅིང་འཇིགས་པར་འགྱུར་བ་དང་། དེའི་རང་བཞིན་སྔོན་ནས་ཤེས་པའི་གང་ཟག་གིས་མཐོང་ཙམ་ཉིད་ནས་དེ་གསོབ་ཉིད་དུ་རྟོག་གི་སེང་གེར་རྟོག་པར་ཡང་མི་བྱེད་ལ་འཇིགས་པར་ཡང་མི་བྱེད་པ་ལྟ་བུ་སྟེ། འདིའི་ཚུལ་ལེགས་པར་རྟོགས་ན་གང་སྣང་ཐམས་ཅད་སེང་གེའི་གསོབ་ལྟར་རང་བཞིན་གྱིས་མ་གྲུབ་པར་ཤེས་པར་འགྱུར་བ་ཉིད་ཀྱི་ཕྱིར། ལྟ་བ་དེ་ལྟར་གཏན་ལ་ཕབ་སྟེ་ཉམས་ལེན་ཅོག་བཞག་བཞིའི་དགོངས་པ་དང་མི་འབྲལ་བར་བྱེད་པ་ནི་ཉོན་མོངས་པའི་ཡུལ་དང་ཡུལ་ཅན་ཐམས་ཅད་རྩ་ཐག་མེ་ལ་ཚིག་པ་བཞིན་དུ་འཆིང་བ་རང་གྲོལ་དུ་གཏོང་བའི་ལམ་བླ་ན་མེད་པ་ཉིད་ཡིན་ནོ། །དེས་ན་ད་ལྟ་ཁ་ཅིག་ཐ་སྙད་ཀྱི་རྣམ་པ་འཛིན་པའི་དཔྱད་ཤེས་ལ་སོ་སོར་རྟོག་པའི་ཤེས་རབ་མཚན་ཉིད་པར་འཆད་པ་ནི་གནད་མ་གོ་བར་ཟད་ཀྱང་། དེ་ཉིད་དེར་འགྱུར་རུང་གི་རྒྱུ་ཙམ་ཡིན་པ་ལ་བསམ་ནས་འབྲས་མིང་རྒྱུ་ལ་བཏགས་ན་ནི་འགལ་བ་མེད་ལ། སྤྱིར་སོ་སོར་རྟོག་པའི་མེས་ཡུལ་དང་རང་འཛིན་གྱི་རྟོག་པ་ཐམས་ཅད་བསྲེག་ནས་དག་པར་བྱེད་པའང་ཤེས་དགོས་སོ། །འདི་དག་ཀྱང་ཕྱག་ཆེན་གྱི་དགོངས་པ་དང་སྦྱར་ན་དོ་ཧ་སོགས་ལས་ལྷན་སྐྱེས་གསུམ་དུ་བཤད་པའི་དང་པོ་སྐྱེ་མེད་ལྷན་སྐྱེས་ནི་འདིར་ཀུན་གཞི་དང་གཞི་དུས་ཀྱི་ཆོས་སྐུའི་ཁྱད་པར་ཕྱེས་ནས་ཆོས་སྐུའི་རང་གནད་བཙལ་བ་དང་ཕྱོགས་མཚུངས་ལ། དེ་བཞིན་དུ་སེམས་ཉིད་ལྷན་སྐྱེས་ནི་སེམས་དང་ཡེ་ཤེས་ཀྱི་ཁྱད་པར་ཕྱེས་ནས་གཞི་དུས་ཀྱི་རྣམ་པར་མི་རྟོག་པའི་ཡེ་ཤེས་ཉིད་ལམ་དུ་ངོ་སྤྲོད་པ་དང་ཆ་འདྲ་ཞིང་། སྣང་བ་ལྷན་སྐྱེས་ནི་ཡིད་དང་སོ་སོར་རྟོག་པའི་ཤེས་རབ་ཀྱི་ཁྱད་པར་ཕྱེས་ནས་ཤེས་རབ་ཀྱི་རང་གནད་བཙལ་ཏེ། སྣང་བ་ཅོག་བཞག་གི་དོན་ལ་མཉམ་པར་འཇོག་པ་དང་ཕྱོགས་མཚུངས་པ་ཡིན་ནོ། །འོ་ན་དེ་དག་ཐེག་པ་གཞན་གྱི་མན་ངག་ལས་ཀྱང་བསྟན་པའི་ཕྱིར་ཐེག་པའི་རྒྱལ་པོ་འདིའི་ཁྱད་པར་གྱི་ཆོས་སུ་ཅིས་འགྱུར་སྙམ་ན། སྤྱིར་བཏང་རང་སྡེའི་ལུགས་ལ་ཐེག་པ་གསུམ་ལས་གཞན་དུ་གྱུར་པའི་ཐེག་པ་ཞིག་ཡོད་པར་ཁོ་བོ་ཅག་ཀྱང་མི་སྨྲ་མོད་དེ། བྱེ་བྲག་ཐེག་ཆེན་བྱང་ཆུབ་སེམས་དཔའི་ཐེག་པ་ལ་གཞུང་དང་མན་ངག་གཉིས་སུ་དབྱེ་བའི་མན་ངག་གསང་ཆེན་རྡོ་རྗེའི་ཐེག་པ་ལ་ནང་གསེས་བྱ་སྤྱོད་རྣལ་འབྱོར་གྱི་རྒྱུད་གསུམ་ལས། རྣལ་འབྱོར་གྱི་རྒྱུད་ལ་མན་ངག་ཐུན་མོང་ཙམ་སྟོན་པའི་གཞུང་དེ་ཉིད་དངོས་དང་། སྦས་དོན་གྱི་མན་ངག་སྟོན་པའི་རྣལ་འབྱོར་བླ་མེད་གཉིས་སུ་ཕྱེ་བའི་ཕྱི་མ་ལ་རྒྱུད་ལུང་མན་ངག་གསུམ་གྱི་ཟླས་དབྱེ་བའི་ཡོ་ག་སྡེ་གསུམ་སྟེ། དེས་ན་ཐེག་པ་རིམ་དགུར་གྲངས་ངེས་ཤིང་། ཐེག་པ་དེ་དག་ཀྱང་སྔ་མ་སྔ་མར་མན་ངག་སྦས་དོན་དུ་བྱས་པ་རྣམས་ཕྱི་མ་ཕྱི་མར་རིམ་བཞིན་གསལ་བར་བྱས་པའི་ཕྱིར་འདིར་ཡང་ཕྱག་ཆེན་སོགས་ལས་ལྷན་སྐྱེས་གསུམ་ཙམ་བཤད་ཀྱང་དེ་ཉིད་ཀུན་གཞི་སེམས་གསུམ་དང་བཅས་པ་ལས་ཁྱད་པར་དུ་འབྱེད་པའི་མན་ངག་འདི་གབ་ནས་ཆེད་དུ་མ་བསྟན་པ་གང་ཞིག་འདིར་དེ་ཉིད་བརྗོད་བྱའི་གཙོ་བོར་བསྟན་ནས་རྒྱ་ཆེར་བཤད་པའི་ཁྱད་པར་རོ། །དེས་ན་ལུགས་འདི་འཛིན་པར་རློམས་པ་རྣམས་ཀྱང་སེམས་རིག་འབྱེད་པའི་མན་ངག་ཉིད་གཙོ་བོར་འཛིན་དགོས་པ་ཤེས་པར་གྱིས་ཤིག རྒྱུ་མཚན་འདིར་དགོངས་ནས་རྫོགས་ཆེན་རང་གཞུང་དུའང་། རེ་འགའ་ནི་འཁྲུལ་སེམས་ཀྱི་ཕྱོགས་ལས་དགོངས་ཏེ། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྷུང་བྱེད་གསུངས། །རྣམ་རྟོག་དེ་དང་བྲལ་བས་ན། །ཁྱོད་ནི་རྟག་ཏུ་མྱ་ངན་འདས། །ཞེས་པའི་དོན་ལྟར་རྣམ་རྟོག་དང་ལག་ལྡང་འབྲེལ་བའི་སྒོམ་ཆེན་པ་རྣམས་ལ་རྫོགས་པ་ཆེན་པོའི་ལས་འབྲེལ་མེད་ཅེས་རྣམ་རྟོག་རྣམ་པ་ཀུན་ཏུ་དགག་བྱར་གསུངས་པ་དང་། རེ་འགའ་ནི་རིག་པའི་ཡེ་ཤེས་ཀྱི་ཕྱོགས་ལས་དགོངས་ཏེ། གནས་ན་ཆོས་ཉིད་ཀྱི་ངང་དུ་གནས། །འགྱུ་ཡང་ཆོས་ཉིད་ཀྱི་རོལ་པ་ཡིན། །ཞེས་རྩལ་སྣང་ལ་དགག་སྒྲུབ་བྱེད་དུ་མེད་པར་གསུངས་པ་རྣམས་ཀྱི་གནད་མ་གོ་བ་ཁ་ཅིག་གང་སྣང་ཡེ་ཤེས་ཀྱི་རོལ་པ་ཡིན་ཟེར་ནས་ཉོན་མོངས་པའི་རྟོག་པ་ལ་དགག་སྒྲུབ་མི་བྱེད་པར་འཆོལ་ཉོག་ཏུ་སྤྱོད་པ་དེ་བྱུང་བ་ཡིན་ནོ། །དེས་ན་རང་ཉིད་ལེགས་པ་དོན་དུ་གཉེར་བ་རྣམས་ཀྱིས་ཐོག་མར་ཐེག་པ་ཐུན་མོང་གི་ལྟ་བ་སྤྱི་དང་བྱེ་བྲག་བདག་མེད་པའི་གནས་ལུགས་ལ་ལུང་རིགས་ཀྱིས་དྲངས་པའི་ངེས་པ་ཐུན་མོང་མ་ཡིན་པ་རྙེད་པར་གྱིས་ལ་གདོད་སྔགས་ཀྱི་ལྷན་སྐྱེས་སྤྱི་དང་བྱེ་བྲག་པ་ཉམས་མྱོང་གི་སྟེང་ནས་ངོ་འཕྲོད་ངེས་བགྱིས་ཏེ་ཉམས་སུ་ལེན་པར་མཛོད་ཅིག །ཚུལ་དེ་དག་གིས་ནི་ཀ་དག་ཁྲེག་ཆོད་ཀྱི་ལྟ་བ་སྐྱོང་ལུགས་ཀྱི་གནད་འགའ་ཞིག་བཤད་ནས། ད་ནི་གཉིས་པ་ལྷུན་གྲུབ་ཐོད་རྒལ་གྱི་ལམ་གནད་འགའ་ཞིག་བཤད་པར་བྱ་སྟེ། དེ་ཡང་ཐོད་རྒལ་སྒོམ་པའི་སྐབས་འདིར་ལུས་ངག་ཡིད་གསུམ་གྱི་བྱ་བ་དགུ་ཕྲུགས་སུ་གཏོང་བ་ནི་གལ་ཆེ་བ་ཡིན་ཏེ་དེའི་ཚུལ་ཡང་ཐོག་མར་ལུས་ཀྱི་ཕྱིའི་བྱ་བ་ཚོང་དང་སོ་ནམ་སྒྲུབ་པ་ལ་སོགས་དང་། ངག་གི་ཕྱིའི་བྱ་བ་ཐ་མལ་འཁྲུལ་གཏམ་སོགས་དང་། ཡིད་ཀྱི་ཕྱིའི་བྱ་བ་ཉོན་མོངས་པའི་ཀུན་རྟོག་སྣ་ཚོགས་རྣམས་ཏེ། དེ་དག་བཏང་ནས་གཞུང་བཞིན་བསྒོམས་པས་ཆོས་ཉིད་མངོན་སུམ་གྱི་རྟགས་ལུས་རུས་སྦལ་མཁར་གཞོང་དུ་བཅུག་པ་ལྟ་བུ་ལ་སོགས་པ་རྣམས་བྱུང་བ་ནས། རིམ་བཞིན་ཉམས་སྣང་གོང་འཕེལ་གྱི་དུས་སུ་ནང་གི་བྱ་བ་གསུམ་གཏོང་བ་དང་། རིག་པ་ཚད་ཕེབས་ཡན་ཆད་དུ་གསང་བའི་བྱ་བ་གསུམ་གཏོང་བ་ལ་འཇུག་དགོས་པའི་ཕྱིར། ད་ལྟ་ཕལ་ཆེར་ལྟར་ཕྱིའི་བྱ་བ་འདུ་འཛི་རྣམ་གཡེང་དགྲ་འདུལ་གཉེན་སྐྱོང་སོགས་འཇིག་རྟེན་གྱི་ཆོས་བརྒྱད་པོ་རྣམས་མ་སྤང་བཞིན་དུ། ཆོས་སྤྱོད་བཅུ་སོགས་དགེ་བའི་བྱ་བ་རྣམས་འདོར་བར་བྱེད་པ་ནི་ལམ་གྱི་གོ་རིམ་ལོག་པར་གྱུར་པའི་ཕྱིར་ཡིད་གཏད་མེད་དོ། །དེ་ལྟར་ཤེས་ནས་ལམ་དངོས་སྒོམ་པ་ལ་མི་འགུལ་བ་གསུམ་ལ་གཞི་བཅའ་བ། སྡོད་པ་གསུམ་གྱི་ཚད་བཟུང་བ། ཐོབ་པ་གསུམ་གྱིས་གཟེར་གདབ་པ། གདེང་བཞིའི་གྲོལ་ཚད་བསྟན་པ་རྣམས་ཀྱིས་ཁོག་ཕུབ་ནས་སྒོམ་དགོས་ཏེ། དེའི་རྒྱུ་མཚན་ཡང་རྡོ་རྗེའི་ལུས་ཐོག་མར་ཆགས་དུས་ཉིད་ནས་ལུས་ལ་རྩ་བརྟེན། རྩ་ལ་རླུང་བརྟེན། རླུང་ལ་ཁམས་བརྟེན། ཁམས་ལ་དོན་དམ་པའི་སེམས་བརྟེན་པ་ཉིད་ཀྱི་ཕྱིར་སྒོ་གསུམ་གྱི་གནད་གཟིར་བ་གལ་ཆེ་བ་དང་། གནད་ལ་བརྟེན་ནས་ཤར་བའི་ཡེ་ཤེས་ཀྱི་ས་མཚམས་ངོས་ཟིན་པའང་གལ་ཆེ་བ་ཉིད་ཡིན་པའི་ཕྱིར་རོ། །དེས་ན་ལུས་ལ་བརྟེན་པའི་རྩ་གསུམ་འཁོར་ལོ་ལྔ་ལ་སོགས་པའི་རྣམ་བཞག་སྤྱིར་བཏང་རྣམས་ནི་ཐུན་མོང་གི་རྫོགས་རིམ་རྣམས་ཀྱི་སྐབས་དང་ཕལ་ཆེར་མཚུངས་པའི་ཕྱིར་སྨྲོས་མ་དགོས་ཀྱང་། འདིར་མི་འདྲ་བའི་ཁྱད་པར་དབུ་མ་ལ་བརྟེན་པའི་དག་པ་ཡེ་ཤེས་ཀྱི་འོད་རྩ་ཀ་ཏི་གསེར་གྱི་རྩ་ཆེན་དུ་གྲགས་པ་གང་ཞིག་ཐོགས་རེག་གི་རྣམ་པར་མེད་པའི་ཕྱིར་སྙིང་ནས་ལམ་ཕྱུང་སྟེ་ཡར་སྣེ་གསུམ་དུ་གྱུར་པའི་དབུས་མ་ཤེལ་སྦུགས་ཅན་ཞེས་བྱ་བ་ཚངས་བུག་ཏུ་དང་། གཡས་གཡོན་དར་དཀར་སྣལ་མ་དང་ཕྲ་ལ་འགྲིལ་བ་གཉིས་ལྟག་པ་ནས་གུག་སྟེ་མིག་གཉིས་ལ་ཟུག་ཅིང་དེ་གང་ལ་བརྟེན་པའི་ཤེས་རབ་རང་བྱུང་གི་སྒྲོན་མ་དང་། ཐིག་ལེ་སྟོང་བའི་སྒྲོན་མ་དང་། རྣམ་དག་དབྱིངས་ཀྱི་སྒྲོན་མ་སོགས་སྒྲོན་མ་བཞིའམ་དྲུག་ཏུ་བཞག་པ་རྣམས་ལམ་དུ་བྱས་ནས་སྒོམ་པ་ཉིད་ཡིན་ནོ། །དེ་ཡང་རྟེན་ལུས་ཀྱི་རྩ་ཐིག་རླུང་གསུམ་རགས་པ་རྣམས་ལ་བརྟེན་པའི་ཕྲ་བ་ཡེ་ཤེས་ཀྱི་རྩ་ཐིག་རླུང་གསུམ་འདི་དག་ཡོད་པའི་གནད་ཀྱིས་ཐུན་མོང་དུའང་སྲོག་རྩོལ་བསྡམས་པ་ལས་རླུང་སེམས་དབུ་མར་ཚུད་པ་ནི་དེ་ལ་བརྟེན་པའི་ཡེ་ཤེས་ཀྱི་རྩ་ཐིག་འདི་རྣམས་སུ་དེ་དག་འདུས་པའི་ཁྱད་པར་ལས་བྱིན་ཟས་བུད་ཤིང་བསྲེག་པ་བཞིན་རྣམ་རྟོག་བཞོན་པའི་ལས་རླུང་དང་བཅས་པ་འོད་གསལ་གྱི་ངོ་བོར་རོ་གཅིག་པར་གྱུར་པ་ན་དེ་ཉིད་ཀྱི་རང་སྣང་རྟགས་བཅུ་ཡོན་ཏན་བརྒྱད་ལ་སོགས་པ་ཤུགས་འབྱུང་དུ་ཤར་བ་ཡིན་པ་ལ། ཁ་ཅིག་དེ་ལྟར་མ་རྟོགས་ཏེ་དབུ་མར་རླུང་ སེམས་ཟིན་པ་ལས་རྟགས་སྣང་དེ་དག་འཆར ་བར་ནི་འདོད་ལ་དེ་འཆར་བའི་རྒྱུ་མཚན་ཐུན་མོང་མ་ཡིན་པ་ནི་མ་ངེས་པ་དེ་བྱུང་འདུག་སྟེ་འདི་ནི་དབྱར་གྱི་དུས་སུ་འཇའ་ཚོན་འཆར་བར་ནི་མཐོང་ལ། དེ་འཆར་བའི་རྒྱུ་མཚན་ཐུན་མོང་མ་ཡིན་པ་ནི་མ་ངེས་པ་དང་ཁྱད་མེད་པར་སྣང་ཕྱིར། ལུགས་འདི་དག་ལ་བསམ་ན་ཐེག་པའི་རྒྱལ་པོ་འདི་ཉིད་ཐེག་པ་གཞན་ཐམས་ཅད་ཀྱི་སྦས་དོན་ཡིན་པར་སྙིང་ནས་ངེས་པ་རྙེད་པ་ཡིན་ནོ། །དེས་ན་གོང་དུ་བཤད་པའི་ཀ་ཏི་གསེར་གྱི་རྩ་ཆེན་དེ་ཉིད་སྐྱེ་དགུ་རྣམས་གསོན་གྱི་གནས་སྐབས་སྙིང་ནས་བརྒྱུད་དེ་སྤྱི་བོར་ཟུག་པར་བཤད་པ་འདི་སྐབས་དེ་ལ་བརྟེན་པའི་ཤེས་རབ་རང་བྱུང་གི་སྒྲོན་མ་དེ་ངོ་བོ་རང་བཞིན་ཐུགས་རྗེ་གསུམ་གྱི་ཚུལ་དུ་བཞུགས་པར་གསུངས་ནས་དེ་ལས་འཕྲོས་ཏེ་ངོ་བོ་སྐུར་གནས་ཞེས་པའི་སྐུ་དེ་ལ་སྙིང་གར་ཞི་བ་བཞི་བཅུ་རྩ་གཉིས་དང་། སྤྱི་བོར་ཁྲག་འཐུང་ལྔ་བཅུ་རྩ་བརྒྱད་དེ་དམ་པ་རིགས་བརྒྱའམ་གནས་ལྔར་དེ་ཉིད་རིགས་ལྔའམ། གནས་གསུམ་དུ་གསང་བ་རིགས་གསུམ་མམ། སྙིང་གར་གསང་ཆེན་རིགས་གཅིག་སོགས་དབྱེ་བསྡུའི་རྣམ་པ་ཇི་རིགས་པར་གསུངས་ཏེ། དེ་ལྟར་བཞུགས་ཞེས་བཤད་པ་འདི་ལ་གཞན་སྡེ་ཐོས་པ་ཉུང་བ་འགའ་ཞིག དེ་ལྟར་འདོད་པ་དེ་ནི་ཕྱི་རོལ་པ་དག་སྙིང་གི་ནང་ན་བདག་རྟག་པ་མཐེ་བོང་ཙམ་ཡོད་དོ་ཞེས་འདོད་པ་དང་ཁྱད་མེད་ཅེས་གཤེ་བར་བྱེད་པ་དང་། རང་ལུགས་འཛིན་པར་རློམ་པ་འགའ་ཞིག་ཀྱང་ཚུལ་དེ་དེ་ལྟར་དངོས་པོར་གྲུབ་བོ་སྙམ་དུ་སེམས་པ་དག་སྣང་སྟེ། དེས་ན་དེ་གཉིས་ཀས་དོན་ལ་མི་གནས་པར་སྨྲས་པ་ཡིན་ཏེ། དེའི་ཕྱིར་ཅུང་ཟད་བཤད་ན། སྤྱིར་སྐུ་ཙམ་ལ་བཞིན་ལག་གི་རྣམ་པར་ཤར་བའི་གཟུགས་སྐུས་མ་ཁྱབ་སྟེ་ངོ་བོ་ཉིད་སྐུ་དེ་དེ་མ་ཡིན་པའི་ཕྱིར་དང་། སྐུ་གསུམ་གང་རུང་ཡིན་ནའང་འབྲས་དུས་ཀྱི་སྐུ་གསུམ་གང་རུང་ཡིན་པས་མ་ཁྱབ་སྟེ་གཞི་དུས་ཀྱི་སྐུ་གསུམ་བཞག་ཏུ་ཡོད་པའི་ཕྱིར། དེ་ཡང་ཡིན་ཏེ་ཁྱེད་རང་གི་གཞུང་དུ་འདོད་པའི་རིམ་ལྔ་དང་སྦྱོར་དྲུག་སོགས་སུའང་གཞི་དུས་ཀྱི་སྐུ་གསུམ་དེ་འཇོག་པར་མཛད་ཅིང་དེ་ཡང་འགྲོ་བའི་སེམས་རྒྱུད་ལ་འཇོག་པར་མཛད་པའི་ཕྱིར། དེ་ལྟར་ན་དེ་ལྟ་བུའི་གཞི་དུས་ཀྱི་སྐུ་གསུམ་གྱི་ནང་ཚན་དུ་གྱུར་པའི་གཟུགས་སྐུ་གཉིས་པོ་གང་རུང་ཡིན་ན་དེ་ལ་བཞིན་ལག་ལ་སོགས་པའི་རྣམ་པ་དངོས་གནས་དང་བརྡར་བཏགས་གང་རུང་ཞིག་ཡོད་པར་འཆད་དགོས་ཏེ། དེ་ལྟར་མེད་ན་དེ་ཉིད་ཆོས་སྐུ་ལས་གཟུགས་སྐུར་འབྱེད་པའི་འབྱེད་ཆོས་ཀྱང་མེད་པར་འགྱུར་བའི་ཕྱིར་རོ། །དེས་ན་འདིར་ཞལ་ཕྱག་དང་རིགས་ཀྱི་དབྱེ་བ་སོགས་བསྟན་པ་ནི་རང་གཞུང་གི་རིག་པའི་རྩལ་དབང་གི་སྐབས་སུ་ལྔ་ཚན་ལྔའི་ངོ་སྤྲོད་བགྱིད་པ་ན། རིག་པའི་ཡེ་ཤེས་ལ་སྐྱོན་གྱིས་མ་གོས་པས་ན་ཁ་དོག་དཀར་པོ་དང་། རྡོ་རྗེའི་རིགས་དང་། མེ་ལོང་ལྟ་བུའི་ཡེ་ཤེས་དང་། རྡོ་རྗེ་སེམས་དཔའ་དང་། རྡོ་རྗེ་མཁའ་འགྲོ་རྣམས་སུ་བཤད་པ་ནས་ཡོན་ཏན་མ་བཙལ་ལྷུན་གྱིས་གྲུབ་པས་སེར་པོ་སོགས་དང་། སེམས་ཀྱི་དེ་བཞིན་ཉིད་དེས་ཆོས་ཐམས་ཅད་ལ་ཁྱབ་པར་བསྡུས་པས་དམར་པོ་སོགས་དང་། དེ་ལ་ཕྲིན་ལས་ཐམས་ཅད་རྫོགས་པས་ལྗང་གུ་སོགས་དང་། གང་གི་རང་བཞིན་སྤྲོས་བྲལ་ལས་མི་འགྱུར་བའི་ཕྱིར་མཐིང་ག་སོགས་སུ་བཤད་པའི་བརྡར་བཏགས་ཁོ་ན་ཡིན་པའི་ཕྱིར་འདི་ལ་འགལ་བའི་དྲི་མ་ཇི་ལྟར་སྒྲུབ། འོ་ན་སྙིང་ནང་ལ་སོགས་པའི་གནས་དེ་དང་དེར་ཡོད་ཅེས་ཆེད་དུ་སྨྲ་ཅི་དགོས་ཞེ་ན། བཤད་པ། ཅི་ཁྱོད་ཀྱི་སེམས་ས་རྡོ་ལའང་ཡོད་ཅེས་སྨྲའམ། འོན་ཀྱང་འདི་ལྟར་ཡིན་ཏེ། འགྲོ་བ་རྣམས་ཀྱི་བདག་ཏུ་འཛིན་པའི་ཉེ་བར་ལེན་པས་རིགས་དྲུག་སོ་སོའི་ལུས་དེ་བཟུང་ཙམ་ཉིད་ནས་སྔོན་གྱི་ལས་ལ་སོགས་ལུས་འགྲུབ་པའི་རྟེན་འབྲེལ་རྣམས་ཀྱིས་རྣམ་འགྱུར་ཐ་དད་དུ་བསྐྱེད་པ་ན་སྲིད་པ་སོ་སོའི་ལུས་དང་རྗེས་སུ་འབྲེལ་བའི་ལུས་ཀྱི་སྙིང་པོ་དང་། ཡན་ལག་དང་། ཉིང་ལག་སོ་སོར་སྨིན་པ་ལྟར། སེམས་ཀྱིས་ཀྱང་དེ་དང་། དེར་དེ་བཞིན་དུ་བདག་སྤྲད་པ་ལས་ཕན་ཚུན་རྒྱུ་འབྲས་ཀྱི་ཚོགས་པ་ལྟོས་གྲུབ་ཏུ་སོང་ཞིང་། ནམ་ཞིག་ཚོགས་པ་དེ་འཇིག་པའི་རྐྱེན་ཐུན་མོང་མ་ཡིན་པ་བྱུང་བ་ནའང་ཕུང་བོའི་འདུ་བྱེད་འདོར་བར་འགྱུར་བ་སྟེ། དེས་ན་ལུས་ཀྱི་སྙིང་པོའམ་སྲོག་ཤིང་ལྟ་བུར་གྱུར་པ་ནི་སྤྱིར་བཏང་རྩ་རྣམས་ཏེ། དེའི་ནང་ནས་ཀྱང་དབུ་མ་ལ་བརྟེན་པའི་སྙིང་ནས་སྤྱི་བོར་འབྲེལ་བའི་རྩ་ཉིད་ཡིན་པའི་ཕྱིར་སེམས་ཅན་རྣམས་ཀྱི་ཡན་ལག་སོགས་བཅད་ཀྱང་འཆི་བའི་ངེས་པ་མེད་པ་ལ་སྙིང་བཏོན་ན་དེ་མ་ཐག་འཆི་བ་མངོན་སུམ་ཚད་མས་གྲུབ་པའི་ཕྱིར་རོ། །འདིར་སྙིང་ནས་གློ་བར་འབྲེལ་བ་ལ་སོགས་པ་ལས་རྩ་ཕྲན་གྲངས་མེད་པར་གྱེས་པ་ཉིད་ལུས་ཀྱི་བ་སྤུའི་སྒོ་ཐམས་ཅད་ཟུག་པ་དག་ཏུའང་སེམས་ཀྱི་རྩལ་ལས་རླུང་གི་བཞོན་པ་དང་འགྲོགས་ཏེ། ཁྱབ་པར་རྒྱུ་ཞིང་། དེ་ལྟར་རྒྱུ་བ་ནའང་འཕྲོ་གཞི་མར་མེའི་སྙིང་པོ་ལྟར་སྙིང་ལ་བརྟེན་པ་ཙམ་ལ་དགོངས་ཏེ། རིག་པའི་ཡེ་ཤེས་དང་སེམས་ཀྱི་གནས་ཙིཏྟ་དང་རླུང་ཅན་དུ་སོ་སོར་བཤད་པའང་དེ་ལྟར་ཡིན་པ་ཤེས་པར་བྱའོ། །དེས་ན་ལུས་ལ་རྩ་ཐིག་རླུང་གསུམ་དང་། དེ་ལ་སེམས་བརྟེན་པ་དང་། སེམས་ཀྱི་ངོ་བོ་སྤྲོས་པ་དང་བྲལ་བའི་རང་བཞིན་འོད་གསལ་བ་ཉིད། རང་གནད་ངེས་པ་ལ་བརྟེན་ནས་བསྒོམས་ན་མེ་ཤི་བ་དང་དུ་བ་ཞར་ལ་རང་འགག་དུ་འགྲོ་བ་ལྟར་འོད་གསལ་གྱི་སྣང་བ་ཆེན་པོའི་ཀློང་དུ་གཉིས་སྣང་གི་འཛིན་པ་ཐམས་ཅད་ཞིག་ནས་སྙིགས་མའི་ཕུང་ཁམས་ཐམས་ཅད་ཟུང་འཇུག་འཇའ་ལུས་རྡོ་རྗེའི་སྐུར་མངོན་དུ་འགྱུར་བ་ཡིན་ཏེ། གནས་འདི་ལ་ཨོ་རྒྱན་གྱི་རིག་འཛིན་ཆེན་པོ་དགའ་རབ་རྡོ་རྗེ་དང་། སངས་རྒྱས་གཉིས་པ་པདྨ་སམ་བྷ་ཝའི་ཞལ་སྔ་ནས་དང་། འཕགས་ཡུལ་གྱི་པཎ་ཆེན་ལྔ་བརྒྱའི་གཙུག་རྒྱན་དྲི་མེད་ཆོས་ཀྱི་བཤེས་གཉེན་སོགས་བགྲང་གིས་མི་ལང་བ་ཞིག་དང་། གངས་རིའི་ལྗོངས་ཀྱི་ལོ་ཆེན་བཻ་རོ་ཙ་ན་དང་། ལྕེ་བཙུན་སེང་གེ་དབང་ཕྱུག་ལ་སོགས་བསམ་གྱིས་མི་ཁྱབ་པ་ཞིག་མངོན་སུམ་ཚད་མར་གྱུར་པ་ཡིན་པའི་ཕྱིར་སོམ་ཉི་བཟློ་བའི་གནས་མེད་དོ། །དེས་ན་རིམ་ལྔ་སོགས་ལ་བརྟེན་ནས་ཟུང་འཇུག་འགྲུབ་པར་རློམས་པ་རྣམས་ཀྱང་རང་རང་གི་གཞུང་ན་གབ་པའི་མན་ངག་བླ་མའི་ཞལ་ལས་ཤེས་པར་བྱ་བ་སྙན་བརྒྱུད་ཐིག་ལེ་གསང་སྐོར་གྱི་ལམ་གནད་འདི་དང་བྲལ་བར་གྱུར་ན་འཇུ་བཏུལ་གྱི་ལས་ལ་ཚལ་དཀར་ཆད་པ་ལྟར་མི་འགྱུར་རམ་སྙམ་སྟེ་སེམས་ཅན་གྱི་ལོག་པར་རྟོགས་པའི་མཐའ་སུ་ཞིག་གིས་འགོགས་པར་ནུས། རྒྱུ་མཚན་འདི་དག་གིས་ནི་གཞན་སྡེས་ལོག་སྨྲ་དགག་པའི་ཞལ་ལ་རང་ཕྱོགས་ཀྱི་འཁྲུལ་བའང་བསལ་གྲུབ་པ་ཡིན་ནོ། །དེ་ལྟར་ཤེས་པར་བྱ་བའི་གནས་རྣམས་ངེས་པར་གྱུར་པ་ན་ལུས་བཞུགས་སྟངས་གསུམ་མམ་ལྔ་གང་རུང་དང་། མིག་གཟིགས་སྟངས་གསུམ་གང་རུང་ལས་མི་གཡོ་བར་རྩེ་གཅིག་ཏུ་དབྱིངས་རིག་ལ་མཉམ་པར་འཇོག་དགོས་ཏེ། དེ་ཡང་བཞུགས་སྟངས་དང་གཟིགས་སྟངས་བསྟུན་ནས་རླུང་རང་བབ་ལས་ཆེད་དུ་དགག་སྒྲུབ་མི་བགྱིད་པར་གཙོ་བོར་རླུང་རིག་དལ་བའི་ཐབས་ཁོ་ན་ལ་བསླབ་ཅིང་། ཉམས་སྐྱོང་ཚུལ་གྱི་གནད་ལ་སྤྱིར་ཕྱི་ནང་གི་ཆོས་ཐམས་ཅད་རང་བཞིན་གྱིས་མ་གྲུབ་པའི་སྟོང་བ་ཉིད་ཡིན་པ་དང་། དེ་ལས་ཀྱང་རྟེན་འབྱུང་སྒྱུ་མའི་ཚུལ་དུ་སྣང་ཙམ་ལ་ཁྱད་པར་མེད་ཕྱིར་ཡུལ་ཤེས་གང་གི་སྟེང་དུ་གཉེན་པོའི་བློ་བཞག་ཀྱང་སྤང་གཉེན་རོ་གཅིག་ཏུ་གྲོལ་པའི་ཚུལ་འདྲ་ཡང་། འདིར་འཁྲུལ་བའི་སྣང་བ་རྣམས་ལ་རང་བཞིན་མེད་པའི་ཕྱིར་སེམས་སུ་མ་གྲུབ་ཀྱང་། སྣང་བཞི་སེམས་ལ་སྣང་ཞིང་སེམས་ཀྱིས་བདག་སྤྲད་པའི་གཞན་དབང་ཁོ་ནར་གྱུར་པ་ཉིད་ཀྱི་ཕྱིར། སེམས་ཀྱི་རང་བཞིན་སྤྲོས་པ་དང་བྲལ་བའི་ཡེ་ཤེས་འོད་གསལ་བའི་དགོངས་པ་ལ་རྩེ་གཅིག་ཏུ་མཉམ་པར་བཞག་ན་དེའི་གདངས་སོ་སོར་རྟོག་པའི་ཤེས་རབ་བམ། ཤེས་རབ་རང་བྱུང་གི་སྒྲོན་མ་ཉིད་དབྱིངས་སྟོང་བ་ཉིད་ཀྱི་ར་བར་ཚུད་པར་འགྱུར་ཞིང་དེའི་རྟགས་སུ་རིག་གདངས་རྡོ་རྗེ་ལུ་གུ་རྒྱུད་ཀྱང་རྣམ་དག་དབྱིངས་ཀྱི་སྒྲོན་མའི་ར་བར་ཚུད་པར་འགྱུར་བ་ཡིན་ནོ། །འདི་སྐབས་སུ་ལྕགས་ཁམས་དངུལ་ཆུའི་སྦྱོར་བས་གསེར་དུ་བསྒྱུར་བ་ལྟར། ཐབས་ཤེས་ཁྱད་པར་ཅན་གྱི་སྦྱོར་བས་སེམས་ཀྱི་རྒྱུན་ཡེ་ཤེས་ཀྱི་རྒྱུན་ཏུ་གོ་འཕོས་པས་ན། སེམས་ཀྱིས་བདག་སྤྲད་པའི་ཡུལ་སྣང་མཐའ་དག་ཀྱང་ཡེ་ཤེས་ཀྱི་རང་ཡུལ་སྟོང་བ་ཉིད་དུ་ལམ་ལམ་འཆར་བ་ཡིན་པའི་ཕྱིར་ཆོས་ཉིད་མངོན་སུམ་གྱི་སྣང་བ་ཞེས་བྱའོ། །འོན་ཀྱང་མཉམ་གཞག་ཏུ་དེ་ལྟར་སྐྱོང་བ་ལ་རྒྱ་མཚོ་ཅོག་བཞག་གི་དགོངས་པའང་ཟེར་ལ། རྗེས་ཐོབ་ཏུ་གང་སྣང་ཐམས་ཅད་ལ་དགག་སྒྲུབ་མི་བྱེད་པར་སྣང་ཐོག་དེ་ཉིད་དུ་ཅེར་ཅེར་གློད་པས་ཆུ་རླབས་རྒྱ་མཚོ་ཐིམ་པ་བཞིན་ཡུལ་དང་ཡུལ་ཅན་གཉིས་མེད་དུ་གྲོལ་པར་འགྱུར་བའི་ཕྱིར་སྣང་བ་ཅེར་བཞག་གམ་སྣང་བ་ཅོག་བཞག་གི་དགོངས་པ་ཞེས་བྱའོ། །དེ་ལྟར་མཉམ་རྗེས་སུ་བསྐྱང་བ་ན་དབྱིངས་སྣང་དེ་དག་རིམ་གྱིས་འཕེལ་ཏེ་མཐར་རྣམ་དག་དབྱིངས་ཀྱི་སྒྲོན་མ་ཟ་འོག་ཁ་ཕྱེ་བ་ལྟ་བུས་གང་སྣང་ཐམས་ཅད་ཁྱབ་པའི་ནང་དུ་ཐིག་ལེ་ལྔ་ཚོམ་གྱི་དབུས་སུ་ཞི་བའི་སྐུ་རྐྱང་མ་ཤར་ཚུན་ཆད་ལ་ཉམས་སྣང་གོང་འཕེལ་གྱི་སྣང་བ་དང་། ཞི་ཁྲོ་ཡབ་ཡུམ་འཁྲིལ་སྦྱོར་ནས་རིགས་ལྔ་ཚོམ་བུའི་དཀྱིལ་འཁོར་གྱིས་འཇིག་རྟེན་གྱི་ཁམས་ཐམས་ཅད་ཡོངས་སུ་ཁྱབ་པ་ཙམ་དུ་མ་ཤར་བར་ལ་རིག་པ་ཚད་ཕེབས་ཀྱི་སྣང་བ་དང་། དབྱིངས་སྣང་གི་འཕེལ་ཆ་རྫོགས་ནས་མཐར་ནང་དབྱིངས་སུ་བཙན་ས་ཟིན་ཏེ་སངས་མ་རྒྱས་ཀྱི་བར་ལ་ཆོས་ཉིད་ཟད་པའི་སྣང་བ་ཞེས་བྱ་ཞིང་། དེ་ལྟར་སྤྲུལ་སྐུ་ནས་ལོངས་སྐུར་འཕེལ་བའི་གཟུགས་སྐུའི་སྣང་བ་ཤར་ནས་མཐར་ཆོས་སྐུའི་སྣང་བར་ནུབ་པར་འགྱུར་བའི་རྒྱུ་མཚན་ཡང་། གཞི་དུས་ཀྱི་སྐུ་གསུམ་ལམ་རྐྱེན་དང་འཕྲད་ན་ལམ་དུས་ཀྱི་སྐུ་གསུམ་པོར་འཆར་རུང་དུ་གནས་པ་གང་ཞིག་དཔེར་ན་འཇའ་ཤེལ་ལ་འོད་ལྔ་འཆར་རུང་གནས་པ་ཉི་མའི་རྐྱེན་དང་ཕྲད་པ་ལས་མངོན་དུ་ཤར་བ་བཞིན་དུ། འདིར་ཡང་འོད་གསལ་གྱི་ལམ་ཐུན་མོང་མ་ཡིན་པ་བསྒོམས་པ་ལས་ཐོག་མར་གཟུགས་སྐུ་གཉིས་ཀྱི་རང་རྩལ་རྫོགས་ནས་མཐར་ཆོས་ཀྱི་སྐུར་བཙན་ས་ཟིན་པ་ན་གཟུགས་སྐུའི་སྣང་བ་དེ་དག་དེ་དང་དབྱེར་མེད་པར་སོང་ནས་ཐ་དད་དུ་མི་མངོན་པར་གྱུར་པ་ལ་ཟད་པའི་ཐ་སྙད་བཏགས་པའོ། །སྐབས་འདི་དག་ཏུ་རྟགས་ལུས་ངག་ལ་འཆར་བ་དང་ཚད་རྨི་ལམ་གྱིས་བཟུང་བ་གཉིས་སུ་བཤད་ནས། དེའི་དང་པོ་ལའང་བར་ཆད་བདུད་ཀྱི་རྟགས་དང་། འཕེལ་འགྲིབ་ཉམས་ཀྱི་རྟགས་དང་། མི་འགྱུར་གསང་བའི་རྟགས་ཏེ་གསུམ་དུ་བཤད་པ་རྣམས་ཀྱང་ཞིབ་མོར་ཤེས་པར་འདོད་ན་ཉམས་ལེན་གནད་ཀྱི་སྒྲོན་མེ་ལ་སོགས་པ་ལས་རྟོགས་པར་བྱའོ། །འདིར་ལམ་བསྒྲོད་པའི་གོ་རིམ་ཐུན་མོང་གི་ཐེག་པ་དང་བསྟུན་ནས་ཅུང་ཟད་ཙམ་བཤད་ན་རྫོགས་ཆེན་རང་ལམ་ལས། ཆོས་ཉིད་མངོན་གསུམ་གྱི་སྣང་བས་ཚོགས་ལམ་དང་། ཉམས་སྣང་གོང་འཕེལ་གྱི་སྣང་བས་སྦྱོར་ལམ་གྱི་དོད་ཐུབ་བྱས་ནས། རིག་པ་ཚད་ཕེབས་ཀྱི་དུས་སུ་ཆོས་ཉིད་ཀྱི་བདེན་པ་མངོན་གསུམ་དུ་མཐོང་སྟེ་སངས་རྒྱས་བརྒྱ་ཕྲག་གི་ཞལ་མཇལ་བ་ལ་སོགས་པའི་ཡོན་ཏན་བརྒྱ་ཕྲག་བཅུ་གཉིས་ཀྱང་མངོན་དུ་བྱས་ཏེ་ས་དང་པོ་ཐོབ་ནས། ཆོས་ཉིད་ཟད་པས་སྒོམ་ལམ་ས་དགུའི་རྟོགས་པ་མངོན་དུ་བྱས་ཏེ་སངས་རྒྱས་ཀྱི་སར་མཚམས་སྦྱོར་བར་འདོད་ཀྱང་། འདིར་ལམ་གྱི་རིམ་པ་སྤྱིའི་ཉམས་ལེན་དང་འགྲོས་སྦྱར་ན་སྔོན་འགྲོ་སྤྱི་དང་་ཁྱད་པར་དུ་བདག་མེད་པའི་གནས་ལུགས་རྟོགས་པའི་ལྟ་བ་གཏན་ལ་ཕེབས་པ་དང་། སྔགས་ཀྱི་ལྷན་སྐྱེས་ངོ་འཕྲོད་པར་བྱས་ནས། དེ་ཉིད་ཀྱི་ངང་ལ་མཉམ་པར་འཇོག་པའི་སྟོང་བ་ཆེན་པོའི་རྣལ་འབྱོར་དང་དྲན་པ་ཉེ་བར་བཞག་པ་བཞི་སྦྲེལ་ནས་བསྒོམ་པས་ཚོགས་ལམ་ཆུང་དུ་བགྲོད་པ་ན། དེ་ལྟ་བུའི་དོན་མ་རྟོགས་པའི་སེམས་ཅན་རྣམས་ལ་དམིགས་མེད་ཀྱི་སྙིང་རྗེ་ཆེན་པོ་སྒོམ་པ་སྙིང་པོ་སྒྱུ་མའི་རྣལ་འབྱོར་སྟེ། དེ་དང་ཡང་དག་པའི་སྤོང་བ་བཞི་སྦྲེལ་ནས་བསྒོམས་པས་ཚོགས་ལམ་འབྲིང་བོ་བགྲོད་པ་དང་། མཐར་ཐུག་གི་སྐུ་གཉིས་མངོན་དུ་སྒྲུབ་པའི་རྒྱུ་ཐུན་མོང་མ་ཡིན་པ་དེ་གཉིས་ཟུང་དུ་འཇུག་པའི་རིག་པ་ཉིད་ས་བོན་གྱི་ཡི་གེ་ཧྲཱི་དང་ཧཱུྃ་ལ་སོགས་པའི་རྣམ་པར་བསྒྱུར་ནས་སྒོམ་པ་ཕྱག་རྒྱ་གཅིག་པའི་ནང་ཚན་ཕྲ་བ་ཡིག་འབྲུ་ལ་བསླབ་པ་དང་། དེ་ཡོངས་སུ་གྱུར་པ་ལས་ལྷ་སྐུ་ཕྱག་རྒྱ་གཅིག་པའི་རྣལ་པར་སྒོམ་པ་རགས་པ་ལྷ་སྐུ་ལ་བསླབ་པ་སྟེ། དེ་དང་དེ་ལས་ཀྱང་ལྷ་གྲངས་དང་ཞལ་ཕྱག་སོགས་གྲངས་མེད་པའི་བར་དུ་སྤྲོ་བ་པྲ་ཏིག་གི་རྣལ་འབྱོར་ལ་སློབ་པའི་བར་དེར་ཕྱག་རྒྱ་སྤྲོས་བཅས་ཀྱི་རྣལ་འབྱོར་སྟེ། དེ་དག་དང་རྫུ་འཕྲུལ་གྱི་རྐང་བ་བཞི་སྤྲེལ་ནས་བསྒོམས་པས་ཚོགས་ལམ་ཆེན་པོ་མངོན་དུ་བྱེད་ཅིང་། འདི་དག་གི་སྐབས་སུ་སོ་སོ་སྐྱེ་བོའི་ཚུལ་ཁྲིམས་དབང་པོའི་སྒོ་བསྡམས་པ། ཟས་ཀྱི་ཚོད་རིག་པ། ནམ་གྱི་ཆ་སྟོད་སྨད་ལ་མི་ཉལ་བར་རྣལ་འབྱོར་ལ་བརྩོན་པ། ཤེས་བཞིན་དུ་གནས་པ་ལ་མངོན་པར་དགའ་སྟེ་ཚོགས་ལམ་གྱི་ཡན་ལག་ལྔ་བོ་རྣམས་ཀྱང་ཉམས་སུ་ལེན་པ་གལ་ཆེ་ལ། དེ་ནས་དེ་དག་ཇི་རིགས་པ་དང་སྦྲེལ་ནས་རྫོགས་རིམ་གྱི་ནང་ཚན་དབེན་པ་གསུམ་མམ། གཏུམ་མོའི་རྣལ་འབྱོར་གང་རུང་ལ་བརྟེན་ཏེ་རླུང་སེམས་དབུ་མར་ཚུད་པར་བགྱིས་ཏེ། སླར་སྦྱོར་ལམ་དུ་བདེན་པ་གཉིས་ཀྱི་རྫོགས་རིམ་ལས་སྒྱུ་ལུས་ཀྱི་གདམས་པ་ཉིད་དྲོད་རྩེ་གཉིས་སུ་དབང་པོ་ལྔ་དང་སྦྲེལ་ཞིང་བཟོད་པ་དང་ཆོས་མཆོག་གཉིས་སུ་སྟོབས་ལྔར་སྦྲེལ་ནས་སྒོམ་ཞིང་དེའི་ཉེ་རྒྱུར་ཐུན་མོང་དུ་སྤྱོད་པ་སྐྱོང་བར་གྲགས་པ་ཚོམ་བུ་ཚོགས་སྒྲུབ་ཀྱི་རྣལ་འབྱོར་ལ་བརྩོན་པ་ལས་རླུང་སེམས་ཙམ་ལས་གྲུབ་པའི་སྒྱུ་མའི་སྐུ་རྣམ་པར་སྨིན་པའི་རིག་འཛིན་ཉིད་མངོན་དུ་བྱེད་པ་ཡིན་ལ། དེ་ནས་འོད་གསལ་ཆེན་པོ་ཐོད་རྒལ་གྱི་གདམས་པ་དང་ཡང་ལྡན་པར་བྱས་ནས་འཕགས་ལམ་ཡན་ལག་བདུན་པ་དང་། བརྒྱད་པ་དག་དང་འབྲེལ་བར་བསྒོམས་པས་མཐོང་ལམ་ཡན་ཆད་དུ་འོད་གསལ་གྱི་སྐུ་ཚེ་དབང་རིག་འཛིན་དང་སློབ་པའི་ཟུང་འཇུག་ཕྱག་ཆེན་རིག་འཛིན། མི་སློབ་བའི་ཟུང་འཇུག་ལྷུན་འགྲུབ་རིག་འཛིན་རྣམས་རིམ་གྱིས་ཐོབ་པར་འགྱུར་བ་ཡིན་ནོ། །འདི་དག་ལུང་ཨ་ནུ་ཡོ་གའི་ཆོས་སྐད་དང་སྦྱར་ན་སློབ་ལམ་བཞི་མཐར་ལམ་དང་བཅས་པ་དེ་ལ་རིམ་པ་བཞིན་འདུན་པ་སེམས་པའི་རྣལ་འབྱོར། རིགས་ཆེན་འབྱེད་པའི་རྣལ་འབྱོར། དབུགས་ཆེན་འབྱིན་པའི་རྣལ་འབྱོར། ལུང་ཆེན་ཐོབ་པའི་རྣལ་འབྱོར། རྩལ་ཆེན་རྫོགས་པའི་རྣལ་འབྱོར་ཞེས་ཟེར་ལ། དེ་དག་ཏུ་སའི་ནོན་ཚུལ་ལའང་སོ་སོའི་སྐྱེ་བོའི་ས་ལྔ་དང་འཕགས་པའི་ས་ལྔ་སྟེ། རྣལ་འབྱོར་ལྔས་ཇི་ལྟར་བགྲོད་པའི་ལམ་དང་སྐྱེ་འཕགས་ཀྱི་ས་བཅུ་ཐོབ་པར་བཤད་དེ། དེ་ཡང་རིམ་པ་ལྟར་ཚོགས་ལམ་འདུན་པ་སེམས་པའི་རྣལ་འབྱོར་གྱིས་ས་དང་པོ་འགྱུར་བ་མེད་པའི་ས་དང་། གཉིས་པ་བརྟེན་པའི་གཞིའི་ས་གཉིས། སྦྱོར་ལམ་རིགས་ཆེན་འབྱེད་པའི་རྣལ་འབྱོར་གྱིས་གསུམ་པ་གལ་ཆེན་སྦྱོང་བའི་ས་དང་། བཞི་བ་བསླབ་རྒྱུན་གྱི་ས་དང་། ལྔ་བ་བསོད་ནམས་རྟེན་གྱི་ས་སྟེ་སོ་སོ་སྐྱེ་བོའི་ས་ལྔ་བགྲོད་ནས་མཐོང་ལམ་དབུགས་ཆེན་འབྱིན་པའི་རྣལ་འབྱོར་གྱི་ས་དྲུག་པ་བརྟེན་པའི་ཁྱད་པར་དུ་འགྲོ་བ་དང་། སྒོམ་ལམ་ལུང་ཆེན་ཐོབ་པའི་རྣལ་འབྱོར་གྱིས་བདུན་པ་དམིགས་པའི་འབྲས་བུ་སྐྱེ་བའི་ས་དང་། མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བརྒྱད་པ་གནས་པ་མི་འགྱུར་བའི་ས་དང་། དགུ་བ་གདལ་བ་ཆོས་ཉིད་ཀྱི་ས་དང་། བཅུ་བ་རྫོགས་པ་ཅིར་ཆིབ་ཀྱི་ས་རྣམས་མངོན་དུ་བྱེད་པར་འདོད་དོ། །དེ་དག་གིས་ས་ལམ་གྱི་ཁྱད་པར་བསྒྲོད་ཚུལ་དང་བཅས་བ་མདོ་ཙམ་བཤད་གྲུབ་ནས། ད་ནི་དོན་གསུམ་པ་འབྲས་བུའི་ཁྱད་པར་ཅུང་ཟད་འཆད་པ་ལ། སྤྱིར་ཐུན་མོང་དུའང་ས་བཅུའི་རྒྱུན་མཐར་རྡོ་རྗེ་ལྟ་བུའི་ཏིང་ངེ་འཛིན་གྱིས་ཤེས་སྒྲིབ་ཕྲ་བ་བཅོམ་ནས་མངོན་པར་འཚང་རྒྱ་བར་བཞེད་པ་ལྟར། འདིར་ཡང་གོང་སྨོས་སྣང་བཞི་མཐར་ཕྱིན་ནས་རྒྱུན་མཐའི་བར་ཆད་མེད་ལམ་རྒྱུད་ལ་སྐྱེས་པ་གང་གི་ཚེ་སྐྱེ་འཇུག་ལ་རང་དབང་ཐོབ་པའི་ཁྱད་པར་གྱིས་ཟུང་འཇུག་འཕོ་བ་ཆེན་པོའི་སྐུར་བཞེང་པར་འདོད་ན་སླར་ཡང་ཤེས་པ་ལག་སོར་ལ་བཅུག་པའི་རྟེན་འབྲེལ་གྱིས་ཐུགས་འོད་གསལ་ཆོས་ཀྱི་སྐུ་ལས་མ་གཡོས་བཞིན་དུ་ཤིན་ཏུ་ཕྲ་བའི་རླུང་སེམས་ཙམ་ལས་གྲུབ་པའི་སྒྱུ་མའི་སྐུའང་འཛིན་པར་མཛད་དེ། །དེ་གཉིས་དབྱེར་མེད་མི་བྱེད་པའི་ཟུང་འཇུག་རྡོ་རྗེའི་སྐུ་མངོན་དུ་བྱས་པ་ཨོ་རྒྱན་སངས་རྒྱས་གཉིས་པ་ལྟ་བུའོ། །གལ་ཏེ་འཇུག་པ་ལ་རང་དབང་ཐོབ་བཞིན་ནང་དབྱིངས་གཞོན་ནུ་བུམ་པའི་སྐུར་བཙན་ས་བཟུངས་ཏེ་ཡང་དག་པའི་སངས་རྒྱས་སྐུ་བཞི་ཡེ་ཤེས་ལྔ་ཡི་བདག་ཉིད་ཆེན་པོ་ཉིད་མངོན་དུ་བྱེད་པར་བཞེད་ན། ཀོ་མོག་ལ་རྡོ་བོར་བ་ན་ཆུ་གཉེར་དབུས་ནས་མཐའ་ལ་རིམ་བཞིན་ཡལ་བར་འགྱུར་བ་ལྟར། སྙིང་དབུས་ནས་འོད་རྩ་ཡེ་ཤེས་སུ་དེང་བ་ནས་རིམ་བཞིན་ལུས་ཀྱི་རྩ་ཁམས་ཕྲ་རགས་ཐམས་ཅད་འོད་གསལ་དུ་དེང་བ་ན། དེ་ལ་དགག་སྒྲུབ་མི་བྱེད་པར་ཡེ་ཤེས་ཀྱི་སྣང་བ་ཉིད་ལ་གཏད་པས་འགའ་ཞིག་ལ་ལུས་ཀྱི་མཐའི་སྐྲ་སེན་ཙམ་ལྷག་པར་འགྱུར་བ་དང་། འགའ་ཞིག་ལ་དེ་ཡང་མི་སྣང་བར་འོད་གསལ་ལ་སྣང་སྟོང་གཉིས་སུ་དབྱེ་བའི་སྟོང་བའི་འོད་གསལ་ཆོས་ཐམས་ཅད་ཀྱི་ངོ་བོའི་གནས་ལུགས་ཀ་དག་སྤྲོས་པ་ཐམས་ཅད་དང་བྲལ་བའི་དབྱིངས་རང་བཞིན་གྱི་འོད་གསལ་བའི་བྲལ་འབྲས་ངོ་བོ་ཉིད་སྐུའི་བདག་ཉིད་དུ་གྱུར་པའི་ཐུགས་དང་སྣང་བའི་འོད་གསལ་ཕུང་ཁམས་སྐྱེ་མཆེད་རགས་པའི་ཆ་ཐམས་ཅད་ལྷག་མ་མེད་པར་འོད་གསལ་གྱི་སྣང་བ་འབའ་ཞིག་པར་གྱུར་པའི་ཡེ་ཤེས་ཆོས་ཀྱི་སྐུ་སྟེ། དེ་ལྟ་བུའི་སྐུ་ཐུགས་ཟུང་དུ་འཇུག་པའི་ངང་ནས་གདུལ་བྱ་དག་པ་དང་མ་དག་པའི་ཁྱད་པར་གྱིས་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་ཅི་རིགས་པར་སྣང་བར་མཛད་ནས་འཁོར་བ་མ་སྟོང་གི་བར་དུ་གདུལ་བྱ་རྣམས་འདུལ་བའི་ཕྲིན་ལས་བསམ་གྱིས་མི་ཁྱབ་པ་རྒྱུན་མི་ཆད་པར་འབྱུང་བ་རིག་འཛིན་དགའ་རབ་རྡོ་རྗེ་ལྟ་བུ་ཡིན་ནོ། །འདི་སྐབས་སུ་ཡང་ལ་ལ་དག་རླུང་སེམས་ཕྲ་བའི་ལུས་ཡོད་པར་འཆད་པ་ནི་བརྗོད་པའི་ཁྱད་པར་ལས་དམ་འཆའ་བ་ཙམ་དུ་ཟད་དོ། །དེ་ལྟར་གང་ཟག་དབང་རབ་སྐལ་བ་མཆོག་དང་ལྡན་པ་རྣམས་ཀྱིས་རྒྱལ་བསྟན་ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་འདི་ལ་ཆགས་སྡང་གི་བློས་ཆོས་སྤང་གི་ལས་མི་བསགས་པར་ཐེག་པ་རིམ་དགུའི་རྣམ་གཞག་མཐའ་དག་ལམ་གྱི་ལུས་གཅིག་ཏུ་དྲིལ་ནས་ཉམས་སུ་བླངས་པས་ཚེ་གཅིག་ལུས་གཅིག་ལ་གདོད་མའི་མགོན་པོ་ཀུན་བཟང་རྡོ་རྗེ་འཆང་ཆེན་པོའི་གོ་འཕང་མངོན་དུ་བྱེད་པ་ཡིན་ཡང་། ལམ་གནད་དེ་ལྟར་བཙལ་མ་ཤེས་པའམ་གློ་བུར་དུ་ཚེ་ལ་བར་ཆད་བྱུང་བ་སོགས་ཀྱིས་ལམ་མཐར་ཕྱིན་མ་ཁོམ་ན་བར་དོར་དེ་ལྟ་བུའི་དོན་མངོན་དུ་བྱེད་པའི་ཚུལ་བར་དོ་བཞིའི་གདམས་ངག་རྣམས་ཏེ། དེ་ལས་ཀྱང་གཞན་རྣམས་ཕལ་ཆེར་འདྲ་ཡང་འོད་གསལ་ལས་སྲིད་པ་བར་དོ་མཚམས་སྦྱོར་བྱེད་སྣང་མཆེད་ཐོབ་གསུམ་ལུགས་ལྡོག་ཏུ་འཆར་བའི་སྐབས་འདིར་ཆོས་ཉིད་བར་དོར་འཆར་བར་གསུངས་པ་དེ་འདིའི་ཁྱད་ཆོས་ཡིན་ལ། དེ་ཡང་དེ་ལྟ་བུའི་སྣང་མཆེད་ཐོབ་གསུམ་དེ་ཐོག་མའི་འཆི་རིམ་གྱི་འཆར་ལུགས་ལ་ལྟོས་ན་ལུགས་ལྡོག་ལྟ་བུ་ཡིན་ཡང་། བར་དོ་རང་གི་སྲིད་པར་འཇུག་ཚུལ་ལ་ལྟོས་ན་ལུགས་འབྱུང་ཁོ་ན་ཡིན་ཏེ། དཔེར་ན་ཀུན་ནས་ཉོན་མོངས་ཕྱོགས་ཀྱི་རྟེན་འབྱུང་དང་། རྣམ་བྱང་ཕྱོགས་ཀྱི་རྟེན་འབྱུང་དག་གི་བགྲང་ལུགས་ལྟ་བུ་ཡིན་པའི་ཕྱིར་རོ། །དེས་ན་འོད་གསལ་གྱི་སྔ་ལོག་ཏུ་བྱུང་བའི་ཐོག་མའི་འཆི་རིས་ཀྱི་སྣང་མཆེད་ཐོབ་གསུམ་དེ། འཕེན་ས་འོད་གསལ་དུ་འཕེན་པ་ཡིན་ཡང་། འཕེན་བྱེད་ཚེ་འདིའི་སྣང་བ་མ་དག་པས་འཕངས་པའི་ཕྱིར་དཀར་ལམ་དམར་ལམ་སོགས་ལས་ལོངས་སྐུའི་ཞིང་སྣང་སོགས་དངོས་གནས་འཆར་བར་མ་མངོན་པར་དེ་དེའི་དོད་ཐུབ་བགྱིས་ཏེ། དེའི་དེ་མ་ཐག་ཆོས་སྐུའི་སྣང་བ་འོད་གསལ་ཤར་བ་ཡིན་ཏེ། འདིར་ཉིན་སྣང་དག་པ་འགའ་ཞིག་ལ་སྲོག་རྩོལ་བསྡམས་པས་རླུང་དབུ་མར་ཚུད་པ་ནའང་སྣང་མཆེད་ཐོབ་པའི་སྐབས་ལོངས་སྐུའི་ཞིང་སྣང་སོགས་ཤར་བའང་བཀའ་བརྒྱུད་གོང་མ་རྣམས་ཀྱི་རྣམ་ཐར་ན་གསལ་བ་ལྟར་ཡིན་ལ། དེ་བཞིན་ཏུ་ཚེ་འདིའི་ལས་སྒྲིབ་སྲབ་པ་འགའ་ཞིག་ལ་འཆི་རིམ་གྱི་སྐབས་སུའང་དག་པའི་ཞིང་སྣང་འཆར་བར་སྨྲ་བ་ལྟར་ཡིན་ནོ། །དེས་ན་སྲིད་པ་བར་དོ་འགྲུབ་བྱེད་ཀྱི་དེ་ནི། འཕེན་ས་སྲིད་པ་བར་དོ་ཡིན་ཡང་འཕེན་བྱེད་འོད་གསལ་གྱིས་འཕང་བའི་སྣང་བ་ཡིན་པའི་ཕྱིར། འོད་གསལ་ལས་ཉེར་ཐོབ་དང་། ཉེར་ཐོབ་ལས་མཆེད་པ་དང་། མཆེད་པ་ལས་སྣང་བ་དང་། སྣང་བ་ལས་བར་སྲིད་མ་གྲུབ་བར་དེ་སྲིད་དུ་ལས་རླུང་རགས་པ་དེས་བསྐྱེད་དང་བཅས་པས་བསླད་པ་ཆེར་མེད་པའི་ཕྱིར་གཞི་དུས་ཀྱི་ལོངས་སྐུའི་ཞིང་སྣང་འཆར་བར་འཐད་ལ། སྣང་བ་གསུམ་པོ་དེ་དག་གི་བཞོན་པའམ་རྟེན་དུ་གྱུར་པའི་ལས་རླུང་ཕྲ་བ་དེར་ཡང་ལས་སྔ་མས་བགོས་པའི་བག་ཆགས་ངན་གོམས་ཡོད་མེད་ཀྱི་ཁྱད་པར་ལས་ལོངས་སྐུའི་རང་སྣང་ལ་འཇིགས་སྡང་སྐྱེ་མི་སྐྱེ་དང་། ལོངས་སྐུའི་དེ་ཡང་ཞི་བ་དང་ཁྲོ་བོའི་རྣམ་པ་སོ་སོ་བར་སྣང་བ་དེ་བྱུང་བ་ཡིན་པའི་ཕྱིར་ལུགས་འདི་འཐད་པ་དང་བཅས་པ་ཡིན་ནོ། །དེས་ན་རང་བཞིན་སྐྱེ་གནས་ཀྱི་བར་དོར་ཐོས་བསམ་གྱིས་སྒྲོ་འདོགས་གཅོད་པ་ཐི་བྱ་ཚང་འཚོལ་བ་ལྟ་བུའི་གདམས་ངག་དང་། འཆི་ཁའི་བར་དོར་མི་གསལ་བ་ལ་གསལ་འདེབས་པ་སྒེག་མོས་མེ་ལོང་ལ་ལྟ་བ་ལྟ་བུའི་གདམས་ངག་དང་། ཆོས་ཉིད་ཀྱི་བར་དོར་གདམས་ངག་ལ་ཡིད་ཆེས་པ་མ་པང་དུ་བུ་འཇུག་ལྟ་བུའི་གདམས་ངག་དང་། སྲིད་པའི་བར་དོར་ལས་ཀྱི་འཕྲོ་མཐུན་པ་ཡུར་བ་ཁ་ཆད་ལ་ཝ་འཛུག་པ་ལྟ་བུའི་གདམས་ངག་རྣམས་ལེགས་པར་ཁོང་དུ་ཆུད་པར་བྱས་ནས་དེ་དང་དེའི་སྐབས་སུ་ཉམས་སུ་ལེན་པར་བྱའོ། །དེ་དག་གིས་ནི་ཐ་མར་དགེ་བའི་ཁྲིད་ཀྱི་རིམ་པ་མདོ་ཙམ་འཆད་གྲུབ་བོ། །འདིར་ཁ་ཅིག་རང་ཉིད་ཀྱང་བསྟན་པ་ཐམས་ཅད་འགལ་མེད་རྟོགས་པ་དང་། གསུང་རབ་མ་ལུས་གདམས་པར་ཤར་བ་ལས་རྒྱལ་བའི་དགོངས་པ་བདེ་བླག་ཏུ་རྙེད་པར་དམ་འཆའ་བཞིན་དུ། རང་ཉིད་དགའ་བའི་མདོ་རྒྱུད་ཉི་ཚེ་བ་ཞིག་སྒྲུབ་པའི་ཕྱིར་རྒྱལ་བསྟན་སྤྱི་གཞུང་ཐམས་ཅད་འགལ་འདུའི་ཕྲེང་བར་བསྒྲུབ་སྟེ། གསུང་རབ་ཕལ་མོ་ཆེ་རྣམས་མཐོང་ཐོས་ཙམ་ཡང་མི་བགྱིད་པར་དེ་དག་ཆོས་ལོག་པའོ་ཞེས་ཆོས་སྐད་སྙན་སྙན་མོས་བྲིད་ནས་ཆོས་སྤངས་པའི་ལས་གསོགས་པ་རྔོན་པས་གླིང་བུ་འབུད་པའི་བརྟུལ་ཞུགས་འཛིན་པ་རྣམས་ཀྱི་ཟླ་བོར་མ་སོང་བར་རྒྱལ་བསྟན་རིན་པོ་ཆེའི་ལུས་རྣམ་པར་བཞག་པ་ཐེག་པ་རིམ་དགུའི་དགོངས་དོན་ཐམས་ཅད་གཅིག་ཏུ་དྲིལ་ནས་ཉམས་སུ་ལེན་པའི་ཚུལ་སྔོན་དུས་སུ་བྱོན་པའི་སྟོན་པ་ཉིད་ཀྱི་རིང་ལུགས་འཛིན་པ་སྔོན་དུས་ཀྱི་ལོ་པཎ་སྐྱེས་ཆེན་རྣམས་ཀྱི་བཞེད་གཞུང་ཇི་ལྟ་བ་བཞིན་དུ་ལག་ཁྲིད་ཀྱི་ཡི་གེའི་རྣམ་པར་བཀོད་པ་ལ། དཀར་ཕྱོགས་སྐྱོང་བའི་ལྷ་དང་གང་ཟག་གཟུ་བོར་གནས་པ་རྣམས་གཅིག་ཏུ་དགའ་བའི་འཁྲི་ཤིང་སློང་བར་རིགས་སོ། །གཞན་དུ་ནག་པོའི་ཕྱོགས་ཀྱི་བདུད་སྡེ་རྒྱལ་འགོང་དམ་སྲིའི་རིགས་སུ་གཏོགས་པ་རྣམས་དང་། ཕྱོགས་ལྷུང་དང་ཕྲག་དོག་པས་ལུས་རྣམ་པར་བགྱིངས་པ་རྣམས་འདུད་པར་མི་འགྱུར་ཡང་རེ་ཞིག་སྙིང་རྗེའི་ཡུལ་དུ་བགྱིད་པ་ཙམ་དུ་ཟད་དོ། །འདིར་སླར་ཡང་སྨྲས་པ། མཁས་མང་ལེགས་བཤད་ས་འཛིན་མཐོན་པོའི་སྤོར། །ཆགས་པའི་བརྗོད་དོན་གངས་ལས་བབས་པའི་རྒྱུན། །བདག་བློའི་འཛིན་མར་འཁྱིལ་བའི་ཆུ་གཏེར་འདིར། །དོན་གཉེར་སྲིད་པའི་མགྲོན་རྣམས་ད་རོལ་ཅིག །འདི་ན་བདག་སེམས་འཁྲུལ་བའི་རྙོག་མ་དང་། །མཁས་མའི་གཞུང་ལས་བརྒལ་བའང་མཆིས་སྲིད་ན། །དེ་ཡང་དུས་གསུམ་བསགས་པའི་སྡིག་ལྟུང་དང་། །ལྷན་ཅིག་མགོན་པོ་རྣམས་ཀྱི་སྤྱན་སྔར་འཆགས། །གལ་ཏེ་ལེགས་པར་བཤད་པའི་ཆ་ཤས་ཙམ། །མཆིས་ན་དེ་ཡང་རང་བློའི་རྣམ་དཔྱོད་ཀྱིས། །མ་ཡིན་དགེ་བའི་བཤེས་ཀྱི་བཀའ་དྲིན་ལས། །བྱུང་ཕྱིར་དམ་པ་དགྱེས་པའི་མཆོད་པ་འབུལ། །དེ་མཐུས་བདག་དང་འགྲོ་ཀུན་ཚེ་རབས་སུ། །བཤེས་གཉེན་དམ་པའི་དྲིན་གྱིས་སྐྱོང་བ་དང་། །རྒྱལ་བ་དགྱེས་པའི་ལམ་བཟང་སྔ་འགྱུར་གྱི། །བསྟན་པ་སྤེལ་བའི་ཁུར་ཆེན་འཛིན་པར་ཤོག། དེ་ལྟར་ཟབ་ཆོས་རིག་འཛིན་བདེ་འདུས་ཀྱི་ལམ་ཁྲིད་སྐལ་ལྡན་འཇུག་ངོགས་ཞེས་བྱ་བ་འདི་ཡང་གཏེར་ཆེན་ཉིད་ཀྱི་སྐུ་གསུང་ཐུགས་ཀྱི་སྲས་མཆོག་དམ་པ་མཁྱེན་བརྩེ་ནུས་པའི་ཡོན་ཏན་ལ་གཞན་དྲིང་མི་འཇོག་པ་གཅེན་རིག་འཛིན་མཐུ་སྟོབས་རྡོ་རྗེ་དང་། གཅུང་བློ་བཟང་བསྟན་པའི་རྒྱལ་མཚན་སྐུ་མཆེད་རྣམས་གཉིས་ཀྱི་ཞལ་སྔ་ནས་བཀྲ་ཤིས་པའི་ལྷ་རྫས་སྲིད་དུ་རིང་བ་དང་། རིན་ཆེན་གཉིས་པའི་འཁོར་ལོ་རྒྱལ་སྲིད་རིན་པོ་ཆེ་སྣ་བདུན་གྱི་གྲངས་དང་མཉམ་པ་དང་བཅས་ལེགས་པར་སྩལ་ནས། གཞུང་འདིའི་ཁྲིད་རིམ་ཞིག་སྔོན་ཆད་གཏེར་ཆེན་ཉིད་ཞལ་བཞུགས་པའི་དུས་སུ་བསྐུལ་རྒྱུ་མ་བྱུང་འདུག་པས། ད་ལན་ཁྱོད་ཀྱིས་ཅི་ནས་ཀྱང་རྩོམ་དགོས་ཞེས་བཀའ་སྩལ་གཙུག་ཏུ་ཕེབས་པ་དང་དུ་བླངས་ནས། ཤཱཀྱའི་དགེ་སློང་རྡོ་རྗེ་འཛིན་པ་ཐུབ་བསྟན་པདྨ་རྒྱས་པའི་ཉིན་བྱེད་དཔལ་བཟང་པོའམ་མིང་གཞན་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་དུ་འབོད་པས་གཏེར་ཆེན་ཉིད་ཀྱི་གདན་ས་ལྷ་ལྡིང་བླ་བྲང་དུ་བསྐུལ་བ་པོ་ཡབ་སྲས་རྣམས་ལ་ཀློང་ཆེན་སྙིང་ཐིག་གི་དབང་ལུང་སོགས་བྱེད་པའི་ཆོས་མཚམས་རྣམས་སུ་བློ་ཐོག་ནས་ཤར་མར་སྤེལ་བ་ཉིད་ཕྱིས་སུ་མ་ཧཱ་གུ་རུའི་སྒྲུབ་གནས་མཁར་ཆེན་བྲག་ཏུ་རྫོགས་པར་བགྱིས་པ་འདིས་ཀྱང་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། མངྒ་ལམ། །