དབང་མདོ་བསྟན་གྱི་འགྲེལ་བ་ཟབ་མོའི་དོན་མཐའ་དག་གསལ་བར་བྱེད་བའི་ཉི་མ།
དབང་མདོ་བསྟན་གྱི་འགྲེལ་བ་ཟབ་མོའི་དོན་མཐའ་དག་གསལ་བར་བྱེད་བའི་ཉི་མ་བཞུགས།
ན་མོ་གུ་རུ་བྷྱཿ བུདྡྷཱ་བོ་དྷི་སཏྭེ་བྷྱཿ ངེས་དོན་མཐར་ཐུག་སྙིང་པོའི་རྒྱུད། དབང་མདོར་བསྟན་གྱི་འགྲེལ་པ་ཟབ་མོའི་དོན་མཐའ་དག་གསལ་བར་བྱེད་པའི་ཉི་མ་ཞེས་བྱ་བ། བླ་མ་དང་སངས་རྒྱས་རྣམས་ལ་ཕྱག་འཚལ་ལོ། །རྣམ་དག་རང་བཞིན་སྐུ་བཞིའི་བདག་ཉིད་དངོས། །བླ་མའི་ཞབས་ལ་དངོས་པོ་ཀུན་གྱིས་འདུད། །རྣམ་ཀུན་དྲི་བྲལ་སྟོང་པའི་ཡུམ་གྱིས་འཁྱུད། །ཟུང་འཇུག་བདེ་ཆེན་རྡོ་རྗེ་སེམས་དཔའ་རྒྱལ། །དང་པོའི་སངས་རྒྱས་འགྱུར་མེད་ཡེ་ཤེས་སྐུ། །མཐའ་ཡས་ཆོས་རྣམས་ཀུན་གྱི་དེ་ཉིད་དེ། །གང་གིས་གསལ་བར་བྱེད་པའི་རྡོ་རྗེའི་ཚིག །གཞུང་འདི་ལ་ཡང་གུས་པས་བཏུད་ནས་ནི། །ཤིན་ཏུ་རྙེད་དཀའི་ཆོས་འདི་
ལ། །རང་གི་བློ་དང་རྗེས་མཐུན་པར། །རྣམ་པར་དབྱེ་ལ་དེར་ཞུགས་ཏེ། །གེགས་མེད་ཕུན་སུམ་ཚོགས་པར་ཤོག །རྣམ་བཤད་འགའ་ཞིག་ཚིག་གི་དོན་ལ་འཁྲུལ། ཁ་ཅིག་མན་ངག་དང་བྲལ་རྟོག་གེས་བསླང༌། །ངེས་མེད་མུ་ཅོར་ལྷུར་ལེན་གཞན་ན་སྟེ། །ཕལ་ཆེར་གླེགས་བམ་མཐོང་བས་ཁེངས་པ་ཙམ། །དེ་སླད་རྡོ་རྗེའི་ལམ་དོན་གཉེར་བ་ལ། །རྨད་བྱུང་ཟུང་འཇུག་འགྱུར་བ་མེད་པའི་གཏམ། །དུས་གསུམ་རྒྱལ་བའི་སྒྲ་དབྱངས་རྒྱ་མཚོའི་བཅུད། །འཆི་མེད་དགའ་སྟོན་འགྱེད་ལ་སྤྲོ་བ་སྐྱེས། །འདིར་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པུ་པ། འཕགས་པ་རྣམས་ཀྱིས་ངེས་པར་རྟོགས་ཤིང༌། དམ་པ་རྣམས་ཀྱིས་ཐོབ་པར་བྱ་བ་ནི། བདེན་པ་གཉིས་ཟུང་དུ་འཇུག་པའི་མཚན་ཉིད་ཅན། སྟོང་པ་ཉིད་དང་སྙིང་རྗེ་ཆེན་པོ་གཉིས་སུ་མེད་པའི་ཡེ་ཤེས་སོ། །དེ་ཉིད་གང་ལས་རབ་ཏུ་གསལ་བར་སྟོན་པ། དཔལ་དུས་ཀྱི་
འཁོར་ལོའི་རྩ་བའི་རྒྱུད་དང་པོའི་སངས་རྒྱས་སྟོང་ཕྲག་བཅུ་གཉིས་པའི་མདོར་བསྟན་གྱི་སྐབས་ལས་བརྩམས་ནས། ཁྱབ་བདག་རྡོ་རྗེ་འཛིན་ཆེན་པོའི་ལམ་གྱི་རིམ་པ་ཡོངས་སུ་རྫོགས་ཤིང་གསལ་ལ་གཞི་དང་འབྲས་བུའི་གནས་ཚུལ་དང་བཅས་པ་སྟོན་པ། རྒྱུད་རྒྱལ་རྒྱ་མཚོ་ལྟ་བུའི་ཟབ་དོན་ངེས་གསང་གཅེས་པ་མཐའ་དག་མ་ཚང་བ་མེད་པར་བསྡུས་པ་དུམ་བུ་བཀོལ་བའི་རྒྱུད་དབང་མདོར་བསྟན་པ་ཞེས་བྱ་བ་འདི་འཆད་པར་བྱེད་པ་ལ། །དང་པོར་མཚན་གྱི་དོན་ནི། རྒྱ་གར་སྐད་དུ། སེ་ཀ་ནི་དབང༌། ཨུཏ་དེ་ཤ་མདོར་བསྟན་པ། དེ་ཉིད་མཚམས་སྦྱར་བས་སེ་ཀོཏ་དེ་ཤའོ། །དེ་ལ་གཞུང་འདི་ཇི་ལྟར་ན་དབང་བསྐུར་བ་མདོར་བསྟན་པར་འགྱུར་སྙམ་ན། །དབང་བཅུ་གཅིག་པོ་རྣམས་ཀྱི་དག་བྱ་དག་བྱེད་གནད་ཆེ་བ་རྣམས་ཀྱང་གསལ་བར་བསྟན་ལ། གཙོ་བོར་དབང་དོན་གྱི་ཡེ་ཤེས་གང་ཡིན་པ་དེ་ཉིད་ཞིབ་མོར་བསྟན་པ་ཡིན་ནོ། །དེ་ཡང་ཆུ་དང་ཅོད་པན་ལ་སོགས་པ་རྫས་དང་ཨོཾ་ཨ་ཨི་རྀ་ཨུ་ལྀ་ཞེས་སོགས་སྔགས་དང༌། ཡུམ་ལྔ་རིགས་ལྔའི་ལྷའི་རྣམ་པ་བསྐྱེད་པ་སོགས་བསམ་གཏན་གྱི་ཁྱད་པར་གང་ཡིན་པས་སློབ་མ་བྱིན་གྱིས་རློབ་པར་བྱེད་པ་དེ་ནི། འཇིག་རྟེན་ཀུན་རྫོབ་པའི་དབང་གི་ཆོ་ག་ཡིན་ལ། སློབ་མའི་རྒྱུད་བྱིན་གྱིས་བརླབས་པའི་ཁྱད་པར་ལས། རང་རྒྱུད་ཀྱི་དྲི་མའི་རྣམ་གྲངས་མང་པོ་ཉམས་སྨད་ཅིང༌། དགེ་བའི་ས་བོན་ཁྱད་པར་ཅན་མང་པོ་གསོས་ཐེབས་པས། ལམ་སྒོམ་པ་ལ་ནུས་པ་མཐུ་ཅན་དུ་གྱུར་པ་ནི་རྒྱུད་འགྱུར་བའི་ཁྱད་པར་ཏེ་དབང་དངོས་སོ། །ཆོ་ག་དེས་དེ་བྱས་པ་ལ་དབང་ཐོབ་པའམ་དམ་ཚིག་ཐོབ་པ་ཞེས་བྱ་སྟེ། ཆོ་གས་སེམས་རྒྱུད་ཀྱི་ཡོན་ཏན་དགེ་བའི་ས་བོན་གསོས་བཏབ་པའི་ཆ་དེ་ནི་སྔགས་ཀྱི་སྡོམ་པ་དང་དམ་ཚིག་ཡིན་ནོ། །ཆོ་ག་ཡང་དེ་བཞིན་གཤེགས་པས་གསུངས་པ་ཁོ་ན་ཡིན་གྱི། གཞན་ལས་ནི་སྡོམ་པ་ཐོབ་པར་མི་འགྱུར་ཏེ། ལྷའི་མཆོག་རྣམས་ཀྱིས་བྱས་པའི་
ཆོ་ག་ལས་ནི། ལས་དང་འཇིག་རྟེན་པའི་དངོས་གྲུབ་འགྲུབ་པའི་བྱིན་རླབས་རྗེས་སུ་འཇུག་པ་དང༌། དེ་ཉིད་ཀྱི་དབང་དང་དམ་ཚིག་ཙམ་ཡོད་སྲིད་ཀྱང༌། སྔགས་ཀྱི་སྡོམ་པ་ཐོབ་པ་ནི་མེད་དེ། ཆོ་ག་ལས་སྡོམ་པ་ཐོབ་པ་ནི་ཆོས་འདི་པ་ཁོ་ནའི་ཁྱད་ཆོས་ཡིན་པའི་ཕྱིར་རོ། །ཆོ་ག་བརྫུན་པ་ལས་ནི་འཇིག་རྟེན་ལས་འདས་པ་ལྟ་ཞོག་གི་འཇིག་རྟེན་པའི་དངོས་གྲུབ་ཀྱི་བྱིན་རླབས་ཀྱང་འཇུག་པར་མི་འགྱུར་ཏེ། གཞན་དུ་ན་འཚོ་བའི་དོན་ཙམ་དུ་ཟད་དོ། །འཇིག་རྟེན་ལས་འདས་པ་དོན་དམ་པའི་དབང་དུ་བྱས་ན། ཡན་ལག་དྲུག་ལ་སོགས་པའི་མན་ངག་གི་སྒྲུབ་པའི་ཚུལ་ནི་ཆོ་ག་ཡིན་ལ། དེ་འདྲས་སྒྲུབ་པའི་ཡེ་ཤེས་ནི། དབང་དང་དམ་ཚིག་དང་སྡོམ་པ་ཡིན་ཏེ། དེས་དེ་ཐོབ་པ་ནི་དབང་བསྐུར་བའོ། །ཡང་དབང་བཅུ་གཅིག་པོ་རྣམས་ཀྱི་རིམ་པས་རྒྱུད་འགྱུར་བ་ཐོབ་པའི་དགེ་བའི་ས་བོན་འཕེལ་ཞིང་གསོས་ཐེབས་ཞེས་པའི་དགེ་བ་ནི། གཙོ་བོར་སེམས་ཀྱི་རང་བཞིན་དགེ་བ་དེ་ཡིན་ལ། དེར་མ་ཟད། ལམ་རིམ་པ་གཉིས་ཀྱི་ཡེ་ཤེས་འཕྲལ་དུ་སྐྱེ་བའི་ནུས་པ་ཡང་གསོས་ཐེབས་པས་རྒྱས་འགྱུར་གྱི་རིགས་སྐྱེས་པའང་ཡིན་པས། བྱིས་པ་འཇུག་པའི་དབང་བདུན་གྱི་དབང་དོན་བསྐྱེད་རིམ་དང༌། དབང་གོང་མ་བཞིའི་དབང་དོན་རྫོགས་རིམ་དུ་འཇོག་པ་ཡིན་ནོ། །དེས་ན་སྐབས་འདིར་མདོར་བསྟན་རྒྱུའི་དབང་ནི་དབང་ཆོག་ཁོ་ན་མ་ཡིན་གྱི་གཙོ་བོར་དབང་དོན་མདོར་བསྟན་པ་ཡིན་ནོ། །དེའི་ཕྱིར་འདི་ནི་དབང་དོན་སྟོན་བྱེད་ཀྱི་སྒོ་ནས་དབང་མདོར་བསྟན་ཞེས་བཏགས་གྱི། ལེའུ་ལྔའི་མདོར་བསྟན་སོ་སོ་ལས། དབང་ལེའི་མདོར་བསྟན་ཁོར་ནར་འཆད་པ་དོན་མ་ཡིན་ཏེ། ཕྱི་འཇིག་རྟེན་ཁམས་དང་བསྐྱེད་རིམ་གྱི་ཕྱོགས་སུ་གཏོགས་པ་རྣམས་བོར་བའི་ལྷག་མ། ནང་དང་དབང་དང་རྫོགས་པའི་རིམ་པའི་སྒྲུབ་ཐབས་དང་ཡེ་ཤེས་ས་ལམ་དང་འབྲས་བུར་བཅས་པ་རྣམས་མདོར་བསྟན་པའི་ཚུལ་གྱིས་གསལ་བར་གསུངས་པ་ཡིན་ནོ། །འགྱུར་གྱི་ཕྱག་
ནི་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ་ཞེས་པའོ། །གཞུང་དངོས་ལ། ཟླ་བ་བཟང་པོས་དྲི་བ་ཞུས་པ་དང༌། སྟོན་པས་བཤད་པར་ཞལ་གྱི་བཞེས་པ་དང༌། བཤད་བྱའི་དོན་རྒྱས་པར་བཤད་པའོ། །དང་པོ་ནི། ཟླ་བ་བཟང་པོས་གསོལ་བ། སྟོན་པ་དབང་བསྐུར་རྣམ་བདུན་དང༌། །རྣམ་གསུམ་དེ་བཞིན་བླ་ན་མེད། །འཇིག་རྟེན་འདས་པའི་དངོས་གྲུབ་ཕྱིར། །མདོར་བསྡུས་པ་ཡིས་བདག་ལ་གསུངས། །ཞེས་གསུངས་ཏེ། སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་སེང་གེ་ལ། ཕྱག་ན་རྡོ་རྗེའི་སྤྲུལ་པ་རྒྱལ་པོ་ཟླ་བ་བཟང་པོས་གསོལ་ཞིང་ཞུས་པར་གྱུར་པ་ནི། ཀྱཻ་འགྲོ་བ་ཐམས་ཅད་ཀྱི་སྟོན་པ་ཞེས་བོས་ནས། བྱིས་པ་འཇུག་པའི་དབང་བསྐུར་བ་རྣམ་པ་བདུན་དང༌། བུམ་པ་གསང་བ་ཤེས་རབ་ཡེ་ཤེས་ཀྱི་དབང་སྟེ། འཇིག་རྟེན་པའི་དབང་གོང་མ་རྣམ་པ་གསུམ་དང༌། དེ་བཞིན་དུ་བླ་ན་མེད་པ་འཇིག་རྟེན་ལས་འདས་པ་བཞི་པའི་དབང་བསྐུར་བ་སྟེ། དབང་བཅུ་གཅིག་པོ་འདི་རྣམས་ཀྱི་དབང་དོན་གྱི་ཡེ་ཤེས་གང་ཡིན་པ་དེ་བདག་ལ་གསུངས་ཤིག་ཅེས་པ་སྤྱིར་གསོལ་བ་འདེབས་པ་ཡིན་ལ། ཉུང་ངུ་ལ་མོས་པའི་གང་ཟག་རྣམས་རྗེས་སུ་བཟུང་བའི་དོན་དུ། ཚིག་བཟུང་སླ་ཞིང་དོན་རྟོགས་སླ་བའི་ཕྱིར་མདོར་བསྡུས་པས་གསུངས་ཤིག་ཅེས་པ་དང༌། དགོས་པ་གང་གི་ཕྱིར་ཞུ་བ་ནི། འཇིག་རྟེན་འདས་པའི་དངོས་གྲུབ་ཕྱིར་ཞེས་པ་སྟེ། གྲུབ་པ་བརྒྱད་ལ་སོགས་པ་ནས་འོག་མིན་གྱི་སྲིད་པའི་མཐར་ཐུག་པའི་བར་གྱི་དངོས་གྲུབ་ནི། དངོས་གྲུབ་འཇིག་རྟེན་པ་དང༌། ཕྱག་རྒྱ་ཆེན་པོ་མཆོག་གི་དངོས་གྲུབ་ནི་འཇིག་རྟེན་ལས་འདས་པའི་དངོས་གྲུབ་སྟེ། སྐབས་འདིའི་རྒྱ་སྐད་དུ། ལོ་ཀི་ཀོ་ཏ་ཏ་ར་སིདྡྷྱ་ར་ཐཾ་ཞེས་འབྱུང་བས། འཇིག་རྟེན་ལས་འདས་པ་ཁོ་ན་སྟོན་པ་མ་ཡིན་པར། འཇིག་རྟེན་པ་དང་འདས་པ་ཞེས་པའི་དོན་དུ་སྣང་ཞིང༌། འགྲེལ་པ་རྣམས་ཀྱིས་ཀྱང་དེ་བཞིན་དུ་བཤད་དོ། །དེས་ན་འཇིག་
རྟེན་དང་འདིས་དངོས་གྲུབ་ཕྱིར། །ཞེས་བསྒྱུར་ན་ལེགས་ལ། འཇིག་རྟེན་འཇིག་རྟེན་འདས་གྲུབ་ཕྱིར། །ཞེས་འབྲོ་འགྱུར་ལས་འབྱུང་བ། རྒྱ་སྐད་ལ་དང་གི་སྐད་དོད་དང༌། འཇིག་རྟེན་ཞེས་པ་ལན་གཉིས་མེད་ཀྱང་དོན་འགྱུར་གྱི་དབང་དུ་བྱས་ན་མི་འགལ་ཏེ། རྒྱལ་བའི་བསྟན་པ་ནི་དོན་ལ་རྟོན་པ་ཡིན་པས་དོན་འཁྲུལ་སོ་མེད་ཅིང་གོ་བདེ་བ་ཉིད་གནད་ཆེ་བ་ཡིན་ནོ། །འདི་ནི་གཞུང་འདིའི་དགོས་འབྲེལ་གྱི་ངག་དངོས་མིན་ཀྱང༌། དགོས་སོགས་ཆོས་བཞི་སྟོན་པར་འཆད་པ་ཁོག་དོན་ནམ་འཕྲོས་དོན་གྱི་ཚུལ་དུ་བྱས་ན་ལེགས་པར་འགྱུར་རོ། །འདིར་མཆོག་ཏུ་མི་འགྱུར་བའི་ཡེ་ཤེས་དོན་དམ་པའི་དབང་བཞི་པ་ནི་བརྗོད་བྱའི་གཙོ་བོ་ཡིན་ཞིང༌། དེ་ཉིད་སྒྲུབ་པར་བྱེད་པའི་ཐབས་རྣམས་ཀྱང་བརྗོད་བྱའོ། །གཞུང་ཚིག་ཤོ་ལོ་ཀ་བརྒྱ་དང་བདུན་ཅུ་རྩ་བཞིའི་བདག་ཉིད་ཀྱི་རྒྱུད་འདི་ནི་བརྗོད་བྱེད་དོ། །གཞུང་འདི་ལ་བརྟེན་ནས་དབང་དོན་སྒྲུབ་ཐབས་དེ་ཉིད་གསལ་བར་རྟོགས་ཤིང་བདེ་བླག་ཏུ་རྟོགས་པ་ནི་དགོས་པའོ། །དེ་ལས་ཕྱག་རྒྱ་ཆེན་པོའིདངོས་གྲུབ་སངས་རྒྱས་ཉིད་ཐོབ་པ་ནི། དགོས་པའི་ཡང་དགོས་པའོ། །དབང་བཞི་པའི་ཡེ་ཤེས་སྒྲུབ་ཐབས་དང་བཅས་པ་དང་གཞུང་འདི་ཉིད། བརྗོད་བྱ་བརྗོད་བྱེད་ཀྱི་འབྲེལ་པ་ཅན་དུ་གནས་ཤིང༌། གཞུང་འདི་ལ་བརྟེན་ནས་དབང་དོན་མ་ནོར་བར་གོ་བ་དང་དེ་ལྟར་ཕྱིན་ཅི་མ་ལོག་པར་གོ་བ་བཞིན་དུ་ཉམས་སུ་བསྟར་བས། མཆོག་གི་དངོས་གྲུབ་ཐོབ་པ་རྣམས། ཕྱི་མ་ཕྱི་མ་སྔ་མ་སྔ་མ་ལ་བལྟོས་པའི་ཚུལ་གྱི་འབྱུང་བའི་ཕྱིར། ཕྱི་མ་རྣམས་སྔ་མ་ལ་འབྲེལ་བ་ནི་འབྲེལ་བའོ། །དཔེར་ན་ས་འོག་ན་རིན་པོ་ཆེའི་གཏེར་ཡོད་པར་གྱུར་ལ། དེ་ཡོད་པས་རྣོ་མཐོང་མཁན་པོས་ཕྱོགས་འདི་ན་གཏེར་གྱི་ཁྱད་པར་འདི་དང་འདི་ལྟ་བུ་དག་ཡོད་དོ། །ཞེས་པའི་ངག་གི་བརྗོད་པ་དེ་འབྱུང་ལ་བརྗོད་པ་དེ་ལས་གཏེར་དོན་གཉེར་འགའ་ཞིག་ལ། ཕྱོགས་དེར་
གཏེར་གྱི་ཁྱད་པར་ཡོད་ངེས་པའི་བློ་སྐྱེ། བློ་དེ་སྐྱེས་པས་བརྐོ་སྤྱད་ལ་སོགས་པའི་བྱ་བས་གཏེར་ལག་ཏུ་འོང་བར་འགྱུར་ལ། སྔ་མ་སྔ་མ་མ་བྱུང་བར་ཕྱི་མ་ཕྱི་མ་མི་འབྱུང་བ་བཞིན་ནོ། །སྐབས་འདིར་འཇིག་རྟེན་པའི་དངོས་གྲུབ་ཐོབ་པ་དགོས་པར་འཆད་པ་ནི། དཔལ་དྲི་མེད་འོད་ལ་བརྟེན་པར་སྣང་ཡང༌། དེ་དང་མི་འདྲ་སྟེ། བསྡུས་པའི་རྒྱུད་ཆེན་པོ་ལས་ནི། འཇིག་རྟེན་པའི་དངོས་གྲུབ་སྒྲུབ་ཐབས་ཡན་ལག་དང་བཅས་པ་རྒྱས་པར་གསུང་ཞིང༌། གཞུང་འདིར་དེ་ལྟར་མ་གསུངས་པའི་ཕྱིར་རོ། །ཚིག་བཅད་དང་པོའི་སྐབས་འདིར་ཉེ་བར་མཁོ་བ་ལ། འཇིག་རྟེན་པའི་དངོས་གྲུབ་ནི་ཐུན་མོང་གི་དངོས་གྲུབ་ཡིན་ལ། དེ་ཡང་རི་ལུ་མིག་སྨན་ལ་སོགས་པ་དངོས་གྲུབ་ཆུང་ངུ་དང༌། འདོད་པའི་ཁམས་ཀྱི་ལྷའི་ལུས་སུ་འགྱུར་བའི་རིག་འཛིན་ནི་འབྲིང་པོ་དང༌། གཟུགས་ཀྱི་ཁམས་ཀྱི་ལུས་སུ་འགྱུར་བའི་རིག་འཛིན་ནི་ཆེན་པོའོ། །དེ་དག་གི་ནང་ཚན་འདོད་ཁམས་ཀྱི་ལྷ་ལ་རིགས་དྲུག་དང༌། གཟུགས་ཁམས་ལ་བཅུ་དྲུག་ཡོད་ཅིང༌། དེའི་བཟང་ཤོས་འོག་མིན་པ་ཡིན་པས། འོག་མིན་པའི་ལྷའི་ལུས་སུ་འགྱུར་བའི་རིག་འཛིན་ནི། ཐུན་མོང་གི་དངོས་གྲུབ་མཐར་ཐུག་པ་ཡིན་པས། འོག་མིན་གྱི་སྲིད་པའི་མཐར་ཐུག་པའི་འཇིག་རྟེན་པའི་དངོས་གྲུབ་ཞེས་འབྱུང་བ་ཡིན་ནོ། །ཡང་གནས་སྐབས་འགའ་ཞིག་ཏུ། ཞི་སོགས་ཀྱི་ལས་ཆུང་ངུ་དང༌། གྲུབ་པ་བརྒྱད་སོགས་འབྲིང་པོ་དང༌། གཟུགས་ཀྱི་རིག་པ་འཛིན་པ་ཆེན་པོར་བཤད་པའི་སྐབས་ཀྱང་ཡོད་དེ། དེ་ནི་ལས་དང་དངོས་གྲུབ་སོ་སོར་མ་ཕྱེ་བར། སིངྔྷི་ཅེས་པ་གྲུབ་པའི་སྒྲ་འབྲས་བུ་ཙམ་ལ་འཇུག་པར་དགོངས་ནས། བསྐྱེད་རིམ་གྱི་གྲུབ་པ་སྟེ་འབྲས་བུ་རབ་འབྲིང༌། ་མ་གསུམ་དུ་བཤད་པའི་སྐབས་ཡིན་ནོ། །འཇིག་རྟེན་པ་ནི་ཁམས་གསུམ་གྱི་ཉོན་མོངས་པ་མ་སྤངས་པའི་དོན་ཡིན་ལ། སྤངས་པ་ནི་འཇིག་རྟེན་ལས་འདས་པའོ། །དེའི་ནང་ནས་སངས་རྒྱས་ཉིད་ནི་ཉོན་མོངས་
པའི་སྒྲིབ་པར་མ་ཟད། ཤེས་བྱའི་སྒྲིབ་པ་དང་སྙོམས་པར་འཇུག་པའི་སྒྲིབ་པ་ཡང་སྤངས་པ་སྟེ། སྒྲིབ་པ་གསུམ་ལས་གྲོལ་བའོ། །སེམས་ཅན་བསྡུས་པ་ལ་མངོན་པར་དགའ་བ་ཞེས་པ་ནི། ཉོན་མོངས་པ་དང༌། དུས་དང༌། སེམས་ཅན་དང༌། ལྟ་བ་དང༌། ཚེའི་སྙིགས་མ་སྟེ། སྙིགས་མ་ལྔ་དང༌། ལྡན་པའི་སེམས་ཅན་གཞུང་རྒྱ་ཆེན་པོ་མི་རྟོགས་པའོ། །གཉིས་པ་ནི།བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ཟླ་བཟང་དབང་བསྐུར་དོན། །རྣམ་པ་བདུན་དང་རྣམ་གསུམ་མཆོག །རྩ་ཡི་ཀུན་སྤྱོད་རྩོལ་བ་ནི། །མདོར་བསྟན་པ་ཡིས་ཁྱོད་ལ་བཤད། །བཅོམ་ལྡན་འདས་ཞེས་པ་ལ། རྒྱ་གར་གྱི་སྐད་དུ་བྷ་ག་ཝཱན་ཞེས་པ་སྟེ་དེ་ནི། སྐལ་བ་དང་ལྡན་པའམ། བཅོམ་པ་དང་ལྡན་པ་ལ་ཡང་འཇུག་པ་ལས། དང་པོའི་དབང་དུ་བྱས་ནས་རྩ་བའི་རྒྱུད་ལས། དབང་ཕྱུག་དང་ནི་གཟུགས་བཟང་དང༌། །གྲགས་དང་དཔལ་དང་ཡེ་ཤེས་དང༌། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་རྣམས་བྷ་ག་ཞེས་བརྗོད་དོ། །རྣམ་དག་སུམ་ཅུ་རྩ་དྲུག་ཁམས། །ས་སོགས་རྡོ་རྗེ་བཙུན་མོ་སྟེ། །དེ་རྣམས་དབང་ཕྱུག་སོགས་ཡོན་ཏན། །དྲུག་པོ་དེ་རྣམས་བྷ་གར་གྲགས། །ཞེས་ཏེ་བསམ་ཏན་གྱི་ཕ་རོལ་ཏུ་ཕྱིན་པའི་འབྲས་བུ་དབང་ཕྱུག་དང༌། བཟོད་པའི་འབྲས་བུ་གཟུགས་བཟང་དང༌། ཚུལ་ཁྲིམས་ཀྱི་སྙན་པར་གྲགས་པ་དང༌། སྦྱིན་པའི་དཔལ་འབྱོར་དང་ཤེས་རབ་ཀྱི་ཡེ་ཤེས་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་འབྲས་བུ་བརྩོན་འགྲུས་ཕུན་སུམ་ཚོགས་པ་སྟེ། དེ་ལ་དབང་ཕྱུག་ཕུན་སུམ་ཚོགས་པ་ནི་ཟད་པར་དང་ཟིལ་གནོན་ལ་སོགས་པའམ་དབང་བཅུ་དང་ལྡན་པ་ལྟ་བུ་སྟེ། བརྟན་གཡོ་ཐམས་ཅད་ལ་འདོད་དགུར་སྒྱུར་བའོ། །གཟུགས་བཟང་ནི་མཚན་དང་དཔེ་བྱད་དོ། །དཔལ་ནི་ཡོངས་སུ་དག་པའི་ཞིང་ཁམས་མཆོད་པའི་ཡོ་བྱད་དཔག་ཏུ་མེད་པ་དང་བཅས་པའོ། །གྲགས་པ་ནི་འགྲོ་བ་མཐའ་དག་
གི་མཆོད་འོས་སུ་གྱུར་པས་བསྟོད་པའོ། །ཡེ་ཤེས་ནི་སྟོབས་བཅུ་དང་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ལ་སོགས་པའོ། །བརྩོན་འགྲུས་ཕུན་སུམ་ཚོགས་པ་ནི་འབད་རྩོལ་མེད་ཅིང་རྣམ་པར་རྟོག་པ་མེད་པར་ཕྱོགས་བཅུ་དུས་གསུམ་གྱི་སེམས་ཅན་རྣམས་ལ་གང་ལ་གང་འདུལ་གྱི་འགྲོ་དོན་འཁྲུལ་པ་མེད་ཅིང་དུས་ལས་མ་ཡོལ་བར་འཇུག་པ་སྟེ། འདི་ལྟ་བུའི་སྐལ་བ་དྲུག་ནི་དངོས་སངས་རྒྱས་རྣམས་ཁོ་ན་ལ་མངའ་ལ། རྗེས་མཐུན་པ་བྱང་ཆུབ་སེམས་དཔའ་ལ་ཡང་ཡོད་ཅིང༌། གཞན་རྣམས་ལ་མེད་དོ། །གང་ཚངས་པ་དང་དབང་ཕྱུག་ལ་སོགས་པ་དེ་དག་ལ་ནི། དབང་ཕྱུག་དྲུག་ཡོད་པར་གྲགས་མོད་ཀྱི། འཁོར་བ་ཉིད་ན་འཕྲལ་གྱི་བྱ་བ་ལ་ཅུང་ཟད་དབང་འབྱོར་བ་སོགས། དབང་ཕྱུག་དང་ལུས་དང་དཔལ་དང་གྲགས་པ་དང་མངོན་ཤེས་དང༌། བྱ་བ་ལ་འཇུག་པའི་བརྩོན་འགྲུས་ཉི་ཚེ་བ་དང་ལྡན་པ་ཁོ་ན་ཡིན་ནོ། །གཉིས་པའི་དབང་དུ་བྱས་ནས་དགྱེས་པའི་རྡོ་རྗེ་ལས། ཡང་ན་ཉོན་མོངས་ལ་སོགས་བདུད། །འཇོམས་ཕྱིར་བཅོམ་ལྡན་འདས་ཞེས་བྱ། །ཞེས་པ་ལྟར། བདུད་བཞི་བཅོམ་པའི་ཡོན་ཏན་དང་ལྡན་པའོ། །དེ་ལ་བདུད་བཞི་ནི། ཐེག་པ་ཐུན་མོང་ལྟར་ན། གང་ལ་ལྟོས་ནས་འབྲས་བུའི་ཕྱོགས་ཉེ་བར་བཟུང་བའི། ཉེར་ལེན་གྱི་ཕུང་པོ་ལྔ་ནི། ཕུང་པོའི་བདུད་ཡིན་ལ། རྒྱུའི་ཕྱོགས་བཟུང་བའི་ཁམས་གསུམ་གྱི་ཉོན་མོངས་པ་ནི་ཉོན་མོངས་པའི་བདུད་དང༌། ཕུང་པོ་དང་ཉོན་མོངས་པ་དེ་རྣམས་ཉིད་ཀྱི་འཇིག་ཅིང་འགྱུར་བའི་རང་བཞིན་ཅན་གྱི་མི་རྟག་པའི་མཚན་ཉིད་ནི་འཆི་བདག་གི་བདུད་དང༌། འདོད་པའི་ཁམས་ཀྱི་ལྷའི་གདོན་གྱི་གཙོ་བོ། གཞན་འཕྲུལ་དབང་བྱེད་ཀྱི་བདག་པོ། གང་གི་མཐུ་ལས་འདོད་པའི་ཁམས་ཀྱི་སེམས་ཅན་རྣམས་དགེ་བ་ལ་གཡེལ་ཞིང་ཆགས་བྲལ་གྱི་ལམ་ལས་ཕྱིར་ཟློག་པར་བྱེད་པ་ནི་ལྷའི་བུའི་བདུད་སྟེ། དེ་རྣམས་བདུད་བཞི་དངོས་ཡིན་ལ། ཕྱོགས་མཐུན་ཙམ་སངས་
རྒྱས་ཀྱི་ཡེ་ཤེས་ཀྱི་གཞོམ་པར་བྱེད་པའི་དབང་དུ་བྱས་ན། ཡིད་ཀྱི་རང་བཞིན་གྱི་ལུས་དང༌། མ་རིག་བག་ཆགས་ཀྱི་ས་དང། བསམ་གྱི་མི་ཁྱབ་པའི་འཆི་འཕོ་དང༌། དབང་སྒྱུར་བའི་སྲེད་པ་ལ་སོགས་པ་རྣམས་ཀྱང་རིམ་བཞིན་ཕུང་པོའི་བདུད་ལ་སོགས་པར་སྦྱར་རོ། །ཐུན་མོང་མ་ཡིན་པའི་ཐེག་པ་འདིར་ཡང་དེ་དག་ཁས་ལེན་ཞིང་ལྷག་པོར་བཤད་པ་ནི། ལུས་ཀྱི་ཐིག་ལེའི་སྒྲིབ་པ་ནི་ཕུང་བོའི་བདུད་དང༌། ངག་གི་ཐིག་ལེའི་སྒྲིབ་པ་ནི་ཉོན་མོངས་པའི་བདུད་དང༌། ཡིད་ཀྱི་ཐིག་ལེའི་སྒྲིབ་པ་ནི་འཆི་བདག་གི་བདུད་དང༌། །བཞི་པའི་ཐིག་ལེའི་སྒྲིབ་པ་ནི་ལྷའི་བུའི་བདུད་དོ། །དེ་དག་ཀྱང་གནས་སྐབས་བཞིའི་མཚན་ཉིད་ཅན་ཡིན་ཞིང༌། སད་པའི་གནས་སྐབས་ཀྱི་སྣོད་བཅུད་དུ་སྣང་བ་ནི། ལུས་ཀྱི་ཆོས་རྣམས་ཕུང་སོགས་ཀྱི་དངོས་པོ་རགས་ཤོས་ཡིན་པའི་ཕྱིར་དང༌། གང་ཉོན་མོངས་མ་རྣམས་ཀྱི་དམིགས་པའི་ཡུལ་ནི། ཡིད་ངོར་སྣང་བའི་ཕུང་སོགས་ཕྲ་བ་ཡིན་ཞིང༌། དེ་ཉིད་རྨི་ལམ་གྱི་གནས་སྐབས་དང་འབྲེལ་བ་དང༌། ཐིག་ལེ་རླུང་གིས་སྐྱོད་པ་ལས་སྣང་བའམ་བརྗོད་འདོད་ཀྱི་རྟོག་པ་དང་འབྲེལ་བའི་ཕྱིར། ཉོན་མོངས་པ་ནི་ངག་གི་ཆོས་སུ་སྦྱོར་བའི་ཕྱིར་དང༌། འདུས་བྱས་སྐྱེ་འཇིག་ཐམས་ཅད་ཀྱང་རྣམ་པར་རྟོག་པའི་སྐྱེ་འཇིག་གི་བྱེད་པ་ཅན་ཡིན་ཞིང༌། ཡིད་ཀྱི་ཐིག་ལེའི་དྲི་མ་ཡང་རྣམ་པར་རྟོག་པ་ཡིན་པས་དང༌། ཚོགས་དྲུག་རགས་པ་འགགས་པ་རྨོངས་པའི་གནས་སྐབས་ནི་གཉིད་འཐུག་པོ་དང་འཆི་བ་ལ་སོགས་པ་གནད་གཅིག་པའི་ཕྱིར་དང༌། བཞི་པ་ཐིག་ལེ་འཕོ་བ་ལ་ཆགས་པ་ནི། དེ་ཐམས་ཅད་ཀྱི་དཔུང་གཉེན་ཡིན་ཞིང༌། འཛག་བདེའི་སྲེད་པ་མངོན་གྱུར་ནི་བདུད་སྡིག་ཏོ་ཅན་གྱི་བྱེད་ལས་དངོས་ཀྱང་ཡིན་པའི་ཕྱིར་རིམ་པ་བཞིན་དུ་སྦྱར་རོ། །བདུད་དེ་ཐམས་ཅད་ཀྱང་རང་གི་སེམས་ཀྱི་དྲི་མ་ཡིན་ཞིང༌། སྤང་བར་བྱ་རྒྱུ་བདེན་པའི་དངོས་པོ་ཅན་དུ་མེད་དེ། སེམས་འཁྲུལ་པའི་སྣང་བ་ཙམ་ཡིན་པའི་ཕྱིར་རོ། །དེ་ཡང་
ཏིང་ངེ་འཛིན་གྱི་ས་བཅུ་གཉིས་པའི་མཐར། བདུད་བཞི་དངོས་རྣམས་བཅོམ་པ་ཡིན་ལ། བླ་ན་མེད་པའི་བྱང་ཆུབ་ཐོབ་པའི་སྔ་ལོགས་སུ་བདུད་བཞིའི་ཆར་གཏོགས་ཐམས་ཅད་ཀྱང་བཅོམ་པ་ཡིན་ཏེ། གང་འདིའི་འཁྲུལ་པའི་ཆ་ཤས་ཐམས་ཅད་ཡོངས་སུ་སངས་པ་ནི་བཅོམ་པའོ། །དེ་ལྟར་སྐལ་ལྡན་དང་བཅོམ་ལྡན་གྱི་ཡོན་ཏན་གང་ལ་མངའ་བ་དེ་ནི་སངས་རྒྱས་བཅོམ་ལྡན་འདས་སོ། །དེས་བཀའ་སྩལ་པ་ནི། ལེགས་པར་རབ་ཏུ་ཉོན་ལ་ཡིད་ལ་བཟུང་ཞིག་དང༌། ཞེས་པའི་ཚུལ་གྱི་སྣོད་ཀྱི་སྐྱོན་གསུམ་སྤངས་ནས་ཉན་པར་གདམས་པའོ། །དེ་ཡང་ཀྱཻ་ཟླ་བ་བཟང་པོ་ཞེས་ཞུ་བ་པོ་ཉིད་ཡིན་པའི་ཕྱིར་ན། དངོས་སུ་ཟླ་བཟང་ཁོ་ན་སྨོས་ཀྱང༌། ཤུགས་ལ་འཁོར་ཐམས་ཅད་ལ་ཉན་པར་གདམས་པའོ། །དེ་ལྟར་ཉན་པར་གདམས་ནས། མདོར་བསྟན་པའི་སྒོ་ནས་ཁྱོད་ལ་བཤད་པར་བྱའོ་ཞེས་བཤད་པར་ཞལ་གྱི་བཞེས་པའོ། །གང་ཞིག་བཤད་པར་བྱ་བ་ནི། བྱིས་འཇུག་གི་དབང་བདུན་དང༌། དབང་གོང་མ་ལས་འཇིག་རྟེན་པ་གསུམ་དང༌། མཆོག་སྟེ་འཇིག་རྟེན་ལས་འདས་པ་བཞི་པ་སྟེ། དབང་བཅུ་གཅིག་པོ་རྣམས་ཀྱི་དོན་བཤད་པར་བྱའོ། །ཞེས་པ་ཡིན་ལ། རྩ་ཡི་ཀུན་སྤྱོད་རྩོལ་བ་ནི་ཞེས་པ་ལ། རྩ་ནི་རྩ་དྲུག་དང༌། འཁོར་ལོ་དྲུག་ལ་སོགས་པ་སྟེ། གང་ལས་བྱང་ཆུབ་ཀྱི་སེམས་འབབ་པའི་རྩ་དང་རླུང་རྣམས་སོ། །དེ་རྣམས་ཀྱི་ཀུན་ཏུ་སྤྱོད་པ་ནི། བྱ་བ་དང་བྱེད་པའི་དངོས་པོ་སྟེ། རྩ་རྣམས་སུ་རླུང་དང་ཐིག་ལེ་རྒྱུ་ཞིང་སྤྱོད་པའི་ཚུལ་གཞི་ལམ་གྱིས་བསྡུས་པ་དང༌། རྣམ་པར་དག་ཚུལ་འབྲས་བུས་བསྡུས་པ་རྣམས་སོ། །རྩོལ་བའི་སྐད་དོད། ཨཱ་ཡ་མ་ནི་འགོག་པ་ལ་འཇུག་སྟེ། རྩ་དེ་རྣམས་སུ་ཀུན་ཏུ་སྤྱོད་པ་འགོག་པའོ་འདིར་རྩོལ་བ་ནི། སྲོག་རྩོལ་གྱི་ཡན་ལག་གི་རྩོལ་བ་ལ་བྱེད་པ་ནི་མི་ལེགས་ཏེ། ཡན་ལག་དེ་དབང་བཞི་པའི་དོན་དངོས་མ་ཡིན་པའི་ཕྱིར་རོ། །དེས་ན་ཏིང་ངེ་འཛིན་གྱི་ཡན་ལག་ཏུ་ལས་རླུང་ཉི་ཁྲི་ཆིག་སྟོང་དྲུག་བརྒྱ་འགགས་པ་མི་འགྱུར་བའི་བདེ་བ་ཆེན་པོའི་ཡེ་ཤེས།
སྐད་ཅིག་དང་པོ་ནས་བརྩམས་ཏེ། མཐར་ཕྱིན་པ་རྫོགས་པའི་སངས་རྒྱས་ཀྱི་བར་དུ། ལས་རླུང་འགག་བཞིན་པ་དང༌། འགགས་ཟིན་པ་མངོན་དུ་གྱུར་པའི་ཡེ་ཤེས་རྣམས་བསྟན་པ་ཡིན་ནོ། །སྐབས་འདིར་མཁས་པ་ཁ་ཅིག །རྣམ་པ་བདུན་དང་རྣམ་གསུམ་མཆོག་ནི། ཞུས་པའི་ལན་ཡིན་ལ། རྩའི་ཀུན་སྤྱོད་རྩོལ་བ་ནི་མ་ཞུས་པར་གསུངས་པའོ། །ཞེས་གསུངས་པ་ནི་མི་ལེགས་ཏེ། དེ་ནི་ཞུས་པའི་དོན་གྱི་གཙོ་བོ་དབང་བཞི་པའི་ཡེ་ཤེས་ཀྱི་སྒྲུབ་པ་ཡིན་པའི་ཕྱིར་རོ། །ཚིགས་སུ་བཅད་པ་འདི་དག་གིས་སྟོན་པ་བཅོམ་ལྡན་འདས་དང་ཞུ་བ་པོ་ཟླ་བ་བཟང་པོ་དང༌། ཆོས་དབང་བཞི་པའི་ཡེ་ཤེས་ངེས་པའི་དོན་རྣམས་དངོས་སུ་བསྟན་ཞིང༌། གནས་དང་འཁོར་ཕུན་སུམ་ཚོགས་པའང་ཤུགས་ལ་བསྟན་པ། དེའི་ཕྱིར་གླེང་གཞིའི་ཚུལ་དུ་བཤད་དགོས་སོ། །སྙམ་ན། རྒྱུད་འདི་ནི་རྒྱུད་རྒྱས་པའི་བར་སྐབས་ནས་ཕྱུང་བ་ཡིན་པའི་ཕྱིར། ཚིགས་བཅད་འདི་དག་གླེང་གཞི་ནྀ་མ་ཡིན་ལ། ཕུན་སུམ་ཚོགས་པ་ལྔ་དང་སྦྱར་བ་ནི་སྤྲོས་ཏེ་བཤད་པ་ཡིན་མོད་ཀྱང་དེ་ལྟར་འཆད་པ་མི་འགལ་ལོ། །རྩ་བའི་རྒྱུད་ལས། སྟོན་པས་བྱ་སྟེ་ཕུང་པོ་རུ། །ཤེས་རབ་ཕ་རོལ་ཕྱིན་ཚུལ་བཞིན། །ཆོས་སྟོན་དཔལ་ལྡན་འབྲས་སྤུངས་ཏུ། །དེ་བཞིན་གསང་སྔགས་ཚུལ་རབ་གསུངས། །གང་ལ་གནས་ནས་སྟོན་པ་ནི། །སུ་ཡིས་རྒྱུད་བསྟན་ཅི་ཞིག་བསྟན། །གནས་ནི་གང་དུ་འཇིག་རྟེན་པའི། །འཁོར་ནི་སུ་ཡི་རྒྱུ་ཅི་ཡིས། །བྱ་རྒོད་ཕུང་པོའི་རི་ཆེན་པོ། །ཐཻག་པ་ཆེན་པོ་བླ་ན་མེད། །ཤེས་རབ་ཕ་རོལ་ཕྱིན་པའི་ཚུལ། །བྱང་ཆུབ་སེམས་དཔའ་རྣམས་ལ་བསྟན། །དེ་ནས་གཅིག་ཏུ་མཆོད་རྟེན་ཆེར། །ཆོས་ཀྱི་དབྱིངས་ཀྱི་དཀྱིལ་འཁོར་དུ། །བྱང་ཆུབ་སེམས་དཔའ་སོགས་རྣམས་ཀྱིས། །ཐབས་ཅིག་དེ་བཞིན་གཤེགས་པ་བཞུགས། །ནམ་མཁའ་བེམ་མིན་ཤིན་ཏུ་དྭངས། །གོ་སྐབས་མེད་པར་རབ་ཏུ་གསལ། །སྣ་ཚོགས་རྡོ་རྗེའི་ཁང་པ་གནས། །ཆོས་ཀྱི་དབྱིངས་དང་ཡིད་འོང་པར། །རྒྱུད་བསྟན་སྐྱེས་བུ་རྣམས་ཀྱི་ནི། །
བསོད་ནམས་ཡེ་ཤེས་དགོས་པའོ། །ཨེ་ཡིག་ནམ་མཁའི་སྣང་བ་ཆེ། །ཆོས་ཀྱི་དབྱིངས་སུ་རབ་ཏུ་གྲགས། །ཝཾ་ཡིག་བདེ་བར་གཤེགས་པའི་ཚོགས། །ཨེ་ཡིག་རྣམ་པར་ཡང་དག་གནས། །ཞེས་གསུངས་ཏེ། འདིའི་ཚིག་བཅད་དང་པོའི་དོན་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་རྗེས་སུ་གསང་སྔགས་བསྟན་ཏོ་ཞེས་དུས་སྔ་ཕྱིར་འཆད་པ་དོན་མིན་ལ། བྱ་རྒོད་ཕུང་པོར་ཤེས་རབ་ཕ་རོལ་ཏུ་ཕྱིན་པའི་ཚུལ་ཕུན་སུམ་ཚོགས་པ་ལྔ་ལྡན་དུ་གསུངས་པ་བཞིན་དུ། དཔལ་ལྡན་འབྲས་སྤུངས་ཆོས་ཀྱི་དབྱིངས་ཀྱི་གནས་སུ་ཡང༌། གསང་སྔགས་ཀྱི་རྒྱུད་གསུངས་པ་རྣམས་ཕུན་སུམ་ཚོགས་པ་ལྔ་དང་ལྡན་ནོ་ཞེས་དཔེ་དོན་དུ་སྦྱར་བ་ཡིན་ནོ། །གང་ལ་གནས་པ་དང༌། གནས་གང་དུ་ཞེས་གནས་ཕུན་སུམ་ཚོགས་པའི་དབྱེ་བ་གཉིས་འབྱུང་བ་ནི། སེམས་ཅན་སྤྱི་མཐུན་གྱི་སྣང་བ་དང༌། དག་པའི་འཁོར་རྣམས་ཀྱི་སྣང་ངོའི་དབང་དུ་བྱས་པ་སྟེ། འབྲས་སྤུངས་ཀྱི་མཆོད་རྟེན་ལ་གནས་ནས། ཨེ་ཡིག་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་རང་བཞིན་གཞལ་མེད་ཁང་གི་དབུས་ན་སེང་གེའི་ཁྲིའི་གནས་སུའོ། །སྟོན་པ་ནི་དེ་བཞིན་གཤེགས་པ་ཤཱཀྱ་ཐུབ་པ་སྟེ། འདི་ལ་ཁ་ཅིག་ཆགས་བྲལ་རབ་ཏུ་བྱུང་བའི་རྣམ་པ་ཁོ་ནས་སོ། །ཞེས་སྨྲ་བ་ནི་སྙིང་པོ་མེད་ཅིང༌། སྐུ་རྣམ་པ་ཐམས་ཅད་པ་ཡིན་པའི་ཕྱིར། འགའ་ཞིག་ལ་དེ་ལྟར་སྣང་བ་མི་འགལ་མོད་ཀྱི། རྡོ་རྗེ་དབྱིངས་ཀྱི་དཀྱིལ་འཁོར་གྱི་གཙོ་བོར་ཡང་ནས་ཡང་དུ་གསུངས་པའི་ཕྱིར། གཙོ་བོར་འཁོར་ལོའི་དབང་ཕྱུག་གི་རྣམ་པ་ཉིད་དོ། །དེ་ལྟ་བུའི་སྟོན་པ་ནི་ཝཾ་ཡིག་བདེ་བ་ཆེན་པོ་ཡིན་པས། ཆོས་ནི་ཨེ་ཡིག་ལ་ཝཾ་ཡིག་གནས་པའི་དོན་བདེ་སྟོང་ཟུང་འཇུག་གི་རྒྱུད་བསྟན་པ་ཡིན་ཞིང༌། བསྡུད་པ་པོ་ནི་ཕྱག་ན་རྡོ་རྗེ་སྟེ། ཐབས་ཀྱི་ཕྱོགས་ལས་ཐུགས་ཀྱི་སེམས་དཔའོ། །འཁོར་ནི་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་ལྷ་མོའི་དཀྱིལ་འཁོར་པ་དང་ལྷའི་མཆོག་དང་ཀླུ་སོགས་ཁམས་གསུམ་གྱི་བདག་པོ་རྣམས་དང་ཐབས་ཅིག་པའོ། །དགོས་པ་ནི་སྐྱེ་དགུ་རྣམས་ཀྱིས་བསོད་ནམས་དང་ཡེ་ཤེས་ཀྱི་འབྲས་བུ་བླ་ན་
མེད་པའི་བྱང་ཆུབ་ཐོབ་པའི་སླད་དུའོ། །ཞེས་པའི་དོན་ནོ། །དེ་ལྟར་ན་ཞུས་པ་དང་བཤད་པར་ཞལ་གྱི་བཞེས་པའི་ཚིག་བཅད་གཉིས་པོ་འདི་དག་ལ་འགྲེལ་ཆེན་དོན་དམ་བསྡུས་པར། སྤྲོས་པའི་བཤད་པ་དུ་མ་མཛད་ཏེ། སྤྲོ་ན་དེ་ཉིད་དུ་བལྟ་བར་བྱའོ། །གསུམ་པ་ལ། རྒྱུད་དོན་ཕྱིན་ཅི་མ་ལོག་པ་རྟོགས་པའི་ཐབས་བཤད། དབང་རྣམ་པ་བཅུ་གཅིག་གི་དག་དབྱེ་མདོར་བསྟན། མཆོག་གི་དངོས་གྲུབ་སྒྲུབ་པའི་ཐབས་རྒྱས་པར་བཤད་པའོ། །དང་པོ་ལ། རྒྱུད་དོན་ཚང་ལ་མ་ནོར་བར་སྟོན་པའི་རྗོད་བྱེད་ངོས་བཟུང༌། ཕྱིན་ཅི་མ་ལོག་པའི་ངེས་དོན་བརྗོད་བྱར་བསྟན། བརྗོད་བྱ་རྗོད་བྱེད་གཉིས་འདུས་ཀྱི་རིམ་པ་བསྟན་པའོ། །དང་པོ་ནི། རྒྱུད་དུ་མདོར་བསྟན་རྣམ་གསུམ་དང༌། རྒྱས་པར་བཤད་པ་རྣམ་གསུམ་འགྱུར། །རབ་ཏུ་མདོར་བསྟན་མདོར་བསྟན་ཆེ། །རབ་ཏུ་རྒྱས་པར་བཤད་པ་གཞན། །མདོར་བསྟན་རྒྱས་པར་བཤད་པ་ཉིད། །རྒྱུད་དོན་ཡང་དག་བསྡུས་པར་བརྗོད། །རབ་ཏུ་མདོར་བསྟན་རྒྱས་བཤད་པ། །དཀའ་འགྲེལ་ཚིག་ནི་འབྱེད་པའོ། །མདོར་བསྟན་ཆེན་པོ་རྒྱས་བཤད་པ། །རྒྱས་འགྲེལ་ཐམས་ཅད་དོན་སྟོན་བྱེད། །དེ་ནི་མངོན་ཤེས་ཐོབ་རྣམས་ཀྱིས། །བྱ་ཡི་མཁས་རྣམས་ཀྱིས་མིན་ཉིད། །དེ་ལྟར་མཐའ་དྲུག་རྣམས་ཀྱིས་དག །ཅེས་གསུངས་ཏེ་ཚིག་བཅད་འདི་དག་གི་དོན་ལ། དུས་འཁོར་ཞབས་ཀྱི་མཛད་པར་གྲགས་པའི་འགྲེལ་བ་འགྱུར་རྙིང་ལས། མདོར་བསྟན་ཨེ་ཝཾ་གི་ཡི་གེ་ལ་བཤད་པ་སོགས་དང༌། འགའ་ཞིག་རྒྱུད་ཉིད་ཀྱི་མདོར་བསྟན་རྒྱས་བཤད་སོགས་ཡིན་ནམ་སྙམ་དུ་སེམས་པ་ནི། དེ་ནི་མངོན་ཤེས་ཐོབ་རྣམས་ཀྱིས། །བྱ་ཡི་མཁས་རྣམས་ཀྱིས་མིན་ཉིད། །ཅེས་གསུངས་པས། མངོན་ཤེས་མེད་པའི་མཁས་པས་རྒྱུད་རྩོམ་པའི་ དོགས་པ 
་མེད་པའི་ཕྱིར། ཤིན་ཏུ་མི་འབྲེལ་ལོ། །དེ་ལྟར་ན་བསྡུས་པའི་རྒྱུད་དང་འབྲེལ་བ་ལ། མདོར་བསྟན་ལ་སོགས་པ་རྣམ་པ་གསུམ་དང༌། རྩ་རྒྱུད་དང་འབྲེལ་བ་ལ་རྒྱས་བཤད་ལ་སོགས་པ་གསུམ་དུ་འགྱུར་ཏེ།
དྲུག་པོ་དེ་དག་ཀྱང་གང་ཞེ་ན། མདོར་བསྟན་ཞེས་པའི་མིང་དངོས་སུ་སྨོས་པའི་ཤུགས་ལ། རབ་ཏུ་མདོར་བསྟན་དང་མདོར་བསྟན་ཆེན་པོ་སྟེ། བསྡུས་རྒྱུད་ཀྱི་ཕྱོགས་ལ་གསུམ་དང༌། རྒྱས་བཤད་དངོས་སུ་སྨོས་པའི་ཤུགས་ལ། རབ་ཏུ་རྒྱས་བཤད་དང༌། གཞན་ཞེས་པ་རྒྱས་བཤད་ཆེན་པོ་སྟེ། རྩ་རྒྱུད་ཀྱི་ཕྱོགས་ལ་གསུམ་མོ། །དེ་ལ་དོན་དམ་བསྡུས་པ་ལ་སོགས་པ་འབྲེལ་བ་རྣམས་ཀྱི་དགོངས་པ་དང༌། བོད་ཀྱི་མཁས་པ་ཕྱི་མ་ཕལ་ཆེར་འདི་སྐད་ཅེས། མདོར་བསྟན་ནི་བསྡུས་པའི་རྒྱུད་དེ། གསང་འདུས་ལེའུ་བཅུ་བདུན་པ་དང༌། བདེ་མཆོག་ཉུང་ངུ་དང༌། དགྱེས་རྡོར་བརྟག་གཉིས་ལ་སོགས་པ་ཡིན་ལ། རབ་ཏུ་མདོར་བསྟན་ནི་དེ་དག་གི་དཀའ་འགྲེལ་བྱང་ཆུབ་སེམས་དཔའ་འཕགས་པས་མཛད་པ་དང༌། མདོར་བསྟན་ཆེན་པོ་ནི། རྒྱས་འགྲེལ་བྱང་ཆུབ་སེམས་དཔའ་འཕགས་པས་མཛད་པའོ། །རྒྱས་བཤད་ནི་གསང་འདུས་ཉི་ཁྲི་ལྔ་སྟོང་པ་དང༌། བདེ་མཆོག་འབུམ་པ་དང༌། དགྱེས་རྡོར་འབུམ་ལྔ་ལ་སོགས་པ་ཡིན་ལ། རབ་ཏུ་རྒྱས་བཤད་ནི་དེ་རྣམས་ཀྱི་དཀའ་འགྲེལ་འཕགས་པས་མཛད་པ་དང༌། འགྲེལ་བཤད་ཆེན་པོ་ནི་དེ་རྣམས་ཀྱི་རྒྱས་འགྲེལ་འཕགས་པས་མཛད་པ་སྟེ། དེས་ན་པདྨ་དཀར་པོའི་དྲི་མེད་འོད་ལྟ་བུ་ནི། མདོར་བསྟན་ཆེན་པོ་དང་ཟླ་བ་བཟང་པོས་མཛད་པའི་འགྲེལ་བཤད་སྟོང་ཕྲག་དྲུག་ཅུ་པ་ལྟ་བུ་ནི། རྒྱས་བཤད་ཆེན་པོའོ། །མདོར་བསྟན་རྒྱས་པར་བཤད་པ་ཉིད་རྒྱུད་ཡང་དག་པར་བསྡུས་པར་བརྗོད། ཅེས་སྟོན་ཏེ། མདོར་བསྟན་རྒྱས་བཤད་གཉིས་ཀྱིས་ནི། བཤད་བྱ་རྒྱུད་རྣམས་ཡང་དག་པར་བསྡུས་པ་ཡིན་ལ། རབ་ཏུ་མདོར་བསྟན་དང༌། རབ་ཏུ་རྒྱས་པར་བཤད་པ་གཉིས་ནི་རྒྱུད་དེ་དག་གི་དཀའ་འགྲེལ་ཏེ། ཚིག་དོན་གསལ་བར་བྱེད་པ་ཡིན་ལ། མདོར་བསྡུས་ཆེན་པོ་དང༌། རྒྱས་བཤད་ཆེན་པོ་ནི། དེ་གཉིས་ཀྱི་འགྲེལ་ཆེན་ཏེ་རྒྱུད་ཀྱི་ཚིག་དོན་ཐམས་ཅད་ཞིབ་མོར་སྟོན་པའོ། །དེ་ལྟར་དྲུག་ལས་དཀའ་འགྲེལ་གཉིས་དང༌། རྒྱས་འགྲེལ་གཉིས་པོ་དེ་ནི།
ཡང་དག་པའི་ལམ་ལ་མངོན་ཤེས་ཐོབ་པ་རྣམས་ཀྱི་བྱ་ཡི། མཁས་པ་པཎྜི་ཏ་ཕལ་པ་རྣམས་ཀྱིས་བྱ་བ་ནི་མ་ཡིན་ནོ། །ཞེས་འཆད་ཅིང་དེ་དག་ལས་མཁས་པ་ཁ་ཅིག་ནི། དེ་ལྟ་བུའི་མཐའ་དྲུག་ཀྱང་མཐའ་གསུམ་དུ་འདུས་ཏེ། རྒྱུད་དང་དཀའ་འགྲེལ་དང་རྒྱས་འགྲེལ་གསུམ་མོ། །ཞེས་པ་དང༌། མཐའ་དྲུག་ཅེས་པའི་མཐའི་དོན་ནི། རྣམ་བཤད་རིག་པ་ལས། མཐའ་ནི་ཟད་དང་འཇུག་ཆ་དང༌། །ཉེ་དང་ཕྱོགས་དང་སྨད་པ་ལ། །ཞེས་གསུངས་པས། རྒྱུད་དོན་གྱི་ཆ་ཤས་ཡོངས་སུ་རྫོགས་པར་འགྲེལ་པའི་དོན་ནོ་ཞེས་འཆད་པ་དང༌། ཡང་མཁས་པ་ཁ་ཅིག་རྒྱུད་དོན་ཐམས་ཅད་དྲུག་པོ་འདིར་ཟད་པ་དང༌། རྒྱུད་འགྲེལ་གྱི་ཆ་ཤས་ལ་དབྱེ་ན་དྲུག་ཡོད་པའི་དོན་ཡིན་ནོ། །ཞེས་ཀྱང་གསུང་ངོ༌། །འོན་ཀྱང་བདག་གི་རྣམ་པར་རྟོག་པ་ནི་འདི་ཡིན་ཏེ། དེ་ནི་ཞེས་པའི་ཚིག་དེ་ཉེ་བ་ལ་སྦྱོར་ན། རྒྱས་འགྲེལ་ཁོ་ན་ལ་བྱེད་དགོས་པར་འགྱུར་ཞིང༌། ཉེ་བ་ལ་མི་སྦྱོར་ན་དྲུག་ཀ་ལ་འཇུག་སྟེ། དང་པོ་གཉིས་ངེས་པར་འབོད་དགོས་ལ། བར་བ་གཉིས་ལ་ངེས་པར་འཇུག་པའི་དངོས་ཤུགས་ཀྱི་ནུས་པ་གང་ཡང་བཤད་དུ་མེད་པའི་ཕྱིར་རོ། །དེས་ན་དཀྱུས་སུ་བྲིས་པའི་འགྱུར་ལ། རྒྱུད་དོན་ཡང་དག་བསྡུས་པར་བརྗོད། །ཅེས་པ་དང༌། འབྲོ་འགྱུར་ལས་ཀྱང༌། རྒྱུད་ཀྱི་བསྡུས་པ་བརྗོད་པ་ཡིན། །ཞེས་འབྱུང་བ་ལྟར་ལེགས་ཏེ། འདིའི་རྒྱ་སྐད་ལས། ཏནྟྲ་ས་གཱི་ཏི་རུ་ཙེ་ཏེ་ཞེས་འབྱུང་བས། རྒྱུད་ཀྱི་དོན་འགྲེལ་ལམ་དོན་བསྡུས་དཔལ་དོན་དམ་བསྙེན་པ་ལྟ་བུ་ཡིན་པར་གསལ་ལོ། །འགྲེལ་བཤད་ཐམས་ཅད་དོན་སྟོན་བྱེད། །ཅེས་པ་ནི་འགྲེལ་བཤད་དོན་ཀུན་སྟོན་བྱེད་པའོ། །ཞེས་བཅོས་ན་བདེའོ། །དེས་ན་བསྡུས་རྒྱུད་དང་རྩ་རྒྱུད་སོ་སོ་ལ་སྦྱར་ཏེ། ཚིག་ལ་འབྲུ་བཤད་མ་བྱས་པར། དོན་གྱི་སྙིང་པོ་གསལ་བར་འགྲེལ་པ་ནི། མདོར་བསྟན་རྒྱས་བཤད་དང་ཚིག་དོན་མ་ནོར་བར་བཀྲལ་ཕྱིན་དོན་མི་འགྲེལ་
པ་མི་སྲིད་པས། དོན་འགྲེལ་པའི་སྟེང་དུ་ཚིག་ཀྱང་གསལ་བར་འབྱེད་པ། རབ་ཏུ་བསྟན་བཤད་དང༌། རྒྱུད་དེ་ཉིད་ཀྱི་ཚིག་དོན་དངོས་འགྲེལ་པར་མ་ཟད། ཐེག་པ་མཐའ་དག་གི་དོན་གསལ་བར་བྱེད་པ་ནི། བསྟན་བཤད་ཆེན་པོའོ། །དེ་ལྟར་ན་མཐའ་དྲུག་པོ་དེ་དག་གང་ཡང་རུང་བ་ཅིག་གིས། རྒྱུད་ཀྱི་རྡོ་རྗེའི་ཚིག་གི་དོན་རྣམ་པར་དག་པ་ཕྱིན་ཅི་མ་ལོག་པ་རྟོགས་པར་ནུས་སོ། །འོ་ན་དོན་འགྲེལ་དང༌། དཀའ་འགྲེལ་དང༌། འགྲེལ་ཆེན་མཁས་པ་ཅི་རུང་རུང་གིས་སྦྱར་བ་ལ་བསྟེན་ནས། རྒྱུད་དོན་ཡང་དག་པར་རྟོགས་སམ་ཞེ་ན། མ་ཡིན་ཏེ་དེ་ནི་མངོན་ཤེས་ཞེས་སོགས་དང་སྦྲེལ་ལོ། །དེ་ཡང་མདོར་བསྟན་གྱི་མཐའ་དང༌། རབ་ཏུ་མདོར་བསྟན་གྱི་མཐའ་ལ་སོགས་པ་ནི། མངོན་ཤེས་ལྔ་ཐོབ་པ་རྣམས་ཀྱིས་སྦྱར་བ་ཁོ་ནའི་མིང་ཡིན་ཞིང༌། སོ་སོ་སྐྱེ་བོས་སྦྱར་བ་ལ་མཐའ་དྲུག་གི་ཐ་སྙད་མི་འཇོག་པས། རྒྱུད་དོན་བསྡུས་པ་དང༌། དཀའ་འགྲེལ་ཚིག་འབྱེད་དང༌། རྒྱས་འགྲེལ་དོན་ཀུན་སྟོན་བྱེད་དེ་ནི་འཕགས་པས་བྱ་ཡི། མཁས་པས་མངོན་པའི་ང་རྒྱལ་གྱིས་མ་ཡིན་ནོ། །ཞེས་སྦྱར་དགོས་ཀྱི། མདོར་བསྟན་སོགས་མཐའ་དྲུག་པོ་སོ་སོ་སྐྱེ་བོས་མི་བྱ་ཞེས་མི་སྦྱོར་ཏེ། ཉེས་བྱས་པའི་དེ་འདྲ་མི་སྲིད་པའི་ཕྱིར་རོ། །སྐབས་འདིར་མངོན་པར་ཤེས་པ་ལྔ་པས་ཆོག་གམ། དྲུག་པ་དགོས་ཞེ་ན། སེམས་འགྲེལ་སྐོར་གསུམ་ལས་མངོན་ཤེས་ལྔར་གསུངས་པ་མང་བའི་ཕྱིར། མངོན་ཤེས་ལྔ་པ་ཡན་ཆད་ཀྱིས་རྒྱུད་འགྲེལ་བྱར་རུང་ལ། མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས། ས་བརྒྱད་པ་མངོན་ཤེས་ལྔ་པ་ཅན་དུ་བཤད་ཅིང༌། དེའི་ཤུགས་ལས་ས་བཅུ་གཉིས་པ་མངོན་ཤེས་དྲུག་པའོ། །འདིའི་ས་བཅུ་གཉིས་ཀྱང་ཏིང་ངེ་འཛིན་གྱི་ས་བཅུ་གཉིས་ཡིན་ཏེ། དེ་ལྟར་ན་མི་འགྱུར་བའི་བདེ་བ་ཆེན་པོའི་ཡེ་ཤེས་ཀྱི་རང་བཞིན་ལས་བྱུང་བའི། མངོན་ཤེས་ལྔ་དང་ལྡན་པས་རྒྱུད་དོན་རང་སྟོབས་སུ་འགྲེལ་ནུས་པ་ཡིན་ལ། དེ་བས་ཀྱང་ནང་ཚན་དུ་གོང་མ་གོང་མར་གྱུར་པ་དག །
ཆེས་བཟང་བའི་ཕྱིར། སེམས་འགྲེལ་སྐོར་གསུམ་ལྟ་བུ་ནི་རྒྱུད་ཀྱི་དགོངས་འགྲེལ་མཐར་ཐུག་པ་ཡིན་ནོ། །ས་བརྒྱད་པ་ནི་མགྲིན་པའི་འཁོར་ལོ་མི་འགྱུར་བའི་བདེ་བས་དག་པ་སྟེ། དེའི་ཕྱིར་རྡོ་རྗེའི་ཚིག་གི་དོན་མ་ནོར་བར་འབྱེད་པ་ལ་དགོངས་སོ། །དེས་ན་རྒྱུད་ཀྱི་འགྲེལ་པ་རིགས་གསུམ་མངོན་ཤེས་ལྔ་ཐོབ་པ་རྣམས་ཀྱིས་བྱས་ན་མ་ནོར་བ་ཁོ་ནར་འབྱུང་བས་རང་གཞན་ལ་ཕན་པའི་ཕྱིར་བྱ་ཡི། གཞན་སོ་སོ་སྐྱེ་བོ་མཁས་ཀྱང་རུང༌། རང་སྟོབས་ཀྱིས་སྦྱར་ན་རྒྱུད་དོན་ལོག་པར་བཀྲལ་བའི་ཉེས་པས་རང་བཞིན་གཉིས་ཀ་ལ་གནོད་པའི་ཕྱིར་མི་བྱའོ། །ཡང་ཁ་ཅིག །རྒྱུད་དང་མགོ་སྙོམས་པའི་འགྲེལ་པ་མི་བྱ་ཞེས་སོགས་སྨྲ་བ་ནི་ཅལ་ཅོལ་ཏེ། སོ་སོ་སྐྱེ་བོས་དེ་འདྲ་བྱེད་པ་མི་སྲིད་པའི་ཕྱིར་དང༌། སེམས་འགྲེལ་རྣམས་ཀྱང་རྒྱུད་དང་མགོ་སྙོམས་པ་རང་ནི་མ་ཡིན་པའི་ཕྱིར་རོ། །ཡང་འདི་སྙམ་དུ། འོ་ན་ཏིང་ངེ་འཛིན་གྱི་ས་བརྒྱད་པ་དེ། སོ་སོ་སྐྱེ་བོའི་གནས་པ་མ་ཡིན་ནམ་སྙམ་ན། འདི་ནི་འཕགས་པའི་ས་ལ་ཤིན་ཏུ་ཉེ་བའི་ཕྱིར་དང༌། སྤྱིར་ཡང་ཐེག་ཆེན་སྦྱོར་ལམ་པ་ནི། ཐེག་ཆེན་རང་ལམ་གྱི་སོ་སོ་སྐྱེ་བོའི་ས་ལ་གནས་པ་ཡིན་ཀྱང༌། ཉན་རང་གི་འཕགས་པ་ལས་ཆེས་ལྷག་པའི་ཡོན་ཏན་མངའ་བའི་ཕྱིར། སྤྱི་ལྡོག་ནས་འཕགས་པའི་ཕྱོགས་སུ་བསྡུ་བའི་སྐབས་མང་དུ་ཡོད་པ་བཞིན་ནོ། །དེ་ལ་མངོན་ཤེས་ལྔ་ནི། ལྷའི་མིག་དང༌། ལྷའི་རྣ་བ་དང༌། གཞན་སེམས་ཤེས་པ་དང༌། སྔིན་གྱི་གནས་རྗེས་སུ་དྲན་པ་དང༌། རྫུ་འཕྲུལ་གྱི་མངོན་ཤེས་སོ། །མཐའ་དྲུག་ལ། དྲང་དོན་དང༌། ངེས་དོན་དང༌། དགོངས་པ་ཅན་དང༌། དགོངས་མིན་དང༌། སྒྲ་ཇི་བཞིན་དང༌། སྒྲ་ཇི་བཞིན་མ་ཡིན་པ་སྟེ་དྲུག་ཏུ་བཤད་པའང་ཡོད་པ། སྤྱིར་རྒྱུད་དོན་མཐའ་དྲུག་པོ་དེ་དག་གིས་ཀྱང་བཤད་དགོས་མོད་ཀྱི། སྐབས་འདིའི་མཐའ་དྲུག་ནི། ཥཏ་ཀོ་ཊི་ཞེས་འབྱུང་བས། གནས་དྲུག་ཅེས་པ་སྟེ། གཞུང་གི་བརྗོད་བྱའི་དོན་གྱི་གནས་ཏེ། བརྗོད་དོན་འཛིན་པའི་གཞིའི་དོན་ནོ། །
དེ་དག་གིས་ནི་བརྗོད་བྱེད་མཐའ་དྲུག་ལ་བསྟེན་ན་རྒྱུད་དོན་ཕྱིན་ཅི་མ་ལོག་པར་རྟོགས་པར་འགྱུར་བས། དབང་རྣམ་པ་བཅུ་གཅིག་གི་དོན་རྟོགས་པའི་ཐབས་ཀྱི་སྒོ་དང་པོ་བསྟན་པ་ཡིན་ནོ། །གཉིས་པ་ནི། རྡོ་རྗེའི་རྣམ་འབྱོར་རྣམ་བཞི་དང༌། །རྫོགས་པའི་བྱང་ཆུབ་བཞི་རྣམས་དང༌། །ཕུང་ཁམས་སྐྱེ་མཆེད་རིགས་དྲུག་རྣམས། །ཞེས་པ་སྟེ། རྡོ་རྗེ་འཛིན་ཆེན་པོ་དེ་བཞིན་གཤེགས་པའི་ལམ་རྣམ་པར་དག་པའི་དོན་གྱི་ཕྱག་རྒྱ་ནི་འདི་དག་ཡིན་ཏེ། དཔེར་ན་མི་རྟག་སྡུག་བསྔལ་བདག་མེད་གསུམ་ནི། དེ་བཞིན་གཤེགས་པས་བསྟན་པའི་ཕྱག་རྒྱ་ཡིན་པ་བཞིན་ནོ། །དེ་ལ་རྡོ་རྗེའི་རྣལ་འབྱོར་རྣམ་པ་བཞི་ནི། སྐུ་རྡོ་རྗེ་དབྱིབས་གྱི་རྣལ་འབྱོར་དང༌། གསུང་རྡོ་རྗེ་སྔགས་ཀྱི་རྣལ་འབྱོར་དང༌། ཐུགས་རྡོ་རྗེ་ཆོས་ཀྱི་རྣམ་འབྱོར་དང༌། ཡེ་ཤེས་རྡོ་རྗེ་དག་པའི་རྣལ་འབྱོར་རོ། །དེ་དག་ཀྱང་སྟོང་པ་ཉིད་ཀྱི་ཕྱོགས་ནས། རྣམ་པར་ཐར་པའི་སྒོ་བཞི་དང༌། སྙིང་རྗེ་ཆེན་པོའི་ཕྱོགས་ནས་ཚད་མེད་པ་བཞི་དང་ཡང་སྦྱར་བར་བྱ་སྟེ། དབྱིབས་ཀྱི་རྣལ་འབྱོར་འདུས་མ་བྱས་པ། སྔགས་ཀྱི་རྣལ་འབྱོར་སྨོན་པ་མེད་པ། ཆོས་ཀྱི་རྣལ་འབྱོར་མཚན་མ་མེད་པ། དག་པའི་རྣལ་འབྱོར་རྣམ་པར་ཐར་པའི་སྒོ་སྟོང་པ་ཉིད་དོ། །དེ་བཞིན་དུ་དབྱིབས་བཏང་སྙོམས། སྔགས་དགའ་བ། ཆོས་བྱམས་པ། དག་པའི་རྣལ་འབྱོར་སྙིང་རྗེ་ཚད་མེད་དོ། །དེ་ལྟར་ན་རྡོ་རྗེའི་རྣལ་འབྱོར་རྣམ་པ་བཞི་ལམ་དང་འབྲས་བུས་བསྡུས་པ་ཐམས་ཅད་ཀྱང༌། སྟོང་ཉིད་སྙིང་རྗེའི་བདག་ཉིད་དང༌། བདེ་སྟོང་གཉིས་སུ་མེད་པའི་རང་བཞིན་ཉིད་དོ། །དེ་ལ་དབྱིབས་ནི་སྟོང་གཟུགས་ཕྱག་རྒྱ་ཆེན་པོའི་རང་བཞིན་ཏེ། ལམ་དུས་ན་སོར་བསམ་གྱི་ཡན་ལག་དང༌། འབྲས་དུས་ན་སྤྲུལ་པའི་སྐུའོ། །སྔགས་ཀྱི་རྣལ་འབྱོར་ནི་ངག་རླུང་གཞོམ་མེད་ཀྱི་སྒྲར་འགོག་པ་སྟེ། ལམ་དུས་ན་སྲོག་འཛིན་གྱི་ཡན་ལག་དང༌། འབྲས་དུས་ན་ལོངས་སྤྱོད་རྫོགས་སྐུའོ། །ཆོས་ཀྱི་རྣལ་འབྱོར་ནི། སྟོང་ཉིད་ལ་དམིགས་པའི་ཡེ་ཤེས་ཏེ།
ལམ་དུས་ན་སྟོང་ཉིད་ལ་ཞུ་བ་དེས་དམིགས་པའི་རྗེས་དྲན་གྱི་ཡན་ལག་དང༌། འབྲས་དུས་ན་ཆོས་སྐུའོ། །དག་པའི་རྣལ་འབྱོར་ནི། མི་འགྱུར་བའི་བདེ་བ་ཆེན་པོ་སྟེ། ལམ་དུས་ན་ཏིང་ངེ་འཛིན་གྱི་ཡན་ལག་དང༌། འབྲས་དུས་ན་ལྷན་ཅིག་སྐྱེས་པའི་སྐུའོ། །དེ་བཞིན་དུ་རྣམ་པར་ཐར་པའི་སྒོ་འདུས་མ་བྱས་ནི། སྟོང་གཟུགས་ཕྱག་རྒྱ་ཆེན་པོ་དངོས་ཉིད་ཡིན་ལ། སྨོན་པ་མེད་པ་ནི། ངག་གི་རང་བཞིན་བརྗོད་བྲལ་དུ་རྟོགས་པ་སྟེ། སྐབས་འདིར་གཞོམ་མེད་ཀྱི་སྒྲ་ཐམས་ཅད་པ་ནི། ཀུན་ཏུ་རྟོག་པའི་རྒྱུ་རླུང་འགགས་པའི་ཕྱིར་རོ། །མཚན་མ་མེད་པ་ནི་ལྷན་ཅིག་སྐྱེས་པའི་བདེ་བ་སྟེ། བདེ་བས་རྣམ་རྟོག་འགགས་པའི་ཕྱིར་དང༌། བདེ་བ་གཅིག་པུ་ཁོ་ན་ལས་གཞན་རྣམ་རྟོག་གི་ཡུལ་སྤྲོས་པའི་མཚན་མ་མི་དམིགས་པའི་ཕྱིར་རོ། །སྟོང་པ་ཉིད་ནི་གཟུགས་བརྙན་དང་བདེ་བ་དབྱེར་མེད་པ་ཟུང་འཇུག་གི་ཡེ་ཤེས་ཏེ། གཟུང་འཛིན་གཉིས་ཆོས་ཐམས་ཅད་ཀྱིས་སྟོངས་པའི་ཕྱིར་རོ། །དེ་བཞིན་དུ་ཁྱད་པར་ཅན་གྱི་རྣམ་པར་མི་རྟོག་པའི་ཡེ་ཤེས་ནི་བཏང་སྙོམས་དང༌། རོ་རྐྱང་གི་རླུང་འགགས་པ་ནི་བདེ་བ་མི་ཉམས་པར་བྱེད་པའི་ཕྱིར་དགའ་བ་དང་བདེ་བ་སྒྲུབ་པའི་རྣལ་འབྱོར་ནི་བྱམས་པ་དང༌། དཀར་དམར་རླུང་གསུམ་གྱི་སྡུག་བསྔལ་འགོག་པ་ནི་སྙིང་རྗེའོ། །དེ་ལྟར་ཡང་དཔལ་དྲི་མེད་འོད་ལས། ཡེ་ཤེས་སྟོང་ཉིད་ཡེ་ཤེས་ཀྱིས། །ལེགས་དག་རྣམ་དག་འགྱུར་བ་མེད། །སེམས་ནི་མཚན་མེད་ཡེ་ཤེས་ཀྱིས། །ལེགས་དག་གཉིས་མེད་ཆོས་བདག་ཉིད། །ངག་ནི་སྨོན་མེད་ཡེ་ཤེས་ཀྱིས། །དག་པ་གསང་སྔགས་མི་བཟད་སྒྲ། །གང་ཞིག་ལུས་སྔོན་འདུས་མ་བྱས། །ཡེ་ཤེས་ཀྱིས་དག་དྲི་མ་མེད། །དབྱིབས་ཏེ་རྫུ་འཕྲུལ་བགྲོད་པ་ཅན། །ཞེས་གསུངས་ཏེ། གཞིའི་དུས་ཀྱི་རྡོ་རྗེ་བཞི་རྣམ་པར་དག་པའི་ལམ་དང་འབྲས་བུ་ནི་སྟོང་ཕྱོགས་རྣམ་ཐར་བཞི་དངོས་སུ་གསུངས་ལ། དེ་བཞི་དང་སྦྱོར་རྒྱུ་བདེ་བ་ཚད་མེད་བཞི་
ཡང་དོན་གྱིས་འཕངས་ཤིང༌། དོན་དམ་བསྡུས་པ་ལས་ཀྱང་བཤད་པ་བཞི་ཡིན་ནོ། །དེ་ལྟར་ན་རྡོ་རྗེ་བཞིའི་ལམ་དང་འབྲས་བུ་ནི་དབང་གི་དོན་བདེ་བར་གཤེགས་པའི་ལམ་རྣམ་པར་དག་ཅིང་རྫོགས་པའོ། །རྫོགས་པའི་བྱང་ཆུབ་པ་བཞི་ནི། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་པ་དང༌། རྣམ་པ་ཉི་ཤུས་མངོན་པར་རྫོགས་པར་བྱང་ཆུབ་པ་དང༌། རྣམ་པ་ལྔས་མངོན་པར་རྫོགས་པར་བྱང་ཆུབ་པ་དང༌། སྒྱུ་འཕྲུལ་དྲྭ་བས་མངོན་པར་རྫོགས་པར་བྱང་ཆུབ་པའོ། །སྐད་ཅིག་གཅིག་ནི་ཡེ་ཤེས་རྡོ་རྗེ་དང༌། རྣམ་པ་ལྔ་ནི་ཐུགས་རྡོ་རྗེ་དང༌། རྣམ་པ་ཉི་ཤུ་ནི་གསུང་རྡོ་རྗེ་དང༌། སྒྱུ་འཕྲུལ་དྲྭ་བ་ནི་སྐུ་རྡོ་རྗེའོ། །གནས་ལུགས་རང་བཞིན་བདེ་བ་ཆེན་པོ་གཅིག་པུར་གནས་པ་དང༌། ལམ་བསྒོམས་པས་དབུགས་ཉི་ཁྲི་ཆིག་སྟོང་དྲུག་བརྒྱ་འགགས་པའི་བདེ་བའི་སྐད་ཅིག་རྣམས་རྒྱུན་མི་འཆད་ཅིང་རྣམ་པ་མི་འགྱུར་བ་དང༌། སྐད་ཅིག་རྣམས་ཀྱང་ངོ་བོ་གཅིག་ཏུ་གནས་པའི་ཕྱིར། མི་འགྱུར་བའི་བདེ་བ་སྒྲིབ་བྲལ་དེ་ནི། སྐད་ཅིག་གཅིག་གི་མངོན་པར་རྫོགས་པར་བྱང་ཆུབ་པའོ། །ཆོས་ཉིད་ཁམས་ལྔའི་དྭངས་མ་ཡེ་ཤེས་ལྔའི་རང་བཞིན་དུ་གནས་པའི་ཕྱིར་དང༌། དེ་བཞིན་གཤེགས་པ་ལྔ་བསྲེགས་ཤིང་ཞེས་སོགས་ཀྱི་རིམ་པས། ལམ་དུས་སུ་ཡང་ཕུང་པོ་ལྔ་དང་ཁམས་ལྔ་རང་བཞིན་སྟོང་ཉིད་དང་ཞུ་བདེ་ཟུང་འཇུག་ཏུ་དག་པར་བྱེད་པའི་ཕྱིར། རྗེས་དྲན་གྱི་རྣལ་འབྱོར་སོགས་གཏུམ་མོ་ནི། རྣམ་པ་ལྔས་བྱང་ཆུབ་པའོ། །གནས་ལུགས་སྟོང་ཉིད་ཉི་ཤུའི་བདག་ཉིད་ཅན་ཡིན་པ་དང༌། ལམ་སྒོམ་པས་ཀྱང༌། དབང་པོ་ལྔ་དང༌། ཡུལ་ལྔ་དང༌། ལས་དབང་ལྔ་དང༌། བྱ་བ་ལྔ་སྟེ་ཉི་ཤུ་གཏུམ་མོའི་ཡེ་ཤེས་ཀྱི་མེས་བཅོམ་ཤིང་ཞུ་བདེས་བྱིན་གྱིས་བརླབས་པས་དབང་ཡུལ་བྱ་བྱེད་དང་བཅས་པ་རང་བཞིན་སྟོང་པ་ཉིད་དུ་རྟོགས་པར་འགྱུར་བའི་ཕྱིར། གཏུམ་མོའི་སྣང་བའི་སྐུ་གཞོམ་མེད་གྱི་སྒྲ་དང་བཅས་པ་དེ་ནི་རྣམ་པ་ཉི་ཤུས་བྱང་ཆུབ་པའོ། །ཆོས་ཐམས་ཅད་ཀྱི་རང་བཞིན་དོན་དམ་སྲིད་གསུམ་སྒྱུ་མས་རྣམ་པར་
འཕྲུལ་པ་ལྟ་བུ་ཡིན་ལ། ལམ་གྱི་དུས་ན་ཡང་སྟོང་པ་ཉིད་ཀྱི་གཟུགས་བརྙན་རབ་འབྱམས་སུ་སྣོད་བཅུད་ཐམས་ཅད་དག་པར་བྱེད་པའི་ཕྱིར་དང༌། སྟོང་གཟུགས་ནི་རྣམ་པར་འཕྲུལ་པ་མཐའ་ཡས་པའི་ཕྱིར། སྒྱུ་འཕྲུལ་དྲྭ་བས་མངོན་པར་བྱང་ཆུབ་པའོ། །གཞན་ཡང་ཆོས་ཉིད་ལྷན་ཅིག་སྐྱེས་པ་དེ་ནི། སྐད་ཅིག་གཉིས་པ་ཕན་ཆད་དུ་འགྱུར་ཞིང་འགྲོ་བ་མེད་པས། ལྷན་ཅིག་སྐྱེས་པའི་སྐུ་ནི་སྐད་ཅིག་གཅིག་པ་དང༌། ཡེ་ཤེས་ལྔའི་རང་བཞིན་ཡིན་པའི་ཕྱིར། ཆོས་སྐུ་ནི་རྣམ་པ་ལྔ་དང༌། དབང་ཡུལ་བྱ་བྱེད་དག་པ་སྟོང་ཉིད་དང༌། ཉི་ཤུའི་བྱེད་ལས་ཀྱི་ཕྱིར། ལོངས་སྐུ་ནི་རྣམ་པ་ཉི་ཤུ་དང༌། སྤྲུལ་པ་སྣ་ཚོགས་པ་སྒྱུ་མ་ལྟ་བུས་སེམས་ཅན་གྱི་དོན་བྱེད་པའི་ཕྱིར། སྤྲུལ་སྐུ་ནི་སྒྱུ་འཕྲུལ་དྲྭ་བས་བྱང་ཆུབ་པའོ། །དེ་ལྟར་ན་བྱང་ཆུབ་རྣམ་པ་བཞིའི་ལམ་དང་འབྲས་བུ་ཚང་བ་དེ་ནི། རྡོ་རྗེ་འཆང་ཆེན་པོའི་ལམ་རྣམ་པར་དག་པ་ཡིན་པས། བྱང་ཆུབ་རྣམ་པ་བཞིས་ཀྱང༌། རྒྱུད་ཀྱི་དགོངས་དོན་དང་དབང་གི་ཡེ་ཤེས་རྣམ་པར་དག་པ་ཤེས་པར་འགྱུར་རོ་ཞེས་པའོ། །དོན་དམ་བསྡུས་པར་དུ་བ་ལ་སོགས་པའི་མཚན་མ་བཅུ་པོ་ཆུང་ངུ་དང༌། འབྲིང་དང༌། ཆེན་པོ་དང༌། ཆེན་པོའི་ཆེན་པོ་བཞི་བྱང་ཆུབ་བཞི་དང་སྦྱར་བ་ནི། རྡོ་རྗེ་བཞིའི་བསྙེན་སྒྲུབ་ལ་རིམ་པ་བཞིན་དུ་སྦྱར་བ་ལ་དགོངས་སོ། །ཕུང་ཁམས་སྐྱེ་མཆེད་རིགས་དྲུག་རྣམས་ཞེས་པ་ནི་གཟུགས་ཚོར་བ་འདུ་ཤེས་འདུ་བྱེད་རྣམ་ཤེས་ཡེ་ཤེས་ཀྱི་ཕུང་པོ་སྟེ། ཕུང་པོ་དྲུག་དང༌། ས་ཆུ་མེ་རླུང་ནམ་མཁའ་ཡེ་ཤེས་ཀྱི་ཁམས་དྲུག་དང༌། ལུས་ལྕེ་མིག་སྣ་རྣ་བ་ཡིད་ཀྱི་དབང་པོ་སྟེ་ནང་གི་སྐྱེ་མཆེད་དྲུག་དང༌། དྲི་གཟུགས་རོ་རེག་སྒྲ་དང་ཆོས་ཁམས་ཏེ་ཕྱིའི་སྐྱེ་མཆེད་དྲུག་དང༌། སྐྱེ་མཆེད་ཅེས་པའི་ཤུགས་ལའམ། རྣམས་ཞེས་པའི་ཚིག་ཟུར་གྱིས་བསྟན་པ་ནི། བཤང་ལམ་རྐང་ལག་དག་དང་ཆུ་ལམ་དུང་ཅན་མ་སྟེ། ལས་ཀྱི་དབང་པོ་དྲུག་དང༌། བཤང་འདོར་དང་འགྲོའི་ན་དྲི་ཆུ་འདོར་དང་
ཁུ་བ་འཕོ་བ་སྟེ། ལས་དབང་གི་བྱ་བ་དྲུག་གོ །དེ་ལྟར་ན་ཕུང་ཁམས་སོ་དྲུག་པོ་དེ་དག །སྒྲིབ་པ་དང་བཅས་པ་ཉིད་ཀྱི་འཁོར་བ་དང༌། དེ་རྣམས་སྒྲིབ་བྲལ་ཉིད་ཀྱི་མྱང་འདས་ཏེ། དེ་དག་སྒྲིབ་བྲལ་དུ་བྱེད་པ་ནི་ལམ་ཡན་ལག་དྲུག་གོ །དེ་ལྟར་ན་གཞི་དང་ལམ་དང་འབྲས་བུ་གསུམ་ལ་རིགས་དྲུག་གི་རྣམ་པར་དག་པ་དང་བཅས་པ་འདི་ལྟ་བུས་ཀྱང༌། རྒྱུད་དོན་དག་པར་འགྱུར་ཏེ། དེ་ལྟར་ན་རྣལ་འབྱོར་བཞི་དང༌། བྱང་ཆུབ་བཞི་དང་རིགས་དྲུག་པོ་ཐམས་ཅད་སྡོམ་པའམ། སྡེ་ཚན་རེ་རེས་ཀྱང༌། རྒྱུད་དོན་རྣམ་པར་དག་པར་འགྱུར་བའི་ཕྱིར། དབང་དོན་ཕྱིན་ཅི་མ་ལོག་པ་རྟོགས་པ་འགྱུར་རོ། །གསུམ་པ་ནི། དག་པ་འཇིག་རྟེན་ཁམས་ལ་སོགས། །ལེའུ་ལྔ་ནི་འདོད་རྣམས་ཀྱི། །བདེན་གཉིས་དང་པོའི་སངས་རྒྱས་འགྱུར། །དུས་ཀྱི་འཁོར་ལོར་མངོན་བརྗོད་བྱེད། །ཅེས་པའོ། །འདིར་དག་པ་ཞེས་པ་རིགས་དྲུག་གི་དག་པའོ་ཞེས་སྔ་མ་ལ་སྦྱོར་བ་མང་ཡང༌། འདིའི་རྒྱ་སྐད་དུ། བ་ཊ་ལཻཿཔཉྩ་བྷིཿཤུདྡྷི་ལོ་ཀ་དྷཱ་ཏྭཱ་དི་ཀཻརྨ་ཏེ། ཞེས་འབྱུང་བ། ལེའུ་ལྔ་རྣམས་ཀྱིས་དག་པའོ། །ཞེས་དང༌། འཇིག་རྟེན་ཁམས་ལ་སོགས་པར་འདོད་དོ། །ཞེས་པའི་དོན་དུ་སྣང་བས་དང༌། །ཚིག་བཅད་ཀྱི་གཅོད་མཚམས་སོ་སོར་ཡོད་པའི་ཕྱིར། དག་པ་ཞེས་པ་སྐབས་འདིའི་སྦྱར་བར་བྱའོ། །དེ་ལྟར་ན་ཕྱི་འཇིག་རྟེན་ཁམས་དང༌། ནང་རྡོ་རྗེའི་ལུས་དང༌། དབང་བསྐུར་བ་དང༌། སྒྲུབ་པའི་ཐབས་དང༌། ཡང་དག་པའི་ཡེ་ཤེས་ཏེ། ལེའུའམ་དོན་ཚན་རྣམ་པ་ལྔས་སྟོན་པར་བྱེད་དེ། དང་པོ་གཉིས་ནི་སྦྱང་བྱ་གཞི་འཁོར་བའི་ཆོས་དང༌། སྦྱང་གཞི་དེ་བཞིན་གཤེགས་པའི་སྙིང་པོ་ཡང་སྟོན་པར་བྱེད་དོ། །གསུམ་པས་ནི་ལམ་གྱི་གཞི་དང༌། བཞི་བས་ལམ་དང༌། ལྔ་པས་ལམ་དང་འབྲས་བུ་ཡང་སྟོན་པར་བྱེད་དོ། །དེ་དག་ཀྱང་བདེན་པ་གཉིས་ཀྱི་བདག་ཉིད་དེ་འཇིག་རྟེན་ཁམས་ལ་ཡང༌། ཀུན་རྫོབ་འཁོར་བའི་འཇིག་རྟེན་ཁམས་དང༌། དོན་དམ་ཡེ་ཤེས་ཀྱི་འཇིག་རྟེན་ཁམས། བཅུད་ཀྱི་སེམས་ཅན་ལ་ཡང་དེ་བཞིན་དུ་གཉིས་སུ་དབྱེ་བ་དང༌། དབང་ལ་ཡང་ཀུན་རྫོབ་བརྡ་དང༌། ཡེ་ཤེས་དོན་དམ་གྱི་དབང་
གཉིས་དང༌། སྒྲུབ་པའི་ཐབས་ལ་ཡང་འཇིག་རྟེན་པ་དང༌། འཇིག་རྟེན་ལས་འདས་པའི་སྒྲུབ་ཐབས་གཉིས་དང༌། ཡེ་ཤེས་ལ་ཡང་གཞན་རིག་ཀུན་རྫོབ་གཟུགས་སྐུ་དང་འབྲེལ་བ་དང༌། རང་རིག་དོན་དམ་ཆོས་སྐུའི་ངོ་བོ་སྟེ། དེ་རྣམས་ལས་དོན་དམ་གང་ཡིན་པ་དེ་ནི་འཇིག་རྟེན་ཁམས་དང་བཅུད་ཀྱི་སེམས་ཅན་གྱི་མིང་བཏགས་པ་སྟེ། ཕྱི་ནང་གཞན་གསུམ་ལས་ཕྱི་ནང་གི་ཆོས་སུ་མི་འཇོག་སྟེ། གཞན་གྱི་ཆོས་འབའ་ཞིག་ཡིན་ནོ། །ཡང་ཕྱི་ནང་གཞན་གསུམ་ལས། ཕྱི་ནང་གཉིས་ནི་ཀུན་རྫོབ་དང༌། གཞན་ནི་དོན་དམ་པའོ། །དང་པོའི་སངས་རྒྱས་འགྱུར། དུས་ཀྱི་འཁོར་ལོར་མངོན་བརྗོད་བྱེད་ཅེས་པ་ནི། རྣལ་འབྱོར་བཞི་དང༌། བྱང་ཆུབ་བཞི་དང༌། རིགས་དྲུག་དང༌། ལེའུ་ལྔ་དང༌། བདེན་པ་གཉིས་ལ་སོགས་པ་ཟབ་མོའི་དོན་འདི་རྣམས། དམ་པའམ་མཆོག་གི་དང་པོའི་སངས་རྒྱས་ཀྱི་རྒྱུད་ཅེས་ཀྱང་བྱ། དུས་ཀྱི་འཁོར་ལོ་ཞེས་བྱ་བའི་རྒྱུད་འདིར། མངོན་པར་བརྗོད་པར་འགྱུར་བ་སྟེ། ལེགས་པར་ཡང་དག་པར་བརྗོད་པར་བྱའོ་ཞེས་པའོ། །དེས་ན་དང་པོའི་སངས་རྒྱས་འགྱུར་དུས་ཀྱི་འཁོར་ལོར་མངོན་བརྗོད་བྱེད། ཅེས་པའི་ཚིག་འདི་གོང་དུ་རིགས་དྲུག་རྣམས་ཞེས་པའི་སྐབས་སུ་ཡང་སྦྱར་རྒྱུ་ཡིན་ནོ། །སྐབས་འདིར་དང་པོའི་སངས་རྒྱས་དང༌། དུས་ཀྱི་འཁོར་ལོ་ཞེས་པ་ཡང་བདེན་པ་གཉིས་སོགས་དོན་གྱི་སྡེ་ཚན་ལ་བགྲོང་པ་ནི། རྒྱ་བོད་ཀྱི་མཁས་པ་མང་པོ་བཞེད་ཀྱང༌། ཚིག་དོན་ལ་ནི་མ་བཞུགས་པར་སྣང་ངོ༌། །གཉིས་པ་དབང་བཅུ་གཅིག་གི་དག་དབྱེ་བསྟན་པ་ལ། བདེན་པ་གཉིས་ཀྱི་སྒོ་ནས་མདོར་བསྟན་པ་དང༌། སོ་སོའི་དག་དབྱེ་ཞིབ་མོར་བསྟན་པའོ། །དང་པོ་ནི། དང་པོར་དབང་བསྐུར་བདུན་པ་གང༌། །བྱིས་པ་རྣམས་ནི་གཞུག་པའི་ཕྱིར། །རྣམ་གསུམ་འཇིག་རྟེན་ཀུན་རྫོབ་སྟེ། །དམ་པའི་དོན་གྱི་བཞི་པའོ། །བདེན་པ་གཉིས་ཀྱི་ཆོས་རྣམས་ཀྱིས། །རྡོ་རྗེ་ཅན་དག་གིས་བསྟན་པ། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པས་སོ། །ཆུ་ལ་སོགས་པ་དབང་བསྐུར་
བ་བདུན་ནི། ཀུན་རྫོབ་ཀྱི་བདེན་པའི་དབང་ཁོ་ན་ཡིན་ལ། བྱིས་པ་རྣམས་གཞུག་པ་ཞེས་པའི་དོན་ནི། བྱིས་པ་ཞེས་པའི་སྒྲ་ཚིག་གྲོགས་ཀྱི་དབང་དུ་བྱས་ནས། གནས་སྐབས་སོ་སོར་སོ་སོ་སྐྱེ་བོ་དང༌། བླུན་པོ་དང༌། ན་ཚོད་བྱིས་པ་རྣམས་ལ་འཇུག་པ་སྟེ། འདིར་དོན་གྱི་གཙོ་བོ་ནི་དབང་གོང་མའི་སྣོད་དུ་མ་གྱུར་པས་བླུན་པོའམ། རྒྱུད་ཡོངས་སུ་མ་སྨིན་པ་ན་ཚོད་བྱིས་པ་ལྟ་བུ་ལ་བསྐུར་བར་བྱ་བ་ཡིན་པའི་དོན་ཏེ། འདི་བསྐུར་བས་ན་ཚོད་སྨིན་པ་དང་འདྲ་བར། དབང་གོང་མ་རྣམས་ཀྱི་སྐལ་བ་ཅན་དུ་འགྱུར་རོ། །གཞན་ཡང་དགྱེས་རྡོར་འབུམ་ཕྲག་ལྔ་པའི་ལུང་རྡོ་རྗེ་སྙིང་པོས་དྲངས་པར་ཡང༌། བྱིས་པ་སྐྱེས་ལ་མ་དག་གི །ཆུ་ཡིས་འཁྲུ་བའི་དབང་བསྐུར་བྱེད། །དེ་ཡི་གཙུག་ཕུད་རབ་བཞག་ལ། །དབུ་རྒྱན་དུ་ནི་ཡོངས་སུ་བཏགས། །དེ་ཡི་རྣ་བ་དབུགས་ལ་སོགས། །དར་དཔྱངས་དབང་དུ་ཤེས་པར་བྱ། །བྱིས་པ་དགོད་དང་སྨྲ་བ་ཉིད། །རྡོ་རྗེ་དྲིལ་བུའི་དབང་ཉིད་དོ། །ལྔ་པ་ལོངས་སྤྱོད་བརྟུལ་ཞུགས་སོ། །མིང་གིས་མིང་གི་དབང་བསྐུར་རོ། །ཕ་ཡིས་རྟག་ཏུ་གློག་ལ་སོགས། །སྟེར་བར་བྱེད་པ་རྗེས་གནང་ཡིན། །ཞེས་གསུངས་པ་ལྟར། ལོ་བཅོ་ལྔའི་མཚམས་ཚུན་ཆད་བྱིས་པའམ་གཞོན་ནུའི་གནས་སྐབས་དང་སྦྱོར་བའི་དབང་ཡིན་པའི་ཕྱིར། བྱིས་པའི་དབང་ཞེས་བྱ་སྟེ་རྣམ་གྲངས་གཞན་ནོ། །དབང་གོང་མ་རྣམས་ལས་ཀྱང་བུམ་པ་དང༌། གསང་བ་དང༌། ཤེས་རབ་ཡེ་ཤེས་ཀྱི་དབང་གསུམ་ནི། འཇིག་རྟེན་ཀུན་རྫོབ་ཀྱི་བདེན་པས་གཞུག་པ་ཡིན་ལ། འཇིག་རྟེན་ལས་འདས་པ་དམ་པའི་དོན་གྱི་བདེན་པས་བསྟན་པ་ནི། བཞི་པ་ཤེས་རབ་ཆེན་བོའི་དབང་ཁོ་ནའོ། །འདིར་བུམ་དབང་སོགས་གསུམ་འཇིག་རྟེན་ཀུན་རྫོབ་པར་བཤད་པས་འཇིག་རྟེན་པའི་དངོས་གྲུབ་སྒྲུབ་བའི་དོན་དུ་འཆད་པ་ནི་སྐབས་ཀྱི་དོན་དུ་མི་སྣང་སྟེ། དབང་བདུན་གྱི་དོན་ཁོ་ནས་འོག་མིན་གྱི་སྲིད་པའི་མཐར་ཐུག་པའི་དངོས་གྲུབ་ཏུ་ལུང་སྟོན་དགོས་ལ། དེ་ལས་ལྷག་པའི་འཇིག་རྟེན་པའི་དངོས་གྲུབ་ཡོད་པ་ཡང་མ་ཡིན་ནོ། །དེས་ན་དབང་གསུམ་པོ་དེ་རྣམས་ཀྱི་དོན། །
འཇིག་རྟེན་པའི་ལམ་ཚོགས་སྦྱོར་གཉིས་དང་སྦྱོར་བའི་དོན་ཡིན་ལ། བཞི་པ་དག་པ་བ་ནི་འཇིག་རྟེན་ལས་འདས་པའི་ལམ་མཐོང་ལམ་ཡན་ཆད་ལ་འཇོག་དགོས་པས་སོ། །དེས་ན་སོར་སྡུད་ཀྱི་ཡེ་ཤེས་དང་པོ་ཉིད་ནས་བཟུང་སྟེ་ཤེས་རབ་ཆེན་པོ་བཞི་པའི་ཆ་ཤས་ལ་རྟག་ཏུ་གནས་པས། བཞི་པའི་ལམ་གྱི་ཆ་ཤས་ཅན་ནི་ཡན་ལག་དྲུག་ཀར་ཡིན་ལ། རྡོ་རྗེ་བཞིའི་ལམ་ལ་དབང་བཞིའི་བགོ་སྐལ་སོ་སོར་གཅོད་དགོས་པས། ཐོབ་སྐལ་དུ་བགོས་པའི་དབང་བཞི་བའི་ལམ་ནི་ཏིང་ངེ་འཛིན་གྱི་ཡན་ལག་མཐའ་དག་ཡིན་ཞིང༌། བཞི་པའི་ཡེ་ཤེས་དག་པ་བ་སྟེ་གཞན་དང་མ་འདྲེས་པ་ནི། མཐོང་ལམ་ཡན་ཆད་དོ། །གཞི་འབྲས་དབྱེར་མེད་དེ་བཞིན་གཤེགས་པའི་སྙིང་པོ་བདེ་བ་ཆེན་པོ་དེ་ནི། བཞི་པའི་ལམ་དེ་རྣམས་ཀྱི་རྟོགས་བྱ་འགྱུར་མེད་ཡོངས་གྲུབ་ཡིན་གྱི། འཇིག་རྟེན་དང་འཇིག་རྟེན་ལས་འདས་པའི་ལམ་གྱིས་བསྡུས་པ་མ་ཡིན་ནོ། །དེ་ལྟར་དབང་ལ་འཇིག་རྟེན་དང་འཇིག་རྟེན་ལས་འདས་པ་གཉིས་སུ་འབྱེད་དགོས་ཏེ། རྡོ་རྗེ་ཅན་སངས་རྒྱས་བདག་གིས་བསྟན་པ་ཐམས་ཅད་འཇིག་རྟེན་ཀུན་རྫོབ་བདེན་པ་དང༌། འཇིག་རྟེན་ལས་འདས་པ་དོན་དམ་པའི་བདེན་པ་སྟེ། ཆོས་ཀྱི་རྣམ་གྲངས་རེ་རེ་ཞིང་ཆོས་རྣམས་ཐམས་ཅད་ཀྱང༌། བདེན་པ་གཉིས་ཚང་བར་སྟོན་དགོས་པའི་ཕྱིར་རོ། །ད་ལྟའི་འགྱུར་གྱི་ཚིག་ལམ་ལྟར་ན། བདེན་པ་གཉིས་སུ་སངས་རྒྱས་ཀྱིས་བསྟན་ཏེ། གཉིས་པོ་གང་ཞེ་ན་ཀུན་རྫོབ་དང་དོན་དམ་པའོ། །ཞེས་སྦྱར་ཏེ་བཤད་པར་བྱའོ། །ཀུན་རྫོབ་བདེན་པ་དང་དོན་དམ་པའི་བདེན་པ་ཞེས་པ་ཡང་རྣམ་གྲངས་ཀྱི་སྒོ་ནས་རྣམ་པ་དུ་མར་འགྱུར་ཏེ། སྣང་བ་སྣ་ཚོགས་པ་ནི་ཀུན་རྫོབ། དེ་རྣམས་ཉིད་ཀྱི་རང་བཞིན་ཅིར་ཡང་མ་གྲུབ་པ་ནི། དོན་དམ་བདེན་པའོ་ཞེས་པ་ནི། སྣང་གྲགས་ཀུན་རྫོབ་ཀྱི་ཆོས་རྣམས་ཉིད་ཁྱད་གཞིར་བཞག་ནས། དེ་ལ་བརྟེན་པའི་བདེན་པ་གཉིས་སོ། །གཟུང་འཛིན་འཁྲུལ་སྣང་ཀུན་རྫོབ་དང༌། གཉིས་མེད་ཀྱི་ཡེ་ཤེས་དོན་དམ་དུ་འཇོག་པ་ནི། ཀུན་རྫོབ་དང་དོན་དམ་དངོས་
དག་པ་བ་ཡིན་ནོ། །འདིར་དག་པ་བ་ཞེས་པ་ནི། གཞན་ལ་མ་བལྟོས་གཞན་དང་མ་འདྲེས་པའི་རྐང་ཚུགས་པའི་དོན་ནོ། །རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་ཕྱག་རྒྱ་ཆེན་པོ་ཀུན་རྫོབ་དང༌། མི་འགྱུར་བའི་བདེ་བ་ཆེན་པོ་དོན་དམ་པར་བཞག་པ་ནི། དོན་དམ་ཁོ་ན་ཁྱད་གཞིར་བཞག་པའི་དབྱེ་བ་སྟེ། དོན་དམ་ཉིད་ལ་ལྡོག་ཆས་ཕྱེ་བའི་རྣམ་པར་གཞགས་པའོ། །དགོས་པ་གང་གི་སྒོ་ནས་ལྡོག་ཆས་འབྱེད་པ་ཡང་འདི་ཡིན་ཏེ། ཡེ་ཤེས་དེ་ཉིད་བདེ་ཆེན་གྱི་ལྡོག་པ་ནས། དོན་དམ་བདེན་པ་རང་ཉིད་ཀྱི་ངོ་བོར་གནས་པའི་ཆོས་ཉིད་ཡིན་ལ། རྣམ་པ་ཐམས་ཅད་པའི་ལྡོག་པ་ནས་ཀུན་རྫོབ་བདེན་པ་སོ་སོའི་གནས་ལུགས་ཀྱི་ཆོས་ཉིད་ཡིན་པའི་ཕྱིར། ཀུན་རྫོབ་བདེན་པའི་ཐ་སྙད་བཏགས་པའོ། །དཔེར་ན་ལྷའི་དབང་པོ་བརྒྱ་བྱིན་ནི། ལྷ་དངོས་ཡིན་ལ་རྒྱལ་པོ་ཡང་ཡིན་པས་ལྷའི་རྒྱལ་པོ་ཞེས་བྱ་ལ། ཀླུ་དང་གྲུལ་བུམ་ལ་དབང་སྒྱུར་བས། དེ་དག་དངོས་མ་ཡིན་ཀྱང་དེ་དག་གི་ཡང་རྒྱལ་པོར་འཇོག་པ་བཞིན་ནོ། །གཞན་ཡང་འཁོར་བ་འཇིག་རྟེན་པ་ལ་ཀུན་རྫོབ་དང༌། འཇིག་རྟེན་འདས་པ་འཕགས་པའི་སྤྱོད་ཡུལ་ལ་དོན་དམ་དུ་བཞག་པ་སོགས། འཇོག་མཚམས་མི་འདྲ་བ་དུ་མ་ཡོད་ཀྱང༌། ཕལ་ཆེར་སྙིང་པོའི་གནད་གཅིག་པར་སྣང་ངོ༌། །སྐབས་འདིར་བདེན་གཉིས་དག་པ་བ་དང༌། འཁོར་འདས་གཉིས་ཀྱི་དབང་དུ་བྱས་ནས། དབང་བཅུ་གཅིག་ལ་བདེན་གཉིས་ཀྱི་དབྱེ་བ་མཛད་པ་ཡིན་ནོ། །གཉིས་པ་ལ་གཉིས་ཏེ་དབང་བདུན་གྱི་དག་དབྱེ་དང༌། དབང་བཞིའི་དག་དབྱེའོ། །དང་པོ་ནི། ཆུ་དང་ཅོད་པན་དར་དཔྱངས་དང༌། །རྡོ་རྗེ་དྲིལ་བུ་བརྟུལ་ཞུགས་ཆེ། །མིང་དང་རྗེས་གནང་ཡང་དག་ལྡན། །དབང་བསྐུར་རྣམ་བདུན་མི་ཡི་བདག །ལུས་ངག་སེམས་ནི་ལེགས་དག་པ། །མངོན་པར་དབང་བསྐུར་གཉིས་གཉིས་སོ། །རྗེས་གནང་ཡེ་ཤེས་ཡང་དག་དག །གཞན་པ་ཁམས་སོགས་དག་པ་ལས། །ཆུ་ནི་ཁམས་ཀྱི་དག་པ་སྟེ། །ཅོད་པན་ཕུང་པོ་རྣམ་སྦྱོང་བྱེད། །དར་དཔྱངས་ཕ་རོལ་ཕྱིན་པ་
དག །རྡོ་རྗེ་དྲིལ་བུ་མི་འགྱུར་ཆེ། །སངས་རྒྱས་སྐད་རྒྱུན་མི་འཆད་ལ། །ཉི་ཟླ་གཅིག་ཏུ་དག་པར་བྱེད། །ཡུལ་དང་དབང་པོ་ལེགས་དག་པ། །འཕོ་མེད་རྡོ་རྗེའི་བརྟུལ་ཞུགས་འགྱུར། །མིང་ནི་བྱམས་སོགས་ཡང་དག་དག །རྗེས་གནང་སངས་རྒྱས་ཉིད་དག་བྱེད། །དབང་བསྐུར་བདུན་པོ་འདི་རྣམས་ནི། །དཀྱིལ་འཁོར་བཞེངས་ནས་སྦྱིན་པར་བྱ། །ཞེས་གསུངས་ཏེ། དེ་ལ་དབང་བདུན་གྱི་དབྱེ་བ་ནི། ཆུ་དང་སོགས་ཏེ། ཆུའི་དབང་དང༌། ཅོད་པན་གྱི་དབང་དང༌། དར་དཔྱངས་ཀྱི་དབང་དང༌། རྡོ་རྗེ་དང་བཅས་པའི་དྲིལ་བུའི་དབང་དང༌། བརྟུལ་ཞུགས་ཀྱི་དབང་དང༌། མིང་གི་དབང་དང༌། རྗེས་གནང་གི་དབང་རྣམས་སོ། །རྡོ་རྗེ་བཞིའི་དག་པ་བསྟན་པ་ནི། ལུས་ངག་ཞེས་སོགས་ཏེ། ལུས་ཀྱི་དྲི་མ་སྦྱོང་ཞིང་སྐུ་རྡོ་རྗེའི་ནུས་པ་མངོན་དུ་བྱེད་པ། ཆུ་ཅོད་པན་གཉིས་དང༌། ངག་གི་དྲི་མ་སྦྱོང་ཞིང་གསུང་རྡོ་རྗེའི་ནུས་པ་མངོན་དུ་བྱེད་པ། དར་དཔྱངས་དང་དྲིལ་བུའི་དབང་གཉིས་དང༌། ཡིད་ཀྱི་དྲི་མ་སྦྱོང་ཞིང་ཐུགས་རྡོ་རྗེའི་ནུས་པ་མངོན་དུ་བྱེད་པ། བརྟུལ་ཞུགས་དང་མིང་གི་དབང་གཉིས་དང༌། ཡེ་ཤེས་ཀྱི་སྒྲིབ་པའམ་ཆགས་རྟོག་གི་སྒྲིབ་པ་དག་པར་བྱེད་ཅིང༌། ཡེ་ཤེས་རྡོ་རྗེའི་ནུས་པ་མངོན་དུ་བྱེད་པ། རྗེས་གནང་འདོགས་དང་བཅས་པའི་དབང་ངོ༌། །དེའི་རྗེས་སུ་དབང་བདུན་གྱི་དག་བྱ་དག་བྱེད་ཞིབ་མོར་བསྟན་པ་ནི། གཞན་པ་ཁམས་སོགས་དག་པ་སྟེ། །ཞེས་པ་ལ་སོགས་པ་སྟེ། རྡོ་རྗེ་བཞི་ལས་གཞན་པའི་རྣམ་གྲངས། ཁམས་ལྔ་ལ་སོགས་པ་དག་པ་གཞན་བསྟན་པ་ནི། ཆུ་དང་ཅོད་པན་ལ་སྦྱང་བྱ་ཕུང་ཁམས་དང༌། བརྟུལ་ཞུགས་ལ་དབང་ཡུལ་གྱི་སྒོ་ནས་བསྟན་པས། གཞན་རྣམས་ཀྱི་ཡང་སྦྱང་བྱ་རྟཽགས་དགོས་ལ། དར་དཔྱངས་དྲིལ་བུ་མིང་དབང་གསུམ་ལ། ཕར་ཕྱིན་སོགས་སྦྱོང་བྱེད་དང་སྦྱངས་འབྲས་ཀྱི་སྒོ་ནས་བསྟན་པས། གཞན་རྣམས་ལ་ཡང་དེ་དག་སྦྱོར་དགོས་པ་དང༌། རྗེས་གནང་ལ་བསྐྱེད་རིམ་དང་འབྲས་བུའི་དབང་དུ་བྱས་ནས། ལྷའི་དག་པ་སྦྱར་
བ་བཞིན། གཞན་དྲུག་ལའང་ཤེས་པར་བྱ་སྟེ། ཆུ་དབང་གིས་ནི་སྦྱང་བྱ་ནམ་མཁའ་རླུང་མེ་ཆུ་ས་སྟེ་ཁམས་ལྔ་དག་པ་དང༌། ལམ་དུ་འབྱུང་བ་ལྔའི་དཀྱིལ་འཁོར་དབུ་མར་ཐིམ་པའི་ཡེ་ཤེས་བསྐྱེད་པ་དང༌། འབྲས་དུས་སུ་ཤེས་རབ་ཕྱོགས་ཀྱི་ཡེ་ཤེས་ལྔ་དང་རྡོ་རྗེ་དབྱིངས་ཀྱི་དབང་ཕྱུག་མ་སོགས་ལྷ་མོ་ལྔའི་གོ་འཕང་ཐོབ་པའི་སྐལ་བ་ཅན་དུ་བྱེད་དོ། །ཅོད་པན་གྱི་དབང་གིས་རྣམ་ཤེས་འདུ་བྱེད་ཚོར་འདུ་གཟུགས་ཏེ་ཕུང་པོ་ལྔ་སྦྱོང་བར་བྱེད། ཕུང་པོ་ལྔའི་དཀྱིལ་འཁོར་དབུ་མར་ཐིམ་པའི་ཡེ་ཤེས་དང༌། འབྲས་དུས་ཐབས་ཀྱི་ཕྱོགས་ཀྱི་ཡེ་ཤེས་ལྔ་དང༌། རྒྱལ་བ་རིགས་ལྔ་མངོན་དུ་འགྱུར་རོ། །དར་དཔྱངས་ཀྱི་དབང་ནི། རླུང་བཅུ་དག་པ་དང༌། ཕ་རོལ་ཏུ་ཕྱིན་པ་བཅུའི་ཡེ་ཤེས་དང༌། རྟགས་བཅུ་མཐར་ཕྱིན་ཞིང་ནུས་མ་བཅུ་མངོན་དུ་འགྱུར་བ་ལ་སྦྱར་རོ། །རྡོ་རྗེ་དྲིལ་བུ་དང་རྡོ་རྗེའི་དབང་གིས་ཉི་མའི་རྩ་ར་ས་ནཱ་དང༌། ཟླ་བའི་རྩ་ལ་ལ་ནཱ་དག་པར་བྱེད་ཅིང༌། ཟླ་བ་དང་འབྲེལ་པ་སྲོག་དང་ཉི་མ་དང་འབྲེལ་བ་ཐུར་སེལ་ཡང་ཡིན་པས། གཡས་གཡོན་སྲོག་ཐུར་གྱི་རླུང་རྣམས་དབུ་མར་གཅིག་ཏུ་ཞུགས་པས་དག་པར་བྱེད་དོ། །རྡོ་རྗེ་ནི་མི་འབྱུང་བའི་བདེ་བ་ཆེན་པོ་རང་དོན་ཆོས་སྐུ་དང༌། དྲིལ་བུ་ནི་རྒྱུན་མི་འཆད་པ་སྟེ་གཞོམ་དུ་མེད་པའི་སངས་རྒྱས་ཀྱི་གསུང་གཞན་དོན་ལོངས་སྐུའོ། །འདིར་རྡོ་རྗེ་མི་འགྱུར་ཆེ་དྲིལ་བུ། །རྒྱུན་མི་འཆད་པའི་སངས་རྒྱས་གསུང༌། །ཞེས་བསྒྱུར་ན་གོ་བདེའོ། །དེ་ལྟར་ན་སྦྱང་བྱ་རྩ་གཉིས་དག་པ་དང༌། དེ་གཉིས་ཀྱི་རྒྱུ་བ་འགོག་པ་དང༌། མི་འགྱུར་བའི་བདེ་བ་དང་གཞོམ་མེད་ཀྱི་ཡེ་ཤེས་དང༌། དཀྱིལ་འཁོར་གྱི་གཙོ་བོ་དཔལ་དུས་ཀྱི་འཁོར་ལོ་དང་སྣ་ཚོགས་ཡུམ་མངོན་དུ་འགྱུར་རོ། །རྡོ་རྗེའི་བརྟུལ་ཞུགས་ཀྱི་དབང་གིས། དབང་པོ་དྲུག་དང་ཡུལ་དྲུག་རབ་ཏུ་དག་པར་བྱེད་ཅིང༌། གཞན་ཡེ་ཤེས་ཀྱི་དབང་པོ་དྲུགགཞན་སྟོང་གཟུགས་ཀྱི་ཡུལ་དྲུག་ལ་རབ་ཏུ་འཇུག་པས། ཐིག་ལེ་འཕོ་མེད་ཀྱི་ཡེ་ཤེས་སྐྱེད་པར་བྱེད་པ་དང༌། མངོན་ཤེས་སོགས་ཀྱི་ཡོན་ཏན་དང༌། སེམས་དཔའ་ཡབ་ཡུམ་བཅུ་
གཉིས་ཀྱི་གོ་འཕང་མངོན་དུ་བྱེད་ལ། ཐིག་ལེ་འཕོ་བ་མེད་པའི་ཚངས་སྤྱོད་ནི་རྡོ་རྗེའི་བརྟུལ་ཞུགས་ཏེ་དབང་ཡུལ་དག་པས་སྟོང་གཟུགས་ཀྱི་སྐུ་འགྲུབ་ནས་འཕོ་མེད་དུ་བྱེད་པའི་ཕྱིར་རོ། །མིང་དབང་གིས་ལས་དབང་ལྔ་བྱ་བ་ལྔ་དང་བཅས་པ་དག་པར་བྱེད་པ་དང༌། བྱམས་སོགས་ཚད་མེད་ལྔའི་ཡེ་ཤེས་དང༌། འཕྲིན་ལས་སྣ་ཚོགས་པས་སེམས་ཅན་འདུལ་བ་དང༌། ཁྲོ་བོ་ཡབ་ཡུམ་བཅུ་མངོན་དུ་བྱེད་དོ། །འདིར་ཚད་མེད་ལྔ་པ་ནི་མཉམ་པ་ཉིད་ཚད་མེད་དོ། །རྗེས་གནང་གི་དབང་གིས་སངས་རྒྱས་ཀྱི་གོ་འཕང་ཉིད་རྫོགས་པ་མཚོན་བྱེད་དུ། སངས་རྒྱས་ཉིད་དེ་རིགས་བདག་གི་དག་པར་བྱེད་དོ། །དེ་ཡང་ཕུང་ཁམས་དྲུག་པ་ཡེ་ཤེས་ཀྱི་ཕུང་ཁམས་སྦྱོང་ཞིང༌། སྟོང་ཉིད་དང་བདེ་བ་ཟུང་དུ་འཇུག་པའི་ཡེ་ཤེས་དང༌། ཆོས་ཀྱི་འཁོར་ལོ་ཡང་དག་པར་བསྐོར་བ་དང༌། རྡོ་རྗེ་སེམས་དཔའ་དང་ཤེས་རབ་ཀྱི་ཕ་རོལ་ཏུ་ཕྱིན་མའི་གོ་འཕང་མངོན་དུ་བྱེད་པ་ཡིན་ནོ། །འབྲས་དུས་ཀྱི་ལྷའི་དག་པ་བསྟན་པས་བསྐྱེད་རིམ་གྱི་ལྷ་ཡི་སྨིན་བྱེད་དུ་འགྱུར་ཚུལ་ཤུགས་ལ་ཤེས་ཤིང༌། རྡོ་རྗེ་བཞི་དང་སྦྱར་བས་བསྐྱེད་རིམ་ཡན་ལག་བཞིའི་སྨིན་བྱེད་དུ་འགྲོ་བའི་ཚུལ་ཡང་ཡོད་དོ། །དེ་དག་ལ་ཡང་ཕུང་ཁམས་ལུས་ཀྱི་ལྡོག་ཆ་གཙོ་ཆེ་ཞིང༌། རླུང་བཅུ་དང་རྩ་གཉིས་དག་གི་ཆོས་དང༌། དབང་པོ་ལས་དབང་ཡུལ་བཅས་ནི། རྣམ་རྟོག་གི་གཞི་ཡིན་པའི་ཕྱིར་ཡིད་ཀྱི་ཆོས་དང༌། ཡེ་ཤེས་ཀྱི་ཕུང་ཁམས་བདེ་བའི་ཆོས་ཡིན་པའི་ཕྱིར། ཡེ་ཤེས་རྡོ་རྗེ་བཞག་པས་རྡོ་རྗེ་བཞིའི་དག་པ་དེ་ཉིད་རྒྱས་པར་བཤད་པར་འགྱུར་རོ། །དབང་བདུན་པོ་དེ་ཉིད་གང་དུ་བསྐུར་བའི་དཀྱིལ་འཁོར་སྟོན་པ་ནི། དབང་བསྐུར་བདུན་པོ་སོགས་ཏེ། དཀྱིལ་འཁོར་བཞེངས་ནས་ཞེས་པའི་ཚིག་གིས། བཅོས་མ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བར་ཤིན་ཏུ་གསལ་ལ།འགྲེལ་ཆེནདོན་དམ་བསྡུས་པར། རྡུལ་ཚོན་གྱི་དཀྱིལ་འཁོར་ཁོ་ནར་དབང་བསྐུར་གྱིས། གཞན་རས་བྲིས་ལ་སོགས་པ་མ་ཡིན་ཞེས་བཤད་ཅིང༌། རྒྱུ་མཚན་གསལ་བར་མ་བྲིས་ལ། དཔལ་འཛིན་
དགའ་བས་བྱས་པའི་འགྲེལ་པ་མདོར་བཤད་ལས། རས་བྲིས་ལ་སོགས་པའི་དཀྱིལ་འཁོར་དུ་ནི་མ་ཡིན་ཏེ། བཅོམ་ལྡན་འདས་ཀྱི་རྒྱུད་རྣམས་སུ་མ་གསུངས་པའི་ཕྱིར་རོ། །ཞེས་འགྲེལ་པ་སྔ་མའི་དགོངས་པ་གསལ་བར་བསྟན་ཏོ། །དེ་ལ་རྒྱུད་རྣམས་སུ་ཞེས་པས། དུས་ཀྱི་འཁོར་ལོ་ཁོ་ན་མ་ཡིན་པར་གསལ་ལོ། །བོད་ཁ་ཅིག་བྱིས་འཇུག་རྡུལ་ཚོན་ཁོ་ནར་བསྐུར་དགོས་པ་དུས་འཁོར་གྱི་རྒྱུད་འདིའི་ཁྱད་ཆོས་ཡིན་ཞིང༌། རྒྱུད་སྡེ་གཞན་ལ་ནི་རས་བྲིས་ཀྱང་རུང་ངོ་ཞེས་དབྱེ་བ་འབྱེད་པ་ནི་འཆལ་གཏམ་ཡིན་ཞིང༌། མཁས་ཆེན་ཁ་ཅིག་གིས་ཀྱང༌། རྡུལ་ཚོན་གྱི་ནི་དཀྱིལ་འཁོར་དུ། །དབང་བསྐུར་བྱ་བར་གསུངས་མོད་ཀྱི། གཞན་གྱི་སྨིན་བྱེད་རྒྱུད་ལས་བཀག །ཅེས་གསུངས་པ་ནི། མདོར་བཤད་དུ་འབྱུང་བ་ལྟར་གྱི་དོན་དེ་ཉིད་ཐུགས་ལ་བཞག་པ་སྟེ། རྒྱུད་ལས་མ་གསུངས་པ་ཉིད་ཀྱི་ཕྱིར་བྱར་མི་རུང་བས་བཀག་པར་དགོངས་སོ། །འོན་ཀྱང་རྒྱུད་ཀྱི་ཚིག་འདིས་ནི་དབྱིབས་སམ་གཟུགས་བརྙན་གྱི་དཀྱིལ་འཁོར་བཞེངས་ནས་དབང་བདུན་བསྐུར་བར་བྱ་ཞེས་གསུངས་ཀྱི། གཟུགས་བརྙན་གྱི་ནང་ཚན་རྡུལ་ཚོན་རས་བྲིས་སོགས་དབྱེ་བ་གང་ཡང་མི་གསལ་ཞིང༌། མ་བཞེངས་པར་སྦྱིན་དུ་མི་རུང་ཞེས་པའི་ཚིག་ཀྱང་མེད་དེ། དཔེར་ན་ནམ་ལངས་ནས་ཁ་ཏོན་བྱའོ་ཞེས་པས། ནམ་ལངས་པའི་སྔོན་དུ་ཁ་ཏོན་བཀག་པ་མ་ཡིན་པ་བཞིན་ནོ། །འགྲེལ་པ་དེ་དག་གིས་དེ་ལྟར་བཤད་ཀྱང་དེ་སེམས་འགྲེལ་ནི་མ་ཡིན་པས། མཐའ་གཅིག་ཏུ་ཁས་ལེན་དགོས་པའང་མིན་ལ། ལེན་དུ་ཆུག་ཀྱང་སྤྱིར་བཏང་ལ་དགོངས་པར་བཤད་དགོས་སོ། །རས་བྲིས་ཀྱི་དཀྱིལ་འཁོར་དུ་མ་སྨིན་པ་སྨིན་པར་བྱེད་པའི་དབང་བསྐུར་བ་ནི། དེང་སང་བཞུགས་པའི་རྒྱུད་ཕལ་ཆེར་ལས་གསལ་བར་མ་གསུངས་མོད་ཀྱི། རྒྱུད་རྣམ་པར་དག་པ་ཁ་ཅིག་ལས་གསལ་བར་གསུངས་པའང་སྣང་ངོ༌། །རྒྱུད་ཀྱི་རྒྱལ་པོ་དུས་ཀྱི་འཁོར་ལོ་འདིར་ཡང༌། སློབ་དཔོན་དང་སློབ་མ་གཉིས་ཀར་ཀུན་སྤངས་ཀྱི་སྤྱོད་པ་ཅན་ལ་རྫས་དང་ཡོ་བྱད་སྤངས་པའི་དབང་བསྐུར་བ་སྦྱིན་པར་གསུངས་ཏེ། བསྡུས་པའི་རྒྱུད་ཀྱི་རྒྱལ་པོ་ལས།
རྫས་རྣམས་མེད་པའི་མངོན་པར་དབང་བསྐུར་རྒྱལ་བའི་བདག་པོའི་བཀའ་ཡིས་ཀུན་སྤངས་ལ་ནི་སྦྱིན་པར་བྱ། །ཞེས་གསུངས་པས་རྫས་ཅི་རིགས་པ་སྤངས་པ་ནས་མཐའ་དག་སྤངས་པའི་བར་དུ་སྟེ། གཟུགས་བརྙན་གྱི་དཀྱིལ་འཁོར་ཡང་རྫས་ཀྱི་ནང་ཚན་ནོ། །དེ་བཞིན་དུ་ལུས་ཀྱི་དཀྱིལ་འཁོར་ཡང་སྟེ། དེས་ན་ཏིང་ངེ་འཛིན་འབའ་ཞིག་གི་དཀྱིལ་འཁོར་དུ་ཡང་དབང་བསྐུར་དུ་རུང་ན། གཞན་ལྟ་སྨོས་ཀྱང་ཅི་དགོས། འཇིགས་མེད་འབྱུང་གནས་ཀྱི་ཞལ་སྔ་ནས་ཀྱིས་ནི། འབྱོར་བ་དང་ལྡན་ཡང་རུང༌། ལྷག་པར་མོས་པ་བརྟན་པོ་ཅན་ལ་ཏིང་ངེ་འཛིན་ཁོ་ནའི་དཀྱིལ་འཁོར་གྱིས་སྨིན་བྱེད་རུང་བར་བཤད་པ་ནི་ལེགས་པར་གསུངས་པའོ། །འགྲེལ་པ་དོན་དམ་བསྡུས་པ་སོགས་ཀྱི་དགོངས་པས་ནི། བཞེངས་ནས་ཞེས་པའི་ཚིག་གིས། སྐབས་དེར་བཞེངས་པར་གསལ་བས། རྡུལ་ཚོན་ལས་འོས་མེད་པའི་ཕྱིར་མཉམ་དུ་དགོངས་པ་སྟེ། དུས་དེ་ཙམ་ན་འཕགས་པའི་ཡུལ་ན། རས་བྲིས་ཤིན་ཏུ་དར་བ་ལ་ཟུར་ཟ་བ་མཛད་པ་ཡིན་ནོ། །གཉིས་པ་ལ། དབང་བཞིའི་དབྱེ་བ། དབང་བཞིའི་ཡེ་ཤེས། དབང་བཞིའི་དག་པ། དབང་བཞིའི་དཔེ། དབང་བཞིའི་ངོ་བོ་བཤད་པ་སྟེ་ལྔ་ལས། དང་པོ་ནི། བུམ་པ་གསང་བའི་དབང་བསྐུར་དང༌། །ཤེས་རབ་ཡེ་ཤེས་མངོན་བརྗོད་པ། །སླར་ཡང་ཤེས་རབ་ཆེན་པོ་ཉིད། །དེ་ཡི་ཡེ་ཤེས་མངོན་རྗོད་བྱེད། །ཅེས་ཏེ་དབང་གོང་མ་ལ་ངོ་བོའི་སྒོ་ནས་དབྱེ་ན་བུམ་པའི་དབང་བསྐུར་བ་དང༌། གསང་བའི་དབང་བསྐུར་བ་དང༌། ཤེས་རབ་ཡེ་ཤེས་ཀྱི་དབང་བསྐུར་བ་ཞེས་མངོན་པར་བརྗོད་ཅིང་གྲགས་པ་དང༌། གསུམ་པ་ཤེས་རབ་ཡེ་ཤེས་དེའི་རྗེས་སུ། སླར་ཡང་ཤེས་རབ་ཡེ་ཤེས་གཞན་ཞིག་སྟེ། ཤེས་རབ་ཆེན་པོ་ཉིད་དེ་ཡི་ཡེ་ཤེས་ཀྱི་དབང་བསྐུར་བ་ཞེས་མངོན་པར་བརྗོད་པར་བྱེད་པ། འཇིག་རྟེན་ལས་འདས་པའི་དབང་བཞི་པ་རྣམས་སོ། །གཉིས་པ་ནི། འགྱུར་དང་འགྱུར་དང་དེ་ནས་འཛག །དེ་ནས་གཞན་ཡང་མི་འཛག་པའོ། །བུམ་དབང་གི་ཡེ་ཤེས་ནི་བྱང་ཆུབ་ཀྱི་སེམས་ཅུང་ཟད་གཡོ་ཞིང་འགྱུར་བའི་བདེ་བ་དང༌། གསང་
དབང་གི་ཡེ་ཤེས་ནི་སྔ་མ་ལས་ཆེས་གཡོ་ཞིང་འགྱུར་བའི་བདེ་བ་དང༌། གསུམ་པ་ཤེས་དབང་གི་ཡེ་ཤེས་ནི་འགྱུར་བ་རྫོགས་པ་འཛག་པའི་སྐད་ཅིག་ལ་རེག་པའི་བདེ་བ་དང༌། དེ་ལས་གཞན་འཇིག་རྟེན་ལས་འདས་པ་བཞི་པའི་ཡེ་ཤེས་ནི། བྱང་ཆུབ་ཀྱི་སེམས་འཕོ་མེད་དུ་བཅིངས་པའི་བདེ་བའོ། །གསུམ་པ་ནི། ལུས་ངག་སེམས་ནི་ལེགས་དག་པ། །དབང་བསྐུར་གསུམ་པོ་རིམ་པ་ཡིས། །བཞི་པ་ཡེ་ཤེས་ཡང་དག་དག །ལུས་ངག་སེམས་ནི་དག་པར་བྱེད། །ཅེས་ཏེ། ལུས་ཀྱི་དྲི་མ་དག་ཅིང་སྐུ་རྡོ་རྗེ་རྫོགས་པར་བྱེད་པ་བུམ་དབང་དང༌། ངག་གི་དྲི་མ་དག་ཅིང་གསུང་རྡོ་རྗེར་རྫོགས་པར་བྱེད་པ་གསང་དབང་དང༌། ཡིད་ཀྱི་དྲི་མ་དག་ཅིང་ཐུགས་རྡོ་རྗེ་རྫོགས་པར་བྱེད་པ་འཇིག་རྟེན་པའི་ཤེར་དབང་དང༌། ཡེ་ཤེས་ཀྱི་ཁམས་ཆགས་རྟོག་གི་དྲི་མ་སྦྱོང་ཞིང་ཡེ་ཤེས་རྡོ་རྗེ་རྫོགས་པར་བྱེད་པ་འཇིག་རྟེན་ལས་འདས་པའི་དབང་བཞི་པ་སྟེ། འདིས་ནི་ལུས་དང་ངག་དང་སེམས་ཀྱི་དྲི་མ་བག་ཆགས་དང་བཅས་པ་ཡང་སྦྱོང་བར་བྱེད་དོ། །དེ་བཞིན་དུ་བུམ་དབང་སོར་བསམ་གྱི་སྨིན་བྱེད་དང༌། གསང་དབང་སྲོག་འཛིན་གྱི་དང༌། འཇིག་རྟེན་པའི་ཤེར་དབང་རྗེས་དྲན་གྱི་དང༌། འཇིག་རྟེན་འདས་པའི་དབང་བཞི་པ་ཚིག་གི་དབང་དུ་བྱས་པ་ནི་ཏིང་ངེ་འཛིན་གྱི་ཡན་ལག་གི་སྨིན་བྱེད་བགོ་སྐལ་དུ་ཐོབ་པ་དང༌། སྦྱིར་ཡན་ལག་ལྷག་མ་ལྔ་པོའི་ཡང་ངོ༌། །ཚུལ་འདིས་གོང་དབང་བདུན་ལ་ཡང་ངེས་པ་སྟེར་བར་བྱེད་དོ། །ཆུ་ཅོད་ནི་བུམ་དབང་གི་སྔོན་འགྲོ་དང་སོར་བསམ་གྱི་སྨིན་བྱེད། དར་དཔྱངས་དང་དྲིལ་བུ་གསང་དབང་དང་སྲོག་འཛིན། བརྟུལ་ཞུགས་དང་མིང་འཇིག་རྟེན་པའི་ཤེར་དབང་དང་རྗེས་དྲན། རྗེས་གནང་ནི་འཇིག་རྟེན་འདས་པ་བཞི་བའི་སྔོན་འགྲོ་དང༌། ཏིང་ངེ་འཛིན་གྱི་སྨིན་བྱེད་དུ་ཡང་སྦྱོར་ལ། དབང་བདུན་ནི་བསྐྱེད་རིམ་གྱི་དངོས་ཀྱི་སྨིན་བྱེད་དང༌། རྫོགས་རིམ་གྱི་བརྒྱུད་པའི་སྨིན་བྱེད་དོ། །དབང་གོང་མ་བཞི་ནི་རྫོགས་རིམ་གྱི་དངོས་ཀྱི་སྨིན་བྱེད་དང༌། འབྲས་བུ་སྐུ་བཞི་རྒྱུད་ནས་སྨིན་པར་བྱེད་པའོ། །ཞེས་རགས་པའི་ཐ་སྙད་དུ་སྦྱོར་ཞིང༌། ཡང་དག་པར་ན་དབང་
བཞི་པའི་ཡེ་ཤེས་ཉིད་ལམ་རྫོགས་པའི་རིམ་པ་དང་འབྲས་བུ་སྐུ་བཞིའོ། །བཞི་པ་ནི། བྱིས་པ་དར་མ་དེ་ནས་རྒན། །བཞི་པ་སྐྱེ་དགུའི་བདག་པོའོ། །བུམ་དབང་གི་ཡེ་ཤེས་ནི་བདེ་བ་གསར་དུ་སྐྱེས་པ་ཕྲ་མོ་ཡིན་པའི་ཕྱྀར་བྱིས་པ་དང༌། གསང་དབང་གི་ཡེ་ཤེས་ནི་སྔར་ཡོད་ཀྱི་རྒྱུན་ལས་ལྷག་པར་འཕེལ་ཀྱང་མ་སྨིན་པ་ཡིན་པའི་ཕྱིར། ལང་ཚོའམ་དར་མ་དང༌། འཇིག་རྟེན་པའི་ཤེར་དབང་གི་ཡེ་ཤེས་ནི། }ར་གྱི་བདེ་བའི་རྒྱུན་ལས་རྒྱས་པ་ནི་ཡིན་ཡང་རབ་ཏུ་སྨིན་པའི་ཕྱིར་རྒན་པོ་དང༌། འཇིག་རྟེན་ལས་འདས་པའི་བཞི་པ་ནི། བདེ་བ་གཞན་ཐམས་ཅད་ཀྱི་རང་བཞིན་ལ་ཁྱབ་ཅིང༌། རང་ཉིད་ལ་སྐྱེ་འཇིག་མེད་ལ་གཞན་རྣམས་གང་ལས་འབྱུང་བ་དང་གང་དུ་ཐིམ་པའི་གཞི་ཡིན་པའི་ཕྱིར་སྐྱེ་དགུའི་བདག་པོའོ། །ལྔ་པ་ནི། ཤེས་རབ་ནུ་མར་ཡན་ལག་ནི། །རེག་པས་བྱང་ཆུབ་སེམས་འཕོའི་བདེ། །འོ་མ་འཛིན་པས་དབང་བསྐུར་བ། །གང་ལས་བདེ་ཐོབ་དེ་བྱིས་པའོ། །ཡུན་རིང་གསང་བར་སྤྲོས་ལས་སྐྱེས། །བྱང་ཆུབ་སེམས་ནི་འཕྲོ་བའི་བདེ། །གསང་བའི་དབང་བསྐུར་གསང་བར་ནི། །གང་ལས་བདེ་ཐོབ་དེ་དར་མ། །ཡུན་རིང་གསང་བར་སྤྲོས་ལས་སྐྱེས། །རྡོ་རྗེའི་རྩེ་མོར་གཡོ་བའི་བདེ། །ཤེས་རབ་ཡེ་ཤེས་དབང་བསྐུར་བ། །གང་ལས་གཡོ་བའི་བགྲོད་དེ་རྒན། །ཕྱག་རྒྱ་ཆེན་པོ་རྗེས་ཆགས་ལས། །སྐྱེས་པ་གཡོ་མེད་བདེ་བ་ནི། །ཤེས་རབ་ཆེན་པོའི་དབང་བསྐུར་བ། །གང་ལས་གཡོ་མེད་རྟོགས་པ་སྟེ། །སྐྱེ་དགུའི་བདག་པོར་རྣམ་ཤེས་བྱ། །སྐྱོབ་པ་ཐམས་ཅད་སྐྱེད་མཛད་པ། །རྡོ་རྗེ་སེམས་དཔའ་སེམས་དཔའ་ཆེ། །བྱང་སེམས་གཉིས་མེད་མི་འགྱུར་བ། །འདི་ནི་དམ་ཚིག་སེམས་དཔར་འགྱུར། །རྡོ་རྗེའི་རྣལ་འབྱོར་རྣམ་པ་ཡིན། །དུས་ཀྱི་འཁོར་ལོ་འདིར་བཤད་པ། །རྣམ་འབྱོར་བ་ཡི་ཐར་སྟེར་བྱེད། །ཅེས་གསུངས་ཏེ་ཤེས་རབ་མའི་ནུ་མ་ལ་ཐབས་ཀྱི་ཡན་ལག་རེག་པའི་རྗེས་ཆགས་ལས། བྱང་ཆུབ་ཀྱི་སེམས་གཙུག་ཏོར་ནས་དཔྲལ་པར་འཕོས་ཤིང་འོངས་པ། རྣལ་འབྱོར་གྱི་ཐབས་
ཀྱི་ཅུང་ཟད་བཅིངས་པའི་བདེ་བའི་ཡེ་ཤེས་ནི་བུམ་དབང་སྟེ། དེ་ཡང་སྐུ་གསུང་ཐུགས་དང་ཡེ་ཤེས་ཀྱི་དགའ་བ་སྟེ་བཞིའི་བདག་ཉིད་དོ། །དེ་ལ་བུམ་པའི་བརྡས་ནི་ཤེས་རབ་ཀྱི་འོ་མ་འཛིན་པ་བསྟན་པ་ཡིན་ཏེ། དེ་ལ་རེག་པ་ལས་བྱུང་བའི་ཕྱིར་བུམ་དབང་ཞེས་བྱའོ། །དེ་ལྟ་བུའི་བདེ་བ་དེ་ནི་བྱིས་པའི་དཔེས་བསྟན་པ་སྟེ། དང་པོར་བྱུང་བ་དང༌། ཆུང་བ་དང༌། མི་བསྟན་པས་སོ། །ཡུན་རིང་གསང་བར་སྤྲོས་ལས་སྐྱེས། །ཞེས་པ་དང་པོ་ནི། གསང་བར་སྤྲོས་ལས་སྐྱེས་ཡུན་རིང་ཞེས་པའམ། འབྲོ་འགྱུར་ལས། གསང་བ་མཉེས་ལས་ཡུན་རིང་སྐྱེས། །ཞེས་འབྱུང་བ་ལེགས་ཏེ། རྒྱ་གར་གྱི་སྐད་དུ་གུ་ཧྱཱ་སྥཱ་ལ་ཙི་རཱ་ཛ་ཏཾ། ཞེས་འབྱུང་བས། སྥཱ་ལ་སྤྲོས་པ་དང་མཉེས་པ་གཉིས་ཀར་ལ་འཇུག་གོ །ཤེས་རབ་མའི་གསང་བར་ཐབས་ཀྱི་རྡོ་རྗེ་སྤྲོས་པ་སྟེ་ཕྱིན་པ་ལས། བྱང་ཆུབ་ཀྱི་སེམས་དཔྲལ་པ་ནས་ཞུ་སྟེ་མགྲིན་པ་ནས་རྒྱུད་སྙིང་གར་འཕོས་པ་ལས་སྐྱེས་པའི་བདེ་བ་ཐབས་ཀྱིས་ཅུང་ཟད་བཅིངས་པ་ནི། གསང་དབང་གི་ཡེ་ཤེས་ཏེ། དེ་ལ་དབྱེ་ན་སྐུ་གསུང་ཐུགས་དང་ཡེ་ཤེས་ཀྱི་མཆོག་ཏུ་དགའ་བ་བཞིའོ། །གསང་བར་ནི་ཞེས་པ། གསང་བའི་དབང་པོ་ཕྲད་པ་ལས་ཐོབ་པ་ཞེས་འཆད་ཅིང༌། }་མ་ལས་འཕེལ་བའི་ཕྱིར་དར་མའི་དཔེས་སྟོན། འདི་ནི་དོན་དམ་བསྡུས་པ་སོགས་འགྲེལ་པ་རྣམས་ལས་བཤད་པའི་ལུགས་ཡིན་ལ། གསང་བར་སྤྲོས་པ་ནི། སློབ་དཔོན་གྱི་བྱང་ཆུབ་ཀྱི་སེམས་གསང་བའི་རྩ་འཁོར་ཕན་ཆད་དུ་སྤྲོས་པ་སློབ་མའི་ཁར་དབབ་པ་དང༌། གསང་བར་ནི་ཞེས་པས་ཤེས་རབ་མའི་གསང་བའི་དཀྱིལ་འཁོར་དུ་ཞེས་པ་སྟེ། དེ་ལྟར་ན་ཐབས་ཀྱི་བྱང་སེམས་དང༌། ཤེས་རབ་མའི་བྷ་གའི་དཀྱིལ་འཁོར་བལྟས་པ་ལས། སྔ་མ་བུམ་དབང་ལས་ཡུན་རིང་བའི་བདེ་བ་ཐོབ་པ་གསང་དབང་ངོ་ཞེས་བཤད་ན། གཞུང་དོན་དཔྱིས་ཕྱིན་པར་འགྱུར་རོ་སྙམ་པ་ནི་ཁོ་བོའི་རྣམ་པར་རྟོག་པའོ། །དེ་བཞིན་དུ་སློབ་དཔོན་གྱི་སློབ་མ་ལ་ཤེས་རབ་མ་གཏད་པ་ལས། ལག་བཅངས་དང༌། སྙོམས་འཇུག་གི་སྤྱོད་པས་བྱང་ཆུབ་ཀྱི་
སེམས་སྙིང་ག་ནས་གསང་བའི་བར་དུ་སྐུ་གསུང་ཐུགས་དང་ཡེ་ཤེས་ཀྱི་དགའ་བྲལ་བཞི་དང༌། གསང་བ་ནས་ནོར་བུའི་བར་དུ། སྐུ་གསུང་ཐུགས་དང་ཡེ་ཤེས་ཀྱི་ལྷན་སྐྱེས་བཞིའོ། །ནོར་བུའི་རྩེ་མོར་གཡོ་ཞིང་བྱོན་པའི་བདེ་བ་ནི་ཤེས་རབ་ཡེ་ཤེས་ཀྱི་དབང་གི་ཡེ་ཤེས་ཏེ། སྔ་མ་གཉིས་ཀ་ལས་ཡུན་རིང་ཞིང༌། ཁྱད་པར་དུ་གྱུར་ལ་མཐར་མི་བརྟན་པའི་ཕྱིར་རྒན་པོའོ། །དེ་དག་ཐམས་ཅད་ལ་གཡོ་བའི་བགྲོད་པ་ཞེས་གསུངས་པ་ནི། མི་བརྟན་པ་དང༌། འགྱུར་བདེའི་རང་བཞིན་ཅན་དུ་དགོངས་པ་ཡིན་ལ། བགྲོད་པ་ཞེས་པ་ནི་འགྲོ་བའི་དོན་ནོ། །ཡུན་རིང་ཞེས་པས་མཐར་འཇིག་ཀྱང་སྔ་མ་ལས་ཡུན་རིང་ཞེས་བསྟན་པས། འོག་ཏུ་འཆད་པ་བཞི་པའི་ཡེ་ཤེས་ནི། མི་འཇིག་ཅིང་བརྟན་པར་ཡང་ཤུགས་ལ་བསྟན་ཏོ། །འཇིག་རྟེན་ལས་འདས་པའི་དབང་བཞི་པ་ནི། ལས་དང་ཡེ་ཤེས་ཀྱིས་ཕྱག་རྒྱ་དང༌། རྣམ་པར་རྟོག་པའི་སྒོམ་པ་ལས་འབྱུང་བ་མ་ཡིན་ཏེ། སྟོང་གཟུགས་ཕྱག་རྒྱ་ཆེན་མོ་ལ་རྗེས་སུ་ཆགས་པ་ལས། བྱང་ཆུབ་ཀྱི་སེམས་བཅིངས་ཤིང་བཟློག་པར་འགྱུར་ལ། དེ་ལས་སྐྱེས་པ་སྟེ་མངོན་དུ་གྱུར་པའི་བདེ་བ་གཡོ་བ་མེད་པ་ནི། ཤེས་རབ་མ་ཆེན་པོ་སྟོང་གཟུགས་ཕྱག་རྒྱ་ཆེན་མོས་དབང་བསྐུར་བ་སྟེ། འཇིག་རྟེན་ལས་འདས་པའི་དབང་བཞི་པ་བསྐུར་བ། མི་འགྱུར་བའི་ཡེ་ཤེས་སོ། །དེ་ལྟར་ན་ཕྱག་རྒྱ་ཆེན་པོའི་ཐབས་གང་ལས། ཐིག་ལེ་གཡོ་མེད་མི་འགྱུར་བའི་བདེ་བ་རྟོགས་པ་དེ་ནི་སྐྱེ་དགུའི་བདག་པོ་ཞེས་བྱ་བར་རྣམ་པར་ཤེས་པར་བྱ་སྟེ། འཇིག་རྟེན་དུ་ཡང་བུ་དང་ཚ་བོ་ལ་སོགས་པའི་རིགས་བརྒྱུད་དཔག་ཏུ་མེད་པ་གང་ལས་བྱུང་བའི་གཞི། ཡང་མེས་དེ་ནི་སྐྱེ་དགུའི་བདག་པོ་ཞེས་གྲགས་ཏེ། མུ་སྟེགས་བྱེད་དག་ཚངས་པ་ལ་སོགས་པ་བྱེད་པོ་དག་ནི་འཇིག་རྟེན་ཐམས་ཅད་སྤྲུལ་པར་བྱེད་ཅིང༌། མཐར་དེ་ཉིད་དུ་ཐིམ་པར་བྱེད་པ་ནི་སྐྱེ་དགུའི་བདག་པོའོ་ཞེས་འདོད་དོ། །དེ་བཞིན་དུ་མི་འགྱུར་བའི་བདེ་བ་དེ་ནི་ཆོས་ཉིད་ཀྱིས་རབ་ཏུ་ཕྱེ་བའི་ཕྱིར་དང༌། ཆོས་ཉིད་
ནི་འཁོར་འདས་ཐམས་ཅད་ཀྱི་གཞིའི་ཕྱིར་རོ། །སྐྱོབ་པ་ནི་སངས་རྒྱས་ཡིན་ལ། དེ་ཡང་ཆོས་ཉིད་རྟོགས་པས་རབ་ཏུ་ཕྱེ་བའི་ཕྱིར། སངས་རྒྱས་ཐམས་ཅད་སྐྱེད་པར་མཛད་པ་པོ་ཡིན་པ་དང༌། ཡང་ན་སྐྱོབ་པ་སྟེ་སངས་རྒྱས་ཀྱི་བརྡས་ལྷ་སུམ་ཅུ་རྩ་དྲུག་གི་རྣམ་པར་དག་པ་ཅན་ཕུང་ཁམས་སུམ་ཅུ་རྩ་དྲུག་ཡིན་ལ། དེ་ཡང་ཕུང་ཁམས་མ་དག་པ་རྣམས་སྦྱངས་ནས། རྣམ་པར་དག་པའི་ཕུང་ཁམས་བསྐྱེད་པར་བྱེད་དོ། །མི་འགྱུར་བའི་བདེ་བ་བྱང་ཆུབ་གྱི་སེམས་ནོར་བུ་ནས་གཙུག་ཏོར་གྱི་བར་ཏུ་བརྟན་པ་གང་ཡིན་པ་དེ་ནི། འབྲས་བུ་སྐུ་བཞི་ལམ་དུ་བྱེད་པས་ལམ་གྱི་སྐུ་བཞི་ཡིན་ཏེ། རྡོ་རྗེ་སེམས་དཔའ་ལྷན་ཅིག་སྐྱེས་པའི་སྐུ་དང་བྱང་ཆུབ་སེམས་དཔའ་ཆོས་སྐུ་དང༌། སེམས་དཔའ་ཆེན་པོ་ལོངས་སྐུ་དང༌། དམ་ཚིག་སེམས་དཔལ་སྤྲུལ་སྐུ་སྟེ། བྱང་ཆུབ་ཀྱི་སེམས་ལྟེ་བ་དང༌། སྙིང་ག་དང༌། མགྲིན་པ་དང༌། གཙུག་ཏོར་དུ་བརྟན་པས་མས་བརྟན་པའི་དགའ་བ་བཞི་དང༌། སྐད་ཅིག་མ་བཞི་དང༌། འབྲས་བུ་བཞི་ཐོབ་པ་ལ་སྦྱར་ཞིང༌། ཐམས་ཅད་ཀྱང་བདེ་སྟོང་གཉིས་སུ་མེད་པ་ཐིག་ལེ་མི་འགྱུར་བའི་ཡེ་ཤེས་སོ། །དེ་དག་ཡེ་ཤེས་དང༌། ཐུགས་དང༌། གསུང་དང༌། སྐུ་རྡོ་རྗེའི་རྣལ་འབྱོར་རྣམ་པ་བཞི་ཡང་ཡིན་ཏེ། དབང་བཞི་པའི་ཡེ་ཤེས་དུས་ཀྱི་འཁོར་ལོའི་རྒྱུད་འདིར་བཤད་པ་ནི། རྣལ་འབྱོར་པ་སྟེ་སངས་རྒྱས་བྱང་ཆུབ་སེམས་དཔའ་རྣམས་ཀྱི་ཐར་པ་ཟུང་འཇུག་མཆོག་ཏུ་མི་འགྱུར་བ་སྟེར་བར་བྱེད་པའོ། །དེས་ན་རྡོ་རྗེ་སེམས་དཔའ་སེམས་དཔའ་ཆེ། བྱང་སེམས་ཞེས་གོ་རིམ་དེ་ལྟར་གསུངས་པ་ནི་སྡེབ་སྦྱོར་གྱི་དབང་ལས་ཏེ། དོན་དུ་ནི་གོ་རིམ་གོང་དུ་བཤད་པ་ཉིད་དོ། །འདིར་འགྲེལ་ཆེན་དོན་དམ་བསྡུས་པ་རྗེས་འབྲང་དང་བཅས་པ་ལས་ནི། གསང་ལྟེ་སྙིང་མགྲིན་བཞི་ལ་སེམས་དཔའ་བཞི་དང༌། དཔྲལ་པར་རྡོ་རྗེའི་རྣལ་འབྱོར་བཞི། གཙུག་ཏོར་དུ་དུས་ཀྱི་འཁོར་ལོ་ཞེས་འཁོར་དྲུག་ལ་སེམས་དཔའ་དྲུག་སྦྱོར་ཏེ། སྐབས་འདིའི་གཞུང་གི་ཚིག་དོན་ལ་ཞུགས་པར་མི་སྣང་ངོ༌། །དེ་ལ་རྒྱུད་ཀྱི་རྒྱལ་པོ་འདིར་ཆུ་དབང་སོགས་ལ། བྱིས་
འཇུག་གི་དབང་ཞེས་བརྗོད་ཀྱི་རྡོ་རྗེ་སློབ་དཔོན་གྱི་དབང་དང་བུམ་དབང་གི་ཐ་སྙད་མི་མཛད་དོ། །བུམ་དབང་ནི་རྣམ་པ་ཀུན་ཏུ་དབང་གོང་མ་ཡིན་ལ། དེ་རྒྱུད་འདིར་རྡོ་རྗེ་སློབ་དཔོན་གྱི་དབང་དུ་མི་འཇོག་ཀྱང་ཕྱིར་མི་ལྡོག་པའི་དབང་དུ་ནི་བྱེད་དགོས་པ་ཡིན་ནོ། །དེས་ན་དབང་ལ་དབྱེ་ན་བྱིས་འཇུག་དང་དབང་གོང་མ་གཉིས་སོ། །དེ་ལ་དབྱེ་ན། །གང་ལ་བསྐུར་བའི་ཡུལ་གྱི་སྒོ་ནས་སློབ་དཔོན་གྱི་དབང་དང༌། སློབ་མའི་དབང་ངོ༌། །ཡེ་ཤེས་མཆོག་དམན་གྱི་དབྱེ་བས། འཇིག་རྟེན་པ་དང་འཇིག་རྟེན་ལས་འདས་པ་གཉིས་སོ། །དེ་ཡང་དཔལ་དྲི་མ་མེད་པའི་འོད་ལས། འདིར་དབང་གོང་མ་ནི་རྣམ་པ་གཉིས་ཏེ། གཅིག་ནི་སེམས་ཅན་གཞུག་པའི་དོན་དང༌། ལམ་ཡོངས་སུ་ཤེས་པའི་དོན་དང༌། རྒྱུད་ཉན་པ་ལ་དབང་བའི་དོན་དུའོ། །གཞན་ནི་སློབ་དཔོན་ཆེན་པོའི་གནས་སྦྱིན་པ་དང༌། སྟོན་པ་པོ་བྱེད་པའི་སླད་དུའོ། །ཞེས་གསུངས་ཏེ། རང་ཉིད་སྒོམ་པ་དང་རྒྱུད་ཉན་པ་ལ་དབང་བའི་དོན་དུའོ་སློབ་མའི་དབང་བསྐུར་བ་ལ། ཤེས་རབ་ཀྱི་ནུ་མ་ལ་རེག་པའི་བུམ་དབང་དང༌། བྱང་ཆུབ་ཀྱི་སེམས་མྱང་ཞིང་བྷ་གའི་དཀྱིལ་འཁོར་ལྟ་བའི་གསང་དབང་དང་རིགས་དྲུག་གི་སྦྱང་པ་བྱས་པའི་རིག་མ་གཏད་དེ་གཉིས་སྦྱོར་གྱི་བདེ་བ་སྒོམ་པའི་ཤེར་དབང་རྣམས་ངེས་པར་སྦྱིན་པར་བྱ་བ་ལ་རྩོད་པ་མེད་ལ། ཁ་ཅིག་འཇིག་རྟེན་ལས་འདས་པའི་དབང་བཞི་པ་མི་སྦྱིན་པར། ཤེར་དབང་གི་ནང་ཚན་འཇིག་རྟེན་པའི་དབང་བཞི་པ་དེ་ཉིད་ལོགས་སུ་བགྲངས་ནས། སློབ་མའི་དབང་གོང་མར་གྱུར་པ་བཞིའོ་ཞེས་འདོད་པ་ནི་མི་འཐད་དེ། འཇིག་རྟེན་ལས་འདས་པའི་དབང་བཞི་པའི་ཚིག་དབང་ཙམ་ཡང་མ་ཐོབ་པར། དབང་དེའི་ལམ་སྒོམ་དུ་རུང་བ་དང༌། འདས་པའི་ལམ་སྟོན་བྱེད་ཀྱི་རྒྱུད་ཚིག་རྣམས་ཉན་དུ་རུང་བར་ཐལ་བའི་ཕྱིར། དགོས་པའི་སྒོ་ནས་མི་འཐད་ལ། དབང་དང་པོ་གསུམ་ལ་གསོལ་གདབ་དང་ང་རྒྱལ་འཛིན་པ་ཡོད་ལ། བཞི་པ་ལ་མི་བྱེད་པའི་ལག་ལེན་ཡང་མི་འཐད་ཅིང༌། དང་པོ་གཉིས་སོ་སོར་བྱེད་ཅིང་ཕྱི་མ་གཉིས་གཅིག་ཏུ་
སྡོམ་པ་ཡང་མི་འཐད་པའི་ཕྱིར་རོ། །དེས་ན་བསྡུས་རྒྱུད་ལས། དབང་བདུན་རྣམས་ཀྱིས་མངོན་པར་དབང་བསྐུར་དགེ་བའི་དབང་གིས་ས་བདུན་གྱི་ནི་དབང་ཕྱུག་ཉིད་དུ་འགྱུར། །བུམ་པ་གསང་བས་དབང་བསྐུར་སླར་ཡང་ཕྱིར་མི་ལྡོག་པ་སོགས་སུ་ངེས་པར་རབ་ཏུ་འཇུག །ཤེས་རབ་ཡེ་ཤེས་དག་གིས་མངོན་པར་དབང་བསྐུར་སྲིད་པའི་འཇིགས་པ་འཇོམས་པའི་འཇམ་དབྱངས་ཉིད་དུ་འགྱུར། །ཞེས་ཤེས་རབ་ཡེ་ཤེས་དག་ཅེས་པས་འཇིག་རྟེན་འཇིག་རྟེན་འདས་པ་གཉིས་བསྟན་པར་འགྱུར་ལ། དབང་བདུན་གྱི་ཕྲེང་ཆགས་སུ་དག་པའི་རིམ་པ་གཅིག་གིས་བསྟན་པའི་ཕྱིར། སློབ་མའི་དབང་ཁོ་ན་ཡིན་པར་འགྱུར་རོ། །གཞན་དུ་ན་འཇིག་རྟེན་པའི་དབང་གསུམ་པ་དང་བཞི་པ་སོ་སོར་བགྲངས་ཀྱང་འཇིག་རྟེན་པའི་ཤེས་རབ་ཡེ་ཤེས་ཁོ་ནར་རིམ་པ་གཅིག་པའི་ཕྱིར། ཤེས་རབ་ཡེ་ཤེས་རིམ་པ་གཉིས་སུ་མི་འགྱུར་རོ། །འོ་ན་དཔལ་ལྡན་ཤེས་རབ་ནུ་མ་ལ་ཡང་དང་པོར་རེག་པ་གང་ཡིན་བུམ་པའི་དབང་ནི་དེ་ཉིད་དོ། །གསང་བ་དག་ལས་རི་བོང་འཛིན་པ་མྱང་བ་དང་ནི་བལྟ་བ་དག་གི་གསང་བའི་དབང་དུ་འགྱུར། །ཤེས་རབ་ཡེ་ཤེས་དབང་ལ་མཐའ་དག་རྒྱལ་བའི་རིགས་ཀྱི་ཡན་ལག་ཞལ་གྱིས་སྦྱང་བ་བྱས་ནས་ནི། །རྒྱལ་བ་དག་ཀྱང་འདིར་ནི་བླ་མས་དབང་པོར་བྱས་ནས་སློབ་མ་ལ་ནི་ཕྱག་རྒྱ་སྦྱིན་པར་བྱ། །ཞེས་པའི་ཚིགས་བཅད་འདིས་སློབ་མའི་དབང་བསྟན་ཞིང་འདིར་འཇིག་རྟེན་ལས་འདས་པའི་བཞི་པ་མ་གསུངས་ལ། རྒྱན་རྣམས་ཐམས་ཅད་དང་ལྡན་ཞུན་མའི་གསེར་དང་མཚུངས་ཤིང་བཅུ་གཉིས་ལོ་ལོན་མཛེས་པའི་བུ་མོ་ནི། །ཁྲག་དང་ལྡན་ལ་ཤེས་རབ་ཐབས་ཀྱི་བདག་ཉིད་དག་གིས་རང་གི་རྡོ་རྗེ་ནོར་བུས་འདོད་སྤྱད་ནས། །ས་བོན་དང་བཅས་རྡོ་རྗེ་དག་ཀྱང་སློབ་མ་དག་པར་ཤེས་ནས་ཁ་རུ་འཕང་པ་བྱས་ནས་ནི། །ཕྱི་ནས་རང་གི་ཕྱག་རྒྱ་སྦྱིན་བྱ་དེ་ནས་སླར་ཡང་གཞན་ནི་དུ་བའི་ལམ་སོགས་ལྡན་པའོ། །ཞེས་རྡོ་རྗེ་སློབ་དཔོན་གྱི་དབང་ལ་དུ་བའི་ལམ་སོགས་འཇིག་རྟེན་འདས་པའི་དབང་གསུངས་པས་ཁྱད་
པར་གསལ་པོར་ཕྱེ་བ་མ་ཡིན་ནམ་སྙམ་ན་མ་ཡིན་ཏེ་ཚིགས་བཅད་དང་པོ་ཡང༌། ཕྱག་རྒྱ་དར་དཔྱངས་ཅོད་པན་དག་དང་རྡོ་རྗེ་མཆོད་ཕྱིར་ཐོགས་ནི་བླ་མ་མཆོག་གིས་སྦྱིན་པར་བྱ། །དེ་རྣམས་སློབ་དཔོན་སླད་དུ་རང་གི་རྒྱལ་བའི་རིགས་ཀྱི་དབང་གིས་ཕྱག་རྒྱ་རྣམ་པར་དག་པ་ཉིད། །ཅེས་གསུངས་པའི་འཕྲོས་འཆང་བ་ཡིན་པས་ན་སློབ་དཔོན་སླད་དུ་ཞེས་སློབ་དཔོན་གྱི་དབང་གི་སྐབས་ཉིད་དུ་འབྲེལ་བས། དངོས་ནི་སློབ་དཔོན་གྱི་དབང་ཉིད་ཡིན་ལ། ཆོ་ག་ནི་སློབ་མའི་དབང་དང་ཡང་ཕལ་ཆེར་འདྲ་བས་ཐུན་མོང་དུ་བསྟན་པ་ཉིད་དོ། །དེས་ན་ཚིགས་བཅད་འོག་མར་དུ་བའི་ལམ་སོགས་བསྟན་པས་ཚིག་བཅད་སྔ་མའི་གཞུག་ཏུ་ཡང་ཁ་འགེངས་དགོས་པ་ཡིན་ནོ། རང་ལུགས་ནི། སློབ་མའི་དབང་གི་སྐབས་སུ་ཟབ་ལམ་ཉན་པ་དང་སྒོམ་དུ་རུང་བའི་དོན་དུ་འཇིག་རྟེན་ལས་འདས་པའི་དབང་བཞི་པ་སྦྱིན་དགོས་ཤིང༌། རྡོ་རྗེ་སློབ་དཔོན་གྱི་དབང་ཡང་ནང་ཚན་དུ་ཕྱེ་ན་གཉིས་སུ་འགྱུར་ཏེ། བདག་པོའི་དབང་དང་བདག་པོ་ཆེན་པོའི་དབང་ངོ༌། །དང་པོ་ནི་དབང་སྟེགས་སོགས་བཅས་ནས་ཕྱག་རྒྱ་དར་དཔྱངས་ཅོད་པན་སོགས་སྔོན་དུ་འགྲོ་བས། དབང་བཞི་བསྐུར་བ་སྟེ་དཔལ་ལྡན་ཤེས་རབ་ལྡན་ནུ་མ་སོགས་ཀྱིས་བསྟན་ཏོ། །གཉིས་པ་བདག་པོ་ཆེན་པོའི་དབང་ནི་རིག་མ་བཅུའི་དཀྱིལ་འཁོར་དང་བཅས་ཏེ། ཆོ་གའི་ཁྱད་པར་སྔ་མ་གཉིས་དང་ཅུང་ཟད་མི་འདྲ་བས་དབང་བཞི་བསྐུར་བ་ནི། རྒྱན་རྣམས་ཐམས་ཅད་དང་ལྡན་སོགས་ཀྱིས་བསྟན་ཏོ། །ཕྱི་མ་འདི་ནི་རིག་པའི་བརྟུལ་ཞུགས་དང་འབྲེལ་བའི་དབང་བསྐུར་བ་ཡིན་པར་གསལ་ལ། འགའ་ཞིག་དབང་གོང་མ་རྣམ་པ་གཉིས་ཞེས་གསུངས་པས། སློབ་དཔོན་གྱི་དབང་ལ་དབྱེ་བ་གཉིས་མེད་པར་འདོད་པ་དང༌། ཁ་ཅིག་གོང་མ་ཆེན་མོ་སྟོན་པའི་ཚིག་རྣམས་ཀྱིས་བརྟུལ་ཞུགས་ཀྱི་སྤྱོད་པའི་དབང་ཁོ་ན་བསྟན་པའི་ཕྱིར། གནས་སྐབས་དེ་མ་ཐོབ་པར་བྱེད་པ་མི་འཐད་ལ། དེ་ལས་གཞན་པའི་སློབ་དཔོན་གྱི་དབང་ལ། ཕྱག་རྒྱ་དྲུག་སོགས་བྱིན་
ནས་སློབ་དཔོན་གྱི་གནས་སུ་གནང་བ་སྦྱིན་པ་ཡིན་གྱི། དབང་བཞི་བལྡབས་ཏེ་བསྐུར་མི་དགོས་སོ་སྙམ་པ་དང༌། འགའ་ཞིག་རིག་མ་གཅིག་ལ་བརྟེན་པའི་དབང་གསུམ་ལ་གོང་ཆུང་དང༌། བཅུ་ལ་བརྟེན་པའི་དབང་བཞི་ཀ་ལ་གོང་ཆེན་ཟེར་ཞིང༌། སློབ་དཔོན་ཆེན་པོའི་དབང་ཡིན་པར་འདོད་བཞིན་དུ་བདག་པོ་ཆེན་པོར་མི་འདོད་པ་དང༌། ཕྱག་རྒྱ་དར་དཔྱངས་སོགས་ཁོ་ན་བདག་པོ་ཆེན་པོར་བྱེད་པ་རྣམས་ནི། དྲི་མེད་འོད་ཉིད་དང་འགལ་ཞིང༌། རིག་པའི་གནོད་བྱེད་ཀྱང་ཡོད་མོད་ཀྱི་འདིར་མ་སྨོས་སོ། །ཡང་རྒྱུད་ལས་འདི་སྐད་ཅེས། འདིར་ནི་དབང་བསྐུར་རྣམ་པ་གཉིས་ཀྱང་བུའི་ཡོན་ཏན་དབང་གིས་འཇིག་རྟེན་འཇིག་རྟེན་འདས་པའོ། །གང་ཞིག་ཤེས་རབ་ཀྱི་ནི་ནུ་མ་ལ་རེག་གཞན་པ་བདུད་རྩི་མྱང་དང་འཁྱུད་པ་གང་ཡིན་པ། །ཤེས་རབ་དང་འགྲོགས་བྱང་ཆུབ་སེམས་ནི་ཞུ་བ་དག་ལ་བཞི་པའི་སྐད་ཅིག་བདུད་རྩི་རྟོགས་པ་གང༌། །འདི་དག་ཐམས་ཅད་ངེས་པར་འཇིག་རྟེན་པ་སྟེ་མཆོག་གི་སྙིང་རྗེ་ཡིས་ནི་ལམ་གྱི་རྒྱུ་རུ་བསྟན། །འཇིག་རྟེན་འདས་པའི་དབང་གང་མཆོག་གི་རྒྱལ་བའི་བདག་པོའི་ཕྱག་རྒྱ་མཆོག་ལ་རྗེས་སུ་སྦྱོར་བའོ། །ཞེས་གསུངས་ཏེ། སློབ་མའི་དབང་དང༌། བདག་པོའི་དབང་དང༌། བདག་པོ་ཆེན་པོའི་དབང་གསུམ་གང་ལ་ཡིན་ཡང་རུང་སྟེ། ཏིང་ངེ་འཛིན་གྱི་ཡན་ལག་མ་ཐོབ་པ་ལ་སྦྱིན་ན་དབང་དང་པོ་གསུམ་ནི་འཇིག་རྟེན་པ་དང༌། བཞི་པ་ནི་འཇིག་རྟེན་ལས་འདས་པའོ། །ཏིང་ངེ་འཛིན་ཐོབ་པ་ལ། དེ་དག་གང་སྦྱིན་ཡང་འཇིག་རྟེན་ལས་འདས་པར་འགྱུར་མོད་ཀྱི། སློབ་མ་དང༌། བདག་པོའི་དབང་སྦྱིན་མི་དགོས་པས། བདག་པོ་ཆེན་པོ་ཁོ་ན་རིག་པའི་བརྟུལ་ཞུགས་ཀྱི་དོན་དུ་སྦྱིན་པར་བྱས་ལ། གནས་སྐབས་དེར་ནི་མི་འགྱུར་བའི་བདེ་བ་ཁོ་ནའི་རྣམ་རོལ་ཏུ་འཆར་བའི་ཕྱིར། དབང་བཞི་ཀ་འཇིག་རྟེན་ལས་འདས་པའོ། །འཇིག་རྟེན་པའི་དབང་རྣམས་ལ་ནི་དབང་གོང་མ་ཆུང་ངུ་ཞེས་བརྗོད་ལ། འཇིག་རྟེན་ལས་འདས་པའི་དབང་རྣམས་
ནི་དབང་གོང་མ་ཆེན་པོའོ། །བཞི་པ་དང་ཤེས་རབ་ཡེ་ཤེས་ཀྱི་རབ་དབྱེ་ནི། ཤེས་རབ་ཡེ་ཤེས་ལ་འཇིག་རྟེན་པ་དང་འཇིག་རྟེན་ལས་འདས་པ་གཉིས་ཏེ། དབང་བཞིའི་ཟླས་ཕྱེ་བའི་གསུམ་པ་དང་བཞི་པ་གཉིས་སོ། །འཇིག་རྟེན་པའི་ཤེས་རབ་ཡེ་ཤེས་ལ། ལག་བཅངས་ལས་ཐོབ་པ་འཇིག་རྟེན་པའི་དབང་གསུམ་པ་དང༌། གཉིས་གཉིས་ལས་ཐོབ་པ་འཇིག་རྟེན་པའི་དབང་བཞི་པ་གཉིས་སུ་དབྱེ་ལ། འཇིག་རྟེན་ལས་འདས་པའི་ཤེས་རབ་ཡེ་ཤེས་དང༌། ཤེས་རབ་ཡེ་ཤེས་ཆེན་པོ་དང༌། འཇིག་རྟེན་ལས་འདས་པའི་དབང་བཞི་པ་རྣམས་དོན་གཅིག་གོ །འོ་ན་གཞུང་འདིའི་དངོས་བསྟན་ལས་གསུངས་པའི་དབང་བཞི་པོ་འདི་སློབ་མའམ་སློབ་དཔོན་གྱི་དབང་གང་ཡིན་ཞེ་ན། དབང་བཞི་ཚན་གསུམ་པོ་ཐམས་ཅད་ཀྱི་སྤྱི་ཐུན་མོང་གི་མཚན་ཉིད་ནས་བསྟན་པ་ཡིན་ཏེ། དེ་གསུམ་ཀ་ཆོ་གའི་ཡན་ལག་རྒྱས་བསྡུས་མ་གཏོགས་སྤྱིའི་མཚན་ཉིད་འདྲ་བའི་ཕྱིར་རོ། །མཁས་པ་འགའ་ཞིག་རྒྱུད་འདི་དང་ཕྱག་རྡོར་སྟོད་འགྲེལ་ལས། གསང་དབང་གི་ཡེ་ཤེས་ནི་སློབ་མའི་རྡོ་རྗེ་ཤེས་རབ་ཀྱི་པདྨར་ཅུང་ཟད་སྐྱོད་པས་དཔྲལ་པ་ནས་མགྲིན་པར་ཞུ་བའི་བདེ་བ་ལ་བཤད་ཅིང༌། བསྡུས་རྒྱུད་རྩ་འགྲེལ་སོགས་ལས། བྱང་ཆུབ་ཀྱི་སེམས་མྱངས་ཤིང་བྷ་གར་བལྟ་བ་ལ་བཤད་པས་ཕན་ཚུན་ཁ་བསྐངས་ནས་གཉིས་ཀར་ཚང་བ་དགོས་སོ་ཞེས་འཆད་མོད་ཀྱང༌། གཞུང་འདིས་ཇི་ལྟར་བསྟན་ཚུལ་ནི་གོང་དུ་བཤད་པ་ལྟར་ཡིན་ལ། སྟོད་འགྲེལ་གྱི་དགོངས་པ་ཅི་ཡིན་བརྟག་པར་བྱ་བ་ཉིད་དེ། གལ་ཏེ་དེ་ལྟར་ཡིན་དུ་ཟིན་ཀྱང༌། དཔྲལ་བའི་བྱང་ཆུབ་ཀྱི་སེམས་མགྲིན་པར་འོངས་པའི་མཆོག་དགའ་ཞིག་ལ། ངེས་པར་གསང་དབང་དུ་ངོ་སྤྲོད་དགོས་པ་ཡིན་གྱི། ཕན་ཚུན་ཁ་འགེངས་དགོངས་པ་མ་ཡིན་ཏེ། སོ་སོར་བཤད་ལུགས་བཞིན་དུ་བྱའོ། །དཔེར་ན་དགྱེས་རྡོར་དུ་སློབ་དཔོན་གྱི་མིང་གིས་བསྟན་པ་བུམ་དབང་སྟེ། དགོད་པ་དག་པ་སློབ་དཔོན་ཉིད་ཅེས་གསུངས་པ་དང་འདིར་ནུ་མ་ལ་རེག་པ་དང༌། འཕགས་ཡུལ་གྱི་དཀྱིལ་ཆོག་མང་པོར་འཁྱུད་པ་ལ་བཤད་པ་སོགས་ཡོད་ཀྱང༌།
དབང་ནི་བཞི་ཡི་གྲངས་ཉིད་ཀྱིས། །དགའ་བ་ལ་སོགས་རིམ་ཤེས་བྱ། །ཞེས་པའི་དགོངས་དོན་ལ་མཐུན་པ་བཞིན་ནོ། །སྐབས་འདིར་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་མ་སྦྱར་ན། སྤྱི་ལྡོག་ནས་དབང་བཞིའི་ཡ་གྱལ་གྱི་ཤེས་རབ་ཡེ་ཤེས་ནི་འཇིག་རྟེན་པ་དང༌། བཞི་པ་ནི་འཇིག་རྟེན་ལས་འདས་པ་ཁོ་ན་ལ་བཟུང་བར་བྱའོ། །གཞན་ཡང་འདི་དག་ལ་མང་དུ་བཤད་པ་བྱར་ཡོད་མོད་ཀྱི། སྤྲོས་པས་ཆོག་གོ། །།འདིར་སྨྲས་པ། མཁས་མིན་སྐྱེ་བོས་བྱས་པའི་བཤད་པ་རྣམས། །ཉེས་བཤད་སྒྱུ་མས་གཞུང་བཟང་མུན་པར་སྤྲུལ། །ངེས་གསང་སྐྱ་རེངས་བུ་ཡི་རོལ་སྒེག་འདིས། །སྐལ་བཟང་དོན་མཐུན་ཚོགས་ལ་སྣང་བ་སྦྱིན། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །གསུམ་པ་མཆོག་གི་དངོས་གྲུབ་སྒྲུབ་པའི་ཐབས་རྒྱས་པར་བཤད་པ་དང༌། རྡོ་རྗེ་བཞི་སྒྲུབ་པའི་ཐབས་རྒྱས་པར་བསྟན་པ་དང༌། གྲུབ་པ་འབྲས་བུའི་རྣམ་གཞག་ཞིབ་མོར་བསྟན་པའོ། །དང་པོ་ལ། སྐུ་རྡོ་རྗེའི་སྒྲུབ་པ་དང༌། གསུང་རྡོ་རྗེའི་སྒྲུབ་པ་དང༌། ཐུགས་རྡོ་རྗེའི་སྒྲུབ་པ་དང༌། ཡེ་ཤེས་རྡོ་རྗེའི་སྒྲུབ་པའོ། །དང་པོ་ལ་སྒྲུབ་བྱ་སྟོང་གཟུགས་ཀྱི་རབ་དབྱེ་དང༌། སྒྲུབ་བྱེད་སོར་བསམ་གྱི་རྣལ་འབྱོར། སྟོང་གཟུགས་ཀྱི་རྣལ་འབྱོར་ལ་
དོགས་པ ་བཅད་པའོ། །དང་པོ་ནི། འདི་ཉིད་ཀྱིས་ནི་སྒྲུབ་བྱེད་བྱ། །སྣང་བརྙན་བསམ་པ་མ་ཡིན་པའི། །དུ་སོགས་མཚན་མ་དེ་རྣམས་ཀྱིས། །ཤེས་རབ་གཟུགས་བརྙན་ནམ་མཁའ་མཉམ། །ཡོད་དང་མེད་ལས་རྣམ་པར་འདས། །རང་གི་སེམས་ཀྱི་རྐྱེན་གྱི་དོན། །རྡུལ་ཕྲན་ལས་སྐྱེས་ཚོགས་པ་རྣམས། །ཀུན་ནས་ཡོངས་སུ་དོར་བ་ཡིས། །དུ་བ་སྨིག་སྒྱུ་མཁའ་སྣང་དང༌། །སྒྲོན་མེ་འབར་བ་ཟླ་ཉི་མ། །མུན་ཅན་ཆ་དང་ཐིག་ལེ་ཆེ། །སྣ་ཚོགས་གཟུགས་བརྙན་འོད་གསལ་བའོ། །ཞེས་ཏེ། དུ་བ་ལ་སོགས་པ་རྟགས་བཅུའི་རང་བཞིན་གྱི་མཚན་མ་དེ་རྣམས་ཀྱིས། ཐར་པ་མཆོག་འདི་ཉིད་ཀྱི་སྒྲིབ་བྱེད་དེ་སྒྲུབ་པའི་ཐབས་སྒོམ་པར་བྱའོ། །མཚན་མ་དེའི་རང་བཞིན་གང་ཞེ་ན། རྣམ་རྟོག་གི་བསམ་པས་
བསྐྱེད་པ་མ་ཡིན་པའི་སྣང་བརྙན་སྣ་ཚོགས་པ་སྟེ། རབ་གསལ་བསམ་གྱིས་མི་ཁྱབ་པའི། །ཞེས་བསྒྱུར་བ་ལྟར་ན། ཤིན་ཏུ་གསལ་བར་སྣང་བའི་ཕྱིར་རབ་གསལ་དང༌། རྣམ་རྟོག་ཞི་བའི་བསམ་གྱི་མི་ཁྱབ་པའོ། །འོན་ཀྱང་འབྲོ་འགྱུར་ལས། མ་བསམ་པའི་སྣང་བ་དེ་ཞེས་པར་བསྒྱུར་བ་གོ་བདེའོ། །འོ་ན་མཚན་མར་བཤད་པས། དུ་བ་ལ་སོགས་པའི་རྟགས་རྣམས་ལམ་དངོས་ཀྱང་མིན་ན། ཆོས་ཉིད་ལྟ་སྨོས་ཀྱང་ཅི་དགོས་ཞེས་ཁ་ཅིག་གི་བསམ་པ་ལ་འབྱུང་མོད་ཀྱི། འོན་ཀྱང་འདི་ནི་གསེར་གྱི་མཆོད་སྡོང་ས་འོག་ཏུ་བྱང་བའི་རྩེ་མོ་ས་སྟེང་དུ་ཅུང་ཟད་མངོན་པར་ཡོད་ན། མཆོད་སྡོང་གི་རྩེ་མོ་མཐོང་བ་དེ་ནི། མཆོད་སྡོང་ས་འོག་ན་ཡོད་པའི་རྟགས་ཡིན་པ་དང༌། རྒྱང་རིང་པོ་ནས་མེ་འབར་བ་མཐོང་བ་ནི། ཕྱོགས་དེ་ན་མེ་ཡོད་པའི་རྟགས་སམ། དེ་ནས་མེ་བླངས་ན་ཐོབ་པའི་རྟགས་དང་མཚན་མར་འགྱུར་བ་བཞིན་ཡིན་པས། མཚན་མ་ཡང་ཡིན་ལ་ཆོས་ཉིད་ཀྱང་ཡིན་ནོ་ཞེས་སྟོན་པ་ནི་ཤེས་རབ་སོགས་ཏེ། གཟུང་འཛིན་གཉིས་མེད་ཀྱི་ཡེ་ཤེས་ནི་ཤེས་རབ་ཏེ་དེ་ཉིད་གཟུགས་སུ་ཤར་བ་ཞེས་པའི་དོན་ཏེ། གཟུགས་བརྙན་དེ་ཉིད་ནམ་མཁའ་དང་མཉམ་ཞིང་མཚུངས་པར་སྤྲོས་པ་དང་བྲལ་བ། ཡོད་པ་དང་མེད་པའི་ཆོས་ལས་འདས་པ་སྟེ། དངོས་པོ་མ་ཡིན་པས་ཡོད་པ་ལས་འདས་ཤིང༌། དངོས་མེད་མ་ཡིན་པས་མེད་པ་ལས་འདས་པའོ། །དེ་ཡང་ཅང་མེད་མ་ཡིན་ཞིང༌། ཆོས་ཉིད་ཀྱི་གནས་ཚུལ་ལ་གྲུབ་པའི་ཕྱིར། ཡོད་པ་ཡིན་ལ། ཡུལ་དབང་རྣམ་ཤེས་སོགས་གང་ལའང་མི་གནས་ཤིང༌། གཅིག་དང་དུ་མ་དང་ཡུལ་དང་དུས་ཐམས་ཅད་ལས་འདས་པའི་ཕྱིར། རང་བཞིན་མེད་པའང་ཡིན་ནོ། །དེས་ན་ཕྱོགས་གཅིག་ནས་ཡོད་པ་དང་མེད་པར་ཡང་འགྱུར་ལ། ཕྱོགས་ཅིག་ཤོས་ནས་ཡོད་པ་དང་མེད་པ་གཉིས་ཀའང་མིན་པས། སྤྱི་ལྡོག་ནས་ཡོད་མེད་ཐམས་ཅད་ལས་འདས་པ་ཡིན་ནོ། །འདིར་གཟུགས་བརྙན་ཞེས་པས་ཡེ་ཤེས་དངོས་མ་ཡིན་
པར་འགྱུར་ཏེ། བྱད་ཀྱི་གཟུགས་བརྙན་བྱད་མ་ཡིན་པ་བཞིན་ནོ་སྙམ་ན། གཟུགས་བརྙན་ཞེས་པ་རང་དངོས་ཀྱི་གཟུགས་དབྱིབས་དང༌། དངོས་མ་ཡིན་པ་གཟུགས་འདྲ་ལ་འཇུག་པ་གཉིས་ཡོད་དེ། རྒྱ་གར་གྱི་སྐད་དུ་ཡང༌། བིམ་པ་ཞེས་པ་གཟུགས་དབྱིབས་ཀྱི་གཟུགས་བརྙན་དང་པྲ་ཏི་བིམ་པ་ཞེས་ལ་གཟུགས་འདྲའི་གཟུགས་བརྙན་ལ་འཇུག་གོ །འདིར་རྒྱ་སྐད་ལས། པྲཛྙཱ་བི་མ་བཻ་ར་ན་བྷཿས་མཻཿཞེས་འབྱུང་བས། གཟུགས་དབྱིབས་ཀྱི་དོན་ཡིན་གྱི་གཟུགས་འདྲ་མ་ཡིན་ནོ། །རྐྱེན་གྱི་དོན་ཞེས་པ་ལ། རྒྱ་སྐད་པྲ་ཏྱ་ཡཱརྠཻཿཞེས་པ་ཡིད་ཆེས་དོན་ལའང་འཇུག་པས། རང་གི་སེམས་ཉིད་ཀྱི་ངོ་བོ་ཡང་ཡིན་ལ། སེམས་ཀྱི་རང་བཞིན་སངས་རྒྱས་ཀྱི་སྐུ་རྣམ་པ་ཐམས་ཅད་པར་ཡིད་ཆེས་སྐྱེད་པའི་དོན་ནོ། །འདིར་དོན་ཞེས་བྱ་བ་ནི་ཡོངས་གཅོད་དུ་གྲུབ་ཅིང་དངོས་གནས་ལ་ཡོད་པའི་མིང་ཡིན་གྱི། ཕྱི་རོལ་ཀྱི་དོན་ནི་མིན་ཏེ། སེར་པོ་འབར་བ་དང་དུ་བ་ལ་སོགས་པར་སྣང་ཡང༌། རྡུལ་ཕྲན་ལས་སྐྱེས་ཤིང་བྱུང་བའི་ཚོགས་པའི་དངོས་པོ་རྣམས་ནི། ཀུན་ནས་ཡོངས་སུ་དོར་ཞིང་སྤངས་པ་ཉིད་དོ། །དེས་ན་སྟོང་པའི་གཟུགས་ནི་གཟུགས་མ་ཡིན་ལ། སྟོང་པའི་སྒྲ་ཡང་སྒྲ་མ་ཡིན་ཞིང༌། དཀར་པོ་འབར་བ་ཡང་དཀར་པོ་མ་ཡིན་ཞེས་སོགས་སྦྱར་རོ། །འདི་ལ་ལྟ་བ་ལོག་པའི་དབང་དུ་སོང་བ་ཁ་ཅིགདཀར་པོ་མ་ཡིན་པ་དཀར་པོ་དང༌། ས་མ་ཡིན་པ་སར་སྣང་བ་སོགས་ཀྱི་རྒྱུ་མཚན་གྱིས་སྟོང་གཟུགས་ནི་བདེན་པར་མེད་ཅིང་འཁྲུལ་སྣང་ཡིན་པར་གྲུབ་བོ་ཞེས་ཡང་དག་པའི་ཆོས་ལ་བསྐུར་བ་འདེབས་པ་ལྷུར་བྱེད་ཅིང༌། རང་བློ་རྩིང་པོའི་རིག་པ་ལྟར་སྣང་འཆོར་ཆས་སུ་ངོམ་ལ། ཡང་དག་པའི་ཆོས་ཉིད་ལ་སྙིང་ནས་བསྐུར་བ་བཏབ་པས་དམྱལ་བའི་སྡུག་བསྔལ་ཤིན་ཏུ་མི་བཟད་པའི་ཚོགས་རྣམས་སྤུས་ཀྱིས་ཉེ་བར་བྱེད་དོ། །འདིར་མང་དུ་དཔྱད་པ་བྱར་ཡོད་མོད་ཀྱི། །དོན་གྱི་སྙིང་པོ་ནི། དཀར་པོ་འབར་བ་དེ་གནས་ཚུལ་ལ་དོན་དམ་པའི་དཀར་པོ་ཡིན་ལ། ཡེ་ཤེས་ཀྱི་སྣང་ངོར་དོན་
དམ་གྱི་དཀར་པོར་སྣང་ཡང་སྣང་བས་ཡིན་པ་ལ་ཡིན་པར་སྣང་བ་ཡིན་པ་དང༌། ཀུན་རྫོབ་ཀྱི་དཀར་པོ་ནི་ཡིན་ཡང་མ་ཡིན་ལ། དེར་སྣང་ཡང་མི་སྣང་བས་མ་ཡིན་པའི་རྒྱུ་མཚན་གྱིས་མི་སྣང་བ་ཡིན་པས། མ་འཁྲུལ་བ་ཁོ་ན་ཡིན་ནོ། །དེའི་ཕྱིར་སའི་རྣམ་པ་སྲ་བ་མིན་ཞིང་ཞེས་སོགས་ཀྱང༌། དོན་དམ་ཡེ་ཤེས་ཀྱི་སའི་རྣམ་པར་སྣང་ཡང༌། ཀུན་རྫོབ་འཁྲུལ་སྣང་གདོས་བཅས་ཀྱི་སྲ་བའི་དངོས་པོ་མ་ཡིན་ཞེས་པ་ཡིན་པས་ཅིའི་ཕྱིར་འཁྲུལ་བའི་རྒྱུ་མཚན་དུ་འགྲོ་བས་མ་དགོས་སོ། །དེ་ལྟ་བུའི་རྟགས་དེ་ཡང་མཐའ་ཡས་པའི་རང་བཞིན་ཅན་ཡིན་མོད་ཀྱི། སྐབས་འདིར་དགོས་ཆེད་དང་དག་བྱའི་དབང་གིས་བསྡུ་ན། དབྱེ་བ་རྣམ་པ་བཅུར་འདུ་སྟེ། དུ་བ་དང༌། སྨིག་རྒྱུ་དང༌། མཁའ་སྣང་སྟེ་སྲིན་བུ་མེ་ཁྱེར་འདྲ་བ་དང༌། སྒྲོན་མེ་འབར་བ་རྣམས་ནི་མཚན་མོའི་རྟགས་བཞི་དང༌། སེར་པོ་འབར་བ་དང༌། ཟླ་བ་སྟེ་དཀར་པོ་འབར་བ་དང༌། ཉི་མ་སྟེ་དམར་པོ་འབར་བ་དང༌། མུན་ཅན་ནི་སྒྲ་གཅན་ཏེ་ནག་པོ་འབར་བ་དང༌། ཆ་སྟེ་གློག་དང༌། ཐིག་ལེ་ཆེན་པོ་རྣམས་ཉིན་མོའི་རྟགས་དྲུག་སྟེ་ཉིན་མཚན་སྡོམ་པས་རྟགས་བཅུའོ། །ཉིན་རྟགས་མཚན་རྟགས་འདི་དག་ཉིན་མཚན་གྱི་རྣལ་འབྱོར་ལ་སྦྱར་བ་ནི། ཐབས་ཤེས་དག་སྦྱོར་མཚུངས་པའི་དབང་དུ་སྦྱར་བ་ཡིན་གྱི། མུན་ཁང་དང་ནམ་མཁའ་ལ་སོ་སོར་མཐོང་བའི་ངེས་པ་མེད་དོ། །བཅུ་པ་ཐིག་ལེ་དེའི་དབུས་སུ་ནི། ཁམས་གསུམ་གྱི་གཟུགས་བརྙན་རྣམ་པ་སྣ་ཚོགས་པ་འོད་ཟེར་རབ་ཏུ་འཕྲོ་ཞིང་གསལ་བའམ། པྲ་བྷ་སྭ་ར་ཞེས་འབྱུང་བས། དེ་ཐམས་ཅད་འོད་གསལ་ཆེན་པོའི་ཡེ་ཤེས་ཀྱི་སྣང་བའོ། །ཞེས་པའོ། །གཉིས་པ་ལ། སོ་སོར་སྡུད་པའི་རྣམ་འབྱོར་ནི། བཀབ་དང་མ་བཀབ་མིག་དག་གིས། །སྟོང་པར་འདི་ནི་རྗེས་རྟགས་མིན། །རྨི་ལམ་བཞིན་དུ་གཟུགས་མཐོང་འགྱུར། །ཞེས་པ་སྟེ། བཀབ་དང་མ་བཀབ་མིག་ཅེས་པས། བྱེད་བཅིངས་ཀྱི་གཙོ་བོ་བལྟ་སྟངས་བསྟན་པའི་ཕྱིར། བྱེད་བཅིངས་གཞན་རྣམས་ཤུགས་ལ་
བསྟན་པར་དགོངས་ཤིང༌། སོར་སྡུད་ཀྱི་རྣལ་འབྱོར་དངོས་ནི་མུན་པའི་ནམ་མཁའ་འམ། སྤྲིན་མེད་པའི་ནམ་མཁའ་སྟོང་པ་ལ་ཡིད་དང་མིག་མཉམ་པར་གཏད་དེ། གཟུང་འཛིན་གྱི་སྣང་བ་སྤངས་པའི་སྟོང་ཉིད་ལ། རྣམ་པར་རྟོག་པས་རྗེས་སུ་མ་རྟགས་པར་བསམ་མེད་ལ་མཉམ་པར་འཇོག་པའོ། །མིག་ལྟ་བའི་ཡུལ་ཕྱི་རོལ་ཀྱི་ནམ་མཁའ་ཡིན་ལ། དངོས་སུ་སེམས་ཡང་དེ་ལ་གཏོད་མོད་ཀྱི། དོན་གྱི་ནི་ཕྱི་རོལ་ཀྱི་ནམ་མཁའ་སེམས་ཀྱི་ཉམས་སུ་མྱོང་དུ་མེད་པས། བློས་ཅིར་ཡང་མ་བསམས་པའི་མྱོང་བྱ། གང་དུ་ཡང་མཚོན་དུ་མེད་པའི་རིག་པ་དེ་ནི་ནང་གི་ནམ་མཁའ་འམ་སྟོང་ཉིད་དོ། །དེས་ན་སེམས་ནི་དམིགས་པས་ཕྱིའི་ནམ་མཁའ་ལ་གཏད་ཀྱང༌། ནང་གི་ནམ་མཁའི་ལ་གནས་པར་འགྱུར་བས། སྟོང་པའི་གཙོ་བོ་ནི་དེ་ཡིན་ལ། དེ་ཡང་མིག་སོགས་དབང་པོའི་སྒོ་ནས་རླུང་རྒྱུས་ནས། གཟུགས་སོགས་ལྔ་ཡུལ་གཟུང་བའི་སྣང་བ་དང༌། དབང་ཤེས་ལྔ་སོགས་ཡུལ་ཅན་འཛིན་པ་རྣམ་པར་རྟོག་པའི་ཚོགས་དང་བཅས་པ་བསྐྱེད་པ་ཞིག་ཡོད་པ་དེ་ལ། འབྲས་བུ་དབང་ཤེས་དང་ཡུལ་སྣང་གློ་བུར་དུ་བསྡུས་ཏེ་སྒོམ་པས་རྒྱུ་རླུང་གི་ཚོགས་ནང་དུ་རིམ་གྱིས་འགག་པ་དང༌། དེ་འགགས་པས་སྔར་གཟུང་འཛིན་གྱི་སྣང་བ་བསྡུས་པའི་ཏིང་ངེ་འཛིན་དེ་ཡང་གོང་འཕེལ་དུ་འགྱུར་ཏེ། མདོར་ན་སེམས་བསྡུས་པས་རླུང་འདུས། རླུང་བསྡུས་པས་ཀྱང་སེམས་འདུས་ཏེ་ཕན་ཚུན་གཅིག་ལ་གཅིག་བརྟེན་པའི་ཚུལ་གྱིས་སྒོམ་པས་ཆ་ཤས་དབུ་མས་དབང་དུ་བྱས་པ་ནི། སོ་སོར་སྡུད་པའི་རྣམ་འབྱོར་ཡིན་ལ། གཙུག་ཏོར་འཁོར་ལོས་བསྒྱུར་བའི་ལྟ་སྟངས་གི་མཐུ་ལས། གཟུང་འཛིན་གྱི་རླུང་གི་ཆ་ཤས་གཙུག་ཏོར་དུ་འགགས་པ་ཞེས་ཀྱང་བྱའོ། །དེ་ནས་རྟགས་ནི། རྡུལ་ཕྲན་གྱི་ཚོགས་པ་མེད་ཀྱང་གསལ་བར་སྣང་བ། རྨི་ལམ་བཞིན་དུ་སྟོང་གཟུགས་རྟགས་བཅུ་པོ་རྣམས་རིམ་གྱིས་མཐོང་བར་འགྱུར་རོ། །གཟུང་འཛིན་གྱི་རླུང་རྣམས་ལོག་པའི་མཐུ་ལས་
དབང་པོ་ལྔའི་གནས་སུ་བྱང་ཆུབ་ཀྱི་སེམས་ཀྱི་བདེ་བའི་ཆ་ཤས་ཀྱིས་ཅུང་ཟད་བསླན་པ་དེ་ཉིད་དབུ་མར་ཅུང་ཟད་འབབ་པས། མི་འགྱུར་བའི་ཆ་ཤས་ཀྱི་བདེ་བའི་ཡེ་ཤེས་ཕྲ་མོ་སྐྱེས་པ་ནི། གནས་ལུགས་ལ་ལྟ་བའི་ཕྱིར་མིག་ཡིན་ལ། མ་དག་པའི་དབང་པོ་ལྔས་ཤིན་ཏུ་གཡོགས་པའི་ཕྱིར་ཤའི་མིག་དང༌། སྟོབས་དམན་པའི་ཕྱིར་ཁྱིའི་མིག་ཅེས་ཀྱང་བཏགས་ཏེ། བདེ་བའི་ཡེ་ཤེས་ཕྲ་མོ་དེའི་སྣང་བ་ལ་རྟགས་སྣང་ཤར་བ་ནི་ཤའི་མིག་གིས་རྟགས་བཅུ་མཐོང་བའི་དོན་ནོ། །གཉིས་པ་བསམ་གཏན་གྱི་ཡན་ལག་ནི། རྟག་ཏུ་གཟུགས་དེ་བསྒོམ་པར་བྱ། །ཞེས་པ་སྟེ། རྟགས་བཅུ་རྫོགས་ཤིང་རྟགས་སྣང་བརྟན་པོར་གྱུར་པ་ན། རྟག་ཏུ་སྟོང་པའི་གཟུགས་དེ་ཉིད་ལ་སེམས་གཏད་དེ། རྣམ་པར་རྟོག་པའི་ཡིད་བྱེད་སྤངས་ནས་སྒོམ་པར་བྱའོ། །སོར་སྡུད་ཀྱི་སྐབས་སུ་ནང་གི་ནམ་མཁའ་ཙམ་ལ་མཉམ་པར་འཇོག་པ་ཡིན་ལ། འདིར་ནི་དེ་དང་སྟོང་གཟུགས་དབྱེར་མེད་དུ་གྱུར་པ་ལ་མཉམ་པར་བཞག་པས། དང་པོར་ཤེས་རབ་དང༌། དེ་ནས་རྟོག་པ་དང༌། དཔྱོད་པ་དང༌། དགའ་བ་དང༌། གཡོ་མེད་བདེ་བའི་ཡན་ལག་རྣམས་རིམ་གྱིས་སྐྱེ་བར་འགྱུར་ཏེ། དེ་ཡང་སྟོང་གཟུགས་དེ་གནས་ཚུལ་ལ་སེམས་ཉིད་ཆོས་ཀྱི་སྐུའི་ངོ་བོ་ཡིན་ཀྱང༌། དང་པོའི་ལས་ཅན་གྱི་རྣལ་འབྱོར་པའི་སྣང་ངོ་ལ་ཕྱི་རོལ་རྒྱང་ཆད་ཁོ་ནར་སྣང་བ་ན། དེ་ལ་སེམས་བསྲེ་བའི་ཚུལ་གྱིས་སྒོམ་པ་ནི་ཤེས་རབ་དང༌། དེ་ནས་དེ་ཕྱི་རོལ་རྒྱང་ཆད་དུ་མེད་པ་ལྟར་ཡང་སྣང་བ། སེམས་ཙམ་དུ་ཤེས་སུ་ཉེ་བའི་སྐབས་ནི་རྟོག་པ་དང༌། དེ་ཕྱི་རོལ་རྒྱང་ཆད་མ་ཡིན་པར་ངེས་ཤིང༌། གཟུང་འཛིན་དང་བྲལ་བ་དང་དངོས་པོའི་རང་བཞིན་མེད་པར་འཆར་དུ་ཉེ་བ་ནི། དཔྱོད་པ་དང། ཚོགས་དྲུག་འཁོར་བཅས་རྣམ་ཤེས་ཀྱིས་བསྡུས་པ་འདི། ན་བུན་བཞིན་དུ་གྱུར་ནས། དེའི་དབུས་ཀྱི་སེམས་ཉིད་གསལ་དྭངས་ཅན་དེ་ཀ་སྟོང་གཟུགས་དང་གཅིག་པར་མྱོང་ཞིང༌། གཟུང་འཛིན་རང་བཞིན་མེད་པར་ངེས་པས་
དྲངས་པའི་དགའ་བདེ་ཆུང་ངུ་ཞེན་པ་ཕྲ་མོ་དང་བཅས་པ་ནི་དགའ་བ་དང༌། སྟོང་གཟུགས་དང་སེམས་གཅིག་ཏུ་རྟོགས་པས་དགའ་བདེ་ཆེན་པོ་ཞེན་པ་དང་བྲལ་བ་ནི་གཡོ་མེད་བདེ་བའོ། །འདི་དག་ཏུ་གནས་ལུགས་རྟོགས་པའི་ཚུལ་ནི། གསལ་སྣང་རྙེད་པའི་ཚུལ་གྱིས་རྟོགས་པ་ཡིན་གྱི། མཐོང་སྤངས་ལ་སོགས་པའི་སྒྲིབ་པ་སྤངས་པའི་ཚུལ་གྱིས་རྟོགས་པ་ནི་མ་ཡིན་ནོ། །གཞུང་ལུགས་སྤྱིར་ཁྱབ་ཏུ་སོ་སོ་སྐྱེ་བོའི་ལམ་རྣམས་དང༌། ཁྱད་པར་སྦྱོར་ལམ་དུ་སེམས་ཉིད་རྟོགས་ཚུལ་ལ། རང་གི་མངོན་སུམ་དང༌། མོས་པའི་ཚུལ་གྱིས་རྟོགས་པ་ཡིན་ལ། རྣམ་འབྱོར་མངོན་སུམ་གྱིས་རྟོགས་པའི་ཐ་སྙད་མི་མཛད་དོ། །སྐབས་འདིར་ནི་ཡན་ལག་དྲུག་གི་ཡེ་ཤེས་ཐམས་ཅད་རྣལ་འབྱོར་མངོན་གསུམ་ཡིན་ཡང༌། སྐྱེ་འཕགས་ཀྱི་མངོན་སུམ་གྱི་ཁྱད་པར་ནི། སྒྲིབ་པ་སྤངས་པ་དང་མ་སྤངས་པ་ལས་ཡིན་ཞིང༌། རྟོག་གེའི་གཞུང་ལུགས་རྣམས་དང་ཐ་སྙད་མི་བསྟུན་དགོས་པ་མ་ཡིན་ནོ། །གསུམ་པ་ནི། དངོས་མེད་གཟུགས་ལ་སྒོམ་པ་དེ། །རྣལ་འབྱོར་པ་ཡི་སྒོམ་མ་ཡིན། །སེམས་ཀྱི་དངོས་པོ་དངོས་མེད་མིན། །སྟོང་པར་མ་བརྟགས་མཐོང་ཕྱིར་རོ། །ཇི་ལྟར་པྲ་ཕབ་གཞོན་ནུ་མས། །མེ་ལོང་ལ་མཐོང་དངོས་མེད་སྐྱེས། །དེ་བཞིན་འདས་དང་མ་འོངས་ཆོས། །མཁའ་ལ་དེ་ཉིད་རྣལ་འབྱོར་པས། །འདི་ལས་དངོས་པོ་དངོས་མེད་འགྱུར། །དངོས་པོ་སྟོང་པའི་དོན་མཐོང་ཕྱེས། དངོས་པོ་དངོས་མེད་དོན་ཡོད་པ། སྒྱུ་མ་རྨི་ལམ་མིག་འཕྲུལ་བཞིན། །མེད་པའི་ཆོས་ཅན་དག་ལ་ཆོས། །སྐྱེ་བའི་འདི་ནི་རབ་ཏུ་མཐོང༌། །ཡིད་བཞིན་ནོར་ལྟར་མཐའ་ཡས་པའི། །སེམས་ཅན་བསམ་པ་ཡོངས་རྫོགས་བྱེད། །པྲ་ཕབ་པ་ཡི་གཞོན་ནུ་མས། །མ་མཐོང་པ་ཡི་རྐུན་པོ་མཐོང༌། །ཉེ་ཚེ་པ་ཡི་མིག་དག་གིས། །སོང་ནས་སྒྲུབ་པ་པོ་ཡིས་མཐོང༌། །གལ་ཏེ་ཡོད་པའི་གཟུགས་མཐོང་ན། །རང་གི་གདོང་བ་ཅིས་མི་མཐོང༌། །གལ་ཏེ་མེད་པའི་གཟུགས་མཐོང་ན། །རི་བོང་རྭ་ནི་ཇི་ལྟར་མིན། །གཞན་གྱི་
མིག་གིས་མི་མཐོང་ཞིང༌། །རང་གི་མིག་གིས་མཐོང་མིན་པ། །སྐྱེ་བ་མེད་པ་མཐོང་བ་ནི༌། །གཞོན་ནུ་མ་ཡི་བུ་ཇི་བཞིན། །ཞེས་གསུང་པའི། གཞུང་འདི་དག་དོན་ཚན་བཞིར་འདུས་ཏེ། སྟོང་གཟུགས་ཀྱི་རྣལ་འབྱོར་འདི་རྟོག་པའི་སྒོམ་པ་མ་ཡིན་པ་དང༌། ཡོད་མེད་ལས་འདས་པའི་སྤྲོས་བྲལ་ལ་རྣལ་འབྱོར་དུ་བྱེད་པ་ཡིན་པ་དང༌། དངོས་པོ་ལས་འདས་ཀྱང་ཕུན་སུམ་ཚོགས་པའི་དོན་མཐའ་དག་འགྲུབ་པ་དང༌། སྟོང་གཟུགས་དེ་ཉིད་སྐྱེ་བ་མེད་པའི་དོན་ཡིན་པར་བསྟན་པའོ། །དེ་དག་ལས་རྟོག་པའི་སྒོམ་པ་ལས་འདས་པར་མཚོན་པ་ནི། དངོས་མེད་སོགས་ཤོ་ལོ་ཀ་གཅིག་སྟེ། སྟོང་གཟུགས་འདི་ནི་དངོས་པོ་མ་ཡིན་པས། དངོས་པོར་མེད་པའི་གཟུགས་དེ་ལ་སྒོམ་ཀྱང༌། འདུས་བྱས་ལ་དམིགས་པར་མི་འགྱུར་ཏེ། སེམས་ཀྱི་ཆོས་ཉིད་དེར་སྣང་བ་ཙམ་ལས། སེམས་དང་སེམས་བྱུང་དང་བེམ་ཆོས་སོགས་དངོས་པོ་དང༌། རིགས་སྤྱི་སོགས་དངོས་པོ་མེད་པའང་མིན་པའི་ཕྱིར་རོ། །སྣང་བ་དང་བཅས་པ་ཡིན་ཀྱང་རྣམ་པར་རྟོག་པས་སྒོམ་པ་མ་ཡིན་ཏེ། རྣམ་རྟོག་མེད་བཞིན་དུ་མ་བརྟགས་པར་སྟོང་པ་ལ་མཐོང་བའི་ཕྱིར་རོ། །དེ་ཡང་ཕྱི་རོལ་ཀྱི་གཟུགས་ལ་སོགས་པ་མཐོང་བ་ནི། རྣམ་པར་རྟོག་པ་སྔོན་འགྲོ་ཅན་ཡིན་པ་དང༌། རྣམ་རྟོག་དང་ལྷན་གཅིག་ཏུ་འཇུག་ཅིང༌། རྣམ་རྟོག་རྗེས་སུ་འབྲང་བའང་ཡིན་ལ། ཅི་སྟེ་དོན་དུ་མ་གྲུབ་པའི་གསལ་སྣང་ཡིན་ན། མི་སྡུག་པའི་ཏིང་ངེ་འཛིན་བཞིན་དུ། རྣམ་རྟོག་སྒོམ་པ་གོམ་པ་ལས་སྣང་བ་མ་ཡིན་ནམ་སྙམ་ན། འདི་ནི་རྣམ་རྟོག་གོམས་པའི་གསལ་སྣང་མིན་ཞིང༌། ཡིད་ལ་བྱེད་པའི་རྣམ་རྟོག་གི་མཚམས་སྦྱར་ནས་མཐོང་བ་ཡང་མིན་ལ། རྣམ་རྟོག་དང་ལྷན་ཅིག་ཀྱང་མི་འབྱུང་ཞིང་རྗེས་སུ་འབྲང་བ་ཡང་མ་ཡིན་ནོ། །རྣམ་པར་རྟོག་པའི་བག་ཆགས་ཀྱི་མཐུ་ལས་སྣང་བ་མ་ཡིན་ནམ་སྙམ་ན་མ་ཡིན་ནོ། །རེ་ཞིག་ལས་དང་པོ་པས་སྟོང་གཟུགས་རྒྱང་ཆད་དུ་མཐོང་ན། ཕྱི་རོལ་
རྒྱང་ཆད་དུ་ཤར་བའི་ལྡོག་ཆ་ནི་གཉིས་སྣང་གི་བག་ཆགས་ཀྱི་མཐུ་ཡིན་ཀྱང༌། སྟོང་གཟུགས་ཉིད་སྣང་བའི་ངོས་ནས་བག་ཆགས་ཀྱི་སྟོབས་ལས་མ་ཡིན་ཏེ། དཔེར་ན་ཆུར་སྣང་བའི་རྒྱུར་གྱུར་པའི་བག་ཆགས་ལས། ཆུ་ཉིད་སྣང་བ་འཐད་ཀྱི། ཆུ་མ་ཡིན་པ་སྣང་བ་ཇི་ལྟར་འཐད་དེ་སྟོང་གཟུགས་ཆུའི་སྣང་བརྙན་ནི་ཆུ་མ་ཡིན་ནོ། །ཅི་སྟེ་གདོན་མི་ཟ་བར་ཆུའི་བག་ཆགས་ལས་ཆུ་མ་ཡིན་པ་ཡང་སྣང་བར་འགྱུར་ན་ནི། དམྱལ་བའི་བག་ཆགས་ལས་ལྷའི་སྣང་བ་ཡང་འབྱུང་བ་ཐལ་བར་འགྱུར་ཏེ། རྒྱུ་འབྲས་ཀྱི་རྟེན་འབྲེལ་ཤིན་ཏུ་འཁྲུགས་པར་འགྱུར་རོ། །གཞན་ཡང་བག་ཆགས་གང་དག་ཁམས་གསུམ་དང་རྗེས་སུ་མཚུངས་པ་ལས་ཁམས་གསུམ་དུ་སྣང་བ་འབྱུང་བར་འགྱུར་བ་ནི་བདེན་ན་ཐིག་ལེ་ཆེན་པོ་ལ་སོགས་པ་ཅི་ཞིག་གི་བག་ཆགས་ལས་བྱུང་ཞེས་བརྟགས་པར་བྱའོ། །དེས་ན་འདི་ནི་རྣམ་པར་རྟོག་པ་གློ་བུར་དུ་འགགས་པ་ན། ལས་རླུང་ཅུང་ཟད་ཆོས་ཉིད་དུ་ཐིམ་པར་གྱུར་པས་ཆོས་ཉིད་མཐོང་བའི་ཡེ་ཤེས་ཕྲ་མོ་སྐྱེས་ནས། ཆོས་ཉིད་ཅུང་ཟད་མཐོང་བའོ། །དེས་ན་བསྐྱེད་རིམ་གྱི་གསལ་སྣང་ནི་ངེས་པར་རྣམ་རྟོག་གི་བསྐྱེད་དགོས་ལ། འདིའི་གསལ་སྣང་ནི་ངེས་པར་རྣམ་རྟོག་འགགས་པ་ལས་སོ། །དེ་བས་ན་སེམས་མི་རྟོག་པ་གཉིད་ལོག་པ་ལྟ་བུའི་གནས་སྐབས་དང༌། ཀུན་རྫོབ་ཀྱི་སྣང་བ་ཅན་དཔྱད་པ་མེད་པ་ཙམ་དང༌། ཡོངས་གཅོད་བློའི་ཡུལ་དུ་མི་འཆར་བའི་རྣམ་བཅད་ཁོ་ན་ལ་དམིགས་པའི་སྟོང་ཉིད་སྒོམ་པ་རྣམས་ནི། ཡང་དག་པའི་སྟོང་ཉིད་དེ་ཁོ་ན་ཉིད་ནི་མ་ཡིན་ཏེ། ཤིན་ཏུ་རྨོངས་པའི་ཕྱིར་དང༌། ཕྱིན་ཅི་ལོག་གི་སྣང་བ་ཅན་གྱི་ཕྱིར་དང༌། རྣམ་པར་རྟོག་པས་ཆད་པའི་མཐའ་བཟུང་བའི་ཕྱིར་རོ། །དེས་ན་ཐུབ་པས་ལན་བརྒྱ་བསྔགས་པའི་རྣམ་པར་མི་རྟོག་པའི་ཡེ་ཤེས་ནི་སྟོང་གཟུགས་ཀྱི་རྣལ་འབྱོར་རོ། །འོ་ན་རྣམ་པར་མི་རྟག་པ་ཆོས་ཀྱི་དབྱིངས་སྒོམ་པ་དེ་ནི། ཡོད་མེད་ཀྱི་མཐའ་ལས་འདས་པའི་རྣལ་འབྱོར་དབུ་མའི་ལམ་ལ་གསུངས་པ་ཡིན་ན་
སྟོང་གཟུགས་ཀྱི་རྣལ་འབྱོར་ནི་ཇི་ལྟར་ན་དེར་འགྱུར་ཏེ། གཟུགས་སོགས་ལ་རབ་ཏུ་དམིགས་པའི་ཕྱིར་རོ། །ཞེ་ན་ཡོད་མེད་ལས་འདས་པའི་རྣལ་འབྱོར་དུ་སྟོན་པ་ནི་ཇི་ལྟར་པྲ་ཕབ་སོགས་ཤོ་ལོ་ཀ་གཉིས་ཕྱེད་དང་བཅས་པ་སྟེ། ཇི་ལྟར་པྲ་ཕབ་པའི་གཞོན་ནུ་མས་མེ་ལོང་ལ་མཐོང་བའི་གཟུགས་བརྙན་དེ་རྣམས་ནི། གཟུགས་སོགས་རྡུལ་གྱི་དངོས་པོ་མེད་ཀྱང་སྔགས་ལ་སོགས་པའི་རྟེན་འབྲེལ་ལས་སྣང་བ་དེ་སྐྱེས་ཤིང་ཤར་བ་བཞིན་དུ། དེ་ཁོ་ན་ཉིད་ལ་རྣལ་འབྱོར་དུ་བྱེད་པས་ཀྱང༌། ནམ་མཁའ་ལ་འདས་པ་དང་མ་འོངས་པ་ལ་སོགས་པ་སྟེ་དུས་གསུམ་དུ་སྲིད་པར་འགྱུར་བའི་ཆོས་ཐམས་ཅད་ཀྱི་གཟུགས་བརྙན་མཐོང་བར་འགྱུར་རོ། །དེ་བས་ན་དཔེ་དོན་སྦྱར་བའི་རྒྱུ་མཚན་འདི་ལས། སྟོང་གཟུགས་ཀྱི་དངོས་པོ་དེ་ནི་དངོས་པོ་མེད་པར་འགྱུར་ཏེ། ཡུལ་དང་དབང་པོ་དང་རྣམ་པར་ཤེས་པ་འཁོར་དང་བཅས་པ་སོགས། དངོས་པོ་ནི་མ་ཡིན་ལ། དངོས་མེད་ཅི་མེད་ཀྱང་མ་ཡིན་ཏེ། དངོས་པོས་སྟོང་པའི་དོན་ཁོ་ན་ཞིགསྟོང་གཟུགས་ཀྱི་དངོས་པོར་མཐོང་བའི་ཕྱིར་རོ། །ཡང་ན་ད་ལྟའི་འགྲོ་བ་ལ་སྣང་བའི་དངོས་པོའི་སྣང་བ་ཐམས་ཅད་འགགས་པ་ན་འདི་སྣང་ལ། དངོས་པོ་རྣམས་སྣང་བ་ན་འདིའི་སྣང་བ་འགགས་པའི་ཕྱིར་སྟོང་གཟུགས་འདི་དངོས་པོ་མ་ཡིན་པ་ཁོ་ནའོ། །སྟོང་གཟུགས་ཀྱི་དངོས་པོ་ཞེས་པའི་དངོས་པོ་ནི། དངོས་པོ་དངོས་མེད་གཉིས་ཀྱི་ཟླས་ཕྱེ་བའི་དངོས་པོ་མ་ཡིན་གྱི། ཡོད་པ་དང་གསལ་བ་དང་ཉམས་མྱོང་དུ་གྲུབ་པ་ཅན་ཡིན་པའི་དོན་ནོ། །དེ་བས་ན་སྟོང་གཟུགས་ཀྱི་དངོས་པོ་དང་ཐ་མལ་གྱི་དངོས་མེད་གཞི་གཅིག་ཏུ་འདུས་པར་འགྱུར་རོ། །འོ་ན་སྣང་བའི་དངོས་པོ་དང༌། རྡུལ་ཕྲ་རབ་ཚོགས་ཤིང་འདུས་པའི་དངོས་པོ་མེད་པ་དོན་གཅིག་གི་སྟེང་དུ་འདུས་ཤིང་ཚོགས་པས་ཡོད་པ་གཞན་འགའ་ཡང་མ་མཐོང་བས་ཡིད་མི་ཆེས་སོ་སྙམ་ན། སྒྱུ་མ་དང་རྨི་ལམ་དང་མིག་འཕྲུལ་ལ་སོགས་པ་འཇིག་རྟེན་ཀུན་རྫོབ་ལ་ཡང་དེ་ལྟར་གྲགས་ཤིང་གྲུབ་པ་མང་
དུ་ཡོད་པའི་ཕྱིར་རོ། །དེ་ཡང་པྲ་ཕབ་པའི་གཟུགས་བརྙན་དཔེར་བླངས་པ་ན། མེ་ལོང་ལ་སོགས་པ་བརྟེན་ནམ་འཁྲུལ་བའི་གཞི་ཡོད་པ་ཡིན་ནོ་སྙམ་པ་ལ། རྟེན་གྱི་སྣང་བ་མེད་ཀྱང་སྒྱུ་མ་རྨི་ལམ་ལ་སོགས་པ་དཔེར་བྱས་སོ། །དེ་ལྟར་ན་རྡུལ་ཕྲན་སོགས་དངོས་པོ་མེད་པའི་ཆོས་ཅན་ཡང༌། གསལ་བར་སྣང་བའི་ཆོས་སྐྱེ་བ་འདི་ནི་འཇིག་རྟེན་ན་ཡང་རབ་ཏུ་མང་པོ་མཐོང་བའི་ཕྱིར། སྟོང་གཟུགས་ལ་དངོས་པོ་མེད་ཀྱང༌། ཡང་དག་པར་གསལ་བ་ལ་ཅིའི་ཕྱིར་ཡིད་མི་ཆེས། དེས་ན་དངོས་པོ་དང་དངོས་མེད་ལས་འདས་པའི་ཕྱིར་ཡོད་མེད་ཀྱི་མཐའ་དང་བྲལ་བའི་ཆོས་ཉིད་མཐོང་ཞིང་ཉམས་སུ་མྱོང་བའོ། །ཞེས་པའོ། །འོ་ན་རྣམ་རྟོག་གི་རྩོལ་བ་མེད་པ་དང༌། དངོས་པོ་མེད་པའི་ཕྱིར་ན། ཕུན་སུམ་ཚོགས་པའི་ཡོན་ཏན་གང་ཡང་མི་འབྱུང་བས། གསལ་བར་སྣང་ཞིང་མྱོང་བས་གྲུབ་ཀྱང་དོན་མེད་དོ་སྙམ་ན། ཡིད་བཞིན་གྱི་ནོར་བུ་རྣམ་རྟོག་གི་འབད་རྩོལ་མེད་ཀྱང་སྐྱེ་བོའི་འདོད་པ་ཚུལ་བཞིན་དུ་སྐོང་ནུས་པ་འཇིག་རྟེན་དུ་གྲགས་ཤིང་མཐོང་བ་ལྟར། སྟོང་གཟུགས་ཀྱི་རྣལ་འབྱོར་འདིས་ཀྱང༌། མཐའ་ཡས་པའི་སེམས་ཅན་རྣམས་ཀྱི་བསམ་པའི་དོན་ཡོངས་སུ་རྫོགས་པར་བྱེད་དོ། །འདིས་ནི་སྟོང་གཟུགས་དེ་ཉིད་སོར་བསམ་པས་མཐོང་ནས་སངས་རྒྱས་ཀྱི་བར་དུ་མི་འཇིག་པའི་རྟག་པ་ཉིད་དང༌། དེ་བཞིན་ཉིད་དང༌། ཆོས་ཀྱི་སྐུ་དང༌། བདེ་གཤེགས་སྙིང་པོ་དང༌། སངས་རྒྱས་ཉིད་དོ། །ཅི་སྟེ་འདི་དེ་བཞིན་གཤེགས་པ་དང་ཆོས་དབྱིངས་མ་ཡིན་ལ་གནས་སྐབས་དེ་ཉིད་དུ་འཇིག་པ་ཡང་ཡིན་ན། སོར་བསམ་པས་མཐོང་བའི་སྟོང་གཟུགས་ཀྱིས་སེམས་ཅན་ཐམས་ཅད་ཀྱི་བསམ་པ་ཇི་ལྟར་རྫོགས་པར་བྱེད་བརྟག་དགོས་སོ། །དངོས་པོ་མེད་ཀྱང་དོན་འགྲུབ་པ་དཔེས་བསྟན་པ་ནི། སྒྲུབ་པ་པོའི་རྫས་རྐུན་པོས་ཁྱེར་ན། དེ་ལ་བརྟན་པའི་ཕྱིར་མེ་ལོང་དང་རལ་གྲི་དང་ཆུ་ལ་སོགས་པ་པྲ་ཕབ་བརྒྱད་པོ་གང་རུང་ལ་བརྟེན་ནས་པྲ་སེན་འབེབས་པར་བྱེད་དེ། དེའི་ཚེ་པྲ་ཕབ་པའི་གཞོན་ནུ་མས་སྔར་མ་མཐོང་ཞིང་
འདྲེས་པའི་བག་ཆགས་མེད་པར། རྐུན་པོའི་གཟུགས་བརྙན་མེ་ལོང་སོགས་ལ་མཐོང་ཞིང་གསལ་བར་སྣང་བར་འགྱུར་རོ། །གཞོན་ནུ་མ་དེའི་ངག་ལས་ཐོས་ནས་སྒྲུབ་པ་པོ་དེས་ཚོལ་དུ་སོང་ན་སྒྲུབ་པ་པོའི་ཉེ་ཚེ་བའི་མིག་སྔགས་ཀྱིས་བྱིན་གྱིས་མ་བརླབས་པ་དེས་ཀྱང༌། རྐུན་པོ་དེ་དངོས་སུ་མཐོང་སྟེ་རྫས་དེ་དག་ཐོབ་པར་འགྱུར་རོ། །འདི་ལ་སྒྲུབ་པ་པོ་དག་སོང་ནས་ནི། ཉི་ཚེ་བ་ཡིས་མིག་གིས་མཐོང་ཞེས་སྦྱར་ན་གོ་བདེའོ། །དེ་བཞིན་དུ་པྲ་ཕབ་ཀྱིས་མཐོང་བ་དང་འདྲ་བར། རྗེས་དྲན་ཚུན་ཆད་དུ་མཐོང་བ་ལ་ཡིད་ཆེས་བྱས་ནས། སྒྲུབ་པ་པོ་འགྲོ་བ་དང་འདྲ་བར་ཏིང་ངེ་འཛིན་གྱིས་སྒྲུབ་ན། འབྲས་བུ་ཐོབ་པའི་དོན་ནོ། །པྲའི་གསལ་སྣང་ཤར་བའི་ཚེ། མེ་ལོང་ལ་གཟུགས་བརྙན་ཤར་བ་མ་ཡིན་གྱི། }གས་དང་མེ་ལོང་ལ་སོགས་པའི་རྟེན་འབྲེལ་གྱིས། རྐུན་པོ་དེ་ཡང་མཐོང་བའི་ས་ཉེ་སྐོར་ན་མེད་ཀྱང་རྐུན་པོ་ཉིད་མཐོང་བ་ཡིན་ནོ། །གལ་ཏེ་དེ་དངོས་པོར་གྲུབ་པ་ཞིག་མཐོང་བ་ཡིན་ན་ནི། ཐག་རིང་བའི་རྐུན་པོ་མཐོང་ནས་ཐག་ཉེ་བའི་རང་གི་གདོང་པ་ཅིའི་ཕྱིར་མི་མཐོང༌། གལ་ཏེ་རྐུན་པོ་དེ་མ་ཡིན་ལ་གཞན་ཡང་མ་ཡིན་པས་དངོས་པོ་གཏན་ནས་མེད་ཀྱང་གཟུགས་སུ་མཐོང་ན་ནི། རི་བོང་རྭ་སོགས་མི་སྲིད་པ་རྣམས་ཀྱང༌། མཐོང་བའི་གནས་སྐབས་ཡོད་པར་ཐལ་བར་འགྱུར་རོ། །དེ་རྣམས་ཀྱི་དོན་བསྡུ་བ། ད་ནི་དེ་རྣམས་ཀྱི་དོན་བསྡུ་བ་སྟོང་གཟུགས་སྐྱེ་བ་མེད་པའི་ཆོས་དབྱིངས་སུ་བསྟན་པ་ནི་གཞན་གྱི་སོགས་ཤོ་ལོ་ཀ་གཅིག་སྟེ། སྟོང་གཟུགས་འདི་མིག་གིས་མཐོང་བའི་ཕྱིར། གཟུགས་ཅན་ཡིན་པས། འདི་བསྒོམས་པས་དོན་དམ་སྒོམ་པར་མི་འགྱུར་སྙམ་ན། འདི་མིག་སོགས་དབང་པོ་ལྔའི་སྐྱེ་མཆེད་ཀྱིས་མཐོང་བ་མ་ཡིན་ནོ། །ཅི་སྟེ་ན་གཞན་གྱི་མིག་གིས་མཐོང་བ་མ་ཡིན་པར་མངོན་སུམ་དུ་གྲུབ་ཅིང༌། རང་གི་མིག་གིས་ཀྱང་མི་མཐོང་སྟེ། མིག་གིས་གཟུགས་མཐོང་བའི་མཐོང་ཚུལ་དང་འགལ་བར་སྣང་བ། ཐག་རིང་ཐུང་དང་མདུན་རྒྱབ་དང་ཆེ་ཆུང་སོགས་ལ་ཁྱད་པར་མེད་ཅིང༌། མིག་གསལ་མི་གསལ་ལས་སྟོང་གཟུགས་
གསལ་མི་གསལ་རྗེས་སུ་འགྲོ་བ་མེད་པ་དང༌། གཟུགས་བརྙན་ལན་ཅིག་གྲུབ་ན། མིག་མེད་ཀྱིས་རྟག་ཏུ་མཐོང་བའི་ཕྱིར་རོ། །ཡིད་ལའང་མི་སྣང་སྟེ་མི་རྟོག་པ་ཆེས་འཐུག་པོས་ནོན་པ་ནའང་འདི་གསལ་བར་སྣང་བས་སོ། །སེམས་སེམས་བྱུང་གཞན་ལ་ནི་དེ་ལས་ཀྱང་མི་སྣང་བ་དེས་ན་གསལ་ལ་ངོས་བཟུང་མེད་པའི་ཚུལ་གྱི་སྐྱེ་བ་མེད་པ་སྟེ། སྐྱེ་འགག་གནས་གསུམ་དང་བྲལ་བའི་དབྱིངས་གསལ་བར་མཐོང་བ་དེ་ནི། དོན་ལ་གསར་དུ་སྐྱེས་པ་མེད་ཀྱང་རྣལ་འབྱོར་པའི་སྣང་ངོར་འཕྲལ་དུ་སྐྱེས་པར་སྣང་བའི་ཕྱིར། གཞོན་ནུ་མ་སྐྱེ་གནས་མ་ཉམས་པའི་རྨི་ལམ་དུ་བུ་སྐྱེ་བ་བཞིན་ནོ། །སྐུ་རྡོ་རྗེའི་བསྙེན་སྒྲུབ་བསྟན་པའི་གཞུང་འདི་རྣམས་ཀྱིས་ཁོངས་གཅོད་མཚམས་ལ། རྒྱ་བོད་ཁ་ཅིག་སྣ་ཚོགས་གཟུགས་བརྙན་འོད་གསལ་བ་ཞེས་པ་ཡན་ཆད་སོར་སྡུད་ཁོ་ན་དང༌། བཀབ་དང་ཞེས་སོགས་མན་ཆད་བསམ་གཏན་ཁོ་ན་ལ་སྦྱོར་རོ། །འདི་ལ་སྐབས་དེར་སོར་སྡུད་སྒོམ་ཐབས་སྟོན་པའི་ཚིག་མེད་པའི་ཕྱིར་དང༌། སྟོང་གཟུགས་ཀྱི་དོགས་གཅོད་རྣམས་བསམ་གཏན་ཁོ་ནའི་སྐབས་ལ་སྦྱོར་དགོས་པའི་རྒྱུ་མཚན་ཡང་མེད་པའི་ཕྱིར་མི་འཐད་དོ༌། །སྟོང་གཟུགས་ཀྱི་མཚན་ཉིད་དང་དབྱེ་བ་བསྟན་པས་ཀྱང༌། སོར་བསྡུད་ཁོ་ན་བསྟན་པར་མི་འགྱུར་བས་དཀྱུས་སུ་བསྟན་པ་ཁོ་ན་ཚིག་དོན་ལ་ཞུགས་པ་ཡིན་ནོ། །གཉིས་པ་གསུང༌། རྡོ་རྗེ་སྒྲུབ་པ་ལ། སྲོག་རྩོལ་གྱི་ཡན་ལག་གསལ་བར་བཤད། འཕྲོས་དོན་རྫོགས་རིམ་གང་ལ་སྒོམ་པའི་ཡུལ་རྩ་རླུང་ཐིག་ལེའི་ཀུན་སྤྱོད་བསྟན། འཛིན་པའི་རྣལ་འབྱོར་གྱིས་འཆི་མེད་སྒྲུབ་པའི་ཚུལ་བསྟན་པའོ། །དང་པོ་ནི། གཟུགས་བརྙན་མཐོང་ན་དེ་ནས་ནི། །བར་མ་ཆད་པར་སྲོག་རྩོལ་བྱ། །སྟེང་འོག་རྩ་གསུམ་པོ་རྣམས་ལ། །ལུས་ངག་སེམས་ནི་འགོག་པ་ལས། །ཞེས་ཏེ་གཟུགས་བརྙན་མཐོང་བ་སྟེ་སྟོང་གཟུགས་ལ་བརྟན་པ་ཐོབ་ནས། ལམ་གྱི་རིམ་པ་གཞན་གྱིས་བར་མ་ཆད་པ་སྟེ། བར་དུ་གཞན་འཇུག་མི་དགོས་པར་སྲོག་རྩོལ་གྱི་ཡན་ལག་བསྒོམ་པར་བྱའོ། །དེ་ཡང་སྟོང་གཟུགས་
ལ་བརྟན་པ་མ་ཐོབ་བར་ཡང་བུམ་པ་ཅན་ལ་སོགས་པ་སྒོམ་དུ་མི་རུང་བ་མ་ཡིན་ཞིང༌། ཡོན་ཏན་ཅི་རིགས་པར་མི་སྐྱེད་པའང་མ་ཡིན་མོད་ཀྱི། ཉི་ཟླའི་ལམ་ཡང་དག་པར་བཀག་པའི་ཡེ་ཤེས་བསྐྱེད་མི་ཐུབ་པས་སྲོག་རྩོལ་གྱི་ཡན་ལག་དངོས་སུ་མི་འགྲོ་བ་ལ་དགོངས་སོ། །སྲོག་རྩོལ་ཇི་ལྟར་བསྒོམ་པར་བྱ་ཞེ་ན། སྟེང་གི་རྩ་གསུམ་དང་འོག་གི་རྩ་གསུམ་པོ་རྣམས་ལ། ལུས་ངག་ཡིད་ཀྱི་རླུང་གསུམ་འགོག་པའི་ཐབས་ལས་སོ། །དེ་ཡང་རླུང་ཕྱིར་འགྲོ་བ་ངག་དང༌། ནང་དུ་འོང་བ་ལུས་དང༌། གནས་པ་ཡིད་དང་སྦྱོར་ཞིང༌། སྲོག་གི་ཕྱོགས་ལ་རོ་མའི་བྱེད་པ་ལས་འགྲོ་བ་དང༌། རྐྱང་མའི་བྱེད་པ་ལས་འོང་བ་དང༌། དབུ་མའི་བྱེད་པ་ལས་གནས་པའོ། །ཐུར་སེལ་ཕྱོགས་ལ་གཅི་བར་འགྲོ་བ་དང༌། བཤང་བར་འོང་བ་དང༌། ཁུ་བའི་རྩར་གནས་པའི་རླུང་ཀུན་ཏུ་སྤྱོད་དོ། །དེ་ལྟར་རྩ་གསུམ་པ་གཉིས་དང་འགྲོ་འོང་གནས་པ་གསུམ་པོ་དེ་དག་ཐ་མལ་གྱི་དུས་སུ་རོ་རྐྱང་གི་སྟོབས་ཀྱིས་དབང་བྱེད་པ་དེ། རྣལ་འབྱོར་གྱི་སྟོབས་ཀྱིས་བཀག་ནས་དབུ་མས་དབང་བྱས་པ་ན། གཡས་གཡོན་གྱི་རྒྱུ་བ་འགགས་པ་ལས་སྟེང་འོག་སྲོག་ཐུར་ཀྱང་གཅིག་ཏུ་བསྲེ་ཐུབ་པ་ཡིན་ཏེ། ཐུར་སེལ་ལ་རྐྱང་མ་དང༌། སྲོག་ལ་རོ་མས་དབང་བྱེད་པས་སོ། །འདི་ལ་རླུང་གི་རྣལ་འབྱོར་གྱི་གཙོ་བོ་ནི་བུམ་པ་ཅན་ཡིན་ཏེ། རྡོ་རྗེའི་བཟླས་པ་ཡང་བུམ་པ་ཅན་ཉིད་ལ་ཚང་བ་དང༌། རླུང་འཆིང་བའི་བྱེད་པ་གཞན་ཐམས་ཅད་ནི་བུམ་པ་ཅན་གྱི་ཡན་ལག་ཡིན་པས་སོ། །རླུང་གི་སྦྱོར་བ་ཁོ་ནས་སྲོག་རྩོལ་གྱི་ཡན་ལག་ཏུ་མི་འགྱུར་ཏེ། རྣམ་པ་ཀུན་གྱི་མཆོག་དང་ལྡན་པའི་སྟོང་གཟུགས་ཕྱག་རྒྱ་ཆེན་པོ་དྷཱུ་ཏཱིའི་རྩ་ལ་ཤར་བ་ལ། དམིགས་པ་མེད་པའི་ཚུལ་གྱིས་མཉམ་པར་བཞག་ཅིང༌། རོ་རྐྱང་གི་རླུང་སྟོབས་ཀྱིས་བཀག་པ་ལས་བྱུང་བ། དབུ་མའི་རླུང་དང་སྟོང་གཟུགས་འདྲེས་པའི་ཏིང་ངེ་འཛིན་ནི་སྲོག་རྩོལ་གྱི་ཡན་ལག་གོ །གཉིས་པ་ནི། དེ་ལྟར་བཤད་པའི་སྟེང་འོག་གི་རྩ་ཞེས་པ་ལས་འཕྲོས་པའི་ཚུལ་ཏེ། དེ་ཡང་ཟླ་ཉི་སྒྲ་
གཅན་བཤང་གཅི་དང་ཞེས་པ་ནས། དཀྱིལ་འཁོར་ལྔ་རྣམས་འབབ་པའི་ཕྱིར། །ཞེས་པའི་བར་དུ། ཤོ་ལོ་ཀ་བཞི་བཅུ་ཞེ་གཅིག་སྟེ། དེ་ལ་ཀུན་སྤྱོད་དངོས་དང༌། འཕྲོས་དོན་འཆི་རླུང་རྒྱུ་བའི་ཚུལ་གཉིས་སོ། །དང་པོ་ལ་མདོར་བསྟན་པ་དང་རྒྱས་པར་བཤད་པའོ། །དང་པོ་ནི། ཟླ་ཉི་སྒྲ་གཅན་བཤང་གཅི་དང༌། །ཁུ་བ་འབབ་པའི་ལམ་རྣམས་སུ། །ཆུ་མེ་སྟོད་པ་ས་རླུང་དང༌། །ཡེ་ཤེས་ཁམས་རྣམས་རིགས་རྣམས་ལ། །ཞེས་ཏེ། དེ་ཡང་ལྟེ་བ་ཡན་ཆད་གཡོན་པ་ཟླ་བའི་རྩ་དང༌། གཡས་པ་ཉི་མའི་རྩ་དང༌། དབུས་སྒྲ་གཅན་གྱི་རྩ་སྟེ་གསུམ་དང༌། ལྟེ་བའི་འོག་གསང་བའི་འཁོར་ལོ་མན་ཆད་དུ། དབུས་ནས་རྒྱབ་ཏུ་བཤང་བའི་རྩ་དང༌། གཡོན་གྱི་མདུན་ཕྱོགས་སུ་གཅི་བའི་རྩ་དང༌། གཡས་ཀྱི་མདུན་ཕྱོགས་སམ་མདུན་གྱི་དབུས་སུ་ཁུ་བ་འབབས་པའི་ལམ་གྱི་རྩ་སྟེ་དེ་རྣམས་སུ། ཁམས་དྲུག་གི་རླུང་དང་ཐིག་ལེ་འབབ་པའི་ཚུལ་ནི་ཟླ་བའི་རྩ་ལ་ཆུ་ཁམས་དང༌། ཉི་མའི་རྩ་ལ་མེ་ཁམས་དང༌། སྒྲ་གཅན་གྱི་རྩ་ལ་སྟོང་པ་སྟེ་ནམ་མཁའི་ཁམས་དང༌། བཤང་བའི་རྩ་ལ་ས་ཁམས་དང༌། གཅི་བའི་རྩ་ལ་རླུང་ཁམས་དང༌། ཁུ་བའི་རྩ་ལ་ཡེ་ཤེས་ཀྱི་ཁམས་རྣམས་འབབ་སྟེ། རིགས་ཞེས་པ་ནི། ཁམས་དྲུག་པོ་དེ་རྣམས་ཀྱི་རིགས་ལས་སྐྱེས་པའི་རླུང་དང་ཐིག་ལེ་རྣམས་ཞེས་པའོ། །གཉིས་པ་རྒྱས་པར་བཤད་པ་ནི། གང་ཞིག་ཟླ་ཉི་མུན་ཅན་དང༌། །ཞེས་པ་ནས། འདི་ནི་རྩ་ཡི་ཀུན་སྤྱོད་དོ། །ཞེས་པའི་བར་ཚིགས་བཅད་སུམ་ཅུ་རྩ་གཅིག་ཕྱེད་བཅས་ཏེ། དེ་དག་ཀྱང་སྲོག་ཐུར་ལ་བལྟོས་པའི་སྐུ་གསུང་ཐུགས་གསུམ་དང༌། ཐབས་ཤེས་ལ་བལྟོས་པའི་སྐུ་གསུང་ཐུགས་གསུམ་དང༌། སྐྱེ་འཆིའི་རླུང་འབབ་ཚུལ་དང༌། དབུ་མའི་དབུགས་ཀྱི་མཚན་ཉིད་དང༌། རྩ་དྲུག་གི་མིང་གི་རྣམ་གྲངས་རིགས་ཀྱི་བདག་པོར་བཅས་པ་དང༌། སྲོག་གི་རླུང་གི་འགྲོ་འོང་དང༌། ཐུར་སེལ་གྱི་རླུང་གི་འགྲོ་འོང་དང༌། རྩ་དྲུག་ཐབས་ཤེས་སུ་སྦྱར་བ་དང༌། དུས་སྦྱོར་བཅུ་གཉིས་ཀྱི་དཀྱིལ་འཁོར་དང༌། དཀྱིལ་འཁོར་དེ་རྣམས་ཀྱི་ཐབས་ཤེས་དང༌།
རྩ་དྲུག་རྩ་གསུམ་དུ་འདུ་བའི་ཚུལ་རྣམས་ཏེ་དེ་ལྟར་དོན་བསྡུས་བཅུ་གཅིག་རྣམས་ཀྱིས། རྩ་རླུང་ཐིག་ལེའི་ཀུན་སྤྱོད། རྫོགས་རིམ་གྱི་ལམ་ཟབ་མོ་གང་ལ་གནད་དུ་བསྣུན་པའི་གཞི་རྣམས་རྒྱས་པར་བཤད་དོ། །དེ་དག་སྡོམ་དུ་བྱས་ན་འདི་ལྟར། སྲོག་ཐུར་སྒོ་གསུམ་ཐབས་ཤེས་སྒོ་གསུམ་དང༌། །སྐྱེ་འཆིའི་རླུང་དང་དབུ་མའི་རླུང་མཚན་ཉིད། །རྩ་དྲུག་མིང་རིགས་སྲོག་རླུང་འགྲོ་འོང་དང༌། །ཐུར་སེལ་འགྲོ་འོང་ཐབས་དང་ཤེས་རབ་སྦྱོར། ཁྱིམ་གྱི་དཀྱིལ་འཁོར་དེ་དག་ཐབས་ཤེས་སྦྱོར། །རྩ་དྲུག་གསུམ་དུ་བསྡུ་བའི་ཚུལ་རྣམས་ཏེ། །དོན་ཚན་བཅུ་གཅིག་ཀུན་སྦྱོད་རྒྱས་བཤད་ཡིན། འཕྲོས་དོན་སྤང་བྱ་དུས་ཀྱི་ལྟས་གསུམ་མོ། །དེ་ལ་དང་པོར་སྲོག་ཐུར་གྱིས་བསྡུས་པའི་སྐུ་གསུང་ཐུགས་གསུམ་གྱི་རྩ་བསྟན་པ་ནི། གང་ཞིག་ཟླ་ཉི་སོགས་ཤོ་ལོ་ཀ་གཅིག་གོ །ཐབས་ཤེས་སྒོ་གསུམ་གྱི་རྩ་ནི། ཟླ་བ་ཐབས་ཀྱིས་སོགས་ཤོ་ལོ་ཀ་གསུམ་མོ། །སྐྱེ་འཆིའི་རླུང་འབབ་ཚུལ་ནི། འཆི་བལྟས་ལུས་ངག་སོགས་རྐང་པ་དྲུག་གོ །དབུ་མའི་དབུགས་ནི། ཉི་མའི་འཕོ་བ་སོགས་ཤོ་ལོ་ཀ་གསུམ་དང་རྐང་པ་གཉིས་སོ། །རྩ་དྲུག་གི་མིང་རིགས་བསྟན་པ་ནི། སྟེང་དུ་གཡོན་གཡས་སོགས་ཤོ་ལོ་ཀ་གསུམ་དང༌། ལྟེ་བའི་སྟེང་དུ་སོགས་གཅིག་དང༌། རྡུལ་འབབ་ཕྱིར་ཏེ་སོགས་གཅིག་སྟེ་ཚིག་བཅད་ལྔའོ། །སྲོག་གི་རླུང་འགྲོ་འོང་བསྟན་པ་ནི། ལྟེ་བའི་ཆུ་སྐྱེས་སོགས་ཤོ་ལོ་ཀ་གཉིས་སོ། །ཐུར་སེལ་གྱི་དེ་བཤད་པ་ནི། ལྟེ་གསང་སོགས་ཤོ་ལོ་ཀ་གཉིས་སོ། །རྩ་དྲུག་ཐབས་ཤེས་སུ་སྦྱར་བ་ནི་ཤེས་རབ་ཐབས་དངོས་སོགས་ཤོ་ལོ་ཀ་གཅིག་གོ །དུས་སྦྱོར་བཅུ་གཉིས་ཀྱི་དཀྱིལ་འཁོར་བཤད་པ་ནི། རྣམ་ཤེས་ལ་སོགས་དཀྱིལ་འཁོར་ལྔ། །ཞེས་སོགས་ཤོ་ལོ་ཀ་དྲུག་གོ །དཀྱིལ་འཁོར་དེ་རྣམས་ཀྱི་ཐབས་ཤེས་སྦྱར་བ་ནི་ནུབ་དང་ཤར་དུ་སོགས་ཤོ་ལོ་ཀ་ལྔའོ། །རྩ་དྲུག་གསུམ་དུ་བསྡུ་བ་ནི། ཐོག་མར་མིང་རིགས་བསྟན་པའི་སྐབས་ཀྱི་རྡོ་རྗེ་རྡོ་རྗེ་འཛིན་པར་འདོད། །ཅེས་པའི་རྗེས་སུ། ཟླ་བའི་སོགས་ཤོ་ལོ་ཀ་གཅིག་དང༌། དཀྱིལ་
འཁོར་རྣམས་ཀྱི་ཐབས་ཤེས་སྦྱར་བའི་འོག་འདིར། ཟླ་བ་ཉི་མའི་སོགས་ཤོ་ལོ་ཀ་ཕྱེད་དང་གཉིས་སོ། །དེ་ལྟར་དོན་ཚན་བཅུ་གཅིག་ལས། དང་པོ་སྲོག་ཐུར་གྱིས་བསྡུས་པའི་སྒོ་གསུམ་རྩ་དྲུག་དང་སྦྱར་བ་ནི། གང་ཞིག་ཟླ་ཉི་མུན་ཅན་དང༌། །བཤང་གཅི་ཁུ་བ་འབབ་མ་རྣམས། །སྲོག་དང་ཐུར་སེལ་རིམ་པ་ལས། ལུས་ངག་སེམས་ཀྱི་རྩ་རྣམས་སོ། །ཞེས་པ་སྟེ་གང་ཞིག་སྟེང་སྲོག་གི་རླུང་དང་འབྲེལ་བ་ལ་ཟླ་བའི་རྩ་དེ་སྐུ་དང་ཉི་མའི་རྩ་ནི་གསུང་དང༌། མུན་ཅན་གྱི་རྩ་ནི་ཐུགས་སོ། །འོག་ཐུར་སེལ་དང་འབྲེལ་བ་ལ་བཤད་པའི་རྩ་ནི་སྐུ་དང༌། གཅི་བའི་རྩ་ནི་གསུང་དང༌། ཁུ་བ་འབབ་མ་ནི་ཐུགས་ཀྱི་རྩ་རྣམས་སོ། །དོན་ཚན་གཉིས་པ་ཐབས་ཤེས་ཀྱི་སྒོ་གསུམ་དང་སྦྱར་བ་ནི། ཟླ་བ་ཐབས་ཀྱི་སྐུ་ཡིན་ཏེ། །ཉིན་མོ་བྱེད་པ་ཤེས་རབ་གསུང༌། །ཤེས་རབ་སྐུ་ནི་གསང་བའི་རྩ། །གཅི་བ་འབབ་མ་གཙོ་བོའི་གསུང༌། །སྟེང་འོག་ཐུགས་ཀྱི་རྩ་གཉིས་དག །མུན་ཅན་ཁུ་བ་འབབ་མའོ། །ཐབས་ཀྱི་ཐུགས་ནི་མུན་པ་ཅན། ཁུ་བ་འབབ་མ་ཤེས་རབ་ཀྱི། །སྟེང་འོག་རིགས་དྲུག་འདི་རྣམས་ནི། །སྐུ་གསུང་ཐུགས་ཀྱི་རྣལ་འབྱོར་ལས། །ཤེས་རབ་ཐབས་དངོས་ཡན་ལག་གིས། །ལུས་ཅན་ཀུན་ལ་རྣམ་པར་གནས། །ཞེས་པ་སྟེ་ཟླ་བའི་རྩ་ནི་ཆུ་ཁམས་ཡིན་པས་ཐབས་ཀྱི་སྐུ་དང༌། ཉི་མའི་རྩ་ནི་མེ་ཁམས་ཡིན་པས་ཤེས་རབ་ཀྱི་གསུང་དང༌། བཤང་བའི་རྩ་ནི་ས་ཁམས་ཡིན་པས་ཤེས་རབ་ཀྱི་སྐུ་དང༌། གཅི་བ་འབབ་མ་ནི་རླུང་ཁམས་ཡིན་པས་གཙོ་བོ་སྟེ་ཐབས་ཀྱི་གསུང་ཡིན་ལ། སྟེང་དང་འོག་ཏུ་ཐུགས་ཀྱི་རྩ་རེ་རེ་སྟེ་གཉིས་ནི་མུན་ཅན་གྱི་རྩ་དང་ཁུ་བ་འབབ་མ་སྟེ། མུན་པ་ཅན་གྱི་རྩ་ནི་ནམ་མཁའི་ཁམས་ཀྱི་ཕྱིར་ཐབས་ཀྱི་ཐུགས་དང་ཁུ་བ་འབབ་པ་ནི་ཡེ་ཤེས་ཀྱི་ཁམས་ཀྱི་ཕྱིར་ཤེས་རབ་ཀྱི་ཐུགས་སོ། །དེ་ལྟར་ན་སྟེང་དུ་གསུམ་དང་འོག་ཏུ་གསུམ་སྟེ། བསྡོམས་པས་འབྱུང་བའི་ཁམས་རིགས་དྲུག་གི་རྩ་འདི་རྣམས་ནི། ས་མེ་ཡེ་ཤེས་གསུམ་ཤེས་རབ་ཀྱི་སྐུ་གསུང་ཐུགས་ཀྱི་དངོས་པོ་དང༌། ཆུ་མེ་
ནམ་མཁའ་གསུམ་ཐབས་ཀྱི་དངོས་པོའི་སྐུ་གསུང་ཐུགས་ཀྱི་ཡན་ལག་སྟེ་དབྱེ་བས་དང༌། རྣལ་འབྱོར་ཏེ་ཐབས་ཤེས་ཕན་ཚུན་གཉིས་མེད་དུ་སྦྱོར་བའི་ཚུལ་གྱིས། ལུས་ཅན་ཀུན་གྱི་ལུས་ལ་ཏྶཾ་རྣམ་པར་གནས་སོ། །དོན་ཚན་གསུམ་པ་སྐྱེ་འཆིའི་རླུང་བཤད་པ་ནི། འཆི་ལྟས་ལུས་ངག་རྩ་དག་ལ། །སྟེང་འོག་ལྷག་པའི་རླུང་རྣམས་ཀྱིས། །མུན་ཅན་ཁུ་བ་འབབ་མ་ལ། །སྐྱེ་བ་དང་ནི་འཆི་བ་གནས། །སྐྱེ་དང་འཆི་དང་འཁྲིག་པ་ཡི། །དུས་སུ་ཁུ་བ་འབབ་པའོ། །ཞེས་པ་སྟེ་འཆི་ལྟས་ཀྱི་རླུང་རྣམས་བསྡུ་ན་གསུམ་དུ་འདུས་པ་ལས་རགས་པར་ན། ཚེ་ལོ་བརྒྱ་པའི་དབང་དུ་བྱས་ན། ལོ་དགུ་བཅུ་གོ་དྲུག་དང༌། ཟླ་བ་ཕྱེད་དང་བཅུ་གཅིག་ཚུན་ཆད་ལ་བྱུང་བའི་འཆི་ལྟས་ནི། དུས་མིན་གྱི་འཆི་ལྟས་ཡིན་ལ། དེ་ཕན་ཆད་ནི་དུས་འཆིའི་ལྟས་སོ། །དེ་ཡང་སྟེང་གི་ལུས་ངག་གི་རྩ་ཟླ་ཉི་གཉིས་དང༌། འོག་གི་ལུས་ངག་གི་རྩ་བཤང་གཅི་གཉིས་ལ་ཉི་ཟླའི་འཆི་ལྟས་འཆར་ཏེ། དེ་དག་སྟེང་དང་འོག་གི་རླུང་སྲོག་དང་ཐུར་སེལ་ལ་སྐྱོན་ཞུགས་པ་ལས་སོ། །དེ་ཡང་བཤང་བའི་རྩ་ལ་སྐྱོན་ཞུགས་ན་ཟླ་བའི་དང༌། གཅི་བའི་རྩ་ལ་སྐྱོན་ཞུགས་ན་ཉི་མའི་སྟེ། འདི་དག་ཚད་ལས་ལྷག་པར་རྒྱུས་པའི་རླུང་གི་སྟོབས་ཀྱིས་ཡིན་པས། དུས་མིན་གྱི་བལྟས་སོ། །མུན་ཅན་གྱི་རྩ་དང་ཁུ་བ་འབབ་མའི་རྩ་ལ་གློ་བུར་དུ་མ་ཡིན་པར། རིམ་གྱིས་སྐྱོན་ཞུགས་པ་ལས། མཐར་དུས་འཆིའི་བལྟས་སུ་འགྱུར་རོ། །གཞན་ཡང་སྐྱེ་བ་སྟེ་མངལ་དུ་ལུས་ཆགས་པ་ནས་ཕྱི་རོལ་ཏུ་མ་བཙས་ཀྱི་བར་ལ། མུན་ཅན་གྱི་རྩ་དྷཱ་ཏཱིར་རླུང་གནས་པ་ཡིན་ལ་འཆི་བའི་ཚེ་ཡང་རླུང་དང་ཁམས་གྱི་ནུས་པ་ཐམས་ཅད་དེར་གནས་པར་འགྱུར་རོ། །གཞན་ཡང་སྐྱེ་བའི་གནས་སྐབས་དེ་དང༌། འཆི་བའི་གནས་སྐབས་དང༌། འཁྲིག་པའི་དུས་སུ་ཡང༌། རྩ་དེ་གཉིས་སུ་རླུང་དང་ཁུ་བ་འབབ་པའོ། །དོན་ཚན་བཞི་པ་དབུ་མའི་རླུང་གི་མཚན་ཉིད་ནི། མུན་ཅན་མ་ཡང་སྟེང་དུ་འབབ། །ཉི་མའི་འཕོ་བ་མཉམ་པ་ལ། །དུས་སྦྱོར་འཆར་བའི་མངོན་མཚམས་སུ། །དབུ་མ་ནས་ནི་མཉམ་པ་འབབ། །རྐང་པ་དང་བཅས་ལྔ་བཅུ་དྲུག །འབྱུང་དང་འཇུག་པའོ་མི་ཡི་བདག །བདུན་ཅུ་རྩ་ལྔའི་ལྷག་པ་ཡི། །དྲུག་བརྒྱ་ཉིན་དང་མཚན་ལའོ། །དྲུག་བརྒྱ་རྣམས་ཀྱིས་ལྷག་པ་ཡི། །སྟོང་ཕྲག་ཉི་ཤུ་རྩ་གཅིག་གོ། འདི་ཡིས་དམན་པ་གང་དེ་རྣམས། །
གཡོན་དང་གཡས་པའི་རྩར་འབབ་བོ། །ཕྱོགས་གསུམ་དང་བཅས་ལོ་གསུམ་རྣམས། །ལོ་བརྒྱ་རྣམས་ལས་དབུ་མའོ། །ཞེས་པ་སྟེ། གཞན་ཡང་རླུང་དབུ་མར་འབབ་པའི་དུས་ཡོད་སྟེ། མུན་ཅན་མ་ལས་སྟེང་དུ་མཉམ་རྒྱུ་འབབ་བའི་དུས་ནའོ། །དེ་ཡང་རླུང་འགྲོ་འོང་གནས་གསུམ་གཅིག་ཏུ་སྡོམ་པ་ནི་དབུགས་གཅིག་ཡིན་ལ། དེ་དྲུག་ལ་ཆུ་སྲང་དང༌། དེ་དྲུག་ཅུ་ལ་དབུགས་སུམ་བརྒྱ་དྲུག་ཅུ་ཡོད་དེ། ཆུ་ཚོད་གཅིག་གོ །ཆུ་ཚོད་རེ་ནི་འབྱུང་བའི་དཀྱིལ་འཁོར་རེ་དང་ཚད་མཉམ་པ་ཡིན་ལ། ཆུ་ཚོད་ལྔ་ནི་དབུགས་སྟོང་བརྒྱད་བརྒྱ་སྟེ་དུས་སྦྱོར་གཅིག་གི་དབུགས་སོ། །འདི་དག་ཏུ་དུས་སྦྱོར་དང་ཁྱིམ་དང༌། འཕོ་བ་ཡང་དོན་གཅིག་གོ །དེ་ལྟ་བུའི་འཕོ་བ་བཅུ་གཉིས་ནི་ཉིན་ཞག་གཅིག་སྟེ་དེ་ལ་དབུགས་ཉི་ཁྲི་ཆིག་སྟོང་དྲུག་བརྒྱའོ། །དབུགས་ཐམས་ཅད་ལ་རང་རང་གི་ཆ་ལ་སུམ་ཅུ་རྩ་གཉིས་སུ་བགོས་པའི་ཆ་གཅིག་ཙམ་ཞིག་དབུ་མ་ནས་འབབ་པ་མཉམ་པར་རྒྱུ་བའི་རླུང་ཡིན་ནོ། །འཕོ་བ་བཅུ་གཉིས་པོ་དེ་ཡང་ལྟེ་བའི་རྩ་འདབ་བཅུ་གཉིས་དང་སྦྱོར་བས། དང་པོ་ལུག །གསུམ་པ་འཁྲིག་པ། ལྔ་པ་སེང་གེ བདུན་པ་སྲང༌། དགུ་པ་གཞུ། བཅུ་གཅིག་པ་བུམ་པ་རྣམས་ནི་ཁ་ཡར་བ་ཡིན་པའི་ཕྱིར་མི་མཉམ་པ་ཞེས་བྱ་ལ། དེ་རྣམས་གཡོན་གྱི་རྩ་འདབ་དྲུག་ལ་རིམ་བཞིན་འབྱུང་ངོ༌། །གཉིས་པ་གླང༌། བཞི་པ་ཀརྐ་ཊ། དྲུག་པ་བུ་མོ། བརྒྱད་པ་སྡིག་པ། བཅུ་པ་ཆུ་སྲིན། བཅུ་གཉིས་པ་ཉ་རྣམས་ཁ་འཆམ་པ་ཡིན་པའི་ཕྱིར་མཉམ་པ་ཞེས་བྱ་སྟེ། གཡས་ཀྱི་རྩ་འདབ་དྲུག་ལ་རིམ་བཞིན་འབྱུང་ངོ༌། །དེ་ལྟར་ངེས་པར་བྱས་ནས། ཉི་མའི་ཆོས་གཡས་ཀྱི་འཕོ་བ། གླང་ལ་སོགས་པ་མཉམ་པའི་དུས་སྦྱོར་ལ་མཚོན་ནས། དུས་སྦྱོར་འཆར་བའི་མངོན་མཚམས་སུ། དབུ་མ་ནས་ནི་མཉམ་པ་འབབ། །ཅེས་གསུངས་པ་སྟེ། གཡོན་པ་མི་མཉམ་པའི་དུས་སྦྱོར་ལའང་འདྲའོ། །དབུགས་རེ་རེའི་སོ་གཉིས་ཆ་རྣམས་བསྡོམས་པས། དཀྱིལ་འཁོར་རེ་རེའི་མཚམས་ཀྱི་མཐར། བཅུ་གཅིག་རྐང་བཅས་རེ་རེར་ལོངས་པར་འགྱུར་བས། དུས་སྦྱོར་སྔ་མ་རྫོགས་
ཤིང་ཕྱི་མ་འཆར་བའི་བར་མཚམས་དེར། དུས་སྦྱོར་དེ་ལ་དབུ་མའི་དབུགས་ལྔ་བཅུ་ང་དྲུག་རྐང་པ་དང་བཅས་པ་ཡིན་ལ། འབྱུང་བ་དང་འཇུག་པའི་ཚུལ་གྱིས། དབུ་མ་ནས་གཡས་གཡོན་མཉམ་པ་སྟེ་མཉམ་རྒྱུའི་ཚུལ་དུ་འབབ་བོ་ཞེས་པ་སྟེ། དུས་སྦྱོར་གཅིག་ལ་དབུ་མའི་མཉམ་རྒྱུ་བསྡོམས་པས་འཕོ་མཚམས་སུ་རྩིས་ན། ང་དྲུག་རྐང་བཅས་སུ་ལོངས་པའི་དོན་ནོ། །དེ་འདྲ་བ་བཅུ་གཉིས་ཀྱིས་ཉིན་དང་མཚན་གྱི་ཞག་གཅིག་ལ་འབབ་པ་རྣམས་བསྡོམས་པས། བདུན་ཅུ་རྩ་ལྔ་ལྷག་པའི་དྲུག་བརྒྱའོ། །ཞག་གཅིག་ལ་དྲུག་བརྒྱ་རྣམས་ཀྱིས་ལྷག་པའི་སྟོང་ཕྲག་ཉི་ཤུ་རྩ་གཅིག་གི་དབུགས་རྒྱུ་བ་ལས། དྲུག་བརྒྱ་བདུན་ཅུ་དོན་ལྔའི་ཚད་འདི་ཡིས། དམན་ཞིང་ཕྲི་བའི་དབུགས་གང་ཡིན་པ་དེ་རྣམས། གཡོན་རྐྱང་མ་དང༌། གཡས་རོ་མའི་རྩར་འབབ་བོ། །དེ་ཡང་སོ་གཉིས་ཆས་ཕྲི་བའི་དབང་ལས་དབུགས་རིལ་པོའི་ཚད་དུ་བཞག་ན། ཉི་ཁྲི་དགུ་བརྒྱ་ཉི་ཤུ་རྩ་ལྔ་རོ་རྐྱང་དུ་འབབ་པ་ཡིན་གྱི། སྤྱིར་འབྱུང་འཇུག་གི་གྲངས་ནི་ཉི་ཁྲི་ཆིག་སྟོང་དྲུག་བརྒྱ་ཉིད་རོ་རྐྱང་ནས་འབབ་བོ། །ཚུལ་དེས་རྩིས་ན་ཞག་སུམ་ཅུ་རྩ་གཉིས་ལ་དབུ་མའི་དབུགས་ཉི་ཁྲི་ཆིག་སྟོང་དྲུག་བརྒྱའོ་ཞག་སྟོང་ཕྲག་སུམ་ཅུ་རྩ་དྲུག་སྟེ། ལོ་བརྒྱ་རྣམས་ལས་དབུ་མའི་དབུགས་ནི། ཕྱོགས་གསུམ་དང་བཅས་པའི་ལོ་གསུམ་སྟེ། ཞག་སྟོང་བརྒྱ་ཉི་ཤུ་རྩ་ལྔའོ། །འདིར་རྐང་པ་དང་བཅས་པ་ཞེས་པའི་རྐང་པ་ནི་དབུགས་གཅིག་གི་བཞི་ཆའོ། །དོན་འདི་དག་ལ་སེམས་འགྲེལ་རྣམས་ཀྱི་ཚིག་བརླིང་པོ་ལ་འཁྲུལ་གཞི་བྱས་ཏེ། འཕོ་མཚམས་སུ་ང་དྲུག་རྐང་བཅས་ལྷག་པོར་འདོད་པ་ནི། སྔ་མ་མང་པོ་ཞིག་དང༌། བོད་ཀྱི་གྲུབ་ཐོབ་ཏུ་གྲགས་པ་ཁ་ཅིག་ཀྱང་སྟེ། འོན་ཀྱང་མི་འཐད་པར་རྟོགས་སླ་ལ། ཡང་འཕོ་བ་སྔ་མའི་འཇུག་དང་ཕྱི་མའི་སོ་ག །སུམ་ལྷག་རེ་མཉམ་རྒྱུར་འགྱུར་རོ་ཞེ་ན་རགས་པའི་མཉམ་རྒྱུ་ནི་སུམ་བརྒྱ་རེ་ཡང་འབྱུང་སྲིད་ལ། འདི་ལ་དཀྱིལ་འཁོར་རྣམས་ཚད་མི་མཉམ་པར་ཐལ་ལོ། ཁ་ཅིག་དབུགས་རེ་རེའི་སོ་གཉིས་ཆ་དེ་འཕོ་བ་དངོས་ཀྱི་སྒང་ལ་མི་རྒྱུ་བར། འཕོ་མཚམས་
སུ་བསྡོམས་ཏེ་ང་དྲུག་རྐང་བཅས་རྒྱུ་བར་འདོད་པ་ཡང༌། ཤིན་ཏུ་མི་འཐད་དེ། དཀྱིལ་འཁོར་རེ་རེའི་མཚམས་སུ་དྲག་པོ་རྐང་བཅས་དང༌། ཞག་གཅིག་གི་མཐར་དྲུག་བརྒྱ་དོན་ལྔ་ལ་ཡང་དེ་ལྟ་བུ་དགོས་པར་ཐལ་བར་འགྱུར་རོ། །ཡང་དེ་གཉིས་ཐོབ་སྐལ་ཙམ་རྩིས་པ་ཡིན་ལ། འཕོ་མཚམས་ཀྱི་འདི་ནི་གཡས་གཡོན་ཕན་ཚུན་དུ་འཕོ་བའི་བར་དུ་མཉམ་རྒྱུ་འབྱུང་བའི་ངེས་པ་ཡིན་པས། མི་འདྲའོ་སྙམ་ན་འདི་ནི་ཕྲ་མོའི་མཉམ་རྒྱུ་ངོས་མ་ཟིན་པའི་གཏམ་ཡིན་ཞིང༌། དབུགས་འབྱུང་འཇུག་ཉི་ཁྲི་ཆིག་སྟོང་དྲུག་བརྒྱ་ལས་ལྷག་པའི་སྐྱོན་དང༌། འཕོ་བའི་དབུགས་དང་དབུ་མའི་དབུགས་རྣམས་ཡུན་རིང་ཐུང་དང་དངོས་པོ་སྦོམ་ཕྲ་མི་མཉམ་པའི་སྐྱོན་དུ་ཐལ་བར་འགྱུར་རོ། །དེས་ན་རང་ལུགས་ནི་སོ་གཉིས་ཆ་དེ་ནི་དབུགས་ཐམས་ཅད་ལ་ཡོད་ཅིང་དེ་ཡང་ཕྱོགས་ཅིག་ན་དུམ་བུའི་ཚུལ་གྱིས་ཡོད་པ་མ་ཡིན་ཏེ། ཏིལ་ལ་ཏིལ་མར་བཞིན་དུ་ཁྱབ་པ་དང༌། དབུ་མའི་དབང་བྱས་པ་དང༌། དབུ་མའི་ཆ་དེ་ཉིད་སྣ་སྒོ་གཉིས་ནས་མཉམ་པར་རྒྱུ་བ་ཡིན་ལ། འཕོ་མཚམས་ཀྱི་འཕོ་བ་སྔ་མའི་འགོ་དང་ཕྱི་མའི་འཇུག་རྣམས་ལ། མཉམ་རྒྱུ་ལྟར་སྣང་བ་འབྱུང་བ་ནི་རགས་པའི་མཉམ་རྒྱུ་ཡིན་པས་འདི་དང་མི་གཅིག་གོ །དབུ་མའི་རླུང་འདི་དྲུག་པ་ཡེ་ཤེས་ཀྱི་ཁམས་ཀྱི་རླུང་ཡིན་ཞིང༌། དཔེར་ན་སེང་ལྡེང་ལ་སེང་ལྡེང་གི་ཁུ་བས་ཁྱབ་ཅིང༌། སེང་ལྡེང་གི་སྡོང་དུམ་དང་པོར་འཇལ་བྱེད་ཀྱི་གཞལ་ནས་སླར་ཆུ་ནང་དུ་བསྐོལ་ཏེ་ཁུ་བ་མཐའ་དག་བྱུར་ནས། ཤིང་དེ་ཡང་སྐམ་ལ། ཁུ་བ་དེ་ཡང་ཁན་དར་བསྐམས་ནས། སོ་སོར་འཇལ་བྱེད་ལ་གཞལ་ན། སེང་ལྡེང་དེ་ཁན་དའི་བརྗིད་གྱི་ཚད་ཙམ་གྱིས། སྔོན་ལས་ཡང་བར་འགྱུར་རོ། །དེ་ཡང་ཤིང་གི་ཉི་ཤུ་ཆ་ཁན་དའི་བརྗིད་དུ་འགྱུར་བ་ཡིན་ན། སྔོན་ཉི་ཤུ་ཆའི་བཅུད་དེས་ཤིང་དེ་ཐམས་ཅད་ལ་ཁྱབ་པར་གནས་སོ། །དེས་ན་འདིར་དབུ་མའི་དབུགས་དེ་ཡང༌། དབུགས་ཀྱི་ནང་ནས་ལོགས་སུ་སྟོན་པ་ཞིག་སྲིད་ན་སོ་གཉིས་ཆ་ཡོད་ཞེས་པ་ཡིན་གྱི། དུམ་བུར་ཆད་པ་ནི་མ་ཡིན་ཏེ། རོ་རྐྱང་གི་དབང་
བྱས་པའི་རླུང་གི་ལུས་ལ། དབུ་མས་དབང་བྱས་པའི་རླུང་གི་བཅུད་ཀྱིས་ཁྱབ་པ་ཡིན་ནོ། །འདི་ནི་ལམ་མ་སྒོམས་པའི་དབང་དུ་བྱས་པ་སྟེ། དབུ་མའི་དབུགས་ཀྱི་གྲོལ་བ་མི་ཐོབ་པར་མ་ཟད། དུས་ཀྱི་འཆི་བ་ནི་འདི་ཁོ་ནའི་སྟོབས་ཀྱིས་ཡིན་ལ། དུས་མིན་དུ་འཆི་བ་ཡང་འདིས་རྒྱུ་བྱས་ནས་རོ་རྐྱང་ལ་སྐྱོན་ཞུགས་པ་ཡིན་པས། དེ་ལྟ་བུའི་སྐྱོན་བཟློག་པའི་ཕྱིར་འདི་ལམ་དུ་བྱེད་པ་ལ་འབད་པར་བྱའོ། །དོན་ཚན་ལྔ་པ་རྩ་དྲུག་གི་མིང་རིགས་བཤད་པ་ནི། སྟེང་དུ་གཡོན་གཡས་ཟླ་ཉི་མ། །རྐྱང་མ་ལུག་དང་སེར་སྐྱ་གཞན། །ཆུ་དང་མེ་ཡི་རང་བཞིན་ཅན། །པདྨ་རིན་ཆེན་འཛིན་པར་འདོད། །འོག་ཏུ་བཤང་གཅི་འབབ་པ་དག །ས་དང་རླུང་གི་རང་བཞིན་ཅན། །དབུས་མའི་རྩ་དང་གཡོན་པ་ཡང༌། །འཁོར་ལོ་རལ་གྲི་འཛིན་པར་འདོད། །སྟེང་དང་འོག་ཏུ་དབུས་མ་གཡས། །སྒྲ་གཅན་ཁུ་བ་རབ་འབབ་པ། །སྟོང་པ་ཡེ་ཤེས་རང་བཞིན་ཅན། །རྡོ་རྗེ་རྡཽ་རྗེ་འཛིན་པར་འདོད། །ཅེས་པ་སྟེ་སྟེང་དུ་གཡོན་ཟླ་བའི་རྩ་ཡི་མིང་ནི་རྐྱང་མ་དང༌། ལུག་ཅེས་ཀྱང་བྱ་སྟེ་ཆུ་ཁམས་འབབ་པས། པདྨ་སྟེ་འོད་དཔག་མེད་ཀྱི་རིགས་ཡིན་ལ། སྟེང་དང་གཡས་ཉི་མའི་རྩ་ནི་སེར་སྐྱ་དང་གཞན་རོ་མ་ཞེས་ཀྱང་བྱ་སྟེ། མིའི་རང་བཞིན་ཅན་གྱི་ཕྱིར། རིན་ཆེན་འཛིན་པ་སྟེ་རིན་ཆེན་འབྱུང་ལྡན་དུ་འདོད་དོ། །འོག་ཏུ་བཤང་བ་འབབ་པ་སའི་རང་བཞིན་ཅན་རྒྱབ་ཀྱི་དབུས་སུ་གནས་པའི་རྩ་ནི་འཁོར་ལོ་འཛིན་པ་རྣམ་སྣང་གི་རིགས་དང༌། གཅི་བ་འབབ་པ་རླུང་གི་རང་བཞིན་ཅན་མདུན་གྱི་གཡོན་ན་གནས་པ་ཡང༌། རལ་གྲི་འཛིན་པ་སྟེ་དོན་ཡོད་གྲུབ་པར་འདོད་དོ། །སྟེང་གི་དབུས་མ་སྒྲ་གཅན་གྱི་རྩ་སྟོང་པའི་རང་བཞིན་ཅན་ནི་རྡོ་རྗེའི་རིགས་མི་བསྐྱོད་པ་དང༌། འོག་ཏུ་མདུན་གྱི་གཡས་ཕྱོགས་ན་ཁུ་བ་འབབ་པའི་རྩ་ཡེ་ཤེས་ཀྱི་ཁམས་ཀྱི་རང་བཞིན་ཅན་རྡོ་རྗེ་འཛིན་པ་སྟེ། རྡོ་རྗེ་སེམས་དཔའི་རིགས་སུ་འདོད་དོ། །དེའི་རྗེས་སུ། ལྟེ་བའི་སྟེང་དུ་ཀུན་འདར་མ། །གང་དེ་ལ་ཡིད་བཟང་མུན་པ་འབབ། །འོག་ཏུ་ཁུ་བ་འབབ་གང་དེ། །མཁའ་འགྲོ་གདོང་དང་དུང་
ཅན་མ། །ཞེས་ཚིག་བཅད་འོག་མ་འདིར་བླངས་ཏེ། ལྟེ་བའི་སྟེང་དུ་དབུས་མ་སྒྲ་གཅན་གྱི་རྩ་དེ་ནི་ཀུན་འདར་མ་སྟེ། གང་དེ་ལ་ཡིད་བཟང་མ་ཞེས་ཀྱང་བྱ་བ་མུན་པ་སྟེ་རླུང་དང༌། མུན་པའི་ཁམས་འབབ་པའོ། །འོག་ཏུ་ཁུ་བ་འབབ་པའི་རྩ་དེ་ནི་རྩ་མཁའ་འགྲོ་གདོང་སྟེ་བྱ་གདོང་དང༌། དུང་ཅན་མ་ཞེས་ཀྱང་བྱའོ། །ཡང་འོག་ནས་འབྱུང་བ་རྡུལ་འབབ་ཕྱིར་དེ་གཏུམ་མོ་སྟེ། ཁུ་བ་འབབ་ཕྱིར་མཁའ་འགྲོ་གདོང༌། །སྟེང་དུ་བརྗོད་དུས་བུད་མེད་ཀྱི། །གཡུང་མོ་སྐྱེས་བུའི་ཀུན་འདར་མ། །ཞེས་པ་ཡང་འདིར་བླངས་ནས། བུད་མེད་ཀྱི་ནི་རྩ་མཁའ་འགྲོ་གདོང་དེ་ལ་རྡུལ་འབབ་པའི་ཕྱིར། གཏུམ་མོ་ཞེས་བྱ་སྟེ། དམར་ཆ་ལ་གཏུམ་མོར་ཀུན་ཏུ་གྲགས་པའི་ཕྱིར་རོ། །སྐྱེས་པ་ལ་ནི་ཁུ་བ་འབབ་པའི་ཕྱིར། མཁའ་འགྲོ་གདོང་སྟེ་མཁའ་འགྲོའི་བརྡས་ནི་དཀར་ཆ་བསྟན་པ་ཡིན་ནོ། །རྩ་དེ་ཉིད་ཀྱི་རྒྱུད་ལྟེ་བའི་སྟེང་དུ་གནས་པ་ལ། མིང་བརྗོད་དུས་བུད་མེད་ཀྱི་དབུ་མ་དེ་ལ་ནི་གཡུང་མོ་ཞེས་བྱ་སྟེ། སྐྱེས་བུའི་དེ་ལ་ནི་ཀུན་འདར་མ་ཞེས་གྲགས་སོ། །དེ་ཡང་གཡུང་མོ་ནི་རྣམ་རྟོག་གིས་མི་རེག་ཅིང་མ་གོས་པ་སྟེ། མི་རྟོག་པའི་བདེ་བ་ལ་གནས་པའི་ཕྱིར་དང༌། ཀུན་འདར་མའམ་སྡིག་འཇོམས་མ་ནི་རྒྱ་སྐད་དུ་ཨ་ཝ་དྷཱུ་ཏཱི་སྟེ། རྣམ་པར་རྟོག་པའི་སྡིག་པ་འཇོམས་པའི་ཕྱིར་དེ་སྐད་ཅེས་བཏགས་ཏེ། མ་གོས་པ་དང་འཇོམས་པའི་དོན་ལ་ཤེས་རབ་དང་ཐབས་ཀྱི་ལྡོག་ཆའི་ཁྱད་པར་ཅུང་ཟད་ཡོད་དོ། ཁ་ཅིག་གཡུང་མོ་དང་གཏུམ་མོ་རྡུལ་འཛག་པའི་དུས་ཁོ་ན་ལ་སྦྱར་བ་ནི་སྐབས་ཀྱི་དོན་མ་ཡིན་ནོ། །དོན་ཚན་དྲུག་པ་སྲོག་རླུང་འགྲོ་འོང་གི་རྣམ་གཞག་ནི། ལྟེ་བའི་ཆུ་སྐྱེས་སྙིང་མགྲིན་དང༌། །དཔྲལ་པ་གཙུག་ཏོར་འདམ་སྐྱེས་ལ། །ས་ཆུ་མེ་རླུང་སྟོང་པ་རྣམས། རབ་ཏུ་འབབ་པ་བསྡུད་པ་ཡིས། །འབྱུང་འགྱུར་དེ་ནི་འཇུག་པ་དང༌། །སྐྱེད་པའི་འཇུག་དེ་ས་ལའོ། །ལྟེ་བ་ནས་ནི་ལྟེ་བའི་དབུས། །ཨ་ཝ་དྷཱུ་ཏཱིར་འགྲོ་དང་འོང༌། །ཞེས་ཏེ། དེ་ལ་དབུགས་ཕྱིར་འགྲོ་བ་ནི་འབྱུང་བ་ལྔ་བསྡུད་རིམ་གྱི་ཚུལ་གྱིས་
འགྲོ་བས། རྒས་པ་དང་འཆི་བ་སོགས་ཀྱི་རྒྱུ་ཡིན་ལ། ནང་དུ་འཇུག་པ་ནི་སྐྱེ་རིམ་ཡིན་པས། སྟོབས་དང་ཚེ་ལ་སོགས་པའི་རྒྱུའོ། །དེ་ཡང་ལྟེ་བའི་དཀྱིལ་འཁོར་ནས་བརྩམས་ཏེ་སྲོག་གི་རླུང་རྒྱུ་བ་ཡིན་པ་ལ། ལྟེ་བར་ས་དང༌། སྙིང་གར་ཆུ་དང༌། མགྲིན་པར་མེ་དང༌། དཔྲལ་པར་རླུང་དང༌། གཙུག་ཏོར་དུ་ནམ་མཁའི་རིམ་པས་རྒྱུད་ནས། སླར་ཡང་སྨིན་མཚམས་ནས་སྣ་བུག་གཡས་གཡོན་གང་རུང་དུ་འབབ་བོ། །འདམ་སྐྱེས་ནི་པདྨ་སྟེ་རྩ་འཁོར་རོ། །དེ་ཡང་ལྟེ་བའི་ཆུ་སྐྱེས་ལ་སའི་ཡོན་ཏན། དྲི་གཟུགས་རོ་རེག་སྒྲ་སྟེ་ལྔ་དང༌། སྙིང་ག་ལ་ཆུའི་ཡོན་ཏན་གཟུགས་རོ་རེག་སྒྲ་སྟེ་བཞི་དང༌། མགྲིན་པ་ལ་མེའི་ཡོན་ཏན་རོ་རེག་སྒྲ་གསུམ་དང༌། དཔྲལ་བ་ལ་རླུང་གི་ཡོན་ཏན་རེག་སྒྲ་གཉིས་དང༌། གཙུག་ཏོར་གྱི་འཁོར་ལོ་ལ་སྟོང་པ་སྟེ་ནམ་མཁའི་ཡོན་ཏན་སྒྲ་གཅིག་པུའི་མཚན་ཉིད་དོ། །དེ་ཡང་ལྟེ་བའི་ས་སྙིང་གའི་ཆུ་ལ་ཐིམ། དེ་མགྲིན་པའི་མེ་དང༌། དེ་དཔྲལ་བའི་རླུང་དང༌། དེ་གཙུག་ཏོར་གྱི་ནམ་མཁའ་ལ་ཐིམ་པས་ན། བསྡུད་པའི་རིམ་པས་རླུང་ཕྱིར་འབྱུང་བར་འགྱུར་ཞིང༌། དེ་ནི་སྔར་གྱི་ལམ་ནས་ནང་དུ་འཇུག་པ་དག་ལ། ནམ་མཁའ་ལས་རླུང་དང༌། རླུང་ལས་མེ་དང༌། མེ་ལས་ཆུ་དང༌། ཆུ་ལས་ས་སྐྱེ་བའི་ཚུལ་གྱིས། བསྐྱེད་པའི་རིམ་པས་མཐར་ལྟེ་བའི་ས་ལ་འཇུག་གོ །སྐབས་འདིར་རྩ་གསུམ་ལམ་གསུམ་གྱི་བགྲོད་ཚུལ་དང༌། རྩ་བའི་འཁོར་ལོ་དྲུག་དང༌། ལས་ཀྱི་འཁོར་ལོ་བཅུ་གཉིས་དང༌། བྱ་བའི་འཁོར་ལོ་དྲུག་ཅུ་ལ་སོགས་པ་དང༌། དེ་དག་གི་ཕྱི་ནང་དག་སྦྱོར་སོགས་རྒྱས་པར་རྟོགས་དགོས་ཏེ་རྒྱུད་འགྲེལ་ཆེན་མོ་ཉིད་ལས་རྟོགས་པར་བྱའོ། །འདིར་རབ་ཏུ་འབབ་པ་ཞེས་པ་ནི་ཁམས་ལྔ་རབ་ཏུ་འབབ་ཅེས་པའི་དོན་ཡིན་གྱི། དབུ་མ་ལས་འབབ་པར་འཆད་བ་དོན་མིན་ནོ། །འཁོར་ལོ་ལྔ་པོ་རྣམས་ཀྱི་ལྟེ་བ་ནས་ལྟེ་བའི་དབུས་ཀྱི་ཨ་ཝ་དྷུ་ཏཱིའི་ནང་ནས་འགྲོ་ཞིང་འོང་བར་བྱེད་ཅེས་པས་ནི། འཁོར་ལོའི་བར་
བར་གྱི་ཨ་ཝ་དྷཱུ་ཏཱི་ལ་གཞི་འཁོར་བའི་གནས་སྐབས་སུ་འགྲོ་འོང་མི་བྱེད་པའི་དོན་ཏེ། དེ་ཡང་འགྲོ་འོང་གཏན་ནས་མི་བྱེད་པ་མིན་ཡང༌། རྩ་དེས་རླུང་དེ་ལ་དབང་མི་སྒྱུར་བའི་དོན་ནོ། །དོན་མཚན་བདུན་པ་ཐུར་སེལ་འགྲོ་འོང་བཤད་པ་ནི། ལྟེ་གསང་ནོར་བུའི་ཆུ་སྐྱེས་ལ། །ལུས་ངག་སེམས་རྣམས་འབབ་པ་ནི། །འབྱུང་དང་དེ་ནི་འཇུག་པ་དག །བསྡུད་དང་སྐྱེད་པའི་རང་བཞིན་ཅན། །དུང་ཅན་སྐྱེ་བོ་ཐམས་ཅད་ཀྱི། །ཐུར་སེལ་རླུང་ནི་འབབ་པའོ། །འདི་རྣམས་བུད་མེད་བདེ་བ་ལས། །ཁུ་བའི་དུས་ལ་ཁྲག་འབབ་པའོ། །ཞེས་པ་སྟེ། ལྟེ་བའི་དཀྱིལ་འཁོར་དང༌། གསང་གནས་དང༌། ནོར་བུའི་ཆུ་སྐྱེས་ཀྱི་རྩ་འཁོར་ཏེ་གསུམ་ལ། ལུས་ངག་སེམས་ཀྱི་ཁམས་དང་རླུང་གི་རིམ་པས། ཐུར་སེལ་གྱི་རླུང་ཕྱིར་འབྱུང་བ་ནི་བསྡུད་པའི་རིམ་པ་དང༌། ཐུལ་སེལ་དེ་ནི་ནང་དུ་འཇུག་པ་ན། སེམས་ངག་ལུས་ཏེ་སྐྱེད་པའི་རང་བཞིན་ཅན་གྱིས་འབབ་པའོ། །དེ་ཡང་ལྟེ་བར་མུན་རྡུལ་སྙིང་སྟོབས་གསུམ་ཚོགས་པ་ལས་སྙིང་སྟོབས་གཙོ་བོ་དང༌། གསང་བར་མུན་རྡུལ་གཉིས་ལས་རྡུལ་གཙོ་བོ་དང༌། ནོར་བུར་མུན་པ་ཁོ་ན་ལྷག་པར་སྤྱོད་དོ། །སྙིང་སྟོབས་ལུས། རྡུལ་ངག །མུན་པ་སེམས་ཀྱི་ཆོས་ཡིན་ཞིང༌། ལུས་ངག་སེམས་གསུམ་གཅིག་ཏུ་འཚོགས་པ་ལས། ལུས་ངག་ལ་ཐིམ་པས་གཉིས་ཚོགས་ཙམ་དང༌། ངག་སེམས་ལ་ཐེམ་པས་གཅིག་པུར་འགྱུར་ཞིང༌། སེམས་ལས་ངག་སྐྱེས་པས་གཉིས་ཚོགས་དང༌། ངག་ལས་ལུས་སྐྱེས་པས་སུམ་ཚོགས་སུ་འགྱུར་བ་ནི། དཔེར་མཚོན་ན། འཆི་བའི་ཚེ་ལུས་ཕུང་ཁམས་རགས་པ་རླུང་ལ་ཐིམ། རླུང་ཡང་འཆི་སེམས་ལ་ཐིམ་པར་འགྱུར་ལ། ཡང་འཆི་སེམས་ལས་བར་སྲིད་རླུང་གི་རང་བཞིན་ཅན་དང༌། དེ་ལས་རགས་ལུས་འགྲུབ་པར་འགྱུར་བ་བཞིན་ནོ། །དེ་ལྟ་བུའི་སྐྱེ་བོ་ཐམས་ཅད་ཀྱི་ཐུར་སེལ་གྱི་རླུང་འགྲོ་འོང་གི་ཚུལ་གྱིས་འབབ་པ་འདི་ནི། དུང་ཅན་མ་ནས་འབབ་པ་ཡིན་པས། ལྟེ་བ་ནས་ནི་ལྟེ་བའི་དབུས། །དུང་ཅན་མར་ནི་འགྲོ་དང་འོང། །ཞེས་སྦྱར་རོ། །དེ་ཡང་སྟེང་གི་
རླུང་ཕྱིར་འགྲོ་བའི་ཚེ། ཐུར་སེལ་ནང་དུ་འཇུག་ལ། སྟེང་རླུང་ནང་དུ་འོང་བའི་ཚེ་ཐུར་སེལ་ཕྱིར་འགྲོའོ། །འཁོར་བའི་དུས་ན་དེ་ལྟར་ཡིན་ཀྱང་རྣལ་འབྱོར་སྒོམ་པའི་ཚེ། མཉམ་པར་ཁ་སྦྱར་དུ་འཆི་དགོས་པ་ཡིན་ནོ། །བུད་མེད་ལ་ཆགས་པའི་བདེ་བའི་དུས་ནི་སྐྱེས་པ་ལ། དུང་ཅན་མ་དེ་ཉིད་ཁུ་བ་འབབ་པའི་རྩར་འགྱུར་ཞིང༌། དེའི་དུས་སུ་བུད་མེད་ལ་ནྀ་ཁྲག་འབབ་བོ། །འདིར་ལྟེ་བའི་དཀྱིལ་འཁོར་ནི་སྲོག་ཐུར་གཉིས་ཀར་དང་པོར་འགོ་རྩོམ་ཡིན་པར་བཤད་པ་ལ། འཁོར་ལོ་གཅིག་ཁོ་ནར་འདོད་པ་དང༌། སྟེང་བལྟ་འོག་བལྟའི་རིམ་པ་གཉིས་ཡོད་པར་འདོད་པ་དང༌། ཐུར་སེལ་གྱི་སྐབས་ཀྱི་ལྟེ་བ་ནི་ལྟེ་འོག་སོར་བཞིའོ་ཞེས་འདོད་ཚུལ་གསུམ་ཡོད་ཀྱང་བར་པ་ལེགས་པར་མཐོང་ངོ༌། །དོན་ཚན་བརྒྱད་པ་རྩ་དྲུག་པོ་ཐབས་ཤེས་སུ་སྦྱོར་བ་ནི། ཤེས་རབ་ཐབས་དངོས་ཡན་ལག་གིས། །སྟེང་དུ་གཡས་དང་གཡོན་དག་དང༌། འོག་ཏུ་བཤང་གཅི་འབབ་པ་དང༌། །རྡུལ་དང་ཁུ་བ་འབབ་པ་དག །ཅེས་པ་སྟེ་ཡན་ལག་གིས་ཞེས་པ་ནི་དབྱེ་བ་ཡིས་ཞེས་པའི་དོན་ནོ། །དེ་ཡང་སྟེང་དུ་གཡས་རོ་མ་མེ་དང༌། གཡོན་རྐྱང་མ་ཆུ་གཉིས་རིམ་པས་ཐབས་ཤེས་དང༌། འོག་ཏུ་རྒྱབ་བཤང་བའི་རྩ་ས་དང༌། མདུན་གཅི་བའི་རྩ་རླུང་གཉིས་པོ་ཐབས་ཤེས་སུ་སྦྱར་བ་དང༌། དབུས་སུ་རྡུལ་དང་ཁུ་བ་འབབ་པ་དག །ཁུ་བ་ནི་ནམ་མཁའ་དང་རྡུལ་ཡེ་ཤེས་ཀྱི་ཁམས་ཐབས་ཤེས་སུ་སྦྱོར་ཏེ། དེ་ལྟར་ན་ཤེས་རབ་དང་ཐབས་ཀྱི་དངོས་པོའི་དབྱེ་བས་སོ། །འདི་ནི་འབྱུང་བ་ཁམས་དྲུག་ལུས་བསམ་གྱི་དབྱེ་བས་ཐབས་ཤེས་སུ་སྦྱོར་བ་དེ་ཡིན་པས། གོང་གི་ཐབས་ཤེས་རིགས་དྲུག་དང་སྦྱོར་ཚུལ་མི་འདྲའོ། །དེ་ལ་སྟེང་གི་རྩ་གསུམ་གཡས་གཡོན་ལ་སུམ་སྒྲིགས་དང༌། འོག་གི་རྩ་གསུམ་སུམ་འཛོམ་གྱི་ཚུལ་ལམ་མདུན་རྒྱབ་ཏུ་སུམ་སྒྲིགས་སུའང་དོན་གྱིས་གནས་པ་ཡིན་ལ། དེ་ཡང་རོ་རྐྱང་གཉིས་པོ་གཡས་གཡོན་ལྷོ་བྱང་གི་རིམ་པར་འགྱུར་ཞིང༌། བཤང་བའི་རྩ་དབུས་ཞེས་བརྗོད་ཀྱང་རྒྱབ་ལ་ཉེ་བས་ནུབ་ཀྱི་རྩ་དང༌། གཅི་བ་
དང་ཁུ་བའི་རྩ་གཉིས་མདུན་གྱི་ཕྱོགས་སུ་འཁྱོགས་མཉམ་པ་གཡས་གཡོན་སོ་སོར་བཟུང་བ་ཡིན་ཀྱང་གཅི་བའི་རྩ་མདུན་གྱི་ཕྱི་ལ་ཉེ་བས་ཤར་གྱི་རྩར་བྱ་ལ། ཁུ་བའི་རྩ་ནི་གཅི་བའི་རྩ་ལས་ཅུང་ཟད་ནང་དུ་ཕྱོགས་པས་འོག་དབུས་ཀྱི་རྩར་དོན་གྱིས་འགྱུར་རོ། །གཅི་བའི་གཡོན་དང་ཁུ་བའི་གཡས་སུ་བཤད་པ་འདི། སྐྱེས་པའི་ལུས་ལ་དེ་ལྟར་ངེས་ལ། ཡང་བོད་དུ་འགྱུར་བའི་རྒྱུད་གཞུང་ལས་བཤད་ཁུངས་གསལ་པོ་མ་མཐོང་ཡང༌། བུད་མེད་ལ་དེ་གཉིས་གོ་བཟློག་པའོ་ཞེས། དམ་པ་འགའ་ཞིག་གསུང་པ་ལྟར་ཡིན་པར་སེམ་མོ། །དེས་ན་འོག་གི་གཡས་གཡོན་དབུས་གསུམ་ལ་སྐབས་ཐོབ་ཀྱི་ངོས་འཛིན་ཅི་རིགས་པར་སྣང་བས། དུས་ཞབས་པ་ཆུང་བས་མཛད་པར་གྲགས་པའི་འགྲེལ་པ་ལས། ཁུ་བ་འབབ་པ་དབུས་སུ་བཤད་པ་ཡང་མ་ནོར་བར་སེམ་མོ། །དེ་ཡང་ཕོ་མོ་གང་རུང་གཅིག་གི་ལུས་ལ་ཨ་ཝ་དྷཱུ་ཏཱི་མཁའ་ཁམས་དང༌། དུང་ཅན་མ་ཡེ་ཤེས་ཀྱི་ཁམས་ཐབས་ཤེས་སུ་སྦྱོར་ལ། སྐབས་འདིར་དངོས་བསྟན་ལ་སྐྱེས་པའི་ཁུ་བ་འབབ་པ་དང་བུད་མེད་ཀྱི་རྡུལ་འབབ་པ་ཐབས་ཤེས་སུ་སྦྱར་བའོ། །དོན་ཚན་དགུ་པ་ཁྱིམ་གྱི་དཀྱིལ་འཁོར་འབབ་ཚུལ་རྒྱས་པར་བཤད་པ་ནི། རྣམ་ཤེས་ལ་སོགས་དཀྱིལ་འཁོར་ལྔ། །རྟག་ཏུ་གཡོན་པའི་རྩ་ལའོ། །ས་སོགས་གཡས་པའི་རྩ་ལ་སྟེ། དབུས་སུ་དྲུག་པ་འབབ་པའོ། །ལྟེ་བའི་པདྨ་འདབ་མ་ལ། །དཀྱིལ་འཁོར་དྲུག་ཅུ་རྣམས་རིམ་བཞིན། །གཡོན་དང་གཡས་པའི་དུས་སྦྱོར་ནི། །ལུག་སོགས་གླང་ལ་སོགས་པ་ལ། །རྩ་བ་གཡོན་དང་དེ་ནས་གཡས། །སྟེང་དང་དབུས་སུ་རིམ་པས་རླུང༌། །ས་སོགས་དཀྱིལ་འཁོར་རེ་རེ་ཞིང༌། །དབྱུག་གུས་སྣ་བུག་དག་ལའོ། །རིམ་པས་ཆུ་ཚོད་འབབ་པ་ནི། །དྲུག་ཅུ་དང་བཅས་སུམ་བརྒྱའི་དབུགས། །བརྒྱ་ཕྲག་བཅོ་བརྒྱད་དབུགས་དེ་རྣམས། །ཆུ་ཚོད་ལྔར་ནི་འབབ་པའོ། །ཆུ་ཚོད་དྲུག་ཅུ་ཉིན་མཚན་དུ། །ལུས་ལ་དཀྱིལ་འཁོར་རྣམས་ཞེས་པའོ། །འདབ་མའི་དབུས་དང་དེ་ནས་ཤར། །གཡས་གཡོན་གཞན་དུ་རིམ་པ་ཡིས། །གཡོན་པར་
རྟག་ཏུ་ནམ་མཁའ་སོགས། །གཡས་པར་ས་སོགས་གཞན་ལས་སོ། །གཡོན་པར་རྣམ་ཤེས་སོགས་འབྱུང་བ། །གཡས་པར་ས་སོགས་བསྡུད་པའོ། །ཞེས་པ་སྟེ་རྣམ་ཤེས་ལ་སོགས་པའི་སྒྲས་འདུ་བྱེད་དང༌། ཚོར་བ་དང༌། འདུ་ཤེས་དང༌། གཟུགས་ཀྱི་ཕུང་པོ་སྟེ་ཕུང་པོ་ལྔའི་རླུང་ནི་རྟག་ཏུ་ལྟེ་བའི་རྩ་འདབ་མ་བཅུ་གཉིས་ཀྱི་ནང་ཚན་གཡོན་པའི་རྩ་འདབ་དྲུག་ལ་འབབ་སྟེ། དེ་ཡང་རྣམ་ཤེས་ནམ་མཁའི་ཁམས་དང༌། འདུ་བྱེད་རླུང་དང༌། ཚོར་བ་མེ་དང༌། འདུ་ཤེས་ཆུ་དང༌། གཟུགས་ཕུང་ས་ཁམས་ཡིན་ཀྱང༌། གཡོན་གྱི་འདི་རྣམས་རགས་ཤིང་བདེ་བ་ཤས་ཆེ་བའི་ཕྱིར་ཁམས་ཀྱི་རང་མིང་གིས་མ་བསྟན་པར་ཕུང་པོར་བཞག་པ་དང༌། གཡས་ཀྱི་རྣམས་ནི་ཕྲ་ཞིང་གསལ་བ་ཤས་ཆེ་བའི་ཕྱིར་ཁམས་ལྔ་པོ་ཉིད་ཀྱི་རང་མིང་གིས་བསྟན་པ་ཡིན་ནོ། །དེ་བས་ན་ས་སོགས་ཀྱི་སྒྲས་ཆུ་མེ་རླུང་ནམ་མཁའི་ཁམས་ཀྱི་རླུང་རྣམས། གཡས་པའི་རྩ་འདབ་དྲུག་ལ་འབབ་པ་ཡིན་ལ། དྲུག་པ་ཡེ་ཤེས་ཀྱི་ཁམས་ཀྱི་རླུང་ནི། དབུས་ཨ་ཝ་དྷཱུ་ཏཱི་ནས་འབབ་སྟེ་གོང་དུ་བསྟན་ཟིན་ཏོ། །གཡས་ཀྱི་རྩ་འདབ་དྲུག་གི་འཕོ་བ་རྣམས་ནི་རོ་མས་དབང་བྱས་ཤིང༌། སྣ་བུག་གཡས་ནས་འབབ་པ་གཙོ་ཆེ་ལ། གཡོན་གྱི་རྣམས་རྐྱང་མས་དབང་བྱས་ཤིང་སྣ་བུག་གཡོན་དུ་འབབ་པ་གཙོ་ཆེའོ། །དེ་ཡང་ལྟེ་བའི་རྩ་འདབ་བཅུ་གཉིས་ཀྱི་འདབ་མ་རེ་རེ་ལ། དུས་སྦྱོར་ནི་རེ་རེ་འབབ་པ་ཡིན་ཞིང༌། དུས་སྦྱོར་རེ་ལ་དཀྱིལ་འཁོར་ལྔ་ལྔ་འབབ་པས། དཀྱིལ་འཁོར་དྲུག་ཅུའོ། །རྒྱབ་མདུན་གྱི་དབུས་དྲང་ཐད་ལ་མཚམས་བཅོལ་བའི་གཡོན་དུ་ལུག་སོགས་དུས་སྦྱོར་དྲུག་སྟེ། ལུགའཁྲིགསེང༌། སྲང༌། གཞུ། བུམ་དྲུག་དང༌། གཡས་སུ་གླང་སོགས་དུས་སྦྱོར་དྲུག་སྟེ། གླང༌། ཀར། བུ་མོ། སྡིག་པ། ཆུ་སྲིན། ཉ་རྣམས་སོ། །དེ་དག་ལས་དཀྱིལ་འཁོར་ལྔ་སྣ་སྒོར་འབབ་ཚུལ་ནི། རྩ་བ་ནི་འོག་སྟེ་མཆུའི་ཕྱོགས་ལ་བསྟན་པ་དང༌། གཡོན་ནི་རླུང་ཕྱིར་འགྲོ་ཕྱོགས་ཀྱི་མདུན་གྱི་དབང་དུ་བྱས་པའི་གཡོན་ཏེ་སྣའི་བར་ཀ་ཕྱོགས་དང༌། གཡས་ནི་རིམ་པ་དེས་རྩིས་ཏེ་སྣ་
གཤོག་གི་ཕྱོགས་དང༌། སྟེང་ནི་སྣའི་རྩེ་མོའི་ཕྱོགས་དང༌། དབུས་ནི་སྣའི་བུ་གའི་དབུས་ཀྱི་ཕྱོགས་ཏེ་སོགས་སུ་འགྲོ་བ་ལ་བརྡ་སྦྱར་རོ། །དེས་ན་རྩ་བ་སྟེ་འོག་ཏུ་ཁམས་ས་དང༌། གཡོན་ཏེ་བར་ཀ་ཕྱོགས་སུ་ཁམས་ཆུ་དང༌། གཡས་ཏེ་མཁུར་ཚོས་ཕྱོགས་ལ་ཁམས་མེ་དང༌། སྟེང་སྟེ་སྣ་རྩེ་ཕྱོགས་ནས་ཁམས་རླུང་དང༌། དབུས་ནས་ཁམས་ནམ་མཁའི་དཀྱིལ་འཁོར་རྒྱུ་ཞིང༌། གོ་རིམ་དེ་ཡང་སྣ་བུག་གཡས་ལའོ། །གཡོན་པ་ལ་ནི་དེ་གོ་བཟློག་སྟེ། ཐོག་མར་དབུས་སུ་ཕུང་པོ་ནམ་མཁའ་དང༌། དེ་ནས་སྟེང་དུ་རླུང་དང༌། གཡས་སུ་མེ་དང༌། གཡོན་དུ་ཆུ་དང༌། འོག་ཏུ་སའི་དཀྱིལ་འཁོར་རྒྱུའོ། །འདི་དག་ཀྱང་དོན་ལ་འབྱུང་བ་ལྔ་པོ་རྟག་ཏུ་འདྲེས་པ་ཡིན་ཀྱང༌། གནས་དེ་དང་དེ་དག་ཏུ་དབང་བྱེད་པའི་དོན་ཡིན་ལ། དེ་ཡང་སྣ་སྒོ་ནས་ས་རླུང་སོར་བཅུ་གཉིས། ཆུ་རླུང་བཅུ་གསུམ། མེ་རླུང་བཅུ་བཞི། རླུང་གི་རླུང་བཅོ་ལྔ། ནམ་མཁའི་རླུང་སོར་བཅུ་དྲུག་རྣམས་ཕྱི་རོལ་ཏུ་རྒྱུ་སྟེ། འདིར་བླ་མའི་མན་ངག་མེད་པར་གླེགས་བམ་དང་ཤོག་ཁྲ་ཙམ་མཐོང་བས་ཁེངས་པ་ཁ་ཅིག་གི་འདོད་པ་ལྟར། ཤིང་ཡལ་ག་ལྔ་འཁྱོག་པོར་སྐྱེས་པ་ལྟར་སྣ་སྒོར་རྒྱུ་བ་ནི་མ་ཡིན་ཏེ། རླུང་ལྔ་པོ་གཙོ་བོར་སྤྱོད་པ་ནི་ཚད་དེ་དང་དེའི་མཐས་སྟེང་འོག་གཡས་གཡོན་མདུན་དང་ལྔར་ཟླུམ་པོར་རྒྱུ་ཡང༌། གང་དབང་དུ་བྱེད་པ་པོས་ལས་བྱེད་པ་ནི་ཕྱོགས་སོ་སོ་ན་གནས་པའི་དོན་ནོ། །དེས་ན་སྣ་སྒོ་ནས་སོར་བཅུ་དྲུག་སྟེང་ཐད་ཀྱི་ནམ་མཁར་གཞལ་བ། ནམ་མཁའི་དཀྱིལ་འཁོར་གྱི་མཐའི་མཚམས་ཡིན་པས། དེར་སྒོམ་མོ་ཞེས་ལམ་འདི་མངོན་སུམ་དུ་བྱས་པ་རྣམས་ཀྱིས་གསུངས་པ་ལ། ཉམས་མྱོང་མེད་པ་དག་གིས་ཁྲེལ་བགད་དུ་བྱེད་པ་ནི། གསལ་བྱེད་པའི་བཞད་གད་དེ་དེ་ཉིད་རང་ལ་ལག་ལེན་དང་འབྲེལ་བའི་བཤད་རྒྱུན་ཙམ་ཡང་མེད་དོ་ཞེས་གོ་བར་བྱེད་པ་དང༌། མན་ངག་ཤེས་པའི་མདུན་དུ་རང་གི་དེ་ཉིད་སྟོན་པར་ཟད་དོ། །ཇི་ལྟར་ཕྱིར་རིང་བ་དེ་ཙམ་ནང་དུ་ཐུང་བས། ནང་དུ་རྒྱུ་བའི་ཚེ་ནམ་མཁའི་རླུང་ལྟེ་བ་ལ་རེག་ཙམ་དང༌། རླུང་ནི་ལྟེ་འོག་ཏུ་སོར་
གཅིག་ནས་ས་ནི་ལྟེ་འོག་ཏུ་སོར་བཞིའི་བར་དུ་རྒྱུའོ། །དེ་ཡང་ས་ལ་སོགས་པ་དཀྱིལ་འཁོར་རེ་རེ་ལ་རིམ་པས་དབུགས་དྲུག་ཅུ་དང་བཅས་པའི་སུམ་བརྒྱ་སྟེ། དབྱུག་གུའི་ཚད་ཅེས་བྱ་བ་ཆུ་ཚོད་རེ་འབབ་ལ། དེ་འདྲ་ལྔ་སྡོམ་པས་ཁྱིམ་མམ་དུས་སྦྱོར་རམ་འཕོ་ཆེན་རེ་ལ་ཆུ་ཚོད་ལྔའམ་དབུགས་བརྒྱ་ཕྲག་བཅོ་བརྒྱད་འབབ་སྟེ་དེ་ལྟར་ཆུ་ཚོད་ལྔ་ལྔར་སྣ་བུག་གཡས་གཡོན་ལ་སྤེལ་མར་འབབ་པ་ནི་སྣ་བུག་དག་ལའོ་ཞེས་པ་དབུས་ཀྱི་གསལ་བྱེད་དོ། །དེ་འདྲ་ལན་བཅུ་གཉིས་ཀྱིས་ཉིན་མཚན་ཞག་གཅིག་གི་ནང་དུ་ཆུ་ཚོད་དྲུག་ཅུས་འབྱུང་བའི་དཀྱིལ་འཁོར་རྣམས་ལུས་ལ་འབབ་ཅེས་པའོ། །དཀྱིལ་འཁོར་ལྔ་རྣམས་ལྟེ་བའི་རྩ་འདབ་ནས་འབབ་ཚུལ་ནི། རྩ་འདབ་བཅུ་གཉིས་པོ་རེ་རེའི་དབུས་སུ་པད་འདབ་བཞི་པ་ལྟ་བུའི་པདྨ་རེ་རེ་གནས་པར་བྱས་ནས། གཡོན་གྱི་འདབ་མ་རྣམས་ལ། འདབ་མའི་དབུས་ཀྱི་ལྟེ་བ་ནས་ཕུང་པོ་ནམ་མཁའ་དང༌། དེའི་རྗེས་ནས་ཤར་རམ་མདུན་ཏེ་ཕྱི་རོལ་ཕྱོགས་ཀྱི་འདབ་མ་ནས། ཕུང་པོ་རླུང་དང༌། རིམ་པ་དེ་ཉིད་ཀྱི་གཡས་ཀྱི་འདབ་མ་ནས་ཕུང་པོ་མེ་དང༌། གཡོན་གྱི་འདབ་མ་ནས་ཕུང་པོ་ཆུ་དང༌། གཞན་ཏེ་དབུས་ཀྱི་ལྟེ་བ་རྩ་དབུ་མ་ལ་བསྟན་པའི་ཕྱོགས། པདྨ་འདབ་མ་བཞི་པ་དེ་ཉིད་ཀྱི་རྒྱབ་བམ་ནུབ་ཀྱི་འདབ་མ་ནས་ཕུང་པོ་ས་རྣམས་རིམ་པས་འབབ་ལ། གཡས་པ་རྣམས་ལའང་འདབ་མ་ནས་འབྱུང་བ་འབབ་ཚུལ་དེ་དང་འདྲ་བ་ཡང༌། གོ་རིམ་དེ་ལས་གཞན་ཏེ། ས་ཆུ་མེ་རླུང་ནམ་མཁའ་ཞེས་པའི་རིམ་པས་འབབ་བོ། གཡོན་པར་རྣམ་ཤེས་ཏེ་ཕུང་པོ་ནམ་མཁའ་སོགས་ནི། རླུང་མེ་ཆུ་སའི་རིམ་པ་བསྐྱེད་ཅིང་འབྱུང་བའི་རིམ་པས་རྒྱུ་བ་དང༌། གཡས་པར་ས་སོགས་སྟེ་ཆུ་མེ་རླུང་ནམ་མཁའི་རིམ་པ་བསྡུད་རིམ་གྱིས་རྒྱུ་བ་ཡིན་ནོ། །གོང་གི་འབྱུང་བ་ལྔའི་བསྐྱེད་བསྡུད་ཀྱི་རིམ་པ་ནི། དབུགས་རེ་རེ་ཞིང་འགྲོ་འོང་གིས་ཡིན་ལ། འདི་ནི་འབྱུང་བའི་རླུང་གི་དཀྱིལ་འཁོར་ལྔ་པོ་རྣམས་ཀྱི་སྔ་ཕྱིའི་གོ་རིམ་ལ་ལྟོས་པའི་བསྐྱེད་བསྡུད་ཀྱི་རིམ་པའོ། །འདིར་འགའ་ཞིག་སྣ་སྒོ་གཡས་སུ་རྒྱུ་བ་ལྷོ་བགྲོད་དང༌། གཡོན་དུ་རྒྱུ་བ་བྱང་བགྲོད་མཚོན་ཞེས་གསུང་ནའང་ལྟེ་བའི་ཁྱིམ་བཅུ་གཉིས་གཡས་གཡོན་དུ་འཕོ་བ་དང་མི་འགྲིག་པས། གནས་སྐབས་གཞན་དུ་སྦྱོར་རུང་བ་སྲིད་ཀྱང༌།
སྐབས་འདིར་མི་སྦྱོར་རོ། །དེས་ན་སྐབས་འདིར་ནི་དེའི་ཉིན་མོ་དང་མཚན་མོ་ཉིད་དམ་ཆུ་སྲིན་ལ་སོགས་པ་དང་ཀརྐཊ་ལ་སོགས་པ་བྱང་བགྲོད་དང་ལྷོ་བགྲོད་དུ་ཤེས་པར་བྱའོ། །དོན་ཚན་བཅུ་པ་དཀྱིལ་འཁོར་ཐབས་ཤེས་སུ་སྦྱར་བའི་ཞོར་ལ་ལག་པའི་ཕྱག་རྒྱ་བསྟན་པ་ནི། ནུབ་དང་ཤར་དུ་འཛིན་མ་རླུང༌། །ཕན་ཚུན་ཤེས་རབ་ཐབས་ཡིན་ཏེ། །མཐེ་བོང་མིང་མེད་དག་གིས་ནི། གང་ཕྱིར་ཁ་ལ་དབང་བསྐུར་བའོ། །གཡས་དང་གཡོན་དུ་མེ་དང་ཆུ། །ཕན་ཚུན་ཤེས་རབ་ཐབས་ཡིན་ཏེ། །གུང་མོ་མཛུབ་མོ་གཉིས་དག་གིས། །གང་ཕྱིར་རལ་གྲིར་འགྱུར་བའོ། །ཟླ་ཕྱེད་རྣམ་པའི་ཕྱག་རྒྱ་ནི། །མཆེ་བ་གྲི་གུག་མཐེ་ཆུང་སྟེ། །སྟོང་པ་མི་འགྱུར་སྟེང་འོག་ཏུ། །ཕན་ཚུན་ཐབས་དང་ཤེས་རབ་བོ། །དཀྱིལ་འཁོར་བཅུ་པོ་ཡང་དག་སྦྱོར། །སོར་མོ་རྣམས་ནི་ཕན་ཚུན་དུ། །མགོ་བོར་ལག་མཐིལ་སྦྱར་བ་ལ། །གྲི་གུག་དང་བཅས་རྩེ་གཅིག་གོ །དབུ་མའི་རྩ་ལ་མཉམ་པ་དེ། བསྐྱེད་དང་སྡུད་པའི་བྱེད་པ་པོ། །ཕུང་པོ་ཁམས་དང་རྡོ་རྗེ་གསུམ། །གཅིག་ཉིད་དབུ་མར་སོན་པ་ནའོ། །ཞེས་པ་སྟེ་ནུབ་ཏུ་གནས་པའི་འཛིན་མ་སྟེ་ས་དང༌། ཤར་དུ་གནས་པའི་རླུང་གཉིས་ཕན་ཚུན་དུ་ཤེས་རབ་དང་ཐབས་ཡིན་ཏེ། ས་ནི་ཤེས་རབ་རླུང་ནི་ཐབས་སོ། །དེ་བས་ན་མཐེ་བོང་ས་ཁམས་དང༌། མིང་མེད་རླུང་ཁམས་དག་ཁ་སྦྱོར་བས། གསང་རྫས་བླངས་ཏེ་གསང་དབང་གི་དུས་སུ་སློབ་མའི་ཁ་ལ་དབང་བསྐུར་བ་དང༌། མཆོད་པའི་དུས་སུ་ལྷ་རྣམས་བདུད་རྩིའི་མཆོད་པས་མཉེས་པར་བྱེད་དོ། །གཡས་སུ་གནས་པའི་མེ་ཤེས་རབ་དང༌། གཡོན་དུ་གནས་པའི་ཆུ་ཐབས་ཕན་ཚུན་མཉམ་པར་སྦྱོར་བས་ནི་ཟུང་འཇུག་ཏུ་འགྱུར་བས་ན་གུང་མོ་མེ་དང་མཛུབ་མོ་ཆུ་གཉིས་མཉམ་པར་སྦྱོར་བས་རལ་གྲིའི་ཕྱག་རྒྱར་འགྱུར་རོ། །འདིར་གང་ཕྱིར་ཞེས་བྱ་བ་གཉིས་ནི། གང་གི་ཕྱིར་འབྱུང་བ་གཉིས་གཉིས་པོ་དེ་ཐབས་ཤེས་ཡིན་པ་དེའི་ཕྱིར་ཕྱག་རྒྱ་དེར་འགྱུར་རོ། །ཞེས་པའི་དོན་ནོ། །རྡོ་རྗེ་ཁུ་ཚུར་ལས་མཐེའུ་ཆུང་ཟླ་བ་ཕྱེད་པའི་
རྣམ་པ་ལྟ་བུར་བྱེད་པའི་ཕྱག་རྒྱ་ལས། གཡོན་གྱི་མཐེ་ཆུང་མཆེ་བའི་ཕྱག་རྒྱ་ནི་སྟོང་པ་ནམ་མཁའི་ཁམས་ཏེ། མི་བསྐྱོད་པའི་ཕྱག་རྒྱ་སྟེང་གི་བགོ་སྐལ་དུ་འགྱུར་བ་དང༌། གཡས་ཀྱི་མཐེ་ཆུང་གྲི་གུག་གི་ཕྱག་རྒྱ་ནི་མི་འགྱུར་བའི་ཡེ་ཤེས་ཀྱི་ཁམས་ཏེ། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་འོག་གི་བགོ་སྐལ་དུ་སྦྱོར་ལ། ནམ་མཁའ་དང་ཡེ་ཤེས་མཉམ་པར་སྦྱོར་བ་ནི་དབུས་སུ་འགྱུར་ཏེ། གཞན་ཡང་དཀྱིལ་འཁོར་ལྔའི་རྩ་དང༌། ལག་པའི་སོར་མོའི་རྩ་རྣམས་འབྲེལ་བ་ལས། མཐེ་ཆུང་ནི་ལྟེ་བ་ནམ་མཁའི་ཁམས་རྣམས་ཀྱི་ཐོབ་སྐལ་ཡིན་པ་ལ། གཡོན་གྱི་ནམ་མཁའ་རྣམས་ནམ་མཁའི་ཁམས་དག་པ་བ་དང༌། གཡས་ཀྱི་རྣམས་ཡེ་ཤེས་ཁམས་ཀྱི་དོད་དུ་གྱུར་པའི་ནམ་མཁའ་འོ། །དེ་ཕྱིར་གཡས་ཀྱི་མཐེ་ཆུང་ནི་ཡེ་ཤེས་ཀྱི་ཁམས་ལ་སྦྱར་རོ། །གཡས་ཀྱི་ཁམས་ལྔ་དང༌། གཡོན་གྱི་ཕུང་པོ་ལྔ་སྟེ་དཀྱིལ་འཁོར་བཅུ་པོ་རྣམས་དབུ་མར་ཡང་དག་པར་སྦྱོར་བ་ནི། ཤེས་རབ་ཀྱི་ཕ་རོལ་དུ་ཕྱིན་མའི་གྲི་གུག་གི་ཕྱག་རྒྱ་དང་བཅས་པའི། རྡོ་རྗེ་སེམས་དཔའི་ཕྱག་རྒྱ་རྡོ་རྗེ་རྩེ་གཅིག་པ་སྟེ། མགོ་བོའི་སྟེང་དུ་ཐལ་མོ་བཀོད་པའི་ལག་མཐིལ་མཉམ་པར་སྦྱར་ཞིང༌། སོར་མོ་རྣམས་ཀྱང་ཕན་ཚུན་མཉམ་པར་སྦྱར་བའི་ཕྱག་རྒྱའོ། །འདིར་ལག་མཐིལ་སྦྱར་བ་མགོར་བཀོད་དེ། ཞེས་བརྗོད་ན་གོ་བདེ་ལ། ཁ་ཅིག་ཐལ་མོ་འདི་ཉིད་གྲི་གུག་གི་ཡང་ཡིན་ལ། རྡོ་རྗེ་རྩེ་གཅིག་གི་ཡང་ཡིན་པར་འདོད་པ་དང༌། གྲི་གུག་གི་ཕྱག་རྒྱ་ནི་ཆུ་གྲིའི་ཕྱག་རྒྱའོ་ཞེས་ཟེར་བ་ནི་ཅལ་ཅོལ་ལོ། །དེས་ན་བཅས་ཞེས་པའི་ཚིག་གིས་ཕྱག་རྒྱ་དེ་གཉིས་ཐ་དད་དུ་སྟོན་པའི་ཚིག་སྟེ། སོར་མོ་བརྒྱད་པོ་གཞན་རྣམས་མཉམ་པར་སྦྱར་བ་རྩེ་གཅིག་དང༌། མཐེ་ཆུང་སྦྱར་བ་གྲི་གུག་གོ །འདི་ནི་རྡོ་རྗེ་སེམས་དཔའ་ཡེ་ཤེས་ཀྱི་ཁམས་དག་པ་བ་དང༌། ཤེར་ཕྱིན་མ་སྟོང་པའི་མཚན་ཉིད་ཀྱི་ཕྱིར་ན་ནམ་མཁའི་ཁམས་ཏེ་དེ་གཉིས་མཉམ་པར་སྦྱོར་བའང་མཚོན་མོད་ཀྱི། གཙོ་བོར་སྟེང་དུ་ཕུང་ཁམས་ཀྱི་དཀྱིལ་འཁོར་བཅུ་རོ་མཉམ་པ་
རྡོ་རྗེ་སེམས་དཔའ་དང༌། འོག་ཏུ་སྐུ་གསུང་ཐུགས་རྡོ་རྗེ་གསུམ་གྱི་རླུང་དུང་ཅན་མར་འགགས་པ། དྷཱུ་ཏཱི་དང་དུང་ཅན་མ་མཉམ་པར་སྦྱར་བ་མཚོན་ནོ། །འོ་ན་དབྱིངས་ཕྱུག་མ་མཁའ་ཁམས་དང༌། ཤེར་ཕྱིར་མ་ཡེ་ཤེས་ཀྱི་ཁམས་སུ་སྦྱོར་དགོས་པ་མིན་ནམ་སྙམ་ན། མཁའ་མེ་གཉིས་ནམ་ཡང་དགྲར་གྱུར་པ་མེད་དེ་ཁྱབ་བྱ་ཁྱབ་བྱེད་ཡིན་པས་འབྱུང་བ་གཞན་དང་མི་མཚུངས་པས་མི་བསྐྱོད་པ་དང༌། རྡོར་སེམས་ལ་རང་རིགས་ཀྱིས་འཁྱུད་པ་དང་གཞན་རིགས་གྱི་འཁྱུད་པ་གཉིས་ཀ་འབྱུང་བ་དང༌། ཡུམ་གཉིས་པོ་དེའི་ཁམས་ཀྱང་ཕན་ཚུན་རྒྱས་བཏབ་པའི་ཕྱིར་དེ་གཉིས་ཀ་ལ་རེ་རེ་ཞིང་ཁམས་གཉིས་ཀ་འབྱུང་ངོ༌། །དེ་ཡང་དབུ་མའི་རྩ་ལ་ཕུང་ཁམས་བཅུ་དང་རྡོ་རྗེ་གསུམ་པོ་དེ་དག་རོ་མཉམ་པར་གྱུར་པ་ནི། གཞི་འཁོར་བའི་སྐབས་མངལ་དུ་གནས་པའི་དུས་ན་དེ་ལྟར་གནས་པ་ལས་ཕུང་ཁམས་སོགས་ཐམས་ཅད་བསྐྱེད་པ་དང་འཆི་བའི་ཚེ་ཕུང་ཁམས་སོགས་བསྡུས་ནས། དེ་ལྟར་གནས་པར་འགྱུར་བས་བསྐྱེད་བསྡུད་ཀྱི་བྱེད་པ་པོ་དང༌། ཡང་ན་ལམ་གྱི་གནས་སྐབས་སུ་སྟེང་གི་ཕུང་པོ་ལྔ་དང་ཁམས་ལྔའི་དཀྱིལ་འཁོར་བཅུ་དང་འོག་གི་རྡོ་རྗེ་གསུམ་གཅིག་ཉིད་དུ་འདྲེས་པ་དབུ་མ་ཨ་ཝ་དྷཱུ་ཏཱིར་ཐིམ་པ་ནི། ཡང་དག་པའི་ཕུང་ཁམས་དང་རྡོ་རྗེ་གསུམ་བསྐྱེད་ཅིང༌། འཁོར་བའི་ཕུང་ཁམས་དང་རྡོ་རྗེ་གསུམ་བསྡུད་པའི་བྱེད་པ་པོར་འགྱུར་རོ། །དེ་ཡང་སོར་མོ་རྣམས་སྦྱར་བ་ནི་དཀྱིལ་འཁོར་བཅུ་གཅིག་ཏུ་འདྲེས་པ་མཚོན་ལ་ཐལ་མོ་སྦྱར་བ་ནི་རྡོ་རྗེ་གསུམ་གཅིག་ཏུ་འདྲེས་པ་སྟེ། གཡོན་ལུས་དང༌། གཡས་ངག་དང༌། ཁ་སྦྱོར་གྱི་ཁོང་སྟོང་སེམས་ཏེ་གསུམ་པོ་གཅིག་ཏུ་འཚོགས་པ་ནི་ངོ་བོ་གཅིག་ཏུ་འདྲེས་པ་མཚོན་ནོ། །དོན་ཚན་བཅུ་གཅིག་པ་རྩ་དྲུག་གསུམ་དུ་བསྡུ་བའི་ཚུལ་ནི། གོང་དུ་ཚིགས་བཅད་བཞི་བཅུ་ཞེ་དགུ་པར་འབྱུང་བ་ཡང་འདིར་དྲངས་པ། ཟླ་བའི་ལམ་གྱིས་བཤང་བའི་རྩ། །ཉི་མས་གཅི་བ་འབབ་པ་སྟེ། །སྐྱེ་འཆི་མཉམ་པ་ཆགས་པ་ལ། །སྒྲ་གཅན་ཁུ་བ་རབ་ཏུ་འབབ། །ཅེས་ཏེ། སྟེང་གི་རྩ་གསུམ་དང་འོག་
གི་རྩ་གསུམ་ཞེས་དྲུག་ཏུ་བྱས་པ་ཡང༌། བྱེད་ལས་ཐ་དད་པས་དྲུག་ཏུ་བཞག་པ་སྟེ་རྩ་གཉིས་གཉིས་རྩའི་རྒྱུད་གཅིག་ཏུ་འདྲེས་ཤིང༌། རྩ་རེ་རེའི་མགོ་མཇུག་རྫོགས་པའི་དབང་དུ་བྱས་ན་རྩ་གསུམ་དུ་གྱུར་ཏེ། ཟླ་བའི་ལམ་སྟེ་རྩའི་རྒྱུད་ལས་བཤད་པའི་རྩ་བྱུང་བ་ཡིན་ཞིང༌། ཉི་མའི་རྩའི་རྒྱུད་ལས་གཅི་བ་འབབ་པ་དང༌། སྒྲ་གཅན་གྱི་རྩའི་རྒྱུད་ལས་ཁུ་བ་འབབ་པ་བྱུང་སྟེ། ལྟེ་བ་ཡན་ཆད་སྒྲ་གཅན་གྱི་རྩ་ཉིད་ལས་ཡང་སྐྱེ་བ་སྟེ་མངལ་ན་གནས་པའི་དུས་དང་འཆི་བའི་དུས་དབུགས་རྣམས་ཐིམ་ཞིང་སྲོག་ཆད་ལ་བར་སྲིད་མ་གྲུབ་པའི་གོང་གི་འཆི་སེམས་ཀྱི་སྐབས་དང༌། གཞིའི་དུས་ན་དབུ་མའི་དབུགས་སོ་གཉིས་ཆ་གཡས་གཡོན་མཉམ་པར་རྒྱུ་བས་དྲངས་ཏེ་ཐིག་ལེ་ཕྲ་མོ་དང༌། ལམ་སྒོམ་དུས། རོ་རྐྱང་གི་རྒྱུ་བ་འགགས་པས། མཉམ་རྒྱུར་སོང་བའི་དུས་དང༌། ཆགས་པ་སྟེ་འཁྲིག་པའི་སྦྱོར་བའི་དུས་རྣམས་ལ་ཡང་སྒྲ་གཅན་གྱི་རྩ་ལ་ཁུ་བ་འབབ་པའོ། །དུས་གཞན་དུ་ཡང་རྩ་ནང་དེ་ན་བྱང་ཆུབ་ཀྱི་སེམས་གཏན་ནས་མི་གནས་པ་ནི་མ་ཡིན་ནོ། །འོན་ཀྱང་འགྲོ་འོང་གི་རང་བཞིན་ཅན་ཞུ་བའི་ཐིག་ལེ་མི་འབབ་པ་ལ་དགོངས་སོ། །རྒྱུ་མཚན་དེའི་ཕྱིར་ཚིགས་བཅད་དྲུག་ཅུ་རེ་བདུན་པའི་རྗེས་ཀྱི་སྐབས་འདིར་བཅིངས་གྲོལ་གྱི་ངེས་པར་བསྟན་པ་ནི། ཟླ་བ་ཉི་མའི་རྩ་འགག་པ་ན། །བཤང་བ་གཅི་པའི་རྩ་འགག་གོ །སྒྲ་གཅན་རྩ་ནི་འགག་པ་ན། །འོག་ཏུ་ཁུ་བ་འབབ་འགག་འགྱུར། །བསྐྱེད་དང་སྡུད་པའི་བྱེད་པ་པོ། །འདི་རྣམས་གྲོལ་ན་གྲོལ་བར་འགྱུར། །ཞེས་པ་སྟེ། ཟླ་བའི་རྩར་ལས་རླུང་འགགས་པ་ལས། བཤང་བའི་རྩར་ཡང་འགག་པར་འགྱུར་བ་དང༌། ཉི་མའི་རྩར་འགགས་ཤིང་ཐིམ་པ་ལས་ཀྱང༌། གཅི་བའི་རྩར་འགག་པར་འགྱུར་ལ་འདིར་འགགས་པའི་དོན་ནི་རྩ་དེའི་སྒོ་འགགས་པའམ་སྟོབས་ཉམས་པ་སྟེ་དེའི་རླུང་དང་ཁམས་དང་རྣམ་པར་རྟོག་པའི་རྒྱུ་བ་ཐིམ་པའོ། །སྟེང་དུ་སྒྲ་གཅན་གྱི་རྩ་འགག་པ་སྟེ།
དེར་རླུང་ཟིན་པ་ན་འོག་ཏུ་ཁུ་བ་འབབ་པའི་རྩ་ཡང་འགག་སྟེ་རླུང་ཟིན་པས་ཐིག་ལེ་བརྟན་པར་འགྱུར་རོ། །རྩ་གཞན་རྣམས་ཐམས་ཅད་དྲུག་པོ་འདི་ལས་སྐྱེས་ཤིང༌། དྲུག་པོ་འདིར་ཐིམ་པར་འགྱུར་བ་དང༌། སྣ་ཚོགས་པའི་ནད་ལ་སོགས་པའི་སྐྱོན་དང༌། གནས་སྐབས་དང་མཐར་ཐུག་གི་ཡོན་ཏན་དང༌། ལུས་ཀྱི་ལང་ཚོ་དང༌། ཁམས་དང༌། དབང་པོ་ཐམས་ཅད་འཕེལ་འགྲིབ་བྱེད་པ་ནི་རྩ་འདི་རྣམས་ཀྱི་མཐུ་ཡིན་པས། འདི་རྣམས་བསྐྱེད་དང་བསྡུད་པའི་བྱེད་པ་ཅན་ནོ། །དེ་བཞིན་དུ་ཟླ་བའི་རྩ་མདུད་གྲོལ་ན་བཤང་བའི་རྩ་དང༌། གཅི་བའི་རྩ་མདུད་གྲོལ་ན་ཉི་མའི་རྩ་དང༌། སྒྲ་གཅན་གྱི་རྩ་མདུད་གྲོལ་ན་ཁུ་བའི་རྩ་རྣམས་ཀྱང་གྲོལ་བར་འགྱུར་ལ་དྲུག་པོ་འདི་རྣམས་གྲོལ་ན་རྩ་གཞན་ཐམས་ཅད་ཀྱི་ཡང་གྲོལ་བར་འགྱུར་རོ། །དེ་བཞིན་དུ་ཟླ་ཉི་སྒྲ་གཅན་གྱི་རྩ་རྣམ་པར་དག་པས་ཀྱང༌། བཤང་གཅི་ཁུ་བའི་རྩ་སོགས་དག་པ་ནས་རྩ་ཐམས་ཅད་དག་པར་འགྱུར་རོ། །སྤྱིར་དང་པོར་འོག་གི་ལམ་གསུམ་འགགས་པས་ཕྱིས་སྟེང་གི་ལམ་གསུམ་འགག་པ་ཡང་ཡོད་ལ། ཕལ་ཆེར་ཐོག་མའི་གནས་སྐབས་སུ། དང་པོར་སྟེང་གི་ལམ་གསུམ་འགགས་པའི་མཐུ་ལས་འོག་གི་ལམ་གསུམ་འགག་པ་གཙོ་ཆེ་བ་དང༌། དྲན་ཏིང་གཉིས་ཀྱི་གནས་སྐབས་སུ་དང་པོར་འོག་གི་ལམ་གསུམ་རྣམ་པར་དག་པའི་རྐྱེན་གྱིས། ཕྱིས་སྟེང་གི་ལམ་གསུམ་དག་པར་འགྱུར་བ་ཤས་ཆེའོ། །གཞན་ཡང་དབང་གི་ཡེ་ཤེས་ལམ་དུ་བྱེད་པར་གྲགས་པའི་མན་ངག་འགའ་ཞིག་ལ། དང་པོ་འོག་གི་ལམ་གསུམ་ཤིན་ཏུ་འགགས་པ་མིན་ཡང༌། བཙན་ཐབས་ཀྱི་སྦྱོར་བས་ཅུང་ཟད་འགགས་པ་ན། དེའི་རྐྱེན་གྱིས་སྟེང་གི་ལམ་གསུམ་རིམ་གྱིས་འགག་པའི་ཡེ་ཤེས་སྐྱེ་བ་ཡང་ཡོད་པས་སྟེང་འོག་གི་གོ་རིམ་གཅིག་ཏུ་ངེས་པ་ཁོ་ན་རང་ཡང་མིན་མོད། ཕལ་ཆེར་རྣལ་འབྱོར་ཡན་ལག་དང་པོ་གསུམ་ལ། སྟེང་སྔོན་དུ་འགག་ཅིང༌། འཛིན་པ་ལ་ཁྲེའུ་རིས་དང༌། ཕྱི་མ་གཉིས་ལ་ཐུར་སེལ་སྔོན་དུ་འགག་པའི་རིམ་པ་སྦྱར་རོ། །གསུམ་པ་དོན་བསྡུ་བ་ནི། སྲོག་དང་ཐུར་སེལ་ལམ་གསུམ་
གྱི། །འདི་ནི་རྩ་ཡི་ཀུན་སྤྱོད་དོ། །ཞེས་པ་སྟེ་སྲོག་གི་ལམ་གསུམ་དང༌། ཐུར་སེལ་གྱི་ལམ་གསུམ་སྟེ་རྩ་དྲུག་པོ་རྣམས་དང༌། དེ་ལས་གྱེས་པའི་རྩའི་གཙོ་བོ་རྣམས་དང༌། རྩ་དྲུག་གི་དབང་བྱས་པའི་རླུང་རྣམས་རྒྱུ་བའི་ཚུལ་དང༌། དེ་དག་ཏུ་ཁམས་ཇི་ལྟར་འབབ་པའི་ཚུལ་ཏེ། རྣམ་གཞག་འདི་ལྟ་བུ་དག་ནི་རྩའི་ཀུན་སྤྱོད་དོ། །དེ་ལྟར་ན་རྩ་རླུང་ཐིག་ལེའི་རྣམ་གཞག་ལ་རྩའི་ཀུན་སྤྱོད་ཅེས་བྱ་སྟེ། རྩ་རླུང་ཐིག་ལེ་འདི་དག་ནི་རྫོགས་པའི་རིམ་པ་གང་ལ་སྒོམ་པའི་གཞི་ཡིན་ཞིང༌། དེ་ལ་གནད་དུ་བསྣུན་པ་ནི། ཡན་ལག་དྲུག་པོ་ཐམས་ཅད་ཡིན་ཀྱང༌། ཡན་ལག་ཕྱི་མ་བཞི་པོའི་དོན་སྒོམ་པ་དང་གོ་བ་ལ། འདིའི་རྣམ་གཞག་ཤེས་པ་གལ་ཆེ་ཞིང༌། ཁྱད་པར་གཡས་གཡོན་གྱི་དཀྱིལ་འཁོར་བཅུ་འགོག་ཅིང༌། སྲོག་ཐུར་བསྲེ་བ་ནི། སྲོག་རྩོལ་ཀྱི་ཡན་ལག་ཡིན་པས་དཀྱིལ་འཁོར་བཅུ་དང་སྲོག་ཐུར་གྱི་རྩ་རྣམས་སྐབས་འདིར་བཤད་ན་འགྲེལ་ཆེ་བར་དགོངས་ཀྱི། སྲོག་རྩོལ་ཁོ་ན་དང་སྦྱོར་དགོས་པ་ནི་མ་ཡིན་ནོ། །ད་ནི་རྩའི་ཀུན་སྤྱོད་ཕྱིན་ཅི་ལོག་སྤང་བྱའི་དབང་དུ་བྱས་ནས་བཤད་པ། གཉིས་པ་འཕྲོས་དོན་འཆི་རླུང་རྒྱུ་བའི་ཚུལ་ལ་གསུམ་སྟེ། དུས་མིན་ཉི་ཟླའི་འཆི་ལྟས་དང༌། །སྒྲ་གཅན་དུས་འཆིའི་ངེས་པ་དང༌། །འཆི་ལྟས་མི་འབྱུང་བའི་རྒྱུ་བཤད་པའོ། །དང་པོ་ལ་མདོར་བསྟན་པ་དང་རྒྱས་པར་བཤད་པའོ། །དང་པོ་ནི། གཡོན་པའམ་ནི་གཡས་པ་ལ། །མཚན་མོ་གཅིག་དང་དེ་བཞིན་ལྔར། །ལྷག་པའི་རླུང་ནི་རབ་འབབ་པ། །དེ་ལས་ལོ་གསུམ་ན་འཆིའོ། །ཞེས་ཏེ། ལུས་ཀྱི་འབྱུང་བའི་ཁམས་མ་སྙོམས་པ་ལས། སྣ་བུག་གཡོན་པ་ལ་རང་བཞིན་དུ་གནས་པ་ལས་ལྷག་པའི་རླུང་མཚན་མོ་སྟེ། ཞག་གཅིག་བར་མ་ཆད་དུ་འབབ་པ་རྣམས་སྔ་ཕྱིར་བསགས་པས་ཟླ་བའི་འཆི་ལྟས་སུ་འགྱུར་ཞིང༌། སྣ་བུག་གཡས་པ་ཁོ་ན་ལ་རང་བཞིན་དུ་གནས་པ་ལས་ལྷག་པའི་རླུང་དེ་བཞིན་དུ་མཚན་མོ་སྟེ་ཞག་སྔ་ཚན་དུ་བཅད་པ་བར་མ་ཆད་པར་འབབ་པ་ལས་ཉི་མའི་འཆི་ལྟས་སུ་འགྱུར་ཏེ་
གཞན་གཡས་གཡོན་གྲངས་མཉམ་དུ་འབབ་པ་ནི་རང་བཞིན་དུ་གནས་པའམ་ཐ་མལ་དུ་གནས་པའི་འབབ་ཚུལ་ཡིན་ལ་རགས་རྩིས་ཀྱིས་དབང་དུ་བྱས་ན་འཆི་ལྟས་འདི་གཉིས་དང་པོར་ཤར་བ་ནས་བཟུང་སྟེ་ལོ་གསུམ་ན་ངེས་པར་འཆིའོ། །དེ་ལ་ཟླ་བའི་འཆི་ལྟས་ནི་ཐུར་སེལ་གྱི་བྱེད་པ་དང༌། ཉི་མའི་འཆི་ལྟས་ནི། སྲོག་རླུང་གི་བྱེད་པ་ཅན་ནོ། །གཉིས་པ་རྒྱས་པར་བཤད་པ་ལ། ཉི་མའི་འཆི་ལྟས་ཀྱི་རྒྱས་བཤད་ནི། གཡས་པ་ཉི་མའི་འཆི་ལྟས་ལ། ལྔ་དང་ཕྱོགས་ཆོས་ཉི་ཤུ་དང༌། །དེ་ཉིད་གཅིག་ལྷག་གཞན་རིམ་པས། །ཉིན་ཞག་སུམ་ཅུ་གསུམ་རྒྱུ་ན། །གསུམ་གཉིས་གཅིག་ལོ་ཟླ་བ་ནི། །དྲུག་གསུམ་ཟུང་ཟླ་ཉིན་ཞག་ཚེས། །ཕྱོགས་ལྔ་ཡོན་ཏན་གཉིས་གཅིག་གིས། །ལུས་ཅན་རྣམས་ཀྱི་ཚེ་འགྲོའོ། །དེ་ཡང་ནང་གི་འབྱུང་བ་ཆ་མ་སྙོམས་པ་ལས་ཏེ། ཉི་མའི་འཆི་ལྟས་ཀྱི་སྐབས་འདིར། ལོ་གསུམ་གྱི་ཞག་གི་ཚོགས་པ་རྣམས་ལས་འདབ་མ་དང་པོ་གཅོད་པ་ལ་ཞག་གསུམ་བརྒྱ་སུམ་ཅུ་སོ་ལྔ་དང༌། གཉིས་པ་ལ་སུམ་བརྒྱ་བཞི་བཅུ་ཞེ་ལྔ་དང༌། གསུམ་པ་ལ་བརྒྱ་བདུན་ཅུ་དང༌། བཞི་པ་ལ་བརྒྱད་བཅུ་གྱ་གཉིས་དང༌། ལྔ་པ་ལ་ལྔ་བཅུ་ང་བདུན་དང༌། དྲུག་པ་ལ་ཉི་ཤུ་རྩ་བརྒྱད། བདུན་པ་ལ་ཉི་ཤུ་རྩ་བདུན། བརྒྱད་པ་སོགས་ལ་ཚེས། ཕྱོགས། ལྔ། གསུམ། གཉིས་རྣམས་སོ། །འདབ་མ་རེ་རེ་བཅད་ཟིན་པ་ན་ཚེའི་ལྷག་མའི་ཞག་གི་ཚོགས་ནི། རྩ་འདབ་དང་པོ་བཅད་རྗེས་སུ། བདུན་བརྒྱ་དང་བཞི་བཅུ་ཞེ་ལྔ། གཉིས་པའི་རྗེས་སུ་བཞི་བརྒྱ། གསུམ་པའི་རྗེས་སུ་ཉིས་བརྒྱ་སུམ་ཅུ། བཞི་བའི་རྗེས་སུ་བརྒྱ་ཞེ་བརྒྱད། །ལྔ་པའི་རྗེས་སུ་དགུ་བཅུ་གོ་གཅིག །དྲུག་པའི་རྗེས་སུ་དྲུག་ཅུ་རེ་གསུམ། བདུན་པའི་རྗེས་སུ་སུམ་ཅུ་རྩ་དྲུག་སྟེ། བརྒྱད་པ་སོགས་ཀྱི་ལྷག་མ་ནི། ཉེར་གཅིག་དང༌། བཅུ་གཅིག་དང༌། དྲུག་དང༌། གསུམ་དང༌། གཅིག་རྣམས་སོ། །འཆི་ཞག་སོ་སོའི་གྲངས་ནི། ལྔ་དང༌། བཅུ་དང༌། བཅོ་ལྔ་དང༌། ཉི་ཤུ་དང༌། ཉེར་ལྔ་དང༌། ཉེར་དྲུག་དང༌། ཉེར་བདུན་དང༌།
ཚེས་དང༌། ཕྱོགས་དང༌། མདའ་དང༌། གསུམ་དང༌། གཉིས་དང༌། གཅིག་རྣམས་སོ། །གང་འཆི་ལྟས་ཀྱི་ཞག་རྣམས་སོ་སོ་རྫོགས་པ་ནས་བརྩམས་ནས། ཚེས་ལྷག་མ་ཇི་ཙམ་ཡོད་པ་ཡང༌། དང་པོ་ནས་བདུན་པའི་བར་ལ་ལོ་གསུམ་དང་གཉིས་དང་གཅིག་དང༌། ཟླ་བ་དྲུག །གསུམ་དང༌། གཉིས་དང༌། གཅིག་རྣམས་ཏེ། བརྒྱད་པ་ལ་ཉེར་གཅིག་སོགས་དེ་ཕན་ཆད་གོང་དུ་བཤད་པ་ཉིད་ཡིན་ནོ། །འདི་ལ་ཁ་ཅིག་འཆི་ཞག་ལྔ་ནས་ཉེར་བདུན་གྱི་བར། འདབ་མ་སྔ་མ་སྔ་མ་རྣམས་ལ་ཤར་བ་དང༌། བསྡོམས་ཏེ་རྩི་བ་ཡིན་ནོ་ཞེས་འདོད་པ་ནི་ལེགས་པར་མ་མཐོང་ངོ༌། །གཞན་ཡང་འདི་དག་ལ་ལུགས་བཟློག་གི་རིམ་པས་བཤད་པའི་སྐབས་ན། ཆ་ཤས་ཆ་ཤས་འཆར་ཚུལ་དང༌། ལོ་གསུམ་གྱི་མཐར་བཤད་པ་ཡང༌། རིམ་པས་འཆི་བ་ཕལ་ཆེར་གྱི་དབང་དུ་བྱས་པ་སྟེ། གློ་བུར་དུ་འཆི་བ་དང༌། རིམ་འཆི་ཡིན་ཡང༌། ཞག་གི་ཚོགས་པ་མ་རྫོགས་པ་ལ་ལྟས་རྣམ་སྔ་བསྣུར་ནས་ཡོང་བ་ཡོད་དེ། ཞིབ་མོར་རྒྱུད་འགྲེལ་དང་མན་ངག་ལས་རྟོགས་པར་བྱའོ། །དེ་ཡང་སྐབས་འདིར་གཡས་ཁོ་ནར་བར་མ་ཆད་དུ་རྒྱུ་བའི་ཞག་རྣམས་ལ། འཆི་ཞག་གམ་རྒྱུ་ཞག་ཅེས་བྱ་སྟེ། ལོ་གསུམ་གྱི་དབང་དུ་བྱས་ནས། སྣ་བུག་གཡས་ནས་བར་མ་ཆད་དུ་ཞག་ལྔ་འབབ་པ་འཆི་ཞག་ལྔ་སྟེ། ཞག་པོ་ལྔ་པོ་དེ་ཐི་བའི་ཞག་སུམ་བརྒྱ་སུམ་ཅུ་སོ་ལྔས་ལྟེ་བའི་རྩ་འདབ་དང་པོ་གཅོད་ཅིང་མཉམ་པར་བྱེད་དོ། །དེ་ཡང་འཆི་ཞག་ལྔ་པོ་དེ་རྒྱུས་པ་ནས། ཁོ་རང་ཐི་བའི་ལོ་གསུམ་ན་འཆིའོ། །དེ་ནས་འཆི་ཞག་བཅུ་སྟེ་ལྔ་ཚན་གཉིས་དང༌། ཐ་མལ་བ་སུམ་བརྒྱ་སུམ་ཅུ་སོ་ལྔས་རྩ་འདབ་གཉིས་པ་མཉམ་པར་བྱེད་དེ། བཅུ་རྒྱུས་པ་དེ་ནས་ལོ་གཉིས་ནས་སོ། །དེ་ནས་ལྔ་ཚན་གསུམ་སྡོམ་པ་ཆོས་ཏེ་བཅོ་ལྔ་དང༌། ཐ་མལ་པ་བརྒྱ་ལྔ་བཅུ་རྩ་ལྔས་རྩ་འདབ་གསུམ་པ་ཉམས་ཏེ་བཅོ་ལྔའི་མཚམས་ནས་ལོ་གཅིག་ནས་སོ། །ཡང་ལྔ་ཚན་བཞི་སྡོམ་པ་ཉི་ཤུ་དང་ཐ་མལ་པ་དྲུག་ཅུ་རྩ་གཉིས་ཀྱིས་བཞི་པ་ཉམས་
པར་བྱེད་དེ། ཉི་ཤུའི་རྗེས་སུ་ཟླ་བ་དྲུག་གོ །ཡང་ལྔ་ཚན་ལྔ་པ་དེ་ཉིད་སྟེ་ཉེར་ལྔ་དང་ཐ་མལ་པ་སུམ་ཅུས་ལྔ་པ་གཅོད་དེ། ཉེར་ལྔའི་མཚམས་ནས་ལྷག་མ་ཟླ་བ་གསུམ་མོ། །ཡང་ཉེར་ལྔ་ལས་གཅིག་གིས་ལྷག་པ་ཉི་ཤུ་རྩ་དྲུག་དང༌། ཐ་མལ་པ་གཉིས་ཀྱིས་དྲུག་པ་གཅོད་དེ་ལྷག་མ་ཟླ་བ་ཟུང་སྟེ་གཉིས་སོ། །དེ་ནས་འཆི་ཞག་འབའ་ཞིག་པ་ཉེར་དྲུག་གི་རྗེས་སུ་གཞན་ཏེ་ཉི་ཤུ་རྩ་བདུན་གྱིས་རྩ་འདབ་བདུན་པ་གཅོད་དེ། ལྷག་མ་ཟླ་བའི་གྲངས་ཀྱི་ཟླ་བ་སྟེ་ཟླ་བ་གཅིག་གོ །གོང་དུ་ལྷག་མ་ཟླ་བ་གསུམ་ཞེས་པའི་སྐབས་སུ་ཟླ་བ་བཞི་དང་ཞག་གསུམ་བྱུང་བས་རགས་རྩིས་ལ་ཡང་ཧ་ཅང་ཐལ་བར་འགྱུར་སྙམ་ན། རགས་རྩིས་བྱས་ཕྱིན་ཧ་ཅང་ཐལ་བ་རྩིར་མེད་ལ། དེས་ན་ལྷག་མའི་ཞག་རྣམས་ཕལ་ཆེར་རགས་རྩིས་སུ་བཤད་པ་སྟེ། སྔ་མ་རྣམས་ལའང་ཞག་གྲངས་འགའ་རེས་ལྷག་པ་ཡོད་ལ། འདིར་ཡང་དངོས་སུ་ན་ཞག་པོ་སུམ་ཅུ་རྩ་དྲུག་གོ །དེ་ཡང་དཔེར་ན་ཟླ་བ་གཉིས་མ་ལོངས་ན་ཟླ་གཅིག་ལས་ལྷག་ཀྱང་ཟླ་གཅིག་ཏུ་རྩི་བ་དང༌། སྐབས་འགའ་ཞིག་ཏུ་གཅིག་ལས་ལྷག་ན་ཟླ་གཉིས་དངོས་སུ་མ་ལོངས་ཀྱང་ཟླ་གཉིས་སུ་རྩི་བ་ལྟ་བུ་ཕྱོགས་གཞན་ལས་ཀྱང་མང་དུ་འབྱུང་བས་འདིར་ཡང་དེ་ལྟར་སྦྱར་བས་ཆོག་གོ །འདིར་ཁ་ཅིག་འཆི་ཞག་རྒྱུ་བའི་མཚམས་ཀྱི་རྣམ་གཞག་ལ་རང་རང་གི་འཚོ་ཞག་གི་ཐོག་མཐའ་དབུས་གསུམ་གང་ཡང་རུང་བ་གཅིག་ཏུ་ནི་སྦྱོར་ལ་གང་དུ་སྦྱོར་ནི་མ་ངེས་པར། ཇི་ལྟར་མཚམས་མཚམས་སུ་སྦྱར་ནས་ཞག་གྲངས་ལྷག་ཆད་མེད་པར་བྱེད་དགོས་སོ་ཞེ་ན་སྤྱིར་མ་ངེས་པའི་ཚུལ་རྒྱུ་ཞག་གི་མཚམས་ལ་མཐོ་དམན་ཅུང་ཟད་འབྱུང་སྲིད་ཀྱང་ངེས་ཅན་དུ་སྒྲག་པ་འདི་ནི། རྒྱ་གར་བ་འགའ་རེས་བཤད་ཅིང༌། ཕལ་གྱིས་བལྟས་ན་ལེགས་བཤད་རྣམ་པ་གསལ་གསལ་འདྲ་བ་ཞིག་འདུག་ཀྱང༌། རྒྱུད་དང་སེམས་འགྲེལ་སྐོར་གསུམ་ལས་མ་གསུངས་ཤིང༌། ལུང་རིག་གི་རྒྱུ་མཚན་མེད་ཀྱང༌། མ་འགྲིག་བར་དུ་འབད་པས་རང་བཟོར་བསྒྲིགས་པས། མཐར་གྲངས་འགྲིག་
ཙམ་བྱུང་བ་ལ། ངོ་མཐེན་དུ་བསྒྲགས་པར་མངོན་ནོ་སྙམ་པ་ནི་བདག་གི་རྣམ་པར་རྟོགས་པ་སྟེ། མཁས་པ་རྣམས་ཀྱིས་ལེགས་པར་དཔྱོད་ཅིག །དེ་ནས་འཆི་ཞག་འབའ་ཞིག་པ་ཉིན་ཞག་ཚེས་ཏེ་བཅོ་ལྔས་བརྒྱད་པ་བཅད། ལྷག་མ་ཉེར་ཅིག་གོ །ཕྱོགས་ཏེ་བཅུས་དགུ་པ་བཅད། ལྷག་མ་བཅུ་གཅིག་ལུས། ལྔས་བཅུ་པ་བཅད། ལྷག་མ་དྲུག་ལུས། གསུམ་གྱིས་བཅུ་གཅིག་པ་བཅད་དེ་ལྷག་མ་གསུམ་ལུས་སོ། །དེ་ནས་གཡོན་དུ་འཆི་བའི་རླུང་ཞག་གཉིས་རྒྱུས་པས། རྩ་འདབ་བཅུ་གཉིས་པ་བཅད་པས་དུས་སྦྱོར་གྱི་རྩ་འདབ་རྣམས་བཅད་ཟིན་ཏོ། །དེ་ནས་མུན་པ་ཆེན་པོའི་རླུང་སྟེ་དབུ་མའི་མཉམ་རྒྱུ་ཞག་གཅིག་གིས། འཁོར་ལོའི་ལྟེ་བ་བཅད་ནས་ལུས་ཅན་རྣམས་ཀྱི་ཚེ་ཟད་ཅིང་འགྲོ་སྟེ་སྐྱེ་བ་གཞན་དུ་འཕོའོ། །འདིར་ལོ་ནི་གསུམ་གཉིས་གཅིག །ཟླ་བ་ནི་དྲུག་གསུམ་ཟུང་ཟླ། ཉིན་ཞག་ནི་ཚེས་ཕྱོགས་ལྔ་ཡོན་ཏན་གཉིས་གཅིག་ཅེས་བྱས་ཏེ། རིམ་པས་ཞེས་པ་ནི་ལྔ་དང་ནས་གཞན་ཏེ་རྩ་བདུན་གྱི་བར་ལ་ལོ་གསུམ་ནས་ཟླ་བ་གཅིག་གི་ཞེས་པའི་བར་དུ་རིམ་པ་བཞིན་དུ་མཚུངས་པར་སྦྱར་ཞེས་པའོ། །སུམ་ཅུ་གསུམ་རྒྱུ་ན་ཞེས་པ་ནི་སྣ་བུག་གཡས་ལ་ཚེས་ཕྱོགས་ཡོན་ཏན་རྣམས་རྒྱུ་བ་སྡོམ་པའི་དོན་ནོ། །ཟླ་བའི་འཆི་ལྟས་རྒྱས་བཤད་ནི། །རྩ་བ་ནས་གཅིག་ལྷག་པ་ཡིས། །གཡོན་པར་ཟླ་བའི་རྒྱུ་བར་འགྱུར། །ཉི་ཟླ་ཉིན་ཞག་ཟླ་བ་དག །ཉིན་ཞག་གསུམ་རྣམས་ཟླ་བ་གསུམ། །ཉིན་ལ་འཆི་ལྟས་ཟླ་བར་དགེ། །འཕེལ་འགྲིབ་དེ་ནས་འདི་དག་ལ། །ཞེས་གསུངས་པའི་འཕེལ་འགྲིབ་ཞེས་པ་ཡན་ཆད་དོ། །དེ་ཡང་ལོ་གསུམ་གྱི་དང་པོར་གཡོན་ཁོ་ན་ལ་ཞག་གཅིག་བར་མ་ཆད་པར་འབབ་པ། འཆི་ལྟས་ཀྱི་ཞག་གཅིག་རྒྱུ་ཞིང་དེ་ནས་ཐ་མལ་པ་འཚོ་ཞག་ལྔ་བཅུ་ང་དགུ་སྟེ་ཟླ་བ་གཉིས་སོ། །དེ་འདྲ་ལན་གསུམ་གྱིས་ཟླ་བ་དྲུག་འགྲོ་སྟེ་སྔ་ཕྱིར་བྱུང་བའི་འཆི་ཞག་གསུམ་གྱིས་ལྟེ་བའི་དུས་སྦྱོར་གྱི་རྩ་འདབ་དང་པོ་གཅོད་དོ། །དེ་ནས་ཟླ་བ་རེ་རེ་བཞིན་འཆི་ཞག་རེ་འབྱུང་སྟེ། འཆི་ཞག་གསུམ་གསུམ་གྱིས་རྩ་འདབ་
རེ་རེ་བཅད་འགྲོ་བས་ན། ཟླ་བ་གསུམ་གསུམ་ལ་རྩ་འདབ་རེ་རེ་བཅད་དེ། ཟླ་བ་གསུམ་ཚན་པ་བཅུ་ཕྲག་གཅིག་གིས་རྩ་འདབ་བཅུ་གཅོད་པ་དང༌། ཐོག་མའི་འཆི་ཞག་གསུམ་ལ་ཟླ་བ་དྲུག་ཡོད་པ་དེ་བསྡོམས་པས། ཟླ་བ་སུམ་ཅུ་སོ་དྲུག་སོང་བ་ན་དུས་སྦྱོར་གྱི་རྩ་འདབ་བཅུ་གཅིག་བཅད་ཟིན་ལ། དེའི་རྗེས་སུ་སྣ་བུག་གཡས་ལ་ཞག་གཉིས་རྒྱུས་པས་བཅུ་གཉིས་པ་གཅོད། དེ་ནས་དབུ་མའི་མཉམ་རྒྱུ་ཞག་གཅིག་གིས་འཁོར་ལོའི་ལྟེ་བ་བཅད་ནས་འཆི་བ་ཡིན་ཏེ། དེ་ཡང་རྩ་བ་སྟེ་དང་པོའི་འདབ་མ་ལ། ཉིན་ཞག་གཅིག་ཏུ་ལྷག་པའི་རླུང་རྒྱུ་བས། གཅིག་དང་གཉིས་དང་གསུམ་ལ་སོགས་པ་སྔ་མ་སྔ་མའི་སྟེང་དུ་ཕྱི་མ་ཕྱི་མ་བསྣན་པས། སྔ་ཕྱི་སྡོམ་པའི་ཉིན་ཞག་སུམ་ཅུ་རྩ་གསུམ་གྱིས་འདབ་མ་བཅུ་གཅིག་པ་ལ་སྣ་བུག་གཡོན་པར་འཆར་བའི་ཟླ་བའི་འཆི་བལྟས་རྒྱུ་པར་འགྱུར་རོ། །ཉི་ཟླ་ཉིན་ཞག་ཟླ་བ་དག །ཉིན་ཞག་གསུམ་རྣམས་ཟླ་བ་གསུམ། །ཞེས་པ་ལ་འབྲོ་འགྱུར་ལས། ཞག་དང་ཞག་གི་ཟླ་བ་སྟེ། །ཟླ་གཉིས་ཅན་གྱི་ཞག་གསུམ་མོ། །ཞེས་འབྱུང་སྟེ། རྒྱ་དཔེ་མི་འདྲ་བའི་ཁྱད་པར་ཅུང་ཟད་ཡོད་སྲིད་ལ། བདག་གིས་མཐོང་བའི་རྒྱ་དཔེ་ན། དི་ནཾ་མཱ་སོ་དི་ནེ་མཱ་སཽ་ཞེས། ཉིན་ཟླ་ཉིན་ཞག་ཟླ་བ་དག །ཅེས་པ་དང་མཐུན་ཞིང༌། ཏྲི་དི་ནཱ་ནི་དྭི་མཱ་ས་ཀཽ་ཞེས། ཟླ་གཉིས་ཅན་གྱི་ཞག་གསུམ་མོ་ཞེས་པ་དང་མཐུན་པ་ཞིག་སྣང་ངོ༌། །ཡང་འདི་ལ་ཞག་དང་ཟླ་བ་ཞག་ཟླ་དག །ཟླ་གཉིས་ཅན་གྱི་ཞག་རེ་གསུམ། །ཞེས་པ་སྒྱུར་ན་བདེ་སྟེ་དོན་ནི། འདབ་མ་ཐོག་མཐའ་གཉིས་མ་གཏོགས་པའི་བར་པ་བཅུ་གཅོད་པ་ལ། འདབ་མ་རེ་ལ་འཆི་ལྟས་ཞག་རེ་དང༌། ཐ་མལ་པ་ཞག་ཉི་ཤུ་རྩ་དགུ་པའི་ཟླ་བ་རེ་རེར་ལན་གསུམ་གསུམ་དགོས་ཤིང༌། དེ་འདྲ་བ་ལན་བཅུ་དགོས་པས་མང་པོའི་དོན་ལ་ཞག་དང་ཞག་ཅེས་ལན་གཉིས་སྨོས་སོ། །ཡང་ཐ་མལ་བ་ཟླ་བ་གཉིས་དང་བཅས་པའི་ཉིན་ཞག་གཅིག་པ་དེ་འདྲ་ལན་གསུམ་གྱིས་འདབ་མ་དང་པོ་གཅོད་ཅེས་པའི་དོན་ནོ། །དེ་ལྟར་ན་གསུམ་ལ་སོགས་པའི་ཉིན་ཞག་རྣམས་ལ་འཆི་
ལྟས་འཕེལ་ཞིང༌། སུམ་ཅུ་ལ་སོགས་པའི་ཟླ་བ་རྣམས་ལ་དགེ་བ་འགྲིབ་པ་སྟེ། འཚོ་བའི་སྟོབས་ཟད་པར་འགྱུར་རོ། །གཉིས་པ་སྒྲ་གཅན་དུས་འཆིའི་ངེས་པ་བཤད་པ་ནི། དེ་ནས་འདི་དག་ལ། དབུ་མའི་འཆི་བ་རྒྱུ་བ་ནི། ལོ་བརྒྱ་ཡོངས་སུ་རྫོགས་པ་ཡིས། །མཉམ་དང་མི་མཉམ་ཉིན་ཞག་རྣམས། །སྐྱེ་བར་སྐྱེ་བའི་དཀྱིལ་འཁོར་གྱིས། །དེ་རུ་གཡས་དང་གཡོན་པར་ཡང༌། །ཕྱོགས་གཉིས་རྣམ་པར་ཉམས་པ་ལས། །ཞེས་གསུངས་ཏེ། དེ་ལ་དང་པོར་དབུ་མའི་འཆི་ལྟས་འདིའི་མངོན་པར་རྟོགས་པ་བཤད་ན། མངལ་དུ་སྐྱེ་བ་བཟུང་ནས་ཟླ་བ་གཅིག་སོང་པ་ནས་བཟུང༌། ལོ་གཅིག་གི་བར་དུ་ཞག་རེ་ལ་རྩ་ཉིས་བརྒྱ་རེ་འཆགས་པས། བཙས་ནས་ཟླ་བ་བཞི་པ་ལ་བདུན་ཁྲི་ཉིས་སྟོང་གི་རྩ་རྫོགས་སོ། །བཙས་ནས་ལོ་བརྒྱ་དང་ཟླ་བ་གཅིག་འཚོ་བའི་དབང་དུ་བྱས་ཏེ། གོང་དུ་བཤད་པའི་དབུ་མའི་དབུགས་དེ་ལོ་གསུམ་ཕྱོགས་གསུམ་དུ་ལོངས་པ་ན་དུས་ཀྱིས་འཆིའོ། །དེ་ཡང་བཙས་ནས་ཟླ་ཕྱེད་དང་བཅུ་གཅིག་ལ་འཆི་ལྟས་ཀྱི་རླུང་མི་རྒྱུའོ། །དེ་ནས་ལོ་དྲུག་ལ་འཆི་བའི་རླུང་རེ་རེ་རྒྱུ་སྟེ། དེ་ཡང་ལོའི་ཉི་མ་དང་པོ་ལ་རྒྱུ་ཞིང༌། གལ་ཏེ་དེ་མི་མཉམ་པའི་དུས་སྦྱོར་གྱི་མཐའ་ལ་སྐྱེས་ན་སྣ་བུག་གཡོན་དུ་དབུགས་ཡོན་པོ་གཅིག་དང༌། མཉམ་པའི་དུས་སྦྱོར་གྱི་མཐའ་ལ་སྐྱེས་ན་སྣ་བུག་གཡས་སུ་དབུགས་ཡོན་པོ་རེ་རེ་རྒྱུའོ། །དེ་ལྟར་ལན་དྲུག་གིས་ཆུ་སྲང་གཅིག་ཏུ་ལོངས་སོ། །དེ་ནས་ལོ་དྲུག་ཅུའི་བར་དུ་ལོ་དེའི་མགོར་འཆི་བའི་རླུང་ཆུ་སྲང་རེ་རེ་རྒྱུ་བ་ལས། དང་པོར་གཡོན་ནས་འབབས་པའི་རིགས་ལ་ཐོག་མར་གཡོན་དུ་ཡོན་པོ་ཆུ་སྲང་གཅིགལོ་གཉིས་པ་ལ་གཡས་ནས་ཡོན་པོ་ཆུ་སྲང་གཉིས་སོ། །དེ་ནས་བརྩམས་ཏེ་ལོ་ང་དགུ་པ་ལ་གཡོན་ནས་ཆུ་སྲང་ང་དགུ་དང༌། ལོ་དྲུག་ཅུ་པ་ལ་གཡས་ནས་ཆུ་སྲང་དྲུག་ཅུ་སྟེ་ཆུ་ཚོད་དུ་ལོངས་སོ། །དང་པོར་གཡས་ནས་བབས་པ་ལ་གཡས་གཡོན་གྱི་གོ་རིམ་དེ་ལས་བཟློག་སྟེ་འབྱུང་ངོ༌། །དེ་ནས་ལོ་སུམ་ཅུའི་བར་དུ་ཉི་མའི་བགྲོད་པ་རེ་ལ་འཆི་རླུང་རེ་རྒྱུ་སྟེ། གཡོན་སྔ་མའི་
དབང་དུ་བྱས་ནས། བགྲོད་པ་དང་པོ་ལ་གཡོན་ནས་ཆུ་ཚོད་གཅིག །གཉིས་པ་ལ་གཡས་ནས་ཆུ་ཚོད་གཉིས། དེ་བཞིན་དུ་སྦྱར་ཏེ་བགྲོད་པ་ང་དགུ་པ་ལ་གཡོན་ནས་ཆུ་ཚོད་ང་དགུ། བགྲོད་པ་དྲུག་ཅུ་པ་ལ་གཡས་ནས་ཆུ་ཚོད་དྲུག་ཅུ་འབབ་སྟེ། ཞག་གཅིག་ཏུ་ལོངས་སོ། །འདིར་གོ་བདེ་བའི་ཕྱིར་དེ་ལྟར་བརྗོད་པ་ཡིན་ལ། དཔལ་དྲི་མ་མེད་པའི་འོད་དུ་བགྲོད་པ་བརྒྱ་ཉི་ཤུ་དང༌། བགྲོད་པ་ཕྱེད་ལ་བརྒྱ་ཉི་ཤུའི་དབྱེ་བ་མཛད་པ་ནི་འཚོ་བ་ཉམས་པ་དང་མི་ཉམས་པའི་ཁྱད་པར་རྟོགས་པའི་ཕྱིར་རོ། །དེ་ཡན་ཆད་ལ་ལོ་དགུ་བཅུ་གོ་དྲུག་དང་ཟླ་བ་ཕྱེད་དང་བཅུ་གཅིག་སོང༌། ལྷག་མ་ལོ་གསུམ་ཕྱོགས་གསུམ་དང་ཟླ་བ་གཅིག་སྟེ། ཞག་སྟོང་བརྒྱ་ལྔ་བཅུ་ང་དྲུག་ལུས་སོ། །ཡང་གཡོན་སྔ་མ་ཅན་གྱི་དབང་དུ་བྱས་ནས། གཡོན་ནས་འཆི་རླུང་ཞག་གཅིག་དང་ཐ་མལ་པ་ཞག་གཅིག་དེ་བཞིན་དུ་གཡས་ནས་འཆི་རླུང་ཞག་གཉིས་དང༌། ཐ་མལ་ཞག་གཉིས། དེ་བཞིན་དུ་སྦྱར་ཏེ། གཡོན་ནས་གསུམ་ཚན་གཉིས་དང༌། གཡས་ནས་བཞི་ཚན་གཉིས། གཡོན་ནས་ལྔ་ཚན་གཉིས་དང༌། གཡས་ནས་དྲུག་ཚན་གཉིས། དེ་རྣམས་ཀྱིས་ལྟེ་བའི་དཀྱིལ་འཁོར་དྲུག་ཅུའི་གཡོན་གྱི་ནམ་མཁའ་དྲུག་དང་གཡས་ཀྱི་ས་དྲུག་གཅོད་དོ། །དེ་ནས་གོང་བཞིན་སྦྱར་ཏེ་བདུན་པ་ནས་བཅུ་གཉིས་པའི་བར་གྱི་གཡོན་གྱི་རླུང་དྲུག་དང༌། གཡོན་གྱི་ཆུ་དྲུག་གཅོད་དོ། །དེ་བཞིན་དུ་བཅུ་གསུམ་པ་ནི་བཅོ་བརྒྱད་པའི་བར་གྱིས། ཁྱིམ་བཅུ་གཉིས་ཀྱི་མེ་བཅུ་གཉིས་གཅོད་དོ། །དེ་བཞིན་དུ་བཅུ་དགུ་པ་ནས་ཉེར་བཞི་པའི་བར་གྱིས། གཡོན་གྱི་ཆུ་དྲུག་དང༌། གཡས་ཀྱི་རླུང་དྲུག་གཅོད་དོ། །དེ་བཞིན་དུ་ཉེར་ལྔ་པ་ནས་སུམ་ཅུ་པའི་བར་གྱིས། གཡོན་གྱི་སའི་དཀྱིལ་འཁོར་དྲུག་དང༌། གཡས་ཀྱི་ནམ་མཁའ་དཀྱིལ་འཁོར་དྲུག་གཅོད་དོ། །དེ་ནས་གཡོན་སྔ་མ་ཅན་གྱི་དབང་དུ་བྱས་ཏེ། གཡོན་ནས་འཆི་རླུང་དང་ཐ་མལ་གཉིས་ཀ་ལ་ཞག་སོ་གཅིག་རེས། སྙིང་སྟོབས་ཀྱི་ཁམས་འདོར་བར་བྱེད། གཡས་ནས་སོ་གཉིས་པ་རེས་རྡུལ་
གྱི་ཁམས་དང༌། གཡོན་ནས་སོ་གསུམ་པ་རེས་མུན་པའི་ཁམས་འདོར་ཏེ། ཞག་པོ་སྟོང་དང་བརྒྱ་ཉི་ཤུ་རྩ་གཉིས་སོང༌། ལྷག་མ་སུམ་ཅུ་སོ་བཞི་ལུས་སོ། །དེ་ནས་གཡས་འབའ་ཞིག་ནས་འཆི་རླུང་ཞག་སོ་གསུམ་རྒྱུས་པས། ཕུང་ཁམས་དབང་ཡུལ་ལས་དབང་བྱ་བ་ལྔ་ལྔ་རྣམས་འདོར། ལྷག་མ་ཞག་གཅིག་མཉམ་རྒྱུར་བབས་པས། ཕུང་སོགས་དྲུག་པ་ཡེ་ཤེས་ཀྱི་ཆ་རྣམས་དོར་ཏེ་འཇིག་རྟེན་ཕ་རོལ་ཏུ་འགྲོའོ། །གཡས་པ་སྔོན་མ་ཅན་ལ་གཡས་གཡོན་གྱི་གོ་རིམ་དེ་དག་བཟློག་སྟེ་ཤེས་པར་བྱའོ། །དུས་འཆིའི་བལྟས་ཞག་གཅིག་ཏུ་ལོངས་པ་ཕན་ཆད་བཟློག་པར་དཀའ་བ་དང༌། ཉི་ཟླའི་འཆི་ལྟས་ལ་ཡང་རྩ་འདབ་བདུན་པ་ལ་ཞུགས་པ་ཕན་ཆད་མི་བཟློག་པར་བཤད་པ་ཡང༌། སྤྱིར་བཏང་ཀྱི་དབང་དུ་བྱས་པ་ཡིན་གྱི་ཐབས་ཟབ་མོས་བཟློག་པ་སྲིད་དོ། །དེ་ལ་གཞུང་གི་དོན་ལ་དེ་ནས་སྒྲ་གཅན་གྱི་འཆི་ལྟས་བཤད་པ་ནི་གཡས་གཡོན་གྱི་སྒོ་འདི་དག་ལ། སྒྲ་གཅན་ནམ་དབུ་མའི་འཆི་བ་ཡོངས་སུ་རྒྱུ་སྟེ། བཙས་ནས་ལོ་གོ་དྲུག་དང༌། ཟླ་བ་ཕྱེད་དང་བཅུ་གཅིག་གི་མཚམས་ནས་ཏེ། ལོ་གསུམ་ཕྱོགས་གསུམ་ཟླ་བ་གཅིག་དང་བཅས་བའི་བར་ལ་རྒྱུ་སྟེ། ལོ་བརྒྱ་ཡོངས་སུ་རྫོགས་པའི་མཐར་འཆི་བའི་དབང་དུ་བྱས་པ་ཡིས་སོ། །དེ་ཉིད་རྒྱས་པར་བཤད་པ་ནི། སྐྱེ་བར་སྟེ་སྐྱེ་བའི་དུས་སུ་གླང་སོགས་མཉམ་པའི་དུས་སྦྱོར་གྱི་མཚམས་ལ་སྐྱེས་པར་གྱུར་ན། དེའི་དཀྱིལ་འཁོར་ནས་བརྩམས་ཏེ་གཡས་ལ་འཆི་ལྟས་ཀྱི་རླུང་དེ་རྒྱུ་ལ། དེ་ཡང་དུས་མིན་གྱི་འཆི་བ་མེད་པ་ཅིག་གི་དབང་དུ་བྱས་ནས། ལོ་གོ་དྲུག་དང་ཟླ་བ་ཕྱེད་བཅས་བཅུ་ན། འཆི་རླུང་ཉིན་ཞག་ཏུ་ལོངས་པའི་རྗེས་སུ་གཡས་ནས་ཉིན་ཞག་གཉིས་དང༌། གཡོན་ནས་གཅིག་སོགས་མཉམ་པ་དང་མི་མཉམ་པའི་ཉིན་ཞག་རྣམས། སུམ་ཅུ་རྩ་གསུམ་གྱི་མཐར་ཐུག་པའི་བར་དུ་རྒྱུའོ། །ལུག་སོགས་མི་མཉམ་པའི་དུས་སྦྱོར་གྱི་དཀྱིལ་འཁོར་གྱི་མཚམས་ལ་སྐྱེས་ན། ཐོག་མ་གཡོན་ལ་ཡོན་པོའི་དབུགས་ཉིན་ཞག་གཅིག་ཏུ་ལོངས་པའི་རྗེས་སུ། ཐོག་མར་
གཡོན་ནས་ཞག་གཅིག་སོགས་རྒྱུ་སྟེ། དེ་ལྟར་ན་འཆི་རླུང་འདི་དག་ཐམས་ཅད་ཀྱང་གཡས་པར་ཁམས་དང༌། གཡོན་པར་ཕུང་པོ་འབབ་པའི་རྩའི་ཕྱོགས་གཉིས་རྣམ་པར་ཉམས་པ་ལས་འབྱུང་སྟེ། ཡོན་པོར་རྒྱུ་བའི་ཕྱིར་རོ། །འཆི་རླུང་འདི་དག་ནི་དབུ་མར་འབབ་པའི་རླུང་ཡིན་ཡང༌། སྐྱོན་ཅན་དུ་འབབས་པའི་ཕྱིར་དང༌། རོ་རྐྱང་གཉིས་ཀྱིས་དབང་བྱས་པའི་ཕྱིར། མཉམ་རྒྱུ་མ་ཡིན་པར་ཡོན་པོར་རྒྱུའོ། །གསུམ་པ་འཆི་ལྟས་མི་འབྱུང་བའི་རྒྱུ་བཤད་པ་ནི། གཞན་དུ་འཆི་བར་མི་འགྱུར་ཏེ། །ཕྱོགས་གཉིས་ཡང་དག་གནས་པ་ན། །གཡས་དང་གཡོན་པའི་ཀུན་སྤྱོད་དང༌། །དཀྱིལ་འཁོར་ལྔ་རྣམས་འབབ་པའི་ཕྱིར། །ཞེས་ཏེ། གཡས་གཡོན་གྱི་རྩའི་ཕྱོགས་གཉིས་རྣམ་པར་མཉམ་པ་ལས་གཞན་མ་ཉམས་བར་དུ་འཆི་བར་མི་འགྱུར་ཏེ། གཡས་གཡོན་གྱི་ཕུང་པོ་དང་ཁམས་འབབ་པའི་ཕྱོགས་གཉིས་མ་ཉམས་པར་ཡང་དག་པར་གནས་པ་ནི། གཡས་དང་གཡོན་པའི་རྩའི་ཀུན་སྤྱོད་དང༌། གཡས་གཡོན་གྱི་དཀྱིལ་འཁོར་ལྔའི་རླུང་རྣམས་རྣལ་མར་འབབ་པའི་ཕྱིར། ཕུང་པོ་དང་ཁམས་རྣམས་ནམ་ཡང་གཅོད་པར་བྱེད་པ་མེད་པས་སོ། །དེ་ཡང་དཀྱིལ་འཁོར་ལྔ་རྣམས་འབབ་ཕྱིར་རོ། །ཞེས་པ་སྒྱུར་ན་གོ་བདེའོ། །གསུམ་པ་འཛིན་པའི་རྣལ་འབྱོར་ནི། འཆི་ལྟས་མཚན་ཉིད་ཤེས་ནས་ནི། །སྲོག་ནི་ཐིག་ལེར་གཞུག་པར་བྱ། །ཨ་ཝ་དྷཱུ་ཏཱིའི་ཞབས་བསྟེན་ནས། མཆོག་ཏུ་མི་འགྱུར་བསྒོམ་པར་བྱ། །རྟག་ཏུ་རྡོ་རྗེ་བསླང་བར་བྱ། །ཟླ་ཉིའི་བགྲོད་པ་འཇོམས་པ་ལས། །གཞན་དུ་ཀུན་འདར་ཡན་ལག་ལ། །སྲོག་གི་རླུང་ནི་འཇུག་པ་མེད། །འོག་ཏུའང་དུང་ཅན་མ་ཐུར་སེལ། །དེ་མ་ཞུགས་ལས་འཆི་བའོ། །འཆི་ལྟས་བསླུ་བ་རྣལ་འབྱོར་པའི། །འདི་ནི་དགའ་བ་རྣམས་ཀྱིས་འགྱུར། །ཞེས་གསུངས་ཏེ། དེ་ལ་འཛིན་པའི་ཡན་ལག་གི་ངོ་བོ་ནི། སྲོག་དང་ཐུར་སེལ་གོང་བུ་གཅིག་ཏུ་གྱུར་ཟིན་པ་སྟེ། དབུ་མའི་ནང་གི་ཐིག་ལེ་ལ་ཡོངས་སུ་ཐིམ་པར་བྱས་པའོ། །དེ་ཡང་དང་པོར་ལྟེ་བའི་ཐིག་ལེ་ལ་ས་ཁམས་གཙོ་བོར་གྱུར་པའི་འབྱུང་བ་ལྔ་རྣམས་རིམ་པས་ཐིམ་པས། གཏུམ་མོ་འབར་བར་འགྱུར་རོ། །
དེ་བཞིན་དུ་སྙིང་གར་ཆུ་ཁམས་གཙོ་བོ་དང༌། མགྲིན་པར་མེ་ཁམས་གཙོ་བོ་དང༌། དཔྲལ་པར་རླུང་ཁམས་གཙོ་བོ་དང༌། སྤྱི་བོར་ནམ་མཁའི་ཁམས་གཙོ་བོར་གྱུར་པའི་འབྱུང་བ་ལྔ་རྣམས་ཐིམ་པས། དེ་དང་དེའི་གཏུམ་མོ་རྣམས་ཀྱང་འབར་བར་འགྱུར་རོ། །འཁོར་ལོ་ལྔ་པོའི་འཛིན་པ་སྒྲུབ་པས་ཁམས་ལྔའི་ཐིམ་རིམ་གཙོ་ཆེ་ཤོས་དེ་ཡང་སྐབས་འདིར་འགྲུབ་སྟེ། དེ་ནས་བྱང་ཆུབ་ཀྱི་སེམས་ཡོངས་སུ་ཞུ་བའི་ཐིག་ལེ་དང༌། འབར་བ་དེ་དག་ཁ་སྦྱོར་དུ་བྱས་པས། དང་པོར་དཔྲལ་བ་དང༌། དེ་ནས་མགྲིན་པ་དང༌། སྙིང་ག་དང་ལྟེ་བ་རྣམས་ལ་བརྟན་པར་བྱས་པས། གནས་པའི་དགའ་བཞིའི་ཡེ་ཤེས་བརྟན་པར་འགྱུར་ཞིང༌། སྔར་གྱི་གཏུམ་མོ་འབར་བ་དང༌། ཁམས་ཐིམས་པའི་རིམ་པ་བརྟན་པོར་བྱེད་དོ། །མཐར་གསང་བ་ཡང༌། ཐིག་ལེའི་བགྲོད་པ་བརྟན་པའི་རྐྱེན་གྱིས། སྔར་གྱི་དགའ་བ་བཞི་པོ་ལྷག་པར་རྒྱས་ཤིང༌། ཁམས་རྣམས་ཐིམ་པར་བྱེད་པ་ཡིན་ནོ། །འདིར་ཡས་བབས་ཀྱི་དགའ་བཞིའི་ས་རྣམས་དང་པོར་ཐོབ་པ་ཡིན་གྱི་རྫོགས་པ་ནི་མ་ཡིན་ལ། དཔྲལ་བའི་ཡན་ལག་སྨིན་མཚམས་སུ་ཟུག་པའི་རྩའི་རྩེ་མོར་ཐིག་ལེ་ཟིན་པས། སྤྱི་བོ་ནས་སྨིན་མཚམས་སུ་ཞུ་བའི་ཞུ་བདེ་བརྟན་པ་ཐོབ་པ་ཡིན་གྱི། གཙུག་ཏོར་དུ་ནི་རླུང་དང་ཁམས་ལྔ་པོ་རྣམས་ཀྱི་ཐིམ་ཚུལ་དང་དེ་ཙམ་ལ་བརྟན་པ་གསར་དུ་ཐོབ་པ་ཡིན་ཡང༌། ཐིག་ལེའི་བགྲོད་པ་ཕྲ་མོ་ལ་བརྟན་པ་ཐོབ་པ་ནི་མ་ཡིན་པས། འཁོར་ལོ་ལྔ་ལ་འགྲོ་འོང་གི་དབྱེ་བ་གཉིས་གཉིས་བཤད་པ་ལ། གཙུག་ཏོར་ལ་འགྲོ་འོང་གི་ཐ་སྙད་དངོས་སུ་བཞག་དཀའ་ཡང༌། ཐིམ་བྱེད་དང་བརྟན་བྱེད་གཉིས་ལ་འགྲོ་འོང་མིང་བཏགས་པའོ། །དེ་ལ་གཞུང་གི་དོན་ནི། རྣལ་འབྱོར་བ་སྲོག་རྩོལ་སྒོམ་པ་ལ་འཆི་ལྟས་བྱུང་ན། འཛིན་པའི་རྣལ་འབྱོར་བསྒོམས་པས། འཕྲལ་དུ་འཆི་བ་བཟློག་པར་དགོངས་ཏེ། གོང་དུ་བཤད་པ་ལྟར་འཆི་ལྟས་ཀྱི་མཚན་ཉིད་ཁོང་དུ་ཆུད་ཅིང་ཤེས་པར་བྱས་ནས་འཆི་ལྟས་མ་བྱུང་བའི་སྔོན་རོལ་ནས་འཆི་ལྟས་དང་འཆི་བ་སྲུང་བའི་དོན་དང༌། བྱུང་ན་བཟློག་པའི་དོན་དུ༌། གོང་དུ་ཇི་སྐད་བསྟན་པ་ལྟར་སྲོག་སྟེ་རླུང་རྣམས་དབུ་
མའི་ནང་གི་ཐིག་ལེར་དྲག་ཏུ་གཞུག་པར་བྱའོ། །འདི་ལ་གང་དུ་འཇུག་པའི་གནས་ནི་གོང་དུ་བཤད་པ་ལྟར་འཁོར་ལོ་ལྔའམ་དྲུག་ཀར་གྱི་འཁོར་ལོ་ཡིན་གྱི། དཔྲལ་བ་ཁོ་ན་ལ་མི་བཟུང་ངོ༌། །དེའི་རྒྱུ་མཚན་ཡང༌། ཅི་སྟེ་འཛིན་པའི་རྣལ་འབྱོར་སྔར་གྲུབ་ཟིན་པ་ཡིན་ན་ནི། དཔྲལ་བ་ལ་གཞུག་པ་གཙོ་བོར་འགྱུར་སྲིད་ཀྱང༌། གདོད་འཛིན་པ་སྒྲུབ་དགོས་པ་རྣམས་ཀྱིས་དང་པོ་ཉིད་ནས་དཔྲལ་པར་གཞུག་མི་ནུས་པས་སོ། །ཨ་ཝ་དྷཱུ་ཏཱིའི་ཞབས་བསྟེན་ནས་ཞེས་པ་ལ་བསྟེན་པའི་དོན་ནི་བླ་མའི་ཞབས་པད་བསྟེན་པ་དང་འདྲ་བར། མཆོད་ཅིང་བསྟེན་པའི་དོན་ཡིན་ལ། དེ་ཡང་རླུང་དང་བྱང་ཆུབ་ཀྱི་སེམས་དབུ་མར་དྲག་ཏུ་བཅུག་པས། དབུ་མ་རྒྱས་པར་བྱ་བ་སྟེ། མི་འགྱུར་བའི་བདེ་བ་རིམ་གྱིས་ཐོབ་པའི་རྒྱུར་ཐིག་ལེ་མི་འགྱུར་ཞིང་མི་འཛག་པ་བསྒྲུབ་པར་བྱའོ། །སྐབས་འདི་རུ་ཨ་ཝ་དྷཱུ་ཏཱིའི་ཞབས་ལྟེ་བ་དང༌། དེར་དམིགས་བཅས་ཀྱི་ཡི་གེ་ཐིག་ལེ་སྒོམ་པ་ཙམ་བསྟེན་པའི་དོན་དུ་འཆད་པ་ནི། སྐབས་ཀྱི་དོན་ལས་བྱོལ་བའོ། །འཛིན་པའི་བོགས་འདོན་སྦོགས་པའི་ཆོ་ག་ནི། རྟག་ཏུ་རྡོ་རྗེ་བསླང་བར་བྱ་ཞེས་པ་སྟེ། འདི་ལ་རྡོ་རྗེའི་སྒྲ་ནི་རྣམ་པ་གསུམ་སྟེ། ཀུན་རྫོབ་གསང་བའི་རྡོ་རྗེ་དང༌། ནང་ཀུན་ད་ལྟ་བུའི་རྡོ་རྗེ་དང༌། དོན་དམ་སྟོང་ཉིད་ཀྱི་རྡོ་རྗེའོ། །དང་པོ་ནི། ལས་དང༌། ཡེ་ཤེས་ཀྱི་ཕྱག་རྒྱ་དང༌། ལག་པའི་ཕྱག་རྒྱས་ཀྱང་རུང་སྟེ། རྡོ་རྗེ་བསླང་ཞིང་མཉམ་པར་སྦྱོར་བས། དབུ་མ་དང་དུང་ཅན་གྱི་སྒོ་ཡང་ཡང་དབྱེ་བ་ཡིན་ལ། གཉིས་པ་ནི། བྱང་ཆུབ་ཀྱི་སེམས་ཀྱི་རྡོ་རྗེ་དེ་གསང་བ་ནོར་བུའི་བར་དུ་དབབ་ཅིང༌། ནོར་བུ་ནས་སྤྱི་བོའི་བར་དུ་དབུ་མར་བཅུག་པས་གྱེན་དུ་བསླང་པའོ། །གསུམ་པ་ནི།དོན་གྱི་གཙོ་བོ་སྟེ་སྟོང་གཟུགས་ཀྱི་ཐིག་ལེ་དབུ་མར་བཅུག་པས་གཏུམ་མོའི་འབར་སྣང་གྱེན་དུ་ལངས་པ་སྟེ། རྡོ་རྗེ་བསླང་པ་སྔ་མ་གཉིས་ཆབས་གཅིག་ཏུ་སྒོམས་པ་ལས་ཕྱི་མ་འདི་འབྱུང་ངོ༌། །འདི་ནི་འཛིན་པ་མ་གྲུབ་པ་སྒྲུབ་པ་དང༌། གྲུབ་པ་བརྟན་པར་བྱེད་པ་དང༌། བརྟན་ཀྱང་བོགས་མ་བྱུང་བར་བྱུང་བར་བྱེད་པ་སྟེ། འཆི་བ་འཇོམས་པའི་མཆོག་ཀྱང་
ཡིན་ནོ། །འཆི་བ་ནི་ཉི་ཟླའི་བགྲོད་པ་ཁ་ཡན་དུ་སོང་བས་ལུས་ངག་ཡིད་ཀྱི་ནུས་པ་ཕྱིར་ཡལ་བ་ལས་འབྱུང་ཞིང༌། འཆི་བ་མེད་པ་ཡང་དེ་གཉིས་དབུ་མར་འགགས་པ་ལས་འབྱུང་ལ། དེ་ཡང་ཉི་ཟླ་མ་བཅིངས་ན་སྒྲ་གཅན་གྱི་རྩའི་ནུས་པའང་ཉི་ཟླའི་ལམ་དུ་ཤོར་བར་འགྱུར་བ་དང༌། དེ་གཉིས་བཀག་ན་དེ་ཡང་ཁེགས་ཏེ། དེའི་ཕྱིར་རོ་རྐྱང་ཉི་མ་དང་ཟླ་བའི་རྩའི་བགྲོད་པ་འགོག་ཅིང་འཇོམས་པ་ལས་གཞན་དུ་ཀུན་འདར་མའི་ཡན་ལག་སྟེ་ཆ་ཤས་ལ། སྲོག་གི་རླུང་འཇུག་པའི་ཐབས་མེད་པས། རོ་རྐྱང་གི་ལམ་དགག་དགོས་ལ། འོག་ཏུ་ཡང་བཤང་གཅི་ཁུ་བའི་རྩ་གསུམ་མ་བཅིངས་པར་འཛག་པ་ལས་འཆི་བ་ཡིན་ཏེ། དུང་ཅན་མར་ཐུར་སེལ་གྱི་རླུང་རྣལ་འབྱོར་གྱི་སྟོབས་ཀྱིས་ཞུགས་ཤིང་བཅིངས་ལ་ཐིག་ལེར་ཐིམ་ན་འཆི་བ་མེད་པ་སྟེར་བ་ལས། དུང་ཅན་མར་ཐུར་སེལ་དེ་མ་ཞུགས་པས་ཁུ་བ་མ་བཅིངས་ཤིང༌། བཤང་གཅིའི་རྩ་ལ་རྒྱུ་བའི་ཐུར་སེལ་ཡང༌། དགག་པར་མ་ནུས་པར་ལུས་ངག་ཡིད་ཀྱི་ཁམས་དང་རླུང་ཕྱིར་ཤོར་བ་ལས་འཆི་བའོ། །དེས་ན་བཤང་གཅིའི་རྩའི་ཐུར་སེལ་དུང་ཅན་མར་བཀཀ་ཅིང༌། དུང་ཅན་མ་ཉིད་ཀྱི་ཐུར་སེལ་ཡང་སྟེང་དུ་དགག་པར་བྱའོ། །དེས་ན་འོག་ཏུ་ཐུར་སེལ་གྱི་རླུང་དེ། དུང་ཅན་མར་མ་ཞུགས་ན་འཆི་བའོ་ཞེས་པའི་དོན་ནི་དེ་ཡིན་ལ། གཞན་ཡང་འཆི་ལྟས་བྱུང་ན་འཆི་བ་བསླུ་བ་ནི། དགའ་བའི་ས་བཞི་པོ་དེ་དག་གང་ཡང་རུང་བ་ཞིག་ཐོབ་ན། དེ་ཉིད་འབད་པས་བསྒོམས་པས། རྣལ་འབྱོར་པ་རྣམས་ཀྱི་འཆི་བ་དགའ་བ་བཞི་པོ་རྣམས་ཀྱིས་བསླུ་བར་འགྱུར་རོ། །དེ་ལྟར་ན་འཛིན་པ་གྲུབ་པ་རྣམས་དང༌། མ་གྲུབ་ཀྱང་སྲོག་རྩོལ་གྲུབ་པ་རྣམས་འཛིན་པ་བསྒོམས་པས་འགའ་ཞིག་འཛིན་པ་གྲུབ་སྟེ་འཆི་བ་བསླུ་བ་དང་འགའ་ཞིག་འཛིན་པ་མ་གྲུབ་ཀྱང་འཆི་བ་བཟློག་གོ། སྲོག་རྩོལ་མ་གྲུབ་ཀྱང་རླུང་གི་རྣལ་འབྱོར་ཅུང་ཟད་གོམས་པ་དག་གིས་ཀྱང་འདི་དག་བསྒོམ་ན་ངེས་པར་འཆི་བ་ཅུང་ཟད་བསླུས་པ་འགྱུར་རོ། །གསུམ་པ་ཐུགས་རྡོ་རྗེའི་སྒྲུབ་པ་ལ། བདེ་བའི་ཡེ་ཤེས་སྤྱིར་བསྟན་
པ་དང༌། རྗེས་དྲན་གྱི་ཡན་ལག་ཁྱད་པར་དུ་བཤད་པའོ། །དང་པོ་ལ་དགའ་བའི་རབ་དབྱེ་རྒྱས་པར་བསྟན། རྡོ་རྗེ་སྤྲོ་བའི་རྣམ་གཞག་བཤད། བདེ་བ་འཕེལ་བའི་རྒྱུ་ངོས་བཟུང་བའོ། །དང་པོ་ལ། དགའ་བ་བཞིའི་རབ་དབྱེ་དང༌། བཅུ་དྲུག་གི་རབ་དབྱེའོ། །དང་པོ་ནི། མགོ་བོའི་པདྨར་གཙུག་ཏོར་ལས། ཁུ་བ་འོང་བ་དགའ་བ་སྟེ། །མགྲིན་པ་སྙིང་གར་མཆོག་དགའོ། །དགའ་བྲལ་དགའ་བར་དེ་ནས་འགྱུར། །སྣ་ཚོགས་དགའ་བ་ལྟེ་བ་དང༌། །གསང་བའི་པདྨར་གང་འོངས་པའོ། །གསང་གནས་རྡོ་རྗེ་ནོར་བུའི་བར། །ལྷན་ཅིག་སྐྱེས་དགའ་མི་འཕོ་བའོ། །རབ་གནས་མྱ་ངན་འདས་པ་མིན། །ཆགས་ཆེན་མི་འགྱུར་ཁྱབ་བདག་གོ། འདོད་ཆགས་བྲལ་ལས་འཕོ་མེད་བདེ། །དེ་ནི་མྱ་ངན་འདས་རབ་གནས། །ཞེས་ཏེ་འདིར་སྐད་ཅིག་མའི་དགའ་བཞི་གཙོ་ཆེ་བའི་དབང་དུ་བྱས་ནས། རང་ལུས་ལ་གཏུམ་མོ་འབར་བའི་རྗེས་ཆགས་སམ། ཤེས་རབ་མའི་ཆགས་པས་ཞུ་བར་གྱུར་ཀྱང་རུང་སྟེ། གཙུག་ཏོར་ནས་ཁུ་བ་ཞུ་ཞིང་འོངས་པ། མགོ་བོའི་པདྨ་སྟེ་སྨིན་མཚམས་ཀྱི་འཁོར་ལོར་སླེབ་པ་ནི་དགའ་བའི་སྐད་ཅིག་མ་སྟེ། སྨིན་མཚམས་ནས་མགྲིན་པའི་བར་དུ་དེའི་འགྲོས་ཡོད་ལ། མགྲིན་པའི་ཐིག་ལེ་ཞུ་ནས་སྙིང་གར་འོང་པ་ནི་མཆོག་དགའི་སྐད་ཅིག་སྟེ། ལྟེ་བའི་བར་དུ་ཡང་དེའི་འཕྲོས་སོ། །དགའ་བྲལ་ཞེས་པ་ལ་འདིར་བི་རཱ་མ་ནི་དགའ་བྲལ་ལམ་ཁྱད་པར་གྱི་དགའ་བ་ཞེས་བྱ་ལ། བི་རཱ་མ་ཞེས་པ་ལ་བི་བི་དྷ་རཱ་མ་ཞེས་རྒྱ་སྐད་དུ་འབྲུ་མནན་ཏེ། བི་བི་དྷ་ནི་སྣ་ཚོགས་སོ། །དེས་ན་དགའ་བྲལ་ལ་སྣ་ཚོགས་ཀྱི་འབྲུ་བོད་སྐད་ལ་གསལ་པོར་སྦྱོར་མི་ཐུབ་ཀྱང༌། བི་རཱ་མ་ཞེས་པ་ལ། བི་བི་དྷ་རཱ་ལ་ཞེས་བཤད་ན་ཤིན་ཏུ་བདེའོ། །དེ་ན་དགའ་བྲལ་གྱི་དགའ་བ་ནི་མཆོག་དགའི་རྗེས་དེ་ནས་འབྱུང་བར་འགྱུར་ཏེ། དགའ་བའི་བྱེ་བྲག་རྣམ་འགྱུར་སྣ་ཚོགས་དང་བཅས་པའི་དགའ་བ་དེ་ནི་ལྟེ་བའི་ཐིག་ལེ་ཞུ་ནས་གསང་བའི་པདྨ་སྟེ་གསང་བའི་རྩ་འཁོར་དུ་གང་འོངས་པའོ། །གསང་གནས་ནས་རྡོ་རྗེ་ནོར་བུའི་རྩ་འཁོར་གྱི་བར་དུ་བྱང་ཆུབ་ཀྱི་སེམས་འོངས་པ་ནི། ལྷན་ཅིག་སྐྱེས་དགའ་སྟེ།
དེ་ལས་ཕྱི་རོལ་ཏུ་འཕོ་བ་མེད་པ་གང་ཡིན་པ་ནི། ཡང་དག་པའི་དགའ་བའོ། །ཕྱི་རོལ་ཏུ་འཕོས་པར་གྱུར་ན་ནི། ལྷན་ཅིག་སྐྱེས་པ་ལ་ལོག་པར་ཞུགས་པ་སྟེ། ལྷན་ཅིག་སྐྱེས་པའི་ཡེ་ཤེས་སུ་མི་འགྱུར་རོ། །དེ་ཡང་སྐད་ཅིག་བཞིའི་མཚན་ཉིད་ཅན་གྱི་དགའ་བའི་དབང་དུ་བྱས་ན་ཡང་ནས་ཡང་དུ་འཆར་ནུབ་བྱེད་པ་ཡིན་ལ། གང་ཞིག་ཐིག་ལེ་བརྟན་པ་ལས་ཐོབ་པའི་དགའ་བའི་སར་གྱུར་པའི་དགའ་བ་བཞི་ནི། སོ་སོ་སྦྱོར་བའི་ལམ་ཐ་དད་པས་ཐོབ་པ་ཡིན་མོད། གང་ཐོབ་པ་དེ་ནི་གཞན་དུ་མི་འགྱུར་བར་གནས་པ་ཡིན་ནོ། །དེ་ཡང་སྐད་ཅིག་གི་དགའ་བ་བཞིའི་འགྱུར་བ་ཡང་ཡང་བཀག་པ་ཡུན་རིང་དུ་གོམས་པ་ལས། དགའ་བའི་ས་དང་པོ་ཐོབ་པར་འགྱུར་ལ། དེ་ལ་གནས་བཞིན་དུ་སྔ་མ་ལྟར་ཡུན་རིང་དུ་གོམས་པ་ལས། དུས་གཞན་ཞིག་ན་མཆོག་དགའི་ས་ཐོབ་པར་འགྱུར་ཏེ། དེ་བཞིན་དུ་གཞན་རྣམས་ལའང་སྦྱར་རོ། །དགའ་བ་བཞིའི་ས་འདི་དག་ནི་འཛིན་པའི་ཡན་ལག་གི་ཕྱེད་ཕྱི་མ་ལ་ཐོབ་པར་འགྱུར་ཞིང༌། རྗེས་དྲན་གྱི་ཡན་ལག་ཏུ་རྫོགས་པར་འགྱུར་ལ། མས་བརྟན་གྱི་ས་ནི་ཏིང་ངེ་འཛིན་གྱི་ཡན་ལག་ཏུ་རྫོགས་པ་ཉིད་དོ། །སྐད་ཅིག་མའི་མཚན་ཉིད་ཀྱི་དགའ་བ་བཞི་ནི་འདི་ཡིན་ཏེ། ཕྱི་རོལ་གྱི་ཡུལ་ལ་མངོན་པར་ཆགས་པ། སྤྱི་བོའི་ཐིག་ལེ་ཞུ་བའི་བདེ་བ་ཡིན་པས་ན། གདོང་ལ་རྣམ་པར་འགྱུར་བ་འབྱུང་བ་དགའ་བ་དང༌། ནང་གི་རེག་བྱའི་རྐྱེན་གྱིས་ཕྱི་རོལ་ལ་ཆགས་པ་རགས་པ་རྣམས་ནང་དུ་འདུས་ཤིང༌། མགྲིན་པའི་ཐིག་ལེ་གཡོས་པས། རླུང་རྒྱུ་བ་ལ་རྣམ་འགྱུར་འཆར་བ་ནི་མཆོག་དགའ་དང༌། ཞུ་བའི་བདེ་བ་རྒྱས་པས་ཕྱི་རོལ་ཀྱི་ཆགས་པའི་དགའ་བ་ཐམས་ཅད་ནང་དུ་འདུས་ཏེ། ཕྱི་རོལ་ཀྱི་དགའ་བ་བྲལ་ཞིང་ཡིད་ཀྱི་ཐིག་ལེ་གཡོས་པས། རྟོག་པ་འགགས་ཤིང་རྣམ་པར་རྨོངས་པའི་མཚན་ཉིད་ཅན་གྱི་ཕྱིར་དང༌། ནང་གི་དགའ་བ་ནི་སྔ་མ་གཉིས་ལས་ཆེས་ཁྱད་པར་དུ་གྱུར་པའི་ཕྱིར་དང༌། ལྟེ་བ་ལས་ཐིག་ལེ་གཡོས་པས། ལུས་དང་རླུང་གི་འགྱུར་བ་སྣ་ཚོགས་པ་ཅན་གྱི་ཕྱིར། དགའ་བྲལ་དང༌། ཁྱད་དགའ་དང༌། སྣ་ཚོགས་དགའ་བའོ། །གང་ལས་དེ་ལྟ་
བུའི་དགའ་བ་རང་གིས་རིག་པའི་མཚན་ཉིད་ཅན་གྱི་བདེ་བ་གསང་བའི་འཁོར་ལོ་ལས་ལུས་ངག་ཡིད་ཆགས་བཞིའི་ཐིག་ལེ་འདྲེས་པ་གཡོ་བའི་མཚན་ཉིད་ཅན་ནི་ལྷན་ཅིག་སྐྱེས་པའི་དགའ་བ་སྟེ། འདི་དག་ནི་དཔེ་ཡིན་ལ། དེས་མཚོན་པའི་དོན་ནི། ཡས་འབས་ཀྱི་དགའ་བའི་ས་ལ་ཕྱི་རོལ་གཟུང་བའི་རྣམ་པར་རྟོག་པ་མ་འགགས་པའི་བདེ་བ་དང༌། མཆོག་དགའི་ས་ལ་གཟུང་རྟོག་རགས་པ་ཐིམ་པ་དང༌། ཁྱད་དགའི་ས་ལ་འཛིན་རྟོག་རགས་པ་ཡང་ཐིམ་པ་དང༌། ལྷན་སྐྱེས་ཀྱི་ས་ལ་བདེ་ཆེན་རང་གིས་རིག་པའི་ཡེ་ཤེས་གསལ་བར་མཚོན་ནུས་པ་ཡིན་ནོ། །མས་བརྟན་གྱི་དགའ་བའི་ས་ནི། ངོ་བོ་ཏིང་ངེ་འཛིན་གྱི་ས་བཅུ་གཉིས་ཡིན་པས། དེ་དང་དེའི་ཡོན་ཏན་གྱི་ཁྱད་པར་ནི་མི་འདྲ་བ་ཆེར་ཡོད་པ་ཡིན་ལ། འོན་ཀྱང་དགའ་བ་བཞིའི་ས་རྣམས་ཀྱི་ལྡོག་ཆ་ནི་མི་འགྱུར་བའི་བདེ་བ་ཆེན་པོ་དོན་གྱི་ཡེ་ཤེས་རང་གིས་རིག་པ་ནི། ལྷན་ཅིག་སྐྱེས་པའི་ས་དང་རྣམ་པར་མི་རྟོག་པའི་བདེ་བ་བརྟན་པོ་སྟོང་གཟུགས་དང་གཅིག་ཏུ་འདྲེས་པ་ནི་ཁྱད་དགའ་དང༌། དེ་ཉིད་གསུང་གཞོམ་དུ་མེད་པ་དང་འདྲེས་པ་ནི་མཆོག་དགའི་ས་དང༌། དེ་ཉིད་གཞན་དོན་དུ་སྐུ་སྣ་ཚོགས་པར་སྤྲོ་བའི་ནུས་པ་དང་འབྲེལ་བའི་ཡེ་ཤེས་ནི་དགའ་བའི་སའོ། །འདྀ་ནི་སྐུ་བཞིའི་རིམ་པས་ལྷན་སྐྱེས་ནས་དགའ་བའི་བར་དུ་ལུགས་བཟློག་ལ་སྦྱར་བ་ཡིན་ལ། ཡང་ན་མས་བརྟན་ལ་ཡང་དགའ་བ་དང་པོ་ནས་བརྩིས་ཀྱང་རུང་སྟེ། གོང་དུ་བསྟན་པ་དང་ཕྱོགས་མཚུངས་པར་བཟུང་བའི་རྟོག་པ་རགས་པ་འགགས་པ་དང༌། ཐམས་ཅད་འགགས་པ་དང༌། འཛིན་པའི་རྟོག་པ་འགགས་པ་དང༌། ལྷན་ཅིག་སྐྱེས་པ་དོན་དམ་པ་རང་རིག་པ་ཡོངས་སུ་རྫོགས་པ་རྣམས་ལ་རིམ་བཞིན་སྦྱར་ཏེ། སྐབས་འདིར་ནི་ཏིང་ངེ་འཛིན་གྱི་ས་དང་པོ་གཉིས་དགའ་བའི་ས་དང༌། དེ་ནས་བཞི་བཞི་སྟེ་བརྒྱད་ལ་མཆོག་དགའ་དང་ཁྱད་དགའ་གཉིས། ཕྱི་མ་གཉིས་པོ་ལྷན་སྐྱེས་ཀྱི་སར་སྦྱར་རོ། །གཞན་ཡང་འདིར་བཤད་པའི་དགའ་བ་བཞི་པོ་འཁོར་ལོ་དྲུག་ལ་ས་མཚམས་སུ་གཅོད་ལུགས་འདི།
འོག་ཏུ་འཆད་པ་ཟླ་བའི་ཆ་བཅུ་དྲུག་དང་སྦྱོར་བའི་ལུགས་ཡིན་ལ། འདི་དང་དགའ་བ་བཞི་ལ་ལུས་ངག་ཡིད་དང་ཡེ་ཤེས་བཞིས་དབྱེ་བས་བཅུ་དྲུག་ཏུ་བྱེད་པ་ནི། རྣམ་གཞག་ཐ་དད་ཡིན་པས་མ་འདྲེས་པར་ཕྱེད་པར་བྱའོ། །སྐབས་འདིར་འཁོར་ལོ་དྲུག་ལ་དགའ་བཞི་སྦྱར་ཚུལ་སྐད་ཅིག་མའི་དབྱེ་བ་ཅན་ཉིད་དངོས་སུ་གསུངས་པ་ཡིན་མོད། གཅིག་ཤོས་ཀྱང་ཞོར་ལ་འཕངས་སོ། །དགའ་བ་བཞི་ལ་སྐད་ཅིག་མ་དང་སའི་དབྱེ་བ་མ་ཕྱེད་ན། རྒྱུད་སྡེ་རྣམས་ཀྱི་ཚིག་མང་པོའི་དོན་དབྱེ་བར་མི་ནུས་ཤིང༌། རྒྱ་གར་བ་འགའ་ཞིག་དང༌། བོད་ཀྱི་མཁས་པ་མང་པོ་ལའང༌། ངེས་མེད་སྣ་ཚོགས་ཀྱི་བཤད་པ་ལས་མི་སྣང་བས། གནས་འདི་ལ་ངེས་པ་རྙེད་པ་གལ་ཆེའོ། །དེ་ཡང་སྐད་ཅིག་རྣམ་པའི་མཚན་ཉིད་ཅན་གྱི་དགའ་བ་བཞི་ནི། རང་ལུས་ཀྱི་རྣལ་འབྱོར་ལ་བརྟེན་ནས་གཏུམ་མོ་ལན་རེ་འབར་བ་ལས་ཁམས་ཞུ་བ་ལན་རེ་འབྱུང་བ་ན་ཡང་ཆ་ཚང་བ་ཐེངས་རེ་རེ་འབྱུང་ཞིང༌། དང་པོར་སྨིན་བྱེད་ཀྱི་དབང་གི་སྐབས་དང༌། བསྐྱེད་རིམ་དང་རྫོགས་རིམ་གྱི་གནས་སྐབས་མང་པོ་ཡང་སྟེ། ལས་ཀྱི་ཕྱག་རྒྱ་དང་མཉམ་པར་སྦྱར་བའི་བྱ་རྩོལ་ཚར་གཅིག་ལ་ཡང༌། དེ་ལྟ་བུའི་དགའ་བ་བཞི་དང་བཅུ་དྲུག་ཡས་བབ་དང་མས་བརྟན་གྱི་རིམ་པ་ཆ་ཚང་བར་འབྱུང་ངོ༌། །གནས་པའམ་སའི་དགའ་བ་ནི། རྫོགས་པའི་རིམ་པ་ཡུན་རིང་དུ་བསྒོམས་པ་ལས། དུས་ལན་ཅིག་ན་དཔྲལ་པར་ཞུ་བདེའི་ཐིག་ལེ་བརྟན་པ་ལས་བྱུང་བའི་དགའ་བ་ཞེས་བྱ་བ་བདེ་བའི་ཉམས་དང་ལྡན་པའི་ཡེ་ཤེས་གཅིག་འཆར་བར་འགྱུར་ཞིང༌། ཤར་བ་དེ་ཡང་ཅུང་ཟད་བརྟན་པར་གྱུར་ན། ཕྱིན་ཆད་ཉམས་པར་མི་འགྱུར་ལ། སྐབས་དེར་མཆོག་ཏུ་དགའ་བའི་ས་ལ་སོགས་པ་མ་ཐོབ་བོ། །དེ་ནས་ཀྱང་ཡུན་རིང་དུ་གོམས་པས་དུས་ལན་ཅིག་ན་སྙིང་གར་ཐིག་ལེ་བརྟན་པ་ལས་མཆོག་དགའ་སྐྱེ་བ་སོགས་ཡིན་ཏེ། དེ་ལྟར་གཞན་རྣམས་ལ་ཡང་སྦྱར་ཏེ་ཤེས་པར་བྱའོ། །དེ་ལྟར་བུའི་དགའ་བ་དེ་དག་ཀྱང་སྐབས་འདིར་རབ་གནས་ཞེས་སོགས་ཀྱི་དོན་ལ། དོན་དམ་བསྡུས་པ་རྗེས་འབྲང་དང་
བཅས་པ་ནི། གཙུག་ཏོར་དུ་ཁུ་བ་རབ་ཏུ་གནས་པ་དང༌། ནོར་བུ་ལས་འཕོ་བ་ནི་མྱང་འདས་ཡིན་ལ། འདིར་ནོར་བུ་ལས་མི་འཕོ་ཞིང༌། གཙུག་ཏོར་ཁོ་ནར་གནས་པ་ཡང་མིན་ཏེ། ཨ་ཝ་དྷཱུ་ཏཱི་ཡང་ནས་ཡང་དུ་འགེངས་པར་བྱེད་པས་རབ་གནས་དང་མྱ་ངན་ལས་འདས་པ་གཉིས་ཀ་མིན་ནོ། །ཞེས་འཆད་ལ། འབྲོ་འགྱུར་དང༌། དཔལ་འཛིན་དགའ་བའི་མདོར་བཤད་ལས་ནི། རབ་ཏུ་མི་གནས་མྱ་ངན་འདས། །ཞེས་འདོན་པར་སྣང་ཞིང༌། འགའ་ཞིག་ཁུ་བ་འཕོ་བ་ནི་མྱང་འདས་ཡིན་པས། མྱ་ངན་འདས་ལ་རབ་གནས་མིན། །ཞེས་འདོན་པའང་ཡོད་དོ། །འོན་ཀྱང་འདི་ལྟར་བཤད་ན་བདེ་སྟེ། ཁུ་བ་འཕོ་བ་ནི་ཕུང་ཁམས་ཀྱི་སྟོབས་རྣམས་ཟད་པར་བྱེད་པ་ཡིན་པའི་ཕྱིར་མྱང་འདས་ཀྱི་མིང་བཞག་པ་སྟེ། ལྷན་གཅིག་སྐྱེས་དགའ་མི་འཕོ་བ་དེ་ནི། བྱང་ཆུབ་ཀྱི་སེམས་རྡོ་རྗེ་ནོར་བུ་ལ་རབ་ཏུ་གནས་ཤིང་འགྱུར་བ་མེད་པས། འཕོ་བའི་མྱང་འདས་མ་ཡིན་ལ། ཆགས་བྲལ་གྱི་མཐའ་ལས་འདས་ནས། བདེ་བའི་འདོད་ཆགས་ཆེན་པོ་ཐིག་ལེ་མི་འགྱུར་བ། དོན་དམ་ཁྱབ་བདག་གི་ངོ་བོ་སྟེ་འདྲིས་པའི་ཚུལ་གྱིས་དེ་དངོས་སུ་མཚོན་པའམ། མཚོན་པའི་རྒྱུ་ཐུན་མོང་མ་ཡིན་པའོ། །ཁྱབ་བདག་ནི་གཙོ་བོའི་དོན་སྟེ། ཆོས་ཉིད་དང་དབྱེ་བ་མེད་པའི་ཕྱིར་རོ། །རྣམ་པར་མི་རྟོག་པའི་ངོ་བོ་ཉིད་ཀྱིས་སྲེད་པའི་འདོད་ཆགས་དང་བྲལ་བའི་ཕྱིར། བརྟེན་ཐིག་ལེ་འཕོ་བ་མེད་པའི་བདེ་བ་ནི་འཁོར་བའི་མཐའ་སྤངས་ཏེ་མྱ་ངན་ལས་འདས་པ་ལ་རབ་ཏུ་གནས་སོ། །ཞེས་ཏེ་དང་པོར་མྱང་འདས་མིན་ཞེས་པས་མྱང་འདས་ཀྱི་མཐའ་ལ་མི་གནས། སྐབས་འདིར་མྱ་ངན་འདས་རབ་གནས་ཞེས་པས་འཁོར་བའི་མཐའ་ལ་མི་གནས་པའོ། །གཉིས་པ་ནི། ཁུ་བ་ཟླ་འཆར་གཙུག་ཏོར་དུ། །རྫོགས་པ་གསང་བའི་མཚོ་སྐྱེས་ལ། །བཅུ་དྲུག་ཆ་གང་དེ་ནོར་བུའི། །པདྨར་རྡོ་རྗེའི་རྩེ་མོར་གནས། །དེ་སྟེང་འཕོ་བའི་དུས་སུ་འགྱུར། །ནག་པོའི་ཚེས་གཅིག་འོངས་པ་ན། །འདོད་ཆགས་བྲལ་བས་གནམ་སྟོང་ལ། །ཉི་མ་མཛོད་སྤུའི་གནས་སུ་འགྲོ །དེ་ཡི་ཆ་ཤས་
བཅུ་དྲུག་མ། གཙུག་ཏོར་པདྨར་སོན་པའོ། །ཟླ་བ་ཉམས་པ་ཞེས་བརྗོད་དེ། །ཆགས་པའི་བདེ་ལ་ཆགས་བྲལ་ཕྱིར། །ཞེས་ཏེ་བྱང་ཆུབ་ཀྱི་སེམས་ཁུ་བ་ནི་བདེ་བ་ཐམས་ཅད་སྐྱེ་བའི་ཕྱིར་ཟླ་བ་སྟེ། ཕྱི་རོལ་ཏུ་ཚེས་གཅིག་ནས་ཟླ་བའི་ཆ་དང་པོར་ཤར་བ་ནས། བཅོ་ལྔ་པ་ལ་ཆ་བཅོ་ལྔ་རྫོགས་ཏེ་ཉེ་བར་འགྱུར་ཞིང༌། དེའི་བཅུ་དྲུག་པ་ནི་ཉ་གང་པ་དེ་ཉིད་ལ་སྐད་ཅིག་ཙམ་གནས་པའོ། །དེ་བཞིན་དུ་གཙུག་ཏོར་ནས་བྱང་ཆུབ་ཀྱི་སེམས་ཆ་དང་པོ་ཤར་བ་ནས་བརྩམས་ཏེ་མགྲིན་པའི་ཡས་མཐའ་ཚུན་ཆད་དུ་ཆོས་གཅིག་ནས་ལྔའི་བར་ཏེ། དགའ་བ། བཟང་པོ། རྒྱལ་བ། སྟོང་པ། རྫོགས་པ་རྣམས་ལ་ཨཾཾཾ་ཨིཾ་རྀ༵ཾ་ཨུཾ་ལྀཾ་རྣམས་འཆར་བ་ནམ་མཁའ་རླུང་མེ་ཆུ་སའི་མུན་པ་བསལ་བ་མུན་པའི་ཡོན་ཏན་ཅན་དེ་དགའ་བའི་སྐད་ཅིག་མ་ལྔ་འཆར་བར་འགྱུར་རོ། །མགྲིན་པ་ནས་ལྟེ་བའི་ཡས་མཐའི་བར་ལ། ཚེས་དྲུག་ནས་བཅུའི་བར་ཏེ། དགའ་བ་སོགས་ལྔ་ལ་ཨཾཾ་ཨེཾ་ཨཾར་ཨོཾ་ཨཾལ་རྣམས་འཆར་བ་འབྱུང་བ་ལྔའི་མུན་པ་བསལ་བ་རྡུལ་གྱི་ཡོན་ཏན་གྱི་བདག་ཉིད་ཀྱི་མཆོག་དགའ་སྐད་ཅིག་མ་ལྔ་འཆར་བར་འགྱུར་རོ། །ལྟེ་བ་ནས་གསང་བའི་མཚོ་སྐྱེས་ཀྱི་མས་མཐའི་བར་དུ། ཚེས་བཅུ་གཅིག་ནས་བཅོ་ལྔའི་བར་ཏེ། དགའ་བ་སོགས་ལྔ་ལ་ཧཾ་ཡཾ་རཾ་ཝཾ་ལཾ་རྣམས་འཆར་བ་ཁམས་ལྔའི་མུན་པ་བསལ་བ་སྙིང་སྟོབས་ཀྱི་ཡོན་ཏན་གྱི་ཁམས་ལྔའི་བདག་ཉིད། ཁྱད་པར་གྱི་དགའ་བ་སྐད་ཅིག་མ་ལྔ་འབྱུང་སྟེ། དེ་ལྟར་ན་རྫོགས་པ་གསུམ་པ་དགའ་བའི་ཚེས་བཅོ་ལྔ་པ་ནི་གསང་བའི་མཚོ་སྐྱེས་ལ་འཆར་བར་འགྱུར་ཞིང༌། དེའི་ཆ་དྲུག་པའམ། ཆོས་བཅུ་དྲུག་པ་ཨཾ་ཡིག་འཆར་བ། མཚོན་བྱེད་ལྷན་ཅིག་སྐྱེས་པའི་དགའ་བ་གང་ཡིན་པ་དེ་ནི། གསང་བ་ནས་ནོར་བུའི་བར་ཏེ་ཁྱད་པར་དུ་ཡང་ནོར་བུའི་དབུས་ཀྱི་རྩའི་པདྨ་རྡོ་རྗེའི་རྩེ་མོར་འཕོ་མེད་དུ་གནས་པ་ཉིད་ཏེ། འདི་ནི་ཡེ་ཤེས་ཀྱི་ཁམས་དང་ཁྱབ་བདག་གོ །དེ་ནས་ལམ་དུ་མ་བྱས་པ་ཐ་ལམ་པ་རྣམས་ལ་དེའི་སྟེང་སྟེ་རྗེས་ཐོགས་ཉིད་
ལ་ཁམས་འཕོ་བའི་འགོ་རྩོམ་པའི་དུས་སུ་འགྱུར་ཏེ། དེ་ནི་ནག་པོ་སྟེ་མར་ངོའི་ཚེས་གཅིག་འོངས་པ་ཡིན་ནོ། །དེ་དང་དུས་མཉམ་པར་རྡོ་རྗེ་ནོར་བུའི་རྩེ་མོར་རྡུལ་གྱི་གཟུགས་ཉི་མའི་ཚེས་ཀྱི་ཆ་དང་པོ་ཤར་རོ། །དེ་ནས་གསང་གནས་ཀྱི་བར་དུ་མར་ངོའི་ཚེས་ལྔའི་བར་ཏེ་དགའ་བ་ལ་སོགས་པ་ཟླ་བའི་ཆ་དང་པོ་ལྔ་མུན་པ་ལ་ཞུགས་ལཱཿཝཱཿརཱཿཡཱཿཧཱཿརྣམས་འཆར་བའོ། །དེ་ནས་སྙིང་གའི་བར་དུ་ཚེས་བཅུ་པའི་བར་ཏེ། དགའ་བ་ལ་སོགས་པ་ཆ་བར་བ་ལྔ་མུན་པ་ལ་ཞུགས་པ་ཨཱལཿཨཽཿཨཱརཿཨཻཿཨཱཿརྣམས་འཆར་བའོ། །དེ་ནས་དཔྲལ་པའི་བར་དུ་མར་ངོའི་ཚེས་བཅོ་ལྔའི་བར་ཏེ་དགའ་བ་ལ་སོགས་པ་ཟླ་བའི་ཆ་ཐ་མ་ལྔ་མུན་པ་ལ་ཞུགས་པ་ལཱྀཿཨུཿརཱྀཿཨཱིཿཨཱཿརྣམས་འཆར་བའོ། །དེ་ལྟ་བུའི་ལྔ་ཚན་གསུམ་པོའང་སྙིང་སྟོབས་རྡུལ་མུན་གྱི་དབྱེ་བ་ཅན་ཡིན་ལ། བཅོ་ལྔ་པ་གནམ་སྟོང་ལ་ནི། མཛོད་སྤུའི་འཁོར་ལོའི་གནས་སུ་ཉི་མ་རྡུལ་གྱི་ཁམས་འགྲོ་སྟེ། དེ་ལྟར་ཉི་མའི་ཆ་ཤས་རེ་རེ་འཕེལ་བ་ན། ཟླ་བའི་ཆ་ཤས་རེ་རེ་འགྲིབས་ཏེ། ཆ་བཅོ་ལྔ་རྫོགས་པར་ཉམས་སོ། །དེ་ལྟར་ཆ་བཅོ་ལྔ་འགྲིབས་ཟིན་ལ་སླར་ཡང་འཕེལ་བའི་འགོ་མ་བརྩམ་བར་གྱི་སྐད་ཅིག་དེ་ནི། ནག་ཕྱོགས་ཀྱི་ཚེས་སམ་ཆ་ཤས་བཅུ་དྲུག་མ་ཨཱཿཡིག་འཆར་བ་སྟེ། དེ་ལ་ནི་གཙུག་ཏོར་གྱི་པདྨར་ཉི་མ་སོན་པའོ། །བཅུ་དྲུག་པ་དེ་ལ་ནི་ཟླ་བ་མཐའ་དག་ཉམས་པ་ཞེས་བརྗོད་དེ། གོང་དུ་ནག་ཕྱོགས་ཀྱི་ཚེས་གཅིག་ཤར་བ་ནས། འདོད་ཆགས་བྲལ་བས་ཞེས་ཆགས་བྲལ་གྱི་མགོ་ཟིན་ལ། བཅུ་དྲུག་པའི་མཐའི་གནས་སྐབས་འདིར་ནི་ཆགས་པའི་བདེ་བ་མཐའ་དག་ཉམས་པ་སྟེ། གང་ལ་ཆགས་པའི་གཞི་བདེ་བ་མེད་པས་དགའ་བའི་ཆགས་པ་དང་བྲལ་བའི་ཕྱིར། འདོད་ཆགས་ཉམས་པ་ཞེས་བྱ་ལ་འོན་ཀྱང་སྲིད་པ་མངོན་གྱུར་དང༌། སྡང་བ་དང་རྨོངས་པ་འཐུག་པོ་རྣམས་གཅིག་ཏུ་འཚོགས་པ་ནི་འགྱུར་བའི་མ་རིག་པ་ཡིན་ནོ། །འདི་དག་གི་ཆུང་འབྲིང་ཆེན་པོའི་དབྱེ་བ་སོགས་རྒྱས་པར་གཞན་དུ་ཤེས་པར་བྱའོ། །དེ་ལྟར་ན་དགའ་བ་བཅུ་དྲུག་གི་རབ་དབྱེ་བསྟན་ནས། འཕྲོས་དོན་འཁོར་འདས་ཀྱི་ཁྱད་པར་བཤད་དེ། ཡང་དག་པའི་ལམ་ལ་གདམས་པ་ནི། ལུས་ཅན་ཐམས་ཅད་འཆི་བ་ན། །ཟླ་བ་བདུད་རྩི་འོག་ཏུ་འགྲོ །སྟེང་དུ་ཉི་མ་རྡུལ་སྒྲ་གཅན། རྣམ་ཤེས་དངོས་པོའི་མཚན་ཉིད་ལ། །
དེ་ཕྱིར་ཟླ་བ་བདུད་རྩི་ནི། །སྟེང་དུ་བགྲོད་བྱ་མི་ཡི་བདག །འོག་ཏུ་ཉི་མ་རྡུལ་སྒྲ་གཅན། །རྣམ་ཤེས་འགྱུར་མེད་བདེ་བ་ལ། སངས་རྒྱས་ཀུན་གྱི་མཛོད་སྤུ་ཡི། །པདྨར་ཟླ་བ་བདུད་རྩི་ཉ། །ཉི་རྡུལ་གནམ་སྟོང་གསང་བར་ཏེ། །གཙུག་ཏོར་ནོར་བུ་དེ་དག་གོ། ཞེས་པ་སྟོན་པའི་རྡོ་རྗེའི་ཚིག །ལུས་ཅན་ཀུན་ལ་ཕྱིན་ཅི་ལོག །རབ་གནས་མྱ་ངན་འདས་པ་མིན། ཁམས་རྣམས་ཕྱིན་ཅི་ལོག་ཏུ་འགྱུར། ཅེས་པ་སྟེ། གང་གི་ཕྱིར་ལུས་ཅན་འཁོར་བ་པ་རྣམས་ནི། འཛག་པའི་བདེ་བ་མ་སྤངས་པའི་ཕྱིར། འཆི་བ་ན་ཟླ་བ་བདུད་རྩི་ཁམས་དཀར་པོ་ནི། དུང་ཅན་གྱི་ལམ་ལས་འོག་ཏུ་ལྷུང་ཞིང་འཛག་པར་འགྱུར་ལ། ཉི་མའི་ཆོས་རྡུལ་ཏེ་ཁམས་དམར་པོ་ནི། སྟེང་གཙུག་ཏོར་གྱི་བར་དུ་འགྲོ་ཞིང༌། དེ་གཉིས་ཀྱི་བར་ནས་སྒྲ་གཅན་རྣམ་ཤེས་སྲོག་གི་རླུང་དང་བཅས་པ་ཕྱིར་སོང་བ། སྔོན་བསགས་པའི་དགེ་སྡིག་གི་ལས་དང་རྗེས་སུ་འབྲེལ་བར་དངོས་པོ་སྲིད་པ་གཞན་དུ་འགྲོ་བའི་མཚན་ཉིད་སྟེ་བྱ་བ་ལ་འཇུག་གོ །འདི་ནི་སྐྱེ་བོ་ཕལ་བའི་མཚན་ཉིད་དོ། །མིའི་བདག་པོ་ཞེས་ཟླ་བ་བཟང་པོ་ལ་བོས་ནས། འཁོར་བའི་ཚུལ་དེ་ཉེས་དམིགས་དང་བཅས་པ་དེའི་ཕྱིར་ཟླ་བ་བདུད་རྩི་བྱང་ཆུབ་ཀྱི་སེམས་ནི་འཛག་པ་བཀག་སྟེ་སྟེང་དུ་བགྲོད་པ་ལ་འབད་པར་བྱ་ལ། །ཉི་མ་དང་རྡུལ་ཡང་འོག་རྡོ་རྗེ་ནོར་བུར་བགྲོད་པར་བྱས་ནས། སྒྲ་གཅན་ཏེ་རྣམ་ཤེས་རླུང་དང་བཅས་པ། ཁམས་འགྱུར་མེད་ཀྱི་བདེ་བ་ལ་ཐིམ་ཞིང་བགྲོད་པར་བྱའོ། །བགྲོད་པ་ཞེས་བྱ་བ་ནི་འགྲོ་ཞིང་ལོངས་སྤྱོད་པའི་དོན་ཡིན་ལ། རྣལ་འབྱོར་གྱྀ་སྟོབས་ཀྱིས་ཁམས་ཀྱི་བགྲོད་པ་ནོར་བུར་ཁེགས་པ་ནས། དེ་ཕྱིན་ཆད་འདི་ལྟ་བུར་འགྱུར་ཏེ། དཀར་ཆའི་གནས་གཙུག་ཏོར་ཡིན་ལ། དེ་ལས་ཁུ་བ་ནོར་བུར་འོངས་པ་དེ་ཉིད་དུ་ཐིམ་མི་འགྲོ་བར། རང་གནས་གཙུག་ཏོར་ཉིད་དུ་ལོག་སྟེ་ཐིམ་པར་འགྱུར་བ་བཞིན་དུ་ཁམས་དམར་པོ་ཡང་གསང་གནས་ནས་ཡར་གཙུག་ཏོར་གྱི་བར་དུ་འབར་བར་འགྱུར་ཞིང༌། དེར་ཐིམ་སྟེ་མི་འགྲོ་བར་སླར་ལོག་སྟེ་རང་གནས་གསང་བར་ཐིམ་ཞིང་འགྲོའོ། །དེ་ཡང་དང་པོར་ཚུལ་འདི་ལྟར་འབྱུང་སྟེ། དམར་པོ་སྤྱི་བོའི་བར་དུ་འབར། བྱང་སེམས་དཀར་ཆ་ཞུ་ནས་ནོར་བུར་སླེབ་པའི་དམར་པོ་ཡང་སྤྱི་བོ་ནས་ལོག་ནས་གསང་གནས་སུ་ཐིམ། བྱང་ཆུབ་ཀྱི་
སེམས་སྟེང་དུ་གཤེགས་པ་ན་དམར་པོ་ཡང་དེ་དང་ལྷན་ཅིག་གཙུག་ཏོར་གྱི་བར་དུ་སོང་ནས། རྗེས་ཆགས་ལ་སོགས་པ་རྐྱེན་གཞན་གྱིས་བསྐུལ་བ་མེད་ན། དཀར་ཆ་ཞུ་བར་མི་འགྱུར་ཞིང༌། སྤྱི་བོར་བརྟན་པའི་དམར་པོ་རང་ལོག་ནས་གསང་བར་འགག་གོ འཁོར་བ་པ་རྣམས་ཀྱི་དཀར་པོ་འོག་ཏུ་ཕྱི་ལ་ཐལ་བས། ཉོན་མོངས་པ་ཐམས་ཅད་ཀྱི་གཞིར་འགྱུར་ཞིང༌། རྒས་པ་དང༌། ནད་དང༌། སྡུག་བསྔལ་བསྐྱེད་པར་བྱེད་ལ། དེ་རྗེས་དམར་ཆ་གྱེན་དུ་འབར་བ་གཙུག་ཏོར་ནས་དབང་པོའི་སྒོ་རྣམས་རྒྱུད་དེ་ཕྱིར་ཤོར་བས། གཟུང་འཛིན་གྱི་སྣང་བ་དང་རྣམ་རྟོག་སྣ་ཚོགས་བསྐྱེད་ཅིང༌། འཆི་བ་བསྐྱེད་པར་ཡང་འགྱུར་རོ། །རྣམ་འགྱུར་པས་དཀར་པོའི་འོག་གི་སྒོ་བཀག་ཅིང༌། དམར་པོའི་སྟེང་གི་སྒོ་ཁེགས་པས། ལས་དང་ཉོན་མོངས་པ་དང༌། ནད་དང་སྡུག་བསྔལ་དང་རྣམ་རྟོག་དང་འཆི་བ་ཐམས་ཅད་བཟློག་པར་འགྱུར་རོ། །འགྱུར་བ་འགེགས་པའི་གོམས་པ་མཐར་ཕྱིན་ནས། ཏིང་ངེ་འཛིན་གྱི་ཡན་ལག་སྐྱེས་པའི་གནས་སྐབས་སུ་ནི། ནོར་བུ་ནས་དམར་པོ་འབར་བ་དང༌། གཙུག་ཏོར་ནས་དཀར་པོ་འཛག་པ་དུས་མཉམ་པར་བྱས་ནས། དཀར་ཆ་ནོར་བུར་སླེབ་པ་དང༌། དམར་ཆ་གཙུག་ཏོར་དུ་སླེབ་པ་དུས་མཉམ་མོ། །དེ་ནས་གཉིས་ཀར་ཕྱིར་ལོག་པ་དུས་མཉམ་སྟེ། ཐིག་ལེ་གཙུག་ཏོར་དུ་ཐིམ་པ་ནི། རྡུལ་ནོར་བུར་ཐིམ་མོ། །ཤར་ཕྱོགས་ནས་ཉི་མ་ཤར་བའི་འོད་ནུབ་ཀྱི་རི་རྩེ་ལ་འཆར་བ་བཞིན་དུ། ཐིག་ལེ་གཙུག་ཏོར་དུ་ཐིམ་པའི་ནུས་པ་ལས། ནོར་བུར་འགྱུར་བ་མེད་པའི་ཐིག་ལེ་དཀར་པོ་ཅུང་ཟད་ཅིག་བརྟན་ཏེ་ཕྱིས་དེ་ཉིད་རིམ་གྱིས་འཕེལ་བར་འགྱུར་ལ། རྡུལ་གྱི་ཆ་ནོར་བུར་བཅིང་ཞིང་ཐིམ་པས། དེའི་འོད་ལས་གཙུག་ཏོར་དུ་དམར་ཆ་ཅུང་ཟད་ཅིག་བརྟན་ནས། ཕྱིས་དེ་ཉིད་རིམ་གྱིས་འཕེལ་བར་འགྱུར་རོ། །དེ་ལྟར་ན་དེ་རྣམས་ནི་ཡང་དག་པའི་རྣལ་འབྱོར་བ་རྣམས་ཀྱི་ངེས་པའི་ལམ་བརྟན་པའོ། །ཏིང་ངེ་འཛིན་གྱི་ས་བཅུ་གཉིས་རྫོགས་པ་ཕན་ཆད་ཀྱི། སངས་རྒྱས་ཏེ་ཟུང་འཇུག་ཡེ་ཤེས་ཀྱི་སྐུ་འགྲུབ་པ་ཀུན་ནི། བྱང་ཆུབ་ཀྱི་སེམས་སྤྱི་བོར་ཟླ་བ་ཉ་གང་བ་ལ་རྟག་ཏུ་གནས་པའི་
ཕྱིར། མཛོད་སྤུའི་པདྨ་ཐིག་ལེ་གང་བའི་བརྡ་མཛོད་སྤུ་དུང་ལྟར་འཁྱིལ་བ་དང༌། ཉི་རྡུལ་གནམ་སྟོང་གི་ངོ་བོ་གསང་བར་རྟག་ཏུ་རྫོགས་པ་ལས། གསང་བ་སྦུབས་སུ་ནུབ་པའོ། །ཟླ་བའི་ཆ་བཅུ་དྲུག་པ་གཙུག་ཏོར་དུ་རྟག་ཏུ་གནས་པ་དང༌། ཉི་མའི་ཆ་བཅུ་གཉིས་པའམ་ཉི་མ་ལ་ཡང་ཆ་བཅུ་དྲུག་པ་ནོར་བུར་རྟག་ཏུ་གང་བའི་ཕྱིར། གཙུག་ཏོར་རབ་ཏུ་འཕགས་པའོ། །དེ་ལྟར་ན་གཙུག་ཏོར་དང་ནོར་བུར་དེ་དག་བརྟན་པར་བྱའོ་ཞེས་པ། སྟོན་པ་སངས་རྒྱས་ཀྱི་གསུངས་པའི་རྡོ་རྗེའི་ཚིག་སྟེ། འདི་ལས་བླ་ན་མེད་པའི་བྱང་ཆུབ་འགྲུབ་པ་གདོན་མི་ཟ་བས་མི་བསླུ་བའི་ཚིག་གོ །དོན་དམ་བསྡུས་པར་ཚིག་ཅེས་པའི་དོན་ནི།བགྲོད་བྱའམ་རྟོགས་བྱ་ལ་བཤད་པ་ལྟར་ན། སྟོན་པས་བསྟན་པ་འགྱུར་བ་མེད་པ་རྡོ་རྗེའི་ལམ་མོ། །མི་གནས་པའི་མྱ་ངན་ལས་འདས་པའི་ལམ་དང་འབྲས་བུ་ནི་དེ་ལྟ་ཡིན་ཡང༌། ལུས་ཅན་འཁོར་བ་པ་ཀུན་གྱི་ཁམས་བགྲོད་ཚུལ་ནི་དེ་ལས་ཕྱིན་ཅི་ལོག་གོ །རབ་གནས་མྱ་ངན་འདས་པ་མིན་ནི་གོང་བཞིན་ཏེ། ནོར་བུར་བྱང་ཆུབ་ཀྱི་སེམས་འགྱུར་མེད་བདེ་བའི་སྐད་ཅིག་མར་གྱུར་ན་ནི། ཁམས་རྣམས་ཐམས་ཅད་སྔར་འཁོར་བའི་མཚན་ཉིད་དུ་གནས་པ་ལས། ཕྱིན་ཅི་ལོག་སྒྲིབ་བྲལ་དུ་འགྱུར་རོ། །གཉིས་པ་རྡོ་རྗེ་སྤྲོ་བའི་རྣམ་གཞག་ནི། ནོར་བུར་ཐུགས་དང་གསང་བར་གསུང༌། །ལྟེ་བར་སྐུ་སྟེ་བདེ་ཆེན་ལས། །ཆོས་དང་ལོངས་སྤྱོད་རྫོགས་སྤྲུལ་པ། །འདི་རྣམས་དག་པའི་སྐུ་ལས་སྤྲོ། །ཐབས་ཀྱི་འོག་ཏུ་རྒྱལ་པོའི་དབང༌། །ཤེས་རབ་ཀྱིས་ནི་སྟེང་དུ་འགྱུར། །འདི་ཡི་དཔྲལ་པར་སྐུ་རྡོ་རྗེ། །མགྲིན་སྙིང་ལྟེ་བའི་འདམ་སྐྱེས་ལ། །གསུང་ཐུགས་ཡེ་ཤེས་རྡོ་རྗེ་རྣམས། །སྤྲུལ་པ་ལ་སོགས་འདི་རྣམས་སྤྲོ། །ཕུང་པོ་ཁམས་རྣམས་སྤྲོ་བ་ནི། །སྒྲིབ་པ་མེད་པའི་བདེ་བ་ལས། །ཞེས་གསུངས་ཏེ། གོང་དུ་ཁམས་རྣམས་ཕྱིན་ཅི་ལོག་ཏུ་འགྱུར། །ཞེས་པ་ལ། ཇི་ལྟར་སྒྲིབ་བྲལ་དུ་འགྱུར་སྙམ་ན། གང་ཞིག་དོན་དམ་པའི་གཏུམ་མོ་འབར་བ་དང༌། མི་འགྱུར་བའི་མཚན་ཉིད་ཅན་གྱི་ཐིག་ལེས་བསླན་པ་ལས། ནོར་བུ་ཐུགས་ཀྱི་ཐིག་ལེ་ལ། གཉིད་འཐུག་པོའི་གནས་སྐབས་ཀྱི་སྒྲིབ་པ་བྲལ་བས།
ཆོས་ཀྱི་སྐུའི་ཡེ་ཤེས་སྐྱེ་བར་འགྱུར་བ་དང༌། གསང་བར་གསུང་གི་ཐིག་ལེ་ལ་རྨི་ལམ་གྱི་གནས་སྐབས་བྲལ་བས་ལོངས་སྐུ་ཐོབ་པ་དང༌། ལྟེ་བར་སྐུའི་ཐིག་ལེ་ལ་སད་པའི་གནས་སྐབས་བྲལ་བ་ལས། སྤྲུལ་པའི་སྐུ་སྤྲོ་ཞིང༌། སྐུ་གསུམ་པོ་འདི་རྣམས་ཀྱང༌། རྡོ་རྗེའི་རྩེ་མོ་ནོར་བུའི་འཁོར་ལོའི་ཕྱི་ལོགས་ནས་ཡེ་ཤེས་ཀྱི་ཐིག་ལེ་བཞི་པའི་གནས་སྐབས་དག་པ་བདེ་བ་ཆེན་པོའི་སྐུའམ། དག་པའི་སྐུ་ལས་སྤྲོའོ། །རྒྱལ་པོའི་དབང་པོ་ཞེས་བོས་ནས་དེ་ལྟར་བཞི་ནི་སྐུ་བཞི་ཐབས་ཀྱི་ཆ་སྟེ་ལྟེ་བའི་འོག་ཏུའོ། །སྐུ་བཞི་ཤེས་རབ་ཀྱི་ཆོས་སྤྲོ་བ་ནི་ལྟེ་བའི་སྟེང་དུ་འགྱུར་རོ། །དེ་བཞིན་དུ་ཤེས་རབ་ཀྱི་ཆ་འདིའི་དབང་དུ་བྱས་ན། གཙུག་ཏོར་དང་བཅས་པའི་དཔྲལ་པར་སྐུ་རྡོ་རྗེ་དང༌། མགྲིན་པར་གསུང་དང༌། ཐུགས་ཀར་ཐུགས་དང༌། ལྟེ་བའི་འདམ་སྐྱེས་ལ་ཡེ་ཤེས་རྡོ་རྗེ་སྟེ། རྡོ་རྗེ་བཞི་པོར་དེ་རྣམས་ཀྱི་ཐིག་ལེ་ལ་སྔ་མ་བཞིན་དུ། སད་རྨི་གཉིད་འཐུག་བཞི་པའི་གནས་སྐབས་བཞི་རིམ་པས་དག་པས། སྤྲུལ་ལོངས་ཆོས་དག་བཞིའི་སྐུ་འདི་རྣམས་སྤྲོ་བར་འགྱུར་རོ། །སྤྲུལ་པ་ལ་སོགས་ཞེས་པ་ནི་སྐུ་བཞིའོ། །འདི་རྣམས་ཞེས་པ་གོང་དུ་ཆོས་དང་ཞེས་སོགས་ལ་བསྙེགས་པའོ། །རྡོ་རྗེ་སྤྲོ་བ་འདི་དག་དངོས་ནི་ཏིང་ངེ་འཛིན་གྱི་ཡན་ལག་ཐོབ་པ་ནས་ཡིན་ལ། རྗེས་མཐུན་པ་ནི་རྗེས་དྲན་ལ་ཡང་སྟེ་དེའི་སྒྲུབ་པ་ནི་སོར་སྡུད་ནས་ཀྱང་ངོ༌། །དེ་ཡང་ཡེ་ཤེས་ཀྱི་སྣང་ངོར་ཞུ་བདེ་དང་མི་རྟོག་པ་འཐུག་པོ་ལས་ཁམས་གསུམ་གྱི་གཟུགས་བརྙན་འཆར་བས་ཁྱད་པར་ཏུ་བྱས་པ་ནི་ཐུགས་རྡོ་རྗེ་དང༌། གཞོམ་མེད་གྱི་སྒྲ་རྣམ་པ་ཐམས་ཅད་པར་འཆར་བ་ནི་གསུང་རྡོ་རྗེ་དང༌། རྟེན་དང་བརྟེན་པའི་དཀྱིལ་འཁོར་དུ་སྣང་བའི་སྟོང་གཟུགས་ནི་སྐུ་རྡོ་རྗེ་དང༌། ནང་གི་བདེ་བ་མུ་མཐའ་མེད་པས་རྣམ་རྟོག་དང༌། མ་དག་པའི་སྣང་བ་འགོག་ཅིང༌། དག་པའི་སྣང་བ་རེ་རེས་ཀྱང་བདེ་བ་མཐའ་ཡས་པ་བསྐྱེད་པ་ནི་ཡེ་ཤེས་རྡོ་རྗེའི་སྤྲོ་བ་སྟེ། ཡེ་ཤེས་ཀྱི་སྣང་བ་བཞི་པོ་འདི་རབ་འབྱམས་སུ་མཆེད་པ་ལས་སྣང་བ་འགག་པ་ནི་རྡོ་རྗེ་སྤྲོ་བའི་དོན་ནོ། །དེ་དག་ནི་རྡོ་རྗེ་བཞིའི་སྤྲོ་བ་ཡིན་ལ། འབར་སྣང་དང་ཐིག་ལེ་སྦྱོར་བ་དེ་རྩ་དྲུག་གམ་
འཁོར་ལོ་དྲུག་ཏུ་སྒོམ་པ་ན། འགྱུར་བའི་སྒྲིབ་པ་མེད་པའི་བདེ་བ་དེ་ལས། ཕུང་ཁམས་ཀྱི་སྒྲིབ་པ་འགག་སྟེ། སྒྲིབ་བྲལ་གྱི་ཕུང་པོ་དྲུག་སངས་རྒྱས་དྲུག་དང༌། ཁམས་དྲུག་ནི་ཡུམ་དྲུག་ལ་སོགས་པ་མདོར་ན་མཐའ་ཡས་པའི་དཀྱིལ་འཁོར་དུ་འགྱུར་བ་ནི། ཕུང་སོགས་རིགས་དྲུག་རྣམས་ཀྱི་རྡོ་རྗེ་སྤྲོ་བའོ། །གསུམ་པ་བདེ་བ་འཕེལ་བའི་རྒྱུ་ངོས་བཟུང་བ་ནི། ལས་ཀྱི་ཕྱག་རྒྱའི་སྙོམས་འཇུག་དང༌། །ཡེ་ཤེས་ཕྱག་རྒྱའི་དམིགས་པ་དང༌། །ཕྱག་རྒྱ་ཆེན་མོ་གཅིག་སྦྱོར་བས། །མི་འགྱུར་བདེ་བ་འཕེལ་བར་འགྱུར། །འཕེལ་བའི་འཕེལ་བར་འགྱུར་བའང་མེད། །ཉམས་པའི་ཉམས་པ་ཉིད་ཀྱང་མེད། །ནུབ་པ་དེ་ཡི་ནུབ་པ་མེད། །འཆར་བ་ཡིན་ནི་འཆར་བ་མེད། རབ་ཏུ་གསལ་བའི་རབ་གསལ་མེད། །བཀབ་པའི་བཀབ་པ་ཡང་མེད་དོ། །སྐྱེ་བའི་སྐྱེ་བར་འགྱུར་ཉིད་མེད། །འཆི་བའི་འཆི་བ་ཡང་མེད་དོ། །གྲོལ་བའི་གྲོལ་བར་འགྱུར་བའང་མེད། །མི་གནས་པ་ཡི་མི་གནས་མེད། །དངོས་པོ་མེད་པའི་དངོས་མེད་མེད། །དངོས་པོའི་དངོས་པོ་ཉིད་ཀྱང་མེད། །འགྱུར་བའི་འགྱུར་བར་འགྱུར་བའང་མེད། །མི་འགྱུར་བ་ཡིའང་མི་འགྱུར་མེད། །རང་བཞིན་མེད་པའི་ཆོས་རྣམས་ཀྱི། །སྐྱེ་འཇིག་སྒྱུ་མ་དེ་བཞིན་ནོ། །འབྱུང་དང་འཇིག་པར་འགྱུར་མིན་ཏེ། །རང་བཞིན་ཉིད་ཀྱི་སྐྱེ་མི་འགྱུར། །སྣ་ཚོགས་འདི་ནི་རང་བཞིན་མེད། །དངོས་པོ་དངོས་མེད་མཚན་ཉིད་ཅིག །ཅེས་གསུངས་པ་ལ་མི་འགྱུར་བའི་བདེ་བ་འཕེལ་བ་ཞེས་བྱ་བ་ནི་རྣམ་པ་གཉིས་ཏེ། མི་འགྱུར་བའི་བདེ་བ་མ་གྲུབ་པ་སྒྲུབ་པར་བྱེད་པ་ནི། དེའི་རྒྱུ་ཚོགས་འཕེལ་བར་བྱེད་པ་ཉིད་ཡིན་པའི་ཕྱིར། འཕེལ་བ་ཞེས་བཏགས་པ་དང༌། མི་འགྱུར་བའི་བདེ་བ་ཐོབ་ཟིན་སྐད་ཅིག་རྣམས་གོང་ནས་གོང་དུ་འཕེལ་བ་གཉིས་སོ། །དང་པོ་ནི་འཛིན་པའི་ཕྱེད་ཕྱི་མ་དང་རྗེས་དྲན་གྱི་སྐབས་ཡིན་ལ། ཕྱི་མ་ནི་ཏིང་ངེ་འཛིན་གྱི་སྐབས་ཉིད་དོ། །དེ་ཡང་ལས་ཀྱི་ཕྱག་རྒྱའི་རྣལ་འབྱོར་དབང་པོ་གཉིས་ཀྱི་སྙོམས་པར་འཇུག་པ་དང༌། ཡེ་ཤེས་ཀྱི་ཕྱག་རྒྱའི་རྣལ་འབྱོར་རྣམ་རྟོག་གི་སྒོམ་པ་གོམས་པ་མཐར་ཕྱིན་པའི་འབྲས་བུ་ཡིད་ངོར་རིག་མའི་གསལ་སྣང་ཤར་བ་ལ། དམིགས་པས་མཉམ་པར་སྦྱོར་བ་དང་སྟོང་
གཟུགས་ཕྱག་རྒྱ་ཆེན་མོ་སྟེ། ཁམས་གསུམ་པའི་གཟུགས་བརྙན་གྱིས་བརྒྱན་པའི་རང་འདོད་པའི་ལྷ་ཡབ་ཡུམ་ཁ་སྦྱོར་གྱི་རྣམ་པ་ཡང་དག་པའི་གཏུམ་མོའི་བར་སྣང་གི་སྟོང་གཟུགས་དེ་ལ་རྗེས་སུ་ཆགས་པའི་སྦྱོར་བ་སྟེ། ཕྱག་རྒྱའི་རྣལ་འབྱོར་གསུམ་པོ་འདིས་མི་འགྱུར་བའི་བདེ་བ་འཕེལ་བར་འགྱུར་རོ། །ཞེས་སྤྱིར་བཤད་ནས། གཅིག་སྦྱོར་བས་ཞེས་པ་ནི། ཕྱག་རྒྱ་ཆེན་མོ་ཁོ་ན་དང་མཉམ་པར་སྦྱོར་བ་ལས་བདེ་བ་བསྐྱེད་པ་སྟེ། འདིའི་ཤུགས་ལ་འདི་དག་ཀྱང་སྟོན་ཏེ། ལུས་ཀྱི་ཕྱག་རྒྱ་ཡང༌། ཡེ་ཤེས་ཀྱི་ཕྱག་རྒྱ་དང༌། ཕྱག་རྒྱ་ཆེན་མོ་སྟེ་གསུམ་ལྷན་ཅིག་ཏུ་སྦྱོར་བ་དང༌། ཡེ་ཤེས་ཀྱི་ཕྱག་རྒྱ་ནི། ཕྱག་རྒྱ་ཆེན་པོ་དང་གཉིས་སྦྱོར་ཡང་ངོ༌། །ཡང་མན་ངག་ཏུ་དེ་དག་རེ་རེ་ལ་ཆོས་ཀྱི་ཕྱག་རྒྱ་སྦྱར་ཏེ། བཞི་སྦྱོར་དང་གསུམ་སྦྱོར་ལ་སོགས་པའི་ཐ་སྙད་དཔེ་མཛད་པར་ཡང་ཡོད་དེ་གནད་ཆེན་པོ་དང་ལྡན་པའོ། །དེ་ལ་ཕྱག་རྒྱ་བཞིའི་ངོ་བོ་ནི་ལས་ཀྱི་ཕྱག་རྒྱ་དང་དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་ཞེས། རྒྱུད་དང་བསྟན་བཅོས་མང་པོ་ལས་འབྱུང་ལ། ངོས་འཛིན་ཡང་རྒྱུད་ཐ་དད་ལས་ཀྱང་སེམས་ཅན་བསམ་པའི་དབང་གིས་ཅུང་ཟད་མི་འདྲ་བར་གསུངས་པ་ཡང་ཡོད་ཅིང་སློབ་དཔོན་སོ་སོའི་འདོད་ལུགས་ལ་ནི་ཆེས་མི་འདྲ་བ་ཤིན་ཏུ་མང་ངོ༌། །འདིར་གྲགས་ཆེ་བ་དག་ལས་ཕྱོགས་ཙམ་སྨོས་ན། ལག་པའི་ཕྱག་རྒྱ་འཆིང་བ་དང༌། བསྐྱེད་རིམ་གྱི་ཕྱོགས་ལ་ཡང་ཕྱག་རྒྱ་བཞིའི་རྣམ་གཞག་ཡོད་མོད་ཀྱང་སྐབས་ཀྱི་དོན་མ་ཡིན་ལ། འདིར་ནི་རྫོགས་པའི་རིམ་པ་ཡན་ལག་དང་བཅས་པ་རྣམས་སོ། །དེ་ལ་ཀླུ་སྒྲུབ་ཞེས་བྱ་བས་མཛད་པ་ཕྱག་རྒྱ་བཞིའི་རྗེས་སུ་འགྲོ་བའི་གཞུང་དང༌། དེའི་རྗེས་སུ་འབྲང་པ་རྣམས་ལས་ནི་དངོས་དང་ཡིད་ཀྱིས་སྒོམ་པའི་རིགས་ལས་ཀྱི་ཕྱག་རྒྱ་དངོས་དང་ཕྲ་ཐིག་སོགས་རང་ལུས་ཐབས་ལྡན་ཡང་ལས་རྒྱ་རྗེས་མཐུན་པ་དང༌། ལས་ཀྱི་ཕྱག་རྒྱའི་ཡེ་ཤེས་དེ་ཉིད་དཔེར་བྱས་ནས། མི་རྟག་པའི་རང་བཞིན་སྒོམ་པར་བྱེད་པ་ནི་ཆོས་ཀྱི་ཕྱག་རྒྱ་དང༌། མ་བརྟགས་པ་ཉིད་ལས་རང་བཞིན་བདེ་སྟོང་དུ་གནས་པ་དེ། སྒོམ་སྟོབས་ཀྱི་མངོན་གྱུར་དུ་རང་ཤར་བ་ནི་ཕྱག་རྒྱ་ཆེན་པོ་དང༌། མངོན་བྱང་
ལྔ་སོགས་བསྐྱེད་རིམ་གྱི་མཚོན་པར་བྱ་བ་འབྲས་བུའི་ཡེ་ཤེས་མི་རྟོག་པ་ལས་ཤར་བ་ནི། དམ་ཚིག་གི་ཕྱག་རྒྱའོ། །ཞེས་བཞེད་ལ། སློབ་དཔོན་མང་པོ་ཞིག་ནི་ལས་དང་ཕྱག་རྒྱ་ཆེན་པོ་དེ་དང་འདྲ་བ་ལ། ཞུ་བདེའི་ཉམས་མྱོང་གིས་སྣང་བ་ཐམས་ཅད་ལ་རྒྱས་བཏབ་པས་སྣང་བ་ཐམས་ཅད་བདེ་བ་འབར་བའི་གྲོགས་སུ་འགྱུར་བ་ནི། ཆོས་རྒྱ་དང༌། འབར་འཛག་གི་དམིགས་པ་སོགས་རང་ལུས་ཐབས་ལྡན་གྱི་རྣལ་འབྱོར་རྣམས་དམ་ཚིག་གི་ཕྱག་རྒྱ་ཡིན་ཞེས་གསུང༌། གྲུབ་ཐོབ་རྡོ་རྗེ་དྲིལ་བུས་པས། རིམ་ལྔར་དམ་ཚིག་གི་ཕྱག་རྒྱ་མི་མོ་དང༌། ལག་པའི་ཕྱག་རྒྱ་དང༌། ཆོས་རྒྱ་དང༌། ཕྱག་ཆེན་བཤད་མ་ཐག་པ་དེ་ཉིད་དང་ཕལ་ཆེར་འདྲ་བར་གསུངས་པ་ནི། ནོར་བུ་འགེངས་པའི་རིམ་པ་ཁོ་ན་ལས་ཕྱེ་བའི་ཕྱག་རྒྱ་བཞི་ཡིན་གྱི། རྫོགས་རིམ་མཐའ་དག་སྟོན་པ་ནི་མ་ཡིན་ནོ། །དགྱེས་རྡོར་གྱི་འགྲེལ་པ་སྙན་གྲགས་བཟང་པོས་མཛད་པ་ལས། ལས་དང་ཡེ་ཤེས་ཕྱག་རྒྱ་ཆེ། །དམ་ཚིག་ཅེས་བྱ་འོད་གསལ་རྣམས། །རྒྱུ་དང་དེ་བཞིན་བསྒོམ་བྱ་དང༌། །ཐོབ་བྱ་བཞི་པ་འཇིག་པ་མེད། །ཅེས་ཕྱག་རྒྱ་བཞི་པའི་གཞུང་དང་ཕྱོགས་འདྲ་རུང་ལ། ཆོས་རྒྱ་མི་བགྲོང་པར་ལས་ཡེ་ཕྱག་ཆེན་དམ་ཚིག་ཅེས་བགྲངས་ནས། ཕྱག་རྒྱ་ཆེན་པོ་འབྲས་བུ་དང༌། དམ་ཚིག་གི་ཕྱག་རྒྱ་གཞི་ལམ་འབྲས་གསུམ་ཀུན་ཏུ་ཁྱབ་ཅིང་འཇིག་པ་མེད་པས་དངོས་པོའི་གནས་ལུགས་སུ་འདོད་པའོ། །རྒྱུད་ཀྱི་རྒྱལ་པོ་འདི་དག་ལས་ནི། འགྱུར་བ་མེད་པ་བདེ་བའི་འབྲས་སྟེར་ཕྱག་རྒྱ་བཞི་པོ་འདི་རྣམས་གྲོང་དང་འབྲོག་དགོན་དུར་ཁྲོད་དང་ཞེས་པ་ལ་སོགས་པ་དང༌། སྨད་འཚོང་དམ་པ་ལས་ཀྱི་ཕྱག་རྒྱར་འགྱུར་ཞིང་གསང་བའི་མི་མོ་གཞན་གྱི་བུད་མེད་དམ་ཚིག་སྟེ། རང་དབང་ཆོས་ཀྱི་ཕྱག་རྒྱ་ཡུལ་ནི་མང་པོ་ལ་དགའ་རང་གི་ཆུང་མ་ཡེ་ཤེས་ཕྱག་རྒྱའོ། །ཞེས་གསུངས་པའི་སྐབས་དོན་རྣམས་སྦྱར་ན། ལས་དམ་ཚིག་ཆོས་ཡེ་ཤེས་ཀྱི་ཕྱག་རྒྱ་བཞི་ཀུན་རྫོབ་དང༌། ཁྱབ་བྱེད་ཕྱག་རྒྱ་ཆེན་པོ་ནི་དོན་དམ་མོ། །དེས་ན་ལས་ཡེ་གཉིས་སྤྱི་དང་འདྲ་ལ་དམ་ཚིག་གི་ཕྱག་རྒྱ་ནི།
གཏུམ་མོ་འབར་བ་ལ་རྣམ་པ་གཉིས་ཡོད་པའི། ཀུན་རྫོབ་ལྟེ་གསང་ལ་སོགས་པའི་འཁོར་ལོ་ནས་དམར་ཆའི་ཁམས་འབར་བ་དེ་ཡིན་ལ། མེ་ཏོག་དང་མེ་ཏོག་གི་དྲི་ལྟར་དེ་ལྟ་བུ་དེའི་ཆོས་ཉིད་དུ་གནས་པ། སྟོང་གཟུགས་འབར་བའི་གཏུམ་མོ་ནི་ཕྱག་ཆེན་ཁོ་ནར་འགྱུར་ཞིང༌། ཀུན་རྫོབ་ཇི་ལྟར་སྣང་ཡང༌། རང་བཞིན་མེད་པར་ཤེས་ནས་དབྱིངས་སྤྲོས་པ་དང་བྲལ་བ་མི་རྟོག་པར་འཇོག་པ་ནི། ཆོས་ཀྱི་ཕྱག་རྒྱའོ། །དེ་ལྟར་ན་ཕྱག་རྒྱ་ལྔའི་རྣམ་གྲངས་སུ་འགྱུར་བ་ལས། དམ་ཚིག་གི་ཕྱག་རྒྱ་ནི་ཤུགས་ལ་འབྱུང་ཞིང༌། ཆོས་ཀྱི་ཕྱག་རྒྱ་ནི་གཞན་རྣམས་ཀྱི་ཡན་ལག་ཏུ་སྦྱོར་བས། ལམ་གྱི་རྐང་ཚུགས་པའི་དབང་དུ་བྱས་ན། ལས་དང་ཡེ་ཤེས་དང་ཕྱག་རྒྱ་ཆེན་པོ་གསུམ་གྱི་རིམ་པ་ཡང་ནས་ཡང་དུ་རྒྱས་པར་གསུངས་སོ། །འོ་ན་ཕྱག་རྒྱ་སྔ་མ་གཉིས་ཀྱང་ཕྱག་རྒྱ་ཆེན་མོའི་དོན་དུ་ཡིན་ན། ཅིའི་ཕྱིར་གཅིག་ཏུ་མི་བསྡུ་སྙམ་ན། བདེན་ཏེ་འོན་ཀྱང་རང་རང་གི་གྲུབ་འབྲས་མི་འདྲ་བ་གསུམ་དང༌། བདེ་བའི་སྐྱེད་ཚུལ་མི་འདྲ་བ་གསུམ་དང༌། གནས་སྐབས་མི་འདྲ་བ་གསུམ་དུ་ངེས་པར་འཇུག་པའི་རིམ་པ་གསུམ་ཡོད་པའི་དབང་ལས་དེ་གསུམ་གྱི་རིམ་པ་ངེས་པར་སྒོམ་དགོས་པས་ན། དེ་འདྲའི་རྣམ་གཞག་ཤེས་པ་གཞན་ལས་གལ་ཆེའོ། །དེ་དག་ཀྱང་ལས་ཀྱི་ཕྱག་རྒྱའི་ལམ་མཐར་ཕྱིན་པའི་འབྲས་བུ་ནི། འདོད་པའི་ཁམས་ཀྱི་རིག་པ་འཛིན་པ་དང༌། ཡེ་ཤེས་ཀྱི་ཕྱག་རྒྱའི་ནི་གཟུགས་ཁམས་ཀྱི་རིག་པ་འཛིན་པ་དང༌། ཕྱག་རྒྱ་ཆེན་མོས་ནི། མཆོག་གི་དངོས་གྲུབ་ཟུང་དུ་འཇུག་པའི་ཡེ་ཤེས་ཀྱི་སྐུ་འགྲུབ་པར་བྱེད་པས་གྲུབ་འབྲས་གསུམ་མོ། །མི་མོའི་སྐྱེ་གནས་ནི་འཇིག་རྟེན་དུ་སྐྱེས་བུའི་ཐིག་ལེ་རགས་པ་ཕྱི་རོལ་ཏུ་འཛག་པར་བྱེད་པ་ལ་སྟོབས་དང་ལྡན་པ་ཡིན་པའི་ཕྱིར་དང༌། རྣལ་འབྱོར་དང་ལྡན་པ་ལ་ཕྱི་རོལ་ཏུ་མི་འཛག་ཀྱང༌། སྤྱི་བོ་ནས་ནོར་བུའི་བར་དུ་འཛག་ཅིང༌། རྣལ་འབྱོར་གྱིས་བཅིངས་པ་མ་གཏོགས་རང་སྟོབས་ཀྱིས་འཛག་པར་བྱེད་པའི་རིགས་ཅན་ཡིན་པའི་ཕྱིར། འཛག་པའི་བདེ་བ་སྟེར་བའོ། །རྫོགས་པའི་རིམ་པ་འདིར་དམིགས་གསལ་ཕྲན་བུ་མ་གཏོགས། གང་ཕྱི་རོལ་དུ་དངོས་པོར་འཛག་ན་ནི། བུད་མེད་དེ་ཡང་མི་མོ་ཙམ་སྟེ་ལས་རྒྱར་མི་འགྱུར་བ་ཉིད་དེ། འཇིག་རྟེན་ཕལ་པ་བཞིན་ནོ། །ཡེ་ཤེས་ཀྱི་ཕྱག་
རྒྱ་ནི། ཐིག་ལེ་རགས་པ་རྣམས་རང་གནས་སུ་གཡོ་བ་དང༌། ཅུང་ཟད་ཕྲ་བ་བར་མ་ཕན་ཆད་ནོར་བུར་འགྲོ་ཞིང་འོང་བར་ཅན་ཏེ། རྣལ་འབྱོར་གྱི་སྟོབས་ཀྱིས་མ་བཅིངས་ན་འདི་ཡང༌། ཕྱི་རོལ་ཏུ་འཛག་མོད་ཀྱི། འཛག་པའི་སྟོབས་ཆུང་བའི་ཕྱིར་གཡོ་བའི་བདེ་བ་སྦྱིན་པ་མོ་སྟེ། འདི་ཡང་ཕྱི་རོལ་ཏུ་འཛག་ན་ཡེ་ཤེས་ཀྱི་ཕྱག་རྒྱ་མི་འགྱུར་རོ། །ཕྱག་རྒྱ་ཆེན་མོའི་རང་སྟོབས་ཀྱིས་ནི་ཕྱི་རོལ་ཏུ་འཛག་པ་མི་སྲིད་ལ། རང་གི་ནུས་པ་ནི་གཉིས་ཏེ། བྱང་ཆུབ་ཀྱི་སེམས་ཤིན་ཏུ་དྭངས་མ་གཙུག་ཏོར་ནས་ནོར་བུའི་བར་དུ་དབབ་བཟློག་བྱེད་པ་དང༌། མི་འགྱུར་བའི་ཐིག་ལེར་བྱེད་པ་གཉིས་སོ། །སྔ་མ་ཡང་མི་འགྱུར་བའི་ཐིག་ལེའི་རྒྱུ་ཡིན་པའི་ཕྱིར། ཕྱག་རྒྱ་ཆེན་མོ་ནི་མི་འགྱུར་བའི་བདེ་བ་སྦྱིན་པ་མོ་སྟེ། དེས་ན་བདེ་བ་བསྐྱེད་ཚུལ་མི་འདྲ་བ་གསུམ་མོ། །རྒྱུ་མཚན་དེ་ལས་ན་གནས་སྐབས་གསུམ་དུ་འཇུག་སྟེ། བསྡུས་པའི་རྒྱུད་ལས། འདི་དག་དམན་པ་ལ་སོགས་དབྱེ་བ་རྣམས་ཀྱིས་སྣ་ཚོགས་གཙོ་བོའི་སྒྲུབ་ཐབས་རྣམ་པ་གསུམ་དུ་འགྱུར། །ཕྱག་རྒྱ་གསུམ་དང་གནས་སྐབས་གསུམ་ནི་རྣམ་གསུམ་བགྲོད་པའི་དབང་གིས་ལས་དང་ཀུན་རྟོག་མཆོག་རྣམས་སོ། །ཞེས་གསུངས་ཏེ་དེ་ཡང་ཁམས་རགས་པའི་ཚོགས་པ་ལ་དྭངས་མ་བར་བ་རྣམས་བཅུད་ཀྱི་ཚུལ་དུ་གནས་ལ། དེ་ལ་ཤིན་ཏུ་ཕྲ་བའམ་ཤིན་ཏུ་དྭངས་མ་རྣམས་བཅུད་ཀྱི་ཚུལ་དུ་གནས་སོ། །དེ་ལྟར་གནས་ཀྱང་སྔ་མ་སྔ་མ་མ་ཞུ་བར་ཕྱི་མ་ཕྱི་མ་མངོན་དུ་མི་འགྱུར་བས་དང་པོར་ཐིག་ལེ་རགས་པ་མཐའ་དག་ཤིན་ཏུ་བཞུ་སྟེ། དངས་སྙིགས་ཕྱེད་པ་ན་དེའི་རྩིགས་མ་རྣམས་ཟད་ཀྱི་བར་དྭངས་མ་རྣམས་བར་བར་མ་གྱུར་གྱི་བར་དུ་ལས་ཀྱི་ཕྱག་རྒྱ་ངེས་པར་དགོས་ཏེ། ཡེ་རྒྱ་དང་ཕྱག་ཆེན་ཙམ་གྱི་རགས་པ་བཞུ་མི་ནུས་པའི་ཕྱིར་རོ། །དེའི་རྗེས་སུ་དངས་མ་བར་མའི་དངོས་པོ་མཐའ་དག་ཤིན་ཏུ་བཞུ་སྟེ། བར་མའི་དངོས་པོ་དེ་ཉིད་ཀྱི་དངས་སྙིགས་ཕྱཻད་པ་ན། རྩིགས་མའི་ཆ་རྣམས་ཟད་ལ། དངས་མའི་ཆ་གང་ཡིན་པ་དེ་ནི་ཤིན་ཏུ་དངས་མའི། ཤིན་ཏུ་ཕྲ་བར་གྱུར་གྱི་བར་དུ་ནི་ལས་ཀྱི་ཕྱག་རྒྱ་མི་བསྟེན་པར་ཡེ་ཤེས་ཀྱི་ཕྱག་རྒྱ་ངེས་པར་དགོས་ཏེ། ཕྱག་ཆེན་འབའ་ཞིག་གི་བར་པ་དེ་བཞུ་མི་ནུས་པའི་
ཕྱིར་དང༌། སྐབས་དེར་ལས་རྒྱ་བསྟེན་ན་མཐར་རིམ་པས་འགྲུབ་མོད་ཀྱི་གཡེང་རྐྱེན་དུ་གྱུར་པས་ལམ་བུལ་བར་འགྱུར་རོ། །ཤིན་ཏུ་དངས་མ་འབའ་ཞིག་ཏུ་གྱུར་ནས་ནི། མི་འགྱུར་བའི་བདེ་བ་མ་སྐྱེས་ཀྱི་བར་དུ་ཕྱག་རྒྱ་ཆེན་མོ་ཁོ་ནས་དེ་བཞུ་བར་བྱ་སྟེ། སྐབས་དེར་ལས་དང་ཡེ་རྒྱས་གཡེང་བ་ཅན་དུ་བྱེད་པས་ལམ་འགོར་བར་འགྲོ་བས་སོ། །མི་འགྱུར་བའི་བདེ་བ་ཐོབ་ནས་ནི་གསུམ་ཀས་འཕེལ་བར་བྱའོ། །ཐིག་ལེར་རགས་པ་ནི་ཞོ་དང་འདྲ་ལ། བར་པ་ནི་དེ་ཉིད་སྲུབས་པས་མར་དུ་བྱས་པ་དང་འདྲ་ཞིང༌། ཤིན་ཏུ་དངས་མ་ནི་ཞུན་མར་གྱི་ཉིང་ཁུ་དང་འདྲ་ལ། མི་འགྱུར་བའི་ཐིག་ལེ་ནི་དེ་ཉིད་མར་མེ་འབར་བར་གྱུར་པ་ལྟ་བུ་སྟེ། སྔ་མ་གསུམ་རྣམ་པ་འདྲ་རུང་སྐྱེད་པ་ཡིན་ལ་རྫས་ཀྱི་ཐིག་ལེ། རྫས་མ་ཡིན་པར་ན་འཕོས་པས་ཕྱིར་ན། ཕྱི་མ་ནི་མི་འདྲ་བར་གྱུར་པ་སྟེ། འདིར་ལས་ཡེ་གཉིས་ཀྱིས་ཐིག་ལེ་བཞུ་ནུས་ཀྱང་ཕྱག་ཆེན་མེད་ན་ནི་ལས་དང་ཡེ་ཤེས་ཀྱི་ཕྱག་རྒྱས་ཁམས་དེ་དང་དེ་དཔྱིས་ཕྱིན་པས་དངས་སྙིགས་འབྱེད་མི་ཐུབ་ཅིང་མི་འགྱུར་བའི་བདེ་བའི་རྒྱུད་དངས་མ་རྒྱས་པར་མི་བྱེད་དོ། །མན་ངག་གི་གཏམ་ལས་ཕྱག་རྒྱ་བཞི་སྦྱོར་སོགས་ཀྱི་ཐ་སྙད་མཛད་པའི་དོན་ནི། ལུས་ཀྱི་ཕྱག་རྒྱ་ཉིད་ཡེ་ཤེས་ཀྱི་ཕྱག་རྒྱར་བསྐྱེད་དགོས་ཤིང༌། རྗེས་ཆགས་ལས་གཏུམ་མོ་དམར་ཆ་འབར་བའི་དམ་རྒྱ་ཡང་ཡོད་ལ། དེ་ཐམས་ཅད་ཕྱག་རྒྱ་ཆེན་མོས་རྒྱས་བཏབ་དགོས་པའི་ཕྱིར། བཞི་སྦྱོར་ཞེས་བྱ་ལ། དེ་ལས་དང་པོ་ལས་ཀྱི་ཕྱག་རྒྱ་བོར་བ་ནི་གསུམ་སྦྱོར་ཡིན་ཞིང༌། དེ་ལས་ཡེ་རྒྱ་བོར་ན་ད་དུང་དམ་ཚིག་གི་ཕྱག་རྒྱ་ཡོད་ཀྱང༌། རང་ཤུགས་ལ་བྱུང་བ་ཡིན་གྱི་གཙོ་བོ་མ་ཡིན་ལ་སྒོམ་པའི་རྣལ་འབྱོར་ཕྱག་ཆེན་ཁོ་ན་གཙོ་བོ་ཡིན་པས་ཕྱག་རྒྱ་ཆེན་པོ་གཅིག་སྦྱོར་ཞེས་བྱའོ། །གཞན་ཡང་བསྡུས་པའི་རྒྱུད་ལས། རྒྱལ་བའི་ལྷན་སྐྱེས་བདེ་བ་འདི་ནི་འཕེལ་བའི་དོན་སླད་དང་པོར་ལས་ཀྱི་ཕྱག་རྒྱ་བསྟེན་པར་བྱ། །དེ་ནས་ཉི་མའི་གཟུགས་ནི་ལུས་དང་གདོང་དང་རྐང་པ་གཙུག་ཏོར་ཡན་ལག་ཐམས་ཅད་རྫོགས་པ་སྟེ། །གློག་གི་དབྱུག་པའི་རྗེས་མཐུན་འཕོ་མེད་བདེ་བ་བསྐྱེད་པར་བྱེད་མ་མཚན་ཉིད་ཡན་ལག་རབ་ཏུ་རྫོགས། །རྡོ་རྗེ་རྣམས་
ཀྱི་རབ་ཏུ་སྣང་བར་བྱེད་མ་སྲིད་གསུམ་གནས་ལས་ཆོས་ཀྱི་དབྱིངས་ནི་དེ་ནས་འགྱུར། །ཞེས་གསུངས་ཏེ་དང་པོར་ལས་དང་ཡེ་ཤེས་ཀྱི་ཕྱག་རྒྱས་ཐིག་ལེའི་བགྲོད་པ་རྫོགས་པར་བཞུ་དགོས་ཏེ། འདིར་ལས་རྒྱ་དངོས་སུ་སྨོས་པས་ཡེ་རྒྱ་ཡང་ཤུགས་ལ་བསྟན་ཏོ། །དེ་ནས་སྟོང་གཟུགས་ཀྱི་སྟོབས་དང་ནུས་མཐུ་ཤིན་ཏུ་འཕེལ་བ་དང༌། གནས་སྐབས་སྔ་མ་རྣམས་ལས་ཆེས་གསལ་བར་གྱུར་པ་དང༌། ཐིག་ལེ་ཡང་ཤིན་ཏུ་དྭངས་མར་གྱུར་པ་འཛོམས་པ་ན། གཟུགས་བརྙན་ཁོ་ནས་ཁམས་ཀྱི་བགྲོད་པ་མཐའ་དག་བཞུ་ནུས་ཏེ། དེ་ལ་ཉི་མའི་གཟུགས་ཞེས་བྱ་བ་ནི། གཏུམ་མོའི་སྣང་བ་ལ་ཤར་བའི་དོན་ཡིན་ལ། དབྱུག་པའི་གཟུགས་དང་རྗེས་སུ་མཐུན་པའི་གློག་ཅེས་བྱ་བ་ནི། དབུ་མའི་ནང་གཏུམ་མོས་གང་བའི་དོན་ཡིན་ཞིང༌། ལུས་དང་སོགས་ཀྱི་ལྷ་སྐུའི་རྣམ་པར་ཤར་བ་དང༌། ཡན་ལག་ཐམས་ཅད་རྫོགས་པ་སྟེ་ཞེས་པས་ནི། མཚན་དང་དཔེ་བྱད་དང་རྒྱན་དང་ཆ་ལུགས་མ་ཚང་བ་མེད་པར་རྫོགས་པ་བསྟན་ཞིང༌། ཡན་ལག་རབ་ཏུ་རྫོགས་ཞེས་པས་ནི། ཡན་ལག་མ་སྟེ་ལྷ་མོས་འཁྱུད་པའི་སྐུ་ཅན་ནོ། །ཕྱག་རྒྱ་ཆེན་མོ་ནི་ཤེས་རབ་ཀྱི་ཕྱོགས་ལས་བརྩམས་ཏེ། འདོད་པའི་ལྷ་མོ་ཉིད་ལ་གཙོ་བོར་སྦྱོར་རམ་སྙམ་ན། ཞུ་བདེ་འགྱུར་མེད་སྐྱེད་པ་དང༌། མི་འགྱུར་བའི་ཐིག་ལེ་སྒྲུབ་པའི་གནས་སྐབས་གཉིས་ཆར་དུ། རང་འདོད་པའི་ལྷ་ཡབ་ཡུམ་གྱི་རྣམ་པར་སྣང་བའི། ཡབ་ཡུམ་གཉིས་པོ་བདེ་བ་སྐྱེད་པ་ལ། གཙོ་ཆེ་ཆུང་གི་ཁྱད་པར་མེད་པས། གཉིས་ཀར་ཕྱག་རྒྱ་ཆེན་མོའི་གཙོ་བོར་འཇོག་པ་ལ་འདྲ་བའོ། །རྡོ་རྗེ་རྣམས་ཀྱི་ཞེས་པ་ནི། རྡོ་རྗེ་བཞིའི་གཏུམ་མོ་འབར་བ་རྩ་འཁོར་བཞི་ནས་སམ་ཐབས་ཤེས་ཀྱི་སྐུ་གསུང་ཐུགས་རྡོ་རྗེ་དྲུག་གི་གཏུམ་མོ་རྣམས་རྩ་འཁོར་ལོ་དྲུག་ནས་འབར་བས་ཕྱི་ནང་ཐམས་ཅད་འོད་ཀྱི་དཀྱིལ་འཁོར་གྱིས་ཁྱབ་པ་བྱེད་པ་ཡིན་ཞིང༌། སྲིད་གསུམ་གནས་ལུས་ཞེས་པ་ནི། ལྷ་སྐུ་དེའི་ཕྱི་ནང་ཐམས་ཅད་དོན་དམ་སྲིད་གསུམ་འཁོར་འདས་རྣམ་པ་ཐམས་ཅད་པའི་ལྷར་ཤར་བ། དེ་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་ནོ། །དེ་རྣམས་གནས་ཚུལ་ལ་ངོ་བོ་
གཅིག་ཀྱང༌། རྗེས་དྲན་གྱི་གནས་སྐབས་ན། རྣལ་འབྱོར་པའི་སྣང་ངོར་འདོད་ལྷ་ཡབ་ཡུམ་མཉམ་སྦྱོར་རྣམས་ཀྱིས་བདེ་བ་ཤིན་ཏུ་འཕེལ་བ་ཙམ་སྣང་ཆ་གཞན་རྣམས་ཀྱིས་མི་འཕེལ་ཏེ། འཇིག་རྟེན་ཀུན་རྫོབ་ཏུ་ཡང་ས་ཕྱོགས་ཉམས་དགའ་བ་ཙམ་མཐོང་བས་དགའ་བ་སྐྱེ་ཡང༌། ཞུ་བདེ་མི་བསྐྱེད་པ་བཞིན་ནོ། །གཞན་ཡང་འཁོར་བ་དང་མཚུངས་པའི་རྣམ་ཆ་ལས། དག་པའི་རྣམ་ཆ་གཙོ་ཆེ་ཞིང༌། དེའི་གཙོ་བོར་ཡང་ཁ་སྦྱོར་གྱི་སྐུ་ཡིན་པས། འདིར་ཕྱག་ཆེན་གྱི་གཙོ་བོ་ནི་ལྷ་སྐུའི་ལྡོག་ཆ་ནས་འཇོག་དགོས་ཏེ། དེས་ན་རྣམ་པ་དང་བཅས་པ་ལ་གཏན་ནས་མི་མོས་པ་དང༌། སྣང་ཆ་གཞན་ལ་མོས་ཀྱང་ལྷ་སྐུའམ། སྣང་ཆ་ནན་གྱིས་འགོག་པ་ནི། སྔགས་གྱི་ཐེག་པའི་གཞུང་ལམ་ལས་གོལ་བ་སྟེ་རང་གི་མཚན་ཉིད་རང་གི་ངོ་ཤེས་པར་གྱིས་ཤིགསྤྲོས་པས་ཆོག་གོ །འོ་ན་མི་འགྱུར་བའི་བདེ་བ་འཕེལ་བ་དང༌། འགྱུར་བ་ཉམས་པ་ལ་སོགས་པ། དོན་དམ་པའི་ངོར་ཡིན་ནམ་ཞེ་ན་མ་ཡིན་ཏེ་དོན་དམ་པ་ནི་ཇི་སྐད་དུ། འདི་ལ་བསམ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་གསུངས་པར་ལྟར་ཏེ། འོག་ཏུའང་རྒྱས་པར་འཆད་པ་ལྟར། ཡེ་ཤེས་འཕེལ་བར་སྣང་བ་ཡང་བློ་ངོར་ཤར་བ་ཡིན་གྱི། དོན་དམ་པར་མ་ཡིན་ཏེ་གནས་ལུགས་ལ་འཕེལ་འགྲིབ་མེད་པའི་ཕྱིར་རོ། །སྒྲིབ་པ་རྣམས་ཉམས་ཤིང་སྤངས་པར་སྤང་བ་ཡང༌། བློ་ལ་སྣང་ཚུལ་ཡིན་གྱི་དངོས་གནས་ལ་ཉམས་ཤིང་སྤང་རྒྱུ་མེད་དེ། སྒྲིབ་པ་ཉིད་འཁྲུལ་སྣང་ཙམ་མ་གཏོགས་གདོད་མ་ནས་ཡོད་མ་མྱོང་བའི་ཕྱིར་རོ། །དེ་བཞིན་དུ་རྣམ་རྟོག་ནུབ་པ་ལྟར་སྣང་ཡང༌། ནུབ་པ་མེད་དེ་ནུབ་རྒྱུ་རྣམ་རྟོག་ཉིད་མེད་པས་སོ། །ཡང་དག་པའི་ཡེ་ཤེས་ཤར་བར་སྣང་ཡང་ཤར་བ་མེད་སྟེ་གདོད་མ་ནས་གནས་པའི་ཕྱིར་རོ། །དེ་བཞིན་དུ་ཡེ་ཤེས་རབ་ཏུ་གསལ་བ་ལ། གསལ་བར་གྱུར་པ་མེད་ཅིང༌། སྒྲིབ་གཡོགས་ཀྱིས་བཀབ་པར་སྣང་ཡང༌། གནས་ཚུལ་ལ་བཀབ་པ་མེད་པ་དང༌། གཞི་ལམ་འབྲས་བུ་སྐྱེ་བའི་སྣང་བ་ལ་སྐྱེ་བ་
ཉིད་མེད་པ་དང༌། འཆི་བའི་ཚུལ་ཅན་ཏེ་འཇིག་པར་སྣང་བ་ལ། དོན་དུ་འཇིག་པ་མེད་ཅིང་མ་གྲུབ་པའོ། །གྲོལ་བར་སྣང་ཡང་གྲོལ་བར་འགྱུར་བ་མེད་དེ། །བཅིངས་མ་མྱོང་བའི་ཕྱིར་དང༌། དེ་རྣམས་ཀྱིས་འཁོར་འདས་ཀྱི་མཐའ་མ་གྲུབ་པར་བསྟན་ནས། འཁོར་འདས་ཉིད་ལ་མི་གནས་པའི་མྱང་འདས་ལ། མི་གནས་པའི་ངོ་བོ་ཉིད་མེད་དེ་གང་ལ་བརྟེན་ནས་མི་གནས་པར་འཇོག་པའི་འཁོར་འདས་ཉིད་མེད་པའི་ཕྱིར་རོ། །དངོས་པོ་མེད་པའི་ངོ་བོ་དངོས་མེད་ཀྱི་རང་བཞིན་ཉིད་མེད་དེ། བློས་བརྟགས་པ་ཙམ་ལས་གཞན་ཅི་ཡང་མེད་པའི་ཕྱིར་རོ། །གཟུགས་སོགས་དངོས་པོར་སྣང་ཡང་དེའི་ངོ་བོ་དངོས་པོ་ཉིད་མེད་དེ། དངོས་པོར་ཡོད་ན་གཅིག་དང་དུ་མ་གང་རུང་དུ་ཡོད་དགོས་པ་ལས་དེར་མེད་པའི་ཕྱིར་རོ། །འགྱུར་བའི་ཆོས་ཅན་དངོས་པོ་རྣམས་ལ་འགྱུར་བའི་ངོ་བོ་མེད་དེ། འགྱུར་འགྲོ་རྒྱུའི་དངོས་པོ་ཉིད་མེད་པའི་ཕྱིར་རོ། །མི་འགྱུར་བ་ནམ་མཁའ་ལྟ་བུ་དངོས་མེད་ཀྱི་རྟག་པ་རྣམས་ལ། མི་འགྱུར་བ་རྟག་པའི་ངོ་བོ་ཡང་མེད་དེ། རྟག་པར་གནས་རྒྱའི་ཆོས་རང་ཉིད་མེད་པའི་ཕྱིར་རོ། །དེ་ལྟར་རང་བཞིན་མེད་པའི་ཆོས་འདི་རྣམས། སྐྱེ་བ་དང་འཇིག་པར་སྣང་བ་ནི་འཁྲུལ་པའི་སྣང་བ་ལ་སྣང་ཡང་དངོས་གནས་མ་ཡིན་ཏེ། སྒྱུ་མ་སྤྲུལ་པ་ཇི་ལྟ་བ་དེ་བཞིན་ནོ། །འབྱུང་བ་སྟེ་དངོས་པོ་འདི་རྣམས་གནས་ཚུལ་ལ་འཇིག་པར་འགྱུར་བ་མ་ཡིན་ཏེ། འཇིག་པ་ལ་སྔོན་དུ་སྐྱེ་དགོས་པ་ལས། གནས་ཚུལ་ལ་རང་བཞིན་ཉིད་ཀྱིས་སྐྱེ་བར་འགྱུར་བ་མི་སྲིད་པའི་ཕྱིར་རོ། །དེ་ལྟར་ན་ཉོན་མོངས་པ་དང༌། ལས་དང༌། ལུས་དང༌། ལོངས་སྤྱོད་སྣོད་ཀྱི་འཇིག་རྟེན་གྱིས་བསྡུས་པའི་སྡུག་བསྔལ་རྣམས་དང་ལམ་སྒོམ་པ་རྐྱེན་ལས་བྱུང་བའི་ཡེ་ཤེས་རྣམས་དང༌། འབྲས་བུ་སྤངས་ཐོབ་ཏུ་སྣང་བ་དང༌། དེ་རྣམས་གང་ལ་འཆར་བའི་གཞི་སེམས་སེམས་བྱུང་གི་ཚོགས་པ་སྟེ། སྣ་ཚོགས་སུ་སྣང་བ་འདི་རྣམས་ནི་རང་བཞིན་ནམ་ངོ་བོ་ཉིད་དུ་ཡོད་པ་མ་ཡིན་ཏེ། སྣང་ཡང་བདེན་པས་སྟོང་པའོ། །མིག་དང་གཟུགས་སོགས་ཀུན་རྫོབ་ཏུ་བྱ་བ་བྱེད་པའི་དངོས་པོ་འདི་རྣམས་དང༌། དེ་རྣམས་ཉིད་
རང་བཞིན་གྱིས་མ་གྲུབ་པའི་དངོས་པོ་མེད་པ་སྟོང་པ་ནི། མཚན་ཉིད་དེ་རང་བཞིན་དབྱེ་བ་མེད་པར་གཅིག་པ་ཉིད་དོ། །དེ་ལས་གཅིག་ཅེས་བྱ་བ་ནི། ཐ་དད་དུ་མེད་པ་ཙམ་ཏེ་གཅིག་དངོས་སུ་གྲུབ་པ་ཡང་མ་ཡིན་ནོ། །དེ་དག་ནི་རྗེས་དྲན་གྱི་སྐབས་སུ་འབྲེལ་བ་མང་ཞིང༌། ཞུ་བདེ་ནང་སྤྲོས་པ་བཀག་པའི་སྟོང་ཉིད་ནི། རང་ལྡོག་ནས་ཐུགས་རྡོ་རྗེའི་སྒྲུབ་པར་འགྱུར་བ་ཤས་ཆེ་ཞིང༌། དགའ་བའི་རབ་དབྱེ་ནི་སྤྱིར་གཞི་དུས་ནའང་ཡོད་ལ། དབང་དུས་ནས་བརྩམས་ཏེ་ཡང་ནས་ཡང་དུ་ཡོད་མོད་ཀྱང༌། གཙོ་བོར་འཛིན་པའི་ཕྱེད་ཕྱི་མ་ལ་འབྱུང་བ་དང༌། རྗེས་དྲན་གྱི་སྐབས་ཉིད་ཡིན་པ་ལས། འཛིན་པའི་དེ་ཡང་རྗེས་དྲན་གྱི་རྒྱུ་ཐུན་མོང་མ་ཡིན་པ་ཉིད་ཀྱི་ཕྱིར། རྗེས་དྲན་དང་འབྲེལ་བ་ཡིན་ནོ། །གཉིས་པ་རྗེས་དྲན་གྱི་ཡན་ལག་ཁྱད་པར་དུ་བཤད་པ་ནི། རང་གི་ཤེས་རབ་ལ་འགྱུར་སེམས། །རྡོ་རྗེ་ནོར་བུའི་པདྨར་སོན། །དེར་སོན་ཟླ་བ་གཡོ་བ་དང༌། །མི་གཡོ་བ་དང་མི་འགྱུར་སྒོམ། །ལུས་ངག་སེམས་ཀྱི་རྩ་རྣམས་སུ། །སྐུ་གསུང་ཐུགས་རྣམས་སྒོམ་པ་སྟེ། རྡོ་རྗེ་གསུམ་རྣམས་ལེགས་བསྡུས་པ། །ཡེ་ཤེས་དུང་ཅན་མར་སྒོམ་པའོ། །ཤེས་རབ་ཆགས་པས་ཞུ་བ་ཡི། །ཐིག་ལེ་རིམ་པས་མགོ་བོ་ལས། །རྫོགས་པའི་གནས་སུ་ཞུགས་རྣམས་ཀྱང༌། །འཆིང་བ་དམ་པའི་དོན་གྱིས་སོ། །ཞེས་གསུངས་ཏེ། རྗེས་སུ་དྲན་པའི་ཡན་ལག་ནི། གང་ཞིག་གཏུམ་མོའི་འབར་སྣང་ལས་གྲུབ་པ། འདོད་པའི་ལྷ་ཡབ་ཡུམ་གྱི་དཀྱིལ་འཁོར་བརྟན་གཡོ་ཀུན་གྱི་སྣང་བརྙན་དང་བཅས་པའི་སྟོང་གཟུགས་དེ་གྲུབ་ན་ཡང༌། རེ་ཞིག་ཞུ་བདེ་མཐར་ཐུག་པའི་བདེ་བ་འཕེལ་བར་མ་ནུས་ནས། ཕྱག་རྒྱ་བཞི་སྦྱོར་གྱི་སྒོ་ནས་ལས་ཀྱི་ཕྱག་རྒྱ་སྒྲུབ་པར་བྱའོ། །དེར་ལས་རྒྱ་ལ་བལྟོས་པའི་གནས་སྐབས་བཅུ་རྫོགས་ནས་བདེ་བ་ཚད་དུ་ཕྱིན་པར་འགྱུར་རོ། །དེ་ནས་ཕྱག་རྒྱ་གསུམ་སྦྱོར་གྱི་ཡེ་རྒྱ་ལ་བསྟེན་ཏེ་བསྒོམས་པས། དེ་ཉིད་ལ་བལྟོས་པའི་འདོད་པའི་གནས་སྐབས་བཅུ་རིམ་གྱིས་རྫོགས་པ་ལས། ཡེ་རྒྱ་ཉིད་ཀྱི་བདེ་བ་ཚད་དུ་ཕྱིན་པར་འགྱུར་རོ། །དེ་དག་ཕྱག་ཆེན་གྱི་རྗེས་
དྲན་ལ་བལྟོས་ན་སྔོན་འགྲོ་ལྟ་བུ་སྟེ། དེ་ནས་སྟོང་གཟུགས་ཕྱག་རྒྱ་ཆེན་པོ་འབའ་ཞིག་གིས་བདེ་བ་སྐྱེད་པ་ལ་གོམས་པར་བྱས་པས། འདོད་པའི་གནས་སྐབས་བཅུ་དང་མཚུངས་པའི་བདེ་བའི་ཡེ་ཤེས་མཐར་ཐུག་པ་ནམ་མཁའ་དང་མཉམ་པ་བཅུ་ཐོབ་སྟེ། ཕྱག་ཆེན་གྱིས་དྲངས་པའི་ཞུ་བདེ་རྫོགས་པར་འཆར་རོ། །དེ་ལ་འདོད་པའི་གནས་སྐབས་བཅུ་ནི། རྒྱུད་ཀྱི་རྒྱལ་པོ་ལས། བསམ་དང་འདོད་དང་ལུས་ལ་རིམ་དང་ཁ་མཆོག་པདྨ་སྐམ་དང་ཟས་ལ་རབ་ཏུ་མི་འཇུག་དང༌། འདར་དང་སྨྱོ་དང་རབ་ཏུ་རྨོངས་དང་ཡིད་ནི་རྣམ་པར་འཁྲུལ་དང་དྲག་ཏུ་བརྒྱལ་བ་དག །རྡོ་རྗེ་ཅན་གྱི་དུ་བ་ལ་སོགས་རབ་གསལ་རྣམ་པ་བཅུ་སྟེ་སྲོག་ཆགས་ལུས་ལ་འཇིག་རྟེན་དུ། །རབ་ཏུ་གསལ་ཞིང་ངེས་པ་དེ་རྣམས་ཡིད་སྲུབས་གནས་སྐབས་སུ་ཞིག་རྒྱལ་བར་འདོད་པ་དེ་ནི་སུ། །ཞེས་གསུངས་ཏེ། ཐ་མལ་པཔའི་འདོད་ཆགས་ཀྱི་གནས་སྐབས་བཅུ་ནི་ཆགས་ཡུལ་བསམ་པ་དང༌། ཕྲད་འདོད་ཀྱི་འདུན་པ་དང༌། ལུས་ལ་དྲོད་འབར་བ་དང༌། ཁ་སྐམ་པ་དང༌། ཟས་སོགས་བྱ་བ་གཞན་ལ་མི་འཇུག་པ་དང༌། ལུས་འདར་བ་དང༌། འཛེམ་བག་དོར་བ་དང༌། རིགས་པར་སྨྲས་པའི་དོན་ལ་བློ་མི་གཏོང་བར་བྱར་འོས་མི་འོས་དབྱེ་བ་མི་ཤེས་པ་དང༌། འདོད་པའི་ཆགས་པས་སེམས་བསྡུས་ཏེ་བརྒྱལ་བ་ལྟར་གཞན་མི་དྲན་མི་ཤེས་པའི་གནས་སྐབས་སོ། །སྐབས་འདིར་རྟགས་བཅུའི་རང་བཞིན་གྱི་ཕྱག་རྒྱ་ཆེན་པོ་རྣམས་ཀྱི་རིམ་པས་དྲངས་པའི་བདེ་བའི་ཡེ་ཤེས་རྣམས་པ་བཅུ་རིམ་གྱི་ཐོབ་པ་ན། འདོད་པའི་གནས་སྐབས་བཅུ་དང༌། དེས་བཞག་པའི་སྒྲིབ་པ་ཐམས་ཅད་སྤོང་བར་འགྱུར་རོ། །བདེ་བའི་ཡེ་ཤེས་དེ་དག་ཀྱང་འདོད་པའི་གནས་སྐབས་བཅུ་དང༌། ཕྱོགས་དེ་ནས་རྣམ་པ་མཚུངས་པ་སྟེ། ཤེས་རབ་མ་གྲངས་མེད་པའི་གཟུགས་བརྙན་རང་ཤར་བའི་བདེ་བ་དང༌། དེ་རྣམས་ལ་སེམས་གཡོ་བ་མེད་པར་ཆགས་པའི་བདེ་བ་དང༌། གཏུམ་མོའི་དྲོད་འབར་བའི་བདེ་བ་དང་ནང་གི་བདེ་བས་ཚིམ་སྟེ། བཟའ་བཏུང་གོས་སོགས་
ལ་སྲེད་པ་དང་བྲལ་བའི་བདེ་བ་དང༌། རྩ་རླུང་ཐིག་ལེ་ཐམས་ཅད་རབ་ཏུ་གཡོ་ཞིང་འདར་བའི་བདེ་བ་དང༌། བདེ་སྡུག་མཐོ་དམན་ཐམས་ཅད་མགོ་སྙོམ་པར་གྱུར་པའི་བདེ་བ་དང༌། འདོད་ཡོན་ལྔ་བཟང་ངན་གྱི་དབྱེ་བ་སོགས་མི་རིག་པར་འགྱུར་བའི་བདེ་བ་དང༌། ཕྱི་རོལ་ཀྱི་སྣང་བ་དང་རྣམ་རྟོག་རབ་ཏུ་ནུབ་པ་ལས་བྱུང་བའི་བདེ་བའི་ཡེ་ཤེས་རྣམས་སོ། །དེ་ཡང་རྟགས་བཅུ་པོ་རེ་རེ་བཞིན་གྱི་རིགས་ལས་སྟོང་གཟུགས་མཐའ་དག་གིས། རང་སྟོབས་སུ་ལུགས་འབྱུང་ལུགས་བཟློག་གི་དགའ་བ་བཞིའམ་བཅུ་དྲུག་རྫོགས་པར་དྲངས་པ་ན་རྗེས་དྲན་རྫོགས་པར་འགྱུར་ཏེ། དེ་ལ་རྗེས་དྲན་གྱི་ངོ་བོ་ནི། གྲོགས་ཕྱག་རྒྱ་གཞན་ཡོད་དམ་མེད་ཀྱང་རུང༌། སྟོང་གཟུགས་ཉིད་ཀྱིས་དངོས་སུ་ཞུ་བདེ་འགྱུར་མེད་ཀྱི་དགའ་བཞི་འདྲེན་པའི་ལམ་མོ། །དེ་ལ་གཞུང་དོན་ནི། ལས་ཀྱི་ཕྱག་རྒྱ་ལ་སོགས་པ་རང་གི་ཤེས་རབ་མ་རྣམ་པ་གསུམ་ལ་འཁྱུད་པའི་རྐྱེན་གྱིས། རྗེས་ཆགས་ཀྱི་གཏུམ་མོ་འབར་བས་བཞུ་བའི་བྱང་ཆུབ་ཀྱི་སེམས་རྡོ་རྗེ་ནོར་བུའི་རྩ་འཁོར་གྱི་པདྨར་སོན་པའི་དུས། རྩ་འཁོར་དེ་དག་ཏུ་སོན་པའི་ཟླ་བ་གཡོ་བའི་བདེ་བ་ཤར་བ་ན། རྣལ་འབྱོར་གྱི་སྟོབས་ཀྱིས་ནོར་བུའི་གནས་དེ་ཉིད་དུ་རླུང་མི་གཡོ་ཞིང་ཐིག་ལེ་མི་འགྱུར་བར་སྒོམ་མོ། །དེ་ནས་མས་བརྟན་པའི་ཚུལ་གྱིས་གཙུག་གཏོར་གྱི་བར་དུ་བགྲོད་པར་བྱའོ། །རྒྱ་བོད་མང་པོས་འདིས་ཏིང་ངེ་འཛིན་གྱི་ཡན་ལག་བརྟན་པར་བཞེད་ཀྱང༌། ཡན་ལག་འདི་གཉིས་ཕྱོགས་མཚུངས་པའི་ཕྱིར་ཕྱོགས་མཐུན་ཙམ་དུ་འགྱུར་མོད། ཟླ་བ་གཡོ་བ་ཞེས་གསུངས་པས། གཞུང་དོན་ནི་མིན་ནོ། །ཐབས་གང་གི་མི་འགྱུར་བར་སྒོམ་སྙམ་ན། ལུས་ཀྱི་རྩ་རྐྱང་མ་དང་བཤང་བའི་རྩར་རླུང་གི་རྒྱུ་བ་བཀག་པ་ལ་སྐུ་རྡོ་རྗེ་སྤྲོ་བ་སྒོམ་པ་དང༌། ངག་རོ་མ་དང་གཅི་བའི་རྩར་དེ་ལྟ་བུའི་ཚུལ་གྱིས་གསུང་གི་སྤྲོ་བ་སྒོམ་པ་དང༌། སེམས་ཀྱི་རྩ་ཨ་ཝ་དྷཱུ་ཏཱིར་ཚུལ་དེ་ལྟ་བུས་ཐུགས་ཀྱི་སྤྲོ་བ་རྣམས་སྒོམ་པ་དང༌། སྐུ་གསུང་ཐུགས་རྡོ་རྗེ་གསུམ་པོ་དེ་རྣམས་ལེགས་པར་གཅིག་ཏུ་བསྡུས་པ་ཡེ་ཤེས་རྡོ་རྗེའི་སྤྲོ་བ་དུང་ཅན་མའི་རྩ་ལ་སྒོམ་པས་སོ། །འདིར་དོན་དམ་བསྡུས་པ་ལས། སྐུའི་རྩ་དཔྲལ་བ་སོགས་སུ་
གསུངས་པ་ཡང་སྤྱིར་སྐབས་འདིར་ཤིན་ཏུ་འབྲེལ་མོད་ཀྱི། ཡེ་ཤེས་དུང་ཅན་མ་ཞེས་གསུངས་པའི་ཟླས་དྲངས་པར་མི་ལེགས་ཏེ། དུང་ཅན་མ་ནི་ལྟེ་བ་མན་ཆད་དུ་དྷཱུ་ཏཱིའི་མས་སྣ་ཐམས་ཅད་ལ་འཆད་དགོས་ཀྱི། རྡོ་རྗེ་ནོར་བུ་ཁོ་ན་ལ་གནས་པ་མ་ཡིན་པའི་ཕྱིར་དང༌། སྐུ་གསུང་ཐུགས་ཀྱི་འཁོར་ལོ་མ་སྨོས་པར་རྩ་ཙམ་སྨོས་པ་ལ་རྒྱུད་འདིར་རོ་རྐྱང་སོགས་ལ་གཙོ་བོར་གྲགས་པའི་ཕྱིར་དང༌། གཞུང་ཚིག་འདིས་བསྟན་པའི་སྐུ་གསུང་ཐུགས་གསུམ་དཔྲལ་སྙིང་གསང་གསུམ་ཡིན་ན། གསང་འཁོར་དུང་ཅན་མར་འདུས་པའི་ཕྱིར་ཐུགས་ཡེ་ཤེས་སུ་འདུས་པས། རྡོ་རྗེ་བཞིའི་དབྱེ་བ་ཟློས་བུ་ཅན་དུ་འགྱུར་པའི་ཕྱིར་རོ། །ཤེས་རབ་མ་ལ་ཆགས་པས་ཞུ་བའི་ཐིག་ལེ་གཙུག་ཏོར་ནས་འོང་ནས། རིམ་པས་མགོ་བོ་སྟེ་སྤྱི་བོའི་འཁོར་ལོ་སོགས་ལས་རྒྱུད། རྫོགས་པའི་གནས་གསང་བའི་འཁོར་ལོ་མན་ཆད་དུ་ཞུགས་ཤིང་སོང་བ་རྣམས། མི་འཛག་པར་འཆིང་བའི་ཐབས་ནི་ལུས་ཀྱི་བྱེད་བཅིངས་སམ་རླུང་གི་སྦྱོར་བ་སོགས་ཀྱིས་མ་ཡིན་ཏེ། དམ་པའི་དོན་གྱི་སྦྱོར་བས་སོ། །དེ་ཡང་གང་ཞེ་ན་བྱང་ཆུབ་ཀྱི་སེམས་གསང་བར་འོང་པ་ན། འབད་རྩོལ་མེད་ཀྱང་སྟོང་གཟུགས་ཀྱི་སྣང་བ་རྒྱ་ཆེར་མཆེད་པ་ལ། མཉམ་པར་བཞག་པས་བཟུང་བ་དང་བཟློག་པ་དང་ཁྱབ་པར་ཡང་འགྱུར་རོ། །འདི་ཉིད་ཚུལ་ཁྲིམས་ཀྱི་ཚོགས་ཏེ་ཡེ་ཤེས་དང་བསོད་ནམས་ཀྱི་རྒྱུ་ཅན་ནོ། །དེ་ལྟར་ཡང་རྩ་བའི་རྒྱུད་ལས། བྷ་གར་ལིང་ག་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། ཁམས་གསུམ་པོ་ནི་མ་ལུས་པའི། །སངས་རྒྱས་གཟུགས་ནི་བསྒོམ་པར་བྱ། །སྲུང་བ་འདི་ཉིད་ཁོ་ན་ཡིས། །སྐྱེ་བ་འདི་ལ་སངས་རྒྱས་ཉིད། །ཚུལ་ཁྲིམས་ཚོགས་ནི་ཡང་དག་རྫོགས། །བསོད་ནམས་ཡེ་ཤེས་ཡང་དག་ལྡན། །ཞེས་སོ། །དེ་ཡང་དང་པོར་ལུས་ཀྱི་བྱེད་བཅིངས་དང༌། ནཱ་དའི་སྦྱོར་བ་སྟེ་རླུང་གི་བྱེད་པ་བཅིང་པ་ལ་བརྟེན་ནས། འཆིང་བ་ལ་སོགས་པའི་བྱ་བ་བྱེད་དགོས་པ་དེ་སྲིད་དུ། ལས་དང་པོ་པའི་སྐབས་ཡིན་ལ་
ལུས་ཀྱི་བྱེད་བཅིངས་སྤངས་ནས། རླུང་གི་བྱེད་བཅིངས་ཁོ་ནས་བྱ་བ་བྱེད་པའི་སྐབས་ཀྱང་ཕལ་ཆེར་དེ་དང་མཚུངས་ཏེ། སོ་སོར་སྡུད་པ་དང་བསམ་གཏན་གྱི་ཡན་ལག་ལ་གནས་པའི་རྣལ་འབྱོར་པ་རྣམས་ལའོ། །བསྐྱེད་པའི་རིམ་པ་ཤིན་ཏུ་གོམས་པ་དག་ལ་ནི། མཚན་མ་དང་བཅས་པའི་ཏིང་ངེ་འཛིན་ཁོ་ནས། དེ་དག་བྱེད་པ་ཡོད་མོད་ཀྱི། དབུ་མའི་ནང་དུ་གཞུག་པར་ནུས་པ་ནི་མ་ཡིན་ནོ། །བསྐྱེད་རིམ་སྔོན་མ་ཅན་གྱི་སོར་བསམ་པ་དག་ལ་ནི། དེ་འདྲས་དེ་དག་ནུས་པར་མ་ཟད། དབུ་མར་ཅུང་ཟད་འཇུག་ཐུབ་ནུས་པ་ཡང་ཡིན་ནོ། །སྲོག་རྩོལ་གྱི་ཡན་ལག་ལ་གནས་པ་དག་གིས། མཚན་མ་མེད་པའི་རྣལ་འབྱོར་ལ་རྩོལ་བ་དང་བཅས་པ་ཁོ་ནས། རླུང་འགགས་ཏེ་འཆིང་བ་དང༌། བཟློག་པ་དང༌། ཁྱབ་པར་ཡང་བྱེད། འཛིན་པའི་ཕྱེད་གོང་མ་ལ་ཡང་ངོ༌། །མཚན་མ་མེད་པའི་རྣལ་འབྱོར་དེ་ཡང་སྟོང་གཟུགས་ཕྱག་རྒྱ་ཆེན་མོ་ལ་མཉམ་པར་འཇོག་པ་ཡིན་ཏེ། འོན་ཀྱང་བཟུང་བ་དང༌། བཟློག་པ་དང༌། ཁྱབ་པའི་ཕྱིར་རྩོལ་བ་དང་བཅས་པ་དགོས་ལ། ཡན་ལག་དེ་རྣམས་སུ་གེགས་བསལ་བ་དང༌། བོགས་དབྱུང་བའི་དོན་དུ་བཙན་ཐབས་ཀྱི་སྦྱོར་བར་བཤད་པ་མ་གཏོགས། ལས་དང་ཡེ་ཤེས་ཀྱི་ཕྱག་རྒྱ་ལམ་གྱི་དངོས་གཞིའི་གཙོ་བོར་བསྟེན་པ་མ་ཡིན་ལ། འཛིན་པའི་ཕྱེད་ཕྱི་མ་ལ་དགའ་བཞིའི་ས་ཐོབ་པར་འགྱུར་ཏེ། སྔར་བྱང་ཆུབ་ཀྱི་སེམས་ཀྱི་བགྲོད་པ་ཐམས་ཅད་རྩོལ་བཅས་ཀྱིས་དགག་དགོས་པ་ཡིན་ཀྱང༌། སྐབས་འདིའི་དང་པོར་ལུས་ཀྱི་ཐིག་ལེ་རྩོལ་མེད་དུ་འགགས་ཤིང༌། གཞན་རྣམས་མ་འགགས་པའི་དུས་དགའ་བའི་ས་དང་པོ་ཐོབ་པ་ཡིན་པ་ནས། བཞི་ཀ་རྩོལ་མེད་དུ་འགགས་པ་ལྷན་སྐྱེས་ཀྱི་ས་ཡིན་པའི་བར་དུའོ། །ལུས་ངག་ཡིད་ཆགས་ཀྱི་ཐིག་ལེ་བཞི་ཀར་ལུས་ཀུན་ལ་ཁྱབ་པ་ཡིན་ཀྱང་གནས་གང་ནས་འབྱུང་ཞིང་གང་དུ་ཐིམ་པར་འགྱུར་བའི། བྱ་བ་བྱེད་པ་ནི་རྩ་འཁོར་སོ་སོ་ཡིན་ལ། རྩོལ་མེད་དུ་བརྟན་པ་ཐོབ་པའི་དོན་ནི། འདི་ཞུ་བདེ་ཡིན་པས་འགྲོ་འོང་གཏན་ནས་མི་བྱེད་པ་མིན་ཡང༌། ནོར་བུའི་འཁོར་ལོ་རང་འགགས་སུ་སོང་རྗེས་
གཙུག་ཏོར་གྱི་བར་དུ་རྩོལ་མེད་དུ་ལོག་ནས། སླར་རང་རང་གི་འཁོར་ལོ་རྒྱུད་ནས་རང་གནས་སུ་ཐིམས་པར་འགྱུར་བའི་དོན་ནོ། །བཞི་པ་ཡེ་ཤེས་རྡོ་རྗེའི་སྒྲུབ་པ་བཤད་པ་ལ། མི་འགྱུར་བའི་མཚན་ཉིད་སྤྱིར་བསྟན་པ་དང༌། །ཏིང་ངེ་འཛིན་གྱི་ཡན་ལག་ངོས་བཟུང་བའོ། །དང་པོ་ནི། ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་ཉམས་པ་རྫོགས་པ་སྟེ། །ཟླ་བ་ཆད་དང་རྫོགས་པ་མིན། །དེ་བཞིན་ཡེ་ཤེས་ཤར་རིམ་པས། །ས་རྣམས་ཀྱིས་ནི་རྫོགས་པར་འགྱུར། །ཉོན་མོངས་ལ་སོགས་ཉམས་པ་རྫོགས། །ཡེ་ཤེས་ཆད་དང་རྫོགས་པ་མིན། །ཇི་ལྟར་རི་བོང་མཚན་མར་དབུས། །རྫོགས་པར་རི་བོང་ཅན་མི་གནས། །དེ་བཞིན་འགྱུར་མེད་བདེ་བར་སེམས། །འཁོར་བའི་བག་ཆགས་མཚན་མ་ཡིས། །སྐྱེད་དང་རབ་ཏུ་ཉམས་པའི་ཕྱོགས། །དཀར་པོ་ནག་པོ་རབ་ཏུ་གནས། །དེ་དག་དབུས་སུ་རྫོགས་པ་གང༌། །དེ་ནི་རྫོགས་པར་མི་གནས་སོ། །སྐད་ཅིག་གཅིག་མངོན་རྫོགས་སངས་རྒྱས། །རྫོགས་པ་ལ་ནི་གཡོ་མི་འགྱུར། །གང་ཚེ་རྡོ་རྗེ་ནོར་བུའི་སེམས། །དེ་ནི་སྐད་ཅིག་ཐམས་ཅད་རྫོགས། །དཀར་པོའི་ཕྱོགས་ལ་འདི་མི་གནས། །རེས་འགའ་དཀར་མིན་ལ་མི་འགྲོ །ཕྱོགས་གཉིས་པོ་ཡི་དབུས་གནས་པ། །རྫོགས་པ་ལ་གནས་གཉིས་སུ་མེད། །གཙུག་ཏོར་ལས་ནི་ཤར་བ་སྟཻ། །རྡོ་རྗེ་ནོར་བུར་རྫོགས་པར་འགྱུར། །དེ་ཆགས་བྲལ་ལས་ཆ་ཉམས་པ། །རྡོ་རྗེ་ནས་མཉམ་ལ་རབ་རྫོགས། །སླར་ཡང་གཙུག་ཏོར་དུ་ཤར་བ། །སླར་ཡང་རྡོ་རྗེ་ནོར་བུར་རྫོགས། །དེ་ཆགས་བྲལ་ལས་ཆ་ཉམས་པ། །ལུས་ཅན་ཡེ་ཤེས་ཉམས་པ་མིན། །འདི་ཡི་བདེ་བ་ཆེ་རང་བཞིན། །རྫོགས་པའི་སྒྲ་ཡིས་བརྗོད་པར་བྱ། །དངོས་པོ་བར་མ་གཞན་ཐམས་ཅད། །འབྱུང་དང་བསྡུད་པའི་རྒྱུ་ཡིན་ནོ། །སྲིད་ལས་མྱ་ངན་འདས་པར་འགྲོ། །དེ་ལས་སླར་ཡང་སྲིད་པར་འོང༌། །རང་ཕྱོགས་དག་ལས་ཟླ་བཞིན་དང༌། །བགྲོད་པ་དག་ལས་སྣང་བྱེད་བཞིན། །ཞེས་གསུངས་ཏེ། ཇི་ལྟར་ཟླ་བ་ནི་ཚེས་གཅིག་
ལ་སྔར་སྒྲིབ་བྱེད་ཀྱི་གྲིབ་མས་བསྒྲིབས་པ་ཆ་གཅིག་པར་བསལ་བས། ཆ་ཤས་དང་པོ་ཤར་བ་ནས་བརྩམས་ཏེ། རིམ་པས་ཆགས་རྣམས་ཀྱི་གྲིབ་མ་བསལ་བས་ནི་མཐར་ཚེས་བཅོ་ལྔ་ལ་ཟླ་བའི་ཆ་ཡོངས་སུ་རྫོགས་པར་འགྱུར་རོ་ཞེས་འཇིག་རྟེན་ན་གྲགས་ཀྱང༌། སྒྲིབ་བྱེད་ཀྱི་གྲིབ་མ་རྣམས་ཉམས་པའི་རིམ་པ་རྫོགས་པ་ཙམ་ཡིན་གྱི། །ཟླ་བའི་དཀྱིལ་འཁོར་གྱི་ངོ་བོ་དང་པོ་ནས་ཆད་པ་མེད་པས། ཕྱིས་རྫོགས་པའང་མིན་ཏེ། མདོར་ན་སྒྲིབ་བྱེད་འཕེལ་འགྲིབ་ཡིན་གྱི་ཟླ་བ་འཕེལ་འགྲིབ་མིན་ནོ། །དེ་བཞིན་དུ་མི་འགྱུར་བའི་ཡེ་ཤེས་ཀྱང་རྒྱུ་མཐུན་པ་ལ་སོགས་པའི་འབྲས་བུ་བཞིའམ། ས་བཅུ་གཉིས་ལ་སོགས་པའི་རིམ་པས་ཤར་ཏེ། ས་བཅུ་གཉིས་ཀྱི་མཐར་ཐུག་པས་ནི་མི་འགྱུར་བའི་བདེ་བ་རྫོགས་པར་འགྱུར་ཞེས་རྣལ་འབྱོར་པའི་སེམས་སྣང་དང་བསྟུན་ནས་བཤད་མོད་ཀྱང༌། ཉོན་མོངས་པ་ལ་སོགས་པ་ལས་རླུང་ཉི་ཁྲི་ཆིག་སྟོང་དྲུག་བརྒྱ་དང་སྒྲིབ་པའི་ཁྱད་པར་གཞན་རྣམས། ཉམས་ཤིང་སྤངས་པའི་རིམ་པ་རྫོགས་པ་ཡིན་གྱི། མི་འགྱུར་བའི་ཡེ་ཤེས་ནི་གདོད་མ་ནས་གནས་པའི་ཕྱིར། དང་པོར་མ་ཚང་ཞིང་ཆད་པ་མེད་པས། ཕྱིས་རྫོགས་པའང་མིན་ཏེ། བསལ་བཞག་མེད་པའི་ཕྱིར་རོ། །བྲམ་ཟེ་ཆེན་པོའི་ཞལ་ནས། བྱེད་པོ་དང་བྲལ་འགྲོ་ལ་རྟག་ཏུ་ཤར། །གང་ཞིག་དུས་སུ་ངེས་པར་གསུངས་པ་ན། །ཐམས་ཅད་མཁྱེན་པའང་ཚིག་གིས་དབུལ་འགྱུར་བ། །བདེ་བའི་རྒྱལ་པོ་གཅིག་པུ་རྒྱལ་གྱུར་ཅིག །ཅེས་སོ། །འགྱུར་བར་སྣང་བའི་རྒྱུ་ནི་བག་ཆགས་ཏེ། ཇི་ལྟར་རི་བོང་གི་མཚན་མའི་རྣམ་པར། མུན་པའི་ས་བོན་ཟླ་བའི་དཀྱིལ་འཁོར་གྱི་དབུས་སུ་གནས་པའི་རྒྱུ་མཚན་གྱིས། ཆ་བཅོ་ལྔ་རྫོགས་པའི་ངང་དེར་རི་བོང་ཅན་གནས་པར་མི་ནུས་སོ། །དེ་བཞིན་དུ་འཁོར་བའི་བག་ཆགས་ཀྱི་མཚན་མས་རྙོག་པར་བྱས་པའི་སེམས་ཉིད་བརྟེན་ཐིག་ལེར་བཅས་པ་ཡང༌། བདེ་བ་ལ་མི་འགྱུར་བར་གནས་པར་མི་ནུས་སོ། །ཟླ་བ་ནི་སྐྱེད་པ་དཀར་ཕྱོགས་དང༌། རབ་ཏུ་ཉམས་པ་ནག་པོའི་ཕྱོགས་གཉིས་པོ་ལ། རྟག་པར་རབ་ཏུ་གནས་ཤིང༌། ཕྱོགས་གཉིས་པོ་དེའི་དབུས་སུ། དཀར་
ཆ་རྫོགས་པའི་གནས་སྐབས་བཅུ་དྲུག་པ་གང་ཡིན་པ་དེ་ལ། ཟླ་བ་དེ་ནི་སྐད་ཅིག་ཙམ་གནས་ཀྱི། རྫོགས་པའི་སྐབས་དེར་དེ་ལས་ལྷག་པ་མི་གནས་ཏེ། དཀར་པོའམ་ནག་པོའི་ཕྱོགས་གང་རུང་ལ་དེ་མ་ཐག་འཇུག་པར་འགྱུར་བ། དེ་བཞིན་དུ་དཀར་དམར་གྱི་རིམ་པའི་བྱང་ཆུབ་ཀྱི་སེམས་ནོར་བུ་དང་གཙུག་ཏོར་དུ་སྐད་ཅིག་ལས་མི་གནས་པའོ། །གང་མི་འགྱུར་བའི་སྐད་ཅིག་མ་གཅིག་མངོན་པར་རྫོགས་པར་སངས་རྒྱས་པ་སྟེ་བྱང་ཆུབ་ཀྱི་སེམས་ཆ་བཅུ་དྲུག་པ་ནོར་བུར་རྫོགས་པའི་སྐབས་དེ་ཉིད་དུ། མི་འགྱུར་བའི་ཐིག་ལེར་གྱུར་པ་ནི་རྫོགས་པ་ལ་གཡོ་བར་མི་འགྱུར་བ་སྟེ། མི་གཡོ་བ་ཞེས་བྱ་སྟེ། གང་གི་ཚེ་རྡོ་རྗེ་ནོར་བུར་སེམས་དམ་པའི་བདེ་བར་གྱུར་པ་དེ་ནི། མི་འགྱུར་བའི་བདེ་བའི་སྐད་ཅིག་ཐམས་ཅད་ཡོངས་སུ་རྫོགས་པ་སྟེ། བདེ་བའི་སྐད་ཅིག་ཐམས་ཅད་ནོར་བུར་སེམས་བརྟན་པ་ལས་བྱུང་ཞེས་པའོ། །དེ་བས་ན་མི་འགྱུར་བའི་བདེ་བ་དེ་ལ་ནི་སྐད་ཅིག་གཅིག་གིས་མངོན་པར་རྫོགས་པར་སངས་རྒྱས་པ་ཞེས་བྱ་སྟེ། དེ་ཡང་དཀར་པོ་ནོར་བུར་རྫོགས་པའི་སྐད་ཅིག་དང༌། དམར་པོ་གཙུག་ཏོར་དུ་རྫོགས་པའི་སྐད་ཅིག་སྟེ། རྡོ་རྗེ་ལྟ་བུའི་ཏིང་ངེ་འཛིན་ཡིན་པར་བཤད་དོ། །བྱང་ཆུབ་ཀྱི་སེམས་ནོར་བུར་ཟིན་པའི་རྒྱུ་ནི་གཉིས་ཏེ། ཐིག་ལེས་གང་བ་དང༌། སྙིང་གའི་ནཱ་ད་མི་གཡོ་བའོ། །དེ་ཡང་རོ་རྐྱང་གི་རྒྱུ་བ་འགགས་པས། ལྟེ་བའི་གཏུམ་མོ་བརྟན་པ་ན། སྙིང་གའི་ནཱ་ད་ཡང་མི་གཡོ་བར་གནས་སོ། །སྙིང་ཁ་དང་ལྟེ་བ་ནི་མཚོན་པ་སྟེ་འཁོར་ལོ་ཐམས་ཅད་ལ་གཏུམ་མོ་དང་ནཱ་ད་གནས་པའོ། །གང་གི་ཚེ་མི་འགྱུར་བའི་བདེ་བ་ཡོངས་སུ་རྫོགས་པ་ན། དཀར་པོའི་ཕྱོགས་དགའ་བ་བཅོ་ལྔ་པོ་ལ་ཡང་མི་གནས་ལ། དཀར་མིན་ནག་པོའི་ཕྱོགས་ལ་རེས་འགའ་ཙམ་སྟེ་ལན་གཅིག་ཀྱང་མི་འཕྲོ་ཞིང༌། ཕྱོགས་གཉིས་པོའི་དབུས་སུ་གནས་པ། དཀར་དམར་གྱི་བགྲོད་པ་བཅུ་དྲུག་པར་རྫོགས་པ་ལ་རྟག་ཏུ་གནས་པ་ནི་གཉིས་སུ་མེད་པ་སྟེ། ཟུང་འཇུག་གི་དོན་ནམ་ཕྱོགས་གཉིས་སུ་མེད་པ་ལ་འཇུག་གོ །དེས་ན་ཟུང་དུ་འཇུག་པ་ཡེ་ཤེས་ཀྱི་སྐུ་ཐོབ་པའི་མཚམས་ཀྱང༌།
མི་འགྱུར་བའི་སྐད་ཅིག་རྫོགས་པའོ། །འཁོར་བ་པ་རྣམས་ཆ་བཅུ་དྲུག་པ་ལ་མི་གནས་པའི་ཚུལ་ནི་གཙུག་ཏོར་ལས་ནི་ཤར་བའི་བྱང་ཆུབ་ཀྱི་སེམས་དེ་དགའ་བ་བཅུ་དྲུག་གི་རིམ་པས། རྡོ་རྗེ་ནོར་བུར་རྫོགས་པར་གྱུར་ཏེ། དེ་ཆ་བཅུ་དྲུག་པའི་མཐར། ཕྱི་རོལ་ཏུ་ཉམས་ཤིང་ལྷུངས་པ་དགའ་བའི་ཆགས་བྲལ་དུ་གྱུར་པ་ལས། རྡོ་རྗེ་ནས་ལྷུངས་ཤིང་ཉམས་ལ་རབ་ཏུ་རྫོགས་པས་ཆ་བཅུ་དྲུག་པ་ཉམས་པ་ཞེས་བྱ་ལ། རྡུལ་ཡང་གཙུག་ཏོར་གྱི་མཐའ་ལས་ཉམས་པར་འགྱུར་རོ། །ཡང་ནག་ཕྱོགས་ཀྱི་ཆ་བཅུ་དྲུག་པའི་མཐར། ཆགས་པའི་སྦྱོར་བ་ལ་བརྟེན་ནས། སླར་ཡང་གཙུག་ཏོར་དུ་ཤར་བ་སྔར་བཞིན་སླར་ཡང་རྡོ་རྗེ་ནོར་བུར་རྫོགས་པར་འགྱུར་ལ། དེར་ཆགས་བྲལ་ལས་ཆ་བཅུ་དྲུག་པ་ཉམས་པ་ཞེས་བརྗོད་ཀྱང༌། བརྟེན་ཐིག་ལེ་ལྷུང་བ་ལ་བརྟེན་ནས་སེམས་སྒྲིབ་པས་བསྒྲིབས་པ་ཡིན་གྱི། ཡེ་ཤེས་ཀྱི་ངོ་བོ་ཉམས་པ་ནི་མ་ཡིན་ཏེ། ཇི་སྐད་དུ། སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་ནོ་ཞེས་སོ། །ཞེས་འགྲེལ་པ་དོན་དམ་བསྡུས་པ་ལས་གསུངས་ཤིང༌། ཡང་ན་དེ་ལྟ་བུའི་དགའ་བྲལ་གྱི་ཆ་བདེ་བ་ཆེན་པོས་བཅོམ་པས། དགའ་བྲལ་དང་བེམ་ཆོས་ཀྱི་ཆ་ཉམས་ཀྱང་ཡེ་ཤེས་མ་ཉམས་ཤིང་མ་བཅོམ་ཞེས་བོད་ཀྱི་གྲུབ་ཐོབ་ཆེན་པོ་མན་ལུང་གུ་རུ་གསུང་པར་གྲག་གོ །ནམ་ཡང་ཉམས་པར་མི་འགྱུར་བའི་མཚན་ཉིད་ཅན་འདིའི་བདེ་བ་ཆེན་པོ་ནི། རྟག་པར་རང་བཞིན་གྱིས་རྫོགས་པ་ཡིན་ནོ་ཞེས་པའི་སྒྲ་ཡིས་བརྗོད་པར་བྱའོ། །ཞེས་པ་སྟེ་གདོད་མའི་ཡེ་ཤེས་ནི་ཐོག་མ་མེད་པ་ནས་གདོད་མ་གནས་ལུགས་གཤིས་ཀྱི་རང་བཞིན་གྱིས་རྫོགས་པའོ། །དང་པོ་བར་མ་གཞན་ཐམས་ཅད་ཅེས་པ་ལ། རྒྱ་སྐད་དུ། ཨ་ནྱ་བྷཱ་ཝཱན་ཏ་རཾ་སརྦཾ། ཞེས་འབྱུང་ཏེ་ཨན་ཏ་ར་ནི། མཐའ་ལ་ཡང་འཇུག་པས། གཞན་པ་དང་དངོས་པོའི་མཐའ་ཐམས་ཅད་ཅེས་བསྒྱུར་བ་ལྟར་ལེགས་པས། བདེ་ཆེན་གདོད་མའི་ཡེ་ཤེས་དེ་ལས་གཞན་པ་སྲིད་པའི་ཆོས་ཐམས་ཅད་ནི། འབྱུང་བ་སྐྱེ་བ་དང༌། བསྡུད་པ་འཇིག་པའི་རྒྱུའམ་མཚན་ཉིད་ཅན་ཡིན་ནོ། །དངོས་པོའི་མཐའ་ནི་འདུས་བྱས་ཐམས་ཅད་དོ། །དེ་ཡང་སྲིད་པ་སྟེ་སྐྱེ་བ་ནས་
འཆི་བ་མྱ་ངན་ལས་འདས་པའི་མཐར་འགྲོ་ཞིང༌། དེ་ལས་སླར་ཡང་ལས་ཀྱི་དབང་གིས་སྲིད་པ་སྟེ་སྐྱེ་བའི་གནས་སུ་འབྱུང་བར་འགྱུར་བ་ནི། ཟླ་བའི་དཀྱིལ་འཁོར་ཟླ་བ་རང་གི་དཀར་ཕྱོགས་དང་ནག་ཕྱོགས་དག་ལ་འཕེལ་བ་དང་འགྲིབ་པར་བྱེད་པ་དང༌། སྣང་བྱེད་དེ་ཉི་མ་ཡང་བྱང་བགྲོད་དང་ལྷོ་བགྲོད་ཀྱི་བགྲོད་པ་དག་ལ་སྟོབས་འཕེལ་བ་དང་འབྲི་བར་འགྱུར་བ། སྤེལ་མར་བྱེད་པས་དུས་འདའ་བ་བཞིན་ཏེ། འདི་དགའ་བ་བཅུ་དྲུག་གི་འཕེལ་འགྲིབ་ཁོ་ན་ལ་འཆད་པ་མང་ཡང༌། དེ་ནི་གོང་དུ་གཙུག་ཏོར་ལས་ནི་ཤར་བ་དེའི་སོགས་ཀྱིས་བཤད་ཟིན་ཞིང༌། ཕྱི་ནང་གི་ཟླ་ཉི་དང་དཔེ་དོན་དུ་ཡང་ལན་མང་དུ་སྦྱར་ཟིན་པས། འདིར་འཁོར་བའི་མཚན་ཉིད་སྤྱི་ལྡོག་ནས་སྦྱར་ན་གནད་ཆེ་ཞིང་མ་བཟློས་པར་འགྱུར་རོ། །གཉིས་པ་ཏིང་ངེ་འཛིན་གྱི་ཡན་ལག་བྱེ་བྲག་ཏུ་བཤད་པ་ནི། རྫོགས་པར་མི་གཡོ་བ་འདི་ནི། །ས་རྣམས་ཀྱིས་ནི་ཡོངས་རྫོགས་ཉིད། །ཉི་ཁྲི་བརྒྱད་གཉིས་བརྒྱ་ཡི་དབུགས། །འགྱུར་མེད་སྐད་ཅིག་ཟོས་རྣམས་ཀྱིས། །ཕྱོགས་གཉིས་ཡང་དག་གནོན་པ་ནི། །ས་རྣམས་ཀྱིས་ནི་ཡོངས་སུ་རྫོགས། །བདེན་དོན་རྣམ་པ་བཅུ་གཉིས་པ། །རྣམ་པ་བཅུ་དྲུག་འགྱུར་བ་མེད། །ཅེས་གསུངས་ཏེ། བྱང་ཆུབ་ཀྱི་སེམས་བདེ་བ་ཆེན་པོའི་ཡེ་ཤེས་ཉིད་མི་གཡོ་བ་སྟེ་འགྱུར་མེད་ཀྱི་ཐིག་ལེ་རྫོགས་པར་འགྱུར་བ་ནི་རྒྱུ་གང་ལས་ཞེ་ན། ཏིང་ངེ་འཛིན་གྱི་ས་བཅུ་གཉིས་ཡོངས་སུ་རྫོགས་པ་ཉིད་དོ། །དེ་ལ་ཏིང་ངེ་འཛིན་གྱི་ཡན་ལག་ནི། མི་འགྱུར་བའི་བདེ་བའི་སྐད་ཅིག་གི་ཡེ་ཤེས་ཉིད་སྟེ། གོང་དུའང་བཤད་པ་ལྟར་ཇི་སྲིད་དུ་རྟགས་དང་པོས་དགའ་བཞི་རྫོགས་པར་སྐྱེད་ཅིང༌། འདོད་པའི་གནས་སྐབས་དང་པོ་རྣམ་པར་དག་པའི་ཡེ་ཤེས་སུ་འགྱུར་བ་ནས། དགུ་པའི་བར་དུ་རྗེས་དྲན་ཁོ་ན་སྟེ་ཏིང་ངེ་འཛིན་གྱི་སྦྱོར་བའི་ལམ་དུ་མི་འགྱུར་རོ། །བཅུ་པ་ཐོབ་ནས་ནི། མི་འགྱུར་བའི་བདེ་བ་དངོས་སུ་སྒྲུབ་པའི་འགོ་བརྩམས་ཏེ། མི་རིང་བར་ལས་རླུང་དབུགས་གཅིག་འགགདཀར་པོ་ཆ་གཅིག་ནོར་བུ་དང༌། དམར་པོ་ཆ་གཅིག་གཙུག་ཏོར་དུ་བརྟན་པས་
དཀར་དམར་རླུང་གསུམ་གྱི་ཆ་རེ་རེ་སྟོང་གཟུགས་སུ་གྱུར་པ་ནི་རྫས་དང་དངོས་པོ་ལས་འདས་ཤིང་ཆོས་ཉིད་དུ་སོང་བའི་ཕྱིར། མི་འགྱུར་བའི་ཐིག་ལེ་ཞེས་བྱ་སྟེ། དེའི་ཡེ་ཤེས་ནི་མི་འགྱུར་བའི་བདེ་བ་སྟེ། ཐིག་ལེ་དང་ཡེ་ཤེས་ཀྱང་ངོ་བོ་གཅིག་གོ །དེ་ནས་ཀྱང་དཀར་པོའི་འགྲོ་འོང་གཙུག་ཏོར་ནས་ནོར་བུའི་བར་དུ་རྟག་ཏུ་བྱེད་ཅིང༌། དམར་པོའི་འགྲོ་འོང་ནོར་བུ་ནས་གཙུག་ཏོར་གྱི་བར་དུ་རྟག་ཏུ་བྱེད་དགོས་ཏེ། དེས་ལས་རླུང་འགགས་པ་དང༌། ཐིག་ལེའི་བགྲོད་པ་བརྟན་པར་བྱེད་དོ། །མི་འགྱུར་བའི་ཐིག་ལེར་གྱུར་ཟིན་པའི་ཐིག་ལེ་དེ་ནི་ལུས་ལ་དངོས་སུ་འགྲོ་འོང་བྱར་མེད་ཀྱང༌། ལྷག་མ་རྣམས་འགྲོ་འོང་བྱེད་པ་ཡིན་ནོ། །གང་མི་འགྱུར་བའི་ཐིག་ལེར་གྱུར་པ་དེ་ནི། འཇའ་ཚོན་ལྟ་བུ་གཉིས་སུ་མེད་པའི་ཡེ་ཤེས་ཀྱི་སྐུར་གྱུར་པ་ཡིན་པས། དེའི་ཚད་ཀྱི་མ་དག་པའི་ལུས་ངག་ཡིད་གསུམ་སྤངས་ཤིང༌། རྣམ་པར་གྱུར་པ་ཡིན་ལ་སྐུ་དེ་ཡང་བདེ་བ་ཆེན་པོ་དང་ངོ་བོ་གཅིག་པའི་ཕྱིར། སྐད་ཅིག་ཉི་ཁྲི་ཆིག་སྟོང་དྲུག་བརྒྱ་རྫོགས་པ་ན། རྣམ་པར་སྨིན་པའི་ལུས་རྩ་བ་ནས་དག་སྟེ་ཟུང་འཇུག་གི་སྐུར་རྫོགས་པ་ཡིན་ནོ། །དེ་ལྟར་ཡན་ལག་དྲུག་གི་རང་བཞིན་རྣམས་འདིར་ཕྱོགས་ཙམ་སྨོས་པ་ཡིན་གྱི། རྒྱས་པར་བྱང་ཆུབ་སེམས་དཔའི་འགྲེལ་པ་རྣམས་ལས་ཤེས་པར་བྱའོ། །ལས་རླུང་དབུགས་སྟོང་བརྒྱད་བརྒྱ་རེ་འགགས་པ་ལས་ཏིང་ངེ་འཛིན་གྱི་ས་རེ་རེ་ཐོབ་པར་འགྱུར་ཞིང༌། །གསང་བའི་འཁོར་ལོའི་ཕྱེད་མི་འགྱུར་པའི་ཐིག་ལེས་གང་བ་ན། ས་དང་པོ་དང༌། ཕྱེད་ཕྱི་མས་གཉིས་པ་དང༌། དེ་བཞིན་དུ་སྦྱར་ཏེ་ལྟེ་བའི་ཕྱེད་ཀྱིས་གསུམ་པ་དང༌། རིལ་པོས་བཞི་པ་དང༌། སྙིང་གའི་ཕྱེད་ཀྱིས་ལྔ་པ་དང༌། རིལ་པོས་དྲུག་པ་དང༌། མགྲིན་པའི་ཕྱེད་ཀྱིས་བདུན་པ་དང༌། རིལ་པོས་བརྒྱད་པ་དང༌། དཔྲལ་པའི་ཕྱེད་ཀྱིས་དགུ་པ་དང༌། རིལ་པོས་བཅུ་པ་དང༌། གཙུག་ཏོར་གྱི་ཕྱེད་ཀྱིས་བཅུ་གཅིག་པ་དང༌། གཙུག་ཏོར་རིལ་གྱི་གང་བས་བཅུ་གཉིས་པའོ། །ས་འདི་རྣམས་ལ་ཡོན་ཏན་ཁྱད་པར་ནི། ཕྱོགས་བཅུའི་འཇིག་རྟེན་གྱི་ཁམས་སམ་སྟོང་གཅིག་གི་འཇིག་རྟེན་གྱི་ཁམས་མ་མཐོང་བའི་དོན་ཡང་དག་པར་
མཐོང་བ་ས་དང་པོ་ཡིན་པ་ནས། དེ་འདྲ་སྟོང་དང་ཉི་ཤུ་རྩ་བཞི་མཐོང་བ་ས་བཅུ་གཅིག་པ་ཡིན་པའི་བར་དུ་ས་རེ་ལ་ཉིས་འགྱུར་བསྒྲེ་བ་ཡིན་ནོ། །ས་དེ་དག་གི་མིང་ཡང༌། གནས་དང་ཉེ་གནས་དང༌། ཞིང་དང་ཉེ་ཞི་དང༌། འདུན་པ་དང་ཉེ་བའི་འདུན་པ་དང༌། འདུས་པ་དང་ཉེ་བའི་འདུས་པ་དང༌། དུར་ཁྲོད་དང་ཉེ་བའི་དུར་ཁྲོད་དང༌། འཐུང་སྤྱོད་དང་ཉེ་བའི་འཐུང་སྤྱོད་རྣམས་སོ། །དབུགས་ཇི་ཙམ་འགག་པ་དེ་ཙམ་གྱི་གྲངས་དང་མཉམ་པའི་དཀར་ཆ་གསང་བ་ནས་གཙུག་ཏོར་གྱི་བར་དུ་བརྟན་པ་དང༌། དམར་ཆ་གཙུག་ཏོར་ནས་ནོར་བུའི་བར་དུ་བརྟན་པས། མི་འགྱུར་བདེ་བའི་སྐད་ཅིག་ཀྱང་དེ་སྙེད་ཐོབ་སྟེ། ཐོབ་ཚུལ་ནི་གང་དུ་བསྟན་པ་ལྟར་མི་འགྱུར་བའི་བདེ་བ་ཆེན་པོ་ཐམས་ཅད་ངོ་བོས་གཅིག་ཡིན་ཀྱང༌། རྣལ་འབྱོར་བའི་སེམས་ལ་འགྱུར་བ་འགག་ཚུལ་དེ་སྙེད་ཀྱིས་ཡེ་ཤེས་འཆར་ཚུལ་ཡང་དེ་ཙམ་ཞིག་བྱུང་བ་ཡིན་ནོ། །དེ་ལྟར་ན་ཉི་ཁྲི་དང་བརྒྱད་གཉིས་བརྒྱ་སྟེ་བརྒྱ་ཕྲག་བཅུ་དྲུག་ནི་བསྡོམས་པས་ཉི་ཁྲི་ཆིག་སྟོང་དྲུག་བརྒྱ་སྟེ། དེ་ཙམ་གྱི་དབུགས་འགྱུར་བ་མེད་པའི་སྐད་ཅིག་གིས་ཡེ་ཤེས་ཀྱིས་ཟོས་ཤིང་ཡེ་ཤེས་ལ་ཐིམ་པ་རྣམས་ཀྱི་རྒྱུས། ས་རྣམས་ཀྱི་རིམ་པས་ནི་མི་འགྱུར་བའི་བདེ་བ་ཡོངས་སུ་རྫོགས་པ་སྟེ། ནོར་བུར་དཀར་པོ་དང་གཙུག་ཏོར་དུ་དམར་པོ་དང༌། ཆགས་པ་དང་ཆགས་བྲལ་ལམ། དཀར་ཕྱོགས་དང་ནག་ཕྱོགས་སམ། སྲིད་པ་དང་མྱ་ངན་འདས་པའི་ཕྱོགས་གཉིས་ཡང་དག་པར་གནོན་ཞིང་སྤོང་བ་ནི། ཏིང་ངེ་འཛིན་གྱི་ཡན་ལག་གོ །སྐབས་དེར་ས་རེ་རེ་ལ་རྟེན་འབྲེལ་བཅུ་གཉིས་ལུགས་བཟློག་རེ་རེ་སྦྱར་ཏེ། རྟེན་འབྲེལ་ཡན་ལག་བཅུ་གཉིས་འགགས་པའི་བདེན་པའི་དོན་རྣམ་པ་བཅུ་གཉིས་དང་དགའ་བ་བཅུ་དྲུག་སྒྲིབ་བྲལ་དུ་གྱུར་པ། སྐུ་བཅུ་དྲུག་གི་བདག་ཉིད་ནི་དངོས་པོའི་དེ་ཁོ་ན་ཉིད་ཡིན་ལ་དེ་ཡང༌། བདེ་བའི་རྣམ་པ་བཅུ་དྲུག་འགྱུར་བ་མེད་པ་མངོན་དུ་བྱས་པ་ནི། མས་བརྟན་གྱི་དགའ་བའི་ས་བཅུ་དྲུག་ཡིན་ཏེ། དགའ་བ་རེ་རེ་ཡང་ལུས་དང་ངག་དང་སེམས་དང་ཡེ་ཤེས་ཀྱི་དབྱེ་བ་ཅན་ཡིན་པས། སྐུ་རེ་རེ་ལ་ཡང་སྐུ་དང་གསུང་དང་ཐུགས་དང་
ཡེ་ཤེས་ཀྱི་དབྱཻ་བ་ཅན་ནོ། །དེ་ཡན་ཆད་ནི་རྡོ་རྗེ་བཞིའི་སྒྲུབ་པ་རྒྱས་པར་བསྟན་པ་སྟེ། དེ་ཡང་ཡན་ལག་སྔ་མ་སྔ་མའི་ཡེ་ཤེས་རྣམས་ཀྱི་རྒྱུན། ཕྱི་མ་ཕྱི་མའི་གནས་སྐབས་ན་ཡང་ཡོད་པས། ཏིང་ངེ་འཛིན་གྱི་ཡན་ལག་མ་རྫོགས་བར་དུ་རྡོ་རྗེ་བཞིའི་སྒྲུབ་པ་ཡིན་ལ། ཏིང་ངེ་འཛིན་གྱི་མཐར་སྐུ་དང༌། གསུང་དང༌། ཐུགས་དང་ཡེ་ཤེས་གཅིག་ཏུ་འདུས་པའི་ཟུང་འཇུག་གི་སྐུ་ཐོབ་པ་ནས་བཟུང་ནས། རེ་ཤིག་སྒྲུབ་པ་ཞེས་མི་བྱ་སྟེ། སྐབས་འདིར་གྲུབ་པའི་གནས་སྐབས་སུ་འཇོག་དགོས་པ་ཡིན་པའི་ཕྱིར་རོ། །གྲུབ་པ་དེ་ཡང་གནས་སྐབས་ལ་ལྟོས་པའི་དབང་དུ་བྱས་པ་སྟེ། མི་སློབ་པ་རྫོགས་པའི་སངས་རྒྱས་ལ་ལྟོས་ན་ནི། འདི་ཡང་སྒྲུབ་པ་ཁོ་ན་ཡིན་པར་ཤེས་པར་བྱའོ། །འདིར་སྨྲས་པ། གང་གི་ཉུང་ངུའི་རྒྱུད་དོན་རྣམ་བཤད་པས། །རྒྱུད་རྒྱལ་ཆེན་པོའི་དགོངས་དོན་ཀུན་ཤེས་པ། །གླེགས་བམ་ཉུང་ངུས་འབད་མེད་དོན་ཆེན་འགྲུབ། །རྒྱུད་དོན་རིག་པའི་རྣམ་འགྱུར་ངོ་མཚར་རྨད། །ཅེས་པ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་འབྲས་བུའི་རྣམ་པར་གཞག་པ་ཞིབ་མོར་བསྟན་པ་ལ། ཐོག་མར། མངོན་པར་རྟོགས་པ་ཕྱོགས་སྨོས་པ་ཙམ་ནི་འདི་ཡིན་ཏེ། རྡོ་རྗེ་བཞིའི་རང་བཞིན་དང༌། སྐུ་བཞིའི་རྣམ་གཞག་དང༌། ཡེ་ཤེས་ཀྱི་རྣམ་དབྱེ་དང༌། འཕྲིན་ལས་འཇུག་པའི་ཚུལ་དང༌། །ཉེ་བར་སྦྱོར་བ་འཕགས་པའི་ལམ་གྱི་རྣམ་གཞག་རྣམས་སོ། །དང་པོ་ནི། བསྡུས་པའི་རྒྱུད་ཀྱི་རྒྱལ་པོ་ལས། རྒྱལ་བའི་སྐུ་ཡི་རྡོ་རྗེ་ཡུལ་དང་ཡུལ་ཅན་རྣམས་ཀྱི་བགྲོད་བྱ་མིན་པ་རྣམ་པ་ཐམས་ཅད་པ། །གསུང་གི་རྡོ་རྗེ་སེམས་ཅན་ཐམས་ཅད་རང་སྙིང་སྐད་རྣམས་དག་གིས་ཆོས་ནི་གོ་བར་བྱེད་པའོ། །རྡོ་རྗེ་ཅན་གྱི་ཐུགས་ཀྱི་རྡོ་རྗེ་སེམས་ཅན་རྣམས་ཀྱི་སེམས་ཀྱི་རང་བཞིན་མཐའ་དག་ས་ལ་གནས། །དྲི་མེད་ནོར་བུ་ལྟ་བུ་དངོས་པོ་རྣམས་ཀྱི་འཛིན་བྱེད་གང་ཡིན་དེ་ཉིད་ཡེ་ཤེས་རྡོ་རྗེའོ། །ཞེས་གསུངས་ཏེ་ཆོས་ཀྱི་དབྱིངས་ཡུལ་དང་ཡུལ་ཅན་གྱི་དབྱེ་བ་དང་བྲལ་ཡང༌། དོན་དམ་པའི་འཁོར་འདས་ཀུན་གྱི་རྣམ་པར་སྣང་བ་ནི་སྐུ་རྡོ་རྗེ་དང༌། ཆོས་དབྱིངས་དེ་ཉིད་སངས་རྒྱས་རང་སྣང་ལ་བརྗོད་བྲལ་
ཡང་ཡིན་ལ་སྒྲ་སྐད་ཐམས་ཅན་པར་རྟག་ཏུ་ཤར་བ་དེའི་མཐུ་ལས། གདུལ་བྱ་གཞན་སྣང་དུ་སེམས་ཅན་ཐམས་ཅད་ཀྱི་རང་རང་གི་སྐད་དང༌། རང་རང་གི་བློ་དང་མཚམས་པར་ཆོས་ཀྱི་སྒྲ་དབྱངས་ཆེན་པོ་འབྱུང་བ་ནི་གསུང་རྡོ་རྗེ་དང༌། ཆོས་ཉིད་དེ་སེམས་ཅན་ཐམས་ཅད་ཀྱི་སེམས་ལ་དངས་མའི་ཚུལ་གྱིས་བཞུགས་པས། ས་གཞི་མཐའ་དག་སྟེ་ཤེས་བྱ་མཐའ་དག་ལ་ཇི་ལྟ་བ་དང་ཇི་སྙེད་པའི་རྟོགས་ཚུལ་རྣམ་པ་གཉིས་རྟག་ཏུ་འབྱུང་བ་ནི་ཐུགས་རྡོ་རྗེ་དང༌། ཆོས་དབྱིངས་དེ་ཉིད་རང་བཞིན་བདེ་བ་ཆེན་པོར་གནས་པས། འཁོར་འདས་ཀྱི་དངོས་པོ་ཐམས་ཅད་དང་རྣམ་ཆ་མཚུངས་པས་ཐམས་ཅད་ཀྱི་མཚན་ཉིད་འཛིན་པར་བྱེད་པ་ཞེས་བྱ་སྟེ། མདོར་ན་རྣམ་པ་ཐམས་ཅད་པ་འཛིན་པས་ཁྱད་པར་དུ་བྱས་བའི་བདེ་བ་འགྱུར་མེད་དེ་ནི་ཡེ་ཤེས་རྡོ་རྗེའོ། །དེ་ཡང་གཞི་གདོད་མའི་གནས་ལུགས་ཆོས་ཉིད་མི་འགྱུར་བའི་ཐིག་ལེ་བཞི་ནི། རྡོ་རྗེ་བཞི་དངོས་ཡིན་ཞིང༌། ཆོས་ཉིད་རང་ངོས་ནས་དག་པ་གཉིས་ལྡན་གྱི་ཆོས་ཉིད་ལ་རྟག་ཏུ་གནས་པ་སྟེ། དེ་ཉིད་སྔར་བྱོན་པའི་སངས་རྒྱས་རྣམས་ཀྱིས་རྟག་ཏུ་ཐོབ་པ་ཞེས་བྱ་ལ། སྐྱེས་བུ་ཞིག་ད་ལྟར་གསར་དུ་སངས་རྒྱས་ཐོབ་པར་འགྱུར་ན། ཆོས་ཉིད་དེ་སྐྱེས་བུ་དེ་ལ་བལྟོས་ནས་ནི་སངས་རྒྱས་མ་ཐོབ་བར་དུ་རང་བཞིན་རྣམ་དག་ཁོ་ན་ཡིན་ལ། སངས་རྒྱས་ཐོབ་པ་ནས་བརྩམས་ཏེ་ནི་དེ་ཉིད་ལ་བལྟོས་ནས་ཀྱང༌། དག་པ་གཉིས་ལྡན་ཁོ་ནའོ། །ཆོས་ཉིད་ཀྱི་ཐིག་ལེ་བཞི་ཞེས་བྱ་བ་ཡང་མཚན་ཉིད་ཀྱི་སྒོ་ནས་ལྡོག་ཆས་ཕྱེ་བ་ཡིན་ཏེ། དེ་དག་ལ་ངོ་བོའི་སྒོ་ནས་དབྱེ་བ་ཅུང་ཟད་ཀྱང་མེད་ལ། དོན་དམ་པར་གཅིག་དང་དུ་མའི་མཐའ་ཀུན་ལས་གྲོལ་བ་ཡིན་ཀྱང༌། ཐ་སྙད་འཇོག་པའི་ཚེ་ཐིག་ལེ་བཞི་ཡང་ངོ་བོ་གཅིག་གོ་ཞེས་རྣམ་གཞག་བྱའོ། །འདི་ནི་སྐུ་བཞི་སོགས་འོག་ཏུ་འཆད་པ་རྣམས་ལ་ཡང་རིགས་འགྲེའོ། །གཉིས་པ་ནི་རྒྱུད་ལས། ཤེས་རབ་མ་ཡིན་ཐབས་ཀྱང་མིན་པ་འདི་ནི་ལྷན་ཅིག་སྐྱེས་པའི་སྐུ་སྟེ་ཆོས་ཀྱི་སྐུར་གྱུར་པ། །ཤེས་རབ་ཐབས་ཀྱི་རང་བཞིན་
ངེས་པར་མུན་པ་དང་བྲལ་ཡེ་ཤེས་དང་ནི་རྣམ་ཤེས་དབྱེ་བ་ལས། །འདི་ནི་ལོངས་སྤྱོད་རྫོགས་པའི་སྐུ་སྟེ་སྒྲ་བརྙན་ལྟ་བུ་སེམས་ཅན་དུ་མའི་དོན་ནི་བྱེད་པ་པོ། །སེམས་ཅན་རྣམས་ནི་སྨིན་པའི་སླད་དུ་སླར་ཡང་འདི་ནི་སངས་རྒྱས་རྣམས་ཀྱི་སྤྲུལ་པའི་སྐུ་རུ་འགྱུར། ཞེས་ཏེ། དེ་ལ་ཤེས་རབ་ནི་དངོས་པོ་མེད་པ་སྟེ་ནག་ཕྱོགས་དང༌། ཐབས་ནི་དངོས་པོའི་རང་བཞིན་གྱི་ཕྱིར་དཀར་ཕྱོགས་ཡིན་ལ། ཡེ་ཤེས་ཀྱི་སྐུ་ལ་དོན་དམཔའི་ཐིག་ལེ་དཀར་པོ་ནི་རྟག་ཏུ་ཉ་གང་གང་བར་གནས་པས། ཤེས་རབ་མ་ཡིན་ཞིང༌། དོན་དམ་པའི་རྡུལ་གྱི་ཐིག་ལེ་རྟག་ཏུ་གནམ་སྟོང་ཁོ་ན་ལ་གནས་པས། ཐབས་ཀྱང་མ་ཡིན་ནོ། །དཀར་ཕྱོགས་དང་ནག་ཕྱོགས་ཐམས་ཅད་ལ་རྟག་ཏུ་དེ་དག་ཆོས་ཉིད་ཀྱི་ཚུལ་གྱིས་ཁྱབ་པའང་ཡིན་ཏེ། དེའི་ཕྱིར་ཡོད་པ་དང་མེད་པ་དང༌། གཉིས་ཀ་དང་གཉིས་མིན་ཏེ། མཐའ་བཞི་ལས་གྲོལ་བའི་བདེ་ཆེན་རྣམ་པ་ཐམས་ཅད་པ་དེ་ནི་ལྷན་ཅིག་སྐྱེས་པ་བདེ་བ་ཆེན་པོའི་སྐུ་ཡིན་ལ་དེ་ཉིད། སྐུ་གཞན་གསུམ་ཆར་ལ་ཁྱབ་བྱེད་དུ་འཇུག་པ་པོ་ཡིན་ཞིང་བཞི་པའི་གནས་སྐབས་སྤངས་པ་ལས་མངོན་དུ་འགྱུར་བ་དང༌། རྒྱུ་མཐུན་པའི་མཚན་ཉིད་ཅན་ཏེ་རང་དོན་ཕུན་སུམ་ཚོགས་པའོ། །ཤེས་རབ་དང་ཡེ་ཤེས་དང་སེམས་ཉིད་དེ་ཡུལ་ཅན་བདེ་བ་ཆེན་པོ་དང༌། ཐབས་དང་རྣམ་ཤེས་སྙིང་རྗེ་སྟེ་ཡུལ་སྟོང་གཟུགས་གཉིས་རོ་གཅིག་ཏུ་འདྲེས་པ་ལས་ཐ་མལ་གྱྀ་གཟུང་འཛིན་ནི་ཡུལ་ཡུལ་ཅན་ཟད་ཅིང༌། དོན་དམ་པའི་ཡེ་ཤེས་དང་རྣམ་ཤེས་དེ་དག་གཟུང་འཛིན་ཐམས་ཅད་ཀྱི་མཚན་ཉིད་འཛིན་པ་ནི། མུན་པ་ཀུན་གཞི་རྣམ་ཤེས་དང་བྲལ་བའི་འབྲས་བུ་སྟེ། འདི་ནི་གཞན་དོན་བྱེད་པ་པོ་ཆོས་ཀྱི་སྐུ་ཞེས་བྱ་བ་གཉིད་འཐུག་གི་གནས་སྐབས་ཟད་པ་ལས་བྱུང་བ། རྣམ་པར་སྨིན་པའི་མཚན་ཉིད་ཅན་ནོ། །ཚུལ་ཇི་ལྟ་བུས་གཞན་དོན་ལ་འཇུག་པའི་བྱེད་པ་ནི་རབ་ཏུ་དང་བའི་གཟུགས་བརྙན་གྱི་སྐུ་དང༌། སྒྲ་དབྱངས་རྒྱ་མཚོ་སྒྲ་བརྙན་གྱི་གསུང་གིས་གདུལ་བྱ་གཞན་སྣང་དུ་སྐུ་དང་
གསུང་གི་སྣང་བ་མཐའ་ཡས་པ་སྟོན་པའི་རྒྱུ་སྟེ། ཤེས་བྱ་ཐམས་ཅད་གཟིགས་པའི་མཚན་ཉིད་ཅན་འདི་ནི། རྨི་ལམ་གྱི་གནས་སྐབས་ཟད་པ་དང༌། ཁམས་སྟེང་དུ་ལོག་པའི་འབྲས་བུ་ལོངས་སྤྱོད་རྫོགས་པའི་སྐུ་སྟེ་སྐྱེས་བུ་བྱེད་པའོ། །འདིའི་དོན་འཆད་པ་ན་དྲི་མ་མེད་པའི་འོད་ལས། ལྷའི་མིག་དང་ལྷའི་རྣ་བ་ཞེས་སྨོས་པས། གཟུང་འཛིན་གཞན་ཞེས་བྱ་བ་དོན་དམ་པ་གཉིས་དབྱེར་མེད་དུ་འདྲེས་པ་དང༌། སངས་རྒྱས་རང་སྣང་ཡིན་པར་སྟོན་པའི་ཚིག་གོ །སྐུ་དེ་རྣམས་ཉིད་ཀྱི་ཤེས་རབ་གཅིག་དང་ཐབས་དུ་མ་དོན་དམ་པར་སྦྱོར་བ་སྟེ། རྒྱུད་གཅིག་ཉིད་ལས་སྤྲུལ་པ་སྣ་ཚོགས་པས་འགྲོ་བའི་དོན་སྤྱོད་པའི་རྒྱུ་དམིགས་པ་མེད་པའི་སྙིང་རྗེ་རྣམ་པ་ཐམས་ཅད་པར་འཆར་བའི་ཡེ་ཤེས་དེ་ནི། སད་པའི་གནས་སྐབས་སྤངས་པའི་འབྲས་བུ་སྤྲུལ་པའི་སྐུ་སྟེ་དྲི་མ་དང་བྲལ་བ་ཡིན་ལ། དེའི་ལས་ནི་གཞན་སྣང་དུ་སྤྲུལ་པ་སྣ་ཚོགས་པས་འགྲོ་བའི་དོན་སྤྱོད་པ་ཉིད་དོ། །འདིར་ཤེས་རབ་མ་ཡིན་ཐབས་ཀྱང་མིན་ཞེས་པ་དང༌། ཤེས་རབ་ཐབས་ཀྱི་རང་བཞིན་ཞེས་སོགས་ཀྱིས་དོན་རྒྱས་པར་འཆད་པ་ནི། དབང་མདོར་བསྟན་གྱི་གཞུང་འདི་ཉིད་ལས། རྟེན་དང་བརྟེན་པ་ལེགས་རྫོགས་པ། །ཞེས་པ་ལ་སོགས་པས། སྐུ་དང་ཡེ་ཤེས་ཟུང་འཇུག་དང༌། སྟོང་པ་ལས་བྱུང་གཟུགས་བརྙན་སོགས་ཀྱིས་བདེ་སྟོང་ཟུང་འཇུག་དང༌། རྒྱུ་ནི་འབྲས་བུས་རྒྱས་བཏབ་སོགས་ཀྱིས་རྒྱུ་འབྲས་ཟུང་འཇུག་དང༌། སྟོང་ཉིད་གཟུགས་བརྙན་འཛིན་པ་སོགས་སྟོང་ཉིད་སྙིང་རྗེར་ཟུང་འཇུག་དང༌། མྱ་ངན་འདས་པ་བྲལ་བ་ཞེས་སོགས་དང༌། གཟུགས་ནི་སྲིད་པར་མི་འོང་སོགས་ཀྱིས་འཁོར་འདས་ཟུང་འཇུག་དང༌། དངོས་མེད་ལས་བྱུང་སོགས་དངོས་མེད་ཟུང་འཇུག་དང༌། གཟུགས་དང་གཟུགས་མིན་ཞེས་སོགས་སྟོང་པ་དང་གཟུགས་ཟུང་འཇུག་དང༌། སྐྱེ་བ་མེད་ཅིང་སོགས་ཀྱི་ཡུལ་ཡུལ་ཅན་ཟུང་འཇུག་དང༌། ཤེས་རབ་མ་ཡིན་ཐབས་ཀྱང་མིན། །ཞེས་སོགས་དང༌། ཕན་ཚུན་འཁྱུད་པ། ཞེས་སོགས་སྔ་ཕྱི་
མང་པོས་ཐབས་ཤེས་ཟུང་འཇུག་སྟེ། དེ་ཡང་གཉིས་སུ་མེད་པའི་ཡེ་ཤེས་ཀྱི་སྐུ་དང༌། ཡང་དག་པར་སྦྱོར་བའི་ཡེ་ཤེས་དང༌། རྡོ་རྗེ་སེམས་དཔའ་མ་ནིང་གི་གོ་འཕང་རྣམས་ཟུང་འཇུག་གི་མཚན་གྱི་རྣམ་གྲངས་ཡིན་ནོ། །དེ་ལྟར་ན་རྡོ་རྗེ་བཞི་དང་སྐུ་བཞི་ངོ་བོ་གཅིག་ཏུ་འདུས་པ་ནི་རྣམ་པ་ཀུན་གྱི་མཆོག་དང་ལྡན་པའི་སྐུ་དང༌། མི་འགྱུར་བའི་བདེ་བ་ཐུགས་ཟུང་འཇུག་གི་མཚན་ཉིད་ཅན་ཏེ། དེ་ལ་ཟུང་འཇུག་གི་དོན་གཉིས་མེད་རོ་མཉམ་ལ་འཇོག་ཅིང༌། དེ་ལས་གཞན་གང་ཡང་རུང་བའི་ཆོས་གཉིས་དབྱེར་མེད་ངོ་བོ་གཅིག་ཏུ་མ་གྱུར་ན། དུས་སྤེལ་མའམ་དུས་གཅིག་ཏུ་ཚོགས་པ་ཙམ་ནི་ཟུང་འབྲེལ་གྱི་དོན་ཡིན་གྱི་ཟུང་འཇུག་མ་ཡིན་ནོ། །ཡང་ཆོས་གང་དེ་དངོས་སུ་ན་ཟུང་འབྲེལ་ཡིན་ཀྱང༌། ཟུང་འཇུག་རྟོགས་པའི་ཐབས་སུ་འགྱུར་ན་འབྲེལ་བའི་སྒོ་ནས་དེའི་ཐ་སྙད་འདོགས་པའང་རུང་མོད་ཀྱི། ཏིང་ངེ་འཛིན་གྱི་ས་བཅུ་གཉིས་རྫོགས་པ་ཡན་ཆད་ཀྱི་ལམ་དང་འབྲས་བུའི་ཟུང་འཇུག་ནི། རྗེས་མཐུན་པ་ཟུང་འབྲེལ་ཙམ་མ་ཡིན་གྱི་དབྱེར་མེད་ཀྱི་ཟུང་འཇུག་ཡིན་ལ། ཏིང་ངེ་འཛིན་ཐོབ་ནས་མ་རྫོགས་བར་དུ། མི་འགྱུར་བའི་ཐིག་ལེར་སོང་བ་རྣམས་ནི་ཟུང་འཇུག་ཡིན་ལ། སླད་ཀྱིས་འགྲོ་རྒྱུའི་རྣམས་ནི་ཟུང་འབྲེལ་གྱི་མཚན་ཉིད་ཅན་ནོ་ཞེས་རྣམ་གཞག་བྱ་མོད་ཀྱི། རྣམ་པར་དཔྱད་ན་ནི་དེ་འདྲ་དེ་གནས་ཚུལ་ལ་ཐམས་ཅད་ཟུང་འཇུག་ཡིན་ཀྱང༌། རྣལ་འབྱོར་པའི་བློ་ངོ་ལ་ཟུང་འཇུག་དང་ཟུང་འབྲེལ་འདྲེས་མར་སྣང་བ་ཡིན་ནོ། །དེ་ལ་གཉིས་ཆོས་སྤངས་ཚུལ་ཡང༌། དེ་ལྟ་བུ་ལ་ངོ་བོའི་སྒོ་ནས་རྒྱུ་འབྲས་ཀྱི་དབྱེ་བ་མེད་དེ། རྟག་ཏུ་ངོ་བོ་གཅིག་པར་གནས་པའི་ཕྱིར་དང༌། རྒྱུ་འབྲས་དངོས་ཡིན་ན་འདུས་བྱས་ཡིན་པས་ཁྱབ་པ་ལས། གཉིས་མེད་འདི་ནི་འདུས་མ་བྱས་ཡིན་པའི་ཕྱིར་རོ། །འདིར་ངོ་བོའི་སྒོ་ནས་དབྱེ་བ་མེད་ཀྱང༌། རྣམ་པ་ཐམས་ཅད་པའི་ལྡོག་པ་ནས་རྒྱུ་རྣམས་ཀྱི་དང༌། བདེ་བའི་ལྡོག་པ་ནས་འབྲས་བུ་རྣམས་ཀྱི་ཆོས་ཉིད་དུ་གནས་པས་སྟོང་ཉིད་རྒྱུ་དང་བདེ་བ་འབྲས་བུར་བཞག་ལ། དོན་དུ་ཡོད་པ་དང་བདེ་བ་གཉིས་ཆར་རྒྱུ་འབྲས་གཉིས་ཀྱི་ཆོས་ཉིད་དོ། །ཡང་རྟོགས་བྱེད་ལམ་རྒྱུ་འབྲས་ཡིན་པའི་སྒོ་ནས་ཀྱང་
སྟོང་པ་དང་བདེ་བ་རྒྱུ་འབྲས་སུ་འཇོག་པས་རྒྱུ་འབྲས་ཀྱི་རྒྱས་བཏབ་ཅན་དང་རྒྱས་བཏབ་མེད་པའི་ཚུལ་གཉིས་འགལ་མེད་དུ་གྲུབ་པ་ཡིན་ནོ། །དེ་བཞིན་དུ་རང་བཞིན་གཉིས་སུ་མེད་ཅིང་ཐམས་ཅད་རོ་མཉམ་པའི་ཕྱིར། དུ་མ་དང་བྲལ་བས་གནས་སྐབས་སུ་ཟུང་འཇུག་དེ་ལ་གཅིག་པུ་ཡིན་པའི་ཐ་སྙད་སྦྱར་གྱི། ངེས་པར་ན་གཅིག་དང་དུ་མ་དང༌། ཡུལ་ཡུལ་ཅན་དང༌། ཡོན་མེད་ཡིན་མིན་ཐམས་ཅད་ལས་འདས་པའོ། །དེ་བཞིན་དུ་ཟུང་འཇུག་རང་གི་ངོ་བོ་འཁོར་འདས་ལས་འདས་པ་ཡེ་གདོད་མ་ནས་གྲུབ་ཚུལ་དང༌། ལམ་ཟུང་འཇུག་གིས་འཁོར་འདས་ཀྱི་མཐའ་སྤོང་ཚུལ་རྣམས་ཀྱང་ཤེས་དགོས་ཏེ་འོག་ཏུ་འཆད་དོ། །དེ་ལྟ་བུའི་ཟུང་འཇུག་གི་རང་བཞིན་ལ་ལྡོག་ཆ་སོ་སོའི་དབང་དུ་བྱས་ནས་ཐུགས་བདེ་སྟོང་གི་ཡེ་ཤེས་ཡིན་པའི་ཆ་རྒྱས་པར་འཆད་པ་ནི། མཆོད་ཆེན་དྲུག་པོ་རྣམས་ཏེ། དེ་ལ་ཡང་རྣམ་ཀུན་མཆོག་ལྡན་ཚང་བར་བསྟན་ལ། སྐུ་རྣམ་པ་ཐམས་ཅད་པའི་ལྡོག་ཆས་རྒྱས་པར་འཆད་པ་ནི། དོན་དམ་རྡོ་རྗེ་དབྱིངས་ཀྱི་དཀྱིལ་འཁོར་རྒྱས་པར་བཤད་པའི་སྐབས་རྣམས་ཏེ། རྣམ་པ་ཐམས་ཅད་པ་ཉིད་ཀྱི་ཕྱིར། བསམ་གྱིས་མི་ཁྱབ་པའི་དཀྱིལ་འཁོར་དུ་གནས་པ་ཡིན་ནོ། །རྣམ་པ་ཐམས་ཅད་པ་དེ་ཡང་བདེ་བའི་རྒྱས་བཏབ་ཅན་གྱི་ཕྱིར། མི་འགྱུར་བའི་རང་བཞིན་དུ་བསྟན་ཞིང༌། མི་འགྱུར་བ་དེ་ཉིད་ཉོན་མོངས་རྒྱ་མཚོའི་ཆོས་ཉིད་དུ་གནས་ཞིང་ཉོན་མོངས་ཟད་པར་བྱེད་པ་ཡང༌། མཆོད་ཆེན་དྲུག་གི་དོན་ཡིན་ནོ། །དབྱིངས་དེས་ཉོན་མོངས་ཟད་པར་བྱེད་ན་ཐམས་ཅད་འབད་མེད་དུ་གྲོལ་བར་ཐལ་སྙམ་ན། གཉེན་པོ་དངོས་རྣམས་ཀུན་རྫོབ་པ་ཡིན་ཞིང་དབྱིངས་དེས་ཀུན་རྫོབ་ཀྱི་བྱ་བ་མི་བྱེད་ཀྱང་ཉོན་མོངས་ཟད་མཐའ་ཡིན་པ་དང༌། གཉེན་པོ་ཡང་དབྱིངས་ཀྱི་ནུས་པ་ལས་བྱུང་བས་དེར་གཞག་པའོ། །དེ་ལ་ལྷན་ཅིག་སྐྱེས་དང་སྐུ་གཉིས་སྡོམ་པ་ནི་ཐུགས་བདེ་ཆེན་དང༌། ལོངས་སྤྲུལ་གཉིས་སྡོམ་པ་ནི་སྐུ་རྣམ་པ་ཐམས་ཅད་པ་སྟེ། དོན་དུ་སྐུ་བཞི་དབྱེར་མེད་ནི་དེ་ལྟ་བུའི་ཚུལ་གྱི་ཟུང་འཇུག་ཡིན་ལ། ཐབས་ཤེས་རྒྱས་བཏབ་ཀྱི་སྒོ་ནས་སྐུ་རེ་རེ་ལ་ཡང་ཟུང་འཇུག་གི་ལྡོག་ཆ་ཚང་བའི་རྣམ་གཞག་ཤེས་དགོས་སོ། །གསུམ་པ་
ནི། བསྡུས་པའི་རྒྱུད་ཀྱི་རྒྱལ་པོ་ལས། གང་དུ་ངེས་པར་རིགས་ཀྱི་གཟུགས་ནི་ཉམས་པ་ཉིད་དུ་གྱུར་པ་དེ་ནི་ཆེན་པོའི་གཟུགས་སུ་གསུངས། །གང་དུ་འཁོར་བའི་སྡུག་བསྔལ་ཉམས་པ་ཉིད་དུ་གྱུར་པ་དེ་ནི་ཚོར་བ་ཆེན་པོར་གསུངས་པ་སྟེ། །གང་དུ་འཁོར་བའི་འདུ་ཤེས་ཉམས་པ་ཉིད་དུ་གྱུར་པ་དེ་ནི་རྡོ་རྗེ་འདུ་ཤེས་ཆེན་པོའོ། །གང་དུ་འཁོར་བའི་འཕེལ་པ་ཉམས་པ་ཉིད་དུ་གྱུར་པ་དེ་ནི་རྡོ་རྗེ་འདུ་བྱེད་ཁོ་ནའོ། །གང་དུ་གཉིད་ལ་སོགས་པའི་གནས་སྐབས་ཉམས་པ་ཉིད་དུ་གྱུར་པ་དེ་ཡང་རྣམ་པར་ཤེས་པར་གསུངས། །གང་དུ་ཤེས་པ་མིན་པའི་དངོས་པོ་ཉམས་པ་ཉིད་དུ་གྱུར་པ་དེ་ནི་ཐུབ་པའི་ཡེ་ཤེས་ཉིད། །ཅེས་པ་ལ་སོགས་པ་ཕུང་པོ་དྲུག་དང༌། འབྱུང་བ་དྲུག་གི་བདག་ཉིད་ཉོན་མོངས་རྣམས་དང༌། དབང་པོ་དྲུག་ལ་སོགས་པའི་ཆོས་ཉིད་གདོད་མའི་ཡེ་ཤེས་མེ་ལོང་ལྟ་བུ་ལ་སོགས་པ་ཡེ་ཤེས་དྲུག་གམ་ལྔ་སྟེ། དེ་ཡང་ཆོས་ཀྱི་དབྱིངས་ཀྱི་ཡེ་ཤེས་ལ། སྟོང་པའི་ཕྱོགས་མཁའ་ཁམས་དང༌། བདེ་བའི་ཕྱོགས་ཡེ་ཤེས་ཀྱི་ཁམས་སུ་བཞག་པ་གཉིས་སོ་སོར་དབྱེ་བས་དྲུག་དང༌། དེ་གཉིས་གཅིག་ཏུ་བསྡོམས་པས་ལྔ་ཡིན་ལ། དེ་རྣམས་ཐམས་ཅད་ཀྱང་རྣམ་པར་ཤེས་པའི་ཡུལ་ལས་འདས་ཤིང་ཡེ་ཤེས་ཁོ་ནའི་སྤྱོད་ཡུལ་ལོ། །གཞན་ཡང་རྒྱུད་ལས། གཙོ་བོའི་སྐུ་ཡི་མཐུ་ལས་རྣལ་འབྱོར་པ་རྣམ་དག་གི་མཆོག་གི་ལུས་ལ་ལྷའི་སྤྱན་དུ་འགྱུར་ཞེས་པ་ལ་སེམས་པ་རྩ་དྲུག་དག་པས། མངོན་པར་ཤེས་པ་དྲུག་ཏུ་འགྱུར་བ་ལ་སོགས་པ། རྒྱ་ཆེར་གསུངས་ཏེ་བསྡུས་པའི་རྒྱུད་ཆེན་པོ་ཉིད་དུ་རྟོགས་པར་བྱའོ། །བཞི་པ་ནི་རྒྱུད་ལས། ཕུང་པོ་ལྔའི་རང་བཞིན་རྣམས་ཀྱི་རྡོ་རྗེ་བཙུན་མོའི་བྷ་ག་རྣམས་ལ་བཞུགས་པ་བརྩེ་བ་ཡིས། །ངེས་པ་རྣམ་པར་མ་སྒྲུབ་བསོད་ནམས་བསགས་པ་མིན་པའི་སེམས་ཅན་རྣམས་ནི་སྨིན་པའི་དོན་དུ་སྟེ། །གཙང་མའི་གནས་ལ་སོགས་པར་བཅོམ་ལྡན་གང་ཞིག་རྣམ་པར་བཞུགས་པ་ཉན་ཐོས་རྣམས་ཀྱི་སླད་དུའོ། །གང་ཞིག་ཨེ་བཾ་ཡི་གེ་ལ་གནས་མཆོག་གི་ངེས་པ་ཅན་རྣམས་མཆོག་ལ་འགོད་པའི་དོན་དུའོ། །ཞེས་དང༌། དོན་གཅིག་དུ་མའི་ཀྱང་ནི་རང་རང་དངོས་པོ་རྣམས་ཀྱིས་སྲོག་ཆགས་རྣམས་ཀྱི་སྙིང་ལ་རབ་ཏུ་འཇུག །གནས་ཅན་རྣམས་ཀྱིས་བསོད་ནམས་སླད་དུ་འཁོར་ལོར་གནས་ལ་བསོད་སྙོམས་ལ་ནི་རྣམ་པར་རྒྱུ་རུ་གཤེགས། །ཞེས་དང༌། སངས་རྒྱས་རྣམས་ཀྱིའང་རྟོགས་བྱ་མིན་པ་དཔག་མེད་ཡོན་ཏན་དང་ལྡན་སངས་
རྒྱས་སྤྲུལ་པ་རྒྱུ་མ་ནི། །སྲིད་པ་གསུམ་གྱི་གནས་སུ་བདག་ཉིད་སྟོན་པར་བྱེད་དེ་བརྒྱ་བྱིན་དྲ་བ་ཇི་བཞིན་ཉིད་དུའོ། །ཞེས་གསུངས་ཏེ། སོ་སྐྱེ་ཕལ་པ་རྣམས་དང༌། ཉན་རང་ཐེག་ཆེན་ལ་ཉུགས་པ་རྣམས་དང༌། ཡང་དག་པར་སྦྱངས་པའི་བྱང་ཆུབ་སེམས་དཔའ་རྣམས་ཀྱི་དོན་དུ། ཛམྦུའི་གླིང་དང༌། གནས་གཙང་མ་ཆེན་པོ་དང༌། འོག་མིན་སྟུག་པོ་བཀོད་པ་ལ་སོགས་པ་དག་པའི་ཞིང་རྣམས་སུ། སངས་རྒྱས་འབྱུང་བ་དང༌། གསུང་དང་སྐུ་རྣམ་པ་ཐམས་ཅད་པ་དང༌། བརྟན་གཡོ་ཐམས་ཅད་ཀྱི་རྣམ་པས་སེམས་ཅན་ཀྱི་དོན་སྤྱོད་པའི་འཕྲིན་ལས་རྒྱ་ཆེར་འབྱུང་བ་ཡིན་ནོ། །ལྔ་པ་ནི། །ལམ་ཡན་ལག་དྲུག་རེ་རེ་ནས་མཚན་ཉིད་ཚང་བ་དྲུག་པོ་ཆ་ཚང་བ་མ་ཐོབ་ཀྱི་བར་དུ། འབྲས་བུ་གཉིས་སུ་མེད་པའི་ཡེ་ཤེས་ཀྱི་སྐུའམ། ཟུང་འཇུག་མ་ཐོབ་པ་ཞེས་བྱ་ལ། དེ་ཐོབ་ནས་དེ་ཡང་ཐོབ་པ་དང་གྲུབ་པ་ཞེས་བྱ་ཞིང༌། དེ་ཉིད་ཟུང་འཇུག་ཆུང་ངུ་དང་ཙམ་པོ་ཡིན་ཏེ། ཏིང་ངེ་འཛིན་གྱི་ས་བཅུ་གཉིས་མ་རྫོགས་བར་གྱི་ལམ་རྣམས་དེ་ཐོབ་པའི་ཕྱིར་དུ་སྒོམ་པ་ཙམ་ཡིན་པས། ལམ་དེ་རྣམས་ལམ་འབྲས་གཉིས་ཀྱིས་ཟླས་ཕྱེ་བའི་འབྲས་བུའི་གནས་སྐབས་སུ་ནམ་ཡང་མི་འཇོག་པར། ལམ་དུས་ཁོ་ནའི་ཐ་སྙད་བྱེད་ལ། ཟུང་འཇུག་ཆུང་ངུ་དེ་ལ་ནི་འབྲས་བུའི་གནས་སྐབས་དང༌། ལམ་གྱི་གནས་སྐབས་ཀྱི་ལྡོག་པ་གཉིས་ཀ་ཡོད་པས་རེས་འགའ་འབྲས་བུ་དང་ཕལ་ཆེར་ལམ་དུ་བཤད་ཅིང༌། གཉིས་སུ་མེད་པའི་སྐུའི་ཟུང་འཇུག་ཆེན་པོ་མི་སློབ་པའི་གནས་སྐབས་ནི། འབྲས་དུས་ཁོ་ན་ཡིན་གྱི། ལམ་གྱི་གནས་སྐབས་སུ་ནམ་ཡང་མི་འཇོག་གོ །ཟུང་འཇུག་ཆུང་ངུ་དེ་ཐོབ་ནས་དེ་ཕྱིན་ཆད། ཆེན་པོ་ཁོ་ན་ཐུན་མོང་མ་ཡིན་པའི་ཐོབ་བྱར་བྱེད་དགོས་པའི་ཕྱིར། ཟུང་འཇུག་ཆེན་པོ་ཐོབ་བྱེད་ཀྱི་ལམ་ནི་ཆུང་ངུ་དེ་ཡིན་ནོ། །དེ་ཡང་མ་བརྟགས་མ་དཔྱད་པའི་རྣམ་གཞག་ཙམ་ཡིན་གྱི། ཤིན་ཏུ་དཔྱད་ན་གནས་ལུགས་དོན་དམ་པའི་ཟུང་འཇུག་ནི། ཆེན་པོ་ཁོ་ནར་ངེས་པའི་ཕྱིར་དང༌། ཆུང་ངུ་ནི་ལམ་གྱི་རྟོགས་པས་རབ་ཏུ་བྱེ་བའི་ཕྱིར་ནི། རྟོགས་བྱ་ནི་ཟུང་འཇུག་ཆེན་
པོ་དེ་ཁོ་ན་ཡིན་ཡང༌། རྣལ་འབྱོར་པས་ནི། དེ་ཡི་ཁྱད་པར་ཅུང་ཟད་ཙམ་རྟོགས་ལ། ཅི་རིགས་པར་ནི་མ་རྟོགས་པའི་ལམ་གྱི་ཤེས་པ་དེ་ཉིད་ཟུང་འཇུག་ཆུང་ངུ་བཞག་པ་ཡིན་ཞིང༌། དེ་ལ་དབྱེ་ན་འཕགས་པའི་ས་བཅུ་གཅིག་གམ་བཅུ་གཉིས་སོ། །དེ་ཡང་ཏིང་ངེ་འཛིན་གྱི་ས་བཅུ་གཉིས་ཉེ་རྒྱུའི་མངོན་བྱང་དང་བཅས་པ་ནི། བསྡུས་པའི་རྒྱུད་ཀྱི་རྒྱལ་པོ་ལས། སྲོག་དང་ཐུར་སེལ་འགགས་པར་གྱུར་ན་རི་བོང་འཛིན་པའི་བསྐྱོད་པ་ཉི་མའི་གཟུགས་སུ་རབ་ཏུ་འགྱུར། །རྡོ་རྗེ་པདྨས་རབ་ཏུ་སད་ན་སླར་ཡང་འདི་ནི་ཉི་མའི་གཟུགས་ཀྱི་མེ་ལྕེས་ཞུ་བར་བྱེད། །རླུང་དང་ཟླ་བ་ཉི་མ་འགགས་པར་གྱུར་ན་རྣམ་པར་ཤེས་པ་དང་ནི་ཡེ་ཤེས་གཅིག་ཏུ་འགྱུར། །དེ་ལྟར་དེ་ལྟར་དང་ནི་དེ་བཞིན་དེ་ལྟར་རྣམ་གསུམ་དུ་འགྱུར་གཞན་ནི་ཅུང་ཟད་ཡོད་མ་ཡིན། །ཞེས་སྲོག་ཐུར་འགགས་པས་ཐིག་ལེ་ཞུ་བ་སྟོང་གཟུགས་སུ་འགྱུར་བ་དང༌། ཡང་རྗེས་སུ་ཆགས་པའི་རྐྱེན་གྱིས་སྟོང་གཟུགས་ཐིག་ལེའི་གཏུམ་མོ་དེ་འབར་བས་ཞུ་བདེ་འདྲེན་པ་དང༌། མཐར་དཀར་དམར་རླུང་གསུམ་གྱི་བགྲོད་པ་རེ་འགགས་པས། དེ་ལ་བལྟོས་པའི་གཟུང་འཛིན་དང་རྟེན་དང་བརྟེན་པའི་དབྱེ་བ་ཟད་པར་འགྱུར་ཏེ། ཚུལ་དེ་རྫོགས་པ་ན་རང་རྒྱུད་ཀྱིས་བསྡུས་པ་ལ། ཡེ་ཤེས་ཀྱི་སྐུ་ཁོ་ན་ལས་གཞན་གཟུང་འཛིན་དངོས་པོ་རགས་པ་ཅུང་ཟད་ཀྱང་མེད་པའོ། །ཡང་རྒྱུད་ལས། ཟླ་བ་ཉི་མའི་གཟུགས་ནི་ཟོས་ན་མཁའ་ལ་ཉིན་མོ་དང་ནི་མཚན་མོ་ནམ་ཡང་མིན་པ་ཉིད། ཐུན་མཚམས་དེ་ནི་རྣལ་འབྱོར་རྣམས་ཀྱི་ལས་ཀྱི་དབུས་སུ་དུས་ཀུན་བདུད་རྩིའི་གོ་འཕང་ལ་གནས་པའོ། །ཞེས་པས་ཟུང་འཇུག་ཆུང་ངུའི་ཉེ་རྒྱུ་ཏིང་ངེ་འཛིན་གྱི་ས་བཅུ་གཉིས་པར། འབྱུང་རྒྱུའི་མངོན་བྱང་འོག་མ་བསྟན་ཏོ། །བདུད་རྩིའི་གོ་འཕང་ཞེས་པ་ནི། འཆི་བ་མེད་པའི་གོ་འཕང་སྟེ། དེ་ལྟར་མ་དག་པའི་ལུས་གནས་གྱུར་ཏེ། ཡེ་ཤེས་ཀྱི་སྐུར་གྱུར་པ་ལ་འཆི་སྲིད་མི་འབྱུང་བའི་དོན་ནོ། །ཡང་འདི་ལྟར། ཟླ་བ་ཉི་མའི་རྒྱུ་བ་ཉམས་ཤིང་ལམ་ནི་གཉིས་ཀ་ཡི་ཡང་སྲོག་གི་རླུང་ནི་ཆེན་པོ་འགགས། །ཆུ་སྐྱེས་རྡོ་རྗེ་རབ་ཏུ་སད་ཅིང་རི་བོང་
ཅན་ཞུ་ཉི་མའི་གཟུགས་ཅན་ལ་ནི་རབ་ཏུ་ཞུ། །དངོས་དང་དངོས་མེད་གཅིག་གྱུར་རྣམ་གསུམ་སྲིད་པར་གནས་པའི་གཞོམ་མེད་ལེགས་པར་རབ་ཏུ་རྟོགས་གྱུར་པ། །དེ་ཡི་དུས་སུ་རྣལ་འབྱོར་པ་སྟེ་གང་ལ་གཉིས་ནི་ཅུང་ཟད་མེད་པ་མཆོག་གི་གོ་འཕང་འགྲོ། །ཞེས་ཏིང་ངེ་འཛིན་གྱི་ས་བཅུ་གཉིས་དང་མཚན་ཉིད་འདྲ་རུང་དུ་འཕགས་པའི་ས་བཅུ་གཉིས་ཀྱང་བསྟན་པ་ཡིན་ཞིང༌། ཡང་འདི་ལྟར་ཕྱོགས་ཟད་ཟླ་བ་མཁའ་ལ་གནས་པ་ཉི་མའི་གཟུགས་ལ་རོ་ནི་མཉམ་པར་གྱུར་པ་ཇི་ལྟ་བར། །སྲོག་དང་ཐུལ་སེལ་ཟད་པར་གྱུར་ན་བསལ་བར་ཡང་ནི་ལུས་ལ་དངོས་གྲུབ་དུས་སུ་དེ་འགག་གོ། ཞེས་པས་མངོན་པར་བྱང་ཆུབ་པ་གོང་མར་གྲགས་པ་མཐར་ཐུག་གི་འབྲས་བུ་ལ་ཉེ་བར་སྦྱོར་བྱེད་དེ་བསྟན་ཏོ། །ཏིང་ངེ་འཛིན་དང་འཕགས་པའི་སའི་དབྱེ་བ་དང༌། མངོན་བྱང་གོང་འོག་གཉིས་ཀྱི་དབྱེ་བ་མ་ཤེས་ན། གཞུང་ཚིག་འདི་དག་དོན་ཟློས་པ་ཅན་དུ་འཆད་དགོས་པའི་སྐྱོན་དུ་འགྱུར་བས། འདི་འདྲའི་རིགས་ཅན་སྔ་ཕྱིར་མང་པོ་ཡོད་པ་རྣམས་དབྱེ་བ་ཕྱེད་པ་གལ་ཆེའོ། །མངོན་བྱང་དེ་གཉིས་ཀྱི་སྐབས་སུ་དབང་བསྐུར་བ་དང་མཆོད་པའི་བཀོད་པ་རྒྱ་ཆེན་པོ་འབྱུང་བ་ནི། ཡང་འདི་སྐད་ཅེས། ཁྲོ་བོ་སངས་རྒྱས་ལྷ་མོ་དང་བཅས་ངེས་པར་རོ་ཡི་རྡོ་རྗེ་རྣམས་དང་ས་ཡི་སྙིང་པོ་སོགས། །རབ་ཏུ་དགའ་བའི་ཐུགས་རྣམས་རྣལ་འབྱོར་པ་ལ་གྲུབ་པའི་དུས་སུ་ནམ་མཁའ་ལ་ནི་མངོན་སུམ་འགྱུར། །དེ་ཡི་འདོད་པའི་དངོས་གྲུབ་རི་བོང་ཅན་གྱི་ཞག་གི་ཐོ་རངས་དང་ནི་མཚན་མོ་ཕྱེད་ལ་འགྱུར། །རིན་པོ་ཆེའམ་མེ་ཏོག་ཆར་ནི་མཆོག་གྱུར་དུས་ཀྱི་སྦྱོར་བས་ས་ཡི་སྟེང་དུ་འབབ་པར་འགྱུར། །ཞེས་ཏེ། གཙོ་བོར་ནི་མངོན་བྱང་ཆུང་ངུའི་དབང་དུ་བྱས་ནས་གསུངས་མོད་ཀྱི། ཆེན་པོའི་སྐབས་ཀྱི་དེ་ཡང་མཚན་ཉིད་འདྲ་བའི་སྒོ་ནས་ཞོར་ལ་འཕངས་སོ། །དེ་ལྟ་བུའི་སྐབས་སུ་དཀར་དམར་རླུང་གསུམ་དང༌། ཕུང་ཁམས་ཀྱི་ཚོགས་པ་གནས་འགྱུར་ཚུལ་ནི། འོག་ཏུ་གཞུང་དོན་གྱི་སྐབས། དཔེ་དུ་མས་སྟོན་པར་འགྱུར་ཏེ། སྙིང་པོར་དྲིལ་ན། དོན་དམ་པའི་ཡེ་ཤེས་ཆེན་པོ་ལ་རྣལ་འབྱོར་པའི་བློ་ངོས་ནས། སྔར་སྒྲིབ་པའི་རྟེན་བྱེད་པ་དེ་སླར་ནས་ཕྱིན་ཆད་སྒྲིབ་
པའི་བརྟེན་མི་བྱེད་ན། གནས་གྱུར་ཞེས་མིང་འདོགས་ཏེ། གནས་པོ་གཞན་དུ་གྱུར་པ་བཞིན་ནོ། །རྣམ་ཤེས་འཁོར་བཅས་ཀྱི་རིགས་རྒྱུན་རྣམས་ནི། གཞན་སྣང་དུ་འགྲོ་བའི་དོན་སྦྱོར་བ་ཡེ་ཤེས་ཀྱི་མིང་ཅན་ཀུན་རྫོབ་ཤེས་པར་གྱུར་པ་ནི་དེའི་གནས་གྱུར་ཏོ། །ཤིན་ཏུ་སྤྲོས་པས་ཆོག་གོ །གཉིས་པ་གཞུང་གི་དོན་ལ། མདོར་བསྟན་པ་དང་རྒྱས་པར་བཤད་པའོ། །དང་པོ་ནི། རྣམ་པ་བཅུ་གཉིས་ས་རྣམས་ཀྱིས། །རྫོགས་པ་གཉིས་སུ་མེད་པ་མཆོག །ཆ་ཤས་རྣམས་ཀྱིས་རྫོགས་པའི་སེམས། །རྣམ་པ་བཅུ་དྲུག་མི་འགྱུར་བ། །དོན་གཅིག་གཉིས་སུ་མེད་པའི་ཆོས། །དམ་པའི་དོན་ཏེ་འཇིག་པ་མེད། །རྫོགས་པའི་གནས་སྐབས་སོན་པའི་སེམས། །ཀུན་ནས་རབ་ཏུ་རྫོགས་པའོ། །ཆགས་བྲལ་དང་པོ་ཆགས་པ་ཆེ། །རྡོ་རྗེ་ལུས་མེད་མི་འགྱུར་ཆེ། །ཡོངས་སུ་རྫོགས་པའི་ཕྱོགས་གཉིས་ཀྱི། །བག་ཆགས་རྣམས་ཀྱིས་མ་འཁྱུད་པའོ། །དེ་ཡང་གནས་སྐབས་ཀྱི་འབྲས་བུའི་དབང་དུ་བྱས་ནས་ཚིགས་བཅད་གཅིག་སྟེ། རྣམ་པ་བཅུ་གཉིས་ཀྱི་ས་ནི་ཀུན་ཏུ་འོད་དང༌། བདུད་རྩིའི་འོད་དང༌། ནམ་མཁའི་འོད་དང༌། རྡོ་རྗེའི་འོད་དང༌། རིན་ཆེན་འོད་དང༌། པདྨའི་འོད་དང༌། སངས་རྒྱས་ཀྱི་འཕྲིན་ལས་བྱེད་པ་དང༌། དཔེ་མེད་པ་དང༌། དཔེ་དང་ལྡན་པ་དང༌། ཤེས་རབ་འོད་དང༌། ཐམས་ཅད་མཁྱེན་པ་ཉིད་དང༌། སོ་སོར་བདག་ཉིད་རིག་པའི་ས་རྣམས་ཏེ། རྡོ་རྗེ་སྙིང་པོ་རྒྱན་རྩ་བའི་རྒྱུད་ལས། ཀུན་ཏུ་འོད་ཀྱི་ས་ཆེན་པོ། །དེ་ཉིད་ཉི་མའི་དཀྱིལ་འཁོར་འདྲ། །བདུད་རྩིའི་འོད་ནི་གཉིས་པ་སྟེ། །ཤིན་ཏུ་འོད་གསལ་ཟླ་བ་འདྲ། །ནམ་མཁའི་འོད་ནི་གསུམ་པ་སྟེ། །ནམ་མཁའ་ཇི་བཞིན་རབ་ཏུ་གནས། །རྡོ་རྗེའི་འོད་ནི་བཞི་པ་སྟེ། །ས་དེའི་འོད་ནི་ཡིད་དགའ་བའོ། །ལྷག་པའི་བསམ་པ་བརྟན་སྦྱོར་བས། །རྡོ་རྗེ་ཞེས་ནི་ཡོངས་སུ་བཏགས། །ལྔ་པ་རིན་ཆེན་འོད་ཅེས་བྱ། །དབང་བསྐུར་བ་ལ་རབ་ཏུ་གནས། །པདྨའི་འོད་ནི་དྲུག་པ་སྟེ། །པདྨ་བཞིན་དུ་རབ་ཏུ་སྐྱེ། །རང་བཞིན་དག་པའི་སེམས་ཉིད་ཀྱིས། །དྲི་མ་མེད་པ་ཡོངས་སུ་
འཛིན། །བདུན་པ་ལས་ཀྱི་འོད་ཅེས་པ། །སངས་རྒྱས་འཕྲིན་ལས་བྱེད་པར་འདོད། །བརྒྱད་པ་དཔེ་མེད་ཅེས་པ་སྟེ། །དེ་ལ་དཔེ་ནི་ཡོད་མ་ཡིན། །དཔེ་ལྡན་ཞེས་བྱ་དགུ་པ་སྟེ། །ཐམས་ཅད་དཔེ་ནི་སོ་སོར་རྟོགས། །བཅུ་པ་ཤེས་རབ་འོད་ཅེས་པ། །སངས་རྒྱས་ས་ནི་བླ་ན་མེད། །བཅུ་གཅིག་ཐམས་ཅད་མཁྱེན་པ་ཉིད། །རབ་ཏུ་འོད་གསལ་ས་ཆེན་པོའོ། །བཅུ་གཉིས་སོ་སོའི་བདག་ཉིད་རིག །རྣལ་འབྱོར་ཡེ་ཤེས་རབ་ཏུ་རྫོགས། །ཞེས་གསུངས་སོ། །འདི་ལ་འཆད་ཚུལ་མི་གཅིག་པ་མང་པོ་ཡོད་ཀྱང༌། དཔའ་བོ་གྲུབ་པའི་དབང་ཕྱུག་དཔལ་ལྡན་བདེ་བ་ཆེན་པོའི་རྡོ་རྗེ་ལམ་ལྔ་བསྟན་པ་ཞེས་བྱ་བའི་གཞུང་དུ་གསལ་བར་མཛད་པ་ནི། མ་རིག་པའི་རྣམ་རྟོག་ཉོན་མོངས་པའི་མུན་ནག་སྤོང་བར་བྱེད་པའི་ཡེ་ཤེས་ནི། ཉི་མ་དང་འདྲ་བས་ཀུན་ཏུ་འོད་དང༌། མི་འགྱུར་བདེ་བའི་ཡེ་ཤེས་ཟླ་བ་གང་བ་དང་འདྲ་བས་བདུད་རྩིའི་འོད་དང༌། དབྱིངས་སྤྲོས་བྲལ་ནམ་མཁའ་ལྟ་བུར་མཐོང་བའི་ཡེ་ཤེས་ནི། ནམ་མཁའི་འོད་དང་ལྷག་པའི་བསམ་པ་དམིགས་པ་མེད་པའི་སྙིང་རྗེ་ཤིན་ཏུ་བསྟན་པ། ཉེས་པས་ཚུར་མི་འཇོམས་ཤིང༌། རང་གཞན་གྱི་ཉེས་པ་ཐམས་ཅད་སྤོང་བ་ལས། སྙིང་རྗེ་དེ་ཡང་བདེ་བ་ཆེན་པོར་གྱུར་པས་ཡིད་དགའ་ཞིང་ཚིམ་པ་ནི་རྡོ་རྗེ་འོད་དང༌། དེ་བཞིན་གཤེགས་པ་རྣམས་ཀྱིས་གསར་དུ་དབང་བསྐུར་བས་ཐོབ་པའི་ཡེ་ཤེས་ནི། གཞན་གྱི་དོན་ལ་སྟོབས་ཆེན་པོའི་ནུས་མཐུ་དང་ལྡན་པའི་ཕྱིར་རིན་ཆེན་འོད་དང༌། འགྲོ་བ་ཐམས་ཅད་ཀྱི་སེམས་ཀྱི་རང་བཞིན་གདོད་ནས་དག་པར་གཟིགས་པ་ནི། འཁོར་བར་གནས་ཀྱང་འཁོར་བའི་སྐྱོན་གྱིས་མ་གོས་པར་བྱེད་པ་སྟེ་པདྨའི་འོད་དང༌། སྤྲུལ་པ་སྣ་ཚོགས་པས་འགྲོ་བའི་དོན་སྦྱོར་ཞིང༌། སངས་རྒྱས་སུ་སྟོན་པ་སོགས་དེ་བཞིན་གཤེགས་པ་རྣམས་ཀྱི་འཕྲིན་ལས་དང་ལྷན་ཅིག་འཇུག་པ་ནི། ལས་ཀྱི་འོད་དང༌། ལྷན་ཅིག་སྐྱེས་པ་ཟུང་དུ་འཇུག་པའི་ཡེ་ཤེས་ནི། ཐབས་གཞན་གྱིས་མཚོན་དུ་མེད་པའི་ཕྱིར། དཔེ་མེད་པའི་ས་དང༌། དེ་ཉིད་ཆོས་ཐམས་ཅད་ཀྱི་ཆོས་ཉིད་དུ་རྗེས་སུ་ཞུགས་ཤིང༌། ཆོས་ཐམས་ཅད་ཀྱང་དེ་རྟོགས་པའི་ཐབས་སུ་ཤེས་པས།
དཔེ་དང་རྒྱུ་མཚན་མ་ལུས་པར་མཁྱེན་པ་ནི། དཔེ་དང་ལྡན་པའི་དཔེ་ཐམས་ཅད་པའི་ས་དང༌། གནས་ལུགས་ཇི་ལྟ་བའི་གཟིགས་པས་ཤེས་བྱའི་སྒྲིབ་པ་སྤོང་བར་བྱེད་པའི་ཡེ་ཤེས་ནི། ཤེས་རབ་འོད་དང༌། འོད་གསལ་བའི་ཡེ་ཤེས་དེ་ཉིད་ཀྱི། ཤེས་བྱ་ཇི་སྙེད་པ་མཁྱེན་པ་ནི་ཐམས་ཅད་མཁྱེན་པའི་ས་དང༌། དེ་ཐམས་ཅད་ཀྱང་དོན་དམ་པའི་བདེ་སྟོང་ཟུང་འཇུག་གཅིག་ཏུ་འདུས་ཤིང་རྫོགས་པ་རང་རིག་དོན་དམ་ཁོ་ནས་ཉམས་སུ་མྱོང་བ་ནི། སོ་སོའི་བདག་ཉིད་རིག་པའི་ས་ཡིན་ཏེ། ཡོན་ཏན་གོང་ནས་གོང་དུ་འཕེལ་བའི་གཞི་དང༌། རང་སའི་ཕུན་ཚོགས་ཐམས་ཅད་ཀྱི་གཞིའམ་གནས་ཡིན་པའི་ཕྱིར། རེ་རེའི་ལྡོག་པ་ནས་ཀྱང་ས་ཞེས་བྱའོ། །ཞེས་བཞེད་དེ་རང་ལུགས་ལ་ཡང་གཙོ་བོར་འདི་ཉིད་ཁས་བླངས་པར་བྱ་ལ། འདི་ནི་རབ་ཏུ་དགའ་བ་ལ་སོགས་པ་ས་བཅུ་གཉིས་རེ་རེ་ལ་ཡང་ཀུན་ཏུ་འོད་ལ་སོགས་པ་བཅུ་གཉིས་བཅུ་གཉིས་ཚང་བའི་ལུགས་ཡིན་ནོ། །ཡང་རྒྱ་གར་བ་འགའ་ཞིག་དང༌། བོད་མང་པོའི་བཞེད་པ་ལྟར་ན། ཀུན་ཏུ་འོད་རབ་ཏུ་དགའ་བ་ནས། དཔེ་ཐམས་ཅད་པ་ལེགས་པའི་བློས་གྲོས་ཀྱི་བར་དུ་སྦྱོར་བ་ཡིན་ལ། བཅུ་པ་སོགས་ལ་འདོད་ཚུལ་སྣ་ཚོགས་ཡོད་ཀྱང་ས་ལྷག་མ་གཉིས་སམ་གསུམ་སྦས་པར་འདོད་པ་ལ་སོགས་པ་ཡང་དག་པའི་རྣམ་གཞག་མ་ཡིན་པའི་ཕྱིར་འདི་ལྟར་བཤད་དགོས་ཏེ། ཤེས་རབ་འོད་ནི་ཆོས་ཀྱི་སྤྲིན་ཙམ་པོ་དང༌། ཐམས་ཅད་མཁྱེན་པའི་ས་ནི། རྒྱུན་མཐའི་སྔ་ལོགས་ཀྱི་སྦྱོར་བ་དང༌། སོ་སོར་རང་གི་བདག་ཉིད་རིག་པའི་ས་ནི། རྒྱུན་མཐའ་དང་རྫོགས་པའི་སངས་རྒྱས་ཀྱི་ས་བསྡོམས་པའོ། །དང་པོ་ཆོས་ཉིད་གསར་མཐོང་དང༌། གཉིས་པ་མི་འགྱུར་བའི་ཚུལ་ཁྲིམས་ཡིན་པ་ནས། དཔེ་ལྡན་སོ་སོ་ཡང་དག་རིག་པ་བཞི་དང་འགྲིག་པ་སོགས། རྣམ་གཞག་འཐད་ལྡན་དུ་འབྱུང་བར་མངོན་པས། འདི་ཡང་རྣམ་གྲངས་ཀྱི་སྒོ་ནས་རང་ལུགས་སུ་ཁས་བླང་དུ་རུང་ངོ༌། དེ་ལྟར་ན་ས་བཅུ་གཉིས་རྣམས་ཀྱི་རབ་ཏུ་རྫོགས་པ་གཉིས་སུ་མེད་པ་ཟུང་འཇུག་གི་མཆོགམཐར་ཐུག་སངས་རྒྱས་ཀྱི་ཡེ་ཤེས་སོ། །ཡང་ན་ཆ་ཤས་བཅོ་ལྔ་རྣམས་ཀྱིས་རྫོགས་པའི་
བྱང་ཆུབ་ཀྱི་སེམས་བཅུ་དྲུག་པ་སྟེ། དགའ་བ་བཅུ་དྲུག་སྒྲིབ་བྲལ་དུ་གྱུར་པའི། འཇིག་རྟེན་ལས་འདས་པའི་སྐུ་བཅུ་དྲུག་རིམ་གྱིས་གྲུབ་ནས། མཐར་རྣམ་པ་བཅུ་དྲུག་པོ་ཐམས་ཅད་གཏད་ནས་འགྱུར་བ་མི་མངའ་བའི། རྫོགས་པའི་སངས་རྒྱས་ཀྱི་སྐུ་བཅུ་དྲུག་ཐོབ་བོ། །འདི་ལའང་དགའ་བ་བཅུ་དྲུག་གིས་ས་བཅུ་དྲུག་གོ །ཏིང་ངེ་འཛིན་གྱི་ས་བཅུ་གཉིས་དང༌། འབྲས་བུའི་ས་བཅུ་གཉིས་འདི་དག་འཁོར་བའི་ལུས་ངག་ཡིད་དང་ཡེ་ཤེས་དངོས་རྣམས་འགགས་པ་དང༌། དེ་རྣམས་ཀྱི་བག་ཆགས་འགགས་པའི་ཁྱད་པར་དང༌། ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་སྤོང་བའི་ཁྱད་པར་དང༌། འཁོར་བའི་ཁུ་རྡུལ་རླུང་གསུམ་འགགས་པ་དང༌། ཁམས་གསུམ་གྱི་འཁོར་བ་ལས་འདས་པ་ཡིད་ཀྱི་རང་བཞིན་གྱི་ཁུ་རྡུལ་རླུང་གསུམ་འགགས་པའི་ཁྱད་པ་ཡིན་ལ། དོན་ལ་སྤངས་རྟོགས་ཡོན་ཏན་གྱི་ཁྱད་པར་ཤིན་ཏུ་ཆེ་ཡང༌། སྒྲིབ་པ་རྣམས་སྤོང་ཚུལ་གྱི་རིམ་པ་དང༌། རྡོ་རྗེ་བཞི་འགྲུབ་ཚུལ་གྱི་རིམ་པ་དང༌། བདེན་དོན་བཅུ་གཉིས་དང༌། དེ་ཉིད་བཅུ་དྲུག་གི་རབ་དབྱེ་སོགས། རྣམ་གཞག་རྣམ་པ་ཤིན་ཏུ་མཚུངས་པས། དཔེ་དོན་གྱི་ཚུལ་དུའང་གནས་པ་ཡིན་ནོ། །འདིར་རྒྱུ་འབྲས་ཀྱི་ས་བཅུ་གཉིས་རིམ་པ་གཉིས་ཡོད་པས། དཔའ་བར་འགྲོ་བའི་ཏིང་ངེ་འཛིན་འཇིག་རྟེན་ཆོས་མཆོག་ནས་ཐོབ་པ་དང༌། སངས་རྒྱས་ལས་གཞན་ལ་མེད་པར་བཤད་པ་གཉིས་འབྱུང་བའི་རྒྱུ་མཚན་དེ་ཡིན་ནོ་ཞེས་གྲུབ་ཐོབ་མན་ལུང་བ་གསུང་བར་གྲག་སྟེ། རྒྱུད་དང་འཕགས་ཡུལ་གྲུབ་པའི་དགོངས་པ་བོད་སྔ་ཕྱི་མང་པོ་ཞིག་གིས་མ་རྟོགས་པའི་རྣམ་གཞག་བླ་ན་མེད་པའོ། །ཚིགས་བཅད་གཉིས་པས་ནི་མཐར་ཐུག་གི་འབྲས་བུ་ལས་བརྩམས་ཏེ། རྡོ་རྗེའི་སྐུ་རྣམ་ཀུན་མཆོག་ལྡན་གྱི་སྟོང་པ་བཤད་པ་ནི། སངས་རྒྱས་ཀྱི་ཡེ་ཤེས་དེ་ནི། ཤེས་བྱ་ཐམས་ཅད་ཀྱི་གནས་ལུགས་ཡིན་ལ། གནས་ལུགས་ལ་ཐ་དད་པ་གཉིས་པ་མི་འབྱུང་བའི་ཕྱིར་དང༌། ཀུན་ཁྱབ་དེ་ཉིད་ཆ་དང་བྲལ་བའི་ཕྱིར། དོན་གཅིག་པུ་ཡིན་ལ། དེ་ལ་གཟུང་བ་དང་འཛིན་པ་དང༌། ཡུལ་ཡུལ་ཅན་དང་ཤེས་པ་དང་ཤེས་བྱ་སོགས།
གཉིས་ཚན་ཐམས་ཅད་དང་བྲལ་བས་གཉིས་སུ་མེད་པའི་ཆོས་ཉིད་དེ་ནི། དམ་པའི་དོན་གྱི་བདེན་པ་སྟེ། རྟག་པ་བརྟན་པ་འགྱུར་བ་མེད་པ་ཉིད་ཀྱིས་འཇིག་པ་མེད་པ་དང༌། སྤང་བྱ་རྣམས་ཟད་ཅིང་རྫོགས་པ་སྟེ་ཆོས་ཉིད་རྫོགས་པ་མཐར་ཐུག་པར་སོན་པའི་གནས་སྐབས་ཀྱི་སེམས་ཉིད། གནས་ལུགས་ཇི་ལྟ་བ་ལ་སྒྲིབ་གཡོགས་མཐའ་དག་སྤངས་པས་གནས་ཚུལ་ཀུན་ནས་རབ་ཏུ་རྫོགས་པར་མངོན་དུ་གྱུར་པ་སྟེ། སྤངས་པ་དང་རྟོགས་པ་ཀུན་ནས་རབ་ཏུ་རྫོགས་པའོ་ཞེས་ཀྱང་བྱ་སྟེ། འདི་ནི་རྣམ་བཅུ་དབང་ལྡན་གྱི་ངོ་བོར་བརྗོད་དོ། །ཚིགས་བཅད་གསུམ་པས་གཞན་ཡང་མི་འགྱུར་བའི་བདེ་བ་ཆེན་པོ་ལས་བརྩམས་ཏེ་བཤད་པ་ནི། རྟག་ཏུ་ཆགས་བྲལ་གྱི་དང་པོ་སྟེ་འགྱུར་བའི་ཆགས་བྲལ་ནམ་ཡང་མི་སྐྱེ་བའི་ཕྱིར་དང༌། བདེ་བ་ཆེན་པོ་འགྱུར་བ་མེད་པའི་རང་བཞིན་གྱིས་ཆགས་པ་ཆེན་པོའི་ངོ་བོར་རྟག་ཏུ་གནས་པ། རྡོ་རྗེ་ལུས་མེད་མི་འགྱུར་བ་ཆེན་པོ་ཞེས་ཀྱང་བྱ་སྟེ། ལུས་མེད་ནི་ལྷའི་བུའི་བདུད་སྟེ་འཁྲིག་པའི་འདོད་ཆགས་ཀྱི་སྙིང་པོ་ཅན་གྱི་འདོད་པའི་ཡུལ་ལྔའམ་དྲུག་ལ་རྗེས་སུ་ཆགས་པ་སྙིང་ལ་འཇུག་པའི་སེམས་ཏེ། ཡིད་འོང་ཡུལ་གྱི་རྣམ་པ་ཡིད་ལ་ཤར་བ་དང༌། དེ་ལ་བརྟེན་ནས་ཆགས་པའི་བདེ་སྣང་དུ་ཤར་བ་གཉིས་ངོ་བོ་རྫས་གཅིག་ཏུ་འདྲེས་པ་དེ་ཡིན་ལ། དེ་ལྟ་བུའི་ལུས་མེད་དེ་འཛག་མེད་ཀྱི་བདེ་བས་བཅོམ་པ་ནི། རྡོ་རྗེ་ལུས་མེད་དམ་ལུས་མེད་རྡོ་རྗེ་སྟེ། སྟོང་གཟུགས་ཡིད་འོང་མཆོག་དང་ཐིག་ལེ་མི་འགྱུར་བའི་བདེ་བ་འདོད་ཆགས་མཆོག་ཐོབ་པས། འགྱུར་བ་མེད་པའི་བདེ་བ་ཆེན་པོའོ། །སྤང་བྱ་ལུས་མེད་ལའང་ཆགས་པ་དང་ཆགས་ཡུལ་ངོ་བོ་གཅིག་པ་བཞིན་དུ། ལུས་མེད་རྡོ་རྗེ་སྟོང་གཟུགས་དང་བདེ་བ་ཡང་ངོ་བོ་གཅིག་གོ །གང་ཆགས་པའི་ཡུལ་དངོས་ནི་ཡིད་ཀྱི་ཡུལ་ཀུན་ཏུ་རྟོག་པ་ལ་ཤར་བ་དེ་ཡིན་གྱི། ཕྱི་རོལ་ཀྱི་རྣམས་མིན་པས། ལུས་མེད་ཅེས་བྱ་སྟེ། དེ་ལྟར་ཡང༌། འཇིག་རྟེན་སྣ་ཚོགས་གང་བདེ་འདོད་མིན་པས། །སྐྱེས་བུའི་ཀུན་རྟོག་འདོད་ཆགས་འདོད་པ་ཡིན། །ཞེས་གསུངས་པ་ལྟ་བུའོ། །ཉི་མ་དང་ཟླ་བའི་ཆོས་ཉིད་ཆ་བཅུ་དྲུག་པའི་
ཐ་སྙད་བཏགས་པ་ལ་རྟག་ཏུ་གནས་པའི་ཕྱིར། ཡོངས་སུ་རྫོགས་པའི་རང་བཞིན། དཀར་ཕྱོགས་དང་ནག་ཕྱོགས་ཏེ་ཕྱོགས་གཉིས་ཀྱི་སྒྲིབ་པའི་བག་ཆགས་རྣམས་ཀྱིས་མ་འཁྱུད་པ་སྟེ་མ་གོས་པ་འདི་ནི་རྡོ་རྗེ་ཧཾཀཥ། །གཉིས་པ་རྒྱས་པར་བཤད་པ་ལ། སྒྲིབ་པ་སྤོང་ཚུལ་གྱི་རྣམ་གཞག་ཞིབ་མོར་དབྱེ། ཟུང་འཇུག་གཉིས་མེད་ཀྱི་མཚན་ཉིད་གསལ་བར་བཤད། རང་བཞིན་འགྱུར་མེད་ཀྱི་དཀྱིལ་འཁོར་རྒྱས་པར་བསྟན་པའོ། །དང་པོ་ལ་བཞི་སྟེ། དཔེ་བདུན་ནམ་བརྒྱད་ཀྱི་སྒོ་ནས་གནས་གྱུར་པའི་དོན་བསམས། སྒྲིབ་པ་སྤོང་ཚུལ་སྤྱི་ལྡོག་ནས་བཤད། སྒྲིབ་པའི་གཙོ་བོ་འཕོ་བའི་ཉེས་དམིགས་བསྟན། ཉེས་དམིགས་ཅན་གྱི་འགྱུར་བདེ་འགག་མཚམས་སོ། །དང་པོ་ནི། ཇི་ལྟར་ཆུ་བོའི་ཆུ་ཞུགས་པ། །དེ་ནི་རྒྱ་མཚོའི་ཆུར་མཚུངས་པ། །དེ་བཞིན་དངོས་པོའི་ཚོགས་འདི་སྟེ། །འགྱུར་བ་མེད་པར་འགྱུར་མེད་མཚུངས། །ཇི་ལྟར་ཁམས་ཀྱི་ཚོགས་པ་འདི། །ཟོས་པ་ལས་ནི་རོ་ཉིད་འགྱུར། །ས་བོན་རང་བཞིན་ས་བོན་གྱི། །འབྲས་བུའི་དུས་སུ་ང་རྒྱལ་སྤངས། དེ་ལྟར་དངོས་པོའི་ཚོགས་པ་ཡང༌། །མཆོག་ཏུ་མི་འགྱུར་ཟོས་པ་ཡིས། །མཆོག་ཏུ་མི་འགྱུར་པ་ཉིད་འགྱུར། །རྣམ་པ་ཐམས་ཅད་རང་བཞིན་འཛིན། །མཆེ་བའི་ཚོར་བ་སྡུག་བསྔལ་ནི། །དུག་རྫོགས་གནས་སྐབས་གྱུར་པ་ན། །རྨ་ལ་རིག་མིན་གཞན་དུ་མིན། །ཡུལ་རྣམས་དབང་པོའི་སྒོ་རྣམས་ཀྱིས། །དེ་བཞིན་རྣལ་འབྱོར་དམ་པའི་བདེ། །སེམས་རྫོགས་ཆར་གྱུར་ན་རྡོ་རྗེ། །ནོར་བུར་རིག་མིན་གཞན་དུ་མིན། །ཡུལ་རྣམས་དབང་པོའི་སྒོ་རྣམས་ཀྱིས། །ཇི་ལྟར་རོ་ཆེན་ལྕགས་རྣམས་ཀྱི། །ཕྱོགས་གཅིག་ཡང་དག་གནས་པ་ནི། །ལྕགས་ལ་དྲགས་པོའི་མེས་གདུངས་ནས། ཀུན་ནས་ཀུན་ཏུ་འབིགས་པར་བྱེད། །དེ་བཞིན་ཉིད་དུ་འགྱུར་མེད་བདེ། །ཕྱོགས་གཅིག་གང་དག་གནས་པ་ཡང༌། སེམས་ལ་འདོད་པའི་མེ་གདུངས་ན། །ཀུན་ནས་ཀུན་ཏུ་འབིགས་པར་བྱེད། །ཇི་ལྟར་ཕུག་པའི་ལྕགས་རྣམས་ནི། །འགའ་ཞིག་ཏུ་ཡང་དྲི་མ་མེད། །དེ་བཞིན་དུ་ནི་ཕུག་པའི་སེམས། །འགའ་ཞིག་ཏུ་ཡང་བག་ཆགས་མེད། །ལྕགས་ནི་གསེར་ཉིད་དུ་གྱུར་པ། །མེ་ཡིས་དྲི་མ་མེད་པར་འགྱུར། །དེ་བཞིན་ཡང་དང་ཡང་དུ་སེམས། །འདོད་ཆགས་མི་ཡིས་དྲི་མ་མེད། །ཇི་ལྟར་ནོར་བུ་ཆེ་རེག་ལས། །རྡོ་ནི་རབ་ཏུ་འབར་བར་
འགྱུར། །དེ་བཞིན་འགྱུར་མེད་བདེ་རེག་ལས། །སེམས་ནི་བདེ་བ་ཉིད་དུ་འགྱུར། །འདིར་ནི་མང་པོ་བརྗོད་པས་ཅི། །འཇིག་རྟེན་ཀུན་རྫོབ་བདེན་པ་ཡིས། །ལྕགས་རྣམས་རབ་ཏུ་འབིགས་བྱེད་པ། །རོ་ཡི་མཐུ་ནི་བརྟག་བྱ་མིན། །ཅི་ཞིག་སླར་ཡང་དོན་དམ་པས། །གློ་བུར་དྲི་མས་གཡོགས་པ་ཡི། །སེམས་ནི་རབ་ཏུ་འབིགས་བྱེད་པ། །ཡེ་ཤེས་མཐུ་ནི་རྟག་བྱ་མིན། །ཞེས་གསུངས་ཏེ། ཇི་ལྟར་ཆུ་བོ་སྣ་ཚོགས་པའི་ཆུ་རྒྱུན་རྣམས། རྒྱ་མཚོར་ཞུགས་པ་ན་དེ་རྣམས་ཀྱི་རོ་ནི་རྒྱ་མཚོའི་ཆུར་མཚུངས་ཤིང་གཅིག་པ་ཉིད་དུ་འགྱུར་རོ། །དེ་བཞིན་དུ་ཕུང་ཁམས་སུམ་ཅུ་རྩ་དྲུག་གིས་བསྡུས་པའི་བརྟན་གཡོའི་དངོས་པོའི་ཚོགས་པ་འདི་རྣམས་ཀྱང་འགྱུར་བ་མེད་པའི་ཐིག་ལེར་ཐིམ་པ་ན། འགྱུར་མེད་ཀྱི་བདེ་བ་གཅིག་ཏུ་མཚུངས་པར་འགྱུར་རོ། །ཇི་ལྟར་དངུལ་ཆུ་གྲུབ་པ་ན། སྨན་གྱི་ཁམས་ཐ་དད་པའི་ཚོགས་པ་འདི་དག་ནི་དངུལ་ཆུས་ཟོས་པ་ལས། ཐམས་ཅད་ཀྱང་རོ་སྟེ། དངུལ་ཆུ་ཉིད་དུ་འགྱུར་ལ། དངུལ་ཆུར་གྱུར་ཀྱང་ཁམས་སྣ་ཚོགས་པ་ཐམས་ཅད་ཀྱི་ནུབ་པ་སོ་སོ་བ་རྣམས་དངུལ་ཆུ་ཐམས་ཅད་ཀྱིས་ཅིག་ཅར་འཛིན་པ་དང༌། འབྲས་ལ་སོགས་པའི་ས་བོན་ཞིང་སར་བཏབ་པ་དེ། སའི་བཅུད་དང་ཆུ་ལུད་ལ་སོགས་པའི་ཁམས་ཟོས་པ་ལས། སླར་ཡང་ས་བོན་གྱི་རང་བཞིན་འབྲས་བུ་ལོ་ཐོག་སྐྱེད་མོད་ཀྱིས། ས་བོན་དང་མྱུ་གུ་དང་འབྲས་བུའི་དུས་གསུམ་པོ་དེ་རྣམས་སུ། འདི་དང་འདི་སྐྱེད་དོ་སྙམ་པའི་ང་རྒྱལ་རྣམ་རྟོག་ནི་སྤངས་སྟེ་ཡོད་པ་མ་ཡིན་ནོ། །ང་རྒྱལ་ཞེས་པ་འཛིན་པའི་མིང་ངོ༌། །དེ་བཞིན་དུ་དངོས་པོའི་ཚོགས་པ་ཡང༌། མཆོག་ཏུ་མི་འགྱུར་བའི་བདེ་བས་ཟོས་པ་ཡིས་ནི། མཆོག་ཏུ་མི་འགྱུར་བའི་བདེ་བ་ཉིད་དུ་འགྱུར་ཏེ། འོན་ཀྱང་རྣམ་པ་ཐམས་ཅད་པའི་སྟོང་གཟུགས་ཀྱི་རང་བཞིན་པས་ན་དངོས་པོ་ཤེས་བྱ་ཐམས་ཅད་དང་མཚུངས་པའི་རྣམ་པ་དོན་དམ་པ་འཆར་བ་ནི་ཡིན་ལ། དེ་ལྟར་གྱུར་ཀྱང་ང་རྒྱལ་སྤངས་པ་ཡང་ཡིན་ནོ། །དེ་ལའང་ཏིང་ངེ་འཛིན་གྱི་སྐབས་སུ་འགྱུར་བ་དངོས་རྩ་བ་ནས་འགགས་པའི་ཐིག་ལེ་དང༌། འཕགས་པའི་ས་ལ་འགྱུར་བའི་གནས་ཀྱི་བག་ཆགས་འགག་ཚུལ་གཉིས་ཀ་དང་འབྱོར་
བ་ལས་དང་པོ་ནི། ཆུ་བོ་རྒྱ་མཚོར་གྱུར་པ་དང༌། ཁམས་ཀྱི་ཚོགས་པ་དངུལ་ཆུར་གྱུར་པའི་དཔེ་གཉིས་ཀྱིས། མི་འགྱུར་བའི་ཐིག་ལེ་འགྲུབ་ཚུལ་བསྟན་པ་ཡིན་ལ། དེ་སྔར་ཡང་བཤད་ཟིན་མོད་ཀྱི་གསལ་བར་བརྗོད་ན་རང་རྒྱུད་ཀྱི་ཕུང་ཁམས་སོ་དྲུག་བེམ་ཆོས་རྣམས་ཀྱི་དྭངས་མ་ནི། ཐིག་ལེ་བྱང་ཆུབ་ཀྱི་སེམས་ཡིན་ལ། ཐིག་ལེ་བྱང་ཆུབ་ཀྱི་སེམས་རྡུལ་ཉིད་ཆོས་དེ་ཉིད་ལ་དབྱེ་ན། རྡུལ་ཆོས་ཉིད་ལ་བལྟོས་པའི་རགས་པ་ཕྲ་བ་ཤིན་ཏུ་ཕྲ་བ་གསུམ་མམ། སྦོམ་པོ་དྭངས་མ་ཤིན་ཏུ་དྭངས་མ་གསུམ་མོ། །ཡང་ན་རགས་པ་བར་མ་ཕྲ་མོ་གསུམ་མམ། སླ་བ་དང༌། བསྐ་བ་དང༌། ཤིན་ཏུ་བསྐ་བ་གསུམ་ཞེས་ཀྱང་གྲགས་སོ། །དེ་དག་ལས་གཏུམ་མོ་འབར་བས། ཕུང་ཁམས་ཐ་མལ་གྱི་ཆོས་ཇེ་ཆུང་དུ་སྲེགས་དང༌། ཐིག་ལེ་ཞུ་ཞིང་ཇེ་རྒྱས་སུ་འགྲོ་བ་ལས། ཐིག་ལེ་རིམ་པ་གསུམ་ཡང་ཕྱི་མ་ཕྱི་མ་ཇེ་རྒྱས་དང༌། སྔ་མ་སྔ་མ་བསྲེགས་ནས་མཐར་རྡུལ་ཆོས་ཀྱི་ཐིག་ལེ་དངས་ཤོས་དེ། རྗེས་ཆགས་ཀྱིས་ཞུ་ནས་ནོར་བུར་སླེབ་པ་ན་སྟོང་གཟུགས་ཕྱག་རྒྱ་ཆེན་པོས་བཅིངས་པས། ཐིག་ལེ་དེ་ཉིད་རིལ་པོའི་ཆ་ཤས་ནས། བེམ་ཆོས་ཡལ་ཏེ་སྟོང་གཟུགས་སུ་སོང་ནས། འཆིང་བྱེད་ཀྱི་སྟོང་གཟུགས་དང་རོ་གཅིག་ཏུ་གྱུར་པ་ན། ཐིག་ལེ་ཡང་ཡིན་ལ་སྟོང་གཟུགས་ཀྱང་ཡིན་པས། སྟོང་པ་ཉིད་ཀྱི་ཐིག་ལེའམ། ཐིག་ལེ་ཆེན་པོའམ། དངས་མ་ཆེན་པོ་ཞེས་བྱའོ། །དེ་ནི་སེམས་ཉིད་ཀྱི་རང་སྣང་ཁོ་ན་ཡིན་པས་ཞུ་གཡོ་འཛག་གསུམ་གྱི་ཆོས་མེད་པ་དང༌། ཆོས་ཉིད་ཡིན་པའི་ཕྱིར་ན་འགྱུར་མེད་ཀྱི་ཐིག་ལེ་ཞེས་བྱ་ཞིང༌། དེ་དང་ངོ་བོ་གཅིག་ཀྱང་འགྱུར་མེད་ཀྱི་ཐིག་ལེ་རྟོགས་པའི་ཆ་ནས། འགྱུར་མེད་ཀྱི་བདེ་བ་ཞེས་ཡེ་ཤེས་ལ་བརྗོད་ཅིང༌། རྟོགས་ཚུལ་ཡང་རང་རིག་གི་ཚུལ་གྱིས་སོ། །ཚུལ་དེ་འདྲ་བས་འགྱུར་མེད་བདེ་བ་སྐད་ཅིག་གཅིག་སྐྱེ་ཞིང་དེ་ལྟ་བུ་ཉི་ཁྲི་ཆིག་སྟོང་དྲུག་བརྒྱ་རྫོགས་པ་ན་དཀར་དམར་རླུང་གསུམ་ཐམས་ཅད་སྟོང་གཟུགས་གྱི་ཐིག་ལེ་འབའ་ཞིག་ཏུ་སོང་ལ། ཕུང་ཁམས་རགས་པ་གཞན་རྣམས་མར་གསར་བཞུ་བ་ན་རྙིགས་མ་བསྐམས་ཏེ། ཞུན་མར་གྱི་ཉིང་ཁུར་འགྱུར་བ་བཞིན་དུ།
སྐད་ཅིག་མ་རེ་རེའི་སྔོན་དུ་གཏུམ་མོ་འབར་ཐེངས་རེ་ངེས་པར་བྱུང་བས། རྙིགས་མ་བསྲེགས་ཤིང་དྭངས་མ་ཐིག་ལེར་གྱུར་ཟིན་པས་ཤུལ་དུ་ལུས་རྒྱུ་མེད་དོ། །རང་རྒྱུད་ཀྱིས་བསྡུས་པའི་ཕུང་ཁམས་སོ་དྲུག་ནི་དེ་ལྟར་གནས་འགྱུར་ལ། དེའི་སྟོབས་ཀྱིས་ཕྱི་སྣང་བ་ཐམས་ཅད་ཀྱང་བཟང་པོ་འབའ་ཞིག་ཏུ་རྣམ་པར་གྱུར་པ་ནི་ཡིན་ནོ། །འགྱུར་བདེ་དངོས་མེད་མོད་ཀྱི་འོན་ཀྱང་འགྱུར་བའི་བག་ཆགས་དང་ལྡན་པས། ཀུན་རྫོབ་ཀྱི་སྣང་བ་འདི་དེ་སྐབས་མ་ནུབ་བོ། ཕྱི་མ་ནི་འཕགས་པའི་ས་བཅུ་གཉིས་ལ་བག་ཆགས་དེ་རིམ་གྱིས་སྦྱངས་པས། རང་སྣང་དུ་སྣང་བ་འདི་ཡང་རིམ་གྱིས་ཐམས་ཅད་གནས་འགྱུར་ཏེ། མཐར་རྫོགས་པའི་སངས་རྒྱས་ཀྱི་སར་ཕྱིན་པ་ན། མ་དག་པའི་སྣང་བ་གཏན་ནས་འགགས་ལ། འགྱུར་མེད་བདེ་བ་ཁོ་ནའི་སྣང་བ་རབ་འབྱམས་སུ་གནས་པ་ཡིན་ནོ། །དེས་ན་དངོས་པོ་རྣམས་ཀྱི་ཆོས་ཉིད་གདོད་མ་གང་ཡིན་པ་དེ། རྣམ་པ་ཐམས་ཅད་པའི་སྟོང་གཟུགས་དང་བདེ་བ་ཟུང་འཇུག་གི་རང་བཞིན་འཛིན་པ་ལ། དངོས་པོ་ཀུན་རྫོབ་པའི་ཆོས་ཡལ་བའི་ཚེ། ཆོས་ཉིད་དེ་ཆོས་ཉིད་ཀྱི་རྒྱ་མཚོ་ཆེན་པོ་དང་གདོད་མ་ནས་རོ་ཅིག་པར་རྟོགས་པ་ཙམ་ལ། དངོས་པོ་དེ་དང་དེ་འགྱུར་མེད་བདེ་བར་འགྱུར་ཞིང༌། རྣམ་པ་ཐམས་ཅད་པ་འཛིན་ཞེས་བརྟགས་པ་སྟེ། སྔར་མ་རྟོགས་པ་གསར་དུ་རྟོགས་པས་ན། རྣལ་འབྱོར་བའི་བློ་ངོར་སྔར་དངོས་པོ་ཡིན་འཕྲོ་ལ་དེ་ནས་མི་འགྱུར་བའི་བདེ་བར་སོང་བ་ལྟ་བུ་ཞིག་འཆར་བ་དང༌། གཞན་ཡང་རྣམ་པ་ཐམས་ཅད་པའི་སྟོང་གཟུགས་མཐར་ཕྱིན་པ་ན་དེ་ཉིད་ཀྱིས་དུས་གསུམ་ཤེས་བྱ་ཐམས་ཅད་མཁྱེན་པར་འགྱུར་ཞིང༌། དེ་ཡང་ཕན་ཚུན་དུ་གཉིས་སྣང་གི་ཚུལ་གྱིས་མ་ཡིན་ཏེ། ཤེས་བྱ་དུས་གསུམ་པོ་རང་གི་ཤེས་པ་ལས་གཞན་པར་གནས་ཚུལ་ལ་མེད་པ་བཞིན་དུ་མེད་པ་ཁོ་ནར་གཟིགས་པས། ཤེས་དང་ཤེས་བྱ་གཅིག་པའི་སྐུ་ཡིན་ལ། བདེ་བ་དང་རྣམ་པ་མཐའ་ཡས་པའི་སྟོང་གཟུགས་རོ་ཅིག་ཅིང༌། བདེ་བའི་ངོ་བོ་དམིགས་མེད་ཀྱི་སྙིང་རྗེ་ཡིན་པས་སྙིང་རྗེ་དེ་ཡང་རྣམ་པ་ཐམས་ཅད་པའི་སྟོང་ཉིད་དུ་གནས་པས་སྟོང་ཉིད་སྙིང་རྗེའི་
བདག་ཉིད་ཅན་ཞེས་བྱ་ལ། རྣམ་པ་ཐམས་ཅད་པའི་སྙིང་རྗེས་སེམས་ཅན་མཐའ་ཡས་པའི་དོན་ཅིག་ཅར་སྒྲུབ་ནུས་པ་ཡིན་ནོ། །དོན་དམ་སྲིད་གསུམ་རྣམ་པ་ཐམས་ཅད་པ་དེ་ནི་གདོད་མ་ཡིན་པས་དང་པོར་མ་སྐྱེས་ཤིང༌། བར་དུ་མི་འགྱུར་ལ། མཐར་མི་འཇིག་པས་སྲིད་གསུམ་སྐྱེ་དང་འཇིག་པ་མེད་པའོ། །དེའི་རྗེས་སུ་བདེ་བ་ཆེན་པོ་གཅིག་པུ་དང་རྟོག་བྲལ་དུ་བསྟན་པ་ནི། དུག་སྦྲུལ་གྱི་མཆེ་བས་བཟུང་བའི་ཚོར་བ་སྡུག་བསྔལ་ནི། ཐོག་མ་རྨའི་སྒོ་ལ་སྡུག་བསྔལ་རིག་ཀྱང༌། དུག་གི་ནུས་པ་རྫོགས་པའི་གནས་སྐབས་སུ་གྱུར་པ་ན། རྨ་ལ་ཟུག་རྔུ་རིག་པའམ་ཤེས་པ་མིན་ལ། ལུས་ཀྱི་གནས་གཞན་དུ་ཡང༌། ཤེས་པ་མིན་ཞིང་དབང་པོའི་སྒོའི་རྣམ་ཤེས་ལྔ་པོ་རྣམས་ཀྱིས་གཟུགས་སོགས་ཡུལ་ལྔ་པོ་རྣམས་ཀྱང་མི་མཐོང་སྟེ། བརྒྱལ་ཞིང་མྱོས་པའི་ཕྱིར་རོ། །དེ་བཞིན་དུ་དང་པོ་ཞུ་བདེའི་གནས་སྐབས་ན། ལྷག་པར་བདེ་བ་མྱོང་ངོ་ཞེས་ང་རྒྱལ་དུ་བྱེད་ཀྱང༌། རྣལ་འབྱོར་པ་འགྱུར་མེད་དམ་པའི་བདེ་བ་ཆེན་པོའི་སེམས། ཆ་ཤས་རྫོགས་པར་གྱུར་པ་ན། རྡོ་རྗེ་ནོར་བུའི་བདེ་བ་མྱོང་ངོ་ཞེས་ཀྱང་རིག་པ་མིན་ལ། ལུས་ཀྱི་གནས་གཞན་དུའང་མིན་ཏེ། བདེ་བར་འཛིན་པ་མེད་པ་ནི། རི་ཀླུངས་ཐམས་ཅད་གསེར་འབའ་ཞིག་ཏུ་སོང་ན་གསེར་གྱི་གོང་བུ་ལ་སྲེད་པ་མི་འབྱུང་བ་བཞིན་ཏེ། བདེ་བས་བྱིན་གྱིས་བརླབས་པས། དབང་པོའི་སྒོའི་རྣམ་ཤེས་རྣམས་ཀྱིས་ཡུལ་རྣམས་མི་རིག་སྟེ་མཉམ་བཞག་ཏུ་མ་དག་པའི་སྣང་བ་འགགས་ཤིང་གཉིས་སྣང་ནུབ་པའི་ཕྱིར་དང༌། ལུས་ངག་ཡིད་གསུམ་བདེ་བ་ཆེན་པོ་འབའ་ཞིག་ཏུ་གྱུར་པའི་ཕྱིར་རོ། །འདིས་ནི་བདེ་བས་གཉིས་སྣང་འགག་པ་རྒྱུ་མཚན་དང་བཅས་པ་བསྟན་ཏོ། །ཇི་ལྟར་རོ་ཚན་པོ་གྲུབ་པའི་དངུལ་ཆུ་ལྕགས་ཀྱི་གོང་བུ་རྣམས་ཀྱི་ཕྱོགས་གཅིག་ཏུ་ཡང་དག་པར་གཞག་ཅིང་གནས་པའི་སྐབས་དེར། ལྕགས་ལ་དྲག་པོའི་མེས་གདུངས་ཞིང་སྲེགས་ན། ཕྱོགས་ཀུན་ནས་དུས་ཀུན་ཏུ་གསེར་དུ་འབིགས་པ་སྟེ་འགྱུར་བར་བྱེད་དོ། །དཔེ་དེ་བཞིན་ཁོ་ན་ཉིད་དུ་མི་
འགྱུར་བའི་བདེ་བ་ཡང་ལུས་ཀྱི་ཕྱོགས་གཅིག་རྡོ་རྗེ་ནོར་བུར་ཡང་དག་པར་གནས་པ་ཡང༌། ལས་ཀྱི་ཕྱག་རྒྱ་སོགས་དང་མཉམ་པར་སྦྱོར་བའི་འདོད་ཆགས་ཀྱིས་གཏུམ་མོ་འབར་བའི་མེས། བྱང་ཆུབ་ཀྱི་སེམས་དེ་ལ་ཀུན་ཏུ་གདུངས་ན། ཕུང་ཁམས་སོ་དྲུག་པོ་ཆ་ཤས་ཀུན་ནས་དུས་ཀུན་ཏུ་མི་འགྱུར་བའི་ཐིག་ལེ་ཆེན་པོར་འབིགས་པར་བྱེད་དོ། །འདིས་ནི་ཏིང་ངེ་འཛིན་གྱི་སྐད་ཅིག་དང་པོ་སྐྱེས་ནས། ཐུན་མཚམས་སུ་ལས་ཀྱི་ཕྱག་རྒྱ་སྒྲུབ་པའི་སྤྱོད་པ་བས། མི་འགྱུར་བའི་བདེ་བ་རྫོགས་པར་བྱེད་དགོས་པར་བསྟན་ཞིང་གོང་དུ་ཕུང་ཁམས་བདེ་བ་ཆེན་པོར་འགྱུར་བ་ཙམ་ཞིག་བཤད་ལ། ཇི་ལྟར་འགྱུར་བའི་ཚུལ་ཡང་འདིས་བསྟན་ཏོ། །ཇི་ལྟར་རོ་བཅུད་ཀྱིས་ཕུག་པའི་ལྕགས་གསེར་དུ་གྱུར་པ་ནི། དུས་འགའ་ཞིག་ཏུ་ཡང་དྲི་མ་མེད་པ་སྟེ། གཡུའི་རང་བཞིན་དུ་མི་འགྱུར་ཞིང་འོད་གསལ་བར་གནས་པ་དེ་བཞིན་དུ། མི་འགྱུར་བའི་བདེ་བས་ཕུག་པའི་སེམས་ལ་འགའ་ཞིག་ཏུ་ཡང་བག་ཆགས་ཀྱི་དྲི་མ་སྐྱེ་བའི་སྐབས་མེད་དེ། འདིར་དྲི་མ་ཞེས་པའི་སྐབས་ན། ཀཱ་ལི་ཀ་ཞེས་པ་ཡོད་པས་ནག་པོའི་དོན་ཏེ། ཕལ་ཆེར་གསེར་དུ་གྱུར་ཀྱང་འགའ་ཞིག་ན་ལྕགས་དྲེག་ལུས་པའི་ནག་ཚིག་ཡོད་དམ་སྙམ་ན། དེ་འདྲ་མེད་དོ་ཞེས་པའི་དོན་ཡིན་ལ། བག་ཆགས་ཞེས་པ་ཡང་བཱ་ས་ན་ཞེས་པ་སྤྱིར་བག་ཆགས་དང་གནས་དང་དྲི་མ་རྣམས་ལ་འཇུག་པ་ཡིན་ཡང༌། འདིར་དྲི་མ་སྟེ་འཇིག་རྟེན་ན་ཡང་སོལ་བ་ལ་དཀར་པོའི་དྲི་མ་མེད་ཞེས་པའམ། འདི་དང་འདི་ལྟ་བུ་ལ་ཡོན་ཏན་གྱི་དྲི་མ་མེད་ཅེས་པ་དང་སྐྱོན་གྱི་དྲི་མ་མེད་ཅེས་པ་ལྟར། ཆ་ཤས་ཕྲ་མོ་ཙམ་ཡང་ལུས་པ་མེད་པའི་དོན་ཡིན་གྱི། དེ་ཉིད་དངོས་མ་ཡིན་ཀྱང༌། རྣམ་པ་མཐུན་རུང་ཕྲ་མོ་མ་རིག་བག་ཆགས་ཀྱི་ས་ལྟ་བུའི་གནས་ཀྱི་བག་ཆགས་ལ་མི་འཇོག་སྟེ། བཞག་ནས་དང་པོར་དངོས་སུ་སྤངས་པའི་སྤང་བྱ་རྣམས་ཀྱི་བག་ཆགས་ཀྱང༌། ས་དང་པོ་ཉིད་དུ་སྤངས་པར་ཐལ་བ་འགྱུར་རོ། །དེས་ན་གང་ཞིག་འགྱུར་མེད་ཀྱི་བདེ་བར་
གྱུར་པ་དེ་ལ། འགྱུར་བ་དངོས་སུ་བགྲང་བ་ཐན་ཐུན་ཙམ་ཡང་མ་གོས་ཞེས་པའི་དོན་ཏེ། འགྱུར་མེད་ཀྱིས་སྤངས་པ་རྣམས་ཕྱིན་ཆད་མི་སྐྱེ་བའི་ཆོས་ཅན་དུ་བྱས་པའོ། །ཡང་ལྕགས་ནི་གསེར་ཉིད་དུ་གྱུར་པ། མེ་དྲག་པོས་སྦྱངས་ན་གཡའ་ལ་སོགས་པ་དྲི་མ་མེད་པར་འགྱུར་བ་བཞིན་དུ། སེམས་མི་འགྱུར་བའི་བདེ་བ་ཐོབ་པ་ཡང༌། ཡང་ནས་ཡང་དུ་གཏུམ་མོའི་འདོད་ཆགས་ཀྱི་མེས་བསྲེགས་ན། དྲི་མ་སྤང་བྱ་རྣམས་རིམ་གྱིས་མེད་པར་འགྱུར་རོ། །དེ་ལྟར་བཤད་པ་ལས་འདིར་འགྱུར་ཏེ། ཏིང་ངེ་འཛིན་གྱི་ཡན་ལག་གི་སྐབས་སུ་གཏུམ་མོས་བསྲེགས་པ། ལྕགས་འབུགས་པའི་དཔེས་བསྟན་ཞིང་གསེར་དུ་གྱུར་ཟིན་མེས་སྦྱོང་དགོས་པའི་དཔེ་བཤད་པ་འདི་ནི་ཏིང་ངེ་འཛིན་རྫོགས་ཟིན་ནས་འཕགས་པའི་ས་བཅུ་གཉིས་འདོད་ཆགས་ཆེན་པོའི་ལམ་གྱིས་བགྲོད་དགོས་པར་བསྟན་ཏོ། །ཇི་ལྟར་ནོར་བུ་ཆེན་པོ་པ་རི་ཤ་ཀ་ཞེས་བྱ་བ་ལ་རེག་པའི་སྦྱོར་བ་ལས། རྡོ་རྣམས་ནི་ཨིནྡྲ་ནཱི་ལ་ལ་སོགས་པ་དང༌། ལྕགས་སོགས་ཁམས་རྣམས་ནི་གསེར་ལ་སོགས་པར་གྱུར་ཏེ། འོད་རབ་ཏུ་འབར་བར་འགྱུར་རོ། །དེ་བཞིན་དུ་འགྱུར་བ་མེད་པའི་བདེ་བའི་ཐིག་ལེ་ལ་སེམས་མཉམ་པར་བཞག་ཅིང་རེག་པ་ལས། སེམས་དང་སེམས་ལས་བྱུང་བ་རྣམས་ཀྱང་བདེ་བ་ཉིད་དུ་གནས་འགྱུར་རོ། །རང་བཞིན་རྣམ་པར་དག་པ་མངོན་དུ་གྱུར་པ་ན། ཀུན་རྫོབ་ཀྱི་ཆོས་རྣམས་ཀྱི་རིགས་རྒྱུན་ཡང༌། ལམ་གྱི་བདེན་པར་འགྱུར་ཏེ་གཞན་སྣང་དུ་སེམས་ཅན་གྱི་དོན་བྱེད་དོ། །ཞེས་བསྟན་ཏོ། །ཡང་འདི་སྙམ་དུ་ཁུ་བའི་ཁམས་ནི་འཇིག་རྟེན་རྣམས་དང་ཐུན་མོང་ཡིན་ལ། དེ་བཅིངས་པའི་བྱེད་པས་སངས་རྒྱས་སུ་འགྱུར་བ་མི་རིགས་སོ་ཞེ་ན། འདིར་ནི་མང་པོ་བརྗོད་པས་ཅི་ཞིག་བྱ་སྟེ། འཇིག་རྟེན་ཀུན་རྫོབ་བདེན་པའི་སྣང་ངོར་ཡང༌། ལྕགས་རྣམས་རབ་ཏུ་འབུགས་པས་གསེར་དུ་བྱེད་པའི་རོ་བཅུད་ཀྱི་ནུས་མཐུ་ནི། མངོན་སུམ་དུ་གྱུར་ཡང་བརྟག་ཅིང་དཔྱད་པར་བྱ་བ་མ་ཡིན་ཏེ། ནུས་པ་དངོས་པོའི་ཆོས་ཉིད་འདི་ལ། ཐ་མལ་བའི་བློ་གྲོས་
དང༌། རྟོག་གེའི་རིགས་པ་མི་འཇུག་གོ །དེ་ཡང་དེ་འདྲ་ན་གང་ཅི་ཞིག་སླར་ཡང་དོན་དམ་པའི་བདེན་པའི་དབང་དུ་བྱས་ནས་གློ་བུར་གྱི་དྲི་མས་གཡོགས་པའི་སེམས་འདི་ནི་ཐིག་ལེ་མི་འགྱུར་བའི་སྟོབས་ལས་སངས་རྒྱས་ཀྱི་ཡེ་ཤེས་སུ་རབ་ཏུ་འབུགས་པར་བྱེད་པའི་ཡེ་ཤེས་ཀྱི་ནུས་མཐུ་འདི་ནི་བརྟག་བྱ་མ་ཡིན་པ་ལྟ་སྨོས་ཀྱང་ཅི་ཞིག་དགོས། ཞེས་སོ། །གཉིས་པ་སྒྲིབ་པ་སྤོང་ཚུལ་སྤྱི་ལྡོག་ནས་བསྟན་པ་ལ་གསུམ་སྟེ། སྒྲིབ་པའི་རང་བཞིན་བསྟན་པ། དག་པ་གཉིས་ལྡན་གྱི་མཚན་ཉིད་བཤད་པ། དེ་ཐོབ་བྱེད་སོ་སོ་རང་རིག་གིས་གྲུབ་པའི་ཚུལ་ལོ། །དང་པོ་ནི། །སེམས་ལ་གློ་བུར་དྲི་མ་མེད། །སེམས་ལས་ཡུན་རིང་དུས་ཅན་མིན། །སེམས་མེད་པར་ནི་སྐྱེ་བ་མེད། །སེམས་ལ་མི་ཟད་གནས་པ་མིན། །ཞེས་མདོར་བསྟན་གྱི་ཚུལ་དུ་དམ་བཅས་ནས། དེ་ཉིད་རྒྱས་པར་བཤད་པ་ནི། གལ་ཏེ་འདི་ཉིད་གློ་བུར་བ། །དེ་ཚེ་སྔོན་དུ་སེམས་དྲི་མེད། །གལ་ཏེ་སེམས་ལས་དུས་རིང་ཅན། །དེ་ཚེ་དེ་ནི་ཅི་ལས་སྐྱེས། །གལ་ཏེ་སེམས་མེད་པར་སྐྱེ་ན། །དེ་ནི་ནམ་མཁའི་མེ་ཏོག་མཚུངས། །གལ་ཏེ་སེམས་ལ་རྟག་ཏུ་གནས། །དེ་ཚེ་ཀུན་ཏུ་ཐར་པ་མིན། །ཞེས་གསུངས་ཏེ། སྒྲིབ་པའི་མཚན་ཉིད་དམ་ཁྱད་ཆོས་ནི་སེམས་ཀྱི་སྐྱོན་ཏེ་སྔོན་སེམས་གྲུབ་ཙམ་ན་དེ་ཡང་གྲུབ་ལ། སེམས་ཉིད་དང་རྫས་གཅིག་དང་ཐ་དད་ལས་འདས་པ། རང་ཡོད་དུས་སེམས་འདྲེས་པར་སྣང་ཡང༌། རང་བཞིན་འགལ་བས་འབྲལ་དུ་རུང་བའི་ཆོས་ཅན་གྱི་གློ་བུར་པའོ། །དེས་ན་དྲི་མ་སྟེ་སྒྲིབ་པ་ནི། ཕྱིས་བྱུང་བས་གློ་བུར་ཡིན་ལ། སེམས་ཉིད་ནི་སྔོན་དྲི་མ་མེད་དོ་སྙམ་ན། སེམས་ཉིད་སྔོན་དྲི་མ་མེད་པ་ལ། ཕྱིས་བློ་བུར་གྱི་དྲི་མ་སྐྱེས་པ་མིན་ཏེ། གལ་ཏེ་འདི་ཉིད་ཕྱིས་བྱུང་བའི་གློ་བུར་པ་ཡིན་པ་དེའི་ཚེ། སྔོན་དུ་སེམས་དྲི་མེད་དེ་དྲི་མས་དག་པར་འགྱུར་ཞིང༌། དྲི་མས་དག་པ་ལ་སླར་ཡང་སྐྱེ་བ་མི་འཐད་དོ། །གལ་ཏེ་སེམས་ལས་དྲི་མ་དུས་ཡུན་རིང་བ་ཅན་གྱི་སྔ་བ་ནི་མིན་ཏེ་གང་གི་ཚེ་དེ་ལྟར་ཡིན་པ་དེའི་ཚེ། སེམས་ནི་མེད་ན་སྒྲིབ་པ་དེ་ནི་ཅི་ལས་སྐྱེས་ཞེས་དཔྱད་ན་མི་འཐད་དོ། །སེམས་མེད་པར་
ཡང་སྒྲིབ་པ་སྐྱེ་བ་མེད་དཻ་གལ་ཏེ་སེམས་མེད་པར་སྒྲིབ་པ་སྐྱེ་ན། རྒྱུ་མེད་ཀྱང་སྐྱེ་བར་ཐལ་པའི་ཕྱིར་ཏེ། དེའི་ཚེ་ནམ་མཁའི་མེ་ཏོག་ཀྱང་སྐྱེ་བར་ཐལ་བར་མཚུངས་པ་ཡིན་ནོ། །སེམས་ལ་སྒྲིབ་པ་ནི་མི་ཟད་པ་སྟེ། སྒྲིབ་པ་སེམས་ཀྱི་ངོ་བོ་ཉིད་དུ་གནས་པའམ་འབྲལ་མི་ཤེས་པ་མིན་པ་ནི། གལ་ཏེ་སྒྲིབ་པ་རྣམས་སེམས་ལ་སེམས་ཀྱི་རང་བཞིན་གྱིས་རྟག་ཏུ་གནས་པ་ཡིན་ན། དེའི་ཚེ་ཀུན་ཏུ་སྟེ་ནམ་ཡང་ཐར་པ་ཐོབ་སྲིད་པ་མིན་པར་འགྱུར་ཏེ། སེམས་མ་ཟད་པར་དེ་ཡང་ཟད་མི་ཤེས་པའི་ཕྱིར་དང༌། དེ་ཟད་ན་སེམས་ཀྱང་ཟད་དེ། ཐར་པ་ཐོབ་མཁན་མེད་པའི་ཕྱིར་རོ། །གཉིས་པ་ནི། འོ་ན་རང་བཞིན་གྱི་སེམས་ལ་གློ་བུར་བའི་དྲི་མ་ཇི་ལྟར་སྤོང་སྙམ་ན་ལན་ནི། ཇི་ལྟར་ཟངས་ཀྱི་དྲི་མ་ནི། །རོ་ཡི་སྦྱོར་བས་ཉམས་པར་འགྱུར། །དེ་ཡི་ཡོད་ཉིད་ཉམས་པ་མེད། །དྲི་མེད་ཉིད་ཀྱིས་ཡང་དག་གནས། །དེ་བཞིན་སེམས་ཀྱི་དྲི་མ་ནི། །སྟོང་ཉིད་སྦྱོར་བས་རྣམ་ཉམས་འགྱུར། །དེ་ཡི་ཡེ་ཤེས་ཉིད་ཉམས་མེད། །དྲི་མེད་ཉིད་ཀྱིས་ཡང་དག་གནས། །ཇི་ལྟར་བཅུད་ཀྱིས་ཕུག་པའི་ལྕགས། །ལྕགས་ཉིད་དུ་ནི་རྗེས་འགྲོ་མིན། །དེ་བཞིན་བདེ་བས་ཕུག་པའི་སེམས། །སྡུག་བསྔལ་ཉིད་དུ་རྗེས་འགྲོ་མིན། །ཞེས་གསུངས་ཏེ། ཇི་ལྟར་ཟངས་ཀྱི་ངོ་བོ་ཡོད་པ་ཙམ་དང་ཟངས་ཀྱི་དྲི་མ་ཁ་དོག་ངན་ཞིང་གྱོང་པོར་སྣང་བ་མི་བརྟན་པའི་ཆ་གཉིས་དང་པོར་བྱུང་བ་དུས་མཉམ་ཞིང༌། དེ་ལྟར་ཡང་འབྲལ་མི་ཤེས་པ་ལྟ་བུར་གནས་ཀྱང༌། ཟངས་ཀྱི་དངོས་པོ་ཡོད་ཙམ་དེ། ཟངས་ཀྱི་མཚན་ཉིད་གྱོང་བ་དང༌། ཁ་དོག་ངན་པ་དེའི་ངོ་བོར་གནས་པ་མེད་དེ། རོ་བཅུད་ཆེན་པོ་གསེར་འགྱུར་རྩི་བྱུགས་པའི་སྦྱོར་བས་ཟངས་ཀྱི་དྲི་མའི་ཆ་ཁ་དོག་ངན་པ་དང༌། གྱོང་བ་དང༌། བསྲེགས་བཅད་ཀྱིས་འཇིག་པའི་ཆ་དེ་ནི་ཉམས་པར་འགྱུར་མོད། དེའི་དངོས་པོ་ཡོད་པ་ཉིད་ནི་ཉམས་པ་མེད་དེ། སྔོན་ཟངས་ཀྱི་བོངས་ཇི་ཙམ་ཡོད་པ་དེ་ཙམ་དུ། དྲི་མ་མེད་པ་དང་ཁ་དོག་གསལ་བ་དང༌། གཉེན་པ་དང༌། བསྲེགས་བཅད་ཀྱིས་མི་འཇིག་པའི་ཆོས་ཅན་གསེར་ཉིད་ཀྱི་ངོ་བོས་
གནས་པ་ཡིན་ནོ། །དེའི་ཚེ་ཟངས་ཀྱི་རང་བཞིན་ཡོད་ཉིད་ཙམ་གདོད་ནས་དག་པ་དེ་ལ་ལྷན་སྐྱེས་ཀྱི་དྲི་མ་ཁ་དོག་ངན་པ་སོགས། རྩད་ནས་སྤངས་པས་དག་པ་གཉིས་ལྡན་གྱི་དཔེའོ། །དེ་བཞིན་དུ་འཁོར་བའི་དུས་ན། སེམས་དང་སྒྲིབ་པ་འབྲལ་མི་ཤེས་པ་ལྟར་སྣང་ཡང༌། སེམས་སྒྲིབ་པའི་ངོ་བོར་མེད་དེ། སེམས་ཀྱི་དྲི་མ་ཡང་དམིགས་བཅས་ཀྱི་སྟོང་ཉིད་ཕྱག་རྒྱ་ཆེན་པོའི་སྦྱོར་བས། རྣམ་པར་ཉམས་པར་འགྱུར་ཏེ། སེམས་དེའི་རང་བཞིན་ཡེ་ཤེས་ཉིད་ནི་ནམ་ཡང་ཉམས་པ་མེད་ལ། གདོད་ནས་དྲི་མས་མ་གོས་པའི་སྟེང་དུ། གློ་བུར་བ་བཅོམ་སྟེ་ཕྱིས་མི་སྐྱེ་བས། དག་པ་གཉིས་ལྡན་དྲི་མེད་ཉིད་ཀྱིས་ཡང་དག་པར་གནས་སོ། །དོན་འདི་ནི་ཐེག་པ་ཆེན་པོ་རྒྱུད་བླ་མ་དང༌། ཆོས་དབྱིངས་བསྟོད་པ་ལས་ཤིན་ཏུ་རྒྱས་པར་གསུངས་སོ། །དག་པ་གཉིས་ལྡན་དྲི་མེད་ཁོ་ནར་གནས་པའི་རྒྱུ་མཚན་ནི། ཇི་ལྟར་བཅུད་ཀྱིས་ཕུག་པའི་ལྕགས་གསེར་དུ་གྱུར་པ་ནི། སླར་ཡང་ལྕགས་ཉིད་དུ་རྗེས་སུ་འགྲོ་བ་མིན་པ་དེ་བཞིན་དུ། མི་འགྱུར་བའི་བདེ་བས་ཕུག་པའི་སེམས། བདེ་ཆེན་དོན་དམ་པ་དེ། སླར་ཡང་སྡུག་བསྔལ་འཁོར་བའི་ཆོས་ཉིད་དུ་ལོག་ཏེ་རྗེས་སུ་འགྲོ་བ་སྲིད་པ་མིན་ནོ། །གསུམ་པ་ནི། ཆགས་བྲལ་ལས་གཞན་སྡིག་པ་མེད། །བདེ་བ་ལས་གཞན་བསོད་ནམས་མེད། །དེ་ཕྱིར་འགྱུར་མེད་བདེ་བར་སེམས། །མི་བདག་རྟག་ཏུ་གནས་པར་བྱ། །གཞོན་ནུ་མ་ཡི་དགའ་བ་ནི། །མེད་པར་བདེ་བ་སྨྲ་མི་ནུས། །ལང་ཚོའི་དགའ་བ་ཐོབ་པ་ན། །བདེ་བ་ཆེན་པོ་རང་གིས་རིག །དེ་བཞིན་ཏིང་འཛིན་དང་བྲལ་བའི། །བདེ་བ་སྨྲ་བར་ནུས་མ་ཡིན། །འགྱུར་མེད་ཏིང་འཛིན་ཐོབ་པ་ན། །རྣལ་འབྱོར་པ་ཡིས་རང་རིག་འགྱུར། །འགྱུར་མེད་ལས་སྐྱེས་བདེ་རིག་པ། །ཐམས་ཅད་མཁྱེན་ལའང་ཐེ་ཚོམ་ཟ། །དེ་ལྟར་ན་ཡང་ཡིད་བདེ་མིན། །ཆགས་བྲལ་ཉིད་དུ་མི་བྱའོ། །འདིར་གཞན་ཞེས་པ་ནི་བར་ཞེས་པའི་སྒྲ་ལས། མཆོག་གམ་ཆེ་བ་ལ་ཡང་འཇུག་པས། བདེ་བ་ཉམས་པའི་ཆགས་བྲལ་ལས་གཞན་ཏེ། ཆེ་བའི་
སྡིག་པ་མེད་ཅིང༌། བདེ་བ་མ་ཉམས་པ་ལས་གཞན་ཏེ་ཆེ་བའི་བསོད་ནམས་དགེ་བ་མེད་པས། དེའི་ཕྱིར་བདེ་བའི་མཆོག་འགྱུར་མེད་ཀྱི་བདེ་བར་སེམས་རྟག་ཏུ་གནས་པར་བྱའོ། །མི་བདག་ཅེས་པ་ནི་བོད་པའོ། །འོ་ན་མི་འགྱུར་བའི་བདེ་བ་དེ་ད་ལྟ་དངོས་སུ་མ་མཐོང་ན་ཇི་ལྟར་ཡིད་ཆེས་ཞེ་ན། འཕགས་པ་རྣམས་ཀྱི་སོ་སོར་རང་གིས་རིག་པས་གྲུབ་པའི་ཕྱིར། འཕགས་པའི་ཚིག་ལ་ཡིད་ཆེས་པར་བྱའོ། །ཞེས་པའི་དོན་ལ་གཞོན་ནུ་མ་བྱིས་པ་ཆུང་ངུའི་རྒྱུད་ལ་དགའ་བའི་བདེ་བ་མངོན་དུ་གྱུར་པ་མེད་པས། འདི་ལྟར་མྱོང་ངོ་ཞེས་མི་ཤེས་ལ། གཞན་ལ་སྨྲ་མི་ཐུབ་ཀྱང༌། ནམ་ཞིག་ལང་ཚོ་མར་གྱུར་ཏེ་དགའ་བ་ཐོབ་པ་ན། བདེ་བ་ཆེན་པོ་རང་གིས་རིག་ཅིང་ཤེས་སོ། །དེ་བཞིན་དུ་ཏིང་ངེ་འཛིན་གྱི་ཡན་ལག་དང༌། བྲལ་བ་སྟེ་མ་ཐོབ་པའི་གང་ཟག་གིས། མི་འགྱུར་བའི་བདེ་བ་མ་རིག་ཅིང༌། མ་ནོར་བར་སྨྲ་ནུས་པ་མ་ཡིན་ཀྱང༌། འགྱུར་བ་མེད་པའི་ཏིང་ངེ་འཛིན་གྱི་ཡན་ལག་ཐོབ་པ་ན། རྣལ་འབྱོར་པ་རང་ཉིད་ཀྱིས་ཉམས་སུ་མྱོང་བས་རང་རིག་གྀས་རྟོགས་པར་འགྱུར་རོ། །དེ་ལྟར་ནའང་དེ་མ་ཐོབ་པས་སངས་རྒྱས་རྣམས་ཀྱི་བདེ་བ་ཆེན་པོའི་སྐུ། ཐིག་ལེ་མི་འགྱུར་བ་ལས་ཐོབ་བོ་ཞེས་པ་འདི་ལ་ཐེ་ཚོམ་ཟའོ་སྙམ་པ་ལ་གདམས་པ་ནི། འགྱུར་མེད་ལས་སྐྱེ་སོགས་ཏེ་འདི་ལ་འབྲོ་འགྱུར་ལས། ཐམས་ཅད་མཁྱེན་པ་མ་ཐོབ་པས། འགྱུར་མེད་ལས་སྐྱེས་ཐེ་ཚོམ་སྟེ། །ཞེས་འབྱུང་བ་ལྟར་བདེ་སྟེ། རྒྱ་སྐད་དང་ཡང་མཐུན་ནོ། །དེ་ཡང་ཐམས་ཅད་མཁྱེན་པའི་གནས་མ་ཐོབ་པས་དེ་འགྱུར་མེད་ལས་སྐྱེས་མ་སྐྱེས་ཐེ་ཚོམ་ཟ་བས། འཛག་མེད་ཀྱི་ལམ་ལ་མི་གུས་སོ་སྙམ་ན། རེ་ཞིག་དེ་ཞོག་ཅིགདེ་ལྟར་ཡང་འཁོར་བའི་ཆགས་པ་ཉིད་ལས་ཀྱང༌། ཐིག་ལེ་མ་འཕོས་པ་ནི། དགའ་བ་ཕུན་སུམ་ཚོགས་པ་དང་ལྡན་ལ་འཕོས་པ་ན་ཡིད་བདེ་བ་མིན་ཞིང༌། ལང་ཚོ་ལ་སོགས་པ་ཕུན་སུམ་ཚོགས་པ་ཉམས་པར་བྱེད་པ་མངོན་སུམ་གྱིས་གྲུབ་པའི་ཕྱིར་ན། བདེ་བ་ཉམས་པའི་ཆགས་བྲལ་ཉིད་དུ་མི་བྱའོ། །ད་ནི་དེ་ལས་འཕྲོས་པའི་ཚུལ་
བཤད་པ། གསུམ་པ་སྒྲིབ་པའི་གཙོ་བོ་འཕོ་བའི་ཉེས་དམིགས་བསྟན་པ་ནི། འཕོས་པ་ལས་ནི་ཆགས་བྲལ་འགྱུར། །ཆགས་བྲལ་ལས་ནི་སྡུག་བསྔལ་འབྱུང༌། །སྡུག་བསྔལ་སྐྱེས་བུའི་ཁམས་ཟད་བྱེད། །ཟད་པ་ལས་ནི་འཆི་བར་བརྗོད། །ཤི་ནས་སླར་ཡང་དེ་རྣམས་ཀྱི། །སྲིད་པའོ་སྲིད་ལས་སླར་འཆི་འཕོ། །དེ་ལྟར་སེམས་ཅན་གྱི་སྲིད་པ། །ཆགས་བྲལ་ལས་བྱུང་གཞན་དུ་མིན། །དེ་ཕྱིར་འབད་པ་ཐམས་ཅད་ཀྱིས། །འཕོ་བའི་ཆགས་པ་རྣམ་པར་སྤངས། །གང་གིས་འགྱུར་མེད་བདེ་བར་འགྱུར། །རྣལ་འབྱོར་འཁོར་བ་བཅིངས་པ་ཡིས། །འདོད་ལྡན་ཡང་ནི་ཆགས་བྲལ་བར། །འདོད་པའི་བསྟན་བཅོས་སུ་མི་འདོད། །བདག་གིས་བརྗོད་པའི་རྒྱུད་དུ་སླར། །རྣལ་འབྱོར་པ་ཞེས་སྡུག་བསྔལ་འདོད། །ཅེས་གསུངས་ཏེ། དེ་ཡང་ཐིག་ལེ་འཕོས་པས། ཚད་མེད་བཞི་ཉམས། ཉོན་མོངས་བཞི་སྐྱེའོ། །འདོད་ཆགས་ཉམས་པས་སྡིག་སྟེ་གང་ཕྱིར་ཤིན་ཏུ་སྡུག་མ་ལ་ནི་ཞེ་སྡང་སྐྱེ། །སྡང་ལས་གཏི་མུག་འདི་ལས་རང་གི་རྡོ་རྗེ་ལྷུང་ལས་སེམས་ནི་རྟག་རྨོངས་ཏེ། །མཆོག་མིན་མ་ལུས་བཟའ་དང་བཏུང་བ་ལ་སོགས་ཡུལ་གཞན་དག་ལ་རབ་ཏུ་འཇུག །དེ་ཡིས་སེམས་ལ་ཅོ་དྲིས་བདེ་བ་ཉམས་ཤིང་སྐྱེ་བ་དྲུག་ཏུ་འཁོར་བར་འགྱུར། །ཞེས་སོ། །དེ་ཡང་ཆགས་དགའི་བདེ་བ་འཕེལ་བའི་བདག་ཉིད་སྙིང་རྗེ། ཞེ་སྡངཉམས་པའི་བདག་ཉིད་བྱམས་པ། གཏི་མུག་ཟད་པའི་བདག་ཉིད་དགའ་བ། མི་འགྱུར་བའི་བདག་ཉིད་ནི་བཏང་སྙོམས་སོ། །དེ་ཡང་ཐིག་ལེ་འཕོས་པ་ཉིད་ན་སྡིག་པ་སྟེ་སྙིང་རྗེ་ཟད་པ་དང༌། སྡུག་མ་ལ་ཡིད་འོང་གི་མཛའ་བ་ཉམས་པའི་ཞེ་སྡང་དང༌། དགའ་བ་ཉམས་ཤིང་རྨོངས་པས་གཏི་མུག་དང༌། བདག་ཏུ་རྨོངས་པ་བཏང་སྙོམས་ཟད་པའི་མཚན་ཉིད་ཅན་གཞན་ལ་སྡང་བ་དང་འགྱུར་བ་ལ་སྲིད་པ་རྣམས་རིམ་པས་འབྱུང་ངོ༌། །དེ་ལྟ་བུའི་མ་རིག་པ་ཉོན་མོངས་པ་དེ་ལས་ནི་འདུ་བྱེད་སོགས་ཡན་ལག་བཅུ་གཉིས་ཀྱི་འཁོར་ལོ་སྐོར་བར་འགྱུར་རོ། །འདིར་འཁོར་བ་འཇུག་པའི་ཚུལ་ནི། རྟེན་ཅིང་འབྲེལ་བར་འབྱུང་བ་བཅུ་གཉིས་ཏེ། དེ་ཡང་རྩ་བའི་མ་རིག་པ་ནི་འགྱུར་བདེའི་བག་
ཆགས་བཤད་མ་ཐག་པ་དེ་ཡིན་ལ། དེའི་དབང་ལས་བྱུང་བ་ནུས་པ་བཞི་དང༌། དེས་སྐྱེད་པའི་བསམ་པ་བཞིའོ། །དེ་དག་ཀྱང་དངོས་པོ་རྣམས་གསལ་བར་བྱེད་པ་འདོད་པ་དང༌། ཡིད་འཇུག་པར་བྱེད་པ་བྱ་བ་དང༌། དོན་ངེས་ཤིང་རྟོག་པ་དང་ཡུལ་གྱི་རྣམ་པ་འདྲེས་པར་བྱེད་པ་ཡེ་ཤེས་དང༌། དེ་རང་ཤུགས་ཀྱི་ལེགས་པ་སྟོང་པར་བྱེད་པ་ནི་བཞི་པའི་ནུས་པ་སྟེ། བག་ཆགས་གསར་པ་བསྐྱེད་ཅིང་རྙིང་པ་གསོས་འདེབས་པར་བྱེད་པའི་སེམས་སོ། །འཆི་ཁའིདུས་ཀྱྀ་དགེ་བའི་བསམ་པ་ནི་ཞི་བའི་བསམ་པ་སྟེ། སྙིང་སྟོབས་ཀྱི་ཡོན་ཏན་ལྷའི་སྐྱེ་བར་འགྲོ་བའི་རྒྱུའོ། །དེ་དུས་ཀྱི་མི་དགེ་བའི་བསམ་པ་དྲག་པོ་ནི་མུན་པའི་བསམ་པ་སྟེ། མུན་པའྀ་ཡོན་ཏན་དམྱལ་བ་དང༌། དེ་དུས་ཀྱི་མི་དགེ་བ་འབྲིང་པོ་ནི་རྡུལ་གྱི་བསམ་པ་རྡུལ་གྱི་ཡོན་ཏན། འབྱུང་པོ་དང༌། དེ་དུས་ཀྱི་དགེ་མི་དགེ་འདྲེས་པ་ནི། འདྲེས་པའི་བསམ་པ་སྟེ་ཡོན་ཏན་གསུམ་འདྲེས་པ། མི་དང་དུད་འགྲོའི་སྐྱེ་བའི་རྒྱུའོ། །དེ་ལས་འབྲས་བུའི་སྐྱེ་བ་ནི་སད་པའི་གནས་སྐབས་ལ་གཙོ་བོར་སྤྱོད་པ་དམྱལ་བ་ལྷ་མིན་གཉིས། རྨི་ལམ་ལ་གཙོ་བོར་སྤྱོད་པ་ལྷ་དང་ཡི་དྭགས་གཉིས། གཉིད་འཐུག་ལ་གཙོ་བོར་སྤྱོད་པ་མི། བཞི་པ་ལ་གཙོ་བོར་སྤྱོད་པ་དུད་འགྲོ་སྟེ། གནས་སྐབས་བཞི་ལ་འགྲོ་བ་དྲུག་སྦྱར་བ། རྒྱུ་དང་འབྲས་བུ་ཕན་ཚུན་རྒྱས་བཏབ་ཀྱི་ཚུལ་ལོ། །དེ་ལྟར་ན་སྐྱེ་བ་སྔ་མའི་ནུས་པ་བཞི་དང་བསམ་པ་བཞི་ལས། འཆི་གར་སྟོང་པ་ལ་ཞུགས་པ་ཡན་ཆད་ནི་མ་རིག་པ་དང༌། མངལ་དུ་ཉིང་འཚམས་སྦྱོར་བཞིན་པ་ལས་ཀྱིས་འཁྲིད་པ་ནི་འདུ་བྱེད། །ཉིང་མཚམས་སྦྱར་མ་ཐག་པའི་ཤེས་པ་ནི་རྣམ་ཤེས། ཁམས་དྲུག་འཕེལ་བ་ནི་མིང་གཟུགས། དབང་པོ་དོད་པ་ནི་སྐྱེ་མཆེད་དྲུགདེས་ཡུལ་ཕྲ་མོ་འཛིན་པའི་ནུས་པ་རྙེད་པ་ནི་རེག་པ། ཡུལ་ཉམས་སུ་མྱོང་བ་ནི་ཚོར་བ་སྟེ། མངལ་དུ་ཟླ་བ་བདུན་པ་མན་ཆད་དོ། །སྲིད་པའི་ལོངས་སྤྱོད་བདེ་སྡུག་ལ་བླང་དོར་དུ་སྲེད་པ་ནི་སྲེད་པ། ཡན་ལག་གཡོ་བ་ནི་ལེན་པ། བཙས་པའི་གནས་སྐབས་སུ་རླུང་རྒྱུ་བ་ནི་སྲིད་པ། དེ་ནས་བརྩམས་ཏེ་བྱིས་པ་དང་ལང་ཚོའི་བར་ནི་སྐྱེ་བ། རྒས་པ་དང་འཆི་བའི་གནས་སྐབས་ནི་རྒ་ཤི་སྟེ།
རྡོ་རྗེ་སྙིང་འགྲེལ་ལས། འཆི་བར་མ་རིག་འཇུག་པ་ཡི། །འདུ་བྱེད་དེ་ནས་སྐྱེ་བར་འབྱུང༌། །ཞེས་དང༌། མི་བསྐྱོད་ལ་སོགས་གང་ཞུགས་པ། དེ་ནས་རྣམ་ཤེས་སྲིད་པའོ། །དེ་ནས་མིང་དང་གཟུགས་འགྱུར་ཏེ། ཁམས་དྲུག་བདག་ཉིད་དེ་ནས་སོ། །ཞེས་དང༌། རེག་ན་མིག་ལ་སོགས་པ་དང༌། གཟུགས་སོགས་ལྷན་ཅིག་སྦྱོར་བའོ། །དེ་ནས་ཚོར་བ་སྐྱེ་འགྱུར་ཏེ། །ཞེས་དང༌། སྲིད་པའི་ལོངས་སྤྱོད་བདག་ཉིད་ནི། དེ་ལས་སྲེད་པ་སྐྱེ་བར་འགྱུར། །རྐང་དང་ལག་པ་རྐྱང་བ་ནི། །དེ་ནས་ཉེ་བར་ལེན་པར་བརྗོད། །བྱིས་པ་སྲོག་དག་འབྱུང་བ་ནི། །དེ་ནས་སྲིད་པ་སྐྱེ་བར་འགྱུར། །བྱིས་པ་རྟག་ཏུ་བརྗོད་པ་ནི། །དེ་བས་སྐྱེ་བའི་འདུ་ཤེས་སོ། །ཞེས་གསུངས་ཏེ། འདི་ནི་སྐྱེ་བ་གཉིས་ལ་སོགས་པས་རྫོགས་པའི་ལུགས་ཡིན་ལ། མངལ་གྱི་ཟླ་བ་དང་པོ་མ་རིག་པ་སོགས། ཟླ་བ་རེ་རྟེན་འབྲེལ་རེ་ལ་སྦྱར་བ་ནི། སྐྱེ་བ་གཅིག་ལ་བཅུ་གཉིས་ཀ་ཚང་བའི་དབང་དུ་མཛད་པ་སྟེ། ཞིབ་པར་གཞན་དུ་རྟོགས་པར་བྱའོ། །དེ་ཡང་བྱང་ཆུབ་ཀྱི་སེམས་འཕོས་པ་ལས་ནི་ཆགས་པ་སྟེ་དགའ་བའི་བདེ་བ་དང་བྲལ་བར་འགྱུར་ལ། ཆགས་བྲལ་ལས་ནི་སེམས་སྡུག་བསྔལ་དུ་འབྱུང་ཞིང༌། སྡུག་བསྔལ་གྱིས་སྐྱེས་བུའི་ལུས་ཀྱི་ཁམས་ཟད་པར་བྱེད་ལ། ཁམས་ཟད་ལས་ནི་རྒ་བ་དང༌། ན་བ་དང་ཐ་མར་འཆི་བར་བརྗོད་དོ། །ཤི་བ་ལས་སླར་ཡང་དེ་རྣམས་ཀྱི་བར་དོའི་སྲིད་པ་རྒྱུད་ནས་སྐྱེ་བའི་སྲིད་པར་མཚམས་སྦྱོར་རོ། །སྲིད་པ་སྐྱེ་བ་བཟུང་བ་ལས་སླར་ཡང་འཆི་འཕོ་བ་སོགས། འཁོར་ལོ་ལྟར་འཁོར་བ་སྟེ། དེ་ལྟར་སེམས་ཅན་རྣམས་ཀྱི་སྲིད་པ་འཁོར་བ་ནི། རྩ་བ་འཛག་བདེ་ཁམས་འཕོས་པའི་ཆགས་བྲལ་ལས་འབྱུང་བས། འཛག་བདེ་ལས་གཞན་དུ་རྒྱུའི་གཙོ་བོ་ཡོད་པ་མིན་ནོ། །དེའི་ཕྱིར་རྣལ་འབྱོར་པ་ལམ་ལ་བརྩོན་པ་དང་པོའི་ལས་ཅན་ཉིད་ནས་ཀྱང༌། ཐབས་འབད་པ་ཐམས་ཅད་ཀྱིས་འཕོ་བའི་ཆགས་པ་རྣམ་པར་སྤངས་ཏེ། ཐིག་ལེ་འགྱུར་མེད་ཀྱི་སྒྲུབ་པ་ལ་བརྩོན་པར་བྱའོ། །རྣལ་འབྱོར་པ་གང་ཞིག་འཁོར་བའི་རྒྱུ་འཛག་བདེ་བཀག་ཅིང་བཅིངས་པ་ཡིས་ཏེ། འདི་ལྟ་བུའི་ཐབས་གང་གི་སྒྲུབ་ན་
འགྱུར་མེད་ཀྱི་བདེ་བ་ཐོབ་པར་འགྱུར་རོ། །ཐེག་པ་མཆོག་གི་རྣལ་འབྱོར་པས་དེ་ལྟར་བྱ་དགོས་པར་མ་ཟད། འདོད་ལྡན་འཇིག་རྟེན་པའི་བདེ་བ་ཙམ་དོན་དུ་གཉེར་བ་ཉོན་མོངས་ཀྱི་གཉེན་པོའི་ཆོས་ཁས་མི་ལེན་པ་མུ་སྟེགས་བྱེད་ལ་སོགས་པ་རྣམས་ཀྱང་ནི། དབང་ཕྱུག་ལ་སོགས་པས་བྱས་པའི་འདོད་པའི་བསྟན་བཅོས་སུ་ཡང༌། རྫས་དང་སྔགས་དང་བྱེད་བཅིངས་དང༌། ཡི་གེ་སོགས་ཐབས་སྣ་ཚོགས་ཀྱི། བདེ་བ་མ་ཉམས་པ་དོན་དུ་གཉེར་གྱི། བདེ་བ་ཉམས་པའི་ཆགས་བྲལ་མི་འདོད་ཅིང་དོན་དུ་མི་གཉེར་ན། དེ་བཞིན་གཤེགས་པ་བདག་གིས་བརྗོད་པ་སྟེ་གསུངས་པའི་རྒྱུད་དུ་ལྟ་སྨོས་ཀྱང་ཅི་དགོས་པ་ལས། སླར་ཡང་འཇིག་རྟེན་ལས་འདས་པའི་ཆོས་ལ་བརྟེན་པ། ཉོན་མོངས་ལས་གྲོལ་བར་བྱེད་པའི་ཆོས་ལ་ཞུགས་པ་དང་རྡོ་རྗེ་འཛིན་པའི་ལམ་སྒོམ་པ་དང༌། སངས་རྒྱས་པར་ཁས་འཆེ་བའི་རྣལ་འབྱོར་པ་དགསྡུག་བསྔལ་གྱི་རྒྱུ་འཕོ་བའི་བདེ་བ་ཅིའི་ཕྱིར་འདོད་པར་བྱེད་ཅེས་དྲག་ཏུ་བཀྱོན་པའོ། །བཞི་པ་ཉེས་དམིགས་ཅན་གྱི་འགྱུར་བདེ་འགགས་མཚམས་ནི། ཁུ་བ་མི་འགྱུར་རང་བཞིན་གྱིས་མཆོག་ཏུ་མི་འགྱུར་སྒྲུབ་པར་བྱ། བརྟེན་ནི་འཕོ་བ་ཐོབ་པ་ན། རྟེན་པ་འདོད་ཆགས་བྲལ་བ་ཉིད། །ཅེས་པ་ལ། བརྟེན་ཁུ་བ་མི་འགྱུར་བའི་རང་བཞིན་ཏེ་ཐབས་ཀྱི་དངོས་པོས། མཐར་ཐུག་མཆོག་ཏུ་མི་འགྱུར་བའི་བདེ་བ་བསྒྲུབ་པར་བྱ་དགོས་ཏེ། དེ་ལས་བཟློག་སྟེ། བརྟེན་ཁུ་བ་འཕོ་བའི་གནས་སྐབས་ཐོབ་པ་ན། རྟེན་པའི་སེམས་ཀྱང་དགའ་བའི་འདོད་ཆགས་དང་བྲལ་བར་འགྱུར་རོ། །རྟེན་དང་བརྟེན་པ་ལེགས་རྫོགས་པ། །ཇི་སྲིད་འགྱུར་མེད་ཉིད་དུ་འགྲོ། །སེམས་ཀྱི་འགྱུར་མེད་ཉིད་ཐོབ་ན། །རྟེན་དང་བརྟེན་པའི་མཚན་ཉིད་མེད། །ཅེས་པ་ལ། ཇི་སྲིད་དེ་ཇི་ཙམ་དུ། བརྟེན་ཐིག་ལེ་དཀར་དམར་ལེགས་པར་ཡོངས་སུ་རྫོགས་པར་མི་འགྱུར་བའི་ཐིག་ལེར་གྱུར་པ་དང༌། རྟེན་པ་སེམས་མི་འགྱུར་བའི་སྐད་ཅིག་ལེགས་པར་རྫོགས་པ་དེ་སྲིད་ན། ལུས་ངག་ཡིད་གསུམ་ཐམས་ཅད་འགྱུར་མེད་གཅིག་པུ་ཁོ་ན་ཉིད་དུ་འགྲོ་བར་འགྱུར་རོ། །སེམས་ཀྱི་གནས་ལུགས་འགྱུར་མེད་ཀྱི་གོ་འཕང་ཉིད་ཐོབ་པ་ན། སྔར་
བཤད་པ་ལྟར་ལུས་ཀྱི་ཆོས་རྣམས་ཀྱང་སེམས་ལ་ཐིམ་པའི་ཕྱིར། བརྟེན་ལུས་དང་རྟེན་པ་སེམས་ཀྱི་མཚན་ཉིད་སོ་སོར་ངེས་པའི་དབྱེ་བ་མེད་སྟེ། སྐུ་དང་ཡེ་ཤེས་ཟུང་དུ་འཇུག་པར་གྱུར་པའི་ཕྱིར་རོ། །རྟེན་བརྟེན་པ་འགགས་ཚུལ་ནི། རྣམ་པ་ཐམས་ཅད་རང་བཞིན་འཛིན་ཞེས་པའི་སྐབས་སུ་བཤད་ཟིན་ཏོ། །གཉིས་པ་ཟུང་འཇུག་གཉིས་མེད་ཀྱི་མཚན་ཉིད་རྒྱས་པར་བཤད་པ་ལ། གཉིས་མེད་ཡེ་ཤེས་ཀྱི་སྐུའི་དཀྱིལ་འཁོར་ངོས་བཟུང་བ། དེའི་ཁྱད་ཆོས་ལ་མཐའ་བཅད་པའོ། །དང་པོ་ནི། འགྱུར་མེད་ལས་བྱུང་སྐུ་ཡི་ནི། །མཛོད་སྤུའི་འཁོར་ལོ་སོན་པའི་ཡང༌། །ཨཱ་ལི་ཀཱ་ལི་མཉམ་སྦྱོར་བ། །ཧཱུཾ་ཡིག་མི་འདོད་མི་ཡི་བདག །ཅེས་པ་སྟེ། དེ་ཡང་འགྱུར་མེད་ཀྱི་བདེ་བ་རྫོགས་པ་ལས་བྱུང་བའི་ཟུང་འཇུག་སྐུ་སྟེ། ཕུང་ཁམས་སོ་དྲུག་ཐམས་ཅད་སྒྲིབ་བྲལ་དཀྱིལ་འཁོར་གྱི་འཁོར་ལོར་གྱུར་པ་ནི། དུས་ཀྱི་འཁོར་ལོ་དང༌། དགྱེས་པ་རྡོ་རྗེ་དང༌། འཁོར་ལོ་སྡོམ་པ་དང༌། གསང་བ་འདུས་པ་དང༌། སྒྱུ་འཕྲུལ་དྲྭ་བ་ལ་སོགས་པ་དུ་མས་བསྙད་པ་སྟེ། སྐུ་འདིའི་རྒྱུ་ལ་རྟོག་པས་སྒོམ་པའི་ཨཱ་ལི་ལས་བྱུང་བ་ཟླ་བའི་དཀྱིལ་འཁོར་དང༌། ཀཱ་ལི་ལས་བྱུང་བའི་ཉི་མའི་དཀྱིལ་འཁོར་མཉམ་པར་སྦྱོར་བ་དང༌། ཧཱུཾ་ཡིག་ལ་སོགས་པ་ས་བོན་ནམ་ཕྱག་མཚན་དང་གཅིག་ཏུ་འདྲེས་པ་ལས་སྐྱེད་པ་ནི་མི་འདོད་དེ། མཛོད་སྤུའི་འཁོར་ལོར་སོན་པའི་བྱང་ཆུབ་ཀྱི་སེམས་སྤྱི་བོར་གང་བ་ལས། དཀར་ཆ་མི་འགྱུར་བའི་ཐིག་ལེར་རིམ་པའི་ཟླ་བ་དང༌། དམར་ཆ་ཡང་དེར་ཐིམ་པའམ་ནོར་བུར་ཐིམ་པའི་ཉི་མ་དང༌། ལས་རླུང་དང་ཡིད་སོགས་རྣམ་ཤེས་འགགས་པའི་ས་བོན་ཕྱག་མཚན་དང་གཅིག་ཏུ་འདྲེས་པ་སྟེ། འགྱུར་བ་མེད་པའི་མངོན་བྱང་ལྔ་ལས་བྱུང་ཞིང་འཁྲུངས་པའོ། །འདིར་འགྱུར་མེད་ཅེས་པ་ལས་འཕྲོས་ནས་འགྱུར་མེད་ལྔའམ་དྲུག་གི་རང་བཞིན་ཨེ་བཾ་ཟུང་འཇུག་གི་དོན་རྒྱས་པར་བཤད་ན་ལེགས་པོར་འགྱུར་ལ། གཞན་ཡང་དོན་འདི་རྒྱས་པར་མཐའ་ཆོད་པ་དང་བཅས་པ་མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་བལྟ་ཞིང༌། རྒྱུད་སྡེ་གཞན་རྣམས་ལས་འབྱུང་བ་མངོན་
པར་བྱང་ཆུབ་པའི་རིམ་པ་ལས་མི་གནས་པའི་མྱ་ངན་ལས་འདས་པ་སྤྲོ་བ་དང༌། ཨཱ་ལི་ཀཱ་ལི་ཉེ་རྒྱུ་མངོན་བྱང་ལྔ་ལ་སོགས་པ་ཡང༌། དོན་འདི་ཉིད་གསལ་བར་བྱེད་པའོ། །གཉིས་མེད་ཡེ་ཤེས་ཀྱི་སྐུའི་ཁྱད་པར་གསལ་པོར་བསྟན་པའོ། །དང་པོ་ནི། སྟོང་པ་ལས་བྱུང་གཟུགས་བརྙན་རྒྱུ། །མི་འགྱུར་ལས་སྐྱེས་བདེ་བ་འབྲས། །རྒྱུ་ནི་འབྲས་བུས་རྒྱས་བཏབ་ཅིང༌། །འབྲས་བུ་རྒྱུ་ཡིས་རྒྱས་བཏབ་པའོ། །སྟོང་ཉིད་གཟུགས་བརྙན་འཛིན་པ་རྒྱུ། །སྙིང་རྗེ་འགྱུར་མེད་འཛིན་པ་འབྲས། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་དེ་མི་འཕོ་བའོ། །ཞེས་པ་ལ་བདེ་སྟོང་ཟུང་འཇུག་ཏུ་བསྟན་པ་དང༌། སྟོང་པ་དང་བདེ་བ་རྒྱུ་འབྲས་ཀྱི་གཟུགས་སུ་གཞག་པར་རྟོགས་ཏེ། སྤྲོས་པའི་མཚན་མ་ཐམས་ཅད་དང་བྲལ་བའི་སྟོང་པ་ལས་བྱུང་བ་སྟེ་སྟོང་པའི་རང་བཞིན་གྱི་གཟུགས་བརྙན་སྟོང་གཟུགས་ཕྱག་རྒྱ་ཆེན་པོ་ནི་རྒྱུའི་ཚུལ་ཡིན་ལ། ཐིག་ལེ་མི་འགྱུར་བ་ལས་སྐྱེས་པ་སྟེ་མི་འགྱུར་བ་ལས་གྲུབ་པའི་བདེ་བ་ནི་འབྲས་བུ་ཞེས་བྱ་སྟེ། རྒྱུ་སྟོང་ཉིད་དེ་ཉིད་འབྲས་བུ་བདེ་བ་ཆེན་པོའི་ངོ་བོར་གྱུར་པའི་ཕྱིར། རྒྱུ་ལ་འབྲས་བུའི་རྒྱས་བཏབ་པ་དང༌། འབྲས་བུ་བདེ་ཆེན་དེ་ཉིད་རྒྱུ་སྟོང་གཟུགས་རྣམ་པ་ཐམས་ཅད་པར་འཆར་བའི་ཕྱིར། འབྲས་བུ་ལ་རྒྱུ་ཡིས་རྒྱས་བཏབ་པའོ། །ཡང་སྟོང་ཉིད་སྙིང་རྗེ་དབྱེར་མེད་པ་རྒྱུ་འབྲས་ཟུང་འཇུག་ནི་ཡང་དག་པའི་སྟོང་ཉིད་གཟུགས་བརྙན་གྱི་མཚན་ཉིད་འཛིན་པ་སྟེ་གཟུགས་བརྙན་གྱི་རྣམ་པར་འཆར་བ་དེ་རྒྱུ་ཡིན་ལ། སྙིང་རྗེ་ཆེན་པོ་ཐིག་ལེ་འགྱུར་མེད་ཀྱི་བདེ་བའི་མཚན་ཉིད་འཛིན་པ་ནི་འབྲས་བུ་སྟེ། དེ་ལྟ་བུའི་སྟོང་ཉིད་སྙིང་རྗེ་དབྱེར་མེད་པ་ནི། དོན་དམ་བྱང་ཆུབ་ཀྱི་སེམས་ཞེས་བྱ་སྟེ། དེ་ནི་གདོད་མའི་ཆོས་དབྱིངས་ཡིན་པའི་ཕྱིར། རང་གི་ངོ་བོ་འཕོ་འགྱུར་མེད་པས་མི་འཕོ་བའོ། །དེ་འདྲ་བའི་སྟོང་ཉིད་སྙིང་རྗེ་དབྱེར་མེད་དེ་ནི་གདོད་མ་ནས་གྲུབ་པའི་མི་འགྱུར་བའི་བདེ་བ་ཡིན་ཡང༌། རྣལ་འབྱོར་པས་ཇི་སྲིད་མི་འགྱུར་བའི་ཐིག་ལེ་མ་གྲུབ་ཀྱི་བར་དུ། རྣལ་
འབྱོར་པ་དེ་ཉིད་ཀྱིས་མངོན་དུ་མ་གྱུར་ཞིང་མ་རྟོགས་ལ། མངོན་དུ་གྱུར་པ་ན་དེ་ཐོབ་པའོ། །སྟོང་ཉིད་དེ་ལ་མཉམ་པར་བཞག་པས་མི་འགྱུར་བ་དེ། མངོན་སུམ་དུ་ཐོབ་པར་སྣང་བའི་ཕྱིར། སྟོང་ཉིད་ཀྱི་ཆ་ལ་རྒྱུ་དང་བདེ་བའི་ཆ་ལ་འབྲས་བུར་བཤད་པ་ཡིན་གྱི། ངོ་བོའི་སྒོ་ནས་དབྱེ་བ་མེད་པས་རྒྱུ་འབྲས་ཀྱི་དངོས་པོར་གཞག་ཏུ་མེད་དོ། །དེས་ན་སྟོང་ཉིད་རྒྱུར་བྱས་ནས་བདེ་བ་འབྲས་བུར་དངོས་སུ་བྱས་པ་མིན་ཡང༌། སྟོང་ཉིད་རྟོགས་པའི་ལམ་བདེན་ལས་བདེ་བ་རྟོགས་པའི་ལམ་བདེན་སྐྱེ་སྟེ། དཔེར་ན། དུང་གི་མདོག་དབྱིབས་རགས་པ་མཐོང་བ་ལ་དམིགས་ནས། ཡུན་སྲིངས་ཏེ་ཞིབ་མོར་བལྟས་པ་ལས། ཁྱད་པར་མཐའ་དག་ཕྱི་ནས་རྟོགས་པ་ན། དུང་གི་མདོག་དབྱིབས་ལ་མི་འདྲ་བ་གཉིས་རྒྱུ་འབྲས་སུ་མེད་ཀྱང༌། དུང་མཐོང་བའི་ཤེས་པ་སྐད་ཅིག་མ་དང་པོ་རགས་པའི་རྣམ་པ་ཙམ་འཛིན་པ་དེ་ལས། ཤེས་པ་སྐད་ཅིག་མ་ཕྱི་མ་ཕྲ་བའི་རྣམ་པ་འཛིན་པ་སྐྱེ་བ་ན། ཡུལ་ལའང་སྔ་ཕྱི་རྒྱུ་འབྲས་སུ་མིང་བཏགས་བཞིན་ནོ། །གཉིས་པ་ནི། མྱ་ངན་འདས་པ་བྲལ་བའི་གཟུགས། །འཁོར་བ་ལས་འདས་མི་འགྱུར་བ། །དེ་དག་སྦྱོར་བ་གཉིས་མེད་མཆོག །རྟག་དང་ཆད་ལས་ངེས་པར་གྲོལ། །ཞེས་པ་ལ། མྱ་ངན་ལས་འདས་པའི་མཐའ་དང་བྲལ་བར་བྱེད་པའི་ཆོས་ནི་སྟོང་གཟུགས་ཡིན་ཏེ། སྐུ་སྣ་ཚོགས་པ་སྟོན་པས་ཆད་པའི་མྱང་འདས་ལ་མི་གནས་པའི་ཕྱིར་རོ། །འཁོར་བའི་མཐའ་ལས་འདས་པར་བྱེད་པ་ནི་མི་འགྱུར་བའི་བདེ་བ་སྟེ། སྤྲོས་པ་ཐམས་ཅད་དང་བྲལ་བའི་རྣམ་པ་ཉིད་དང༌། འཁོར་བའི་རྒྱུ་འགྱུར་བདེ་བ་ལོག་པའི་མཚན་ཉིད་ཀྱི་ཕྱིར་རོ། །སྟོང་གཟུགས་ནི་རྣམ་པ་ཐམས་ཅད་པ་དང༌། དངོས་པོ་སྤངས་པའི་ཕྱིར་རྟག་མཐའ་ལས་ངེས་པར་གྲོལ་ཞིང་བདེ་བ་ནི་ངོ་བོ་མི་འགྱུར་བས་རྟག་ཅིང༌། ཉམས་སུ་མྱོང་བར་ཡོད་པས་ཆད་མཐའ་ལས་གྲོལ་བ་སྟེ། རྒྱུ་མཚན་མཚུངས་པའི་ཕྱིར་གཟུགས་ཀྱིས་ཀྱང་རྟག་མཐའ་དང་མི་འགྱུར་བས་ཀྱང་ཆད་མཐའ་ཡང་གནོན་ཏེ། གཟུགས་དང་བདེ་བ་དེ་དག་མཉམ་པར་སྦྱོར་བ་ནི། གཉིས་མེད་ཟུང་འཇུག་མཆོག་སྟེ། མི་གནས་པའི་མྱ་ངན་ལས་འདས་པའོ། །དངོས་མེད་ལས་བྱུང་མཚན་ཉིད་ཕྱིར། །གཟུགས་ནི་དངོས་པོ་མེད་
པ་མིན། །དངོས་པོ་ལས་བྱུང་མཚན་ཉིད་ཕྱིར། །འགྱུར་བ་མེད་པ་དངོས་པོ་མིན། །ཞེས་པ་ལ། སྟོང་གཟུགས་ནི་རྡུལ་ཕྲ་རབ་སྤངས་པས། དངོས་པོར་མེད་ཀྱང་དངོས་པོ་མེད་པའི་དབྱིངས་ལས་རང་བྱུང་རང་ཤར་བའི་ཡེ་ཤེས་ཀྱི་གཟུགས་ཀྱི་མཚན་ཉིད་ཅན་གྱི་ཕྱིར་ཏེ་བྱུང་བ་དང་ཤར་བས་ན། དངོས་པོ་མེད་པ་ཡང་མིན་ནོ། །འགྱུར་མེད་ཀྱི་བདེ་བ་ནི། དམིགས་པ་མེད་པའི་ཕྱིར་དང༌། དངོས་པོ་ཐིག་ལེ་རྣམས་འགགས་པ་ལས་བྱུང་བའི་མཚན་ཉིད་ཀྱི་ཕྱིར། དངོས་པོ་མིན་ལ་བདེ་བ་ཆེན་པོ་ཉིད་དུ་རྟག་པར་ཡོད་པའི་ཕྱིར་དངོས་མེད་ཀྱང་མིན་ནོ། །དངོས་པོ་དངོས་མེད་ཡང་དག་སྦྱོར། །རྡོ་རྗེའི་རྣལ་འབྱོར་གཉིས་མེད་མཆོག །གཟུགས་དང་གཟུགས་མིན་རྣམ་པར་གྲོལ། །པྲ་ཕབ་མེ་ལོང་ལ་བཞིན་ནོ། །ཞེས་པ་ལ། དངོས་པོ་དངོས་མེད་ལས་གྲོལ་བའི་སྟོང་གཟུགས་དོན་དམ་པའི་དངོས་པོ་དང་བདེ་བ་དོན་དམ་པའི་དངོས་མེད་གཉིས་བདེ་སྟོང་ཡང་དག་པར་སྦྱོར་བ་སྟེ། ནམ་ཡང་དབྱེ་བ་མེད་པའི་ཕྱིར། རྡོ་རྗེའི་རྣལ་འབྱོར་ཟུང་འཇུག་གཉིས་སུ་མེད་པའི་མཆོག་གོ། དེ་བཞིན་དུ་རྡུལ་ཕྲ་རབ་སོགས་འདུས་བྱས་ཀྱི་ཆོས་མེད་པས་གཟུགས་ཀྱི་ཆོས་ལས་རྣམ་པར་གྲོལ་བ་དང༌། ཡེ་ཤེས་འདུས་བྱས་ཀྱི་སྣང་བ་རབ་འབྱམས་ཀྱི་ཕྱིར། གཟུགས་མིན་ལས་རྣམ་པར་གྲོལ་བ་སྟེ། པྲ་ཕབ་པའི་མེ་ལོང་ལ་རྐུན་པོའི་གཟུགས་བརྙན་ཤར་ན། ཤ་རུས་ལ་སོགས་པ་མེད་པས་གཟུགས་མིན་ཞིང༌། མདོག་དབྱིབས་ཀྱི་རྣམ་པར་གནས་པས་གཟུགས་མིན་མིན་པ་བཞིན་ནོ། །གཟུགས་ནི་སྲིད་པར་མི་འོང་སྟེ། །འགྱུར་མེད་མྱ་ངན་འདས་མི་འགྲོ །ཕན་ཚུན་འཁྱུད་པ་ཞི་བ་སྟེ། །མ་ནིང་གི་ནི་གོ་འཕང་མཆོག །ཅེས་པ་ལ། སྟོང་གཟུགས་ནི་འཁོར་བའི་ལུས་ངག་ཡིད་གསུམ་ལས་འདས་པའི་ཕྱིར་དང༌། སྟོང་ཉིད་ཡིན་པའི་ཕྱིར་འདིས་སྲིད་པར་མི་འོང་ལ། འགྱུར་མེད་ནི་བདེ་བ་ཆེན་པོ་དང་ཐམས་ཅད་རིག་པ་ཡིན་པའི་ཕྱིར། མྱ་ངན་ལས་འདས་པའི་མཐར་མི་འགྲོ་བའོ། །གོང་དུ་མྱ་ངན་འདས་པ་བྲལ་བའི་གཟུགས་སོགས་དང༌། འདིར་བཤད་པ་གཉིས་སྦྱོར་ཚུལ་གོ་བཟློག་པ་སྟེ། དེས་ན་སྟོང་ག །ཟུགས་ཀྱི་ལྡོག་ཆ་ནས་ཀྱང་འཁོར་འདས་ཀྱི་མཐའ་གཉིས་
ཀ་གནོན་ལ། བདེ་བའི་ལྡོག་ཆས་ཀྱང་མཐའ་གཉིས་ཀ་གནོན་ནོ། །དེ་ལྟ་བུའི་ཕྱིར་ན། གཟུགས་དང་འགྱུར་མེད་གཉིས་ཀ་ལ་གཉིས་ཀ་ཕན་ཚུན་འཁྱུད་པ་སྟེ། འབྲལ་མི་ཤེས་པ་ནི་སྤྲོས་པ་ཐམས་ཅད་ཞི་ཞིང༌། ཐབས་ཀྱང་ཡིན་ལ་ཤེས་རབ་ཀྱང་ཡིན་པའི་ཕྱིར། རྡོ་རྗེ་སེམས་དཔའ་མ་ནིང་གི་གོ་འཕང་མཆོག་གོ །འདིར་འཁོར་འདས་དང་རྟག་ཆད་དང་ཡོད་མེད་གཟུགས་དང་གཟུགས་མིན་ཏེ། སྤྲོས་པའི་མཐའ་བརྒྱད་སྤངས་པ། རྣམ་པ་ཀུན་གྱི་མཆོག་དང་ལྡན་པའི་སྐུ་རྣམ་པ་ཐམས་ཅད་པའི་དཀྱིལ་འཁོར་དང༌། རྣམ་པ་ཐམས་ཅད་པའི་སྒྲ་དབྱངས་སུ་འཆར་བ་གསུང་དང༌། ཆོས་ཉིད་བདེ་བ་ཆེན་པོའི་ཡེ་ཤེས་འགྱུར་བ་མེད་པ་ཇི་ལྟ་ཇི་སྙེད་མཁྱེན་པའི་ཐུགས་རྣམས་མིང་འདོགས་དང་ལྡོག་ཆས་དབྱེ་བ་མ་གཏོགས་ངོ་བོའི་སྒོ་ནས་དབྱེ་བ་མེད་པའི་ཡེ་ཤེས་ནི་ཟུང་འཇུག་གོ །དེ་ལྟར་ཡང༌། ལུས་ནི་དྭངས་ཤིང་རྡུལ་ཕྲན་ཉམས་པ་ནམ་མཁའ་དང་མཚུངས་མཚན་ལ་སོགས་པ་རྣམས་ཀྱིས་རབ་རྫོགས་འགྱུར། །སྣ་ཚོགས་འཇིག་རྟེན་གསུམ་པོ་ཉིད་ནི་དངས་ཞིང་སྒྲིབ་པ་རྣམ་པར་བྲལ་བ་རྨི་ལམ་བཞིན་དུ་སྣང༌། །སྐད་ནི་ཀུན་ནས་ཆད་པ་མེད་ཅིང་དུ་མའི་སྐད་གཞན་དག་གིས་གཞན་གྱི་སྙིང་ལ་འཇུག་པ་སྟེ། །སེམས་ནི་དམ་པའི་བདེ་བས་གང་ཞིང་མི་གཡོ་ཐམས་ཅད་དུས་སུ་ལྷན་ཅིག་སྐྱེས་པས་འཁྱུད་པའོ། །ཞེས་སོ། །དེ་ལྟ་བའི་ཟུང་འཇུག་དེ་ལ་སྤྲོས་པ་མེད་ཅིང་གཉིས་ཆོས་རྣམས་སྤངས་པ་ཡང་ཟུང་འཇུག་གི་དོན་ཕྱོགས་གཅིག་གོ །གསུམ་པ་ནི། ཤེས་རབ་རྒྱུ་ལས་མ་བྱུང་ཞིང༌། །ཤེས་རབ་རྒྱུ་ལས་བྱུང་བ་འབྲས། །ཤེས་རབ་རྒྱུ་ལས་མ་སྐྱེས་ཕྱིར། །ཤེས་རབ་ལས་སྐྱེས་རྒྱུ་སྐྱེས་མིན། །དེ་ཕྱིར་ཡེ་ཤེས་རྒྱུ་སྐྱེས་མིན། །ཤེས་རབ་ཡེ་ཤེས་བླ་ན་མེད། །ཅེས་པ་ལ། ལས་དང་ཡེ་ཤེས་ཀྱི་ཕྱག་རྒྱའི་ཤེས་རབ་ཀྱི་རྒྱུ་ལས་མ་བྱུང་ཞིང༌། སྟོང་གཟུགས་ཕྱག་རྒྱ་ཆེན་མོའི་ཤེས་རབ་ཀྱི་རྒྱུ་ལས་བྱུང་བའི་འབྲས་བུའི་ཕྱིར། སྟོང་གཟུགས་ཀྱི་ཤེས་རབ་མ་དེ་ཡང་རྒྱུ་ལས་མ་སྐྱེས་པའི་ཕྱིར། སྟོང་གཟུགས་ཀྱི་ཤེས་རབ་མ་ལ་སྙོམས་པར་ཞུགས་པ་ལས་སྐྱེས་པའི་བདེ་བ་དེ་ཡང༌། རྒྱུ་ལས་སྐྱེས་པ་མིན་པས། དོན་དམ་པའི་ཤེས་རབ་ཡེ་ཤེས་དེ་ནི། ཤེས་རབ་ཡེ་ཤེས་བླ་ན་མེད་པ་ཡིན་ཏེ། རྒྱུ་ལས་སྐྱེས་པ་མིན་པར་རང་བྱུང་གདོད་མའི་ཡེ་ཤེས་ཡིན་པའི་ཕྱིར་རོ། །འདིར་སྟོང་གཟུགས་དང་བདེ་ཆེན་གྱི་
གཞི་མཐུན་པ་ལ། སྟོང་གཟུགས་ལས་བྱུང་བའི་བདེ་བ་ཞེས་ཟེར་བ་ནི། གསེར་དང་བུམ་པའི་གཞི་མཐུན་པ་ལ་གསེར་ལས་བྱུང་བའི་བུམ་པ་དང༌། སེང་ལྡེང་དང་ཕུར་བུའི་གཞི་མཐུན་པ་ལ། སེང་ལྡེང་ལས་སྐྱེས་པའི་ཕུར་བུ་ཟེར་བ་བཞིན་དུ། བྱུང་བ་དང་སྐྱེས་པ་ནི་དེའི་བདག་ཉིད་དུ་ཡོད་པའི་མིང་ངོ༌། །འོན་ཀྱང་རྣམ་གཞག་ཙམ་གྱི་རྒྱུ་འབྲས་སུ་ཡང་འཇོག་སྟེ། གསེར་གྱི་རྒྱུ་ལས་བུམ་པ་སྒྲུབས་སོ་ཟེར་བ་བཞིན་དང༌། རྒྱུ་བུ་རམ་ལས་བྱུང་བའི་རོ་མངར་བ་ཞེས་པ་བཞིན་ནོ། །སྟོང་གཟུགས་ལ་རྒྱུ་མེད་པར་བཤད་པ་ནི་འཇིག་རྟེན་ཀུན་རྫོབ་ཏུ་ན། དུ་སྣང་ལ་བུད་ཤིང་ལ་སོགས་པ་དུ་བའི་རྒྱུ་མེད་པ་ལྟ་བུ་ཡིན་ལ། དོན་དམ་པར་ན་རང་བྱུང་གདོད་མའི་སྟོང་ཉིད་ཡིན་པའི་ཕྱིར། སྐྱེད་པའི་རྒྱུད་གཏན་ནས་ཡོད་པ་མ་ཡིན་པས། སྟོང་གཟུགས་ངོ་བོས་ཀྱང་དངོས་པོར་མ་གྲུབ་པའོ། །འབྲས་བུ་རྒྱུ་ཡིས་གཞན་དང་གཞན། །ཕན་ཚུན་དུ་ནི་རྒྱས་བཏབ་མེད། །ཅེས་པ་ལ། དེ་བས་ན་ཟུང་འཇུག་འདི་ནི་རྒྱུ་འབྲས་རྟེན་འབྲེལ་ཐམས་ཅད་ལས་འདས་པའོ། །དེ་དོན་དམ་པར་འབྲས་བུ་བདེ་བ་དང་རྒྱུ་སྟོང་གཟུགས་གཉིས་པོ་ལ་རྒྱུ་འབྲས་ཀྱི་དབྱེ་བ་མེད་པར་མ་ཟད། ཡུལ་ཡུལ་ཅན་དང་ལུས་དང་སེམས་སོགས་རྣམ་གཞག་གཞན་དང་གཞན་གྱིས་ཀྱང་ཕན་ཚུན་དུ་རྒྱས་བཏབ་པ་མེད་དོ། །རྒྱུ་དང་འབྲས་བུ་ཐམས་ཅད་གང༌། །དེ་ནི་རྟེན་ཅིང་འབྲེལ་བར་འབྱུང༌། །ཕན་ཚུན་རྒྱ་ཡིས་བཏབ་པའི་གཟུགས། །སྐྱེ་མིན་མྱ་ངན་འདས་པ་མིན། །ཞེས་པ་ལ། གང་རྒྱུ་དང་འབྲས་བུ་ལ་སོགས་པ་རྒྱས་བཏབ་པ་སྟེ་ཕན་ཚུན་བསྲེ་བར་བྱེད་ནུས་པའི་ཆོས་གང་ཡིན་པ་དེ་ནི། རྟེན་ཅིང་འབྲེལ་བར་འབྱུང་བ། སྐྱེ་འཇིག་གི་རང་བཞིན་ཅན་ཀུན་རྫོབ་བདེན་པ་ཡིན་ལ། དོན་ལ་ཕན་ཚུན་རྒྱ་ཡིས་བཏབ་རྒྱུ་མེད་ཀྱང༌། འཁོར་འདས་དབྱེར་མེད་རྒྱུ་འབྲས་དབྱེར་མེད། ཡུལ་ཡུལ་ཅན་དབྱེར་མེད་སོགས་གདོད་མ་ནས་གཉིས་སུ་མེད་པ་ལ། རྒྱས་བཏབ་པ་ལྟར་ཐ་སྙད་བྱས་པ་ནི་རྒྱས་བཏབ་པའི་གཟུགས་བརྙན་ཅན་ཏེ། ཟུང་འཇུག་འདི་ནི་རྟེན་འབྲེལ་དངོས་མ་ཡིན་ལ། དོན་དམ་པའི་རང་བཞིན་གྱི་ཕྱིར་སྐྱེ་བ་མིན་ཞིང་འཇིག་པའི་མྱ་ངན་ལས་འདས་པའང་མིན་ནོ། །དེ་ལྟར་ན་ཀུན་
རྫོབ་འཁོར་བའི་སྐྱེ་འགག་མེད་ཅིང༌། དོན་དམ་པ་རྟག་ཏུ་སྐྱེ་བ་དང༌། རྟག་ཏུ་མྱ་ངན་ལས་འདས་པའང་ཡིན་ཏེ། ཤེས་རབ་ཀུན་ནས་མྱ་ངན་འདས། །སྐྱེ་བ་མཆོག་ཏུ་འགྱུར་བ་མེད། །རྒྱུ་དང་འབྲས་བུ་རྣམ་ངེས་གྲོལ། །ཕན་ཚུན་དུ་ནི་རྒྱས་བཏབ་མེད། །ཅེས་པ་ལ། ཤེས་རབ་སྟོང་གཟུགས་ནི་དངོས་པོ་ཐམས་ཅད་སྤངས་པའི་ཕྱིར། ཀུན་ནས་རྟག་ཏུ་ཞིག་ཅིང་མྱ་ངན་ལས་འདས་པའང་ཡིན་ལ། མཆོག་ཏུ་འགྱུར་བ་མེད་པའི་བདེ་བ་ནི། སོ་སོར་རང་གིས་རིག་ཅིང༌། དོན་དམ་སྲིད་གསུམ་རྣམ་པ་ཐམས་ཅད་པ་འཛིན་པའི་ཕྱིར། རྟག་པར་སྐྱེ་བ་ཡང་ཡིན་པས། འདུས་བྱས་ཀྱི་རྒྱུ་དང་འབྲས་བུ་ལས་ངེས་པར་རྣམ་པར་གྲོལ་བའི་ཕྱིར། ཕན་ཚུན་དུ་ནི་རྒྱས་བཏབ་མེད་དེ། གཉིས་སུ་མ་གྲུབ་པའི་ཕྱིར་རྒྱས་གདབ་བྱ་འདེབས་བྱེད་སོ་སོར་མེད་པས་སོ། །མ་སྐྱེས་པ་དང་མ་འགགས་པའི། །ཤེས་བྱ་གང་ཞིག་འདིར་མཐོང་བ། །དེ་ནི་རང་སེམས་གཞན་མ་ཡིན། །ཕྱི་ཡི་ཤེས་བྱ་རྣམ་འབྱེད་ཕྱིར། །ཞེས་པ་ལ། མ་སྐྱེས་པ་དང་མ་འགགས་པའི་རང་བཞིན་གྱི། ཤེས་བྱ་སྟོང་གཟུགས་གང་ཞིག་རྡོ་རྗེའི་རྣལ་འབྱོར་གྱིས་སྐབས་འདིར་མཐོང་བ་ནི་རང་གི་སེམས་ལས་གཞན་ཕྱི་རོལ་ཀྱི་དོན་མ་ཡིན་ཏེ། འདི་ཡིས་ལས་སྣང་ཕྱི་རོལ་ཀྱི་དོན་དུ་ཤར་བའི་ཤེས་བྱ་རྣམས། རྣམ་པར་འབྱེད་ཅིང་འཇོམས་པའི་ཕྱིར། དགྱེས་པའི་རྡོ་རྗེ་ལས་ཀྱང༌། མཐོ་རིས་མི་ཡུལ་ས་འོག་རྣམས། །སྐད་ཅིག་གིས་ནི་གཟུགས་གཅིག་འགྱུར། །རང་གཞན་ཆ་ཡི་རྣམ་རྟོག་གིས། །གནོན་པ་ཉིད་ནི་ནུས་པ་མིན། །ཞེས་གསུངས་སོ། །དེ་ཕྱིར་བདག་གི་བདག་ཉིད་ལ། །འགར་ཡང་རྒྱས་བཏབ་ནུས་མ་ཡིན། །རལ་གྲི་ཆེན་པོ་བདག་ཉིད་ལ། །བདག་ཉིད་སོ་ཡིས་གཅོད་དམ་ཅི། ཞེས་པ་ལ། དོན་དམ་པའི་རྒྱུ་འབྲས་དེ་གཉིས་སེམས་ཉིད་ཀྱི་ངོ་བོར་གཅིག་པ་དེའི་ཕྱིར། བདག་གིས་བདག་ཉིད་ལ་རྒྱས་བཏབ་པར་ནུས་པ་གནས་སྐབས་འགར་ཡང་ཡོད་པ་མ་ཡིན་ཏེ། གཞན་དུ་ན། རལ་གྲི་ཆེན་པོ་བདག་ཉིད་ལ། རལ་གྲི་བདག་ཉིད་ཀྱི་སོ་ཡིས་གཅོད་དམ་ཅི་སྟེ། གཅོད་པར་ཐལ་བ་ལས་མི་གཅོད་དོ། །འོ་ན་ཕྱག་རྒྱ་ཆེན་པོ་ནི་སྐྱེ་བ་མེད་པ་ཡིན་པའི་ཕྱིར། དེའི་བདེ་བ་སུས་ཀྱང་མྱོང་བ་མེད་དོ་སྙམ་ན། མོ་གཤམ་བུ་མོ་དང་འགྲོགས་པས། །རྨི་ལམ་དུ་ནི་
བདེ་འགྱུར་ལྟར། །ནམ་མཁའ་ལས་བྱུང་གཟུགས་བརྙན་ནི། །བརྟེན་པས་བདག་ལ་དེ་བཞིན་ནོ། །རྨི་ལམ་དུ་མོ་གཤམ་གྱི་བུ་མོ་དང་འགྲོགས་པ་ལས། བདེ་བ་ཐོབ་པ་འགྱུར་བ་ན། མོ་གཤམ་གྱི་བུ་མོ་མེད་ཅིང༌། དེ་ལས་བདེ་བ་སྐྱེས་པ་མེད་ཀྱང་མྱོང་བ་ལྟར། ནམ་མཁའ་སྟེ་སྤྲོས་པ་ཐམས་ཅད་དང་བྲལ་བའི་སྟོང་ཉིད་ལས་བྱུང་བ་སྟེ་སྟོང་ཉིད་ལས་གྲུབ་པའི་གཟུགས་བརྙན་ནི་སྟོན་པས། བདག་ལ་མི་འགྱུར་བའི་བདེ་བ་འབྱུང་བ་ཡང་སྐྱེས་པ་མེད་ཀྱང་མྱོང་བ་དེ་བཞིན་ནོ། །རྨི་ལམ་དུ་མོ་གཤམ་གྱི་བུ་མོ་དང་འགྲོགས་པའི་བདེ་བ་ནི། རྒྱུ་རྐྱཻན་མེད་ཀྱང་ཉམས་སུ་མྱོང་བའི་དཔེར་བླངས་ཀྱི་སྣང་ཡང་བདེན་པས་སྟོང་པའི་དཔེར་བྱས་པ་ནི་མ་ཡིན་ནོ། །དོན་འདི་ཡང་རྒྱས་པར་མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་འབྱུང་ངོ༌། །དེ་ལྟར་ན་འདི་དག་གི་བསྐྱེད་བྱ་སྐྱེད་བྱེད་དང༌། རྟོགས་བྱ་རྟོགས་བྱེད་སོགས་སོ་སོ་བ་བཀག་པ་ཡིན་གྱི། བོད་འགའ་ཞིག་འདི་དག་གིས་རང་རིག་བཀག་པར་སེམས་པ་ནི། གྲུབ་མཐའ་ངན་པའི་གདོན་གྱིས་བསླབ་པའི་རྣམ་འགྱུར་ཙམ་ལས་ཕྱོགས་སུ་འགྲོ་བའི་རྒྱུ་མཚན་ཙམ་ཡང་མེད་དོ། །བཞི་པ་ནི། ཤེས་རབ་མ་ཡིན་ཐབས་ཀྱང་མིན། །འདི་ནི་ལྷན་སྐྱེས་ཤེས་རབ་བཅས། །ཀུན་ནས་བདེ་བ་རྫོགས་པ་ལས། །སྒྲིབ་པ་ཐམས་ཅད་སྤངས་པ་སྟེ། །ནམ་མཁའ་བཞིན་དུ་གོས་པ་མེད། །ཡུལ་དང་དབང་པོ་སྤངས་པ་ནི། །ཀུན་ནས་འབྱུང་པོ་ཀུན་ལ་གནས། །བཅད་དུ་མེད་པ་དབྱེ་བ་སྤངས། །ཞེས་གསུངས་ཏེ། ཟུང་འཇུག་གི་ངོ་བོ་ནི། ཤེས་རབ་རྐྱང་པ་མིན་ལ་ཐབས་རྐྱང་པ་ཡང་མིན་ཞེས་པ་དང༌། ལྷན་སྐྱེས་ཤེས་རབ་བཅས་ཤེས་པས་ཐབས་ཡིན་ལ་ཤེས་རབ་ཡང་ཡིན་ཞེས་པར་འགྱུར་བས། འདིར་ཐབས་ཤེས་ཀྱི་གཙོ་བོ་གོང་དུ་བཤད་པ་ལྟར་ཡིན་ཡང༌། ཐབས་ཤེས་ཀྱི་རྣམ་གྲངས་མཐའ་དག་ཀྱང་འདིར་སྦྱར་བར་བྱ་སྟེ། མདོར་བསྡུ་ན། ཤེས་རབ་སྤྲོས་བྲལ་གྱི་སྟོང་ཉིད་ཁོ་ན་རྟོགས་པའི་ཡེ་ཤེས་ཀྱང་མིན་ལ། ཐབས་དམིགས་བཅས་ཀྱི་སྙིང་རྗེ་ཁོ་ན་ཡང་མིན་ཏེ། འདི་ནི་ལྷན་ཅིག་སྐྱེས་པའི་བདེ་བ་ཆེན་པོ་སྟོང་གཟུགས་ཀྱི་ཤེས་རབ་མ་དང་བཅས་པ་སྟེ་ངོ་བོ་དབྱེ་བ་མེད་པའོ། །བདེ་བ་ཆེན་པོས་
ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་ཏེ། སྒྲིབ་པ་དང་བྲལ་བས་བདེ་བ་རང་གི་རྣམ་པ་རྫོགས་པའི་རང་སྣང་ལས་སྟོབས་བཅུ་ལ་སོགས་པའི་ཡོན་ཏན་ཐམས་ཅད་ཀུན་ནས་ཡོངས་སུ་རྫོགས་པའི་རང་བཞིན་ཏེ་དེ་ཡང་བསོད་ནམས་ཀྱི་ཚོགས་རྫོགས་པས་འཁོར་བ་ཇི་སྲིད་པར་གཞན་དོན་རྒྱུན་མི་འཆད་པ་དང༌། ཡེ་ཤེས་ཀྱི་ཚོགས་རྫོགས་པས་ཡེ་ཤེས་དག་པའི་ཞིང་དང༌། འཁོར་དང༌། མཆོད་པ་དང༌། མཚན་དཔེ་ཅན་གྱི་སྐུ་དང་རྒྱན་དང༌། ཆོས་འབྱུང་དང་གཞལ་མེད་ཁང་ལ་སོགས་པས་འགྱུར་ཞིང༌། ཚུལ་ཁྲིམས་ཀྱི་ཚོགས་རྫོགས་པས་ཁ་སྦྱོར་གྱི་སྐུ་དང་རང་སྣང་གི་ཆོས་ཐམས་ཅད་བདེ་བར་ཤར་བ་དང༌། རྣམ་པར་མི་རྟོག་པའི་ཡེ་ཤེས་ཀྱིས་ཤེས་བྱ་ཐམས་ཅད་རིག་པའོ། །ཉོན་མོངས་པ་དང་ཤེས་བྱ་དང༌། སྙོམས་འཇུག་གི་སྒྲིབ་པ་ཐམས་ཅད་བྲལ་ཞིང་སྤངས་པ་དང༌། ནམ་མཁའ་ནི་ས་ལ་སོགས་པས་གོས་པ་མེད་པ་བཞིན་དུ། རང་སྣང་དུ་མ་དག་པའི་སྣང་བ་ཐམས་ཅད་སངས་ཤིང༌། ཀུན་རྫོབ་གཉིས་སྣང་གི་ཆོས་གང་གིས་ཀྱང་གོས་པ་མེད་པ་དང༌། ཡེ་ཤེས་ཀྱི་ཞིང་དང་མཆོད་པ་རབ་འབྱམས་རྣམས་ཀྱང༌། གཟུགས་སོགས་སྐྱེ་མཆེད་དྲུག་གི་ཡུལ་སྤངས་ཤིང༌། སྐུ་རྣམ་པ་ཐམས་ཅད་པ་མཚན་དང་དཔེ་བྱད་ཀྱིས་བརྒྱན་ཡང་མིག་སོགས་དབང་པོ་སྤངས་པ་དང༌། ཐམས་ཅད་མཁྱེན་པའི་ཡེ་ཤེས་ཉིད་ཀྱི་མཐུ་ལས། ཡུལ་དུས་ཀུན་ནས་འབྱུང་པོ་དངོས་པོ་ཀུན་ལ། དོན་དམ་པར་ཆོས་ཉིད་ཀྱི་ཚུལ་གྱིས་གནས་ཤིང༌། ཀུན་རྫོབ་ཏུ་ཡང་ཅིག་ཅར་ལྷུན་གྱིས་གྲུབ་པར་འགྲོ་བའི་དོན་མཛད་པས་ཁྱབ་པར་གནས་པ། གཅད་ཅིང་བཞིག་ཏུ་མེད་ལ། གཟུང་འཛིན་སོགས་གཉིས་ཆོས་ཀྱི་དབྱེ་བ་སྤངས་པ། སྐུ་དང་ཡེ་ཤེས་དང་ཞིང་ཁམས་དང་ཡོན་ཏན་དང༌། ལོངས་སྤྱོད་དང་མཛད་པ་ཐམས་ཅད་ངོ་བོ་གཅིག་ཏུ་གནས་པའོ། །གསུམ་པ་རང་བཞིན་འགྱུར་མེད་ཀྱི་དཀྱིལ་འཁོར་རྒྱས་པར་བསྟན་པ་ལ་གཉིས་ཏེ། རང་བཞིན་མཆོད་པ་ཆེན་པོ་དྲུག་ཞིབ་མོར་བཤད་པ་དང༌། དོན་དམ་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་རྒྱས་པར་བསྟན་པའོ། །དང་པོ་ནི། རང་བྱུང་རྡོ་རྗེ་སེམས་དཔའ་འདི། །དོན་ཆེན་མཆོག་ཏུ་མི་འགྱུར་བ། །ཞེས་མདོར་བསྟན་པའི་དོན་རྒྱས་པར་བཤད་པ་ནི། རྡོ་རྗེ་མི་ཕྱེད་ཞེས་པར་བརྗོད། །འདིར་ནི་དོན་ཆེན་བཅོམ་ལྡན་འདས། །སེམས་དཔའ་
སྲིད་གསུམ་གཅིག་པ་ཉིད། །མཆོག་ཏུ་མི་འགྱུར་བརྗོད་པར་བྱ། །ཞེས་གསུངས་ཏེ། སྐྱེ་འགགས་ཐམས་ཅད་དང་བྲལ་ཞིང༌། ཡང་དག་པའི་གནས་ལུགས་ལ་ཞུགས་པའི་ཡེ་ཤེས་ནི། རྒྱུ་རྐྱེན་སྤངས་པའི་ཕྱིར་རང་བྱུང་སྟེ། དོན་དམ་པ་མཆོག་ཏུ་མི་འགྱུར་བའི་བདེ་བ་ཆེན་པོ། ཆོས་ཐམས་ཅད་ཀྱི་གནས་ལུགས་ཡིན་ལ། ཕུན་སུམ་ཚོགས་པ་ཡང་ཡིན་ཞིང༌། ནམ་དུ་ཡང་ཉམས་པར་མི་འགྱུར་བའི་ཕྱིར་ན་དོན་ཆེན་པོ་སྟེ། གཞི་ལམ་འབྲས་གསུམ་ཀུན་ཁྱབ་ཀྱྀ་སེམས་ཉིད་བདེ་བ་ཆེན་པོ་འདི་ནི། རྡོ་རྗེ་སེམས་དཔའ་ཞེས་བྱ་སྟེ། བདེ་བ་ཆེན་པོ་དེ་ཉིད་འདུས་མ་བྱས་པའི་ཕྱིར་གཞིག་ཏུ་མེད་ལ། རྣམ་པར་རྟོག་པས་མི་བྱེད་པའི་ཕྱིར་རྡོ་རྗེ་ཞེས་པར་བརྗོད་དེ། དེ་ཉིད་བདུད་བཞི་གདོད་མ་ནས་བཅོམ་པ་སྟེ། བདུད་བཞིའི་དྲི་མས་ཀྱང་མ་གོས་པས་གནས་ལུགས་ཉམས་པ་མེད་ལ། སྐལ་པ་དྲུག་གི་བདག་ཉིད་ཕུན་སུམ་ཚོགས་པའང་ཡིན་པའི་ཕྱིར་བཅོམ་ལྡན་འདས་ཏེ། འདིར་ནི་དོན་ཆེན་པོ་ཡང་དེ་ཉིད་དོ། །སེམས་དཔའ་ནི་དོན་དམ་པའི་འདོད་པ་དང༌། གཟུགས་ཁམས་དང༌། གཟུགས་མེད་ཅེས་པ་སྲྀད་པ་གསུམ་མམ། སྐུ་གསུང་ཐུགས་གསུམ་གྱི་སྲིད་པའི་སྣང་བ་རབ་འབྱམས་ཏེ། སྟོང་གཟུགས་རྣམ་པ་ཐམས་ཅད་པ་རྣམས་ངོ་བོ་བདེ་བ་ཆེན་པོར་རོ་གཅིག་པ་ཉིད་དོ། །གདོད་མའི་བདེ་བ་དང་སྟོང་གཟུགས་ཟུང་དུ་འཇུག་པ་ནི། མཆོག་ཏུ་མི་འགྱུར་བ་ཞེས་བརྗོད་པར་བྱའོ། །དེ་ཡང་སྟོང་གཟུགས་ཀྱི་སྲིད་གསུམ་ལ། སེམས་དཔའི་སྒྲ་དོན་ཇི་ལྟར་འཇུག་སྙམ་ན། བདེ་བ་ཆེན་པོ་སྟོང་གཟུགས་ལ་སེམས་པའི་ཕྱིར། སེམས་པའི་ཡུལ་གྱི་དོན་ཡང་ཡིན་ཞིང༌། སཏྭ་ཞེས་པ་བཅུད་དམ་ཁུ་བ་ལ་ཡང་འཇུག་པས། དོན་དམ་སྲིད་གསུམ་འདི་ཀུན་རྫོབ་སྲིད་གསུམ་གྱི་བཅུད་དུ་ཡོད་པར་ཡང་དགོངས་སོ། །འདི་ནི་མཚན་བརྗོད་ལས། འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །ཞེས་གསུངས་པས། མཆོད་ཆེན་བདེ་བའམ་འདོད་པ་ཆེན་པོའོ། །འདིར་འདོད་པ་ནི་ཁུ་བ་སྟེ་དོན་དམ་པའི་ཐིག་ལེའོ། །བདེ་བ་ནི་མི་འགྱུར་བ་དང༌། དགའ་བ་ནི་ལྷན་ཅིག་སྐྱེས་པ་དང༌། མགུ་བ་ནི་ཀུན་ལ་ཁྱབ་པའི་ཕྱིར་ཏེ། བརྟན་གཡོ་ཐམས་ཅད་མགུ་བར་བྱེད་པས་སོ། །འདོད་ཆགས་ཆེན་པོ་སེམས་དཔའ་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་མདོར་
བསྟན་ནས། རྒྱས་པར་བཤད་པ་ནི། མཆོག་ཏུ་མི་འགྱུར་བདེ་བ་རྫོགས། །ས་རྣམས་ཡོངས་སུ་རྫོགས་པ་ཡིས། །འདོད་ཆགས་ཆེན་པོ་སེམས་དཔའ་ཆེ། །སེམས་ཅན་ཐམས་ཅད་དགའ་བར་བྱེད། །དེ་ལ་སེམས་དཔའ་ཆེན་པོ་ནི། གསུང་རྡོ་རྗེའི་བདག་ཉིད་དེ། སྲིད་པ་གསུམ་གྱི་འདོད་ཆགས་སེམས་ཅན་ཐམས་ཅད་ཀྱི་རྒྱུད་ལ་གནས་པ། དེ་ཐམས་ཅད་ཀྱི་ཆོས་ཉིད་ཡིན་པའི་ཕྱིར་ཆེན་པོའོ། །འདོད་ཆགས་རྒྱ་མཚོའི་ཆོས་ཉིད་དེས་ནི། དྲི་མའི་ཆ་ལས་གཞི་འཁོར་བའི་དུས་སུ། མ་གྲོལ་བའི་སེམས་ཅན་ཐམས་ཅད་ལ་འདོད་ཡོན་རྣམས་ཀྱི་དགའ་བ་བསྐྱེད་པ་བྱེད་པ་ཡིན་ལ། དྲི་མ་སྤངས་པ་ན་རང་སྣང་ཐམས་ཅད་བདེ་བ་ཆེན་པོར་འགྱུར་བས་རྣམ་པར་གྲོལ་བའིསེམས་ཅན་ཐམས་ཅད་དགའ་བར་བྱེད་པའོ། །རང་སྣང་ཐམས་ཅད་ཇི་ལྟར་བདེ་བར་འགྱུར་སྙམ་ན། གོང་དུ་བསྟན་པ་ལྟར་ས་བཅུ་གཉིས་ཡོངས་སུ་རྫོགས་པ་ཡིས། མཆོག་ཏུ་མི་འགྱུར་བའི་བདེ་བའི་སྐད་ཅིག་རྫོགས་པས་སོ། །དེ་ལྟར་ན་ཐིག་ལེ་དག་པ་གཉིས་ལྡན་དུ་བྱས་པ་ནི་སེམས་དཔའ་ཡིན་ལ། དེ་ཉིད་འདོད་ཆགས་ཆེན་པོའོ། །སེམས་ཅན་ཐམས་ཅད་དགའ་བར་བྱེད་པའི་ཕྱིར། ཆེན་པོ་ཞེས་བྱ་སྟེ། དེ་ལྟར་ན་སེམས་དཔའ་ཆེན་པོའོ། །དེ་བས་ན་རྡོ་རྗེ་སེམས་དཔའ་ནི་ཟུང་འཇུག་གི་བདེ་བའི་ངོ་བོ་སེམས་དཔའ་ཆེན་པོས་མྱོང་བྱ་ཡིན་ལ། སེམས་དཔའ་ཆེན་པོ་ནི་བདེ་བ་དེ་ལ་སེམས་དཔའ་པ་དང་ཆགས་པ་པོའི་ལྡོག་ཆ་ཡིན་ནོ། །འདོད་ཆགས་ནི་རྡུལ་གྱི་ཆོས་ཡིན་པས། གསུང་རྡོ་རྗེའོ། །མཚན་བརྗོད་ལས། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་སོ། །བྱང་ཆུབ་སེམས་དཔའ་ཞེ་སྡང་ཆེ། །ཉོན་མོངས་ཟད་པ་དགྲ་ཆེན་པོ། །ཞེས་མདོར་བསྟན་ནས་རྒྱས་པར་བཤད་པ་ནི། བྱང་ཆུབ་ལ་གནས་སེམས་དཔའ་ནི། །མི་གཡོ་དེ་ཕྱིར་བྱང་ཆུབ་སེམས། །ཉོན་མོངས་ལ་སོགས་ཞེ་སྡང་ཚོགས། །ཞེ་སྡང་ཆེན་པོ་དགྲ་ཆེ་བ། །ཞེས་གསུངས་ཏེ། སེམས་ཅན་ཐམས་ཅད་ཀྱི་ཞེ་སྡང་ནི་ཞེ་སྡང་གི་རྒྱ་མཚོ་སྟེ། ཞེ་སྡང་རྒྱ་མཚོའི་ཆེན་པོ་ཆོས་ཉིད་ནི། བྱང་ཆུབ་སེམས་དཔའ་ཞེས་བྱ་སྟེ། ཆོས་ཉིད་དེ་དང་མཐུན་པའི་ལམ་སྒོམ་པའི་ཡེ་ཤེས་ནི། གཟུང་འཛིན་གྱི་སྣང་བ་དང༌། རྒྱུ་རོ་རྐྱང་གི་རླུང་སོགས་འགག་པར་བྱེད་པས། ཉོན་མོངས་པ་ཟད་པར་བྱེད་ཅིང་བདུད་ཀྱི་དགྲ་ཆེན་པོའོ། །དེ་ཡང་
སྤྲོས་བྲལ་དང་རྣམ་པ་ཐམས་ཅད་པ་ཟུང་དུ་འཇུག་པའི་སྟོང་ཉིད་ནི་བྱང་ཆུབ་སྟེ། དེ་ལ་སེམས་མཉམ་པར་གནས་པའི་སེམས་དཔའ་ཐིག་ལེའི་བདེ་བ་ནི་ཞུ་བདེ་ཡིན་ལ། ཞུ་བདེའི་སེམས་སྟོང་པ་ཉིད་དུ་ཐིམས་པས། འཛིན་ཆ་འགགས་པའི་སྤྲོས་བྲལ་དེ་ནི། ཐུགས་རྡོ་རྗེའི་ལམ་ཡིན་པས། བདེ་བ་རྒྱུ་ཡིན་ཀྱང༌། ཐུགས་ཀྱི་ལྡོག་ཆ་ནི་སྤྲོས་བྲལ་གྱི་སྟོང་ཉིད་དོ། །འདིས་ནི་གཞི་དུས་ཀྱི་ཐུགས་རྡོ་རྗེ་སྤྲོས་པས་ནམ་ཡང་མི་གཡོ་བ་དེ་མངོན་དུ་འགྱུར་ལ། དེས་ན་བྱང་ཆུབ་ལ་སེམས་དཔའ་ཐིམ་པའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེས་ནི་དུག་གསུམ་ལ་སོགས་པ་ཉོན་མོངས་པ་ཐམས་ཅད་དང༌། སོགས་པའི་སྒྲས་བདུད་བཞི་རྣམས་ཏེ་རང་གཞན་ལ་གནོད་ཅིང་ཞེ་སྡང་བའི་ཚོགས་དེ་ཐམས་ཅད་དབྱིངས་སུ་འཇོམས་པའི་ཕྱིར། ཞེ་སྡང་ཆེན་པོ་དང་བདུད་ཀྱི་དགྲ་ཆེན་པོ་ཞེས་ཀྱང་བྱའོ། །ཞེ་སྡང་ནི་སྡང་བྱེད་དེ་མི་མཐུན་པའི་ཕྱོགས་ཀྱི་མིང་ཡིན་པས་ཉོན་མོངས་ལ་སོགས་སྡང་བའི་ཚོགས། ཞེས་སྦྱར་ན་གོ་བདེའོ། །རླུང་ནི་སེམས་ཀྱི་ཆོས་ཡིན་ལ། ཞུ་བདེ་སྟོང་པར་རོ་མཉམ་པ་རོ་རྐྱང་གི་རླུང་རྟག་ཏུ་འགགས་པར་བྱས་པས། མངོན་དུ་གྱུར་པའི་ཡེ་ཤེས་ཡིན་པའི་ཕྱིར་ཐུགས་དང༌། གསལ་སྟོང་གི་ལྡོག་པ་ནི་ཞེ་སྡང་སྟེ། མཚན་བརྗོད་ལས། མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་དགྲ་ཆེ་བ། །ཞེས་སོ། །དམ་ཚིག་སེམས་དཔའ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །ཞེས་མདོར་བསྟན་ནས། དེ་ཉིད་རྒྱས་པར་བཤད་པ་ནི། །དམ་ཚིག་ཟླ་བ་བདུད་རྩི་ཡི། ཁུ་བ་འཕོ་མེད་དེ་ཟ་བ། །དམ་ཚིག་སེམས་དཔའོ་རིགས་པ་འདིས། །གཏི་མུག་བློ་སྟེ་གཏི་མུག་སེལ། །གཏི་མུག་རྒྱ་མཚོའི་ཆོས་ཉིད་ནི་གཏི་མུག་ཆེན་པོ་སྟེ། དེ་ཉིད་རང་དང་རྣམ་པ་མཚུངས་པའི་ལམ་དང་བཅས་པ་ནི། དམ་ཚིག་སེམས་དཔའོ། །གཏི་མུག་རྣམ་པར་མི་རྟོག་པའི་བློ་ཡེ་ཤེས་ནི་དེ་ལྟ་བུ་སྟེ། ཆོས་རྣམས་ལ་རབ་ཏུ་རྨོངས་པའི་ཆ་དང༌། ཐིག་ལེ་འཕོ་བའི་གཏི་མུག་མཐའ་དག་སེལ་བར་བྱེད་དོ། །ཟླ་བ་བདུད་རྩི་ཡི་ཁུ་བ་ནི། སེམས་དཔའ་ཡིན་ལ། དམ་ཚིག་ནི་འདུས་པ་དང་འདའ་བར་མི་བྱ་བའི་དོན་གཉིས་ཀ་ལ་འཇུག་པ་ཡིན་ཏེ། སྟོང་པ་ཉིད་དང་འདུས་པ་ལས་དང་སྟོང་པས་ཐིག་ལེ་དེར་མི་འདའ་ཞིང༌། འཕོ་འགྱུར་མེད་པར་ཟ་ཞིང་ལོངས་སྤྱོད་པས་ན་དམ་ཚིག་སེམས་དཔའོ། །རིགས་པ་
སྟེ་རྒྱུ་མཚན་འདིས་ནི། གཏི་མུག་བློ་སྟེ་གཏི་མུག་སེལ་བ་སྟེ་དེ་ལྟར་ཡང༌། རྟོག་པ་ཉམས་པས་བློ་ཉམས་ཏེ། །བློ་ངན་རྗེས་སུ་རྟོག་བྱེད་དོ། །དེ་ཉིད་ལས་ནི་བློ་བཟང་པོ། །ནམ་མཁའ་ལས་ལྷག་ཅི་ཡང་འབྱུང༌། །ཞེས་པའོ། དེ་ཡང་རྣམ་པར་རྟོག་པ་དང་བཅས་པས་འགྱུར་མེད་ཐོབ་མི་སྲིད་ལ་མི་འགྱུར་བའི་ཐིག་ལེའི་རང་ངོས་ནས་ཀྱང་རྣམ་རྟོག་སྐྱེད་མི་སྲིད་དེ། དེས་ན་ཐིག་ལེ་འགྱུར་མེད་ནི་རྣམ་པར་མི་རྟོག་པའི་བྱེད་པ་ཅན་ཡིན་པའི་ཕྱིར་དེ་ལྟར་བཤད་ལ། དམ་ཚིག་སེམས་དཔའ་དངོས་ནི་མི་རྟོག་པའི་ལྡོག་ཆ་ནས་ཏེ། སྐུ་རྡོ་རྗེའི་རྣལ་འབྱོར་རོ། །དེ་ཡང་མི་རྟོག་པ་ཉིད་ཀྱིས་མ་རིག་པ་ཐམས་ཅད་སེལ་ཏེ་རྣམ་པར་རྟོག་པ་དང་བཅས་པས་ནི་མ་རིག་པ་འཕེལ་བར་འགྱུར་རོ། །དེ་ལྟར་ཡང༌། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྷུང་བྱེད་ཡིན། །མི་རྟོག་ཏིང་འཛིན་ལ་གནས་ན། །ནམ་མཁའ་བཞིན་དུ་དྲི་མེད་འགྱུར། །མཚན་བརྗོད་ལས། མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །ཞེས་སོ། །རྡོ་རྗེའི་རྣལ་འབྱོར་ཁྲོ་བ་ཆེ། །ལྷ་མིན་ཁྲོ་བོ་དགྲ་ཆེན་པོ། །ཞེས་མདོར་བསྟན་ནས། རྡོ་རྗེ་ཐམས་ཅད་གཅིག་པ་ཉིད། །ཤེས་རབ་སྐུ་དང་མི་འགྱུར་བཅས། ཁྲོ་བོ་ཆེན་པོ་དགྲ་ཆེན་པོ། ཁྲོ་བོའི་གཟུགས་ཅན་བདུད་རྣམས་ཀྱིའོ། །རྡོ་རྗེ་སྟོང་གཟུགས་དང་བདེ་ཆེན་རོ་མཉམ་པའི་རྣལ་འབྱོར་ནི་རྣམ་པར་རྟོག་པ་དང་ཉོན་མོངས་པ་ཐམས་ཅད་བརླག་པར་བྱེད་པའི་ཕྱིར་ཁྲོ་བོ་ཆེན་པོ་དང༌། བདེ་བ་ཉམས་པའི་དགའ་བྲལ་གསོད་པའི་ཕྱིར་ལྷ་མིན་ཁྲོ་བོ་སྟེ་སྲིན་པོའོ། །དེ་ཉིད་ཀྱིས་ན་འཁོར་བའི་དགྲ་ཆེན་པོའོ། །རྡོ་རྗེ་བཞི་ལ་སོགས་པའམ། ཡེ་ཤེས་ཀྱི་ལྷ་ཐམས་ཅད་རོ་གཅིག་པ་ཉིད་ཀྱི། ཤེས་རབ་སྟོང་གཟུགས་ཀྱི་སྐུ་དང༌། ཐུགས་མི་འགྱུར་བའི་བདེ་བ་རོ་གཅིག་པ་དང་བཅས་པ་ནི། སྒྲིབ་པ་ཐམས་ཅད་འཇོམས་པར་བྱེད་པ་སྟེ། ཚིག་རྐང་ཐ་མ་གཉིས་ནི། ཁྲོ་བོ་ཆེན་པོ་ཁྲོ་གཟུགས་ཅན། །བདུད་རྣམས་ཀྱི་ནི་དགྲ་ཆེན་པོ། །ཞེས་སྦྱར་བར་བྱ་སྟེ། སྐུ་དང་ཡེ་ཤེས་ཟུང་དུ་འཇུག་པ་རྡོ་རྗེའི་རྣལ་འབྱོར་འདི་ནི། བདུད་བཞི་པོ་རྣམས་འཇོམས་པར་བྱེད་པའི་དགྲ་བོ་ཆེན་པོ་ཡིན་ལ་ཐུགས་བདེ་བས་རང་གི་ཉོན་མོངས་འཇིག་པར་བྱེད་པའི་ཕྱིར་ཁྲོ་བོ་ཆེན་པོ་དང༌། སྐུའི་སྤྲུལ་པས་གཞན་གྱི་ཉོན་
མོངས་འཇིག་པར་བྱེད་པའི་ཕྱིར་ཁྲོ་བོའི་གཟུགས་ཅན་ནོ། །མཚན་བརྗོད་ལས། མཆོད་པ་ཆེན་པོ་ཁྲོ་བ་ཆེ། ཁྲོ་བ་ཆེན་པོ་དགྲ་ཆེ་བ། །ཞེས་སོ། །དུས་ཀྱི་འཁོར་ལོ་ཆགས་པ་ཆེ། །འཕོ་བའི་ཆགས་པ་སེལ་བར་བྱེད། །ཞེས་མདོར་བསྟན་ནས། འགྱུར་མེད་བདེ་བ་ཆེ་ཐབས་ལས། །ནམ་ཡང་སེམས་ཅན་དོན་མི་འདོར། །སེམས་ཅན་གྲོལ་ནས་ཆགས་ཆེན་པོ། །འགྱུར་བའི་ཆགས་པ་སེལ་བར་བྱེད། །ཅེས་རྒྱས་པར་བཤད་དེ། དུས་ཀྱི་འཁོར་ལོ་ནི། འཕོ་བའི་ཆགས་པ་ལས་འདས་པ། སེམས་ཅན་རྣམས་ལ་རྗེས་སུ་ཆགས་པ་ཆེན་པོ་སྟེ། འགྲོ་བ་ཐམས་ཅད་ཀྱི་འཕོ་བར་འགྱུར་བདེའི་ཆགས་པ་སེལ་བར་བྱེད་དོ། །དེ་ཡང་རང་སྣང་ཐམས་ཅད་འགྱུར་བ་མེད་པའི་བདེ་བ་ཆེན་པོར་གྱུར་པས། དེའི་མཐུ་སྟེ་ཆོས་ཉིད་ཀྱི་བྱིན་རླབས་ལས། ཆོས་ཅན་སེམས་ཅན་རྣམས་ཀྱང་འགྱུར་མེད་ཀྱི་བདེ་བ་ཆེན་པོ་དེ་ཐོབ་པའི་ཐབས་རྙེད་པར་འགྱུར་བ་དེ་ལས་ནམ་ཡང་སེམས་ཅན་ཐམས་ཅད་ཀྱི་དོན་མི་འདོར་ཞིང་རྒྱུན་མི་འཆད་པ་སྟེ། བདེ་བ་ཆེན་པོ་དུས་དང་གཞན་དོན་འཁོར་ལོའོ། །སེམས་ཅན་རྣམས་ལས་རླུང་དང་འཛག་བདེ་ལས་གྲོལ་ནས་འགྱུར་བའི་ཆགས་པ་མ་ལུས་པ་སེལ་བར་བྱེད་པ་ནི། ཆགས་པ་ཆེན་པོའོ། །མཚན་བརྗོད་ལས། མཆོད་པ་ཆེན་པོ་ཆགས་པ་ཆེ། །ཆགས་པ་ཐམས་ཅད་སེལ་བར་བྱེད། །ཅེས་གསུངས་ཏེ། འདིར་ཆགས་པ་ནི་རྒྱ་སྐད་དུ་ལོ་བྷ་སྟེ། ནོར་སོགས་ལ་བརྐམ་ཆགས་ཆེ་བའི་སྲེད་པའོ། །དེ་ལྟར་ན་མཆོད་ཆེན་དྲུག་སྟེ། མཆོད་ཆེན་འདོད་པ་ནི་མི་འགྱུར་བའི་ཐིག་ལེ། མཆོད་ཆེན་འདོད་ཆགས་ནི་བདེ་བ་ཆེན་པོ་མཆོད་ཆེན་ཞེ་སྡང་ནི་སྤྲོས་བྲལ་སྟོང་ཉིད། མཆོད་ཆེན་གཏི་མུག་ནི་རྣམ་པར་མི་རྟོག་པ། མཆོད་ཆེན་ཁྲོ་བ་ནི། གཞན་དོན་གྱི་རྒྱུ་སྐུའི་རྣམ་པ། མཆོད་ཆེན་ཆགས་པ་ནི་འཕྲིན་ལས་ཀྱི་རྒྱུ་སྙིང་རྗེ་སྟེ། དེ་རྣམས་ཀྱང་དག་པ་གཉིས་ལྡན་འབྲས་བུའི་སྐབས་སུ་སྦྱོར་ལ། དེ་དག་ལ་རྡོ་རྗེ་སེམས་དཔའ་དང༌། སེམས་དཔའ་ཆེན་པོ་དང༌། བྱང་ཆུབ་སེམས་དཔའ་དང༌། དམ་ཚིག་སེམས་དཔའ་སྟེ་སེམས་དཔའ་བཞི་དང༌། རྡོ་རྗེའི་རྣལ་འབྱོར་དང༌། དུས་ཀྱི་འཁོར་ལོ་ཞེས་བྱ་བའི་མཚན་དུ་བཏགས་སོ། །རྒྱུད་དང་སེམས་འགྲེལ་དངོས་ཀྱི་དགོངས་པ་དེ་ཁོ་ན་ལྟར་ཡིན་ལ། བཤད་པ་
གཞན་འགའ་ལས་བྱང་ཆུབ་སེམས་དཔའ་གསུང་དང༌། སེམས་དཔའ་ཆེན་པོ་ཐུགས་སུ་འཆད་པའང་སྣང་བ་འདོད་ཆགས་དང་ཞེ་སྡང་ཕན་ཚུན་རྒྱས་བཏབ་པའི་དབང་དུ་བྱས་པ་དང༌། རེས་འགའ་རྡུལ་དག་དང་རླུང་སེམས་ཀྱི་ཆོས་སུ་བྱེད་ཅིང༌། རེས་འགའ་རླུང་དག་གི་ཆོས་དང༌། རྡུལ་ནི་འདོད་ཆགས། དེ་བདེ་བ་དང༌། དེ་སེམས་ཀྱི་ཆོས་སུ་འཇོག་པའི་གནས་སྐབས་ཀྱང་ཡོད་པས། རྣམ་གྲངས་ཀྱི་སྒོ་ཐ་དད་ཡིན་པའི་ཕྱིར་མི་འགལ་ལོ་སྙམ་མོ། །དེ་དག་རྒྱལ་བ་རིགས་དྲུག་དང་སྦྱར་ན། རྡོ་རྗེ་སེམས་དཔའ་ཡེ་ཤེས་རྣམ་སྣང༌། སེམས་དཔའ་ཆེན་པོ་གསུང་རིན་འབྱུང༌། བྱང་ཆུབ་སེམས་དཔའ་ཐུགས་དོན་གྲུབ། དམ་ཚིག་སེམས་དཔའ་སྐུ་འོད་དཔག་མེད་རྡཽ་རྗེ་རྣམ་པ་བཞི་དང༌། རྡོ་རྗེའི་རྣལ་འབྱོར་མི་བསྐྱོད་པ་དང༌། དུས་ཀྱི་འཁོར་ལོ་རྡོ་རྗེ་སེམས་དཔའ་གཉིས། སྤངས་རྟོགས་གཉིས་སམ་ཡོན་ཏན་དང་འཕྲིན་ལས་ཀྱི་དོན་ལ་སྦྱར་ཏེ་སྤྱི་ཁྱབ་ཏུ་བཏང་ངོ༌། །ཡང་ན་ཆུ་རླུང་ནམ་མཁའ་ཡབ་ཀྱི་སྐུ་གསུང་ཐུགས་གསུམ་དང་ས་མེ་ཡེ་ཤེས་ཡུམ་གྱི་སྐུ་གསུང་ཐུགས་གསུམ་དུ་བཤད་པ་དང་སྦྱར་ཀྱང་རུང་སྟེ། སྟོང་གཟུགས་དམ་ཚིག་སྐུ། རླུང་དག་པ་བྱང་ཆུབ་གསུང༌། ཉོན་མོངས་འཇོམས་པའི་ཤེས་རབ་རྣལ་འབྱོར་ཐུགས་ཏེ་ཐབས་ཀྱི་ཕྱོགས་གསུམ་དང༌། ཐིག་ལེ་སྐུ། འདོད་ཆགས་གསུང༌། སྙིང་རྗེ་ཐུགས་ཏེ་ཤེས་རབ་ཀྱི་ཕྱོགས་གསུམ་ལ་སྦྱར་རོ། །གཉིས་པ་ནི། འདི་རྣམས་རྣམ་པ་དྲུག་ཏུ་བརྗོད། །མི་འགྱུར་ཡེ་ཤེས་ཚོར་བ་དང༌། །རྣམ་ཤེས་གཟུགས་དང་འདུ་བྱེད་དང༌། །འདུ་ཤེས་དེ་རྣམས་ཕུང་པོའི་རིགས། །ཡེ་ཤེས་མེ་དང་ནམ་མཁའ་ས། །རླུང་ཆུ་རྣམས་ཀྱི་རིམ་པ་བཞིན། །ཡིད་མིག་རྣ་བ་ལུས་དང་སྣ། །ལྕེ་རྣམས་ཀྱི་ཡང་དེ་བཞིན་ཉིད། །སྒྲ་རོ་ཆོས་ཀྱི་དབྱིངས་དང་དྲི། །རེག་བྱ་ཁ་དོག་རྣམས་ཀྱི་ཡང༌། ཁྲོ་བོའི་རྒྱལ་པོ་གདོང་དྲུག་འཇིགས། །རིགས་དྲུག་རྣམས་ཀྱི་ཡོངས་དག་པ། །ཞེས་གསུངས་ཏེ། གང་དུ་འདི་རྣམས་ཏིང་ངེ་འཛིན་གྱི་མཐར་རྣམ་པར་དག་པས་དཀྱིལ་འཁོར་ཙམ་དུ་གྱུར་པ་ཡིན་ལ་ཡིད་ཀྱི་རང་བཞིན་ཅན་གྱི་འདི་རྣམས་བག་ཆགས་དང་བཅས་པ་དག་པ་ལས་རྫོགས་པའི་སངས་རྒྱས་རྡོ་རྗེ་དབྱིངས་ཀྱི་དཀྱིལ་འཁོར་དོན་དམ་པ་ཐོབ་པའོ། །དེ་ཡང་ཕུང་པོ་དང་ཁམས་དང་དབང་པོ་དང་ཡུལ་དང༌།
ཁྲོ་བོའི་ཞལ་དང་རིགས་ཏེ། སྡེ་ཚན་འདི་རྣམས་རེ་རེ་བཞིན་ནང་ཚན་རྣམ་པ་དྲུག་ཏུ་བརྗོད་དེ། མི་འགྱུར་ཡེ་ཤེས་སོགས་ལ། གོ་རིམས་འདི་གོང་གི་རྡོ་རྗེ་སེམས་དཔའ་སོགས་དྲུག་དང་སྦྱོར་བར་འདོད་པ་ནི་ཇི་བཞིན་འགྲིག་པར་མི་སྣང་ལ། རྩ་དྲུག་ལ་འཁོར་ལོ་རྩིབས་དྲུག་པའི་ཐ་སྙད་སྦྱར་བ་སོགས་ཀྱང༌། དགོས་ནུས་ལྷག་པོ་གང་ཡང་མི་སྣང་བས་འདིར་མི་འཆད་དོ། །དེས་ན་སྡེ་ཚན་ཐོག་མ་ཕུང་པོའི་སྐབས་འདིར། ཡེ་ཤེས་གཙོ་བོར་དགོངས་ནས་ཐོག་མར་སྨོས་ཤིང༌། གཞན་རྣམས་སྡེབ་སྦྱོར་གྱི་རིམ་པའམ་ཡང་ན་སྟེང་འོག་གི་གཡས་དང་དབུས་དང་གཡོན་རྣམས་ཟུང་དང་ཟུང་དུ་སྦྱར་བའི་རྩ་དྲུག་གི་རིམ་པར་སྦྱར་ནའང་ལེགས་ཏེ། སྡེ་ཚན་འོག་མ་རྣམས་ནི་ཕན་ཚུན་ཁམས་ཀྱི་དག་པ་སྦྱོར་བ་སོགས་ལ་མི་འཁྲུལ་བའི་ཕྱིར། ཕུང་པོའི་སྐབས་སུ་ཇི་སྐད་བཤད་པའི་རིམ་པ་ལྟར་སྦྱར་བ་ཡིན་ཏེ། དེ་ཡང་ཀུན་གྱི་ཐོག་མར་མི་འགྱུར་བ་ཞེས་སྨོས་པ་ནི། ཐོག་མའི་གསལ་བྱེད་དེ། གདོད་མའི་ཆོས་ཉིད་རང་བཞིན་རྣམ་དག་ལ། ལམ་སྒོམ་པས་གློག་བུར་གྱི་དྲི་མ་སྦྱངས་ཤིང་དག་སྟེ་སྒྲིབ་བྲལ་གྱི་གནས་སྐབས་ཐོབ་པ་ན་ཡང༌། གདོད་མའི་ངོ་བོ་ལ་འཕོ་འགྱུར་མེད་པའི་དོན་ཏེ། དག་པ་གཉིས་ལྡན་གྱི་ཆོས་དབྱིངས་སུ་གྱུར་པའི། དོན་དམ་པའི་ཕུང་ཁམས་སོ་དྲུག་ནི་ལྷ་སུམ་ཅུ་རྩ་དྲུག་གོ་ཞེས་སྟོན་པའི་ཚིག་སྟེ། དོན་དམ་གདོད་མ་མི་འགྱུར་བའི་ཡེ་ཤེས་ཀྱི་ཕུང་པོ་ནི་ཁྱབ་བདག་རྡོ་རྗེ་སེམས་དཔའི་དཀྱིལ་འཁོར་རབ་འབྱམས་སུ་འཆར་བ་ནས། མི་འགྱུར་བའི་བྱ་བ་ལེན་པ་ནི་ཁྲོ་མོ་ཁེངས་བྱེད་མའི་དཀྱིལ་འཁོར་རབ་འབྱམས་སུ་འཆར་བའི་བར་དུ་སྦྱོར་ཏེ་ཆོས་དབྱིངས་རང་གི་ངོ་བོས་གདོད་མ་ནས་དཀྱིལ་འཁོར་དུ་རང་ཤར་བ་ཡིན་ཞིང༌། དེ་ཉིད་འདས་པའི་རྒྱལ་བ་རྣམས་ཀྱིས་མངོན་དུ་བྱས་ཀྱང་གསར་དུ་གྲོལ་བ་ཐོབ་པའི་སྒྲུབ་པ་པོ་དེ་ཉིད་ཀྱི་བློ་ངོས་ནས་དེ་ཉིད་གྲོལ་བ་ཐོབ་པ་ན་གདོད་དཀྱིལ་འཁོར་དུ་ཤར་ཞེས་བྱའོ། །དེ་ཡང་ཕུང་པོ་དྲུག་ལ་ཡེ་ཤེས་ཀྱི་ཕུང་པོ་རྡོ་རྗེ་སེམས་དཔའ་དང༌། ཚོར་བ་རིན་འབྱུང་དང༌། རྣམ་ཤེས་མི་བསྐྱོད་པ་དང༌། གཟུགས་ཕུང་རྣམ་སྣང་དང༌། འདུ་བྱེད་དོན་ཡོད་གྲུབ་པ་དང༌། འདུ་ཤེས་འོད་དཔག་མེད་དེ། རྡོར་སེམས་ལ་སོགས་པ་དེ་རྣམས་དོན་དམ་པའི་ཕུང་པོའི་རིགས་ཏེ་ཆོས་ཉིད་དོ། ཁམས་དྲུག་གམ་འབྱུང་བ་དྲུག་ལ།
ཡེ་ཤེས་ཀྱི་ཁམས་ནི་ཤེར་ཕྱིན་མ། མེ་གོས་དཀར་མོ། ནམ་མཁའ་རྡོར་དབྱིངས་དབང་ཕྱུག་མ། ས་སངས་རྒྱས་སྤྱན་མ། རླུང་སྒྲོལ་མ། ཆུ་མཱ་མ་ཀཱི་སྟེ་ཁམས་དྲུག་གི་རིགས་ཆོས་ཉིད་རྣམས་སོ། །རྣམས་ཀྱི་རིམ་ཇི་བཞིན་ཞེས་པ་ནི་སྔ་མ་ཕུང་པོའི་ལྷ་དྲུག་དང་རིམ་པ་བཞིན་ཡབ་ཡུམ་དུ་སྦྱར་ཞེས་པའི་དོན་ནོ་དབང་པོ་དྲུག་ལ་ཡིད་ཀུན་ཏུ་བཟང་པོ། མིག་སའི་སྙིང་པོ། རྣ་བ་ཕྱག་ན་རྡོ་རྗེ། ལུས་སྒྲིབ་པ་རྣམ་སེལ། སྣ་ནམ་མཁའི་སྙིང་པོ། ལྕེ་འཇིག་རྟེན་དབང་ཕྱུག་སྟེ། དབང་པོ་རྣམས་ཀྱི་རིགས་ཆོས་ཉིད་དྲུག་པོ་ཡང༌། རྡོ་རྗེ་སེམས་དཔའི་རིགས་ཀྱི་སེམས་དཔའ་སོགས། གོང་གི་རིམ་པ་དེ་བཞིན་ཉིད་དུ་སྦྱར་རོ། །ཡུལ་དྲུག་ལ། སྒྲ་ནི་སྒྲ་རྡོ་རྗེ་མ། རོ་ནི་རོ་རྡོ་རྗེ་མ། ཆོས་ཀྱི་དབྱིངས་ཏེ་ཆོས་ཁམས་ནི་ཆོས་ཁམས་རྡོ་རྗེ་མ། དྲི་ནི་དྲི་རྡོ་རྗེ་མ། རེག་བྱ་ནི་རེག་བྱ་རྡོ་རྗེ་མ། ཁ་དོག་སྟེ་གཟུགས་ནི་གཟུགས་རྡོ་རྗེ་མ་སྟེ། དེ་དག་ཀྱང་ཡུལ་དྲུག་པོ་རྣམས་ཀྱི་རིགས་ཏེ་ཆོས་ཉིད་ཡིན་ལ་ཀུན་བཟང་སོགས་ཀྱི་ཡུམ་སྟེ་རིམ་པ་བཞིན་དུ་སྦྱར་རོ། ཁྲོ་བོའི་རྒྱལ་པོ་གདོང་དྲུག་འཇིགས། །ཞེས་པས་ནི། ལས་དབང་ཡུལ་དང་བཅས་པ་དབྱེར་མེད་པར་འདྲེས་པའི་གདོང་དྲུག་དང་ལྡན་པའི་ཁྲོ་བོ་སྟེ། ལས་དབང་དང་བྱ་བའི་ཆོས་ཉིད་སྒྲིབ་བྲལ་གྱི་ཡེ་ཤེས་ཏེ་རྣམ་པར་རྟོག་པ་ཐམས་ཅད་འཇོམས་པའི་ཕྱིར། འཇིགས་པར་བྱེད་པའོ། །ཚིག་འདིའི་དགོངས་པ་དོན་གྱིས་ན་ལས་དབང་ཡུལ་དང་བཅས་པའི་དག་པ་སྟོན་པ་སྟེ། ཁྲོ་བོ་གཅིག་ཉིད་ཡིན་ཡང་གདོང་པ་དྲུག་ཡོད་པ་ནི་བརྡ་སྟེ། ཆོས་དབྱིངས་གཅིག་ཉིད་དག་བྱའི་དབང་གིས་ཁྲོ་བོ་དྲུག་གམ། ཁྲོ་མོ་དྲུག་ཏུ་འགྱུར་ཏེ་ལས་ཀྱི་དབང་པོ་དྲུག་ལ། མཆོག་གི་དབང་པོ་ནི་གནོད་མཛེས། ལག་པའི་དབང་པོ་ནི་ཤེས་རབ་མཐར་བྱེད། ཆུ་ལམ་གྱི་དབང་པོ་ནི་གཙུག་ཏོར་ཅན། བཤང་ལམ་ནི་གཤིན་རྗེ་མཐར་བྱེད། ངག་ནི་བགེགས་མཐར་བྱེད། རྐང་པ་ནི་པདྨ་མཐར་བྱེད་དེ། ལས་དབང་གི་རིགས་ཆོས་ཉིད་རྣམས་སོ། །ཡུལ་ལམ་བྱ་བ་དྲུག་ལ། ཁུ་བ་འཕོ་བ་དྲག་པོའི་མིག་མ། འགྲོ་བ་རྨུགས་བྱེད་མ། དྲི་ཆུ་འཕེན་པ་ཤིན་ཏུ་སྔོན་མོ། སྨྲ་བ་རེངས་བྱེད་མ། བཤང་བ་འདོར་བ་ཤིན་ཏུ་བརྩོན་འགྲུས་མ། ལེན་པ་ཁེངས་བྱེད་མ་སྟེ། ལས་དབང་གི་བྱ་བ་དྲུག་གི་རིགས་ཆོས་ཉིད་
རྣམས་སོ། །འདིར་ཆོས་དབྱིངས་གཅིག་ཉིད་ཡིན་ཡང་སྦྱང་བྱའི་དབྱེ་བ་དང༌། རྣམ་པ་ཐམས་ཅད་པའི་ལྡོག་ཆ་སོ་སོ་ལྷ་སོ་སོར་སྦྱར་བ་འདི་ནི་དབུས་ཀྱི་གསལ་བྱེད་དེ། སྡེ་ཚན་སྔ་ཕྱི་ཐམས་ཅད་ལ་ཡང་གོ་བར་བྱའོ། །དེ་དག་ཐམས་ཅད་ཀྱང་ཁམས་དྲུག་གི་རིགས་སམ། རྒྱལ་བའི་རིགས་དྲུག་རྣམས་ཀྱི་ཡོངས་སུ་དག་པར་འདུས་ཏེ། ཐིག་ལེ་སྟོང་པ་འགྱུར་མེད་ལྔའམ་དྲུག་གི་བདག་ཉིད་ཅན་ནོ། །ལུས་དང་གསང་བ་དབང་པོ་སེམས། །རྟག་ཏུ་དཀྱིལ་འཁོར་རྣམ་པ་གསུམ། །ཞེས་པ་ལ། སྔར་བསྟན་པ་དྲུག་ཚན་གྱི་སྡེ་ནི་གཙོ་བོར་རྟེན་པ་ལྷའི་ཆ་ནས་བསྟན་ལ་འདི་ནི་གཙོ་བོར་བརྟེན་གཞལ་མེད་ཁང་གི་ཆ་ནས་བཤད་དེ། དངོས་སུ་ནི་བརྟེན་དང་རྟེན་པ་དབྱེར་མེད་ཁོ་ནའོ་འདིར་ལུས་ཀྱི་དཀྱིལ་འཁོར་སྒྲིབ་བྲལ་སྐུ་དང༌། གསང་བའི་དབང་པོ་སྟེ་བྷ་གའི་དཀྱིལ་འཁོར་སྒྲིབ་བྲལ་གསུང་དང༌། བྱང་ཆུབ་སེམས་ཀྱི་དཀྱིལ་འཁོར་སྒྲིབ་བྲལ་ཐུགས་ཏེ་དཀྱིལ་འཁོར་གསུམ་ནི་ལྷ་རྣམས་ཀྱི་གནས་གཞལ་མེད་ཁང་དང་ཞིང་ཁམས་དོན་དམ་པ་མཚོན་བྱེད་ཙམ་མོ། །ཤེས་རབ་ཐབས་ཀྱི་རྡོ་རྗེ་གསུམ་ཞེས་བྱ་བ་ལ། གོང་དུ་ནི་དྲུག་ཚན་ཕན་ཚུན་ཐབས་ཤེས་སུ་བསྟན་ཞིང༌། འདིར་དྲུག་ཚན་རེ་རེར་ཡང་ཐབས་ཤེས་བསྟན་པའི་དོན་དང༌། རྡོ་རྗེ་གསུམ་དབྱེར་མི་ཕྱེད་པའི་ཡེ་ཤེས་ཀྱི་སྐུ་གཅིག་ཉིད་ཀྱང་ཡབ་ཡུམ་སྐུ་གསུང་ཐུགས་རྡོ་རྗེ་དྲུག་ཉིད་དུ་བསྟན་པ་ནི། རིགས་དྲུག་པོ་དེ་ཡང་ཐབས་ཀྱི་སྐུ་གསུང་ཐུགས་གསུམ་དང་ཤེས་རབ་ཀྱི་སྐུ་གསུང་ཐུགས་གསུམ་དུ་འདུས་ལ། ཐབས་ཀྱི་ཕྱོགས་ལ་སྣང་མཐའ་སྐུ་རྡོ་རྗེ། དོན་ཡོད་གསུང་རྡོ་རྗེ། མི་བསྐྱོད་ཐུགས་རྡོ་རྗེ་སྟེ་གསུམ་དང༌། ཤེས་རབ་ཀྱི་ཕྱོགས་ལ་སྤྱན་མ་སྐུ་རྡོ་རྗེ་མ། གོས་དཀར་གསུང་རྡོ་རྗེ་མ། ཤེས་རབ་ཕྱིན་མ་ཐུགས་རྡོ་རྗེ་མ་སྟེ་དཀྱིལ་འཁོར་རྣམ་པ་དྲུག་དང་དེ་ཉིད་ལུས་བསམ་གྱི་དབྱེ་བས་བཅུ་གཉིས་ལ་སོགས་པར་འགྱུར་རོ། །གཞན་ཡང་སྐུ་རྡོ་རྗེ་སྤྲུལ་པའི་སྐུ། གསུང་རྡོ་རྗེ་ལོངས་སྤྱོད་རྫོགས་སྐུ། ཐུགས་རྡོ་རྗེ་ཆོས་ཀྱི་སྐུ་རྣམས་སུ་སྐུ་གསུང་ཐུགས་ཀྱི་དཀྱིལ་འཁོར་རབ་འབྱམས་འདུས་པའོ། །རྡོ་རྗེ་སེམས་དཔའ་ཉིད་དུ་འགྱུར་ཞེས་པ་ནི། མ་ལུས་པའི་དཀྱིལ་འཁོར་དེ་ཐམས་ཅད་ཀྱི་བདག་པོའམ་རྩ་བ་ནི་ཁྱབ་བདག་རྡོ་རྗེ་སེམས་དཔའ་ལྷན་ཅིག་སྐྱེས་པའི་སྐུ་རྡོ་རྗེ་སེམས་དཔའ་ཉིད་དུ་འགྱུར་ཏེ། དཀྱིལ་འཁོར་མཐའ་དག་སྤྲོས་པའི་གཙོ་བོ་ཐམས་ཅད་ཀྱང་འདིའི་རང་བཞིན་དུ་གནས་པའོ། །
གསུམ་པ་རྗེས་ཀྱི་དོན་ནི། འདི་ནི་དབང་གི་སྒྲུབ་ཐབས་ཏེ། །མཆོག་ཏུ་མི་འགྱུར་སྒྲུབ་པའི་ཐབས། །རྩ་དང་རིགས་དང་ཡང་དག་ལྡན། །ཟླ་བ་མདོར་བསྟན་པ་ཡིས་བཤད། །ཅེས་པ་འཇིག་རྟེན་ཁམས་ཀྱི་ལེའུར། ལེའུ་ལྔ་པའི་མཆོག་ཏུ་མི་འགྱུར་བའི་དབང་གི་སྒྲུབ་ཐབས་མདོར་བསྟན་པ་རྫོགས་སོ།། །།ཞེས་པ་སྟེ་དེ་ལྟར་བསྟན་པ་འདིས་ནི་དབང་བཞི་པའི་ལམ་གྱི་སྒྲུབ་ཐབས་ཏེ། མཆོག་ཏུ་མི་འགྱུར་བའི་ཡེ་ཤེས་བདེ་བ་ཆེན་པོ་སྒྲུབ་པའི་ཐབས། ཕྱག་རྒྱ་ཆེན་པོའི་རྣལ་འབྱོར་དང༌། རྩའི་ཀུན་སྤྱོད་དང༌། རིགས་ཏེ་ཆོས་ཉིད་དེ་བཞིན་གཤེགས་པའི་སྙིང་པོ། གཞི་ལམ་འབྲས་གསུམ་དུ་རྣམ་པར་དག་པའི་རིམ་པ་དང་ཡང་དག་པར་ལྡན་པ། དོན་གྱི་གཙོ་བོ་རྣམས་མདོར་བསྟན་པས་བཤད་པ་ཡིན་ནོ། །ཟླ་བ་བཟང་པོ་ཀྱེ་ཞེས་པའོ། །འཇིག་རྟེན་ཁམས་ཀྱི་ལེའུར་ཞེས་པ་ནི། དཔལ་དུས་ཀྱི་འཁོར་ལོའི་རྩ་བའི་རྒྱུད་རྒྱས་པ་སྟོང་ཕྲག་བཅུ་གཉིས་པའི་འཇིག་རྟེན་ཁམས་ལེའི་སྟོད་ན་བཞུགས་པའི་གཞུང་ཚིག་གོ །ལེའུ་ལྔ་པའི་ཞེས་པ་ནི་འདིའི་རྒྱས་བཤད། རྩ་རྒྱུད་ཉིད་ཀྱི་ལེའུ་ལྔ་པ་ཡེ་ཤེས་ལེའུ་ལས་འབྱུང་བའོ། །མཆོག་ཏུ་མི་འགྱུར་བའི་དབང་གི་སྒྲུབ་ཐབས་ཞེས་པ་ནི་བཤད་ཟིན་ལ་མདོར་བསྟན་པ་རྫོགས་སོ། །ཞེས་པ་ནི་གོ་བ་ཉིད་དོ། །རྒྱུད་འདི་ལ་འགྱུར་ཐ་དད་པ་བཞི་ཙམ་ཡོད་པར་གྲགས་ནའང༌། ཁ་ཆེའི་པཎྜི་ཏ་ཟླ་བ་མགོན་པོ་དང༌། འབྲོ་ལོ་ཙཱ་བ་ཤེས་རབ་གྲགས་པས་བསྒྱུར་བ་ལ། ཤོང་སྟོན་སྐུ་མཆེད་ཀྱི་སློབ་མ་སྒྲ་ཚད་པ་རིན་ཆེན་རྒྱལ་མཚན་གྱིས། རྒྱ་གར་གྱི་མཁན་པོ་ལ་མ་ཉན་ཡང༌། འགྲེལ་པ་དོན་དམ་བསྡུས་པའི་རྒྱ་དཔེ་དང་བསྟུན་ནས། འགྱུར་བཅོས་པ་ལ། སླར་ཡང་སྐྱེས་བུ་དམ་པ་འགའ་ཞིག་གིས་ཞུས་དག་ཅུང་ཟད་མཛད་པའོ། །འདིས་སྨྲས་པ། ཟབ་ཡངས་བདེ་གཤེགས་གསུང་གི་ཆུ་གཏེར་ལས། །ངེས་དོན་ཡིད་བཞིན་ནོར་བུ་ལེན་
འདོད་རྣམས། །རྣམ་བཤད་གྲུ་ཆེན་འདི་ལ་ཞུགས་གྱུར་ན། །རིང་པོར་མི་ཐོགས་འདོད་པའི་དོན་ཀུན་འགྲུབ། །འཕགས་མིན་བློ་ནི་ཆོས་ཉིད་གནས་ལ་འཁྲུལ། །གྱ་གྱུས་མིན་ཏེ་འདི་ལ་ནོར་བ་སྲིད། །ཆུ་ཟླ་གཡོ་ལ་མཁས་པའི་སེམས་ཁྲལ་ཅི། །ཡང་དག་ཁོ་ནར་གསུང་པ་སངས་རྒྱས་ཉིད། །ཡུན་རིང་སྦྱངས་ཀྱང་མཁས་པར་མི་འགྱུར་ཞིང༌། །འབད་པས་སྒོམ་ཀྱང་ས་ལམ་མི་བགྲོད་པའི། །རྫུན་ཆོས་གླེགས་བམ་མཐོན་པོའི་ཟློས་གར་ལ། །ལས་ངན་དབང་སོང་སྐྱེ་བོ་ཕལ་ཆེར་འཁོར། །ངེས་དོན་གྲུབ་མཐའི་རྒྱ་ལས་མི་འདའ་ཞིང༌། །ལམ་རིམ་ཁྲིགས་བཀོད་ཞིབ་ལ་མ་འཛིངས་པ། །རྣམ་གསུམ་དཔྱད་པའི་ཚད་མས་ཡོངས་སུ་དག །ནོར་བ་མེད་པའི་མན་ངག་ཟབ་མོ་ཅན། །ཧ་ཅང་མི་རྒྱས་ཤིན་ཏུ་བསྡུས་མིན་ལ། །འདུས་ཤིང་གསལ་བའི་རྣམ་བཤད་འདི་ལྟ་བུ། །གང་གིས་འདྲི་བའང་རྟོན་པ་བཞི་ལྡན་སོགས། །སྐྱེས་ཆེན་དམ་པ་དེ་དེ་རྣམས་ཀྱི་མཐུ། །ལེགས་པ་གང་ཡིན་དེ་ལ་མཆོད་པར་བགྱིད། །དགེ་བ་གང་ཡིན་སེམས་ཅན་རྣམས་ལ་བསྔོ། །བསོད་ནམས་གང་ཡིན་དེས་ཀྱང་དེང་ནས་བདག །སྲིད་ཞི་གང་ཡིན་དེ་དང་མཉམ་པར་སྤྱོད། །ཅེས་པ་རྒྱུད་ཀྱི་རྒྱལ་པོ་དབང་མདོར་བསྟན་པ་ཞེས་བྱ་བ་ངེས་དོན་དོན་དམ་པའི་རྒྱུད་ཀྱི་རྣམ་པར་བཤད་པ་ཟབ་མོའི་དོན་མཐའ་དག་གསལ་བར་བྱེད་པའི་ཉི་མ་ཞེས་བྱ་བ་འདི་ནི་རྡོ་རྗེ་འཛིན་ཆེན་པོའི་ལམ་གྱི་རིམ་པ་མཐའ་དག་དང༌། ཁྱད་པར་ས་བཅུའི་དབང་ཕྱུག་རྣམས་ཀྱི་གསུང་ངེས་དོན་གྱི་སྐབས་ཐམས་ཅད་ལ་ངེས་པ་རྙེད་ཅིང༌། རྒྱུ་འདི་ཉིད་ཀྱི་འགྲེལ་པ་དོན་དམ་བསྡུས་པ་ཞེས་པ་དཔལ་ནཱ་རོ་པས་མཛད་པར་གྲགས་པ་དང༌། དུས་འཁོར་ཞབས་ཞེས་བྱ་བའི་འགྲེལ་པ་དང༌། རྣམ་རྒྱལ་དཔལ་བཟང་པོའི་འགྲེལ་པ་དང༌། དཔལ་འཛིན་དགའ་བའི་མདོར་བཤད་དེ་རྒྱ་འགྲེལ་བཞི་དང༌། རིགས་ལྡན་སྤྲུལ་པ་ཀུན་སྤང་ཆེན་པོའི་གསུང་མཆན་དང༌། མཁས་པ་གཞན་མང་པོའི་འགྲེལ་པ་སོགས་ཀྱི་དོན་ཡང་ཁོང་དུ་ཆུད་ལ། ནམ་ཡང་གྲུབ་པའི་དབང་པོའི་མན་ངག་རྣམས་དང༌། ཀུན་མཁྱེན་ཆོས་ཀྱི་རྒྱལ་པོ་དོལ་པོ་པའི་དགོངས་པ་ཁོ་ན་སྲོག་ཏུ་གཞག་སྟེ། ༧རྒྱལ་ཁམས་པ་ཏཱ་ར་ནཱ་ཐས་རང་ལོ་ཞེ་གཉིས་པ་ལ་ནགས་རྒྱལ་གྱི་དབེན་གནས་ཇོ་ནང་དུ་སྦྱར་བའོ། །
བཀྲ་ཤིས། རྒྱལ་བ་གཉིས་པ་ཀུན་མཁྱེན་ཇོ་ནང་བའི། །རྣམ་སྤྲུལ་རྗེ་བཙུན་ཡོན་ཏན་བཟང་པོ་ཡིས། །སྤྱི་ལོ་ཅིག་སྟོང་གུ་བརྒྱ་གོ་ལྔ་ལོར། །རྒྱལ་བསྟན་མི་ཉམ་གོང་དུ་འཕེལ་བའི་ཕྱིར། །ཀུན་མཁྱེན་ཏཱ་ར་ནཱ་ཐའི་བཀའ་འབུམ་གྱི། །ཞིང་པར་འཛམ་ཐང་གཙང་བའི་ཆོ་གྲྭ་ཆེན། །བསྤྲུན་པའི་དགེ་བ་འོད་དཀར་དྲིན་མེད་ཀྱིས། །མ་གྱུར་གྲོལ་རྫོགས་སངས་རྒྱས་ཐོབ་ཤོག །འདི་ཡང་པུཎྱཻ་ཤྲཱིས་བྲིས་དགེ། །རབ་དཀར་དའི་མཚན་སྐྱེ་འཕགས་དགེ་ཆེན་གྱིས། །དུས་མཐར་རྒྱལ་སྟན་དབུ་འཕང་མཐོ་བ་དང་། །ཆབས་གཅིག་འགྲོ་ལ་ཕན་བདེ་ཡོངས་སྤེལ་ཞིང་། །བསྟན་འགྲོའི་སྲུང་རིམ་རླབས་ཆེན་སྤྱོད་གྱུར་ཅིག །དེ་ཡང་མ་ཏིས་སྨྲས། །དུས་ཀྱི་འཁོར་ལོ་བླ་མ་དབྱེར་མེད་ལ། །གུས་པས་སྐྱབས་གསོལ་འདིར་བསམ་སར་བ་དཀར་མཐུས། །ཤམྦྷ་ལ་རུ་རིགས་ལྡན་སྲས་གྱུར་ཏེ། །བསྟན་འགྲོ་ཡོངས་བརླབས་ཆེན་ཕན་ཐོགས་ཤོག །ཅེས་པ་འང་མ་ཏིས་སོ། བསོད་ནམས་བསགས་དགེ་བདག་སོགས་འགྲོ། །འདི་ཕྱི་ཀཀུན་ཏུ་ཡང་དག་གི །ཆོས་མཐུན་ཁོ་ནས་ལེགས་འཚོ་ཞིང་། །རྐྱེན་ངན་གང་གིས་བསྒྱུར་མེད་ཤོག །ཅེས་པའང་མ་ཏིས་སོ། ལེགས་མཆོག་ཕན་བདེ་ཀུན་གྱི་གཞི་གཅིག་པུ། །ཐུབ་པའི་བསྟན་པ་ལུང་རྟོགས་པའི་ཆོས། །ཡོངས་རྫོགས་སྒོ་གང་ཐང་ནས་འཛིན་པ་ལ། །ལུས་སྲོག་འདོར་ལ་ཐུག་ཀྱང་ཞུམ་མེད་ཤོག །ཁྱད་པར་རྒྱལ་བའི་དགངས་པ་མཐར་ཐུག་པ། །འཁོར་ལོ་ཕྱིར་མི་ལྡོག་པའི་བརྗོད་བྱིའི་དོན། །ངེས་དོན་དབུ་མ་ཟབ་གསང་ཐེག་པའི་ཕུལ། །བསྟན་པའི་སྙིང་པོ་མཆོག་དེ་རྟག་འཛིན་ཤོག །ཅེས་པའང་མ་ཏིས་སོ། རབ་དཀར་བསགས་དགེ་འདིས་ནི་ཕྱི་མིའི་སྐབས། །སྐྱེ་སྲིད་གཞན་གྱིས་གོ་མཚམས་མ་ཕྱེ་བར། །འཐགས་ཤིང་པོ་ཊཱ་ལ་ཡིས་གནས་མཆོག་ཏུ། །ཡང་དག་གདུལ་བྱ་བཟང་པོར་ལེགས་འཕེལ་ཤོག །ཅེས་པའང་མ་ཏིས་སོ། འདིར་འབད་དགེ་འདིས་ལུས་འདི་བོར་མ་ཐག །གཡུ་ལོ་བཀོད་པར་འཕགས་མའི་དགྱེས་ཞལ་དྲུང་། །ཐུགས་སྲས་གདུལ་ཞིང་མཆོག་ཏུ་ལེགས་གྱུར་ཏེ། །སྐྱེ་སྲིད་དེད་ལ་མ་མཐར་ཕྱིན་གྱུར་ཅིག །ཅེས་པ་བརྩོན་འགྲུས་དང་ལ་ལ་མཁོ་ནས་མ་ཏིས་སྨྲས་པའོ།
༄། དཔལ་དུས་ཀྱི་འཁོར་ལོའི་ཆོས་སྐོར་གྱི་བྱུང་ཁུངས་ཉེར་མཁོ་བཞུགས།
ན་མོ་གུ་རུ། སྤྱིར་སྟོན་པས་ཆོས་དཔག་ཏུ་མེད་པ་གསུངས་པ་ལས། ཉན་ཐོས་ཀྱི་དོན་དུ་གསུང་བའི་སྡེ་སྣོད་གསུམ་ནི། བསམ་པ་རང་དོན་ཁོ་ན་དང༌། སྦྱོར་པ་ཉམས་ལེན་ནི། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་གསུམ་ལས་བརྩམས་ཏེ། ལྟ་བ་གང་ཟག་གི་བདག་མེད། སྤྱོད་པ་འཚེ་བ་མེད་པ། སྒོམ་པ་ཞི་ལྷག་གི་རྣལ་འབྱོར་རྣམས་སྟོན། བརྩོན་འགྲུས་རབ་ཀྱིས་བསྒོམས་ན། ཚེ་གསུམ་ཀྱིས་ཉན་ཐོས་དགྲ་བཅོམ་པ་དང༌། བསྐལ་པ་བརྒྱས་རང་སངས་རྒྱས་ཐོབ་ནུས་པ་ནི་ཡིན། ཕར་ཕྱིན་དྲུག་ལ་སོགས་པ་མིང་ཙམ་ལས་ངོ་བོ་ཚང་བར་མ་བཤད། ཐེག་དམན་གྱི་སྡེ་སྣོད་གསུམ་པོ་ཁོ་ནའི་དོན་བསྒོམས་ཀྱང༌། འདིས་སངས་རྒྱས་ཀྱི་ལམ་མ་རྫོགས་པས། སངས་རྒྱས་ཐོབ་པར་མི་ནུས་སོ། །ཐེག་ཆེན་ལ། མདོ་དང་སྔགས་གཉིས་ལས། མདོ་ཕ་རོལ་ཏུ་ཕྱིན་པའི་ཐེག་པ་ལས། བསམ་པ་གཞན་ཕན་བྱང་ཆུབ་ཀྱི་སེམས། སྤྱོད་པ་ཕར་ཕྱིན་བཅུ་དང་བསྡུ་བའི་དངོས་པོ་བཞི། ལྟ་བ་བདག་མེད་གཉིས། སྒོམ་པ་རྣམ་པར་མི་རྟོག་པ་སྟེ། བྱང་ཆུབ་སེམས་དཔའི་གཞི་ལམ་འབྲས་བུ་རྣམས་ཤིན་ཏུ་རྒྱས་པར་སྟོན། ལམ་འདི་ཁོ་ན་བསྒོམས་ན་བསྐལ་པ་གྲངས་མེད་གསུམ་ནས། ས་བཅུ་པའི་བྱང་ཆུབ་སེམས་དཔའ་སངས་རྒྱས་ཀྱི་རྒྱལ་ཚབ་ཆེན་པོའི་གོ་འཕང་ཐོབ་པར་ནུས།
ཕར་ཕྱིན་རང་ལམ་གྱིས་དེ་ལས་ལྷག་པོ་མི་ཐོབ་ཀྱང༌། སྐབས་དེར་སྔགས་ལ་ཞུགས་ནས་སངས་རྒྱས་འཐོབ་བོ། །སྔགས་ཀྱི་ཐེག་པ་ལ། བྱ་རྒྱུད། སྤྱོད་རྒྱུ། རྣལ་འབྱོར་རྒྱུད། རྣལ་འབྱོར་བླ་མེད་ཀྱི་རྒྱུད་དེ་བཞི་ལས། བྱ་རྒྱུད་དུ་ནི་མདོ་ལས་ཇི་སྐད་བཤད་པའི་ལམ་རྣམས་ཀྱི་སྟེང་དུ། ཆུ་དང་ཅོད་པན་གྱི་དབང་བསྐུར་ཙམ་དང༌། མདུན་བསྐྱེད་ཀྱི་ལྷ་སྤྱན་དྲངས། མཆོད་པ་ཕུལ། དམ་ཚིག་གི་ཕྱག་རྒྱས་བཏབ། སྔགས་བཟླས་པས་ཐུགས་རྒྱུད་བསྐུལ་བའི་བསྙེན་པ་དང༌། ལས་ཚོགས་སྣ་ཚོགས་པ་དང༌། ཐུན་མོང་གི་དངོས་གྲུབ་མང་དུ་སྒྲུབ་པའི་ཐབས་རྒྱ་ཆེར་བསྟན། རྒྱུད་འདི་ལ་བདག་བསྐྱེད་མེད་པས། རྗེ་དབོན་ལྟར་དངོས་གྲུབ་ལེན་པའི་ཐ་སྙད་བྱེད། དཀའ་ཐུབ་དང་གཙང་སྦྲ་གཙོ་བོར་སྤྱོད། འདིའི་རང་ལམ་གྱིས་བསྐལ་པ་ཆེན་པོ་བརྒྱད་ནས་བཅུ་པ་འཐོབ། སྤྱོད་རྒྱུད་ནི། ཕལ་ཆེར་བྱ་རྒྱུད་དང་འདྲ་བ་ལས། དབང་གི་ཚེ། ཕྱག་མཚན་གྱི་དབང་དང༌། མིང་དབང་ཡང་ཡོད། ཉམས་ལེན་གྱི་སྐབས་བདག་བསྐྱེད་ཀྱང་ཡོད། གྲོགས་པོ་ལྟ་བུའི་སྒོ་ནས་དངོས་གྲུབ་ལེན། བསྐལ་པ་གསུམ་མ་མ་གཅིག་གིས་ས་བཅུ་ཐོབ་པར་འདོད། བྱ་སྤྱོད་དེ་གཉིས་ལ། ཐུན་མོང་གི་དངོས་གྲུབ་ཀྱིས་ཚེ་བསྐལ་པའི་བར་དུ་གནས་པར་བསྒྲུབས་ནས། རྟེན་དེ་ལ་སྟོང་ཉིད་སྙིང་རྗེ་དབྱེར་མེད་མདོ་དང་ཐུན་མོང་བ་དེས་འཕགས་པའི་ས་སྒྲུབ་པར་འདོད་ཀྱི། མཆོག་གི་དངོས་གྲུབ་སྒྲུབ་ཐབས་སྔགས་ལམ་ཐུན་མོང་མ་ཡིན་པ་བཤད་པ་མེད་དོ། །རྣལ་འབྱོར་རྒྱུད་ནི།སྤྱོད་རྒྱུད་མན་ཆད་ཀྱི་ཆོས་རྣམས་ཡོད་ཀྱི་སྟེང་དུ། དབང་གི་སྐབས། ཆུ་ཅོད་པན། རྡོ་རྗེ་དྲིལ་བུ། མིང་བརྟུལ་ཞུགས། རྡོ་རྗེ་སློབ་དཔོན་གྱི་དབང༌། རྗེས་གནང་སོགས་མཐའ་རྟེན་རྣམས་དང་བཅས་པ་ཡོད་ཅིང༌། ཉམས་ལེན་གྱི་སྐབས། བདག་བསྐྱེད་དཀྱིལ་འཁོར་གྱི་འཁོར་ལོ་ཕྱག་རྒྱ་བཞིས་རྒྱས་བཏབ་ནས་སྒོམ་པ་དང༌། ཐུན་གྱི་མཐར་ཕྱག་བརྒྱ་བཀྲོལ་ནས། བདག་བསྐྱེད་ཀྱི་ལྷ་གཤེགས་སུ་གསོལ་བ་དང༌། འབྲས་བུ་སངས་རྒྱས་ཀྱི་སའི་རྣམ་པ་ལམ་བྱེད་མངོན་བྱང་ལྔ་སོགས་སྒོམ་པ་དང༌། ཕྱག་རྒྱ་ཆེན་པོའི་དངོས་གྲུབ་སྒྲུབ་པའི་ཐབས་མདོ་དང་ཐུན་མོང་མ་ཡིན་པའི་ཏིང་ངེ་འཛིན་གྱི་ཁྱད་པར་མང་དུ་གསུངས། འདིའི་རང་ལམ་གྱི་
ཚེ་ལོ་བརྒྱ་པའི་མིའི་སྐྱེ་བ་བཅུ་དྲུག་གི་ཡུན་ཚོད་ཙམ་ལ། དབང་པོ་རྣོ་ཤོས་ཀྱིས་ཕྱག་རྒྱ་ཆེན་པོ་འགྲུབ་པར་བཤད། དེའི་ཡུན་ཚད་ཉིས་འགྱུར་གྱིས་ས་བཅུ་པ་ལ་སྦྱོར་བ་ཡིན་ནོ། །སྤྱོད་རྒྱུད་དང་རྣལ་འབྱོར་རྒྱུད་འདི་གཉིས་ལ། ལས་ཚོགས་ཀྱི་སྐབས་འགའ་རེ་མ་གཏོགས། དཀའ་སྤྱད་དང་ཁྲུས་སོགས་ཀྱི་གཙང་སྦྲ་མི་དགོས། གཙང་རྨེ་མེད་པའི་སྤྱོད་པ་ཡང་མི་བྱེད་དོ། །དེ་ལྟར་རྒྱུད་སྡེ་དེ་གསུམ་གྱི་ལམ་གྱིས་ས་བཅུ་པ་ཐོབ་པ་ཡང༌། བླ་མེད་ལ་ཞུགས་ནས་སངས་རྒྱས་ལ་སྦྱོར་བ་ཡིན། རྣལ་འབྱོར་བླ་མེད་ཀྱི་རྒྱུད་ནི། དབང་གི་དུས་ན། བུམ་དབང༌། གསང་དབང༌། ཤེར་དབང༌། དབང་བཞི་པ་སྟེ། དབང་བཞི་རྫོགས་པ་དང༌། ལམ་བསྐྱེད་རིམ་མ་དག་པའི་སྣང་བ་དབྱིངས་སུ་སྦྱངས་པའི་དཀྱིལ་འཁོར་གྱི་འཁོར་ལོ་རྫོགས་པར་སྒོམ། དབང་དང་བསྐྱེད་རིམ་གཉིས་ཀ་ལ། ཡར་སངས་རྒྱས་དང་རྣམ་པ་མཐུན་པའི་ལམ་དུ་བྱེད་ཚུལ་གཅིག་དང༌། མར་འཁོར་བ་དང་རྣམ་པ་མཐུན་པའི་དྲི་མ་སྦྱོང་ཚུལ་གཅིག་སྟེ། སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་ཞིབ་མོར་སྦྱོར། ཐུན་མཚམས་སུ་སྣང་བ་ཐམས་ཅད་ལྷར་སྒོམ། བདག་བསྐྱེད་ཀྱི་ལྷ་མི་གཤེགས། རྫོགས་རིམ་རྡོ་རྗེའི་ལུས་རྩ་རླུང་ཐིག་ལེ་ལ་གནད་དུ་བསྣུན་པའི་ཐབས་སྟོན། སྤྲོས་བཅས་སྤྲོས་མེད། ཤིན་ཏུ་སྤྲོས་མེད་ཀྱི་སྤྱོད་པ་གསུམ་སྤྱད་པས། འབྲས་བུ་ལ་སྦྱོར་བར་བཞེད། སྐྱེ་བ་སྔ་མར་བསགས་རྒྱབ་ཅན་མ་ཡིན་ཀྱང༌། བསམ་པའི་སྟོབས་ཆེ་བ་གཅིག་གིས་འབད་པས་བསྒོམས་ན། ཚེ་ལོ་བརྒྱ་པའི་མིའི་ཚེ་གང་གཅིག་གི་ཡུན་ལ། ལམ་གཞན་ལ་མ་ལྟོས་པར་སངས་རྒྱས་ཀྱི་ས་ཐོབ་ནུས་ཏེ། དབང་པོ་རྣོ་ཞིང་བར་ཆད་མེད་པའི་དབང་དུ་བྱས་པ་ཡིན་ནོ། །ལམ་དེ་རྣམས་སྟོན་བྱེད་ཀྱི་སྡེ་སྣོད་སོ་སོ་གཙོ་ཆེ་བ་བོད་དུ་འགྱུར་བའི་རགས་རིམ་ཙམ་ངོས་བཟུང་ན། སོ་སོ་ཐར་བའི་མདོ། འདུལ་བའི་ལུང་སྡེ་བཞི། གདགས་པའི་བསྟན་བཅོས། མདོ་སྡེ་ལས་བརྒྱ་པ། རྟེན་འབྲེལ་གྱི་མདོ། ཆོས་འཁོར་གྱི་མདོ། དོན་རྣམ་པར་ངེས་པའི་མདོ་ལ་སོགས་པ་འཁོར་ལོ་དང་པོ་བདེན་བཞིའི་ཆོས་འཁོར་གྱི་མདོ།
ཆེ་ཆུང་སྡོམ་པ་ལྔ་ཅུ་ཙམ་ཡོད་དེ། ཉན་ཐོས་ལ་གསུངས་པ་ཐེག་དམན་གྱི་སྡེ་སྣོད་དོ། །འབུམ་ཉི་ཁྲི་བརྒྱད་སྟོང་པ་སོགས། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ནི་འཁོར་ལོ་བར་པའི་མདོ་ཡིན་ཅིང༌། གྲངས་བཅུ་བདུན་ཙམ་ཡོད། སྙིང་པོའི་མདོ་སྡེ་ཟབ་མོ་ཕྱིར་མི་ཟློག་པ་འཁོར་ལོའི་གཏམ་སྟོན་བྱེད་ཉི་ཤུ་ཙམ་ཡོད་པ་ནི། འཁོར་ལོ་ཐ་མའི་མདོའི་གཙོ་བོ་ཡིན་ལ། གཞན་དཀོན་མཆོག་བརྩེགས་པ་དང༌། འདུས་པ་ཆེན་པོ་དང༌། སྡོང་པོ་བཀོད་པ་དང༌། ཕལ་པོ་ཆེ་ཤས་ཆེ་བ་ཞིག་དང༌། བསྐལ་བཟང་དང༌། མ་སྐྱེས་དགྲའི་འགྱོད་པ་བསལ་སོགས་མདོ་སྡེ་ཕལ་ཆེ་བ་ཡང༌། ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་གྱི་མདོ་ཡིན་ཏེ། འཁོར་ལོ་བར་མཐའ་གཉིས་བསྡོམས་པ་ལ་ཐེག་ཆེན་གྱི་མདོ་ཞེས་གྲགས་ཤིང༌། ཡོངས་དྲིལ་མདོ་རྣམ་དག་སུམ་བརྒྱ་ཉེ་བ་བཞུགས། བྱ་རྒྱུད་ལ་རིགས་དྲུག་ཡོད་པ་ལས། དམ་ཚིག་གསུམ་བཀོད་དང༌། འཇམ་དཔལ་རྩ་རྒྱུད་སོགས་དེ་བཞིན་གཤེགས་པའི་རིགས། དོན་ཡོད་ཞགས་པའི་ཆོ་ག་ཞིབ་མོ་དང༌། ཞལ་བཅུ་གཅིག་པའི་གཟུངས་སོགས་པདྨའི་རིགས། ཕྱག་རྡོར་རིག་པ་མཆོག་གི་རྒྱུད་སོགས་རྡོ་རྗེའི་རིགས། ནོར་རྒྱུན་མ་དང༌། ཛམྦྷ་ལའི་གཟུངས་སོགས་ནོར་བུའི་རིགས། མེ་ཁ་ལེའི་གཟུངས་སོགས་ལྔ་རྩེན་གྱི་རིགས། ལྷ་ཀླུ་འབྱུང་པོ་ཕལ་པས་ཕུལ་བའི་གཟུངས་མང་པོ་རྣམས་འཇིག་རྟེན་ཕལ་པའི་རིགས་སོ། །སྤྱོད་རྒྱུད་ལ་རིགས་གསུམ་ལས། སྐུའི་རིགས་ནི། རྣམ་སྣང་མངོན་བྱང་དང༌། མི་གཡོ་བ་བརྟུལ་ཕོད་སོགས་ཡིན། གསུང་གི་རིགས་བོད་དུ་མ་འགྱུར། ཐུགས་ཀྱི་རིགས་ཕྱག་རྡོར་དབང་བསྐུར་བའི་རྒྱུད་སོགས་སོ། །རྣལ་འབྱོར་རྒྱུད་ལ། ཕ་རྒྱུད་དེ་ཉིད་བསྡུས་པ་དང༌། རྡོ་རྗེ་རྩེ་མོ་སོགས། མ་རྒྱུད་དཔལ་མཆོག་དང་པོ་དང༌། རྡོ་རྗེ་སྙིང་རྒྱན་སོགས་སོ། །བླ་མེད་ལ་ཕ་རྒྱུད་མ་རྒྱུད་གཉིས། ཕ་རྒྱུད་ལ་གསུམ་ལས། ཆགས་ཅན་རྗེས་སུ་འཛིན་པའི་རྒྱུད་ནི། གསང་བ་འདུས་པ་དང༌། གཤིན་རྗེ་གཤེད་དམར་ནག་དང༌། རྣམ་སྣང་སྒྱུ་འཕྲུལ་དྲྭ་བ་ལ་
སོགས་པ་དང༌། ཞེ་སྡང་ཅན་ཚར་གཅོད་ཀྱི་རྒྱུད་ནི། འཇིགས་བྱེད་ཀྱི་རྟོག་པ་བདུན་པ་ལྟ་བུ་དང༌། གཏི་མུག་ཅན་རྗེས་སུ་འཛིན་པའི་རྒྱུད་ནི། འཇམ་དཔལ་སྒྱུ་འཕྲུལ་དྲྭ་བ་ཡིན་པ་ལས། ཕྱོགས་འདིར་ནི་མཚན་བརྗོད་ཙམ་ཞིག་འགྱུར་རོ། །མ་རྒྱུད་ལ་རིགས་དྲུག་ལས། བདེ་མཆོགདགྱེས་རྡོར། མཧཱ་མཱ་ཡ། སངས་རྒྱས་ཐོད་པ། རྡོ་རྗེ་ཨ་རལླི། རྀ་ཥི་ཨ་རལླི། ཕྱག་ཆེན་ཐིག་ལེ་སོགས་ཧེ་རུ་ཀའི་རིགས། གདན་བཞི་རྣམ་སྣང་གི་རིགས། རིགས་ཀྱི་འཇིག་རྟེན་མགོན་པོ་པདྨའི་རིགས། རྡོ་རྗེ་བདུད་རྩི་རིན་ཆེན་འབྱུང་ལྡན་གྱི་རིགས། སྒྲོལ་མ་བླ་མེད་སོགས་རྟའི་རྒྱལ་པོའི་རིགས། སངས་རྒྱས་ཐམས་ཅད་མཉམ་པར་སྦྱོར་བ་དང༌། ཟླ་གསང་ཐིག་ལེ་རྡོ་རྗེ་སེམས་དཔའི་རིགས་ཡིན་ལ། དཔལ་དུས་ཀྱི་འཁོར་ལོ་ཡང༌། ཧེ་རུ་ཀ་དང་རྡོ་རྗེ་སེམས་དཔའི་རིགས་གཉིས་ཀ་ལ་བརྟེན་པ་ལྟར་ཡོད་ཀྱང༌། རྡོ་རྗེ་སེམས་པའི་རིགས་ཉིད་ཡིན་ནོ། །ཅི་སྟེ་རྣལ་འབྱོར་བླ་མེད་ལ་རིགས་གསུམ་དུ་ངེས་པར་འབྱེད་ན་ནི། གཉིས་མེད་རྒྱུད་ཀྱི་ངོས་འཛིན་དུས་འཁོར་ཁོ་ན་ལ་བྱེད་དགོས་ཏེ། ཐབས་ཤེས་རབ་ཀྱི་ཕན་ཚུན་རྒྱས་གདབ་མང་པོ་དུས་འཁོར་ནས་གསུངས་ལ། དུས་འཁོར་ལ་ལྟོས་ན་བརྒྱུད་སྡེ་གཞན་རྣམས་རྒྱས་གདབ་སྟེ་བསྡུས་པས་སོ། །འོན་ཀྱང༌། བླ་མེད་ཀྱི་རྒྱུད་ལ་ཐབས་རྒྱུད་དང༌། ཤེས་རབ་ཀྱི་རྒྱུད་དང༌། གཉིས་མེད་ཀྱི་རྒྱུད་གསུམ་དུ་འབྱེད་པ་ནི། བོད་ཀྱིས་བརྟགས་པའི་རྣམ་རྟོག་ཙམ་མོ། །ཕ་མ་གཉིས་ཀྱི་ཁྱད་པར་ནི་ལྷ་ཡབ་ཀྱི་དཀྱིལ་འཁོར་དང་སྔགས་དང་ཆོ་ག་ཁོ་ན་རྩལ་དུ་འདོན་པ་ནི། ཐབས་ཀྱི་རྒྱུད་ཡིན་ལ། ལྷ་ཡུམ་གྱི་དཀྱིལ་འཁོར་དང༌། སྔགས་དང་ཆོ་ག་ཁོ་ན་རྩལ་དུ་འདོན་པའམ། ཡབ་ཡུམ་གཉིས་ཀར་གྱི་དཀྱིལ་འཁོར་དང་སྔགས་དང་ཕྱག་རྒྱ་ཆ་མཉམ་པར་རྩལ་དུ་འདོན་པ་ནི་རྣལ་འབྱོར་མའི་བརྒྱུད་ཡིན་ཏེ། བདེ་དགྱེས་དུས་འཁོར་སོགས་མ་རྒྱུད་གཙོ་ཆེ་བ་ཕལ་ཆེར་ལས་ཆ་མཉམ་དུ་སྟོན་ལ། གདན་བཞི་སོགས་འགའ་ཞིག་ལས་ཡུམ་ཁོ་ན་རྩལ་དུ་འདོན་ནོ། །དེ་ལྟར་ན་དངོས་བསྟན་ཚིག་ཟིན་གྱི་དབང་དུ་བྱས་ན།
བླ་མེད་ཀྱི་རྒྱུད་རྣམས་ལ་ཡང་ཟབ་མི་ཟབ་ཀྱི་ཁྱད་ཡོད་ལ། ཕ་རྒྱུད་ནས་བཤད་པའི་ཟབ་དོན་རྣམས། མ་རྒྱུད་ལ་ཡང་ཡོད་ཅིང༌། ཕ་རྒྱུད་ནས་མ་བཤད་པའི་ཐུན་མོང་མ་ཡིན་པའི་ཁྱད་ཆོས་འགའ་རེ་ཡང༌། མ་རྒྱུད་ལ་སྣང་བས། རྣལ་འབྱོར་མའི་རྒྱུད་ཉིད་མཆོག་ཏུ་བྱའོ། །འོན་ཀྱང་མཐའ་དྲུག་དང་ཚུལ་བཞིའི་སྒོ་ནས་རྣམ་པར་ཕྱེ་བ་དང༌། བླ་མ་དམ་པའི་མན་ངག་གིས་བཀྲལ་ན་ནི། བླ་མེད་ཀྱི་རྒྱུད་ཐམས་ཅད་དགོངས་པ་གཅིག་ཏུ་འགྱུར་བའི་ཕྱིར། མཆོག་དམན་གྱི་དབྱེ་བ་ཐུབ་པར་དཀའ་འོ། །དེ་དག་ལས་སྐབས་འདིར། རྒྱུད་ཐམས་ཅད་ཀྱི་མཆོག་ཏུ་གྱུར་པ་མཆོག་གི་དང་པོའི་སངས་རྒྱས་དུས་ཀྱི་འཁོར་ལོ་ནི། སྟོན་པ་ཡང་དག་པར་རྫོགས་པའི་སངས་རྒྱས་མངོན་པར་སངས་རྒྱས་པའི་ཕྱི་ལོ་ནག་པའི་ཉ་ལ། དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོར། དཔལ་ལྡན་རྒྱུ་སྐར་གྱི་དཀྱིལ་འཁོར་ཆེན་པོ་མངོན་པར་སྤྲུལ། འཁོར་སངས་རྒྱས་བྱང་སེམས་དཔའ་བོ་མཁའ་འགྲོ་དཔག་ཏུ་མེད་པ་དང༌། ལྷ་ཆེན་བཅུ་གཉིས་སོགས། ལྷ་ཀླུ་གནོད་སྦྱིན་འབྱུང་པོའི་ཚོགས་དང༌། ཆུ་བོ་སཱི་ཏའི་བྱང་ཕྱོགས་གྲོང་བྱེ་བ་ཕྲག་དགུ་ཅུ་རྩ་དྲུག་གི་མིའི་འགྲོ་བ་སྐལ་ལྡན་དཔག་ཏུ་མེད་པ་འདུས་པའི་དབུས་སུ། ཕྱག་ན་རྡོ་རྗེའི་སྤྲུལ་པའི་སྐུ་རྒྱལ་པོ་ཟླ་བ་བཟང་པོས་ཞུས་པའི་ངོར་གསུངས་པ་ཡིན་ལ། དེར་རྒྱུད་འདིར་མ་ཟད། རྒྱུད་མཐའ་དག་གསུངས་ནས། ཕྱག་ན་རྡོ་རྗེ་ལ་གཏད་པ་ཡིན་ཅིང༌། མི་དང་མི་མ་ཡིན་པ་བགྲང་བ་ལས་འདས་པ་འདོད་པའི་དངོས་གྲུབ་ཐོབ་པར་གྱུར། རེ་ཤིག་མིའི་འཇིག་རྟེན་གཞན་དུ་མ་དར། ཤམྦྷ་ལར་རྒྱལ་པོ་ཟླ་བ་བཟང་པོས་རྒྱུད་མཐའ་དག་གླེགས་བམ་ལ་བྲིས། དུས་ཀྱི་འཁོར་ལོའི་རྩ་རྒྱུད་མཆོག་གི་དང་པོའི་སངས་རྒྱས་སྟོང་ཕྲག་བཅུ་གཉིས་པ་ལ། འགྲེལ་བཤད་སྟོང་ཕྲག་དྲུག་ཅུ་པ་མཛད། རྒྱུ་རིན་པོ་ཆེ་སྣ་ཚོགས་པ་ལས། ལྷའི་བཟོ་བའི་འདུ་
བྱེད་ཀྱིས་དཀྱིལ་འཁོར་གྱི་བཀོད་པ་ཁྲུ་བཞི་བརྒྱ་པ་བཞེངས། སྐྱེ་བོའི་ཚོགས་ལ་སྔགས་ཀྱི་ཐེག་པ་རྒྱ་ཆེར་གསུངས། མང་པོ་ཞིག་དངོས་གྲུབ་མཆོག་ལ་བཀོད། རྩ་རྒྱུད་གསུངས་པའི་དུས་ནས་ལོ་གཉིས་པ་ལ། སའི་སྙིང་པོའི་སྤྲུལ་པ་སྲས་ལྷའི་དབང་པོ་རྒྱལ་སྲིད་དུ་བསྐོས་ནས་ཆོས་ཀྱི་དབྱིངས་སུ་གཤེགས་སོ། །དེ་རྗེས་ས་བཅུའི་དབང་ཕྱུག་སོ་སོའི་སྤྲུལ་པའི་སྐུ། ལྷ་དབང་དང༌། གཟི་བརྗིད་ཅན་དང༌། ཟླ་བས་བྱིན་དང༌། ལྷའི་དབང་ཕྱུག་དང༌། སྣ་ཚོགས་གཟུགས་དང༌། ལྷའི་དབང་ལྡན་ཏེ། དེ་དག་གིས་ཀྱང་ཟླ་བ་བཟང་པོ་བཞིན་དུ་དར་བ་མཛད་དོ། །དེ་རྗེས་འཇམ་དཔལ་གྱི་སྤྲུལ་བ་རྒྱལ་པོ་གྲགས་པས་ལོ་བརྒྱའི་བར་དུ་སྔོན་བཞིན་ཆོས་བསྟན་ནས། སླར་ཡང་རྩ་རྒྱུད་ལས་ལུང་བསྟན་པ་ལྟར། ཡུལ་ཆེན་པོ་དགུ་བཅུ་རྩ་དྲུག་ན་གནས་པའི། ཚངས་པའི་རིགས་ཀྱི་དྲང་སྲོང་བྱེ་བ་ཕྲག་ཕྱེད་དང་བཞི་རྣམས་སྐལ་བ་མཆོག་དང་ལྡན་ཞིང༌། འདུལ་བའི་དུས་ལ་བབ་པར་ཡང་གཟིགས། དེ་དག་མ་བཏུལ་ན་མ་འོངས་པ་ན་དེ་དག་གི་བུ་བརྒྱུད་ལས་ཀླ་ཀློའི་ཆོས་འབྱུང་བ་ཡང་མཁྱེན། དེ་རྣམས་སྔགས་ཀྱི་བསྟན་ལ་བཅུག་ན། ཡུལ་དགུ་བཅུ་རྩ་དྲུག་གི་མི་རྣམས་སྔགས་ཀྱི་ལམ་ལ་འཇུག་པར་ཡང་མཁྱེན། དྲང་སྲོང་རྣམས་ཀྱང་དང་པོར་འཇམ་པོ་ཁོ་ནས་མི་ཐུལ་ཏེ། བསྡིགས་ཤིང་བསྐྲད་ན་ཐུལ་བར་མཁྱེན་ནས། དྲང་སྲོང་རྣམས་ཀྱི་མཆོག་ཉི་མའི་ཤིང་རྟ་ལ་བཀའ་བསྒོས་ཏེ། དྲང་སྲོང་རྣམས་ཀྱི་སྤྱོད་པ་ཐ་དད་པ་རྣམས་དྲིས་ཤིང༌། དེ་རྣམས་ཀྱིས་ཀྱང་ཞུས་པ་ན། ཁྱེད་རྣམས་རང་རང་གི་ལྟ་བ་མུ་སྟེགས་ཀྱི་གྲུབ་མཐའ་ཐ་དད་པ་རྣམས་དང༌། སྤྱོད་པ་སྣ་ཚོགས་པ་རྣམས་དོར་ཏེ། རྡོ་རྗེའི་ཐེག་པ་ལ་རིགས་གཅིག་ཏུ་གྱིས་ཤིག་པར་བཀའ་སྩལ་བ་ན། དེ་རྣམས་རང་རང་གི་ལྟ་སྤྱོད་ངན་པ་ལ་མངོན་པར་ཞེན་པས། རྡོ་རྗེའི་རིགས་ལ་མི་འཇུག་སྟེ། དེ་བས་རང་ཡུལ་བོར་ནས། འཕགས་པའི་ཡུལ་དུ་འགྲོ་བར་སྤྲོ་བའི་
ཚེ། རྒྱལ་པོའི་བཀའ་དྲག་པོས་ལྷོ་ཕྱོགས་སུ་བསྐྲད། ཞག་བཅུའི་བར་དུ་སོང་སྟེ། བཅུ་པ་ལ་ནགས་ཚལ་ཆེན་པོ་ཞུགས་པའི་ཚེ། གཉིད་འཐུག་པོས་ནོན་པར་བྱིན་གྱིས་བརླབས། མི་མ་ཡིན་རྣམས་ལ་བཀའ་བསྒོས་ཏེ། གཉིད་མ་སད་པ་ཁོ་ནར། སྐད་ཅིག་ལ་ནམ་མཁའི་ངོས་ནས་ཁྱེར་འོངས་ཏེ། མཱ་ལ་ཡའི་སྐྱེད་ཚལ་གྱི་དབུས། རྒྱལ་པོ་ཟླ་བ་བཟང་པོས་བཞེངས་པའི་དཀྱིལ་འཁོར་གྱི་བཀོད་པའི་དྲུང་དུ་ཕྱིན་པར་གྱུར་པ་ན་གཉིད་སད་དོ། །དེ་ནས་ཡ་མཚན་དུ་གྱུར་པ་ན། བློན་པོ་རྒྱ་མཚོའི་བློ་གྲོས་ཀྱིས་བརྡའ་སྦྱར་ཏེ། ཉི་མའི་ཤིང་རྟ་ལ་སོགས་པ་དྲང་སྲོང་རྣམས་ཀྱིས་གསོལ་བ་བཏབ་པར་གྱུར་པའི་ཚེ། ཡེ་ཤེས་ཀྱི་དཀྱིལ་འཁོར་དུ་དབང་བསྐུར་ཞིང༌། རྩ་བའི་རྒྱུད་ཀྱི་སྙིང་པོ་བསྡུས་པ་དུས་ཀྱི་འཁོར་ལོའི་རྒྱུད་ཀྱི་རྒྱལ་པོས་བསྡུས་རྒྱུད་དུ་གྲགས་པ་འདི་གསུངས་ཏེ། གཞུང་གི་ཚད་ནི་རྩ་རྒྱུད་ལས་བསྡུས་པའི་ཚིག་ནི། འཕྲེང་འཛིན་གྱི་སྡེ་སྦྱོར་ཅན་གྱི་ཤླཽ་ཀ་སྟོང་དང་སུམ་ཅུ་ཡིན་ལ། རྩ་རྒྱུད་རྗེས་སྔགས་ཀྱི་སྡེབ་སྦྱོར་ཡིན་པར་འདོད་པས། རྗེས་སྔགས་ཚད་ཀྱིས་གཞལ་ན་རགས་རྩིས་ལ་སུམ་སྟོང་གི་ཚད་ཙམ་དུ་འགྱུར་བས། རྩ་རྒྱུད་ཀྱི་བཞི་ཆ་ཙམ་མོ། །དེར་ནག་པའི་ཉ་ལ་དྲང་སྲོང་རྣམས་ལ་དབང་བསྐུར་ཞིང་རྒྱུད་བཤད་པས། དེའི་ཟླ་བ་ཕྱི་མ་ས་གའི་ཉ་ལ་དྲང་སྲོང་དེ་རྣམས་ཐམས་ཅད་ཀྱིས་གཉིས་སུ་མེད་པའི་ཡེ་ཤེས་ཀྱི་སྐུ་གྲུབ་བོ། །དེའི་རྗེས་སུ་སྤྱན་རས་གཟིགས་ཀྱི་སྤྲུལ་པ་པདྨ་དཀར་པོས། བསྡུས་པའི་རྒྱུད་ལ་འགྲེལ་བཤད་དྲི་མ་མེད་པའི་འོད་ཅེས་བྱ་བ་སྟོང་ཕྲག་བཅུ་གཉིས་པ་མཛད་དོ། །དེ་ལ་དྲང་སྲོང་རིགས་པ་ཐ་དད་པ་རྣམས་རྡོ་རྗེ་ཐེག་པ་ལ་རིགས་གཅིག་ཏུ་མཛད་པས། རྒྱལ་པོ་གྲགས་པའི་སྐུ་ཚེའི་ཐ་མར་རིགས་ལྡན་གྱི་མཚན་གསོལ་ཞིང༌། དེ་མན་ཆད་དུ། རིགས་གཅིག་པའི་རྒྱུད་ལ་གནས་པས། རིགས་ལྡན་ཞེས་བྱ་སྟེ།
པདྨ་དཀར་པོའི་རྗེས་སུ་ས་བཅུའི་དབང་ཕྱུག་སོ་སོའི་སྤྲུལ་པའི་སྐུ། བཟང་པོ་དང༌། རྣམ་རྒྱལ་དང༌། བཤེས་གཉེན་བཟང་པོ་དང༌། ཕྱག་དམར་དང༌། ཁྱབ་འཇུག་སྦས་པ་དང༌། ཉི་མ་གྲགས་དང༌། ཤིན་ཏུ་བཟང་པོ་དང༌། རྒྱ་མཚོ་རྣམ་རྒྱལ་དང༌། རྒྱལ་དཀའ་དང༌། ཉི་མ་དང༌། སྣ་ཚོགས་གཟུགས་དང༌། ཟླ་འོད་དང༌། མཐའ་ཡས་དང༌། ས་སྐྱོང་དང༌། དཔལ་སྐྱོང་དང༌། སེང་གེ་དང༌། རྣམ་པར་གནོན་པ་དང༌། སྟོབས་པོ་ཆེ་དང༌། མ་འགགས་པ་དང༌། མིའི་སེང་གེ་དང༌། དབང་ཕྱུག་ཆེན་པོ་དང༌། མཐའ་ཡས་རྣམ་རྒྱལ་དང༌། འཁོར་ལོ་ཅན་ཏེ། གྲགས་པ་ནས་འདིའི་བར་ལ་ཉི་ཤུ་རྩ་ལྔའོ། །དེ་དག་ལས་ཁྱབ་འཇུག་སྦས་པས། རྫུ་འཕྲུལ་གྱིས་ཁ་ཆེའི་ཡུལ་དུ་བྱོན་ཞིང༌། རྡོ་རིང་བཙུགས། ཟླ་བ་གསུམ་དུ་སྔགས་ཀྱི་ཐེག་པ་མང་དུ་གསུངས། ཆོས་སྟོན་པའི་ཚེ་ས་གཡོ་ཞིང་འོད་འབྱིན་པ་དང༌། ཁ་ཆེའི་མཚོ་ནང་ཀླུའི་ཕོ་བྲང་དུ་ཡང་ཡང་འབྱོན་ཞིང༌། ཀླུ་རྣམས་དངོས་སུ་ཆོས་ཉན་པ་སོགས་ཆོ་འཕྲུལ་མང་པོ་བསྟན། རྡོ་རྗེ་ཕག་མོའི་སྒྲུབ་ཐབས་དང༌། རལ་གཅིག་མའི་སྒྲུབ་ཐབས་སོགས་མཛད་དེ། ནམ་མཁའི་ལམ་ལས་ཕྱིར་གཤེགས་སོ་ཞེས་གྲག་གོ །དུས་འདི་ཙམ་ན། སློབ་དཔོན་ཆེན་པོ་དཔལ་ཕྱོགས་གླང་ངམ། ཆོས་ཀྱི་གྲགས་པས་བསྟན་པ་སྐྱོང་བའི་དུས་ཙམ་ཡིན་པར་མངོན་ནོ། །རིགས་ལྡན་རྒྱལ་དཀའི་དུས་སུ། འཕགས་པའི་ཡུལ་དུ་དུས་ཀྱི་འཁོར་ལོ་དང༌། ད་ལྟ་དཔལ་སྐྱོང་སེང་གེའི་ཁྲི་ལ་བཞུགས་ཞེས་བྱ་ཞིང༌། ཆོས་རྒྱལ་ལྷ་དབང་ནས་བརྩམས་ཏེ་མཐའ་ཡས་རྣམ་རྒྱལ་གྱི་བར་དུ་ཐམས་ཅད་ཀྱང་རྒྱལ་སྲིད་ལ་ལོ་གྲངས་རྒྱ་ཕྲག་རེ་རེ་བཞུགས་པར་མཉམ་མོ། །དྲག་པོས་ཀྱང་ལོ་བརྒྱའི་བར་དུ་སྔར་བཞིན་ཆོས་བསྟན་ནས། ཀླ་ཀློའི་འདུལ་བར་བཞེད་པ་ལྟར་རེ་ཞིག་ཁས་བླང་བར་བྱ་ལ། ཉི་མ་གྲགས་སེང་གེའི་ཁྲི་ལ་འཁོད་པ་ཙམ་ན། མཁའི་ཡུལ་
དུ་ཀླ་ཀློའི་ཆོས་ལྷག་པར་དར་ཞིང༌། འཕགས་ཡུལ་གྱི་ནུབ་ཀྱིས་རྣམས་སུ་གསར་དུ་དར་ལ། ཀླ་ཀློའི་སྟོན་པ་སྦྲང་རྩིའི་བློ་གྲོས་ཀྱི་དུས་དེ་ཡིན་པར་མངོན་ནོ། །དེ་ནས་ད་ལྟའི་བར་དུ་ཆེར་འཕེལ་ཞིང༌། མ་འོངས་པ་ན། ཆུ་བོ་ཤཱི་ཏའི་ལྷོ་ཕྱོགས་ཐམས་ཅད་ཀླ་ཀློར་གྱུར་པའི་ཚེ། ཀླ་ཀློ་རྣམས་འདུལ་བའི་དུས་ལ་བབ་པ་ན། འཁོར་ལོ་ཅན་གྱི་སྤྲུལ་པའི་དམག་ཚོགས་ཀྱིས་ཀླ་ཀློ་ཐམས་ཅད་བཅོམ་སྟེ། ཀླ་ཀློ་སྤྲུལ་པ་རྣམས་ནི་བསད་བའི་ཚུལ་བསྟན། རང་རྒྱུད་པ་རྣམས་ཀྱི་དྲེགས་པ་ཞི་བར་མཛད་དེ། ཡང་དག་པའི་ལམ་ལ་བཀོད་ནས། མཐར་སྤྲུལ་པ་བསྡུ་བར་འགྱུར་རོ། །དེ་ནས་དུས་རྣམས་ཀྱང་རྫོགས་ལྡན་དུ་འགྱུར་ཞིང༌། འཁོར་ལོ་ཅན་གྱི་སྲས་ཚངས་པ་དང༌། ལྷ་དབང་གཉིས། ལྷ་དབང་གི་རྒྱུད་ལ་འོད་སྲུངས་སོགས་ཤིན་ཏུ་མང་པོ་དག་འབྱུང་སྟེ། ས་དུམ་བུ་བཅུ་གཉིས་རྣམས་སུ་འཁོར་ཞིང༌། ལོ་ཉྀ་ཁྲི་ཆིག་སྟོང་དྲུག་བརྒྱའི་བར་དུ་ཆོས་མིན་ཀླ་ཀློའི་ཆོས་ཉམས་ཤིང༌། ཡང་དག་པའི་ལམ་དར་བར་མཛད་དོ། །འདི་ཙམ་ཞིག་ཡོངས་སུ་གྲགས་པ་ལྟར་བཀོད་པ་ཡིན་ལ། བྱང་ཆུབ་སེམས་དཔའ་རྣམས་ཀྱི་རྣམ་པར་ཐར་བ་གསང་བ་ནི་བསམ་གྱིས་མི་ཁྱབ་པ་ཡིན་པའི་ཕྱིར། རིག་དྲས་ཀྱི་ཕོ་ཚོད་དོན་ལ་གནས་པ་དཀའ་འོ། །དེ་ནས་རྒྱ་བོད་དུ་དར་ལུགས་ལ། རྒྱ་གར་དུ་ལུགས་མང་པོ་དང་འབྲེལ་བའི་གཏམ་བརྒྱུད་ཡོད་ཅིང༌། བོད་དུ་ཡང༌། གྱི་ཅོ་ལོ་ཙཱ་བ་ཟླ་བའི་འོད་ཟེར། རྨ་དགེ་བའི་བློ་གྲོས། འ་ཞ་རྒྱ་གར་བརྩེགས། ཁྱུང་པོ་ཆོས་བརྩོན། རྭ་ཆོས་རབ། རྩ་མི་སངས་རྒྱས་གྲགས་སོགས་ཀྱི་ལུགས་ཤིན་ཏུ་མང་ཡང༌། མཆོག་ཏུ་གྱུར་པ་འབྲོ་ལུགས་སམ། ཟླ་མགོན་ལུགས་ལྟར་བཤད་ན། འཕགས་པའི་ཡུལ་དུ་གཤིན་རྗེ་གཤེད་ཀྱི་རྣལ་འབྱོར་པ་ཞིག་གི་སྲས། དུས་འཁོར་ཞབས་ཆེན་པོར་གྲགས་པ་དེ་ནི། མཚན་དངོས་མཉྫུ་བཛྲ། མདོ་སྔགས་ཐམས་ཅད་ལ་མཁས་
པའི་པཎྜི་ཏ། རྟེན་དགེ་བསྙེན། འཇམ་དཔལ་གྱི་ཞལ་གཟིགས་པ་ཞིག་ཡིན་ལ། ཡི་དམ་གྱི་ལུང་བསྟན་ནས་བྱང་ཕྱོགས་སུ་གཤེགས་པས། ལམ་དུ་རིགས་ལྡན་གྱི་སྤྲུལ་པ་དང་མཇལ། དབང་བསྐུར་ཞིང་ཟབ་མོའི་རྣལ་འབྱོར་ཟླ་བ་དྲུག་བསྒོམས་པས་རྫུ་འཕྲུལ་ཐོབ་སྟེ་བྱང་ཤམྦྷ་ལར་བྱོན། རིགས་ལྡན་དངོས་དང་མཇལ། དུས་ཀྱི་འཁོར་ལོ་སོགས་རྒྱུད་སྡེ་མང་པོ་དང༌། བྱང་ཆུབ་སེམས་དཔའི་འགྲེལ་བ་སྐོར་གསུམ་སོགས། འགའ་ཞིག་ཐུགས་ལ་གཟུང༌། འགའ་ཞིག་གླེགས་བམ་སྤྱན་དྲངས་ཏེ་འཕགས་ཡུལ་དུ་བྱོན། ཕལ་ཆེར་སྒོམ་པ་གཙོ་བོར་མཛད། མུ་སྟེགས་ཀྱི་དཔུངས་ལྟ་སྟངས་ཀྱིས་གནོན་པ་སོགས་རྫུ་འཕྲུལ་མང་དུ་བསྟན། མཐར་འཇའ་ལུས་སུ་གཤེགས། འདི་ལ་སློབ་མ་བཅུ་གཉིས་ཙམ་བྱུང་ནའང༌། ཐམས་ཅད་རྣལ་འབྱོར་པ་ཤ་སྟག་ཏུ་གྱུར་ཅིང༌། གྲུབ་པའི་རྟགས་དང་ཆོ་འཕྲུལ་མང་དུ་བསྟེན་ནས། འཇའ་ལུས་སུ་གཤེགས་པས། བཤད་རྒྱུན་ལ་ཕན་པ་ཙམ་མ་བྱུང༌། དུས་ཞབས་པ་ཆུང་པ་ཁོ་ནས་ཆོས་འདི་དར་བར་མཛད་དེ། མཚན་དངོས་ནི་ཤྲཱི་བྷ་དྲ། རིགས་ནི་རྗེ་རིགས། རྟེན་དགེ་བསྙེན། ཐེག་པ་མཐའ་དག་ལ་ཤིན་ཏུ་མཁས་པ། མངོན་ཤེས་ཐོགས་མེད་དུ་མངའ། ཆུ་ལ་མི་འབྱིང༌། རྩིག་པ་དང་རི་ལ་ཐོགས་མེད་དུ་གཞུད། འདིས་དཔལ་ནཱ་ལནྡར་པཎྜི་ཏ་ལྔ་བརྒྱ་དང་འབེལ་གཏམ་བྱས་པས། དེ་ཐམས་ཅད་སྨྲ་བས་ཟིལ་གྱིས་མནན། ངག་དབང་གྲགས་པ་དང༌། ཤེས་རབ་འབྱུང་གནས་མ་གཏོགས་ཐམས་ཅད་ཀྱིས་ཞབས་ལ་གཏུགས། ཆོས་འདིས་ས་སྟེང་ཐམས་ཅད་ཁྱབ་པར་མཛད་དེ། རྒྱལ་པོ་དང༌། བློན་པོ་དང༌། ཚོང་དཔོན་ཆེན་པོ་རྣམས་ཀྱིས་ཀྱང༌། གླེགས་བམ་བཞེང་བ་དང༌། བག་ཆགས་འཇོག་པ་བྱུང༌། རྒྱ་གར་དུ་དུས་འཁོར་མ་ཕེབས་གོང་ཕར་བཞགདེ་ཕྱིན་ཆད་དུས་འཁོར་གྱི་གྲུབ་ཐོབ་ཕྱོགས་གཅིག་ཏུ་གཞགཆོས་གཞན་གྱི་
གྲུབ་ཐོབ་ཐམས་ཅད་ཕྱོགས་གཅིག་ཏུ་གཞག་ཀྱང༌། དུས་འཁོར་གྱི་གྲུབ་ཐོབ་མང་ངོ༌། །དུས་ཞབས་པ་ཆུང་བ་དེ་ཉིད་ཀྱི་སྲས་ནཱ་ལེནྡྲ་པ་ནི། མཚན་དངོས་བོ་དྷི་བྷ་དྲ། ནཱ་ལེནྡྲ་ཞེས་བྱ་བའི་གནས་གཞིའི་བདག་པོ་མཛད། ལས་བཞི་གང་སྒྲུབ་ཀྱང་རླུང་གི་རྣལ་འབྱོར་ཁོ་ནས་འགྲུབ་བོ། །དེ་ལ་སློབ་མ་མང་ཡང་ཕྱོགས་འདིར་ཕྲིན་ལས་ཆེ་བ་ཁ་ཆེའི་པཎྜི་ཏ་ཟླ་བ་མགོན་པོ་ནི། དབུགས་ཐེང་རེ་ལ་ཤླཽ་ཀ་བཅུ་དྲུག་ཙམ་རེ་ཟིན་པའི་ཤེས་རབ་མངའ། བླ་མ་བྲམ་ཟེ་བཟང་པོའི་ཞབས་ཞེས་བྱ་བ་ཅིག་བསྟེན། ཁ་ཆེའི་ཡུལ་གྱི་ཆོས་ཐམས་ཅད་མཁྱེན། སླར་ཡུལ་དབུས་སུ་བྱོན་ནས་ནཱ་ལེནྡྲ་པ་ལ་དུས་འཁོར་སོགས་སྔགས་ཀྱི་ཟབ་དོན་དཔག་ཏུ་མེད་པ་གསན། བསྒོམས་པས་སྲོག་རྩོལ་དང་འཛིན་པ་མཐར་ཕྱིན། སྐུ་ལ་བཤང་གཅིའི་རྒྱུ་བ་ཆད། ཆོམ་རྐུན་ལ་སྡིགས་མཛུབ་མཛད་པས་རེངས་པ་སོགས་ནུས་པ་མངའ། བོད་དུ་ལན་གསུམ་བྱོན། སྒྲོན་གསལ་དང༌། རིག་ཚོགས་དང༌། ས་སྡེ་སོགས་ཆོས་མང་དུ་གསུངས། ཁྱད་པར་དུས་ཀྱི་འཁོར་ལོ་ཤིན་ཏུ་དར་བར་མཛད། མན་ངག་ལ་བཀའ་དོག་སྟེ། ཕལ་ཆེར་ལ་སོར་སྤོང་ཙམ་ལས་མ་གནང༌། གདམས་ངག་ཡོངས་རྫོགས་གནང་པ་གསུམ་ཡོད་ཀྱང༌། ལོ་རོ་བ་ཡིན་པ་ཅིག་ནི། གྲུམ་བུས་ཟིན་ནས་སྒོམ་ལོང་མ་བྱུང་བར་འདས། པུ་རངས་བའི་དགེ་སློང་གཅིག་གིས་ཡེར་པར་བསྒོམས་པས་འཇའ་ལུས་སུ་སོང༌། ཆོས་ཀྱི་བརྒྱུད་པ་ལ་ཕན་པ་ལྷ་རྗེ་སྒོམ་པ་ཡིན། དེ་ལ་འབྲོ་ལོ་ཙཱ་བ་ཤེས་རབ་གྲགས་ཀྱི་རྒྱུད་འགྲེལ་གཞུང་འགྲེལ་མང་པོ་དང་བཅས་པ་བསྒྱུར་པཎྜི་ཏའི་ལོ་ཙཱ་བ་མཛད། ལྷ་རྗེ་སྒོམ་པའི་ཡང་བླ་མ་ཡིན་པས་ཤིན་ཏུ་སྐུ་དྲིན་ཆེ། འདི་འཁྲུངས་ཡུལ་ལ་སྟོད་ལྷོའི་གཉན་རྩེ་བ་ཡིན། པཎ་ཆེན་ཟླ་མགོན་རྩ་བའི་བླ་མ་མཆོག་ཏུ་འཁུར། གཞན་པཎ་གྲུབ་ཀྱི་བླ་མ་མང༌། སྐུ་ཚེའི་སྨད་ལ་ཁ་ཆེ་ཉིད་དུ་བཞུགས། བླ་མ་ལྷ་རྗེ་སྒོམ་པས། པཎ་ཆེན་ཟླ་མགོན་ལ་དབང་རྒྱུད་བཤད་མན་
ངག་མཐའ་དག་རྫོགས་པར་གསན། བླ་མ་སྒྲོ་སྟོན་གྱིས་པཎ་ཆེན་ལ་དབང་དང་རྒྱུད་བཤད་རྫོགས་པར་ཐོབ། གྲུབ་ཆེན་ཡུ་མོས་ཆོས་འབྲེལ་ཙམ་གསན། དེ་ལ་ལྷ་རྗེ་སྒོམ་པ་ནི། འཁྲུངས་ཡུལ་འཕན་ཡུལ་གྲབ། མཚན་དཀོན་མཆོག་བསྲུངས། རྟེན་དགེ་བསྙེན། སྔགས་པ་ཚངས་སྤྱོད། སྨན་དཔྱད་དང༌། མངོན་པ་དང༌། སྔགས་རྙིང་མ་གསུམ་ལ་མཁས་པ་གཅིག་ཡིན་པ། ཡོ་བྱད་ཐམས་ཅད་དྲིལ་བས་གསེར་སྲང་དྲུག་དང༌། དར་ཡུག་གཅིག་བྱུང་བ་པཎ་ཆེན་ལ་ཕུལ། སྒྱུ་ལུས་ཀྱི་ཞབས་ཏོག་བྱེད་པར་ཞུས་ནས། གདམས་ངག་ཞུས་ཏེ་བསྒོམས་པས། ཉམས་རྟོགས་བསམ་གྱིས་མི་ཁྱབ་པ་འཁྲུངས། བྲན་ཀ་དང༌། འོ་དེ་གུང་རྒྱལ་སོགས་དམ་ལ་བརྟགས། བྲམ་པ་སྐམ་པོ་ལས་ཆུ་བཏོན། གཞན་སེམས་ཤེས་པ་སོགས་ཡོན་ཏན་དཔག་ཏུ་མེད་དོ། །བླ་མ་སྒྲོ་སྟོན་ནི། རུས་སྒྲོ། འཁྲུངས་ཡུལ་འཕན་ཡུལ་སྤྲས་པ། བཞུགས་ས་སྣོར་བཟང༌། རྟེན་སྔགས་པ་དཀར་པོ། མཚན་གནམ་ལ་བརྩེགས། ཆོས་མངོན་པ། ས་སྡེ། དབུ་མ་རིག་ཚོགས། གསང་འདུས་སྒྲོན་གསལ། ཡོ་ག་སྨན་དཔྱད་སོགས་ལ་མཁས་པ་ཞིག་ཡིན། པཎ་ཆེན་ཟླ་མགོན་ལ་དུས་ཀྱི་འཁོར་ལོའི་དབང་ཞུས། རྒྱུད་བཤད་མཁས་པར་ཉན། སྦྱོར་དྲུག་གི་མན་ངག་རྣམས་ལྷ་རྗེ་སྒོམ་པ་ལ་ཞུས། ཕྱིས་པཎ་ཆེན་ཉིད་ལ་ཡང་བཀའི་གནང་བ་ཐོབ། ཉམས་རྟོགས་མཐར་ཕྱིན་པ་བརྙེས་ཏེ། ཡི་དམ་གྱི་ལྷ་མང་པོ་ཞལ་གཟིགས། མངོན་ཤེས་ཐོགས་མེད་མངའ། བཞེད་དོན་ཐམས་ཅད་མཁའ་འགྲོ་ལ་བཀའ་བསྒོས་པ་ཙམ་གྱི་འགྲུབ་བོ། །གྲུབ་ཆེན་ཡུ་མོ་ནི། གདུང་རུས་རྔམ། འཁྲུངས་ཡུལ་གངས་ཏི་སེའི་འགྲམ། ཕྱིས་རབ་ཏུ་བྱུང་བའི་མཚན་དད་པ་རྒྱལ་པོ། གསང་མཚན་མི་བསྐྱོད་རྡོ་རྗེ་ཞེས་བྱ། དབུས་གཙང་དུ་བླ་མ་མང་དུ་བསྟེན། སོག་འདུལ་འཛིན་ཚུལ་ཁྲིམས་བླ་མའི་ཐུགས་ཟིན་གྱི་སློབ་མར་གྱུར། ཕྱིས་གསང་སྔགས་ལ་མོས་ནས་
སྔགས་ཆོས་མང་དུ་གསན། རྡོ་རྗེ་སྙིང་འགྲེལ་གྱི་མཚན་གསན་པས་ཀྱང་དགའ་བ་དཔག་ཏུ་མེད་པ་སྐྱེས། བླ་མ་སྒྲོ་སྟོན་ལོ་ཙཱའི་བར་དུ་བསྟེན་ནས། ཁོད་ལ་བཞུགས་པའི་དབང་རྒྱུད་མན་ངག་མཐའ་དག་ཐོབ། བདག་པོའི་དབང་དང༌། བདག་པོ་ཆེན་པོའི་དབང་རྒྱུད་འགྲེལ་ལས་ཇི་སྐད་གསུངས་པ་བླ་མའི་ཀྱང་གནང༌། ཕྱིས་འུ་ཡུག་གི་རྒྱ་ལ་གནས་སུ་བཞུགས། བསྟན་བཅོས་ཀྱང་མང་དུ་མཛད། སྔགས་ཀྱི་གཞན་སྟོང་གྲུབ་མཐའི་སྲོལ་ཀ་ཕྱེ། མངོན་ཤེས་ཐོགས་པ་མེད་པ་མངའ། སྐྱ་ཀ་དང་བྱ་རོག་ཏུ་སྤྲུལ་པ་སོགས། ཡུལ་སྣ་ཚོགས་སུ་སྤྲུལ་སྒྱུར་མང་དུ་མཛད་པའི་ལོ་རྒྱུས་ཡོད། གྲུབ་ཐོབ་གྱི་སྙན་གྲགས་ཀྱང་ཤིན་ཏུ་ཆེ་བས་ས་སྟེང་ཁྱབ་བོ། །དེ་ཉིད་ཀྱི་སྲས་དྷརྨེ་ཤྭ་ར་ཆོས་ཀྱི་དབང་ཕྱུག་ཡིན་ཏེ། མཁྱེན་རབ་ཤིན་ཏུ་ཆེ། དགུང་ལོ་བཅུ་གཉིས་པ་ལ་ཡང༌། དབང་མདོར་བསྟན་གྱི་རྒྱུད་ལ་ཐུགས་བཤད་མཛད། བཅུ་དྲུག་པ་ལ་རྒྱུད་འགྲེལ་ཆེན་མོ་ཐུགས་ནས་གསུངས། གྲུབ་ཆེན་ལ་མངའ་བའི་གཞུང་གདམས་ངག་ཐམས་ཅད་དགུང་ལོ་ཉི་ཤུ་ཚུན་ལ་ཐུགས་སུ་ཆུད། མཁས་པ་མང་དུ་བསྟེན་པས། མདོ་སྔགས་ཀྱི་ཆོས་ལ་མི་མཁྱེན་བྱ་བ་མེད། ཁྱད་པར་དབུ་ཚད་གཉིས་དང༌། གསང་འདུས་དུས་འཁོར་རྣམས་ལ་རྩལ་དུ་ཐོན། ས་ཆེན་ཀུན་དགའ་སྙིང་པོ་དང༌། དཔྱལ་ལོ་ཀུན་དགའ་རྡོ་རྗེ་དང༌། རྔོག་ཞེ་སྡང་རྡོ་རྗེ་སོགས་ཀྱང་འབེལ་གཏམ་གྱིས་ཟིལ་གྱིས་མནན། ཐོག་མཉམ་གྱི་ཇོ་སྲས་གཅིག་ལ་འདི་ལས་མཁས་པ་མེད། འཇམ་དཔལ་གྱི་སྤྲུལ་པ་ཡང་གྲགས་སྐད། དེའི་བུ་ཆེན་མཁས་པ་ནམ་མཁའ་འོད་ཟེར་ནི། འཁྲུངས་ཡུལ་དང་བཞུགས་ས་ཁང་གསར་ཡིན། རྟེན་དགེ་བསྙེན་དཀར་པོ། ཆོས་དབུ་ཚད། ཕར་ཕྱིན། མངོན་པ། ས་སྡེ། སེམས་འགྲེལ་སྐོར་གསུམ། གསང་འདུས་འཕགས་སྐོར་སོགས་ལ་མཁས། རྡོ་རྗེ་ཕག་མོ་དང༌། རྡོ་རྗེ་དབྱངས་ཅན་མའི་ཞལ་གཟིགས། འོད་ཟེར་འཕྲེང་བ་
སོགས་བསྟན་བཅོས་ཀྱང་མང་དུ་མཛད་དོ། །སྲས་མཆོག་ཆོས་ཀྱི་དབང་ཕྱུག་ལ་སྲས་ལྕམ་སྲིང་གསུམ་བྱོན་པ་ལས། འགྲོ་དོན་ཅན་གཉིས་ཏེ། ལྕམ་ལྷ་རྗེ་ཇོ་འབུམ་ནི། ཨིནྡྲ་བོ་དྷིའི་ལྕམ་ལཀྵཾ་ཀ་རའི་སྤྲུལ་པའི་སྐུ་ཡིན་པར་གྲགས་ཤིང༌། མཁྱེན་པ་ཆེ་བས་དུས་ཀྱི་འཁོར་ལོའི་རྒྱུད་འགྲེལ་ཡོངས་རྫོགས་ཐུགས་ལ་བཞུགས། གཞོན་ནུའི་དུས་ན་སྤྱོད་པ་ངེས་མེད་ཅིག་ཡོད་པ། དར་བབ་ཀྱི་དུས་ན་ཡུམ་གྱིས་བསྐུལ་ཏེ། གཤིན་རྗེ་གཤེད་ཕྱག་རྒྱ་ཟིལ་གནོན་སྒྲུབ་པས་ཞལ་གཟིགས། ཚེ་བདག་དང་ལྷ་ཆེན་དཔལ་འབར་ཕྲན་དུ་འཁོལ། སྲོག་མཐུ། ཆོ་འཕྲུལ་སེར་བ་སོགས་ཞག་དུས་ཐེབ་པ་ཁོ་ན་བྱུང་སྟེ། དྲག་སྔགས་ཀྱི་མཐུ་ཤིན་ཏུ་ཆེ། དགུང་ལོ་སུམ་ཅུ་སོ་དྲུག་པ་ལ་སྙུང་གཞི་དྲག་པོ་བྱུང་བས་ཐུགས་བསྐུལ་ཏེ། གནས་ལུགས་མ་རྟོགས་ན་ཅིས་ཀྱང་དགོས་པ་མེད་པ་མཁྱེན། ཡབ་ལ་གསན་པའི་སྦྱོར་བ་ཡན་ལག་དྲུག་བསྒོམས་པས། ཞག་གཅིག་ལ་རྟགས་བཅུ་རྫོགས། བདུན་ལ་རླུང་དབུ་མར་ཐིམ། གྲུབ་ཐོབ་ཆེན་མོར་གྱུར་ཏེ། དབེན་པར་ཟླ་ཕྱེད་ཙམ། ཟླ་རེ་ཙམ་མི་ཟས་ཡེ་མ་གསོལ་ཀྱང༌། ཉམ་སྟོབས་ཆེས་བཟང་བ་དང༌། སྲིན་པོ་རིའི་བྲག་གི་སྐྱིབས་མིས་མི་ཐར་བ་རྣམས་སུ་འགྲོ་འོང་མཛད་ཅིང་སྒོམ། ནད་ཡམ་ལ་བདེན་སྟོབས་བརྗོད་པ་ཙམ་གྱིས་ཆད་པ་དང༌། ནད་པ་ལ་ཕྱག་གི་རེག་པ་ཙམ་གྱིས་ནད་ལས་གྲོལ་བ་སོགས་རྟགས་མངོན་གྱུར་མངའོ། །དེ་ཉིད་ཀྱི་མིང་པོར་གྱུར་པ། གྲུབ་ཐོབ་སེ་མོ་ཆེ་བ་ནམ་མཁའ་རྒྱལ་མཚན་ཡིན་ཏེ། དང་པོ་སྤྱན་རབ་རིབ། སྙན་མི་བསང༌། ལྗགས་ཀྱང་མི་བདེ་བ་ཞིག་བྱུང་བས། རེ་ཆེན་པོ་མེད་ཀྱང་སྦྱོར་བ་ཡན་ལག་དྲུག་པ་བསྒོམས་པས་ཉམས་རྟོགས་དང་མཁྱེན་རབ་ནང་ནས་རྡོལ་ཏེ། མཁས་པ་ནམ་མཁའ་འོད་ཟེར་གྱི་དྲུང་དུ། དུས་འཁོར་གྱི་རྒྱུད་འགྲེལ་ལ་སྦྱངས་པས་མཁས་པར་མཁྱེན། སྤྲུལ་སྐུ་ཇོ་འབུམ་ལ་དབང་མདོར་བསྟན་དང་བཀའ་འགྲེལ་
པདྨ་ཅན་གསན། བླ་མ་གཞན་ལ། བདེ་མཆོག །ཀྱཻ་རྡོར། ནཱ་རོ་ཆོས་དྲུག་སོགས་ཀྱང་གསན། ལྕམ་ཇོ་འབུམ་སྐུ་འདས་ནས། ཕྱིས་ལོ་མཆོད་ཀྱི་དུས་སུ་ཞག་བཅོ་ལྔ་ཏིང་ངེ་འཛིན་ཐུན་གཅིག་ལ་སོང༌། དེ་རྗེས་སྔོན་གྱི་སྐྱེ་བ་ཐམས་ཅད་དྲན། ཕྱིས་སྐྱེ་བ་རེ་ལ་ས་རེ་དགྲོད་ནས། སྐྱེ་བ་བཅུ་བཞི་ནས་སངས་རྒྱ་བའི་གནས་ཚུལ་ཐམས་ཅད་གཟིགས། དེས་མཚོན་ཏེ། རང་གཞན་ཐམས་ཅད་ཀྱི་སྐྱེ་བ་སྔ་ཕྱི་དང་ཚེ་འདིའི་བདེ་སྡུག་ཐམས་ཅད་སྒྲིབ་མེད་དུ་མཁྱེན། མ་སྦས་པ་མང་དུ་ཡང་གསུངས། གཙང་པོ་ལ་ཇི་ལྟར་གཤེགས་ཆ་མེད་པར་ཆུ་ཕ་ཁར་ཟང་གི་གཤེགས་པ་མང་དུ་བྱུང༌། གྲུབ་ཐོབ་ཀྱི་མཚན་གྲགས་ཤིན་ཏུ་ཆེ། རྟེན་དགེ་སློང་ཡིན། སྐུ་ཚེའི་སྨད་ལ་གཙང་འོ་ལུང་སེ་མོ་ཆེའི་དགོན་པ་བཏབ་སྟེ། དེར་ཤས་ཆེར་བཞུགས། ཆོས་རྗེ་འཇམ་དབྱངས་གསར་མ་ནི། མཚན་ཤེས་རབ་འོད་ཟེར། འཁྲུངས་ཡུལ་ཉང་སྟོད། སྔགས་རྙིང་མ་བའི་རྒྱུད་དུ་འཁྲུངས། གཞོན་ནུ་ནས་རབ་ཏུ་བྱུང་སྟེ། འུ་མཚན་ཉིད་ཀྱི་གྲྭ་མང་པོར་བྱོན། ཁྱད་པར་གསང་ཕུར་གཉལ་ཞིག་གི་སློབ་མའི་གཙོ་བོར་གྱུར། བར་སྐབས་སུ་བསྙུང་མཛེ་བྱུང༌། ལོ་ཕྱེད་དང་གཉིས་ཕྱག་ན་རྡོ་རྗེའི་སྒོམ་བཟླས་མཛད་པས་སྙུང་བ་གདངས། མི་གཞན་གདོན་གྱི་ཟྀན་པ་ལ་སྔགས་བཏབ་པ་ཙམ་གྱིས་ཕན་པ་བྱུང༌། འཇམ་དབྱངས་ཞལ་གཟིགས་པ་ལ་ལུང་བསྟན་ཞུས་པས། གྲུབ་ཐོབ་སེ་མོ་ཆེ་པ་དང་ལས་འབྲེལ་ཡོད་པར་ལུང་བསྟན་ཏེ། འུ་ཡུག་ལ་མཇལ་དུ་ཕེབས་པའི་ལམ་དུ། ལྷ་འདྲེ་ཆོ་འཕྲུལ་མི་བཟད་པ་བྱུང་ཡང་མཉམ་པ་ཉིད་ཀྱི་ངང་དུ་བཞགསེ་མོ་ཆེ་བ་ལ་དུས་འཁོར་གྱི་དབང་གསན་པའི་ཚེ། བླ་མ་དུས་འཁོར་དངོས་སུ་གཟིགས། བསྒོམས་པས་ཉམས་རྟོགས་མཐར་ཕྱིར། རྐྱང་འདུར་གྱི་འཆད་ཉན་ཀྱང་མཛད་དེ། རྒྱ་ནག་རི་བོ་རྩེ་ལྔར་སྒྲུབ་པ་མཛད་ན་འཇའ་ལུས་རྡོ་རྗེའི་སྐུ་བརྙེས་རྒྱུ་ཡིན་པས།
དེ་ལྟར་བཞེད་པ་ལ་སློབ་མ་རྣམས་ཀྱིས་བཤོལ་བཏབ་སྟེ་མ་ཐོན་པས། བཤད་སྒྲུབ་སྤེལ་མའི་ངང་ལ་བཞུགས་སོ། །གྲུབ་ཐོབ་སེ་མོ་ཆེ་བ་ཡན་ཆད། དུས་འཁོར་ལ་ཤིན་ཏུ་བཀའ་དོག་གཉན་ཆ་ཆེ་བ་ཡིན། ཆོས་རྗེ་འཇམ་གསར་ནས་གཟུང་ཅུང་ཟད་བཀའ་ཡངས་སུ་སོང༌། ཀུན་མཁྱེན་ཆོས་སྐུ་འོད་ཟེར་ནི། གསེར་སྡིངས་པ་གཞོན་ནུ་འོད་ཀྱི་སྲས་ཡིན། མཚན་དངོས་ཆོས་ཀྱི་འོད་ཟེར་ཡིན་པ་ལ། བླ་ཆེན་འཕགས་པ་རིན་པོ་ཆེས། ཁྱེད་ཆོས་ཀྱི་སྐུའི་རང་བཞིན་དུ་འདུག་པས། ཆོས་སྐུ་འོད་ཟེར་དུ་ཐོགས་གསུང༌། མདོ་སྔགས་ཐམས་ཅད་ལ་ཤིན་ཏུ་མཁྱེན་པ་ཆེ། ཁྱད་པར་གསང་འདུས་འཕགས་སྐོར་དང༌། ཀྱཻ་རྡོར་དཔྱལ་རྔོག་གཉིས་འདུས་ལ་མཁས་པ། གསང་འདུས་རིམ་ལྔའི་ཉམས་རྟོགས་ཀྱང་ཚད་དུ་ཕྱིན་པ་ཞིགའཇམ་དབྱངས་གསར་མ་ལ་དུས་འཁོར་གྱི་དབང་རྒྱུད་མན་ངག་ཐམས་ཅད་རྫོགས་པར་གསན་པས། ཉམས་རྟོགས་བརྒྱ་འགྱུར་དུ་འཕེལ། དབང་གི་ཡེ་ཤེས་དབབ་པའི་སྐབས་བླ་མ་རྡོ་རྗེ་ཤུགས་སུ་གཟིགས། ཡེ་ཤེས་ཕེབས་ནས་ཉི་མ་ཕྱེད་ཙམ་ཕེབས་པ་མ་བཏང༌། གསང་བ་འདུས་པའི་རྒྱུད་ཡོངས་སུ་རྫོགས་པ་རྒྱ་སྐད་དུ་སངས་ཀྱིས་བཏོན། བླ་མ་གསུང་ནས། འདི་ཁ་ཆེ་པཎ་ཆེན་ཤཱཀྱ་ཤྲཱིའི་སྐྱེ་བ་ཡིན་ཏེ། དེའི་ཚེ་གསང་འདུས་ལ་མཁས་པར་སྦྱངས་པའི་བག་ཆགས་ཡིན་གསུང༌། མནལ་ཐམས་ཅད་འོད་གསལ་དུ་ཆུག་ནས། གཟིགས་རྟོག་དང༌། ཆོས་གསན་པ་དང༌། སྒོམ་བཟླས་ཐམས་ཅད་མནལ་གྱི་ངང་ནས་གྲུབ་པར་མཛད། སྒྲུབ་ཁང་དུ་འདག་སྦྱང་ལ་བཞུགས་པ་དང༌། འབུམ་པ་ལ་བསྐོར་བ་མཛད་པ་དུས་གཅིག་ཏུ་འབྱུང་བ་སོགས། སྐུ་ལུས་ཀྱི་བཀོད་པ་ཡང་མང་དུ་བསྟན་ཏོ། །ཆོས་རྗེ་ཀུན་སྤངས་ཆེན་པོ་ཞང་ཐུགས་རྗེ་བརྩོན་འགྲུས་ནི། མདོག་གི་དབ་ཕྱར་དུ་སྐུ་འཁྲུངས། ས་སྐྱ་དང་མདར་སོགས་དབུས་གཙང་གི་གྲྭ་ས་ཕལ་ཆེར་དུ་ཕེབས། མདོ་སྔགས་ཐམས་ཅད་ལ་མཁྱེན་པ་ཤིན་
ཏུ་རྒྱས། ཆུ་མིག་པ་སེང་གེ་དཔལ་སོགས་མཁས་མཆོག་ཐམས་ཅད་ཟིལ་གྱིས་མནན། མདར་དང་དོན་མོ་རིར་ཟུར་ཆོས་ཀྱང་མཛད། དེ་ནས་འཇམ་གསར་གྱི་གདན་ས་རྐྱང་འདུར་གྱི་ཆོས་དཔོན་མཛད་ཅིང༌། ཀུན་མཁྱེན་ཆོས་སྐུ་བ་ལ་མངའ་བའི་གཞུང་གདམས་ངག་ཐམས་ཅད་གསན། ཁྱད་པར་དུས་འཁོར་ར་ལུགས་སྔར་ནས་མཁྱེན་ཅིང༌། ཀུན་མཁྱེན་ཆོས་སྐུ་བ་ལ་འབྲོ་ལུགས་ཀྱི་དབང་རྒྱུད་བཤད་དང༌། སྦྱོར་དྲུག་ཉམས་ཁྲིད་དུ་གསན་པས། ཉམས་རྟོགས་ཀྱི་ཀློང་བརྡོལ། སྤྱི་སྦྱོར་བ་ཡན་ལག་དྲུག་པའི་གདམས་པ་མི་འདྲ་བ་བཅུ་བདུན་ཙམ་གསན་ཅིང་ཉམས་སུ་མྱོང་བར་མཛད། སྲོག་རྩོལ་བསྒོམས་པས། འབྱུང་བ་ལྔའི་རླུང་སྟོབས་སུ་གྱུར་ཏེ། ཐུགས་ཉམས་འུར་ལངས། ཕྱག་ཡ་རེ་མི་བཅུ་བཅུས་མི་ཐུབ་དང༌། གཟིམས་ཁང་ན་ཡོད་པ་རྣམས་རེས་འགའ་འཁྱགས་ཏེ་མི་ཚུགས་པ་དང༌། རེས་འགའ་ཚད་པས་གདུངས་ཏེ་མི་ཚུགས་པ་དང༌། གཟིམས་ཁང་ཡོམ་ཡོམ་དུ་གཡོ་བ་དང༌། བུག་སྒོ་རྩིག་པ་ལ་ཐོགས་མེད་དུ་གཤེགས་པ་རྣམས་བྱུང༌། ལན་གཅིག་སྲོག་གེགས་ཅུང་ཟད་བྱུང་བ། ཀུན་མཁྱེན་ཆོས་སྐུ་བས་མངོན་ཤེས་ཀྱིས་མཁྱེན་ནས་ཕེབས་ཏེ་བསལ། དེར་ཉམས་རྟོགས་མཐར་ཕྱིན་ནས། སྤྱན་རས་གཟིགས་ཞལ་བཅུ་གཅིག་པ་སོགས་ཡི་དམ་དཔག་ཏུ་མེད་པའི་ཞལ་གཟིགས། དེ་ནས་འཆད་ཉན་བོར་ཏེ་ཀུན་སྤངས་མཛད། རི་ཁྲོད་ངེས་མེད་ལ་ཐེགས། ལྷ་སའི་ཇོ་བོ་བཅུ་གཅིག་ཞལ་ལ་སོགས་གསོལ་བ་ཡུན་རིང་དུ་བཏབ་པས། སྤྱན་རས་གཟིགས་སྨར་ཁྲིད་ཀྱི་བཀའ་རྒྱ་གྲོལ་བའི་ལུང་བསྟན་བྱུང༌། སེ་མཁར་ཆུང་དུ་བཞུགས་པའི་ཚེ། དུས་ཀྱི་འཁོར་ལོའི་རྒྱུད་ཀྱི་སྙིང་པོ་བསྡུ་བར་དགོངས་ནས་གསོལ་བ་བཏབ་པས། ཆོས་རྒྱལ་རིགས་ལྡན་རྣམས་དུས་གཅིག་ཏུ་ཞལ་གཟིགས་ནས་བཀས་གནང༌། འདི་ལ་དགེ་མཚན་ལན་གསུམ་
བྱུང༌། དེ་དུས་ནགས་སྨན་རྒྱལ་མོས་སྤྱན་འདྲེན་བྱུང་ཡང༌། ཅུང་ཟད་དུས་ལ་མ་བབ་པར་མཁྱེན་ཏེ། ལོ་གསུམ་ནས་འབྱོར་པར་ཞལ་གྱིས་བཞེས། ཕྱིས་ཕེབས་ནས་མཁའ་སྤྱོད་བདེ་ལྡན་དུ་རྣལ་འབྱོར་ཡན་ལག་དྲུག་པའི་མན་ངག་སྙན་བརྒྱུད་དུ་བཞུགས་པ་རྣམས་ཡི་གེར་འགོད་པ་མཛད་པ་ན། དུས་ཀྱི་འཁོར་ལོ་ཉིད་ཞལ་གཟིགས་ནས་ལུང་བསྟན་ཐོབ། འདི་སྦྱོར་དྲུག་གི་འཁྲིད་ཡིག་རྒྱས་པ་བོད་དུ་བྱུང་བའི་སྔ་ཤོས་ཡིན། ཕྱིས་སྐྱིད་ཕུག་བདེ་ལྡན་དུ་ཕེབས། རྣལ་འབྱོར་དབང་ཕྱུག་བིརྺ་པ་ཞལ་གཟིགས། ལམ་འབྲས་ལ་འཁྲུགས་སྡེབས་ཀྱི་ཡིག་ཆ་མཛད། གསང་སྔགས་གསར་རྙིང་སྒོ་མཐའ་དག་ནས་ཆོས་ཀྱི་སྒོ་སྤེལ། ཕྱོགས་རིགས་མེད་པ་ནས་འདུས་པའི་སྒོམ་ཆེན་དྲུག་བརྒྱ་རེ་རྟག་ཏུ་འཚོགས། ཉམས་རྟོགས་བཟང་པོ་མ་སྐྱེས་པ་གཅིག་ཀྱང་མེད། སྦྱོར་དྲུག་ལ་ཉམས་ལེན་གྱི་མཐིལ་དུ་མཛད། རྒྱུད་འགྲེལ་ཆེན་མོ་ཡང་མང་དུ་གསུངས། རྒྱུད་སྙིང་ལོ་རེ་བཞིན་ལན་གཉིས་གཉིས་གསུངས། བྱམས་སེམས་ཆེན་པོ་གདན་སར་བསྐོས་ནས། ཞིང་འདི་ན་གདུལ་བྱ་མེད་པས་གཞན་དུ་འགྲོ་ཞེས་སྐུ་འདའ་བར་དགོངས་པ་ན། བྱང་སེམས་ཆེན་པོ་བསྙུང་བས། ཟླ་བ་ཤས་ཤིག་སྐུ་ཚེ་བསྲིངས། ཡང་གཤེགས་པར་བཞེད་པ་ལ་སློབ་མ་རྣམས་ཀྱིས་གསོལ་བ་བཏབ་པས་ཟླ་བ་ཕྱེད་བཞུགས། དེ་ནས་བསྙུང་བར་མེད་པར་སྐུ་འདས། བྱང་སེམས་ཆེན་པོ་རྒྱལ་བ་ཡེ་ཤེས་ནི། འཁྲུངས་ཡུལ་མདོ་ཁམས། ཆུང་ངུའི་དུས་སུ་ཀརྨ་པག་ཤིའི་གྲྭ་པ་ཡིན། རྗེ་པག་ཤི་དེ་སྐུ་འཁོར་པ་ཐམས་ཅད་ལ་བཀའ་དྲག་ཏུ་སྐྱོན་པ་ཞིག་ཡོད་པས། ཤིན་ཏུ་འཇིགས་པ་ཞིག་ཡོད་པ་ལ། ཤིང་ཁུར་ཞིག་བསྣམས་ནས་བྱོན་པས། ནགས་བསེབ་གཅིག་ཏུ་བླ་མ་སྐུ་རྐྱང་བྱོན་པ་དང་ཐུག་གིས་མཇལ། སྐྲག་སྟེ་བྲོས་པས། བླ་མ་ན་རེ། དེ་ཚུགས་མ་བྱེད། ད་ལྟ་བླ་མ་ལ་བྲོས་ན་བར་
དོར་ཡང་འབྲོས། ཚུར་ཤོག་གསུང༌། དེ་ནས་འཇིགས་པ་སངས། ལོ་མང་དུ་བསྟེན། ཁོང་ལ་མངའ་བའི་གདམས་ངག་ཐམས་ཅད་གསན་ཅིང་བསྒོམས། འོན་ཀྱང་དེ་སྐབས་ཉམས་མྱོང་རྩལ་ཆེ་བ་ཙམ་མ་བྱུང༌། དེ་ནས་བླ་མ་པའི་ཞལ་ནས། རི་ཁྲོད་ངེས་མེད་འགྲིམས། ཆོས་ལ་ཕྱོགས་རིས་མ་བྱེད། བླ་མ་བཟང་པོ་གཅིག་དང་མཇལ་བར་འདུག་གི་གསུངས་པས་དེ་བཞིན་དུ་མཛད། ཤར་བ་འཇམ་དབྱངས་ཆེན་པོའི་སྐུ་གཞོགས་སུ་ཡུན་རིང་དུ་བཞུགས། མདོ་སྔགས་ཀྱི་ཆོས་མང་དུ་གསན། ཆོས་རྗེ་ཀུན་སྤངས་ཆེན་པོ་དང་མཇལ་ནས་ཤིན་ཏུ་དད་པ་ཐོབ། རྣལ་འབྱོར་ཡན་ལག་དྲུག་པ་གསན་པས་ཉམས་རྟོགས་མཐར་ཕྱིན། གཞུང་གདམས་ངག་ཐམས་ཅད་བུམ་པ་གང་བྱོར་གནང༌། གནས་ངེས་མེད་དུ་གཤེགས་པར་བཞེད་པ་ལ། འཇམ་དབྱངས་ཆེན་པོའི་བཀའ་མ་ཆོགས་ཏེ། བདེ་ཆེན་གྱི་དགོན་པ་བཏབ། སྒྲུབ་པའི་ངང་ནས་ཆོས་ཀྱང་མང་དུ་གསུངས། ཐུགས་སྙིང་རྗེ་ཆེན་པོའི་རང་བཞིན་དུ་བཞུགས་པས། བྱང་སེམས་ཆེན་པོའི་མཚན་ཐོགས། ཀུན་སྤངས་ཆེན་པོའི་བཀའ་གནང་བ་ལ་རྟེན། ཇོ་ནང་གི་གདན་སར་ཕེབས། དགོན་གཉིས་ཀར་དུ་སྒྲུབ་གྲྭ་རྒྱ་ཆེར་བསྐྱངས། ཞབས་ལ་གཏུགས་ཚད་གནས་ལུགས་ཀྱི་རང་ཞལ་ལྟ་ཤེས་པ་ཁོ་ན་བྱུང༌། མཐར་ཕུག་མོ་ཆོས་རྗོང་གི་རི་ཁྲོད་དུ་སྐུ་གཤེགས། མཁས་བཙུན་ཆེན་པོ་ཡོན་ཏན་རྒྱ་མཚོ་ནི། བྱང་སེམས་ཆེན་པོ་དེ་ཉིད་ཀྱི་མཆེད་གྲོགས་དང༌། སློབ་མ་དང༌། རྒྱལ་ཚབ་གསུམ་ཀ་ཡིན། མདོག་གི་མཁར་རྙིང་དུ་སྔགས་རྙིང་མ་བའི་རྒྱུད་དུ་འཁྲུངས། གྲྭ་ས་མང་དུ་བསྟེན་པ་ལས། གཙོ་བོར་མདར་དུ་སྦྱངས་པ་མཛད། གསང་སྔགས་ཕྱོགས་ཀྱི་བླ་མ་མང་དུ་བསྟེན། ཁྱད་པར་ཤར་པ་འཇམ་དབྱངས་ཆེན་པོའི་བུ་ཆེན་དང་ཟུར་ཆོས་པའི་གཙོ་བོ་ཡིན།
ཁོང་པའི་བཀའ་ནན་གྱིས་ཐུགས་བློས་མི་ལོངས་བཞིན་དུ། རྒྱ་ནག་དུ་ཡང་ཕེབས་དགོས་བྱུང༌། ཆོས་རྗེ་ཡབ་སྲས་གཉིས་དང་སྔར་ནས་དཔོན་སློབ་དུ་གྱུར་པ་ཡིན་ཅིང༌། དེ་སྐབས་ཇོ་ནང་དུ་ཕེབས། ཀུན་སྤངས་ཆེན་པོ་ལ་ཟབ་ལམ་གྱི་འཁྲིད་གསན། མཚན་མའི་རྣལ་འབྱོར་ཞག་ཉི་ཤུ་རྩ་གཅིག་ལ་རྟགས་བཅུ་རྫོགས་པར་མཐར་ཕྱིན། ཉིན་མོའི་རྣལ་འབྱོར་གྱི་སྐབས། འཕར་གཡོའི་ཉམས་ཆེར་བྱུང་སྟེ། མདའ་རྒྱང་ཙམ་དང་རྡོ་རྒྱང་ཙམ་དུ་འཕར་བའི་འཕར་གཡོས་ཇོ་ནང་གི་རི་ཀླུངས་མེད་པར་བྱོན་པ་ཞག་བདུན་གྱི་བར་དུ་བྱུང༌། དེ་སངས་ནས་མཉམ་ཉིད་ཆེན་པོ་གཅིག་གི་ངང་དུ་གྱུར། མངོན་མཁྱེན་ཐོགས་པ་མེད་པར་མངའ། ཆོས་ལ་འདི་མ་གསན་དང་འདི་མི་མཁྱེན་མེད་པ་ཙམ་ཡིན། སྐུ་བཙུན་པ་རབ་ཀྱི་མཐར་ཐུག་པས། ཚུལ་ཁྲིམས་ཀྱི་དྲི་བསྲུང་རྒྱ་ཆེར་འཕྲོ་བ་ཞིག་སྟེ། དང་པོར་ཀུན་སྤངས་ཆོས་རྗེ་བླ་མ་བསྟེན་ཚུལ་རྒྱུད་ནས་བཤད་པ་ལྟར་བསྟེན། དེ་རྗེས་བྱང་སེམས་ཆེན་པོ་གདན་སར་ཕེབས་པ་ལའང༌། ཀུན་སྤངས་ཆེན་པོ་དང་ཁྱད་མེད་དུ་བསྟེན། བྱང་སེམས་ཆེན་པོ་སྐུ་འདས་ནས་ཇོ་ནང་གི་གདན་སར་ཕེབས། སྒྲུབ་བརྒྱུད་ཀྱི་བསྟན་པ་རྒྱ་ཆེར་བསྐྱངས་ཏེ། ལོ་བདུན་ལྷག་ཙམ་ནས་ཀུན་མཁྱེན་ཆེན་པོ་གདན་སར་བསྐྱོས། དེ་རྗེས་ལོ་གཉིས་ཙམ་ནས་སྐུ་འདས་སོ། །ཆོས་རྗེ་ཀུན་མཁྱེན་ཆེན་པོ་དུས་གསུམ་སངས་རྒྱས་ནི། འཁྲུངས་ཡུལ་དོལ་པོ་པན་ཚང་བ། རུས་སྔགས་རྙིང་མ་ཡིན། ཡུལ་དུ་བླ་མ་སྐྱི་སྟེངས་པ་སོགས་བླ་མ་མང་རབ་བསྟེན། ཆོས་ཀྱང་རྙིང་མ་དང༌། དབུ་མ་རིག་ཚོགས་སོགས་དང༌། རིག་གནས་དང་བཟོ་གནས་ཕྲ་མོ་མང་པོ་ཆུང་ངུའི་དུས་ནས་ཚེགས་མེད་དུ་མཁྱེན། དགུང་ལོ་བཅུ་བཞི་བཅོ་ལྔ་ཙམ་ལ་དགོན་པའི་བྱ་བ་ཐན་ཐུན་མཛད་དགོས་བྱུང༌། ཕྱིས་གསུང་ལས། བར་དེར་དོན་མེད་ཡུན་རིང་དུ་འདས་གསུང༌། དགུང་ལོ་བཅུ་བདུན་པ་ལ་སྐྱི་སྟོན་འཇམ་དབྱངས་
གྲགས་པ་རྒྱལ་མཚན་ཡ་རྩེར་ཕེབས་པའི་ལམ་ཞོར་ལ། གློ་བོ་སྟེང་དུ་ཕེབས་པ་དང་མཇལ། འཕྲེང་བ་སྐོར་གསུམ་སོགས་ཀྱི་ལག་ལེན་དང་ཆོས་ཀྱང་མང་དུ་གསན། དེ་རྗེས་མར་ཕེབས་དང་ཡང་མཇལ་ནས། གསང་སྔགས་ཀྱི་ཆོས་སྣ་མང་པོ་དང༌། ཚད་མ་བསྡུས་པ་མཁྱེན་པ་མཛད། དེ་རྗེས་ཀྱི་སྟོན་འཇམ་དབྱངས་ཀྱི་དྲུང་དུ་ཕེབས་པར་བཞེད་ནས། དགུང་ལོ་ཉི་ཤུ་རྩ་གཅིག་པ་ལ་གཅིག་པོར་བྲོས་ནས་ཕེབས། སྔར་ཡང་རབ་ས་འབྱོར་པ་ཅན་ཡིན་པ་དང༌། ལམ་དུ་འབྲོག་པའི་ཁྱིས་ཞལ་རས་ལ་རྨུགས་པ་དང༌། བཤུལ་ཐག་རིང་བ་སོགས་ཀྱི་ཤིན་ཏུ་འོ་བརྒྱལ་བར་བྱུང་ཡང༌། ཐུགས་ཀྱི་བརྟན་པ་མ་ཞུམ། ངལ་དུབ་ཆེ་བ་ཡབ་ཡུམ་གྱི་བཀའ་བཅག་པས་ལན་དགོངས་ཏེ། ལ་ཁ་ཅིག་ནས། ཡབ་ཡུམ་བཞུགས་པའི་ཕྱོགས་སུ་ཕྱག་དང་བཤགས་པ་མང་པོ་མཛད་པས་དེ་ཕྱིན་ཆད་བདེ་བར་བྱུང༌། དེ་ནས་ས་སྐྱར་ཀྱི་སྟོན་འཇམ་དབྱངས་ཀྱི་དྲུང་དུ་ཕར་ཚད་མངོན་པ་གསུམ་དུས་གཅིག་ཏུ་བསླབས་པས། གྲོགས་རྣམས་ཀྱི་གཅིག་ལ་དྲིལ་བ་འཐད་ཟེར་ཡང༌། མ་གསན་པར་གསུམ་པོའི་སྟེང་དུ་སྤྱོད་འཇུག་སྔགས་ཆོས་འགའ་ཡང་བསྣན། ལོ་ཕྱེད་གཉིས་ནས། གཞུང་བཞི་ཆར་འགྲེལ་པ་དང་བཅས་པའི་ཚིག་དོན་མཐའ་དག་ཐུགས་སུ་ཆུད་ནས། བཤད་གསར་མཛད་པའི་ཆས་སྒྲུབ་པ་ལ་རྟ་ནག་ཏུ་ཕེབས། སློབ་དཔོན་རིན་ཡེའི་དྲུང་དུ་ཟླ་བ་གསུམ་ཙམ་བཞུགས། རྡེའུའི་བཅུད་ལེན་སོགས་ཁ་ཟས་རྒྱུད་གཅོད་ཀྱི་གདམས་ངག་སྤྱོད་བཞིན་དུ། བྱམས་པའི་ཆོས་ལྔའི་བཤད་པ་ཚར་གཅིག་གསན། དེ་རྗེས་བཤད་གསར་མཛད། བཀའ་རྒྱས་འབྲིང་བསྡུས་གསུམ་སོགས་ཤེར་ཕྱིན་གྱི་མདོ་རྣམས་ཡུད་ཙམ་གསན་པས་ཐམས་ཅད་ཐུགས་སུ་ཆུད། དབུས་གཙང་གི་སྡེ་ཕལ་ཆེར་དུ་གྲྭ་སྐོར་ལ་ཕེབས་པས། མཁྱེན་རབ་ཀྱི་རྩལ་དང༌། རིག་པའི་རྣམ་འགྱུར་བཟང་ཞིང༌། ཤེར་ཕྱིན་འབུམ་པ་སོགས་མདོ་སྡེ་
དུ་མའི་ཚིག་མཐའ་དག་ཐུགས་ལ་བྱང་བར་བཞུགས་པ་དང༌། གཞུང་ཆེ་ཆུང་གང་ལ་ཡང་ཐོགས་པ་མེད་པར་མཁྱེན་པ་རྒྱས་པས། ཐམས་ཅད་ཀྱིས་ཀུན་མཁྱེན་རང་དུ་འདུག་ཅེས་བསྔགས་པས། ཀུན་མཁྱེན་གྱི་མཚན་དེ་དུས་ནས་ཀྱང་ཐོགས། སྤྱིར་མདོ་སྔགས་ཀྱྀ་ཆོས་གསན་པའི་བླ་མ་སུམ་ཅུ་ལྷག་ཅིག་མངའ་མཆོག་ཏུ་ཀྱི་སྟོན་འཇམ་དབྱངས་ལ། མདོ་སྔགས་ཀྱི་གཞུང་ཆེ་ཆུང་དཔག་ཏུ་མེད་པ་དང༌། དབང་བསྐུར་རང་ཡང་ཟུར་བཀའ་བདུན་ཅུ་ཙམ་གསན། དཔལ་དུས་ཀྱི་འཁོར་ལོའི་ཕྱོགས་ལ་ཡང༌། དང་པོར་བླ་མ་འདིའི་དྲུང་དུ་དབང་རྒྱུད་མན་ངག་ཐམས་ཅད་ལ་ཤིན་ཏུ་མཁས་པར་མཛད་པ་ཡིན། འཆད་ཉན་ཟུར་ཆོས་པ་ཡང་ལོ་ཤས་མཛད། ཆོས་ལུང་ཚོགས་པའི་མཁན་ཆེན་བྱང་སེམས་བསོད་ནམས་གྲགས་པ་ལ་བསྙེན་རྫོགས་ཞུས་ཤིང༌། འདུལ་བ་མདོ་རྩ་གཞུང་འགྲེལ་དང་བཅས་པ་མ་ལུས་པ་གསན་ཅིང་མཁྱེན་ནས། སྐུ་བཙུན་པའི་མཐར་ཐུག་པར་བཞུགས། བར་སྐབས་དེར་ཡུལ་དུ་ཕེབས། ཡབ་ཡུམ་སོགས་དང་མཇལ། སྔོན་བཀའ་བཅག་ནས་དབུས་གཙང་དུ་ཕེབས་པ་ལ་བཟོད་གསོལ་བྱས། མི་དགྱེས་མེད་པར་མཛད། ལོ་གཅིག་ཙམ་བཞུགས། སླར་ས་སྐྱར་ཕེབས། དགུང་ལོ་སུམ་ཅུ་པ་ལ་ཇོ་ནང་དུ་དོན་གཅོད་གཅིག་ལ་ཕེབས་པས། སྒྲུབ་ཚུགས་ལ་ཐུགས་དད་སོང༌། དེ་ནས་ལྷ་ས་དང་འཚུར་ཕུ་སོགས་སུ་ཕེབས། ཆོས་རྗེ་རང་བྱུང་པ་དང་ཆོས་ཀྱི་གསུང་གླེང་མང་དུ་མཛད། རང་བྱུང་པས་རྗེ་འདིའི་ལུང་རིག་གི་ཞལ་ཡ་མ་ཐེགས་ཀྱང༌། མངོན་ཤེས་བཟང་པོ་མངའ་བས། ཁྱེད་ལ་ལྟ་གྲུབ་དང་ཆོས་སྐད་ད་ལྟའི་འདི་བས་ཀྱང་ཆེས་བཟང་བ་ཅིག་མྱུར་དུ་འོང༌། ཞེས་ལུང་བསྟན། དགུང་ལོ་སོ་གཅིག་པ་ལ་ཇོ་ནང་དུ་ཕེབས། མཁས་བཙུན་ཆེན་པོ་ལ་སྤྱིར་དབང་དང་གདམ་པ་མང་དུ་གསན། སྦྱོར་དྲུག་ལ་ཉམས་འཁྲིད་མཛད། དམིགས་པ་ཞུ་བའི་སྐབས་
མ་གཏོགས་སུ་དང་ཡང་མི་འཕྲད་པར་མཁའ་སྤྱོད་བདེ་ལྡན་དུ་བཞུགས། སོར་སྡུད་བསམ་གཏན་གྱི་ཉམས་རྟོགས་མཐར་ཕྱིན་པས། བླ་མའི་གསུང་ནས་མགྱོགས་ཁྲིད་བྱ་གསུང་བ་ལ། གོལ་ལེ་སྐྱོང་བར་ཞུ་ཞུས་ཏེ་སྒོམ་པར་མཛད་པས། སྲོག་རྩོལ་མཐར་ཕྱིན་པའི་རྟགས་རྒྱུད་ནས་བཤད་པ་བཞིན་མངའ། དེ་ནས་ལྷ་སར་སྨོན་ལམ་མཛད་ཅིང༌། ཡེར་བར་ཐོག་གཅིག་ཐུགས་དམ་པ་ལ་བཞུགས། ཡང་ཡར་ཕེབས་ཏེ། སྐྱིད་ཕུག་དུ་བླ་མ་ཀུན་སྤངས་ཆོས་གྲགས་པ་ལ། འགྲེལ་ཆེན་ཚར་གཅིག་གསན་ནས་གསུངས། མཁས་བཙུན་ཆེན་པོའི་གསུང་གནང་བས། དགེ་བཤེས་ལྔ་ཅུ་ཙམ་ལ་རྒྱུད་འགྲེལ་གྱི་བཤད་པ་རྒྱས་པ་ཚར་གཅིག་གསུངས། དེ་ནས་བླ་མའི་བཀའ་ནན་ཆེན་པོས་གདན་སར་ཕེབས། མཁས་བཙུན་ཆེན་པོ་ཤིན་ཏུ་དགེས་ནས། ལོ་གཉིས་སུ་ཉེ་བ་ཞིག་ཉིན་མཚན་མེད་པར། དབང་ལུང་འཁྲིད་བཤད་པ་སོགས། བླ་མ་ཉིད་ལ་མངའ་བའི་ཆོས་ཐམས་ཅད་སྩལ། སྤྱིར་ཀྱི་སྟོན་འཇམ་དབྱངས་དང༌། མཁས་བཙུན་ཆེན་པོ་ལ་ཆོས་གསན་པ་ནི་མཐའ་ཡས་ཏེ། མི་ཙམ་འཛིན་པ་ཡང་དཀའོ། །གཞན་སྟོང་གི་ལྟ་སྒོམ་ཁྱད་པར་ཅན་ནི། མཁའ་སྤྱོད་བདེ་ལྡན་དུ་བཞུགས་པའི་ཚེ་ཐུགས་ལ་འཁྲུངས་པ་ཡིན་ཀྱང༌། ལོ་ཤས་ཤིག་གཞན་ལ་མ་གསུངས། གདན་སར་ཕེབས་ནས་ལོ་ཤས་ནས། སྐུ་འབུམ་ཆེན་མོའི་རྨང་འདིངས་པ་དང༌། བཟང་ལྡན་གོང་གི་ཆོས་ཁྲིར་བཞུགས། བཤེས་གཉེན་དམ་པ་བཅུ་ལྷག་ལ། སྙིང་པོའི་མདོ་བཅུའི་བཤད་པ་རང་བཞེད་རྩལ་དུ་སྟོན་ནས་རྒྱས་པར་གསུངས། གཞན་སྟོང་སྟོན་པའི་གསུང་རབ་ཐན་ཐུན་ཀྱང་མང་དུ་མཛད། དཔེ་རྣམས་དང་ཆོས་སྐད་ཕྱོགས་ཐམས་ཅད་དུ་ཁྱབ་པས། མཁས་པ་ཕལ་གྱི་བློར་མ་ཤོང༌། དངོས་སུ་འབེལ་གཏམ་རྩོད་པ་ཞུས་པ་རྣམས། རྒྱ་མཚོ་ལ་ཁ་བ་བབས་པ་བཞིན་དུ་སོང་བས།
དངོས་སུ་མཇལ་བ་རྣམས་གྲུབ་མཐའ་ལ་ངེས་ཤེས་དང༌། བླ་མ་ལ་དད་པ་ཐོབ་པ་ཤ་སྟག་བྱུང༌། རིང་ནས་ངག་ལོན་དང་རྩོད་ཡིག་བསྐུར་བ་རྣམས་ལ་ཆོས་དང་མཐུན་པའི་ལན་མཛད་པས། ངེས་པ་རྙེད། ཕྱིས་གྲུབ་མཐའ་དེ་རྩོད་བྲལ་དུ་སོང་ནས། ཕྱོགས་བཞིའི་དགེ་བཤེས་དུ་མས་བསྐུལ་ནས། ངེས་དོན་རྒྱ་མཚོ་སོགས་ཡིག་ཆ་ཆེ་བ་རྣམས་མཛད་པ་ཡིན། མཆོད་རྟེན་ཆེན་མོ་བཞེང་པའི་ཚེ། སྲོག་ཆགས་ཤིན་ཏུ་མང་བ་ལ་ལྗགས་སྔགས་མཛད། སེ་གོལ་རྟོག་པས། སྲོག་ཆགས་གཅིག་ཀྱང་མེད་པར་སོང་ཞིང༌། ནམ་མཁའ་འཇའ་འོད་ཀྱི་ཁེངས། ཆུ་མེད་པ་ལ། བཅའ་ལུང་གི་ཕུ་ཆུ་ནར་གྱིས་ཐོན། གཞལ་ཡས་ཁང་གི་ཐོག་ཕུབས་དང༌། གདུགས་ཀྱི་ཐོག་ཕུབས་ཀྱང་ཉི་མ་རེ་རེ་ཁོ་ན་ལ་ཁེལ། རླུང་ཤིན་ཏུ་ཆེ་བ་དང༌། ཆར་ཞོང་ཆེ་བ་བྱུང་རེས་ལ་བདེན་སྟོབས་བརྗོད་པས། འཕྲལ་ཉིད་དུ་ཞི་བ་ཁོ་ན་བྱུང༌། ཆོས་ཁྲིའི་ཁར་ཆོས་གསུང་བ་དང༌། བཟོ་བོ་རྣམས་ཀྱི་སར་བཀོད་པ་མཛད་པ་དང༌། གཟིམས་ཆུང་དུ་ཐུགས་དམ་ལ་བཞུགས་པ་སོགས། སྐུ་ལུས་ཀྱི་བཀོད་པ་གསུམ་གསུམ་དུས་གཅིག་ཏུ་འབྱུང་བ་ནི་མང་པོས་ཡང་ཡང་མཐོང༌། སྐུའི་བཀོད་པ་བརྒྱད་དུས་གཅིག་ཏུ་འབྱུང་བ་ཡང་འགའ་རེས་མཐོང༌། སྔ་ཕྱིར་ཇོ་ནང་དང༌། ཕུག་མོ་ཆོས་རྫོང་དང༌། སྤྱི་བར་ཕུག་གི་བྲག་གི་ངོས་མིས་ཡེ་མི་ཐར་པ་མང་པོར་ཡུད་ཀྱིས་ཕེབས་ནས། མཆོད་རྟེན་མང་པོ་བཞེངས། ལ་ལ་ད་ལྟ་ཡང་སྣང༌། ཐོག་མ་ཇོ་ནང་དུ་ཕེབས་པའི་སྐབས་ཉིད་ན་མདའ་ནས་ཡར་ཕེབས་པས། ནམ་མཁའ་ལ་དུས་ཀྱི་འཁོར་ལོའི་དཀྱིལ་འཁོར་ཡོངས་སུ་རྫོགས་པར་གཟིགས། དེ་ནས་བཟུང་ཡི་དམ་ཞལ་གཟིགས་པ་ནི་གྲངས་ལས་འདས་ཏེ་ཆེར་ཆེར་ཡང་མི་མཛད། འཕགས་པ་སྤྱན་རས་གཟིགས་དང་མི་ལབ་པ་བཞིན་ཡོད་ལ། གུར་གྱི་མགོན་པོ་དང༌། རྣམ་ཐོས་
སྲས་བྲན་བཞིན་འཁོལ། ཕྱག་མཆོད་ཐུགས་དམ་མཛད་རེས་ཀྱི། རིགས་གསུམ་མགོན་པ་དང༌། འཕགས་མ་སྒྲོལ་མ་དང༌། སྨན་བླ་དང༌། བྱམས་པ་རྣམས་རེ་མོས་ཀྱི་འབྱོན། མཁའ་འགྲོ་རྒྱ་མཚོ་དང༌། སྒྱུ་འཕྲུལ་དྲྭ་བ་དང༌། སྡོམ་པ་ཆེ་ཆུང་དང༌། རྡོ་རྗེ་ཕག་མོ་དང༌། རྡོ་རྗེ་དབྱིངས་ལ་སོགས་པའི་དཀྱིལ་འཁོར་གཟིགས་པ་ཡང་གྲངས་ལས་འདས། བདེ་བ་ཅན་གྱི་སྨོན་ལམ་མཛད་པའི་ཚེ། བདེ་བ་ཅན་གྱི་ཞིང་ཁམས་དངོས་སུ་གཟིགས་པ་དང༌། གཟིམས་ཁང་བདེ་བ་ཅན་དུ་གུ་རུའི་ཚེས་བཅུའི་མཆོད་པ་མཛད་པའི་ཚེ། སློབ་དཔོན་པདྨ་མཁའ་འགྲོའི་ཚོགས་དང་བཅས་པ་མངོན་སུམ་དུ་བྱོན་ནས་ཤིས་བརྗོད་མཛད་པ་དང༌། མཆོད་རྟེན་བཞེང་པའི་ལས་ལ་ཞུགས་ཚད་བདེ་བ་ཅན་དུ་འགྲོ་བའི་མཚན་མ་གཟིགས། སྤུན་གསུམ་དུ་བཞུགས་སྐབས། ཐུགས་དམ་གྱི་ལྷ་ཇོ་བོ་བྷུ་གྨ་ལ་རབ་གནས་མཛད་པའི་ཚེ། འཇའ་འོད་ལ་བཀྲ་ཤིས་རྟགས་བརྒྱད་ཀྱི་གཟུགས་ཤིན་ཏུ་གསལ་བ་ནུབ་ཕྱོགས་ནས་བྱུང་བ་དང༌། མེ་ཏོག་གི་ཚོགས་ཁ་དོག་སྣ་ཚོགས་པ་མང་པོ་སྙོན་མེད་དུ་བབས། ནམ་ཕྱེད་སྐུ་འབུམ་ནང་དུ་ཆུ་ཤོར་བ་སོགས་འཕྲན་བུ་རྣམས་ཀྱང་འཕྲལ་འཕྲལ་མཁྱེན་ཅིང༌། གོང་མ་ཡོན་མཆོད་ཀྱི་མངའ་ཐང་འགྱུར་ལྡོག་དང༌། རྒྱལ་ཁམས་ཀྱི་འགྱུར་ལྡོག་རྣམས་ཀྱང་ཇི་སྐད་གསུངས་པ་བཞིན་ཐོག་ཏུ་ཁེལ། ཧོར་གྱི་སྤྱན་འདྲེན་འབྱུང་བ་ཡང་སྔ་མོ་ནས་དགོངས། སྤྱན་འདྲེན་བྱུང་བའི་ཚེ། ཉིང་རོ་དང༌། ཕར་ཕུག་དང༌། ན་དུམ་སོགས་སུ་དབེན་པ་ཁོ་ན་བསྟེན་པ་ལོ་བཞི་ཙམ་མཛད། ཕྱིས་རྒྱལ་པོས་ལུང་བཟང་པོ་གནང་སྟེ། ཕེབས་མི་དགོས་པར་བྱུང་ནས། ཤིན་ཏུ་དགྱེས་ཏེ་དགོན་པར་ཕེབས། དེ་ལ་རྗེ་འདིས་ཇོ་ནང་གི་གདན་ས་ལོ་བཅུ་བདུན་མཛད་རིང༌། གཙོ་བོར་ཇོ་ནང་ཉིད་དུ་བཞུགས་ཤིང༌། སྒྲུབ་བརྒྱུད་ཀྱི་བསྟན་པ་རྒྱ་ཆེར་སྤེལ། སྐུ་འབུམ་བཞེང་པ་དང༌། གསུང་སྒྲོགས་དང༌།
མཆོད་པ་འབུལ་བ་དང༌། མཁས་པ་དུ་མ་འདུས་པ་ལ། མདོ་སྔགས་ཀྱི་དབང་དང་གཞུང་བཤད་རྒྱ་ཆེར་སྩལ། ཚོགས་པ་ཡང་སྒྲུབ་པ་སྙིང་པོར་བྱེད་པ་ཁོ་ན་རང་ཡང་ཉུང་དུས་སུ་སྟོང་ཙམ་རེ་འཚོག་ཅིང༌། སྤྱིར་ཚོགས་པ་ཉུང་དུས་སུ་ཡང་ཉིས་སྟོང་ཙམ་རེ་འདུ་བ་བྱུང༌། མང་བ་ལ་ཚད་མེད། མཆོད་རྟེན་བཞེང་པའི་ལས་ཀ་སུ་རེམ་པ་དང༌། རྒྱུ་ཚོགས་གཏོང་ཕོད་སུ་ཆེ་བ་ལ་དགེ་སྦྱོར་ཡང་ཤིན་ཏུ་བཟང་བར་བྱུང༌། ཆོས་རྗེ་འདི་ལ་ཟབ་ལམ་གྱི་འཁྲིད་ཞུས་པ་ལ། དགེ་སྦྱོར་གྱི་སྣེ་མ་ཟིན་པ་ནི་གཅིག་ཀྱང་མེད། མུ་གེ་བྱུང་བའི་སྐབས། སློབ་མ་ཀུན་ལ་དཀའ་ཐུབ་རིགས་མང་དུ་གནང༌། དཔོན་སློབ་ཀུན་གྱིས་མི་ཟས་སྤངས། གསོལ་ཆས་ཐམས་ཅད་འཕོངས་པ་རྣམས་ལ་གནང༌། ཕྱིས་ཆོས་རྗེ་ཐུགས་སྲས་ཀླུ་བས་ལོ་ཙཱ་བ་དང༌། རྗེ་ཕྱོགས་ལས་རྣམ་རྒྱལ་བས་གདན་ས་མཛད་པའི་རིང༌། དབེན་གནས་ངེས་མེད་ཀྱི་རི་ཁྲོད་མང་པོར་ཕེབས་ཤིང༌། ཕལ་ཆེར་ནི་ཐུགས་དམ་ལ་བཞུགས་པ་དང༌། ཟབ་ལམ་གྱི་འཁྲིད་འདེབས་པའི་འགྲོ་དོན་ཉིད་གཙོ་བོར་མཛད་བར་བར་དུ་ཆོས་གསུང་བ་དང༌། རྟེན་བཞེང་པ་དང༌། ཡུལ་སོ་སོའི་ལྷ་ཁང་ལ་ཞིག་གསོས་མཛད་པ་ཡང་ཤིན་ཏུ་མང༌། ངམ་རིངས་སུ་ཆོས་སྡེ་བཏབ་སྟེ་བཤད་ཉན་གྱི་གྲྭ་བཙུགས། དེར་སྙུང་བ་ཞིག་གིས་རྐྱེན་བྱས། ཞག་བཅུ་གཉིས་ཀྱི་རིང་སངས་རྒྱས་ཀྱི་ཞིང་ཁམས་དང༌། ཡི་དམ་ཀྱི་ལྷ་བགྲང་བར་མི་དཔྱོད་པ་ཞལ་གཟིགས། རིན་ཆེན་སྡིང་གི་ལྕགས་ཟམ་འདྲེ་གདུག་པ་ཞུགས་པ་ཞིགཐུགས་རྟོག་མི་མཛད་ན་བསྣོམས་པར་ཞུ་ཞེས་བདག་པོས་ཕུལ་བ་ལ། འདྲེན་ཐག་བཏང་མཚམས། ལྕགས་ཀྱི་ཚུ་ཁ་ནས་བཀའ་ཤོག་བསྒྲགས་པ་ཙམ་གྱིས། ཕ་ཕྱོགས་ཀྱི་ལྕགས་ཐག་རང་ཆད་ལ་སོང་སྟེ། ཚུར་ཕྱོགས་ཀྱི་ཟམ་རྔུར་དུ་ཕུང་གི་བྱུང་བ་སོགས་ཡ་མཚན་པའི་ལྟས་མང༌། དབུས་དམག་
ཡོད་པའི་སྐབས་ཤིགཞག་ཤས་བློ་སྦྱོང་ཁོ་ནའི་ཆོས་གསུངས་ཤིང༌། བཟོད་པའི་བསྔགས་པ་འབའ་ཞིག་མཛད། ཆོས་རང་བཞུགས་ཐོག་དམག་རྒྱ་ཙམ་སླེབས། སྐུ་ལ་མདའ་རྡོ་མཚོན་ཆ་སྣ་ཚོགས་འཕངས་ཀྱང༌། ཅུང་ཟད་ཀྱང་མ་སྐྱོན་ཅིང་གཡོ་མེད་དུ་བཞུགས། དེ་ནས་དད་པ་སྐྱེས་ཏེ་བཤགས་པ་ཕུལ། སྐུ་ཚེའི་སྨད་ལ་ནུབ་ཆོས་ལུང༌། འུ་ཡུགསྙེ་མོ། གནམ་སྟོང་ལུང་སོགས་རིམ་པས་བརྒྱུད་ནས། ཁྱད་པར་ལྷ་སར་ཕེབས་ནས་ཟླ་བ་བཅུ་གཅིག་བཞུགས། དབུས་ཕྱོགས་ཀྱི་བླ་མ་སློབ་དཔོན་དགེ་བཤེས་དཔོན་སྐྱ་སྐྱེ་བོ་ཐམས་ཅད་ཀྱི་ཞབས་ལ་གཏུགས། གང་ཕེབས་ཐམས་ཅད་དུ་ཟབ་ལམ་རྡོ་རྗེའི་རྣལ་འབྱོར་གྱི་འཁྲིད་དང༌། སྐྱེ་བོའི་ཚོགས་ལ་སེམས་བསྐྱེད་དང༌། ཡིག་དྲུག་གི་ཆོས་ཁོ་ན་གནང༌། ལྷ་སར་བཞུགས་རིང་གདོན་གྱི་གནོད་པ་ལ་བཀའ་ཤོག་བསྒྲགས་པ་ཙམ་གྱིས་ཕན་པས། བཀའ་ཤོག་ཞུ་བ་ཉིན་རེ་བཞིན་ཤིན་ཏུ་མང་སྟེ། མང་དུས་བརྒྱ་བརྒྱ་ཙམ་བྱུང་སྐད། ཟབ་ལམ་གྱི་འཁྲིད་ལན་བདུན་གནང་བ་ལ། འཁྲིད་གྲྭ་སྔ་མ་རྣམས་ལ་བརྒྱ་ཙམ། ཉིས་བརྒྱ་ཙམ། ལྔ་བཅུ་ཙམ་ཅི་རིགས་པ་ཡོད་ཅིང༌། འཁྲིད་རྟིང་མ་འཁྲིད་མོ་ཆེར་གྲགས་པ་ལ། དམ་པོ་འདེབས་པ་སྟོང་དང་བརྒྱད་བརྒྱ་ལྷག་ཙམ་བྱུང༌། གྲངས་སུ་མ་བཅད་པ་ལ་ཟབ་ལམ་སྒོམ་མཁན་དཔག་ཏུ་མེད་དེ། སྤྲང་པོ་ཚུན་ཆད་ཀྱང་ཆོས་ལ་དད་པ་སྐྱེས་ནས། ལས་སྲང་རྣམས་སུ་དབེན་གསུམ་སྒོམ་པ་དང༌། སྐྱེ་བོ་སྟོང་ཕྲག་མང་པོ་ལ་མཆོག་དབང་གོང་མ་གནང་བས། མི་རྣམས་ལ་ལྟ་ཅི་སྨོས་སྲང་གའི་ཁྱི་ཚུན་ཆད་ལ་ཡེ་ཤེས་ཕེབས་པའི་རྣམ་འགྱུར་མང་དུ་བྱུང༌། གཞན་ཡང་དུས་འཁོར་གྱི་རྒྱུད་འགྲེལ་ཆེན་མོ་ཚར་གཅིགའབུམ་གྱི་བཤད་པ་ཚར་གཅིགདབང་མདོར་བསྟན་ཚར་གཉིས། ནཱ་རོ་འགྲེལ་ཆེན་དང༌། སེམས་འགྲེལ་ཆུང་བ་ཚར་གཉིས། དབུ་མ་བསྟོད་
ཚོགས་ཚར་གསུམ། སྙིང་པོའི་མདོ་བཅུ་དང༌། ངེས་དོན་རྒྱ་མཚོ་སོགས་མང་དུ་གསུངས། སྙེ་མོ་ནས་འདིའི་བར་ལ་སྲོག་རྩོལ་གནང་བས་ཉམས་རྟོགས་ཚད་དུ་ཕྱིན་པ་ཡང་ཉིས་བརྒྱ་ལྷག་ཙམ་བྱུང༌། ཕྱིར་ཕེབས་པའི་ཚེ། ཕྱག་འབུལ་བར་འོངས་པའི་རྟ་ཁྲོམ་མི་ཁྲོམ་རྐྱང་ཐང་སྒང་ལ་མི་ཤོང་བ་ཙམ་བྱུང༌། དེ་ནས་ཀྱི་སྨད་དང༌། ཡར་འབྲོག་དང༌། ཉང་སྟོད་སོགས་སུ་རིམས་གྱིས་ཕེབས་ནས། དེ་ཀུན་དུ་ཡང་ཟབ་ལམ་གྱི་འཁྲིད་མང་དུ་གསུངས། ཤམ་པོ་རྩེ་ལྔ་ལ་བདེ་གཤེགས་སྙིང་པོ་དོན་རྟོགས་པ་མང་དུ་འབྱུང་ཞེས་ལུང་བསྟན། ཐམས་ཅད་མཁྱེན་པ་གཉིས་པ་བུ་སྟོན་ཆེན་པོ་དང་འབེལ་གཏམ་མཛད་པར་བཞེད་ནའང༌། བུ་སྟོན་ཆེན་པོས་རྩོད་པ་མཛད་མ་ནུས་ཞེས་གྲགས་པ་ཡང་དོན་ལ་གནས། སྔ་དུས་བུ་སྟོན་ཆེན་པོས་ཇོ་ནང་གི་སྐུ་འབུམ་གཟིགས་པར་བཞེད་ནས། མནལ་ལམ་གཟུང་སྟེ་ཕེབས་པས། ཇོ་མདར་ཕེབས་པ་ན། ཀུན་མཁྱེན་ཆེན་པོས་ཕཊ་ཅེས་གསུངས་པས་མནལ་སད་དེ་གཟིགས་མ་ཐུབ་སོགས་ཀྱི་ལོ་རྒྱུས་ཡོད། གང་ཕེབས་ཐམས་ཅད་དུ་སེམས་བསྐྱེད་དང༌། ཡིག་དྲུག་གི་ལུང་ཞུ་བ་དང༌། དགེ་བསྙེན་ཕོ་མོ་ཞུ་བ། རབ་བྱུང་བསྙེན་རྫོགས་ཞུ་བ་སོགས་ཀྱང་རྒྱུན་མི་འཆད་པར་བྱུང༌། དེ་ནས་ཇོ་མོ་ནང་དུ་ཕྱག་ཕབ་ནས་ལོ་གཉིས་སུ་ཉེ་བ་ན། གཟུགས་སྐུ་དབྱིངས་སུ་བསྡུ་བར་མཛད་དེ། ཞག་བདུན་དུ་ཐུགས་དམ་མ་གྲོལ་བའི་སྐབས། བར་ཕུག་ནས་འཇད་ཀྱི་བར་གཙང་པོ་ཉིས་ལྡབ་དུ་བྲི། ཐུགས་དམ་གྲོལ་བའི་ཚེ་བྱང་ཆུབ་ཀྱི་སེམས་དབུ་གཙུག་ནས་ལུད་པའི་སྐབས། ཇོ་མདར་ཇ་སྦྱོར་གཅིག་ཙམ་གྱི་ཡུན་གཙང་པོ་གྱེན་དུ་ལོག་ནས་ཆད། དེ་བར་ལ་མི་འགའ་རེས་འགྲོ་འོང་བྱས། སྐུ་མི་འདའ་བའི་སྔོན་ལོ་ལྔ་དང་ཙམ་ནས་བཤང་གཅི་རྒྱུན་ཆད་པ་དང༌། སྔ་མོ་ནས་གཏུམ་མོའི་བདེ་དྲོད་ཀྱི་འུར་ལངས་པ་ལ་ཉིན་མཚན་དང་ཐུན་ཐུན་མཚམས་མེད། མ་ཟོས་བཀྲེས་
མེད་ཟོས་ཀྱང་འཇུ། ཞེས་པའི་ཚུལ་གྱིས། རེས་འགའ་ཞག་གྲངས་མང་པོར་གསོལ་བ་མི་གསོལ་བ་ཉུང་ངུ་ཙམ་གསོལ་བ་ཡང་མཛད། ནུབ་ཆོས་ལུང་དུ་སྐྱ་སེར་མང་པོ་ལ་བསྙུང་གནས་དཀར་པོ་ཕྱོགས་བརྒྱད་འབོགས་བ་མཛད་སྐབས། གུག་པ་རེའི་བར་དུ་གསོལ་ཇ་སུན་རེ་གསོལ་བ་ཙམ་མ་གཏོགས། ཟླ་བ་ཕྱེད་ལ་གསོལ་བ་ཁམ་གཅིག་ཀྱང་མ་གསོལ་ཏེ། སྐུ་ཉམས་སྟོབས་གཞན་པས་བཟང་བར་བྱུང༌། མཚལ་གུང་ཐང་དུ་ཕེབས་ནས། ཞག་བདུན་བཞུགས་པའི་སྐབས། ཉིན་རེའི་ནང་དུ་ཚ་དྲོ་མཆོད་པ་ཞུ་མཁན་མང་དུས་བཅུ་བཅུ་ཙམ་དང༌། བདུན་བརྒྱད་རེ་འཁོར་མོར་བྱུང་བ་ཀུན་ལ་ཡང༌། དེ་ཀུན་གྱི་བློ་ཁ་ཚིམ་པའི་ཕྱིར་གཞན་པས་ལྷག་པར་གསོལ་བ་མཛད་པས། རེས་འགའ་མི་ཉི་ཤུ་ཙམ་རེའི་ཟས་ཀྱི་ཚད་ཙམ་གསོལ། ཡང་མ་འབྱོངས་པའི་རྣམ་པ་ཡེ་མ་བྱུང་བ་དང༌། ས་སྐྱའི་སྒོག་རར་དབང་བསྐུར་མཛད་པའི་ཡེ་ཤེས་དབབ་པའི་རོལ་མོ་ཕྱི་རོལ་གྱང་འཆག་པའི་མིས་ཚོར་བ་ལ་ཡང་ཡེ་ཤེས་ཕེབས་པ་དང༌། དབང་བསྐུར་མཛད་ཚད་ལ་ཡེ་ཤེས་ཕེབས་པ་དང༌། ཤ་གྲག་སེང་སོགས་སྐྱེས་བུ་དམ་པ་དུ་མ་ཞལ་མཐུན་པར་རིགས་ལྡན་གྱི་སྤྲུལ་པར་ལུང་བསྟན་པ་དང༌། འཆིམས་བློ་བཟང་གྲགས་པས་འཕགས་པ་སྤྱན་རས་གཟིགས་ཀྱི་སྐུར་དངོས་སུ་གཟིགས་པ་ཡང་ཡང་བྱུང་བ་དང༌། ཉེ་གནས་ནམ་མཁའ་བྱང་ཆུབ་ཀྱིས་འཇམ་དབྱངས་དངོས་སུ་མཐོང་བ་དང༌། བཅོམ་ལྡན་རྡོ་རྗེ་སྙིང་པོ་དང༌། སྣང་བ་དག་པའི་སྒྲུབ་པ་ཕོ་མོ་མང་པོས་སྐུ་ལ་མཚན་དཔེ་རྫོགས་པར་མཐོང་བ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་མངོན་གྱུར་དུ་མངའ། དོན་དུ་ནི། འཕགས་པ་སྤྱན་རས་གཟིགས་ཀྱི་རྣམ་པར་འཕྲུལ་པ་ཡིན་པས། རིགས་ལྡན་པདྨ་དཀར་པོ་དང་གཉིས་སུ་མེད་པའི་ངོ་བོ་ཉིད་ཡིན་པས། དམ་པ་སོ་སོའི་གཟིགས་སྣང་
ལ་བྱུང་བ་ཡང་དེ་སྣང་ཞིང༌། རྣམ་པ་གཅིག་ཏུ་ན། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས། རྔ་བོ་ཆེའི་མདོ་དང༌། སྤྲིན་ཆེན་པོའི་མདོར་ལུང་བསྟན་པ། ལི་ཙཱ་བི་གཞོན་ནུ་འཇིག་རྟེན་ཀུན་གྱི་མཐོང་ན་དགའ་བ་ཞེས་བྱ་བ། མ་འོངས་པའི་དུས་ན། ཀ་ཡོ་རིའི་རྒྱུད་དུ་སྟོན་པའི་མཚན་འཆང་བ་ལ་དགེ་སློང་དུ་གྱུར་སྟེ། མདོ་སྡེ་དུ་མ་གསལ་བར་བྱེད་ཅེས་སྟོན་པའི་མཚན་ནི། ཀུན་མཁྱེན་ཅེས་ཡོངས་སུ་གྲགས་པ་སྟེ། ཆོས་རྗེ་འདི་ཉིད་ལུང་བསྟན་པར་དངོས་སློབ་རྣམས་བཞེད་པ་ཡང༌། དོན་ལ་གནས་པ་ཡིན་ཞིང༌། ཆོས་རྗེ་ཉིད་ཀྱིས་ཀྱང་དོན་གྱི་ཞལ་གྱི་བཞེས་པར་མངོན་ནོ། །དེའི་ཕྱིར། སྐུ་གསུང་ཐུགས་དང་མཛད་པ་གསང་བ་མཐའ་དག་དེ་བཞིན་གཤེགས་པ་ཁོ་ནའི་སྤྱོད་ཡུལ་ལོ། །ཆོས་རྗེ་ཐམས་ཅད་མཁྱེན་པ་འདི་ལ། རིགས་ལྡན་ཀྱི་སྤྲུལ་པ་ཡིན་པའི་སྙན་གྲགས་ཆེ་བ་དང༌། དཔལ་དུས་ཀྱི་འཁོར་ལོའི་ཆོས་ཀྱི་མངའ་བདག་ཆེན་པོར་མངོན་སུམ་དུ་བཞུགས་པ་ལ་རྟེན། དུས་མཉམ་གྱི་དགེ་བཤེས་ཕལ་མོ་ཆེ་ཞིག་གིས། ཆོས་འདི་དང་འབྲེལ་བའི་མན་ངག་ཅི་རིགས་པ་མ་གསན་པ་མེད་པ་ལྟ་བུ་ཡིན། དབང་རྒྱུད་མན་ངག་རྫོགས་པར་གསན་པ་ཡང་སྟོང་ཕྲག་མང་པོ་དང༌། དབང་དང་འཁྲིད་ཆ་ཚང་བ་ཐོབ་པ་ཁྲི་ཕྲག་བརྒལ་བ་དང༌། མཆོག་དབང་གོང་མ་དང༌། སོ་སོར་སྡུད་པའི་འཁྲིད་གསན་ཅིང་ཉམས་མྱོང་སྐྱེས་པ་ནི་བགྲང་བར་མི་སྤོགས་པ་ཙམ་ཡོད་པར་གྲགས་ཤིང༌། སྤྱིར་བསྟན་པ་སྒོ་ཐམས་ཅད་ནས་རྒྱས་པར་མཛད། སྒོས་སུ་བོད་ཀྱི་རི་སུལ་ཐམས་ཅད་རྡོ་རྗེའི་རྣལ་འབྱོར་གྱི་སྒྲུབ་པ་པོས་ཁྱབ་པ་དང༌། བཤད་ཉན་གྱི་གྲྭ་ཐམས་ཅད་དུ། སྙིང་པོའི་མདོ་དང་རྒྱུད་བླ་མའི་བསྟན་བཅོས་ལས་བརྩམས། ཕྱིར་མི་ལྡོག་པ་འཁོར་ལོའི་གཏམ། བདེ་གཤེགས་སྙིང་པོ་སེང་གེའི་སྒྲས་ཁྱབ་
པར་མཛད་དེར། རྔ་བོ་ཆེའི་མདོ་ལས་ལུང་བསྟན་པ་བཞིན་དུ། ལོ་བརྒྱད་ཅུ་ལྷག་གི་བར་དུ་དེ་ལྟ་བུའི་རྒྱུན་གནས་པར་གྱུར་ལ། དེ་རྗེས་ལྟ་བ་མཐོ་རུ་རེ་ཞིང་དྲང་དོན་ཀུན་རྫོབ་ལ་ལྷག་པར་ཞེན་པའི་ངང་ཚུལ་ཅན། སྙན་གྲགས་དང༌། དབང་ཐང་དང༌། འཁོར་ཚོགས་བསྡུ་བའི་བགོ་སྐལ་ཅན་མང་དུ་བྱོན་པ་ལ་རྟེན། སྔོན་བཞིན་གསལ་བར་མ་གྱུར་ཀྱང༌། དུས་ཀྱི་ཐ་མའི་ཐ་མ་ད་ལྟའི་བར་དུ་ཡང༌། རྡོ་རྗེའི་རྣལ་འབྱོར་སྒོམ་པ་དང༌། དེ་བཞིན་གཤེགས་པའི་སྙིང་པོའི་གཏམ་སྲོལ་ཁ་མ་ནུབ་ཙམ་ཡོད་ཅིང༌། བར་སྐབས་སུ་མང་དུ་བྱུང་བ་ནི་དམ་པ་འདི་ཁོ་ནའི་དྲིན་ནོ། །ཡང་དམ་པ་འདིས་དང་པོ་ས་སྐྱར་འཆད་ཉན་ལ་ཐུགས་གཞོལ་བའི་ཚེ། ཀ་ཆེན་བཞི་དང༌། རིགས་ཚོགས་ལྔ། དབུ་མ་འཇུག་པ། བྱམས་ཆོས་ཕྱི་མ་བཞི་རྣམས་ལན་མང་དུ་གསུངས། སྔ་ཕྱིར་གཞུང་འཕྲན་མི་གཅིག་པ་ཡང་བཅུ་ཙམ་གསུངས། ཕྱིས་སྒྲུབ་པ་ལ་ཐེགས་ནས། སྟར་ཆགས་དུ་སྐྱོང་བའི་འཆད་ཉན་གྱི་གྲྭ་འཛུགས་པ་ནི་ཡེ་མི་མཛད། དོན་གཉེར་མཁས་པ་མང་པོ་འདུས་པ་ལ། བྱམས་ཆོས་སྡེ་ལྔ་དང༌། དབུ་མ་བསྟོད་ཚོགས་དང༌། འབུམ་དང༌། སྙིང་པོའི་མདོ་རྣམས་དང༌། འགྲེལ་ཆེན་དྲི་མ་མེད་པའི་འོད་སོགས་སེམས་འགྲེལ་སྐོར་གསུམ་དང༌། དབང་མདོར་བསྟན་ཀྱཻ་རྡོ་རྗེ་ནཱ་རོ་འགྲེལ་ཆེན་རྣམས་ཡང་དང་ཡང་དུ་གསུངས། དབུ་མ་རྩ་བ་དང༌། སྤྱོད་འཇུགབསླབ་བཏུས། ཀྱཻ་རྡོར་རྒྱུད་གསུམ། མཁའ་འགྲོ་རྒྱ་མཚོ། རྡོ་རྗེ་འཕྲེང་བ། གསང་འདུས་སྒྲོལ་གསལ། དམར་ནག་འཇིགས་གསུམ་སོགས་ཀྱང༌། ལན་རེ་རེ་གཉིས་གཉིས་གསུངས། སོ་སོའི་འདོད་པ་དང་མཐུན་པར། དཀྱིལ་འཁོར་གྱི་ཆོ་ག་རྡོ་རྗེ་འཕྲེང་བའི་དབང་རྣམས་དང༌། བདེ་དགྱེས་གསང་འདུས་གཤིན་རྗེ་གཤེད། རྡོ་རྗེ་དབྱིངས་དང༌། རྟ་མགྲིན་ཕུར་པ་སོགས་གསང་སྔགས་
གསར་རྙིང་གི་དབང་ཟུར་བཀའ་ཡང་མང་དུ་གནང༌། གདམས་ངག་འཁྲིད་ཚུལ་ཐ་དད་པ་ཡང་མང་དུ་གསུང་མོད་ཀྱི། གཙོ་བོར་ཤེར་ཕྱིན་གྱི་མདོ་དང༌། མངོན་རྟོགས་རྒྱན། སྙིང་པོའི་མདོ་དང་རྒྱུད་བླ་མ། དུས་ཀྱི་འཁོར་ལོའི་དབང་ཁྲིད། སེམས་འགྲེལ་སྐོར་གསུམ་གྱི་བཤད་པ་དང་བཅས་པ་རྣམས་རྟག་ཏུ་གསུང་བ་ལྟ་བུ་ཡིན་ཞིང༌། ཐེག་པ་མཐའ་དག་གི་ངེས་པའི་དོན་ཡང་དེ་དག་ལས་བརྩམས་ཏེ་གསུང་ངོ༌། །འོན་ཀྱང་རེས་འགའ་ནི་སྒྲུབ་པ་ཁོ་ན་ལ་ཐུགས་གཞོལ་བར་ཡང་མཛད། ཆོས་གསུང་བའི་དུས་ན་ཡང༌། གཟིགས་རྟོག་བཤར་སྦྱང༌། ཐུགས་བསམ་སོགས་མཛད་མི་དགོས་ཏེ། ཆོས་གྲྭར་ཕེབས་པའི་དུས་དང༌། ཞལ་བཀོད་སོགས་གང་དགོས་པའི་དུས་དེ་ཀ་མ་གཏོགས། ཟབ་མོའི་རྣལ་འབྱོར་ཁོ་ན་ལ་བཞུགས་སོ། །སྔོན་བཀའ་དང་བསྟན་བཅོས་འགྱུར་རོ་འཚལ་རྫོགས་པར་ནན་ཏན་དང་བཅས་པས་ཚར་གཅིག་གཟིགས། དེ་ཀས་དོན་ཐམས་ཅད་མ་འདྲེས་པར་ཐུགས་སུ་ཆུད། སྐུ་འཁོར་འགའ་ཞིག་གིས། བླ་མ་པའི་མཁྱེན་རླབས་འདི་ལ། མཁན་ཆེན་བུ་སྟོན་པའི་གཟིགས་རྟོག་གི་ཐུགས་རྩོལ་དང༌། འཆད་ཉན་ལ་ཐུགས་གཞོལ་བ་འདི་ཡོད་ན། སངས་རྒྱས་འཇིག་རྟེན་དུ་བྱོན་པ་ལྟ་བུ་གཅིག་ཡོང་བར་གདའ་ཞུས་པས། སྤྱིར་ཆོས་འདི་རྣམས་བསླབས་པས་གོ་བ་ཁོ་ན་རང་ཡང་མིན། ཚོགས་སྒོར་དུ་མ་ནས་བསོག་ཅིང༌། བསྒོམས་ན་གོ་བ་ལགས། ད་ལྟ་སྙིང་པོ་བསྡུ་བའི་སྐབས་འདིར། སྒྲུབ་པ་ཁོ་ན་ཕན་ཡོན་ཆེ་བ་ཡིན་མོད་གསུང་ངོ༌། །དེ་ལྟར་ན་དམ་པ་འདི་ལ་སྤྱིར་སློབ་མའི་ཚོགས་མཐའ་ཡས། ཐུན་མོང་མ་ཡིན་པའི་དགོངས་པ་སྐྱོང་བའི་སློབ་མ་རང་ཡང་ཤིན་ཏུ་མང༌། གཙོ་བོར་གྱུར་པ། ལོ་ཙཱ་བ་བློ་གྲོས་དཔལ་དང༌། ས་བཟང་ལོ་ཙཱ་བ་མ་ཏི་པཎ་ཆེན་གཉིས་ལ་ཐུགས་སྲས་རྣམ་གཉིས་སུ་གྲགས། ཀུན་སྤངས་ཆེན་པོ་ཆོས་གྲགས་
དཔལ་བཟང་ཞབས་ཏོག་ཤིན་ཏུ་ཆེ། འདིས་ཀྱང་ལོ་ཙཱ་ཚད་དུ་ཕྱིན་པ་མཁྱེན། ཆོས་རྒྱལ་ཕྱོགས་ལས་རྣམ་རྒྱལ། མཁན་ཆེན་རིན་ཆེན་ཚུལ་ཁྲིམས། ཞང་སྟོན་བསོད་ནམས་གྲགས་པ། མཁས་གྲུབ་དཀོན་མཆོག་རྒྱལ་མཚན། ཡར་ལུང་པ་ཆོས་དཔལ་མགོན་པོ་རྣམས། འཕྲིན་ལས་ཀྱི་རྒྱུན་རྒྱ་ཆེར་སྐྱོང་མཁན་ཡིན་ཞིང༌། དེ་དག་ལས། ཆོས་རྒྱལ་ཕྱོགས་ལས་རྣམ་རྒྱལ་ནི། ཡ་ཚེ་རྒྱལ་པོའི་བླ་མཆོད་བླ་ཆེན་ཞིག་གི་སྲས་སུ་འཚར་ཀའི་རོང་དུ་སྐུ་འཁྲུངས། ལོ་ཤས་གསང་བའི་ཚུལ་དུ་བཞུགས། དེ་རྗེས་བློ་བོར་བྱོན། ཡབ་དང་ཁུ་བོ་སོགས་ལས་སྔགས་ཆོས་མང་པོ་དང༌། དབུ་མ་རྩ་འཇུག་གཉིས་སྤྱོད་འཇུག་དང་བཅས་པ་མཁས་པར་སྦྱངས། གཞོན་ནུའི་དུས་དེ་ཉིད་དུ་ཚོགས་པ་རྣམས་ལ་བཤད་པས། ངོ་མཚར་དུ་གྱུར། དེ་ནས་དབུས་གཙང་དུ་འབྱོན་པར་བཞེད་པ་ལ། རེ་ཞིག་བླ་མས་བཀས་མ་གནང་ཡང༌། ཡིད་ཀྱིས་ཡང་ཡང་གསོལ་བ་བཏབ་སྟེ། གཅིག་པུར་བྲོས་ནས་བྱོན། གུང་ཐང་དུ་དཔང་ལོ་ཆེན་པོ་དང་མཇལ། ས་སྐྱར་བྱོན་ཏེ། དེ་ལོ་འཆད་ཉན་རྐང་ཚུགས་པར་མི་འདུག་ནས། བྲག་རམ་དུ་བྱོན། ལོ་གཅིག་ཕར་ཚད་དབུ་གསུམ་ལ་སྦྱངས་པ་མཛད་པས་མཁས་པར་མཁྱེན། དེ་ནས་དབུས་ཀྱི་གུང་ཐང་དུ་བྱོན། ལོ་གཉིས་ཀྱི་རིང་སྦྱངས་པ་ཆེར་མཛད། གཞུང་ལུགས་ཐམས་ཅད་ལ་མཁྱེན་བརྒྱས། དགུང་ལོ་ཉེར་གཅིག་པ་ལ་དབུས་གཙང་གི་གྲྭ་ས་ཐམས་ཅད་དུ་གྲྭ་བསྐོར་མཛད། སྐུ་གཞོན་ནུ་གཞུང་ལུགས་ཐམས་ཅད་ལ་མཁྱེན་པ་རྒྱས་ཤིང༌། ཐུགས་གསལ་བ་དང༌། བརྗོད་པ་གཙང་བ་དང༌། རྩོད་པ་བཟང་བ་ལ་འགྲན་གྱི་དོ་མེད་དུ་གྲགས། འཚལ་པའི་དཔོན་དགའ་བདེས། ཕྱོགས་ལས་རྣམ་རྒྱལ་དུ་མཚན་གསོལ། འཚལ་གུང་ཐང་གི་ཟུར་ཆོས་ཀྱང་མཛད།
སླར་ཡང་བྲག་རམ་དུ་བྱོན་པ་ཞིག་ལ། ཇོ་ནང་དུ་ཀུན་མཁྱེན་ཆེན་པོ་དང་མཇལ་ནས། གཞན་སྟོང་གི་གྲུབ་མཐའ་ལ་ལུང་རིགས་ཀྱི་བརྟག་དཔྱད་བྱེད་དགོས་དགོངས་ཏེ་ཕེབས་པས། ཀུན་མཁྱེན་སྐུ་འབུམ་ལ་བསྐོར་བ་མཛད་པ་དང་མཇལ། འབེལ་གཏམ་མཛད་པར་ཞུས་པས་ཤིན་ཏུ་དགྱེས་ཏེ། བླ་བྲང་དུ་ཞག་བདུན་ཙམ་གྱི་རིང་ལ་འབེལ་གཏམ་ཤིན་ཏུ་འཕེལ་བར་མཛད་པས། གཞན་སྟོང་གི་གྲུབ་མཐའ་སངས་རྒྱས་ཐམས་ཅད་ཀྱི་དགོངས་པ། ཆོས་ཐམས་ཅད་ཀྱི་ཆོས་ཉིད་དུ་ངེས་པ་རྙེད། གཞན་སྟོང་གི་འགོག་བྱེད་ཀྱི་རྩོད་པ་རྣམས་ནི། རྣམ་པར་རྟོག་པའི་རི་མོ་ཙམ་ལས་དོན་ལ་མི་གནས་པར་མཁྱེན། ཀུན་མཁྱེན་ཆེན་པོ་ལ་མི་ཕྱེད་པའི་དད་པ་འཁྲུངས། དེ་སྐབས་ཆོས་འབྲེལ་ཅི་རིགས་པ་གསན་ནས་ཐེགས། སླར་དུས་ཀྱི་འཁོར་ལོ་རྒྱུད་སོགས་ཐུགས་ལ་བཟུང་ནས་ཇོ་ནང་དུ་ཕེབས། དུས་ཀྱི་འཁོར་ལོའི་དབང་ཞུས། ཟབ་ལམ་གྱི་འཁྲིད་བསྐྱངས་པས། ཉམས་རྟོགས་ཕུན་སུམ་ཚོགས་པར་འཁྲུངས། རྒྱུད་འགྲེལ་ལ་སྦྱངས་པས་ཚེགས་མེད་པར་མཁྱེན། ཀུན་མཁྱེན་ཆེན་པོ་ལ་དབང་དང་མདོ་སྔགས་ཀྱི་བཤད་པ་དཔག་ཏུ་མེད་པ་གསན། ལོ་མང་པོར་མཆོད་གཡོག་ཀྱང་མཛད། བུ་སྟོན་ཆེན་པོ་ལ་ཡང༌། ཕར་ཕྱིན་དང་མཚན་བརྗོད་གསན། ཤུག་ཕུག་ཏུ་བཤད་སྒྲུབ་ཀྱི་གྲྭ་ཆུང་དུ་སྐྱོང་ཞིང་ལོ་ཤས་བཞུགས། ངམ་རིང་གི་ཆོས་དཔོན་མཛད་ནས་ཕར་ཚད་ལ་བསྟན་བཅོས་ཀྱང་མང་དུ་མཛད། འཆད་ཉན་འཕེལ་བར་བཞུགས་སྐབས། ལོ་ཙཱ་བ་བློ་གྲོས་དཔལ་སྐུ་འདས་ནས། ཇོ་ནང་གི་གདན་ས་ལོ་དྲུག་མཛད། ངམ་རིང་གི་ཆོས་དཔོན་དང་ཇོ་ནང་གི་གདན་ས་ལྷན་ཅིག་ཏུ་བཞག་ནས། སེ་མཁར་ཆུང་དུ་གཙོ་བོར་ཐུགས་དམ་ལ་བཞུགས། དེ་ནས་ལོག་འགའ་ནས་ཀུན་མཁྱེན་ཆེན་པོ་གཤེགས། དེ་རྗེས་མི་
རིང་བར། འཚལ་གུང་ཐང་དང༌། ཡར་ཀླུངས་སོགས་དབུས་ཀྱི་ཕྱོགས་རྣམས་སུ་དུས་ཀྱི་འཁོར་ལོའི་ཆོས་རྒྱ་ཆེར་སྤེལ། ཕྱིས་སྐུ་ཚེའི་སྨད་ཀྱི་དུས་སུ། སླར་ཡང་ཇོ་མོ་ནང་གི་གདན་ས་མཛད། མངོན་མཁྱེན་ཐོགས་མེད་མངའ། གཙང་ནས་སེ་ཁར་ཆུང་དུ་ཕེབས་པ་ཞིག་ལ། ནམ་སྲོད་ཁྱེར་བ་ལ་མདོག་ཆུའི་འགྲམ་དུ་ཕེབས། འཁོར་གཡོག་རྣམས་ཀྱི་གནས་ཚད་དུ་བཞུགས་པར་ཞུས་པ་ལ། འཕྲལ་དུ་ཐེགས་པའི་ཞལ་ཏ་མཛད་དེ། དེ་འཕྲལ་ཀོ་བ་སོགས་གང་ཡང་མེད་པར་སྐུ་རྐྱང་ཆུའི་ཕ་ཁར་ཕེབས། དེ་རྗེས་འཁོར་གཡོག་རྣམས་ཀྱང་ནམ་ཕྱེད་དེ་ཁར་ཀོ་བ་ལ་རྟེན་ནས་ཡོངས་པས། ནམ་ལངས་མ་ཐེག་བལྟས་དུས། ཆུའི་ཕ་ཁ་ཐམས་ཅད་དམག་གིས་ཁེངས། དེ་འདྲ་བའི་ལོ་རྒྱུས་མང༌། དགུང་ལོ་བདུན་དུ་དོན་གསུམ་པ་ལ། ཐམས་ཅད་ཀྱི་སྐུ་དོག་ཆེ་ཟེར་ཞིང༌། སྐུ་ཁམས་བག་ཙམ་བསྙུང་བ་ལ། རིམ་གྲོ་མཛད་པར་ཞུས་པས། དེ་ཡང་རུང་སྟེ། ལོ་བརྒྱད་ཅུ་གྱ་གཅིག་གི་བར་བསྡད་པས་ཆོག་གསུང་བ་དང༌། བདུན་ཅུ་དོན་དགུ་པའི་གཞུག་ལ། སྐུ་ཁམས་ཤིན་ཏུ་བསྙེལ་བའི་སྐབས། ད་ལོ་མི་འཆི་བའི་རང་དབང་ཡོད་གསུང༌། བརྒྱད་ཅུ་པ་ལ་སྐུ་ཁམས་ཤིན་ཏུ་བཟང་བ་ལ། ད་ཀུན་སྐུ་ཁམས་བཟང་བར་གདའ། ལོ་ཤས་བློ་བདེ་ཞུས་པས། ད་ལོ་ཁམས་བཟང་སྟེ། ད་བཟོད་ངེས་པར་འགྲོ་དགོས་པ་ཡིན་གསུང༌། ཐམས་ཅད་ཐོགས་ཏུ་ཁེལ། དེ་སོགས་ཡོན་ཏན་དཔག་ཏུ་མེད་པ་མངའོ། །དེ་ལ་ཞལ་སློབ་འགྲོ་དོན་ཅན་ཤིན་ཏུ་མང་ཡང༌། ཉ་དབོན་ཀུན་དགའ་དཔལ་ནི། ཁམས་པའི་དགེ་བཤེས་ཉ་དར་མ་རིན་ཆེན་ཞེས་བྱ་བའི་དབོན་པོ་ཡིན། ཆུང་ངུ་ནས་མཁྱེན་རབ་ཤིན་ཏུ་ཆེ། ཆོས་རྗེ་ཀུན་མཁྱེན་ཆེན་པོ་དང་ཡང་ཡང་མཇལ། དགོངས་དོན་ཐུགས་སུ་ཆུད་ཅིང༌། མོས་གུས་
ཆེན་པོ་ཞིག་ཡིན་པ། དགུང་ལོ་ཉི་ཤུ་སྐོར་ལ། ཕྱག་ཞབས་གོང་སྟེ་འབྱོན་མ་ཐུབ། ཀླུ་གདོན་གྱི་རྟོག་པ་བྱུང༌། ཀུན་མཁྱེན་ཆེན་པོ་ས་སྐྱར་ཕེབས་པ་ཞིག་ལ། གྲོགས་ཀྱི་ཁུར་ནས་བྱིན་རླབས་ཞུ་རུ་བྱོན། བྱིན་རླབས་གནང༌། ལྗགས་བཏབ་ཙམ་གྱིས་བསྙུང་གཞི་ལས་འཕྲལ་དུ་གྲོལ། ཕྱིས་མདོ་སྔགས་ཀྱི་གཞུང་ཐམས་ཅད་ལ་མཁྱེན་པ་རྒྱས་ཤིང་རིག་པའི་དབང་ཕྱུག་ཆེན་པོར་གྱུར། རྗེ་ཕྱོགས་ལས་རྣམ་རྒྱལ་ཡུན་རིང་དུ་བསྟེན། ཉམས་རྟོགས་ཀྱང་མཐར་ཕྱིན་པ་བརྙེས། དུས་འཁོར་སོགས་མདོ་སྔགས་ཀྱི་ཆོས་མང་པོ་གསན། ས་སྐྱར་འཆད་ཉན་ཡུན་རིང་དུ་མཛད། སྐུ་ཚེའི་སྨད་ལ་བློ་གསལ་དྲུག་བརྒྱ་ཙམ་གྱིས་བསྐོར་ནས། རྩེ་ཆེན་གྱི་ཆོས་སྡེ་བཏབ། བཤད་སྒྲུབ་གཉིས་ཀ་ཤིན་ཏུ་འཕེལ་བར་མཛད་དོ། །གྲུབ་ཆེན་ཀུན་བློ་ནི། ཤར་ཁ་བའི་སྐུ་རུས་སུ་འཁྲུངས། ཕར་ཚད། མངོན་པ། འདུལ་བ། དབུ་མ་སོགས་མདོ་ཕྱོགས་རྣམས་དང༌། དཔལ་དུས་ཀྱི་འཁོར་ལོའི་བཤད་སྒྲུབ་རྣམས་ཉ་དབོན་ཆེན་པོ་ཁོ་ན་ལ་གསན། གཞན་བླ་མ་དམ་པ་མང་དུ་བསྟེན་ཅིང༌། དབང་གདམས་ངག་མཐའ་ཡས་པ་ལ་མངའ་བརྙེས། རྒྱལ་པོའི་རིགས་སུ་འཁྲུངས་ཀྱང་སྲིད་ལ་མ་ཆགས་པས། སྤ་གྲོ་ལ་སོགས་པ་ཡུལ་ཐེག་རིང་པོ་དང༌། བས་མཐའ་རྣམས་སུ་སྒྲུབ་པ་ཁོ་ན་ལ་ཐུགས་གཞོལ། རང་གི་དཔོན་རིགས་རྩེ་ཤར་ནུབ་གཉིས་ཀྱི་འཁྲུག་པར་དུས་མི་བདེ་བ་ལ། ཕན་བདེའི་བཀས་ཁྱད་པར་མཛད། སྐུ་ཚེའི་སྨད་ལ་འཁྲུལ་ཞིག་ཆེན་པོར་བཞུགས་ཤིང༌། བུ་སྟོན་ཆེན་པོའི་སྐྱེ་བ་ཡིན་པར་གྲགས་སོ། །འཇམ་དབྱངས་དཀོན་མཆོག་བཟང་པོ་ནི། འཁྲུངས་ས་ལ་སྟོད་བྱང་པ། རྩ་བའི་གྲྭ་ས་བཟང་ལྡན་ཡིན། ས་སྐྱ་སོགས་གྲྭ་ས་གྲགས་ཆེ་བ་ཕལ་ཆེར་དུ་བྱོན། མཁན་ཆེན་འཇམ་དབྱངས་
རིན་རྒྱལ་པ་ལས་ས་སྐྱ་པའི་ཆོས་རྣམས་གསན། གྲུབ་ཆེན་ཀུན་དགའ་བློ་གྲོས་ལ་དུས་ཀྱི་འཁོར་ལོ་སོགས་ཟབ་དོན་མཐའ་དག་གསན། སི་ཏུ་རབ་བརྟན་ཀུན་བཟང་འཕགས་ཀྱི་བླ་མར་བཀུར། ཉང་སྟོད་ཀྱི་ཆོས་སྡེ་གསར་བའི་ཆོས་དཔོན་མཛད། ཇོ་ནང་པའི་གྲྭ་ཚང་གསར་དུ་བཙུགས། ཕྱིས་རྩེ་ཤར་ནུབ་གཉིས་ཀར་གྱིས་གུས་པས་བཏུད། ཆོས་སྡེ་གཉིས་ཆར་དང་ཇོ་ནང་གི་གདན་ས་ཡང་མཛད། གྲུབ་མཐའི་ཆགས་སྡང་ལས། མཁས་གྲུབ་དགེ་ལེགས་དཔལ་བཟང་དཔོན་སློབ་ཀྱིས་བྱད་ཁ་བྱས་པ་ཡང་བདག་གཞན་བརྗེ་བའི་བྱང་ཆུབ་ཀྱི་སེམས་དང༌། རྡོ་རྗེའི་བཟླས་པ་སྤེལ་བས། བྱད་ཁ་ཕྱིར་ལོག་སྟེ། མཁས་གྲུབ་དགེ་ལེགས་དཔོན་སློབ་རྣམས་མི་རིང་བར་གྲོངས། ལྷ་ཆེན་བཟང་ར་དམ་ལ་བཏགས། དེ་སོགས་ཡ་མཚན་བའི་ལོ་རྒྱུས་མང༌། བླ་མ་ས་སྐྱ་བ་ཆེན་པོའི་སྤྲུལ་པ་གྲགས་སོ། །མཁས་གྲུབ་ནམ་མཁའ་ཆོས་སྐྱོང་ནི། རབ་བྱུང་བསྙེན་རྫོགས་མཛད་ས་དང༌། རྩ་བའི་གྲྭ་ས་གྲྭ་ཚང་ཆེན་མོ་ཡིན། ཀུན་མཁྱེན་ནམ་བསོད་ཆེན་མོ་ལ་མཚན་ཉིད་ཀྱི་གཞུང་རྣམས་མཁས་པར་སྦྱངས། སླར་འཇམ་དབྱངས་དཀོན་མཆོག་བཟང་པོའི་ཆོས་གྲྭར་བྱོན། ཆོས་དང་གང་ཟག་ཐམས་ཅད་ལ་དད་མོས་འཁྲུངས། མཚན་ཉིད་ཀྱི་གཞུང་རྣམས་ལ་མཁས་ཉན་མཛད། གཞན་སྟོང་གི་གྲུབ་མཐའ་རྣམས་ལ་ངེས་པ་གཏིང་ནས་ཚུགས། སྦྱོར་བ་ཡན་ལག་དྲུག་པ་ཞུས་ཏེ་ཉམས་རྟོགས་ཀྱང་ཤིན་ཏུ་བཟང༌། དུས་ཀྱི་འཁོར་ལོའི་རྒྱུད་གཞུང་ལ་ཡང་མཁས་པར་སྦྱངས། ངམ་རིང་འཚལ་གུང་སོགས་འཆད་ཉན་ཆང་ཆུང་འགའ་རེའི་སར་ཕེབས། རྩེ་ཤར་ནུབ་གཉིས་དང༌། ཁྱད་པར་སེང་གེ་རྩེ་བས་ཡོན་བདག་གི་མཐིལ་བྱས། རྩེ་ཆེན་དང་ཇོ་ནང་གི་གདན་ས་ཡུན་རིང་དུ་མཛད། བཤད་སྒྲུབ་ཀྱི་བསྟན་པ་གཉིས་ཀར་བཟུང༌།
སྐུ་འབུམ་ཆེན་མོའི་ཆོས་འཁོར་བཅུ་གསུམ་གསེར་ཟངས་ཀྱི་གཡོག་པར་མཛད་དོ། །པཎ་ཆེན་ནམ་མཁའ་དཔལ་བཟང་ནི། གྲུབ་མཐའ་རྩ་བ་ས་སྐྱ་བ་ཡིན། མུས་པ་རབ་འབྱམས་པ་ཐུགས་རྗེ་དཔལ་བཟང་གི་གྲྭ་སར་སློབ་གཉེར་མཛད། བརྒྱ་སྡེར་འཆད་ཉན་ཡང་ལོ་ཤས་ཚུགས་པ་བྱུང༌། བདག་ཆེན་རྣམ་རྒྱལ་གྲགས་པའི་སློབ་མ་ཤངས་སྟོན་པ་བྱ་བ་ལ། ལྷུན་སྡིངས་སུ་དུས་འཁོར་བྱང་ལུགས་དེ་ཤིན་ཏུ་མཁས་པར་སྦྱངས། རྒྱལ་བ་ནམ་མཁའི་མཚན་ཅན་ལ་སྦྱོར་དྲུག་གི་མན་ངག་ཇོ་ནང་བའི་རང་ལུགས་འདི་སྔ་དུས་ཅིག་གསན་པས་ཉམས་རྟོགས་བཟང་པོར་འཁྲུངས་པ་ཡིན། འབྲས་སྤུང་གི་དགོན་པ་བཏབ་ནས་འགྲོ་དོན་ཅུང་ཟད་མཛད་དོ། །དེ་ལ་ལོ་ཆེན་རཏྣ་བྷ་དྲས་ཞུས། དེ་ལ་རྗེ་བཙུན་གྲོལ་མཆོག་གིས་གསན། དེ་ལ་མཁན་ཆེན་ལུང་རིགས་རྒྱ་མཚོས་གསན། དེའི་དྲུང་དུ་དངོས་ཀྱིས་ཐོབ་སྟེ། འདི་མན་ངག་ཁོ་ནའི་བརྒྱུད་པ་ཡིན་ནའང༌། ཉམས་རྟོགས་ཀྱི་རྒྱུན་མ་ཆད་པ་ཡིན་པས་རྩིས་སུ་བྱས་ལ། ཡང་དབང་རྒྱུད་མན་ངག་གསུམ་ཀར་བཀའ་ཅིག་པའི་དབང་དུ་བྱས་ན། འཇམ་དབྱངས་དཀོན་མཆོག་བཟང་པོ་ལ། འཇམ་དབྱངས་ཆོས་དབང་གིས་གསན་ཏེ། མཁས་པ་དེ་ནི། སྤྱིར་མདོ་སྔགས་ཀྱི་གཞུང་ལུགས་ཐམས་ཅད་ལ་མཁས་ཤིང༌། ཁྱད་པར་ཕར་ཕྱིན་ཇོ་ནང་ཀུན་མཁྱེན་ཆེན་པོའི་རང་ལུགས་ཐུན་མོང་མ་ཡིན་པ་འདི་དང༌། དུས་ཀྱི་འཁོར་ལོ་ལ་ཤིན་ཏུ་མཁས། སྦྱོར་དྲུག་ལ་ཉམས་རྟོགས་བཟང་པོ་མངའ། གུར་གྱི་མགོན་པོ་ཞལ་གཟིགས། བཟང་ར་སོགས་འཇིག་རྟེན་གྱི་ལྷ་འདྲེ་དྲེགས་པ་མང་པོས་ཞབས་ལ་བཏུད། དང་པོར་ཁང་གསར་གི་འཆད་ཉན་མཛད་ཅིང༌། ཕྱིས་ཆོས་སྡེ་ཆེན་པོའི་གདན་ས་ཡུན་རིང་དུ་མཛད་དོ། །དེ་ལ་དབོན་ཆེན་ཆོས་སེང་གེ་གི་ཞུས། དེ་ལ་མཁས་གྲུབ་སངས་རྒྱས་ཡེ་ཤེས་ཀྱི་ཞུས། དེ་ལ་མཁས་གྲུབ་
བྱམས་པ་ལྷུན་གྲུབ་ཀྱིས་གསན། དངོས་ཀྱིས་མཁས་གྲུབ་སངས་རྒྱས་ཡེ་ཤེས་ལ་རས་བྲིས་ཀྱི་དཀྱིལ་འཁོར་དུ་དབང་ཙམ་མནོས། བྱམས་པའི་མཚན་ཅན་ལ། རྡུལ་ཚོན་གྱི་དཀྱིལ་འཁོར་ལ་རྟེན་དབང་ཡོངས་སུ་རྫོགས་པ་དང༌། རིམ་པ་གཉིས་ཀྱི་བཤད་པ་རྒྱུད་འགྲེལ་དང་བཅས་པ་ཐོབ་བོ། །ཡང་འཇམ་དབྱངས་དཀོན་མཆོག་བཟང་པོ། འཇམ་དབྱངས་ཆོས་དབང༌། མཁན་ཆེན་ཀུན་དགའ་དཔལ་འབྱོར། མཁན་ཆེན་དཀོན་མཆོག་རིན་ཆེན་རྣམས་བརྒྱུད་ནས། མཁན་ཆེན་ལུང་རིགས་རྒྱ་མཚོའི་དྲུང་དུ། མངོན་རྟོགས་དཔག་བསམ་ལྗོན་ཤིང་དང༌། དཀྱིལ་ཆོག་ཡེ་ཤེས་རྒྱ་མཚོ་ཀླགས་ཆོག་གི་སྟེང་ནས་དབང་རྫོགས་པར་ཞུས། གཞན་ཡང་སྦྱོར་དྲུག་གི་ལུང་སོགས་ཐན་ཐུན་ཞུས་པའི་བླ་མ་འགའ་རེ་ཡོད་དེ། བརྒྱུད་པ་དེ་རྣམས་ནི་ཇོ་ནང་བའི་ལུགས་ཡིན་ལ། བུ་སྟོན་རིན་པོ་ཆེའི་ལུགས་ཀྱི་དབང་རྣམས་ཡོངས་སུ་རྫོགས་པར། རྡོ་རྗེ་སློབ་དཔོན་ཆེན་པོ་དཔལ་ལྡན་ཆོས་བཟང་ལ་མནོས་ཤིང༌། ཡན་ལག་དྲུག་པའི་གདམས་པ་གྲུབ་ཐོབ་ཞི་བ་སྦས་པའི་ལུགས་དང༌། རྣལ་འབྱོར་མ་རིགས་བརྒྱའི་དཀྱིལ་འཁོར་གྱི་དབང་དང༌། ལྷ་ཉི་རྩ་ལྔའི་དཀྱིལ་འཁོར་གྱི་དབང་རྣམས། སློབ་དཔོན་པུརྞ་བཛྲ་ལས་ཀྱང་ཐོབ་བོ། །ཞེས་པ་དཔལ་དུས་ཀྱི་འཁོར་ལོའི་ཆོས་སྐོར་གྱི་བྱུང་ཁུངས་ཉེར་མཁོ་བསྡུས་པ་འདི་ཡང༌། རྒྱལ་ཁམས་པ་ཏཱ་ར་ནཱ་ཐས་ཆོས་ལུང་བྱང་རྩེར་སྦྱར་བའོ། །དགེ་ལེགས་འཕེལ། །
ཤོག་སྟོང་