དཔལ་དུས་ཀྱི་འཁོར་ལོའི་སྒྲུབ་པའི་ཐབས་བསྐྱེད་པའི་རིམ་པ་རྣམ་པར་བཤད་པ་དངོས་གྲུབ་ཉེར་འཚོ།
དཔལ་དུས་ཀྱི་འཁོར་ལོའི་སྒྲུབ་པའི་ཐབས་བསྐྱེད་པའི་རིམ་པ་རྣམ་པར་བཤད་པ་དངོས་གྲུབ་ཉེར་འཚོ་ཞེས་བྱ་བ་བཞུགས།
ཨོཾ་སྭཱསྟི། གུ་རུ་བུདྡྷཱ་བོ་དྷི་སཏྭེ་བྷྱོ་ན་མོ་ན་མཿ དཔལ་དུས་ཀྱི་འཁོར་ལོའི་སྒྲུབ་པའི་ཐབས་བསྐྱེད་པའི་རིམ་པ་རྣམ་པར་བཤད་པ་དངོས་གྲུབ་ཉེར་འཚོ་ཞེས་བྱ་བ། དཔལ་ལྡན་བླ་མ་དམ་པ་རྣམས་དང་དབྱེར་མ་མཆིས་པ་སྐུ་བཞིའི་བདག་ཉིད་དང་པོའི་སངས་རྒྱས་དུས་ཀྱི་འཁོར་ལོ་ལ་ཕྱག་འཚལ་ལོ། །གང་གསུང་བདུད་རྩིའི་ཆ་ཤས་ཙམ། །རྣ་བའི་བུམ་པར་ལྷུང་བས་ ཀྱང༌། །སྲིད་གསུམ་མཆོག་ཏུ་བདེ་བའི་སར། །འགོད་མཛད་རྩ་བའི་བླ་མར་འདུད། །མཐའ་དག་བདེ་བར་གཤེགས་ཀུན་འདུས་པ་དུས་འཁོར་ལོ། །རྩོད་དུས་འགྲོ་ལ་མཁས་བཙུན་བཟང་པོའི་བཤེས་གཉེན་ཚུལ། །སྟོན་མཛད་སྲིད་གསུམ་འདི་ན་དོལ་པོ་པ་ཞེས་གྲགས། །ཀུན་མཁྱེན་ཤེས་རབ་རྒྱལ་མཚན་དེ་ལ་སྤྱི་བོས་འདུད། གང་ཞིག་
མཆོག་ཏུ་མི་འགྱུར་ལྷན་སྐྱེས་ལང་ཚོ་རྒྱས་པའི་སྐུ། །རྣམ་པ་ཀུན་ལྡན་འཁོར་ལོའི་དབང་མོར་གདོད་ནས་རྟག་པར་རོལ། །ཀུན་ཁྱབ་སྲིད་པའི་བདག་པོ་དུས་ཀྱི་འཁོར་ལོ་རྡོ་རྗེ་སེམས། །འཁོར་དང་མྱ་ངན་འདས་པའི་དཔལ་གྱུར་དེ་ལ་ཕྱག་འཚལ་ལོ། །ཐུགས་རྗེས་གདུལ་དཀའ་འདུལ་མཛད་འཇིགས་བྱེད་ཧེ་རུ་ཀ་དཔལ་ནི། །རྡོ་རྗེའི་མཁའ་འགྲོ་མ་ཚོགས་དང་བཅས་ཁྲོ་བོའི་རྒྱལ་རྣམས་ལ། །ཡང་དག་བཏུད་ནས་དེ་རྗེས་དཀྱིལ་འཁོར་འཁོར་ལོ་ཐམས་ཅད་ལའང༌། །སྤྱི་བོས་འདུད་དོ་སྲིད་འདིར་བགེགས་རྣམས་ཞི་ཞིང་དགེ་ལེགས་མཛོད། །ཟླ་བ་བཟང་ལ་ཤཱཀྱ་སེངྒེས་གསུངས་དོན་འཇམ་དཔལ་གྱིས་ནི་དྲང་སྲོང་ཚོགས་རྣམས་ལའོ། །མཐའ་དག་གྲོལ་བའི་རྒྱུར་གསུངས་འཇིག་རྟེན་མགོན་པོས་དེ་དོན་གསལ་བྱེད་རྒྱས་འགྲེལ་རྒྱ་མཚོ་ལས། །ཐིགས་པའི་ཚུལ་དུ་ཅུང་ཟད་བླངས་ནས་དག་པའི་རྣལ་འབྱོར་ཆ་ཙམ་ཡི་གེའི་ལམ་དུ་བྱ། །མཁས་དང་མཁས་མིན་མང་པོས་ཡང་ཡང་བཤད་མོད་གཞན་གྱིས་བསྐུལ་དང་རང་སེམས་དག་ཕྱིར་ཡིན། །དེ་
བས་དེ་རིང་འདི་འདྲ་སྦྱོར་བ་ལ། །བདེན་དང་བླཽ་གྲོས་ལྡན་རྣམས་བཟོད་པར་མཛོད། །གང་ལ་སྐྱོན་སྤངས་ཡོན་ཏན་ཀུན་ལྡན་ཚིག །རྒྱ་ཆེར་སྟོན་དེ་འཕགས་མཆོག་ཁོ་ནས་ཡིན། །བདག་ཉིད་ཀྱིས་ནི་ཇི་ལྟར་གོ །དེ་ལྟར་གཞན་ལ་སྟོན་མོད་ཀྱི། །ཕྱོགས་འཛིན་ཕྲག་དོག་འགྲན་སེམས་དང༌། །གཡོ་སྒྱུ་མེད་ཕྱིར་ཡིད་རབ་བདེ། །དེ་ཡང་སྲིད་ཞི་ཀུན་ལ་ཁྱབ་པའི་ཡེ་ཤེས་ཆོས་ཀྱི་དབྱིངས་ཁྱབ་པ་དང་རྟག་པའི་སྐུ་ཅན་བདེ་བར་གཤེགས་པའི་སྙིང་པོའི་རང་གཟུགས་ནི། ཕྱོགས་བཅུ་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་མ་ལུས་པ་ཟུང་འཇུག་རོ་མཉམ་དུ་བཞུགས་པའི་བདག་ཉིད་དཔལ་དུས་ཀྱི་འཁོར་ལོ་རྡོ་རྗེ་སེམས་དཔའ་རིས་མེད་པ་ཉིད་དོ། །དེ་ཉིད་ཀྱི་རང་བཞིན་ཆོས་ཐམས་ཅད་ཀྱི་སྲོག་དང་མགོན་དང་དྭངས་མ་དང་བཅུད་དང་སྙིང་སྟོབས་དང་གནས་དང་གཞི་དང་རྟེན་གྱི་ཚུལ་དུ་གདོད་ནས་རྟག་ཏུ་བཞུགས་པ་ཡིན་ལ། སེམས་ཅན་རྣམས་ཀྱི་བདེ་བ་དམ་པའི་རྒྱུར་བརྟན་གཡོ་ཐམས་ཅད་ཀྱི་རྣམ་པས་འགྲོ་བའི་དོན་སྤྱོད་པའང་ཡིན་མོད་ཀྱི། དེ་དག་སོ་སོའི་གནས་སྐབས་དང་ཁྱད་པར་ལ་བལྟོས་ནས་འགྲོ་བ་རྣམས་ཀྱི་སྡུག་བསྔལ་སེལ་བ་པོ་དང༌། བདེ་བ་སྐྱེད་པ་པོ་རྣམས་དང་སྣ་ཚོགས་པའི་རིག་པ་དང༌། གྲུབ་པའི་མཐའ་དུ་མ་སྟོན་པ་པོ་དང༌། སྐྱེ་བོ་རྣམས་ཀྱི་ལས་དང་བྱ་བ་དང༌། ལམ་སྟོན་པ་པོ་མཐའ་ཡས་པ་བྱུང་བ་དག་ཀྱང་གདོད་མའི་མགོན་པོ་དེ་ཉིད་ཀྱི་རྣམ་འགྱུར་དུ་གསལ་བར་བསྔགས་ཏེ། དེ་སྐད་དུ་ཡང་རྒྱུད་ཀྱི་རྒྱལ་པོ་ལས། ཐིག་ལེ་ནུས་མ་མིག་སྨན་དག་དང་མཁའ་ལྡིང་ལྷ་ཡི་ཆུ་བོ་མེ་སྦྱིན་དང་ནི་འདོད་འཇོ་དང༌། །རྫོང་དང་གློག་དང་རིག་པ་བཟང་པོ་འགྱུར་མེད་མཆོག་གི་ཆ་དང་ལྷ་ཡི་སྐད་དང་ལུས་མེད་ཏེ། །ཡང་དག་རྒྱུ་བའི་གཟུགས་འདི་རྣམས་ཀྱིས་ས་ལ་འཇུག་པར་འགྱུར་རོ་རྒྱལ་བ་ཡི་ནི་ཡེ་ཤེས་སྐུ། །བྱུང་བར་
གྱུར་དང་བྱུང་དང་འབྱུང་འགྱུར་རིག་བྱེད་རྟོག་གེ་ལ་སོགས་བསྟན་བཅོས་མཐའ་དག་རབ་ཏུ་སྨྲ། །ཞེས་གསུངས་ཤིང༌། ཕལ་པོ་ཆེ་དང་དཀོན་མཆོག་ཏ་ལ་སོགས་མདོ་སྡེ་དུ་མ་ཞིག་ལས་ཀྱང་རྣམ་པ་འདི་ལྟ་བུ་མང་དུ་གསུངས་སོ། །དེ་ལྟ་བས་ན་ནང་པ་སངས་རྒྱས་པའི་གྲུབ་མཐའ་བཞི་ལ་སོགས་པ་ལྟ་ཅི་སྨོས། ཕྱི་རོལ་ཀྱི་གཞུང་ལུགས་ཐ་དད་པ་དང༌། བཟོའི་གནས་ལ་སོགས་པ་རིག་པའི་འཇུག་སྒོ་མ་ལུས་པའང་སངས་རྒྱས་བཅོམ་ལྡན་འདས་ཉིད་ཀྱི་ཡེ་ཤེས་ལས་བྱུང་བའི་འཕྲིན་ལས་ཀྱི་རྣམ་འགྱུར་ཙམ་དུ་ནི་རིག་པར་བྱ་ལ། དེའི་ཕྱིར་འཕགས་པའི་ཡུལ་དང་གངས་རིའི་ཁྲོད་འདིར་བྱུང་བའི་མཁས་པར་འདོད་པ་མང་པོ་ཞིག་རང་ཉིད་དུལ་བར་རློམ་ཞིང་ཁས་ལེན་ལ་གཞན་གྱི་ལྟ་བ་དང་རིག་པ་དང་སྤྱོད་ཚུལ་དང་ངང་ཚུལ་ལ་སྡང་སྨྲས་འབའ་ཞིག་གིས་མི་ཚེ་རིལ་པོ་དུས་འདའ་བར་བྱེད་པ་ནི་ཤིན་ཏུ་མི་མཁས་ཤིང་དམ་པའི་སྤྱོད་ཚུལ་བཏང་བར་གསལ་ལོ། །འོན་ཀྱང་རྒྱལ་བའི་བསྟན་པ་ཡང་བཟང་ཞིང༌། དེ་ལས་ཕྱི་རོལ་ཏུ་གྱུར་པ་དག་ཀྱང་དེ་དང་འདྲ་བར་བཟང་ངོ་སྙམ་དུ་སེམས་སུ་རུང་བ་ལྟ་ག་ལ་ཞིག་སྟེ། དེ་བཞིན་གཤེགས་པའི་འཕྲིན་ལས་གང་ལ་གང་འདུལ་དུ་འཇུག་པ་ཡིན་པས་ལོག་པར་མོས་ཤིང་རྣམ་པར་གྲོལ་བའི་སྐལ་བ་མེད་པ་དག་ལ་ཡང་དག་པའི་ལམ་དངོས་སུ་སྟོན་པར་མི་འགྱུར་བར་རྣམ་པ་གཞན་དང་ཚུལ་གཞན་གྱིས་འཇིག་རྟེན་པའི་ལམ་ཙམ་ཞིག་སྟོན་པ་ཡིན་ཏེ། དཔེར་ན། འཁོར་ལོས་བསྒྱུར་བའི་རྒྱལ་པོས། ས་སྟེང་གི་སྐྱེ་འགྲོ་ཐམས་ཅད་ལ་བྱ་དགའ་དང༌། ཁ་ཟས་ཀྱི་ཁྱད་པར་མཐའ་ཡས་པ་དག་སྩོལ་བར་མཛད་པ་ན། ཁྱི་དང་ཕག་ལ་སོགས་པ་དག་ལ་ནི་རིན་པོ་ཆེ་དང༌། ལྷ་རྫས་ཀྱི་གོས་དང༌། \ང་པོ་ལ་སོགས་པའི་ཐེག་པ་དང་ཁ་ཟས་རོ་བརྒྱ་བ་དག་གིས་ཅི་ཞིག་བྱ། གཞན་དུ་ན་ལྷག་མའི་ཟས་དང་
སྨད་པའི་དངོས་པོ་དག་གིས་ཚིམ་པར་བྱེད་དེ། རང་ཉིད་མངོན་སུམ་དུ་དེ་དག་ལ་ལག་བདར་ཏེ་སྟེར་བར་ཡང་མི་བྱེད་དོ། །དེ་ལྟར་འདིར་ཡང་དེ་བཞིན་གཤེགས་པས་འགྲོ་བ་ཐམས་ཅད་ཀྱི་དོན་མཛད་པ་ན། བྱང་ཆུབ་རྣམ་པ་གསུམ་གྱི་སྐལ་བ་དང་ལྡན་པ་རྣམས་དེ་དང་དེ་ལ་འགོད་ཅིང༌། མཐོ་རིས་ཀྱི་སྐལ་བ་ཅན་ལ་འཇིག་རྟེན་པའི་ལམ་སྟོན་ལ། དེའི་སྐལ་བའང་མེད་ན་ངན་འགྲོའི་གནས་ཉིད་དུ་བདེ་བ་ཕྲ་མོ་དང༌། སྡུག་བསྔལ་ཆུང་ངུར་སྒྱུར་བ་དང་ཆེར་མི་སྐྱེད་པའི་ཐབས་ཙམ་ཡང་འབྱུང་བར་འགྱུར་རོ། །དེས་ན་མུ་སྟེགས་བྱེད་ལ་སོགས་པ་རྣམས་ཀྱི་རྟག་པ་དང་ཆད་པའི་མཐའ་སྟོན་པའི་གཞུང་ལུགས་དེ་དག་ཀྱང་ཤིན་ཏུ་རྨོངས་པའི་གང་ཟག་ལ་བློ་གྲོས་ཀྱི་འཇུག་པ་གསར་དུ་སྐྱེ་བའི་རྒྱུ་ཡིན་པས། གནས་སྐབས་ཀྱི་བདེ་བ་ཕྲ་མོ་ཡང་སྐྱེད་ལ། བློ་གྲོས་ཤིན་ཏུ་བྱང་བའི་ཚེ་ཡང་དག་པའི་ལམ་དང་སྤྱོད་པ་ལའང་འཇུག་པར་འགྱུར་བའི་སྐབས་ཡོད་པས། རྒྱལ་བའི་འཕྲིན་ལས་ཀྱི་འཇུག་པ་ནི་ཡིན་ཞིང༌། ཐར་པའི་ལམ་གྱི་སྐལ་བ་མེད་པའི་ཕྱིར་རྒྱལ་བས་དེ་དག་ལ་ཐར་ལམ་བསྟན་པ་ཡང་མ་ཡིན་ལ། སྐྱོན་ཀུན་སྤངས། ཡོན་ཏན་ཀུན་རྫོགས། སངས་རྒྱས་ཉིད་ཅེས་འཇིག་རྟེན་དུ་གྲགས་པའི་སྐུའི་རྣམ་པས་ཀྱང་དེ་རྣམས་ལ་དངོས་སུ་གསུང་བར་མི་མཛད་དེ། ལྷ་དང་དྲང་སྲོང་དང་དཀའ་ཐུབ་པ་དང་རྟོག་གེ་བ་དག་ལ་བྱིན་གྱིས་བརླབས་པའམ། དེ་དག་གི་གཟུགས་སུ་སྤྲུལ་ནས་སྟོན་པར་མཛད་དོ། །དེ་ལྟར་ཡང་རྒྱུད་ལས། རིག་བྱེད་མཐའ་ལས་གསང་བ་འདི་དག་ཚངས་པ་ཡིས་ནི་རྣལ་འབྱོར་པ་རྣམས་དག་ལ་མངོན་བརྗོད་ཀྱང༌། །དུས་ཀྱིས་ཤེས་པ་རབ་ཉམས་ཐུབ་པ་རྣམས་ཀྱིས་འདིར་ནི་སྲོག་ཆགས་རྣམས་ལ་གསོད་པ་དག་ཀྱང་བསྟན། །མི་རྣམས་མཐོ་རིས་དོན་དུ་དེ་ལ་རབ་ཏུ་འཇུག་སྟེ་དམྱལ་བ་དར་པའི་འབྲས་བུ་སྟེར་བར་འགྱུར། །སོལ་བ་འོ་མའི་རྒྱུན་གྱིས་མངོན་པར་བཀྲུས་པ་འདིར་
ནི་ཟླ་བའི་མདོག་ཏུ་འགར་ཡང་འགྱུར་མ་ཡིན། །ཞེས་རིག་བྱེད་ལ་སོགས་པའི་གཞུང་འགའ་ཞིག་སྦས་པའི་དོན་མ་འཁྲུལ་པ་ཡོད་ཀྱང་སྐལ་བ་དང་མི་ལྡན་པའི་ངོར་ཆེས་ཤིན་ཏུ་གབ་པ་ཐལ་ཆེས་ཏེ། ཚིག་དོན་དངོས་བསྟན་ལ་གྲོལ་བའི་ལམ་ཏེ་གསལ་བར་མ་བསྟན་པ་ལྟ་ཅི་སྨོས། ལོག་པའི་ལམ་དུ་མ་སྟོན་པ་ལྟར་ཡང་བྱུང་བ་སྐལ་མེད་རྣམས་ཀྱིས་མ་ཤེས་ཏེ། གཞུང་དེ་ལ་ཡིད་བརྟན་འཆའ་བའི་རྗེས་འཇུག་རྣམས་ཕྱིན་ཅི་ལོག་ལ་ཞུགས་པ་ཡིན་ཞེས་ཀྱང་གསུངས་ལ། དེས་ན་ནང་ལེ་ལས། ཡན་ལག་དང་བཅས་རིག་བྱེད་དྲན་པའི་གཞུང་དང་བཅས་དང་རྟོག་གེ་གྲུབ་པའི་མཐར་ལྡན་འཇིག་རྟེན་དུ། །སྙན་ངག་མཁན་པོ་རྒྱས་པ་མེ་ལ་སོགས་པ་རྣམས་ཀྱིས་བྱས་པའི་བསྟན་བཅོས་གཞན་ཡང་རིག་པ་མིན། །རིག་པ་ཞེས་པ་ནང་རིག་འགྱུར་མེད་ཀྱང་སྟེ་འཇིག་རྟེན་འདིར་ནི་ཐུབ་པ་རྣམས་ཀྱིས་རབ་གསུངས་ཉིད། །ཅེས་གསུངས་པ་ལྟར། དངོས་སུ་ན་སངས་རྒྱས་ཀྱིས་བསྟན་པ་ཁོ་ན་ཐར་བའི་ལམ་སྟོན་པ་ཡིན་གྱི། གྲོལ་བའི་ཐབས་སྟོན་པ་གཞན་མེད་ལ། དེ་ཡང་ཐེག་པ་གསུམ་གྱི་ལམ་ཞེས་བརྗོད་མོད་ཀྱི། ཉན་ཐོས་དང་རང་སངས་རྒྱས་ཀྱི་ཐེག་པ་ནི། མྱ་ངན་ལས་འདས་པའི་ལམ་དང་འབྲས་བུ་ཡོངས་སུ་རྫོགས་པ་མ་ཡིན་ཏེ། དངོས་སུ་ལམ་གྱི་ཆ་ཤས་དུམ་བུ་ཉེ་ཚེ་ཙམ་བསྟན་པ་དང༌། འབྲས་བུ་ཐར་བའི་ཆ་ཤས་ཙམ་ཐོབ་པ་ཡིན་པ་དང༌། མཐར་ཐུག་ཐེག་པ་ཆེན་པོ་ལ་གཞོལ་དགོས་པའི་ཕྱིར་རང་སྐྱ་མ་ཐུབ་པས། དགོས་པའི་དབང་གིས་ཐེག་པ་གསུམ་དུ་གསུངས་ཀྱང་གཉིས་པོ་ཐེག་པ་ཆེན་པོའི་ལམ་དུ་འདུས་པའི་ཕྱིར་ཤིན་ཏུ་ཆེས་ཐ་དད་པའི་རིམ་པ་གསུམ་ཡོད་པ་མ་ཡིན་ནོ། །ཐེག་པ་ཆེན་པོ་དེ་ལ་ཡང་འབྲས་བུ་མཐར་ཐུག་བགྲོད་བྱེད་ཀྱི་ལམ་རྫོགས་པར་མི་འབྱུང་བ་ཕ་རོལ་ཏུ་ཕྱིན་པའི་ཐེག་པ་དང༌། མཐར་ཐུག་བགྲོད་བྱེད་ཀྱི་ལམ་རྫོགས་པ་སྔགས་
ཀྱི་ཐེག་པ་གཉིས་ཞེས་འབྱུང་བའང༌། ཕ་རོལ་ཏུ་ཕྱིན་པའི་ལམ་དང་འབྲས་བུའི་རྣམ་པ་ཐམས་ཅད་སྔགས་ཀྱི་ཐེག་པར་འཆད་ལ། རྡོ་རྗེ་ཐེག་པའི་ཐུན་མོང་མ་ཡིན་པའི་ཁྱད་ཆོས་རྣམས་ནི་དེ་ལ་མེད་པའི་ལྷག་པོ་ཡིན་ཞིང༌། དོད་ཐུབ་ཀྱང་བཞག་ཏུ་མེད་པས་དོན་གྱི་སྒོ་ནས་ཐེག་པ་ཆེན་པོ་མདོ་སྡེའི་ཚུལ་ཡང་སྔགས་ཀྱི་ཚུལ་དུ་འདུས་སོ། །དེ་ལ་འདིར་ནི་ཐེག་པ་ཆེན་པོ་གསང་སྔགས་ཀྱི་ནང་ནས་རྒྱུད་ཐམས་ཅད་ཀྱི་ཡང་རྩེར་གྱུར་པ། དཔལ་ལྡན་དུས་ཀྱི་འཁོར་ལོ་སྟེ། དེ་ཡང་རྒྱུད་ཀྱི་རྒྱལ་པོའི་ཡེ་ཤེས་ལེའུ་ལས། ཤེས་རབ་རྒྱུད་ནི་ཤར་ནས་སླར་ཡང་རྣལ་འབྱོར་རྗེས་སུ་རིག་པ་ཉིད་ནི་ནུབ་ཀྱི་ཞལ་ལས་སོ། །གཡས་ཀྱི་ཞལ་ནས་རྒྱལ་བའི་བདག་པོས་རྣལ་འབྱོར་རྒྱུད་གསུངས་གཡོན་གྱི་ཞལ་ནས་བྱ་བ་ལ་སོགས་སོ། །ཞེས་གསུངས་པ་སོགས་ཁོངས་ནས། སྤྱོད་པའི་རྒྱུད་དང་རྟོག་པའི་རྒྱུད་ལ་སོགས་པ་བསྡུས་པ་ཡིན་ལ། རྣལ་འབྱོར་རྗེས་སུ་རིག་པ་ནི་མཚོན་བྱེད་དེ་རྣལ་འབྱོར་བླ་མེད་ལས་ཐབས་ཀྱི་རྒྱུད་རྣམས་སོ། །དེ་ལ་བྱ་སྤྱོད་རྟོག་པ་གསུམ་ནི་གཙང་སྦྲ་ལ་སོགས་པ་ལུས་ཀྱི་བྱ་བ་གཙོ་བོར་སྟོན་པའི་ཕྱིར། དཔལ་དུས་ཀྱི་འཁོར་ལོའི་གཡོན་ཞལ་སྐུ་རྡོ་རྗེའི་འཕྲིན་ལས་ཡིན་པས་དེས་གསུངས་པ་དང༌། རྣལ་འབྱོར་གྱི་རྒྱུད་རྣམས་ནི་འདོད་ཆགས་བདེ་བ་ཆེན་པོ་ཅུང་ཟད་རྒྱས་པའི་ལམ་ཉིད་ཀྱི་ཕྱིར་གཡས་ཞལ་དམར་པོས་ཀྱང་མཚོན་ལ། སྔགས་ཀྱི་ཡིག་འབྲུའི་དངོས་གྲུབ་ཉིད་མཐར་ཐུག་ཏུ་སྟོན་པའི་ཕྱིར། གཡས་ཞལ་གསུང་རྡོ་རྗེས་གསུངས་པ་དང༌། རྣལ་འབྱོར་རྗེས་སུ་རིག་པ་དང་འདུས་པ་ལ་སོགས་པ་ཐབས་རྒྱུད་རྣམས་ནི་རྣམ་ཀུན་མཆོག་ལྡན་གྱི་སྟོང་ཉིད་ཡེ་ཤེས་རྡོ་རྗེ་དེ་ཁོང་དུ་སྦས་པའི་ཟ་མ་ཏོག་བསྐྱེད་རིམ་བྱ་བ་དང་བཅས་པ་གཙོ་བོར་སྟོན་པའི་ཕྱིར། རྒྱབ་ཞལ་ཡེ་ཤེས་རྡོ་རྗེས་གསུངས་པ་དང༌། བདེ་མཆོག་དང་དགྱེས་རྡོར་ལ་སོགས་པ་རྣལ་འབྱོར་མ་རྒྱུད་རྣམས་
མི་འགྱུར་བའི་བདེ་བ་ཆེན་པོའི་ཟ་མ་ཏོག་ཐུགས་རྡོ་རྗེའི་ལམ་ཞུ་བདེ་ལྷན་ཅིག་སྐྱེས་པའི་ཡེ་ཤེས་སྤྲོས་པའི་སྣང་བ་ནུབ་པ་ཅན་དེ་ཉིད་གཙོ་བོར་སྟོན་པའི་ཕྱིར། མདུན་ཞལ་ཐུགས་རྡོ་རྗེའི་འཕྲིན་ལས་ཡིན་པ་དང་དེས་གསུངས་པའོ། །དེ་ལྟར་ན་བྱ་སྤྱོད་རྣལ་འབྱོར་རྒྱུད་གསུམ་ལས་ཆེས་མཆོག་ཏུ་གྱུར་པ། བཞི་པ་རྣལ་འབྱོར་བླ་ན་མེད་པ་ཡིན་ལ། དེ་ལ་ཡང་ཐབས་དང་ཤེས་རབ་ཀྱི་རྒྱུད་གཉིས་ལས་བྱིན་རླབས་མྱུར་བའི་སྒོ་ནས་རྣལ་འབྱོར་མའི་རྒྱུད་མཆོག་ཡིན་ཞིང༌། དཔལ་དུས་ཀྱི་འཁོར་ལོ་ནི། རྣལ་འབྱོར་མ་རྒྱུད་ཁྱད་པར་ཅན་ཡིན་ཡང་གོང་དུ་གསུངས་པ་ལྟར་གྱི་ཞལ་རེ་རེའི་ཕྱོགས་སུ་ལྷུང་བ་མ་ཡིན་པར་ཞལ་བཞིའི་སྤྱི་བོའམ་ཡང་ན་སྐུ་ལུས་དང་མཚུངས་པར་བསྟན་པ་སྟེ། དེ་ཡང་དཔལ་གྱི་མགུར་ནས་གསུངས་པའི་རྒྱུད་རྣམས་ལ་སྤྱི་ལྡོག་ནས་བཟང་ངན་གྱི་དབྱེ་བ་མི་ཐུབ་ཀྱང༌། བརྗོད་བྱེད་ཚིག་གི་དངོས་བསྟན་སྒྲ་ཇི་བཞིན་པ་ལ། བརྗོད་བྱ་ཟབ་མི་ཟབ་དང་རྒྱ་ཆེ་ཆུང་གི་ཁྱད་པར་ནི་ངེས་པར་འབྱུང་དུ་རུང་བ་ལས། དུས་ཀྱི་འཁོར་ལོ་ནི་ལྷག་པར་ཟབ་ཅིང་རྒྱ་ཆེ་བ་ཡིན་ནོ། །དེ་ཡང་ཕྱི་འཇིག་རྟེན་ཁམས་ཀྱི་རྣམ་གཞག་སྐར་རྩིས་ཀྱི་རིམ་པ་སོགས་དང༌། ནང་རྡོ་རྗེ་ལུས་ཀྱི་སྐྱེ་གནས་འཇིག་ཚུལ་སོགས་གཞི་གཏན་ལ་འབེབས་ཚུལ་ཡང་གཞན་པས་རྒྱ་ཆེ་ཞིང༌། གྲུབ་མཐའི་དབྱེ་བ་དང་རང་ལུགས་ཀྱི་འཁོར་བ་འཇུག་ཟློག་སོགས་གཞིའི་གནས་ཚུལ་གཏན་ལ་འབེབས་ཚུལ་གཞན་པས་ཟབ་པའང་ཡིན་ལ། སྨིན་བྱེད་དབང་གི་དུས་ན་ཆུ་སོགས་ཀྱི་དབང་ལ་རྒྱུད་གཞན་རྣམས་ལ་རྒྱལ་བ་རིགས་ལྔ་ཙམ་ལས་མ་གསུངས་པ་ལ། འདིར་ལྷ་བཞི་བཅུ་རྩ་དྲུག་སོགས་ཀྱི་དག་པ་མཛད་པས། གཞན་པས་འདི་རྒྱ་ཆེ་ཞིང་ཟབ་ལ་རྒྱུད་སྨིན་ཚབས་ཆེ་བ་དང༌། དབང་གོང་མའི་གནས་སྐབས་ཀུན་ན་བཞི་པ་ཕྱག་རྒྱ་ཆེན་པོའི་དབང་རྒྱུད་གཞན་དུ་མི་གསལ་ཞིང་བསྡུས་པ། འདིར་རྒྱས་ཤིང་གསལ་
བར་གསུངས་པས་ཆེས་ཟབ་པ་དང༌། གཞན་ནས་མ་བཤད་པའི་རྡོ་རྗེ་སློབ་དཔོན་བདག་པོ་དང་བདག་པོ་ཆེན་པོའི་དབང་དག་གསུངས་པས། སློབ་དཔོན་གྱི་དབང་ལ་ཟབ་པ་དང་རྒྱ་ཆེ་བ་གཉིས་ཀར་གྱི་སྒོ་ནས་མཆོག་ཏུ་གྱུར་པ་དང༌། བསྐྱེད་རིམ་ལ་ཡང་ཕ་རྒྱུད་དང་མ་རྒྱུད་གཞན་ཐམས་ཅད་ཀྱི་ཟབ་གནད་གཅིག་ཏུ་འདུས་པས་མཆོག་ཏུ་གྱུར་པ་དང༌། བཟླས་པ་སོགས་ལ་ཐུན་མོང་མ་ཡིན་པའི་ཟབ་གནད་ཐོར་བུ་དུ་མ་ཡོད་པ་དང༌། ཟབ་གནད་ཀྱི་གཙོ་བོ་ཚེ་གཅིག་ལ་འཚང་རྒྱ་བའི་ཉེ་ལམ་རྡོ་རྗེའི་རྣལ་འབྱོར་སྦྱོར་བ་ཡན་ལག་དྲུག་པ་ཞེས་བྱ་བ་རྣམ་པ་ཀུན་གྱི་མཆོག་དང་ལྡན་པའི་སྟོང་ཉིད་ཕྱག་རྒྱ་ཆེན་པོ་དང༌། མི་འགྱུར་བའི་བདེ་བ་ཟུང་དུ་འཇུག་པའི་ལམ་དབང་བཞི་པའི་ཡེ་ཤེས་དེ་ནི་རྒྱུད་རྒྱལ་གཞན་རྣམས་སུ་གབ་ཅིང་མི་གསལ་བ་དང་བརྡ་ཐབས་དང༌། ཟུར་ཙམ་གྱིས་མཚོན་པ་དང༌། མིང་ཙམ་དང༌། མཚན་ཉིད་མདོར་བསྡུས་ཙམ་གྱིས་མཚོན་པ་ལས་མ་གསུངས་པ་ལ། འདིར་རྒྱས་ཤིང་གསལ་ལ་ཐང་མར་བརྡལ་བ་ཡིན་ ནོ། །དེ་བཞིན་དུ་འབྲས་བུའི་བཞུགས་ཚུལ་གྱི་སྒོ་ནས་ཀྱང༌། གཞན་ལས་གསལ་པོར་མི་འབྱུང་བའི་ཟབ་ཁྱད་དུ་མ་དང་བཅས་པ་གསལ་བོར་གསུངས་པ་ཡིན་ཞིང༌། དེར་མ་ཟད་རྒྱུད་གཞན་ཐམས་ཅད་ཀྱི་མི་གསལ་བ་གསལ་བྱེད་བླ་ན་མེད་པ་ཡང་འདི་ཡིན་ལ། ཐེག་པ་གཞན་ཐམས་ཅད་ཀྱི་དགོངས་དོན་ཡང་འདིར་གཏན་ལ་ཕབ་པས། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་ནང་ན་གཙུག་གི་ནོར་བུ་ལྟ་བུར་གྱུར་པ་ནི་རྒྱུད་རྒྱལ་དུས་ཀྱི་འཁོར་ལོ་འདིའོ། །ཡང་བཀའ་རྒྱུད་སྡེ་རྣམས་རྟོགས་དཀའ་བས། དགོངས་འགྲེལ་མཁན་པོའི་གཞུང་ལ་བརྟེན་ནས་རྟོགས་དགོས་པར་འདོད་པ་ཡང་མང་ན། དགོངས་འགྲེལ་གྱི་གཞུང་ཡང་ལུགས་འདི་ཉིད་ཆེས་མཆོག་ཏུ་གྱུར་པ་སྟེ། རྒྱུད་ཀྱི་རྒྱལ་པོ་གཞན་རྣམས་ལ་ནི་འཕགས་པའི་ཡུལ་གྱི་པཎྜི་ཏ་ཕལ་པ་དང༌། སྒྲུབ་པ་པོ་ནུས་པ་ཅུང་ཟད་
ཐོབ་པས་བཤད་པ་དང༌། ཐུན་མོང་གི་དངོས་གྲུབ་ཙམ་ཐོབ་པའི་གྲུབ་ཐོབ་ཀྱིས་བཤད་པའང་མང་ལ། འཕགས་པའི་ས་ཐོབ་པའམ་མཆོག་གི་དངོས་གྲུབ་ཐོབ་པར་གྲགས་པ་རྣམས་ཀྱང་སྔར་མིའི་འགྲོ་བ་སོ་སོ་སྐྱེ་བོའི་རྟེན་ལ་སྐབས་དེར་མཆོག་གསར་དུ་བརྙེས་པ། འཕགས་པའི་ས་དང་པོ་ལྟ་བུ་ཐོབ་པ་ཡང་ཡོད། མཆོག་གི་དངོས་གྲུབ་ཉམས་འོག་ཏུ་ཆུད་པའི་སྦྱོར་ལམ་གྱི་ས་ཐོབ་པ་ལ་མཆོག་ཐོབ་པར་བྱས་པའང་ཡོད་ཀྱི། དགོངས་འགྲེལ་མཁན་བཟང་ཤོས་རྣམས་ཀྱང་དེ་ཙམ་ཞིག་ཡིན་ལ། འདིར་ནི་བྱང་ཆུབ་སེམས་དཔའི་འགྲེལ་པ་སྐོར་གསུམ་དང༌། ལྟ་འདོད་མདོར་བསྟན་དང༌། དོན་དམ་བསྙེན་པ་ལ་སོགས་པ་ནི། ངེས་པའི་དོན་དུ་རྫོགས་པའི་སངས་རྒྱས་ཉིད་གདུལ་བྱའི་སྣང་ངོར་ཚུལ་སྟོན་པའི་རྣམ་པའི་དབང་དུ་བྱས་ན་ས་བཅུའི་དབང་ཕྱུག་སྤྱན་རས་གཟིགས་དང་རྡོ་རྗེའི་སྙིང་པོ་དང༌། ཕྱག་ན་རྡོ་རྗེ་ལ་སོགས་པ་རྒྱལ་སྲས་ཐུ་བོ་རྣམས་ཀྱིས་རྒྱུད་དོན་གསལ་བར་མཛད་པའི་བསྟན་བཅོས་ཡིན་པས་སོ། །དེས་ན་སེམས་འགྲེལ་སྐོར་གསུམ་སོགས་འདི་དག་ནི། བསྡུས་པའི་རྒྱུད་གཞན་རྣམས་ལ་བཤད་རྒྱུད་ཅེས་བྱ་བ། རྩ་བའི་རྒྱུད་ཀྱི་དོན་འགྲེལ་སྟོན་པ་ཉིད་ཀྱིས་གསུངས་པའི་རང་འགྲེལ་ལྟ་བུ་དེ་དག་དང་ཁུངས་ཆེ་ཆུང་ལ་ཁྱད་པར་མེད་པ་ལས་གོ་བདེ་ཞིང་ཚིག་དོན་གསལ་བའི་ཕྱོགས་ནས་འདི་དག་ངོ་མཚར་ཆེ་ཆེ་ཙམ་ཡིན་ནོ། །དེ་ལ་དཔལ་ལྡན་འབྲས་སྤུངས་ཀྱི་མཆོད་རྟེན་ཆོས་ཀྱི་དབྱིངས་ཀྱི་གནས་སུ་འོ་སྐོལ་གྱི་སྟོན་པ་ཤཱཀྱ་སེངྒེས་ཕྱག་ན་རྡོ་རྗེའི་སྤྲུལ་པའི་སྐུ་རྒྱལ་པོ་ཟླ་བཟང་སོགས་སྔགས་ཀྱི་ཐེག་པའི་གདུལ་བྱ་རྣམས་ལ་དངོས་སུ་གསུངས་པའི་རྩ་རྒྱུད་སྟོང་ཕྲག་བཅུ་གཉིས་པ་དང༌། དེའི་རྣམ་པར་བཤད་པ་ཟླ་བཟང་ཉིད་ཀྱིས་མཛད་པ་སྟོང་ཕྲག་དྲུག་ཅུ་པ་སོགས་ནི། འཕགས་པའི་ཡུལ་
དང་གངས་རིའི་ཁྲོད་སོགས་ཆུ་བོ་སཱི་ཏའི་ལྷོ་ཕྱོགས་འདིར་མི་ཡུལ་གྱི་འགྲོ་བའི་དོན་དུ་མ་བྱོན་ཏེ་དབང་མདོར་བསྟན་སོགས་ཆ་ཤས་ཉེ་ཚེ་ཙམ་ནི་མ་གཏོགས་སོ། །འཕགས་པའི་ཡུལ་དུ་ཇི་ཙམ་དར་ཞིང་ཡོད་པ་དེ་ཐམས་ཅད་བོད་ཡུལ་འདིར་བྱོན་པ་མ་ཡིན་མོད། འོན་ཀྱང་གཙོ་ཆེ་བ་རྣམས་ནི་འདིར་ཡང་ཡོད་པ་ལས། དེ་དག་ཀྱང་གང་ཞེ་ན། རྩ་བའི་རྒྱུད་ཀྱི་དུམ་བུ་ངེས་དོན་ཕྱོགས་གཅིག་པ་དབང་མདོར་བསྟན་དང༌། བསྡུས་རྒྱུད་ལེའུ་ལྔ་པ་འཕྲེང་འཛིན་སྡེབ་སྦྱོར་གྱི་ཚིགས་བཅད་སྟོང་སུམ་ཅུ་ལྷག་བཅས་དང༌། བསྡུས་པའི་རྒྱུད་ཕྱི་མ་རྣམས་ནི་ཡོངས་སུ་གྲགས་པ་རྒྱུད་ཀྱི་མཚན་འབྱར་བ་ཡིན་ལ། འཇམ་དཔལ་གྲགས་པའི་གསུང་ལྟ་འདོད་མདོར་བསྟན་དང༌། པདྨ་དཀར་པོའི་གསུང་དོན་དམ་བསྙེན་པ་དང༌། གཞན་ཡང་རྣལ་འབྱོར་གསུམ་གྱི་སྙིང་པོ་གསལ་བ་སོགས་གཞུང་ཕྲན་ཅི་རིགས་དེ་དག་ཀྱང༌། རྒྱུད་ཀྱི་མཚན་མ་འབྱར་མོད། དོན་གྱིས་རྒྱུད་དུ་ནི་གཏོགས་སོ། །དུས་ཀྱི་འཁོར་ལོའི་འགྲེལ་ཆེན་དྲི་མེད་འོད་ཤླཽ་ཀ་སྟོང་ཕྲག་བཅུ་གཉིས་པ་རྫོགས་པར་དངོས་སུ་ཡོད་པ་དང༌། ཀྱཻ་རྡོ་རྗེའི་འགྲེལ་པ་རྡོ་རྗེ་སྙིང་པོས་མཛད་པ་དང༌། འཁོར་ལོ་སྡོམ་པའི་འགྲེལ་པ་ཕྱག་ན་རྡོ་རྗེས་མཛད་པ་གཉིས་ནི། ཡོངས་རྫོགས་ཀྱི་ཚད་ཤླཽ་ཀ་སྟོང་ཕྲག་དྲུག་པ་རེར་བཤད་ཀྱང༌། རྒྱ་བོད་གཉིས་སུ་འགྲོ་བའི་དོན་གྱི་ཕྱིར་སྤྱོད་པ་ནི། སྟོད་ཀྱི་ཆ་ནས་ཉུང་ཟད་རེ་ཡིན་མོད། འདི་གཉིས་རེ་རེས་ཀྱང་དོན་གྱི་སྙིང་པོའི་ཆ་ནས་རྒྱུད་དོན་རྫོགས་པར་འགྲེལ་བ་སྟེ། གསང་སྔགས་ཀྱི་གཞི་ལམ་འབྲས་བུའི་རིམ་པ་ཆ་ཚང་རྫོགས་པ་རེ་བསྟན་ནོ། །དེ་དག་དང་འཁོར་ལོ་སྡོམ་པའི་སྒྲུབ་ཐབས་ཕྱག་ན་རྡོ་རྗེས་མཛད་པ་དང༌། རྡོ་རྗེ་ཕག་མོའི་སྒྲུབ་ཐབས་རིགས་ལྡན་ཁྱབ་འཇུག་སྦས་པས་མཛད་པ་སོགས་ཀྱང་རྒྱུད་ཀྱི་འགྲེལ་བཤད་དང༌། སྒྲུབས་
ཐབས་ཞེས་པའི་ཐ་སྙད་ཀྱིས་གོ་བཀག་སྟེ། རྒྱུད་ཀྱི་མཚན་མ་འབྱར་ཡང་དོན་གྱིས་རྒྱུད་དང་མཚུངས་པ་ཉིད་དོ། །དེ་ལ་ཁ་ཅིག་འདི་སྙམ་དུ་སངས་རྒྱས་ཀྱི་བསྟན་པའི་དབང་དུ་བྱས་ནས། དེ་བཞིན་གཤེགས་པ་མྱ་ངན་ལས་མ་འདས་གོང་དུ་བྱུང་བ་ནི་བཀའ་དང༌། དེའི་རྗེས་སུ་བྱུང་བ་ནི་དགོངས་འགྲེལ་གྱི་བསྟན་བཅོས་སུ་འཇོག་དགོས་པས་དུས་ཀྱི་འཁོར་ལོའི་བསྡུས་པའི་རྒྱུད་ཀྱང་སྟོན་པ་ནས་ལོ་དྲུག་བརྒྱའི་ཕྱིས་སུ་བྱུང་བའི་ཕྱིར་དགོངས་འགྲེལ་ཁོ་ནའོ་སྙམ་ན། འདི་ནི་ཚིག་དང་དོན་གཉིས་ཀའི་སྒོ་ནས། རྩ་བའི་རྒྱུད་ཉིད་ལས་འབྱུང་བ་བསྡུས་པ་ཁོ་ན་སྟེ། ཉི་མའི་ཤིང་རྟས་གསོལ་བ་བཏབ་པ་སོགས་ཁ་སྐོང་གི་ཚིག་ཤོ་ལོ་ཀ་འགའ་ཞིག་མ་གཏོགས་ཤོ་ལོ་ཀ་སྟོང་དང་སུམ་ཅུ་རྩ་རྒྱུད་ལས་བཏུས་པའི་ཚིག་ཁོ་ན་ལ། སྡེབ་སྦྱོར་གྱི་དབང་གིས་གོ་རིམ་བསྒྲིགས་མཚམས་བསྒྱུར་བ་ཙམ་ནི་ཡོད་མོད། དེ་ནི་སྡུད་པ་པོའི་བསམ་པས་མདོ་རྒྱུད་གཞན་ཐམས་ཅད་ལ་ཡང་ཡོད་དོ། །སངས་རྒྱས་ཀྱི་བཀའ་རྒྱ་ཆེན་པོ་ལས་ཚིག་ཉུང་ངུའི་ཚུལ་དུ་བསྡུ་བ་དེ་ལྟ་བུ། དུས་ཕྱིས་སོ་སོ་སྐྱེ་བོས་བྱས་ན་བཀའ་ཡིན་པར་མི་འགྲོ་བ་སྲིད་མོད་ཀྱང༌། འཕགས་པ་འཇམ་དཔལ་གྱིས་མཛད་པ་ཡིན་པས། སྡུད་པ་པོས་བཀའ་བསྡུས་པ་དང་ཁྱད་པར་མེད་པས་བཀའ་མ་ཡིན་པར་མི་འགྲོའོ། །དེ་ལས་ཀྱང་ཁྱད་པར་དུ་གྱུར་པའི་རྒྱུ་མཚན་གྱི་གཙོ་བོ་སྟོན་པ་ཉིད་ཀྱིས་རྩ་བའི་རྒྱུད་དུ་ལུང་བསྟན་པ་ཉིད་ཀྱི་ཕྱིར་བཀའ་ཡིན་ཏེ། འཕགས་པར་ལུང་བསྟན་པའི་གང་ཟག་དེ་འཕགས་པ་ཡིན་པར་ཐེ་ཚོམ་མེད་པ་བཞིན་ནོ། །དེ་ཡང་ཇི་ལྟ་བུ་ཞེ་ན། འཕྲེང་འཛིན་ཚིགས་བཅད་སུམ་ཅུ་ནི། །ལྷག་པའི་ཕྱོགས་བརྒྱ་ལེའུ་ལྔས། །དཔལ་ལྡན་རྒྱུད་དག་རྫོགས་པར་ནི། །སྨྲ་བའི་རྒྱལ་པོས་སྟོན་འགྱུར་ཏེ། །སྡུད་པར་བྱེད་པ་པོ་ཡང་འདི། །ཞེས་གསུངས་པའི་ཕྱིར་རོ། །དྲི་མེད་འོད་སོགས་ནི་གོང་དུ་བརྗོད་པ་ལྟར་དོན་གྱིས་ན་བཤད་རྒྱུད་ཉིད་དུ་འགྱུར་ཞེས་སྨྲ་ཡི། སྔོན་ནས་ད་ལྟའི་
བར་དུ་རྒྱུད་ཀྱི་ཐ་སྙད་མི་བྱེད་པའི་ཕྱིར། བདག་ཅག་གིས་ཀྱང་རྒྱུད་ཀྱི་ཐ་སྙད་གསར་དུ་སྦྱོར་བར་མི་བྱེད་དེ་དགོས་པ་མེད་པའི་ཕྱིར་རོ། །དེ་ལས་རྒྱུད་ཀྱི་རྒྱལ་པོ་འགྲེལ་བ་དང་བཅས་པ་འདི་ལ་བོད་ཀྱི་ཕྱོགས་འདིར་ལོ་ཙཱ་བ་ཐ་དད་པས་བསྒྱུར་བའི་འགྱུར་མི་གཅིག་པ་ཤིན་ཏུ་མང་བར་བྱུང་སྟེ། གྱི་ཇོ་རྨ་ལོ་འབྲོ་གཉན་མང་འོར་དང༌། །འ་ཞ་རྭ་ལོ་ག་རོང་ཙ་མི་དང༌། །སྤོང་ཞོ་ཁེར་རྒང་ལྡིང་རི་གྲགས་མྀང་བཞི། །རོང་གླིང་སེ་ལོ་ལོ་ཆུང་བསོད་ཡེ་དང༌། །བློ་གྲོས་སྙིང་པོ་ཆག་ལོ་ཡར་ལུངས་པ། །དེ་རྣམས་ལོ་པཎ་སྡེབས་པའི་འགྱུར་ཡིན་ཏེ། །ཁ་ཅིག་གཞི་འགྱུར་ཁ་ཅིག་འགྱུར་བཅོས་ཡིན། །འགོས་ལོ་ཁུག་པས་བསྒྱུར་ཞེས་འགའ་ཞིག་ཟེར། །ཤོང་སྟོན་ཐང་སྟོན་དཔང་ལོའི་འགྱུར་རྣམས་ནི། །པཎྜི་ཏ་ལ་མ་ཉན་རྩལ་འགྱུར་ཡིན། །ལོ་ཙཱ་བློ་གྲོས་གཉིས་ཀྱིས་བསྒྱུར་བ་ནི། །དུས་གསུམ་སངས་རྒྱས་ཀུན་མཁྱེན་ཆེན་པོ་ཡི། །བཀའ་ཡིས་བསྐུལ་ཞིང་གསུང་དང་བསྟུན་པའི་ཕྱིར། །རྩལ་འགྱུར་ཡིན་ཡང་བྱིན་རླབས་གཟི་བྱིན་ལྡན། །འགྱུར་གསར་རྣམས་ཀྱི་ནང་ནས་འདི་ཉིད་མཆོག །གོ་བདེ་ཚིག་ལམ་ལེགས་ཤིང་གསལ་བ་ཡིན། །དེ་དག་ཀྱང་འདི་ལྟ་སྟེ། ཐོག་མ་གྱི་ཇོ་ཟླ་བའི་འོད་ཟེར་གྱི་འགྱུར་ཏེ་འདི་ལ་འགྱུར་མངས་སུ་གྲགས། དེ་ནས་རྨ་དགེ་བའི་བློ་གྲོས། འབྲོ་ལོ་ཙཱ་བ་གཉེལ་ཙེར་ཤེས་རབ་གྲགས། གཉན་ལོ་ཙཱ་བ་དར་མ་གྲགས། མང་འོར་བྱང་ཆུབ་ཤེས་རབ། འ་ཞ་རྒྱ་གར་བརྩེགས། རྭ་ལོ་ཙཱ་བ་ཆོས་རབ། སྟེང་པ་ལོ་ཙཱ་ག་རོང་ཚུལ་ཁྲིམས་འབྱུང་གནས། བུ་རང་ལོ་ཆུང་གྲགས་འབྱོར་ཤེས་རབ། གྲགས་པའི་མིང་གི་མཐའ་ཅན་བཞི་ནི། ཙ་མི་སངས་རྒྱས་གྲགས། སྤོང་ཞོ་གསལ་བ་གྲགས། ཁེར་རྒང་འཁོར་ལོ་གྲགས། ལྡིང་རི་ཆོས་གྲགས་སོ། །ཡང་རོང་གླིང་ལོ་ཙཱ་བ་རྡོ་རྗེ་དབང་ཕྱུག །སེ་ལོ་ཙཱ་བ་ཚུལ་ཁྲིམས་གཞོན་ནུ་
ལོ་ཙཱ་བ་བསོད་ནམས་ཡེ་ཤེས། ལོ་ཙཱ་བ་བློ་གྲོས་སྙིང་པོ། ཆག་ལོ་ཆོས་རྗེ་དཔལ། ཡར་ལུངས་ཤུད་ཀེ་གྲགས་པ་རྒྱལ་མཚན་ཏེ། དེ་རྣམས་ཀྱིས་རྒྱ་གར་གྱི་པཎ་གྲུབ་ལ་དབང་མན་ངག་བཤད་པ་རྣམས་ཞུས་ཏེ་བསྒྱུར་བ་ཡིན་པས། ཕལ་ཆེར་བྱིན་རླབས་དང་ལྡན་པ་ཡིན་ཡང་རྭ་འབྲོ་ཙཱ་མི་ཆག་ལོའི་ལུགས་རྣམས་མ་གཏོགས། གཞན་རྣམས་ལ་བརྒྱུད་པ་རིང་དུ་མ་དར་བ་འདྲའོ། །པཎ་ཆེན་ཟླ་མགོན་གྱི་རང་འགྱུར་དང་གཉོས་ཁ་རག་ལོ་ཙཱའི་འགྱུར་དང་ཁྱུང་པོ་ཆོས་བརྩོན་གྱི་འགྱུར་ཡང་ཡོད་པར་གྲགས་ལ། འགྲོ་སེང་དཀར་དང༌། མཚུར་དབྱིག་གི་སྙིང་པོ་ལ་སོགས་པས་ཀྱང་སེམས་འགྲེལ་སྐོར་ཅི་རིགས་པར་འགྱུར་ཟེར། དེ་དག་ཀྱང་བར་སྐབས་ཀྱི་མཁས་པ་ཆོས་ཀྱི་སྤྱན་ཡངས་འགའ་རེས་གཟིགས་པའི་དབང་དུ་བྱས་ལ། བདག་གིས་མཐོང་བ་ནི་རྭ་འབྲོ་གྱི་རྨ་འ་ཞ་ལོ་ཆུང་མང་འོར་ཙ་མི་ཆག་ལོ་ཤུད་ཀེ་ཤོང་དཔངས་ཇོ་འགྱུར་རྣམས་སོ། །བར་སྐབས་སུ་ཙ་མི་དང་ཆག་ལུགས་ཀྱང་དར་རབ་བྱུང་མོད། དཔལ་དུས་ཀྱི་འཁོར་ལོ་ལ་བོད་ཁམས་འདིར་རྭ་འབྲོའི་ལུགས་གཉིས་པོ་འཕྲིན་ལས་ཀྱི་སྒོ་འགྲན་ཟླ་མེད་པ་ཡིན་ཞིང༌། འབྲོ་བ་ལ་སྒྲུབ་པའི་བཀའ་བབས། རྭ་བ་ལ་བཤད་པའི་བཀའ་བབས་ཟེར་བ་ཡང་ཕྱོགས་མཐུན་རུང་ཡིན་ཏེ། རྭ་ལུགས་འཛིན་པ་ལ་རྒྱུད་བཤད་ཤིན་ཏུ་དར་ཞིང་འཕྲིན་ལས་ཆེ་ལ། འབྲོ་ལུགས་པ་རྣམས་ལ་གྲུབ་པ་བརྙེས་པ་ཆེས་མང་དུ་བྱུང་བའང་ཡིན་ནོ། །ལོ་ཙཱ་བ་འགོས་ཁུག་པས་ཕྱག་རྡོར་སྟོད་འགྲེལ་བསྒྱུར་བ་ནི་ཡོད་ལ། དུས་འཁོར་རྩ་འགྲེལ་བསྒྱུར་བའི་ཐོག་མ་ནི། གྱི་ཇོ་ཉིད་ཡིན་པར་ཀུན་ཏུ་གྲགས་ཤིང༌། སྔོན་གྱི་ཆེན་པོ་ཐམས་ཅད་ཞལ་འཆམ་པས་འགོས་ཀྱིས་བསྒྱུར་བ་མེད་པར་སེམས་ལ། སློབ་དཔོན་གཞོན་ནུ་དཔལ་བ་སོགས་ཡོད་སྐད་གསུང་བ་གལ་ཏེ་བདེན་སྲིད་ན་གྱི་ཇོ་དང་དུས་
མཉམ་ཙམ་ཡིན་གྱི་ཆེས་སྔ་བ་མིན་ནོ། །ཤོང་ཐང་དཔང་གསུམ་གྱི་འགྱུར་ནི། རྒྱུད་འགྲེལ་གྱི་དོན་ལ་རང་བློས་དཔྱད་ཅིང༌། བོད་སྟེན་རྣམས་ལ་དྲི་གཏུགས་བྱེད་བཞིན་དུ་སྒྲ་ལ་མཁས་པའི་སྒོ་ནས་འགྱུར་བཅོས་བྱས་པ་ཡིན་གྱི། །རྭ་འབྲོ་ཙཱ་ཆག་བཞི་ལས་བརྒྱུད་པ་ལོགས་སུ་ནི་མེད་ལ། བློ་གྲོས་ཀྱི་རྩལ་གྱིས་དཔྱད་པའི་བཤད་པ་དང་ལག་ལེན་མི་འདྲ་བ་ནི་ཡོད་དོ། །དེ་རྗེས་ཇོ་ནང་འགྱུར་དུ་གྲགས་པ་ལོ་ཙཱ་བ་རྣམ་གཉིས་ཀྱིས་བསྒྱུར་བ་ནི། ཤོང་འགྱུར་སྒྲ་དོན་འགྲིག་ཅིང་ཚིག་སྦྱོར་ལེགས་པར་ཡོད་པ་ལ། ད་དུང་དོན་གྱི་ཆ་གནད་དུ་མ་ཕྱིན་པ་ཡོད་པ་རྣམས་ལ་འགྱུར་རྙིང་རྣམས་དང་དཔང་འགྱུར་སོགས་ལའང་གཏུགས། སྒྲ་དོན་ལ་མཁས་པས་ལེགས་པར་དཔྱད་ཅིང་འགྱུར་བཅོས་ཀྱང་མཛད་ལ། གནད་ཆེ་ས་མང་པོར་ཆོས་རྗེ་ཀུན་མཁྱེན་ཆེན་པོ་ཉིད་ཀྱིས་འགྱུར་བཅོས་མཛད་པ་ཡིན་པས་འགྱུར་གསར་གཞན་རྣམས་ལས་ཆེས་བྱིན་རླབས་ཆེའོ། །དེ་ཕྱིན་ཆད་ནས་ཀྱང་འགྱུར་བཅོས་ཐན་ཐུན་བྱེད་མཁན་བྱུང་ཟེར་ཏེ། བྱུང་བ་ཙམ་དུ་ཟད་ཀྱི་བཤད་སྒྲུབ་ཀྱིས་གཏན་ལ་ཕབ་པ་མེད་དོ། །རྒྱུད་ཕྱི་མ་གཉན་ལོ་དང་ཤེའུ་ལོ་ཙཱ་བས་བསྒྱུར་བ། ཕྱིས་ཇོ་ནང་ལོ་ཙཱ་བ་བློ་གྲོས་དཔལ་གྱིས་ཤོ་ལོ་ཀ་བཅུ་གཅིག་འགྱུར་ཆད་བསབས་ཤིང༌། གཞན་ལ་འགྱུར་བཅོས་ཡང་དག་པར་མཛད་དོ། །དོན་དམ་བསྙེན་པ་པཎ་ཆེན་ཟླ་མགོན་གྱི་རང་འགྱུར་ཉིད་གཙོ་བོ་ཡིན་ལ། འགྱུར་བཅོས་གཞན་ཡང་ཡོད། འཇམ་དཔལ་གྲགས་པའི་ལྟ་འདོད་མདོར་བསྟན་ནི། ཀུན་མཁྱེན་ཆེན་པོ་ཇོ་ནང་པའི་ཐུགས་སྲས་ཀུན་སྤངས་ཆོས་གྲགས་དཔལ་བཟང་གིས་བསྒྱུར་བའོ། །གཞན་ཡང་དཔལ་དུས་ཀྱི་འཁོར་ལོའི་ཕྱོགས་ལ་དགོངས་འགྲེལ་གྱི་བསྟན་བཅོས་མང་རབ་འགྱུར་ཏེ། དབང་མདོར་བསྟན་གྱི་འགྲེལ་པ་དོན་དམ་བསྡུས་པ་ཞེས་བྱ་བ། ནཱ་རོ་པས་མཛད་པ་དང༌། དུས་ཞབས་པ་ཞེས་བྱ་བས་མཛད་པ་དང༌། མཛད་བྱང་མེད་པ་ཕྱིས་བུ་སྟོན་གྱིས་
བསྒྱུར་བ་དང༌། རྣམ་རྒྱལ་དཔལ་བཟང་པོས་མཛད་པ་དཔང་ལོས་བསྒྱུར་བ་དང༌། སཱ་དྷུ་པུ་ཏྲས་མཛད་པ་རྗེ་སྦོབ་བརྡར་བའི་འགྱུར་ཏེ་འགྲེལ་པ་ལྔ་ཡོད་པ། ཕྱི་མ་གསུམ་པོ་ནི་དང་པོའི་རྗེས་འབྲང་ངོ༌། །དབང་གི་རབ་བྱེད་ཀྱི་འགྲེལ་པ་རྒྱ་གར་དཱ་རི་ཀ་པས་བྱས་པ་དང༌། དཀའ་འགྲེལ་པདྨ་ཅན་དང༌། དུས་འཁོར་གྱི་སྒྲུབ་ཐབས་ཡན་ལག་བཞི་པ་དང༌། ཡན་ལག་བཅུ་གཅིག་པ་གཉིས་དཀྱིལ་ཆོག་ཡིད་འོང་འཕྲེང་བ་སྟེ། བཞི་པོ་དེ་རྣམས་པཎྜི་ཏ་དུས་ཞབས་པ་ཞེས་བྱ་བས་མཛད་དོ། །མདོར་བསྡུས་དང་པོ་ལ་སློབ་དཔོན་མི་གཡོ་སྙིང་པོས་བཤད་སྦྱར་སྙིང་པོ་སྣང་བ་ཞེས་བྱ་བ་མཛད་པ་དང༌། སཱ་དྷུ་པུ་ཏྲས་མཛད་པའི་སྒྲུབ་ཐབས་དང་དཀྱིལ་ཆོག་གཉིས། བལ་བོ་མཻ་ཏྲི་པས་མཛད་པའི་སྒྲུབ་ཐབས་དང༌། ལྷན་སྐྱེས་ཀྱི་སྒྲུབ་ཐབས་རོལ་པའི་རྡོ་རྗེ་དང་དུས་ཞབས་པས་མཛད་པ་གཉིས། མཚན་བརྗོད་སྒྲུབ་ཐབས་ཞེས་བྱ་བ་བྱང་ཆུབ་སེམས་དཔས་མཛད་ཟེར་བ་གཅིག སྙིང་པོ་རྒྱན་ཞེས་བྱ་བ་རྫོགས་རིམ་གཙོ་བོར་སྟོན་པའི་སྒྲུབ་ཐབས་བྲམ་ཟེ་བསོད་སྙོམས་པས་མཛད་པ་དུས་འཁོར་གྱི་མན་ངག་གི་གཞུང་ཆུང་དུས་ཞབས་པས་མཛད་པ། སྦྱོར་དྲུག་གི་གཞུང་དཔེ་མེད་འཚོས་མཛད་པ། དེའི་འགྲེལ་བ་ཉི་མ་དཔལ་གྱིས་མཛད་པ། རྣལ་འབྱོར་གསུམ་གྱི་སྙིང་པོ་གསལ་བ་ཡེ་ཤེས་སྤྱན་སྒྲུབ་ཉི་ཟླ་སྒྲུབ་པ། དུས་ཞབས་སྙན་བརྒྱུད། སྦས་པ་མིག་འབྱེད་རྩ་འགྲེལ། སྦྱོར་དྲུག་གི་མན་ངག་ཙི་ལུ་བས་མཛད་པ། ཤཱ་བཱ་རིའི་གཞུང་ཆུང༌། ཙ་མིའི་སྦྱོར་འཕྲེང༌། བི་བྷུ་ཏིའི་ནང་གི་སྙེ་མ། རྩ་ལྷུང་གི་གཞུང་བྱང་ཆུབ་སེམས་དཔས་མཛད་ཟེར་བ་གཅིག །དུས་འཁོར་གྱི་སྡོམས་ཚིག་དང༌། དུས་འཁོར་ལ་འཇུག་པ་ཞེས་བྱ་བ་ཨ་བྷ་ཡཱ་ཀ་རས་མཛད་པ། ཁ་ཆེ་པཎ་ཆེན་ཤཱཀྱ་ཤྲཱིས་མཛད་པ་རྩིས་ཀྱི་གཞུང་ཆུང་གསུམ། གཞན་ཡང་རབ་གནས་ཚོགས་འཁོར་སྦྱིན་སྲེག །རྣལ་
འབྱོར་མའི་གཏོར་ཆོག སཱ་དྷུ་ཀིརྟིས་བྱས་པའི་བསྟོད་པ་རྒྱུན་ཆགས་རྣམས་ཡོད་ལ། རྒྱུད་གཞན་གྱི་སྐོར་དུས་འཁོར་ལུགས་སུ་བཀྲལ་བ་ལ། མཚན་བརྗོད་ཀྱི་འགྲེལ་བ་བདུད་རྩིའི་ཐིགས་པ་ཉི་མ་དཔལ་ཡེ་ཤེས་ཀྱིས་མཛད་པ་ཡོད། དཔེ་མེད་འཚོས་མཛད་ཟེར་བའི་མཚན་བརྗོད་ཀྱི་འགྲེལ་བ་ཚིགས་བཅད་མ་འདི་ཕལ་ཆེར་དེ་དང་བཤད་པ་མཐུན་ལ། པདྨ་དཀར་པོས་མཛད་ཟེར་བའི་མཚན་བརྗོད་ཀྱི་འགྲེལ་བ་འདི་བཤད་སྒྲོས་དེ་དང་མི་མཐུན་ཡང་དུས་འཁོར་ལུགས་ཡིན་ཞིང༌། དེ་གཉིས་ཀ་བོད་རྩོམ་ནི་མིན་པ་འདྲའོ། །རིགས་ལྡན་འཇམ་དཔལ་གྲགས་པས་མཛད་ཟེར་བའི་འགྲེལ་པ་དང༌། །ཕན་ཡོན་གྱི་འགྲེལ་པ་ནི་བོད་རྩོམ་ཟངས་མར་འདུག་ཅིང༌། བསྟན་འགྱུར་སྒྲིག་མཁན་རྣམས་ཀྱིས་དུས་འཁོར་ཕྱོགས་ཀྱི་སྡེབས་སུ་བཅུག་མོད། དུས་འཁོར་གྱི་ལུགས་ཡེ་མིན་ནོ། །ཡང་རྒྱུད་ཀྱི་ངོ་བོ་མི་གཅིག་པའི་དབང་གིས་བསྟན་བཅོས་འགྱུར་རོ་ཚལ་བསྡུ་བ་པོ་རྣམས་ཀྱིས་དུས་འཁོར་གྱི་ཆོས་སྐོར་ལ་མ་བཅུག་འདུག་ཀྱང༌། དགོངས་པ་གཅིག་པའི་ཕྱིར་འདིའི་ཆོས་སྐོར་ཡིན་ངེས་ལ་རྡོ་རྗེ་སྙིང་འགྲེལ་ནི་རྟག་གཉིས་ཀྱི་ལེའུ་ཐོག་མ་ལྔའི་འགྲེལ་བ་ཡིན་ཞིང༌། ཕྱག་རྡོར་སྟོད་འགྲེལ་ནི་བདེ་མཆོག་རྩ་རྒྱུད་ལེའུ་དང་པོའི་ཤོ་ལོ་ཀ་བྱེད་དང་བཅུ་གཅིག་གི་འགྲེལ་པ་ཡིན་ནོ། །དེ་བཞིན་དུ་བདེ་མཆོག་གི་སྒྲུབ་ཐབས་ཕྱག་ན་རྡོ་རྗེས་མཛད་པ་དང༌། ཕག་མོ་བཅུ་གསུམ་མའི་སྒྲུབ་ཐབས་ཁྱབ་འཇུག་སྦས་པས་མཛད་པ་དང༌། དེའི་དཀྱིལ་ཆོག་འཇིགས་མེད་ལྷས་མཛད་པ་དང༌། ད་རི་ཀ་པའི་གཞུང་ཕྲན་གཉིས་ཙམ་དང༌། དགྱེས་རྡོར་གྱི་དཀའ་འགྲེལ་ནཱ་རོ་འགྲེལ་ཆེན་དུ་གྲགས་པ་དང༌། རྡོ་རྗེ་སྙིང་པོའི་སྨད་འགྲེལ་དུ་གྲགས་པ་ཁ་འཕངས་ཡིན་པ་དེ་ཡང་སྟེ། དཔལ་དུས་ཀྱི་འཁོར་ལོ་དང་འབྲེལ་བ་ལ་དེ་ཙམ་ཞིག་འགྱུར་བ་མཐོང་ངོ༌། །གཞན་གྱིས་བསྒྱུར་བ་དང༌། སྔ་རོལ་ནས་འགྱུར་ཡང་མ་རྙེད་པ་གཞན་མང་དུ་ཡོད་སྲིད་ནའང་
གྲགས་ཆེ་བ་ནི་དེ་དག་གོ །ཆོས་འབྱུང་ཞི་བའི་སྒྲུབ་ཐབས་ནི་པཎྜི་ཏ་ནགས་རིན་གྱི་དུས་སུ་འགྱུར་བར་གྲགས་ཆེ་ཡང་མ་མཐོང་ལ། ཡང་ཙ་མིའི་རྒྱུད་གསུམ་དུ་གྲགས་པ་བླ་མའི་ཡོན་ཏན་ཡོངས་བཟུང་དང༌། ཅེ་སྤྱང་ཚོགས་རོལ་དང༌། གླུ་གར་གྱི་རྒྱུད་ཏེ་གསུམ་པོ་ནི། མཁས་པ་ཆེན་པོ་རྣམས་བོད་ཀྱིས་རྩམས་རྒྱུད་ཡིན་པར་བཞེད་པས་ཚིག་གི་ཕྱོགས་ནས་དེ་ལྟར་ཡིན་ཡང༌། དོན་གྱི་ཆ་ནས་སྐུར་པ་གདབ་པར་མི་བྱའོ། །དེ་དག་ལས་དབང་མདོར་བསྟན་གྱི་འགྲེལ་པ་དོན་དམ་བསྡུས་པ་ནི། ནཱ་རོ་བའི་གསུང་རྒྱུན་ཙམ་ཡིན་ནམ་སེམས་ཏེ་རྩོམ་པ་རང་ནི་མིན་པ་འདྲ་ལ། སྤྱིར་རྣམ་དཔྱོད་དང་མཐོང་རྒྱ་ཆེ་བའི་པཎྜི་ཏ་ཞིག་གིས་བྱས་འདུག་ཅིང༌། ལེགས་བཤད་ཀྱང་མང་མོད། སྐབས་སུ་མི་བབ་པའི་བཤད་པ་དང༌། སེམས་འགྲེལ་དང་མི་མཐུན་པ་ཡང་ཅུང་ཟད་ཡོད་དོ། །ནཱ་རོ་བའི་རྩོམ་པ་ཡིན་དུ་ཆུག་ཀྱང་སློབ་དཔོན་དེ་སྐུ་ཚེ་དེ་ལ་ཕྲ་མོ་རྣམས་གྲུབ་ཅིང༌། གྲོང་འཇུག་སོགས་ཐུན་མོང་གི་དངོས་གྲུབ་ཆུང་ངུ་བརྙེས་པ་ཙམ་ཡིན་པས། སེམས་འགྲེལ་དང་མི་མཐུན་པ་རྣམས་དོར་བྱ་ཡིན་གྱི། འདི་ན་གཞན་མཁས་པར་གྲགས་པ་གང་དག་སེམས་འགྲེལ་དང་འདྲ་བར་རྩི་བ་མང་པོ་འདུག་ཀྱང་གནང་མ་དགོངས་པ་སྟེ། གསེར་དང་ར་གན་མཉམ་པར་མ་རྩི་ཤིག རྒྱུད་སྡེ་གཞན་ས་བཅུའི་བྱང་ཆུབ་སེམས་དཔའི་གསུང་གིས་དགོངས་འགྲེལ་མེད་པ་རྣམས་ལ་ཐེབས་གཞན་མེད་པའི་ཕྱིར། སོ་སོ་སྐྱེ་བོ་མཁས་པ་ལས་དང་པོ་པ་ལ་ཡང་རྩིས་སུ་བྱེད་པའི་སྐབས་མང་ཞིང༌། ནུས་པ་ཅི་རིགས་པ་བརྙེས་པ་རྣམས་ལ་ལྷག་པར་ཡང་རྩིས་སུ་བྱེད་དགོས་མོད། ཆོས་འདི་ལ་ནི་སེམས་དཔའ་ཆེན་པོ་རྣམས་ཀྱི་བཤད་པ་ཐང་མར་བརྡལ་བ་ཡོད་ཕྱིན་ཆད་པན་ཆུང་དང་གྲུབ་ཆུང་གི་ཚིག་ཟུར་ལ་འཇུག་དགོས་པ་མ་ཡིན་ནོ། །དུས་ཞབས་པས་མཛད་
ཟེར་བ་ཀུན་ཡང་རྒྱུད་སྤྱན་འདྲེན་པ་པོ་གྲུབ་ཐོབ་དུས་འཁོར་བ་འཇམ་པའི་རྡོ་རྗེ་དང༌། ཙི་ལུ་བར་གྲགས་པ་གྲུབ་ཐོབ་དྷརྨཱ་ནནྡ་དང༌། པི་ཧཱ་ཊྭ་ཙརྱ་བསོད་སྙོམས་པ་འོད་བྱེད་སྦས་པ་རྣམས་ཀྱིས་མཛད་པ་ནི་མ་ཡིན་ལ། གལ་ཏེ་དེ་རྣམས་ཀྱིས་མཛད་ན་རྒྱུན་སྤྱན་འདྲེན་པ་པོ་ཉིད་ཀྱི་ཕྱིར་ཁུངས་ཚད་མར་བྱེད་དགོས་ཀྱང༌། དེ་རྣམས་ཀྱིས་མཛད་པའི་རྡོ་རྗེའི་གླུ་རེ་རེ་ཙམ་མ་གཏོགས། བསྟན་བཅོས་གཞན་ནི་མེད་པར་གྲགས་ཤིང་དོན་ལ་ཡང་གནས་སོ། །ཡང་རྒྱུད་སྡེ་གཞན་གྱི་བཤད་སྒྲུབ་ཆེར་མི་མཛད་པར་དུས་འཁོར་ཁོ་ནའི་བཤད་སྒྲུབ་རྩལ་དུ་འདོན་པའི་སློབ་དཔོན་སུ་བྱུང་ཡང་སློབ་དཔོན་དུས་འཁོར་བ་ཞེས་ཟེར་ལ། དེ་ལ་ཞེས་སྦྱར་བས་སློབ་དཔོན་དུས་འཁོར་ཞབས་ཞེས་འབྱུང་བའི་ཕྱིར། དུས་ཞབས་པ་ཞེས་པ་འདི་ལ་སྣ་ཚོགས་པ་ཡོད་ཅིང༌། ཙི་ལུ་བ་དང༌། བསོད་སྙོམས་པས་མཛད་ཟེར་བའི་གཞུང་ཕྲན་འདི་ཀུན་ཡང་མཚན་གྱིས་བྱིན་གྱིས་བརླབས་པ་ཁོ་ནའོ། །སློབ་དཔོན་ནཱ་རོ་བ་ནི་བདེ་དགྱེས་སོགས་རྒྱུད་སྡེ་གཞན་ལ་རྩལ་འདོན་མཛད་པར་གྲགས་ཤིང་གྲུབ་ལ། དེ་དང་དེའི་རྒྱུད་འཛིན་ཡང་མང་ཞིང༌། རང་ཡང་ཁས་ལེན་བཞིན་དུ་ནཱ་རོ་བ་དུས་འཁོར་ཞབས་ཆུང་བའོ་ཟེར་བ་ནི་འབྲེལ་མེད་པའི་ཕྱོགས་ཞེན་ཐལ་ཆེས་པའི་མུ་ཅོར་ཏེ། རྒྱུ་མཚན་དེ་ལྟར་ཡིན་པའི་ཕྱིར་ན་མཐར་གཏུགས་ན་དུས་འཁོར་མིན་པ་མི་ཤེས་ཟེར་བར་འགྲོ་ཉེན་ཡོད་པས། བསྟོད་ར་མི་གཏོང་དགུ་གཏོང་བྱེད་པར་འདོད་ཀྱང་སྨད་པར་སོང་བ་ཡིན་ནོ། །སློབ་དཔོན་ཨ་བྷ་ཡཱ་ཀ་རས་དུས་འཁོར་ལ་གཞུང་ཕྲན་མང་དུ་མཛད་པར་གྲགས་ཤིང༌། བོད་དུ་ཡང་གོང་དུ་སྨོས་པ་ལྟར་ཐན་ཐུན་འགྱུར་ལ། ལོ་ཙཱ་བ་གྲགས་པའི་མཐའ་ཅན་བཞི་ཅར་ཁོང་གི་ཐུགས་སྲས་ཡིན་ཞིང༌། །བཞི་ཀས་འདིའི་གཞུང་འགྲེལ་འབད་ནས་བསྒྱུར་བའི་ཕྱིར། ཁ་ཅིག་ཨ་བྷ་ཡཱ་ཀ་ར་དུས་འཁོར་གཙོ་བོར་མི་བྱེད་དོ་ཟེར་བ་ཡང་རྫུན་འབའ་ཞིག་གོ །ཡང་ཀྱཻ་རྡོ་རྗེའི་འགྲེལ་བ་རྡོ་རྗེའི་ཚིག་བསྡུས་ཞེས་བྱ་བ་འདི་རྫོགས་རིམ་ངེས་
དོན་གྱི་བཤད་པ་མང་ཞིང༌། བཤད་པ་བཟང་བར་ཡང་ཡོད་ལ། རྫོགས་རིམ་ཐམས་ཅད་དུས་འཁོར་ལུགས་ལྟར་བཀྲལ་བ་ཡིན་མོད་ཀྱི། འདི་ཡང་ནཱ་རོ་བས་མཛད་པར་འདོད་པ་དང་མི་འདོད་པ་གཉིས་སྔོན་ཡང་བྱུང་ལ། དེ་ལ་བོད་ཁ་ཅིག་ས་སྐྱ་པཎྜི་ཏས་དཔྱལ་ལོ་ལ་ཕྲག་དོག་མཛད་ནས་ནཱ་རོའི་གསུང་མིན་ཞེས་བསྒྲགས་ཟེར་ཡང་མི་བདེན་པར་སྣང་སྟེ། དེའི་རྒྱ་དཔེ་བདག་གིས་མཐོང་བ་གཅིག་ན་ཡང༌། ཁ་ཆེ་ཆེན་པོ་བྱང་ཆུབ་རྡོ་རྗེས་མཛད་ཟེར་བ་སྣང་བ་དོན་དུ་གཉེར་ན་རྒྱ་དཔེ་དེ་ཡང་བསྟན་པར་བྱའོ། །དེ་ལྟར་ན་དཔལ་དུས་ཀྱི་འཁོར་ལོའི་དགོངས་འགྲེལ་གྱི་གཞུང་རྣམས་ལའང་མཆོག་དང་མཆོག་མིན་གྱི་དབྱེ་བ་ཤེས་པར་བྱའོ། །བོད་ཀྱི་དུས་འཁོར་བ་མང་པོ་དག་སཱ་དྷུ་པུ་ཏྲ་དང་འཇིགས་མེད་འབྱུང་གནས་གཉིས། །སཱ་དྷུ་པུ་ཏྲ་མཆོག་ཡིན་པར་བཟུང་ནས། །ཐ་ན་ལུང་འདྲེན་ཚུན་ཆོད་ལ་ཡང༌། ཨ་བྷ་ཡའི་སྔོན་དུ་དེ་འདྲེན་ཅི་ཐུབ་བྱེད་པ་མཐོང་སྟེ། སཱ་དྷུ་པུ་ཏྲ་དེ་ནི་ཨ་བྷ་ཡའི་རྗེས་འབྲང་ཡིན་པ་མ་ཤེས་པའོ། །དེ་ཅིས་མངོན་ཞེ་ན། དེས་མཛད་པའི་དུས་འཁོར་གྱི་དཀྱིལ་ཆོག་ན། རྡོ་རྗེ་འཕྲེང་བའི་ཁ་སྐོང་ཁོ་ན་མང་བའི་ཕྱིར་ དང༌། །ཚེས་ལྷའི་ཁ་དོག་རྣལ་འབྱོར་རྫོགས་འཕྲེང་བཞིན་མེད་ཀྱང༌། གཞན་ཕལ་ཆེར་མཐུན་ཅིང༌། དེ་ནི་འཇིགས་མེད་འབྱུང་གནས་ཀྱི་རྗེས་སུ་བྱུང་བའང་ཡིན་པས་སོ། །ཡང་འཇིགས་མེད་ནི་ཤིང་རྟ་ཆེན་པོ་མཚུངས་བྲལ་ཡིན་ལ། གཅིག་ཤོས་ཕྱོགས་རེའི་བློ་གྲོས་ཅན་ཡིན་པའང་གོ་དགོས་ལ། དེ་ལྟར་ན་སློབ་དཔོན་ཆེ་ཆུང་དང༌། གཞུང་བཟང་ངན་དང༌། ཁུངས་ཆེ་ཆུང་གི་དབྱེ་བ་ཤེས་པ་གལ་ཆེའོ། །རྒྱུད་འགྲེལ་སྒྱུར་བྱེད་ལོ་ཙཱ་བ་ནི་གོང་དུ་སྨོས་པ་ལྟར་ཡིན་ལ། གཞན་ཡང་པཎ་ཆེན་ཤཱཀྱ་ཤྲཱི་དང། བི་བྷུ་ཏི་ཙནྡྲ་དང༌། རཏྣ་རཀྵི་ཏ་ལ་སོགས་པ་ཕྱོགས་འདིར་དབང་དང་རྒྱུད་བཤད་གསལ་བར་མཛད་པ་དང༌། །རྒ་ལོ་ཙཱ་བ་དང༌། ཏྲེ་བོ་ཤེས་རབ་དཔལ་
ལ་སོགས་པ་མན་ངག་རྣལ་འབྱོར་ཡན་ལག་དྲུག་པའི་རྐང་ཚུགས་པ་ཇི་སྙེད་ཅིག་བྱུང་ངོ༌། །དེ་དག་ལས་རིགས་ལྡན་སྤྲུལ་པའི་སྐུ་ཆོས་རྗེ་ཡབ་སྲས་བཞི་པོའི་སྐབས་སུ། རྭ་འབྲོ་ཙ་མི་ཆག་ལོ་ཤཱཀྱ་ཤྲཱི་བི་བྷུ་ཏི་ལོ་གྲགས་པའི་ལུགས་སོགས་དབང་བཀའ་དང་རྒྱུད་བཤད་བཀའ་མ་ནུབ་པ་ཐམས་ཅད་གསན་ཞིང༌། རྫོགས་རིམ་བརྒྱུད་པ་མི་འདྲ་བ་བཅུ་བདུན་སོགས་བཀའ་ཡོད་ལྷད་མེད་ཐམས་ཅད་གཅིག་ཏུ་འདུས་པར་མཛད་པ་ཡིན་ལ། འོན་ཀྱང་གྲུབ་ཐོབ་བརྒྱུད་པ་ཡིན་པ་དང༌། ཉམས་མྱོང་བྱིན་རླབས་བརྒྱུད་པའི་དབང་ལས་པཎ་ཆེན་ཟླ་མགོན་གྱི་བཀའ་སྲོལ་འབྲོ་ལུགས་འདི་ཉིད་སྙིང་གི་ཐིག་ལེར་བཀོད་ནས་བླ་མ་རྣམས་ལ་གསོལ་བ་འདེབས་པར་མཛད་ཅིང༌། རྫོགས་རིམ་ནི་བི་བྷུ་ཏི་ཙནྡྲའི་ཉེ་བརྒྱུད་ལ་ཡང་ཤིན་ཏུ་རྩིས་སུ་མཛད་དོ། །དེ་དག་ཀྱང་གདུལ་བྱ་གཞན་ངོ་དང་བསྟུན་ཏེ། ཁ་ན་མ་ཐོ་བ་སྤང་ཞིང༌། རྩོད་པའི་དུས་ཀྱི་ཐ་མ་འདི་ལྟ་བུར་མིའི་རྟེན་ཅན་གྱི་བླ་མ་དམ་པ་ཁོ་ན་རྗེས་འཇུག་གདུལ་བྱ་རྣམས་ལ་བྱིན་རླབས་འཇུག་པའི་སྒོར་གཟིགས་ནས། བརྒྱུད་པ་བཟང་ཚད་འདུས་པར་མཛད་པ་ཡིན་གྱི། བྱིན་རླབས་བཀའ་བབས་ཀྱི་བརྒྱུད་པ་གཅིག་གིས་ཆོག་མ་ཤེས་པ་ཡང་མ་ཡིན་ལ། དེ་ལས་ཀྱང་ལྷག་པར་དཔལ་ཇོ་ནང་པའི་ཆོས་རྗེ་ཡབ་སྲས་ལྔའམ་དྲུག་རྣམས་ས་བཅུའི་དབང་ཕྱུག་རིགས་ལྡན་རྣམས་ཀྱི་སྤྲུལ་པར་ཐེ་ཚོམ་མེད་པ་དང༌། ཡང་སྒོས་སུ་དུས་གསུམ་སངས་རྒྱས་ཀུན་མཁྱེན་ཆེན་པོ་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་ཞེས་ཕྱོགས་ཐམས་ཅད་དུ་སྙན་པའི་སྒྲ་དབྱངས་ཀྱིས་ཁྱབ་པ་འདི་ནི། བཅོམ་ལྡན་འདས་དཔལ་དུས་ཀྱི་འཁོར་ལོ་ཉིད་འགྲོ་བའི་དོན་དུ་བཤེས་གཉེན་དམ་པའི་ཚུལ་བཟུང་བ་ཡིན་པས། ཆོས་འདི་དང་ཆོས་གཞན་གང་དག་ལ་བྱིན་རླབས་དང་ལྡན་པའི་བརྒྱུད་པ་ཐ་དད་པ་དང༌། ལེགས་པར་བཤད་པའི་ཟབ་དོན་གྱི་རྣམ་གྲངས་གཞན་དེ་ཀུན་ནི་ཆུ་ཀླུང་བྱེ་བ་ཕྲག་བརྒྱ་ལྟ་བུ། ཆོས་རྗེ་ཀུན་མཁྱེན་ཆེན་པོ་རང་ཉིད་ཀྱི་ངེས་
དོན་གྱི་བསྟན་པའི་བབས་དང༌། བྱིན་རླབས་ཀྱི་བཀའ་བབས་ནི་རྒྱ་མཚོ་ཆེན་པོ་བདུན་དང་འདྲ་བ་ཡིན་པས། རང་ལུགས་ལ་བྱིན་རླབས་ཀྱི་བཀའ་བབས་གཞན་ལ་འཚོལ་མི་དགོས་སོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་གྱི་རྣམས་པར་བཤད་པ་ལས། ཟབ་མོའི་ཆོས་ལ་འཇུག་སྒོ་བསྟན་པའི་སྡེ་ཚན་ཏེ་དང་པོའོ།། །།དེ་ལྟ་བུའི་དཔལ་དུས་ཀྱི་འཁོར་ལོ་དེ་ཡང་ཕྱི་ནང་གཞན་གསུམ་གྱི་རིམ་པ་ལས་བརྩམས་ཏེ་རྟོགས་པར་བྱ་དགོས་ན། འདིར་ནི་གཞན་གྱི་རིམ་པའོ། །དེ་ཡང་སྨིན་བྱེད་ཀྱི་དབང་དང༌། གྲོལ་བྱེད་ཀྱི་ལམ་དང༌། གྲོལ་བ་འབྲས་བུ་སྟེ་གསུམ་མམ་ཀུན་ཁྱབ་ཆོས་ཉིད་བདེ་བར་གཤེགས་པའི་སྙིང་པོ་སྟེ་བཞིའོ། །སྐབས་འདིར་གཉིས་པ་གྲོལ་བྱེད་ལམ་གྱི་དབང་དུ་བྱས་ན། གྲོལ་བྱེད་ལམ་སྤྱི་ལྡོག་ནས་གཏན་ལ་དབབ་པ་དང༌། སྒྲུབ་ཐབས་ཀྱི་རྣམ་གཞན་བྱེ་བྲག་ཏུ་བཤད་པའོ། །དང་པོ་ལ་གྲོལ་བྱེད་ལམ་གྱི་ངོ་བོ། ནང་སེལ་གཉིས་སུ་དབྱེ་བ། ཕྱེ་བ་སོ་སོའི་རང་བཞིན། རང་བཞིན་དོན་ལྡན་གྱི་མཚན་ཉིད། ཉམས་ལེན་སྒྲུབ་པའི་དགོས་པ། གྲངས་དང་གོ་རིམ་ངེས་པ། དབང་ལམ་འབྲས་བུའི་སྦྱོར་ཚུལ་ཏེ་བདུན་ནོ། །དང་པོ་ནི། སྤྱིར་ཐེག་པ་གསུམ་གྱི་ལམ་ཐམས་ཅད་གྲོལ་བྱེད་ཀྱི་ལམ་ཡིན་ཡང༌། གསང་སྔགས་རྣལ་འབྱོར་བླ་ན་མེད་པའི་ཕྱོགས་འདིར་སྐབས་སུ་བབ་པ་སྨིན་གྲོལ་གཉིས་ཀྱི་ཟླས་ཕྱེ་བའི་གྲོལ་བྱེད་ལམ་གྱི་ངོ་བོ་ཅི་ཞེ་ན། གཞི་སྒྱུར་བའི་ལམ་ཁྱད་པར་ཅན་ལ་འཇོག་པ་ཡིན་ནོ། །དེ་ལ་ཐེག་པ་སྤྱི་ལ་གྲགས་པའི་གནས་གྱུར་དང༌། སྔགས་པ་ཕལ་ལ་གྲགས་པའི་གཞི་སྒྱུར་བ་དང༌། ཆོས་འདི་ལ་གྲགས་པའི་སྒྲིབ་བྲལ་དུ་བྱེད་པ་ཞེས་པ་རྣམས་དོན་གྱི་འགངས་འདྲ་བ་ཡིན་ནོ། །དེ་ཡང་གཞི་ཞེས་བྱ་བ་ནི། འཁོར་བ་སྣོད་བཅུད་ཀྱི་འཇིག་རྟེན། ཕུང་ཁམས་སྐྱེ་མཆེད་ལུས་ངག་སེམས་དང་ཆགས་པའི་ཐིག་ལེ་ལས་ཉོན་སྡུག་བསྔལ་གསུམ་གྱིས་བསྡུས་པ་འདི་དག་
ཡིན་ལ། གཞི་དེ་ལ་དམིགས་ནས་རེ་རེ་བཞིན་རྣམ་པ་འགལ་བའི་གཉེན་པོས་མཐར་དེ་དང་དེའི་སྣང་བ་འགགས་པའི་སྟོང་པ་ལ་སྦྱོར་བར་བྱེད་པ་ནི་གཞི་སྤོང་བའི་ལམ་ཡིན་ལ། འདིར་ནི་དེ་ལྟ་བུ་མ་ཡིན་ཏེ། གཞིའི་ཆོས་དེ་རྣམས་ཉིད་ལ་དམིགས་ནས་སྣང་ཆ་དེ་རྩ་བ་ནས་བཀག་པའི་སྣང་མེད་ཁོ་ན་ལ་མཐར་སྐྱེལ་བ་མི་བྱེད་དེ། །ལྷ་སྐུ་དང་བདེ་ཆེན་ལ་སོགས་པ་གཞིའི་ཆོས་དེ་ཉིད་དང་རྣམ་པ་ཕྱེད་འདྲ་བ་ཙམ་དུ་བསྒྱུར་ནས། སྣང་བཅས་ཀྱི་ཡེ་ཤེས་དེ་ཉིད་བསྒོམས་པས། གཞིའི་གནས་ཚུལ་རྟོགས་པར་བྱེད་པ་ཡིན་ནོ། །དེ་ལ་འདི་ལྟར་གོ་དགོས་ཏེ། སྤྱིར་མདོ་སྔགས་ཐེག་པ་གསུམ་གྱི་ལམ་ཀུན་ལ་ཡང༌། གཞི་སྤོང་བ་དང༌། གཞི་སྒྱུར་བའི་ཆ་ཤས་གཉིས་ཀ་འདྲེས་མར་ཡོད་མོད་ཀྱི། །ཐེག་དམན་གཉིས་ནི་གཞི་སྤོང་བ་ཁོ་ན་ཤས་ཆེ་ལ། ཐེག་ཆེན་མདོ་ལུགས་སུ་ཡང་ཅུང་ཞིག་སྤོང་བ་གཙོ་ཆེ་ཞིང༌། བྱ་སྤྱོད་རྣལ་འབྱོར་རྒྱུད་གསུམ་དུ་ཆ་མཉམ་པ་ཙམ་ཡིན་ལ། ཐེག་པ་བླ་ན་མེད་པ་འདིར་སྒྱུར་བ་ཉིད་ཆེས་མང་ཞིང་ལྷག་པར་གཙོ་ཆེ་བས། གང་ཞིག་གཙོ་ཆེ་བ་དེའི་སྒོ་ནས་བཞག་གོ །དེ་ཡང་དཔེར་ན་དུག་གི་སྡོང་པོ་ཞིག་ལ། ལོ་འདབ་གཅོད་པ་དང༌། རྩ་བ་འབྱིན་པ་དང༌། མེས་སྲེག་པ་ལ་སོགས་པས་དུག་མེད་པར་བྱེད་པ་ནི་གཞི་སྤོང་བའི་དཔེ་ཡིན་ཏེ་དེའི་ལུགས་ལ་ཐ་མལ་གྱི་ལུས་འདི་དག་པར་བྱེད་པ་ལ་དཔེར་མཚོན་ན། དང་པོར་ལུས་ཀྱི་སྣང་བ་བཀག་པའི་སྣང་མེད་ལ་མཉམ་པར་འཇོག་མི་ཐུབ་པའི་སྐབས། ལུས་འདི་མི་གཙང་བ་དང༌། མི་རྟག་པ་དང༌། སྡུག་བསྔལ་བ་དང༌། བྱེད་པ་པོས་སྟོང་པ་སོགས་སྒོམ་ལ། དེ་དག་ཀྱང་ལུས་ཀྱི་སྣང་བ་ནུབ་པར་བྱེད་པའི་རིང་རྒྱུ་ཙམ་ཡིན་ཏེ། མི་གཙང་བས་ལུས་སྲ་བ་མ་ཡིན་པ་མི་བརྟན་པའི་རྒྱུ་དང༌། སྡུག་བསྔལ་བས་ལུས་ཀྱི་སྣང་བ་མི་འདོད་པ་དང༌། མི་རྟག་པས་སྐད་ཅིག་རེ་རེ་བཞིན་འཇིག་པས་ལུས་ཀྱི་སྣང་བ་ཤར་ནས་སྡོད་ལོང་མེད་
པ་དང༌། སྟོང་པས་ན་གང་ཟག་གཅིག་གིས་དབང་བསྒྱུར་ནས་ལུས་ཡོད་པར་བྱེད་པ་འགོག་པའི་ཕྱིར་རོ། །དེ་དག་གི་གནས་སྐབས་སུ་ཡང་བདག་མེད་ཡིད་ཡུལ་དུ་བྱེད་པ་ཡོད་མོད་ཀྱི། གསལ་བར་མངོན་དུ་བྱེད་མི་ནུས་སོ། །དེ་ལ་གོམས་ནས་ཕྱིས་ཐེག་དམན་ལྟར་ན་གང་ཟག་གི་བདག་མེད་དེ། ལུས་དེ་མི་བརྟན་པར་མ་ཟད། དེ་ལ་དངོས་པོ་གཅིག་པུ་རང་རྐང་ཚུགས་པ་མེད་པས་ང་བདག་མེད་པར་མཐོང་ནས་དེར་སྣང་བ་ཟད་པ་དང༌། ཐེག་ཆེན་ལ་ཆོས་ཀྱི་བདག་མེད་ཏེ། དེ་ཡང་མི་གཙང་མི་རྟག་སྡུག་བསྔལ་སྟོང་པའི་ཕྱིར་སྣང་བ་ཙམ་མ་གཏོགས། རྟག་ཚུགས་ཐུབ་པ་མེད་པར་ཤེས་ཏེ། ལུས་ནམ་ཡང་གདོད་ནས་མ་གྲུབ་པ་ཙམ་ལ་བློ་བཞག་པ་ན། ཡིད་ཡུལ་དུ་སྣང་བ་ཅི་ཡང་མེད་པ་ཞིག་ལ་གནས་པར་འགྱུར་རོ། །དེས་ན་དམིགས་པའི་རྣལ་འབྱོར་རེ་རེ་བཞིན་ཐོག་མར་ཁྱད་གཞི་ལུས་ལ་དམིགས་ནས་བསྒོམས་ཀྱང་དེ་མ་ཐག་ཏུ་ལུས་ཀྱི་སྣང་བ་འགགས་པའི་སྣང་མེད་ལ་ཡང་ཡང་གཏོད་པར་བྱེད་ཅིང༌། དེ་ཉིད་དང་པོར་གསལ་སྣང་ཙམ་དང༌། ཕྱིས་མངོན་དུ་ཕྱོགས་པས་སྒྲུབ་པར་བྱེད་དེ། དུག་རྩ་བ་ནས་བཅོམ་སྟེ་མི་སྣང་བར་བྱེད་པ་བཞིན་ནོ། །ཐེག་དམན་གང་ཟག་གི་བདག་མེད་ཙམ་སྒོམ་པར་བྱེད་པ་ལ་ལུས་གདོད་ནས་སྟོང་པར་རྟོགས་པ་ནི་མེད་མོད། དེའི་འཇིག་རྟེན་འདས་པའི་མཉམ་གཞག་ཏུ་ཐ་མལ་ལུས་ཀྱི་སྣང་བ་དམིགས་པར་མི་བྱེད་དོ། །དེ་ལྟར་ན་ལུས་ནི་མཚོན་བྱེད་དེ་ཆོས་ཐམས་ཅད་སྦྱར་རོ། །གཞི་མི་སྤོང་བར་སྒྱུར་བའི་དཔེ་ནི། དུག་གི་སྡོང་པོ་ལ་སྔགས་དང་སྨན་སོགས་རེག་པའི་ཁྱད་པར་གྱི་བསྒྲུབས་པས། དེའི་ཉེས་པ་རྣམས་ནི་སངས། ཡོན་ཏན་དཔག་ཏུ་མེད་པ་དང་ལྡན་པའི་སྨན་མཆོག་ཕུན་སུམ་ཚོགས་པའི་སྡོང་པོར་གྱུར་པ་ནི། དུག་ལ་སྐྱོན་དུ་མི་བལྟ་ཞིང༌། བསྲེག་བཅད་ལ་སོགས་པ་མ་དགོས་པར་
སྡོང་པོ་དེའི་རིགས་རྒྱུན་ཡང་མ་ཆད་ལ། ཡལ་ག་ལོ་འདབ་ཀྱི་ཕྱི་དབྱིབས་ལ་རྣམ་འགྱུར་ཆེན་པོ་མེད་ཀྱང༌། ནུས་པ་དང་བྱེད་ལས་ཤིན་ཏུ་མི་འདྲ་བར་བསྒྱུར་བས་གཞི་དུག་གི་སྡོང་པོ་བསྲེག་བཅད་ཀྱིས་སྤོང་བ་མི་དགོས་པར་རྫས་སྔགས་ཀྱི་སྦྱོར་བས་ནུས་པ་དང་མཚན་ཉིད་ཐམས་ཅད་བསྒྱུར་བ་ཡིན་ནོ། །དེ་བཞིན་དུ་འདིར་ཡང་སྤོང་སེམས་ཞེ་བཅད་དང༌། ཉེས་དམིགས་མཐོང་བའི་ཆགས་བྲལ་དང༌། སྟོང་ཉིད་ཀྱི་སྒོ་ནས་སྣང་བ་ཡལ་དུ་གཞུག་པ་སོགས་གཙོ་བོར་མི་སྤྱོད་དེ། དགོས་པའི་དབང་གིས་ལམ་གྱི་ཡན་ལག་ཕྲ་མོ་རེ་རེ་ཙམ་ནི་མ་གཏོགས་སོ། །དེས་ན་རང་གི་ལུས་ལ་དམིགས་ནས་དག་སྣང་ལྷའི་རྣམ་པ་དམིགས་པས་སྒོམ་པ་དང༌། རྫོགས་རིམ་གྱི་སྐབས་ལུས་སྟོང་གཟུགས་དང་མི་འགྱུར་བའི་བདེ་བར་སྒྲུབ་པ་སོགས་གཞི་དུས་ལུས་ཀྱི་སྣང་བ་དང་ཕྱེད་ཙམ་རྣམ་པ་མཐུན་ཏེ། བསྐྱེད་རིམ་ལ་ཞལ་ཕྱག་གཞལ་མེད་ཁང་སོགས་གནས་དང་ལུས་ཀྱི་རྣམ་པར་མཚུངས་པ་དང༌། རྫོགས་རིམ་ལ་སྟོང་གཟུགས་ཀྱི་སྐུ་དང་ཞིང་ཁམས་འཆར་བ་དང༌། བདེ་བ་ལུས་དང་མཉམ་པ་སོགས་ཀྱི་ཕྱིར་རོ། །ཕྱེད་ཙམ་ཅིག་ཤོས་ཀྱི་ཆ་ནས་རྣམ་པ་འགལ་ཏེ། བསྐྱེད་རིམ་ལ་ཐ་མལ་གྱི་རྣམ་པ་དང་འགལ་བའི་དཀྱིལ་འཁོར་གྱི་རྣམ་པ་དང། རྫོགས་རིམ་ལ་རྡུལ་ཆོས་ཀྱི་རྣམ་པ་དང་འགལ་བའི་ཡེ་ཤེས་ཀྱི་རྣམ་པ་དང༌། འགྱུར་བའི་རྣམ་པ་དང་འགལ་བའི་མི་འགྱུར་བའི་བདེ་བ་ལ་སོགས་པ་ཡིན་པའི་ཕྱིར་རོ། །རྒྱུ་མཚན་དེས་ན་སློབ་དཔོན་སངས་རྒྱས་ཡེ་ཤེས་ཀྱིས་ཀྱང༌། རྣམ་པ་འགལ་བ་དང་འཛིན་སྟངས་མི་མཐུན་པའི་ཐ་སྙད་མཛད་དེ། དེ་དང་རྣམ་པ་འགལ་བར་གྱུར་པའི་ཡིད། །ཅེས་དང༌། གང་ཞིག་གང་དང་མི་མཐུན་པ་དག་ཏུ། །ཞེས་བཤད་པ་ལྟ་བུའོ། །འོ་ན་རྣམ་པ་འགལ་བའི་ཕྱིར་གཞི་སྤོང་བར་མི་འགྱུར་རམ་སྙམ་ན། གཞིའི་ཆོས་ལ་སྤོང་སེམས་དང་མི་མཐུན་པར་འཛིན་པ་མེད་དེ། གཞིའི་ཆོས་
དེ་ཉིད་ལ་དམིགས་གཏད་བྱས་ནས་དེ་དག་སྒྲུབ་པའི་ཚུལ་གྱིས་བསྒོམ་པའི་ཕྱིར། གཞི་སྤོང་བར་མི་འགྱུར་ཏེ། དཔེར་ན་དབུལ་པོའི་སྐྱེ་བོ་རྣམས་ཀྱི་སྲོག་ཕྲལ་ནས་མི་དབུལ་པོ་མེད་པར་བྱེད་པ་ལྟ་བུ་མ་ཡིན་གྱི། དབུལ་པོ་ལ་ནོར་དང་ཡོ་བྱད་མང་པོ་སྦྱིན་ཏེ། ཕྱུག་པོར་བསྒྱུར་ནས་དབུལ་པོ་མེད་པར་བྱེད་པ་བཞིན་ནོ། །དེས་ན་མི་དབུལ་པོ་དེའི་སྟེང་གི་མིའི་དངོས་པོ་ཙམ་ཞིག་ནི་གཞི་དངོས་ཡིན་ལ། དེའི་ཁྱད་ཆོས་སྐྱོན་དུ་གྱུར་པ་བཀྲེན་པ་དེ་བཟློག་ཅིང༌། ཁྱད་གཞི་མིའི་དངོས་པོ་ལ་ནམ་ཡང་གནོད་པ་མེད་པར་ཕུན་སུམ་ཚོགས་པ་གཞན་ཡང་ཐོབ་པ་དང་འདྲ་བ་ཡིན་ནོ། །ཡང་འོ་ན་མི་སྤོང་བ་ཞེས་པས་སྐྱོན་མི་སྤོང་བའི་ཕྱིར་ལམ་དུ་མི་འགྱུར་རོ་སྙམ་ན། སྐྱོན་མི་སྤོང་བ་ག་ལ་ཞིག་སྟེ། གཞི་སྤོང་བའི་ལམ་ལས་ཀྱང་འདི་ལྷག་པར་སྐྱོན་སྤོང་ཚུལ་སྟོབས་ཆེའོ། །དེས་ན་མི་སྤོང་བ་ཞེས་པ་ནི། སྐྱོན་དུ་བལྟ་བ་དང། མི་འཕྲོད་པར་འཛིན་པ་དང༌། སྤོང་སེམས་ཀྱིས་ཆེད་དུ་གཉེར་ནས་སྤོང་བ་མ་ཡིན་པའི་དོན་ཏེ། དཔེར་ན་སྐྱེས་བུ་ཞིག་གིས་སྐྱེས་བུ་གང་ཡང་རུང་བ་ལ། སྐྱོན་རྟོག་པ་དང༌། འཁོན་པ་དང༌། དེ་ལས་གུད་དུ་འགྲོ་བ་ལ་དེས་ངེ་སྤངས་སོ་ཞེས་བརྗོད་ཀྱི། སྐྱེས་བུ་དེ་དེ་ལ་དགའ་བའི་བློ་མ་དོར་བཞིན་དུ་རང་བོར་པ་ལ་སྤངས་བའི་ཐ་སྙད་མི་འཇུག་པ་བཞིན་ནོ། །དེས་ན་ལུས་ཀྱི་ཆོས་ཉིད་ཡེ་ཤེས་ཀྱི་ལྷ་སྐུར་གདོད་ནས་གྲུབ་ཅིང༌། དེ་ལ་བརྟེན་ནས་བྱུང་བའི་དྲི་མ་ཡིན་པའི་ཕྱིར། མེ་ལོང་གི་གཡའ་མེ་ལོང་གི་གཟུགས་དང་ཕྱོགས་འདྲ་ཙམ་དུ་འབྱུང་བ་ལྟར། །རྡོ་རྗེའི་སྐུ་དང་རྣམ་པ་ཕྱོགས་འདྲ་རུང་ཙམ་དུ་ལུས་དེ་ཡང་བཞིན་ལག་དབང་པོ་དང་བཅས་པའི་རྣམ་པར་ཤར། དེའི་ཚེ་རྣལ་འབྱོར་པས་ལུས་དང་ལུས་ཀྱི་ཆོས་ཉིད་གཉིས་རྣམ་པ་འདྲ་བའི་འདྲ་ཆོས་ལྷའི་རྣལ་འབྱོར་བསྒོམས་པས་ཐ་མལ་གྱི་ལུས་ཀྱི་རིགས་རྒྱུན་དེ། གནས་གྱུར་ནས་ལམ་གྱིས་
བསྡུས་པའི་ཡེ་ཤེས་ལྷ་སྐུའི་རྣམ་པ་ཅན་དུ་གྱུར་པ་ནི། དཔེར་ན་སྔགས་བཏབ་པས་དུག་གི་ནུས་པ་སྨན་མཆོག་གི་ནུས་པ་གྱུར་པ་ལྟ་བུའོ། །ལམ་དུས་ཀྱི་ལྷ་སྐུ་དེ་གོམས་པ་ན། ཐ་མལ་ལུས་ཀྱི་སྣང་བའི་དྲི་མ་ཀུན་དག་པའི་ཚེ། ལམ་ཡང་དབྱིངས་སུ་ཐིམ་ནས་ཆོས་ཉིད་ཀྱི་སྐུ་རྡོ་རྗེ་མངོན་འགྱུར་དུ་ཐོབ་པར་འགྱུར་ཏེ། ཚུལ་འདི་ཆོས་གཞན་ཐམས་ཅད་ལ་ཡང་རིགས་བསྒྲེའོ། དཔེར་ན་འདོད་ཆགས་ཀྱི་ཆོས་ཉིད་བདེ་བ་འགྱུར་མེད་རྣམ་པ་ཐམས་ཅད་པ་ཡིན། དེ་ལ་བརྟེན་ནས་བྱུང་བའི་ཕྱིར། འདོད་ཆགས་ཉིད་ཀྱང་བདེ་བ་གནས་ལུས་ལོངས་སྤྱོད་ཀྱི་རྣམ་པ་ཅན་དུ་ཤར། དེ་ཡང་བདེ་བ་འགྱུར་བཅས་དང༌། རྣམ་པ་ཐ་མལ་བ་ཡིན་མོད་ཀྱི། རྣལ་འབྱོར་པས་འདོད་ཆགས་དང་ཆོས་ཉིད་བདེ་བ་རྣམ་བཅས་ཙམ་དུ་མཚུངས་པའི་ཆ་ནས་གཟུང་སྟེ། ཞུ་བདེ་འགྱུར་མེད་དང༌། སྟོང་གཟུགས་ཀྱི་སྐུའམ། བསྐྱེད་རིམ་གྱི་ལྷ་སྐུ་གནས་དང་མཆོད་པར་བཅས་པའི་རྣམ་པ་ཅན་ཚོགས་པ་གཅིག་ཏུ་ཡང་ཡང་བསྒྲུབས་པས་སྔར་གྱི་འདོད་ཆགས་ཀྱི་རིགས་རྒྱུན་དེ་ཡོན་ཏན་དུ་གྱུར་ནས་ཞུ་བདེ་འགྱུར་མེད་ཀྱི་ལྷ་སྐུའམ། ལམ་གྱི་ཆས་བསྡུས་པའི་མི་འགྱུར་བའི་བདེ་བར་འགྲོ་ཚུལ་སྒྲུབ་པ་པོ་ཉམས་རྟོགས་མཐོ་དམན་དང་བསྟུན་མོད། གང་ལྟར་ཡང་ལམ་གྱི་བདེ་བ་རྣམ་བཅས་དེ་བསྒོམས་པས་ནམ་ཞིག་འདོད་ཆགས་ཀྱི་བག་ཆགས་རང་ཟད་པ་ན། ཆོས་ཉིད་ཀྱི་བདེ་བ་རྣམས་པ་ཐམས་ཅད་པ་དེ་ཐོབ་པ་ཡིན་ཏེ། ཉོན་མོངས་ལམ་བྱེད་ཀྱི་གནད་མཐར་ཐུག་པ་ཡང་འདི་ཁོ་ནའོ། །དེ་དག་གི་ཚེ་ལུས་དང་འདོད་ཆགས་ལ་སྨོད་པ་དང༌། མི་མཐུན་པར་བལྟ་བ་དང༌། སྤོང་སེམས་ཀྱིས་སྤོང་པ་དང༌། བློ་ཐག་བཅད་ནས་རྒྱང་སྐྱུར་གྱི་ཚུལ་མི་བྱེད་པས་ཉོན་མོངས་མི་སྤོང་བ་དང༌། ལུས་མི་སྤོང་བ་ཞེས་ཐ་སྙད་བྱེད་ལ། ལུས་དང་འདོད་ཆགས་ནམ་གནས་གྱུར་པའི་མཚམས་ནས་
ཆེས་ཤིན་ཏུ་སྤངས་པའང་ཡིན་མོད་ཀྱི། རང་སྤངས་ལ་སོང་བ་ལས་གཞན་དུ་ཆེད་གཉེར་གྱིས་སྤངས་པ་མ་ཡིན་ནོ། །གཞིའི་མཆོག་ལུས་དང་འདོད་ཆགས་ཀྱི་ཆོས་ཉིད་ལ་དམིགས་ནས་སྤོང་བའི་དམིགས་གཏད་མི་བྱེད་པ་ལྟ་སྨོས་ཀྱང་ཅི་དགོས། ལུས་དང་འདོད་ཆགས་ཀྱི་རྫས་རྒྱུན་ལ་དམིགས་ནས་ཆེད་དུ་སྤོང་བ་དང་མི་མཐུན་པར་འཛིན་པ་མེད་པས། གཞི་ལུས་དང་འདོད་ཆགས་ཀྱི་རྫས་རྒྱུན་མི་སྤོང་ལ། ལུས་དང་འདོད་ཆགས་ཀྱི་སྟེང་དུ་སྣོན་ཁ་དང༌། ལོངས་སྤྱོད་དགའ་སྟོན་གྱི་ཚུལ་དུ་ལྷ་སྐུ་དང་བདེ་བ་རྣམ་བཅས་བསྒོམས་པས། ལུས་ཀྱི་སྡུག་བསྔལ་དང༌། འདོད་ཆགས་ཀྱི་སེམས་རྒྱུད་མ་རུངས་པར་བྱེད་པའི་ཆ་དེ་བཟློག་ནས། ལྷ་སྐུ་དང་བདེ་བ་ཁྱད་པར་ཅན་རྒྱུན་མི་ཆད་པར་ཤར་བ་ན། ལུས་དང་འདོད་ཆགས་ཀྱི་རྫས་རྒྱུན་དེ་གཉིས་ཀྱང༌། ལྷ་སྐུ་དང་བདེ་བར་གནས་འགྱུར་བའི་ཕྱིར་གཞི་བསྒྱུར་བ་ཞེས་བྱའོ། །དེ་ལྟར་ན། གཞི་བསྒྱུར་བའི་མིང་ཙམ་ཞིག་སྔགས་པར་འདོད་པ་ཀུན་གྱི་ཁ་ན་རྒྱུ་ཡང་དོན་ནི་མཁས་རློམ་ཕལ་གྱིས་ཀྱང་ཕྱོགས་མཐོང་ཙམ་ལས་གསལ་དག་ཏུ་གོ་བ་ཞིག་མི་འདུག་པས་འདིར་རྗེན་ཆེར་དུ་བཤད་དོ། །གཞི་བསྒྱུར་བའི་ལམ་ཞེས་པའི་དོན་དེ་ལྟར་ཡིན་ལ། ཁྱད་པར་ཅན་ཞེས་བྱ་བ་ནི། འདོད་ཆགས་ཆེན་པོའི་ལམ་ཡིན་པ་སྟེ། དེ་ཡང་ཐེག་དམན་གྱི་ལམ་ནི་ཆགས་བྲལ་ཁོ་ན་དང༌། ཐེག་ཆེན་མདོ་ནི་ཆགས་བྲལ་ཤས་ཆེ་བ་དང༌། རྒྱུད་སྡེ་འོག་མའི་ལམ་ནི་ཆ་མཉམ་པ་ཙམ་དང༌། འདིར་ནི་ཆགས་ཆེན་གྱི་ལམ་ཆེས་གཙོ་བོར་གྱུར་པའོ། །དེ་ལྟར་ན་འདུས་པ་ཕྱི་མ་ལས། གསང་སྔགས་ཀྱི་དོན་ཡིད་སྐྱོབ་པ་ལ་བཤད་པ་དང༌། དཔལ་དྲི་མ་མེད་པའི་འོད་ལས་ཀྱང༌། རྡོ་རྗེ་ཐེག་པ་ཞེས་པའི་རྡོ་རྗེའི་དོན་ཆོས་འདི་ཉིད་ཀྱི་རང་ལུགས་ལས་བྱུང་བའི་སྟོང་ཉིད་སྙིང་རྗེ་དབྱེར་མེད་དམ། བདེ་སྟོང་དབྱེར་མེད་ལ་བཤད་
དེ། ཡིད་སྐྱོབ་པའི་དོན་ནི་ལམ་སྒྱུར་བ་དང༌། བདེ་སྟོང་དབྱེར་མེད་ནི་ཆགས་ཆེན་གྱི་དོན་ཡིན་ནོ། །གཉིས་པ་ནང་སེལ་གཉིས་སུ་དབྱེ་བ་ནི། འོ་ན་དེ་འདྲ་བའི་ལམ་དེ་ལ་རང་འབྲས་དངོས་གྲུབ་སྒྲུབ་ཚུལ་རྣམ་པ་གཉིས་ཀྱི་དབྱེ་བ་རྟོགས་པའི་ཕྱིར། བསྐྱེད་པའི་རིམ་པ་དང༌། རྫོགས་པའི་རིམ་པ་གཉིས་སུ་དབྱེའོ། །དེ་གཉིས་ཀྱི་སྒྲ་དོན་ནི། བསྐྱེད་རིམ་གྱི་སྐད་དོད་ཨུཏྤ་ཏྟི་ཀྲ་མ་ཞེས་པ་ལ། ཨུཏྤ་ཏྟི་བསྐྱེད་པ་སྟེ་གསར་དུ་བཅོས་པའི་དོན་ཡིན་པ་དང༌། རྫོགས་རིམ་གྱི་སྐད་དོད་ནིཥྤནྣ་ཀྲ་མ་ཞེས་པའི་ནིཥྤནྣ་ནི་རྫོགས་པ་སྟེ། རྩོལ་མེད་ཤུགས་བྱུང་དུ་འབྱུང་བའི་དོན་ཡིན་ལ། དེ་གཉིས་ཀའི་ཀྲ་མ་ནི་རིམ་པ་སྟེ་ལམ་གྱི་གོ་རིམ་མམ། ཐབས་ཡིན་པའི་དོན་ ནོ།། །། གསུམ་པ་དབྱེ་བ་སོ་སོའི་རང་བཞིན་ནི། རྒྱུད་ལས། ལྷ་ཡི་དམིགས་པ་གང་ཡིན་མངོན་སུམ་དང་ནི་རྗེས་སུ་དཔག་པ་རྣམ་པ་གཉིས་སུ་འགྱུར་བ་སྟེ། །ཞེས་གསུངས་པ་ལྟར། བསྐྱེད་རིམ་གྱི་ངོ་བོ་ནི་རྗེས་སུ་དཔག་པའི་ལྷའི་རྣལ་འབྱོར་ཡིན་ལ། རྫོགས་རིམ་གྱི་ངོ་བོ་ནི། མངོན་སུམ་གྱི་ལྷའི་རྣལ་འབྱོར་ རོ། །དེ་ལ་རྗེས་སུ་དཔག་པའི་དོན་ནི། གཞན་ལས་རྒྱུ་མཚན་དྲན་པའི་ངེས་ཤེས་ཀྱི་ཁྱད་པར་ལ་འཇོག་པ་ལྟར། འདིར་ཡང་བྲིས་སྐུ་སོགས་ལ་བལྟ་བ་དང༌། ཚིག་ཏུ་བརྗོད་པ་ལས་དངོས་སུ་ཐོས་པའི་དོན་བསམས་ཏེ། སྔར་གྱི་མཐོང་ཐོས་དང་རྗེས་སུ་མཐུན་པར་དེ་མ་ཡིན་ཡང་དེ་དང་འདྲ་བའི་རྣམ་པ་ཤར་བའོ། །དེ་ནི་རྒྱུད་ལས། མངོན་སུམ་མེད་ན་རྗེས་སུ་དཔག་པ་ཤི་བའི་ལུས་བཞིན་དེ་ཉིད་མིན་པ་ཡིས་ནི་བརྟགས་པ་གང༌། །དེ་ནི་རི་མོ་སོགས་ལ་བལྟ་བྱ་ཡོངས་སུ་མ་སྨིན་བློ་ཅན་རྣལ་འབྱོར་རྣམས་ཀྱིས་བསྒོམ་པའི་དོན། །ཅེས་གསུངས་ཏེ། བྲིས་སྐུ་ལ་སོགས་པའི་རྣམ་པ་ལས་རྗེས་སུ་དཔགས་ནས། ལྷའི་སྐུ་ནི་འདི་འདྲའོ་ཞེས་ཡིད་ཀྱི་སྣང་ངོར་གསར་དུ་བཅོས་པ་ཙམ་ལས། གནས་ལུགས་ལ་ཞུགས་པའི་དེ་ཁོ་ན་ཉིད་མ་
ཡིན་ནོ། །རྫོགས་པའི་རིམ་པ་ནི། ཇི་སྐད་དུ། མངོན་སུམ་དག་ནི་དེ་ཉིད་སྦྱོར་བས་མཁའ་ལ་སྐར་མ་བཞིན་དུ་དུ་མ་ལོངས་སྤྱོད་རྫོགས་པའི་སྐུ། །ཞེས་ནམ་མཁའ་ལ་སྐར་མ་ཤར་བའི་དཔེ་འདིས་སྟོང་པ་ཉིད་ལས་མ་གཡོས་བཞིན་དུ་ཤར་བའི་དོན་དང༌། སྔར་མའི་གཟུགས་བརྙན་རྟོགས་པས་བསྒོམ་མི་དགོས་པར་མིག་གིས་དངོས་སུ་མཐོང་བ་ལྟར་རྫོགས་རིམ་གྱི་ལྷ་ནི་སྟོང་པར་བློས་གསར་དུ་སྒོམ་པ་ལ་མ་བལྟོས་པར་སྟོང་པའི་ངང་ལས་ཤར་ཞིང་ཤར་ནས་ཀྱང་སྟོང་པའི་རང་བཞིན་ལས་མ་འདས་པར་གནས་པ་དང། སྟོང་པ་དང་ལྷ་སྐུ་གཉིས་ཀར་རྣམ་རྟོག་གིས་བརྟགས་པ་མ་ཡིན་པར་དངོས་སུ་མྱོང་བའི་ཡུལ་དུ་བྱུང་བས་ན། མོས་པ་ཡིད་བྱེད་ཀྱི་རྣལ་འབྱོར་ཙམ་མ་ཡིན་པར་དེ་ཁོ་ན་ཉིད་ཀྱི་རྣལ་འབྱོར་རོ། །ཡང་འགའ་ཞིག་འདི་སྙམ་དུ། དེ་ཁོ་ན་ཉིད་ནི་དོན་དམ་པ་ཡིན་ལ། དེ་ཁོ་ན་ཉིད་ཀྱི་རྣལ་འབྱོར་དེ་ཡང་མངོན་སུམ་དུ་རྟོགས་པ་ལ་བྱེད་ན་ནི། སོ་སྐྱེའི་རྫོགས་རིམ་མེད་པར་འགྱུར་ཞིང༌། དམིགས་པའི་ཡུལ་མ་ནོར་བའི་སྒོ་ནས་བྱེད་ན་ནི། བསྐྱེད་རིམ་ཀྱང་དེ་ཁོ་ན་ཉིད་ཀྱི་ཡིད་བྱེད་དུ་མི་འགྱུར་རམ། རང་བཞིན་སྟོང་པ་ཉིད་དུ་ཤེས་པ་ཡོད་པས་སོ་སྙམ་ན། མ་ཡིན་ཏེ་འདིར་རེ་ཞིག་དེ་ཁོ་ན་ཉིད་ཅེས་པ་དོན་དམ་བདེན་པ་ཉག་གཅིག་ལ་འཇོག་མི་དགོས་ཏེ། འདུས་བྱས་མི་རྟག་པར་སྒོམ་པ་སོགས་དེ་ཡིན་པ་ལྟར། ཀུན་རྫོབ་འཁོར་བའི་རང་བཞིན་གནས་ལུགས་ནི་སྣང་བཅས་ཀྱི་ཡེ་ཤེས་ཡིན་པ་ལ། དེ་དང་མཐུན་པའི་གསལ་སྣང་ཤར་བའི་གནས་ཚུལ་དང་ཤིན་ཏུ་མཐུན་པའི་དེ་ཁོ་ན་ཉིད་ཀྱི་རྣལ་འབྱོར་ཡིན་ལ། སྣང་ཆ་དེ་མ་བརྟགས་པར་དངོས་སུ་སྣང་བའི་ཕྱིར། རྫོགས་པའི་རིམ་པ་ལ་མངོན་སུམ་ཞེས་བྱའོ། །བསྐྱེད་རིམ་ནི་དངོས་པོའི་རང་བཞིན་དཀྱིལ་འཁོར་དུ་གནས་པ་དེ་ལ་དམིགས་པ་ཙམ་ཡིན་ཡང༌། དེ་དང་རྣམ་པ་དང་མཚན་
ཉིད་མི་མཐུན་པ་ཆེ་བའི་ཕྱིར། །དེ་ཁོ་ན་ཉིད་མིན་པ་ཞེས་གསུངས་ལ། གོང་དུ་སྨོས་པ་ལྟར་རྟོག་སྒོམ་ཉིད་ཀྱི་ཕྱིར། མཆོག་ཏུ་བཟང་ཡང་རྗེས་དཔག་ལས་མ་འདས་སོ། །འོ་ན་ལུས་ཀྱི་ཆོས་ཉིད་ལྷ་སྐུའི་རྣམ་པ་ཅན་དུ་གནས་པར་ཁྱེད་འདོད་ན་ཅིའི་ཕྱིར་བསྐྱེད་རིམ་དེ་ཁོ་ན་ཉིད་ཡིད་བྱེད་མ་ཡིན། འཛིན་སྟངས་དང་གནས་ཚུལ་མཐུན་པས་སོ་སྙམ་ན། དེ་ཁོ་ན་ཉིད་ཡིད་བྱེད་ཙམ་ཡིན་དུ་ཆུག་ཀྱང༌། རྣམ་པར་རྟོག་པའི་རབ་རིབ་ཅན་གྱི་ཕྱིར་དེ་ཁོ་ན་ཉིད་རྣལ་འབྱོར་དུ་བྱེད་མི་ནུས་ལ། སྒྲུབ་པ་པོ་དེས་ལུས་ཀྱི་ཆོས་ཉིད་མངོན་སུམ་དུ་ནི་མ་མཐོང༌། གསལ་སྣང་ཡང་མ་སྐྱེས་པས་ཆོས་ཉིད་ལྷ་སྐུར་སྒོམ་པ་སོགས་སུ་རློམ་ཀྱང༌། ཆོས་ཉིད་ལ་བསྒོམས་པར་མ་སོང་དེའི་དོན་སྤྱི་ལ་བསྒོམས་པར་སོང་བས། དོན་སྤྱི་ནི་ལྷའི་སྐུར་མེད་པའི་ཕྱིར། ཡུལ་དང་རྣམ་པ་མཐུན་པ་མ་ཡིན་ནོ། །ཡང་ཆོས་ཉིད་ཅེས་བྱ་བ་མིང་རྐྱང་གཅིག་ལ་དམིགས་ན་དེ་ལྟར་འགྱུར་ཡང༌། ལུས་འདི་ཉིད་ལྷར་སྒོམ་པའམ། འདི་སྟོང་པར་སྦྱངས་པའི་ཤུལ་དུ་ལྷ་བསྒོམས་པས་གནས་ལུགས་ལ་རེག་པར་འགྱུར་སྙམ་ནའང༌། མ་དག་པའི་ལུས་འདི་ཡང་ལྷ་སྐུ་མ་ཡིན་ལ། འདི་སྦྱངས་པའི་ཤུལ་ཡིད་ངོའི་སྟོང་པ་དེ་ཡང་ལྷ་སྐུ་མ་ཡིན་པས། དེ་འདྲ་དེ་ལྷ་སྐུར་སྒོམ་པ་གནས་ཚུལ་དང་མཐུན་པ་མ་ཡིན་ནོ། །རྫོགས་རིམ་མ་བརྟགས་པར་རང་ཤར་བའི་ལྷ་སྐུ་ནི་ཐམས་ཅད་ཀྱང་གནས་ལུགས་དོན་དམ་པའི་ལྷ་སྐུའི་ཆ་ཤས་ཙམ་དངོས་སུ་ཤར་བའང་ཡིན་ལ། འགའ་ཞིག་རྐྱེན་གྱིས་བྱུང་བ་ཡིན་དུ་ཆུག་ཀྱང༌། གནས་ལུགས་ཀྱི་ལྷ་དེ་དང་ཤིན་ཏུ་འདྲ་བའི་ཕྱིར་དང༌། རྣམ་རྟོག་གི་རྩོལ་བ་དང་བྲལ་བའི་ཕྱིར། སྔ་མ་དང་མི་འདྲ་སྟེ་ལུས་དང་ལུས་ཀྱི་བཤུལ་དང༌། ཆོས་ཉིད་ཀྱི་དོན་སྤྱི་སོགས་ལ་མི་བསྒོམ་སྟེ། ཆོས་ཉིད་དངོས་སམ་དེའི་སྣང་བརྙན་ལ་རྗེན་པར་སྒོམ་པའི་ཕྱིར་རོ། །གནས་འདི་ལ་ཁྱད་པར་དུ་ཡང་དོན་
དམ་ཆོས་ཉིད་ཀྱི་ལྷ་སྐུ་རྣམ་བཅས་མི་འདོད་པ་རྣམས་ལ་ནི། བསྐྱེད་རིམ་ནམ་དུ་ཡང་དེ་ཁོ་ན་ཉིད་ཡིད་བྱེད་དུ་འགྱུར་བའི་དྲི་ཙམ་ཡང་མེད་དེ། ཐ་མལ་གྱི་ལུས་སམ། དེ་སྦྱངས་པའི་ཤུལ་ཙམ་མམ། དེའི་ཆོས་ཉིད་སྟོང་པ་ཙམ་མམ། རིག་སྟོང་ཟུང་འཇུག་ཙམ་མམ། འབྲས་བུ་སངས་རྒྱས་འབྱུང་བའི་ནུས་པ་ཙམ་མམ་གང་ལ་དམིགས་ནས་བསྒོམས་ཀྱང་འདྲ་སྟེ། མཚན་དཔེའི་རྣམ་པ་ཅན་གྱི་ལྷ་སྐུར་མེད་པའི་ཕྱིར་རོ། །འགའ་ཞིག་ལྟར་མ་འོངས་པ་ཐོབ་འགྱུར་གྱི་ལྷ་སྐུ་ལ་བསྒོམ་སྙམ་ན། མ་འོངས་པའི་ཆོས་ད་ལྟ་བའི་དུས་ན་ནམ་དུའང་མེད་པའི་ཕྱིར་དང༌། འདི་ནི་དུས་ཤིན་ཏུ་རིང་པོས་ཆོད་པའི་ཕྱིར། ཡིན་པ་ལ་ཡིན་པར་འདུ་ཤེས་པའི་དེ་ཁོ་ན་ཉིད་ཡིད་བྱེད་དེ་ཕྱོགས་སུ་ཡང་མ་བྱུང་སྟེ་མ་འོངས་པ་ད་ལྟ་བར་སྒོམ་པའམ། ད་ལྟ་བ་དེ་མ་འོངས་པར་བསྒོམ་པའི་ལོག་རྟོག་ཤིན་ཏུ་ཐ་ཆད་པར་འགྱུར་རོ།། །།བཞི་པ་རང་བཞིན་དོན་ལྡན་གྱི་མཚན་ཉིད་ནི། མངོན་སུམ་དང་རྗེས་དཔག་གི་ལམ་དེ་དག་ལ་ཁྱད་ཆོས་ཇི་ལྟ་བུ་ཞེ་ན། བསྐྱེད་རིམ་ལ་རྣམ་རྟོག་གི་བརྟགས་པའི་ལྷ་སྐུ་ཡིན་པ་ཙམ་གྱིས་བསྐྱེད་རིམ་དུ་མ་ངེས་ཀྱང༌། ཁྱད་གཞི་རྣམ་རྟོག་གིས་བརྟགས་པའི་ལྷ་སྐུ་ལ་ཁྱད་ཆོས་ཆོ་གའི་ཁྱད་པར་རྒྱལ་བས་སྔགས་རྒྱུད་ལས་གསུངས་པའི་བསྐྱེད་ཆོག་གི་རིམ་པ་ཚང་བ། ངོ་བོའི་ཁྱད་པར་ཐུན་མོང་མ་ཡིན་པའི་ཞུ་བདེའི་ཆ་ཤས་དང་སྟོང་ཉིད་ཀྱིས་རྒྱས་བཏབ་པ། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་སྐྱེད་པར་བྱེད་པ་སྟེ། ཁྱད་པར་བཞི་ལྡན་ནམ། འཇུག་པའི་ཁྱད་པར་སློབ་དཔོན་གྱིས་བྱིན་གྱིས་བརླབས་པ་སྟེ་ལྔ་ལྡན་ནོ། །ཁྱད་པར་གཉིས་པ་དང་གསུམ་པ་ནི། བསྐྱེད་རིམ་གྱི་ཐུན་མོང་མ་ཡིན་པའི་ཁྱད་ཆོས་ཡིན་ལ། གཞན་རྣམས་ནི་རྒྱུད་སྡེ་བཞིའི་ལྷའི་རྣལ་འབྱོར་ཐམས་ཅད་ལ་དགོས་སོ། །དག་རྫོགས་སྨིན་གསུམ་ཞེས་བྱ་བ་ནི། གཞི་འཁོར་བའི་སྲིད་
པ་སྐྱེ་བའི་རིམ་པ་རྣམས་འདྲ་མཚུངས་ཀྱི་སྒོ་ནས་དག་པར་བྱེད་པ་དང༌། འབྲས་བུ་སངས་རྒྱས་ཀྱི་ཆོས་རྣམས་རྣམ་པ་མཚུངས་པའི་སྒོ་ནས་རྫོགས་པ་སྟེ་ཐོབ་པར་བྱེད་པའི་རྒྱུ་དང༌། ལམ་གོང་མ་རྫོགས་རིམ་བསྒོམ་པའི་གཞི་འདིངས་ཤིང་རྒྱུད་སྨིན་པར་བྱེད་པ་རྣམས་སོ། །རྫོགས་པའི་རིམ་པ་ལ་ནི། ངོ་བོ་རྣམ་པར་མི་རྟོག་པའི་ཡེ་ཤེས་ལ་ཁྱད་ཆོས་རྒྱུའི་ཁྱད་པར་རྡོ་རྗེ་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་བྱེད། རྣམ་པའི་ཁྱད་པར་བདེ་བ་ཆེན་པོ་དང་སྟོང་གཟུགས་ལྷན་ཅིག་པ་སྟེ། ཁྱད་པར་གསུམ་ལྡན་ནོ། །འདིའི་རང་བཞིན་ནི་རྣལ་འབྱོར་ཡན་ལག་དྲུག་པའི་མན་ངག་གི་ཡི་གེ་དང༌། བཤད་འབུམ་དུ་གཏན་ལ་ཕབ་ཟིན་པ་ལས་ཤེས་པར་བྱའོ།། །།ལྔ་པ་ཉམས་ལེན་སྒྲུབ་པའི་དགོས་པ་ནི། དཔལ་དྲི་མ་མེད་པའི་འོད་ལས། དེ་ནས་དཀྱིལ་འཁོར་དུ་ཞུགས་པ་ལས་འཇིག་རྟེན་པའི་དབང་སྦྱིན་པས་བསོད་ནམས་ཀྱི་ཚོགས་ཀྱི་དོན་བྱེད་པ་ནི་དགོས་པའོ། །ཤེས་རབ་ཆེན་པོ་འཇིག་རྟེན་ལས་འདས་པའི་དབང་བཞི་པ་སྦྱིན་པས་རིས་མེད་པ་ཕྱག་རྒྱ་ཆེན་པོའི་དངོས་གྲུབ་ཐོབ་པ་དང༌། བསོད་ནམས་དང་ཡེ་ཤེས་ཀྱི་ཚོགས་ཀྱི་དོན་བྱེད་པ་ནི། དགོས་པའི་དགོས་པ་སྟེ་ཞེས་གསུངས་པ་དང༌། གཞན་ཡང་སྔ་ཕྱིར་དེ་ལྟར་གསུངས་པ་མང་སྟེ། ལས་ཚོགས་དང་ཐུན་མོང་གི་དངོས་གྲུབ་སྒྲུབ་པ་གཙོ་བོར་བྱས་པས་རང་གཞན་གྱི་བསོད་ནམས་རྒྱ་ཆེན་པོ་གསོག་པ་དང༌། གང་ཟག་གི་དབང་པོའི་ཁྱད་པར་ལས་མང་པོ་ཞིག་བསྐྱེད་རིམ་མེད་པར་རྫོགས་རིམ་གྱི་རྟོགས་པ་བསྐྱེད་མི་ནུས་པའི་རིགས་ལ་རྫོགས་རིམ་གྱི་རྟོགས་པའི་རྒྱུད་སྦྱང་བའི་དོན་དང༌། ཁ་ཅིག་རྫོགས་རིམ་ཁོ་ན་བསྒོམས་པས་ཡེ་ཤེས་སྐྱེ་རུང་ཙམ་ཡིན་ཡང༌། བསྐྱེད་རིམ་སྔོན་དུ་སོང་བའམ། སྦགས་ཏེ་བསྒོམས་ན་རྫོགས་རིམ་གྱི་ཡེ་ཤེས་མྱུར་དུ་སྐྱེ་བ་དང༌། བོགས་ཆེ་བའི་རིགས་ཅན་ལ་རྫོགས་རིམ་མྱུར་
དུ་སྐྱེད་པ་དང༌། ལྷག་པར་སྐྱེད་པའི་དོན་དང༌། འགའ་ཞིག་ཚེ་དེ་ལ་རྫོགས་རིམ་སྒོམ་པར་མི་ནུས་པ་དང༌། མི་མོས་པའི་རིགས་ཅན་དག་རྗེས་སུ་བཟུང་བ་དང༌། རྫོགས་པའི་རིམ་པའི་རྣལ་འབྱོར་པ་ལའང་བསྐྱེད་རིམ་གྱིས་བོགས་འབྱིན་པའི་གནས་སྐབས་ཡོད་པས་བསྐྱེད་པའི་རིམ་པ་བསྒོམ་པར་བསྟན་པའི་དགོས་པ་ནི་དེ་དག་ཡིན་ནོ། །སྐབས་འདིར་ལས་ཚོགས་ནི། ལས་ཆེན་བརྒྱད་དང་བཅུ་གཉིས་ལ་སོགས་པ་མཐའ་ཡས་པ་རྣམས་སོ། །དངོས་གྲུབ་ནི་ཆུང་ངུ་དང༌། འབྲིང་དང༌། ཆེན་པོ་སྟེ་ཐུན་མོང་གི་དངོས་གྲུབ་འབའ་ཞིག་གོ །ཆུང་ངུ་ནི་གྲུབ་པ་བརྒྱད་ལ་སོགས་པའོ། །འབྲིང་པོ་ནི་ལྷ་མིན་ནམ་ཀླུ་སོགས་དང་སྐལ་བ་མཉམ་པ་ས་འོག་གི་རིག་འཛིན་དང༌། གནོད་སྦྱིན་སྲིན་པོ་དྲི་ཟ་མིའམ་ཅི་སོགས་དང་སྐལ་བ་མཉམ་པའི་ས་སྟེང་གི་རིག་འཛིན་དང༌། འདོད་ལྷ་རིགས་དྲུག་སོ་སོ་དང་སྐལ་བ་མཉམ་པའི་ས་བླའམ། མཁའ་སྤྱོད་ཀྱི་རིག་འཛིན་གསུམ་མོ། །ཆེན་པོ་ནི་འོག་མིན་གྱི་མཐར་ཐུག་པ་གཟུགས་ཁམས་གནས་རིགས་བཅུ་དྲུག་གི་ལྷ་སོ་སོ་དང་སྐལ་བ་མཉམ་པའི་རིག་འཛིན་ནོ། །རྣམ་པར་སྨིན་པའི་མི་ལུས་འདི་མ་སྤངས་པར་གནས་གྱུར་ཏེ། གཟུགས་མེད་ཁམས་ཀྱི་ལྷར་འགྱུར་བ་གསལ་བར་མ་བཤད་པས། དེའི་རིག་འཛིན་གྱི་ཐ་སྙད་མི་འཆད་མོད། རྗེས་མཐུན་པ་ནི་ཡོད་པར་མངོན་ཏེ། འོན་ཀྱང་ལུགས་འདི་ལ་འོག་མིན་གྱི་རིག་འཛིན་ལས་རྟོགས་པ་མཐོ་བ་ནི་མ་ཡིན་པར་ཤེས་པར་བྱའོ། །གང་དག་གཟུགས་མེད་ཁམས་ལ་གཟུགས་ཅན་གཏན་ནས་མེད་པ་དང༌། བར་དོ་མེད་པ་སོགས་ཉན་ཐོས་སྡེ་པ་ཐམས་ཅད་ཡོད་སྨྲའི་གྲུབ་མཐའ་དུས་འཁོར་གྱི་སྐབས་སུ་ཡང་ཨུ་ཚུགས་སུ་འཁྱེར་བ་ནི། རྒྱུད་ལས། གཟུགས་མེད་ཁམས་ལ་གནས་འཇིག་རྟེན་ཁམས་ཀྱི་ངེས་པ་བཤད་པ་དང༌། འགྲེལ་ཆེན་མདོར་བསྡུས་གཉིས་པར།
ཁམས་གསུམ་གྱིས་ཕྱག་བྱས་པ། ཞེས་པའི་སྐབས་སུ། གཟུགས་མེད་ཁམས་པས་ཀྱང་ཕྱག་བྱས་པར་བཤད་པ་སོགས་དང་འགལ་ཏེ་ལུས་གཏན་ནས་མེད་ན། གནས་ཀྱི་དགོས་པ་སྟོང་པ་དང༌། ཕྱག་ཇི་ལྟར་འཚལ། འདི་དག་གིས་ནི་ཐེག་པ་ཆེན་པོའི་མདོ་སྡེ་རྣམས་ངེས་པོར་མ་བཀླགས་ཤིང༌། ཐེག་ཆེན་རྒྱུད་བླའི་འགྲེལ་བར་ཐོགས་མེད་ཀྱིས་དྲངས་པའི་མདོ་སྡེའི་ལུང་མང་པོ་ལའང་རང་བཟོའི་ཞུས་དག་བྱས་ཏེ་དག་པ་རྣམས་མ་དག་པར་བཅོས་སོ། །ལས་དང་དངོས་གྲུབ་འདི་དག་བསྐྱེད་རིམ་པས་ཆེད་ཀྱིས་བསྒྲུབ་དགོས་ལ། རྫོགས་རིམ་པས་སྲོག་གཟུགས་གྲུབ་ན་ལས་ཚོགས་རྣམས་འབད་མེད་དུ་འགྲུབ་ཅིང༌། གྲུབ་པ་བརྒྱད་སོགས་ཀྱང་འདོད་ན་ཅི་བདེར་འགྲུབ་ལ། རྗེས་དྲན་ཚུན་ཆད་ཐུན་མོང་གི་རིག་འཛིན་དེ་དག་ཀྱང་འགྲུབ་པ་ཡོད་དོ། །རྫོགས་པའི་རིམ་པ་བསྒོམས་པའི་དགོས་པ་ནི། ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་བསྒྲུབ་པའི་ཕྱིར་ཏེ། དེ་ཡང་གཞན་དུ་བཤད་ཟིན་ཏོ།། །།དྲུག་པ་གྲངས་དང་གོ་རིམ་ངེས་པ་ནི། སྤྱིར་གཞི་སྒྱུར་བའི་ལམ་རིམ་པ་གཉིས་པོ་འདི་ལ་གནས་སྐབས་བཞི་དང༌། ཕྱི་ནང་གི་ཟླ་བའི་ཆ་བཅུ་དྲུག་སྦྱོང་བར་བྱེད་པའི་ལམ་ཚང་བ་དང༌། རྡོ་རྗེ་བཞི་ལམ་བྱེད་དང༌། འགྱུར་མེད་ཀྱི་དགའ་བ་བཅུ་དྲུག་སྒྲུབ་པར་བྱེད་པའི་ཐབས་རྣམས་རྣམ་གྲངས་ཆ་ཚང་བའི་གྲངས་ངེས་ནི་ངེས་པར་དགོས་ཏེ། རྫོགས་རིམ་ལ་ནི་དེ་དག་དངོས་སུ་ཡོད་ཅིང༌། བསྐྱེད་རིམ་ལ་ནི་རྣམ་པ་འདྲ་བ་དང་གཞི་འདིངས་པའི་སྒོ་ནས་འབྲེལ་པས་ལམ་དུ་བྱེད་པ་དགོས་སོ། །དེ་ལྟར་ཡང༌། སྣ་ཚོགས་རྣམ་རྟོག་ལ་སོགས་ལམ་གྱི་ནི། །དེ་ཉིད་དེ་བཞིན་གཤེགས་པས་གང་གསུངས་པ། །བཅུ་དྲུག་བཞི་ཡི་རབ་ཏུ་དབྱེ་བ་ ཅན། །ལམ་དང་བྲལ་བས་ཐོབ་པ་མ་ཡིན་ནོ། །ཞེས་གསུངས་ཏེ། རྫོགས་རིམ་གྱི་སྒོ་ནས་འབྲས་བུ་མཆོག་གི་དངོས་གྲུབ་ཐོབ་པ་ལ་གནས་སྐབས་བཞི་སྦྱོང་བྱེད་དང༌། རྡོ་རྗེ་བཞི་ལམ་དུ་བྱེད་པ་དང༌།
འགྱུར་བཅས་ཀྱི་ཐིག་ལེ་བཅུ་དྲུག་བཀག་ནས་འགྱུར་མེད་ཀྱི་ཐིག་ལེ་བཅུ་དྲུག་སྒྲུབ་པའི་ཐབས་རྣམས་མང་མི་དགོས་ཤིང་ཉུང་ན་མི་འདུ་བའི་གྲངས་ངེས་སོ། །བསྐྱེད་རིམ་གྱི་སྒོ་ནས་རིག་པ་འཛིན་པའི་དངོས་གྲུབ་སྒྲུབ་པ་ལའང་མོས་སྒོམ་གྱི་རྒྱུ་ལས་བྱུང་བའི་གསལ་སྣང་ཅན་གྱི་ཏིང་ངེ་འཛིན་ལ། དེ་དག་གི་རྣམ་པ་ལམ་བྱེད་ཚང་དགོས་པ་ཡང་མང་མི་དགོས་ཤིང་ཉུང་ན་མི་འདུ་བའི་གྲངས་ངེས་སོ། །འདི་དག་ནི་ངེས་ཅན་ཡིན་ལ། རྫོགས་པའི་སངས་རྒྱས་ཐོབ་པར་བྱེད་པ་ལ་ལམ་བསྐྱེད་རྫོགས་གཉིས་སུ་གྲངས་ངེས་པར་བྱེད་པ་ནི་དགོས་པ་ལ་བལྟོས་པའི་གྲངས་ངེས་ཏེ། འགའ་ཞིག་ལ་རྫོགས་རིམ་ཁོ་ནས་ཆོག་པའི་ཕྱིར། ཉུང་ན་མི་འདུ་བ་ཡང་མཐའ་གཅིག་ཏུ་མ་ཡིན་ལ། ཚོགས་ཀྱི་སྒོ་དུ་མ་ནས་གསག་དགོས་པའི་ཕྱིར་དང༌། རྒྱུད་སྦྱང་བ་སྔོན་དུ་གཏོང་དགོས་པའི་རིགས་ཅན་སོགས་ལ་གཉིས་པོ་ལས་མང་བ་མི་དགོས་པ་ཡང་མ་ཡིན་ ནོ། །འོན་ཀྱང་ཐེག་པ་འདིའི་ཆེད་དུ་བྱ་བའི་གདུལ་བྱ་ནི་ཡིན་ལ། དབང་པོ་རྣོ་བརྟུལ་གཉིས་ཀྱི་ཟླས་ཕྱེ་བའི་བརྟུལ་པོར་གྱུར་པ་རྣམས་ཀྱི་དབང་དུ་བྱས་ནས། བསྐྱེད་རིམ་ལམ་གྱི་སྔོན་འགྲོ་དང༌། རྫོགས་རིམ་ལམ་དངོས་གཞི་ཡིན་པའི་རིམ་པ་དང༌། སྤྱིར་ཡེ་ཤེས་ཚོགས་ཀྱི་གཞི་འདིངས་པ་བསོད་ནམས་ཀྱི་ཚོགས་ཡིན་ཞིང༌། འདིར་ཡེ་ཤེས་ཀྱི་ཚོགས་ཁྱད་པར་ཅན་རྣམ་པ་ཐམས་ཅད་པའི་ཡེ་ཤེས་སྐྱེ་བའི་གེགས་བསལ་བའི་རྒྱུར་བསོད་ནམས་ཀྱི་ཚོགས་བསྐྱེད་པའི་རིམ་པ་བསྒོམ་པར་འདོད་པའི་ཕྱིར། སྔོན་འགྲོ་དངོས་གཞིའམ། རྟེན་བརྟེན་པའི་སྒོ་ནས་གཉིས་སུ་གྲངས་ངེས་དང༌། ཚོགས་གཉིས་རྒྱུ་འབྲས་ཀྱི་སྒོ་ནས་གཉིས་སུ་གྲངས་ངེས་པའང་ཡིན་ལ། དེ་བཞིན་དུ་བདེན་པ་གཉིས་ཀྱི་རིམ་པས་ཀྱང་གྲངས་ངེས་ཏེ། ཇི་སྐད་དུ། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་གནས། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་
པའོ། །དེ་བཞིན་དུ། རྡོ་རྗེ་ཅན་དག་གིས་བསྟན་པ། རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང༌། །རྫོགས་པ་ཡི་ཡང་རིམ་ཉིད་དོ། ཞེས་གསུངས་ནས། དེ་ལ་དེང་སང་ཕལ་གྱིས་གོ་ལུགས་ལྟར་ཀུན་རྫོབ་དང༌། དོན་དམ་ཞེས་བྱ་བ། ཀུན་རྫོབ་རྟེན་འབྲེལ་སྣ་ཚོགས་དང༌། དོན་དམ་སྤྲོས་བྲལ་ཙམ་གྱི་དབང་དུ་བྱས་པའི་སྒོ་ནས་རིམ་པ་གཉིས་འཇོག་པ་ནི་མ་ཡིན་ཏེ། གཉིས་ཀས་གཉིས་ཀ་དམིགས་པའི་ཡུལ་དུ་ནི་བྱེད་ཅིང༌། བདེན་གཉིས་འཇོག་བྱེད་མཐར་ཐུག་ཡང་དེ་ཙམ་ལ་མ་བལྟོས་པའི་ཕྱིར་རོ། །ཀུན་རྫོབ་རྣམ་ཀུན་མཆོག་ལྡན་གྱི་སྟོང་ཉིད་དང༌། དོན་དམ་མི་འགྱུར་བའི་བདེ་བ་ལ་ཡང་མི་བཞག་སྟེ། ཐེག་པ་འདིའི་བདེན་གཉིས་མཐར་ཐུག་དེ་ཡིན་ཡང༌། དངོས་སུ་ལམ་དུ་བྱེད་པའི་སྒོ་ནས། དེ་གཉིས་ཀར་རྫོགས་རིམ་གྱིས་གཙོ་ཆེ་ཆུང་མེད་པར་སྒྲུབ་དགོས་ལ། བསྐྱེད་རིམ་གྱིས་དངོས་སུ་ནི་གཉིས་ཀར་བྱེད་མི་ནུས། མོས་པས་ལམ་དུ་བྱེད་པ་ལ་ནི། གཙོ་ཆེ་ཆུང་གི་ཁྱད་པར་མེད་པར་ཆ་མཉམ་དུ་སྤྱོད་དགོས་པས་སོ། །དེས་ན་ཀུན་རྫོབ་འཇིག་རྟེན་སྐྱེ་བའི་རིམ་པ་དང༌། དོན་དམ་འཇིག་རྟེན་འགག་པའི་རིམ་པ་ལ་སྦྱར་ཏེ། བསྐྱེད་རིམ་ཀུན་རྫོབ་བདེན་པའི་རྣལ་འབྱོར་དང༌། རྫོགས་རིམ་དོན་དམ་བདེན་པའི་རྣལ་འབྱོར་ཞེས་བྱའོ། །འོ་ན་བསྐྱེད་རིམ་གྱི་ཆ་འགའ་ཞིག་ཀྱང་འཆི་བ་དང་སྦྱོར་བ་སོགས་ཡོད་པས་སྐྱེ་བའི་རིམ་པ་ཀུན་རྫོབ་ཁོ་ན་སྦྱོང་བྱེད་དུ་ཇི་ལྟར་འཐད་སྙམ་ན། བདེན་ཏེ་འོན་ཀྱང་སྐྱེ་བ་དང་འགག་པ་ཞེས་བྱ་བ། གནས་སྐབས་དེ་དང་དེའི་ཁྱད་པར་ཙམ་ཡིན་གྱི། གཞི་དང་དངོས་པོ་སོ་སོར་གྲུབ་པ་མེད་དོ། །དེ་ལྟ་ན་འདུས་བྱས་ཐམས་ཅད་རྟག་ཏུ་སྐྱེ་བ་ཡང་ཡིན་ཞིང༌། རྟག་ཏུ་འཇིག་པ་ཡང་ཡིན་པས་སྐྱེ་འཇིག་འདི་དག་མཚན་ཉིད་ཀྱི་ཆོས་ཡིན་གྱི། རང་གི་ངོ་བོ་ཉིད་ཀྱིས་སམ་རྫས་ཀྱི་མཚན་གཞིའི་ཆོས་སུ་མི་འགྱུར་རོ། །དེས་ན་འགྲོ་བ་གང་ཞིག་སྐྱེ་བ་བཟུང་ནས་ཚེ་ཟད་པའི་མཐར་
ཐུག་པ་སྐད་ཅིག་རེ་རེ་རང་རང་གི་ངོ་ཐོག་དེ་ན་སྐྱེ་བའི་མཚན་ཉིད་ཅན་ཤ་དག་ཀྱང་ཡིན་ལ། ཡང་དུས་དེ་ཉིད་དུ་འགག་ཅིང་འཇིག་པའི་མཚན་ཉིད་ཅན་འབའ་ཞིག་ཀྱང་ཡིན་པའི་ཕྱིར། སྐྱེས་བུའི་སྐྱེ་བ་དེ་ལ་ཚེ་སྟོད་སྨད་ལྟ་བུར་ཁྱད་གཞི་སོ་སོར་ཕྱེ་ནས། སྐྱེ་འཇིག་གི་ཆ་སོ་སོ་ལ་སྦྱོར་རྒྱུ་མེད་དོ། །དེས་ན་འཆི་བ་ནི་འཇིག་པའི་མཚན་ཉིད་ཅན་ཡིན་པར་སོ་སོ་སྐྱེ་བོའི་མངོན་སུམ་གྱིས་གྲུབ་ཅིང་ཀུན་ཏུ་གྲགས་པ་ལྟར་ཡང་ཡིན་མོད་ཀྱི། རིགས་པར་ན་སྐྱེ་བའི་མཚན་ཉིད་ཅན་ཡང་ཡིན་ཏེ། འཆི་བའི་གནས་སྐབས་རང་ཉིད་གསར་དུ་སྐྱེས་པའི་ཕྱིར་རོ། །དེས་ན་འཆི་བ་ནི་དངོས་པོ་གཞན་ཞིག་པའི་གནས་སྐབས་ལ་བཏགས་མོད། འཆི་བ་རང་ཉིད་ཞིག་པའི་ཆ་ལ་མི་འདོགས་ཏེ། འཆི་བ་ཉིད་སྐྱེ་ཞིང་གནས་པའི་ཆ་ལ་འཇོག་པས་ན། ཀུན་རྫོབ་འཇིག་རྟེན་སྐྱེ་བའི་རིམ་པ་ཉིད་དུ་འཇོག་པ་ལ་མི་འགལ་ལོ། །དེའི་ཕྱིར་སྦྱང་བྱ་སེམས་ཅན་གྱི་འཆི་བ་བར་དོ་སྐྱེ་བ་གསུམ་འབྲེལ་ཆགས་སུ་འབྱུང་བ་གཅིག་ལ་དངོས་པོ་རྣམས་སྐྱེད་པའི་བྱ་བ་ཡང་རྒྱུན་མི་ཆད་ཅིང༌། རང་དུས་ཀྱི་སྐད་ཅིག་གཉིས་པར་འཇིག་པའི་ཆོས་ཀྱང་རྒྱུན་མི་ཆད་པར་ཡོད་པ་ལས། སྐྱེད་ཅིང་སྐྱེ་བའི་ཕྱོགས་ཀྱི་རྣམ་པ་དང་མཐུན་པར་མོས་སྒོམ་བྱེད་པའི་རྣལ་འབྱོར་ནི་བསྐྱེད་རིམ་ཡིན་ལ། སྐད་ཅིག་རེ་རེར་ཀུན་རྫོབ་ཀྱི་དངོས་པོ་དེ་རྣམས་འགག་ཅིང་སྟོང་པར་ཐིམ་པའི་རིམ་པ་དང་རྣམ་པ་མཐུན་པར་མངོན་སུམ་དངོས་སམ་རྗེས་མཐུན་གྱི་ཚུལ་གྱིས་སྒོམ་པ་ནི་རྫོགས་པའི་རིམ་པའོ། །དངོས་སུ་ན་སྐྱེ་འཇིག་གཉིས་ཀར་ཀུན་རྫོབ་དང་འཁོར་བ་ཡིན་མོད་ཀྱི། གསར་དུ་སྐྱེ་བ་ནི་འཁོར་བ་བྱུང་བ་དངོས་ཡིན་ལ། དེ་དང་དེ་འགགས་པ་ནི་འགགས་པ་དེ་ཉིད་ཀྱི་ཆ་ནས་འཁོར་བའི་ཆོས་དེ་དག་ཐིམ་པ་ཡིན་པས་མྱ་ངན་ལས་འདས་པ་དང་ཆོས་འདྲ་ཞིང༌། རྣམ་པ་ཕྱོགས་མཚུངས་པའི་སྒོ་ནས་དོན་དམ་ཞེས་བཞག་གོ །
འོ་ན་རྫོགས་རིམ་གྱི་སྐབས་སུ་ཡེ་ཤེས་ཀྱི་སྣང་བ་སྐྱེད་པ་མ་ཡིན་ནམ་ཞེ་ན་ཡིན་མོད་ཀྱི། རྣམ་རྟོག་གི་རྒྱུ་ལས་སྐྱེད་པ་ནི་ཀུན་རྫོབ་འབའ་ཞིག་པ་དང༌། འཇིག་རྟེན་སྐྱེད་པ་ཁོ་ན་ཡིན་ལ། མ་བརྟགས་པར་ཤར་བའི་ཡེ་ཤེས་ཀྱི་སྣང་བ་ཡང་ངེས་པར་དཔྱད་ན་ཀུན་རྫོབ་དོན་དམ་གཉིས་ཀའི་ཆ་ཡོད་མོད་ཀྱི། དོན་དམ་གཙོ་བོ་ཡིན་ཞིང༌། སྲིད་པ་སྐྱེད་པའི་རིམ་པ་མ་ཡིན་ནོ། །དེས་ན་སྐབས་འདིར་ཀུན་རྫོབ་དོན་དམ་ཞེས་པ། སྦྱང་བྱ་གཞི་འཁོར་བའི་ཆོས་ཁོ་ན་ལས་ཕྱེ་བའི་སྐྱེ་བ་ཀུན་རྫོབ་དང༌། འཇིག་པ་དོན་དམ་ཉིད་ཡིན་པ། སྦྱོང་བྱེད་ལམ་རིམ་པ་གཉིས་ཀྱིས་སྦྱོང་བས། སྐབས་འདིའི་བདེན་གཉིས་ཀྱི་གྲངས་ངེས་ནི་དེ་ལྟར་ཡིན་ལ། དེ་ཡང་གཙོ་བོའི་དབང་དུ་བྱས་ཀྱི་གཉིས་ཀས་གཉིས་ཀ་མི་སྦྱོང་བ་ནི་མ་ཡིན་མོད། ཤིན་ཏུ་མཐར་གཏུགས་པ་ན་སྐྱེ་འཆི་གཉིས་ཀར་རྫོགས་རིམ་གྱིས་སྦྱོང་བ་ཡིན་མོད་ཀྱང༌། རེ་ཞིག་དེ་སྒོམ་པའི་སྐལ་བ་མེད་པ་ལ་དང་པོ་ཉིད་ནས་ཀྱང་བསྐྱེད་རིམ་ནི། འཁོར་བ་སྐྱེད་པའི་རྣམ་རྟོག་མགོ་གནོན་གྱི་གཉེན་པོ་སྟོབས་ཆེན་པོ་དང་ལྡན་པ་ཡིན་ལ། འཇིག་པའི་རྣམ་རྟོག་གི་ཡང་གཉེན་པོ་ཅི་ཡང་ཅུང་ཟད་ཙམ་བྱེད་མོད་ཀྱི། སྐྱེད་པའི་ཕྱོགས་ལ་འཇུག་པ་ཙམ་གྱི་སྟོབས་མི་བྱེད་པ་དང༌། བསྐྱེད་རིམ་གྱི་ལམ་ཡང་གང་ཟག་འགའ་ཞིག་ལ་གནས་སྐབས་འགའ་ཞིག་ཏུ་ངེས་པར་དགོས་པའི་ཡང་ཕྱིར། དགོས་པ་འདི་ལ་བལྟོས་ནས་རིམ་པ་གཉིས་ཞེས་གྲངས་ངེས་སུ་མཛད་པའོ།། །།གཉིས་པོའི་གོ་རིམ་ངེས་པ་ནི། རྡོ་རྗེ་སྙིང་འགྲེལ་ལས། དང་པོར་རེ་ཞིག་ཞིང་དག་ཕྱིར། །ཁྲེ་ཙེ་རྣམས་ནི་བཏབ་པར་འགྱུར། །ཕྱི་ནས་དག་པའི་ཞིང་ལ་ ནི། །ས་ལུའི་འབྲས་ནི་ཐོབ་པའོ། །ཞེས་སོགས་དཔེར་མཛད་པ་དང༌། རྣམ་རྟོག་རྒྱ་རུ་ཚུད་པ་ཡི། །འགྲོ་བ་གསུམ་པོ་རྣམ་གཟིགས་ནས། །ཇི་ལྟ་ཇི་ལྟར་གྲོལ་འགྱུར་བ། །དེ་དང་དེའི་ཐབས་བསྟན་ནོ། །རྣམ་རྟོག་བག་ཆགས་ཀྱིས་བཅིངས་ལ། །ཐོག་མར་རྟོག་པའི་ཆོ་ག་སྟོན། །རྣམ་རྟོག་རང་བཞིན་ཤེས་པ་ན། །
མི་རྟོག་པ་ལ་རྣམ་འཇུག་བྱ། །ཞེས་གསུངས་ཤིང༌། དགྱེས་རྡོར་ལ་སོགས་པའི་རྒྱུད་གཞན་ལས་ཀྱང༌། དེ་ལྟར་གསུངས་པ་མང་སྟེ། དབང་རྟུལ་དང་པོའི་ལས་ཅན་ཤིན་ཏུ་མང་པོ་ཞིག་ཚེ་འདིར་རྫོགས་རིམ་གྱི་ཡེ་ཤེས་སྐྱེ་བའི་སྐལ་བ་མེད་པ་དང༌། ཅུང་ཟད་ཡོད་དུ་ཆུག་ཀྱང་བསྐྱེད་རིམ་སྔོན་དུ་མ་སོང་བར་རྫོགས་རིམ་གྱི་རྟོགས་པ་དངོས་མི་སྐྱེ་བའི་དབང་དུ་མཛད་ནས། དང་པོར་བསྐྱེད་རིམ་བརྟན་པ་ཐོབ་ཀྱི་བར་དུ་བསྒོམས། དེ་ནས་རྫོགས་པའི་རིམ་པ་སྒོམ་པ་སྟེ། བརྟེན་པའི་ཚུལ་དུ་ཉམས་སུ་ལེན་པའམ། དང་པོར་བསྐྱེད་རིམ་ཅུང་ཟད་གོམས་པར་བྱས་ནས། ཕྱིས་བསྐྱེད་རྫོགས་སྦགས་ཏེ་སྒོམ་པ་སྔོན་འགྲོ་དངོས་གཞིའི་ཚུལ་དུ་བྱེད་པའམ། དང་པོ་ཉིད་ནས་ཐུན་གྱི་སྟོད་ལ་བསྐྱེད་རིམ་དང༌། སྨད་ལ་རྫོགས་རིམ་སྒོམ་པ་ལྟ་བུ་གཅིག་གྲོགས་གཅིག་ཤོས་ཀྱིས་བྱེད་པ་གྲོགས་དང་གྲོགས་ཅན་གྱི་ཚུལ་གྱིས་སྒྲུབ་པ་རྣམས་ཀྱང་དང་པོར་བསྐྱེད་རིམ་བསྒོམས་ཤིང༌། ཕྱིས་རྫོགས་རིམ་སྒོམ་པའི་ཚུལ་ཁོ་ན་ལས་ཕྱེ་བ་ཡིན་ལ་ཤིན་ཏུ་དམན་པ་ཚེ་འདིར་རྫོགས་རིམ་གཏན་ནས་བསྒོམ་མི་ནུས་པ་དགཚེ་འདིར་བསྐྱེད་རིམ་བསྒོམས་ཤིང༌། ཕྱི་མ་རྫོགས་རིམ་སྒོམ་པ་ཡང་ཡོད་པ། དེ་ཡང་བསྐྱེད་རྫོགས་གོ་རིམ་སྔ་མ་དང་འདྲ་སྟེ། རིག་པ་ནི་སུ་ཞིག་རྫོགས་རིམ་གྱི་ཡེ་ཤེས་ཐུན་མོང་མ་ཡིན་བརྒྱུད་ལ་སྐྱེས་ཟིན་པ་དེ་ལ་བོགས་འབྱིན་གྱི་གནས་སྐབས་སྲིད་མཐའ་ཙམ་ལ་དུས་ཡུད་ཙམ་ལན་རེ་ལན་གཉིས་མ་གཏོགས། བསྐྱེད་རིམ་སྒོམ་པ་མི་འབྱུང་སྟེ། རྫོགས་རིམ་དངོས་གཞིའི་ཡེ་ཤེས་སྐྱེས་ནས། བསྐྱེད་རིམ་བསྒོམས་པ་ལ་ཕལ་ཆེར་དུ་དགོས་པ་མེད་པའི་ཕྱིར་རོ། །དེས་ན་རིམ་པ་གཉིས་ཀར་བསྒོམ་དགོས་ཕྱིན་ཆད། སྤྱིར་བཏང་དུ་དང་པོར་བསྐྱེད་རིམ་དང་ཕྱིས་རྫོགས་རིམ་བསྒོམ་པ་ཡིན་ཞིང༌། ཞིང་ཐ་རྒོད་བཏུལ་ནས་དང་པོར་འབྲུ་ངན་པ་བཏབ་སྟེ་
ཞིང་དུལ་བར་བྱས་པའི་རྗེས་སུ་ས་ལུ་ལ་སོགས་པའི་བཟང་འབྲུ་འདེབས་པར་བྱེད་པ་བཞིན་དུ། རྫོགས་རིམ་ཀྱི་སྔོན་དུ་བསྐྱེད་རིམ་དེར་ཕྱིན་པར་བྱེད་པའམ། བསྐྱེད་རིམ་ཅི་རིགས་པ་སྔོན་དུ་གཏོང་པ་ཡིན་ལ། སྐྱེ་བ་དང་པོ་ལ་བསྐྱེད་རིམ་ཁོ་ན་བསྒོམས་ཤིང༌། ཕྱི་མ་ལ་རྫོགས་རིམ་སྒོམ་པ་ཡང་དེའི་རིགས་ཡིན་ནོ། །དང་པོ་ཉིད་ནས་ཆ་མཉམ་དུ་སྒོམ་པ་རྣམས་ཀྱང་དཔེ་དེས་མཚོན་པའི་རིགས་སུ་ཡང་ཅུང་ཟད་ནི་འགྱུར་ཏེ། ཐུན་སྟོད་དང་ཐུན་སྨད་ཀྱི་དུས་སྔ་ཕྱི་ལ་ཡང་རྒྱུད་འགྱུར་བའི་ཁྱད་པར་བསྟེན་པས་སེམས་རྒྱུད་སྨིན་པའི་ཚུལ་ཡོད་དགོས་པའི་ཕྱིར་ཏེ། ཕྲ་མོ་སྐད་ཅིག་རེ་རེ་ནས་རྒྱུད་སྨིན་ཚུལ་མི་འབྱུང་ན། ཡུན་རིང་ལོན་པ་ལ་ཡང་མི་འབྱུང་བའི་རིག་པས་སོ། །འོན་ཀྱང་གཙོ་བོར་དཔེ་དེས་བསྟན་པའི་དོན་དུ་མི་འཇོག་ཀྱང༌། དགོས་དོན་གྱི་སྒོ་ནས་འདྲ་བ་ཡིན་ཏེ། བསྐྱེད་རིམ་བརྟན་པའི་རྗེས་སུ་རྫོགས་རིམ་བརྟན་ན་མི་རིང་བར་རྫོགས་རིམ་གྱི་དངོས་གཞི་ཡེ་ཤེས་སྐྱེ་བ་བཞིན་དུ་ཐོག་མ་ཉིད་ནས་བསྐྱེད་རྫོགས་འབྲེལ་ཆགས་སུ་བསྒོམས་པས། ནམ་ཞིག་བསྐྱེད་རིམ་ལ་བརྟན་པ་ཐོབ་པ་དང་རྫོགས་རིམ་གྱི་ཡེ་ཤེས་སྐྱེ་བ་དུས་མཉམ་དུ་འབྱུང་བ་དེ་དུས་ཀྱི་རྫོགས་རིམ་དངོས་གཞིའི་ཉམས་རྟོགས་དེ་དང། བསྐྱེད་རིམ་བརྟན་རྗེས་ནས་རྫོགས་རིམ་འགོ་བརྩམས་པ་ལས་བྱུང་བའི་དངོས་གཞིའི་ཡེ་ཤེས་དེ་ལ་བཟང་ངན་ཁྱད་པར་ཡེ་མེད་དོ། །དེས་ན་འདི་ནི་རྫོགས་རིམ་གྱི་དམིགས་པ་ས་བོན་ལྟ་བུ་དང༌། བསྐྱེད་རིམ་གྱི་སྒོམ་པ་ཆུ་ལུད་ལྟ་བུའི་དཔེ་དང་སྦྱར་བར་བྱའོ། །དེ་ཚེ་གཉིས་པོ་ཆ་མཉམ་དུ་སྒོམ་མམ། བསྐྱེད་རིམ་ཤས་ཆེ་བ་ཙམ་སྒོམ་ཀྱང་རུང༌། རྫོགས་རིམ་ཉིད་གཙོ་བོར་བསྒོམས་པར་འགྲོ་སྟེ། རྒྱལ་རིགས་གཅིག་དང༌། སྐྱེ་བོ་ཕལ་པ་གཅིག་གམ་མང་པོ་འཛོམ་ཡང་རུང་སྟེ། ཕྲད་མ་ཐག་པ་ནས་རྒྱལ་རིགས་གཙོ་བོར་འགྱུར་བ་བཞིན་ནོ། །ད་ལྟའི་གང་ཟག་ལ་སྒོམ་ཚུལ་འདི་ཡང་ཤིན་ཏུ་ལེགས་པ་ཡིན་མོད་
འགའ་ཞིག་འདི་སྙམ་དུ། རྒྱུད་གཞུང་ཐམས་ཅད་ཀྱི་དགོངས་པ་ནི། བསྐྱེད་རིམ་བརྟན་ནས་རྫོགས་རིམ་སྒོམ་པ་ཡིན་ལ། ཆ་མཉམ་དུ་སྒོམ་པ་འདི་འདྲ་བསྐྱེད་རིམ་མི་སྒོམ་པར་རྫོགས་རིམ་ལ་ཅང་འཇུས་བྱེད་པ་ལས་བཟང་ཞིང་དགག་བྱ་ཆུང་ཡང༌། སྔ་མ་ལྟ་བུའི་ཕན་ཡོན་མེད་ལ། བོད་ཀྱི་གསང་སྔགས་པ་ཕལ་ཆེར་དང༌། རྒྱ་གར་བ་འགའ་ཞིག་འདོད་དུ་ཆུག་ཀྱང་རང་འདོད་དང་བླ་ཆོས་ཙམ་མོ་སྙམ་པ་དག་ཀྱང་སྣང་མོད། རེ་ཞིག་རྒྱུད་ཀྱི་རྒྱལ་པོ་འདི་ཉིད་ཀྱི་སྒྲུབ་ཐབས་ལེའུ་ལས། བསྐྱེད་རིམ་དངོས་གཞི་ཡན་ལག་བཞི་པོ་ནི་སོང༌། དཀྱིལ་འཁོར་བསྡུ་བ་སོགས་རྗེས་ཀྱི་ཆོ་ག་མ་གསུངས་པའི་སྐབས་དེར་རྫོགས་རིམ་སྒོམ་ཚུལ་རྒྱས་པར་གསུངས་པའི་ཕྱིར་དང༌། དུས་འཁོར་ཉིད་ཀྱི་སྒྲུབ་ཐབས་སཱ་དྷུ་པུ་ཏྲས་མཛད་པ་དང༌། དགྱེས་རྡོར་གྱི་སྒྲུབ་ཐབས་མཚོ་སྐྱེས་དང༌། བདག་མེད་མའི་སྒྲུབ་ཐབས་བདུད་རྩི་འོད་དང༌། སྒྱུ་འཕྲུལ་ཆེན་པོའི་སྒྲུབ་ཐབས་ཀུ་ཀུ་རི་པས་མཛད་པ་གསུམ་སོགས་སྒྲུབ་ཐབས་ཁུངས་ཅན་ཤིན་ཏུ་མང་བ་ལས་གནས་སྐབས་དེར་རྫོགས་རིམ་གྱི་རྣམས་གཞག་གསུངས་པས་རྫོགས་རིམ་དེ་དག་བར་སྐབས་དེར་བསྒོམ་རྒྱུ་མ་ཡིན་ན། དེར་གསུངས་པ་དགོས་པ་མེད་པར་འགྱུར་བའི་ཕྱིར་རོ། །གལ་ཏེ་གཞུང་དེ་དག་ཏུ་བསྐྱེད་རིམ་དང་རྫོགས་རིམ་ཞེས་ལམ་རིམ་པ་གཉིས་ཀྱི་རྣམ་གཞག་སྟོན་པ་ཙམ་ཡིན་ན་ནི། བསྐྱེད་རིམ་གྱི་བྱ་བ་རྣམས་རྫོགས་པའི་རྗེས་སུ་རྫོགས་རིམ་སྟོན་པར་རིགས་ཀྱི། གསེབ་ཚགས་སུ་བསྟན་པ་འདིས་ནི་དོན་ཚན་འཁྲུགས་ཤིང༌། གཞུང་དགོད་པ་ལ་མི་མཁས་པའི་སྐྱོན་དུ་ཐལ་བར་འགྱུར་རོ། །དེ་དག་ཀྱང་ཆེད་དུ་བྱ་བའི་གདུལ་བྱའི་ནང་ཚན་དབང་པོ་བརྟུལ་འབྲིང་རྣོན་པོ་གསུམ་གྱི་དབང་དུ་བྱས་ཀྱི། ད་ལྟའི་སྔགས་པ་ཕལ་ཆེར་ཐོས་པའི་སྐལ་བ་ཅན་ཙམ་སྟེ། ཐེག་པ་གང་དུ་ཡང་རིགས་མ་ངེས་པ་སྟེས་དབང་
གིས་སྔགས་ལ་ཞུགས་པ་ཡིན་པས། འདི་དག་ལ་ནི་རྫོགས་རིམ་དངོས་གཞི་སྐྱེད་དཀའ་བ་བཞིན་དུ་བསྐྱེད་རིམ་དངོས་ཀྱང་སྐྱེ་དཀའ་ལ་རྗེས་མཐུན་ཙམ་ནི་གཉིས་ཀར་སྐྱེར་རུང་བས་གང་མོས་པ་ལ་ཞུགས་པས་གདུལ་བྱ་དེ་ཉིད་ལ་བལྟོས་པའི་དོན་ཁྱད་པར་ཅན་འགྲུབ་ཀྱི་སྔ་ཕྱིའི་གོ་རིམ་ངེས་པ་མེད་དེ། གཽ་ཌ་བཞད་གད་མཁན་གྱི་རྩོད་པའི་དཔེ་བཞིན་ནོ།། །།བདུན་པ་དབང་ལམ་འབྲས་བུའི་སྦྱོར་ཚུལ་ནི། རྒྱས་པར་གཞན་ལས་ཤེས་པར་བྱ་དགོས་མོད། འདིར་ཟུར་ཙམ་བརྗོད་ན། དབང་གིས་ཇི་ལྟར་སྨིན་པ་ལྟར་དེ་དང་རྗེས་སུ་མཐུན་པའི་ལམ་བསྒོམ་པས། འབྲས་བུ་ཡང་དེ་དང་མཐུན་པ་འགྲུབ་ལ། ལམ་ཉིད་ལ་རིམ་པ་གཉིས་ཀྱི་བསྐྱེད་རིམ་གྱི་ཡན་ལག་ཇི་ལྟར་བསྒོམས་པ་དེ་ཐམས་ཅད་རྫོགས་རིམ་གྱི་ཡེ་ཤེས་སྐྱེ་བར་འགྱུར་བའི་རྒྱུད་སྦྱང་ཐབས་སུ་འགྲོ་ཚུལ་ཤེས་དགོས་ཏེ། བསྐྱེད་རིམ་ལ་བཅུ་དྲུག་བཞིའི་རབ་ཏུ་དབྱེ་བ་དགོས་པའི་ཕྱིར་རོ། །དེ་ལ་བྱིས་པ་འཇུག་པའི་དབང་བདུན་ནི། བསྐྱེད་རྫོགས་གཉིས་ཀའི་ཐུན་མོང་དུ་སྨིན་པར་བྱེད་པ་ཡིན་ཡང་གཙོ་བོར་བསྐྱེད་རིམ་གྱི་སྨིན་བྱེད་ཡིན་ལ། བསྐྱེད་རིམ་དངོས་ཀྱི་སྨིན་བྱེད་ཞེས་ཀྱང་བྱ་སྟེ། སོ་སོར་ཕྱེ་ན་ཆུ་དང་ཅོད་པན་གྱི་དབང་ནི་དཀྱིལ་འཁོར་རྒྱལ་མཆོག་དང༌། དར་དཔྱངས་དང་དྲིལ་བུའི་དབང་ནི་ལས་རྒྱལ་མཆོག་དང༌། བརྟུལ་ཞུགས་དང་མིང་གི་དབང་གི་ཐིག་ལེའི་རྣལ་འབྱོར་དང༌། རྗེས་གནང་ནི་ཕྲ་མོའི་རྣལ་འབྱོར་གྱི་སྨིན་བྱེད་དོ། །དབང་གོང་མ་རྣམས་ནི་བསྐྱེད་རིམ་གྱི་སྨིན་བྱེད་མ་ཡིན་ཡང༌། བསྐྱེད་རིམ་ལ་གནས་པའི་རྣལ་འབྱོར་པས་གོང་མ་བཞི་བླངས་པ་ན། བསྐྱེད་རིམ་གྱི་དྲི་མ་སྦྱོང་བའི་དག་བྱེད་གྱི་དབང་དུ་ནི་འགྱུར་ཏེ། དེའི་ཚེ་ཡང་གཙོ་བོར་བསྐྱེད་རིམ་ཡན་ལག་བཞི་དང་དབང་བཞི་རིམ་ཅན་དུ་སྦྱར་རོ། །རྫོགས་རིམ་གྱི་གཞི་འདིངས་པའི་སྨིན་བྱེད་དུ་འགྲོ་ཚུལ་ནི། དཀྱིལ་འཁོར་རྒྱལ་མཆོག་སོར་བསམ་གྱི་སྨིན་བྱེད། ལས་རྒྱལ་མཆོག་སྲོག་འཛིན་གྱི་སྨིན་བྱེད། ཐིག་ལེའི་རྣལ་འབྱོར་རྗེས་དྲན་གྱི་སྨིན་བྱེད། ཕྲ་མོའི་རྣལ་འབྱོར་ཏིང་ངེ་འཛིན་གྱི་སྨིན་བྱེད་དེ་
དེ་ལྟར་ན་གྲོལ་བྱེད་དངོས་རྫོགས་རིམ་ཡིན་ལ། བསྐྱེད་རིམ་ནི་དེའི་སྔོན་འགྲོའམ་ཆ་ལག་ལྟ་བུར་འགྱུར་བའི་ཕྱིར། དེའི་ཁོངས་སུ་བསྡུ་བ་ཡིན་གྱི་གྲོལ་བྱེད་དངོས་མ་ཡིན་ནོ། །འབྲས་བུའི་སྐབས་ས་ལ་སྦྱར་ན། དབང་བདུན་ས་བདུན་གྱི་དག་པ་དང་སྦྱར་བ་ལྟར་མངོན་བྱང་ལྔ་དང་སྙིང་རྗེའི་དབང་དང་དམ་ཚིག་གི་དཀྱིལ་འཁོར་དང༌། ཡེ་ཤེས་པ་གཞུག་པ་དང༌། མཁའ་གསང་གནས་དྲུག་དང་བཅས་པ་བྱིན་གྱིས་བརླབ་པ་དང༌། ཐིག་ལེའི་རྣལ་འབྱོར་དངོས་དང༌། ཕྲ་མོའི་རྣལ་འབྱོར་ཏེ། བདུན་པོ་དེ་རྣམས་ས་བདུན་དང་སྦྱོར་ཞིང༌། ཆུ་ཅོད་བུམ་དབང་གི་སྔོན་འགྲོ་དང༌། དར་དྲིལ་གསང་དབང་དང༌། མིང་བརྟུལ་ཤེར་དབང་དང༌། རྗེས་གནང་བཞི་པའི་སྔོན་འགྲོ་ཡིན་པའི་རིག་པ་སྦྱར་ཏེ། ས་དང་པོ་དང་གཉིས་པ་ནི་རང་ས་དེར་བརྒྱད་པ་དང་རྣམ་པ་མཐུན་པ་དང༌། གསུམ་བཞི་གཉིས་ནི་དགུ་པ་དང༌། ལྔ་དྲུག་གཉིས་ནི་བཅུ་པ་དང༌། བདུན་པ་ནི་བཅུ་གཅིག་བཅུ་གཉིས་དང་ཆོས་མཚུངས། དེ་ལ་འཇིག་རྟེན་པའི་དབང་བཞི་པ་དང་ས་གཉིས་སྦྱོར་ཚུལ་ནི། འདི་ལྟར་གོ་དགོས་ཏེ། ལམ་གྱི་ས་བཅུ་གཅིག་ལ་དབང་བཅུ་གཅིག་གིས་ཐོབ་ཐང་བགོས་པས་དབང་རེས་ས་རེ་ཐོབ་པ་ལས། འཇིག་རྟེན་ལས་འདས་པའི་བཞི་པའི་སྐལ་བ་ས་བཅུ་གཅིག་པ་ཡིན་ཞིང༌། ས་གཞན་རྣམས་སྔ་མ་རྫོགས་ནས་ཕྱི་མ་ལ་མུ་འབྱོར་འགྲོ་བ་ཡིན་ལ། དེ་ལས་གཞན་པའི་བར་དེར་འབྲས་བུ་ཐོབ་སྐལ་མེད་དེ། ས་ཕྱི་མ་ཉིད་སྔ་མའི་འབྲས་བུ་ཡིན་པའི་ཕྱིར་རོ། །ས་བཅུ་གཅིག་པ་ལ་ནི། དེའི་རྗེས་སུ་སློབ་ལམ་གྱི་ས་ཐོབ་རྒྱུ་མེད་ཅིང༌། དབང་ཡང་བཞི་པ་ལས་བཟང་བའི་ལྷག་པོ་བསྐུར་རྒྱུ་མེད་པས། ད་དུང་བགྲོད་བྱའི་ལམ་གྱི་ས་ལ་དབང་སྦྱོར་རྒྱུ་ཡོད་དམ་སྙམ་ན་མེད་དོ། །འོན་ཀྱང་ས་དེ་དང་འབྲེལ་ཆགས་སུ་མི་སློབ་པའི་ལམ་བྱུང་བ། དེ་ནི་ལམ་གྱི་མི་བཏགས་ཀྱང་འབྲས་བུ་ཁོ་ན་ཡིན་པ་དང༌།
འབྲས་བུ་དེ་ཡང་དངོས་སུ་ས་བཅུ་གཅིག་པ་ཉིད་ཀྱི་དངོས་འབྲས་ཡིན་པའི་ཕྱིར། རྒྱུ་ས་བཅུ་གཅིག་པ་དང༌། འབྲས་བུ་ས་བཅུ་གཉིས་གཉིས་ཀར་འདས་པའི་དབང་བཞི་པ་ཁོ་ནའི་ཐོབ་སྐལ་དུ་བྱུང་ངོ༌། །འཇིག་རྟེན་པའི་དབང་རྣམས་དང་མི་མཚུངས་ཏེ། དཔེར་ན་ས་བརྒྱད་པ་བུམ་དབང་གི་ཐོབ་བསྐལ་ཡིན་ལ། བརྒྱད་པའི་དངོས་འབྲས་དགུ་པ་ཡིན་ཡང༌། དེ་གསང་དབང་གིས་ཐོབ་པས་བུམ་དབང་ལ་མི་སྦྱོར་ལ། འཇིག་རྟེན་འདས་པའི་དབང་བཞི་པ་ལ་ནི། རང་གིས་ཐོབ་སྐལ་བཅུ་གཅིག་པའི་དངོས་འབྲས་བཅུ་གཉིས་པ་ཡིན་ལ། བཞི་པ་ལས་བཟང་བའི་དབང་གཞན་ཞིག་ཡོད་ན། དེའི་ཐོབ་སྐལ་དུ་དེ་འགྱུར་ཡང་དེ་འདྲ་མེད་པས་སོ། །དེས་ན་བཞི་པའི་དངོས་ཀྱི་སྐལ་བ་ལམ་བཅུ་གཅིག་པ་དང༌། རྒྱུ་ལམ་ལས་འབྲས་བུ་སངས་རྒྱས་འབྱུང་བའི་ཕྱིར་ཤུགས་ཀྱིས་ཐོབ་པ་བཅུ་གཉིས་པ་ཡང་ཡིན་ནོ། །དེས་ན་དབང་རྣམས་སློབ་པའི་ས་ཁོ་ན་ལ་སྦྱོར་བའི་དབང་དུ་བྱས་ནས། དབང་བཅུ་གཅིག་ས་བཅུ་གཅིག་དང་སྦྱོར་དགོས་པས། འཇིག་རྟེན་པའི་བཞི་པ་བཅུ་གཅིག་པ་དང་སྦྱོར་བ་ཤིན་ཏུ་མི་འཐད་དོ། །དེའི་ཕྱིར་དངོས་སུ་མི་སྦྱོར་ཡང་བརྒྱུད་པས་འབྲེལ་བའི་དབང་དུ་བྱས་ནས། དཀྱིལ་འཁོར་རྒྱལ་མཆོག་དང་བརྒྱད་པ། ལས་རྒྱལ་མཆོག་དང་དགུ་པ། ཐིག་ལེའི་རྣལ་འབྱོར་དང་བཅུ་པ། ཕྲ་མོའི་རྣལ་འབྱོར་དང་བཅུ་གཅིག་པ། དེའི་ཤུགས་ལས་བཅུ་གཉིས་པ་དང་ཡང་སྦྱོར་རོ། །འབྲས་བུ་མཐར་ཐུག་གི་སྐབས་དང་སྦྱར་ན། བསྐྱེད་རིམ་ཡན་ལག་བཞི་པོ་རྫོགས་པའི་སངས་རྒྱས་ཀྱི་སྐུ་གསུང་ཐུགས་ཡེ་ཤེས་རྡོ་རྗེ་དང་སྦྱོར་ཏེ། འོག་ཏུ་རྒྱས་པར་འཆད་པར་འགྱུར་རོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་གྱི་རྣམ་པར་བཤད་པ་ལས། རིམ་པ་གཉིས་ཀྱི་སྤྱིའི་དོན་བཤད་པ་སྟེ་སྡེ་ཚན་གཉིས་པའོ།། །།ད་ནི་གཉིས་པ་སྒྲུབ་ཐབས་ཀྱི་རྣམ་གཞག་བྱེ་
བྲག་ཏུ་བཤད་པ་ལ། གང་གིས་སྒྲུབ་པའི་གང་ཟག་གང་དུ་སྒྲུབ་པའི་གནས། ཇི་ཙམ་བར་དུ་སྒྲུབ་པའི་དུས། ཇི་ལྟར་སྒྲུབ་པའི་ཐབས། དེ་ལྟར་བསྒྲུབས་པའི་འབྲས་བུ་སྟེ་ལྔ་ལས། དང་པོ་ནི། རྒྱུད་ལས། ཟབ་ཅིང་རྒྱ་ཆེ་ལ་སེམས་བླ་མའི་ངེས་པ་ལ་དགའ་གཏོང་བའི་ངང་ཚུལ་དང་ལྡན་ཡོན་ཏན་ཤེས། །ཐར་པ་དོན་གཉེར་རྒྱུད་ལ་གུས་ཤིང་གཡོ་བ་མིན་པའི་སེམས་ལྡན་དེ་ཉིད་ཐོབ་པ་ཤིན་ཏུ་སྦེད། །གདུག་པ་རྣམས་ཀྱི་གྲོགས་ཉམས་སློབ་མ་དེ་ཉིད་བླ་མ་ཤིན་ཏུ་མཁས་པ་རྣམས་ཀྱིས་བསྡུ་བྱ་བ། །ཤེས་རབ་དབང་ལ་སོགས་པའི་རྒྱུར་ཏེ་གཞན་ཞེས་བྱ་བ་སླར་ཡང་འབྲིང་པོ་བསོད་ནམས་དག་གི་རྒྱུར། །ཞེས་སློབ་མའི་མཚན་ཉིད་གསུངས་པ་རྣམས་ཕལ་ཆེར་ཚང་བ་དང༌། ཁྱད་པར་དུ་ཡང་དཀོན་མཆོག་གསུམ་ལ་སྐྱབས་སུ་སོང་ཞིང༌། འཁོར་བའི་རྒྱ་མཚོ་གཏིང་མཐའ་མེད་པར་ཡོངས་སུ་བྱེད་པའི་འགྲོ་བ་རྣམས་བྱང་ཆུབ་མཆོག་ལ་འགོད་པར་འདོད་པའི་ཁུར་ཁྱེར་བ། རྡོ་རྗེ་ཐེག་པའི་ཚུལ་ལ་ལྷག་པར་མོས་པ་དང་ལྡན་པས། དཔལ་དུས་ཀྱི་འཁོར་ལོའི་དཀྱིལ་འཁོར་ཆེན་པོར་རབ་ཏུ་ཞུགས་ཏེ་དབང་བསྐུར་བ་རྣམ་པ་བདུན་ཐོབ་ཅིང༌། རྩ་བའི་ལྟུང་བ་བཅུ་བཞི་ཕྱོགས་མཐུན་དང་བཅས་པས་ཤིན་ཏུ་མ་གོས་ཤིང༌། བརྟུལ་ཞུགས་ཉི་ཤུ་རྩ་ལྔ་ལ་སོགས་པ་དམ་ཚིག་དང་སྡོམ་པ་ལ་ཡང་དག་པར་གནས་པའོ། །ཡན་ལག་བཞི་ཚང་བའི་བསྐྱེད་རིམ་བསྒོམ་དུ་རུང་བ་ཙམ་ལ། དེ་ཙམ་གྱིས་ཆོག་ལ། དག་བྱ་དག་བྱེད་ཁྱད་པར་ཅན་སྦྱར་ཏེ་སྒོམ་ན་ནི་བསྐྱེད་རིམ་འབའ་ཞིག་སྒོམ་ནའང༌། གོང་མ་འཇིག་རྟེན་དང་འཇིག་རྟེན་ལས་འདས་པ་དེ་དག་ཐོབ་པ་ནི་དགོས་ཏེ། གཞི་འབྲས་ཀྱི་བཞུགས་ཚུལ་ཐུན་མོང་མ་ཡིན་པ་རྣམས་དང༌། རྫོགས་རིམ་གྱི་རྟེན་དུ་ཇི་ལྟར་འགྱུར་བའི་ཚུལ་ཤེས་ནས། དེ་དག་སྦྱར་ཏེ་མོས་སྒོམ་དུ་བྱེད་པ་ལ། དེ་རྣམས་ལེགས་པར་ཐོས་ཤིང་གོ་བ་
ཅིག་དགོས། དེ་ལ་དབང་དེ་དག་བསྐུར་དགོས་པའི་ཕྱིར་རོ། །དེ་ལས་ཀྱང་བསྐྱེད་རིམ་ལ་གཙོ་བོར་བྱེད་ཀྱང་རིམ་གཉིས་འབྲེལ་ཅན་སྒོམ་པ་ལ་ནི། དབང་བཅུ་གཅིག་པོ་ཐོབ་པ་མེད་དུ་མི་རུང་བའི་ཡན་ལག་གོ། །།གཉིས་པ་ནི་གནས་སྤྱིའི་དབང་དུ་བྱས་ནས། རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང༌། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པ། །དེར་ནི་རྣལ་འབྱོར་ཡང་དག་བརྩམ། །ཞེས་གསུངས་ཤིང༌། སྒོས་ཀྱི་གནས་ནི་བསྡུས་རྒྱུད་ལས། གང་དུ་སེམས་ནི་རབ་ཏུ་ཚིམ་པར་འགྱུར་བ་དེར་ནི་བསྒྲུབ་པར་བྱའོ་མི་ཡི་བདག་པོ་ཀྱེ། ངེས་པར་འཇམ་པའི་མལ་ཆ་དག་དང་གདན་ལ་ཉེ་བར་འདུག་ནས་སྔར་བརྗོད་བསྲུང་བ་བྱས་ནས་ནི། །ཞེས་གསུངས་ཏེ། རྒྱུན་གྱི་ཉམས་ལེན་དང་བསྙེན་པའི་སྐབས་སུ། སྐྱེད་མོས་ཚལ་ལ་སོགས་པའི་གནས་ངེས་པ་མི་དགོས་ཏེ། གང་དུ་ཡིད་དགའ་ཞིང་ཉེར་འཚེ་མེད་པ་དེར་བསྒོམ་མོ།། །།གསུམ་པ་ནི་མཐའ་གཅིག་ཏུ་མ་ངེས་ཀྱང༌། །བསྐྱེད་རིམ་ཉིད་གཙོ་བོར་བྱེད་པ་དང༌། ཐུན་མོང་གི་དངོས་གྲུབ་ཐོབ་པར་འདོད་པ་དང༌། ལས་ཕྲ་མོ་ཙམ་ལ་དམིགས་ཀྱང་འགྲུབ་ཚུལ་ཁྱད་པར་ཅན་དུ་གྲུབ་པར་འདོད་པ་དག་གིས་ཇི་སྲིད་ལྷའི་གསལ་སྣང་ལ་བརྟན་པ་མ་ཐོབ་བར་དུ་བསྒོམ་མོ། །འཁྲུལ་འཁོར་དང་སྦྱིན་སྲེག་ལ་སོགས་པའི་ལས་ཕལ་པ་ཙམ་ཞིག་སྒྲུབ་པར་བྱེད་པ་ལ་ནི། དམ་ཚིག་དང་ལྡན་ཞིང་བརྟུལ་བ་དང་བཅས་པས་དམིགས་པ་ལ་ཡིད་ཤུགས་དྲག་པོ་ཡོད་ན། གསལ་སྣང་ལ་བརྟན་པ་མ་ཐོབ་ཀྱང༌། སྔགས་བྱེ་བ་བཟླས་ན་འགྲུབ་པར་འགྱུར་བས་དུས་དེ་སྲིད་དུ་བསྒོམས་པར་བྱའོ།། །།བཞི་པ་ཇི་ལྟར་སྒྲུབ་པའི་ཐབས་ལ་གང་གིས་སྒྲུབ་པའི་ཐབས་ཆོ་གའི་རིམ་པ་དང༌། གང་བསྒྲུབ་པར་བྱ་བའི་ཡུལ་དཀྱིལ་འཁོར་གྱི་རབ་ཏུ་དབྱེ་བ་དང༌། གོ་རིམ་ལ་གཞན་གྱིས་བརྟགས་པའི་མཐའ་འགོག་པའོ།། །།
དང་པོ་ལ་ཡང་གཉིས་ཏེ། སྒྲུབ་ཐབས་ཀྱི་ཆིངས་ཟུར་ཙམ་སྨོས་པ་དང༌། མངོན་རྟོགས་རྒྱས་པའི་རིམ་པ་རྣམ་པར་ངེས་པའོ། །དང་པོ་ནི། སྤྱིར་རྣལ་འབྱོར་ཕྱི་ནང་གི་རྒྱུད་ཀུན་ལས། དང་པོ་ལ་སྦྱོར་བ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་སྟེ་ཏིང་ངེ་འཛིན་གསུམ་དུ་གསུངས་བ་མང་པོ་ཡོད་ལ། རྣལ་འབྱོར་ཆེན་པོ་ཐབས་ཀྱི་རྒྱུད་དཔལ་གསང་བ་འདུས་པའི་རྒྱུད་ཕྱི་མ་ལས། བསྙེན་པའི་ཆོ་ག་དང་པོ་སྟེ། །ཉེ་བར་སྒྲུབ་པ་གཉིས་པ་ཡིན། །སྒྲུབ་པ་ཡང་ནི་གསུམ་པ་སྟེ། །སྒྲུབ་པ་ཆེན་པོ་བཞི་པའོ། །ཞེས་བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་བཞི་གསུངས་ཞིང༌། དེ་ལ་ཏིང་ངེ་འཛིན་ཕྲུགས་གཅིག་གི་རིམ་པ་དང༌། བྱ་བའི་རིམ་པ་ལ་བལྟོས་པ་གཉིས་ཡོད་ཀྱང༌། སྐབས་འདིར་ཏིང་ངེ་འཛིན་ཕྲུགས་གཅིག་གི་རིམ་པ་ལ་བལྟོས་པའོ། །དེ་བཞིན་དུ་གཤིན་རྗེ་གཤེད་དམར་ནག་གི་རྒྱུད་ལས། དང་པོར་རྣལ་འབྱོར་བསྒོམ་པར་བྱ། །རྗེས་སུ་རྣལ་འབྱོར་གཉིས་པར་རོ། །ཤིན་ཏུ་རྣལ་འབྱོར་གསུམ་པར་ཏེ། །རྣལ་འབྱོར་ཆེན་པོ་བཞི་པར་རོ། །ཞེས་རྣལ་འབྱོར་དང། རྗེས་སུ་རྣལ་འབྱོར་དང༌། ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོ་སྟེ་བཞི་གསུངས་སོ། །རྒྱུད་དེ་དག་ལས་འབྱུང་བའི་མན་ངག་གི་རིམ་པ་རྣམས་དང༌། རྒྱུད་ཀྱི་རྒྱལ་པོ་འདིར་གསུངས་པ་རྣམས་ནི་མིང་མཚུངས་ཀྱང་དོན་མི་འདྲ་བར་བྱུང་མོད། འོན་ཀྱང་འདི་ནས་གསུངས་པའི་ཡན་ལག་བཞིའི་སྒྲུབ་ཐབས་ལ། རྒྱུད་གཞན་དེ་དག་ལས་འབྱུང་བའི་མན་ངག་གི་དོན་དེ་དག་ཀྱང་ཚང་བ་ནི་ཡིན་ནོ། །དེ་ཡང་སྨྲོས་ཤིག་ཅེ་ན། རྒྱུད་འདི་ལས་འབྱུང་བའི་ཡན་ལག་བཞི་ནི། སྟོང་པ་སྔོན་དུ་འགྲོ་བའི་མངོན་བྱང་ལྔ་ལས་གཙོ་བོ་སྐྱེད་ཅིང༌། འཁོར་གྱི་ལྷ་ཚོགས་སྤྲོ་བ་ནི། དག་བྱ་ལུས་ཀྱི་རྩ། དག་བྱེད་དཀྱིལ་འཁོར་རྫོགས་པར་སྤྲོ་བ་ཙམ་ཡིན་པས་དཀྱིལ་འཁོར་རྒྱལ་མཆོག་
ཅེས་བྱ། ཡང་ཞུ་བ་གླུས་བསྐུལ་ནས་འབྲས་བུ་རྡོ་རྗེ་འཛིན་པར་བཞེངས་ཏེ་དམ་ཚིག་པའི་ལྷ་ཚོགས་སྤྲོས། ཡེ་ཤེས་པ་དགུག་གཞུག་བྱས། རིགས་དྲུག་དང་སྐུ་གསུང་ཐུགས་བྱིན་གྱིས་བརླབས། དབང་བསྐུར་བ་དང་རྒྱས་བཏབ་རྣམས་བྱེད་པ་ནི། སྦྱང་བྱ་ལས་ཀྱི་རྒྱུ་རླུང་རྒྱུ་བ་དང༌། ལས་དབང་བྱ་བ་ལ་འཇུག་པ་སྦྱོང་བའི་ཕྱིར་དང༌། གནས་སྐབས་སུ་ཡང་ཡེ་ཤེས་སྤྱན་འདྲེན་དང་དབང་བསྐུར་སོགས་ལས་ཀྱི་ཆོ་ག་མི་འདྲ་བ་དུ་མ་འཇུག་པའི་ཕྱིར། ལས་རྒྱལ་མཆོག་ཅེས་བྱའོ། །དེ་ནས་རིག་མ་དང་མཉམ་པར་སྦྱར་བའི་རྗེས་ཆགས་ཀྱི་བདེ་བ་ཙམ་སྒོམ་པ་ནི། ཐིག་ལེའི་བདེ་བ་མྱོང་མ་གྲུབ་གོང་དུ་ཆེད་དུ་དོན་གཉེར་གྱི་ཡུལ་བདེ་བ་ཡིན་ཡང༌། དེ་ལ་དངོས་སུ་དམིགས་མི་ཐུབ་ལ། རྒྱུ་ཐིག་ལེ་གཡོ་བ་ལ་དངོས་སུ་དམིགས་ནུས་ཤིང་རྩོལ་བའི་ཕྱིར། ཐིག་ལེའི་རྣལ་འབྱོར་ཞེས་བྱའོ། །དེ་ནས་ཕྲ་མོ་ནི་སྤང་བྱའི་དབང་དུ་བྱས་ན། འཕོ་བའི་བདེ་བ་ལན་ཅིག་མྱོང་ཟིན་པ་ན། བདེ་བ་དེ་ལ་དམིགས་ཐུབ་པས་འཕོ་བའི་བདེ་བ་ཡང་ཡང་མྱོང་བར་བྱེད་པས་ན་བདེ་བ་ལ་དམིགས་པ་ཞེས་བྱ། ལམ་གྱི་དུས་ན་འཕོ་བ་བཀག་སྟེ། བདེ་བ་ལ་སེམས་གཏང་ནས་ལྷ་སྐུ་ཕྲ་མོ་སྤྲོ་བའི་ཕྱིར། བདེ་བ་ལ་དམིགས་པ་ཕྲ་མོའི་རྣལ་འབྱོར་ཞེས་བྱའོ། །དེ་རྣམས་བསྙེན་སྒྲུབ་ཡན་ལག་བཞི་ཞེས་བྱ་སྟེ་དཀྱིལ་འཁོར་རྒྱལ་མཆོག་བསྙེན་པ། ལས་རྒྱལ་མཆོག་ཉེར་སྒྲུབ། ཐིག་ལེའི་རྣལ་འབྱོར་སྒྲུབ་པ། ཕྲ་མོའི་རྣལ་འབྱོར་སྒྲུབ་པ་ཆེན་པོའོ། །རྒྱུད་གཞན་དེ་དག་གི་ལུགས་ནི། གཙོ་བོ་སྐྱེད་པའི་ཆོ་ག་དང་པོ་སྦྱོར་བ། འཁོར་ཚོགས་སྤྲོ་བ་དཀྱིལ་འཁོར་རྒྱལ་མཆོག ཆོ་ག་ལྷག་མ་རྣམས་ལས་རྒྱལ་མཆོག་ཡིན་ན། དེ་དག་གི་ལུགས་ཀྱི་དང་པོ་སྦྱོར་བ་ནི། འདིར་ཡང་རྒྱུ་རྡོ་རྗེ་འཆང་གཙོ་བོ་ནུས་མ་དང་བཅས་པ་སྐྱེད་པ་ལ་ཚང༌། དེའི་རྗེས་ནས་ཡེ་ཤེས་པ་གཞུག་པའི་བར་དཀྱིལ་
འཁོར་རྒྱལ་མཆོག་དང༌། དེ་མན་ཆད་ལས་རྒྱལ་མཆོག་ཏུ་འགྱུར་རོ། །དེ་བཞིན་དུ་གསང་བ་འདུས་པ་བ་རྣམས་ཀྱི་ལུགས་ལ་གཙོ་འཁོར་གང་ཡིན་ཡང་རུང་དམ་ཚིག་པ་བསྐྱེད་ཅིང་ཡེ་ཤེས་པ་བསྲེ་བ་ནི་བསྙེན་པ། སྐྱེ་མཆེད་བྱིན་རླབས་ནི་ཉེར་སྒྲུབ། སྐུ་གསུང་ཐུགས་བྱིན་རླབས་སྒྲུབ་པ། དབང་བསྐུར་བ་སྒྲུབ་ཆེན་དུ་བཞེད་པས། འདིའི་ལུགས་ཀྱི་རྒྱལ་མཆོག་དང་པོ་དང༌། གཉིས་པའི་ཡང་ཡེ་ཤེས་པ་གཞུག་པ་ཡན་ཆད་དེའི་ལུགས་ཀྱི་བསྙེན་པའི་ཡན་ལག །ཡི་གེ་དགོད་པ་དང་རྒྱས་བཏབ་བཞི་ཉེར་སྒྲུབ། སྐུ་གསུང་ཐུགས་བྱིན་རླབས་སྒྲུབ་པ། རིགས་བདག་གི་རྒྱས་འདེབས་སྒྲུབ་ཆེན་དུ་འགྱུར་རོ། །ཡང་གཤིན་རྗེ་གཤེད་ལས་གསུངས་པའི་རྣལ་འབྱོར་བཞི་ནི། རྒྱུ་རྡོ་རྗེ་འཛིན་པའི་སྐོར་རྣལ་འབྱོར་དང་པོ། འབྲས་བུ་རྡོ་རྗེ་འཛིན་པར་བཞེངས་པ་རྗེས་སུ་རྣལ་འབྱོར། འཁོར་ཚོགས་སྤྲོ་བ་ཤིན་ཏུ་རྣལ་འབྱོར། ལྷག་མ་དབང་བསྐུར་མཆོད་བསྟོད་སོགས་རྣལ་འབྱོར་ཆེན་པོར་གསུངས་ན། འདིའི་རྒྱལ་མཆོག་དང་པོ་དེའི་ལུགས་ཀྱི་རྣལ་འབྱོར་དང༌། ཞུ་བ་གླུས་བསྐུལ་བ་གཙོ་བོ་ཡབ་ཡུམ་བཞེངས་པ་དང་བཅས་པ་རྗེས་སུ་རྣལ་འབྱོར། འཁོར་ཚོགས་སྤྲོ་བ་དང་ཡེ་ཤེས་པ་གཞུག་པ་ཤིན་ཏུ་རྣལ་འབྱོར། དེ་མན་ཆད་རྣལ་འབྱོར་ཆེན་པོ་དང་འབྱོར་རོ། །ཡང་རྡོ་རྗེ་གུར་ལས། ཕོ་བྲང་སངས་རྒྱས་རྣམ་སྣང་མཛད། །རྗེས་སུ་ཆགས་པ་རྡོ་རྗེ་སེམས། །དབང་ནི་མི་བསྐྱོད་རྡོ་རྗེ་དག །བདུད་རྩི་མྱང་བ་འོད་དཔག་མེད། །མཆོད་པ་དོན་ཡོད་གྲུབ་པ་སྟེ། །བསྟོད་པ་རིན་ཆེན་འབྱུང་ལྡན་ཡིན། །ཞེས་ཡན་ལག་དྲུག་བཤད་པ་རྣམས་འདི་ལ་ཚང་ཚུལ་གཞན་རྣམས་གོ་སླ། བདུད་རྩི་མྱང་བ་ནི། སྔོན་འགྲོ་དང་རྗེས་ཀྱི་སྐབས་ན་ཡོད་ཅིང༌། གཞན་ཡང་འདི་ནི་དོན་གྱི་གནས་ལ་གནད་ཆེ་ཤོས་མིན་ནོ། །ཡང་གསང་བ་འདུས་པའི་རྒྱུད་ཕྱི་མ་དང༌། དགྱེས་རྡོར་དང་
གཤེད་དམར་གྱི་རྒྱུད་རྣམས་ལས། དང་པོ་སྟོང་ཉིད་བྱང་ཆུབ་སྟེ། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་གསུངས་པ་ལྟར། རྒྱུད་ཀྱི་རྒྱལ་པོ་འདི་ལས་ཀྱང༌། དང་པོར་སྟོང་ཉིད་བྱང་ཆུབ་ངེས་པར་སླར་ཡང་དེ་ནས་ཟླ་བ་ཐིག་ལེ་དག་ནི་ཡང་དག་འཛིན། །དེ་ནས་གཟུགས་ནི་སྐྱེད་ཅིང་རབ་མཆོག་རོ་ཡི་རིགས་རྣམས་དག་གིས་ཡི་གེ་དགོད་པ་ཉིད་ཡིན་ཏེ། །ཆུ་ཡི་གཏེར་གྱི་རྡོ་རྗེ་འདི་ནི་སྤྱི་ཡི་བསྙེན་པར་འགྱུར་བ་སྒྲུབ་པ་དག་ནི་དབུ་མ་ཡང༌། །འདི་ལ་ཐབས་ནི་རྣམ་པ་བཞིར་འགྱུར་དམན་པ་བརྟན་པ་སྒྲུབ་པ་ཡན་ལག་དག་ལ་དེ་བཞིན་ ཉིད། །ཅེས་གསུངས་ཏེ། དང་པོ་སྟོང་ཉིད་བྱང་ཆུབ་ནི་འཆི་སྲིད་དང་བར་སྲིད་དག་བྱེད། སྟོང་ཉིད་རྣམ་བཅས་སུ་སྒོམ་པ་སྟེ་འདིར་འགྲེལ་ཆེན་ལས། སྟོང་པ་ཉིད་ཀྱི་སྐད་ཅིག་མ་གཅིག་པོ་སྲིད་པ་གསུམ་མཐོང་བ་ཞེས་གསུངས་པས། དཔྱད་པའི་ཡུལ་གྱི་སྟོང་ཉིད་མ་ཡིན་ནོ།། །།གཉིས་པ་ས་བོན་བསྡུ་བ་ནི། ཀུན་གཞི་རྣམ་ཤེས་ཀྱི་ཟླ་བ་ཐིག་ལེ་འཛིན་པ་སྟེ། མངལ་དུ་ཐིག་ལེའི་དབུས་སུ་བར་དོའི་རྣམ་ཤེས་ཞུགས་ཟིན་པ་མཚོན་བྱེད་ས་བོན་ཕྱག་མཚན་ནམ། ཆོ་ག་གསུམ་མམ། མངོན་བྱང་ལྔའི་དང་པོ་བཞི་ལ་སོགས་པའོ།། །།གསུམ་པ་གཟུགས་རྫོགས་པ་ནི་མངལ་དུ་ཟླ་བ་བདུན་གྱིས་ལུས་རགས་པ་རྫོགས་པ་སྦྱོང་བྱེད་ལྷའི་སྐུ་རྫོགས་པ་སྟེ་མངོན་བྱང་དང་སྦྱར་ན་ལྔ་པའོ།། །།བཞི་པ་ཡི་གེ་འགོད་པ་ནི། རོ་ཡི་རིགས་ཏེ་རིགས་དྲུག་རྣམས་ཀྱི་ཡི་གེ་དྲུག་སྐུ་ལ་དགོད་པར་བཤད་པ་མིག་ལ་སོགས་པ་རྣམས་གཟུགས་ལ་སོགས་པའི་ཡུལ་ལ་རབ་ཏུ་འཇུག་པ་དང༌། ཕུང་ཁམས་དྲུག་ལ་སོགས་པ་སྦྱོང་བ་སྟེ། དེ་རྣམས་ལ་སྟོང་པ་ཉིད་ལས་བྱང་ཆུབ་པ། ས་བོན་བསྡུ་བ་ལས་བྱང་ཆུབ་པ། གཟུགས་རྫོགས་པ་ལས་བྱང་ཆུབ་པ། ཡི་གེ་འགོད་པ་ལས་བྱང་ཆུབ་པ་ཞེས་བྱ་ན། དེ་དག་འདི་རང་ལ་བལྟོས་པའི་ཐུགས་གསུང་
སྐུ་དང་ཡེ་ཤེས་རྡོ་རྗེའི་རྣལ་འབྱོར། བསྙེན་པ། ཉེར་སྒྲུབ། སྒྲུབ་པ། སྒྲུབ་ཆེན་གྱི་ཆ་ཤས་ཏེ། འདི་ཅུང་ཟད་རྒྱས་པའི་དབང་དུ་བྱས་ནས་དུས་འཁོར་ལས་གསུངས་པའི་ལྷ་དཔའ་བོ་གཅིག་པ་རེའི་རྣལ་འབྱོར་ཚུན་ཆོད་ལ་ཚང་བར་བྱེད་དགོས་པའི་མངོན་རྟོགས་ཀྱི་ཆིངས་ཡིན་ལ། དེ་ཙམ་ནི་སྤྱི་ལྡོག་ནས་བསྙེན་པ་སྟེ། དམན་པའམ་བསྡུས་པ་ཡིན་ཞིང༌། དེའི་སྟེང་དུ་སྒྲུབ་པ་དག་ནི་ཞེས་པ་དག་གི་སྒྲས་ཉེར་སྒྲུབ་དང༌། སྒྲུབ་པ་གཉིས་བསྣན་པ་སྟེ། སྒྲུབ་ཆེན་ཡང་ཤུགས་ལ་བསྟན་ནོ། །དེ་ཡང་ཇི་ལྟ་བུ་སྙམ་ན། དང་པོ་སྲོག་རྫོགས་པའི་དོན་དུ་ཡེ་ཤེས་དགུག་གཞུག་དང༌། གཉིས་པ་སྐུ་གསུང་ཐུགས་བྱིན་རླབས་དང༌། གསུམ་པ་དབང་བསྐུར་རིགས་བདག་གིས་རྒྱས་བཏབ་པ་དང༌། བཞི་པ་ཕྲ་ཐིག་སོགས་ཇི་ལྟར་འོས་པ་བསྣན་ན། དབུ་མ་སྟེ་ཆོ་ག་འབྲིང་པོའམ་བརྟན་པའི་རྣལ་འབྱོར་ཞེས་ བྱའོ། །དེ་ལྟ་བུའི་སྒྲུབ་པ་དེ་ཡང་སྦྱང་བྱ་བཞིར་འདུས་ཏེ། དམ་ཡེ་བསྲེ་བ་ནི་བཙས་པའི་དུས་ཀྱི་བྱིས་པ་དང༌། སྐུ་གསུང་ཐུགས་བྱིན་རླབས་ནི་སོ་སྐྱེས་པ་ནས་བརྩམས་ཏེ་འབྲིང་པོའི་བྱིས་པ་དང༌། དབང་བསྐུར་ནས་ཐིག་ལེའི་རྣལ་འབྱོར་གྱི་བར་ནི། སོ་ལྷུངས་ནས་གཞོན་ནུའི་གནས་སྐབས་དང༌། ཕྲ་མོའི་རྣལ་འབྱོར་ནི་སོ་སྐྱེས་ནས་ལོ་བཅུ་དྲུག་གི་མཐར་རིགས་བརྒྱུད་སྤྲོ་བ་ལ་སོགས་པ་སྦྱོང་ངོ༌། །འདི་དག་ནི་གཙོ་བོ་འཁོར་དང་བཅས་པའི་དཀྱིལ་འཁོར་མི་སྒོམ་པའི་དབང་དུ་བྱས་པའམ། གཙོ་འཁོར་ཡོད་ཀྱང་ཞུ་བ་གླུས་བསྐུལ་དང༌། དཀྱིལ་འཁོར་ལན་གཉིས་སྤྲོ་བ་མེད་པའི་དབང་དུ་བྱས་པའོ། །ཐབས་རྣམ་པ་བཞི་ཞེས་བྱ་བ་ནི། སྒྲུབ་པ་གསུམ་གྱི་སྐབས་རྣམས་བྱིས་པ་ལ་སོགས་པའི་གནས་སྐབས་བཞི་པོ་སྦྱོང་བྱེད་དེ། དམན་པ་ཞེས་པ་སྔར་གྱི་བྱང་ཆུབ་བཞི་བསྐྱེད་ཀྱི་སྟེང་དུ། ཆོ་ག་བཞི་པོ་དེ་བསྣན་པ་ནི་བརྟན་པ་སྟེ་འབྲིང་པོའོ། །འགྲེལ་ཆེན་ལས། ལྷ་ཐམས་
ཅད་ལ་ཡན་ལག་རྣམ་པ་བཞིར་རྣལ་འབྱོར་པས་བསྒོམ་པར་བྱའོ། །ཞེས་གསུངས་པས། ལྷ་རེ་རེའི་རྣལ་འབྱོར་ལ་ཡང་བསྡུས་འབྲིང་དེ་གཉིས་གང་རུང་རེ་སྒོམ་དགོས་ལ་དཀྱིལ་འཁོར་རྒྱས་པ་དང༌། ཆོ་ག་རྒྱས་པ་ལའང་དེ་དག་ཤུགས་ལ་ཚང་བ་དགོས་ཞེས་པ་སྟེ། འཆད་ཚུལ་ཇི་ལྟར་བྱེད་ཅེ་ན། ཞུ་བ་གླུས་བསྐུལ་དང༌། འཁོར་ཚོགས་ལན་གཅིག་གམ། ལན་གཉིས་གང་སྤྲོ་ཡང་གསུམ་པ་གཟུགས་བརྙན་རྫོགས་པའི་ཡན་ལག་གི་སྐབས་དེར་བསྣོན་པ་ཡིན་ཞིང༌། ཡེ་གེ་འགོད་པ་ནི་ཡེ་ཤེས་པ་གཞུག་པའི་སྔ་ཕྱི་གང་དུ་བྱས་ཀྱང་འདྲ་སྟེ། མངོན་རྟོགས་ཆེན་མོ་གཅིག་ལ་སྤྱིར་ནས་ཚང་བ་ཙམ་གྱིས་ཆོག་གོ ཁ་ཅིག་དཀྱིལ་འཁོར་རྒྱལ་མཆོག་གི་སྐབས་སུ་ངེས་པར་ཆུག་དགོས་ཞེས་པ་ནི། སྤྱིའི་བསྙེན་པ་ཞེས་གསུངས་པའི་དོན་མ་གོ་བའོ། །དེས་ན་འོག་ཏུ་འཆད་འགྱུར་གྱི་ཡན་ལག་བཞིའི་དབང་དུ་བྱས་ན། དཀྱིལ་འཁོར་རྒྱལ་མཆོག་ཡོངས་རྫོགས་དང༌། ལས་རྒྱལ་མཆོག་གི་དམ་ཚིག་པ་སྐྱེད་པ་ཡན་ཆད་བྱང་ཆུབ་དང་པོ་གསུམ་ཡིན་ལ། དེ་མན་ཆད་ཡི་གེ་དགོད་པའི་རིགས་སུ་གཏོགས་པ་ཡིན་ནོ། །ཡང་བསྙེན་པ་བྱང་ཆུབ་བཞི་དང་སྒྲུབ་པ་ཆོ་ག་བཞི་སྟེ། བརྒྱད་ཀྱིས་བསྡུས་པའི་ཆོ་ག་འབྲིང་པོ་ཡང་ཡན་ལག་བཞིའི་རྣལ་འབྱོར་རྒྱས་པ་དང་སྦྱོར་ཚུལ་སྔ་མས་རིགས་བསྒྲེས་ཏེ་གོ་ནུས་ལ། ཡན་ལག་བཞི་རྒྱས་པའི་ཆིངས་ནི་འོག་ཏུ་འཆད་པར་འགྱུར་རོ། །སྐབས་འདིར་སྟོང་ཉིད་བྱང་ཆུབ་སོར་སྡུད་དང༌། དེ་ནས་བསམ་གཏན་དང་སྲོག་འཛིན་པར་ས་བོན་བསྡུ་བ་དང༌། རྗེས་དྲན་གཟུགས་བརྙན་སྐྱེད་པ་དང༌། ཏིང་ངེ་འཛིན་ཡི་གེ་འགོད་པའི་བར་དུ་སྦྱོར་བར་མཛད་པ་འདི་ལྟ་བུ་གཞན་ཡང་མང་སྟེ། བསྐྱེད་པའི་རིམ་པའི་གནས་སྐབས་གང་དང་གང་ཡིན་པ་རྣམས་རྫོགས་རིམ་གྱི་ཡེ་ཤེས་སྐྱེད་པའི་རྒྱུད་སྦྱང་ཐབས་སུ་སྟོན་པའི་ཁུངས་མང་ངོ༌། །དེ་བཞིན་དུ། བདུད་རྩི་ལྔ་ལ་སོགས་དང་ཆུ་གཏེར་རྡོ་རྗེ་
རྣམས་དང་སྔགས་ཀྱི་བཟླས་པ་སོགས་ཀྱིས་བསྙེན་པ་སྟེ། །སོ་སོར་སྡུད་པ་ལ་སོགས་རྡོ་རྗེ་པདྨ་ལས་སྐྱེས་བདུད་རྩི་ཡིས་ནི་ཉེ་བའི་སྒྲུབ་པར་འགྱུར། །དགའ་བ་ལ་སོགས་རྣམས་ཀྱི་རྡོ་རྗེ་གསུམ་དང་ཆུ་སྐྱེས་རོ་མཉམ་གྱུར་པ་སྒོམ་པ་སྒྲུབ་པར་འགྱུར། །ཤེས་རབ་ལ་སྦྱར་གང་ཚེ་འཕོ་མེད་ཕྲ་མོའི་རྣལ་འབྱོར་དག་ལས་ངེས་པར་སྒྲུབ་པ་ཆེན་པོར་འགྱུར། །ཞེས་རྫོགས་རིམ་གྱི་སྐབས་སུ་བལྟོས་མེད་བཞི་དང་བུམ་ཅན་སོགས་སྔོན་འགྲོ་བསྙེན་པ་དང༌། རྫོགས་རིམ་ཡན་ལག་དང་པོ་བཞི་ཉེར་སྒྲུབ་པ་དང༌། རྗེས་དྲན་སྒྲུབ་པ། ཏིང་ངེ་འཛིན་སྒྲུབ་ཆེན་དུ་བཤད་པའང་བྱུང་ལ། ཡང་བཤད་ཚུལ་གཅིག་ལ་དམ་རྫས་བསྟེན་ཅིང་ཁ་དག་པ་སྔོན་དུ་འགྲོ་བས་རྡོ་རྗེ་བཞི་པོ་ལམ་དུ་བྱེད་པའི་ལྷའི་རྣལ་འབྱོར་རྒྱས་བསྡུས་གང་རུང་བསྒོམས་ཏེ། བཟླས་པ་བྱེད་པ་བསྙེན་པར་གསུངས་ཤིང༌། གཞན་རྣམས་སྔ་མ་དང་འདྲ་བས་བསྐྱེད་རྫོགས་གཉིས་ཀ་བསྙེན་སྒྲུབ་ཡན་ལག་བཞི་ཕྲུགས་གཅིག་གིས་བསྡུས་པ་ཡང་མཛད་དོ། །ཡང་འདི་སྙམ་དུ་བྱང་ཆུབ་བཞི་བསྐྱེད་ནི། དཀྱིལ་འཁོར་རྒྱལ་མཆོག་ཁོ་ན་ལས་ཕྱེ་བ་མ་ཡིན་ན། བསྙེན་སྒྲུབ་ཡན་ལག་བཞི་བཞི་བཅུ་དྲུག་ཏུ་རྩི་བ་མེད་པར་འགྱུར་རོ་སྙམ་ན། དཀྱིལ་འཁོར་རྒྱལ་མཆོག་གི་བསྙེན་པ་ཉེར་སྒྲུབ་ཅེས་སོགས་བཞི་བཞི་བཅུ་དྲུག་ནི་མཐའ་གཅིག་ཏུ་རྩི་ཡང་མི་དགོས་ལ། བརྩིས་ཀྱང་འགལ་བ་མེད་དེ་ཡི་གེ་འགོད་པའི་དོད་ང་རྒྱལ་བཟུང་བའམ། སྙིང་རྗེའི་དབང་བསྐུར་སོགས་གཞན་ཡོད་པས་དེ་ཁོ་ན་ལ་བློ་རྩེ་གཏོད་མི་དགོས་སོ། །རྡོ་རྗེ་བཞི་ལ་ནང་ཚན་རྡོ་རྗེ་བཞི་བཞིས་ཕྱེ་བ་ནི་ངེས་པར་རྩི་དགོས་མོད། དཀྱིལ་འཁོར་རྒྱལ་མཆོག་ལ་བྱང་ཆུབ་བཞི་མ་ཚང་ཡང་དེ་ལ་ཁྱད་མེད་དོ། །ཅིའི་ཕྱིར་ཞེ་ན། འཁོར་གྱི་ལྷ་ཚོགས་སྤྲོ་བ་མན་ཆད་ཡེ་ཤེས་རྡོ་རྗེའི་ལམ་ཡིན་པས། ཐུགས་གསུང་སྐུ་དང་ཡེ་ཤེས་ཀྱི་རིམ་པ་ཚང་བ་དང༌། རྒྱལ་མཆོག་གཉིས་པར་དམ་ཡེ་
དབང་བསྐུར་རྒྱས་གདབ་རྣམས་ལ་སྐུ་གསུང་ཐུགས་ཡེ་ཤེས་ཀྱི་རིམ་པ་ཚང་བ་དང༌། ཐིག་ལེའི་རྣམ་འབྱོར་དང༌། ཕྲ་མོའི་རྣལ་འབྱོར་གྱི་དགའ་བ་བཞི་དང་འབྲས་བུ་བཞི་ལའང་དེ་དག་སྦྱོར་བའི་ཕྱིར་བཅུ་དྲུག་ གོ །ཡང་འགྲེལ་ཆེན་ལས་སྔོན་གྱི་སྨོན་ལམ་ཡོངས་སུ་རྫོགས་པར་བྱ་བ་དང༌། ཆོས་ཀྱི་འཁོར་ལོ་བསྐོར་བའི་དོན་དུ་མངལ་དུ་འཇུག་པའི་ཚུལ་གྱིས་བསྐྱེད་པའི་རིམ་པས་བཅོམ་ལྡན་འདས་ཀྱི་སྒྲུབ་ཐབས་གསུངས་པ། ཞེས་པའང་འདིས་འབྲས་བུ་ལ་སྦྱོར་ཚུལ་གསལ་བར་བསྟན་པ་ཡིན་ནོ། །འོན་ཀྱང་ཁ་ཅིག་འདི་སྐད་ཅེས། ཚོགས་གསོག་དང་པོ་གྲངས་མེད་གསུམ་དང༌། གཉིས་པ་དགའ་ལྡན་ནས་འཕོ་བ། གཞལ་ཡས་ཁང་ཡུམ་གྱི་ལྷུམས་སུ་ཙན་དན་གྱི་ཁང་བཟངས་གྲུབ་པ། མངོན་བྱང་ལྔས་སྐུ་རྫོགས་པ་ལྷུམས་ན་བཞུགས་པ་ཞུ་བ་གླུས་བསྐུལ་ནས་བཞེངས་ཏེ་དམ་ཚིག་གི་འཁོར་ལོ་སྤྲོ་བ་ནི་སྐུ་བལྟམས་པ། ཡེ་ཤེས་པ་དང་རོ་མཉམ་པ་ནི། ཕྱོགས་ཕྱོགས་སུ་གོམས་པ་བདུན་པོར་ནས་སེངྒེའི་སྒྲ་བསྒྲགས་པ། དབང་བསྐུར་རྒྱས་བཏབ་ནི་སྐུ་ཁྲུས་གསོལ་ནས་ཁྱིམ་དུ་བཞུགས་པའི་མཐའི་བར་དང༌། ཐིག་ལེའི་རྣལ་འབྱོར་ནི་དཀའ་ཐུབ་ནས་བདུད་བཅོམ་པའི་བར་དང༌། ཕྲ་མོའི་རྣལ་འབྱོར་ནི་སངས་རྒྱས་ནས་ཆོས་འཁོར་བསྐོར་བའི་བར་རོ། །ཞེས་འདོད་ཀྱང་གཞལ་ཡས་ཁང་ལ་མངལ་སྦྱང་བའོ་ཞེས་གསུངས་པས། དེ་ཡན་ཆད་ཙམ་མི་འགལ་ཡང་གཞན་རྣམས་ཤིན་ཏུ་མི་འགྲིག་པས་བློས་བཏགས་སུ་ཟད་དོ། །རང་ལུགས་ནི་སྦྱང་བྱ་དང༌། རྫོགས་རིམ་ལ་བརྟེན་ནས་དེ་དང་དེའི་འབྲས་བུ་གོ་བར་ནུས་པས་དོན་གྱི་གཙོ་བོ་ནི་འོག་ནས་རྒྱས་པར་འཆད་པ་བཞིན་ཡིན་ལ། འདིར་ཞོར་བྱུང་དུ་བཤད་ན་སྔར་གྱི་ལུང་གི་འཕྲོས་དང་སྦྱོར་ཏེ། གཙོ་བོ་བསྐྱེད་པ་སྐུ་བལྟམས་པ་དང༌། འཁོར་གྱི་ལྷ་ཚོགས་སྤྲོ་བ་ཁྱིམ་ན་གནས་པའི་མཛད་པ་དང༌། ཞུ་བ་གླུས་བསྐུལ་དཀའ་སྤྱད་དང༌།
སླར་བཞེངས་པ་སངས་རྒྱས་པ་དང༌། དམ་ཚིག་གི་དཀྱིལ་འཁོར་སྤྲོ་བ་འཁོར་ཚོགས་སྐྱེད་པ་དང༌། ཡེ་ཤེས་པ་བསྲེ་བ་ཆོས་ཀྱི་འཁོར་ལོ་བསྐོར་བ་དང༌། དབང་བསྐུར་རྒྱས་བཏབ་འགྲོ་བ་རྣམས་བྱང་ཆུབ་གསུམ་ལ་བཀོད་པ་དང༌། ཐིག་ཕྲ་གཉིས་ཆགས་ཆེན་གྱི་གདུལ་བྱ་འདུལ་བའི་དོན་དུ་སྔགས་ཀྱི་འཁོར་ལོ་སྐོར་བའོ། །ཞེས་སྦྱར་ན་འཛམ་བུའི་གླིང་དུ་སྤྲུལ་པའི་སྐུ་བྱུང་བ་དང་མཚུངས་པར་བསྟན་པས་ལེགས་ལ། སྤྱིར་ནི་དཔལ་དུས་ཀྱི་འཁོར་ལོའི་རྒྱུད་གསུངས་པ་ན་རྣམ་ཐར་བཞི་ནས་ཉེར་བསྡུའི་བར་གྱི་རིམ་པ་འདི་དག་མངོན་སུམ་དུ་བསྟན་ཅིང༌། བཟླས་པའི་ཐད་དུ་གདུལ་བྱ་རྣམས་ལ་དབང་བསྐུར་ཞིང་རྒྱུད་བཤད་པ་ཡིན་པས་མངོན་རྟོགས་འདི་ལྟར་སྒོམ་པ་འདི། སངས་རྒྱས་ཆགས་བྲལ་གྱི་མཛད་པའི་གསེབ་ནས་རིགས་མཐུན་རྟགས་ཏེ་སྦྱོར་དགོས་པ་མ་ཡིན་ཏེ། འདི་ཉིད་ཡོངས་རྫོགས་སྤྲུལ་སྐུའི་མཛད་པ་དང་མཐུན་པའི་རྣམ་པ་ལམ་བྱེད་ཡིན་པའི་ཕྱིར་རོ།། །།གཉིས་པ་མངོན་རྟོགས་རྒྱས་པའི་རིམ་པ་རྣམ་པར་ངེས་པ་ནི། རེ་ཞིག་དཀྱིལ་འཁོར་རྒྱས་པ་ཆོ་ག་རྒྱས་པའི་སྒོ་ནས་སྒོམ་པར་བྱེད་པའི་དབང་དུ་བྱས་ཏེ་བཤད་ན། མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་འདི་སྐད་ཅེས། འོ་ན་བཅོམ་ལྡན་འདས་དེ་བཞིན་གཤེགས་པ་དེ་ཁོ་ན་ཉིད་རིག་པས་རྒྱུད་ཀྱི་རྒྱལ་པོ་ཐམས་ཅད་ལས། དང་པོར་བསྲུང་བའི་འཁོར་ལོ་བསྒོམ་པར་བྱའོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ལྷའི་ས་བོན་གྱི་ཡི་གེ་བསམ་ཞིང༌། རྣམ་པར་ཐར་བའི་སྒོ་ལ་སོགས་པ་དག་པར་བྱས་ནས་ནམ་མཁའི་མཐིལ་དུ་ཡེ་ཤེས་ཀྱི་ས་བོན་གྱི་འོད་ཟེར་རྣམས་ཀྱིས་དེ་བཞིན་གཤེགས་པ་རྣམས་སད་པར་བྱས་ཏེ། དེ་རྣམས་ལ་སྔགས་པས་མཆོད་པ་བྱས་ནས་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། གསུམ་ལ་སྐྱབས་སུ་འགྲོ་བ་དང༌། བདག་ཉིད་ཀྱི་དངོས་པོ་དབུལ་བ་དང༌། བྱང་ཆུབ་ཀྱི་སེམས་བསྐྱེད་པ་དང༌། ལམ་ལ་བརྟེན་པ་
དང༌། སྟོང་ཉིད་ལ་དམིགས་པར་བྱའོ། །དེ་ནས་ཆོས་འབྱུང་ནམ་མཁའི་ཁམས་ཀྱི་རང་བཞིན་བསྒོམ་པར་བྱ་སྟེ། དེའི་དབུས་སུ་ཧཱུཾ་ཡིག་ཡོངས་སུ་གྱུར་པ་ལས་རྡོ་རྗེའི་ས་གཞིའོ། །ཡང་ན་ཤེས་རབ་ཀྱི་རྒྱུད་ཀྱི་དགོངས་པས། རླུང་ལ་སོགས་པའི་དཀྱིལ་འཁོར་རྣམས་རང་ལྷུན་པོའི་སྟེང་དུ་ཁང་པ་བརྩེགས་པའམ་རྡོ་རྗེའི་གུར་རོ། །དེ་ནས་སྐུ་རྡོ་རྗེ་ཡོངས་སུ་གྱུར་པ་ལས་དཀྱིལ་འཁོར་མཚན་ཉིད་ཐམས་ཅད་ཡང་དག་པར་རྫོགས་པ་ཟླ་བ་དང་ཉི་མའི་གདན་དང་ལྡན་པའོ། །ཡང་ན་པཾ་ཡིག་ཡོངས་སུ་གྱུར་པ་ལས་པདྨ་དང༌། ཨ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རམ། ར་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་རོ། །དེའི་སྟེང་དུ་ཨཱ་ལི་དང་ཀཱ་ལི་ལས་ཟླ་བ་དང་ཉི་མ་དང་ཡེ་ཤེས་ཀྱི་ས་བོན་གྱི་ཡེ་གེ་རྣམས་ཀྱིས་མེ་ལོང་ལྟ་བུ་དང༌། མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་སྒྲུབ་པ་དང༌། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཏེ༌། ཡེ་ཤེས་ལྔའི་བདག་ཉིད་ཀྱི་ལྷའི་གཟུགས་བསྒོམ་པར་བྱའོ། །དེ་ནས་སྐུ་དང་གསུང་དང་ཐུགས་ཀྱི་རྡོ་རྗེ་ཤེས་རབ་ཀྱི་ཆགས་པས་ཞུ་བ་ལ་ལྷ་མོ་རྣམས་ཀྱིས་རྡོ་རྗེའི་གླུ་རྣམས་ཀྱིས་རབ་ཏུ་བསྐུལ་ཏེ༌། སླར་ཡང་སྐུ་དང་གསུང་དང་ཐུགས་བྱིན་གྱིས་བརླབས་པ་རང་གི་མཚན་མ་ལས་རྫོགས་པའོ། །དེ་ནས་དཀྱིལ་འཁོར་ལ་ལྷའི་ཚོགས་སྤྲོ་བ་དང༌། ཡེ་ཤེས་ཀྱི་དཀྱིལ་འཁོར་ལོ་དགུག་པ་དང༌། གཞུག་པ་དང༌། བཅིང་བ་དང༌། མཉེས་པ་དང༌། དམ་ཚིག་གི་དཀྱིལ་འཁོར་ལ་རོ་མཉམ་པར་བྱེད་པ་དང༌། དེ་བཞིན་གཤེགས་པ་ཐམས་ཅད་དང༌། ལྷ་མོ་རྣམས་ཀྱིས་དབང་བསྐུར་བ་དང༌། རྡོ་རྗེའི་ཅོད་པན་དང༌། རྒྱན་དང་ལྡན་པ་དང༌། རྡོ་རྗེ་སེམས་དཔའི་ང་རྒྱལ་གཟུགས་སུ་སྔགས་པས་བདག་ཉིད་བསྒོམ་པར་བྱའོ། །ཞེས་གསུངས་པ་ནི། རྒྱུད་འདིའི་ལུགས་ཀྱི་བསྐྱེད་རིམ་རྒྱས་པའི་རྐང་གྲངས་མཐའ་དག་གསལ་བར་བསྟན་པ་ཡིན་ནོ། །འདི་ཙམ་ནི་རྒྱུད་འདི་ཉིད་ལས་གསུངས་པའི་ཚིག་ཟིན་གྱི་དཀྱིལ་འཁོར་གསལ་བར་བསྟན་པ་བཅུ་གཉིས་པོ་མཐའ་དག་ལ་ཆོ་ག་
རྒྱས་པ་སྦྱོར་ཚུལ་ཡིན་ལ། གསང་འདུས་དང་སྒྱུ་དྲ་སོགས་ཐབས་རྒྱུད་ཀྱི་དཀྱིལ་འཁོར་ལ་འབྱུང་བཞི་ཡོངས་སུ་བྱུང་བ་ལས་གཞལ་ཡས་ཁང་དང༌། སྡོམ་པ་ཆེ་ཆུང་མ་རྒྱུད་ཀྱི་དཀྱིལ་འཁོར་ལ་འགྱུར་བཞི་རི་རབ་ཀྱི་སྟེང་དུ་གཞལ་ཡས་ཁང་བསྒོམ། གཙོ་བོའི་གདན་པདྨ་ཟླ་ཉི་ཙམ་དུ་གསུངས་པ་ཡང་དཀྱིལ་འཁོར་བཅུ་གཉིས་པོ་སྤྱི་འགྲོའི་དབང་དུ་བྱས་པའོ། །རྒྱུད་འདི་ལས་འབྱུང་བའི་དཀྱིལ་འཁོར་མཐའ་དག་ལ་རིམ་པ་ནི་ཁོ་ན་དགོས་པ་མ་ཡིན་ཞིང༌། དཀྱིལ་འཁོར་བཅུ་གཉིས་པོ་ཐུགས་དཀྱིལ་ལ་སོགས་པ་ལ་ཡང་ཆོ་ག་འབྲིང་དང་བསྡུས་པའི་སྐབས་འདི་དག་མཐའ་དག་ཚང་བར་སྦྱོར་མི་དགོས་པའི་སྐབས་མང་ངོ༌། །འོན་ཀྱང་སྐབས་འདིར་དུས་ཀྱི་འཁོར་ལོ་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་ལ་སྒྲུབ་ཐབས་ཆོ་གའི་རིམ་པ་རྒྱས་པ་སྦྱར་བའི་དབང་དུ་བྱས་ནས། བསྐྱེད་རིམ་གྱི་སྔོན་དུ་འགྲོ་བའི་རིམ་པ། དངོས་གཞི་ཡན་ལག་བཞིའི་རྣལ་འབྱོར། རྗེས་བཟླས་པ་མཆོད་གཏོར་དང་བཅས་པའོ།། །།དང་པོ་ལ་ཐུན་མོང་གི་སྔོན་འགྲོ་དང༌། ཐུན་མོང་མ་ཡིན་པའི་སྔོན་འགྲོ་གཉིས་སོ། །ཐུན་མོང་བ་ནི། རྒྱུད་གཞུང་ལས་གསལ་བར་མེད་ཀྱང༌། བླ་མ་དམ་པ་རྣམས་ཀྱི་མན་ངག་སྟེ། དུས་ད་ལྟའི་རྣལ་འབྱོར་པ་རྣམས་ལ་གལ་ཆེ་བའང་ཡིན་ནོ། །དེ་ལ་སྐྱབས་འགྲོ་སེམས་བསྐྱེད་སྤྱི་དང་མཐུན་ཅིང༌། གོ་དོན་རྣམས་འཁྲིད་ཡིག་ལས་འབྱུང་བ་ལྟར་ཡིན། རྡོར་སེམས་ཀྱི་རྣལ་འབྱོར་ནི། རྒྱུད་རྣམས་ལས་ཐུན་མཚམས་སུ་སྒོམ་བཟླས་བྱེད་པར་གསུངས་ཏེ། ལྷག་ཆད་ཁ་བསྐང་བ་དང༌། ཐུན་གྱི་སྐབས་སུ་སྒོམ་བཟླས་བྱས་པའི་བྱིན་རླབས་བརྟན་བྱེད་དང༌། ལྷའི་ཐུགས་རྒྱུད་སྐུལ་བའི་གསོལ་འདེབས་ཀྱི་དོན་དུ་ཡིན་ལ། གཙོ་བོར་སྡིག་སྒྲིབ་དང་ཉེས་ལྟུང་སྦྱང་ཕྱིར་དུ་ཡིན་པ། སྤྱིར་ཐུན་མཚམས་གང་ལ་བྱས་ཀྱང་རུང་མོད་ཀྱི། ཐུན་མཚམས་གཞན་ལ་ལོང་སྐབས་
དང་བསྟུན་ཞིང༌། ཐུན་ལ་འཇུག་པའི་ཐོག་མར་ངེས་ཅན་དུ་སྦྱོར་བ་བླ་མ་རྣམས་ཀྱིས་ཕྱག་ལེན་དུ་བཏབ་པའི་རྒྱུན་ཡིན་པས། འདི་ཉིད་ཁོ་ན་ཁུངས་སུ་ཆེ་ཡི། གནས་གཞི་རྙིང་པའི་དཔེ་འཁྱམས་གཡེངས་པའི་ཁུངས་འཚོལ་མི་དགོས་སོ། །འདི་ལ་རིགས་ལྡན་སྤྲུལ་པའི་སྐུ་ཀུན་སྤངས་ཆེན་པོ་འཁྲིད་ཡིན་ན་ཡུམ་དམར་མོར་མཛད་པ་ཞིག་ཡོད་དེ། མཆོག་བརྙེས་དེ་ཉིད་ཀྱི་ཡེ་ཤེས་ཀྱི་སྣང་བ་དང༌། རིགས་ལྡན་རྣམས་ཀྱི་གསུང་གི་སྣང་བ་ལས་བྱུང་བའི་མན་ངག་ཡིན་པས་དེ་ལྟ་བུ་ཡང་བསྒོམ་པར་བྱ་ལ། ཡང་འབྲོ་བའི་བླ་མ་གོང་མ་རྣམས་དང་སྲེག་པ་ལུང་པའི་ཡི་གེ་དང༌། ཙ་མི་དང་རྒ་ལོའི་མན་ངག་གི་རྒྱུན་སོགས་ཡིག་བརྒྱའི་སྒོམ་བཟླས་རྙིང་མ་ཕལ་ཆེར་ན་སྤྱི་དང་མཐུན་པ་ཉིད་ཡོད་པ་ལྟར་ཀུན་མཁྱེན་ཆོས་ཀྱི་རྒྱལ་པོ་ཐུགས་སྲས་རྣམས་དང་བཅས་པའང་ཕྱག་ལེན་ལ་འདེབས་པར་མཛད་པ་ནི་དཀྱུས་སུ་བཤད་པ་ལྟར་ཡིན་ཞིང༌། དེ་ལ་རྡོ་རྗེ་སེམས་དཔའ་ཞི་བར་བྱས་ནས་བཛྲ་ས་ཏྭའི་མཚན་བཅུག་པ་དང༌། རྡོར་སེམས་རོལ་པའི་ཁྲོ་བོ་ཧེ་རུ་ཀར་བྱས་ནས། ཧེ་རུ་ཀའི་ཡིག་བརྒྱ་བཟླ་བ་གདམ་ཁ་ཡིན་པས་གཉིས་པོ་གང་བྱས་ཀྱང་འདྲ་མོད། གཙོ་བོ་དུས་ཀྱི་འཁོར་ལོ་རོལ་པའི་ཁྲོ་བོའི་ཚུལ་དུ་བཞུགས་པས། འདིར་ཡང་རྡོར་སེམས་ཧེ་རུ་ཀ་ཉིད་གཙོ་བོར་མཛད་དོ། །དེས་ན་འདིར་ཧེ་རུ་ཀའི་ཡིག་བརྒྱའི་སྒོམ་བཟླས་འདི་ནི། བདེ་མཆོག་མངོན་བརྗོད་བླ་མ་ལས་གསུངས་ཤིང༌། རྒྱ་བོད་ཀྱི་རྡོ་རྗེ་འཛིན་པ་ཕལ་ཆེར་ལ་སྤྱི་ཁྱབ་ཏུ་གྲགས་པའི་ཉི་ཟླ་ལྟ་བུ་ཡིན་པས་འདི་ལ་གོལ་ས་ཡེ་མེད། དེ་ཉིད་གསང་བ་སྤྱིའི་ཆོ་ག་ཡིན་པས་རིགས་མཐུན་མི་མཐུན་གྱི་རྒྱུད་སྣ་ཚོགས་པ་ལ་འཇུག་པའི་ཕྱིར་འདི་ཁོ་ན་བསྒོམ་པ་རིགས་སོ། །འོ་ན་ལྟེ་བར་ཧོཿཡིག་བྱེད་པས་དུས་འཁོར་ཁོ་ནའི་ལུགས་སུ་བཀྲལ་བ་མིན་ནམ་སྙམ་ན། ཁ་སྐོང་ཕྲ་མོ་ནི་སྣ་ཚོགས་ནས་བྱས་ཀྱང་ཆོག་པའི་སྐབས་ཡོད་པས། མངོན་
བརྗོད་བླ་མའི་ཆོ་ག་ལ་དུས་འཁོར་གྱིས་ཁ་སྐོང་དུ་ཅིས་ཀྱང་རུང་སྟེ། དུས་འཁོར་ལ་ཡང་དེ་ཉིད་བསྡུས་པ་སོགས་རྒྱུད་སྡེ་གཞན་གྱིས་ཁ་སྐོང་དུ་རུང་གིན་འདུག་པའི་ཕྱིར་དང༌། ཡང་ལྟེ་བར་ཧོཿ ཡིག་ཡེ་ཤེས་རྡོ་རྗེའི་ངོ་བོ་ནི། མངོན་བརྗོད་བླ་མ་ཉིད་ལས་ཀྱང་བཤད་པས་དུས་འཁོར་ལས་ཁ་བསྐང་བ་ཡིན་པར་ཡང་མ་ངེས་སོ། །དེས་ན་གང་དག་འདིའི་དཀྱིལ་འཁོར་གྱི་ལྷ་ཚོགས་ལས་བྱུང་བའི་རྡོར་སེམས་སྔོན་པོ་ཞལ་གསུམ་ཕྱག་དྲུག་པ་བསྒོམས་ནས་སྔགས་ཡིག་བརྒྱ་བཟླ་བ་ནི། གང་ནས་ཀྱང་མ་བཤད་ཅིང་གཉིས་བསྲེས་པས་གཉིས་མིན་དུ་སོང་བ་ནགས་ཀྱི་མི་བླུན་པོས་མེ་དང་ཆུ་བསྲེས་པའི་དཔེ་དང་འདྲའོ། །དེས་ན་སྔགས་ཡི་གེ་བརྒྱ་པ་གསུངས་པའི་རྒྱུད་ལས་སྒྲུབ་ཐབས་སྐུའི་རྣམ་འགྱུར་དེ་འདྲ་གསུངས་པ་མེད་ལ། རྡོར་སེམས་སྔོན་པོ་ཞལ་གསུམ་ཕྱག་དྲུག་པ་གསུངས་པའི་སྐབས་ཀྱི་སྔགས་ལ་ཡིག་བརྒྱ་གསུངས་པ་ནམ་ཡང་མེད་པས་འབྲེལ་མེད་ཁོ་ན་དང༌། འཁོར་ལོ་སྒྱུར་དྲུག་གི་གཙོ་བོ་རྡོར་སེམས་ཧེ་རུ་ཀ་དཀར་པོ་འདི་དང༌། སྔགས་ཧེ་རུ་ཀའི་ཡིག་བརྒྱ་སྦྱར་ནས་དབང་གི་ཆུ་རྒྱུན་གྱིས་སྡིག་སྒྲིབ་བཀྲུ་བའི་དམིགས་པ་བྱས་ན། ཉེས་ལྟུང་སྦྱོང་བ་ལ་བསྔགས་པར་བཤད་པ་ཡིན་གྱི། སྤྱི་ལྡོག་ནས་ལྷ་རྡོ་རྗེ་སེམས་དཔའ་ཡིན་པ་ཙམ་གྱིས་མི་བསྐྱོད་པ་དང་རྣམ་སྣང་སོགས་ལས་སྒྲིབ་སྦྱོང་ལ་བསྔགས་པའི་རྒྱུ་མཚན་མེད་དེ། མི་འཁྲུགས་པ་དང་ཀུན་རིག་རྣམ་སྣང་གིས་མཚོན་ནོ། །སྔགས་ཀྱང་ཧེ་རུ་ཀའི་ཡིག་བརྒྱ་དེ་གོང་དུ་སྨོས་པའི་རྡོར་སེམས་དེའི་སྔགས་སུ་འགྱུར་ལ། རྡོར་སེམས་ཡིན་ཚད་ལ་སྦྱོར་བ་མ་ཡིན་ཏེ། ཁ་སྦྱོར་དང་མཉམ་སྦྱོར་དང་ཟླ་གསང་ཐིག་ལེ་སོགས་ཀྱིས་མཚོན་ནོ། །དེས་ན་དེ་འདྲའི་རིགས་ཀྱི་བློ་བཟོ་སྤངས་ཏེ། བླ་མའི་མན་ངག་ཁུངས་དང་ལྡན་པ་ལ་འཇུག་པར་བྱའོ།། །།གཉིས་པ་ཐུན་མོང་མ་ཡིན་པའི་སྔོན་འགྲོ་
ལ། སྲུང་བའི་འཁོར་ལོ་ཡན་ལག་དང་བཅས་པ་དང༌། ཚོགས་བསག་རྣམ་པ་གཉིས་སོ། །དང་པོ་ལ་གོ་རིམ་ངེས་པ་དང༌། སོ་སོའི་གོ་དོན་གཉིས་སོ། །དང་པོ་ནི། སྤྱིར་ལུས་ངག་ཡིད་གསུམ་གྱི་སྐྱོན་སྦྱང་བའི་དོན་དུ་རྡོ་རྗེའི་ཞལ་དག་པ་དང༌། གཞི་ལམ་འབྲས་གསུམ་རང་གཞན་གྱི་རྒྱུད་ཀྱིས་བསྡུས་པ་མཐའ་དག་ལས་རིགས་བྱེ་བྲག་པ་རྣམས་རིགས་དྲུག་ཏུ་མ་འདུས་པ་མེད་ཅིང༌། དེ་དག་ཁྱབ་བྱེད་ཀྱི་ཡེ་ཤེས་སུ་བྱིན་གྱིས་རློབ་པའི་ཕྱིར་རིགས་དྲུག་དགོད་པ་དང༌། རིགས་ཁྱབ་བྱེད་རྣམས་སྤྱིར་རྡོ་རྗེ་བཞི་དང༌། ཁྱད་པར་དུ་ཡེ་ཤེས་རྡོ་རྗེ་ཉིད་དུ་འདུས་ལ། དེ་ཐམས་ཅད་སྤྱིར་རྡོ་རྗེ་བཞི་དང༌། ཁྱད་པར་ཡེ་ཤེས་རྡོ་རྗེའི་རང་བཞིན་དུ་བྱིན་གྱིས་རློབ་པ་ནི་རྡོ་རྗེ་བཞིས་བྱིན་གྱིས་བརླབ་པའམ། མཆོག་གི་ཕྱག་རྒྱས་བྱིན་གྱིས་རློབ་པའོ། །སྤྱི་ལྡོག་ནས་འདི་རྣམས་བསྒོམས་པས་ཀྱང་བར་ཆད་སེལ་བྱེད་དང་མི་མཐུན་པའི་ཕྱོགས་སྲུང་ཞིང་བཟློག་པར་འགྱུར་བ་ནི་ཡིན་མོད་ཀྱང༌། སྲུང་བ་ཁོ་ནའི་ཕྱིར་མ་ཡིན་པས། དེ་དག་སྲུང་འཁོར་གྱི་ཆོ་ག་དངོས་སུ་མི་འགྱུར་མོད། །ཆོ་ག་ཤིན་ཏུ་རྒྱས་པའི་ལུགས་ལ་གང་ལ་སྲུང་བ་བྱེད་རྒྱུའི་གཞི་སྒྲུབ་པ་ཡིན་པས་སྲུང་འཁོར་གྱི་སྔོན་འགྲོའི་ཚུལ་དུ་སྦྱོར་བ་ཡིན་ནོ། །ཡན་ལག་དྲུག་འགོད་པ་ནི། སྲུང་འཁོར་དངོས་གཞིའི་ཆོ་གའི་ཆ་ལག་དངོས་མིན་ཀྱང༌། སྤྱིར་ནས་འདི་རང་སྲུང་བའི་ཆོ་ག་ཁྱད་འཕགས་ཡིན་ལ། བདུད་ཚོགས་སྲེག་པའི་སྔོན་འགྲོར་བདག་ཉིད་སྲུང་བ་བརྟན་པོ་དགོས་པའི་ཕྱིར་དེ་དང་འབྲེལ་བ་ཡིན་ནོ། །ཆོ་ག་རྒྱས་པའི་སྐབས་འདིར་སྔར་ཡོད་ཀྱི་བདུད་རྣམས་བསྲེགས་པའི་རྗེས་སུ་ཕྱིན་ཆད་མི་འཇུག་པའི་ཕྱིར་སྲུང་འཁོར་སྒོམ་པ་ཡིན་པས། བདུད་ཚོགས་སྲེག་པའང་སྲུང་འཁོར་དངོས་གཞིའི་ཡན་ལག་ཏུ་འབྲེལ་ཞིང་གོ་རིམ་ཀྱང་ཐོག་མ་སྲེག་པ་ལེགས་སོ། །ཕྱིས་ཀྱི་ཕལ་ཆེར་ཞིག་བསྲེགས་པས་མ་ཚིག་པར་
བྲོས་པ་རྣམས་ཕྱིས་ཕུར་བུས་འདེབས་ཟེར་ཏེ། དངོས་པོ་ལ་ཚིག་མི་དགོས་ཤིང༌། ཕུར་བུས་འདེབས་ཀྱང་མི་དགོས་ལ། སྒྲུབ་པ་པོའི་བློ་སྣང་ལ་ཐམས་ཅད་བསྲེགས་པ་དང་ཐམས་ཅད་ཕུར་བུས་གདབ་པ་ཡིན་པས་བར་ཆད་བཟློག་པའི་སྒོ་མི་འདྲ་བ་ཡང་ཡང་སྒོམ་པ་ཡིན་གྱི། ཁ་ཅིག་བསྲེགས་ཁ་ཅིག་ཕུར་བུས་གདབ་པ་མ་ཡིན་ཏེ། དེ་ལྟར་དགོས་ན་ཐུག་མེད་དུ་འགྱུར་བའི་ཕྱིར་རོ། །དེ་ལ་སྲུང་འཁོར་སྟོན་བྱེད་རྡོ་རྗེའི་ཚིག་ནི་འདི་ལྟ་སྟེ། དཔལ་ལྡན་རྡོ་རྗེ་རྣམས་ཀྱིས་ཕྱོགས་ཀུན་ཏུ་གནས་མཐའ་དག་བདུད་ཀྱི་ཚོགས་ནི་ངེས་པར་བསྲེག་བྱ་སྟེ། །ཕྱིས་ནས་འཁོར་ལོའི་རྩིབས་བཅུ་རྣམས་ལ་ཕྱོགས་དང་ཕྱོགས་བྲལ་དུ་གནས་ཁྲོ་བོའི་ཚོགས་ནི་བསྒོམ་པར་བྱ། །འཁོར་ལོའི་དབུས་སུ་གཉིས་ལྷག་རྒྱལ་བའི་ཕྱག་དང་དུས་ཀྱི་ཞལ་ལྡན་ཁྲོ་བོའི་དབང་པོ་རྡོ་རྗེ་ཤུགས། །དེ་ནས་བླ་མའི་ངེས་པ་དང་ལྡན་གང་ཞིག་ཅུང་ཟད་འདོད་པ་སྒྲུབ་པ་པོ་ཡིས་བསྒྲུབ་པར་བྱ། །རྡོ་རྗེ་གསུམ་གྱི་ས་ཡི་དཀྱིལ་འཁོར་ལ་གནས་རྭ་བ་གསུམ་ནི་རིང་དུ་མཐོང་བའི་མཐའ་རུ་སྟེ། །ཐོ་རངས་གྲིབ་མ་ཡི་ནི་མཐའ་རུ་ས་གཞིའི་གནས་ལས་ནམ་མཁའ་དག་ལ་རྡོ་རྗེ་བརྩེགས་པའོ། །དབུས་སུ་ཆུ་སྐྱེས་ཉི་མའི་ཁྲུ་སྟེ་ལྟེ་བ་གདན་དང་བཅས་པ་དག་ཀྱང་དུས་ཀྱི་ཁྲུར་འགྱུར་རོ། །དེ་ཡི་སྟེང་དུ་བདག་ཉིད་ཉེས་པ་དག་དང་རྣམ་པར་བྲལ་བ་རྣལ་འབྱོར་པ་ཡིས་བསྒོམ་པར་ བྱ། །ས་ཡི་ཕྱོགས་རྣམས་སུ་འདིར་དང་པོ་རྡོ་རྗེ་གསུམ་གྱིས་ཞིང་སྐྱོང་རྣམས་ལ་གཏོར་མ་སྦྱིན་བྱ་སྟེ། །ཕྱི་ནས་རྡོ་རྗེ་བཞི་ཡིས་ཕྱོགས་དང་ཕྱོགས་བྲལ་ལ་གནས་བདུད་ཀྱི་ཚོགས་ནི་ངེས་པར་བསྲེག་པར་བྱ། །ཞེས་ས་ཆོག་གི་སྐབས་སུ་གསུངས་ཏེ། དཔལ་ལྡན་རྡོ་རྗེ་སོགས་ཀྱིས་ལུས་ལ་རྡོ་རྗེ་བཀོད་ནས་བདུད་སྲེག་པ་བསྟན། ཕྱི་ནས་འཁོར་ལོ་སོགས་ཀྱིས་སྲུང་འཁོར་གྱི་ལྷ་ཁྲོ་བོ་བཅུ་བསྟན་པས་ཤུགས་བསྟན་འགྲེལ་བར་
གསུངས་པ་སྲུང་མ་དྲུག་ཅུ་གང་ཡིན། འཁོར་ལོའི་དབུས་སུ་སོགས་ཀྱིས་རྡོ་རྗེ་ཤུགས་སྒོམ་པ་དང༌། དེ་ལས་དང་དངོས་གྲུབ་ཐམས་ཅད་སྒྲུབ་བྱེད་དུ་བསྟན་ནོ། །འདིར་ཅུང་ཟད་འདོད་པ་ཞེས་གསུངས་པ། འཁོར་གང་འདོད་སྤྲོ་བ་དང༌། ས་ཆོག་ཙམ་ལ་འབྲུ་གནོན་པ་ནི། འགྲེལ་ཆེན་དུ་སྐབས་དེར་དགོས་པའི་དབང་གིས་ཅུང་འདོད་པའི་མཚན་གཞི་བཟུང་བ་ལ་མཚན་ཉིད་བསྟན་པར་འཁྲུལ་པ་སྟེ། རྒྱུད་དོན་རྒྱ་ཆེན་པོ་དེ་ཕྲ་མོ་ཕྱོགས་གཅིག་པར་བསྡུས་པ་ནི་ལེགས་པར་མི་འགྱུར་ལ། རྡོ་རྗེ་གསུམ་གྱི་སོགས་སྲུང་འཁོར་གྱི་རྭ་བ་དང་ཁང་བརྩེགས་གཙོ་བོའི་གདན་དང་བཅས་པའོ། །སའི་ཕྱོགས་ཞེས་སོགས་གཏོར་མ་སྦྱིན་པ་དང༌། དེ་རྗེས་བདུད་སྲེག་པའི་སྔ་ཕྱིའི་འབྲེལ་ཡང་བསྟན་ནོ། །ཡང་རྒྱུད་ལས། དེ་དག་ཀུན་ལ་གསོལ་བ་བཏབ་ནས་སེང་ལྡེང་རང་བཞིན་སྲ་བའི་ཕུར་བུ་རྣམས་ཀྱིས་ས་ལ་གདབ། །ཕྱོགས་ཀྱི་ཁྲོ་བོ་མཚོན་ཆ་ལྡན་པ་རྣམས་ནི་ཕྱོགས་ཀྱི་ཆ་རུ་བསྲུང་བའི་དོན་དུ་དགོད་པར་བྱ། །ཞེས་ས་ཆོག་གི་སྐབས་སུ་ཕུར་གདབ་གསུངས་པའི་ཆོ་ག་དེ་ཉིད་དགོས་དོན་མཚུངས་པའི་ཕྱིར། སྲུང་འཁོར་རྒྱས་པའི་སྐབས་སུ་སྦྱོར་དགོས་ཏེ། སྲུང་མ་དྲུག་ཅུ་བསྒོམས་པའི་མཛད་པའི་གཙོ་བོ་ཡིན་པའི་ཕྱིར་རོ། །སྔོན་འགྲོའི་ཆོས་འདི་རྣམས་ཀྱི་གོ་རིམ་ངེས་པ་ནི། དྲི་མེད་འོད་ཀྱི་ལུང་གིས་རྟོགས་པར་ཡང་བྱ་དགོས་ན། དེ་ཡང་སྐུ་དང་གསུང་དང་ཐུགས་དང་ཡེ་ཤེས་རྣམ་པར་སྦྱོང་བར་བྱེད་པའི་སྔགས་ཀྱི་ཚིག་རྣམས་སུ་འགྱུར་ཏེ། ཞེས་པ་ནས། མགོ་བོ་ལ་སོགས་པས་བཟུང་བར་བྱའོ། །ཞེས་པའི་བར་དུ་རྡོ་རྗེའི་ཞལ་དག་པ་དང༌། རིགས་དྲུག་དགོད་པ་དང༌། རྡོ་རྗེ་བཞི་ཡིས་དག་པར་བྱེད་པ་དང༌། ཡན་ལག་དྲུག་དགོད་པ་རྣམས་བར་མ་ཆད་པར་སྔ་ཕྱིར་རིམ་ཅན་དུ་གསུང་པས། དེ་བཞི་པོའི་གོ་རིམ་ངེས་པ་དང༌། ཆོ་ག་འདི་དག་རྩ་བའི་རྒྱུད་ལས་གསུངས་
པའི་དོན། འགྲེལ་ཆེན་དུ་ནག་དུམ་གྱི་ཚུལ་དུ་གསུངས་པ་མ་གཏོགས། བསྡུས་རྒྱུད་དུ་དངོས་བསྟན་གྱི་ཚིག་གིས་ཟིན་པ་ནི་མེད་ལ། འོན་ཀྱང་དང་པོ་རྡོ་རྗེ་གསུམ་གྱི་ཞེས་པ་དང༌། ཕྱི་ནས་རྡོ་རྗེ་བཞི་ཡིས་ཞེས་པའི་འགྲེལ་བ་ལ་གཙོ་བོ་ཉིད་ཀྱི་ཕྱིར་གསུངས་པའོ། །ཞེས་འབྱུང་བ་རྣམས་ཀྱིས་ཤུགས་ལ་འཕངས་པ་ནི་ཡིན་ནོ། །ཡང་དཔལ་ལྡན་རྡོ་རྗེ་རྣམས་ཡན་ལག་ལ་དགོད་པར་བྱ་སྟེ། དཔྲལ་བར་ཟླ་བའི་དཀྱིལ་འཁོར་ཞེས་པ་ནས། སྒྲུབ་པ་པོ་ཡིས་བསྒྲུབ་པར་བྱ་ཞེས་པ་ནི་ངེས་པའོ་ཞེས་པའི་བར་ཏེ། ཕུར་གདབ་མ་གཏོགས་སྲུང་འཁོར་གྱི་ཆོ་ག་ལྷག་མ་རྣམས་རྒྱས་པར་གསུངས་པ་ལས་གོ་རིམ་དངོས་ནི་འདི་སྐད་ཅེས། དེ་ལྟར་གཏོར་མ་བྱིན་ནས་གནས་ཀྱི་བདག་པོ་གཤེགས་ཏེ། དེ་ནས་སྔར་གསུངས་པའི་ཆོ་གས་བདུད་ཀྱི་ཚོགས་བསྲེགས་ནས་སྲུང་བའི་འཁོར་ལོ་རྣམ་པར་བསམ་མོ། །ཞེས་གཏོར་མ་སྦྱིན་པ་དང༌། བདུད་ཚོགས་སྲེག་པ་དང༌། སྲུང་འཁོར་རྒྱས་པ་སྒོམ་པ་རྣམས་རིམ་ཅན་དུ་གསུངས་ལ། དེའི་དེ་མ་ཐག་པའི་རྗེས་སུ་སྲུང་མ་དྲུག་ཅུ་ལ་གཏོར་མ་འབུལ་བ་དང༌། སྲུང་འཁོར་གྱི་ལྷ་རྣམས་གཤེགས་པ་གསུངས་པས། སྲུང་འཁོར་གྱི་རྗེས་ཆོག་གཉིས་པོ་གསལ་བར་བྱུང་ལ། འོག་ཏུ་སྲུང་འཁོར་གྱི་སྔགས་རྣམས་ཕྱོགས་གཅིག་ཏུ་གསུངས་པའི་སྐབས། ཨོཾ་ཧཱུཾ་ཀྲོ་དྷ་ཨིནྡྲོ་ཧཾ། སོགས་གཙོ་བོའི་ང་རྒྱལ་བཟུང་བའི་སྔགས་ཀྱི་དེ་མ་ཐག་ཏུ་ཕུར་གདབ་ལ་སོགས་པའི་སྔགས་མེད་པར། ཨོཾ་ཧཾ་སོགས་ཁྲོ་བོ་རྣམས་ལ་བཀའ་བསྒོ་བ་དང༌། སྲུང་འཁོར་གྱི་ང་རྒྱལ་བཟུང་བའི་སྔགས་གསུངས་པས། དེ་དག་སྲུང་འཁོར་གྱི་ལྷ་རྣམས་བསྐྱེད་ཟིན་ཕུར་གདབ་སོགས་ཀྱི་ལས་མ་བྱས་པའི་སྔོན་རོལ་ཏུ་དེ་རྣམས་བྱེད་དགོས་པར་གསལ། ཁ་ཅིག་ཕུར་གདབ་བྱས་པའི་རྗེས་སུ་གཙོ་བོའི་ང་རྒྱལ་འཛིན་པ་དང༌། ཁྲོ་བོ་ལ་བཀའ་བསྒོ་
བ་ནི། ལས་ཟིན་པའི་རྗེས་སུ་སླར་ཡང་ལས་ལ་བསྐུལ་བ་འབྲེལ་མེད་ཅིང༌། སྐབས་འདིར་སྲུང་བའི་ལས་བྱེད་རྒྱུའི་གཙོ་བོ་ཕུར་གདབ་ཉིད་ཡིན་པའི་ཡང་ཕྱིར་རོ། །སྔགས་གསུངས་པའི་རིམ་པ་ཙམ་ལ་མཐའ་གཅིག་ཏུ་གོ་རིམ་ངེས་པ་མེད་ཀྱང་ཕལ་ཆེར་གོ་རིམ་དུ་གནས་སོ། །ཕུར་བུ་རྣམས་བསྲུངས་པའི་དོན་དུ་ཁྲོ་བོ་བཅུ་འགོད་པར་གསུངས་པ་ནི། ས་ཆོག་གི་སྐབས་སོགས་ཕྱི་རོལ་མཚན་མ་རྫས་ཀྱི་ཕུར་བུ་བཏབ་པའི་དབང་དུ་བྱས་ནས། དེ་ལ་སྲུང་བ་དགོས་པས་དེ་ལྟར་མཛད་པ་ཡིན་ལ། ཏིང་ངེ་འཛིན་ཁོ་ནས་བཏབ་པའི་ཕུར་བུ་ལ་ཡང་སྲུང་བྱེད་ཀྱི་ལྷ་འགོད་དགོས་ན་ཧ་ཅང་ཐལ་བར་འགྱུར་ཏེ། གཞལ་མེད་ཁང་དང་ལྷ་ཚོགས་རེ་རེ་ལ་ཡང་སྲུང་མཁན་དགོས་པར་འགྱུར་ རོ། །དེའི་ཕྱིར་འགའ་ཞིག་དེ་འདྲ་བྱེད་པ་ཐལ་ཆེས་ལ་ཏིང་ངེ་འཛིན་གྱི་ཕུར་བུ་ནི་གཏན་དུ་མེད་ཅིང་ཐོགས་པ་མེད་པ་བགེགས་ཀྱིས་མཐོང་བར་མི་ནུས་ཤིང༌། མཐོང་ཡང་ཕུར་བུ་འདོན་པ་སོགས་ཅི་ལྟར་ནུས་བསམ་པར་བྱའོ། །ཁ་ཅིག་ཕུར་གདབ་བྱེད་པ་ནི། ས་ཆོག་སོགས་ཀྱི་སྐབས་སུ་ཡིན་གྱི་སྲུང་འཁོར་གྱི་ཡན་ལག་ཏུ་འབྲེལ་བ་མ་ཡིན་ནོ་ཞེས་ཟེར་བ་ནི། འགྲེལ་ཆེན་ལས། འཆད་བར་འགྱུར་བའི་རིམ་པས་བདུད་དང་བགེགས་དང་ལོག་འདྲེན་རྣམས་ཕུར་བུས་གདབ་པའི་དོན་དང༌། གནས་སྲུང་བའི་དོན་དུ་བསྔགས་པས་སྲུང་བའི་འཁོར་ལོ་བསྒོམ་པར་བྱའོ། །ཞེས་གསུངས་པའི་དོན་མ་རྟོགས་པར་ཟད་ལ། ཁ་ཅིག་བདུད་བསྲེགས་པའི་དེ་མ་ཐག་སྲུང་འཁོར་གྱི་སྔོན་དུ་ཕུར་གདབ་བྱེད་དགོས་ཏེ། བདུད་གཞོམ་པའི་སྔགས་གསུངས་པའི་རྗེས་ཉིད་དུ་ཕུར་གདབ་གསུངས་པའི་ཕྱིར་རོ། །ཞེས་ཟེར་བ་ནི་ས་ཆོག་དང་བདག་བསྐྱེད་ཀྱི་དབྱེ་བ་མ་ཕྱེད་པར་ཟད་དེ། དེའི་ཐད་ནས་གསུངས་པའི་རིམ་པ་འདི་རྣམས་བདག་བསྐྱེད་སྲུང་འཁོར་གྱི་སྐབས་སུ་ཡང་དགོས་ན། དེ་དག་གི་སྔོན་དུ་སའི་ལྷ་མོའི་ཆོ་ག་དང༌། ཕུར་གདབ་ཀྱི་
དེ་མ་ཐག་ཏུ་སྟང་སྟབས་གསུངས་པ་རྣམས་ཀྱང་དགོས་པར་འགྱུར་ལ། གོང་དུ་དྲངས་པའི་འགྲེལ་ཆེན་གྱི་ལུང་དང་ཤིན་ཏུ་འགལ་ཏེ། ཕུར་བུས་གདབ་པའི་དོན་དུ་སྲུང་འཁོར་བསྒོམ། ཞེས་པ་སྔར་སྲུང་འཁོར་བསྒོམས་པ་དེ་ཕྱིས་ཕུར་གདབ་བྱེད་པའི་དོན་དུ་ཡིན་ཞེས་པ་ཡིན་པ་ལ། ཕྱིས་སྲུང་འཁོར་བསྒོམ་པའི་དོན་དུ་སྔར་ཕུར་བུ་འདེབས་ཞེས་རིམ་པ་ཕྱིན་ཅི་ལོག་ཏུ་སོང་འདུག་པའི་ཕྱིར་རོ། །དེས་ན་སྲུང་འཁོར་གྱི་ཆོ་ག་མཐའ་རྒྱས་ཀྱི་སྐབས་སུ། ཁྲོ་བོ་རྣམས་ལ་བཀའ་བསྒོ་བ་ནི་ཟིན། གཏོར་མ་འབུལ་བ་མ་བྱས་པའི་སྔོན་དུ་ཕུར་གདབ་བྱེད་དགོས་པར་གྲུབ་བོ། །ཡང་རྡོ་རྗེའི་ཞལ་དག་པའི་སྔོན་དུ་འགྲེལ་ཆེན་ལས་འདི་སྐད་ཅེས་འབྱུང་སྟེ། འདིར་དང་པོར་སྒྲུབ་ཐབས་ཀྱི་ལེའུ་ལས་འཆད་པར་འགྱུར་བའི་རིམ་པས་ཁ་རྣམ་པར་དག་པ་དང༌། དེ་བཞིན་གཤེགས་པ་རྣམས་མཆོད་པ་དང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། གསུམ་ལ་སྐྱབས་སུ་འགྲོ་བ་དང༌། བདག་ཉིད་ཀྱི་དངོས་པོ་འབུལ་བ་དང༌། བྱང་ཆུབ་ཀྱི་སེམས་བསྐྱེད་པ་དང༌། ལམ་ལ་བརྟེན་པ་བྱས་ཏེ། དེ་ནས་སྟོང་པ་ཉིད་ལ་དམིགས་པ་བྱས་ནས། ལྷ་རྫོགས་པར་བྱ་བའི་དོན་དུ་སྐུ་དང་གསུང་དང་ཐུགས་དང་ཡེ་ཤེས་རྣམ་པར་སྦྱོང་བ་ཞེས་སོགས་གསུངས་པ་ལ་རྒྱ་བོད་མང་པོ་ཞིག་གོ་བ་ལོག་སྟེ། རྡོ་རྗེའི་ཞལ་དག་པའི་སྔོན་དུ་ཁ་དག་པ་དང༌། བསོད་ནམས་ཚོགས་གསོག་དང༌། སྟོང་ཉིད་ལ་དམིགས་པ་རྣམས་བྱེད་པ་ནི། ཁ་དག་པ་ལན་གཉིས་སུ་འགྱུར་བའི་སྐྱོན་དང་བཅས་ཤིང༌། ཚིག་དོན་ཕྱིན་ཅི་ལོག་ཏུ་གོ་བ་སྟེ། འདིར་དོན་དངོས་ནི་རྒྱུན་བཤགས་དང་སྟོང་ཉིད་སྒོམ་པ་སྔོན་དུ་འགྲོ་བའི་དངོས་གཞི་དཀྱིལ་འཁོར་གྱི་ལྷ་རྣམས་རྫོགས་པར་བྱེད་པ་ལ། རྡོ་རྗེའི་ཞལ་དག་པ་ནས་ཡན་ལག་དྲུག་འགོད་
པའི་བར་འདི་དེ་རྣམས་ཀུན་གྱི་ཐོག་མར་སྔོན་དུ་འགྲོ་དགོས། ཞེས་པ་ཙམ་ཞིག་ཡིན་པས་དོན་དུ་ཞེས་པའི་ཚིག་གི་ནུས་པ་མ་གོ་བ་དེ་དག་ལྷ་རྫོགས་པར་བྱ་བའི་དོན་དུ་རྡོ་རྗེ་བཞི་སྦྱོང་བར་བྱེད་ཅེས་རྡོ་རྗེའི་ཞལ་དག་པའི་གྲུབ་འབྲས། རང་ལྷ་གཙོ་རྐྱང་ཕྱག་གཉིས་པའི་གཅིག་ཏུ་སོང་བར་འདོད་པ་ནི་ཆེས་བླུན་ཞིང༌། སྟོང་པར་སྦྱངས་མ་ཐག་པའི་རྗེས་སུ་སླར་ཡང་ཐ་མལ་པའི་ལུས་ཟླ་འོད་ཀྱིས་སྦྱངས་ནས་ལྷར་བསྒྱུར་ཞིང༌། ཡང་དེ་མ་ཐག་ཏུ་སྭ་བྷཱ་ཝས་སྦྱོང་བ་སོགས་ཆོ་ག་མ་དག་པ་ཡིན་པར་རྟོགས་པར་སླ་ལ་འགའ་ཞིག་བསོད་ནམས་ཚོགས་གསོག་དང་ཡེ་ཤེས་ཚོགས་གསོག་གི་བར་དུ་ཡིག་བརྒྱའི་སྒོམ་བཟླས་བྱེད་ཅིང༌། དེ་མ་ཐག་སྟོང་པར་སྦྱངས། ཡང་རང་ཉིད་ལྷར་བསྐྱེད་ནས་ཞལ་དག་པ་བྱེད་པའང་མཐོང་སྟེ། འདི་འདྲ་རྒྱ་བོད་ཀྱི་རྡོ་རྗེ་འཛིན་པ་སུས་ཀྱང་མཐོང་ཐོས་མ་བྱུང་བའི་ཆོ་གའི་གོ་རིམ་སྟེ། ཆེས་གད་མོའི་གནས་སོ། །དེས་ན་སྒྲུབ་ཐབས་ལེའུ་ལས་འཆད་པར་འགྱུར་བའི་ཁ་དག་པ་ཞེས་པ་ནི། རྒྱུད་ལས། ངེས་པར་འཇམ་པའི་མལ་ཆ་དག་དང་གདན་ལ་ཉེ་བར་འདུག་ནས་སྔར་བརྗོད་སྲུང་བ་བྱས་ནས་ནི། །དང་པོར་སྙིང་གར་ཟླ་བའི་དབུས་སུ་དེ་ཉིད་འོད་ཟེར་སྣ་ཚོགས་རྣམས་ནི་ཕྱོགས་བཅུར་བསྒོམ་པར་བྱ། ཁ་ལ་སོགས་པ་དག་པ་བྱས་ནས་སླར་ཡང་ནམ་མཁའ་དག་ལ་སྤྲོས་པའི་རྒྱལ་བ་རྣམས་ལ་ནི། །མཆོད་པ་རྣམ་པ་སྣ་ཚོགས་བྱ་སྟེ་ཞེས་སོགས་གསུངས་ཤིང༌། འགྲེལ་པར་སྔོན་དུ་ཁ་ལ་སོགས་པ་དག་པར་བྱས་ནས་ཏེ་བདུད་རྩི་ལྔའི་རིལ་བུ་ཁ་རུ་བཅུག་པས་ཁ་དག་པར་འགྱུར་རོ། །དེ་བཞིན་དུ་སྔར་གསུངས་པའི་མཆོག་གི་ཕྱག་རྒྱས་མགོ་བོ་ནས་བརྩམས་ཏེ་ཞེས་སོགས་གསུངས་པ་ནི། དབང་ལེར་རྡོ་རྗེའི་ཞལ་དག་པའི་སྔགས་དང་ཏིང་ངེ་འཛིན་གསུངས་ཀྱང༌། རྫས་མ་གསུངས་པ་དེ་འདིར་བདུད་རྩི་རིལ་བུ་རྫས་སུ་གསུངས་ཤིང༌། མཆོག་གི་ཕྱག་རྒྱས་སྦྱང་བ་མཚོན་བྱེད་དུ་བྱས་ནས། ཆོས་བཞི་པོ་དེ་དག་སྲུང་འཁོར་གྱི་སྔོན་དུ་གཏོང་བ་དང༌། སྔར་
བརྗོད་སྲུང་བ་བྱས་ནས་ཞེས་གསུངས་པས་དེ་རྗེས་སྲུང་བ་བྱེད་པར་གསུངས་པ་ཡིན་ཏེ། དེ་ནས་སྲུང་བའི་རྗེས་སུ་བསོད་ནམས་ཚོགས་གསོག་ཡན་ལག་བདུན་པ་དང༌། སྟོང་ཉིད་སྔོན་དུ་འགྲོ་བས་དངོས་གཞི་ལྷའི་རྣལ་འབྱོར་བསྒོམ་དགོས་པ་ཡིན་པ་ལ། སྟོང་པ་དང་ལྷའི་རྣལ་འབྱོར་བསྒོམ་པའི་སྔོན་དུ་ཆོ་ག་རྒྱས་པའི་སྐབས། སྟོང་པ་དང་ལྷ་སྒོམ་པའི་བར་ཆད་ཞི་བ་སོགས་ཀྱི་ཡན་ལག་རྡོ་རྗེའི་ཞལ་དག་པ་སོགས་འདི་ལྟར་བསྒོམ་དགོས་སོ་ཞེས་རྒྱས་བཤད་མཛད་པ་ཡིན་གྱི། ཡན་ལག་བདུན་པ་དང་སྟོང་ཉིད་སོགས་ཀྱི་རྗེས་སུ་སླར་ཡང་ཞལ་དག་པ་སོགས་བསྒོམ་དགོས་པའི་དོན་ཡིན་ན། སྒྲུབ་ཐབས་ལེའུ་ལས་འཆད་པར་འགྱུར་བའི་ལྷ་སྒོམ་པ་ནི། དངོས་གཞི་དཀྱིལ་འཁོར་གྱི་འཁོར་ལོ་ཉིད་ཡིན་པས། རྡོ་རྗེའི་ཞལ་དག་པ་ལ་སོགས་པ་འདི་དག་དངོས་གཞིའི་རྗེས་སུ་བྱེད་དགོས་པར་ཐལ་བས་རྗེས་ཀྱི་ཆོ་གར་འགྱུར་རོ། །དེས་ན་སཱ་དྷུ་པུ་ཏྲ་སོགས་ཀྱིས་བཤད་པ་ནི། རྒྱ་གར་གྱི་པཎྜི་ཏ་ཕལ་པ་ལ་ཉེས་བཤད་ཀྱང་མང་དུ་ནི་འབྱུང་ལ། འོན་ཀྱང་པཎྜི་ཏ་དེས་འགྲེལ་ཚིག་འདི་དག་མ་རྟོགས་པ་ནི་མིན་ལ་རག་ཀྱང༌། དཀྱིལ་འཁོར་དངོས་གཞི་ཐུགས་དཀྱིལ་ལམ་སྐུ་གསུང་ཐུགས་ཡོངས་རྫོགས་ལྟ་བུ་མི་སྒོམ་པར་རྡོ་རྗེ་ཤུགས་སྲུང་མ་དྲུག་ཅུ་དང་བཅས་པའི་སྲུང་འཁོར་ཉིད་ཀྱི་མངོན་རྟོགས་ཉམས་ལེན་མཐིལ་དུ་བྱེད་པ་རྣམས་ལ་ཕན་ཐོགས་པའི་ཕྱིར་དུ་དེ་ལྟར་མཛད་དམ་སེམས་མོ། །འོན་ཀྱང་དེ་ལྟ་བུའི་ཚུལ་ལ་ཁ་དག་པའི་སྔོན་དུ་ཚོགས་གསོག་བྱེད་པ་མི་ལེགས་ལ། དེ་ནི་བདུད་སྲེག་པའི་ཆོ་གའི་གོང་འོག་གང་རུང་དུ་སྦྱར་ན་ལེགས་པ་ལས། དེའི་ནང་ནས་ཀྱང་འོག་ཏུ་སྦྱར་བ་ཉིད་ལྷག་པར་བཟང་ངོ༌། །ཡང་འགྲེལ་ཆེན་ལས། དང་པོར་རེ་ཞིག་སློབ་དཔོན་གྱིས་རང་གི་ལུས་དང་གནས་སྲུང་བ་བསམ་པར་བྱ་སྟེ། ཞེས་སྲུང་བ་སྔ་ཕྱི་འདི་དག་ཐམས་ཅད་བདག་སྲུང་དང༌། གནས་སྲུང་གཉིས་སུ་བསྡུས་ཏེ་གསུངས་ལ། སྲུང་འཁོར་དངོས་གཞི་གནས་
སྲུང་བ་ཡིན་པར་གསུངས་པས། ཤུགས་ལ་ཡན་ལག་དྲུག་འགོད་པ་དང་བདུད་ཚོགས་གཞོམ་པ་གཙོ་བོར་བདག་སྲུང་ཡིན་པར་གྲུབ་ བོ། །གཞུང་འགྲེལ་ལས་གསལ་ཁ་མེད་ཀྱང་རྣལ་འབྱོར་སྲུང་བ་ནི། གཙོ་བོར་ཕུར་གདབ་ཡིན་པར་གསལ་ཞིང༌། སྔ་མ་འགའ་ཞིག་ཀྱང་བཞེད་ལ། གཞན་རྣམས་ཆོ་གའི་ཡན་ལག་གོ །གཙོ་བོར་དེ་བཞིན་ཡིན་ཡང་བདུད་སྲེག་པ་དང༌། སྲུང་འཁོར་དངོས་དང༌། ཕུར་གདབ་རྣམས་ལ་ཆ་ཤས་ཀྱི་སྒོ་ནས་ནི་རེ་རེ་བཞིན་ཡང་སྲུང་བ་གསུམ་ཀ་ཚང་ངོ༌། །དེ་ལ་བདག་སྲུང་བ་ནི། རང་གི་ལུས་ངག་ཡིད་གསུམ་ལ་གདོན་གྱིས་བསྐུལ་བའི་གནོད་པ་དང༌། ནད་ལ་སོགས་པ་ལུས་ངག་གི་གནོད་པ་གཞན་ཡང་སྲུང་བའོ། །གནས་སྲུང་བ་ནི། ཇི་ཙམ་འདོད་པའི་ཡུལ་ཕྱོགས་དེ་ཚུན་ཆད་དུ་རྣལ་འབྱོར་པ་རང་ཉིད་ལ་བརྟེན་པ་རྣམས་ལ་མི་དང་མི་མ་ཡིན་པ་དང་འབྱུང་བའི་གནོད་པ་སྲུང་བ་སྟེ། ནོར་དང་གཡོག་འཁོར་དང་གྲོགས་དང་ཡོ་བྱད་སོགས་ལ་བརྟེན་པའི་བར་ཆད་སྲུང་བའོ། །སེམས་ཅན་ལས་ཐ་དད་ལ་སྤྱོད་པའི་ཕྱིར། རང་ལ་བརྟེན་པ་མ་ཡིན་པ་ལ་སྲུང་བའི་རྣམ་གཞག་མི་བྱེད་ཅིང༌། ཡམས་ནད་དང་ལོ་ཉེས་ལ་སོགས་པ་སྒྲུབ་པའི་བར་ཆད་ཡིན་པས་བསྲུང་ཞེས་ཀྱང་ཁ་ཅིག་འདོད་དོ། །རྣལ་འབྱོར་སྲུང་བ་ནི། ཏིང་ངེ་འཛིན་སེམས་ཀྱི་བར་ཆད་སྔོན་གྱི་ལས་དང་བག་ཆགས་ལས་བྱུང་བ་ཁོ་ནའི་གཉེན་པོ་ཡིན་ཏེ། སྲུང་བ་དེའི་གཙོ་བོ་ནི་སྟོང་ཉིད་སྙིང་རྗེ་གཉིས་ཡིན་པར་བཤད་ལ། དེས་ན་བདག་གི་རྣམ་པར་རྟོག་པ་ནི། འདིར་ཞལ་དག་པ་སོགས་གསུམ་ཡང་རྣལ་འབྱོར་སྲུང་བ་ཉིད་ཡིན་ནོ་སྙམ་མོ། །དེ་ལྟར་ན་སྲུང་འཁོར་གྱི་གོ་རིམ་ངེས་པས་སྤྱིའི་གོ་བ་རྙེད་པར་འགྱུར་ རོ།། །།གཉིས་པ་སོ་སོའི་གོ་དོན་བཤད་པ་ནི། སྲུང་འཁོར་ཤིན་ཏུ་རྒྱས་པའི་ཆོ་ག་ལ། སྔོན་འགྲོ་དངོས་གཞི་རྗེས་གསུམ་མོ། །དང་པོ་ལ་རྡོ་རྗེའི་
ཞལ་དག་པ། རིགས་དྲུག་འགོད་པ། རྡོ་རྗེ་བཞི་དག་པ། ཡན་ལག་དྲུག་འགོད་པ། གནས་ཀྱི་བདག་པོ་ལ་གཏོར་མ་སྦྱིན་པ། བདུད་ཚོགས་གཞོམ་པ་སྟེ་དྲུག་གོ། །།དང་པོ་ནི་ཐོག་མར་ནང་མཆོད་བྱིན་རླབས་བྱ་སྟེ། རྒྱས་པ་དང་འབྲིང་པོ་འོག་ཏུ་འཆད་ལ། བསྡུས་པ་ནི། བསངས་སྦྱངས་ཡི་གེ་བཞིས་བྱིན་གྱིས་རློམ་པ་ཡིན་ན། སྤྱིར་རྒྱུད་ཀྱི་རྒྱལ་པོ་འདིའི་ལུགས་ལ་སྦྱང་སྤེལ་སྤར་བདུད་རྩིར་བྱེད་པ་བཞི་པོའི་ཕྱག་རྒྱ་དང་སྔགས་དང༌། ཡི་གེ་འབྲུ་བཞིའི་ཏིང་ངེ་འཛིན་རྣམས་ཉིད་བྱིན་རླབས་ཀྱི་གཙོ་བོ་ཡིན་གྱིས། དམ་རྫས་བསྐྱེད་པ་དང་བུད་པ་དང་འབར་བ་དང་བསྐོལ་བ་སོགས་ནི། ཆོ་ག་རྒྱས་པའི་ཡན་ལག་ཙམ་ཡིན་མོད་གཙོ་ཆུང་བར་བཞེད་ལ། ལག་མཐིལ་དུ་རྡོ་རྗེའི་བཞི་ཞལ་གསུམ་ཕྱག་དྲུག་པ་བསྐྱེད་པ་སོགས་ནི་སྤྲོས་པ་ལ་དགའ་བ་ཙམ་དུ་ཟད་པས་ངེས་པར་དགོས་པ་མིན་ཞིང༌། དེས་ན་སྣོད་གང་ཡང་རུང་བར་རྫས་གཅིག་གམ་ཇི་ལྟར་འོས་པ་ཚོགས་པ་ལ་བྱིན་གྱིས་བརླབས་པས་ཆོག་གོ །དེ་ནས་ནང་མཆོད་མྱངས་ཏེ། ཨོཾ་ཨཱཿཧཱུྃ་སོགས་ཀྱི་སྔགས་བརྗོད། གཙུག་ཏོར་གྱི་སྟེང་དུ་བཾ་ཡིག་སོགས་ཀྱི་དམིགས་པ་བསྒོམ། སྔགས་ལན་གསུམ་བརྗོད་པ་གལ་ཆེ་ཞིང་དམིགས་པ་ཡང་ལན་གསུམ་བྱེད་པ་ཡིན། བོད་ཀྱི་ལུགས་ལ་དམིགས་པ་ངག་ཏུ་འདོན་པ་ལྟར་ན་ཚིག་བྱང་ལན་གཅིག་གིས་ཆོག་གོ །འདིར་ལས་སོ་སོའི་སྐབས་སུ་ཞི་རྒྱས་ལ་ཟླ་བ་སྒོམ་པ་ཡིན་ལ། ཟླ་བའི་དོད་ལ་བསད་བསྐྲད་ལ་ཡཾ་ལས་བྱུང་བའི་སྒྲ་གཅན། རྨོངས་རེངས་ལ་ལཾ་ལས་བྱུང་བའི་དུས་མེ། དབང་དགུག་ལ་རཾ་ལས་བྱུང་བའི་ཉི་མ་རྣམས་སོ་སོའི་ཁམས་ཀྱི་མདོག་ཅན་དང༌། །སླར་གསོ་བ་ལ་ཧཾ་ལས་བྱུང་བའི་ནམ་མཁའི་དཀྱིལ་འཁོར་ལྗང་ཁུ་སོགས་གསུངས་པས། ཁ་ཅིག་གནས་སྐབས་
ཀུན་ཏུ་ཟླ་བ་ཁོ་ན་བྱེད་པར་འདོད་པ་དང༌། གཞན་དག་ལས་ཐམས་ཅད་པ་ལ་ལྗང་གུ་ཡིན་པས་དཀྱུས་སུ་སྒོམ་པ་ལ་ལྗང་ཁུ་འཐད་ཅེས་ཟེར་བ་གཉིས་ཀ་མི་རུང་སྟེ། བསད་བསྐྲད་སོགས་ལ་དཀར་པོ་མི་རུང་བ་དང༌། སླར་གསོ་བ་ཁོ་ན་ལ་ལྗང་ཁུར་བཤད་པས་ལས་ཐམས་ཅད་པའི་དོན་སླར་གསོ་བ་ཙམ་མ་ཡིན་པའི་ཕྱིར་རོ། །ཡང་འདི་ཡིག་བརྒྱའི་སྒོམ་བཟླས་ཀྱི་ཚབ་ཡིན་ཟེར་བ་ཡང་མི་འཐད་དེ། འདི་ནི་བདུད་རྩི་མྱངས་བས་ཁ་དག་པར་བྱེད་པའི་སྐབས་ཀྱི་དམིགས་པ་ཙམ་ཡིན་པའི་ཕྱིར་དང༌། སྔགས་འདི་ལ་རིང་དུ་བཟླས་བརྗོད་བྱེད་པ་ཡང་མ་བཤད་པའི་ཕྱིར་རོ། །ཁ་ཅིག་རང་ཉིད་དུས་འཁོར་དུ་གསལ་བ་ལ་དེ་ལྟར་བསྒོམས་པས། ལུས་ཟླ་དཀྱིལ་གྱི་རྣམ་པར་སོང་བར་བྱེད་པ་ཡང་དཔེ་དང་དོན་ནོར་ནས་རང་གར་སྨྲས་པ་ཙམ་ཡིན་ནོ། །འདིར་དྲི་མ་མེད་པའི་ལུས་སུ་གྱུར་པའི་དོན་ནི། རྣམ་པ་ཐ་མལ་གྱི་ལུས་ལ་ཤ་ཁྲག་སོགས་སྤངས་པའི་འོད་ལུས་དཀར་པོར་བསམ་པའོ། །ཞི་རྒྱས་ཀྱི་ལས་ལ་བཾ་ཡིག་ལས་སྐྱེས་པའི་ཟླ་བ་བསྐྱེད་པ་ཡིན་ལ། དཀྱུས་ཀྱི་ཉམས་ལེན་མཆོག་སྒྲུབ་ཅེས་གྲགས་པའི་སྐབས་འདིར་ཡང་ཕལ་ཆེར་ཞི་རྒྱས་དང་མཐུན་པར་མཛད་པ་མང་གི ལས་ཐམས་ཅད་པ་དང་བསྟུན་པ་ཉུང་བས་དཀར་པོ་ཉིད་རིགས་ སོ། །འོ་ན་མཆོག་སྒྲུབ་པ་ཞེས་པ་ཅི་སྙམ་ན། རིང་རྒྱུའི་རྣམ་གྲངས་ཙམ་ཡིན་པའི་ཕྱིར། མཆོག་གི་དངོས་གྲུབ་ལ་བཤད་ཀྱང་མི་རུང་བ་མེད་མོད། འདིར་དངོས་གྲུབ་སྤྱི་ཁྱབ་ལ་མཆོག་གི་མིང་བཏགས་པ་ཡང་མང་བ་ལྟར་ལས་ཕྲ་མོ་ཙམ་ལ་རག་མ་ལུས་པར་ཐུན་མོང་གི་དངོས་གྲུབ་ཆེན་པོ་རྣམས་ལ་དམིགས་པའི་དོན་ཡང་ཡིན་ནོ། །འདི་དང་ཕྱི་མ་རིགས་དྲུག་འགོད་པའི་མཚམས་སྦྱོར་བའི་ཚུལ་དུ་མཐར་སྭ་བྷཱ་ཝའི་སྔགས་བརྗོད་དེ་སྟོང་པར་བསམ་མོ།། །།
གཉིས་པ་ནི་སྟོང་པའི་ངང་ལས་རང་སྐད་ཅིག་གིས་དུས་ཀྱི་འཁོར་ལོ་ཕྱག་གཉིས་པ་ཐུན་མཚམས་ཀྱི་ལྷ་སྐུ་ལྟ་བུར་བསྒོམས་པའི་གནས་དྲུག་ཏུ་རིགས་དྲུག་གསལ་འདེབས་པ་ཡིན་ལ། སྐབས་འདིར་རིགས་དྲུག་པོ་ཡབ་རྐྱང་ཁོ་ན་ཡིན་ཏེ། འདི་ལུས་ཀྱི་རྣམ་དག་གི་རྩ་བ་ཁོ་ན་སྒོམ་པའི་སྐབས་ཡིན་པས། ཡལ་ག་རྣམ་གྲངས་སྤྲོ་བའི་སྐབས་མིན་ལ། འདི་སྐབས་ཀྱི་དྲུག་ཀར་ཁྱབ་བྱེད་རིགས་དྲུག་ཡིན་ཏེ། རྡོ་རྗེ་བཞི་རིགས་ཀུན་ལ་ཁྱབ་བྱེད་དུ་ངེས་ལ། འདིའི་དང་པོ་བཞི་པོ་རྡོ་རྗེ་བཞིར་བཤད་པ་ཉིད་ཀྱིས་ཤེས་སོ། །དེས་ན་འདི་ནི་ཕུང་པོ་དྲུག་ཁོ་ན་སྦྱོང་བྱེད་ཀྱི་རྒྱལ་བ་རིགས་དྲུག་མ་ཡིན་ཏེ། ཕུང་ཁམས་སྐྱེ་མཆེད་མ་ལུས་པ་གཅིག་ཏུ་བསྡོམས་པ་ལུས་ངག་ཡིད་བདེ་བ་སྟོང་པ་རིག་པ་རྣམས་རྣམ་པར་དག་པའི་རིགས་དྲུག་ཡིན་པས། དཔེར་མཚོན་ན་འདིའི་སྐབས་ཀྱི་འོད་དཔག་མེད་ལ། རིགས་བྱེ་བྲག་པའི་རྡོར་སེམས་ལྷ་སོ་དྲུག་པོ་ཐམས་ཅད་ཀྱི་ཆ་ཤས་གཙོ་ཆེ་ཆུང་མེད་པར་ཚང་བ་སྟེ། དེ་ཐམས་ཅད་ཀྱི་སྐུའི་སྣང་ཆ་ཡིན་པ་སོགས་གཞན་ལའང་སྦྱར་ཏེ། མདོར་ན་སྐབས་འདིར་ཐབས་དང་ཤེས་རབ་དབྱེ་བ་གཏན་ནས་མེད་པ་མཚོན་ཕྱིར་རེ་རེ་བཞིན་གཅིག་པུའི་སྐུའོ། །ཞེས་པ་ནི་བྱིན་རླབས་བརྒྱུད་པའི་མན་ངག་གོ། །།གསུམ་པ་ནི། མཆོག་གི་ཕྱག་རྒྱས་དག་པར་བྱེད་པ་ཞེས་ཀྱང་བྱ་སྟེ། འདི་ལ་ལག་པ་སྦྱོང་བ་དངོས་དང༌། ཡི་གེ་འགོད་པས་ལག་པ་བྱིན་གྱིས་བརླབ་པ་དང༌། རྡོ་རྗེའི་ཕྱག་རྒྱས་ལུས་སྦྱང་བ་དང༌། ང་རྒྱལ་བཟུང་བ་སྟེ་དོན་ཚན་བཞི་ཡོད་པ་ལས། ཨོཾ་ཧྲ་སརྦ་ཨ་ཏྲ་སོགས་སྔགས་བརྗོད་ཅིང་ལག་པ་ཉེད་པ་ནི་ལག་པ་སྦྱོང་བའོ། །གསུམ་པའི་སྐབས་སུ་རྡོ་རྗེའི་ཕྱག་རྒྱ་གཙུག་ཏོར་ནས་རྐང་སེན་གྱི་བར་དུ་རེག་པ་ནི། དང་པོ་སྤྱི་གཙུག་ཏུ་རྡོ་རྗེ་རྩེ་ལྔ་པའི་རྩེ་མོ་
རེག་པ་ནས་བརྩམས་ཏེ། ལུས་ཀྱི་ གཡོན་དང་རྐང་པ་དང༌། ཡང་ཡར་ལྡོག་སྟེ་གཡས་ཀྱི་ཆ་ལ་རིག་པའི་གཡས་སྐོར་དུ 
་བྱེད་པ་ཡིན་ལ། གཞན་རྣམས་གོ་སླ་ཞིང༌། འགའ་ཞིག་ལག་པ་ལ་བཀོད་པའི་ཡི་གེ་རྣམས་དང༌། ཉི་ཟླ་སྒྲ་གཅན་ལ་དག་སྦྱོར་མང་པོ་བྱེད་པ་ནི་སྤྲོས་བཤད་ཙམ་དུ་ཟད་དེ་འདིར་བཏང་སྙོམས་སུ་བཞག་མོད། དོན་ལ་ལག་པ་བྱིན་རླབས་ཉིད་ཡིན་གྱི། སྦྱང་བྱ་སྦྱོང་བྱེད་མང་པོ་བྱེད་པ་དོན་མེད་ དོ། །སྤྲོས་བཤད་བྱས་ན་ཨ་ཨི་རི་ཨུ་ལའི་དོན་ཁོ་ན་ལ་ཟད་པ་མེད་མོད། སྐབས་སུ་བབ་པ་དེ་ཙམ་བཤད་ན་ལེགས་སོ།། །།གསུམ་པ་ཡན་ལག་དྲུག་འགོད་པ་ལ། ཧྲ་ནི་གཞོམ་དུ་མེད་པ་དྲག་པོའི་ས་བོན་ཡིན་པས། དུས་འཁོར་ཁྲོ་བོའི་སྔགས་ཀྱི་རྩ་བར་འགྱུར་ཞིང༌། དེ་ཉིད་སྲོག་ཏུ་དབྱངས་དྲུག་སྟེང་དུ་ཀླད་སྐོར་ཡེ་ཤེས་སྟོང་པ་དང་སྦྱར་བས། འབྲུ་རེ་རེ་བཞིན་དབྱངས་ཀྱི་ཕྱོགས་ལ་དབྱངས་ཟླ་ཕྱེད་ཐིག་ལེ་སྟེ་རྡོ་རྗེ་གསུམ་དང༌། གསལ་བྱེད་ཧ་དང་ར་བརྩེགས་པ་ཉིད་ཡེ་ཤེས་རྡོ་རྗེའོ། །དེས་ན་དཀྱུས་སུ་བཤད་པ་འདི་མཁའ་འགྲོ་རྒྱ་མཚོར་གོ་ཆ་དྲུག་གིས་གནས་དྲུག་བྱིན་གྱིས་རློབ་པ་བཤད་པ་དང་གནད་གཅིག་གོ་ཞེས་ཁ་ཅིག་ཟེར་བ་ཡང་དོན་དང་མཐུན་ཏེ་གོ་ཆའི་དཔའ་བོ་དྲུག་དང་གནད་གཅིག་གོ །དེ་ཡང་སྙིང་ཁ་དང༌། སྤྱི་བོ་དང༌། སྤྱི་གཙུག་རྣམས་གནས་དང་གོ་རིམ་གཅིག་ཅིང༌། དེར་བཞི་པ་ཕྲག་པའི་དོད་དུ་འདིར་ལྔ་པ་ཡན་ལག་སྟེ་ལུས་ཐམས་ཅད་ལ་རེག་པ་ཡིན་ལ། དེའི་ལྔ་པ་དང་འདིའི་བཞི་པ་མིག་སྟེ་གནད་གཅིག་པ་དང༌། དྲུག་པ་ནི་འདིར་དངོས་སུ་དགེ་བའི་ལས་ལ་གཡོན་པ་དང༌། མི་དགེ་བའི་ལས་ལ་གཡས་པའི་མཐེབ་འཛུག་གིས་སེ་གོལ་ཕྱོགས་བཅུར་བརྡབ་པ་ཡིན་ཡང༌། ཚིགས་ཆེན་བརྒྱད་ལ་འགོད་པ་དང་གནད་གཅིག་སྟེ། འདིར་མཚོན་ཆ་ཞེས་གསུངས་ཤིང༌། སྡོམ་པའི་བཤད་རྒྱུད་རྣམས་ལས་
ཕཊ་ཧཾ་ཡན་ལག་ཐམས་ཅད་ལ་མཚོན་ཆའོ་ཞེས་འབྱུང་བའི་ཕྱིར་རོ། །དེས་ན་གོ་ཆ་ཙམ་ནི་རང་ཉིད་སྲུང་བའི་དོན་ཡིན་ལ། མཚོན་ཆ་ནི་དེར་མ་ཟད་ཕ་རོལ་པོའི་དུག་མཚོན་མེ་སོགས་སམ། དེ་དང་འདྲ་བའི་སྔགས་དང་སྦྱོར་བ་ངན་པ་ཉིད་འཇིག་པའོ། །དེའི་ཆེད་དུ་སེ་གོལ་ཕྱི་རོལ་ཏུ་བརྡབ་པ་ཡིན་གྱི། བསྲུང་རྒྱུ་ནི་འདིར་ཡང་རང་ལུས་ཉིད་ཡིན་པས་ཡན་ལག་དྲུག་ཅེས་པ་ལུས་ཀྱི་ཡན་ལག་ཉིད་ལ་འཇོག་པ་འཐད་ཀྱི། ཕྱིས་བྱུང་ཁ་ཅིག་ལྟར་དང་པོ་ལྔ་པོ་རང་ལུས་སྲུང་བར་འདུག་ཀྱང་ཕྱི་མ་འདི་ཕྱི་རོལ་ཏུ་བསྲུང་རྒྱུ་ཞིག་ཡིན་ནམ་སྙམ་ནས། ཕྱོགས་མཚམས་སྲུང་བ་ལུས་ཀྱི་ཡན་ལག་ཏུ་མི་རུང་ཞེས་ཟེར་ཞིང༌། གཙོ་བོའི་ལས་རྣམས་སྒྲུབ་པའི་སྔགས་ཀྱི་ཡན་ལག་ཡིན་ཞེས་ཟོལ་ཐབས་ཀྱི་སྨྲ་སྟེ་གཡོ་སྒྱུའི་སྦྱོར་བ་ཤིན་ཏུ་མི་འཐད་མོད། དེ་སྐད་སྨྲ་བ་དེ་ལ་རང་ལུགས་འཇོག་རྒྱུ་མི་འདུག་པས་འགོག་ཀྱང་མི་དགོས་སོ། །འདིར་འགྲེལ་ཆེན་དུ་ཡན་ལག་དྲུག་འགོད་ཚུལ་མི་འདྲ་བ་གཉིས་གསུངས་ཤིང༌། དཀྱུས་ལ་བྱེད་པ་འདི་ནི་བསྲུང་བའི་དོན་དུ་རྩ་རྒྱུད་ནས་གསུངས་པའི་དགོངས་པ། འགྲེལ་པར་ནག་དུམ་དུ་བཀོད་པ་ཡིན་ལ། ལུགས་གཅིག་ཤོས་དེ་སྒྲུབ་ལེར། མགོ་དང་མགྲིན་པ་སྙིང་ག་ལྟེ་གསང་གཙུག་ཏོར་དུ་ནི་རང་གི་རྡོ་རྗེ་རྣམས་ཀྱི་ཡན་ལག་འགོད། །གཉིས་ཀའི་རིགས་ལ་གནས་པའི་ཡན་ལག་སྒོ་རྣམས་ཀྱིས་ནི་གཉིད་ཀྱི་དུས་དང་མཆོད་དང་འཁྲིག་པ་ལ། ཞེས་གསུངས་ཏེ། སྙིང་གའི་སྒྲས་ལྟེ་བར་ཧྲཱྀཾ་དང༌། མགོ་བོའི་སྒྲས་སྙིང་གར་ཧཱུཾ་དང༌། སྤྱི་གཙུག་གི་སྒྲས་མགྲིན་པར་ཧྲཱྀཾ་དང༌། ཡན་ལག་ཐམས་ཅད་ཀྱི་བརྡས་མགོ་བོར་ཧྲིཾ་དང༌། མིག་གི་བརྡས་གཙུག་ཏོར་དུ་ཧྲཾ་དང༌། མཚོན་ཆའི་བརྡས་གསང་གནས་སུ་ཧྲཱཿསྟེ། འཁོར་ལོ་དྲུག་ལ་སྲོག་གི་ཡི་གེ་རྣམས་འབྱུང་བ་ཁམས་མཐུན་གྱི་སྦྱོར་
ཚུལ་གཅིག་ཀྱང་མཛད་དེ། རྩ་རྒྱུད་ལས་སྙིང་ག་སོགས་སུ་གསུངས་པ། དངོས་བསྟན་དེ་ཡང་དྲང་དོན་མཚོན་ཆ་ཙམ་གྱི་དོན་ཡིན་མོད། ངེས་དོན་ནང་ཁམས་དྲུག་གི་དག་པ་དང་སྦྱར་ན། ཕྱི་མ་ལྟར་དགོས་པ་ལ་རྩ་རྒྱུད་ལས་སྙིང་ག་སོགས་དྲུག་གི་སྒྲས་བསྟན་པ་དགོངས་པ་ཅན་སྒྲ་ཇི་བཞིན་པ་མ་ཡིན་པར་བཀྲལ་ན་ཕྱི་མ་ལྟར་འོང་ཞེས་པའི་དོན་ཡིན་གྱི། ཁ་ཅིག་སྨྲ་བ་ལྟར་འགྲེལ་པས་འགྲེལ་པ་རང་ཉིད་དགོངས་པ་ཅན་དུ་འཆད་པ་དང༌། སྙིང་གའི་སྒྲས་ལྟེ་བ་བསྟན་ཞེས་པ་ལྟེ་བའི་སྒྲས་སྙིང་ག་བསྟན་པའི་དོན་དུ་འཆད་པའི་གོ་ཟློག་ཏུ་སྨྲ་བ་དེ་འདྲ་སྤང་བར་བྱ་ལ། རྩ་རྒྱུད་ལས་སྙིང་ག་སོགས་སུ་བཤད་པ། བསྡུས་རྒྱུད་ལས་ལྟེ་བ་སོགས་སུ་གསུངས་པ་དང་སྦྱོར་བས་དོན་གྱི་གནད་གཅིག་གོ་ཞེས་པའོ། །འོན་ཀྱང་འཁོར་ལོ་དྲུག་ཏུ་རིགས་དྲུག་གི་སྔགས་དངོས་ནི། ཐབས་ཤེས་རིགས་དྲུག་གི་དབྱངས་དྲུག་པོ་རྣམས་ངེས་པའི་དོན་ཞེས་གསུངས་ཏེ་ངེས་པ་ཅན་གྱི་དོན་ཡིན་ལ། དགོས་པའི་དབང་གིས་གཞན་སྣ་ཚོགས་སུ་སྦྱར་བ་ལ་ངེས་པ་མེད་དོ། །ཞེས་འཆད་པ་ནི་གཉིས་ཀའི་རིགས་ལ་གནས་པའི་ཞེས་སོ། །གཉིས་པོ་དེ་ལ་དགོངས་པ་དགོངས་མིན་དྲང་ངེས་སོ་སོར་འཇོག་པའི་དོན་གཞན་མེད་ཀྱང་སྔ་མ་རྒྱུད་སྡེ་གཞན་ལས་འབྱུང་བ་དང་གོ་བསྟུན་པ་དང༌། ཕྱི་མ་དུས་འཁོར་ཉིད་ཀྱི་ངེས་གནས་ཀྱི་དོན་ཡིན་ཞེས་པ་ཙམ་ཞིག་ཡིན་པས་གཉིས་པོ་གང་རུང་རེས་ཆོག་ཀྱང༌། འདི་ན་ཁ་ཅིག་གཉིས་ཀ་བྱེད་པ་ནི་སྤྱིར་ཡང་ལྷག་པོ་ཤོར་བ་ཡིན་ཞིང༌། སྒོས་སུ་ཡང་གང་རུང་གཅིག་ལ་ཡིད་མ་ཆེས་པའི་རྣམ་འགྱུར་དུ་སྣང་བས་སྤང་བར་བྱའོ། །ཨོཾ་སརྦ་ཏ་ཐཱ་སོགས་སྔགས་ཕྱི་མ་ནི། དྲུག་པོ་དེ་རྣམས་ཀྱི་ང་རྒྱལ་ཕྱོགས་གཅིག་ཏུ་བཟུང་བ་ཙམ་མོ།། །།ལྔ་པ་ནི་སྤྱིར་བདག་བསྐྱེད་སྒྲུབ་ཐབས་ཉམས་ལེན་ཙམ་གྱི་གནས་སྐབས་སུ། ཡུལ་བདག་གྲོང་བདག་གི་གཏོར་མ་སྐབས་འདིར་མ་བྱས་
ཀྱང་ཆོག་མོད། བྱས་ན་ལེགས་པའི་ཡན་ལག་ཡིན་ནོ། །འགའ་ཞིག་ལྟར་ཡུལ་བདག་གྲོང་བདག་གི་གཏོར་མ་ནི་ས་ཆོག་གི་སྐབས་སུ་ཡིན་གྱི། སྐབས་འདིར་བྱེད་དུ་མི་རུང་ཟེར་བ་ནི་མ་ཡིན་ཏེ། དེ་ལྟར་འདོད་པ་པོ་ཉིད་སྒྲུབ་ཐབས་ཀྱི་འགོར་སྔོན་འགྲོ་གཏོར་མ་ངེས་པར་བྱེད་པ་དང་ནང་འགལ་ལོ། །སྒྲུབ་མཆོད་ལྟ་བུའི་བདག་བསྐྱེད་ལ་ནི་ངེས་པར་དགོས་ལ། དཀྱུས་ལ་ཡང་སྔོན་འགྲོ་གཏོར་མའི་ཆོ་ག་ཡིན་པས་འགྲུབ་ན་ལེགས་སོ། །འདིའི་གཏོར་མ་བྱིན་རླབས་ནི། བསངས་སྦྱངས་སྔོན་དུ་འགྲོ་བས་དམ་རྫས་ཉིད་ལ་དམིགས་ཏེ། ཨོཾ་ཨོཾ་བཛྲ་ཙནྡྲ་སོགས་སྔགས་བཞི་དང༌། ཕྱག་རྒྱ་བཞི་དང༌། ཡིག་འབྲུ་བཞིའི་ཏིང་འཛིན་གྱིས་ཆོག་གི འཇིག་རྟེན་ཕལ་པ་ལ་དམ་རྫས་བཅུའི་དབྱེ་བ་མི་དགོས་སོ། །དེ་ཡང་ཟླ་བས་རྩྭ་ཤིང་སོགས་དངོས་པོ་ཀུན་གྱི་དུག་སེལ་བ་དང་འདྲ་བར། ཨོཾ་གྱིས་རྫས་སྦྱོང་བ་དང༌། ཉི་མས་རོ་ནུས་སྨིན་ཅིང་རྒྱས་པར་བྱེད་པ་དང་འདྲ་བར་ཨཱཿཡིས་སྤེལ་བ་དང༌། སྒྲ་གཅན་གྱིས་དངོས་པོ་རྣམས་ཀྱི་མདངས་དང་ནུས་པ་མ་འདྲེས་པ་གསེལ་བར་བྱེད་པ་ལྟར་ཧཱུཾ་གིས་འབར་བ་དང༌། མཁའ་ལྡིང་དང་དུས་མེ་གཉིས་ཀར་དུག་བདུད་རྩིར་བྱེད་པ་སོགས་དངོས་པོ་སྒྱུར་བའི་ནུས་པ་ཅན་ཡིན་པའི་ཕྱིར། མཁའ་ལྡིང་གི་ཕྱག་རྒྱ་དང་ཧོཿཡིག་གིས་བདུད་རྩིར་བྱེད་པའོ། །འགའ་ཞིག་ཟླ་བ་མི་འགྱུར་བའི་བདེ་བས་འགྱུར་བཅས་སྦྱོང་བ་དང༌། གཏུམ་མོ་འབར་བས་བདུད་རྩི་ཞུ་བ་དང༌། དུས་མེ་གཏུམ་མོའི་མེས་བདེ་བ་འབར་བར་བྱེད་ཅེས་སོགས་ངེས་དོན་གྱི་བཤད་པར་རློམ་པ་ནི་རྟོག་བཟོ་འབའ་ཞིག་གོ །ཡུལ་བདག་གྲོང་བདག་ལ་མིང་མི་ཤེས་ན། ཡུལ་བདག་ཅེས་སམ། གནས་འདིའི་བདག་པོ་ཞེས་སོགས་བརྗོད་པས་ཆོག་ཅིང༌། ཤེས་ན་མིང་དངོས་བརྗོད་ཀྱང་རུང་མོད། ཡང་འགྲེལ་པ་ལས་
མིང་གི་ཡི་གེ་མཉམ་པ་སྟེ་ཁ་འཆམ་ན། ཡི་གེ་ཐོག་མཐའ་གཉིས་བསྡུས་པ། མ་ཧཱ་ཀཱ་ལ་ལ། མ་ལ་ཞེས་པ་ལྟ་བུ་དང༌། མིང་གི་ཡི་གེ་མི་མཉམ་ཞིང༌། ཡི་གེ་མང་ན་ཐོག་བར་མཐའ་གསུམ་ནས་ཡི་གེ་རེ་བསྡུས་པ། དཎྜ་བྷཻ་ར་བ་ཞེས་པ་ལ་ད་བྷེ་བ་ཞེས་པ་ལྟ་བུ་བརྗོད་པ་ཡིན་པར་བཤད་ལ། དེ་ལས་ཡུལ་བདག་ནི་མ་ག་དྷ་ན་གནས་པའི་ཡུལ་བདག་ས་པ་རི་ཝ་ར་ཞེས་པ་ལྟ་བུ། གྲོང་བདག་ནི་རྒྱལ་པོའི་ཁབ་ན་གནས་པ་ས་པ་རི་ཝ་ར་ཞེས་པ་ལྟ་བུ་སྟེ། ཡུལ་དང་གྲོང་ནི་སྤྱི་དང་བྱེ་བྲག་གི་ཁྱད་པར་རོ། །ས་ཆོག་སོགས་ཀྱི་སྐབས་སུ་འདི་བྱེད་པ་ནི། བདུད་སྲེག་པ་དང༌། ཁྲོ་བོ་སྤྲོ་བ་དང༌། ཕུར་བུས་བཏབ་པ་དང༌། སྟང་སྟབས་བྱེད་པ་སོགས་ཀྱི་སྐབས་སུ་གནོད་བྱེད་མ་ཡིན་པའི་གཞིར་གནས་རྣམས་ལ། འཕོག་ཐུག་མི་འབྱུང་བའི་ཕྱིར་དང༌། ལས་གྱི་གྲགས་འཆོལ་བའི་ཕྱིར་ཡང་ཡིན་ནོ། །གོང་དུ་དྲངས་པ་ལྟར་རྒྱུད་ལས་རྡོ་རྗེ་གསུམ་གྱི་ཞེས་འབྱུང་བ་ནི། རྡོ་རྗེ་གསུམ་བྱིན་གྱིས་བརླབས་པའི་རྣལ་འབྱོར་པས་གཏོར་མ་སྦྱིན་ཞེས་པའི་དོན་ཡིན་ན། དེ་ནི་ཡན་ལག་དྲུག་འགོད་པ་ཡན་ཆད་བྱས་པས་འགྲུབ་བོ། །ཡང་ན་ཨོཾ་ཨཱཿཧཱུྃ་གིས་མགོ་དྲངས་པའི་གཏོར་སྔགས་ཀྱིས་སྦྱིན་ཞེས་པའི་དོན་དུ་ཡང་འགྱུར་རོ།། །།དྲུག་པ་ནི་རྡོ་རྗེ་བཞི་པོ་རྣམས་ཀྱིས་ཞེས་འབྱུང་བ། མདོར་བསྡུ་ན་གཙོ་བོའི་དོན་ལ། དཔྲལ་མགྲིན་སྙིང་ལྟེ་བཞིའི་རྡོ་རྗེ་ལས་མེ་སྤྲོས་པ་ཙམ་གྱིས་ཀྱང་ཆོག་ལ། གཞན་དུ་ན་དཀྱུས་བཞིན་ཐམས་ཅད་སྒོམ་མོ། །དེ་ཡང་ཕལ་ཆེར་གོ་སླ་ལ། དོན་བསྡུ་ན་འཁོར་ལོ་དྲུག་གི་རྩ་བྱིན་གྱིས་བརླབ་པ། ལས་དང་བྱ་བའི་འཁོར་ལོ་ལྷན་ཅིག་བྱིན་གྱིས་བརླབ་པ། དབང་པོ་དྲུག་བྱིན་གྱིས་བརླབ་པ། ལས་དབང་དྲུག་བྱིན་གྱིས་བརླབ་པ་སྟེ། རྡོ་རྗེ་འགོད་པ་ལ་དོན་ཚན་བཞི་ཡིན་ལ། དེ་ལྟར་བདག་ཉིད་ཅེས་པ་མན་ཆད་བདུད་སྲེག་པ་དངོས་སོ། །
འདིའི་སྔགས་ནི་རྡོ་རྗེ་མེ་ཞེས་བྱ་བའི་ཁྲོ་བོའི་སྔགས་ཡིན་པས། ཁྲོ་བོའི་རྒྱལ་པོ་རྡོ་རྗེ་ཤུགས་དང་གཅིག་པར་བླ་མ་གོང་མ་རྣམས་བཞེད་དོ། །རྡོ་རྗེའི་རྭ་རྣམས་ཀྱི་གྲངས་ནི་ལྷག་པོ་རེ་རེ་རྩ་འཁོར་གྱི་ལྟེ་བའི་ཡིན་ལ། གཞན་རྣམས་རྩ་འདབ་ཀྱི་གྲངས་སོ། །ལྕེ་དང་ལྕེ་ཆུང་ཞེས་པའི་ལྕེ་ནི་རོ་མྱོང་བྱེད་ལྕེ་དབང་ཡིན་ཞིང༌། དེའི་རྡོ་རྗེའི་ལྕེའི་རྩ་བའི་ཕྱོགས་སུ་འགོད་ལ། ལྕེ་དང་རྐན་དག་ལ་ཞེས་པ་ནི། ངག་སྨྲ་བའི་ལས་དབང་གི་ལྕེ་སྟེ། དེའི་རྡོ་རྗེ་ལྕེའི་རྩེ་མོ་ལ་འགོད་ཅིང༌། ཡིད་ཀྱི་རྩ་ཨ་ཝ་དྷཱུ་ཏཱི་དང༌། ཁུ་བའི་རྩ་དུང་ཅན་མ་དང༌། གཙུག་ཏོར་དང་མགོ་བོ་ཞེས་པའི་མགོ་བོ་ནི། འཚོགས་ཀའམ། སྐྲ་མཚམས་དང༌། གསང་བ་ནི་ལྟེ་འོག་སོར་བརྒྱད་ཀྱི་ལུས་ཀྱི་དབུས་ཡིན་ཞིང༌། དཔྲལ་བའི་རྡོ་རྗེ་རྩེ་མོ་བཅུ་བདུན་པ་ནི། རྩ་འཁོར་དངོས་སྤྱི་བོ་བདེ་བ་ཆེན་པོའི་འཁོར་ལོ་ཡིན་པས། དཔྲལ་བའི་དཀྱིལ་དང་མཐོ་དམན་མཉམ་པ་ལ་དཔྲལ་བ་ཞེས་བརྗོད་མོད། རྩ་འཁོར་དེ་དཔྲལ་བའི་ངོས་ལ་ཟུར་ལངས་སུ་གནས་པ་མ་ཡིན་ཀྱང༌། འདིར་དམིགས་པས་བསྒྱུར་ཏེ། མེ་སྤྲོ་བ་སླ་བའི་དོན་དུ་དེ་ལྟར་བསྒོམ་དགོས་ཞེས་ཀྱང་ཟེར་རོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། སྤྱི་ཆིངས་དང་སྔོན་འགྲོ་སྣ་ཚོགས་པའི་སྡེ་ཚན་ཏེ་གསུམ་པའོ།། །།གཉིས་པ་སྲུང་འཁོར་དངོས་གཞི་ལ། རྟེན་གྱི་སྲུང་འཁོར་བསྐྱེད་པ། གཙོ་བོ་རྡོ་རྗེ་ཤུགས་བསྐྱེད་པ། ཕྱག་རྒྱ་དང་ཕྱག་མཚན་འགོད་པ། བཀའ་སྦྱིན་པོའི་ང་རྒྱལ་འཛིན་པ། འཁོར་ཚོགས་སྤྲོ་བ། སྲུང་འཁོར་གྱི་ང་རྒྱལ་བཟུང་སྟེ་བཀའ་བསྒོ་བ། གནོད་བྱེད་ལ་ཕུར་བུས་གདབ་པ་སྟེ་བདུན་ནོ།། །།དང་པོ་ནི། ཧཾ་ལས་བྱུང་བའི་ནམ་མཁའི་རང་བཞིན་ཞེས་པ་ནས། དེ་དང་མཉམ་པའི་ཉི་མའི་གདན་ཞེས་པའི་བར་ཏེ། འབྱུང་བཞིའི་དཀྱིལ་འཁོར་འོག་གཞལ་ཡས་ཁང་གི་སྐབས་སུ་འཆད་
པར་འགྱུར་བ་དང་འདྲ་ལ། སྣ་ཚོགས་རྡོ་རྗེ་ཁ་སྦྱར་བས་ཞེས་པ་ཡང་ཁ་ཅིག་དཀྱིལ་འཁོར་རེ་རེའི་སྟེང་དུ་ཁ་སྦྱོར་རེ་དང༌། འོག་ཏུ་ཁ་སྦྱོར་རེ་འདོད་པ་དང༌། གཞན་དག་འོག་དང་སྟེང་དུ་རེ་རེ་ཀ་ཡིན་ཡང་ཆོད་ཆེ་བས་འབྱུང་བཞི་སོ་སོའི་དབུས་སུ་རྒྱ་གྲམ་གཉིས་པོ་རེག་པ་དེ་གཉིས་ཁ་སྦྱོར་ཞེས་བྱ་ལ། འོག་དངོས་གཞིའི་སྐབས་སུ་མ་རེག་པའོ། །ཞེས་འདོད་ཀྱང༌། འདི་དང་འོག་གི་དངོས་གཞིའི་སྐབས་ལ་ཚིག་གི་བརྗོད་ཚུལ་མི་གཅིག་པ་ཙམ་ལས་དོན་ལ་ཁྱད་པར་མེད་དོ། །དཀྱིལ་འཁོར་བཞི་པོ་གཅིག་ཏུ་འདྲེས་པ་ཞེས་སོགས་ནི། དངོས་གཞིའི་སྐབས་སུ་འབྱུང་བཞི་རི་རབ་དང་བཅས་པའི་སྟེང་དུ་གཞལ་མེད་ཁང་སྒོམ་པ་འཁོར་ལོ་སྡོམ་པ་སོགས་མ་རྒྱུད་མང་པོ་དང་མཐུན་ཞིང༌། སྲུང་འཁོར་གྱི་སྐབས་འདིར་འབྱུང་བཞི་ཡོངས་སུ་གྱུར་པ་ལས་ཁང་བརྩེགས་སོགས་སྒོམ་པ། གསང་འདུས་ལ་སོགས་པ་ཕ་རྒྱུད་གྲགས་ཆེ་བ་རྣམས་དང་མཐུན་ཞེས་གསུངས་པ་ནི། རྒྱུད་སྡེ་གཞན་གྱི་ཆོ་ག་འདིར་དྲངས་པའི་དོན་མ་ཡིན་གྱི། དུས་འཁོར་རང་གི་ཆོ་གའི་བབས་ལ་དེ་བཞིན་དུ་ཡོད་པ། རྒྱུད་དེ་དག་ལས་འབྱུང་བ་དང་ཚུལ་འདྲའོ་ཞེས་འདྲ་ཚུལ་གསུངས་པ་ཡིན་ནོ། །ཤེས་རིན་པ་སོགས་འབྱུང་བཞི་གྱུར་པའི་གཞལ་ཡས་ཁང་དང༌། འབྱུང་བཞིའི་སྟེང་དུ་གཞལ་ཡས་ཁང་སྒོམ་པ། ཕ་མ་སོ་སོའི་རྒྱུད་ཀྱི་ཐུན་མོང་མ་ཡིན་པའི་ཁྱད་ཆོས་ཡིན་ཚུལ་སོགས་སྨིན་གྲོལ་གྱི་སྐབས་ཐམས་ཅད་དུ་བླ་མེད་རིགས་གསུམ་གྱི་དབྱེ་བ་ཤིན་ཏུ་མང་བ་ཡོད་སྐད་དང༌། ཕན་ཚུན་གོ་བསྟུན་པ་མང་པོ་ཡོད་ཚུལ་སོགས་དོན་མེད་ཀྱི་བཤད་པ་མང་པོས་སློབ་མ་རྣམས་ཀྱི་བློ་གྲོས་གྲོན་དུ་བྱེད་པ་མང་དུ་བྱུང་མོད། དེང་སང་རྗེས་འཇུག་མེད་ཅིང་དགོས་པ་ཆུང་བས་འདིར་དགག་སྒྲུབ་མ་སྨོས་སོ། །གང་ལྟར་ཡང་འདིར་འབྱུང་བཞི་གཅིག་ཏུ་གྱུར་པ་ལས་རྡོ་རྗེའི་
ས་གཞི་ཤིན་ཏུ་ཡངས་ཤིང་རྒྱ་ཆེ་ལ་འཐུག་ཅིང་དཔངས་མཐོ་བ་དབུས་ཀྱི་ཆ་ལ་རྡོ་རྗེའི་ཁང་བརྩེགས་སུམ་ཐོག་ཅན་དང༌། དེའི་ཕྱི་རོལ་རྡོ་རྗེའི་རྭ་བ་སྟེ་ལྕགས་རི་ཕྱི་ནང་གཉིས་ཡོད་པ་ལས། ནང་མ་རྩིག་པ་རིམ་པ་གསུམ་དང་ཕྱི་མ་རྩིག་པ་རིམ་པ་ལྔ་ཡོད་པ། དེ་དག་དཀྱིལ་འཁོར་དངོས་གཞིའི་སྐབས་ཀྱི་རྩིག་པ་དང་འདྲ་ལ། འོན་ཀྱང་རྩིག་པ་ཕྱི་ནང་གི་རིམ་པ་ལ་ནི། ལུགས་འབྱུང་ལུགས་ཟློག་གི་རིམ་པ་གང་བྱས་ཀྱང་འདྲ་བར་མངོན་ཏེ། སྲུང་བ་ནི་ཞི་བར་འདུས་ལ། བཟློག་པ་ལ་ཞི་དྲག་གཉིས་ཀར་ཡོད་ཅིང༌། ཕུར་གདབ་ནི་དྲག་པོ་ཡིན་པའི་ཕྱིར་རོ། །དེ་ལ་རྭ་བ་ལྔ་པའི་ལྕགས་རི་ནི་རྡོ་རྗེའི་ས་གཞི་དེ་ཉིད་ཀྱི་མཐའ་སྐོར་མཚམས་སུ་ཡོད་ཅིང༌། རྡོ་རྗེའི་ས་གཞི་དེ་ཡང་ཟླམ་པོ་ཕྱེད་གཤགས་ཁ་གྱེན་དུ་བསྟན་པའི་རྣམ་པ་ཅན་ཡིན་ལ། རྭ་བའི་སྟེང་དུ་གུར་ཕུབ་པས་གུར་རྭ་བ་དང་བཅས་པ་ཡང་ཕྱི་ནས་བལྟས་ན་ཟླུམ་པོ་ཕྱེད་གཤགས་ཀྱི་རྣམ་པ་ཅན་ལྷུང་བཟེད་རྒྱ་གར་མ་ལྟ་བུ་སྟེ་དེ་གཉིས་ཁ་སྦྱར་བས་དབྱིབས་ཟླུམ་པོ་ཡིན་ལ། དྲ་བའི་འགྲམ་མན་ཆད་ཀྱི་ས་གཞིའི་ཕྱི་རོལ་ཐམས་ཅད་དུ་མདུང་གི་རྭ་བ་རྩེ་མོ་ཕྱིར་བསྟན་དང༌། སྟེང་གི་གུར་མཐའ་སྐོར་གྱི་རྭ་བ་དང་བཅས་པའི་ཕྱི་རོལ་ཐམས་ཅད་མདའི་དྲ་བས་བསྐོར་བ་སྟེ་མདའ་དྲ་ནི་སྤྱི་དང་འདྲའོ། །དེའི་དབུས་སུ་རྡོ་རྗེའི་ས་སྟེགས་ཕྱོགས་བཞི་མཚམས་བཞིར་སྒོ་གཏོད་པ། འོག་གཞི་རྡོ་རྗེའི་ས་གཞིའི་སྟེང་དུ་ཁོང་སྟོང་ཁང་པ་འདྲ་བ་མཐའ་སྐོར་ཟླུམ་པོ། དེའི་སྟེང་གི་མཐའ་སྐོར་དུ་ལྕགས་རི་རྩིག་པ་རིམ་གསུམ་ཅན་དེའི་སྟེང་གི་ཡང་གུར་སོགས་སྔར་དང་འདྲ། འདི་ལ་ཡང་མདུང་དང་མདའི་རྭ་བ་སྔར་བཞིན་འགོད་པའམ། བསྡུ་ན་མ་བཀོད་ཀྱང་ཆོག་གོ །དེ་ལྟར་བྱེད་པའི་ལུགས་ལ་དེའི་ནང་ཟླུམ་པོའི་ཚད་དུ་ས་གཞི་ཟླུམ་པོ་ཕྱེད་ཀས་ལྟ་བུའི་
འོག་མཐའ་དང་ས་གཞིའི་བར་ལ་མདུང་དང༌། སྲུངས་མ་ཉིས་སྦྲག་བར་མཚམས་དང་བཅས་པ་ཤོང་བའི་བར་སྟོངས་ཡོད་པ། དེས་ན་ས་སྟེགས་ལ་རྒྱའི་ཕྱེད་ལ་བར་སྟོངས་དེས་ལྷག་པའི་དཔངས་སོ། །དེའི་སྟེང་གི་དབུས་ཀྱི་ས་གཞི་ལ་སྔ་མ་དང་འདྲ་བའི་རྡོ་རྗེའི་ས་སྟེགས་ཁོང་སྟོང་གི་སྟེང་དུ་ཁང་པ་བརྩེགས་པ་བསམ་མོ། །ཁང་པ་བརྩེགས་པའི་ཁ་དོག་ནི། ཕྱོགས་མདོག་གམ་ལྗང་ཁུའོ། །དེ་ལ་ཡུལ་འཁོར་གྱི་མཚམས་སུ་རྭ་བ་ལྔ་དང༌། ས་དང་ནམ་མཁའ་འབྱར་བར་སྣང་བའི་མཚམས་སུ་རྭ་བ་གསུམ་དང༌། ཁང་བརྩེགས་ཁྲུ་ཉིས་བརྒྱ་པ་ཞེས་པ་རྣམས་དཀྱིལ་འཁོར་གྱི་ས་ཆོག་སོགས་ཕྱིའི་བྱ་བ་དང་འབྲེལ་བ་རྣམས་ལ་ཆོ་ག་མ་གྲོལ་གྱི་བར་དུ་ཡུལ་ཕྱོགས་དེར་བགེགས་མི་འཇུག་པའི་དོན་དུ། དེ་ལྟར་བཤད་པ་ཡིན་གྱི་རྒྱུན་གྱི་རྣལ་འབྱོར་ལ་ཚད་དེ་ལྟར་ངེས་པ་མེད་མོད། དེ་ལྟར་བྱེད་ནའང་མི་འགལ་ལོ། །འདིར་གྱི་ཇོ་སོགས་འགྱུར་རྙིང་འགའ་ལས། ཁང་བརྩེགས་ཁྲུ་ཉིས་སྟོང་པ་ཞེས་པའང་ཡོད་པ་ཉིས་བརྒྱ་དང་ཉིས་སྟོང་གང་ཡིན་བརྟག་པར་བྱ་བའི་གནས་ཅུང་ཟད་ཡོད་དོ། །དེ་ལ་ས་དང་ནམ་མཁའ་འབྱར་བར་སྣང་བ་ཞེས་པ་དང༌། ཐོ་རངས་ནས་ནི་གྲིབ་མའི་མཚམས་སུ་ཞེས་པའི་དོན་བོད་འདིར་ཕྱིས་རྣམ་གྲངས་ཅལ་ཅོལ་སྨྲ་བ་མང་ཡང༌། སྙིང་པོ་འདི་ཡིན་ཏེ། རྒྱ་གར་ལྟ་བུ་ས་སྙོམས་ཤིང་རི་མེད་པའི་དབང་དུ་བྱས་ནས། རི་རྩེ་དང་མཁར་གྱི་རྩེ་སོགས་མིན་པ་ཐང་དཀྱིལ་ནས་བལྟས་ན་ཐོ་རངས་ཀྱི་མཐར་ཉི་མ་འཆར་བའི་ཚེ་ས་འདི་ལྟ་བུའི་ཐང་ནས་ཉི་མ་ཤར་རོ། །གྲིབ་མ་སྟེ་ཉི་མ་ནུབ་པའི་ཚེ་ས་འདིའི་ཐད་ཀར་ཉི་མ་ནུབ་བོ་སྙམ་པ་འབྱུང་བའི་ས་ཐང་དེ་ཉིད་ཤར་ནུབ་ཏུ་གནམ་ས་འབྱར་བ་ལྟ་བུར་སྣང་བའི་ས་མཚམས་ཡིན་ཞིང༌། ལྷོ་བྱང་དུ་ཡང་དེ་དང་འདྲ་བས་ཟླུམ་པོར་
སྣང་ངོ༌། །ཞེས་བྱ་སྟེ། འདི་ལ་དཔག་ཚད་བཅུ་གཉིས་ཀྱི་ཚད་ཟླུམ་པོར་བསྐོར་བ་ཡོད་ཅེས་པཎྜི་ཏ་གང་པའི་རྡོ་རྗེ་གསུང་ ངོ༌། །ཡུལ་འཁོར་ནི་ཁ་ཅིག་རང་དང་སྡེ་གཅིག་པས་བཟུང་བའི་ཡུལ་འཁོར་ལ་འཇོག་དགོས་ཟེར་ཏེ། དེ་ནི་སྤྱིར་ཡང་ཚད་མ་ངེས་ཤིང༌། སྒོས་སུ་སྒྲུབ་པ་པོ་མཐའ་དབུས་གང་དུ་སྡོད་མ་ངེས་པས་ཚད་བཟུང་དཀའ་ན། འོན་ཀྱང་འདི་ནི་དེ་འདྲ་མ་ཡིན་པར་ངེས་ཅན་ཏེ། སྔོན་མ་ལས་ཉིས་འགྱུར་གྱི་ཚད་ཙམ་ཕྱི་རོལ་ཏུ་བསྐོར་བར་བྱས་ན་ལེགས་ཏེ། རྒྱ་གར་རྒྱ་ནག་སོགས་ཡུལ་བཟང་པོ་རྣམས་སུ་རྒྱལ་ཁམས་ཞེས་པ་གྲོང་འབུམ་གྱི་ས་ཡུལ་ཡང་དེ་ཙམ་ཡོད་དོ་ཞེས་གསུང་ ངོ༌། །ཚད་ངེས་ཅན་བྱེད་ན་དེ་ལྟར་འཐད་ལ། དེ་དག་ཚད་སྟོན་པ་ཡིན་གྱི་རང་སྡོད་སའི་མཐོང་ཡུལ་དང་བསྟུན་པ་མིན་པས། ཡུལ་གང་དུ་སྒོམ་ཀྱང་འདྲའོ། ཁ་ཅིག་ཡུལ་འཁོར་གྱི་མཚམས་བསྲུང་བྱ་རྒྱ་ཆེ་ཆུང་དང༌། གནམ་ས་འབྱར་བར་སྣང་བའི་མཚམས་ལུང་པ་ཡངས་དོག་གིས་མ་ངེས་པར་འགྲོ་ཟེར་བ་ནི་ཤིན་ཏུ་འཁྲུལ་ཏེ། དེ་ལྟར་ན་ཕུག་པ་ཟབ་མོ་ན་གནས་པ་ན། གནམ་ས་འབྱར་བར་སྣང་བ་གཏན་ནས་མེད་པ་དང༌། རི་དྲུང་ན་གནས་པ་ལ་ཡོན་པོར་སྣང་བ་དང༌། རྭ་བ་ལྔ་པ་དང༌། གསུམ་པ་དེ་དང་དེའི་མཚམས་སུ་གསུངས་པ་ཡིན་པས། རྭ་བ་དེ་གཉིས་ཕྱི་ནང་ངེས་མེད་དང༌། བསྣོལ་མ་ལ་སོགས་པར་ཐལ་བར་འགྱུར་བའི་ཕྱིར་རོ། །དེས་ན་ཐང་ཡངས་ལ་ས་གཞི་ཟླུམ་པོར་སྣང་བའི་ཚད་དང་ཡུལ་འཁོར་བཟང་པོ་ཞིག་ཏུ་གྲོང་ཁྱེར་མ་ཡིན་པའི་ཐོར་བུ་གྲོང་འབུམ་འཆགས་ཐུབ་པའི་ཡུལ་ཕྱོགས་ཀྱི་ཚད་ཙམ་བསྒོམ་པའི་དོན་ཡིན་ཞིང༌། དེས་ན་གྲིབ་མ་ཞེས་པའང༌། ཉི་མ་ནུབ་སའི་མཚམས་ལ་ཟེར་གྱི། ཁང་པའི་གྲིབ་མས་གང་དུ་སླེབ་པ་ལ་ངོས་འཛིན་པ་ནི། ཟླུམ་པོར་
སྣང་བ་དང་ཤིན་ཏུ་འགལ་ལོ། །དེས་ན་སྐབས་འདིའི་ས་གཞི་དང་རྭ་བ་རིམ་གསུམ་དང་ཚད་འདི་དག་ལ། བོད་ཀྱི་ཕྱོགས་འདིར་ཕྱི་རབས་ཀྱི་དུས་སུ་རྣམ་རྟོག་མི་འདྲ་བ་ཇི་སྙེད་ཅིག་བྱུང་འདུག་ཀྱང༌། དོན་ལ་མི་གནས་པ་ཤ་སྟག་ཏུ་འདུག་ཅིང༌། དགག་སྒྲུབ་ཀྱང་འགངས་ཆུང་བས་འདོད་པ་བསྐྱར་བ་ལ་དགོས་པ་མི་སྣང་ངོ༌། །རྭ་བ་འགོད་པའི་སྔགས་ལ་ཨོཾ་ཨཱཿཧཱུྃ་རཿཞེས་འབྱུང་བ་ནི་རྡོ་རྗེ་བཞི་དང་ཉི་ཟླ་སྒྲ་དུས་བཞིའི་ས་བོན་ཡིན་པས། ལྕགས་རི་གཉིས་ཅར་རྡོ་རྗེ་བཞིའི་རང་བཞིན་དུ་བྱིན་གྱིས་རློབ་པར་བྱས་ཀྱང་རུང༌། ཡང་ན་འབྲུ་གསུམ་རྭ་བ་ནང་མ་དང༌། རཿཡིག་ཡེ་ཤེས་རྡོ་རྗེ་རྭ་བ་ཕྱི་མའི་ས་བོན་དུ་བྱས་ཀྱང་འགལ་བ་མེད་དོ། །ཁང་བརྩེགས་ཁྲུ་ཉིས་བརྒྱ་པ་ཞེས་པ་ནི། ཞིབ་རྩིས་ཀྱི་དབང་དུ་བྱས་ན་ཁྲུ་བརྒྱད་ཀྱིས་དམན་པ། ཞེས་གསུང་པའང་ཡོད་ལ། འོན་ཀྱང་འདིར་ཁྲུ་ཉིས་བརྒྱ་ཞེས་པ། རྒྱ་དཔངས་གཉིས་ལས་རྒྱ་ཚད་སྟོན་པར་གསལ་ཏེ། སྐུ་གསུང་ཐུགས་ཀྱི་དཀྱིལ་འཁོར་གྱི་ཚད་རྣམ་པར་གཞག་པ་སོགས་ཀྱིས་རིགས་འགྲེ་བས་སོ། །ཐོག་རིམ་པ་གཅིག་ལ་དེའི་རྒྱ་ཕྱེད་དཔངས་སུ་བྱ་ལ། བརྩེགས་མ་གསུམ་ཀར་ཡང་དེ་དང་འདྲ་ཞིང༌། སོ་སོའི་ཐོག་གི་རྔམས་དང༌། སྟེང་མ་ལ་ཧར་མི་སོགས་བཀོད་ན། ཉིས་འགྱུར་གྱིས་དཔངས་མཐོ་བར་འགྱུར་རོ། །ཁྲོ་བོ་བཅུའི་བཞུགས་གནས་རྩིབས་བཅུའི་འཁོར་ལོ་མི་བྱེད་ན། ཁང་བརྩེགས་བར་མའི་དབུས་སུ་གཙོ་བོའི་གདན་ཉིད་བྱེད་ལ། དེའི་ཚེ་རྡོ་རྗེ་ཤུགས་ཀྱི་བཞུགས་གདན་འཁོར་ལོ་རྩིབས་བརྒྱད་དང༌། པདྨ་འདབ་བརྒྱད་གདམ་ཁ་ཡིན་ཞིང༌། རྩིག་པའི་ནང་ལ་མ་རེག་ཙམ་གྱི་ཕྱོགས་མཚམས་བརྒྱད་དུ་ཁྲོ་བོ་བརྒྱད་དང༌། གཙོ་བོའི་དབུ་ཐོག་དྲང་ཐད་མ་ཡིན་པར་ཅུང་ཟད་ཤར་དུ་འཕགས་པའི་སྟེང་ཁང་ནང་དུ་ཁྲོ་བོ་གཙུག་ཏོར་གྱི་གདན་དང༌། དེ་བཞིན་དུ་འོག་ཁང་ནང་གི་རྡོ་རྗེའི་ས་
གཞིའི་མིང་ཅན་ས་མཐིལ་ལ་ཉེ་བར་ཁྲོ་བོ་གནོད་མཛེས་ཀྱི་གདན་ བྱའོ། །གལ་ཏེ་ཁང་བརྩེགས་ཀྱི་ནང་དུ་འཁོར་ལོ་རྩིབས་བཅུ་པ་ཡང་སྒོམ་ན། ཁང་བརྩེགས་འོག་མ་དང་བར་མ་གཉིས་ཀའི་ཐོག་གི་དབུས་སུ། ཁང་པའི་ཐོག་རྒྱའི་སུམ་ཆའི་ཚད་ཙམ་གྱི་མཐོངས་ཀ་ཟླུམ་པོ་བྱ། མཐོངས་ཀ་གཉིས་ཀྱི་བར་དུ་འཁོར་ལོའི་ལྟེ་བ་ཟླུམ་པོ་དང༌། བར་ཁང་གི་དབུས་སྐེད་མཚམས་དྲང་ཐད་དུ་འཁོར་ལོའི་རྩིབས་བརྒྱད་པོ་རྣམས་རྩེ་མོ་རྩེགས་པ་ལ་མ་རེག་ཙམ་དང༌། སྟེང་འོག་གི་རྩིབས་སྦུབས་ཅན་གཉིས་སྟེང་འོག་གི་ཁང་བརྩེགས་ཀྱི་ནང་དུ་བྱུང་ནས། སྟེང་གི་རྩེ་མོ་སྟེང་ཐོག་ལ་ལྟེ་ཁུང་དང༌། འོག་གི་རྩེ་མོ་ས་གཞིའི་ནང་དུ་ལྟེ་ཁུང་ཡོད་པ་ལ་ཆུག་པའོ། །འཁོར་ལོ་དེའི་ལྟེ་བ་སྦུབས་སྟོང་གི་ནང་དུ་གཙོ་བོའི་གདན་དང༌། འོག་གི་རྩིབས་ཀྱི་སྦུབས་སྟོང་གི་ནང་འོག་ཕྱོགས་ལ་ཉེ་བ་སྦོམ་ཕྲའི་མཚམས་ཙམ་དུ་འོག་གི་ཁྲོ་བོ་དང༌། སྟེང་གི་ཐོག་ལ་ཉེ་བའི་རྩིབས་སྦོམ་ཕྲའི་མཚམས་ཙམ་དུ་སྟེང་གི་ཁྲོ་བོ་བཞུགས་པས་དེ་དང་མཚམ་པའི་གདན་དང༌། ཕྱོགས་མཚམས་ཀྱི་རྩིབས་རལ་གྲིའི་རྩེ་མོ་བཅད་པ་ལྟ་བུའི་སྟེང་སོ་སོའི་དཀྱིལ་དྲང་ཐད་དུ་ཕྱོགས་མཚམས་ཀྱི་ཁྲོ་བོ་རྣམས་ཀྱི་གདན་ནོ། །པདྨ་ཁྲུ་བཅུ་གཉིས་པ་དང༌། ཉི་མ་ཁྲུ་བཞི་པ་ཞེས་པ་ རྡོ་རྗེ་ཤུགས་ཀྱི་སྐུ་ཚད་ཇི་ཙམ་ཡིན་པ་དེའི་ཁྲུའོ། །ལྷག་མ་དཀྱུས་ཉིད་ཀྱིས་གོ་སླའོ།། །།གཉིས་པ་ནི་སྒྲུབ་ལེ་ལས། ཁྲོ་བོའི་དབང་པོ་རྡོ་རྗེ་ཤུགས་ནི་གཉིས་ལྷག་རྒྱལ་བའི་ཕྱག་དང་རིག་བྱེད་ཞལ་དང་ཞབས་གཉིས་པ། །དམར་སེར་སྤྱན་དང་དབུ་སྐྲ་དམར་སེར་རྒྱལ་བའི་བདག་པོའི་ཅོད་པན་མཆེ་བ་རྣོན་པོ་གཙིགས་པ་སྟེ། །སྦྲུལ་གྱི་རྒྱན་དང་རབ་མཆོག་སྟག་གི་པགས་པའི་ཤམ་ཐབས་དང་ནི་གཙོ་བོ་བཞིན་དུ་མཚོན་ཆའི་ཕྱག །སྤྱི་བོར་མཐའ་དག་ རྒྱལ་བའི་རིགས་ཀྱི་ཐོད་པ་ཁ་དོག་ལྔ་རྣམས་དག་གི་འཕྲེང་བ་ངེས་པར་བཅིངས། །དྲི་མེད་འོད་ཟེར་
འཕྲོ་བ་སྣ་ཚོགས་ཆུ་སྐྱེས་ཉི་མའི་སྟེང་དུ་དཀྱིལ་འཁོར་སྣ་ཚོགས་མདོག་ལ་ནི། །ཞབས་གཉིས་དག་གིས་འབྱུང་པོའི་མགོན་པོ་ལྷག་པའི་སྟོབས་ཀྱིས་མནན་ཅིང་གཡས་བརྐྱང་སྟབས་ཀྱིས་ཡང་དག་ གནས། །ཞེས་གསུངས་པ་ལྟར་ཏེ། དེ་ལ་རྒྱུད་ཚིག་འདི་ཁོ་ནའི་འགྲེལ་པར་ཧཱུཾ་དང་རྡོ་རྗེ་ལས་བསྐྱེད་པ་ཡང་བཤད་ཅིང༌། དེ་ནི་སྒྲུབ་ཐབས་ལོགས་པའི་དབང་དུ་བྱས་པ་ཡིན་ལ། སྲུང་འཁོར་གྱི་སྐབས་སུ་ས་བོན་འབའ་ཞིག་ལས་བསྐྱེད་པས་ཀྱང་ཆོག་སྟེ། ལར་དེ་གཉིས་གདམ་ང་ཡིན་མོད། མངོན་བྱང་ལྔ་བསྐྱེད་སོགས་ཐོབ་ཐང་མེད་དོ། །དེ་ལ་གཞན་རྣམས་གོ་སླ་ལ། རྒྱལ་བའི་བདག་པོ་མི་བསྐྱོད་པར་ཡིན་པར་བཤད་པས་མི་བསྐྱོད་པའི་ཅོད་པན་ཅན་ནོ། །མཆེ་བ་རྣོན་པོ་གཙིགས་པ་ཞེས་པས་ཤིན་ཏུ་ཁྲོས་པར་བསྟན་པའི་ཕྱིར། སྐུ་ཡང་ཅུང་ཟད་སྦོམ་ཐུང་ངོ༌། །གཉིས་ཀྱིས་ལྷག་པའི་རྒྱལ་བ་ཉི་ཤུ་རྩ་བཞིའི་ཕྱག་ཞེས་པས་ཕྱག་ཉེར་དྲུག་ཐ་མ་གཉིས་ཀྱིས་གླང་ལྤགས་འཛིན་པའོ། །དམར་སེར་སྤྱན་ཞེས་པ་ནི་གུར་གུམ་མདོག་མ་ཡིན་གྱི་མེ་འོད་ལྟར་དམར་པོའོ། །ཐོད་པ་ཁ་དོག་ལྔ་ཞེས་པ་ཁ་དོག་རིགས་ཀྱི་དོན་ཡིན་པས། རྒྱལ་བ་རིགས་ལྔ་མཚོན་པ་ཡིན་ལ། དེ་ཉིད་ཀྱི་ཕྱིར་ཁ་དོག་རང་ཡང་ལྔར་བྱེད་པ་མི་འགལ་ལོ། །དཀྱིལ་འཁོར་སྣ་ཚོགས་མདོག་ལ་ཞེས་པ་ནི། རྡོ་རྗེ་ཤུགས་ཉིད་ལོགས་སུ་སྒོམ་པའི་དབང་དུ་མཛད་ནས། གཞལ་ཡས་ཁང་ཕྱོགས་མདོག་གི་དོན་ཡིན་མོད། སྐབས་འདིར་ཡང་རྡོ་རྗེའི་ས་གཞི་དང་ཁང་བརྩེགས་ལ་སྦྱོར་དུ་རུང་ངོ༌། །འབྱུང་པོའི་མགོན་པོ་ནི། ཡི་དྭགས་ཀྱི་མགོན་པོ་གཞན་གྱིས་མི་ཐུབ་པ་ཞེས་བྱ་བ་ཡིན་པར་གསུངས་ཤིང༌། འདིའི་རྗེས་སུ་འབྱུང་པོ་རྣམས་ཀྱི་གཙོ་བོ་གང་ཡིན་པ་དེ་དང་དེ་ཞབས་འོག་ཏུ་མནན་པ་བསྒོམས་པས། དེ་རྣམས་འཁོར་བཅས་འགྲུབ་པར་འགྱུར་ཞེས་ལོགས་སུ་གསུངས་པས། གཞན་གྱིས་མི་ཐུབ་པ་ཞབས་འོག་ཏུ་
གནོན་པ་ནི། དཀྱུས་ཀྱི་རྣལ་འབྱོར་ལ་ཡིན་གྱི། འགའ་ཞིག་གི་འདོད་པ་ལྟར་འབྱུང་པོ་སྒྲུབ་པ་ཁོ་ནའི་སྐབས་མ་ཡིན་ནོ། །ཡང་སྒྲུབ་ལེའུ་བརྒྱ་སོ་གཅིག་པ་དང་སོ་གཉིས་པར། རྡོ་རྗེ་འཇིགས་བྱེད་ཐོད་པ་ཅན་གྱི་སྒྲུབ་ཐབས་གསུངས་པ་ན་འདི་སྐད་ཅེས། ཕྱོགས་ནི་ལྷག་པ་ལས་བྱུང་བུང་བ་དང་ནི་གསེར་དང་མཚུངས་པ་གཡས་དང་གཅིག་ཤོས་དག་གིས་ནི། ཕུང་པོའི་བདུད་ཉིད་གླང་ཆེན་པགས་པ་དག་ཀྱང་མ་ལུས་བཤུས་ཏེ་རྐང་པ་ཟུང་ཞིག་དག་ནས་འཛིན་ལྷ་མིན་དབང་པོའི་ཁྲག་གི་ཐོད་པ་རབ་མཆོག་ཕྱག་མཐིལ་ན་ཏེ་འཆི་བདག་བདུད་ཀྱི་གདོང་གི་ ཕྱག །ཉོན་མོངས་བདུད་ནི་ཞབས་ཀྱིས་བསྒྱེལ་བ་གཉིས་ལྷག་རྒྱལ་བའི་ཕྱག་ཅན་གཞན་གྱི་དོན་དུ་བསྒོམ་པར་བྱ། དེ་ལ་ཡུམ་ནི་ཞལ་གཅིག་ཟུང་གི་ཕྱག་གི་པདྨ་དག་ལ་གྲི་གུག་དཔལ་ལྡན་ཐོད་པ་སྟེ། །ཞེས་གསུངས་ཤིང༌། ཡུམ་གྱི་མཚན་ཡང་སྐབས་འདིར་སྣ་ཚོགས་ཡུམ་ཉིད་དོ། །འདི་དང་སྡོམ་ཆེན་གྱི་གཙོ་བོ་ཕལ་ཆེར་རྣམ་པ་མཚུངས་ཤིང༌། དེ་དང་རྡོ་རྗེ་ཤུགས་ཀྱང་ཕལ་ཆེར་རྣམ་པར་མཚུངས་པར་གསུངས་པས། ཡུམ་གྱིས་འཁྱུད་པའི་ཁྱད་པར་མ་གཏོགས། འཇིགས་བྱེད་ཐོད་པ་ཅན་གྱི་སྐབས་སུ་གསུངས་པ་རྣམས་འདིར་ཡང་ཚང་བར་བྱའོ། །དེས་ན་ཕྱག་ལྷག་མ་གཉིས་ཀྱི་གཡས་པ་བུང་པ་ལྟར་གནག་པ་དང༌། གཡོན་པ་གསེར་གྱི་ཁ་དོག་དང་མཚུངས་པ། དེས་ཕུང་པོའི་བདུད་བཅོམ་ཡང་ཕུང་པོའི་བདུད་ཀྱི་ཤུལ་ལམ་གནས་ངན་ལེན་གྱི་དྲི་མའི་ལྷག་མ་ཆ་ཙམ་ཡོད་དོ་ཞེས་པའི་བརྡ་གླང་ལྤགས་འཛིན་པ་དང༌། ལྷའི་བུའི་བདུད་བཅོམ་པའི་ཆ་ཤས་ལུས་པའི་བརྡར། ལྷ་མིན་དབང་པོའི་ཐོད་པ་ལྷ་མིན་དེ་ཉིད་ཀྱི་ཁྲག་གིས་གང་བ་གཡས་ནག་པོས་འཛིན་པ་དང༌། འཆི་བདག་གི་བདུད་བཅོམ་ཟིན་ཀྱང་དེའི་ཆ་ཤས་གནས་པས་ནི། འཆི་བདག་བདུད་
ཉིད་ཀྱི་གདོང་སྟེ་མགོ་བོ་ཕྱག་གཡོན་པ་ན་གནས་པའོ། །ཉོན་མོངས་པའི་བདུད་བཅོམ་པའི་ལྷག་མ་ཆ་ཙམ་ནི། ཡི་དྭགས་ཞབས་འོག་ཏུ་བསྒྱེལ་བར་བཤད་པའི་ཡི་དྭགས་ནི། རྡོར་ཤུགས་ཉིད་ཀྱི་སྐབས་སུ་ཡི་དྭགས་ཀྱི་དབང་པོ་གཞན་གྱིས་མི་ཐུབ་པ་ལ་བཤད་པའི་ཉིད་ཡིན་པས། ཉོན་མོངས་བདུད་ཅེས་པ་སྐབས་གཞན་དུ་དྲག་པོ་དང་འདོད་ལྷ་ལ་ཟེར་བའི་ཁ་སྐྱུགས་འདིར་འཁྱེར་བར་མི་བྱ་སྟེ། དེས་ན་རྐང་པ་བཅུ་དྲུག་པའི་མཱ་ར་ཀླེ་ཤ་ཞེས་པ་ཡང་རྣམ་པ་གཅིག་ཏུ་ན་འདིར་ཉོན་མོངས་བདུད་ཅེས་པ་དང་དོན་གཅིག་ཏུ་རུང་བས་ང་རྒྱལ་ཅན་རྣམས་བག་ཡོད་འཚལ་ལོ། །སྤྱིར་ནི་དུས་འཁོར་ཁྲོས་པ་འདི་དག་ལ་ཡང་དྲག་པོ་དང་འདོད་ལྷ་ཙམ་ཞབས་འོག་ཏུ་མནན་པ་དང༌། ཡི་དྭགས་དབང་པོ་ཁོ་ན་ཞབས་འོག་ཏུ་མནན་པ་དང༌། གསུམ་ཀ་མནན་པ་རྣམས་གདམ་ཁ་ཙམ་དུ་འགྱུར་ཡང་རྡོ་རྗེ་ཤུགས་ལ་དམིགས་ཀྱི་བསལ་བ་ཡི་དྭགས་ཀྱི་གདན་ཡིན་པས། འདི་ནི་ཤིན་ཏུ་གལ་ཆེ་ལ། ཐུན་མོང་མ་ཡིན་པ་འདི་དག་ལྷག་པོར་བྱས་ནས། ལྷག་མ་དུས་འཁོར་དཀྱུས་དང་མཚུངས་པར་བྱེད་དགོས་པས་དྲག་པོ་འདོད་ལྷ་གཉིས་ཀྱང་ཞབས་འོག་ཏུ་གནོན་པ་ལེགས་པའི་ཡན་ལག་ཡིན་ནོ། །དེའི་ཚེ་ཡི་དྭགས་ཀྱི་གདན་ཉི་གདན་ལ་ཁྱབ་པའི་ཚུལ་གྱི་འོག་ཏུ་བྱ་ལ། དེའི་སྟེང་
དུ་ལྷ་གཉིས་པོ་ཞབས་གཡས་གཡོན ་རེ་རེས་བརྫིས་པར་བྱ་སྟེ། ཀུན་མཁྱེན་ཆེན་པོ་ཉིད་ཀྱིས་ཐུགས་དཀྱིལ་སྒྲུབ་ཐབས་ཀྱི་དགོངས་པ་ཡང་ཡིན་ལ། ཐུགས་དམ་བྲིས་སྐུ་ལ་ཡང་ཡོད་ཅིང༌། ཡང་ན་བདུད་ཉོན་གྱི་ངོ་བོ་ཡི་དྭགས་ཆེན་པོར་བྱེད་པར་ཡང་གསུངས་སོ། །ཕྱིས་བྱུང་བ་བྱམས་གླིང་པ། ཤེས་རིན་པ། སྒྲུབ་ཐབས་པད་ཞལ་རྗེས་འབྲང་དང་བཅས་པ། ཆོས་གྲགས་པ་ལ་སོགས་པ་བསྐྱེད་རིམ་གྱི་རྣམ་བཤད་བྱེད་པ་མང་པོ་ཞིག །འཆི་བདག་བདུད་ཀྱི་མགོ་བོ་ནི་ཕྱག་ཉེར་བཞི་པོའི་
ནང་གི་ཚངས་མགོ་དང༌། ལྷ་མིན་དབང་པོའི་ཐོད་ཁྲག་ཕྱག་གཡོན་གཉིས་པ་ན་འཛིན་པའི་ཐོད་ཁྲག་དང༌། ཞབས་འོག་ཏུ་མནན་པ་ཡང་དྲག་པོ་འདོད་ལྷ་གཉིས་ཁོ་ནར་ནན་གྱིས་སྒྲུབ་པའི་ཉེས་བཤད་ཀྱི་འཕྲེང་བ་རིང་པོར་སྤེལ་བ་དེ་དག་ནི་རིགས་ལྡན་ཀུན་མཁྱེན་ཆེན་པོའི་ལེགས་བཤད་ལ་ཕྲག་དོག་གི་དབང་གིས་རྒྱུད་འཁྲུགས་ཤིང༌། རང་ཉིད་བག་ཙམ་མོས་ཕྱོགས་ཡོད་པའི་མཁས་པ་འགའ་ཞིག་གིས་ཕོ་རུས་སུ་བྱས་པར་སྣང་ཡང་བྱུང་རྒྱལ་དུ་སྨྲ་བ་ཞིག་སྟེ། ཕྱོགས་ནི་ལྷག་པ་ཞེས་སོགས་ཀྱི་ཚིག་འདི་རྣམས་ཀྱིས་དུས་འཁོར་ཕྱག་ཉེར་བཞི་པ་ལ་མེད་པའི་ལྷག་པོའམ་མི་འདྲ་བའི་ཁྱད་པར་སྟོན་པ་ཁོ་ན་ཡིན་པའི་ཕྱིར་དང༌། ཁྱེད་ལྟར་ན་ཕྱག་ཉེར་བཞི་པ་འཆི་བདག་དང་ཉོན་མོངས་པ་དང༌། ལྷའི་བུའི་བདུད་ཀྱི་ལྷག་མ་ནི་ཡོད། ཕུང་པོའི་བདུད་ཀྱི་ལྷག་མ་གཏན་ནས་མེད་པ་མཚོན་བྱེད་དུ་འདོད་དགོས་པ་ལས། བདུད་བཞི་པོ་བཅོམ་ན་བཅོམ་མཉམ་ཡིན་པས་མོ་ཤམ་གྱི་བུའི་མཚོན་བྱེད་དམ་ཅི། ཡང་དངོས་སུ་དེ་ལྟར་མི་སྲིད་ཀྱང་རྒྱུ་འབྲས་ཀྱི་མཚོན་དོན་ཡོད་སྙམ་ན། འདི་ལ་ཁྱེད་རྣམས་ཀྱི་རྒྱུ་འབྲས་གོ་ལོག་ཏུ་འགྱུར་ཏེ། རྒྱུ་ལས་ཉོན་ལས་འབྲས་བུ་ཕུང་པོ་འབྱུང་བས་སྔར་གྱི་འབྲས་བུའི་འཕྲོས་ལས་ཕུང་པོའི་རྒྱུན་ཡོད་ལ། ཉོན་མོངས་འགགས་ཟིན་པ་ནི་སྲིད་ཀྱི། ཕུང་པོ་སྤངས་ཤིང་འགགས་ནས་ཉོན་མོངས་ཡོད་པའང་མི་སྲིད་ལ། ཁྱད་པར་དུ་ཡང་ཕུང་པོ་སྤངས་ནས་འཆི་བདག་མ་སྤངས་པ་ནམ་ཡང་མི་སྲིད་དེ། ཕུང་པོ་མེད་ན་སུ་ཞིག་འཆི་བར་འགྱུར། ཚུལ་སྟོན་པའོ་སྙམ་ན། རི་བོང་རྭའི་ཚུལ་བསྟན་པ་ལ་དགོས་པ་ཅི། ཚུལ་སྟོན་པར་ཁྱེད་ཅག་ཐམས་ཅད་དང་འོ་སྐོལ་མཚུངས་ཤིང༌། གཞན་ཡང་སྔགས་པ་ཐམས་ཅད་མཚུངས་པར་སྨྲ་མོད་ཀྱི། དེ་ལའང་འཇིག་རྟེན་དང་མཐུན་པའི་ནང་འགལ་མེད་པ་དགོས་ཏེ།
སངས་རྒྱས་ཀྱི་སྤྲུལ་པ་སྨད་འཚོང་མར་བསྟན་པ་དེས། ཚུལ་དེ་བཟུང་བའི་ཕྱིར་ཆགས་བྲལ་གྱི་ཆོས་སྟོན་པ་པོ་དང༌། རབ་ཏུ་བྱུང་བ་རྣམས་ཀྱི་མཁན་པོ་དང༌། སློབ་དཔོན་བྱེད་པར་ནམ་ཡང་མི་འགྱུར་རོ། །གང་དག་སངས་རྒྱས་རྣམས་དགྲ་བཅོམ་པའི་ཚུལ་བཟུང་ནས་སེམས་ཅན་གྱི་དོན་བྱེད་པ་དེས་ནི། སྐུ་དེས་མཚོན་ཆ་ཐོགས་ནས་གཡུལ་དུ་ཞུགས་ཏེ་གདུག་པ་ཅན་གསོད་པར་ནམ་ཡང་མི་སྲིད་དོ། །དེས་ན་སངས་རྒྱས་ཀྱི་ཡེ་ཤེས་དངོས་ནི་སེམས་ཅན་རྣམས་ཀྱིས་སྦྱོང་ཡུལ་དུ་མ་གྱུར་ལ། སྨད་འཚོང་མར་སྤྲུལ་པ་དང༌། ཆགས་བྲལ་གྱིས་ཆོས་སྟོན་པ་གཉིས་ཀར་ཚུལ་སྟོན་ཡིན་པར་མཉམ་ཡང་གཞི་གཅིག་ལ་མི་འདུ་ཞིང༌། དགྲ་བཅོམ་པ་དང་དམག་དཔོན་དུ་སྤྲུལ་པ་གཉིས་ཚུལ་ཙམ་བསྟན་པར་མཚུངས་ཀྱང་དངོས་པོ་གཅིག་ལ་མི་འདུའོ། །དེ་བཞིན་དུ་འདིར་ཡང་ཕུང་པོའི་ལྷག་སྤངས་པ་དང༌། འཆི་བདག་དང་ཉོན་མོངས་པའི་ལྷག་མ་མ་སྤངས་པ་གཉིས་ཚུལ་སྟོན་མཉམ་པོ་ཡིན་དུ་ཆུག་ཀྱང་བསྒོམ་བྱ་ལྷའི་རྣམ་པ་གཅིག་གི་དག་པ་ལ་མི་འགྲིག་པ་གོ་བར་གྱིས་ཤིག །གཞན་ཡང་དུས་ཀྱི་འཁོར་ལོའི་བསྐྱེད་རིམ་རྣམ་བཤད་བྱེད་པ་པོ་དུས་ཕྱིས་བྱུང་བ་ཕལ་ཆེར་འདི་རྣམས་ཤིན་ཏུ་མཁས་སོ་ཞེས་གྲགས་པ་དང་ལྡན་ཡང་ཐམས་ཅད་ལ་ཐུན་མོང་དུ་གནས་པའི་སྐྱོན་ནི་དངོས་གནས་དང། བསྐྱེད་རིམ་གྱི་མོས་སྒོམ་གཉིས་པོ་དབྱེ་བ་མ་ཕྱེད་པར་ཆོས་སྐད་དམུ་མ་གོ་བའི་དགག་སྒྲུབ་ཅལ་ཅོལ་མང་པོ་ཞིག་འདུག་པ་འཆད་པར་འགྱུར་བ་འདི་ལྟར་གོ་ན་མུན་པ་སངས་བར་འགྱུར་རོ། །དེ་ཡང་ཅི་ཞེ་ན། བསྐྱེད་རིམ་ལ་གསལ་སྣང་མ་ཐོབ་པའི་མོས་སྒོམ་རབ་རིབ་ཙམ་ནི་རྣམ་པ་དང་དོན་སྤྱི་འདྲེས་པ་ཁོ་ན་ཡིན་ལ། སྐྱེས་བུ་གཅིག་ལ་དུས་སྐབས་གཅིག་ཏུ་གསལ་སྣང་ཤར་བའི་དཀྱིལ་འཁོར་གྱི་ལྷ་ཚོགས་རྣམས་ལ་ཡང་རྒྱུད་
ཚོད་བཟང་ངན་ནི་མེད་དེ་ཐམས་ཅད་སྒྲུབ་པ་པོ་རང་གི་སེམས་ཉིད་ཀྱིས་བསྡུས་པའི་ཕྱིར་རོ། །དེ་དག་ནི་རྣལ་འབྱོར་པ་རང་གི་ཡིད་ལ་ཤར་བའི་ཏིང་ངེ་འཛིན་གྱིས་སྤྱོད་ཡུལ་གྱི་གཟུགས་ཙམ་ཡིན་པས། དངོས་གནས་ལ་སངས་རྒྱས་དང་བྱང་ཆུབ་སེམས་དཔའ་གང་ཡང་མ་ཡིན་ ནོ། །འཇིག་རྟེན་ལས་འདས་པ་ཡང་མ་ཡིན་ཏེ། འཁོར་བ་པའི་སེམས་ཀྱི་སྣང་བརྙན་ཡིན་པའི་ཕྱིར་རོ། །འཇིག་རྟེན་པའི་ལྷ་ཞེས་ཀྱང་མི་བྱ་སྟེ། དེ་དག་ལ་རྒྱུད་སོ་སོ་བ་གཞན་གྱིས་བསྡུས་པ་མེད་པས་རྣལ་འབྱོར་བ་དེའི་རང་གི་སེམས་སྣང་ཁོ་ན་ལ་འཇིག་རྟེན་པའི་ལྷའི་ཐ་སྙད་མི་འཇུག་པའི་ཕྱིར་དང༌། གཞན་ཡང་གསུང་རབ་རྣམས་རྣམ་བྱང་གི་དམིགས་པར་བཤད་པ་དང་འདི་འདྲ་བས་ཟག་བཅས་དངོས་དང་འཇིག་རྟེན་པ་དངོས་སུའང་མི་འཇོག་གོ །རེ་ཞིག་འཇིག་རྟེན་ཀུན་རྫོབ་ཉིད་ཀྱི་དབང་དུ་བྱས་ནས་ཐུན་མོང་གི་གྲུབ་པ་ཆེན་པོའམ། མཆོག་མ་ཐོབ་ཀྱི་བར་དུ་སྒྲུབ་པ་པོ་རང་ཉིད་ལྷ་ཡིན་པར་མི་འཇོག་ལ། ཡེ་ཤེས་ཀྱི་ལྷ་དང་འཇིག་རྟེན་པའི་ལྷ་ཞེས་བཏགས་པ་ཐམས་ཅད་སྒྲུབ་པ་པོ་ཉིད་ལས་རྒྱུད་གཞན་པ་ལ་ཐ་སྙད་འདོགས་སོ། །ཐུན་མོང་གི་གྲུབ་པ་ཆེན་པོ་དེ་ཐོབ་ན་ནི། སྒྲུབ་པ་པོ་རང་ཉིད་སྔགས་ཀྱི་ལྷར་འགྱུར་ལ། དེ་རང་གི་ངོ་བོ་འཁོར་བ་ལས་མ་འདས་པའི་ཕྱིར་འཇིག་རྟེན་པ་ཡིན་ཡང༌། སྔར་བཤད་པ་དང་རྒྱུ་མཚན་མཚུངས་པའི་ཕྱིར་འཇིག་རྟེན་པའི་ལྷ་ཞེས་ཀྱང་མི་བརྗོད་དོ། །མཆོག་གི་དངོས་གྲུབ་ཐོབ་པ་ན་རྣལ་འབྱོར་པ་དེ་ཉིད་ཡེ་ཤེས་ཀྱི་ལྷ་ཡིན་ཏེ། དེ་ལའང་སློབ་པ་དང་མི་སློབ་པ་གཉིས་ཡོད་མོད། སློབ་པས་ཀྱང་ཡེ་ཤེས་གཅིག་ལས་དཀྱིལ་འཁོར་མཐའ་ཡས་པ་སྤྲོ་ནི་ནུས་སོ། །ཡང་དཀྱིལ་འཁོར་སེམས་ཀྱི་སྣང་བ་ཙམ་ཞེས་བརྗོད་པ་ན། ཁ་ཅིག་འདི་ལྟར་སེམས་པ་སྲིད་དེ། ཕྱི་རོལ་དོན་འགོག་གི་རིག་པས་
སྣང་བ་ཐམས་ཅད་རང་སེམས་གཅིག་པུ་ལས་མ་འདས་པར་འཇོག་དགོས་པའི་ཕྱིར། འཇིག་རྟེན་པའི་ལྷར་འགྱུར་བ་ལ་རང་སེམས་ཀྱི་སྣང་བ་མ་ཡིན་པ་མི་དགོས་སྙམ་ན། འདིར་འཆད་པ་རྣམས་འཇིག་རྟེན་ཀུན་རྫོབ་ཀྱི་བདེན་པ་དང་བསྟུན་དགོས་ཀྱི། ཕྱི་རོལ་དོན་འགོག་གི་རིག་པ་སོགས་བརྟགས་དོན་འཚོལ་བྱེད་ཀྱི་རིག་པ་དང་བསྟུན་པ་མི་དགོས་སོ། །སྤྱིར་རིག་པ་དེ་དང་བསྟུན་ན་འཇིག་རྟེན་གྱི་ལྷ་ཞེས་བྱ་བ་མ་གྲུབ་པའི་ཕྱིར། དེ་དེར་འགྱུར་བ་ག་ལ་སྲིད། ཡང་དོན་དམ་ཡེ་ཤེས་ཀྱི་ལྷའི་དཀྱིལ་འཁོར་ལ་ནམ་དུ་ཡང་དབྱེ་བ་ཡོད་པ་མ་ཡིན་མོད། རྣམ་པ་ཐམས་ཅད་པ་ཉིད་ཀྱི་ཕྱིར་གྲངས་དང་ཁ་དོག་ཚད་དང་ས་བོན་ངེས་པ་མཐའ་གཅིག་ཏུ་འཇོག་མི་ནུས་ལ། ཀུན་རྫོབ་གཟུགས་སྐུའི་དཀྱིལ་འཁོར་གྱི་འཁོར་ལོ་ལ་ནི། ཡེ་ཤེས་གཅིག་གི་རྣམ་འཕྲུལ་ཐ་དད་པར་བསྟན་པ་ཡང་ཡོད། སྔོན་གྱི་ལུས་རྗེས་འབྲང་བའི་སྒོ་ནས་རྒྱུད་ཐ་དད་པའི་ཐ་སྙད་གདགས་སུ་རུང་བ་ཡང་ཡོད། གཙོ་བོ་སངས་རྒྱས་ལ་འཁོར་སློབ་པ་དང་སོ་སོ་སྐྱེ་བོའང་ཡོད་པའི་ཕྱིར། རྒྱུད་ཐ་དད་པའི་ལྷ་ཚོགས་ཀྱང་ཡོད་པས་ཐམས་ཅད་རྒྱུད་གཅིག་ཏུ་མ་ངེས་སོ། །དེས་ན་ཁ་ཅིག་གསང་སྔགས་དཀྱིལ་འཁོར་གཅིག་གི་ལྷ་ཚོགས་ཡིན་ན། རྒྱུད་གཅིག་པ་ཁོ་ནས་ཁྱབ་པ་ཡིན་ནོ་ཞེས་རྒྱུ་མཚན་དང༌། རྣམ་དབྱེ་གང་ཡང་མི་ཤེས་ཤིང་མ་གོ་བཞིན་དུ་ཡུས་ཆེན་པོས་འོ་དོད་འབོད་པ་ནི། བླུན་ཅིང་བློ་ཁུལ་དོག་པའི་རྣམ་འགྱུར་ཁོ་ནའོ། །ཡང་རྣལ་འབྱོར་བླ་ན་མེད་པ་ཁོ་ནའི་དབང་དུ་བྱས་ན། སྔོན་སྟོན་པས་རྒྱུད་གསུངས་པའི་དུས་ཆེད་དུ་བྱ་བའི་གདུལ་བྱ་རྣམས་དཀྱིལ་འཁོར་གང་དུ་དབང་བསྐུར་བའི་དཀྱིལ་འཁོར་དེའི་དབང་དུ་བྱས་ན། གང་ལ་དབང་བསྐུར་བའི་ཡུལ་གྱི་འཁོར་དེ་དག་ཕལ་ཆེར་རང་རྒྱུད་པ་རྒྱུད་ཐ་དད་པ་ཡིན་ཡང༌། དབང་བསྐུར་གང་ལས་
ཐོབ་པའི་དཀྱིལ་འཁོར་གྱི་ལྷ་ཚོགས་དེ་དག་ཐམས་ཅད་རྒྱུད་གཅིག་པའི་རྣམ་གཞག་གཙོ་ཆེ་ཡང་ཐུན་མོང་མ་ཡིན་པ་གསང་བ་ལས་བཤད་པ་ལྟ་བུ་རྒྱུད་ཐ་དད་པར་བཤད་པའང་ཡོད་དམ། ཡང་འཁོར་ཚོགས་གཞན་ཐམས་ཅད་གཙོ་བོས་སྤྲུལ་པ་ངེས་པར་ཡིན་པ་རྣམས་ལའང་དཀྱིལ་འཁོར་འདིའི་དབང་དུ་བྱས་ན་རིགས་དང་རིགས་ཅན་གྱི་སྤྲུལ་པའི་རིམ་པ་རྣམས་ཀྱང་མ་འཚོལ་བར་བྱུང་བ་ཡིན་ནོ། །དེ་བཞིན་དུ་རྣལ་འབྱོར་སྒྲུབ་པ་པོས་མོས་པ་སྒོམ་པའི་ཚུལ་ཡང༌། སྔོན་སྟོན་པས་ཇི་ལྟར་དཀྱིལ་འཁོར་བསྟན་པ་ལྟར། རང་གི་ཡིད་ཀྱིས་བསྒོམས་པའི་དཀྱིལ་འཁོར་དེ་ཡང་རྒྱལ་བའི་ཡེ་ཤེས་ཀྱི་དཀྱིལ་འཁོར་དངོས་ཡིན་པ་དང༌། གཙོ་བོས་ཀྱང་འཁོར་རྣམས་སྤྲུལ་པ་ཡིན་པ་དང༌། འཁོར་རྣམས་ནང་ཚན་དུ་ཡང་རིགས་དང་རིགས་ཅན་དམིགས་བསལ་གསུངས་པ་རྣམས་བློ་སྦྱོང་བའི་དོན་དུ་དེ་དང་དེའོ་ཞེས་རློམ་ཚོད་དུ་ཡེ་ཤེས་གཅིག་གི་དཀྱིལ་འཁོར་དུ་ང་རྒྱལ་བྱེད་པ་ཡིན་ནོ། །དེ་ཡང་གོ་ཞིང་ནུས་ན་རང་གི་ཡིད་ངོར་ཤར་བའི་དཀྱིལ་འཁོར་ལ། སྟོན་པ་ཤཱཀྱ་ཐུབ་པ་དུས་འཁོར་གྱི་དཀྱིལ་འཁོར་དུ་བཞེངས་པ་དེ་ཡིན་པར་རློམ་པ་ཙམ་དུ་མ་ཟད། དེ་ཡང་ལོངས་སྐུ་དང༌། ལོངས་སྐུ་ཡང་ཆོས་ཉིད་དོན་དམ་པའི་དཀྱིལ་འཁོར་གྱི་རིམ་པ་ལས་བྱུང་བ་ཡིན་པས་གནས་སྐབས་ཀྱི་ལོངས་སྐུ་དང༌། ཆོས་དབྱིངས་ཀྱི་དཀྱིལ་འཁོར་ཡིན་པར་ཡང་མོས་དགོས་མོད། དེ་ཐམས་ཅད་མོས་པས་སྒོམ་ཚུལ་ཡིན་པས། དངོས་གནས་ལ་སྒྲུབ་པ་པོ་རང་གི་ཤེས་པའི་སྣང་བ་ཙམ་ཡིན་གྱི། སྤྲུལ་ལོངས་ཆོས་གསུམ་པོ་གང་ཡང་མ་ཡིན་ལ། དེ་དག་རྒྱུད་ལ་སྣང་བའི་ཆ་ཡིན་གྱི། སྐྱེས་བུའི་རྒྱུད་དངོས་མ་ཡིན་པས་གཙོ་འཁོར་དེ་དག་ལ་རྒྱུད་གཅིག་དང་ཐ་དད་ཀྱི་ཐ་སྙད་གང་ཡང་མི་འཇུག་སྟེ། གཙོ་འཁོར་རེ་རེ་ཞིང་རྣལ་འབྱོར་བའི་རྒྱུད་གཅིག་
ལ་གནས་པ་ཙམ་ཡིན་མོད། རེ་རེ་བཞིན་རྒྱུད་དུ་གྲུབ་པ་ཙམ་ཡང་མེད་པའི་ཕྱིར་རོ། །སྒྲུབ་པ་པོའི་རྒྱུད་གཅིག་པོས་བསྡུས་པ་ཡིན་ཡང་གང་ཟག་གཅིག་ལ་དུས་གཅིག་ཏུ་ཡིད་ངོར་ཤར་བའི་ལྷ་མཉམ་པོ་ལ་མོས་པ་སྦྱོར་ཚུལ་མ་གཏོགས་དངོས་གནས་ལ་གཙོ་བོས་འཁོར་སྤྲུལ་པ་ལ་སོགས་པ་མི་འཐད་དོ། །དེ་བཞིན་དུ་དོན་དམ་ལ་ཡང་ཆོས་ཉིད་ཡེ་ཤེས་ཀྱི་ཨཱ་ལི་ཀཱ་ལི་དང༌། ལྷ་སྐུ་ངོ་བོ་གཅིག་པའི་ཕྱིར་སྔ་ཕྱི་དང་རྒྱུ་འབྲས་མེད་མོད་ཀྱི། རྣམ་པའི་སྒོ་ནས་རྒྱུ་དང་འབྲས་བུའི་ཚུལ་དུ་གནས་ལ། གཞན་སྣང་ལོངས་སྤྲུལ་གཉིས་ཀར་གྱི་གནས་སྐབས་སུ་རྒྱུ་ཨཱ་ལི་ཀཱ་ལིའི་ཡེ་ཤེས་ལས་འབྲས་བུ་ལྷ་སྐུའི་ཡེ་ཤེས་དངོས་སུ་བྱུང་བར་ཁས་ལེན་མོད། རྣལ་འབྱོར་པས་དེ་དང་རྣམ་པ་མཐུན་པ་ལམ་དུ་བྱེད་དུས་སྐད་ཅིག་དང་པོར་ཨཱ་ལི་ཀཱ་ལི་བསྒོམས། གཉིས་པར་གཅིག་ཏུ་འདྲེས་པ་བསྒོམས། གསུམ་པར་ལྷ་སྐུ་བསྒོམས་ནས་སྔ་མ་སྔ་མ་རྒྱུར་བྱས་ནས་ཕྱི་མ་ཕྱི་མ་འབྲས་བུར་བྱུང་དེ་སྙམ་དུ་གཟུགས་སྐུའི་རྣམ་འཕྲུལ་དང་མཐུན་པར་ང་རྒྱལ་བྱེད་པ་ཡིན་གྱི། སྐད་ཅིག་དང་པོར་ཨཱ་ལི་ཀཱ་ལིའི་རྣམ་པ་ཤར་བ་དེའི་རིགས་རྒྱུན་གཉིས་པ་འདྲེས་པ་དང༌། གསུམ་པ་ལྷ་སྐུའི་རྣམ་པ་ཅན་དུ་སོང་བ་མ་ཡིན་ཏེ། དེ་གསུམ་པོ་ནི་རང་རང་གི་སྐད་ཅིག་སྔ་ལོགས་ཀྱི་རིག་པ་དང་ཡིད་བྱེད་འཛོམ་པས་རྒྱུ་བྱས། རང་དང་དུས་མཉམ་གྱི་རིག་པ་ལ་འབྲས་བུ་གསལ་བ་གསལ་སྣང་དུ་ཤར་པ་ཙམ་ཡིན་པའི་ཕྱིར་རོ། །དཔེར་ན་ནགས་ཚལ་ཤིན་ཏུ་ཆེ་བས་ས་ཕྱོགས་སྟེང་ཤོད་མེད་པར་ཁྱབ་ཀྱང་ཤིང་སྡོང་གཅིག་གི་ཡལ་འདབ་ལས་ཤིང་སྡོང་གཅིག་ཤོས་སྐྱེ་བ་མ་ཡིན་གྱི། ཤིང་ཐམས་ཅད་ས་ལས་སྐྱེས་པ་ཁོ་ན་ཡིན་ལ། ཤིང་རྣམས་འབྲེལ་པ་ལྟར་སྣང་བ་འཁྲུལ་བ་ཡིན་པ་བཞིན་དུ། གསལ་སྣང་ངམ་མི་གསལ་བའི་སྣང་བ་ཅན་གང་ཡིན་ཀྱང༌། ཡུལ་སྣང་བའི་བློ་ཐམས་ཅད་ནང་གི་རིག་པ་ལས་རེ་རེ་
བཞིན་གཅིག་སྐྱེས་གཉིས་སྐྱེས་སུ་བྱུང་བ་ཡིན་གྱི། ཡུལ་སྣང་སྐད་ཅིག་མ་སྔ་མ་ལས་ཡུལ་སྣང་སྐད་ཅིག་མ་ཕྱི་མ་བྱུང་བ་ནི་མ་ཡིན་པས་སྒོམ་ཆེན་པ་མང་པོ་དག་རྟོག་པ་ལ་རྗེས་འཐུད་མེད་པར་འདོད་པ་ཡང་དོན་འདིའི་སྒོ་ནས་འཐད་པ་ཡིན་ནོ། །དེས་ན་སྒྲུབ་པ་པོས་དངོས་སུ་བསྒོམས་པའི་དཀྱིལ་འཁོར་དེ་ནི་རང་གཅིག་པུའི་སེམས་ཀྱི་སྣང་བ་ཡིན་པས། ལྷ་ཚོགས་ལ་ངོ་བོ་བཟང་ངན་མེད་ཀྱང་སྔགས་དང་རྣམ་པ་སོ་སོ་ཡིན་པའི་རྟེན་འབྲེལ་གྱིས་ལྷ་དེ་དག་ལ་བྱེད་ལས་དང་ཕན་ཡོན་སོ་སོར་ཡོད་དོ། །འབྲས་བུ་སྤྲུལ་སྐུ་ལ་དུས་སྐབས་དང་རྣམ་པ་ཐ་དད་འབྱུང་བ་དང༌། རྒྱུད་གཅིག་ཀྱང་འཕྲིན་ལས་ཐ་དད་དུ་འབྱུང་བ་ཀུན་ལ་གྲགས། དེ་བཞིན་དུ་རྣལ་འབྱོར་པས་སྣང་བ་ཐམས་ཅད་ལྷ་སྐུར་མོས་དགོས་ཀྱང་མཚན་ཉིད་གཏན་ལ་འབེབས་དུས་མོས་དེ་དབང་བཙན་པར་བྱས་ན་ཤིན་ཏུ་འཁྲུལ་ཏེ། མ་དག་པའི་སྣང་བ་འདི་དག་དངོས་གནས་ལ་ལྷ་སྐུ་ནི་མ་ཡིན་ནོ། །ལས་སྣང་ཀུན་རྫོབ་དང་ལྷ་སྐུ་དོན་དམ་ལྟར་ན་དེ་དེ་ཡིན་པའི་གོ་སྐབས་མེད་ལ། གཉིས་ཀ་ཀུན་རྫོབ་མཉམ་པོ་ཡིན་པ་ལ་ཡིན་མིན་ཀྱི་ཁྱད་བྱེད་ན། ཟླ་གཉིས་སུ་སྣང་བ་དེ་ཟླ་གཉིས་མིན་སྐྲ་ཤད་དོ་ཞེས་སྨྲ་བ་དང་འདྲ་ཞིང༌། ཀུན་རྫོབ་ཡང་ལོག་གི་དབྱེ་བ་ཡོད་ནའང་དེ་དེ་ཡིན་མི་སྲིད་དོ། །འོ་ན་ཅི་ཞེ་ན། འདི་རྣམས་ཀྱི་ཆོས་ཉིད་དོན་དམ་པའི་དཀྱིལ་འཁོར་ཡིན་པ་ལ་རྣལ་འབྱོར་པས་ཆོས་ཉིད་དངོས་སུ་མ་དམིགས་ཀྱང་དངོས་པོ་དེ་དང་དེའི་ཐད་ན་ཆོས་ཉིད་རེ་རེ་ཡོད་པའི་ཕྱིར་རིམ་གྱིས་མོས་པ་ཡིད་བྱེད་དང་གནས་ལུགས་གཉིས་ཕྱོགས་མཚུངས་པ་ལྟག་འཕྲོད་དེ། མ་དག་པའི་སྣང་བ་དབྱིངས་སུ་དག་པར་འགྱུར་པ་ཡིན་ནོ། །དེས་ན་མོས་པ་ཡིད་བྱེད་དང༌། དེ་ཁོ་ན་ཉིད་ཡིད་བྱེད་ཅེས་གསུང་རབ་ཀུན་ལ་གྲགས་པ་ཡིན་པས། དེའི་དབྱེ་བ་མ་ཤེས་ན་བོད་རྒྱུག་ཀྱཻ་རྡོར་དུ་འདོད་པའི་དཔེར་འགྲོའོ། །དེ་ལྟར་ཤེས་པ་ན་རྣལ་འབྱོར་
པས་བསྒོམས་པའི་རྡོ་རྗེ་ཤུགས་ལ་སྒྲིབ་པའི་ལྷག་མ་དངོས་གནས་ལ་ཡོད་མེད་དང༌། ཚུལ་སྟོན་ཡིན་མིན་སོགས་ཀྱི་དགག་སྒྲུབ་མཐའ་ཡས་པ་བྱུང་བ་རྣམས་འདི་ལའང་རྗེས་སུ་བརྗོད་པ་ཡོད། དེས་ན་ངན་པའི་མུན་པས་ཁྱབ། ཅེས་པ་དེའོ། །དེས་ན་ཡང་དག་པའི་དུས་ཀྱི་འཁོར་ལོ་དང༌། རྡོ་རྗེ་འཇིགས་བྱེད་དང༌། རྡོ་རྗེ་ཤུགས་སོགས་དཀྱིལ་འཁོར་གྱི་ལྷ་ཚོགས་ཐམས་ཅད་རང་བཞིན་གཅིག་པ་ཁོ་ན་གནས་པ་སྨོས་ཀྱང་མ་དགོས་ལ། དེ་ནི་ཀུན་ལ་སྔོན་ཉིད་ནས་གྲགས་པ་ཡིན་པས། རྡོ་རྗེ་འཇིགས་བྱེད་དང་རྡོ་རྗེ་ཤུགས་གཅིག་པར་ཐང་བརྡོལ་བ་ཁྱེད་རྣམས་དེ་སྐད་སྨྲ་བ་དེ་གཞན་གྱི་སྐྱོར་བཟློས་རྟིང་མ་ཞིག་ཡིན་པ་འདུག་ལ། རྣམ་པ་ཐ་དད་དུ་སྒོམ་པའི་སྐབས་འདིར་གཟུགས་སྐུའི་སྐབས་སུ་ཡང་ཚུལ་ཐ་དད་དུ་སྟོན་ཞིང༌། རྣལ་འབྱོར་བས་མ་བཅོས་པ་ལ་ཡང་དེ་དང་དེར་མོས་པ་བྱེད་དགོས་པ་ཡིན་ནོ། །དེས་ན་དུས་འཁོར་ཕྱག་ཉེར་བཞི་པ་ནི། སྒྲིབ་གཉིས་ཐམས་ཅད་དངོས་གནས་ལ་ཡང་སྤངས་ཤིང༌། སྤངས་པའི་ཚུལ་ཡང་སྟོན་པའི་ལོངས་སྐུ་དུས་ཀྱི་འཁོར་ལོ་མཚོན་པར་བྱེད་པའི་རྣམ་པ་ཡིན་ལ། ཡིན་པ་ལྟར་རྣལ་འབྱོར་བས་སྒོམ་པ་ལ་ཡང་དེར་མོས་པ་བྱེད་དགོས་སོ། །ཕྱག་ཉེར་དྲུག་པ་ནི། བདུད་བཞི་སོགས་སྒྲིབ་གཉིས་དོན་ལ་སྤངས་ཀྱང༌། གཞན་སྣང་དུ་སྤངས་ལྡན་གྱི་ཚུལ་དུ་དེའི་ལྷག་མ་ཅུང་ཟད་དང་འགྲོགས་པའི་ཚུལ་སྟོན་པ། སྤྲུལ་སྐུ་འགྲོ་བ་དྲུག་ཏུ་སྟོན་པའི་དུས་ཀྱི་འཁོར་ལོ་མཚོན་བྱེད་དུ་བྱས་ནས། ཕྱག་ཉེར་དྲུག་པ་སྒོམ་པའི་ཚེ། བདག་དུས་འཁོར་སྤྲུལ་པའི་སྐུ་ཡིན་ཞིང༌། དངོས་གནས་ལྷག་བཅས་མིན་ཡང་ཚུལ་སྟོན་ལྷག་བཅས་ཡིན་ནོ་ཞེས་གཞན་ལ་བརྡ་སྟོན་པའི་ཚུལ་ཡང་འདི་དང་འདི་དག་གོ་ཞེས་ང་རྒྱལ་བཟུང་དགོས་ལ། གཞན་གྱི་དོན་དུ་བསྒོམ་པར་བྱ་ཞེས་པ་ཡང་མ་རུངས་བ་འདུལ་བ་སོགས་ཀྱི་ཕྱིར། ད་ལྟ་ལྷའི་རྣལ་འབྱོར་སྒོམ་པ་ལའང༌།
གཞན་དོན་གྱི་འཕྲིན་ལས་སྣ་ཚོགས་སྒྲུབ་པ་ལ། ཕྱག་ཉེར་དྲུག་པ་བསྔགས་པའི་དོན་ཏེ་གསད་བསྐྲད་རྨོངས་རེངས་དང་དཔའ་བོའི་རིམ་པ་ལ་ངེས་པ་ཁོ་ནའོ། །དེའི་ཤུགས་ལས་མ་དག་པའི་འགྲོ་བའི་དོན་སྤྱོད་པ་ལ་སྤྲུལ་པའི་སྐུ་བསྔགས་པ་བསྟན་མོད། སྤྱིར་ནས་ལོངས་སྐུ་དང་སྤྲུལ་སྐུ་གཉིས་ཀར་རྣམ་པ་ཐམས་ཅད་པའི་སྐུ་ཡིན་ཞིང༌། འདིར་སྐབས་སུ་བབ་པ་དུས་འཁོར་གྱི་ལྷའི་དབང་དུ་བྱས་ན། ཞི་དྲག་དང་ཕྱག་མང་ཉུང་གི་དབྱེ་བས་ངེས་པ་སོགས་ངོ་བོའི་སྟེང་ནས་བཞག་ཏུ་མེད་ཀྱང༌། སྟོན་པ་ཉིད་ཀྱི་གདུལ་བྱ་རྣམས་ལ་ལོངས་སྤྱོད་རྫོགས་པའི་སྐུ་མཚོན་བྱེད་ཀྱི་ལྷ་སྒོམ་ན་འདི་ལྟར་སྒོམས། སྤྲུལ་སྐུ་ལམ་བྱེད་ཀྱི་ལྷ་སྒོམ་ན་ཚུལ་འདི་ལྟ་བུ་གྱིས་ཤིག་ཅེས་གདམས་ཤིང་བྱིན་གྱིས་བརླབས་པ་དེ་བཞིན་དུ་བསྒོམ་དགོས་པ་ཡིན་པས། ཕྱག་ཉེར་བཞི་པ་སྣ་ཚོགས་གཙོ་བོ་བསྒོམས་ན། ལོངས་སྐུ་ལམ་དུ་བྱས་པར་འགྱུར་ཞིང༌། ཉེར་དྲུག་པ་ཧེ་རུ་ཀ་བསྒོམས་ན་སྤྲུལ་སྐུ་ལམ་དུ་བྱས་པར་འགྱུར་བ། སྔགས་རྒྱུད་སྦྱོར་བ་པོ་སངས་རྒྱས་ཉིད་ཀྱི་བྱིན་རླབས་ཀྱི་མཐུ་ལས་ཡིན་ནོ། །དེའི་ཚེ་དུས་འཁོར་ཧེ་རུ་ཀའི་སྐབས་འདིར་གླང་ལྤགས་ཕུང་པོའི་བདུད་ཀྱི་ལྷག་མ་མཚོན་བྱེད་དུ་སྟོན་པ་སངས་རྒྱས་ཉིད་ཀྱི་ཐུགས་ཀྱིས་སྦྱར་བས་དེ་ལྟར་འགྲོ་བ་ཡིན་གྱི། སྤྱིར་ཁྲོ་བོའི་ན་བཟའ་གླང་ལྤགས་ཐམས་ཅད་དེར་འགྲོ་བ་མ་ཡིན་ཏེ། གླང་ལྤགས་དང་ཕུང་པོའི་བདུད་ལ་དངོས་པོའི་འབྲེལ་བ་མེད་པའི་ཕྱིར་རོ། །འདིར་སྒྲིབ་པའི་ཆ་ཙམ་ཞེས་པས་རང་རྒྱུད་ལ་སྒྲིབ་པའི་ཆ་ཤས་ཅུང་ཟད་ལུས་པ་མཚོན་པར་བྱེད་ན་ས་བཅུ་པ་པ་དང་འགྲིག་ཅིང༌། སྒྲིབ་པའི་ལྷག་མ་ཡོད་པར་གཞན་སྣང་དུ་སྟོན་པ་ཁོ་ན་དང་སྦྱར་ན། སངས་རྒྱས་སྤྲུལ་པའི་སྐུ་ལ་འགྲིག་པས་རྡོ་རྗེ་ཤུགས་དང་རྡོ་རྗེ་འཇིགས་བྱེད་གཉིས་གཅིག་མི་གཅིག་གཞི་དེ་ལ་བརྟེན་
ནས་དཔྱད་པ་བྱ་དགོས་ཀྱི་ཚིག་ཙམ་ལ་སྙིང་པོ་མེད་དེ། དཔལ་དུས་འཁོར་ཉིད་ཀྱང་རང་སྣང་དུ་སངས་རྒྱས་ཀུན་འདུས་ཀྱི་ཡེ་ཤེས་དང༌། གཞན་སྣང་དུ་སངས་རྒྱས་ལོངས་སྐུ་དང༌། སྤྲུལ་སྐུ་དང༌། ས་བཅུ་པ་སོགས་དཀྱིལ་འཁོར་གཅིག་ཉིད་དུའང་སྣ་ཚོགས་སྟོན་པར་འགྱུར་ལ། དེའི་ཚེ་རྒྱུད་གཅིག་ཀྱང་སྤྲུལ་པ་སྤྲུལ་གཞི་ཐ་དད་ཡིན་པས། རྣམ་པ་ཀུན་ཏུ་གཅིག་ཁོ་ན་ཡིན་པའི་ཨུར་གནོན་མི་རུང་སྟེ། ནུས་མ་བརྒྱུད་དང་རབ་གཏུམ་མ་བཞིན་ནོ། །དེའི་ཕྱིར་སྒྲ་པ་ཤེས་རབ་རིན་ཆེན་པ། རྡོ་རྗེ་ཤུགས་དང་འཇིགས་བྱེད་ལ་ལྡོག་པ་ཐ་དད་ཀྱང་མེད་དོ་ཟེར་བ་ནི། རྟོག་གེ་པའི་སྟོང་ཤོབ་ཁ་ཐལ་ནས་རྟོག་གེའི་ལུགས་དང་འགལ་བ་སྟེ། དེ་གཉིས་ཆོས་ཅན་ལྡོག་པ་ཐ་དད་ཏེ། མིང་གི་དོན་ཐ་དད་པའི་ཕྱིར། བྱས་པ་དང་མི་རྟག་པ་བཞིན་ནོ། །ཞེས་བྱའོ། །གདུག་པ་སྐྲག་པར་བྱེད་པ་དང༌། ཤུགས་སྟོབས་ཆེན་པོ་དང་ལྡན་པ་གཉིས་ལྡོག་པ་ཐ་དད་པར་མངོན་དུ་གྱུར་པ་སྟེ། འདིས་ནི་མཚན་གཞི་གཅིག་པ་དང་ལྡོག་པ་གཅིག་པའི་དབྱེ་བ་མ་ཕྱེད་པར་ཟད་དོ། །དེ་ལ་རང་ལུགས་རྣམ་པར་གཞག་ན། སྤྱི་ལྡོག་ནས་རྡོ་རྗེ་ཤུགས་དང༌། རྡོ་རྗེ་འཇིགས་བྱེད་དང༌། སྡོམ་པ་ཆེན་པོའི་དུས་འཁོར་ཧེ་རུ་ཀ་རྣམས་སྐབས་དེ་དང་དེའི་སྒྲུབ་ཐབས་ཅུང་ཟད་མི་འདྲ་བ་ཙམ་ལས་ཐུགས་རྒྱུད་གཅིག་པ་སྨོས་མ་དགོས། ལྷའི་ངོ་བོ་ཡང་གཅིག་ཏུ་འཇོག་ཅིང༌། སྐབས་ཐོབ་སོ་སོ་དང་སྦྱར་ན་རྣམ་གྲངས་ལྷ་རིགས་ཐ་དད་དེ། འཇིགས་བྱེད་ཧེ་རུ་ཀ་ནི་རྡོ་རྗེ་སེམས་དཔའ་ཧེ་རུ་ཀ་ཡིན་ཞིང༌། རྡོར་སེམས་ཀྱི་རིགས་གཙོ་ཆེ་བས་དུས་འཁོར་ཁོ་ན་སྟེ། དེའི་ཕྱིར་བཙུན་མོ་ལ་ཡང་སྣ་ཚོགས་ཡུམ་ལས་གཞན་པའི་ཐ་སྙད་མི་མཛད་ལ། སྡོམ་པ་ཆེན་པོ་ནི་རྡོ་རྗེ་སེམས་དཔའི་འགྱུར་ཏེ་ཧེ་རུ་ཀ་དངོས་ཡིན་པས་མི་བསྐྱོད་པའི་རིགས་གཙོ་ཆེ་སྟེ་དེའི་ཕྱིར་ཡུམ་ལའང་རྡོ་རྗེ་མཁའ་འགྲོ་མའི་ཐ་སྙད་གཙོ་བོར་འཇུག་གོ །
རེ་ཤིག་དེ་གཉིས་སངས་རྒྱས་ཁོ་ནར་བྱ་ལ། ཁྲོ་བོའི་དབང་པོ་རྡོ་རྗེ་ཤུགས་ནི་རྡོ་རྗེ་སེམས་དཔའི་རིགས་ཀྱི་ཁྲོ་བོར་གྱུར་པས་རིགས་ཐམས་ཅད་པ་ཉིད་ཀྱི་ཕྱིར་དང༌། སངས་རྒྱས་དང་ཁྲོ་བོའི་ཆ་བྱད་གཉིས་ཀར་འཛིན་པ་སྟེ། སངས་རྒྱས་ཁྲོས་པའི་ཧེ་རུ་ཀ་ཡང་ཡིན་ལ། བྱང་ཆུབ་སེམས་དཔའ་ཁྲོས་པའི་ཁྲོ་བོའི་སྡེ་ཚན་ལ་ཡང་གཏོགས་པས། རྡོར་སེམས་དང་ཀུན་བཟང་གཉིས་ཀར་གྱི་རིགས་སུ་གསུངས་པའི་རྒྱུ་མཚན་དེ་ཡིན་ལ། ཡུམ་ལའང་ཁྲོ་མོའི་དབང་ཕྱུག་ཅེས་ལོགས་སུ་ཐ་སྙད་མཛད་དོ། །དེས་ན་འདིར་རྗེ་ཕྱོགས་པ་སོགས་ཀྱིས་ཁྲོ་བོ་རྣམས་ས་བཅུ་པ་སྒྲིབ་པའི་ལྷག་མ་དང་བཅས་པ་ཞེས་གསུངས་པ་ལ། བླུན་པོ་མཁས་འདོད་ཅན་རྣམས་རྡོ་རྗེ་འཇིགས་བྱེད་ཀྱང་དེར་ཐལ་ཏེ། ཁྲོ་བོ་ཡིན་པའི་ཕྱིར་ཞེས་ཟེར་བ་ནི། དོན་མ་གོ་བའམ་ཚིག་འཁྲི་ཙམ་མོ། །དེའི་རྒྱུ་མཚན་ཡང་ལྷ་ཞི་ཁྲོ་གཉིས་ཀྱིས་ཟླས་ཕྱེ་བའི་ཁྲོ་བོ་དང༌། གཤེགས་ཁྲོ་སེམས་དཔའ་གསུམ་གྱིས་ཟླས་ཕྱེ་བའི་ཁྲོ་བོའི་དབྱེ་བ་ཕྱེ་སྟེ་སྨྲ་དགོས་པ་ལས། རྗེ་ཕྱོགས་ལས་རྣམ་རྒྱལ་པས་ཁྲོ་བོ་རྣམས་ས་བཅུ་པའི་ཕྱིར་སྒྲིབ་པའི་ཆ་ཙམ་ཡོད་གསུང་པ་ནི་གསུམ་གྱིས་ཟླས་ཕྱེ་བའི་ཁྲོ་བོ་ལས་དགོངས་པ་ལ། ཁྱེད་ཀྱིས་ཞི་ཁྲོ་གཉིས་ཀྱིས་ཟླས་ཕྱེ་བའི་ཁྲོ་བོ་ལས་བརྩམས་ཏེ་སྨྲས་བའི་ཕྱིར་ རོ། །དེས་ན་སྡོམ་ཆེན་དགྱེས་རྡོར་འཇིགས་བྱེད་ཐོད་པ་ཅན་སོགས་ཞི་ཁྲོ་གཉིས་ཀྱིས་ཟླས་ཕྱེ་བའི་ཁྲོ་བོ་ཡིན་ཡང༌། གཤེགས་ཁྲོ་སེམས་གསུམ་གྱིས་ཟླས་ཕྱེ་བའི་གཤེགས་པ་ཡིན་གྱི་ཁྲོ་བོ་མ་ཡིན་ནོ། །གཞན་ཡང་དགྱེས་རྡོར་ལ་སོགས་པ་ལ་སྒྲིབ་པའི་ཆ་ཙམ་ཡོད་པར་གསུངས་པ་ཡང་གཙོ་བོར་སྤྲུལ་སྐུ་མཚོན་བྱེད་དུ་འཇོག་དགོས་ཤིང༌། ས་བཅུ་པ་མཚོན་བྱེད་དུ་བཞག་ཀྱང་སྤྱིར་ནི་འགལ་བ་མེད་དེ། ས་བཅུ་པ་བ་མཚོན་བྱེད་ཡིན་ན་དངོས་གནས་ལ་ས་བཅུ་པ་བ་ཡིན་མི་དགོས་པའི་ཕྱིར་དང༌། རྒྱུད་སྟོན་པ་པོ་ལ་ནི་འགལ་བ་
མེད་དེ། འཇམ་དཔལ་གྲགས་པ་ཚུལ་སྟོན་ལ་བྱང་ཆུབ་སེམས་དཔའ་ཡིན་ཡང་བསྡུས་རྒྱུད་སྟོན་པ་པོ་ཡིན་པའི་ཕྱིར་རོ། །དེས་ན་རྡོ་རྗེ་སྙིང་འགྲེལ་གྱི་མཆོད་བརྗོད་དུ། ཉོན་མོངས་ཤེས་བྱ་བསྡུས་དང་སྦྱར་བ་བྲང་འགྲོ་ཕྱག་རྒྱ་སྟག་གི་པགས་པ་ཡིས། གང་ལ་བདུད་སོགས་སྒྲིབ་རྣམས་ཆ་ཙམ་ལྟ་བུ་སེམས་ཅན་དོན་དུ་བརྒྱན་དེ་ལ། །ཞེས་འབྱུང་བ་ནི། སེམས་ཅན་དོན་དུ་ཞེས་པས་གདུལ་བྱ་གཞན་སྣང་དུ་སྟེ། སྤྲུལ་སྐུ་ཉིད་དུ་སྟོན་པར་གསལ་བས་གཞུང་ཚིག་འདིས་ཕྱིས་ཀྱི་གྲགས་པ་ཅན་གྱི་བླུན་པོ་རྣམས། ཀྱཻ་རྡོར་ལོངས་སྐུ། བདེ་མཆོག་སྤྲུལ་སྐུ་ཟེར་བའི་རང་འཚང་བསྒྲགས་པ་ཡིན་ ནོ། །དེ་ལ་འདིར་དུས་འཁོར་བ་སྔ་ཕྱི་ཕལ་ཆེར་རྡོ་རྗེ་ཤུགས་དང་འཇིགས་བྱེད་གཅིག་པར་འདོད་ལ། དེ་ཡང་སྔ་རབས་པ་རྣམས་དཔྱད་པ་མ་བྱས་པར་ཁས་ལེན་ཅིང༌། ཀུན་མཁྱེན་ཆེན་པོ་ཡང་དེ་ལྟར་བཞེད་ལ། ཕྱི་རབས་པ་རྣམས་དཔྱད་པ་ཆེ་ཞིང་དཔྱད་འབྲས་མ་དག་ལ། རིག་པ་ལྟར་སྣང་གི་སྒོ་ནས་གཅིག་པར་ཁས་ལེན་ནོ། །ཆོས་རྒྱལ་ཕྱོགས་ལས་རྣམ་རྒྱལ་དང༌། གཞན་བདག་ཆེན་པ་སོགས་ཁ་ཅིག་ནི་སྒྲུབ་ཐབས་དང་ཆོ་གའི་སྒོ་ནས་དེ་གཉིས་རྣམ་པ་ཐམས་ཅད་དུ་མི་གཅིག་པར་བཞེད་དོ། །སྤྲུལ་གཞི་དུས་ཀྱི་འཁོར་ལོ་ལས་དེ་དག་སྤྲུལ་པ་དང༌། ཐུགས་རྒྱུད་ཀྱི་སྒོ་ནས་གཅིག་པར་ནི་སྔ་ཕྱི་ཐམས་ཅད་འདོད་པས་གོང་དུ་སྨོས་པའི་རྣམ་བཤད་མཁན་དེ་རྣམས་ཐུགས་རྒྱུད་མི་གཅིག་པའི་ཁས་བླངས་ལ་སྐྱོན་གཏོང་པ་ནི་ཕྱོགས་སྔ་མེད་པའི་ཐལ་འགྱུར་ཡིན་ལ། སྐབས་དེར་ཐུགས་རྒྱུད་གཅིག་ཀྱང་སྐུའི་རྣམ་པ་ཐ་དད་འབྱུང་བའི་སྒྲུབ་བྱེད་མང་པོ་འགོད་ཅིང༌། དེ་འདྲ་མི་འབྱུང་བར་འདོད་མཁན་ཡོད་པ་ལྟར་བྱས་ནས་དགག་པ་མང་པོ་གཏོང་བའང་དེ་དང་འདྲའོ། །སྐབས་འདིར་རང་ལུགས་ནི་རིགས་ལྡན་སྤྲུལ་པའི་སྐུ་ཀུན་མཁྱེན་དོལ་པོ་པ་གང་བཞེད་པ་དེ་ཉིད་ཕྱིན་ཅི་མ་ལོག་པ་ཡིན་པའི་
ཕྱིར་ཁས་བླངས་དགོས་ཏེ་སྤྱིར་ཆོ་ག་དང་སྒྲུབ་ཐབས་ཀྱི་སྒོ་ནས་རྡོ་རྗེ་ཤུགས་དང་རྡོ་རྗེ་འཇིགས་བྱེད་ཐ་དད་དུ་བྱེད་དགོས་པའི་གནས་སྐབས་ཅུང་ཟད་ཡོད་ཀྱང་ཆོ་གའི་གནས་སྐབས་ཕལ་ཆེར་དུ་གཅིག་པར་བྱ་སྟེ། རྗེ་ཕྱོགས་པ་ཉིད་ཀྱིས་ཀྱང་ཡེ་ཤེས་འཁོར་ལོ་རྡོ་རྗེ་ཤུགས་ཀྱིས་བཀུག་པའི་སྐབས་ཨོཾ་བཛྲ་བྷཻ་ར་བ་ཨ་ཀརྵ་ཡ་ཛཿ ཞེས་རྡོ་རྗེ་འཇིགས་བྱེད་ཀྱི་མཚན་གྱིས་གསུངས་པའི་ཕྱིར་དང༌། འགྲེལ་ཆེན་ལས། སྡོམ་ཆེན་དང་རྡོ་རྗེ་ཤུགས་གཅིག་པར་གསུངས་པས་ཀྱང་གྲུབ་བོ། །སྐབས་འགའ་ཞིག་ཏུ་ཆོ་གའི་སྒོ་ནས་མི་གཅིག་པའི་ཚུལ་དུ་སྒྲུབ་པ་ལའང་འགལ་བ་མེད་དེ། དཔེར་ན་ནག་པོ་ཆེན་པོ་ལྟ་བུ་ཕོ་ཉ་གཅིག་ཉིད་ལའང་ལྷ་དང་ཀླུ་དང་བདུད་དང་གནོད་སྦྱིན་ལ་སོགས་པའི་ཚུལ་དུ་སྒྲུབ་པ་དང༌། འཇིག་རྟེན་པ་ལྟར་སྒྲུབ་པ་དང༌། འདས་པ་ལྟར་སྒྲུབ་པ་སོགས་སྣ་ཚོགས་པ་འབྱུང་བ་བཞིན་ནོ། །སྒྲུབ་ཚུལ་ཐ་དད་པའི་ཚེ་ཐ་དད་པའི་རྣམ་གཞག་དང༌། གཅིག་ཏུ་སྒྲུབ་པའི་ཚེ་གཅིག་པའི་རྣམ་གཞག་བྱ་དགོས་ཀྱི་གནས་ཚུལ་ནི་བསམ་གྱི་མི་ཁྱབ་བོ། །སྒྲུབ་ཚུལ་ཐ་དད་དེ་ལྟར་ཡིན་ཡང་ཐུན་མོང་གི་ཆོ་ག་རྣམས་གཅིག་གིས་བསྒྲུབས་པས་ཆོག་པ་བཞིན། ཕྱག་རྒྱ་རྒྱན་བཀོད་ལ་སོགས་པའི་ཆོ་གའི་ཡན་ལག་རྣམས་འདྲ་བར་སྦྱོར་དུ་རུང་ངོ༌། །དེ་ལ་ཡེ་ཤེས་དགུག་གཞུག་དང༌། ཀླུ་དང་འབྱུང་པོ་སྒྲུབ་པ་སོགས་དང༌། ལས་ཚོགས་རྒྱས་པ་སོགས་ལ་སེམས་དཔའ་ཁྲོ་བོའི་ཚུལ་གྱིས་སྒྲུབ་པ་ཡིན་པས་འཇིགས་བྱེད་དང་སོ་སོ་ཡིན་ལ། སྲུང་འཁོར་གྱི་གཙོ་བོའམ། རྡོ་རྗེ་ཤུགས་ཉིད་དཀྱིལ་འཁོར་གྱི་གཙོ་བོར་བྱེད་པ་དང༌། སྡོམ་ཆེན་ལ་སོགས་པའི་གནས་སྐབས་ན་སངས་རྒྱས་ཁྲོ་བོ་ཉིད་དུ་སྒྲུབ་པ་ཡིན་པས། འཇིགས་ཤུགས་དེ་གཉིས་གཅིག་པ་ཉིད་དུ་བྱེད་དོ། །གནད་འདི་ཤེས་ན་ཆོས་ཀྱི་རྒྱལ་པོ་ཀུན་མཁྱེན་ཆེན་པོ་དང༌། རྗེ་
ཕྱོགས་པ་གཉིས་དགོངས་པའི་གཏད་མཚམས་ལ་འགལ་བ་མི་འདུག་མོད། གནས་སྐབས་བརྗོད་ཚུལ་ཐ་དད་དུ་བྱུང་བ་སྔ་མའི་གསུང་བཞིན་སྐྱོང་དགོས་ཏེ། ཕྱོགས་དང་སྒོ་ཐམས་ཅད་ནས་ཚད་མར་གྱུར་པ་དང༌། ཤིང་རྟའི་སྲོལ་འབྱེད་ཉིད་ཡིན་པའི་ཕྱིར་རོ། །དེ་ལ་དཀྱིལ་འཁོར་གྱི་ལྷ་ཚོགས་རྣམས་ཀྱང་ཚུལ་སྟོན་ཐ་སྙད་ཀྱི་ཚུལ་གྱིས་གཙོ་བོ་སངས་རྒྱས་ཀུན་འདུས་དང༌། གཤེགས་པ་ཡབ་ཡུམ་རྒྱུད་སོ་སོ་བའི་སངས་རྒྱས་ཀྱི་ཚུལ་དང༌། སེམས་དཔའ་ཡབ་ཡུམ་ས་བཅུ་ཁྱད་པར་ཅན་ལ་གནས་པ་དང༌། ཁྲོ་བོ་ཁྲོ་མོ་རྣམས་ས་བཅུ་དབང་བསྐུར་ཐོབ་པ་ཙམ་པོ་ལ་གནས་པ་དང༌། གསུང་གི་རྣལ་འབྱོར་མ་ནས་རབ་གཏུམ་མའི་བར་རྣམས་ལུས་འཇིག་རྟེན་གྱི་ལྷ་ལ་སེམས་རྒྱུད་འཇིག་རྟེན་དང་འཇིག་རྟེན་ལས་འདས་པའི་ལམ་གྱི་ཡེ་ཤེས་ཇི་ལྟར་འོས་འོས་སུ་སྐྱེས་པའི་ཚུལ་དང༌། གྲུབ་པ་དང་འབྱུང་པོ་རྣམས་ཕལ་ཆེར་འཇིག་རྟེན་ལས་མ་འདས་པའི་ཚུལ་དུ་བྱས་ནས། ངོ་བོ་རྒྱལ་བའི་ཡེ་ཤེས་གཅིག་ཉིད་རྣམ་པ་གང་ལ་གང་འདུལ་གྱི་སྒོ་ནས་ཚུལ་སྟོན་ལ་དེ་དང་དེར་བསྟན་པའོ་ཞེས་ང་རྒྱལ་བསྐྱེད་དགོས་པ་ཡིན་པས། ཀུན་རྫོབ་གནས་སྐབས་ཀྱི་རིམ་པ་ལ་བཟང་ངན་གཏན་ནས་མེད་པའང་མ་ཡིན་ཏེ། གཙོ་བོའི་གནས་སུ་ཀླུ་ལྟ་བུ་ཞིག་བཀོད་དེ་སྒོམ་བཟླས་བྱས་ན་དངོས་གྲུབ་མི་འགྲུབ་པར་མ་ཟད་བྱུར་ཆགས་ཆེན་པོའི་རྒྱུར་འགྱུར་བ་དག་ཡོད་དོ། །ཁྲོ་བོའི་རྒྱལ་པོ་རྡོ་རྗེ་ཤུགས་ནི། ཁྲོ་བོའི་སྡེ་ཚན་དུ་བྱེད་པའི་ཚེ་རིགས་གཉིས་བཟུང་བའི་དགོས་པ་ལ། ཁྲོ་བོ་གཞན་ལས་རྒྱུད་མཐོ་བ་སྟེ་བྱང་སེམས་ཞི་བ་རྣམས་དང་མཉམ་པར་བྱེད། དེའི་ཚེ་སངས་རྒྱས་རྗེས་མཐུན་པ་ཉིད་ཀྱི་ཕྱིར། སངས་རྒྱས་ཁྲོ་བོ་ཧེ་རུ་ཀའི་མཚན་ཡང་འདོགས་ལ། ཁྲོ་བོ་གཞན་རྣམས་ལ་ནི་ཧེ་རུ་ཀའི་མཚན་མི་སྦྱོར་རོ། །དེ་ལྟར་བཤད་པ་རྣམས་གོ་ན། འདི་དག་གི་སྐབས་ཀྱི་དགག་
སྒྲུབ་རྩོད་པ་མང་པོ་དེ་རྣམས་བརྒལ་ལན་གྱི་སྤྲོས་པ་མི་དགོས་པར་དབྱིངས་སུ་ཞི་འགྲོ་བའི་ཕྱིར། ཅུང་ཟད་ཞིབ་ཏུ་བཤད་པ་ཡིན་གྱི། ད་ནི་ཤིན་ཏུ་སྤྲོས་པས་ཆོག་གོ ། དམིགས་པའི་རིམ་པ་རྣམས་དཀྱུས་ཀྱིས་གསལ་ལ་རྡོ་རྗེ་ཤུགས་ཀྱི་སྐུ་མདོག་ནི་མཐིང་ནག་ཏུ་བྱ་བ་ཡིན་ཏེ། དུས་འཁོར་དུ་སྔོན་པོ་དང་ནག་པོ་ཁམས་ཐ་དད་པའི་དབང་གིས་ཐ་དད་དུ་བཞག་པ་ཤས་ཆེ་ཡང་རེས་འགའ་གཅིག་ཏུ་གསུངས་པའང་ཡོད་མོད་ཀྱི། སྲུང་འཁོར་གྱི་སྐབས་འདིར་ནག་པོ་བསྔགས་སོ།། །།གསུམ་པ་ནི། ཕྱག་རྒྱ་མཚོན་ཆ་རྒྱན་རྣམས་འགོད་པའི་དོན་ལ་མང་པོ་ཞིག་གི་བློ་ལ་ཐོག་མར་རྒྱན་དང་ཕྱག་མཚན་ཅི་ཡང་མེད་པ་ཞིག་བསྒོམས་ནས། སྔགས་དེ་དང་དེས་གོས་རྒྱན་མཚོན་ཆ་རྣམས་བསྐྱེད་དེ། སྐུ་ལ་བསྐོན་ཅིང་ཕྱག་ཏུ་གཏོང་བའོ་སྙམ་དུ་སེམས་པ་ནི། དགོངས་དོན་མ་གོ་ཞིང་དམ་པའི་གསུང་ངག་མེད་པར་དཔེ་སྒྲོགས་ཙམ་ལ་ང་རྒྱལ་ཞིང་ཡིད་ཚིམ་པའི་སྐྱོན་ཡིན་ལ། དེས་ན་དེ་དང་དེར་བྱིན་གྱིས་བརླབས་ཤིང་ས་བོན་དང་སྔགས་ཀྱི་སྟོབས་ལས་མཐུ་ཆེན་དུ་བྱས་པ་ཉིད་བྱིན་རླབས་འགོད་པ་ཡིན་པས་དགོད་པའི་དོན་དེ་ལྟར་དུ་ཤེས་པར་བྱའོ། །རྣ་རྒྱན་གཉིས་ཀྱི་ས་བོན་ཧཾ་ཧཿ སྐེ་རགས་ཀྱི་ས་བོན་ཨཾ། མགུལ་རྒྱན་གྱི་ས་བོན་ཨཿལག་གདུབ་ཀྱི་ས་བོན་ཨ་ཨཱཿཞབས་གདུབ་ཀྱི་ས་བོན་ཧ་ཧཱ། ཐོད་སྐམ་གྱི་དབུ་རྒྱན་དང༌། གཙུག་གི་ནོར་བུ་ཕྱོགས་གཅིག་ཏུ་བསྡོམས་པའི་ས་བོན་ཧཾ་ཡིན་ལ། སྐུ་ལ་བྱུགས་པའི་ཐལ་ཆེན་གྱི་ས་བོན་ནི་བཾ་ཡིན་ནོ། །ས་བོན་བཅུ་པོ་ནི། ཁམས་ལྔ་དང་ཕུང་པོ་ལྔ་རྣམ་པར་དག་པའམ། རླུང་བཅུ་རྣམ་པར་དག་པ་ཕ་རོལ་ཏུ་ཕྱིན་པ་བཅུའི་རང་བཞིན་ཡིན་པ་དང༌། གནས་ཀྱི་དབྱེ་བས་དེ་རྣམས་ཕྱག་རྒྱ་བཅུ་ཡིན་ལ། རིགས་མཚུངས་པའི་དབང་དུ་བྱས་ན་རྣ་རྒྱན་
མགུལ་རྒྱན། སྐེ་རགས། ཕྱག་གདུབ། ཞབས་གདུབ། སྤྱི་བོའི་ནོར་བུ་ཐལ་བ་སྟེ་རྣམ་གྲངས་བདུན་བྱུང་ནའང༌། ལག་གདུབ་རྐང་གདུབ་གཅིག་ཏུ་བསྡོམས་པས་ཕྱག་རྒྱ་དྲུག་གོ །དེ་དག་ཕར་ཕྱིན་དྲུག་དག་པ་སྟེ། གཙུག་གི་ནོར་བུ་སྦྱིན་པ། རྣ་རྒྱན་བཟོད་པ། གདུབ་བུ་ཚུལ་ཁྲིམས། མགུལ་རྒྱན་བརྩོན་འགྲུས། སྐེ་རགས་བསམ་གཏན། ཐལ་ཆེན་ཤེས་རབ་ཅེས་བྱ་བའམ། ཡང་ན་སྐེ་རགས་དང་མགུལ་རྒྱན་ཡང་གཅིག་ཏུ་བསྡོམས་ནས་བརྩོན་འགྲུས་དང་སྦྱར། མཆོད་ཕྱིར་ཐོགས་བསམ་གཏན་དུ་བྱེད་པའང་སྣང་ངོ༌། །རྡོ་རྗེ་དར་དཔྱངས་ཀྱི་སྟེང་དུ་རྡོ་རྗེ་ཟླ་བ་ཕྱེད་པ་དང་བཅས་པ་ནི་ཟླ་ཕྱེད་དར་དཔྱངས་ཞེས་བྱ་སྟེ། དེ་ལ་དར་དཔྱངས་ནི་ཐོད་པའི་འཕྲེང་བའི་རྩ་བཅིངས་ཀྱི་འོག་ཏུ་ཆུག་པའི་སྣམ་བུའི་ངོས་ནས་རྣ་ལྟག་གཡས་ གཡོན་དུ ་དར་དཔྱངས་པ་ཡིན་ལ། ཟླ་ཕྱེད་ཀྱང་རལ་པའི་གཡོན་ངོས་ཀྱི་ཟླ་བ་ཕྱེད་པ་མ་ཡིན་ཏེ། དར་དཔྱངས་དང་འབྲེལ་བར་དབུས་སུ་དབྱུག་པ་བསྒྲེང་བའི་རྩེ་ལ་ཟླ་ཕྱེད་ནོར་བུས་མཚན་པའོ། །དེའི་ས་བོན་ཨཾ་ཡིག་ཡིན་ལ། མཆོད་ཕྱིར་ཐོགས་ཏེ་སེ་རལ་ཁ་ནི། ཨ་ཨཱཿཨཾ་ཞེས་རྡོ་རྗེ་གསུམ་རྣམ་པར་དག་པའི་རང་བཞིན་གྱི་ཡི་གེ་ལས་བྱུང་བའི་དོན་ཏེ། སྔགས་དོན་ལ་སརྦ་སྭཱ་ར་ཨེ་ཀ་ཞེས་པ་ལྟར་ན་དབྱངས་ཐམས་ཅད་གཅིག་པ་ཞེས་པ་ཡིན་ན། དབྱངས་ཐམས་ཅད་ཀྱི་རྩ་བ་ཨ་ཡིག་ཡིན་ཞེས་པའོ། །ཡང་རྒྱ་བོད་ཀྱི་དཔེ་གཞན་དུ་བཛྲ་སྭཱ་ར་ཨེ་ཀ་ཞེས་འབྱུང་བ་ལྟར་ན། རྡོ་རྗེའི་དབྱངས་གཅིག་པུ་སྟེ་རྩ་བ་མི་འགྱུར་བའི་དབྱངས་ཨ་ཐུང་ཁོ་ན་ལ། ཏྲི་སྭཱ་ར་ཞེས་དབྱངས་གསུམ་སྟེ་ཚེག་དྲག་དང་ཀླད་སྐོར་བསྣན་པ་དང༌། མ་བསྣན་པའི་ངེས་པས་གཅིག་ལས་གསུམ་དུ་ཕྱེ་ཞེས་པའོ། །དེ་ཡང་དོན་དམ་མི་འགྱུར་བའི་ཡེ་ཤེས་གཅིག་ཉིད་རྡོ་རྗེ་གསུམ་དུ་སྣང་བའི་བརྡ་སྟེ། ཚངས་སྐུད་ལ་མདུད་པ་གསུམ་ཡོད་པའི་ངེས་པས་ས་བོན་གསུམ་མོ། །དེ་ལྟར་ན་རྣ་རྒྱན་གཉིས་གཅིག་ཏུ་བསྡོམས་
པ་དང༌། མགུལ་རྒྱན་སྐེ་རགས་གཅིག་ཏུ་བསྡོམས་པ་དང༌། གདུ་བུ་བཞི་གཅིག་ཏུ་བསྡོམས་པ་དང༌། ནོར་བུ་དང་ཐལ་བ་གཅིག་ཏུ་བསྡོམས་པ་དང༌། ཟླ་ཕྱེད་དར་དཔྱངས་དང་ཚངས་སྐུད་རྣམས་ལ་ཕྱག་རྒྱ་དྲུག་ཅེས་བྱ་སྟེ། ཕར་ཕྱིན་དྲུག་དག་པའོ། །དེ་ཡང་ནོར་བུ་དང་ཐལ་བ་སྦྱིན་པ། རྣ་རྒྱན་བཟོད་པ། གདུབ་བུ་ཚུལ་ཁྲིམས། མགུལ་སྐེད་བརྩོན་འགྲུས། མཆོད་ཕྱིར་ཐོགས་བསམ་གཏན། དར་དཔྱངས་ཤེས་རབ་བོ། །ཡང་ཕྱག་རྒྱ་ལྷག་མ་བཞི་ནི། སྟག་ལྤགས་ཀྱི་ས་བོན་ཀྵཿཡིག་མ་རུངས་པ་འཇོམས་པའི་ཕྱིར་སྲིན་པའི་ས་བོན་དང༌། ལྟེ་འོག་ནས་སྐུལ་བྱེད་ཀྱི་གཏུམ་མོ་སྤར་བར་བྱེད་པ་མཚོན་ནོ། །བདུད་རིགས་བརྒྱའི་མགོ་བོའི་འཕྲེང་བ་ལ་ས་བོན་ཧཾ་ཀྵཿནི་བདེ་བ་ཆེན་པོ་དང༌། སྟོང་པ་ཟུང་དུ་འཇུག་པས་བདུད་ཐམས་ཅད་བཅོམ་པ་མཚོན་ལ། སྐབས་གཞན་དུ་མགོ་འཕྲེང་གི་སྔགས་དང་མཁའ་འགྲོ་མའི་འཕྲེང་སྔགས་གཅིག་པར་གསུངས་པའང་ཡོད་ཅིང༌། འདིར་ཡང་སུམ་ཅུ་དང་བདུན་ཅུ་ཞེས་འབྱུང་ལ། དང་པོར་སྡེ་པ་དྲུག་གི་གསལ་བྱེད་སུམ་ཅུ་དབྱེ་གཞི་རྩ་བའི་ཚུལ་དུ་བཞག་པ་དང༌། དེའི་སྟེང་དུ་ཧ་སྡེ་བསྣན་ཏེ་སུམ་ཅུ་སོ་ལྔ་ལ་རིང་ཐུང་གཉིས་ཀྱིས་ཕྱེ་བའི་བདུན་ཅུ་ནི་ནང་སེལ་དབྱེ་བའི་ཚུལ་ཏེ། བདུན་ཅུ་དང་སུམ་ཅུ་བསྡོམས་པའི་གསལ་བྱེད་བརྒྱ་ཐམས་པའི་རང་བཞིན་གྱི་མགོ་འཕྲེང་ངོ༌། །དབུ་རྒྱན་ཐོད་སྐམ་ལྔའི་ས་བོན་ནི། ཧ་ཡིག་བདེ་བ་ཆེན་པོའི་རང་བཞིན་ལ་རྩ་བའི་དབྱངས་ལྔ་ཞུགས་པ་ཕུང་པོ་ལྔ་དག་པའི་ཡེ་ཤེས་མཚོན་ནོ། །དེ་ལྟར་གསུམ་གྱི་སྟེང་དུ་འོག་གི་གླང་ལྤགས་བསྣན་པས་འདིར་བཞི་དང༌། གོང་གི་དྲུག་སྟེ་ཕ་རོལ་ཏུ་ཕྱིན་པ་བཅུ་དག་པའི་ཕྱག་རྒྱ་བཅུ་ལས་དྲུག་ནི་བཤད་ཟིན། སྟག་ལྤགས་ནི་མངོན་པའི་ང་རྒྱལ་ཏེ་དངོས་པོར་འཛིན་པ་སྤངས་པའི་སྒོ་ནས་
ཐབས་མཁས་ཀྱི་འགྲོ་བའི་དོན་སྤྱོད་པ་ཐབས་ཀྱི་ཕར་ཕྱིན་དང༌། མགོ་འཕྲེང་ནི་བདུད་བཞི་འཇོམས་པའི་སྟོབས་ཀྱི་ཕར་ཕྱིན་ཏེ། རླུང་བཅུ་རྣམ་པར་དག་པའི་སྟོབས་བཅུ་ལ་ཁམས་ལྔ་ཐབས་ཤེས་ཀྱི་དབྱེ་བ་བཅུས་རེ་རེ་བཞིན་ཕྱེ་བ། སྟོབས་བརྒྱ་སྟེ་དེས་བདུད་རིགས་མ་དག་པའི་ཕུང་ཁམས་བཅུ་ལ་རེ་རེ་བཞིན་ལས་རླུང་བཅུའི་བྱེད་པ་འཇུག་པ་བརྒྱ་ཕྲག་རྣམས་བཅོམ་པ་དང༌། ཐོད་སྐམ་གྱི་དབུ་རྒྱན་ནི་ཤའི་ར་རི་བྲལ་ཞིང་རུས་པ་སྲ་བ་ལྟར། སྐྱོན་དག་པའི་སྨོན་ལམ་གྱི་འབྲས་བུ་ནི་གཞན་དུ་མི་འགྱུར་བས་སྨོན་ལམ་གྱི་ཕར་ཕྱིན་དང༌། གླང་ལྤགས་ནི་ཡེ་ཤེས་ཀྱི་ཕར་ཕྱིན་ནོ། །དེ་རྣམས་གནས་ཀྱི་དབྱེ་བས་ཕྱག་རྒྱ་བཅུ་དྲུག་སྟོང་ཉིད་བཅུ་དྲུག་རྣམ་པར་དག་པར་འགྱུར་ཏེ། རྣ་རྒྱན་གཉིས་ཕྱག་གདུབ་གཉིས། ཞབས་གདུབ་གཉིས། མགུལ་སྐེད་གཉིས་སོ་སོ་དང༌། ནོར་བུ་ཐལ་བ་གཉིས་སོ་སོ་དང༌། ཟླ་ཕྱེད་དང་དར་དཔྱངས་སོ་སོར་བགྲངས་པས་གྲངས་བཅུ་དྲུག་ཏུ་འགྱུར་རོ། །ཕྱག་མཚན་རྣམས་ལ་གཡས་ཀྱི་ཕྱག་མཚན་རྣམས་དམར་ཆ་མཚོན་པའི་ཀྵཿཡིག་དང༌། ཤེས་རབ་ཀྱི་ཕྱོགས་མཚོན་པའི་རྣམ་བཅད་དང༌། དྲག་པོ་མེ་མཚོན་པའི་རཾ་ཡིག་གོ །གཡོན་གྱི་ཕྱག་མཚན་རྣམས་དཀར་ཆ་མཚོན་པའི་ཧ་ཡིག་དང༌། ཐབས་ཀྱི་ཀླད་སྐོར་དང་ཞི་བ་ཆུ་མཚོན་པའི་བ་ཡིག་རྣམས་ཚོགས་པ་ཡིན་ལ། ཤེས་རབ་རྣམས་བསམ་པ་ཐབས་མཚོན་པའི་ཕྱིར་ས་བོན་རྣམས་ཐུང་ངུ་དང༌། ཐབས་ཀྱི་ཡི་གེ་ཧོཿཡིག་སྦྱར་ལ། ཐབས་རྣམས་བསམ་པ་ཤེས་རབ་ཡིན་པའི་ཕྱིར། ས་བོན་རིང་པོ་དང་ཤེས་རབ་ཀྱི་ཡི་གེ་ཧོཿཕྲཻཾ་སྦྱར་བ་ཡིན་ནོ། །གཞན་ཐམས་ཅད་ལ་བཛྲ་སྔོན་དུ་འགྲོ་བ་ཡིན་པ་ལ་ཚངས་མགོ་ལ་མེད་པ་ནི། ཙ་ཏུར་བེ་ཏ་སྭ་བྷཱ་ཝ་ཞེས་པ་ཉིད་བཛྲ་གྱི་དོད་དེ། རིག་བྱེད་བཞིའི་རང་བཞིན་ཞེས་པའོ། །གླང་ལྤགས་ཀྱི་ས་བོན་ལ་
ཀྵཿཡིག་བཅུ་གཉིས་གཡས་ཀྱི་ཕྱག་མཚན་བཅུ་གཉིས་ཀྱི་ས་བོན་དང༌། ཧ་ཡིག་བཅུ་གཉིས་གཡོན་གྱི་ས་བོན་བཅུ་གཉིས་ཀྱི་ཕྱག་མཚན་ཡིན་པས་ཕྱག་ཐ་མ་གཉིས་ཕྱག་གཞན་རྣམས་ཀྱི་ཆ་ཤས་ལས་བྱུང་བ་དང༌། ཕྱག་མཚན་གླང་ལྤགས་ལ་ཕྱག་མཚན་གཞན་ཐམས་ཅད་ཀྱི་ཆ་ཤས་ཚང་བ་སྟེ། དེ་ཡང་དུས་སྦྱོར་བཅུ་གཉིས་ཀྱི་རླུང་དང༌། ལས་རླུང་འཕོ་ཆེན་བཅུ་གཉིས་འགགས་པའི་ཡེ་ཤེས་ཀྱི་ས་བཅུ་གཉིས་ཐབས་དང་ཤེས་རབ་ཀྱིས་ཕྱེ་བ་རྣམས་མཚོན་ཞིང་ཧཱ་ཀྵ་རེ་རེ་བཞིན་དབྱངས་རིང་ཐུང་དྲུག་དྲུག་སྟེ་བཅུ་གཉིས་ཀྱིས་ཕྱེ་བ་ནི། འགྱུར་མེད་ཀྱི་ཐིག་ལེ་དྲུག་ཐབས་དང་ཤེས་རབ་ཀྱིས་ཕྱེ་བའི་ཡེ་ཤེས་ཏེ། དེ་ལྟར་ན་དོན་དམ་ཐབས་ཤེས་དབྱེར་མེད་ཀུན་ཏུ་འོད་ལ་སོགས་པའི་ས་བཅུ་གཉིས་གཅིག་ཏུ་གྱུར་པའི་ཡེ་ཤེས་ནི་ཡེ་ཤེས་ཀྱི་ཕར་ཕྱིན་དངོས་ཡིན་ལ། ཀུན་རྫོབ་ཏུ་ཁྲོ་བོ་ཆེན་པོས་བགེགས་ཀྱི་རྒྱལ་པོ་ལོག་འདྲེན་བཅོམ་པ་དང༌། དོན་དམ་པར་ཡེ་ཤེས་དེས་སྒྲིབ་པ་གསུམ་པོ་ཆར་གཏོགས་དང་བཅས་པའི་བགེགས་བཅོམ་པ་ནི་གླང་ལྤགས་ཀྱིས་མཚོན་ནོ། །དེ་བཞིན་དུ་ཀླུ་བཅུ་པོ་རྣམས་ཀྱིས་བརྒྱན་པ་ཡང་ཕ་རོལ་ཏུ་ཕྱིན་པ་བཅུ་ལ་སོགས་པ་བཅུ་ཚན་གྱི་ཆོས་རྣམས་རྣམ་པར་དག་པར་དོན་གྱི་ཤེས་པར་བྱའོ། །འདིར་ཀླུ་རྒྱལ་བའི་ས་བོན་ཧཱུྃ་ཐུང་དང༌། རྣམ་པར་རྒྱལ་བའི་ས་བོན་ཧཱུྃ་ཡིག་རིང་པོར་མཛད་ དོ། །དེ་ལྟར་ཕྱག་རྒྱ་དྲུག་ནི་རུས་རྒྱན་ཡིན་ལ། ཀླུ་རྣམས་ནི་སྦྲུལ་གདུག་པའི་གཟུགས་ཁ་དོག་མངོན་རྟོགས་ནས་འབྱུང་བ་དང་མཐུན་པ། ཕྱག་རྒྱ་དྲུག་པོ་ལ་སྦྲུལ་གྱི་ལུས་རྣམས་ཅུང་ཟད་དཀྲིས་ཤིང་མགོ་རྣམས་གདེངས་ཀ་བྱས་ཏེ་ཕྱིར་ལྟ་བའོ། །ཞལ་ཕྱག་ལ་སོགས་པའི་དག་པ་གཞན་རྣམས་དཔལ་དུས་ཀྱི་འཁོར་ལོ་ཉིད་དང་འདྲ་ལ། འདིར་ས་བོན་ཅན་གྱི་སྔགས་ཀྱིས་བྱིན་གྱིས་
རློབས་པ་ཡིན་གྱི། སྐབས་འདིར་ས་བོན་ལས་བསྐྱེད་པ་ནི་མ་ཡིན་ནོ།། །།བཞི་པ་ནི། ཨོཾ་ཧཱུྃ་ཀྲོ་དྷ་ཨིནྡྲོ་ཧཾ། ཞེས་སོགས་ཏེ། ང་ཉིད་ཁྲོ་བོ་ཐམས་ཅད་ཀྱི་དབང་པོ་ཡང་ཡིན་ལ། ཡེ་ཤེས་ཀྱི་ཁྲོ་བོ་གཞན་རྣམས་ལ་བཀའ་སྦྱིན་པ་པོའོ། །ཞེས་ང་རྒྱལ་བཟུང་བ་ཉིད་དེ་འདི་ནི་གཙོ་བོ་ཁོ་ནའི་ང་རྒྱལ་འཛིན་པ་ཡིན་པས་འཁོར་རྣམས་མ་སྤྲོས་པའི་སྔོན་དུ་བྱེད་པ་ཉིད་བཟང་ངོ༌།། །།ལྔ་པ་འཁོར་ཚོགས་སྤྲོ་བ་ལ། འཁོར་ཚོགས་མཁའ་ནང་ནས་སྤྲོ་ན། རྡོ་རྗེ་ཤུགས་ཡུམ་ཅན་དུ་དགོས་ཀྱང༌། འདིར་ཐུགས་ཀ་ཁོ་ན་ནས་སྤྲོ་བར་གསུངས་པས་གཙོ་བོ་ཡང་ཡབ་རྐྱང་ཡིན་པར་ཞོར་ལ་རྟོགས་སོ། །དེ་ལ་ཁྲོ་བོའི་སྡེ་ཚན་ནས་འབྱུང་པོའི་སྡེ་ཚན་གྱི་བར་དུ་རིམ་པ་དྲུག་ཡོད་པ་ལས། དང་པོ་ཁྲོ་བོ་བཅུ་སྤྲོ་བ་ནི། རང་ཉིད་རྡོ་རྗེ་ཤུགས་ཀྱི་ང་རྒྱལ་དུ་གནས་པའི་ཐུགས་ཀར་ཧ་ཡ་ར་ཝ་ལ་བརྩེགས་པའི་རང་བཞིན་གྱི་ཡི་གེའི་གོང་བུ་བསྒོམ་པར་བྱ་སྟེ། འདིའི་དོན་ལ་ལྔ་བརྩེགས་གཅིག་ཏུ་སྒོམ་པ་དང༌། ཧ་ཧ་ཡ་ཡ་སོགས་བརྩེགས་པ་བསྒོམ་ཞེས་པ་དང༌། ཧ་ཧ་ཡི་ཡི་སོགས་སྒོམ་པར་འདོད་པ་དང༌། བརྩེགས་མའི་ཡི་གེ་དེ་ཉིད་ནས་ལྷ་གཉིས་ཚན་གཉིས་ཚན་བསྐྱེད་ཟིན་པ་ན། རིམ་པས་ཟད་ནས་བཅུ་ཆར་སྤྲོས་ཟིན་པ་ན། ཉི་མའི་དཀྱིལ་འཁོར་སྟོང་པར་སོང་བར་འདོད་པ་མང་མོད་ཀྱང༌། ཐུགས་ཀའི་ས་བོན་ལས་ཧ་ཧ་སོགས་ཡི་གེ་དེ་དག་སྤྲོ་བ་ཡིན་གྱི། ཐུགས་ཀའི་ས་བོན་ཉིད་བགོ་བཤའ་བྱས་ནས་ལྷར་འགྲོ་བ་མིན་ནོ། །དེས་ན་ཧ་ཡ་ར་ཝ་ལ་ཐུང་ངུ་བརྩེགས་པ་ནི། གཙོ་བོ་ཉིད་ཀྱི་ས་བོན་ཧཱུྃ་ཡིག་གི་རྣམ་འགྱུར་ཡིན་པར་ཤེས་པར་བྱ་སྟེ། ལྷ་སོ་སོ་སྤྲོ་བའི་དོན་དུ་ཡི་གེའི་གཟུགས་ཐ་དད་པར་བསྒྱུར་བ་ཡིན་ནོ། །དེས་ན་ལྔ་བརྩེགས་ཀྱི་སྟེང་མ་ཧ་ཡིག་ལས་ཧ་ཐུང་ལྗང་ཁུ་དང། ཧཱ་རིང་སྔོན་པོ་
སྤྲོས། སྟེང་འོག་གི་ཁྲོ་བོར་གྱུར་ཏེ་རྣ་བ་གཡོན་ནས་སྟེང་གི་དང༌། གཡས་ནས་འོག་གི་ཁྲོ་བོ་སྤྲོས་ཏེ། སྟེང་འོག་གི་རྩིབས་ལ་བཀོད་ཟིན་པ་ན། ཧཱ་ཡིག་གི་འོག་གི་ཡ་ལས་ཡི་རིང་ཐུང་གཉིས་སྤྲོས། ཐུང་ངུ་ཤར་གྱི་ཁྲོ་བོ་དང༌། རིང་བོ་ཤར་ལྷོ་མཚམས་ཀྱི་ཁྲོ་བོར་གྱུར། ཤར་བ་སྣ་བུག་གཡོན་དང༌། ཤར་ལྷོ་བ་སྣ་བུག་གཡས་ནས་སྤྲོས་ཏེ། སོ་སོའི་ཕྱོགས་སུ་རང་རང་གི་གདན་ལ་འགོད་དོ། །དེས་གཞན་རྣམས་ལའང་མཚོན་ཏེ། བྱང་གི་ཁྲོ་བོ་ལྕེའི་དབུས་རོ་མྱང་བའི་སྒོ་དང༌། བྱང་ཤར་བ་ཆུ་ལམ་དང༌། ནུབ་པ་བཤང་ལམ་དང༌། ནུབ་བྱང་པ་གཙུག་ཏོར་གྱི་བུ་ག་རྩ་དབུ་མའི་ཕྱི་རོལ་ཀྱི་སྒོ་ནས་སྤྲོ་བ་ཡིན་ནོ། །ཁྲོ་བོ་སྤྲོ་བའི་བྱ་བ་རྫོགས་ནས་ཟད་པར་སྤྲོ་བ་ལ་བབ་པ་ན། སྔར་གྱི་ཧ་ཡ་ར་ཝ་ལ་བརྩེགས་པའི་གོང་བུ་དེ། ང་ཉ་ཎ་མ་ན་བརྩེགས་པའི་གོང་བུར་གྱུར་ཏེ། ཡི་གེ་སྟེང་མ་ང་ལས་ང་ངཱ་གཉིས་སྤྲོ་བ་དང༌། ཉ་ལས་ཉི་ཉཱི་སྤྲོ་བ་སོགས་ཐུགས་ཀའི་ས་བོན་བསྒྱུར་བ་དང༌། ཇི་ལྟར་སྤྲོ་བའི་ཚུལ་རྣམས་འབྱུང་པོའི་བར་དུ་ཐམས་ཅད་ལ་རིགས་འགྲེའོ། །བརྩེགས་མའི་ཡི་གེ་ལྔ་པོའི་ཁ་དོག་ནི། སྟེང་ནས་རིམ་པས་ལྗང་ནག་དམར་དཀར་སེར་བའི་རིམ་པ་ཁོ་ནའོ། །སྐབས་འདིར་ནུབ་བྱང་གི་ལྷ་རྣམས་ཐམས་ཅད་ས་ཆུ་འདྲེས་མ་ལས་གཙོ་བོར་ས་ཁམས་པ་ཉིད་ཡིན་པ་ལ། གཙུག་ཏོར་གྱི་སྒོ་ནམ་མཁའི་ཁམས་ལས་སྤྲོ་བ་ཇི་ལྟ་བུ་ཞེ་ན། དོན་གྱི་གཙོ་བོ་སྒོ་བཅུ་པོ་ལ་ལྷ་བཅུས་བགོ་བཤའ་བྱས་པའི་ཐོབ་སྐལ་དུ་བྱུང་བ་ཉིད་ཡིན་ཡང༌། འདྲ་ཆོས་ཅུང་ཟད་སྦྱོར་ལུགས་ལ། ཁ་ཅིག་མཁའ་ཁམས་ཐབས་ཀྱི་ཐུགས་ཡིན་ལ། ཐབས་ཀྱི་བསམ་པ་ཤེས་རབ་ཡིན་ཞིང༌། ཐུགས་ཀྱི་རིགས་ཀྱི་བསམ་པ་ལུས་ཡིན་པས་ཤེས་རབ་ཀྱི་ལུས་ས་ཁམས་པའི་ལྷ་དེ་ཐབས་ཀྱི་ཐུགས་ནམ་མཁའི་སྒོ་ནས་ སྤྲོའོ། །ཞེས་འཆད་པའང་ཡོད་ལ། ཡང་ནོར་ལས་རྒྱལ་གྱི་
རླུང་གཙུག་ཏོར་དུ་གནས་བཅས་ལུས་ཐམས་ཅད་ལ་ཁྱབ་པར་བྱེད་པ་ཡིན་ཞིང༌། དེ་ས་ཁམས་གཙོ་ཆེ་བ་ཡིན་པས་རྒྱུ་མཚན་དེའི་སྒོ་ནས་སྐབས་འདིར་གཙུག་ཏོར་གྱི་སྒོ་ས་ཁམས་སུ་འཇོག་པ་ཡིན། ཞེས་འཆད་དེ་གཉིས་ཀ་ལྟར་ཡང་མི་འགལ་བ་འདྲ་མོད། ད་དུང་ཁུངས་དཔྱད་པར་བྱའོ། །ཁྲོ་བོ་བཅུ་པོ་རྣམས་ཀྱི་ཞལ་ཕྱག་གི་གྲངས་ལ་དཔྱད་ན། ཁ་ཅིག་མཚམས་དང་སྟེང་འོག་གི་ཁྲོ་བོ་རྣམས་ཞལ་གཅིག་ཕྱག་བཞི་པ་ཁོ་ནར་བྱེད་དགོས་ཞེས་དེ་རྣམས་ཞལ་གསུམ་ཕྱག་དྲུག་པ་མ་བཤད་དོ་སྙམ་དུ་སེམས་པ་དང༌། འགའ་ཞིག་བཅུ་ཀར་ཞལ་གསུམ་ཕྱག་དྲུག་པ་ཁོ་ན་ལས་གཞན་མི་རུང་པའོ་ཞེས་སེམས་པ་དང༌། གཞན་དག་ཕྱོགས་དང་སྟེང་གི་ཁྲོ་བོ་ཞལ་གསུམ་པ་དང༌། མཚམས་དང་འོག་གི་རྣམས་ཞལ་གཅིག་པའོ་ཞེས་སེམས་ན། རེ་རེ་ཞིང་རང་རང་གི་འདོད་པ་ལ་འགལ་བ་ཆེར་མེད་ཀྱང༌། དེ་དག་མཐའ་གཅིག་ཏུ་སོ་སོར་ཞེན་ནས། གཞན་དག་འགོག་པ་ནི་མི་རིགས་སོ། །དེ་ཡང་འགྲེལ་ཆེན་ལས། སྲུང་འཁོར་གྱི་སྐབས་ཁྲོ་བོ་གཙུག་ཏོར་ལ་འཆང་པར་འགྱུར་བའི་སྐུ་མདོག་ཕྱག་མཚན་ཞེས་གསུངས་པ་ནི། སྒྲུབ་ལེར་གསུངས་པའི་གནས་སྐབས་གཉིས་ཀར་ལ་ཡང་ཁ་འཕངས་པ་ཡིན་མོད་ཀྱི། གཙོ་བོར་སྐུ་དཀྱིལ་གྱི་སྐབས་ལ་སྦྱོར་དགོས་པས་སྟེང་སོགས་ཁྲོ་བོ་དྲུག་པོ་རྣམས་ཕྱག་བཞི་པའང་ཡིན་ལ། ཐུགས་དཀྱིལ་གྱི་ཁྲོ་བོ་གཙུག་ཏོར་ཞལ་གསུམ་ཕྱག་དྲུག་པར་བཤད་པས་སྟེང་དང་ཕྱོགས་བཞི་ཞལ་གསུམ་པ་དང༌། འོག་དང་མཚམས་བཞི་ཞལ་གཅིག་པར་བྱས་ཀྱང་རུང་བ་དང༌། སྒྲུབ་ལེའི་རོ་ལངས་སྒྲུབ་པའི་དཀྱིལ་འཁོར་སྐབས་ནས། ཕྱི་རོལ་ རེ་ཁ་གསུམ་ལ་ཕྱོགས་བཅུའི་དཀྱིལ་འཁོར་དུ་ནི་དེ་བཞིན་ཁྲོ་བོའི་མཚན་མ་རྣམས། །ཞེས་པ་ནི། དེ་བཞིན་གཤེགས་པ་རྣམས་ཀྱི་ཇི་ལྟ་བ་དེ་བཞིན་དུ་ཕྱོགས་རྣམས་སུའོ། །ལྷ་མོ་རྣམས་ཀྱི་ཇི་ལྟ་བ་དེ་
བཞིན་ཕྱོགས་བྲལ་རྣམས་སུའོ། །སྟེང་དུ་གཙུག་ཏོར་གྱི་རྡོ་རྗེ་དང༌། འོག་ཏུ་གནོད་མཛེས་ཀྱི་དགྲ་སྟ་སྟེ་ཞེས་འབྱུང་བས་མཚམས་དང་སྟེང་འོག་གི་ཁྲོ་བོ་རྣམས་ཀྱང་ཞལ་གསུམ་ཕྱག་དྲུག་པ་མཚམས་རྣམས་རང་རང་གི་ཕྱོགས་དང་མཚུངས་ཤིང༌། གཙུག་ཏོར་མི་བསྐྱོད་པ་དང་གནོད་མཛེས་རྡོ་རྗེ་སེམས་དཔའ་དང་འདྲ་བར་འདིས་བསྟན་པ་ཡིན་ལ། སྟེང་འོག་མཚམས་རྣམས་ཁྲོ་བོ་ཕྱག་བཞི་པ་ཡིན་ན། སྟེང་དུ་རྡོ་རྗེ་དང་འོག་ཏུ་དགྲ་སྟ་དང༌། མཚམས་རྣམས་སུ་ཡུམ་བཞི་དང་མཐུན་པའི་ཕྱག་མཚན་འབྱུང་བ་མི་རིགས་པའི་ཕྱིར་རོ། །གཞན་ཡང་སྲུང་འཁོར་གྱི་སྐབས་སུ་ཁྲོ་བོ་བཅུ་བཀོད་པའི་རྗེས་སུ་སྙིང་པོའི་དཀྱིལ་འཁོར་འགོད་པའོ་ཞེས་ཐུགས་དཀྱིལ་གྱི་དོད་ཐུབ་པའི་ལྷར་བཤད་པ་དང༌། དུས་འཁོར་ནས་བཤད་པའི་དཀྱིལ་འཁོར་ལ་འཁོར་གྱི་དཀྱིལ་འཁོར་རིམ་པ་གཅིག་པ་ལ། ཕྱོགས་དང་མཚམས་ཀྱི་དབྱེ་བ་ཕྱེད་ནས་ཞལ་ཕྱག་གི་གྲངས་སྡེ་ཚན་གཉིས་སུ་ཕྱེ་བ་གནས་སྐབས་གཞན་ན་མི་འདུག་ཅིང༌། མཐར་བྱེད་བཞི་ལ་ཞལ་གསུམ་པར་ངེས་པའི་རིག་པ་སྦྱར་ན། སྲུང་འཁོར་གྱི་ཁྲོ་བཅུ་ནི། ཞལ་གསུམ་ཕྱག་དྲུག་པར་བྱེད་པ་ཉིད་འཐད་པ་བཟང་ཞིང༌། འཇུག་པའང་བདེ་བས་འདི་ཉིད་གཙོ་བོར་བྱའོ། །རྣལ་འབྱོར་རྫོགས་འཕྲེང་ལས་ཀྱང༌། ཞལ་གསུམ་ཕྱག་དྲུག་པ་ཉིད་དུ་མཛད་དེ། དེས་ན་གང་དག་སྐུ་དཀྱིལ་གྱི་ལྷའི་ཕྱོགས་མདོག་འཐད་པ་ཅུང་ཟད་ཆུང་བའི་ཕྱོགས་དེ། རྫོགས་འཕྲེང་གི་ལུགས་སུ་གཞུང་འཛུགས་ཤིང༌། སྲུང་འཁོར་གྱི་ཁྲོ་བཅུ་ཐམས་ཅད་ཞལ་གསུམ་པ་རྫོགས་འཕྲེང་ལས་འབྱུང་བ་འཐད་པ་མང་བའི་ཕྱོགས་དེ་འགོག་པ་ནི། གཞུང་གཞན་དང་འཕྲེང་བ་གཉིས་ལ་གདམ་ང་བྱས་རེས་ཀྱིས་གདམ་ཁ་ཤིན་ཏུ་ནོར་བའོ། །ཁྲོ་བོ་བཅུ་པོ་རྣམས་ཀྱི་གདན་གྱི་ཁྱད་པར་ནི། ཉི་མའི་བུ་ལོན་དག་པས་ཐམས་ཅད་
ཉི་མའི་གདན་དང༌། ཚེས་ཀྱི་ནོར་དང་བུ་ལོན་གྱི་དབྱེ་བས་ཁྲོ་བོ་བཅུ་པོ་ཐམས་ཅད་ཟླ་བའི་གདན་ལ་གནས་པ་དང༌། ལུས་ཀྱི་དབྱེ་བས་ཕྱོགས་རྣམས་ཟླ་བ། མཚམས་རྣམས་ཉི་མ། བསམ་པའི་དབྱེ་བས་དེ་གོ་ཟློག་པ་དང༌། ལྷོ་དང་ལྷོ་ནུབ། ནུབ་དང་ནུབ་བྱང་དུ་ཉི་མ། ཤར་དང་ཤར་ལྷོ། བྱང་དང་བྱང་ཤར་ཟླ་བའི་གདན་ཏེ་གདན་གྱི་རྣམ་གྲངས་འགོད་ཚུལ་གདམ་ང་ཅན་ལྔ་གསུངས་ཀྱང༌། ཉི་རྐང་བཅུ་གཅིག་རྣམ་པར་དག་པ་མཚོན་པའི་ཁྲོ་བོ་གཙོ་འཁོར་བཅུ་གཅིག་ཉིད་གདན་ལ་བཞུགས་པ་ཉིད་གཙོ་བོར་མཛད་དོ། །དོན་ཚན་གཉིས་པ་ཟད་པར་སྤྲོ་བའི་སྐབས། རྭ་བ་སྔ་མ་རྣམས་ནི། ཟད་པར་རྣམས་ནི་རྣལ་འབྱོར་མ་བརྒྱད་དང་ཕོ་མོ་མ་གཏོགས་རྣམ་པ་མཚུངས་པར་མཛད་པ་དང༌། རོང་པ་རྣམས་ཐབས་ཤེས་སུ་སྦྱོར་བའི་ཕྱིར་ཁྲོ་བོ་བཅུ་དང་མཚུངས་པར་མཛད་པ་དང༌། ལྷོ་པ་གྲུབ་སེང་སོགས་མཉམ་གཞག་གི་ཕྱག་རྒྱ་ཅན་དུ་མཛད་པ་དང༌། ཤོང་བློ་བརྟན་སོགས་གྲུབ་པའི་གཟུགས་སམ་འབྱུང་བའི་དཀྱིལ་འཁོར་གདམ་ཁ་མཛད་པ་དང༌། ཁ་ཅིག་ཞི་བའི་ལས་ཀྱི་ལྷ་མོ་སོགས་ལས་བཞིའི་ལྷ་མོ་དང་མཐུན་པར་བཞེད་པ་དང༌། བླ་མ་བསོད་ནམས་འོད་ཟེར་པ་ཡུམ་ལྔ་དང་རྣམ་པ་མཐུན་པར་མཛད་པ་སོགས་སྔ་རབས་པ་རྣམས་ལ་ལུགས་སྣ་ཚོགས་བྱུང་འདུག་ཅིང༌། བི་བྷཱུ་ཏི་ཙནྡྲའི་མཆན་བུ་ལ་ཕྱག་གཉིས་ཀར་གྱིས་གྲི་གུག་འཛིན་པར་བཤད་ཅེས་མཁས་མཆོག་བུ་སྟོན་གསུང་ངོ༌། །དེ་རྣམས་ཐམས་ཅད་ལ་ཕྱི་མ་རྣམས་ཀྱིས་དགག་སྒྲུབ་མང་དུ་བྱེད་པ་ཞིག་སྣང་ན་ཡང༌། ཕལ་ཆེར་རྒྱལ་བའི་བསྟན་པ་ལ་གཅེས་སྤྲས་སུ་མཛད་པའི་སྐྱེས་བུ་དམ་པ་ཡིན་པས། རང་རང་གི་བླ་མའི་མན་ངག་ལ་བརྟེན་པ་ཡིན་ཏེ་འོང་བས་དེ་ལྟར་སོ་སོར་སྒོམ་པ་ལ་འགལ་བ་མེད་དོ། །དེ་ཡང་རྒྱུད་ཀྱི་དངོས་བསྟན་གསལ་པོར་གསུངས་པ་དང་འགལ་ན་ནི་ཤིན་ཏུ་མི་འཐད་པས་འགོག་
དགོས་ཀྱང༌། དངོས་བསྟན་མི་གསལ་བ་རྣམས་ལ་མན་ངག་ཁོ་ན་གཙོ་བོར་བྱེད་དགོས་པའི་ཕྱིར་རོ།། །།རང་ལུགས་ནི། ཟད་པར་རྣམས་མཉམ་གཞག་གི་ཕྱག་རྒྱས་གསུངས་པ་ཉིད་འཐད་དེ། ཟད་པར་གཞན་རྣམས་གཟུགས་ཁམས་ཀྱི་ལྷ་དང༌། ཟད་པར་སྟོང་པ་གཉིས་པོ་གཟུགས་མེད་ཁམས་ཀྱི་ལྷའི་རྣམ་པ་ཡིན་ཞིང༌། ཁམས་དེ་དག་གི་ལྷ་རྣམས་ལུས་ཀྱི་བྱ་བྱེད་རྣམ་འགྱུར་སྣ་ཚོགས་མེད་པར་སྐྱིལ་ཀྲུང་དང་མཉམ་གཞག་གི་ཚུལ་གྱིས་རྟག་ཏུ་གནས་སོ་ཞེས་གྲགས་ཤིང༌། གྲགས་པ་དེ་ཡང་རྣལ་འབྱོར་ཅན་རྣམས་ཀྱིས་མཐོང་བ་བརྒྱུད་པའི་གཏམ་ཡིན་པ་དང༌། རང་གཞན་སྡེ་པ་ཕྱི་ནང་གི་བསམ་གཏན་པ་ཐམས་ཅད་ཀྱང༌། སྤྱོད་ལམ་དེ་ལྟ་བུ་དང་མཚུངས་པ་ཡང་ཐུན་མོང་གི་སྒྲུབ་བྱེད་ལྷ་མཉམ་གཞག་པ་དེ་དག་དང་སྤྱོད་ལམ་མཚུངས་པར་སྟོན་པ་ཡིན་པས་སོ། །དེ་བཞིན་དུ་རང་ལུགས་ཀྱི་བླ་མ་བརྒྱུད་པའི་མན་ངག་ཀྱང་གཙོ་བོར་འདི་ཉིད་ཡིན་ནོ། །དེ་ལ་སྟེང་གི་ཟད་པར་ནི། ཁང་བརྩེགས་ཀྱི་སྟེང་གི་ནམ་མཁའ་ལ་འགོད་ཅིང༌། འོག་གི་ཟད་པར་ནི། ཁང་བརྩེགས་ཀྱི་ས་སྟེགས་ཁོང་སྟོང་དུ་གནས་པའི་ནང་དུ་འགོད་དོ། །ཕྱོགས་སྐྱོང་སྤྲོ་བའི་སྐབས་ཚངས་པ་ལྗང་ཁུ་སོགས་སྐུ་དཀྱིལ་གྱི་ལྷ་དང་ཁ་དོག་མི་འདྲ་བ་འབྱུང་བ་ལ་དོགས་དཔྱོད་བྱེད་པ་མང་པོ་སྣང་བ་ནི། རྟོག་དཔྱོད་ཁ་ཐལ་བའི་དོགས་པ་མ་ལངས་དགུ་ལངས་པའི་ཚུལ་མ་གཏོགས། གནས་སྐབས་དང་དགོས་པ་ཐ་དད་ཡིན་པས་དོགས་སེལ་འགལ་སྤོང་མི་དགོས་ལ། ནོར་སྦྱིན་གྱི་གདན་ལ་གཞལ་མེད་ཁང་པ་དང༌། ཤིང་རྟ་དང་འཁོར་ལོ་སོགས་འགྱུར་མི་གཅིག་པ་རྣམས་སུ་སྣ་ཚོགས་འབྱུང་བའི་དོན་ནི། དེའི་རྒྱ་སྐད་བི་མཱ་ན་ཞེས་འབྱུང་སྟེ། དེ་ཡང་ལྷའི་གནས་ན་ཉི་ཟླ་སྐར་གསུམ་བཞིན་དུ་རང་གང་འདོད་སར་གཞལ་མེད་ཁང་ཉིད་འགྲོ་བ་ཞིག་ཡོད་པ། དཔེར་ན་དཔུང་
བཟང་ནས་བཤད་པ་བཞིན་ཏེ་ཕྱི་ནང་ཀུན་ལ་གྲགས་སོ། །དེ་ལ་ཤིང་རྟ་འཁོར་ལོ་མེད་པ་དང༌། ཡོད་ཀྱང་འདྲེན་བྱེད་མེད་པ་དང༌། འདྲེན་བྱེད་ཀྱང་ཡོད་པ་སོགས་ཅི་རིགས་པའོ། །མིའི་ཡུལ་དུ་ནི་དེ་དང་མཚུངས་པའི་རྣམ་པ་ཅན་བི་མཱ་ནར་གྲགས་པ་ནི། འཁོར་ལོ་དང་འདྲེན་བྱེད་མེད་པར་འགྲོ་མ་ཐུབ་པས་ངེས་པར་སྨད་ཤིང་རྟ་འཁོར་ལོའི་རྣམ་པ་ལ་དངོས་ཤིང་ཁང་ངམ། ཡོལ་ཁང་བྱས་པ། ཐོག་གཅིག་གམ། གཉིས་སམ་གསུམ་ལ་སོགས་པ་འབྱུང་སྟེ། འདྲེན་བྱེད་ཀྱིས་འདྲེན་པར་བྱེད་དོ། །འདིར་ཡང་འཁོར་ལོ་མེད་ན་ཁང་པ་ཙམ་གྱིས་བཞོན་པ་ཡིན་པར་མི་མཚོན་པས་འཁོར་ལོས་དྲངས་པའི་ཁང་བརྩེགས་ སོ། །གཟའ་རྣམས་སྤྲོ་བའི་སྐབས་སུ་རྭ་བ་རྙིང་པ་རྣམས་ཐབས་ཤེས་ཡིན་པའི་ཕྱིར་གཟའ་ཕྱོགས་སྐྱོང་དང་འདྲ་བར་བཞེད། ཡང་རོང་པ་ཤེར་སེང་སྦྱིན་སྲེག་གི་ལས་སོ་སོའི་མེ་ལྷ་དང་ཕྱག་མཚན་མཐུན་པ་ལ་ཁ་དོག་བསྒྱུར་བར་བཞེད་པ་དང༌། ཁ་ཅིག་གཟའ་སྐར་གྱི་དཀྱིལ་འཁོར་གྱི་རྣམ་པ་ཟླུམ་པོར་བཞེད་པ་སོགས་སྣ་ཚོགས་བྱུང་ཡང་ཞལ་ཕྱག་གི་རྣམ་པ་མེད་པ་ནི་ཟླ་སྟོབས་ཀྱི་རིག་པས་མི་འཐད་ལ། གཞན་རྣམས་མན་ངག་ངེས་ཅན་ཡིན་ན་མི་འགལ་ཞིང༌། ཡིག་རིགས་ཀྱི་འགྲོས་དེད་པའི་ཕོ་ཚོད་ཙམ་ཀ་ཡིན་ན་ཅིར་ཡང་མི་རུང་ངོ༌། །དེས་ན་རང་ལུགས་ནི་གཟའ་རྣམས་ཀྱི་ཕྱག་མཚན་སོགས་གསང་སྔགས་པ་སྤྱི་ལ་ཡོངས་སུ་གྲགས་པ་དང་མཐུན་པ་ལ་སྐུ་མདོག་དངོས་བསྟན་དུ་གསལ་བ་ལྟར་མཛད་ཅིང༌། འདི་ཉིད་འབྲོ་ལུགས་པ་སོགས་ལོ་པཎ་མཁས་པ་མང་པོའི་མན་ངག་ཞལ་མཐུན་པའང་ཡིན་ནོ། །བོད་དུ་ཕྱིས་བྱུང་བ་དུས་འཁོར་གྱི་བསྐྱེད་རིམ་ལ་རྣམ་བཤད་བྱེད་པ་རྣམས་ནི། སྔར་གྱི་ལུགས་དེ་དག་ཐམས་ཅད་ལ་སྐྱོན་བརྗོད་ཅི་ལྕོགས་ཀྱིས་བྱས་ནས་རང་ལུགས་འཇོག་པ་ན། སྒྲུབ་ཐབས་པད་ཞལ་པ་རྗེས་འབྲང་དང་བཅས་པ་ནི། འགྲེལ་ཆེན་དུ་ཨི་ཡིག་ཡོངས་
སུ་གྱུར་པ་ལས་རལ་གྲི་སྟེ། དེ་ཡོངས་སུ་གྱུར་པ་ལས་ལྷའམ་ལྷ་མོ་ཕྱག་ན་རལ་གྲིར་འགྱུར་རོ། །ཞེས་སོགས་གསུངས་པས་དམིགས་གསལ་མེད་པའི་ལྷ་རླུང་ཁམས་པ་རྣམས་རལ་གྲི་དང། མེ་ཁམས་པ་རྣམས་ནོར་བུའམ་མདའ་དང༌། ཆུ་ཁམས་པ་རྣམས་པདྨའམ་ཨུཏྤལ་དང༌། ས་ཁམས་པ་རྣམས་འཁོར་ལོ་དང༌། མཁའ་ཡེ་གཉིས་ལའང་རྡོ་རྗེ་དང་གྲི་གུག་ཐོབ་པས་ཟད་པར་རྣམས་མཁའ་ཁམས་ཀྱི་ལྷ་ཡིན་པས་ཕྱག་མཚན་གྲི་གུག་ཡིན་ཞིང༌། །བི་བྷཱུ་ཏའི་མཆན་བུ་ལ་ཡོད་ཟེར་བ་དེའང་སྟེས་དབང་འགྲིག་ནས་རྒྱབ་རྟེན་དུ་སྦྱོར་ལ། གཟའ་རྣམས་མེ་ཁམས་ཀྱི་ལྷ་ཡིན་པས་རིན་པོ་ཆེའམ་མདའ་འཛིན་པའོ། །ཞེས་ཟེར་ཞིང་བདག་ཉིད་སྒྲོག་པ་ལྷུར་བྱེད་དོ། །ཡང་བྱམས་གླིང་ཤེས་རིན་ཆོས་གྲགས་པ་སོགས་མགྲིན་གཅིག་པར་ལུགས་དེ་ཡང་བཀག་ནས་ལུང་ཁུངས་དེ་ཉིད་ལ་གོ་བ་མི་འདྲ་བ་བཙལ་ནས་ཟད་པར་དང་གཟའ་ཕྱོགས་ཀྱི་དབྱེ་བས་ནག་པོ་གཉིས་རལ་གྲི་དང༌། དམར་པོ་གཉིས་མདའ་འཛིན་པ་སོགས་འདོད་ཅིང་དེ་རྣམས་གཅིག་ལ་གཅིག་བྲིས་བཤུས་ལྟ་བུར་འདུག་ཀྱང་གཞན་རྣམས་ཀྱིས་རྒྱུད་འགྲེལ་གྱི་དོན་མ་ཤེས་ལ། རང་རང་གི་བློ་གྲོས་ཀྱིས་གསར་དུ་རྙེད་པ་ལྟར་ཤིན་ཏུ་སྤྱོམས་པར་སྒྲོག་གོ །ཆེན་པོ་རྣམ་རྒྱལ་གྲགས་པ་ནི་ཁྲོ་བོ་ལ་ཕྱག་མཚན་གསུངས་ཟད་པར་ལ་མ་གསུངས། ཕྱོགས་སྐྱོང་ལ་གསུངས། གཟའ་ལ་མ་གསུངས། ཀླུ་ལ་གསུངས་ནས་འབྱུང་པོ་ལ་མི་གསུང་བར་རིགས་པ་ལ་དེར་ཕྱག་མཚན་གསུངས་པས་འདི་ཐ་མའི་གསལ་བྱེད་དུ་སྦྱར་ནས། སྔར་མ་གསུངས་པ་གཉིས་པོ་ཡང་འདི་དང་འདྲའོ། །ཞེས་གོ་བའི་ཆེད་ཡིན་ཞིང༌། སྔ་རབས་པ་ཁ་ཅིག་ཀྱང་དེ་ལྟར་བཞེད་དོ། །ཞེས་འཆད་དོ། །སྔ་རབས་པ་དེ་སུ་ཞིག་ཞེས་བཙལ་བར་བྱ་ལ། ཚད་ལྡན་གཞན་གྱི་བཤད་པ་དང་མན་ངག་བརྒྱུད་པ་ཡིན་ན། དེ་ཡང་མི་འགལ་
ཞིང་ལེགས་ལེགས་འདྲ་བ་ཞིག་སྣང་ངོ༌། །འོན་ཀྱང་ཕྱི་རབས་པའི་ལུགས་དེ་རྣམས་ཐམས་ཅད་རང་ཉིད་ཀྱིས་རྒྱུད་འགྲེལ་སྒྲུབ་དཀྱིལ་སྣ་ཚོགས་ལ་བལྟས་ནས་བློས་དཔྱད་དེ་དོན་ཐོབ་ལ་འདི་ལྟ་བུ་ཞིག་དགོས་སོ་ཞེས་མཐའ་གཞན་འགོག་པའི་ཚུལ་གྱིས་བསྒྲུབ་པ་ལས། གཞན་ཚད་ལྡན་གྱི་ལུང་གི་ཁུངས་དང་རིག་པའི་སྒྲུབ་བྱེད་དང༌། མན་ངག་གི་རྒྱུན་སོགས་ཡེ་མི་སྣང་བས་ཡིད་བརྟན་ཐུབ་པར་མི་འདུག་གོ །ཁྱད་པར་དུ་ཡང་དམིགས་བསལ་མེད་པའི་ལྷ་རྣམས་ལ་འབྱུང་བའི་ཁམས་ཀྱི་རིགས་དེད་ནས་ཕྱག་མཚན་དེ་བཞིན་དུ་བྱེད་ཅེས་པ་ནི། སྒྲུབ་ལེའི་ཚིག་བཅད་བརྒྱ་ཞེ་གསུམ་པར་ཨི་རྀ་ཨུ་ལཱི་དེ་བཞིན་ཉིད་དུ་རབ་གསལ་ཡ་ར་ལ་ཝ་རླུང་མེ་ཆུ་དང་ས་རྣམས་སོ། །ཞེས་པའི་འགྲེལ་བ་ལ་བསམ་པར་སྣང་ཡང་འདི་ནི་ཞི་སོགས་ལས་རྣམས་སྒྲུབ་པའི་སྐབས་ཀྱི་མཁའ་ནང་ནས་སྤྲོས་པའི་ལྷ་ཚོགས་འགའ་ཞིག་གི་ཕྱག་མཚན་སྟོན་པ་ཡིན་གྱི། དུས་འཁོར་གྱི་རྒྱུད་ལས་གསུངས་པའི་ལྷ་དམིགས་བསལ་མེད་པ་ཐམས་ཅད་ཀྱི་ཕྱག་མཚན་སྟོན་པ་མ་ཡིན་ནོ། །དེའི་ཕྱིར་སྒྲུབ་ཐབས་པད་ཞལ་བས་དམིགས་བསལ་མེད་པའི་ལྷའི་ཕྱག་མཚན་སྟོན་པ་ཡིན་ཞེས་བསྒྲགས་པ་ན། གཞན་མང་པོའང་དཔྱད་པ་མེད་པར་འུར་ལངས་ཏེ་དེ་ཡིན་པ་གཞིར་བཞག་ཏུ་ནི་བྱས། ལུགས་དེའི་རྗེས་སུ་འབྲང་བར་ཡང་མ་འདོད་དེ། ལུགས་དེའི་ཕྱེད་ལ་དགག་པ་མང་དུ་བྱས་ནས་ཕྱེད་རང་ལུགས་སུ་བྱས་པར་སྣང་ངོ༌། །ལུགས་ཕྱི་མ་དེའི་ཚིག་རྣམས་ཀྱང་རིགས་པ་མ་ཡིན་ཏེ། འགྲེལ་ཆེན་དུ། སྲུང་འཁོར་གྱི་སྐབས་འདིར་གཙུག་ཏོར་འཁོར་ལོས་བསྒྱུར་བ་དང་འབྱུང་པོ་མ་བཏོགས། གང་ལའང་ཕྱག་མཚན་མ་གསུངས་པས་ཕྱོགས་སྐྱོང་ལ་གསུངས་གཟའ་ལ་མ་གསུངས་སོགས་ཀྱི་རྣམ་གཞག་མི་འཐད་ཅིང༌། དེའི་ཕྱིར་འབྱུང་པོའི་དེ་མཐའི་གསལ་བྱེད་ཡིན་ན། ཁྲོ་བོ་གཙུག་ཏོར་མ་
གཏོགས་སྲུང་མ་སྡེ་དྲུག་ཐམས་ཅད་གྲི་ཐོད་འཛིན་པར་འགྱུར་ལ། ཡང་ཁྲོ་བོ་ཕྱོགས་སྐྱོང་ཀླུ་སོགས་ལ་སྐབས་གཞན་དུ་བཤད་པས་སོ་སྙམ་ན། འདི་ནི་དང་པོ་དབང་ལེར་བཤད་ལ། དེ་དག་སྒྲུབ་ལེར་གསུངས་པ་ཡིན་པས་ཐ་མའི་གསལ་བྱེད་དང་པོར་འབྱུང་བ་ངོ་མཚར་ཆེའོ། །དེས་ན་གཟའ་དང་ཟད་པར་སྤྱི་ཁྱབ་ཏུ་གྲགས་པ་ལ་དགོངས་ནས་གསལ་བར་མ་མཛད་པའོ། ཁ་ཅིག་མེ་ལྷ་གཟའ་དག་དང་བསྟུན་དུ་མི་རུང་བའི་རྒྱུ་མཚན་བོད་སྐད་དུ་གཟའ་ཞེས་གཅིག་ལས་མེད་ཀྱང་རྒྱ་སྐད་དུ་བ་ར་དང་གྲ་ཧ་ཞེས་པ་དོན་ཡང་ཐ་དད་དེ། གཟའ་བདུན་མེ་ལྷའི་ལྕེར་བཤད་པ་ལྟ་བུ་ཝ་ར་ཏེ་རེས་གཟའ་ཡིན་ལ། རེས་གཟའ་རྣམས་ཉི་མ་ཉིད་ཀྱི་ནང་ཚན་ལས་ཕྱེ་བ་ཡིན་ཞིང༌། ཁྱིམ་བདག་གི་མེ་ལྕེ་བདུན་པར་བྱེད་པའི་རྒྱུ་མཚན་ཡང་དེ་ཡིན་ནོ། །འདིར་བཤད་པ་འདི་རྣམས་གྲ་ཧ་སྟེ། རྒྱ་སྐད་ལ་སྤྱོད་པའི་གཟའོ་ཞེས་འཆད་དེ་ཅུང་ཟད་དོན་དང་འབྲེལ་བར་ཡང་སྣང་ངོ༌། །འབྱུང་པོ་སྤྲོ་བའི་སྐབས་རོ་ལངས་ནི་ལྷའི་སྲིན་པོ་སྟེ་འཇིགས་བྱེད་དགུའམ་མགོན་པོ་ནག་པོ་ལྟ་བུ་ཡིན་ལ། གྲུལ་བུམ་ནི་གཤིན་རྗེ་སྟེ་གཏོར་སྔགས་ཀྱི་སྐབས་སུ་བི་ཀྲི་ཏ་མུ་ཁ་རྣམ་པར་འགྱུར་བའི་གདོང་སྟེ། གཤིན་རྗེའི་སྔགས་དང་མཐུན་པར་ཡང་མཛད་དོ། །མིའམ་ཅི་དང་སྐྱེས་བུའམ་ཅི་བྲམ་ཟེའི་གཞུང་ལུགས་ལས་དོན་གཅིག་པར་བཤད་ཀྱང༌། འདིར་ནི་དེ་གཉིས་འགྲོ་བའི་རིགས་དང་སྤྱོད་ཡུལ་གཅིག་པ་ལས་གཟུགས་མཛེས་ཤིང་སྤྱོད་པ་ལྷ་དང་མཚུངས་པ་ནི་མིའམ་ཅི་དང༌། མགོ་བརྙན་སོགས་གཟུགས་མི་གདུག་ཅིང་སྤྱོད་པ་སྲིན་པོ་དང་མཚུངས་པ་ནི་སྐྱེས་བུའམ་ཅིའོ། །འབྱུང་པོ་བྱ་རྒོད་ཀྱི་གདོང་པ་ཅན་ཞེས་པའི་འབྱུང་པོ་ནི། སྤྱི་མིང་བྱེ་བྲག་ལ་ཐོགས་པ་སྟེ། ཀུན་ཏུ་རྒྱུ་བའི་བགེགས་ཀྱི་རྒྱལ་པོའོ། །ཡི་དྭགས་ནི་
ཡི་དྭགས་དམངས་རིགས་ཀྱི་གཙོ་བོ་ཡིན་ཞིང༌། འབྱུང་པོ་བརྒྱད་གཞན་རྣམས་གདོང་བརྙན་ཡིན་ལ། མཁའ་ལྡིང་ནི་འདབ་ཆགས་ཀྱི་མཆུ་སོགས་གདོང་བརྙན་གྱི་དོད་རང་བཞིན་གྱིས་གྲུབ་མོད། སྐྱེས་བུའི་ལུས་ལ་གཤོག་པ་དང་འཇུག་སྒྲོ་ཡོད་པའོ། །དེ་ལྟར་ན་སྲུང་མ་འདི་རྣམས་ལས་ཁྲོ་བོ་རྣམས་འཁོར་ལོ་རྩིབས་བཅུ་བསྒོམས་ན་འཁོར་ལོའི་རྩིབས་དང༌། མ་བསྒོམས་ན་ཁང་བརྩེགས་ཀྱི་རྩིག་པ་ལ་ཅུང་ཟད་ཉེ་བར་བཞུགས་ཤིང༌། ཟད་པར་ལ་སྟེང་འོག་བཤད་ཟིན། ཟད་པར་གཞན་རྣམས་ཁང་བརྩེགས་བར་མའི་ཐད་ཀྱི་ཕྱི་རོལ་རྩིག་པ་དང་ཧ་ཅང་མི་རིང་བའི་ཕྱོགས་མཚམས་བརྒྱད་ཀྱི་ནམ་མཁའ་ལ་འབྱུང་བའི་གདན་ལ་བཞུགས་པ་ཡིན། དེ་བཞིན་དུ་ཕྱོགས་སྐྱོང་རྣམས་རྩིག་པ་རིམ་པ་གསུམ་པའི་རྭ་བའི་ནང་ལ་མ་རེག་ཙམ་དང༌། གུར་ནང་མའི་སྟེང་ཕྱོགས་ལ་མ་རེག་ཙམ་གྱི་ནམ་མཁའ་དང༌། རྭ་བ་གསུམ་པ་ཉིད་ཀྱི་རྡོ་རྗེའི་ས་སྟེགས་ཁོང་སྟོང་གི་ནང་འོག་གཞི་ལ་རེག་པར་བཞུགས་པ་ཡིན་ལ། གཟའ་རྣམས་དེ་དག་གི་ཐད་ཀྱི་རྭ་བའི་ཕྱི་རོལ་ཏུ་བཞུགས་པས་གཞན་རྣམས་གོ་སླ། འོག་གི་དུས་མེ་ནི་འོག་གི་ཕྱོགས་སྐྱོང་བཞུགས་ས་ནས་ཐོག་གི་རིམ་པ་གཅིག་གི་འོག་རྡོ་རྗེ་ས་གཞིའི་ནང་དུ་ཆུག་ཙམ་ན་བཞུགས་ པའོ། །དེའི་རིག་པ་ཀླུ་ལ་སྦྱར་ཏེ་གཞན་རྣམས་རྭ་བ་ལྔ་པའི་ནང་དང་གུར་འོག་ན་བཞུགས་པ་གོ་སླ་ཞིང༌། འོག་གི་ཀླུ་ནི་སྒོ་ང་ཕྱེད་པ་འདྲ་བའི་རྡོ་རྗེའི་གཞིའི་དབུས་ཀྱི་སྦུབས་སྟོང་ལ་གནས་ཏེ། འབྱུང་པོ་བཅུ་ཡང་གཞན་རྣམས་སྔ་མ་གཟའ་དང་འདྲ་ལ། གྲུལ་བུམ་ནི་རྡོ་རྗེའི་ས་གཞི་ཟླུམ་པོའི་མཐའ་རང་གི་ཕྱོགས་ལ་ནང་དུ་སྦུབས་སྟོང་ཕྱི་ངོས་ལ་གནམ་སྒོ་ལྟ་བུ་ཡོད་པའི་སྟེང་དུ་བཞུགས་པ་སྟེ། འོག་ཕྱོགས་ཀྱི་ལྷ་རྣམས་ཐམས་ཅད་ས་འོག་ཏུ་གནས་པ་ཡིན་ཞིང༌། ས་འོག་གི་འཇིག་རྟེན་ནི་བར་བར་ན་སྦུབས་སྟོང་ཕུག་པའི་རྣམ་པ་ལྟ་བུ་ཡིན་
པས། དེ་དང་མཐུན་པར་འདིར་ཡང་སྒོམ་པ་ཡིན་ནོ། །འདིར་ཟད་པར་དང་ཁྲོ་བོ་གཟའ་དང་ཕྱོགས་སྐྱོང༌། ཀླུ་དང་འབྱུང་པོ་རྣམས་ཡང་དག་པའི་སྦྱོར་བས་སྦྱོར་ཞེས་གསུངས་པས། བོད་ཕལ་ཆེར་ཁང་བརྩེགས་དང་རྭ་བའི་ནང་གི་ལྷ་རྣམས་ཞལ་ཕྱིར་བསྟན་ཏེ་རྩིག་པ་ལ་ཕྱོགས་པ་དང༌། ཕྱིའི་ལྷ་རྣམས་ནང་དུ་བལྟས་ཏེ་རྩིག་པ་ལ་ཕྱོགས་པའོ། །ཞེས་འདོད་པ་ནི། ལུགས་དང་ཤིན་ཏུ་མི་མཐུན་ལ། ཡང་ཁ་ཅིག་ཕྱི་ནང་གཉིས་ཀར་གྱི་ལྷ་རྒྱབ་རྩིག་པ་ལ་བརྟེན་པ་ཡིན་པས་སྦྱོར་བའི་དོན་རྒྱབ་སྦྱོར་བའོ་ཞེས་པ་ཡང༌། སྔ་མ་ལས་ཅུང་ཟད་ལེགས་ཀྱང་དོན་དང་འགལ་ཞིང༌། སྦྱོར་བའི་དོན་ལྷ་སྐུ་སྦྱོར་བ་ལ་འདོད་ཕྱིན་ལུགས་དེ་གཉིས་ཀ་ཡང་རྩིག་པས་བར་ཆོད་པས་ལྷ་སྐུ་ལ་ཁ་སྦྱོར་གྱི་དོན་མི་འགྲིག་གོ །དེས་ན་ཁ་སྦྱོར་གྱི་དོན་ནི། ལྷ་དེ་རྣམས་ཀྱི་ཁམས་མཁའ་ཡེ་ཐབས་ཤེས། རླུང་མེ་ཐབས་ཤེས། ས་ཆུ་ཐབས་ཤེས་ཏེ་དེ་ཡང་མཐུན་སྦྱོར་ཡིན་པས། སྒྲུབ་པ་པོའི་ལུས་ཀྱི་ཁམས་མི་འཁྲུག་ཅིང་ཁ་སྦྱོར་དུ་གནས་པའི་རྟེན་འབྲེལ་དུ་འཆད་པའི་དོན་ཡིན་གྱི། ལྷ་ཞལ་སྤྲོད་དང་རྒྱབ་སྤྲོད་གང་གི་དོན་དུ་ཡང་མི་འགྱུར་རོ། །དེས་ན་འཁོར་དྲུག་ཅུ་དང་པོར་བསྐྱེད་པའི་དུས་ཞལ་ནང་བསྟན་ཁོ་ན་བསྐྱེད་ནས་སྲུང་བ་ཡིན་ན་རེ་ཁའི་རྒྱུན་ལ་གནས་པ་དང༌། བཟློག་པ་ཡིན་ན་བཀའ་བསྒོས་པའི་རྗེས་སུ་ཞལ་ཕྱིར་བསྒྱུར་བའོ།། །།དྲུག་པ་འཁོར་ལོའི་ང་རྒྱལ་བཟུང་ཞིང་བཀའ་བསྒོ་བ་ནི། ཨོཾ་བཛྲ་རཀྵ་ཙཀྲ་སོགས་ཏེ་འདི་ལ་མང་པོ་ཞིག་ཁྲོ་བོ་ལ་བཀའ་བསྒོས་པའི་རྗེས་སུ་ང་རྒྱལ་འཛིན་པར་བྱེད་པ་དང༌། དེའི་ཡང་སྔོན་དུ་ཕུར་གདབ་བྱེད་པ་སོགས་ནི་འགྲེལ་པའི་དངོས་བསྟན་ལ་སྔགས་གོ་རིམ་མ་ངེས་པར་སྣ་ཚོགས་གསུངས་པ་རྣམས་གོ་རིམ་ངེས་ཅན་དུ་བཟུང་བའི་སྐྱོན་ཏེ་དེ་ནི་སྤྱིར་ཉེར་མཁོའི་སྔགས་རྣམས་སྡེ་ཚན་དུ་མཛད་པ་ཙམ་ཡིན་ཞེང༌།
ད་ལྟ་གླེགས་བམ་ལ་བྲིས་པའི་གོ་རིམ་ཇི་ལྟ་བ་ཁོ་ན་རང་བྱེད་དགོས་ན། རྭ་བ་དང་ཁང་བརྩེགས་བསྐྱེད་པའི་རྗེས་སུ་འབྱུང་བཞིའི་དཀྱིལ་འཁོར་བསྐྱེད་དགོས་པར་འགྱུར་ཏེ། འགྲེལ་པར་སྔགས་རྣམས་སྔ་ཕྱི་དེ་བཞིན་དུ་བཀོད་པའི་ཕྱིར་རོ། །དེས་ན་གཙོ་བོའི་ང་རྒྱལ་འཛིན་པ་སྐབས་འདི་དག་ཏུ་བྱེད་པ་ཡང་མི་ལེགས་ཏེ། འཁོར་རྣམས་བསྐྱེད་ཟིན་པའི་རྗེས་སུ་གཙོ་བོ་རང་ཉིད་གཅིག་པུའི་ང་རྒྱལ་འཛིན་པ་ནི། ལུགས་དང་ཡང་མི་མཐུན་ཞིང་སྒྲུབ་ཐབས་གཞན་ལའང་དེ་འདྲའི་རིགས་མི་སྣང་བའི་ཕྱིར་རོ། །སྐབས་འདིའི་སྲུང་འཁོར་གྱི་ང་རྒྱལ་འཛིན་པ་ནི། འདི་མན་ཆད་ཕུར་འདེབས་ལ་སོགས་པ་སྲུང་འཁོར་གྱི་མཛད་པ་ཡིན་གྱི། སྲུང་བའི་འཁོར་ལོ་དངོས་ནི་སྲུང་མ་དྲུག་ཅུ་བསྐྱེད་ཟིན་པ་ན་གྲུབ་པ་ཡིན་པས། སྐབས་འདི་ཉིད་དུ་སྲུང་འཁོར་གྱི་ང་རྒྱལ་འཛིན་པ་ཉིད་ལེགས་ཏེ། དེ་དང་དེའི་བྱ་བའི་གཙོ་བོ་གྲུབ་པ་ན་དེ་དང་དེའི་ང་རྒྱལ་འཛིན་པ་འབྱུང་བ་ནི། གཞན་མང་པོ་ཞིག་ལའང་སྣང་བའི་ཕྱིར་རོ། །དེ་ཡང་ཇི་ལྟར་གྲུབ་པ་ཡིན་སྙམ་ན། ཡུལ་འཁོར་སྲུང་བ་ནས་འབྱུང་པོ་རྣམས་བཀོད་པའི་བར་གྱི་གནས་སྲུང་བ་རྒྱས་པར་གྲུབ་པ་ཁོ་ནར་མ་ཟད་སྒྲུབ་པ་པོ་རང་ཉིད་གཙོ་བོ་གྱུར་པའི་བསྲུང་བྱ་རྣམས་ཀྱི་ལུས་ངག་ཡིད་གསུམ་གྱི་སྲུང་བ་བླ་ན་མེད་པ་ཡང་ཡིན་ཏེ། ཡིད་གཟུང་འཛིན་གཉིས་ཀྱི་དྲི་མ་གདོད་ནས་དག་པ་རང་བཞིན་གྱིས་འོད་གསལ་བ་རྡོ་རྗེ་ལྟར་འགྱུར་བ་མེད་པ་མཚོན་པ་ནི་ཁང་བརྩེགས་ཡིན་ལ། སེམས་དེ་ལ་ནམ་མཁའ་དང་ཡེ་ཤེས་རོ་མཉམ་དུ་འཇུག་པ་ལྟར་ཁམས་དེ་གཉིས་རྣམ་པར་དག་པའི་རང་བཞིན་ཁྲོ་བོ་དང་ཟད་པར་གྱི་སྐུར་བཞེངས་ནས་ཡིད་ལ་བརྟེན་པའི་སྐྱོན་དང་མི་མཐུན་ཕྱོགས་མཐའ་དག་སྲུང་བར་འགྱུར་བ་དང༌། ངག་གི་རང་བཞིན་ཉི་ཟླ་སྒྲ་གཅན་གྱི་དབུགས་ཀྱི་ངོ་བོ་རྭ་བ་གསུམ་ལྡན་གྱི་ལྕགས་
རི་ས་སྟེགས་གུར་དང་བཅས་པ་ཡིན་ལ། ངག་སྨྲ་བར་བྱེད་པ་ནི་ངག་གི་རྒྱུའི་རླུང་དྲོད་ཀྱི་རང་བཞིན་རྣམས་བསྐྱོད་པ་ལས་འབྱུང་བ་བཞིན་དུ་རྣམ་པར་དག་པའི་མེ་རླུང་ཕྱོགས་སྐྱོང་དང་གཟས་ངག་ལ་བརྟེན་པའི་མི་མཐུན་ཕྱོགས་ཐམས་ཅད་སྲུང་ཞིང་སེལ་བ་དང། ལུས་ནི་འབྱུང་བ་ལྔ་རགས་པ་འདུས་པའི་བདག་ཉིད་ཡིན་པས་དེ་མཚོན་པ་རྭ་བ་ལྔ་ལྡན་གྱི་ལྕགས་རི་ས་གཞི་གུར་བཅས་ལ་ལུས་བརྟན་པའི་བྱ་བ་བྱེད་པ་ས་དང༌། འཕེལ་བར་བྱེད་པ་ཆུ་ཡིན་པ་ལྟར་དེ་གཉིས་རྣམ་པར་དག་པའི་ཆ་ཀླུ་དང་འབྱུང་པོར་བཞེངས་ནས་ལུས་ལ་བརྟེན་པའི་བར་ཆད་ཐམས་ཅད་སྲུང་ཞིང་བཟློག་པར་མཛད་པ་ཡིན་ནོ། །མཐར་གཏུགས་ན་དངོས་བརྒྱུད་ཀྱི་ཁྱད་པར་ཅུང་ཟད་བཞག་པ་ཙམ་མ་གཏོགས་བར་ཆད་ཐམས་ཅད་ཀྱང་ཡིད་ཀྱི་བར་ཆད་དུ་འདུས་པ་ལྟར་སྲུང་བཟློག་ཐམས་ཅད་ཀྱང་ཡིད་ཀྱི་སྲུང་བཟློག་ཏུ་འདུས་ཤིང༌། ཁམས་ཀྱི་དབྱེ་བའི་ཁྱད་པར་སོགས་རྒྱས་པ་སྒོམ་པར་ནུས་ན། ཕན་ཡོན་རྣམ་གྲངས་དུ་མ་འབྱུང་བ་ལ་རྣོ་མྱུར་གྱི་ཁྱད་པར་དུ་མ་ཡོད་པ་མ་གཏོགས། སྤྱིར་གཞན་ལྔ་བཅུ་པོ་ཡང་ཁྲོ་བོ་བཅུར་འདུས་པས་སྲུང་འཁོར་བསྡུས་པའི་གནས་སྐབས་སུ་ཁྲོ་བོ་བཅུ་གཅིག་ཁོ་ནས་ཆོག་པ་ཡིན་ནོ། ཁྲོ་བོ་རྣམས་ལ་བཀའ་བསྒོ་བ་ནི། བཀའ་སྩོལ་བ་པོ་རྡོ་རྗེ་ཤུགས་ཉིད་ཀྱིས་གསུངས་པ་སྟེ། སྔགས་དོན་ནི་གོ་སླ་ཞིང་གཞན་དུ་འཆད་པར་འགྱུར་རོ།། །།བདུན་པ་ཕུར་བུས་གདབ་པ་ནི། དེ་དག་གིས་ཀྱང་ཞེས་པ་ནས། བྲོས་པར་གྱུར་གྱི་བར་ཡིན་ཏེ་དཀྱུས་ཙམ་གོ་སླ་ལ། དོན་གྱི་ཁོག་འདི་ལྟར་ཡིན་ཏེ། ཡེ་ལེ་ལས། སྲིད་པ་གསུམ་གྱི་གནས་སུ་བདུད་རྣམས་དག་ལ་བསྣུན་པ་ངེས་པར་དབྱུག་པ་སྔོན་པོས་བྱེད་པ་སྟེ། །བཅིང་བ་ཁྲོ་བོ་མི་གཡོ་དུས་མཐའི་ཉི་མ་དང་མཚུངས་མཐའ་ཡས་
བརྩོན་འགྲུས་ཀྱིས་ནི་ཕུར་བུས་གདབ། །འདོད་པས་དེ་ཡི་བརྩོན་འགྲུས་ཉམས་པར་ས་གཞི་ལ་གནས་རེངས་པར་བྱེད་པ་གནོད་མཛེས་ཉིད་ཀྱིས་སོ། །གཙུག་ཏོར་གྱིས་ནི་རྫུ་འཕྲུལ་ཉམས་པ་རབ་ཏུ་གསལ་ཞིང་ངེས་པར་སྔར་བཞིན་ཁྲོ་བོའི་ལྷ་མོ་རྣམས། །ཞེས་གསུངས་ཏེ། དངོས་སུ་བགེགས་འཇོམས་པའི་ཚུལ་ཡིན་ལ། བགེགས་རྣམས་འགུགས་པར་བྱེད་པ་བགེགས་མཐར་བྱེད་ཀྱི་ཐུགས་ཀ་ནས་ཕོ་ཉ་དཔག་ཏུ་མེད་པ་སྤྲོས། དབྱུག་སྔོན་གྱི་ཐུགས་ཀ་ནས་དབྱུག་སྔོན་མང་པོ་སྤྲོས་ཏེ། བགེགས་རྣམས་ལ་བསྣུན་པས་བརྒྱལ་ཞིང་འགྱེལ་བ། མི་གཡོ་བ་ལས་མི་གཡོ་བ་སྤྲོས་པ་རྣམས་ཀྱིས་ཞགས་པས་བཅིངས། ཕོ་ཉ་རྣམས་ཀྱི་ལྕགས་ཀྱུ་བཏབ་སྟེ་ཚུར་དྲངས། གཙུག་ཏོར་ལ་གཙུག་ཏོར་སྤྲོས་པ་རྣམས་ཀྱིས་དེ་དག་གི་རྫུ་འཕྲུལ་ཉམས་པར་བྱས་ཤིང༌། འདོད་རྒྱལ་སྤྲོས་པ་རྣམས་ཀྱིས་དེ་དག་གི་བརྩོན་འགྲུས་ཏེ། ལུས་ངག་ཡིད་གསུམ་གྱི་སྟོབས་བཅོམས་ནས་རྭ་བ་ལྔ་པའི་ཕྱི་འཚམས་ཀྱི་ས་གཞི་ལ་ཁྲོན་པ་གྲུ་གསུམ་ཟབ་མོ་རྣམས་ཀྱི་ནང་དུ་བཅུག གནོད་མཛེས་སྤྲུལ་པ་རྣམས་ཀྱིས་བདུད་བགེགས་དེ་དག་ལུས་ངག་ཡིད་གསུམ་སྒུལ་བསྐྱོད་མི་ཤེས་པར་རེངས་པར་བྱེད་པ་དེ་ལ་གཙོ་བོའི་ཐུགས་ཀ་ནས་སྤྲོས་པའི་ཕུར་བུའི་ལྷ་བྱུང་བ་རྣམས་ཁྲོ་བོ་མཐའ་ཡས་བརྩོན་འགྲུས་སྟོབས་པོ་ཆེས་བླངས་ནས། བགེགས་རྣམས་ཀྱི་ལུས་ལ་ཕུར་བུས་འདེབས་ཤིང༌། རེངས་བྱེད་གཤིན་རྗེ་མཐར་བྱེད་ཀྱིས་ཐོ་བས་རྡུང་བ་ཡིན་ནོ། །གསལ་ཁ་མེད་ཀྱང་རྨུགས་བྱེད་ཀྱིས་བགེགས་རྣམས་ཕྱིན་ཆད་ལྡང་དུ་མེད་པ་དང༌། ཁེངས་བྱེད་ཀྱིས་དེ་རྣམས་འོད་གསལ་དུ་བཅུག་ནས་གནས་སྤོར་བ་ཡིན་ནོ། །ཞེས་གྲུབ་ཆེན་ཡུ་མོ་ཡབ་སྲས་ཀྱི་གསུང་སྒྲོས་དང་བླ་མའི་མན་ངག་ལས་འབྱུང་བའི་ཕྱིར། མཆོག་ཏུ་ཡིད་ཆེས་པས་བསྒོམ་པར་བྱའོ། །ཡང་ན་ཕྱོགས་བཅུའི་ཕུར་བུ་ཕྱོགས་བཅུའི་ཁྲོ་བོས་འདེབས་པ་ཡང་བཤད་དེ་
གདམ་ཀའོ། །སྐབས་འདིར་རྫས་ཀྱི་ཕུར་བུ་མེད་པའི་ཕྱིར། བསངས་སྦྱངས་སོགས་ཆོ་གའི་ཡན་ལག་རྣམས་མི་དགོས་ལ། ས་བོན་ཙམ་དང་ཆོ་ག་གསུམ་བསྐྱེད་དང༌། སྐད་ཅིག་གིས་བསྐྱེད་པ་གང་འོས་བྱེད་པ་ཡིན། ཕུར་བུའི་ཁྲོ་བོའི་སྐུ་ནི་ཁ་ཅིག་ཁྲོ་བོ་བཅུ་པོ་ཉིད་ལ་ཞལ་མདོག་ཉིས་འགྱུར་བྱེད་པ་ནི། གངས་ནས་ཀྱང་མ་བཤད་ཅིང་རིག་པས་ཀྱང་མི་ཐོབ་ལ། ལུང་དང་ཡང་འགལ་ལོ། །ཁུངས་མེད་པ་དངོས་སུ་གྲུབ། རིག་པས་མི་ཐོབ་སྟེ་སྟོབས་པོ་ཆེ་ཉིད་སྟོབས་པོ་ཆེས་འདེབས་པ་མི་མཛེས་ཤིང༌། ཁྲོ་བོ་གཞན་རྣམས་ཀྱི་འཕྲིན་ལས་དེ་ཡོད་པ་བཞིན་དུ་གཙོ་བོའི་ཐུན་མོང་མ་ཡིན་པའི་འཕྲིན་ལས་ཅིག་དགོས་པ་ཆད་པར་འགྱུར་བའི་ཕྱིར་རོ། །ལུང་དང་ཡང་འགལ་ཏེ་སྔགས་དོན་ལ་བསམས་ན། ཕུར་བུའི་ཁྲོ་བོ་ནི་ཁྲོ་བོ་ལོགས་པ་ཡིན་གྱི། བཅུ་པོ་གང་དུའང་ མི་གཏོགས་པར་གསལ་བ་དང༌། ཇི་སྐད་དུ། ཁྲོ་བོའི་རྒྱལ་པོ་གདོང་དྲུག་འཇིགས། །རིགས་དྲུག་རྣམས་ཀྱི་ཡོངས་དག་པ། །ཞེས་ཞལ་དྲུག་པོ་རིགས་དྲུག་དང་ཁམས་དྲུག་དག་པ་ཡིན་པ་ལ། ལྗང་དམར་དཀར། ལྗང་དམར་དཀར་བའི་ཞལ་དྲུག་ཅེས་བྱས་ན་ལྗང་ཁུ་གཉིས་ནམ་མཁའ། དམར་པོ་གཉིས་མེ། དཀར་པོ་གཉིས་ཆུར་སོང་བས་ཁམས་དྲུག་གི་དག་པ་བརྩི་རྒྱུ་མ་བྱུང་བའི་ཕྱིར་རོ། །དེས་ན་ཁྲོ་བོ་འདི་ནི་གཙོ་བོ་དུས་འཁོར་རམ། རྡོ་རྗེ་ཤུགས་ཉིད་ཀྱི་རྣམ་འཕྲུལ་རྡོ་རྗེ་ཕུར་བུ་ཞེས་ཁྲོ་བོ་ལོགས་པར་བྱ་སྟེ། རྣམ་པ་དབང་ཆོག་ཏུ་བཤད་ཟིན་པ་ལྟར་རམ། ཡང་ན། ཞལ་བཞི་ཕྱོགས་མདོག ཞལ་སྟེང་མ་གཉིས་ལྗང་ཁུ། ཕྱག་མཚན་རྡོར་སེམས་དང་འདྲ། ཐོག་མར་ཞབས་དྲུག་ཡོད་པ་བསྒོམ། ཕྱིས་དེ་བསྒྱུར་ཏེ་ལྟེ་བ་མན་ཆད་ཕུར་ཤམ་དུ་སོང་ནས་བགེགས་ལ་འདེབས་པ་ཡིན་ལ། དེས་ན་ཕུར་བུ་སྒྲུབ་པ་ནི་གཙོ་བོའི་འཕྲིན་ལས་ཏེ་འདི་ལ་བར་སྐབས་སུ་བྱུང་བ་ལ་ལ་ཞབས་དྲུག་
པོ་བགེགས་གན་ཀྱལ་དུ་བསྒྱེལ་བའི་འཁོར་ལོ་དྲུག་ལ་མནན་པའི་ཚུལ་གྱིས་ཕུག་པ་ལ་ཕུར་བུའི་དོན་དུ་འདོད་པ་དང༌། ཞབས་རེ་རེ་ཕུར་བུའི་དཔལ་དུ་སོང་བར་འདོད་པ་དང༌། གཞན་དག་ཞབས་གཉིས་བརྐྱང་སྟེ་རྩེ་མོ་སྤྲད། བཞི་པོས་གར་སྟབས་བྱས་པས་ཕུར་བུའི་གཟུགས་ཡིན་ཞེས་རྡོ་རྗེ་མཁའ་འགྲོ་རྩ་འགྲེལ་ན། ཕུར་བུའི་གཟུགས་ཞེས་པ་གར་སྟབས་སུ་བཀྲལ་བ་ཞིག་ཡོད་པ། བློ་ལ་བཞག་པའི་འཆལ་གཏམ་དེ་དག་མི་འཐད་པ་རྟོགས་པ་སླའོ། །ཅི་ཡིས་ཞེ་ན། ཡུབ་གཅིག་ལ་རྩེ་མོ་དྲུག་ཡོད་པའི་ཕུར་བུ་སྔོན་མ་བྱུང་བའི་གཏམ་ཡིན་ཞིང༌། མཚོན་ཆའི་གཟུགས་སུ་མེད་པར་ཞབས་དངོས་ཀྱི་འབིགས་པར་བྱེད་པ་ཡང་འཇིག་རྟེན་ཚུལ་དང་མི་མཐུན་པའི་ཕྱིར་རོ། །མཚན་བརྗོད་དང་དུས་འཁོར་ལས། ཁྲོ་བོ་གདོང་དྲུག་ལ་བསྔགས་པ་ཆེ་བ་ཞིག་ཡོད་ཀྱང༌། ད་ལྟ་ལག་ལེན་ལ་ཐེབས་ངེས་ཤེས་པ་ཕུར་བུའི་ཁྲོ་བོ་འདི་གཅིག་པུ་ཡིན་པས། གནད་ཆེ་ས་ནས་མ་འཆུགས་པ་གལ་ཆེ་ཞིང༌། སྐྱོ་མ་སྔ་བཙན་གྱི་ཞེན་པས་བསླུ་བར་འགྱུར་ཏ་རེ། ས་ཆོག་གི་སྐབས་སྤྲོས་པ་བྱེད་པའི་སྐབས་ཀྱང་ཕུར་བུ་བཅུ་སྲུང་མཁན་ཁྲོ་བོ་བཅུས་བྱེད་པས་འདེབས་མཁན་ཀྱང་དེ་རྣམས་ཀྱིས་བྱེད་པ་ཚུལ་དང་མཐུན་པའི་དབང་དུ་བྱས་པ་ཡིན་གྱི། གང་འདེབས་རྒྱུའི་ཕུར་བུ་ནི་འདི་ཡིན་གྱི་ཁྲོ་བོ་བཅུ་པོ་མ་ཡིན་ནོ། །ཡང་ཕྱིས་ཀྱི་རྒྱ་དཔེ་འགའ་ལས་ཀྱང༌། ཞབས་དྲུག་དང་ཕུར་བུའི་རྣམ་པ་འགལ་བར་བསམས་ཏེ། ཥཊ་ཙ་ར་ཎ་ཞེས་པ་སརྦ་ཙ་ར་ཎ་ཞེས་པ་དང༌། སརྦཱ་བྷ་ར་ཎ་ཞེས་བཅོས་ཏེ། སྦྲུལ་གྱི་ཞབས་ཞེས་ཕུར་ཤམ་དང༌། སྦྲུལ་གྱིས་བརྒྱན་པ་ཞེས་པར་བྱས་སྣང་ཡང་སྔོན་གྱི་ལོ་པཎ་ཆེན་པོ་རྣམས་ཀྱི་དཔེ་ལ་གང་ཡོད་པ་དེ་དག་པ་ཤས་ཆེ་ཞིང༌། འདིར་དྲུག་ཚན་དུ་མཉམ་པའི་ཕྱིར། ཞལ་དྲུག་ཕྱག་དྲུག་གི་ཟླ་སྡེབས་སུ་ཞབས་དྲུག་ཀྱང་ཐོབ་ལ། སྡོམ་གསུམ་
པ་དང་སྒྱུ་འཕྲུལ་དྲྭ་བ་སོགས་ལས་ཀྱང་ཁྲོ་བོ་འདི་ལྟར་གསུངས་པ་དང་གནད་གཅིག་པ་ཞིག་ཡོད་དོ། །དེ་ཡང་སྨོས་ཤིག་ཅེ་ན། དུས་ཀྱི་འཁོར་ལོ་ནི། སེམས་དཔའ་རིགས་ཉེ་ཚེ་བ་ཙམ་མ་ཡིན་པའི་རིགས་ཀུན་ཁྱབ་བདག་འཇམ་དཔལ་རྡོ་རྗེ་འཆང་གི་ངོ་བོ་ཡིན་པས། དེའི་རིགས་ཀྱི་ཁྲོ་བོ་ཡང་མཐར་བྱེད་བཞིའི་ནང་ཚན་ལྟ་བུ་རིགས་ཉེ་ཚེ་བ་མ་ཡིན་པས་འཁོར་ལོའི་དབང་ཕྱུག་གཤིན་རྗེ་གཤེད་དང་དགོས་དོན་བྱ་བ་ངོ་བོ་རྣམས་གཅིག་པར་འགྱུར་རོ། །དེ་ཉིད་ཀྱིས་ན་འགྲེལ་ཆེན་ལས་མཚན་བརྗོད་ཁོ་ན་དཔང་པོར་མཛད་པ་དང༌། འཇམ་དཔལ་ཇི་ལྟར་བ་བཞིན་དུ་སློབ་དཔོན་ཡང་དེ་ལྟར་བལྟ་ཞེས་གསུངས་པ་དང༌། བསྡུས་རྒྱུད་གསུང་པ་པོ་ཡང་འཇམ་དཔལ་ཡིན་པ་དང༌། འཁྲུལ་འཁོར་གྱི་སྐབས་ཀྱང་འཇམ་དཔལ་དང་གཤིན་རྗེ་གཤེད་ཀྱི་སྔགས་ཁོ་ན་འབྱུང་བའི་རྒྱུ་མཚན་དེ་ལྟར་ཡིན་ནོ། །རིགས་ཉེ་ཚེ་བ་དང་འཁོར་ལོའི་དབང་ཕྱུག་དེ་དག་ངོ་བོ་ཐ་དད་པ་མིན་ཀྱང་སྔགས་རྒྱུད་སྦྱོར་ལུགས་དང༌། སྒྲུབ་ཚུལ་ཐ་དད་པའི་དབང་གིས་སོ་སོར་གྱུར་པར་ཤེས་པར་བྱའོ། །སྨད་ཕུར་བུའི་དབྱིབས་ནི། མདུང་གི་དབྱིབས་ཅན་ཡིན་ལ། དེ་ཡང་ཟླུམ་པོ་ཟླ་ཁམ་གྲུ་གསུམ་ལ་སོགས་པའང་ཡིན་མོད་ཀྱི། སྐབས་འདིར་རེངས་པའི་ལས་ལ་བསྔགས་པའི་ཕྱིར། ཟུར་བཞི་པར་འདོད་ཅིང༌། ཕུར་བུ་ཐོ་བས་བརྡུང་ཚུལ་དུ་བྱས་པས་བགེགས་རྣམས་ཀྱི་འཁོར་ལོ་དྲུག་འབིགས་པར་བྱེད་པའི་ཚུལ་ནི། བགེགས་རྣམས་བཅིངས་ཏེ་ཙོག་ཙོག་པུར་འདུག་པའི་སྤྱི་བོ་ནས་བཏབ་པས། གསང་གནས་ཀྱི་བར་དུ་འཁོར་ལོ་དྲུག་གི་ལྟེ་བ་ཐལ་ཕྱུང་དུ་སོང་ནས་རྡོ་རྗེའི་ས་གཞི་ལ་སྦྲགས་པར་བསམ་པའོ། །འདིར་ཐོག་མའི་མེ་སྔགས་དང༌། བར་དུ་རྒྱན་དང་ཕྱག་མཚན་འགོད་པ་དང༌། ཕུར་བུ་དང་ཐོ་བའི་སྔགས་ཀྱིས་སྐབས་འདི་དག་ཏུ་སོ་
སོའི་ཕྱག་རྒྱ་འཆའ་བའི་ལུགས་ཀྱང་འདུག་སྟེ། བཤད་ཚོད་མེད་པས་ངེས་པར་དགོས་པ་ནི་མ་ཡིན་ཡང་མི་འབྲེལ་པའང་མིན་པས་ཇི་ལྟར་མོས་པར་བྱའོ། །དེའི་རྗེས་སུ་སྤྲོ་ན་བགེགས་རྣམས་འཇོམས་པའི་ཕྱིར། རྐང་པ་བཅུ་དྲུག་པ་དང་བདུན་ཅུ་རྩ་གཉིས་པ་ཡང་ཅི་རིགས་པར་བཟླའོ། །སྤྱིར་སྲུང་འཁོར་གྱི་སྐབས་ནས་བཟླས་པ་མ་གསུངས་པས་ངེས་པར་བཟླ་དགོས་པ་ནི་མིན་ལ། དེ་བཞིན་དུ་མཚན་མ་ངན་པ་བཟློག་པའི་སྐབས། སྲུང་འཁོར་ཚོགས་བསག་སྔོན་འགྲོར་བྱས་པའི་རྗེས་ལ་དངོས་གཞི་རྡོ་རྗེ་འཇིགས་བྱེད་ཀྱི་རྣལ་འབྱོར་སྒོམ་པའི་སྐབས། སྔགས་དབང་རྒྱས་པར་གསུངས་པ་དེ་འདིར་ཡང་སྦྱོར་མོད་ཀྱི་མི་རུང་བ་རང་ཏ་མ་ཡིན་ཡང༌། ཧ་ཅང་སྤྲོས་པ་ལ་དགའ་ཆེས་བར་ཟད་དེ་དངོས་གཞི་ལས་རྒྱལ་མཆོག་གི་སྐབས་སུ་ཡང་སྔགས་དབང་རྒྱས་པ་ལེན་པ་དང་མི་ལེན་པ་གདམ་ཁ་ཅན་ཡིན་ན། སྲུང་འཁོར་ནི་ཆོ་གའི་ཡན་ལག་ཡིན་པས་རྒྱས་པ་དེ་སྐབས་སུ་བབ་མ་བབ་བསམ་དགོས་ཤིང༌། འདིའི་རིགས་མཐར་གཏུགས་ན་རྡོ་རྗེ་སེམས་དཔའི་སྒོམ་བཟླས་དང༌། ཐུན་མཚམས་ཀྱི་ལྷའི་སྐབས་སུ་ཡང་བདག་འཇུག་རྒྱས་པ་ལེན་པའི་ལག་ལེན་ཡོད་ཉེན་གདའོ། །དེས་ན་ཉམས་ལེན་ལ་བློ་རྩེ་མི་གཏོང་བར་གསང་སྒྲོགས་ཀྱི་གཞི་རྩ་ཆོག་གྲྭ་སྒྲིག་པར་གྲགས་པ་ལ་བློ་རྩེ་གཏད་ནས་བོད་ཀྱི་ཕྱོགས་འདིར་བར་སྐབས་ཤིག་ཁྱེད་ཅག་གི་དཀྱིལ་འཁོར་འདི་ནི་ཆོ་ག་ཡང་སྟེ་ཞེས་ཁྱད་དུ་གསོད་ཅིང༌། ཁོ་བོ་ཅག་གི་ཆོ་ག་འདི་བརྫིའོ། །དེ་བས་ཀྱང་འདི་ཚོགས་ ཆེའོ། །འདི་ལ་ནི་ཞག་འདི་སྙེད་ཅིག་འགོར་རོ་ཞེས་འདོན་པ་མང་བ་ཁོ་ན་ངོམ་ཞིང་དོན་དུ་གཉེར་བ་ཞིག་བྱུང་སྣང་ངོ༌། །འདི་ལྟ་བུ་བོད་དུ་མ་ཟད། ཕྱིས་བྱུང་བའི་རྒྱལ་བལ་གྱི་པཎྜི་ཏ་ཅི་རིགས་ལ་ཡང་སྣང་སྟེ། མདོར་ན་ཚིག་འདོན་མང་བ་དང༌། ལག་ལེན་གྱོང་
བ་ཙམ་གྱིས་སྐྱོན་ཡོན་གང་དུའང་སྒྲུབ་མི་ཐུབ་པས། དགོས་ངེས་ཤེས་པ་མ་ཆད་ཅིང༌། མི་དགོས་པ་མ་ལྷག་པའི་འཚམ་པ་ཉིད་བཟང་ངོ༌།། །།གསུམ་པ་སྲུང་འཁོར་གྱི་རྗེས་ཀྱི་ཆོ་ག་ནི་གཏོར་མ་འབུལ་བ་དང༌། མཆོད་བསྟོད་གསོལ་བཏབ་དང། གཤེགས་སུ་གསོལ་བ་རྣམས་ཡིན་པ་ལས། གཞན་རྣམས་དཀྱུས་བཞིན་གོ་སླ་ལ། གཏོར་མ་ཐུན་མོང་དུ་གཅིག་གམ། གཙོ་བོ་དང་སྡེ་དྲུག་སྟེ་བདུན་ནམ། ལྷ་གྲངས་དང་མཉམ་པ་སོགས་ཇི་ལྟར་འོས་པའོ། །དམིགས་པ་ནི། སྤྱན་འདྲེན་པའི་ཕྱག་རྒྱ་ཡོད་པ་ལྟར། རང་རང་གི་སྐུ་ལས་སྐུ་གཉིས་པ་རེ་ཆད་ནས་བྱོན་ཏེ། གཏོར་སྣོད་དང་ཉེ་བའི་སྟེང་གི་ཆ་ལ་བཞུགས་ནས། ལྗགས་རྡོ་རྗེའི་སྦུ་གུས་གཏོར་མ་དྲངས་ཏེ་གསོལ། དེ་མ་ཐག་རྩ་བའི་སྐུ་ལ་ཐིམ་པར་བསམ་མོ། །གཞུང་ནས་གསལ་བར་མ་གསུངས་ཀྱང་བླ་མའི་མན་ངག་ཏུ། ཨོཾ་ཨཱཿཧཱུྃ་བཛྲ་བྷཻ་ར་ཝ་སོགས་ཀྱིས་གཙོ་བོ་ལ་འབུལ་བ་ནི་རྒྱུད་འགྲེལ་ལས་ཁྲོ་བོ་བཅུ་ལ་འབུལ་བར་གསུངས་པའི་ཤུགས་བསྟན་ལ་ཐོབ་པའང་ཡིན་ཞིང༌། ཤིན་ཏུ་གལ་ཡང་ཆེ་སྟེ། ཁྲོ་བོའི་མཆོད་པ་ཐུན་མོང་མ་ཡིན་པ་གཏོར་མ་ཡིན་པར་གསུངས་ལ། རྡོ་རྗེ་ཤུགས་ཁྲོ་བོའི་གཙོ་བོ་ཡིན་པའི་ཕྱིར་རོ། །སྤྱིར་རྗེས་ཀྱི་སྐབས་འདིར་མཆོད་བསྟོད་ནི་མེད་མི་རུང་ཡིན་ལ། གཏོར་མ་དང་གསོལ་གདབ་ནི་འགྲུབ་ན་ལེགས་པའི་ཡན་ལག་ཡིན་པས་ངེས་པར་བྱེད་དགོས་ཀྱང༌། མ་བྱས་ན་ཆོ་ག་ཆད་པའི་ཡན་ལག་ཏུ་མི་འགྱུར་བས་རྒྱུན་གྱིས་ཉམས་ལེན་ལ་མ་གྲུབ་ཀྱང་སླའོ། །དེ་ནས་གཤེགས་སུ་གསོལ་བ་ཡང་དཀྱུས་བཞིན་ལས་སྲུང་འཁོར་ཙམ་མ་གཏོགས་དངོས་གཞི་གཞན་མི་བསྒོམ་ན། རྭ་གུར་ས་གཞི་ཁང་བརྩེགས་རྣམས་ཀྱང་ལྷ་རྣམས་བསྡུས་པའི་རྗེས་སུ་རང་ལུས་ལ་བསྡུ་བའམ་རང་རང་གི་ལྷ་དང་ལྷན་ཅིག་བསྡུ་བ་གཉིས་བྱུང་
བ་ལས་སྔ་མ་ལེགས་སོ། །སྒྲུབ་ཐབས་དངོས་གཞི་དང་སྦྲེལ་ཏེ་སྒོམ་པ་ལ་ནི། སྐབས་དེར་དེ་དག་བསྡུ་བ་མི་དགོས་ཏེ། ཡེ་ཤེས་ཚོགས་བསོག་གི་སྐབས་སུ་སྣོད་བཅུད་གྱི་སྣང་བ་རྣམས་དང་ལྷན་ཅིག་ཏུ་སྦྱངས་བས་ཆོག་གོ །དེ་ལྟར་ན་སྒྲུབ་ཐབས་འདིའི་སྲུང་འཁོར་གྱི་རིམ་པ་ལ། བསྡུས་རྒྱུད་ཀྱི་དངོས་བསྟན་བསྡུས་པ། ཁྲོ་བོ་བཅུ་ཙམ་དང༌། རྩ་རྒྱུད་ཀྱི་དགོངས་པ་བཞིན་འགྲེལ་བས་རྒྱས་པར་ཁ་བསྐང་བ། གོང་དུ་བཤད་པ་ལྟར་མཐའ་རྒྱས་སུ་བྱེད་པ་གཉིས་ཡིན་ལ། དེའི་བསྡུས་པ་ནི། སྲུང་འཁོར་རྟེན་གྱི་དཀྱིལ་འཁོར་སྔར་བཤད་པ་ལྟ་བུའི་རྒྱས་པ་དང་མཐུན་པར་བསྒོམས་ཀྱང་རུང་བ་བསྡུས་རྒྱུད་ཀྱི་དངོས་བསྟན་ཡང་ཡིན་ལ། འདི་ལའང་འཁོར་ལོ་ཡོད་མེད་གདམ་ཀའོ། །ཡང་འབྱུང་བཞི་ལས་གྱུར་པའི་རྡོ་རྗེའི་གུར་དང་ས་གཞི་ཙམ་གྱི་དབུས་སུ་སྒོམ་པའམ། འབྱུང་བཞི་ཙམ་ཡང་མི་བྱེད་པར་ཧཱུྃ་ལས་ས་གཞི་རྭ་གུར་བསྐྱེད་དེ། དེའི་དབུས་སུ་འཁོར་ལོ་རྩིབས་བཅུ་པ་བསྒོམས་པས་ཀྱང་རུང་ངོ༌། །བསྡུས་པ་ཕྱི་མ་འདི་ལ་ངེས་པར་འཁོར་ལོ་རྩིབས་བཅུ་བསྒོམ་དགོས་ཤིང༌། ལྷག་མ་སྔར་བཞིན་སྦྱོར་བའམ། ཆོ་ག་བསྡུས་པ་ཉིད་ཀྱི་ཕྱིར་ཕྱག་མཚན་རྒྱན་བཀོད། ཕུར་གདབ་བཟླས་པ་སོགས་སྤངས་ཤིང༌། གཏོར་མའང་ཁྲོ་བཅུ་ཉིད་ལ་ཕུལ་བས་ཆོག་ལ། ཉེ་བར་བསྡུ་བའི་ཚེ། ཁྲོ་བོ་བཅུ་ཀར་གསང་བའི་འཁོར་ལོར་བསྡུ་བ་དཀྱུས་བཞིན་ནམ། ཡང་ན་འདི་ལ་ལྷ་རྣམ་གྲངས་གཞན་མེད་པས་ཁྲོ་བོ་བཅུ་པོ་ཉིད་ཁམས་དྲུག་དང་བསྟུན་ཏེ་འཁོར་ལོ་དྲུག་ཏུ་བསྡུའོ། །གལ་ཏེ་སྲུང་འཁོར་དེ་གཉིས་ཀ་སྒོམ་པ་ལ་མི་སྤྲོ་ན། གོང་གི་བདུད་སྲེག་པ་ཙམ་གྱིས་ཀྱང་གོ་ཆོད་ལ། རང་ཉིད་དུས་ཀྱི་འཁོར་ལོར་གསལ་བའི་ཐུགས་ཀ་ནས་ཁྲོ་བོ་བཅུ་དང་ཕུར་བུ་སྤྲོས་ཏེ། ཕུར་གདབ་ཙམ་བྱས་པས་ཀྱང་སྲུང་འཁོར་གྱི་བྱ་བ་འགྲུབ་པ་དང༌། ཡང་ཁ་དག་པ་ནས་ཡན་ལག་
དྲུག་འགོད་པའི་བར་གྱིས་ཀྱང་བདག་དང་རྣལ་འབྱོར་བ་སྲུང་བ་འགྲུབ་ཅིང༌། དེ་རྗེས་ཚོགས་གསག་གཉིས་ལ་འཇུག དངོས་གཞིའི་སྐབས་རྡོ་རྗེའི་གུར་བསྒོམས་པས་གནས་སྲུང་གྲུབ་པའི་ཕྱིར། བསྡུས་པ་ལ་དེ་ཙམ་གྱིས་ཀྱང་ཆོག་པའི་ལུགས་ཡིན་ནོ། །དེ་དག་ཀྱང་དཀྱིལ་འཁོར་སྒོམ་པའི་དབང་དུ་བྱས་ཀྱི་གཙོ་རྐྱང་སོགས་ལ་སྒྲུབ་ཐབས་ཕྲ་མོ་གཞན་གྱིས་རིགས་འགྲེ་བ་ལས་ཁྲིགས་བཀོད་ཀྱི་སྤྲོས་པ་མི་དགོས་སོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། སྲུང་བའི་འཁོར་ལོའི་སྡེ་ཚན་ཏེ་བཞི་པའོ།། །།གཉིས་པ་ཚོགས་གསག་པ་ལ། བསོད་ནམས་ཀྱི་ཚོགས་གསག་པ་དང། ཡེ་ཤེས་ཀྱི་ཚོགས་གསག་པ་གཉིས་ལས། དང་པོ་ནི། རྟེན་ངེས་པ་སྒྲུབ་པ། ཚོགས་ཞིང་སྤྱན་འདྲེན་པ། བདུན་རྣམ་པར་དག་པ། ལམ་བསྟེན་པ་སྟེ་བཞི་ལས། དང་པོ་ནི་རང་ཉིད་སྔར་རྡོ་རྗེ་ཤུགས་ཀྱི་རྣམ་པ་ཅན་དེ་ཉིད་སྐད་ཅིག་གིས་དཔལ་དུས་ཀྱི་འཁོར་ལོའི་སྐུར་གྱུར་པར་བསམ་མོ། །སྐབས་འདིར་ཞལ་ཕྱག་མང་ཉུང་ངེས་པ་ནི་མེད་དེ། རང་གི་བློ་ནུས་དང་བསྟུན་པས་ཆོག་པས་ཕྱག་གཉིས་པ་ནས་ཉེར་བཞི་པའི་བར་ཇི་ལྟར་འོས་པ་ཡིན་ལ། ཁ་སྦྱོར་གྱི་སྐུ་མ་ཡིན་ཏེ་ཡབ་རྐྱང་ཁོ་ནའོ། །དེའི་ཐུགས་ཀར་འགོད་རྒྱུ་ལ། དབང་ལེ་ལས་སྣ་ཚོགས་པདྨ་དང་ཟླ་བ་གསུངས་ཤིང༌། སྒྲུབ་ལེ་ལས། པདྨ་དམར་པོ་གསུངས་པ་གཉིས་སྤྱིར་གདམ་ཁ་ཡིན་ཡང༌། ལྷ་དབང་དུ་བྱེད་པའི་རྒྱུ་མཚན་དང༌། མངོན་རྟོགས་ཀྱི་སྐབས་སུ་སྒྲུབ་ལེ་གཙོ་ཆེར་བྱེད་དགོས་པ་མང་བས་དཀྱུས་ཀྱི་ཉམས་ལེན་ལ་དམར་པོར་སྒོམ་མོ། །གཞན་རྣམས་གོ་སླ། ཡན་ལག་དང་པོ་ཕྱག་འཚལ་བ་སོང་བའི་རྗེས་སུ། རང་གི་སྙིང་གར་ཟླ་བའི་སྟེང་དུ་གཟུངས་མ་བཅུ་གཉིས་ཀྱི་ས་བོན་སྡེ་པ་དྲུག་གི་ཡི་གེ་བརྩེགས་པ་རིང་ཐུང་གི་དབྱེ་བས་བཅུ་གཉིས་པོ་རྣམས་བཀོད་དེ་
དེ་རྣམས་མཆོད་ལྷ་བཅུ་གཉིས་སུ་སོང༌། སྙིང་ག་ནས་ཕྱིར་སྤྲོས་པ་ན། ལྷ་མོ་རེ་ལས་ཀྱང་གཟུངས་མ་དཔག་ཏུ་མེད་པ་སྤྲུལ་ཏེ། མདུན་དུ་བཞུགས་པའི་བླ་མ་དང༌། དཀྱིལ་འཁོར་གྱི་ལྷ་ཚོགས་ལ་མཆོད་པར་བསམ་དགོས་ཤིང༌། ཡན་ལག་ལྷག་མ་རྣམས་དཀྱུས་ཉིད་ན་གསལ་བ་བཞིན་ནོ།། །།བཞི་པ་ལམ་བསྟེན་པ་ནི། བྱང་ཆུབ་མཆོག་གི་སེམས་དང་ནི། །ཞེས་སོགས་ཏེ། བྱང་ཆུབ་ཏུ་སེམས་བསྐྱེད་པ་དང༌། གཞན་དོན་གྱི་ཁུར་ཁྱེར་བའི་ལྷག་བསམ་དང༌། བདག་དང་བདག་གིར་འཛིན་པ་སྤངས་པའི་ཡེ་ཤེས་བདག་མེད་རྟོགས་པའི་ཤེས་རབ་སྟེ་རྩ་བ་གསུམ་པོ་དྲན་པར་བྱས་ནས་སློབ་པར་དམ་འཆའ་བ་དང༌། ཕ་རོལ་ཏུ་ཕྱིན་པ་བཅུ་དང༌། ཚངས་པའི་གནས་པ་ཚད་མེད་བཞི་དང༌། སྦྱིན་པ་དང༌། སྙན་པར་སྨྲ་བ་དང༌། དོན་སྤྱོད་པ་དང༌། དོན་མཐུན་པ་སྟེ་བསྡུ་དངོས་བཞི་དང། མི་དགེ་བ་བཅུ་སྤོང་བའི་ཚུལ་ཁྲིམས་དང༌། འགྱོད་པ་དང༌། ལེ་ལོ་དང༌། གཉིད་དང༌། རྒོད་པ་དང༌། ཐེ་ཚོམ་སྟེ་སྒྲིབ་པ་ལྔ་སྤངས་པ་དང༌། འདོད་ཆགས་ཞེ་སྡང་གཏི་མུག་ང་རྒྱལ་ཏེ་ཉོན་མོངས་བཞི་སྤོང་བ་དང༌། འདོད་པའི་ཟག་པ་དང༌། སྲིད་པའི་ཟག་པ་དང༌། མ་རིག་པའི་ཟག་པ་དང༌། ལྟ་བའི་ཟག་པ་སྟེ་ཟག་པ་བཞི་སྤོང་བ་ལ་བསླབ་པར་དམ་འཆའ་བའོ། །དེ་ལྟར་ལམ་བསྟེན་པ་ལ། རྩ་བ་གསུམ་དང་ཕྱིན་བཅུ་ཚད་མེད་བཞི། །དགེ་བཅུ་སྒྲུབ་དང་སྒྲིབ་ལྔ་ཉོན་མོངས་བཞི། །ཟག་བཞི་སྤོང་བ་ཞེས་པ་སྡེ་ཚན་བདུན། །བརྒྱད་པ་ཚོགས་གསུམ་སྒྲུབ་པའི་ཡན་ལག་ཡིན། །ཞེས་སྡོམས་སུ་བྱ་སྟེ། དེ་ལྟར་ལམ་གྱི་སྡེ་ཚན་བརྒྱད་ལས། རྩ་བ་གསུམ་པོ་ནི། ཚོགས་གསུམ་པོ་རེ་རེའི་རྒྱུར་སྦྱར་ཏེ། སེམས་བསྐྱེད་ནི་ཚུལ་ཁྲིམས་དང༌། ལྷག་བསམ་ནི་བསོད་ནམས་དང༌། བདག་འཛིན་སྤོང་བ་ནི་ཡེ་ཤེས་ཀྱི་ཚོགས་ཀྱི་རྩ་བ་ཡིན་ལ། མི་དགེ་བཅུ་སྒྲིབ་པ་ལྔ་ཉོན་མོངས་བཞི་རྣམས་སྤོང་བ་ནི་ཚུལ་ཁྲིམས་ཀྱི་ཚོགས་ཀྱི་ཡན་
ལག་དང༌། ཚད་མེད་དང་བསྡུ་དངོས་ནི་བསོད་ནམས་ཀྱི་ཚོགས་དང༌། ཟག་བཞི་སྤོང་བ་དང༌། ཕྱིན་བཅུ་ལ་བསླབ་པ་ནི་ཡེ་ཤེས་ཀྱི་ཚོགས་སོ། །ཕར་ཕྱིན་བཅུ་ལ་ཐུན་མོང་བ་སྤྱི་དང༌། ཁྱད་པར་བ་ནོར་རྣམས་སྤངས་པས་སྦྱིན་པ་ཞེས་སོགས་དང་སྦྱོར་ཞིང༌། གཞི་རྩ་བ་གསུམ་ལ་བརྟེན་ནས་ལམ་གྱི་ངོ་བོ་གཞན་ཕན་གྱི་བསོད་ནམས་དང༌། བདེ་སྟོང་གི་ཡེ་ཤེས་དང༌། འཕོ་མེད་ཀྱི་ཚུལ་ཁྲིམས་གསུམ་ལ་སློབ་ཅིང༌། དེའི་ཕྱིར་དུ་བླང་དོར་གྱི་ཡུལ་ཐབས་སམ་ལམ་གྱི་རྣམ་གྲངས་དེ་དག་བསྒྲུབ་པར་བྱའོ། །ཞེས་པ་ཡིན་ནོ། །འདིར་སྒྲིབ་པ་ལྔ་ལ། ཐེ་ཚོམ་འགྱོད་པ་དག་དང་གཉིད་དང་ནི། །ལེ་ལོ་རྒོད་པའི་ཆོམ་རྐུན་རྣམས་ཀྱིས་ཀྱང། །ཞེས་མདོར་བསྡུས་དང་བོར་གསུངས་ཤིང༌། འགྱོད་གཉིད་རྨུགས་རྒོད་ཐེ་ཚོམ་ཞེས་སྐབས་འདིར་གསུངས་ལ། མདོ་ལས་རྒོད་འགྱོད་གཉིས་གཅིག་ཏུ་བསྡོམས། གཉིད་རྨུགས་གཉིས་གཅིག་ཏུ་བསྡོམས། འདོད་པ་ལ་འདུན་པ་དང༌། གནོད་སེམས་དང༌། ཐེ་ཚོམ་སྟེ་བློ་རིས་བདུན་ལ་སྒྲིབ་པ་ལྔར་གསུངས་ན། ཁ་ཅིག་འདིར་འདོད་འདུན་གནོད་སེམས་གཉིས་པོ་རྒོད་པའི་ནང་དུ་འདུས་པར་དགོངས་པ་ཡིན་ནོ་ཞེས་འཆད་པ་དང༌། ཁ་ཅིག་དེ་གཉིས་ཐེག་པ་འདིར་བསམ་གཏན་གྱི་སྒྲིབ་པར་མ་ངེས་ཞེས་འཆད་པ་བྱུང་ནའང་སྔ་མ་ལེགས་སོ། །ཟག་པ་ཡང་མངོན་པ་ལས། ཟག་པར་མ་ཡིན་གྲོགས་མེད་རྣམས། །འཇོག་པའི་རྗེས་སུ་མི་མཐུན་ལོ། །ཞེས་ཟག་པ་གསུམ་གྱི་རྣམ་གཞག་ཁོ་ན་བྱེད་པའང་ཡོད་མོད་ཀྱི། འདིར་ནི་ཆུ་བོ་སྦྱོར་བ་སོགས་དང་མཚུངས་པར། ཟག་པ་བཞིའི་རྣམ་བཞག་མཛད་པ་ལས་ཐོག་མས་འདི་མི་འགོག་སྟེ། ཐེག་པའི་ཁྱད་པར་ལས་བརྩམས་ཏེ་གོང་མ་ཉིད་མཆོག་ཏུ་གོ་དགོས་སོ། །དེ་ལྟར་ན་བསོད་ནམས་ཚོགས་གསོག་འདི། ཏིང་ངེ་འཛིན་དངོས་གཞི་ལ་འཇུག་པའི་སྔོན་དུ་ཕྱག་མཆོད་
བསྐུལ་བ་གསོལ་གདབ་སོགས་ཀྱི་སྒོ་ནས་ཡེ་ཤེས་ཀྱི་ལྷ་མཉེས་པ་དང༌། སྡིག་བཤགས་ཡི་རང་བསྔོ་བ་ལམ་བསྟེན་སོགས་ཀྱིས་རྒྱུད་སྦྱོང་ཞིང༌། དེ་ཐམས་ཅད་ཀྱིས་སྔགས་ཀྱི་ལྷ་དང་སྔགས་འགྲུབ་པའི་རྒྱུ་དགེ་རྩ་གསར་པ་གསོག རྙིང་པ་ལ་ལ་གསོས་འདེབས་ཤིང་རྒྱས་པར་བྱེད། ལ་ལ་སྔར་དགེ་རྩ་ཕལ་པ་ཡིན་པ་དེ་སྔགས་ཀྱི་དངོས་གྲུབ་ཐོབ་པའི་ཐུན་མོང་མ་ཡིན་པའི་རྒྱུར་འགྱུར་བ་སོགས་སྒོམ་བཟླས་ཀྱི་རྣལ་འབྱོར་ལ་འཕྲལ་ཉིད་དུ་ཕན་འདོགས་པའི་ཐབས་བླ་ན་མེད་པའོ། །རྡོ་རྗེའི་ཞལ་དག་པ་ནས་འདིའི་བར་དུ་སྤྱིར་ཆོ་ག་དེ་དང་དེ་ལ་དགོས་པ་ཁྱད་པར་ཅན་རེ་ཡོད་ཀྱང༌། སྦྱང་བྱ་སྦྱོང་བྱེད་སྦྱངས་འབྲས་སྦྱོར་བར་བཤད་པ་མེད་པས་ངེས་ཅན་སྦྱོར་ནི་མི་དགོས་ལ། ཡང་བསྐྱེད་རིམ་གཞན་གྱི་བཤད་སྒྲོས་དང་བསྟུན་ནས། སྦྱང་བྱ་སྐྱེ་བ་ཕྱི་མ་འཕེན་བྱེད་ཀྱི་ལས་གསོག་པ་དང༌། སྦྱངས་འབྲས་སློབ་ལམ་དུ་ཚོགས་གསུམ་རྫོགས་པའི་ཐབས་ལ་སློབ་པ་དང༌། རྫོགས་རིམ་གྱི་སྔོན་འགྲོའི་རྟོགས་པ་བསྐྱེད་པའི་གཞི་འདིངས་པའོ། །ཞེས་བཤད་ཀྱང་འགལ་བ་མེད་དོ། །དེ་ཡན་ཆད་སྔོན་འགྲོའི་རྐང་གྲངས་ལ། སྐྱབས་འགྲོ་སེམས་བསྐྱེད་ཡིག་བརྒྱ་ཞལ་དག་དང༌། །རིགས་དྲུག་ལག་སྦྱོང་ཡན་ལག་དྲུག་འགོད་དང༌། གནས་བདག་གཏོར་མ་ལུས་ལ་རྡོ་རྗེ་འགོད། །བདུད་གཞོམ་སྲུང་འཁོར་རྟེན་དང་གཙོ་བོ་བསྐྱེད། །རྒྱན་འགོད་འཁོར་ཚོགས་སྤྲོ་དང་བཀའ་བསྒོ་དང༌། །ཕུར་གདབ་བཟླས་པ་གཏོར་མ་མཆོད་བསྟོད་དང༌། །གཤེགས་གསོལ་ཚོགས་ཞིང་སྤྱན་འདྲེན་མཆོད་པ་བདུན། །ལམ་བསྟེན་ཞེས་པ་ཉི་ཤུ་རྩ་གསུམ་ལ། །སྲུང་འཁོར་སྐབས་སུ་ང་རྒྱལ་བཟུང་བ་གཉིས། །འཁོར་ཚོགས་སྤྲོ་ལ་དབྱེ་ན་སྡེ་ཚན་དྲུག །ཁ་ཅིག་ཁ་དག་པ་དང་རྡོ་རྗེས་སྦྱོང༌། །སོ་སོར་འདྲེན་པ་འཁྲུལ་པ་ཡིན་ཕྱིར་སྤང༌། །ཞེས་བྱ་ལ། ཡང་ན་འཆད་འགྱུར་ཡེ་ཤེས་ཀྱི་ཚོགས་ཀྱང་བསྣན་ཏེ།
རྡོ་རྗེའི་ཞལ་དག་རིགས་དྲུག་འགོད་པ་དང༌། །རྡོ་རྗེ་བཞི་དང་ཡན་ལག་དྲུག་རྣམས་འགོད། །བདུད་ཚོགས་གཞོམ་ཞིང་སྲུང་བའི་འཁོར་ལོ་བསྒོམ། །མཁའ་ལ་རྒྱལ་བའི་ཚོགས་རྣམས་རྟོགས་བྱས་ཏེ། །བླ་མེད་མཆོད་པ་རྣམ་པ་བདུན་གྱིས་མཆོད། །ལམ་བསྟེན་སྟོང་པ་ཉིད་ལ་དམིགས་པའོ། །ཞེས་སྔོན་འགྲོ་བཅུའི་ཐ་སྙད་མཛད་དེ་ཤིན་ཏུ་ལེགས་སོ།། །།གཉིས་པ་ཡེ་ཤེས་ཚོགས་གསོག་ནི། བཤད་མ་ཐག་པའི་སྔོན་འགྲོ་བཅུ་ལས། བཅུ་པ་སྟོང་ཉིད་ལ་དམིགས་པ་སྟེ། དངོས་གཞི་དཀྱིལ་འཁོར་རྒྱལ་མཆོག་གི་ནང་དུ་བསྡུས་ཀྱང་རུང་མོད་ཀྱི། འདི་ཡེ་ཤེས་ཚོགས་གསོག་ཡིན་ལ། ཚོགས་གསག་རྣམས་སྔོན་འགྲོའི་ཆོས་སུ་ཕྱི་ཁྱབ་ཏུ་གྲགས་པ་དང༌། རྒྱུད་འགྲེལ་འདི་ཉིད་དུ་ཡང་སྔོན་འགྲོའི་རྣམ་གྲངས་ཉིད་དུ་གསུངས་བའི་ཕྱིར། རེ་ཞིག་སྔོན་འགྲོ་ཉིད་ཀྱི་ཐ་སྙད་འདོགས་ཤིང༌། སྔོན་འགྲོ་རྣམ་པ་བཅུ་ལས་གཞན་རྣམས་འཁོར་དང་འདི་གཙོ་བོ་ཡིན་པར་རིག་པར་བྱའོ། །འདི་ལའང་བཞི་སྟེ། སྟོང་ཉིད་ཀྱི་དོན་བསམ་པ། འོད་གསལ་དུ་བསྡུ་བའི་རིམ་པ། དངོས་གཞི་སྟོང་ཉིད་ལ་མཉམ་པར་འཇོག་པ། རྗེས་ང་རྒྱལ་བཟུང་བ་སྟེ་བཞིའོ། །དང་པོ་ནི་འགྲེལ་ཆེན་ལས། དེ་ནས་རྣམ་པར་ཐར་པ་བཞི་བསྒོམ་པར་བྱ་སྟེ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུས་མ་བྱས་པ་བསྒོམ་པར་བྱའོ། །རྒྱུ་བ་དང་མི་རྒྱུ་བ་དང་བཅས་པའི་ཁམས་གསུམ་པོ་ཚིགས་སུ་བཅད་པ་འདིས་རྣམ་པར་དཔྱད་པར་བྱ་སྟེ། དངོས་པོ་མེད་ལ་སྒོམ་པ་མེད། །སྒོམ་པ་སྒོམ་པ་ཉིད་མ་ཡིན། །དེ་ལྟར་དངོས་པོ་དངོས་མིན་པས། །སྒོམ་པ་དམིགས་སུ་མེད་པའོ། །ཞེས་པའོ། །འདིའི་དོན་ནི་འཆད་པར་འགྱུར་བ་ལས་བརྗོད་པར་བྱའོ། །ཞེས་གསུངས་ཏེ། རྣམ་ཐར་བཞིའི་དོན་ཡིད་ལ་བསམས་ཤིང༌། ཚིགས་བཅད་དེ་དག་ནས་བརྗོད་
དགོས་པར་གསུངས་ལ། དེ་ཡང་སྟོང་ཉིད་གོ་ཡུལ་དུ་གཏན་ལ་ཕབ་སྟེ། རང་གཞན་སྣང་བ་ཐམས་ཅད་ལ་རྣམ་ཐར་བཞིའི་དོན་གྱི་རྣམ་པ་ལྷང་སྟེ་ཤར་བ་ཞིག་དགོས་སོ། །དེ་ཡང་བསྡུས་རྒྱུད་ལས། སྟོང་པ་དངོས་པོའི་ངོ་བོའི་རང་བཞིན་འགྲོ་བ་མཐའ་དག་འདི་ནི་དངོས་པོ་དག་གིས་རྣམ་པར་དམན། །དེ་ལས་སངས་རྒྱས་བྱང་ཆུབ་མེད་ཅིང་གཞན་ཕན་སྙིང་རྗེ་དག་དང་མཚན་མའི་དམ་བཅའ་མེད་པ་སྟེ། །ཞེས་རྣམ་ཐར་གསུམ་པོའི་ངོས་འཛིན་གསལ་བར་གསུངས་ཏེ། སྟོང་པ་ཉིད་ཀྱི་དོན་ནི། བརྟན་གཡོའི་འགྲོ་བ་མཐའ་དག་འདི་རྣམས་ཡང་དག་པ་མ་ཡིན་པའི་ཀུན་རྟོག་གི་འཁྲུལ་འཁོར་དངོས་པོ་སོ་སོའི་ངོ་བོ་མཚན་ཉིད་ཀྱི་རང་བཞིན་དུ་སྣང་ཡང་གཟུགས་སོགས་དངོས་པོ་སོ་སོ་དེ་དང་དེ་དག་རང་གི་ངོ་བོར་མ་གྲུབ་པས་དངོས་པོ་རང་ཉིད་རང་གི་ངོ་བོས་རྣམ་པར་དབེན་པའོ། །མཚན་མ་མེད་པ་ནི་སྣང་གྲགས་ཐམས་ཅད་རང་གི་ངོ་བོས་སྟོང་པའི་རྒྱུ་མཚན་དེ་ལས་སངས་རྒྱས་ཀྱི་བྱང་ཆུབ་གསར་དུ་ཐོབ་པར་སྣང་བ་ཡང་སྣང་བ་དེ་འཁྲུལ་པའི་ཆ་ཤས་སུ་རྟོགས་ཏེ། གདོད་མའི་ཆོས་དབྱིངས་ཁོ་ན་སངས་རྒྱས་ཡིན་པ་མ་གཏོགས། ཐོབ་བྱ་འབྲས་བུའི་མཚན་ཉིད་ཅན་གྱི་སངས་རྒྱས་ཀྱི་བྱང་ཆུབ་ཀྱང་བདེན་པར་མེད་ཅིང༌། འཁོར་བ་ལུས་སེམས་གནས་དོན་ཐམས་ཅད་ཀྱང་འཁྲུལ་སྣང་ཙམ་མ་གཏོགས། གནས་ཚུལ་ལ་གང་ཡང་མ་གྲུབ་པས་སེམས་ཅན་གཞན་ལ་ཕན་འདོགས་ཤིང་སྡུག་བསྔལ་སྤོང་འདོད་ཀྱི་སྙིང་རྗེ་ཡང་འཁྲུལ་ངོར་སྒྱུ་མ་ལྟ་བུའི་སྣང་བ་ཤར་བ་མ་གཏོགས། གཞན་དངོས་པོ་གང་ཡང་མེད་ཅེས་པ་ནི་མཚོན་བྱེད་དེ། །རྒྱུ་འཁོར་བའི་གནས་སྐབས་ལས་འབྲས་བུ་མྱང་འདས་དང༌། རྒྱུ་རང་ཉིད་བྱང་ཆུབ་ཐོབ་པས་འབྲས་བུ་སེམས་ཅན་སྨིན་གྲོལ་བྱེད་པ་སོགས་སྤྱིར་རྒྱུ་འབྲས་ལ་སོགས་པའི་མཚན་མ་ཐམས་ཅད་མེད་པ་དང༌། སྒོས་སུ་འབྲས་བུའི་མཚན་
མ་རྣམས་ཀྱང་ལྟོས་འཇོག་གི་དབང་གིས་རྒྱུར་བསྡུས་ནས། རྒྱུའི་མཚན་མ་མེད་པ་ཞེས་བྱའོ། །སྨོན་པ་མེད་པ་ནི། སེམས་ཅན་སྒྲོལ་བའི་ཕྱིར་སངས་རྒྱས་ཐོབ་པར་བྱའོ་ཞེས་པ་ལྟ་བུས་མཚོན་པའི་གང་དང་གང་གི་བྱ་བའི་འབྲས་བུ་སྟེ་ཐོབ་བྱ་འབྲས་བུའི་དངོས་པོ་ཐམས་ཅད་གནས་ཚུལ་ལ་ཅུང་ཟད་ཀྱང་མ་གྲུབ་པས་མཚན་མ་ལ་དམིགས་ཤིང་སྨོན་པའི་དམ་བཅའ་མེད་པ་སྟེ། གསུམ་པོ་དེ་ཡང་གནས་ཚུལ་ལ་དེ་དང་དེ་མེད་ཙམ་མ་ཡིན་ཏེ། སྤྲོས་པ་དེ་དག་སྤངས་བའི་དབྱིངས་དང་ཡེ་ཤེས་དབྱེར་མེད་དེ་ཡིན་ལ། དེ་འདྲ་དེ་མངོན་སུམ་དུ་རྟོགས་པའི་ཡེ་ཤེས་ནི་རྣམ་ཐར་གསུམ་དངོས་ཡིན་ན་སྐབས་འདིར་གསུམ་པོའི་དོན་ལ་སེམས་ངེས་པར་འཛིན་པས་འཇོག་པ་དེ། རྣམ་ཐར་གསུམ་གྱི་སྒྲུབ་པའམ་རྗེས་མཐུན་པ་ཡིན་ནོ། །དངོས་པོ་མེད་ལ་སོགས་ཚིགས་བཅད་ཀྱི་དོན་ལ། །ཐུན་མོང་ལྟར་ན་ཚིག་རྐང་དང་པོས་སྟོང་པ་ཉིད། གཉིས་པས་མཚན་མེད། གསུམ་པས་སྨོན་མེད་བསྟན་ཅིང༌། བཞི་པ་དོན་བསྡུ་བའོ། །དང་པོ་ནི། དངོས་པོ་ལྟ་ཞོག་དངོས་མེད་དེ་ཡང་མི་བསྒོམ་ཞེས་པ་དང༌། གཉིས་པ་ནི་རྒྱུ་འབྲས་སུ་ཞེན་ནས་མི་བསྒོམ་སྟེ། རྒྱུ་འབྲས་མ་གྲུབ་པའི་ཕྱིར་དེ་ཉིད་སྒོམ་པ་ནི་མཚན་མ་སྒོམ་པ་མིན་ཞེས་དང༌། གསུམ་པ་ནི་རང་ལས་ཕྱི་རོལ་ཏུ་སྣང་བའི་དངོས་པོ་རྣམས་གདོད་ནས་དངོས་པོར་མ་གྲུབ་པའི་ཕྱིར། བྱ་བྱེད་འདིས་འབྲས་བུ་འདིར་འགྱུར་བར་བྱའོ་སྙམ་པའི་སྨོན་པའི་ཡུལ་སྟོང་པའོ། །བཞི་པ་ནི། དངོས་པོའི་སྒོམ་པ་དབྱིངས་སུ་ཞིག་སྟེ་དམིགས་པར་མི་འགྱུར་ཞེས་པའི་དོན་དུ་སྒྲོན་གསལ་ལས་བཤད་པ་དང་དོན་གཅིག་གོ །འོན་ཀྱང་འདིའི་ཐུན་མོང་མ་ཡིན་པ་ལྷག་པོ་ནི། དངོས་པོ་མེད་པ་ནམ་མཁའ་དང་སྟོང་གཟུགས་ལ་ཡིད་བྱེད་ཀྱི་སྒོམ་པ་མེད་པར་འཇོག་ཅིང༌། མཚན་མའི་སྒོམ་པ་ནི་ཡང་དག་པའི་སྒོམ་པ་མ་ཡིན་ལ།
དེ་ལྟར་སྟོང་གཟུགས་ཡེ་ཤེས་ཀྱི་དངོས་པོ་ཞེས་བྱ་བ་དེ་ནི་དངོས་པོ་ཡིན་ན་དམིགས་པ་དང་བཅས་པར་འགྱུར་ཡང་འདི་དངོས་པོ་མ་ཡིན་པས་འདི་ལ་སྒོམ་པ་ནི་དམིགས་སུ་མེད་པའོ། །ཞེས་པའི་དོན་ཡིན་ཏེ། སྔར་སྟོང་ཉིད་ཀྱི་དོན་རྣམ་རྟོག་གིས་ཡིད་ལ་དྲན་པར་བྱས་ནས། འཆད་པར་འགྱུར་བ་ལྟར་འོད་གསལ་དུ་བསྡུས་པའི་འཇུག་ཏུ་གོ་ཡུལ་ཙམ་ལ་མ་བཞག་པར་དབྱིངས་སྤྲོས་པ་དང་བྲལ་བ་དེ་ལ་འཛིན་པ་རྣམ་རྟོག་མེད་པར་འཇོག་ཅེས་པའི་དོན་ཡིན་ལ། འཆད་པར་འགྱུར་བ་ལས་བརྗོད་པར་བྱའོ་ཞེས་གསུངས་པའི་འཆད་འགྱུར་ནི། སྒྲུབ་ལེའི་སོར་སྡུད་སོགས་དང༌། ཡེ་ཤེས་ལེའུའི་མཆོག་མི་འགྱུར་དང༌། གཞན་ཡང་རྒྱུད་ཚིག་གི་གནས་སྐབས་མང་པོ་ལ་དགོངས་པ་སྟེ། གཙོ་བོར་སོར་སྡུད་མི་རྟོག་པའི་རྣལ་འབྱོར་ལ་དགོངས་ཀྱི། གྲུབ་མཐའ་སྡེ་བཞིའི་ནང་གི་དབུ་མའི་སྡེ་པ་པ་རྣམས་ཀྱི་འདོད་ཚུལ་ཙམ་ལ་དགོངས་པ་ནི་ག་ལ་ཞིག་སྟེ། དེ་ཡིན་ན་སྔར་བཤད་ཟིན་པ་ལས་ཤེས་པར་བྱའོ་ཞེས་གསུང་པར་རིགས་ཏེ། ལྟ་བ་དེ་ནི་ནང་ལེའི་འཇུག་ཏུ་ཅི་རིགས་པར་གསུངས་ཀྱི། འདི་མན་ཆད་དུ་མ་གསུངས་ཤིང༌། དེར་མ་ཟད་འགོག་པར་ཡང་མཛད་དོ། །ཡང་རྒྱུད་ཚིག་སྔ་མའི་འཕྲོས་ལས། མཐའ་དག་དེ་ལྟར་ཤེས་ནས་དེ་ལྟ་ན་ཡང་མི་ཡི་བདག་པོ་སྐུ་གསུང་ཐུགས་ཀྱི་རྡོ་རྗེ་ནི། །དཔག་མེད་ཡོན་ཏན་དཀྱིལ་འཁོར་དབང་པོ་དཀྱིལ་འཁོར་ལ་ནི་བྱང་ཆུབ་སེམས་དཔའ་རྣམས་ཀྱིས་བསྒོམ་པར་བྱ། །ཞེས་གསུངས་ཏེ། མཐའ་དག་དེ་ལྟར་ཤེས་ནས་ཞེས་པས་བཞི་པ་འདུས་མ་བྱས་ཀྱི་རྣམ་ཐར་ཟུར་གྱིས་འཕངས་སོ། །འདུས་མ་བྱས་ཀྱི་དོན་དེ་བཞིན་གཤེགས་པའི་སྙིང་པོ་གདོད་ནས་ལྷུན་གྱིས་གྲུབ་པ། རྒྱུ་རྐྱེན་ལས་གྲོལ་ཞིང༌། སྤྲོས་བྲལ་རྟག་པའི་གནས་ལུགས་དེ་ཡིན་ཡང་དེ་ཉིད་རྣམ་ཐར་གསུམ་ཀར་ལ་ཁྱབ་
ཅིང་དབྱེ་བ་མེད་པས་གསུམ་པོ་ཉིད་འདི་ཡིན་ལ་འདི་ཡང་གསུམ་པོ་ཉིད་ཡིན་པའི་ཕྱིར། དེ་ལྟར་ཞེས་སྔ་མ་དང་འདྲ་བར་གསུངས་པ་ཡིན་ཞིང༌། གནས་ལུགས་བདེ་གཤེགས་སྙིང་པོ་དེ་ཉིད་སྤྲོས་བྲལ་ཡིན་པའི་ཕྱིར་སྟོང་ཉིད་དང༌། གང་གིས་ཀྱང་མ་བསྐྱེད་པའི་ཕྱིར་མཚན་མེད་དེ་རྒྱུ་འབྲས་དང་བྲལ་བའི་ཕྱིར་དང༌། ཡང་དེ་ཉིད་རྫོགས་པའི་བྱང་ཆུབ་ཏུ་གདོད་ནས་བཞུགས་པའི་ཕྱིར། དགོས་དོན་གསར་དུ་སྒྲུབ་པའི་བྱ་བྱེད་སྤངས་པས་སྨོན་མེད་དོ། །དེས་ན་ངོ་བོའི་སྒོ་ནས་གཅིག་ཡིན་ཡང་རྣམ་པ་ལྡོག་ཆའི་སྒོ་ནས་སྔ་མ་གསུམ་དགག་ཕྱོགས་དང༌། འདི་སྒྲུབ་ཕྱོགས་ཡིན་ལ། གཞན་དག་འདུས་མ་བྱས་ཀྱི་དོན་སབ་ཏ་སུབ་ཏ་གཞན་དུ་འཆད་པ་ལ་སྙིང་པོ་མེད་དོ། །དེ་ལྟར་ཀུན་རྫོབ་ཀྱི་ཆོས་ཐམས་ཅད་རྩ་བྲལ་ཉིད་ཀྱི་ཕྱིར་སྤོང་རྒྱུ་མེད་ལ། དོན་དམ་གྱི་ཡེ་ཤེས་གདོད་ནས་གྲུབ་པའི་ཕྱིར། སྒྲུབ་རྒྱུ་མེད་པ་དེ་ལྟ་བུ་གནས་ལུགས་ལ་ཡིན་ན་ཡང་འཁྲུལ་ངོར་སེམས་ཀྱི་དྲི་མ་སྦྱང་བ་དང༌། གནས་སྐབས་སུ་ལས་དང་དངོས་གྲུབ་འཇིག་རྟེན་པ་སྣ་ཚོགས་པས་སེམས་ཅན་ལ་ཕན་འདོགས་པའི་ཕྱིར་དང༌། ཕུགས་སུ་ཡང་གཟུགས་སྐུ་གསར་དུ་བསྒྲུབས་ཏེ་སེམས་ཅན་ལ་ཆོས་སྟོན་པའི་རྒྱུ་ཁྱད་པར་ཅན་དུ་འགྱུར་བའི་ཕྱིར་དུ་སྐུ་གསུང་ཐུགས་ཀྱི་དཀྱིལ་འཁོར་བསྐྱེད་རིམ་རྣམ་རྟོག་གི་སྒོ་ནས་ཀྱང་བསྒོམ་པར་བྱའོ། །ཞེས་པ་སྟེ། དེ་ལ་ཡེ་ཤེས་ཚོགས་གསོག་རྣམ་ཐར་གསུམ་གྱི་སྒོ་ནས་བྱེད་པའི་རྒྱུ་མཚན་དེའི་འབྲས་བུ་སྐུ་གསུང་ཐུགས་ཀྱི་དཀྱིལ་འཁོར་སྒོམ་པར་སྦྱར་ཏེ་གསུངས་པ་ཡིན་པས་མདོར་བསྟན་པ་ཡིན་ལ། ང་རྒྱལ་བཟུང་བ་ལ་བཞི་པ་འདུས་མ་བྱས་ཀྱང་གསུངས་པ་བཞིན་དཀྱིལ་འཁོར་ཡང་བདེ་བ་ཆེན་པོའི་འཁོར་ལོ་དང་སྦྱར་བར་བྱའོ། །ཡང་ན་ལྷ་སྐུ་དང་ས་བོན་དང་སྟོང་པ་དང་
བདེ་བ་རྣམས་ལ་དཀྱིལ་འཁོར་བཞི་ཞེས་བཤད་ཀྱང་རུང་ངོ༌།། །།གཉིས་པ་ནི། རྣམ་ཐར་བཞིའི་དོན་བསྒོམས་པ་དེས་ཕྱི་སྣོད་བཅུད་གཞན་རྣམས་རང་ཤུགས་ཀྱིས་མི་དམིགས་པར་འགྱུར་ལ། ནང་ལུས་ཀྱི་དབང་དུ་བྱས་ནས་བདག་ཉིད་ཀྱི་ལུས་ལ་གནས་པའི་ཆུ་ཁམས་ཀྱིས་མི་ཉམས་པ་སོགས་གོ་སླ་ལ། རླུང་ནམ་མཁའ་ལ་ཐིམ་པའི་རྗེས་སུ། རྒྱུད་ལས། སེམས་ནི་མེ་དང་མུན་པའི་མཐའ་སྟེ་ཡུལ་དང་རྣམ་པར་བྲལ་བ་དབུས་ཀྱི་ས་ལ་བཞག་པར་བྱ། །ཞེས་གསུངས་པ་ཡིན་པས། མེ་དང་མུན་པའི་མཐའ་ཞེས་པ་ཡན་ཆད་འོད་གསལ་དུ་འཇུག་པའོ། །དེ་དག་གི་སྦྱང་བྱ་ནི། ལུས་ཅན་རྣམས་འཆི་བ་དང་ཉེ་བའི་གནས་སྐབས་སུ་བབ་པ་ན། གཟུགས་སོགས་ཡུལ་དང་མིག་སོགས་དབང་པོ་དང༌། གནས་འཇིག་རྟེན་ཁམས་ཀྱི་སྣང་བ་རྣམས་རིམ་གྱིས་ཐིམ་པ་ནི། རྣམ་ཐར་བཞིའི་དོན་ཡིད་བྱེད་ཀྱི་སྒོ་ནས་བསྒོམས་པས་སྦྱོང་ལ། དེ་ནས་ལུས་ཀྱི་ཆུ་ཁམས་བསིལ་ལ་རྩུབ་པ་དེ་ཁྱབ་བྱེད་ཀྱི་རླུང་གིས་ལུས་ཀྱི་ཆ་ཤས་ཀུན་དང༌། ཁྱད་པར་སྲོག་འཛིན་པའི་གནས་ཀུན་ཏུ་དྲངས་བས་ཁ་ཟས་ཀྱི་དྭངས་སྙིགས་ཕྱེ་སྟེ་དྭངས་མ་ཁྱབ་པར་བྱེད་པ་དང༌། མདངས་སྟོབས་ཀྱི་རྒྱུར་གྱུར་པའི་མེ་དྲོད་རྣམས་ཉམས་པར་བྱེད་ཅིང༌། དེ་ཉམས་པས་རུས་པ་དང་ས་ལ་སོགས་པ་སྲ་བའི་ཁམས་ཀྱི་སྟོབས་ཉམས་སྟེ་དེ་དག་གིས་སེམས་རྟེན་ཅིང་འཚོ་བར་ནུས་པ་ཡང་རིམ་གྱིས་ཉམས། དེ་ལྟར་སའི་སྟོབས་ཉམས་པ་ན། ཆུའི་དྭངས་མ་ལུས་སེམས་སྡུད་ཅིང་འཚོ་བར་བྱེད་པ་ཞིག་ཡོད་པ་དེའང་གསར་བ་མ་འཕེལ་ཞིང་སྔར་རྒྱུན་ཡོད་པ་རྣམས་རླུང་གིས་སྐམ་པར་བྱེད། དེ་ནས་རླུང་དེ་དག་ཀྱང་སྡོང་ཟླ་གཞན་མེད་པས་རིམ་གྱིས་དེངས་པར་འགྱུར་ཏེ་རྩ་སྦུབས་ཀྱི་ནམ་མཁར་ཐིམ་པ་ཡིན་ལ། དེ་ཡན་ཆད་ལ་ཆུའི་ཁམས་ཀྱིས་
མེ་ཉམས་པ་ནི། ཆུ་ཁམས་ནད་རིགས་ཀུན་དང་འདྲེས་པས་མེ་དྲོད་ཉམས་པར་བྱེད་པ་ཙམ་ཡིན་པས་འཆི་བའི་སྔ་རོལ་སྔ་མོ་ནས་འབྱུང་སྟེ། དབང་ཡུལ་ཅུང་ཟད་ཐིམ་པའི་སྐབས་མན་ངག་གཞན་ལས་རགས་པ་ཐིམ་པར་འཆད་པའི་དུས་དེ་ཙམ་ཡིན་ལ། ས་ཆུ་ལ་ཐིམ་པ་ནི་སྤྱི་དང་འདྲ་བའི་འབྱུང་བའི་ཐིམ་ཚུལ་དང༌། ཆུ་རླུང་གིས་བསྐམས་པར་བྱས་པ་ན། མེ་རླུང་སྦྲགས་པས་བསྐམས་པ་ཡིན་ཞིང༌། སྔར་ཉམས་པར་བཤད་པའི་མེ་ནི་མེ་རགས་པ་ཕོ་བའི་མེ་དྲོད་སོགས་ཡིན་ལ། འདིར་མེ་དང་རླུང་སྡེབས་པའི་མེ་ནི་ཕྲ་བ་རྩ་ནང་གི་དྲོད་ཡིན་པས་མི་གཅིག་ལ། ཆུ་ཐིམ་ཞིང་བསྐམས་པའི་རྗེས་སུ་མེ་དེ་ཡང་རང་དང་ལྷན་ཅིག་པའི་རླུང་གི་ནང་དུ་བག་ལ་ཞ། དེ་རྗེས་རླུང་ཡང་དེངས་པ་ཡིན་པས་རླུང་གིས་ཆུ་བསྐམས་ཞེས་པས་ཆུ་ཁམས་དེ་མེ་རླུང་གཉིས་གར་ལ་ཐིམ་པ་ཡིན་ཡང་མེའི་བགོ་སྐལ་དུ་བྱས་རླུང་ནམ་མཁའ་ལ་ཐིམ་ཞེས་པ་མེ་རླུང་དང་རླུང་ནམ་མཁའ་ལ་ཐིམ་པས་གཉིས་ཀ་བསྡུས་པ་ཡིན་ཏེ། མེ་རླུང་འདྲེས་པ་དེ་སྟོབས་ཇེ་ཆུང་ཇེ་ཆུང་ལ་སྔོན་ལ་མེའི་ནུས་པ་ཟད། དེ་རྗེས་མི་རིང་བར་རླུང་ཡང་ཐིམ་པ་ཡིན་པས་སྐབས་དེའི་ཐོག་མ་མེ་རླུང་གཉིས་ཀའི་ཐིམ་ཚུལ་ཡོད་ཀྱང༌། མེའི་སྐལ་བར་ཐོབ་པས་མེ་རླུང་ལ་ཐིམ་པའི་སྐབས་ཡིན་པ་དང༌། མེ་ཟད་པའི་རྗེས་སུའང་ལུས་པའི་རླུང་རྣམས་ནམ་མཁའ་ལ་ཐིམ་པ་ནི་རླུང་ཁོ་ནའི་སྐལ་བ་ཡིན་པས་རླུང་ནམ་མཁའ་ལ་ཐིམ་པའོ། །དེས་ན་སྐབས་གཞན་དུ་ས་ཆུ་མེ་རླུང་གི་ཐིམ་ཚུལ་གསུངས་པ་དང་འདི་མི་འགལ་བར་མ་ཟད་འདིས་དེ་གསལ་བར་བྱེད་པའི་རྒྱུ་མཚན་ཡང་དེ་བཞིན་ཡིན་ནོ། །འདིར་མེ་ལོགས་སུ་མི་སྨོས་པའི་རྒྱུ་མཚན་མེ་རགས་པ་རྣམས་སྔ་རོལ་ཏུ་ཉམས་ཟིན་ནས་རིང་ཞིག་ལོན་པས་སྐབས་འདིར་སྟོབས་ཆུང་བ་ལ་དགོངས་པའོ། །
དེས་ན་དམིགས་པས་སྒོམ་ཚུལ་ལ་གནོད་བྱེད་ཆུ་དང་གཞོམ་བྱ་མེ་ས་ཆུ་རླུང་བཞིའི་རིམ་པ་ལས་མི་དགོས་ཀྱང་སྦྱང་བྱའི་སྐབས་འདིར་གནོད་བྱེད་རགས་པ་རླུང་ཆུ་གཉིས་དང༌། ཐིམ་རིམ་འབྱུང་བ་ལྔ་ཅར་ཚང་བ་ཡིན་ནོ། །ཁ་ཅིག་དབུ་མའི་ནང་གི་ཆུ་མེ་ས་རླུང་གི་ཟློག་ཚུལ་དང་སྦྱོར་བ་ནི་སྤྱིར་མི་ལེགས་པ་མིན་ཀྱང༌། སྐབས་འདིའི་རྒྱུད་འགྲེལ་དང་མི་མཐུན་ནོ། །དེ་ལྟར་ནམ་མཁའ་ཡང་ཡེ་ཤེས་ལ་ཐིམ་པའི་འོག་ཏུ་བཤང་གཅིའི་རྩ་དུང་ཅན་མར་འགགས་ཤིང༌། རོ་རྐྱང་ཡང་དབུ་མར་འགགས་པ་ན་མུན་པ་དབུ་མ་དང་མེ་དུང་ཅན་ཡང་གཅིག་ཏུ་འདྲེས་པའི་མཐའ་སྟེ། གནས་སྐབས་དེར་འཆི་བ་འོད་གསལ་སྣང་མེད་ཀྱི་ཆ་མངོན་དུ་བྱེད་དོ། །དེ་དག་སྦྱངས་འབྲས་ལ་སྦྱར་ན། ཀུན་རྫོབ་ཐམས་ཅད་བདེན་མེད་དུ་གཟིགས་ཤིང༌། མ་དག་པའི་ཕུང་ཁམས་ཐམས་ཅད་ཆོས་ཉིད་དུ་ཐིམ་པ་ཙམ་མཚོན། རྫོགས་རིམ་གྱི་སྨིན་ཚུལ་ནི། རྣམ་ཐར་སྒོ་བཞི་ལྟོས་མེད་བཞི་ལྡན། ཐིམ་རིམ་གྱི་མཐར་ནམ་མཁའ་སྒོམ་པ་ཕྱིའི་ནམ་མཁའ། མེ་དང་མུན་པའི་མཐའ་ནང་གི་ནམ་མཁའ་སྟེ་སོར་སྡུད་ཀྱི་རྣལ་འབྱོར་རོ།། །།གསུམ་པ་འོད་གསལ་སྟོང་ཉིད་ལ་མཉམ་པར་འཇོག་པ་ནི། ཡུལ་དང་རྣམ་པར་བྲལ་བ་དབུས་ཀྱི་ས་ལ་བཞག་པར་བྱ་ཞེས་པས་བསྟན་ཏེ། ཡུལ་དང་རྣམ་པར་བྲལ་བ་ནི་སྤྲོས་བྲལ་དང་སྟོང་གཟུགས་རོ་གཅིག་པ་དངོས་པོ་དང་དངོས་མེད་གཉིས་ཀ་མ་ཡིན་པའི་དབུས་ཀྱི་ས་ལ་བཞག་ཅེས་པའོ། །དེ་ལྟར་ན་སྟོང་པ་འདི་ནི་སྤྲོས་པ་དང་བྲལ་ཙམ་མ་ཡིན་ཏེ། དབུས་ཀྱི་ས་ཞེས་པས་དོན་དམ་པའི་སྣང་སྟོང་ཟུང་འཇུག་རྣམ་པ་ཐམས་ཅད་པའི་སྟོང་པ་ཉིད་དོ། །འདིས་སྦྱང་བྱ་འཆི་བ་འོད་གསལ་སྣང་བཅས་ཀྱི་ཆ་རྣམས་སྦྱོང་ཞིང༌། སྦྱངས་འབྲས་སྤྲོས་པ་ཐམས་ཅད་སྤངས་ཀྱང་ཡེ་ཤེས་ཀྱི་སྣང་བ་རྒྱས་པའི་
ཆོས་སྐུ་དངོས་མཚོན་ལ། རྫོགས་རིམ་ལ་སོར་སྡུད་ཀྱི་གནས་སྐབས་དང་པོ་མུན་པ་ལས་འདས་ནས་རྟགས་སྣང་སྣ་ཚོགས་པ་འཆར་བ་མཚོན་ནོ།། །།བཞི་པ་ནི། དེ་ལྟར་བསྒོམས་པ་ལ་དམིགས་ནས། ཤུ་ནྱ་ཏ་སོགས་རྣམ་ཐར་བཞིའི་ང་རྒྱལ་བྱེད་པ་ཡིན་པ། སྔ་མ་ལས་ལངས་པའི་རྗེས་ཐོབ་ཡིན་པས་བར་དོ་སྦྱོང་བྱེད་དེ་དོན་འབྲེལ་ཆགས་པའི་སྒོ་ནས་འདིར་ཡང་བརྗོད་ཀྱི། དངོས་གཞི་དཀྱིལ་འཁོར་རྒྱལ་མཆོག་དངོས་སུ་གཏོགས་པས་ད་ལྟ་ཉིད་དུའང་ཅུང་ཟད་འཆད་པར་འགྱུར་རོ། །ཡང་དེ་ཙམ་དུ་མ་ཟད་སྟོང་ཉིད་ལ་དམིགས་པའི་སྐོར་འདི་དག་ཐམས་ཅད་དངོས་གཞིར་ཡང་བྱེད་པའི་རྒྱུ་མཚན་ནི་འདི་རྣམས་བྱང་ཆུབ་རྣམ་པ་བཞིའི་ནང་ནས་སྟོང་ཉིད་བྱང་ཆུབ་དངོས་ཡིན་ཞིང༌། དེ་ཉིད་ནང་རྫོགས་རིམ་ལ་སོར་སྡུད་དང་སྦྱོར་བར་ཡང་གསུངས་པས་ཤེས་སོ།། །།གཉིས་པ་དངོས་གཞི་ལ། ལྷའི་རྣལ་འབྱོར་གྱི་རིམ་པ་ཇི་ལྟར་སྒོམ་པའི་ཚུལ་གྱི་རིམ་པའི་གཙོ་བོ་ནི་སྐབས་འདིར་བསྙེན་སྒྲུབ་ཡན་ལག་བཞིར་གསུངས་ཏེ། ཡེ་ལེའི་བཅུ་གཉིས་པར་མངལ་གྱི་ལུས་བསྐྱེད་པ་ཇི་ལྟ་བ་དེ་བཞིན་དུ་ལྷ་བསྐྱེད་པ་ལ་དཀྱིལ་འཁོར་རྒྱལ་མཆོག་བསྙེན་པའི་ཡན་ལག་གོ །ངག་བསྐྱེད་པ་ཇི་ལྟ་བ་དེ་བཞིན་དུ་ལས་རྒྱལ་མཆོག་དང་ཉེ་བར་སྒྲུབ་པའོ། །བྱང་ཆུབ་སེམས་ཀྱི་ཐིག་ལེ་བསྐྱེད་པ་ཇི་ལྟར་བ་དེ་བཞིན་དུ་ཐིག་ལེའི་རྣལ་འབྱོར་དང་སྒྲུབ་པའོ། ཁུ་བ་འཕོ་བ་ན་བདེ་བ་བསྐྱེད་པ་ཇི་ལྟ་བ་དེ་བཞིན་དུ་ཕྲ་མོའི་རྣལ་འབྱོར་དང་སྒྲུབ་པ་ཆེན་པོའོ། །ཞེས་འགྲེལ་ཆེན་ལས་འབྱུང་སྟེ། དེས་ན་སྐུ་རྫོགས་པ་བསྙེན་པའི་ཡན་ལག་དཀྱིལ་འཁོར་རྒྱལ་མཆོགགསུང་རྫོགས་པ་ཉེར་སྒྲུབ་ཀྱི་ཡན་ལག་ལས་རྒྱལ་མཆོག །ཐིག་ལེ་རྫོགས་པ་སྒྲུབ་པའི་ཡན་ལག་ཐིག་ལེའི་རྣལ་འབྱོར། བདེ་བ་རྫོགས་པ་སྒྲུབ་པ་ཆེན་པོའི་ཡན་ལག་ཕྲ་མོའི་
རྣལ་འབྱོར་ཏེ་བཞིའོ།། །།དང་པོ་ལ་དཀྱིལ་འཁོར་རྒྱལ་མཆོག་དངོས་བཤད་པ་དང༌། དེའི་ངག་དབྱེའི་རིམ་པ་རྣམས་བཤད་པ་གཉིས་སོ། །དང་པོ་ལ་ཐུན་མོང་མ་ཡིན་པའི་སྟོང་ཉིད་སྒོམ་པ། རྟེན་གཞལ་ཡས་ཁང་བསྐྱེད་པ། བརྟེན་པ་ལྷ་རྫོགས་པ། མཛད་པ་སྙིང་རྗེའི་དབང་བསྐུར་ཏེ་བཞི་ལས། དང་པོ་ནི། གོང་དུ་བཤད་མ་ཐག་པ་ལྟར་གང་ཡང་མི་དམིགས་པ་རྣམ་མེད་ཀྱི་སྟོང་ཉིད་ལས་ལངས་ཏེ། རྣམ་ཀུན་མཆོག་ལྡན་གྱི་སྟོང་ཉིད་ལ་དམིགས་ནས་སྔགས་ཀྱི་ང་རྒྱལ་བཟུང་བ་བཞི་པོ་བྱེད་ཅིང༌། དེའི་རྒྱུན་ཅུང་ཟད་སྐྱོང་བ་སྟེ། འདི་དག་ལ་རྣལ་འབྱོར་པ་སོ་སོར་སྡུད་པའི་ཉམས་མྱོང་ཅུང་ཟད་སྐྱེས་པ་ཞིག་གིས། འདི་བསྒོམས་ན་སྟོང་གཟུགས་ཀྱི་སྣང་བ་ཁྱད་པར་ཅན་དངོས་སུ་འབྱུར་བས་དེ་ལ་དམིགས་ཏེ་སྒོམ་པ་ཡིན་ལ། རྫོགས་རིམ་མ་བསྒོམ་པ་དག་གིས་རྫོགས་རིམ་གྱི་གནས་སྐབས་སུ་དེ་ལྟ་བུ་འབྱུང་བར་འགྱུར་བ་དེར་མོས་པ་བྱེད་པ་སྟེ། དེ་ལྟར་ན་ཕྱོགས་ཐམས་ཅད་ཀུན་ཏུ་ཁྱབ་པའི་སྟོང་གཟུགས་སུ་མོས་པ་འདི་ནི། འོག་ནས་འབྱུང་བ་ལྟར་བསྒོམ་རྒྱུའི་དཀྱིལ་འཁོར་ཐམས་ཅད་སྟོང་གཟུགས་ལས་གྲུབ་པ་དག་པ་ཡེ་ཤེས་ཀྱི་སྣང་བར་མོས་པའི་ཚུལ་དུ་ཤུགས་ལ་རྟོགས་པའི་ཕྱིར་ཡིན་ལ། བསྐྱེད་རིམ་གྱི་སྐབས་འདིར་ཐོག་མར་ཡེ་ཤེས་ཀྱི་དཀྱིལ་འཁོར་དུ་མོས་སྒོམ་ཁོ་ན་དང༌། ཕྱིས་གོམས་ནས་ཡེ་ཤེས་ཀྱི་དཀྱིལ་འཁོར་རྗེས་མཐུན་པའམ་འདྲ་འབག་ལམ་དུ་བྱེད་ནུས་པ་ཡིན་ནོ།། །།གཉིས་པ་རྟེན་གཞལ་ཡས་ཁང་བསྐྱེད་པ་ལ། རྟེན་གཞལ་ཡས་ཁང་ཉིད་སྒོམ་ཚུལ་དང༌། དེའི་ཕྱི་ནང་གཞན་གསུམ་གྱི་དག་སྦྱོར་བསྟན་པའོ། །དང་པོ་ལ་འོག་གཞི་འཇིག་རྟེན་གྱི་ཁམས་བཤད་པ། བཞུགས་གནས་གཞལ་མེད་ཁང་བཤད་པ། སོ་སོའི་གདན་གྱི་རིམ་པ་སྟེ་གསུམ་ལས།
དང་པོ་ནི། རྡོ་རྗེའི་རང་བཞིན་རྩིབས་བཅུ་པ་སྒོམ་པ་ནས། འཇིག་རྟེན་གྱི་ཁམས་སྔ་མ་བཞིན་དུ་གྲུབ་པར་གྱུར་ཞེས་པའི་བར་རོ། །ཆོས་འབྱུང་ནམ་མཁའི་ཁམས་ཞེས་པའི་སྐབས་སུ། འགྲེལ་བར། འདིར་ཕྱི་དང་ནང་དུ་བསྐྱེད་པའི་མཚན་མ་ནི། ནམ་མཁའི་ཁམས་མཐའ་ཡས་པ་དང༌། ཤེས་རབ་ཀྱི་ཆོས་འབྱུང་གྲུ་གསུམ་མོ། །ཕྱི་རོལ་ཏུ་མིའི་ཡུལ་ལ་རྡོ་རྗེའི་རང་བཞིན་རྩིབས་བཅུ་ཟླུམ་པོ་སྟེ་ནང་དུ་མའི་ལུས་སོ། །ཞེས་འབྱུང་བས་ཆོས་འབྱུང་གྲུ་གསུམ་ངེས་པར་བསྒོམ་དགོས་པ་དང། དེའི་ནང་དུ་རྩིབས་བཅུ་པ་ངེས་པར་བསྒོམ་དགོས་པ་ཡིན་ནམ་སྙམ་ན། ལར་ནི་དེ་ལྟར་སྒོམ་པ་ཡང་མི་འགལ་མོད། གྲུ་གསུམ་ཞེས་གསུངས་པ་བསྐྱེད་རིམ་གྱི་སྐབས་སུ་ཆོས་འབྱུང་གྲུ་གསུམ་མཐའ་གཅིག་ཏུ་བསྒོམ་དགོས་པའི་ངེས་པ་སྟོན་པ་མིན་ཏེ། འདིར་ཆོས་འབྱུང་ནམ་མཁའི་ཁམས་སྒོམ་པ་ནི། སྦྱང་བྱ་ཕྱི་འཇིག་རྟེན་ཁམས་ལ་སྦྱར་ན། འཇིག་རྟེན་གྱི་ཁམས་འཆགས་པའི་གནས་ནམ་མཁའ་མཐའ་མེད་དང་སྦྱོར། ནང་ལུས་ལ་སྦྱར་ན་ཤེས་རབ་སྟེ་མའི་ཆོས་འབྱུང་སྐྱེ་གནས་གྲུ་གསུམ་དང་སྦྱོར་ཞེས་པ་ཡིན་ལ། རྩིབས་བཅུ་ཟླུམ་པོ་སྒོམ་པ་ནི། མིའི་ཡུལ་ཞེས་ཐ་སྙད་མཛད་པའི་དོན་ཕྱི་འཇིག་རྟེན་ཁམས་ལ་སྦྱར་ན། རྒྱུད་ལས། དེ་ཡི་ཕྱི་རོལ་སྟོང་པ་གཅིག་པུ་སྲིད་པ་གསུམ་བྲལ་ཡོན་ཏན་མེད་ཅིང་དེ་ཉིད་ཀྱིས་དམན་པ། །ཞེས་གསུངས་པ་ལྟར་གྱི་འཇིག་རྟེན་ཁམས་ཀྱི་མཐའ་སྟོང་པའི་ཁོར་ཡུག་གིས་བསྐོར་བ་དང༌། ནང་ལ་སྦྱར་ན་མའི་ལུས་པོ་ཞེས་པའི་དོན་ནོ། །འཇིག་རྟེན་ཁམས་གྱི་སྟོང་པའི་ཁོར་ཡུག་ལ་རྩིབས་བཅུ་ཟླུམ་པོ་ཇི་ལྟར་འཐད་སྙམ་ན། ཟླུམ་པོ་ནི་དེའི་གཟུགས་དངོས་ཡིན་ལ། རྩིབས་བཅུའི་མཚོན་དོན་ཕྱོགས་བཅུའོ། །ནམ་མཁའ་དེ་ནི་རྡོ་རྗེའི་གུར་གྱི་
མིང་ཅན་ཏེ། གཞོམ་གཞིག་དང་བྲལ་བའི་ཕྱིར་རྡོ་རྗེ་དང༌། སྟེང་འོག་ཕྱོགས་མཚམས་ཀུན་ཏུ་བསྐོར་བའི་ཕྱི་གུར་གྱི་ཐ་སྙད་ཀྱང་བཞག་ གོ །དེས་ན་སྒྲུབ་ཐབས་དཔག་བསམ་ལྗོན་ཤིང་ལས། དེ་ཡང་ཕྱི་ནང་གི་དངོས་ པོ་རྣམས་སྐྱེ་བའི་གནས་ནི། ནམ་མཁའི་ཁམས་དང་ཤེས་རབ་ཀྱི་ཆོས་འབྱུང་ ངོ༌། །དེ་ཉིད་ཀྱིས་ན་ཕྱི་རོལ་ཏུ་མི་ཡུལ་ལ་རྡོ་རྗེའི་གུར་དང༌། ནང་དུ་མའི་ལུས་ཏེ་ཞེས་རྒྱུད་འགྲེལ་གྱི་དགོངས་པ་ཇི་ལྟ་བ་བཞིན་དུ་གསུངས་ སོ། །དེས་ན་ཕྱི་ནང་གི་དབྱེ་བ་ཡང༌། ཕྱི་འཇིག་རྟེན་ཁམས་དང་བསྟུན་ན་རྩིབས་བཅུའི་ཕྱི་རོལ་ཀྱི་ནམ་མཁའ་ཆོས་འབྱུང་དང༌། རྩིབས་བཅུ་པ་ཉིད་དེའི་ནང་དུ་སྒོམ་པ་ཡིན་ཏེ། ནམ་མཁའ་མཐའ་མེད་ཀྱི་དབུས་ན་འཇིག་རྟེན་ཁམས་ཀྱི་ནམ་མཁའི་ཁོར་ཡུག་ཡོད་པས་སོ། །ནང་ལུས་དང་བསྟུན་ན། རྩིབས་བཅུའི་ནང་གི་ནམ་མཁའ་ཆོས་འབྱུང་ཡིན་ཏེ། སྐྱེ་གནས་ལུས་ཀྱི་ཆ་ཤས་ནང་ཚན་ཡིན་པའི་ཕྱིར། ལུས་ཀྱི་ཕྱི་རོལ་ཏུ་འཐད་པ་མ་ཡིན་པས་སོ། །དེས་ན་དེ་གཉིས་གདམ་ཁ་ཡིན་པའི་ཕྱིར། གཅིག་གིས་གཅིག་ཤོས་མི་འགོག་ཀྱང་དུས་མཉམ་དུ་སྒོམ་མི་དགོས་པས་ཆོས་འབྱུང་ནམ་མཁའི་ཁམས་ཉིས་སྦྲག་གི་རྣམ་པ་མི་སྒོམ་ཞིང༌། མན་ངག་གི་ཁྱད་པར་ཡིན་ན་མ་གཏོགས། གྲུ་གསུམ་གྱི་རྣམ་པ་ཡང་བསྒོམ་མི་དགོས་ཏེ། ནམ་མཁའི་ཁམས་ཟླུམ་པོ་ཉིད་ཆོས་འབྱུང་ཟླུམ་པོའོ། །ཡང་རྣམ་པ་གཅིག་ཏུ་ན་རྩིབས་བཅུ་ཟླུམ་པོ་ཉིད་ཆོས་འབྱུང་ཟུར་བཅུ་པར་བཤད་ཀྱང་ཆོག་པའི་སྐབས་ཤིག་ཡོད་དེ། རྒྱལ་བའི་བདག་པོ་ཀུན་མཁྱེན་ཆེན་པོའི་ཐུགས་དཀྱིལ་སྒྲུབ་ཐབས་ལས། སྟོང་པའི་ངང་ལས་ནམ་མཁའི་དབྱིངས་སུ་ཡཾ་ལས་རླུང་ཞེས་སོགས་གསུངས་པའི་དགོངས་པའང་ཡིན་མོད། རེ་ཞིག་མི་འཆད་དོ། །དེས་ན་སྔར་གྱི་སྟོང་ཉིད་རྣམ་བཅས་ཕྱོགས་ཆ་ཉེ་རིང་མེད་པ་དེའི་ངང་ནས་འོད་ཀྱི་
རང་བཞིན་ཟླུམ་པོ་ཁོང་སྟོང་ཕྱི་ལ་འཁོར་ལོ་རྩིབས་བཅུ་འདྲ་བའི་རྩིབས་སྐྱེས་པ། ནམ་མཁའི་ཁམས་ཀྱི་ཕྱིར་ཁ་དོག་ལྗང་ཁུའམ། དྭངས་ཤིང་ཐོགས་པ་མེད་པའི་ཕྱིར་ཁ་དོག་མི་གསལ་བར་བྱས་ཀྱང་རུང༌། སྣོད་ཀྱི་འཇིག་རྟེན་ལ་ཡོད་པའི་དག་པ་དང་སྦྱར་བའི་ཚད་ནི། དཔག་ཚད་འབུམ་ཕྲག་ཕྱེད་དེ་རྩིབས་སོ་སོའི་རྩེ་མོ་ནས་ཟླུམ་པོའི་ནང་མཐའི་བར་གྱི་ཕྱི་ནང་ལ་སྲབ་འཐུག་གི་ཚད་དུ་ཤེས་པར་བྱའོ། །སྤྱིར་དེའི་ཤར་མཐའ་ནས་ནུབ་མཐའི་བར་གྱི་ཚད་ནི། དཔག་ཚད་འབུམ་ཕྲག་ལྔའི་དག་པ་ཅན་ཡིན་ཏེ། ཟླུམ་པོ་ཉིད་ཀྱི་ཕྱིར་ཕྱོགས་གང་ལ་གཞལ་ཡང་དེ་ལྟ་བུ་ཡིན་པས་མཐའ་སྐོར་དུ་འབུམ་ཕྲག་བཅོ་ལྔའོ། །འདིའི་ནང་གི་ཁོང་སྟོང་ཟླུམ་པོ་ཡིན་ཞིང༌། དེའི་ནང་གི་ཚད་ཀྱང་དཔག་ཚད་འབུམ་ཕྲག་བཞིའི་དག་པ་ཅན་ཡིན་པ་དང༌། ཕྱི་རོལ་ཡང་རྩིབས་ཀྱི་རྩེ་མོ་དང་ཚད་མཉམ་པར་བསྐོར་བ་འོད་ཀྱི་རང་བཞིན་ཟླུམ་པོ་ཡིན་ལ། དེའི་བར་དུ་ཁ་དོག་མི་གཅིག་པའི་འོད་རྩིབས་ཀྱི་གཟུགས་ཅན་སྒོམ་པ་ཡིན་པས། རྩིབས་དང་ཟླུམ་པོ་ཐོགས་བཅས་དང༌། བར་སྟོངས་ཐོགས་མེད་ཀྱི་དབྱེ་བ་མི་བྱེད་པར་ཐམས་ཅད་འོད་ཀྱི་རང་བཞིན་མཐོང་བའི་སྤྱོད་ཡུལ་དུ་ཡོད་ལ། རེག་ཐོགས་མེད་པར་འཇའ་ཚོན་ཁ་དོག་མི་འདྲ་བ་ལྟ་བུའི་འོད་ཀྱི་རེ་ཁའི་རྩིབས་སྒོམ་པའོ། །དེའི་ནང་དུ་ཆོས་འབྱུང་དང་སྦྱོར་ན་སྟོང་པ་ཟླུམ་པོ་དེ་ཉིད་ཡིན་ལ། ཕྱི་རོལ་ཏུ་སྒོམ་ན་ནམ་མཁའ་མཐའ་མེད་པར་མོས་ཏེ། ཟླུམ་པོའི་རྣམ་པ་སྒོམ་མོ། །དེ་རྣམ་ཐར་སྒོ་གསུམ་མཚོན་པའི་གྲུ་གསུམ་དུ་གཞན་ལས་བཤད་མོད། འདིར་ནི་ནམ་མཁའ་མཐའ་མེད་པ་ལ་ཕྱོགས་མཚམས་གང་ལའང་ཐག་རིང་ཐུང་མེད་པའི་ཕྱིར། མཚོན་བྱེད་ཟླུམ་པོར་བྱེད་པ་འོས་སོ། །རྩིབས་བཅུ་བྱས་པའི་དགོས་པ་ཕྱོགས་བཅུ་སྦྱོང་བ་དང༌། བར་ཆད་
སྲུང་བའི་དོན་ཡང་ཡིན་ཏེ། སྔར་སྲུང་འཁོར་གྱི་དུས་སུ་རྩིབས་བཅུ་བསྒོམས་ན་ནི། བར་སྐབས་སུ་སྟོང་པར་སྦྱངས་ཀྱང་སླར་ཡང་རྣམ་པ་ཀུན་ལྡན་གྱི་སྟོང་པར་ཤར་བའི་ཚེ། དེའི་དྭངས་མའི་གཟུགས་གྲུབ་པ་ཡིན་པས་སྔ་རབས་པ་འགའ་ཞིག་འདིའི་རྩིབས་བཅུ་སྔར་གྱི་སྲུང་འཁོར་གྱི་རྩིབས་བཅུའི་རྒྱུན་གནས་པ་ཡིན་པར་བཞེད་པའང་ནོར་བ་མ་ཡིན་ནོ། །ཁ་ཅིག་རྩིབས་བཅུ་འདི་ཨ་ལས་བསྐྱེད་དགོས་ཏེ། རྒྱ་གཞུང་གི་བཤད་ཁུངས་ཀྱང་ཡོད་ལ། འདི་མེད་ན། ན་དཱའི་མཚོན་དོན་ཨ་ཡིག་མ་ཚང་པའི་ཕྱིར། རྣམ་བཅུ་དབང་ལྡན་མ་ཚང་བར་འགྱུར་རོ་ཟེར་ན། དེ་ནི་མ་ཡིན་ཏེ་རྩིབས་བཅུའམ་ཆོས་འབྱུང་ནི་ཕྱི་རོལ་ཀྱི་ནམ་མཁའ་ཡིན་ལ། རྣམ་བཅུ་དབང་ལྡན་གྱི་ནམ་མཁའ་ནི་ཕྱི་རོལ་མ་ཡིན་པར་གཞན་དགུ་པོ་ལ་འདྲེས་ཏེ་གནས་པ་ཡིན་པས། ན་དཱའི་བརྡ་ཐབས་ཀྱིས་མཚོན་དགོས་པ་བྱུང་བ་ཡིན་ཞིང༌། འདིར་ཡང་ཡ་སོགས་ཡི་གེ་བདུན་པོ་སྲོག་མེད་མ་ཡིན་པར་རེ་རེ་བཞིན་དབྱངས་ཨ་ཡིག་དང་སྦྱར་བ་ཉིད་ཡི་གེའི་རྣམ་བཅུ་དབང་ལྡན་གྱི་ཨ་ཡིག་གོ །འོ་ན་དེ་དག་ལ་ཟླ་ཕྱེད་ཐིག་ལེ་ན་དཱའང་ཡོད་པས་ཉི་མ་དང་སྒྲ་གཅན་གྱི་ས་བོན་ལྷག་པར་འགྱུར་སྙམ་ན། ཀུན་ཏུ་ཡེ་ཤེས་དང་ནི་སྟོང་པའོ་ཞེས་གསུངས་པའི་དོན་གྱིས་དེ་དག་ལ་ཀླད་སྐོར་སྦྱར་བ་ཡིན་གྱི། རྣམ་བཅུ་དབང་ལྡན་གྱི་ནང་ཚན་སྐུ་དང་ཡེ་ཤེས་ནམ་མཁའ་གསུམ་མཚོན་བྱེད་མ་ཡིན་པའི་ཕྱིར་སྐྱོན་དེ་མེད་དོ། །སྤྱིར་རྩིབས་བཅུའི་ནམ་མཁའ་མའི་ལུས་དང༌། དེའི་ནང་སྐྱེ་གནས་སུ་སྦྱར་བའི་ལུགས་གཅིག་དང༌། ནམ་མཁའ་མཐའ་མེད་ལུས་དང་རྩིབས་བཅུ་སྐྱེ་གནས་ལ་སྦྱར་བ་དང། དེ་གོ་ཟློག་པ་སོགས་སྦྱོར་ཚུལ་སྣ་ཚོགས་ཤིག་ཡོད་དོ། །འབྱུང་བཞིའི་དཀྱིལ་འཁོར་བསྐྱེད་ཚུལ་གཞན་ནི་གོ་སླ། དཀྱིལ་འཁོར་བཞི་ཅར་ཟླུམ་པོ་ཡིན་ཞིང༌། དཔངས་སུ་
འབུམ་ཕྲག་ཕྱེད་ཕྱེད་དོ། །བཀྲ་ཤིས་ཀྱིས་མཚོན་པ་ཞེས་པའི་བཀྲ་ཤིས་ནི་སྭ་སྟི་ཀ་སྟེ་གཡུ་དྲུང་རིས་སོ། །འདི་རྣམས་ཕྱི་འཇིག་རྟེན་ཁམས་ལ་ཡོད་པ་ལྟར་གཅིག་ནང་དུ་གཅིག་ཆུག་ཅིང་སྟེང་ཁང་མཉམ་པ་སྒོ་ང་ཕྱེད་གཤགས་ཀྱི་རྣམ་པ་བསྒོམས་ཀྱང་ལེགས་ལ་ལོ་ཙཱ་བ་བློ་གྲོས་རྒྱལ་མཚན་བཞེད་པ་ལྟར་དཀྱིལ་འཁོར་སྒོམ་པའི་ཚེ་མཆོད་རྟེན་བང་རིམ་བཞི་པ་ཟླུམ་པོ་ལྟར་བསྒོམས་ཀྱང་རུང་ངོ༌། །ཇི་ལྟར་ཕྱི་རོལ་དེ་བཞིན་ནང༌། །ཇི་ལྟར་ལུས་ལ་དེ་བཞིན་གཞན། རྡུལ་ཚོན་གྱི་ནི་དཀྱིལ་འཁོར་ལའོ། །ཞེས་གསུངས་པ་ནི། ཕྱི་ནང་གཞན་གསུམ་ལ་དེ་དང་དེའི་དོད་རེ་ཡོད་པའི་དོན་ཡིན་གྱི། རྣམ་པ་ཐམས་ཅད་དུ་འདྲ་བ་དགོས་པའི་དོན་མ་ཡིན་ནོ། །སྟེང་འོག་ཏུ་སྣ་ཚོགས་རྡོ་རྗེ་རེ་རེས་མཚན་པ་ནི། ཕྱི་འཇིག་རྟེན་ལྟར་ན་བསྐལ་པའི་བར་དུ་བརྟན་པར་གནས་པ་དང༌། གཞན་ཡེ་ཤེས་ལྟར་ན་དྭངས་མ་མི་འགྱུར་བའི་ངོ་བོར་གནས་པ་མཚོན་ནོ། །དེའི་སྟེང་དུ་རི་རབ་ཉིད་བསྒོམ་གྱི་རི་མཚོ་གླིང་གཞན་རྣམས་བསྒོམ་མི་དགོས་སོ། །རི་རབ་རྩ་བ་སྟོང་ཕྲག་བཅུ་དྲུག་པ་རྩེ་མོ་ཇེ་རྒྱས་སྟོང་ཕྲག་ལྔ་བཅུ་པ་ཞེས་བརྗོད་དགོས་ཀྱང་རྩ་བ་ནས་ཅུང་ཟད་ཇེ་རྒྱས་སུ་སོང་ཞིང༌། དབུས་ཀྱི་རྩེ་མོའི་གནས་རི་རབ་ཀྱི་སྙིང་པོ་ཞེས་བྱ་བ་དེ་ཡིན་པས་སྟོང་ཕྲག་ཉེར་ལྔ་ཡིན་ལ། སྟོང་ཕྲག་ལྔ་བཅུ་ནི་རྭ་རྣམས་ཀྱི་ཕྱི་མཐའི་ནམ་མཁའ་ལ་བསྐོར་བའི་དབང་དུ་བྱས་པ་ལ་གུང་ནས་ཕྱེད་གཤགས་ཀྱི་ཚད་དང༌། རྭ་རྣམས་སྐྱེ་བའི་གཞི་རྟེན་ཟླུམ་པོའི་བརྒྱ་ལ་བརྩིས་པ་ཡིན་ཏེ། ལྷུན་པོའི་དཔག་ཚད་སྟོང་ཕྲག་བརྒྱ་ལས། ཕྱེད་སྟེང་མ་སྟོང་ཕྲག་ལྔ་བཅུའི་མཚམས་ནས་རྭ་རྣམས་སྐྱེ་བའི་གཞི་འཕེལ་ཁ་ཕྱིར་སྐྱེ་བ་ཡིན་ལ། དེའི་སྟེང་དུ་རྩེ་མོ་ལྔ་པ་བྱུང་བའོ། །དེ་ཙམ་ཞིག་སྒོམ་དོན་གོ་བ་ལ་གལ་ཆེ་བས་སྨོས་ཀྱི་རྒྱས་པར་གཞན་དུ་ཤེས་པར་བྱའོ། །རི་རབ་དེའི་ཤར་ཕྱོགས་ཨིནྡྲ་ནཱི་ལ་དང༌། ལྷོ་པདྨ་རཱ་ག བྱང་
ཟླ་བ་ཆུ་ཤེལ། ནུབ་ཀ་རྐེ་ཏ་ན་ཏེ་དྭངས་ཤེལ་སེར་པོ། དབུས་ཏེ་རྩ་བ་ནས་རྩེ་མོའི་བར་གྱི་རི་རབ་གྱི་སྙིང་པོ་ན་རིན་པོ་ཆེ་མ་ར་ཀ་ཏ་ཏེ་ལྗང་ཁུའོ། །དེའི་སྟེང་དུ་སྣ་ཚོགས་པདྨ་ནི་རི་རབ་ཀྱི་ལྟེ་བ་ཉིད་དང་རྒྱ་མཉམ་པ་སྟེ། ལྷག་མ་ནི་གོ་སླ། དེ་ནས་དེ་དག་ཐམས་ཅད་གཅིག་ཏུ་འདུས་ཏེ། རྣམ་བཅུ་དབང་ལྡན་བརྩེགས་པའི་ཡི་གེ་ཉིད་དུ་གྱུར། དེ་ལས་འཇིག་རྟེན་གྱི་ཁམས་རྣམ་པ་སྔ་མ་ལྟ་བུ་གཅིག་ཅར་གྲུབ་པ་ཡིན་ཏེ། ཡཾ་རཾ་སོགས་སོ་སོ་ལས་རེ་རེ་སྐྱེས་པ་མ་ཡིན། རེ་རེ་བཞིན་ཡི་གེ་བཅུ་པོའི་ཆ་ཐམས་ཅད་ལས་སྐྱེས་པའོ། །སྤྱིར་ལྔར་དྲངས་པ་ལྟར་རླུང་ལ་སོགས་པའི་དཀྱིལ་འཁོར་རྣམས་དང་ལྷུན་པོའི་སྟེང་དུ་ཁང་པ་བརྩེགས་པའམ། རྡོ་རྗེའི་གུར་རོ་ཞེས་འཇིག་རྟེན་གྱི་ཁམས་ལན་ཅིག་བསྐྱེད་པས་ཆོག་པའི་སྐབས་ཀྱང་ཡོད་མོད་ཀྱི། སྒྲུབ་ཐབས་ལེའུའི་རྒྱས་བཤད་ཀྱི་སྐབས་འདིར་ལན་གཉིས་བསྐྱེད་ཚུལ་གསུངས་པ་བསྙོན་དུ་མེད་པས། རྩེས་ཐང་པ་གཞོན་ནུ་དཔལ་བ་ཚིག་དེ་དག་རྒྱས་བཤད་དང་དོན་བསྡུ་ཡིན་ཞེས་ཚར་གཅིག་ལས་མི་བསྐྱེད་པར་འདོད་པ་ནི། སྐྱོགས་བཤད་ཟད་མའོ། །ཡང་སྐབས་འདིར་འགྲེལ་ཆེན་ལས། དེ་རྣམས་ཀྱི་ནང་གི་དག་པ་གསུངས་པའི་སྐབས། གསང་བའི་པདྨ་ནི་བཅོམ་ལྡན་འདས་ཀྱི་པདྨ་བཞིན་ནོ། །ཞེས་གསུངས་པ་ནི། པདྨའོ་ཞེས་མི་གསུང་བར་བཞིན་ནོ་ཞེས་འདྲ་བར་བཤད་པ་ཁོ་ནས་རི་རབ་ཀྱི་སྟེང་གི་པདྨའི་མཚོན་དོན་མའི་གསང་བའི་པདྨ་ནི་བཅོམ་ལྡན་འདས་ཀྱི་བཞུགས་གདན་པད་གདན་དང་མཚོན་དོན་འདྲའོ། །ཞེས་པ་ཙམ་ཡིན་པས། རྣམ་བཅུ་དབང་ལྡན་གྱི་པདྨ་དང༌། གཙོ་བོའི་གདན་གྱི་པདྨ་གཅིག་པ་དང་མི་གཅིག་པའི་ལུགས་གཉིས་ཀ་ལ་མི་འགལ་ཞིང༌། འཇིག་རྟེན་གྱི་ཁམས་གྲུབ་ཅེས་གསུངས་པ་དང༌། སྔ་མ་བཞིན་དུ་གྲུབ་ཅེས་བཞེད་པ་
ལའང་འདི་དག་འགལ་བ་མེད་དེ། འབྱུང་བཞི་རི་རབ་དང་བཅས་པ་ཙམ་ལ་འཇིག་རྟེན་གྱི་ཁམས་ཀྱི་ཐ་སྙད་འཇུག་པའི་ཕྱིར་རོ། །ཁ་ཅིག་པདྨ་ཉི་ཟླ་གསུམ་གཙོ་བོའི་གདན་ཡིན་ན། གཙོ་བོའི་གདན་ཨོཾ་ལས་བསྐྱེད་པ་སོགས་གསུངས་པས་རྣམ་བཅུ་དབང་ལྡན་མ་ཚང་བར་འགྱུར་རོ་ཟེར་བ་ནི། བསྐྱེད་ཐེངས་སྔ་མ་ཇི་ལྟར་བྱས་མ་དྲན་པ་དང༌། ཕྱི་མ་རྣམ་བཅུ་དབང་ལྡན་ཡོངས་རྫོགས་གཅིག་ཏུ་འདྲེས་པ་ལས་འབྱུང་བཞི་རི་རབ་བསྐྱེད་པའི་ཚུལ་མ་གོ་བའི་བབ་ཅོལ་ཡིན་ནོ། །འོན་ཀྱང་པདྨ་ཉི་ཟླ་སྒྲ་གཅན་རྣམས་གཞལ་ཡས་ཁང་གུར་དང་བཅས་པའི་གདན་དུ་བྱེད་པ་དང༌། འབྱུང་བཞི་རི་རབ་ཀྱི་སྟེང་དུ་གུར་བྱས་ནས། པདྨ་སོགས་གཙོ་བོའི་གདན་དུ་བྱེད་པ་ལུགས་གཉིས་ཅར་ཡང་རུང་བ་ཡིན་པས་གཅིག་གིས་གཅིག་དགག་པར་མི་བྱའོ། །པདྨ་སོགས་རྡོ་རྗེའི་གུར་གྱི་གདན་དུ་བྱེད་ཀྱང་ལྷུན་པོའི་སྟེང་གི་རྡོ་རྗེའི་ས་གཞི་ཞེས་བརྗོད་པ་ལ་འགལ་བ་མེད་པའི་སྐབས་ཀྱང་སྲིད་དེ། དེ་རྣམས་རྡོ་རྗེའི་ས་གཞི་ཆེན་པོས་ནོན་ཏེ། དབུས་ཀྱི་ཆ་པདྨ་སོགས་ཡོད་སའི་ཐད་དེ་མ་གཏོགས། རྡོ་རྗེའི་གཞི་ཐམས་ཅད་ལྷུན་པོ་ལ་ཐུག་ཅིང་པདྨ་སོགས་མི་མངོན་པར་བསྒྲིབས་པའི་ཕྱིར་རོ།། །།གཉིས་པ་བཞུགས་གནས་གཞལ་མེད་ཁང་བཤད་པ་ལ། རྡོ་རྗེའི་གུར་བཤད་པ། དཀྱིལ་འཁོར་གྱི་རྒྱ་ཚད་བཤད་པ། དཔངས་ཚད་བཤད་པ། རྒྱན་བཤད་པ། ཁ་དོག་བཤད་པ་སྟེ་ལྔ་ལས། དང་པོ་ནི། རི་རབ་ཀྱི་སྟེང་དུ་ཧཱུཾ་ལས་རྡོ་རྗེའི་གུར་བསྒོམ་པར་བྱ་སྟེ། དཔལ་དྲི་མེད་འོད་ལས། དེ་བཞིན་དུ་དེའི་སྟེང་དུ་ཁང་པ་བརྩེགས་པ་ཀུན་ནས་དྲི་མེད་འོད་ཟེར་འཕྲོ་བའམ། རྡོ་རྗེ་ལས་སྐྱེས་ཏེ་ཧཱུཾ་ཡིག་ལས་སྐྱེས་པའི་རྡོ་རྗེའི་གུར་ཏེ་ཡུམ་གྱི་སྐྱེ་གནས་སུ་ནི་རྡོ་རྗེ་དང་བཅས་པདྨ་ཞེས་པའི་ཤེས་པར་བྱེད་པ་ལས་སོ། །དེ་ཉིད་
ཀྱིས་ནི་ཡང་ན་རྡོ་རྗེའི་རང་བཞིན་གྱི་གུར་རོ། །ཞེས་གསུངས་པས་དགོས་དོན་གཅིག་པ་ལ་རྣམ་པ་མི་འདྲ་བ་གཉིས་གདམ་ཁ་ཡིན་ཏེ། སྲུང་བའི་དོན་དུ་རྡོ་རྗེའི་ཁང་བརྩེགས་ཏེ་ཁང་བཟང་སྒོ་བཅད་པ་ཡངས་ཤིང་རྒྱ་ཆེ་བ་སྒོམ་པ། དེའི་ཚེ་ཁང་པའི་འོག་གཞི་རྡོ་རྗེའི་ས་གཞི་དང༌། རྩིག་པ་དང་ཐོག་རྭ་གུར་གྱི་དོད་དུ་འགྱུར་ལ། ཡང་ན་རྡོ་རྗེའི་གུར་ཉིད་བསམ་སྟེ། དེ་ལ་གུར་གྱི་སྐད་དོད་པཉྩར་ཞེས་བྱ་བ་དྲ་བ་དང༌། གཟེབ་མ་དང༌། ཟ་མ་ཏོག་ལྟ་བུའི་སྣོད་ལའང་འཇུག་ཅིང༌། དེ་ལྟ་བུ་རྒྱ་གར་བ་ཕལ་པ་ཀུན་ལའང་གྲགས་པ་ལྟར་ཡིན་པས། རྡོ་རྗེའི་ས་གཞི་གཞལ་ཡས་ཁང་གི་རྟེན་དུ་གྱུར་པ་དེ་དང༌། རྡོ་རྗེའི་རྭ་བ་ཡང་ཡོད་མོད། སྐབས་འདིར་ཐམས་ཅད་ལ་གུར་གྱི་སྒྲས་བརྗོད་པར་མཛད་དེ། དཔེར་ན་ཟ་མ་ཏོག་ཅེས་བྱ་བ་སྤྱི་མིང་ཡིན་པས། དེའི་མཐིལ་དང་ལོགས་དང་ཁ་ཁེབས་ལ་སོ་སོར་དབྱེ་བ་མེད་པ་བཞིན་ནོ། །དེས་ན་དཀྱིལ་འཁོར་སྤྱི་དང་མཐུན་པར་རི་རབ་ཀྱི་རྩེ་མོ་ལ་རེག་མཚམས་སུ་རྡོ་རྗེ་ཁོ་ན་འབྲེལ་བའི་རང་བཞིན་གྱི་ས་གཞི་དང༌། ཐད་ཀར་ཡང་དེ་ཉིད་རྩིག་པའི་ཚུལ་དུ་གྱེན་དུ་ལངས་པའི་རྣམ་པ་དང༌། རྩེ་མོ་ནང་དུ་གུག་ཅིང་སྟེང་ཕྱོགས་སུ་འདུས་ནས་གཅིག་ཏུ་འདྲེས་པའི་སྟེང་ཐོག་སྟེ་རྒྱུད་གཞན་གྱི་སྒྲུབ་ཐབས་རྣམས་ལས་གུར་དུ་གྲགས་པ་དེ་ཡང་ཡིན་ཞིང༌། ཁ་དོག་ནི་ལྗང་ཁུ་ཁོ་ནའམ་སྔོན་པོ་ཁོ་ནའམ་འོག་གཞི་སྔོ་ལ་འཁོར་ཡུག་དང་སྟེང་ལྗང་ཁུར་བྱས་ཀྱང་རུང་ལ། ཕྱིས་གཞལ་མེད་ཁང་རྫོགས་པ་ན་འདིའི་རྭ་བ་ཉིད་རྡོ་རྗེའི་འཕྲེང་བ་ཡིན་པར་ཤེས་ཏེ། གལ་ཏེ་གུར་གྱི་ནང་དུ་བར་ཆད་པའི་རྡོ་རྗེའི་རྭ་བ་གཞན་ཡིན་ན། དེ་ལས་མེ་དཔུང་མཐའ་མེད་དུ་འཕྲོ་བ་མི་རུང་བའི་ཕྱིར་དང༌། རྡོ་རྗེའི་གུར་ལ་མེ་འབར་བ་ནི། དཀྱིལ་འཁོར་ཀུན་གྱི་སྤྱི་ལུགས་སུ་སྣང་བའི་ཕྱིར་རོ། །དེས་ནས་གུར་ཞེས་པ་སྟེང་འོག་ཐད་ཀ་གསུམ་ལ་སྤྱི་
མིང་དུ་འཇུག་པ་གོ་བའི་ཚེ། སྐབས་འདིར་ཁ་ཅིག་གུར་མ་གཏོགས་ས་གཞི་དང་རྭ་བའི་གསལ་ཁ་མ་གསུངས་ཞེས་པ་དང༌། ས་གཞི་ཡང་དོན་གྱིས་ཐོབ་ཅེས་པ་དང༌། རྡོ་རྗེའི་ས་གཞི་བྱ་བ་གཞན་མེད་དེ་རི་རབ་ཀྱི་སྟེང་གི་གཞི་ཡིན་ཞེས་པ་དང། དེའི་རྒྱུ་མཚན་རླུང་དཀྱིལ་ནས་རི་རབ་ཀྱི་བར་རྡོ་རྗེར་བྱིན་གྱིས་བརླབས་པའི་ཕྱིར་ཟེར་བ་ལ་སོགས་པ་དང། རྡོ་རྗེ་ས་གཞི་ནི་པདྨ། གུར་ནི་རྡོ་རྗེ་དག་པའོ་ཞེས་སོགས་ངེས་མེད་རང་ག་བའི་འཁྲུལ་པ་རྣམས་གཞི་མེད་དུ་སངས་པར་འགྱུར་ལ། ཁང་པ་བརྩེགས་པ་ནི་འགྱུར་རྙིང་གཞན་འགའ་རེར་གཞལ་མེད་ཁང་ཉིད་ལ་གསུང་པ་ལྟ་བུར་ཡོད་ཅིང༌། དེའི་དོན་འཆད་པ་ན། བོད་སྔ་མ་རྣམས་ཡང་ན་སྲུང་འཁོར་རྡོ་རྗེའི་གུར་མེད་པའི་གཞལ་མེད་ཁང་བསྒོམ་ཞེས་པའི་དོན་དུ་འཆད་ཅིང་གུར་བསྒོམས་པའི་ཚེ། དེ་ཉིད་ཐབས་ཀྱི་རྡོ་རྗེ་དག་པ་བཞིན་དུ་གུར་མ་བསྒོམས་ན་གཞལ་མེད་ཁང་རྡོ་རྗེའི་དག་པའོ། །ཞེས་འཆད་དོ། །རྣམ་པ་གཅིག་ཏུ་ན་དེ་ཡང་དཔྱད་གཞིར་འགྱུར་བར་སྣང་མོད། རེ་ཞིག་དཔྱད་པ་དོར་རོ། །འོན་ཀྱང་ཉམས་ལེན་གྱི་རྒྱུན་ལ། དེ་འདྲ་མི་མཛད་ཅིང༌། གདམ་ཁ་སྔ་མ་ཁང་པ་ཡང་མི་མཛད་པར་གུར་ཁོ་ནར་མཛད་ལ། རྡོ་རྗེའི་དྲ་མིག་དང་མདའ་དྲ་ལ་སོགས་པ་ནི་ལུགས་འདི་ལ་མ་བཤད་པས་མི་དགོས་སོ། །ཁ་ཅིག་ཁང་བརྩེགས་བྱ་བ་གསུང་དང་ཐུགས་ཀྱི་དཀྱིལ་འཁོར་གྱི་གཞི་རྡོ་རྗེའི་ས་སྟེགས་ཁོང་སྟོང་ཅན་ལ་འདོད་པ་ཡང་མི་ལེགས་ཏེ། དེ་ནི་གཞལ་ཡས་ཁང་ཉིད་ཀྱི་ནང་ཚན་ཡིན་པས། ཕྱིས་གཞལ་མེད་ཁང་ཉིད་དང་ལྷན་ཅིག་བསྐྱེད་པར་བྱ་དགོས་ཀྱི་འདིར་མི་བསྐྱེད་པས་སོ།། །།གཉིས་པ་གཞལ་ཡས་ཁང་པའི་རྒྱ་ཚད་བཤད་པ་ནི། གུར་བསྐྱེད་པའི་རྗེས་སུ་ཨོཾ་དང་བྷྲཱུྃ་ལས་གཞལ་ཡས་ཁང་བསྐྱེད་དགོས་ཤིང༌། དེ་ཡང་ཡི་གེ་གཉིས་པོ་གདམ་
ཁ་ཡིན་གྱི། ཕྱི་རོལ་ཁང་བརྩེགས་དང་གུར་གྱི་དབྱེ་བ་ལ་སྦྱོར་རྒྱུ་མེད་དོ། །མཆོད་པའི་ས་གཞིའི་བཅལ་དང༌། འཁོར་ཡུག་ལ་སོགས་པ་ཡང་གཞལ་ཡས་ཁང་གི་ཆ་ལག་ཡིན་པས་ས་བོན་གཅིག་པོ་དེ་ལས་སྐྱེས་པའོ། །དེ་ལ་སྐུ་དཀྱིལ་གྱི་རྩིག་པའི་ནང་མཐའ་ལ་དཔག་ཚད་འབུམ་ཕྲག་བཞི། དེའི་ཕྱེད་གསུང་དཀྱིལ་ལ་འབུམ་ཕྲག་གཉིས། དེའི་ཕྱེད་ཐུགས་དཀྱིལ་ལ་འབུམ་ཕྲག་གཅིག དེའི་ཕྱེད་ནི་བདེ་ཆེན་འཁོར་ལོ་ལ་སྟེ་བྲི་ཆ་ལྟར་ན་རྡོ་རྗེའི་འཕྲེང་བ་ལྗང་ཁུ་ཚུན་ཆོད་ཡིན་ལ། སྒོམ་དོན་ལ་དེ་དང་ཚང་མཉམ་པའི་འོག་གཞི་ལ་འཇོག་དགོས་ཏེ་དཔག་ཚད་འབུམ་ཕྲག་ཕྱེད་དོ། །དེའི་དབུས་སུ་གཙོ་བོའི་པདྨའི་གནས་གྲུ་བཞི་པ། རྡོ་རྗེའི་འཕྲེང་བ་ནག་པོའི་ནང་མཐའ་དང་ཚད་མཉམ་པ་དེ་ནི་སྔ་མའི་ཡང་ཕྱེད་དཔག་ཚད་སྟོང་ཕྲག་ཉི་ཤུ་རྩ་ལྔ་སྟེ། གཙོ་བོའི་པདྨ་ནི་དེའི་སྟེང་དུ་ཟླུམ་པོར་བསྐོར་བས་ཕྱོགས་བཞི་ལ་ས་གཞི་དང་པདྨ་རྒྱ་ཆེ་ཆུང་མཉམ་པ་དང༌། མཚམས་བཞི་ལ་གྲུ་ཆད་ཀྱི་སྒོ་ནས་ས་གཞི་ཕྱིར་ལྷག་པའོ། །དེ་ལྟར་དཔག་ཚད་ཀྱི་ཚད་བཤད་པ་ནི། ཕྱི་འཇིག་རྟེན་ཁམས་ཀྱི་དག་པའི་ཕྱོགས་གཅིག་དང་བསྟུན་པ་དང༌། སོ་སོའི་ཚད་ངེས་ཅན་གོ་བའི་ཕྱིར་བཤད་པ་ཡིན་གྱི། ཚད་དེ་ཁོ་ནར་བསྒོམ་དགོས་པ་མིན་ཏེ་འཆད་པར་འགྱུར་རོ། །དེ་ཡང་སྐུ་དཀྱིལ་གྱི་རྩིག་པའི་ནང་ལ་སྐུ་དཀྱིལ་རང་གི་ཆ་ཆེན་ནམ་སྒོ་ཚད་བརྒྱད་ཡོད་ལ། རྩིག་པ་ལ་སྒོ་ཚད་བཞི་ཆ་སྟེ་ཆ་ཕྲན་ཕྱེད་དང་གཉིས་སོ། །དེའི་ཕྱི་རོལ་སྟེགས་བུ་འདོད་སྣམ་ལ་སྒོ་ཚད་ཕྱེད་དེ་ཆ་ཕྲན་གསུམ་མོ། །དེའི་ཕྱི་རོལ་མཆོད་པའི་ས་གཞི་ལ་སྒོའི་རྩིག་གདོང་དང་ཁང་ཚད་ཀྱི་ཚངས་ཐིག་གི་གནས་ནས་ཕྱི་ལ་སྒོ་ཚད་གཉིས་ཀྱི་ཐད་དང་ནང་གི་སྒོ་གླེག་འཛུགས་ས་ནས་སྒོ་ཚད་བཞི་འདས་པ་དང༌། ཡང་འདོད་སྣམ་ཚུན་གྲུ་བཞི་དང་ཕྱི་རོལ་ཟླུམ་པོ་ཉིད་ཀྱི་ཕྱིར། གཞན་རྣམས་ཀྱི་བར་ཐག་ངེས་མེད་དུ་འགྱུར་ཡང་
འདོད་སྣམ་གྱི་ཟུར་རྩེ་ནས་སྒོ་ཚད་ཕྱེད་འདས་པའི་ཚད་ལ་མཆོད་པའི་ས་གཞི་ཟླུམ་པོར་བསྐོར་བའོ། །འདི་བྲི་ཆ་ལ་ཚངས་ཐིག་ཟད་མཚམས་མྱོས་སྲུང་སྟེང་མ་ནས་བསྲོར་དགོས་པ་དེ་ཡིན་ཞིང༌། དེའི་ཕྱི་རོལ་ཏུ་སའི་འཁོར་ཡུག་གི་ཞེང་སྒོ་ཚད་ཕྱེད། ཆུ་མེ་རླུང་གསུམ་སྒོ་ཚད་རེ་རེ། ནམ་མཁའི་འཁོར་ཡུག་ཀྱང་སྒོ་ཚད་ཕྱེད་ཡིན་མོད། དངོས་སུ་ན་དབུས་སུ་ཆ་ཕྲན་གཅིག་རྡོ་རྗེའི་རྭ་བ་ཡིན་པས། རྭ་བའི་ནང་གི་ནམ་མཁའ་མཚོན་བྱེད་ལ་ནང་དུ་ཆ་ཕྲན་གཅིག་དང༌། ཕྱི་རོལ་ཀྱི་ནམ་མཁའ་མཚོན་བྱེད་དུ་ཕྱི་རོལ་ཏུ་ཡང་ཆ་ཕྲན་གཅིག་གི་ནམ་མཁའི་ཁོར་ཡུག་གོ །འོད་ཟེར་གྱི་འཁོར་ཡུག་ནི། འོག་གཞི་རྡོ་རྗེའི་ས་གཞིའི་འོག་ཕྱོགས་ཀྱི་དབུས་ནས་གཡས་ གཡོན་དུ ་གྱེད་དེ། ས་གཞིའི་མཐའ་ནས་ཡར་འབར་ནས་ནམ་མཁའི་ཁོར་ཡུག་གི་སྟེང་ནས་ཚུར་བརྒལ་ནས། རྭ་གུར་ཐམས་ཅད་ལ་འབར་བ་ཕྱི་རོལ་རྒྱང་རིང་དུ་འགྲོ་བ་ཡིན་པས། བྲི་ཆ་ལ་སྒོ་ཚད་དམ་སྒོ་ཚད་ཕྱེད་སོགས་ཇི་ལྟར་འོས་པ་ལས་མི་བྱེད་ཀྱང༌། བསྒོམ་བྱ་ལ་ཐག་རིང་དུ་འགྲོ་བ་ནི་དགོས་ཀྱང་ཚད་ངེས་པ་མེད་དོ། །འཁོར་ཡུག་གི་ཚད་ངེས་པ་ཡང་གཙོ་བོར་བྲི་ཆའི་དབང་དུ་བྱས་ནས་ཕྱི་ནང་གི་དག་སྦྱོར་མཛད་པ་ཡིན་གྱི། སྒོམ་དོན་ལ་ནི་ངེས་ཅན་ཡང་རུང་མོད་ཀྱི། མཐའ་གཅིག་ཏུ་ངེས་པ་མེད་པར་ཡང་མངོན་ཏེ། དུར་ཁྲོད་ཀྱི་ཡོ་བྱད་དང་གྲུབ་པ་འབྱུང་པོའི་ཚོགས་པ་ཤོང་བའི་གནས་ཀྱི་ཕྱིར་དང༌། གུར་དང་གཞལ་མེད་ཁང་ཤིན་ཏུ་ཉེ་བར་དགོས་པའི་ངེས་པ་ཡང་མེད་པའི་ཕྱིར་རོ། །དཀྱིལ་འཁོར་གསུམ་གྱི་རྩིག་པའི་ནང་དུ་དཀྱིལ་འཁོར་གསུམ་པོ་སོ་སོ་རང་གི་ཆ་ཕྲན་རེ་རེ་དཔངས་ཆུང་ཡིན་ལ། དེ་རྣམས་ཀྱི་ནང་དུ་སྐུ་དཀྱིལ་ལ་རང་གི་སྒོ་ཚད་ཕྱེད། གསུང་དཀྱིལ་ལ་རང་གི་སྒོའི་སུམ་ཆ། ཐུགས་དཀྱིལ་ལ་རང་གི་སྒོའི་སུམ་གཉིས་ཀྱི་ཞིང་ཚད་
ཅན་གྱི་ལྷ་སྣམ་དང༌། སོ་སོའི་ནང་དུ་དཀྱིལ་འཁོར་ནང་མའི་རྡོ་རྗེའི་ས་སྟེགས་ལ་ཐུག་གི་བར་དུ་མཚོན་ས་ཞེས་བྱ་ལ་འདི་ལ་གཞན་དག་སྤངས་ཆེན་ཟེར་གྱི་འདུག་ནའང༌། སྤངས་པའི་ཐ་སྙད་མི་ཐོབ་པས་མི་ལེགས་སོ། །བྲི་ཆ་ལ་ནང་མའི་ཀྲ་མ་ཤིརྵ་ཡོད་པའི་ཐད་དུ་ཚུན་ཆད་གསུང་དཀྱིལ་དང་ཐུགས་དཀྱིལ་ལ་སྟེགས་བུའི་རྒྱ་ཚད་ཡིན་པས་འདོད་སྣམ་ཀྱི་ཕྱི་ངོས་སུ་སྒོ་ཚད་གཅིག་དང་བཞི་ཆ་རེ་ཡིན་མོད། ཕྱོགས་རེ་རེར་དབུས་ཀྱི་སུམ་ཆ་ལ་གློ་འབུར་སྒོ་ཚད་ཕྱེད་ཙམ་རེ་ཐད་ཀར་འཕགས་པ་དགོས་ཏེ། སྐས་འཛུགས་པ་དང༌། རྟ་བབས་ཀྱི་ཀ་བ་འཛུགས་པ་དང༌། བསྐོར་བ་སོགས་ལ་འཇུག་པའི་ལམ་དགོས་པའི་དོན་དང༌། སྒོ་ཁང་ཕྱི་རོལ་ཏུ་འཕགས་པ་དང་མཐུན་པར་མཛེས་པའི་ཆེད་དུའོ། །བདེ་ཆེན་འཁོར་ལོ་ལ་ནི་བྱ་བ་གཞན་དེ་དག་མི་དགོས་ཀྱང་ཐེམ་སྐས་ཀྱི་དོན་དུ་གློ་འབུར་ཅུང་ཟད་བྱའོ།། །།གསུམ་པ་དཔངས་ཚད་ནི། སྤྱིར་དཀྱིལ་འཁོར་གྱི་དཔངས་ཚད་ལ་མཐའ་གཅིག་ཏུ་ངེས་པ་མེད་ཀྱང་བཟོ་ཉེས་སྤངས་པའི་ཚད་ལེགས་པོ་གཅིག་ལ་སྲོག་ཤིང་མ་བཅོལ་ན་ཧ་ཅང་ཐལ་བར་འགྱུར་བས། རེ་ཞིག་རྒྱལ་བ་ཀུན་གྱི་བདག་པོ་ཀུན་མཁྱེན་དོལ་པོ་པའི་བཞེད་པ་ནི། སྐུ་དཀྱིལ་གྱི་རྩིག་པའི་ནང་གི་རྒྱ་སྒོ་ཚད་བརྒྱད། དེའི་ཕྱེད་དཔངས་སུ་བྱ་ན། དེ་ཡང་ཐོག་འོག་ཁོ་ན་ལ་མི་བརྩི་བར་རྒྱ་ཕུབས་བྱེད་ན་ཐོག་གི་མཐིལ་ལམ། མི་བྱེད་ན་ཀྲ་མ་ཤིརྵའི་རྩེའི་བར་དུ་ བརྩིའོ། །འོ་ན་རྒྱ་ཚད་ནང་ལ་བྱེད་པའི་ཚེ། དཔངས་ཐོག་འོག་ལ་རྩིབ་དང༌། དཔངས་ཐོག་རྩེ་ལ་རྩི་ན་རྒྱ་ཡང་ཕྱི་མཐའ་ལ་བྱེད་དགོས་སམ་སྙམ་པ་དང༌། རྒྱ་ཕུབས་བྱེད་པ་དང་མི་བྱེད་པའི་དབྱེ་བས་མདའ་ཡབ་མན་ཆད་ལ་མཐོ་དམའ་བྱས་ན་རྩིག་པའི་དཔངས་ལ་མཐོ་དམའ་ངེས་མེད་དུ་འགྱུར་སྙམ་ན། བཟོ་ཉེས་འགོག་པའི་སླད་དུ་དགོས་པའི་དབང་གིས་དཔངས་ཀྱི་ངེས་པ་
བྱས་པ་ཡིན་གྱི། གཅིག་ཏུ་དཔངས་ལ་ངེས་པ་མེད་དོ་ཞེས་པ་འདི་གཅིག་པུ་གོ་བས་འདིའམ་འདི་འདྲ་བའི་དོགས་པ་ཐམས་ཅད་སེལ་བར་འགྱུར་རོ། །དེས་ན་རྩིག་པའི་དཔངས་ལ་སྒོ་ཚད་གསུམ། ཕ་གུ་དྲ་ཕྱེད་ཐོག་མཐིལ་ཀྲ་མ་ཤིརྵ་སྦྲགས་པ་ལ་སྒོ་ཚད་གཅིག་སྟེ་བཞིར་བྱས་ཀྱང་རུང་ལ། ཡང་རྩིག་པའི་དཔངས་ལ་སྒོ་ཚད་གཉིས་དང་ཆ་གསུམ། ཕ་གུ་ལ་བཞི་ཆ་གཅིགདྲ་ཕྱེད་ཀྱི་ས་ལ་སྒོ་ཕྱེད། རྒྱ་ཕུབས་ཀྱི་སྟེང་འོག་ལ་སྒོ་ཕྱེད། ཤར་བུ་མདའ་ཡབ་ལོགས་སུ་མི་བརྩི་སྟེ། མདའ་ཡབ་ནི་རྒྱ་ཕུབས་ཀྱི་དཔངས་ལ་གཏོགས་པ་དང༌། ཤར་བུ་ཡང་ཐོག་སའི་ཐད་དང༌། དྲ་ཕྱེད་ཀྱི་དཔངས་ལ་མཐུས་པ་ཡིན་ནོ། །དེ་ཉིད་དཀྱིལ་འཁོར་ནང་མ་གཉིས་ལའང་རང་རང་གི་སྒོ་ཚད་གཞལ་བས་ཁྱད་པར་མེད་ལ། སྐུའི་རྩིག་པའི་ནང་དུ་དཔངས་ཆུང་ནི་སྒོ་ཁང་དང་མཐོ་དམའ་མེད། ལྷ་སྣམ་ས་སྟེགས་ཀྱི་ཚུལ་གྱིས་འོག་གཞིའི་སྟེང་དུ་བརྩིགས་པ་ཡིན་ཞིང༌། དཔངས་སུ་སྒོའི་བཅུ་གཉིས་ཆའམ་བརྒྱད་ཆ་ཙམ་བྱའོ། །དེ་ནས་མཚོན་ས་ནི་མཐིལ་ལ་བབས་པའི་གཞི་དཔངས་ཆུང་དང་ཐད་མཉམ་ཡིན། རྒྱ་ཕུབས་བྱེད་དམ་མི་བྱེད་རུང་འདྲ་སྟེ། ལྷ་སྣམ་གྱི་ནང་མཐའ་ལ་ཀ་བ་བཙུགས་ནས་ཕྱིའི་གསེར་གདུང་དང་ཐད་མཉམ་པར་འཕྱམས་བཏང་བའི་སྟེང་ནས་ཐོག་འབུབས་པ་ཡིན་ལ། དེ་ཡང་ལྷ་སྣམ་ནོན་པའི་འཁོར་ཕིབས་གཡབས་སྐོར་དུ་བྱེད་ཅིང༌། རྒྱ་ཕུབས་ཀྱི་རྣམ་པར་བྱེད་ནའང༌། ལྷ་སྣམ་གྱི་ཐད་དུ་མཐོ་ས་ཡོང་བའི་རྒྱ་ཕུབས་ཕྱེད་པའི་རྣམ་པར་བྱས་ན། ཆུ་རྣམས་ཕྱི་རོལ་ཏུ་འགྲོ་ཞིང༌། ནང་དུའང་མཛེས་པར་མངོན་ཏེ། འོན་ཀྱང་ལག་ལེན་པ་ཕལ་ཆེར་ཕྱི་ནང་གཉིས་ཀར་ལ་གཞོལ་པ་བྱེད་པར་སྣང་ངོ༌། །དེ་ལྟ་མོད་ཀྱི་གཙོ་བོའི་གནས་མ་གཏོགས། གཞན་རྣམས་ཐོག་བཅལ་བསྒྲིགས་ཉིད་བྱས་ན། རྒྱ་གར་ལུགས་དང་མཐུན་ཞིང་
དགོས་དོན་འགྲུབ་ཕྱིན་ཆད་ཚེགས་ཆུང་བས་ལེགས་སོ་སྙམ་པ་ནི་ཁོ་བོའི་རྣམ་པར་རྟོག་པའོ། །མཚོན་སའི་ཐང་ཐོག་མེད་པས་མཐོངས་ཀ་ལྟ་བུ་ཡིན་ལ། དེའི་དབུས་སུ་རིན་པོ་ཆེའི་གར་བུ་གྲུ་བཞི་པ་རྡོ་རྗེའི་ས་སྟེགས་དེ་ནི་རྒྱ་ཚད་གོང་དུ་བཤད་ཟིན་པ་ལྟར་ལ་དཔངས་སུ་སྐུ་དཀྱིལ་གྱི་སྒོ་ཚད་བཞི་པ་བྱས་པས་སྐུའི་མདའ་ཡབ་ཀྱི་རྩེའམ། རྒྱ་ཕུབས་ཀྱི་ཐོག་མཐིལ་དང་མཐོ་དམན་མཉམ་པ་ཡིན་ནོ། །དེའི་སྟེང་དུ་གསུང་དཀྱིལ་སྔར་བཞིན་ཕུབ། དཔངས་ནི་གསུང་དཀྱིལ་རང་གི་སྒོ་ཚད་བཞི་ཡིན་ཀྱང༌། སྐུའི་སྒོ་ཚད་གཉིས་ཡིན་པས་དཔག་ཚད་འབུམ་ཕྲག་གཅིག་གི་དག་པ་སྦྱོར་ལ། གསུང་དཀྱིལ་གྱི་མཚོན་སའི་དབུས་སུ། ཐུགས་དཀྱིལ་གྱི་གཞི་གསུང་དཀྱིལ་གྱི་མདའ་ཡབ་ཀྱི་རྩེ་དང་དཔངས་མཉམ་པ། དེའི་སྟེང་དུ་ཐུགས་དཀྱིལ་བརྩིགས་ཏེ་དཔངས་ནི། ཐུགས་དཀྱིལ་ཉིད་ཀྱི་སྒོ་ཚོད་བཞི་ཡིན་ཀྱང་སྐུ་དཀྱིལ་གྱི་གཅིག་ཡིན་པས་དཔག་ཚད་འབུམ་ཕྲག་ཕྱེད་མཚོན་ པའོ། །གཞན་སྔ་མ་དང་འདྲ། ཐུགས་ཀྱི་མཚོན་སའི་དབུས་སུ་བདེ་ཆེན་འཁོར་ལོའི་གཞི་རྡོ་རྗེའི་ས་སྟེགས་དཔངས་སུ་ཐུགས་དཀྱིལ་ཀྱི་ཐོག་དཔངས་དང་མཉམ་པ། དེའི་སྟེང་དུ་ཕྱོགས་བཞིར་ཀ་བ་བཞི་བཞི་བཙུགས་པ་མཚམས་བཞིར་གདུང་སོགས་དྲས་ཀྱི་ཁ་སྦྱར་བ་ལྟ་བུ་སྟེ། དེ་དག་ཀ་བའི་སྟེང་དུ་གདུང་ལྗང་ཁུ་བཀོད་པ་ཡིན་པ་ལ་སྒོམ་དོན་གྱི་སྐབས་རིན་པོ་ཆེ་གཅིག་ལས་གྲུབ་པ་ཡིན་ལ། བློས་སློང་གི་བཀོད་པ་ཆུང་ངུ་བཞེངས་པ་སོགས་ལ་དེ་ཙམ་གྱིས་ཆོག་ཅིང་དཀའ་གནས་མེད་ཀྱང༌། བཀོད་པའི་ཁང་བཟངས་གཞོང་ན། དེ་ཙམ་གྱིས་ནང་མི་ཐེག་པས་ཟུར་བཞིར་གདུང་སྣེ་འགལ་བའི་རྩིག་པ་བརྟན་པོ་གཡས་ གཡོན་དུ ་ཆ་ཕྲན་རེ་རེ་ཙམ་རེ་ངེས་པར་དགོས་སོ། །དེ་ནས་དེའི་ནང་ཐུགས་དཀྱིལ་ཉིད་ཀྱི་ཆ་ཆེན་གཉིས་པའི་ཐད་བདེ་གཤེགས་འཕར་མ་ཉིད་ཀྱིས་ཡོངས་སུ་བསྐོར་བ།
དབུས་སུ་ཐུགས་ཀྱི་སྒོ་ཚད་ལ་བདེ་གཤེགས་འཕར་མ་ལས་ཅུང་ཟད་མཐོ་བ་ས་སྟེགས་གྲུ་བཞིའི་རྣམ་པ་ཅན་ཏེ། དེ་ལ་དཔངས་ཚད་ངེས་པ་མ་གསུངས་ཀྱང་ཐུགས་ཀྱི་སྒོའི་བཞི་ཆ་ཙམ་བྱས་ན་ལེགས་པས། རྒྱ་དཔངས་དེ་འདྲ་བའི་ཕྱི་མཐའ་ལ་རེག་པར་བཙུགས་པའི་ངོས་བཞི་ལ་ཀ་བ་གཉིས་གཉིས་དང༌། ཟུར་བཞི་ལ་རེ་རེ་ཏེ་བཅུ་གཉིས་ཀྱི་སྟེང་དུ་གདུང་ནག་པོའམ་སྔོན་པོ་བཀལ། དེ་དང་གདུང་ལྗང་ཁུའི་སྟེང་ནས་འཕྱམས་བཏང་སྟེ་ཐོག་ཕུབ། ཤར་བུ་དང་མདའ་ཡབ་ནི་གདུང་ལྗང་ཁུའི་ཕྱི་འདི་ལའང་དགོས་པར་མངོན་ཏེ། ཕྱོགས་ཐམས་ཅད་དུ་འཕྱོང་གཡབས་གྲུ་བཞིར་བསྐོར་བ་འདྲ་བ་ཞིག་ཡོད། བདེ་གཤེགས་འཕར་མའི་ཐོག་དཔངས་ཀྱི་ཚད་ནི་ཐུགས་དཀྱིལ་གྱི་སྒོ་ཚད་གཉིས་ཏེ། དཔག་ཚད་སྟོང་ཕྲག་ཉེར་ལྔའི་དག་པར་སྦྱོར་རྒྱུ་ཡིན། གཙོ་བོའི་གནས་ལ་བསྐོར་བའི་ཀ་བ་བཅུ་གཉིས་པོའི་སྟེང་དུ་ཀ་ཐོག་ཀ་བཞག་གི་ཀ་ཐུང་བཅུ་གཉིས་དང༌། དེའི་སྟེང་དུ་གདུང་དང་བྲེ་འདེགས་སོགས་བཏང་སྟེ། དབུས་རྒྱ་ཕུབ་ཧར་མིའི་རྣམ་པར་བྱས་ཤིང༌། བདེ་གཤེགས་འཕར་མའི་ཐོག་མཐིལ་ནས། གཙོ་བོའི་གནས་ཀྱི་ཐོག་རྒྱ་ཕུབས་རྩེ་མོར་རྡོ་རྗེ་རིན་པོ་ཆེའི་ཏོག་གི་རྩེ་མོའི་བར་དུ་དཔངས་ལ་བདེ་གཤེགས་འཕར་མའི་ཐོག་དཔངས་ཉིད་དང་མཉམ་སྟེ་དཔག་ཚད་སྟོང་ཕྲག་ཉེར་ལྔའི་དག་པ་ཅན་ནོ། །དེ་ལྟར་ན་གཙོ་བོའི་གནས་ཀྱི་ཐོགས་དཔངས་ལ་སྟོང་ཕྲག་ཉེར་ལྔ། བདེ་གཤེགས་འཕར་མ་ལའང་སྟོང་ཕྲག་ཉེར་ལྔ། ཐུགས་དཀྱིལ་ལ་སྟོང་ཕྲག་ལྔ་བཅུ། གསུང་དཀྱིལ་ལ་འབུམ་ཕྲག་གཅིག སྐུ་དཀྱིལ་ལ་འབུམ་ཕྲག་གཉིས་ཏེ་འབུམ་ཕྲག་བཞི་ཡིན་པས་སྐུ་དཀྱིལ་གྱི་རྩ་ཐིག་ཚུན་ཆོད་རྒྱ་དཔངས་མཉམ་པའོ། །འདོད་སྣམ་གྱི་རིགས་གསུམ་ནི་རང་རང་གི་རྩིག་པའི་ཕྱི་རོལ་ཀྱི་རྩ་བའི་ཕྱོགས་སུ་བརྩེགས་པ་ཡིན་པས། དཀྱིལ་འཁོར་
གྱི་དཔངས་ལ་ལོགས་པར་མི་འདྲེན་ཡང་དེ་ཉིད་ཀྱི་དཔངས་ནི་སྒོའི་བཞི་ཆའམ་ཕྱེད་ཀྱི་ཚད་དུ་བྱེད་པ་གཉིས་ཀ་ཡོད་དེ་མི་འགལ་ཡང་བཞི་ཆར་བྱའོ། །འདོད་སྣམ་ཚུན་ཆོད་གཞལ་ཡས་ཁང་གི་གཞི་དང། ཕྱིའི་མཆོད་པའི་ས་གཞི་ལ་མཐོ་དམན་གྱི་གསལ་ཁ་གསུངས་པ་མེད་ཀྱང་ཅུང་ཟད་ཙམ་ནང་མ་མཐོ་བར་བྱེད་ན་ལེགས་པས་སྒོ་ཚད་གཅིག་གི་བཞི་ཆ་སོགས་ཇི་ལྟར་འོས་པ་བྱ་ལ། གསལ་ཁ་མེད་པས་རྣམ་པ་གཅིག་ཏུ་ན་མ་བྱས་ཀྱང་ཆོག་གོ །དེའི་ཕྱི་རོལ་སའི་འཁོར་ཡུག་གི་བར་གྱི་རེ་ཁ་ནི་མཆོད་པའི་གཞི་ཉིད་ལ་གཏོགས་ཏེ། གཞན་རྣམས་ཀྱང་སོ་སོའི་མཐའི་རེ་ཁ་དེ་རང་རང་གི་འཁོར་ཡུག་ནང་མ་ལ་གཏོགས་པ་ཡིན་པས། ད་ལྟ་གཅད་ཀྱི་རེ་ཁ་འབྲི་བའི་གནས་སུ་སོ་སོའི་རྭ་བ་རྣམས་སྟེང་དུ་སོ་སོའི་གཞི་ལས་ཆ་ཕྲན་རེ་ཙམ་འཕགས་པར་བྱ་ལ། གཞན་མཆོད་པའི་ས་གཞི་དང་འཁོར་ཡུག་བཞི་པོ་ཐམས་ཅད་ཁང་མཉམ་པར་བྱའོ། །དེ་ལ་འཁོར་ཡུག་བཞིའི་ཐད་དུ་འོག་གཞི་རྡོ་རྗེའི་ས་གཞི་འོབས་བྲུས་པ་ལྟར་ས་གཞི་རྐོང་མོར་ཡོད་པ། ས་ཆུ་མེ་རླུང་གིས་གང་བའི་རྣམ་པ་ཡིན་ཏེ། རླུང་གི་ཕྱི་རོལ་ཏུ་འོག་རྡོ་རྗེའི་ས་གཞི་ལ་དབུས་ཀྱི་ཆ་ལ་རྡོ་རྗེའི་རྭ་བ་ལྕགས་རི་མཐོན་པོ་དང༌། རྭ་བའི་ཕྱི་ནང་གི་འཁོར་ཡུག་ལ་དངོས་སུ་ནམ་མཁའ་ས་སྟོངས་ཡིན་ཞིང༌། འོན་ཀྱང་འོད་ཟེར་ལྗང་ཁུའི་རྣམ་པས་ཁྱབ་པ་ནི། ནམ་མཁའི་འཁོར་ཡུག་ཅེས་ བྱའོ། །དེ་བས་ན་རྡོ་རྗེའི་ས་གཞི་དེ་སྟེང་དུ་མཐོ་དམའི་ཁྱད་པར་མ་གཏོགས། རྡོ་རྗེའི་རྭ་བ་འཁོར་ཡུག་གི་གཞི་རྟེན་དགོས་པའི་བར་དུ་ཡོད་པར་མ་ཟད། རྭ་བའི་ཕྱི་རོལ་ཏུ་ཡང་ཁ་ཁྱེར་ལྟ་བུར་ཡོད་པའི་སྟེང་དུ་ནམ་མཁའི་ཁོར་ཡུག་ཕྱི་མ་སྐུའི་སྒོ་དྲུག་ཆ་ཡང་ཡོད་ཅིང༌། དེ་དང་ཁ་ད་ཆད་དུ་མ་སོང་བར་དེ་ལས་ཀྱང་ཅུང་ཟད་རིང་བ་ལ་ཡང་ཁོར་མོར་ཡོད་པས་དེ་ལ་མེ་ལྕེ་འབར་བའི་ཚུལ་དུ་ཡོད་དོ།། །།
བཞི་པ་ནི། རྒྱན་གཞན་རྣམས་གཞལ་ཡས་ཁང་སྤྱི་དང་འདྲ། གཞལ་ཡས་ཁང་གི་ཟུར་ལ་སྣ་ཚོགས་རྡོ་རྗེས་བརྒྱན་པ་ནི། ཟུར་གྱི་དབུས་སམ་རྩ་བའི་ཕྱོགས་གང་ཡང་རུང་བར་སྣ་ཚོགས་རྡོ་རྗེ་གྱེན་ལངས་ཀྱི་ཚུལ་ དུ་གཡས་གཡོན ་གྱི་ངོས་ལ་ཕྱེད་ཕྱེད་སྤར་བཏབ་པ་ལྟ་བུའི་ཚུལ་གྱིས་འབུར་དོད་དུ་ཡོད་པ་ཡིན་ལ། སྒོ་དང་སྒོ་མཁྱུད་ཀྱི་མཚམས་རྩིགས་པའི་ཕྱི་རུ་འདོད་སྣམ་གྱི་སྟེང་དུ་ཟླ་བ་ཕྱེད་པའི་རྣམ་པ་ལ་གནས་པའི་རིན་པོ་ཆེ་ཟུར་དགུ་པའི་དབྱིབས་ཅན་གྱིས་སྤྲས་པ་ཡིན་ཞིང༌། དེ་བཞིན་དུ་བྱང་ཤར་གྱི་ཟུར་ཐད་ཁོ་ནའི་སའི་དཀྱིལ་འཁོར་གྱི་སྟེང་ཐད་སྐུ་དཀྱིལ་གྱི་མདའ་ཡབ་དང་མཐོ་དམན་མཉམ་པ་ཙམ་གྱི་ནམ་མཁའ་ལ་ཟླ་བ་ཉ་གང་བ་དང༌། ལྷོ་ནུབ་ཀྱི་ཟུར་ཐད་རང་གི་མཐོ་དམན་དེ་ཙམ་གྱི་ནམ་མཁའ་ལ་ཉི་མ་གནས་པ་སྟེ། དཀྱིལ་འཁོར་འབྲི་བའི་སྐབས་སུ་དེའི་ཐད་ཀྱི་སའི་འཁོར་ཡུག་མདའ་ཡབ་དང་ཤར་བུས་བསྒྲིབས་པས། བྱང་ཤར་གྱི་ནང་ངོས་དང༌། བདེན་བྲལ་གྱི་ཕྱི་རྒྱབ་ལྟ་བུར་འབྲི་དགོས་ཀྱང༌། སྒོམ་དོན་ནི་འདིར་བཤད་པ་བཞིན་ ནོ། །རྟ་བབས་ནི་སྒོ་ཁང་གི་སྟེང་དུ་བཀལ་བ་སྟེ། འདེགས་བྱེད་ཀྱི་ཀ་བ་བཞི་སྤྱི་དང་མཐུན་པར་བཙུགས་པའི་སྟེང་དུ། གདུང་ཁོར་ཡུག་ཏུ་བཀལ། དེའི་སྟེང་དུ་ཐོག་ཕུབ་ཅིང༌། ཕྱིའི་འཕྱམས་སྣ་སོགས་མི་མངོན་པར་ཤིང་ལེབ་ཀྱིས་བསྒྲིགས་པ་ཡང་བྲི་ཆ་སོགས་ཀྱི་དོན་ལ་གདུང་གི་དཔངས་སུ་ཀ་བ་རྩི། སྒོ་གདོང་ཕྱོགས་ལ་སྒོ་གཡབས་ཆ་གསུམ་དུ་བཏང་བའི་མཚམས་གཉིས་སུ་རྒྱན་གྱི་ཀ་བ་བཙུགས་ཤིང༌། དེའི་སྟེང་ནས་སྒོ་མཁྱུད་སྒོ་འགྲམ་གྱི་མཚམས་སུ་འཕྲེད་གདུང་རེ་ཡང་བཏང་ཐོག་ཕུབས་པ་དེའི་སྟེང་དུ་ཕྱི་ཕྱོགས་སུ་སྒོའི་བཞི་ཆ་བོར་བ་གཡས་ གཡོན་དུ ་རྩིག་པའི་ཐད་དང༌། དབུས་ཀྱི་གཡས་ གཡོན་དུ ་འཕྲེང་གདུང་གཉིས་ཀྱི་སྟེང་དུ་ཀ་བ་བཙུགས།
ཀ་བ་ལས་ཅུང་ཟད་ཕྱིར་འཕགས་པར་མྱོས་སྲུང་བཏང༌། ཡང་གདུང་རིང་བར་གྱི་འཕྲེད་གདུང༌། ཐོག་འབུབས་ལུགས་སོགས་གོང་བཞིན་བྱས་པ་ལ་བརྩེགས་མ་གཉིས་པའི་ཁང་པ་བྱ་ཞིང༌། གསུམ་པ་ལ་ཡང་གཞན་དེས་རིགས་འགྲེ་ཞིང༌། སྟེང་དུ་ཧར་མི་རྟ་རྒྱབ་ཀྱི་རྣམ་པ་བྱའོ། །སྒོ་ཁང་གི་སྟེང་བརྩེགས་མ་དང་པོའི་ཟུར་ཀ་བཞིའི་ལོགས་ལ་ཀ་རྒྱན་གྱི་ཚུལ་དུ་རྒྱུ་རིན་པོ་ཆེ་ལས་བརྐོས་པའི་གླང་སེང་བརྩེགས་མ་དང༌། བརྩེགས་མ་བར་མ་དང་གོང་མ་ལ་ཤཱ་ལ་བྷཉྩི་ཀ་ཞེས་བྱ་བ་ཀ་རྒྱན་དུ་བྱེད་པའི་ཤཱ་ལ་བྷཉྩི་ཀ་ནི་ཁ་ཅིག་མིའམ་ཅིའི་བུ་མོ། ཁ་ཅིག་ནི་ཅེ་སྤྱང་གསོད་བྱེད། ཁ་ཅིག་ནི་རྟེན་བྱེད་ཐུར་མ། ཞེས་སོགས་སྣ་ཚོགས་སྨྲ་ཡང༌། ལྷ་མོའི་གཟུགས་ཅན་དུ་བྱེད་པ་རྣམས་དོན་ལ་མ་ནོར་ཞིང༌། མིའམ་ཅི་སོགས་ཕོའམ་ཀ་བ་ཕུར་བུའི་གཟུགས་འདྲ་བ་སོགས་འདོད་པ་ནི་འཁྲུལ་ཏེ། དོན་ནི་སྔོན་འཁོར་ལོས་བསྒྱུར་བའི་རྒྱལ་པོ་བྱུང་བའི་སྐབས། སྐྱེད་མོས་ཚལ་དུ་ཞག་མང་པོར་རྩེ་བ་ན། རིན་པོ་ཆེ་ལས་བཅོས་པའི་ཁང་བཟངས་ཀྱི་ཐོག་འདེགས་བྱེད་ལ། ཀ་བའི་ཚབ་མ་མིའམ་ཅི་མོ་དངོས་ཀྱིས་བྱེད་པ་དག་བྱུང་བའི་བཀོད་པ། ཕྱིས་འཁྲེགས་ཤིང་བཟང་པོའམ། རྡོ་ལ་ཀ་བ་བྱེད་པ་ནི་ཕྱི་དབྱིབས་བཟོ་རྩེད་ལྷ་མོའི་རྣམ་པ། ཞུའི་ངོས་ལ་ལག་པ་གཉིས་ཀྱིས་གདུང་འདེགས་ཚུལ་བྱེད་པ་བརྐོས་པའི་ཀ་བའི་ཁྱད་པར་དེའི་མིང་ལ་ཤཱ་ལ་བྷཉྩི་ཀ་ཟེར་རོ། །རྣམ་པ་ལྷ་མོའི་གཟུགས་བརྙན་བརྐོས་པ་ཡིན་གྱི། སེམས་ཅན་དངོས་མིན་ནོ། །དེ་བཞིན་དུ་སྐུའི་རྟ་བབས་ཀྱི་བརྩེགས་མ་འོག་མའི་འཁོར་ལོའི་གཡས་སུ་རི་དྭགས་ཕོ་དང་ གཡོན་དུ ་མོ་དང། བྱང་ཆུབ་ཤིང་གི་གཡས་གཡོན་གྱི་མིའམ་ཅི་ཕོ་མོ་ཡང་རིན་པོ་ཆེ་ལས་བྱས་པའི་གཟུགས་བརྙན་ཡིན། རྔ་བོ་ཆེའི་གཡས་ཀྱི་དབྱུག་པ་ནི། དབྱུ་གུ་རིན་པོ་ཆེའི་ཏོག་ཅན་ཡིན།
གཡོན་གྱི་ཐོ་བ་ཡང་རྡོ་རྗེས་མཚན་པ་སོགས་ཀྱི་སྤྲོས་པ་མི་དགོས། དབྱུ་གུའི་རྩེ་མོ་ལ་ཏོག་གྲུ་བཞི་ཡོད་པའམ། ཡང་ན་སྤྱི་དང་མཐུན་པའོ། །མཆོད་པའི་ས་གཞིན་ལ་མཆོད་པ་སྣ་ཚོགས་ནི་གོ་སླ། མེ་རླུང་གི་འཁོར་ཡུག་གི་མཚམས་ལ་དུར་ཁྲོད་ཅེས་གསུངས་པ་ནི། མེའི་འཁོར་ཡུག་གི་ཕྱེད་ཕྱི་མ་དང༌། རླུང་གི་དཀྱིལ་འཁོར་གྱི་ཕྱེད་ནང་མ་ལ་དུར་ཁྲོད་གནས་པའམ་ཡང་ན་གཡོ་བའི་དཀྱིལ་འཁོར་ལ་གནས་དུར་ཁྲོད་ཅེས་གསུངས་པས་མེ་དཀྱིལ་ལ་མེད་པར་རླུང་དཀྱིལ་ཡོངས་རྫོགས་ལ་བཀོད་ཀྱང་རུང་སྟེ་གདམ་ཁ་ཡིན། འབྱུང་པོ་རྣམས་རླུང་དཀྱིལ་གྱི་ཕྱེད་ཕྱི་མ་ལ་གནས་པས། དུར་ཁྲོད་ས་གཞི་ལ་འབྱུང་པོའི་ཚོགས་ཞེས་པ་དང་ཡང་འགྲིག་གོ །དཀྱུས་ལྟར་ན་གྲུབ་པ་འབྱུང་པོའི་ཚོགས་དུར་ཁྲོད་ཀྱི་ཕྱི་རོལ་ཏུ་གནས་པ་ཡིན་ཞིང༌། རླུང་དཀྱིལ་ཁོ་ན་ལ་བྱེད་པའི་ཚེ། རབ་གཏུམ་མ་རྣམས་ནང་མཚམས་ལ་བཞུགས་པ་ཕྱོགས་སྐྱོང་གི་དོད་མིན་པར་ལྷག་པོ་ཡིན་ནོ། །ཕྱོགས་སྐྱོང་སོགས་དུར་ཁྲོད་གཞན་དང་འདྲ། འཁོར་ཡུག་འགོད་ནའང་རླུང་གི་ཕྱེད་ཕྱི་མ་དེར་འགོད་དོ། །དཀྱུས་ལྟར་ན་དུར་ཁྲོད་དུ་ཕྱོགས་སྐྱོང་ཞིང་སྐྱོང་མི་འགོད། རབ་གཏུམ་མ་ཉིད་དེའི་དོད་ཡིན། གང་ལྟར་ན་ཡང་དུར་ཁྲོད་གཞན་རྣམས་སྤྱི་དང་འདྲའོ། །འགའ་ཞིག་ཕ་རྒྱུད་ལྟར་དུར་ཁྲོད་མེད་པའང་མིན། མ་རྒྱུད་ལྟར་རྒྱས་པའང་མིན། ཀེང་རུས་སོགས་ཐོར་རེ་བ་བྲིས་ཀྱང་འགལ་བ་མེད་ཟེར་བ་དང༌། ཁ་ཅིག་འཁོར་ལོ་དཀར་དམར་བརྒྱད་པོ་དང་དུར་ཁྲོད་ཀྱི་དོན་ཡིན་གྱི། གཞན་མི་དགོས་ཟེར་བ་སོགས་བྱུང་རྒྱལ་དུ་སྨྲ་བ་དེ་དག་གིས་ཅི་ཞིག་བྱ་སྟེ། འདི་ལ་དུར་ཁྲོད་དངོས་མི་འབྲི་བའི་སྲོལ་ཞིག་ཀྱང་བྱུང་བ་ནི། སྐལ་བ་དང་མི་ལྡན་པ་འདུས་པའི་ནང་དུ་དུར་ཁྲོད་མི་འབྲི་ཞེས། རྒྱ་གར་དུ་བར་སྐབས་ཤིག་དེ་ལྟར་དར་བའི་རྒྱུན་ཡིན་པ་ལས། དེ་ལ་ནི་དུས་འཁོར་དུ་མ་ཟད་གཞན་
ལའང་འདྲའོ། །རོ་དང་བྱ་དང་གཅན་གཟན་དང༌། ཀེང་རུས་སོགས་གང་ཡང་མེད་པའི་ས་སྟོང་ལ་དུར་ཁྲོད་ཀྱི་ཐ་སྙད་མི་འཇུག་པས་སྒོམ་པའི་ཚེ་ངེས་པར་དུར་ཁྲོད་དུ་བྱ་ཞིང༌། རྡུལ་ཚོན་འབྲི་བའི་ཚེ་དུར་ཁྲོད་བཞག་ཀྱང་འགལ་བ་མེད་པའི་སྐབས་ཤིག་བྱུང་མོད། རྒྱ་བལ་དུ་བཞེངས་པའི་དུས་འཁོར་གྱི་དཀྱིལ་ཐད་ཕལ་ཆེར་ལའང་དུར་ཁྲོད་རྒྱས་པར་བྲིས་སྣང་ངོ༌།། །།ལྔ་པ་ནི། གཙོ་བོའི་པདྨ་ཉིད་ལྗང་ཁུ་དང༌། དེའི་འོག་གཞི་ནི་སྔོན་པོར་ངེས་པར་བྱ་ཞིང༌། བདེ་ཆེན་འཁོར་ལོ་རིམ་གྱིས་སྔོན་པོར་བྱས་ཀྱང་མི་འགལ་ལ། ཕྱོགས་མདོག་ཏུ་བྱས་ཀྱང་ནི་རུང་ངོ༌། །གང་འོག་གཞི་སྔོན་པོ་ཡིན་པ་དེའི་སྟེང་ཐོག་ཀྱང་ལྗང་ཁུ་ཡིན་ལ། བདེ་ཆེན་འཁོར་ལོ་རིམ་གྱི་སྔོན་པོར་བྱས་ན། དེའི་ས་སྟེགས་ཀྱི་ལོགས་ཀྱང་སྔོན་པོའོ། །གཞན་འོག་གཞི་དང་སྟེང་ཐོག་ཐམས་ཅད་གཙོ་བོའི་ཞལ་གྱིས་དབྱེ་བས། ཤར་ནག་ལྷོ་དམར་སོགས་ཕྱོགས་མདོག་ཡིན་ཞིང༌། ལྷ་སྣམ་དང་འདོད་སྣམ་དཀར་པོར་འབྱུང་བ་ནི། དེའི་འོག་གཞི་ཕྱོགས་མདོག་ཡིན་ཡང་དེའི་སྟེང་དུ་དཀར་པོ་བརྩེགས་པ་སྟེ། དཔེར་ན་རྩིག་པ་རྣམས་དང་ འདྲའོ། །མཆོད་པའི་ས་གཞི་ཡང་སྐུ་དཀྱིལ་དངོས་ལ་འབྲེལ་པ་ཡིན་པས་སྐུ་དཀྱིལ་གྱི་ལྷ་སྣམ་དང་འདྲ་བར་ཕྱོགས་མདོག་བྱ་སྟེ། འདི་ཐམས་ཅད་འོག་གཞི་རྡོ་རྗེའི་ས་གཞི་སྔོན་པོ་ཡིན་ཡང༌། དེའི་སྟེང་དུ་རིན་པོ་ཆེ་སྣ་ཚོགས་པའི་བཅལ་བཀྲམ་པའི་ཁ་དོག་ཡིན་པས། རི་རབ་ཀྱི་ཁ་དོག་དང་རྡོ་རྗེའི་ས་གཞིའི་ཁ་དོག་ཡིན་པར་འདོད་པ་ནི་འཁྲུལ་ལོ། །དེས་ན་མཆོད་པའི་ས་གཞི་ནག་འཇམ་སེར་འཇམ་ལྗང་ཁུ་སོགས་རྒྱ་བོད་གཉིས་ཀར་དུ་བྱུང་ཞིང༌། སྒྲ་གཅན་གྱི་དཀྱིལ་འཁོར་ཡིན་པ་དང༌། རྡོ་རྗེའི་ས་གཞི་ཡིན་པ་སོགས་སྒྲུབ་བྱེད་དུ་འགོད་ཀྱང༌། རྒྱུད་ཀྱི་དགོངས་པ་ལས་ཕྱིར་ཕྱོགས་པ་ཡིན་ལ། བླ་མའི་མན་ངག་ཡིན་ན་མཐའ་གཅིག་ཏུ་མི་
འགལ་བ་ཡང་སྲིད་དོ། །ཁོར་ཡུག་ཆེན་པོ་ལྔ་ནི་འབྱུང་བ་སོ་སོའི་མདོག་ཡིན་ལ། རྡོ་རྗེའི་རྭ་བ་སྔོན་པོ་ཡིན་ཞིང༌། མེ་ལྕེའི་ཕྲེང་བ་ཡང་ཁ་དོག་ལྔའམ་དྲུག་སྤེལ་མར་བྱེད་པ་ཡིན་གྱི། ཕྱོགས་བགོས་པ་ལྟ་བུར་འདོད་མཁན་ཡོད་ཀྱང་མ་ཡིན་ནོ། །གསུང་དང་སྐུའི་རྩིག་པ་རྣམས་ཞི་རྒྱས་དབང་དགུག་སོགས་དགེ་བའི་ལས་ལ་ནམ་མཁའ་རླུང་མེ་ཆུ་ས་ཞེས་སྐྱེ་རིམ་དང་མཐུན་པར་བྱེད་དགོས་པ་ལ། རིམ་པ་དེ་ཡང་གང་གཙོ་ཆེ་བ་དེ་ཐོག་མར་དགོས་ཤིང༌། དེ་ཡང་ནང་གཙོ་བས་ནང་ནས་ཕར་བརྩི་དགོས་ཀྱི། ཕྱི་རོལ་ནས་ཚུར་མི་ བརྩིའོ། །དྲག་པོའི་ལས་ལ་དེ་ལས་ཟློག་པ་སྡུད་རིམ་དགོས་པ་ཡིན་ཡང་དབང་བསྐུར་རབ་གནས་བསྙེན་པ་ལ་སོགས་པའི་སྐབས་ཞི་རྒྱས་དང་མཐུན་པ་ཡིན། ཐུགས་དཀྱིལ་ལ་ནི་འགྲེལ་པར་དཀར་པོ་དམར་པོ་ནག་པོ་ཞེས་གསུངས་པ་ཙམ་གྱིས་ནང་ནས་དཀར་དམར་ནག་གསུམ་ཡིན་ཞེས། རྒྱ་བོད་ཀྱི་མཁས་པ་ཆེ་བ་འགའ་ཞིག་ཀྱང་བཞེད་ཅིང༌། ཁ་ཅིག་དེའི་རྒྱབ་སྐྱོར་སྒྲུབ་བྱེད་དུ་བསམས་ནས། དང་པོར་ལུས་དེ་ནས་ངག་དེ་ནས་སེམས་འགྲུབ་ཅེས་སོགས་མངོན་ལྐོག་ཐམས་ཅད་དང་འགལ་བའི་འབྲེལ་མེད་སྨྲ་བ་དང། ཡང་ཁ་ཅིག་རྭ་བ་རིམ་གསུམ་སྐུ་གསུང་ཐུགས་གསུམ་མཚོན་པ་ཡིན་ལ། སྐུ་ཕྱི་རོལ་དང་ཐུགས་ནང་དུ་ཡོད་པའི་ངེས་པ་མེད་དེ། ནོར་བུར་ཐུགས་དང་གསང་བར་གསུང་ཞེས་པ་དང་ འདྲའོ། །ཞེས་ཟེར་རོ། །དེ་ནི་ཐུགས་གསུང་སྐུ་ཞེས་པ་སྐྱེ་རིམ་ཡིན་པ་དང༌། སྐུ་གསུང་ཐུགས་ཞེས་པ་སྡུད་རིམ་ཡིན་པ་མ་གོ་བའི་ཚུལ་དུ་སྣང་སྟེ། དེ་ཡང་མངལ་སྐྱེས་དང་པོར་ལུས་ལེན་པ་ན་བར་སྲིད་ཞིག་ཙམ་ན་སེམས་དང༌། དེ་ལས་ལུས་ལེན་པའི་རླུང་སྐྱེས་པ་ན་ངག་དང༌། རླུང་སེམས་ཕ་མའི་ས་བོན་ལ་ཞུགས་པ་ལུས་ཏེ། རྩ་བའི་ཡིད་ངག་ལུས་སྐྱེ་རིམ་དང༌། སྒོ་གསུམ་རྣམ་འགྱུར་ཅན་འཆགས་པའི་
དུས་ནའང་མངལ་དུ་ཟླ་བ་གཅིག་ཡིད་ཙམ་དང༌། དེ་རྗེས་རླུང་ཆགས་པ་ངག་དང༌། དེའི་འོག་ཏུ་བཞིན་ལག་དབང་པོ་ཤ་རུས་སོགས་རྒྱས་པར་ཆགས་པ་ལུས་ཏེ། དེ་ལྟར་ན་ལུས་ངག་ཡིད་ཅེས་པ་སྐྱེ་བའི་རིམ་པ་མ་ཡིན་གྱི། སྐྱེ་བ་བསྐྱེད་པའི་གོ་རིམ་ནི་ཡིད་ངག་ལུས་ཀྱི་རིམ་པའོ། །མངལ་སྐྱེས་མི་རྣམས་འཆི་བའི་དུས་ན་ལུས་རགས་པའི་ཚོར་བ་འགགས་ཀྱང༌། རླུང་ད་དུང་མ་འགགས་པས་ངག་ཡོད་པ་དང༌། རླུང་འགགས་ནས་རྗེས་སུ་འཆི་སེམས་ལ་གནས་པ་ཡིན་པའི་ཕྱིར་དང༌། དེའི་སྣང་མཆེད་ཐོབ་གསུམ་ཡང་ལུས་ངག་ཡིད་ཀྱི་གོ་རིམ་གྱི་ཕྱིར་སྡུད་རིམ་ཁོ་ནའོ། །ཁ་ཅིག་དགེ་བའི་ལས་ལ་སྐྱེ་རིམ་དང། དྲག་པོའི་ལས་ལ་སྡུད་རིམ་ཡིན་པས་བསྙེན་པ་དང་དབང་བསྐུར་བ་སོགས་ནི་ཐམས་ཅད་ཀྱི་ཐུན་མོང་ཡིན་པས་ན། ཐུགས་དཀྱིལ་ལ་སྡུད་རིམ་དང༌། སྐུ་གསུང་ལ་སྐྱེ་རིམ་བྱེད་དོ།།ཞེས་ཟེར་ན་བྱེད་པ་འགལ་བའི་ལས་ཀྱི་ཆོས་འདྲེས་པ་ནི་ལས་གང་ཡང་མི་འགྲུབ་པའི་རྒྱུ་ཡིན་གྱི། ཐུན་མོང་གི་འགྲུབ་བྱེད་དུ་མི་འགྱུར་རོ། །དེས་ན་རང་ལུགས་ཀྱི་བཞེད་པ་ཐུགས་དཀྱིལ་ལ་ཡང་ནང་ནས་རིམ་པས་ནག་དམར་དཀར་བའི་རྩིག་པ་ཉིད་ཡིན་ནོ། །ཡང་རྒྱ་གར་བ་ལ་ལ་དང༌། བོད་རྙིང་མ་ཁ་ཅིག་དང༌། ཕྱི་མ་འགའ་རེ་ཡང་གཞལ་ཡས་ཁང་གི་འོག་གཞི་རེ་མིག་དགུར་བགོས་པ་ལྟ་བུར་ཕྱོགས་མཚམས་ཆ་མཉམ་པར་བྱས་ནས་ཤར་དང་ཤར་ལྷོ་ནག་པོ་ཞེས་སོགས་ཤར་གྱི་རྟ་བབས་འདེགས་པའི་ཀ་བ་བྱང་མ་ནས། ལྷོའི་ཀ་བ་ཤར་མས་བར་མཚམས་ནག་པོར་བྱེད་པ་སོགས་གཞན་རྣམས་ལའང་རིགས་བསྒྲེ་བར་འདོད་དོ། །དེ་ཡང་རྣམ་པ་གཅིག་ཏུ་རྣམ་གྲངས་ཙམ་ལའང་མི་རུང་ངོ་ཞེས་ཁ་ཚོམ་རང་ཏ་མི་གཅོད་མོད་དེ། འོན་ཀྱང་དེའི་སྒྲུབ་བྱེད་དུ་གཙོ་བོའི་ཞལ་གྱི་དབྱེ་བས་རྡུལ་ཚོན་གདབ་ཅེས་གསུངས། ཞེས་དང་ལྷ་མཚན་གྱི་སྐབས་སུ་ཡང་
གཙོ་བོའི་ཞལ་གྱི་དབྱེ་བས་ཤར་དང་མེ་ནག་པོ་ཞེས་སོགས་གསུངས་པས། ས་གཞི་ཡང་མཚོན་པར་ནུས་ཟེར་བ་ནི། ལྷ་མཚན་ལྗང་ཁུ་དང་སྔོན་པོའི་ས་རྣམས་ཀྱང་ལྗང་སྔོན་དུ་ཐལ་བར་འགྱུར་བ་དང༌། ཕྱིས་ཀྱི་འགའ་ཞིག་གཙོ་བོའི་སྐུ་ལ་གཡས་འགྱིང་ཡོད་པས་རྩ་ཞལ་གྱི་ཤར་དང་ཤར་ལྷོ་གཉིས་ཀར་ཁྱབ་པས་དེ་ལྟར་འབྱུང་བ་ཡིན་ཟེར་བ་ནི། འགྱིང་ཞལ་ལ་སྟེང་དང་འོག་ཏུ་གཡོ་བའི་རྣམ་པ་བྱུང་ཡང་གཡས་ གཡོན་དུ ་ཞལ་རས་བསྒྱུར་བ་ལ་མི་དགོས་པས་དེ་ཡང་མ་འབྲེལ་བའོ། །དེས་ན་རྒྱ་བོད་ཀྱི་དུས་འཁོར་བ་ཆེས་ཆེ་བ་ཐམས་ཅད་ཟུར་ཐིག་མཚམས་ལ་ཕྱོགས་མདོག་གི་དབྱེ་བ་འཇོག་ཅིང༌། དེ་ཉིད་ཡོངས་སུ་གྲགས་པའི་རྒྱུད་སྡེའི་དཀྱིལ་འཁོར་ཐམས་ཅད་ལས་ཀྱང་འབྱུང་བས་རང་ལུགས་ལ་ཟུར་ཐིག་མཚམས་ཀྱི་ཕྱོགས་མདོག་གི་དབྱེ་བ་བྱེད་དོ། །གཞན་ཡང་ཡེ་ཤེས་ལེའུ་བརྒྱ་ཞེ་གཅིག་པའི་སྐབས། ཞལ་བརྒྱད་པ་གསུངས་པ་ན། ནུབ་བྱང་གི་ཞལ་སེར་སྐྱའམ་དཀར་སེར་ཕྱེད་པས་རྒྱས་པའི་ལས་སྒྲུབ་པ་དང༌། ལྷོ་ནུབ་ཀྱི་ཞལ་དམར་སེར་གྱིས་རྨོངས་པ་དང༌། ཤར་ལྷོའི་ཞལ་དམར་ནག་གིས་དབང་དང༌། བྱང་ཤར་གྱི་ཞལ་ནག་དཀར་གྱིས་བསྐྲད་པ་འགྲུབ་པར་གསུངས་ཤིང༌། དེས་ན་འདིར་བྱང་དང་བྱང་ཤར་ཞི་རྒྱས་སུ་མ་མཛད་པར་བྱང་དང་ནུབ་བྱང་ཞི་རྒྱས་སུ་མཛད་པ་སོགས་དང༌། དེའི་ཚེ་བྱང་དང་ནུབ་བྱང་གཉིས་ཀ་དཀར་པོར་མ་མཛད་པར། ནུབ་བྱང་དཀར་སེར་འདྲེས་པའམ་ཕྱེད་གཟུགས་གང་བྱས་ཀྱང་འདྲ་སྟེ། ནུབ་བྱང་གི་ས་གཞི་ཕྱེད་དཀར་བ་དང་ཕྱེད་སེར་པོར་བྱེད་པ་ཡིན་པར་ཤིན་ཏུ་གསལ་ཏེ། དེས་གཞན་རྣམས་ལའང་རིགས་ འགྲེའོ། །དེ་ལྟར་ཡང༌། ཞི་ལ་དཀར་པོའི་ཞལ་ཏེ་དང་པོར་རྒྱས་པ་ལ་ནི་དཀར་དང་གསེར་མཚུངས་ཐུན་ཚོད་ལག་པ་ལ། རེངས་ལ་སེར་པོ་མེའི་ཐུན་ལའོ་
རྨོངས་ལ་གསེར་དང་ཉི་མཚུངས་ཆུ་གཏེར་ལ་ཏེ་དགུག་པ་ལ། །ཞེས་སོགས་གསུངས་པའོ།། །།གསུམ་པ་ལྷ་སོ་སོའི་གདན་བཤད་པ་ལ། གཙོ་བོའི་བཞུགས་གནས་ཀྱི་པདྨ་སྣ་ཚོགས་པདྨ་ནི་ལྗང་ཁུ་ཡིན་ལ། དེ་ཡང་ཁ་དོག་ཁྲ་བོ་སྣ་ཚོགས་པར་ཡོད་པ་མཚོན་བྱེད་ཡིན་ཞེས་འཆད་པ་ནི་མི་ལེགས་ཏེ། ཁྲ་བོ་དང་ལྗང་ཁུ་ལ་སྒོམ་པ་དང་འབྲི་བ་དང༌། བརྡ་དང་དོན་གྱི་སྒོ་ནས་དཀའ་བ་དང་སླ་བའི་ཁྱད་པར་གང་ཡང་མེད་པས། དེ་འདྲ་བའི་བརྡ་ཐབས་ལ་དགོས་པ་མེད་དེ། ཁྲ་བོ་ཡིན་ན་ཁྲ་བོ་ཉིད་བྲིས་པས་ཆོག་པ་ལ་མཚོན་བྱེད་ལྗང་ཁུས་ཅི། དེས་ན་ནམ་མཁའི་ཁམས་སམ་འབྱུང་བ་ལྔའི་འདུས་པ་མཚོན་པ་ནི་ཡིན་ལ། ཁ་དོག་ནི་ལྗང་ཁུ་ཉིད་དེ། དེའི་སྟེང་དུ་ཟླ་བ་ཉི་མ་སྒྲ་གཅན་གྱི་དཀྱིལ་འཁོར་རྣམས་སྟེང་ནས་སྟེང་དུ་བརྩེགས་པ་སྟེ། དབང་ལེའུ་དྲུག་ཅུ་རྩ་བཞི་པའི་འགྲེལ་པར་ལྟེ་བའི་སྟེང་དུ་ཨཾ་ཨཿཨ་ཟླ་བ་ཉི་མ་སྒྲ་གཅན་གྱི་གདན་རྣམས་སོ། །ཞེས་གསུངས་པ་ལྟར། དཀྱིལ་འཁོར་གསུམ་རྩེག་ཉིད་སྒོམ་པ་གཙོ་ཆེ་བ་ཡིན་ལ། རྒྱུད་ལས། དཔལ་ལྡན་ཨོཾ་ཡིག་ལས་སྐྱེས་རྒྱལ་བའི་བདག་པོའི་པདྨར་ཟླ་བ་ཉི་མ་མེ་ཡི་སྟེང་དུ་ནི། །དྲག་པོ་ལུས་མེད་གཉིས་ཀྱི་སྙིང་གར་རྒྱལ་བའི་དབང་པོ་ཤིན་ཏུ་རོལ་པའི་ཞབས་ནི་གཡས་བརྐྱང་སྟབས། །ཞེས་གསུངས་པའི་མེ་ཡི་སྟེང་དུ་ནི་ཞེས་པ་ཡན་ཆད་གཞལ་ཡས་ཁང་གི་གདན་ནི་མ་ཡིན་རྟེན་གྱི་དཀྱིལ་འཁོར་བསྐྱེད་པའི་སྐབས་ཀྱི་གཙོ་བོའི་པདྨ་བསྐྱེད་པ་བསྟན་ཏེ། ཨོཾ་ཡིག་ལས་སྐྱེས་ཞེས་པའི་ངེས་པས་ སོ། །འགྲེལ་པར། ཟླ་བ་ཉི་མ་མེ་ཡི་སྟེང་དུ་ནི་ཞེས་པ་ལ་ལ་ན་དང༌། ར་ས་ན་དང༌། ཨ་ཝ་དྷཱུ་ཏཱིའི་སྟེང་ དུ་དྲག་པོ་ལུས་མེད་གཉིས་ཀྱི་ཞེས་པ་བདུད་དང་ཉོན་མོངས་པའི་ཕྱོགས་ཏེ། གཡོན ་དང་གཡས་ཀྱི་རབ་ཏུ་འབབ་པ་དག་གི་སྙིང་གར་ཞེས་གསུངས་པ་ལྟར་ཏེ། མདོར་ན་ས་བོན་ཀྱི་སྐབས་སུ་གསུམ་དང༌། དག་པ་ལ་ཡང་རྩ་གསུམ་གྱི་དག་པ་ཁོ་ན་
གསུངས་པའི་ཕྱིར་དང༌། གོང་དུ་གཞལ་ཡས་ཁང་གི་རྟེན་བསྐྱེད་པའི་སྐབས་ཀྱི་ཚིག་ལ། སྟོང་པ་རླུང་མེ་ཆུ་དང་ས་དང་ལྷ་ཡི་རི་བོ་ཆུ་སྐྱེས་ཟླ་བ་ཉི་མ་མེ་རྣམས་ནི། ཞེས་པའི་མེ་ཞེས་པའི་འགྲེལ་པར་དེའི་སྟེང་དུ་ཐིག་ལེ་ཡོངས་སུ་གྱུར་པ་ལས་མེ་ཞེས་པ་སྒྲ་གཅན་གྱི་དཀྱིལ་འཁོར་མཐོན་མཐིང་སྟེ། ཞེས་གསུངས་པ་དང་རིག་པ་མཚུངས་པ་སོགས་ཀྱི་སྒོ་ནས་རྒྱུད་འགྲེལ་དངོས་བསྟན་གྱི་དགོངས་པའི་གཙོ་བོ་གདན་དཀྱིལ་འཁོར་གསུམ་རྩེག་ཉིད་དེ། དེས་ན་འགའ་ཞིག་འདི་སྐད་དུ་ཕྱི་རོལ་ཏུ་ཡང་གཟའ་འཛིན་གྱི་དུས་ཉི་ཟླ་སྒྲ་གཅན་གསུམ་བརྩེགས་པ་ཡིན་པ་ལས། སྒྲ་གཅན་མགོ་མཇུག་གཉིས་ཀར་གྱིས་དུས་གཅིག་ཏུ་འཛིན་པ་མི་སྲིད་པས། སྐབས་འདིར་སྒྲ་གཅན་དུས་མེ་བརྩེགས་པ་ནི་མི་འཐད་ལ། ཉི་ཟླ་བརྩེགས་པ་གཟས་བཟུང་བ་ན། རེས་འགའ་སྒྲ་གཅན་མགོ་དང་རེས་འགའ་སྒྲ་གཅན་མཇུག་གིས་འཛིན་པ་ལྟར། དེ་གཉིས་གང་རུང་རེ་སྒོམ་པ་ཡིན་པ་ལས། གཙོ་བོར་ཨ་ཝ་དྷཱུ་ཏཱི་ཉིད་ཡིན་པའི་དག་སྦྱོར་གྱི་དབང་ལས་སྒྲ་གཅན་མགོ་ཉིད་སྒོམ་པར་བཞེད་པ་ཡང་རྒྱུ་མཚན་དང་བཅས་པ་བརླིང་པོར་བརྗོད་པའོ།།དེ་ལྟ་མོད་ཀྱི་ཟླ་ཉིའི་ཟླས་དྲངས་པའི་དཀྱིལ་འཁོར་གསུམ་དུ་བྱེད་པའི་ཚེ། དུས་མེའི་དཀྱིལ་འཁོར་བཀོད་ན་དེ་ཁ་དོག་སེར་པོ་ཡིན་པས། སྤྱི་ཁྱབ་ཏུ་འཇུག་པའི་རྡོ་རྗེ་གསུམ་གྱི་ཁ་དོག་དཀར་དམར་མཐིང་གསུམ་མམ། ཐབས་ཤེས་སོ་སོའི་སྐུ་གསུང་ཐུགས་དང་སྦྱར་བ་སོགས་ཁ་དོག་གི་ཆ་ནས་མི་འགྲིག་པས་སྒྲ་གཅན་མཐིང་ཁ་ཉིད་བྱའོ། །ཡང་ཁ་ཅིག་འདི་སྐད་ཅེས་ས་བོན་ཨ་ཐུང་གསུངས་པ་ནི། སྒྲའི་གཞུང་ལས་ཨ་ཐུང་ངུས་ཨ་རིང་ཐུང་གཉིས་ཀར་མཚོན་པ་བཤད་ཅིང༌། ཁམས་ལེའི་ཟུང་བདུན་གྱི་སྐབས། ཨ་རིང་ཐུང་གཉིས་སྒྲ་གཅན་དུས་མེའི་ས་བོན་དུ་བཤད་པས་ཨཾ་ཨཿཨ་ཞེས་པ་ཉིད་ཀྱིས་ཉི་ཟླ་སྒྲ་དུས་བཞི་ཅར་བསྟན་པ་འཐད་
ལ། དེའི་ཕྱིར་དཀྱིལ་འཁོར་བཞི་བརྩེགས་དགོས་སོ་ཞེས་དང༌། རིག་པའི་རྣམ་གྲངས་གཞན་རྩ་དབུ་མ་དང་དུང་ཅན་མ་ཡང་འབྲེལ་བ་དང༌། སྒྲ་གཅན་དུས་མེ་ཡང་ལྷ་གཅིག་ཉིད་ཀྱི་མགོ་གཞུག་ཡིན་ན། སྒྲ་གཅན་ནམ་མེ་ཞེས་གཅིག་བརྗོད་པ་ཉིད་ཀྱིས་གཉིས་ཀར་གོ་སྟེ། ལུས་མ་མོ་མེད་པའི་མགོ་རེ་གཞུག་རེ་གདན་དུ་མི་རུང་བའི་ཕྱིར་ཞེས་ཀྱང་སྨྲ་ལ། ལུང་གིས་སྒྲུབ་བྱེད་དུ་རོ་མཉམ་གྱི་སྐབས་ན། བདེ་བ་ཆེན་པོ་ལ་མེའི་སྟེང་དུ་སྟེ། ཟླ་བ་དང་ཉི་མ་དང་སྒྲ་གཅན་དང་དུས་མེའི་དཀྱིལ་འཁོར་གྱི་སྟེང་དུའོ། །ཞེས་གསུངས་ཤིང་ཡེ་ལེའི་ཉིས་བརྒྱ་སོ་ལྔ་པར། སྒྲ་གཅན་མེ་དང་ཟླ་བ་ཉི་མ་བཞི་པོར་བརྗོད་དེ་ས་ཆུ་སྲེག་གཟའ་རླུང་དང་སྟོང་བ་གང༌། །ཞེས་པ་རྩ་འགྲེལ་གྱིས་ཀྱང་བསྟན་ནོ། །ཞེས་ཟེར་རོ། །དེ་ལྟར་སྨྲ་བའི་མཐའ་གཅིག་ཏུ་ངེས་པར་གདན་ཉི་ཟླ་སྒྲ་དུས་བཞི་བརྩེགས་དགོས་པའི་སྒྲུབ་བྱེད་དེ་དག་ནི་ལྟར་སྣང་སྟེ། ཡེ་ལེའི་ལུང་དེ་ནི་རིགས་ཅན་གྱི་རྒྱུད་དང་མཐུན་པར་མཛད་དེ་ཕྱིའི་བྱེད་པོར་བཏགས་པའི་དངོས་པོ་རྣམས་རང་གི་ལུས་ལ་ཚང་ཚུལ་བཤད་པའི་སྐབས་ཡིན་པས་མ་འགྲེལ་ལོ། །དེ་ཡང་ཉི་ཟླ་སྒྲ་དུས་བཞི་འབྱུང་བ་ལྔ། གཟའ་བཅུ་ལས་ལྷག་མ་དྲུག \ིང་བཞི་འདོད་ཡོན་ལྔ། ཡོན་ཏན་གསུམ་རྣམས་ནང་ལུས་ལ་ཚང་ཚུལ་བརྩི་བ་ཙམ་སྟེ། འདི་དག་གི་སྙིང་པོའི་དོན་བསྡུས་པའི་ཉམས་ལེན་གྱི་སྐབས་སུ་སྦྱོར་ཚུལ་ནི་གཞན་ཡོད་དོ། །འོ་ན་སྐབས་དེར་འདི་རྣམས་ཀྱི་སྦྱོར་བ་ནི་བཞི་པོ་སྟེ་གདན་བཞིའོ། །ཞེས་གསུངས་པས་སོ་སྙམ་ན། དེ་ནི་རིགས་ཅན་གྱི་རྒྱུད་ཀྱི་ལྷ་རྣམས་ཀྱི་སོ་སོའི་གདན་དུ་བྱེད་རྒྱུ་ཉི་ཟླ་སྒྲ་དུས་བཞི་པོ་དེ་ཡིན། །ཞེས་པའི་དོན་ཡིན་གྱི། དུས་ཀྱི་འཁོར་ལོའི་བཞུགས་གདན་སྟོན་པའང་མིན་ལ་བརྩེགས་པའི་དོན་ཡང་མིན་ནོ། །རོ་མཉམ་གྱི་སྐབས་ཀྱི་ལུང་དེ་སྒྲུབ་བྱེད་བརླིང་བ་ལྟར་སྣང་ཡང༌། རྭ་དང་ཤོང་གིས་
འགྱུར་ལས་དེ་བཞིན་དུ་བྱུང་མོད། རང་ལུགས་ཀྱི་འགྱུར་དང༌། འ་ཞ་སོགས་འགྱུར་རྙིང་འགའ་ལས། སྒྲ་གཅན་ནམ་དུས་མེའི་དཀྱིལ་འཁོར་ཞེས་འབྱུང་ལ། དེའི་ནམ་གྱི་སྒྲ་ཡང་དོན་གཅིག་མིང་གི་རྣམ་གྲངས་སུ་སྟོན་པའི་ཚིག་ཡིན་པས་བཞི་རྩེག་བཀག་པ་ཡིན་ལ། དཀྱིལ་འཁོར་གཉིས་གདམ་ཁའི་ཚིག་ཀྱང་མ་ཡིན་ནོ། །ཡང་གཅིག་ཏུ་ར་ཧུ་ཀཱ་ལཱགྣི་ཞེས་གཅིག་ཏུ་སྟོན་པའང་ཡིན་ཏེ་སངས་རྒྱས་ཐུབ་པ་ཞེས་པ་བཞིན་ནོ། །རྩ་དབུ་མ་དང་དུང་ཅན་མ་རྒྱུད་གཅིག་ཏུ་འབྲེལ་ཀྱང་མདུད་པ་ཤིན་ཏུ་དམ་པས་བཀག་པ་དང༌། ཁམས་དང་བྱེད་ལས་ཤིན་ཏུ་མི་མཚུངས་པས། རྒྱུད་འདིའི་ལུགས་ལ་རྩའི་གཙོ་མོ་དྲུག་ཅེས་སོ་སོར་མཛད་པ་ཉིད་གཙོ་ཆེ་ལ། སྒྲ་གཅན་དང་དུས་མེ་ཡང་ཕྱི་ན་ཡོད་པའི་ལྷ་དེ་རྒྱུད་གཅིག་ཀྱང་སྔོན་སྟོད་སྨད་ཆད་དེ་སྲོག་གཉིས་སུ་གྱུར་ནས་སྟོད་སྨད་སོ་སོར་གནས་ནས་བྱ་བ་བྱེད་པར་གྲགས་ཤིང༌། གཟའ་བཅུའི་སྐབས་ལྷ་སོ་སོ་རེ་རེ་རྐང་ཐུབ་ཏུ་བྱེད་དགོས་པའི་ཕྱིར་དང༌། དེ་དག་དང་མཐུན་པར་རྒྱུད་སྡེ་གཞན་གྱི་སྒྲུབ་ཐབས་མང་པོར་ཡང་སྒྲ་གཅན་ཁོག་སྟོད་ལས་མེད་པ་ཞེས་འབྱུང་བ་ཡིན་ནོ། །ལུས་དང་བྲལ་བའི་མགོ་གཞུག་གཅིག་ཁོ་ན་འགོད་པ་མི་རིགས་ཞེས་པ་ནི་ཁྱེད་རང་ལ་ཡང་མཚུངས་ཏེ། ཁྱེད་ཀྱི་ལུགས་ལ་སྒྲ་གཅན་ནི་མགོ་བོ་དང༌། དུས་མེ་ནི་མཇུག་མ་ཁོ་ན་ཡིན་ན། ལུས་མ་མོ་མེད་པའི་མགོ་གཞུག་ཁོ་ན་མནན་པར་སོང་བའི་ཕྱིར་རོ། །སྒྲའི་གཞུང་གི་སྒྲུབ་བྱེད་དེ་ཡང་ཤིན་ཏུ་མི་འབྲེལ་ཏེ། དེ་ནི་གཞུང་རྩོམ་པ་ལ་ཚིག་ཉུང་བའི་ཕྱིར་ཏེ། ཨུཏ་ཀྱིས་སྡེ་དང་བཅས་པའོ། །ཞེས་པ་ལྟ་བུར་སྒྲ་གཞུང་གི་བརྡ་ཆད་དང་ཡི་གེའི་བསྡུ་བ་རྣམས་ནི། དོན་མང་པོ་ཚིག་ཉུང་ངུ་ལ་འདུ་བའི་ཕྱིར་སྒྲ་མཁན་རྣམས་ཀྱིས་གསར་དུ་སྦྱར་བ་ཡིན་གྱི་དངོས་པོ་ལ་ཞུགས་པ་
མ་ཡིན། ཀུ་ཡིག་གིས་ཀ་སྡེ་མཚོན་ནའང་ཀུ་ཡིག་དེ་ཀ་ཁ་ག་གྷ་ང་མ་ཡིན་པའི་ཕྱིར་རོ། །དེས་ན་དེ་དག་ནི་ཡིག་ཚོགས་ཆུང་བའི་ཕྱིར། བློས་བཅོས་ཏེ་སྦྱར་བ་ཡིན་ལ་འདིར་ནི་ཨཱ་ཡིག་རིང་པོ་གཅིག་ལྷག་པོར་འབྲི་བ་ལ་དཀའ་ཚེགས་མེད་པའི་ཕྱིར་དང། སྙན་བརྒྱུད་དུ་སྦས་པ་ཡིན་ནོ་ཞེས་ཀྱང་བརྗོད་པའི་གནས་མེད་པའི་ཕྱིར་དང༌། དངོས་པོའི་གནས་ཐབས་ལ་ཨ་ཐུང་དེ་ཨ་རིང་ཐུང་གཉིས་ཀ་ཡིན་པ་ནམ་དུ་ཡང་མི་འཐད་པའི་ཕྱིར་རོ།།དེས་ན་རང་ལུགས་ནི། རྒྱུད་འགྲེལ་གྱི་དགོངས་པ་དུས་མེ་ལོགས་སུ་མི་བྱེད་པ་ཉིད་དེ། ཕྱི་རོལ་ཏུ་ཡང་དུས་མེ་ལས་སྒྲ་གཅན་ཉིད་ལྷག་པར་གྲགས་ཤིང༌། ནང་དུ་ཡང་རྩ་དུང་ཅན་མ་ལས་ཀྱང་ཨ་ཝ་དྷཱུ་ཏཱི་གཙོ་ཆེ་བ་དང༌། གཞན་བསྐྱེད་རིམ་ལ་ཡང་འཁོར་ལོ་སྡོམ་པའི་ཞབས་ཀྱིས་འཇིགས་བྱེད་ཆེན་པོ་མནན་པ་སོགས་དང་གནད་གཅིག་པའི་ཕྱིར་འདིར་ཡང་ངོ༌། །དེ་ལྟ་ན་ཡང་ཨ་བྷ་ཡའི་འཕྲེང་བ་གཉིས་དང༌། སཱ་དྷུ་པུ་ཏྲ་ལ་དང༌། བསྟོད་པ་རྒྱུན་ཆགས་སོགས་ལས་དཀྱིལ་འཁོར་བཞི་བརྩེགས་སུ་བཤད་དོ་སྙམ་ན། སློབ་དཔོན་དེ་དག་གིས་རང་རང་གི་བླ་མའི་མན་ངག་ལ་བརྟེན་ཏེ་སྦྱར་བ་ཡིན་ན་མི་འགལ་ཏེ། མན་ངག་ལས་བྱུང་བ་དགག་ཏུ་མེད་པའི་ཕྱིར་རོ། །འོན་ཀྱང་རྒྱུད་འགྲེལ་གྱི་དགོངས་པ་དངོས་མ་ཡིན་ཅིང༌། འོ་སྐོལ་ཐམས་ཅད་སློབ་དཔོན་དེ་དག་གི་སྲོལ་ཀ་བྱིན་རླབས་ཀྱི་རྒྱུན་ལ་བརྟེན་ཏེ། ཆོས་འདི་ལ་འཇུག་པ་ཡང་མ་ཡིན་པར་མཚུངས་པས། རང་ལུགས་ལ་དེ་མི་མཛད་པ་བཟང་ལ། སློབ་དཔོན་དེ་དག་གི་བྱིན་རླབས་ཀྱི་རྒྱུན་ལ་བརྟེན་པ་ཡིན་ན། དེའི་ལུགས་བཞིན་བྱེད་པ་ལེགས་མོད་ཀྱང༌། རྒྱུད་འགྲེལ་གྱི་དགོངས་པ་མ་ཡིན་ཕྱིན་ཆད། རྭ་འབྲོ་སོགས་ལ་བྱིན་རླབས་རེ་ཞིང༌། སློབ་
དཔོན་གཞན་གྱི་ལུགས་འཛིན་པ་ནི་ངོ་མཚར་ཅན་གྱི་སྲོལ་ཀ་ཞིག་གོ །འོན་ཀྱང་འཇིགས་མེད་འབྱུང་གནས་བཞེད་པ་དེ་ལ་ཁོང་རང་གི་བླ་མའི་མན་ངག་དང༌། ལྷའི་སྟོབས་ལས་བྱུང་བའི་མཚོན་དོན་དག་སྦྱོར་གྱི་ཁྱད་པར་གཞན་ཡོད་དེ། ཁྱེད་ཅག་ཉི་ཟླ་སྒྲ་དུས་ཀྱི་དཀྱིལ་འཁོར་བཞི་རྩེག་ལ་ཞེན་འཐེན་པ་རྣམས་ཀྱིས་ནི་ཕྱོགས་ཙམ་ཡང་མ་རིག་གོ །འདི་ཡང་ཁོ་བོས་གཞན་དུ་བཤད་ཟིན་པས་མི་ སྤྲོའོ། །གོང་གི་ལུང་ཚིག་གིས་བདག་བསྐྱེད་ཀྱི་སྐབས་འདིར་གཙོ་བོའི་པདྨ་ཡང་ཨོཾ་ལས་བསྐྱེད་པ་ཉིད་གཙོ་ཆེ་ལ། ཡི་གེ་ལྔ་བརྩེགས་ལས་བསྐྱེད་པ་མདུན་བསྐྱེད་རྡུལ་ཚོན་སོགས་ཀྱི་དཀྱིལ་འཁོར་ཁོ་ན་ལ་གལ་ཆེ་བ་དང༌། ཡང་མོས་པའི་ཁྱད་པར་གྱིས་བདག་མདུན་གང་ལ་ཡང་པཾ་ལས་བསྐྱེད་ཀྱང་རུང་བ་ཡིན་ནོ། །ད་ནི་འཁོར་གྱི་གདན་བཤད་ན་ཐུགས་དཀྱིལ་རྩིག་པའི་ནང་གི་ལྷ་རྣམས་པདྨའི་གདན་ལ་བཞུགས་པ་ཡིན་ཞིང༌། དེ་ཡང་རྒྱུད་ལས། དེ་ཡི་དབུས་སུ་རྡོ་རྗེའི་ས་ལ་ནོར་བུའི་འོད་ཟེར་ཚོགས་ཀྱིས་དཀྱིལ་འཁོར་རྣམ་པར་འཕྲོ་བ་སྟེ། །ཨོཾ་ཡིག་ཡེ་ཤེས་ལས་སྐྱེས་རྒྱལ་བ་མཆོག་གི་པདྨ་ཟླ་བ་དང་ནི་ཉི་མ་དག་གི་གདན། །ཕྱི་རོལ་ཏུ་ནི་གསུང་གི་དཀྱིལ་འཁོར་ནོར་གྱི་པདྨ་འདི་ནི་ཟླ་བ་ཉི་མས་རྣམ་པར་དམན། །ཕྱི་རོལ་ཕྱོགས་དང་ཟུར་གྱི་ཆར་ནི་ཉིན་མོར་བྱེད་པའི་པདྨ་སྒོ་ཡི་དབུས་སུ་ཤིང་རྟ་རྣམས། །ཞེས་གསུངས་ཤིང༌། ལྷའི་གདན་གྱི་པདྨ་ཐམས་ཅད་དམ། ཡང་ན་ཐུགས་དཀྱིལ་གྱི་ལྷ་རྣམས་ཀྱི་པདྨ་ཟླ་ཉི་ནི་ས་བོན་ལས་བསྐྱེད་ཅིང༌། གདན་གཞན་རྣམས་སྐད་ཅིག་གིས་སྐྱེད་དོ། །དེ་ལ་པདྨའི་ས་བོན་ཨོཾ་དུ་འགྱུར་ཚུལ་ནི། ཇི་སྐད་དུ། རྩ་བ་སྡོང་བུ་དག་ནི་ཨ་ཡིག་འདབ་མ་དང་ནི་དེ་བཞིན་གེ་སར་རྣམས་ཀྱང་ཨུ་ཡིག་གོ །དབུས་སུ་དཔལ་ལྡན་ལྟེ་
བ་དང་ནི་ཟླ་བ་ཉི་མ་རྣམ་གཉིས་རྐང་པའི་གནས་དག་མ་ཡིག་གོ །ཞེས་གསུངས་ཏེ། ཐུགས་དཀྱིལ་གྱི་པདྨ་ཐམས་ཅད་ངེས་པར་སྡོང་བུ་དང་བཅས་པ་ཡིན་ལ། དེའི་རྩ་བ་དང་སྡོང་བུའི་ས་བོན་ཨ་ཡིག་དང༌། འདབ་མ་དང་གེ་སར་གྱི་ས་བོན་ཨུ་ཡིག་དང༌། ལྟེ་བའི་ས་བོན་མ་སྲོག་མེད་དམ་ཀླད་སྐོར་རོ། །ཨ་ཨུ་མ་གསུམ་མཚམས་སྦྱར་བས་ཨོཾ་སྟེ་པདྨའི་ས་བོན་དང༌། འགྲེལ་པར། ཟླ་བའི་གདན་ནི་མ་ཡིག་ལས་སོ། །ཉི་མའི་གདན་ནི་ཡང་ན་ར་ཡིག་ལས་སོ། །ཞེས་གསུངས་པས། ཉི་ཟླ་གཉིས་པོ་མ་ཡིག་ཁོ་ན་ལས་བསྐྱེད་ཀྱང་རུང་ལ། ཡང་ན་ཟླ་བ་མ་ཡིག་དང་ཉི་མ་ར་ཡིག་ལས་སྐྱེད་དོ། དེ་ཡང་སྒྲུབ་ལེའི་ཉི་ཤུ་པ་དང་ཉེར་གཅིག་པའི་སྐབས་སུ་བཤད་པ་ལྟར། སྐབས་དེ་དང་དེར་གཙོ་བོར་གྱུར་པའི་ལྷ་དང་ལྷ་མོ་ནག་པོ་དང༌། དཀར་པོ་རྣམས་ལ་ཟླ་གདན་བྱེད་དེ། དཀར་པོའི་ཆོས་ཀྱི་ཕྱིར་དང༌། དམར་པོ་དང་སེར་པོ་ལ་ཉི་གདན་བྱ་སྟེ། རྡུལ་གྱི་ཆོས་ཀྱི་ཕྱིར་རོ། ཡང་ན་ཤར་དང་བྱང་དང་སྟེང་ན་གནས་པ་རྣམས་ཟླ་གདན། ལྷོ་དང་ནུབ་དང་འོག་ན་གནས་པ་རྣམས་ཉི་གདན། ཡང་ན་མཚམས་ལ་གནས་པ་ལ་ཟླ་གདན། ཕྱོགས་ན་གནས་པ་ལ་ཉི་གདན་ནོ། །དེ་ལྟར་གང་སྦྱར་ཀྱང་རུང་བ་ལས། བདེ་གཤེགས་འཕར་མ་ལ་ཕྱོགས་ཕྱོགས་མཚམས་ཀྱི་དབྱེ་བ་དང༌། གཞན་རྣམས་ལ་ཇི་ལྟར་འོས་པ་སྦྱར་བས་འགྲུབ་པོ། །ཇི་ལྟར་སྒོམ་པའི་ཚུལ་ནི་མངོན་རྟོགས་དཀྱུས་ཉིད་ན་གསལ་ལོ། །དེ་ལྟར་ན་ཐུགས་དཀྱིལ་ལ་གཙོ་བོའི་གདན་ནི་པདྨ་ཟླ་ཉི་སྒྲ་གཅན་ལྷ་སྟེ་ལྔ་བརྩེགས་སམ་ལྷ་གཉིས་ཡོད་པས་དོན་ལ་དྲུག་ཀྱང་ཡིན་ལ། ཐུགས་དཀྱིལ་གྱི་ལྷ་གཞན་རྣམས་སྡོང་བུ་དང་བཅས་པའི་པདྨ་ཟླ་ཉི་གང་རུང་དང་བཅས་པའི་གདན་ནོ། །བུམ་པ་བཅུ་དང་རྡོ་རྗེ་བཞི་ལ་པདྨའི་གདན་ཁོ་ན་ཡིན་ཞིང་གལ་ཏེ་ཐུགས་དཀྱིལ་རྐྱང་པ་སྒོམ་
པའི་དུས་ན་སྒོ་སྐྱོང་གི་ཁྲོ་བོ་བཞི་ཁོ་ན་བྱེད་པ་དང༌། འོག་གི་སྒོ་ཡོད་པའི་དབང་དུ་བྱས་ནས་སྟེང་འོག་གཉིས་ཏེ་ཁྲོ་བོ་དྲུག་བྱེད་པའི་སྐབས་ཀྱང་ཡོད་ལ། འོན་ཀྱང་ཕྱོགས་བཞི་དང་སྟེང་གི་ཁྲོ་བོ་སྟེ་ལྔ་བྱེད་པ་ཉིད་གཙོ་ཆེ་སྟེ། གང་ལྟར་ཡང་ཐུགས་དཀྱིལ་གྱི་ལྷ་ལ་བཀོད་ཕྱིན་སྟེང་འོག་གི་ཁྲོ་བོ་ལ་ཤིང་རྟ་མི་བྱ་སྟེ། པདྨ་ཉི་ཟླའི་གདན་ཁོ་ ནའོ། །རང་ལུགས་ལ་གསུང་གི་རྣལ་འབྱོར་མ་དང༌། སྐུའི་ཚེས་ལྷའི་པདྨ་རྣམས་ལ་ཡང་སྡོང་བུ་ཅུང་ཟད་ཡོད་པར་བྱ་ལ་སྲོག་ཆགས་ཀྱི་སྟེང་དུ་པདྨ་བྱེད་པ་རྣམས་ཀྱི་ལུགས་ལ་ནི། སྡོང་བུ་བྱེད་པའི་ཐབས་མེད་མོད། ལུགས་དེ་ནི་མི་ལེགས་ སོ། །དེ་ལ་རྒྱ་གཞུང་སྒྲུབ་ཐབས་ཁ་ཅིག་དང༌། ཤོང་འགྱུར་སོགས་སུ་སྲོག་ཆགས་ཀྱི་སྟེང་དུ་པདྨ་ཡོད་ཀྱང༌། རང་ལུགས་ལོ་ཙཱ་བ་རྣམ་གཉིས་ཀྱི་འགྱུར་ལ། འདིར་ཤར་གྱི་པདྨའི་ལྟེ་བ་ལ། ཙ་མུཎྜའི་གདན་ཡི་དྭགས་ཆེན་པོ་དམར་པོའོ། །ཞེས་པ་དང༌། བདེན་བྲལ་གྱི་པདྨར་གདན་ནི་ཡི་དྭགས་དམར་པོའོ། །ཞེས་འབྱུང་བ་ལྟར་ཡིན་ལ། །དེ་ལ་ཕྱིས་ཀྱི་མཁས་པ་རང་ཉིད་དྲན་དགུ་ངག་ནས་སྨྲ་བའི་རྒྱས་འགེབས་གཞན་ལ་བྱེད་པ་ངག་རང་གི་འདོད་པས་འགྱུར་ནན་གྱིས་བཅོས་པའོ་སྙམ་པ་སྣང་ནའང་མ་ཡིན་ཏེ། འབྲོ་འགྱུར་ཟང་མ་ལས་འདིར་ཤར་གྱི་ཙ་མུཎྜ་ལ་ཡི་དྭགས་དམར་པོ་ཆེན་པོའི་གདན་ནི་པདྨའི་ལྟེ་བ་ལའོ། །ཞེས་དང༌། བདེན་བྲལ་གྱི་པདྨའི་གདན་ལ་ཡི་དྭགས་དམར་པོའོ། །ཞེས་འབྱུང་བ་དང༌། རྭ་འགྱུར་ལས་ཀྱང༌། ཤར་དུ་པདྨའི་ལྟེ་བར་ཡི་དྭགས་དམར་པོའི་གདན་ལ་ཙ་མུཎྜིའོ་ཞེས་འབྱུང་ཞིང༌། འ་ཞ་རྒྱ་གར་བརྩེགས་ཀྱི་འགྱུར་ལས་ཀྱང༌། འདིར་ཤར་དུ་ཡི་དྭགས་ཆེན་པོ་དམར་པོའི་གདན་པདྨའི་ལྟེ་བར་རོ་ཞེས་དང༌། བདེན་བྲལ་གྱི་པདྨའི་གདན་ལ་ཡི་དྭགས་དམར་པོའོ་ཞེས་འབྱུང་ཞིང༌། གྱི་ཇོའི་འགྱུར་ལས་ནི།
ཤར་དུ་པདྨའི་ལྟེ་བ་དང་འདབ་མ་བརྒྱད་ལ་ཡི་དྭགས་ཆེན་པོ་དམར་པོ་གནས་པ་ནི། རྒན་བྱད་མ་ལ་སོགས་པའི་ལྷ་མོ་རྣམས་ཀྱིའོ། །ཞེས་དང༌། བདེན་བྲལ་གྱི་པདྨ་ལ་ཡི་དྭགས་དམར་པོའོ། །ཞེས་སོགས་འབྱུང་སྟེ། ཕྱིས་འགྱུར་ཡར་ཀླུངས་པས། འདིར་ཤར་དུ་ཡི་དྭགས་དམར་པོའི་གདན་ཙ་མུཎྜའི་ཆུ་སྐྱེས་ཀྱི་ཟེའུ་འབྲུ་ལའོ་ཞེས་བཤད། གྱི་ཇོའི་ལྟར་ན། པདྨའི་སྟེང་དུ་གཙོ་འཁོར་ཐམས་ཅད་ལ་སྲོག་ཆགས་ཀྱི་གདན་རེ་རེ་བྱེད་པར་གསལ་ཞིང༌། རྒྱ་གར་དུ་བཞེངས་པའི་བྲིས་སྐུ་འགའ་ལའང་དེ་བཞིན་མཐོང་མོད། གཙོ་འཁོར་གདན་མཉམ་དུ་འགྱུར་བའི་སྐྱོན་ཡོད་པས། དཀྱིལ་འཁོར་ཡོངས་རྫོགས་ཀྱི་སྐབས་འདིར་དེ་ནི་མི་འདོད་མོད། འགྱུར་དེ་དག་ཐམས་ཅད་པདྨ་འོག་དང་སྲོག་ཆགས་སྟེང་ན་ཡོད་པར་མཐུན་ ནོ། །འགའ་ཞིག་རྒྱ་དཔེ་ལ་པྲེ་ཏོ་པ་ར་ཀ་མ་ལ་ཞེས་སྲོག་ཆགས་ཀྱི་སྟེང་ན་པདྨའི་སྐད་དོད་ཡོད་ཅེས་ཡུས་ཡུས་པོར་བྱེད་ཀྱང་དེ་ལྟ་བུའི་རྒྱ་དཔེ་ཡོད་པ་ཁོ་ནས། དེ་དང་མཐུན་པའི་འགྱུར་བྱུང་བ་ཡིན་པ་དང༌། རྒྱུ་མཚན་དེ་ལས་ཆེས་ལྷག་པ་རྫོགས་འཕྲེང་དང་རྡོར་འཕྲེང་སོགས་སུ་ཡང་སྲོག་ཆགས་རྣམས་པདྨའི་འོག་ཏུ་བཤད་མོད། རྒྱ་དཔེ་ཀུན་ཡང་གཅིག་པ་ཁོ་ནར་མེད་དེ་སྣ་ཚོགས་སུ་ཡོང་གིན་སྣང་བ་དང༌། སློབ་དཔོན་ཁོང་གཉིས་ལ་དེ་ལྟ་བུའི་གཞུང་བཤད་དང་མན་ངག་བྱུང་བ་ཡིན་གྱི། དེ་ཉིད་སྤྱི་ཁྱབ་ནས་ཀུན་ལ་སྦྱོར་དུ་རུང་བ་མ་ཡིན་ནོ། །དེས་ན་རྣལ་འབྱོར་རྫོགས་འཕྲེང་ལས། གཤིན་རྗེ་གཤེད་ནག་པོ་ལ་ཡང་མ་ཧེའི་སྟེང་དུ་པད་ཉིད་སོགས་བཤད་འདུག་ཀྱང༌། གཞུང་གཞན་ལ་བརྟེན་ནས་དེ་ལྟར་འདོད་མི་དགོས་པ་ལྟར་འདིར་ཡང་མཚུངས་སོ། །དེས་ན་འགྱུར་རྙིང་ཕལ་ཆེ་བར་པདྨའི་སྟེང་དུ་སྲོག་ཆགས་འབྱུང་བས། དུས་འཁོར་བ་རྙིང་པའི་རྒྱ་དཔེ་རྣམས་ལ་དེ་ཉིད་ཡོད་པ་མང་པར་གྲུབ་ལ། དེའི་ཕྱིར་སྤྱིར་ནས་ལུགས་
འདིའི་རྗེས་སུ་འབྲང་བ་ལེགས་ཤིང༌། རྣམ་པ་ཡང་ལུགས་དང་མཐུན་པ་དང༌། གཙོ་འཁོར་གྱི་གདན་གྱི་ཆེ་བའི་ཁྱད་པར་སོགས་ཕན་ཡོན་དུ་མ་ཡོད་ལ། ཁྱད་པར་དུ་བྱིན་རླབས་བླ་མ་བརྒྱུད་པའི་མན་ངག་ཀྱང་འདི་ཁོ་ན་ཡིན་པས། ཅལ་ཅོལ་ལ་ཡིད་སྨོན་མི་ བྱའོ། །སྐུའི་སྒོ་སྐྱོང་གི་ཁྲོ་བོ་རྣམས་ལ་ཤིང་རྟའི་གདན་ཡོད་པའི་ཤིང་རྟ་ནི་ཁྲོ་མོ་རྣམས་ཀྱི་བཞུགས་གནས་ཡིན་ཞིང༌། དེའི་ཕྱིར་ཁྲོ་མོ་རྣམས་ཞལ་ཕྱིར་གཟིགས་ཡིན་པས་དེ་དང་མཐུན་པར་ཤིང་རྟའི་གདོང་ཕྱིར་བསྟན་ཞིང༌། འདྲེན་བྱེད་ཀྱི་སྲོག་ཆགས་རྣམས་ཀྱང་ཕྱི་ལ་འགྲོ་བའི་ཚུལ་ལྟ་བུར་གནས་པ་ཡིན་ཞིང༌། སྟེང་འོག་གི་གཉིས་པོ་ཤར་དང་ནུབ་ཏུ་ཕྱོགས་པས་ཅུང་ཟད་གྱེན་དང་ཅུང་ཟད་ཐུར་དུ་ཕྱོགས་པའི་སྲོག་ཆགས་དང༌། ཤིང་རྟ་ཐད་ཀར་གནས་པའོ། །དེ་ལ་མཁའ་ལྡིང་ཨ་ནཱི་ལ་ཞེས་གནས་པ་ནི། ཨ་ནཱི་ལ་རླུང་གི་མིང་ཡིན་པས་མཁའ་ལྡིང་གི་རྒྱལ་པོ་རླུང་ལྟར་མགྱོགས་པས་རླུང་ཞེས་བཏགས་པ་ཡིན་ལ། ཁ་དོག་ལྔ་པ་ནི་ཡེ་ཤེས་ཁྱུང་ཁྲའི་རིགས་པ་སྦྱོར། འདི་ཡང་ཁྲོ་བའི་ཉམས་ཅན་ཡིན་ཞེས་ཁ་ཅིག་འདོད་དོ། །སེངྒེ་རྐང་པ་བརྒྱད་པ་ནི། སེངྒེ་ཤ་ར་བྷ་སྟེ་སེངྒེ་ཁ་དོག་ནག་པོའམ་སྔོན་པོ་དཔུང་པ་གཉིས་དང་དཔྱི་མགོ་གཉིས་སུ་བྱའི་གཤོག་པ་སེར་པོའམ་ཁྲ་བོ་ཆུང་ངུ་རེ་ཡོད་པའོ། ཁྲོ་བོ་འདི་དག་ལ་གདན་པདྨ་དང་ཉི་ཟླ་འདོད་པའང་བྱུང་མོད་ཀྱི། མ་བཤད་པ་ཉིད་སྒྲུབ་བྱེད་ཡིན་པའི་ཕྱིར་མི་དགོས་སོ། །འོ་ན་པདྨ་གདན་ཅན་གྱི་ལྷ་མ་ཡིན་ནམ་སྙམ་ན་ཡིན་མོད་ཀྱི། པདྨ་གདན་ཅན་གྱི་རྣམ་གཞག་ནི། དཔལ་ལྡན་རྒྱུ་སྐར་གྱི་ལྷ་ཚོགས་ཀྱི་དབང་དུ་བྱས་པའི་དཀྱིལ་འཁོར་གཞན་ཡིན་པས་ཕན་ཚུན་བསྲེ་བར་མི་བྱའོ། །ཀླུ་རྣམས་ཀྱི་གདན་སྐབས་འདིར་ངག་འདོན་ལ་མེད་ཀྱང་དུས་འདིར་བསྒོམ་དགོས་མོད། འདིར་རླུང་གི་དཀྱིལ་འཁོར་ཟླུམ་པོ།
ཆུའི་དཀྱིལ་འཁོར་ཟླ་གམ་དུ་བྱེད་པ་ཉིད་མི་འགལ་ཏེ། ཡོངས་སུ་གྲགས་པ་སྤྱི་ཁྱབ་ཀྱི་ལུགས་ལ། འདི་གཉིས་གོ་ཟློག་པར་བཤད་པ་བཞིན་དུ། རྒྱུད་འདིར་ཡང་ཅི་རིགས་པ་གསུངས་མོད་ཀྱི། བཞུགས་སྟངས་ཀྱི་དག་པའི་སྐབས་སུ་ཟླུམ་པོའི་འདུག་སྟངས་ཟླུམ་པོ་རླུང་དང༌། པདྨའི་འདུག་སྟངས་ཟླ་གམ་གྱི་དབྱིབས་ཅན་ཏེ། ཆུའི་དག་པར་གསུངས་པས་རླུང་ཟླུམ་པོ་དང༌། ཆུ་ཟླ་གམ་ཡང་ནོར་བ་མིན་པས། རྒྱུད་འགྲེལ་གྱི་སྐབས་གང་དང་གང་ལས་དེ་དང་དེ་ལྟར་གསུངས་པ་དེ་ལ་བཅོས་ཀ་མི་དགོས་སོ། །རབ་གཏུམ་མ་རྣམས་ཀྱི་གདན་ལ་འགྲེལ་ཆེན་རྭ་འགྱུར་ལས། འཁོར་ལོའི་སྟེང་དུ་ཁྭ་གདོང་མའི་བྷེ་རུཎྜའོ། །ཞེས་པ་དང༌། འ་ཞ་འགྱུར་ལས་ཀྱང༌། བྱ་རོག་གདོད་མའི་འཁོར་ལོའི་སྟེང་དུ་བྷེ་རུཎྜའོ། །ཞེས་འབྱུང་བས་སྤྱི་ལྡོག་ནས་དེ་ཡང་མི་འགལ་ཙམ་དུ་མངོན་པས། བོད་དུ་ཕྱིས་བྱུང་བའི་དུས་འཁོར་བ་མང་པོ་རྣལ་འབྱོར་མ་བརྒྱད་སོགས་ཀྱི་པདྨའི་འོག་ཏུ་སྲོག་ཆགས་དགོས་པའི་རྒྱུ་མཚན་རབ་གཏུམ་མའི་འཁོར་ལོའི་འོག་ཏུ་སྲོག་ཆགས་ཡོད་ལ། འཁོར་ལོ་དེ་པདྨའི་དོད་ཡིན་པའི་ཕྱིར་ཟེར་བ་ནི། རྟགས་ཕྱི་མ་ནི་སྤྱིར་ནས་མ་གྲུབ་ལ། འགྱུར་རྙིང་དེ་གཉིས་ལྟར་ན་རྟགས་སྔ་མ་ཡང་མ་གྲུབ་བོ། །ཡང་འབྲོ་འགྱུར་དང་ཤོང་དཔང་ཇོ་ནང་འགྱུར་རྣམས་ན། དེ་བཞིན་དུ་བྱ་རོག་གདོང་མའི་འཁོར་ལོའི་འོག་ཏུ་བྷེ་རུཎྜ་དང༌། ཞེས་འབྱུང་ཞིང༌། ཙ་མི་དང་ཡར་ཀླུངས་པ་སོགས་ཀྱང་དེ་དང་འདྲ་བས་འདི་དག་ཀྱང་རྒྱ་དཔེ་མི་འདྲ་བའི་ཁྱད་པར་ཡིན་ནོ། །ཡང་ཁ་ཅིག་རྣལ་འབྱོར་མ་སོགས་ལའང་པདྨའི་སྟེང་དུ་སྲོག་ཆགས་འདོད་པ་བཞིན་འདིར་ཡང་མཚུངས་པ་དོད་ཐུབ་ཡིན་པས། འཁོར་ལོའི་འོག་ཏུ་སྲོག་ཆགས་མི་འཐད་ཅེས་ཟེར་ལ། དེ་ལ་ཁ་ཅིག་གིས་རྣལ་འབྱོར་མ་སོགས་ཀྱི་པད་འདབ་ལ་འཁོར་གྱི་ལྷ་ཚོགས་ཡོད་ལ། རབ་གཏུམ་མའི་འཁོར་ལོ་ལ་དེ་འདྲ་མེད་པས་དེའི་
ཁྱད་དོ། །ཞེས་ལན་བཏབ་པ་ན། ཤེས་རིན་པ་སོགས་ཁ་ཅིག་འཁོར་ལོ་པདྨའི་དོད་ཡིན་པས་པདྨ་དང་འཁོར་ལོ་སྟེང་འོག་གང་དུ་བྱེད་ཀྱང་འདྲ་བར་གྲུབ་ཟིན་པ་ལ་འཁོར་ཡོད་མེད་ཀྱི་ཁྱད་སྨྲ་བ་ནི། ཁྱབ་པ་ལ་དངོས་སྐྱོན་སོང་ཡང་ཆོས་ཅན་མི་འདྲའོ་ཞེས་ཟེར་པ་དང་འདྲ་ཞེས་ཁྱད་དུ་གསོད་ན་དེ་ནི་ཤབ་ཤོབ་ཡིན་ཏེ། འཁོར་ལོ་པདྨའི་དོད་ཡིན་པར་ཁས་བླངས། གང་དོད་མཚུངས་ཀྱི་དངོས་པོ་དེ་དོད་དང་ས་ཁུལ་གཅིག་ཏུ་འཇོག་དགོས་པས་ཁྱབ་ཅེས་སྨྲས་ན་ཏ་འདྲ་བར་གྲུབ་ཟེར་བ་ཁྱེད་ཀྱི་དེ་བདེན་སྲིད་ན། དེ་དག་འདྲ་བར་མ་གྲུབ་འཁོར་ལོ་པདྨའི་དོད་དུ་ཡང་ཁས་མ་བླངས་ཏེ། ལྷ་སྡེ་ཚན་སོ་སོ་ལ་གདན་མི་འདྲ་བའི་ཁྱད་པར་ནི་ཡོད་ཀྱི། ཕན་ཚུན་འདྲ་བའི་དོད་ཁོ་ན་བརྩི་དགོས་པའི་རྒྱུ་མཚན་མེད་པའི་ཕྱིར་རོ། །དོད་ཡིན་ཀྱང་ས་ཡུལ་མཚུངས་པར་འཇོག་དགོས་པས་ཀྱང་མ་ཁྱབ་སྟེ། ཤར་ཕྱོགས་ཀྱི་ལྷ་རྣམས་ཀྱི་གདན་གྱི་དོད་ནུབ་ཕྱོགས་ཀྱི་ལྷ་རྣམས་ཀྱི་གདན་དེ་ཡིན་མོད་ཀྱི། ནུབ་ཕྱོགས་ཀྱི་ལྷའི་གདན་ཤར་དུ་འགོད་མི་དགོས་པ་བཞིན་ནོ། །ཡང་བསོད་ནམས་རྣམ་རྒྱལ་བ་ནི། སྤྱིར་འཁོར་ལོ་པདྨ་དོད་མཚུངས་པས་འཁོར་ལོ་འོག་ཏུ་བྱེད་དགོས་ལ། རབ་གཏུམ་མོའི་འཁོར་ལོའི་རྩིབས་ལའང་དཔལ་ལྡན་རྒྱུ་སྐར་གྱི་སྐབས་སུ་འཁོར་འགོད་དགོས་པའི་སྐབས་ཡོད་དོ་ཟེར་ཡང༌། དེ་ལྟ་བུའི་གསལ་ཁ་ནི་ཡེ་མེད་ན། གང་ལས་རྙེད་ཅེས་བརྟག་གོ དེས་ན་དེ་དག་གིས་དགོས་ངེས་ཤེས་པའི་གནད་མ་གོ་སྟེ། རང་ལུགས་ནི་རབ་གཏུམ་མ་རྣམས་ལ་འཁོར་ལོ་བྱེད་པ་ནི། ཕྱོགས་མཚམས་ཀྱི་གདུག་པ་ཅན་ཚར་གཅོད་པའི་དོན་ཡིན་པས། སྲུང་འཁོར་གྱི་འཁོར་ལོ་དང་གནད་གཅིག་ལ། དེ་ཉིད་ས་གཞི་ལ་རེག་ན་སྐོར་བ་མི་བདེ་བ་དང༌། སྲོག་ཆགས་ཀྱི་སྟེང་དུ་མ་རེག་པར་གནས་ན་སྐོར་བའི་བྱ་བ་བྱེད་སླ་བའི་ཕྱིར། རབ་
གཏུམ་ལ་སྲོག་ཆགས་ཀྱི་སྟེང་དུ་འཁོར་ལོ་བྱེད་པ་ཉིད་ལེགས་སོ། །སྟེང་འོག་གི་རབ་གཏུམ་མའི་ཤིང་རྟ་ནི། སྟེང་འོག་ནི་ཁྲོ་བོའི་ཤིང་རྟ་དང་རྣམ་པ་ཤིན་ཏུ་འདྲ་བ་ཡིན་པ་ལ་ཆེ་ཆུང་གི་ཁྱད་པར་ཡོད་པས་སྟེང་འོག་གི་ཁྲོ་བོའི་ཤིང་རྟ་དངོས་ལ་རབ་གཏུམ་མ་འགོད་པ་ནི་མི་ལེགས་སོ། །འདིར་གོ་སླ་བའི་དགོས་པ་ཡོད་པས་འཕྲོས་དོན་དུ་བཤད་ཀྱི། རྟེན་གྱི་དཀྱིལ་འཁོར་སྒོམ་པའི་སྐབས་འདིར་ཤིང་རྟ་འདྲེན་བྱེད་རྣམས་མ་གཏོགས་པདྨ་དང་འཁོར་ལོའི་སྟེང་འོག་གི་སྲོག་ཆགས་རྣམས་བསྒོམ་མི་དགོས་ལ། དེ་དག་ནི་ཕྱིས་ལྷ་བསྐྱེད་པ་དང་དུས་མཉམ་དུ་བསྒོམ་སྟེ། གཙོ་བོའི་ཞབས་འོག་གི་ལྷ་བཞིན་ནོ། །དེའི་ཕྱིར་སྲོག་ཆགས་དེ་རྣམས་ས་བོན་ལས་བསྐྱེད་པའང་མི་དགོས་ཏེ། ཤིང་རྟ་དང། དེ་འདྲེན་པའི་སྲོག་ཆགས་དང་བདུད་དང་དྲག་པོ་བཞིན་ནོ། །འོན་ཀྱང་སྣོད་བཅུད་ཐམས་ཅད་ཀྱི་མིང་ཡིག་དང་པོ་སོ་སོའི་ས་བོན་ཡིན་པའི་ཕྱིར་སྒོམ་མོ་སྙམ་ན། དེ་ལྟ་ན་གཞལ་ཡས་ཁང་གི་ཀ་བ་དང་རྟ་བབས་དང་རྩིག་པ་དང་རྒྱན་གྱི་ཁྱད་པར་ལ་སོགས་པ་ཀུན་ལའང་དེ་བཞིན་དུ་སྦྱར་ན་ལེགས་པར་འགྱུར་རམ་ཅི། དེའི་ཕྱིར་ཧ་ཅང་སྤྲོས་པ་བོར་ལ་རན་པར་བྱའོ།། །།གཉིས་པ་ཕྱི་ནང་གཞན་གྱི་དག་སྦྱོར་བཤད་པ་ལ་ཕྱིའི་དག་སྦྱོར་གྱི་དོགས་པ་བཅད། ནང་དང་གཞན་གྱི་དག་པ་དྲན་ཚུལ་ལོ། །དང་པོ་ནི། དབང་ལེ་ང་གཉིས་པར། སྙིང་པོ་ནས་ནི་སྒོ་ཡི་དང་པོའི་མཚམས་ཀྱིས་ནོར་ལྡན་མར་འགྱུར་འཇིག་རྟེན་ཁམས་ཀྱི་དཀྱིལ་འཁོར་ལ། སྒོ་ནས་ཙ་ར་ཙི་ཀཱ་མཐར་སུམ་འགྱུར་གདེངས་ཅན་རེ་མིག་རྣམས་ཀྱི་ལན་ཚྭའི་རིན་ཆེན་གནས་སུ་འགྱུར། །དེ་ནས་རྒྱལ་བའི་དབང་པོའི་རེ་མིག་གིས་ཀྱང་མི་ཡི་དཀྱིལ་འཁོར་དེ་ནས་དེ་བཞིན་རླུང་དུ་འགྱུར། །དེ་ཡི་ཕྱི་རོལ་ཏུ་ནི་དེ་དག་རྣམ་པར་དག་པའོ་ས་ཆུ་སྲེག་ཟ་རླུང་རྣམས་བལྟ་བར་བྱ། །
ཞེས་གསུངས་པ་དང༌། སྐུ་དཀྱིལ་དཔག་ཚད་འབུམ་ཕྲག་བཞི་པར་བཤད་པ་སོགས་ཀྱིས་འཇིག་རྟེན་ཁམས་མཉམ་གྱི་དཀྱིལ་འཁོར་ཞེས་བྱ་བ་བསྟན་པར་འདོད་པ་དང༌། ཡེ་ཤེས་ལེའུར། མཐའ་དག་རི་ཡི་བདག་པོའི་ཤར་ནི་དག་པའི་ཨིནྡྲ་ནཱི་ལ་ལྷོ་ནི་པདྨ་རཱ་ག་སྟེ། །ནུབ་ནི་ཀརྐེ་ཏ་ན་སེར་པོ་བྱང་ནི་རི་བོང་འཛིན་པ་ལྟར་དཀར་ཟླ་བ་ཆུ་ཤེལ་ལོ། །དབུས་ནི་ལྗང་ཁུ་དེ་ཡི་ནང་དུ་ཆུད་པ་འདིར་ནི་དཀྱིལ་འཁོར་ཆེན་པོ་དེའི་སྙིང་པོ་སྟེ། །དང་པོར་ཐུགས་ཀྱི་རང་བཞིན་དེ་ནས་དབུས་མ་ལས་ནི་ཉིས་འགྱུར་དག་ཀྱང་གསུང་གི་རང་བཞིན་ནོ། །དེ་ནས་གཞན་ནི་ཉེས་འགྱུར་དག་སྟེ་མདའ་ལ་བཅུ་ཡིས་བསྒྱུར་བར་གྱུར་པའི་དཔག་ཚད་སྟོང་ཕྲག་གོ །དེའི་ཕྱི་རོལ་དུས་རྣམ་དག་གིས་འཁོར་ལོའི་ངོ་བོ་དེ་ནས་འཇིག་རྟེན་ཁམས་ཀྱི་རང་བཞིན་ནོ། །ཞེས་གསུངས་པས། ལྷུན་པོའི་སྟེང་མཉམ་གྱི་དཀྱིལ་འཁོར་ཞེས་བྱ་བ་བསྟན་པར་འདོད་ཅིང༌། ཡང་ཡེ་ལེར། ལྷུན་པོར་གནས་པ་ལ་ཡང་རྒྱལ་བའི་བདག་པོའི་སེར་མོ་ཕྱེད་ནི་དཔག་ཚད་སྟོང་ཕྲག་དག་ཏུ་འགྱུར། །དེ་བཞིན་ལྷ་ཡི་རི་བོ་དག་ནི་ལུས་ཀྱི་ཚད་དུ་འགྱུར་ཏེ་རྒྱར་ནི་ཕྱེད་ཀྱི་ཚད་ཡིན་ནོ། །དེ་ཡི་སྟེང་དུ་རྡོ་རྗེའི་རྣམ་པ་བརྩེགས་པ་ཆ་གསུམ་པ་སྟེ་དེ་ཡི་ཡང་ནི་ཕྱེད་དུ་འགྱུར། །དེ་བཞིན་འོག་ཏུ་འཛིན་མ་ཆུ་དང་མེ་དང་རླུང་དང་མེ་ལྕེ་དང་བཅས་རྡོ་རྗེ་འཕྲེང་བའོ། །ཞེས་གསུངས་པས་ལྷུན་པོའི་ཕྱེད་མཉམ་གྱི་དཀྱིལ་འཁོར་བསྟན་ནོ་ཞེས་གྲག་གོ །དེ་དག་གི་དོན་ནི། དཀྱིལ་འཁོར་གང་གི་སྒོ་ཚད་གཉིས་ནི་ཁྲུ་ཡིན་ཏེ། ཁྲུ་རེ་ནི་ཕྱི་རོལ་འཇིག་རྟེན་ཁམས་ལ་དཔག་ཚད་འབུམ་ཕྲག་རེའི་དག་པ་དང་སྦྱོར་བ་ཡིན་ནོ། །དེས་ན་བྲིས་པའི་དཀྱིལ་འཁོར་ལ་ཁྲུ་གཅིག་ནས་སྟོང་གི་བར་སོགས་སྤྱིར་སྒྲུབ་པ་པོའི་ལག་ཁྲུའི་ཚད་ལ་ངེས་པ་མེད་ཀྱང༌། དཀྱིལ་འཁོར་རང་ཉིད་ཀྱི་ཁྲུ་བཞི་པར་ངེས་ཏེ་
དཔག་ཚད་འབུམ་ཕྲག་བཞི་དང་དག་པ་སྦྱོར་དགོས་པས་སོ། །དེས་ན་དབུས་ནས་ཐུགས་དཀྱིལ་གྱི་སྒོའི་ཐད་ཀྱི་རྩ་ཐིག་གི་མཚམས་ཚུན་ཆད་ཕྱོགས་གཉིས་སྡོམས་པ་ནི། ཁྲུ་གང་ཡིན་པས་ནོར་ལྡན་མ་སྟེ་སའི་དཀྱིལ་འཁོར་ཚུན་ཆད་དག་པ་ཡིན་ལ། དེའི་ཕྱིར་གཙོ་བོའི་པདྨ་སོར་ཕྱེད་བཅུ་གཉིས་པ་སྟེ་སོར་དྲུག་པ་ནི། དཔག་ཚད་སྟོང་ཕྲག་ཉི་ཤུ་རྩ་ལྔ་ལྷུན་པོའི་སྙིང་པོ་སྟེ། རྭ་དབུས་མའི་རྩ་བའི་སྦོམས་དང་མཉམ་པ་ཡིན་ཞིང༌། སྟེང་དུ་ལྷུན་པོའི་རྭའི་ཁོར་ཡུག་གམ། རྭའི་གཞི་རྟེན་ལ་རྩི་ཡང་རུང་སྟེ། ལྷུན་པོའི་སྟེང་གི་རྒྱ་དཔག་ཚད་སྟོང་ཕྲག་ལྔ་བཅུ་དང༌། འོག་ཏུ་ནི་གླིང་མཚོ་རི་དྲུག་གནོན་པ་སྟེ། བདེ་གཤེགས་འཕར་མ་དང་དག་པ་སྦྱོར་བ་ཡིན་ནོ། །དེ་ནས་ཐུགས་ཀྱི་ཚོན་ས་ལྷ་སྣམ་དཔངས་ཆུང་རྣམས་ས་དཀྱིལ་དང་སྦྱོར་ལ། དེ་ནས་གསུང་དཀྱིལ་གྱི་སྒོའི་རྩིག་པའི་ནང་ཚུན་ཆོད། སུམ་འགྱུར་གདེངས་ཅན་ཏེ། བརྒྱད་གསུམ་ཉི་ཤུ་རྩ་བཞིའི་རེ་མིག་གིས་ལན་ཚྭའི་རྒྱ་མཚོ་ཆུའི་དཀྱིལ་འཁོར་དང༌། དེ་ནས་རྒྱལ་བའི་བདག་པོ་སྟེ་ཉི་ཤུ་རྩ་བཞིའི་རེ་མིག་ཅེས་པ། ཁ་ཅིག་ཆ་ཕྲན་ཕྱེད་པའི་ཐ་སྙད་ཀྱང་སྦྱོར་བ་དོན་ལ་སྐུའི་སྒོ་ཚད་གཅིག་ལ་སོར་ཕྱེད་ཉི་ཤུ་རྩ་བཞི་ཡོད་པའི་ཚད་དེ། དཀྱིལ་འཁོར་བྲི་ཆ་ལ་གསུང་དཀྱིལ་གྱི་ཀྲ་མ་ཤིརྵ་དང་ཐད་མཉམ་པ་ཚུན་ཆོད་མེའི་དཀྱིལ་འཁོར་དང༌། དེ་ནས་བརྩམས་ཏེ་སྐུ་དཀྱིལ་གྱི་རྩིག་པའི་ནང་མཐའ་སྒོ་བཞིའི་ཐད་ཚུན་ཆོད་ནི། ཁྲུ་བཞི་པ་ཉིད་ཀྱི་ཕྱིར་རླུང་གི་དཀྱིལ་འཁོར་གྱི་མཐའ་ཚུན་ཆད་རྣམ་པར་དག་པ་སྟེ། འདིར་སྐུའི་སྟེགས་བུ་ཕན་ཆད་འཇིག་རྟེན་ཁམས་ཀྱི་ཚད་དང་མ་སྦྱར་ཏེ། ཀུན་ཁྱབ་ཀྱི་ཁམས་ལྔ་རྣམ་པར་དག་པའོ། །འདི་ལ་བོད་རྣམས་འཇིག་རྟེན་ཁམས་མཉམ་གྱི་ཐ་སྙད་སྦྱོར་བར་འདུག་གོ །ཚིགས་བཅད་བར་པའི་དོན་ནི། ལྗང་ཁུ་ཞེས་པ་ཡན་ཆད་ཀྱིས་རི་རབ་
ཀྱི་ཁ་དོག་བསྟན་ནས། དེའི་ནང་དུ་ཆུང་བ་ཞེས་པ་ནི་ལྗང་ཁུ་ཞེས་པ་ལ་མི་བསྙེག་སྟེ། རི་རབ་ཀྱི་སྟེང་གི་རྒྱ་ཡོངས་རྫོགས་ལ་སྦྱོར་བ་ཡིན་པས། རིའི་བདག་པོ་ཞེས་པ་ལ་སྦྱོར་ རོ། །སྙིང་པོ་སྟེ་ཞེས་པ་ཚིག་འོག་མ་ལ་སྦྱར་ཏེ། ཐུགས་ཀྱི་རང་བཞིན་གྱི་དཀྱིལ་འཁོར་དང༌། གསུང་དཀྱིལ་དང༌། སྐུ་དཀྱིལ་རྣམས་རིམ་པས་ཉིས་འགྱུར་ཉིས་འགྱུར་ཡིན་པས། ལྷུན་པོའི་དབུས་ཀྱི་ཆ་སྟོང་ཕྲག་ཕྱེད་དང་བཅུ་གསུམ་དང་ཐུགས་དཀྱིལ་སྦྱོར་ཏེ། འདིའི་ལྷུན་པོའི་རྭ་དབུས་མའི་རྩེ་མོ་ཕྲ་བའི་རྒྱ་ཡིན་པར་མངོན། གསུང་དཀྱིལ་དང་ལྷུན་པོའི་སྙིང་པོའི་རྒྱ་སྦྱོར། སྐུ་དཀྱིལ་དང་ལྷུན་པོའི་སྟེང་གི་རྒྱ་དཔག་ཚད་སྟོང་ཕྲག་ལྔ་བཅུ་སྦྱར་ནས། སྐུའི་རྩིགས་པ་ཕན་ཆད་མེ་ལྕེའི་འཁོར་ཡུག་ཚུན་ཆད་ཕྱིའི་འབྱུང་བཞིའི་དཀྱིལ་འཁོར་ནམ་མཁའ་དང་བཅས་པ་ལ་དག་པ་སྦྱོར་བ་ཡིན་ན། ཁྲུ་ཚད་ངེས་པ་ཅན་གྱི་དག་པ་འདི་ལ་མི་སྦྱོར་ཏེ། འདི་ལྷུན་པོའི་སྟེང་མཉམ་དུ་གྲགས་པའོ། །ཚིགས་བཅད་ཕྱི་མའི་དོན་ནི། ལྷའི་རི་བོ་སྟེ་རི་རབ་ནི་ནང་ལུས་ལ་སྦྱར་བ་ན། ལྟེ་བ་ཡན་ཆད་ཀྱི་ལུས་ཀྱི་ཕྱེད་ཁྲུ་གང་བ་དང་དག་པ་སྦྱོར་བ་ཡིན་ཞིང༌། དེ་སྤྱི་ལྡོག་ནས་ཁྲུ་གང་ཡིན་གྱི། སྒལ་ཚིགས་ཁོ་ན་ལ་རྩི་མི་དགོས་ལ། ལྷུན་པོའི་ཚད་དཔག་ཚད་སྟོང་ཕྲག་ལྔ་བཅུའི་ཕྱེད་དེ་ཉེར་ལྔ་ནི། སྟེང་གི་རྒྱ་སྟེ་ནང་དུ་ཁྲུ་ཕྱེད་ཀྱི་དག་པའོ། །ལྷུན་པོའི་སྟེང་གི་རྒྱའི་ཕྱེད་དབུས་ཀྱི་ཆ་ལ་གནས་པ་ནི། རྡོ་རྗེ་རྣམ་པར་བརྩེགས་པའི་གཞལ་མེད་ཁང་སྐུ་གསུང་ཐུགས་ཀྱི་ཆ་རིམ་པ་གསུམ་པ་སྟེ། ནང་དུ་ཁྲུ་གཅིག་གི་བཞི་ཆ་སོར་ཕྱེད་བཅུ་གཉིས་ཏེ་སོར་དྲུག་རྣམ་པར་དག་པ་དང་སྦྱོར་རོ། །གོང་མ་གཉིས་དང་འདི་ཉིད་དེ་ཕྱི་དང་དཀྱིལ་འཁོར་སྦྱར་བའི་ཚད་གསུམ་ཀ་ལ་འཇིག་རྟེན་ཁམས་རྣམས་ཟླུམ་པོ་དང༌། དཀྱིལ་འཁོར་རྩ་ཐིག་གྲུ་བཞི་ཡིན་པའི་ཕྱིར། ཟུར་རྣམས་གྲུ་ཆད་དུ་སོང་བས་ཚད་སྒྲིག་མི་
དགོས་ལ་སྒོའི་ཐད་ཀྱི་རྩ་ཐིག་དང་ཚངས་ཐིག་འཛོམས་པའི་ཐད་ཁོ་ན་ལ་དག་པ་བརྩིའོ། །དེའི་དབང་དུ་བྱས་ནས་འདིར་ཡང་རི་རབ་ཀྱི་སྙིང་པོའི་རྒྱ་དང་སྐུའི་རྩ་ཐིག་མཚུངས་པར་བྱ་ཞིང༌། སྙིང་པོའི་ས་ནས་སྐུའི་རྩ་ཐིག་གི་བར་ལ་ཁྲུ་གཉིས་སྐུའི་སྒོ་ཚད་བཞི་ཡོད་པ་བཞིན་དུ་རྩ་ཐིག་གི་ཕྱི་རོལ་ཏུ་ཡང་སྒོ་ཚད་བཞི་གཞལ་བ་ནི། མཆོད་པའི་ཁོར་ཡུག་གི་མཐའ་ཡིན་ལ། དེ་དང་རི་རབ་ཀྱི་སྟེང་གི་ཁོར་ཡུག་རྒྱ་མཉམ་པར་བྱས་ནས། དེ་ཚུན་ཆད་ལ་སོར་ཕྱེད་ཀྱི་ཚད་སོགས་ཕྱི་དང་དཀྱིལ་འཁོར་ཚད་མཉམ་པའི་དག་པ་བྱེད་དགོས་པས། སྐུ་དཀྱིལ་དཔག་ཚད་སྟོང་ཕྲག་ཉི་ཤུ་རྩ་ལྔ་པ་དང༌། གསུང་དཀྱིལ་སྟོང་ཕྲག་ཕྱེད་དང་བཅུ་གསུམ་པ་དང༌། ཐུགས་དཀྱིལ་དྲུག་སྟོང་སུམ་བརྒྱ་ལྔ་བཅུ་པ་དང༌། བདེ་ཆེན་སུམ་སྟོང་བརྒྱ་ཉེར་ལྔ་པ་དང༌། གཙོ་བོའི་པདྨ་སྟོང་ལྔ་བརྒྱ་ཕྱེད་དང་རེ་གསུམ་པའོ། །འོན་ཀྱང་སྟོང་ཕྲག་དག་ཅེས་གཉིས་ཚིག་སྟེ་སོར་ཕྱེད་པས་ཉིས་སྟོང་མཚོན་པ་ན་སོར་ཉེར་ལྔས་འབུམ་སྟེ་འབུམ་ཕྲག་བཞི་པའི་དག་པའང་གསུངས་པའོ།། མཆོད་པའི་ས་གཞིའི་ཁོར་ཡུག་གི་ཕྱི་ཕན་ཆད་ལ་དཀྱིལ་འཁོར་དང་ཕྱིའི་ཚད་མཉམ་པར་མི་བརྩི་སྟེ། འབྱུང་བཞིའི་དཀྱིལ་འཁོར་ནམ་མཁའ་དང་བཅས་པ་ཁོར་ཡུག་ལྔ་དང་སྦྱོར་བའོ།། འདི་རི་རབ་ཕྱེད་མཉམ་གྱི་དཀྱིལ་འཁོར་ཞེས་གྲགས་པ་དེ་ཡིན་ནོ། །དེ་ལ་འདི་དག་ཐམས་ཅད་དག་པའི་ཚུལ་གྱིས་བསྟན་པར་སྣང་བས། དེས་ན་ནང་དཀྱིལ་ཞེས་བྱ་བ་སྐུའི་དཀྱིལ་ནང་གི་དཀྱིལ་འཁོར་གྱི་དག་པ་འཇིག་རྟེན་གྱི་ཁམས་གཅིག་ལ་བརྩི་བ་དང༌། དེ་ཉིད་རི་རབ་ཀྱི་སྟེང་གི་རྒྱ་ལ་བརྩི་བ་དང༌། དེ་འདྲ་རི་རབ་ཀྱི་སྙིང་པོའི་ཚད་ལ་རྩི་བ་ཞེས་ཐ་སྙད་སྦྱར་ན་ལེགས་ཀྱི། དཀྱིལ་འཁོར་ཡོངས་རྫོགས་དང་འཇིག་རྟེན་ཁམས་མཉམ་པ་སོགས་མིན་པའི་ཕྱིར། འཇིག་རྟེན་ཁམས་མཉམ་
གྱི་དཀྱིལ་འཁོར་ཞེས་སོགས་ཐ་སྙད་སྦྱོར་ཚུལ་མི་ལེགས་སོ། །དེ་ལ་ནམ་མཁའི་ཁོར་ཡུག་ཚུན་ཆད་དཀྱིལ་འཁོར་ཡིན་ཞིང༌། རབ་གཏུམ་མ་སོགས་རྩ་བའི་ལྷ་འགའ་ཞིག་གི་བཞུགས་གནས་ཀྱང་མེ་རླུང་མཚམས་ཡིན་པས། སྔ་མ་ལ་དེ་དག་ཐམས་ཅད་འཇིག་རྟེན་ཁམས་ཀྱི་ཕྱི་ན་ཡོད་པས། འཇིག་རྟེན་ཁམས་ལས་ལྷག་པའི་དཀྱིལ་འཁོར་དུ་འགྱུར་ཞིང༌། བར་པ་ལ་ཡང་མཆོད་པའི་ས་གཞི་ཚུན་ཆོད་ཀྱི་སའི་དཀྱིལ་འཁོར་དང་མཉམ་པས་དཀྱིལ་འཁོར་ཡོངས་རྫོགས་རི་རབ་ཀྱི་སྟེང་དང་མི་མཉམ་པ་དང་དཀྱིལ་འཁོར་གྱི་ནམ་མཁའི་ཁོར་ཡུག་ཚུན་ཆད་ཀྱིས་འཇིག་རྟེན་ཁམས་ཀྱི་ཆུའི་དཀྱིལ་འཁོར་ནོན་པ་ཙམ་དུ་འགྱུར་བས། རྣམ་པ་གཅིག་ཏུ་ན་འཇིག་རྟེན་ཁམས་ཀྱི་ཕྱེད་དང་མཉམ་པ་ཙམ་དུ་འགྱུར་བ་དང༌། ཕྱི་མ་ཡང་རི་རབ་ཀྱི་སྟེང་དང་མཆོད་པའི་ས་གཞི་མཉམ་པའི་ཕྱིར། ཁོར་ཡུག་གི་མཐའ་དང་ས་དཀྱིལ་གྱི་རྒྱ་མཉམ་པས་རི་རབ་ལས་ཀྱང་ལྷག་པའི་དཀྱིལ་འཁོར་དུ་འགྱུར་བས་རི་རབ་ཀྱི་ཕྱེད་དང་མཉམ་པ་མ་ཡིན་པའི་ཕྱིར་རོ། །དེ་ལྟར་ན་དངོས་བསྟན་ལ་གཙོ་བོར་དག་པ་མི་འདྲ་བ་གསུམ་བསྟན་པ་ཡིན་ཞིང༌། ཤུགས་བསྟན་ལ་སྒོམ་དོན་ཡང་རྣམ་གྲངས་གསུམ་འཕངས་པ་ནི་ཡིན་ནོ། །འོན་ཀྱང་སྔ་མ་ཁ་ཅིག་འདི་སྙམ་དུ་ནང་གི་དཀྱིལ་འཁོར་འཇིག་རྟེན་ཁམས་དང་ཚད་མཉམ་སྒོམ་དོན་ཡིན་པའི་དབང་དུ་བྱས་ནས། གཙོ་བོའི་པདྨའི་རི་རབ་སྟེང་གི་པདྨ་ཡིན་པ་དང༌། བདེ་ཆེན་འཁོར་ལོ་རི་རབ་ཀྱི་སྟེང་ན་ཡོད་པ་དང༌། ཐུགས་དཀྱིལ་སའི་དཀྱིལ་འཁོར་གྱི་སྟེང་དང༌། གསུང་དཀྱིལ་ཆུ་དང༌། སྐུ་དཀྱིལ་རླུང་གི་སྟེང་ན་ཡོད་པར་འདོད་ཅིང༌། ཕྱི་མ་རི་རབ་ཕྱེད་མཉམ་ལ་ཡང་མཆོད་པའི་གཞི་ཡན་ཆད་རི་རབ་ཀྱི་རྩེ་ལ་གནས་པ་དང༌། ཁོར་ཡུག་བཞི་པོ་འཇིག་རྟེན་ཁམས་ཀྱི་དཀྱིལ་
འཁོར་བཞི་ཡིན་པར་འདོད་དོ། །དེ་ལ་གཞན་ཕྱིས་བྱུང་བ་དག་འཇིག་རྟེན་ཁམས་མཉམ་ལ་བདེ་ཆེན་འཁོར་ལོ་རི་རབ་ཀྱི་སྟེང་དང༌། ཐུགས་གསུང་སྐུ་གསུམ་གྱི་གཞི་རི་རབ་ཀྱི་རྩ་བ་ན་མཐོ་དམན་མེད་པར་མཉམ་ན། དེ་དག་ཧ་ཅང་མི་འདྲ་བ་ཐལ་ཆེས་པ་དང༌། ཐུགས་དང་བདེ་ཆེན་མཐོ་དམན་ཆེ་གྲགས་སོ་ཞེས་སྐྱོན་འཛིན་ལ། ཕྱི་མ་ལ་ཡང་མཆོད་པའི་ས་གཞི་དང་ཁོར་ཡུག་བཞི་ལ་མཐོ་དམན་ཆེས་པའི་སྐྱོན་བརྗོད་པ་ན། ཡང་དེ་ལ་འགའ་ཞིག་གིས་རྣལ་འབྱོར་རྒྱུད་ལས་རི་རབ་ཀྱི་རྩེ་མོར་གཞལ་མེད་ཁང་དང་ཁོར་ཡུག་མཐིལ་ལ་ཡོད་པའི་རིགས་འགྲེའི་བརྒལ་ལན་གྱིས་སྐྱོན་མེད་ཚུལ་བྱེད་ཀྱང་འདོད་པ་སྔ་མ་ལ་སྐྱོན་དེ་དག་ངེས་པར་འབྱུང་ངོ༌། །དེས་ན་རང་ལུགས་ལ་དེ་ལྟར་མི་བྱ་སྟེ། གསུམ་ཀར་ལ་མཚུངས་པར་རི་རབ་མན་ཆད་རྡོ་རྗེའི་ས་གཞིའི་གདན་ཡིན་ལ། ནང་དཀྱིལ་འཇིག་རྟེན་ཁམས་དང་ཚད་མཉམ་པའི་ཕྱོགས་ལ་འོག་གཞི་རླུང་གི་དཀྱིལ་འཁོར་གྱི་མཐའ་ཚུན་ཆད་ལས་ཀྱང་སུམ་ལྡབ་ཀྱི་ཆེ་བའི་རྡོ་རྗེའི་ས་གཞི་བཀལ་ཏེ། དེའི་སྟེང་དུ་དཀྱིལ་འཁོར་སྒོམ་པ་ཡིན་ལ། ནང་དཀྱིལ་དང་རི་རབ་སྟེང་མཉམ་ལ་ཡང་རི་རབ་ཀྱི་སྟེང་དུ་འོག་གཞི་ཆུའི་དཀྱིལ་འཁོར་གྱི་མཐའ་དང་རྒྱ་མཉམ་པའི་རྡོ་རྗེའི་ས་གཞི་བཀལ་ཏེ། དེའི་སྟེང་དུ་དཀྱིལ་འཁོར་བྱེད་པ་ཡིན་ཞིང༌། ནང་དཀྱིལ་རི་རབ་ཕྱེད་མཉམ་ལ་ནི། འོག་གཞི་སའི་དཀྱིལ་འཁོར་གྱི་མཐའ་དང་མཉམ་པའི་རྡོ་རྗེའི་ས་གཞི་བཀལ་ཏེ། དེའི་སྟེང་དུ་གཞལ་ཡས་ཁང་སློང་ངོ༌། །དེ་དག་ཀྱང་རགས་རྩིས་ཡིན་གྱི། རྡོ་རྗེའི་གུར་ལས་ཀྱང་ས་གཞི་ཅུང་ཟད་རྒྱ་ཆེ་བ་དགོས་པས་རྡོ་རྗེའི་ས་གཞི་ཅུང་ཟད་ཕྱེད་བསྐྱེད་པ་ལ་འགལ་བ་མེད་དོ། །ད་ལྟ་སྒོམ་པ་ལ། དེ་གསུམ་ཀའི་རྒྱ་ཁྱོན་གྱི་ཚད་རྣམས་མོས་པ་ཙམ་བྱེད་པ་ཡིན་ལ། གསལ་སྣང་དང་ལྷའི་མིག་གི་མངོན་ཤེས་ཐོབ་ན་ནི། སོ་སོའི་
ཚད་དང་མཐུན་པར་སྒོམ་ནུས་པའང་ཡིན་ནོ། །དེ་ཡང་དཔེར་ན་དཀྱིལ་འཁོར་བཞི་རི་རབ་དང་བཅས་པ་བློ་ཡུལ་གང་བདེ་བའི་ཚད་ཅན་ཞིག་བསྐྱེད་ནས་དཔག་ཚད་བཞི་འབུམ་སོགས་ཀྱི་ཚད་ཡོད་སྙམ་པའི་མོས་པ་བྱ། དེའི་སྟེང་དུ་རྡོ་རྗེའི་ས་གཞི་དང༌། ས་གཞིའི་སྟེང་དུ་གཞལ་མེད་ཁང་སྐུ་དཀྱིལ་གྱི་ཤར་སྒོའི་ཐད་དང༌། འོག་གཞི་རླུང་དཀྱིལ་གྱི་ཤར་མཐའ་རྒྱ་ཚད་མཉམ་པས་སྟེང་འོག་ཏུ་གནས་ཤིང༌། གཞལ་ཡས་ཁང་གི་ཟུར་རྣམས་རླུང་དཀྱིལ་ལས་ཀྱང་ཕྱིར་ལྷག་པ་ཞིག་བསྒོམས་ནས། སེམས་ཅན་རྣམས་ལ་རླུང་གི་དཀྱིལ་འཁོར་དུ་སྣང་བ་ནི་འོག་གཞིའི་རླུང་འདི་ཡིན་ཞིང༌། དེའི་རང་བཞིན་གདོད་མའི་ཡེ་ཤེས་དཀྱིལ་འཁོར་དུ་ཤར་བ་ནི། སྐུ་དཀྱིལ་འདི་ཡིན་ནོ། །དེ་བཞིན་དུ་ཆུ་དཀྱིལ་གྱི་ཆོས་ཉིད་གསུང་དཀྱིལ་དང༌། ས་དཀྱིལ་གྱི་ཆོས་ཉིད་ཐུགས་དཀྱིལ་དང༌། རི་རབ་རི་གླིང་མཚོ་དང་བཅས་པའི་གནས་ལུགས་གདོད་མའི་ཡེ་ཤེས་བདེ་ཆེན་འཁོར་ལོར་ཤར་བའོ་ཞེས་བསྒོམ་དགོས་ཏེ། ཚུལ་དེས་གཞན་གཉིས་ལའང་རིགས་འགྲེ་བས་རང་གི་བློ་དང་འཚམས་པའི་དཀྱིལ་འཁོར་ཤིན་ཏུ་ཆུང་ངུ་ཞིག་བསྒོམས་ཀྱང༌། དེ་ཁ་རང་ལ་བལྟོས་པའི་ཚད་ངེས་པར་བྱས་ནས། ང་རྒྱལ་སྔ་མ་བཞིན་དུ་བཞག་པས་དོན་སྟོན་པ་ཡིན་ཏེ། ཚད་ཀྱི་དག་སྦྱོར་ཤེས་ནས་བསྒོམ་དགོས་མོད། སྒོམ་པའི་ཚད་དངོས་ལ་ངེས་པ་མེད་དོ། །དེས་ན་ཁ་ཅིག་བསྒོམ་བྱ་འཇིག་རྟེན་ཁམས་མཉམ་ཁོ་ན་ཡིན་གྱི། གཞན་གཉིས་དག་པ་ཙམ་མོ་གསུང་པ་དང༌། གཞན་དག་རི་རབ་ཕྱེད་མཉམ་ཁོ་ན་བསྒོམ་བྱ་ཡིན་ཞེས་ཟློག་སྟེ་སྨྲ་བ་ཐམས་ཅད་རང་འདོད་སྨྲ་བ་ཙམ་ཡིན་ནོ། །ཤེས་རིན་པ་ནི་འབྱུང་བཞི་རི་རབ་ཆུང་ངུའི་སྟེང་དུ་རྡོ་རྗེའི་ས་གཞི་ཆེན་པོ་འགེལ་བ་ནི། བྲེ་སྟེང་དུ་ཕུབ་བཞག་པ་ལྟར་ཤིན་ཏུ་མི་འཐད་དོ་ཟེར་ཡང་
ཚིག་གི་རྣམ་འགྱུར་ཙམ་མ་གཏོགས་དོན་ལ་མི་གནས་ཏེ། དེ་ལྟར་སོང་ཡང་སྐྱོན་ཅི་ཡོད་སྨོས་ཤིག མ་ཡིན་ཏེ་པདྨའི་སྡོང་པོ་ལ་བཞུགས་པའི་ལྷ་རྣམས་ལའང་སྐྱོན་དེར་ཐལ་བར་འགྱུར་བས་སོ། །ནང་དཀྱིལ་འཇིག་རྟེན་ཚད་མཉམ་གྱི་སྐབས་འདིར་ལྷུན་པོའི་སྟེང་གི་པདྨ་ཉི་ཟླ་སྒྲ་གཅན་རྣམས་ནི་ཚད་སྙོམས་པའི་ཕྱིར། གཙོ་བོའི་གདན་དུ་བྱེད་པའང་མི་འཐད་པ་མེད་ཅིང༌། དེའི་ཚེ་ལྷུན་པོ་དང་དེའི་བར་དུ་རྡོ་རྗེའི་ས་གཞི་ས་སྟེགས་རྣམས་དང་བཅས་པ་རྗེས་སུ་བཅུག་པ་ནི་ངེས་པར་འདོད་ཀྱི་མི་འདོད་པ་ཐལ་པ་མེད་དོ།། །།གཉིས་པ་ནང་དང་གཞན་གྱི་དག་སྦྱོར་ལ། རྡོ་རྗེ་ལུས་ཀྱི་རྣམ་དག་ དང༌། །ཆོས་ཀྱི་ཕུང་པོའི་རྣམ་དག་དང༌། འཕྲོས་དོན་ཕྱོགས་ཙམ་བསྟན་པ་སྟེ་གསུམ་ལས། དང་པོ་ནི། ཀ་བ་རྣམས་དང་ཞེས་པ་ནས་དཀྱིལ་འཁོར་གྱི་ནི་རྣམ་པར་གསུངས། ཞེས་པའི་བར་ཏེ། དཀྱིལ་འཁོར་གྱི་ཕྱི་ནང་རྟ་བབས་ཀྱི་བར་དུ་ཀ་བ་ཐམས་ཅད་དང༌། ནམ་མཁའི་ཁོར་ཡུག་རྡོ་རྗེའི་འཕྲེང་བ་དང་བཅས་པ་དང་སའི་ཁོར་ཡུག་དང༌། ཐུགས་དཀྱིལ་གྱི་རྩིག་པ་རྣམས་ནི། ནང་རྡོ་རྗེའི་ལུས་ལ་སྦྱར་བའི་ཚེ། རུས་པའི་ཚོགས་རྣམས་ཀྱིས་དེ་དག་གི་དོད་ཐུབ་པ་མཛོད་ཅིག་ཅེས་པ་སྟེ། དེ་ཡང་རྐང་ལག་གི་རུས་པ་བརྒྱད་ནི་ཀ་བ་དང༌། རྩིག་མ་རྣམས་ནི་བདེ་གཤེགས་འཕར་མའི་ཕྱི་ནང་དང་ཁོར་ཡུག་ཆེན་པོའི་རྡོ་རྗེའི་འཕྲེང་བ་དང༌། སོར་མོ་རྣམས་སྤངས་པའི་རྐང་མགོ་ལག་མགོའི་རུས་པ་དང་བཅས་པ་དང༌། ཐོད་པ་རྣམས་ནི་ཐུགས་དཀྱིལ་གྱི་རྩིག་པ་དང༌། སྒལ་ཚིགས་ཀྱི་དབྱུག་གུ་ནི་སའི་ཁོར་ཡུག་གོ །རྒྱུད་དང་འགྲེལ་བ་ལས་དངོས་སུ་གསལ་ཁ་མེད་ཀྱང༌། སྐུ་དཀྱིལ་གསུང་དཀྱིལ་གྱི་རྩིག་པའི་དག་པ་འོག་ཏུ་གསལ་བར་བསྟན་པའི་ཕྱིར། དེ་དག་འདིའི་ཁོངས་སུ་བསྡུས་ན་ཟློས་པར་འགྱུར་
བའི་ཕྱིར་དང༌། རུས་པའི་དབྱེ་བ་འདི་རྣམས་དང༌། རྩིག་པ་ཐུགས་དཀྱིལ་གྱི་རྩིག་པར་འཆད་པ། མན་ངག་ལས་ཀྱང་འབྱུང་བ་ཉིད་ཤིན་ཏུ་རིགས་པའི་ཕྱིར་རོ། །དེ་བཞིན་དུ་ཤ་རྣམ་པར་དག་པ་ནི། ཤར་གྱི་རྡུལ་ཚོན་གདབ་པ་སྟེ། ཁ་དོག་ནག་པོ་དང༌། ཁྲག་རྣམ་པར་དག་པ་ནི་ལྷོའི་རྡུལ་ཚོན་གདབ་པ་སྟེ། ཁ་དོག་དམར་པོ་དང༌། དྲི་ཆུ་རྣམ་པར་དག་པ་ནི་བྱང་གི་རྡུལ་ཚོན་གདབ་པ་སྟེ་ཁ་དོག་དཀར་པོ་དང༌། བཤང་བ་རྣམ་པར་དག་པ་ནི། ནུབ་ཀྱི་རྡུལ་ཚོན་གདབ་པ་སྟེ་ཁ་དོག་སེར་པོའོ། །རྡུལ་ཚོན་གདབ་པ་ཞེས་པ་ནི། རྡུལ་ཚོན་འབྲི་བའི་དག་པའི་དབང་དུ་བྱས་པ་སྟེ། སྒོམ་དོན་ལ་སོ་སོའི་ཁ་དོག་ཉིད་དོ། །ལྷ་དང་གཤིན་རྗེ་ནོར་སྦྱིན་ཅེས་པ་ནི། དེ་རྣམས་ཡོད་པའི་ཕྱོགས་ཤར་ལྷོ་བྱང་གསུམ་གྱི་མིང་ཡིན་ལ། གཞན་ཞེས་པ་དེ་གསུམ་ལས་གཞན་པ་སྟེ་ནུབ་བོ། །འགྲེལ་ཆེན་ལས། དབུས་སུ་ཁུ་བ་རྣམ་པར་དག་པས་རྡུལ་ཚོན་གདབ་བོ། །གང་རྡུལ་ཚོན་དྲུག་པ་ཡིན་པ་དེར་ནི་རྡུལ་རྣམ་པར་དག་པས་རྡུལ་ཚོན་གདབ་བོ་ཞེས་གསུངས་པས། གཙོ་བོའི་པདྨ་ལྗང་ཁུ་ནི་ཁུ་བ་རྣམ་པར་དག་པ་དང༌། པདྨ་དེའི་གདན་ས་གཞི་སྔོན་པོ་ནི་རྡུལ་རྣམ་པར་དག་པ་བསྟན་པ་ཡིན་ནོ། །དཀྱིལ་འཁོར་གྱི་ནང་གི་ས་གཞི་གཞན་གང་ཅི་ཡང་རུང་སྔོན་པོའི་མདོག་ཅན་མེད་ལ། རྡུལ་ཚོན་དྲུག་པ་སྟེ་སྔོན་པོའི་ས་གཞི་གཅིག་ངེས་པར་ཡོད་པར་གསུངས་པས། གཙོ་བོའི་པདྨའི་འོག་གཞི་སྔོན་པོ་ཡིན་གྱི། ཁ་ཅིག་འདོད་པ་ལྟར་གྱི་ལྗང་ཁུ་མ་ཡིན་ནོ། །མཁྲིས་པ་རྣམ་པར་དག་པ་ནི། ཉི་མའི་གདན་དང༌། བད་ཀན་རྣམ་པར་དག་པ་ཟླ་བའི་གདན་དང༌། དེ་བཞིན་དུ་ཆུ་རྒྱུས་རྣམ་པར་དག་པ་ནི། ཉི་ཟླའི་འོག་གི་ཆུ་སྐྱེས་པདྨ་སྟེ། སྐབས་འདིར་གཙོ་བོའི་པདྨ་ལ་དག་པ་འོག་ཏུ་གསལ་བས། ཐུགས་དཀྱིལ་གྱི་ལྷ་གཞན་རྣམས་ཀྱི་གདན་པདྨ་རྣམས་སོ། །རྭ་བ་སྟེ་
རྩིག་པ་རིམ་པ་ལྔའི་རེ་ཁ་ལ་སེར་པོ་ནི་ས་ལས་སྐྱེས་པའི་མཐེ་བོང་དཀར་པོ་ཆུ་ལས་སྐྱེས་པའི་འཛུབ་མོ། དམར་པོ་སྲེག་ཟ་སྟེ་མེ་ལས་སྐྱེས་པའི་གུང་མོ། ནག་པོ་རླུང་ལས་སྐྱེས་པའི་མིང་མེད་དང༌། ལྗང་ཁུ་ནི་ནམ་མཁའ་ལས་སྐྱེས་པའི་མཐེ་ཆུང་རྣམ་པར་དག་པ་སྟེ། དེ་ཡང་གསུང་དཀྱིལ་གྱི་རྩིག་པ་ནི་ལག་སོར་དང༌། སྐུ་དཀྱིལ་གྱི་རྩིག་པ་ནི་རྐང་སོར་དང་སྦྱོར་རོ།། དུས་ཀྱི་རྩ་སྟེ་ཨ་ཝ་དྷཱུ་ཏཱི་ནི་གཙོ་བོའི་ཆུ་སྐྱེས་ཏེ། བཅོམ་ལྡན་འདས་ཉིད་གང་དུ་བཞུགས་པའི་ཆུ་སྐྱེས་པདྨའི་གདན་ཡིན་ལ། །འགྲེལ་པར་རོ་རྐྱང་ལ་སོགས་པ་རྩ་སྟོང་ཕྲག་བདུན་བཅུ་རྩ་གཉིས་པོ་གཞན་རྣམས་ནི་རྣལ་འབྱོར་མ་རྣམས་དང་ཚེས་ལྷའི་པདྨ་དང་སྲོག་ཆགས་དང་ཤིང་རྟ་ལ་སོགས་པ་ལྷའི་གདན་སྣ་ཚོགས་པ་གཞན་རྣམས་རྣམ་པར་དག་པར་གསུངས་ཤིང༌། ཡང་རྩ་འགྲེལ་གཉིས་ཀྱི་སྐབས་འདི་ཐད་དུ་དངོས་སུ་མ་གསུངས་ཀྱང་གཙོ་བོའི་གདན་ཉི་ཟླ་སྒྲ་གཅན་ནི་སྐབས་གཞན་དུ་ཡང་ཡང་གསུངས་པ་ལྟར་བཤང་གཅི་ཁུ་བའི་རྩ་གསུམ་དང༌། རྩ་དབུ་མའི་ནང་དུ་གནས་པའི་རྡུལ་མུན་སྙིང་སྟོབས་གསུམ་གྱི་ཐིག་ལེ་ལ་སྦྱོར་དགོས་ཀྱི་གཙོ་བོའི་གདན་མཁྲིས་པ་དང་བད་ཀན་ལ་མི་སྦྱོར་རོ། །གཡོ་བ་སྟེ་རླུང་གི་ཁོར་ཡུག་ལྤགས་པ་རྣམ་པར་དག་པ་དང༌། མེའི་དཀྱིལ་འཁོར་གྱི་ཁོར་ཡུག་ནི་ལྤགས་པའི་སོགས་ཁོངས་ནས་ཁྲག་རྣམ་པར་དག་པ་དང༌། མེའི་སོགས་ཁོངས་ནས་ཆུའི་ཁོར་ཡུག་རྡུལ་འབབ་པ་རྣམ་པར་དག་པ་དང༌། སའི་ཁོར་ཡུག་གི་རྣམ་དག་གོང་དུ་བཤད་ཟིན་པ་དང༌། ནམ་མཁའི་ཁོར་ཡུག་ཀྱང་རྡོ་རྗེའི་འཕྲེང་བ་དང་ལྷན་ཅིག་པ་ཉིད་ཀྱིས་སྔར་བསྟན་པ་ཉིད་དོ། །ཉི་མའི་སྒོ་སྟེ་སྒོ་བཅུ་གཉིས་རྣམས་ནི་རྣ་བའི་བུ་ག་གཉིས། སྣ་བུག་གཉིས། མིག་གཉིས། ཁ་དང་འོག་སྒོ་གཉིས་དང༌། ཁུ་བ་འབབ་པའི་ལམ་དང༌། ནུ་མའི་བུ་ག་གཉིས་རྣམས་རྣམ་པར་དག་པའོ། །སྒོ་བཅུ་གཉིས་ནི། སྐུ་གསུང་ཐུགས་ཀྱི་
དཀྱིལ་འཁོར་གསུམ་ལ་སྒོ་ཁང་སྒོ་གླེག་དང་བཅས་པའི་སྒོ་བཅུ་གཉིས་ཡོད་པ་རྣམས་ཡིན་ལ། སྐབས་གཞན་དུ་སྒོ་བཅོ་ལྔར་གསུངས་པ་ནི། དེའི་སྟེང་དུ་སྟོང་པའི་སྒོ་གསུམ་བསྣན་པ་སྟེ། སྟོང་པའི་སྒོ་ཞེས་པ་སྒོ་གླེག་དང་སྒོ་ཁང་མེད་པའི་དོན་ཏེ་མཐོངས་ཀ་ལ་སྒོའི་མིང་གིས་བཏགས་པའོ། །བཅོ་ལྔ་ལ་དག་པའང་མང་དུ་གསུངས་ཤིང༌། རྣམ་གྲངས་གཅིག་ལ་འོག་ཏུ་འབབ་པའི་སྒོ་རེ་ཡང་འབྱུང་བས་སྒོའི་རྣམ་གྲངས་བཅོ་བརྒྱད་དུ་ཡང་འགྱུར་མོད་ཀྱི། དེའི་རྣམ་གྲངས་རེ་ཞིག་བཞག་སྟེ། སྒོ་དངོས་ནི་བཅུ་གཉིས་དང༌། རྣམ་གྲངས་ཀྱི་བཅོ་ལྔའོ། །དཀྱིལ་འཁོར་ལ་ནོར་བུའི་རང་བཞིན་གྱྀ་བཀོད་པ་དོ་ཤལ་ལ་སོགས་པའི་རྒྱན་རྣམས་ནི། སོའི་འཕྲེང་བ་རྣམ་པར་དག་པ་དང༌། གཡོ་བ་རླུང་གི་དཀྱིལ་འཁོར་ཏེ། ཁོར་ཡུག་ལ་གནས་པའི་དུར་ཁྲོད་ཆེན་པོ་བརྒྱད་པོ་རྣམས་སོ་སོའི་དབུས་སམ་ནང་གི་ཆ་ལ་གནས་པའི་རབ་གཏུམ་མ་རྣམས་ཀྱི་འཁོར་ལོ་བརྒྱད་པོ་ནི། སོར་མོ་རྣམས་ཀྱི་སེན་མོ་ཡིན་ཏེ། དེ་ལྟར་བསྟན་པའི་ཤུགས་ལ་ནམ་མཁའ་དང་ཡེ་ཤེས་ཀྱི་ཁམས་སམ། སྟོང་པའི་ཁམས་གཉིས་སུ་བརྗོད་ཀྱང་རུང་སྟེ། མཐེ་ཆུང་གི་སེན་པོ་གཉིས་ནི། རབ་གཏུམ་མའི་སྟེང་འོག་གི་ཤིང་རྟ་དང་སྦྱོར་དགོས་ལ། དེ་ཡང་གཙོ་བོར་ལག་སོར་ལ་ཡིན་པས། རྐང་སོར་གྱི་སེན་མོ་རྣམས་དེ་དག་གི་ཁོངས་སུ་ཞོར་བྱུང་ལ་འདུས་པའམ། ཡང་ཀླུ་བཅུའི་གདན་དང་སྦྱར་ན་ཡང་ཟླ་སྟོབས་ཀྱི་ཤུགས་ལ་ཐོབ་ཏུ་རུང་བར་ཡང་མངོན་ནོ། །བ་སྤུ་རྣམ་པར་དག་པས་རྡོ་རྗེ་མེ་ལྕེ་ཞེས་པ་སྟེ། དཀྱིལ་འཁོར་གྱི་མཐར་ཕྱོགས་དང་ཕྱོགས་མཚམས་ཐམས་ཅད་དུ་འབར་ཞིང་གནས་པའོ། །དེ་ལྟར་རུས་པ་རྣམ་དག་ཀ་བ་ནས། བ་སྤུ་རྣམ་དག་མེ་ལྕེའི་བར་ཐམས་ཅད་ལ་འདི་ལྟར་སྦྱོར་དགོས་
ཏེ། ཆོས་ཉིད་རྣམ་པ་ཐམས་ཅད་པའི་རུས་པ་ནས་བ་སྤུའི་རྣམ་པའི་བར་དོན་དམ་པའི་རྣམ་པ་དེ་རྣམས་ཀྱི་དབྱིངས་སུ། ཐ་མལ་བའི་རུས་པ་ནས། བ་སྤུའི་བར་རྣམ་པར་དག་པའི་ཡེ་ཤེས་དག་པ་གཉིས་ལྡན་དེ་ནི་དོན་དམ་ཡེ་ཤེས་ཀྱི་ཀ་བ་ནས་མེ་ལྕེའི་ཁོར་ཡུག་གི་བར་དུ་སངས་རྒྱས་རྣམས་ལ་རང་ཤར་དུ་སྣང་བ་དེ་དག་གིས་བསྒོམས་པ་འདི་ཡིན་ནོ་ཞེས་གསལ་འདེབས་དགོས་པའོ། །།གཉིས་པ་ནི། སངས་རྒྱས་ཆོས་དང་དགེ་འདུན་ཆོས། །ཞེས་པ་ནས། དཀྱིལ་འཁོར་ཆོས་ཀྱི་དབྱིངས་ཉིད་དོ། །ཞེས་པའི་བར་ཏེ། དེ་ལ་སངས་རྒྱས་དཀོན་མཆོག་གི་རང་བཞིན་ཐུགས་དཀྱིལ་དང༌། ཆོས་དཀོན་མཆོག་གི་རང་བཞིན་གསུང་དཀྱིལ་དང༌། དགེ་འདུན་དཀོན་མཆོག་གི་རང་བཞིན་སྐུ་དཀྱིལ་ཏེ། འབྲས་བུ་རྫོགས་པའི་སངས་རྒྱས་ཉིད་ཀྱི་ཡེ་ཤེས་ལ་དཀོན་མཆོག་གསུམ་ཚང་བ་ནི། རྒྱུད་བླ་མ་ལས། ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེའི་མཐར་ཐུག་ཕྱིར། །ཞེས་པ་ལྟ་བུའོ། །དེས་ན་ཐུགས་སངས་རྒྱས། གསུང་དམ་ཆོས། སྐུ་དགེ་འདུན་ཡིན་པའི་ཕྱིར་ཡང་དཀྱིལ་འཁོར་གསུམ་དང་ཤིན་ཏུ་འབྲེལ་བའོ། །ཚངས་པའི་གནས་པ་བཞི་སྟེ། ཚད་མེད་བཞི་རྣམ་པར་དག་པ་ནི་རྡོ་རྗེའི་ཐིག་ བཞིའོ། །འདི་ལ་རྡོ་རྗེའི་ཐིག་གི་ངོས་འཛིན་རྩ་ཐིག་ལ་བྱེད་པ་ནི་མི་ལེགས་ཏེ་དཀྱིལ་འཁོར་འདི་ལ་རྩ་ཐིག་བཅུ་གཉིས་འབྱུང་བའི་ཕྱིར་དང༌། དེའི་ནང་ནས་གལ་པོ་ཆེ་བསྡུ་བར་ཡང་མི་རུང་སྟེ། གཙོ་བོ་ཡིན་པའི་ཕྱིར་ཐུགས་དཀྱིལ་གྱི་དེ་བོར་དུ་མི་རུང་ལ། ཚད་ཆེ་ཤོས་ཡིན་པའི་ཕྱིར་སྐུ་དཀྱིལ་གྱི་དེ་ཡང་བཞག་ཏུ་མེད་ཅིང༌། དེ་གཉིས་བགྲངས་ན་བརྒྱད་དུ་འགྱུར་ལ། དེ་དག་བགྲངས་ནས་གསུང་དཀྱིལ་འདོར་བའི་རྒྱུ་མཚན་ཡང་མེད་པས་སོ། །དེས་ན་ཚངས་ཐིག་
གཉིས་དང་ཟུར་ཐིག་གཉིས་ཏེ་བཞི་པོ་ལ་འདོད་པ་ལེགས་ལ། ཐིག་དངོས་ཀྱི་དག་པ་ནི་བྲི་ཆའི་ཕྱོགས་ལ་ཡིན་གྱི། བསྒོམ་བྱ་ལ་ཐིག་དངོས་ཀྱི་དག་པ་མེད་ཀྱང་ཐིག་བཏབ་པ་ལྟར་ཆ་སྙོམས་པའི་དོན་ནོ། །ལུས་དང་ཚོར་བ་དང་ཆོས་དང་སེམས་རྗེས་སུ་དྲན་པ་ཉེ་བར་གཞག་པ་བཞི་ནི། དཀྱིལ་འཁོར་གྲུ་བཞི་པ་མི་མཉམ་པ་མེད་ཅིང་མཉམ་པའོ། །ཀུན་ནས་ཉོན་མོངས་པའི་རྟེན་འབྲེལ་ཡན་ལག་བཅུ་གཉིས་འགགས་ཤིང་དོན་དམ་པའི་ཡན་ལག་བཅུ་གཉིས་ཀྱི་ཡེ་ཤེས་རྒྱས་པ་ནི་སྒོ་བཅུ་གཉིས་ཀྱི་དག་པ་སྟེ། འགགས་པ་སྒོ་བཅད་པ་དང༌། ཕྱེ་བ་ཡེ་ཤེས་རྒྱས་ པའོ། །ཡན་ལག་བཅུ་གཉིས་ནི་མ་རིག་པ་ནས་རྒ་ཤིའི་བར་ཏེ་སྤྱི་དང་འདྲའོ། །དེ་བཞིན་དུ་ས་བཅུ་གཉིས་རྣམ་པར་དག་པའི་རྟ་བབས་བཅུ་གཉིས་ཏེ། དཀྱིལ་འཁོར་རིམ་པ་གསུམ་ཅར་ལ་རྟ་བབས་བཞི་བཞི་ཡོད་པས་སོ། །ས་བཅུ་གཉིས་ནི། ཀུན་ཏུ་འོད་ཉི་མའི་དཀྱིལ་འཁོར་ཆེན་པོ་མཛེས་པའི་ས་དང༌། བདུད་རྩིའི་འོད་ཟླ་བ་ཆེན་པོའི་འོད་གསལ་བའི་ས་དང༌། ནམ་མཁའི་འོད་ནམ་མཁའ་ལྟར་རབ་ཏུ་གནས་པའི་ས་དང༌། རྡོ་རྗེའི་འོད་ཡིད་དགའ་བའི་ས་དང༌། རིན་ཆེན་འོད་མངོན་པར་དབང་བསྐུར་བ་ལ་གནས་པའི་ས་དང༌། པདྨའི་འོད་རང་བཞིན་གྱིས་དག་པའི་ཆོས་དྲི་མ་མེད་པ་ཡོངས་སུ་འཛིན་པའི་ས་དང༌། སངས་རྒྱས་ཀྱི་ལས་བྱེད་པའི་ས་དང༌། དཔེ་མེད་པའི་ས་དང༌། དཔེ་ཐམས་ཅད་ཀྱིས་དཔེ་རབ་ཏུ་རྟོགས་པར་བྱེད་པའི་ས་དང༌། ཤེས་རབ་ཀྱི་འོད་བླ་ན་མེད་པའི་ས་དང༌། ཐམས་ཅད་མཁྱེན་པ་ཉིད་འོད་གསལ་བ་ཆེན་པོའི་ས་དང༌། སོ་སོ་བདག་ཉིད་རིག་པ་རྣལ་འབྱོར་བའི་ཡེ་ཤེས་རྫོགས་པར་བྱེད་པའི་ས་རྣམས་སོ། །འདི་དག་གི་དོན་ནི་རྫོགས་རིམ་གྱི་སྐབས་སུ་བཤད་ཟིན་མོད་ཀྱི། འོན་ཀྱང་ལམ་
གྱིས་བསྡུས་པ་དང༌། འབྲས་བུ་སངས་རྒྱས་ཀྱིས་བསྡུས་པ་གཉིས་ལས། འདི་ནི་དག་པ་གཉིས་ལྡན་འབྲས་བུས་བསྡུས་པའོ། །ཡང་དག་པའི་ལྟ་བ་དང༌། རྟོག་པ་དང༌། ངག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ་དང༌། ཏིང་ངེ་འཛིན་ཏེ་འཕགས་ལམ་ཡན་ལག་བརྒྱད་རྣམས་ཀྱི་ངོ་བོ་ཕྱོགས་མཚམས་བརྒྱད་དུ་དུར་ཁྲོད་བརྒྱད་རྣམས་སོ། །སྟོང་ཉིད་བཅུ་དྲུག་དག་པས་བདེ་ཆེན་འཁོར་ལོའི་ཀ་བ་བཅུ་དྲུག་སྟེ། དེ་ལ་སྟོང་ཉིད་བཅུ་དྲུག་ནི། ནང་དང་ཕྱི་དང་ཕྱི་ནང་སྟོང་དང་ཆེན་པོ་དང༌། འདུས་བྱས་མ་བྱས་མཐའ་འདས་ཐོག་མཐའ་མེད་པ་དང༌། །དོར་མེད་རང་བཞིན་ཆོས་ཀུན་རང་གི་མཚན་ཉིད་དང༌། །མི་དམིགས་དངོས་མེད་ངོ་བོ་ཉིད་ཀྱི་སྟོང་ཉིད་དོ། །ཞེས་པ་རྣམས་སྤྱི་ལ་གྲགས་པ་ལྟར་ཡིན་ལ། ཡང་ཕུང་པོ་ལྔ་སོ་སོའི་སྟོང་ཉིད་ང༌། ཁམས་ལྔའི་སྟོང་ཉིད་སོ་སོ་དང༌། དབང་པོ་ལྔའི་སྟོང་ཉིད་སོ་སོ་དང༌། རྣམ་པ་ཐམས་ཅད་པའི་སྟོང་ཉིད་དེ་བཅུ་དྲུག་ནི། རྒྱུད་འདི་ཉིད་ཁོ་ན་ལས་བཤད་བའི་སྟོང་ཉིད་ཀྱི་རྣམ་གཞག་ཡིན་ཏེ། བཅུ་དྲུག་སྔ་ཕྱི་དེ་དག་ཀྱང་གནད་དོན་གཅིག་པ་ཞིག་ཡིན་པར་འདུག་ཅིང༌། ནང་སྟོང་ཉིད་སོགས་བཅུ་དྲུག་རྣམ་བཅད་གཙོ་ཆེ་བའི་ལྡོག་པ་ནས་བཞག་ལ། རྣམ་ཤེས་ཕུང་པོའི་སྟོང་ཉིད་སོགས་བཅུ་དྲུག་ཡོངས་སྤྱོད་ཡེ་ཤེས་རྒྱས་པའི་ཆ་ནས་བཞག་པ་སྟེ། གསང་སྔགས་ཀྱི་རྒྱུད་འདིའམ་རྒྱུད་གཞན་དུའང་རུང་སྟེ། དགའ་བ་བཅུ་དྲུག་གམ་སྙིང་རྗེ་བཅུ་དྲུག་སོགས་དང་སྦྱོར་རྒྱུའི་སྟོང་ཉིད་བཅུ་དྲུག་ནི་ཕྱི་མ་འདི་གཙོ་བོར་ཡིན་པ་ཤེས་པར་བྱ་ཞིང༌། སྐབས་འདིར་ནི་གཉིས་ཀ་དང་སྦྱར་བར་བྱའོ། །རླུང་ལ་སོགས་པའི་ཁམས་ལྔ་པོ་རྣམས་དག་པའི་ཁང་བརྩེགས་ལྔ་ཞེས་བྱ་བ། འདི་ལ་རྭ་འགྱུར་ལས། ཁམས་རྣམས་གཞལ་ཡས་
ཁང་དུ་བརྗོད་ཅེས་འབྱུང་ཞིང༌། འགྱུར་གཞན་འགའ་རེ་ལའང་དེ་མཚུངས་སྣང་སྟེ། དེའི་དོན་འཆད་པ་ན་ཕྱོགས་མདོག་ལ་འཆད་པ་ནི། ཁ་དོག་གི་དག་པ་འོག་ནས་འབྱུང་བ་དང་ཟློས་པས་མི་ལེགས་ལ། དེས་ན་ས་ཁམས་དག་པའི་སྐུ་དཀྱིལ་གྱི་གཞལ་ཡས་ཁང་ཆུ་ཁམས་དག་པ་གསུང་དཀྱིལ། མེ་ཁམས་དག་པ་ཐུགས་དཀྱིལ་དངོས། རླུང་ཁམས་དག་པ་བདེ་གཤེགས་འཕར་མ། མཁའ་ཁམས་དག་པ་གཙོ་བོའི་གནས་རྣམས་ཇེ་མཐོ་ཇེ་མཐོའི་ཁང་པ་བརྩེགས་པ་སྟེ་རིམ་པ་ལྔར་གནས་པ་རྣམས་ཡིན་ནོ། །གཟུགས་ཅན་གཟུགས་ལ་ལྟ་བའི་རྣམ་ཐར། གཟུགས་མེད་གཟུགས་ལ་ལྟ་བའི་རྣམ་ཐར། ཁྱད་པར་སྡུག་པའི་རྣམ་ཐར། ནམ་མཁའ་མཐའ་ཡས་སྐྱེ་མཆེད་ཀྱི་རྣམ་ཐར། རྣམ་ཤེས་མཐའ་ཡས་སྐྱེ་མཆེད་ཀྱི་རྣམ་ཐར། ཅི་ཡང་མེད་པའི་སྐྱེ་མཆེད་ཀྱི་རྣམ་ཐར། འདུ་ཤེས་མེད་ཅིང་འདུ་ཤེས་མེད་མིན་གྱི་སྐྱེ་མཆེད་ཀྱི་རྣམ་ཐར། འདུ་ཤེས་དང་ཚོར་བ་འགོག་པའི་རྣམ་ཐར་ཏེ། རྣམ་ཐར་རེ་རེ་བཞིན་སྐུ་གསུང་ཐུགས་ཀྱི་དབྱེ་བས་ཕྱེ་བ་ནི། དཀྱིལ་འཁོར་གསུམ་པོ་རེ་རེ་བཞིན་སྒོ་མཁྱུད་བརྒྱད་བརྒྱད་དོ། །དོན་དམ་པའི་གཟུགས་ཅན་བརྒྱད་ནི་སྒོ་འགྲམ་བརྒྱད་དང༌། དོན་དམ་པའི་ཡོན་ཏན་བརྒྱད་ནི་སྒོ་ལོགས་བརྒྱད་དེ། དེ་དག་ཀྱང་སྐུ་གསུང་ཐུགས་ཀྱི་དབྱེ་བས་གསུམ་གསུམ་མོ། །དེ་ལ་འབྱུང་བ་བཞི་དང༌། གཟུགས་དྲི་རོ་རེག་རྣམས་ནི་གཟུགས་ཅན་བརྒྱད་ཡིན་ལ། གཟུགས་སྒྲ་དྲི་རི་རེག་བྱ་རྡུལ་མུན་སྙིང་སྟོབས་ཏེ་བརྒྱད་ལ། ཉི་ཟླའི་ཡོན་ཏན་བརྒྱད་ཅེས་ཟེར་རོ། །ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྟེ། ཟག་མེད་ཕུང་པོ་ལྔས་གཞལ་ཡས་ཁང་ཁ་དོག་རྣམ་པ་ལྔ་རྣམ་པར་དག་པར་འགྱུར་རོ། །ཐེག་
པ་གསུམ་རྣམ་པར་དག་པས་ཐུགས་དཀྱིལ་གྱི་རྭ་བ་རྩིག་པ་རིམ་པ་གསུམ་ཡིན་ཏེ། ནང་མ་ནག་པོ་ནི་ཐུགས་ཏེ་ཐེག་པ་ཆེན་པོ་དང༌། བར་པ་དམར་པོ་ནི་གསུང་སྟེ་རང་སངས་རྒྱས་ཀྱི་ཐེག་པ་དང༌། ཕྱི་མ་དཀར་པོ་ནི་སྐུ་སྟེ་ཉན་ཐོས་ཀྱི་ཐེག་པའོ། །དེ་ཡང་རིགས་ཅན་གསུམ་ལས། ཉན་ཐོས་རྣམས་དགེ་འདུན་ལ་དང་རང་རྒྱལ་རྣམས་ཆོས་ལ་དང༌། བྱང་ཆུབ་སེམས་དཔའ་རྣམས་སངས་རྒྱས་ལ་ཐོབ་བྱར་མོས་པའི་ཕྱིར། ཐེག་པ་གསུམ་དང༌། དཀོན་མཆོག་གསུམ་དང༌། སྐུ་གསུང་ཐུགས་རྡོ་རྗེའི་སྦྱོར་ཚུལ་དེ་ལྟར་བྱའོ། །དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་རྣམས་ནི་གསུང་དཀྱིལ་གྱི་རྩིག་པའི་རིམ་པ་དང༌། དད་བརྩོན་དྲན་ཏིང་ཤེས་རབ་ཀྱི་སྟོབས་ལྔ་ནི། སྐུ་དཀྱིལ་གྱི་རྩིག་པ་རིམ་པ་ལྔ་ལ་སྦྱོར་རོ། །དཔའ་བར་འགྲོ་བ་དང༌། ནམ་མཁའ་མཛོད་དང༌། དྲི་མ་མེད་པའི་ཕྱག་རྒྱ་དང༌། སེངྒེ་རྣམ་པར་རོལ་པའི་ཏིང་ངེ་འཛིན་ཏེ་ཏིང་ངེ་འཛིན་བཞི་དང༌། བཟོད་པའི་གཟུངས་དང། སྔགས་ཀྱི་གཟུངས་དང༌། ཆོས་ཀྱི་གཟུངས་དང༌། དོན་གྱི་གཟུངས་ཏེ་གཟུངས་བཞིའོ།། དཀྱིལ་འཁོར་གསུམ་པོ་རེ་རེ་ལ་དེ་ལྟར་བརྒྱད་པོ་རྣམ་པར་དག་པའི་སྟེགས་བུའོ། །ཞེས་འབྱུང་ན། སྟེགས་བུ་ནི་གཟུངས་དང༌། ཏིང་འཛིན་གཉིས་ཀར་གྱི་དག་པར་གསལ་ལ། གཟུངས་མ་རྣམས་སྐབས་འདིར་བསྐྱེད་མ་གྲུབ་བོ། །རྒྱུད་གཞན་གྱི་སྒྲུབ་ཐབས་སློབ་དཔོན་དག་གིས་སྦྱར་བ་མང་པོ་ན། ཏིང་ངེ་འཛིན་བཞི་སྟེགས་བུ་དང༌། གཟུངས་བཞི་དེ་ལ་གནས་པའི་ལྷ་ལ་བཤད་པའང་ཡོད་དོ། །སྦྱིན་པ་ལ་སོགས་པ་དོན་དམ་པའི་ཕ་རོལ་ཏུ་ཕྱིན་པ་བཅུ་རྣམ་པར་དག་པའི་རིན་པོ་ཆེའི་སྣམ་བུ་སྟེ་ཕ་གུ་ལ་རིན་པོ་ཆེའི་འཕྲ་བཀོད་ཀྱིས་རྣམ་པར་བཀྲ་བ་དང༌། སངས་རྒྱས་ཀྱི་མ་
འདྲེས་པའི་ཆོས་བཅོ་བརྒྱད་རྣམ་པར་དག་པའི་དོ་ཤལ་དང་དོ་ཤལ་ཕྱེད་པ་ལ་སོགས་པ་གཞལ་ཡས་ཁང་གི་རྒྱན་སྣ་ཚོགས་པའོ། །དེ་ལ་མ་འདྲེས་པའི་ཆོས་བཅོ་བརྒྱད་ནི། དེ་བཞིན་གཤེགས་པའི་སྐུ་ལ་འཁྲུལ་པ་མི་མངའ་བ་དང༌། དེ་བཞིན་དུ་སྦྱར་ཏེ་གསུང་ལ་ཅ་ཅོ་དང༌། ཐུགས་ལ་དྲན་པ་ཉམས་པ་དང༌། མཉམ་པར་མ་བཞག་པ་དང་ཐ་དད་པའི་འདུ་ཤེས་དང༌། མ་བརྟགས་པའི་བཏང་སྙོམས་མི་མངའ་བ་སྟེ། དཔྱོད་པས་བསྡུས་པ་དྲུག་དང༌། འདུན་པ་ཉམས་པ་མི་མངའ་བ་དང༌། དེ་བཞིན་དུ་བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བའི་ཡེ་ཤེས་གཟིགས་པ་ཡོངས་སུ་ཉམས་པ་མི་མངའ་བ་སྟེ། རྟོགས་པས་བསྡུས་པ་དྲུག་དང༌། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་རབ་ཏུ་འཇུག་པ་དང༌། མ་འོངས་པ་དང་ད་ལྟར་བྱུང་བ་ལའང་སྦྱར་བས་ཡེ་ཤེས་ཀྱིས་བསྡུས་པ་གསུམ་དང༌། སྐུའི་འཕྲིན་ལས་དང༌། གསུང་གི་འཕྲིན་ལས་དང༌། ཐུགས་ཀྱི་འཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང༌། ཡེ་ཤེས་རྗེས་སུ་འབྲང་བ་སྟེ་འཕྲིན་ལས་ཀྱིས་བསྡུས་པ་གསུམ་མོ། །དབང་བཅུ་པོ་རྣམས་རྣམ་པར་དག་པས་བྱ་འདབས་ལས་ཐུར་དུ་འཕྱང་བའི་བ་ཀུ་ལི་སྟེ། དེ་ལ་དབང་བཅུ་ནི་ཚེ་ལ་དབང་བ་དང༌། སེམས་དང༌། ལས་དང༌། ཡོ་བྱད་དང༌། སྐྱེ་བ་དང༌། མོས་པ་དང༌། སྨོན་ལམ་དང༌། རྫུ་འཕྲུལ་དང༌། ཡེ་ཤེས་དང༌། ཆོས་ལ་དབང་བ་རྣམས་སོ། །སྲོག་གཅོད་པ་ལ་སོགས་པ་མི་དགེ་བ་ལས་ལོག་པའི་དགེ་བ་བཅུས། རྣམ་པར་དག་པ་ཀྲ་མ་ཤིརྵ་ཏེ་མདའ་ཡབ་བོ། དགེ་བ་བཅུ་པོ་སྒྲུབ་ཕྱོགས་གཉེན་པོའི་སྒོ་ནས་སྨོས་ན། གཞན་གྱི་སྲོག་ལ་
གཅེས་པར་འཛིན་པ་དང༌། གཞན་གྱི་ལོངས་སྤྱོད་ལ་ཕན་པ་འབའ་ཞིག་སྤྱོད་པ་དང༌། ཆགས་ཡུལ་འོས་པ་མ་ཡིན་པ་ལ་མ་ཆགས་པ་གཙང་ཞིང་དག་པའི་སེམས་ཀྱིས་གནས་པ་དང༌། བདེན་པ་ཁོ་ནའི་ཚིག་དང༌། མཐུན་པའི་ཚིག་དང༌། སྙན་པའི་ཚིག་དང༌། འབྲེལ་ཞིང་དོན་ལྡན་གྱི་ཚིག་ཁོ་ན་སྨྲ་བ་དང༌། མ་ཆགས་པའི་དགེ་བ་དང༌། ཞེ་སྡང་མེད་པའི་དགེ་བ་དང༌། འཇིག་རྟེན་པའི་ཡང་དག་པའི་ལྟ་བ་ལ་གནས་པ་རྣམས་སོ། །སྟོང་པ་ཉིད་རྣམ་པར་ཐར་པའི་སྒོ་དང༌། མཚན་མ་མེད་པ་དང༌། སྨོན་པ་མེད་པ་དང༌། འདུས་མ་བྱས་པ་རྣམ་པར་ཐར་པའི་སྒོ་སྟེ། རྣམ་ཐར་བཞིའི་ཆོས་སྒྲོག་པའི་གཞོམ་མེད་ཀྱི་སྒྲ་ནི། དྲིལ་བུའི་སྒྲ་སྙན་པོས་གཞལ་མེད་ཁང་གང་བར་བྱེད་པའོ། །འདུན་པ་དང་བརྩོན་འགྲུས་དང་སེམས་དང་དཔྱོད་པ་སྟེ། བཞི་པོ་དེ་རྣམས་ཀྱི་ཏིང་ངེ་འཛིན་རྫུ་འཕྲུལ་གྱི་རྐང་པ་རྣམ་པར་དག་པ་ནི། ཕྱོགས་བཞིའི་དབྱེ་བས་ཕྱེ་བའི་རྒྱལ་མཚན་རྣམས་ སོ། །དགེ་བའི་ཆོས་མ་བསྐྱེད་པ་བསྐྱེད་པ་དང༌། སྐྱེས་པ་སྲུང་བ་དང༌། མི་དགེ་བའི་ཆོས་མ་སྐྱེས་པ་མི་སྐྱེད་པ་དང༌། སྐྱེས་པ་སྤོང་བ་སྟེ་ཡང་དག་སྤོང་བ་བཞི་རྣམ་པར་དག་པས། གཞལ་ཡས་ཁང་ལ་མེ་ལོང་གི་རྒྱན་འོད་རབ་ཏུ་འབར་བ་རྣམས་སོ། །དྲན་པ་ཡང་དག་བྱང་ཆུབ་ཀྱི་ཡན་ལག་དང༌། དེ་བཞིན་དུ་ཆོས་རབ་ཏུ་རྣམ་འབྱེད་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་སྟེ་བདུན་པོ་རྣམ་པར་དག་པས་རྔ་ཡབ་ནོར་བུའི་ཡུ་བ་ཅན་རབ་ཏུ་གཡོ་བ་རྣམས་སོ། །གསུང་རབ་ཡན་ལག་དགུ་རྣམ་པར་དག་པས་རིན་པོ་ཆེའི་ཕྲེང་བ་དང༌། མེ་ཏོག་གི་ཕྲེང་བས་བརྒྱན་པའོ། །དེའི་
ཡན་ལག་དགུ་ནི། མདོ་དབྱངས་ལུང་ཚིག་ཆེད་དུ་བརྗོད་པ་ དང༌། །གླེང་གཞི་དེ་ལྟ་སྐྱེས་རབས་རྨད་དུ་བྱུང༌། ཞེས་བྱ་སྟེ། མདོ་སྡེ་དང༌། དབྱངས་ཀྱིས་བསྙད་པ་དང༌། ལུང་བསྟན་པ་དང༌། ཚིགས་སུ་བཅད་པ་དང༌། ཆེད་དུ་བརྗོད་པ་དང༌། གླེང་གཞི་དང༌། དེ་ལྟ་བུ་བྱུང་བ་དང༌། སྐྱེས་པའི་རབས་དང༌། ཤིན་ཏུ་རྒྱས་པ་རྨད་དུ་བྱུང་བ་རྣམས་སོ། །འདིར་འགྲེལ་ཆེན་ལས། ཤིན་ཏུ་རྒྱས་པ་རྨད་དུ་བྱུང་བ་ཞེས་གཅིག་ཏུ་བསྡོམས་པར་མཛད་ལ། རྣམ་གཞག་གཞན་ལས་གསུང་རབ་ཡན་ལག་བཅུ་གཉིས་བགྲོང་བའི་ཚེ། དེ་གཉིས་ཐ་དད་དུ་འབྱུང་སྟེ། རྨད་དུ་བྱུང་བའི་སྡེ་ལ་ངོས་འཛིན་མི་འདྲ་བའི་ཁྱད་པར་ཡོད་པའི་དབང་ལས་ཡིན་ཡང༌། ཡན་ལག་དགུའམ་བཅུ་གཉིས་འདི་དག་རྣམ་གྲངས་དང་དགོས་པའི་དབང་གིས་ཕྱེ་བ་ཡིན་གྱི། གཅིག་གི་ནང་དུ་གཅིག་ཤོས་བསྡུར་རུང་བ་མང་དུ་ཡོད་པས་ལུགས་གཉིས་པོའང་འགལ་བ་མ་ཡིན་ལ། ཡན་ལག་བཅུ་གཉིས་ཀྱང་དགུར་འདུས་པ་ཡིན་ཏེ། དེ་ལྟ་བུ་བྱུང་བའི་ནང་དུ་རྟོགས་བརྗོད་འདུ་ལ། ཤིན་ཏུ་རྒྱས་པའི་ནང་དུ་རྨད་བྱུང་བསྡུས་ལ། གཏན་ལ་དབབ་པའི་སྡེ་ནི་བཅུ་གཅིག་པོའི་དོན་གཏན་ལ་འབེབས་པ་ཡིན་པས། དེ་དག་སོ་སོའི་ནང་ཚན་བསྡུས་པའོ། །སྦྱིན་པ་དང། སྙན་པར་སྨྲ་བ་དང༌། དོན་མཐུན་པ་དང༌། དོན་སྤྱོད་པ་སྟེ་བསྡུ་བའི་དངོས་པོ་བཞིའི་དག་པ་ནི། གཞན་ཡས་ཁང་གི་ཟུར་བཞི་པོ་ལ་སྣ་ཚོགས་རྡོ་རྗེས་བརྒྱན་པའོ། །སྡུག་བསྔལ་བདེན་པ་དང༌། ཀུན་འབྱུང་བདེན་པ་དང༌། འགོག་པའི་བདེན་པ་དང༌། ལམ་གྱི་བདེན་པ་རྣམས་རྟོགས་པའི་ཡེ་ཤེས་བཞིའམ། དོན་དམ་པའི་བདེན་པ་བཞི་རྣམ་པར་དག་པས་ནི། ཟླ་ཕྱེད་ལ་གནས་པའི་རིན་པོ་ཆེ་བཞི་རྣམས་ཀྱིས་རྩིག་པའི་ཕྱི་
རོལ་སྒོ་དང་སྒོ་མཁྱུད་ཀྱི་མཚམས་སུ་སྤྲས་པའོ། །ལྷའི་མིག་གི་མངོན་ཤེས་དང༌། ལྷའི་རྣ་བ་དང༌། གཞན་གྱི་སེམས་ཤེས་པ་དང༌། སྔོན་གྱི་གནས་རྗེས་སུ་དྲན་པ་དང༌། རྫུ་འཕྲུལ་གྱི་མངོན་ཤེས་རྣམས་ཀྱི་དག་པ་ནི། ས་དང་ཆུ་དང་མེ་དང་རླུང་དང་ནམ་མཁའི་ཁོར་ཡུག་སྟེ། ཁོར་ཡུག་ཆེན་པོ་ལྔས་བསྐོར་བ་དང༌། ཆོས་ཐམས་ཅད་རྣམ་པ་ཀུན་ཏུ་མངོན་པར་མཁྱེན་ཞིང་བྱང་ཆུབ་པའི་ཡེ་ཤེས་ཀྱི་རྣམ་པར་དག་པས་ནི་ནམ་མཁའི་ཁོར་ཡུག་གི་སྟེང་ན་གནས་པའི་རྡོ་རྗེའི་འཕྲེང་བས་ལེགས་པར་བསྐོར་བ་ཡིན་ལ། མི་འགྱུར་བའི་བདེ་བ་གཅིག་པུའི་ཡེ་ཤེས་རྣམ་པར་དག་པ་ནི། དེ་བཞིན་དུ་ཡེ་ཤེས་རྣམ་པ་ལྔའི་རང་བཞིན་རྡོ་རྗེ་མེ་ལྕེ་འབར་བའི་ཁོར་ཡུག་ གོ །འདིར་བདེ་བ་གཅིག་པུ་ཞེས་པ་མི་འགྱུར་བའི་བདེ་བ་སྐད་ཅིག་གཅིག་གིས་མངོན་པར་བྱང་ཆུབ་པའི་ཡེ་ཤེས་ཀྱི་མིང་ཡིན་ལ། བདེ་བ་དེ་ཉིད་རྟག་པ་ཉིད་ཀྱི་ཕྱིར་སྐད་ཅིག་སྔ་ཕྱི་ལ་མི་འདྲ་བ་དུ་མ་མེད་པས་གཅིག་པུ་ཞེས་ཀྱང་བྱ་ཞིང༌། བདེ་ཆེན་དེ་ཉིད་བདེན་ལ་གཞན་ཐམས་ཅད་བརྫུན་པའི་ཕྱིར། བདེན་པ་གཅིག་པུའི་དོན་ཡང་ཡིན་ནོ། །ཡེ་ཤེས་ངོ་བོ་གཅིག་ཉིད་ལ་ཐབས་ཀྱི་ཆ་རྣམ་པར་དག་པ་ནམ་དུ་ཡང་མི་འགྱུར་བས། ཟླ་བ་ཉ་གང་བ་འཆར་བཞིན་པ་ལ་རྟག་ཏུ་གནས་པ་དང༌། ཤེས་རབ་ཀྱི་ཆ་རྣམ་པར་དག་པས་ཉི་མ་ནུབ་བཞིན་པ་ལ་རྟག་ཏུ་གནས་པ་སྟེ། འཆར་བཞིན་པ་དང་ནུབ་བཞིན་པ་ལ་རྟག་ཏུ་གནས་པ་ཡང་ཐབས་ཤེས་དེ་དག་དོན་དམ་འགྱུར་མེད་རྟག་པ་ཡིན་པའི་དོན་ཏེ། རྟག་ཏུ་ནུབ་བཞིན་པ་ལ་གནས་ན་ནི་ནུབ་པ་མ་ཡིན་ཏེ་རྟག་ཏུ་ཤར་བའི་ཆོས་ཡིན་ན། རྟག་ཏུ་འཆར་བཞིན་པ་ནི་ལྟ་སྨོས་ཀྱང་ཅི་དགོས། ཐུགས་རྡོ་རྗེ་རྣམ་པར་དག་པས་ཆོས་ཀྱི་འཁོར་ལོ་དང༌། གསུང་དག་པས་བུམ་པ་དང༌། སྐུ་དག་པས་རྔ་བོ་ཆེ་དང༌། ཡེ་ཤེས་དག་པས་བྱང་ཆུབ་ཀྱི་ཤིང་སྟེ། སྐུའི་རྟ་བབས་ཀྱི་མཚན་མ་རྣམས་
དག་པ་དང༌། དེ་བཞིན་དུ་འོག་ནས་འཆད་ཅིང་སྒོམ་པར་འགྱུར་བའི་ཡིད་བཞིན་ནོར་བུ་དང་གཎྜེ་སོགས་ཀྱང་རྡོ་རྗེ་བཞིའོ། །དེ་ལྟར་ན་ཁམས་ལྔ་ལ་སོགས་པ་ཆོས་ཕུང་འདི་དག་ཐམས་ཅད་བདེ་གཤེགས་སྙིང་པོ་དོན་དམ་དབྱིངས་ཀྱི་ཡེ་ཤེས་རྣམ་པ་ཐམས་ཅད་པ་ཉིད་ཀྱི་རྣམ་པའི་ལྡོག་ཆ་སོ་སོ་བཟུང་ནས། དཀྱིལ་འཁོར་གྱི་ཆ་ཤས་དེ་དང་དེའི་རང་བཞིན་དུ་མོས་དགོས་ཤིང༌། གནས་ཚུལ་ལ་དེ་དང་དེ་ཡིན་ཡང་ཡིན་ནོ། །གཞུང་ཚིག་ལས། དགེ་འདུན་ཆེས་ཞེས་དང༌། རྣམས་ཀྱིས་ནི་ཞེས་པ་དང༌། ཐུགས་གསུང་སྐུ་དང་དག་པ་ཡིས། ཞེས་པའི་བར་དུ་བྱེད་པ་པོའི་སྒྲ་བྱུང་ན། ཅིའི་ཕྱིར་གདོད་ནས་གྲུབ་པའི་ཆོས་དབྱིངས་ལ་ངོས་འཛིན་སྙམ་ན། འདི་ལ་བྱེད་པ་པོའི་སྒྲ་འཇུག་པའི་དོན་གཉིས་ཡོད་དེ། དོན་དམ་གྱི་ཡེ་ཤེས་རང་གི་ངོ་བོའི་དོན་ལ་རྒྱུ་མཚན་དང་གཏན་ཚིགས་བྱེད་པ་པོའི་སྒྲ་འཇུག་ཅིང༌། རྐྱེན་གཞན་གྱིས་བྱས་པའི་དོན་ལ་བྱེད་པོ་དངོས་ཀྱི་སྒྲ་ཡང་འཇུག་སྟེ། དཔེར་མཚོན་ན་དང་པོའི་དོན་ལ་ཆོས་དབྱིངས་དེ་དོན་དམ་དཀོན་མཆོག་གསུམ་ཡིན་པའི་ཆ་ནས་སངས་རྒྱས་ཀྱི་རྣམ་པའི་ལྡོག་ཆ་ཐུགས་ཀྱི་དཀྱིལ་འཁོར་དུ་ཤར་བ་དང༌། ཆོས་ཀྱི་རྣམ་པའི་ལྡོག་ཆ་གསུང་གི་དཀྱིལ་འཁོར་དང༌། དགེ་འདུན་གྱི་རྣམ་པའི་ལྡོག་ཆ་སྐུའི་དཀྱིལ་འཁོར་དུ་འཇོག་སྟེ། དཀོན་མཆོག་གསུམ་པོ་ཐུགས་གསུང་སྐུའི་རྣམ་ཆ་ཡིན་པའི་ཕྱིར་རོ། །ཞེས་པ་ལྟ་བུ་སྟེ་མདོར་ན་ཡེ་ཤེས་དེ་ཉིད་སྐུ་གསུང་ཐུགས་ཀྱི་དཀྱིལ་འཁོར་གསུམ་དུ་འགྱུར་བའི་རྒྱུ་མཚན་དོན་དམ་པའི་དཀོན་མཆོག་གསུམ་ཡིན་པའི་གཏན་ཚིགས་ཀྱིས་སོ། །ཞཻས་རྟགས་ཀྱིས་བསྒྲུབ་བྱ་ངེས་པར་བྱེད་པས། རྟགས་སམ་གཏན་ཚིགས་ལ་བྱེད་པ་པོའི་སྒྲ་འཇུག་པ་རིགས་ཏེ། འདིའི་རིགས་འགྲེ་གཞན་ཐམས་ཅད་ལ་སྦྱར་རོ། །གཉིས་པའི་དོན་ལ་སློབ་པ་ལམ་གྱི་གནས་སྐབས་སུ་
ཚངས་པའི་གནས་བཞི་བསྒོམས་པས་ཆོས་ཉིད་དོན་དམ་པའི་སྟེང་གི་ཚད་མེད་བཞི་དོན་དམ་བདེན་པ་དེའི་གློ་བུར་གྱི་དྲི་མ་དག་པ་ན། དག་པ་གཉིས་ལྡན་གྱི་ཡེ་ཤེས་དེ་དོན་དམ་པ་རྡོ་རྗེའི་ཐིག་བཞིའི་རྣམ་པར་ཤར་ཞེས་པ་ལྟ་བུ་ཡིན་པས། དྲི་མ་སྤོང་པའི་བྱེད་པ་པོ་ལམ་གྱི་ཡེ་ཤེས་ཡིན་པས་དེས་བྱས་པ་ལ་བྱེད་པ་པོའི་སྒྲ་འཇུག་པར་ཐམས་ཅད་ཀྱིས་གོ་སླ་ལ། ཆོས་ཉིད་དོན་དམ་པ་དངོས་ལ་བྱ་བྱེད་མེད་ཀྱང་དག་པ་གཉིས་ལྡན་གྱི་སྟེང་གི་གློ་བུར་རྣམ་དག་གི་ཆ་ལ། བྱེད་པོ་ལམ་གྱི་བྱ་བ་འཇུག་ཅིང༌། གློ་བུར་རྣམ་དག་དེ་ཉིད་བྱེད་པོ་ལམ་ལ་བལྟོས་ནས་ལས་སུ་བཞག་སྟེ། ལས་དང་བྱེད་པ་པོ་བློ་ངོར་འབྲེལ་པ་ཅན་ཡིན་པས་ངོ་བོ་དག་པ་གཉིས་ལྡན་གྱི་ཆོས་དབྱིངས་དེ་ཡིན་ཀྱང་དག་པ་གཉིས་ལྡན་གྱི་བྱེད་པ་པོ་ལམ་གྱིས་རབ་ཏུ་ཕྱེ་བའི་ཕྱིར། རེ་ཞིག་དེའི་ཕྱོགས་ནས་སྨོས་པ་སྟེ། ལམ་བདེན་ཚད་མེད་བཞིས་གནོད་སེམས་ལ་སོགས་པ་སྒྲིབ་པ་བཞི་བག་ཆགས་དང་བཅས་པ་སྦྱངས་ནས། དག་པ་གཉིས་ལྡན་གྱིས་ཚད་མེད་བཞི་རྡོ་རྗེའི་ཐིག་གི་ངོ་བོར་བྱས་ཞེས་པ་ལྟ་བུ་ཡིན་པས་དྲི་མ་སྦྱོང་མཁན་དང་ཡེ་ཤེས་ཐིག་གི་ངོ་བོ་གསལ་བར་བྱེད་པ་པོ་ལམ་གྱི་ཚད་མེད་བཞི་ཡིན་པས་བྱེད་པ་པོའི་སྒྲ་ཐོབ་བོ། །དེ་ཡང་རྣལ་འབྱོར་ཅན་གྱི་སྣང་ཚུལ་ལ་དེ་ལྟར་སྣང་བས་དེ་དང་བསྟུན་པ་ཡིན་གྱི། རིག་ཤེས་ཀྱི་ཡུལ་དང་གནས་ཚུལ་གྱི་དབང་དུ་བྱས་ནས་དེ་ལྟར་བཤད་པ་མ་ཡིན་ཏེ། དེ་ལ་ནི་སེམས་ཅན་རྣམས་ཉིད་གློ་བུར་རྣམ་དག་ཐོབ་དགོས་པ་ཡིན་གྱི་ཆོས་ཉིད་གདོད་ནས་རྣམ་དག་རྟག་ཅིང་སྤྲོས་པ་དང་བྲལ་བ་ལ། གློ་བུར་རྣམ་དག་གི་འཇུག་པ་གོ་སྐབས་བྲལ་བའི་ཕྱིར་རོ།། །།གསུམ་པ་འཕྲོས་དོན་ཕྱོགས་ཙམ་བསྟན་པ་ནི། ཕྱི་འཇིག་རྟེན་ཁམས་དང་སྦྱར་བའི་དག་པ་སྦྱོར་ཚུལ་ནི་ནང་གི་དཀྱིལ་
འཁོར་འཇིག་རྟེན་ཁམས་དང་ཚད་མཉམ་སོགས་གོང་དུ་བཤད་པ་དེ་དག་གིས་ཀྱང་རྟོགས་པར་ནུས་ལ། ཡེ་ལེའི་ཚིགས་བཅད་སོ་ལྔ་པའི་འགྲེལ་པར་གསུངས་པ་ལྟར། འཇིག་རྟེན་གྱི་ཁམས་ལ་ས་ཆུ་མེ་རླུང་ནམ་མཁའི་དཀྱིལ་འཁོར་རྣམས་དཔག་ཚད་འབུམ་ཕྲག་རེ་རེ་སྟེ། འབུམ་ཕྲག་ལྔ་པའི་འཇིག་རྟེན་ཡང་གསུངས་པ། ནམ་མཁའི་ཁོར་ཡུག་རྡོ་རྗེའི་རྭ་བ་མེ་ལྕེ་དང་བཅས་པ་དཔག་ཚད་འབུམ་གྱིས་དག་པར་མཛད་པ་དང༌། ནང་ལུས་དང་སྦྱར་བ། དབང་ལེའི་ང་གསུམ་པའི་འགྲེལ་པར་གསུངས་པ། སྤྱིར་རང་གཞན་སེམས་ཅན་སྤྱིའི་ལུས་དང་སྦྱར་བ་དང༌། སྒོས་སུ་མའི་ལུས་དང་དག་སྦྱོར་གྱི་ཁྱད་མ་གཏོགས། སྦྱང་བྱ་འཆད་འགྱུར་དང་ཕལ་ཆེར་འདྲའོ། །སྒོའི་དག་པ་རྣམ་གྲངས་དུ་མ་གསུངས་ཏེ། ལུས་ཀྱི་བཤང་གཅི་ཁུ་བ་གཙུག་ཏོར་གྱི་བུ་ག་རྣམས་དག་པ་སྐུ་དཀྱིལ་གྱི་སྒོ་བཞི་དང༌། ངག་རླུང་གི་གཞི་རོ་རྐྱང་དབུ་མ་དུང་ཅན་རྣམས་གསུང་གི་སྒོ་བཞི། སེམས་ཀྱི་གནས་སྐབས་བཞི་དག་པ་ཐུགས་ཀྱི་སྒོ་བཞི་དང༌། ཡང་ཐུགས་ཀྱི་སྒོ་རྣམས་མུན་པའི་ཡོན་ཏན་དང༌། དེ་ཉིས་འགྱུར་གསུང་གི་སྒོ་རྡུལ་དང༌། དེ་ཉིས་འགྱུར་སྐུའི་སྒོ་སྙིང་སྟོབས་ཏེ། རྭ་བ་རྟ་བབས་སོགས་ཀྱང་ཡོན་ཏན་གསུམ་མོ། །དེ་བཞིན་དུ་ཁ་དང་བཤང་ལམ་གཙུག་ཏོར་དྲི་ཆུ་ཁུ་བའི་སྒོ་རྣམས་ཐུགས་ཀྱི་སྒོ་ལྔ་དང༌། དབང་པོ་ལྔ་ནི་སྐུའི་སྒོ་ལྔ་དང༌། སྤྱི་བོ་མགྲིན་པ་རྐན་སོ་མཆུ་སྟེ་ཡི་གེ་སྐྱེ་བའི་གནས་ལྔ་ནི་གསུང་གི་སྒོ་ལྔ་སྟེ། དེ་ལྟར་སྒོ་བཅོ་ལྔ་ལས་སྟེང་གི་སྒོ་གསུམ་ནི། ཁུ་བའི་སྒོ་དང༌། ལུས་ཀྱི་དབང་པོ་དང༌། མགྲིན་པ་རྣམས་དག་པ་སྟེ་ཉི་མའི་དུས་སྦྱོར་གྱི་དག་པས་སྒོ་བཅུ་གཉིས་དང༌། ཟླ་བའི་ཆ་བཅོ་ལྔ་དག་པས་སྒོ་བཅོ་ལྔའོ། །ཡང་གནས་སྐབས་བཞི་ཐུགས་ཀྱི་སྒོ་དང༌། ཁ་དང་བཤང་
ལམ་སྣ་བུག་གཉིས་རྣམས་གསུང་གི་སྒོ་དང༌། མིག་གཉིས་དང་རྣ་བ་གཉིས་ནི་སྐུའི་སྒོའོ། །ཞེས་ཀྱང་བཤད་ཅིང༌། ཡང་དཀྱིལ་འཁོར་ཡོངས་རྫོགས་ལ་སྐུའི་རྩ་ཐིག་གི་ནང་ཆ་ཆེན་ཕྱེད་པ་བཅུ་དྲུག་སྙིང་རྗེ་བཅུ་དྲུག་གི་དཀྱིལ་འཁོར་དང༌། དེའི་ཕྱི་རོལ་མཆོད་པའི་ས་གཞིའི་ཁོར་ཡུག་ཚུན་ཆད་སྟོང་ཉིད་བཅུ་དྲུག་གི་དཀྱིལ་འཁོར་དང༌། དེ་ནས་ཁོར་ཡུག་གི་མཐའ་ཚུན་ཆད་དགའ་བ་བཅུ་དྲུག་གི་དཀྱིལ་འཁོར་ཞེས་མདོར་ན་དག་པ་རིམ་པ་གསུམ་ཡང་ཡོད་དོ། །དེ་དག་གིས་མཚོན་པའི་དག་པའི་རིགས་སྔ་ཕྱིར་ཇི་སྙེད་ཅིག་གསུངས་ཀྱང༌། དཀྱིལ་འཁོར་སྒོམ་ཐེངས་གཅིག་ལ་མཐའ་དག་དྲན་པར་ཡང་མི་ནུས་ཤིང༌། ཐམས་ཅད་གཅིག་ཏུ་བསྡུ་དགོས་པ་ཡང་མ་ཡིན་པས། རེ་ཞིག་དེ་ཙམ་ཞིག་བཤད་དོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། ཚོགས་གསག་གཉིས་སྔོན་དུ་འགྲོ་བ་རྟེན་གྱི་དཀྱིལ་འཁོར་བཤད་པའི་སྡེ་ཚན་ཏེ་ལྔ་པའོ།། །།གསུམ་པ་བརྟེན་པ་ལྷ་རྫོགས་པ་ལ། སྙིང་པོའི་གནས་ཀྱི་ལྷ་ཚོགས་བསྐྱེད་པ་དང༌། འཁོར་ལོ་རྣམ་བཞིའི་ལྷ་ཚོགས་སྤྲུལ་པ་དང༌། ཤིན་ཏུ་རྣམ་པར་དག་པའི་ང་རྒྱལ་བཟུང་བའོ། །དང་པོ་ལ་གཙོ་བོ་ཡབ་ཡུམ་བཞེངས་པ་དང༌། ལྷན་ཅིག་སྤྱོད་པའི་འཁོར་ནུས་མ་རྗེས་འབྲང་དང་བཅས་པ་བསྐྱེད་པའོ། །དང་པོ་ནི། མངོན་པར་བྱང་ཆུབ་པ་རྣམ་པ་ལྔའི་བདག་ཉིད་དེ། རྒྱུད་ཀྱི་རྒྱལ་པོ་ལས། ཟླ་བ་ཉི་མ་ལ་ཡང་ཨ་སོགས་ཀ་སོགས་རྡོ་རྗེ་དང་བཅས་མེ་ལོང་ལ་སོགས་ལྔ་རྣམས་ཀྱིས། །འོད་ཟེར་ལྔ་རྣམས་འགྱེད་པར་བྱེད་ཅིང་དྲི་མ་མེད་པའི་འོད་འཕྲོ་དུས་ཀྱི་འཁོར་ལོ་བསྒོམ་པར་བྱ། །ཞེས་གསུངས་ཤིང༌། སྐབས་འདིའི་འགྲེལ་པར། ཉི་ཟླ་ཨཱ་ལི་ཀཱ་ལིས་མཚན་པ་ཙམ་ཞིག་སྒོམ་པར་གསུངས་ལ།
གོང་དུ་དྲངས་པ་ལྟར་མཆོག་མི་འགྱུར་ལས། ཨཱ་ལི་ཀཱ་ལི་ལས་ཟླ་བ་ཉི་མ་བསྐྱེད་པར་གསུངས་པས་ཅུང་ཟད་མདོར་བསྡུས་པའི་ཚེ། ཉི་ཟླ་ས་བོན་ལས་མི་བསྐྱེད་ཅིང༌། ཨཱ་ལི་ཀཱ་ལིས་མཚན་པར་བྱེད་པ་ཙམ་གྱིས་ཀྱང་ཆོག་ལ། ཡང་ན་ཨཱ་ལི་ཀཱ་ལི་ལས་ཉི་ཟླ་བསྐྱེད་ནས། སླར་ཡི་གེས་མཚོན་པ་མི་བྱེད་པས་ཀྱང་རུང་མོད་ཀྱི། རྒྱས་པ་ལ་ལུང་སྔ་ཕྱི་གཉིས་ཀའི་དོན་བསྡོམས་ཏེ། ཉི་ཟླ་ཨཱ་ལི་ཀཱ་ལི་ལས་བསྐྱེད་པའི་རྗེས་སུ་སླར་ཡང་ཨཱ་ལི་ཀཱ་ལིས་མཚན་པ་བྱེད་དོ། །སྲས་མཆོག་ཆོས་ཀྱི་དབང་ཕྱུག་གི་གསུང་འབྲོ་ལུགས་ཀྱི་གསུང་སྒྲོས་ཆེན་མོ་འོད་ཟེར་འཕྲེང་པའི་ནང་ན་བཞུགས་པ་ལས། དབྱངས་གསལ་འོད་ཟེར་དང་བཅས་པ་ནམ་མཁའ་ནས་འབབ་པ་དང༌། དེའི་དག་པ་སོགས་གསུངས་ཀྱང་འོ་སྐོལ་གྱི་ཆོས་རྗེ་ཡབ་སྲས་རྣམས་དེ་ལ་ཕྱག་ལེན་མི་མཛད་དོ། །དེ་ལ་དབྱངས་སུམ་ཅུ་རྩ་གཉིས་སུ་བྱེད་པ་ནི། ཟླ་བ་གཅིག་ལ་ཚེས་ལ་འཆར་བའི་དབྱངས་ཀྱི་དབང་དུ་མཛད་ནས། ཐུང་ངུ་བཅོ་ལྔའི་མཐར་ཨཾ་དང༌། རིང་པོ་བཅོ་ལྔའི་མཐར་ཨཿབསྣན་པ་སྟེ། ཨཾ་ཨཿདེ་གཉིས་ཁྱབ་བྱེད་ཀྱི་དོན་དང༌། ཡར་ངོ་དང་མར་ངོའི་ཚེས་བཅུ་དྲུག་པ་གཉིས་དང༌། དགའ་བ་བཅུ་དྲུག་པ་ལྷན་སྐྱེས་ཀྱི་ལྷན་སྐྱེས་རྣམས་མཚོན་པ་ཡིན་ནོ། །རྒྱུད་འདིར་ཧ་ཡ་ར་ཝ་ལ་ལྔ་པོ་འདི་ཡ་ཎར་བསྒྱུར་པ་གཙོ་ཆེ་བའི་དབང་དུ་བྱས་ནས། ཕལ་ཆེར་དབྱངས་སུ་གསུངས་ཏེ་རྒྱུ་དབྱངས་ལས་བྱུང་བ་ལ་དགོངས་པ་ཡིན། ཡ་ཎར་བསྒྱུར་བ་མ་ཡིན་པའི་གསལ་བྱེད་རྐྱང་པའང་ཡོད་པ། ལ་སྡེའི་མིང་བཏགས་ཏེ་གསལ་བྱེད་ཀྱི་ནང་དུ་འཇུག་པའང་ཡོད་པས་ཆ་ཤས་གཉིས་ཀར་བརྟེན་པ་ཡིན་ལ། རིང་ཐུང་གཉིས་ཀར་ལ་སྡེ་ཚན་གསུམ་གསུམ་བྱེད་པ་ནི། ཐུང་ངུ་ལ་མུན་རྡུལ་སྙིང་སྟོབས་དང༌། རིང་པོ་ལ་སྙིང་སྟོབས་རྡུལ་མུན་
གྱི་དབྱེ་བས་སོ། །དེ་རེ་རེ་བཞིན་ཡང་ཡིག་འབྲུ་ལྔ་ལྔ་འབྱུང་བ་ནི། འབྱུང་བ་ལྔའི་རང་བཞིན་གྱི་ཡི་གེའི་དབྱེ་བ་སྟེ། ལྷག་མ་ཨཾ་དང་ཨཿགཉིས་སྤྱི་ལ་འཇུག་པའི་ཁྱབ་བྱེད་དོ། །དེ་ལ་ཐུང་ངུའི་ནང་གི་ཨ་ཨི་རྀ་ཨུ་ལྀ་ནི་རྩ་བར་རང་བྱུང་གི་ཡི་གེ་ལྔ་ཐབས་ཀྱི་ཕྱོགས་ཡིན་ཞིང༌། དེ་དག་རིང་པོ་ལྔ་ཡང་རང་བྱུང་གི་ཡི་གེ་ཤེས་རབ་ཀྱི་ཕྱོགས་སོ། །འདི་རྣམས་རང་བྱུང་ཞེས་པ་ཕྱི་ལྟར་ན་ཡི་གེ་གཞན་གྱི་རྣམ་འགྱུར་མ་ཡིན་གདོད་མའི་ཡི་གེ་ཡིན་པའོ། །ལྷག་མ་གཞན་རྣམས་ཐམས་ཅད་ཡི་གེ་ལྔ་པོ་འདི་དག་གི་རྣམ་འགྱུར་ཡིན་ཏེ། ཨ་ཨེ་ཨར་ཨོ་ཨལ་རྣམས་ཡི་གེ་ལྔའི་ཡོན་ཏན་དང༌། ཨཱལ་ཨཽ་ཨཱར་ཨི་ཨཱ་རྣམས་རྩ་བའི་ཡི་གེ་ལྔའི་འཕེལ་བ་ཡིན་ལ། ཧ་ཡ་ར་ཝ་ལ་རིང་ཐུང་གཉིས་རྩ་བའི་ཡི་གེ་ལྔའི་ཡ་ཎར་བསྒྱུར་བ་ཡིན་པ་ལས། སཾ་པྲ་ས་ར་ཎའི་སྐབས་སུ་སླར་ཡང་ཨ་ཨི་རྀ་ཨུ་ལིར་ལྡོག་འགྲོ་བའི་སྐབས་ཀྱང་ཡཽད་པས། དེ་རྣམས་རྣམ་འགྱུར་ལས་ཀྱང་རྣམ་འགྱུར་རོ། །སྒྲའི་གཞུང་རྣམས་ལས་ཨ་ཐུང་ངུ་ཡོན་ཏན་དུ་བཤད་པ་མེད་ཀྱང༌། འདིར་ནི་ནང་དོན་ལ་སྦྱར་བ་ཡིན་པས་དགོས་སོ། །དེ་ལ་དབྱངས་ཐུང་ངུ་རྣམས་ནང་ དུ་གཡོན ་སྐོར་དང༌། དབྱངས་རིང་པོ་རྣམས་ཕྱི་རུ་གཡས་སྐོར་དུ་འགོད་ཅིང༌། ཨཾ་དང་ཨཿཕྲད་ཅིང་གཞན་གོ་རིམ་ཡང་ཐུང་ངུ་རྣམས་ཨ་ཨི་སོགས་ནས་འགོ་བརྩམས་ཤིང༌། རིང་པོ་རྣམས་ལཱ་ཝཱ་སོགས་ནས་འགོ་བརྩམས་པས་རིང་ཐུང་གི་ཡི་གེ་བྲང་སྤྲད་དུ་འོང༌། དེ་ལྟར་ཐོག་མར་ཟླ་བ་བསྐྱེད་ནས། སླར་ཡང་གདན་དང་ཟླ་བའི་བར་དུ་ཉི་མ་བསྐྱེད་དེ། ལླ་སོགས་བརྩེགས་མའི་ཡི་གེ་རྣམས་ནང་ དུ་གཡས་སྐོར་གྱི་རིམ་པ་དང༌། ང་གྷ་ག་སོགས་ཐུང་ངུ་རྣམས་ཕྱི་ནས་གཡོན ་སྒོར་གྱི་རིམ་པས་འགོད་དེ་འདི་ནི་དུས་འཁོར་ཉིད་ལ་ཡོངས་སུ་གྲགས་པའི་གསལ་བྱེད་སྡེ་ཚན་དྲུག་
ལ་ཡི་གེ་སུམ་ཅུ་ཡོད་པའི་སྟེང་དུ། ཡ་ཎར་བསྒྱུར་བ་མ་ཡིན་པའི་ལ་ཡིག་སོགས་ལ་སྡེ་དཀྱུས་མ་བསྣན་པས་སོ་ལྔ་བྱུང༌། ལ་སྡེ་ལྷག་པོ་ལ་རྒྱུད་འདིར་ལ་ཝ་ར་ཡ་ཀྵཿགསུངས་པའང་ཡོད་མོད་ཀྱི། དེའི་དོད་དུ་སྐབས་འདིར་རྒྱུད་སྡེ་སྤྱི་འགྲོས་དང་མཐུན་པར་ལ་ཝ་ཡ་ཌ་ཌྷ་བསྣན་པའོ། །དེ་ལ་ལ་སྡེ་བོར་བ་སྡེ་ཚན་དྲུག་འབྱུང་བ་ནི། འབྱུང་ཆེན་ཁམས་དྲུག་གི་དབང་དུ་བྱས་ལ། ནང་ཚན་ལྔ་ལྔ་འབྱུང་བ་ནི། རེ་རེ་བཞིན་འབྱུང་ཆུང་ལྔ་ལྔ་ཡོད་པའོ། །ལ་ཝ་ར་ཡ་ཧ་ལ་འབྱུང་བ་ཆེ་ཆུང་གི་དབྱེ་བ་མི་བརྩི་བར་དེ་ཐམས་ཅད་ལ་འཇུག་ཏུ་རུང་བའི་རྩ་བའི་འབྱུང་བ་ལྔ་ཡིན་ཞིང༌། འདིར་ལ་སོགས་ལྷག་པོ་ལྔ་བྱུང་བ་ཡང༌། སྤྱིར་གསལ་བྱེད་བརྒྱད་ཅུའི་གྲངས་སྒྲིག་པའི་ཕྱིར་ཡིན་ཡང༌། ཌ་ནི་ར་དང་མཚུངས་ཏེ་ལ་ཝ་ར་ཡ་ཀྵཿདང་དོན་གཅིག་པས་རྩ་བའི་འབྱུང་བ་ལྔ་ལ་ཡང་ཡུལ་དང་ཡུལ་ཅན་གྱི་དབྱེ་བ་གཉིས་ཡོད་དེ། ལ་ཝ་ར་ཡ་ཧ་ཡུལ་ཅན་དང༌། ལ་ཝ་ར་ཡ་ཀྵཿནི་ཡུལ་ལོ། །དེ་ཡང་ལ་ཝ་ར་ཡ་བཞི་པོ་ནི། ཀུན་ཁྱབ་ཡིན་པའི་མཚོན་དོན་སྡེ་བ་དྲུག་གི་ཡི་གེ་ཀུན་ལ་འདོགས་འབྲེལ་གྱི་ཚུལ་གྱིས་འཇུག་ཅིང༌། སྤྱིར་ཡི་གེ་གང་དང་གང་ལ་གནས་སྐབས་དེ་དང་དེར་བརྩེགས་པའི་ཡི་གེ་ནི་ཐམས་ཅད་ལ་འབྱུང་མོད་ཀྱི། གཞན་རྣམས་བརྩེགས་པ་ཙམ་ཡིན་གྱི་འདོགས་འབྲེལ་མ་ཡིན་ནོ། ཧ་ཀྵཿའདོགས་འབྲེལ་མ་ཡིན་ཡང༌། ཧ་ནི་ཡི་གེ་ཀུན་གྱི་སྒྲའི་མཐའ་ལ་འཇུག་པ་དང༌། ཀྵཿནི་འཇིག་རྟེན་དུ་ཀློག་པའི་གསལ་བྱེད་ཉི་ཚེ་བ་ཀུན་གྱི་ཐོག་མཐའ་བསྡོམས་པ་ཡིན་པས་འཇུག་པ་མཚོན་ཅིང༌། ཧ་ནི་ནམ་མཁའ་དང་ཀྵཿནི་ཡེ་ཤེས་སོ། །དེ་ལ་དབྱངས་ཀྱི་སྐབས་སུ་རིང་ཐུང་གཉིས་ཐབས་ཤེས་དང༌། གསལ་བྱེད་ཀྱི་སྐབས་
སུའང་སྤྱིར་རིང་ཐུང་གི་དབྱེ་བ་ཤེས་རབ་དང་ཐབས་སུ་སྦྱོར་མོད་ཀྱི། སྐབས་འདིར་རིང་པོའི་དོད་དུ་གསལ་བྱེད་བརྩེགས་མ་ཤེས་རབ་ཏུ་མཛད་པ་ནི། རིང་ཐུང་དངོས་ནི་དབྱངས་ཀྱི་རབ་ཏུ་ཕྱེ་བ་ཡིན་གྱི། གསལ་བྱེད་ཀྱི་སྒོ་ནས་སྟོབས་ལྷག་པོར་མ་སོང་ལ། གསལ་བྱེད་ཉིད་ཉིས་འགྱུར་བྱས་ན་དེར་སོང་བས་སོ། །དེ་ལ་དབྱངས་ནི་ཐུང་ངུ་ཐབས་གཙོ་བོ་ཡིན་པས་ཐུང་ངུ་ནང་དང་རིང་པོ་ཕྱི་རོལ་ཏུ་འགོད། གསལ་བྱེད་ནི་ཉིས་བརྩེགས་ཤེས་རབ་གཙོ་བོ་ཡིན་པས། དེ་ནང་དུ་འགོད་ཅིང་རྐྱང་པ་ཕྱི་རོལ་ཏུ་འགོད་པ་ཡིན་ནོ། །དེ་ལྟར་ན་ཐོག་མར་གདན་ལ་མ་རེག་ཙམ་གྱི་ནམ་མཁའ་ལ་དབྱངས་སྐོར་བ་རིམ་པ་གཉིས་པོ་དེ་བསྒོམ། དེ་ཞུ་བ་ལས་ཟླ་བའི་དཀྱིལ་འཁོར་དུ་གྱུར། དེའི་སྟེང་དུ་སྔར་བཞིན་དབྱངས་ཀྱི་ཡི་གེ་སྐོར་གཉིས་པོ་དེ། མེ་ལོང་ལ་གཟུགས་བརྙན་ཤར་བ་ལྟ་བུའི་ཚུལ་ལམ། དེ་ལྟར་སྒོམ་མི་བདེ་ན་འབུར་དོད་དུ་བསྒོམ། དེ་རྗེས་ཟླ་བ་དང་གདན་གྱི་བར་དུ་གསལ་བྱེད་སྐོར་གཉིས་དང༌། དེ་ཞུ་བ་ལས་ཉི་མ་དང༌། དེ་ལ་གསལ་བྱེད་ཀྱིས་མཚན་པ་ཡང་སྔ་མས་རིགས་བསྒྲེས་ཏེ་བསྒོམ། དེ་ནས་ཟླ་བའི་སྟེང་དུ་ཧཱུྃ་ཡིག་མཐིང་ནག་འོད་འབར་བ་ཆེན་པོ་ཞིག་བསྒོམ་སྟེ། དེ་ཡང་རྒྱུད་དུ། རྡོ་རྗེ་དང་བཅས་ཞེས་པའི་དོན་ཡིན་ཏེ། འདིར་རྒྱུད་ལས་རྡོ་རྗེ་ཞེས་གསུངས་པའི་དོན་འཆད་པ་ན། འགྲེལ་པར་ཉི་མའི་སྟེང་དུ་ཟླ་བའོ། །ཟླ་བའི་དབུས་སུ་ཧཱུཾ་ཡིག་ཟླ་བའི་མཚན་མ་ལྟ་བུའོ། ཞེས་རྡོ་རྗེའི་འབྲུ་གནོན་ཧཱུཾ་ལ་གསུངས་པས། གཞུང་གི་ཚིག་དོན་ལ་ཕྱག་མཚན་རྡོ་རྗེ་གསལ་བར་གསུངས་པ་མེད་པར་གྲུབ། རྒྱུད་ལས། དངོས་སུ་གསུངས་པས་རྡོ་རྗེ་བསྒོམ་ཟེར་བ་ནི་སྤྱན་རས་གཟིགས་ལས་ཀྱང་མཁས་པར་ཁས་ལེན་པའོ། །དེ་ནས་ཧཱུཾ་དེ་རིམ་གྱིས་ཞབས་ཀྱུ་ནས་བརྩམས་ཏེ་
ཟླ་བའི་དབུས་སུ་ཞུགས་ཏེ། དེ་མ་ཐག་ཟླ་བ་ཡང་ཉི་མ་ལ་འདྲེས། ཉི་ཟླ་ཧཱུཾ་གསུམ་གཅིག་ཏུ་འདྲེས་པའི་འོད་ཀྱི་གོང་བུ་ཁ་དོག་སྣ་ཚོགས་པའི་བདག་ཉིད་ཅན། དེའི་ནང་སྟེང་གི་ཆ་ལ་ཧི་ཡིག་ནག་པོ་འོད་ཟེར་སྣ་ཚོགས་པ་འབར་བར་བསྒོམས་ཏེ་གཅིག་ཏུ་འདྲེས་པའི་སྐབས་འདིར་པཎྜི་ཏ་དུས་འཁོར་པས་མཛད་པའི་གཞུང་གཅིག་ནའང་རྡོ་རྗེ་ཕཊ་ཀྱིས་མཚན་པར་བཤད་ཅིང༌། གསུང་སྒྲོས་འོད་ཟེར་འཕྲེང་བ་ལས་ཀྱང༌། གཅིག་ཏུ་འདྲེས་པ་རྡོ་རྗེར་གྱུར་པའི་རྩེ་མོ་ལ་ཧི་དང༌། ལྟེ་བ་ལ་ཕཊ་ཀྱིས་མཚན་པ་བསྒོམ་ད་དུང་འདིའི་མན་ངག་གཞལ་ལས་ཤེས་ཞེས་གསུངས་ཤིང༌། དེའི་མན་ངག་ཀྱང་མཁས་པ་ནམ་མཁའ་འོད་ཟེར་གྱིས་བྲིས་པ་ལས་ཧི་ནི་སྲོག་གི་རླུང་དང་ཕཊ་ནི་ཐུར་སེལ་ཡིན་ཞིང༌། ཐུར་སེལ་གྱི་ནུས་པས་ཐིག་ལེ་སྤྲོ་བ་དང་འཆིང་བ་གཉིས་ཀར་བྱེད་པ་བཞིན་ལྷའི་རྣལ་འབྱོར་ལ་འབྲས་བུ་ལྷར་བསྐྱེད་པའི་སྐབས་ཐིག་ལེ་ལས་ལྷ་ཚོགས་སྤྲོ་བ་དང༌། དགའ་བཞི་ལུགས་འབྱུང་ལུགས་ཟློག་གི་ཡེ་ཤེས་སྒྲུབ་པ་ལ། རྒྱུ་མངོན་བྱང་དང་པོ་བཞིའི་སྐབས་འདིར་ཐུར་སེལ་མཚོན་བྱེད་ཕཊ་ཡིག་བསྒོམ་དགོས་པ་དང༌། དཀར་དམར་རླུང་གསུམ་གོང་བུ་ལོགས་ལོགས་སུ་གནས་ན་འདྲེ་བའི་བྱ་བ་མི་འགྲུབ་པས་རེ་རེ་བཞིན་རྡུལ་དུ་གསིལ་ནས་གཅིག་ཏུ་སྦོལ་བ་ཡིན་པས། ཕཊ་ནི་གོང་བུ་སོ་སོ་བཤིག་སྟེ་གསིལ་བའི་དོན་ཡང་ཡིན་ཞེས་འབྱུང་ངོ༌། །འོན་ཀྱང་དུས་འཁོར་ཉིད་ཀྱི་བསྐྱེད་རིམ་གྱི་སྐབས་འགྲེལ་ཆེན་གྱི་རྒྱས་བཤད་འདི་དག་ཏུ་མ་གསུངས་པས། དཀྱུས་སུ་འབྱུང་བ་རྒྱུད་འགྲེལ་གྱིས་དངོས་བསྟན་འདི་ཁོ་ནས་ཆོག་ལ། དེ་ལྟ་མོད་ཀྱི་གསུང་སྒྲོས་དེ་དག་ཀྱང་བླ་མའི་མན་ངག་མ་ནོར་བ་ནི་ཡིན་ཞིང༌། ཇི་སྐད་དུ། ཨཱ་ལི་ཀཱ་ལི་སྙོམས་འཇུག་དང༌། །ཧཱུཾ་ཕཊ་ཡི་
གེ་སོགས་སྤངས་ཀྱང༌། ཞེས་པ་དང༌། དགྱེས་རྡོར་ལས། ཨཱ་ལི་ཀཱ་ལི་མཉམ་སྦྱོར་བ་སོགས་ཀྱི་དོན། སེམས་འགྲེལ་རྣམས་ཀྱིས་སྐྱེ་རིམ་སྐབས་སུ་བཀྲལ་བ་ཡང་དེ་དང་མཚུངས་ཏེ། བསྐྱེད་རིམ་གྱི་ལྷ་བསྐྱེད་པའི་རྒྱུ་མངོན་བྱང་གི་སྐབས་སུ་ཕཊ་ཡིག་དགོས་པ་གཅིག་ཀྱང་གསུངས་པ་དེར་སྣང་བས། དེ་ལྟར་སྒོམ་པ་ལ་རྒྱུད་འགྲེལ་དང་མི་མཐུན་པའི་སྐུར་པ་གདབ་པར་མི་བྱ་སྟེ། སྤྱི་ལྡོག་ནས་གདམ་ཁ་ཡིན་མོད། ལག་ལེན་ལ་སྐབས་འདི་དག་གི་རྒྱུད་འགྲེལ་དངོས་བསྟན་བཞིན་དུ་མཛད་ དོ། །དེ་ལྟར་ན་ཟླ་བ་ལས་བྱང་ཆུབ་པ་དང༌། ཉི་མ་ལས་བྱང་ཆུབ་པ་དང༌། ཡི་གེ་ལས་བྱང་ཆུབ་པ་དང༌། གཅིག་ཏུ་འདྲེས་པ་ལས་བྱང་ཆུབ་པ་ཞེས་པའམ། མེ་ལོང་ཡེ་ཤེས་ལས་བྱང་ཆུབ་པ་ཞེས་སོགས་བཞི་པོའི་ཐ་སྙད་སྦྱར་ཀྱང་རུང་ངོ༌། །སྐབས་འདིར་ཁ་ཅིག་རྒྱུད་ལས་གསུངས་པའི་ཕྱིར་ཕྱག་མཚན་རྡོ་རྗེ་ངེས་པར་དགོས་ཟེར་བ་ནི། གོང་དུ་བཤད་པ་ལྟར་རྒྱུད་ཚིག་ལ་གོ་བ་མ་ཐེབས་པར་སྣང་ཞིང༌། ཡང་འདི་སྐད་ཅེས། ས་བོན་ཕྱག་མཚན་མངོན་བྱང་གཅིག་ཏུ་བྱེད་ པ་ཡང་མི་རུང་སྟེ། དེ་གཉིས་བྱང་ཆུབ་སོ་སོར་བརྩི་བ་ལས། མངོན་བྱང་གཅིག་ཏུ་རྩི་བ་གང་ནའང་མེད་པས་སོ་ཟེར་བ་ནི། འཕགས་སྐོར་ཁོ་ན་ལས། གཞན་གང་ལའང་བློ་གྲོས་མ་ཞུགས་པ་སྟེ། དགྱེས་རྡོར་དང༌། གཤིན་རྗེ་གཤེད་དང༌། གསང་འདུས་ཉིད་ཀྱིའང་ཡེ་ཤེས་ཞབས་ལུགས་སོགས་མང་པོ་ལ་ལེགས་པར་བལྟ་བར་བྱའོ།། །།དེ་ནས་མངོན་བྱང་ལྔ་པ་ནི། སྐུ་ཡོངས་སུ་རྫོགས་པ་ལས་མངོན་པར་བྱང་ཆུབ་པའམ། ཆོས་དབྱིངས་ཡེ་ཤེས་ལས་བྱང་ཆུབ་པ་ཞེས་བྱ་སྟེ། དེ་ཡང་རྟག་ཏུ་ཟུང་འཇུག་གི་མཚན་ཉིད་ཅན་དུ་གནས་པ་མཚོན་པའི་ཕྱིར་ན། རྒྱུའི་གནས་སྐབས་སུ་ས་བོན་ཕྱག་མཚན་
སོགས་སོ་སོར་མི་བྱེད་པར་རྒྱུ་མངོན་བྱང་དང་པོ་བཞི་ཚན་ཆ་གཅིག་པོ་དེ་ལས་འབྲས་བུ་ཡབ་ཡུམ་གཉིས་ཀར་རྫོགས་པ་ཡིན་ ནོ། །དེ་ཡང་སྐུ་རྫོགས་པ་དང་ལྷན་ཅིག་ཧཾ་ཡིག་གི་སྒྲ་གཟུགས་དང་བཅས་པ་སྟེ། ཧཾ་ཡིག་ནི་རྡོ་རྗེ་སེམས་དཔའི་ས་བོན་ཡིན་ལ། ཐུགས་ཀའམ་གཙུག་ཏོར་གང་རུང་དུ་སྒོམ་པ་གདམ་ཁ་ཡིན་ནའང༌། གཙུག་ཏོར་དུ་སྒོམ་པ་གཙོ་ཆེའོ། །ཧཾ་ཡིག་དེ་ཉིད་ལ་རྒྱུ་མངོན་བྱང་བཞི་ཀར་གྱི་དོན་ཚང་སྟེ། ཐིག་ལེ་ནི་ཟླ་བ། སྟེང་གི་ཆ་ཟླ་ཕྱེད་དུ་གྲགས་པ་ནི་རྣམ་བཅད་ཡིན་པས་ཉི་མ། ཧཾ་ཡིག་ནི་གཞོམ་དུ་མེད་པའི་རླུང༌། ཨ་ཡིག་ནི་སྲོག་སྟེ་རྣམ་པར་ཤེས་པའོ། །ཁ་ཅིག་གཞོམ་མེད་དང་སྲོག་གི་ཁྱད་པར་གདངས་སུ་ཐོན་པ་དང་མ་ཐོན་པའི་ཁྱད་པར་མ་གཏོགས། རླུང་ཁོ་ནའོ་ཞེས་ཀྱང་འཆད་དེ། དེ་ལྟར་ན་བྱང་ཆུབ་རྣམ་པ་གསུམ་གྱི་དོན་ལས་མེད་པར་འགྱུར་བས་མི་འཐད་དོ། །འདིར་ཡང་འདི་སྙམ་དུ་གཞན་མང་པོ་ལས་འབྱུང་བ་ལྟར་གཅིག་ཏུ་འདྲེས་པ་ལས་ལྷར་བཞེངས་བཞིན་པ་མངོན་བྱང་ལྔ་པ་སྟེ། མངོན་བྱང་ལྔ་པོ་རྒྱུ་དང༌། བཞེངས་ཟིན་པ་ནི་མངོན་བྱང་གི་འབྲས་བུ་སྟེ། མངོན་བྱང་ལས་དོན་ཚན་ལོགས་པར་ཕྱེ་བ་རུང་བ་མ་ཡིན་ནམ་ཞེ་ན། འདིར་དེ་ལྟར་མི་འཐད་དེ་དཀྱིལ་འཁོར་ཡོངས་རྫོགས་སྤྲོས་ཟིན་པའི་རྗེས་སུ་ཤིན་ཏུ་རྣམ་པར་དག་པའི་ཆོས་དབྱིངས་ཡེ་ཤེས་ཀྱི་ང་རྒྱལ་འཛིན་པ་ཡོད་ཅིང༌། དེ་ཉིད་མངོན་བྱང་ལྔ་པའི་ང་རྒྱལ་འཛིན་པ་ཡིན་པས་དཀྱིལ་འཁོར་རྒྱལ་མཆོག་གི་ལྷ་ཚོགས་ཐམས་ཅད་སྤྲོས་མ་ཟིན་གྱི་བར་དུ་མངོན་བྱང་ལྔ་པ་ཉིད་ཡིན་ནོ། །དེ་ནས་ལྷ་རྣམས་གསལ་འདེབས་པ་ལ་བདག་ཉིད་དཔལ་དུས་ཀྱི་འཁོར་ལོ་ཞེས་པ་ནས། དཔག་བསམ་གྱི་ཤིང་སེར་པོ་རྣམས་སུ་གྱུར་ཞེས་པའི་བར་མངོན་རྟོགས་དེ་སྟོན་བྱེད་ཀྱི་རྒྱུད་འགྲེལ་རྣམས་ཕལ་ཆེར་
ནི་གོ་སླ་ལ། དཀའ་བ་རྣམས་ཅུང་ཟད་བཤད་ན། ཕྲག་པ་དྲུག་ཅེས་པ་མགྲིན་པའི་འོག་མཚམས་སྦོམ་ཤོས་ཀྱི་ཐད་ནས། དཔུང་པའི་ཚིགས་ཀྱི་མཚམས་ཚུན་ཆད་མིའི་ལུས་ལྟར་ན། རྒྱབ་ཏུ་སོག་པ་དང་མདུན་དུ་སྒྲོག་རུས་ཡོད་པའི་ཐད་སོར་དྲུག་ཙམ་གྱི་དཀྱུས་དེ་ཕྲག་པ་ཞེས་བྱ་སྟེ། དེ་ཡང་གཡས་སུ་མདུན་རྒྱབ་ཏུ་རིམ་པ་གསུམ་དང༌། གཡོན་དུའང་དེ་བཞིན་ཡིན་པས། རྒྱུད་འགྲེལ་དུ ་མདུན་མ་གཉིས་ལ་ཤར་དང༌། རྒྱབ་མ་གཉིས་ལ་ནུབ་དང༌། དབུས་མ་གཉིས་ལ་གཡས་གཡོན་གྱི་ཐ་སྙད་མཛད་དོ།། དཔུང་པ་བཅུ་གཉིས་པ་ཞེས་པ་ནི། དཔུང་པའི་ཚིགས་མཚམས་ནས་གྲུ་མོའི་བར་གྱི་བར་ལྷུ་ལ་དཔུང་པ་ཞེས་བྱ་སྟེ། ཕྲག་པ་རེ་ལས་དཔུང་པ་གཉིས་གཉིས་གྱེས་པས་གཡས་ གཡོན་དུ ་དྲུག་དྲུག་སྟེ་བཅུ་གཉིས་སོ། །གྲུ་མོའི་མཚམས་ནས་བར་ལྷུ་རེ་ལས་ཕྱག་ངར་གཉིས་གཉིས་གྱེས་པ་སྟེ། ཕྱག་ཉི་ཤུ་རྩ་བཞི་ཡིན་ལ། དེ་ལྟར་ན་གཡས་དང་ གཡོན་དུ ་ཕྲག་པ་མདུན་མ་གཅིག་ལས་དཔུང་པ་གཉིས། ཕྱག་ངར་ཕྱག་མགོ་དང་བཅས་པ་བཞི་བྱུང་སྟེ་དེ་རྣམས་ཐམས་ཅད་ནག་པོའོ། །ཕྲག་པ་བར་མ་ལ་ཡང་དེ་བཞིན་དུ་བྱུང་སྟེ་ཐམས་ཅད་དམར་པོའོ།།ཐ་མ་ལ་ཡང་སྟེ་ཐམས་ཅད་དཀར་པོའོ། །འདིར་སྐུ་མདོག་ནི་གཞན་དག་སྐུ་ལུས་སྔོ་ལ་ཞལ་རས་གནག་ཟེར་བ་སོགས་དང༌། སྐུ་ལུས་ནག་པོར་བྱས་ན་གསད་བསྐྲད་ཀྱི་ལས་འབའ་ཞིག་པར་འགྱུར་ཟེར་བ་དང༌། སྐུ་མདོག་སྔོན་པོ་དང་ཞལ་རས་ནག་པོར་གཞུང་ནས་བཤད་ཟེར་བ་དང༌། རྒྱ་གཞུང་འགའ་ཞིག་ལས་སྐུ་ལུས་ཕྱོགས་མདོག་ཏུ་བྱེད་པ་དང༌། བོད་ཀྱི་བླ་མ་འགའ་ཞིག་ཀྱང་སྐུ་མདོག་ལྗང་ཁུར་བཞེད་དོ་ཞེས་གྲགས་ན། ཕྱི་མ་གཉིས་པོ་དཀྱིལ་འཁོར་འདི་ལ་འཐད་པ་མིན་ཞིང་ཀུན་ཏུ་གྲགས་པ་དང་འགལ་ཡང་དེང་སང་རྗེས་འབྲང་
མེད་ལ། སྔོན་པོ་དང་ནག་པོའི་ཁྱད་པར་བཤད་ན། སྤྱིར་གྲགས་ཚོད་ལ་དཔལ་ལྡན་དུས་ཀྱི་འཁོར་ལོའི་ལུགས་ལ། སྔོན་པོ་དང་ནག་པོ་དག་བྱ་དག་བྱེད་ཀྱང་ཐ་དད་ལས་སྒྲུབ་ཚུལ་ཀྱང་ཐ་དད་པས་ཁྱད་ཆེར་ཡོད་ལ། རྒྱུད་སྡེ་གཞན་ལས་ནི་དེ་གཉིས་ཕལ་ཆེར་མཚུངས་པར་བཤད་དོ་ཞེས་ཟེར་ན། ཕྱོགས་གཅིག་ནས་དོན་ལ་གནས་པའང་ཡིན་མོད། མཐའ་གཅིག་ཏུ་མ་ཡིན་ཏེ། རྣལ་འབྱོར་རྒྱུད་སོགས་ལ་མི་བསྐྱོད་པ་སྔོན་པོར་དགོས་ཀྱི་བུང་པའི་མདོག་ཏུ་མི་རུང་བ་སོགས་རྒྱུད་སྡེ་གཞན་ལས་ཀྱང་སྔོ་ནག་ཐ་དད་པའི་སྐབས་མང་ཞིང༌། རྒྱུད་འདིར་ནི་ཁྱབ་བྱ་ཉེ་ཚེ་བ་ཁམས་དྲུག་གི་དབང་དུ་བྱས་ན། ནག་པོ་རླུང་ཁམས་བསད་བསྐྲད་གཙོ་བོ་དང༌། སྔོན་པོ་ཡེ་ཤེས་ཀྱི་ཁམས་ལས་ཐམས་ཅད་པའམ། བསད་གསོ་གཉིས་ཀ་སྒྲུབ་ཅེས་འབྱུང་བས་ཁམས་དྲུག་གི་དབང་དུ་བྱས་ན་ཤིན་ཏུ་ཐ་དད་ལ། ཁྱབ་བྱེད་རྡོ་རྗེ་བཞིའི་དབང་དུ་བྱས་ན་སྔོ་ནག་རིགས་གཅིག་པས་སྐུ་མདོག་གི་སྐབས་སུ་འདི་ལྟར་སྐུ་སྔོན་པོ་སྟེ་ཞེས་སྐུ་ལུས་མ་གཞི་སྔོན་པོར་བཤད་པ་དང༌། ཕྱག་དང་སོར་མོ་སོགས་ཀྱི་སྐབས་ནག་པོར་བཤད་པ་དང༌། གཞན་མང་པོར་མཐོན་མཐིང་ཞེས་གསུངས་པ་རྣམས་དོན་གཅིག་ཅིང་ཤར་གྱི་ཞལ་ནག་པོ་མཆེ་བ་གཙིགས་པ་དྲག་པོ་དང་ཞེས་གསུངས་པ། སྣ་ཚོགས་ཡུམ་སེར་མོའི་ཐབས་སུ་དགོས་པས་སྔོན་པོ་མ་ཡིན་སྙམ་ན། འདིར་སྔོ་ནག་གཅིག་ཏུ་དགོངས་པས་དེ་ཐམས་ཅད་འདྲའོ། །གཞན་ཡང་རི་རབ་ཀྱི་ཤར་ཕྱོགས་ནག་པོའི་དོན་ལ་ཨིནྡྲ་ནཱི་ལའི་རང་བཞིན་དུ་གསུངས་པ་ཡང་སྔོ་ནག་གཅིག་པའི་དབང་དུ་མཛད་པ་སྟེ། ནོར་བུ་ཨིནྡྲ་ནཱི་ལ་མཐིང་མདོག་ཏུ་ཡོད་ཀྱི། སྣག་ཚའི་ཁ་དོག་ཏུ་ནམ་ཡང་མེད་ལ། རི་རབ་ཀྱི་ཤར་ཕྱོགས་ཀྱང་རླུང་ཁམས་མཚོན་བྱེད་ནག་པོའི་དབང་དུ་མཛད་ཀྱི། ཡེ་ཤེས་ཀྱི་
ཁམས་ཀྱི་སྔོན་པོ་མ་ཡིན་ཏེ། ཡིན་ན་དབུས་སམ་འོག་གི་ཁ་དོག་ཏུ་རིགས་ཀྱི། ཤར་དུ་མི་རིགས་པའི་ཕྱིར་དང༌། ཕྱོགས་གཞན་གྱི་ཟླ་སྟོབས་ལས་ཀྱང་ཤེས་སོ། །དེས་ན་གཙོ་བོའི་སྐུའི་ཆ་ཤས་ཀྱི་སྐུ་ལུས་ཞལ་རས་དཔུང་པ་ཕྲག་པ་སོགས་སྔོན་པོ་དང་ནག་པོར་བཤད་པ་རྣམས་སྔོ་ན་སྔོ་མཉམ་དང༌། ནག་ན་ནག་མཉམ་ཡིན་གྱི་ཁ་དོག་སོ་སོ་མ་ཡིན་ནོ། །འགྲེལ་ཆེན་ལས། སྐུ་མདོག་གི་སྐབས་འདིར་དེ་ལ་དཀར་པོ་དང་ནག་པོའི་ཆོས་ཅན་ནི་ཟླ་བ་སྟེ། དམར་པོ་དང་སེར་པོའི་ཆོས་ཅན་ནི་ཉི་མའོ། །ཞེས་གསུངས་པས་ཟླ་བའི་ཆོས་ལས་ཡབ་སྐུ་མདོག་ནག་པོ་ཐུགས་རྡོ་རྗེ་རྣམ་པར་དག་པ་དང༌། ཉི་མའི་ཆོས་ལས་ཡུམ་སྐུ་མདོག་སེར་མོ་ཡེ་ཤེས་རྡོ་རྗེ་མཚོན་པ་སྟེ། རླུང་དང་ས་མཚོན་པའི་སེར་པོ་དང་ནག་པོ་མ་ཡིན་ལ། ཚིག་དེ་ཡང་མངོན་བྱང་གི་ཉི་ཟླ་ལས་གཙོ་ཆེ་ཆུང་གི་དབང་དུ་བྱས་ནས། ལྷ་ཡབ་ཡུམ་སོ་སོར་བྱུང་ཚུལ་ལོ། །དེས་ན་སྐུ་མདོག་སྔོན་པོར་བྱེད་ཀྱང་ཐུགས་མཚོན་བྱེད་ཉིད་ཡིན་གྱི། ཁྱབ་བྱ་ཉེ་ཚེ་བའི་ཡེ་ཤེས་ཀྱི་ཁམས་མཚོན་པ་མིན་ནོ། །ཁ་ཅིག་ཐབས་ཀྱི་སྐུ་ཆུ་ཁམས་དཀར་པོ་དང༌། གསུང་རླུང་ཁམས་ནག་པོ་བསྲེས་པས་ཐུགས་རྡོ་རྗེ་སྔོན་པོ་ནི་ཡབ་དང༌། ཤེས་རབ་ཀྱི་སྐུ་ས་དང་གསུང་མེ་བསྲེས་པས་ཐུགས་རྡོ་རྗེ་དམར་སེར་ནི་ཡུམ་མོ་ཞེས་ཟེར་ཡང༌། སྔོན་པོའི་རྒྱུར་དཀར་ནག་བསྲེ་དགོས་པའི་རྒྱུ་མཚན་མེད་པ་དང༌། སྣ་ཚོགས་ཡུལ་གསེར་མདོག་ཏུ་གསུངས་པས། དམར་སེར་ལི་ཁྲིའི་ཁ་དོག་ཏུ་བྱེད་པ་མངོན་སུམ་དུ་འགལ་བ་དང༌། རྒྱུད་འདིར་གསེར་མདོག་ཏུ་གསུངས་པ་གཞན་ཐམས་ཅད་ཀྱང་སེར་པོ་ཁོ་ན་ཡིན་པ་དང༌། སྔོན་པོའི་རྒྱུར་དཀར་ནག་བསྲེས་པ་མི་དགོས་ཤིང༌། བསྲེས་ཀྱང་སྔོན་པོར་འགྱུར་བར་མ་ངེས་པའི་ཕྱིར་དང༌། ཡབ་ཡུམ་ནི་ཁྱབ་བྱེད་ཀྱི་ལྷ་ཡིན་པས། ཉེ་ཚེ་བའི་འབྱུང་བ་ལ་སྦྱོར་
རྒྱུ་མ་ཡྀན་པ་དང༌། ས་ཆུ་སྐུ་དང་མེ་རླུང་གསུང་ལ་སྦྱོར་བ་ཁྲུགས་ལ། ཐུགས་དང་མཁའ་ཡེ་གཉིས་སྦྱོར་དགོས་པས། ཡབ་ལྗང་ཁུ་དང་ཡུམ་སྔོན་མོར་ཐལ་བར་འགྱུར་གྱི། ཡབ་སྔོན་པོ་དང་ཡུམ་གུར་གུམ་མདོག་གང་ནས་རྙེད། ལུས་ངག་འདྲེས་པ་ལས་ཡིད་འབྱུང་བའི་རྒྱུ་མཚན་ཡང་བརྟག་པར་དཀའོ། །མཆེ་བ་ཕྱེད་གཙིགས་པ་ཞེས་པ་ནི། ཕྱེད་ཀ་ལྷག་མ་སྦས་པའི་དོན་མ་ཡིན་ཏེ། ཁྲོ་བོ་སྲིན་པོའི་ལུས་ཅན་རྣམས་ཀྱི་མཆེ་བའི་སྦོམ་ཕྲ་དང་དཀྱུས་ཀྱི་ཆ་ལས་ཕྱེད་ཙམ་གྱི་ཚད་ཡོད་པའི་དོན་ནོ། །དེ་ལ་རྩ་ཞལ་ཞེ་སྡང་གི་ཉམས་ཅན་དང༌། གཡས་དམར་པོ་འཛུམ་ཞིང་ཟུར་མིག་སོགས་ཆགས་པའི་ཉམས་དང༌། གཡོན་ནི་ཞི་བ་སྟེ་ཁྲོ་ཆགས་གཉིས་ཀར་མེད་པར་རྣལ་དུ ་གནས་པའི་ཉམས་དང༌། རྒྱབ་ཞལ་ནི་ཤིན་ཏུ་ཞི་བ་མཉམ་གཞག་ལ་གནས་པའི་ཉམས་སུ་གསུངས་ཏེ། འོན་ཀྱང་ཐམས་ཅད་མཆེ་བ་ཕྱེད་གཙིགས་པར་བཤད་པས་ཁྲོ་ཉམས་ཅུང་ཟད་ནི་ཀུན་ལ་ཡོད་པར་མངོན་ནོ། །ཕྱག་སོར་རེ་རེ་བཞིན་ཡོངས་སུ་རྫོགས་པ། མཐེ་བོང་སེར་པོ་སོགས་འབྱུང་བ་སོ་སོའི་ཁ་དོག་ཏུ་བྱ་བའམ། ཡང་ན་ཕྱག་སོར་གྱི་མདུན་རྣམས་ཕྱག་མཐིལ་དང་མཚུངས་པར་དམར་པོའི་ཞེས་འདོད་ཀྱང་སྔ་མ་ལྟར་ལེགས་སོ། །སོར་ཚིགས་ཀྱི་ཁ་དོག་རྣམས་ཚིགས་ཁོ་ནའི་ཐད་དུ། པིར་གྱི་བྲིས་པ་ལྟར་ཕྲ་ཁྱུར་བ་རེ་བྱ། ཁ་ཅིག་ཞབས་སོར་ལ་ཡང་འདི་དག་འདོད་དེ་བརྟག་པར་བྱའོ། །ཕྱག་མཚན་གྱི་སྐབས་རྡོ་རྗེ་དང་དྲིལ་བུ་གཉིས་རིང་ཐུང་སྙོམས་པར་ལྷ་ཉིད་ཀྱི་རང་སོར་བཅུ་གཉིས་པ་བྱ། མེའི་མདའ་ནི་མེའི་རང་བཞིན་ཡང་ཡིན་ལ། གྲངས་ཀྱི་བརྡ་ཚིག་གི་དབང་དུ་བྱས་ནས་གསུམ་དུ་བྱེད། དབྱུག་པ་ནི་རྡོ་རྗེའི་དབྱུག་པ་དཀར་པོ་སྟེ་ཐོད་དབྱུགས་མ་ཡིན་ནོ། ཁ་ཊྭཾ་ག་ཁ་རྒྱས་པ་ནི།
རྩེ་མོའི་རྡོ་རྗེ་རྩེ་ལྔ་རྭ་གདེངས་པའོ། །རིན་པོ་ཆེ་ནི་རིན་པོ་ཆེ་ཟུར་དགུ་པ་སྟེ། རབ་བྱུང་གི་ཤེལ་ལྟར་རྒྱ་གཞོགས་ཀྱི་ཟུར་བརྒྱད་ལ་རྩེ་མོ་རེ་རེ་དང་དབུས་ཀྱི་རྩེ་སྟེ་ དགུའོ། །ཚངས་པའི་མགོ་བོ་པདྨས་སྤྲས་པ་ནི། མེ་ཏོག་པདྨའི་འཕྲེང་བས་སྐྲ་མཚམས་བཅིངས་པ་སྟེ། འགྱུར་འགའ་ལས་ཕྱག་གི་པདྨ་ཚངས་མགོས་སྤྲས་པའི་དོན་དུ་བསྒྱུར་བའང་ཡོད་དེ། ཚངས་པའི་དབུ་ལ་མེ་ཏོག་གི་འཕྲེང་བས་བརྒྱན་པར། འཇིག་རྟེན་གྱི་གྲགས་པ་དང་མཐུན་པས་སྔ་མ་ལྟར་ལེགས་ལ། མེའི་མདའ་ནི་མདའ་དམར་པོ་གསུམ་དང༌། འདིའི་པདྨའི་འཕྲེང་བ་ཆོས་རྗེ་ཀུན་མཁྱེན་ཆེན་པོས་འཁྲུལ་སེལ་དུའང་འབྲི་བར་མཛད་དོ། །སྐུའི་རྒྱན་གྱི་སྐབས་སུ་རྡོ་རྗེའི་རྒྱན་ཞེས་པ་ནི། ཁ་ཅིག་རུས་རྒྱན་རྡོ་རྗེའི་བཟོ་དབྱིབས་སུ་བྱེད་པ་དང༌། དུས་འཁོར་ཕྱག་ཉེར་བཞི་པ་ལའང་ཐོད་སྐམ་གྱི་དབུ་རྒྱན་སོགས་མཛད་པའང་བྱུང་སྣང་སྟེ འདིར་ནི་རྡོ་རྗེའི་རྒྱན་ཞེས་པ་རྒྱུ་རིན་པོ་ཆེ་རྡོ་རྗེ་ཕ་ལམ་ལས་གྲུབ་པ་རྣམ་པའི་སྒོ་ནས་ཀྱང་རྡོ་རྗེའི་གཟུགས་ཅན་གྱིས་མཚན་པ་ཡིན་ནོ། །རིན་པོ་ཆེ་རྡོ་རྗེ་ནི་སྤྱིར་ཁ་དོག་སྣ་ལྔ་ཡོད་ཀྱང་ཕལ་ཆེར་སེར་པོར་གྲགས་པས། རྒྱན་རྣམས་ཀྱང་གསེར་གྱི་ཁ་དོག་ལྟ་བུ་གཙོ་བོར་བྱའོ། །རྒྱན་གྱི་རྡོ་རྗེའི་ཚད་རྣམས་ནི། སྒྲུབ་པ་པོའི་རུས་རྒྱན་ལྟ་བུ་ལ་དགོས་ཀྱི། ལྷ་སྐུའི་རྒྱན་ལ་དེའི་ངེས་བཟུང་མི་དགོས་པར་མངོན། འདིའི་རྡོ་རྗེའི་འཕྲེང་བ་ནི། རྡོ་རྗེ་རྣམས་རྩེ་འཐུད་པའི་དོ་ཤལ་ཡིན་ལ། སྐ་རགས་ཞེས་པ་སྐེ་རགས་ཀྱི་རྒྱན་ལ་དྲ་བ་དྲ་ཕྱེད་དཔྱངས་པའོ། །ཞབས་འོག་གི་འདོད་ལྷ་ནི་ཞི་བ་ཆགས་པའི་ཉམས་ཅན་སྐྲ་ནག་པོ་དར་དང་རིན་པོ་ཆེས་བརྒྱན་པ་ཡིན་ལ། མདའ་ལྔ་ནི་མེ་ཏོག་གི་མདེའུ་ཅན་ཡིན་ཞིང༌། དེ་དག་གི་མཚོན་དོན་ནི། དགའ་བྱེད། སྲེད་བྱེད། རྨོངས་བྱེད།
སྐེམས་བྱེད། འཆིང་བྱེད་ཅེས་བཤད་ལ། དྲག་པོ་ནི་ཞི་མ་ཁྲོ། མིག་གསུམ་མཆེ་བ་ཅན། སྐྲ་ཁམ་སེར་གྱེན་བརྫེས་ལུས་སྦོམ་པ་སྟག་ལྤགས་དང་སྦྲུལ་དང་མི་མགོས་བརྒྱན་པ་སྟེ། དེ་གཉིས་ཞབས་ཀྱིས་མནན་པས་གནད་ལ་གཟིར་བའི་རྣམ་པར་བསྒོམ། ཁ་ཅིག་བཅོམ་ལྡན་འདས་ཀྱི་དབུ་སྐྲ་ལ་རལ་པའི་ཐོར་ཚུགས་དང༌། རལ་པའི་ཅོད་པན་གྱི་དབྱེ་བ་བྱེད་ཅིང༌། ཅོད་པན་ནི་སྣེ་མོ་ཐམས་ཅད་ནང་དུ་བཅུག་པ་ལ་སོགས་པའི་རྣམ་གཞག་བྱེད་ཀྱང་ངེས་པ་ཡོད་པར་མ་མཐོང་ངོ༌། །འདིར་གླང་ལྤགས་དང་སྦྲུལ་རྒྱན་སོགས་བོར་བའི་རྒྱན་དང་མཚོན་ཆ་འགོད་པ་བྱས་ན་ལེགས་སོ། །ཞེས་ཐམས་ཅད་མཁྱེན་པ་ཆེན་པོ་དོལ་པོ་པ་གསུང་སྟེ། རིགས་ལྡན་གྱི་བཀའ་ཡིན་ལ། རྒྱ་བོད་རྙིང་པ་འགའ་ཞིག་ཀྱང་བཞེད་ཅིང༌། བྱིན་རླབས་ཀྱི་འཇུག་སྒོ་ཁྱད་པར་ཅན་འཇུག་པའི་ཕྱིར་སྙིང་གི་ཐིག་ལེར་བཀོད་དེ། ལོང་སྐབས་དང་བསྟུན་ནས་ནན་ཏན་དུ་བསྒྲུབ་པར་ བྱའོ། །རྒྱུད་འགྲེལ་གྱི་དངོས་བསྟན་ལས་འདིའི་ཐད་དུ་གསལ་བར་མ་གསུངས་པས་ཆོག་གྲྭ་སོགས་དང་གཞན་ངོར་མ་བྱས་ཀྱང་འགལ་བ་མེད་དེ། ལུང་རིག་ཤེས་པར་རློམ་པའི་སྔགས་པའི་མིང་ཅན་རྟོག་གེ་ངན་པ་དག་ལ་ནན་ཏན་དུ་གསང་བར་བྱ་ལ། གལ་ཏེ་སྐབས་འདིར་དུས་ཀྱི་འཁོར་ལོ་ཕྱག་ཉེར་དྲུག་པ་སྒོམ་ན་ནི། རྒྱན་དང་མཚོན་ཆ་འགོད་པ་ཡོངས་རྫོགས་བྱེད་པ་མངོན་དུ་གྱུར་ པའོ། །བཅོམ་ལྡན་འདས་མ་སྣ་ཚོགས་ཡུམ་ནི་སྐུའི་རྒྱན་རུས་པའི་ཕྱག་རྒྱ་ལྔ་དང་ལྡན་པ་དང༌། དཀྱུས་ཀྱི་རྣལ་འབྱོར་ཞལ་བཞི་ཕྱག་བརྒྱད་མའི་ཕྱོགས་ལ། དབུ་སྐྲ་ཐོར་ཚུགས་ཕྱེད་པ་དང༌། ཞལ་གཅིག་ཕྱག་གཉིས་པ་ལ་དབུ་སྐྲ་གྲོལ་བའོ། །སྔོན་དུས་བཞེངས་པའི་སྐུ་འདྲ་མང་པོ་ལ་དུས་འཁོར་ཡབ་ཡུམ་ལ་དར་ཤམ་དང༌། ཁ་ཅིག་ལ་ཡུམ་གྱི་ཞབས་གཡས་འཁྱུད་སྟབས་སོགས་ཀྱང་
སྣང་བ། རྒྱ་བོད་ཀྱི་དུས་འཁོར་བ་སྔ་མ་མང་པོའི་བཞེད་པར་འདུག་ཅིང༌། འགལ་བའང་ཆེར་མེད་པ་ལྟར་སྣང་ཡང་རྒྱུད་འགྲེལ་ལས་གསལ་བར་མ་གསུངས་ཤིང་རང་ལུགས་ལ་མི་བཞེད་དོ། །འཁོར་རྗེས་སུ་འབྲང་བའི་ནུས་མ་བརྒྱད་ནི། ཁ་ཅིག་གོང་གི་མངོན་བྱང་ལྔ་ལས་གཙོ་བོ་དང་ལྷན་ཅིག་བསྐྱེད་པར་འདོད་ཀྱང༌། འདི་རྣམས་ཀྱི་ས་བོན་དང༌། ཕྱག་མཚན་གྱི་བསྐྱེད་ཆོག་གསལ་པོར་གསུངས་པས། རྒྱལ་མཆོག་གཉིས་ཀར་དུ་ནུས་མ་བརྒྱད་ས་བོན་ཕྱག་མཚན་ལས་མི་བསྐྱེད་ན། སྒྲུབ་ཐབས་ལེའུར། ས་བོན་ཕྱག་མཚན་གསུངས་པ་དགོས་མེད་དུ་ཐལ་བར་འགྱུར་ཏེ། མདུན་བསྐྱེད་ཀྱི་སྐབས་སུ་དགོས་པས་སོ་ཟེར་བ་སྲིད་ཀྱང་དེ་ནི་དབང་ལེའི་ལྷ་མཚན་འགོད་པའི་སྐབས་སུ་གསལ་བར་གསུངས་པའི་ཕྱིར། ཟློས་ཏེ་གསུངས་པ་ལ་དགོས་པ་མེད་པས་སོ། ཁ་ཅིག་ནུས་མ་མངལ་འབྱིན་དུ་བྱེད་པ་ནི། སྔོན་ལ་འདི་རྣམས་ཀྱི་བསྐྱེད་ཆོག་གསུངས་པའི་རྗེས་སུ། གོ་རིམ་ངེས་པ་ཅན་གྱི་ཚིག་གིས་མངལ་འབྱིན་གསུངས་པ་ཁོ་ནས་ཁེགས་སོ། །ཤེས་རིན་པ་ནི་འདི་སྐད་ཅེས། འདི་དག་གཙོ་བོ་ཡབ་ཡུམ་དང་ལྷན་ཅིག་ཏུ་བསྐྱེད་དགོས་ཏེ། མངོན་བྱང་དང་མངལ་འབྱིན་གཉིས་ཀ་ལ་མི་ཐེ་ན། མགྲོན་བཙུན་བཞིན་དུ་འགྱུར་རོ་ཞེས་ཟེར་བ་ནི། འགྱུར་བའི་རྒྱུ་མཚན་ཡང་ཅི། སོང་ཡང་ཉེས་པ་གང༌། སྒྱུ་འཕྲུལ་དྲྭ་བ་དང་སངས་རྒྱས་མཉམ་སྦྱོར་དང༌། ཟླ་གསང་ཐིག་ལེ་ལ་སོགས་པ་ན། འཁོར་བསྐྱེད་ཚུལ་ཇི་ལྟར་ཡོད་ལྟ་དགོས་ལ། འདིའི་མངལ་འབྱིན་ཡང་མངོན་བྱང་དུ་བསྡུ་བ་མ་གོ་བའི་བབ་ཆོལ་ཡིན་ཞིང༌། ཡང་བདེ་མཆོག་གི་སྙིང་པོའི་རྣལ་འབྱོར་མ་བཞི་དང་འདྲ་བའི་ཕྱིར་ཟེར་ཏེ། ནག་པོ་སྤྱོད་པ་སོགས་མང་པོས་སྙིང་པོའི་རྣལ་འབྱོར་མ་རྣམས་མཁའ་སྦྱོར་མཛད་ཡོད་པས་ཤིན་ཏུ་མ་ངེས་ལ། ཡང་ཕྱི་ལ་གཟའ་གཞན་རྣམས་ཉི་ཟླ་དང༌། དེ་སྒྲ་གཅན་དུ་འདུས།
ནང་དུ་རླུང་བཅུ་སྲོག་ཐུར་དུ་འདུས། གཞན་ཕར་ཕྱིན་བཅུ་ཡེ་ཤེས་དང་ཤེས་རབ་ཏུ་འདུས། ནུས་མ་བརྒྱད་པོ་སྣ་ཚོགས་ཡུམ་དང་དབྱིངས་ཕྱུག་མར་འདུས་པའི་ཕྱིར་ཟེར་བ་ཡང་ཕྱི་ནང་སྦྱོར་ཚུལ་མ་འགྲིག་ཅིང༌། དེ་དེར་འདུས་ཀྱང་དུས་གཅིག་ཏུ་བསྐྱེད་དགོས་པའི་རྒྱུ་མཚན་མེད་ལ། སྣ་ཚོགས་ཡུམ་དང་དབྱིངས་ཕྱུག་མའི་མཚན་དོན་སྦྱར་བ་དངོས་དེ་ནུས་མ་བཅུ་ལ་བགྲངས་པས་ནོར་རོ། །གལ་ཏེ་ནོར་ཡང་མི་ཏོ་སྟེ་བགྲོང་ངོ་ན་སྐབས་འདིར་དབྱིངས་ཕྱུག་མ་བསྐྱེད་དགོས་པར་ཐལ་བར་འགྱུར་རོ། །སྣ་ཚོགས་ཡུམ་ལ་ནུས་མ་རྣམས་འདུས་པའི་རྒྱུ་མཚན་བཀོད་ན། ནུས་མ་བརྒྱད་སྒོམ་མི་དགོས་པའི་རྒྱུ་མཚན་དུ་དངོས་འགྲོ་ཉེན་ཆེ་ཡི། མངོན་བྱང་ལྔ་ལས་ནུས་མ་བརྒྱད་བསྐྱེད་དགོས་པའི་རྒྱུ་མཚན་དུ་ཡེ་མི་འགྲོའོ། །ནུས་མ་བཅུ་དངོས་སུ་བགྲོང་པ་ན། མཆོག་གི་ཆ་མ་དང༌། ཐིག་ལེ་མ་བགྲོང༌། དེ་ཉིད་ཤེར་ཕྱིན་མ་དང༌། དབྱིངས་ཕྱུག་མའི་ངོ་བོ་ཡིན། ཞེས་སམ། དེ་གཉིས་སྣ་ཚོགས་ཡུམ་དུ་འདུས་ཞེས་ཟེར་ན་ལེགས་ཀྱི། དུས་འཁོར་པ་རྒན་པོས་ནུས་མ་བཅུ་བགྲོང་མ་ཤེས་ན་རྟ་གད་ཆེན་པོ་འབྱུང་ ངོ༌། །དེ་ཡང་ནུས་མ་བཅུ་ནི་རྟགས་བཅུའི་མིང་དང་ལྡན་པ་ཡིན་ལ། རྟགས་བཅུའི་ཐ་མ་གཉིས་ལ་མཆོག་གི་ཆ་དང་ཐིག་ལེ་ཟེར་གྱི་སྣ་ཚོགས་པའི་རྟགས་དང་རྡོ་རྗེ་དབྱིངས་ཀྱི་རྟགས་མི་ཟེར་རོ། །ཡང་ལས་རྒྱལ་མཆོག་ཏུ་ཡང་ནུས་མ་བརྒྱད་གཙོ་བོ་དང་ལྷན་ཅིག་བསྐྱེད་པའི་ཕྱིར་ཟེར་བ་ནི། ཧཱུཾ་དང་རྡོ་རྗེ་ལས་བསྐྱེད་པའི་ཕྱིར་ཟེར་བ་ཡིན་ན་ནི། དེ་ནི་ཁུངས་མེད་ཅིང་ཁོ་བོ་ཅག་མི་འདོད་པས་སྒྲུབ་བྱེད་བསྒྲུབ་བྱ་དང་མཚུངས་ལ། ས་བོན་ཕྱག་མཚན་ལས་བསྐྱེད་པར་མཚུངས་ཟེར་ན་ནི། དེ་ཡང་མ་བཤད་ཅིང་ཁོ་བོ་ཅག་མི་འདོད་དོ། །དུས་དེར་སྐད་ཅིག་གིས་བསྐྱེད་པས་སོ་ཟེར་ན་ནི། དཀྱིལ་འཁོར་རྒྱལ་མཆོག་ཏུ་མངོན་
བྱང་ལས་བསྐྱེད་དགོས་པའི་རྒྱུ་མཚན་ལས་རྒྱལ་མཆོག་ཏུ་སྐད་ཅིག་གིས་བསྐྱེད་པའི་ཕྱིར་ཟེར་བར་འདུག་པས་རིག་པ་ཤེས་པ་ཡང་འདི་འདྲ་ན། མི་ཤེས་པ་དེ་ཅི་འདྲ་ཞེས་ བྱའོ། །དེ་ལ་ནུས་མ་རྣམས་ནི་རྒྱན་དང་ཉམས་སོགས་སྣ་ཚོགས་ཡུམ་དང་འདྲ་ལ། ཕྱག་མཚན་གྱི་སྐབས་ཙནྡན་ནི་ཙནྡན་གྱི་ལྡེ་གུས་གང་བའི་སྣོད་དང༌། ཡོངས་འདུའི་མེ་ཏོག་ནི་ལྷའི་ཤིང་གི་ཡལ་ག་མེ་ཏོག་དཀར་པོ་དང་བཅས་པ་དང༌། དཀར་མོའི་ཕྱག་གི་སྨན་མཆོག་ནི། སྨན་གྱི་མཆོག་སྣ་ཚོགས་ཀྱིས་གང་བའི་སྣོད་ཡིན་ལ། གྲུབ་པའི་བཅུད་ལེན་ནི་འཆི་བ་མེད་པ་སྟེར་བའི་གྲུབ་པའི་དངུལ་ ཆུའོ། །བདུད་རྩིའི་འབྲས་བུ་ནི། ཨ་མྲའི་ཤིང་གི་འབྲས་བུ་ཡིན་ཞེས་རྒྱ་གར་བ་ཀུན་ཏུ་གྲགས་ལ། བོད་དག་ཨ་རུ་ར་ཡིན་ཟེར་ཏེ་མ་ཡིན་ནོ། །རྔ་ནི་རྔ་ཟླུམ་མམ་རྫ་རྔའོ། །གཙོ་བོའི་གནས་ཀྱི་ས་གཞི་གྲུ་བཞི་ལ་སྟེང་དུ་པདྨས་ཟླུམ་པོར་བསྐོར་བའི་མཚམས་སུ་གྲུ་ཆད་དོན་པ་ལ་དབང་ལྡན་དུ་ཆོས་ཀྱི་དུང་སོགས་འགོད་དེ། དེ་རྣམས་ཨོཾ་ཨཱཿཧཱུཾ་ཧོཿལས་བསྐྱེད་པ་དང༌། ཁ་དོག་དཀར་དམར་ནག་སེར་དུ་བྱེད་པ་ནི། འདི་རྣམས་སྐུ་གསུང་ཐུགས་ཡེ་ཤེས་རྡོ་རྗེ་བཞི་པོའི་ངོ་བོ་ཉིད་ཀྱི་ཕྱིར་ རོ། །དེ་ལྟར་ན་གཙོ་བོ་ཡབ་ཡུམ་ནུས་མ་རྡོ་རྗེ་བཞི་དང་བཅས་པ་བསྐྱེད་པ་ནི། གཙོ་བོའི་གདན་གྱི་པདྨ་ལ་བཞུགས་པའི་ལྷ་རྗེས་འབྲང་དང་བཅས་པ་བསྐྱེད་པ་ཡིན་ཏེ། ནུས་མ་བརྒྱད་པོ་ཡང་གཙོ་བོའི་པད་གདན་ལ་གནས་པ་གཙོ་བོ་ཉིད་ཀྱི་ཡུམ་ཡིན་ལ། རྡོ་རྗེ་བཞི་གཙོ་བོའི་པད་གདན་ལ་མེད་ཀྱང་གཙོ་བོའི་ས་གཞི་ལ་གནས་ཤིང༌། དོན་གྱིས་གཙོ་བོ་ཉིད་ཀྱི་རྣམ་འགྱུར་ཡིན་པ་དཀྱིལ་འཁོར་གཞན་འགའ་ལས་ཧེ་རུ་ཀ་རིགས་བཞི་འབྱུང་བ་སོགས་དང་མཚུངས་སོ། །འགྲེལ་ཆེན་ལས། རང་གི་ཕྱག་རྒྱ་
དང་བཅས་པ་སྟེ། རྡོ་རྗེ་སེམས་དཔའ་རྫོགས་པའོ། །ཞེས་འབྱུང་བས། དཀྱིལ་འཁོར་རྒྱལ་མཆོག་གི་གཙོ་བོ་ནི་རྡོ་རྗེ་སེམས་དཔའ་ཡིན་ལ། སྣ་ཚོགས་ཡུམ་ཡང་ཤེས་རབ་ཀྱི་ཕ་རོལ་ཏུ་ཕྱིན་མ་ཡིན་ཞིང༌། དེ་ལྟར་ལྔའི་བདག་ཉིད་བཅོམ་ལྡན་འདས་དུས་ཀྱི་འཁོར་ལོ་རྡོ་རྗེ་སེམས་དཔའི་དབུ་རྒྱན་ཅན་ཞེས་ཀྱང་གསུངས་པས། གཙོ་བོ་ཡབ་ཡུམ་རྡོར་སེམས་ཡབ་ཡུམ་གྱི་ངོ་བོ་ལ་རྡོ་རྗེ་སེམས་དཔའི་དབུ་རྒྱན་ཅན་དུ་གསུངས་པ་དང༌། ལས་རྒྱལ་མཆོག་གི་རོ་མཉམ་སྐབས་སུ་རྣམ་པར་ཤེས་པ་ནི་ནམ་མཁའ་དང་བཅས་ཞེས་པ་དང༌། རྡོར་དབྱིངས་ཀྱི་དབང་ཕྱུག་མ་དང་ལྷན་ཅིག་ཏུ་སྙིང་པོའི་པདྨར་བདེ་བ་ཆེན་པོ་ལ་ཞཻས་གཙོ་བོ་ནི་རྣམ་ཤེས་ཀྱི་ཁམས་དག་པའི་མི་བསྐྱོད་པ་དང༌། སྣ་ཚོགས་ཡུམ་ནམ་མཁའ་དག་པའི་རྡོར་དབྱིངས་དབང་ཕྱུག་མའི་ངོ་བོར་གསུངས་ཤིང༌། ཡང་འདི་སྐད་དུ། རྡོ་རྗེའི་རྒྱན་དང་ལྡན་ཞིང་རྒྱལ་བའི་བདག་པོའི་ཅོད་པན་ཞེས་པ་མི་བསྐྱོད་པའི་ཅོད་པན་ནོ། །ཞེས་གཙོ་བོ་ཡབ་ཡུམ། མི་བསྐྱོད་པ་ཡབ་ཡུམ་གྱི་ངོ་བོ་ལ་མི་བསྐྱོད་པའི་ཅོད་པན་གསལ་བར་གསུངས་སོ། །མཁས་པ་གང་དག་དཀྱིལ་འཁོར་རྒྱལ་མཆོག་གི་གཙོ་བོ་རྒྱུ་རྡོ་རྗེ་འཛིན་པ་མི་བསྐྱོད་པའི་ངོ་བོ་དང༌། ལས་རྒྱལ་མཆོག་གི་གཙོ་བོ་འབྲས་བུ་རྡོ་རྗེ་འཛིན་པ་རྡོ་རྗེ་སེམས་དཔའི་ངོ་བོ་ཡིན་གསུང་པ་དེ་ལེགས་ལེགས་འདྲ་ཡང་འགྲེལ་པའི་ཚིག་དེས་དངོས་སུ་བཀག་ལ། ཡབ་ཡུམ་ཡེ་ཤེས་ཀྱི་རིགས་ཕན་ཚུན་འཁྱུད་པ་དང༌། རྣམ་ཤེས་ཀྱི་རིགས་ཕན་ཚུན་འཁྱུད་པ་གཉིས་ཀ་འབྱུང་སྟེ། སྒྲུབ་ལེ་རེ་བཞི་པའི་འགྲེལ་པར། མཆོག་གི་རྒྱལ་བའི་བདག་པོའི་ཡེ་ཤེས་ཀྱི་ཕུང་པོ་དང༌། སྣ་ཚོགས་ཡུམ་ཡེ་ཤེས་ཀྱི་ཁམས་ནི་ཕན་ཚུན་ལུས་དང་བསམ་པའོ། །རྣམ་པར་ཤེས་པ་དང་ནམ་མཁའི་ཁམས་སོ། །ཞེས་གསུངས་
པའི་ཕྱིར་རོ། །ཡང་མཁས་པ་དེ་དག་ནི་རྒྱུ་འབྲས་རྡོ་རྗེ་འཛིན་པ་གཉིས་པོ་འདིའི་ཅོད་པན་གྱི་ལྷ་ཡང་རྒྱས་བཏབ་ཀྱི་ལྷ་ཡིན་པར་འདོད་ཅིང༌། དེ་ཡང་རིགས་མི་མཐུན་གྱི་རྒྱས་བཏབ་ཡིན་གྱི། རིགས་མཐུན་གྱི་རྒྱས་བཏབ་རྒྱུད་འདིར་བཀག་པ་ཡིན་ནོ་ཟེར་ཞིང༌། དེའི་ཕྱིར་རྒྱུ་མི་བསྐྱོད་པ་དང་འབྲས་བུ་རྡོར་སེམས་སུ་གྲུབ་བོ་སྙམ་ན། སྐབས་འདིའི་དབུ་རྒྱན་ནི་རང་ཉིད་རིགས་གང་ཡིན་པའི་རིགས་ཀྱི་ངོ་བོ་མཚོན་བྱེད་ཡིན་གྱི། རྒྱས་བཏབ་ནི་མ་ཡིན་ཏེ། རྒྱུད་འདིར་གཙོ་བོ་ཡབ་ཡུམ་ལྔ་གཞན་ཐམས་ཅད་ལ་རྒྱས་འདེབས་བྱེད་དུ་ངོ་བོ་ཉིད་ཀྱིས་གྲུབ་པ་ཡིན་པས། ལྷ་གཞན་གྱིས་གཙོ་བོ་ཡབ་ཡུམ་ལ་ཚུར་རྒྱས་གདབ་པ་མི་རུང་སྟེ། འགྲེལ་ཆེན་ལས། ངོ་བོ་ཉིད་ཀྱི་རིགས་ལ་ནི་རིགས་ལྔས་རྒྱས་བཏབ་པ་བཀག་སྟེ། སངས་རྒྱས་རྣམས་ཀྱིས་སྐྱེད་པར་བྱེད་པ་ཡིན་པའི་ཕྱིར་རོ། །ཞེས་གསུངས་པ། དེ་བས་ན་རིགས་ཅན་ལ་རིགས་ཀྱི་རྒྱས་འདེབས་པ་རུང་ཡང༌། རིགས་ཁོ་ན་ཡིན་གྱི་རིགས་ཅན་མ་ཡིན་པ་ལ་རྒྱས་འདེབས་བྱེད་པ་པོ་གཞན་མེད་ལ། གཙོ་བོ་ཡབ་ཡུམ་ནི་རིགས་ཁོ་ན་ཡིན་གྱི། རིགས་ཅན་མ་ཡིན་པའི་ཕྱིར་རོ། །དུས་ཀྱི་འཁོར་ལོ་ཡབ་ཡུམ་ནི་མི་བསྐྱོད་པའམ། རྡོར་སེམས་ཀྱི་ཚུལ་གང་སྟོན་ཡང་རུང་རྒྱས་བཏབ་མི་དགོས་མོད་ཀྱི། རྒྱལ་བ་རིགས་ལྔ་ལ་ཡང་རང་རིགས་ཀྱིས་རྒྱས་བཏབ་རུང་བའི་སྐབས་ཤིག་ཀྱང་རྒྱུད་འདིར་གཏན་ནས་མེད་པ་ནི་མ་ཡིན་ནོ། །དེ་ཡང་ཅི་སྙམ་ན་རིགས་བྱེ་བྲག་པའམ་ཉེ་ཚེ་བའི་རྒྱལ་བ་རྣམས་ལ་ནི་རང་རིགས་ཀྱིས་རྒྱས་བཏབ་བཀག་སྟེ། རྒྱས་བཏབ་ཀྱི་གཙོ་བོ་ནི་དབུ་རྒྱན་དུ་འགོད་པའི་ལྷ་ཡིན་ལ། སྤྱིར་ལྷ་གང་ལ་ཡབ་ཡུམ་ཕན་ཚུན་སྦྱོར་བ་ཡང་ཕྱག་རྒྱས་རྒྱས་བཏབ་པའི་ཁོངས་སུ་གཏོགས་སོ། ཁྱབ་བྱེད་ཀྱི་རིགས་ལ་
ནི་རྒྱས་བཏབ་མི་བྱེད་མོད། བྱས་ན་སུས་རྒྱས་བཏབ་ཀྱང་གཞན་རིགས་སུ་མི་འགྱུར་ཞིང་རང་རིགས་ཉིད་དེ་ཀུན་ཁྱབ་ཡིན་པའི་ཕྱིར་རོ། །རང་རིགས་མཉམ་པོ་ལ་ཁ་དོག་དང་མཚན་མི་འདྲ་བ་འཚོལ་མི་དགོས་ཏེ། ཁ་དོག་གཅིག་པ་དང་མཚན་གཅིག་པ་ཉིད་ཀྱིས་རྒྱས་འདེབས་སོ། །དེས་ན་དུས་འཁོར་རྒྱུ་རྡོ་རྗེ་འཛིན་པ་ཡབ་ཡུམ་ལ་ཡེ་ཤེས་ཀྱི་ཕུང་པོ་དང་ཡེ་ཤེས་ཁམས་ཀྱི་དག་སྦྱོར་དང༌། འབྲས་བུ་རྡོ་རྗེ་འཛིན་པ་ཡབ་ཡུམ་ལ་རྣམ་ཤེས་དང་ནམ་མཁའི་དག་སྦྱོར་ལྟ་བུར་གསུངས་པ་ནི། རིགས་ཀྱི་རྩ་བ་ཡེ་ཤེས་རྣམ་ཤེས་སོ་སོར་མཐུན་པའི་དབང་དུ་བྱས་པའམ། རྡོར་སེམས་ལ་ཡེ་ཤེས་དང༌། མི་བསྐྱོད་པ་ལ་རྣམ་ཤེས་ཀྱི་བརྡར་བཏགས་པའི་བརྡ་ཆད་ཀྱི་དབང་དུ་བྱས་པ་ཡིན་གྱི། དོན་ལ་དེ་གཉིས་ནི་ཉེ་ཚེ་བའི་ཡེ་ཤེས་རྣམ་ཤེས་མ་ཡིན་གྱི། ཕུང་ཁམས་སོ་དྲུག་ཐམས་ཅད་ལ་ཉེ་རིང་མེད་པའི་དག་པ་ཅན་ཡིན་ནོ། །ཕྱིའི་དཀྱིལ་འཁོར་ལ་འགོད་བྱའི་འཁོར་རྡོ་རྗེ་སེམས་དཔའ་ཡིན་ན། ཡེ་ཤེས་ཀྱི་ཕུང་ཁམས་ཁོ་ན་དང༌། འཁོར་མི་བསྐྱོད་པ་ཡིན་ན། རྣམ་ཤེས་ནམ་མཁའ་ཁོ་ནའི་དག་པ་ཅན་ཡིན་པས། དེ་འདྲ་ནི་རིགས་བྱེ་བྲག་པའི་རྡོར་སེམས་དང་མི་བསྐྱོད་པ་ཡིན་ཏེ། འདི་ལྟ་བུ་པདྨ་གདན་ཅན་གྱི་ལྷའི་སྐབས་སུ་ནི་ངེས་པར་དགོས་ སོ། །དེ་ཡང་ཅི་ལྟ་བུ་ཞེ་ན། དེར་མ་ཟད་ད་ལྟ་གསུང་དབང་གི་དཀྱིལ་འཁོར་ལ་བུམ་པ་བཅུ་བཀོད་པ་ཡིན་ཡང་པདྨ་གདན་ཅན་ནམ་དཔལ་ལྡན་རྒྱུ་སྐར་ལ་ནི། ལྷ་སྐུར་དངོས་སུ་བཞེད་དགོས་པ་ཡིན་ཞིང༌། དེ་དག་ཀྱང་ནུས་མ་བཅུའི་ཐབས་སུ་འགྱུར་བས། དཔལ་དུས་ཀྱི་འཁོར་ལོ་ཉིད་ཀྱི་སྐུའི་རྣམ་འགྱུར་མི་འདྲ་བ་བཅུ་ཡིན་ལ། འོན་ཀྱང་སྐུ་མདོག་ཐ་དད་པ་དང་ཞལ་བཞི་ཕྱག་བརྒྱད་པ་ལ་སོགས་པའི་རྣམ་པར་
བྱ་ཞིང༌། ཕྱག་མཚན་ནི་དུས་འཁོར་ཕྱག་བརྒྱད་པ་དང་འདྲ་བར་རུང་ངམ་སྙམ་མོ། །དེ་ཡང་སྙིང་གའི་རྩ་བཅུ་རྣམ་པར་དག་པ་ནུས་མ་བཅུ་དང༌། རྩ་དེ་ལ་སྤྱོད་པའི་རླུང་དང་ཁམས་བདུད་རྩི་འདྲེས་པ་རྣམ་པར་དག་པ་ནི་ཡབ་བཅུར་འགྱུར་ཞིང༌། འདི་ལ་ནི་གཙོ་མོ་སྣ་ཚོགས་ཡུམ་ལས་ལོགས་སུ་མཆོག་གི་ཆ་མ་དང་ཐིག་ལེ་མ་བསྒོམ་དགོས་པ་ཡིན་པས། དེ་དག་ཀྱང་སྟེང་འོག་ཏུ་འགོད་ལ། འོན་ཀྱང་ཡབ་རྣམས་ཀྱི་མཚན་དང་ཕྱག་མཚན་ནི། བསྡུས་པའི་རྒྱུད་འགྲེལ་པ་དང་བཅས་པར་གསལ་བར་མ་གསུངས་ལ། རྩ་བའི་རྒྱུད་དེང་སང་སྤྱོད་ཡུལ་དུ་མ་གྱུར་པས་འདི་ལྟ་བུ་ཞེས་ཁ་ཚོན་གཅོད་པར་དཀའོ། །མི་བསྐྱོད་པ་དང་རྡོ་རྗེ་སེམས་དཔའ་དག་ཀྱང་གཙོ་བོའི་བཞུགས་གནས་ཀྱི་སྟེང་དང་འོག་ཏུ་འགོད་པར་བྱ་བ་ཡིན་ཞིང༌། པདྨའི་གདན་ཅན་གྱི་དཀྱིལ་འཁོར་ལ་གསུང་དབང་གི་སྐབས་ཀྱི་བུམ་པ་བཅུའི་རང་བཞིན་ལྷ་བཅུར་བཞེངས་ཀྱང་དག་པ་གཞན་ལ་བལྟོས་ནས་བདེ་གཤེགས་འཕར་མའི་བར་གྱི་རེ་མིག་རྣམས་སུ་བུམ་པའམ་ཐོད་པ་ལྷག་པོར་འགོད་ནི་དགོས་སོ། །འོ་ན་པདྨ་གདན་ཅན་ལ་སངས་རྒྱས་ཡབ་ལྔ་ཡུམ་ལྔར་བཤད་པས་རིགས་དྲུག་ཇི་ལྟར་འབྱུང་སྙམ་ན། དུས་འཁོར་ཉིད་རྡོར་སེམས་སུ་བཞེངས་པའི་ཚེ། མི་བསྐྱོད་པ་འཁོར་ཡིན་པས་སྟེང་དང༌། མི་བསྐྱོད་པར་བཞེངས་པའི་ཚེ་རྡོར་སེམས་འཁོར་ཡིན་པས་འོག་ཏུ་འགོད་དེ། དུས་མཉམ་དུ་འཁོར་སངས་རྒྱས་ལྔ་རེ་ཁོ་ན་འབྱུང་བ་ལ་དགོངས་སོ། །ཡང་ནམ་མཁའ་ཡེ་ཤེས་གཉིས་ལ་ཁྱབ་བྱེད་ཀྱི་རིགས་ཡིན་པས་ཁྱབ་སྟེ། ཁྱབ་བྱ་འབྱུང་བ་བཞི་ལ་ཁྱབ་པའི་ཕྱིར་རོ་སྙམ་ན། ཁྱབ་ཚུལ་ལ་ཡིན་པས་ཁྱབ་པ་དང༌། ཡོད་པས་ཁྱབ་པ་གཉིས་ཡོད་དེ། དེ་གཉིས་པོ་གཞན་བཞི་པོ་ལ་ཁྱབ་པ་ནི། ལྷན་ཅིག་ཏུ་འདྲེས་
པའི་ཚུལ་ཏེ་ཐ་དད་པའི་ཚུལ་ཅན་ཡོད་པའི་ཁྱབ་བྱེད་ཡིན་ལ། བཞི་པོ་ནམ་མཁའ་དང་ཡེ་ཤེས་མ་ཡིན་པས་ཡིན་པའི་ཁྱབ་བྱེད་དུ་མི་འགྱུར་ཞིང༌། འདི་ནི་ཁྱབ་བྱེད་ཀྱི་མིང་ཅན་ཉེ་ཚེ་བར་གཏོགས་པ་ཡིན་ནོ། །ཆོས་ཉིད་རིགས་མེད་པ་ནི་ཕུང་ཁམས་སོ་དྲུག་པོ་ཐམས་ཅད་ཀྱི་ཆོས་ཉིད་ཡིན་ལ། ཐམས་ཅད་ཀྱི་ཆོས་ཉིད་ཀྱང་དེ་ཁོ་ན་ཡིན་པ་དང༌། ཕུང་ཁམས་སུ་སྣང་བ་གཞན་རྣམས་དང༌། རྣམ་ཤེས་རང་ཉིད་ཀྱང་རྣམ་ཤེས་ཉིད་ཁོ་ནའི་རྫས་ལས་གཞན་དུ་མེད་ཅིང༌། ཡེ་ཤེས་ལས་གཞན་དུ་རྣམ་ཤེས་ཀྱང་མེད་པས། དེ་མཚོན་བྱེད་དུ་ལྷ་གཞན་ཐམས་ཅད་ཀྱང་གཅོ་བོ་ཉིད་ཀྱི་རྣམ་འཕྲུལ་ཡིན་ཞིང༌། གཙོ་བོ་ཉིད་ཐམས་ཅད་དུ་སྣང་བའི་ཡིན་པས་ཁྱབ་པའི་ཁྱབ་བྱེད་འདི་ནི་ཁྱབ་བྱེད་དངོས་ཡིན་ནོ། །དེས་ན་རྡོ་རྗེ་སེམས་དཔའ་ལྷ་སུམ་ཅུ་རྩ་བདུན་ལ་ཡང་ཁྱབ་བྱེད་རྡོར་སེམས་དང་ཁྱབ་བྱ་རྡོ་རྗེ་སེམས་དཔའ་འབྱུང་བའི་གནད་དེ་ཡིན་ལ། དེས་ན་ཕལ་ཆེར་དུས་འཁོར་ལུགས་ལ་རིགས་ལྔ་ལ་རིགས་མི་མཐུན་གྱི་རྒྱས་བཏབ་དང༌། ལྷ་གང་ལ་ཡང་རིགས་མི་མཐུན་གྱི་ཕྱག་རྒྱའི་འཁྱུད་ཚུལ་ཁོ་ན་ཡིན་པའི་ཐག་ཆོད་བྱེད་པ་དང༌། ལ་ལ་དག་རྒྱུ་མཚན་མི་སྨྲ་བར་སྤྱིར་བཏང་དམིགས་བསལ་ཡིན་ནོ་ཞེས་ཟོལ་འཇོག་བྱེད་པ་དང༌། གཞན་དག་གཉིས་ཀར་ལ་ཐེ་ཚོམ་བཞིན་དུ་གཉིས་ཀ་འགོག་པ་ལྟར་བྱས་ནས། རང་ལུགས་མི་འཇོག་པ་སོགས་དང༌། དུས་འཁོར་དུ་རང་རིགས་གཞན་རིགས་སུ་གསུངས་པ་ཐམས་ཅད་ས་ཆུ་མེ་རླུང་ནམ་མཁའ་ཡེ་ཤེས་དྲུག་པོའི་དབྱེ་བས་བརྩི་པ་ཁོ་ན་ཡིན་པ་ལ། ཆོས་གྲགས་པ་ནི་བདེ་བ་བསྐྱེད་པའི་དོན་དུ་གཞན་རིགས་ཁོ་ན་དགོས་སོ་སྙམ་པ་བློ་ལ་བཞག་ཅིང༌། འདིར་ཡེ་ཤེས་ཀྱི་ཕུང་ཁམས་དང་ནམ་མཁའ་རྣམ་ཤེས་སྦྱར་བ་གསལ་བར་གསུངས་
པས་གཏམ་གྱིས་འཕོངས་ཏེ། ཡེ་ཤེས་སུ་མཉམ་ཡང་ཕུང་པོ་དང་ཁམས་ཀྱི་རིགས་ཐ་དད་དུ་བྱུང་བས་གཞན་རིགས་སོ་ཞེས་ཅི་ཏོལ་སྨྲས་ནས། གཞན་ལ་མེད་པའི་ལེགས་བཤད་ཡིན་ནོ་ཞེས་སྒྲོག་ཅིང༌། དགག་སྒྲུབ་ཟིང་ཟིང་པོ་བ་དུ་མ་བྱེད་དོ། །ཕུང་པོ་དང་ཁམས་རིགས་གཞན་དུ་རྩི་བ་ནི། དུས་འཁོར་བ་ལ་སྔོན་མེད་ཀྱི་གཏམ་དུ་སྣང་ལ། དེའི་ཚེ་དབང་ཡུལ་རིགས་གཞན་དང༌། ལས་དང་བྱ་བ་ཡང་རིགས་གཞན་དུ་འགྱུར་ རོ། །དེས་ན་ཡབ་དོན་ཡོད་གྲུབ་པ་ལྟ་བུ་ཞིག་ལ་ཡུམ་སྒྲོལ་མས་འཁྱུད་ཀྱང༌། ཕུང་ཁམས་ཀྱི་རིགས་ཐ་དད་པའི་ཕྱིར་གཞན་རིགས་སུ་འགྱུར་བས། ལྷ་མོ་གཞན་རྣམས་ཀྱིས་འཁྱུད་པ་ལ་ལྟ་སྨོས་ཀྱང་ཅི་དགོས་ཏེ། མཐར་རང་རིགས་ཀྱི་ཕྱག་རྒྱ་མི་སྲིད་པར་འགྱུར་རོ། །ད་ནི་མང་དུ་སྨྲས་པས་ཅི་ཞིག་བྱ་སྟེ། དེ་ལྟར་རྒྱུ་རྡོར་འཛིན་གྱི་སྐབས་སུ། ཡབ་མི་བསྐྱོད་པ་ལ་ཡུམ་ཤེས་ཕྱིན་མའི་ངོ་བོ་དང༌། འབྲས་བུ་རྡོར་འཛིན་གྱི་སྐབས་སུ། ཡབ་རྡོར་སེམས་ལ་ཡུམ་དབྱིངས་ཕྱུག་མས་འཁྱུད་ཟེར་བ་སོགས་ཀྱང་རང་གང་སྨྲས་པར་ཟད་དེ་ལུང་དང་དངོས་སུ་འགལ་བའི་ཕྱིར་རོ། །ད་ནི་དཀྱུས་ལ་འཇུག་སྟེ། གཙོ་བོ་ཡབ་ཡུམ་དུ་མ་ཟད་ནུས་མ་བརྒྱད་པོ་རྣམས་ཀྱང་རྡོར་སེམས་ཀྱི་དབུ་རྒྱན་ཅན་རྡོར་སེམས་ཀྱི་རིགས་ཀྱི་ཡུམ་ཡིན་ལ། ནུས་མ་མཆོག་གི་ཆ་མ་དང༌། ཐིག་ལེ་མ་ནི་རིམ་བཞིན་ཡེ་ཤེས་དང་ཤེས་རབ་ཀྱི་ཕར་ཕྱིན་ཡིན་པ་བཅོམ་ལྡན་འདས་མ་སྣ་ཚོགས་ཡུམ་ཉིད་ལ་འདུས་པས། དེ་ནི་རྣམ་གྲངས་ཀྱིས་ན་གསུམ་འདུས་པའི་རང་བཞིན་ནོ། །ནུས་མ་བརྒྱད་པོ་འདི་རྣམས་པདྨ་གདན་ཅན་གྱི་སྐབས། གཙོ་བོའི་པདྨ་ལས་གཞན་པདྨ་དམར་པོ་དང་ཟླ་བའི་གདན་རེ་རེ་ལ་བཞུགས་པ་ཡིན་ལ། འོད་ཟེར་འཕྲེང་བ་ལས་ཀྱང་དེ་བཞིན་དུ་གསུངས་
མོད། དཀྱུས་སུ་བྱེད་པ་གསུང་དབང་གི་དཀྱིལ་འཁོར་ལ་གཙོ་བོའི་པད་འདབ་ཉིད་ལ་འགོད་པ་ཡིན་ཞིང༌། གཙོ་བོའི་པད་འདབ་ཀྱི་སྟེང་དུ་པདྨ་གཞན་བྱེད་པ་ནི་མཚན་བརྗོད་མངོན་རྟོགས་སོགས་ན་ཡོད་ཀྱང་ཤིན་ཏུ་མི་ལེགས་སོ།། །།གཉིས་པ་འཁོར་ལོ་རྣམ་བཞིའི་ལྷ་ཚོགས་སྤྲུལ་པ་ལ། སྔོན་འགྲོ་རྗེས་ཆགས་ཀྱི་མཛད་པ་དང༌། དངོས་གཞི་ལྷ་ཚོགས་ཉིད་བསྐྱེད་པའོ། །དང་པོ་ནི། འདོད་ཆགས་ཆེན་པོར་གདུལ་བར་བྱ་བའི་སེམས་ཅན་རྣམས་ཞེས་པ་ནས། དེ་ལས་ཀྱང་སླར་ལྡོག་ནས་རང་ཉིད་ལ་ཞུགས་ཞེས་པའི་བར་ཏེ་རྣམ་པར་དག་པའི་ཕུང་པོ་ཁམས་དང་སྐྱེ་མཆེད་ལས་དབང་ཡུལ་དང་བཅས་པ་ཞེས་པ་ནི། ཆོས་དབྱིངས་བདེ་གཤེགས་སྙིང་པོ་གདོད་ནས་རྣམ་པར་དག་པའི་ངོ་བོར་གྱུར་པའི་དོན་དམ་ཕུང་ཁམས་སྐྱེ་མཆེད་ལས་དབང་བྱ་བ་དང་བཅས་པ་རྣམས་དོན་དམ་ཡེ་ཤེས་ལྷ་སྐུའི་དཀྱིལ་འཁོར་དུ་གདོད་ནས་བཞུགས་པ་དེ། ཡིད་ཀྱིས་ཀྱང་དཀྱིལ་འཁོར་གྱི་ལྷ་ཚོགས་སུ་གསལ་བཏབ་པའི་ལྷ་ཚོགས་རྣམས་རང་ཉིད་དུས་ཀྱི་འཁོར་ལོའི་སྐུར་གསལ་བ་ལ་འཇུག་པ་ཡིན་ཏེ། དེ་ཡང་ཐ་མལ་བའི་རྗེས་ཆགས་དང་རྣམ་པར་མཐུན་པར་ཡབ་ཀྱི་སྐུ་ལས་ལྷ་རྣམས་སྤྲོས་ཏེ་ཡུམ་ལ་བསྟིམ་པ་ནི། ཡབ་ཀྱིས་ཡུམ་ལ་ལྷག་པར་རྗེས་སུ་ཆགས་པ་བསྐྱེད་པས་ཡུམ་གྱི་སྐུ་ལའང་རྗེས་ཆགས་རྒྱས་པ་མཚོན་ཅིང༌། ཡང་དེ་དག་ཡུམ་གྱི་སྐུ་ལས་སྤྲོས་ནས་ཡབ་ཀྱི་སྐུ་ལ་བསྟིམ་པ་ནི་ཡུམ་གྱིས་ཡབ་ལ་རྗེས་སུ་ཆགས་པ་ལྷག་པར་བསྐྱེད་པས་ཡབ་ཀྱི་རྗེས་ཆགས་ཀྱང་ལྷག་པར་རྒྱས་པ་མཚོན་པའོ། གཞན་ཡང་ཡབ་ཡུམ་ཕན་ཚུན་གྱི་སྐུ་ལས་སྤྲོས་པའི་དགོས་པ་ནི། འབྲས་བུ་ལྷ་རྣམས་ཀྱི་རྒྱུ་ཡབ་ཡུམ་གྱི་སྐུའི་བྱང་ཆུབ་སེམས་ཀྱི་འོད་ཟེར་གཉིས་འདུས་པ་ལས་བསྒྲུབ་པའི་
ཕྱིར་དུའོ། དང་པོ་ཡབ་ཀྱི་སྐུ་ལ་ཞུགས་པ་དང༌། དེ་ནས་ཡུམ་གྱི་སྐུ་ལ་ཞུགས་པ་གཉིས་ཡིན་ལ། སླར་ཡང་ཡབ་ཀྱི་སྐུ་ལ་ཞུགས་པ་ནི། བྱང་ཆུབ་ཀྱི་སེམས་སུ་ཞུ་བའི་ཆེད་དོ། །འདིར་འདོད་ཆགས་ཆེན་པོས་གདུལ་བའི་སེམས་ཅན་རྣམས་དང་པོའི་སངས་རྒྱས་ལ་གཞུག་པའི་ཆེད་ཅེས་གསུངས་པ་འདི། སྦྱང་བྱ་དང་རྫོགས་རིམ་གྱི་སྐབས་སུ་གསུངས་པའི་ཆེད་དུ་མི་འབྱོར་ལ། སྦྱངས་འབྲས་ཀྱི་སྐབས་ལས་འོས་མེད་ཀྱང༌། རང་ཉིད་ཀྱིས་ཐོབ་བྱ་ལ་སྦྱོར་རམ་མི་སྦྱོར་ཞེ་ན། གཙོ་བོར་འདི་ནི་སྔོན་བྱུང་སྟོན་པའི་མཛད་པ་དང་མཐུན་པར་རྗེས་འཇུག་རྣམས་ཀྱིས་བསྒོམ་པའི་ཚུལ་ཡིན་ལ། སྒྲུབ་པ་པོ་རང་ཉིད་སངས་རྒྱས་པའི་ཚེ་ཡང་ཆགས་ཆེན་གྱི་གདུལ་བྱ་འདུལ་བར་འགྱུར་བའི་མཛད་པ་དང་ཡང་ཤུགས་ལ་སྦྱོར་རོ། །དེ་ཡང་སྔོན་སྟོན་པས་རྒྱུད་གསུངས་པའི་ཚེ་དཀྱིལ་འཁོར་ཆེན་པོ་སྤྲུལ་པ་ནའང༌། ཡེ་ཤེས་ཀྱི་གཞལ་མེད་ཁང་དུ་མངོན་བྱང་ལྔ་ལས་གཙོ་བོའི་སྐུར་བཞེངས་པ་ནས། ཉེར་བསྡུའི་བར་གྱི་རིམ་པ་འདི་དག་དངོས་ཀྱི་གདུལ་བྱ་རྣམས་ལ་གསལ་པར་བསྟན་པ་ཡིན་པས། དེ་དུས་རྗེས་ཆགས་ཀྱི་སྤྱོད་པས་འཁོར་གྱི་དཀྱིལ་འཁོར་སྤྲུལ་པར་མཛད་པ་དེ་དང་མཐུན་པར་བསྒོམ་ཞིང༌། མོས་པ་ཡང་བྱེད་དགོས་པའོ།། །།གཉིས་པ་དངོས་གཞི་འཁོར་གྱི་ལྷ་ཚོགས་བསྐྱེད་པའི་སྐབས་སུ་འདི་ལྟར་གོ་དགོས་ཏེ། འདི་ལ་སྔོན་དུ་དོགས་པ་དཔྱད་པ་དང༌། ལྷ་ཚོགས་ཇི་ལྟར་སྤྲོ་བའི་ཚུལ་ལོ། །དང་པོ་ནི། སྐབས་འདིར་འགྲེལ་ཆེན་ལས། ཞུ་བ་ཟླ་བར་གྱུར་པ་རྣམས་རང་གི་རྡོ་རྗེ་ནས་སྤྲོས་ཏེ། རང་གི་རིག་མའི་པདྨར་དེ་རྣམས་ཡོངས་སུ་གྱུར་པ་ལས་ལྷ་དང་ལྷ་མོའི་ཚོགས་ཀྱི་དཀྱིལ་འཁོར་རྟེན་དང་བརྟེན་པའི་མཚན་ཉིད་ཅན་ནོ། །ཞེས་གསུངས་པས། ཁ་ཅིག་མཁའ་ནང་དུ་གཞལ་ཡས་ཁང་བསྐྱེད་པར་
བཞེད། གཞན་དག་རྟེན་ས་བོན་དང་ཕྱག་མཚན་ལས་བརྟེན་པ་ལྷ་སྐུ་སྐྱེད་དོ་ཞེས་འབྲུ་གནོན་ལ། དེ་ལ་མང་པོ་ཞིག་རྟེན་གཞལ་ཡས་ཁང་དང་བརྟེན་པ་ལྷ་ལ་འཇོག་པ་སྔགས་པ་སྤྱི་ལ་གྲགས་པ་དང་འགལ་ཞེས་འགོག ཁ་ཅིག་གསང་འདུས་ཡེ་ཤེས་ཞབས་ལུགས་ཀྱི་སྙིང་རྗེའི་དབང་བསྐུར་གྱི་རིག་པ་འདིར་སྦྱོར་བར་རློམ་ནས། དཀྱིལ་འཁོར་རྒྱལ་མཆོག་གི་ལྷ་ཚོགས་སྤྲོ་བ་རྣམས་ཕྱིའི་གཞལ་ཡས་ཁང་ལ་མི་བྱེད་པར་མཁའ་ནང་གི་གཞལ་ཡས་ཁང་དུ་ལྷ་སྤྲོ་བའི་དོན་ཡིན་ཞེས་འཆད་ན། རྒྱུད་འགྲེལ་གྱི་སྔ་ཕྱི་གང་དུའང་མཁའ་ནང་དུ་གཞལ་ཡས་ཁང་སྒོམ་པའི་གསལ་ཁ་མེད་ཅིང༌། འདིར་བསྐྱེད་ན་ཕྱིས་ཕྱི་རོལ་ཏུ་སྤྲོ་དགོས་པ་ལས་སྤྲོ་བའི་ཚིག་ཀྱང་ཡེ་མེད་པའི་ཕྱིར་དང༌། རིག་པས་ཀྱང་མཁའ་ནང་དུ་ལྷ་རྣམས་དུས་གཅིག་ལ་བསྐྱེད་པ་ཡིན་ན། གཞལ་ཡས་ཁང་སྒོམ་པ་འཐད་ཀྱང༌། འདིར་ནི་མངལ་གྱི་ཟླ་བ་རྣམས་དང་བསྟུན་ནས་ལྷ་རྣམས་སྡེ་ཚན་རེ་རེ་དུས་གཅིག་ཏུ་སྐྱེད་ཅིང༌། བསྐྱེད་མ་ཐག་ཏུ་ཕྱིར་འབྱིན་པ་ཡིན་པས། འདིའི་རིགས་ལ་གཞལ་ཡས་ཁང་མི་ཐོབ་པོ། །དུས་གཅིག་ཏུ་བསྐྱེད་ཕྱིན་ཆད་རིམ་ཅན་དུ་སྤྲོའམ་བྱུང་རྫོགས་སུ་སྤྲོ་ཡང་གཞལ་ཡས་ཁང་བྱེད་པ་ལ་མི་བདེ་བ་བསྐྱེད་པའི་གནས་སྐབས་སུ་དུས་གཅིག་ཏུ་མི་བསྐྱེད་པ་ལ་སྤྲོ་ཚུལ་ཇི་ལྟར་བྱེད་ཀྱང་གཞལ་ཡས་ཁང་མི་དགོས་སོ། །དེས་ན་སྐབས་འདིར་གཞལ་ཡས་ཁང་མི་སྒོམ་པ་ཉིད་དུ་ངེས་ལ། ས་བོན་ལ་རྟེན་གྱི་ཐ་སྙད་འཇོག་པ་ཡང་མཐའ་གཅིག་ཏུ་འགལ་བ་ནི་མེད་དེ། རྒྱུ་ལ་རྟེན་དུ་འཇོག་པ་དང་འབྲས་བུ་ལ་བརྟེན་པར་འཇོག་པའི་སྐབས་མང་བའི་ཕྱིར་རོ། །འོན་ཀྱང་དེ་འདྲ་འདིར་སྐབས་ཀྱི་དོན་དུ་མི་འགྱུར་བས་དེ་ཡང་མིན་ནོ། །ཡང་མཁའ་ནང་གི་གཞལ་ཡས་ཁང་དུ་ལྷ་སྤྲོ་བའི་དོན་དུ་འཆད་པ་ནི། དུས་
འཁོར་བ་ཐམས་ཅད་དང་མི་མཐུན་པའི་གྲགས་པའི་ཚད་མས་གནོད་ངེས་ཤེས་པ་ནི་ཡིན་ཞིང༌། གཞན་ཡང་ལྷ་རྣམས་དུས་གཅིག་ཏུ་བསྐྱེད་པ་ཡིན་ན། སྦྱང་བྱ་ཟླ་བ་སོ་སོ་དང་སྦྱར་ནས་རིམ་པས་བསྒོམ་དགོས་པར་གསུངས་པ་དང་འགལ་ཞིང༌། ལྷ་རྣམས་རིམ་པས་བསྐྱེད་པ་ཡིན་ནམ་མཁའ་ནང་དུ་བྱང་ཆུབ་ཀྱི་སེམས་ཀྱང་ལན་གྲངས་མང་པོར་སྤྲོ་དགོས་པར་ཐལ་བར་འགྱུར་བ་དང་མཁའ་དཀྱིལ་གྱི་གཞལ་ཡས་ཁང་དུ་ལྷ་རྣམས་ཁྲོམ་འཚོགས་པ་ལྟར་རིམ་པས་འཇུག་པ་འདི་འདྲ་སྔོན་མེད་པའོ། །ཡང་གཞན་ཁ་ཅིག་མཁའ་ནང་དུ་གཞལ་ཡས་ཁང་བསྐྱེད་པ་ལ་རྒྱུ་མཚན་ཁྱད་པར་ཅན་གཞན་ཡོད་དེ། འདིར་ང་ནི་སྔོན་གྱི་སྨོན་ལམ་ཡོངས་སུ་རྫོགས་པར་བྱ་བ་དང༌། ཆོས་ཀྱི་འཁོར་ལོ་བསྐོར་བའི་དོན་དུ་མངལ་དུ་འཇུག་པའི་ཚུལ་གྱིས་བསྐྱེད་པའི་རིམ་པས་བཅོམ་ལྡན་འདས་ཀྱི་སྒྲུབ་ཐབས་གསུངས་པ་ཞེས་འབྱུང་ཞིང༌། དེའི་དོན་ཐུབ་པའི་དབང་པོ་ཡུམ་གྱི་ལྷུམས་སུ་ཞུགས་པ་དང་མཐུན་པར་བསྒོམ་དགོས་པ་ཡིན་ན། རྒྱ་ཆེ་རོལ་པར་ཡུམ་གྱི་ལྷུམས་སུ་ཁང་བརྩེགས་རིམ་པ་གསུམ་པ་ཙནྡན་སྦྲུལ་གྱི་སྙིང་པོའི་རང་བཞིན་སོགས་གསུངས་པས་སོ། །ཟེར་རོ། །འདི་ནི་སངས་རྒྱས་རྣམས་སྐྱེ་བའི་ཆོ་འཕྲུལ་སྟོན་པ་དང་མཚུངས་པར་ལྷའི་བསྐྱེད་ཆོག་བསྒོམ་ཞེས་རང་ཉིད་མ་འོངས་པ་ན་འཚང་རྒྱ་འགྱུར་གྱི་དུས་དང་འདྲ་བར་བསྒོམ་ཞེས་པ་ཙམ་གྱི་དོན་ཡིན་གྱི། འོ་སྐོལ་གྱི་སྟོན་པ་ཁོ་ནའི་རྣམ་ཐར་དང་བསྟུན་དགོས་པའང་མིན་ལ། ཁྱད་པར་དུ་རྒྱ་རོལ་དང་སྒྲིག་པ་ལའང་འབྲེལ་ཆེར་མེད་དེ། རྒྱ་རོལ་དུ་ཡུམ་གྱི་ལྷུམས་སུ་ཁང་བཟངས་བྱུང་བར་གསུངས་པས་འདིར་མཁའ་ནང་དུ་གཞལ་ཡས་ཁང་བསྒོམས་དགོས་ན། མངོན་པར་འབྱུང་བ་དང་ལུང་བཞི་ལས་ཡུམ་གྱི་ལྷུམས་སུ་ཁང་བཟངས་བྱུང་
བར་མ་གསུངས་པས། སྐབས་འདིར་མི་བྱེད་པའི་རྒྱུ་མཚན་དུ་ཡང་ཐལ་བར་འགྱུར་ རོ། །གཞན་ཡང་མངལ་ཟླ་རྣམས་དང་སྦྱོར་བ་འདི་ཐུབ་པ་ལྷུམས་སུ་བཞུགས་པའི་དབང་དུ་བྱས་པ་ཡིན་ན་ནི། ཁྱེད་དག་གཞལ་ཡས་ཁང་སྐྱེད་པ་དེ་མངལ་ཟླ་བཞི་པའི་སྐབས་སུ་འོང་བས་མངལ་གྱི་ཟླ་བ་བཞི་པ་ལ་ལྷུམས་སུ་ཙནྡན་གྱི་ཁང་བརྩེགས་སྔར་མེད་གསར་དུ་བྱུང་བར་འདོད་དགོས་ཤིང༌། དེ་ལྟར་མི་སྦྱོར་ན་ཐུབ་པ་སྐུ་བལྟམས་པ་གལ་ཆེ་ཤོས་གཙོ་བོ་ཡབ་ཡུམ་དང་མི་སྦྱོར་བར་མངལ་ནས་སྤྲོས་པའི་ལྷ་ཚོགས་དང་སྦྱོར་བ་ནི། བསྐྱེད་རིམ་སྤྱི་དང་བྱེ་བྲག་སུ་དང་ཡང་མི་མཐུན་ཞིང༌། མཁའ་སྤྲོའི་ལྷ་ཚོགས་ཤིན་ཏུ་མང་བའི་སྲས་ཀྱི་གཙོ་བོ་ཐོག་མ་དེ་ཡབ་ལ་ཐིམ་པ་སོགས་ཤིན་ཏུ་མི་ཤེས་ཤིང་བླུན་དཔྱོད་ཁོ་ནར་འགྱུར་རོ། །ཅི་སྟེ་རྒྱ་རོལ་དང་དུས་འཁོར་མི་སྒྲིག་པ་སྟབས་མེད་པའི་དབང་མེད་བྱུང་སྲིད་ན། ཕྱིའི་གཞལ་མེད་ཁང་དང་ཙནྡན་གྱི་ཁང་བཟང་སྒྲིག་པ་ཙམ་རིགས་སོ། །འོ་ན་རྟེན་དང་བརྟེན་པ་ཞེས་པ་ཅི་ཞིག་སྙམ་ན། རང་གི་རིག་མའི་པདྨར་ཞེས་པ་རྟེན་དང༌། ལྷ་དང་ལྷ་མོའི་མཚན་ཉིད་བརྟེན་པའི་མཚན་ཉིད་ཅན་ཞེས་སྦྱོར་རྒྱུ་ཡིན་པས། འདིར་གཞལ་ཡས་ཁང་གི་དོད་ཡུམ་གྱི་མངལ་གནས་ཉིད་རྟེན་གྱི་དཀྱིལ་འཁོར་གྱི་མཚན་ཉིད་ཅན་ཡིན་པ་དེའི་ནང་དུ་རྡོ་རྗེ་ལས་སྤྲོས་པའི་བྱང་ཆུབ་ཀྱི་སེམས་ལྷ་དང་ལྷ་མོའི་ཚོགས་སུ་གྱུར་པ་བརྟེན་པའི་མཚན་ཉིད་ཅན་གྱི་དཀྱིལ་འཁོར་རོ། །ཞེས་པ་ཡིན་པས། འདི་མངལ་དུ་གཞལ་ཡས་ཁང་སྒོམ་པའི་སྒྲུབ་བྱེད་དུ་མི་འགྱུར་གྱི། མི་སྒོམ་པའི་སྒྲུབ་བྱེད་དུ་འགྱུར་བ་ཤས་ཆེའོ། །ཡང་དུས་འཁོར་བ་ཕྱིས་བྱུང་ཕལ་ཆེར་འདི་སྐད་ཅེས། དཀྱིལ་འཁོར་རྒྱལ་མཆོག་གི་སྐབས་འདིར་ལྷ་རྣམས་སྐད་ཅིག་གིས་བསྐྱེད་པ་དང༌།
ལས་རྒྱལ་མཆོག་ཏུ་རླུང་གྲུབ་པ་དང་མཐུན་པར་ལྷ་རྣམས་ཕྱག་མཚན་ས་བོན་ལས་བསྐྱེད་ཟེར་བ་ཡོད་མོད་ཀྱང་དེ་ལྟར་ན་ལས་རྒྱལ་མཆོག་དེ་དཀྱིལ་འཁོར་རྒྱལ་མཆོག་ལས་ཆེས་རྒྱས་པར་འགྱུར་ཞིང༌། དེ་ལྟ་ན་ནི་གསང་སྔགས་སྤྱི་ལུགས་དང་ཡང་མི་མཐུན་པ་དང༌། འབྲས་བུ་ལྷ་ནི་དག་བྱེད་ཡིན་པས་གཉིས་ཀར་དུ་སྒོམ་མཉམ་ལ། རྒྱུ་རླུང་རྣམས་སྦྱོང་བྱེད་ས་བོན་ཕྱག་མཚན་དགོས་ན། འདིར་ཡང་རྩ་རྣམས་གྲུབ་པ་མཚོན་བྱེད་དུ་ས་བོན་ཕྱག་མཚན་ཅིའི་ཕྱིར་མི་དགོས། ཡང་ཁ་ཅིག་འདི་སྐད་ཅེས། འགྲེལ་པ་ལས་ཤེས་རབ་ཀྱི་པདྨར་སྔགས་ཀྱི་རང་བཞིན་ཡི་གེ་སོ་སོ་རྣམས་སོ། །དེ་ནས་པདྨ་ལས་ཞལ་དང་ཕྱག་དང་མཚན་མ་དང༌། དབྱིབས་ཀྱི་མཚན་ཉིད་ཅན་རྣམས་ཡེ་ཤེས་དང་ཐུགས་དང་གསུངས་དང་སྐུའི་དཀྱིལ་འཁོར་རྣམས་ལ་སྤྲོ་བར་བྱའོ།། དེ་ལྟར་དཀྱིལ་འཁོར་རབ་ཏུ་སྤྲོ་བ་དག་ཀྱང་ངོ༌། །ཀྱང་ཡིག་གིས་སྔོན་བཞིན་ པའོ། །ཞེས་གསུངས་པ་འདིས། ལས་རྒྱལ་མཆོག་ཏུ་ཐོག་མར་སྔགས་ཀྱི་རང་བཞིན་གྱི་ཡི་གེ་ཞེས་གསུངས་ནས། སྔོན་བཞིན་ཞེས་པ་ཞལ་ཕྱག་ལ་འབྲུ་མནན་པས་ལས་རྒྱལ་དུ་ས་བོན་ལས་བསྐྱེད་པ་དང༌། རྒྱལ་མཆོག་དང་པོར་དེ་འདྲའི་རྣམ་གཞག་ཅི་ཡང་མ་གསུངས་པས། སྐད་ཅིག་གིས་བསྐྱེད་པར་ངེས་སོ་ཞེས་རང་བྱིས་པའི་དུས་གང་སྨྲས་པ་དེ་ཉིད་ཀྱི་རྒྱབ་སྐྱོར་ཕྱིས་ཀྱང་འབད་དེ་སྨྲའོ། །དེ་ལ་འདི་སྐད་ཅེས་བྱ་སྟེ། རྒྱལ་མཆོག་དང་པོའི་སྐབས་སུ་ཞལ་ཕྱག་རྣམ་འགྱུར་རྣམས་རྒྱས་པར་གསུངས། རྒྱལ་མཆོག་གཉིས་པ་རྫོགས་མཚམས་སུ་ས་བོན་ཕྱག་མཚན་རྣམས་རྒྱས་པར་གསུངས་པ་ནི། དེ་རྣམས་གོང་འོག་གང་རིགས་སུ་ཕྱོགས་གཅིག་ཏུ་བསྡོམས་ཏེ་གསུངས་ན། རྒྱལ་མཆོག་གཉིས་པོ་གཅིག་སྟོན་བྱེད་ཀྱི་ཚིག་མངས་
ཤིང་གཅིག་ཤོས་ཉུངས་བས་གཞུང་མི་མཛེས་པར་གཟིགས་ཏེ། རྒྱུད་དུ་བཀྲམ་ནས་གསུངས་པ་ཡིན་ནོ། །དེ་ལྟ་མ་ཡིན་པར་རྒྱལ་མཆོག་དང་པོ་སྟོན་བྱེད་ཀྱི་གཞུང་གི་ནང་ན། ས་བོན་མཚན་མ་མ་གསུངས་པས་དེ་མི་དགོས་པར་འགྱུར་ན་ལས་རྒྱལ་མཆོག་ལ་ཡང་ལྷ་རྣམས་སྤྲོ་བའི་སྐབས་ས་བོན་ཕྱག་མཚན་མི་སྒོམ་བར་རྒྱས་བཏབ་ཟིན་པའི་རྗེས་སུ། དེ་རྣམས་བསྒོམ་དགོས་པར་ཐལ་བར་འགྱུར་ཏེ། སྐབས་དེར་གསུངས་པའི་ཕྱིར་རོ། །གཞན་ཡང་འདི་སྐད་ཅེས་བྱ་སྟེ། ཁྱེད་དག་ལུང་ཚིག་སྔ་མ་དེ་ཚིག་ལ་འཁྲིས་ཏེ། ས་བོན་ཡི་གེ་ཞེས་སྔོན་ལ་གསུངས་ནས། དེའི་རྗེས་སུ་སྔོན་བཞིན་ཞེས་ཞལ་ཕྱག་ལ་སྦྱར་བ་འདི་ལྟར་ན། ཡུམ་གྱི་མངལ་གནས་སུ་ཡི་གེར་སོང༌། མངལ་ནས་སྤྲོས་པ་ན་ཞལ་ཕྱག་ཏུ་གྱུར། ཅེས་པར་སོང་བས། པདྨ་ནས་ས་བོན་སྤྲོས་པ་ཕྱི་རོལ་ཏུ་ལྷར་གྱུར་པར་འདོད་དགོས་ལ། མཚན་མ་དང་བཅས་པ་ཞེས་པའི་དོན་ལྷ་བསྐྱེད་ཟིན་གྱི་ཕྱག་ན་བསྣམས་པའི་ཕྱག་མཚན་ཡིན་ན། ལྷའི་བསྐྱེད་ཆོག་ལ་ཕྱག་མཚན་མེད་པར་འགྱུར་ལ། འདི་དེ་ཡིན་ན་ལྷར་གྱུར་ཟིན་པ་དེ། སླར་ཡང་ཕྱག་མཚན་དུ་བསྒྱུར་དགོས་པར་ཐལ་བར་འགྱུར་རོ། །དེ་ནི་སློབ་དཔོན་མེད་པར་རང་གར་འཇུག་པ་དགག་པ་དང༌། ཚིག་གི་སྡེབ་སྦྱོར་གྱི་དབང་གིས་སྤེལ་བ་ཡིན་གྱི། དོན་འཁྲུགས་སྡེབས་བྱེད་ཟེར་ན། འདིར་ཡང་དེ་ཁོ་ན་བཞིན་ཏེ། ཤེས་རབ་ཀྱི་པདྨར་སྔོན་བཞིན་དུ་སྔགས་ཀྱི་རང་བཞིན་ཡི་གེ་སོ་སོ་རྣམས་དང་མཚན་མ་རྣམས་སོ། །དེ་ནས་པདྨ་ལས་ཞལ་དང་ཕྱག་དང༌། ཞེས་སོགས་བརྗོད་རྒྱུ་ཡིན་ལ། ཁྱད་པར་དུ་རྒྱུད་ལས། རྒྱལ་པོ་ཤེས་རབ་ཐབས་ཀྱིས་སླར་ཡང་དཀྱིལ་འཁོར་མ་ལུས་པ་ནི་རབ་ཏུ་སྤྲོ་བ་དག་ཀྱང་ངོ༌། །ཞེས་པའི་འབྲུ་དངོས་གནོན་པ་ན། ཀྱང་ཡིག་གིས་
སྔོན་བཞིན་ཞེས་པས། རྒྱལ་མཆོག་ཉིས་པོ་དཀྱིལ་འཁོར་སྤྲོ་ཚུལ་ལ་ཁྱད་པར་མེད་ཅེས་བྱ་བ་དང༌། ཇི་ལྟར་ཁྱད་པར་མེད་ན། ཤེས་རབ་ཀྱི་པདྨར་ཞེས་སོགས་གོང་དུ་བཤད་པ་ཉིད་དོ། །ཡང་མཚན་མ་སུམ་ཅུ་རྩ་གཉིས་ཀྱི་དཀྱིལ་འཁོར་སྐབས་ནས། དེ་ལྟར་ས་བོན་གྱི་མཚན་མ་བསྐྱེད་པ་དང༌། མཚན་མས་ལྷ་བསྐྱེད་པ་ནི། རྣམ་འབྱོར་པས་ཐམས་ཅད་དུ་རྟོགས་པར་བྱའོ། །ཞེས་གསུངས་པས་རྒྱལ་མཆོག་གཉིས་ཀར་ལ་ས་བོན་མཚན་མ་དགོས་ཞེས་བཤད་པ་ལ། ཁ་ཅིག་དེ་ལས་རྒྱལ་གྱི་སྐབས་སུ་བཤད་པ་ཡིན་པས་ལས་རྒྱལ་ཁོ་ན་ལ་དགོངས་ཀྱི། གཞན་དུ་ན་སྐད་ཅིག་གིས་བསྐྱེད་པའི་ལྷ་མེད་པར་འགྱུར་ཟེར་རོ། །དེ་ཡང་མ་ཡིན་ཏེ་འདིའི་དངོས་བསྟན་ཙམ་ཞིག་ལ་དམིགས་ན་ནི། ལས་རྒྱལ་མཆོག་ཀྱང་མ་ཡིན་ཏེ། མཚན་མ་སུམ་ཅུ་རྩ་གཉིས་ཀྱི་ལྷ་ཚོགས་ཁོ་ནར་འགྱུར་རོ། །ཤུགས་བསྟན་ལ་བསམས་ན་ནི་ཐམས་ཅད་དུ་ཞེས་གསུངས་པ་ལས། ཁྱེད་ལྟར་ན་དཀྱིལ་འཁོར་རྒྱལ་མཆོག་རིལ་གྱིས་སྤངས་པས་ཐམས་ཅད་ཀྱི་སྒྲ་ཇི་ལྟར་འཇུགའོན་ཀྱང་སྐད་ཅིག་གིས་བསྐྱེད་པ་ཡང་མེད་པར་མི་འགྱུར་ཏེ། ཐམས་ཅད་ཅེས་པ་ཕལ་ཆེ་བའི་དོན་ཡིན་གྱི། ཁྱབ་མཐའ་བརྩི་མི་དགོས་པས་སོ། །དཔེར་ན་མི་ཐམས་ཅད་ཀྱི་ཟས་ནི་འབྲུ་ཡིན་ནོ་ཞེས་པ་ལ་མི་འཐད་པ་མེད་ཀྱང༌། འབྲུས་མི་འཚོ་བའི་མི་ཅི་རིགས་ཡོད་ཀྱང་མི་འགལ་ཏེ། མི་ཕལ་ཆེ་བ་འབྲུས་འཚོ་བའི་ཕྱིར་རོ། །མི་ཐམས་ཅད་ཁ་སྤུ་ཅན་ནོ་ཞེས་བརྗོད་ན། མིའི་ཕྱེད་ལྷག་པ་ལ་ཁ་སྤུ་མེད་པའི་ཕྱིར་མི་འཐད་པ་ལྟར་རྒྱལ་མཆོག་དང་པོའི་ལྷ་ཐམས་ཅད་ས་བོན་ཕྱག་མཚན་ལས་མི་སྐྱེད་ན། ཕྱེད་མ་བསྐྱེད་པར་སོང་བས་ཐམས་ཅད་ཀྱི་སྒྲ་མི་འཐད་ལ། རྒྱལ་མཆོག་གཉིས་པོ་གང་ལ་ཡང་ས་བོན་ཕྱག་མཚན་
གཉིས་ལས་མི་སྐྱེད་པ་ཅུང་ཟད་ཡོད་དུ་ཆུག་ཀྱང༌། མང་པོ་མེད་པའི་ཕྱིར་ཐམས་ཅད་ཀྱི་སྒྲ་དང་མི་འགལ་ལ། ཡང་སྐད་ཅིག་གིས་བསྐྱེད་པ་སྐབས་འདིར་མེད་ན་སྐྱོན་ཅི་ཞེས་ཀྱང་ནན་ཏན་དུ་དྲི་བར་བྱའོ། །འདི་དག་ཀྱང་ཆོ་ག་རྒྱས་པའི་དབང་དུ་བྱས་ཀྱི། གཞན་དུ་ན་རྒྱལ་མཆོག་གཉིས་ཀར་དུ་ས་བོན་ཁོ་ན་ལས་བསྐྱེད་པ་དང༌། སྐད་ཅིག་གིས་བསྐྱེད་པ་ཁོ་ན་དང་གཅིག་ལ་སྐད་ཅིག་དང༌། གཅིག་ཤེས་ལ་གཞན་བྱེད་པ་དང༌། རྒྱལ་མཆོག་དང་པོ་ལ་གཙོ་བོ་ཁོ་ན་བསྐྱེད། གཉིས་པ་ལ་འཁོར་ཚོགས་སྤྲོ་བ་དང༌། དེ་ཉིད་གོ་ཟློག་པ་སོགས་ཀྱང་མི་འགལ་བས། རྗེ་རོང་བ་ཤེར་སེང་བ་འབྲོ་བས་རྒྱལ་མཆོག་དང་པོ་ཆད། ར་པས་རྟིང་མ་ཆད་གསུང་བ་དངོས་བསྟན་ཆོ་ག་རྒྱས་པའི་དབང་དུ་བྱས་ན་འདྲ་རུང་ཙམ་ཡིན་ཡང༌། སྤྱིར་ན་ཤོབ་པེ་བ་སྟེ། དགོས་པའི་དབང་གིས་རྒྱས་བསྡུས་དེ་ལྟ་བུ་བྱེད་པ་ལ་སྐུར་བ་གདབ་ཏུ་མི་རུང་ཞིང༌། རྒྱལ་མཆོག་དང་པོའི་སྦྱང་བྱ་སྦྱངས་འབྲས་རྣམས་གཙོ་བོ་ནུས་མ་དང་བཅས་པ་ལ་ཚང་ཚུལ་ཡོད་པ་དང༌། ཕྱི་མའི་དམ་ཚིག་པ་བསྐྱེད་པའི་དག་རྫོགས་སྨིན་གསུམ་ཡང་གཙོ་བོ་ནུས་མར་བཅས་པ་ལ་བསྡུད་ཐུབ་པའི་སྐབས་ཡོད་པས་སོ། །དེ་ལྟར་སྤྱིར་ཤེས་པར་བྱས་ནས། གཉིས་པ་ལྷ་ཚོགས་ཇི་ལྟར་སྤྲོ་བ་ཉིད་ལ་དབྱེ་ན། དབུས་དང་བདེ་གཤེགས་འཕར་མའི་ལྷ་ཚོགས་སྤྲོ་བ། ཐུགས་དཀྱིལ་དངོས་ཀྱི་ལྷ་ཚོགས་སྤྲོ་བ། གསུང་དཀྱིལ་གྱི་ལྷ་ཚོགས་སྤྲོ་བ། སྐུ་དཀྱིལ་གྱི་ལྷ་ཚོགས་སྤྲོ་བ། རྗེས་འབྲང་གི་ལྷ་ཚོགས་རྣམས་སྤྲོ་བ་སྟེ་ལྔ་ལས། དང་པོ་ནི། ཨ་ཡིག་ལས་བྱུང་བའི་རྡོ་རྗེ་ལྗང་ཁུ་ཞེས་པ་ནས། བུམ་པ་རྣམས་སུ་
གྱུར་ཞེས་པའི་བར་ཏེ། དེ་ཡང་གཤེགས་པ་ཡབ་ཡུམ་རྣམས་རང་རང་གི་ས་བོན་ཙམ་མམ། ས་བོན་ཕྱག་མཚན་དང་བཅས་པ་ལས་བསྐྱེད་དགོས་ན། ཐུགས་དཀྱིལ་གྱི་རྩིག་པའི་ནང་གི་ལྷ་རྣམས་ལ་ནི་ངེས་པར་ཡང་ཞི་བ་ཡབ་ཡུམ་རྣམས་བསྐྱེད་ཆོག་འདྲ་བར་བྱེད་དགོས་ལ། གསུང་དང་སྐུའི་དཀྱིལ་འཁོར་སོགས་ལ་ནི་མ་ངེས་པར་ཡང་ཡོད་དོ། །སྐབས་འདི་དག་ཏུ་ཡུམ་གཙོ་བོར་གྱུར་པ་ལ་ཡུམ་ཉིད་པདྨའི་སྐྱིལ་ཀྲུང་དང༌། ཡབ་གཙོ་བོར་གྱུར་པ་ལ་ཡབ་ཉིད་རྡོ་རྗེའི་སྐྱིལ་ཀྲུང་དུ་ཡོད་པའི་སྐབས། ཁ་ཅིག་ཡུམ་ལ་འཁྱུད་པའི་ཡབ་ཀྱང་རྡོ་རྗེའི་སྐྱིལ་ཀྲུང་དང༌། ཡབ་ལ་འཁྱུད་པའི་ཡུམ་པདྨའི་སྐྱིལ་ཀྲུང་དུ་འདོད་པ་མང་དུ་བྱུང་ཡང་ཐུགས་དཀྱིལ་ནང་གི་ལྷ་ཞི་སྐྱོང་རྣམས་ལས་གཙོ་མོའི་ཚུལ་རྣམས་པདྨའི་སྐྱིལ་ཀྲུང་དང༌། གཙོ་བོའི་ཚུལ་རྣམས་རྡོ་རྗེའི་སྐྱིལ་ཀྲུང་དུ་བཤད་པ་མ་གཏོགས། ཡབ་ཡུམ་ཞབས་སྟབས་མི་འདྲ་བ་དགོས་པའི་གསལ་ཁ་མེད་ཅིང༌། བཞེངས་པའི་ནང་ནས་གཡས་བརྐྱང་ གཡོན་བརྐྱང་གཉིས་རྣམ་པ་ཡང་མཚུངས་ཤིང༌། ཁ་སྦྱོར་གྱི་ཚེ་གའུ་འགྲིག་པའི་དགོས་པ་ཡོད་པས་དམིགས་གསལ་དུ ་གསུངས་པ་མ་གཏོགས། ཟླུམ་པོ་ས་ག་སོགས་ཡབ་ཡུམ་བཞུགས་སྟངས་མཚུངས་པར་ཡོད་པའི་རིགས་པས། ཡབ་གཙོ་བོའི་ཚུལ་དུ་རྡོ་རྗེའི་སྐྱིལ་ཀྲུང་གིས་བཞུགས་པ་ལ་ཡུམ་ཡང་རྡོ་རྗེའི་སྐྱིལ་ཀྲུངས་ཀྱིས་འཁྱུད་པ་དང༌། ཡུམ་གཙོ་མོའི་ཚུལ་དུ་པདྨའི་སྐྱིལ་ཀྲུང་གིས་བཞུགས་པ་ལ་ཡབ་ཀྱང་པདྨའི་སྐྱིལ་ཀྲུང་གིས་འཁྱུད་པར་བྱེད་པ་ནི་རང་ལུགས་སོ། །ཁ་ཅིག་གིས་ཡུམ་གཙོ་མོར་གྱུར་པ་ལ་ཡབ་ཀྱིས་འཁྱུད་པའི་
སྐབས་ཡབ་རྡོར་སྐྱིལ་ཀྱི་པང་དུ་ཡུམ་བཞུགས་ཤིང༌། ཡབ་ཀྱི་ཞལ་རས་ལས་ཡུམ་གྱི་ཞལ་རས་དཔངས་མཐོ་བར་བྱས་པས་བཞུགས་ཚུལ་འགལ་བའི་རྣམ་པས་སྐུ་གཟུགས་བཞེངས་པའི་ཚེ་མདུན་རྒྱབ་གང་ཡིན་ངོས་མི་ཟིན་པ་འདྲ་བ་ཤིན་ཏུ་མི་མཛེས་པ་དག་བྱུང་ངོ༌། །སྐུའི་རྒྱན་དང་རྣམ་འགྱུར་ལ་སངས་རྒྱས་རིགས་ལྔ་པོ་རྣམ་པ་རལ་པའི་ཐོར་ཚུགས་ཅན་དུ་བཤད་པས་སྐུ་ལ་ཡང་རུས་པའི་ཕྱག་རྒྱ་དྲུག་འགོད་པ་དང༌། སེམས་དཔའ་སེམས་མ་རྣམས་རིན་པོ་ཆེའི་ཐོར་ཚུགས་ཅན་ཡིན་པས་དར་དང་རིན་པོ་ཆེས་བརྒྱན་པ་བྱེད་ཅེས་འོད་ཟེར་འཕྲེང་བ་ལས་བཤད་པ་ཡང་མི་ལེགས་པ་མ་ཡིན་མོད། ཕྱག་རྒྱུན་ལ་ནི་ཐོར་ཚུགས་ཀྱི་ཁྱད་ཙམ་མ་གཏོགས། གཞན་འདྲ་བར་དང་སྲབ་མོའི་ན་བཟའ་ཅུང་ཟད་དང༌། རིན་པོ་ཆེའི་རྒྱན་ཉིད་མཛད་དོ། །དེ་དག་ལས་རིགས་ལྔའི་ཐོག་མ་མི་བསྐྱོད་པ་ཡབ་ཡུམ་ནི། ཐོག་མ་བསྐྱེད་པའི་དུས་རྣམ་ཤེས་ནམ་མཁའ་སྦྱོར་བྱེད་རིགས་བྱེ་བྲག་པ་ཡིན་ཡང་ནམ་མཁར་སྤྲོས་སེམས་ཅན་གྱི་དོན་མཛད་དེ། སླར་ཡང་གཙོ་བོ་དུས་ཀྱི་འཁོར་ལོ་ཉིད་ལ་བདག་པོའི་ཚུལ་དུ་ཞུགས་པ་ནས་གཟུང་སྟེ། གཙོ་བོ་དང་གཉིས་མེད་དུ་བྱེད་དམ། གཙུག་ཏོར་རམ་ཐུགས་ཀར་གཟུགས་བརྙན་གྱི་ཚུལ་གྱིས་འགོད་ཀྱང་རུང་སྟེ། རིགས་ཐམས་ཅད་པ་ཡིན་ལ། རྒྱུན་གཅིག་པོའི་བར་སྐབས་དེར་སྐུའི་རྣམ་པ་འགྱུར་བའང་མི་འཐད་པས་གནས་སྐབས་ཕྱི་མ་གཙོ་བོ་ཉིད་ཡིན་པའི་ཕྱིར། རང་འདྲའི་ཡུམ་རྡོ་རྗེ་དབྱིངས་ཀྱི་དབང་ཕྱུག་མས་འཁྱུད་པའོ། །དེ་ལྟར་ན་སྔར་གཙོ་བོ་ཀུན་ཁྱབ་རྡོ་རྗེ་སེམས་དཔའ་ཡིན་པ་ལ་དེ་ཞུགས་པས་ཡེ་ཤེས་རྣམ་ཤེས་རོ་མཉམ་པའི་ཚུལ་གྱིས་ཀུན་
ཁྱབ་མི་བསྐྱོད་པའི་ངོ་བོར་ཡང་གསལ་བར་མངོན་པའོ། །དེ་ལ་འདི་སྐུའི་ནང་དུ་གཟུགས་བརྙན་གྱི་ཚུལ་དུ་བཞུགས་པ་ལས་ཀྱང་རོ་གཅིག་ཏུ་འདྲེས་པ་ཉིད་བཟང་ངོ༌།། དེའི་ཚེ་སྤྱིར་ཀུན་ཁྱབ་ཡིན་ཡང་རིགས་དྲུག་གི་དབང་དུ་བྱས་ན། གཙོ་བོ་ཉིད་རིགས་གཉིས་འདུས་པ་གཙོ་ཆེ་བ་ཡིན་པ་ཤེས་པར་བྱའོ། །དེ་ལྟར་ན་རྒྱུད་འགྲེལ་ཉིད་ལས་དེ་ཙམ་ཁོ་ན་གསུངས་ཤིང༌། སྤྲོས་པ་གཞན་མ་མཛད་པ་ཉིད་རྒྱུད་མཚན་ཡིན་པས་མཁས་པ་ཁ་ཅིག་རྒྱུ་རྡོར་འཛིན་མི་བསྐྱོད་པ་ཡབ་ཡུམ་དང༌། འབྲས་བུ་རྡོར་འཛིན་རྡོར་སེམས་ཡབ་ཡུམ་ཡིན་ཞིང༌། རྒྱལ་མཆོག་གཉིས་ཀར་ལ་མཁའ་སྤྲོའི་གཙོ་བོ་ཡབ་མི་བསྐྱོད་པ་དང༌། གཙོ་མོ་ཡུམ་རྡོར་དབྱིངས་དབང་ཕྱུག་མ་སོ་སོར་བྱས་ནས། རྗེས་འབྲང་གི་ལྷ་ཡུམ་ཤེས་ཕྱིན་མ་དང་ཡབ་རྡོར་སེམས་ཀྱིས་འཁྱུད་པ་ཙམ་ཞིག་སྤྲོས་ནས། མི་བསྐྱོད་པ་ཡུམ་བཅས་ཡབ་དང༌། རྡོར་དབྱིངས་མ་ཡབ་བཅས་ཡུམ་ལ་ཐིམ་པར་བཞེད་པ་དང༌། རྒྱ་གཞུང་འགའ་ཞིག་ལས་ཀྱང་གཞན་དེ་དང་མཐུན་པ་ལས་མི་བསྐྱོད་པ་ཡབ་ཡུམ་ཁ་སྦྱོར་ཞིག་སྤྲོས་ནས་ཚུར་བསྡུས་ནས་ཁ་ཕྲལ་ཏེ་གཙོ་བོ་ཡབ་ཡུམ་སོ་སོ་ལ་བསྟིམ་པར་འདོད་པ་ནི། རྒྱལ་མཆོག་དང་པོའི་སྐབས། གཙོ་བོ་མི་བསྐྱོད་པ་ལ་མི་བསྐྱོད་པ་བསྟིམ་པས་མི་བསྐྱོད་པ་ཉིས་ལྡབ་ལྷག རྡོར་སེམས་ཆད། གཉིས་པའི་སྐབས་གཙོ་མོ་རྡོར་དབྱིངས་དབང་ཕྱུག་མའི་ངོ་བོ་ལ་ཡང་རྡོར་དབྱིངས་མ་བསྟིམ་པས་དབྱིངས་ཕྱུག་མ་ཉིས་ལྡབ་ཏུ་ལྷག ཤེས་ཕྱིན་མ་རྩ་བ་ནས་ཆད་པས་ལུགས་དེ་གཉིས་ནི་མི་ལེགས་ལ། ཡང་ཕྱིས་ཀྱི་ཁ་ཅིག་རྒྱལ་མཆོག་གཉིས་ཀ་ལ་རྡོར་སེམས་དང་མི་བསྐྱོད་པ་
གཉིས་ཀར་དུས་མཉམ་དུ་བསྐྱེད་ནས། རྡོར་དབྱིངས་མ་དང་ཤེས་ཕྱིན་མ་ཡང་ལོགས་སུ་བསྐྱེད། སོ་སོ་ལ་ཡབ་ཡུམ་ཕན་ཚུན་གྱིས་འཁྱུད་པར་བྱས་ནས་དེ་རྣམས་སྤྲོས་ཏེ། རྡོར་སེམས་དང་མི་བསྐྱོད་པ་ཡུམ་དང་བཅས་པ་སྟེ་ལྷ་བཞི་ཡབ་ལ་གཞུག་ཅིང༌། རྡོར་དབྱིངས་མ་དང་ཤེས་ཕྱིན་མ་ལ་ཡབ་ཀྱིས་འཁྱུད་པ་སྟེ། ལྷ་བཞི་ཡུམ་ལ་སྟིམ་པར་བྱེད་ན། འདི་ནི་རང་གིས་པདྨ་གདན་ཅན་ནི། ལྷ་བགྲོང་ཚུལ་ནོར་བའི་ཁ་གྲངས་སྒྲིག་པའི་ཆེད་ཁོ་ནར་བྱས་མོད་ཀྱང༌། རང་བཟོའི་རྣམ་འགྱུར་དུ་ཤིན་ཏུ་གསལ་བ་ཕལ་གྱིས་གོ་སླ་བ་འདུག་ཅིང༌། མཁའ་ནང་དུ་འཁོར་རྣམས་ལ་དབང་སྒྱུར་བའི་གཙོ་བོ་ཕོ་མོ་མི་འདྲ་བ་བཞི་བྱུང་པ་དང༌། ཡུམ་ལ་ལྷ་ཕོ་བསྟིམ་པ་སོགས་ལུང་རིག་མན་ངག་ཐམས་ཅད་དང་བྲལ་བར་མ་ཟད། འཇིག་རྟེན་པའི་ལུགས་དང་ཡང་འགལ་ཞིང༌། འདི་འདྲ་སྒོམ་པ་པོ་མང་པོ་མ་བྱུང་བས་ལེགས་སྣང༌། མང་དུ་བྱུང་ན་འཇིག་རྟེན་དུ་བྱུར་དང་སྐལ་ངན་འཕེལ་བར་འགྱུར་བ་ཞིག་སྟེ་ངག་ལས་ཤེས་པར་བྱའོ། །པདྨ་གདན་ཅན་གྱི་ལྷ་གྲངས་བགྲོང་བ་ལ་ཡང་འདིས་མི་ཕན་ཏེ། དེ་ལ་ཕྱི་རོལ་ཏུ་དངོས་སུ་ཡོད་པ་དགོས་ཀྱི། བསྟིམ་ནས་ཁོང་དུ་བཞུགས་པས་གོ་མི་ཆོད་དོ།། གཞན་དུ་ན་ཡེ་ཤེས་པ་བསྟིམ་པས་ལྷ་གྲངས་ཤིན་ཏུ་མང་བར་འགྱུར་བའི་ཕྱིར་ རོ། །འདི་ལ་རིག་པའི་གནོད་བྱེད་གཞན་ཡང་ཡོད་དེ། གསང་འདུས་ལུགས་གཉིས་ལྟ་བུའི་དཀྱིལ་འཁོར་རྒྱལ་མཆོག་ལྟར་མངལ་དཀྱིལ་གྱི་གཙོ་བོ་དེ་ཕྱི་དཀྱིལ་གྱི་གཙོ་བོའི་བདག་པོར་བཞུགས་པས་དེའི་ངོ་བོར་གྱུར་པ་ཞིག་དགོས་པ་ལ་བསམས་ན། གཙོ་བོ་དེ་རྡོར་སེམས་ཡིན་ན་རྡོར་སེམས་བསྟིམས་པ་ལ་དགོས་པ་མེད་པ་དང༌། མི་
བསྐྱོད་པ་ཡིན་ན་མི་བསྐྱོད་པ་བསྟིམ་པ་དགོས་པ་མེད་དེ། སྔ་རོལ་ནས་དེ་དང་དེ་ཡིན་པའི་ཕྱིར་རོ། །ཡང་རང་གི་རིགས་ཉིད་ཡིན་པའི་ཆེད་དུ་མཚོན་ན་ནི། རྡོར་སེམས་ཡིན་པ་དེ་ལ་མི་བསྐྱོད་པ་བསྟིམ་པ་མི་རིགས་ཤིང་གཅིག་ཤོས་ལ་ཡང་དེ་དང་མཚུངས་སོ། །དེས་ན་རང་ལུགས་ནི་རྒྱལ་མཆོག་འདིར་གཙོ་བོ་རྡོར་སེམས་ལ་མི་བསྐྱོད་པ་གཉིས་མེད་དུ་འདྲེས་པར་བསྟིམ་པས་རིགས་དྲུག་ཀར་ཚང་ཞིང་གཙོ་བོ་གཉིས་མི་དགོས་པ་དང༌། རྒྱལ་མཆོག་ཕྱི་མར་གཙོ་བོ་མི་བསྐྱོད་པ་ལ་རྡོར་སེམས་བསྟིམ་པས་ཀྱང་དེ་དང་འདྲ་ཞིང༌། གཞན་ཡང་ཡུམ་གཙོ་བོར་གྱུར་པའི་དཀྱིལ་འཁོར་དང༌། ཡབ་གཙོ་བོར་གྱུར་པའི་དཀྱིལ་འཁོར་སོ་སོ་ལའང་སོ་སོའི་དབང་སྒྱུར་བ་པོ་ཕོ་མོ་གང་ཡིན་ཡང་ལྷ་རེ་རེ་ཡིན་གྱི། ཡབ་ཡུམ་གཉིས་ཀར་དངོས་སུ་གཙོ་ཆེ་ཆུང་ཁྱད་མེད་པའི་ཆ་མཉམ་པ་མ་བཤད་དོ། །དེའི་ཕྱིར་འདིར་ཡང་རྒྱལ་མཆོག་གཉིས་ཀར་དུ་ཡབ་གཙོ་བོ་ཡིན་པས་མཁའ་དཀྱིལ་གྱི་གཙོ་བོ་སྤྲོས་ནས་བསྟིམ་པ་ཡབ་ཁོ་ན་ལ་ཡིན་གྱི། སྣ་ཚོགས་ཡུམ་ལ་མི་དགོས་མོད། ལྗོན་ཤིང་གི་རྩ་བར་ཆུ་དྲངས་པས་ལོ་འདབ་ཀུན་ལའང་ཁྱབ་པར་འགྱུར་བ་ལྟར་དོན་གྱིས་དེ་ལའང་དེ་འདྲེས་པ་ནི་ཡིན་ནོ། །ཡང་གསང་འདུས་ལུགས་གཉིས་གྱི་དཀྱིལ་འཁོར་སྒྲུབ་པའི་སྐབས་ལྟ་བུ་ཡིན་ན་ནི། སྒྲུབ་པ་པོ་ལས་རྒྱའི་རིག་མ་དང་ལྷན་ཅིག་ཏུ་དཀྱིལ་འཁོར་སྤྲོ་བ་ཡིན་ན། དམིགས་པའི་རིམ་པ་གཞན་རྣམས་འདྲ་བ་ལ། སྒྲུབ་པ་པོས་གཙོ་བོ་ཡབ་ཀྱི་ང་རྒྱལ་དང༌། རིག་མས་གཙོ་མོའི་ང་རྒྱལ་བྱེད་པ་ཡིན་པས། དེའི་ཚེ་མཁའ་དཀྱིལ་གྱི་གཙོ་མོ་རིག་མ་ལ་བསྟིམ་པ་རུང་སྟེ། སྒྲུབ་པ་པོའི་ཕྱོགས་ནས་ཡབ་གཙོ་བོར་གྱུར་པའི་དཀྱིལ་འཁོར་བསྒོམས་ཀྱང༌། རིག་མའི་ཆ་ནས་ཡུམ་གཙོ་
བོར་གྱུར་པའི་དཀྱིལ་འཁོར་བསྒོམས་པར་སོང་བས་སོ། །འོན་ཀྱང་འདིར་དེ་ལྟ་བུ་གཏན་ནས་མ་ཡིན་ཞིང༌། ལུགས་དེ་དག་ལ་ཡང་སྒྲུབ་པའི་སྐབས་ཁོ་ན་ལ་ཡིན་གྱི། བསྙེན་པའི་སྐབས་མ་ཡིན་ནོ། །དེས་ན་འདིར་སྣ་ཚོགས་ཡུམ་ཡང་དཀྱིལ་འཁོར་གྱི་དབང་ཕྱུག་མ་ཏ་ཡིན་མོད་ཀྱི། དཔལ་དུས་ཀྱི་འཁོར་ལོའི་འཁོར་གྱི་ཚུལ་དུ་བྱ་དགོས་པས། སྟོབས་ཅུང་ཟད་ཀྱིས་ཀྱང་ཁྱད་མེད་པའི་མཉམ་པ་རང་གི་ཚུལ་དུ་མི་བལྟ་ལ། མངལ་དཀྱིལ་གྱི་གཙོ་བོ་སྟིམ་པ་སོགས་འདྲ་མཚུངས་མཉམ་པོར་བྱེད་ན། གཙོ་ཆེ་ཆུང་གི་དབྱེ་བ་ཡེ་ནས་ཕྱེད་པར་མི་འགྱུར་བས་སོ། །གཉིས་པའི་སྐབས་སུ་ཁྲོ་མོ་རྣམས་ལ་འཁོར་ལོ་སེར་པོ། ཨུཏྤལ་དཀར་པོ། པདྨ་དམར་པོ། ཁ་ཊྭཾ་ག་ནག་པོ་རྣམས་བསྐྱེད་ཆོག་གི་ཕྱག་མཚན་ཡིན་པར་འཇིགས་མེད་འབྱུང་གནས་ཀྱིས་འདོད་མའི་སྐབས་སུ་བཤད་ལ། སློབ་དཔོན་ལེགས་པའི་བུ་ཡང་དེ་དང་མཐུན་མོད། འགལ་བ་ཆེར་མེད་ཀྱང་རང་ལུགས་ཁྲོ་མོ་རྣམས་ལ་ས་བོན་མ་གཏོགས་ཕྱག་མཚན་གྱི་བསྐྱེད་ཆོག་མི་དགོས་ལ། བྱང་ཆུབ་སེམས་མ་རྣམས་བསྐྱེད་པའི་མཚན་མ་ཡང་རྒྱུད་མང་དང་གོས་དང་མེ་ལོང་དང་རོའི་སྣོད་དང་དུང་ཆོས་དང་ཆོས་འབྱུང་དུ་བཤད་པའང་ཡོད་པས། དེ་ལྟར་ཡང་རྣམ་གྲངས་སུ་བྱ་མོད་ཀྱི། ལག་ལེན་གཙོ་བོར་མི་བྱེད་དོ། །ཞི་བ་རྣམས་ལ་གཙོ་བོའི་ཚུལ་དུ་བཞུགས་པའི་ཡབ་རྐང་ཚུགས་པ་དང༌། ཡུམ་རྐང་ཚུགས་པ་གཉིས་ཀ་ཡོད་པས། ཕན་ཚུན་འཁྱུད་བྱེད་ཀྱི་ལྷ་རྣམས་ཞར་བྱུང་ཡིན་པས་ན་ས་བོན་ཕྱག་མཚན་ལས་མི་བསྐྱེད་པར་ཀྲོང་སྐྱེད་བྱེད་ཅིང༌། ཁྲོ་མོ་སྡེ་ཚན་ལོགས་སུ་མེད་པས་ཁྲོ་བོ་ལ་འཁྱུད་པས་ཁྲོ་མོ་རྣམས་ཉིད་ཞར་ལ་འོངས་པ་མ་
ཡིན་རྐང་ཚུགས་ཡིན་པས་ས་བོན་ལས་བསྐྱེད་པ་ནི་ངེས་པར་མཛད་ལ། ཕྱག་མཚན་གྱི་བསྐྱེད་ཆོག་ནི། རྒྱུད་འགྲེལ་ལས་གསལ་བར་མ་གསུངས་པའི་ཕྱིར། ལག་ལེན་དུ་མི་མཛད་དོ། །ཡང་སྒྲོལ་མའི་ཕྱག་མཚན་ཁ་ཊྭཾ་གའི་གནས་སུ་ཨུཏྤལ་སྔོན་པོ་དང༌། ཀུན་ཏུ་བཟང་པོའི་ཕྱག་མཚན་ཚངས་མགོའི་གནས་སུ་ཡང་ཨུཏྤལ་མཛད་པ་ཡོད་དེ་གདམ་ཀའོ། །བུམ་པ་རྣམས་ནི་འགྲེལ་པར་ཤར་གྱི་ལྷའི་པདྨའི་གནས་ཀྱི་བྱང་དང་ལྷོ་རུ་ཧི་ཧཱིའམ། བུམ་པ་གཉིས་སོ། །ཞེས་འབྱུང་བས། ཁ་ཅིག་ཕྱོགས་བཞིའི་རེ་མིག་གཡས་ གཡོན་རྣམས་སུ་མི་འགོད་པར་དབུས་ཀྱི་དོན་ཡོད་གྲུབ་པ་གང་དུ ་བཞུགས་པའི་རེ་མིག་དེའི་ནང་དོན་གྲུབ་ཀྱི་སྐུའི་གཡས་ གཡོན་དུ ་རྐང་འགགས་པའི་བུམ་པ་གཉིས་འགོད་པ་སོགས་གཞན་ལའང་རིགས་བསྒྲེ་མོད་ཀྱི། དེའི་གཡས་ གཡོན་གྱི་རེ་མིག་ལ་བཀོད་ཀྱང་གདན་པདྨ་དེའི་ལྷོ་བྱང་ཉིད་ཡིན་གྱི། གཞན་དུ ་མི་འགྲོ་བས་དེ་དེའི་རྒྱུ་མཚན་དུ་འདྲེན་པ་ནི་ཤིན་ཏུ་མ་ངེས་ཤིང༌། གཞན་ཁ་ཅིག་དེའི་རྒྱ་བསྐོར་དུ་རང་ཉིད་ཕྱོགས་མདོག་འཁྱོག་པོ་དེ་འདོད་པས། དེའི་ས་ཚད་ཡིད་ལ་བཞག་ནས་ཕྱོགས་འཚོལ་བར་འགྱུར་ཟེར་ཏེ། དབུས་ཀྱི་གཡས་གཡོན་ན་ཡོད་པའི་རེ་མིག་དེ་གཉིས་ནི། ཕྱོགས་དང་ཕྱོགས་མཚམས་ཀྱི་བར་ན་ཡོད་པས་སོ་སྙམ་པའོ། །དེ་ལྟར་ན་འོག་ཏུ་འབྱུང་བའི་ཐུགས་དཀྱིལ་དང་སྐུ་དཀྱིལ་གྱི་ཤར་གྱི་གཡས་དང་ཤར་གྱི་གཡོན་ཞེས་སོགས་མི་འཐད་པར་ཐལ་བར་འགྱུར་ཏེ། དེ་དག་ཕྱོགས་ཕྱོགས་མཚམས་ཀྱི་བར་ན་ཡོད་པར་འགྱུར་བས་སོ། །དེས་ན་རེ་མིག་འདི་རྣམས་ལ་ཟུར་གྱི་རེ་མིག་ལོགས་སུ་ཡོད་པ་བོར་བའི་གཞན་རྣམས་ཕྱོགས་བཞིར་བསྡུའོ།། སྟེང་འོག་གི་བུམ་པ་ནི་སྒོམ་ཆ་
ལ་གཙོ་བོའི་སྟེང་གི་བར་སྣང་དང༌། འོག་ས་གཞིའི་ནང་དུ་བསྒོམ་རྒྱུ་ཡིན་ཡང་བྲི་ཆ་ལ་ནི་ཤར་ནུབ་ཀྱི་ཁྲོ་བོའི་རྒྱབ་ཏུ་བྱེད་པའམ། བསྡུ་ན་མ་བྲིས་ཀྱང་ཆོག་གོ །ཡང་ན་བུམ་པའི་ཚབ་ཏུ་ཐོད་པ་སྟེ། ཁ་ཅིག་བུམ་པ་ལ་ཐབས་ཤེས་ཀྱི་དབྱེ་བ་བྱས་ནས་ཕྱིར་འབྱིན་པ་ལ་སྔ་ཕྱི་སྡེ་ཚན་སོ་སོར་བྱེད་དེ། རང་ལུགས་ལ་མི་དགོས་ སོ། །སྟེང་འོག་གི་ཁྲོ་བོ་ནི་བྲི་ཆ་ལ་ཤར་ནུབ་ཀྱི་ཁྲོ་བོའི་རྒྱབ་ཏུ་འགོད་པ་ཐུགས་དང་སྐུ་གཉིས་ཅར་ལ་ཡིན་གྱི། རྟ་བབས་ཀྱི་རྩེར་འགོད་པ་ནི་མི་ལེགས་པར་གོ་ལ། སྟེང་འོག་གི་བུམ་པ་བཀོད་ན་དེའི་ཡང་རྒྱབ་ཏུའོ། །ཐུགས་དཀྱིལ་རྐྱང་པ་སྒོམ་པ་ལ་ཡང་ཁྲོ་བོ་འདི་གཉིས་མ་བཀོད་ཀྱང་རུང་སྟེ། སྐུ་གསུང་ཐུགས་ཡོངས་རྫོགས་ཀྱིས་རིགས་འགྲེལ་པ་དབང་ལེར་གསུངས་པ་བཞིན་ཡིན་ལ། སྒྲུབ་ལེར་ཞར་བྱུང་གི་ཚུལ་དུ་ཁྲོ་བོ་གཙུག་ཏོར་བཀོད་དེ་ལྔར་མཛད་པ་ནི། ཐུགས་ལ་ལྔ་དང་སྐུ་ལ་ལྔ་བསྡོམས་པས་སྡེ་ཚན་སྙོམས་ཤིང་ཐབས་ཤེས་དང་ལས་དབང་གི་དག་པ་འགྲིག་པར་དགོངས་པ། ཐུགས་དཀྱིལ་རྐྱང་པ་བྱེད་ན་འདི་ཉིད་གཙོ་ཆེའོ། །ཡང་ན་སྒོ་དྲུག་བསྲུང་བའི་ཕྱིར་ཁྲོ་བོ་དྲུག་ཀ་བསྒོམས་ཀྱང་ལེགས་པ། ལས་དབང་དྲུག་དང་འབྱོར་པ་ཡིན་ལ། སྐུ་གསུང་ཐུགས་ཡོངས་རྫོགས་ཀྱི་སྐབས་ནི། ཐུགས་ལ་ཁྲོ་བོ་བཞི་དང༌། སྐུ་ལ་ཁྲོ་བོ་དྲུག་གམ། ཐུགས་ལ་ལྔ་དང་སྐུ་ལ་ལྔ་ཁོ་ན་བྱ་ཡི། གཙུག་ཏོར་རམ་གནོད་མཛེས་ཀྱང་ལན་གཉིས་གཉིས་འགོད་པ་སོགས་ནི་གདམ་ཀ་གསུངས་པ་དང༌། དཀྱིལ་འཁོར་རྒྱས་བསྡུས་སོ་སོ་ལ་སྦྱོར་ཚུལ་འཁྲུགས་ཏེ་དོན་མ་གོ་བའི་བབ་ཅོལ་ལོ། །རྒྱ་བོད་འགའ་ཞིག་ཁྲོ་མོ་རྣམས་ཕྱག་བཞི་པར་འདོད་པ་ཡང་ཐུགས་དཀྱིལ་གྱི་རྩིག་པའི་ནང་གི་ལྷ་ལ་ཕྱག་གི་གྲངས་ཉུང་མཐའ་དྲུག་ཡིན་པ་མ་གོ་བའི་རྣམ་འགྱུར་དང༌། གཙོ་བོ་མ་
གཏོགས་ཡབ་ཡུམ་ཞལ་ཕྱག་གྲངས་མཉམ་ཟླ་སྟོབས་ལས་ཐོབ་པ་དང་འགལ་བས། སློབ་དཔོན་ཆེན་པོ་འཇིགས་མེད་འབྱུང་གནས་ཀྱིས་བཤད་པ་བཞིན། ཐུགས་དཀྱིལ་གྱི་ཁྲོ་བོ་ཁྲོ་མོ་རྣམས་བཞིའམ་ལྔའམ་དྲུག་གང་འགོད་ཀྱང་རུང༌། ཞལ་གསུམ་ཕྱག་དྲུག་པ་ལས་གཞན་དུ་མི་བསམ་མོ། །ཡང་མཁས་པ་འགའ་ཞིག་ཕྱག་རྡོར་དང་ཆོས་ཁམས་མ་ནམ་མཁའ་ཐབས་ཀྱི་ཕྱོགས་ཡིན། ཀུན་བཟང་དང་སྒྲ་མ་ཡེ་ཤེས་ཤེས་རབ་ཀྱི་ཕྱོགས་ཡིན་ན། ཐབས་གཉིས་ཤར་བྱང་དང༌། ཤེས་རབ་གཉིས་ནུབ་ལྷོར་འགོད་པ་རིགས་པ་ལས། རྒྱུད་འགྲེལ་དུ་དེ་ལས་ཟློག་སྟེ་བཀོད་པ་ནི། ཡབ་ཀྱི་གནས་སུ་ཡུམ་དང་ཡུམ་གྱི་གནས་སུ་ཡབ་སོང་བའི་རྒྱུ་མཚན་གྱིས་ཡིན་གསུང་ན་དེ་ཡང་མི་འགལ་མོད། ལུས་བསམ་གྱི་དབང་གིས་སོ་ཞེས་བརྗོད་ན། ལུགས་འདི་ལ་མཛེས་པ་ཡིན་ནོ། །གཟུངས་མ་བཅུ་གཉིས་པོ་ལ། སྒྲུབ་ལེར། སྟེང་དུ་འདོད་མ་དང་གླུ་མ། འོག་ཏུ་བཤང་གཅིའི་རྩ་དག་པས་ལྷ་བཤོས་མ་དང་འབྲས་བུ་མར་གསུངས་ཤིང༌། དཀྱུས་སུ་བཀོད་པ་ནི་དབང་ལེ་ལས་འབྱུང་བ་ཡིན་ཏེ། སྤྱིར་དེ་གཉིས་གདམ་ཀ་ཡིན་ཡང་རང་རང་གི་ས་བོན་གྱི་སྔགས་ལ་སོགས་པའི་ཁྱད་པར་དང༌། མཆོད་སྔགས་ལ་སོགས་པ་དབང་ལེ་ལས་གསུངས་པ་དང་མཐུན་པ་མང་བས་གཙོ་བོར་དཀྱུས་སུ་བཤད་པ་ཉིད་ཕྱག་ལེན་དུ་མཛད་དོ། །ཁྲོ་བོ་གཟུངས་མ་ཀླུ་དང་རབ་གཏུམ་མའི་སྟེང་འོག་གི་ལྷ་རྣམས་སྒོམ་དོན་ལ་སྟེང་འོག་ཁོ་ནར་འགོད་པ་ཡིན་ལ། ཚེས་ལྷ་དང་སེམས་དཔའ་ཡབ་ཡུམ་སྟེང་འོག་གི་ལྷ་རྣམས་སྟེང་འོག་གི་ཐོབ་སྐལ་ཙམ་མ་གཏོགས། སྟེང་འོག་ཏུ་མི་འགོད་དེ་ཕྱོགས་བཞིར་འགོད་པ་ཁོ་ནའོ།། །།གསུམ་པ་ནི་གསུང་གི་རྣལ་འབྱོར་མ་རྣམས། རྒྱུད་ལས།
ཤར་དུ་ཙ་མུཎྜ་དང་དབང་པོར་འགྱུར་ཏེ་རྩེ་མོ་ཅན་དུ་ཁྱབ་འཇུག་མ་དང་རིག་བྱེད་གདོང༌། །གཤིན་རྗེར་ཕག་མོ་དྲག་པོར་འགྱུར་ཏེ་ལྷ་མིན་བདག་པོར་གདོང་དྲུག་མ་དང་བགེགས་ཀྱི་མགོན་པོའོ། །ནུབ་ཏུ་དབང་མོ་བདེན་བྲལ་དུ་འགྱུར་རླུང་དུ་ངེས་པར་དུས་ཀྱིས་གདོང་མ་དང་ནི་ཁྱབ་འཇུག་ཉིད། །གནོད་སྦྱིན་དུ་ནི་དྲག་མོ་གཤིན་རྗེར་འགྱུར་ཏེ་ཕྱུགས་ཀྱི་བདག་པོར་དཔལ་མོ་ཉིད་དང་གདོང་དྲུག་མ། །ཞེས་གསུངས་ཤིང༌། ཡི་དྭགས་དམར་དང་མཁའ་འགྲོའི་དབང་པོ་མ་ཧེ་རྨ་བྱ་གླང་ཆེན་ངང་པ་གླང་དང་གདོང་ལྔ་པ། །རིམ་པས་ཙ་མུཎྜ་ལ་སོགས་པའི་གདན་དུ་འགྱུར་ཏེ་ཕྱོགས་དང་ཕྱོགས་བྲལ་པདྨ་རྣམས་སུའོ། །ཞེས་གསུངས་ཏེ། རྒྱུད་འདིར་སྲིན་པོ་ལ་ལྷ་མིན་དུ་ཡང་ཡང་གསུངས་པ་ནི། སྔོན་ལྷ་དང་ལྷ་མིན་འཐབས་པ་ན་སྲིན་པོ་རྣམས་ལྷ་མིན་གྱི་ཕྱོགས་སུ་གྲགས་པ་དང༌། སྔོན་གྱི་ལྷ་མིན་རྣམས་ས་སྟེང་དུ་འཇུག་པ་ལང་ག་མགྲིན་བཅུ་སོགས་མིའི་སྲིན་པོ་རྣམས་ཡིན་ནོ་ཞེས་འཇིག་རྟེན་དུ་གྲགས་པ་ལྟར་བརྡ་ཆད་མཛད་པའོ། །ཡབ་རྣམས་ཀྱི་སྐུ་མདོག་གསལ་བར་མ་བཤད་ཀྱང་དུས་འཁོར་གྱི་འཁོར་གྱི་ལྷ་རྣམས་ལ་སྤྱིར་བཏང་གི་དབང་དུ་མཛད་ནས། དཀར་པོ་རྣམས་ཀྱི་ཤེས་རབ་དམར་མ་དམར་པོ་རྣམས་ཀྱི་རི་བོང་འཛིན་པ་ལྟར་དཀར་དེ་བཞིན་ཉིད། །སེར་པོ་རྣམས་ཀྱི་ཁ་དོག་ནག་མོ་དཀར་མིན་རིགས་རྣམས་ཀྱི་ཡང་མཆོག་གི་གསེར་དང་མཚུངས་ པའོ། །སྔོན་པོ་རྣམས་ཀྱི་ཁ་དོག་སྣ་ཚོགས་སླར་ཡང་ལྗང་ཁུ་རྣམས་ཀྱིས་སྔོན་པོ་རྣམས་སུ་དེ་བཞིན་གསུངས། །དེ་བཞིན་ངེས་པར་ལྷ་མོ་རྣམས་ཀྱི་རང་རིགས་ཕྱོགས་སུ་གནས་པའི་ལྷ་རྣམས་དག་ཏུ་རིག་པར་བྱ། །ཞེས་ཏེ། འདིར་ཁ་དོག་སྣ་ཚོགས་ཞེས་པ་
ནི་ལྗང་ཁུའོ། །རིག་པ་འདི་སྦྱར་ནས་ཙ་མུཎྜི་དང་ཁྱབ་འཇུག་མའི་ཡབ་བརྒྱ་བྱིན་དང༌། ཚངས་པ་སེར་པ་དང༌། ཕག་མོ་དང་གདོང་དྲུག་མའི་ཡབ་དྲག་པོ་དང་ཚོགས་བདག་དཀར་བ་དང༌། དྲག་མོ་དང་དཔལ་མོའི་ཡབ་གཤིན་རྗེ་དང་གདོང་དྲུག་དམར་བ་དང༌། དབང་མོ་དང་ཚངས་མའི་ཡབ་སྲིན་པོ་དང་ཁྱབ་འཇུག་ནག་པོར་དོན་ཐོབ་ལ་ངེས་པར་འབྱུང་ཞིང༌། འདི་ལ་རྒྱ་བོད་ཐམས་ཅད་མི་མཐུན་པ་ཡང་མེད་དོ།། སྤྱིར་འདི་རྣམས་འཇིག་རྟེན་གྱི་ལྷའི་གཟུགས་འཛིན་པ་ཡིན་པས་མ་མོ་བརྒྱད་དང༌། ལྷ་འདི་རྣམས་ཉིད་ཀྱི་འཇིག་རྟེན་པའི་སྔགས་རྒྱུད་སོ་སོ་དང་བྱུང་ཁུངས་རྣམས་དང་ཡང་མཐུན་རུང་དུ་དགོས་སོ། །དེའི་དབང་ལྟར་བྱས་ན། དཔེར་ན་ཙ་མུཎྜི་སྲིན་མོ་ཞེས་པ་སྲིན་པོའི་བཙུན་མོ་མ་ཡིན་གྱི། སྲིང་མོ་ཡིན་པ་དང༌། ཁྱབ་འཇུག་མ་ཁྱབ་འཇུག་གི་སྲིང་མོ་སོགས་མིང་མཐུན་པ་རྣམས་གོ་སླ་ཞིང༌། ཕག་མོ་ནི་ས་བདག་ཕག་གི་སྲིང་མོ་སྟེ། གཤིན་རྗེ་ལ་ལྷོ་ན་གནས་པ་དང་འོག་ན་གནས་པ་གཉིས་ལས། འོག་ཕྱོགས་ཀྱི་གཤིན་རྗེ་མོ་ཡིན་ལ། དཔལ་མོ་ནི་ཁྱབ་འཇུག་གི་བཙུན་མོ་ལྷ་མོ་དཔལ་མོ་ཉིད་ཡིན་པས་རྣམ་ཐོས་བུའི་སྲིང་མོའོ། །དེ་དག་ལ་དབྱེ་ན་རྒྱུད་གཅིག་ཀྱང་རྣམ་པ་ཐ་དད་པའི་ཚུལ་གྱིས་ལྷ་ཁོ་ནའི་བྱ་བ་བྱེད་པ་དང༌། འཇིག་རྟེན་དུ་ཕན་གནོད་སྣ་ཚོགས་པའི་ལྷ་གདོན་འདྲེས་པའི་བྱ་བ་བྱེད་པ་གཉིས་གཉིས་འབྱུང་བ་ལས། འདིར་མ་མོ་དང་རྣལ་འབྱོར་མ་སྟེ་ཕྱི་མ་ཡིན་ནོ། །འདི་རྣམས་ལྷ་སོགས་འཇིག་རྟེན་གྱི་བྱེད་པོར་འདོད་པའི་འབྱུང་པོའི་གཙོ་བོ་ཆེར་གྲགས་པ་རྣམས་ཀྱི་ནུས་མའི་ཚུལ་དུ་སྦྱོར་གྱི། རིགས་ཀྱི་བག་མ་བླངས་པའི་ཚུལ་གྱི་བཙུན་མོ་ནི་མ་ཡིན་ནོ། །དེ་བཞིན་དུ་དེ་དག་ཀྱང་ཁམས་འདི་ལྟ་
བུར་ངེས་པ་དང༌། ཕྱོགས་འདི་ལྟ་བུ་སྤྱོད་ཅེས་བྱ་བ་གདོད་ནས་ངེས་པར་གྲུབ་པ་མེད་ཀྱང༌། རྒྱུད་དུ་ཇི་ལྟར་བྱིན་གྱིས་བརླབས་པ་དེ་ལྟར་དུ་སྒྲུབ་ཅིང་རྩིས་སུ་གདབ་དགོས་པ་ཡིན་ནོ། །དཔེར་མཚོན་ན་དྲག་མོ་དེ་ནུས་མའི་ཚུལ་གྱིས་ལྷའི་གཙོ་བོ་ཐམས་ཅད་ལ་ཡང་ཡུམ་དུ་སྦྱོར་དུ་རུང་ལ། བདག་པོ་ངེས་ཅན་ནི་མེད་མོད། འདིར་ལྷོ་ཕྱོགས་ཀྱི་གཤིན་རྗེ་དང་ཡབ་ཡུམ་དུ་མཛད་ནས། ཆུ་དང་མེའི་དག་པར་བྱིན་གྱིས་བརླབས་པ་ཡིན་པས་དེས་གཞན་ཡང་མཚོན་ལ། མ་མོ་རྣམས་སྤྱིར་སྔགས་རྒྱུད་གཞན་ལས་འཇིགས་བྱེད་ཀྱི་ཚོགས་དང༌། ནག་པོ་ཆེན་པོའི་ཡུམ་དུ་བཤད་པ་ནི་ཡོད་དོ། །འདི་དག་ལས་གཞན་ཐམས་ཅད་ཞལ་གཅིག་ཕྱག་བཞི་མ། ཚངས་མ་འཁོར་བཅས་གདོང་བཞི་དང༌། གཞོན་ནུ་མ་འཁོར་བཅས་གདོང་དྲུག་ཡིན་པ་དང༌། འོག་ཏུ་ཚེས་ལྷའི་སྐབས་སུ་ཡང་ཚངས་པ་འཁོར་བཅས་གདོང་བཞི་དང༌། གཞོན་ནུ་འཁོར་བཅས་གདོང་དྲུག་ཏུ་གསལ་བར་བཤད་པས་དེ་ལས་ཟློག་སྟེ་ཞལ་གཅིག་པར་འཆད་པ་ནི་མ་བརྟགས་ པའོ། །མཚན་བརྗོད་མངོན་རྟོགས་ལས། སྟེང་འོག་གི་ཁྲོ་བོ་ཁྲོ་མོ་བཞི་པོ་གསུང་དཀྱིལ་གྱི་སྒོ་སྲུང་ལ་བཀོད་དེ། རྒྱུད་འགྲེལ་དང་དངོས་སུ་ནི་མི་མཐུན་ལ། སྒྲུབ་ཐབས་དེ་ས་བཅུའི་བྱང་སེམས་ཀྱིས་མཛད་ཟེར་བ་བདེན་ན། དཀྱིལ་འཁོར་གསུམ་ཅར་ལ་སྒོ་སྐྱོང་ཡོད་པའི་མཛེས་ཆའི་སྒོ་ནས་ལེགས་ཤིང་རུང་ལ། དེ་མི་བདེན་ན་ནི་ཅིར་ཡང་མི་རུང་ངོ༌། །འདོད་མ་རྣམས་ནི་གསུང་དཀྱིལ་གྱི་ལྷ་ཡིན་ཡང་སྐབས་འདིར་མི་སྤྲོ་སྟེ་འོག་ཏུའོ།། །།བཞི་པ་ནི། དེ་ནས་སྐུའི་དཀྱིལ་འཁོར་གྱི་ལྷ་སྣམ་ལ་ཞེས་པ་ནས། གཡོན་བརྐྱང་གི་སྟབས་ཀྱིས་གནས་པའོ་ཞེས་པའི་བར་ཏེ་
དེ་ལ་དང་པོ་ཚེས་ལྷའི་གཙོ་བོ་ལྷ་ཆེན་ཡབ་ཡུམ་ནི། རྒྱུད་ལས། ཕྱི་རོལ་ཀྱི་ནི་དབང་པོའི་སྒོ་ཡི་གཡས་སུ་ལྷ་མིན་བདག་དང་དེ་ཡི་ཕྱག་རྒྱ་སྲིན་མོར་འགྱུར། །མེར་ནི་རླུང་དང་རབ་གཏུམ་མ་སྟེ་མེ་དང་ཆུ་ལྷ་མོ་ཡང་ལྷོ་ཡི་སྒོ་ལས་གཡས་སུའོ།། ལྷ་མིན་བདག་པོར་དཔལ་ལྡན་གདོང་དྲུག་པ་དང་དཔལ་མོར་འགྱུར་ཏེ་ནུབ་ཏུ་དབང་པོ་རླུང་ལྷ་ མོ། །རླུང་དུ་ཚངས་པ་དང་ནི་གློག་མར་འགྱུར་ཏེ་ནོར་སྦྱིན་དུ་ཡང་རྒྱ་མཚོ་དང་ནི་ཕག་མོའོ། །དབང་ལྡན་ དུ་ནི་ཚོགས་ཀྱི་དབང་པོ་གཞོན་ནུ་མ་སྟེ་ནོར་སྦྱིན་གཤིན་རྗེའི་སྒོ་ཡི་གཡོན ་གྱི་ཆར། །དྲག་པོ་དུས་ཏེ་ཁྱབ་འཇུག་དང་ནི་ནོར་སྦྱིན་ཞེས་པ་ཤར་དང་ནུབ་ཀྱི་སྒོ་ཡི་གཡོན་དུའོ། །དེ་དག་རྣམས་ཀྱི་ཕྱག་རྒྱར་རབ་གྲགས་རི་སྲས་གཤིན་རྗེ་མ་དང་དཔལ་མོ་ནོར་གྱི་དབང་མོར་འགྱུར། །ཞེས་འབྱུང་ཞིང༌། དེའི་ཐད་ཀྱི་གཤིན་རྗེ་མའི་སྐད་དོད་ཡཱ་མི་ནཱི་ཞེས་འབྱུང་བ་ལ། རྒྱ་དཔེ་འགའ་ལས། ཡོ་གི་ནཱི་ཞེས་འབྱུང་སྟེ། དེ་ཡང་སྡེབ་སྦྱོར་ནི་འགྲིག་ལ། འགྱུར་རྙིང་འགའ་ལས་ཀྱང་རྣལ་འབྱོར་མ་ཞེས་བསྒྱུར་རོ། །བཞོན་པ་ནི་རྒྱུད་དུ། གསུང་གི་རྣལ་འབྱོར་མ་དང་མཚུངས་པ་རྣམས་མ་སྨོས་པར་ལྷག་པོ་རྣམས་གསུངས་པ་ནི། ལྷ་མིན་ལ་སོགས་རྣམས་ཀྱི་དེ་བཞིན་ནོར་བདག་རྩེ་མོ་ཅན་དང་ཆུ་གཏེར་རླུང་དང་ཚོགས་ཀྱི་ནི། །གླང་པོའི་དབང་པོ་དང་ནི་ལུག་དང་ཆུ་སྲིན་ཞེས་དང་རི་དྭགས་དང་ནི་བྱི་བ་རིམ་པས་སོ། །ཞེས་གསུངས་ཏེ། མེ་ལྷའི་ལུག་རྒྱ་མཚོའི་ཆུ་སྲིན་རླུང་ལྷའི་རི་དྭགས། ཚོགས་བདག་གི་བྱི་བ་རྣམས་ལྷག་པོ་ཡིན་ལ། རྭ་འགྱུར་དུ་རྒྱ་མཚོའི་གདན་ལ་སྤྲཻའུ་ཞེས་བྱུང་བ་ནི་ཆུ་སྲིན་གྱི་སྐད་དོད་མ་ཀ་ར་དང༌། སྤྲེའུ་ལ་མརྐ་ཊ་ཟེར་བ་རྒྱ་དཔེ་ལ་
ཡི་གེ་ནོར་བའོ།། དཔལ་མོའི་སེངྒེའི་ཚབ་འདིར་གནོད་སྦྱིན་གྱི་གླང་པོ་ཆེ་ཡིན་ན། ཡང་འདིར་གླང་པོའི་སྐད་དོད་མ་ཏདྒ་ཞེས་འབྱུང་བ། དེ་གདོལ་བ་ལ་ཡང་འཇུག་པས་མིའི་གཟུགས་ཅན་གདོལ་བའི་རིགས་ཀྱི་གྱད་ཡིན་པར་བསྒྱུར་བ་ཡང་ཡོད་དེ་མི་འགལ་ལོ། །ཡང་ཁ་ཅིག་ན་མཿའི་མཆོད་སྔགས་ཆེན་མོ་ན། ལྷ་ཆེན་བཅུ་གཉིས་ཀྱི་ཡུམ་གཞན་རྣམས་མ་སྨོས་པར་ཆུ་ལྷ་མོ་རླུང་ལྷ་མོ་གནོད་སྦྱིན་མོ་གཤིན་རྗེ་མོ་སྟེ་བཞི་པོ་རྣམས་སྨོས་པ་ལ་བཞི་པོ་དེ་རྣམས་ལྷག་པོ་ཡིན་ཞིང༌། གཞན་དེ་རྣམས་གསུང་གི་རྣལ་འབྱོར་མ་བརྒྱད་དང་གཅིག་པའི་ཕྱིར་གོང་དུ་སྨོས་ཟིན་པའོ།། ཞེས་གསུངས་པ་ལ། རྣལ་འབྱོར་མ་རྣམས་འབྱུང་སྐྱེས་ཡིན་ལ། འདི་རྣམས་འཆི་མེད་ན་ཆུང་ཞེས་ལྷ་ཉིད་དུ་བཤད་པས་མི་གཅིག་གོ་ཞེས་གཞན་འགོག་པར་མཛད་ཅིང༌། ཡང་དེ་ལ་ཕྱིས་ཀྱི་གཞན་རྣམས་ཡང་ལན་གྱི་ཚུལ་གྱིས་ཅ་ཅོ་འབྲེལ་མེད་མང་དུ་སྨྲ་ཡང༌། དོན་དངོས་ནི། ལྷ་མོ་ལྷག་མ་བརྒྱད་པོ་དེ་དག་རྣལ་འབྱོར་མ་བརྒྱད་དང་རྒྱུད་གཅིག་པས་མཆོད་པའི་ཡུལ་དུ་དགོས་དོན་གཅིག་ཅིང་ཡི་གེ་ཉུང་བའི་དགོས་པ་ཡོད་པའི་ཕྱིར། མཆོད་སྔགས་ཀྱི་སྐབས་སུ་དེ་ལྟར་བསྡུ་བར་མཛད་ལ། གནས་སྐབས་སུ་གནས་དང་བྱེད་པ་ནི་མི་གཅིག་པས་ལྷ་དང་འབྱུང་པོའི་རིགས་ཀྱི་དབྱེ་བ་ཡང་ཤིན་ཏུ་འཐད་དོ། །དེ་ཡང་མ་མོ་རྣམས་ནི་ཤ་ཁྲག་གི་མཆོད་པས་མཉེས་ཤིང༌། དེ་ལས་དེའི་རིག་སྔགས་འགྲུབ་པ་སོགས་མངོན་སུམ་གྱིས་གྲུབ་ལ། ལྷ་ཕོ་མོ་དངོས་རྣམས་ནི་བདུད་རྩིས་ཚིམ་པར་མི་འགྱུར་བར་ཕྱུགས་ཀྱི་ཤ་མི་གཙང་བ་ལ་ཅིའི་ཕྱིར་དགའ་ཞེས་སྐྱེས་རབས་སོ་བཞི་ལས་བཀག་པ་དོན་
ལ་གནས་པའི་ཕྱིར་རོ། །འདི་དག་ལ་དུས་ཀྱི་འཁོར་ལོའི་བསྐྱེད་རིམ་གྱི་བཤད་པ་བྱེད་པ་ཕྱིས་བྱུང་བ་རྣམས་འདོད་པ་མི་མཐུན་པ་ཁོ་ན་དང༌། ཕན་ཚུན་དགག་སྒྲུབ་ཀྱི་ཡིག་ཚོགས་ཆེས་མང་བ་སློབ་མའི་བློ་གྲོས་འཁྲུག་པར་བྱེད་པ་དག་ཡོད་མོད་ཀྱི། ཐམས་ཅད་དོན་དང་མཐུན་པའི་གཙང་སང་ངེ་བ་གཅིག་ཀྱང་མེད་དོ། །འདིར་དེ་དག་རྣམས་ཀྱིས་རྗེས་སུ་བརྗོད་པ་མཐའ་དག་འགོད་པ་ནི། གཞན་གྱི་བློ་གྲོས་འཕེལ་བ་སོགས་ཀྱིས་དགོས་པ་ཆུང་ཞིང༌། དོན་ཉུང་ངུ་ལ་ཡི་གེ་མང་པོའི་ཁུར་གྱིས་ངལ་བས་རེ་ཞིག་བཞག་ནས་སྙིང་པོ་ཙམ་བརྗོད་ན། རྒྱ་བོད་ཁ་ཅིག་སྲིན་མོ་ནི་དབང་མོ་དང༌། ཆུ་ལྷ་མོ་དྲག་མོ་དང༌། རླུང་ལྷ་མོ་ཙར་ཙི་ཀཱ་ཡིན་ཟེར་བ་སོགས་དང༌། ཡང་ཁ་ཅིག་དཔག་བསམ་འཁྲི་ཤིང་ལས། ཞི་བྱེད་ཆུའི་ལྷ་མོ་བཞིན་ཞེས་ཟེར་བ་དང༌། ཆུ་བོ་ལ་གངས་རིའི་བུ་མོ་ཞེས་པ་མིང་མཐུན་པ་རྒྱུ་མཚན་དུ་བྱས་ནས་ཆུ་ལྷ་མོ་དང༌། རི་སྲས་མ་སྟེ་ཨུ་མ་གཅིག་པར་འདོད་པ་དང༌། དྲག་མོ་ཆུ་ཁམས་ཀྱི་ལྷ་ཡིན་པས་ཆུ་ལྷ་མོ་དང༌། ཙར་ཙི་ཀཱ་རླུང་ཁམས་ཡིན་པས་རླུང་ལྷ་མོ་ཟེར་བ་སོགས་འབྲེལ་མེད་མང་པོ་སྨྲ་ཡང༌། དེ་དག་གི་རྗེས་སུ་མི་འབྲང་པར་ཐོག་མར་ངོས་འཛིན་འདི་ལྟར་བྱ་སྟེ། སྲིན་པོའི་ཡུམ་སྲིན་མོ་ནི་ཙར་ཙི་ཀཱ་ཉིད་དང་༡། སྔར་ཁྱབ་འཇུག་མ་དང་ཚངས་པ་མཉམ་པར་སྦྱོར་བ་ནི། འདིར་ཚངས་པ་ལ་གློག་མས་འཁྱུད་པ་དང་གཅིག་སྟེ། གློག་མ་ནི་ཁྱབ་འཇུག་གི་སྤུན་ཟླ་ཆེན་མོ་ཡིན་པར་བྷ་ག་བ་ཏ་དང༌། བྷ་ར་ཏ་དང༌། སྔོན་རབས་རྣམས་ལས་མཐུན་པར་གྲགས་སོ༢། །ཕག་མོ་ནི་རྒྱ་མཚོ་དང་སྦྱོར་བ་དང་༣། གཞོན་ནུ་མ་ནི་ཚོགས་བདག་དང་སྦྱོར་བ་དང་༤། དྲག་མོ་ནི་གཤིན་རྗེ་ཡུམ་སྟེ། བསྡུས་རྒྱུད་ལས། གཤིན་རྗེ་མོ་དང་
དཔལ་མོ་ཞེས་པའི་གཤིན་རྗེ་མོ་དེ་ཡིན་ཡང༌། མཆོད་སྔགས་སུ་བཤད་པའི་ཡ་མི་ནཱི་ཞེས་པའི་གཤིན་རྗེ་མོ་མིན་ལ། གོང་དུ་སྨོས་པ་ལྟར་རྣལ་འབྱོར་མ་ཞེས་པ་ལྟར་ན། དྲག་མོ་རྣལ་འབྱོར་མ་ཀུན་གྱི་གཙོ་མོ་ཡིན་པས་དོན་མཐུན་ལ། གཤིན་རྗེ་མོ་ཞེས་པ་ལྟར་ན་གཤིན་རྗེའི་ཡུམ་ཡིན་པ་ལ་དགོངས་སོ་༥། །ལྷ་མོ་དཔལ་མོ་གདོང་དྲུག་གི་ཡུམ་སྟེ། སྐབས་འདིར་བོད་སྐད་དུ་དཔལ་མོ་ཞེས་པ་གཉིས་བྱུང་ན་ཡང་དོན་མི་གཅིག་པར་མ་ཟད། རྒྱ་སྐད་དུ་མིང་ཡང་མི་གཅིག་སྟེ། དཔལ་ལྡན་གདོང་དྲུག་པ་དང་དཔལ་མོར་འགྱུར་ཏེ་ཞེས་པའི་སྐད་དོད་ལ། ལཀྵྨཱིཿཤྲཱི་ཥཊ་མུ་ཁོ་བི་བྷ་བ་ཏི། ཞེས་འབྱུང་བ། ལཀྵྨཱི་ནི་དཔལ་མོ་ཞེས་པ་ཡིན་པས་སྐབས་འདིར་གདོང་དྲུག་གི་ཡུམ་ནི་ལཀྵྨཱི་ཡིན་ལ། དཔལ་མོ་ནོར་གྱི་དབང་མོར་འགྱུར་ཞེས་པའི་སྐད་དོད་ལ། ཤྲཱིར་དྷཱ་ནེ་ཤཱ་ཞེས་འབྱུང་བའི་ཤྲཱིཿཞེས་པ་ནི་དཔལ་མོའོ། །དེ་ནི་རྣལ་འབྱོར་མ་བརྒྱད་ལ་མི་ཐེ་སྟེ་ནོར་རྒྱུན་མའི་གཟུངས་སོགས་ལས་མ་ཧཱ་ཤྲཱི་ཡེ་སྭཱཧཱ། ཞེས་འབྱུང་བ་དེ་ཡིན་པས་ལྷ་མོ་དཔལ་ཆེན་མོ་ཞེས་གྲགས་པ་དེའོ། །ལཀྵྨཱི་མ་ནི་ཁྱབ་འཇུག་གི་ཆུང་མ་ཡིན་ཡང༌། སྐབས་འདིར་ཚེས་ལ་དབང་བའི་དོན་དུ་གདོང་དྲུག་དང་སྦྱོར་བ་སྟེ། འདི་འདྲའི་རིགས་ཅན་གཞན་ཡང་ཡོད་དོ་༦། །གནོད་སྦྱིན་གྱི་ཡུམ་ནོར་གྱི་དབང་མོ་ནི། བརྒྱ་བྱིན་གྱི་སྲིང་མོ་དབང་མོ་སྟེ། འདིར་གནོད་སྦྱིན་ལ་གླང་པོ་ཆེའི་གདན་འབྱུང་བའི་རྒྱུ་མཚན་ཡུམ་དབང་མོའི་བཞོན་པ་ཡིན་པའི་ཕྱིར་དང༌། གལ་ཏེ་ཁོལ་པོ་གདོལ་བའི་གདན་བྱེད་ན། གནོད་སྦྱིན་ཉིད་ཀྱི་སྟེ་ནོར་བདག་ལ་མིའི་བཞོན་པ་ཅན་དུ་གྲགས་པའི་ཕྱིར་རོ་༧། རབ་གཏུམ་མ་ནི་ཚངས་པའི་སྲིང་མོ་ཡིན་པར་མུ་
སྟེགས་ཅན་གྱི་སྔགས་རྒྱུད་ལ་གྲགས་ཆེ་བ་ལྟར་ཡིན་པས་ཚངས་མ་སྟེ་འདིར་རླུང་ལྷའི་ཡུམ་མོ་༨། །དེ་ལྟར་ན་རྣལ་འབྱོར་མ་བརྒྱད་དང་རྒྱུད་གཅིག་པ་རྣམས་དེ་དག་ཡིན་ལ། ལྷག་མ་བཞི་ལ་རླུང་ལྷ་མོ་ནི། རླུང་ལྷ་ཉིད་ཀྱི་སྲིང་མོ་སྟེ་སྐབས་འདིར་དབང་པོའི་ཡུམ་མོ། །ཆུ་ལྷ་མོ་ནི་ཀླུའི་རྒྱལ་པོ་རྒྱ་མཚོའི་སྲིང་མོ་སྟེ་མེ་ལྷའི་ཡུམ་ མོ། །དེ་གཉིས་མངོན་སུམ་གྱིས་གྲུབ་པ་ལས་ཕྱིན་ཅི་ལོག་ཏུ་སྨྲ་བར་མི་བྱ་ལ། ཡཀྵི་ཎཱི་གནོད་སྦྱིན་མོ་དཔལ་ཆེན་མོ་ནི་གོང་དུ་སྨྲོས་པ་ལྟར་ནོར་རྒྱུན་མའི་རིགས་ཏེ་ལྷ་མོ་དཔལ་ཆེན་མོ་ཡིན། སྤྱིར་རྣམ་ཐོས་བུའི་ཆུང་མ་ཡིན་ཡང་འདིར་ཁྱབ་འཇུག་གི་ཡུམ་དུ་བྱེད་པས་ཁྱབ་འཇུག་རང་གི་ཆུང་མ་དཔལ་མོ་མིན་གྱི་དཔལ་ཆེན་མོའོ། །མཆོད་སྔགས་སུ་འབྱུང་བའི་ཡ་མི་ནཱི་གཤིན་རྗེ་མོ་ནི། རི་སྲས་མོ་སྟེ་ཨུ་མ་ཡིན་ལ། དེ་ནི་གཤིན་རྗེའི་སྲིང་མོར་གྲགས་པ། དེ་ཉིད་དུས་ཀྱི་མཚན་མོར་ཀུན་ཏུ་གྲགས་ཤིང༌། རྒྱུད་མང་པོ་ལས་ཀྱང་བཤད་པའི་ཕྱིར་རོ།། དེས་ན་འདིའི་ཡ་མི་ནཱི་ནི་དྲག་མོའི་བཙུན་མོ་ཡིན་གྱི་གཤིན་རྗེ་ཉིད་ཀྱི་བཙུན་མོ་མིན་ཏེ་ལྕམ་མོ། །འདི་དང་དྲག་མོ་མི་གཅིག་ལ་དྲག་མོའི་འཁོར་གོ་རི་དང་ནི་རྒྱུད་གཅིག་པར་བྱའོ། །དེ་ལྟར་ལྷ་མོ་རྣམས་ངོ་བོ་ངོས་བཟུང་བ་ཡིན་ལ། ཡབ་རྣམས་ཀྱི་སྐུ་མདོག་ཕྱག་མཚན་ངེས་པར་བྱ་བ་ལ། འདིར་སྲིན་པོའི་ཡུམ་མིང་གཞན་གྱིས་མ་བསྟན་པར་སྲིན་མོར་གསུངས་པའི་དགོས་པ། ཡབ་ཡུམ་ཕྱག་མཚན་སོགས་རྣམ་པ་འདྲ་བར་གོ་དགོས་པ་ལ་དགོངས་ཤིང༌། དེ་བཞིན་དུ་གཤིན་རྗེའི་ཡུམ་གཤིན་རྗེ་མོ་དང༌། ནོར་བདག་གི་ཡུམ་ནོར་དབང་མོ་ཞེས་གསུངས་པ་ཡང་ངོ༌། །དེས་ན་གདོང་དྲུག་མ་དང་དཔལ་མོ་ལྟ་བུ་ཁྱད་པར་རེ་རེ་ཙམ་མ་གཏོགས། ཡབ་ཡུམ་ཕྱག་མཚན་སོགས་རྣམ་པ་འདྲ་བར་བྱ་ལ། སྐུ་
མདོག་ཀྱང་འདིར་ལྷ་རྣམས་ཟླ་བ་གཅིག་གི་ཚེས་སོ་སོ་ལ་འཇུག་པར་མཉམ་ལ། ཟླ་བ་གཅིག་པོ་དེའི་ཞག་སུམ་ཅུ་ལ་ཚེས་ཀྱི་སྟོབས་ལས་བྱུང་བའི་ཁམས་མི་འདྲ་བ་མང་ཡང༌། ཟླ་བའི་སྟོབས་ལས་བྱུང་བའི་ཁམས་གཅིག་ཁོ་ན་ཡིན་པས། ལྷ་ཉེར་དགུ་པོ་སྐུ་མདོག་འདྲ་བའི་རིག་པ་འདི་ལའང་འཇུག་པས་ཡབ་ཡུམ་སྐུ་མདོག་མཚུངས་པར་བྱས་ཀྱང་རུང་སྟེ། དམིགས་གསལ་ཡིན་པའི་ཕྱིར་རོ། །འདི་ལྟར་འདོད་པའི་དུས་འཁོར་བ་ཡང་མང་དུ་བྱུང་སྟེ། ནོར་བ་ཁོ་ནར་མི་བཟུང་ངོ༌། །ཡང་ཕྱག་མཚན་འདྲ་བར་བྱས་ནས། སྐུ་མདོག་རྣམས་དཀར་པོ་རྣམས་ཀྱི་ཤེས་རབ་དམར་མོ་སོགས་དུས་འཁོར་སྤྱི་འགྲོས་ཀྱི་རིག་པ་སྦྱར་ཡང་ཤིན་ཏུ་ལེགས་པ་ཡིན་ཞིང༌། རང་ལུགས་ཀྱི་བླ་མ་གོང་མ་རྣམས་ཀྱང་བཞེད་དོ། །དཔེར་ན་རིགས་ཀྱི་བུ་མོ་དེ་རིགས་གཞན་གྱི་ཁྱིམ་དུ་སོང་བ་ན་བདག་པོ་དེ་དང་བྱ་བ་གཅིག་པར་འགྱུར་བ་བཞིན་ཡུམ་རྣམས་ཀྱང་ཡབ་དང་ཕྱག་མཚན་མཐུན་པར་བྱེད་ཅིང༌། ད་དུང་རུས་དང་ངོ་བོ་མ་འགྱུར་བ་བཞིན་དུ་ཁ་དོག་ཐ་དད་དུ་བྱེད་པ་ཡིན། ཞེས་ཀྱང་གསུངས་ཏེ་མན་ངག་གོ །ཡང་ཁ་ཅིག་ཡབ་ནི་མགྲོན་གྱི་ལྷ་ཡིན་པས་ཚེས་ལྷ་ལ་མི་བགྲོང་ལ། དེ་ལྟར་ན་གྲངས་མ་ཚང་ངོ་སྙམ་ན། ཡུམ་ལ་གཉིས་སུ་འབྱེད་དེ་སྟེང་འོག་གི་ནུས་མ་བཞིན་ནོ། །ཞེས་ཟེར་བ་ནི། མངོན་སུམ་དུ་གྲུབ་པ་ལ་བསྙོན་བརྡུངས་ནས་སྐབས་དོན་མ་ཡིན་པ་འབད་པས་སྒྲུབ་པ་ཤིན་ཏུ་གཟུ་བོར་མི་གནས་པ་སྟེ། རང་ལུགས་གནམ་སྟོང་གི་ལྷ་ནི་ཡབ་དང༌། ཉའི་ལྷ་ནི་ཡུམ་ཉིད་ཡིན་པར་རིག་པར་བྱའོ། །འགྲེལ་ཆེན་ལས། ལྷ་ཆེན་བཅུ་གཉིས་ཀྱི་ཕྱག་མཚན་གསལ་བར་གསུངས་ནས།
འདབ་མའི་ལྷ་མོ་རྣམས་ཀྱི་སྐུ་མདོག་ཕྱག་མཚན་དབྱིབས་རྣམས་ཡབ་དང་འདྲ་བར་གསུངས་པས། འཁོར་ཉེར་བརྒྱད་རེ་ཡོད་པ་རྣམས་ཀྱི་ཕྱག་མཚན་ལ་རྩོད་པ་མེད་ལ། དེ་དག་དང་རིག་པ་མཚུངས་པས་འཁྱུད་ཡུམ་རྣམས་ཀྱང་ཕྱག་མཚན་འདྲ་བར་གྲུབ་ཅིང༌། ལུང་དེས་སྐུ་མདོག་ཀྱང་འདྲ་བར་ལུགས་གཅིག་ལ་གྲུབ་མོད། ལུང་གཞན་གྱིས་སྐུ་མདོག་ཐ་དད་ཀྱང་གྲུབ་པས་གདམ་ཀར་བྱའོ། །གཞན་ཕལ་གྱི་འདོད་ཚུལ་ལྟར་ཡུམ་རྣམས་ཡབ་དང་ཕྱག་མཚན་མི་འདྲ་བར་བྱེད་པའི་ལུགས་ལ། འགའ་ཞིག་གི་ཕྱག་མཚན་བརྟག་པར་དཀའ་སྟེ། ཁུངས་གསལ་བར་མེད་བཞིན་དུ་བློ་བཟོའི་རིག་འགྲོས་སྦྱོར་བ་ལོང་རྡོ་འཕེན་པར་འགྱུར་རོ།། མཚན་རིགས་མཚུངས་པའི་སྒོ་ནས་ཀྱང་ཕྱག་མཚན་ངེས་པར་མི་ནུས་ཏེ། དབང་མོ་དང་ཁྱབ་འཇུག་མ་ལྟ་བུ་རང་གི་མིང་པོ་དང་འདྲ་བར་ཡོད་ཀྱང༌། དྲག་མོ་དང་གཞོན་ནུ་མ་དང་ཙར་ཙི་ཀཱ་སོགས་རང་གི་མིང་པོ་དང་འདྲ་མིན་དུ་ཡོད་པ་དཔེར་བཞག་ན། ཆུ་ལྷ་རླུང་ལྷ་གནོད་སྦྱིན་སོགས་ཀྱི་སྲིང་མོ་རྣམས་ལ་སྒོས་ཀྱི་གསལ་ཁ་མེད་པས། རང་རིགས་ཀྱི་ལྷ་དང་ཕྱག་མཚན་འདྲའམ་མི་འདྲ་མཐའ་གཅིག་ཏུ་ངེས་པ་རྙེད་པ་མེད་ལ། རང་ལུགས་ནི་ལྷ་མོ་རྣམས་ཡབ་དང་འདྲ་བའི་ལུང་ལ་བརྟེན་ན་ངལ་དུབ་མ་དགོས་བཞིན་དུ་ཁུངས་རྙེད་པའོ།། ཁ་ཅིག་སྲིན་པོའི་ཡུམ་ནི་དབང་མོ་ཡིན་ཡང་སྡེབ་སྦྱོར་གྱི་དབང་གིས་སྲིན་མོར་གསུངས་ཟེར་བ་ནི་ཚོད་དཔོགས་ཏེ། ལྷ་མིན་བདག་དང་དེའི་ཕྱག་རྒྱ་སྲིན་མོར་འགྱུར་ཞེས་པའི་སྐད་དོད། ད་ནུ་པ་ཏི་རཱཀྵ་སཱི་ཏ་སྱ་མུ་དྲ། ཞེས་པའི་རཱཀྵ་སཱི་སྲིན་མོའི་མིང་སྟེ། དེའི་དོད་དུ་དབང་མོའི་སྐད་དོད་ཨིནྡྲ་ནཱྀ་ཞེས་པ་བཅུག་ཀྱང་སྡེབ་སྦྱོར་འགྲིག་འགྲོ་བའི་ཕྱིར་རོ། །ད་ནི་འདི་དཔྱད་དེ། འདིར་
དྲག་པོ་ནོར་སྦྱིན་ཁྱབ་འཇུག་གཤིན་རྗེ་འཁོར་བཅས་རྣམས་ཀྱི་སྐུ་མདོག་ལ་མི་མཐུན་པ་གཉིས་བྱུང་སྟེ། པཎྜི་ཏ་ལེགས་པའི་བུའི་གཞུང་དང༌། རྒྱ་བོད་ཀྱི་དུས་འཁོར་བ་ཕལ་ཆེར་དྲག་པོ་སོགས་མགོའི་ཟླ་བའི་ལྷ་དང་ནོར་བདག་སོགས་རྒྱལ་གྱི་རྣམས་ཡེ་ཤེས་ཁམས་ཡིན་པས་སྔོན་པོ་དང༌། ཁྱབ་འཇུག་སོགས་མཆུའི་དང༌། གཤིན་རྗེ་སོགས་དབོའི་ཟླ་བའི་ལྷ་རྣམས་མཁའ་ཁམས་ཡིན་པས་ལྗང་ཁུར་བྱེད་ དོ། །སློབ་དཔོན་ཨ་བྷ་ཡཱ་ཀ་རས་སྒྲུབ་ཐབས་རྒྱས་པ་ལོགས་སུ་མ་མཛད་ཀྱང༌། འཕྲེང་བར་བཀོད་པ་ལ་ཁྱབ་འཇུག་འཁོར་བཅས་ནག་པོ་གཤིན་རྗེ་དམར་པོ་ནོར་བདག་སེར་པོ་དྲག་པོ་འཁོར་བཅས་དཀར་པོའོ། །ཞེས་ཐམས་ཅད་བསྡོམས་ནས་ཕྱོགས་བཞིའི་མདོག་ཏུ་མཛད་དོ། །དེ་ལ་བོད་ཀྱི་དུས་འཁོར་བ་རྙིང་པ་མང་པོ་ཞིག་དང༌། ཁྱད་པར་རོང་པ་ཤེར་སེང་བས་དགག་པ་དང༌། ཁ་སྨོད་མང་པོ་མཛད་དོ། །ཕྱིས་སྒྲུབ་ཐབས་པད་ཞལ་མཁན་པོ་རྗེས་འབྲང་དང་བཅས་པས་ཚེས་ལྷའི་སྐབས་འདིར་ཨ་བྷ་ཡའི་ཕྱོགས་བཟུང་ནས་མཐའ་གཞན་འགོག་པ་དུ་མ་དང༌། ལུགས་སྔ་མ་མི་འཐད་ཚུལ་མང་པོ་བྱས་སོ། །ཡང་དུས་འཁོར་གྱི་བཤད་པ་བྱེད་པ་ཕྱིས་བྱུང་གཞན་ཐམས་ཅད་ཀྱིས་དེ་ལས་ཟློག་སྟེ། སཱ་དྷུ་པུ་ཊྲ་དང་ཤེར་སེང་ལ་བསྟོད་ཅིང༌། ཨ་བྷ་ཡ་ལའང་སྨད་ནས་སྒྲུབ་ཐབས་པད་དཀར་པ་ལ་དགག་པ་དུ་མ་ཞིག་བྱེད་དོ། །ཁོ་བོ་ནི་འདི་སྐད་ཅེས་སྨྲ་སྟེ། བླ་མའི་མན་ངག་རྒྱུན་མ་ཆད་པའི་ཕྱག་ལེན་གྱི་རིམ་པ་ཡིན་པ་དང༌། དོན་གྱི་གཙོ་བོ་ཡིན་པའི་ཕྱིར་ལུགས་སྔ་མ་ཉིད་ལག་ལེན་དུ་འདེབས་ཀྱང༌། འཕྲེང་བའི་ལུགས་དེ་ཡང་རྣམ་གྲངས་པའམ། གདམ་ཀའི་སྒོ་ནས་ཁས་བླང་དུ་
རུང་བས་མི་འཐད་པ་ཡང་མ་ཡིན་ནོ། །དེ་ལ་འཕྲེང་བར་དེ་ལྟར་མཛད་པ་ནི། གཤིན་རྗེ་དྲག་པོ་གནོད་སྦྱིན་གསུམ་སྲུང་འཁོར་གྱི་སྐབས་སུ་དམར་དཀར་སེར་པོར་དངོས་སུ་གསུངས་པ་དང༌། རྣལ་འབྱོར་མ་བརྒྱད་ཀྱི་ཡབ་ཀྱི་སྐབས་སུ་ཁ་དོག་དངོས་སུ་མ་གསུངས་ཀྱང༌། ནུབ་བྱང་གི་ཚངས་མ་སེར་མོའི་ཡབ་ཡིན་པས་ཁྱབ་འཇུག་ནག་པོར་ཤུགས་ལ་གསུངས་པ་ཡིན་ཏེ། དངོས་ཤུགས་ཀྱི་སྒོ་ནས་སྐུ་མདོག་དེ་རྣམས་གྲུབ་ཅིང༌། ཚེས་ལྷ་ཉིད་ཀྱི་སྐབས་སུ་སྐུ་མདོག་གི་རྣམ་གཞག་མ་བསྟན་ལ། འོག་ཏུ་འཆད་པར་འགྱུར་ཞེས་ཁ་འཕངས་པའང་མེད་པའི་ཕྱིར། སྐབས་དེར་མི་འཆད་པ་ནི། སྔར་དངོས་བསྟན་དང་ཤུགས་བསྟན་དུ་བཤད་ཟིན་པ་ལ་དགོངས་སོ་སྙམ་པ་དང༌། སྤྱིར་གདམ་ཀ་ལ་རུང་བ་དང༌། སྒོས་སུ་སྒྲུབ་ལེའི་དངོས་བསྟན་གྱི་དཀྱིལ་འཁོར་ལ་འདི་ངོས་གཙོ་ཆེ་བར་ཁོང་རང་ངམ་བླ་མའི་མན་ངག་ལས་བྱུང་ངོ༌། །མན་ངག་ནི་ཡིན་དགོས་ཏེ། སློབ་དཔོན་དེ་དུས་འཁོར་བླ་མ་ལ་ཡེ་མ་ཞུས་པར་གླེགས་བམ་བལྟས་པ་ཙམ་ཡང་མིན་ལ། ཞུས་ཀྱང་བླ་མ་ཅི་གསུང་མ་གོ་བ་དང༌། གོ་ཡང་བླ་མའི་གསུང་དང་འགལ་བར་བྱས་པའི་རྒྱུ་མཚན་མེད་ཅིང༌། རྒྱལ་བའི་བསྟན་པ་ལ་གཅེས་སྤྲས་སུ་བྱེད་ལ་རྒྱ་ཆེར་དར་ཞིང་འཛིན་པར་ནུས་པའི་མཁས་པ་ཆེན་པོ་རྫུན་མི་གསུང་བའི་རིགས་ཡིན་པ་གང་ཞིག ཡི་དམ་གྱི་བྱིན་རླབས་དང་བླ་མའི་མན་ངག་མཆོག་དང་ལྡན་པར་ཁོང་ཉིད་ཀྱི་ཞལ་གྱིས་བཞེས་པའི་ཕྱིར་རོ། །འོན་ཀྱང་ཕྱིས་བྱུང་གི་མཁས་པར་གྲགས་པ་ཕལ་ཆེར་གྱིས་ནོར་པ་ཁོ་ནར་བསྒྲགས་ཀྱང༌། དེ་རྣམས་ཀྱིས་ལུང་འགལ་བསྒྲིགས་པ་རྣམས་ནི་ཕལ་ཆེར་
འདི་ལ་མི་འཇུག་སྟེ། རིགས་བདག་དང༌། རིགས་དང་རིགས་ཅན་དང༌། ས་བོན་དང་ཕྱོགས་དང་དུས་ཏེ་རྒྱུ་མཚན་ལྔའི་སྒོ་ནས་རྒྱུད་འགྲེལ་དང་འགལ་བར་འཆད་ཀྱང་རིགས་བདག་ཙམ་ལ་སྐུ་མདོག་མ་ངེས་ཏེ། ནུས་མ་རྣམས་ཀྱི་རིགས་བདག་རྡོར་སེམས་ཡིན་ཀྱང་སྔོ་རྐྱང་ལྗང་རྐྱང་དུ་མི་བྱེད་པ་དང་སྤྲུལ་པ་སྤྲུལ་གཞིའི་རིགས་དང་རིགས་ཅན་ལ་ཡང་མ་ངེས་པ་དང༌། ཡང་མི་བསྐྱོད་པ་དང་ཁྱབ་འཇུག་བདེ་བྱེད་དང་དྲག་པོ། ཕྱག་རྡོར་དང་གཤིན་རྗེ། ཀུན་བཟང་དང་ནོར་བདག་རྣམས་སྦྱོར་མོད་ཀྱི། ཁ་དོག་མ་ངེས་ཏེ། བུམ་པ་བཅུ་ལས་ཀླུ་བཅུ་སྤྲུལ་ཡང་ཀླུ་རྣམས་བུམ་པའི་ཁ་དོག་གམ། ནང་རྫས་ཀྱི་མདོག་ཏུ་མི་བྱེད་པ་བཞིན་ནོ། །ས་བོན་གྱི་ཡི་གེས་ཀྱང་མ་ངེས་ཏེ། ཀ་སྡེ་དང་ཧ་སྡེ་མཁའ་ཁམས་ལས་ཁྱི་གདོང་མ་ནག་མོ་དང༌། སྟག་གདོང་མ་དཀར་མོ་བསྐྱེད་པ་དང༌། ཀྵཿསྡེ་དང་ས་སྡེ་ཡེ་ཤེས་ཁམས་ལས་ཕག་གདོང་མ་དམར་མོ་དང༌། ཅེ་སྤྱང་གདོང་མ་སེར་མོ་བསྐྱེད་པའི་ཕྱིར་ རོ། །ཕྱོགས་ཀྱི་དབང་དུ་བྱས་ནའང་མ་ངེས་ཏེ། ཚེས་ལྷ་འདི་རྣམས་སྒོམ་ཆ་ལ་སྟེང་འོག་ཡིན་པ་མི་འཐད་པ་དང༌། བྲི་ཆ་དང་དངོས་སུ་བཀོད་པ་ལ་ཤར་ཕྱོགས་སུ་ཡོད་པས་ལྗང་ཁུར་བསྒྲུབས་ན་འགལ་བ་ལྷག་ལྡན་དུ་འགྱུར་བ་དང༌། སྟེང་འོག་གི་ཐོབ་སྐལ་ཙམ་ཡིན་པ་ནི་རྩོད་གཞི་ཡིན་པའི་ཕྱིར་མ་ངེས་པའོ། །དུས་ལ་དེ་བས་ཀྱང་མ་ངེས་ཏེ། སྤྱིར་ཟླ་བ་བཅུ་གཉིས་དུས་བཞིར་ཡང་འདུ་ལ། དུས་བཞི་ལ་ཁམས་བཞིའི་དག་པ་ཡང་རུང་མོད། འདིར་དུས་དྲུག་ཏུ་གསུངས་པས་ཁ་དོག་དྲུག་ཏུ་འགྱུར་དགོས་སྙམ་ནའང། ནམ་མཁའ་དང་ཡེ་ཤེས་ནི་ཁམས་བཞི་པོ་ལ་སྤྱི་ཁྱབ་ཏུ་འཇུག་པས། མགོ་ཆུ་རྒྱལ་ས་མཆུ་རླུང་དབོ་མེའི་ཁམས་དང་འབྲེལ་ཆེ་བར་འཇོག་པ་
ཡང་བླ་མའི་མན་ངག་དང༌། ལྷག་པའི་ལྷས་ལུང་བསྟན་པ་ཡིན་ན་འགལ་བ་མེད་དོ། །དེས་ན་རང་ལུགས་ལ་འདི་གཙོ་བོར་མི་བྱེད་ཀྱང༌། བོད་དུ་ཕྱིས་བྱུང་བའི་མཐོང་རྒྱ་དང༌། ཐོས་རྒྱ་དང༌། འཛིན་བློ་བཟང་རབ་ཡོད་ལ། དོན་ལ་དཔྱོད་པའི་བློ་གྲོས་འབྲིང་ཙམ་བྱས་ནས་ཆེས་ཆེ་བའི་མཁས་པ་ནི་ངའོ་སྙམ་པའི་ང་རྒྱལ་གྱིས། དངོས་གནས་ལ་མཁས་ཤིང་དངོས་གྲུབ་ཐོབ་པའི་སྐྱེས་བུ་དམ་པ་ལ་བླུན་པོའོ་ཞེས་སྡིག་གསོག་པའི་སྒོ་དགག་པའི་ཕྱིར་དང༌། དགག་སྒྲུབ་ལྟར་སྣང་གི་འཚང་རྟོགས་པའི་ཕྱིར་ཟུར་ཙམ་སྨོས་པའོ། །དངོས་འགལ་གྱི་དོན་ལ་རྩོད་ན་གཅིག་གི་སྒྲུབ་བྱེད་དེ་གཅིག་ཤོས་ཀྱི་འགོག་བྱེད་དུ་འགྱུར་ཡང་གཞན་ལ་མ་ཡིན་པས། རིགས་བདག་དང༌། སྤྲུལ་གཞི་དང༌། ས་བོན་དང༌། ཕྱོགས་དང༌། དུས་ཀྱི་སྒོ་ནས་ཁམས་དྲུག་སོ་སོར་བསྒྲུབས་ཤིང༌། དེ་ལས་ཁ་དོག་དཔོག་པའི་རིག་པ་འདིས་དྲག་པོ་ནོར་སྦྱིན་སྔོན་པོ་དང༌། ཁྱབ་འཇུག་གཤིན་རྗེ་ལྗང་ཁུར་རུང་བའི་སྒྲུབ་བྱེད་ཀྱི་ལུང་ཡིན་གྱི། ལུགས་གཞན་འགོག་ཐུབ་པའི་ལུང་དུ་མི་འགྱུར་རོ། །འོ་ན་ཁ་དོག་དྲུག་ཏུ་བྱར་རུང་བའི་རྒྱབ་སྐྱོར་མཐུན་ཕྱོགས་ཀྱི་ལུང་ནི་དེ་དག་ཡིན་ན། གསལ་བར་སྟོན་པའི་ལུང་ནི་ཡེ་ལེའི་བཅུ་བདུན་པའི་འགྲེལ་པར། དེ་བཞིན་དུ་རྡོ་རྗེ་དབྱིངས་ཀྱི་དབང་ཕྱུག་མ་དང༌། གཙུག་ཏོར་དང༌། རྡོ་རྗེ་ཧཱུཾ་མཛད་དང༌། དྲག་སྤྱན་མ་དང༌། ཁྲོ་བོའི་རྒྱལ་མོ་དང༌། ཕྱག་ན་རྡོ་རྗེ་དང༌། ཆོས་ཁམས་རྡོ་རྗེ་མ་དང༌། ཁྱབ་འཇུག་དང༌། གཤིན་རྗེ་དང་ཀླུ་རྒྱལ་བ་སྟེ། འདི་རྣམས་སྟེང་གི་ཞལ་ནས་སྟོང་པ་ལས་སྤྲོས་པས་ཡོན་ཏན་མང་པོའི་གནས་ཏེ། །ལས་ཐམས་ཅད་ཀྱི་དངོས་གྲུབ་སྟེར་བར་རྡོ་རྗེའི་མཚན་མ་ཅན་མི་བསྐྱོད་པས་རྒྱས་བཏབ་པ་ནམ་མཁའི་ཁ་དོག་ལས་ལྗང་ཁུའོ།། ཞེས་དང༌། རྡོ་རྗེ་ཤུགས་དང༌། ཤིན་ཏུ་སྔོན་མོ་དང༌། དྲག་མོ་དང༌། ཛམྦྷ་ལ་དང༌། ཀུན་ཏུ་བཟང་པོ་དང༌། སྒྲ་རྡོ་རྗེ་མ་དང༌།
ཀླུ་རྣམ་པར་རྒྱལ་བ་སྟེ། སྐྱེ་བོ་ཀུན་ལ་ཕན་པ་འདི་རྣམས་སྲོག་ཆགས་རྣམས་ཀྱི་ཐར་པའི་རྒྱུ་རུ་འོག་གི་ཞལ་ཡེ་ཤེས་ཀྱི་ཆོས་ལས་སྤྲོས་པ། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ལས་ཁ་དོག་སྔོན་པོ་མི་བསྐྱོད་པའི་སྐུ་སྔོན་པོ་དང་རྡོ་རྗེ་སེམས་དཔས་རྒྱས་བཏབ་པ་ལས་ཐམས་ཅད་སྒྲུབ་པར་བྱེད་པའོ། །ཞེས་ཁྱབ་འཇུག་དང་གཤིན་རྗེ་ལྗང་ཁུ་དང༌། དྲག་པོ་དང་ཛམྦྷ་ལ་སྔོན་པོར་བཤད་པས་སོ། །ཞེས་ཚེས་ལྷ་རྣམས་ཁ་དོག་དྲུག་གི་དབྱེ་བ་མཛད་པ་ཐམས་ཅད་འདི་ལུང་དུ་འདྲེན་པ་ལྟར། ཁ་དོག་དེ་ལྟར་བྱེད་པ་ཙམ་ལ་ལུང་རྣམ་པར་དག་པར་རང་ལུགས་ལ་ཡང་འདོད་མོད། འདི་ཡང་སྐུ་གསུང་ཐུགས་ཡོངས་རྫོགས་ལྟ་བུའི་དཀྱིལ་འཁོར་གྱི་ལྷ་ལ་འགོད་པའི་སྐབས་སུ་གསུངས་པ་ཐམས་ཅད་ནི་མ་ཡིན་ནོ། །ལྷ་ཚོགས་ལ་ཡང་རྡོ་རྗེ་ཤུགས་དང་ཁྲོ་མོའི་དབང་ཕྱུག་སོགས་ཀྱང་གསུངས་པ་དང༌། དངོས་སུ་གང་གི་ཆེད་དུ་གསུངས་པ་ཡང་ཞལ་དྲུག་པའི་རྣལ་འབྱོར་གྱིས་ཁམས་དྲུག་གིས་བསྡུས་པའི་ལྷ་ཚོགས་རྣམས་སྤྲོས་ཏེ་ལས་སོ་སོ་བ་རྣམས་དུས་མཉམ་དུ་སྒྲུབ་པའམ། ཡང་ཆུ་ཁམས་པའི་སྡེ་ཚན་ཆ་ཚང་བ་ཁོ་ན་སྤྲོས་ཏེ། ཞི་རྒྱས་སྒྲུབ་པ་ལ་སོགས་པ་གཞན་ལའང་རིགས་འགྲེ་བ་དང༌། ལྷ་གཅིག་སྤྲོས་ནས་ལས་གཅིག་སྒྲུབ་པ་ལ་སོགས་པ་ཇི་ལྟར་འོས་པའི་ཚུལ་དུ་ལས་ལ་སྦྱོར་བ་ཡིན་ནོ། །དེ་ལྟར་ཡིན་ཡང་དཀྱིལ་འཁོར་རྫོགས་པའི་ལྷ་ཚོགས་ལའང་སྦྱོར་ནི་དགོས་ལ། ཁྱད་པར་དུ་ཡང་རྒྱུད་འགྲེལ་གྱི་གོང་འོག་ནས་སྲུང་འཁོར་གྱི་སྐབས་ལྟ་བུའི་རྣམ་གཞག་གཞན་དང༌། གསུང་གི་རྣལ་འབྱོར་མའི་སྐབས་ཀྱི་ཤུགས་བསྟན་ལྟ་བུ་མ་ཡིན་པར་སྐུ་གསུང་ཐུགས་ཀྱི་དཀྱིལ་འཁོར་གྱི་ལྷ་ཚོགས་གཙོ་བོ་བསྡུས་པའི་ཁ་དོག་གསལ་པོར་བསྟན་པའི་སྐབས། ལྷ་ཆེན་བཞི་
པོ་དེ་རྣམས་ཀྱི་ཁ་དོག་དམིགས་ཕུག་སྟེ་སྟོན་པ་འདི་ཁོ་ན་ཡིན་པའི་ཕྱིར། འདི་ལྟར་བྱས་ན་ཤིན་ཏུ་བཟང་བ་ནི་ཡིན་ཏེ། དེའི་ཚེ་གོང་དུ་སྨོས་པ་ལྟར་གྱི་རིགས་བདག་དང་སྤྲུལ་གཞི་དང༌། ས་བོན་དང་ཕྱོགས་དང་དུས་དང་ཁམས་རྣམས་ཐམས་ཅད་སྐུ་མདོག་གི་སྟེང་དུ་འགྲིག་པས་སྐབས་དོན་གྱི་གཙོ་བོ་འདི་ཉིད་ཡིན་ལ། ཁ་དོག་བཞིར་བསྡུ་བ་ལས་འདི་ལེགས་མོད་ཀྱི། དུས་འཁོར་རང་ཉིད་སྒོས་སུ་གཏན་ལ་འབེབས་པའི་སྐབས་མ་ཡིན་པར་དཀྱིལ་འཁོར་རིགས་མང་པོའི་སྡེ་ཚན་གྱི་ནང་དུ་འཆད་པའི་ཚེ། དོན་ལ་འགལ་བ་མེད་ཕྱིན་འཇུག་པ་བདེ་བ་ལེགས་པར་བསམས་ཏེ། སློབ་དཔོན་དེས་དེ་ལྟར་མཛད་པ་ཡིན་གྱི། སློབ་དཔོན་དེ་ལུགས་འདི་ཡང་གཏན་ནས་མི་བཞེད་པར་མ་ངེས་སོ། །སྐུའི་སྒོ་སྐྱོང་ཁྲོ་བོ་རྣམས་ཀྱི་སྐབས་སུ། དབྱུག་པ་མདའ་གཏུན་ཤིང་བེ་ཅོན་ཏེ་ཁྲོ་བོ་བཞི་དང༌། དྲག་སྤྱན་མའི་རྩེ་གསུམ་རྣམས་གསལ་བར་བྱུང་ལ། འཕྲེང་བ་ལས། འོད་ཟེར་ཅན་མ་སོགས་བཞི་ལ་འཁོར་ལོ། ཐོ་བ་མདའ་རལ་གྲི་རྣམས་སྐྱེད་བྱེད་ཀྱི་མཚན་མར་བཞེད་ནའང༌། རང་ལུགས་ཁྲོ་མོ་གཙོ་བོར་བྱེད་ན་རང་རང་གི་ས་བོན་ཕྱག་མཚན་ལས་བསྐྱེད་དགོས་པ། དྲག་སྤྱན་མ་ལ་རྩེ་གསུམ་གསུངས་པ་མཚོན་བྱེད་ཙམ་སྟེ། དེའི་ཚེ་འོད་ཟེར་ཅན་མ་ལ་སོགས་པ་ཡང་བེ་ཅོན་སོགས་ཁྲོ་བོ་དང་འདྲའོ། ཁྲོ་བོ་གཙོ་བོར་བྱེད་ན། ཁྲོ་བོ་རྣམས་ས་བོན་ཕྱག་མཚན་དང༌། ཁྲོ་མོ་རྣམས་ས་བོན་ཙམ་ལས་སྐྱེད་དོ། །སྐུའི་སྒོ་སྐྱོང་གི་སྐབས་འདིར། རྒྱ་བོད་འགའ་ཞིག་ཡབ་ཐམས་ཅད་ཞལ་གསུམ་ཕྱག་དྲུག་པ་ལ། ཡུམ་རྣམས་ཕྱག་བཞི་མར་བྱེད་པ་དང༌། རང་ལུགས་ཁ་ཅིག་ཀྱང་གཙུག་ཏོར་ཞལ་གསུམ་ཕྱག་དྲུག་པ། ཁྲོ་བོ་ལྔ་དང་ཁྲོ་མོ་དྲུག་ཕྱག་བཞི་པར་མཛད་
པ་བྱུང་ཡང༌། སྐུ་དཀྱིལ་གྱི་སྒོ་སྲུང་དུ་འགོད་ཕྱིན་གཙུག་ཏོར་ཡང་ཕྱག་བཞི་པར་བྱེད་དགོས་ན། ཁྲོ་བོ་གཞན་རྣམས་ལྟ་ཅི་སྨོས་ཏེ། གསུང་དཀྱིལ་དང་སྐུ་དཀྱིལ་གྱི་རྩ་བའི་ལྷ་ལ་ཕྱག་བཞི་པ་ལས་མང་བ་མི་རུང་བའི་ཕྱིར་རོ། །འོ་ན་སྲུང་འཁོར་གྱི་སྐབས་སུ། གཙུག་ཏོར་འཁོར་ལོས་བསྒྱུར་བ་ལ་འཆད་པར་འགྱུར་བ་ལྟར་ཞེས་ཐོག་མའི་གསལ་བྱེད་དུ་མཛད་ཅིང༌། འཆད་འགྱུར་སྒྲུབ་ལེའི་སྐབས་ཀྱི་མངོན་རྟོགས་ལ་ངོས་འཛིན་པ་དང༌། སྲུང་འཁོར་གྱི་སྐབས་སུ་ཁྲོ་བོ་ཐམས་ཅད་ཟླ་སྟོབས་ཀྱི་དབང་གིས་ཞལ་གསུམ་ཕྱག་དྲུག་པར་འགྱུར་ན། ཡང་སྐུའི་སྒོ་སྐྱོང་རྣམས་ལ་ཞལ་ཕྱག་གི་གསལ་ཁ་མ་བྱུང་རུང༌། རིམ་པ་གཅིག་ལ་གནས་པའི་ཟླ་སྟོབས་ཀྱི་དབང་གིས་དབྱུག་སྔོན་སོགས་དྲུག་པོ་ཕྱག་བཞི་པར་བསྒྱུར་དགོས་ན། ཁྲོ་བོ་འདི་རྣམས་ཀྱི་ཞལ་ཕྱག་མང་ཉུང་ངེས་མེད་དུ་ཐལ་བར་འགྱུར་རོ་ཟེར་ན། ཐལ་བ་འདོད་པ་ཡིན་ཏེ། སྐབས་ཐོབ་ཀྱི་ཞལ་ཕྱག་འགྱུར་འགྲོ་བ་ཤིན་ཏུ་མང་བའི་ཕྱིར་ཏེ། ཐུགས་དཀྱིལ་ལྷ་ཉེར་ལྔ་པའི་རིགས་གཅིག་ལ་འཁོར་གྱི་ཟླ་སྟོབས་དང་དཀྱིལ་འཁོར་གྱི་བཀོད་པའི་ཁྱད་པར་ལས་གཙོ་བོ་ཞལ་གསུམ་ཕྱག་དྲུག་པར་འགྱུར་བ་དང༌། སྡོམ་ཆེན་གྱི་སྐབས་སོགས་མདོར་ན་སྒོ་སྐྱོང་ལས་འགངས་ཆེ་བ་གཙོ་མོ་ནུས་མ་དང་བཅས་པ་ལ་ཡང་ཡོད་པས་སོ། །དེས་ན་སྒྲུབ་ལེར། གཙུག་ཏོར་ཅན་སོགས་ལྔ་རིགས་ལྔ་དང་ཞལ་ཕྱག་འདྲ་བར་དངོས་སུ་གསུངས་པ་ནི། གཙུག་ཏོར་ཅན་ཐུགས་དཀྱིལ་ལ་འགོད་པའི་དབང་དུ་བྱས་པ་ཁོ་ན་ཡིན་ལ། དེའི་ཞོར་དུ་གནོད་མཛེས་རྒྱལ་པོ་སོགས་སྔོན་པོ་རྣམས་ཀྱང་ཕྱག་མཚན་དེ་དང་འདྲ་ཞེས་གསུངས་པའང་གནོད་མཛེས་ཐུགས་དཀྱིལ་ལ་འགོད་པ་ཁོ་ནའི་དབང་དུ་མཛད་པ་ཡིན་པས། སྐུའི་སྒོ་
སྐྱོང་ལ་འགོད་པའི་ཚེ་དེ་དག་ལུང་དུ་མི་འགྱུར་རོ།། འོ་ན་སྐུའི་ཁྲོ་མོ་རྣམས་ཞལ་གཅིག་ཕྱག་བཞི་པར་གསུངས་པའི་རྗེས་སུ་དེ་བཞིན་དུ་ཤར་དང་ལྷོ་དང་ནུབ་དང་བྱང་གི་སྒོར་དབྱུག་པ་སྔོན་པོ་དང༌། འདོད་པའི་རྒྱལ་པོ་དང༌། སྟོབས་པོ་ཆེ་དང༌། མི་གཡོ་བའོ། །ཞེས་པ་འདི་ངེས་པའོ། །ཞེས་གསུངས་པས། སྒོ་བཞིའི་ཁྲོ་བོ་བཞི་ཁོ་ན་ཕྱག་བཞི་པར་གསུངས་པ་མ་ཡིན་ནམ་ཞེ་ན། མ་ཡིན་ཏེ་སྐུ་གསུང་ཡོངས་རྫོགས་ཀྱི་དཀྱིལ་འཁོར་བཀོད་པའི་སྐབས་འདིར་ཁྲོ་བོ་བཞི་པོ་དེ་དག་ཕྱག་བཞི་པ་ཁོ་ནར་ངེས་ལ། གཙུག་ཏོར་གནོད་མཛེས་ལ་ངེས་པ་མེད་དོ་ཞེས་པ་སྟེ། ཐུགས་དཀྱིལ་ལ་བཀོད་ན་ཞལ་གསུམ་ཕྱག་དྲུག་པ་དང༌། སྐུ་དཀྱིལ་ལ་བཀོད་ན་ཕྱག་བཞི་པར་འགྱུར་བས་སོ། །ཡང་སཱདྷུ་པུ་ཏྲ་སོགས་རྒྱ་བོད་མང་པོས་གཙུག་ཏོར་དང་གནོད་མཛེས་ཕྱག་དྲུག་པ་ལ། ཡུམ་ཕྱག་བཞི་པར་མཛད་པ་ཡང་ཅུང་ཟད་མི་ལེགས་ཏེ། གཙོ་བོ་ཡབ་ཡུམ་ནི་བརྗོད་པའི་ཡུལ་མ་ཡིན། གཞན་སྐུ་གསུང་ཐུགས་ཀྱི་དཀྱིལ་འཁོར་ལ་རྩིག་པའི་ནང་ཚུན་ཆད་ཀྱི་ལྷ་རྣམས་ཞལ་སྦྱོར་དུ་ཡོད་པའི་ཚེ་ཕྱག་གྲངས་མཉམ་ཁོ་ན་ཡིན་ཞིང༌། དམིགས་གསལ་ཚངས་མ་གཞོན་ནུ་མ་ཚངས་པ་གདོང་དྲུག་རྣམས་མ་གཏོགས་ཞལ་རས་ཀྱང་ངོ༌། །ཁྲོ་བོ་ཡབ་ཡུམ་གྱི་ས་བོན་ནི་འོག་གི་ལ་རིང་ཐུང་ཐབས་ཤེས་དང༌། གཞན་རྣམས་ལ་རྣམ་བཅད་ཀླད་སྐོར་ཐབས་ཤེས་ཡིན། འདིས་གཞན་མང་པོ་ལའང་རིགས་འགྲེའོ། ཁྲོ་བོ་ཐམས་ཅད་སྦྲུལ་རྒྱན་སྟག་ལྤགས་སོགས་རྒྱན་དང་ན་བཟའི་ཁྱད་པར་དང༌། སྤྱན་གསུམ་མཆེ་གཙིགས་སྐྲ་དམར་སེར་གྱེན་དུ་བརྫེས་པ་སོགས་ནི་ཁྲོ་བོ་སྤྱིའི་ལུགས་ཡིན་པས་དགོས་ལ། ཡབ་རྣམས་ཕྱག་རྒྱ་དྲུགཡུམ་རྣམས་ཕྱག་རྒྱ་ལྔ། ཐོད་སྐམ་གྱི་དབུ་རྒྱན་དང༌། མགོ་རློན་གྱི་དོ་ཤལ་སོགས་ངེས་པར་དགོས་པ་ནི་མིན་ཡང༌།
བྱུང་ན་མི་འགལ་ཞིང་ལེགས་པར་མཐོང༌། ཆོས་གྲགས་སོགས་ཁ་ཅིག་མགོ་འཕྲེང་བྱེད་ཕྱིན་བརྒྱ་འཕྲེང་དགོས་ཟེར་ཏེ། དེ་ལྟར་ན་རྡོ་རྗེ་ཤུགས་དང་ཁྱད་པར་མི་ཕྱེད་པས་ལྔ་བཅུ་ཙམ་བྱེད་པར་བླ་མ་ཤེར་སེང་བ་བཞེད་པ་འཐད་དོ།། །།ལྔ་པ་ནི། སྐུའི་སྟེགས་བུ་ལ་ཀླུ་རྣམས་སྤྲོ་བའི་ཐ་སྙད་མཛད་པ། སྐུ་དཀྱིལ་གྱི་ཕྱི་རོལ་སྟེགས་བུ་དང་ཉེ་བ་ལ་རྟ་བབས་ཀྱི་ཀ་བ་ནང་མའི་རྩ་བར་ཀླུ་བརྒྱད་ཀྱི་གདན་བྱེད་པ་ཡིན་ལ། སྒོམ་ཆ་ལ་དེ་བཞིན་ཡིན་ཡང༌། འབྲི་བ་ལ་ནི་དེའི་ཐད་ཀྱི་སྟེགས་བུ་ལ་འབྲི་བའི་ཕྱིར། ཁ་ཅིག་དེ་ལ་འཁྲུལ་ནས་གནད་འདི་མ་གོ་བར་འདོད་ཕྱིར་འདོད་སྟེགས་བུ་ལ་གནས་པའི་ཕྱིར་གཟུངས་མ་ཡིན་ན། ཀླུ་ཡང་གཟུངས་མར་ཐལ་ཟེར་བ་ནི་གད་མོའི་རྒྱུའོ། །དེ་ཅི་ལས་ཞེ་ན་ཀླུ་རྣམས་ནི་ཞལ་ནང་དུ་བལྟ་བའི་དབང་ དུ་བྱས་ནས་ཀ་བ་ལ་གཡས་གཡོན ་གྱི་ལོགས་བསྟན་ཞིང༌། གདན་གྱི་མདུན་ཕྱོགས་སྟེགས་བུ་ལ་ཐུག་པའི་སྟེགས་བུའི་ཕྱི་རོལ་གྱི་ས་གཞི་ལ་གནས་པ་ཡིན་གྱི་ཀ་བའི་ཐད་ཀྱི་སྟེགས་བུའི་སྟེང་དུ་ཡོད་པ་མ་ཡིན་པའི་ཕྱིར་རོ། །གོ་རིམ་ལ་གཏོར་སྔགས་ཀྱི་སྐབས་སོགས་ན་མི་འདྲ་བ་ཡོད་པར་འདོད་ཀྱང༌། མཐའ་ཡས་དང་རིགས་ལྡན། རིགས་ལྡན་དང་མཐའ་ཡས་ཞེས་སོགས་ཕྲན་ཚེགས་ཙམ་ཡིན་ལ། རྒྱལ་བ་རྣམ་རྒྱལ་གདེངས་ཀ་བདུན་པ་དང༌། གཞན་རྣམས་གདེངས་ཀ་ལྔ་པའོ། །ཞེས་སཱ་དྷུ་པུ་ཏྲ་འཆད་དོ། །དེ་ལྟར་ཀླུ་རྣམས་རྡོ་རྗེའི་སྐྱིལ་ཀྲུང་གིས་གནས་པ་ལ། རབ་གཏུམ་མ་རྣམས་ཀྱང་རྡོ་རྗེའི་སྐྱིལ་ཀྲུང་གིས་འཁྱུད་པ་ཡིན་ཞིང༌། ཀླུ་རྣམས་ཕྱག་མཚན་ལས་བསྐྱེད་པ་མཐའ་གཅིག་ཏུ་མི་དགོས་ལ། ས་བོན་ཁོ་ནའམ་ཕྱག་མཚན་གྱི་དོད་དུ་འབྱུང་བཞིའི་དཀྱིལ་འཁོར་གྱི་མཚན་མ་ལས་བསྐྱེད་པའང་མཛད་དོ། །ཁ་ཅིག་བུམ་པ་ལས་བསྐྱེད་དགོས་ཏེ།
ཀླུ་བརྒྱད་གང་དེ་བུམ་པ་རྣམས་ཏེ་ཞེས་གསུངས་པའི་ཕྱིར་ཟེར་བ་ནི། བུམ་པ་ཀླུའི་ཕྱག་མཚན་ཡིན་པས། དེ་ལྟར་བསྐྱེད་པ་མི་འགལ་ཙམ་ཡིན་ནའང༌། ལུང་འདྲེན་ཚུལ་དེ་ནི་ཤིན་ཏུ་བླུན་ཏེ། དེ་ནི་རིགས་དང་རིགས་ཅན་སྟོན་བྱེད་ཙམ་ཡིན་པའི་ཕྱིར་རོ། །རྒྱལ་བ་རྣམ་རྒྱལ་གྱི་ས་བོན་རྒྱན་བཀོད་གྱི་སྐབས་སུ་ཧཱུཾ་དང་ཀྵུཾ་དུ་བཤད་པའང་ཡོད་དོ། །རང་ལུགས་ནི་སྐབས་འདིར་མ་བཤད་པ་ཉིད་སྒྲུབ་བྱེད་དོ། །རབ་གཏུམ་མ་རྣམས་ནི་དུར་ཁྲོད་འཁོར་ལོའི་གནས་སུ་སྟེ། དེ་ལ་འཁྱུད་པའི་ཀླུ་རྣམས་ཀྱང་ཟླུམ་པོའི་སྟབས་སོ། །འདི་དག་ལ་དབང་ལེའི་འགྲེལ་ པར་ ཞེས་པ་ནས། འི་བར་དུ་ཕྱི་མ་བདུན་པོ་ལ་ཡི་གེ་རྣམས་འབྱུང་བའི་ཁམས་ལུགས་ཟློག་ཏུ་བརྩེགས་པ་དང༌། སྒྲུབ་ལེ་ནས་དེ་རྣམས་ ཞཻས་པ་ནས་ འི་བར་ཁམས་ལུགས་འབྱུང་དུ་བརྩེགས་ཤིང༌། དང་པོ་ཤར་གྱི་ས་བོན་ལ་གཉིས་ཀར་དུ་བྱུང་གི་མ་བྱུང་ངོ༌། །སྤྱྀར་ནི་དེ་གཉིས་ཀར་བྱར་རུང་བ་ཡིན་གྱི། རང་གར་འཇུག་པ་དགག་པའི་ཕྱིར་དཀྲུགས་པ་ལྟ་བུ་ཡང་མ་ཡིན་ལ། ཁ་ཅིག་དབང་ལེའི་དེ་བརྩེགས་ལུགས་ཁམས་ལུགས་ཟློག་ཡིན་ཡང༌། སྡེ་ཚན་གྱི་རིམ་པ་རྣམས་ལུགས་འབྱུང་ཡིན་པས། སྤྱིར་གཉིས་ཀ་ལ་ལུགས་འབྱུང་གི་ཐ་སྙད་འཇོག་གོ་ཟེར་བའང་ཡོད་དེ། ཙ་སོགས་གཞན་ལ་ལུགས་མཐུན་ཏེ། ཞེས་པའི་འབྲུ་གནོན་དུ་བསམས་པའོ། ཁ་ཅིག་དབང་གི་དུས་དྲི་མ་འཁྲུད་བྱེད་ཡིན་པས་སྡུད་རིམ་དང༌། སྒྲུབ་ཐབས་སུ་སྒྲིབ་བྲལ་གྱི་ཕུང་པོ་སྐྱེད་བྱེད་ཡིན་པས། སྐྱེ་རིམ་གྱིས་བསྟན་ནོ་ཞེས་ཀྱང་འཆད་དེ་བརྟག་གོ །འོན་ཀྱང་དཀྱུས་སུ་བཤད་པ་ནི་སྒྲུབ་ཐབས་ལེའུའི་མདོས་བསྟན་ཉིད་ལ་མ་བཅོས་པའོ། །གདན་གྱི་སྲོག་ཆགས་ལ། བསེ་ནི་རི་དྭགས་ལུས་གླང་པོ་ཆེ་དང་
མགོ་མ་ཧེ་འདྲ་བ། མགྲིན་པ་རིང་བ། དཔྲལ་བ་ན་བསེ་རུ་ཡོད་པ། ལུས་ཐམས་ཅད་འབུར་པོས་གང་བ། ཁབ་ལྟ་བུའི་སྤུ་ཐོར་ཙམ་ཡོད་པ་ཞིག་གོ །བྷེ་རུཎྜ་བྱ་སེར་པོ་བྲུན་དྲི་ཞིམ་པ་ཡོད་པ་ཞེས་ངག་རྒྱུན་ལས་འབྱུང་ཡང་བྲུན་དྲི་ཞིམ་ཞེས་པ་འཁྲུལ་ལ། བི་བྷུ་ཏི་ཙནྡྲའི་ཐུགས་དམ་ཐད་ཁ་ལ་ཡང་མདོག་དབྱིབས་དེ་བཞིན་དུ་སྣང་ངོ༌། །གཤད་གདོང་ནི་འགྱུར་གསར་དུ་བྱ་མ་བྱིར་བསྒྱུར་པ། ཕ་ཝང་ཉིད་དེ་རྒོད་གཡུང་གཉིས་ཡོད་དོ། །མིག་སྔོན་ནི་ཕུག་རོན་ཆེ་ཤོས་ཙམ་གཡུའི་མདོག་ཅན་ཤིན་ཏུ་ལེགས་པ་མཇུག་སྒྲོ་རིང་བ་ཞིག་ཡོད་དོ། །སྟེང་འོག་གི་རབ་གཏུམ་མ་གཉིས་ཀྱི་ཤིང་རྟ་ནི། ཁྲོ་བོ་ཡབ་ཡུམ་གྱི་ཤིང་རྟ་དང་འདྲའོ། །སྟེང་འོག་གི་གཏུམ་མོའི་ས་བོན་ལ་ཤིན་ཏུ་སྔོན་མོ་དང་དྲག་སྤྱན་མའི་ས་བོན་སྦྱཽར་བའང་སཱ་དྷུ་པུ་ཏྲ་སོགས་ཀྱི་ལུགས་ཏེ། རང་ལུགས་ནི་དྲི་མེད་འོད་རྩོམ་པའི་ཚེ། དེ་ཙམ་དུ་ཆད་པའི་སྐྱོན་བྱུང་བར་མི་འདོད་པས་ས་བོན་མི་བྱེད་པ་ཉིད་ཁས་ལེན་ཏེ། ཀླུ་དང་རབ་གཏུམ་མ་སྟེང་འོག་ན་གནས་པ་འདི་རྣམས་གཞན་གྱི་ཁྱབ་བྱེད་ཡིན་ཞིང༌། ཕྱོགས་མཚུངས་ཀྱི་དོན་ལ་དཔྱད་ན། པདྨ་གདན་ཅན་དང་དཔལ་ལྡན་རྒྱུ་སྐར་གྱི་དཀྱིལ་འཁོར་ལ་ཡང་མེད་ལ། རབ་གཏུམ་མ་གཉིས་པོ་རྣལ་འབྱོར་མ་སོ་དྲུག་གི་ནང་ནའང་མེད་པས། ལོགས་སུ་མ་བསྐྱེད་ཀྱང་རུང་བ་ཞིག་ཡིན་པར་འདུག་ཅིང༌། སྐྱེད་པར་བྱེད་ནའང་ས་བོན་དང་མཚན་མ་འཚོལ་བ་སོགས་ཀྱི་འབད་སྩོལ་མི་དགོས་སོ། །སཱ་དྷུ་པུ་ཏྲས་རྐང་སོར་ཀླུ་དང་ལག་སོར་རབ་གཏུམ་མར་བཤད་ དོ། །རབ་གཏུམ་མ་འདི་རྣམས་སྲུང་འཁོར་སྐབས་ཀྱི་འབྱུང་པོ་བཅུའི་ངོ་བོ་ལྷ་མོར་བསྒྱུར་བའམ། ཡང་ན་དེ་རྣམས་ཀྱི་སྲིང་མོའི་ཚུལ་དུ་གནས་པའང་ཡིན་ནོ། །ཀླུ་དང་རབ་གཏུམ་མ་འདི་རྣམས་སྐུ་
དཀྱིལ་གྱི་ལྷ་ཚོགས་སུ་གཏོགས་ལ། དཀྱིལ་འཁོར་གསུམ་ཅར་གྱི་ཐུན་མོང་བའི་ལྷའོ་ཞེས་ཀྱང་ཁ་ཅིག་གོ །ཁོར་ཡུག་གི་ལྷར་གྲགས་པ་ཀུན་རིག་དང་གཙུག་དགུ་སོགས་ལ་ཡོད་པ་དེའི་རིགས་འགྲེ་དུས་འཁོར་ལ་སྦྱོར་བ་ཤིན་ཏུ་མང་བ་རྒྱ་བོད་གཉིས་ཅར་ན་སྟེ། དེ་ཡང་འགལ་བ་རང་མེད་མོད་ཀྱི། ངེས་པར་དགོས་པ་ནི་མ་ཡིན་ནོ། །དེ་ལ་སྐབས་འདིར་གྲུབ་པ་ཉི་ཁྲི་ཆིག་སྟོང་ཞེས་གསུངས་ཤིང༌། མགོ་སྐྱེས་སྐྲ་ནི་མཁའ་ལ་སྤྱོད་པ་དང༌། འཆན་ཁུང་དུ་སྐྱེས་པ་ནི་ས་ལ་སྤྱོད་པ་དང། གསང་བར་སྐྱེས་པ་ནི་ས་འོག་ན་སྤྱོད་པ་མཚོན་པར་བཤད་ཅིང༌། གྲུབ་པའི་དེ་ནི་འཇིག་རྟེན་པའི་སྒྲུབ་པ་པོ་རིག་པ་འཛིན་པ་སྣ་ཚོགས་པ་སྟེ། རིལ་ལུ་མིག་སྨན་རལ་གྲི་གཏེར་གྱི་བུམ་པ་ལ་སོགས་པ་གྲུབ་པའི་རྣམ་གྲངས་རེ་རེ་ལ་དབང་བསྒྱུར་བའི་གྲུབ་པ་བརྒྱད་ཅུ་རྩ་བཞི་ལ་སོགས་པས་མཚོན་པའི་ལྷ་སོགས་མི་མིན་གྱི་གྲུབ་པ་ཐོབ་པའི་རྒྱལ་པོའམ། གཙོ་བོ་ཉི་ཁྲི་ཆིག་སྟོང་ ངོ༌། །འབྱུང་པོ་ནི་བ་སྤུའི་གྲངས་ཀྱིས་བྱེ་བ་ཕྲག་ཕྱེད་དང་བཞི་སྟེ། དེ་དག་ཀྱང་གཙོ་བོར་གཏོགས་པ། ལས་ཁྱད་པར་ཅན་དང་དངོས་གྲུབ་ཀྱི་བྱ་བ་ལ་འཇུག་པ་རྣམས་སོ། །གཟའ་དང་དྲང་སྲོང་དང་རྒྱུ་སྐར་དང་ཁྱིམ་བཅུ་གཉིས་དང་ཆ་བཅུ་དྲུག་དང་ཕྱོགས་སྐྱོང་བཅུ་དང་ཞིང་སྐྱོང་བཅུ་རྣམས་དང་དགའ་བྱེད་དབང་ཕྱུག་དང་ནག་པོ་ཆེན་པོ་དང་དྲིལ་བུའི་རྣ་བ་ཅན་དང༌། བྷྲིཾ་གི་ཎི་དང་ཕོ་ཉ་དང་འཕྲོག་མ་དང་གྲུབ་པ་ལ་སོགས་པ་མཐའ་ཡས་པ་འཁོད་པར་མོས་པ་ཙམ་གྱིས་ཆོག་སྟེ། འདི་དག་ལ་དཀྱིལ་འཁོར་བྲི་བའི་སྐབས་ཀྱང་སྤྲོ་ན་མཚན་མ་རྣམ་པ་སྣ་ཚོགས་འབྲི་ཞེས་ངེས་བཟུང་མ་མཛད་ཅིང༌། མི་སྤྲོ་ན་ཡིད་ཀྱིས་བཀོད་པ་ཙམ་གྱིས་ཆོག་གོ །འདི་དག་གི་ས་བོན་སྐུ་མདོག་ཕྱག་མཚན་སོགས་སྤྲོས་པ་དུ་མ་ནི། པཎྜི་ཏ་འཇམ་དཔལ་གྲགས་པའི་
ལུགས་ཀྱི་མཚན་བརྗོད་ཡོ་གའི་ལུགས་ཆོས་དབྱིངས་གསུང་དབང་སོགས་གང་རྙེད་རྙེད་ནས་སྣ་བསྡུས་སུ་བྱས་པ་ཉིད་ཀྱི་ཕྱིར། རང་བཟོའི་མཚན་ཉིད་གསལ་བར་བསྟན་ལ། དམིགས་གསལ་གྱི་ཁུངས་འཚོལ་ས་མ་རྙེད་པ་རྣམས་མནོ་བསམ་གང་སྨར་གྱི་སྟེང་ནས་བསྒྲིགས་པར་འདུག་པས། དེ་རྣམས་བསྡོམས་ཏེ་བསྒོམས་ན་སྐྱེ་བ་དུ་མར་འབད་ཀྱང་དངོས་གྲུབ་ཀྱི་མཚན་མ་གང་ཡང་མི་འབྱུང་བའི་དཀྱིལ་འཁོར་གྱི་ལྷ་ཚོགས་རྨད་དུ་བྱུང་བ་ཞིག་ཡོང་ངོ༌།། །།ད་ནི་འདོད་མ་དང་ཕྱིར་འདོད་མའི་རྣམ་གཞག་ཅུང་ཟད་བཤད་ན། སྒྲོལ་མ་ལ་སོགས་པ་ཡུམ་བཞི་ལས་བྱུང་བ་རྣམས་ལ་དབྱེ་བར་འདོད་མ་སོགས་སྦྱོར་བ་ནི། ཡུམ་བཞིའི་ལས་བྱེད་ཡིན་པས་ལས་བཞི་པོ་དང་སྦྲེལ་བའི་དོན་དང༌། རེག་བྱ་རྡོ་རྗེ་མ་སོགས་རྡོ་རྗེ་མ་བཞི་ལས་བྱུང་བ་ལ་གོས་དང་ཟས་དང་རྒྱན་དང༌། དྲིའི་བྱུག་པ་རྣམས་འདོད་པར་སྦྱོར་བ་ནི། རེག་བྱ་སོགས་ཀྱི་རྒྱུ་ཡིན་པས་སོ། །ལྷ་ཁྱབ་འཇུག་ནག་པོ་ནི། དཀའ་ཐུབ་སྤྱོད་པ་ན་མཆིལ་མ་ནང་དུ་མིད་པར་མི་བྱེད་ཅིང༌། ཁ་བཀྲུ་བ་ལ་དགའ་བར་གྲགས་ལ། ཁྱབ་འཇུག་མ་ཡང་དེ་དང་སྤྱོད་པ་མཐུན་པའི་ཕྱིར། དེ་ལས་བྱུང་བ་མཆིལ་མ་འདོར་བར་འདོད་མ་དང་དེ་བཞིན་གདོང་དྲུག་གར་ལ་དགའ་བ་དང༌། དཔལ་མོའི་མིང་པོ་ནི་རྒྱལ་སྲིད་འཛིན་པ་རྣམས་ཀྱིས་མཆོད་དགོས་པའི་ལྷ་ཡིན་པ་དང༌། ཚངས་པ་ཁྲུས་ཀྱི་དོན་དུ་ཆུ་ཀླུང་དུ་འཇུག་པ་སོགས་བཞི་ལ་རིམ་ཅན་དུ་སྦྱར་རོ། །དེ་བཞིན་དུ་ལྕགས་སྒྲོག་མ་ནི་གདུག་པ་ཅན་རྣམས་ལྕགས་སྒྲོག་རེག་པ་ཙམ་གྱིས་སྡོམས་པར་བྱེད་པ་དང། ཡང་ན་མིང་པོ་དབྱུག་སྔོན་ཅན་གྱི་གཤིན་རྗེའི་དབྱུག་པས་རེག་པ་ཙམ་གྱིས་ཐམས་ཅད་གསོད་པར་བྱེད་ཅིང༌། གསོད་པ་ལ་མངོན་པར་དགའ་བ་དང༌། ཁྲོ་གཉེར་ཅན་
མའི་མིང་པོ་འདོད་རྒྱལ་ནི་འགུགས་པའི་ལས་ལ་བསྔགས་པ་དང༌། ཙུན་ད་ཉིད་གདུག་པ་ཅན་རྣམས་འཆིང་བའི་ལས་ལ་བསྔགས་པ་དང། འོད་ཟེར་ཅན་མའི་མིང་པོ་སྟོབས་པོ་ཆེ་ཕུར་འདེབས་ཀྱི་ལྷ་ཡིན་པ་དང། ལྷ་མོ་ཉིད་ཀྱང་ཁབ་ཀྱི་ཕུར་བུས་གདུག་པ་ཅན་ལ་འདེབས་པའོ། ཁྭ་གདོང་མ་ལས་བྱུང་བ་སོགས་ལ་བྱ་རོག་ལྷག་མ་ཟ་བ་དང༌། གཡུལ་འཐབས་པས་བྱ་རྒོད་ཟས་རྙེད་པ་དང༌། འུག་པ་གཡོག་ལ་ཁྲོ་བ་དང༌། མཁའ་ལྡིང་སྦྲུལ་ཟ་བ་སོགས་སྲོག་ཆགས་དེ་རྣམས་ཉིད་ཀྱི་སྤྱོད་ཚུལ་དང་མཐུན་པའི་འདོད་པའོ། །ཤིན་ཏུ་སྔོན་མོ་ལས་བྱུང་བ་སོགས་ལ་ཁྲོ་མོ་དེ་ནི་ལྷ་དང་ལྷ་མིན་འདུལ་བའི་དོན་དུ་དཀའ་སྤྱད་ཀྱི་གདུང་བ་མཛད་པར་གྲགས་པ་དང༌། དྲག་མིག་མ་ནི་ནམ་མཁའ་ནས་ས་འོག་དང༌། ས་འོག་ནས་ནམ་མཁར་རྒྱུག་ཅིང་བགེགས་འཇོམས་པར་གྲགས་པ་དང༌། རྨུགས་བྱེད་མ་ནི་འབར་བའི་འོད་ཀྱིས་གདུག་པ་ཅན་ཐམས་ཅད་ཀྱི་གནས་སྐེམ་པར་མཛད་པ་དང༌། ཤིན་ཏུ་བརྩོན་འགྲུས་མ་ནི་བསྐྲད་པའི་ལས་ལ་བསྔགས་པ་སྟེ། དེ་ལས་བྱུང་བ་རྣམས་དེ་དག་འདོད་པའོ། །རོལ་མོ་འདོད་མ་ནི། རོལ་མོའི་སྒྲའི་བྱེ་བྲག་ཡིན་པའི་ཕྱིར་དང༌། ཁྲོ་མོ་ཁེངས་བྱེད་མ་ནི་མིང་གི་དབང་དུ་བྱས་ན་ང་རྒྱལ་བྱེད་མ་ཡིན་ལ། ང་རྒྱལ་ཅན་རྣམས་འཇམ་པར་སྨྲ་བ་སྟེ་ངོ་བསྟོད་ལ་དགའ་བ་དང༌། དབང་པོ་གཉིས་སྦྱོར་གྱི་འཁྲིག་པ་ནི། ཆོས་ཁམས་ཀྱི་འདོད་ཡོན་ཡིན་པ་དང། ཁྲོ་མོ་རེངས་བྱེད་མ་ནི་གདུག་པའི་སྐྱེ་བོ་རྣམས་ཉེ་དུ་ལ་སོགས་པའི་གཡེང་བས་སེམས་འཁྲུལ་དུ་བཅུག་ནས་རྨོངས་རེངས་ཀྱི་ལས་ལ་སྦྱོར་བར་མཛད་པས་སོ། །ཙར་ཙི་ཀཱའི་མིང་པོ་སྲིན་པོ་རྣམས་ནི་ལུས་བཙུབ་པའི་ཕྱིར། ཟ་འཕྲུ་འཕྲུག་པ་བཞིན་དུ་ལུས་འཕྲུག་པ་ལ་
མངོན་པར་དགའ་བ་ཡིན་པ་དང༌། ཁྱི་ནི་ཡན་ལག་བསྐྱོད་པས་ཀུན་ཏུ་འགྲོ་ཞིང་འཁྱམས་པ་དང༌། ཕག་མོའི་དམ་རྫས་ནི་ལུས་ཀྱི་དྲི་མ་བརྒྱད་ཡིན་པ་དང༌། ཕག་གདོང་མ་ལས་བྱུང་བ་ནི་བཤང་གཅི་ཟ་བ་ཕག་ཉིད་ཀྱི་སྤྱོད་པ་ཡིན་པས་དེ་ཟག་པར་འདོད་པ་དང༌། དྲག་མོ་ནི་འཁྲིག་སྦྱོར་དུ་ཉལ་བའི་མལ་སྟན་ལ་དགའ་བ་དང༌། སྟག་ནི་ཁྲོ་ཞིང་རྩོད་པ་ལ་དགའ་བ་དང༌། དབང་མོ་ནི་ཁྲིའམ་མལ་སྟན་མཐོན་པོ་ལ་མངོན་པར་དགའ་བའི་ཕྱིར་དང༌། ཅེ་སྤྱང་ནི་གཡོ་སྒྱུ་ཤས་ཆེ་བའི་ཕྱིར། དེ་དང་དེའི་འབྲེལ་བ་ལ་བརྟེན་ནས་འདོད་ཕྱིར་འདོད་རྣམས་ལ་སོ་སོའི་མིང་གིས་བཏགས་པ་ཡིན་ནོ། །དེ་དག་ལས་ཙུན་ད་ལས་བྱུང་བ་འཆིང་འདོད་མ་ལ། རྒྱ་སྐད་དུ་བནྡྷ་ནེ་ཙྪ་ཞེས་འབྱུང་བ་ལྟར། རྭ་དང་ཙ་མི་དང་རྣམ་གཉིས་འགྱུར་དུ་འཆིང་འདོད་མར་བསྒྱུར་ཞིང༌། དཔེ་འགའ་ཞིག་ལས་བནྡ་ཞེས་འབྱུང་བས་ཆག་ལོ་དང་ཤོང་ལོས་ཕྱག་འཚལ་འདོད་མར་བསྒྱུར། རེངས་བྱེད་མ་ལས་བྱུང་བ་ལ་ཡང་འཆིང་བར་འདོད་མ་དང་གཉེན་འདོད་མར་བསྒྱུར་བ་གཉིས་བྱུང་ངོ༌། །རྡོ་རྗེ་དབྱིངས་ཕྱུག་མ་ལས་བྱུང་བའི་བསོད་འདོད་མ་དང༌། སྣ་ཚོགས་ཡུམ་ལས་བྱུང་བའི་བསྐྱེད་འདོད་མ་སྟེ་གཉིས་པོ་ནི་སྤྱི་ཁྱབ་ཡིན་པའི་ཕྱིར་སྐབས་འདིར་མི་བསྒོམ་པར་བཤད་ལ། འདོད་ཕྱིར་འདོད་སུམ་ཅུ་སོ་བདུན་ཞེས་པ་ནི། དེ་གཉིས་གཅིག་ཏུ་བསྡོམས་པའི་མིང་ཡིན་ནོ། །འདི་དག་ཡབ་དང་བཅས་པར་འདོད་པ་ནི་མི་འཐད་ལ། དུས་ཞབས་པས་མཛད་པར་གྲགས་པའི་སྒྲུབ་ཐབས་ལས། འདོད་ཕྱིར་འདོད་འདི་རྣམས་ཕྱག་མཚན་མེད་པར་ཕྱག་སྦྲེལ་བ་ལྟ་བུར་བཤད་ཅིང༌། སློབ་དཔོན་ལེགས་པའི་བུ་ནི་འདི་རྣམས་ཞལ་གཅིག་ཕྱག་གཉིས་རང་གི་བསྐྱེད་གཞིའི་ཕྱག་
མཚན་དང་པོ་གཉིས་འཛིན་པ་བཞེད་ཅེས་གྲགས་ལ། ཨ་བྷ་ཡ་ཀཱ་རས་ནི་སྤྲུལ་གཞི་དང་འདྲ་བར་བཞེད་དེ། ལེགས་པའི་བུ་ཡང་འདི་དང་མཐུན་པར་འདོད་དམ་སྙམ་པ་ནི་བདག་གི་རྣམ་རྟོག་གོ །བལ་པོ་མེ་ཏྲི་པ་ནི་ཟད་པར་དང་གཟའ་ལ་སྤྱི་འགྲོས་སྦྱོར་མཁན་རྣམས་དང་འདྲ་བར་བྱེད། ཤོང་ལོའི་སྒྲུབ་ཐབས་ན་ཡང་དེ་བཞིན་ཡོད་པར་གྲགས། རྗེ་ཤེར་སེང་བ་ཀ་སྡེ་ལས་བྱུང་བ་སྔོན་མོ། ས་སྡེ་ལས་བྱུང་བ་ལྗང་ཁུ་ཞེས་སོགས་ལས་ཕྱག་མཚན་མི་གསུང༌། ཐང་སྟོན་ལོ་ཙཱ་བ་ནི་ཐམས་ཅད་ཞལ་གཅིག་ཕྱག་གཉིས་མཆོད་རྫས་སྣ་ཚོགས་འཛིན་པ། ཞེས་འདོད་པ་དང༌། ཆོས་རྗེ་བླ་མ་བསོད་རྒྱལ་བ་ནི། རིགས་སུམ་ཅུ་རྩ་དྲུག་གི་ཕྱག་མཚན་འཛིན་པའམ། ནང་གི་དམ་རྫས་སོ་དྲུག་སོགས་འཛིན་པར་བྱའོ་གསུང་སྟེ། ཕྱི་མ་དེ་རྣམས་བློས་བཏགས་ཙམ་མ་ཡིན་པར་བླ་མའི་མན་ངག་གམ་ལུང་ཁུངས་ཡོད་ན་མི་འགལ་ལ། མེ་ཏྲི་ཡན་ཆད་སྔ་མ་རྣམས་ནི་མན་ངག་ཡིན་མོད་ཀྱི། གཞན་རྣམས་བཏང་སྙོམས་སུ་བྱས། ཅུང་ཟད་རྒྱས་པར་ན་ཨ་བྷ་ཡཱ་ཀ་རའི་བཞེད་པ་བཞིན་བྱས་ན་ཡང་ངེས་པར་ལེགས་ལ། ཅུང་ཟད་བསྡུས་པ་རང་ལུགས་རབ་གཏུམ་མ་ལས་བྱུང་བ་རྣམས་གྲི་ཐོད་དང༌། གཞན་རྣམས་སྤྲུལ་གཞིའི་ཕྱག་དང་པོ་གཉིས་ཀྱི་ཕྱག་མཚན་འཛིན་ཞིང༌། ཐམས་ཅད་ཀྱང་སྐུ་མདོག་སྤྲུལ་གཞི་དང་འདྲ་མོད། ཞི་ཞིང་སྒེག་ལ་དར་དང་རིན་པོ་ཆེས་བརྒྱན་པ། བཞེངས་ཤིང་གར་གྱི་ཚུལ་སྣ་ཚོགས་པས་ཟུར་གྱིས་བཏེགས་པའི་སྒེག་འཆོས་ཅན་ཏེ། འདི་དག་ཀྱང་ལྷ་རྣམས་མཉེས་པར་བྱེད་པའི་གཟུངས་མ་ཁོ་ན་ཡིན་ལ། ཨ་བྷ་ཡའི་བཞེད་པ་ལྟར་ནའང་ཞལ་ཕྱག་མང་ཉུང་མ་གཏོགས། གཟུངས་མར་མི་བཞེད་པ་མིན་པས་དེའི་ལུགས་སུ་བྱའོ། །འདི་རྣམས་ཀྱི་མཚན་གྱི་བཤད་པ་ལ་མཁས་པ་
ཁ་ཅིག་གིས་རྡོ་རྗེ་སྙིང་འགྲེལ་གྱི་ལུང་དྲངས་ཤིང་འདྲ་མཚུངས་སྦྱོར་རོ། །དེ་ནི་མི་ལེགས་ཏེ་སྙིང་འགྲེལ་ལས་འདི་སྐད་ཅེས། ཆོས་རྣམས་སྟོང་པ་ཉིད་དུ་གཅིག །ཤེས་རབ་སུམ་ཅུ་རྩ་བདུན་པོ། །ཁམས་རྣམས་ཕྱི་བཞིན་དུ་ནི་ལུས། །ལུས་དེ་བཞིན་དུ་དཀྱིལ་འཁོར་རོ། །ས་མ་འདྲེས་པ་རེངས་པ་ཡིན། །ཆུ་མ་འདྲེས་པ་ཞི་བ་ཉིད། །མེ་མ་འདྲེས་པ་དབང་ཡིན་ནོ། །རླུང་འབའ་ཞིག་གིས་རྣམ་པར་སྡང༌། །སྟོང་ཉིད་གཅིག་པུས་འཚོ་བའོ། །དེ་བཞིན་འཆི་ལ་ཡེ་ཤེས་ཀྱིས། །ལས་དྲུག་འདི་དག་མ་འདྲེས་པའོ། །རྣམ་པར་འདྲེས་པའི་ལས་བཞི་ནི། ས་དང་ཆུ་ནི་འདྲེས་པ་ཡིས། །ལུས་ཅན་རྣམས་ནི་རྒྱས་པར་བྱེད། །རླུང་དང་མེ་ནི་བསྲེས་པ་ཡིས། །ལུས་ཅན་རྣམས་ནི་འགུགས་པར་བྱེད། །རླུང་དང་ཆུ་ནི་བསྲེས་པ་ཡིས། །ལུས་ཅན་རྣམས་ནི་སྐྱོད་པར་བྱེད། །ས་དང་སྟོང་ཉིད་བསྲེས་པ་ཡིས། །ལུས་ཅན་རྣམས་ནི་ལྟུང་བར་བྱེད། །ས་དང་ཡེ་ཤེས་བསྲེས་པ་ཡིས། །ལྟུང་བ་ལས་ནི་ཡང་སློང་བྱེད། །ཆུ་དང་མེ་ནི་བསྲེས་པ་ཡིས། །བུད་མེད་སྐྱེས་པ་འཇིག་ཅེས་བྱ། །ས་དང་རླུང་དུ་བསྲེས་པ་ཡིས། །རྨོངས་དང་ཕུར་བུ་ཡིས་ནི་འདེབས། །སྟོང་པ་ཉིད་དང་ཆུ་བསྲེས་པས། །སེམས་ཅན་རྣམས་ནི་ཚིམ་པར་འགྱུར། །ཡེ་ཤེས་སྟོང་ཉིད་བསྲེས་པ་ཡིས། །ཕྱིར་ཡང་འཚོ་བར་འགྱུར་བ་ཡིན། །མེ་དང་ས་ནི་བསྲེས་པ་ཡིས། །ལུས་ཅན་ཐམས་ཅད་གདུང་བ་ཡིན། །མེ་དང་སྟོང་ཉིད་བསྲེས་པ་ཡིས། །ལུས་ཅན་རྣམས་ནི་ཚ་བས་འདེབས། །མེ་དང་ཡེ་ཤེས་བསྲེས་པ་ཡིས། །ལུས་ཅན་རྣམས་ནི་ལྐུགས་པར་འགྱུར། །རླུང་དང་སྟོང་པ་བསྲེས་པ་ཡིས། །ངེས་པར་དུག་རྣམས་སེལ་བ་ཡིན། །རླུང་དང་ཡེ་ཤེས་བསྲེས་པ་ཡིས། །སྐད་ཅིག་ལ་ནི་
ཁམས་གསུམ་འཆིང༌། ཡེ་ཤེས་སྟོང་པར་བསྲེས་པ་ ཡིས། །ལུས་ཅན་ཐམས་ཅད་སྐྱེད་པ་ཡིན། །ཞེས་པ་ཙམ་ཞིག་གསུངས་པ་ཡིན་ལ། དེའི་དོན་ནི་རྣལ་འབྱོར་བ་སྲོག་གཟུགས་གྲུབ་པས་བསྐྱེད་རིམ་གྱི་ལྷ་སྒོམ་པ་དང། ངག་གི་བཟླས་པ་དང༌། ཡིག་འབྲུ་སོགས་དམིགས་པའི་ཁྱད་པར་ཕྲ་མོ་དང༌། རྫས་དང་སྦྱིན་བསྲེག་དང་འཁྲུལ་འཁོར་སོགས་ཕྱིའི་བྱ་བ་གང་ལ་ཡང་མ་བལྟོས་པར་ནང་དུ་རླུང་གི་རྣལ་འབྱོར་ཁོ་ནས་ལས་མཐའ་དག་འགྲུབ་པའི་དོན་ཡིན་ལ། འབྱུང་བ་སོ་སོའི་རླུང་བསྲེས་པས་ལས་ཐམས་ཅད་འགྲུབ་ཚུལ་བསྟན་པའི་ཤུགས་ལ་རང་ཤུགས་ཀྱི་རླུང་དེ་དག་འདྲེས་པ་ལས། ལྷ་མོ་འདི་རྣམས་ཀྱི་རྡོ་རྗེ་འབེབས་པ་རྒྱུད་ལ་སྐྱེས་པ་ན། ཉམས་མྱོང་དེ་དག་འབྱུང་ཞེས་གཙོ་བོར་རྫོགས་རིམ་དང་འབྲེལ་བར་བཤད་ན་དོན་དང་མཐུན་པ་ཞིག་ཡོད་པ་དེ་མན་ངག་གི་ཞལ་བགྲོས་ལས་བྱུང་བའི་རྣ་ཐོས་ལ་བརྟེན་ནས། མཁས་པ་ཁ་གཅིག་གིས་བསྐྱེད་རིམ་གྱི་ལྷའི་མིང་དོན་འཆད་པའི་སྐབས་སུ། སྤྲོས་པ་ལྷུར་བླངས་ནས་བློས་བཏགས་སུ་སྦྱར་བ་ན། གཞན་དག་རྒྱུ་མཚན་མེད་པར་རྒྱུག་ཅེས་པའི་རྣམ་པས། དེ་བས་ཀྱང་ཆེས་མཁས་སོ་སྙམ་དུ་རློམ་པའི་ང་རྒྱལ་ཅན་དག་ཀྱང་ལེགས་བཤད་ཡིན་མིན་གྱི་དབྱེ་བ་མི་ཤེས་པར་རང་གིས་གསར་དུ་ཤེས་པ་སྐད་དུ་བྱས་ནས་སྔ་མ་སྔ་མའི་ཟློས་བརྗོད་ཁོ་ན་བྱེད་པར་སྣང་སྟེ། འོན་ཀྱང་འདི་ལེགས་པ་མ་ཡིན་པའི་རྒྱུ་མཚན་ནི། འདོད་ཕྱིར་འདོད་ཀྱི་སྐབས་མཚན་སྦྱོར་རྒྱུའི་ལྷ་སོ་དྲུག་ཡོད་པ་ལ། སྦྱར་བྱ་འབྱུང་བ་གཉིས་འདྲེས་ཀྱི་རིགས་ལ་སྙིང་འགྲེལ་གྱི་ཚིག་ལས་འབྱུང་བའི་ལས་ཚོགས་ཀྱི་མིང་བཅོ་ལྔ་ལས་མེད་ཅིང༌། ལྷག་མ་རྣམས་བློས་གསར་དུ་སྦྱོར་དགོས་བྱུང་བ་དང༌། སྙིང་འགྲེལ་གྱི་ཚིག་ལས་བྱུང་བའི་ལས་རྐྱང་པ་དྲུག་ལ། འདིར་འདོད་མ་དང་སྦྱོར་
རྒྱུ་མེད་པའི་ཕྱིར་ཕྱོགས་གཅིག་ནས་ལྷ་ལྷག་ཅིང་ལས་ཆད། གཞན་དུ་ན་ལས་ལྷག་ཅིང་ལྷ་ཆད་པ་དང༌། རྒྱུ་མཚན་ཡང་ཤིན་ཏུ་འཁྲུལ་པ་འདི་ལྟ་སྟེ། རེག་རྡོ་རྗེ་མ་ལས་བྱུང་བའི་གོས་འདོད་མའི་སྐབས་སུ་ས་བོན་ཡི་གེ་ཚ་ནི་རླུང་ཁམས་ཀྱི་ཆུ་ཡིན་པས། རླུང་དང་ཆུ་ནི་རྣམ་བསྲེས་པས། །ལུས་ཅན་རྣམས་ནི་སྐྱོད་པར་བྱེད། ཅེས་གསུངས་པས། ཆུ་རླུང་འདྲེས་པས་གྲང་བ་སྐྱེས་པ་ན་གོས་འདོད་པའོ། །ཞེས་ལྷ་མོའི་མིང་དང་ས་བོན་གྱི་བྱེད་ལས་བསྲེས་པར་རློམ་ན། ལར་གྱི་འབྱུང་བ་སོ་སོ་བསྲེས་པ་ནི་འབྱུང་ཆེན་ནང་འཕྲད་པ་དང༌། འབྱུང་ཆུང་ནང་འཕྲད་པ་དགོས་ཀྱི། འབྱུང་ཆེན་རླུང་དང་འབྱུང་ཆུང་ཆུ་ཡིན་པ་ལ་ཆུ་རླུང་ཕྲད་པའི་དོན་མ་ཚང་སྟེ། འདིས་ཐམས་ཅད་མཚོན་ནུས་ལ། ཡང་ཆུ་རླུང་སྦྲགས་པས་གྲང་ཞིང་གོས་འདོད་བྱ་བ་ཡང་བོད་ཡུལ་དང་བསྟུན་པའི་གོ་བདེ་བདེ་མོར་སྣང་སྟེ། གོས་འདོད་ཚང་གྲང་བའི་རྒྱུ་ཁོ་ནས་མ་ཡིན་པའི་ཕྱིར་རོ། །གོས་ནི་ཚད་པ་དང༌། སྲོག་ཆགས་ཀྱི་གནོད་པ་ལས་སྐྱོབ་པའི་དོན་དུའང་མང་ལ། ལྷ་ཀླུ་མི་སོགས་ཀུན་ལ་ཐུན་མོང་དུ་འཇུག་པ་ལ་ལུས་གཅེར་བུ་མི་མཛེས་པ་དག་དགག་པའི་དོན་ཡིན་ནོ། །དེའི་ཕྱིར་རྒྱུ་མཚན་དེ་མ་ངེས་ལ། ཁྱད་པར་ལུས་ཅན་རྣམས་སྐྱོད་པར་གསུངས་པ་ནི། གདུག་པ་ཅན་གནས་ནས་སྐྲོད་པ་དང༌། ས་གཡོ་བའི་རྒྱུའི་སྐབས་སུ། བསམ་གཏན་པ་རྣམས་ཀྱིས་ས་ཆུར་བསྒོམས་ཆུ་རླུང་གིས་བསྐྱོད་པས་ས་གཡོ་གསུང་པ་ལྟར་རི་དང་ནགས་ཚལ་དང༌། ཁང་བཟངས་སོགས་གཡོ་བར་བྱེད་པའི་དོན་དུ་རུང་གི ཆུ་རླུང་སྡེབ་པ་གྲང་བས་ཁ་འདར་ཐེབས་པའི་དོན་ག་ལ་ཡིན། འདིས་དེ་ལྟར་བཤད་པ་ནི། དེའི་ཕྱིར་ཅུང་ཟད་ཀྱང་མ་འབྲེལ་ལོ། །དེ་བཞིན་དུ་མེ་རླུང་འདྲེས་པས་ཟ་འཕྲུག་ཡོང་པའང་
གང་ནས་ཀྱང་མ་བཤད་ཅིང༌། འཆིལ་མ་འདོར་བ་ཡང་སྡང་བའི་ཡུལ་ལ་འཆིལ་མ་འདོར་ཟེར་བ་འབྲེལ་མེད་ཁོ་ན་དང༌། དེ་སྡང་བར་འདོད་མ་ཞེས་འདོད་པ་ནི་སྡང་བ་ནི་དབྱེ་བ་ཡིན་པས། སྡང་བ་ལན་གཉིས་ཟློས་པ་སོགས་མདོར་ན་རེ་རེ་ལ་རྣམ་པར་བརྟགས་ན་དོན་མ་འབྲེལ་བ་ཁོ་ན་དང༌། ཚིག་ལའང་མི་འགྲིག་པ་དུ་མ་ཞིག་སྣང་སྟེ། ཙ་ཡིག་རླུང་ཁམས་ཀྱི་ས་ཡིན་པས་ས་དང་རླུང་བསྲེས་པས་དབྱེ་ཞིང་སྡང་བར་འགྱུར་ཞེས་པ་ནི། ས་དང་རླུང་ནི་བསྲེས་པ་ཡིས། །རྨོངས་དང་ཕུར་བུ་ཡིས་ནི་འདེབས། །ཞེས་པ་དང་དངོས་སུ་འགལ་བ་ལྟ་བུའང་ཡོད་ལ། གཞན་འགའ་ཞིག་སྟབས་ལེགས་ཀྱིས་ཅི་རིགས་པ་འགྲིག་པའང་སྲིད་མོད་ཀྱི། མདོར་ན་དུས་ཀྱི་འཁོར་ལོ་ལ་བརྟེན་ནས། ལས་ཚོགས་སྒྲུབ་པ་ན། ལས་ཀྱི་ལྷའི་གཙོ་བོ་འདོད་ཕྱིར་འདོད་ལ་བརྟེན་ནས་བྱེད་པའང་མ་ཡིན་པའི་ཕྱིར། འདི་འདྲའི་རིགས་རྣམས་གནད་མ་གོ་བའི་སྐྱེས་བུའི་བློ་ངོར་ལེགས་བཤད་ལྟར་སྣང་བ་འབྱུང་ཡང་སྙིང་པོ་མེད་དོ། །འདི་རྣམས་ཀྱི་ས་བོན་ནི། དཔལ་ལྡན་དབང་གི་ལེའུ་ལས། མདུན་བསྐྱེད་ཀྱི་སྐབས་ཀྱི་འགྲེལ་པར་ཕྱོགས་བཞིའི་ གཡོན་གྱི་སྟེགས་བུའི་ལྷ་སྣམ་གྱི་ས་བོན་གསུངས་པ་ལ། ཤར་སྒོའི་བྱང་དུ ་ས་ྉྤ་ཥ་ཤ་ྈྐ། བྱང་སྒོའི་ནུབ་ཏུ་ལཿཝཿརཿཡཿཧཿ ལྷོ་སྒོའི་ཤར་དུ་ཀཿཁཿགཿགྷཿངཿ ནུབ་སྒོའི་ལྷོ་རུ་ཀྵཿགཅིག་པུ་འགོད་པར་མཛད་ལ། དེ་ལྟར་གྲངས་མི་མཉམ་པར་འབྱུང་བ་ནི། ཁ་ཅིག་འདི་རྣམས་རང་རང་གི་རིགས་ཀྱི་ཕྱོགས་སུ་གནས་པར་གསུངས་པའི་ཤུགས་ལ་གོ་བར་དགོངས་ནས་བླ་ཆོས་སུ་བཤད་པ་ཡིན་ཞེས་ཟེར་ཡང་དཀའ་སླའི་ཁྱད་པར་ཆེན་པོ་མེད་པས། དངོས་བསྟན་དེ་ཁ་ལྟར་བསྒོམས་ཀྱང་ཆོག་ཅིང་ལེགས་པ་ཞིག་ཡིན་
ལ། འོན་ཀྱང་གྲངས་མཉམ་དུ་བྱས་ན་མི་ཕལ་པའི་བློ་ངོར་མཛེས་ཤིང༌། སོ་སོའི་རིགས་དང་ཕྱོགས་ཕྱོགས་མཐུན་པའི་དགོས་པ་ཡང་ཡོད་དོ། །དེ་ཡང་ཕྱོགས་བཞིའི་གཡས་ཀྱི་སྟེགས་བུ་ལ་བཞི་བཞི་ནི་ངོས་སུ་ཡིན་ལ། ལྔ་པ་རྣམས་ནི་སྟེགས་བུའི་ཟུར་ལ་གནས་པའོ། །འདི་རྣམས་ཀྱི་ས་བོན་ལ་འཁྲུལ་གཞི་མེད་པས་མི་མཐུན་པ་མེད་ཅིང༌། གཡོན་གྱི་རྣམས་ལ་མི་འདྲ་བ་གཞན་ཐན་ཐུན་འདུག་ཀྱང་འགངས་ཆུང་ལ། མཁས་པ་ཁ་ཅིག་ས་སྡེ་ཀ་སྡེ་ལ་སྡེ་རྣམས་ཀྱི་ཡི་གེ་ཕྱི་མ་བཞི་བཞི་གོ་རིམ་ཀྱང་གཤམ་ནས་ཟློག་པའི་སྡེ་ཚན་གསུམ་ལ་ཡི་གེ་བཞི་བཞི་ཡོད་པ་དེ། ཤར་ལྷོ་ནུབ་བྱང་གི་ གཡོན་དུ ་བཀོད། ཀྵའི་རྗེས་ལ་སྡེ་ཚན་གསུམ་པོ་དེའི་ཡི་གེ་ཐོག་མ་སྦྱར་ནས་ནུབ་ཀྱི་ གཡོན་དུ ་འགོད་པ་མཛད་ན། འཕྲེང་བ་དང་ལེགས་པའི་བུའི་གཞུང་དང་མཐུན་མོད། སྤྱིར་ནས་ཅུང་ཟད་མི་ལེགས་ཏེ་འགྲེལ་ཆེན་ལས་གསུངས་པའི་ས་བོན་གྱི་གོ་རིམ་སྔ་ཕྱི་ཟློག་པ་དང༌། ས་ཀ་ལ་གསུམ་ཁོ་ལ་འདོན་དུ་བཏོན་ཏེ། ནུབ་ཏུ་འགོད་པ་ལ་རྒྱུ་མཚན་མེད་པའི་ཕྱིར་རོ། །དེས་ན་ནུབ་ཀྱི་ གཡོན་དུ ་བཞི་བྱེད་ནའང་འགྲེལ་ཆེན་ལས་གསུངས་པའི་ས་བོན་གྱི་གོ་རིམ་རྣམས་མ་འཁྲུགས་པར་སྦྱར་བ་ཉིད་ལེགས་པས། རང་ལུགས་ཤར་དུ་ས་སྡེའི་ཡི་གེ་དང་པོ་བཞི། ལྷོར་ྈྐ་ཡིག་དང་ཀ་སྡེ་དང་པོ་གསུམ། བྱང་དུ་ཀ་སྡེ་ཐ་མ་གཉིས་དང་མཐར་གནས་ཐ་མ་གཉིས། ནུབ་ཏུ་མཐར་གནས་ཐོག་མ་གཉིས་དང་ཧ་ཀྵ་སྟེ། དེ་ལྟར་འགོད་པ་བླ་མའི་མན་ངག་ཡིན་ཞིང༌། འགྲེལ་པར་གསུངས་པའི་ས་བོན་གྱི་གོ་རིམ་མ་འཁྲུགས་པས་ལེགས་སོ། །འདོད་མ་རྣམས་ཀྱི་འགོད་ཚུལ་འདི་ལ་གཡས་ཀྱི་རྣམས་རང་རང་གི་ཕྱོགས་དང་མཐུན་པའི་ཁམས་སྡེ་ཚན་རེ་རེ་ཁོ་ན་ཡིན་ལ། གཡོན་གྱི་རྣམས་ཤར་དང་
ནུབ་ཀྱི་དང་པོ་འོག་ཕྱོགས་ཡེ་ཤེས་ཀྱི་ལྷ་དང༌། ལྷོ་དང་བྱང་གི་དང་པོ་སྟེང་ཕྱོགས་ནམ་མཁའི་ལྷ་ཡིན་ཞིང༌། ལྷག་མ་གསུམ་གསུམ་རང་རང་གང་ན་གནས་པའི་ཕྱོགས་ཀྱི་འབྱུང་བ་དང་མཐུན་ནོ། །འདི་རྣམས་རྣལ་འབྱོར་མ་སུམ་ཅུ་རྩ་བདུན་ལས་སྤྲུལ་པའི་ཕྱིར་དེ་རྣམས་དང་དོན་གཅིག་ལ། ཕྱིར་འདོད་མའི་དོན་ཁ་ཅིག་འདོད་པ་ཕྱི་ཕྱིར་འཕེལ་བ་ལ་འཆད་ཅིང༌། དེ་ལྟར་མ་བྱས་ན་མཱ་མ་ཀཱི་ལྟ་བུ་གཞི་གཅིག་ལས་རྒྱས་པར་འདོད་པ་དང་མི་འདོད་པ་གཉིས་ཀར་སྐྱེ་བ་མི་འཐད་དེ། ལས་འགལ་བའི་ཕྱིར་སྙམ་དུ་སེམས་སོ། །སྤྱིར་ཕྱིར་འདོད་མའི་སྐད་དོད་པྲ་ཏཱི་ཙྪ་ཞེས་པའི་པྲ་ཏི་མ་ཕན་ཚུན་འཐེན་ཕྱོགས་ཙམ་ཡོད་དུ་ཆུག་ཀྱང༌། འགྲེལ་ཆེན་ཉིད་ལས་འདོད་པ་ཟློག་པའི་དོན་དུ་གསུངས་པས་མི་འདོད་མའི་དོན་ཁོ་ན་ལ་འཆད་དགོས་ཀྱི། ཕྱི་ཕྱིར་འཕེལ་ན་ཟློག་པའི་དོན་རྒྱབ་འགལ་དུ་སོང་བའི་ཕྱིར་རོ། །འགྱུར་གྱི་སྐྱོན་ཡང་མ་ཡིན་ཏེ། འགྱུར་སྔ་ཕྱི་ཕལ་ཆེར་ཟློག་པའི་དོན་ལ་མཚུངས་པའི་ཕྱིར་ རོ། །ཡེ་ཤེས་ཀྱི་ལྷ་གཅིག་ཁོ་ནས་ལས་མཐའ་དག་འགྲུབ་པའི་ཕྱིར་གཞི་གཅིག་ལས་གཉིས་སྐྱེ་བ་མི་རུང་ཟེར་བ་ནི་ག་ཞའི་རྒྱུ་ཆེན་པོའོ། དེ་ལྟར་ན་སྐུ་གསུང་ཐུགས་ཀྱི་ལྷ་ཚོགས་དེ་དག་རྣམས་ལས་ཞབས་ཀྱི་བཞུགས་སྟངས་སོ་སོའི་མཚན་ཉིད་ནི། ཇི་སྐད་དུ། གཡས་ཀྱི་བརླ་དང་པུས་མོ་བསྲང༌། །གཡོན་པ་བྱིན་པ་བརླར་ཕྱོགས་ཏེ། །ཐད་ཀར་འཇོག་པར་བྱེད་པ་དགརྒྱ་རུ་མཐོ་ལྷར་བྱས་པ་ནི། །གཡས་བརྐྱང་པར་ནི་རབ་ཏུ་གྲགས། །དེ་ཉིད་གོ་ཟློག་པ་ནི་གཡོན་བརྐྱང་སྟེ་དེ་གཉིས་ལ་གཤོལ་གྱི་དབྱིབས་ལྟ་བུ་ཞེས་ཀྱང་གྲགས་སོ། །མཉམ་པའི་སྟབས་ནི། རྐང་མཐེབ་དང་ནི་རྟིང་པ་དག །ཤིན་ཏུ་སྦྱར་བས་གཅེར་
བ་དག །བརྟན་པ་མཐུན་པའི་རྐང་སྟབས་སུ། །དེ་ཉིད་ཤེས་པ་རྣམས་ཀྱིས་བཤད། །ཅེས་འབྱུང་ཡང་རྒྱུད་འདི་ཉིད་ལས། རྐང་པ་ཟུང་ནི་མཉམ་པ་དག་ཀྱང་མཉམ་པའི་སྟབས་ཞེས་འབྱུང་བ་ཉིད་དེ། གཅེར་བ་རང་ཡང་མི་དགོས་ཀྱི། སོར་བཞི་ནས་མཐོ་གང་ཚུན་ཆོད་ཇི་ལྟར་འོས་པའི་བར་དང་བཅས་པས་ཀྱང་རུང་ངོ༌། །ས་གའི་སྟབས་ནི་རྐང་སོར་ལོགས་སུ་ཅུང་ཟད་བསྟན་པའི་རྟིང་པའི་བར་དུ་སོར་ཉེར་དྲུག་ཟེར་ཡང་རགས་རྩིས་ཀྱི་ཚུལ་དུ་ཁྲུ་གང་བཞག་ཅིང་སྒྱིད་པ་བསྲང་བའོ། །རོལ་པའི་སྟབས་ལ་བཞེངས་བཞུགས་གཉིས་ཡོད་ཀྱང༌། བཞེངས་པ་ནི་རྒྱུད་ལས། ཅུང་ཟད་པུས་མོ་ཕྱེད་ནི་འཁྱོག་པ་རོལ་པར་འགྱུར་ཏེ། ཞེས་གསུངས་པ་ལྟར། གཡས་རོལ་ནི་རྐང་པ་ གཡོན་པ་དྲང་པོར་བསྲང་ཞིང༌། རྐང་མགོ་མདུན་དུ ་བསྟན་ལ་གཡས་པའི་པུས་མོ་གཡས་སུ་ཅུང་ཟད་འཁྱོགས་ཤིང༌། སོར་མོ་ལོགས་སུ་བསྟན་རྟིང་པ་བཏེག་སྟེ་བོལ་གོང་ལ་རེག་པའམ། བར་དུ་སོར་བཞི་བཞག་པའོ། །གཡོན་རོལ་ནི་དེ་བས་ཟློག་པ་ཡིན་ཞིང༌། བཞུགས་པའི་རོལ་སྟབས་ནི་སྐྱིལ་ཀྲུང་ཕྱེད་པ་དང་ཕལ་ཆེན་འདྲའོ། །ཟླུམ་པོའི་འདུག་སྟངས་ནི། རྟིང་པ་གཉིས་ཀྱི་བར་དུ་ཁྲུ་གང་བཞག པུས་མོ་ངང་པའི་གཤོག་པ་ལྟ་བུ་སྟེ། གཡས་ གཡོན་དུ ་འབུར་པོར་བསྐྱེད་པ། པུས་མོ་གཉིས་ཀྱི་མཐའ་མ་ཁྲུ་གཉིས་ཡོད་པའོ་ཟེར་ཡང་ཇི་ལྟར་འོས་ པའོ། །ཕྱག་མཚན་གྱི་སྐབས་ན་སྤྱིར་གོ་དཀའ་བ་མེད་ཀྱང༌། ཤཀ་ཏི་ནི་མདུང་ཐུང་གི་རིགས་ལ་སོ་ནི་དགྲ་སྟ་ཁ་ཕྱིར་བསྟན་པ་ལྟ་བུ་སྟེ། བི་དྷི་པ་ལ་ལ་འདོད་པ་ནི་ཤིན་ཏུ་འཁྲུལ་ལོ། །ཚངས་པའི་དབྱུག་པ་ནི་སྣེ་གཉིས་སུ་ཏོག་དང་བཅས་པར་ངེས་པ་ལས་
དབྱུ་གུ་གཅིག་པ་ཡིན་ན། སྦོམ་ཕྲ་མེད་པ་རིང་ན་ལུས་ཚད་ཙམ་པ་ལ་སྟེང་འོག་བར་གསུམ་དུ་སོར་བཞི་ཙམ་རེ་སྲད་བུ་དཀར་པོས་མི་མངོན་པར་དཀྲིས་པ་ཡིན། དབྱུ་གུ་གསུམ་པ་ཡིན་ན་དེ་ཀ་འདྲ་བའི་དབྱུ་གུ་ཕྲ་སང་ངེ་བ་གསུམ་བསྒྲིགས་ནས། སྲད་བུ་དཀར་དམར་ནག་གསུམ་གྱིས་སྟེང་འོག་ཏུ་མཐོ་རེ་ཙམ་དང་བར་བར་དུ་ཇི་ལྟར་འོས་པ་དཀྲིས་པའོ། གཞན་ཡང་སྔོན་གྱི་དྲང་སྲོང་རྣམས་ཀྱི་དབྱུ་གུ་རྩེ་གསུམ་པ་ཡང་ཚངས་པའི་དབྱུག་པའོ། ལྟོས་འགྲོ་ནི་སྦྲུལ་ཉིད་དང༌། བར་བུ་ནི་ལྷུང་བཟེད་དང་དབྱིབས་འདྲ་རུང་གི་སྣོད་ཁ་གཅོད་ཅན་ ནོ། །བེ་ཅོན་དང་དབྱུག་པ་ཀུན་ལ་གྲགས་ཀྱང༌། བེ་ཅོན་ཙང་མགོ་ཙང་གཞུག་ཆེ་ཞིང༌། རྩེ་མོར་ཏོག་ཡོད་མེད་གཉིས་ཀ་འབྱུང་བ་འདིར་ནི་རྡོ་རྗེའི་ཏོག་ཅན་ ནོ། །དབྱུག་པ་ནི་ཙང་མགོ་ཙང་གཞུག་ཧ་ཅང་ཆེ་བ་མེད་ཅིང༌། རི་རབ་རྩེ་མོར་ངེས་པར་ཏོག་ཡོད་པ་དང༌། བེ་ཅོན་ཁྲུ་དོ་ལས་མི་རིང་ཞིང་དབྱུག་པ་ཁྲུ་དོ་ལས་མི་ཐུང་བའོ། །ཡོངས་འདུའི་མེ་ཏོག་ནི་ཤིང་གི་ཡལ་ག་ལ་མེ་ཏོག་དཀར་རྐྱང་ངམ་སྣ་ལྔ་སྐྱེས་པའོ། །སྦྲུལ་དང་བཅས་པའི་ཁ་ཊྭཾ་ག་ནི་ཁ་ཊྭཾ་ག་སྦྲུལ་གྱིས་དཀྲིས་པའི་དོན་ཡིན་ལ། དྲག་པོ་དབང་ཕྱུག་ཆེན་པོ་ལ་ཕྱག་མཚན་རྩེ་གསུམ་གྱིས་མཚན་པའི་ཁ་ཊྭཾ་ཡང་སྲིད་མོད། འདིའི་དྲག་པོ་དང་དྲག་མོའི་ཕྱག་ན་རྩེ་གསུམ་ལོགས་སུ་ཡོད་པས། རྩེ་གསུམ་གྱིས་མཚན་པའི་ཁ་ཊྭཾ་ག་ནི་མི་དགོས་ལ། འཇིག་རྟེན་པའི་ཁ་ཊྭཾ་ག་ལ་སྤྱི་ལྡོག་ནས་རྡོ་རྗེས་མཚན་པ་ཡང་མེད་མོད་ཀྱི། འདིར་ནི་རྡོ་རྗེའི་རིགས་སུ་སྦྱངས་པ་ཉིད་ཀྱི་ཕྱིར་རྡོ་རྗེས་མཚན་པར་བྱ་ཡང༌། མི་མགོ་གསུམ་ལ་སོགས་པའི་རྒྱས་པ་མི་དགོས་ཏེ། དབྱུག་པ་ཙང་མགོ་ཙང་གཞུག་ཅན་གྱི་སྟེང་དུ། མི་མགོ་སྐམ་རློན་གང་རུང་ཡོད་པ་མི་མགོའི་མགུལ་དུ་དར་དཔྱངས་བཅིངས་
ཤིང་དྲིལ་ཆུང་བཏགས་པ་ཙམ་གྱིས་ཆོག་གོ །གཞན་དག་དངོས་སུ་གོ་བ་འབའ་ཞིག་སྟེ། ལྷ་ཚོགས་ཀྱི་རྣམ་གཞག་འདི་དག་ལ་འོད་ཟེར་འཕྲེང་བ་ལས། སྤྱི་སྡོམ་མཛད་དེ། ལྷ་ཡི་གྲངས་དང་བཞུགས་གནས་དང༌། །གདན་གྱི་རིམ་པ་སྐྱེ་བའི་རྒྱུ། །སྐུའི་དབྱིབས་དང་བཞུགས་ཚུལ་དང༌། །སྐུ་མདོག་ཕྱག་མཚན་རྒྱན་དག་དང༌། ཐབས་དང་ཤེས་རབ་སྦྱར་བ་ དང༌། །རིགས་དང་རིགས་ཅན་རྣམ་དག་སྟེ། །དེ་ལྟར་བཅུ་གཉིས་རྣམ་པར་ བཞག །ཅེས་སྡོམ་མཛད་པ་ལྟར་བཤད་ཀྱང་རུང་ངོ༌།། །།གསུམ་པ་ཤིན་ཏུ་རྣམ་པར་དག་པའི་ང་རྒྱལ་བཟུང་བ་ནི། ཨོཾ་སུ་བི་ཤུདྡྷ་སོགས་ཏེ། མདོར་ན་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རང་བཞིན་བདག་ཉིད་ངའོ་ཞེས་པ་སྟེ། སྔར་གཙོ་བོ་བསྐྱེད་པ་ནས་གཟུང་སྟེ། འདིའི་བར་དུ་མངོན་བྱང་ལྔ་པ་ཆོས་དབྱིངས་ཡེ་ཤེས་ལས་མངོན་པར་བྱང་ཆུབ་པའི་དོན་ཡང་ཡིན་ལ། ཡང་རྣམ་པ་གཅིག་ཏུ་ན་གདོད་ནས་ཤིན་ཏུ་རྣམ་པར་དག་པའི་ཆོས་དབྱིངས་ཡེ་ཤེས་འཁོར་འདས་ཀུན་ཁྱབ་དེ་ཉིད་དཀྱིལ་འཁོར་འདིའོ་ཞེས་ང་རྒྱལ་བཟུང་བའོ། །གཞན་ལུགས་ཀྱི་སྒྲུབ་ཐབས་ཕལ་ཆེར་དུ། འདི་སྙིང་རྗེའི་དབང་བསྐུར་གྱི་གཞུག་ཏུ་བྱེད་པ་ནི། འགྲེལ་ཆེན་གྱི་གླེགས་བམ་ལས་ཡིག་ཕྲེང་དང་ཤོག་ལོགས་སྔ་ཕྱིའི་གོ་རིམ་ཁོ་ན་ལས་ཇི་ལྟར་བྱུང་བའི་རིམ་པའི་དབང་དུ་བྱས་པར་སྣང་ཡང་བཤད་ཚུལ་ཡི་གེའི་གོ་རིམ་དང་དོན་མངོན་རྟོགས་ཀྱི་གོ་རིམ་མ་ཕྱེད་པ་སྟེ། དེ་ལྟར་ན་ཞུ་བ་གླུས་བསྐུལ་ལན་གཉིས་བྱེད་པ་དང༌། དེའི་ནང་གི་གླུས་བསྐུལ་དང་པོའི་གཞུག་ཏུ་འདི་བྱེད་དགོས་པར་འགྱུར་རོ། །དེས་ན་འགྲེལ་ཆེན་ལས། འདིར་
ལྷའི་ང་རྒྱལ་གྱི་སླད་དུ་སྔགས་ཀྱི་ཚིག་ནི། ཨོཾ་སུ་བི་ཤུདྡྷ་དྷརྨ་དྷ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ། དེ་ནས་གསུང་རྡོ་རྗེ་བསྐྱེད་པའི་སླད་དུ་ཞེས་འབྱུང་ན། ང་རྒྱལ་བཟུང་བ་སྔོན་དང༌། ལས་རྒྱལ་མཆོག་རྗེས་ལ་ཡོད་པའི་དོན་ཙམ་ཡིན་ལ། ཆོ་ག་གཞན་གྱིས་བར་མ་ཆོད་པར་དགོས་པའི་དོན་མིན་ཞིང༌། ཡང་སྙིང་རྗེའི་དབང་བསྐུར་ལམ་གྱི་ཡན་ལག་ཙམ་ཡིན་པས། མདོར་བསྡུས་པའི་ཚེ་མ་གྲུབ་ཀྱང་ཆོག་པའི་སྐབས་ཡོད་པས་ན། དེའི་དམིགས་གསལ་སྐབས་དེར་མ་གསུངས་པ་ཡིན་ལ། འདིའི་གོང་དེ་མ་ཐག་པར་རྣམ་པ་ལྔས་མངོན་པར་བྱང་ཆུབ་པའི་མཚན་ཉིད་ནི། ལྷ་རྣམས་ཀྱི་སྐུ་རྫོགས་པ་སྟེ་བསྙེན་པའི་ཡན་ལག་དང་པོའོ། །འདིར་ལྷའི་ང་རྒྱལ་གྱི་སླད་དུ་ཞེས་གསུངས་པ་ཡིན་པས་སྐུ་རྫོགས་མ་ཐག་ཏུ་ང་རྒྱལ་འཛིན་དགོས་པར་གྲུབ་ལ། དེ་དེ་ལས་ཆོ་གའི་དོན་ཚན་ཡང་ཐ་དད་མིན་པས་བར་དུ་ཆོ་ག་གཞན་གྱིས་མཚམས་གཅོད་པ་མི་རིགས་པའི་ཕྱིར་དང༌། གོང་དུ་ཡང་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་བདག་ཉིད་ཅན་བསྒོམས་ཏེ། དེ་ནས་འགྲོ་བ་དྲུག་ན་གནས་པའི་སེམས་ཅན་ཐམས་ཅད་ཅེས་སོགས་གསུངས་པས། དེའི་དོན་དཀྱིལ་འཁོར་གྱི་ལྷ་ཚོགས་རྣམས་བསྐྱེད་ནས། ཆོས་དབྱིངས་ཡེ་ཤེས་ཀྱི་ངོ་བོར་མོས་པས་བསྒོམས་པའི་རྗེས་སུ་སྙིང་རྗེའི་དབང་བསྐུར་བྱེད་ཅེས་གསུངས་པས། སྙིང་རྗེའི་དབང་བསྐུར་ཆོས་དབྱིངས་ཡེ་ཤེས་ཀྱི་མངོན་བྱང་ལ་མི་ཐེ་བ་དང༌། མངོན་བྱང་དེའི་རྗེས་སུ་དེ་མ་ཐག་སྙིང་རྗེའི་དབང་དགོས་པར་གྲུབ་ལ། ཆོས་དབྱིངས་ཡེ་ཤེས་སུ་མོས་པ་བསྒོམ་པའི་ཚིག་ནི། ང་རྒྱལ་བཟུང་བ་འདི་ཁོ་ན་ཉིད་ཡིན་པའི་ཕྱིར་རོ། །དཀྱིལ་འཁོར་རྒྱལ་མཆོག་གི་རྩ་བའི་ས་བཅད་གསུམ་པ་མཛད་
པ་སྙིང་རྗེའི་དབང་བསྐུར་ནི། ཐུགས་ཀ་ནས་འཕྲོས་པའི་འོད་ཟེར་དཔག་ཏུ་མེད་པ་དག་གིས། ཞེས་པ་ནས། ཞིང་དུ་གཤེགས་སུ་གསོལ། ཞེས་པའི་བར་ཏེ། དངོས་བསྟན་ནི་གོ་སླ། དེ་བཞིན་གཤེགས་པ་ཡུམ་བཅས་རང་གི་སྙིང་གར་བཅུག་ཅེས་པ་ལ། ཁ་ཅིག་སྔར་བསྒོམས་པའི་དཀྱིལ་འཁོར་མཐའ་དག་འཇུག་པར་འདོད་པ་ནི། རྣམ་གཞག་མི་ལེགས་པས་སྤྱིར་ནི་རང་ལུགས་ལ་མི་འདོད་ལ། ཁ་ཅིག་དེ་ལ་གླུས་བསྐུལ་མཁན་མེད་པའི་སྐྱོན་ཡོད་གསུང་མོད་ཀྱང༌། སྐྱོན་དེ་ནི་མི་འཇུག་སྟེ་གླུས་བསྐུལ་མཁན་གྱི་ལྷ་མོ་བཞི་ནི། བདེ་གཤེགས་འཕར་མའི་ཟུར་ན་ཡོད་པ་དེ་རྣམས་མ་ཡིན་པའི་ཕྱིར་རོ། །དབང་བསྐུར་བའི་སྐྱེ་བོ་སེམས་ཅན་རེ་རེ་བཞིན་ལྷ་དུ་མར་བསྐྱེད་པ་ནི། འགྲོ་བ་རེ་རེ་སངས་རྒྱས་པ་ན་དེའི་རྒྱུད་ཁོ་ན་ལ་བལྟོས་པའི་ཡང་ཡེ་ཤེས་ཀྱི་དཀྱིལ་འཁོར་མཐའ་ཡས་པ་འབྱུང་བ་མཚོན་ལ། སོ་གཉིས་སུ་བྱེད་པ་ནི་མཚན་སོ་གཉིས་མཚོན་པའི་དོན་ནོ། །ཐུན་མོང་གི་ས་བོན་ཀྵ་ཡིག་གིས་བྱེད་པ་ནི། ཁ་ཅིག་ཀ་དང་ཥ་དབྱངས་གསལ་གྱི་ཐོག་མཐའ་ཡིན་པས། སེམས་ཅན་གང་ཅི་ཡང་རུང་བའི་མིང་གི་ཡི་གེ་དང་པོ་རྣམས་དེར་འདུས་པ་ལ་དགོངས་པ་ཡིན་ཟེར་བ་ནི། རིག་གྲས་ཙམ་དུ་སྣང་ལ། རང་ལུགས་ཀུན་ཁྱབ་ཡེ་ཤེས་ཀྱི་ཁམས་རྣམ་པར་དག་པ་ལས་བྱུང་བ་མཚོན་པའོ།། གཞོན་ནུ་དཔལ་བ་ནི། དཀྱིལ་འཁོར་རྒྱལ་མཆོག་སྐབས་ཀྱི་དཀྱིལ་འཁོར་སྤྲོ་བ་ཐམས་ཅད་ཕྱིའི་དཀྱིལ་འཁོར་ལ་མ་ཡིན། མཁའ་ནང་གི་གཞལ་ཡས་ཁང་གི་ནང་དུ་སྤྲོ་བ་ཡིན་ཞིང༌། སྙིང་རྗེའི་དབང་བསྐུར་གྱི་སྐབས་འདིར་ཡང་དེའི་དཀྱིལ་འཁོར་དེའི་ནང་དུ་སེམས་ཅན་ཐམས་ཅད་འཇུག་པར་འདོད་ཅིང༌། གཞན་སྔ་རབས་པ་མང་པོ་ཞིག་
ཀྱང་སེམས་ཅན་རྣམས་ཞལ་གྱི་སྒོར་བཅུག་སྟེ། ནང་ཆོག་གི་སྒོ་ནས་ལྷ་སོ་གཉིས་སུ་བསྐྱེད་པར་འདོད་པ་རྣམས་ནི་འཐད་པ་མ་ཡིན་ཏེ། དཀྱིལ་འཁོར་ལྷ་ཚོགས་སྤྲོ་བའི་དོན་མཁའ་ནང་དུ་གནས་པའི་གཞལ་ཡས་ཁང་གི་ནང་དུ་བསྐྱེད་པ་ལ་འཆད་པ་ཁྱེད་རང་གིས་སྨྲས་པ་འདི་མ་གཏོགས་རྒྱུད་སྡེ་གང་ལའང་རུང་རྒྱ་བོད་ཀྱི་གཞུང་གང་ནའང་མེད་པའི་ཕྱིར་དང༌། རིག་པས་ཀྱང་མི་འཐད་དེ། གལ་ཏེ་ཐ་སྙད་གསར་པ་དེ་ལྟར་འཇོག་ན་རྡོ་རྗེའི་བུ་གའི་ནང་ནས་ལྷར་གྱུར་པ་ཞིག་སྤྲོས་ནས། མཁའ་ནང་གི་གཞལ་ཡས་ཁང་གི་ནང་དུ་བཅུག་པ་ཞིག་འདོད་ལ་རག་ན། རྡོ་རྗེ་ནས་ཐིག་ལེ་ཁོ་ན་སྤྲོས་ཏེ། མཁའ་ནང་གི་གཞལ་ཡས་ཁང་དུ་ལྷར་གྱུར་པ་ལ་ཐིག་ལེ་སྤྲོས་པ་ཞེས་བྱ་ཡི་ལྷ་སྤྲོས་པའི་ཐ་སྙད་མི་འཇུག་གོ །དེ་ལ་འདོད་ལན་འདེབས་ན་སྤྲོས་པར་ནི་མི་འགྱུར་ཏེ། སྤྲོས་པ་ནི་ནང་ནས་ཕྱི་རོལ་ཏུ་ཡིན་ན། གཞལ་ཡས་ཁང་གི་ནང་དུ་ཞུགས་པ་ནི་བསྡུས་པར་སོང་གི་སྤྲོས་པར་མི་འགྲོའོ། །ངེས་ན་གསང་འདུས་ཡེ་ཤེས་ཞབས་ལུགས་ཀྱི་སྙིང་རྗེའི་དབང་བསྐུར་གྱི་རིགས་འགྲེར་རློམ་པར་འདུག་ཀྱང་དེ་དང་ཡང་མ་འབྱོར་ཞིང་མི་འགྲིག་བཞིན་དུ་བསྒྲིགས་པའི་སྐྱོན་ཡོད་པས་མི་འཐད་ལ། མཚན་སོ་གཉིས་ཀྱི་ལྷ་རྣམས་ནང་ཆོག་གིས་བསྐྱེད་པ་ཡང་འདིར་དངོས་ཤུགས་གང་ལ་ཡང་མེད་པའི་ཕྱིར་མི་འཐད་དོ། །ཁ་ཅིག་སྙིང་རྗེའི་དབང་བསྐུར་འདི་ནི། བར་འདིར་ཆོ་ག་དེ་ལྟ་བུ་ཞིག་བཅུག་པ་ཡིན་གྱི། རྒྱལ་མཆོག་གཉིས་པོ་གང་ཡང་མི་ཐེ་ཟེར་བ་ནི། དཀྱིལ་འཁོར་ཡོངས་རྫོགས་སྤྲུལ་པ་དེའི་འཕྲིན་ལས་ཀྱི་མཛད་པ་ཡིན་པ་མ་གོ་ཞིང༌། སྔར་གཞན་གྱིས་མ་སྨྲས་པའི་གཏམ་གསར་པ་ཞིག་སྨྲ་དགོས་བྱུང་ནས་གཟུ་ལུམ་དུ་སྨྲས་པ་ཡིན་ལ། དེ་ལྟ་ན་འོག་ཏུ་ཡེ་ཤེས་སྤྱན་འདྲེན་མན་ཆད་ཀྱང་བར་སྐབས་
དེར་བཅུག་པ་ཡིན་གྱི། ལས་རྒྱལ་མཆོག་མ་ཡིན་ཞེས་སྨྲ་དགོས་པར་འགྱུར་རོ། །འོན་ཀྱང་འདི་མངོན་བྱང་ལྔའི་ཆོ་ག་དངོས་ལ་མི་གཏོགས་ཏེ། མངོན་བྱང་ལྔས་བསྐྱེད་ཟིན་པའི་དཀྱིལ་འཁོར་གྱི་མཛད་པ་ཡིན་ ནོ། །ཞེས་སྨྲས་ན་འཐད་པར་སྨྲས་པའོ།། །།གཉིས་པ་ནི། དཀྱིལ་འཁོར་རྒྱལ་མཆོག་གི་རིམ་པ། དེ་དག་གི་སྦྱང་བྱ། སྦྱོང་བྱེད། སྦྱངས་འབྲས་མདོར་བསྡུས་པ་གསལ་པོ་བརྗོད་པར་བྱ་སྟེ། དེ་ལ་དབྱེ་ན་རྟེན་དཀྱིལ་འཁོར་གྱི་སྦྱོང་ཚུལ་དང༌། བརྟེན་པ་ལྷའི་དག་དབྱེ་གཉིས་ལས། དང་པོ་ལ། བར་དོ་སྦྱོང་བྱེད་རྩ་བའི་ཡེ་ཤེས་དང༌། སྐྱེས་གནས་དག་བྱེད་གནས་ཀྱི་རིམ་པའོ། །དང་པོ་ནི། རྣམ་ཐར་བཞིའི་སྔགས་བརྗོད་པའི་དུས་ན། སྟོང་པ་ཉིད་རྣམ་པ་ཐམས་ཅད་པའི་སྤྲོས་པ་དང་བྲལ་བའི་ངང་ནས། སྟོང་གཟུགས་རྡུལ་ཕྲ་རབ་ཀྱི་ཆོས་ལས་འདས་པར་བསྒོམས་ཤིང་དམ་པའི་བདག་ལ་ང་རྒྱལ་སྐྱེད་པ་ནི། ལུགས་འདི་ཉིད་ཀྱི་བར་དོ་སྦྱོང་བ་ཡིན་ཏེ། བར་དོའི་ལུས་དང་སྣང་བ་རྣམས་ནི་རགས་པ་སྤངས་པའི་གསལ་སྣང་ཕྲ་བ་ཡིན་པ། དེ་སྟོང་གཟུགས་དང་མཚུངས་པའི་སྒོ་ནས་ལམ་དུ་བྱེད་པའོ། །དེ་ལྟར་ཡང་དྲི་མ་མེད་པའི་འོད་ལས། ཁམས་གསུམ་པོ་རྡུལ་ཕྲ་རབ་ཀྱི་ཆོས་ཉིད་ལས་འདས་པའི་སྟོང་པ་ཉིད་རྣམ་པར་བསྒོམ་པར་བྱའོ། །ཞེས་རྡུལ་ཕྲ་རབ་ལས་འདས་པར་གསུངས་ཤིང༌། དེ་འདྲའི་རིགས་ཀུན་ནི་རྒྱུད་དང་སེམས་འགྲེལ་ཀུན་གྱི་སྟོད་སྨད་སྣ་ཚོགས་པ་ནས་སྟོང་གཟུགས་ལ་བཤད་པ་ཁོ་ན་ཡིན་པས་འགྱུར་རྙིང་མང་པོ་དང་ཤོང་གིས་བསྒྱུར་བ་ལས་སྟོང་པ་ཉིད་ཀྱི་གཟུགས་སུ་བསྒོམ་པར་བྱའོ།། ཞེས་འབྱུང་བ་གོ་བདེ་བའི་ཕྱིར་ཤིན་ཏུ་ལེགས་ལ། ཁ་ཅིག་རཱུ་པ་གཟུགས་སུ་
བསྒྱུར་བ་འགྱུར་ཉེས་པ་ཡིན་ཏེ། རང་བཞིན་ཞེས་པར་བསྒྱུར་ན་ལེགས་ཤིང༌། ཁམས་གསུམ་པོ་རྡུལ་ཕྲ་རབ་ལས་འདས་པའི་དོན་ཁམས་གསུམ་པོ་གཅིག་དུ་བྲལ་གྱི་རིག་པས་རྣམ་པར་དཔྱད་ན་རྡུལ་དུའང་བདེན་པར་མ་གྲུབ་ཅེས་པའི་དོན་དུ་འཆད་ཅིང༌། སྟོང་གཟུགས་དངོས་པོའི་དེ་ཁོ་ན་ཉིད་དུ་མི་རུང་ཞེས་ཀྱང་སྨྲའོ། །འདིར་སྟོང་གཟུགས་ནི་ཆོས་ཐམས་ཅད་ཀྱི་དེ་ཁོ་ན་ཉིད་མཐར་ཐུག་ཡིན་ཡང༌། དེ་མ་ཡིན་ནོ་སྙམ་པ་ནི། སྔོན་བསོད་ནམས་མ་བསགས་ཤིང་ཆོས་ཀྱི་འཕོངས་པའི་རྒྱུ་ཁོ་ན་བྱས་པ་དུས་འདིར་ཡང་དག་པའི་ཆོས་ཉིད་ལ་སྐུར་བ་འདེབས་པའི་ལོག་ལྟ་མི་བཟད་པའི་གདོན་གྱིས་ནོན་པ་ཙམ་ལས་ཡང་དག་པའི་རྒྱུ་མཚན་མེད་དེ། གཞན་དུ་རྒྱས་པར་བཤད་ཟིན་ཏོ། །འདིར་ཕྲ་རབ་རྡུལ་ལས་འདས་པར་གསུངས་པ་རིག་ངོར་བདེན་མེད་ཙམ་གྱི་དོན་ཡིན་ན། ཕྲ་རབ་རྡུལ་གྱི་ཆོས་ཉིད་འདས། པྲ་ཕབ་པ་ཡི་རང་བཞིན་ ཅན། །ཞེས་སོགས་ཀྱང་དེར་ཐལ་བ་ལས་དེ་ནི་ཁྱེད་རང་ཡང་མི་འདོད་དོ།། ཡང་ནམ་མཁའི་ཁམས་རྣམ་པ་ཐམས་ཅད་པའི་གཟུགས་ཡུལ་དང་རྣམ་པར་བྲལ་བར་དབུས་ཀྱི་ས་ལ་ཀུན་གཞི་རྣམ་པར་ཤེས་པ་བཞག་པར་བྱའོ་ཞེས་གསུངས་པས། རྣམ་པ་ཐམས་ཅད་པའི་སྟོང་གཟུགས་དེ་སྟོང་གཟུགས་མ་ཡིན་ན་གཞན་ཅི་ཞིག་ཡིན། ཁྱེད་ཀྱི་ལུགས་ལ་དེ་ཡང་རང་བཞིན་ཞེས་བསྒྱུར་དགོས་མོད་ཀྱི། དེས་ཕན་མེད་དེ་རྣམ་པ་ཐམས་ཅད་པའི་རང་བཞིན་ཡིན་ན། སྟོང་གཟུགས་ཡིན་པར་གྲུབ་ཅིང༌། ཁྱེད་འདོད་པའི་རྣམ་མེད་དང་འགལ་བའི་ཕྱིར་རོ། །ཡང་དེ་ན་རེ་ལུགས་འདི་ལ་བར་དོར་སངས་རྒྱ་བ་མེད་པས་བར་དོ་སྦྱོང་བྱེད་མི་དགོས་སོ་ཞེས་ཟེར་རོ། །དེ་ནི་འགྲེལ་ཆེན་གྱི་
མངོན་བྱང་ལྔའི་ཐད་ནས། ཁུ་བའི་དབུས་སུ་ཀུན་གཞི་རྣམ་པར་ཤེས་པ་དྲི་ཟའི་སེམས་ཅན་ནོ་ཞེས་དེའི་སྔ་རོལ་བར་དོ་སྦྱོང་བྱེད་དུ་དངོས་སུ་གསུངས་པ་དང་འགལ་ཞིང༌། བར་དོར་སངས་རྒྱ་བ་མེད་པ་རྟགས་མ་གྲུབ་བོ། །ཆོས་འདི་ལ་བར་དོར་སངས་རྒྱ་བ་ཡོད་དེ། བར་དོར་འཕགས་པའི་ས་ཐོབ་པ་ལ་དེར་འཇོག་པ་གང་ཞིགརྣལ་འབྱོར་པ་གསོན་པོའི་དུས་འཛིན་པའི་ཕྱེད་ཕྱི་མ་ཐོབ་པ་དེ། འཆི་བའི་ཚེ་འཛིན་པའི་རིམ་པ་རྫོགས། བར་དོར་རྗེས་དྲན་རྣམ་པ་ཀུན་ལྡན་གྱི་སྐུ་ཐོབ། དེར་ལམ་བསྒོམས་ན་ཏིང་ངེ་འཛིན་གྱི་ས་རྙེད་པས། ས་དེ་ཐོབ་ནས་འཁོར་བར་ཡང་སྲིད་མི་ལེན་པའི་ཕྱིར་རོ། །ཡང་ཚེ་འདིར་རྗེས་དྲན་གྱི་གནས་སྐབས་དང་པོ་ཐོབ་པ་ནས། རྗེས་དྲན་ཆེན་པོ་ཐོག་མའི་གནས་སྐབས་ན་གནས་པའི་བར་གྱི་གང་ཟག་དེ། གློ་བུར་དུ་ཤི་ན་འཆི་བས་རྗེས་དྲན་གྱི་ལམ་རྫོགས། བར་དོའི་དོད་ལ་ཏིང་ངེ་འཛིན་གྱི་ས་རྣམས་འབྱུང་བའི་ཕྱིར་རོ། །འོ་ན་རྫུ་འཕྲུལ་ཀུན་མཁྱེན་ས་དང་སྲིད་གསུམ་བླ་མ་ཉིད་ནི་རྣལ་འབྱོར་རྣམས་ཀྱི་སྐྱེ་བ་འདི་ལ་སྟེ། གལ་ཏེ་ལམ་དུ་རབ་བཞུགས་ཤི་བར་གྱུར་ན་དེ་ཚེ་དེ་ཡི་འཛིན་པས་སྐྱེ་བ་གཞན་ལའོ། །ཞེས་འབྱུང་བས་ཚེ་འདི་དང་སྐྱེ་བ་གཞན་གཉིས་ལ་སངས་རྒྱ་བ་ཁོ་ན་མ་གཏོགས་མ་གསུངས་པས་སོ་ཟེར་བ་ནི། གོ་ན་རུང་བའི་ས་ནས་མ་ གོ །མ་གོ་ན་རུང་བའི་ཕྱོགས་ནས་གོ་བ་སྟེ། བརྩོན་འགྲུས་བརྩམས་ཤིང་སྐལ་བ་དང་ལྡན་ན། ཚེ་འདི་ལ་མཆོག་གི་དངོས་གྲུབ་ཐོབ། བརྩོན་འགྲུས་མེད་ཅིང་ལམ་གྱི་ཡེ་ཤེས་ཚེ་འདིར་མ་ཐོབ་ཀྱང༌། ལམ་འདི་ལ་ཞུགས་ཤིང་དམ་ཚིག་མཉམ་པ་རྣམས་རིང་མཐའ་སྐྱེ་བ་བདུན་པ་ལ་བཞག་པའི་དེ་ཚུན་ཆད་དུ་དངོས་གྲུབ་མི་ཐོབ་པ་མི་སྲིད་ཅེས་པ་
ཡིན་པས་སྐྱེ་བ་བདུན་ཚུན་ཆད་ལ་ངེས་པར་གྲོལ་ཞེས་པའི་དོན་ཙམ་ཡིན་པས། དེའི་ནང་དུ་བར་དོ་ལན་མང་དུ་འབྱུང་བའི་ཕྱིར་རོ།། ལམ་གྱི་ཐོག་མར་ཞུགས་ཀྱང་བརྩོན་འགྲུས་མེད་པས་ཚེ་འདིར་དངོས་གྲུབ་མ་ཐོབ་ན། སྐྱེ་བ་གཞན་དུ་ཐོབ་པར་འགྱུར་ཞེས་གསུངས་པ་ཡིན་གྱི། ཁྱེད་རྣམས་འདོད་པ་ལྟར་འཛིན་པ་ཐོབ་ཅིང་རྗེས་དྲན་མ་ཐོབ་པ་ཞིག་ཤི་ན་བར་དོར་དངོས་གྲུབ་མི་ཐོབ་པར་སྐྱེ་བ་གཞན་དུ་འགྲོ་ཞེས་པའི་དོན་མ་ཡིན་ཏེ། ཚེ་འདིར་འཛིན་པ་ཐོབ་པ་དེ། རྫོགས་རིམ་གྱི་ཡེ་ཤེས་ཁྱད་པར་ཅན་སྐྱེས་པ་ཡིན་པས་དང༌། དེ་ཐོབ་པ་ལ་བརྩོན་འགྲུས་རྩོམ་དགོས་པའི་ཕྱིར། བརྩོན་འགྲུས་མ་བརྩམས་པ་དང་ཡེ་ཤེས་མ་ཐོབ་པར་འགལ་བའི་ཕྱིར། འཛིན་པ་ཐོབ་ཀྱང་ཡེ་ཤེས་མ་སྐྱེས་ལ་བརྩོན་འགྲུས་མ་བརྩམས་པ་དེ་ཅི། ཁྱེད་ཀྱི་སློབ་མ་ལགས་སམ། ཡང་འདིར་འཛིན་པ་ཐོབ་པའི་རྣལ་འབྱོར་པ་དེ་ཚེ་འདི་ལ་དངོས་གྲུབ་ཐོབ་པར་མ་གྱུར་ཀྱང༌། རྐྱེན་འཛོམ་ན་བར་དོར་འཚང་རྒྱ་བར་རུང་བ་ཡིན་ཏེ། ཁྱོད་ཀྱིས་སྲོག་གཟུགས་གྲུབ་པའི་ཕྱིར། རྗེས་དྲན་དང་པོ་ཐོབ་པའི་རྣལ་འབྱོར་པ་དེ་ཆོས་ཅན། ཁྱོད་ཚེ་འདིར་མ་གྲོལ་ན་བར་དོར་གྲོལ་ངེས་ཡིན་ཏེ། སྲོག་གཟུགས་རྣམ་པར་ཀུན་ལྡན་གྱི་སྐུ་གྲུབ་པའི་ཕྱིར། ཡང་བར་དོ་སྦྱོང་བྱེད་མི་དགོས་ཏེ། དེར་སངས་རྒྱ་བ་མེད་པའི་ཕྱིར་ཞེས་པའི་ཁྱབ་པ་འདི་ཡང་ཤིན་ཏུ་རྩིང་བ་ཡིན་ཏེ། ཁྱེད་རང་ལྟར་ན། གསང་འདུས་ཀྱི་རྣལ་འབྱོར་ལ་སྐལ་ལྡན་དབང་པོ་རབ་གཡེངས་རྐྱེན་མེད་ལ་བརྩོན་འགྲུས་དང་ལྡན་པ་དེ་ཆོས་ཅན། ཁྱོད་ཀྱིས་བར་དོ་སྦྱོང་བྱེད་བསྒོམ་མི་དགོས་པར་ཐལ། ཁྱོད་བར་དོར་སངས་རྒྱ་བ་མེད་པའི་ཕྱིར་ཏེ། ཚེ་འདིར་སངས་རྒྱ་ངེས་ཡིན་པའི་ཕྱིར་རོ། །ཞེས་གོ་བར་བྱ་སྟེ་དེས་ན་རང་
གི་ཁས་བླངས་ཀྱི་འདོད་ཚུལ་གཅིག་ཁོ་ནའི་རྒྱབ་སྐྱོར་བའི་ཕྱིར་དུ་རྡོ་རྗེ་ཐེག་པའི་ཟབ་དོན་གྱི་བསྟན་པ་དཀྲུག་པར་མི་བྱའོ།། །།གཉིས་པ་ནི། ཕྱི་རོལ་འཇིག་རྟེན་གྱི་ཁམས་སྟོང་པར་ཐིམ་པའི་ངང་ལས་ནམ་མཁའི་ཁམས་མཐའ་མེད་པ་ཆོས་ཀྱི་འབྱུང་གནས་ཀྱི་རང་བཞིན་གྱི་ནང་དུ་གནས་པ་ཕྱི་རོལ་རྡོ་རྗེའི་རང་བཞིན་རྩིབས་བཅུ་པ་ལྟེ་བ་ཟླུམ་པོའི་ནང་སྟོང་པ་དེ་ནི་སྦྱང་བྱ་ཤེས་རབ་སྟེ་མའི་ཆོས་འབྱུང་སྐྱེ་གནས་གྲུ་གསུམ་སྦྱོང་བར་བྱེད་པ་ཡིན་ཏེ། སྐབས་འདིར་མའི་ལུས་དང་སྐྱེ་གནས་ཞེས་གསུངས་པའི་མ་ནི། མངོན་བྱང་ལྔའི་ཉི་ཟླ་ཁུ་ཁྲག་ལ་སྦྱོར་བ་སོགས་དང་ཕྲུགས་གཅིག་པའི་མ་ལ་དགོངས་པ་མ་ཡིན་ཏེ། འདི་ནི་དོན་ལ་མ་ནི་མཚོན་བྱེད་དེ། ཐོག་མའི་ཕྱི་མོ་དང་ཕ་མེས་མ་མེས་མཐའ་མེད་པའི་བར་གྱི་ཕ་མ་གཉིས་ཀའི་ཕྱོགས་སྦྱོང་བྱེད་ལ་དགོངས་པའོ། དེར་རྣམ་བཅུ་དབང་ལྡན་ལས་འཇིག་རྟེན་གྱི་ཁམས་བསྐྱེད་པ་ལ། རླུང་ནི་མའི་དཔྲལ་བའི་འཁོར་ལོ་མེ་མགྲིན་པ་ཆུ་སྙིང་ག་ས་ལྟེ་བ། རི་རབ་ལྟེ་བ་ནས་གསང་བའི་བར་གྱི་དབུ་མ། པདྨ་ནི་གསང་བའི་པདྨ། ཉི་ཟླ་སྒྲ་གཅན་ནི་གསང་བར་གནས་པའི་རྩ་གསུམ་སྟེ། བཤང་གཅི་ཁུ་བའི་རྩ་གསུམ་རྣམ་པར་དག་པ་ནི་སྔ་མའི་རྗེས་སུ་བྱུང་བའི་ཕྱི་མོའོ། །འཇིག་རྟེན་གྱི་ཁམས་ལན་གཅིག་ལས་མི་བསྐྱེད་པའི་ལུགས་ལ། དེ་རྗེས་མ་དངོས་དང་མཚུངས་པའི་གཞལ་ཡས་ཁང་བསྐྱེད་ཚུལ་དགོས་ཀྱང༌། འདིར་ལན་གཉིས་བསྐྱེད་པ་གཙོ་ཆེ་བས་སྔ་མ་དེ་གཅིག་ཏུ་འདུས་པ་རྣམ་བཅུ་དབང་ལྡན་གྱི་ཡི་གེར་གྱུར་པ་ནི། ལུས་དེ་ལྟ་བུ་དང་ལྡན་པའི་འགྲོ་བ་རྣམས་ཤི་སྟེ། བར་དོའི་ལུས་ཁམས་ཕྲ་བ་ལ་གནས་པ་མཚོན། རྣམ་བཅུ་དབང་ལྡན་དེ་ལས་སླར་ཡང་འཇིག་རྟེན་གྱི་
ཁམས་བསྐྱེད་པ་ནི། བར་དོ་ཁམས་ཕྲ་བ་དེ་ལས་སླར་ཡང་རགས་པའི་ལུས་བླངས་ཏེ། ལུས་དང་རྣམ་བཅུ་དབང་ལྡན་སྦྱོར་ལུགས་གོང་དང་འདྲ། དེར་སླར་ཡང་རྡོ་རྗེའི་གུར་རམ། དེའི་དོད་རྡོ་རྗེའི་ཁང་བརྩེགས་གྲུབ་པ་ནི། ཕའི་གསང་བའི་རྡོ་རྗེ་རྣམ་པར་སྦྱོར་བ་སྟེ། འདི་ལ་རྡོ་རྗེའི་གུར་དང༌། འོག་ས་གཞི་རྒྱ་ཆེན་པོས་ཉི་ཟླ་སྒྲ་གཅན་ནོན་ཏེ་མི་མཐོང་པར་སྒོམ་པའི་ལུགས་ལྟར་ན། ཤེས་རབ་ཀྱི་རྩ་གསུམ་གྱི་གནས་ཐབས་ཀྱི་བྱང་ཆུབ་ཀྱི་སེམས་ཀྱིས་ཁྱབ་པ་མཚོན་ལ། ལྷུན་པོ་སྟེང་མཉམ་ལ་བྱང་ཆུབ་སེམས་ཀྱི་འོད་ཟེར་གྱིས་ཤེས་རབ་ཀྱི་ལུས་ཀུན་ཏུ་ཁྱབ་པ་མཚོན་པའོ། །དེའི་དབུས་སུ་གཞལ་ཡས་ཁང་སྒོམ་པ་ནི། སྒྲུབ་ལེའི་ཚིགས་བཅད་དགུ་པའི་འགྲེལ་པར་གསུངས་པ་ལྟར་ཏེ། ཕྱི་མས་དེ་དག་གི་རྒྱུད་ལས་སྦྱང་བྱ་དངོས་ཀྱི་སྐྱེ་སྲིད་འཛིན་པའི་མའི་ལུས་བསྐྱེད་ཅིང་རྫོགས་པ་སྦྱོང་སྟེ། སྙིང་གའི་འཁོར་ལོའི་ཕྱོགས་དབུས་ནས་སྟེང་འོག་ཏུ་སོར་དྲུག་ཙམ་གཞལ་བ་དང༌། དཔྱི་དང་དཔུང་པའི་ཚིགས་ཚུན་ཆོད་ཐུགས་དཀྱིལ་དང༌། དེའི་ཕྱི་རོལ་མགྲིན་པ་མན། ལྟེ་བ་ཡན་ཆད་གྲུ་མོ་དང་པུས་མོ་ཚུན་གསུང་དཀྱིལ་དང༌། དཔྲལ་བ། གསང་བ། འཁྲིག་མ། བོལ་གོང་ཚུན་ཆོད་སྐུ་དཀྱིལ་གྱི་རྩིག་པའི་ནང་ཚུན་དང༌། རྐང་སོར་དང༌། ལག་སོར་གྱི་རྩེ་ཚུན་ཆོད་ནི་དུར་ཁྲོད་འཁོར་ལོའི་བར་དང༌། གསང་བའི་པདྨ་ནི་གཙོ་བོའི་གདན་གྱི་པདྨ་དང༌། ཉི་ཟླ་སྒྲ་གཅན་གསུམ་ནི་སྐྱེ་གནས་དབུས་སུ་བཤང་གཅི་ཁུ་བའི་རྩ་གསུམ་གནས་པ་དག་པའོ། །ཡང་ཟླ་ཉི་སྒྲ་གཅན་དུས་མེ་བརྩེགས་པའི་ལུགས་ལ་བདུད་དང་ཉོན་མོངས་པ་གཉིས་ཀྱང་བསྣན་ཏེ། རྩ་དྲུག་གི་དག་པ་དང་སྦྱོར་ན་འགྲིག་ཏུ་རུང་ཡང་རེ་ཤིག་དེ་
མི་ལེན་ནོ། །འགྲེལ་པར། གསང་བའི་པདྨ་ནི་བཅོམ་ལྡན་འདས་ཀྱི་པདྨ་བཞིན་ནོ། །ཞེས་ལྷུན་པོའི་སྟེང་གི་པདྨའི་སྐབས་སུ་བཤད་པ་ནི། ལྷུན་པོའི་སྟེང་གི་པདྨ་དང༌། གཙོ་བོའི་གདན་གྱི་པདྨ་གཉིས་ཀར་མའི་གསང་བའི་པདྨ་མཚོན་པའི་དོན་ལ་འདྲ་བར་སྟོན་པ་སྟེ། དེའི་ཤུགས་ལ་རྩིབས་བཅུ་འབྱུང་བཞི་ལྷུན་པོར་བཅས་པ་རྣམས་དང༌། གཞལ་མེད་ཁང་ཡང་མའི་ལུས་རྩ་འཁོར་དང་བཅས་པ་མཚོན་བྱེད་དུ་འདྲ་བར་ཤུགས་ལ་འཕངས་ སོ། །སྤྱིར་རྒྱུད་གཞན་གྱི་ལུགས་བསྐྱེད་རིམ་པའི་སྒྲུབ་ཐབས་རྒྱ་གར་བས་སྦྱར་བ་རྣམས་ལ་སྦྱང་བྱ་ཕལ་ཆེར་ནང་ལ་སྦྱར་བ་ཡིན་ཞིང༌། ཕྱི་འཇིག་རྟེན་ཁམས་ལ་སྦྱར་བའི་ཆ་ཤས་ཅུང་ཟད་རེ་ཙམ་མ་གཏོགས་མེད་དོ། །རྒྱུད་འདིའི་ལུགས་ལ་ཡང་སྦྱང་བྱའི་གཙོ་བོ་ནང་གི་ཆོས་རྣམས་ཡིན་པས་གཞི་ལམ་སྦྱོར་ཚུལ་ནང་ལ་སྦྱོར་བ་མང་ཡང༌། ཕྱི་དང་སྦྱོར་ཚུལ་གཞན་རྣམས་ལས་རྒྱས་པ་ཞིག་གོ །ཁྱད་པར་དུའང་ཆོས་འབྱུང་དང་གཞལ་ཡས་ཁང་གི་བར་འདི་སྦྱང་བ་ཕྱི་ནང་གཉིས་ལས་ཕྱི་གཙོ་ཆེ་བ་སྟེ། སྣོད་ཀྱི་འཇིག་རྟེན་སྦྱོང་བྱེད་གཞལ་ཡས་ཁང་དང༌། བཅུད་ཀྱི་སེམས་ཅན་སྦྱོང་བྱེད་ལྷའི་ཚོགས་སུ་འཇོག་པའི་དབང་གིས་སོ། །དེ་ལ་ཕྱི་རོལ་དང་སྦྱོར་ཚུལ་ལ་རྩིབས་བཅུ་དང་བཅས་པའི་ཆོས་འབྱུང་ནི་ཕྱོགས་བཅུས་བསྡུས་པའི་ནམ་མཁའི་ཁམས་ཡིན་ལ། ནམ་མཁའ་སྟོང་པའི་རྡུལ་དང་བཅས་པ་དེ་ནི་དངོས་པོ་གཞན་གྱིས་གཞིག་ཏུ་མེད་པའི་ཕྱིར། རྩིབས་བཅུ་པ་རྡོ་རྗེའི་རང་བཞིན་དུ་སྒོམ་པ་དང་རྣམ་པ་མཐུན། འདིའི་ནམ་མཁའི་ཁམས་ནི་ཐེག་པ་འོག་མ་པ་རྣམས་འདུས་མ་བྱས་གསུམ་གྱི་ཐ་སྙད་འཇོག་པའི་ནང་ཚན་ནམ་མཁའ་དངོས་མེད་དེ་ལྟ་བུ་མ་ཡིན་ཏེ།
དེ་ནི་སྒྲ་རྟོག་གིས་བཏགས་པའི་བཏགས་ཆ་ཙམ་ལས་གཞན་དུ་མེད་ཅིང༌། དངོས་མེད་ལ་དངོས་པོའི་བྱ་བྱེད་དངོས་སུ་འཇུག་པ་མི་སྲིད་པའི་ཕྱིར་དང༌། སྟོང་པའི་རྡུལ་དང་བཅས་པའི་ནམ་མཁའ་འདི་ལ་ནི། འཇིག་རྟེན་གྱི་ཁམས་རྩོམ་པའི་བྱ་བྱེད་དངོས་སུ་རུང་བའི་ཕྱིར་རོ། །དེས་ན་མངོན་པ་སོགས་སྡེ་སྣོད་འོག་མ་རྣམས་ལས་ནམ་མཁའ་མངོན་པར་སྐབས་ཡོད་པ་ཞེས་པ་བུ་ག་ནམ་མཁའ་དང་རྒྱན་ནམ་མཁར་གྲགས་པ་སོགས་དང་འདི་གཅིག་སྟེ། གཞན་ཡང་སྐྱེས་བུ་ཁམས་དྲུག་འདུས་པ་ཞེས་མདོ་སྡེ་ཀུན་ནས་ཀྱང་གསུངས་ཏེ། དེས་ན་ནམ་མཁའི་ཁམས་ནི་ནམ་མཁའ་འདི་ཡིན་གྱི་དངོས་མེད་མ་ཡིན་ནོ། །དེ་ལྟར་ན་རྡུལ་ཐམས་ཅད་སིལ་བུར་གནས་པས་ཐོགས་པ་མེད་ཅིང་དབང་པོའི་སྤྱོད་ཡུལ་མ་ཡིན་པ་དེ་ནི་སྟོང་པའི་རྡུལ་ཞེས་བྱ་སྟེ། སྒྲིབ་པའི་བྱ་བ་མི་བྱེད་པའི་སྒོ་ནས་ནམ་མཁའ་དང་མཚན་ཉིད་མཚུངས་པའི་ཕྱིར་རོ། །སྟོང་པ་དེ་ལས་འོད་ཟེར་ནག་པོ་གཡོ་བ་ཕྲ་མོ་དང་བཅས་པའི་རླུང་བྱུང་སྟེ། དེ་ནི་དང་པོའི་རླུང་ངམ་རླུང་གི་ཐོག་མ་ཡིན་ཏེ། དེ་ཡང་སྔར་རླུང་གི་རྡུལ་སིལ་བུ་འཐོར་ཐབས་སུ་གནས་པ་རྣམས་ཕྱོགས་གཅིག་ཕྱོགས་གཅིག་ཏུ་འདུས་པ་ལས་རགས་པའི་རླུང་འབྱུང༌། དེ་ལས་རིམ་གྱིས་རླུང་གི་དཀྱིལ་འཁོར་འཆགས་ཏེ། དེ་ལ་ཐོག་མའི་རླུང་སྦྱོང་བ་ནི་ཡཾ་ཡིག་དང༌། དེ་ནས་རླུང་གི་དཀྱིལ་འཁོར་ཡོངས་སུ་རྫོགས་ཀྱི་བར་དུ་སྦྱོང་བ་ནི། རླུང་དཀྱིལ་མཚན་མ་དང་བཅས་པ་སྒོམ་པའོ། །དེ་བཞིན་དུ་ཕྱི་མ་རྣམས་ལའང་སྦྱར་ཏེ། རླུང་གི་སྟེང་དུ་དང་པོའི་མེ་གློག་ལྟ་བུ་འབྱུང་བ་རཾ་ཡིག་དང༌། མེའི་དཀྱིལ་འཁོར་གྲུབ་པ་ཉིད་དེ་ལས་བྱུང་བའི་མེ་དཀྱིལ་མཚན་མ་དང་བཅས་པས་སྦྱོང༌། དེའི་སྟེང་དུ་ཟིལ་ཆར་ཕྲ་མོ་འབབ་པ་དང་པོའི་ཆུ་
སྟེ་ཝཾ་ཡིག་དང༌། ཆུ་དཀྱིལ་ཉིད་མཚན་མ་དང་བཅས་པ་བསྒོམས་པས་ཆུ་དཀྱིལ་ཉིད་སྦྱོང༌། དེའི་སྟེང་དུ་འཇའ་ཚོན་ཤར་བ་དང་པོའི་ས་ནི་ལཾ་ཡིག་དང༌། ས་དཀྱིལ་མཚན་མ་དང་བཅས་པས་ས་གཞི་ཉིད་སྦྱོང༌། དེའི་སྟེང་དུ་མཾ་ཡིག་ནི་ཁམས་ལྔའི་དྭངས་མ་འདུས་པ་དང་རི་རབ་བསྒོམས་པས་རི་རབ་ཉིད་སྦྱོང༌། དེའི་སྟེང་དུ་ཀྵཾ་ལས་བྱུང་བའི་པདྨ་བསྒོམས་པས་ནི། རི་རབ་ཀྱི་མགྲིན་པ་གདོང་གཙུག་ཏོར་རྣམས་སྦྱོང་ཞིང༌། རང་རང་གི་ས་བོན་ལས་ཟླ་ཉི་སྒྲ་གཅན་གསུམ་བསྐྱེད་པས་ནི། འཇིག་རྟེན་གྱི་ཁམས་དེ་རྒྱན་པར་བྱེད་པའི་ཟླ་ཉི་སྒྲ་གཅན་གསུམ་གྱིས་མཚོན་ནས་གཟའ་སྐར་གྱི་ཁྱིམ་དང་ཆ་དང༌། དུས་དྲུག་ལོ་ཟླ་ཞག་ཆུ་ཚོད་སོགས་འཇིག་རྟེན་གྱི་ཁམས་དེ་རྣམས་ཀྱི་འཕེལ་འགྲིབ་ལ་སོགས་པའི་བྱ་བ་བྱེད་པ་ཐམས་ཅད་སྦྱོང་བར་བྱེད་དེ། དེ་ཐམས་ཅད་ཉི་ཟླ་སྒྲ་གཅན་གསུམ་གྱི་ཆོས་སུ་འདུས་པའི་ཕྱིར་རོ།། འཇིག་རྟེན་གྱི་ཁམས་བསྐྱེད་ཐེངས་གཅིག་ལས་མི་བྱེད་ན། རྡོ་རྗེའི་གུར་དང་གཞལ་ཡས་ཁང་བསྒོམས་པས་ནི་ལས་རིགས་མཐུན་པས་བཅད་པའི་ས་མཚམས་ཀྱི་ཡུལ་འཛམ་གླིང་ཆུང་ངུ་ལྟ་བུ་དང༌། སྒོས་སུ་རང་ཉིད་ཀྱི་དབང་པོ་ལྔའི་ཉེར་སྤྱོད་དུ་གྱུར་པའི་ཡུལ་རྣམས་སྦྱོང་ངོ༌། །འོན་ཀྱང་ལན་གཉིས་བསྐྱེད་པ་འདི་གཙོ་བོའི་དོན་ཡིན་པས་འཇིག་རྟེན་གྱི་ཁམས་སྔ་མ་དེ་ཐམས་ཅད་ཚུར་འདུས་ཏེ། རང་རང་གི་ས་བོན་ལ་ཐིམ་པའི་ཚུལ་གྱི་རྣམ་བཅུ་དབང་ལྡན་གཅིག་པུ་འདུས་པ་ནི། བསྐལ་པའི་རིམ་པས་འཇིག་རྟེན་གྱི་ཁམས་སྔ་མ་དེ་ཉིད་ཞིག་སྟེ། ནམ་མཁའི་དབུས་ན་ཁམས་ཕྲ་བའི་ཚུལ་གྱིས་གནས་པ་མཚོན་ཏེ། སྦྱང་བྱ་འཇིག་རྟེན་གྱི་ཁམས་འཆགས་འཇིག་གི་རིམ་པ་མཐའ་ཡས་པ་རྣམས་འཆགས་འཇིག་གི་རྣམ་པར་མཚུངས་ཤིང་གཅིག་པའི་ཕྱིར། སྦྱོང་བྱེད་འཆགས་
འཇིག་གཅིག་གི་དམིགས་པས་སྦྱོང་ངོ༌།། ཡང་འཇིག་རྟེན་གྱི་ཁམས་སྔ་མ་བཞིན་དུ་ཆགས་ནས་གནས་པར་སྒོམ་པ་ནི། སྔར་ཞིག་པ་ལས་སླར་ཆགས་ཏེ་གནས་པ་མཚོན་ལ། རིམ་པ་ཐམས་ཅད་སྔ་མ་དང་འདྲ་སྟེ། སྦྱང་བྱ་བསྐལ་པའི་རིམ་པ་མི་འདྲ་བའི་ཁྱད་པར་ཡིན་ཡང་རྣམ་པ་མི་འདྲ་བ་མ་ཡིན་པས་སོ། །དེ་རྗེས་ཉི་ཟླ་སྒྲ་གཅན་གྱི་སྟེང་དུ་རྡོ་རྗེའི་ས་གཞི་གུར་གཞལ་ཡས་ཁང་སོགས་བསྐྱེད་པ་ནི། ལས་ཀྱི་མཚམས་བཅད་པའི་ས་དང༌། ཉེར་སྤྱོད་དངོས་ཀྱི་ཡུལ་སྦྱོང་བ་གོང་དང་འདྲ། ཡང་པདྨ་ཉི་ཟླ་སྒྲ་གཅན་རྣམས་གཙོ་བོའི་གདན་དུ་བྱེད་པ་ལྟར་ན། གཙོ་བོའི་གདན་གྱི་སྦྱང་བྱ་གཞལ་ཡས་ཁང་གི་གསོས་སུ་བསྡུ་ལ། གཞལ་ཡས་ཁང་གི་རྟེན་འཇིག་རྟེན་གྱི་ཁམས་ལ་ཁམས་ལྔ་རི་རབ་དང་བཅས་པ་ཁོ་ནའི་དག་པ་སྦྱར་བས་ཆོག་གོ །སྦྱོར་ཚུལ་འདི་གཞན་ལ་མ་ཡིན། ནང་དཀྱིལ་འཇིག་རྟེན་ཁམས་མཉམ་ཁོ་ནའི་ཡིན་པས་སྐུ་དཀྱིལ་གྱི་ནང་ནས་བདེ་གཤེགས་འཕར་མའི་བར་དུ་རླུང་ནས་རི་རབ་ཀྱི་བར་གྱི་འཇིག་རྟེན་གྱི་ཁམས་ཐ་མལ་གྱི་ངན་པ་རྣམས་སྦྱངས་ནས། དག་པའི་འཇིག་རྟེན་གྱི་ཁམས་འོ་མའི་དབུས་ནས་མར་གསར་གྱི་གོང་བུ་ཐོན་པ་བཞིན་དུ་གྲུབ་པ་དང༌། འོག་ཕྱོགས་སུ་འཇིག་རྟེན་གྱི་ཁམས་ཕལ་པ་དེ་ཡང་རྩིགས་མ་རོ་ཐོད་ཀྱི་ཚུལ་དུ་བོར་བའི་དགོས་པ་ཡང་མ་དག་པའི་འགྲོ་བ་རྣམས་ཀྱི་གནས་ཀྱི་དོན་ཏེ། སེམས་ཅན་དེ་རྣམས་ཀྱི་དོན་སྤྱོད་པ་མཚོན་པའི་ཕྱིར། འཇིག་རྟེན་གྱི་ཁམས་དེ་ཡང་རེ་ཞིག་སྟོང་པར་མི་བསྡུའོ། །རི་རབ་ཀྱི་མགྲིན་པ་ཡན་ཆད་ནི་ཕྲ་བའི་ཕྱིར་དང༌། ཚོར་བ་སྡུག་བསྔལ་མེད་པའི་ཕྱིར། ཞིང་ཁམས་མཆོག་དེའི་ནང་དུ་བསྡུས་ཤིང༌། དེ་མཚོན་བྱེད་གཙོ་བོ་ཉིད་ཀྱི་གདན་དུ་མཛད་པའོ། །པདྨ་ཟླ་ཉི་སྒྲ་གཅན་ཚར་གཉིས་བྱེད་ན་སྔ་མའི་དག་པ་གོང་
དང་འདྲ། ཕྱི་མ་ཡང་སྔ་མའི་དྭངས་མ་ཉིད་དེ་གོང་དུ་བཤད་པ་དང་ འདྲའོ། །སྦྱོང་བྱེད་ཀྱི་ལམ་གོང་མ་རྫོགས་པའི་རིམ་པའི་རྒྱུད་སྦྱང་པར་འགྲོ་ཚུལ་ནི། གོང་དུ་སྨོས་པ་ལྟར་སོ་སོར་སྡུད་པའི་གནས་སྐབས་དང་པོ་སོང་ནས། ནང་གི་ནམ་མཁའ་ཞེས་བྱ་བ་སེམས་སྤྲོས་བྲལ་ལས་སྣང་བརྙན་སྣ་ཚོགས་པ་འཆར་བ་ནི། བར་དོ་སྦྱོང་བྱེད་ཀྱི་སྟོང་ཉིད་སྒོམ་པ་དེས་རྒྱུད་སྦྱོང་བར་བྱེད་ལ། ཆོས་འབྱུང་ནས་སྒྲ་གཅན་གྱི་བར་ལན་གཉིས་ནི་ངུ་བ་ལ་སོགས་པའི་རྟགས་བཅུ་ལ་ཐབས་དང་ཤེས་རབ་ཀྱི་དབྱེ་བས་གཉིས་མཚོན་ཞིང༌། རྡོ་རྗེའི་ས་གུར་གཞལ་ཡས་ཁང་ལྷའི་གདན་དང་བཅས་པའི་བར་གྱིས་ནི། འོད་གསལ་སྣ་ཚོགས་པའི་གཟུགས་སྣོད་བཅུད་ཀྱི་སྣང་བརྙན་སྣ་ཚོགས་སུ་འཆར་བ་དེ་མྱུར་དུ་རྒྱུད་ལ་སྐྱེ་བའི་རྟེན་འབྲེལ་འགྲིག་པར་བྱེད་དེ། འཇིག་རྟེན་གྱི་ཁམས་བསྐྱེད་ཐེངས་གཅིག་བྱེད་པའི་ཕྱོགས་ལ་ཐབས་ཤེས་ཀྱི་དབྱེ་བ་མི་བྱེད་པར་རྟགས་བཅུ་ཙམ་མོ། །ད་ནི་སྦྱངས་འབྲས་དང་སྦྱར་བར་བྱ་སྟེ། དེ་ཡང་སྟོང་པའི་ངང་ལས་འཇིག་རྟེན་གྱི་ཁམས་དང་པོར་བསྐྱེད་པ་ནི། དབྱིངས་ཆོས་ཉིད་དོན་དམ་པའི་ཡེ་ཤེས་རྡོ་རྗེ་སྐུ་རྣམ་བཅུ་དབང་ལྡན་རྣམ་པ་ཐམས་ཅད་པ་དེ་ལ་རང་ངོས་ནས་ནམ་དུ་ཡང་གློ་བུར་དྲི་མ་མེད་མོད་ཀྱི། དབྱིངས་དེ་ལ་ཕྱོགས་པའི་སེམས་ཅན་རྣམས་ཀྱི་རྒྱུད་གློ་བུར་གྱི་དྲི་མའི་འདམ་རྫབ་ཏུ་བྱིང་བ་ཡིན་ཏེ། སེམས་ཅན་རྣམས་ཉིད་ཀྱི་རྒྱུད་དང༌། དབྱིངས་དེའི་སྦྱོར་བ་ལས་ལམ་དུ་མ་བྱས་པའི་སྐབས་འཁྲུལ་བ་སྣ་ཚོགས་པ་འབྱུང་ངོ༌། །མཚུངས་པའི་རྒྱུ་འབྲས་རྒྱུད་རྒྱུའི་དབང་དུ་བྱས་ཏེ། དོན་དམ་པའི་དབྱིངས་ལས་ཀུན་རྫོབ་པའི་འཇིག་རྟེན་གྱི་ཁམས་ཐམས་ཅད་བྱུང་བའི་ཚུལ་དེ་ཉིད་མཚོན་པ་ཡིན་ལ། ཡང་འཇིག་རྟེན་
གྱི་ཁམས་དེ་རྣམ་བཅུ་དབང་ལྡན་ལ་བསྡུས་པ་ནི། མ་དག་པའི་འཇིག་རྟེན་གྱི་ཁམས་ཐམས་ཅད་གདོད་མའི་དབྱིངས་སུ་ཐིམ་པར་འགྱུར་བ་ལམ་དུ་བྱེད་པ་དང༌། སླར་ཡང་རྣམ་བཅུ་དབང་ལྡན་ལས་འཇིག་རྟེན་གྱི་ཁམས་གཞལ་ཡས་ཁང་དང་བཅས་པ་བསྐྱེད་པ་ནི། གདོད་མའི་དབྱིངས་དེ་ལས་རང་དང་ངོ་བོ་གཅིག་པའི་དག་པའི་སྣང་བ་དོན་དམ་ཡེ་ཤེས་ཀྱི་རང་བཞིན་འཇིག་རྟེན་གྱི་ཁམས་རྣམ་པ་ཐམས་ཅད་པ་སྤྲོ་བ་དེ་མཚོན་ཞིང་ལམ་དུ་བྱེད་པ་ཡིན་ནོ། །འདིར་སྤྲོ་བའི་དོན་ཡང་རྣལ་འབྱོར་ཅན་གྱི་སྣང་ངོ་ལ་སྤྲོས་པ་ལྟར་སྣང་བའི་ཕྱིར། སྤྲོས་པའི་མིང་གིས་བཏགས་པ་ཡིན་ལ། རིགས་པར་ན་གདོད་ནས་གྲུབ་པའི་དག་པ་རབ་འབྱམས་དེ་གློ་བུར་གྱི་དྲི་མ་བསལ་བ་ན། གང་ཟག་དེ་དང་དེ་སངས་རྒྱས་ཐོབ་པ་དེའི་ངོས་ནས། སྔར་མེད་གསར་དུ་སྤྲོས་པ་ལྟར་གྱུར་པ་ཡིན་གྱི། དངོས་སུ་སྤྲོས་པ་མིན་མོད། འོན་ཀྱང་སྤྲོས་པ་དང་འདྲ་བ་ལ་སྤྲོས་པའི་མིང་གིས་བཏགས་པའོ།། ཡང་ཀུན་རྫོབ་ཀྱི་སྦྱངས་འབྲས་ལྟར་ན། འཇིག་རྟེན་གྱི་ཁམས་སྔ་མ་བསྡུས་པ་ནི། གང་དུ་འཚང་རྒྱ་བར་ཚུལ་སྟོན་པའི་ཞིང་ཁམས་ཀྱི་སྐྱོན་རྣམས་སྦྱངས་པ་དང༌། ཕྱི་མ་གུར་ས་གཞི་གཞལ་ཡས་ཁང་དང་བཅས་པ་བསྐྱེད་པ་ནི། ཐུན་མོང་དང་ཁྱད་པར་གྱི་ཞིང་མཆོག་ཕུན་སུམ་ཚོགས་པ་བསྒྲུབས་ཤིང༌། ཞིང་ཡོངས་སུ་དག་པ་མཚོན་པའི་སྒོ་ནས་ལམ་དུ་བྱེད་དོ།། འཇིག་རྟེན་གྱི་ཁམས་ཆར་གཅིག་བསྐྱེད་པའི་ལུགས་འདི་ལྟ་བུ་ལ་སྟོང་པའི་ངང་ལས་དག་པའི་འཇིག་རྟེན་གྱི་ཁམས་སྤྲོ་བ་ཁོ་ན་དང༌། གནས་སྐབས་ཀྱི་དག་འབྲས་ལ་ཡང་ལེགས་པར་སྦྱངས་ཟིན་པའི་ཞིང་ཁམས་ཕུན་སུམ་ཚོགས་པ་ཙམ་ཞིག་མཚོན་ནོ།། །།གཉིས་པ་བརྟེན་པ་ལྷའི་དག་དབྱེ་བཤད་པ་ལ། འཁོར་བ་དག་ཚུལ། རྫོགས་རིམ་སྨིན་ཚུལ།
འབྲས་བུ་རྫོགས་ཚུལ་གསུམ་གྱི་དང་པོ་ལ། ཕྱི་ལ་སྦྱར་བ་དང༌། ནང་ལ་སྦྱར་བ་གཉིས་སོ།། དང་པོ་ནི། སྤྱིར་བརྟེན་པ་ལྷ་རྣམས་ནང་སེམས་ཅན་ལ་སྦྱོར་དགོས་ན། ཕྱི་ལ་སྦྱར་རྒྱུ་མ་ཡིན་ནོ་སྙམ་པའི་དོགས་པ་མི་བྱ་སྟེ། ནང་ལ་སྦྱར་བ་ཞེས་པའི་ནང་ནི། ནང་སྒྲུབ་པ་པོའི་རྡོ་རྗེའི་ལུས་ཁོ་ནའི་དོན་ཡིན་གྱི། ནང་བཅུད་ཀྱི་སེམས་ཅན་ཡིན་པ་ཙམ་ལ་མི་འཇོག་གོ། དེས་ན་ལུས་ཀྱི་ཆ་ཤས་སོ་སོར་ཕྱི་ནས་དག་པ་སྦྱོར་བ་དང༌། རྩ་ཁམས་རླུང་སོགས་དང༌། རང་ཉིད་སྐྱེ་བ་དང་འཆི་བ་སོགས་ཀྱི་དག་པ་སྦྱོར་བ་ནི་ནང་ཡིན་གྱི། རང་རྒྱུད་ལས་གཞན་པ་འཇིག་རྟེན་ཁམས་ཀྱི་གནས་གཞན་འདི་ལྟ་བུ་ན་སེམས་ཅན་འདི་དག་གནས་སོ། །ཞེས་དག་པ་སྦྱོར་བ་ནི་ཕྱིའི་དག་སྦྱོར་ཉིད་དུ་གཏོགས་སོ། །དེས་ན་གོང་གཞལ་ཡས་ཁང་ལ་འཇིག་རྟེན་ཁམས་ཀྱི་དག་སྦྱོར་ཡོད་པས་འཇིག་རྟེན་ཁམས་ཀྱི་གནས་གཞན་དེ་དང་དེ་དག་ན་གནས་པའི་འགྲོ་བ་རྣམས་མངོན་པར་དག་པ་དཀྱིལ་འཁོར་གྱི་གནས་དེ་དང་དེར་བཞུགས་པའི་ལྷ་རྣམས་ཡིན་པར་བཤད་ཀྱང་རུང་ལ། གཞན་ཡང་འདི་དག་དང་ཅི་རིགས་པར་སྦྱར་རྒྱུ་མང་དུ་ཡོད་མོད་ཀྱི། སྐབས་འདིར་རྣལ་འབྱོར་མ་སོ་བདུན་གྱི་སྐབས་སུ་གསུངས་པ་འདི་ཙམ་འཚམ་པར་སྣང་སྟེ། ཇི་སྐད་དུ། དབང་ལེ་ལས། གཞི་ནི་སངས་རྒྱས་དབྱེ་བ་རྣམས་ཏེ་སླར་ཡང་དུས་ནི་བྱང་ཆུབ་སེམས་དཔའི་རབ་ཏུ་དབྱེ་བ་རྣམས། །ཁྲོ་བོ་རྣམས་ནི་ཕྱོགས་ཀྱི་རབ་དབྱེ་ས་སྟེང་གནས་སུ་ཡི་དྭགས་དབྱེ་བ་རྣམས་ནི་དེ་བཞིན་བརྒྱད། ལྷ་མིན་དག་ཀྱང་བརྒྱད་ཀྱི་དབྱེ་བ་གདེངས་ཅན་སྲིད་པར་གནས་རྣམས་རྣལ་འབྱོར་པ་ཡིས་རིག་པར་བྱ། །གཅིག་པུ་གཅིག་ནི་སྣ་ཚོགས་
གཙོ་བོ་སྲིད་གསུམ་གནས་སུ་དཔལ་ལྡན་རིགས་རྣམས་དག་གི་ཁྱབ་བྱེད་དོ། །ས་འོག་རྣམས་སུ་གཏུམ་མོ་བརྒྱད་དེ་མི་ཡི་འཇིག་རྟེན་ཕྱོགས་བཅུའི་དཀྱིལ་འཁོར་ལ་ནི་ཁྲོ་སྐྱེས་རྣམས། །ཡི་དྭགས་ཞེས་བྱ་ཡི་དྭགས་འཇིག་རྟེན་དུ་སྡེ་ལྷ་མཆོག་གནས་སུ་སྒྲ་ཡི་རྡོ་རྗེ་ལ་སོགས་དྲུག །ཚངས་པའི་ཡུལ་སར་དཔལ་ལྡན་བཞི་སྟེ་རབ་མཆོག་ཞི་བའི་གྲོང་དུ་ཁམས་གསུམ་དག་གི་ཡུམ་གཅིག་མ། །རབ་ཏུ་ཁྲོས་པའི་ཞལ་རྣམས་སྣ་ཚོགས་ཡང་དག་སྡུད་བྱེད་དགྱེས་པ་རྣམས་ནི་སྐྱོད་པར་བྱེད་པ་ཉིད། །ཅེས་གསུངས་པ་ལྟར་ཏེ། དམངས་རིགས་ལ་སོགས་པ་བཞི་སངས་རྒྱས་ཀྱི་དབྱེ་བ་དང༌། མཁར་བ་མཁན་མོ་ལ་སོགས་པ་དྲུག་བྱང་སེམས་དང༌། གཤན་པ་མ་སོགས་བརྒྱད་ཡི་དྭགས་དང༌། ལྕགས་མཁན་མ་སོགས་བཅུ་ཁྲོ་མོ་དང༌། ཀླ་ཀློ་མ་སོགས་བརྒྱད་ལྷ་མིན་རབ་གཏུམ་མ་སྟེ་སོ་བདུན་པ་ནི་ཁྱབ་བྱེད་དོ། །ས་འོག་གི་འཇིག་རྟེན་དུ་གཏུམ་མོ་བརྒྱད་བཞུགས་པས་ལྷ་མིན་ལྟོས་འགྲོ་དམྱལ་བ་རྣམས་རྣམ་པར་དག་པ་རབ་གཏུམ་མ་སྟེ། དེའི་ཐབས་ཡིན་པའི་ཕྱིར་ཀླུ་རྣམས་ཀྱིས་ཀྱང་དག་པའོ། །དེས་རིགས་བགྲེས་ཏེ་ལྷ་དེ་རྣམས་གང་དུ་བཞུགས་སའི་གནས་ཀྱི་ཚུལ་དུ་གསུངས་པས་ནི། གནས་དེ་ན་གནས་པའི་སེམས་ཅན་རྣམས་ལྷ་དེ་དག་གི་དག་པར་གོ་བར་བྱ་སྟེ། མི་རྣམས་ཁྲོ་མོ་དང་སྦྱོར་བ་ལས་ཁྲོ་བོ་ཡང་ཤུགས་ལ་གོ་བ་དང༌། རི་རབ་ཀྱི་ངོས་ཡི་དྭགས་ཀྱི་འཇིག་རྟེན་ལ་གནས་པ་རྣམས་ཙར་ཙི་ཀཱ་ལ་སོགས་པས་དག་པ་ཡིན་པའི་ཕྱིར་ལྷ་ཆེན་རྣམས་ཀྱང་ ངོ༌། །རི་རབ་ཀྱི་མགྲིན་པའི་ཕྱོགས་ལ་གནས་པའི་འདོད་ཁམས་ཀྱི་ལྷ་རྣམས་རྡོ་རྗེ་མ་དྲུག་གི་དག་པ་སྟེ་ཤུགས་བསྟན་ལ་སེམས་དཔའ་དྲུག་ཀྱང་ངོ༌། །ཚངས་པའི་ཡུལ་ཏེ་གཟུགས་
ཁམས་ན་གནས་པའི་ཟད་པར་གྲུབ་པ་རྣམས་ཡུམ་བཞིས་དག་པ་བཞིན་དེ་བཞིན་གཤེགས་པ་རྣམས་ཀྱང་ངོ༌། །གཟུགས་མེད་ཁམས་པ་སྟོང་པའི་ཟད་པར་གྲུབ་པ་རྣམས་རྣམ་པར་དག་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། བཅོམ་ལྡན་འདས་སྣ་ཚོགས་གཙོ་བོ་དུས་ཀྱི་འཁོར་ལོ་ཡང་ངོ༌། །ཕྱི་དང་སྦྱར་བ་ནི་རེ་ཞིག་དེ་ཙམ་གྱིས་ཆོག་ཤེས་པར་བྱའོ།། །།གཉིས་པ་ནི། སྦྱང་བྱའི་སྐབས་ཀྱི་གཙོ་བོ་ནང་ལ་སྦྱར་བ་ཡིན་ཏེ། དེ་ཡང་མངོན་བྱང་དང་པོའི་སྐབས་སུ་གཙོ་བོའི་གནས་ཀྱི་པདྨ་ཟླ་ཉི་སྒྲ་གཅན་དང་བཅས་པ་མའི་སྐྱེ་གནས་རྩ་གསུམ་དང་བཅས་པ་མཚོན་པ་དེར་ཨཱ་ལི་སུམ་ཅུ་སོ་གཉིས་ནི། ལུས་སྐྱེད་པར་བྱེད་པའི་རྒྱུ་ཕའི་ས་བོན་དེ་ཡང་ཡར་ངོ་དང་མར་ངོའི་ཐིག་ལེ་འཕོ་བ་བཅུ་དྲུག་ཕྲག་གཉིས་ཀྱི་ངོ་བོར་གནས་ཤིང་དེའི་ཆ་ཤས་ཡོད་པ་མཚོན། དེ་ལས་བྱུང་བའི་ཟླ་བ་ནི་ཁམས་དཀར་པོ་ཉིད་དང༌། དེ་ཉིད་དབྱངས་སོ་གཉིས་ཀྱིས་མཚན་པ་ནི། མངལ་དུ་འཇུག་བཞིན་པའི་ཐིག་ལེ་དེ་ཡང་དགའ་བ་བཅུ་དྲུག་པོ་ལ་འཕེལ་འགྲིབ་ཀྱི་ཆ་གཉིས་གཉིས་དང་བཅས་པ་མཚོན་ནོ། །དེ་ལ་རིང་པོ་དང་རྣམ་བཅད་དང་བཅས་པ་རྣམས་ཤེས་རབ་དང༌། ཐུང་ངུ་དང་ང་རོ་དང་བཅས་པ་རྣམས་ཐབས་མཚོན་ནོ། །མངོན་བྱང་གཉིས་པའི་སྐབས་ཀྱི་རྒྱུ་གསལ་བྱེད་བརྒྱད་ཅུ་ནི། སྤྱིར་ཁམས་དམར་ཆའི་དྭངས་མ་ལ་རྡུལ་ཞེས་མིང་འདོགས་པ་ལྟར། དོན་ལའང་དེ་ནི་རྡུལ་ཕྲན་རྣམ་པ་དུ་མ་ཕྱེ་བའི་མཚན་ཉིད་དུ་གནས་པ་ཡིན་ལ། དཀར་པོ་ནི་ཞུ་ཞིང་འདྲེས་པའི་མཚན་ཉིད་དོ། །དེས་ན་ཁམས་དམར་པོ་དེ་རྡུལ་གྱི་མཚན་ཉིད་ཅན་ཡིན་པ་ལས། དང་པོར་འབྱུང་བ་དྲུག་གི་རྡུལ་ནི་སྡེ་བ་དྲུག་གི་མཚོན།
རེ་རེ་ཡང་ཁམས་ལྔ་ལྔ་དང་ནམ་ཡང་འབྲལ་བ་མེད་པའི་ཕྱིར། སྡེ་པ་རེ་རེ་ལ་ཡང་ཡི་གེ་ལྔ་ལྔ་སྟེ་སུམ་ཅུའི་མཚོན་དོན་ཡིན་ལ། དེ་དག་ལས་རྫས་ལོགས་སུ་མེད་ཀྱང་སྤྱི་ཁྱབ་ཏུ་མིག་དང་མིག་ཤེས་སོགས་ཡུལ་ཅན་བསྐྱེད་པའི་འབྱུང་བ་ལྔ་དང༌། གཟུགས་དང་གཟུགས་ཅན་གྱི་རྟེན་སོགས་ཡུལ་བསྐྱེད་པའི་འབྱུང་བ་ལྔ་ནི། ལ་སྡེ་གཉིས་ཀྱིས་མཚོན་ཏེ། དེ་ལྟར་ན་རྡུལ་གྱི་རིགས་མི་འདྲ་བ་བཞི་བཅུ་ལ་དེ་རེ་རེ་དང་འབྲེལ་བའི་གསལ་སྟོང་གི་ཆ་རེ་རེ་ཡོད་པས་བརྒྱད་ཅུ་ཡིན་ལ། རྒྱུ་དེ་རྣམས་ལས་བྱུང་བའི་རཀྟ་ནི་ཉི་མའི་དཀྱིལ་འཁོར་ཉིད་ཡིན། དེ་ལ་ཤེས་པ་གསལ་བ་དང༌། ལུས་ལ་བདེ་བའི་རྣམ་པ་འབྱུང་རྡུལ་སྔ་མ་ལྟ་བུས་ཕྱེ་བ་ཡོད་པ་ནི། གསལ་བྱེད་ཀྱིས་མཚོན་པའོ།། གསུམ་པའི་སྐབས་སུ། ཧཱུཾ་ཡིག་བར་དོའི་རྣམ་པར་ཤེས་པ་ཞེས་པ་ནི། སྔར་རྣམ་ཐར་བཞིའི་ང་རྒྱལ་གྱི་སྐབས་དེར་སེམས་སྟོང་ཉིད་རྣམ་བཅས་བར་དོའི་སེམས་སུ་ལངས་པ་དེ་རྒྱུན་དེ་ཀ་ལ་གནས་ཤིང༌། མའི་མངལ་ལ་ཁང་བཟངས་ཀྱི་ཉམས་འབྱུང་བ་ལྟར་གཞལ་མེད་ཁང་གཙོ་བོའི་གདན་དང་བཅས་པ་ལ་དམིགས་ཤིང་སྐབས་འདིར་ཧཱུྃ་གི་རྣམ་པར་གྱུར་པ་ནི། ཆགས་སྲེད་ཀྱི་དབང་གིས་ཕ་མའི་རེག་སྦྱོར་གྱི་གནས་སུ་རྒྱུགས་པ་ན། སྐད་ཅིག་དང་པོར་ཕའི་ས་བོན་དང་ཕྲད་པ་ཙམ་དུ་གནས་པ་དེ་སྤྱོད་པ་ཡིན་ཏེ། ཕྱི་རོལ་ཏུ་ཉི་མ་གཟས་འཛིན་པའི་ཚེ་ཡང་སྒྲ་གཅན་དེ་ཉི་མ་དངོས་ལ་དང་པོར་འཇུག་མི་ནུས་པར་ཟླ་བ་ལ་འཇུག་པའི་ཚུལ་གྱིས་ཉི་ཟླ་གཉིས་ཀར་སྒྲིབ་པར་བྱེད་པ་ལྟར་བར་དོའི་རྣམ་ཤེས་སྒྲ་གཅན་གྱི་ཆོས་དེ་ཡང་མའི་རཀྟ་ཉི་མའི་ཆོས་ལ་ཐོག་མ་ནས་འཇུག་མི་ནུས་པས། ཕའི་ས་བོན་ཟླ་བའི་ཆོས་ལ་ཐོག་མར་ཞུགས་ནས་
མཐར་དཀར་དམར་གཉིས་ཀ་དང་འདྲེས་པ་དེ་མཚོན་པར་བྱེད་དོ། །ཟླ་བ་སྟེང་དང་ཉི་མ་འོག་ཏུ་བྱེད་པའི་རྒྱུ་མཚན་ནི། ཁ་ཅིག་དཀར་པོ་སྟེང་ནས་འབབ་ཅིང༌། དམར་པོ་གྱེན་དུ་འཕེན་པས་ཡིན་ཡང་ཟེར་ལ། དམར་པོ་ནི་མེའི་ཁམས་ཏེ་འོག་ནས་སྟེང་དུ་འབར་བའི་ཚུལ་ཅན་ཡིན། དཀར་པོ་ནི་ཆུ་སྟེ་སྟེང་དུ་གནས་ནས་ཆར་བཞིན་འོག་ཏུ་འབབ་པའི་མཚན་ཉིད་ཅན་ཡིན་པའི་ཕྱིར་རོ། །ཞེས་ཀྱང་ངོ༌། ཁ་ཅིག་སྐབས་འདིར་དཀར་དམར་སེམས་གསུམ་རོ་གཅིག་ཏུ་འདྲེས་ཟིན་པར་བྱེད་དགོས་པས་དྲི་ཟའི་སེམས་ཅན་ནོ་ཞེས་པ་སྔོན་གྱི་གནས་སྐབས་ལ་དགོངས་པ་ཡིན་ཟེར་ཡང་མ་ཡིན་ཏེ། དཀར་དམར་སེམས་གསུམ་རོ་གཅིག་ཏུ་འདྲེས་ཟིན་ན། སྲོག་གི་རླུང་དང་ཡང་མ་འདྲེས་པ་མི་སྲིད་ན། མངོན་བྱང་བཞི་པའི་སྐབས་སུ་སྲོག་དང་འདྲེས་པ་ཡིན་པར་བཤད་པ་དང༌། ཀུན་གཞིའི་རྣམ་པར་ཤེས་པ་དྲི་ཟའི་སེམས་ཅན་ནོ་ཞེས་གསུངས་པ་དེ་ལ་འདིར་བར་དོ་སྦྱོང་བ་མེད་པས་དྲི་ཟའི་སེམས་ཅན་མ་ཡིན་ནོ་ཞེས་ཁུངས་མེད་དུ་གཏོང་བ་མི་རིགས་པའི་ཕྱིར་རོ། །དེས་ན་ཕའི་ལུས་ལས་ཐིག་ལེ་འཕོ་བའི་གནས་སྐབས་དང༌། མངལ་གནས་སུ་དཀར་དམར་ཁ་སྦྱོར་དུ་གྱུར་ནས་འདྲེ་བ་ལ་མངོན་དུ་མ་ཕྱོགས་པའི་བར་དུ་བར་དོ་རྟིང་མ་རང་དེ་དཀར་ཆ་དང་འགྲོགས་ཀྱང་ཤི་བ་མིན་ལ། དེ་ནས་དེ་མ་ཐག་བར་དོའི་ལུས་འགག་པ་དང་སྐྱེ་སྲིད་བཟུང་བ་དུས་མཉམ་ལྟ་བུར་འབྱུང་ངོ༌། །བཞི་པའི་སྐབས་སུ་སྔར་དཀར་དམར་ཁ་སྦྱོར་ལ་སྲོག་རླུང་མེད་ཀྱང༌། འདིར་དཀར་དམར་སེམས་གསུམ་རོ་གཅིག་ཏུ་འདྲེས་པ་ན། སྲོག་གི་རླུང་རྣམ་ཤེས་ཀྱི་རྟེན་དེ་ཡང་དེ་ལ་ཁྱབ་པའི་ཚུལ་གྱིས་གནས་སོ། །དེ་མཚོན་བྱེད་ཉི་ཟླ་ཧཱུཾ་ཡིག་རྣམས་གཅིག་ཏུ་འདྲེས་པའི་
གོང་བུ་ལ་རླུང་གི་ཁམས་མཚོན་བྱེད་ཧི་ཡིག་ནག་པོའོ། །ལྔ་པའི་སྐབས་ཀྱི་ཐོག་མ་ནི། དེའི་སྐད་ཅིག་གཉིས་པར་རྣམ་ཤེས་དཀར་དམར་དང་འདྲེས་པས་བདེ་བ་ཉམས་སུ་མྱོང་ཡང་ཡིད་བྱེད་མེད་པར་བརྒྱལ་བ་ལྟར་གནས་ཤིང༌། ལུས་རགས་པ་འགྲུབ་པའི་རྒྱུ་ཚོགས་ཕུང་ཁམས་སྐྱེ་མཆེད་དབང་ཡུལ་རྩ་ཐིག་རླུང་གསུམ་ཐམས་ཅད་ཀྱི་ས་བོན་ཡོད་དེ། ད་ལྟ་མངོན་གྱུར་མེད་ཀྱང་ཕྲ་མོ་འདྲེས་པའི་ཚུལ་གྱི་གནས་པ་ནི་སྦྱང་བྱ་ཡིན་ལ། དེ་སྦྱོང་བྱེད་དཀར་དམར་རླུང་སེམས་བཞི་པོ་འདྲེས་པའི་བརྒྱལ་ཐབས་སུ་གནས་པ་མཚོན་བྱེད་ཧཾ་ཡིག་གི་སྒྲ་དང༌། ཕུང་ཁམས་སྐྱེ་མཆེད་ཐམས་ཅད་ཀྱི་ས་བོན་ཚང་བ་མཚོན་བྱེད་ཞལ་ཕྱག་ཐམས་ཅད་ཡོངས་སུ་རྫོགས་པའོ། །དེ་ལྟར་མངོན་བྱང་དང་པོ་ནི། གཟུགས་ཕུང་ལུས་འགྲུབ་པའི་རྒྱུའི་གཙོ་བོ་ཁམས་དཀར་པོ་ཡིན་པ་དང༌། གཉིས་པ་ནི། ཚོར་བ་བདེ་སྡུག་གསལ་པོར་སྐྱེ་བའི་རྒྱུ་ཤ་ཁྲག་ལྤགས་པ་རྩ་རྒྱུས་རྣམས་ཡིན་ལ། དེ་དམར་པོ་ལས་བྱུང་བའི་ཕྱིར་རཀྟ་ནི་ཚོར་ཕུང་སྐྱེད་པ་དང། གསུམ་པ་ནི། སེམས་སྔ་མ་ལས་འཛིན་པའི་རྣམ་པར་རྟོག་པ་ཕྱི་མ་རྣམས་སྐྱེ་ཞིང༌། རྟོག་པའི་གཙོ་བོ་འདུ་ཤེས་ཡིན་པས་འདུ་ཤེས་ཀྱི་ཕུང་པོ་སྐྱེད་པ་དང༌། བཞི་པ་ནི། དཀར་དམར་སེམས་གསུམ་གཅིག་ཏུ་འདྲེས་པ་ན་དེ་ལ་སྲོག་གི་རླུང་གིས་ཁྱབ་ཅིང༌། ལུས་ངག་ཡིད་གསུམ་གྱི་འདུ་བྱེད་ལས་ཀྱི་བྱེད་པ་པོ་རླུང་ཡིན་པས་འདུ་བྱེད་ཀྱི་ཕུང་པོ་སྐྱེད་པའོ། །ལྔ་པ་ནི་ཕུང་པོ་བཞི་ཀར་ཡང་རྣམ་ཤེས་ཀྱི་སྣང་བ་ཡང་ཡིན་འཁོར་ཡང་ཡིན་པས་ཕུང་པོ་བཞི་ཀར་གཅིག་ཏུ་འདྲེས་པའི་མཚན་ཉིད་ཅན་དེ་ཡི་གེ་བཞི་གཅིག་ཏུ་འདྲེས་པའི་ཧཾ་ཡིག་གིས་མཚོན་ཞིང༌། ཕུང་པོ་བཞི་ཀར་རྣམ་ཤེས་སུ་འདུ་ལ་བཞི་པོ་དེར་རྣམ་ཤེས་
མི་འདུ་བས་ཕུང་པོ་གཞན་རྣམས་ནི་ཡན་ལག་ལྟ་བུ་ཡིན་ལ། རྣམ་ཤེས་ནི་ལུས་ཡོངས་རྫོགས་ལྟ་བུ་ཡིན་པའི་ཕྱིར་སྐུ་ཡོངས་རྫོགས་ཀྱིས་རྣམ་ཤེས་མཚོན་ནོ། །ཡང་ཕུང་པོ་གཞན་རྣམས་མི་གསལ་ལ། རྣམ་ཤེས་ནི་ཡུལ་གྱི་རྣམ་པ་གསལ་བའི་ཕྱིར་སྔ་མ་རྣམས་གཟུགས་བརྙན་མི་གསལ་ཞིང༌། ཕྱི་མ་ཞལ་ཕྱག་གི་རྣམ་པ་གསལ་བ་ཡིན་ནོ། ཁ་ཅིག་སྐབས་འདིར་ཧི་ཡིག་སྲོག་རླུང་མཚོན་བྱེད་ཡོད་པས་ཕ་རྒྱུད་དུ་ལྷ་སྐུའི་སྒྲུབ་གཞི་རླུང་དུ་བཤད་པ་དང་འདྲ་བས། དུས་འཁོར་འདི་མ་རྒྱུད་ཁོ་ན་མིན། ཞེས་སོགས་དང༌། སྐུ་ཡོངས་རྫོགས་སྐུ་དང་ཧཾ་ཡིག་ཐུགས་ཡིན་པས་མངོན་བྱང་གི་བསྐྱེད་འབྲས་ལ་སྐུ་ཐུགས་གཉིས་ཀར་མཚོན་བྱེད་ཡོད་ཟེར་བ་སོགས་ནི་མགྲིན་པ་མ་འགགས་པ་རྒྱུ་མཚན་དུ་བྱས་པའོ། །དེ་ལ་མངོན་བྱང་དང་པོ་བཞི་ནི་མངལ་དང་པོར་བཟུང་བའི་སྐབས་ཀྱི་བྱ་བ་རྫོགས་པའི་སྐད་ཅིག་མ་རེ་རེའི་མཚན་ཉིད་ཐ་དད་པ་དེ་དག་སྦྱོང་བྱེད་ཡིན་ལ། དེ་ནས་གཟུང་ནས་ཟླ་བ་གཅིག་གི་བར་དུ་དཀར་དམར་གྱི་དབུས་སུ་སེམས་བརྒྱལ་བར་གནས་པ་དེ་ནི་མངོན་བྱང་ལྔ་པའི་ནང་ནས་གཙོ་བོ་ཡབ་ཡུམ་བསྐྱེད་པས་སྦྱོང་ངོ༌། །དེ་ནི་མངལ་དུ་ཟླ་བ་དང་པོ་མ་རིག་པའི་ཟླ་བ་ཞེས་བྱ་བ་སྟེ། ཤིན་ཏུ་རྨོངས་པའི་ཚུལ་གྱིས་གནས་པའི་ཕྱིར་རོ། །དུས་སྦྱོར་བཅུ་གཉིས་ལས་ཆུ་སྲིན་གྱི་དུས་སྦྱོར་ཡིན་པས་ཆུ་སྲིན་གྱི་ཟླ་བ་ཞེས་ཀྱང་བྱ་སྟེ། དེ་ལ་ཕྱི་རོལ་ཏུ་ཉི་མའི་རང་འགྲོས་ཀྱི་ཁྱིམ་བཅུ་གཉིས་ལ་སྤྱོད་པའི་དབང་དུ་བྱས་ནས་ལོ་གཅིག་ལ་ཁྱིམ་བཅུ་གཉིས་རྫོགས་པ་དང༌། ཁྱིམ་གྱི་འཁོར་ལོ་ནམ་མཁའ་ལ་འཁོར་བའི་དབང་དུ་བྱས་ནས་ཞག་གཅིག་ལ་དུས་སྦྱོར་བཅུ་གཉིས་སྦྱོར་བ་ཡིན་ནའང༌།
འདིར་སེམས་ཅན་སྐྱེ་བ་དང༌། ནང་གི་དབུགས་ལ་དུས་སྦྱོར་བཅུ་གཉིས་འབྱུང་བ་སོགས་ནི་ཕྱི་རོལ་ཀྱི་དེ་དག་གི་དོད་ཡིན་ཡང༌། ཕྱི་ནང་གི་དུས་སྒྲིག་དགོས་པ་མ་ཡིན་གྱི། གང་མངལ་བཟུང་བའི་ཟླ་བ་དེ་ཉིད་ཕྱི་རོལ་ཀྱི་ཟླ་བ་དང་ཞག་དུས་གང་ལ་ཡང་མ་བལྟོས་པར་མ་རིག་པ་ཆུ་སྲིན་གྱི་ཟླ་བར་འཇོག་ཅིང༌། དེ་ནས་ཟླ་བ་དྲུག་འདས་པའི་བདུན་པ་ནི། ཚོར་བ་ཀརྐ་ཊའི་ཟླ་བ་སྟེ་སྲོག་མངོན་གྱུར་རགས་པ་སྐྱེ་བའི་དུས་ཡིན་པར་བཤད་དོ། །དེ་དག་སེམས་ཅན་སྐྱེ་བ་དེ་ཉིད་ལ་བལྟོས་པ་ཡིན་གྱི། ཕྱི་རོལ་ཀྱི་ཟླ་དུས་དང་ཞག་དུས་ལ་སྒྲིག་རྒྱུ་མ་ཡིན་ནོ། །མངལ་དུ་ཟླ་བ་གཉིས་པ་ལ་སྲོག་གི་རླུང་ཕྲ་མོ་དང་དེའི་རྟེན་དུ་གྱུར་པའི་རྩ་བསྐྱེད་པ་ནི་ཧཾ་ཡིག་གིས་སྦྱོང་ངོ༌། །དེ་ནི་རྩ་རླུང་དེ་དག་ལ་བརྟེན་ནས་འདུ་བྱེད་སེམས་པའི་རྣམ་རྟོག་ཕྲ་མོ་སྐྱེ་བའི་འགོ་བརྩམས་པ་ཡིན་པས་འདུ་བྱེད་ཀྱི་ཟླ་བ་ཞེས་བྱའོ། །དེ་ནས་ཟླ་བ་གསུམ་པ་ལ་སྙིང་གའི་རྩ་བཅུ་སྐྱེ་བའི་འགོ་བརྩམས་ཤིང༌། རླུང་བཅུ་པོའི་ཆ་ཤས་ཕྲ་མོ་ཙམ་སྐྱེས་པ་ནི། མངོན་སུམ་དུ་བཞུགས་པའི་ནུས་མ་བརྒྱད་དང་བག་ལ་ཞ་བ་གཉིས་ཏེ། ནུས་མ་བཅུ་བསྒོམས་པས་སྦྱོང་ཞིང༌། དེའི་ཚེ་འཁོར་ལོ་བཞིའི་ལྟེ་བའི་རྩ་ཁམས་འབྱུང་བའི་སྒོ་དོད་ཅིང༌། ལུས་ངག་ཡིད་དང་ཆགས་པའི་ནུས་པ་སྔར་བས་གསལ་དུ་སོང་བ་དེ་སྦྱོང་བྱེད་ནི་རྡོ་རྗེ་བཞི་སྒོམ་པའོ། །ཟླ་བ་འདི་ལ་རླུང་བཅུའི་ནུས་པས་ལུས་དང་ཡིད་ཀྱི་རྣམ་ཤེས་གསལ་བར་སྐྱེ་ཞིང༌། རྣམ་ཤེས་གཞན་རྣམས་འབྱུང་བའི་ནུས་པའང་སྟོབས་ཆེར་གྲུབ་པས་རྣམ་ཤེས་ཀྱི་ཟླ་བ་ཞེས་བྱའོ། །དེ་ལྟར་ན་མངལ་དུ་ཟླ་བ་དགུ་ལ་ཟླ་བ་གསུམ་གསུམ་སྡེ་ཚན་དུ་བཅད་ནས། སྡེ་ཚན་དང་པོ་ཟླ་བ་གསུམ་པོ་དེ་ནི་མངལ་གྱི་གནས་སྐབས་དང་པོ་ཞེས་བྱ་སྟེ། རྒྱལ་མཆོག་དང་པོ་ཉིད་ལ་བལྟོས་པའི་ཡེ་
ཤེས་རྡོ་རྗེའི་གནས་སྐབས་གཙོ་བོའི་གནས་ཀྱི་ལྷ་རྣམས་ཀྱིས་དག་པར་བྱ་བའོ། །བར་སྐབས་དེར་ཕའི་ཁམས་ལས་བྱུང་བའི་འབྱུང་བ་ལྔས་ཉེར་ལེན་བྱས་ནས་རུས་པ་རྐང་ཁུ་བ་སོགས་བསྐྱེད་ནས་ལྷན་ཅིག་བྱེད་པའི་ཚུལ་དུ་ཤ་སོགས་འཕེལ་བའི་རྒྱུ་བྱེད་དོ། །མའི་རྡུལ་གྱི་འབྱུང་བ་ལྔས་ཉེར་ལེན་བྱས་ནས་ཤ་ཁྲག་ལྤགས་པ་སྐྱེད་ཅིང༌། རུས་པ་སོགས་ལ་ལྷན་ཅིག་བྱེད་རྐྱེན་འཕེལ་བའི་རྒྱུ་བྱེད་དོ། །དེ་དག་སྦྱོང་བར་བྱེད་པ་ནི་སངས་རྒྱས་བྱང་སེམས་རྣམས་ཡབ་ཡུམ་ཕན་ཚུན་གྱི་སྐུ་ལ་སྤྲོ་ཞིང་འཇུག་ལ་ཞུ་བ་སོགས་ཡིན་ནོ། །དེ་ནས་ཟླ་བ་བཞི་པ་ལ་ཕུང་པོ་ལྔ་དང་འབྱུང་བ་ལྔ་རགས་པར་གྱུར་ཞིང༌། དེ་དག་གི་རྩ་གསལ་བར་ཆགས་པ་ནི། དེ་བཞིན་གཤེགས་པ་ཡབ་ཡུམ་བསྒོམས་པས་སྦྱོང་ཞིང༌། ལུས་ཟུངས་དྲུག་པོ་རྣམས་འབྱུང་བའི་རྩ་ཡང་དོད་པ་ནི། བུམ་པ་བཅུ་བསྒོམས་པས་དག་པར་བྱེད། ཟླ་བ་དེའི་འཇུག་ཏུ་ལས་ཀྱི་དབང་པོ་ལྔའི་རྩ་དང༌། ཕྱི་དབྱིབས་ཀྱང་འབུར་པོ་ལྔ་ཅུང་ཟད་དོད་པར་འགྱུར་ཏེ། དེ་རྣམས་སྦྱོང་བྱེད་སྒོ་སྐྱོང་གི་ཁྲ་བོ་ལྔ་པོ་རྣམས་བསྐྱེད་ པའོ། །སྐུ་གསུང་ཐུགས་ཡོངས་རྫོགས་ཀྱི་སྐབས་འདིར་ཐུགས་དཀྱིལ་ལ་ཁྲོ་བོ་བཞི་ལས་མ་བསྐྱེད་ན་ཡང་མཆོག་གི་དབང་པོའམ། གསང་བའི་དབང་པོ་སྤྱི་ཁྱབ་ཏུ་གཏོང་བ་ཡིན་ནོ། །སྤྱིར་རྒྱུད་འདིར་ལས་དབང་དང་པོ་བཞི་ལ་རྣམ་གཞག་མི་འདྲ་བ་མེད། ཕྱི་མ་གཉིས་ལ་ཁུ་བ་འདོར་བ་མཆོག་གི་དབང་པོ་ཡེ་ཤེས་ཀྱི་ཁམས་དྲི་ཆུ་འདོར་བ་གསང་བའི་དབང་པོ་ནམ་མཁའི་ཁམས་སུ་བཞག་སྟེ་ལས་དབང་གཉིས་དང་བྱ་བ་གཉིས་སྦྱོང་བའི་ཕྱིར། ཐུགས་དཀྱིལ་ལམ་སྐུ་དཀྱིལ་ལ་ཁྲོ་བོ་དྲུག་དྲུག་བྱེད་པ་དང༌། ཁུ་བ་འདོར་བ་དང༌། དྲི་ཆུ་འདོར་བ་གཅིག་ཏུ་བསྡོམས་ཏེ། དེ་འདྲའི་དབྱེ་བ་མི་བྱེད་པར་གཉིས་ཀ་ལ་
གཉིས་ཀ་ཚང་བར་བྱས་ནས་རྟེན་ཕོ་མོའི་དབྱེ་བས་རྟགས་ཀྱི་དབང་པོ་ནམ་མཁའ་ཁྲོ་བོ་དང༌། བྷ་གའི་དབང་པོ་ཡེ་ཤེས་ཁྲོ་མོ་སྦྱོར་བའི་དབང་དུ་བྱས་ནས། ཐུགས་དཀྱིལ་ལམ་སྐུ་དཀྱིལ་ལ་ཁྲོ་བོ་ལྔ་ལྔས་ཆོག་པའང་མཛད་དོ། །རྣམ་གཞག་ཕྱི་མ་འདི་ལ་ལས་དང་བྱ་བ་ནི། ཕན་ཚུན་ཡིན་གྱི་ལོགས་སུ་མེད། བྷ་ག་ལས་ཀྱི་དབང་པོར་འཇོག་ན། བྱ་བ་ནི་རྟགས་ཡིན་ཏེ། རྟགས་ལ་བྱ་བ་བྱས་པའི་ཕྱིར་རོ། །རྟགས་ཉིད་ལས་དབང་དུ་བཞག་ན། བྷ་ག་བྱ་བ་ཡིན་ཏེ། དེ་ལ་བྱ་བ་བྱེད་པའི་ཕྱིར། དབང་པོ་གཉིས་དང་བྱ་བ་གཉིས་ཏེ། བཞི་ཚན་གྱི་རྣམ་གཞག་སྐབས་འདིར་མི་དགོས་པས་ཁྲོ་བོ་ཡབ་ཡུམ་ཟུང་གཅིག་གིས་སྦྱོང་ཐུབ་པ་ཡིན་ནོ། །འོ་ན་སྦྱང་བྱའི་སྐབས་སུ་རྟགས་དང་བྷ་ག་དུས་གཅིག་ཏུ་འབྱུང་བ་དཀོན་པས་མི་འགྲིག་གོ་སྙམ་ན། དངོས་སུ་གང་རུང་རེ་ལས་མ་གྲུབ་ཀྱང༌། གཅིག་གྲུབ་ཙམ་ན་གཅིག་ཤོས་ལ་ཡང་བྱ་བ་བྱེད་པའི་ནུས་པ་གྲུབ་པའི་ཕྱིར་སྦྱང་བྱ་དང་ཡང་ཤིན་ཏུ་འགྲིག་པར་ཡིན་ནོ། །དེ་ལྟར་ན་ཟླ་བ་དེའི་ཐོག་བར་མཐའ་གསུམ་ལ་ཕུང་ཁམས་དང༌། ལུས་ཟུངས་དང༌། ལས་དབང་རྣམས་བསྐྱེད་ཅིང༌། དེའི་ནང་གི་ཕུང་པོ་ལྔ་ལས་གཟུགས་ཕུང་གཟུགས་དང་གཞན་བཞི་པོ་ལ་མིང་བཞིའི་ཕུང་པོ་ཞེས་ཀུན་ལ་གྲགས་པ་དང་མཐུན་ཞིང༌། ལུས་ཟུངས་དང་ལས་དབང་གཟུགས་ཕུང་གི་བྱེ་བྲག་པ་ཡིན་པའི་ཕྱིར། ཟླ་བ་འདི་ལ་མིང་གཟུགས་ཀྱི་ཟླ་བ་ཞེས་བྱའོ།། གཞན་ལས་མངལ་བཟུང་མ་ཐག་ཏུ་མིང་གཟུགས་སུ་བཤད་པ་ནི། མིང་གཟུགས་ཡོད་པ་ཙམ་ལ་དགོངས་ཤིང༌། འདིར་ནི་མིང་གཟུགས་ཁྱད་པར་ཅན་ལ་སྤྱོད་པའི་སྐབས་ལ་དགོངས་པ་ཡིན་མོད། སྤྱིར་ནི་མངོན་པ་སོགས་ཀྱི་ཚེ་
གསུམ་ཚེ་གཉིས་སོགས་ལ་སྦྱོར་བའི་རྟེན་འབྲེལ་དང༌། འདིར་མངལ་ཟླ་ལ་སྦྱོར་བ་འདི་རྣམས་རྣམ་གཞག་ཡེ་མི་འདྲ་བས་འགལ་སྤོང་མི་དགོས་སོ། །ཟླ་བ་ལྔ་པ་ལ་མིག་སོགས་སྐྱེ་མཆེད་དྲུག་པོ་གསལ་བར་དོད་པ་ནི། བྱང་ཆུབ་སེམས་དཔའ་དྲུག་གིས་སྦྱོང་སྟེ། དེ་རྣམས་ལ་འཁྱུད་པའི་རྡོ་རྗེ་མ་དྲུག་པོས་ཀྱང་དབང་པོ་དྲུག་པོ་ལ་ཡུལ་དྲུག་འཛིན་པའི་ནུས་པ་ཡོད་པ་སྦྱོང་ངོ༌། །དེས་ན་ཟླ་བ་འདི་སྐྱེ་མཆེད་དྲུག་གི་རྟེན་འབྲེལ་གྱི་དུས་སོ། །དེས་ན་ཉན་ཐོས་སྡེ་བ་འགའ་ཞིག་ཡིད་ཤེས་ཀྱི་བདག་རྐྱེན་སྙིང་ཡིན་པར་འདོད་པ་དང་མཚུངས་པར་འདིར་ཡང་སྟེ། བདག་རྐྱེན་དངོས་མ་ཡིན་དུ་ཆུག་ཀྱང་རྟེན་ཡིན་པའི་ཕྱིར། དེའི་དབང་པོའི་ཐ་སྙད་འདོགས་པ་མི་འགལ་བས། འདིར་ལུས་ཀྱི་ཆ་ནས་གྲུབ་རྒྱུའི་དབང་པོ་དྲུག་པ་ནི། སྐབས་འདིར་སྙིང་དུ་ངོས་འཛིན་པར་བྱའོ། །དེ་ནས་ཟླ་བ་དྲུག་པ་ལ་ལུས་ཀྱི་ཚོགས་པ་ན་གནས་པའི་གཟུགས་སྒྲ་དྲི་རོ་རེག་བྱ་ཆོས་ཁམས་རྣམས་སྟོབས་རྒྱས་པ་དང༌། དབང་པོས་ཡུལ་འཛིན་པའི་ནུས་པ་ལྷག་པར་རྒྱས་པ་དེ་བྱང་ཆུབ་སེམས་མ་དྲུག་གིས་སྦྱོང་ལ། ཡུལ་རྣམས་ལ་དབང་པོ་རྣམས་སད་པར་བྱེད་པའི་ནུས་པ་ཡོད་པ་ནི་འདི་རྣམས་ལ་འཁྱུད་པའི་སེམས་དཔའ་དྲུག་པོ་རྣམས་སོ། །སྔར་དབང་པོ་རྣམས་གྲུབ་ལ་འདིར་ཡུལ་རྣམས་གྲུབ་པས་ཡུལ་དབང་ཕྲད་པའི་རེག་པའི་ནུས་པ་སྟོབས་སུ་གྱུར་པའི་ཕྱིར་ཟླ་བ་འདི་རེག་པའི་ཡན་ལག་གི་གནས་སྐབས་སོ། །དེ་ལྟར་ན་དེ་རྣམས་ཀྱིས་ཐུགས་དཀྱིལ་གྱི་ནང་གི་ལྷ་རྣམས་སྤྲོ་བ་རྫོགས་པ་ཡིན་ནོ། །དེས་ན་རེས་འགའ་ཐུགས་དཀྱིལ་ནི་སྙིང་གའི་འཁོར་ལོ་དག་བྱེད་ཙམ་དུ་སྦྱོར་ཞིང༌། ལྟེ་མགྲིན་ཕན་ཆད་གསུང་དང་སྐུའི་དཀྱིལ་འཁོར་ཁོ་ན་ལ་སྦྱོར་བ་ལྟར་སྣང་བ་དང༌། ཡང་དཔྲལ་བའི་འཁོར་
ལོ་གཤེགས་པ་ཡབ་ཡུམ་དང༌། མགྲིན་པའི་འཁོར་ལོ་སེམས་དཔའ་ཡབ་ཡུམ་ལ་སྦྱོར་བ་ཡང་བཤད་པས། འདིར་ཕྲུགས་གཅིག་ལ་སྦྱོར་རམ་མི་སྦྱོར་རམ་སྙམ་ན། དེ་གཉིས་མི་འགལ་བར་གཞི་གཅིག་གི་སྟེང་དུ་སྦྱོར་བ་ཡིན་ཏེ། དང་པོ་ཟླ་བ་གསུམ་པ་ལ་སྙིང་གའི་རྩ་བཅུ་གྲུབ་པའི་དུས་ན། དེ་ལ་ཤུན་པ་ཆགས་པ་ལྟ་བུར་གཙུག་ཏོར་གྱི་རྩ་བཞིའི་ཆ་ཤས་གྲུབ་ལ། ལུས་ངག་ཡིད་ཆགས་ཀྱི་ནུས་པ་རྒྱས་པའང་དེའི་སྟོབས་ལས་ཡིན་པས་རྡོ་རྗེ་བཞི་དང་སྦྱོར། དེ་ནས་དེ་གཉིས་ཀྱི་བར་དུ་བར་ཤུན་སྐྱེས་པའི་ཚུལ་དུ་དཔྲལ་བའི་འཁོར་ལོའི་རྩ་ཕྲ་མོ་ཆགས། འཁོར་ལོ་སྔ་མ་དང་དེའི་བར་དུ་བར་ཐག་ཅུང་ཟད་བྱུང༌། རྩ་འཁོར་གསར་བ་དེ་ནི་ཕུང་ལྔ་འབྱུང་ལྔའི་སྟོབས་སྐྱེད་བྱེད་ཡིན་པས་གཤེགས་པ་ཡབ་ཡུམ་དང་སྦྱོར་བ་ཡིན་ལ། དེའི་ཚེ་སྙིང་གའི་རྩ་བཅུའི་འོག་གི་ཆ་ལ་ཡང་གསང་བའི་འཁོར་ལོའི་རྩ་ཕྲ་མོ་ཤུན་པའི་ཚུལ་དུ་འབྱར་བ་ཞིག་ཆགས་ཤིང༌། དེ་ལས་དབང་གི་ནུས་པ་ཅན་ཡིན་པས་ཁྲོ་བོ་དང་སྦྱོར། རྩ་བཅུའི་བར་གྱི་ཆ་ལས་ལུས་ཟུངས་རྣམས་འབྱུང་ངོ༌། །ཟླ་བ་ལྔ་པའི་སྐབས་སྔར་དཔྲལ་བ་དང་སྙིང་གའི་རྩ་འབྱར་བའི་བར་དེར་བར་ཤུན་གྱི་ཚུལ་གྱི་མགྲིན་པའི་རྩ་ཕྲ་མོ་ཆགས་ལ། རྩ་འཁོར་སྔ་མ་གཉིས་ཀར་གྱེན་དུ་ཅུང་ཟད་འཕགས་ཤིང༌། ཟླ་བ་དྲུག་པ་ལ་མགྲིན་པའི་རྩ་འཁོར་དེ་ཤིན་ཏུ་རྒྱས་པར་འགྱུར་ཏེ། ཟླ་བ་དེ་ཉིད་ལ་མགྲིན་པའི་འཁོར་ལོ་གྲུབ་པ་སེམས་དཔའ་ཡབ་ཡུམ་གྱིས་སྦྱོང་བ་ཡིན་མོད་ཀྱང༌། རེ་ཞིག་རྩ་འཁོར་དེ་དག་རང་རང་གི་གནས་སུ་མ་སླེབ་ཅིང༌། རང་རང་གི་བྱ་བ་ཇི་བཞིན་དུ་སྤྱོད་མི་ནུས་པས་དེ་དང་དེའི་དག་སྦྱོར་གཙོ་བོར་མ་བྱས་ལ། ཟླ་བ་དྲུག་པའི་ནང་ཚུལ་ཆད་དུ་སྙིང་གའི་འཁོར་ལོའི་ནི་ནུས་པ་རྫོགས་པའི་ཕྱིར་
དེ་ཡན་ཆད་སྙིང་ག་ལ་སྦྱར་བ་ཡིན་ནོ། །ཟླ་བ་ལྔས་དྲུག་པ་དེ་དག་ལ་སྙིང་གའི་རྩ་འཁོར་ཀྱི་འོག་ཕྱོགས་སུ་སྔ་མ་གསང་འཁོར་ཆགས་པ་དང་གཉིས་པོའི་བར་ལ་བར་ཤུན་གྱི་ཚུལ་གྱིས་ལྟེ་བའི་འཁོར་ལོའི་རྩ་ཆགས་ཤིང་གཉིས་ཀའང་བར་མཚམས་བྱེ་ནས་འོག་ཕྱོགས་སུ་ཅུང་ཟད་ཐག་རིང་བར་སོང་ཞིང༌། ཁྱད་པར་དུ་ཡང་ལྟེ་བའི་རྩ་འཁོར་ནི་འདབ་མ་བཅུ་གཉིས་ཡིན་པར་མངོན་པ་དེ་ནི་གཟུངས་མ་རྣམས་ཀྱིས་རྣམ་པར་དག་པར་ཤེས་པར་བྱའོ། །དེ་ལྟར་བཤད་པ་རྣམས་རྒྱུད་འགྲེལ་གྱི་དངོས་བསྟན་སྐུ་གསུང་ཐུགས་ཡོངས་རྫོགས་ཀྱི་དབང་དུ་བྱས་པ་ཡིན་ལ། ཐུགས་དཀྱིལ་ཁོ་ན་ལ་སྦྱོར་ན། ཟླ་བ་དང་པོ་གསུམ་སྔར་དང་འདྲ་ལ། དེ་མན་ཆད་ཟླ་བའི་ངེས་བཟུང་མི་སྦྱོར་བར་དེ་ནས་བརྩམས་ཏེ་ཇི་སྲིད་མངལ་དུ་གནས་པ་དེ་སྲིད་དུ་ཕུང་པོ་དང་ཁམས་དང་དབང་པོ་ཡུལ་དང་བཅས་པ་དང༌། ལས་དབང་བྱ་བ་དང་བཅས་པ་རྣམས་གོང་འཕེལ་དུ་གྱུར་པ་ལ་སྤྱི་ལྡོག་ནས་སྦྱར་བར་བྱ་བ་ཡིན་ཞིང༌། འདི་ལ་ནི་སེམས་དཔའ་ཡབ་ཡུམ་གྱི་སྔོན་དུ་ཁྲོ་བོ་ཡབ་ཡུམ་འགོད་དགོས་པའི་ངེས་པའང་མེད་པས་ཇི་ལྟར་འོས་པ་སྦྱར་བར་བྱའོ། །མངལ་ཟླ་བཞི་པ་དང་ལྔ་པ་དང་དྲུག་པའི་གནས་སྐབས་དེ་དག་ནི་མངལ་གྱི་གནས་སྐབས་གཉིས་པའམ་བར་མ་ཞེས་བྱ་ཞིང༌། རྒྱལ་མཆོག་འདི་ལ་བལྟོས་པའི་ཐུགས་རྡོ་རྗེའི་གནས་སྐབས་སོ། །དེ་ནས་མངལ་གྱི་གནས་སྐབས་གསུམ་པ་ཟླ་བ་བདུན་པ་ལ་ལྟེ་བའི་འཁོར་ལོ་རིམ་པ་གཉིས་ནང་གི་རྩ་འདབ་བརྒྱད་དང་ཕྱིའི་དྲུག་ཅུ་རྩ་བཞི་གྲུབ་པ་དང༌། མགྲིན་པ་དང་ལྟེ་བའི་འཁོར་ལོ་གཉིས་ཀར་རང་གནས་སུ་སླེབ་ཅིང་བྱ་བ་བྱེད་ནུས་སུ་གྱུར་ལ། དེ་གཉིས་ཁ་སྦྱོར་དུ་གྱུར་པའི་ནུས་པས་སྲོག་གི་མིང་ཅན་རླུང་རྣམས་སྟོབས་རྒྱས་ཏེ།
རླུང་རྣམས་ལྟེ་བ་ནས་སྐྱེ་ཞིང་མགྲིན་པར་ཕྱིན་པ་ན། ངག་ཚིག་སྨྲ་བའི་ནུས་པ་གསལ་བར་བྱེད་དོ། །དེ་དག་ལས་ལྟེ་བའི་ནང་སྐོར་གྱི་རྩ་བརྒྱུད་ནི། རྣལ་འབྱོར་མ་བརྒྱད་དང༌། ཕྱི་སྐོར་འདབ་མ་དྲུག་ཅུ་རྩ་བཞི་ནི། འདབ་མ་ལ་གནས་པའི་རྣལ་འབྱོར་མ་དྲུག་ཅུ་རྩ་བཞིའོ། །ལྟེ་བ་དང་མགྲིན་པ་སྡེབ་པས་ངག་གི་བརྗོད་པ་འབྱུང་བའི་ཕྱིར་གསུང་གི་དཀྱིལ་འཁོར་གྱི་ལྷ་ཚོགས་སོ། །སྐབས་གཞན་གྱི་ཚིག་དང་བསྟུན་ནས་ཤུགས་ལ་འཕངས་པ་ནི། མགྲིན་པའི་ནང་སྐོར་གྱི་རྩ་འདབ་བརྒྱད་ཀྱང་རྣལ་འབྱོར་མ་བརྒྱད་པོའི་ཡབ་བརྒྱད་ཀྱིས་རྣམ་པར་དག་པའོ། །དེའི་ཚེ་རྩ་དང་ངག་ཚིག་གི་ནུས་པ་རྒྱས་པས་གནས་སྐབས་སྔ་མ་རྣམས་ལས་ཚོར་བ་ལྷག་པར་རགས་པར་གྱུར་པའི་ཕྱིར། ཚོར་བའི་ཡན་ལག་གི་རྟེན་འབྲེལ་ཞེས་བྱའོ། །སྤྱིར་དཀྱིལ་འཁོར་རྒྱལ་མཆོག་སྐུ་རྡོ་རྗེའི་རྣལ་འབྱོར་ཡིན་ཡང་དེའི་ནང་ཚན་ལ་བལྟོས་པའི་གསུང་དཀྱིལ་བསྐྱེད་པ་ནི་གསུང་རྡོ་རྗེའི་གནས་སྐབས་སོ། །དེ་ནས་ཟླ་བ་བརྒྱད་པ་ལ་གསང་བའི་འཁོར་ལོ་དང་སྤྱི་བོའི་འཁོར་ལོ་ཡང་རང་གནས་སུ་སླེབ་ཅིང་བྱ་བ་བྱེད་ནུས་སུ་གྱུར་པ་དང༌། མགྲིན་པ་ལས་གྱེས་ཏེ་དཔུང་པ་གཉིས། གྲུ་མོ་གཉིས། འཁྲིག་མ་གཉིས་ཏེ་ལག་པའི་རྩ་འཁོར་དྲུག་དང༌། ལྟེ་བ་ལས་གྱེས་ཏེ་དཔྱི་གཉིས། པུས་མོ་གཉིས། བོལ་གོང་གཉིས་ཏེ་རྐང་པ་ལ་གནས་པའི་རྩ་འཁོར་དྲུག མདོར་ན་ལས་ཀྱི་འཁོར་ལོ་བཅུ་གཉིས་པོ་གྲུབ་པར་གྱུར་ལ། དེའི་ཚེ་སྤྱི་བོའི་འཁོར་ལོ་གང་ལ་འདོད་ཆགས་གཡོ་བའི་མཐུན་རྐྱེན་ཁམས་དཀར་པོའི་ཆ་རྒྱས་པ་ཡུལ་དང༌། གསང་བའི་འཁོར་ལོ་ལས་གཉིས་སྦྱོར་གྱི་སྲེད་པ་དྲག་པོ་སྐྱེ་བ་ནི་ཡུལ་ཅན་ཏེ། སྲེད་པའི་རྒྱུ་གྲུབ་པ་ཉིད་ཀྱི་ཕྱིར་གནས་སྐབས་འདི་ལ་
སྲེད་པའི་རྟེན་འབྲེལ་ཞེས་བྱའོ། །གསང་བའི་འཁོར་ལོ་ནི། རྐང་པའི་འཁོར་ལོ་དྲུག་ལ་དབང་སྒྱུར་བ་དང༌། སྤྱི་བོའི་འཁོར་ལོ་ནི་ལག་པའི་འཁོར་ལོ་དྲུག་ལ་དབང་སྒྱུར་བ་ཡིན་ཏེ། སྤྱི་བོའི་རྩ་འདབ་བཅུ་དྲུག་ནི་ཚེས་ཀྱི་སྤྱི་བོ་བཅུ་དྲུག་མཚོན་ལ། གསང་བའི་སོ་གཉིས་ནི་དེ་ལས་ཕྱེ་བའི་ཡར་ངོ་བཅུ་དྲུག་དང༌། མར་ངོ་བཅུ་དྲུག་སྟེ་སོ་གཉིས་ཡིན་ཞིང། བཅུ་དྲུག་པ་གཉིས་སྤྱི་ཁྱབ་ཏུ་བཏང་བའི་ལྷག་མ་སུམ་ཅུ་ལ་ཟླ་བ་བཅུ་གཉིས་ཀྱིས་དབྱེ་བ་ཡིན་པའི་ཕྱིར་ལས་ཀྱི་འཁོར་ལོ་བཅུ་གཉིས་ཀྱི་རྩ་འདབ་སུམ་བརྒྱ་དྲུག་ཅུ་དང༌། ཚེས་ལྷ་སུམ་བརྒྱ་དྲུག་ཅུ་རྣམས་སྤྱི་བོ་གསང་བའི་འཁོར་ལོ་གཉིས་དང་ལྷག་པར་འབྲེལ་བ་ཡིན་ནོ། །དེས་ན་ཁྱབ་བྱེད་སྤྱི་གསང་དང༌། ཁྱབ་བྱ་འཁོར་ལོ་བཅུ་གཉིས་རྣམས་ཚེས་ལྷ་སུམ་བརྒྱ་དྲུག་ཅུས་སྦྱོང་ཞིང༌། ཟླ་བ་དེའི་འཇུག་གི་ཆ་ལ་ལག་མཐིལ་གཉིས། རྐང་མཐིལ་གཉིས། བཤང་ལམ་གྱི་རྩ་རྣམས་གྲུབ་ཅིང༌། གཙུག་ཏོར་གྱི་འཁོར་ལོ་རང་གནས་སུ་སླེབ་པས་ཚངས་བུག་ནི་རྩ་ཡང་གྲུབ་པ་ནི། སྐུའི་སྒོ་སྐྱོང་དྲུག་གིས་སྦྱོང་བར་བྱེད་དེ་འདི་ནི་སྔ་མའི་ཞོར་ལས་བྱུང་བའོ། །དེ་ནས་ཟླ་བ་དགུ་པ་ལ་རྐང་པ་དང་ལག་པའི་སོར་མོ་རྣམས་གྲུབ་ཅིང༌། སྔར་བརྒྱད་པའི་དུས་སུ་འགོ་ཙམ་བརྩམས་པའི་བྱ་བའི་འཁོར་ལོ་དྲུག་ཅུ་པོ་རྣམས་གྲུབ་པ་ནི། ཀླུ་དང་རབ་གཏུམ་མ་རྣམས་ཀྱིས་སྦྱོང་བར་བྱེད་དེ། སོར་མོ་རེ་རེ་ལ་ཚིགས་ཀྱི་འཁོར་ལོ་གསུམ་གསུམ་ཡོད་པས། ལྷ་རེ་རེ་བཞིན་རྩ་འཁོར་གསུམ་གསུམ་དང་སྦྱར་ནས། རྩ་འཁོར་དྲུག་ཅུ་ཀླུ་བཅུ་དང་རབ་གཏུམ་མ་བཅུས་སྦྱོང་ངོ༌། །ཟླ་བ་དེའི་འཇུག་ལ་ལྤགས་པ་དང༌། སྐྲ་
དང་བ་སྤུ་རྣམས་འགྲུབ་པ་ནི། གྲུབ་པ་དང་འབྱུང་པོའི་ཚོགས་རྣམས་ཀྱིས་སྦྱོང་ངོ༌། །དེ་རྣམས་དཀྱིལ་འཁོར་རྒྱལ་མཆོག་སྐུའི་རྡོ་རྗེའི་རྣལ་འབྱོར་གྱི་ནང་ནས་ཀྱང་སྐུ་རྡོ་རྗེའི་རིམ་པའོ། །འདི་ནི་ཡན་ལག་བསྐྱོད་པའི་རྒྱུ་རྣམས་གྲུབ་པ་སྟེ་ལེན་པའི་རྟེན་འབྲེལ་ལོ། །དེ་ནས་ཟླ་བ་བཅུ་པའི་ངོ་ལ་རླུང་རྣམས་སྣ་སྒོ་ནས་ཕྱིར་མི་འགྲོ་ཡང་ནང་དུ་རབ་ཏུ་གཡོ་བས་མངལ་ནས་ཕྱིར་འབྱུང་བ་འདོད་པ་སེམས་ལ་འབྱུང་བ་ནི་འདོད་མ་རྣམས་ཀྱིས་སྦྱོང་ཞིང༌། མངལ་གྱི་གནས་ལ་ཆགས་པ་དང་བྲལ་བ་ནི་ཕྱིར་འདོད་མ་རྣམས་ཀྱིས་སྦྱོང་སྟེ། གཟུངས་མ་རྣམས་ཀྱང་སྐབས་འདིར་སྤྲོས་ན། སྙིང་གའི་རྩ་ལ་རླུང་དྲག་ཏུ་གཡོ་བ་དང་སྦྱོར་རོ། །མངལ་དུ་གནས་དུས་སྣ་སྒོར་འབྱུང་འཇུག་མི་བྱེད་ཀྱང་རླུང་རྫོགས་ནས་བདེ་སྡུག་གི་ཚོར་བ་མཐའ་དག་རྟོགས་པ་འབྱུང་ཞིང༌། རྨི་ལམ་བཞིན་དུ་སྣང་བ་དང་ཤེས་པ་རབ་ཏུ་གསལ་བས་མངོན་ཤེས་ཀྱང་འབྱུང་བ་དེ་ནི་ང་རྒྱལ་བཟུང་བ་དང༌། སྙིང་རྗེའི་དབང་བསྐུར་གྱིས་སྦྱོང་ངོ༌། །དེ་ཡང་མྱོང་ཚོར་དང་གསལ་སྣང་ནི་ང་རྒྱལ་བཟུང་བ་དང༌། མངོན་ཤེས་ནི་དབང་བསྐུར་དང་མཚུངས་ཤིང༌། སེམས་ཅན་རྣམས་མཚན་སོ་གཉིས་ཀྱི་དཀྱིལ་འཁོར་དུ་གྱུར་པ་ནི། སྐབས་དེར་མའི་ཟས་ཀྱི་བཅུད་ལ་སོགས་པའི་ནུས་པས་ཕུང་ཁམས་སོ་དྲུག་གི་ཆ་ཤིན་ཏུ་འཕེལ་ཞིང་སྨིན་པར་གྱུར་པ་མཚོན་ནོ། །འདི་ནི་མངོན་པར་འདོད་པ་ཡིད་ཀྱི་ལས་དུ་མ་དང་བཅས་ཤིང་སེམས་པའི་སྟོབས་ཆེ་བའི་ཕྱིར་ན། སྲིད་པའི་ཡན་ལག་གི་རྟེན་འབྲེལ་དུ་བཞག་གོ། །།གཉིས་པ་རྫོགས་རིམ་གྱི་ལམ་ཇི་ལྟར་སྨིན་པར་བྱེད་པའི་ཚུལ་ནི། གཙོ་བོའི་གདན་པདྨ་ཉི་ཟླ་སྒྲ་གཅན་ནི་རྟེན་གཞི་སོར་
སྡུད་སྐབས་ཀྱི་ཕྱི་ནང་གི་ནམ་མཁའ་དང༌། རོ་རྐྱང་གི་རླུང་དྷཱུ་ཏཱིར་འདྲེས་པ་ཙམ་ལམ་དུ་བྱེད་ལ། དེ་ནི་སོར་སྡུད་སྤྱི་ལའང་ཚང་མོད་ཀྱི་སྐབས་འདིར་སོར་སྡུད་མཐར་ཕྱིན་ནས་བསམ་གཏན་ལ་བརྩོན་པར་བྱེད་པའི་གནས་སྐབས་ཏེ་རྗེས་ཟླ་བ་ལས་བྱང་ཆུབ་པ་ནི་སོར་སྡུད་ཀྱི་སྐབས་སུ་མཐོང་བའི་ཐིག་ལེའི་དབུས་སུ། སླར་ཡང་མཚན་རྟགས་བཞི་ཤར་ཞིང་འདྲེས་པ་དང༌། ཉི་མ་ལས་བྱང་ཆུབ་པ་ནི། དེའི་སྟེང་དུ་ཉིན་རྟགས་དྲུག་ཤར་ཞིང་འདྲེས་པ་སྟེ། གཙོ་བོར་ཤེས་རབ་ཀྱི་ཡན་ལག་སྨིན་པར་བྱེད་པའི་ལམ་དུ་འགྱུར་བ་དང༌། ས་བོན་ལས་བྱང་ཆུབ་པ་ནི། ཐིག་ལེ་ཆེན་པོའི་སྣང་བ་ལ་སེམས་གནས་ཏེ། སྣང་སེམས་དེ་གཉིས་འདྲེར་རུང་བའི་མཚན་ཉིད་ཅན་རྟོག་པའི་ཡན་ལག་དང༌། ཐམས་ཅད་གཅིག་ཏུ་གྱུར་པ་ལས་བྱང་ཆུབ་པ་ནི་སྟོང་གཟུགས་དང་སེམས་ཉིད་རོ་གཅིག་ཏུ་རྟོགས་པ་དཔྱོད་པའི་ཡན་ལག་ཙམ་པོའོ། །ལྷ་ཚོགས་རྣམས་བསྐྱེད་པ་ནི། སྤྱིར་ཐིག་ལེ་ཆེན་པོའི་དབུས་སུ་ལོངས་སྐུ་རྣམ་པ་ཀུན་ལྡན་རྗེས་མཐུན་པ་འགྲུབ་པ་སྨིན་བྱེད་ཡིན་ལ། དེ་དག་ཀྱང་སོ་སོར་ཕྱེ་ན། སྤྱི་ལྡོག་ནས་སོར་བསམ་གཉིས་ཀར་དབུ་མ་གཙོ་བོར་གྱུར་པའི་རྩའི་ལམ་སྦྱོང་བ་ཡིན་པ་ལས། སོར་སྡུད་ནས་དཔྱོད་པའི་ཡན་ལག་རྒྱུད་ལ་སྐྱེས་པའི་བར་དུ་རྩ་རྣམས་སྤྱི་ལྡོག་ནས་སྦྱོང་ཞིང༌། སྦྱངས་པའི་མཐུ་ལས་ཐིག་ལེ་ཆེན་པོའི་བར་དུ་ངེས་པ་དང་མ་ངེས་པའི་རྟགས་སྣ་ཚོགས་ཤར་བ་ཡིན་ལ། ལོངས་སྐུ་རྣམ་པ་ཐམས་ཅད་པའི་མིང་ཅན་རྗེས་དྲན་ཡན་ཆད་དུ་འབྱུང་བར་འགྱུར་པའི་སྟོང་གཟུགས་ཀྱི་ལྷ་རྣམ་པ་ཐམས་ཅད་པ་དེ་དང་རྗེས་མཐུན་པ་ཙམ་ཞིག་སྐབས་
འདིར་གྲུབ་པ་ནས་གཟུང་མཐའ་ཡས་པར་འཕེལ་བར་འགྱུར་ཏེ། དེ་ཡང་རྩ་ཤིན་ཏུ་སྦྱངས་པ་ལས་ལོངས་སྐུ་སྣང་ཞིང༌། ལོངས་སྐུའི་སྣང་བ་རེ་རེ་ལ་མཉམ་པར་བཞག་པ་ནའང༌། སྔར་གྱི་ལས་བརྒྱ་འགྱུར་སྟོང་འགྱུར་གྱིས་ལྷག་པའི་རྩ་ལམ་འབྱོངས་ཚུལ་ཡོང་ཞིང༌། རྩ་བའི་ཁྱད་པར་རེ་རེ་བྱང་བས་ཀྱང་ལོངས་སྐུ་རྣམ་པ་ཐམས་ཅད་པ་དེ་ཉིད་གོང་ནས་གོང་དུ་འགྱུར་རོ། །ལོངས་སྐུ་ཁྱད་པར་དུ་གྱུར་པ་ན། སྒྲུབ་པ་པོ་རང་ཉིད་ཀྱི་རྟོགས་པའི་ཚུལ་ཡང་གོང་ནས་གོང་དུ་ཁྱད་ཞུགས་པར་འགྱུར་རོ། །དེ་ལས་དང་པོར་ཡིད་བཟང་མ་དང༌། དུང་ཅན་མའི་ལམ་བྱང་བ་ན་རྩ་ལམ་དེ་ལ་ཆེད་དུ་གཉེར་ནས་དྲངས་པ་དང་བཅུག་པ་དང་བཅིངས་པ་མ་ཡིན་པར་རང་ཤུགས་ཀྱིས་རྩ་དེ་གཉིས་སུ་རླུང་བབས་པ་ལས་བྱུང་བའི་ལོངས་སྐུ་ནི་གཙོ་བོ་ཡབ་ཡུམ་སྟེ། དཔྱོད་པའི་ཡན་ལག་ཁྱད་པར་ཅན་ནོ། །དེ་ནས་སྙིང་གའི་རྩ་བཅུའི་ལམ་སྦྱངས་པ་ལས་རང་ཤུགས་ཀྱིས་རླུང་དབུ་མར་བབས་པའི་ལོངས་སྐུ་ནི། ནུས་མ་བཅུ་དང༌། དེ་བཞིན་དུ་ཐམས་ཅད་ལ་སྦྱར་ཏེ། གཙུག་ཏོར་ཀྱི་རྩ་ལས་རྡོ་རྗེ་བཞི་དང༌། ཕུང་ཁམས་ཀྱི་རྩ་ལས་སངས་རྒྱས་ཡབ་ཡུམ་དང༌། བདུད་རྩི་དྲུག་གི་རྩ་ལས་བུམ་པ་དང༌། དབང་ཡུམ་གྱི་རྩ་ལས་སེམས་དཔའ་ཡབ་ཡུམ་དང༌། ལས་དབང་གི་རྩ་ལས་ཁྲོ་བོ་ཡབ་ཡུམ་སྟེ། དེ་རྣམས་ནི་བསམ་གཏན་ཡན་ལག་ལྔ་ལས་དགའ་བའི་ཡན་ལག་ཐོབ་པའི་གནས་སྐབས་ཡིན་ཞིང༌། ལྟེ་བ་དང་མགྲིན་པའི་རྩ་ལས་གསུང་འཁོར་གྱི་ལྷ་དང༌། སྤྱི་བོ་གསང་བ་ཚིགས་ཆེན་གྱི་རྩ་རྣམས་ལས་ཚེས་ལྷ་རྣམས་དང༌། རྐང་ལག་གི་སོར་མོའི་ཚིགས་ཀྱི་རྩ་རྣམས་ལས་ཀླུ་དང་བཅས་པའི་རབ་གཏུམ་མ་རྣམས་
དང༌། དེ་ལྟར་བཤད་པའི་རྩ་རྣམས་དང༌། མ་ངེས་པའི་རྩ་སྣ་ཚོགས་པའི་ལམ་སྦྱངས་ཤིང་མཉེན་ལྕུག་ཏུ་བྱས་པ་ལས་སོ་སོའི་རླུང་རྣམས་དབུ་མར་རང་ཤུགས་ཀྱིས་བབས། དེ་ལས་བྱུང་བའི་ལོངས་སྐུ་རྣམ་པ་ཐམས་ཅད་པ་འབྱུང་བ་འགྱུར་བ་ནི། སྐབས་འདིར་གྲུབ་པ་འབྱུང་པོ་འདོད་ཕྱིར་འདོད་ཀྱི་བར་བསྒོམས་པས་སྨིན་པར་བྱེད་དེ་གཡོ་མེད་བདེ་བའི་ཡན་ལག་ཡིན་ལ། བསམ་གཏན་མཐར་ཕྱིན་པ་ལས་ཤེས་པ་དང་ཤེས་བྱ་རོ་གཅིག་གམ་རྩེ་གཅིག་ཏུ་གྱུར་པ་ནི་ང་རྒྱལ་བཟུང་བ་དང༌། བསམ་གཏན་གྱི་མངོན་ཤེས་ལྔ་ཐོབ་པས་སེམས་ཅན་གྱི་དོན་སྤྱོད་པ་ནི་སྙིང་རྗེའི་དབང་བསྐུར་བས་སྨིན་པར་བྱེད་དོ། །དཀྱིལ་འཁོར་རྒྱལ་མཆོག་གི་སྐབས་འདིར་ཁ་ཅིག་གཙོ་བོའི་པདྨ་རྩ་འཁོར་དང༌། ཉི་ཟླ་ཁམས་ཀྱི་འདུ་འཕྲོད་དང༌། ས་བོན་རླུང་ཐིམ་པ་དང༌། རྡོ་རྗེ་བདེ་སྟོང་གི་ཡེ་ཤེས་ལས་ལྷ་སྐུ་བསྐྱེད་པ་སོགས་རྫོགས་རིམ་གྱི་རྒྱུད་སྨིན་པར་བྱེད་ཚུལ་མང་པོ་ཞིག་འཆད་ནའང༌། གཞན་གྱི་རྒྱས་བཀབ་ཏུ་སྣང་ཞིང༌། ཕྲུགས་མི་གཅིག་པ་གཞན་དང་རྣམ་གྲངས་གཞན་གྱི་སྒོ་ནས་འཆད་པ་ལ་ཁུངས་དང་ལྡན་ན་མཐའ་གཅིག་ཏུ་འགལ་བ་རང་མེད་ཀྱང་གཙོ་བོའི་དོན་གྱི་དབང་དུ་བྱས་ན་རིགས་པས་ཀྱང་མི་འཐད་དེ། དཀྱིལ་འཁོར་རྒྱལ་མཆོག་དང་ཐོག་མར་དགེ་བ་སྦྱོར་དགོས་ཀྱི། བར་དགེ་དང་སྦྱོར་བ་མི་ལེགས་པའི་ཕྱིར་རོ། །དེས་ན་དུས་འཁོར་གྱི་རང་ལུགས་ཕྱོགས་ཙམ་ཡང་མ་མཐོང་བར་གཞན་གྱི་རིགས་འགྲེ་མང་དུ་སྨྲས་ཀྱང་གནད་དང་བྲལ་ བའོ།། །།གསུམ་པ་འབྲས་བུ་རྫོགས་ཚུལ་ནི། གཙོ་བོར་རང་སྣང་གི་དབང་དུ་བྱས་ན། ཡེ་ཤེས་ཀྱི་རང་བཞིན་གཞལ་མེད་
ཁང་པ་དང༌། མཆོད་པའི་བཀོད་པས་ཉེ་བར་བརྒྱན་པའི་ཞིང་ཁམས་དོན་དམ་པ་དེར་ཟླ་བས་མཚོན་པ་མེ་ལོང་ཡེ་ཤེས་རྣམ་པར་སྣང་མཛད་དང༌། ཉི་མ་མཉམ་ཉིད་ཡེ་ཤེས་རིན་ཆེན་འབྱུང་ལྡན་དང༌། ཧཱུཾ་ཡིག་སོར་རྟོག་ཡེ་ཤེས་སྣང་བ་མཐའ་ཡས་དང༌། གཅིག་ཏུ་འདྲེས་པ་ཧི་ཡིག་དང་བཅས་པ་བྱ་གྲུབ་ཡེ་ཤེས་དོན་ཡོད་གྲུབ་པ་དང༌། སྐུ་ཡོངས་རྫོགས་ཧཾ་ཡིག་དང་བཅས་པ་ཆོས་དབྱིངས་ཤིན་ཏུ་རྣམ་དག་གི་ཡེ་ཤེས་མི་བསྐྱོད་པ་སྟེ། ཡེ་ཤེས་ལྔའི་རང་བཞིན་རིགས་ལྔའི་དཀྱིལ་འཁོར་མཐའ་ཡས་པའོ། །དཔལ་དུས་ཀྱི་འཁོར་ལོ་ནི། ཡེ་ཤེས་ལྔ་གཅིག་ཏུ་འདུས་པ་མི་འགྱུར་བའི་བདེ་ཆེན་རྡོ་རྗེ་སེམས་དཔའི་དཀྱིལ་འཁོར་དང༌། བཅོམ་ལྡན་འདས་མ་ནི་རིགས་ལྔའི་དཀྱིལ་འཁོར་དག་པ་གཅིག་ཏུ་འདུས་པ་རྣམ་པ་ཀུན་ལྡན་གྱི་ཡེ་ཤེས་ཤེས་རབ་ལྷ་མོའི་དཀྱིལ་འཁོར་རབ་འབྱམས་ཏེ། གཙོ་བོའི་ཞལ་བཞི་ནི། འགྱུར་མེད་བདེ་བའི་རང་བཞིན་གྱི་སྐུ་གསུང་ཐུགས་ཡེ་ཤེས་རྡོ་རྗེ་བཞི་དང༌། ཡུམ་གྱི་ཞལ་བཞི་ནི། རྣམ་ཀུན་མཆོག་ལྡན་གྱི་རང་བཞིན་རྡོ་རྗེ་བཞིའོ། །སྟོང་ཉིད་སྙིང་རྗེའི་རང་བཞིན་གྱི་སྙིང་སྟོབས་དང༌། གང་ལ་གང་འདུལ་གྱི་འཕྲིན་ལས་རྡུལ་དང༌། མ་དག་པའི་སྣང་བ་འགོག་པའི་མུན་པ་སྟེ། ཡོན་ཏན་གསུམ་དག་པའི་མགྲིན་པ་གསུམ། འཁོར་བའི་ལུས་ངག་ཡིད་གསུམ་སྤངས་པའི་ཡེ་ཤེས་ཐབས་དང་ཤེས་རབ་ཀྱིས་ཕྱེ་བས་ཕྲག་པ་དྲུགདོན་དམ་པའི་ས་བཅུ་གཉིས་ཀྱི་དཔུང་པ་བཅུ་གཉིས་དོན་དམ་ཡེ་ཤེས་ཀྱི་རྟེན་འབྲེལ་བཅུ་གཉིས་འབྱུང་ཟློག་གི་དབྱེ་བས་ཉི་ཤུ་རྩ་བཞི་ནི་ཕྱག་གོ །ཕྱག་མཚན་རྣམས་ཀྱང་དེའི་དག་པ་སྟེ། ཆོས་ཐམས་ཅད་རྣམ་པ་ཐམས་ཅད་དུ་སངས་རྒྱས་
ཤིང༌། རོ་མཉམ་གཅིག་པུ་མཁའ་ཁྱབ་ཀྱི་ཡེ་ཤེས་ནི་སྐུ་ལུས་དང༌། ཞབས་གཡས་པ་ཐབས་ལ་མཁས་པས་བདུད་བཞི་བཅོམ་ཞིང༌། གཡོན་པ་དེ་ཉིད་གཟིགས་པའི་མཁྱེན་པས་ཉོན་མོངས་བཞི་བཅོམ་པའོ།། ཕ་རོལ་ཏུ་ཕྱིན་པ་བཅུ་ནི་ནུས་མ་བཅུ་སྟེ་རེ་རེ་བཞིན་ཕྱི་ནང་གི་དུས་སྦྱོར་བཅུ་གཉིས་འགགས་པས། ཞལ་བཞི་ཕྱག་བརྒྱད་དེ་བསྡོམས་པས་བཅུ་གཉིས་དེ་ཐམས་ཅད་སྐུ་བཞིའི་ངོ་བོར་གྱུར་པས་དུང་གཎྜེ་ནོར་བུ་དཔག་བསམ་ཤིང་ཕུང་ལྔ་ཁམས་ལྔ་དག་པའི་ཡེ་ཤེས་སངས་རྒྱས་ཡབ་ཡུམ་སྐྱེ་མཆེད་བཅུ་གཉིས་དག་པའི་ཡེ་ཤེས་དོན་དམ་པ་བྱང་སེམས་ཡབ་ཡུམ། འདི་རྣམས་ཀྱང་ཡེ་ཤེས་རྣམ་པ་ཐམས་ཅད་པའི་ཕུང་ཁམས་སྐྱེ་མཆེད་མཐའ་ཡས་པར་འཆར་བ་ཡིན་ལ། ཉོན་མོངས་ཅན་རྣམས་འདུལ་བའི་འཕྲིན་ལས་ནི་ཁྲོ་བོ་རྣམས་ཏེ། གཞན་ཡང་དོན་དམ་སྲིད་གསུམ་གྱི་རྣམ་པ་ཐམས་ཅད་པའི་མཐུ་ལས། ཀུན་རྫོབ་སྲིད་གསུམ་དབྱིངས་སུ་སྦྱོང་བའི་འཕྲིན་ལས་ཀྱི་ནུས་པ་ནི། རྣལ་འབྱོར་མ་ནས་གྲུབ་འབྱུང་གི་བར་རོ། །ཡང་མདོར་བསྡུ་ན་ཡེ་ཤེས་འགྱུར་མེད་བདེ་ཆེན་དང༌། ཐུགས་ཡེ་ཤེས་ལྔ་ལས་སྐུ་དང་གསུང་དང་འཕྲིན་ལས་སྣ་ཚོགས་པའི་རྣམ་པ་འཆར་བའོ། །ཞེས་བརྗོད་ཀྱང་དོན་ཚང་ངོ༌། །གདུལ་བྱ་གཞན་སྣང་གི་མཛད་པ་དང་སྦྱར་ན། མངོན་བྱང་ལྔ་ལས་གཙོ་བོ་བསྐྱེད་པ་ནི། སྤྲུལ་སྐུ་ཡུམ་གྱི་ལྷུམས་སུ་ཞུགས་ཤིང་སྐུ་བལྟམས་ཏེ་ནུས་མ་བཅུ་ཕར་ཕྱིན་བཅུའི་ཆོས་དང་དུང་སོགས་རྡོ་རྗེ་རྣམ་བཞིའི་ལམ་སྟོན་པ་མཚོན་ལ། རྗེས་ཆགས་དཀྱིལ་འཁོར་སྤྲོ་བ་དང་བཅས་པ་ནི། ཐུགས་སྙིང་རྗེ་ཆེན་པོས་སེམས་ཅན་ལ་ཆགས་པས་གང་ལ་གང་འདུལ་གྱི་སྐུ་སངས་རྒྱས་བྱང་སེམས་སོགས་འཇིག་
རྟེན་ལས་འདས་པ་དང༌། རྣལ་འབྱོར་མ་དང་ལྷ་སོགས་འཇིག་རྟེན་པ་སྲིད་པ་གསུམ་ན་གནས་པ་ཀུན་ཏུ་སྤྲུལ་ནས། སེམས་ཅན་ཐམས་ཅད་ཀྱི་དོན་སྤྱོད་པའོ། །ཡང་ན་སངས་རྒྱས་གཞན་གྱི་རྗེས་ཆགས་ལས་མཆོག་གི་སྤྲུལ་སྐུ་ཐུན་མོང་མ་ཡིན་པ་ཁ་སྦྱོར་གྱི་རྣམ་པར་སྤྲུལ་པ་ནི། མངོན་བྱང་ལྔ་ལས་གཙོ་བོ་ཡབ་ཡུམ་བསྐྱེད་པ་དང༌། ཆགས་ཆེན་གྱིས་འདུལ་བའི་གདུལ་བྱ་རྣམས་ཀྱི་ངོར་རྗེས་ཆགས་ཀྱི་སྤྱོད་པ་མཛད་ནས་དཀྱིལ་འཁོར་སྤྲུལ་པ་ནི། དེ་ཉིད་དང་རྣམ་པ་མཐུན་པའི་དམིགས་པས་ལམ་དུ་བྱེད་པ་དང༌། ཆགས་ཆེན་གྱི་ཆོས་བསྟན་པས་ཐམས་ཅད་དངོས་གྲུབ་མཆོག་ལ་འཇོག་པ་ནི། སྙིང་རྗེའི་དབང་བསྐུར་གྱིས་ལམ་དུ་བྱེད་དོ། །དེ་ལྟར་ན་དཀྱིལ་འཁོར་རྒྱལ་མཆོག་འདི་ནི། བྱང་ཆུབ་རྣམ་པ་བཞི་ལམ་དུ་བྱེད་པའི་ནང་ཚན་ནས་རྣམ་པ་ལྔས་མངོན་པང་བྱང་ཆུབ་པའི་ལམ་སྟེ། དེའི་རྣམ་པ་ལྔ་ནི་ཡེ་ཤེས་ལྔ་ཡིན་པ་ལས། འདིར་མངོན་བྱང་ལྔ་ནི། ཡེ་ཤེས་ལྔ་ལམ་དུ་བྱེད་པ་ཡིན་པའི་ཕྱིར་རོ། །རྣམ་པ་ལྔས་མངོན་པར་བྱང་ཆུབ་པ་ནི་ཐུགས་ཆོས་སྐུའི་བྱང་ཆུབ་ཡིན་ལ། དཀྱིལ་འཁོར་རྒྱལ་མཆོག་ནི། སྐུ་རྡོ་རྗེ་སྤྲུལ་སྐུའི་ལམ་ཡིན་ན། དེ་ལ་དེ་འབྱུང་བ་ཅི་སྙམ་ན། སྐུ་དང་ཐུགས་གཉིས་ཕན་ཚུན་རྒྱས་བཏབ་ཅན་ཡིན་པའི་ཕྱིར། ཡེ་ཤེས་ཀྱི་སྐུ་ཇི་སྙེད་སྣང་བ་ཐམས་ཅད་ཐུགས་བདེ་ཆེན་ཉིད་ལས་ཐ་དད་དུ་གྲུབ་པ་ཅུང་ཟད་ཀྱང་མེད་པ་མཚོན་པའི་ཕྱིར་རོ། །གཞན་ཡང་ཉེ་རྒྱུར་གྱུར་པའི་རྫོགས་རིམ་མངོན་བྱང་གོང་འོག་གཉིས་ཀྱང་རྒྱུད་འདིར་གསལ་བར་གསུངས་པའི་ཕྱིར། སྦྱངས་འབྲས་ཀྱི་མངོན་བྱང་ལྔ་ལ། ཉེ་རྒྱུ་དང་སྦྱོར་བ་སྤྱི་དང་མཐུན་པར་བྱས་ཀྱང་རུང་བར་མངོན་མོད། རྒྱུད་འགྲེལ་
ལས་གསལ་ཁ་མེད་ཅིང་གཞན་གྱིས་བཤད་པའང་མེད་པའི་ཕྱིར་རེ་ཞིག་བཞག་གོ །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། བརྟེན་པ་ལྷ་བསྐྱེད་པ་ལས་བརྩམས་ནས་དཀྱིལ་འཁོར་རྒྱལ་མཆོག་བཤད་པའི་སྡེ་ཚན་ཏེ་དྲུག་པའོ།། །།གཉིས་པ་གསུང་རྫོགས་པ་ཉེར་སྒྲུབ་ཀྱི་ཡན་ལག་ལས་རྒྱལ་མཆོག་ནི། ཉེར་སྒྲུབ་ཀྱི་ངོ་བོ་ལ་དཔྱད་པ། རྣམ་པ་ཉི་ཤུའི་བྱང་ཆུབ་ངོས་བཟུང་བ། ལས་རྒྱལ་མཆོག་གི་རིམ་པ་དངོས་བཤད་པའོ། །དང་པོ་ནི། དེ་ལ་ཉེར་སྒྲུབ་ཅེས་པ་རྒྱུད་འདིར་བསྙེན་པའི་ཡན་ལག་གཉིས་པ་ཞེས་ཀྱང་གསུངས་ཏེ་ཉེ་བསྙེན་དུ་ཡང་གྲགས་པའོ། །ཡང་ལེགས་སྦྱར་གྱི་སྐད་དུ་ཉེར་སྒྱུར་ཨུ་པ་ནི། སྐབས་ཐོབ་ཀྱི་མཆོག་ལ་འཇུག་པ་དང༌། དམན་པ་ལ་འཇུག་པ་གཉིས་ཡོད་ལ། ཨུ་པ་བོད་སྐད་དུ་བསྒྱུར་བ་ཉེ་བ་སྟེ། དེ་བསྙེན་པ་དང་འབྲེལ་བའི་ཚེ་ཉེ་བསྙེན་ཏེ། ལྷག་པར་བསྙེན་པའི་དོན་དུ་འགྱུར་ལ། སྒྲུབ་པ་དང་སྦྲེལ་ན་ཉེར་སྒྲུབ་སྟེ། དམན་པའི་དོན་གྱིས་སྒྲུབ་པ་ལས་ཆུང་བར་འཇོག་གོ །འདིར་བསྙེན་སྒྲུབ་ཡན་ལག་བཞི་ནི། ཏིང་ངེ་འཛིན་ཕྲུགས་གཅིག་ལས་ཕྱེ་བའི་བསྙེན་སྒྲུབ་ཡན་ལག་བཞི་ཡིན་གྱི། བྱ་བ་ལས་ཀྱི་རིམ་པ་ལ་བལྟོས་པའི་བསྙེན་སྒྲུབ་ཡན་ལག་བཞི་མ་ཡིན་པས། གང་ལ་བསྙེན་པར་བྱ་བའི་ཡུམ་ནི་བསྐྱེད་རིམ་གྱི་ལྷ་སྐུ་གསལ་སྟོང་བདེ་བའི་ངོ་བོར་རྫོགས་པ་ལ། རྡོ་རྗེ་བཞིའི་ལམ་གྱི་མཚན་ཉིད་ཚང་བ་ཞིག་དགོས་པ་ལས། དཀྱིལ་འཁོར་རྒྱལ་མཆོག་གི་ལྷ་སྤྲོས་པས་ནི། དེ་ལ་ཉེ་བར་གྱུར་པས་བསྙེན་པ་ཡིན་ཏེ། རྡོ་རྗེ་བཞིའི་མཚན་ཉིད་ཀྱི་ནང་ནས་གལ་ཆེ་ཤོས་སྐུ་རྡོ་རྗེའི་ལམ་གྱི་མཚན་ཉིད་ཚང་བར་བྱས་པའི་ཕྱིར་རོ། །སྐུའི་རྣལ་
འབྱོར་གཙོ་ཆེ་ཤོས་སུ་འགྱུར་བའི་རྒྱུ་མཚན་ཅི་ཞེ་ན། ལུས་མེད་ན་ནི་དངོས་གྲུབ་མེད། །ཅེས་པ་དང༌། ལུས་མེད་ན་ངག་དང་བདེ་བ་མེད་པའི་རིག་པས་བསྒྲུབ་བྱ་བསྐྱེད་པའི་རིམ་པའི་བསམ་གཏན་གྱི་དཀྱིལ་འཁོར་སྐུ་རྡོ་རྗེའི་རྣམ་པ་གཙོ་ཆེ་བའི་ཕྱིར། དེའི་ལྡོག་པ་ལས་སྐུའི་ལམ་རིམ་གཙོ་བོར་འཇོག་གོ །བསྙེན་པ་ནི་ཉེ་བའི་དོན་ཏེ། གང་གི་དྲུང་དུ་དོན་སྤྱོད་དགོས་པའི་ཡུལ་སྐྱེས་བུ་དེའི་དྲུང་དུ་སླེབ་པ་དང་འདྲའོ། །སྒྲུབ་པ་ནི་དོན་དུ་གཉེར་བྱའི་བྱ་བ་དེ་ལ་ཞུགས་པ་དང་འདྲ་ལ། ཉེ་བའི་སྒྲུབ་པ་ནི། བྱ་བ་དེའི་དོན་དུ་སྔ་རོལ་ནས་གསོལ་བ་འདེབས་པའི་ཕྱིར་གཏམ་སྨྲ་བ་དང་འདྲ། སྒྲུབ་ཆེན་ནི་བྱ་བ་དེ་འགྲུབ་ནས། དེའི་འབྲས་བུ་ལ་སྤྱོད་པའི་སྐབས་དང་འདྲའོ། །དེས་ན་སྐབས་འདིར་རྒྱལ་མཆོག་སྔ་མས་ལྷ་ཚོགས་ཐམས་ཅད་དང་པོར་བསྐྱེད་གྲུབ་པའི་ཕྱིར། ཡུལ་བསྐྱེད་རིམ་གྱི་ལྷ་སྐུའི་དྲུང་དུ་སླེབ་པ་དང་འདྲ། རྒྱལ་མཆོག་ཕྱི་མ་འདིས་སླར་ཡང་གསེར་བཞུ་བཏུལ་བྱས་པས་སྐྱོན་དག་ཅིང་བཟང་པོར་བྱེད་པ་བཞིན་ཏུ་སྔར་གྱི་ལྷ་སྐུའི་རྒྱུན་དེ་ཉིད་ཞུ་བ་གླུས་བསྐུལ་དང༌། སླར་ཞལ་དུ་བཅུག་སྟེ་མཁའ་སྤྲོ་བྱེད་པ་སོགས་གཞི་བརྟན་པོར་བྱེད་པ་དང༌། ཡེ་ཤེས་དགུག་གཞུག་སོགས་ཀྱིས་བྱིན་རླབས་དང་མཐུ་ཁྱད་པར་ཅན་དུ་བྱས་པས་དོན་སྤྱོད་རྒྱུའི་ཡུལ་གྱི་གང་ཟག་དེ་མགུ་བར་བྱེད་པ་དང་འདྲའོ།། །།གཉིས་པ་ནི་སྐབས་འདིར་ཉེར་སྒྲུབ་གསུང་རྡོ་རྗེའི་ཡུལ་ཡིན་པས་སྦྱང་བྱའི་གཙོ་བོ་རླུང་ཡིན་ལ། འདིས་རྒྱུད་སྦྱངས་ཏེ་སྨིན་པར་བྱ་རྒྱུའི་ལམ་ནི། བར་དུ་དགེ་བའི་རྫོགས་རིམ་རྣམས་ཡིན་ཞིང་ཐོབ་བྱ་སྦྱངས་འབྲས་ནི། གསུང་རྡོ་རྗེ་ལོངས་སྐུ་གཙོ་བོར་གྱུར་པའོ། །དེ་ཡང་རྣམ་པ་ཉི་ཤུས་མངོན་པར་བྱང་ཆུབ་པ་ཞེས་པ་ལ། རྣམ་པ་ཉི་ཤུའི་མངོན་བྱང་འབྲས་བུའི་སྐབས་སུ་
ནི། སྟོང་ཉིད་ཉི་ཤུ་རྟོགས་པའི་ཡེ་ཤེས་རླུང་རྣམ་པར་དག་པས་རབ་ཏུ་ཕྱེ་བ་དེ་ཡིན་ལ། ལམ་ནི་བསྐྱེད་རྫོགས་གཉིས་ཀར་ལ་རླུང་དག་པའི་རིམ་པ་ཉི་ཤུ་ཡིན་ཞིང༌། སྦྱང་བྱ་ནི་གནས་ཀྱི་སྒོ་ནས་སྲོག་སོགས་རླུང་བཅུ་དང༌། རྒྱུ་བའི་སྒོ་ནས་གཡས་གཡོན་གྱི་དཀྱིལ་འཁོར་བཅུ་སྟེ་ཉི་ཤུའོ། །བསྐྱེད་རིམ་གྱི་སྐབས་འདིར་རྗེ་ཤེར་སེང་པ་ནི་གླུས་བསྐུལ་གྱི་སྐབས་ལྷ་མོ་བཞི། མ་སོགས་རིག་མ་བཞི། ཚད་མེད་བཞི། འབྱུང་བ་བཞི། །འབྲས་བུ་བཞི་སྟེ་ཉི་ཤུར་བཞེད། རྗེ་བུ་སྟོན་རིན་པོ་ཆེ་ནི་དེས་ལས་རྒྱལ་མཆོག་ཡོངས་རྫོགས་མི་འཆུན་པས་སྐུལ་བ་ལྔ། བཞེངས་པ་ལྔ། དགུག་གཞུག་སོགས་ལྔ། དབང་བསྐུར་བ་དང༌། རྒྱས་བཏབ་བཞི་སྟེ་ཉི་ཤུའམ། ཡང་ན་རྒྱས་བཏབ་བཞི་དང་དབང་བསྐུར་དྲུག་སྟེ་བཅུ། བཞེངས་སྐུལ་གཉིས་ལ་བཅུ་སྟེ་ཉི་ཤུ་ཡིན་ནམ་ཡང་གསུང་ངོ༌། །ཆོས་རྗེ་བླ་མ་བསོད་ནམས་རྒྱལ་མཚན་པ་ནི། སྦྱང་བྱ་ཕུང་ཁམས་ལས་དབང་བྱ་བ་ཉི་ཤུ་པོ་རྣམས་ཡིན་ནམ་ཡང་གསུང་སྟེ། འོན་ཀྱང་རང་ལུགས་ནི་སྦྱང་བྱ་ཉི་ཤུའམ་རྟོགས་བྱ་ཉི་ཤུའི་དབང་དུ་བྱས་ནས་སྦྱོང་བྱེད་དང༌། ཐོབ་བྱེད་ཡིན་པའི་ཕྱིར་ལམ་ཡང་ཉི་ཤུས་བྱང་ཆུབ་པ་ཞེས་བྱ་ཡི་བསྐྱེད་རིམ་ལ་ཆོ་གའི་དོན་ཚན་གྱི་རྣམ་གྲངས་ཉི་ཤུ་བགྲོང་མི་དགོས་ཏེ། དེ་ནི་ཆོ་ག་རྒྱས་བསྡུས་དང་རྣམ་གྲངས་གདམ་ཀའི་རིམ་པས་མ་ངེས་པར་འགྲོ་བའི་ཕྱིར་རོ། །དེས་ན་སྦྱང་བྱའི་ཡུལ་རླུང་ཉི་ཤུའམ་རྟོགས་བྱའི་ཡུལ་སྟོང་ཉིད་ཉི་ཤུ་འཇུག་པའི་ལམ་ཡིན་པའི་དོན་ནོ།། །།གསུམ་པ་ལ་རྒྱལ་མཆོག་གཉིས་པའི་ཏིང་ངེ་འཛིན་གྱི་རིམ་པ་དང༌། དག་འབྲས་ཞིབ་མོར་བཤད་པའོ། །དང་པོ་ལ་ཞུ་བ་གླུས་བསྐུལ་དང༌།
དམ་ཚིག་པའི་དཀྱིལ་འཁོར་བཞེངས་པ་དང༌། དག་པ་དྲན་པ་དང༌། ཡེ་ཤེས་དགུག་གཞུག་དང༌། དབང་བསྐུར་བ་དང༌། རྒྱས་བཏབ་པ་སྟེ་དྲུག་ལས། དང་པོ་ནི། ལྟེ་བ་དང་གཙུག་ཏོར་གྱི་ཨ་ཝ་དྷཱུ་ཏཱིའི་ལམ་ཞེས་པ་ནས་སྤྲོ་བར་མཛོད་ཀྱི་བར་ཏེ། དེ་ཡང་ལུས་ཀྱི་རྩ་ཨ་ཝ་དྷཱུ་ཏཱི་ལ་ཡི་གེ་ལྔ་པོ་བཀོད། ཡབ་ཡུམ་སྙོམས་པར་འཇུག་པའི་དགའ་བ་བརྩམས་པས། ལྟེ་བ་ན་གནས་པའི་ཧོཿཡིག་ལས་རྗེས་ཆགས་ཀྱི་དགའ་བའི་རང་བཞིན་འོད་ཟེར་མེའི་དྲོད་ཅན་འབར་བས་སྐུ་གང་བར་བསམ། རྡོ་རྗེའི་ལམ་ལས་འོད་ཟེར་སྤྲོས་པས་ཡུམ་གྱི་སྐུ་ཡང་གང་སྟེ། དེ་བཞིན་དུ་སྤྱི་བོའི་ཧོཿཡིག་ལས་ཀྱང་འོད་ཟེར་ཉམས་བདེ་བའི་རང་བཞིན་ཅན་བྱུང་བའང་སྔར་བཞིན་སྤྲོས་ཏེ། ཡབ་ཡུམ་རྗེས་ཆགས་ཀྱི་བདེ་བས་ཞུ་བར་གྱུར་པ་ཐིག་ལེའི་རང་བཞིན་འོད་ཀྱི་གོང་བུ་དཀར་ལ་དམར་བའི་མདངས་ཆགས་པ་ཁ་དོག་སྣ་ཚོགས་པའི་བདག་ཉིད་ཀྱི་འོད་ཟེར་དཔག་ཏུ་མེད་པ་འབར་བར་བསམ། དེ་ཡང་ཡི་གེ་འབྲུ་གསུམ་ནི་སྐབས་འདི་ཉིད་ལ་བལྟོས་པའི་སྐུ་དང་གསུང་དང་ཐུགས་ཀྱི་བྱ་བ་ཡོངས་སུ་རྫོགས་པ་དང༌། སྤྱི་བོའི་ཧོཿཡིག་ནི་ཐིག་ལེ་རྫོགས་པའི་བདེ་བ་དང༌། ལྟེ་བའི་ཧོཿཡིག་ནི་ཆགས་པ་རྫོགས་པའི་བདེ་བ་མཚོན་ཏེ། སྤྱིར་ཧོཿཡིག་ཙམ་ནི་ཡེ་ཤེས་རྡོ་རྗེ་སྟེ་བདེ་བ་མཚོན་པའོ། །འདིའི་སྐུ་གསུང་ཐུགས་དང་བདེ་ཆགས་རྫོགས་པ་ནི་སྦྱོང་བྱེད་བསྐྱེད་རིམ་པའི་ལྷ་ཉིད་ཀྱི་ཡིན་གྱི། སྦྱང་བྱའི་དག་པ་མ་ཡིན་པས་དབྱེ་བ་ཕྱེད་པར་བྱའོ། །དེ་ལས་ལྟེ་བའི་ཧོཿཡིག་ནི་གཏུམ་མོའི་མེ་སྟེ་དུས་མེ་ཡིན་ལ། དེ་ཡང་དཀར་ཆའི་དངས་མ་ལ་དམར་ཆ་
འདྲེས་པས་ཤིན་ཏུ་དངས་པར་གྱུར་ཏེ་ནག་པོར་སྣང་བ་ནི་མུན་པའི་ཁམས་ཏེ་སྒྲ་གཅན་དང༌། དམར་པོའི་དངས་མ་ལ་དཀར་པོའི་དངས་མ་འདྲེས་པས་ཤིན་ཏུ་དངས་པའི་ཁམས་སེར་པོ་རྐྱང་རྐྱང་པོར་གྱུར་པ་ནི། མེ་སྟེ་དུས་མེ་ཡིན་པས་སྒྲ་གཅན་དཀར་ཆའི་མཚན་ཉིད་དང༌། དུས་མེ་དམར་ཆའི་མཚན་ཉིན་དོ། །དམར་པོ་དང་རྗེས་སུ་འབྲེལ་བ་ནི་ཆགས་པ་ཡིན་ལ། དེ་ཡང་དངས་མར་གྱུར་པ་ཉིད་ཀྱི་ཕྱིར། དམར་པོ་རྡུལ་ཕལ་པའི་རྗེས་ཆགས་ལས་དུས་མེའི་རྗེས་ཆགས་ཆེས་སྟོབས་ཆེའོ། །དེའི་ཕྱིར་རྗེས་ཆགས་འདིས་ལུས་ངག་ཡིད་དང་བཞི་པའི་ཐིག་ལེ་མཐའ་དག་ཡང་དག་པར་ཞུ་བ་མཚོན་ཏེ། དེའི་ཚེ་ལྷ་མོ་བཞིས་གླུས་བསྐུལ་བ་ལ་ཁ་ཅིག་བདེ་གཤེགས་འཕར་མ་ན་བཞུགས་པའི་ལྷ་མོ་བཞི་པོས་བསྐུལ་བར་འདོད་པ་ནི། གསང་འདུས་འཕགས་སྐོར་ལ་དཀྱིལ་འཁོར་གྱི་གྲྭ་བཞི་ན་བཞུགས་པའི་ལྷ་མོ་བཞིས་བསྐུལ་བ་དང༌། གཞན་ཡང་ཀྱཻ་རྡོར་སོགས་དེ་འདྲའི་རིགས་ཅན་ཡོད་པའི་རིགས་འགྲེ་སྦྱར་བར་སྣང་ཡང་དེ་དག་དང་འདི་མི་མཚུངས་ཏེ། དེ་དག་ནི་ཡུམ་རྐྱང་གི་རྣམ་པ་ཅན་ཡིན་པས་སྐུལ་བ་པོ་བྱེད་པ་རིགས་ཀྱང་བདེ་གཤེགས་འཕར་མའི་འདི་ནི་ཡབ་ཡུམ་མཉམ་སྦྱོར་གྱི་རྣམ་པ་ཅན་ཡིན་པས། རང་རང་གི་ཡབ་དང་སྦྱོར་བའི་ཚུལ་དུ་ཡོད་བཞིན་དུ། བདག་འདོད་མཛོད་ཅེས་གཞན་ལ་སྐུལ་བ་དང༌། འདོད་པ་དོན་གཉེར་རྣམས་ལ་འདོད་པ་མཛོད་ཅེས་པའི་ཚིག་མི་འོས་པའི་ཕྱིར་རོ། །ཚིག་དེ་ལ་དོན་གཞན་བཤད་རྒྱུ་ཡོད་སྙམ་ན། རྡོ་རྗེའི་ཚིག་ལ་དགོངས་པ་ཅན་དང་ངེས་དོན་གྱི་བཤད་པ་སྣ་ཚོགས་པ་ཡོད་སྲིད་མོད། ཞུ་བ་གླུས་བསྐུལ་ལ་ཡང་
སྒྲ་ཇི་བཞིན་པ་དེ་འཇིག་རྟེན་ཚུལ་དང་འགྲིག་དགོས་ཏེ། གཞན་དུ་ན་ཁྲོ་བོ་སོགས་སྐྱེས་པའི་རྣམ་པ་ཅན་གྱི་ལྷ་རྣམས་ཀྱིས་ཀྱང་ཞུ་བ་གླུས་བསྐུལ་འབྱུང་དུ་རུང་བ་ཐལ་བ་ལས་གང་ནའང་མ་དམིགས་པའི་ཕྱིར་རོ།། དེས་ན་སྐབས་འདིར་བྱང་ཆུབ་སེམས་ཀྱི་ཐིག་ལེ་ལས་སྤྲུལ་པའམ། གདོད་ནས་གྲུབ་པའི་ལྷ་མོ་བཞི་སྐད་ཅིག་གིས་གསལ་བཏབ་ནས། དེ་དག་གཙོ་བོའི་པདྨའི་ཕྱོགས་བཞིར་བྱོན་ཏེ་བསྐུལ་བར་བསམ་པ་ཡིན་ནོ། །དེ་ཡང་སྤྱན་མ་ནུབ། མཱ་མ་ཀཱི་བྱང༌། གོས་དཀར་མོ་ལྷོ། སྒྲོལ་མ་ཤར་རོ། །འདིའི་ཡུམ་བཞི་ནི་དོན་གྱི་སྣ་ཚོགས་ཡུམ་ནུས་མར་བཅས་པ་དང་གཅིག་ གོ །དེ་ལ་བདག་ཅག་སྲུངས་ཤིག་ཅེས་པ་ནི། སེམས་ཅན་ཐམས་ཅད་ཀྱི་མགོན་མཛད་ནས་དེ་རྣམས་བདེ་བས་སྐྱོངས་ཤིག་པའོ། །འདོད་པ་དོན་གཉེར་སོགས་ནི། ལྷ་མོ་བཞི་པོ་རྣམས་ཉིད་འདོད་པའི་བདེ་བ་དོན་དུ་གཉེར་བ་ལ། ཁྱོད་ཀྱིས་འདོད་པ་མཛོད་ཅིག་པ་སྟེ། འདོད་ཆགས་ཆེན་པོའི་སྤྱོད་པའི་སྒོ་ནས་སེམས་ཅན་གྱི་དོན་མཛོད་ཅིག་པའོ། །གླུས་བསྐུལ་བསྡུས་པ་བསྡུས་རྒྱུད་ལས་འབྱུང་བ་འདི་ལ་ལྷ་མོ་སོ་སོའི་དབྱེ་བ་མེད་པས་ཐམས་ཅད་ཕྱོགས་གཅིག་ཏུ་བྱ་ལ། རྒྱས་པ་རྩ་རྒྱུད་ལས་འབྱུང་བ་ནི་ཚིག་བཅད་དང་པོ་བཞི་པོ་སོ་སོ་དང་ཕྱི་མ་ནི་བཞི་ཆར་ གྱིའོ། །དེ་ཡང་དོན་དམ་རྣམ་པ་ཀུན་ལྡན་གྱི་ཡེ་ཤེས་ནི། ཡེ་ཤེས་ལྷ་མོ་རྣམས་ཀྱི་ངོ་བོ་ཡིན་ལ། དེ་ནི་སྲིད་ཞིའི་ཆོས་གང་ཡང་རུང་བའི་མཚན་གཞི་བཟུང་ན། དེ་དག་མ་གྲུབ་པའི་སྔོན་རོལ་ནས་ཡེ་ཤེས་འདི་གྲུབ་ཅིང༌། འགྲོ་བ་འཁོར་འདས་ཀྱི་ཆོས་ཐམས་ཅད་ཀྱི་ཐོག་མའི་གཞི་རྟེན་ཡིན་པས་ཡུམ་དང༌།
རང་རང་སོ་སོ་དང་མཉམ་པར་འཇུག་པའི་གྲོགས་ཡིན་པས་སྲིང་མོ་དང་འདྲ་བ་དང༌། ཆོས་སོ་སོ་ཉིད་ཞིག་པའི་རྗེས་ཀྱི་དེ་མ་ཐག་པའི་འབྲས་བུ་དང་ཡང་ལྷན་ཅིག་འཇུག་པས་བུ་མོ་དང༌། ཕྱི་མའི་མུ་མཐར་ཐུག་པའི་བར་དུ་ཆོས་ཉིད་འགྱུར་བ་མེད་པའི་ཕྱིར་ཚ་མོ་དང་འདྲ་སྟེ། མ་སྲིང་བུ་མོ་ཚ་མོ་བཞིར་ཆོས་མཚུངས་པའི་སྒོ་ནས་བརྡ་ཆད་བཞག་པའོ། །དེ་དག་ལ་ངོ་བོའི་སྒོ་ནས་དབྱེ་བ་མེད་ཀྱང་ཀུན་རྫོབ་ཐ་སྙད་ཀྱི་ཚུལ་དང་བསྟུན་ནས། ས་གཞི་དང་ཆོས་དབྱིངས་དངོས་པོའི་རྟེན་མཚུངས་པས་ས་རྣམ་པར་དག་པའི་ལྷ་མོ་ལ་མ་དང༌། ཆུའི་དངོས་པོ་གང་དེ་ཉིད་སྔོན་ནས་གནས་ཀྱང་ད་ལྟར་ལྷན་ཅིག་ལོངས་སྤྱོད་པའི་ཆ་ནས་དུས་མཉམ་པས་འཇུག་པ་ཆོས་དབྱིངས་དང་འདྲ་བ་ལ་བཏགས་ཏེ། ཆུ་ནི་མཱ་མ་ཀཱི་དང༌། མེ་ནི་སྔར་མེད་གློ་བུར་དུ་བསྐྱེད་ཅིང་བྱ་བའི་གྲོགས་བྱེད་པའི་ཕྱིར་བུ་མོ་དང་མཚུངས་ཤིང༌། ཆོས་ཉིད་འབྲས་བུ་དང་ལྷན་ཅིག་འཇུག་པའི་ཆ་ནས་ཀྱང་དེ་དང་འདྲ་བས་མེ་ཁམས་དག་པའི་ལྷ་མོ་གོས་དཀར་མོ་དང༌། རླུང་ནི་ཡུལ་སྣ་ཚོགས་བརྒྱུད་ཅིང་གཞན་དང་གཞན་དུ་འགྲོ་བའི་ཕྱིར། ཡུལ་དུས་སྤྱོད་པ་མ་ངེས་པ་མང་པོར་འཕོས་ཟིན་པས་འཇུག་པའི་ཆ་ནས་བརྒྱུད་པ་དུ་མ་སོང་བའི་ཚ་མོ་དང་འདྲ་ལ། ཆོས་དབྱིངས་ཀྱང་དངོས་པོ་རྣམས་ལ་དུས་མཐའ་མེད་དུ་འཇུག་པའི་ཕྱོགས་ནས་དེ་དང་འདྲ་བས་རླུང་དག་པའི་ལྷ་མོ་ཚ་མོ་སྟེ། མོ་རྟགས་སུ་བརྗོད་པ་ནི་ཤེས་རབ་རྣམ་པ་ཀུན་ལྡན་ཡིན་པའི་དོན་ནོ། །རྣལ་འབྱོར་པ་ཞེས་པ་ནི་རྣལ་འབྱོར་ཅན་གྱི་དབང་ཕྱུག་སངས་རྒྱས་ཉིད་དོ། །རྒྱུ་མཐུན་སོགས་ཀྱི་དོན་ནི། རྣལ་འབྱོར་པའི་ཞེས་པར་པའི་ཞེས་དྲུག་པའི་སྒྲ་བདག་པོའི་དོན་དུ་སྦྱར་ཀྱང་འགལ་བ་མེད་མོད་ཀྱི།
འདིར་དངོས་སུ་ན་གཞི་མཐུན་བསྡུ་བའི་སྒྲ་སྟེ། རྣལ་འབྱོར་ཅན་གྱི་དབང་ཕྱུག་སངས་རྒྱས་ཡང་ཡིན་ལ། རྒྱུ་མཐུན་པའི་འབྲས་བུ་ཡང་ཡིན་པ་ཞེས་སྦྱོར་ཏེ་གཞན་ལའང་རིགས་འགྲེའོ། །དེ་ལ་རྒྱུ་མཐུན་གྱི་འབྲས་བུ་ལྷན་ཅིག་སྐྱེས་པའི་སྐུ་དང༌། རྣམ་སྨིན་གྱི་འབྲས་བུ་ཆོས་ཀྱི་སྐུ་དང༌། སྐྱེས་བུ་བྱེད་པའི་འབྲས་བུ་ལོངས་སྐུ་དང༌། དྲི་བྲལ་གྱི་འབྲས་བུ་སྤྲུལ་སྐུ་རྣམས་ཡིན་ཞིང༌། དེ་དག་གི་གནས་སམ་གཞི་ཆོས་ཀྱི་དབྱིངས་ཁོ་ན་ཉིད་ལས་ལྡོག་ཆས་ཕྱེ་ན་ས་སོགས་བཞིའི་དངས་མ་རྣམ་ཀུན་མཆོག་ལྡན་ཡུམ་བཞི་དང་རིམ་གྱིས་སྦྱོར་རོ། །བདག་གི་དཀྱིལ་འཁོར་རང་བཞིན་ཞེས་པ་ནི། བདག་སྤྱན་མ་སྟེ་ས་ཁམས་ཀྱི་དངས་མའི་ཡེ་ཤེས་ཀྱི་རང་བཞིན་དཀྱིལ་འཁོར་དུ་མ་སྤྲོ་བའི་ཕྱིར་བཅོམ་ལྡན་འདས་ཁྱོད་ཐིག་ལེའི་གཟུགས་ལས་དུས་ཀྱི་འཁོར་ལོའི་སྐུར་བཞེངས་ནས། བདག་དང་ལྷན་ཅིག་ཏུ་སྦྱོར་བའི་འདོད་པའི་བདེ་བ་མཛོད་ཅིག་ཅེས་པ་སྟེ། ཆུ་མེ་རླུང་གསུམ་ལའང་རིགས་འགྲེ་སྦྱར་རོ། །དངོས་སུ་སྐུལ་བྱེད་ཀྱི་ལྷ་མོ་བཞི་ལས་མེད་པས་སྟོང་པའི་དཀྱིལ་འཁོར་སོགས་ཐུན་མོང་དུ་སྦྱོར་བ་ཡིན་ཀྱང་དབྱིངས་ཕྱུག་མའི་ཐོབ་སྐལ་ཡིན་ཞིང༌། བཞི་པོ་ལ་ཁྱབ་པའི་ཚུལ་གྱིས་རྡོར་དབྱིངས་དབང་ཕྱུག་མ་ཡང་སྐུལ་བ་པོ་ཡིན་ནོ། །ཤེས་ཕྱིན་མ་ནི་བཞི་པོ་ལ་ཁྱབ་པ་ཡིན་མོད། ཞུ་བའི་ངོ་བོ་ལ་བཞུགས་པ་ཡིན་གྱི་སྐུལ་བར་བྱེད་པ་པོ་མ་ཡིན་ལ། དེའི་ཕྱིར་རྡོ་རྗེ་དབྱིངས་ཕྱུག་མ་བདག་ནི་ཆུང་མ་སྟེ། རྣལ་འབྱོར་བའི་འབྲས་བུ་བཞི་ཅར་གྱི་གནས་ཡིན་ལ། བདག་སྟོང་པའི་དཀྱིལ་འཁོར་ནམ་མཁའི་ཁམས་ཀྱི་ལྷ་ཚོགས་སྤྲོ་བའི་དོན་དུ་དུས་འཁོར་བཞེངས་ལ་བདག་འདོད་མཛོད་ཅེས་སྦྱོར་དགོས་ལ། རྒྱུད་གཞན་ལས་བདེ་བ་ནམ་མཁའི་ཁམས་ཡིན་ཞེས་གསུངས་པ་
ལྟར། ཡེ་ཤེས་ནམ་མཁའི་ཁོངས་སུ་བསྡུས་པའོ། །སྟོང་པའི་དཀྱིལ་འཁོར་ཉམས་མྱོང་ཞེས་པའི་དོན་གྱི་ཁོངས་སུ་འདི་ལྟ་བུ་འདུས་པར་ཤེས་དགོས་ཤིང༌། སྟོང་པའི་དཀྱིལ་འཁོར་ཞེས་པའི་ཚིག་གིས་སྔ་མ་རྣམས་ཀྱི་བདག་གི་དཀྱིལ་འཁོར་ཞེས་པ་དང་མཚུངས་པར་ནམ་མཁའ་དང་ཡེ་ཤེས་ཀྱི་བདེ་བ་ལ་མཉམ་པར་བཞག་པའི་ངང་ནས་ཁམས་དེ་དང་དེའི་ལྷ་ཚོགས་སྤྲོ་བ་དང༌། སྐུའི་རྣམ་པ་སྤངས་ཏེ་ཐིག་ལེར་ཞུ་བའི་བདེ་སྟོང་ད་ལྟ་སྐུ་ཉམས་སུ་བསྟར་ཞིང་མྱོང་བ་དེ་ལས་བཞེངས་ཤིག་ཅེས་པའི་དོན་གཉིས་ཀར་སྟོན་པ་ཡིན་ནོ། །རྣམ་པ་མེད་པའི་བདེ་སྟོང་ཙམ་ལ་དཀྱིལ་འཁོར་ཞེས་པ་མི་ཐོབ་བོ་སྙམ་ན། འདིར་རྣམ་མེད་དེ་མ་ཡིན་མོད། རྣམ་མེད་ཀྱི་ལྡོག་ཆ་ནས་ཡིན་དུ་ཆུག་ཀྱང་དཀྱིལ་འཁོར་གྱི་སྐད་དོད་མཎྜལ་ཞེས་པ། སྙིང་པོ་ལེན་པ་ལ་ཡང་འཇུག་པས་འདོད་དོན་གྱི་སྙིང་པོ་བདེ་བ་ལེན་པའོ། །ད་ལྟ་སྟོང་པ་ཉམས་སུ་མྱོང་བ་ལས་སླར་འགྲོ་བ་རྣམས་འཁོར་བ་ལས་སྒྲོལ་བར་འདོད་པའི་བསམ་པ་སྙིང་རྗེ་ཆེན་པོས་སྟོང་པ་ལས་བཞེངས་ནས་འགྲོ་བའི་མགོན་པོ་དུས་ཀྱི་འཁོར་ལོའི་སྐུར་གྱུར་པས། སྐུ་གསུང་ཐུགས་ཀྱི་དཀྱིལ་འཁོར་གྱི་ལྷ་ཚོགས་རྣམས་སྤྲོ་བར་མཛོད་ཅིག ཅེས་ཚིག་གསུམ་པ་འདིས་མཁའ་ཡེར་མ་ཟད་ལྷ་ཚོགས་ཐམས་ཅད་སྤྲོ་བར་གསོལ་བ་བཏབ་པའང་ཡིན་ནོ། །ཁ་ཅིག་ཡུམ་གྱི་དོན་འགྲོ་བ་རྣམས་ཀྱི་རྒྱུད་ལ་ཡེ་ཤེས་སྐྱེད་པར་བྱེད་པ་དང༌། རྣལ་འབྱོར་སྒྲུབ་པ་པོས་ཐིག་ལེ་ནོར་བུ་ནས་ཡར་ལྟེ་བར་བྱོན་པ་རྒྱུ་མཐུན་གྱི་འབྲས་བུ་ལ་གནས་པ་ནི། བདག་ས་ཁམས་ཀྱི་དཀྱིལ་འཁོར་གྱི་རླུང་ལྟེ་བར་བཅིངས་པའི་མཐུ་ལས། ལམ་དུས་ཀྱི་ཡེ་ཤེས་རྡོ་རྗེ་དུས་འཁོར་ཁྱོད་ཞུ་བའི་རྣམ་པ་ལས་བཞེངས་ནས་ཡེ་ཤེས་ཀྱི་རིགས་
ཀྱི་ལྷ་སྤྲོ་བས། བདག་གི་འདོད་པ་བཞིན་དུ་མཛོད་ཅེས་སོགས་འབྲུ་གནོན་པ་ནི། འབྲས་བུ་བཞི་རྣམ་པ་ལམ་ཕྱེད་བསྐྱེད་རིམ་ཕྲ་མོའི་རྣལ་འབྱོར་དང༌། རྫོགས་རིམ་འཛིན་པ་རྗེས་དྲན་སོགས་དང་སྦྱར་ན་འགྲིག་རུང་ཙམ་ཡིན་ཡང༌། འབྲས་བུ་སངས་རྒྱས་ཀྱི་ས་ལ་སྦྱོར་བ་ལ་མི་འགྲིག་ཅིང༌། འདིར་ཡང་རྫོགས་རིམ་སོགས་ལ་ང་རྒྱལ་བྱེད་པ་མ་ཡིན་འབྲས་བུ་སངས་རྒྱས་ཀྱི་ས་ཁོ་ནའི་ང་རྒྱལ་བྱེད་པ་ལ་འགྲིག་དགོས་པས། བཤད་པ་དེ་ནི་བསྐྱེད་རིམ་ལས་རྒྱལ་གྱི་སྐབས་འདིར་འབྲེལ་མེད་དོ། །ཡང་སྐལ་བ་བཟང་པོ་སྟོན་པས་སྲིང་མོ། ཡོན་ཏན་འཇོ་བའི་ཕྱིར་བུ་མོ། ཞེས་འཆད་ཅིང་ཚ་མོ་ལ་འདི་ཡིན་གྱི་སྒྲ་བཤད་མེད་པར་བུ་མོ་ལས་བྱུང་བའི་ཕྱིར་ཞེས་སོགས་འཆད་པ་ནི། བསྡུ་གསོག་མང་པོ་བྱས་ཀྱང་མ་འདང་བ་སྟེ། སྒྲ་བཤད་དེ་ཙམ་གྱིས་དེ་དག་ཏུ་མི་འགྱུར་ལ། གལ་ཏེ་ཆགས་ལམ་གྱི་མས་བརྟན་དང་སྦྱོར་ན། ལས་རྒྱའམ་ཡེ་རྒྱ་དེ་ཉིད་ལ་མ་སོགས་ཚང་བའི་ཚུལ་སྒྲ་བཤད་ཙམ་མ་ཡིན་པ་དག་ཡོད་པ་གོ་བར་གྱིས་ཤིག ཁ་ཅིག་གླུས་བསྐུལ་བ་ནི་གཉིས་ཏེ་ཞེས་པའི་ཚིག་ལ་འཁྲུལ་ནས། ཞུ་བ་དང་བསྐུལ་བ་དང་བཞེངས་པ་ལན་གཉིས་བྱེད་ཅིང༌། སྔོན་མ་ལ་བསྡུས་རྒྱུད་ཀྱི་ཚིག་དང་ཕྱི་མ་ལ་རྩ་རྒྱུད་ཀྱི་ཚིག་གིས་སྐུལ་བར་བྱེད་དོ། །དེ་ནི་གསང་སྔགས་པ་སུ་ལའང་མ་གྲགས་པའི་བར་བཅོལ་ཡིན་ལ། བདེ་བ་རྫོགས་པའི་སླད་དུ་བསྐུལ་བ་ཕྲ་མོའི་རྣལ་འབྱོར་གྱི་སྐབས་སུ་སྦྱོར་དགོས་རྒྱུ་ཡིན་པ་མ་གོ་བ་དང༌། སྒྲུབ་ལེའི་མདོར་བསྡུས་གཉིས་པའི་འཇུག་དང༌། གསུམ་པའི་འགོར་གསུངས་པ་གཉིས་མདོར་བསྟན་རྒྱས་བཤད་དམ་སྔ་མ་ནི་གོ་བ་སྐྱེ་སླ་བའི་ཕྱིར་འཕྲོས་དོན་དུ་གསུངས་པ་ཡིན་པ་མ་གོ་བར་དོན་ཚན་ཐ་དད་གཉིས་སུ་བཟུང་བས་འཁྲུལ་བར་སྣང་
ངོ༌། །གཉིས་པ་ལ་གཙོ་བོ་བཞེངས་པ་དང་འཁོར་སྤྲོ་བ་གཉིས་སོ། །དང་པོ་ནི་ཞེས་པའི་གླུ་རྣམས་ཀྱིས་ཞེས་པ་ནས། དེ་རྣམས་སྔོན་བཞིན་བསྐྱེད་ཀྱང་ཆོག་གོ་ཞེས་པའི་བར་རོ། །དེ་ཡང་སྔར་བདེ་སྟོང་གི་ཏིང་ངེ་འཛིན་ལ་ཞུགས་པ་དེ་གླུས་བསྐུལ་བ་གསན་ནས་རྣལ་སད་པ་ལྟར་གྱུར་ཏེ། སྣོད་བཅུད་ཐམས་ཅད་སྒྱུ་མ་ལྟར་གཟིགས་བཞིན་པའི་ངང་ནས་དཀྱིལ་འཁོར་མཐའ་དག་སྤྲོ་བ་ཡིན་ཏེ། དེ་ཡང་ཧཱུཾ་དང་རྡོ་རྗེ་ལས་གཙོ་བོ་བསྐྱེད་ཅིང༌། ཇི་སྐད་དུ། རྡོ་རྗེའི་རྒྱན་དང་ལྡན་ཞིང་རྒྱལ་བའི་བདག་པོའི་ཅོད་པན་ཞེས་པ་མི་བསྐྱོད་པའི་ཅོད་པན་ནོ། །ཤེས་རབ་ཀྱིས་ནི་འཁྱུད་པར་འགྱུར་པ་ཞེས་པ་ནི། སྟོང་པའི་དཀྱིལ་འཁོར་འབབ་པ། རྡོ་རྗེ་དབྱིངས་ཀྱི་དབང་ཕྱུག་མ་སྣ་ཚོགས་ཡུམ་གྱིས་ཏེ། དེའི་སྙིང་གར་བྱིས་པ་རྣམས་ཀྱི་བཞིན་ནོ་ཞེས་འགྲེལ་ཆེན་དུ་གསུངས་ཏེ། འདི་ལ་བྱིས་པ་རྣམས་ཀྱི་བཞིན་དུ་སྙིང་གར་སྟོང་པའི་དཀྱིལ་འཁོར་འབབ་པ་ཞེས་སྦྱོར་དགོས་ཏེ་ཚིག་འདིས་སྦྱང་བྱ་གསལ་བར་བསྟན་པ་ཡིན་ནོ། །སྐབས་འདིར་གཙོ་མོ་རྡོ་རྗེ་དབྱིངས་ཀྱི་དབང་ཕྱུག་མའི་ངོ་བོར་མོས་དགོས་ཤིང༌། གོང་བཞིན་གཙོ་བོའི་དབུ་རྒྱན་ཡང་རྒྱས་བཏབ་མ་ཡིན་ཏེ། གཙོ་བོ་མི་བསྐྱོད་པའི་ངོ་བོ་ཡིན་པའི་ཕྱིར་རང་གི་རིགས་ཉིད་མཚོན་པ་མི་བསྐྱོད་པའི་དབུ་རྒྱན་ཡིན་ ནོ། །འདིར་གཞན་མང་པོ་དག་རྒྱལ་མཆོག་དང་པོའི་གཙོ་བོ་ཡབ་མི་བསྐྱོད་པའི་ངོ་བོ་རྡོ་རྗེ་སེམས་དཔའི་རྒྱས་བཏབ་ཅན་ལ། ཡུམ་ཤེས་ཕྱིན་མའི་ངོ་བོ་སྣ་ཚོགས་ཡུམ་ཡིན་པས་གཙོ་བོའི་རིགས་བདག་གིས་རྒྱས་འདེབས་ལུགས་རྣམ་ཤེས་ལ་ཡེ་ཤེས་དང༌། ཡབ་རྣམ་ཤེས་ལ་ཡུམ་ཡེ་ཤེས་སྦྱོར་བར་འགྲོ་ཞིང༌། འདིར་གཙོ་བོ་རྡོར་སེམས་ལ་མི་བསྐྱོད་པའི་རྒྱས་བཏབ་
བྱས། ཡུམ་རྡོར་དབྱིངས་དབང་ཕྱུག་མའི་ངོ་བོས་འཁྱུད་པ། ཡང་རྡོར་སེམས་ལ་མི་བསྐྱོད་པའི་རྒྱས་བཏབ་དང་ཡེ་ཤེས་ལ་རྣམ་ཤེས་འཁྱུད་པར་འགྲོ་བས། དུས་འཁོར་རང་ལུགས་ཀྱི་རྒྱས་བཏབ་དང་ཐབས་ཤེས་སྦྱོར་ཚུལ་ཡིན་གྱི། འདི་ལས་ཟློག་ན་འགངས་ཆེ་ས་དཀྱིལ་འཁོར་གྱི་གཙོ་བོ་རང་ལ་རྒྱུད་སྡེ་གཞན་གྱིས་རྒྱས་བཀབ་མ་གཏོགས། དུས་འཁོར་རང་ལུགས་མ་བྱུང་བས་གནད་འཆུག་ཅེས་ཟེར་བ་ནི། དུས་འཁོར་གྱི་ཁྱད་ཆོས་ཕལ་པ་ཉེ་ཚེ་བས་མགོ་འཁོར་ནས་ཁྱབ་བྱ་ཁྱབ་བྱེད་ཀྱི་དབྱེ་བ་མ་ཤེས་པས། དུས་འཁོར་རང་ལུགས་ཀྱི་ཟབ་ཤོས་གནད་དམ་པ་ཞིག་ཡོད་པ་དེ་ཁྱེད་ཉིད་ཀྱིས་ངོས་མ་ཟིན་པ་ཡིན་ལ། རྒྱུད་ལས། རྣམ་ཤེས་དང་ནམ་མཁའ་ཐབས་ཤེས་སུ་གསུངས་པ་ཡང་གནས་སྐབས་གང་དུ་དགོས་མ་ཤེས་པ་ཡིན་ནོ། །ཁྱེད་ལྟར་ནའང་དཀྱིལ་འཁོར་རྒྱལ་མཆོག་གི་གཙོ་བོ་མི་བསྐྱོད་པ་མ་ཡིན་ཏེ། མངལ་དཀྱིལ་གྱི་གཙོ་བོ་མི་བསྐྱོད་པ་སྤྲོས་ནས་གཙོ་བོ་ལ་བསྟིམ་དགོས་པའི་ཕྱིར་ལས། མི་བསྐྱོད་པ་ལ་མི་བསྐྱོད་པས་རྒྱས་བཏབ་ཏུ་སོང་བའི་ཕྱིར། དེ་ན་རེ། དེ་འདྲ་ཁོ་བོ་ཅིག་རྒྱས་བཏབ་ཏུ་མི་འདོད་དོ་ཞེ་ན། ངེད་ཀྱང་དབུ་རྒྱན་རང་བཅས་རྒྱས་བཏབ་ཏུ་མི་འདོད་དེ། དབང་རྟགས་མ་ཡིན་པའི་ཕྱིར་རོ། །དབུ་རྒྱན་ཡིན་པའི་ཕྱིར་རྒྱས་བཏབ་དང་ཕྱོགས་མཚུངས་སོ་སྙམ་ན། དབྱེར་མེད་དུ་བསྟིམ་པ་ཡང་རྒྱས་བཏབ་དང་ཕྱོགས་མཚུངས་ཏེ། རྒྱུད་སྡེ་གཞན་ལས་ཕྱག་རྒྱ་བཞིའི་རྒྱས་གདབ་གསུངས་པ་ཡང་དབྱེར་མེད་དུ་བསྲེ་བའི་དོན་ཁོ་ན་ཡིན་པ་དང༌། འདིར་ཡང་དབྱེར་མེད་དུ་བྱས་པ་ཉིད་ཀྱི་ཕྱིར་རོ། །དེས་ན་རྒྱལ་མཆོག་གོང་མར་མི་བསྐྱོད་པ་རབ་ཏུ་ཞུགས་པའོ་ཞེས་དང༌། མི་བསྐྱོད་པ་ལྷག་པའི་བདག་པོར་བསྒོམ་
ཞེས་གསུངས་པས་གཙོ་བོ་ཉིད་མི་བསྐྱོད་པ་ཡིན་ན་ནི་དམ་ཡེ་བསྲེ་བའི་གོ་མི་ཆོད་ཕྱིན། རང་ཉིད་རང་ལ་ཞུགས་པ་དགོས་པ་མེད་པ་དང༌། མཁའ་ནང་གི་དཀྱིལ་འཁོར་གྱི་གཙོ་བོ་ཡང་རང་ཉིད་དང་ངོ་བོ་གཅིག་པའི་ཕྱིར་ལྷག་པའི་བདག་པོ་ཞེས་ལྷག་པའི་མིང་འདོགས་གསུང་བ་མི་འཐད་པར་ཐལ་བའི་ཕྱིར་ཏེ། ལྷག་པ་ནི་ལྷག་པོ་སྟེ་མཐེབ་འཁྲོལ་གྱི་དོན་ཡིན་པས་སོ། །དེས་ན་རྒྱལ་མཆོག་དང་པོར་གཙོ་བོ་ཡབ་ཡུམ་དེ་ཤེས་ཕྱིན་མས་འཁྱུད་པའི་རྡོར་སེམས་སུ་གྲུབ་པའི་ཕྱིར་རྒྱལ་མཆོག་ཕྱི་མའི་གཙོ་བོ་འདི་རྡོར་དབྱིངས་དབང་ཕྱུག་མས་འཁྱུད་པའི་མི་བསྐྱོད་པའི་ངོ་བོར་གྲུབ་བོ། །ནུས་མ་རྣམས་སྔར་ཡབ་ཡུམ་ཞུ་བ་དང་ལྷན་ཅིག་ཞུ་བར་གྱུར་ན། སྐབས་འདིར་ཡང་ཧཱུཾ་ཡིག་རྡོ་རྗེ་དང་བཅས་པ་གཅིག་པུ་ལས་གཙོ་བོ་ཡབ་ཡུམ་ནུས་མ་དང་བཅས་པ་གྲུབ་པར་བྱེད་ལ། སྔར་མ་ཞུ་ན་ནུས་མ་རྡོ་རྗེ་བཞི་དང་བཅས་པ་སྔར་ཡོད་གསལ་བཏབ་པ་ཙམ་གྱིས་ཀྱང་ཆོག་གོ །ཡང་ན་ཞུ་བའི་སྐབས་སྣ་ཚོགས་ཡུམ་ཞུ་བ་ན། ནུས་མ་གཞན་རྣམས་ནི་ཞུ་བ་རང་ཁོ་ནའི་ངེས་གཟུང་མེད་བཞིན་དུ་ཟླ་བ་ནུབ་པ་ན་ཆུ་ནང་གི་ཟླ་གཟུགས་ཡང་མི་སྣང་བ་ལྟར་སོང་ནས། སྐབས་འདིར་སྔོན་བཞིན་ས་བོན་དང་ཕྱག་མཚན་ལས་བསྐྱེད་ཀྱང་རུང་ངོ༌། །འོན་ཀྱང་ལག་ལེན་སྔ་མ་ལ་མཛད་པར་སྣང་ལ། རྡོ་རྗེ་བཞི་ཡང་གྲུབ་པར་གྱུར་ཞེས་བྱ་བ་ནི་བློའི་ཡུལ་དུ་གྲུབ་པ་ཡིན་པས་སྔར་ཡོད་གསལ་འདེབས་ཁོ་ན་སྟེ། དེ་ཡང་ཞལ་ཕྱག་གི་རྣམ་པ་ཅན་དུ་མེད་པས་རྗེས་ཆགས་ཀྱི་རྐྱེན་གྱིས་ཞུ་བ་ནི་མ་ཡིན་པར་མངོན་ནོ། །ཡང་ནུས་མ་བཅུ་པོ་རང་བཞིན་གྱིས་མི་སྣང་བར་བྱས་པའི་ཕྱོགས་ལ་ནི། རྡོ་རྗེ་བཞི་ཡང་དེ་དང་འདྲ་བར་བྱས་ཤིང༌། སྐབས་འདིར་ས་བོན་ལས་བསྐྱེད་ཀྱང་
འགལ་བ་མེད་པ་འདྲའོ། །གཉིས་པ་འཁོར་ཚོགས་སྤྲོ་བ་ནི། འཁོར་གྱི་དཀྱིལ་འཁོར་མཁའ་ནང་ནས་སྤྲོ་བ་ལ། སྐབས་འདིར་སྦྱང་བྱ་རླུང་བསྐྱེད་པ་ཙམ་ལས་ཁམས་དཀར་དམར་ཕན་ཚུན་དུ་ཕན་འདོགས་པའི་དབྱེ་བ་མེད་པས་གཙོ་བོ་ཡབ་ཡུམ་ཕན་ཚུན་གྱི་སྐུ་ལ་ལྷ་རྣམས་ཞུགས་པ་ནི་མི་དགོས་ལ། ནམ་མཁའ་བཞུགས་པའི་སངས་རྒྱས་རྣམས་ཞལ་དུ་གཞུག་པ་དང་ལྷན་ཅིག་ཏུ་རིགས་ལྔ་ཡབ་ཡུམ་ནས་བརྩམས་ཏེ་འདོད་ཕྱིར་འདོད་ཀྱི་བར་དུ་ལྷ་སྔར་སྤྲོས་པ་ཐམས་ཅད་གཙོ་བོའི་ཞལ་དུ་ཞུགས། བྱང་ཆུབ་ཀྱི་སེམས་སུ་ཞུ་བ་མན་ཆད་དཀྱིལ་འཁོར་རྒྱལ་མཆོག་བཞིན་ལས། མངལ་དཀྱིལ་གྱི་གཙོ་བོ་རྡོ་རྗེ་སེམས་དཔའ་ལ་ཤེས་རབ་ཀྱི་ཕ་རོལ་ཏུ་ཕྱིན་མས་འཁྱུད་པ་སྤྲོས་ནས། འགྲོ་དོན་མཛད་དེ་གཙོ་བོ་ཉིད་ལ་ཐིམ་པ་ན། སྔར་མི་བསྐྱོད་པ་དུས་ཀྱི་འཁོར་ལོ་ཡིན་པ་སྟེ། དེ་ནས་རྡོ་རྗེ་སེམས་དཔའ་དང་གཞི་མཐུན་པར་གྱུར་པར་བསམ་མོ། །དེས་ན་རྒྱལ་མཆོག་སྔ་ཕྱི་གཉིས་ཀར་ལ་རྒྱལ་བ་རིགས་དྲུག་ཚང་བའི་ཆེད་ཡིན་པས་དེ་ལྟར་གོ་དགོས་སོ། །སྔ་རབས་པ་ཁ་ཅིག་རྒྱལ་མཆོག་སྔ་མའི་སྐབས། སྦྱང་བྱ་མངལ་གྱི་གནས་སྐབས་དང་བསྟུན་ནས་བྱང་ཆུབ་སེམས་དཔའི་སྔོན་དུ་ཁྲོ་བོ་སྤྲོ་དགོས་ཀྱང༌། འདིར་དེ་ལྟར་མ་ཡིན་པས་སེམས་དཔའི་རྗེས་ལ་ཁྲོ་བོ་སྤྲོའོ་ཞེས་གསུང་ཡང༌། འདིར་སྦྱང་བྱའི་སྐབས་སྡེ་ཚན་སོ་སོ་ལ་སྐད་ཅིག་མ་སྔ་ཕྱི་ཡོད་སྲིད་ཀྱང༌། ཡང་དག་པའི་མངོན་ཤེས་ཀྱིས་གཟིགས་ན་མ་གཏོགས། དབང་ཡུལ་གྱི་རླུང་གི་རྗེས་ཁོ་ནར་ལས་དབང་གི་རླུང་འབྱུང་བའི་བཤད་ཚོད་དང་རྒྱུ་མཚན་མེད་ཅིང༌། རགས་རྩིས་སུ་བདེ་གཤེགས་འཕར་མ་ཕན་ཆད་སྦྱང་བྱ་དུས་མཉམ་ཡིན་པར་གསལ་བས། སྔ་ཕྱི་ལ་ཁྱད་པར་མེད་པའི་ཕྱིར། དེའི་རྗེས་སུ་དེ་དགོས་པའི་ངེས་གཟུང་ཀྱང་
མི་འཐད་དོ། །ཇི་ལྟར་སྤྲོ་བའི་ཚུལ་ནི། སྔོན་བཞིན་ཞེས་པའི་ཚིག་ཁོ་ནས་དཀྱིལ་འཁོར་རྒྱལ་མཆོག་ཁོ་ན་དང་འདྲ་སྟེ་གོང་དུ་བཤད་ཟིན་ཏོ། །དེའི་ཕྱིར་བྱང་སེམས་ཀྱི་སྔོན་དུ་ཁྲོ་བོ་སྤྲོ་བ་ཉིད་འཐད་དོ། །འདི་ལ་ཁ་ཅིག་རྒྱལ་མཆོག་གོང་མར་ཕྱིའི་གཞལ་ཡས་ཁང་ལ་ལྷ་སྤྲོས་པ་ཡིན་ན། དེར་དམ་ཚིག་གི་དཀྱིལ་འཁོར་གྲུབ་ཟིན་པར་འགྲོ་བས། རྒྱལ་མཆོག་འདིར་དམ་ཚིག་གི་དཀྱིལ་འཁོར་སྤྲོ་བར་གསུངས་པ་དང་འགལ་ལོ་ཞེས་ཟེར་ཡང༌། སྔ་མ་དམ་ཚིག་གི་དཀྱིལ་འཁོར་གྱི་ཆ་ཤས་ཙམ་ཡིན་ཡང༌། དེའི་བྱ་བ་མ་རྫོགས་པས་དེ་རྫོགས་པའི་ཕྱིར་སླར་ཡང་དམ་ཚིག་གི་དཀྱིལ་འཁོར་སྤྲོ་བ་མི་འགལ་ལོ། །བྱ་བ་མ་རྫོགས་པ་ཅི་ཞེ་ན། སྦྱང་བྱ་ཕྲུགས་ཆེན་པོའི་སྒོ་ནས་རྩ་རྫོགས་ཀྱང་རླུང་མ་རྫོགས་པ་དང༌། དག་སྦྱོར་ཉེར་ཚེ་བ་སྐོར་བུའི་སྒོ་ནས་སྔ་མ་ནམ་མཁའི་ལྷ་རྣམས་སེམས་ཅན་སྐྱེ་བ་པོ་དང༌། མཁའ་ནང་དུ་ཞུ་བ་འཆི་བ་དག་བྱེད་དང་དེ་ལས་བར་དོའི་ལུས་ཅན་ལྷ་ཚོགས་སུ་སྤྲོས་པ་དང༌། ཕྱི་མ་འདི་དང་སླར་ཡང་སྐྱེ་བ་བླངས་པ་སྦྱོར་དགོས་པའི་ཕྱིར་དང༌། ལས་རྒྱལ་མཆོག་སྒོང་སྐྱེས་སུ་འདོད་པ་རྣམས་ལ་ནི་ལྟ་སྨོས་ཀྱང་ཅི་དགོས་ལ། སྦྱོང་བྱེད་ལམ་གྱི་སྒོ་ནས་ནི། གཙོ་བོ་ནུས་མ་དང་བཅས་པ་ལ་ཞུ་བ་གླུས་བསྐུལ་གྱི་བདེ་བའི་རྒྱས་འདེབས་ཡོད་ཀྱང༌། གཞན་རྣམས་ལ་མེད་པས་སྤྲོས་པའི་ལྷ་རྣམས་གཙོ་བོ་ཡབ་ཡུམ་གྱི་བདེ་བ་ཆེན་པོ་གཅིག་གི་ངོ་བོར་སྒྲུབ་པའི་ཕྱིར་སླར་ཡང་བྱང་ཆུབ་ཀྱི་སེམས་སུ་ཞུ་ནས་མཁའ་སྤྲོ་བྱེད་དགོས་པ་ཡིན་ནོ། །དེའི་ཕྱིར་ཞུ་བའི་དུས་ཀྱི་ཡི་གེ་གསུམ་ལ་བསྡུ་བར་བྱེད་པ་སོགས་ཀྱང་འཐད་པ་མ་ཡིན་ནོ། །དེ་བཞིན་དུ་སྔ་རབས་པ་འགའ་ཞིག་དང༌། དྲུང་པ་ཆོས་རྗེ་པས་ཀྱང༌། རྒྱལ་མཆོག་སྔ་མའི་ལྷ་མ་བསྡུས་པ་ལ་ཕྱི་མའི་ལྷ་སྤྲོས་ཏེ་སྟིམ་པར་
མཛད་པ་ཡང་མི་ལེགས་ལ། དེའི་སྒྲུབ་བྱེད་དུ་ཕྱིས་བྱུང་ཁ་ཅིག་ཡེ་ཤེས་པ་གཞུག་པའི་སྐབས་དེར་སྔར་བཞིན་དམ་ཚིག་གི་འཁོར་ལོ་ལ་རོ་མཉམ་པར་གྱུར། ཞེས་པའི་སྔར་བཞིན་ཞེས་པ་རྒྱལ་མཆོག་སྔ་མའི་ལྷ་ལ་ཕྱི་མའི་ལྷ་བསྟིམ་པ་ལ་ཁ་འཕངས་པ་ཡིན་ནོ། །ཞེས་ཟེར་བ་ཡང་ལེགས་པ་མ་ཡིན་ཏེ། ཡེ་ཤེས་པ་གཞུག་ཚུལ་དབང་ལེ་སོགས་སྔར་གྱི་གནས་སྐབས་མང་པོར་གསུངས་པ་ལ་དགོངས་པར་ཡང་རུང་ལ། ཁྱད་པར་དེ་མ་ཐག་པའི་སྔོན་རོལ་དེ་ཉིད་དུ་གསལ་བར་གསུངས་པ་ལ་སྔོན་བཞིན་ཞེས་གསུངས་པ་ཡིན་གྱི། ལས་རྒྱལ་མཆོག་སྤྲོ་བའི་སྐབས་ན་དོན་ལ་བསྲེ་མི་དགོས་པ་ཁོ་ན་ཉིད་ཡིན་མོད། དགོས་སུ་ཆུག་ཀྱང་བསྲེ་བའི་ཚིག་ཡེ་མེད་པ་ལ་སྔོན་བཞིན་ཞེས་པ་ཁ་འཕངས་མཛད་པ་སྲིད་རེ་ཀན། ད་དུང་དོན་འདི་འཆད་པར་འགྱུར་རོ། །ཡང་ཁ་ཅིག་རྒྱལ་མཆོག་སྔ་མའི་ཚེ། ཐིག་ལེ་ཙམ་ལས་བསྐྱེད་ལ། ཕྱི་མའི་སྐབས་སུ་ས་བོན་ལས་བསྐྱེད་པ་ནི། རླུང་གི་མཚོན་བྱེད་ས་བོན་ཡིན་པས་སྦྱང་གཞི་དང་ཤིན་ཏུ་མཐུན་ནོ་ཟེར་བ་ནི་འཕོངས་པའི་རྒྱུ་ཁོ་ན་སྟེ། སྦྱང་གཞི་རླུང་ཡིན་སྲིད་ཀྱང་དབུགས་ཕྱི་རོལ་ཏུ་རྒྱུ་བ་ཁོ་ན་ལ་སྦྱོར་དགོས་པའི་རྒྱུ་མཚན་མེད་པ་དང༌། རང་ཉིད་ལྷའི་གདན་གྱི་སྲོག་ཆགས་བསྐྱེད་པ་སོགས་ཐམས་ཅད་ལ་ས་བོན་འབད་དེ་སྦྱོར་བ་དེ་ཡང་སྦྱང་བྱ་རླུང་ཁོ་ན་ཡིན་ནམ་ཅི། དེ་བཞིན་དུ་སྲུང་འཁོར་ལ་སོགས་པའི་སྐབས་ལའང་སྦྱོར་རམ་ཅི། ཡང་ཁྱེད་རྣམས་རླུང་དང་ས་བོན་རྣམ་པ་ཀུན་ཏུ་རང་སྦྱོར་དགོས་ན་དཀྱིལ་འཁོར་རྒྱལ་མཆོག་ལ་ངེས་པར་ས་བོན་ལས་བསྐྱེད་པ་དགོས་པར་འགྱུར་ཏེ། དེར་སྦྱང་བྱ་རླུང་བཅུ་སོགས་རླུང་ཐམས་ཅད་ཆགས་པའི་ཕྱིར་རོ། །དོན་བསྡུ་ན་སྦྱང་བྱ་བག་ཆགས་དང་བཅས་པའི་སེམས་ལས་འབྲས་བུ་ལུས་ངག་རྫོགས་པར་བྱེད་པའི་ཕྱིར། རྒྱུ་ས་
བོན་ལས་འབྲས་བུ་ལྷ་བསྐྱེད་པ་ཡིན་པ། ཅུང་ཟད་རྒྱས་པར་ན་ས་བོན་གསུང་ཕྱག་མཚན་ཐུགས། ཞལ་ཕྱག་རྫོགས་པ་སྐུ་སྟེ་ལྷ་རེ་རེ་ཡང་རྡོ་རྗེ་གསུམ་གྱི་དག་པར་སྦྱོར་བ་ཡིན་ཞིང༌། ཐིག་ལེ་ནི་གཙུག་ཏོར་སོགས་ནས་ཞུ་བའི་རྒྱུན་དེ་ཁ་ཡིན་པས་སྤྱིར་ཐོག་མའི་རྒྱུ་ཡིན་མོད་ཀྱང༌། ལྷ་སོ་སོའི་བསྐྱེད་ཆོག་ལ་ཐེ་བའི་རྒྱུ་མ་ཡིན་ཏེ། ཐུན་མོང་དུ་གྱུར་པའི་ཕྱིར་རོ། །སྔོན་རབས་འགའ་ཞིག་རྒྱལ་མཆོག་དང་པོ་མངལ་སྐྱེས་སྦྱོང་བྱེད་དང༌། འདི་སྒོང་སྐྱེས་སྦྱོང་བྱེད་དེ་མངལ་སྒོང་གཉིས་སུ་དབྱེ་བའི་དོན་ཡིན་ཞེས་ཟེར་ལ། དེ་ལ་བུ་སྟོན་ཆེན་པོས་མངོན་བརྗོད་བླ་མ་ལས། སྒོང་སྐྱེས་གླུ་ནི་མེད་པ་སྟེ། །སྒྲ་དང་སྒྲ་མིན་སྤངས་པའོ། །ཞེས་གསུངས་པ་དང་འགལ་ལོ་ཞེས་གསུང་བ་དགག་པ་སོང་ཞིང་དོན་ལ་འབྱོར་རོ། །ཡང་ཕྱིས་ཀྱི་རྣམ་བཤད་བྱེད་པ་མང་པོས་ལུགས་སྔ་མ་དེ་རོ་ལངས་བྱས་ནས། སྒོང་སྐྱེས་རླུང་གི་སྐྱེ་གནས་ཡིན་ལ། རྒྱལ་མཆོག་གཉིས་པ་ཡང་རླུང་སྦྱོང་བྱེད་ཡིན་པའི་ཕྱིར་ཞེས་རྒྱབ་ཏུ་མི་ལྟ་བར་གདོང་འདེད་ཀྱི་སྒྲུབ་བྱེད་འགོད་ཅིང༌། དེ་ལས་ཁ་ཅིག་ཨ་བྷི་དྷ་ནའི་ལུང་དེ་སྒྲུབ་ཐབས་ཡོངས་རྫོགས་སྒོང་སྐྱེས་སྦྱོང་བྱེད་ཡིན་མིན་ལ་སྦྱོར་ཟེར་ཏེ་ཁྱེད་རྣམས་འདོད་པའི་རྒྱུ་མཚན་དེ་ལྟ་ན། རྒྱལ་མཆོག་དང་པོ་མངལ་སྐྱེས་སྦྱོང་བྱེད་ཡིན་པའི་ཕྱིར། སྦྱངས་བྱའི་གཙོ་བོ་མེ་ཁམས་ཡིན་པར་ཐལ་བར་འགྱུར་ལ། དེ་འདོད་ན་དེ་ནི་རྩ་ཐམས་ཅད་སྦྱོང་བྱེད་ཡིན་ན་རྩ་ཐམས་ཅད་མེ་ཁམས་ཡིན་པར་ངེས་སམ་ཅི། དེས་ན་རྒྱལ་མཆོག་གཉིས་པའི་སྦྱང་བྱ་ནི་རྩ་རླུང་ཐིག་ལེ་གསུམ་གྱིས་ཟླས་ཕྱེ་བའི་རླུང་ཡིན་གྱི། ཁམས་དྲུག་གིས་ཟླས་ཕྱེ་བའི་རླུང་ཁམས་སུ་ངེས་འདུག་གམ་ལེགས་པར་སོམས་ཤིག སྒོང་སྐྱེས་རླུང་གི་སྐྱེ་གནས་ཅན་ནི། ཁམས་དྲུག་གམ་བརྒྱད་ཀྱི་ནང་ཚན་
གྱི་རླུང་ཁམས་ཁོ་ན་ཡིན། དེ་ཡང་ཁམས་དྲུག་གི་ནང་ཚན་གྱི་འབྱུང་བཞི་དང༌། ཁམས་བརྒྱད་ཀྱི་ནང་ཚན་གྱི་འབྱུང་བཞི་ལ་ཁྱད་པར་མེད་དོ། །གཅིག་ཤོས་དེ་ལའང་འདི་སྐད་ཅེས་བྱ་སྟེ། རྒྱུད་སྡེ་འགྱུར་རོ་ཅོག་ཐམས་ཅད་ཀྱི་ནང་ན་བསྐྱེད་རིམ་སྒོང་སྐྱེས་སྦྱོང་བྱེད་ཀྱི་མཚན་ཉིད་སྟོན་བྱེད་གསལ་པོ་གཞན་ནི་མེད་ལ། གཅིག་པོ་དེ་ལ་མི་རྩི་བ་ནི་ངོ་ཚ་མེད་ཅིང་ཁྲེལ་མེད་པས་བསྟན་པ་དཀྲུག་པ་ཙམ་དུ་ཟད་ན། འདི་ལ་ལུང་དང་རིགས་པས་ཅི་ཞིག་བྱ། དེ་ལྟ་བས་ན་རང་ལུགས་ནི། གནས་འདི་ལ་ཀུན་མཁྱེན་ཆེན་པོ་དང་བུ་སྟོན་རིན་པོ་ཆེ་ཡང་བཞེད་པ་མཐུན་པ་ལྟར། སྒོང་སྐྱེས་སྦྱོང་བྱེད་ནི་རྟེན་གྱི་དཀྱིལ་འཁོར་བསྐྱེད་པ་ཁོ་ན་སྟེ། འགྲེལ་ཆེན་ལས་ཀྱང་ཚངས་པའི་སྒོ་ང་དཔེར་མཛད་པའི་ཕྱིར་རོ།། །།གསུམ་པ་ལྷ་རྣམས་ཀྱི་དག་པ་དྲན་པ་ནི། སྐུ་བཞིའི་རྣམ་དགརྩའི་རྣམ་ དག །དུས་ཀྱི་རྣམ་དག །ཕུང་ཁམས་ཀྱི་རྣམ་དག །མཚན་མའི་རྣམ་དགབཞུགས་སྟངས་ཀྱི་རྣམ་དག །འཕྲོས་དོན་གྱི་དག་པ་གཞན་ཏེ་བདུན་ལས། དང་པོ་ནི། ལྷ་མོ་སངས་རྒྱས་རིག་མ་སོགས་ཏེ། མངལ་གནས་སྐྱེས་པ་ཇི་ལྟ་བ་ཉིད་ཅེས་གསུངས་པས། དངོས་བསྟན་སྦྱང་བྱ་ལ་སྦྱར་བ་གཙོ་ཆེ་ཡང་དོན་གྱི་གཙོ་བོ་སྦྱངས་འབྲས་ཉིད་དེ། དཔེ་སྦྱང་བྱ་ལ་བརྟེན་ནས་དོན་སྦྱངས་འབྲས་གོ་བར་བྱེད་དོ། །དེ་ཡང་མངལ་ན་གནས་པ་དང༌། བཙས་ཟིན་པའི་གནས་སྐབས་བསྡོམས་པ་སྐུ་བཞི་དང་སྦྱར་བའི་དག་པ་ནི། ལྷ་མོ་དུ་བ་མ་ལ་སོགས་པ་བརྒྱད་དང༌། སངས་རྒྱས་དོན་ཡོད་གྲུབ་པ་ལ་སོགས་པ་དང༌། སྒྲོལ་མ་ལ་སོགས་པའི་རིག་མ་བཞི་དང༌། དཔག་བསམ་གྱི་ཤིང་དང༌། བཅས་པའི་སྒྲས་དུང་གཎྜི་ནོར་བུ་སྟེ་རྡོ་རྗེ་བཞི་དང༌། བུམ་པ་བཅུ་རྣམས་དང་བཅས་པ་
རྣམས་རྒྱལ་བ་སངས་རྒྱས་ཀྱི་ནི་དག་པའི་སྐུའོ། །གཙོ་བོ་ནི་ཁྱབ་བྱེད་ཡིན་ཡང་བཅས་པ་ཞེས་པའི་ཚིག་གིས་གཙོ་བོ་ཉིད་འཁོར་དེ་རྣམས་དང་བཅས་པ་ཞེས་པར་གོ་ནུས་སོ། ཁྲོ་བོའི་དབང་པོ་བགེགས་མཐར་བྱེད་ལ་སོགས་པ་ཡུམ་དང་བཅས་པ་དང༌། ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་དྲུག་དང༌། རོ་ཡི་ཞེས་པ་དྲུག་གི་དོན་ཏེ། རྡོ་རྗེ་མ་དྲུག་ནི་ཆོས་ཀྱི་སྐུ་དེ་ཉིད་དོ། །གསུང་དཀྱིལ་གྱི་ཙརྩི་ཀཱ་ལ་སོགས་པ་རྣལ་འབྱོར་མ་བརྒྱད་ཐབས་དང་བཅས་ཤིང༌། འཁོར་གྱིས་བསྐོར་བ་རྣམས་ནི་ལོངས་སྤྱོད་རྫོགས་པའི་སྐུའོ། །སྐུ་དཀྱིལ་གྱི་སྒོ་སྲུང་ཞིང་རྟ་ལ་གནས་པའི་དབྱུག་སྔོན་འོད་ཟེར་ཅན་མ་ལ་སོགས་པ་ཁྲོ་བོ་ཡབ་ཡུམ་རྣམས་དང༌། བདེན་བྲལ་ལ་སོགས་པ་ལྷ་ཆེན་པོར་གྲགས་པ་ཉི་མའི་བརྡས་བསྟན་པའི་བཅུ་གཉིས་པོ་འཁོར་བཅས་རྣམས་དང༌། ཀླུ་བརྒྱད་པོ་རྣམས་དང༌། རབ་གཏུམ་མ་རྣམས་དང༌། མ་ངེས་པའི་འབྱུང་པོའི་འཁོར་དང་བཅས་པ་རྣམས་སངས་རྒྱས་ཀྱི་སྤྲུལ་པའི་སྐུའོ། །འདིར་ཀླུ་བརྒྱད་ཅེས་གསུངས་པ། སྟེང་འོག་གི་ཀླུ་འགོག་པའི་དོན་མ་ཡིན་མོད། བརྒྱད་པོ་གཙོ་ཆེ་བའི་དོན་དུ་བྱས་པའོ། དེས་ན་མངལ་དུ་གནས་པ་དག་པའི་སྐུ། བཙས་ནས་སོ་སྐྱེས་ཀྱི་བར་དུ་ཆོས་སྐུ། དེ་ནས་སླར་ཡང་སོ་ལྷུང་གི་བར་དུ་ལོངས་སྤྱོད་ཀྱི་སྐུ། སླར་སོ་སྐྱེས་པ་ནས་འཆི་བའི་བར་དུ་སྤྲུལ་སྐུ་སྟེ། རིམ་པས་བདེ་བས་བྱིན་གྱིས་བརླབས་པའི་མངོན་ཤེས་དང་ལྡན་པའི་ཕྱིར་དང༌། མཚན་འཛིན་ཤས་ཆུང་བའི་ཕྱིར་དང༌། ངག་གསལ་བར་བརྗོད་པའི་ཐོག་མ་ཡིན་པའི་ཕྱིར་དང༌། བྱ་བ་སྣ་ཚོགས་ལ་འཇུག་ཅིང་རིགས་བརྒྱུད་བསྐྱེད་པ་སོགས་ཀྱི་ཕྱིར་རོ། །དེ་དག་སྦྱོང་བྱེད་
ལ་རིམ་པ་བཞིན་བདེ་ཆེན་འཁོར་ལོ་དང༌། ཐུགས་དང་གསུང་དང་སྐུའི་ལྷ་རྣམས་སྦྱར་བ་སྟེ། འཁོར་བ་རྣམས་ཀྱི་སྐྱེ་སྲིད་རྣམ་པར་དག་པ་དོན་དམ་ཆོས་དབྱིངས་སངས་རྒྱས་ཀྱི་ཡེ་ཤེས་གཙོ་བོ་ཡབ་ཡུམ་མཉམ་སྦྱོར་བདེ་བ་ཆེན་པོས་ཤེས་བྱ་ཕུང་ཁམས་དང༌། ཕར་ཕྱིན་བཅུ་ལ་ཐབས་ཤེས་ཀྱིས་ཕྱེ་བ་དང༌། རྡོ་རྗེ་བཞི་རྣམས་མཁྱེན་པ་སྟེ། བདེ་བས་ཤེས་བྱ་ཐམས་ཅད་མཁྱེན་པ་བདེ་ཆེན་འཁོར་ལོ་དག་པའི་སྐུ་དང༌། ཡུལ་དབང་བྱ་བྱེད་ལས་གསུམ་སོགས་སྤྲོས་པ་ཐམས་ཅད་སྤངས་པའི་ཆོས་སྐུ་ཐུགས་དཀྱིལ་གྱི་ལྷ་དང༌། བརྒྱ་དང་དྲུག་ཅུ་རྩ་བཞིའི་ལྟེ་བའི་རླུང་རྣམ་པར་དག་པའི་རང་བཞིན་གཞོམ་མེད་ཀྱི་སྒྲ་དབྱངས་ལོངས་སྐུ་ནི་གསུང་དཀྱིལ་གྱི་ལྷ་དང༌། ས་འོག་ས་སྟེང་ས་བླར་གང་འདུལ་གྱི་སྤྲུལ་པ་སྣ་ཚོགས་འབྱུང་བའི་སྤྲུལ་སྐུ་ནི་སྐུ་དཀྱིལ་གྱི་ལྷའི་རྣམ་དག་གོ ཡང་རྒྱལ་བའི་སྐུ་བཞིའི་དབྱེ་བ་ཕྱི་རོལ་གསུང་དང་སྐུའི་དཀྱིལ་འཁོར་དག་པ་གཅིག་དང༌། ནང་ཐུགས་དཀྱིལ་ཁོ་ན་ལ་སྦྱར་བ་སྟེ། རིམ་པ་གཉིས་སུ་འགྱུར་ཞིང༌། མངལ་སྐྱེས་རྣམས་མངལ་དུ་གནས་པ་ལ་སྐུ་བཞིའི་དག་པ་ཆ་ཚང་གཅིག་དང༌། བཙས་ནས་མ་ཤིའི་བར་ལ་སྐུ་བཞིའི་དག་པ་ཆ་ཚང་གཅིག་སྟེ། མངལ་སྐྱེས་ཀྱི་ཚེ་གཅིག་ལ་དག་པ་ཕྲུགས་གཉིས་ཡོད་པ་བཞིན་དུ་དཀྱིལ་འཁོར་ཡོངས་རྫོགས་ལ་ཡང་སྐུ་བཞིའི་དག་པ་ཕྲུགས་གཉིས་སོ། །དེ་ཡང་ནང་ལེ་ལས་འབྱུང་བ་ལྟར་མའི་མངལ་དུ་དཀར་དམར་སེམས་གསུམ་འདྲེས་ཤིང༌། ཕུང་ཁམས་ཀྱི་དབྱེ་བ་རགས་པ་མ་ཐོབ་པའི་སྐབས་དེ་རྣམ་ཤེས་བདེ་བའི་གནས་སྐབས་ཡིན་པའི་ཕྱིར། དག་པའི་སྐུའམ་ལྷན་ཅིག་སྐྱེས་པའི་སྐུས་དག་པ་དང༌། དེ་ནས་ཕུང་ཁམས་བཅུའི་དབྱེ་བ་རགས་པ་གྲུབ་པ་ནི་ཆོས་
སྐུ་དང༌། དེ་ནས་དབང་པོ་ཡུལ་བཅས་གྲུབ་པ་ནི་ལོངས་སྐུ་དང༌། དེ་ནས་སྒྲ་ལ་སོགས་པ་རིམ་གྱིས་གྲུབ་སྟེ། བཙའ་བའི་དུས་ཀྱི་མཐར་ཐུག་པ་ནི་སྤྲུལ་སྐུས་དག་པའོ། །རྒྱུ་མཚན་རིམ་པ་བཞིན་བདེ་བ་ཉིད་དང་ཕུང་ཁམས་ཀྱི་རྣམ་རྟོག་སྤངས་པ་དང༌། ལོངས་སྤྱོད་ཀྱི་གཞི་ཡིན་པ་དང༌། བྱ་བྱེད་རྣམ་རྟོག་དུ་མའི་རྒྱུར་གྱུར་པའི་ཕྱིར་འདྲ་ཆོས་ཀྱི་སྒོ་ནས་བཞག་གོ །དེ་ལ་སྟོན་པ་བཅོམ་ལྡན་འདས་འཁོར་ལྷ་མོ་ནུས་མ་རྣམས་དང༌། སོགས་ཀྱི་སྒྲས་རྡོ་རྗེ་བཞི་དང༌། བུམ་པ་རྣམས་ཡིན་ལ་འདི་རྣམས་རྒྱལ་བའི་ལྷན་ཅིག་སྐྱེས་པའི་སྐུའི་དག་པ་ཡིན་ཏེ། དཀྱིལ་འཁོར་སྙིང་པོ་བདེ་ཆེན་འཁོར་ལོའི་ཡང་དབུས་གཙོ་བོའི་པདྨ་ལ་བསྐོར་བ་རྣམས་ནི། དོན་དམ་ལྷན་ཅིག་སྐྱེས་པའི་བདེ་ཆེན་ཉིད་རྡོ་རྗེ་བཞི་དང་ཕར་ཕྱིན་སོགས་གཞི་ལམ་འབྲས་བུའི་རྣམ་པ་ཀུན་ཏུ་འཆར་བ་མཚོན་པའི་ཕྱིར་དང༌། མངལ་གྱི་གནས་སྐབས་དང་པོ་དེ་ན་རྩ་རླུང་ཁམས་དབང་པོ་སོགས་ཐམས་ཅད་ཀྱི་ས་བོན་ཕྲ་མོའི་ཚུལ་གྱིས་གནས་པ་དང་མཚུངས་པས་སོ། །དོན་གྲུབ་སོགས་སངས་རྒྱས་བཞི་དང༌། སོགས་ཀྱི་སྒྲས་ཡུམ་བཞི་ནི་ཕུང་ཁམས་སོགས་ཆོས་ཐམས་ཅད་ཀྱི་རང་བཞིན་འོད་གསལ་བ་གཟིགས་པའི་ཆོས་སྐུས་དག་པ་སྟེ། མངལ་གྱི་གནས་སྐབས་སུ་ཕུང་ཁམས་ཀྱི་དབྱེ་བ་རགས་པ་གྲུབ་ཅིང༌། འབུར་པོ་ལྔར་དོད་པ་དང་མཚུངས་པའི་སྒོ་ནས་དག་པའོ། །རྡོ་རྗེ་མ་དྲུག་དང་སོགས་པའི་སྒྲས་སེམས་དཔའ་དྲུག་ནི། ཡེ་ཤེས་ཀྱི་སྐུ་མཚན་དཔེ་ཅན་གྱིས་ཟག་མེད་ཀྱི་འདོད་ཡོན་ལ་ལོངས་སྤྱོད་པའི་ལོངས་སྐུས་མཚོན་ནས་མངལ་དུ་ཡུལ་ལྔའི་ནུས་པ་དང་དབང་པོ་ལྔ་རྣམ་པར་དག་པའོ། །སྒོ་སྐྱོང་གི་
ཁྲོ་བོ་བཞིའམ་ལྔ་ཡུམ་དང་བཅས་པ་དག་ནི། འཕྲིན་ལས་སྣ་ཚོགས་པའི་སྒོ་ནས་འགྲོ་བའི་དོན་སྤྱོད་པ་སྤྲུལ་བའི་སྐུ་མཚོན་ཞིང༌། མངལ་དུ་ཚིགས་ཆེན་བཅུ་གཉིས་སོགས་དང༌། སྐྲ་དང་བ་སྤུ་སོགས་འགྲུབ་པ་རྣམ་པར་དག་པའོ། །དེ་དག་ནི་དཀྱིལ་འཁོར་གྱི་སྙིང་པོ་ཐུགས་དཀྱིལ་ཁོ་ན་ལ་སྐུ་བཞི་སྤྱོད་ཚུལ་ལོ། །ཡང་ནང་ལེ་ལས་འབྱུང་བ་ལྟར་བཤད་ན། བྱིས་པ་བཙས་མ་ཐག་ཏུ་རླུང་རྒྱུ་བའི་ཐོག་མར་དབུ་མ་ལས་ང་དྲུག་རྐང་བཅས་འབབ་ཅིང༌། དེས་རླུང་གཞན་ཐམས་ཅད་སད་པར་བྱེད་པ་ནི། ལྷན་སྐྱེས་ཀྱི་སྐུ་སྟེ་ཡུལ་ཤེས་བྱ་རྣམས། རིག་པའི་ནུས་པ་ཐོབ་པ་ལ་ཕྱོགས་པའི་ཕྱིར་རོ། །དེ་ནས་སོ་སྐྱེ་བའི་བར་ནི་ཆོས་སྐུ་སྟེ། ཆོས་སྐུ་བརྗོད་བྲལ་དང༌། འདི་ཚིག་མི་གསལ་བའི་ཕྱིར་རོ། །དེ་ནས་སོ་ལྷུང་བའི་བར་ལོ་བརྒྱད་ནི་ལོངས་སྐུ་སྟེ། སྤྱིར་ལོངས་སྤྱོད་ཡུལ་ལྔ་རིག་པ་དང༌། སྒོས་སུ་ཟས་ལ་ལོངས་སྤྱོད་པའི་ཐོག་མ་ཤར་བའི་ཕྱིར་ རོ། །སོ་ལྷུང་བ་ནས་འཆི་བའི་མཐར་ཐུག་པ་སྤྲུལ་སྐུ་སྟེ། ཐོག་མའི་དག་པ་དང་འདྲ་བར་བྱ་བ་སྣ་ཚོགས་པའི་ཕྱིར་རོ། །ཡང་ཐུགས་དཀྱིལ་གྱི་ཕྱི་རོལ་གསུང་འཁོར་དུ་ཙ་མུཎྜ་སོགས་ལྷ་མོ་བརྒྱད་འཁོར་བཅས་ནི། དག་པ་ལྷན་སྐྱེས་ཀྱི་སྐུ་སྟེ། མ་མོ་འདི་རྣམས་འདོད་པའི་དགའ་བ་ལྷག་པར་སྤྱོད་པ་དང་ཚུལ་མཐུན་པའི་ཕྱིར་དང༌། བཙས་མ་ཐག་དབུ་མའི་དབུགས་འབབ་པ་ཡང་ནང་གི་ཐིག་ལེའི་བདེ་བ་སྐུལ་བྱེད་ཡིན་ཞིང་འདིས་དེ་སྦྱོང་བའི་ཕྱིར་རོ། །སྐུ་འཁོར་གྱི་ལྷ་ཆེན་བཅུ་གཉིས་འཁོར་བཅས་དང༌། སྒོ་སྐྱོང་རྣམས་ཕྱི་ནང་གི་ཡུལ་དང་དུས་ཀྱི་དབྱེ་བ་སྣ་ཚོགས་པ་དང༌། གཙོ་འཁོར་དང་བྱ་བྱེད་ལས་གསུམ་སོགས་ཆོས་སྣ་ཚོགས་པ་ཐམས་ཅད་རོ་མཉམ་དུ་གཟིགས་པ་མཚོན་པའི་ཕྱིར་ཆོས་སྐུ་སྟེ།
བཙས་ནས་སོ་མ་སྐྱེས་བར་དུ་མིག་སོགས་དབང་པོ་རྣམས་གཟུགས་སོགས་ཡུལ་གྱི་སྣང་བ་སྣ་ཚོགས་ལ་འཇུག་ཀྱང་བླང་དོར་གྱི་རྟོག་པ་ཤས་ཆུང་བ་དེ་སྦྱོང་བའི་ཕྱིར་རོ། །གདེངས་ཅན་རིགས་ཏེ་ཀླུ་བཅུ་པོ་རྣམས་ནི། འཇིག་རྟེན་གྱི་ཀླུ་རྣམས་རྡོ་རྗེའི་ས་གཞི་ནས་གཞན་འཕྲུལ་དབང་བྱེད་ཀྱི་བར་དུ་སྣ་ཚོགས་པའི་ཆོ་འཕྲུལ་གྱིས་རྩེ་ཞིང་ལོངས་སྤྱོད་པ་དང་རྣམ་པ་མཚུངས་པའི་ཕྱིར་ལོངས་སྤྱོད་རྫོགས་སྐུ་སྟེ། བྱིས་པ་སོ་སྐྱེས་ནས་སོ་མ་ལྷུང་གི་བར་ཡང་སྣ་ཚོགས་པའི་རྩེད་མོའི་རོལ་པ་དང་བཅས་པ་དེ་སྦྱོང་བའི་ཕྱིར་རོ། །རབ་གཏུམ་མོ་རྣམས་ནི་དུར་ཁྲོད་དུ་གནས་ཤིང༌། ཁྲོ་ཆགས་ལ་སོགས་པའི་སྤྱོད་པ་སྣ་ཚོགས་པ་སྟོན་པས་ན་འཁོར་བར་གནས་ནས་གང་ལ་གང་འདུལ་གྱི་འགྲོ་དོན་མཛད་པའི་སྤྲུལ་སྐུ་མཚོན་པར་འགྱུར་ཏེ། གཞོན་ནུ་སོ་ལྷུང་ཞིང་བརྗེས་ནས་ཚེའི་མཐར་གཏུགས་པའི་བར་གནས་ལུས་ལོངས་སྤྱོད་བྱ་བྱེད་མ་ངེས་པ་འབྱུང་བ་རྣམ་པར་དག་པའི་ཕྱིར་རོ། །སེམས་ཅན་ཀུན་གྱི་དོན་གྱི་སླད་དུའོ་ཞེས་པ་ནི་གསུང་དང་སྐུའི་ལྷ་ཚོགས་འདི་དག་ཐུགས་དཀྱིལ་གྱི་ལྷ་རྣམས་དང་ངོ་བོ་གཅིག་པ་ཡིན་ཡང༌། འཇིག་རྟེན་ལྷའི་གཟུགས་སུ་སྣ་ཚོགས་སུ་འབྱུང་བ་ནི། དེ་དང་དེས་འདུལ་བའི་སེམས་ཅན་གྱི་དོན་དུའོ། །ཞེས་པའི་དོན་ཡིན་ལ། འདིར་དག་པ་རིམ་པ་གཉིས་སུ་མཛད་པ་ནི་ལུས་ངག་ཡིད་གསུམ་ཞེས་པའང་ངག་ལུས་ལ་བསྡུས་ཏེ། ལུས་སེམས་གཉིས་སུ་འདུ་བའི་དབང་དུ་མཛད་ནས་སེམས་ཀྱི་ཆོས་ཐུགས་དཀྱིལ་ལ་དག་པ་ཚར་གཅིག་དང༌། ལུས་ཀྱི་ཆོས་ཕྱི་མ་གཉིས་ལ་དག་པ་ཚར་གཅིག་མཛད་པ་ཡིན་ལ། དག་པ་སྔོན་མ་ནི་སྐུ་གསུང་ཐུགས་བདེ་ཆེན་བཞི་པོ་ལ་སྐུ་བཞི་དང་རྡོ་རྗེ་བཞི་བྲང་ཐད་དུ་སྦྱར་བ་ཡིན་ནོ། །དེ་
ལྟར་ན་སྐུ་བཞིའི་དག་པ་འདི་ནི་དག་སྦྱོར་གྱི་གཙོ་བོ་ཡིན་ལ། དུས་ཀྱི་འཁོར་ལོའི་བསྐྱེད་རིམ་གྱི་བཤད་པ་བྱེད་པའི་བོད་རྣམས་ཀྱིས་འགྲེལ་པའི་དངོས་བསྟན་རགས་བཤད་ཙམ་དེ། ཐམས་ཅད་དུ་གཅིག་ལ་གཅིག་གིས་སྐྱོར་ཟློས་བྱེད་པའི་ཚིག་ཙམ་ལ་ཞེན་པ་ལས་རྒྱུ་མཚན་ངེས་ཅན་བཤད་པ་མ་མཐོང་ནས་འདིར་གསལ་བར་བཤད་པའོ། །སྐུ་ཡི་རྡོ་རྗེ་ལྷན་ཅིག་སྐྱེས་པའི་སྐུ་ནི་ཟུང་དུ་འགྱུར་ཏེ་གཟུགས་ནི་རྫོགས་པའི་སླད་དུའོ། །གསུང་གི་རྡོ་རྗེ་དང་ནི་ཆོས་ཀྱི་སྐུ་ཡང་ཟུང་དུ་འགྱུར་ཏེ་ཆོས་ཉིད་བསྟན་པའི་དོན་དུའོ། །ཐུགས་དང་ལོངས་སྤྱོད་རྫོགས་པའི་སྐུ་ཡང་ཟུང་དུ་འགྱུར་ཏེ་སེམས་ཅན་ཀུན་གྱི་དོན་ནི་བྱེད་པ་པོ། ཡེ་ཤེས་དང་ནི་སྤྲུལ་པའི་སྐུ་དག་ཟུང་དུ་འགྱུར་ཏེ་སྲོག་ཆགས་རྣམས་ལ་ཐར་པ་སྟེར་བ་ཉིད། ཅེས་པའི་དོན་ནི་རྣམ་གཞག་སྤྱིར་བཏང་ལ་སྐུ་རྡོ་རྗེ་སྤྲུལ་སྐུ། གསུང་ལོངས་སྐུ། ཐུགས་ཆོས་སྐུ། ཡེ་ཤེས་ལྷན་ཅིག་སྐྱེས་པའི་སྐུར་འཇོག་ཀྱང་འདིར་དམིགས་གསལ་གྱི་ཚུལ་དུ་ཕན་ཚུན་གདོད་ནས་རྒྱས་བཏབ་པའི་རྣམ་གཞག་བྱ་སྟེ། མངལ་དུ་བྱིས་པ་རྣམས་ཀྱི་ལུས་རྫོགས་པ་སྐུ་རྡོ་རྗེའི་རིགས་ལ་རྣམ་ཤེས་ཁུ་ཁྲག་གིས་བྱིན་གྱིས་བརླབས་པ་བདེ་ཆེན་ལྷན་ཅིག་སྐྱེས་པའི་སྐུ་ཟུང་འབྲེལ་དུ་རྒྱས་འདེབས་ཤིང༌། འབྲས་དུས་དཀྱིལ་འཁོར་གྱི་འཁོར་ལོ་མཚན་དཔེའི་སྐུ་གཞལ་མེད་ཁང་མཆོད་པ་ལ་སོགས་པ་ཐམས་ཅད་མི་འགྱུར་བའི་བདེ་བའི་རང་བཞིན་ལས་གྲུབ་པའི་ཕྱིར། དེ་ལམ་དུ་བྱེད་པ། རྟེན་གཞལ་ཡས་ཁང་སྐུ་ལ་བརྟེན་པ་ལྷ་ཁ་སྦྱོར་གྱི་སྐུ་ཅན་ལྷན་ཅིག་སྐྱེས་པ་མི་འབྲལ་པའི་ཚུལ་གྱིས་འཇུག་པ་དང༌། བརྟེན་པ་ལྷ་ཉིད་ཀྱང་རྒྱུ་ཐབས་ཤེས་ཉི་ཟླ་ལས་བྱུང་བ་སྐུ་དང༌། འབྲས་བུ་ཐབས་ཤེས་ཁ་སྦྱོར་གྱི་ལྷ་ཡིན་པས་བདེ་བ་
སྟེ་སྐུ་དང་བདེ་ཆེན་མི་འབྲལ་བ་མཚོན་ཏེ། དཀྱིལ་འཁོར་རྒྱལ་མཆོག་གི་དག་པའོ།། བྱིས་པ་བཙས་ནས་སོ་སྐྱེས་པའི་བར་རང་བཞིན་རླུང་འབབ་ཅིང༌། རྣམ་འགྱུར་ངག་གི་བརྗོད་པ་དང་པོར་འབྱུང་བའི་སྐབས་ཡིན་པསགསུང་རྡོ་རྗེའི་འདྲ་མཚུངས་ཀྱང་ཡིན་ལ། ཤེས་པ་གསལ་ལ་རྟོག་མེད་ཤས་ཆེ་བའི་ཕྱིར་ཆོས་སྐུ་དང་མཐུན་ནོ། །འབྲས་བུ་ཐུགས་རྡོ་རྗེ་སྟོང་ཉིད་གཟིགས་པའི་ཡེ་ཤེས་དེ་ཀས་ཇི་སྙེད་པ་མཐའ་དག་གཟིགས་པའི་ཕྱིར་ཆོས་ཀྱི་འཁོར་ལོ་མ་ལུས་པ་བསྐོར་བས་ན། ཆོས་སྐུའི་རང་བཞིན་ལས་གསུང་གི་སྣང་བ་འབྱུང་བས། གསུང་དང་ཆོས་སྐུ་རོ་མཉམ་ཟུང་འབྲེལ་ཏེ། ཆོས་སྐུས་ཇི་ལྟར་རྟོགས་པ་བཞིན་གསུང་གིས་སྟོན་པའི་ཕྱིར། །དེ་གཉིས་དང་མཚུངས་པར་བསྐྱེད་རིམ་ལ་ཡང་ཞུ་བ་ཆོས་ཀྱི་སྐུ་ལས་གླུས་བསྐུལ་ནས། ངག་རླུང་རྣམ་པར་དག་པའི་དཀྱིལ་འཁོར་སྤྲོ་བ་ཡིན་ཏེ། ལས་རྒྱལ་མཆོག་གི་དག་པའོ། །བྱིས་པ་གཞོན་ནུར་གྱུར་པའི་གནས་སྐབས་ནང་དུ་ཐིག་ལེ་གཡོ་བ་ཐུགས་རྡོ་རྗེ་དང༌། ངག་གི་སྨྲ་བརྗོད་ལྷག་པར་གསལ་བ་ལོངས་སྤྱོད་རྫོགས་སྐུ་ཟུང་འབྲེལ་དང༌། འབྲས་བུ་དག་རླུང་རྣམ་པར་དག་པའི་ལོངས་སྐུ་མཚན་དཔེ་ཅན་གྱི་སྐུ་དཀྱིལ་འཁོར་དང་བཅས་པ་ཤིན་ཏུ་གསལ་བ་དེས་ཐུགས་རྣམ་པར་མི་རྟོག་པའི་བདེ་བ་ཉམས་སུ་མྱོང་བའམ། དེ་གཉིས་ངོ་བོ་གཅིག་པ་བཞིན་དུ་སྐབས་འདིར་ཡང་བྱང་ཆུབ་ཀྱི་བགྲོད་པ་སྤྱི་བོ་ནས་ནོར་བུའི་བར་དུ་དགའ་བ་བཅུ་དྲུག་གི་རིམ་པས་འོངས་པའི་བདེ་བ་དེ། ལྷ་སྐུ་གསལ་སྟོང་དེ་དང་ཟུང་དུ་འཇུག་པའི་ཕྱིར། ཉམས་སུ་མྱོང་བྱ་ཞུ་བདེ་ནི་ཐུགས་དང༌། མྱོང་བ་པོ་ལྷ་སྐུ་ནི་ལོངས་སྤྱོད་རྫོགས་པ་སྟེ་ཐིག་ལེའི་རྣལ་འབྱོར་རོ། །གཞོན་ནུ་དེ་ཉིད་ལང་ཚོའི་གནས་སྐབས་ཐོབ་ནས་ཁུ་བ་
འཕོ་བའི་གནས་སྐབས་ཡེ་ཤེས་དང་བུ་དང་བུ་མོ་སྤྲོ་བ་དང༌། བྱ་བ་སྣ་ཚོགས་ལ་འཇུག་པའི་ཆ་ནས་སྤྲུལ་སྐུ་དང་མཚུངས་ཏེ། རྫོགས་རིམ་མཐར་ཐུག་དང་འབྲས་བུའི་གནས་སྐབས་སུ་མི་འགྱུར་བའི་བདེ་བ་ཡེ་ཤེས་རྡོ་རྗེ་དང༌། དེ་ལས་རྡོ་རྗེ་སྤྲོ་བའི་དཀྱིལ་འཁོར་འབྱུང་བ་སྤྲུལ་པའི་སྐུ་ཟུང་འཇུག་ཏུ་གནས་པ་བཞིན་དུ། འདིར་ཡང་བདེ་བ་ཉམས་སུ་མྱོང་བའི་ཤེས་པ། མས་བརྟན་གྱི་དགའ་བ་བཅུ་དྲུག་དང༌། རྡོ་རྗེ་སྤྲོ་བའི་མོས་པ་བྱེད་པའོ། །ཕྱི་མ་མི་འགྱུར་བའི་ལམ་འདི་ནི་ཐར་བ་མཆོག་གི་ལམ་དངོས་ཡིན་པས་ཐར་པ་སྟེར་བ་ཉིད་ཅེས་སོ། །ཡང་ཁ་ཅིག་བསྐྱེད་རིམ་གྱི་སྐབས། མངོན་བྱང་ལྔ་ལས་བདེ་ཆེན་འཁོར་ལོ་བསྐྱེད་པ་དང༌། དབྱངས་གསལ་ལས་ཐུགས་དཀྱིལ་བསྐྱེད་པ་དང༌། ཐུན་ཚོད་དང་དབྱུ་གུའི་དག་པ་ཐུགས་ལས་གསུང་གི་རྣལ་འབྱོར་མ་ལོངས་སྐུ་བསྐྱེད་པ་དང༌། གཙོ་བོ་ཡེ་ཤེས་ཀྱི་རྣམ་འཕྲུལ་ལས་སྐུ་དཀྱིལ་གྱི་ལྷ་རྣམས་སྤྲུལ་ཏེ། ལྷ་ཚོགས་ཐམས་ཅད་སེམས་ཅན་རྣམས་ལ་ཐར་པ་སྟེར་བའི་སླད་དུ་སྤྲུལ་པའོ། །ཞེས་ཀྱང་འཆད་དེ་འགལ་བ་རང་ཆེར་མི་འདུག་མོད། གནད་གྱི་འགངས་ཆུང་ངོ༌།། །།གཉིས་པ་རྩའི་རྣམ་དག་ནི། བུམ་པ་རྣམས་དང་དུ་བ་ལ་སོགས་བརྒྱད་པོ་རྣམས་ཀྱིས་སྙིང་གར་ཆོས་ཀྱི་འཁོར་ལོ་རབ་ཏུ་འགྱུར། རིག་མ་རྣམས་དང་སངས་རྒྱས་ཉིད་ཀྱིས་མགོ་བོར་རྩིབས་བཅུ་དྲུག་པ་ལྷན་ཅིག་སྐྱེས་པར་རབ་ཏུ་གྲགས། བྱང་ཆུབ་སེམས་དཔའ་ལ་སོགས་ཉིས་འགྱུར་མི་བདག་རྣམས་ཀྱིས་མགྲིན་པར་ལོངས་སྤྱོད་རྫོགས་པའི་འཁོར་ལོར་འགྱུར། འཇིགས་མ་ལ་སོགས་ནོར་ནི་གདེངས་ཅན་དག་གིས་བསྒྱུར་བ་རྣམས་ཀྱིས་ལྟེ་བ་སྤྲུལ་པའི་འཁོར་ལོར་འགྱུར། ལྷ་རྣམས་ཀྱིས་ནི་ལས་ཀྱི་འཁོར་ལོ་ལག་པ་རྐང་
པའི་ཚིགས་ལ་དགུ་བཅུ་དུས་ཀྱིས་བསྣུན་པ་སྟེ། ཀླུ་དང་གཏུམ་མོ་མི་ཡི་བདག་པོ་རྣམས་ཀྱིས་སོར་མོའི་ཚིགས་ཀྱི་མཚམས་ལ་བྱ་བ་ཞེས་བྱར་འགྱུར། །ཞེས་གསུངས་ཏེ། བུམ་པ་བརྒྱད་ནི་སྙིང་གའི་རྩ་བརྒྱད་དང༌། ལྷ་མོ་བརྒྱད་ཀྱང་སྙིང་གའི་རྩ་བརྒྱད་དག་པར་གསུངས་ན། དག་པ་ཚར་གཉིས་ཡིན་ནམ་སྙམ་ན་མ་ཡིན་ཏེ། བུམ་པ་དང་ནུས་མ་ཐབས་ཤེས་སུ་སྦྱར་བའི་དག་པའོ།། སྙིང་ག་ཆོས་ཀྱི་འཁོར་ལོ་ཞེས་པ་ཆོས་ཀྱི་སྐུའི་དག་ པའོ། །རིག་མ་ཡུམ་བཞི་དང་སངས་རྒྱས་བཞི་པོ་སྟེ། བརྒྱད་ལ་ཕན་ཚུན་ཡབ་ཡུམ་གཉིས་གཉིས་ཀྱིས་ཕྱེ་བས་བཅུ་དྲུག་ནི་མགོ་བོ་སྟེ། སྨིན་མཚམས་སམ་སྤྱི་བོའི་འཁོར་ལོའི་རྩིབས་རྩ་འདབ་བཅུ་དྲུག་པ་རྣམ་པར་དག་པ་སྟེ། ལྷན་ཅིག་སྐྱེས་པ་ཞེས་པ་ནི་བདེ་བ་ཆེན་པོའི་འཁོར་ལོ་ཞེས་པ་དང་དོན་འདྲའོ། །བྱང་ཆུབ་སེམས་དཔའ་དྲུག་དང་སོགས་ཁོངས་ནས་རྡོ་རྗེ་མ་དྲུག་དང་ཁྲོ་བོ་བཞི་དེ་ལྟར་ལྷ་བཅུ་དྲུག་པོ་ལ་ཐབས་ཤེས་ཀྱི་དབྱེ་བས་ཉིས་འགྱུར་སུམ་ཅུ་རྩ་གཉིས་ནི། མགྲིན་པ་ལོངས་སྤྱོད་འཁོར་ལོའི་རྩ་འདབ་སོ་གཉིས་རྣམ་པར་དག་པའོ། །འཇིགས་མ་ལ་སོགས་པ་བརྒྱད་བརྒྱད་དྲུག་ཅུ་རེ་བཞིའི་རྣལ་འབྱོར་མ་རྣམས་ལྟེ་བ་སྤྲུལ་པའི་འཁོར་ལོའི་རྩ་འདབ་དྲུག་ཅུ་རྩ་བཞི་དག་པའོ། །ལག་པ་དང་རྐང་པའི་ཚིགས་ཆེན་བཅུ་གཉིས་པོ་རྣམས་ལ་ཡོད་པའི་ལས་ཀྱི་འཁོར་ལོ་འདབ་མ་ཉེར་བརྒྱད་པའི་རྩ་འཁོར་ལ་ལྟེ་བར་རྩ་ཕྱི་ནང་གཉིས་རེ་སྟེ་རྩ་སུམ་ཅུ་སུམ་ཅུ་ཡོད་པ་རྣམས་རྣམ་པར་དག་པ་སྟེ། ལྷ་ཆེན་བཅུ་གཉིས་འཁོར་བཅས་ཏེ། དགུ་བཅུ་ཐམ་པ་དུས་ཏེ་བཞིས་བསྒྱུར་བས་རྩ་སུམ་བརྒྱ་དྲུག་ཅུ་དག་པའོ། །ཀླུ་བརྒྱད་དང་གཏུམ་མོ་བརྒྱད་དེ་བཅུ་དྲུག་པོ་རྣམས་ཀྱི་ཡབ་ཡུམ་ལུས་བསམ་གྱིས་ཕྱེ་བ་སོ་གཉིས་པོ་རྣམས་བྱ་བའི་འཁོར་
ལོ་ཞེས་བྱ་བ་རྐང་ལག་གི་སོར་མོའི་ཚིགས་ཀྱི་རྩ་འཁོར་རྣམས་རྣམ་པར་དག་པ་སྟེ། ལག་སོར་གྱི་རྩ་འཁོར་སུམ་ཅུ་དང་རྐང་སོར་གྱི་རྩ་འཁོར་སུམ་ཅུ་སྟེ། སུམ་ཅུ་པོ་ཚན་རེ་དེ་དང་སྦྱོར་ཞེས་འབྱུང་ན། དོན་འདི་ལྟར་ཡིན་ཏེ། ལག་སོར་གྱི་འཁོར་ལོ་སུམ་ཅུ་པོ་རེ་རེ་དང་སྦྱར་ནས། ལྷ་ལྷག་མ་གཉིས་ལུས་པ་ན་རྐང་སོར་སྡེ་ཚན་གཉིས་སུ་བསྡོམས་ནས། རྐང་སོར་གཡས་ཀྱི་འཁོར་ལོ་བཅོ་ལྔ་པོ་གཅིག་དང༌། གཡོན་གྱི་བཅོ་ལྔ་པོ་གཅིག་ཏུ་བསྡོམས་ཏེ་ལྷ་རེ་རེ་དང་སྦྱོར་རོ། །འདི་ནི་ལག་སོར་ལ་གཙོ་བོར་སྦྱར་བ་ཡིན་ལ། རྐང་སོར་ལ་སྦྱོར་ན་དེ་ལས་གོ་ཟློག་སྟེ། རྐང་སོར་གྱི་འཁོར་ལོ་སུམ་ཅུ་ལ་རེ་རེ་དང་ལག་སོར་གྱི་འཁོར་ལོ་རྣམས་གཉིས་སུ་བསྡོམས་ཏེ་སྦྱར་རོ། །རྒྱུད་ཀྱི་དགོངས་དོན་རྒྱུད་དངོས་ཀྱི་ཚིག་གིས་མི་གསལ་བ་འགྲེལ་པར་གསུངས་པ་ནི། གཙུག་ཏོར་གྱི་འཁོར་ལོའི་རྩ་བཞི་ཆོས་ཀྱི་དུང་སོགས་རྡོ་རྗེ་བཞི་དང༌། ཙ་མུཎྜ་སོགས་མ་མོ་བརྒྱད་དང༌། སྒེག་སོགས་གཟུངས་མ་བརྒྱད་ཐབས་དང་བཅས་པ་སུམ་ཅུ་སོ་གཉིས་ཀྱིས་གསང་བའི་འཁོར་ལོའི་རྩ་སོ་གཉིས་རྣམ་པར་དག་པ་ཡིན་ ནོ། །དངོས་སུ་མ་གསུངས་ཀྱང་དོན་གྱིས་ཐོབ་པ་ནི། གཙོ་བོ་ཡབ་ཡུམ་གཉིས་ནི་རྩ་དེ་ཐམས་ཅད་ཀྱི་བྱེད་པ་པོ་རྩའི་གཙོ་བོ་དྲུག་རྣམ་པར་དག་པའོ། །ཞེས་སྦྱར་ན་མཆོག་ཏུ་ལེགས་སོ།། །།གསུམ་པ་དུས་ཀྱི་རྣམ་པར་དག་པ་ནི། གཙོ་བོ་ཡབ་ཡུམ་གཉིས་ཀྱི་སྐུའི་དག་པ་སྟེ། ལོ་དང་ཟླ་བ་ལ་སོགས་དབྱེ་བའི་དུས་ཀྱི་ཞེས་སོགས་ཏེ། དེ་ཡང་གཙོ་བོ་བཅོམ་ལྡན་འདས་ནི་དུས་སྤྱིའི་རྣམ་པར་དག་པ་སྟེ། ཕྱི་རོལ་ཏུ་དུས་ཀྱི་སྤྱི་ལོ་དང༌། དེའི་ནང་ཚན་ཆུ་སྲིན་ལ་སོགས་པ་ཁྱིམ་བཅུ་གཉིས་ཀྱི་ཟླ་བ་རྣམས་དང༌། ནང་དུ་ཡང་དུས་སྦྱོར་བཅུ་གཉིས་ཀྱི་
རླུང་རྣམ་པར་དག་པ་དང༌། ཐུན་མོང་དུ་རྟེན་འབྲེལ་ཡན་ལག་བཅུ་གཉིས་རྒྱུ་དང་འབྲས་བུས་བསྡུས་པ་འགགས་པ་ནི། དཔལ་དུས་ཀྱི་འཁོར་ལོའི་སྐུའོ། །དེ་ལས་རྒྱུས་བསྡུས་པ་ནི། མ་རིག་འདུ་བྱེད་སྲེད་ལེན་སྲིད་པ་སྟེ་ལྔ་པོ་རྣམས་ཡིན་ལ། རྣམ་ཤེས་མིང་གཟུགས་སྐྱེ་མཆེད་རེག་ཚོར་སྐྱེ་རྒ་སྟེ་བདུན་པོ་ནི་འབྲས་བུའི་ཆོས་སོ། །མ་རིག་སྲེད་ལེན་ཉོན་མོངས་ཀྱི་ཀུན་འབྱུང་དང༌། འདུ་སྲེད་གཉིས་ལས་ཀྱི་ཀུན་འབྱུང་དང༌། འབྲས་བུའི་ཆོས་བདུན་ནི་སྐྱེ་བའི་ཉོན་མོངས་ཏེ་སྡུག་བསྔལ་ལོ་ཞེས་འགྲེལ་ཆེན་ཉིད་ལས་གསུངས་ལ། དེ་དག་གི་རང་བཞིན་ཐུན་མོང་མ་ཡིན་པ་རྣམས་རྫོགས་རིམ་གྱི་སྐབས་སུ་བཤད་ཟིན་མོད། མདོ་དང་ཐུན་མོང་པ་ཡང་རྒྱུད་འདི་ལས་འབྱུང་སྟེ། བདག་མེད་ལས་ཀྱི་རྣམ་སྨིན་སྲིད་པ་གསུམ་དང་དུས་ཀྱི་འགྲོ་བ་ཡན་ལག་བཅུ་གཉིས་རྟེན་འབྲེལ་ལས། ཞེས་པའི་སྐབས་སུ་འབྱུང་བ་ཉིད་དེ་འདིར་རྒྱས་པར་མ་སྤྲོས་སོ། །གཞན་ཡང་ཕྱི་རོལ་ཏུ་ལོ་གཅིག་རྣམ་པར་དག་པས་སྐུ་ལུས་གཅིག །བགྲོད་པ་གཉིས་དག་པས་ཞབས་གཉིས། དུས་གསུམ་དག་པས་མགྲིན་པ་གསུམ། དུས་བཞི་དག་པས་ཞལ་བཞི། དུས་དྲུག་དག་པས་ཕྲག་པ་དྲུག །ཟླ་བ་བཅུ་གཉིས་དག་པས་དཔུང་པ་བཅུ་གཉིས། ཕྱོགས་ཉི་ཤུ་རྩ་བཞི་དག་པས་ཕྱག་ཉེར་བཞི། ཞག་སུམ་བརྒྱ་དྲུག་ཅུ་དག་པས་ཕྱག་གི་ཚིགས་སུམ་བརྒྱ་དྲུག་ཅུ་ཡིན་པར་བཤད་པ་རྣམས་ཀྱང་དུས་ཀྱི་དག་པ་ཉིད་དེ། དེ་ལྟར་ན་ཕྱི་ནང་གི་དུས་རྣམས་དབྱིངས་སུ་དག་པའི་ཡེ་ཤེས་ནི། དཔལ་ལྡན་རྡོ་རྗེ་ཅན་དུས་ཀྱི་འཁོར་ལོ་ཉིད་དོ། །དེའི་ནང་ནས་ཉིན་ཞག་སོ་སོ་རེ་རེ་བཞིན་གྱི་ནང་དུ་དུས་སྦྱོར་བཅུ་གཉིས་བཅུ་གཉིས་འཆར་བའི་རང་
བཞིན་རྣམ་པར་དག་པ་ནི་སྣ་ཚོགས་ཡུམ་ཡིན་ལ། དེ་ཡང་དོན་དམ་པ་ཆོས་ཉིད་ཀྱི་སེམས་ཀྱི་རྣམ་པ་ལས་རླུང་སྲོག་གི་མིང་ཅན་གདོད་ནས་ཡོངས་སུ་འགགས་པས་སྒྲིབ་བྲལ་མྱང་འདས་ཀྱི་སེམས་ཡིན་ལ། དེ་ནི་འཁོར་བའི་མཚན་ཉིད་སྲོག་སྟེ་ལས་རླུང་གི་རྟ་ལ་ཞོན་ནས་རྣམ་ཤེས་སྐྱེ་བ་ཉིན་མོ་དང༌། འགག་པ་མཚན་མོའི་མཚན་ཉིད་ཅན་གྱི་འཁོར་བའི་སེམས་སུ་གྱུར་པའི་རྣམ་ཤེས་ཀྱི་ཕུང་པོ་ནི་མ་ཡིན་ནོ། །ཞེས་གཙོ་བོ་ནི། དུས་གསུམ་འགྱུར་བ་མེད་ཅིང་བསམ་དུ་མེད་པའི་ཐུགས་ཀྱི་རྡོ་རྗེ་དང༌། གཙོ་མོ་ནི་སྐད་ཅིག་འགྱུར་བ་མེད་པའི་ཡེ་ཤེས་ཀྱི་ངོ་བོར་གསུངས་པ་ཡིན་ནོ། །འདིར་འགྱུར་གཞན་ལས་ཉི་མ་མ་ཡིན་ཞེས་འབྱུང་བ་ཡང༌། ཉིན་མཚན་ཞེས་པ་དང་དོན་གཅིག་སྟེ་ཞག་གི་དོན་ཡིན་པས་ཉི་མའི་ལྷའམ་དཀྱིལ་འཁོར་ཤིང་རྟ་ལ་ཞོན་པ་སོགས་ཀྱི་འདྲ་ཆོས་དང༌། འཁོར་བའི་སེམས་ཤེས་རབ་ཡིན་པས་ཉི་མར་འཇོག་ཅེས་ཟེར་བ་ཡང་མི་འཐད་དོ།། །།བཞི་པ་ཕུང་ཁམས་ལ་སོགས་པའི་དག་པ་ནི་འཁོར་གྱི་དག་པ་ཡིན་ཏེ། འདིར་རླུང་དང་རྡོ་རྗེ་བཞི་དང༌། ཕུང་ཁམས་དངོས་དང་ཡེ་ཤེས་དང་ཐུན་ཚོད་དང་བྱ་བྱེད་དང་ལུས་ཀྱི་ཆ་ཤས་འགའ་ཞིག་ལ་སྦྱར་བ་སོགས་སྣ་ཚོགས་ཞིག་ཡོད་ཀྱང་ཕུང་པོ་དང་ཁམས་ཀྱི་དག་པ་གཙོ་བོ་ཡིན་ལ། དེ་ཡང་རླུང་གི་དག་པས་སོགས་ཏེ་སྙིང་གའི་པདྨ་སྟེ་རྩ་འཁོར་གྱི་ཕྱོགས་མཚམས་བརྒྱད་དང༌། སྟེང་འོག་གི་རྩ་ཡང་སྙིང་ག་ལ་བརྟེན་པའི་ཕྱིར་དེ་ལ་གནས་པའི་རླུང་བཅུ་དག་པས་ལྷ་མོ་དུ་བ་མ་ལ་སོགས་པ་བཅུ་རྣམས་སོ། །དེ་ནི་རྩ་བཅུ་དང་རླུང་བཅུ་ནུས་མ་བཅུ་དང་བུམ་པ་བཅུ་ཐབས་ཤེས་སུ་སྦྱར་བའི་དག་པ་ཡིན་ལ། མཆོག་གི་ཆ་མ་དང་ཐིག་ལེ་མ་གཉིས། དངོས་སུ་གཙོ་མོ་ལ་འདུས་ཀྱང་ལྡོག་ཆའི་
སྒོ་ནས་དག་པ་སོ་སོར་བསྟན་ནོ།། འདོད་ཆགས་ཞེ་སྡང་གཏི་མུག་ང་རྒྱལ་ཏེ། ཉོན་མོངས་བཞི་པོ་རྣམ་པར་དག་པའི་རྒྱུ་མཚན་གྱིས་ཞབས་གཡོན་གྱི་འོག་ཏུ་དྲག་པོ་ཆུང་མར་བཅས་པ་དང༌། ཕུང་པོ་དང་ཉོན་མོངས་པ་དང༌། འཆི་བདག་དང༌། ལྷའི་བུ་སྟེ་བདུད་ཀྱི་ཚོགས་རྣམས་དག་པས་ཞབས་གཡས་ཀྱི་འོག་ཏུ་བདུད་ཀྱི་ལྷ་དགའ་མར་བཅས་པ་མནན་པའོ། །དེ་བཞིན་དུ་ཆོས་ཀྱི་དུང་སྐུ་རྡོ་རྗེ་དང༌། གཎྜི་གསུང་རྡོ་རྗེ་དང༌། ནོར་བུ་ཐུགས་རྡོ་རྗེ་དང༌། དཔག་བསམ་གྱི་ཤིང་ཡེ་ཤེས་རྡོ་རྗེ་རྣམས་སོ། །བུམ་པ་བརྒྱད་ནི། བདུད་རྩིའི་ཡན་ལག་སྟེ་ཆ་ཤས་རྐང་ཁྲག་གཅི་བ་བཤང་བ་རྣམས་འགགས་པ་ཞེས་པ། ཀུན་རྫོབ་ཀྱི་དེ་དང་དེ་དག་ཡལ་ཏེ་དོན་དམ་མམ་དངས་མའི་བདུད་རྩི་བཞིར་གྱུར་པའོ། །རྒྱལ་བའི་བུམ་པ་བྱང་སེམས་དཀར་པོ་དང༌། རྣམ་རྒྱལ་བུམ་པ་ནི་སོགས་ཀྱི་སྒྲས་རྡུལ་ཏེ་བདུད་རྩིའི་གཙོ་བོ་དེ་གཉིས་འཛག་མེད་དུ་བཅིངས་པའི་སྒོ་ནས་དངས་མར་གྱུར་པའི་ཡེ་ཤེས་སོ། །ཐ་མལ་གྱི་འདུ་བྱེད་གདོད་ནས་རྣམ་པར་དག་ཅིང༌། ལམ་གྱིས་གནས་གྱུར་པའང་ཡིན་ཏེ། དེ་འདྲ་བའི་རྣམ་དག་གནས་གྱུར་གཉིས་ཀ་བསྡོམས་པའི་ཡེ་ཤེས་དེ་ནི་སྒྲིབ་བྲལ་གྱི་འདུ་བྱེད་དང༌། འདུ་བྱེད་གཞན་དང༌། འདུ་བྱེད་ཆེན་པོ་ཞེས་བྱའོ། །དེས་མཚོན་ནས་ཕུང་ཁམས་དབང་ཡུལ་ལས་དབང་སོགས་མཐའ་དག་ལ་སྦྱོར་རོ།། དེ་ལྟ་བུའི་འདུ་བྱེད་ཆེན་པོ་ནི་དོན་ཡོད་གྲུབ་པ་དང༌། ཚོར་བ་ནི་དྲི་མེད་ནོར་བུའི་ཕྱག་ཅན་རིན་ཆེན་འབྱུང་ལྡན་དང༌། འདུ་ཤེས་ནི་སྣང་བ་མཐའ་ཡས་དང༌། གཟུགས་ཕུང་ནི་འཁོར་ལོ་ཅན་རྣམ་པར་སྣང་མཛད་དོ། །གཞན་ཡང་རྣམ་པར་དག་པའི་སྟོབས་ཏེ་ཤ་དང༌། རྣམ་པར་
དག་པའི་ཁྲག་དང༌། རྣམ་པར་དག་པའི་གཅི་བ་དང༌། རྣམ་པར་དག་པའི་བཤང་བ་རྣམས་ཀྱང་དོན་གྲུབ་སོགས་བཞི་པོ་དེ་ལ་རིམ་གྱིས་སྦྱོར་ལ། རྣམ་པར་དག་པའི་རི་བོང་ཅན་ཏེ་ཁུ་བ་ནི་མི་བསྐྱོད་ པའོ། །འདིར་དག་པ་རིམ་པ་གཉིས་བསྟན་པའི་ཕྱི་མ་འདི་བུམ་པའི་དག་པར་ཡང་ཅི་རིགས་པ་འདུས་མོད་ཀྱི། བདུད་རྩི་ལྔ་པོ་རྣམས་སངས་རྒྱས་ལྔའི་དམ་རྫས་སུ་གཏོགས་པའི་ཕྱིར་འཕྲོས་དོན་གྱི་ཚུལ་དུ་བཤད་པའོ། །ལྷ་མོ་སྟེ་ཡུམ་དྲུག་ནི་ཁམས་དྲུག་རྣམས་ཀྱིས་དག་པ་སྟེ། སྒྲིབ་བྲལ་གྱི་ཡེ་ཤེས་ཤེར་ཕྱིན་མ་དང༌། ནམ་མཁའི་རྡོ་རྗེ་དབྱིངས་ཕྱུག་མ་དང༌། རླུང་སྒྲོལ་མ་དང༌། མེ་གོས་དཀར་མོ་དང༌། ཆུ་མཱ་མ་ཀཱི་དང༌། སྒྲིབ་བྲལ་གྱིས་སངས་རྒྱས་སྤྱན་མའོ། །ཡུལ་ཅན་དབང་པོ་དྲུག་དག་པས་བྱང་ཆུབ་སེམས་དཔའ་དྲུག་དང༌། ཡུལ་འདོད་ཡོན་དྲུག་དག་པས་ཕྱག་རྒྱ་སེམས་མ་དྲུག་སྟེ་དོན་དམ་པའི་རྣ་བ་ཕྱག་ན་རྡོ་རྗེ། སྣ་ནམ་སྙིང༌། མིག་ས་སྙིང༌། ལྕེ་སྤྱན་རས་གཟིགས། ལུས་སྒྲིབ་སེལ། དོན་དམ་པའི་ཡིད་ཀུན་བཟང་ངོ༌། །ཆེན་པོའི་གཟུགས་ནི་གཟུགས་རྡོ་རྗེ་མ་ནས། སྒྲ་ནི་སྒྲ་རྡོ་རྗེ་མ། དྲི་ནི་དྲི་རྡོ་རྗེ་མ། རོ་ནི་རོ་རྡོ་རྗེ་མ། རེག་ནི་རེག་རྡོ་རྗེ་མ། ཆེན་པོའི་ཆོས་ཁམས་ནི་ཆོས་དབྱིངས་རྡོ་རྗེ་མའོ། །ཁྲོ་བོ་ལྔ་ནི་སྟོབས་ལྔ་སྟེ། ཤེས་རབ་ཀྱི་སྟོབས་གཙུག་ཏོར། ཏིང་འཛིན་ཤིན་ཏུ་སྟོབས། དྲན་པ་རྨུགས་བྱེད། བརྩོན་འགྲུས་ཁེངས་བྱེད། དད་པའི་སྟོབས་རེངས་བྱེད་དོ། །དབང་པོ་གཞན་ནི་ལས་དབང་སྟེ། གསང་བའི་དབང་པོ་གཞན་གནོད་མཛེས་དང༌། དག་གཞན་དབྱུག་སྔོན། ལག་པ་གཞན་ཊཀྐཱི་དང༌། རྐང་པ་གཞན་མི་གཡོ་བ། བཤང་ལམ་གཞན་སྟོབས་པོ་ཆེ་སྟེ། དེ་རྣམས་ཀྱི་བྱ་བ་ལྔ་ཡང་དྲག་སྤྱན་མ་ལ་སོགས་པའི་ཁྲོ་མོ་
རྣམས་སོ། །ཐུགས་དཀྱིལ་ཁོ་ན་དང་སྦྱོར་རྒྱུའི་ཕུང་ཁམས་སོ་དྲུག་གི་དབང་དུ་བྱས་ན། མཐར་བྱེད་བཞི་དང་གཙུག་ཏོར་ལས་དབང་ལ་སྦྱོར་ཡང༌། འདིར་སྐུ་གསུང་ཐུགས་ཡོངས་རྫོགས་ཀྱི་དབང་དུ་བྱས་ནས། ལས་དབང་རྣམས་དབྱུག་སྔོན་སོགས་ལྔ་ལ་སྦྱོར་ཞིང༌། གཞན་ཡང་ཐུགས་ཀྱི་ཁྲོ་བོ་རྣམས་སྟོབས་ལྔ་ལ་སྦྱར་བ་ནི། ཡེ་ཤེས་ཀྱི་དག་པའི་དབང་དུ་མཛད་ལ། སྔར་གྱི་ཕུང་ཁམས་དག་པའི་འཕྲོས་ལ་སྦྱོར་ཞིང་ལས་དབང་ལ་མི་སྦྱོར་ན། རྣམ་པར་ཤེས་པའི་ཁམས་ལྔ་ཡིན་ཏེ། དགུག་གཞུག་རྒྱས་བཏབ་ཀྱི་སྐབས་ལས་ཤེས་སོ། །དེའི་ཚེ་རྒྱུད་སྡེ་གཞན་གྱི་ལུགས་དང་མཐུན་པར་ཐུགས་དཀྱིལ་གྱི་ཁྲོ་བོ་ཡབ་ཡུམ་ལ་སྦྱང་བྱ་སོ་སོ་མི་སྦྱོར་བར་མངོན་ནོ། །རྣམ་གྲངས་གཞན་དུ་སྐུ་གསུང་ཐུགས་ཡོངས་རྫོགས་ལ་ཡང་ཐུགས་ཀྱི་ཁྲོ་བོ་དང༌། ལས་དབང་སྦྱོར་དགོས་པས་ན། དེའི་ཚེ་སྐུའི་ཁྲོ་བོ་ལས་དབང་གི་རྟེན་ཁོག་པ་མཐིལ་བཞི་སོགས་དང་སྦྱོར་བ་གོང་དུ་བཤད་པ་ཉིད་དོ། །ཙ་མུཎྜ་ལ་སོགས་པ་པདྨའི་ལྟེ་བ་ལ་བཞུགས་པའི་རྣལ་འབྱོར་མ་བརྒྱད་ནི། ཐུན་ཚོད་བརྒྱད་ཀྱི་རྣམ་དག་དང༌། ནང་དུ་ལྟེ་བའི་རྩ་ཆེན་བརྒྱད་ དོ། །འདབ་མ་ལ་གནས་པའི་འཇིགས་མ་ལ་སོགས་པ་དྲུག་ཅུ་རྩ་བཞི་ནི་ཉི་མའི་དུས་སྦྱོར་གྱི་ཆུ་ཚོད་ཏེ། དངོས་སུ་ན་ཞག་གཅིག་གི་ཆུ་ཚོད་དྲུག་ཅུ་དང༌། སྤྱི་ཁྱབ་ཏུ་གཏོང་རྒྱུའི་ཆུ་ཚོད་བཞི་སྟེ། ནང་དུ་ཡང་ཆུ་ཚོད་དེ་རྣམས་ཀྱི་རླུང་འབབ་པའི་ལྟེ་བའི་རྩ་འདབ་དྲུག་ཅུ་རྩ་བཞིའོ་ལྷ་མིན་སྲིན་པོ་ལ་སོགས་པ་སྟེ་ཟླ་བ་བཅུ་གཉིས་དག་པ་པདྨའི་དཀྱིལ་འཁོར་བཅུ་གཉིས་པོའི་ལྷ་ཆེན་བཅུ་གཉིས་ནི་ཟླ་བ་བཅུ་གཉིས་པོ་ཉིད་རྣམ་པར་དག་པ་དང༌། འཁོར་ལྷ་མོ་རྣམས་ཀྱི་སྟེང་དུ་གཟུགས་མ་བཅུ་གཉིས་བསྣན་པ་སུམ་བརྒྱ་
དྲུག་ཅུ་ནི། ཕྱི་རོལ་ཏུ་ལོ་གཅིག་ལ་ཞག་སུམ་བརྒྱ་དྲུག་ཅུ་འབྱུང་བ་དང༌། ནང་དུ་ཆུ་ཚོད་གཅིག་ལ་དབུགས་སུམ་བརྒྱ་དྲུག་ཅུ་འབྱུང་བ་དག་སྟེ་ཞག་དང་ཟླ་བའི་དག་པ་སོ་སོར་བྱས་པའོ། །ཡང་ན་ལྟེ་བའི་ཡབ་ཡུམ་རྣམས་སོ་སོ་ཐད་ཀར་གཉིས་མེད་དུ་བགྲངས་པའམ། ཡུམ་རྣམས་མ་བགྲངས་པར་ཡབ་རྣམས་ཞག་གི་གྲངས་སུ་བཅུག གཟུངས་མ་བཅུ་གཉིས་བསྣན་པའང་ཡིན་ཏེ། ཚེས་ལྷ་ཉིད་ཀྱི་ཕྱིར་ཟླ་བ་ཤུགས་ལ་གྲུབ་པས་ཟླ་བའི་རྣམ་གཞག་ལོགས་སུ་མ་བྱས་པའོ། །གསང་བའི་འཁོར་ལོ་མི་བདག་སྟེ་བཅུ་དྲུག་ཉིས་འགྱུར་གྱི་རྩ་ལ་སྟོང་པ་གཉིས་ཐེ་བའི་ཉིན་གང་མཚན་གང་གི་ཆུ་ཚོད་སུམ་ཅུ་རྩ་གཉིས་འབབ་པ་རྣམ་པར་དག་པ་ཀླུ་དང་རབ་གཏུམ་མ་ཐབས་ཤེས་ཀྱིས་ཕྱེ་བ་སུམ་ཅུ་རྩ་གཉིས་རྣམས་སོ། །དེ་བཞིན་དུ་འདོད་མ་སོ་དྲུག་དང་ཕྱིར་འདོད་མ་སོ་དྲུག་རྣམས་ཀྱང་ལུས་ཀྱི་བྱ་བ་རྣམ་པ་སྣ་ཚོགས་པ་དག་རྣམ་པར་དག་པ་སྟེ། སྐྲ་ཉི་ཁྲི་ཆིག་སྟོང་རྣམས་ཀྱིས་གྲུབ་པ་ཉི་ཁྲི་ཆིག་སྟོང་དང༌། བ་སྤུ་བྱེ་བ་ཕྲག་ཕྱེད་དང་བཞི་རྣམས་ཀྱིས་འབྱུང་པོ་བྱེ་བ་ཕྲག་ཕྱེད་དང་བཞི། དུར་ཁྲོད་ཀྱི་ས་གཞི་ལ་གནས་པ་རྣམས་རྣམ་པར་དག་པའོ།། །།ལྔ་པ་མཚན་མའི་རྣམ་དག་ནི། དེ་ཉིད་ཉེར་བཞི་རྣམ་པར་དག་པས་གཙོ་བོའི་མཚོན་བྱ་ཉེར་བཞི། ཁམས་རྣམས་ཀྱི་ཡོན་ཏན་དྲི་སོགས་ཡུལ་དྲུག་པོ་རྣམས་རྣམ་པར་དག་པས་གཙོ་བོའི་སྐུ་ལ་ཕྱིའི་ཕྱག་རྒྱ་དྲུག་སྟེ། འཁོར་ལོ་རྣ་ཆ་མགུལ་རྒྱན་ལ་སོགས་པའོ། །དེ་ཉིད་ཉེར་བཞི་ནི་རང་བཞིན་ཁོ་ན་ཡིན་པ་ནམ་མཁའི་ཁམས་ཏེ་གཅིག རང་བཞིན་དང་རྣམ་འགྱུར་གཉིས་ཀ་ཡིན་པ་ས་ཆུ་མེ་རླུང་ཡིད་བློ་ང་རྒྱལ་ཏེ་བདུན། རྣམ་འགྱུར་ཁོ་ན་ཡིན་པ་དབང་ལྔ་ཡུལ་ལྔ་ལས་དབང་ལྔ་མཆོག་གི་
དབང་པོ་སྟེ་བཅུ་དྲུག་ཀུན་བསྡོམས་པས་ཉེར་བཞིའོ། །སྐབས་འདིར་རྒྱ་བོད་འགའ་ཞིག་འདི་སྐད་ཅེས་འཆད་དེ། མཁའ་རྡོ་རྗེ། ས་འཁོར་ལོ། ཆུ་པདྨ། མེ་ནོར་བུ། རླུང་རལ་གྲི རྣ་བ་ཌཱ་མ་རུ། སྣ་དགྲ་སྟ། མིག་མདའ། ལྕེ་མདུང༌། ལུས་ཕུབ། སྒྲ་རྩེ་གསུམ། རེག་བྱ་ཐོ་བ། རོ་ལྕགས་ཀྱུ། གཟུགས་ཞགས་པ། དྲི་དབྱུག་པ། མཆོག་གི་དབང་པོ་གྲི་གུགདྲི་ཆུའི་དབང་པོ་དྲིལ་བུ། ངག་ཁ་ཊྭཾ་ ག །ལག་པ་ཚངས་མགོ །རྐང་པ་ནི་ཐབས་ཀྱི་དབང་གིས་ཨུཏྤལ་ཡིན་ཡང༌། འདིར་ཤེས་རབ་ཀྱི་དབང་གིས་དུང་ཡིན་ནོ་ཞེས་དང༌། ཡིད་བློ་ང་རྒྱལ་གསུམ་ནི་གསལ་ཁ་མེད་ཀྱང་མེ་ལོང་ལྕགས་སྒྲོག་ཐོད་པ་གསུམ་དང་སྦྱོར་བ་དོན་གྱིས་ཐོབ། ཅེས་བཞེད་དེ་ལེགས་པར་ཡང་སེམས་ལ། ཡང་གྲངས་མཚུངས་ཀྱི་དག་པ་ཙམ་དུ་སྦྱར་ཡང་འགལ་བ་མེད་དོ། །སྐུ་གསུང་ཐུགས་ཡེ་ཤེས་རྡོ་རྗེ་བཞི་རྣམ་པར་དག་པས་ནང་གི་ཕྱག་རྒྱ་ཡིན་ཏེ། རྡོ་རྗེ་འཛིན་པ་དཀྱིལ་འཁོར་གྱི་གཙོ་བོའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཡང་དག་པར་གནས་པ་དེའོ། །ནང་གི་ཕྱག་རྒྱ་ནི་སྐུ་ལ་བཀོད་པའི་ཕྱག་རྒྱ་བཞི་སྟེ། རྒྱུད་འགྲེལ་ལས། འདི་སྐད་ཅེས་གསུངས་ཏེ། འདིར་རྒྱུད་ཐམས་ཅད་ལས་ཕྱི་རོལ་ཏུ་དྲང་པའི་དོན་གྱིས་དཔྲལ་བར་སྐུའི་ཕྱག་རྒྱ་དང༌། མགྲིན་པར་གསུང་གི་ཕྱག་རྒྱ་དང༌། སྙིང་གར་ཐུགས་ཀྱི་ཕྱག་རྒྱའོ། །ཞེས་གསལ་བར་གསུངས་པས། ལྟེ་བར་ཡེ་ཤེས་ཀྱི་ཕྱག་རྒྱ་ཤུགས་ལ་འགྲུབ་སྟེ། འོན་ཀྱང་འདིར་དེ་གསལ་བར་མི་སྟོན་པ་ནི། རྒྱུད་ཐམས་ཅད་ལས་ཞེས་པའི་ཚིག་དང་འབྱོར་དགོས་པ་ལ། ཕྱི་མ་འདི་ཟབ་མོའི་རྒྱུད་འགའ་ཞིག་མ་གཏོགས་གཞན་ལས་མི་གསལ་བར་དགོངས་པའོ། །དེའི་དོན་ནི། རྒྱུད་རྣམས་
ལས་བསྐྱེད་རིམ་གྱི་སྐབས་གནས་གསུམ་བྱིན་རླབས་གསུངས། དེ་ཡང་སྔགས་ཀྱི་ལྷ་གང་ཅི་ཡང་རུང་བ་དེ་ཐམས་ཅད་སྐུ་དང་གསུང་དང་ཐུགས་རྡོ་རྗེ་གསུམ་མཉམ་པ་ཉིད་ཀྱིས་རྒྱས་བཏབ་པའི་དོན་གོ་བར་བྱ་བའི་ཕྱིར་ཡིན་ལ། སྤྱི་བོ་མགྲིན་པ་སྙིང་གའི་རྩ་ཐིག་རླུང་གསུམ་གཞི་ལམ་འབྲས་གསུམ་གང་གི་སྐབས་སུ་ཡང་སྐུ་གསུང་ཐུགས་ཀྱི་སྣང་བ་སྤྲོ་བའི་གནས་ཡིན་པས། དེ་དག་བྱིན་གྱིས་རློབ་པ་ཡིན་ལ། ཕྱག་རྒྱ་གསུམ་པོ་དེ་དག་ངེས་པའི་དོན་དུ་ནི། རྡོ་རྗེ་སླང་བ་དང༌། རྡོ་རྗེ་མེ་དང༌། རྡོ་རྗེ་མི་ལྟུང་བ་སྟེ། དགེ་བའི་བརྟུལ་ཞུགས་གསུམ་གྱི་ཡེ་ཤེས་རྣལ་འབྱོར་གསུམ་ལ་དགོངས། དེའི་ཕྱི་མ་ལ་ཡང་འཕོ་མེད་དང༌། རྣམ་པ་ཐམས་ཅད་པའི་ཆ་གཉིས་ཡོད་དེ། ཐུགས་དང་ཡེ་ཤེས་རྡོ་རྗེའི་ཕྱག་རྒྱའོ། །དེ་ལྟར་ནང་གི་ཕྱག་རྒྱ་བཞི་པོ་དེ་རྣམས་གཅིག་ཏུ་འདུས་པ་ནི། གཙོ་བོའི་ཐུགས་ཀར་ཟླ་བ་ལ་གནས་པའི་ཡི་གེས་མཚོན་ལ། ཡི་གེ་ཡང་ཧཾ་ངམ་ཧཱུཾ་སྟེ་ཁྱབ་བྱེད་ཡེ་ཤེས་རྡོ་རྗེ་རྡོ་རྗེ་སེམས་དཔའི་དབང་དུ་བྱས་ན་ཧཾ་ཡིག་དང༌། ཁྱབ་བྱེད་ཐུགས་རྡོ་རྗེ་དུས་འཁོར་ཉིད་ཀྱི་དབང་དུ་བྱས་ན་ཧཱུཾ་ཡིག་གོ །དེ་ལ་ཧཾ་ཡིག་ནི་གོང་དུ་བཤད་པ་ལྟར་ཟླ་བ་སྐུ། ཉི་མ་གསུང༌། གཞོམ་མེད་ཐུགས། སྲོག་ཡེ་ཤེས་ཏེ་ཧཱུཾ་ལའང་དེས་རིགས་འགྲེའོ། །གཞན་ཡང་དཔལ་ལྡན་རྡོ་རྗེ་ཅན་གཙོ་བོ་དུས་ཀྱི་འཁོར་ལོ་ནི། འགྱུར་བ་མེད་པའི་བདེ་བ་ཆེན་པོ་ཡིན་ལ། སྣ་ཚོགས་ཡུམ་ནི་སྲིད་པ་རྣམ་པ་གསུམ་ན་གནས་པ་མཐའ་དག་གཟིགས་པའི་སྟོང་ཉིད་ཀྱི་ཡེ་ཤེས་རྣམ་པར་དག་པ་སྟེ། དེ་གཉིས་ངོ་བོ་དབྱེར་མེད་པ་ནི། ཁ་སྦྱོར་གྱི་སྐུས་མཚོན་ནོ། །དེ་ཡང་དབྱིབས་སྤངས་པ་དང་བཏགས་པའི་སྒྲིབ་པ་ཟད་པ་ཞེས་འབྱུང་སྟེ།
དབྱིབས་ནི་རྡུལ་གྱི་ཆོས་དང་བཏགས་པ་ནི་བློ་རྣམ་རྟོག་གིས་བསྐྱེད་པ་སྟེ། ལུས་ཐོགས་བཅས་དང༌། སེམས་རྟོག་བཅས་ཤིན་ཏུ་སྤངས་པའི་དོན་ནོ། །དེའི་འཕྲོས་དོན་སྐུ་བཞིའི་རྒྱུ་འབྲས་ཀྱི་དག་པ་ནི། དཔལ་ལྡན་དག་པ་ལས་ནི་ཆོས་སྐུར་འགྱུར་ཏེ་ཆོས་ལས་ངེས་པར་ལོངས་སྤྱོད་རྫོགས་སྐུ་བཟང་པོའོ། །ལོངས་སྤྱོད་ལས་ནི་སྤྲུལ་པའི་སྐུ་རུ་འགྱུར་ཏེ་རྒྱལ་བའི་བདག་པོའི་སེམས་ཅན་ཀུན་དོན་བྱེད་པའོ། །བཞི་པའི་གནས་སྐབས་ཤིན་ཏུ་གཉིད་ལོག་ངེས་པར་སླར་ཡང་གཞན་དང་ལུས་ཀྱི་དབྱེ་བས་སད་པ་སྟེ། །དེ་ལྟར་ལུས་ཀྱི་རབ་ཏུ་དབྱེ་བས་སྲོག་ཆགས་རྣམས་ཀྱི་ལུས་ལ་ཡིད་ནི་རྣམ་པ་བཞི་རུ་གནས། །སྤྲུལ་པར་ཡིད་ནི་ལོངས་སྤྱོད་བྱེད་པ་པོ་རུ་རབ་ཏུ་འགྱུར་ཏེ་ལུས་དང་ངག་གི་དབང་པོས་སོ། །ལོངས་སྤྱོད་རྫོགས་ལ་མ་མཐོང་སེམས་དཔར་འགྱུར་ཏེ་ཡོན་ཏན་དབང་གིས་ཆོས་ཀྱི་སྐུ་ལ་ཉིད་ཀྱང་ངོ༌། །དག་པ་ལ་ནི་བདེ་བར་རབ་འགྱུར་འདི་ནི་ཉིན་མཚན་དུས་སུ་ཐིག་ལེ་གྲོལ་བ་གསུམ་གྱི་མཐར། །དེ་ཕྱིར་དེ་ནི་ཉིན་མཚན་དུས་སུ་རྣལ་འབྱོར་པ་ཡིས་བསྒོམ་པར་བྱ་སྟེ་འགྱུར་མེད་དོན་དུའོ། །ཞེས་གསུངས་ཏེ། དེ་ཡང་འཁོར་བ་པ་རྣམས་ཀྱི་མ་རིག་པའི་བག་ཆགས་ལས་གནས་སྐབས་བཞིར་འགྱུར་ཞིང༌། ཀུན་རྫོབ་ཏུ་མངལ་སྐྱེས་རྣམས་དྲི་ཟ་ཉེ་བར་འཇུག་པ་ན། ཕ་དང་མའི་དཀར་དམར་འཕོ་བའི་བདེ་བ་དྲི་ཟས་ཉམས་སུ་མྱོང་སྟེ། དེ་མ་ཐག་བར་དོའི་ལུས་འགགས་ཀྱང་སྔར་གྱི་རྒྱུན་ལས་སེམས་འགྱུར་བ་དེས་བྱིན་གྱིས་བརླབས་ཏེ་གནས་པ་ནི། དཔལ་ལྡན་དག་པ་ལྷན་ཅིག་སྐྱེས་པའི་སྐུའི་དག་བྱ་ཡིན་ལ། དག་པའི་སྐུ་དེ་ལས་ནི་ཟླ་བ་དྲུག་ཏུ་ཀུན་རྫོབ་འཁོར་བའི་ཆོས་སྐུ་ཤིན་ཏུ་གཉིད་ལོག་པ་སྟེ། དྲན་མེད་དུ་བརྒྱལ་
བ་ལྟ་བུའི་གནས་སྐབས་སུ་འགྱུར་ལ། ཆོས་སྐུ་དེ་ལས་ཀུན་རྫོབ་ཀྱི་ལོངས་སྤྱོད་རྫོགས་པའི་སྐུ་དབང་པོ་དང་ཡུལ་གྱི་རང་བཞིན་སྐྱེ་མཆེད་རྣམས་འབྱུང་སྟེ། རྨི་ལམ་གྱི་གནས་སྐབས་ཀྱི་མཚན་ཉིད་ཅེས་བྱ་བ་གསལ་སྣང་དང་བཅས་པ་འབྱུང་ངོ༌། །ལོངས་སྤྱོད་རྫོགས་སྐུ་དེ་ལས་ནི། སོར་མོ་ལ་སོགས་པ་རྫོགས་ནས་ཕྱིར་འབྱུང་བའི་བར་གྱི་ཀུན་རྫོབ་ཀྱི་སྤྲུལ་པའི་སྐུ་སད་པའི་མཚན་ཉིད་ཅན་དེ་འབྱུང་ངོ༌། །དེ་བཞིན་དུ་མངལ་ནས་བཙས་ནས་སྲོག་གི་རླུང་འབྱུང་བའི་དུས་དག་པའི་སྐུ་དང༌། དེ་ནས་སོ་སྐྱེས་ཀྱི་བར་ཆོས་སྐུ་དང༌། དེ་ནས་སོ་བརྗེ་བའི་བར་ལོངས་སྐུ་དང༌། དེ་ནས་མ་ཤི་བར་སྤྲུལ་སྐུའི་དག་པའོ། །བཞི་པའི་གནས་སྐབས་དང་ཤིན་ཏུ་གཉིད་ལོག་པ་སྟེ་གཉིད་འཐུག་པོའི་གནས་སྐབས་དང་དེ་གཉིས་ལས་གཞན་པ་རྨི་ལམ་གྱི་གནས་སྐབས་དང༌། ལུས་བྱ་བྱེད་བྱེད་པའི་སྒོ་ནས་རབ་ཏུ་དབྱེ་བས་ཕྱེ་བ་སྟེ། རྒྱུ་མཚན་དེའི་སྒོ་ནས་བཞག་པའི་སད་པའི་གནས་སྐབས་སོ། །དེ་ལྟར་ན་གནས་སྐབས་བཞི་དང་འབྲེལ་བའི་ལུས་ཀྱི་ཁྱད་པར་གྱིས་རབ་ཏུ་དབྱེ་བས། སྲོག་ཆགས་རྣམས་ཀྱི་ལུས་ལ་ཡིད་སེམས་ཀྱི་གནས་སྐབས་རྣམ་པ་བཞི་རུ་འགྱུར་ཏེ། གནས་སྐབས་བཞི་ཉིད་དང༌། གནས་སྐབས་བཞིའི་དྲི་མ་དང༌། གནས་སྐབས་བཞིའི་སེམས་ཞེས་བརྗོད་ཀྱང༌། ཀུན་རྫོབ་རྣམ་ཤེས་ཀྱི་སེམས་ཁོ་རང་གི་རང་ངོས་ནས་མི་འདྲ་བ་མེད་ལ། ལུས་དང་འབྲེལ་བའི་ཆོས་ཀྱི་སྒོ་ནས་ཐིག་ལེ་འཕོ་བ་དང༌། ཡུལ་གྱི་འཇུག་པ་འགགས་པ་དང༌། སེམས་ཀྱི་སྣང་བའི་འདོད་ཡོན་ལ་ལོངས་སྤྱོད་པ་དང༌། རགས་པའི་བྱ་བྱེད་ཅན་གྱི་དབྱེ་བ་སྟེ་བཞི་བྱུང་བས། དེ་དག་དངོས་ཀྱི་གནས་སྐབས་སོ་སོའི་རྣམ་འགྱུར་མི་འདྲ་བ་དང་དེ་དག་གིས་བཞག་པའི་
བག་ཆགས་བཞི་པོ་མཚན་ཉིད་ཀྱི་དབྱེ་བ་སོ་སོ་དང་བཅས་ཏེ་སེམས་ལ་རྟག་ཏུ་གནས་པའོ། །དེ་ཡང་འཁོར་བ་པ་རྣམས་ཀྱི་སྤྲུལ་སྐུ་སྟེ་སད་པའི་གནས་སྐབས་སུ་ཡིད་ནི་ཡུལ་རགས་པ་རྣམས་ལ་ལོངས་སྤྱོད་བྱེད་པ་པོར་འགྱུར་ཏེ། ཡིད་ཀྱི་གཡོ་བ་ལ་བརྟེན་ནས་ལུས་ཀྱི་འགྲོ་འོང་དང༌། ངག་གི་གཏམ་སྨྲ་བ་སོགས་བྱེད་དོ། །ལོངས་སྤྱོད་རྫོགས་པའི་མིང་ཅན་རྨི་ལམ་དུ་དབང་པོ་གཟུགས་ཅན་གྱི་ཤེས་པ་རྣམས་ཀྱིས་མ་མཐོང་བའི་ཡུལ་ཡིད་འཁྲུལ་བའི་གསལ་སྣང་ལ་སེམས་པར་འགྱུར་ཞིང༌། འཁོར་བའི་ཆོས་སྐུ་ལ་ནི་རགས་སྣང་དང་རྨི་ལམ་གྱི་སྣང་བ་གཉིས་ཀ་དང་བྲལ་བའི་གཉིད་འཐུག་པོ་ཡུལ་སྣང་མེད་པའི་ཚུལ་གྱིས་འཇུག་གོ །དག་པའི་སྐུའི་མིང་ཅན་བཞི་པའི་གནས་སྐབས་ལ་ནི། ཐིག་ལེ་འཕོ་བའི་བདེ་བར་འགྱུར་ཏེ། ཉིན་མཚན་ལ་སོགས་པའི་དུས་གང་ཡང་རུང་བར་ལུས་ངག་ཡིད་ཀྱི་ཐིག་ལེ་གྲོལ་བ་ཞེས་པས་ཕྱིར་འཕོ་བའི་མཐར་དཔེའི་ལྷན་ཅིག་སྐྱེས་དགའ་འཛག་བདེའི་མཚན་ཉིད་ཅན་མྱོང་བར་འགྱུར་ཏེ། དེ་ཡང་སྔོན་དུ་བཞི་པ་འཕོ་བའི་བདེ་བ་ལས་བརྒྱལ་བའི་གཉིད་འཐུག་དང༌། དེ་ལས་རྨི་ལམ་དང་དེ་ལས་སད་པར་འགྱུར་ཞིང༌། སླར་ཡང་སད་པ་ལས་འཕོ་བའི་བདེ་བར་འགྱུར་བ་སོགས་རྩ་བ་ཐིག་ལེ་འགྱུར་བ་ལས་སྒྲིབ་པ་དེ་རྣམས་ཐམས་ཅད་བྱུང་བའི་ཕྱིར། ཐིག་ལེ་འགྱུར་མེད་ཀྱི་དོན་དུ་ཉིན་མཚན་རྟག་ཏུ་རྡོ་རྗེའི་རྣལ་འབྱོར་བསྒོམ་པར་བྱའོ། །ཞེས་པ་སྟེ་འདི་ནི་གོང་དུ་རྡོ་རྗེ་ནང་གི་ཕྱག་རྒྱ་ཞེས་སོགས་ཀྱི་རྒྱས་བཤད་མཐའ་ཆོད་ཡིན་ཏེ། གཙོ་བོ་དཔལ་ལྡན་དུས་ཀྱི་འཁོར་ལོ་ཡབ་ཡུམ་ཉིད་རྡོ་རྗེ་བཞི་རོ་མཉམ་པའི་བདག་ཉིད་ཡིན་ལ། རྡོ་རྗེ་བཞི་ཡང་སྐུ་བཞིའི་རང་བཞིན་ནོ། །འཁོར་བར་
སྐུ་བཞིའམ་རྡོ་རྗེ་བཞི་པོ་དེ་རྣམས་ཤིན་ཏུ་རྣམ་པར་དག་པའི་གདོད་མའི་ཡེ་ཤེས་སྐུ་བཞི་པོ་ནི། བཅོམ་ལྡན་འདས་ཉིད་ཡིན་ལ། གདོད་མའི་སྐུ་བཞི་དེ་འཁོར་བ་གནས་སྐབས་བཞི་ལ་ཁྱབ་པའི་ཚུལ་གྱིས་ཆོས་ཉིད་དུ་སོང་ལ། དེའི་ཕྱིར་གནས་སྐབས་བཞིའི་འཁྲུལ་པ་སོ་སོ་ལ། མངལ་སྐྱེས་རྣམས་ཀྱིས་གཙོ་བོར་སྤྱོད་པའི་དུས་མངལ་གྱི་གནས་སྐབས་བཞི་དང༌། བཙས་ཟིན་པའི་གནས་སྐབས་བཞི་པོ་དེ་དག་ཏུ་དུས་ཀྱི་འཁོར་ལོའི་སྐུའམ་རྡོ་རྗེ་བཞི་པོ་དེ་དག་གིས་སོ་སོར་སེམས་ཅན་རྣམས་ལ་སྐལ་བ་དང་འཚམ་པར་ཕན་པ་དང་བདེ་བའི་དོན་མཛད་དེ། རྒྱལ་བའི་བདག་པོས་སེམས་ཅན་ཀུན་དོན་བྱེད་པའོ། ཞེས་པའི་དོན་ནོ། །གཞན་ཡང་སྐུ་ཡབ་ཡུམ་མཉམ་སྦྱོར་གྱི་རྣམ་པས་བཞི་པའི་གནས་སྐབས་སྤོང་ཞིང༌། ལྷན་སྐྱེས་ཀྱི་སྐུ་དང་ཡེ་ཤེས་རྡོ་རྗེ་མཚོན། སྟོང་པས་རྒྱས་བཏབ་པས་གཉིད་འཐུག་པོ་འགོག་ཅིང་ཆོས་སྐུ་དང་ཐུགས་རྡོ་རྗེ་མངོན་དུ་བྱེད། ལྷ་སྐུ་འབྱུང་ལུས་སྤངས་པའི་འཇའ་ཚོན་ལྟ་བུར་ཤར་བས་རྨི་ལམ་སྦྱོང་ཞིང༌། ལོངས་སྐུ་དང་གསུང་རྡོ་རྗེ་མཚོན། འོད་ཟེར་སྤྲོ་བསྡུ་རྒྱན་ཆ་ལུགས། སྐུའི་རྣམ་འགྱུར། གསུང་གི་བརྗོད་པ། ཐུགས་ཁྲོ་ཆགས་ཀྱི་རྣམ་པ་སོགས་ཀྱིས་ནི་སད་པ་སྦྱོང་ཞིང༌། སྤྲུལ་སྐུ་དང་སྐུ་རྡོ་རྗེ་མཚོན་པས་ན། བཅོམ་ལྡན་འདས་དུས་ཀྱི་འཁོར་ལོ་ཡབ་ཡུམ་ལ་གཙོ་བོར་སྦྱོར་དགོས་པར་མ་ཟད། ཁ་སྦྱོར་གྱི་སྐུ་ཅན་གཞན་ཐམས་ཅད་ལ་དངོས་སུ་འབྱོར་ཞིང༌། འདབ་མའི་ལྷ་མོ་རྣམས་ཀྱང་ཁ་སྦྱོར་ལྷའི་རིགས་སུ་གནས་པ་ཡིན་ཏེ་རེ་མོས་ཀྱི་འཁོར་པར་འགྱུར་བ་དང༌། ལྟ་རྒོད་ལ་སོགས་པ་རྗེས་ཆགས་ཀྱི་སྤྱོད་པ་གཞན་དང་ལྡན་པའི་ཕྱིར། དཀྱིལ་འཁོར་གྱི་ལྷ་ཐམས་ཅད་ལ་འབྱོར་རོ། །
དེ་ལྟར་ན་དེ་ལྟ་བུའི་སྐུ་བཞི་རྡོ་རྗེ་བཞི་གཅིག་ཏུ་འདུས་པར་མཚོན་པ་ནི་ཐུགས་ཀའི་ས་བོན་ནོ་ཞེས་པའི་དོན་ཏེ། རྒྱུད་ཚིག་གནས་སྐབས་སོ་སོ་ན་ཡོད་ཀྱང༌། གོང་འོག་གི་ཚིག་དོན་བསྒྲིགས་ཏེ་གོ་བར་བྱའོ། །དོན་གྱི་སྙིང་པོ་བསྒྲིལ་ཏེ་འདི་ལྟར་མ་གོ་ན། རྣམ་བཤད་མང་པོ་ཞིག་ལྟར་འབྲུ་ཡམ་མེ་བའི་ཚིག་རྐྱང་བྲིས་བཤུས་ཡང་ཡང་འཕར་བ་ལ་དགོས་པ་མེད་དོ།། །།དྲུག་པ་བཞུགས་སྟངས་ཀྱི་རྣམ་དག་ནི། གཡོན་དུ ་སྲོག་ནི་རབ་ཏུ་རྒྱུ་བར་འགྱུར་བ་དེ་བཞིན་ དུ་ནི་གཡས་པ་བསྐུམ་པ་གང་ཡིན་པ། དེ་ནི་གཡོན ་བརྐྱང་སྟབས་ཏེ་མཉམ་པའི་སྟབས་དང་གཞན་པ་གཡས་བརྐྱང་མེ་དང་ཉི་མའི་རྒྱུ་བ་ལས། ས་ག་དང་ནི་ཟླུམ་པོ་ཉིད་དང་མཆོག་གི་རོལ་པའི་སྟབས་དང་པདྨ་དང་ནི་རྡོ་རྗེའི་གདན། །མཉམ་དང་མི་མཉམ་བགྲོད་པ་དག་ལ་ནམ་མཁའ་ལ་སོགས་རབ་ཏུ་རྒྱུ་བའི་སྲོག་རླུང་རྣམ་པ་ལྔ། །ཞེས་གསུངས་ཏེ། སེམས་ཅན་འཁོར་བ་པ་རྣམས་ལ་ཕལ་ཆེར་གཡོན་གྱི་རྩ་ལ་སྲོག་སྟེ་རླུང་རྒྱུ་བ་བརྐྱང་བ་ལྟ་བུར་གནས་པའི་ཚེ། གཡས་ཀྱི་ཆ་ལ་མི་རྒྱུ་བ་བསྐུམ་པ་ལྟ་བུར་གནས་པས་དེ་སྦྱོང་བྱེད་ཞབས་གཡས་བསྐུམ་གཡོན་བརྐྱང་རྣམས་སོ། །དེ་ལས་གཞན་པ་སྟེ་གོ་ཟློག་པ་རྩ་གཡོན་ལ་རྒྱུ་ཞིང་གཡས་ལ་མི་རྒྱུ་བ་ནི། ཞབས་གཡས་བརྐྱང་རྣམས་ཀྱི་དག་པར་འགྱུར་རོ། །དེ་བཞིན་མཉམ་རྒྱུ་དབུ་མར་འབབ་པ་གང་ཡིན་པ་དེ་དག་རྣམ་པར་དག་པ་ནི་མཉམ་པའི་ཞབས་སྟབས་ཀྱིས་རྣམ་པར་དག་པའོ། །མེ་ཞེས་པ་དུས་མེ་སྟེ་དབུ་མར་མཉམ་རྒྱུ་དང༌། ཉི་མའི་རྒྱུ་བ་ནི་གཡས་རོ་མ་ལ་འབབ་པ་ཡིན་པས་ཟླ་སྟོབས་ཀྱིས་གོ་བ་ལ་གཡོན་ནས་རྒྱུ་བ་རི་བོང་ཅན་ནོ། །ས་གའི་སྟབས་ནི་ནམ་མཁའི་དཀྱིལ་འཁོར་ལ་སྲོག་གི་
རྒྱུ་བ་དག་པ་དང༌། ཟླུམ་པོའི་སྟབས་རླུང་དང་རོལ་པའི་སྟབས་མེ་དང༌། པདྨའི་སྐྱིལ་ཀྲུང་ཆུ་དང༌། རྡོ་རྗེའི་སྐྱིལ་ཀྲུང་སའི་དཀྱིལ་འཁོར་ལ་སྲོག་རྒྱུ་བ་རྣམ་པར་དག་པའོ། །མཉམ་དང་མི་མཉམ་བགྲོད་པ་དག་ལ་ཞེས་པའི་དོན། མཉམ་པ་ནི་རྩ་གཡས་ལ་གླང་ལ་སོགས་པ་དུས་སྦྱོར་ཁ་འཆམ་དྲུག་དང༌། མི་མཉམ་པ་ནི་རྩ་གཡོན་ལ་ལུག་ལ་སོགས་པའི་དུས་སྦྱོར་ཁ་ཡར་བ་དྲུག་འཆར་བའི་རླུང་གི་བགྲོད་པ་རྣམས་ལ་རེ་རེ་བཞིན་དཀྱིལ་འཁོར་ལྔ་ལྔ་རེ་འབྱུང་བས། དེ་རྣམས་དག་པ་ས་གའི་འདུག་སྟངས་ལ་སོགས་པ་ལྔ་ཡིན་ལ། སྤྱི་ཁྱབ་གཡས་གཡོན་མཉམ་རྒྱུ་གསུམ་དག་པ་ནི་སྔོན་མ་གསུམ་པོའོ།། །།བདུན་པ་འཕྲོས་དོན་གྱི་དག་པ་རྣམ་གྲངས་གཞན་བསྟན་པ་ལ། དང་པོ་སྐུ་གསུང་ཐུགས་ཀྱི་དག་པ་གཞན་ནི། དཔལ་ལྡན་རྡོ་རྗེ་ཅན་ནི་ཐུགས་ཀྱི་རྡོ་རྗེར་འགྱུར་ཏེ་མི་བདག་དཀྱིལ་འཁོར་སྐུ་ཡི་རྡོ་རྗེའོ། །ཟླ་བ་ཉི་མའི་སྟེང་དུ་ཨཱ་ལི་ཀཱ་ལིའི་རིགས་སྐྱེས་ལྷ་རྣམས་འཁོར་ལོ་གསུང་གི་རྡོ་རྗེའོ། །ཞེས་གསུངས་ཏེ། ཐུགས་དཀྱིལ་ཉིད་ལ་དཔལ་ལྡན་རྡོ་རྗེ་ཅན་གཙོ་བོ་ལ་སོགས་པ་ལྷ་ཚོགས་རྣམས་ནི་ཐུགས་རྡོ་རྗེ་དང་ཉི་ཟླའི་གདན་གྱི་སྟེང་དུ་ཨཱ་ལི་ཀཱ་ལིའི་རིགས་རང་རང་གི་ས་བོན་ནི་གསུང་རྡོ་རྗེ་སྟེ་འདི་ལས་དེ་བསྐྱེད་པའོ། །གཞལ་མེད་ཁང་ནི་སྐུ་རྡོ་ རྗེའོ། །དེ་ལྟར་ན་ཐུགས་དཀྱིལ་ལ་སྐུ་གསུང་ཐུགས་ཀྱི་དབྱེ་བ་དེ་བཞིན་དུ་གསུང་དཀྱིལ་དང་སྐུ་དཀྱིལ་ལ་ཡང་དབྱེ་བས་རྣམ་གྲངས་དགུའི་དག་པའོ། །དེ་དག་ནི་སྒྲུབ་ཐབས་དཔག་བསམ་ལྗོན་ཤིང་ལས། བརྟེན་པ་ལྷའི་དག་པའི་སྐབས་སུ་དངོས་སུ་ལུང་འདྲེན་པར་མཛད་པ་རྣམས་ཀྱི་དོན་བཤད་པ་ཡིན་ལ། དག་པའི་རྣམ་གྲངས་གཞན་རྒྱུད་དང་འགྲེལ་བའི་སྔ་ཕྱིར་ཇི་སྙེད་ཅིག་འབྱུང་
ཡང་མཐའ་དག་ཕྱོགས་གཅིག་ཏུ་བསྡུས་ན་གོ་དཀའ་ཞིང་འཁྲུག་པར་འགྱུར་བས་སྤྲོས་པ་ཐམས་ཅད་བརྗོད་པར་མི་འོས་ཀྱང་ད་དུང་ཉེར་མཁོ་འགའ་ཞིག་བརྗོད་ན། ཡེ་ལེའི་ཞེ་གཉིས་ཞེ་གསུམ་པའི་འགྲེལ་པར་གསུངས་པ་ལྟར་ཡུལ་དག་པ་ཞེས་ཟླ་བའི་ཡུལ་ལ་གཟུགས་སོགས་ཡུལ་ལྔ་དང༌། ཉི་མའི་ཡུལ་ལ་མུན་པ་སོགས་ཡོན་ཏན་གསུམ་མོ། །རླུང་གི་ཡོན་ཏན་རེག་བྱ་གཅིག་ཉིད་དག་པས་ཞལ་གཅིག་པ། མེ་ལ་རང་གི་ཡོན་ཏན་རོ་དང༌། གཞན་རླུང་གི་ཡོན་ཏན་རེག་བྱ་དང་ལྡན་པས་ཞལ་གཉིས་པ་དང༌། ཆུ་ལ་རིང་གི་ཡོན་ཏན་གཟུགས་དང༌། གཞན་རོ་རེག་གཉིས་དག་པས་ཞལ་གསུམ་པ་དང༌། ས་ལ་རང་གི་ཡོན་ཏན་དྲི་དང༌། གཞན་གཟུགས་རོ་རེག་གསུམ་ལྡན་པས་ཞལ་བཞི་པ་དང༌། སྟོང་ཆེན་ལྔ་དག་པས་ཞལ་ལྔ་པ་དང༌། འགྱུར་མེད་དྲུག་དག་པས་ཞལ་དྲུག་པ་དང༌། དེ་དག་གི་ཤུགས་ལ་གཞན་ཡང་ཉི་ཟླའི་ཡོན་ཏན་བརྒྱད་དག་པས་ཞལ་བརྒྱད་པ་ལ་སོགས་པ་རྣམས་སུ་འགྱུར་ལ། རྒྱས་བཏབ་ཀྱི་ཞལ་ཞེས་གསུངས་པ་ཡོད་དེ་རིགས་བདག་ཉིད་ལ་བྱའོ། །གཙོ་བོ་བཅོམ་ལྡན་འདས་ཀྱི་སྐུ་མདོག་ནི་གོང་དུ་སྨོས་པ་ལྟར། ཡེ་ཤེས་ཀྱི་ཁམས་དག་པའི་སྔོན་པོའམ། ཐུགས་རྡོ་རྗེ་ཉིད་ཀྱི་ནག་པོ་སྟེ། ཁ་ཅིག་དཀར་ནག་གི་ཕྱོགས་གཉིས་རོ་མཉམ་དང་འདྲེས་པས་ཀྱང་སྔོན་པོ་ཞེས་འཆད་པ་ནི་གོང་དུ་དཔྱད་པ་དང་འདྲ། བཅོམ་ལྡན་འདས་མ་སྐུ་མདོག་སེར་བ་ནི། ཡེ་ཤེས་རྡོ་རྗེ་མའི་ངོ་བོ་ཉིད་ཀྱི་ཕྱིར། ཀུན་ཁྱབ་ཀྱི་རིགས་ལ་ཐུགས་དང་ཡེ་ཤེས་ཟུང་དུ་འཇུག་པའི་བདག་ཉིད་དོ། །འཁོར་རྣམས་ཀྱི་ཁ་དོག་གི་དག་པ་ལ། ཡེ་ལེ་བཅུ་གསུམ་པ་ལ་སོགས་པའི་རྩ་འགྲེལ་ལས་རྒྱས་པར་
གསུངས་པ་རྣམས་ཏེ། དག་པར་ཡང་དག་དག་པའི་ཆུ་ལས་རི་བོང་འཛིན་པ་ལྟར་དཀར་པདྨའི་མཚན་མ་འོད་དཔག་མེད། །ཅེས་པ་ནས། སྟེང་དང་འོག་ནས་ཡོན་ཏན་མང་པོའི་གནས་དང་སྲོག་ཆགས་རྣམས་ཀྱི་ཐར་པའི་རྒྱུར་ནི་སྤྲོས་པའོ། །ཞེས་པའི་བར་དུ་གསུངས་ཤིང༌། འགྲེལ་ཆེན་དུ། ད་ནི་འཁོར་ལོ་དྲུག་པོ་རྣམས་སུ་ཁམས་དྲུག་ལས་རིགས་ཀྱི་ལྷ་རྣམས་སྤྲོ་བ་གསུངས་པ་ཞེས་པ་ནས། རྒྱས་བཏབ་པའི་ངེས་པའོ་ཞེས་པའི་བར་དུ་ཕྲ་མོའི་རྣལ་འབྱོར་དང༌། རྫོགས་རིམ་ཐ་མར་དགེ་བའི་སྐབས་ཀྱི་རྡོ་རྗེ་སྤྲོ་བ་ལྷན་ཅིག་ཏུ་གསུངས་པའི་ཞོར་ལ། ཁ་དོག་དཀར་པོ་རྣམས་ནི་དཀར་བ་དང་གསལ་བ་ཉིད་ཀྱིས་ཉེས་པའི་སྐྱོན་གྱིས་མ་གོས་ཤིང་ཡོན་ཏན་རྒྱས་པ་མཚོན་ལ། དེའི་ཕྱིར་ཞི་རྒྱས་ཀྱི་ལས་འགྲུབ་པའི་དགོས་པ་ཅན་དུ་འགྱུར་རོ། །ནག་པོ་རྣམས་ནི་སྤྲོས་པའི་སྣང་བ་མེད་པ་དང༌། སྒྲིབ་པའི་ཆོས་འཐར་པར་བྱེད་པ་མཚོན་པས་བསད་པ་དང་དབྱེ་བའི་ལས་འགྲུབ་པའི་ཕྱིར་དང༌། དམར་པོ་རྣམས་ནི་སྣ་ཚོགས་འདི་དག་སེམས་ཉིད་ཀྱིས་སྤྲུལ་ཞིང༌། སེམས་སུ་ཐིམ་པར་བྱེད་པ་དམར་པོས་ཁ་དོག་གཞན་ཟིལ་གྱིས་གནོན་པ་དང་འདྲ་བ་སྟེ། བྱེད་པ་པོ་ཉིད་ཀྱི་ཕྱིར་དབང་གི་ལས་དང༌། ཁོངས་སུ་འདུ་བའི་ཕྱིར་དགུག་པའི་ལས་འགྲུབ་པའོ། །སེར་པོ་རྣམས་ནི་སེར་པོ་ཁ་དོག་གསལ་བས་གཞན་གྱི་མདངས་ཉམས་སྨད་པར་བྱེད་པ་དང་མཚུངས་པས། རྣམ་པར་མི་རྟོག་པའི་ཡེ་ཤེས་རྣམ་པ་ཐམས་ཅད་ཤིན་ཏུ་བརྟན་པས་རྣམ་རྟོག་ཐམས་ཅད་དྲན་དུ་མི་གཞུག་པ་དང༌། སྒྲ་རྟོག་གིས་གཡོ་བ་མེད་པར་བྱེད་པ་མཚོན་པས་རེངས་པ་དང་རྨོངས་པའི་ལས་འགྲུབ་བོ། །ནམ་མཁའི་ཁམས་ཀྱི་ལྷ་ཚོགས་ལྗང་ཁུ་དང༌། ཡེ་ཤེས་ཁམས་ཀྱི་ལྷ་
ཚོགས་སྔོན་པོ་ནི། ཁ་དོག་ཐམས་ཅད་འདྲེས་པའི་བདག་ཉིད་ཅན་གྱི་ཕྱིར་སྔར་གྱི་དག་པ་ཐམས་ཅད་འདུས་ལ། དེའི་ཕྱིར་ལས་ཐམས་ཅད་སྒྲུབ་པར་བྱེད་པ་ཡིན་ཏེ། དེ་ཡང་ལྗང་ཁུ་ལས་རྣམས་ཆ་མཉམ་དང༌། སྔོན་པོ་ནི་བསད་པ་སོགས་འཇོམས་པའི་ལས་དང༌། དེ་རྣམས་སླར་གསོ་བའི་ཕྱོགས་ལ་ལྷག་པར་མཐུ་དང་ལྡན་པ་ཡིན་ནོ། །ཡང་ཇི་སྐད་དུ། ལུས་ལ་བསམ་པ་རབ་ཏུ་ཞུགས་པ་ནམ་མཁའ་བཞིན་དུ་རོ་མཉམ་བསམ་པའི་དབུས་སུ་ལུས་ངག་ཀྱང༌། རྣལ་འབྱོར་ལྡན་པས་ཤེས་བྱ་རང་བཞིན་ཡོན་ཏན་དབང་གིས་ཁམས་ཀྱི་ཁ་དོག་ལ་སོགས་དབྱེ་བས་ཏེ། སེར་པོ་ནག་པོ་དག་དང་ཁ་དོག་དམར་པོ་ཞེས་དང་དཀར་པོ་ས་རླུང་མེ་དང་ཆུ་ ལའོ། །ཡེ་ཤེས་ནམ་མཁའ་ལ་ཡང་སྔོན་པོ་ལྗང་ཁུར་འགྱུར་ཏེ་ལུས་དང་བསམ་པའི་རབ་ཏུ་དབྱེ་བས་སོ། །ཞེས་གསུངས་ཏེ། ལྷ་ཕན་ཚུན་ཁ་དོག་གཞན་རིགས་ཀྱིས་ཡང་དག་པར་འཁྱུད་པ་ནི། ལུས་བསམ་གྱི་དབྱེ་བའི་དག་པར་མཛད་པ་སོགས་མང་མོད་ཀྱི་རྒྱས་པར་མ་སྤྲོས་ལ། ཤུགས་ཀྱིས་གོ་བར་ཡང་འགྱུར་རོ། །སྤྱི་ཁྱབ་ཏུ་ཞལ་གསུམ་པ་རྣམས་ཡོན་ཏན་གསུམ་དག་པ་རྡོ་རྗེ་གསུམ་དང༌། ཕྱག་དྲུག་རྣམས་ཕལ་ཆེར་ཁམས་དྲུག་རྣམ་པར་དག་པ་དང༌། ཞབས་གཉིས་རྣམས་ཉི་ཟླའི་རྒྱུ་བ་དག་པ་དང༌། ཞལ་གཅིག་པ་རྣམས་ནི་བདེ་བ་གཅིག་པུ་དང༌། ཕྱག་བཞི་རྣམས་ནི་རྡོ་རྗེ་བཞིའམ་ཁྱབ་བྱ་ས་ཆུ་མེ་རླུང་བཞི་དག་པ། ཕྱག་གཉིས་པ་རྣམས་ནི་བདེ་བ་ཆེན་པོ་དང༌། རྣམ་པ་ཐམས་ཅད་པའམ་དྷཱུ་ཏཱི་དང་དུང་ཅན་མ་དག་པའོ། །ནུས་མ་རྣམས་ཀྱི་ཞལ་བཞི་རྡོ་རྗེ་བཞིའི་རྒྱས་བཏབ་དང༌། ཕྱག་བརྒྱད་ནི་ཉི་ཟླའི་ཡོན་ཏན་དག་པའི་བདག་ཉིད་ཡིན་ལ། གཞན་ཡང་རྒྱུད་ལས། དེ་
ལྟར་ངེས་པར་སྐུ་ཡི་རྡོ་རྗེ་མཆོག་གི་ཡོན་ཏན་རྣམ་མང་དཀྱིལ་འཁོར་གྱི་ནི་རྣམ་པར་གསུངས། །གསུང་གི་རྡོ་རྗེ་ཨ་སོགས་ཀ་སོགས་ལྷ་ཡི་རྣམ་པ་ཉིད་ནི་མཐའ་དག་རྒྱལ་བའི་རིགས་རྣམས་ཀྱིས། །སྟོང་པ་དྲུག་གི་ཐུགས་ཀྱི་རྡོ་རྗེ་རྣམ་གསུམ་སྲིད་པར་གནས་པ་གཙོ་བོར་རྣམ་པ་གཅིག་པུའོ། །དེ་བཞིན་དུ་ནི་ཡེ་ཤེས་རྡོ་རྗེ་ངེས་པར་སྲིད་པའི་འཇིགས་འཇོམས་སྣ་ཚོགས་ཡུམ་གྱི་རང་བཞིན་ནོ། །ཞེས་དང༌། རྒྱལ་བའི་སྐུ་ཡི་རྡོ་རྗེ་ཡུལ་དང་ཡུལ་ཅན་རྣམས་ཀྱིས་བགྲོད་བྱ་མིན་པ་རྣམ་པ་ཐམས་ཅད་པ། །གསུང་གི་རྡོ་རྗེ་སེམས་ཅན་ཐམས་ཅད་རང་སྙིང་སྐད་རྣམས་དག་གིས་ཆོས་ནི་གོ་བར་བྱེད་པའོ། །རྡོ་རྗེ་ཅན་གྱི་ཐུགས་ཀྱི་རྡོ་རྗེ་སེམས་ཅན་རྣམས་ཀྱི་སེམས་ཀྱི་རང་བཞིན་མཐའ་དག་ས་ལ་གནས། །དྲི་མེད་ནོར་བུ་ལྟ་བུར་དངོས་པོ་རྣམས་ཀྱི་འཛིན་བྱེད་གང་ཡིན་དེ་ཉིད་ཡེ་ཤེས་རྡོ་རྗེའོ། །སྦྱིན་པ་ལ་སོགས་བདེ་མཉམ་འབྲས་སྟེར་དྲུག་དང་བཞི་རྣམས་ནུས་མ་བཅུ་པོ་དེ་དག་རྣམས་སུ གསུངས། །དེ་དག་རྣམས་ཀྱི་ཐབས་ནི་དག་པ་མཆོག་གི་སེམས་ཀྱིས་གང་བའི་བུམ་པ་རྣམ་བཅུ་དེ་རྣམས་སོ། །བདུད་དང་ཉོན་མོངས་ཉམས་པ་འདོད་པ་ཞེས་དང་འཕྲོག་བྱེད་རྡོ་རྗེའི་ཚོགས་ནི་ལྗོན་པ་ལ་སོགས་རྣམས། །ཕྱག་རྒྱ་དྲུག་རྣམས་སྟོང་པ་དྲུག་སྟེ་སྲིད་གསུམ་སྐྱེད་པར་མཛད་པ་ཡེ་ཤེས་རྣམ་ཤེས་གཅིག་ པའོ། །འཁོར་ལོ་སྲིད་གསུམ་ཀུན་ནས་དང་བ་ཞེས་པའོ་བདེ་བ་རིན་ཆེན་འདི་ཡི་ཆགས་པ་ཉིད་དག་ནི། །པདྨའོ་ཉོན་མོངས་ཟད་པ་རལ་གྲི་རྡོ་རྗེ་དག་ཀྱང་ཡེ་ཤེས་སྐུ་ཆེན་རྣམ་པར་མི་ཕྱེད་པའོ། །མི་ཤེས་གཅོད་པ་གྲི་གུག་མཆོག་གི་རིགས་དྲུག་རྣམས་ཏེ་འདི་དག་རྣམས་ཀྱིས་བསྐྱེད་པ་གང་ཡིན་པ། །ཕུང་པོ་ཁམས་དང་དབང་པོ་ལ་སོགས་མཁའ་བཞིན་རོ་མཉམ་དེ་དག་རྣམས་ཀྱང་དེ་བཞིན་རིག་པར་བྱ། །ཞེས་གསུངས་
པ་རྣམས་གལ་ཆེ་བའི་དག་པ་ཡིན་མོད་ཀྱི། གོ་སླ་བ་ཉིད་ཀྱི་ཕྱིར་རེ་ཞིག་མ་སྤྲོས་སོ། །སྔར་གྱི་སྐུ་བཞི་དག་པའི་འཕྲོས་ལས། ཤེས་རབ་ཐབས་ཀྱི་ལུས་དང་བསམ་པ་མཉམ་དང་མི་མཉམ་རིགས་ནི་ཉི་ཟླ་ཨ་སོགས་ཀ་སོགས་དང༌། །རྣམ་གསུམ་སྲིད་པ་ལ་གནས་ཡེ་ཤེས་རྣམ་ཤེས་དབྱེ་བ་དག་གིས་རྣལ་འབྱོར་བ་ཡིས་རིག་པར་བྱ། །ཞེས་འབྱུང་བའི་དོན་ནི། དེ་ལ་རྟག་ཏུ་ཕན་ཚུན་རྒྱས་བཏབ་ཡིན་མོད་ཀྱང༌། ཤེས་རབ་ཀྱི་ལྡོག་ཆ་ནས་ལུས་དང༌། ཐབས་ཀྱི་ལྡོག་ཆ་ནས་བསམ་པ་གཙོ་ཆེའོ།། མཉམ་དང་མི་མཉམ་ཞེས་པ་ནི། མཁའ་ཡེ་རླུང་མེ་ཆུ་ས་ཞེས་ཁམས་དྲུག་གི་རིམ་པ་བགྲོད་ཚུལ་ལས། མཁའ་རླུང་ཆུ་སྟེ་ཡ་བ་རེ་པ་གསུམ་ལ་མི་མཉམ་པ་དང༌། ཡེ་མེ་ས་སྟེ་ཆ་འགྲིག་པ་གསུམ་ལ་མཉམ་པ་ཞེས་གྲངས་བགྲོང་ཚུལ་གྱི་སྒོ་ནས་མིང་བཏགས་པ་ཡིན་ལ། དེ་ཡང་ཕྱི་རོལ་ཏུ་ཟླ་བ། ནང་དུ་ཨ་སོགས་དབྱངས་རྣམས་ཐབས་ཁུ་བའི་ཆོས། ཆུ་རླུང་ནམ་མཁའ་སྟེ་རིགས་གསུམ་རྣམ་པར་དག་པ་ལྷ་ཡབ་རྣམས་ཟླ་བ་དང་དབྱངས་ཀྱིས་མཚོན་པའི་དགའ་བ་བཞི་ལ་བཞི་བཞིས་ཕྱེ་བའི་ནང་ཚན་བཅུ་དྲུག མི་འགྱུར་བའི་བདེ་བ་སྐུ་གསུང་ཐུགས་གསུམ་དབྱེར་མེད་པའི་བདག་ཉིད་ཡིན་ལ། ཕྱི་རོལ་ཏུ་ཉི་མ་དང༌། ནང་དུ་ཀ་སོགས་གསལ་བྱེད་ཀྱི་རྩ་རླུང་ཐིག་ལེ་རྣམས་མཉམ་པའི་རིགས་དམར་པོའི་དངས་མ་རྡུལ་གྱི་ཆོས་ལས་བྱུང་བ་ས་མེ་ཡེ་ཤེས་གསུམ་དག་པ་ནི་ལྷ་ཡུམ་རྣམས་ཏེ། ཉི་མ་དང་གསལ་བྱེད་བཅུ་གཉིས་ཚན་པ་ཕྲག་གསུམ་གྱིས་མཚོན་པ། རྡུལ་དག་པའི་སྣང་ཆ་ལས་བྱུང་བའི་གཏུམ་མོ་ཡེ་ཤེས་ཀྱི་མེ་རྣམ་པ་ཐམས་ཅད་པའི་སྟོང་པའི་རང་བཞིན་རྟེན་འབྲེལ་བཅུ་གཉིས་ཀྱི་རླུང་རེ་རེ་འགགས་པ་ལས་བྱུང་བ་
སྐུ་བཞི་ལ་ཡོན་ཏན་གསུམ་གསུམ་གྱིས་ཕྱེ་བའི་བདག་ཉིད་རྣམ་པར་དག་པའོ། །གསལ་བྱེད་སོ་དྲུག་ནི་སུམ་ཅུའི་སྟེང་དུ་ཧ་ཡ་ར་ཝ་ལ་ཀྵཿཞེས་པ་བསྣན་པའོ། །དེ་ལྟར་ན་ཡབ་ཡུམ་གཉིས་ཀྱི་དག་པ་ལ་སྦྱར་བའི་ཚེ་ཡབ་ལ་ཆུ་རླུང་ནམ་མཁའ་སྐུ་གསུང་ཐུགས་གསུམ་བསམ་པའི་ངོ་བོ་དང༌། ཡུམ་ལ་ས་མེ་ཡེ་ཤེས་སྐུ་གསུང་ཐུགས་གསུམ་ལུས་ཀྱི་ངོ་བོར་འཇོག་ཅིང༌། ཡབ་ཡུམ་མཉམ་པར་སྦྱོར་བ་ལུས་བསམ་རོ་མཉམ་མོ། །ཡང་ཁྱད་གཞི་ཡབ་གཅིག་པུ་ལ་བཞག་ན། ཆུ་རླུང་ནམ་མཁའ་གསུམ་སྤྱིར་ཐབས་ཡིན་ཀྱང༌། ཡབ་ཁོ་ན་ལ་བལྟོས་ན་ལུས་ཀྱི་སྒོ་ནས་ཡབ་ཉིད་ཀྱི་ཤེས་རབ་ཏུ་འགྱུར་ཞིང༌། ས་མེ་ཡེ་ཤེས་གསུམ་པོ་བསམ་པའི་སྒོ་ནས་ཐབས་སུ་འགྱུར་བས་ཡབ་ཉིད་ལའང་དྲུག་པོ་ཚང་ལ། ལྷ་ཡུམ་ལ་བལྟོས་ནས་མེ་ཡེ་ཤེས་གསུམ་པོ་ཡུམ་ཉིད་ཀྱི་ལུས་ཤེས་རབ་དང༌། ཆུ་རླུང་ནམ་མཁའ་གསུམ་པོ་བསམ་པ་ཐབས་ཀྱི་ཚུལ་དུ་བཞུགས་པས་ཡུམ་ལའང་དྲུག་པོ་ཚང་པས་དེས་མཚོན་ཏེ། དཀྱིལ་འཁོར་གྱི་ལྷ་རེ་རེ་བཞིན་གྱི་དག་པར་ཡང་འགྱུར་རོ། །ཡང་དྲུག་པོ་སོ་སོར་ཕྱེ་ནས་ལྷ་སོ་སོའི་ཁ་དོག་ལ་ཡང་སྦྱོར་ན། སེར་དམར་སྔོ་གསུམ་གྱི་ལྷ་རྣམས་ཕོ་མོ་གང་ཡིན་ཡང་རུང་ཤེས་རབ་ཉི་མའི་དག་པ་སྟེ། ལུས་བསམ་གང་རུང་རེའི་དབང་ལས་ཡིན་པ་མོ་ལ་ལུས་དང་ཕོ་ལ་བསམ་པ་གཙོ་ཆེ་བར་བཞག་གོ །དཀར་ནག་ལྗང་གསུམ་ཕོ་མོ་གང་ཡིན་ཡང་རུང་སྟེ། ལུས་བསམ་གང་རུང་རེའི་སྒོ་ནས་ཐབས་ཟླ་བའི་ཆོས་སུ་འཇོག་སྟེ་ཕོ་ལ་ལུས་དང་མོ་ལ་བསམ་པ་གཙོ་ཆེ་བ་ཡིན་ནོ། །དེ་ལྟར་ན་ལྷ་སོ་སོ་རང་རང་དང༌། ཕན་ཚུན་སྐུ་ལ་འཁྱུད་པའི་ཡབ་ཡུམ་རྣམས་ཀྱི་དག་སྦྱོར་གྱི་གནད་དེ་བཞིན་དུ་སྦྱོར་
ཞིང༌། གཞན་ཡང་ཟླ་བའི་ཆོས་དགའ་བ་བཞི་དང༌། དེ་ལས་ཕྱེ་བའི་བཅུ་དྲུག་ཉི་མའི་ཆོས་སྐྱེ་མཆེད་བཅུ་གཉིས་སམ། གནས་སྐབས་བཞི་དང་སྐུ་བཞི་རྡོ་རྗེ་གསུམ་གྱིས་ཕྱེ་བ་སྟེ། རྣམ་གསུམ་སྲིད་པར་གནས་པའི་སེམས་ཅན་རྣམས་ལ་མངལ་དུ་དགའ་བ་བཅུ་དྲུག་གི་སྐུ་བཞི་དང༌། བཙས་ནས་སྐྱེ་མཆེད་བཅུ་གཉིས་ཀྱི་སྐུ་བཞི་དག་པའི་ཚུལ་གྱིས་ཡོད་པ་བཞིན་དུ་དཀྱིལ་འཁོར་གྱི་འཁོར་ལོའི་ལྷ་རྣམས་ཀྱང་ཉི་ཟླ་དབྱངས་གསལ་གྱི་རྒྱུ་ལས་བྱུང་བའི་བརྡ་ཐབས་ལས་རྡོ་རྗེ་གསུམ་ཐབས་ཤེས་ཀྱིས་དབྱེ་བའི་རང་བཞིན་དང༌། དོན་དམ་པའི་ཡེ་ཤེས་དགའ་བཞི་ལ་སྐུ་བཞིས་ཕྱེ་བ་སྟེ་བཅུ་དྲུག་དང༌། དོན་དམ་པའི་རྣམ་ཤེས་རྡོ་རྗེ་གསུམ་གྱི་སྐུ་བཞི་ལ་བཅུ་གཉིས་ཏེ་རྣམ་ཤེས་ཡེ་ཤེས་ཟུང་དུ་འཇུག་པའི་བདག་ཉིད་དོ། །ཞེས་ཀྱང་གོ་བར་བྱའོ།། །།བཞི་པ་ཡེ་ཤེས་དགུག་གཞུག་ནི། དེ་ནས་བདག་ཉིད་ཀྱི་ཐུགས་ཀར་ཧཱུཾ་ཡོངས་སུ་གྱུར་པ་ལས་ནས། འཁོད་པར་གྱུར་ཞེས་པའི་བར་ཏེ། འདི་ལ་རྡོ་རྗེ་ཤུགས་སྤྲོ་བ་སྔོན་འགྲོ་དང༌། ལས་ལྔ་པོ་དངོས་གཞི་དང༌། ཡི་གེ་འགོད་པ་རྗེས་བརྟན་བྱེད་དེ། དེ་ཡང་ཧཱུཾ་ཡིག་རྡོ་རྗེའི་སྤྲུལ་པ་ཞེས་གསུངས་པས། ཧཱུཾ་དང་རྡོ་རྗེ་ལས་བསྐྱེད་པ་བསྟན་ཞིང༌། ལེགས་པའི་བུའི་སྒྲུབ་ཐབས་ལས། ཉི་ཟླ་སྒྲ་གཅན་གྱི་གདན་དང་ཛཿཡིག་ལྕགས་ཀྱུ་སོགས་དང༌། འོག་མ་རྣམས་ལའང་སྤྲོས་པ་མང་པོ་ཡོད་པ་དག་སྤྲོས་པ་ཙམ་དུ་ཟད་པས་རང་ལུགས་རྒྱུད་འགྲེལ་གྱི་དངོས་བསྟན་ཙམ་གྱིས་ཆོག་ཤེས་པར་བྱའོ། །དབུ་མའི་སྲོག་མཚོན་པའི་ཕྱིར་སྐུ་མདོག་སྔོན་པོ་ཉིད་ཡིན་ཞིང༌། རྣམ་འགྱུར་གཞན་རྣམས་རྡོ་རྗེ་ཤུགས་སྤྱི་དང་འདྲ་བ་ལས། སེངྒེ་རྐང་བརྒྱད་ཏེ་ཤ་ར་བྷས་དྲངས་བའི་ཤིང་
རྟ་སྔོན་པོ་ལ་གནས་པ་དང་སྐབས་འདིར་སྐུ་ལ་ཕྱག་རྒྱ་ལྔ་ཁོ་ནས་བརྒྱན་པ་ཡིན་ནོ། །འགའ་ཞིག་ཤེས་རབ་དང་ཐབས་ལས་ཡང་དག་པར་བྱུང་བ་ཞེས་གསུངས་པས་མཁའ་ནང་ནས་སྤྲོ་བ་དགོས་ཞེས་ཟེར་རོ། །འོན་ཀྱང་འདིར་དངོས་སུ་ཡབ་རྐྱང་སྤྲོ་ཡང་ཐབས་རྐྱང་པ་མི་མཚོན་ཏེ། ཐབས་ཤེས་རོ་མཉམ་དུ་འདྲེས་པའི་ལྷ་གཅིག་ཡིན་ནོ། །ཞེས་པའི་དོན་ཙམ་ཀ་ཡིན་པས། བླ་མའི་མན་ངག་ཡིན་ན་ནི་མཁའ་སྤྲོ་མི་འགོག་ཀྱང༌། སྤྱིར་ངེས་པར་དགོས་པ་མིན་ལ། ཐབས་ཤེས་ལས་བྱུང་བ་ཞེས་པའི་ཚིག་རྒྱུ་མཚན་དུ་བྱེད་པ་ཙམ་གྱིས་བློས་གཟུང་ལ་སྙིང་པོ་མེད་པས། རང་ལུགས་ལ་ཐུགས་ཀ་ནས་སྤྲོའོ།། འདིར་རྐང་པ་བརྒྱད་པའི་ཤིང་རྟ་ནི། ཁྲོ་མོ་ཤིན་ཏུ་སྔོན་མོའི་ཤིང་རྟ་དང་མཚུངས་ཏེ། རྡོ་རྗེ་ཤུགས་ཡེ་ཤེས་དང་ཤིང་རྟ་ནམ་མཁའི་ཁམས་སོ། །སེངྒེ་རྐང་བརྒྱད་ཀྱི་ཡན་ལག་བརྒྱད་པོ་ནི། སྒྲ་རེག་གཟུགས་རོ་དྲི་རྡུལ་མུན་སྙིང་སྟོབས་ཏེ་ཡོན་ཏན་བརྒྱད་པོ་དེ་རྣམས་དག་པའི་བརྡ་ཡིན་ལ། འདིར་གསལ་ཁ་མེད་ཀྱང་དེ་འདྲ་བདུན་གྱིས་དྲངས་པའོ།། །།གཉིས་པ་དངོས་གཞི་ནི་རྡོ་རྗེ་ཤུགས་ནམ་མཁར་བྱོན་ཏེ། སངས་རྒྱས་བྱང་ཆུབ་སེམས་དཔའ་ཀུན་འདུས་པ། དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ལྷ་ཚོགས་གདོད་མའི་དབྱིངས་ན་བཞུགས་པ་ལ་ཡིད་ཀྱི་དམིགས་པས་སྒོམ་ཚུལ་སྟེང་དང་མདུན་གྱི་ནམ་མཁའ་ཐག་རིང་བ་ན། ཡེ་ཤེས་ལྷ་ཚོགས་རྣམས་རོལ་ཞིང་རྩེ་བའི་ཚུལ་དུ་བཞུགས་པ་གསལ་བཏབ་སྟེ། དེ་ལ་རྡོ་རྗེ་ཤུགས་དེ་ཡེ་ཤེས་སེམས་དཔའི་དྲུང་དུ་ལྷགས་ནས་སྐད་ཅིག་ལ་ཞགས་པ་སྦྲུལ་ཞགས་སུ་སྤྲུལ་ཏེ། ཕྱག་ཉེར་བཞི་པོ་འཆིང་བ་དང༌། ལྕགས་ཀྱུས་ལྟེ་བ་
ནས་འདེབས་ཤིང༌། ཕྱག་མཚན་ལྷག་མ་ཐམས་ཅད་ཀྱིས་སྡིགས་ཚུལ་དུ་བྱས་ཏེ། གཙོ་བོ་ཉིད་ཚུར་སྤྱན་དྲངས་པ་ན། ལྷ་ཚོགས་གཞན་ཐམས་ཅད་དེའི་ཤུགས་ཀྱིས་བྱོན་ཏེ། ལྷ་རང་རང་སོ་སོའི་སྟེང་ཕྱོགས་ཀྱི་མདུན་ངོས་སུ་བྱོན་པར་གྱུར། སྔགས་ནི་རྒྱུད་འགྲེལ་ལས། ཛཿཞེས་པ་ཁོ་ན་གསུངས་པས་དེ་གཅིག་པུས་ཀྱང་ཆོག་མོད། དཀྱུས་སུ་བཤད་པའི་ཨོཾ་ཤྲཱི་སོགས་བླ་མའི་མན་ངག་ཕྱག་ལེན་ཡིན། དེ་ནས་རྡོ་རྗེ་ཤུགས་དེ་འཕྲལ་དུ་རང་ལ་ཐིམ་པ་ནན་ཏན་དུ་གསལ་འདེབས་དགོས་ཏེ། འདིའི་སྦྱང་བྱ་དབུ་མའི་ལུགས་དེ་ནི་དེ་ཕྱིན་ཆད་འཆི་བའི་དུས་མ་གཏོགས། རེ་ཞིག་དཀྱིལ་འཁོར་དུ་བྱས་ཏེ་མི་འབྱུང་བ་ཉིད་ཀྱིས་སོ། །དེ་མ་ཐག་ཏུ་ཡེ་ཤེས་ཀྱི་འཁོར་ལོ་ལ་ཇི་ལྟར་འོས་པའི་མཆོད་པ་བྱ་བ་ཡིན་ཏེ། ཕྱག་ལེན་དུ་ནི་མཆོད་པ་བཅུ་གཉིས་ཙམ་གྱིས་མཆོད་དོ། །དེ་ནས་ཁྲོ་བོ་ཤེས་རབ་མཐར་བྱེད་སྤྲོས། ཕྱག་གཡས་ཀྱི་དང་པོའི་ཕྱག་མཚན་མདའ་དེ་སྐད་ཅིག་གིས་རྡོ་རྗེར་བསྒྱུར་ཏེ། ཡེ་ཤེས་ཀྱི་ལྷ་ཐམས་ཅད་ཀྱི་སྐུ་རྒྱབ་ཏུ་རེག་ཙམ་བྱས་ཏེ། ཧཱུཾ་ཞེས་པས་ལྷ་སོ་སོ་ལ་བཅུག་སྟེ། ཤེས་རབ་མཐར་བྱེད་ཉིད་སྤྲུལ་གཞི་ལ་ཐིམ་གཞུག་པའོ། །ཡང་རེངས་བྱེད་གཤིན་རྗེ་གཤེད་བྱུང་སྟེ། དམ་ཡེ་ཕྱོགས་གཅིག་ཏུ་ཞུགས་པ་དེའི་ལྷ་རྣམས་ཀྱི་ཕྱག་ཞབས་ལ་ཞགས་པས་རེག་ཙམ་བྱས་པས་དམ་ཡེ་གཉིས་པོ་སོ་སོར་འགྱེས་མི་ནུས་པར་བསམ། ཁ་ཅིག་རེངས་བྱེད་ཀྱི་ཕྱག་གཡོན་གྱི་ལྕགས་སྒྲོག་དེ་ཞགས་པར་བསྒྱུར་བའང་ཡོད་མོད། འོན་ཀྱང་ཕྱག་གཡས་ཀྱི་དང་པོ་འཁོར་ལོ་ཞགས་པར་བསྒྱུར་བ་ཉིད་ཡིན་པར་མངོན་ནོ། །དེ་ནས་དེ་སྤྲུལ་གཞི་ལ་བསྡུས་
ཏེ་བཅིང་བའོ། །ཡང་ཁེངས་བྱེད་པདྨ་མཐར་བྱེད་སྤྲོས། གཡས་ཀྱི་ཐོ་བ་དྲིལ་བུར་བསྒྱུར་ཏེ་ལྷ་ཐམས་ཅད་ཀྱི་མདུན་དུ་འདུག་ཅིང༌། དྲིལ་བུ་དཀྲོལ་བས་ཐམས་ཅད་མཆོག་ཏུ་དགྱེས་ཤིང་མཉེས་པར་བསམས་ལ་དེ་སྤྲུལ་གཞི་ལ་བསྡུའོ། །ཡང་ཤིན་ཏུ་སྟོབས་ཏེ་བགེགས་མཐར་བྱེད་སྤྲོས། གཡས་ཀྱི་རལ་གྲི་དབྱུག་པར་བསྒྱུར། ལྷ་རྣམས་ཀྱི་སྤྱི་བོ་ལ་སོགས་པའི་གནས་དྲུག་ཏུ་རེག་ཙམ་བྱས་པས་ཐམས་ཅད་དམ་ཚིག་སེམས་དཔའ་ལ་ཡེ་ཤེས་པ་བསྟིམ་ཟིན་པ་དེ་རྣམས་རོ་མཉམ་དབྱེར་མེད་གཅིག་ཏུ་གྱུར་ཏེ། སླར་དེ་ཉིད་སྤྲུལ་གཞི་ལ་བསྡུའོ། ཁྲོ་བོ་ལྷག་མ་དེ་རྣམས་སྤྲོ་བསྡུ་ནི་མདོར་བསྡུས་ཙམ་གྱིས་ཆོག་སྟེ། ཞོར་བྱུང་ཙམ་ཡིན་པའི་ཕྱིར་དང་སྦྱང་བྱ་དང་བསྟུན་ནའང༌། རྣམ་ཤེས་ལྔའི་རླུང་ནི་ཡང་ཡང་འགག་ཅིང༌། ཡང་ཡང་འབྱུང་བས་ལན་གཅིག་པོ་དེ་ཁོ་ན་གཙོ་བོ་མ་ཡིན་པའི་ཕྱིར་རོ། །དེ་རྣམས་གཙོ་བོའི་ཐུགས་ཀ་ནས་སྤྲོ་བསྡུ་བྱས་ཀྱང་རུང༌། སྒོ་བཞིར་བཞུགས་པ་རྣམས་ཉིད་ལས་སྤྲོ་བསྡུ་བྱས་ཀྱང་རུང་ལ། ཡང་ཡེ་ལེ་ལས་འདི་དང་མི་འདྲ་ཙམ་གསུངས་པ་ནི། ཕྱི་བསྐྱེད་རིམ་ལ་ཡང་དངོས་བསྟན་དེ་ཙམ་གདམ་ཀར་རུང་བ་ཡིན་མོད། འགྲེལ་པ་ལས། གཙོ་བོར་དགོངས་པ་ཅན་གྱི་བཤད་པ་མཛད་པས། རྫོགས་རིམ་རྗེས་དྲན་ནམ་ཐིག་ལེའི་རྣལ་འབྱོར་དང་སྒྲིག་གོ །དེ་ལ་དགུག་པའི་སྔགས་ཛཿཡིག་གི་དུས་སུ་ལྕགས་ཀྱུའི་ཕྱག་རྒྱ་དང༌། ཧཱུཾ་ཞེས་པ་ལ་རྡོ་རྗེའི་ཕྱག་རྒྱ་དང༌། བཾ་ཞེས་པ་ལ་ཞགས་པ་དང༌། ཧོཿཞེས་པ་ལ་དྲིལ་བུ་དང༌། ཧི་ཞེས་པ་ལ་དབྱུག་པའི་ཕྱག་རྒྱ་རྣམས་དགོས་སོ། །རྒྱུད་སྡེ་གཞན་རྣམས་ལས་དགུག་གཞུག་བཅིང་མཉེས་
བཞིའི་རྣམ་གཞག་ལས་མ་བཤད་པས། ལྔ་པ་རོ་མཉམ་ནི། རྒྱུད་འདི་ཁོ་ན་ལས་འབྱུང་བའི་བརྡ་ཆད་ཡིན་ལ། གཞན་ལས་མི་འབྱུང་བ་ནི། གཞུག་པ་ལ་འདིའི་དོན་ཚང་བ་ཙམ་ཡིན་པས་བསྡུས་པ་ལ་དེས་གོ་ཆོད་པའི་དབང་དུ་མཛད་པའོ། །སྐབས་འདིར་རྒྱུད་འགྲེལ་ལས་རོ་མཉམ་ཆེན་པོ་ཞེས་པའི་སྐབས་ཤིག་བྱུང་བ་དེ། རོ་མཉམ་འདི་ཉིད་ཀྱི་དམིགས་པའི་གོ་བ་དང་རྒྱས་བཤད་ཡིན་གྱི། བོད་མང་པོ་ཞིག་ཆོ་གའི་ཡན་ལག་ལོགས་པ་ཡིན་པ་ལྟར་བཅོས་ནས་རོ་མཉམ་ལ་ངག་འདོན་རྒྱས་པ་བྱེད་པའི་སྲོལ་འདུག་ཀྱང་སྐྱོན་ཆེན་པོར་འགྱུར་བ་རང་ཏ་མིན་མོད། ཆོ་ག་ལོགས་པའོ་སྙམ་པའི་འཁྲུལ་གཞི་འཇུག་པའི་ཕྱིར་མི་ལེགས་ལ། ཧཱི་ཞེས་པ་ཉིད་ཀྱི་སྐབས་སུ་རོ་མཉམ་རྒྱས་པ་གསུངས་པའི་དོན་བསམ་པ་ཉིད་ཡིན་གྱི། དམིགས་པ་དག་ནས་བརྗོད་དགོས་པ་མིན་མོད། དམིགས་པ་གསལ་བའི་ཕྱིར་བརྗོད་དོ་ཞེ་ན་ནི། དགུག་གཞུག་བཅིང་མཉེས་པ་ལ་ཡང་དགོས་སོ། །དེ་རྒྱུད་འགྲེལ་ལས་མ་གསུངས་སོ་སྙམ་ན། རྒྱུད་འགྲེལ་ལས་རོ་མཉམ་ལ་རྒྱས་པ་གསུངས་པ་དེ་ཀ་མཐའི་གསལ་བྱེད་ཀྱི་ཚུལ་གྱིས་དེ་དག་ལའང་གོ་བར་བྱེད་ པའོ། །དེ་ལྟར་ཡང་འགྲེལ་ཆེན་ལས། རྣམ་པ་ལྔ་ནི་ཛཿཡིག་གིས་དགུག་པ་དང༌། ཧཱུཾ་ཡིག་གིས་གཞུག་པ་དང༌། བཾ་ཡིག་གིས་བཅིང་པ་དང༌། ཧོཿཡིག་གིས་མཉེས་པ་དང༌། ཧཱི་ཡིག་གིས་རོ་མཉམ་པར་བྱས་ཏེ། རྡོ་རྗེ་ལྕགས་ཀྱུ་དང༌། རྡོ་རྗེ་དང༌། རྡོ་རྗེ་ཞགས་པ་དང༌། རྡོ་རྗེ་དྲིལ་བུ་དང༌། རྡོ་རྗེ་དབྱུག་པས་སོ། །དེ་ལྟར་ཡེ་ཤེས་ཀྱི་འཁོར་ལོ་ཡང་དག་པར་མཆོད་དེ། སྔར་བཞིན་དམ་ཚིག་གི་འཁོར་ལོ་ལ་རོ་མཉམ་པ་ཉིད་དུ་གྱུར་པར་བསྒོམ་པར་བྱའོ། །ཞེས་གསུངས་
པའི་དོན་ནི། ཐོག་མར་ལས་རིགས་མཐུན་པའི་དབང་གིས་ལྔ་པོ་བསྡེབས་ལ་གསུངས་ནས། བར་དུ་མཆོད་པ་འབུལ་བའི་ཚིག་བྱུང་ཡང༌། དགུག་གཞུག་བཅིང་མཉེས་རོ་མཉམ་གྱི་རྗེས་སུ་མཆོད་ནས། སླར་ཡང་རོ་མཉམ་ཆེན་མོ་སྟེ་རོ་མཉམ་ལམ་གཉིས་བྱེད་པའི་དོན་མིན། དགུག་པ་སོང་མ་ཐག་མཆོད་པའི་རྗེས་སུ་སྔར་དེ་མ་ཐག་རང་དུ་བཤད་ཟིན་པའི་གཞུག་པ་དང་བཅིང་མཉེས་སྔོན་དུ་སོང་བའི་རོ་མཉམ་དེ་ཀ་བྱེད་ཅེས་པའི་དོན་ཡིན་པས། སྔར་བཞིན་ཞེས་པ་རྒྱལ་མཆོག་གཉིས་ཀྱི་ལྷ་བསྲེ་བ་ལ་ངོས་འཛིན་པ་ནི་བཞད་གད་དོ། །རྗེས་ཡི་གེ་འགོད་པ་ནི། སྤྱིར་རྒྱུད་འགྲེལ་ལས། སྐུ་གསུང་ཐུགས་ལ་བྱིན་རླབས་དབང་བསྐུར་བྱེད་པའི་སྔོན་འགྲོར་གསུངས་པ་ལྟར། དོན་ཚན་དེའི་ནང་དུ་བསྡུས་ཀྱང་ལེགས་མོད། འོན་ཀྱང་རྒྱུད་འགྲེལ་དུ། མཚམས་དེར་ཡེ་ཤེས་དགུག་གཞུག་གི་རྣམ་གཞག་གསུངས་པ་མེད་པས་དེ་ལ་ཚིག་སྦྲེལ་རྒྱུ་མེད་ལ། སྐུ་གསུང་ཐུགས་བྱིན་རླབས་ཀྱི་སྔོན་དུ་འདི་ངེས་པར་བྱེད་ཀྱང་དགོས་པས་དེ་ལྟར་གསུངས་ཀྱི། སྤྱིར་ནས་ཡེ་ཤེས་དགུག་གཞུག་དང་སྦྲེལ་ན་ཡི་གེ་འགོད་པ་འདི་ཡེ་ཤེས་འཁོར་ལོའི་དོན་ཚན་དུ་བསྡུས་ནས་རོ་མཉམ་དུ་གྱུར་ཟིན་པ་དེ་བརྟན་པར་བྱེད་པའི་ཆོ་གར་སྦྱར་ན་ཤིན་ཏུ་ལེགས་ཏེ། གསང་སྔགས་ཀྱི་སྒྲུབ་ཐབས་གཞན་མང་པོ་དང་ཡང་མཐུན་ནོ། །ཁ་ཅིག་འདི་ཡི་གེ་འགོད་པ་མ་ཡིན་ཏེ། ཡི་གེ་འགོད་པ་ནི་བསྙེན་པ་ཡན་ལག་བཞིའི་ནང་ཚན་ཡིན་ཞིང། བསྙེན་པ་ཡང་དཀྱིལ་འཁོར་རྒྱལ་མཆོག་ལ་ངོས་འཛིན་དགོས་པའི་ཕྱིར། མངོན་བྱང་ལྔ་ལས་དུས་འཁོར་བསྐྱེད་མ་ཐག་ཡི་གེ་དྲུག་པོ་འདི་འགོད་དགོས་ཏེ། དུས་ཞབས་པའི་སྒྲུབ་ཐབས་ལ་ནི་ཡོད་ལ། རྒྱལ་མཆོག་དང་པོ་
འཆད་པའི་སྐབས་ཀྱི་རྒྱུད་འགྲེལ་ན་མེད་པས་རྒྱ་བོད་གཞན་རྣམས་ཀྱིས་མ་བྱས་ཀྱང་ངེས་པར་དགོས་སོ། །ཟེར་བ་ནི། ཡན་ལག་བཞིའི་བསྙེན་པ་ཞེས་པ་བྱུང་ཚད་རྒྱལ་མཆོག་དང་པོ་ལ་ངོས་གཟུང་བའི་འཁྲུལ་པ་ལ་བརྟེན་ནས། བྱང་ཆུབ་རྣམས་བཞིའི་བསྙེན་པ་འདི་དཀྱིལ་འཁོར་ཆེན་པོ་ནས་ལྷ་གཙོ་རྐྱང་གཅིག་གི་བར་ཐམས་ཅད་ལ་འཇུག་པ་མ་ཤེས་པར་འཁྱམས་པ་སྟེ། ཏིང་འཛིན་ཕྲུགས་གཅིག་གི་བསྙེན་སྒྲུབ་ཡན་ལག་བཞི་པོ་ལ་ཡང་ལས་རྒྱལ་མཆོག་བསྙེན་པ་གཉིས་པར་བཤད་པས་བསྙེན་པར་བཤད་པའི་ཕྱིར། ལས་རྒྱལ་མཆོག་གི་སྐབས་སུ་མི་རུང་ཟེར་བ་ནི། ཁྱེད་རང་ལ་ཡང་འགལ་ལ། སྤྱིར་དུས་འཁོར་གྱི་མངོན་རྟོགས་རྒྱས་པའི་ནང་དུ་བྱང་ཆུབ་བཞི་བསྐྱེད་ཚང་བ་ཡིན་ཡང༌། ཆིངས་དེས་བསྡུས་པ་མིན་པར་འཆད་པའང་ཤེས་པར་གྱིས་ཤིགལར་ཡེ་ཤེས་པ་དགུག་གཞུག་དང་སྐྱེ་མཆེད་དང་གནས་གསུམ་བྱིན་རླབས་དང་དབང་བསྐུར་རྒྱས་བཏབ་ཀྱི་རིགས་ཐམས་ཅད་བཞི་པ་ཡི་གེ་འགོད་པའོ། །ཞེས་པར་བསྡུ་པའི་སྐབས་ཡོད་པས་དུས་འཁོར་ལུགས་ཀྱི་དཀྱིལ་འཁོར་རྒྱལ་མཆོག་གཅིག་པུ་ལ་སྐོར་བརྡེག་དེ་ཙམ་རང་མི་འཚལ་ལོ།། །།ལྔ་པ་དབང་བསྐུར་བ་ནི། མེད་མི་རུང་སྐུ་གསུང་ཐུགས་ཀྱི་དབང་བསྐུར་བ་དང༌། རྒྱས་པ་དབང་བདུན་གྱིས་དབང་བསྐུར་བའོ། །དང་པོ་ནི་བཤད་མ་ཐག་པའི་ཡི་གེ་འགོད་པ་དང༌། ས་བོན་ཡི་གེའི་སྒོ་ནས་འདྲ་བ་ལྟར་ཡོད་ཀྱང་སྦྱང་བྱ་དང༌། དགོས་པ་ཐ་དད་པའི་ཕྱིར་གཉིས་ཀར་དགོས་སོ། །དེ་ཡང་དཔྲལ་བར་ཨ་ལས་ཟླ་བའི་དཀྱིལ་འཁོར་ཞེས་པ་ནས། ཧཱ་ལས་ཐུགས་རྡོ་རྗེ་རྣམས་འཁོད་པར་གྱུར་ཞེས་པའི་བར་དུའོ། །དེ་ལ་སྐུ་གསུང་ཐུགས་རྡོ་རྗེ་གསུམ་ནི། རྒྱུད་གཞན་ལས་འབྱུང་བ་
ལྟར་ན། རིན་འབྱུང་ཁོང་དུ་ཞུགས་པའི་རྣམ་སྣང་ནི་སྐུ་རྡོ་རྗེ་དང༌། དོན་ཡོད་གྲུབ་པ་དང་གཉིས་སུ་མེད་པའི་འོད་དཔག་མེད་ནི་གསུང་རྡོ་རྗེ་དང༌། རྡོ་རྗེ་སེམས་དཔའ་དང་དབྱེར་མེད་པའི་མི་བསྐྱོད་པ་ནི་ཐུགས་རྡོ་རྗེ་སྟེ། དེ་གསུམ་ཀར་ཉེ་རིང་མེད་པར་དཀྱིལ་འཁོར་གྱི་ལྷ་ཐམས་ཅད་ལ་བྱིན་གྱིས་རློབ་པ་པོ་ཀུན་ཁྱབ་ཞིག་གོ །དུས་ཀྱི་འཁོར་ལོར་ཡང་དེ་དང་གནད་གཅིག་སྟེ། རིགས་རྐྱང་རེ་དང་རྡོ་རྗེ་བཞི་སྦྱོར་ན་འོད་དཔག་མེད་སྐུ། རིན་འབྱུང་གསུང༌། དོན་གྲུབ་ཐུགས་རྣམ་སྣང་ཡེ་ཤེས་རྡོ་རྗེར་འཇོག་ཀྱང༌། ཀུན་ཁྱབ་རིགས་གསུམ་ལ་ནང་ཚན་ཐབས་ཤེས་ཀྱིས་ཕྱེ་ན། སྣང་མཐའ་སྐུ། དོན་གྲུབ་གསུང༌། མི་བསྐྱོད་ཐུགས་ཐབས་ཀྱི་ཕྱོགས་དང༌། རྣམ་སྣང་སྐུ། རིན་འབྱུང་གསུང༌། རྡོར་སེམས་ཐུགས་ཡིན་ལ། ཐབས་ཤེས་དབྱེར་མེད་རོ་མཉམ་དུ་བྱས་པའི་ཚེ། ས་ཆུ་དབྱེར་མེད་དུ་གྱུར་ཏེ། རྣམ་སྣང་འོད་དཔག་མེད་ཀྱི་སྐུ་མདོག་ཅན་དཀར་པོ་སྐུ་རྡོ་རྗེ་དང༌། དོན་གྲུབ་བསྲེས་པའི་རིན་འབྱུང་དམར་པོ་གསུང་རྡོ་རྗེ་དང༌། མི་བསྐྱོད་པ་ཞུགས་པའི་རྡོར་སེམས་ཐུགས་རྡོ་རྗེར་འཇོག་པས། དུས་འཁོར་རང་ལུགས་ལ་ཡང་རྣམ་སྣང་དཀར་པོ་འབྱུང་བའི་སྐབས་ཡོད་ལ། རྒྱས་བཏབ་ཀྱི་སྐབས་སུ་གསལ་བ་ལྟར་འོད་དཔག་མེད་གསུང་དུ་འཇོག་པའི་སྐབས་ཀྱང་ཡོད་པས་སྐབས་ཐོབ་རྩིས་ཀྱིན་ཤེས་དགོས་སོ། །སྐབས་འདིར་ནི་དུས་འཁོར་རང་ལུགས་ཀྱི་ཐབས་ཤེས་རོ་མཉམ་པའི་སྐུ་གསུང་ཐུགས་རྡོ་རྗེ་དེ་དང་གནད་གཅིག་ཀྱང་རྣམ་གྲངས་ཀྱི་སྒོ་ནས་ཕ་རྒྱུད་འདུས་པ་དང་མཐུན་པར་བསྟན་ཞེས་གསུངས་ཏེ། དེ་ཡང་འདུས་པའི་ཆོ་ག་ཡིན་པས། དུས་འཁོར་རང་ལུགས་ཀྱི་ཆོ་ག་མ་ཡིན་ཟེར་བ་ནི་མི་འཐད་དེ། དུས་འཁོར་རང་ལ་དགོས་པའི་ཆོ་ག་
མིན་ན། འདིར་གསུངས་པ་དོན་མེད་དུ་ཐལ་བ་དང༌། འདི་ཆད་ཀྱང་ཆོ་ག་ཆད་པའི་ཉེས་སྐྱོན་དུ་མི་འགྱུར་དུ་ཐལ་ ལོ། །དེས་ན་འདུས་པའི་ཆོ་ག་ཡང་ཡིན་ལ། དུས་འཁོར་རང་ལུགས་ཀྱི་ཆོ་ག་ཡང་ཡིན་པའི་གཞི་མཐུན་བར་འཆད་དགོས་སོ། །དེའི་ཕྱིར་རྣམ་སྣང་སྐུ་རྡོ་རྗེ་དང༌། འོད་དཔག་མེད་གསུང་རྡོ་རྗེ་དང༌། མི་བསྐྱོད་པ་ཐུགས་རྡོ་རྗེར་འཇོག་ཅིང༌། ཡུམ་རྣམས་ནི་རིམ་པ་བཞིན་དུ་སྤྱན་མ། གོས་དཀར། མཱ་མ་ཀཱི་གསུམ་དུ་བྱས་ཀྱང་ཆོག་ལ། གཙོ་བོར་རང་སྣང་གི་ཡུམ་དུ་བྱས་ཀྱང་ཆོག་ གོ །འོ་ན་དུས་འཁོར་ལས་རང་སྣང་གི་ཡུམ་བཀག་གོ་སྙམ་ན། དུས་འཁོར་གྱི་ཐུན་མོང་མ་ཡིན་པའི་རིགས་བྱེ་བྲག་པ་ལ་རང་སྣང་གི་ཡུམ་བཀག་པ་ཡིན་གྱི། ཆོ་ག་ཐུན་མོང་བ་ལའང་མ་ངེས་ཤིང༌། ཁྱད་པར་རྡོ་རྗེ་གསུམ་པོ་འདི་རིགས་ཀུན་ཁྱབ་ཡིན་པའི་ཕྱིར་ཡང་མ་ངེས་སོ། །རྒྱུད་སྡེ་གཞན་ལུགས་ཡིན་ནོ་ཞེས་སྤོང་བ་ལྟར་བྱེད་པའི་དུས་འཁོར་བ་ཡང་ཡོད་མོད་ཀྱི། དེ་ལྟ་ན་རྒྱུད་སྡེ་གཞན་ལས་འབྱུང་བའི་ཕྱིར་ས་བོན་ཕྱག་མཚན་ལས་བསྐྱེད་པ་དང༌། འོད་ཟེར་སྤྲོ་བསྡུ་སོགས་ཀྱང་སྤོང་དགོས་པར་འགྱུར་རོ། །དེས་ན་རྣམ་སྣང་དཀར་པོ་ལ་ཡུམ་དམར་པོ་སོགས་བྱེད་པ་ཡང༌། ཁྱད་ཆོས་ཧ་ཅང་ཁ་ཐལ་བ་ཡིན་ཞིང༌། ཕྱག་མཚན་གོང་འོག་བསྒྱུར་བ་ཡང་རིགས་ལྡན་སྤྲུལ་པའི་སྐུ་ལ་བརྙས་པར་འགྲོ་བས་མི་བྱའོ། །ལྷག་མ་གཞན་རྣམས་གོ་སླ། ལྷ་མོ་གསུམ་གྱིས་བདུད་རྩིའི་ཆུ་རྒྱུན་གྱིས་རིམ་ཅན་དུ་དབང་བསྐུར་བས་སྒོ་གསུམ་གྱི་དྲི་མ་མཐའ་དག་བྱང་ཞིང༌། ལུས་ངག་ཡིད་གསུམ་ཀར་བདེ་བ་དང༌། གསལ་བའི་མཐུ་ཆེན་པོ་དང༌། སྟོང་ཉིད་ཀྱི་ངོ་བོར་མོས། །
ལྷ་སྐུ་དང་སྔགས་དང་བདེ་སྟོང་དུ་གྱུར་པར་བསམས་ལ། དེ་མ་ཐག་ཏུ་སྐུ་གསུང་ཐུགས་རྡོ་རྗེ་ཡབ་ཡུམ་རྣམས་རང་གི་གནས་གསུམ་དུ་བཞུགས་ཤིང༌། ནམ་མཁའ་གང་བའི་སངས་རྒྱས་རྣམས་ཀྱང་རྡོ་རྗེ་གསུམ་གྱི་རྣམ་པས་མཁའ་དབྱིངས་སུ་བཞུགས་པ་ལ་གསོལ་བ་འདེབས་ཏེ། སྐབས་འདིར་རྡོ་རྗེ་གསུམ་པོ་འདི་དག་གཙོ་བོ་ཡབ་ཡུམ་གཉིས་ཀར་གྱི་སྐུ་ལ་འགོད་པ་ཡིན་ནོ། །ཚིགས་བཅད་ཀྱི་དོན་ནི། གཉིས་སུ་མེད་པའི་ཡེ་ཤེས་ཀྱི་རང་གཞན་གྱི་དཔལ་དང་ལྡན་པ། སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ནི་རྟག་ཅིང་བརྟན་པ་མི་ཕྱེ་ད་ཅིང་མི་ཤིགས་པ་སྟེ་མི་འགྱུར་བའི་དོན་དང་ལྡན་པའི་ཡེ་ཤེས་རྣམ་པ་ཐམས་ཅད་འཛིན་པ་ཞེས་བོས་ནས། བདག་གིས་ཀྱང་རྡོ་རྗེ་གསུམ་བསྒོམས་ཏེ། རྡོ་རྗེ་གསུམ་པོ་རེ་རེ་ཡང་འབྲལ་མི་ཤེས་ཤིང་དབྱེ་བ་མི་ཕྱེད་པའི་མཚན་ཉིད་སྐུ་རྣམ་པ་ཐམས་ཅད་དང༌། གསུང་གཞོམ་མེད་ཀྱི་སྒྲ་དང༌། ཐུགས་ལྷན་ཅིག་སྐྱེས་པའི་བདེ་སྟོང་གཉིས་སུ་མེད་པ་སྟེ། རྡོ་རྗེ་རེ་རེ་བཞིན་མི་ཕྱེད་རྡོ་རྗེ་གསུམ་གསུམ་དུ་བདག་གིས་མོས་པའི་ཚུལ་དུ་སྒོམ་པར་བྱེད་ན། སྐུའི་རྡོ་རྗེ་ཅན་བཅོམ་ལྡན་འདས་ཁྱེད་ཀྱིས་ཞེས་པ་དང༌། གསུང་དང་ཐུགས་ལའང་སྦྱར་ཏེ། ཁྱེད་རྣམས་ཀྱིས་དང་བདག་ལ་བྱིན་གྱིས་བརླབ་པའི་གནས་ལུས་ངག་ཡིད་གསུམ་རྡོ་རྗེ་གསུམ་པོ་ཁྱེད་ཀྱི་ངོ་བོར་བྱིན་གྱིས་བརླབ་ཏུ་གསོལ་ཞེས་པ་ནི། རང་གི་གནས་གསུམ་དུ་བཞུགས་པའི་རྡོ་རྗེ་གསུམ་ཡབ་ཡུམ་ལ་གསོལ་བ་འདེབས་པ་ཡིན་ལ། ཚིགས་བཅད་ཕྱི་མ་ནི་མཁའ་དབྱིངས་གང་བར་བཞུགས་པའི་སངས་རྒྱས་རྣམས་ལ་གསོལ་བ་འདེབས་པ་སྟེ། ཕྱོགས་བཅུར་བཞུགས་པའི་སངས་རྒྱས་རྣམས་ཞེས་བྱ་བ་སྟེ་ལྷག་མ་རྣམས་གོ་སླའོ། །
འདི་དག་ལ་རྒྱུད་འགྲེལ་གྱི་དངོས་བསྟན་ལྟར་སྒྲུབ་ཐབས་དཔག་བསམ་ལྗོན་ཤིང་ལས་འབྱུང་སྟེ། སྔ་ཕྱི་རིམ་ཅན་དུ་སྐུ་རྡོ་རྗེ་བསྐྱེད་སྤྲོས་དབང་བསྐུར་གསོལ་བ་བཏབ་སྟེ་རང་ལ་བསྟིམ། དེ་བཞིན་དུ་གཞན་གཉིས་ལའང་སྦྱོར་ཏེ། རྒྱས་པར་ན་དེ་ལྟར་སྒོམ་དགོས་ལ། བསྡུ་ན་ཆོས་རྒྱལ་ཕྱོགས་ལས་རྣམ་རྒྱལ་གྱིས་མཛད་པ་ལྟར་དུས་གཅིག་ཏུ་བསྐྱང༌། དུས་གཅིག་ཏུ་སྤྲུལ། དུས་གཅིག་ཏུ་དབང་བསྐུར། དུས་གཅིག་ཏུ་གསོལ་བ་བཏབ། དུས་གཅིག་ཏུ་རང་ལ་བསྟིམ་ན་འཁྱེར་བདེ་སྟེ་དོན་ལ་ཁྱད་མེད་ཕྱིན་ཟོར་ཡང་བས་འདི་ལ་ཕྱག་ལེན་མཛད་དོ། །དེ་ནས་ང་རྒྱལ་བཟུང་བའི་སྔགས་བརྗོད་དོ། །ཁུ་བའི་ཆོས་ལས་ཐབས་ལ་རིགས་གསུམ་དུ་རྟོགས་པར་བྱ་བའི་ཕྱིར་ཡབ་ལ་དེ་ཙམ་གྱིས་ཆོག་ལ། ཁུ་རྡུལ་གཉིས་ཀ་དང་ལྡན་པའི་ཆོས་ལས་ཤེས་རབ་རིགས་དྲུག་ཏུ་རྟོགས་དགོས་པས་ཡུམ་ལ་ལྷག་པོར་ལྟེ་བར་ཧོཿལས་སྐུ་རྡོ་རྗེ་དང༌། གསང་བར་སྭཱ་ལས་གསུང་རྡོ་རྗེ་དང༌། གཙུག་ཏོར་དུ་ཧཱ་ལས་ཐུགས་རྡོ་རྗེ་རྣམས་འགོད་དེ། དེ་རྣམས་སེར་སྔོ་ལྗང་བའི་ཁ་དོག་ཏུ་མི་བྱེད་པར་དཀར་དམར་མཐིང་གསུམ་སྔ་མ་བཞིན་དུ་བསྐྱེད་པས་བྱིན་གྱིས་བརླབ་པ་ཙམ་བྱ། སྤྲོ་བསྡུ་གསོལ་གདབ་སོགས་ཆོ་ག་ལྷག་མ་རྣམས་འདི་ལ་མི་དགོས་སོ།། །།གཉིས་པ་རྒྱས་པ་དབང་བདུན་གྱིས་དབང་བསྐུར་བ་ནི། མདོར་བསྡུས་ཀྱི་ཚུལ་ལ་མི་དགོས་ཀྱང་སྤྲོ་ཞིང་མོས་ན་ལེགས་པའི་ཡན་ལག་ཡིན་པས། དབང་ལྷ་སྤྱན་དྲངས་ཤིང་མཆོད་ནས། གསོལ་བཏབ་དང་དབང་བསྐུར་བའི་སྔགས་རྣམས་སྔགས་དབང་ཙམ་གྱི་ཚུལ་དུ་ལེན་པ་ཡིན་ལ། དེ་དག་བྱིས་འཇུག་ཉིད་ཀྱི་ཕྱིར། བྱིས་པའི་དུས་ཀྱི་སྦྱང་བྱ་དང་ཡང་ཤིན་ཏུ་འབྱོར་རོ། །དབང་གོང་མ་རྣམས་ནི་སྐབས་འདིར་
མི་དགོས་པ་ཙམ་དུ་མ་ཟད་བླངས་ན་སྐབས་སུ་མ་བབ་པར་ལྷག་པའི་སྐྱོན་དུ་འགྱུར་ཏེ་འགལ་བ་དང་དགོས་པ་མེད་པས་སོ། །སྐབས་འདི་སྦྱང་བྱ་གཉིས་སྦྱོར་གྱི་འཁྲིག་པའི་བདེ་བ་ཉམས་སུ་མྱོང་མི་ནུས་པའི་སྐབས་དང་སྦྱོར་ཞིང༌། དབང་གོང་མ་རྣམས་ནི་སྦྱང་བྱ་གཉིས་སྦྱོར་གྱི་བྱ་བ་དང་སྦྱོར་དགོས་པ། འདིར་ཕྲུགས་གཅིག་ལ་ཤིན་ཏུ་མི་འགྲིག་པའི་ཕྱིར་དང༌། གསུང་རྡོ་རྗེ་བསྐྱེད་པ་ཉེར་སྒྲུབ་ནི་གཙོ་བོར་རླུང་སྦྱོང་བྱེད་དུ་མི་འགྱུར་བར་གཙོ་བོར་ཐིག་ལེ་སྦྱོང་བྱེད་སོགས་བཞི་ཀར་དུ་ཐལ་བར་འགྱུར་བའི་ཕྱིར་ཤིན་ཏུ་འགལ་བ་དང༌། དབང་གོང་མ་རྣམས་ཀྱི་སྦྱང་བྱ་དང༌། སྦྱངས་འབྲས་གང་ཡིན་པ་དེ་སྐབས་འདིར་ཕྲ་ཐིག་གི་རྣལ་འབྱོར་གྱིས་འགྲུབ་པའི་ཕྱིར་དགོས་པ་མེད་པས་སོ།། །།དྲུག་པ་རྒྱས་བཏབ་པ་ལ་རིགས་བདག་གི་རྒྱས་བཏབ་དང༌། རྡོ་རྗེ་བཞིའི་རྒྱས་བཏབ་བོ།། དང་པོ་ནི། དབང་བདུན་མ་བླངས་ན། སྐུ་གསུང་ཐུགས་བྱིན་རླབས་ཀྱི་རྗེས་ཐོགས་ཉིད་དུ་འདི་བྱ་ཞིང༌། དབང་བདུན་པ་བླངས་ན། ཆུ་ཅོད་ཀྱི་དབང་ལ་སོགས་པ་གནས་སྐབས་གཞན་དུ་ཡང་རུང་བ་ཡོད་མོད་ཀྱི། གཙོ་བོར་རྗེས་གནང་གི་འཇུག་ཏུ་བྱེད་པ་ཉིད་ཕྱག་ལེན་ཡིན་ཞིང་ལགས་སོ། །ཁ་ཅིག་དབང་མ་བསྐུར་བའི་གོང་དུ་རིགས་བདག་གི་རྒྱས་འདེབས་བྱེད་ཅིང༌། བྱིས་དབང་བསྐུར་བྱེད་པ་ནི། གསང་སྔགས་ཀྱི་ཆོ་ག་སྤྱི་ལུགས་དང་འགལ་བའི་རང་ག་མ་ཡིན་ནོ། །འདིར་གཙོ་བོ་ཡབ་ཡུམ་ལ་རང་གི་རང་བཞིན་གསལ་བར་མཚོན་པའི་དབུ་རྒྱན་རང་ཆས་མ་གཏོགས། རིགས་བདག་གིས་རྒྱས་འདེབས་མེད་པ་དང༌། འཁོར་དེ་བཞིན་གཤེགས་པ་བཞིའམ་བརྒྱད་ལ་རང་རིགས་ཀྱིས་རྒྱས་མི་འདེབས་པར་གཞན་རིགས་ཀྱིས་རྒྱས་འདེབས་པ་ནི། རྣམ་པར་སྣང་མཛད་ལ་མི་
བསྐྱོད་པས་རྒྱས་འདེབས་ཏེ། རྣམ་སྣང་གཟུགས་ཕུང་དང་མི་བསྐྱོད་པ་སེམས་ཀྱི་དག་པ་ཡིན་ལ། གཟུགས་ནི་སེམས་ཀྱི་སྣང་བར་བྱེད་པ་སྟེ། དང་པོར་སེམས་ཀྱི་མཐུ་ལས་གཟུགས་གྲུབ་པ་དང༌། ཕྱིས་དུས་མཉམ་དུ་ཡང་སེམས་དང་བྲལ་ན་ལུས་ཀྱི་བྱ་བ་མི་བྱེད་པའི་ཕྱིར། ལུས་ཀྱི་བྱ་བ་ཐམས་ཅད་སེམས་ལ་བལྟོས་པས་ན། སེམས་ནི་རྟེན་དང་ལུས་ནི་བརྟེན་པ་ཡིན་པས་བརྟེན་པ་ལ་རྟེན་གྱིས་རྒྱས་བཏབ་པ་སྟེ། ལུས་ལ་སེམས་ཀྱི་རྒྱ་ཞེས་གཞན་ལས་གྲགས་པ་དང་འདྲའོ། །སྣང་བ་མཐའ་ཡས་ལ་རྣམ་སྣང་གིས་རྒྱས་བཏབ་པ་ནི། ལུས་མེད་པ་ལ་ངག་མི་འབྱུང་སྟེ། ངག་གི་སོ་སོར་སྣང་བ་ཐམས་ཅད་ལུས་ཀྱི་བྱེད་པ་ལ་རག་ལས་པའི་ཕྱིར། ངག་དག་པ་སྣང་བ་མཐའ་ཡས་ལ་ལུས་དག་པ་རྣམ་སྣང་གིས་རྒྱས་འདེབས་ པའོ། །རིན་ཆེན་འབྱུང་ལྡན་ལ་འོད་དཔག་མེད་ཀྱིས་རྒྱས་འདེབས་ནི། འོད་དཔག་མེད་ཆུ་ཁམས་དང༌། རིན་ཆེན་འབྱུང་ལྡན་ཁྲག་དག་པ་ཡིན་ཏེ། ཁྲག་ནི་གཤེར་བའི་ཆོས་ཅན་ཆུ་ལས་བྱུང་བའི་ཕྱིར་རྒྱུ་འབྲས་དང༌། དོན་གྲུབ་ལ་རིན་འབྱུང་གི་རྒྱ་ནི། རིན་འབྱུང་ཁྲག་དང་དོན་གྲུབ་ཤ་དག་པ་ཡིན་ཞིང༌། ཤ་ནི་ཁྲག་ལས་བྱུང་བའི་ཕྱིར་འདི་ཡང་རྒྱུ་འབྲས་ཀྱི་རྒྱའོ། །འབྱུང་བའི་ཁམས་དང་སྦྱར་ན་རླུང་མེ་ཆུ་ས་རྣམས་སྔ་མ་སྔ་མ་ལ་ཕྱི་མ་ཕྱི་མས་རྒྱས་བཏབ་ཅིང༌། ས་ལ་ནམ་མཁའི་རྒྱས་གདབ་བོ།། དེ་དག་ནི་ད་ལྟ་དཀྱིལ་འཁོར་ལ་དངོས་སུ་བཀོད་པས་རྩོད་པ་མེད་ལ། རྡོར་སེམས་མི་བསྐྱོད་པ་གཉིས་ནི། རིགས་ཉེ་ཚེ་བ་ཡིན་ན་རིགས་བདག་ཐུགས་རྡོ་རྗེ་སྐུ་མདོག་མཐིང་ནག་ས་གནོན་མཉམ་གཞག་ཅན་གྱིས་རྒྱས་འདེབས་པ་ཡིན་ལ། ཐུགས་རྡོ་རྗེ་དེ་ཡང་ཕྱག་སྟངས་རྣམ་པ་མི་བསྐྱོད་པ་འདྲ་མོད་ཀྱང༌། དོན་ལ་
རིགས་ཀུན་འདུས་དང་ནམ་མཁའ་ཡེ་ཤེས་གཉིས་འདྲེས་གཙོ་ཆེ་ཙམ་ཡིན་མོད་ཀྱི། མི་བསྐྱོད་པ་ཁོ་ན་མིན་ནོ། །ཡང་ན་ནམ་མཁའ་དང་ཡེ་ཤེས་གཉིས་ཕན་ཚུན་གཅིག་ལས་གཅིག་བྱུང་བའི་ཕྱིར། མི་བསྐྱོད་པ་ལ་རྡོར་སེམས་སྔོན་པོ་དང༌། རྡོར་སེམས་ལ་མི་བསྐྱོད་པ་ལྗང་ཁུས་རྒྱས་འདེབས་སོ། །དེ་ལ་མཚན་མ་སོ་གཉིས་ཀྱི་དཀྱིལ་འཁོར་དང་ཐུགས་དཀྱིལ་ཉེར་ལྔ་པའི་ནང་ཚན་གཅིག་སོགས་དཀྱིལ་འཁོར་གྱི་རྣམ་གྲངས་འགའ་ཞིག་ཏུ་རིགས་ཀྱང་རྡོར་སེམས་དང་མི་བསྐྱོད་པས་གཙོ་བོ་མཛད་པའང་ཡོད་ཅིང༌། པདྨ་གདན་ཅན་དང༌། རྒྱུ་སྐར་གྱི་དཀྱིལ་འཁོར་སོགས་སུ་དེ་གཉིས་གང་རུང་གཅིག་འཁོར་ལ་དངོས་སུ་བཀོད་པ་རྣམས་ལ་འདི་དགོས་པས་སྐབས་འདིར་ཞོར་བྱུང་ཐབས་སུ་གསུངས་པ་ཡིན་གྱི། གསུང་དབང་གི་སྐབས་འདིར་ནི་མི་དགོས་ཏེ། རྒྱས་གདབ་ཀྱི་ཚབ་དབུ་རྒྱན་རང་ཆས་ཀྱི་རྡོ་རྗེ་སེམས་དཔའ་ཡབ་ཡུམ་དཀྱིལ་འཁོར་རྒྱལ་མཆོག་ཏུ་སོང་ལ། མི་བསྐྱོད་པ་ཡབ་ཡུམ་ལས་རྒྱལ་མཆོག་གི་ཐོག་མར་སོང་བའི་ཕྱིར་དང༌། གཙོ་བོ་ཡབ་ཡུམ་གྱི་སྐུ་ལ་དེ་དག་འགོད་པར་ནི་མི་བྱེད་མོད། བཀོད་ཀྱང་ཀུན་ཁྱབ་ཀྱི་རིགས་ཡིན་པའི་ཕྱིར་རྒྱས་བཏབ་མི་འཐད་པས་སོ། །གང་ལྟར་ནའང་རྒྱས་གདབ་བྱ་དམ་ཡེ་དབྱེར་མེད་ཀྱི་དཀྱིལ་འཁོར་གྱི་ལྷའི་ནང་ནས། རིགས་དྲུག་པོ་དེ་དག་གང་དུ་བྱུང་ཡང་འདྲ་སྟེ། དབུ་སྐྲ་རལ་པའི་ཐོར་ཚུགས་ཅན་ཡིན་ལ། དེ་ལ་རྒྱས་བཏབ་པའི་རིགས་བདག་དྲུག་པོ་ནི། རབ་བྱུང་ཆགས་བྲལ་གྱི་ཆ་བྱད་གཙུག་ཏོར་དང་ཆོས་གོས་འཛིན་པའོ། །དེ་ཡང་དག་པའི་ཕུང་པོ་ཞེས་གསུངས་པས། རང་བཞིན་རྣམ་དག་གདོན་ནས་དྲི་མ་དང་བྲལ་བའི་ཆོས་ཀྱི་དབྱིངས་འགྱུར་བ་མེད་པའི་ཡེ་ཤེས་ཀྱི་རང་བཞིན་དོན་དམ་ཕུང་པོ་ལྔ་ནི་
སྤྲོས་པ་ཐམས་ཅད་དང་བྲལ་བའི་ཕྱིར། རྒྱན་སྤངས་པའི་རིགས་བདག་རྒྱལ་བ་རིགས་དྲུག་གིས་མཚོན་ལ། རྒྱས་གདབ་བྱ་ལྔ་པོ་ནི་སྐབས་འདིར་ཀུན་རྫོབ་ལམ་བདེན་གྱིས་བསྡུས་པའི་ཡེ་ཤེས་ཀྱི་རང་བཞིན་ཕུང་པོ་དྲུག་པོ་ཉིད་མཚོན་པ། དོན་དམ་དབྱིངས་ལས་ལམ་གྱི་ཡེ་ཤེས་འབྱུང་བ་མཚོན་པའི་ཕྱིར། དེས་དེ་དག་ལ་རྒྱས་གདབ་པའོ། །ལྷག་མ་གཞན་ལྷ་ཚོགས་ཐམས་ཅད་ལ་རིགས་དྲུག་པོ་རལ་བའི་ཐོར་ཚུགས་དང་བཅས་ཤིང་རྒྱན་དང་ལྡན་པ་ཆགས་ཅན་གྱི་སྐུས་རྒྱས་འདེབས་ཏེ། ཁ་དོག་མཐུན་པ་ལྗང་ཁུ་རྣམས་ལ་མི་བསྐྱོད་པ་སོགས་ཏེ། འདི་ནི་རྒྱུད་གཞན་དགྱེས་རྡོར་སོགས་ལ་གྲགས་པའི་ངོ་བོ་ཉིད་ཀྱི་རྒྱ་ཡིན་ཏེ་རྟོགས་པར་སླའོ། ཁ་ཅིག་རྒྱལ་བ་རིགས་དྲུག་གིས་རྒྱས་འདེབས་ལ་ནང་གི་རྩ་དྲུག་སོགས་དང་སྦྱར་བའི་བཤད་པ་བྱེད་ཀྱང་བློས་བཏགས་ཙམ་དུ་གསལ་བར་མངོན་ལ། འོད་དཔག་མེད་དང་རིན་འབྱུང་ཚོར་བ་འདུ་ཤེས་སམ། རོ་མ་དང་རྐྱང་མ་གྲོགས་དང་གྲོགས་ཅན་ཡིན་ཟེར་བའང༌། སུ་གྲོགས་དང་གང་གྲོགས་ཅན་ཡིན། ཕན་ཚུན་ངེས་མེད་དུ་ཐལ་བར་འགྱུར་བས་མི་རིགས་སོ། །ཡང་འགྲེལ་ཆེན་ལས་འདི་སྐད་གསུངས་ཏེ། འདིར་མཆོག་གི་དང་པོའི་སངས་རྒྱས་ཀྱི་དཀྱིལ་འཁོར་དུ་ཅོད་པན་དག་ལ་ཕན་ཚུན་རྡོ་རྗེ་ཡི་ནི་རྡོ་རྗེར་འགྱུར་ཏེ་དེ་ཅིའི་ཕྱིར་ཞེ་ན། ཡེ་ཤེས་དང་རྣམ་པར་ཤེས་པ་ཕན་ཚུན་ཡང་དག་པར་སྦྱོར་བའི་ཕྱིར་རོ།། དེ་བས་ན་ཡེ་ཤེས་ཀྱི་རྣམ་པར་ཤེས་པ་དང༌། རྣམ་པར་ཤེས་པ་ཡེ་ཤེས་ལ་སྟེ་གཉིས་ཀའི་སྤྱི་བོ་ལ་ཐུགས་རྡོ་རྗེ་ཆོས་གོས་དང་གཙུག་ཏོར་འཛིན་པ་རྡོ་རྗེ་སྐྱིལ་ཀྲུང་གིས་གནས་པ་ས་ལ་རེག་པའི་ཕྱག་རྒྱས་དེ་བཞིན་གཤེགས་པའི་དབུགས་དབྱུང་བས་སོ། །ངོ་བོ་ཉིད་ཀྱི་རིགས་ལ་ནི། རིགས་
ལྔས་རྒྱས་གདབ་པ་བཀག་སྟེ་སངས་རྒྱས་རྣམས་ཀྱི་སྐྱེད་པར་བྱེད་པ་པོ་ཡིན་པའི་ཕྱིར་རོ། །ཡང་ན་ཡེ་ཤེས་དང་རྣམ་པར་ཤེས་པའི་ཆོས་ཀྱིས་སངས་རྒྱས་ལྔའི་བདག་ཉིད་ཀྱི་ཅོད་པན་ནི་རེས་འགའ་ནའོ། །ཞེས་པ་ངེས་པའོ། །ཞེས་གསུངས་ཏེ། གཉིས་ཀའི་སྤྱི་བོ་ལ་ཞེས་པ་གཙོ་བོ་ཡབ་ཡུམ་ལ་འཆད་པ་ནི་ཤིན་ཏུ་བླུན་ཏེ་མི་འཐད་པར་བཤད་ཟིན། ནུས་མ་རྣམས་ལའང་དབུ་རྒྱན་རང་ཆས་ཉིད་ཀྱི་ཕྱིར་རྒྱས་གདབ་མི་དགོས་ལ། དགོས་པར་འདོད་ན་ཁ་དོག་སོ་སོ་ཡིན་པའི་ཕྱིར། རྡོ་རྗེ་སེམས་དཔའི་ཅོད་པན་དང་འགལ་བར་འགྱུར། དེས་ན་རིགས་བྱེ་བྲག་པའི་མི་བསྐྱོད་རྡོར་སེམས་གཉིས་ཡིན་པ་ལ། ཐུགས་རྡོ་རྗེ་དེ་ཡང་རྡོར་སེམས་ལ་ནམ་མཁའ་དང༌། མི་བསྐྱོད་པ་ལ་ཡེ་ཤེས་ཀྱི་རིགས་སུ་འགྱུར་རོ། །ངོ་བོ་ཉིད་ཀྱི་རིགས་ལ་ཞེས་པའི་སྐབས་སུ་ཁ་ཅིག་ངོ་བོ་ཉིད་ཀྱི་དོན་ཆགས་བྲལ་གྱི་རྣམ་པ་ཅན་ལ་འཆད་པ་ནི། རྒྱུ་མཚན་མེད་ཅིང་དཀྱིལ་འཁོར་དངོས་ཀྱི་ལྷ་ལ་དེ་འདྲའི་རྣམ་པ་ཡང་མེད་པས། དཔྱད་གཞི་མ་གྲུབ་པའི་ཕྱིར་འབྲེལ་མེད་ཀྱི་ཚིག་ཡིན་ལ། ཁ་ཅིག་སངས་རྒྱས་རིགས་དྲུག་ཉིད་ལ་འཆད་དེ། རང་འདྲའི་རྒྱས་བཏབ་བཀག་ཟེར་པའང༌། རྣམ་སྣང་སོགས་བཞི་པོ་ལ་སངས་རྒྱས་ཀུན་གྱི་སྐྱེད་པ་པོའི་ཐ་སྙད་སྐབས་འདིར་འཇུག་པ་ནམ་ཡང་མེད་པས་མི་རིགས་ཤིང༌། སྤྱིར་ཡང་རིགས་ཀུན་འདུས་ཀྱི་རྡོར་སེམས་ལ་སྐྱེད་པ་པོ་དང༌། མི་བསྐྱོད་པ་ལ་རྒྱལ་བའི་བདག་པོར་བཤད་ཀྱི། རིགས་བྱེ་བྲག་པའི་དེ་གཉིས་ལ་ཐ་སྙད་དེ་འཇུག་པ་ཉུང་ངོ༌། །གཞན་འགའ་ངོ་བོ་ཉིད་ཡེ་ཤེས་ཀྱི་ཕུང་པོའི་རིགས་རྡོར་སེམས་ལ་རིགས་ལྔ་རལ་པའི་ཅོད་པན་ཅན་གྱིས་རྒྱས་བཏབ་བཀག་ཟེར་བ་ནི། དཔྲལ་བ་སྤུ་སྐྱེས་ཀྱི་དཔེས་འཁྱོག་བཤད་ཁོ་ན་ཡིན་ཏེ། རྡོར་སེམས་ལས་
གཞན་རིགས་ལྔ་པོ་རྣམས་ལའང༌། རིགས་བདག་རལ་པ་ཅན་མེད་པའི་ཕྱིར་རོ། །དེའི་ཕྱིར་ཡང་ན་ཞེས་སོགས་ཀྱང་རིགས་བྱེ་བྲག་པའི་དབང་དུ་བྱས་པ་སྟེ། རྡོར་སེམས་དང་མི་བསྐྱོད་པ་ཕན་ཚུན་རྒྱས་བཏབ་བྱེད་པ། དེའི་ཚེ་རྡོར་སེམས་ལ་རིགས་ལྔའི་ནང་ཚན་མི་བསྐྱོད་པས་རྒྱས་འདེབས་པའི་ཕྱིར་རོ། །སྐབས་འདིའི་རྒྱུད་འགྲེལ་དུ་རལ་པའི་ཅོད་པན་ཅན་གྱི་ལྷ་དྲུག་ཅེས་གསུངས་པ་ནི། དྲག་པོ་དབང་ཕྱུག་ཆེན་པོའི་རྒྱུད་ལས། རལ་པ་ཅན་གྱི་ལྷ་དྲུག་གསུངས་པ་དེ་རྣམ་པར་སྦྱངས་པའམ། དེ་འདུལ་པའི་ཕྱིར་རིགས་དྲུག་རལ་པའི་ཅོད་པན་ཅན་ལ་ཆགས་བྲལ་གྱི་རྣམ་པས་སངས་རྒྱས་ཤཱཀྱ་ཐུབ་པའི་ངོ་བོ་ཆོས་གོས་ཅན་རིགས་དྲུག་གིས་རྒྱས་བཏབ་པས་གནས་སྐབས་སུ་ཡང་རལ་པ་ཅན་གྱི་ལྷ་དྲུག་པོའི་རྗེས་འབྲང་དེ་རྣམས་ཡང་དག་པའི་ལམ་ལ་འཇུག་པའི་མཁྱུད་དཔྱད་ཆེན་པོའོ། །རིགས་ལྔ་རལ་པ་ཅན་རྣམས་ལ་ཐ་མལ་པའི་ཕུང་པོ་ཞེས་གསུངས་པ་ན་དེའི་རིགས་རྒྱུན་ཡིན་པ་སྟེ། ཕུང་པོ་དྲུག་གནས་གྱུར་པའི་ལམ་བདེན་གྱི་ཡེ་ཤེས་སོ། །རལ་པ་ཅན་གྱི་ལྷ་དྲུག་ནི། དེ་མ་ཐག་པའི་ལྷ་དང༌། གཡོན་གྱི་ལྷ་དང༌། མི་འཇིགས་པ་དང༌། དེ་ཡི་སྐྱེས་བུ་དང༌། དབང་ལྡན་དང༌། དུས་ཀྱི་མེ་སྟེ་དེ་དག་རིམ་པས་ས་ཆུ་མེ་རླུང་མཁའ་ཡེའི་རང་བཞིན་དུ་འདོད་ལ། དེ་རྣམས་སྦྱོང་བ་ལ་རིམ་པས་སྣང་མཛད། སྣང་མཐའ། རིན་འབྱུང༌། དོན་གྲུབ། མི་བསྐྱོད། རྡོར་སེམས་རྣམས་ སོ། །རྡོ་རྗེས་རྡོ་རྗེ་ལ་རྒྱས་འདེབས་པ་ནི། སྤྱིར་རྡོར་སེམས་ལ་གྲི་གུག་གི་རིགས་ཞེས་ཀྱང་འདོགས་མོད་ཀྱི། སྐབས་འདི་སོགས་ཕལ་ཆེར་དུ་རྡོར་སེམས་རྡོ་རྗེ་རྩེ་གཅིག་པ་དང༌། མི་བསྐྱོད་པ་རྩེ་ལྔ་པ་ཉིད་ཀྱི་ཕྱིར། གཉིས་ཀར་ཡང་རྡོ་རྗེའི་རིགས་ཞེས་གཅིག་ཏུ་བསྡོམས་ནས།
རིགས་དྲུག་ཅེས་པ་དང་རིགས་ལྔ་ཞེས་པ་རྒྱ་ཆེ་ཆུང་མེད་པར་མཛད་པའི་སྐབས་མང་ངོ༌།། །།གཉིས་པ་རྡོ་རྗེ་བཞིའི་རྒྱས་བཏབ་ལ་སྐུའི་རྒྱས་བཏབ་ནི་ལྷ་སོ་སོའི་གཙུག་ཏོར་དུ་སོགས་ཏེ། ནམ་མཁའི་དཀྱིལ་འཁོར་ལྗང་ཁུ་དང་ཡེ་ཤེས་ཀྱི་དཀྱིལ་འཁོར་སྔོན་པོ་སྟེ་གཉིས་པོའང་ཟླུམ་པོ་ཡིན་ལ། ཟླ་ཉི་སྒྲ་དུས་གོ་སླ། ཨ་ཡིག་མི་བསྐྱོད་པ་ཞེས་སོགས་ཡི་གེ་དེ་ཉིད་ལྷའི་ངོ་བོར་སྒོམ་པ་ཡིན་ཞིང༌། འདི་རྣམས་ལྷ་ཡིན་པའི་དབང་དུ་བྱས་ནས་ཟླ་བ་ལ་སོགས་པའི་ལྷའི་གདན་ལ་བཀོད་པ་ཡིན་ནོ། །འདི་ནི་ལུས་ལ་ཁམས་དྲུག་གནས་པ་དེའི་རང་བཞིན་རྒྱལ་བ་རིགས་དྲུག་སྔར་ནས་ཡིན་ཡང་དེ་ཉིད་མངོན་དུ་གྱུར་པ་མཚོན་བྱེད་ཀྱི་རྟགས་ལྟ་བུའོ།། །།གཉིས་པ་སྲོག་གི་དག་པ་ནི། ལྷ་རྣམས་ཀྱི་ལྟེ་བ་སོགས་ཏེ་འདི་སྲོག་གི་དཀྱིལ་འཁོར་ལྔ་པོ་རྣམས་རང་བཞིན་གདོད་ནས་གསུང་གཞོམ་མེད་ཀྱི་སྒྲར་གནས་པ་དེ་འདིར་མངོན་དུ་གྱུར་པའི་མཚོན་བྱེད་དོ།། །།གསུམ་པ་ཐིག་ལེའི་རྒྱས་བཏབ་ནི། ལྷ་རྣམས་ཀྱི་དཔྲལ་བ་སོགས་ཏེ། ཟླ་བ་སོགས་བཞི་པོ་ཐིག་ལེ་བཞི་དང༌། ཡི་གེ་འབྲུ་བཞི་རྡོ་རྗེ་བཞི་ཡིན་པས་ཐིག་ལེ་བཞི་པོའི་རང་བཞིན་གདོད་ནས་སྐུ་བཞི་ཡིན་པ་དེ། སྐབས་འདིར་གསལ་བར་མངོན་དུ་གྱུར་པ་མཚོན་བྱེད་དོ།། །།བཞི་པ་ཡེ་ཤེས་ཀྱིས་རྒྱས་བཏབ་ནི། རྡོ་རྗེ་ནོར་བུར་སོགས་ཏེ་འཁོར་བའི་དུས་ཀྱི་འཛག་བདེ་ཆགས་རྟོག་བཞི་པའི་གནས་སྐབས་དེའི་རང་བཞིན་ཆོས་ཉིད་མི་འགྱུར་བའི་བདེ་བ་ཡིན་ཡང་མངོན་དུ་མ་གྱུར་ལ། དེ་ཉིད་སྐབས་འདིར་མངོན་དུ་གྱུར་པ་མཚོན་བྱེད་ཨ་ཡིག་གོ།དེ་ཡང་ཨ་ཡིག་ནི་མི་ཤིགས་པའི་ཡི་གེ་སྟེ་མཚོན་དོན་མཐའ་ཡས་པ་ཡོད་པའང་གོ་བར་བྱ་ལ། སྐབས་འདིར་ཨ་ཀྵར་མ་ཧཱ་སུ་ཁ་ཞེས་མི་འགྱུར་བའི་བདེ་བ་ཆེན་པོ་དང༌། ཨ་ཀཱ་ར་ཀཱ་ར་རྣམ་ཀུན་རྣམ་
མེད་དེ། ཡེ་ཤེས་རྣམ་པ་ཀུན་ལྡན་ཡང་ཡིན་ལས་སྣང་གི་རྣམ་པ་སྤངས་པའང་ཡིན་པའི་རྣམ་ཀུན་མཆོག་ལྡན་གྱི་སྟོང་ཉིད་དེ། ཨ་ཡིག་གིས་བདེ་སྟོང་དེ་གཉིས་ཟུང་དུ་འཇུག་པ་མཚོན། དེ་ཡང་དཀྱིལ་འཁོར་རྒྱས་པ་འདི་ལ་རྣལ་འབྱོར་བཞིའི་ཆོ་ག་རྒྱས་པ་སྦྱར་བའི་དབང་དུ་བྱས་ན་ནི། ད་དུང་ལྷའི་རྣལ་འབྱོར་བསྐྱེད་རིམ་ཀྱང་ཅུང་ཟད་མ་རྫོགས་ལ། དེ་བཞིན་དུ་དག་བྱ་དག་འབྲས་སོགས་ཀྱང་མ་རྫོགས་མོད་ཀྱི། སྤྱི་ཙམ་ནས་རིགས་བདག་གིས་རྒྱས་བཏབ་ཟིན་པས་ལྷའི་རྣལ་འབྱོར་བསྐྱེད་རིམ་གྱི་ཆོ་ག་ཡང་རྫོགས་ཤིང༌། སྦྱང་བྱ་དང་སྦྱངས་འབྲས་ཀྱང་ཆ་ཚང་བས་རིགས་བདག་རྒྱས་འདེབས་ཀྱི་རྗེས་སུ་དག་པ་གཉིས་ལྡན་དུ་གྱུར་པའི་རྟགས་རྡོ་རྗེའི་བཞིའི་རྒྱས་བཏབ་འདི་འབྱུང་བ་ཡིན་ནོ།། །།གཉིས་པ་ནི། དེ་ལྟར་བཤད་པའི་ལས་རྒྱལ་མཆོག་གི་གཞི་ལམ་འབྲས་བུའི་ཆོས་མཐུན་སྦྱོར་ཚུལ་ལ། དང་པོར་སྦྱང་བྱ་འཁོར་བའི་ཆོས་དང་སྦྱར་ན། མངལ་གྱི་གནས་སྐབས་ཟླ་བ་བཅུ་པ་དངོས་ལ། མངལ་ན་གནས་པའི་སེམས་ཅན་དེ་ཉིད་ཀྱི་ལུས་ངག་ཡིད་དང་ཐིག་ལེའི་ནུས་པ་བརྟས་ཤིང༌། རླུང་གི་ཆ་ཤས་ཀྱང་ཅུང་ཟད་རྒྱས་པས། རྩ་དབུ་མ་ཁེངས་ཏེ་དབྱུག་པ་འབྲེང་བ་ལྟར་གནས་པ་དང༌། ད་ལྟ་ཕྱི་རོལ་ཀྱི་སྣང་བ་མེད་ཀྱང་སེམས་ཀྱི་གསལ་སྣང་དུ་སྔོན་གྱི་ལུས་ངག་ཡིད་གསུམ་གྱི་སྤྱོད་པ་དྲན་པ་ཡོད་པ། དེ་དག་སྦྱོང་བྱེད་ནི་ཡིག་འབྲུ་ལྔ་དང༌། ཨ་ཝ་དྷཱུ་ཏཱི་སྒོམ་པའོ། །དེའི་ཚེ་ལྟེ་བ་ནས་མེ་རླུང་འདྲེས་པ་འབྱུང་ཞིང༌། སྔར་རླུང་རྣམས་རང་གནས་སུ་གནས་ཤིང་གཡོ་བ་ཙམ་ལས། གཞན་ཕྱི་རོལ་ཏུ་རྒྱུ་བ་ལྟ་ཞོག རྩ་གནས་ཕན་ཚུན་དུ་འཕོ་བ་ཡང་ཆེར་མི་བྱེད་པ་ལས། ལྟེ་བའི་མེ་རླུང་དེས་སྐབས་འདིར་དེ་རྣམས་དཀྲུགས་ཤིང་སྲུབ་པར་བྱེད་དེ། དེ་ནི་ཧོཿཡིག་གི་འོད་ཀྱིས་བཞུ་བས་
སྦྱོང་ངོ༌། །དེ་ནས་རེ་ཞིག་སེམས་ཅན་དེ་ཚོར་བ་དྲག་པོའི་རྐྱེན་གྱིས་དྲན་མེད་དུ་འགྱུར་ཞིང༌། མགོ་རྐང་ཟློག་པར་འགྱུར་བ་ནི་ཐིག་ལེའི་ཚུལ་དུ་ཞུ་བས་སྦྱོང་ངོ། །དེར་ད་ལྟར་རླུང་དངོས་སུ་ཕྱི་རོལ་ནི་མི་རྒྱུ་ཡང༌། ད་ནི་མྱུར་དུ་རྒྱུ་བའི་སྔ་ལྟས་སུ་སྔར་ཧོཿཡིག་གི་འོད་ཀྱིས་དཀྲུགས་པའི་རྐྱེན་གྱིས་འབྱུང་བ་ལྔའི་རླུང་ཕྱོགས་ཕྱོགས་སུ་གནས་ནས། ལྟེ་བར་ས། སྙིང་གར་ཆུ། མགྲིན་པར་མེ། གཙུག་ཏོར་དུ་ནམ་མཁའི་རླུང་རྣམས་འདུས་ཤིང་སྣ་སྒོར་མ་སོན་ཀྱང་གནས་དེ་དག་ཏུ་རབ་ཏུ་གཡོ་ཞིང་རྒྱུ་བ་ལ་མངོན་དུ་ཕྱོགས་པ་ནི། གླུས་བསྐུལ་བས་སྦྱོང༌། དེ་ལ་འཁོར་ལོ་ལྔ་དང་ལྷ་མོ་ལྔ་སྦྱོར་ཏེ། འདིར་ནི་རླུང་དེ་རྣམས་བསྐྱོད་པའི་རྐྱེན་གྱིས་སྔར་དྲན་མེད་དུ་བརྒྱལ་བ་ལས་ཅུང་ཟད་ཅུང་ཟད་གསལ་སྣང་སྐྱེ་བའོ། །དེའི་འོག་ཏུ་མཁའ་ཁམས་ཀྱི་རླུང་ཤིན་ཏུ་སྟོབས་དང་ལྡན་པས་གཙུག་ཏོར་དུ་དྲངས་པ་དང༌། དེས་སྙིང་གའི་རྩ་བཅུ་ཁྱབ་ཅིང༌། འཁོར་ལོ་བཞིའི་ལྟེ་བ་ནས་ཀྱང་རབ་ཏུ་གཡོ་བ་དང་བཅས་ཏེ་གྱེན་དུ་ཕྱོགས་ནས་ནམ་མཁའི་རླུང་གི་གནས་ཀྱི་གཙོ་བོ་གཙུག་ཏོར་བརྒྱུད་དེ། སྣའི་རྩ་བར་འོངས་པའི་བར་ནི་མངལ་སྒོར་ལག་པ་དང་གདོང་མངོན་དུ་ཕྱོགས་པའི་དུས་ཏེ། གཙོ་བོ་ཡབ་ཡུམ་ནུས་མ་རྡོ་རྗེ་བཞི་དང་བཅས་པས་སྦྱོང་བར་བྱེད་དོ། །དེའི་ཚེ་ཕྱི་རོལ་ཀྱི་རླུང་ཕྲ་མོ་ཞིག་སྣ་ནང་དུ་འཇུག་སྟེ། དེ་ནི་དཀྱིལ་འཁོར་གཙོ་བོའི་སྐུ་ལ་བསྡུ་བས་སྦྱོང་བར་བྱེད་དོ། །ཕྱི་རོལ་ཀྱི་རླུང་ནང་དུ་འོངས་པ་དེ་ནང་དུ་མ་ཐིམ་ཞིང་མི་གནས་པར་ཕྱིར་སོང་བ་ན་དེས་དྲངས་ཏེ་རླུང་གཞན་རྣམས་ཀྱང་སྣ་སྒོ་ནས་རྒྱུ་བར་བྱེད་དེ། སྐབས་འདིར་བོད་རྣམས་དམ་ཚིག་པ་བསྐྱེད་པ་དང༌། ཡེ་ཤེས་པ་སྤྱན་འདྲེན་པ་གཉིས་ཀྱི་སྦྱང་བྱ་སྔ་ཕྱིར་སྤེལ་བར་འདོད་པ་དང༌། སྔ་ཕྱི་ངེས་ཅན་དུ་འདོད་པ་དང༌། དུས་མཉམ་གྱི་རིགས་སུ་འདོད་པ་སྟེ་གསུམ་བྱུང་ངོ༌། །རང་ལུགས་ཕྱི་མ་
ལྟར་ཡིན་མོད། གང་ལྟར་ཡང་རླུང་ཐམས་ཅད་ཀྱི་སྣེ་འདྲེན་པ་ལ་རླུང་གི་གཙོ་བོ་ཤིན་ཏུ་གཡོ་བའི་རླུང་གཅིག་གིས་བྱེད་དགོས་པ་ལས་ཡེ་ཤེས་གཡོ་བ་མིན་ཞིང༌། འབྱུང་བཞི་གཙོ་བོ་མིན་པས་གཙོ་བོ་དང་གཡོ་བའི་གཞི་མཐུན་པ་ནམ་མཁས་བྱེད་ལ། རྒྱུ་བ་ན་དངས་མ་ཁ་བུན་དུ་རྒྱུག་པ་དང༌། ཤིན་ཏུ་གཙོ་བོ་ཉིད་ཀྱི་ཕྱིར་ཡེ་ཤེས་ཀྱི་རླུང་ཐོག་མར་རྒྱུའོ། །དེ་ནི་རྡོར་སེམས་སྤྲོ་བསྡུས་སྦྱོང་ཞིང༌། དང་པོར་དབུ་མའི་རླུང་ཡེ་ཤེས་ཀྱི་ཁམས་ང་དྲུག་རྐང་བཅས་རྒྱུ་ཞིང༌། དེ་རྗེས་གཡས་དང་གཡོན་གྱི་དབྱེ་བས་ནམ་མཁའ་རླུང་མེ་ཆུ་སའམ། ས་ཆུ་མེ་རླུང་ནམ་མཁའི་རིམ་པས་རླུང་རྒྱུ་བ་ན། རྩ་གནས་ཐམས་ཅད་ནས་རླུང་རྒྱུ་བར་འགྱུར་ཏེ་སྙིང་ག་ལས་གྱེས་པའི་རྩ་དང༌། གཙུག་ཏོར་དང་དཔྲལ་བ་ནས་རྒྱུ་བའི་རླུང་འབབ་པ་ནི། སངས་རྒྱས་ཡབ་ཡུམ་དང༌། མགྲིན་པའི་འཁོར་ལོ་དང༌། དབང་པོ་དང༌། ལས་དབང་གི་འཁོར་ལོ་ལ་འབབ་པའི་རླུང་རྒྱུ་བ་ནི། སེམས་དཔའ་ཡབ་ཡུམ་ཐུགས་དཀྱིལ་གྱི་ཁྲོ་བོར་བཅས་པ་རྣམས་དང༌། མགྲིན་པའི་ལྷག་མ་དང་ལྟེ་བའི་རྩ་འདབ་ལ་གནས་པའི་རླུང་འབབ་པ་ནི་གསུང་གི་རྣལ་འབྱོར་མ་རྣམས་དང༌། ལས་ཀྱི་འཁོར་ལོ་བཅུ་གཉིས་ལ་གནས་པའི་རླུང་འབབ་པ་ནི། ཚེས་ལྷ་རྣམས་དང༌། གསང་བའི་འཁོར་ལོར་གནས་པའི་རླུང་འབབ་པ་ནི། སྐུའི་སྒོ་སྐྱོང་རྣམས་དང༌། བྱ་བའི་འཁོར་ལོ་ལ་གནས་པའི་རླུང་འབབ་པ་ནི་ཀླུ་དང་རབ་གཏུམ་མ་རྣམས་དང༌། རྩ་ཕྲན་མ་ངེས་པ་རྣམས་ཀྱི་རླུང་འབབ་པ་ནི། གཟུངས་མ། འདོད་མ། ཕྱིར་འདོད་མ། གྲུབ་པ་འབྱུང་པོའི་ཚོགས་དང་བཅས་པས་སྦྱོང་བར་བྱེད་དོ། །དེ་ཡང་སྔར་རྩ་གནས་རྣམས་སུ་རླུང་རྣམས་བག་ལ་ཞ་བའི་ཚུལ་གྱིས་གཡོ་འགུལ་མི་མངོན་པར་གནས་པ་ལས། སྣ་སྒོ་ནས་དཀྱིལ་འཁོར་ལྔ་རྒྱུ་བས་རྐྱེན་བྱས་ཏེ། རྩ་
གནས་ཐམས་ཅད་དུ་འགྲོ་འོང་གི་སྒོ་ནས་རླུང་གི་རྒྱུ་བ་འགྲོ་འོང་རགས་པ་མངོན་དུ་གྱུར་པ་ནི། སྐབས་འདིར་རླུང་སྐྱེས་པ་ཞེས་བྱ་བའི་ཐ་སྙད་སྦྱོར་རོ། །ཡང་མཁའ་ཡེ་བསྡོམས་ནས་ལྷ་ཐམས་ཅད་ཁམས་ལྔར་འདུས་པ་ཡིན་པས། དེ་རྣམས་རླུང་གི་དཀྱིལ་འཁོར་ལྔ་འབབ་པས་སྦྱོང་བར་བྱེད་དོ། །ཞེས་བསྡུས་ཏེ་བཤད་ཀྱང་ཆོག་གོ །སྐབས་འདིར་སྦྱང་བྱ་ལ་གཞན་ཕལ་ཆེར་འདོད་པ་ལྟར་རླུང་ཁོ་ནའམ་ཞེ་ན་མ་ཡིན་ཏེ། སྦྱང་བྱའི་ངོ་བོ་གནས་སྐབས་དེ་དང་དེའི་ཕུང་ཁམས་མཐའ་དག་གི་ཚོགས་པའམ། ལུས་ངག་སེམས་ཡེ་ཤེས་བཞིའི་ཚོགས་པ་ཉིད་ཡིན་ལ། དེའི་ཁྱད་ཆོས་རླུང་གི་རྒྱུ་བས་དབང་བསྒྱུར་བ་སྟོབས་དང་ལྡན་པས་ཁྱད་པར་དུ་བྱས་པ་སྟེ། དེའི་ཕྱིར་ཐུན་མོང་མ་ཡིན་པའི་རྟགས་མཚན་ཡིན་པའི་སྒོ་ནས། སྦྱང་བྱ་རླུང་རྒྱུ་བ་གཙོ་བོ་ཡིན་ནོ་ཞེས་བརྗོད་པ་ཡིན་ནོ། །འདིས་རྒྱལ་མཆོག་དང་པོ་ལ་ཡང་རིགས་འགྲེ་སྟེ། ཕུང་ཁམས་ཀྱི་ཚོགས་པའམ། ལུས་ངག་ཡིད་ཀྱི་ཚོགས་པ་ནི་སྦྱང་བྱའི་ངོ་བོ་དང༌། གནས་སྐབས་སོ་སོར་རྩ་སོ་སོ་འགྲུབ་པས་ཁྱད་པར་དུ་བྱས་པ་ནི། རྟགས་དང་མཚན་མ་དང་ཁྱད་ཆོས་ཡིན་གྱི། རྩ་ཁོ་ན་སྦྱང་བྱར་འཇོག་པ་མ་ཡིན་ནོ། །དེ་ལྟར་དཀྱིལ་འཁོར་མཁའ་སྤྲོ་དང་ཡེ་ཤེས་དགུག་གཞུག་གི་སྐབས་འདི་དག་ནི། སྔར་མིག་གིས་སྤྱོད་ཡུལ་དུ་མ་གྱུར་པ་ལས། སྐབས་དེར་བྱིས་པ་གཅེར་བུ་ཡང་ཡིན་ལ། ཁྲུ་མའི་ཆོས་གོས་ཀྱང་འཛིན་པའི་འགལ་བ་འདུ་བ་ཅན་སྲོག་ཕྱིར་རྒྱུ་བའི་འགོ་བརྩམས་པ་དང་དབང་པོ་ཡུལ་ལ་སང་བཞིན་པ་ལྷ་སྤྲོ་བ་དང་འདྲ་བར་ངུ་བའི་ཚུལ་གྱིས་ངག་འབྱིན་པ་དང་ཆོས་མཐུན་ནོ། །འདིར་རང་ལུགས་ལ་མཁའ་ནང་གི་དཀྱིལ་འཁོར་སྤྲོ་བ་མན་ཆད་ཀྱི་དམ་ཚིག་སེམས་དཔའ་བསྐྱེད་པའི་སྦྱང་བྱ་དང༌། རྡོ་རྗེ་ཤུགས་སྤྲོ་བ་ནས་བརྩམས་
ཡེ་ཤེས་དགུག་གཞུག་རོ་མཉམ་བར་གྱི་སྦྱང་བྱ་རྣམས་བྱེད་ལས་དང་མཚན་ཉིད་ཐ་དད་པའི་དབང་ལས་ཡིན་གྱི། དུས་སྔ་ཕྱི་ཡོད་པ་ནི་མ་ཡིན་ཏེ། རྡོ་རྗེ་སེམས་དཔའ་སྤྲོས་ནས་རང་ལ་ཐིམ་པ་དང༌། རྡོ་རྗེ་ཤུགས་སྤྲོ་བ་སྦྱང་བྱ་དུས་མཉམ་ཞིང་དངོས་པོ་ཡང་གཅིགདགུག་གཞུག་བཅིང་མཉེས་རོ་མཉམ་ལྔ་པོ་དང༌། ཁམས་ལྔའི་བདག་ཉིད་ཀྱི་དཀྱིལ་འཁོར་སྤྲོ་བ་ནི་སྦྱང་བྱ་སྤྱི་ལྡོག་ནས་ངོ་བོ་གཅིག་ལ། དགུག་གཞུག་སོགས་ཀྱི་སྔ་ཕྱིའི་གོ་རིམ་ཇི་ལྟ་བ་དང་དཀྱིལ་འཁོར་སྤྲོ་བའི་སྔ་ཕྱིའི་རིམ་པ་ནི་མི་སྦྱོར་ཏེ། ཁམས་ལྔའི་ལྷ་ཚོགས་རྣམས་ཁམས་སོ་སོ་སྡེ་ཚན་དུ་བྱས་ནས་མི་སྤྲོ་བར་ལྷ་རིགས་སོ་སོའི་སྡེ་ཚན་དུ་སྤྲོས་པས་ཁམས་ཀྱི་གོ་རིམ་འཚོལ་བར་ཡོད་པའི་ཕྱིར་རོ། །སྦྱང་བྱའི་རིམ་པ་འདི་དག་གི་ཕྱིར་ཡང་ལས་རྒྱལ་མཆོག་གི་མཁའ་དཀྱིལ་གྱི་གཙོ་བོ་རྡོར་སེམས་ཁོ་ན་ཡིན་གྱི་མི་བསྐྱོད་པ་མ་ཡིན་ཏེ། དེ་ཡིན་ན་གཡས་གཡོན་གང་རུང་གི་ནམ་མཁའི་དཀྱིལ་འཁོར་དང་སྦྱོར་དགོས་པ་ལས། འདི་ནི་ཡེ་ཤེས་ཀྱི་རླུང་དབུ་མའི་དབུགས་དང་སྦྱོར་དགོས་པའི་ཕྱིར། ཡེ་ཤེས་ཀྱི་ཁམས་དག་པའི་དཔལ་རྡོ་རྗེ་སེམས་དཔའ་ཉིད་དོ། །དུས་འཁོར་གྱི་བསྐྱེད་རིམ་རྣམ་བཤད་བྱེད་པ་ཕྱིས་བྱུང་བ་དག་གིས་ནི། དམ་ཚིག་གི་དཀྱིལ་འཁོར་བསྐྱེད་པ་དང༌། ཡེ་ཤེས་སྤྱན་འདྲེན་གྱི་སྦྱང་བྱའི་དབྱེ་བ་དམིགས་ཕྱེད་པར་ཅུང་ཟད་ཀྱང་མ་གོ་བ་ཤ་སྟག་སྟེ། གླུས་བསྐུལ་ཉིད་ལ་དཀྱིལ་འཁོར་ལྔའི་རླུང་རྒྱུ་བ་སྦྱོར་བ་ལྟར་བྱེད་པ་དང༌། གཙོ་བོ་བཞེངས་པ་ནས་བརྩམས་ཏེ་སྣ་སྒོ་ནས་རླུང་རྒྱུ་བ་དང༌། དབང་པོ་ཡུལ་ལ་སད་ཚུལ་དང་སྦྱོར་ཞིང༌། གླུས་བསྐུལ་ཡང་དབང་པོ་ཡུལ་ལ་སད་པའི་ཕྱིར་དུ་འདོད་ལ། ཡང་དེའི་རྗེས་སུ་ནི་དམ་ཚིག་བསྒོམ་པ་
ཡན་ཆད་མངལ་ནས་བཙས་མ་ཟིན་པ་ལྟར་བྱས་ནས་བཙས་མ་ཐག་ཏུ་ང་དྲུག་རྐང་བཅས་འབབ་པ་དང༌། སྔར་དབང་པོ་ཡུལ་ལ་མ་སད་པ་སྐབས་དེར་སད་ཚུལ་ཡེ་ཤེས་དགུག་གཞུག་དང་སྦྱོར་བའི་བརྗོད་པ་མང་པོ་སྔ་ཕྱི་འགལ་བ་རིབ་རིབ་པོར་སྨྲ་ཞིང༌། ངེས་པ་མ་ཐོབ་པས་གསལ་པོར་ཕྱེ་ནས་མི་སྨྲའོ། །དེ་ཐམས་ཅད་སྲོག་སྤྲོ་བའོ་སྲོག་སྤྲོ་བའོ་ཞེས་བཟླས་བརྗོད་དུ་བྱེད་ཀྱང༌། རྩ་ནང་དུ་སྤྲོའམ་ཕྱི་རོལ་ཏུ་སྤྲོ་མངལ་ནས་བཙའ་བའི་གནས་སྐབས་ཇི་ལྟ་བུ་ཞིག་ཏུ་སྤྲོ། དབུ་མའམ་གཡས་གཡོན་གྱི་ཡིན། སྔ་ཕྱི་གཅིག་གམ་མི་གཅིག་སོགས་མི་སྨྲ་བ་རྫུ་བག་བྱེད་དོ། །དེ་ལ་རང་ལུགས་འདི་ལྟར་ཡིན་ཏེ། མཁའ་དཀྱིལ་གྱི་རྡོ་རྗེ་སེམས་དཔའ་སྤྲོ་ཞིང་བསྟིམ་པ་ནི། སྦྱང་བྱ་དབུ་མའི་དབུགས་དེ་དྷཱུ་ཏཱིའི་མས་སྣ་ནས་གཙུག་ཏོར་གྱི་བར་དུ་བརྒྱུད་ཅིང༌། སྣ་སྒོ་ནས་སོར་བཅུ་དྲུག་གི་བར་སོང་ལ། སླར་ཡང་སྔར་གྱི་རིམ་པས་དབུ་མར་འཇུག་པའི་འགྲོ་འོང་ལྔ་བཅུ་ང་དྲུག་པོ་དེ་དག་སྦྱོང་ལ། རྡོར་ཤུགས་སྤྲོ་ཞིང་བསྡུ་བས་ནི། དེ་དུས་དབང་པོ་དབང་ཤེས་སྤྱི་དང་ཁྱད་པར་རྣམས་ཡུལ་ལ་སད་པར་འདོད་པ་དེ་སྦྱོང་སྟེ། མཁའ་དཀྱིལ་རྡོར་སེམས་སྤྲོ་བ་དང་དེ་གཉིས་སྦྱང་བྱ་དུས་མཉམ་ཡིན་ལ། ཡེ་ཤེས་ཀྱི་རླུང་གཅིག་ཉིད་ལའང་རྡོར་སེམས་སྤྲོ་བ་དང༌། རྡོ་རྗེ་ཤུགས་སྤྲོ་བ་གཉིས་ཀ་སྦྱོར་དགོས་པ། ནང་དུ་སྲོག་བརྟན་པར་བྱེད་པའི་ནུས་པའི་ཆ་ནས། རྡོར་སེམས་ཀྱི་སྤྲོ་བསྡུ་ཡིན་ན་འདི་ནི་རང་ལ་བདག་པོར་ཞུགས་པའི་ཆ་ནས་འཆི་དུས་མ་གཏོགས་ཕྱིན་ཆད་དཀྱིལ་འཁོར་དུ་མི་རྒྱུ་བ་མཚོན་ཞིང༌། ཁམས་ལྔའི་དཀྱིལ་འཁོར་སྤྲོ་བ་ལ་མི་ཐེ་བ་བཞིན་དུ། སྦྱང་བྱའི་སྐབས་སུ་ཡང་གཡས་ གཡོན་གྱི་རྒྱུ་བ་དང་མི་སྦྱོར་རོ། །དེ་བཞིན་དུ ་ཡེ་ཤེས་
པའི་སྐབས་སུ་ཡང་རྡོར་ཤུགས་སྤྲོ་བ་དང་དགུག་པའི་ལས་སོ་སོར་ཕྱེ་སྟེ། རྡོར་ཤུགས་སྤྲོ་བའི་སྦྱང་བྱ་དབུ་མའི་དབུགས་རྒྱུས་པས་རླུང་གཞན་འདྲེན་པ་ཡིན་ལ། དགུག་པ་ནི་དབང་ཤེས་སད་པ་དང་སྦྱོར་རོ། །སྤྲོས་པའི་དབུ་མའི་དབུགས་དང༌། དགུག་པ་ནི་ལས་ལྔའི་དང་པོ་ཡིན་ལ། ལས་ལྔ་པོ་དེའི་སྦྱང་བྱ་དང༌། ཁམས་ལྔའི་དཀྱིལ་འཁོར་སྤྲོ་བའི་སྦྱང་བྱ་ངོ་བོ་གཅིག་ཀྱང་སྦྱང་བྱ་དཀྱིལ་འཁོར་ལྔ་པོ་དེ་རྣམས་ཉིད་རྒྱུ་ཞིང༌། རྩ་གནས་ཀུན་ཏུ་གཡོ་བས་ཁྱབ་པར་བྱེད་པ་ནི། ནང་དུ་ཚེ་སྲོག་བརྟན་པར་བྱེད་པའི་ནུས་པ་དང་སྦྱར་ནས་ཁམས་ལྔའི་ལྷ་ཚོགས་སྤྲོ་བ་དང༌། དཀྱིལ་འཁོར་ལྔ་པོའི་རླུང་གིས་དབང་པོ་ལྔ་དབང་ཤེས་དང་བཅས་པ་རེ་རེ་བཞིན་ཡུལ་སོ་སོ་ལ་སད་པར་བྱེད་པའི་ནུས་པ་དང་བྱེད་ལས་ཅན་དེ་ལས་ལྔ་པོས་སྦྱོང་བར་བྱེད་པ་ཡིན་པས། མདོར་ན་རླུང་རྒྱུ་བ་གཅིག་པུ་དེ་རྩ་གནས་ལ་ཁྱབ་པར་བྱེད་པའི་ཆ་ནས། དམ་ཚིག་པའི་སྦྱང་བྱ་དང༌། དབང་ཤེས་ཀྱིས་ཡུལ་སྣང་འཛིན་པར་བྱེད་པའི་ཆ་ནས། ཡེ་ཤེས་དཀྱིལ་འཁོར་དགུག་གཞུག་གི་སྦྱང་བྱར་སྦྱོར་བ་ཡིན་པ་སྦྱོར་ཚུལ་དེ་ལྟར་ཤེས་དགོས་ལ། དེས་ན་རྡོར་སེམས་སྤྲོ་བ་དང༌། རྡོ་རྗེ་ཤུགས་སྤྲོ་བ་སྦྱང་བྱའི་ངོ་བོ་གཅིག དེ་གཉིས་ཀྱི་འཕྲིན་ལས་མཛད་པ་དང༌། དེ་གཉིས་ཀྱི་ཐུགས་ཀར་བསྡུ་བ་ཡང་སྦྱང་བྱ་ངོ་བོ་གཅིག་མོད་ཀྱི། རྡོར་སེམས་ཀྱི་མཛད་པ་མཁའ་ཁམས་ཀྱི་ལྷ་སྤྲོ་བ་དང་སོ་སོར་ཡོད་ཅིང༌། རྡོར་ཤུགས་ཀྱི་མཛད་པ་མཁའ་ཁམས་ཀྱི་དབང་པོ་ཡུལ་ལ་སྤྲོ་བ་དང་སྦྱོར་དགོས་པས་ཅུང་མི་འགྲིག་གོ་སྙམ་ན། དམ་ཚིག་གི་དཀྱིལ་འཁོར་བསྐྱེད་པ་ལ་ཁམས་དྲུག་ཚན་གྱིས་འགྲོས་ཤེས་རབ་ཨེ་ཡིག་དང༌།
ཡེ་ཤེས་འཁོར་ལོ་གཞུག་པ་ལ་ལྔ་ཚན་གྱི་འགྲོས་ཐབས་ཝཾ་ཡིག་གི་དག་པ་སྦྱོར་བའི་ཕྱིར། མཁའ་ཁམས་ཀྱི་དབང་པོ་ཡུལ་ལ་སད་བྱེད་ཀྱི་སྐོར་རྣམས་རྡོར་ཤུགས་ཀྱི་མཛད་པའི་ནང་དུ་བསྡུས་པ་སྟེ། ལྔའི་གྲངས་སུ་སྡུད་དགོས་པའི་ཆེད་དུ་ཡེ་ཤེས་ནམ་མཁའ་གཅིག་ཏུ་བསྡོམས་པ་ཡིན་ནོ། །དེ་ལྟར་ན་སྦྱང་བྱ་ལ་དུས་སྔ་ཕྱི་འཇོག་མི་ཐུབ་ཀྱང་སྦྱོང་བྱེད་ཏིང་ངེ་འཛིན་གྱི་རིམ་པ་ལ་སྔ་ཕྱིར་འཇོག་སྟེ། དུས་གཅིག་ཏུ་སྒོམ་མི་ཐུབ་པས་སྔ་ཕྱི་བྱེད་དགོས་ཤིང༌། རྒྱུ་མཚན་སྦྱང་བྱའི་སྒོ་ནས་བཤད་དུ་མེད་ཀྱང་ཐིམ་པར་བྱ་བའི་ཡུལ་དམ་ཚིག་པ་སྔོན་དུ་མ་སོང་བར་ཐིམ་པར་བྱེད་པ་པོ་ཡེ་ཤེས་པ་སྤྱན་འདྲེན་པ་ཡང་མི་འཐད་ཅིང༌། དགུག་གཞུག་བྱེད་པའི་ཡུལ་མེད་པ་དགུག་གཞུག་བྱེད་པ་མི་འཐད་པས་སྔ་ཕྱིའི་གོ་རིམ་གྲུབ་བོ། །དེ་ལ་རྡོ་རྗེ་ཤུགས་སྤྲོ་བས་ནི། བཙས་མ་ཐག་ཏུ་དབུ་མའི་རླུང་འབབ་པ་སྦྱོང་ཞིང༌། ཡེ་ཤེས་ཀྱི་འཁོར་ལོ་དགུག་པ་ནི། རྣམ་པར་ཤེས་པ་ཁམས་ལྔའི་བདག་ཉིད་ཅན་གྱི་ཀུན་གཞིའི་རྣམ་པར་ཤེས་པ་རྣམ་སྨིན་གྱི་ངོ་བོར་གྱུར་པ་དེ། དབུ་མའི་དབུགས་ཀྱིས་བསྐྱོད་པས་ཡུལ་འདོད་ཡོན་དྲུག་པོ་ཐམས་ཅད་ལ་སད་དེ། ཡུལ་འཛིན་ཅིང་ལོངས་སྤྱོད་པའི་ནུས་པ་ཅན་དུ་འགྱུར་བ་དང༌། ཁྲོ་བོ་སྤྲོ་བའི་སྐབས་ཞོར་བྱུང་དུ་དྲག་སྤྱན་མའི་ཤིང་རྟ་སྤྲོས་པ་ནི། ཁྲོ་མོ་དེ་མཁའ་ཁམས་ཡིན་པས་ཤིང་རྟའང་ཁམས་དེའི་ཕྱིར། ཞོར་བྱུང་དུ་ནམ་མཁའི་དཀྱིལ་འཁོར་འབབ་པ་ཡང་མཚོན། དེའི་ཕྱིར་དགུག་པས་དབང་ཤེས་ཐམས་ཅད་སྤྱི་ལྡོག་ནས་སད་པ་མཚོན་པར་མ་ཟད། རྣ་བའི་དབང་ཤེས་དང་ཡིད་ཀྱི་ཤེས་པ་ལྷག་པར་སད་པས་སད་ཚུལ་རྫོགས་པར་གྱུར་པ་མཚོན་ནོ། །གཞུག་པས་མིག་ཤེས་དང༌། བཅིང་པས་ལུས་ཀྱི་རྣམ་ཤེས་དང༌། མཉེས་པས་ལྕེའི་རྣམ་ཤེས་དང༌། རོ་མཉམ་པས་སྣའི་རྣམ་ཤེས་
རྣམས་རང་རང་སོ་སོའི་ཡུལ་ལ་སད་པའི་ནུས་པ་རྫོགས་པར་བྱེད་དོ། །སྔགས་དང་ཆོ་གའི་གོ་རིམ་ནི། དགུག་གཞུག་བཅིང་མཉེས་རོ་མཉམ་ལྔའི་གོ་རིམ་ཡིན་གྱི། སྦྱང་བྱ་དབང་ཤེས་ལྔ་པོ་སད་པ་ལ་སྔ་ཕྱིའི་གོ་རིམ་གསལ་བར་གསུངས་པ་མེད་དོ། །དེ་ཡང་ཁ་ཅིག་དབང་པོ་རྣམས་བྱང་ཆུབ་སེམས་དཔའི་དག་པ་ཡིན་པའི་ཕྱིར། དབང་ཤེས་རྣམས་སེམས་དཔའ་ལས་སྤྲུལ་པའི་ཁྲོ་བོ་དང་དག་པ་སྦྱོར་ཟེར་ཏེ། སྤྱིར་རིགས་དང་རིགས་ཅན་གྱི་སྐབས་ཁྲོ་བོ་རྣམས་སེམས་དཔའི་སྤྲུལ་པར་བྱེད་མོད། འོན་ཀྱང་ད་རེས་སྐབས་འདིར་ཁྲོ་བོ་འདི་རྣམས་དེ་བཞིན་གཤེགས་པ་ལྔ་ལས་སྤྲུལ་པ་ཡིན་གྱི། སེམས་དཔའ་རྣམས་ལས་སྤྲུལ་པར་མི་འདོད་ལ། སྦྱང་བྱ་རྣམ་ཤེས་ཀུན་འདུས་པ་དེ་སྦྱོང་བྱེད་ཡེ་ཤེས་འཁོར་ལོ་དང་སྦྱོར། སྦྱང་བྱ་རླུང་བསྐྱོད་པས་ཡུལ་ལ་སད་པ་དང་མཚུངས་པ་སྦྱོང་བྱེད་ཁྲོ་བོས་དགུག་གཞུག་བྱེད་པ་ཡིན་པས་ཁྲོ་བོ་ལྔ་རླུང་ལྔ་དང་སྦྱོར་ལ། དགུག་གཞུག་ལ་སོགས་པའི་ལས་རྣམས་ཡུལ་ལ་སད་པ་དང་སྦྱོར་རོ། །དེས་ན་འགའ་ཞིག་ཁྲོ་བོ་ལྔ་སྐབས་འདིར་དབང་པོ་ལྔའི་དག་པ་ཅན་དུ་གསུངས་པ་དང༌། གཞན་དུ་ལས་དབང་ལྔའི་དག་པ་ཅན་དུ་གསུངས་པ་ལ་འགལ་སྤོང་བྱེད་མོད། རང་ལུགས་ལ་གོང་དུ་བཤད་པ་ལྟར་ཡིན་ལ། སྤྱིར་གནས་སྐབས་སོ་སོར་དག་པ་ཐ་དད་འབྱུང་བ་ལ་འགལ་སྤོང་མི་དགོས་ཏེ། ཐུགས་དཀྱིལ་ཁོ་ན་སྒོམ་པའི་སྐབས་ཐུགས་དཀྱིལ་གྱི་ཁྲོ་བོ་རྣམས་ལས་དབང་ལ་སྦྱོར་ཡང་དཀྱིལ་འཁོར་སུམ་སྦྲག་གི་སྐབས་སྐུ་དཀྱིལ་གྱི་ཁྲོ་བོ་ལས་དབང་ལ་སྦྱོར་དགོས་པ་བཞིན་ནོ། །དེ་རྗེས་ཡི་གེ་དགོད་པ་ནི། མངལ་ནས་བཙས་ཟིན་པའི་སེམས་ཅན་དེའི་ཁམས་དྲུག་གི་ནུས་པ་རྒྱས་པ་དང༌། དེ་ལྟ་བུའི་ཡི་གེ་
འགོད་པ་དེ་དང་སྐུ་གསུང་ཐུགས་བྱིན་གྱིས་བརླབ་པ་སོགས་ཀྱི་དབང་བསྐུར་བ་བསྡོམས་པ་ནི། ཁྲུས་བྱེད་པ་དང་ལུས་ངག་ཡིད་གསུམ་གྱི་སྟོབས་གོང་འཕེལ་དུ་སོང་ནས་སྒོ་གསུམ་གྱི་བྱ་བ་སྣ་ཚོགས་ལ་འཇུག་པ་དང། སྔར་གཉིད་ལོག་པ་དང་སད་པའི་དབྱེ་བ་མེད་ཀྱང་དེ་ནས་གཟུང་སྟེ་སད་པ་དང༌། རྨི་ལམ་དང་གཉིད་འཐུག་པོ་རྣམས་འབྱུང་བ་སྦྱོང་ངོ༌། །དབང་བདུན་གྱི་སྔགས་དབང་བླངས་ན། བྱིས་པ་སྐྱེས་ལ་མ་དག་གིས། །ཆུ་ཡིས་འཁྲུ་བའི་དབང་བསྐུར་བྱེད། །ཅེས་སོགས་དག་བྱ་དག་བྱེད་སྦྱོར་དགོས་ལ། ཡབ་ལ་ཐབས་ཤེས་རིགས་གསུམ་དང་ཡུམ་ལ་ཐབས་ཤེས་རིགས་དྲུག་ཀར་སྦྱོར་བས་ན། ལུས་ངག་ཡིད་གསུམ་གྱི་སྒོ་ནས་ཡབ་ཡུམ་མཉམ་པ་ལ་ཡེ་ཤེས་ཆགས་རྟོག་ལས་ཕྱེ་བའི་རིགས་གསུམ་གྱི་སྒོ་ནས། བུད་མེད་ལ་ལྷག་པོ་ཡེང་བ་སྦྱོང་བ་དང༌། རིགས་བདག་གིས་རྒྱས་བཏབ་པ་ནི། རང་གི་རིགས་ཀྱི་ལས་ལ་འཇུག་པ་དང༌། སྐུའི་རྒྱས་བཏབ་ནི་རྩ་དྲུག་དང་ཕུང་པོ་དྲུག་གི་སྟོབས་རིམ་གྱིས་རྫོགས་པ་དང༌། སྲོག་གི་རྒྱས་བཏབ་ནི་རླུང་གི་སྟོབས་རྫོགས་པ་དང༌། ཐིག་ལེའི་རྒྱས་བཏབ་ནི་ཁམས་རྣམས་ཀྱི་སྟོབས་རྫོགས་པ་དང༌། ཡེ་ཤེས་ཀྱི་རྒྱས་བཏབ་ནི་སྦྱང་བྱ་ཁོ་ན་ལྟར་ན་ཆགས་པའི་སྟོབས་རྫོགས་པ་སྟེ། རྒྱས་གདབ་བཞི་པོའི་སྦྱང་བྱ་དུས་མཉམ་ཡིན་པས། ལོ་བཅུ་དྲུག་པ་ལ་ཉེ་བ་སྔར་གྱི་བྱིས་པ་དེ་གཞོན་ནུས་གནས་སྐབས་སུ་གྱུར་གྱི་བར་དུའོ།། །།གཉིས་པ་སྦྱོང་བྱེད་དངོས་ལམ་རྫོགས་རིམ་དང་ཆོས་མཐུན་སྦྱར་བ་ནི། སྐབས་འདིར་བར་དུ་དགེ་བའི་རྫོགས་རིམ་དང་སྦྱོར་དགོས་ཏེ། དེ་ཡང་ཨ་ཝ་དྷཱུ་ཏཱིའི་ནང་དུ་ཡི་གེ་འབྲུ་གསུམ་བཀོད་པ་ནི། རླུང་འགྲོ་བ་དང་འོང་བ་དང་གནས་པ་གསུམ་རོ་རྐྱང་ལས་བྱེད་པ་བཀག་
སྟེ་དབུ་མ་ཉིད་དུ་འབབ་པ་དང༌། དེའི་མཐུ་ལས་ལྟེ་བའི་གཏུམ་མོ་དུས་ཀྱི་མེ་སྟོབས་རྒྱས་པའི་འོད་ཀྱི་ཤུགས་སྤྱི་བོའི་བར་དུ་སླེབ་ཅིང༌། སྤྱི་བོའི་ཐིག་ལེ་ལས་ཞུ་བདེ་ཕྲ་མོ་ཙམ་ནི་འབབ་ཀྱང་ཡང་དག་པར་ཞུ་ནི་མ་ཐུབ་ལ། གཏུམ་མོའི་དྲོད་ཀྱིས་དབང་བྱས་པ་དེ་ལྟེ་བ་དང༌། སྤྱི་བོའི་ཧོཿཡིག་གིས་མཚོན། དེའི་རྗེས་སུ་དབུ་མའི་ནང་གི་འབར་འཛག་འབྱུང་བ་དེའི་ནུས་པ་ལ་བརྟེན་ནས། མཉམ་གཞག་ཏུ་དུས་སྦྱོར་བཅུ་གཉིས་ཀྱི་རླུང་རོ་རྐྱང་དུ་རྒྱུ་བ་ཐམས་ཅད་བཀག་སྟེ། དབུ་མ་འབའ་ཞིག་ཏུ་འབབ་ཅིང་གསལ་སྟོང་བདེ་བའི་མི་རྟོག་པ་འཐུག་པོ་ཐོབ་པ་ནི། རྗེས་ཆགས་ཀྱི་མེས་ཐིག་ལེར་ཞུ་བ་དང་འདྲ་སྟེ། སྲོག་རྩོལ་གྱི་ཡན་ལག་གོ །དེ་ནས་གླུས་བསྐུལ་བ་ལྔ་ལས། རླུང་རྣམས་ལྟེ་བའི་མི་ཤིགས་པ་ལ་ཐིམ་པ་ནི། སྤྱན་མས་བསྐུལ་བ་དང༌། སྙིང་གར་ཐིམ་པ་ནི་མཱ་མ་ཀཱི་དང༌། མགྲིན་པར་ཐིམ་པ་ནི་གོས་དཀར་མོ་དང༌། སྤྱི་བོར་ཐིམ་པ་ནི་སྒྲོལ་མ་དང༌། གཙུག་ཏོར་རམ་དཔྲལ་བར་ཐིམ་པ་ནི། རྡོར་དབྱིངས་དབང་ཕྱུག་མའི་ཐོབ་སྐལ་ཡིན་ཡང་དངོས་སུ་ལྷ་མོ་བཞི་པོས་སྤྱི་ཁྱབ་ཏུ་བསྐུལ་བ་རྣམས་ཀྱིས་མཚོན་ཞིང༌། དེ་ཡང་རླུང་མ་ཐིམ་ན་ཡེ་ཤེས་ཀྱི་གཏུམ་མོ་འབར་མི་ཐུབ་སྟེ། སྤྱིར་གཏུམ་མོ་ཡིན་ཚད་ཐིག་ལེའི་རང་མདངས་དང༌། སྒོས་སུ་ཡེ་ཤེས་ཀྱི་གཏུམ་མོ་མི་ཤིགས་ཐིག་ལེའི་རང་མདངས་ཡིན་པས་སོ། །རླུང་ཐིམ་པ་ན་རླུང་དེའི་མི་ཤིགས་པའི་ཐིག་ལེའི་ངོ་བོར་སོང་སྟེ། དེ་མ་ཐག་ཏུ་སྟོང་གཟུགས་ཀྱི་རང་བཞིན་གཏུམ་མོ་འབར་བར་གྱུར་པ་ནི། རྫོགས་རིམ་གྱི་ལམ་རྒྱུད་ལ་སྐྱེས་པའི་སྐབས་སུ། ཐོག་མར་ལྟེ་བ་ནས་འགོ་རྩོམ་པ་ཡིན་ཡང་སྐབས་འདིར་དེའི་སྔ་ཕྱིའི་གོ་རིམ་ལ་མཐའ་གཅིག་ཏུ་སྦྱོར་མི་དགོས་པས། གཙོ་ཆེ་ཆུང་གི་གོ་རིམ་དང་སྦྱར་ནས། གཙུག་ཏོར་དུ་ནམ་མཁའི་ཁམས་གཙོ་བོར་གྱུར་པའི་སྟོང་གཟུགས་ཀྱི་རང་བཞིན་ཡེ་ཤེས་ལྔའི་གཏུམ་མོ་འབར་བ་ནི། གཙོ་བོ་ཡབ་ཡུམ་ནུས་མ་རྡོ་རྗེ་བཞི་དང་བཅས་པ་དང༌། གཙུག་ཏོར་
དུ་ཐིམ་པའི་དུས་ན་གསང་བར་ཡང་ཐིམ་པར་འགྱུར་ཏེ། དེ་ལས་ཡེ་ཤེས་ཀྱི་ཁམས་གཙོ་བོར་གྱུར་པའི་གཏུམ་མོ་ཡེ་ཤེས་ལྔ་ལྡན་འབར་བར་འགྱུར་བ་ནི། དེ་རྗེས་རྡོ་རྗེ་སེམས་དཔའ་སྤྲོས་ཤིང་བསྡུ་བ་དང༌། ལྷ་ནམ་མཁའི་ཁམས་པ་རྣམས་སྤྲོ་བ་ཡང་དེའི་ཁོངས་སུ་གཏོགས། ལྷག་མ་དཔྲལ་བ་ལས་རླུང་ཁམས་གཙོ་བོ་དང༌། མགྲིན་པ་ལས་མེ་ཁམས་གཙོ་བོ་དང༌། ལྟེ་བ་ལས་ས་ཁམས་ཀྱི་དངས་མ་གཙོ་བོར་གྱུར་པའི་ཡེ་ཤེས་ལྔའི་གཏུམ་མོ་འབར་བ་ནི། རླུང་མེ་ཆུ་སའི་ལྷ་རྣམས་སྤྲོ་བས་མཚོན་ནོ། །དེ་ལྟར་ན་དེ་དག་ནི་འཛིན་པའི་ཕྱེད་སྔ་མ་དང་སྦྱར་བའོ། །དེ་ནས་གཙུག་ཏོར་དུ་བྱང་ཆུབ་ཀྱི་སེམས་ཞུ་ཞིང༌། གཏུམ་མོ་འབར་བ་དང་འདྲེས་པ་ནི། རྡོ་རྗེ་ཤུགས་ཀྱིས་ཡེ་ཤེས་སེམས་དཔའ་བཀུག་སྟེ། དམ་ཚིག་པའི་དྲུང་དུ་ཕྱིན་པས་མཚོན་ནོ། །སྤྱི་བོའི་ཐིག་ལེ་དེ་དཔྲལ་བར་སླེབ་ཅིང༌། དཔྲལ་བ་ཉིད་དུ་ཞུ་བའི་ཐིག་ལེ་དང་འདྲེས་ཏེ། རླུང་ཁམས་ཀྱི་གཏུམ་མོ་དང་རོ་གཅིག་ཏུ་གྱུར་པ་ནི། ཤིན་ཏུ་སྟོབས་ཀྱིས་རོ་མཉམ་དུ་བྱས་པ་དང༌། དེ་བཞིན་དུ་རིགས་བསྒྲེས་ཏེ་མགྲིན་པར་ཐིག་ལེ་དང་གཏུམ་མོ་འདྲེས་པ་ནི། ཤེས་རབ་མཐར་བྱེད་ཀྱིས་དམ་ཚིག་པ་ལ་ཡེ་ཤེས་པ་བཅུག་པ་དང༌། སྙིང་གར་ཞུ་པའི་ཐིག་ལེ་དང་གཏུམ་མོ་འདྲེས་པ་ནི། པདྨ་མཐར་བྱེད་ཀྱིས་དམ་ཡེ་དབྱེར་མེད་དེ་མཉེས་པར་བྱས་པ་དང༌། ལྟེ་བར་ཐིག་ལེ་ལྔ་འདྲེས་པ་དང༌། གཏུམ་མོ་ལྔ་འདྲེས་པ་དབྱེར་མེད་དུ་གྱུར་པ་ནི། གཤིན་རྗེ་མཐར་བྱེད་ཀྱིས་དམ་ཡེ་དབྱེར་མེད་དུ་བཅིངས་པས་མཚོན་ནོ། །འདི་རྣམས་དགུག་གཞུག་གི་སྐབས་སུ་
རྫོགས་རིམ་འཛིན་པའི་སྐབས་དང་གོ་རིམ་མི་མཚུངས་པར་བྱུང་བ་ནི། བསྐྱེད་རིམ་གྱི་ཆོ་གའི་སྐབས་ལ་དགུག་གཞུག་བཅིང་མཉེས་རོ་མཉམ་ཞེས་པའི་གོ་རིམ་དགོས་པའི་དབང་གིས་མི་འདྲ་བར་བྱུང་བ་ཡིན་ཡང༌། རེ་རེ་ནས་སྤྱི་བོ་ནས་འོང་བའི་རིམ་པ་ལ་བལྟོས་པའི་འཛིན་པའི་དབྱེ་བ་ལྔ་པོའི་རྒྱུད་སྦྱོང་ཞིང༌། སྨིན་པར་བྱེད་པ་ལ་ཁྱད་པར་མེད་པས་གོ་རིམ་མ་མཐུན་ཀྱང་སྐྱོན་མེད་དོ།། དེ་ནས་ཡི་གེ་འགོད་པ་ནི། འཁོར་ལོ་དྲུག་ཏུ་ཡས་བབས་ཀྱི་དགའ་བའི་ས་རྣམས་བརྟན་པར་བྱས་པ་མཚོན་ཞིང༌། སྐུ་གསུང་ཐུགས་བྱིན་གྱིས་བརླབ་ཅིང་དབང་བསྐུར་བས་ནི། འཛིན་པའི་ཕྱེད་ཕྱི་མ་གཙུག་ཏོར་གྱི་འབར་འཛག་ཁ་སྦྱོར་ནས། གསང་བའི་འབར་འཛག་ཁ་སྦྱོར་གྱི་བར་ལ་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་ལུས་གང་བ་དང༌། ཐབས་ཁམས་དཀར་པོས་གཞི་བྱས་པ་ལ་བརྟེན་ནས་སྟེང་གི་རྩ་གསུམ་ལས་སྐུ་གསུང་ཐུགས་ཀྱི་རྡོ་རྗེ་སྤྲོ་བའི་ལྷ་ཚོགས་རྗེས་མཐུན་པ་ཞེས་བྱ་བ། གཏུམ་མོའི་འབར་སྣང་གི་དཀྱིལ་འཁོར་མང་དུ་འབྱུང་བ་མཚོན་ཞིང༌། ཤེས་རབ་ཁམས་དམར་པོ་དང་རླུང་གི་ཆ་དག་པ་ལས། རྩ་དྲུག་ནས་ཁམས་དྲུག་གི་ལྷ་ཚོགས་སྤྲོ་བ་ནི། ཤེས་རབ་ཡུམ་ལ་རྡོ་རྗེ་དྲུག་བྱིན་གྱིས་བརླབས་པས་མཚོན་ནོ། །རིགས་བདག་གིས་རྒྱས་འདེབས་པ་ནི། དཔྲལ་བའི་འཁོར་ལོའི་མིང་ཅན་སྤྱི་བོའི་འཁོར་ལོར་ཞུ་བདེ་འཛག་མེད་ཤིན་ཏུ་བརྟན་པ་མཚོན་ཞིང༌། སྐུའི་རྒྱས་གདབ་ནི། འཛིན་པས་དྲངས་པའི་རྗེས་དྲན་གྱི་མིང་ཅན་གཏུམ་མོའི་འབར་སྣང་ལ་ཁམས་དྲུག་གི་དངས་མའི་སྟོང་གཟུགས་རིགས་དྲུག་གི་དཀྱིལ་འཁོར་རྣམ་པ་ཀུན་ལྡན་འཆར་བ་རྣམས་དང༌། སྲོག་གི་རྒྱས་བཏབ་ནི། དབུ་མ་ལས་བྱུང་བ་གཞོམ་མེད་ཀྱི་སྒྲ་དབྱངས་ལས་སྒྲ་རྣམ་པ་ཐམས་ཅད་པ་ཁམས་
ལྔས་བསྡུས་པ་རྣམས་འབྱུང་བ་དང༌། ཐིག་ལེའི་རྒྱས་བཏབ་ནི། ལུས་ངག་ཡིད་གསུམ་ཡེ་ཤེས་རྡོ་རྗེའི་བདེ་བས་བྱིན་གྱིས་བརླབས་ཏེ། བདུད་བཞི་དང་ཉོན་མོངས་པ་བཞི་བཅོམ་པ་སྟེ། ཐིག་ལེ་བཞི་པོ་ཞུ་བདེ་འགྱུར་མེད་ཀྱི་མཚན་ཉིད་ཅན་དུ་གྱུར་པའོ། །ཡེ་ཤེས་ཀྱི་རྒྱས་བཏབ་ནི་རགས་པའི་ཐིག་ལེ་ནོར་བུར་བརྟན་པས། ཐ་མལ་གྱི་འདོད་ཆགས་ལས་ལོག་པ་ལམ་གྱི་འདོད་ཆགས་ཆེན་པོ་ཉམས་པ་མེད་པ་དེའོ། །སྐུ་གསུང་ཐུགས་བྱིན་གྱིས་བརླབ་པ་ནས་བརྩམས་ནས་འཛིན་པའི་ཕན་ཡོན་འབྲས་བུར་བཅས་པ་དང་སྦྱར་བའོ། །ཡང་དེ་དག་སྦྱངས་འབྲས་སངས་རྒྱས་ཀྱི་ཆོས་དང་སྦྱར་ན། སྐབས་འདིར་གསུང་རྡོ་རྗེ་ལོངས་སྐུ་དང་གཙོ་བོར་སྦྱོར་ཞིང༌། གསུང་དང་ཆོས་སྐུ་ཟུང་འབྲེལ་དུ་བསྟན་པ་ལྟར་ཆོས་ཀྱི་སྐུའི་ཆ་ཤས་དང་ཡང་སྦྱོར་རོ། །དེ་ལ་ལྟེ་བ་དང་གཙུག་ཏོར་དུ་བཀོད་པའི་ཧོཿཡིག་གཉིས་ནི། ཡུལ་ཅན་དོན་དམ་འདོད་ཆགས་ཆེན་པོའི་ཡེ་ཤེས་དང་ཡུལ་དོན་དམ་བདེ་བ་ཆེན་པོའི་ཡེ་ཤེས་ཏེ། རྡོ་རྗེ་ཧཾ་ཀྵའི་དོན་ནམ་ཡེ་ཤེས་རྡོ་རྗེ་ཡིན་ལ། འབྲུ་གསུམ་ནི་རྡོ་རྗེ་གསུམ། ཨ་ཝ་དྷཱུ་ཏཱི་ནི་ནམ་དུ་ཡང་གཞིག་ཏུ་མེད་པ་སྟེ། གསུང་རྡོ་རྗེ་དེ་ཡང་ནང་ཚན་དུ་རྡོ་རྗེ་བཞི་དབྱེར་མེད་པའི་མཚན་ཉིད་དོ། །ཐིག་ལེར་ཞུ་བ་ནི་དེ་ཡང་རྣམ་པར་མི་རྟོག་པའོ།། གླུས་བསྐུལ་བ་ལྔ་ནི། ཁམས་ལྔའི་དངས་མ་ལས་བྱུང་བ་གཞོམ་མེད་ཀྱི་སྒྲ་དབྱངས་ལྔ་སྟེ། རེ་རེ་ཡང་དོན་དམ་མཁའ་མཉམ་ཡེ་ཤེས་ཀྱི་སྒྲ་དབྱངས་རྣམ་པ་ཐམས་ཅད་པའོ། །གཙོ་བོ་བཞེངས་པ་ནི། སྒྲ་དབྱངས་དེ་རྣམས་ཀྱི་སྤྱོད་ཡུལ་དངོས་སུ་ན། དོན་དམ་སྲིད་གསུམ་གྱི་ཤེས་བྱ་ཐམས་ཅད་ཡིན་ལ། དེ་ལྟར་ཡིན་པས་དེ་རྣམས་དེ་ལ་ཆོས་ཉིད་དུ་སོང་བའི་ཕྱིར། ཆོས་ཅན་ཀུན་རྫོབ་སྲིད་
གསུམ་ཐམས་ཅད་ཀྱང་བརྒྱུད་ནས་དེའི་སྤྱོད་ཡུལ་དུ་འགྱུར་རོ། །དོན་དམ་ཀུན་རྫོབ་ཀྱི་སྲིད་གསུམ་དེ་ཀུན་ཀྱང་རང་བཞིན་ཁྱབ་བྱེད་བདེ་སྟོང་གཉིས་སུ་མེད་པའི་ཡེ་ཤེས་སུ་རོ་གཅིག་པ། རྣམ་འགྱུར་ཁྱབ་བྱ་ཁམས་དྲུག་གི་དག་པ་སོ་སོའི་དབྱེ་བ་ཅན་ནི། དཀྱིལ་འཁོར་ཆེན་པོའི་འཁོར་ཚོགས་སྤྲོ་བས་མཚོན་ནོ། །གཞན་དོན་ནི་ཐབས་ཡིན་ཞིང་དེ་ཉིད་ཁྲོ་བོས་མཚོན། དུག་ལྔའི་རིགས་ཅན་སོགས་རིགས་ལྔས་གདུལ་བར་བྱ་བའི་སེམས་ཅན་རྣམས་ལ་ཆོས་ཀྱི་འཁོར་ལོའི་སྒྲ་དབྱངས་བསྒྲགས་པས། དེ་རྣམས་ཀྱི་རྒྱུད་ལ་ཡང་དག་པའི་ཡེ་ཤེས་ཕྱིན་ཅི་མ་ལོག་པར་སྐྱེས་པ་ནི། དགུག་གཞུག་བཅིང་མཉེས་རོ་མཉམ་ལྔས་མཚོན་ནོ། །དེ་བཞིན་དུ་སྐུ་གསུང་ཐུགས་ཀྱི་སྤྲུལ་པ་མཐའ་ཡས་པས་ཆོས་སྟོན་ཞིང༌། འགྲོ་བའི་སེམས་རྒྱུད་འཁྱུད་པ་ནི། སྐུ་གསུང་ཐུགས་བྱིན་གྱིས་བརླབས་ཤིང་དབང་བསྐུར་བ་དང༌། དེ་བཞིན་དུ་ཡི་གེ་འགོད་པ་ནི། ཁམས་དྲུག་གི་ཆོས་དང༌། སྐུའི་རྒྱས་བཏབ་ནི་ཕུང་པོ་དྲུག་གི་ཆོས་དང༌། སྲོག་གི་རྒྱས་བཏབ་ནི། བརྗོད་བྱ་བརྗོད་བྱེད་ཀྱི་ཡུལ་དང་བཅས་པ་ཐམས་ཅད་ལ་མངའ་འབྱོར་བ་དང༌། ཐིག་ལེའི་རྒྱས་བཏབ་ནི་འཁོར་འདས་ཐམས་ཅད་ཐིག་ལེ་བཞིའི་སྣང་བ་ལས་བྱུང་བ་རྣམ་པར་དག་པ་དང༌། ཡེ་ཤེས་ཀྱི་རྒྱས་བཏབ་ནི་ཨ་ཡིག་ཆོས་ཐམས་ཅད་གདོད་མ་ནས་སྐྱེ་བ་མེད་པ་དང༌། སྲོག་ཆེན་པོ་དང༌། འགྱུར་མེད་ཆེན་པོ་དང༌། བརྗོད་པ་ཀུན་གྱི་གཞི་ཉིད་དེ། མདོར་ན་སྤྲོས་པ་ཐམས་ཅད་དང་བྲལ་བའི་ཡེ་ཤེས་ནམ་མཁའ་ལྟ་བུ་ལས། བརྟན་གཡོ་ཐམས་ཅད་ཀྱི་སྒྲ་དང་དོན་གྱི་རྣམ་པ་འཆར་བ་སྟེ། ཁམས་དྲུག་ནས་བརྩམས་དེ་དང་དེའི་བར་གྱི་དེ་རྣམས་ཆོས་ཀྱི་སྐུའི་ཡེ་ཤེས་ཀྱིས་ཇི་ལྟར་གཟིགས་པ་ལྟར་རང་སྣང་ལ་ཡང་དེ་དང་མཐུན་
པའི་གསུང་གི་སྒྲ་དབྱངས་འབྱུང་ཞིང༌། གཞན་སྣང་དུ་ཆོས་སྟོན་པའི་སྒྲ་སྐད་མཐའ་ཡས་པས་སེམས་ཅན་སྨིན་ཅིང་གྲོལ་བར་མཛད་པ་མཚོན་ནོ། །གཙོ་བོ་ལ་རིགས་བདག་རང་ཆས་ཉིད་ཀྱི་ཕྱིར། ཁམས་གསུམ་ཆོས་ཀྱི་རྒྱལ་པོར་གདོད་མ་ནས་བཞུགས་པ་དང༌། འཁོར་རྣམས་རིགས་བདག་གིས་རྒྱས་བཏབ་པ་ནི། དེ་ལྟ་བུའི་གོ་འཕང་གསར་དུ་བརྙེས་པ་མཚོན་པའོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། ལས་རྒྱལ་པོ་མཆོག་གི་ཏིང་ངེ་འཛིན་བཤད་པའི་སྡེ་ཚན་ཏེ་བདུན་པའོ།། །།གསུམ་པ་ཐུགས་རྫོགས་པ་ཐིག་ལེའི་རྣལ་འབྱོར་ནི། རྣམ་པ་གཉིས་ཀྱིས་རྟོགས་པར་བྱ་སྟེ། རྣལ་འབྱོར་སྒོམ་པའི་རིམ་པ་དང༌། དེའི་དག་པའི་དབྱེ་བ་བཤད་པའོ། །དང་པོ་ལ་ས་ལམ་གྱི་ཏིང་ངེ་འཛིན་གྲུབ་པའི་ཐིག་ལེའི་རྣལ་འབྱོར་དང༌། སྐབས་འདི་ཉིད་ལ་བལྟོས་པའི་ལས་དང་པོ་པས་མོས་སྒོམ་བྱེད་ཚུལ་ ལོ། །དེའི་དང་པོ་ལ་དབྱེ་ན་གཉིས་ཏེ། རྫོགས་རིམ་གྱི་ཐིག་ལེའི་རྣལ་འབྱོར་དང་བསྐྱེད་རིམ་གྱི་ཐིག་ལེའི་རྣལ་འབྱོར་རོ། །དང་པོ་ནི། འཛིན་པའི་རིམ་པས་མཚམས་སྦྱར་ཏེ། རྗེས་དྲན་གྱི་ཡན་ལག་མཚན་ཉིད་ཚང་བ་རྒྱུད་ལ་སྐྱེས་པ་ན། ཡེ་ཤེས་སྟོང་གཟུགས་ཀྱི་གཏུམ་མོ་ཨ་ཝ་དྷཱུ་ཏཱིར་འབད་པས་བྱང་ཆུབ་ཀྱི་སེམས། ཐིག་ལེ་རྫོགས་པར་ཞུ་སྟེ། དབུ་མའི་ནང་འཁོར་ལོ་དྲུག་དང་ནོར་བུར་སྟོང་གཟུགས་ཕྱག་ཆེན་ཉིད་ལ་བརྟེན་ནས་ཞུ་བདེ་འཛག་མེད་དུ་བཅིངས་པ་རྩོལ་བྲལ་གྱི་ཡེ་ཤེས་དེ་ཡིན་ཏེ། འདི་ལ་ལུགས་འབྱུང་ལུགས་ཟློག་གཉིས་ཡོད་པ་ལས་ལུགས་འབྱུང་དེ་ཐིག་ལེའི་རྣལ་འབྱོར་དངོས་ཡིན་ལ། ལུགས་ཟློག་ནི་ཞུ་བདེ་ཉིད་ཀྱི་ཕྱིར་ཐིག་ལེའི་རྣལ་འབྱོར་ཡང་ཡིན་ལ། རྡོ་རྗེ་སྤྲོ་བ་ཡོད་པའི་ཕྱིར་ཕྲ་མོའི་རྣལ་འབྱོར་རྗེས་མཐུན་པའང་ཡིན་ནོ། །གཉིས་པ་ནི་ལྷའི་རྣལ་འབྱོར་བསྐྱེད་རིམ་
བརྟན་པའི་རྣལ་འབྱོར་པས་ལས་ཀྱི་ཕྱག་རྒྱའམ་གསལ་སྣང་ཐོབ་པའི་ཡེ་ཤེས་ཀྱི་ཕྱག་རྒྱ་གང་རུང་ལ་བརྟེན་ནས། རྗེས་ཆགས་ཀྱི་བདེ་བ་བསྒོམས་པ་ན། དབུ་མ་ནས་གཙོ་བོར་འགྲོ་བ་མ་ཡིན་པའི་བྱང་ཆུབ་ཀྱི་སེམས་གཙུག་ཏོར་ནས་རྡོ་རྗེ་ནོར་བུའི་རྩེ་མོའི་བར་དུ་འོངས་ཤིང༌། ཡང་ནོར་བུ་ནས་གཙུག་ཏོར་གྱི་བར་དུ་ཟློག་སྟེ། དེ་ཉིད་ཤིན་ཏུ་གོམས་པ་ལས་ནོར་བུར་རགས་པའི་ཐིག་ལེ་རྩོལ་མེད་དུ་བརྟན་པ་ལས་བདེ་སྟོང་གི་ཉམས་ཁྱད་པར་ཅན་སྐྱེ་བ་ནི། བསྐྱེད་རིམ་གྱི་ཐིག་ལེའི་རྣལ་འབྱོར་དངོས་ཡིན་ལ། འདིའི་སྐབས་ཀྱི་མས་བརྟན་ལ་རྡོ་རྗེ་སྤྲོ་བ་རྗེས་མཐུན་པ་ཡང་མེད་པས་དེ་ཕྲ་མོའི་རྣལ་འབྱོར་དངོས་རྗེས་གང་ཡང་མ་ཡིན་ནོ། །གཉིས་པ་ལས་དང་པོ་པས་མོས་སྒོམ་དུ་བྱེད་ཚུལ་ནི། ཡབ་ཡུམ་གཉིས་ཀར་གྱི་གནས་དྲུག་ཏུ་ཨོཾ་སོགས་ཡི་གེ་དྲུག་བཀོད། རྡོ་རྗེ་དང་པདྨ་བྱིན་གྱིས་བརླབས། རྡོ་རྗེ་དྲུག་གམ་ཡན་ལག་དྲུག་ཀྱང་བཀོད། ལྷའི་ང་རྒྱལ་དང་ལྡན་པས་སྙོམས་པར་ཞུགས་པའི་རྗེས་ཆགས་དང༌། སྲོག་ཐུར་གོང་བུ་གཅིག་ཏུ་འདྲེས་པར་མོས་པ་དང༌། དེ་དུང་ཅན་མ་ནས་ལྟེ་བར་ཕྱིན་པར་མོས་པས་ལྟེ་བའི་ཧོཿཡིག་བསྐུལ་ནས་ཡེ་ཤེས་ཀྱི་གཏུམ་མོ་འབར་བར་མོས་པ་དང༌། དེར་གཡས་གཡོན་གྱི་དཀྱིལ་འཁོར་བཅུ་རྣམ་ཤེས་ཡུལ་ལ་འཇུག་པའི་རླུང་དང་བཅས་པ་རྣམས་བསྲེགས་པ་སྟེ་དབུ་མར་ཐིམ་པར་མོས། དེ་རྗེས་སྤྱི་བོའི་ཧཾ་ཡིག་ཞུ་བའི་དགའ་བཞི་ཉམས་སུ་མྱོང་བར་མོས་ཤིང༌། ནོར་བུར་ལྷན་སྐྱེས་ཤར་བར་མོས་པ་ན། ལྷ་སྣང་ཐམས་ཅད་ལ་ཐ་ན་མོས་པའི་སྒོ་ནས་ཀྱང་བདེ་བ་རྒྱས་བཏབ་སྟེ། ལྷ་སྐུ་དང་བདེ་བ་ལ་ཅུང་ཟད་སེམས་འཛིན་པའོ། །ལས་དང་པོ་པའི་རྣལ་འབྱོར་འདི་ཉིན་རེ་བཞིན་གོམས་པ་ལ་
བརྟན་ནས། ཕྱིས་ལྷ་སྐུ་ལ་གསལ་སྣང་ཐོབ་པའི་དུས་སུ་འདི་ཡང་མཚན་ཉིད་ཚང་བ་སྒོམ་ནུས་པ་འབྱུང་ལ། དེ་གཉིས་ཀས་ཀྱང་རྗེས་དྲན་གྱི་རྒྱུད་སྨིན་པར་བྱེད་ནུས་ཤིང་ཆོས་སྐུ་ལམ་བྱེད་དུ་འགྱུར་རོ། །དེ་ཡང་ལྷའི་རྣལ་འབྱོར་དང་བུམ་པ་ཅན་ཐ་མལ་པ་ལྷན་ཅིག་ཏུ་གོམས་པར་བྱས་པས། ལྷ་ལ་གསལ་སྣང་ཐོབ་པ་ན་བུམ་ཅན་སོགས་རླུང་གི་རྣལ་འབྱོར་དེ་ཡང་མཐུ་ཅན་དུ་འགྱུར་རོ། །དེ་ནས་ཡེ་ཤེས་ཀྱི་ཕྱག་རྒྱ་ལ་བརྟེན་ནས་ཞུ་བདེ་མངོན་འགྱུར་བ་འདྲེན་ཐུབ་པའམ། ལས་རྒྱ་ལ་བརྟེན་ནས་ཀྱང་རུང་སྟེ། རླུང་གི་རྣལ་འབྱོར་གྱིས་རྒྱུའི་གཙོ་བོ་བྱས། ཕཊ་ཀྱིས་དགག་པ་དང་འོད་ཟེར་སྤྲོ་བ་སོགས་ཀྱིས་སྣེ་ཁྲིད་བྱས་ནས་ཚེགས་ཙམ་མེད་པར་བྱང་ཆུབ་ཀྱི་སེམས་ནོར་བུར་འཆིང་བ་དང༌། གཙུག་ཏོར་གྱི་བར་དུ་ཟློག་ཅིང་ཁྱབ་པ་དང་བརྟན་པའང་འབྱུང་བ་ཡིན་ནོ། ཁ་ཅིག་རླུང་གིས་སྦྱོར་བ་མེད་པ་གསལ་སྣང་ཁོ་ནས་ཐིག་ལེའི་བགྲོད་པ་འགོག་ཅིང་ཟློག་ཅེས་ཟེར་ཡང༌། རྫོགས་རིམ་ལ་མ་བརྟེན་པར་བསྐྱེད་རིམ་གྱི་དམིགས་པ་ཁོ་ནས་དེ་ལྟར་འབྱུང་བ་ནི། སྔ་མར་སྦྱངས་བའི་ལས་འཕྲོ་ཡོད་ན་མ་གཏོགས། སྐྱེ་བ་གཅིག་ལ་མི་འགྲུབ་པས་དེ་བཟང་པོ་ཞིག་ཡིན་དུ་ཆུག་ཀྱང་ཉེ་བར་མི་མཁོ་བ་དང༌། གཅིག་ཏུ་ན་བཟུང་ཟློག་ཙམ་ནུས་སུ་ཆུག་ཀྱང་རླུང་མ་འདྲེས་པའི་ཐིག་ལེ་ཙམ་གྱིས་ཡོན་ཏན་མི་སྐྱེ་བ་དང༌། བསྐྱེད་རིམ་དང་ཐུན་མོང་བའི་སྲོག་རྩོལ་མ་ཐོབ་པར་དེ་འདྲ་བའི་གསལ་སྣང་འགྲུབ་པའང་ཕལ་ཆེར་མི་འབྱུང་བའི་ཕྱིར། བཟང་བཟང་མོ་དང་ཡིན་ཡིན་ལྟར་སྣང་བའི་བཤད་སྒྲོས་མང་ཡང་འཇོག་པོའི་གཙུག་རྒྱན་ལེན་པའི་ངང་ཚུལ་ཁོ་ནར་འགྱུར་རོ། །ཆེད་དུ་བྱ་བའི་གདུལ་བྱ་དབང་པོ་ཡང་རབ་ཀྱི་དབང་དུ་མཛད་ནས་གསུངས་པའོ་ཞེ་ན། དེ་དག་ཁོ་ནའི་དོན་དུ་གསུངས་པ་དེས་འོ་སྐོལ་ལ་ཅི་ཞིག་བྱ། སྐལ་
དམན་ཤིན་ཏུ་ལས་དང་པོ་པས་བསྒོམ་བྱའི་རྣལ་འབྱོར་ལ་ཉེ་བར་མཁོ་བ་འཚོལ་བའི་སྐབས་སུ། དབང་པོ་ཡང་རབ་ཀྱི་ཁ་སྐད་མཐོ་མཐོ་མོས་ཕན་པ་མེད་པས། གོ་ཡུལ་ཙམ་དུ་འཇོག་རྒྱུ་ཞིག་དང༌། ལག་ལེན་ལ་འདེབས་རྒྱུའི་དབྱེ་བ་ཕྱེད་པ་གལ་ཆེའོ། །འདི་སྒྲུབ་པའི་ཡན་ལག་ཏུ་འཇོག་པའི་རྒྱུ་མཚན་ནི། དངོས་སུ་ན་ཞུ་བའི་ཐིག་ལེ་རྩ་ནང་སོ་སོར་སྦྱར་བས་ལྷ་སྐུ་བདེ་བར་སྒྲུབ་པའི་དོན་ཡིན་ལ། གཙོ་བོར་བརྒྱུད་པའི་དོན་ལ་རྫོགས་རིམ་གྱི་སྒྲུབ་པའི་རྣམ་པ་ལམ་བྱེད་ཡིན་པས་སྒྲུབ་པ་ཞེས་བྱའོ། །འདི་ནི་ལྷ་རྣམས་ཐམས་ཅད་བདེ་བ་གཅིག་པུའི་ངོ་བོར་རོ་མཉམ་པར་བྱེད་པའི་ཕྱིར་དང༌། བདེ་བ་དེ་ཡང་ནོར་བུར་འོངས་པའི་སྐད་ཅིག་གཅིག་ལས་རྟོགས་པ་དང༌། འགྱུར་མེད་སྐད་ཅིག་གཅིག་པ་དེའི་རྒྱུ་དངོས་ཡིན་པའི་ཕྱིར། སྐད་ཅིག་གཅིག་གིས་མངོན་པར་རྫོགས་པར་བྱང་ཆུབ་བའི་ལམ་མོ། །གཉིས་པ་དག་པའི་དབྱེ་བ་ལ། དག་བྱ་དག་བྱེད་དག་འབྲས་གསུམ་གྱི། དང་པོ་ནི། སྦྱང་བྱ་སྐྱེས་བུ་ལོ་བཅུ་དྲུག་ལོན་པའི་མཚམས་སུ་ཐིག་ལེའི་ནུས་པ་རྫོགས་པས་གཉིས་སྦྱོར་གྱི་ཆགས་པའི་རྒྱུ་ཡང་རྫོགས་པ་ཡིན་ཏེ། ཟླ་བ་ལ་ཆ་བཅོ་ལྔ་ཡོད་པ་བཞིན་དུ། ཐིག་ལེ་ཆ་བཅོ་ལྔ་ཡོད་པ་ཡང་བྱིས་པ་བཙས་ནས་ལོ་རེ་རེ་བཞིན་དུ་ཆ་རེ་རེ་འཕེལ་ཏེ། ལོ་བཅོ་ལྔའི་མཐར་ཆ་བཅོ་ལྔ་རྫོགས་ལ། ཕྱི་རོལ་ཏུ་ཡང་ཟླ་བའི་ཆ་བཅུ་དྲུག་པ་ནི། དེ་ཉིད་ཀྱི་སྐད་ཅིག་གི་ཆ་ལ་བཏགས་པ་ཙམ་ཡིན་གྱི། ལོགས་པ་རང་དབང་དུ་སྤྱོད་པ་མེད་པ་ལྟར་འདིར་ཡང་ལོ་བཅོ་ལྔའི་མཐར་ཐུག་པར་འཕེལ་ཞིང༌། འཕེལ་བ་རྫོགས་ནས་འཛག་བདེ་དོན་གཉེར་གྱི་འདོད་ཆགས་མངོན་འགྱུར་བ་དང་དེའི་བྱ་བ་རྩོམ་པ་ན། འབྲིད་པའི་འགོ་བརྩམས་པ་ཡིན་པས། ཆ་བཅུ་དྲུག་པའི་
གནས་སྐབས་འདིའོ་ཞེས་དུས་ཀྱི་ཆ་ཤས་ལོགས་སུ་སྡེ་ཚན་བྱས་ནས་གསལ་པོར་སྟོན་རྒྱུ་མེད་ཀྱང༌། འཕེལ་འགྲིབ་ཀྱི་གནས་སྐབས་དེ་དག་ཉིད་ལ་ཁྱབ་པའི་ཚུལ་གྱིས་ཡོད་པ་ཡིན་ནོ། །དོན་གྱིས་ཀྱང་ཆ་བཅུ་དྲུག་པ་ཞེས་པ་ལ་ཆ་ལོགས་པ་མེད་དེ། དེ་ནི་ཆ་བཅོ་ལྔ་པ་རྫོགས་ནས་འབྲིད་པའི་འགོ་མ་བརྩམས་པའི་མིང་ཡིན་ན་དེ་འདྲ་དེ་ཆེས་ཕྲའོ། །འདིར་ལོ་གྲངས་ཀྱི་ངེས་པ་ནི། ཚེ་ལོ་བརྒྱ་པའི་དབང་དུ་བྱས་པའི་ཆ་ལས་བཞག་པར་གོ་དགོས་ལ། བཅུ་དྲུག་ལ་སླེབ་པ་ན་ཆགས་པ་ནི་རྫོགས། གཉིས་སྦྱོར་གྱི་འཁྲིག་པ་ལ་དངོས་སུ་མི་སྤྱོད་པའི་སྐབས་ནས། འཁྲིག་པའི་སྦྱོར་བ་དང་པོར་ཉམས་སུ་མྱོང་བ་ཚུན་ཆད་ཐིག་ལེའི་རྣལ་འབྱོར་གྱིས་སྦྱོང་ངོ༌། །དེ་ཡང་དེའི་ཚེ་སྲེད་པས་རྒྱུད་དཀྲུགས་པས་འདོད་ཆགས་དང་ཀུན་ཏུ་འབྲེལ་བའི་ལུས་ངག་གི་རྣམ་འགྱུར་དུ་མ་འབྱུང་བ་དང༌། རྒོད་ཅིང་བརྩེ་བ་དང༌། ལག་པ་འཛིན་པ་སོགས་བག་མའི་བྱ་བ་རྣམས་སྦྱོང་བྱེད་དབང་གི་དུས་ན་བུམ་པ་གསང་བའི་དབང་གཉིས་དང༌། བསྐྱེད་པའི་སྐབས་འདིར་རིགས་དྲུག་དང་རྡོ་རྗེ་དྲུག་འགོད་པ་མཁའ་གསང་བྱིན་རླབས་དང་བཅས་པ་སྔོན་འགྲོའི་བྱ་བ་རྣམས་ཀྱིས་སྦྱོང་ཞིང༌། དེ་ནས་གཉིས་སྦྱོར་གྱི་ཆ་འཁྲིག་པ་དངོས་ལ་བཞུགས་ནས་ཐ་མལ་འཛག་བདེའི་ངོ་བོར་གྱུར་པའི་དགའ་བཞི་དང༌། མཐར་ཐིག་ལེ་འཕོ་བའི་ལྷན་སྐྱེས་མྱོང་བ་ནི། འཇིག་རྟེན་པའི་བཞི་གསུམ་ཤེས་རབ་ཡེ་ཤེས་ཀྱི་དབང་དང༌། སྐབས་འདིར་ལམ་ཐིག་ལེའི་རྣལ་འབྱོར་དངོས་གཞིས་སྦྱོང་བར་བྱེད་ དོ། །མོས་སྒོམ་གྱི་སྐབས་འདིར་མོས་པ་ལམ་བྱེད་ཙམ་དང༌། སུན་འབྱིན་པའི་གཉེན་པོར་གཏོགས་པ་ཙམ་ལས་མེད་ཀྱང༌། བསྐྱེད་རིམ་གྱི་ཐིག་ལེའི་རྣལ་འབྱོར་དངོས་གྲུབ་པ་ན། སྤོང་བའི་སྦྱོར་བ་ལ་ཞུགས་ཤིང༌། རྫོགས་རིམ་ཐིག་ལེའི་རྣལ་
འབྱོར་གྱིས་དངོས་སུ་སྤོང་ངོ་ཞེས་རགས་བཤད་ཀྱི་དབང་དུ་བྱས་ པའོ། །དེ་ཡང་སྦྱང་བྱ་ཐ་མལ་བའི་འདོད་པའི་གནས་སྐབས་རྣམ་པ་བཅུ་ཡོད་པ་ལས། བསམ་པ་དང་འདོད་པ་དང༌། དྲོད་དང༌། སྐམ་པ་དང༌། ཟས་ལ་མི་འཇུག་པ་སྟེ་གནས་སྐབས་ལྔ་པོ་དེ་ནི་བུམ་གསང་གི་སྦྱང་བྱ་སྔོན་འགྲོའི་སྐབས་དེ་ཡིན་ལ། འདར། སྨྱོ། འཁྲུལ། བརྒྱལ། རྨོངས་པ་ལྔ་པོ་ཐིག་ལེའི་རྣལ་འབྱོར་དངོས་གཞིའི་སྦྱང་བྱའོ།། །།གཉིས་པ་དག་བྱེད་ཀྱི་ལམ་རྫོགས་རིམ་གྱི་གཞི་འདིངས་པར་འགྱུར་ཚུལ་ནི། སྐབས་འདིར་ལྷ་སྐུ་ཡབ་ཡུམ་གྱིས་བདེ་བ་འབྱུང་འགྱུར་ལ་དམིགས་པའི་ཆགས་པའི་བདེ་བ་ཕྲ་མོས་བྱིན་གྱིས་བརླབ་པ་ནི། ཕྱིས་རྫོགས་རིམ་སྐབས་སུ་འཛིན་པས་དྲངས་པའི་རྗེས་དྲན་དུ་གྲགས་པ་ཡེ་ཤེས་གཏུམ་མོའི་འབར་སྣང་ལས་གྲུབ་པའི་སྟོང་གཟུགས་ཀྱི་ལྷ་སྐུ་ཡབ་ཡུམ་རྣམ་པ་མཐའ་ཡས་པ་དང་བཅས་པ་དེ་མཚོན་ལ། སྔོན་འགྲོ་བྱིན་རླབས་ཀྱི་སྐབས་རྣམས་འདོད་པའི་གནས་སྐབས་དང་པོ་ལྔ་དག་པ་དང༌། དངོས་གཞི་དགའ་བ་བཞི་ཤར་བ་དང༌། ལྷན་སྐྱེས་ལ་གནས་པ་སྟེ་ལྔ་ནི་འདོད་པའི་གནས་སྐབས་ཕྱི་མ་ལྔ་རྣམ་པར་དག་པའི་རྗེས་དྲན་གྱི་ལམ་སྦྱོང་ཡིན་པ། རྗེས་དྲན་གྱི་སྐབས་ཀྱི་ལས་དང་ཡེ་ཤེས་ཀྱི་ཕྱག་རྒྱ་ཡང་སྣ་ཚོགས་ཡུམ་ཉིད་ཀྱིས་མཚོན་པས་ན། ཕྱག་རྒྱ་བཞི་སྦྱོར་དང་གསུམ་སྦྱོར་གྱི་སྐབས་སུ་བྱུང་བའི་གནས་སྐབས་བཅུ་ཕྲག་གཉིས་པོ་ཡང་དེ་རྣམས་ཉིད་ཀྱིས་ལམ་སྦྱོང་པ་ཡིན་གྱི། རིམ་པ་སོ་སོར་སྦྱོར་མི་དགོས་སོ། །ཧོཿཡིག་ལས་གཏུམ་མོ་རབ་ཏུ་འབར་བས་གཡས་གཡོན་གྱི་དཀྱིལ་འཁོར་བཅུ་དང་དབང་ཡུལ་བཅུ་བསྲེགས་པ་སྟེ་དབུ་མར་ཐིམ་པར་བསམ་པ་ནི། ཕྱག་རྒྱ་གསུམ་པོ་གང་ལ་བརྟེན་ཀྱང་རུང་སྟེ། ལྟེ་བའི་རྩ་འཁོར་གྱི་གཏུམ་
མོ་བདུན་བཅུ་རྩ་གཉིས་ཡོངས་སུ་རྫོགས་པར་འབར་བས་རྩ་གནས་ཐམས་ཅད་བྱིན་གྱིས་བརླབས་ཤིང༌། དབུ་མ་ལས་བརྒྱུད་ནས་གཙུག་ཏོར་དུ་ཕྱིན་པ་ན། རྩ་ཐམས་ཅད་ཞུ་བའི་ཐིག་ལེ་རྣམས་རླུང་གི་བགྲོད་པས་སྟེང་དུ་འདུས་ཏེ་དེ་ན་གནས་པའི་ཐིག་ལེའི་བདག་པོ་མི་ཤིགས་པ་ཧཾ་དང་བཅས་ཏེ་ཞུ་ལ། སྨིན་མཚམས་ཀྱི་འཁོར་ལོ་ལས་ཆ་བཅུ་དྲུག་གི་རིམ་པས་བབས་ཏེ་འཁོར་ལོ་རྣམས་ཀྱི་ལྟེ་བར་ཞུ་བདེ་ཤིན་ཏུ་བརྟན་པའི་རིམ་པས་དགའ་བ་བཞིའམ་བཅུ་དྲུག་གི་མཐར་ཐུག་པའི་རིམ་པས་འོངས་ཤིང༌། དེ་ཉིད་སླར་ཡང་ལུགས་ཟློག་གིས་སྤྲོ་བར་བྱེད་དོ། །འདི་ཡང་འཛིན་པའི་འཇུག་ཏུ་རྗེས་མཐུན་པ་དང༌། རྗེས་དྲན་ལ་ཡོངས་རྫོགས་དངོས་སུ་འབྱུང་ངོ༌། །དེའི་ཚེ་ནོར་བུར་ལྷན་ཅིག་སྐྱེས་པ་ཡང་དག་པར་རིག་པའི་ལྷན་སྐྱེས་དེ་ནི་འཇིག་རྟེན་པ་དང་འཇིག་རྟེན་ལས་འདས་པའི་ས་མཚམས་ཕྲ་མོས་ཕྱེ་ན། འཇིག་རྟེན་པ་ཞེས་བྱ་མོད་ཀྱང༌། འཁོར་བ་ཁམས་གསུམ་ལས་ནི་ཤིན་ཏུ་འདས་པ་ཡིན་ནོ།། །།གསུམ་པ་དག་འབྲས་ལ་སྦྱར་བ་ནི། ཐུགས་དང་ལོངས་སྤྱོད་རྫོགས་པའི་སྐུ་ཡང་ཟུང་དུ་འགྱུར་ཏེ། ཞེས་པ་ལྟར་འདི་ཐུགས་རྡོ་རྗེ་ཆོས་སྐུའི་ལམ་ཡིན་ཡང་གསུང་ལོངས་སྐུའི་ཆོས་ཀྱིས་བརྒྱན་པར་བྱེད་དགོས་ཏེ། བདེ་བའི་ཆ་ནས་ཀྱང་ལོངས་སྐུ་ཞེས་སྤྱི་ལ་གྲགས་པ་དང༌། རླུང་ནི་ངག་གི་ཆོས་ཡིན་པ་ལས་རླུང་གིས་གཏུམ་མོ་བསྐུལ་བ་དང༌། གཏུམ་མོ་སྤར་བས་ཕུང་ཁམས་ཀྱི་རླུང་ཐམས་ཅད་ཐིམ་པར་བྱེད་པ་ཉིད་ཀྱིས་སོ། །དེ་ལ་ཐུགས་རྡོ་རྗེ་ནི་རབ་ཏུ་བརྟན་ཅིང་མི་འགྱུར་ལ་མཚན་མ་མེད་པ་བྱ་བྱེད་ཐམས་ཅད་དང་བྲལ་བའི་ཕྱིར། དེ་མཚོན་པ་ནི་རྡོ་རྗེ་དྲུག་དང་མཁའ་གསང་བྱིན་གྱིས་བརླབ་པ་ལ་སོགས་པ་སྟེ། ཡེ་ཤེས་ཀྱི་མཚན་མ་ཡིན་པའི་ཕྱིར་ཀུན་རྫོབ་ཀྱི་མཚན་མ་སྤངས་པའོ་
ཡང་དག་མ་ཡིན་པའི་ཀུན་ཏུ་རྟོག་པའི་རྒྱུ་རླུང་ཐམས་ཅད་ཐིམ་པ་ལས་ཤིན་ཏུ་དངས་མའི་ཡེ་ཤེས་བརྙེས་པ་ནི། རླུང་རྣམས་འགགས་པར་མོས་པ་དང་སྦྱོར་ཏེ། འདོད་ཆགས་བདེ་བ་ཆེན་པོའི་ཆོས་ཉིད་ཀྱི་ཕྱིར་ཧོཿཡིག་དང༌། ཇི་ལྟ་བ་དང་ཇི་སྙེད་པའི་ཆོས་ཐམས་ཅད་སྣང་བར་བྱེད་པའི་ཕྱིར། ལུས་ཐམས་ཅད་འོད་ཀྱིས་གང་ཞིང་གཙུག་ཏོར་དུ་ཕྱིན་ པའོ། །ཐུགས་ཉིད་ཀྱང་རྡོ་རྗེ་བཞི་ཟུང་དུ་འཇུག་པའི་བདག་ཉིད་ཡིན་པའི་ཕྱིར། དགའ་བཞིའི་རིམ་པ་སྒོམ་པར་བྱེད་པ་སྟེ། ཡེ་ཤེས་མཐའ་ཡས་པ་བདེ་སྟོང་གི་རང་བཞིན་གཅིག་ཏུ་བསྡོམས་པ་ནི་ཐུགས་རྡོ་རྗེའམ་ཆོས་ཀྱི་སྐུའོ། །རྗེས་ཆགས་ཀྱི་ང་རྒྱལ་ནི་སྐབས་འདིར་བཟུང་བ་ཡིན་ཏེ། ཁ་ཅིག་ཨ་ནུ་རཱ་ག་ནའི་སྔགས་ཀྱིས་ཁྱེད་ཀྱང༌། རྒྱུད་ཚིག་ཉིད་ལས། ཡེ་ཤེས་མཆོད་པ་རྗེས་སུ་ཆགས་པ་ལ་སྟེ། ཞེས་འབྱུང་བ་ལྟར་ཛྙཱ་ན་པུ་ཛ་སོགས་བརྗོད་པ་འདི་ཁོ་ན་རྒྱུད་འགྲེལ་གྱི་དགོངས་པ་ཡིན་ཏེ། འོན་ཀྱང་ལོ་ཙཱ་བས་དེ་བོད་སྐད་དུ་བསྒྱུར་པས་འཁྲུལ་གཞི་བསྐྱེད་དེ། ཀུན་མཁྱེན་ཆེན་པོ་མ་གཏོགས། གཞན་བོད་ཀྱི་དུས་འཁོར་བ་རྣམས་ཀྱིས་སྔགས་ཡིན་པ་མ་ཤེས་པར་སྣང་ངོ༌།། །།བཞི་པ་བདེ་བ་རྫོགས་པ་ཕྲ་མོའི་རྣལ་འབྱོར་ལ། སྒོམ་པའི་རིམ་པ་དང༌། དག་དབྱེ་བཤད་པའོ། །དང་པོ་ལ་ཕྲ་མོའི་རྣལ་འབྱོར་དངོས་དང༌། མོས་སྒོམ་བྱེད་ཚུལ་ལོ། །དང་པོ་ནི། ཕྲ་མོའི་རྣལ་འབྱོར་གྱི་མཆོག་ཏིང་ངེ་འཛིན་གྱི་ཡན་ལག་སྟེ། དེ་ཡང་ཐིག་ལེ་ཕྲ་མོ་ཟུང་དུ་འབྲེལ་བའི་ཚུལ་གྱིས་འབྱུང་ན། དེ་སྐབས་ཀྱི་ཐིག་ལེའི་རྣལ་འབྱོར་དེ་ཡང་ཕྲ་མོ་དངོས་ཀྱི་སྦྱོར་བ་ཡིན་པས། རྟོགས་རིགས་ཐིག་ལེའི་རྣལ་འབྱོར་ཡིན་ཡང་སྡེ་ཚན་ཕྲ་མོའི་ནང་དུ་བསྡུའོ། །དེ་ཡང་ཇི་ལྟ་བུ་ཞེ་ན། ཕྱག་རྒྱ་གཞན་གྲོགས་སུ་ཡོད་དམ་མེད་ཀྱང་རུང་སྟེ། སྟོང་
གཟུགས་ཕྱག་རྒྱ་ཆེན་མོ་དང་མཉམ་པར་སྦྱོར་བའི་རྗེས་ཆགས་ཀྱི་ཡེ་ཤེས་ཀྱི་གཏུམ་མོ་འབར་ནས་ཀུན་ད་ལྟ་བུ་ཞུ་ཞིང་བཅིངས་པ་འཁོར་ལོ་རྣམས་སུ་སྤེལ་གྱིན་སྦྱར་བའི་མཐར་ནོར་བུར་ལྷན་ཅིག་སྐྱེས་པ་བརྟན་པར་བྱས་པའི་སྐད་ཅིག་དེ་ནི་ཕྲ་མོའི་སྦྱོར་བ་ཡིན་ཀྱང་ངོ་བོ་ཐིག་ལེའི་རྣལ་འབྱོར་རོ། །དེའི་སྐད་ཅིག་གཉིས་པར་ཡར་ཟློག་པ་ནས་གཟུང་སྟེ། འཁོར་ལོ་དྲུག་དང་ཁྱད་པར་གཙུག་ཏོར་གྱི་མཐར་བརྟན་པར་བྱས་པའི་བར་དེ་དག་ཏུ་ཞུ་བའི་ཐིག་ལེ་དེ་མི་འགྱུར་བའི་ཐིག་ལེར་སོང་ཞིང༌། དེ་ནི་གཏུམ་མོའི་འབར་སྣང་དང་ངོ་བོ་གཅིག་ཏུ་གྱུར་པ་ཡིན་པའི་ཕྱིར། ཁམས་གསུམ་པའི་གཟུགས་བརྙན་རྣམ་པ་ཀུན་གྱི་མཆོག་དང་ལྡན་པའི་ཡེ་ཤེས་ཀྱི་དཀྱིལ་འཁོར་རྡོ་རྗེ་སྤྲོ་བ་འབྱུང་བ་དེ་རྡུལ་ལས་འདས་ཤིང༌། རང་རིག་ཕྲ་བ་ཙམ་གྱི་ངོ་བོ་ཡིན་པས་ན་ཕྲ་མོའི་རྣལ་འབྱོར་ཞེས་བྱའོ། །དེ་ནི་རྫོགས་རིམ་གྱི་ཕྲ་མོ་ཡིན་ལ། བསྐྱེད་རིམ་མཐར་ཕྱིན་པའི་ཕྲ་མོའི་རྣལ་འབྱོར་དངོས་ནི། གོང་དུ་བཤད་པ་ལྟར་གྱི་ལྷའི་རྣལ་འབྱོར་དང༌། རགས་པའི་རླུང་ལས་རྣམ་པར་རྒྱལ་བ་དང༌། ལས་སམ་ཡེ་ཤེས་ཀྱི་ཕྱག་རྒྱ་ལ་བརྟེན་ནས་ཐིག་ལེའི་རྣལ་འབྱོར་གྱི་བདེ་བ་ལ་བརྟན་པ་ཐོབ་སྟེ། སླར་ཐོག་མར་ནོར་བུའི་གནས་སུ་བདེ་བའི་ཐིག་ལེ་ལ་བརྟེན་ནས་དཀྱིལ་འཁོར་ཡིད་ལ་བྱས་པས། དེར་དཀྱིལ་འཁོར་ཅི་རིགས་པའི་གསལ་སྣང་འབྱུང་ལ། དེ་བཞིན་དུ་ལྟེ་སྙིང་མགྲིན་སྤྱི་གཙུག་ཏོར་རྣམས་སུའང་སྦྱངས་ནས། མཐར་ཤིན་ཏུ་བྱང་བ་ན་མས་བརྟན་ལུགས་ཟློག་གི་དགའ་བཞིའི་སྐབས་སུ། སྔོན་ཡིད་ལ་བྱས་པའི་ཤུགས་ཀྱིས་ཐོབ་པའི་གསལ་སྣང་གི་ཚུལ་ལ་འཁོར་ལོ་དྲུག་ནས་རྡོ་རྗེ་སྤྲོ་བ་རྗེས་མཐུན་པ་འབྱུང་སྟེ། དེ་ལ་གསང་བ་ནས་ཡེ་ཤེས་ཁམས་ཀྱི་ལྷ་ཚོགས་དང༌། ལྟེ་བ་ནས་ས་ཁམས། སྙིང་ག་ནས་ཆུ་ཁམས། མགྲིན་པ་ནས་མེ་ཁམས་སྤྱི་བོ་
ནས་རླུང་ཁམས། གཙུག་ཏོར་ནས་མཁའ་ཁམས་ཀྱི་ལྷ་ཚོགས་སྤྲོ་ཞེས་ཐ་སྙད་བྱེད་དོ། །འདི་ལའང་ཕྲ་མོ་དངོས་ནི། ཐིག་ལེ་ལ་དཀྱིལ་འཁོར་གྱི་གསལ་སྣང་ཅན་མས་བརྟན་ཁོ་ནའི་སྐབས་ཡིན་ལ། དེའི་སྔོན་རོལ་ཏུ་རྗེས་ཆགས་ཀྱི་མེ་སྤར་བས་ཐིག་ལེ་ཞུ་བ་ནི། རྟོགས་རིགས་ཐིག་ལེའི་རྣལ་འབྱོར་ཡིན་ཡང་ཕྲ་མོའི་སྦྱོར་བ་དེ་མ་ཐག་པ་ཡིན་པའི་ཕྱིར། ཕྲ་མོའི་རྣལ་འབྱོར་ཉིད་ཀྱི་ཁོངས་སུ་བསྡུའོ། །འདིར་ཡས་བབས་ཀྱི་སྐབས་སུ་ཞུ་བདེ་རྒྱས་ཤིང་རྣམ་པར་རྟོག་པ་ཐིམ་པའི་ཞོར་ལ་གསལ་སྣང་ཡང་ཅུང་ཟད་ཅུང་ཟད་ནུབ་པར་འགྱུར་བས་དེ་དུས་རྡོ་རྗེ་སྤྲོ་མི་ནུས་ལ། མས་བརྟན་གྱི་སྐབས་རྟོག་པ་མེད་ཀྱང༌། དག་པའི་རླུང་དང་ཐིག་ལེ་དངས་པ་ཡེ་ཤེས་ཀྱི་གསལ་སྣང་འཕེལ་བའི་དུས་ཡིན་པས་རྡོ་རྗེ་སྤྲོ་བ་གང་འདོད་ནུས་པ་ཡིན་ནོ། །གཞན་ཡང་བསྐྱེད་རིམ་གྱི་རྟོགས་པ་ལ་བརྟན་པ་ཐོབ་པའི་རྣལ་འབྱོར་པ་ལ། ཕྲ་མོ་བསྒོམས་པས་ཞོར་བྱུང་དུ་ཐིག་ལེའི་རྣལ་འབྱོར་འབྱུང་སྟེ། ཐིག་ལེའི་རྣལ་འབྱོར་ལོགས་སུ་མི་དགོས་ཤིང༌། འདི་ནི་ཕྱི་དཀྱིལ་རགས་པ་ལ་བལྟོས་ན་མཆོག་ཏུ་ཕྲ་བའི་དཀྱིལ་འཁོར་སྤྲོ་བའི་ཕྱིར་ཕྲ་མོའི་རྣལ་འབྱོར་རམ། དེ་འདྲའི་ལྷ་སྐུ་དེ་རླུང་སེམས་ཀྱི་སྣང་ཆ་ཙམ་ཡིན་པས་ཕྲ་མོའི་རླུང་གི་རྣལ་འབྱོར་ཞེས་སྤྱི་དང་མཐུན་པར་བཤད་ཀྱང་རུང་ངོ༌།། །།གཉིས་པ་མོས་སྒོམ་བྱེད་ཚུལ་ནི། ད་ལྟ་ལས་དང་པོ་པས་མོས་སྒོམ་བྱེད་ན། སླར་ཡང་ཇི་ལྟར་བྱོན་པ་དེ་བཞིན་དུ་ཞེས་སོགས་ཏེ། ཐིག་ལེའི་རྣལ་འབྱོར་མོས་སྒོམ་གྱི་འཇུག་ཐོགས་དེ་ཁར་བྱང་ཆུབ་ཀྱི་སེམས་གྱེན་དུ་གཤེགས་པར་མོས་ཤིང༌། ལྟེ་བ་སོགས་འཁོར་ལོ་བཞི་པོའི་གནས་རེ་རེར་སླེབ་པ་ན། རྒྱུ་མཐུན་པའི་འབྲས་བུ་ལྷན་ཅིག་སྐྱེས་སྐུ་སོགས་ཐོབ་སྙམ་པ་དང༌། འཁོར་ལོ་སོ་སོའི་ལྟེ་བའི་ཐད་དུ་སླེབ་པ་ན། ཡེ་ས་ཆུ་མེ་རླུང་མཁའི་ལྷ་ཚོགས་ཅི་རིགས་
པ་སྤྲོ་བའི་མོས་པ་བྱའོ། །དེར་མ་ཟད་ཐིག་ལེ་ཕྲ་མོའི་སྐབས་འདི་གཉིས་ཀ་ལ་ལས་དང་པོ་པའི་མོས་སྒོམ་གྱི་ཚེ། འབྲས་བུ་སངས་རྒྱས་ཀྱི་ཐུགས་དང་ཡེ་ཤེས་སུ་ང་རྒྱལ་བྱེད་དགོས་པའི་སྟེང་དུ། ལམ་རྗེས་དྲན་དང་ཏིང་འཛིན་ཡིན་པར་ཡང་ང་རྒྱལ་བྱེད་དགོས་སོ། །ཕྲ་མོའི་རྣལ་འབྱོར་ལ་སྒྲུབ་པ་ཆེན་པོ་ཞེས་བྱ་བ་ནི། དངོས་སུ་ན་ཐིག་ལེའི་དབུས་སུ་དཀྱིལ་འཁོར་ཡོངས་རྫོགས་ལྟ་ནུས་པའི་དཀྱིལ་འཁོར་ཕྲ་མོ་དེ་དག་ཀྱང་སྒྲུབ་པར་ནུས་ན། རགས་པ་ལྟ་སྨོས་ཀྱང་ཅི་དགོས་པས་སྒྲུབ་པ་ཆེན་པོ་སྟེ། སྣའི་རྩེ་མོར་ཡུངས་ཀར་སོགས་ཀྱིས་དོན་ཡིན་ལ། སྔར་ཐིག་ལེའི་སྐབས་རགས་པའི་རྣལ་འབྱོར་གྱི་ལྷ་སྐུ་བདེ་བར་ཅུང་ཟད་བསྒྲུབས་པ་ལས། འདིར་དེ་བས་ཀྱང་སྒྲུབ་ཚུལ་ལྷག་སྟེ་བདེ་བའི་རང་བཞིན་གྱི་ལྷ་སྐུ་སྤྲོ་བའི་ཕྱིར་རོ།། ངེས་པར་ན་རྫོགས་རིམ་གྱི་ཕྲ་མོ་ཏིང་ངེ་འཛིན་གྱི་རྣལ་འབྱོར་ནི། གཉིས་སུ་མེད་པའི་ཡེ་ཤེས་ཀྱི་སྐུ་མཆོག་གི་དངོས་གྲུབ་དེ་དངོས་སུ་སྒྲུབ་བྱེད་ཡིན་པའི་ཕྱིར་སྒྲུབ་པ་ཆེན་པོའོ། །ཕྲ་མོའི་སྦྱོར་བ་འདི་ནི་ཡེ་ཤེས་རྡོ་རྗེའི་ལམ་ཡིན་ཏེ། བདེ་བ་ལྷ་སྐུར་སྤྲོ་བ་ན་མཆོག་ཏུ་མི་འགྱུར་བའི་བདེ་བ་དེ་ཉིད་རྣམ་པ་ཐམས་ཅད་པར་འཆར་བའི་ཕྱིར་རོ། །དེ་ལ་ཐུགས་སྟོང་པ་དང་ཡེ་ཤེས་བདེ་བའི་ཆ་ནས་བཞག་པའང་མང་མོད། གཙོ་བོར་ཐུགས་བདེ་སྟོང་དང་ཡེ་ཤེས་རྣམ་པ་ཐམས་ཅད་པའི་སྒོ་ནས་འཇོག་ལ། ཡེ་ཤེས་དང་ནི་སྤྲུལ་པའི་སྐུ་དག་ཟུང་དུ་འགྱུར་ཏེ། ཞེས་པས་རྣམ་པ་ཐམས་ཅད་པ་ཉིད་ལས་སྤྲུལ་སྐུ་འཆར་ཞིང༌། རྡོ་རྗེ་སྤྲོ་བ་ནི་སྤྲུལ་སྐུ་དང་རྣམ་པ་མཐུན་པའི་ལམ་མོ། །དེའི་ཕྱིར་སྤྲུལ་པ་སྒྱུ་མ་ལྟ་བུའི་ཚོགས་པ་བགྲངས་པ་ལས་འདས་པ་སྤྲོ་བ་པོ་ཡིན་པའི་ཕྱིར་སྒྱུ་འཕྲུལ་དྲྭ་བས་མངོན་པར་རྫོགས་པར་བྱང་ཆུབ་པ་དང་སྦྱོར་རོ། །སྤྱིར་བྱང་ཆུབ་རྣམ་པ་བཞི་པོ་ནི་སྐུ་སྒྱུ་འཕྲུལ་དྲྭ་བ་གསུང་རྣམ་པ་ཉི་ཤུ་ཐུགས་རྣམ་པ་ལྔ་ཡེ་ཤེས་སྐད་ཅིག་གཅིག་པ་རྣམས་ཡིན་ཀྱང་ཡན་ལག་བཞི་ལ་བྱང་ཆུབ་བཞི་
སྦྱོར་ཚུལ་ཕལ་ཆེར་བསྣོལ་བ་འདི་ནི། ཕན་ཚུན་རྒྱས་བཏབ་ཀྱི་དབང་དུ་བྱས་པའོ། །དེ་ཡང་འདིར་རྡོ་རྗེ་བཞིའི་རྣལ་འབྱོར་ལ་བྱང་ཆུབ་བཞིའི་མིང་བསྣོལ་ཚུལ་སྐུ་ལ་ཐུགས་ཀྱི་ཆོས་དང༌། ཡེ་ཤེས་ལ་སྐུའི་ཆོས་དང༌། ཐུགས་ལ་ཡེ་ཤེས་ཀྱི་ཆོས་རྗེས་སུ་ཞུགས་པའི་ཚུལ་དང༌། གསུང་གི་རྣལ་འབྱོར་ལ་རང་གནས་སོ།། །།གཉིས་པ་དག་དབྱེ་ལ་ཕྲ་མོའི་རྣལ་འབྱོར་གྱི་སྐབས་སུ་བབ་པའི་སྦྱང་བྱ་ནི། གཞོན་ནུ་དེ་དག་ལང་ཚོའི་གནས་སྐབས་ཐོབ་པ་ན། རིགས་ཀྱི་བུད་མེད་ལས་ཐིག་ལེ་འཕོ་བ་ཡང་ཡང་ཐོབ་པ་ན་ལས་ཀྱི་དབང་གིས་བུ་དང་མུ་མོ་མང་དུ་སྤྲོས་པར་གྱུར་ལ། དེ་དག་ལས་ཀྱང་ཚ་བོ་དང་ཡང་ཚ་ལ་སོགས་པ་དུ་མ་སྤྲོས་ན། རིགས་ཀྱི་སྐྱེ་བོ་མང་པོ་དེ་རྣམས་ཀྱི་བསྐྱེད་གཞི་ཕ་མེས་དེ་ནི་སྐྱེ་དགུའི་བདག་པོ་ཞེས་འདོགས་པར་བྱེད་དོ། །དེ་ལ་འཁོར་བ་པ་རྣམས་ཀྱི་ཐིག་ལེ་ཕྱིར་འཕོ་བའི་དོད་དུ་འདིར་ཕྱིར་འཕོ་བ་བཀག་སྟེ་མངལ་གནས་ཀྱི་དོད་རང་ལུས་ཀྱི་རྩ་འཁོར་ལོ་རྣམས་ཡིན་ལ། འཐུར་དུ་ལྷུང་བའི་དོད་ནོར་བུ་ནས་གཙུག་ཏོར་གྱི་བར་དུ་གྱེན་དུ་ཟློག་སྟེ་སྤྲོས་པས་བུ་དང་ཚ་བོ་སོགས་བསྐྱེད་པའི་དོད་རྫོགས་རིམ་གྱི་སྐབས་སུ་རྡོ་རྗེ་སྤྲོ་བ་དང༌། བསྐྱེད་རིམ་དངོས་ལ་རླུང་སེམས་གསལ་སྣང་ཙམ་གྱི་ལྷ་སྤྲོ་བ་དང༌། ལས་དང་པོ་པས་ཀྱང་དེ་ལྟར་མོས་པས་ཏེ། དེས་ན་གཞི་སེམས་ཅན་གྱི་བྱ་བ་དེ་དག་ལམ་གྱི་རྣལ་འབྱོར་དེ་རྣམས་ཀྱིས་སྦྱོང་བར་བྱེད་དོ། །ལམ་གོང་མའི་སྔོན་འགྲོར་འགྱུར་ཚུལ་ནི། རྣལ་འབྱོར་ཡན་ལག་དྲུག་གི་རིམ་པས་ཐ་མ་ཏིང་ངེ་འཛིན་གྱི་རིམ་པའི་སྐབས་སུ་གསང་ལྟེ་སྙིང་མགྲིན་དཔྲལ་པ་སྤྱི་གཙུག་རྣམས་ལ་རེ་རེ་བཞིན་ས་གཉིས་གཉིས་ཏེ། ས་བཅུ་གཉིས་འབྱུང་བ་དེ་ནི་ད་ལྟ་བྱང་ཆུབ་ཀྱི་སེམས་གསང་བ་ནས་གཙུག་ཏོར་གྱི་བར་དུ་ཟློག་པས་རྒྱུད་སྦྱོང་བར་བྱེད་ལ། དེའི་ཚེ་རླུང་དང་ཁམས་དཀར་དམར་གྱི་བགྲོད་པ་ཉི་ཁྲི་ཆིག་སྟོང་དྲུག་བརྒྱ་ཡོད་པ་སྟོང་གཟུགས་ཀྱི་ངོ་བོར་
འགྱུར་ཞིང༌། གྱུར་མ་ཐག་ཏུ་རྣམ་པ་ཐམས་ཅད་པའི་དཀྱིལ་འཁོར་དུ་སྤྲོ་བ་ནི། འཁོར་ལོ་དྲུག་གི་དབྱེ་བས་སྡེ་ཚན་དྲུག་ཏུའང་འདུས་པ་བཞིན། སྐབས་འདིར་འཁོར་ལོ་དྲུག་ནས་ལྷ་ཚོགས་སྤྲོ་བས་སྨིན་པར་བྱེད་དོ། །ཡང་ནོར་བུ་དང་གསང་བའི་ནུས་པ་ལྟེ་བར་བསྡུས་ཤིང༌། དཔྲལ་བ་དང་སྤྱི་གཙུག་ཀྱང་གཅིག་ཏུ་བསྡོམས་ནས། ལྟེ་བ་སོགས་འཁོར་ལོ་བཞིར་འབྲས་བུ་བཞི་ལམ་གྱི་སྐུ་བཞིའི་ངོ་བོ་རྣམས་ཐོབ་པར་འགྱུར་བ་ནི། མས་བརྟན་དགའ་བ་བཞིའི་རིམ་པ་ལ་སྐུ་བཞི་དང་འབྲས་བུ་བཞིར་མོས་པས་སྨིན་པར་བྱེད་དོ། །དག་འབྲས་ནི། སངས་རྒྱས་རྣམས་ནི་རྟག་ཏུ་འཕོ་བ་མེད་པའི་ཐིག་ལེ་འཆང་ཞིང་སྐུ་གསུང་ཐུགས་དང་ཡེ་ཤེས་ཀྱི་འཁོར་ལོ་སྒྲིབ་བྲལ་ཉིད་དུ་གནས་ལ། ནམ་མཁས་གར་ཁྱབ་ཀྱི་སྲིད་པ་ཀུན་ཏུ་སེམས་ཅན་རྣམས་ཀྱི་སྐལ་བ་དང་འཚམ་པར་སྤྲུལ་པ་དང་འཕྲིན་ལས་ཀྱིས་ཁྱབ་ཅིང༌། དེའི་རྒྱུ་ཡེ་ཤེས་ཀྱི་དཀྱིལ་འཁོར་རྣམ་པ་ཐམས་ཅད་པ་སངས་རྒྱས་རང་སྣང་ལ་གནས་པ་དེ་ནི་ཐིག་ལེ་བཞི་མི་འགྱུར་བ་རང་བཞིན་ལྷན་ཅིག་སྐྱེས་པའི་བདེ་ཆེན་ཉིད་ལས་སྤྲུལ་པའི་ཕྱིར་བདེ་ཆེན་དེ་ལ་སྐྱེ་དགུའི་བདག་པོ་ཞེས་བྱའོ། །དེ་བས་ན་ཐིག་ལེ་བཞི་རྟག་ཏུ་མི་འགྱུར་བར་གནས་པ་དེ་ནི་ད་ལྟའི་གང་ཟག་ལ་མས་བརྟན་གྱི་རིམས་པས་སྐུ་བཞིར་མོས་པས་ལམ་དུ་བྱེད་ལ། སྐུ་རྣམ་པ་ཐམས་ཅད་པས་སྤྲུལ་པ་རྣམ་པ་ཐམས་ཅད་པ་སྤྲུལ་བ་ནི། ད་ལྟ་ལྷ་ཚོགས་སྤྲོ་བས་ལམ་དུ་བྱེད་དོ། །དེ་ལྟར་ན་སྦྱང་བྱ་ལ་ཡང་བུ་དང་ཚ་བོ་སྤྲོ་བའི་ཕ་མེས་ལ་སྐྱེ་དགུའི་བདག་པོའི་མིང་འཇུག་པ་དང༌། ཏིང་ངེ་འཛིན་གྱི་ཡན་ལག་ཏུ་དཀྱིལ་འཁོར་སྤྲོ་བསྡུ་ཅན་གྱི་མི་འགྱུར་བའི་བདེ་བ་ལ་སྐྱེ་དགུའི་བདག་པོའི་ཐ་སྙད་མཛད་པ་དང༌། སངས་རྒྱས་རང་སྣང་གི་སྐུ་བཞི་དབྱེར་མེད་ཡེ་ཤེས་རྡོ་རྗེ་ནི་ཆོས་ཉིད་ཀྱི་ཆ་ནས་འཁོར་འདས་ཐམས་ཅད་སྤྲོ་བསྡུ་མཛད་པ་པོ་དང༌། འབྲས་བུའི་ཆ་ནས་
སྤྲུལ་པ་མཐའ་ཡས་པ་སྤྲོ་བསྡུ་མཛད་པ་པོ་ཡིན་པའི་ཕྱིར་སྐྱེ་དགུའི་བདག་པོ་དངོས་ཏེ། དེ་རྣམས་དང་རྣམ་པ་མཐུན་པའི་ཕྲ་མོའི་རྣལ་འབྱོར་ཡང་ལྷ་ཚོགས་སྤྲོ་བའི་སྒོ་ནས་སྐྱེ་དགུའི་བདག་པོར་ང་རྒྱལ་བྱེད་དགོས་པས་འབྲས་བུ་བཞི་དྲན་པའི་མཐར་ཨོཾ་སརྦ་ཏ་ཐཱ་ག་ཏ་སོགས་དེ་བཞིན་གཤེགས་པ་ཐམས་ཅད་ཀྱི་བདག་པོ་སྟེ། སྐྱེ་དགུའི་བདག་པོར་ང་རྒྱལ་བྱེད་དོ། །ད་ནི་ཐིག་ལེ་དང་ཕྲ་མོའི་རྣལ་འབྱོར་དེ་དག་རྒྱུད་ལས་ཇི་ལྟར་གསུངས་ཞེ་ན། རེ་ཞིག་རྩ་བའི་རྒྱུད་ལས་གསུངས་པ་འགྲེལ་པར་ལུང་དྲངས་བ་ནི། བཅུ་དྲུག་ལོ་ལོན་རིགས་ཅན་མ། །གཟུགས་དང་ལང་ཚོས་བརྒྱན་པ་ལ། །དང་པོར་ལེགས་པར་བསླབས་བྱས་ནས། དབང་བསྐུར་ནས་ནི་སྒྲུབ་པ་བརྩམས། །སྐུ་གསུང་ཐུགས་དང་ཆགས་པ་ནི། །དཔྲལ་བ་ལ་སོགས་རྣམས་ལ་འགོད། །སྭཱ་ཧཱ་གསང་བ་གཙུག་ཏོར་ཆེར། །དེ་ནས་པདྨ་རྣམ་པར་སྦྱངས། ཨཱཿཡིག་པདྨ་འདབ་བརྒྱད་པ། །ཧཱུཾ་ཡིག་གིས་ནི་རྡོ་རྗེར་ལྡན། །དེ་ལྟར་རྡོ་རྗེ་དང་བཅས་པའི། ཤེས་རབ་པདྨ་བསྐྱོད་རྒྱུ་ལས། །ཧཱུཾ་ཡིག་རང་གི་རྡོ་རྗེ་ནི། །རྩེ་མོ་ལྔ་པར་རྣམ་པར་བསྒོམ། དེ་དབུས་པདྨ་འདབ་བརྒྱད་པ། །ཨཱཿཡིག་གིས་ནི་རབ་ཏུ་བརྟག །དེ་ལྟར་རྡོ་རྗེ་པདྨ་དང༌། བཅས་པ་བྱས་ནས་པདྨར་གཞུག །དེ་ནས་རྡོ་རྗེ་འཛིན་པའི་སྙེམས། །འཛིན་ཅིང་རྣལ་འབྱོར་ཧཱུཾ་ཕཊ་ བྱ། །བྷ་གར་ལིང་ག་རབ་བཀོད་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པའི། །སངས་རྒྱས་གཟུགས་ནི་བསྒོམ་པར་བྱ། །ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེག་ཅིང༌། །སྤྱན་མ་མིག་ལ་སོགས་པ་ཡང༌། བསྲེགས་ནས་རི་བོང་ཅན་ཧཾ་འཛག བདུད་རྩི་ཁུ་བའི་ཆོས་ཅན་ནི། །ཐིག་ལེའི་གཟུགས་ཀྱིས་འཛག་པར་བྱེད། །ཐིག་ལེའི་རྣལ་འབྱོར་ཞེས་པར་གྲགས། །བཅུ་དྲུག་ཕྱེད་ཕྱེད་ཐིག་ལེ་འཆང། །ཆ་མེད་
ཆ་ལས་འདས་པ་སྟེ། །བསམ་གཏན་བཞི་ཡི་རྩེ་མོ་འཆང༌། །ཕྲ་མོའི་རྣལ་འབྱོར་ཞེས་པར་གྲགས། །རྒྱུ་མཐུན་ལ་སོགས་སྟེང་དུ་འགྲོ། །དུང་ཅན་མ་འདི་ཕྱག་རྒྱ་ཆེ། །དེ་ནི་གཏུམ་མོར་རབ་ཏུ་བརྗོད། །ལྟེ་བའི་སྟེང་དུ་གཡང་མོ་གང༌། ཨ་ཝ་དྷཱུ་ཏཱི་མི་ཡི་སྣ། འོད་ཟེར་ལྔ་ཡི་རང་བཞིན་སྲོག །དཀྱིལ་འཁོར་ལྔ་ནི་འབབ་བྱེད་པ། །སྣ་རྩེར་ཡུངས་ཀར་དུ་གྲགས་པ། །དེ་ཡང་སྲོག་རྩོལ་ཉིད་དུ་བཤད། །ཁམས་གསུམ་པོ་ནི་མ་ལུས་པའི། །སྲིད་པ་གསུམ་ནི་ཡོངས་ཤེས་པ། སྲོག་འགོག་པ་ན་ཡུངས་ཀར་ཏེ། །དེ་ཡང་རྒྱུ་བཅས་རྒྱུ་མེད་དུའོ། །སོ་སོར་སྡུད་པ་ཕྱག་རྒྱ་ཆེ། །ནམ་མཁའ་སྟོང་པའི་མཚན་ཉིད་དོ། །སྣ་དེ་ཡི་ནི་ཕྱོགས་སུ་ ཡང༌། །གང་ཞིག་ཁོ་ནར་ཡིད་བཀོད་པ། །མཚན་མའི་མཐར་ནི་རེ་ཁཱ་གང༌། །དེ་ལ་སྣ་ཚོགས་རྒྱུ་མི་རྒྱུ། །མ་ལུས་བསྒོམ་པར་བྱ་དེ་ལ། །རྣལ་འབྱོར་བསམ་གཏན་སོགས་དེ་ཡང༌། །ཞེས་གསུངས་ཤིང༌། བསྡུས་པའི་རྒྱུད་ལས་ནི། གཏུམ་མོ་ལྟེ་བའི་འཁོར་ལོ་དགུ་ཡིས་བསྣུན་པའི་ལག་འགྲོ་ཙར་ཙི་ཀཱ་སོགས་ལྷག་པའི་ལྷ་དང་ལྡན། །ཧོཿཡིག་ཡེ་ཤེས་སྙིང་པོ་ལ་ནི་དྲི་མེད་གློག་དང་མཚུངས་པའི་ཡེ་ཤེས་མེ་ནི་རབ་རྒྱས་པ། །ལྟེ་བར་རྣམ་པར་སྣང་མཛད་ལ་སོགས་སྲེག་ཅིང་མི་ཡི་བདག་པོ་སྤྱན་མ་མིག་ལ་སོགས་པ་རྣམས། །ཐམས་ཅད་བསྲེགས་ནས་མགོ་བོར་ཟླ་བ་བཟང་ལས་ཐིག་ལེའི་གཟུགས་ནི་འཇོག་པ་གང་དེ་རྡོ་རྗེ་ཅན། །ཤེས་རབ་ཆོས་འབྱུང་དག་ལ་གནས་པ་མཐའ་དག་སླར་ཡང་སྤྲོ་བ་བྱས་ཏེ་ངེས་པར་ཐིག་ལེ་ཡིས། སྣ་ཚོགས་རྒྱན་དང་ལྡན་ཅིང་མེ་ལོང་དག་ལ་གནས་པ་ལྟ་བུའི་ཡེ་ཤེས་འཁོར་ལོ་རང་བྱུང་བ། འདོད་པ་དང་ནི་གཟུགས་དང་གཟུགས་མེད་སྲིད་པ་རྣམ་པ་གསུམ་པོ་རྣམས་ཀྱང་རིམ་པས་སྦྱངས་བྱས་ཏེ། །ཕྱི་ནས་ཡེ་ཤེས་མེ་ལྕེ་དག་གིས་སྲིད་པ་གསུམ་པོ་མཐའ་དག་དུས་གཅིག་ཏུ་ནི་
དགུག་པར་བྱ། །ཞེས་གསུངས་ཏེ། དེ་ལ་རྩ་རྒྱུད་ཀྱི་ལུང་དྲངས་བ་འདིས་སྦྱོར་བ་ཡན་ལག་དྲུག་ཀ་བསྟན་ཏེ། གཞུང་དེའི་དངོས་བསྟན་ན་རྫོགས་རིམ་ཉིད་དོ། །ཞེས་སྔ་རབས་པ་རྣམས་བཞེད་པ་ནི། དེ་ལ་གནས་པའི་ཕྱོགས་ཡིན་ཞིང༌། ཡང་འགའ་ཞིག་རླུང་སྟོབས་ཀྱིས་ཐིག་ལེ་བཟུང་བཟློག་བྱས་པའི་ཐིག་ལེའི་རྣལ་འབྱོར་ལས་རྒྱལ་བརྟེན་པ་ནི་བསྐྱེད་རིམ་ཡིན་ལ། ཕྱག་རྒྱ་ཆེན་མོའི་དེ་ནི་རྫོགས་རིམ་མོ་ཞེས་ཀྱང་འཆད་པ་ལ། ཕྱིས་ཀྱི་རྣམ་བཤད་བྱེད་པ་འགའ་ཞིག་ནི། རྩ་རྒྱུད་བསྡུས་རྒྱུད་ཀྱི་གཞུང་འདི་དག་གི་དངོས་བསྟན་རྫོགས་རིམ་ཁོ་ན་ཡིན་པའམ། ཕྲ་ཐིག་རྫོགས་རིམ་དུ་སྡུད་ན། བསྐྱེད་རིམ་ལ་ཡན་ལག་བཞི་མ་ཚང་བར་འགྱུར་ཞེས་སྨྲ་ཞིང༌། དེ་ལས་ཤེས་རིན་པ་སོགས་ཁ་ཅིག་མཁའ་གསང་བྱིན་རླབས་དང་ཡི་གེ་འགོད་པ་ཡོད་པའི་ཕྱིར་བསྐྱེད་རིམ་ཁོ་ན་ཡིན། འདི་སྐབས་སུ་བུ་དོལ་གཉིས་ཀར་གྱིས་རྒྱུད་འགྲེལ་གྱི་ས་བཅད་ནོར་རོ་ཞེས་ཟེར་ལ། ནོར་བཟང་རྒྱ་མཚོ་སོགས་གཞན་དག་ཕྲ་མོའི་རྣལ་འབྱོར་ཞེས་པར་གྲགས་ཞེས་པ་ཡན་ཆད་ཀྱིས་བསྐྱེད་རིམ་དང༌། དེ་མན་ཆད་རྫོགས་རིམ་སྟོན་ཟེར་ཞིང༌། རླུང་སྟོབས་ཀྱིས་བཟུང་ཟློག་བྱེད་པ་དེ་རླུང་དབུ་མར་མ་ཐིམ་པ་ལ་མི་ཡོང་ཞིང༌། དེར་ཐིམ་པས་ཡེ་ཤེས་ནི་རྫོགས་རིམ་ཁོ་ན་ཡིན་སྐད་པ་དང༌། འགྲེལ་ཆེན་ལས་ཀྱང༌། ཡེ་ཤེས་ཀྱི་མེ་ནི་ཀུན་རྫོབ་ཀྱི་ཡེ་ཤེས་འདོད་པའི་མེ་ཞེས་གསུངས་པས། དུང་ཅན་མའི་ནང་དུ་གཏུམ་མོ་འབར་བ་མིན་ཅིང༌། དབུ་མའི་ནང་དུ་འབར་འཛག་མི་བྱེད་པས་རླུང་སྟོབས་ཀྱིས་དེ་འདྲ་མིན་ཞེས་འཆད་པ་སོགས་ཟ་ཟི་ལངས་པའི་རྣམ་འགྱུར་མང་དུ་གསལ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། གཞུང་འདི་དག་གི་དངོས་བསྟན་གཙོ་བོར་རྫོགས་རིམ་ཉིད་ཡིན་པས། བུ་དོལ་གཉིས་ས་བཅད་
མ་ནོར་ཤེས་རིན་པ་རང་གི་ས་བཅད་ནོར། ཡང་དཔེར་ན་སངས་རྒྱས་ལ་དད་པ་སྒོམ་པ་ལ་དེའི་ཡོན་ཏན་ཤེས་དགོས་པས་ཡོན་ཏན་འཆད་པ་དད་པའི་ཆོས་སྐོར་དུ་འགྱུར་བ་བཞིན། རྫོགས་རིམ་གྱི་ཕྲ་ཐིག་གི་མཚན་ཉིད་ཤེས་ནས། དེ་དང་རྣམ་པ་མཐུན་པར་ལམ་དུ་བྱེད་པའི་དོན་ལ་བསྐྱེད་རིམ་གྱི་ཕྲ་ཐིག་འབྱུང་བའི་ཕྱིར་གཞུང་དེ་དག་གིས་རྫོགས་རིམ་བསྟན་ཀྱང༌། བསྐྱེད་རིམ་ལ་ཡན་ལག་བཞི་མ་ཚང་བའི་དོགས་པ་མི་དགོས་སོ། །སྤྱིར་ནི་བསྐྱེད་རིམ་ཉིད་ཀྱི་ནང་ཚན་ལས་ཕྱེ་ནས་བཤད་ན། ལྷ་སྣང་བསྐྱེད་རིམ་དག་པ་བ་དང༌། བདེ་སྟོང་རྫོགས་རིམ་གྱི་ཕྱོགས་སུ་འཇོག་ཅིང༌། དེའི་ཚེ་རྗེས་མཐུན་པའི་དབང་དུ་བྱས་ནས་ཕྲ་ཐིག་ཙམ་རྫོགས་རིམ་གྱི་ཚུལ་དུ་བཤད་ཀྱང་འགལ་བ་མེད་པའི་སྐབས་མང་བས་དེ་གཉིས་དེ་འདྲ་ཡིན་ན། ཡན་ལག་བཞི་མ་ཚང་ངོ་ཟེར་བ་ཡང་གཞན་ལ་སྙད་འཚོལ་བའི་ཚིག་འཁྲི་གཡོ་སྒྱུ་ཙམ་མམ། འགངས་མ་གོ་བ་གང་རུང་ལས་མ་འདས་སོ། །ཡང་རླུང་སྟོབས་ཀྱིས་བཟུང་ཟློག་བྱེད་པ་ལ་རླུང་སེམས་དབུ་མར་ཐིམ་དགོས་ན། དམིགས་པས་དེ་བྱེད་པ་ལ་ཡང་དེར་འགྱུར་ཏེ། དམིགས་པ་ཁོ་ནས་དེ་ལྟར་བྱེད་པ་ནི་ཤིན་ཏུ་དཀའ་ལ། དེ་བས་རླུང་སྟོབས་ཀྱིས་དེ་ལྟར་ནུས་པ་སླ་བའི་ཕྱིར་རོ། །གཞན་ཡང་ཁྱེད་ཀྱི་ལུགས་ལ་རྫོགས་རིམ་གྱི་གཟུང་ཟློག་ལས་བསྐྱེད་རིམ་གྱི་བཟུང་ཟློག་བཟང་བར་འགྱུར་ཏེ། རྫོགས་རིམ་གྱི་དེ་ལ་ནི་རགས་པ་རླུང་གི་རྩོལ་བ་དགོས། བསྐྱེད་རིམ་གྱི་དེ་ལ་ནི་ཕྲ་བ་བསམ་གཏན་གྱི་རྣལ་འབྱོར་ཁོ་ནས་ཆོག་པའི་ཕྱིར་རོ། །དེས་ན་རླུང་ལས་རྣམ་པར་རྒྱལ་བ་ལ་ཡང་གཉིས་ཡོད་དེ། རགས་པའི་རླུང་ལས་རྣམ་པར་རྒྱལ་བ་ཐོབ་པ་ཙམ་ལ། རྫོགས་རིམ་ལུགས་ཀྱི་རླུང་སེམས་དབུ་མར་ཐིམ་པ་མི་དགོས་ལ། འདི་ཙམ་ནི་མུ་སྟེགས་བྱེད་ལ་ཡང་མང་
ཞིང༌། དེ་དག་གནས་འདི་ལ་བསྐྱེད་རྫོགས་ཀྱི་ཁ་བཤད་དགག་སྒྲུབ་མཁན་ཁྱེད་རྣམས་ལས་ནི་ལྷག་སྟེ། རྟགས་མངོན་གྱུར་དུ་སྟོན་པའི་ཕྱིར་རོ། །བསྐྱེད་རིམ་གྱི་སྐབས་འདིར་རགས་པ་ལས་རྣམ་པར་རྒྱལ་བ་དེ་ཙམ་གྱིས་ཆོག་ལ། དེས་རགས་པའི་ཐིག་ལེ་ལས་དབང་བསྒྱུར་བར་ཡང་བྱེད་ན་བཟུང་ཟློག་ཙམ་སྨོས་ཅི་དགོས། བསྐྱེད་རིམ་གྱི་ཕྲ་ཐིག་སྐབས་རླུང་དབུ་མར་གཏན་ནས་མ་ཐིམ་པ་ཡང་མ་ཡིན་ཏེ། ཁྱེད་རྣམས་ཉིད་ཀྱང་འཕགས་སྐོར་གྱི་ལུས་དབེན་སྐབས་སུ་དོན་འདི་འདོད་ལ་རག་གོ །གཞན་ཡང་རྒྱ་གར་གྱི་སློབ་དཔོན་མང་དག་ཞིག་རྫོགས་རིམ་དུ་འདོད་པ་ཇི་སྙེད་ཅིག་ཆོས་འདི་ནས་བཤད་པས་བསྐྱེད་རིམ་དུ་ཡོད་པས་ལེགས་པར་བརྟགས་ཏེ་བག་ཡོད་བྱ་ཡི་རྔ་སྒྲ་གཅིག་ཐོས་མ་ཐག་མ་བརྟགས་པར་བྲོ་འཁྲབ་པར་མི་བྱའོ། །དེ་ལ་རང་ལུགས་ནི་ཡེ་ཤེས་ཀྱི་རྩ་དབུ་མར་མང་ཡང་རུང་ཉུང་ཡང་རུང༌། རླུང་འགགས་པ་ལས་བྱུང་བའི་ཡེ་ཤེས་ནི་རྫོགས་རིམ་ཁོ་ན་ཡིན་གྱི། རགས་པའི་དབུ་མར་རགས་པའི་རླུང་ཅུང་ཟད་ཐིམ་པའི་ཡེ་ཤེས་ནི་བསྐྱེད་རིམ་ཕྲ་ཐིག་གི་སྐབས་སུའང་ངེས་པར་ཡོད་ཅིང༌། ཡང་རྣམ་རྟོག་གི་དམིགས་པས་ཡི་གེ་འགོད་པ་དང་མཁའ་གསང་བྱིན་རླབས་སོགས་ཀྱང་རྫོགས་རིམ་པ་ལ་མཐའ་གཅིག་ཏུ་དགོས་པ་མིན་ཀྱང༌། རྫོགས་རིམ་པས་དེ་བསྒོམས་པ་ལ་སྐྱོན་སྟོན་རྒྱུ་ནི་ཅུང་ཟད་ཀྱང་མེད་དོ། །རགས་པའི་དབུ་མར་རགས་པའི་རླུང་ཐིམ་པ་དེ་པཎ་གྲུབ་གཞན་གྱི་ལུགས་ལ་རླུང་དྷཱུ་ཏཱིར་ཐིམ་པ་དངོས་སུ་འདོད་ཀྱང་དུས་འཁོར་ལུགས་ལ་ནི་རྗེས་མཐུན་པ་དང་ཐབས་ཙམ་ནི་ཡིན་གྱི་དྷཱུ་ཏཱིར་ཐིམ་ཚུལ་གོ་ཆོད་པོ་མིན་ནོ། །འོན་ཀྱང་དངོས་ཀྱི་དོན་ནི། རྫོགས་རིམ་པས་རྩ་འཁོར་ལོ་དྲུག་ལ་བུམ་ཅན་བརྟན་པ་དེ་རིག་མ་དང་སྦྱོར་བའི་སྔོན་དུ་གསོས་འདེབས་པ་དང༌།
རྡོ་རྗེ་དང་པདྨར་ཡང་སྟོང་གཟུགས་དྲངས་པས་ཐིག་ལེ་མི་འགྱུར་བ་རྡོ་རྗེ་དང༌། དབུ་མ་ཁ་བྱེ་བ་པདྨས་མཚོན་པས་རྫོགས་རིམ་གྱི་སྐབས་སུ་མཚོན་དོན་དངོས་དང་བསྐྱེད་རིམ་གྱི་སྐབས་སུ་བརྡ་ཙམ་སྒོམ་མོ། །ཁྱད་པར་དུ་ཡང༌། ཁམས་གསུམ་པོ་ནི་མ་ལུས་པའི། །ཞེས་སོགས་ཀྱི་སྟོང་གཟུགས་ལ་བརྟེན་ནས་ཐིག་ལེ་འཆིང་བ་དང༌། གཞན་ཡང་དེ་བཞིན་གཤེགས་པ་ལྔ་སྲེག་པ་སོགས་གསུངས་པས། སྐབས་དེར་གཡས་གཡོན་གྱི་དཀྱིལ་འཁོར་བཅུ་དང༌། དབང་པོ་ཡུལ་ལ་འཇུག་པ་འགག་པ་སོགས་ཀྱང་རྫོགས་རིམ་ཁོ་ན་ལ་ཡིན་གྱི། བསྐྱེད་རིམ་ལ་ག་ལ་ཞིག་སྟེ། དེས་ན་རང་ངམ་རང་གི་བླ་མའི་ཁས་བླངས་སྔ་མ་ཞིག་ལ་ནོར་འཁྲུལ་ཡོད་པ་དེ་ལ་རྫུན་རྒྱབ་རྫུན་གྱིས་སྐྱོར་བ་ཁོ་ན་ལྷུར་མ་བྱེད་ཅིག དེས་ན་འདིར་རྩ་རྒྱུད་གྱི་ལུང་རྣམས་ཕལ་ཆེར་གོ་སླ་བར་སྣང་ལ། སྔར་གོང་དུ་བཤད་པའི་ཕྲ་ཐིག་གི་དོན་དེ་རྣམས་གོ་ན། ཟ་ཟི་ཆལ་ཆོལ་དེ་འདྲ་ཡོད་དོན་མེད་པས་རང་ལུགས་ལ་འཆད་པར་སླའོ། །དེ་ལ་རྩ་རྒྱུད་ཀྱི་ལུང་འདིས་སྦྱོར་བ་རིམ་པ་དྲུག་གི་ངེས་བཟུང་རང་ཡང་མི་སྟོན་མོད། ཡན་ལག་དྲུག་གི་མཚན་ཉིད་ནི་གསལ་བར་སྟོན་ནོ། །དུས་འཁོར་ཤེས་རློམ་བོད་ཤས་ཆེ་བ་དག་ནི་རིམ་པ་དྲུག་དང༌། ཡན་ལག་ཙམ་དྲུག་གི་དབྱེ་བ་མ་ཤེས་པས་ཉོན་མོངས་སུ་བཅུག་གོ །བཅུ་དྲུག་ལོ་ལོན་སོགས་ཀྱིས་རྗེས་དྲན་ཏེ་ཧཱུཾ་ཕཊ་བྱ། ཞེས་པ་ཧཱུཾ་གི་བརྡས་དབུ་མའི་སྲོག་ཐུར་སེལ་ལ་འདྲེས་པ་དང༌། ཕཊ་ཀྱི་བརྡས་དུང་ཅན་མའི་ཐུར་སེལ་སྲོག་ལ་ཞུགས་པའི་དོན་མཚོན་པ་ཡིན་ལ། མན་ངག་ཏུ་ན་དེ་བཙན་ཐབས་ཀྱི་སྦྱོར་བ་ཅུང་ཟད་ཙམ་སྟོན་མོད་ཀྱང༌། ཁ་ཅིག་རྣལ་འབྱོར་པས་སྐབས་དེར་ངག་ནས་ཧཱུཾ་ཕཊ་ཅེས་བརྗོད་དགོས་སོ་ཟེར་བ་ནི། བདག་ཅག་ནི་ལམ་གྱི་གཞུང་ཤིང་ལ་རྒྱབ་
བསྟན་ཅིང༌། ལག་ལེན་དང་མན་ངག་གི་ཕྱོགས་སུ་མ་ཕྱིན་པའོ། །ཞེས་རྒྱལ་ཁམས་ལ་གོ་བར་བྱེད་པའོ། །ལྟེ་བར་གཏུམ་མོ་འབར་བ་ཞེས་གསུངས་པས། འདོད་པ་ཚངས་པའི་མེ་ཙམ་ཞིག་ཡིན་པར་འདོད་པ་དངོས་སུ་བཀག་ལ། དཀྱིལ་འཁོར་ལྔ་འགག་པ་སོགས་ཀྱང་ལྟེ་བ་ནས་བརྩམས་ཏེ་སྟེང་དུ་ཡིན་གྱི་ལྟེ་བའི་འོག་ཏུ་བྱེད་གྱུ་བའི་རྫབ་རྫུབ་མི་བྱའོ། །བཅུ་དྲུག་ཕྱེད་ཕྱེད་ཐིག་ལེ་འཆང་སོགས་ཀྱིས་ཏིང་ངེ་འཛིན་གྱི་ཡན་ལག་བསྟན་ཏེ་གོ་སླ། དུང་ཅན་མ་འདི་ཕྱག་རྒྱ་ཆེ། །ཞེས་སོགས་ཀྱིས་སྲོག་རྩོལ་བསྟན་ཏེ། རྒྱུད་གཞན་ལས། སྣའི་རྩེ་མོར་ཡུངས་ཀར་བསམ། །ཞེས་པ་དང༌། རིན་ཆེན་ཁ་དོག་སྣ་ལྔ་པ། །སྲོག་དང་རྩོལ་བ་ཞེས་བྱར་བཤད། །ཅེས་སོགས་ཀྱི་དོན་ལྟེ་བའི་སྣ་རྩེར་དཀྱིལ་འཁོར་བཅུ་གོང་བུ་གཅིག་ཏུ་འགྲིལ་བ་ཡིན་ལ། འདི་ཡང་རྫོགས་རིམ་གྱི་ཐིག་ལེའི་རྣལ་འབྱོར་རྣམ་གྲངས་གཞན་ཞིག་ཡིན་ནོ། །ཞེས་པའོ། ཁམས་གསུམ་པོ་ནི་མ་ལུས་པའི། །ཞེས་སོགས་ཀྱིས་འཛིན་པའི་ཡན་ལག་སྟེ། སྔར་རྒྱུ་བ་དང་བཅས་པའི་རླུང་དབུ་མའི་ཐིག་ལེར་ཞུགས་པས་རྒྱུ་བ་མེད་པར་བྱེད་ཅིང༌། དེ་ལས་གཏུམ་མོའི་འབར་སྣང་ལ་ཁམས་གསུམ་གྱི་གཟུགས་བརྙན་འཆར་ བའོ། །འདི་ཡང་རྫོགས་རིམ་གྱི་ཕྲ་མོའི་རྣལ་འབྱོར་རྣམ་གྲངས་གཅིག་གོ །སོ་སོར་སྡུད་པ་ཕྱག་རྒྱ་ཆེ། །ཞེས་པ་སོགས་སོར་སྡུད་ཏེ། ཡང་ཐིག་ལེའི་རྣལ་འབྱོར་གྱི་རྣམ་གྲངས་ཅིག་དང༌། དེ་ལ་སྣ་ཚོགས་རྒྱུ་མི་རྒྱུ་སོགས་ནི་བསམ་གཏན་གྱི་རྣལ་འབྱོར་ཏེ། ཕྲ་མོའི་རྣལ་འབྱོར་གྱི་རྣམ་གྲངས་ཅིག་གོ །དེ་ལ་སོར་སྡུད་སྲོག་རྩོལ་གཉིས་རྗེས་དྲན་དང་ཅུང་ཟད་མཐུན་པ་དང༌། བསམ་གཏན་འཛིན་པ་གཉིས་ཏིང་ངེ་འཛིན་དང་བག་ཙམ་མཐུན་པའི་
ཕྱིར། ཐིག་ཕྲའི་རྣམ་གཞག་དེ་ལྟར་ཡང་མཛད་ལ། རྒྱུ་མཚན་དེའི་ཕྱིར་བསྐྱེད་རིམ་ཁོ་ནའི་ནང་སེལ་གྱི་སྐབས་སུའང༌། རྒྱལ་མཆོག་གཉིས་པོ་ཡང་ཕྲ་ཐིག་གི་སྔོན་འགྲོ་རྒྱུད་སྦྱངས་པའི་ཚུལ་དུ་འགྱུར་ཞིང་དེ་གཉིས་བསྐྱེད་རིམ་ཟད་མ་དང༌། ཐིག་ཕྲ་འདི་གཉིས་བསྐྱེད་རིམ་གྱི་ནང་ཚན་ཡིན་ན་ཡང་རྫོགས་རིམ་གྱི་ཞང་ཆེན་པོ་ཡོད་ལ། ཀྱཻ་རྡོར་གྱི་སྒྲུབ་ཐབས་སོགས་གཞན་མང་པོ་ལས་ལྷའི་རྣལ་འབྱོར་གྱི་མཐར་གཏུམ་མོ་སྒོམ་པ་ཡོད་པ་དེ་རྫོགས་རིམ་དུ་ཕལ་ཆེར་གྱིས་བཤད་ཅིང༌། དུས་འཁོར་བསྐྱེད་རིམ་གྱི་རྣམ་བཤད་རྒྱས་པ་བྱེད་པ་ཁྱེད་རྣམས་ཀྱང༌། དེ་ནི་དཔྱད་པ་མེད་པར་ཁས་ལེན་གྱི་འདུག་ན། དེ་དང་འདི་ལ་ཁྱད་ཅི་འདུག་ལྟོས་ཤིག དེས་ན་བསྐྱེད་རིམ་གྱི་ཆ་ལག་ཐིག་ཕྲ་ལ་རྫོགས་རིམ་གྱི་ཐ་སྙད་སྐབས་འགར་སྦྱར་བ་ལ་ཉེས་པ་ཅི་ཡོད། ཕྱོགས་སུ་མ་ལྷུང་བའི་བློས་བརྟག་དགོས་སོ། །ད་ནི་བསྡུས་རྒྱུད་ཀྱི་ལུང་དེའི་དོན་ནི། གསུང་གི་རྣལ་འབྱོར་མ་བདུན་བཅུ་རྩ་གཉིས་ཀྱིས་བྱིན་གྱིས་བརླབས་པ་ལྟེ་བའི་ནད་སྐོར་གྱི་རྩ་འདབ་བཅུ་གཉིས་དང༌། ཕྱི་སྐོར་གྱི་དྲུག་ཅུ་ལ་གནས་པའི་གཏུམ་མོ་རྣམས་གཅིག་ཏུ་འབར་བ་མཚོན་བྱེད་ནི་ཧོཿཡིག་གོ །དེ་ཡང་དུས་སྦྱོར་བཅུ་གཉིས་དང༌། དེ་ལས་ཕྱེ་བའི་དཀྱིལ་འཁོར་དྲུག་ཅུ་རེ་རེ་བཞིན་དབུ་མར་འགགས་པ་མཐར་ཕྱིན་པའི་སྐབས་ཤིག་ན། དེའི་ཤུལ་ནས་གཏུམ་མོ་ཅུང་ཟད་རེ་འབར་བར་འགྱུར་ཏེ། སྲོག་རྩོལ་མཐར་ཕྱིན་པའི་སྐབས་ནས་ཡིན་ལ། སོ་སོར་འབར་བས་རང་རང་གི་རྩ་མདུད་ཅུང་ཟད་གྲོལ་བར་བྱེད་ཀྱང༌། དབུ་མའི་སྒོ་གླེག་འཇོམ་མི་ཐུབ་ཅིང༌། དེ་དག་ལས་མང་པོ་གཅིག་ཏུ་འདུས་པ་ལྟེ་བའི་མེ་དང་རོ་གཅིག་ཏུ་འདྲེས་པས་ནི། དེ་ནུས་པའི་ཕྱིར་ཏེ་དེ་ནི་འཛིན་པའི་སྐབས་ཀྱི་ལྟེ་བར་ཐིག་
ལེ་ལ་ཐིམ་ཚུལ་བྱུང་ཟིན་པ་ནས་འབྱུང་སྟེ། བསྐྱེད་རིམ་གྱི་སྐབས་འདིར་དེ་རྣམས་གཅིག་ཏུ་འདུས་པའི་ངོ་བོར་མོས་པ་དང༌། དེ་ཀུན་ཀྱང་འདོད་ཆགས་ཆེན་པོ་ཡེ་ཤེས་རྡོ་རྗེའི་དག་པ་ཡིན་པའི་ཕྱིར། ཧོཿཡིག་གཅིག་པུའི་བརྡ་མཛད་པའོ། །ཡེ་ཤེས་སྙིང་པོ་ཞེས་པ་གཏུམ་མོ་དེ་རྣམས་ཀུན་འདུས་པའི་དོན་དང༌། ཡེ་ཤེས་མེ་ཞེས་པ་འདོད་ཆགས་ཀྱི་མདངས་རྒྱས་པའི་དོན་ཡིན་ཡང་འདོད་པ་ཐ་མལ་པ་མ་ཡིན་གྱི། དུང་ཅན་མར་སྲོག་ཐུར་འདྲེས་པའི་རྐྱེན་གྱིས་ཐོབ་པའི་སྒོམ་ཉམས་ལམ་གྱི་ཆགས་ཆེན་ལྟེ་བའི་གཏུམ་མོ་བསྐུལ་ནུས་པ་དེ་དང་གཏུམ་མོ་ཉིད་གཅིག་ཏུ་འདྲེས་པའོ། །དེ་ནས་བདུན་བཅུ་རྩ་གཉིས་ཀ་ཆེར་འབར་བ་གཅིག་ཏུ་འདུས་ཤིང༌། དེ་འབར་བས་སླར་ཡང་ལྟེ་བ་ནས་གཙུག་ཏོར་མན་ཆད་ཀྱི་བར་དུ་ཕུང་པོ་ལྔ་དང༌། ཁམས་ལྔ་དང། དབང་པོ་ལྔ་དང་ཡུལ་ལྔའི་རླུང་རྣམས་ཐིམ་པར་བྱེད་དེ། དེ་ཡང་རླུང་ཚན་གཅིག་ཐིམ་པས་གཏུམ་མོ་འབར། གཏུམ་མོ་འབར་བས་རླུང་གི་ལྷག་མ་རྣམས་ཐིམ་པ་སྟེ། འདིས་ནི་རྩ་བདུན་ཁྲི་ཉིས་སྟོང་ཞུ། མགོ་བོ་སྟེ་གཙུག་ཏོར་གྱི་ཧཾ་ལ་རེག་པས་བྱང་ཆུབ་ཀྱི་སེམས་ཞུ་ཞིང་ནོར་བུར་འཕོ་མེད་དུ་བཅིངས་པའི་ཡེ་ཤེས་ནི་རྡོ་རྗེ་ཅན་ཏེ་མི་འཛག་པ་དེ་ནི་ཀུན་རྫོབ་བྱང་ཆུབ་ཀྱི་སེམས་ཡང་དག་པའོ། །དེས་ན་གཏུམ་མོས་ཕུང་ཁམས་དབང་ཡུལ་བསྲེགས་པ་སྟེ་མཉམ་གཞག་ཏུ་དེ་རྣམས་ཀྱི་སྣང་བ་འགགས་ཏེ་འབར་སྣང་རྣམ་པ་ཐམས་ཅད་པ་ཁོ་ནར་སོང་བ་ལྟར་སྣང་བ་ནི་རྗེས་དྲན་གྱི་སྐབས་སུའོ། །དེ་ཡང་གཙུག་ཏོར་དང་སྤྱི་བོ་ནས་ཞུ་བ་མགྲིན་པར་སླེབ་པ་དགའ་བ་སོགས་ནས་ལྟེ་བ་ནས་གསང་བའི་བར་དུ་ལྷན་སྐྱེས་ཞེས་གསུང་ལ། གསང་བ་ཞེས་སྨོས་པས་ནོར་བུའི་བར་དུ་ཡང་བརྟན་པ་ཡིན་མོད་ཀྱི། ཤེས་རིན་པ་ནི་བསྐྱེད་རིམ་གྱི་སྐབས་
སུ་གསང་བའི་འཁོར་ལོ་ཞུ་བདེ་བརྟན་པར་བྱེད་ཐུབ་ཀྱང་ནོར་བུར་མི་ཐུབ་ཅིང༌། ཆ་བཅོ་ལྔ་པ་བཤད་པ་ལས་བཅུ་དྲུག་པ་མི་འཆད་པའི་རྒྱུ་མཚན་ཡང་དེ་ཡིན་ཞེས་སྨྲ་བ་སོགས་ནི་གནད་མ་གོ་བ་སྟེ། རྫོགས་རིམ་གྱི་སྐབས་སུ་གཙུག་ཏོར་ནས་ནོར་བུའི་བར་ལ་འདི་དང་འདིར་དགག་ནུས་ཞེས་སོ་སོར་གསུངས་པ་དེ་ནི་དེ་དང་དེར་ཞུ་བདེ་འགྱུར་མེད་ཀྱི་ཐིག་ལེ་གྲུབ་པས། ཡོན་ཏན་དཔག་ཏུ་མེད་པ་སྐྱེ་བའི་རྒྱུ་བྱེད་པའི་དོན་ཡིན་གྱི། བྱེད་བཅིངས་ན་དའི་སྦྱོར་བ་ལ་མ་བལྟོས་པར་རླུང་སྟོབས་ཀྱིས་ཡིན་དུ་ཆུག་ཀྱང་སྐད་ཅིག་མའི་དགའ་བཞི་བསྐྱེད་པས་རགས་པའི་ཐིག་ལེ་ནོར་བུར་བཟུང་ཟློག་ནུས་པ་ལ་དེ་ཙམ་དུ་དཀའ་བ་མ་ཡིན་པའི་ཕྱིར་རོ། །བྱང་ཆུབ་ཀྱི་སེམས་ནོར་བུ་ཕྱིན་པ་དེའི་ཚེ། ཤེས་རབ་ཀྱི་ཆོས་འབྱུང་གི་མིང་ཅན་རང་ལུས་ཀྱི་རྩའི་འཁོར་ལོའི་ལྟེ་བ་རྣམས་སུ་ཐིག་ལེ་བཞིའི་ཞུ་བདེས་གང་བར་གྱུར་པ་ནི་ཐིག་ལེའི་རྣལ་འབྱོར་རོ། །ཇི་ལྟར་གང་ཚུལ་ནི། ཐིག་ལེ་བཞི་པོ་ལུས་ཀུན་ལ་ཁྱབ་པའི་ཚུལ་གྱིས་ཡོད་པ་ལས་ལུས་ཀྱི་ཐིག་ལེ་ཐོག་མར་དགའ་བའི་སྐད་ཅིག་གི་དུས་སུ་ཞུ་བས་དེ་ཉིད་ཐོག་མར་འོག་ཏུ་སོང་བའི་ཕྱིར། གསང་བ་ནས་ནོར་བུའི་བར་ཁྱབ་ཅིང༌། ངག་གི་ཐིག་ལེ་ལྟེ་བ་ནས་གསང་བའི་གོང་དུ་གནས་པ་དང༌། སེམས་ཀྱི་ཐིག་ལེ་སྙིང་ག་ནས་ལྟེ་བའི་གོང་དུ་གནས་པ་དང༌། ཡེ་ཤེས་ཀྱི་ཐིག་ལེ་མགྲིན་པ་ནས་སྙིང་གའི་བར་དུ་གནས་པར་བཤད་ཅིང༌། སྐབས་དེར་མགྲིན་པ་ཡན་ཆད་དུ་དང་པོར་ཞུ་བ་དེ་ད་ལྟ་མགྲིན་པ་མན་ཆད་དུ་གནས་འཕོས་པ་ཡིན་པས། དཔྲལ་བ་དང་གཙུག་ཏོར་གྱི་རྣམ་གཞག་སྐབས་འདིར་མ་མཛད་ དོ། །དེའི་རྗེས་སུ་སླར་ཡང་གྱེན་དུ་ལྡོག་སྟེ་སྤྲོ་བ་ནི། ཁམས་གསུམ་གྱིས་བརྡས་བསྟན་པ་མེ་ལོང་གི་གཟུགས་བརྙན་ལྟ་བུའི་དཀྱིལ་འཁོར་གྱི་འཁོར་ལོ་ཅན་ལུས་ངག་ཡིད་
ཀྱི་རྡོ་རྗེ་སྤྲོ་བ་དཔག་ཏུ་མེད་པ་བྱུང་ནས། རང་གི་ལུས་ངག་ཡིད་གསུམ་གྱི་དྲི་མ་དག་པར་བྱེད་ཅིང༌། འདི་གོམས་ན་ཕྱི་ནས་གཏུམ་མོ་ཡེ་ཤེས་ཀྱི་མེའི་སྣང་བར་གྱུར་པའི་སྲིད་པ་གསུམ་པོས་ཐ་མལ་གྱི་སྲིད་གསུམ་མ་ལུས་པ་འགུགས་པ་སྟེ། མངོན་ཤེས་ཀྱི་ཚུལ་གྱིས་རྟོགས་པར་ནུས་པ་དེ་ནི་ཕྲ་མོའི་རྣལ་འབྱོར་རོ། །ཐིག་ཕྲ་འདི་གཉིས་ཀྱང་གཙོ་བོར་རྗེས་དྲན་དང་ཏིང་ངེ་འཛིན་གྱི་ཡན་ལག་ཉིད་ཡིན་ནོ། །ཡང་ཡེ་ཤེས་ལེའུ་ལས། ཡེ་ཤེས་དགུག་པར་བྱེད་པ་འདི་ནི་སླར་ཡང་ཤིན་ཏུ་སྟོབས་ཏེ་དེ་ནི་གཞུག་པ་རྨུགས་བྱེད་ཀྱིས། །དེ་ནི་བཅིང་བ་རེངས་བྱེད་ཀྱིས་ཏེ་ངེས་པར་མཆོག་བདེའི་དབང་གིས་ཁེངས་བྱེད་ཀྱིས་ནི་མཉེས་པ་ཡང༌། ཡེ་ཤེས་འཁོར་ལོ་དག་ལ་འཁོར་ལོ་རོ་ནི་མཉམ་པར་བྱེད་པ་རྡོ་རྗེ་ཤུགས་ཀྱི་བྱེད་པ་སྟེ། དེ་བཞིན་ཁྲོ་བོའི་ལྷ་མོ་རྣམས་ནི་རབ་གསལ་ངེས་པར་རྣལ་འབྱོར་མ་ཡི་རྒྱུད་ཀྱི་སྐུ་ལའོ། །ཞེས་གསུངས་ཏེ། ཚིག་འདིའི་སྒྲ་ཇི་བཞིན་པའི་དོན་ནི་སྔར་བཤད་པའི་དགུག་གཞུག་གི་སྐབས་ཀྱི་ཁྲོ་བོ་ཐོག་མཐའ་རྡོར་ཤུགས་དང་ཤིན་སྟོབས་བརྗེས་པ་ཙམ་ཡིན་ལ། དེ་ཡང་དུས་ཀྱི་འཁོར་ལོ་ཕྱག་ཉེར་བཞི་པ་དགུག་པ་ལ་རྡོར་ཤུགས་ངེས་པར་དགོས་པས་གོང་བཞིན་དང༌། གཞན་རྣམས་ལ་ཤིན་ཏུ་སྟོབས་ཀྱིས་བཀུག་པས་ཆོག་པ་ཡིན་ནོ། །ཐབས་རྒྱུད་ཀྱི་དཀྱིལ་འཁོར་ལ་དེ་ལྟ་བུ་དང༌། རྣལ་འབྱོར་མ་རྒྱུད་ལ་ཤིན་ཏུ་སྟོབས་མ་སོགས་ཁྲོ་མོ་ལྔས་དེ་ལྟར་བྱེད་ཅེས་པ་ཡིན་ཡང༌། འགྲེལ་པས་སྦས་དོན་དུ་དཀྲལ་བའི་དོན་གྱི་སྙིང་པོ་ནི། ཁྲོ་བོ་ལྔ་པོ་དེ་ནི་རིམ་པས་དྷུ་ཏཱིའི་སྲོག་རླུང་དང༌། རོ་མའི་རླུང་ཉི་མ་དང༌། དུང་ཅན་མའི་ཐུར་སེལ་དང༌། རྐྱང་མའི་རླུང་ཟླ་བ་དང༌། དབུ་མ་ནས་འབབ་པའི་ཡེ་ཤེས་ཀྱི་རླུང་རྣམས་
ཡིན་ལ། དེ་རྣམས་གཏུམ་མོའི་མེ་དང་ཚོགས་པ་གཅིག་པས་ཡེ་ཤེས་སེམས་དཔའ་སྤྱི་བོའི་ཐིག་ལེ་ཞུ་བར་བྱེད་པ་ནི་འགུགས་པ་དང༌། རྩ་འཁོར་རྣམས་སུ་གཞུག་པ་དང༌། ནོར་བུ་ནས་ཕྱིར་མི་འཕོ་བར་བཅིང་བ་དང༌། ཕུང་ཁམས་ཐམས་ཅད་བདེ་བའི་སྐད་ཅིག་བསིལ་པོས་མཉེས་པར་བྱེད་པ་དང༌། ཞུ་བདེ་དེ་མི་འགྱུར་བའི་བདེ་བས་རོ་མཉམ་དུ་བྱེད་པ་སྟེ། ཕྲ་མོའི་རྣལ་འབྱོར་གྱི་དངོས་ཀྱི་སྦྱོར་བ་ཐིག་ལེའི་རྣལ་འབྱོར་དེ་ཡིན་ལ། དེ་ནས་ཕྲ་མོའི་རྣལ་འབྱོར་དངོས་ནི་ཞུ་བ་གླུས་བསྐུལ་གྱི་ངེས་དོན་ཏེ། གླུས་བསྐུལ་བ་གཉིས་ཡོད་པའི་གཅིག་ནི་ལོ་བཅུ་དྲུག་པའི་མཐར་བདེ་བ་རྫོགས་པའི་སླད་དུ་བསྐུལ་བ་ཞེས་པ་དེ་ཡིན་ཞིང༌། དེ་ཡང་བསྐྱེད་རིམ་པས་ནི་སྐབས་གཅིག་ཏུ་ན། ལྷ་མོ་བཞིས་བསྐུལ་བའི་མོས་པ་བྱས་པས་ཐིག་ལེ་གྱེན་དུ་གཤེགས་པར་སྒོམ་པའང་ཡིན་ལ། རྫོགས་རིམ་པའི་ཏིང་ངེ་འཛིན་གྱི་སྐབས་སུ་ནི། འཁོར་ལོ་ལྔའི་ལྟེ་བའི་འབྱུང་བཞི་དངས་མའི་ཤུགས་ཀྱིས་ཐིག་ལེ་སྟེང་དུ་ཟློག་པའི་བརྡ་ཙམ་ཡང་ཡིན་ནོ། །དེ་ལྟར་ན་བསྐྱེད་རིམ་ཡན་ལག་བཞི་པོ་བཤད་ཟིན་ཏོ།། །།དེའི་རྗེས་སུ་མཆོད་བསྟོད་བྱ་སྟེ། ལྷའི་རྣལ་འབྱོར་གྱི་རིམ་པ་རྫོགས་པའི་དགའ་སྟོན་དང་ལྷ་མཉེས་པར་བྱེད་པའི་ཕྱིར་རོ། །ཁ་ཅིག་སྐབས་འདིར་དག་དྲན་བྱེད་པ་ཡོད་པ་ནི་མི་ལེགས་ཏེ། འགྲེལ་ཆེན་ལས། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་བསྒོམས་ནས་མཆོད་པ་དང༌། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ལ་སོགས་པས་བསྟོད་པ་བྱས་ཏེ། དེ་ནས་དཀྱིལ་འཁོར་གྱི་ལྷ་རྣམས་གཤེགས་སུ་གསོལ། ཞེས་ཕྲ་མོའི་དེ་མ་ཐག་མཆོད་བསྟོད་གསུངས་པའི་
བཟླས་པ་མི་བྱེད་ན་ཕྲ་མོའི་རྣལ་འབྱོར་གྱི་དེ་མ་ཐག་པར་འོག་ཏུ་འཆད་པར་འགྱུར་བའི་མཆོད་ཆོག་དང་གཤེགས་གསོལ་བྱ་ལ། བཟླས་པ་བྱེད་ན་དེའི་སྔོན་དུའང་མཆོད་བསྟོད་བྱེད་པ་གསང་སྔགས་སྤྱིའི་ལུགས་ཡིན་པས་ངེས་པར་བྱའོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། ཟབ་མོ་བསྐྱེད་རིམ་ཐིག་ལེ་དང་ཕྲ་མོའི་རྣལ་འབྱོར་ཀྱི་དོན་རྣམ་པར་ངེས་པའི་སྡེ་ཚན་ཏེ་བརྒྱད་པའོ།། །།དེ་ལྟར་བསྐྱེད་རིམ་དངོས་གཞི་བསྟན་ཟིན་ཏེ། ད་ནི་གསུམ་པ་རྗེས་བཟླས་པ་དང༌། མཆོད་གཏོར་ལ་སོགས་པའི་རྣལ་འབྱོར་ལ། སྔགས་ཀྱི་བཟླས་པའི་རྣལ་འབྱོར་དང༌། ཐུན་མཚམས་རྗེས་སྤྱོད་རིམ་པ་རྣམས་སོ། །དང་པོ་ནི། ཇི་སྐད་དུ་རྩ་བའི་རྒྱུད་ལས། ཨ་ཀུ་ཧ་ྈྐ་མགྲིན་བྱུང་གང༌། །དབྱངས་དང་གསལ་བྱེད་མཚན་ཉིད་རྣམས། །སྟོང་པ་རླུང་སོགས་ཁམས་རྣམས་ཀྱིས། །གྲོགས་པོ་ཉིད་ཀྱིས་རྟག་ཏུ་གནས། །ཨི་ཙུ་ཡ་ཤ་རྐན་ལས་བྱུང༌། དབྱངས་དང་གསལ་བྱེད་མཚན་ཉིད་རྣམས། །རླུང་གི་ཁམས་ལ་ཡང་དག་བྱུང༌། །ཆུ་ལས་སྐྱེས་པ་རྣམས་ཀྱི་དགྲ། །རྀ་ཊུ་ར་ཥ་སྤྱི་བོ་སྐྱེས། །དབྱངས་དང་གསལ་བྱེད་མཚན་ཉིད་ རྣམས། །མེའི་ཁམས་ལས་ཡང་དག་བྱུང༌། །ས་ལས་སྐྱེས་པ་རྣམས་ཀྱི་དགྲ། །ཨུ་པུ་ལྭ་ྉྤ་མཆུ་སྐྱེས་གང༌། །དབྱངས་དང་གསལ་བྱེད་མཚན་ཉིད་རྣམས། །ཆུ་ཡི་ཁམས་ལས་ཡང་དག་བྱུང༌། །མེ་ལས་སྐྱེས་པ་རྣམས་ཀྱི་དགྲ། །ལྀ་ཏུ་ལ་ས་སོ་སྐྱེས་གང༌། །དབྱངས་དང་གསལ་བྱེད་མཚན་ཉིད་རྣམས། །ས་ཡི་ཁམས་ལས་ཡང་དག་བྱུང༌། །རླུང་ལས་སྐྱེས་པ་རྣམས་ཀྱི་དགྲ། །རྟག་ཏུ་རླུང་གི་གྲོགས་པོ་ མེ། །ཐ་མལ་པ་ཆུ་ནུས་མེད་ཕྱིར། །མེ་ཡི་གྲོགས་པོ་རླུང་ཡིན་ཏེ། །ཐ་མལ་པ་ས་ནུས་མེད་ཕྱིར། །ཆུ་ཡི་གྲོགས་པོ་ས་ཡིན་ཏེ། །ཐ་མལ་པ་མེ་ནུས་མེད་ཕྱིར། །ས་ཡི་གྲོགས་པོ་ཆུ་ཡིན་ཏེ། །ཐ་མལ་པ་ནི་རླུང་ཉིད་དོ། །ཨོཾ་གྱི་ཡི་གེ་སྤངས་ནས་ཀྱང༌། །སྔགས་ཀྱི་
དང་པོའི་ཡི་གེའི་རིགས། །དེ་ཉིད་སྔགས་རྣམས་དག་གི་ཐུགས། གཟུགས་ནི་རྫོགས་པའི་རྒྱུ་ཡིན་ནོ། །གང་ཚེ་སྔགས་ཀྱི་དང་པོ་ཡི། །ཡི་གེ་གསལ་བྱེད་གཞན་བརྩེགས་ན། །དེ་ཚེ་ཐོག་མར་བརྗོད་པའི་སླད། །དེ་དག་ལས་ནི་དང་པོ་བཟུང༌། དབྱངས་དང་གསལ་བྱེད་དབྱེ་བ་ཡིས། །དེ་ཉིད་རྣམ་པ་གཉིས་སུ་འགྱུར། །སྲོག་གི་དགྲ་དང་གྲོགས་པོ་དང༌། །ལུས་ཀྱི་ཡང་ནི་བརྗོད་པར་བྱ། །སྲོག་གི་དགྲ་དང་གྲོགས་པོའམ། །ཐ་མལ་པ་ནི་དབྱངས་སུ་བརྗོད། །ལུས་ཀྱི་དགྲ་གྲོགས་ཐ་མལ་པ། །གསལ་བྱེད་རྣམས་ཀྱི་བདག་ཉིད་དོ། །དབྱངས་ཀྱི་དགྲ་ཡིས་སྒྲུབ་པ་པོའི། །སྲོག་འཕྲོག་པར་ནི་ཐེ་ཚོམ་མེད། གསལ་བྱེད་མཚན་ཉིད་དགྲ་ཡིས་ནི། །ལུས་ལ་ནད་ལ་སོགས་པ་བྱེད། །སྡེ་བ་གཅིག་ལའང་ཀ་ལ་སོགས། །གསལ་བྱེད་ཆོས་ཅན་ལྔ་རྣམས་གང༌། །དེ་རྣམས་ས་ལ་སོགས་པའི་རིགས། སྔགས་སྒྲུབ་པ་ལ་ཤེས་པར་བྱ། །ང་ཉ་ཎ་མ་ནན་འདི་རྣམས། །རླུང་སོགས་ལས་སྐྱེས་རྣམས་ཀྱི་གྲོགས། །གྷ་ཛྷ་ཌྷ་བྷ་ དྷདྷ་འདི་ རྣམས། །ཆུ་ལས་སྐྱེས་པ་རྣམས་ཀྱི་དགྲ། །ག་ཛ་ཌ་བ་དད་འདི་རྣམས། །ས་ལས་སྐྱེས་པ་རྣམས་ཀྱི་དགྲ། །ཁ་ཚ་ཋ་ཕ་ཐཐ་འདི་རྣམས། །མེ་ལས་སྐྱེས་པ་རྣམས་ཀྱི་དགྲ། །ཀ་ཅ་ཊ་པ་ཏཏ྄་འདི་རྣམས། །རླུང་ལས་སྐྱེས་པ་རྣམས་ཀྱི་དགྲ །སྔགས་ཀྱི་དང་པོར་གནས་ཡི་གེ། །རང་གི་སྡེ་པའམ་གཞན་ལ་ཡང༌། །སྒྲུབ་པ་པོ་ཡི་ཡི་གེ་གཉིས། སྐྱེ་བ་ལས་སྐྱེས་མིང་སྐྱེས་འགྱུར། །ཞེས་ཁམས་ཀྱི་དགྲ་གྲོགས་རྩི་ཚུལ་དང༌། གཞན་ཡི་གེའི་ལས་དྲུག་གི་བཟླས་པ་བྱེད་ཚུལ་ཡང༌། སྔགས་ཀྱི་དང་པོར་གསལ་བྱེད་དམ།། དབྱངས་རྣམས་སྒྲུབ་པར་བྱ་བའི་སླད། །བསྙེན་དང་བཟླས་པ་བྱེད་རྣམས་ལ། །འདི་ཡི་ལས་ནི་རྣམ་དྲུག་གསུངས། །དང་པོར་བསྣུན་པར་བྱ་བ་སྟེ། །དེ་
ནས་དབབ་དང་སྲེག་པ་དང༌། དེ་ནས་སྔགས་པས་བསླང་བ་དང༌། །དེ་ནས་རྒྱས་དང་མཉེས་པའོ། །རྣམ་པར་བཅད་བཅས་སྟོང་པ་ཡིས། །སྔགས་ཀྱི་སྔོན་འགྲོ་བསྣན་པ་ནི། །མཚོན་བྱའི་རྒྱལ་པོས་བསྣུན་པ་སྟེ། །བརྒྱལ་བའི་གནས་སྐབས་ཐོབ་པར་འགྱུར། །ཐུགས་ཀྱི་བཟླས་པ་འབུམ་གྱིས་ནི། །རྒྱལ་བར་གྱུར་པའི་སྔགས་ཀྱི་ལྷ། །ང་རྒྱལ་ཡོངས་སུ་སྤངས་པ་ནི། །སྒྲུབ་པ་པོ་ཡི་དབང་དུ་འགྱུར། །དེ་བཞིན་རླུང་གིས་མནན་ན་དེ། །རྣལ་འབྱོར་པ་ལ་ཕེབས་པར་ འགྱུར། །མེ་ཡིས་མནན་ན་སྲེག་པར་འགྱུར། །དེ་བཞིན་ཆུ་ཡིས་བསླང་བར་འགྱུར། །ས་ནི་སྤྱི་བོར་གནས་པ་དག །བཟླས་ན་ལྷ་ནི་རྒྱས་པར་འགྱུར། །སྤྱི་བོར་ཐིག་ལེའི་ཆས་མནན་ན། །མཉེས་པས་མཆོག་ནི་སྟེར་བར་འགྱུར། །དེ་ལྟར་དྲུག་འབུམ་བཟླས་པ་ནི། །དང་པོའི་སངས་རྒྱས་རྒྱུད་ཆེན་ལས། །འདོད་པ་གྲུབ་སླད་བདེ་གཤེགས་ཀྱིས། །སྔོན་དུ་བསྙེན་པ་རྣམས་སུ་གསུངས། ཕཊ་ཡིག་དེ་བཞིན་ཧཱུཾ་བཽ་ཥཊ། །ན་མཿསྭཱ་ཧཱ་པ་ཥཊ་རྣམས། །ལས་དྲུག་ལ་ནི་གྲངས་བཞིན་དུ། །སྔགས་མཐར་བརྟུལ་ཞུགས་ཅན་གྱིས་བྱ། །དང་པོར་རྣམ་སྣང་མཛད་བྱིན་ནས། །སླར་ཡང་བཟླས་པ་ཡང་དག་བརྩམས། །དེ་ནས་བྱེ་བ་བཟླས་བྱས་ ནས། །སྦྱིན་སྲེག་བཅུ་ཡི་ཆ་ཤས་ཀུན། །རྒྱུད་ལས་གསུངས་པའི་ཆོ་གས་བྱ། །དེ་ནས་ལྷ་ནི་འགྲུབ་འགྱུར་ཏེ། །སྔགས་པ་རྣམས་ལ་གྲུབ་པ་དེས། །མཆོག་དང་གང་ཞིག་དོན་གཉེར་སྟེར། །རིགས་གཞན་དང་ནི་བྱ་བ་གཞན། །དུས་དང་དེ་བཞིན་སྔགས་ཀྱི་རིགས། །གནས་དང་ཕྱོགས་དང་གདན་གཞན་གྱི། །ལས་རྣམས་ཀུན་ལ་འབྲས་བུ་མེད། །གླེགས་བམ་དག་ལས་བཀླགས་པའི་སྔགས། མན་ངག་རྣམ་པར་སྤངས་རྣམས་ཀྱིས། །སྒྲུབ་པ་རབ་ཏུ་བྱེད་པའི་མི། །གང་
དེ་ས་ལ་ཉོན་མོངས་འགྱུར། །གལ་ཏེ་གླེགས་བམ་ལས་རྙེད་ན། །མན་ངག་ཅེས་བྱ་དེ་ནི་ཅི། །ཇི་ལྟར་བྲིས་པ་བཀླགས་པ་ནི། །དྲང་བའི་དོན་གྱིས་རབ་བསྟན་ནོ། །སྔགས་ཀྱི་དམ་པའི་དངོས་སྤངས་རྣམས། །གླེགས་བམ་བཀླགས་པའི་སྔགས་རྣམས་ཀྱིས། །ལྷ་ལ་སོགས་རྣམས་སྒྲུབ་པ་པོ། །ནམ་མཁའ་དག་ནི་ཟ་བར་འདོད། །རང་སེམས་བརྟན་པའི་བརྩོན་འགྲུས་ཀྱིས། སྔགས་ཀྱི་བཟླས་པས་སྒྲུབ་པ་པོ། །གཞན་དོན་གཉེར་བ་རྣམས་ཀྱིས་ནི། །འདོད་པའི་འཇིག་རྟེན་དངོས་གྲུབ་འགྱུར། །སྔགས་བཟླས་དེ་བཞིན་སྦྱིན་སྲེག་དང༌། །མཆོད་རྟེན་མཆོད་པའི་ཆོག་རིམ་གྱིས། །ཚིག་འདི་ཇི་ལྟར་གྱུར་པ་བཞིན། །བརྩེ་བས་དམན་ན་འགྲུབ་མི་འགྱུར། །དེ་ཕྱིར་འབད་པ་ཐམས་ཅད་ཀྱིས། །སྟོན་པ་བྱང་ཆུབ་སེམས་དཔའ་དང༌། །ལྷ་རྣམས་སྒྲུབ་པའི་སླད་དུ་ནི། །དེ་ཉིད་མཁས་པར་བཟུང་བར་བྱ། །ཞེས་གསུངས་སོ། བསྡུས་པའི་རྒྱུད་ལས། མིང་གི་དང་པོ་ཐུགས་ཀྱི་རྡོ་རྗེར་འགྱུར་ཏེ་མི་ཡི་བདག་པོ་ལྷ་དང་ལྷ་མོ་རྣམས་ཀྱིའོ། །གསུང་གི་རྡོ་རྗེ་མིང་གི་ཡི་གེ་ཐམས་ཅད་པ་དེ་ལྷག་པ་དག་ཀྱང་སྐུ་ཡི་རྡོ་རྗེ་སྟེ། དེ་ལས་ཡན་ལག་སོ་སོའི་སྔགས་ནི་རྣམ་པ་མང་པོར་འགྱུར་ཏེ་བཀླགས་པས་འགྲུབ་པ་རྒྱ་ལམ་ན། །བསྒོམ་བྱ་མཆོད་བྱ་བཟླས་བྱ་རང་གི་རྒྱལ་བའི་རིགས་ཀྱི་དབང་གིས་ཐུགས་གསུང་སྐུ་ཡི་དབྱེ་བས་སོ། །སོ་སོར་སྔགས་ཀྱི་རིགས་ནི་ངེས་པར་བྱེ་བ་བཟླས་པར་རབ་ཏུ་འགྱུར་ཏེ་རབ་ཏུ་གྲགས་པའོ། །སྦྱིན་སྲེག་དེ་ལས་ཆུ་ཡི་ཆ་ཤས་རང་བཞིན་ཡོན་ཏན་དབང་གིས་འགྲུབ་པར་འགྱུར་པ་ཇི་སྲིད་ཉིད། །ཕྱི་ནས་ཞི་བ་ལ་སོགས་རྣམས་ལ་འབྲས་བུ་སྟེར་བར་རབ་འགྱུར་རྣམ་པ་གཞན་དུ་འགྲུབ་མི་འགྱུར། །བསམ་གཏན་དང་བཅས་བཟླས་དང་སྦྱིན་སྲེག་བརྟུལ་ཞུགས་ངེས་ལྡན་རྣམས་ཀྱིས་སྔགས་ཀྱི་
སྐྱེ་གནས་བསྒྲུབ་པར་བྱ། །ཞེས་སྐུ་གསུང་ཐུགས་ཀྱི་བཟླས་པའི་དབྱེ་བ་དང༌། སྦྱིན་སྲེག་དང་བཟླས་པའི་གྲངས་སོགས་གསུངས་ཤིང༌། དབང་ལེ་ལས། ཤེལ་དང་མུ་ཏིག་དང་ནི་མི་དང་བོང་བུའི་སོའམ་རུས་པ་དག་དང་བོ་ཏེ་ཙེ་དང་ནི། །པདྨ་ཞེས་བྱ་དབང་མིག་ལུང་ཏང་བདེ་གཤེགས་རིགས་ཀྱི་དབང་གིས་སྔགས་བཟླས་པ་ལ་འཕྲེང་བར་འགྱུར། །ཞེས་བགྲང་འཕྲེང་གི་དབྱེ་བ་མདོ་ཙམ་དུ་བསྟན་ཏོ། །དེ་ལྟར་རྩ་བའི་རྒྱུད་དང་བསྡུས་པའི་རྒྱུད་ཀྱི་གཞུང་ཚིག་དེ་རྣམས་ཉིད་རྩ་བར་བཞག་པས། བཟླས་པའི་ཡུལ་རྣམས་རྟོགས་པར་སླ་ལ། སྒྲུབ་པ་པོ་རང་ཉིད་ཀྱི་སྐྱེ་བའི་ཡི་གེའི་ཁྱད་པར་འགའ་ཞིག་རྡོ་རྗེ་སྙིང་འགྲེལ་ལས་གསུངས་ཏེ། རང་གི་ཡི་གེ་ལ་ཡང་གཉིས། མིང་གི་ཡི་གེའི་དང་པོ་དང༌། །གང་ལས་སྐྱེས་པའི་ཡི་གེའོ། །འདི་ནི་ཟླ་བ་སོ་སོའི་ཚེས། དཀར་པོའི་ཕྱོགས་ལ་རིམ་པ་བཞིན། །རང་བཞིན་ཡོན་ཏན་ཡ་ཎ་རྣམས། །ཐུང་ངུ་བསྐྱེད་པའི་རིམ་པས་འཆར། །ནག་ཕྱོགས་ལ་ནི་འདི་དག་ཉིད། །རིང་པོ་སྡུད་པའི་རིམ་པས་སོ། བཅོ་ལྔའི་མཐར་ནི་ཐིག་ལེ་དང༌། །རྣམ་པར་བཅད་པ་གནམ་སྟོང་མཐར། །འཆར་ཕྱིར་གང་ལས་སྐྱེས་པ་བརྟག །ཡུད་ཙམ་སུམ་ཅུ་ཚེས་རེ་ལ། །འཆར་བའི་དབྱངས་ཀྱང་འདི་དག་ཉིད། དེ་བཞིན་ཚེས་གྲངས་སོ་སོ་ལ། །འཆར་བའི་དུས་སྦྱོར་བཅུ་གཉིས་སོ། །རེ་རེ་ལ་ཡང་དབྱུག་གུ་ལྔ། །དབྱུག་གུ་རེ་རེའི་གསལ་བྱེད་ནི། །ཀ་སྡེ་ཆུ་སྲིན་བུམ་པ་ལ། །རིང་པོ་སྡུད་པའི་རིམ་པ་དང༌། །ཐུང་ངུ་བསྐྱེད་པའི་རིམ་པས་འཆར། །དེ་བཞིན་ཙ་སྡེ་ཉ་དང་ལུག །ཊ་སྡེ་ཁྱུ་མཆོག་འཁྲིག་པ་སྟེ། །པ་སྡེ་སྦལ་བ་སེངྒེ་ལ། །ཏ་སྡེ་བུ་མོ་སྲང་ལ་འཆར། །ས་སྡེ་སྡིག་པ་གཞུ་ལའོ། །ཞེས་གསུངས་ཤིང༌། ལས་སོ་སོའི་འཕྲེང་བའི་གྲངས་ཀྱི་ཚད་ཀྱང༌།
དེ་ཉིད་ལས། དཀའ་ཐུབ་ཅན་གྱི་བགྲང་འཕྲེང་ནི། །འདི་ལྟར་རྣམ་པ་བརྒྱད་དུ་བཤད། །ཤེལ་གྱི་བཅོ་བརྒྱད་རྣམས་ཀྱིས་ཞིག །བརྟུལ་ཞུགས་ཅན་གྱི་ཞི་བར་བྱེད། །མུ་ཏིག་སུམ་ཅུ་དྲུག་དབྱངས་སུ། །བརྗོད་པས་མི་རྣམས་རྒྱས་པའོ། །ཉི་ཤུ་རྩ་བདུན་རྒྱུ་སྐར་གྱིས། །མི་སོས་བསོད་ལ་བཤད་ པའོ། །དེ་ཡི་ཉིས་འགྱུར་བོང་བུའི་སོས། །སྡང་བར་བྱེད་དང་སྐྲོད་པའང་ འགྱུར། །གསལ་བྱེད་སུམ་ཅུ་དྲུག་དག་པས། །དབང་དུ་བྱས་སོགས་བོ་ཏེ་ ཙེས། །དབྱངས་དང་གསལ་བྱེད་ཡོངས་བསྲེས་པ། །བཞི་ལྷག་པ་ཡི་ལྔ་བཅུ་ ཡིས། །པདྨ་ཞེས་པའམ་ཡང་ན་ནི། །ཙནྡན་ས་བོན་གྱིས་དགུག་ལའོ། །རྒྱུ་སྐར་ཕྱེད་ཀྱི་རྐང་པ་ཡིས། །རྨོངས་པར་བྱེད་ལ་ལུང་ཏང་བཤད། །དབྱངས་དང་གསལ་བྱེད་རྐང་པས་དག །རེངས་ལ་རུ་དྲཱ་ཀྵ་རུ་བཤད། དེ་ལྟར་དག་པའི་ས་ལས་ ནི། །དག་པ་རྣམ་པ་བརྒྱད་དུ་བཤད། །ཅེས་འབྱུང་ངོ༌། །དེ་དག་ཕལ་ཆེར་ཚིག་དོན་གོ་སླ་ཞིང༌། འབྲུ་ཞིབ་མོར་བཤད་ན་ཧ་ཅང་ཡི་གེ་མང་བར་འགྱུར་རོ། །དེ་དག་གི་སྙིང་པོའི་དོན་དྲིལ་བ་ནི་འདི་ཡིན་ཏེ། བཟླས་བྱ་སྔགས་ཀྱི་རང་བཞིན། བཟླས་པའི་གྲངས་ཀྱི་དབྱེ་བ། ཇི་ལྟར་བཟླ་བའི་མན་ངགཕན་གནོད་ཀྱི་ཡན་ལག་རྩི་བ། ལས་དང་མཐུན་པ་བགྲང་འཕྲེང་གི་དབྱེ་བ་སྟེ་ལྔ་ལས། དང་པོ་ནི་རྒྱུད་ཀྱི་རྒྱལ་པོ་འདི་ལས། དངོས་སུ་གསུངས་པའི་སྔགས་ཀྱི་རྣམ་གྲངས་ཡང་ཤིན་ཏུ་མང་བ་དང༌། དངོས་སུ་མ་གསུངས་ཀྱང་བརྟན་གཡོ་ཐམས་ཅད་ལ་མིང་གི་ཡི་གེ་དང་པོ་ས་བོན་དུ་འགྱུར་ཞིང༌། མིང་ཉིད་ལ་སྔགས་ཀྱི་ཡི་གེ་སྤེལ་བས་ཀྱང་སྔགས་སུ་འགྱུར་ཚུལ་སོགས་འདྲེས་བརྩིས་པའི་སྔགས་ཀྱི་རྣམ་གཞག་ཀྱང་མང་དུ་བྱུང་ལ། རྒྱས་འགྲེལ་ལས་བཤད་པའི་ལུང་ཚིག་མང་པོ་ཡོད་ཀྱང༌། སྙིང་པོ་ནི། ལྷའི་མཚན་གྱི་ཐོག་མའི་ཡི་གེའམ་ཡང་ན་ས་བོན་ཧཱུཾ་ཡིག་
ཁོ་ན་ཐུགས་རྡོ་རྗེ་དང༌། ཀཱ་ལ་ཙཀྲ་ཞེས་པ་ལྟ་བུ་མཚན་ཙམ་སྨོས་པ་གསུང་རྡོ་རྗེ་དང༌། དེ་ལ་ཨོཾ་དང་སྭཱཧཱ་ཐོག་མཐར་སྦྱར་བ་སྐུ་རྡོ་རྗེའི་སྔགས་སུ་མཛད་དེ། ཇི་སྐད་དུ། ཐུགས་ཀྱི་དབྱེ་བས་བསྒོམ་པར་བྱའོ། །གསུང་གི་དབྱེ་བས་མཆོད་པར་བྱའོ། །སྐུའི་དབྱེ་བས་བཟླས་པ་བྱའོ་ཞེས་དཔལ་དུས་ཀྱི་འཁོར་ལོ་ལ་ཧཱུཾ་ངམ་ཀཱཾ་ཡིག་ལྟ་བུ་ལྷ་བསྐྱེད་པའི་རྒྱུད་སྒོམ་པ་དང༌། ཐུགས་ཀར་འགོད་རྒྱུའི་ས་བོན་ཡིད་ཀྱིས་སྒོམ་པའི་དོན་དུ་དགོས་ལ། དེ་ཡང་དཔེར་ན་འབྲས་ཀྱི་ས་བོན་བཏབ་པ་ལས། མྱུ་གུ་དང་རྐང་བུ་དང་ཤུན་པ་དང་སྙེ་མའི་བར་དུ་འབྱུང་ཞིང༌། སྔོན་ས་བོན་བཏབ་པ་ཅི་འདྲ་བའི་འབྲུ་ཡང་དགོས་པ་བཞིན་དུ་ས་བོན་ལས་ལྷ་ཞལ་ཕྱག་གི་རྣམ་པ་ཅན་གྲུབ་པར་མ་ཟད་ས་བོན་ཉིད་དང་འདྲ་བ་ཞིག་ཀྱང་འབྲས་བུར་གྲུབ་དགོས་ཏེ། སེམས་དཔའ་སུམ་རྩེག་གམ་ས་བོན་གདན་བཅས་སམ། ཡིག་འབྲུ་མང་པོ་འགོད་དགོས་པའི་བར་དུ་ཡང་འདིའི་རིགས་ཡིན་ནོ། །མཚན་གྱི་ཐོག་མར་ན་མཿའམ་སྭཱཧཱ་སྦྱར་བ་ན་མཿའི་མཆོད་སྔགས་ལྟ་བུ་སྲེག་བླུགས་དང་མཆོད་སྦྱིན་ལ་སོགས་པའི་སྐབས་སུ་དགོས་པའི་སྔགས་ཡིན་པ་དང༌། དེར་མ་ཟད་ཀཱ་ལ་ཙཀྲ་ཞེས་པ་གཅིག་པུས་ཀྱང་མཆོད་པའི་སྔགས་ཡིན་ནོ། །ཡང་བཟླས་པ་བྱེད་ན་ཧཱུཾ་ཧཱུཾ་ཞེས་ས་བོན་གཅིག་པུ་བཟླ་བ་དང༌། ཀཱ་ལ་ཙཀྲ་ཀཱ་ལ་ཙཀྲ་ཞེས་མཚན་གཅིག་པུ་འདོགས་འབྲེལ་མེད་པར་བཟླ་བ་ནི་འགའ་ཞིག་ཏུ་ཡོད་ཀྱང་ཕལ་ཆེར་དུ་མི་བྱེད་དེ་བཟླས་པར་བྱེད་པའི་ཚེ། མགོ་བོར་ཨོཾ་དང་མཐར་ཧཱུྃ་ཕཊ་སྦྱིན་པའམ་སྭཱཧཱ་སྦྱར་བ་བཟླ་དགོས་ཏེ། སྐབས་འདིར་མིང་ལས་ལྷག་པ་ཞེས་པ་ཐོག་མར་མགོ་འདྲེན་དང་ཐ་མར་སྒྱུར་བྱེད་ཀྱི་སྔགས་བཅུག་པ་ཉིད་ལ་ངོས་བཟུང་སྟེ། སྐུ་གསུང་ཐུགས་ཀྱི་བཟླས་པའི་དབྱེ་བ་སོ་སོའི་ངོས་འཛིན་དང༌།
འགོས་དོན་རྣམ་པ་གསུམ་གྱི་སྒོ་ནས་འཇོག་ཚུལ་དང་དབྱེ་བའི་རྣམ་གཞག་གཅིག་ནི་དེ་བཞིན་ཡིན་ལ། འདི་ལ་ཡང་དཀྱིལ་འཁོར་གྱི་ལྷ་སོ་སོའི་ས་བོན་ཉིད་དང༌། མིང་ཡིག་གི་དང་པོ་གཉིས་ཀར་ཐུགས་སུ་གསུངས་པ་ལས་གཙོ་བོར་ས་བོན་ཉིད་ཡིན་ནོ། །ཡང་སྐུ་གསུང་ཐུགས་ཀྱི་སྔགས་ཀྱི་རྣམ་གཞག་དེ་ཉིད་དང་ཅུང་ཟད་མི་འདྲ་བ་ཚུལ་གཞན་ནི། སྒོམ་པ་དང་མཆོད་པའི་དབང་དུ་མ་བྱས་པར་བཟླས་པ་ཁོ་ནའི་དབང་དུ་བྱས་ནས། བསྒྲུབ་བྱ་ལྷའི་མིང་གི་ཡི་གེ་དང་པོ་ལ། མགོ་བོར་ཨོཾ་དང་གཞུག་ཏུ་བསྐུལ་བའི་ཚིག་བཀོད་པ་ནི། ཐུགས་ཀྱི་བཟླས་པ་སྟེ། འཆད་པར་འགྱུར་བའི་ལས་ཀྱི་ཡན་ལག་དྲུག་པོ་ཡང་འདིའི་མན་ངག་ཡིན་ནོ། །ཨོཾ་ཀཱ་ལ་ཙཀྲ་ཡ་སྭཱཧཱ་ཞེས་པ་ལྟ་བུ་མཚན་དངོས་ལ་ཐོག་མཐའི་སྔགས་སྦྱར་བ་ནི་གསུང་གི་བཟླས་པའི་སྔགས་སོ། མཚན་དངོས་ཡོད་པའི་སྟེང་དུ་ལྷག་པོའི་སྔགས་བསྣན་པ་ནི། སྐུའི་བཟླས་པའི་སྔགས་ཡིན་ལ། དེ་དག་རྩ་བའི་སྔགས་ཡིན་ཞིང༌། འཕྲེང་བའི་སྔགས་ནི་གཉིས་ཏེ་གཙོ་བོ་ཉིད་དང་འབྲེལ་བའི་འཕྲེང་སྔགས་དང༌། འཁོར་ཁོ་ནའི་སྔགས་སོ། །འཕྲེང་སྔགས་དེ་ནི་ལུས་ཀྱི་ཡན་ལག་དང་མཚུངས་པར་བཤད་ཅིང༌། འཁོར་རྐྱང་གི་སྔགས་རྣམས་ཡན་ལག་ཁོ་ན་ཡིན་པས་ཡན་ལག་གི་སྔགས་ཞེས་བྱ་ལ་རྐང་པ་བཅུ་དྲུག་པ་དང༌། བདུན་ཅུ་རྩ་གཉིས་པ་ལྟ་བུ་གཙོ་བོ་ཉིད་ཀྱི་འཕྲེང་སྔགས་ནི། སྐུ་ཡོངས་སུ་རྫོགས་པའི་སྔགས་ཡིན་པའི་ཕྱིར་སྐུའི་སྔགས་ཉིད་ཀྱི་ནང་དུ་འདུ་བ་ཡིན་ལ། འདི་དག་འཁོར་གྱི་སྔགས་སུ་ཡང་འགྱུར་བ་ནི་སྡོམ་ཆེན་གྱི་སྐབས་སུ་ཤེས་ཏེ། དེའི་ཕྱིར་ཡན་ལག་གི་སྔགས་ཀྱང་ཡིན་ནོ། །གཙོ་བོའི་འཕྲེང་སྔགས་ནི། སྐུ་རྡོ་རྗེའི་སྔགས་ཀྱི་མཚན་ཉིད་ཚང་བའི་ཕྱིར་ཡན་ལག་གི་སྔགས་ཁོ་ནར་མི་བསམ་མོ། །
ཡང་ཨོཾ་ཨཱཿཧཱུཾ་ཧོཿ ཞེས་པ་ནི་གཙོ་བོའི་སྙིང་པོའོ། །ཨོཾ་ཧྲཱཾ་ཧྲཱིཾ་ཧྲཱྀཾ་ཧྲུཾ་ ཧྲཱཿཞེས་པ་ནི་ཡན་ལག་དྲུག་གི་སྔགས་ཞེས་ཀྱང་བྱ་སྟེ་ཉེ་སྙིང་ངོ༌། །དེ་དག་ལའང་མཐར་སྭཱཧཱ་ཞེས་པའམ། ན་མཿདང་ཧཱུྃ་ཕཊ་ལ་སོགས་པ་ཇི་ལྟར་འོས་པ་སྦྱོར་དགོས་ལ་འཁོར་རྣམས་ཀྱི་སྔགས་ལ་ཡུམ་གྱི་ས་བོན་ཕྲཻཾ་དང༌། ནུས་མ་རྣམས་ལ་ཨ་ཨཱ་ཨཾ་ཨ་ཧ་ཧཱ་ཧཾ་ཧ། སངས་རྒྱས་ཡབ་ཡུམ་སེམས་དཔའ་ཡབ་ཡུམ། ཁྲོ་བོ་ཡབ་ཡུམ་རྣམས་ལ་ཨ་ཨཱ་ཨི་ཨཱི་རྀ་རཱྀ་ཨུ་ཨཱུ་ལྀ་ལཱྀ་ཨཾ་ཨཿ ཨ་ཨཱ་ཨེ་ཨཻ་ཨར་ཨཱར་ཨོ་ཨཱཽ་ཨལ་ཨཱལ་ཨཾ་ཨཱཿ ཧ་ཧཱ་ཡ་ཡཱ་ར་རཱ་ཝ་ཝཱ་ལ་ལཱ་ཧཾ་ཧཿ འདི་དག་སྦྱིན་སྲེག་གི་སྐབས་ལས་བཟླས་བྱའི་སྔགས་སུ་གསལ་བར་གསུངས་པ་ཡིན་ལ། དེའི་ཤུགས་ལས་ཐོབ་ཅིང་ཐུགས་ཀྱི་སྔགས་སུ་སྤྱིར་བཏང་ནས་ཀྱང་གསུངས་པ་དང༌། བླ་མ་བརྒྱུད་པ་རྣམས་ཀྱི་མན་ངག་ལས་བྱུང་བ་བྱིན་རླབས་ཉམས་མྱོང་གིས་བརྒྱན་པ་ཡིན་པས། འདིའི་རིགས་འགྲེ་བུམ་པ་རྣམས་དང༌། གསུང་དང་སྐུའི་དཀྱིལ་འཁོར་གྱི་ལྷ་རྣམས་ལ་ཡང་སྦྱོར་རོ། །འདིའི་མན་ངག་སྦྱིན་པར་བྱ་སྟེ། སྡེ་ཚན་རེ་རེ་ལ་དང་པོར་རབ་བསྔགས་དང༌། མཐར་སྒྱུར་སྔགས་སྦྱར་བ་ཉིད་གཙོ་བོར་བཟླ་བ་དང༌། སྤྲོ་ན་ཡི་གེ་རེ་རེ་བཞིན་ཐོག་མཐའི་སྔགས་སྦྱར་བའང་ཡིན་ནོ། །ཕྱིས་ཀྱི་བོད་མང་པོ་དག་ལྷ་སོ་སོ་ཐམས་ཅད་ཀྱི་མཚན་སྔགས་བྱེད་པ་ནི། སྤྲོས་པ་ཙམ་གྱི་དོན་དུ་བྱས་པར་ཟད་ཀྱི་དགོས་པ་ཆུང་ལ། དག་པོར་འདོན་ཤེས་ན་མཆོད་པའི་སྐབས་སུ་རྣམ་གྲངས་ཙམ་དུ་འགྱུར་མོད་ཀྱི། ཆོག་གྲྭའི་སྐབས་སུ་ལྷ་ཐམས་ཅད་ཀྱི་མཚན་སྔགས་ཀྱི་སྤྲོས་པ་བྱེད་ཅིང༌། རྒྱུད་དག་ལས་འབྱུང་བའི། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི།
ཞེས་པའང་ཁས་བླངས་པ་ན། ལོག་པའི་བློ་ཅན་དག་འདི་སྐད་ཅེས། ཁྱེད་ཀྱི་རྒྱུད་ལས་བཤད་པའི་ལྷ་གྲངས་ཀྱི། བསྙེན་པ་ཚེ་ལོ་བརྒྱ་པས་འཁྱོལ་དཀའ་ན། ཞེས་སོགས་ཀྱི་ཀླན་ཀ་བྱུང་བའི་རྒྱུ་ཡང་འདི་ཁོ་ནར་ཟད་དོ། །འདིའི་ལན་མྱུར་དུ་འཆད་པར་འགྱུར་རོ། །དེས་ན་ཐུགས་དཀྱིལ་གྱི་ལྷ་རྣམས་ལ་གོང་དུ་བཤད་པའི་ཐུགས་ཀྱི་བཟླས་པ་དེ་ཉིད་བྱེད་ཅིང༌། གསུང་དང་སྐུའི་ལྷ་རྣམས་ལ་ཅུང་ཟད་ཙམ་བཟླས་ནའང་ལེགས་མོད། ཐུགས་ལས་སྤྲུལ་པ་འབའ་ཞིག་པ་ཉིད་ཀྱི་ཕྱིར། དཀྱིལ་འཁོར་ཡོངས་རྫོགས་སྒོམ་པའི་གནས་སྐབས་སུ་ཡང་དེ་དག་ལ་སྒོས་ཀྱི་བཟླས་པ་མེད་ཀྱང་ཆོ་གའི་ཡན་ལག་ཆད་པར་མི་འགྱུར་རོ། །ཡང་འདིར་རྐང་པ་བདུན་བཅུ་རྩ་གཉིས་པ་ལྟ་བུའི་འཕྲེང་སྔགས་ཆེན་མོ་སྐུའི་བཟླས་སྔགས་ཡིན་དུ་ཆུག་ཀྱང་དེ་བས་ཉུང་བ་འཕྲེང་སྔགས་མ་ཡིན་པའི་སྐུའི་སྔགས་དཔལ་དུས་ཀྱི་འཁོར་ལོ་ཉིད་ལ་སྦྱར་ན་ཇི་ལྟ་བུ་ཞེ་ན། འགྲེལ་ཆེན་ཉིད་ལས་སྒྲོལ་མའི་སྔགས་ལ་དཔེར་བརྗོད་མཛད་པ་དེ་དུས་ཀྱི་འཁོར་ལོ་ལ་ཇི་ལྟར་སྦྱོར་ཚུལ་ལག་ལེན་འགལ་རྒྱུ་ནི་འདི་ལྟ་སྟེ། ཨོཾ་ཨཱཿཧཱུཾ་ཧོཿཧཾ་ཀྵཿ ཀཱ་ལ་ཙཀྲ་ཧཱུྃ་ཧཱུྃ་ཕཊ་ཅེས་པ་ལྟ་བུ་རྐང་པ་དང་པོའི་སྔགས་ཀྱིས་ཀྱང་རུང་ཞིང་ལེགས་ལ། མན་ངག་བརྒྱུད་པ་ལས། ཨོཾ་ཀཱ་ལ་ཙཀྲ་མ་མ་ཝ་ར་དེ་སྭཱཧཱ། ཞེས་སྦྱོར་བར་མཛད་དེ། ཡང་ན་སརྦ་སིདྡྷི་ད་ཡ་ཀ་ཞེས་སྦྱོར་བ་ཡང་ཡོད་ལ། དེ་དག་གིས་ཀྱང་འགྲུབ་བོ། །ཁ་ཅིག་མ་མ་ཤཱནྟིཾ་ཀུ་རུ་ཀུ་རུ་ཞེས་པ་སྦྱོར་བར་འདོད་དེ། ལས་ཕྱོགས་གཅིག་པའི་སྔགས་སུ་འགྱུར་བས། རྩ་བའི་བསྙེན་སྔགས་ལ་འདི་བྱེད་པ་མི་འཐད་དོ། །ཡང་ཨོཾ་ སྭཱ་ཧཱ། ཞེས་པ་འདི་གཅིག་པུ་བརྟན་གཡོ་མ་ལུས་པ་གཅིག་ཏུ་འདུས་པ་དུས་ཀྱི་འཁོར་
ལོའི་རྩ་བའི་སྔགས་ཉིད་ཡིན་པའི་ཕྱིར། གཙོ་འཁོར་སོ་སོའི་དབྱེ་བ་མེད་པར་འདི་ཁོ་ནས་ཀྱང་འགྲུབ་པ་ནི། ཁ་བཤད་གཙོ་བོའི་སྟོན་པ་ཙམ་མ་ཡིན་པར་ཉམས་ལེན་བྱིན་རླབས་ཀྱི་བརྒྱུད་པ་དང་ལྡན་པ་རྣམས་ཀྱི་ལག་ལེན་མ་ནོར་བའོ།། །།གཉིས་པ་བཟླས་པའི་གྲངས་ཀྱི་དབྱེ་བ་ནི། ཐུགས་ཀྱི་བཟླས་པའི་ནང་ཚན་ལས་ཀྱི་ཡན་ལག་དྲུག་གི་སྔགས་ལ་རེ་རེ་བཞིན་འབུམ་ཕྲག་རེ་རེ་དང༌། གསུང་གི་བཟླས་པ་མཚན་སྔགས་ལ་འབུམ་ཕྲག་བཅུ་དང༌། དེའི་བཅུ་ཆའི་སྦྱིན་སྲེག་དང༌། མཚན་ལས་ལྷག་པའི་སྔགས་ཐུང་སྐུའི་བཟླས་སྔགས་ལ་བྱེ་བ་བཟླས་པས་བསྙེན་པ་མཆོག་ཏུ་འགྱུར་ལ། ཡང་ན་དེ་དག་མི་བཟླ་བར་རྐང་པ་བདུན་ཅུ་རྩ་གཉིས་པ་སྡོམ་ཆེན་གྱི་སྐབས་ལས་ཇི་སྐད་འབྱུང་བ་དང་མཐུན་པར་བྱའི་དུས་དང་སྦྱར་ནས་དུས་སྐབས་སོ་སོར་རིམ་པས་བཟླས་ཏེ་རྐང་བ་རྣམས་སོ་སོར་བགྲངས་པས་ཐམས་ཅད་བསྡོམས་པ་ལ་བྱེ་བར་ལོངས་ན། དེ་ཕྱིན་ཆད་བཀླགས་པས་གྲུབ་པའི་བསྙེན་གྲངས་སུ་བཤད་མོད། འོན་ཀྱང་དུས་འཁོར་སྣ་ཚོགས་གཙོ་བོ་འདི་ལ་ཧཱ་བཛྲ་ཞེས་སོགས་སྡོམ་ཆེན་གྱི་འཁོར་གྱི་དཔའ་བོ་དཔའ་མོའི་མཚན་སྔགས་དེ་དག་མི་དགོས་ལ། བཀླགས་པས་གྲུབ་པར་དངོས་སུ་གསུངས་པ་ནི་ཕལ་ཆེར་རྣམ་གཡེང་སྤངས་པའི་དབང་དུ་བྱས་ལ། ད་ལྟའི་གང་ཟག་རྣམ་གཡེང་ཅན་གྱི་དབང་དུ་བྱས་ན་བཀླགས་པས་གྲུབ་པ་ནི་དཀའ་མོད་ཀྱི། འོན་ཀྱང་ངག་བཟླས་དེ་ཙམ་གྱིས་ཀྱང་འཁོར་ལོ་ལ་སོགས་པའི་ལས་རྣམས་རྗེས་མཐུན་དུ་འགྲུབ་པ་ནི་ཡིན་ནོ། །ཡང་ན་རྐང་པ་བཅུ་དྲུག་པ་བྱེ་བ་བཟླས་པས་ཀྱང་བཀླགས་པས་གྲུབ་པ་ཡིན་པར་བཤད་ན། འདིར་རྐང་པ་བཅུ་དྲུག་པ་དང་དུར་ཁྲོད་བཅུ་དྲུག་སྦྱོར་རྒྱུ་མེད་ཀྱང༌། མན་ངག་གི་བཤད་རྒྱུན་ལས་འབྱུང་བ་
ལྟར་ན། དེ་ཡང་ཚེས་བཅུ་དྲུག་རྣམས་ལ་སོ་སོར་བཟླ་སྟེ་ཚེས་གཞན་རྣམས་ལ་རྐང་པ་རེ་རེ་སྦྱར་ཞིང༌། བཅོ་ལྔའི་ཉིན་བར་རྐང་པ་བཅོ་ལྔ་པ་དང༌། མཚན་མོ་རྐང་པ་ཐ་མ་སྦྱར་རོ།། ཚུལ་དེས་སོ་སོར་བཟླས་པ་ཡོངས་སུ་བསྡོམས་པའི་བྱེ་བ་སྟེ། འདི་ཡང་སྔ་མ་དང་འདྲ་བར་ཤེས་པར་བྱའོ། །ཡང་འཁོར་ལོ་སྡོམ་པ་ལས་རྐང་པ་བརྒྱད་པ་གསུངས་པ། འདིར་ཉིས་འགྱུར་དབང་གིས་བཅུ་དྲུག་ཏུ་མཛད་པ་དང༌། འཁོར་ལོ་སྡོམ་པར་རྐང་པ་ཉི་ཤུ་རྩ་བཞི་ཡོད་པའི་དོན་འདིར་སུམ་འགྱུར་བདུན་བཅུ་རྩ་གཉིས་སུ་མཛད་དེ། ཐབས་ཤེས་ཀྱི་དབྱེ་བས་ཕྱེ་བའི་ཁྱད་པར་ཉིས་འགྱུར་དང༌། ཟླ་ཉི་སྒྲ་གཅན་གསུམ་གྱི་དབྱེ་བས་ཕྱེ་བའི་ཁྱད་པར་མ་གཏོགས་དག་ཚུལ་མཚུངས་པར་མཛད་པ་ཡིན་ན། དེས་འདི་ལ་རིགས་འགྲེ་བར་རུང་ངོ༌། དེས་ན་ཕྱག་ན་རྡོ་རྗེས་མཛད་པའི་བདེ་མཆོག་སྟོད་འགྲེལ་ལས་ཇི་སྐད་གསུངས་པའི་བཟླས་པའི་ཚུལ་དེ་ཉིད་སླར་ཡང་ལྡབས་ཏེ་ལན་ཉིས་འགྱུར་དང་སུམ་འགྱུར་དུ་སྦྱར་ན། བཅུ་དྲུག་པ་དང་བདུན་བཅུ་རྩ་གཉིས་པ་གཉིས་ཀ་བསྡོམས་པས་བྱེ་བའི་དོན་གྱིས་བསྙེན་པར་འགྱུར་རམ་སྙམ་པ་ནི་བདག་གི་རྣམ་པར་རྟོག་པའོ། །འོན་ཀྱང་གཞན་གྱིས་བཤད་པ་མེད་པས་འདིར་མི་སྤྲོའོ། །ཡང་དེ་བཞིན་དུ་གཙོ་བོའི་སྙིང་པོ་དང༌། ཉེ་སྙིང་དང༌། ཨོཾ་ཨཱཿཧཱུཾ་ཧོ་ཧཾ་ཀྵཿཞེས་པ་རིགས་དྲུག་གི་ས་བོན་དང༌། རྣམ་བཅུ་དབང་ལྡན་གྱི་སྔགས་རྣམས་གང་ཡང་རུང་བ་རེ་རེ་བྱེ་བ་བཟླས་པས་དཀྱིལ་འཁོར་གྱི་ལས་ཁྱད་པར་ཅན་ལ་འཇུག་པ་སོགས་དང༌། ལས་ཆེན་བརྒྱད་སོགས་འགྲུབ་རུང་ཡིན་ལ། དེ་ཉིད་ཚར་གཉིས་སམ་གསུམ་མམ་བཞིར་བསྐྱར་གྱིན་སོང་ན་ངེས་པར་འགྲུབ་བོ། །འཁོར་གྱི་སྔགས་བཟླ་བ་ནི་ངེས་པར་དགོས་པ་མིན་ཡང༌། གལ་ཏེ་བཟློས་པར་འདོད་ན་ཐུགས་དཀྱིལ་གྱི་
ལྷ་རྣམས་ལ་གོང་དུ་བཤད་པའི་ས་བོན་སྡེ་ཚན་བཞི་པོ་དེ་རྣམས་བཟླ་སྟེ། རྒྱུད་ནི་རྒྱུད་གཞན་གྱིས་ཤེས་པར་རིག་པས་གྲངས་འབུམ་ཕྲག་བཅུ་རེའོ། །གསུང་དཀྱིལ་ཕན་ཆད་ལ་ལྷ་སོ་སོ་སྒྲུབ་པའི་སྐབས་ཡིན་ན་མ་གཏོགས། ཅུང་ཟད་ཙམ་རེ་ལས་གྲངས་ངེས་ཅན་མི་དགོས་སོ། །སྤྱིར་དམིགས་པ་ལ་གསལ་སྣང་བརྟན་པོར་ཐོབ་པས་ནི། ཡིད་བཟླས་སམ་འགོག་བཟླས་གྱི་སྒོ་ནས་ཡུད་ཙམ་རེ་ལ་ཡང་བཟླས་པ་བརྒྱ་སྟོང་ཁྲི་འབུམ་མང་པོ་འགྲོ་བ་ཡོད་པས་སྔགས་ཚིག་པོ་ཏི་མང་པོར་ལོངས་པའང་བྱེ་བ་སོགས་བཟླ་བ་ལ་ཡུན་རིང་མི་འགོར་བ་ཡང་ཡོད་ལ། རྒྱུད་འདི་དག་གསུངས་པའི་གདུལ་བྱའི་གཙོ་བོ་དེ་ཡང་དབང་རྣོན་དེ་འདྲའི་རིགས་ཡིན་པས་དྲུག་བརྒྱ་སོ་དྲུག་གི་ལྷ་ཚོགས་ལ་རེ་རེ་བཞིན་མཚན་སྔགས་ས་ཡ་རེ་བཟླ་དགོས་པ་ལྟ་བུ་གལ་ཏེ་ཡོད་དུ་ཆུག་ཀྱང༌། འཇོག་པོའི་གཙུག་རྒྱན་ལེན་པའི་བསྟན་བཅོས་ལྟ་བུའོ་སྙམ་རྒྱ་ཆེར་སྐྲག་དངངས་སུ་བྱེད་མི་དགོས། རེད་འདའ་བ་ཉིད་བློ་ཁོག་ཆུང་པར་ཟད་ལ། འོན་ཀྱང་འཁོར་ཚོགས་ཀྱི་སྔགས་བཟླ་ཚུལ་ཇི་ཙམ་ཡིན་པ་དང༌། དེང་སང་ལག་ལེན་བྱེད་པ་ཉུང་ཡང་བཅུ་དྲུག་པ་དང་དོན་གཉིས་པ་བྱེ་བ་བྱེ་བ་བཟླ་བར་གསུངས་པའི་དོན་ཡང་གོང་དུ་བཤད་པ་ལྟར་ཡིན་པས། དེང་སང་གི་གདུལ་བྱ་ཐ་མའི་དབང་དུ་བྱས་ཀྱང་ཚེ་ལོ་བརྒྱ་བས་བསྙེན་པ་མི་འཁྱོལ་ཞེས་ཧ་ཐང་ཆེ་ཆེ་མོར་བྱེད་དགོས་པའི་རྒྱུ་མཚན་ནམ་ཡང་མེད་དོ།། གཞན་ཡང་དཔའ་བོ་གཅིག་པུའམ་ལྷན་སྐྱེས་ཙམ་བསྒོམས་ནས། སྙིང་པོ་སོགས་གཙོ་བོ་ཉིད་ཀྱི་སྔགས་བྱེ་བ་བཟླས་པས་ཀྱང་དོན་འགྲུབ་ངེས་པ་སྟེ། རྒྱུད་ལ་ཁ་བཤད་ཤོབ་སེ་བ་རེ་དང༌། དབང་བསྐུར་བའི་དོན་གྱི་བསྙེན་པ་སོང་ངོ་སྐད་པའི་རྫུན་རིབ་ཙམ་མ་ཡིན་པར་ལས་ཚོགས་ལ་སོགས་པ་མངོན་རྟགས་ཅན་གྱི་
བསྙེན་པ་འགྲུབ་པ་གོ་བར་གྱིས་ཤིག་དང་མངོན་སུམ་ལ་བསྙོན་པར་མི་བྱའོ། །ཡང་ཁ་ཅིག་ལས་དྲུག་དང༌། བྱེ་བསྙེན་བཟླ་བ་སོགས་ནི་དངོས་གྲུབ་ཀྱི་དོན་དུ་ཡིན་ལ། དབང་བསྐུར་བའི་སློབ་དཔོན་གྱི་གནས་ཐོབ་པ་སོགས་ཀྱི་དོན་དུ་གཙོ་བོའི་སྙིང་པོ་འབུམ་དང༌། ཐུགས་དཀྱིལ་གྱི་ལྷ་རྣམས་ཀྱི་ཁྲི་ཕྲག་རེ་རེའོ། །ཞེས་འདོད་པ་ནི། གཞན་གྱི་རྒྱས་བཀབ་ན་རུང་ཙམ་ནི་ཡིན་པར་མངོན་ཡང་འདིར་གསལ་ཁ་མེད་ཅིང༌། བྱེ་བ་བཟླ་བའི་ལག་ལེན་བཟང་པོའི་རྒྱུན་མ་ནུབ་པར་བྱའོ།། །།གསུམ་པ་ཇི་ལྟར་བཟླ་བའི་མན་ངག་ནི། ཡན་ལག་དྲུག་གམ་ལས་དྲུག་གི་བཟླས་པ་ནི། གོང་དུ་དྲངས་པའི་དང་པོར་བསྣུན་པར་བྱ་བ་སྟེ་ཞེས་སོགས་ཏེ། བསྣུན་པའི་ལས། དབབ་པའི་ལས། བསྲེག་པའི་ལས། བསླང་བའི་ལས། རྒྱས་པའི་ལས། མཉེས་པའི་ལས་ཏེ་དྲུག་གོ །དང་པོ་ནི་བསྒྲུབ་བྱ་ལྷ་རང་རང་གི་མིང་གི་ཡི་གེ་དང་པོ་དེ་ལ་ཧཿཚེག་དྲག་ཅན་སྤྱི་བོར་བཞགམགོར་ཨོཾ་དང༌། ཐ་མར་ཕཊ་ཡིག་བསྣན་པ་སྟེ། དཔེར་ན་དུས་འཁོར་གྱི་ཀཱ་ལ་ཙཀྲ་ཞེས་པའི་ཀཱ་ཡིག་གི་མགོར་ཧ་དང་མཐར་ཚེག་དྲག་བཞག ཐོག་མཐའི་ཡི་གེ་གཉིས་སྦྱར་བ། ཨོཾ་ཕཊ། ཅེས་པ་ལྟ་བུ་སྟེ། དེ་ལྟར་འབུམ་བཟླས་པས་སྔགས་ཀྱི་མཚོན་ཆས་སྔགས་ཀྱི་ལྷ་ལ་བསྣུན་པ་ཞེས་བྱ་སྟེ། དཔེར་ན་སྐྱེས་བུད་མུ་རྒོད་ཞིག་བརྟུལ་ཏེ་མངག་གཞུག་བཟང་པོར་བྱེད་ན། དང་པོར་སྡིགས་ཤིང་བརྡེགས་པས་ས་ལ་འགྱེལ་ཞིང་བརྒྱལ་བ་ལ་སོགས་པ་དགོས་པ་བཞིན་དུ་སྔགས་ཀྱི་ལྷ་དངོས་གྲུབ་མི་སྩོལ་བ་ལ་སྡིགས་པའོ། །སྡིགས་ཐུབ་པ་ན་བརྒྱལ་བའི་གནས་སྐབས་ཐོབ་པ་སྟེ། ལྷ་དེ་རང་ཉིད་དམ་ཚིག་ཉམས་པར་འགྱུར་བས་སྐྲག་པའོ། །རྣམ་པར་བཅད་བཅས་སྟོང་པ་ཡི།
ཞེས་པ་ནི་སྟོང་བ་སྟེ། མཁའ་ཁམས་ཀྱི་ཡི་གེ་རྣམ་བཅད་དང་བཅས་པའི་དོན་ནོ། །དེས་མཚོན་ཏེ་རླུང་མེ་ཆུ་ས་ཞེས་པ་རྣམས་ཀྱང་ཡ་ར་ཝ་ལའི་ཡི་གེའོ། །གཉིས་པ་དབབ་པའི་ལས་ནི། དཔེར་ན། ཀཱ་ཡིག་ལ་རླུང་གི་ཡི་གེ་ཡ་སྤྱི་བོར་བཞགམཐར་ཧཱུཾ་སྟེ། ཨོཾ་ ཧཱུཾ་ཞེས་པ་འབུམ་བཟླས་པས་དབབ་པ་སྟེ། ཐུལ་འོག་ཏུ་ཆུད་པའི་མིང་ཡིན་ལ། དཔེར་ན། བྲན་ཕོ་དམུ་རྒོད་འགྱེལ་བ་དེ་བཅིངས་ནས་ང་རྒྱལ་ཆག་ཅིང་མནའ་འོག་ཏུ་ཆུད་པ་ལྟ་བུའོ། །དེ་ཡང་སྔགས་ཀྱི་ལྷ་དེ་སྔར་སྒྲུབ་པོ་ལ་དངོས་གྲུབ་མི་སྩོལ་ཞིང༌། ཕྱིར་ལ་གནོད་པ་སྐྱེལ་བ་ལྟར་ཡོད་པ་དེ། ད་དུང་མགུ་བ་མིན་ཀྱང་སྔགས་དྲག་པོས་གཟིར་བའི་ཆད་པས་སྐྲག་སྟེ། ཚུར་ཅུང་ཟད་ཁ་ཕྱོགས་པ་ལྟར་གནས་པའོ། །གསུམ་པ་སྲེག་པ་ནི། ཀཱ་ཡིག་གི་མགོར་མེའི་ས་བོན་ར་བཞགམཐའ་བསྟེན་དུ་བཽ་ཥཊ་སྦྱར་ནས། ཨོཾ་ བཽ་ཥཊ་ཅེས་པ་འབུམ་བཟླས་པས་སྔགས་ཀྱིས་ཅུང་ཟད་དབང་དུ་བྱེད་པ་སྟེ། དཔེར་ན་བྲན་དམུ་རྒོད་དེ་འོག་ཏུ་ཆུད་པ་ན། ད་དུང་བྱ་བ་མ་ཡིན་པའི་ཉེས་དམིགས་བཤད་པས་སྡིགས། ལེགས་པར་བྱས་ན་བྱ་དགའ་འབྱུང་བ་སོགས་ཕན་ཡོན་གྱིས་སྤྲོ་བ་བསྐྱེད་པས་རང་ལ་བློ་གཏོད་རུང་དུ་འགྲོ་བ་ལྟར་སྔགས་ཀྱི་ལྷ་ཡང་སྒྲུབ་པ་པོ་ལ་ཅུང་ཟད་ཉེ་བར་གྱུར་པ་སྟེ། སྔགས་མེ་ལྟ་བུས་བསྲེགས་པ་ནི་ཚ་བས་གདུངས་པ་ན། ཞུ་བ་དང་མཚུངས་པར་སྒྲུབ་པ་པོ་ལ་དགའ་གདུང་ཅུང་ཟད་སྐྱེས་པའོ། །བཞི་པ་བསླང་བ་ནི། ཚིག་པ་ལས་བསླང་བའམ་བརྒྱལ་བ་ལས་བསླང་བ་སྟེ། ཀཱ་ཡིག་གི་མགོར་ཆུའི་ས་བོན་ཝ་ཡིག་གིས་མནན་ཏེ། མཐར་ན་མཿསྦྱར་བ་དང་བཅས་པ་ཨོཾ་ ནམཿཞེས་པ་འབུམ་ཕྲག་གཅིག་བཟླས་པས། སྔགས་ཀྱི་ལྷ་བསླང་བ་སྟེ།
གནས་སྐབས་སྔ་མ་གསུམ་དུ་ཚར་བཅད་པའི་ཚུལ་གྱིས་འགྱེལ་བའི་དཔེས་བསྟན་པ་དེ། སླར་རྗེས་སུ་བཟུང་བས་བསླང་བ་ཡིན་ལ། དེ་ཡང་བྲན་དེ་ཕྱིན་ཆད་སྡིགས་པར་མི་བྱེད་ཅིང༌། ཟས་གོས་ལ་སོགས་པས་ཅུང་ཟད་བདེ་བར་བྱེད་པ་ལྟ་བུ་སྔགས་ཀྱི་ལྷ་གནས་སྐབས་དང་པོ་གསུམ་གྱིས་བརྒྱལ་བ་དང་བཅིངས་པ་དང་གདུང་བ་བསྐྱེད་པ་ལས་དེ་རྣམས་སངས་ཏེ་བདེ་བ་ལ་བཀོད་པ་ལྟར་གྱུར་པ་སླར་གསོ་བའམ་ཞི་བར་བྱེད་པའི་དོན་ལ་ན་མཿའི་སྔགས་སྦྱར་བ་ཡིན་ནོ། །ལྔ་པ་རྒྱས་པའི་ལས་ནི། ཀཱ་ཡིག་གི་མགོར་ས་ཁམས་ཀྱི་ཡི་གེ་ལ་བཞག་སྟེ། མཐར་རྒྱས་པའི་སྔགས་སྭཱཧཱ་སྦྱར་ཏེ། ཨོཾ་ལྐཱ་སྭཱཧཱ་ཞེས་འབུམ་བཟླས་པས། སྔགས་ཀྱི་ལྷ་དེའི་ནུས་པ་རྒྱས་པར་འགྱུར་རོ། །དཔེར་ན་བྲན་བདེ་བར་གནས་པ་དེ་ལ་ཁྱིམ་དང་གཞོན་པ་དང་བང་མཛོད་སོགས་སྦྱིན་པ་ལྟ་བུའོ། །དྲུག་པ་མཉེས་པའི་ལས་ནི། ཀཱ་ཡིག་གི་མགོར་ཐིག་ལེའི་ཆ་ཤས་ཀྱིས་མནན་ལ། མཐར་དབང་དུ་བྱེད་པའི་སྔགས་ཝ་ཥཊ་སྦྱར་བ། ཨོཾ་ཀཱཾ་ཝ་ཥཊ། ཅེས་འབུམ་བཟླས་པས། ལྷ་དེ་རབ་ཏུ་མཉེས་ནས་བདག་ལ་དངོས་གྲུབ་སྩོལ་བར་ཕྱོགས་པ་སྟེ། སྔགས་ཀྱི་ལྷ་དབང་དུ་གྱུར་པའོ། །དཔེར་ན་བྲན་དེ་ལ་སླར་ཡང་ཕན་འདོགས་ཀྱི་འབྲེལ་པ་ཟབ་མོར་བྱས་པ་ན། སྔར་ཕུན་སུམ་ཚོགས་པ་བྱིན་པའི་དྲིན་དྲན་ཏེ། བདག་གི་བྱ་བ་ཅི་དགོས་སྒྲུབ་པར་བྱེད་པ་ལྟ་བུའོ། །དེས་ནི་ཐུགས་བསྐུལ་བ་ལེགས་པར་གྲུབ་པ་ཡིན་ལ། ལས་དྲུག་པོ་དེ་དག་ལ་དམིགས་པའི་ཁྱད་པར་ལ་སོགས་པ་གཞན་དམིགས་གསལ་མ་གསུངས་ཤིང༌། གནོན་བྱེད་དང་མཐའ་བསྟེན་གྱི་ཡི་གེའི་སྔགས་ཉིད་ཀྱི་མཐུ་ལས་དེ་ལྟར་འབྱུང་བའོ། །སྐབས་དེའི་བསྣུན་པ་ལ་སོགས་པ་བྱེད་རྒྱུའི་ལྷ་དེ། རང་རེའི་
ཡིད་ཀྱི་མོས་ངོར་དམ་ཡེ་དབྱེར་མེད་ཀྱི་ལྷ་དེ་ཡིན་པས། གདོད་མའི་ལྷ་དང་འབྲས་བུའི་ལྷར་མོས་པ་ཡིན་མོད་ཀྱང༌། སོང་ཚོད་ལ་དོན་དམ་དབྱིངས་ཀྱི་ལྷ་ལྟ་ཅི་སྨོས། ཀུན་རྫོབ་གཞན་སྣང་གཞན་རྒྱུད་ཀྱིས་བསྡུས་པའི་ལྷ་རྣམས་མ་ཡིན་ཏེ། དེས་ན་བདག་བསྐྱེད་ཀྱི་ལྷ་དང༌། དེའི་ཡང་གཙོ་བོ་དམ་ཚིག་པ་ཉིད་དོ། །དམ་ཚིག་པའི་ལྷ་དེའི་ངོ་བོ་ཇི་ལྟ་བུ་ཞེ་ན། སླར་སློབ་དཔོན་གྱིས་དབང་བསྐུར་བའི་དུས་ཀྱི་བྱིན་གྱིས་བརླབས་པའི་སྔགས་ཀྱི་རྒྱུན་སློབ་མའི་སེམས་རྒྱུད་ལ་འཕོས་པ་ན། དེ་རང་སེམས་ཀྱི་ཆོས་ཉིད་ལ་ཕན་འདོགས་ཤིང་མཐུན་པའི་ཆོས་ཡིན་པས། ཆོས་དབྱིངས་དེའི་ནུས་པ་དང་ཅུང་ཟད་འདྲེས་པས་གཞན་དགེ་བའི་ཆོས་སྤྱད་པ་རྣམས་ཀྱང་དེའི་གྲོགས་སུ་འགྱུར་ཞིང༌། སྔགས་ཀྱི་བྱིན་རླབས་ཀྱི་རྒྱུན་དེ་རྒྱུར་བྱས་ནས། དང་པོར་དབང་དང་ཕྱིས་བསྐྱེད་རིམ་གྱི་དུས་སུ་དེ་ལྷའི་རྣམ་པ་ཅན་དུ་བཞེང་པར་འགྱུར་ལ། མོས་པས་ཆོས་ཀྱི་དབྱིངས་ཀྱི་ཡེ་ཤེས་ལྷར་གྱུར་པ་ལ། སྔར་སངས་རྒྱས་ཐོབ་ཟིན་པའི་ཡེ་ཤེས་ལྷ་གཞན་རྒྱུད་ལྟར་སྣང་བ་རྣམས་ལ་རང་ལ་བསྟིམ་ཞིང་བསྲེ་བའི་ང་རྒྱལ་བྱས་མོད་ཀྱང༌། སོང་ཚོད་ལ་སྔར་སྔགས་ཀྱི་བྱིན་རླབས་སེམས་ལ་བཞག་པའི་རྒྱུན་དེ་བསྐྱེད་རིམ་གྱི་ལྷ་སྐུར་བཞེངས་པ་ཡིན་པས་དེ་ལ་གསལ་སྣང་རགས་པ་ཐོབ་པ་ན། དེ་ལྷ་སྐུར་གྱུར་པ་ཞེས་བྱའོ། །དེ་འདྲའི་ལྷ་དེ་སེམས་སྣང་ཙམ་ལས་རྒྱུད་ལོགས་པ་མེད་ཀྱང༌། གཞན་རྒྱུད་ལྟར་སྣང་བའི་ཡེ་ཤེས་ལྷ་རྣམས་ཀྱི་བྱིན་རླབས་ཞུགས་ཏེ། ཀུན་རྫོབ་སྒྱུ་མ་ལྟ་བུའི་ཚུལ་དུ་རང་དང་འདྲེས་ནས་བཞུགས་ལ། རང་དང་རེས་འགའ་གཅིག་པ་དང་རེས་འགའ་ཐ་དད་པའི་རྣམ་པར་སྣང་བ་དེ་ནི་བསྐྱེད་རིམ་གྱི་དམ་ཚིག་སེམས་དཔའ་དངོས་ཡིན་ལ། ལྷ་དེ་རང་ལས་
ལོགས་པའི་སེམས་དང་ལྡན་པ་མིན་ཡང༌། སྒྲུབ་པ་པོ་རང་ཉིད་ཀྱིས་སྤྱོད་པར་མི་ནུས་པའི་སེམས་ཅན་གྱི་དོན་མང་པོ་བྱེད་དོ། དེས་སྒྲུབ་པ་པོ་ཁ་ཅིག་ལ་འཇམ་ཞིང་བདེ་བ་ཁོ་ནས་དངོས་གྲུབ་སྒྲུབ་པར་ཡང་བྱེད་ལ། ཁ་ཅིག་ལ་ནི་རེ་ཞིག་དངོས་གྲུབ་མི་སྩོལ་བ་དང༌། གཞན་འགའ་ལ་ནི་འཁུ་བའི་ཚུལ་འབྱུང་ཞིང༌། ནད་དང་གནོད་པ་ལ་སོགས་པར་འགྱུར་བ་ཡང་ཡོད་དོ། །དེ་དག་ཀྱང་སྒྲུབ་པ་པོ་རང་ཉིད་ཀྱི་ལས་ཀྱི་སྒྲིབ་པ་ཆེ་ཆུང་དང༌། དགེ་བའི་བསགས་པ་ཆེ་ཆུང་དང་དམ་ཚིག་དག་མ་དག་གི་དབང་ལས་སྣང་བ་ཡིན་གྱི། སྔགས་ཀྱི་ལྷ་ལ་རྣམ་རྟོག་ཀྱང་མེད་ཅིང་རང་ལས་གཞན་དུ་གྲུབ་པ་ཡང་མེད་དེ། དཔེར་ན་འཁྲུལ་འཁོར་གྱི་མི་འཁྲུལ་འཁོར་མཆོག་ལས་བྱུང་བ་ཞིག་གིས་སྐྱེ་བོ་ངན་པ་ལ་བརྡེག་ཅིང་གསོད་པ་དང༌། བཟང་པོ་འགའ་ཞིག་ལ་རིམ་གྲོའི་བྱ་བ་བྱེད་པ་དང་འདྲ་སྟེ། སྔགས་ཀྱི་མཐུ་བསམ་གྱིས་མི་ཁྱབ་པའོ། །དེས་ན་གསང་སྔགས་སྐུ་ནི་རབ་སྒྲུབ་བྱེད། །བསྐྱེད་པའི་རིམ་པ་དང་པོ་ཡིན། །ཞེས་སོགས་གསང་འདུས་སྐོར་ལས། གསང་སྔགས་ཀྱི་སྐུ་ཞེས་བཤད་པའི་དོན་ངེས་ཏིག་ཅན་ནི་འདི་ཡིན་ཡང་འདུས་པ་བ་ཕལ་གྱིས་མ་གོའོ། །དེས་ན་གསང་འདུས་དང་རྡོ་རྗེ་གུར་སོགས་ལས་འབྱུང་བའི་ལྷ་ཕུར་བུས་གདབ་པ་སྡིག་སྦྱོར་ཞེས་གྲགས་པ་ཡང་གནད་འདི་ལ་བརྟེན་པ་ཡིན་པས། རང་གི་སེམས་ཀྱིས་བཀོད་པའི་གཟུགས་བརྙན་དངོས་གྲུབ་སྒྲུབ་པར་བྱེད་པའི་སྤོགས་ཆོག་གི་ཁྱད་པར་ཞིག་ཡིན་གྱི། གཞན་རྒྱུད་ཀྱི་ལྷ་ལ་གནོད་པར་འགྱུར་བ་ནི་ནམ་ཡང་མ་ཡིན་ནོ།། ལྷ་འདིས་སེམས་ཀྱི་དྲི་མ་སྦྱངས་ན། ཡེ་ཤེས་ཀྱི་སྐུ་མངོན་དུ་འགྱུར་བ་ལ་ཤིན་ཏུ་ཕན་པ་ནི་ཡོད། འདི་རང་ཡེ་ཤེས་ཀྱི་སྐུར་འགྱུར་བ་ནི་མིན་ཏེ། སེམས་འགྲེལ་སྐོར་གསུམ་གྱི་དགོངས་པའོ། །འདིས་
དངོས་གྲུབ་སྩོལ་བའི་ཚུལ་ནི། འདི་དང་སངས་རྒྱས་དངོས་ཀྱི་བྱིན་རླབས་འདྲེས་ཏེ། སྒྲུབ་པ་པོའི་བློའི་སྣང་བ་ལ་རྒྱུད་གཞན་གྱིས་བསྡུས་པའི་ཡི་དམ་ལྷར་སྣང་ནས་རང་ལ་དངོས་གྲུབ་སྩལ་བར་སྣང་བ་ཡང་ཡོད་ཅིང༌། རང་གི་ལུས་ངག་ཡིད་རྣམས་སྔགས་ཀྱི་ལྷ་དེའི་ངོ་བོར་ཐིམ་པ་ན། བསྐྱེད་རིམ་པ་རགས་པའི་ལུས་ངག་སྟེ། འདོད་གཟུགས་ཀྱི་རིག་འཛིན་དུ་གྱུར་པའི་རྣམ་གཞག་བྱེད་ལ། གོང་དུ་བཤད་པའི་རིག་སྔགས་ཀྱི་ནུས་པ་དང་བྱིན་རླབས་སེམས་ལ་བཞག་པ་དེ་ནི་ཀུན་རྫོབ་བདེན་པས་བསྡུས་པའི་སྔགས་སྡོམ་གྱི་ངོ་བོ་རང་རྐང་ཚུགས་པ་ཡིན་པར་ཤེས་པར་བྱའོ། །ཞེས་ཞོར་ལ་འོངས་པས་ཆོག་གོ །ཡང་ལས་དྲུག་པོ་དེ་རྣམས་རྒྱུད་འགྲེལ་ལས། བཟླས་པའི་སྐབས་སུ་ཆེ་ཐང་དུ་བཤད་ཅིང༌། རྒྱ་བོད་ཀྱི་དུས་འཁོར་བ་ཕལ་ཆེར་གྱིས་གལ་ཆེར་བཤད་འདུག་པ་དང༌། རྒྱུད་དོན་གོ་བ་ལ་ཕན་པའི་ཕྱིར་གསལ་པོར་བརྗོད་དོ། །འོན་ཀྱང་རང་ལུགས་ནི་འདི་ཡིན་ཏེ། འདི་འདྲ་བ་ལྷ་གནད་ལ་བོར་བ་ཡིན་པས་སྔོན་སྔགས་ཀྱི་ལྷ་ལ་དད་པའི་ཚད་དུ་བཞག་པ་གཅིག་བསྐྱེད་རིམ་ལ་ཅུང་ཟད་སེམས་བརྟན་ཅིང༌། བཟླས་བརྗོད་མཐར་ཕྱིན་པ་ཡན་ཆད་ལ་དངོས་གྲུབ་དངོས་ཉིད་གྲུབ་པའམ། ཕྲ་མོའི་ལས་རྣམས་ཡིན་ཡང་ཐོག་མེད་དུ་གྲུབ་པ་འབྱུང་བའི་དོན་དུ་སྒྲུབ་པ་ཡིན་གྱི། ལས་དང་པོ་པ་ལ་ནི་དགོས་པ་མིན་པས་ད་ལྟའི་དུས་ན་རྗེས་མཐུན་པའི་ཚུལ་གྱིས་ཉམས་སུ་ལེན་པའི་ཚེ། དང་པོར་སྙིང་པོའམ་ཉེ་སྙིང་ངམ་རྣམ་བཅུ་དབང་ལྡན་བྱེ་བ་སྦྱིན་སྲེག་དང་བཅས་པ་སོང་ཞིང༌། བསྐྱེད་རིམ་གྱི་ཁྲིད་ཅུང་ཟད་བསྐྱངས་པ་ཞིག་གིས་ལྷ་ལ་གུས་པའི་ཚུལ་གྱིས་ལས་དྲུག་པོ་འདི་དག་བྱས་ནས་གསུང་གི་སྔགས་འབུམ་ཕྲག་བཅུ་སྦྱིན་སྲེག་དང་བཅས་པ་བྱའོ། །དེ་རྗེས་སྐུའི་བཟླས་
པ་འགྲུབ་ན་ནི་ལེགས། གོང་དུ་བྱེ་བ་བཟླས་པ་དེས་དོད་ཐུབ་ཏུ་བཞག་ཀྱང་རུང་ངོ༌། །རྒྱུད་འགྲེལ་དངོས་ཀྱི་དགོངས་པ་ལས་དྲུག་བསྙེན་པར་བཤད་པ་ནི། ལས་སམ་དངོས་གྲུབ་ཀྱི་དོན་གྱི་སྒོས་བསྙེན་ཡིན་གྱི། རྩ་བའི་བསྙེན་པ་མ་ཡིན་ཏེ། བསྐྱེད་རིམ་ལ་བརྟན་པ་ཐོབ་ཅིང༌། ལྷ་གནད་ལ་བོར་བ་མེད་ན་མི་འགྲུབ་པའི་གང་ཟག་གི་རིགས་དེ་ལའང་ནང་ཚན་གསུམ་ཡོད་པས་རབ་ཀྱིས་ལས་དྲུག་བརྩམས་པས་དངོས་གྲུབ་ཐོབ། འབྲིང་གིས་དེའི་སྟེང་དུ་གསུང་བཟླས་སྦྱིན་སྲེག་དང་བཅས་པ་དང༌། ཐ་མས་དེའི་སྟེང་དུ་སྐུའི་བཟླས་པ་བྱེ་བས་དངོས་གྲུབ་ཐོབ་ཅེས་རགས་ཚིག་ཙམ་གོ་བར་བྱས་ནས། དེ་རེ་རེ་བསྐྱེད་རིམ་ལ་བརྟན་པ་ཆུང་ངུ་ཐོབ་ན་ཞི་སོགས་ཐོགས་པ་མེད་པ་དང༌། འབྲིང་གིས་རོ་ལངས་ལ་སོགས་པ་དངོས་སུ་འགྲུབ་ཅིང༌། རབ་ཏུ་ཐོབ་པས་ཆེན་པོ་རིག་འཛིན་གཉིས་ཀྱི་དངོས་གྲུབ་ལ་སྣང་བ་དངོས་སུ་ཐོབ་པར་འགྱུར་རོ། །དེ་ཐོབ་ནས་སྤྱོད་པ་སྤྱད་པས་མྱུར་དུ་རིག་པ་འཛིན་པ་ཐོབ་པའོ། །ད་ནི་སྐབས་འདིར་དཀྱུས་ཀྱི་བཟླས་པའི་དམིགས་པ་བཤད་པར་བྱ་སྟེ། ཐུགས་ཀར་ཟླ་བའམ་ཉི་མའམ། ཟླ་ཉི་སྒྲ་གཅན་བརྩེགས་པའི་གདན་ལ་རྣམ་བཅུ་དབང་ལྡན་གྱི་ཡི་གེ་བརྩེགས་པ་ཁམས་སོ་སོའི་ཁ་དོག་ངེས་ཅན་ནམ། ཡང་ན་གཙོ་བོ་ཉིད་ཀྱི་སྐུ་མདོག་དང་མཚུངས་པ་སྔོན་པོའམ། ལས་ཐམས་ཅད་པའི་དོན་དུ་ལྗང་ཁུར་བསྒོམས་ཀྱང་རུང་ལ། དེ་ལས་འོད་ཟེར་སྤྲོས་འཕགས་པ་མཆོད་སེམས་ཅན་གྱི་དོན་བྱས་སླར་བསྡུས་ཏེ་རྣམ་བཅུ་དབང་ལྡན་ལ་ཐིམ་པར་བསམས་ལ། ཨོཾ་ སྭཱཧཱ་ཞེས་བཟླ་ཞིང༌། ཡང་གནས་བཞིར་རྡོ་རྗེ་བཞིའི་ས་བོན་ནན་ཏན་དུ་གསལ་བཏབ་ནས་སྤྱི་བོ་དང༌།
གསང་བ་དང༌། སྙིང་གའི་ཧཱུཾ་གི་སྟེང་ཙམ་སྟེ། གནས་གསུམ་པོ་དེ་གང་རུང་གཅིག་ཏུ་སྔ་མ་བཞིན་བསྒོམས་ཏེ། དེ་ཐམས་ཅད་ལ་འོད་ཟེར་སྤྲོ་བསྡུ་བྱེད་པ་ནི་སྙིང་པོའི་བཟླ་ཚུལ་ཡིན་ལ། རིགས་དྲུག་གི་ས་བོན་དང༌། ཉེ་སྙིང་ལ་ཡི་གེ་དྲུག་པོ་རྣམས་གནས་དྲུག་ཏུ་བཀོད་ནས་འོད་ཟེར་སྤྲོ་བསྡུ་བྱེད་ཅིང༌། ཁྱད་པར་ དུ་ཉེ་སྙིང་ལ་ཡི་གེ་དྲུག་པོ་རེ་རེའི་གནས་སུ་གཡས་གཡོན ་ནམ་སྟེང་འོག་ཏུ་ཨོཾ་དང་སྭཱཧཱ་རེ་རེ་སྒོམ་མོ། །སྐུ་དང་གསུང་གི་སྔགས་ལ་ཐུགས་ཀར་ཉི་མ་སོགས་ཀྱི་སྟེང་དུ་ས་བོན་ཧཱུཾ་ལ་སྔགས་དེ་དང་དེས་བསྐོར་བ་བསྒོམས་ནས་སྤྲོ་བསྡུ་བྱེད་པ་སྟེ། འཁོར་གྱི་བཟླས་པ་ལ་ཡང་དེས་རིགས་འགྲེའོ། །ལས་དྲུག་པོ་རྣམས་ལ་ནི། སྙིང་གར་ཟླ་ཉི་སྒྲ་གཅན་བརྩེགས་པའི་སྟེང་དུ་རང་རང་གི་སྔགས་ཀྱི་ཡིག་འབྲུ་སྟེང་དུ་ཨོཾ་དང༌། འོག་ཏུ་ཕཊ་དང་སྭཱཧཱ་ལ་སོགས་པ་སོ་སོའི་སྐབས་བཞིན་སྦྱར་བ་འོད་ཟེར་འཕྲོ་བ་བསམས་ཏེ། གཙོ་བོ་རང་ཉིད་ཀྱི་སྐུ་གང་ལས་དང་རྗེས་སུ་མཐུན་པའི་བྱ་བ་བྱས་པར་བསམ། ཡི་གེའི་ཁ་དོག་ནི། ཀཱ་ཡིག་ལྟ་བུ་ལྷ་ཉིད་ཀྱི་སྐུ་མདོག་དང་མཚུངས་པ་དང༌། ཨོཾ་ཡང་དེ་དང་འདྲ་བར་ཁ་ཅིག་བཞེད་ལ། སྟེང་གི་ཡི་གེ་དང་སྐུ་ལ་སྔགས་གཉིས་ལས་དང་རྗེས་སུ་མཐུན་པར་བྱ་དགོས་ན། དང་པོ་རེངས་པའི་ལས་ཡིན་པས་སེར་པོ་དང༌། གཉིས་པ་དབྱེ་བར་གཏོགས་པའི་ཕྱིར་ནག་པོ་དང༌། གསུམ་པ་དགུག་པ་དང་དྲུག་པ་དབང་ཡིན་པས་དམར་པོ་དང༌། བཞི་པ་ཞི་བ་དང༌། ལྔ་པ་རྒྱས་པ་ཡིན་པས་དཀར་པོ་སྟེ། ལས་དང་མཐུན་པའི་ཁ་དོག་གམ། ཡང་ན་གཞན་དེ་དང་འདྲ་བ་ལ་ཧ་སོགས་འབྱུང་བ་རང་རང་གི་ཁ་དོག་ཏུ་བྱས་ཀྱང་ལེགས་པར་བཞེད་ན། དེའི་ཚེ་མིང་གི་ཡི་གེ་
དང་པོ་ལས་ཀྱི་ཁ་དོག་ཏུ་བྱེད་དོ། །འཁོར་གྱི་ལྷ་རྣམས་དགོས་སུ་སྒྲུབ་པ་ཡིན་ན། རང་རང་གི་ས་བོན་ལ་སྤྱི་དང་མཐུན་པར་དེ་ཉིད་གསུམ་སྤེལ་ལམ་ལྔ་སྤེལ་དུ་བྱེད་པ་ལྟ་བུའི་ཐུགས་ཀྱི་བཟླས་པ་བྱ། གསུང་མཚན་སྔགས་ཁོ་ན་ནི་གཙོ་བོར་མི་བྱེད་ལ། ས་བོན་སྔོན་འགྲོ་ཅན་གྱི་མཚན་དུ་བྱེད་པ་ནི། ཨོཾ་ཨཱཿཏཱཾ་ཏཱ་རེ་ཧཱུཾ་སྭཱཧཱ། ཞེས་པ་ལྟ་བུ་མིང་ལས་ལྷག་པ་སྐུ་སྔགས་ཀྱི་ཚུལ་དུ་བཟླས་པ་བྱ། དེ་ཡང་མདུན་བསྐྱེད་དུ་བྱེད་ན་རང་དུས་ཀྱི་འཁོར་ལོའི་ཐུགས་ཀར་ཧཱུཾ་གི་མཐའ་སྐོར་དུ་སྔགས་དེས་བསྐོར་བ་དང༌། མདུན་གྱི་ཐུགས་ཀར་ས་བོན་བསྒོམ་སྟེ། འོད་ཟེར་ཕན་ཚུན་དུ་བསྟིམ་པ་དང་སྤྲོ་བསྡུ་བྱེད། མདུན་བསྐྱེད་ཀྱི་ལྷ་དེ་དང་པོར་རང་གི་ཐུགས་ཀ་ནས་སྤྲོ་ཞིང་མཐར་རང་གི་ཐུགས་ཀར་བསྡུའོ། །བདག་བསྐྱེད་དུ་བྱེད་ན་གཙོ་བོས་རིགས་འགྲེ་སྟེ། ནུས་མ་ནས་རབ་གཏུམ་མའི་བར་དུ་ངེས་པར་སྦྱོར་ཞིང༌། གཞན་ཡང་གཟའ་བཅུ་དང༌། ནག་པོ་ཆེན་པོ་དང༌། འཕྲོག་མ་ལ་སོགས་པ་ཡང་སྒྲུབ་ཏུ་རུང་ངོ༌། །སྤྱིར་ནི་མོས་པའི་དབང་ལས་དེ་ཙམ་བཤད་པ་ཡིན་གྱི། བཅོམ་ལྡན་འདས་སྣ་ཚོགས་གཙོ་བོ་དུས་འཁོར་ཉིད་གྲུབ་ན་ཐམས་ཅད་འགྲུབ་ལ། གཙོ་བོས་བྱིན་གྱིས་མ་བརླབས་ན་གཞན་རྣམས་ཀྱང་མི་འགྲུབ་པར་བཤད་པས་གཙོ་བོ་ཉིད་ཀྱི་རྣལ་འབྱོར་ལ་ནན་ཏན་དུ་བསྒྲུབ་པར་བྱའོ། །འདི་སྐབས་ཙར་ཙི་ཀཱ་སོགས་རང་རང་འཁོར་བཅས་ཀྱི་བཟླས་པ་བྱེད་ན། སྔགས་ཀྱི་སྤྲོ་བསྡུ་སོགས་གཙོ་མོ་ཁོ་ན་ལ་བྱས་པས་ཆོག །སྔགས་ནི། ཨོཾ་ཨཱཿཧ་ཙར་ཙི་ཀཱ་ཧི་ཧི་ཡ་ཡི་ ཡུ་ཡྀལ་ཡཾ་ཧཱུཾ་སྭཱཧཱ། ཞེས་བཟླ་སྟེ་གཞན་རྣམས་ཀྱང་དེས་རིགས་འགྲེའོ། །མ་མོ་བརྒྱད་དང་ལྷ་ཆེན་རྣམས་དང༌། ཁྲོ་བོ་རྣམས་དང༌། ཀླུ་རྣམས་དང༌། རབ་གཏུམ་མ་རྣམས་ཀྱི་བཟླས་བརྗོད་
བྱས་ན། འཕྲལ་གྱི་འདོད་དོན་ཕྲ་མོ་མང་པོ་སྒྲུབ་ཏུ་ཡོད་དེ། དམན་པ་ལ་མོས་པ་རྣམས་ལ་ཤིན་ཏུ་ཉེ་བར་མཁོ་བའང་ཡིན་ནོ། །བཟླས་པའི་དམིགས་པ་འདི་དག་བླ་མ་དམ་པ་རྣམས་ཀྱི་མན་ངག་གཅིག་ནས་གཅིག་ཏུ་བརྒྱུད་པ་ཡིན་པའི་ཕྱིར། ཉམས་ལེན་གྱི་སྒོ་ནས་གཅེས་སྤྲས་སུ་བྱ་ཡི། ཆོས་སྐད་ཁ་རྒྱུགས་དང༌། དགག་སྒྲུབ་ཁ་ལ་ཁྱེར་བའི་རྩོད་ཆོས་སུ་འབེབས་པར་མ་བྱེད་ཅིག རྒྱུད་གཞན་གྱི་མན་ངག་ལས་འབྱུང་བ་ལྟར་བཀོད་པའི་བཟླས་པ། སྤྲོ་བསྡུའི་བཟླས་པ། དོ་ལིའི་བཟླས་པ། ཡིད་བཟླས། འགོག་བཟླས་སོགས་ཀྱང་སྦྱོར་དུ་རུང་བར་མངོན་ལ། བསྐྱེད་རིམ་གྱི་རྡོར་བཟླས་ནི་ཡེ་ཤེས་ལེའུའི་སོ་བརྒྱད་པའི་འགྲེལ་པར་རྫོགས་རིམ་དང་བསྲེས་པའི་ཚུལ་གྱིས་གསུངས་ཏེ། ཇི་སྐད་དུ། འདིར་བགྲང་འཕྲེང་མེད་ཅིང་སྔགས་བརྗོད་པ་མེད་དེ། དབུགས་འབྱུང་བ་དང་འཇུག་པ་དག་དང་ལྷན་ཅིག་སྔགས་ཀྱི་ཡི་གེ་རྣམས་རབ་ཏུ་འབྱུང་བ་དང་འཇུག་པ་མེ་ཏོག་གི་འཕྲེང་བ་བཞིན་དུ་ཟླ་བ་དང་ཉི་མའི་རང་བཞིན་ལུགས་དང་མཐུན་པ་དང༌། ལུགས་དང་མི་མཐུན་པས་བལྟ་བར་བྱའོ། །ཞེས་གསུངས་པས་སྙིང་གའི་ས་བོན་ལས་སྔགས་ཀྱི་ཡིག་འབྲུ་དབུགས་འབྱུང་བ་དང་ལྷན་ཅིག་བྱུང་སྟེ། ཉི་མའི་ལམ་སྣ་བུག་གཡས་པ་ནས་ལུགས་དང་མི་མཐུན་པར་སྔགས་ཀྱི་ཐ་མས་སྣ་དྲངས་ཏེ་འགྲོ་བ་དང༌། དབུགས་ནང་དུ་འཇུག་པ་དང་ལྷན་ཅིག་ལུགས་མཐུན་ཞེས་པ་ཨོཾ་སོགས་སྔགས་ཀྱི་ཐོག་མས་སྣ་དྲངས་ཏེ་ཟླ་བའི་ལམ་སྣ་བུག་གཡོན་པ་ནས་འཇུག་ཅིང༌། སྙིང་གའི་ས་བོན་ལ་ཐིམ། རླུང་གནས་པ་ན་ས་བོན་གཅིག་པུ་ལ་སེམས་གཏོད་པ་སྟེ། བསྐྱེད་རིམ་གྱི་རྡོར་བཟླས་འདི་ལྟ་བུའང་གསལ་བར་
གསུངས་པས། ཡི་གེ་འབྲུ་གསུམ་གྱི་རྡོར་བཟླས་དངོས་ཉིད་ཀྱང་འདིས་ཤུགས་ལ་འཕངས་བས་གསལ་བར་མཛད་དོ།། །།བཞི་པ་ཕན་གནོད་ཀྱི་ཡན་ལག་རྩི་བ་ནི། གོང་དུ་ཨ་ཀུ་ཧ་ྈྐ་སོགས་ཁམས་སོ་སོའི་དགྲ་གྲོགས་ཐ་མལ་པ་གསུམ་རྩི་བའི་ཚུལ་རྒྱས་པར་གསུངས་པ་བཞིན་ཡིན་པ། དོན་གྱི་སྙིང་པོ་ནི་སྤྱིར་རྒྱུད་འདི་ལས་གནས་སྐབས་གཞན་ཕལ་ཆེར་དུ་དབྱངས་སུམ་ཅུའམ་སོ་གཉིས། གསལ་བྱེད་སུམ་ཅུ་དང་གོང་དཔེ་བྱད་བརྒྱད་ཅུའི་སྐབས་བཞི་བཅུར་ཕྱེ་བ་སོགས་གསུངས་མོད་ཀྱི། དགྲ་གྲོགས་རྩི་བའི་སྐབས་འདིར་བརྡ་སྤྲོད་སོགས་ཀྱི་གཞུང་ལས་འབྱུང་བ་དང་མཐུན་ཏེ། ངག་སྦྱོར་གྱི་རིམ་པ་དང༌། བརྟན་གཡོ་སོ་སོའི་ས་བོན་དང༌། དུས་སོ་སོར་འཆར་ཚུལ་དང་ཡི་གེ་ཕན་ཚུན་ཕན་གནོད་བྱེད་ཚུལ་ཏེ། གནས་སྐབས་བཞི་པོ་དེ་དག་ལ་ཕལ་ཆེར་མཚུངས་པ་མང་ཡང་སོ་སོར་རང་རང་གི་དགོས་པའི་དབང་གིས་མི་འདྲ་བ་ཡང་མང་དུ་ཡོད་དོ། །དེས་ན་གནས་སྐབས་སྔ་མ་གསུམ་གྱི་མེ་ཆུ་ལྟ་བུ་དགྲ་གཤེད་ཀྱི་རིགས་སུ་གཏོགས་པ་ཡིན་ཡང༌། དངོས་སུ་ཡི་གེ་ཕན་ཚུན་གནོད་པ་བྱེད་པར་མ་ངེས་ཏེ། འགའ་ཞིག་བར་མ་དང༌། འགའ་ཞིག་ཕན་པ་ཡང་ཡོད་ དོ། །འདིར་སྔགས་ཀྱི་དང་པོ་དང་མིང་གཉིས་ལ་ངེས་པར་ཕན་གནོད་ཐ་མལ་གསུམ་འབྱུང་བའི་དབང་དུ་མཛད་དེ། འདི་ཙམ་ཞིག་གསུངས་པ་ཡིན་ལ། འདིའི་དབང་དུ་བྱས་ན་ཆུ་ནི་མེའི་དགྲར་ངེས་ཤིང༌། རླུང་ལ་ཐ་མལ་པ་སྟེ་ནུས་མེད་དུ་ངེས་ལ། ས་ལ་གྲོགས་པོར་ངེས་ཀྱང་སྤྱི་ལྡོག་ནས་ཆུ་ཁམས་ཀྱི་ཡི་གེ་ཙམ་མེའི་དགྲ་ལ་སོགས་པའི་རིགས་སུ་སྐྱེས་པ་ཙམ་ཡིན་ཡང༌། མེ་རླུང་ས་གསུམ་གྱི་ཡི་གེ་ལ་རེ་རེ་བཞིན་དུ་ཕན་གནོད་བར་མ་གསུམ་ཀར་འབྱུང་
བའི་སྐབས་སྲིད་པ་ཡིན་ནོ། །དེས་ན་སྐབས་གཞན་དུ་གསུངས་པའི་གསལ་བྱེད་སུམ་ཅུ་པོ་རྣམས་ལ་ནང་ཚན་ལྔ་ཚན་དྲུག་ལ་ཁམས་དྲུག་གི་རེ་རེ་སྦྱོར་ཞིང༌། ལྔ་ཚན་རེ་རེ་ཡང་ལྔ་ ལྔའོ། །དབྱངས་ལ་སྡེ་ཚན་དྲུག་ལ་ཁམས་དྲུག་མི་སྦྱོར་ཡང་སྡེ་ཚན་རེ་རེ་བཞིན་ཁམས་འབྱུང་བ་ལྔ་ལྔའི་དབྱེ་བ་སོགས་གསུངས་པ་རྣམས་དང༌། འདིར་མི་འདྲ་བའི་ཁྱད་པར་ནི། དེར་ཨར་ཡིག་གཉིས་མེ་དང༌། ཨལ་ཡིག་གཉིས་སར་འབྱུང་ཡང་འདིར་ནི་བཞི་པོ་དེའི་ཡི་གེ་དང་པོ་ནི་ཨ་ཁོ་ན་ཡིན་པས་ནམ་མཁའི་ཁམས་སུ་བརྩི་ལ། ར་ལ་གཉིས་མེ་དང་ས་ཡིན་ཡང་དང་པོའི་ཡི་གེ་མ་ཡིན་པས་ཕན་གནོད་བརྩི་མི་དགོས་སོ། །ཨེ་ཨཻ་གཉིས་ཨི་དང་འདྲ། ཨོ་ཨཽ་གཉིས་ཨུ་དང་འདྲ་ལ་ཅུང་ཟད་སྟོབས་ཆུང་བ་ནི་ཡིན་ནོ། །འདིར་ཀུ་ཙུ་ཊུ་པུ་ཏུ་ཞེས་འབྱུང་བ་ནི་ཞབས་ཀྱུ་ཨུ་ཡིག་སྦྱར་བས། རང་རང་གི་སྡེ་བ་ཐམས་ཅད་མཚོན་པ་སྟེ། སྒྲའི་གཞུང་ལས་ཨུཏ་ཀྱིས་སྡེ་དང་བཅས་པའོ། །ཞེས་འབྱུང་བ་བཞིན་ནོ། །དེས་ན་ཀུ་ནི་ཀ་སྡེ་དང༌། ཙུ་ནི་ཙ་སྡེ་དང༌། ཊུ་ནི་ཊ་སྡེ་དང༌། པུ་ནི་པ་སྡེ་དང༌། ཏུ་ནི་ཏ་སྡེའི་མིང་ཡིན་ལ། དེའི་ཕྱིར་ཨ་ཀ་ཁ་ག་གྷ་ང༌། ཧ་ྈྐ་རྣམས་མཁའ་ཁམས་ཡིན་ཞིང༌། ཐམས་ཅད་ལ་གྲོགས་ཁོ་ནར་གནས། ཨི་ཙ་ཚ་ཛ་ཛྷ་ཉ། ཡ་ཤ་རྣམས་ནི་རླུང་ཁམས་ཏེ། ཆུ་ཡི་དགྲ་མེའི་གྲོགས། ས་ལ་ནུས་མེད་དོ། །རྀ་ཊ་ཋ་ཌ་ཌྷ་ཎ། ར་ཥ་རྣམས་མེ་སྟེ་ས་ཁམས་ཀྱི་དགྲ། ཆུ་ལ་ནུས་མེད་རླུང་གི་གྲོགས་པོའོ། །ཨུ་པ་ཕ་བ་བྷ་མ། ཝ་ྉྤ་རྣམས་ཆུ་སྟེ་མེའི་དགྲ་དང༌། རླུང་ལ་ནུས་མེད་དང༌། སའི་གྲོགས་པོ། ལྀ་ཏ་ཐ་ད་དྷ་ན། ལ་ས་རྣམས་ས་ཁམས་ཏེ་རླུང་གི་དགྲ་དང༌། སའི་གྲོགས་དང༌། མེ་
ལ་ནུས་མེད་དོ།། དེས་ན་སྐབས་འདིར་ས་སྡེ་ཡེ་ཤེས་ཀྱི་ཁམས་ཞེས་ལོགས་པར་མི་བྱེད་པར་ལྔ་པོའི་ནང་དུ་ཕར་བསྡུས་སོ། །འབྱུང་ཆུང་གི་རིམ་པ་ནི། གཞན་ལ་མི་བརྩི་སྟེ། སྡེ་པ་ལྔ་པོ་ཉིད་ལ་བྱ་ན། ང་ཉ་ཎ་མ་ན་རྣམས་སྟོང་པའི་ཁམས། གྷ་ཛྷ་ཌྷ་བྷ་དྷ་རྣམས་རླུང་ཁམས། ག་ཛ་ཌ་བ་ད་རྣམས་མེ་ཁམས། ཁ་ཚ་ཋ་ཕ་ཐ་རྣམས་ཆུ་ཁམས། ཀ་ཙ་ཊ་པ་ཏ་རྣམས་ས་ཁམས་སོ། །དེ་རྣམས་ཀྱི་ཡང་དགྲ་གྲོགས་བརྩི་ཚུལ་གོང་དང་འདྲ། །སྡོམ་ནི། ཆུ་དགྲ་རླུང་ཡིན་རླུང་དགྲ་ས། ས་དགྲ་མེ་ཡིན་མེ་དགྲ་ཆུ། །ས་ཆུ་ཕན་ཚུན་གྲོགས་པོ་དང༌། །མེ་རླུང་ཕན་ཚུན་གྲོགས་པོ་དང༌། །རླུང་ལ་ཆུ་དང་མེ་ལ་ས། །ཆུ་ལ་མེ་དང་ས་ལ་རླུང༌། །སྔ་མར་ཕྱི་མ་ནུས་མེད་དེ། སྟོང་པ་ཀུན་གྱི་ཕན་ཚུན་གྲོགས། །ཞེས་སོ། །རེ་མིག་འགོད་པར་འདོད་ན། ཕྱོགས་བཞི་གཡས་སྐོར་ཚུལ་ལ་ནི། ཆུ་མེ་ས་རླུང་རིམ་བཞིན་བཀོད། །བྲང་སྤྲོད་ཟུང་དག་གྲོགས་ཡིན་ཏེ། གཡས་སྐོར་ཐ་མལ་གཡོན་སྐོར་དགྲ །ཞེས་པ་སྟེ། དེ་དག་ཐམས་ཅད་ལ་རིགས་མཚུངས་པ་རྣམས་ནི་རྟག་ཏུ་གྲོགས་ཡིན་ལ། ཨོཾ་ཡིག་ལ་སོགས་པ་མགོ་འདྲེན་པའི་སྔགས་ཡིག་རྣམས་ཡར་ཕུང་པའི་འདོད་ལྷའི་སྔགས་ཀྱི་ཡི་གེ་དང་པོ་དེ་རྣམས་དང༌། སྒྲུབ་པ་པོའི་མིང་ཡིག་དང་པོ་དེ་དགྲ་གྲོགས་བརྩི་དགོས་ན། དགྲ་བྱེད་པོ་དང༌། གྲོགས་བྱེད་པོ་དང༌། ནུས་མེད་བྱེད་པ་པོ་ནི་སྔགས་ཡིན་ལ། གང་ལ་བྱ་བའི་ཡུལ་སྒྲུབ་པོའི་མིང་ཡིན་པ་གོ་བར་བྱ་སྟེ། དཔེར་ན། སྒྲུབ་པོའི་མིང་རབ་འབྱོར་ཞེས་པ་ལྟ་བུ་ཡི་གེ་དང་པོ་ར་ཡིག་མེ་ཁམས་ཡིན་པ་ལ། ཨོཾ་མཱ་མ་ཀཱི་ཞེས་ཆུ་ཁམས་བྱུང་ན། གསལ་བྱེད་ཀྱི་དགྲ་ཡིན་པས་སྔགས་ཀྱིས་སྒྲུབ་པ་པོ་ལ་ནད་ཀྱིས་གདུང་
བར་བྱེད་ལ། སྒྲུབ་པོའི་མིང་ཡིག་དང་པོ་ར་ཡིག་ལ་སྔགས་ཀྱི་དང་པོ་ལོ་ཙ་ན་ལྟ་བུ་ལ་ཡིག་ས་ཁམས་ཡོད་ན། ཐ་མལ་པ་སྟེ་ནུས་མེད་ཡིན་པ་དང༌། སྒྲུབ་པོའི་མིང་ར་ཡིག་ལ་སྔགས་ཀྱི་དང་པོ་ཡ་མནྟ་ཀ་ཞེས་པ་ལྟ་བུ་ཡ་ཡིག་རླུང་ཁམས་ཡོད་པ་གྲོགས་ཡིན་པས་བདེ་བ་དམ་པ་ཐོབ་པར་བྱེད་ཅིང༌། དབྱངས་ཀྱི་ཡི་གེའི་སྔགས་རྣམས་དགྲར་གྱུར་ན། སྒྲུབ་པོ་འཆི་བ་དང༌། གྲོགས་སུ་གྱུར་ན་ཡུན་རིང་དུ་འཚོ་བ་དང་དངོས་གྲུབ་ཆེན་པོ་རྣམས་མྱུར་དུ་ཐོབ་པའོ། །གསལ་བྱེད་དགྲར་གྱུར་པས་ནང་དུ་བྱེད་ཅིང༌། གྲོགས་སུ་གྱུར་ན་འབྱོར་པ་རྙེད་པ་དང༌། དངོས་གྲུབ་ཆུང་བ་རྣམས་རྙེད་དོ། །རྒྱུད་གཞུང་འདི་རྣམས་སུ་གསལ་ཁ་མེད་ཀྱང་མན་ངག་གཞན་རྣམས་ལས་འབྱུང་ཆེན་འབྱུང་ཆུང་གཉིས་འབྱུང་ཆུང་སྟོབས་ཆེ་བར་འདོད་དོ། །ལེགས་སྦྱར་སོགས་རྒྱ་སྐད་ལ་མིང་གི་ཡི་གེ་དང་པོ་དེ་ལ་ཡི་གེ་གཉིས་བརྩེགས་ཡོད་ན་སྟེང་མ་ལ་བརྩི་བ་ཡིན་ཡང༌། བོད་ཡུལ་འདིར་གྲགས་པའི་སྔོན་འཇུག་དང་མགོ་ཅན་སོགས་ནི་གཟུགས་འབྲི་བའི་ཚེ་ཐོག་མ་དང་མགོ་བོར་ཡོད་ཀྱང་དོན་སོ་སོར་གོ་བྱེད་ཀྱི་བརྡ་ཙམ་མ་གཏོགས། ཡི་གེའི་བརྗོད་པ་སྒྱུར་ནུས་མ་ཡིན་པས། ཡི་གེ་དངོས་གཞི་ལ་བརྩི་མི་དགོས་ཏེ་དཔེར་ན་སྐལ་བཟང་ཞེས་པའི་ས་མགོ་དེ། རྒྱ་སྐད་ཀྱི་ཡི་གེ་བརྩེགས་མ་དང་མི་འདྲ་སྟེ། བསོད་ནམས་ཅན་དུ་གོ་བའི་ཆེད་ཀྱི་བརྡ་ཙམ་ཡིན་གྱི་བརྗོད་པའི་ཡི་གེ་མ་ཡིན་པའི་ཕྱིར། ཀ་ཉིད་ལ་བརྩི་དགོས་པ་དང༌། དཀར་མོ་ཞེས་པ་ལྟ་བུ་ལ་འཕུལ་བྱེད་ད་ཡོད་པའང༌། ཁ་དོག་གོ་བྱེད་ཀྱི་བརྡ་ཙམ་ཡིན་པས་ང་ཡིག་གི་གཟུགས་དང་པོར་བྲིས་ཀྱང་བརྗོད་པའི་ཡི་གེ་མ་ཡིན་པའི་ཕྱིར་ཀ་ཉིད་ནས་བརྩི་བ་ཡིན་ལ། ཡང་དགའ་བྱེད་དང༌། རྫ་མཁན་དང་
སྦས་པ་དང༌། བརྡ་གཏོང་བ་ལ་སོགས་པ་ནི། གྷ་ཛྷ་བྷ་དྷའི་དོད་ཡིན་ཏེ་སྒྲ་གཅིག་པའི་ཕྱིར་དང༌། སྒྲ་ལྟ་བུ་ནི་གྷྲ་ཞེས་པའི་དོད་ཡིན་ཞིང༌། ས་མགོ་ནི་སྙན་ཆ་གོ་བའི་ཕྱིར་ཙམ་སྟེ། བརྩེགས་མའི་དང་པོ་གྷ་རང་ཉིད་ཡིན་གྱི་ས་མ་ཡིན་པ་དང༌། རྒྱ་སྐད་ཀྱི་ཡི་གེ་ཛྙ་ལ་ཟུར་ཆག་པའི་ཚུལ་གྱིས་རྒྱ་གར་གྱི་ཡུལ་ཕལ་ཆེ་བ་ན། རྒྱ་ཞེས་འབོད་པ་དང༌། འགའ་ཞིག་ཏུ་གྷྱ་ཞེས་འབོད་པ་ཡང་སྣང་བ། ཡི་གེའི་ངོ་བོ་མི་གཅིག་ཀྱང་སྒྲ་ཕྱོགས་མཚུངས་པའི་འདྲ་ཆོས་ཡོད་པས། བོད་ཀྱི་ཡི་གེ་མཁན་པོས་རྒ་ལ་ཡ་བཏགས་ཀྱི་རྣམ་གཞག་སོགས་བྱས་ནས། ཛྙ་ཟུར་ཆགས་དང་བརྗོད་པ་གཅིག་པར་བྱུང་བས། རྒྱལ་པོ་ཞེས་པ་ལྟ་བུའི་ཡི་གེ་དང་པོ་རྒྱ་སྐད་ཀྱི་ཛྙ་ཡིག་གི་རིགས་སུ་བསྡུ་བར་བྱའོ། །ཅ་ཆ་ཇ་རྣམས་ཙ་ཚ་ཛ་ཉིད་ཡིན་ལ། དཔྱོད་ལྡན་དང་སྤྱོད་པ་ཞེས་པ་ལྟ་བུ་བོད་ཡིག་གི་གཟུགས་ལ་བ་འཕུལ་བཞག་ཅན་དང་ས་མགོ་ཅན་ཡིན་ཡང་རྒྱ་ཡིག་གི་ལུས་འགྱུར་དང་འདྲ་སྟེ། ཡིག་གཟུགས་ཡི་གེ་མ་ཡིན་ལ། བརྗོད་པ་ཉིད་ཡི་གེར་འཇོག་དགོས་པས། དེ་དག་ཀྱང་ཙ་ཡིག་གི་ཁོངས་སུ་བསྡུའོ། །དེ་རྣམས་ཀྱིས་གཞན་ལའང་རིགས་འགྲེ་སྟེ། ཞ་ནི་ཤ་དང་མཚུངས་པར་གྲགས་པ་བཞིན་དང༌། ཟ་ནི་ས་དང་མཚུངས་པར་གྲགས་ཤིང༌། སྒྲ་མཚུངས་པས་ན་ཛ་དང་ཡང་འདྲ་བར་མངོན་ལ། འ་ནི་ཨ་ཡིག་དང་མཚུངས་པར་བྱ་སྟེ། སྔོན་གྱི་བོད་ཡིག་བྱེད་པོས་རིང་པོ་ལ་འ་འདོགས་བྱེད་པའི་རྒྱུ་མཚན་ཡང་དེ་ཡིན་ནོ། །དེ་བཞིན་དུ་མཁའ་ནི་ཁ། མངའ་ནི་ང༌། འཚ་ནི་ཚ། མཐ་ནི་ཐ། འཕ་ནི་ཕ། དམའ་ནི་མ། ལྷ་ནི་ལ། བཤ་ནི་ཤ། བསའ་ནི་ས་དང་མཚུངས་པ་སྟེ། དེ་དག་གིས་རིགས་འགྲེ་སྟེ་མ་བཤད་པ་རྣམས་ཀྱང་དཔག་པར་ནུས་སོ། །དེས་ན་ཡི་གེའི་དགྲ་གྲོགས་འདི་དག་རྒྱ་སྐད་ཀྱི་སྟེང་དུ་བརྩི་ཚུལ་ཡིན་པས།
བོད་སྐད་དུ་ངོ་བོ་མི་འདྲ་བ་རྣམས་ལ་དོད་བརྩི་བ་གལ་ཆེ་ཞིང༌། ཡི་གེ་ཡང་གཟུགས་ལ་མི་བརྩི་ཡི་བརྗོད་པའི་སྒོ་ནས་བརྩི་དགོས་སོ། །འོ་ན་འདི་དག་སྔགས་བཟླས་པ་ཐམས་ཅད་ལ་བརྩི་དགོས་སམ་སྙམ་ན། སེམས་ཅན་བསམ་པའི་བྱེ་བྲག་གིས་སྔགས་བྱེད་པ་པོས་གང་བྱིན་གྱིས་བརླབས་པ་དེ་ཁོ་ན་ལ་ནུས་པ་དེ་འབྱུང་བ་ཡིན་པས། རྒྱུད་འདི་དང་དེའི་རྗེས་སུ་འབྲང་བ་རྣམས་ལ་ངེས་པར་གལ་ཆེ་ཞིང༌། བླ་མེད་ཀྱི་རྒྱུད་སྡེ་གཞན་རྣམས་ལ་འདི་ལྟར་བརྩི་བ་ལེགས་པའི་ཡན་ལག་ཏུ་འགྱུར་བ་ནི་ཡོད་ཀྱི་ངེས་པར་དགོས་པ་ནི་མིན་ལ། རྒྱུད་སྡེ་འོག་མ་རྣམས་སུ་འདི་དག་མི་དགོས་པ་ཤས་ཆེའོ། །རྒྱུ་མཚན་ཡང་རྒྱུད་འདིར་ནི། འབྱུང་བའི་ཁམས་ཀྱི་རིམ་པ་ཉིད་འཁོར་འདས་བརྟན་གཡོ་ཀུན་གྱི་སྲོག་ཏུ་བཞག་པའི་རྒྱུ་མཚན་གྱིས་ཡིན་ལ། བླ་མེད་གཞན་རྣམས་ལས་ཁམས་ལྔ་སྲོག་ཏུ་བཞག་པ་ཅུང་ཟད་ཡོད་ཀྱང༌། རྒྱུད་འདི་ལྟ་བུར་རྩལ་དུ་བཏོན་པ་མེད་པའི་ཕྱིར་དང༌། འོག་མ་རྣམས་སུ་དེ་འདྲའི་དག་སྦྱོར་རེ་ཞིག་དངོས་སུ་གསུངས་པ་མེད་ཅིང་མི་སྦྱོར་བའི་ཕྱིར་རོ། །ཕྱི་རོལ་ཀྱི་སྔགས་རྒྱུད་ལ་ཡང་རིགས་ཅན་དང་མཁའ་ལྡིང་གི་རྒྱུད་ལ་ཡི་གེའི་ཁམས་ཀྱི་དགྲ་གྲོགས་བརྩི་ཞིང༌། རི་ཁྲོད་པ་དང༌། འབྱུང་པོ་དང་འཆོལ་བའི་རྒྱུ་ལ་བརྩི་མི་དགོས་པ་དང་འདྲའོ་ཞེས་བླ་མ་པཎྜི་ཏ་འགའ་ཞིག་གསུང་ངོ༌། །གོང་དུ་དྲངས་པའི་རྩ་རྒྱུད་ཀྱི་ལུང་ལས། སྒྲུབ་པ་པོ་ཡི་ཡི་གེ་གཉིས། །སྐྱེ་བ་ལས་སྐྱེས་མིང་སྐྱེས་འགྱུར། །ཞེས་པའི་དོན་སྒྲུབ་པ་པོའི་ཡི་གེ་ནི་རྣམ་པ་གཉིས་ཏེ། སྐྱེ་བའི་ཡི་གེ་དང་མིང་གི་ཡི་གེ་འ། ཕྱི་མ་བཤད་ཟིན་པ་དང༌། སྐྱེ་བའི་ཡི་གེ་ནི་དང་པོ་བཙས་པའི་དུས་སུ་ཞག་དེ་ལ་ཡི་གེ་གང་ཤར་བ་དང༌། ཡུད་ཙམ་སུམ་ཅུའི་ཡི་གེ་གང་ལ་བཙས་པ་དང༌། དབྱུག་གུ་སོ་སོའི་ཡི་གེ་གང་ལ་བཙས་པ་དག་བརྩིས་ཏེ། དེ་
དང་སྔགས་ཀྱི་ཡི་གེའི་དགྲ་གྲོགས་བརྩི་དགོས་པ་ཡིན་ཏེ། འདིའི་རྒྱས་བཤད་རང་གི་ཡི་གེ་ལ་ཡང་གཉིས་ཞེས་སོགས་རྡོ་རྗེ་སྙིང་འགྲེལ་གྱི་ལུང་དྲངས་པ་དེ་ཡིན་ནོ། །སྤྱིར་ནས་མིང་ལས་ཀྱང་འདི་གལ་ཆེ་བ་འདྲ་བ་ཞིག་འདུག་ཀྱང༌། བོད་ཡུལ་འདིར་དེ་རྟོགས་པར་དཀའ་བས་སྐྱེ་བའི་ཡི་གེ་གང་ཡིན་མ་ཤེས་པ་སྐྱོན་ཡིན་ཡང༌། དེ་ལ་བརྟེན་པའི་རྣམ་རྟོག་མི་འཇུག་པ་ཡོན་ཏན་དུ་སྣང་བས་ཡུལ་ལུགས་དང་བསྟུན་པར་བྱོས་ཤིགའདིར་ཡི་གེ་མངས་པར་འགྱུར་བའི་ཕྱིར་མ་སྤྲོས་སོ།། །།ལྔ་པ་ལས་དང་མཐུན་པའི་བགྲང་འཕྲེང་གི་དབྱེ་བ་ནི་མདོ་ཙམ་དུ་བཤད་ན། ཞི་བ་ལ་ཤེལ་གྱི་བགྲང་འཕྲེང་སྟེ། དབྱངས་ཐུང་ངུ་བཅོ་ལྔ་ལ་ཨཾ་ཨཾ་ཧཾ་བསྣན་པ་དབྱངས་བཅོ་བརྒྱད་ཀྱི་གྲངས་སོ། །རྒྱས་པ་ལ་མུ་ཏིག་གི་བགྲང་འཕྲེང་སྡེ་དབྱངས་ཐུང་ངུ་བཅོ་བརྒྱད་དང༌། རིང་པོ་བཅོ་བརྒྱད་དེ་སུམ་ཅུ་རྩ་དྲུག་གི་གྲངས་ཀྱིས་སོ། །དབང་ལ་བོ་ཏེ་ཙེའི་བགྲང་འཕྲེང་སྟེ་གསལ་བྱེད་སུམ་ཅུ་རྩ་དྲུག་གི་གྲངས་ཀྱིས་སོ། །དགུག་པ་ལ་ཙན་དན་ནམ་པདྨའི་ས་བོན་གྱི་བགྲང་འཕྲེང་སྟེ་གསལ་བྱེད་ཐུང་ངུ་སུམ་ཅུ་རྩ་དྲུག་དང། དབྱངས་བཅོ་བརྒྱད་འདུས་པ་ལྔ་བཅུ་རྩ་བཞིའི་གྲངས་ཀྱིས་སོ། །བསད་པ་ལ་མིའི་སོའི་བགྲང་འཕྲེང་སྡེ་རྒྱུ་སྐར་ཉི་ཤུ་རྩ་བདུན་གྱི་གྲངས་ཀྱིས་སོ། །སྡང་བ་དང་བསྐྲད་པ་ལ་རྔ་མོའམ་བོང་བུའི་སོའི་བགྲང་འཕྲེང་སྟེ་རྒྱུ་སྐར་ཉིས་འགྱུར་ལྔ་བཅུ་རྩ་བཞི་གྲངས་ཀྱིས་སོ། །རྨོངས་པ་ལ་ལུང་ཏང་གི་བགྲང་འཕྲེང་སྟེ། རིལ་བུ་ཕྱེད་བཅས་བཅུ་གསུམ་རྒྱུ་སྐར་ཕྱེད་ཀྱི་གྲངས་ཀྱིས་སོ། །རེངས་པ་ལ་རུ་རག་ཤའི་བགྲང་འཕྲེང་སྟེ་ཐུང་ངུ་དང་རིང་པོའི་གསལ་བྱེད་བདུན་བཅུ་རྩ་གཉིས་དང་དབྱངས་སུམ་ཅུ་རྩ་དྲུག་བསྲེས་པ་བརྒྱ་དང་བརྒྱད་ཀྱི་གྲངས་ཀྱིས་སོ། །སླར་གསོ་བ་ལ་ནི། མ་ར་ཀ་ཏའི་བགྲང་འཕྲེང་གིས་སོ། །ལས་ཐམས་ཅད་པ་ལ་དབང་ལེའི་སྦྱིན་སྲེག་གི་སྐབས་
སུ་གསུངས་པ་ལྟར་མཚན་སོ་གཉིས་དང༌། དཔེ་བྱད་བརྒྱད་ཅུ་བསྲེས་པའི་གྲངས་སྤྱིར་བརྒྱ་དང་བཅུ་གཉིས་ཡིན་པ་ལས་བཞི་ནི་རྡོ་རྗེ་བཞི་དང་རི་རབ་ཀྱི་གདོང་བཞི་མཚོན་པ་མདོ་འཛིན་གྱི་དོན་དུ་སྦྱར་བས་འཕྲེང་བ་དངོས་ལ་རིལ་བུ་བརྒྱ་རྩ་བརྒྱད་པ་སྟེ། རྒྱུ་ནི་ཞི་རྒྱས་སམ་ལྷ་དབང་དུ་བྱེད་པ་ཡིན་པའི་ཕྱིར་བོ་ཏེ་ཙེའམ། གཞན་ཡང་དགེ་ཞིང་ཤིས་པའི་རྒྱུ་གང་ཡང་རུང་བ་སྟེ། བསྙེན་པའི་དུས་ཀྱང་ལས་ཐམས་ཅད་པ་དང་འདྲའོ། །བགྲང་འཕྲེང་བྱིན་གྱིས་བརླབས་པ་ནི། གདན་བཞི་དང་སམྦུ་ཊིའམ་དཀྱིལ་འཁོར་གྱི་ཆོ་ག་རྡོ་རྗེ་འཕྲེང་བ་སོགས་ལས་འབྱུང་བ་བཞིན་བྱས་ཀྱང་ལེགས་ལ། ཡང་ན་མན་ངག་ལས་འབྱུང་བ་ཧཱུཾ་ཕྲཻཾ་ལས་གཙོ་བོ་ཡབ་ཡུམ་གྱི་ངོ་བོ་བགྲང་འཕྲེང་ཉིད་དུ་བསྐྱེད། བགྲང་འཕྲེང་ལ་ཡེ་ཤེས་པ་བསྟིམ་ནས། རིགས་དྲུག་གི་ས་བོན་བརྒྱ་རྩས་བྱིན་གྱིས་བརླབས་ནའང་ལེགས་པ་ཡིན་ནོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། སྔགས་ཀྱི་བཟླས་པའི་རིམ་པ་བཤད་པའི་སྡེ་ཚན་ཏེ་དགུ་པའོ།། །།གསུམ་པ་ལ་མཆོད་པ་གཏོར་མ་ཟས་ཀྱི་རྣལ་འབྱོར་གསུམ་ནི། སྒྲུབ་ཐབས་ལེའུར། ཨོཾ་ཨཱཿཧཱུཾ་ཧོཿརིམ་པར་གནས་པས་དང་པོར་འདིར་ནི་རྟག་ཏུ་ཆང་ནི་སྦྱངས་ནས་རྒྱས་པར་བྱ། རབ་ཏུ་འབར་བར་བྱས་ཏེ་རིང་བོང་ཅན་ནི་ཞུ་བ་བཞིན་དུ་རིམ་པས་བསྒོམས་པར་བྱས་ནས་ནི། །སྣོད་དེ་ནས་ནི་ཐིག་ལེ་དག་གིས་ལག་པར་རི་བོང་ཅན་གྱི་མིང་མེད་རྩེ་མོས་ས་གཞི་ལ། ཕྱི་རོལ་ཏུ་ནི་ཟུར་གསུམ་བྱས་ནས་དེ་ཡི་དབུས་སུ་ཉིན་མོར་བྱེད་པ་དང་མཚུངས་ཟླུམ་པོའོ། དེ་ཡི་དབུས་སུ་ཡེ་ཤེས་འཁོར་ལོ་སྲིད་གསུམ་གནས་པ་དག་ཀྱང་འདིར་ནི་སྔགས་པས་བསྒོམས་བྱས་ནས། །མཐེ་བོང་དང་ནི་མིང་
མེད་དག་གིས་ཉིན་ཞག་སོ་སོའི་དུས་སུ་ཚིམ་པར་བྱེད་པ་ལ་སོགས་བྱ། །ཡུལ་དང་གྲོང་གི་བདག་པོ་རྣམས་ལ་ཐོག་མར་འདིར་ནི་གཏོར་མ་དང་པོ་དབུས་མཐའི་མིང་གིས་ཏེ། །འཕྲོག་མ་ལ་ནི་ཆང་བུ་གཉིས་དང་སླར་ཡང་སྔགས་པས་ཁྲོ་བོའི་རྒྱལ་པོ་ལ་ནི་གཏོར་མའོ། །ཕོ་ཉ་མོ་རྣམས་དག་ལ་ཟས་ཀྱི་ཕུད་ནི་ས་སྟེང་གནས་སུ་བདག་པོའི་རྡོ་རྗེ་རྣམས་ཀྱིས་ སྦྱིན། །འབྱུང་པོ་རྣམས་ལ་ཟོས་པའི་ལྷ་མ་སླར་ཡང་དགེ་བའི་དོན་དུ་སྦྱིན་པའི་ཚིགས་བཅད་འདིར་བཀླག་གོ །ཞེས་གསུངས་ཤིང༌། གཤེགས་སུ་གསོལ་བ་ཡང་སྒྲུབ་ལེར། གཙུག་ཏོར་དུ་ནི་རྡོ་རྗེ་རྩེ་མོ་ལྔ་པར་འགྱུར་ཏེ་ཕྱི་རོལ་རྩེ་མོ་དག་ནི་ཉིས་འགྱུར་གྱི། །རྡོ་རྗེ་ཆོས་ཀྱི་འཁོར་ལོ་འགྱུར་ཞིང་ཉིས་འགྱུར་གཞན་མ་དང་ནི་དེ་ཡི་ཉིས་འགྱུར་དག་ཀྱང་གཞན། །དེ་ཡི་ཡང་ནི་ཉིས་འགྱུར་གཞན་དུ་འགྱུར་ཏེ་ལྷན་སྐྱེས་ལོངས་སྤྱོད་རྫོགས་དང་སྤྲུལ་པའི་འཁོར་ལོར་རོ། །དེ་ཡི་སྙིང་པོར་རྩེ་མོ་གཅིག་པ་བདེ་མཉམ་འབྲས་སྟེར་གསང་བའི་པདྨའི་ཁོངས་སུ་གནས་ པའོ། །ཞེས་གསུངས་ཤིང༌། ཡང་མཎྜལ་དང་འབྲེལ་བའི་མཆོད་ཆོག་ནི། དབང་ལེའི་ཚིགས་བཅད་གྱ་བཞི་པའི་འགྲེལ་བར་གསལ་བར་གསུངས་པས། དེ་རྣམས་ཀྱི་ཁོག་དོན་སྡེབ་ན། འགྲེལ་ཆེན་ལས། དེ་ལྟར་གཤེགས་སུ་གསོལ་བ་བྱས་ཏེ། དེ་ནས་ཐུན་མཚམས་གསུམ་ལ་སྔར་གསུངས་པའི་ཆོ་གས་གཏོར་མ་སྦྱིན་པར་བྱའོ། །སྔར་གྱི་ཆོ་གས་བདུད་རྩི་ལྔ་སྦྱང་བ་བྱས་ནས། དེས་བདག་ཉིད་ཚིམ་པར་བྱའོ། །ཞེས་བདག་བསྐྱེད་ཀྱི་ལྷ་ཚོགས་རང་ཉིད་ལ་བསྡུ་བའི་གཤེགས་གསོལ་བྱས་ཟིན་པའི་རྗེས་སུ་གཏོར་མ་འབུལ་བ་དང༌། གཏོར་མའི་རྗེས་སུ་ཁ་ཟས་ཀྱི་རྣལ་འབྱོར་བྱ་བར་ཤིན་ཏུ་གསལ་ལ། དེའི་ཕྱིར་སྤྱི་ལྡོག་ནས་བདག་བསྐྱེད་ལ་གཏོར་མ་ཙམ་མི་འགོག་ཀྱང་སྐབས་
འདིར་གཏོར་ཆོག་ནི་བདག་བསྐྱེད་ཀྱི་ལྷ་ལ་མ་ཡིན་ཏེ། སྤྱིར་མདུན་བསྐྱེད་དང༌། ཁྱད་པར་དུ་ཡང་ཁྲོ་བོའི་རྒྱལ་པོ་རྡོ་རྗེ་ཤུགས་སྡེ་དྲུག་དང་བཅས་པ་ལ་འབུལ་བ་དང༌། གཞན་མཁའ་འགྲོ་མ་དང་ཡུལ་བདག་གྲོང་བདག་སོགས་ལ་སྦྱིན་པ་ཉིད་ཡིན་ཞིང༌། ཁ་ཟས་ཀྱི་བྱ་བའང་ཐུན་མཚམས་དེ་ཉིད་ལ་བྱེད་རྒྱུ་ཡིན་ན་གཏོར་མའི་རྗེས་སུ་བྱ་ཡི། སྔོན་དུ་མ་ཡིན་ཏེ་ཟས་ཀྱི་ཕུད་ཉིད་ལ་གཏོར་མ་བྱ་བའམ། མ་ཡིན་ཀྱང་ཟས་ཀྱི་ཕུད་ནས་གཏོར་མ་ལ་འབུལ་དགོས་པའི་དབང་དུ་བྱས་སོ། །མཎྜལ་མཆོད་པའི་ཆོ་ག་ནི། དབང་ལེའི་གྱ་བཞི་པའི་འགྲེལ་པ་ལས་འདི་སྐད་ཅེས། འདིར་སྔར་བརྗོད་པའི་ཆོ་གས་ལྷ་རྣམས་དམིགས་པ་བྱས་ཏེ། དེ་ནས་ཡེ་ཤེས་ཀྱི་འཁོར་ལོ་དམ་ཚིག་གི་འཁོར་ལོ་དང་ལྷན་ཅིག་ཏུ་བྱས་ནས། སྔར་གྱི་སྔགས་ཀྱི་ཚིག་རྣམས་ཀྱིས་མཆོད་ཡོན་ལ་སོགས་པ་འབུལ་ལོ། །ཞེས་གསུངས་པའི་སྔར་བརྗོད་པའི་ཆོ་གས་ལྷ་ལ་དམིགས་པར་བྱས་ཏེ། ཞེས་པའི་ལྷ་ལ་དམིགས་པ་སྔར་གསུངས་པ་ལ་ཁ་འཕངས་པའི་གནས་སྐབས་ནི་གཉིས་ཡོད་དེ། དབང་ལེའི་མདོར་བསྡུས་གཉིས་པར་འདི་སྐད་ཅེས། སྟོང་པ་ཉིད་ལ་དམིགས་པ་དང༌། དཀྱིལ་འཁོར་རྒྱལ་མཆོག་དང་ལས་རྒྱལ་མཆོག་དང༌། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་རྣམས་སྔགས་པས་བྱའོ། །ཞེས་གསུངས་པས། དེ་ལ་བསྙེགས་པ་ན་བདག་བསྐྱེད་ཀྱི་མཐར་དཀྱིལ་འཁོར་མ་བསྡུས་པ་ཉིད་ལ་མཎྜལ་དུ་དམ་ཡེ་བསྲེས་ནས་མཆོད་པ་བྱ་བར་གསུངས་པར་སོང་བས། བདག་བསྐྱེད་ཀྱི་ལྷ་ལ་མཆོད་པ་འབུལ་བ་བསྟན་ལ། ཡང་མདོར་བསྡུས་གསུམ་པར་མདུན་བསྐྱེད་ཀྱི་དཀྱིལ་འཁོར་རྒྱས་པར་གསུངས་ཟིན་པ་ལས་ཁ་འཕངས་པའང་ཡིན་པས་
སྔར་ཇི་ལྟར་བཤད་པའི་ལྷ་ཚོགས་དེ་ལྟ་བུར་བསྒོམ་ཞེས་པར་འགྱུར་ལ། དངོས་བསྟན་ཡང་མདུན་བསྐྱེད་ཀྱི་འཇུག་ཉིད་ན་ཡོད་པ་གཉིས་ཀ་ལ་ཡང་འཇུག་མོད་ཀྱི། ཆོ་གས་ལྷ་རྣམས་ལ་དམིགས་ཞེས་པའི་ཚིག་ནི་མདུན་བསྐྱེད་ཀྱི་བསྐྱེད་ཆོག་ལས་ཀྱང་བདག་བསྐྱེད་རྣལ་འབྱོར་བཞི་ལ་གཙོ་བོར་འཇུག་གོ །དེས་ན་བདག་བསྐྱེད་ཀྱི་ལྷ་མཎྜལ་དུ་མཆོད་པ་ཡང་ངེས་པར་གྲུབ་ལ། མཆོད་ཆོག་དང་གཏོར་ཆོག་གཉིས་དཀྱུས་ཐོག་གཅིག་ལ་བྱེད་ན་སྤྱིར་ཡང་གཏོར་ཆོག་འཇུག་ཏུ་བྱེད་པ་ཕལ་ཆེར་ལ་གྲགས་ལ། ཁྱད་པར་འདིར་མཆོད་ཆོག་ནི། བདག་བསྐྱེད་མ་བསྡུས་པ་ལ་བྱེད་དགོས་ཤིང༌། གཏོར་ཆོག་ནི་བདག་བསྐྱེད་ཀྱི་དཀྱིལ་འཁོར་བསྡུས་པའི་རྗེས་སུ་བྱེད་པས་སྔར་གྱི་ལུང་གིས་གྲུབ་པས། བདག་བསྐྱེད་མཎྜལ་མཆོད་པ་ནི་སྔོན་དུ་བྱ་དགོས་ཤིང༌། དེ་ལ་ཕྱི་མཆོད་ནང་མཆོད་གཉིས་ཡོད་པ་ལས་སྔོན་དུ་ཕྱི་མཆོད་བྱེད་པ་རྒྱུད་སྡེ་སྤྱིའི་ལག་ལེན་གྱི་རིག་པས་གྲུབ། དེ་གཉིས་ལ་དཀྱིལ་འཁོར་སོ་སོ་མི་དགོས་པར་གཅིག་གི་སྟེང་ནས་བསྒྲུབས་ཀྱང་རུང་མོད། དབང་ལེར་མཎྜལ་མཆོད་པ་དངོས་ལ་ཙནྡན་ལ་སོགས་པའི་མཎྜལ་གསུངས་པ་ཕྱི་མཆོད་དང༌། སྒྲུབ་ལེར་ནང་མཆོད་བྱིན་གྱིས་བརླབས་ནས་བདུད་རྩིའི་མཎྜལ་བྱེད་པར་གསུངས་པ་ནང་གི་མཆོད་པའི་མཎྜལ་ཡིན་པར་ཤིན་ཏུ་གསལ་བས་འགྲུབ་ན་སོ་སོར་བྱའོ། །མཆོད་སྔགས་ཆེན་མོ་ནི། དེང་སང་ནང་མཆོད་ལ་སྦྱོར་བའི་ལག་ལེན་ཁོ་ན་ཡོད་ཀྱང་མེ་ཏོག་ལ་སོགས་པ་དང༌། མཆོད་པ་བཅུའམ་བཅུ་གསུམ་དང་ཕྱི་ནང་གསང་བ་ཐམས་ཅད་ཀྱི་སྤྱི་སྔགས་ཡིན་ནོ། །མཎྜལ་མཆོད་པ་མདུན་བསྐྱེད་དུ་བྱེད་པའི་རིགས་ལ། དཀྱིལ་འཁོར་རྒྱས་པ་དང་འབྲེལ་ན་དཀྱིལ་འཁོར་མཆོད་པ་དངོས་གཞི་ཉིད་ཀྱི་སྐབས་ལས་གཞན་དུ་མ་ཡིན་ལ། ལོགས་
སུ་བྱེད་ན་ཕལ་ཆེར་བདག་བསྐྱེད་བསྡུས་པའི་མཐར་བྱེད་པ་དང༌། མཆོད་ཆོག་ཙམ་ལ་བདག་བསྐྱེད་སྔོན་དུ་མ་སོང་ཡང་ཐུན་མཚམས་ཀྱི་ལྷ་ལ་བརྟེན་ནས་ཀྱང་བྱར་རུང་མོད་ཀྱི། གལ་ཏེ་གཏོར་ཆོག་དང་སྦྲེལ་ནས་བྱེད་ན་མདུན་བསྐྱེད་ལ་མཆོད་ཆོག་སོང་བའི་རྗེས་སུ་གཏོར་ཆོག་བྱའོ། །ཁ་ཟས་ཀྱི་རྣལ་འབྱོར་ནི། སྤྱིར་ངེས་པ་མེད་ཀྱང་དེའི་རྗེས་སུ་དཔའ་བོའི་སྟོན་མོ་བསྡུས་པའི་ཚུལ་གྱིས་བྱེད་པ་ཡིན་པ་ལས། འཁོར་ལོའི་མཆོད་ཆོག་དངོས་ལ་ཟས་ཀྱི་བྱ་བ་ཟིན། ལྷག་གཏོར་བཏང་བའི་འོག་ཏུ་མཎྜལ་དང༌། གཏོར་མའི་ལྷ་རྣམས་གཤེགས་སུ་གསོལ་བ་ཡིན་ཡང༌། དཀྱུས་ཀྱི་རྣལ་འབྱོར་ལ་ནི་དེ་ལྟར་བྱས་ཀྱང་རུང༌། མཎྜལ་གྱིའམ་དེ་དང་གཏོར་མའི་ལྷ་ལྷན་གཅིག་ཏུ་གཤེགས་སུ་གསོལ་ཟིན་པའི་རྗེས་སུ་ཁ་ཟས་ཀྱི་རྣལ་འབྱོར་བྱས་ཀྱང་རུང་ངོ༌། །ཡང་དཀྱིལ་འཁོར་རྒྱས་པ་དང་མ་འབྲེལ་ན་མཆོད་པ་འབུལ་བའི་ཡུལ་གཏོར་མའི་མགྲོན་ཅུང་ཟད་མི་འདྲ་བས། མཎྜལ་མཆོད་པའི་ལྷ་གཤེགས་སུ་གསོལ་བའི་རྗེས་སུ་གཏོར་ཆོག་བྱ། དེ་གཤེགས་སུ་གསོལ་ནས་ཟས་ཀྱི་རྣལ་འབྱོར་བྱས་པས་ཀྱང་ཆོག་གོ །དེ་ལྟར་སྤྱི་ཁོག་ངེས་པར་བྱས་ནས། སྐབས་འདིར་ཐུན་མཚམས་ཀྱི་བྱ་བ་ལ་དབྱེ་ན། མཆོད་བསྟོད་གྱི་རྣལ་འབྱོར། ཉེར་བསྡུའི་རིམ་པ། གཏོར་མའི་ཆོ་ག ཁ་ཟས་ཀྱི་རྣལ་འབྱོར། སྤྱོད་ལམ་གྱི་རྣལ་འབྱོར་ཏེ་ལྔ་ལས། དང་པོ་ལ་མཆོད་པ་བསྡུས་པ་དང་རྒྱས་པ་གཉིས་སོ། །དང་པོ་བསྡུས་པ་ནི། སྒྲུབ་ཐབས་ལྗོན་ཤིང་ལ་འཇུག་པ་ལས། དཀྱུས་སུ་བསྟན་པའི་མཆོད་པ་བཅུ་གཉིས་དང༌། འདུད་ཉི་ཤུ་དང༌། ཡེ་ཤེས་ལྔའི་བསྟོད་པས་བསྟོད་པ་ཙམ་བྱ་བ་སྟེ། དཀྱིལ་འཁོར་སྒྲུབ་མཆོད་སྐབས་ཀྱི་བདག་
བསྐྱེད་ཀྱི་འཇུག་ཏུ་འདི་ཁོ་ན་འཇུག་ཅིང༌། རྒྱུན་གྱི་ཉམས་ལེན་ལ་ནི། མཆོད་ཆོག་རྒྱས་པ་གང་འགྲུབ་བྱ་ཞིང༌། མི་ཤེས་པ་དང༌། མི་ནུས་པ་དང༌། ལོང་སྐབས་མེད་ན་འདི་ཙམ་གྱིས་ཀྱང་གོ་ནི་ཆོད་ལ། ཁ་ཅིག་སྡེབ་གཅིག་ལ་བསྡུས་རྒྱས་གཉིས་ཀར་བྱེད་པ་ནི། སྤྲོས་པ་ཁོ་ན་ལྷུར་བླངས་པ་ལས་གཞན་མ་ཡིན་ནོ། །བཟླས་པའི་འཇུག་ཏུ་མཎྜལ་དང་འབྲེལ་བའི་ཆོ་ག་རྒྱས་པ་འདི་བྱེད་ཕྱིན། མཆོད་བསྟོད་བསྡུས་པ་འདི་མི་དགོས་མོད། གཞན་དག་ཕལ་ཆེར་གྱིས་ཕྱི་རོལ་རྡུལ་ཚོན་སོགས་ཀྱི་དཀྱིལ་འཁོར་བཞེངས་ཤིང་བསྒྲུབས་པ་ལ་མཆོད་པ་འབུལ་བའི་སྐབས། མཎྜལ་དུ་དམ་ཚིག་པ་བསྐྱེད་པ་ལ་རྡུལ་ཚོན་དཀྱིལ་འཁོར་གྱི་ལྷ་ཚུར་སྤྱན་འདྲེན་པའམ། མཎྜལ་དུ་དཀྱིལ་འཁོར་གྱི་གཟུགས་བརྙན་དམ་ཚིག་པ་རྗེས་མཐུན་པ་ལ། མགྲོན་གྱི་ལྷ་ཡེ་ཤེས་པ་རྗེས་མཐུན་པ་བྱས་ཏེ་བཀུག་ནས། དེ་ཉིད་ལ་མཆོད་པ་འབུལ་བར་གསུངས་པ་དེ་དངོས་བསྟན་དཀྱིལ་འཁོར་དང་འབྲེལ་བའི་མདུན་བསྐྱེད་ཀྱི་མཆོད་པ་ཡིན་ཞིང༌། དེ་ཙམ་གོ་ཡང་བླ་མའི་མན་ངག་གི་དཀྱུས་ཀྱི་ཉམས་ལེན་ལ། བདག་བསྐྱེད་ཀྱི་དཀྱིལ་འཁོར་མཎྜལ་ལ་གཟུགས་བརྙན་ཤར་བའི་ཚུལ་ཅན་དམ་ཚིག་པ་རྗེས་མདུན་པ་དང༌། མགྲོན་གྱི་ལྷ་ཡེ་ཤེས་པ་རྗེས་མཐུན་པ་ཡང་སྤྱན་དྲངས་ཏེ་མཆོད་པའི་ལག་ལེན་གྱི་རྒྱུན་ཉམས་པས་རྒྱུད་འགྲེལ་གྱི་དགོངས་པ་དེ་ལྟར་ཡིན་པ་མ་ཤེས་པར། མཎྜལ་མཆོད་ཕྱིན་ཕྱི་རོལ་མཆོད་པ་ཁོ་ནར་བསམས་ཤིང༌། དེའི་ཚེ་བདག་བསྐྱེད་ལ་མཆོད་བསྟོད་བསྡུས་པ་དེ་མ་བྱས་ན། མཎྜལ་མཆོད་པ་བྱེད་རིང་བདག་བསྐྱེད་གུག་པར་ལས་ཀྱི་དོགས་པ་དེར་སྣང་ལ། མཎྜལ་གྱི་ལྷ་དང་བདག་བསྐྱེད་ཀྱི་ལྷ་ཐ་དད་པར་བཟུང་བས་གཤེགས་གསོལ་གྱི་སྐབས་མཎྜལ་གྱི་ལྷ་བཛྲ་མུཿ
ཡིས་ཟངས་ཀྱིས་གཤེགས་ནས། བདག་བསྐྱེད་ཀྱི་དཀྱིལ་འཁོར་བསྡུ་བར་འདོད་ལ། ཡང་ན་བདག་བསྐྱེད་ཀྱི་ལྷ་དང་མཉམ་པོར་རིགས་མཐུན་རིགས་མཐུན་སྡེབས་ནས་མཎྜལ་གྱི་ལྷ་བསྡུས་ཀྱང་ཆོག་ཅེས་གདམ་ཀའི་སྒོ་ནས་སྦུབས་ཡངས་འཕྲུལ་ཆགས་ཡིན་པར་རློམ་མོ། །གལ་ཏེ་མཎྜལ་མཆོད་པ་འདི་ཕྱི་རོལ་མཆོད་པའམ་མདུན་བསྐྱེད་ཁོ་ན་ཡིན་ན། བདག་བསྐྱེད་ཀྱི་དཀྱིལ་འཁོར་མ་བསྡུས་ཀྱང་གནད་འཆུག་པའི་ནོར་བ་མིན་མོད་འོན་ཀྱང་དེའི་སྔོན་དུ་བསྡུ་བ་ཉིད་བཟང་སྟེ། བདག་མདུན་ངེས་པར་བསྲེ་དགོས་པའི་རིགས་ཅན་ཡིན་ན་མ་གཏོགས། གསང་སྔགས་སྤྱིའི་ཆོ་གའི་ལུགས་རྒྱས་བསྡུས་ཆེ་ཆུང་ཕལ་ཆེར་ལ་དེ་ལྟ་བུར་སྣང་བ་དང་རིག་པ་མཚུངས་པས་སོ། །བདག་མདུན་གཉིས་ཚོགས་ཁང་གཉིས་སུ་ཚོགས་པ་སོ་སོར་འཚོགས་པ་ལྟ་བུ་དང༌། ཁྱིམ་གཅིག་གི་ཆ་ཤས་ཀྱི་ནང་དུ་ཁྱིམ་གཅིག་ཤོས་བཀོད་པ་ལྟ་བུ་བྱེད་པའི་རྣམ་གཞག་ནི་ཚད་ལྡན་ཡོངས་སུ་གྲགས་པ་གང་ལའང་མི་སྣང་བའི་ཕྱིར་དང༌། མདུན་བསྐྱེད་མཆོད་པ་ཙམ་ལ་བདག་བསྐྱེད་ཀྱི་འཁོར་རྣམས་བྱ་ར་བྱེད་པ་ཙམ་ལ་དགོས་པ་མེད་པའི་ཕྱིར་རོ། །དེས་ན་བདག་བསྐྱེད་བསྡུ་བ་མཎྜལ་མཆོད་པའི་རྗེས་སུ་བྱེད་པའི་ཕྱིར་བདག་བསྐྱེད་ཉིད་མཆོད་པ་ཡིན་ཏེ། གཞན་དུ་ན་བདག་བསྐྱེད་ཀྱི་ཆོ་གའི་བར་དེར་བདག་ཉིད་ཀྱི་དཀྱིལ་འཁོར་མ་བསྡུས་བཞིན་དུ་དེའི་དམིགས་པ་བཏང་ནས་མདུན་བསྐྱེད་ཀྱི་ལྷ་ལ་ཡུན་རིང་དུ་དམིགས་ཤིང༌། བྱ་བྱེད་མང་པོས་དུས་རིང་དུ་འདའ་བ་འོས་པ་མ་ཡིན་པའི་ཕྱིར་རོ། །གཉིས་པ་མཆོད་པའི་ཆོ་ག་རྒྱས་པ་ནི། མཎྜལ་འདུས་བྱ་བ། ཕྱི་མཆོད་བྱིན་གྱིས་བརླབ་པ། དཀྱིལ་འཁོར་གསལ་འདེབས་པ། མགྲོན་སྤྱན་དྲངས་པ། ཕྱི་མཆོད་རྒྱས་པར་འབུལ་པ། ནང་མཆོད་བྱིན་གྱིས་བརླབས་ཏེ་འབུལ་
བ། བསྟོད་པ། འདོད་དོན་གསོལ་བ་གདབ་པ་རྣམས་ཆོ་གའི་རིམ་པ་ཡིན་ལ། མཎྜལ་འདུས་བྱ་ཚུལ་ནི། མཎྜལ་གཉིས་ལས་གཅིག་མཆོད་པ་བྱིན་རླབས་ཀྱི་རྗེས་སུ། ཙན་དན་གྱི་ལྡེ་གུ་སོགས་འཐེབ་སྲིན་གྱི་བླང་སྟེ་ལེགས་པར་བྱུགས། མེ་ཏོག་གི་ཚོམ་བུ་ཅི་རིགས་པ་བཀྲམ་ནས། གཟུགས་བརྙན་ལྟ་བུའི་ལྷ་གསལ་འདེབས་པ་སོགས་བྱེད་ཅིང༌། མཎྜལ་གཅིག་ཤོས་ནི། ཕྱི་མཆོད་དང་བསྟོད་པའི་བར་དུ་མཎྜལ་ལ་ནང་མཆོད་ཀྱི་ཆོས་འབྱུང་གྲུ་གསུམ་དབུས་སུ་ཐིག་ལེ་ཟླུམ་པོ་དང་བཅས་པ་བཀོད་ནས་དབུས་སུ་མེ་ཏོག་ཅིག་བཞག མཎྜལ་སྔ་མའི་ལྷ་དང་དབྱེར་མེད་དུ་མོས་ནས། ནང་མཆོད་འབུལ་བ་ནི། རྒྱུད་འགྲེལ་གྱི་དངོས་བསྟན་གནས་སྐབས་སོ་སོར་གསུངས་པ་དེ་ཉིད་མ་ནོར་བར་བསྒྲིགས་པའི་ལུགས་ཕན་ཚུན་རྒྱས་བཀབ་ཀྱི་བསྲེ་སླད་མེད་པ་དེ་ཡིན་ལ། འོན་ཀྱང་ཟླ་བ་རེའི་ནང་དུ་ལན་རེ་སོགས་ཁྱད་པར་གྱི་དུས་སྐབས་གལ་ཆེ་བ་ལ་ནི་ངེས་པར་བྱ་ཞིང༌། རྒྱུན་གྱི་ཉམས་ལེན་ལ་འགྲུབ་དཀའ་ན། མཎྜལ་ཕྱི་ནང་གང་རུང་ཞིག་ལ་བསྡུས་པས་རུང་མོད། ཁྱད་པར་དུ་ཕྱི་ནང་གིས་མཎྜལ་གཉིས་པོ་ནང་གཙོ་ཆེ་བས་ནང་མཆོད་ཀྱི་ཆོས་འབྱུང་ཐིག་ལེ་དང་བཅས་པ་དེ་བཀོད་པ་གཅིག་པུས་ཆོག་གོ །དེ་ཡང་སྐབས་འདིར་གསར་དུ་ནང་མཆོད་བྱིན་རླབས་བྱེད་པའི་ལག་ལེན་འདུག་ཀྱང་དེ་གཙོ་མི་ཆེ་སྟེ། ཐུན་གྱི་མགོར་བྱིན་གྱིས་བརླབས་པའི་ནང་མཆོད་དེས་བྱའོ། །དེ་ལྟར་ན་དང་པོར་ནང་གི་མཎྜལ་འདུས་བྱས་ཏེ་སྟེགས་ཅུང་ཟད་ལ་བཞུགས་སུ་གསོལ། དེའི་མདུན་དུ་མཆོད་པ་བཤམ། མཆོད་པ་བཅུ་བཅུ་གཉིས་བཅུ་གསུམ་སོགས་རི་མོར་བྲིས་པའམ། འབུར་དུ་དོད་པ་སོགས་ཡོད་ན་ཤིན་ཏུ་ལེགས། མེད་ན་ཡིད་ཀྱིས་བསྒོམས་པས་ཆོག །དུང་ཆོས་སོགས་སྣོད་གཙང་མ་གཅིག་གམ་བཞིར་ཡོན་ཆབ་
བླུགདེ་རྗེས་དུང་ཆོས་སོགས་སྣོད་གཅིག་ཏུ་བསང་ཆུ་འཐོར་ཡབ་ཀུ་ཤའམ་དུར་བ་དང་བཅས་པ་བཞག་ནས། ཡི་གེ་དྲུག་པ་ལན་བརྒྱ་སོགས་ཇི་ལྟར་འོས་པ་བཟླས་པས་བསང་ཆུ་སྒྲུབ་མཆོད་གཏོར་ཐམས་ཅད་ལ་དེས་བསང་བ་ཡིན། གལ་ཏེ་བསང་ཆུ་མི་བྱེད་ན། ནང་མཆོད་ཀྱིས་བསངས་ཀྱང་ཆོག་གོ །གཉིས་པ་མཆོད་པ་བྱིན་རླབས་ནི། སྒྲུབ་མཆོད་ཀྱི་སྐབས་དང་འདྲ། བསང་བའི་སྔགས་ཡི་གེ་དྲུག་པས་བྱ་ཞེས་གསུངས་པ་ལ། ཁ་ཅིག་ཨོཾ་ཨཱཿཧཱུཾ་ཧོཿཧཾ་ཀྵཿལ་བཞེད་པ་དང༌། འགའ་ཞིག་ཧྲཱཾ་ཧྲཱིཾ་སོགས་ལ་འདོད་པའང་ཡོད་པ། དེ་དག་རང་གི་འདོད་པ་ཙམ་མ་ཡིན་པར་མན་ངག་ལས་བྱུང་བ་ཡིན་ན་སྤྱིར་བཟང་མོད་ཀྱང༌། འགྲེལ་པ་ལས། བསང་བྱེད་ཀྱི་སྔགས་དངོས་སུ་གསུངས་པ་སྔགས་གཅིག་ལས་མེད་ཅིང༌། དེ་ནི་སྦྱིན་སྲེག་གི་སྐབས་སུ། ཨོཾ་ཨཱཿཧཱུཾ་ཧྲ་ཕཊ་ཅེས་པ་འདི་གཅིག་པུའོ། །དེའི་ཕྱིར་བསངས་སྦྱངས་ཙམ་གྱི་དོན་དུ། སྦྱིན་སྲེག་ཁོ་ན་ལ་ཁྱད་ཆོས་འོང་བ་མི་རིགས་ཤིང༌། གནས་སྐབས་གཞན་དུ་གཞན་ཡང་གསུངས་པ་མེད་པས་དངོས་སུ་གསུངས་པ་གཅིག་པུ་དེ་བོར་ནས། མ་གསུངས་པ་ལ་རིག་པའི་སྒྲུབ་བྱེད་མང་པོ་བཀོད་ཀྱང༌། གཡེམ་མ་མུ་ཅོར་གྱིས་རྒྱལ་ལོ། །ཞེས་པར་འགྱུར་བས། དེས་ན་འདི་ནི་རྒྱུད་འགྲེལ་གྱི་དངོས་བསྟན་ཡིན་ལ། བརྒྱུད་པའི་རིམ་པ་མ་ཆད་པའི་བླ་མ་དམ་པའི་མན་ངག་ལས་ཀྱང་བྱུང་ངོ༌། །འོ་ན་ཡི་གེ་ལྔ་ལས་མེད་པ་ཅི་ཞེ་ན། ཕ་དང་ཊ་སོ་སོར་འབྱེད་པ་ཡིན་ཏེ། འཇམ་དཔལ་རྡོ་རྗེ་འཇིགས་བྱེད་ཀྱི་རྟོགས་པ་བདུན་པ་ལས་ཀྱང༌། མཁས་པས་གཉིས་སུ་བྱ་ཞེས་ཕཊ་ཀྱི་ཕ་དང་ཊ་སོ་སོར་བགྲང་བར་གསུངས་པ་བཞིན་ནོ། །འོ་ན་ར་བཏགས་དང་ཀླད་སྐོར་ལ་སོགས་པ་ཡང་བགྲོང་དགོས་པར་འགྱུར་རོ་སྙམ་
ན། དེ་དག་སྒྲ་འདྲེས་པ་ཡིན་པས་སོ་སོར་མི་བགྲོང་ལ། ཕ་དང་ཊ་སྒྲ་མི་འདྲེ་བའི་ཕྱིར། ཡི་གེ་སོ་སོར་བགྲོང་པ་རིགས་པ་ཉིད་དོ། །མཆོད་པའི་སྣོད་ཤེལ་ལས་གྲུབ་པ་ནི། ཞི་བའི་སྐབས་སུ་གསུངས་ལ། རྩ་བའི་བསྙེན་སྒྲུབ་དང་རྒྱུན་གྱི་རྣལ་འབྱོར་ནི། ཞི་བའི་ལས་སྒྲུབ་དངོས་མིན་ཡང་ཞི་བ་དང་འདྲ་བ་བྱེད་པ་སྤྱི་ལུགས་ཡིན་ནོ། །གསུམ་པ་མཆོད་ཡུལ་གྱི་ལྷ་དཀྱིལ་འཁོར་གསལ་འདེབས་པ་ནི། མཎྜལ་ལ་བསངས་སྦྱངས་བྱས་ཏེ། སྟོང་པའི་ངང་ལས་གཞི་ཡོངས་སུ་དག་པ་དེར་བདག་བསྐྱེད་དཀྱིལ་འཁོར་གྱི་ལྷ་ཚོགས་མ་ལུས་པ་གཟུགས་བརྙན་ཤར་བ་ལྟ་བུའི་ཚུལ་དུ་སྐད་ཅིག་གིས་གྲུབ་པར་བསམ། འདི་ཡིད་ཀྱིས་བསམས་པ་ཁོ་ནས་ཆོག་མོད། སྤྲོས་པ་ལ་མོས་ན་གཙོ་བོ་ཡབ་ཡུམ་གྱི་སྙིང་པོ་ཙམ་དང༌། འཁོར་རྣམས་ཀྱི་ས་བོན་ཙམ་བརྗོད། འདི་བདག་བསྐྱེད་ཀྱི་ལྷ་རྣམས་དངོས་སུ་བྱོན་པ་ལྟ་བུ་མིན། བདག་བསྐྱེད་ཀྱི་ཡེ་ཤེས་པ་སྔགས་དང་ཕྱག་རྒྱས་དེར་སྤྱན་འདྲེན་པ་ལྟ་བུ་ཡང་མིན། དེར་དཀྱིལ་འཁོར་གྱི་གཟུགས་བརྙན་ཤར་བའི་ཚུལ་ལས་ལྷ་དངོས་སུ་བཞེངས་པར་སྒོམ་པ་ཡིན་ནོ། །བཞི་པ་མགྲོན་སྤྱན་འདྲེན་པ་ནི། རྡོ་རྗེ་བསྡུ་བའི་ཕྱག་རྒྱ་དང༌། ཨོཾ་བཛྲ་ས་མཱ་ཛཿ ཛཿཧཱུཾ་བཾ་ཧོཿ ཞེས་བརྗོད་པས་བླ་མ་དང་སངས་རྒྱས་བྱང་ཆུབ་སེམས་དཔའི་ཚོགས་ཐམས་ཅད་ཉེ་བར་བྱོན་ཏེ། ནམ་མཁའི་ཁམས་ཐམས་ཅད་གང་བའི་ཚུལ་གྱིས་བཞུགས་པར་བསམ། །བཞི་པ་ཕྱི་མཆོད་འབུལ་བ་ལ། དང་པོར་མཆོད་ཡོན་ནི། སྦྱིན་སྲེག་གི་སྐབས་སུ་མཆོད་ཡོན་གྱི་སྔགས། ཨོཾ་པྲ་ཝ་ར་སཏྐ་རཾ་མ་ཧཱ་རསྨི་པྲ་ཏཱི་ཙྪ་སྭཱཧཱ། ཞེས་ཀྱང་གསུངས་མོད་ཀྱི། མ་ཧཱ་རསྨི་ཞེས་པ་འོད་ཟེར་ཆེན་པོ་སྟེ་མེ་ལྷའི་མཚན་གྱི་རྣམ་གྲངས་ཡིན་པས་འདི་དངོས་སུ་སྦྱིན་སྲེག་གི་སྒོས་ཆོས་ཡིན་ཡང་
ལྷའི་མཚན་གྱི་གནས་སྤོས་ན་གཞན་ལའང་རུང་བར་ནི་མངོན་ནོ། །འོན་ཀྱང་སྐབས་གཞན་དུ་གསལ་བར་གསུངས་པ་ཡིན་པས། ཨོཾ་ཨཱཿཧཱུཾ་ཧོཿཏྲཻ་དྷ་ཏུ་ཀེ་ཤྭ་ར་སོགས་མཛད་པ་ཉིད་བཟང་ངོ༌། །ཆུ་གཞན་བཤམས་ཡོད་ན། ཨོཾ་ཤྲཱི་ཀཱ་ལ་ཙཀྲ་ས་པ་རི་ཝ་རེ་བྷྱཿ པཱདྱཾ་པྲ་ཏཱི་ཙྪ་ན་མཿ སོགས་ཀྱིས་ཕུལ། འགྲེལ་ཆེན་ལས། ན་མཿམཆོད་པ་རྒྱས་པར་གསུངས་པའི་ཚིག་གི་རྗེས་སུ། རིན་ཆེན་ཨིནྡྲ་ནཱི་ལ་ལ་སོགས་པ་རྣམས་དང༌། གསེར་གྱི་མེ་ཏོག་དང་ཞེས་སོགས་མཆོད་པ་བཅུ་གསུམ་གསུངས་པ་དང༌། གཞན་པ་རྣམ་བཅུ་ཞེས་པ་ནི་འཆད་པར་འགྱུར་པ་ལས་བརྗོད་པར་བྱའོ་ཞེས་ཁ་འཕངས་པ་ནི། དབང་ལེའི་ཚིགས་བཅད་བརྒྱ་ལྔ་བཅུ་ང་ལྔ་པའི་འགྲེལ་བར། ཆུའི་སྣོད་དང་མཆོད་ཡོན་གྱི་སྣོད་དང༌། ཞེས་སོགས་མཆོད་པ་རྣམ་པ་བཅུ་གསུངས་པས། དེ་དག་གང་ཡང་རུང་བ་ཞིག་ཕུལ་བས་ཆོག་ལ། ད་ལྟ་ལག་ལེན་དུ་མཆོད་པ་བཅུ་གཉིས་འབུལ་བར་མཛད། ཁམས་གསུམ་དབང་ཕྱུག་བཅོམ་ལྡན་འདས། །ཞེས་པ་ལ་སོགས་པའི་ཚིགས་བཅད་དང་བཅས་པའམ་སྔགས་དང་ཕྱག་རྒྱ་ཙམ་གྱིས་མཆོད། དཀྱིལ་འཁོར་རྒྱས་པ་དང་འབྲེལ་བའི་མཆོད་པ་ལ། ཚིག་གི་བརྗོད་པ་མང་པོ་དག་མཛེས་པའི་སྐབས་ཡོད་ཡང༌། རྒྱུན་གྱི་ཉམས་ལེན་ལ་ཚིག་ཧ་ཅང་སྤྲོས་པ་ཆེས་པའང་མི་ལེགས་པས་དམིགས་པ་རྒྱ་བསྐྱེད་ལ་ངག་གི་བརྗོད་པ་རན་ཙམ་དེ་བཟང་ངོ༌། །དྲུག་པ་ནང་མཆོད་འབུལ་བ་ལ། ནང་མཆོད་གསར་པ་ཞིག་ལོགས་སུ་བཤམས་ཡོད་ན་ལེགས། མེད་ན་སྔར་གྱི་དེ་ཁ་གསོལ་ལ། བྱིན་རླབས་རྒྱས་པར་བྱས་ནས་དང་པོར་རྩ་རྒྱུད་ཀྱི་བླ་མ་རྣམས་ཀྱི་མཚན་ནས་བརྗོད་ཅིང་འབུལ། དེ་བཤད་ཚོད་
མེད་ཀྱང་གསང་སྔགས་པ་སྤྱིའི་ཕྱག་ལེན་དུ་འདུག་པ་བྱིན་རླབས་འཇུག་པའི་སྒོ་ཁྱད་པར་ཅན་དུ་སྣང་ངོ༌། །དེ་ནས་ཨོཾ་བུདྡྷཱ་ཡ་ན་མཿསོགས་མཆོད་སྔགས་ཆེན་མོས་མཆོད་ཅིང༌། གོ་སྐབས་བདེ་ན་མཐེབ་སྲིན་གྱིས་མཎྜལ་ཉིད་དུ་འབུལ་ལ། མི་བདེ་ན་རང་གི་དཔྲལ་བའི་ཐད་ཙམ་ནས་འབུལ། ཐུགས་དཀྱིལ་ཁོ་ན་སྒོམ་པ་ཡིན་ན། ཨོཾ་ཥཊ་ཨངྒཱ་ཡ་ན་མཿཞེས་པའི་རྗེས་སུ་ཨོཾ་གུ་རུ་བུདྡྷཱ་སྦྱར་བས་ཆོག དེས་མཚོན་ཏེ་ལྷ་ཉེར་ལྔ་བཅུ་གསུམ་ལྷ་དགུ་ལྷ་ལྔ་སོགས་ལའང་རིགས་འགྲེའོ། །འགའ་ཞིག་ན་མཿམཆོད་པའི་སྐབས་འདིར་མདུན་བསྐྱེད་དང་འབྲེལ་བ་ན། བཟེད་ཞལ་གྱི་ནང་དུ་མཎྜལ་སྤྱན་དྲངས་ཏེ་བདུད་རྩི་དང༌། མེ་ཏོག་དང༌། ཟས་མཆོག་སོགས་དངོས་སུ་འབུལ་བའི་ལག་ལེན་ཡང་སྣང་བ། རང་ལུགས་ལ་གཙོ་བོར་མི་མཛད་ནའང༌། སྤྱི་རྒྱ་བལ་མཁས་པའི་ལག་ལེན་གྱི་རྒྱུན་ཡིན་པས། དེ་ཡང་སྐབས་འགར་བྱས་ན་ལེགས་མོད་ཀྱི། རྒྱུན་གྱི་ཉམས་ལེན་བདག་བསྐྱེད་ཀྱི་སྐབས་འདིར་མི་དགོས་སོ། །མཆོད་ཡོན་ནས་འདིའི་བར་དུ་དངོས་སུ་མཎྜལ་གྱི་ལྷ་གཟུགས་བརྙན་ལྟ་བུ་དེ་ལ་འདེབས་པའི་མོས་པ་བྱེད་ཀྱང༌། བདག་བསྐྱེད་ཉིད་ཀྱི་དཀྱིལ་འཁོར་དུ་མཆོད་པ་དཔག་ཏུ་མེད་པ་བྱུང་ཞིང་ལྷ་རྣམས་ཚིམ་པར་བསམ་མོ། །ན་མཿའི་སྔགས་ཀྱི་སྐབས་འདིར་ནང་མཆོད་ཁོ་ནར་མ་ཟད། མཆོད་པ་གཞན་ཐམས་ཅད་ལ་ཡང་དམིགས་ནས་འབུལ་བ་ཡིན་ཏེ། ལྕོགས་ཤིང་འགྲུབ་ལ་སྤྲོས་པ་ལ་དགའ་ན། དངོས་སུ་ལྷ་སོ་སོའི་གནས་སུ་མེ་ཏོག་འདོར་ཞིང༌། མཆོད་སྔགས་ཆེན་མོ་ཚར་གཅིག་བརྗོད། དེ་བཞིན་དུ་དྲི་དང་སྤོས་དང་མར་མེ་སོགས་ཐམས་ཅད་ལ་སྦྱོར་བ་ཡིན་ཡང་དེ་ཙམ་མི་ནུས་པས་རྫས་ཀྱི་མཆོད་པ་ངེས་ཅན་རྣམས་སྔོན་
ལ་མདོར་བསྡུས་པའི་ཚུལ་གྱིས་སྤྱི་བུངས་སུ་ཕུལ་ནས། རྫས་ངེས་ཅན་གྱི་མཆོད་པའི་རྟིང་མ་ནང་མཆོད་ཡིན་པས་དེ་ལྷ་སོ་སོའི་སྔགས་ཀྱིས་འབུལ་བའི་ཞོར་ལ་མཆོད་པ་སྔ་མ་རྣམས་ཀྱི་ལྷ་སོ་སོ་ལ་དམིགས་པ་ཡིན་ནོ། །དེ་ལ་རྫས་ངེས་པ་ཅན་ནི། རྒྱུད་འགྲེལ་ཉིད་ལས་དངོས་བསྟན་དུ་གསུངས་བའི་མཆོད་པ་བཅུ་དང་བཅུ་གཉིས་བཅུ་གསུམ་སོགས་ཕྱི་ནང་གི་དག་སྦྱོར་ཅན་རྣམས་ཡིན་ལ། གཞན་མ་ངེས་པ་རྣམས་ལ་ནི། ལྷ་སོ་སོའི་སྔགས་ཀྱིས་འབུལ་བ་མི་དགོས་སོ།། །།བདུན་པ་བསྟོད་པ་ནི། སྤྱིར་ངེས་པ་མེད་ཀྱང་མཚན་བརྗོད་ཀྱི་འདུད་ཉི་ཤུ་དང༌། གང་ལ་ཐོག་མཐའ་དབུས་མེད་སོགས་ཡེ་ཤེས་ལྔའི་བསྟོད་པ་ཙམ་མཛད་པ་ཕྱག་ལེན་ཡིན་ཞིང༌། རྐང་པ་བཅུ་དྲུག་པ་ལ་སོགས་པས་བསྟོད་ཀྱང་ལེགས་སོ།། །།བརྒྱད་པ་འདོད་དོན་གསོལ་བ་གདབ་པ་ནི། སྤྱིར་བདག་བསྐྱེད་མདུན་བསྐྱེད་གང་ཡིན་ཡང་འདོད་དོན་ཞུ་བའི་ཡུལ་གྱི་གཙོ་བོ་ཡེ་ཤེས་སེམས་དཔའ་ཡིན་ལ། དམ་ཡེ་དབྱེར་མེད་ཉིད་ཀྱི་ཕྱིར་དམ་ཚིག་སེམས་དཔའ་ལ་ཡང་ཞོར་བྱུང་དུ་ཡིན་ཏེ། དམ་ཚིག་པ་ནུས་པ་རྒྱས་པ་དང༌། ཡེ་ཤེས་པ་མཉེས་པའི་ཕྱིར་བཟླས་པ་དང༌། མཆོད་བསྟོད་དང༌། གསོལ་བ་འདེབས་པ་རྣམས་དགོས་པ་ཡིན་ནོ། །དེ་ནས་སྐབས་འདིར་ཡིག་བརྒྱ་བཟོད་གསོལ་སོགས་ཁ་བསྐང་ཀྱང་རུང་མ་བྱས་ཀྱང་རུང་སྟེ། མགྲོན་རྣམས་གཤེགས་སུ་གསོལ། གཟུགས་བརྙན་ལྟ་བུའི་དཀྱིལ་འཁོར་དེ། དཔེར་ན་ཆུ་ཕོ་བ་ན་ཟླ་གཟུགས་མི་སྣང་བ་ལྟ་བུའམ། ཡང་ན་རྩ་བའི་དཀྱིལ་འཁོར་ཉིད་ལ་ཐིམ་པར་བསྒོམས་ཀྱང་རུང་ངོ༌། །དེ་ལྟར་དོན་ཚན་བརྒྱད་ཀྱིས་མཎྜལ་མཆོད་ཆོག་བཤད་ཟིན་ཏོ།། །།གཉིས་པ་ཉེར་བསྡུའི་རིམ་པ་ནི། གཙུག་ཏོར་དུ་རྡོ་རྗེ་རྩེ་མོ་ལྔ་པའི་ལྟེ་བར་སོགས་ཏེ།
བདེ་ཆེན་འཁོར་ལོའི་ལྷ་རྣམས་གནས་གཞན་དུ་གཤེགས་དགོས་པའི་ཕྱིར། སྐབས་འདིར་དཔག་བསམ་གྱི་ཤིང་སོགས་རྡོ་རྗེ་བཞི་པོ་ཉིད་སྤྱི་བོའི་རྩ་འདབ་བཞི་ལ་ཐིམ་པ་ནི་ངེས་པར་ཡིན་ཞིང༌། བདེ་བ་ཆེན་པོའི་འཁོར་ལོ་ཞེས་པ་ལས་འཁོར་ལོ་པ་ཞེས་སམ། འཁོར་ལོའི་ལྷ་ཞེས་པའི་གསལ་ཁ་མེད་པས་བདེ་ཆེན་འཁོར་ལོའི་གནས་ཀྱི་གཞལ་མེད་ཁང་ཉིད་ཀྱང་གཤེགས་སུ་གསོལ་བ་ཡིན་ཏེ། གྱི་ཇོའི་འགྱུར་ལས། གཙུག་ཏོར་དུ་རྩེ་ལྔ་པའི་རྡོ་རྗེ་བསྒོམ་པར་ བྱའོ། །དེའི་ལྟེ་བར་བདེ་བ་ཆེན་པོའི་དཀྱིལ་འཁོར་གཤེགས་སུ་གསོལ་ལོ། །ཞེས་འབྱུང་བ་གོ་བདེའོ། །ཕུང་པོ་བཞི་དང་ཁམས་བཞིའི་ལྷ་ནི། སངས་རྒྱས་ཡབ་ཡུམ་བཞི་བཞི་སྟེ་བརྒྱད་སྨོས་ཀྱང་ཕན་ཚུན་ཡབ་ཡུམ་འཁྱུད་པའི་དབྱེ་བས་བཅུ་དྲུག་ཡོད་པ། དཔྲལ་བའི་རྩ་འདབ་ཀྱི་གྲངས་དང་མཉམ་པ་ཡིན་པ་དང༌། སྐྱེ་མཆེད་བཅུ་གཉིས་ནི་སེམས་དཔའ་ཡབ་ཡུམ་བཅུ་གཉིས། ཁྲོ་བོ་བཞི་ནི་ཐུགས་ཀྱི་སྒོ་སྲུང་སྟེ་བཅུ་དྲུག་པོ་ལ་ལུས་བསམ་མཚོན་བྱེད་ཕན་ཚུན་འཁྱུད་པའི་ཡབ་ཡུམ་གྱི་དབྱེ་བས་སུམ་ཅུ་སོ་གཉིས་མགྲིན་པའི་རྩ་འདབ་དང་གྲངས་མཚུངས་པ་ཡིན་ནོ། །ཐུགས་དཀྱིལ་རྐྱང་པ་ལས་མ་བསྒོམས་ན་དེ་ཙམ་གྱིས་ཆོག་པ་ཡིན་ལ། སྐུ་གསུང་ཐུགས་ཡོངས་རྫོགས་ལ་གཞན་རྣམས་ཀྱང་བསྡུ་དགོས་པས་ལྟེ་བར་རྡོ་རྗེ་རྩེ་མོ་དྲུག་ཅུ་རྩ་ལྔ་པ་དང༌། རྣལ་འབྱོར་མ་རེ་བཞི་གྲངས་མཚུངས་ཀྱང་པདྨའི་ལྟེ་བའི་ལྷ་ལ་གསལ་ཁ་མ་བྱུང་སྟེ་དེས་ན་གཙོ་མོ་བརྒྱད་པོ་རང་རང་གི་འཁོར་ལ་སྤྱི་ཁྱབ་ཏུ་གནས་པའི་དབང་དུ་བྱ། གསང་བའི་རྩ་འདབ་སོ་གཉིས་ཡིན་ལ། སྐུའི་སྒོ་སྐྱོང་ནི་ཁ་སྦྱོར་གྱི་ལྷ་ལྟར་ན་དྲུག ཡབ་ཡུམ་སོ་སོར་བགྲངས་ཀྱང་བཅུ་གཉིས་ལས་མེད་པ་ལ། སྐབས་འདིར་དགོས་པའི་དབང་གིས་དག་པ་ལས་སུམ་ཅུ་རྩ་གཉིས་ཀྱི་དབྱེ་བ་
བྱེད་དེ། དེ་ཡང་སྐུ་གསུང་ཐུགས་ཡོངས་རྫོགས་ཀྱི་སྐབས་འདིར་ལས་དབང་བྱ་བ་དང་བཅས་པའི་དག་པ་སྐུའི་སྒོ་སྐྱོང་རྣམས་ལ་འཇོག་པའི་སྐབས་ཤིག་བྱུང་ངོ༌། །དེའི་དབང་དུ་བྱས་ནས་ཡབ་རྣམས་ལས་དབང་དང༌། ཡུམ་རྣམས་བྱ་བ་ཡིན་པས་སྦྱངས་བྱ་ཐ་དད་པ་ཉིད་ཀྱི་ཕྱིར་ཡབ་གཙོ་བོར་བྱེད་པ་དང་ཡུམ་གཙོ་བོར་བྱེད་པ་གཉིས་ཀ་བྱུང་ཞིང༌། དེས་ན་ཡབ་དྲུག་ལ་ཡུམ་དྲུག་གིས་འཁྱུད་པའི་ལྷ་བཅུ་གཉིས། དེ་གོ་ཟློག་པའི་ལྷ་བཅུ་གཉིས། དེ་དག་ནི་སྐྱེས་པ་དང་བུད་མེད་ཀྱི་ཡུལ་ལ་ལས་མཐའ་དག་སྒྲུབ་པར་མཛད་པ་ཡིན་ལ། ཐུན་མོང་དུ་ལས་དབང་དང་བྱ་བའི་གཞི་ཡུལ་རྣམ་པར་དག་པའི་ཤིང་རྟ་དྲུག་སྟེ་སུམ་ཅུ་རྩ་གཉིས་པོ་གསང་བའི་རྩ་འདབ་སོ་གཉིས་དང་གྲངས་མཐུན་པའོ། །ལས་ཀྱི་འཁོར་ལོ་ཚིགས་ཆེན་བཅུ་གཉིས་པོར་ཚེས་ལྷ་རྣམས་ཐིམ་པར་བྱེད་པ་ལ་ནག་པ་དང་ས་གའི་ལྷ་གཉིས་གྲུ་མོ་གཉིས་དང༌། སྣྲོན་དང་ཆུ་སྟོད་འཁྲིག་མ་གཉིས་དང༌། གྲོ་བཞིན་ཁྲུམས་སྟོད་དཔྱི་གཉིས་དང༌། ཐ་སྐར་སྨིན་དྲུག་པུས་མོ་གཉིས་དང༌། མགོ་རྒྱལ་བོལ་གོང་གཉིས་དང༌། མཆུ་དང་དབོ་རྣམས་དཔུང་པ་གཉིས་ལ་སྟེ། སྔར་བཤད་པ་རྣམས་ཀྱི་རིག་པས་ཤེས་སོ། །རྐང་ལག་གི་སོར་མོའི་ཚིགས་དྲུག་ཅུ་ལ་ཀླུ་དང་རབ་གཏུམ་མ། ཐབས་ཤེས་ཀྱི་དབྱེ་བས་ཕན་ཚུན་དུ་ཕྱེ་བས་དངོས་སུ་ལྷ་བཞི་བཅུ་འབྱུང་ལ། དེ་རྣམས་ཀྱི་གདན་ཉི་ཤུ་བསྣན་པས་འཁོར་ལོའི་གྲངས་དང་མཐུན་པའི་དྲུག་ཅུ་པོ་རྣམས་ཐིམ་པར་བྱེད་པ་ཡིན་ནོ། །གཞན་དག་སྐྲ་དང་བ་སྤུ་ལ་གྲུབ་པ་འབྱུང་པོ་སོགས་ཐིམ་པའི་རྣམ་གཞག་མཛད་ནའང༌། དེ་དག་བསྐྱེད་ཆོག་གིས་བསྐྱེད་པ་མ་ཡིན་པས་ངེས་པར་དགོས་པ་ནི་མ་ཡིན་ལ། གཟུངས་མ་རྣམས་དང༌། འདོད་ཕྱིར་འདོད་རྣམས་བསྐྱེད་ཆོག་གིས་བསྐྱེད་མོད་ཀྱང༌།
ཞོར་བྱུང་གི་ལྷ་ཡིན་པའི་ཕྱིར་རང་རང་གི་བསྐྱེད་གཞི་དང་ལྷན་ཅིག་ཏུ་བསྡུ་བའམ། སོ་སོའི་གཞལ་མེད་ཁང་བསྡུ་བའི་སྐབས་སུ་བསྡུའོ། །བདེ་ཆེན་འཁོར་ལོའི་གཞལ་མེད་ཁང་བསྡུ་བར་གསུངས་པས་མཚོན་ཏེ། ཐུགས་དཀྱིལ་དང་གསུང་དཀྱིལ་རང་རང་གི་ལྷ་རྣམས་དང་ལྷན་ཅིག་དང༌། སྐུ་དཀྱིལ་ནི་ཚེས་ལྷ་རྣམས་དང་ལྷན་ཅིག་བསྡུ་ལ། བསྲུང་འཁོར་ཁོར་ཡུག་དང་བཅས་པ་སྒོ་སྐྱོང་ཀླུ་རབ་གཏུམ་རྣམས་དང་ལྷན་ཅིག་བསྡུའོ། །གཙོ་བོ་གཙུག་ཏོར་གྱི་འཁོར་ལོར་བསྡུ་ཞེས་གཞན་མང་པོ་དག་བཞེད་ཀྱང༌། མདུན་བསྐྱེད་དཀྱིལ་འཁོར་གྱི་གཙོ་བོ་ཡིན་ན་ནི། དམིགས་གསལ་མེད་པའི་བདེ་ཆེན་འཁོར་ལོའི་ལྷ་ཡིན་པའི་ཕྱིར། དེ་ལྟར་ཡང་ལེགས་མོད་ཀྱི་བདག་བསྐྱེད་ཀྱི་སྐབས་སུ་དེ་ལྟར་འཆད་པ་ནི། རང་ཉིད་ཡོངས་རྫོགས་བསྡུས་ན་གང་དུ་བསྡུ་བའི་གཞི་མེད་པའི་ཕྱིར། ཚིག་རྐྱང་པར་ཟད་ལ། འོད་གསལ་གྱི་རིམ་པས་གཙུག་ཏོར་གྱི་འཁོར་ལོར་བསྡུས་པར་འདོད་པ་ཡིན་སྲིད་ཀྱང༌། དེ་ལྟར་བསྡུས་ཟིན་པ་ལ་གནས་སོ་སོར་སླར་ལྷ་རྣམས་སྡུད་པར་བྱེད་མི་ཐུབ་སྟེ། བསྡུ་བའི་གཞི་མེད་པའི་ཕྱིར་དེ་ནི་མི་འཐད་ལ། སྤྱིར་ཡང་གཙོ་བོ་བསྡུ་བ་ལུགས་འདི་ལ་མི་དགོས་པར་མངོན་ནོ། །ཡང་རང་ལུས་ཕལ་པ་རྩ་འཁོར་ལས་བྱུང་བའི་རྡོ་རྗེ་དང་བཅས་པ་བཞག་ནས། ཡེ་ཤེས་ཀྱི་ལྷ་དུས་ཀྱི་འཁོར་ལོ་གཙུག་ཏོར་དུ་བསྟིམ་པ་ཡིན་ཟེར་ན་ཡང་རང་ཐ་མལ་དུ་འགྱུར་བས་ཤིན་ཏུ་མི་འཐད་ལ། རང་དུས་འཁོར་གྱི་ང་རྒྱལ་དང་རྣམ་པ་ལ་གནས་ན་ནི། བསྡུས་སོ་བསྡུས་སོ་ཞེས་ལན་བརྒྱ་སྟོང་དུ་བརྗོད་ཀྱང་མ་བསྡུས་པ་ཁོ་ནར་རིག་པར་བྱའོ།། གཞན་གྲུབ་པ་དང་འབྱུང་པོ་སྤུ་ལ་བསྡུ་བ་སོགས་བླ་མའི་མན་ངག་ཡིན་ན་དེ་བཞིན་དུ་བྱས་ཀྱང་རུང་མོད་རྩོད་པས་ཅི་ཞིག་བྱ།། །།གསུམ་པ་གཏོར་མའི་རྣལ་འབྱོར་ནི།
ཐུན་མཚམས་ཀུན་ཏུ་འགྲུབ་ན་ལེགས་ལ། གལ་ཏེ་མ་གྲུབ་ན་ཐིག་མཐའ་གང་རུང་ངམ། གཉིས་ཀ་ལ་བྱའོ། །དེ་ལ་གཏོར་མ་བྱིན་གྱིས་བརླབ་པ། མགྲོན་སྤྱན་འདྲེན་པ། གཏོར་མ་འབུལ་ བའོ། །དང་པོ་ནི། །བསངས་སྦྱངས་སྔོན་དུ་འགྲོ་བ་སྟེ། བསང་བའི་སྔགས་ཡི་གེ་དྲུག་པས་བྱས་ཀྱང་ལེགས་པར་འགྱུར་ལ། རྫས་མཐའ་དག་སྦྱང་བའི་སྔགས་ཨོཾ་བཛྲ་དྷཱ་ཏྭཱི་ཤྭ་རཱི་སོགས་ཀྱིས་བསང་བའི་སྲོལ་ཡོད་པའང་ཅུང་ཟད་རྒྱས་པའི་སྐབས་སུ་ཤིན་ཏུ་འབྲེལ་ལ། སྤྱིར་ནི་སྔགས་དེ་མཆོད་པ་དང༌། གཏོར་མ་དང༌། བཟའ་བ་སོགས་ལོངས་སྤྱོད་ཀྱི་རྫས་ཐམས་ཅད་སྦྱོང་ཞིང་བྱིན་གྱིས་རློབ་པའི་སྔགས་ཡིན་པས། སྔགས་དེ་ཁོ་ནས་ཀྱང་གཏོར་མ་ལ་སོགས་པའི་བྱིན་རླབས་ཡོངས་སུ་རྫོགས་པར་འགྱུར་རོ། །འོན་ཀྱང་ད་ལྟ་ལག་ལེན་དུ་གཏོར་མ་བྱིན་རླབས་རྒྱས་པའི་སྐབས། ཐོག་མར་གཏོར་རྫས་ལ་དམིགས་ནས་སྔགས་དེས་དངོས་པོ་རྣམས་ཡིད་ཀྱིས་བྱིན་གྱིས་བརླབས་པའི་ཡུལ་དུ་དམིགས། དེ་ནས་ཡི་གེ་དྲུག་པས་བསངས། སྭ་བྷཱ་ཝས་སྟོང་པར་སྦྱངས། འབུད་པ་དང་འབར་བའི་གཞི་ས་བོན་ལས་རླུང་དང་མིའི་དཀྱིལ་འཁོར་བསྒོམ། རྒྱལ་མཚན་ནི་གཡོ་བའི་བྱེད་ལས་དང༌། འབར་བ་དང་མེ་ལྕེ་ཡང་མེའི་བྱེད་ལས་སོ། །ཁ་ཅིག་ཡཾ་རཾ་གཉིས་མེ་རླུང་གི་མིང་ཡིག་དང་པོར་འདོད་པ་ནི་ཏོམ་ཆོལ་དུ་སྣང་ལ། མིང་ཡིག་དང་པོ་ལས་དངོས་པོ་བསྐྱེད་པ་ནི་མིང་རྐྱང་ཙམ་དུ་གྲུབ་པ་མཚོན་བྱེད་ཡིན་ཟེར་བ་སོགས་ཀྱང་འབྲེལ་མེད་དོ།། སྣོད་ཀྱི་རྟེན་ནི། མི་མགོའི་སྐྱེད་པུ་གསུམ་ཡིན་ལ། གསུམ་དུ་བྱེད་པ་ནི་འཇིག་རྟེན་བྱ་བ་དང་མཐུན་པའི་ཕྱིར་དང༌། རྡོ་རྗེ་གསུམ་གྱི་རང་བཞིན་དུ་རྟོགས་པའི་ཕྱིར་རོ། །མི་མགོ་ཨ་ལས་
བསྐྱེད་པ་ནི། ཨ་ནི་ཡིག་འབྲུ་ཀུན་གྱི་རྩ་བ་ཡིན་ཡང༌། དམ་རྫས་ཀྱིས་ཀྱང་གསུང་རྡོ་རྗེ་མཆོད་པས་དམ་རྫས་ཀྱང་གཞི་ཨ་ཡིག་དེ་ལ་ཐུག་པའི་ཕྱིར་རོ། །སྣོད་ནི་ཐོད་པ་སྟེ་ཀ་པཱ་ལ་ཞེས་པའི་དོན་བདེ་བ་སྐྱོང་བར་འགྱུར་བའི་ཕྱིར་བདེ་ཆེན་མཚོན་ཞིང༌། དགེ་བ་བསགས་པ་མིའི་ལུས་ཀྱི་རྩེ་མོ་མཆོག་ལས་བྱུང་བ་དང༌། རྡོ་རྗེ་ཁྲོ་བོ་དང་མཁའ་འགྲོ་མ་རྣམས་དགྱེས་པའི་སྣོད་ཀྱི་ཕྱིར་རོ། །ས་བོན་ཨོཾ་ལས་བསྐྱེད་པ་ནི། ཨོཾ་ནི་རབ་བསྔགས་དགེ་བ་དང་བཀྲ་ཤིས་པའི་དོན་ཏེ། དེའི་ནང་གི་རྫས་རྣམས་སྐྱོན་སྤངས་ཤིང་ནུས་པ་དགེ་ཞིང་ཕུན་སུམ་ཚོགས་པ་དང་ལྡན་པར་བྱེད་པའི་དོན་ཡིན་ནོ། །ནང་དུ་བདུད་རྩི་ལྔའི་དམ་རྫས་ལ་ཨ་ཨི་རྀ་ཨུ་ལྀ་ལས་བསྐྱེད་པ་ནི་ཕུང་པོ་ལྔའི་དངས་མ་ཡིན་པའི་དོན་དང༌། རྒྱལ་བ་རིགས་ལྔའི་དམ་རྫས་ཡིན་པའི་འབྲེལ་བས་བཞག་གོ །བདུད་རྩིའི་དོན་ནི། རང་གི་ལུས་ལ་གནས་པའི་ལྔ་པོ་དེ་དངས་མར་འགྱུར་ན་འཆི་བ་མེད་པར་འགྱུར་ཞིང༌། སྦྱངས་རྟོགས་སྤར་གསུམ་ནུས་པས་བྱིན་གྱིས་བརླབས་ཏེ་བརྟེན་ན། ཕྱི་རོལ་ཀྱི་དེ་དག་ལ་ཡང་ནུས་པ་རྗེས་མཐུན་པ་ཡོད་པ་དང་ནང་གི་དེའི་རིགས་སུ་རྟོགས་པས་སོ། །རྒྱུད་གཞན་ལས་བདུད་རྩི་ལྔ་པོ་ཡུམ་ལྔའི་དམ་རྫས་སུ་བྱེད་པ་མང་ཡང༌། རྒྱུད་འདིར་བདུད་རྩི་ལྔ་སངས་རྒྱས་དང༌། ཤ་ལྔ་ཡུམ་གྱི་དམ་རྫས་སུ་གསུངས་པ་མང་ངོ༌། །ཤ་ལྔ་པོ་དབྱངས་རིང་པོ་ལ་ལས་བསྐྱེད་པ་ནི་ཡུམ་ལྔའི་དམ་རྫས་དང༌། སྲོག་ཆགས་ལྔ་པོ་དེ་དག་ཁམས་ལྔ་སོ་སོའི་རང་བཞིན་ཅན་ཡིན་པ་མཚོན་ཞིང༌། ཤ་ལྔ་ལ་སྒྲོན་མེ་ལྔ་ཞེས་བྱ་བ་ནི། དངོས་གྲུབ་གསལ་བར་བྱེད་པས་སྒྲོན་མེ་ཞེས་ཐམས་ཅད་འཆད་མོད། ཚིག་དེ་ཙམ་གྱིས་དོན་མི་གོ་བས་འདི་ལྟར་བྱ་སྟེ། འཇིག་རྟེན་དུ་ཤ་ཟོས་པས་སྟོབས་དང་
མདངས་རྒྱས་པར་བྱེད་དོ་ཞེས་གྲགས་པ་ལྟར་དོན་ལ་ཤའི་དམ་རྫས་ཀྱིས་ལྷ་རྣམས་མཉེས་པར་བྱས་པས་གང་ཞིག་ཐོབ་པའམ་འཐོབ་པར་འགྱུར་བའི་དངོས་གྲུབ་དེ་ཡང་སྟོབས་དང་ལྡན་པས་གསལ་བ་སྟེ་གཟི་བརྗིད་ལྡན་པར་བྱེད་ཚུལ་གསང་འདུས་ལས་གསུངས་པ་ལྟ་བུ་ཡིན་ལ། དོན་དམ་པར་ཤ་ལྔའི་བརྡས་མཚོན་པ་འབྱུང་བ་ལྔའི་དངས་མ་སྟོབས་སུ་གྱུར་པས་མི་གསལ་བ་ཤ་ཁྲག་གི་ལུས་དག་སྟེ་ཡེ་ཤེས་ཀྱི་ལུས་འོད་འབར་ཞིང་གསལ་བ་ཐོབ་པའི་དོན་ནོ། །དེ་ཉིད་ལ་ལྕགས་ཀྱུ་ལྔ་ཞེས་བྱ་བ་ནི། དངོས་གྲུབ་མྱུར་དུ་འགུགས་པའི་དོན་ཏེ། དེ་ལྟར་ན་རྫས་བཅུ་པོ་དེ་རྣམས་ནི་སྤྱི་ཁྱབ་ཀྱི་མཚོན་དོན་རགས་པ་ཕུང་ཁམས་རྣམས་མཚོན་བྱེད་ཡིན་ལ། གཞན་རིགས་སུམ་ཅུ་རྩ་དྲུག་གི་སྐབས་སུ་བཤད་པ་ལྟར། དམ་རྫས་ཀྱི་ཁྱད་པར་རྣམ་པ་མང་པོ་དེ་དག་ཡིན་ནོ། །རྫས་རྣམས་ཞུ་ནས་གཅིག་ཏུ་འདྲེས་པ་ཙམ་ནི་འོག་གཞི་མེ་རླུང་གཉིས་ཀྱི་བྱེད་པ་ཡིན་ལ། དེ་ནས་ཐལ་མོ་ གཡོན་པ་བསྟན་ཏེ། ལག་མཐིལ་དུ ་གནས་པ་སྐུ་རྡོ་རྗེའི་ངོ་བོ་ཨོཾ་ཡིག་དཀར་པོའི་འོད་ཟེར་རྫས་ལ་ཕོག་པས་རྫས་ངན་པའི་རྣམ་པ་སྦྱངས་ཏེ། ཁ་དོག་དང་རྣམ་པ་ཕྱོགས་མཚུངས་པ་ལ་དྲི་རོ་མདོག་དབྱིབས་ངན་པ་རྣམས་མེད་པ། ཡིད་དུ་འོང་བའི་རྣམ་པར་གྱུར་པར་བསམས་ལ་སྔགས་དང་པོ་བརྗོད་ དོ། །དེ་བཞིན་དུ་ཐལ་མོ་གཡས་བསྟན་ཞིང༌། གསུང་རྡོ་རྗེ་ཨཱཿཡིག་གི་འོད་ཟེར་དམར་པོ་ཕོག་པས་རི་བོ་དང་རྒྱ་མཚོ་ལྟ་བུར་རྒྱ་ཆེར་འཕེལ་བར་བསམ། སྔགས་དང་ཕྱག་རྒྱ་ཏིང་ངེ་འཛིན་གསུམ་ཀར་དེ་རྣམས་ཀྱིས་རིགས་འགྲེ་སྟེ། ལག་པ་གཉིས་ཐལ་མོ་ཁ་སྦྱོར་བསྟན་ཞིང༌། ཐུགས་རྡོ་རྗེ་ཧཱུཾ་གི་འོད་ཟེར་མཐིང་ཀ་ཕོག་པས་ཤིན་ཏུ་འོད་འབར་ཞིང༌། མེ་ལྕེ་ལྟར་གསལ་བ་རེག་བྱ་ཡང་བ་ཁ་དོག་དྲི་རོ་ཕུན་སུམ་ཚོགས་པར་གྱུར་པའོ། །ཡང་
མཁའ་ལྡིང་བྱ་ཁྱུང་གི་ཕྱག་རྒྱ་སྟེ། ལག་པ་གཉིས་བསྣོལ། མཐེ་ཆུང་གཉིས་འདུད། མཐེ་བོང་གཉིས་ལག་མཐིལ་དུ་གཏད། སོར་མོ་ལྷག་མ་གསུམ་གཤིབས་ཏེ་བརྐྱང་བ། ལག་མཐིལ་རྒྱབ་སྤྲད་པའི་འཛོམ་དུ་ཡེ་ཤེས་རྡོ་རྗེ་ཧོཿཡིག་ལས་འཕྲོས་པའི་འོད་ཟེར་སེར་པོ་ཕོག་པས་ནུས་མཐུ་ཕུན་སུམ་ཚོགས་པ་བསམ་གྱིས་མི་ཁྱབ་པའི་བདུད་རྩི་སྟེ། བརྟན་པའི་དངོས་པོ་ལྗོན་ཤིང་སོགས་ལ་བླུག་ན། བསྐམས་པ་གསར་དུ་སྐྱེ་ཞིང༌། རློན་པ་མི་སྐམ་པ་དང༌། ལྕགས་སོགས་ཁམས་ལ་རག་ན་གསེར་ལ་སོགས་པར་འགྱུར་བ་དང༌། གཡོ་བ་སྲོག་ཅན་གྱིས་ཟོས་འཐུངས་བསྟེན་ན། ཚེ་ཉི་ཟླ་དང་མཉམ་པར་བྱེད་པའི་མཐུ་ཅན་ངོ་བོ་དོན་དམ་ཆོས་ཉིད་ཀྱི་ཡེ་ཤེས་ཡིན་པ་ལ་རྣམ་པ་དེ་ལྟ་བུའི་བདུད་རྩིའི་མཚན་ཉིད་ཅན་དུ་གྱུར་པར་མོས་པའོ། །ཉི་ཟླ་སྒྲ་གཅན་དུས་མེ་བསམ་པ་ནི། རྡོ་རྗེ་བཞིའི་གདན་གྱི་དབང་དུ་བྱས་པའང་ཡིན་ལ། རྡོ་རྗེའི་ལུས་སུ་བྱེད་པའི་རྒྱུ་ཡང་ཁམས་དངས་མ་བཞི་པོ་དེ་དག་གིས་བྱེད་པའི་ཕྱིར་འདིར་ཡང་བདུད་རྩིའི་རྒྱུར་སྨོས་པའོ། །བྱིན་རླབས་རྒྱས་བསྡུས་ཀྱི་དབྱེ་བ་སོགས་དཀྱུས་ན་གསལ་ལ་གོང་དུའང་བཤད་ཟིན་ཏོ།། །།མགྲོན་སྤྱན་འདྲེན་པ་ནི། སངས་རྒྱས་ཡབ་ཡུམ་ཞེས་སོགས་སོ། །དེ་ལ་སྲས་བཅས་ཞེས་པའི་སྲས་ནི་སེམས་དཔའ་ཡབ་ཡུམ་དང་ཁྲོ་བོ་ཡབ་ཡུམ་རྣམས་ཡིན་ལ། འཁོར་གཡོག་ནི་རྣལ་འབྱོར་མ་དང༌། ལྷ་ཆེན་ནས་ཁོར་ཡུག་གི་འབྱུང་པོའི་བར་རོ། །དེ་རྣམས་ཉིད་གྲོགས་དང་བཅས་གཉེན་གྱིས་བསྐོར་ཞེས་དང༌། རང་རང་གི་འཁོར་ལྷ་དང་ལྷ་མོ་རྣམས་ཀྱིས་མཆོད་པར་བྱེད་པ་དེ་ཐམས་ཅད་ཀྱང་ཀུན་ཁྱབ་ཏུ་བྱིན་གྱིས་རློབ་པ་པོ་གཙོ་བོ་རྡོ་རྗེ་སེམས་དཔའ་ཉིད་དང་བཅས་པ་སྤྱན་འདྲེན་པའི་དོན་ཡིན་ཏེ། དེ་ལ་སྤྱིར་རྒྱུད་སོ་སོ་ལས་གཏོར་མའི་
རྣམ་གཞག་མང་དུ་འབྱུང་ཡང༌། རྒྱུད་འདིའི་ལུགས་ཀྱི་ཞི་བ་ལ་བཤོས་གཙང་དང༌། ཁྲོ་བོ་ལ་གཏོར་མ་ཞེས་གྲགས་ཤིང༌། གཏོར་སྔགས་རྣམས་ཀྱང་ཁྲོ་བོ་ནས་འཇིག་རྟེན་པའི་བར་དུ་གསལ་བར་གསུངས་ཀྱི། ཞི་བ་ལ་གསལ་པོར་མ་གསུངས་པ་ནི་གཙོ་ཆེ་བའི་དབང་དུ་མཛད་པའོ། །ཕྱག་རྡོར་སྟོད་འགྲེལ་ལས། གཙོ་བོ་ཧེ་རུ་ཀ་ལ་གཏོར་མ་འབུལ་བ་ཤིན་ཏུ་གསལ་བས་དེ་དང་མཚུངས་པར་འདིར་ཡང་གོང་མ་རྣམས་ཀྱི་མན་ངག་ཕྱག་ལེན་དུ། ཨོཾ་ཨཱཿཧཱུཾ་ཧོཿཤྲཱི་ཀཱ་ལ་ཙཀྲ་བཛྲ་བྷ་ར་བ་བྷཻ་སྐ་རཱ་ཡ་ས་པ་རི་ཝ་རེ་བྷྱཿཨི་དཾ་བ་ལིང་སོགས་སྦྱོར་བ་ནི་ཤིན་ཏུ་ལེགས་ལ། མཁའ་འགྲོ་མའི་གཏོར་སྔགས་ཀྱང་དེ་ལ་འཐུས་པར་མཛད་པའི་སྲོལ་ཞིག་རྗེ་ཕྱོགས་པ་མན་ཆད་ལ་བྱུང་འདུག་ཀྱང༌། རྒྱལ་མཆོག་ཀུན་མཁྱེན་ཆེན་པོའི་གསུང་ལ་མེད་ཅིང༌། མཁའ་འགྲོ་མའི་གཏོར་སྔགས་ནི་ཡུལ་བདག་དང་འདྲ་ཡི། སྡེ་དྲུག་དང་མི་འདྲ་བས་ལོགས་སུ་བྱས་ན་ལེགས་སོ། །སྡེ་དྲུག་སྲུང་མ་དྲུག་ཅུའི་གཏོར་མ་ནི། སྲུང་འཁོར་གྱི་སྐབས་སུ་བྱེད་པ་དེ་ཁོ་ན་སྟེ། འཇིག་རྟེན་འདས་པའི་གཏོར་མ་གཞན་ཡོད་ན་ཡང་སྐབས་དེར་ཕུལ་ནས། དེ་ནས་མཁའ་འགྲོ་མའི་གཏོར་མ་ དང༌། །འབྱུང་པོ་སྤྱི་གཏོར་གཞན་དང༌། ཡུལ་བདག་གྲོང་བདག་གི་གཏོར་མ་རྣམས་ཀྱང་འབུལ་ལོ། །སྲུང་མ་དྲུག་ཅུའི་གཏོར་མ་ཡན་ཆད་མེད་མི་རུང་ཡིན་ལ། ཕྱི་མ་རྣམས་རང་གི་མོས་པ་དང་བསྟུན་པར་བྱའོ། །ཚོགས་ཀྱི་བཟའ་བ་དང་མ་འབྲེལ་ན། དེ་རྗེས་རྡོ་རྗེའི་གླུ་བླངས་ཤིས་བརྗོད་དང་སྨོན་ལམ་བྱས་ཏེ་ཡིག་བརྒྱ་བཟོད་གསོལ་གྱི་མཐར་གཏོར་མགྲོན་རྣམས་གཤེགས་སུ་གསོལ་བ་ཡིན་ནོ།། །།བཞི་པ་ཁ་ཟས་ཀྱི་རྣལ་འབྱོར་ནི། ཁ་ཟས་གཏོར་མ་ལྟར་བྱིན་གྱིས་
བརླབས། ཕུད་བཅད་དེ། ཨོཾ་ཨཱཿཧཱུཾ་གུ་རུ་བུདྡྷཱ་བོ་དྷི་ས་ཏྭེ་བྷྱོ་བཛྲ་ནཻ་ཝི་ཏྱེ་ཧཱུཾ། ཞེས་བླ་མ་ཡི་དམ་སངས་རྒྱས་བྱང་ཆུབ་སེམས་དཔའ་ཐམས་ཅད་ལ་ཕུལ། དེ་རྗེས་ཨོཾ་ཧ་རི་ཏྱཻ་པིཎྜ་ཀེ་པྲ་ཏཱི་ཙྪ་སྭཱཧཱ་ཞེས་པས་འཕྲོག་མ་བུ་དང་བཅས་པ་ལ་ཆང་བུ་གཉིས་དང༌། ཨོཾ་སརྦ་དཱུ་ཏཱི་ཀེ་ཨ་གྲཱ་གྲ་སཾ་པྲ་ཏཱི་ཙྪ་སྭཱཧཱ། ཞེས་ཕོ་ཉ་སོགས་འབྱུང་པོ་ཕུད་ལ་དབང་བ་རྣམས་ལ་སྦྱིན། དེ་ནས་རང་ཉིད་དུས་ཀྱི་འཁོར་ལོ་ལྟེ་བའི་ཧོཿལས་གཏུམ་མོ་འབར་བ་དང༌། གཤེགས་གསོལ་གྱི་སྐབས་སུ་བཤད་པ་ལྟར་གནས་དེ་དང་དེ་དག་ཏུ་ལྷ་རྣམས་གསལ་ཐེབས་ན་རབ། མིན་ནའང་བཞུགས་པར་མོས་པ་ཙམ་བྱ་ལ། ཡང་ན་ཕུང་ཁམས་ཐམས་ཅད་གདོད་ནས་གྲུབ་པའི་ལྷ་སུམ་ཅུ་རྩ་བདུན་ཡེ་ཤེས་ཀྱི་འཁོར་ལོར་མོས་པས་ཀྱང་ཆོག གང་ལྟར་ཡང་ནང་གི་སྤྱིན་སྲེག་གི་ཚུལ་གྱིས་སྡིག་དང་མ་འདྲེས་ཤིང༌། རྒྱལ་བའི་བཀས་གནང་བའི་བཟའ་བཏུང་ལ་ལོངས་སྤྱད་པར་བྱའོ།། མཇུག་ཏུ་སྨོན་ལམ་བཏབ། གལ་ཏེ་ཞོར་ལ་དཔའ་བོའི་སྟོན་མོའམ། དཔའ་མོའི་སྟོན་མོ་རྗེས་མཐུན་པ་གྲུབ་པར་བྱེད་ན། མཎྜལ་གྱི་མཆོད་བསྟོད་སོང་མཚམས་ཉིད་ནས་དཀྱིལ་འཁོར་མ་བསྡུས་པ་ལ་བྱས་ན་ལེགས་ཏེ། དེ་མ་ཐག་གཏོར་མ་བཤམས་ནས་གཏོར་བསྔོ་བྱ། ཡང་ན་མཎྜལ་མཆོད་ཆོག་དང་བདག་བསྐྱེད་བསྡུས་ཀྱང་རུང་སྟེ། གཏོར་བསྔོ་སོང་མ་ཐག་ཏུ། ཁ་ཟས་བྱིན་གྱིས་བརླབས། ཕུད་དང་པོ་གཏོར་མ་ལ་སྦྲོན་པའམ། སྣོད་གཞན་དུ་སྤྱི་བུངས་ཀྱི་ཚུལ་བྱས་ཏེ། གཏོར་མའམ་མཎྜལ་ཡོད་ན་ཡང་མཎྜལ་གྱི་མདུན་དུ་བཞགགྲོགས་དང་བཅས་པ་ཡིན་ན་ཚོགས་བསྲེ་བའི་དྲི་བ་དྲི་ལན་གྱིས་དྲངས། སྒོས་ཀྱི་ཟས་ཕུད་ཀྱང་བཅད། རང་གཅིག་པུ་ཡིན་ན་དེ་གཉིས་ཀ་མི་དགོས། ཕུད་ལ་མཆོད་སྔགས་ཆེན་མོའམ།
གཏོར་སྔགས་ཀྱིས་ཕུལ། དེ་རྗེས་སྔར་བཞིན་ཆང་བུ་སྦྱིན་ཞིང་ལོངས་སྤྱད་ལ། ལྷག་མ་བསངས་སྦྱངས། ཨོཾ་ཨཱཿཧཱུཾ་ཧོས་བྱིན་གྱིས་བརླབས། སྤྱི་འགྲོས་ལྟར་འབར་བའི་ཕྱག་རྒྱ་དང་ཁ་ཁྲུ་བཏབ་པ་བྱས་ཀྱང་ཆོགགཅིག་ཏུ་ངེས་པར་དགོས་པའང་མིན། ཨོཾ་ཁ་ཁ་ཁཱ་ཧི་ཁཱ་ཧི་ཨུཙྪིཥྟ་བ་ལིཾ་ཨུཙྪིཥྟ་བྷཀྵ་བྷཀྵ་ཀ་སྭཱཧཱ། ཞེས་པས་ལྷག་མ་ཕྱི་རོལ་ཏུ་དོར་བ་དང་ལྷན་ཅིག་མཁའ་འགྲོ་མ་དང་འབྱུང་པོ་སྤྱི་གཏོར་སོགས་ཀྱང་དོར། དེ་རྗེས་སྡེ་དྲུག་གི་གཏོར་མ་རྣམས་ཀྱང་འདོད་དོན་གསོལ་བའི་ཚིག་དང་བཅས་ཏེ་ཕྱིར་བཏང་ ངོ༌། །རྡོ་རྗེའི་གླུ་དང་སྟེང་ན་བྱང་ཆུབ་སེམས་དཔའ་སོགས་སྨོན་ལམ་དང་ཤིས་པ་བརྗོད་པ་བྱས། ཡིག་བརྒྱ་བཟོད་གསོལ་གཤེགས་གསོལ་རྣམས་སོང་བའི་རྗེས་སུ་སྔར་བདག་བསྐྱེད་ཀྱི་དཀྱིལ་འཁོར་མ་བསྡུས་ན་ལུས་ལ་བསྡུ་ཞིང༌། བསྡུས་ཟིན་ན་གཏོར་མགྲོན་གཙོ་བོ་ཡེ་ཤེས་འཁོར་ལོ་དང་བཅས་པ་རང་ཉིད་ལ་བསྟིམ། སླར་ཡང་སྨོན་ལམ་དང་ཤིས་བརྗོད་རྒྱས་པར་བྱ། ལག་ལེན་དུ། བསོད་ནམས་འདི་ཡིས་འགྲོ་རྣམས་དུ་བ་ལ་སོགས་ཞེས་པ་ནས། བདག་ལ་རྗེས་སུ་འཛིན་པའི་རྒྱུར་གྱུར་ཅིག་ཅེས་པའི་བར་དེ་མཛད་དོ།། །།ལྔ་པ་སྤྱོད་ལམ་ཀྱི་རྣལ་འབྱོར་ནི། དུས་ཐམས་ཅད་དུ་སྣང་བ་ཐམས་ཅད་སྒྱུ་མ་ལྟ་བུ་དང༌། བྲག་ཆ་ལྟ་བུར་ཤེས་ཤིང༌། གཟུགས་སུ་སྣང་བ་ཐམས་ཅད་ལྷ། སྒྲ་གྲག་ཚད་སྔགས། ཡིད་ཀྱི་འཆར་སྒོ་ཐམས་ཅད་ཡེ་ཤེས་ལྔའི་ངོ་བོར་དག་པ་དྲན་པར་བྱའོ། །ཉལ་བའི་ཚེ་གནས་དྲུག་ཏུ་རྡོ་རྗེ་དྲུག་བཀོད་དེ། དེ་ཡང་ལྟེ་བར་ སྙིང་གར་ཧཱུཾ། མགྲིན་པར་ཧྲྀཾ། དཔྲལ་བར་ཧྲཱིཾ། གཙུག་ཏོར་དུ་ཧྲཾ། གསང་བར་ཧྲཱཿསྟེ་ཡན་ལག་དྲུག་གོ །དེ་ནས་འོད་གསལ་གྱི་གདམས་ངག་གིས་གཉིད་ལོག་པར་བྱ་ཞིང༌།
སད་པའི་ཚེ་ལངས་ནས་སྣང་བ་སྒྱུ་མ་ལྟ་བུ་དང༌། བླ་མ་ཡི་དམ་དྲན་བཞིན་པས་དབང་བསྐུར་བའི་དམིགས་པ་དང་བཅས་ཏེ། ཁྲུས་ཀྱི་རྣལ་འབྱོར་ལ་སོགས་པ་བྱའོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། རྣལ་འབྱོར་ལམ་གྱི་ཡན་ལག་ཐུན་མཚམས་ཀྱི་སྤྱོད་པ་རྣམས་བཤད་པའི་སྡེ་ཚན་ཏེ་བཅུ་པའོ།། །།གསུམ་པ་གང་བསྒྲུབ་པར་བྱ་བའི་ཡུལ་དཀྱིལ་འཁོར་གྱི་རབ་དབྱེ་ལ། དཀྱིལ་འཁོར་བསྡུས་པའི་ཤིན་ཏུ་གཙོ་བོ་ངོས་བཟུང་བ་དང༌། རྒྱུད་འདི་ཉིད་ལས་འབྱུང་བའི་དཀྱིལ་འཁོར་གྱི་གྲངས་བཤད་པའོ། །དང་པོ་ནི། སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་སྒོམ་པར་དཀའ་བས་མི་ནུས་ན། ཐུགས་ཀྱི་དཀྱིལ་འཁོར་འབའ་ཞིག་བསྒོམས་པས་ཀྱང་གཞན་གསང་འདུས་ལ་སོགས་པའི་དཀྱིལ་འཁོར་རྒྱས་པ་བསྒོམས་པ་ལས་ཀྱང་ཆོ་གའི་རིམ་པ་མང་ཞིང༌། དག་བྱ་དག་བྱེད་ཀྱི་སྒོ་ནས་ཀྱང་རྒྱས་པར་འགྱུར་བ་དང༌། ཐུགས་དཀྱིལ་འབའ་ཞིག་ཏུ་དབང་བསྐུར་བ་ཐོབ་པས་ཀྱང་རྒྱུད་དོན་མཐའ་དག་སྒྲུབ་པ་ལ་དབང་བའི་རྒྱུ་མཚན་ནི་རིགས་དང་རིགས་ཅན་གྱི་སྒོ་ནས་སྐུ་གསུང་ཐུགས་ཡོངས་རྫོགས་ཀྱི་ལྷ་ཐམས་ཅད་ཐུགས་དཀྱིལ་ཉིད་དུ་འདུས་པའི་རྒྱུ་མཚན་གྱིས་ཡིན་ལ་ཚུལ་ཇི་ལྟ་བུས་འདུས་སྙམ་ན། བསྡུས་པའི་རྒྱུད་ཀྱི་རྒྱལ་པོ་ལས། དཔལ་ལྡན་རྡོ་རྗེ་ཅན་དང་ཀུན་བཟང་རིགས་ཀྱི་དབང་གིས་རྡོ་རྗེ་འཛིན་པ་ཕྱག་ན་རྡོ་རྗེར་འགྱུར། །དོན་ཡོད་གྲུབ་དང་ནམ་མཁའི་སྙིང་པོ་དྲི་མེད་ནོར་བུའི་ཕྱག་དང་ས་ཡི་སྙིང་པོ་ཡང་དག་གོ །ཕྱག་ན་འཁོར་ལོ་རྣམ་པར་སེལ་བར་འགྱུར་ཏེ་རིགས་ཀྱི་དབང་གིས་འོད་དཔག་མེད་དང་འཇིག་རྟེན་མགོན། །དཔལ་ལྡན་ཡུམ་དང་ཆོས་ཀྱི་ཁམས་ཏེ་སྒྲ་ཡི་རྡོ་རྗེ་མ་དང་རྡོ་རྗེ་དབྱིངས་ཀྱི་དབང་ཕྱུག་མ། །དཔལ་ལྡན་
སྒྲོལ་མ་རེག་བྱ་རྡོ་རྗེ་མ་སྟེ་རིགས་ཀྱི་དབྱེ་བས་གོས་དཀར་རོ་ཡི་རྡོ་རྗེ་མ། །མཱ་མ་ཀཱི་དང་གཟུགས་ཞེས་གྲགས་པར་འགྱུར་ཏེ་རིགས་ཀྱི་དབང་གིས་སྤྱན་མ་དྲི་ཡི་རྡོ་རྗེ་མ། །ཁྲོ་བོའི་དབང་པོ་རྡོ་རྗེ་ཤུགས་དང་རྒྱལ་བའི་བདག་པོར་འགྱུར་ཏེ་ཀུན་ཏུ་བཟང་པོ་དེ་ཉིད་དོ། །གཙུག་ཏོར་མི་བསྐྱོད་པ་ཉིད་འདིར་ནི་སླར་ཡང་ཤིན་ཏུ་སྟོབས་དང་དོན་ཡོད་གྲུབ་པར་རབ་ཏུ་གྲགས། རྨུགས་བྱེད་དང་ནི་ཕྱག་ན་རིན་ཆེན་དུ་འགྱུར་རིགས་ཀྱི་དབང་གིས་ཁེངས་བྱེད་དང་ནི་འོད་དཔག་མེད། །རེངས་བྱེད་དང་ནི་རྣམ་པར་སྣང་མཛད་དུ་འགྱུར་སྟོབས་ལྡན་ཕྱག་ན་རྡོ་རྗེ་དག་དང་གནོད་མཛེས་སོ། །མཁའ་སྙིང་དང་ནི་དབྱུག་པ་སྔོན་པོ་རང་བཞིན་ཡོན་ཏན་དབང་གིས་ས་ཡི་སྙིང་པོ་འདོད་པའོ། །རྣམ་པར་སེལ་དང་ཤིན་ཏུ་བརྩོན་འགྲུས་སུ་འགྱུར་རིགས་ཀྱི་དབང་གིས་འཇིག་རྟེན་མགོན་པོ་མི་གཡོ་བ། །ཡུམ་དང་ཁྲོ་བོའི་དབང་པོའི་ཕྱག་རྒྱར་འགྱུར་ཏེ་རིགས་ཀྱི་དབང་གིས་སྒྲ་ཡི་རྡོ་རྗེ་དེ་བཞིན་ཉིད། །སྟོང་པར་གྲགས་པ་ཤིན་ཏུ་སྔོན་མོ་རླུང་མེ་ཆུ་དང་ས་རྣམས་དང་པོ་མཐའ་ཡས་བརྩོན་འགྲུས་མ། །རྨུགས་བྱེད་མ་དང་ཁེངས་མ་རེངས་བྱེད་མར་ནི་རིམ་པས་རབ་ཏུ་གསལ་ཞིང་ངེས་པར་རབ་ཏུ་གྲགས། །དྲག་སྤྱན་ཆོས་ཀྱི་ཁམས་མར་འགྱུར་ཏེ་རིགས་ཀྱི་དབང་གིས་ལྕགས་སྒྲོག་མ་དང་རེག་བྱ་རྡོ་རྗེ་མ། འོད་ཟེར་ཅན་དང་དྲི་ཡི་རྡོ་རྗེར་རབ་ཏུ་འགྱུར་ཏེ་ཁྲོ་གཉེར་ཅན་དང་ཙུན་དཱར་རབ་གྲགས་པ། རིགས་ཀྱི་དབྱེ་བས་ངེས་པར་རོ་ཡི་རྡོ་རྗེ་མ་དང་གཟུགས་ཀྱི་རྡོ་རྗེར་རིམ་པས་ཤེས་པར་བྱ། འདིར་ནི་རེངས་བྱེད་དུས་མཐར་བྱེད་པ་ཉིད་དེ་སླར་ཡང་ཤིན་ཏུ་སྟོབས་དང་བགེགས་དགྲར་རབ་ཏུ་གྲགས། །རྨུགས་བྱེད་ཤེས་རབ་མཐར་བྱེད་དག་ཏུ་རབ་ཏུ་འགྱུར་ཏེ་དེ་བཞིན་ཁེངས་བྱེད་དང་ནི་པདྨའི་དགྲ། །རླུང་མེ་ཆུ་ས་ཙ་མུཎྜ་དང་ཕག་མོ་དབང་ཕྱུག་མ་དང་དེ་བཞིན་དབང་མོ་བཞི་པ་སྟེ། །དྲི་
དང་གཟུགས་དང་རོ་དང་རེག་བྱ་ཞེས་པ་གཡོ་བ་འཕྲོག་བྱེད་ལྷ་མིན་མེར་ནི་གནས་པ་ཡང༌། །ཚངས་པ་དང་ནི་རྣམ་པར་སྣང་མཛད་དུ་འགྱུར་རིགས་ཀྱི་དབང་གིས་རྒྱ་མཚོ་དག་དང་འོད་དཔག་མེད། །མེ་དང་དཔལ་ལྡན་ཕྱག་ན་རིན་ཆེན་དུ་འགྱུར་རླུང་དང་དོན་ཡོད་གྲུབ་པ་དག་ནི་དེ་བཞིན་ཉིད། །མི་བསྐྱོད་པ་དང་ལྷ་མིན་དགྲ་བོར་འགྱུར་ཏེ་རྒྱལ་བའི་བདག་པོ་དང་ནི་བདེ་བྱེད་རབ་ཏུ་གྲགས། །རྣམ་པར་སེལ་བ་གང་དེ་བརྒྱ་བྱིན་དུ་འགྱུར་འཇིག་རྟེན་མགོན་པོ་ཚོགས་ཀྱི་བདག་པོ་དེ་བཞིན་ཉིད། །ས་ཡི་སྙིང་པོ་གདོང་དྲུག་པར་འགྱུར་དཔལ་ལྡན་མཁའ་སྙིང་ལྷ་མིན་བདག་པོར་རབ་ཏུ་གྲགས་པ་ཡིན། དཔལ་ལྡན་ཕྱག་ན་རྡོ་རྗེ་དུས་སུ་འགྱུར་ཏེ་དྲུག་པ་ཀུན་ཏུ་བཟང་པོ་ནོར་གྱི་བདག་པོའོ། རིག་མ་དྲུག་དང་རྡོ་རྗེ་དྲུག་ནི་རང་བཞིན་ཡོན་ཏན་དབང་གིས་དེ་རྣམས་རང་རང་ཕྱག་རྒྱ་སྟེ། རིག་མ་ཕྱག་རྒྱ་ལ་སོགས་ཉི་མ་ལྷ་ཡི་མཆོག་གི་བདག་རྣམས་དཀར་པོ་ནག་པོ་རྫོགས་པའོ། དེ་དག་རྣམས་ཀྱི་པད་འདབ་ལ་ནི་ནོར་ལག་ཚེ་སྟེ་མཆུ་ཡི་ཟླ་བ་ལ་སོགས་གང་དེ་རྣམས། ཟླ་བ་དྲུག་ནི་སྔ་མ་དྲུག་ཏུ་འགྱུར་ཏེ་རིགས་ཀྱི་དབང་གིས་ལྷ་མོ་རྣམས་ཀྱི་ཕྱི་མ་ཡང༌། །ཀླུ་བརྒྱད་གང་དེ་བུམ་པ་རྣམས་ཏེ་ཁྱབ་བདག་པདྨའི་འདབ་ལ་ནུས་མ་དེ་རྣམས་རབ་གཏུམ་མ། དཔལ་ལྡན་དུ་བ་བྱ་རོག་གདོང་མར་འགྱུར་ཏེ་རིགས་ཀྱི་དབང་གིས་བྱ་རྒོད་གདོང་མ་སྨིག་སྒྱུ་མ། །མཁའ་སྣང་མ་ནི་འུག་གདོང་མ་སྟེ་དཔལ་ལྡན་མར་མེ་མཁའ་འགྲོའི་བདག་པོའི་གདོང་མར་རབ་ཏུ་གྲགས། །ནག་མོ་འབར་མ་ཁྱི་གདོང་མ་སྟེ་དམར་མོ་འབར་མ་ཤིན་ཏུ་རྣམ་འགྱུར་གདེང་ལྡན་ཕག་གདོང་མ། དཀར་མོ་འབར་མ་སྟག་གི་གདོང་མར་འགྱུར་ཏེ་རིགས་ཀྱི་དབང་གིས་སེར་མོ་འབར་མ་ཅེ་སྤྱང་མ། །དེ་བཞིན་རྣམ་པ་བཅུ་ཡི་སྒེག་མོ་ལ་སོགས་ཀུན་རབ་གསལ་ཏེ་སྣ་ཚོགས་ཡུམ་གྱི་ལྷག་མའོ། །ཞེས་གསུང་
དང་སྐུའི་ལྷ་ཚོགས་རྣམས་ཐུགས་དཀྱིལ་ལ་འདུས་པར་གསུངས་ཏེ། ཙ་མུཎྜ་སོགས་བཞི་སྒྲོལ་མ་སོགས་བཞི་ལས་བྱུང་བ་དང༌། ཚངས་མ་སོགས་བཞི་དྲི་རྡོ་རྗེ་མ་སོགས་བཞི་ལས་བྱུང་བ་དང༌། ཁྱབ་འཇུག་རླུང་མེ་ཆུ་ཚངས་པ་དྲག་པོ་རྣམས་མི་བསྐྱོད་པ་སོགས་རྒྱལ་བ་རིགས་དྲུག་ལས་བྱུང་བ་དང༌། ནོར་བདག་སོགས་དྲུག་ཀུན་བཟང་སོགས་སེམས་དཔའ་དྲུག་ལས་བྱུང་བ་དང༌། འདབ་མའི་ལྷ་མོ་རྣམས་རང་རང་གི་གཙོ་བོ་ཡབ་ཡུམ་དུ་འདུས་པ་དང༌། ཁྲོ་བོ་གཙུག་ཏོར་སོགས་དྲུག་ཀྱང་མི་བསྐྱོད་པ་དང་མཁའ་སྙིང་སོགས་སུ་བསྡུས་ཤིང༌། ཁྲོ་མོ་རྣམས་ཀྱང་དེ་དག་གི་ཡུམ་དུ་འདུས་པ་དང༌། ཀླུ་རྣམས་བུམ་པ་དང༌། རབ་གཏུམ་མ་རྣམས་ནུས་མ་ལ་འདུས་ཤིང༌། འདོད་ཕྱིར་འདོད་རྣམས་ཀྱང་རང་རང་གི་སྤྲུལ་གཞི་ལ་འདུས་པའི་ཕྱིར་རོ། དེ་ལྟར་ཐུགས་དཀྱིལ་ཙམ་སྒོམ་པ་ཡང་ཡོངས་རྫོགས་ལ་བལྟོས་ནས་བསྡུས་པ་ཡིན་པས་བསྡུས་པ་ཞེས་བྱ་ཡི། སྤྱི་ལྡོག་ནས་རྒྱས་པ་ལ་དགའ་བའི་དོན་དུ་གསུངས་པ་ཡིན་ཏེ། བསྡུས་པ་ཁོ་ན་ལ་མོས་པས་ནི། ཐམས་ཅད་ཀྱང་གཙོ་བོ་ཡབ་ཡུམ་དུ་འདུས་པའི་ཕྱིར་ལྷན་སྐྱེས་སྒོམ་པ་ཡིན་ཏེ། གཞན་ཡང་ལྷ་ལྔ་དང༌། ལྷ་དགུ་ལ་སོགས་པ་ཇི་ལྟར་འོས་པའོ།། །།གཉིས་པ་རྒྱུད་འདི་ཉིད་ལས་འབྱུང་བའི་དཀྱིལ་འཁོར་གྱི་གྲངས་བཤད་པ་ནི། འོ་ན་རྒྱུད་ཀྱི་རྒྱལ་པོ་འདི་ལས་དཀྱིལ་འཁོར་གྱི་རྣམ་གྲངས་ཇི་ཙམ་བཤད་ཅེ་ན། གཙོ་བོར་སྨོས་པ་དང༌། དངོས་སུ་གསུངས་པ་དང༌། འགྲེས་བསྒྱུར་བའི་རྣམ་གྲངས་ཀྱི་དཀྱིལ་འཁོར་ཏེ་གསུམ་ལས། དང་པོ་ནི། དཔལ་དུས་ཀྱི་འཁོར་ལོ་སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་ཉིད་དང༌། སྡོམ་པ་ཆེ་ཆུང་གཉིས། གསང་བ་འདུས་པ་ལྷ་སོ་བཞི་མ། སྒྱུ་འཕྲུལ་དྲྭ་བ་ལྷ་ཞེ་དགུ་མ་སྟེ་ལྔ་པོ་
དེ་རྣམས་སོ། །དེ་དག་ནི་གཙོ་འཁོར་གྱི་ལྷ་རྣམས་གཅིག་གི་ནང་དུ་གཅིག་ཤོས་བསྡུ་མི་ནུས་པའི་ཕྱིར་ཤིན་ཏུ་མི་འདྲ་ཞིང༌། དཀྱིལ་འཁོར་གཞན་རྣམས་དེ་དག་ཏུ་འདུས་ལ། འདི་རྣམས་མ་ཚང་ན་མི་འདུ་བའི་ཕྱིར་རྩ་བའི་དཀྱིལ་འཁོར་གྱི་ཐ་སྙད་བཞག་ན་ལེགས་ལ། འོན་ཀྱང་དེ་ཐམས་ཅད་ཀྱི་ཡང་གཙོ་བོ་ནི། དུས་ཀྱི་འཁོར་ལོ་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་ཉིད་དོ། །དྲུག་བརྒྱ་སུམ་ཅུ་སོ་དྲུག་གི་ལྷ་ཚོགས་དང་ལྡན་པའི་དུས་ཀྱི་འཁོར་ལོའི་དཀྱིལ་འཁོར་སྒྲུབ་ཐབས་ལེའུར་རྒྱས་བཤད་མཛད་པ་འདི་ནི། ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་ཞེས་བྱ་ལ། དཔལ་ལྡན་རྒྱུ་སྐར་གྱི་དཀྱིལ་འཁོར་ཞེས་བྱ་བ་ནི། དཀྱིལ་འཁོར་བཅུ་གཅིག་གམ་བཅུ་གཉིས་ཡོངས་སུ་བསྡོམས་པའི་མིང་ངོ༌། །ཁྲོ་རྒྱལ་རྡོ་རྗེ་ཤུགས་སྲུང་མ་དྲུག་ཅུས་བསྐོར་བ་ལྟ་བུ་གཙོ་བོ་ཡང་ཅུང་ཟད་ཐ་དད་པ་དང༌། འཁོར་ཀྱི་ལྷ་ཟད་པར་བཅུ་དང་གཟའ་བཅུ་ལྟ་བུ་དྲུག་བརྒྱ་སུམ་ཅུ་སོ་དྲུག་གི་ལྷ་ཚོགས་དང༌། དཔལ་ལྡན་རྒྱུ་སྐར་སྟོང་དྲུག་བརྒྱ་ཉི་ཤུའི་ནང་དུ་མི་ཐེ་བ་དང༌། ལྷ་དེ་དག་བསྐྱེད་ཆོག་གི་སྒོ་ནས་བསྐྱེད་ཅིང་ངེས་པ་ཅན་གྱི་ལྷར་ཡང་མཛད་པས། འདི་ཡང་རྩ་བའི་དཀྱིལ་འཁོར་དུ་བགྲང་དགོས་པ་མ་ཡིན་ནམ་སྙམ་ན། འདི་ནི་ས་སྦྱང་བ་དང་སྲུང་འཁོར་གྱི་སྐབས་སུ་དགོས་པའི་ལྷ་ཚོགས་ཙམ་ཡིན་པས། འདི་ལ་དཀྱིལ་འཁོར་སྦྱར་བ་ནི། ཆ་ཤས་ཀྱིས་གསུངས་པའམ་དོན་ཐོབ་ཀྱིས་སྦྱར་བའི་དཀྱིལ་འཁོར་ཡིན་གྱི། དངོས་སུ་གསུངས་པའི་དཀྱིལ་འཁོར་མ་ཡིན་ལ། རྩ་བའི་དཀྱིལ་འཁོར་ཡིན་ན་དངོས་སུ་གསུངས་བའི་དཀྱིལ་འཁོར་གྱིས་ཁྱབ་པའི་ཕྱིར་དེར་མི་བགྲང་ངོ༌། །ཡང་ཟད་པར་རྣམས་ནི་ཁོར་ཡུག་གི་གྲུབ་པའི་ནང་ཚན་དང༌། གཟའ་རྣམས་ཀྱང་
ཁོར་ཡུག་གི་ལྷ་ལ་ཡོད་པས་འཁོར་ཐམས་ཅད་གསུང་དབང་གི་དཀྱིལ་ཁོར་དུ་འདུས་སམ་སྙམ་ན་དེ་ནི་མ་ཡིན་ཏེ། ཁོར་ཡུག་གི་ལྷ་གཙོ་བསྡུས་སུ་རླཽམ་པ་རྣམས་ས་བོན་ཕྱག་མཚན་ལས་བསྐྱེད་ཆོག་གིས་བསྐྱེད་པ་ནི་རྒྱུད་ཀྱི་དགོངས་པ་མ་ཡིན་ཞིང༌། འདིའི་ཁུངས་ཀྱི་རྩ་བ་དེད་ན་པཎྜི་ཏ་སྤྲོས་པ་ཅན་གྱི་བློའི་རི་མོ་ཙམ་ལ་ཐུག་འདུག་པའི་ཕྱིར། གཟའ་བཅུ་སོགས་དེའི་ནང་དུ་བཅུག་མོད་ཀྱང༌། རྒྱུད་ལས་གསུངས་བའི་ཆོས་དབྱིངས་གསུང་དབང་དང༌། དཔལ་ལྡན་རྒྱུ་སྐར་གཉིས་ཀ་ལ་ལྷ་དེ་དག་གི་མི་ཐེའོ།། །།གཉིས་པ་ནི། སྔར་བསྟན་པའི་དཀྱིལ་འཁོར་ལྔ་པོ་དེ་དག་ལས་རྣམ་པར་ཕྱེ་ན། དཀྱིལ་འཁོར་ཤིན་ཏུ་མང་པོར་འགྱུར་ཏེ། སྒྲུབ་ལེར། གཅིག་པུའི་སྐུའམ་ནུས་མ་དང་ལྡན་གནས་དགུ་དང་བཅས་ཉི་ཤུ་རྩ་ལྔའི་བདག་ཉིད་ལ་སོགས་པ། བསྒོམས་ན་ཕྱག་རྒྱ་ལ་སོགས་གྲུབ་པ་རྣམས་སུ་ངེས་པར་ཉིན་ཞག་འགའ་ཞིག་དག་གིས་ཡང་དག་འགྱུར། ཞེས་གསུངས་ཤིང༌། འགྲེལ་ཆེན་དུ། བཅོམ་ལྡན་འདས་དུས་ཀྱི་འཁོར་ལོ་དཔའ་བོ་གཅིག་པའམ་ཤེས་རབ་དང་ཐབས་ཀྱི་བདག་ཉིད་དམ། ལྔའི་བདག་ཉིད་ལ་སོགས་པར་གསུངས་པ་ནི། ཞལ་ལ་སོགས་པའི་དབྱེ་བ་རྣམས་ཀྱི་ཞི་བ་ལ་སོགས་པར་འགྱུར་རོ། །ཞེས་བརྒྱ་སུམ་ཅུ་པའི་འགྲེལ་པར་གསུངས་པས་གཅིག་པུའི་སྐུ་ལས་ཕྱེ་ན་དཔའ་བོ་གཅིག་པ་དང་ལྷན་སྐྱེས་གཉིས་ཡོད་ལ། རྩ་བའི་ཚིག་གིས་མ་ཟིན་མོད་ལྷ་ལྔ་པ་ཡང་འགྲེལ་པར་བྱུང་ཞིང༌། གཙོ་བོ་ནུས་མ་དང་བཅས་པའི་ལྷ་དགུ་དང༌། བདེ་གཤེགས་འཕར་མའི་རེ་མིག་གི་གནས་དང༌། གཙོ་བོའི་གནས་ཏེ་མདོར་ན་གཙོ་བོ་གཤེགས་པ་ཡབ་ཡུམ་བརྒྱད་དང་བཅས་པའི་ལྷ་དགུ་དང༌། ཐུགས་དཀྱིལ་ལྷ་ཉེར་ལྔ་མར་ཡོངས་སུ་གྲགས་པ་དང༌། སོགས་
ཁོངས་ནས་ལྷ་བཅུ་གསུམ་གྱི་དཀྱིལ་འཁོར་དང༌། ལྷ་བཅུ་བདུན་གྱི་དཀྱིལ་འཁོར་དང༌། བཅུ་དགུའི་དཀྱིལ་འཁོར་དང༌། ཐུགས་དཀྱིལ་ཡོངས་སུ་རྫོགས་པའི་དཀྱིལ་འཁོར་རྣམས་སྟོན་པ་སྟེ། སྐབས་གཞན་དུ་གསུངས་པ་ལ་དགོངས་སོ། །དེ་ལ་ལྷ་བཅུ་གསུམ་མ་ནི་ནང་ལེའི་བརྒྱ་ང་གཅིག་པར་གསུངས་ཏེ། གཤེགས་པ་ཡབ་ཡུམ་བརྒྱད་ཀྱི་སྟེང་དུ་ཁྲོ་བོ་བཞི་བསྣན་པས་བསྐོར་བའོ།། འདི་ནི་བྱིས་པའི་གདོན་ཞི་བྱེད་ཀྱི་སྐབས། དབང་བསྐུར་བའི་དཀྱིལ་འཁོར་དུ་ཡང་གསུངས་སོ། །བཅུ་བདུན་གྱི་དཀྱིལ་འཁོར་ནི། ནང་ལེའི་བརྒྱ་ཞེ་བདུན་གྱི་འགྲེལ་པར། ལྷ་དགུ་རྣམས་ཀྱི་དཀྱིལ་འཁོར་གྱི་ཚད་ཁྲུ་གཅིག་གོ །བཅུ་གསུམ་རྣམས་ཀྱི་ཁྲུ་གཉིས་སོ། །མི་བདག་ཅེས་པ་བཅུ་དྲུག་རྣམས་ཀྱི་ཁྲུ་བཞིའོ། །ཞེས་བཅུ་དྲུག་ཅེས་པ་འཁོར་གྱི་ལྷ་བཅུ་དྲུག་གོ །དེ་ཡང་ནུས་མ་བརྒྱད་དང་སངས་རྒྱས་ཡབ་ཡུམ་བརྒྱད། གཙོ་བོ་དང་བཅས་པས་བཅུ་བདུན་ནོ། །ལྷ་བཅུ་དགུ་མ་ནི། སྒྲུབ་ལེར་རོ་ལངས་སྒྲུབ་པའི་ཐབས་ཀྱི་དཀྱིལ་འཁོར་གྱི་སྐབས་སུ་གསུངས་ཏེ་རིགས་བཞི་ཡུམ་བཞི་ཁྲོ་བོ་བཅུས་བསྐོར་བའི་དཀྱིལ་འཁོར་གསུངས་ སོ། །ཉེར་ལྔའི་བདག་ཉིད་ནི། རྒྱུད་ལས། དུ་བ་ལ་སོགས་ལྷ་མོ་བརྒྱད་པོ་དོར་ནས་རྒྱལ་བའི་བདག་པོའི་པདྨ་དག་ལ་རེས་འགའ་ནི། །དཔལ་ལྡན་འཁོར་ལོའི་སྙིང་པོའི་དབུས་སུ་མི་ཡི་བདག་པོ་ཉི་ཤུ་རྩ་ལྔའི་བདག་ཉིད་དུ་ཡང་འགྱུར། །ཞེས་པ་སྟེ། ནུས་མ་བརྒྱད་སྤངས་པའི་གཞན་ཐུགས་དཀྱིལ་གྱི་ལྷ་རྣམས་ཚང་བ་ཡིན་ཏེ། འདི་ལ་ནི་མཚོན་སའི་དབུས་སུ་པདྨ་འདབ་བརྒྱད་བྱ་སྟེ། ཀ་བ་དང་བཅས་པའི་བདེ་གཤེགས་འཕར་མ་སྤངས་པ་འདབ་མ་བརྒྱད་ལ་རིགས་ལྔ་ཡུམ་བཞི་བཞུགས་པའོ། །ཐུགས་དཀྱིལ་ཡོངས་རྫོགས་ནི། དབང་གི་དོན་དུ་
དཀྱིལ་འཁོར་དག་ནི་རིགས་ཀྱི་དབང་གིས་ཕྱི་ཡི་འཁོར་ལོས་རབ་ཏུ་དམན་པར་འགྱུར། །ཞེས་གསུངས་ཏེ། སྤྱི་ཙམ་ནས་གོང་དུ་བཤད་པའི་ལྷ་གྲངས་ཉུང་ངུ་དེ་རྣམས་ཀྱང་སྒོམ་པའི་དོན་འབའ་ཞིག་ཏུ་མ་ཟད་དབང་བསྐུར་བ་ཡང་རུང་སྟེ། བཅུ་གསུམ་གྱི་སྐབས་སུ་བཤད་པས་མཚོན་ནོ། །འོན་ཀྱང་འདིར་དབང་གི་དོན་དུ་ཞེས་གསུངས་པ་ནི། སྔ་མ་དེ་རྣམས་སུ་དབང་བསྐུར་བ་ནི། ཅུང་ཟད་རྒྱུད་སྨིན་པའི་སྟོབས་ཆུང་ལ། རྣལ་འབྱོར་པ་མཆོག་གིས་སྤྱོད་ཡུལ་ཡིན་ན་མ་གཏོགས། དབང་བསྐུར་རབ་གནས་སོགས་སྒྲུབ་པ་ལ་ཅུང་ཟད་དཔལ་ཆུང་བའི་དགག་བྱ་ཡོད་ལ། གཙོ་བོར་སྒོམ་པའི་དོན་དུ་ནི། རང་གི་བློའི་ནུས་པ་དང་བསྟུན་ནས་སྦྱོར་དགོས་པས་མོས་པ་ཐ་དད་པ་སོ་སོའི་ངོར་ཐམས་ཅད་ལེགས་པ་ཤ་སྟག་ཡིན་པས་སྤང་བླང་གི་དབྱེ་བ་མི་འཐད་དེ། རྒྱུད་ལས། རང་གི་སེམས་ཀྱི་ནུས་པ་ཤེས་པས་བཅོམ་ལྡན་འདི་ཡང་རྣལ་འབྱོར་པ་རྣམས་དག་གིས་བསྒོམ་པར་བྱ། །ཞེས་གསུངས་པ་ལྟར་ཏེ། ཉེར་ལྔ་པའི་སྐབས་སུ་འདི་སྐད་ཅེས་གསུང་པ་ནི། དཔའ་བོ་གཅིག་པ་ནས་ཉེར་ལྔ་པའི་བར་སྒོམ་པའི་དོན་དུ་གཙོ་ཆེ་བར་དགོངས་སོ། །གཅིག་པུའི་སྐུའམ་ཞེས་པའི་སྐབས་ཀྱི་དཔའ་གཅིག་དང་ལྷན་སྐྱེས་ནི། རེ་ཞིག་ཕྱག་མང་གི་དབང་དུ་བྱས་པའོ། །ཉི་ཤུ་རྩ་ལྔའི་བདག་ཉིད་ལ་ཡང་སྒྲུབ་པའི་ཐབས་དང་དབང་བསྐུར་བའི་ཆོ་ག་དང༌། པཎ་གྲུབ་རྣམས་ལ་དབང་བསྐུར་བའི་རྒྱུན་ཡང་ཡོད་དེ། ཐུགས་དཀྱིལ་ཡོངས་རྫོགས་དང་ཕལ་ཆེར་མཚུངས་པར་དགོངས་ཤིང༌། ཟོར་ཡང་བའི་ཕྱིར་ཤིན་ཏུ་འཐད་པའང་ཡིན་ལ། འོན་ཀྱང་གསུང་དབང་ཡོངས་རྫོགས་ཀྱི་དཀྱིལ་འཁོར་བཞེང་པར་མི་ནུས་
པས། ཐུགས་དཀྱིལ་རྒྱས་པ་བཞེང་ཐུབ་ན་ནི། ཡོངས་རྫོགས་དང་ཕན་ཡོན་ཁྱད་མེད་པ་ལྟ་བུར་བསྔགས་པ་མཛད་དོ། །ཐུགས་དཀྱིལ་དང་གསུང་དཀྱིལ་ནི་ཡོད་ལ་སྐུ་དཀྱིལ་སྤངས་པ་ལྟ་བུ། བར་མཚམས་དེར་རྣམ་གཞག་མི་འདྲ་བ་གཞན་མ་གསུངས་པས་ཐུགས་དཀྱིལ་རྒྱས་པ་ལས་སྤྲོས་པ་བྱེད་ཕྱིན། སྐུ་གསུང་ཐུགས་གསུམ་ཅར་རྫོགས་པ་ཉིད་སྒོམ་དགོས་པ་ཡིན་ལ། དེ་ཉིད་ལ་ལྷ་མང་ཉུང་གི་དབྱེ་བ་ནི་འབྱུང་དུ་རུང་བར་མངོན་ནོ། །གཞན་ཡང་དཔལ་ལྡན་རྒྱུ་སྐར་གྱི་སྐབས་སུ་དགོས་པའི་དུས་ཀྱི་འཁོར་ལོ་ལྷ་སྟོང་དང་བཞི་པའི་དཀྱིལ་འཁོར་དང༌། འབྱུང་པོ་སྒྲུབ་པའི་སྐབས་སུ་གསུངས་བའི་རྡོ་རྗེ་ཤུགས་ལྷ་ལྔའི་དཀྱིལ་འཁོར་དང༌། ཀླུ་བརྒྱད་ཀྱིས་བསྐོར་བའི་དཀྱིལ་འཁོར་ཏེ་གཉིས་དང༌། སྡོམ་པ་ཆེན་པོ་ལྷ་བརྒྱ་ཉི་ཤུ་པའི་དཀྱིལ་འཁོར་དང༌། སྡོམ་པ་ཆུང་བ་དྲུག་ཅུ་རྩ་གཉིས་པའི་དཀྱིལ་འཁོར་དང༌། གསང་འདུས་ལྷ་དགུ་པ་བཅུ་གསུམ་མ་བཅུ་དགུ་བ་ཉེར་ལྔ་མ་སོ་གཉིས་མ་སོ་བཞི་མ་སྟེ། གསང་འདུས་རིགས་དྲུག་དང༌། སྒྱུ་འཕྲུལ་དྲྭ་བ་བཞི་བཅུ་ཞེ་གསུམ་མ་དང༌། ཞེ་ལྔ་པ་དང༌། ཞེ་དགུ་པ་རྣམས་དང༌། སྣ་ཚོགས་ཡུམ་ལྷ་ལྔ་བཅུ་ང་དྲུག་པའི་དཀྱིལ་འཁོར་དང༌། རྣལ་འབྱོར་མ་རིགས་སུམ་ཅུ་སོ་དྲུག་གི་དཀྱིལ་འཁོར་ཏེ་སྐབས་འདིར་དཀྱིལ་འཁོར་ཉི་ཤུ་རྩ་བརྒྱད་དོ། །གསུམ་པ་འགྲེས་བསྒྱུར་བའི་རྣམ་གྲངས་ཀྱི་དཀྱིལ་འཁོར་ལ་རྒྱུད་ཚིག་གིས་ཟིན་པ་དང་དོན་གྱི་ཐོབ་པ་གཉིས་ལས། དང་པོ་ནི། དཔལ་ལྡན་རྒྱུ་སྐར་གྱི་དཀྱིལ་འཁོར་གྱི་ནང་ནས། པདྨ་གདན་ཅན་གྱི་དཀྱིལ་འཁོར་ལོགས་སུ་ཕྱུང་བ་ནི། ནང་ལེ་ལས། ནུས་མ་ཁྲོ་བོ་རྣམས་ནི་རིམ་པས་བཅུ་རུ་རབ་ཏུ་འགྱུར་ཏེ་ལྔ་ནི་
སངས་རྒྱས་ལྷ་མོ་རྣམས། །གཟུགས་སོགས་མིག་ལ་སོགས་པ་དྲུག་སྟེ་སླར་ཡང་མི་ཡི་བདག་པོ་ལྷ་ཡི་ཚོགས་ནི་དྲུག་གཉིས་སོ། །རྣལ་འབྱོར་མ་དང་ཀླུ་དང་གཏུམ་མོ་བརྒྱད་ཅེས་བྱ་སྟེ་སྲིད་པར་འདི་རྣམས་ཐམས་ཅད་ཉིས་འགྱུར་རོ། །ཞེས་འབྱུང་སྟེ། འདི་ལ་ནུས་མ་བཅུ་ལ་ཡང་པདྨའི་གདན་ལོགས་སུ་བྱེད་ཅིང༌། ཐབས་རེ་རེས་དངོས་སུ་འཁྱུད་པ་དང༌། རྒྱལ་བ་ཡབ་ལྔ་ཡུམ་ལྔ་ཁྲོ་བོ་བཅུ། སེམས་དཔའ་ཡབ་ཡུམ་བཅུ་གཉིས། ལྷ་ཆེན་བཅུ་གཉིས། རྣལ་འབྱོར་མ་བརྒྱད། རབ་གཏུམ་མ་བརྒྱད། ཀླུ་བརྒྱད་དེ་བདུན་ཅུ་དོན་བརྒྱད་པོ་དེ་རྣམས་ཐབས་ལ་ཤེས་རབ་ཀྱིས་འཁྱུད་པ་དང༌། ཤེས་རབ་ལ་ཐབས་ཀྱིས་འཁྱུད་པའི་དབྱེ་བས་བརྒྱ་ལྔ་བཅུ་ང་དྲུག་དང༌། རྒྱས་འདེབས་ཀྱི་ལྷ་དྲུག་ཅེས་བྱ་བ། རིགས་བདག་རྒྱལ་བ་རིགས་དྲུག་རྣམས་བསྣན་པས་བརྒྱ་དྲུག་ཅུ་རེ་གཉིས་པའི་དཀྱིལ་འཁོར་དུ་ཡང་འགྱུར་ལ། འགའ་ཞིག་སྙིང་རྗེའི་དབང་བསྐུར་གྱི་སྐབས་སུ་བཤད་པའི་མཚན་སོ་གཉིས་ཀྱི་ལྷ་ཚོགས་ལ་གཙོ་བོ་རྡོར་སེམས་དང༌། མི་བསྐྱོད་པའི་དབྱེ་བས་དཀྱིལ་འཁོར་གཉིས་སུ་འགྱུར་བ་དང༌། སྦྱིན་སྲེག་གི་དཀྱིལ་འཁོར་བཅུ་ཡང་ཚིག་ཟིན་གྱི་དཀྱིལ་འཁོར་དུ་བགྲོང་ལ། དེ་བཞིན་དུ་སྒྲུབ་ལེ་ལས། ཞེས་པ་ལ་སོགས་མི་ཡི་བདག་པོ་ལྷ་རྣམས་དང་ནི་ལྷ་མོ་རྣམས་ཀྱི་སྒྲུབ་ཐབས་སོ་སོ་རུ། །དཀྱིལ་འཁོར་འདིར་ནི་རང་གི་རྒྱལ་བའི་རིགས་ཀྱི་དབང་གིས་ལས་ཀྱི་དབྱེ་བ་མཐའ་དག་རྣམས་ཀྱིས་འགྱུར། །ཞེས་དང༌། དེའི་འགྲེལ་པར་ཡང༌། ལྷ་དང་ལྷ་མོ་རྣམས་ཀྱི་སྒྲུབ་ཐབས་སོ་སོ་རུ་དཀྱིལ་འཁོར་འདིར་ནི་དཔའ་བོ་གཅིག་པ་རྣམས་ཀྱིས་འགྱུར་ཏེ་རང་གི་རྒྱལ་བའི་རིགས་ཀྱི་དབང་གིས་ནི། རྣམ་པར་སྣང་
མཛད་ལ་སོགས་པའི་རིགས་ཀྱི་དབང་གིས་ལས་ཀྱི་དབྱེ་བ་མཐའ་དག་རྣམས་ཀྱི་སྒྲུབ་ཐབས་སུ་འགྱུར་རོ། །ཞེས་དང༌། ཡང་སྔ་མའི་འཕྲོས་ལས། སུམ་ཅུ་རྩ་དྲུག་རྣལ་འབྱོར་མ་རྣམས་འགྱུར་ཏེ་སླར་ཡང་བཟླས་དང་སྦྱིན་སྲེག་རང་གི་ས་བོན་གྱི། །ཞེས་གསུངས་ཤིང་དེའི་འགྲེལ་པར་ཡང༌། སུམ་ཅུ་རྩ་དྲུག་རྣལ་འབྱོར་མ་རྣམས་དང༌། གཞན་དུར་ཁྲོད་ཀྱི་མཐར་ཐུག་པ་རྣམས་ཀྱིས་འཆད་པར་འགྱུར་བའི་སྒྲུབ་ཐབས་སུ་འགྱུར་ཏེ། ཞེས་འབྱུང་བས། ལས་ཕྲ་མོ་སོ་སོ་བའི་སྐབས་སུ། གཙོ་བོ་ནས་དུར་ཁྲོད་ཀྱི་བར་གྱི་ལྷ་རེ་རེ་ནས་དཀྱིལ་འཁོར་དུ་འགྱུར་བར་བཤད་པས་ནུས་མ་བཅུ། སངས་རྒྱས་ཡབ་ཡུམ་བཅུ། ཁྲོ་བོ་བཅུ། ཀླུ་བཅུ། རབ་གཏུམ་མ་བཅུ། སེམས་དཔའ་ཡབ་ཡུམ་བཅུ་གཉིས། ལྷ་ཆེན་བཅུ་གཉིས། རྣལ་འབྱོར་མ་བརྒྱད། གསུང་དང་སྐུའི་འདབ་མའི་ལྷ་བཞི་བརྒྱ་དང་བཅུ་གཉིས་བསྡོམས་པས་ལྔ་བརྒྱ་བརྒྱད་ཅུ་གྱ་གཉིས་ཀྱི་དཀྱིལ་འཁོར་དུ་འགྱུར་རོ། དེ་བཞིན་དུ་རང་གི་མོས་པའི་དབང་གིས་ལྷ་རེ་རེའི་སྒྲུབ་ཐབས་ཀྱང་དེ་བཞིན་དུ་འགྱུར་ཏེ། གཞན་ཡང་རྡོ་རྗེ་ཤུགས་སྲུང་མ་དྲུག་ཅུ་དང་བཅས་པའི་དཀྱིལ་འཁོར་དང༌། ཁྲོ་བོ་བཅུས་བསྐོར་བའི་དཀྱིལ་འཁོར་གཉིས་སུ་འགྱུར་ཞིང༌། རྣལ་འབྱོར་མ་རིགས་བརྒྱའི་དཀྱིལ་འཁོར་དང༌། ཕྱག་མཚན་སོ་གཉིས་ཀྱི་དཀྱིལ་འཁོར་དང༌། དངུལ་ཆུའི་བཅུད་ལེན་གྱི་སྐབས་སུ་གསུངས་པའི་ཛམྦྷ་ལའི་དཀྱིལ་འཁོར་དང༌། གསང་འདུས་རིགས་དྲུག་གི་ལྷ་ཐམས་ཅད་གཙོ་བོ་གོ་འཕོ་བྱས་པས། ལྷ་དགུ་ལ་དཀྱིལ་འཁོར་དགུ་ནས་ལྷ་སོ་བཞི་པ་ལ་དཀྱིལ་འཁོར་སོ་བཞིའི་བར་དུ་འགྱུར་བས། ཀུན་བསྡོམས་ན་གསང་འདུས་ལ་བརྒྱ་དང་སུམ་ཅུ་སོ་གཉིས་སོ། །དེ་ལྟར་ན་སྔར་གྱི་ཉེར་བརྒྱད་མི་ཐེ་བའི་
འགྲེས་ཀྱིས་བསྒྲེས་པ། རྒྱུད་འགྲེལ་གྱི་ཚིག་ཟིན་ལས་བསྟན་པའི་དཀྱིལ་འཁོར་བདུན་བརྒྱ་བཅོ་བརྒྱད་དོ།། །།གསུམ་པ་དོན་གྱིས་ཐོབ་པ་ལ། ཁྲོ་བོ་མོབཅུའི་དཀྱིལ་འཁོར་དང༌། རྣལ་འབྱོར་མ་བརྒྱད་ལ་ལྷ་བཅུ་པའི་དཀྱིལ་འཁོར་བརྒྱད་དང༌། ཚེས་ལྷ་རྣམས་ལ་ལྷ་སུམ་ཅུ་བའི་དཀྱིལ་འཁོར་བཅུ་གཉིས་དང༌། གཙོ་བོ་དུས་ཀྱི་འཁོར་ལོ་ཉིད་ལའང༌། རྒྱལ་བ་རིགས་དྲུག་གོ་འཕོས་པའི་དབྱེ་བས་དཀྱིལ་འཁོར་ཆེན་པོ་དྲུག་ཏུ་འགྱུར་ཞིང༌། དཀྱིལ་འཁོར་འབྲི་བའི་སྐབས་སུ་སྐུ་གསུང་ཐུགས་ཡོངས་རྫོགས་བཀོད་པའི་དཀྱིལ་འཁོར་གཅིག་ལ་ཐུགས་ཀྱི་དཀྱིལ་འཁོར་ཁྲུ་བཅུ་གཉིས་པ་དང༌། གསུང་ལ་བཅུ་དྲུག་པ་དང༌། སྐུ་ལ་ཉི་ཤུ་པར་གསུང་པ་དངོས་བསྟན་ཆེ་ཆུང་གི་ཚད་ལ་ཐུགས་གསུང་སྐུའི་དག་པ་སྦྱོར་ཚུལ་ཙམ་ཞིག་ཡིན་པས། གཞན་རྣམ་འགྱུར་མི་འདྲ་བ་དང་ལྷ་གྲངས་སོགས་ལ་ཁྱད་པར་གསལ་བར་མ་གསུངས་ཀྱང༌། དོན་ཐོབ་ཀྱི་རིག་པས་ད་ལྟའི་གསུང་དབང་གི་དཀྱིལ་འཁོར་དངོས་སུ་བཤད་པ་འདི་ཡེ་ཤེས་རྡོ་རྗེའི་དཀྱིལ་འཁོར་ཡིན་པས་གཞན་དེ་དག་ལ་སྐུ་དང་གསུང་དང་ཐུགས་ཀྱི་རྡོ་རྗེས་གཙོ་བོ་མཛད་པའི་དཀྱིལ་འཁོར་འབྱུང་ཞིང༌། མདུན་བསྐྱེད་བྲི་ཆ་ལ་ཇི་ལྟར་འབྱུང་བ་ལྟར་བདག་བསྐྱེད་ལ་སྒོམ་དུ་རུང་བ་ཡིན་ལ། ད་ལྟ་ཡེ་ཤེས་རྡོ་རྗེའི་དབང་དུ་བྱས་ནས་མི་བསྐྱོད་པ་དང་རྡོར་སེམས་ཀྱི་ངོ་བོར་བྱེད་པ་བཞིན་དུ་ཐུགས་རྡོ་རྗེ་ལ་རྒྱུ་འབྲས་རྡོ་རྗེ་འཛིན་པའི་སྐབས་སུ་འདི་གོ་ཟློག་དང༌། གསུང་ལ་རིན་འབྱུང་རྒྱུ་དོན་གྲུབ་འབྲས་བུར་བྱེད་པའི་དཀྱིལ་འཁོར་དང༌། སྐུ་ལ་རྣམ་སྣང་རྒྱུ་འོད་དཔག་མེད་འབྲས་བུར་བྱེད་པའི་དཀྱིལ་འཁོར་འབྱུང་སྟེ། གང་དཀྱིལ་འཁོར་གྱི་གཙོ་བོར་གྱུར་པ་དེ་ཉིད་རིགས་ཐམས་ཅད་ཀྱི་ཁྱབ་
བདག་ཏུ་བྱའོ།། ཐུགས་ལ་ད་ལྟའི་གཙོ་བོའི་ཁ་དོག་སྔོན་པོའི་གནས་སུ་ལྗང་ཁུ་འབྱུང༌། གཞན་འདྲ༌། གསུང་དང་སྐུའི་ནག་པོ་ལ་ཡང་ཕལ་ཆེར་དེ་དང་འདྲ་བ་དང༌། དམར་པོ་དང་དཀར་པོ་ལ་ཞལ་གྱི་དབྱེ་བ་རིམ་པས་འཕོ་ཚུལ་དང༌། ཕྱག་དང་པོ་བཞིའི་འཕོ་ཚུལ་རིགས་བསྒྲེ་བ་ཡིན་ལ། ཡང་ན་རྒྱུ་འབྲས་རྡོ་རྗེ་འཛིན་པ་གཉིས་ཀ་རིགས་ཐ་དད་ཡིན་ཀྱང་སྐུའི་རྣམ་འགྱུར་མི་འཕོ་བར་དམར་པོ་དང་དཀར་པོར་བྱ་ཞིང་དེའི་ཚེ་ཐུགས་རྡོ་རྗེ་ཡང་ནག་པོའོ། །དེ་བཞིན་དུ་སྦྱིན་སྲེག་གི་དཀྱིལ་འཁོར་བཅུ་ལ་ཡང་དེ་དང་མཐུན་པའི་བསྒོམ་བྱའི་དཀྱིལ་འཁོར་བཅུ་འབྱུང་ཞིང༌། རྣལ་འབྱོར་མ་སོ་དྲུག་གི་དཀྱིལ་འཁོར་གསུངས་པས་དཔའ་བོ་སུམ་ཅུ་རྩ་དྲུག་གི་དཀྱིལ་འཁོར་ཡང་དོན་གྱིས་ཐོབ་པ་དང༌། སྡོམ་ཆེན་ལ་གསུངས་པ་ལྟར་སྡོམ་པ་ཆུང་བ་ལ་ཡང་ཡུམ་གྱི་དཀྱིལ་འཁོར་ཐོབ་པ་དང༌། གསང་འདུས་ལ་གཙོ་བོ་གོ་འཕོ་གསུངས་པས། སྒྱུ་འཕྲུལ་དྲྭ་བ་གསུམ་ལའང་གཙོ་བོ་གོ་འཕོ་ཐོབ་སྟེ། དེ་བཞིན་དུ་གཙོ་བོ་དུས་ཀྱི་འཁོར་ལོ་ཉིད་ཀྱི་ཞལ་ཕྱག་མང་ཉུང་གི་སྒོ་ནས་ཀྱང་དབྱེ་བའི་རྣམ་གྲངས་དུ་མར་འགྱུར་ཏེ། ཡེ་ཤེས་ལེའུར། རྡོ་རྗེ་རྣམས་ཀྱི་ཞལ་གྱི་དབྱེ་བ་འགྱུར་ཏེ་རྒྱལ་བའི་བདག་པོའི་ཕྱག་རྣམས་དབྱངས་ཀྱི་དབྱེ་བ་ ཡིས། །ཞེས་པའི་འགྲེལ་པར། རིགས་གཅིག་གི་ཞལ་གཅིག་དང༌། རིགས་གསུམ་གྱི་དག་པ་ཞལ་གསུམ་དང༌། རིགས་ལྔ་དག་པས་ཞལ་ལྔར་འགྱུར་བ་དང༌། རིགས་དྲུག་གི་དག་པ་ཞལ་དྲུག་ཏུ་འགྱུར་ཏེ་འཇིགས་ཞེས་བྱའོ། །དེ་བཞིན་དུ་ཞལ་བརྒྱད་པ་ལ་སོགས་པ་ནས།
ཧ་ལ་ཧ་ལ་གདོང་བརྒྱ་པའི་བར་དུ་ཁམས་རྣམས་ཀྱི་དག་པ་གཙོ་བོར་འགྱུར་རོ། །ཞེས་དང༌། སྒྲུབ་ལེར། གཅིག་ལ་སོགས་པ་མཐའ་ཡས་ཞལ་ཏེ་ཕྱག་དང་ཞབས་མང་དུ་མའི་ཁ་དོག་མུན་པ་དག་གི་མཐར། ཞེས་གསུངས་པའི་འགྲེལ་པར། འདིར་ཞལ་གཅིག་པའམ་སོགས་པའི་སྒྲས་ཞལ་གཉིས་པའམ། བཞི་དང་ལྔ་དང་མཐའ་ཡས་པའམ། ཞེས་ཞལ་གཉིས་པ་ཡང་གསུངས་ལ། ཡེ་ལེར། ཤེས་རབ་ཐབས་ནི་ཞལ་བཅུ་ཡོན་ཏན་རྣམ་པ་གསུམ་གྱི་དབང་གིས་བཞི་ལ་ཞལ་ནི་བཅུ་གཉིས་པ། །ཞེས་པ་དང༌། འགྲེལ་བར། དེ་ལྟར་ཞལ་བཅུ་གཉིས་དང༌། ཕྱག་ཉི་ཤུ་རྩ་བཞི་པ་ནི། བཅོམ་ལྡན་འདས་དུས་ཀྱི་འཁོར་ལོ་གཅིག་གོ་ཞེས་གསུངས་ཤིང༌། དེ་ལ་ཞལ་གཅིག་པ་ནི་དཔའ་གཅིག་བསྡུས་པ་དང༌། ལྷན་སྐྱེས་བསྡུས་པ་ལྟ་བུ་རྩ་བའི་ཞལ་ཕྱག་ཙམ་ཞིག་ཡིན་ལ། ཞལ་གཉིས་པ་ནི་མདུན་ཞལ་སྔོ་ཞིང་རྒྱབ་ཞལ་ལྗང་བའམ་རྩ་ཞལ་སྔོ་སྟེང་ལྗང་བ་ལྟ་བུ་ཕྱག་བཞི་ཕྱག་མཚན་རྡོར་དྲིལ་དང་གྲི་ཐོད་འཛིན་པ། དེ་གཉིས་ལ་ཡུམ་ཕྱག་གཉིས་མ་སྟེ་ལྷན་སྐྱེས་བསྡུས་པས་མཚོན། ཞལ་གསུམ་པ་ལ་ཕྱག་དྲུག་པ་སྟེ། ཞལ་མདོག་དང་ཕྱག་མཚན་རྡོ་རྗེ་སེམས་དཔའ་ཡབ་ཡུམ་དང་མཐུན། ཞལ་བཞི་པ་ནི་སྤྱི་དང་འདྲ་བ་ལས། ཕྱག་བརྒྱད་པ་གཡས་རྡོ་རྗེ་རལ་གྲི་རྩེ་གསུམ་གྲི་གུག གཡོན་དྲིལ་བུ་ཕུབ་དང༌། ཁ་ཊྭཾ་ཐོད་པ་འཛིན་ཞིང༌། ཡུམ་ཡང་ཞལ་བཞི་ཕྱག་བརྒྱད་མ་སྤྱི་དང་འདྲའོ། །ཞལ་ལྔ་པ་ཡང་སྤྱི་དང་འདྲ་བ་ལས། སྟེང་ཞལ་ལྗང་ཁུ་ལྷག་པོ་དང༌། ཕྱག་བརྒྱད་ཀྱི་ཕྱག་མཚན་གོང་དུ་བཤད་པ་བཞིན་དང༌། ཐ་མ་གཉིས་ནི་དེ་བཞིན་གཤེགས་པའི་
ངོ་བོ་ལྟར་ན། དགྲ་སྟ། ཚངས་མགོ་དང༌། ཧེ་རུ་ཀ་ལྟར་ན་གླང་ལྤགས་སོ། །འདི་ལ་ཡུམ་ཞལ་གསུམ་ཕྱག་དྲུག་མའོ། །ཞལ་དྲུག་པ་ནི། ཞལ་དྲུག་ཕྱག་དྲུག་ཞབས་དྲུག་པ་སྟེ་ཕུར་པའི་ཁྲོ་བོ་དང་འདྲའོ། །ཞལ་བརྒྱད་པ་ནི། ཕྱོགས་བཞིའི་ཞལ་ཕྱོགས་མདོག་མཚམས་བཞིའི་ཞལ་ཕྱེད་གཟུགས་སམ། ཡང་ན་ཁ་དོག་འདྲེས་པའོ། །དེའི་ཚེ་ཕྱག་བཅུ་དྲུག་པ་སྟེ། ཕྱག་མཚན་གསལ་ཁ་མེད་ནའང་དགྱེས་རྡོར་དང་མཚུངས་པར་བཞེད་པ་དང༌། ཉེར་བཞི་པའི་ཕྱག་མཚན་གྱི་ནང་ནས་འདོར་ལེན་བྱེད་ཟེར་ཏེ། བདག་གི་རྟོག་པ་ནི། འཁོར་ལོ་སྡོམ་པའི་ཧཱུཾ་མཛད་ཕྱག་བཅུ་དྲུག་པ་དང་མཚུངས་པར་བྱས་ན་ལེགས་སམ་སྙམ་མོ། །ཞལ་བཞི་ཕྱག་ཉེར་བཞི་པ་ནི་དཀྱུས་ཀྱི་གཙོ་བོ་འདི་ཡིན་ལ་ཕྱག་ཉེར་དྲུག་པ་ནི། དུས་ཀྱི་འཁོར་ལོ་ཐོད་པ་ཅན་ཉིད་དང༌། ཞལ་བཅུ་གཉིས་ཕྱག་ཉེར་བཞི་པ་ནི། རྡོ་རྗེ་བཞི་ལ་ཞལ་གསུམ་གསུམ་སྟེ། ཕྱོགས་ཀྱི་དེ་བཞིན་གཤེགས་པའི་ཞལ་མདོག་དང་མཚུངས་སོ། །ཕྱག་མཚན་ཡང་དེ་ཉིད་ཀྱིས་རེགས་འགྲེ། འདི་ལའང་ཕྱག་ཉེར་དྲུག་པ་འབྱུང་བར་མངོན་ཞིང༌། དེ་བཞིན་དུ་ཉེར་གཉིས་པ་དང་ཞལ་བཅུ་པ་དང་བཅུ་གཅིག་པའི་དག་པ་ཡང་ཡོད་ལ། གཞན་ཞལ་བརྒྱ་པའི་བར་དུ་འབྱུང་ཞེས་གསུངས་ཀྱང་མཚན་ཉིད་གསལ་བར་མ་བཤད་པས་དེ་དང་དེའི་རྣམ་གཞག་མི་བྱའོ། །དེས་ན་གོང་དུ་བཤད་པའི་གཅིག་པུའི་སྐུའི་དཀྱིལ་འཁོར་ནས། སྐུ་གསུང་ཐུགས་ཡོངས་རྫོགས་ཀྱི་དཀྱིལ་འཁོར་གྱི་བར་ལ་གཙོ་བོའི་ཞལ་ཕྱག་གི་དབྱེ་བ་མི་འདྲ་བ་དུ་མ་སྦྱར་ན་མཐའ་ཡས་པར་ཡང་འགྱུར་ལ། འོན་ཀྱང་དཀྱིལ་འཁོར་གྱི་རྣམ་གྲངས་ཕྲ་མོ་དུ་མ་ནི། སྤྱིར་རྒྱུད་ཀྱི་དོན་ལ་ཇི་ལྟར་གནས་ཚུལ་ཙམ་གོ་
བ་ལ་ཉེ་བར་མཁོ་ཡི། ཉམས་ལེན་སྒྲུབ་པ་ལ་དེ་ཙམ་གྱིས་དགོས་དོན་ཆུང་བས། གཙོ་བོ་གཙོ་དག་བཟུང་བར་བྱའོ། །དཔལ་ལྡན་རྒྱུ་སྐར་གྱི་དཀྱིལ་འཁོར་ལ་དཀྱིལ་འཁོར་སོ་སོ་ཐ་དད་པ་ནི། སྔར་བཤད་པ་དེ་རྣམས་ཉིད་ཡིན་ལ། དཀྱིལ་འཁོར་ཐམས་ཅད་གཅིག་ཏུ་བསྡོམས་ཏེ་སྒོམ་པ་དཀྱིལ་འཁོར་ལོགས་པ་ཞིག་ཏུ་བྱེད་པ་ཡང་ཡོད་དེ། མི་འགལ་ཞིང་ལེགས་པར་ཡང་སེམས་མོད། ཁ་ཅིག་གཞལ་མེད་ཁང་ལྷག་པོ་ཞིག་ཕྱིར་བཀོད་དེ་སྒོ་སྦྲག་བཞི་པ་བྱས་ནས། ཕྱོགས་བཞིར་དཀྱིལ་འཁོར་གསུམ་གསུམ་འགོད་རྒྱུ་ལ་གཉིས་མ་འདངས་ཏེ་མཆོད་པའི་དཀྱིལ་འཁོར་གཉིས་ བཅུག །དེ་རྣམས་ཐམས་ཅད་འདོད་སྣམ་ཚུན་ཆད་ཀྱི་དཀྱིལ་འཁོར་དུ་བྱས་ནས་ཀུན་གྱི་ཕྱི་རོལ་ཏུ་ཁོར་ཡུག་ཆེན་པོ་གཅིག་གིས་ཆོག་པར་བྱེད་ཟེར་ཏེ། དེ་འདྲ་ནི་རང་བཟོ་ཁོ་ན་ཉིད་དུ་འགྲོ་བས་མི་བྱ་ལ། དེས་ན་སྲུང་འཁོར་གཅིག་ཁོ་ནས་ཆོག་པ་དང༌། ཚོགས་གསོག་གི་ཚེ་ཡང་དཀྱིལ་འཁོར་བཅུ་གཅིག་ཀར་སྤྱན་འདྲེན། དེ་ནས་སྟོང་ཉིད་དུས་གཅིག་ཏུ་བསྒོམ། གཞལ་ཡས་ཁང་གུར་དང་བཅས་པ་བཅུ་གཅིག་དུས་གཅིག་ཏུ་བསྐྱེད། མངོན་བྱང་ལྔ་སོགས་གཙོ་བོ་སོ་སོ་བསྐྱེད་པ་ཡང་དུས་གཅིག་ལ་བྱ། དེ་བཞིན་དུ་དཀྱིལ་འཁོར་རྒྱལ་མཆོག་སྤྲོ་བ་དང༌། ཞུ་བ་དང༌། གླུས་བསྐུལ་དང༌། ལས་རྒྱལ་མཆོག་སྤྲོ་བ་དང༌། ཡེ་ཤེས་སྤྱན་འདྲེན་དང༌། རྒྱས་བཏབ་ཀྱི་བར་དུ་དམིགས་པ་གསལ་ན་དཀྱིལ་འཁོར་བཅུ་གཅིག་བཅུ་གཅིག་པོ་རྣམས་དུས་གཅིག་ཏུ་བསྐྱེད། མི་གསལ་ན་ཡང་དཀྱིལ་འཁོར་བཅུ་གཅིག་པོའི་བྱ་བ་རེ་རེ་རིམ་ཅན་དུ་བྱས་ནས་སྤེལ་གྱིན་བསྒོམ། དེ་ལ་དཀྱིལ་འཁོར་ཡོངས་རྫོགས་བཅུ་གཅིག་བསྒོམ་དགོས་པས། དཔལ་མཆོག་
དང་རྩེ་མོའི་རིགས་བསྡུས་སམ། གཉིས་མེད་རྣམ་རྒྱལ་བརྫུས་མའི་དཀྱིལ་འཁོར་གྱི་རིགས་འགྲེ་མི་བྱའོ།། ཕྱོགས་གང་དུ་དཀྱིལ་འཁོར་གང་འགོད་ན། རྒྱུད་ལས། འདི་ལ་སོགས་པ་དེ་བཞིན་དུ་ནི་རྣལ་འབྱོར་རྒྱུད་ཀྱང་འདུས་པ་རྣམ་པ་དྲུག་ཏུ་གསུངས་པ་སྟེ། །ཞེས་པ་ནས། ཤེས་རབ་དང་ནི་ཐབས་རྣམས་མཐའ་དག་ཞལ་གསུམ་རོའི་ཕྱག་ལྡན་གཡས་གྱི་ཞལ་ལས་སྤྲོས་པའོ།། ཞེས་པའི་བར་གསུངས་པས། གསང་འདུས་ཀྱི་དཀྱིལ་འཁོར་གྱི་གཙོ་བོ་ལྷོ་ཕྱོགས་སུ་འགོད་རིགས་ལ། ཡང་ཇི་སྐད་དུ། སྒྱུ་འཕྲུལ་དྲྭ་བའི་དབྱེ་བ་གསུམ་སྟེ་ཞལ་གསུམ་རོ་ཡི་ཕྱག་ནི་ལྷ་ཡི་སྐུ་ཡི་དབྱེ་བ་ལས། །རྟོག་པ་ལ་སོགས་གང་ཡིན་མཐའ་དག་བླུན་པོའི་སེམས་ཀྱི་དབང་གིས་གཡོན་གྱི་ཞལ་ནས་སྤྲོས་པའོ། །ཞེས་པས་སྒྱུ་དྲའི་གཙོ་བོ་ གཡོན་དུ ་བྱ། རྣལ་འབྱོར་རྗེས་སུ་རིག་པའི་རྒྱུད་དང་འདིར་ནི་ཉེས་འགྱུར་སྡོམ་པ་ཆེན་པོ་མཁའ་འགྲོ་མ་རྣམས་ཀྱི། །འཁོར་ལོ་དྲུག་ནི་རིགས་དྲུག་རྣམས་ཏེ་མི་བདག་དུར་ཁྲོད་ས་རྣམས་ནུབ་ཀྱི་ཞལ་ནས་སྤྲོས་པའོ། །ཞེས་འབྱུང་བ་ལ། རྣལ་འབྱོར་རྗེས་སུ་རིག་པའི་དཀྱིལ་འཁོར་དངོས་རྒྱུད་འདིར་མ་གསུངས་ཤིང༌། སྡོམ་པ་ཆེན་པོ་ནུབ་ཀྱི་ཞལ་ནས་སྤྲོས་པར་གསུངས་པས་ནུབ་ཏུ་འགོད་རིགས་སམ་སྙམ་ན། སྡོམ་པ་ཆུང་བ་དཔལ་ལྡན་རྒྱུ་སྐར་ལ་མི་བགྲོང་པའི་དབང་དུ་བྱས་ན། ཤེས་རབ་རྒྱུད་ཀྱི་མངོན་པར་བརྗོད་པ་སྲིད་པ་གསུམ་གྱི་བླ་མས་ཤར་གྱི་ཞལ་ནས་སྤྲོས་པའོ། །ཞེས་འབྱུང་བ་སྡོམ་པ་ཆུང་བའི་དཀྱིལ་འཁོར་གྱི་སྐབས་དང་འབྲེལ་བ་ཡིན་ཡང༌། སྡོམ་ཆེན་ཡང་མངོན་བརྗོད་འབུམ་པ་ལས་གསུངས་པའི་དཀྱིལ་འཁོར་དུ་བཤད་པའི་ཕྱིར། ཤེས་རབ་
རྒྱུད་ཀྱི་ནང་ཚན་ཁོ་ན་ཡིན་པས་ཤར་དུ་བཀོད་ན་འགྲེལ་བར་སྣང་ཞིང༌། གསང་འདུས་གཞན་དང་སྒྱུ་འཕྲུལ་དྲྭ་བ་གཞན་རྣམས་ཕྱོགས་ཕྱོགས་འབྲེལ་གང་ཆགས་སུ་འགོད་པར་བྱའོ། །རྒྱུ་སྐར་འཁོར་ལོའི་གྲངས་ལས་ལྷག་པར་གྱུར་ཀྱང༌། རྒྱུད་འདི་ནས་བཤད་པའི་དཀྱིལ་འཁོར་མཐའ་དག་ཟླུམ་པའི་དབང་དུ་བྱས་ན། ལྷོ་བྱང་གི་སྔར་དང་འདྲ་བ་ལས་ཤར་དུ་སྡོམ་ཆུང༌། ནུབ་ཏུ་སྡོམ་ཆེན། དེ་དང་ཉེ་བར་རྡོ་རྗེ་ཤུགས་རྒྱས་པའི་དཀྱིལ་འཁོར་རྣམས་བཀོད་ན། དཀྱིལ་འཁོར་འགོད་ཚུལ་ལེགས་ཤིང༌། དེ་རྣམས་དཀྱིལ་འཁོར་གཅིག་ཏུ་བསྲེས་པ་མ་ཡིན་པར་སོ་སོར་སྒོམ་པ་ཡིན་པའི་ཕྱིར། སྡོམ་ཆུང་རྡོ་རྗེ་ཤུགས་གཉིས་ཀྱིས་ལྷག་པའི་སྐྱོན་ཡང་མི་སྐྱེད་དོ། །ཁོར་ཡུག་ཆེན་པོ་རྣམས་ཀྱིས་བསྐོར་བའི་དཀྱིལ་འཁོར་གཞལ་ཡས་ཁང་གཅིག་གི་ནང་དུ་བཤད་ཚོད་ལས་ལྷག་ན་སྐྱོན་ཆེ་སྟེ། འདིར་བརྗོད་པ་དེ་ལ་ནི། ཁོར་ཡུག་ཐ་དད་པ་བཅུ་གསུམ་བྱུང་བའི་ཕྱིར་སྐྱོན་མེད་དོ། །འོ་ན་དཔལ་ལྡན་རྒྱུ་སྐར་དང་ལྷན་ཅིག་དཀྱིལ་འཁོར་གཞན་སྒོམ་པ་མི་རིགས་སོ་སྙམ་ན། དེ་ཙམ་ལ་མི་རུང་བ་ག་ལ་ཞིག་སྟེ། རྣལ་འབྱོར་བའི་བློའི་སྟོབས་ཀྱིས་ནུས་ན། རྒྱུད་སྡེ་བཞི་པོའི་དཀྱིལ་འཁོར་བརྒྱ་སྟོང་དུ་མ་གཅིག་ཅར་སྒོམ་ཐུབ་ན་ཡང་ཡུད་ཙམ་ཞིག་གིས་ཚོགས་ཀྱི་སྒོ་མཐའ་ཡས་པ་གསོག་ནུས་པས་ཏིང་ངེ་འཛིན་ལ་དབང་འབྱོར་བ་ངོ་མཚར་རྨད་དུ་བྱུང་བའི་ཆོས་ཡིན་གྱི། སོ་སོ་སོ་སོའི་རང་ཐད་དུ་རང་རང་གི་ཆོ་ག་ཚང་བའི་ཕྱིར། འདྲེས་པའི་སྐྱོན་ཅུང་ཟད་ཀྱང་མེད་དེ། སྒྲུབ་པ་པོ་ཐ་དད་དུ་མས་སོ་སོར་དཀྱིལ་འཁོར་དུ་མ་དུས་གཅིག་ཏུ་བསྒོམས་པ་བཞིན་ནོ། །ཡང་དེ་འདྲ་ཏིང་ངེ་འཛིན་
ལ་དབང་འབྱོར་བས་ཡིན་གྱི། ལས་དང་པོ་པ་ལ་མིན་ནོ་སྙམ་ན་ཏིང་ངེ་འཛིན་ལ་དབང་མ་འབྱོར་ན། དཔལ་ལྡན་རྒྱུ་སྐར་གྱི་དཀྱིལ་འཁོར་རང་ཡང་ཆབས་ཅིག་ཏུ་སྒོམ་པར་མི་ནུས་ཏེ། འདིར་དེའི་དབང་དུ་བྱས་སོ། །གཞན་ཡང་འདིའི་དཀྱིལ་འཁོར་བཅུ་གཅིག་པོ་ཕྱོགས་གཅིག་ཏུ་སྒོམ་པ་ཞིག་ངེས་པར་ཡོད་པ་ནི་ཡིན་ཏེ། འདིའི་ལྷ་གྲངས་ལ་དག་སྦྱོར་མང་དུ་མཛད་པའི་ཕྱིར་ཏེ། སྒོམ་པའི་དོན་མ་ཡིན་ན་དག་སྦྱོར་གྱི་སྡེ་ཚན་ཕྲུགས་གཅིག་ཏུ་མཛད་པ་དེ་ལ་དགོས་པ་མི་འབྱུང་བའི་ཕྱིར་རོ། །དེ་ཡང་ནང་གི་ལེའུར། དུས་ཀྱི་ལོ་ནི་མེ་གྲངས་ལོ་ཡི་ཉིན་ཞག་ཚོགས་ཀྱིས་བསྒྱུར་ཏེ་རིགས་དྲུག་བགྲོད་པའི་ཡན་ལག་གི །ཞེས་སོགས་དག་སྦྱོར་ཆེ་ཐང་དུ་མཛད་པའི་ཕྱིར་དང༌། དེ་དག་རྒྱུད་འདིར་གསུངས་པའི་དཀྱིལ་འཁོར་གཙོ་ཆེ་བ་མཐའ་དག་གི་དག་སྦྱོར་ཙམ་མོ་སྙམ་ན། དེ་ལྟར་ཡང་སྒོམ་པའི་དོན་ཡིན་དགོས་ལ། འདིར་སྡོམ་པ་ཆུང་བ་སོགས་མ་གསུངས་པས་རྒྱུ་སྐར་གྱི་དཀྱིལ་འཁོར་ཁོ་ནའི་ཡིན་པ་ལས། དེའི་ནང་གི་དཀྱིལ་འཁོར་རེ་རེ་ཙམ་ལས་མ་བསྒོམས་ན། རྒྱུ་སྐར་ཅི་རིགས་པའི་ཆུ་ཚོད་ཀྱི་དག་པ་ལས་མི་འབྱུང་བའི་ཕྱིར། རྒྱུ་སྐར་གྱི་ཆུ་ཚོད་ལ་དག་པ་མཐའ་དག་ཕྲུགས་གཅིག་ཏུ་སྦྱར་བ་འདིས། དཀྱིལ་འཁོར་བཅུ་གཅིག་ཀར་ཆབས་ཅིག་ཏུ་སྒོམ་པའང་བསྟན་པ་ཡིན་ནོ། །དེ་ལ་རྒྱུ་སྐར་གྱི་དཀྱིལ་འཁོར་ནི་རྒྱུད་འདིར་ཡང་གསུངས་མོད་ཀྱི། རྩ་རྒྱུད་ལས་འབྱུང་བ་གཙོ་ཆེ་བར་གྲགས་ལ། བསྡུས་རྒྱུད་འདི་ལས་འབྱུང་བའི་དཀྱིལ་འཁོར་ནི། ཆོས་ཀྱི་དབྱིངས་གསུང་གི་དབང་ཕྱུག་ཅེས་བྱ་བ། སྒྲུབ་ལེར་རྒྱས་བཤད་མཛད་པ་འདི་ཁོ་ན་ཡིན་གྱི། འདི་ལ་ནུས་མ་བཅུ། སངས་རྒྱས་ཡབ་
ཡུམ་ཉི་ཤུ། བྱང་སེམས་ཡབ་ཡུམ་ཉེར་བཞི། ཁྲོ་བོ་ཡབ་ཡུམ་བརྒྱད། གཟུངས་མ་བཅུ་གཉིས་ཏེ་ཐུགས་དཀྱིལ་ལ་ལྷ་བདུན་བཅུའོ། །མ་མོ་བརྒྱད། དེའི་ཡབ་བརྒྱད། རྣལ་འབྱོར་མ་དྲུག་ཅུ་རྩ་བཞི། འདོད་མ་སོ་དྲུག་སྟེ་གསུངས་དཀྱིལ་བརྒྱ་དང་བཅུ་དྲུག་གི་ལྷ་ཚོགས་སོ།། ཚེས་ལྷ་སུམ་བརྒྱ་དྲུག་ཅུ། སྒོ་སྐྱོང་ཁྲོ་བོ་ཡབ་ཡུམ་བཅུ་གཉིས། ཀླུ་དང་རབ་གཏུམ་མ་ཕན་ཚུན་ཡབ་ཡུམ་འཁྱུད་པས་བཞི་བཅུ། །ཕྱིར་འདོད་མ་སོ་དྲུག་སྟེ། སྐུ་དཀྱིལ་ལ་བཞི་བརྒྱ་བཞི་བཅུ་ཞེ་བརྒྱད་དོ། །གསུམ་ཀ་བསྡོམས་པས་དྲུག་བརྒྱ་སུམ་ཅུ་སོ་བཞི་སྟེ་འཁོར་ཚོགས་ཡིན་ལ། ཀུན་ཁྱབ་གཙོ་བོ་ཡབ་ཡུམ་བསྣན་པས་དྲུག་བརྒྱ་སོ་དྲུག་གི་ལྷ་ཚོགས་སོ། །འདི་དག་ཏུ་ཆོས་ཀྱི་དུང་སོགས་ནང་གི་རྡོ་རྗེ་བཞི། ཆོས་ཀྱི་འཁོར་ལོ་སོགས་ཕྱིའི་རྡོ་རྗེ་བཞི། བུམ་པ་བཅུ་རྣམས་ལྷའི་ངོ་བོ་ཡིན་ཡང༌། ཆོས་འཁོར་སོགས་ཞར་ལ་བསྐྱེད་པ་ཡིན་ཞིང༌། དེ་ཐམས་ཅད་ཞལ་ཕྱག་གི་རྣམ་པ་ཅན་དུ་མེད་པས་འཇིག་རྟེན་གྲགས་པ་དང་བསྟུན་ཏེ་ལྷའི་གྲངས་སུ་མི་གཞུག་པའོ། །ཡེ་ཤེས་ནམ་མཁའི་གཤེགས་པ་ཡབ་ཡུམ་བཞི་ནི་གཙོ་བོ་ཡབ་ཡུམ་ལ་ཚང་བ་ཙམ་ལས་དངོས་སུ་མེད་ཀྱང་དག་སྦྱོར་གྱི་དབང་གིས་བགྲངས་པའོ། དཔལ་ལྡན་རྒྱུ་སྐར་གྱི་དཀྱིལ་འཁོར་ལྟར་ན་པདྨའི་ལྟེ་བ་ལ་བཞུགས་པའི་ལྷ་བརྒྱ་ལྔ་བཅུ་རྩ་དྲུག་གསུང་དང་སྐུའི་པད་འདབ་ཀྱི་ལྷ་མོ་བཞི་བརྒྱ་བཅུ་གཉིས་ཀྱི་སྟེང་དུ་གཟུངས་མ་བཅུ་གཉིས་བསྣན་ཏེ་བཞི་བརྒྱ་ཉེར་བཞི་པོ་ལའང་རང་རང་གི་ཐབས་རེ་རེ་སྦྱར་བས་བརྒྱད་རྒྱ་བཞི་བཅུ་ཞེ་བརྒྱད་འབྱུང་བ་པདྨ་གདན་ཅན་དང་བསྡོམས་པས་སྟོང་དང་བཞི་འབྱུང་ལ། དེ་རྣམས་འཁོར་ཚོགས་ཁོ་ན་ཡིན། དེའི་སྟེང་དུ་གཙོ་བོ་ཡབ་ཡུམ་
བསྣན་པས་སྟོང་དང་དྲུག །དེ་ནས་འཁོར་ལོ་སྡོམ་ཆེན་གྱི་ཡབ་ཡུམ་ཁ་སྦྱོར་གྱི་ལྷ་རྣམས་ཅིག་ཏུ་བགྲངས་པས་ཞེ་བརྒྱད་དང༌། ལྷ་མོ་རྐྱང་པ་ཉེར་བཞི་ཡོད་དེ་དྲིལ་བུས་བདུན་བཅུ་རྩ་གཉིས། སྡོམ་ཆེན་གཙོ་བོ་ཡབ་ཡུམ་གཉིས་དཀྱིལ་འཁོར་ཀུན་ལ་དགོས་པའི་རྒྱས་འདེབས་ཀྱི་ལྷ་དྲུག་སྟེ། དེ་རྣམས་ལས་འཁོར་ཚོགས་ཁོ་ན་ལ་སྟོང་དང་བརྒྱད་ཅུ་ནི། ལོ་གསུམ་གྱི་ཉིན་ཞག་གི་ཚོགས་པ་རྣམ་པར་དག་པ་ཡིན་ལ། གསང་འདུས་རིགས་དྲུག་བསྡོམས་པས་ཁ་སྦྱོར་གྱི་ལྷ་བརྒྱ་སོ་གཉིས། སྒྱུ་དྲ་རིགས་གསུམ་བསྡོམས་པས་ཁ་སྦྱོར་གྱི་ལྷ་བརྒྱ་སོ་བདུན། དེ་གཉིས་བསྡོམས་པས་ཁ་སྦྱོར་གྱི་ལྷ་ཉིས་བརྒྱ་དྲུག་ཅུ་རེ་དགུ། ཡབ་ཡུམ་སོ་སོར་བགྲངས་པས་ལྔ་བརྒྱ་སུམ་ཅུ་སོ་བརྒྱད་དོ། །འདིར་ལྔ་བརྒྱ་སོ་བརྒྱད་དང་གོང་གི་སྟོང་བརྒྱད་ཅུ་བསྡོམས་པས་སྟོང་དང་དྲུག་བརྒྱ་བཅོ་བརྒྱད་ལ་གསུང་དབང་དང་སྡོམ་ཆེན་གྱི་གཙོ་བོ་དུས་ཀྱི་འཁོར་ལོ་ཡབ་ཡུམ་ངོ་བོ་གཅིག་པ་བསྣན་པས་སྟོང་དྲུག་བརྒྱ་ཉི་ཤུ་སྟེ། རྒྱུ་སྐར་གྱི་ཆུ་ཚོད་ཀྱི་གྲངས་དང་ལྷ་གྲངས་མཚུངས་པར་དག་སྦྱོར་བྱས་པས། དཔལ་ལྡན་རྒྱུ་སྐར་གྱི་དཀྱིལ་འཁོར་ཞེས་བྱའོ། །སྡོམ་ཆེན་གྱི་ལྷའི་ཚབ་ཏུ་འདོད་ཕྱིར་འདོད་བདུན་ཅུ་རྩ་གཉིས་འཇུག་པའང་སྔོན་དུས་འགའ་ཞིག་འདོད་པར་གྲགས་ཏེ། རྒྱུད་ལས། མཐའ་དག་བསྡུས་པར་གྱུར་པ་མངོན་བརྗོད་རྣམས་དང་བཅས་པ་ཉི་མའི་ཉིན་ཞག་གསུམ་འགྱུར་དུ་ནི་འགྱུར། །ཞེས་པའི་འགྲེལ་པར། རྣལ་འབྱོར་མའི་རྒྱུད་ལ་ལོ་གསུམ་གྱི་ཉིན་ཞག་གི་ཚོགས་ཀྱི་ལྷ་དང་ལྷ་མོ་རིག་པར་བྱ། ཞེས་གསུངས་ཤིང༌། མངོན་བརྗོད་ཅེས་པ་མངོན་བརྗོད་འབུམ་པའི་དོན་དུ་གསལ་བའི་ཕྱིར་སྡོམ་ཆེན་ངེས་པར་དགོས་པས། རྒྱུ་སྐར་གྱི་དཀྱིལ་འཁོར་འདི་ལ་འདོད་ཕྱིར་འདོད་དང་སྟེང་འོག་གི་ཀླུ་དང་རབ་
གཏུམ་མ་རྣམས་མེད་པར་གསལ་ལོ། །དེས་ན་སྐབས་འདི་དག་གི་འགྲེལ་པས། འདུས་པས་སྒྱུ་དྲ་གཉིས་ཐབས་རྒྱུད་དང༌། དུས་འཁོར་བདེ་མཆོག་གཉིས་ཤེས་རབ་ཀྱི་རྒྱུད་དུ་ཡང་གསུངས་ཤིང༌། ཤེས་རབ་ཀྱི་རྒྱུད་ཤར་གྱི་ཞལ་ནས་གསུངས་ཤིང་སྡོམ་པ་ཆེན་པོ་ནུབ་ཞལ་ནས་སྤྲོས་པས་ཀྱང་རྣལ་འབྱོར་མ་རྒྱུད་དངོས་ཐུགས་དང༌། མ་རྒྱུད་ཁྱད་པར་ཅན་ཡེ་ཤེས་སུ་བསྟན་པས་སྡོམ་པ་ཐུགས་རྡོ་རྗེ་དང༌། དུས་འཁོར་ཡེ་ཤེས་རྡོ་རྗེ་གཙོ་ཆེ་བར་བསྟན་པར་འགྱུར་རོ། །དེ་ལྟར་ན་དངོས་བསྟན་དང་འགྲེས་སྦྱར་བ་སོགས་སྤྱིར་བསྡོམས་ན། གཙོ་བོ་ཡབ་རྐྱང་དང༌། ཁ་སྦྱོར་གཅིག་པུ་དང༌། ལྷ་ལྔ་མ་དང༌། དགུ་མ་རིགས་གཉིས་དང༌། བཅུ་གསུམ་མ་དང༌། བཅུ་བདུན་མ་དང༌། བཅུ་དགུ་མ་དང༌། ཉེར་ལྔ་མ་དང༌། ཐུགས་དཀྱིལ་རྒྱས་པ་དང༌། པདྨ་གདན་ཅན་གྱི་དཀྱིལ་འཁོར་དང༌། སྐུ་གསུང་ཐུགས་ཡོངས་རྫོགས་དང༌། སྐུ་གསུང་ཐུགས་རྡོ་རྗེའི་དཀྱིལ་འཁོར་གསུམ་སྟེ། གཙོ་བོ་དུས་འཁོར་ཉིད་ལས་ཕྱེ་བའི་དཀྱིལ་འཁོར་བཅོ་ལྔ་དང༌། སྣ་ཚོགས་ཡུམ་ལྷ་ང་དྲུག་པའི་དཀྱིལ་འཁོར་དང༌། རྡོ་རྗེ་ཤུགས་ལ་སྲུང་མ་དྲུག་ཅུས་བསྐོར་བ་དང༌། ཁྲོ་བོ་བཅུས་བསྐོར་བ་དང༌། ཀླུ་བརྒྱད་ཀྱིས་བསྐོར་བ་དང༌། ཁྲོ་བོ་བཞིས་བསྐོར་བ་སྟེ། རྡོ་རྗེ་ཤུགས་ཀྱི་དཀྱིལ་འཁོར་བཞི། ཕྱི་མ་འདི་ལ་དཔའ་བོ་གཅིག་པའི་དཀྱིལ་འཁོར་ཟེར་བ་ཡོད་དེ་དོན་མ་གོ་བའོ། །རིགས་སོ་བདུན་གྱི་དཀྱིལ་འཁོར་ཡབ་ཡུམ་གཉིས། རིགས་བརྒྱའི་དཀྱིལ་འཁོར་མཚན་མ་སོ་གཉིས་ཀྱི་དཀྱིལ་འཁོར་སྡོམ་པ་ཆེ་ཆུང་གཉིས། སྒྱུ་འཕྲུལ་དྲྭ་བ་རིགས་གསུམ་སྟེ་ཉི་ཤུ་རྩ་དགུ་དང༌། དུས་ཀྱི་འཁོར་ལོའི་འཁོར་ཚོགས་ཀྱི་ལྷ་རེ་རེ་བཞིན་གྱི་སྒྲུབ་ཐབས་ལ། འགྲེལ་
བའི་དངོས་བསྟན་ལ་དེ་བཞིན་གཤེགས་པ་ནས། དུར་ཁྲོད་ཀྱི་བར་གྱི་གསལ་ཁ་ལས་མ་བྱུང་ཡང་ནུས་མ་བཅུ་དོན་གྱིས་ཐོབ་ཅིང༌། དཀྱིལ་འཁོར་དངོས་ཀྱི་ཕྱི་རུ་མ་བཀོད་ཀྱང་རྡོར་སེམས་ཡབ་ཡུམ་དང་མི་བསྐྱོད་པ་ཡབ་ཡུམ་ངེས་པར་དགོས་པས་འདབ་མའི་ལྷ་མོ་དང་འདོད་ཕྱིར་འདོད་གཟུངས་མ་ནུས་མ་དང་བཅས་པ་ལ་ལྔ་བརྒྱ་བཅུ་དྲུག་ལྷ་མོ་རྐྱང་པ་དང༌། རིགས་དྲུག་ཡུམ་དྲུག་སེམས་དཔའ་སེམས་མ་བཅུ་གཉིས་ལྷ་ཆེན་བཅུ་གཉིས། ཁྲོ་བོ་ཀླུ་དང་རབ་གསུམ་གསུམ་ལ་བཅུ་བཅུ། རྣལ་འབྱོར་མ་བརྒྱད་དེ་ཡབ་ཡུམ་ཁ་སྦྱོར་བདུན་ཅུ་དོན་བཞི་དཀྱིལ་འཁོར་དངོས་ལ་བཀོད་པ་ཡིན་ལ། ཤུགས་ལ་ཁྲོ་མོ་བཅུ་གཙོ་བོར་བྱས་པའང་འབྱུང་བས་ཁ་སྦྱོར་བརྒྱད་ཅུ་གྱ་བཞི། དེ་སྔར་གྱི་ཡུམ་རྐྱང་ལྔ་བརྒྱ་བཅུ་དྲུག་དང་བསྲེས་པས་དྲུག་བརྒྱ་སྟེ་དེ་ལྟར་འཁོར་ཚོགས་གཅིག་པུའི་དཀྱིལ་འཁོར་དེ་ཙམ་ཡིན་ལ། གསང་འདུས་རིགས་དྲུག་ལ་གཙོ་བོ་གོ་འཕོས་པས་བརྒྱ་དང་སོ་གཉིས། གསུང་གི་རྣལ་འབྱོར་མ་འཁོར་བཅས་ལ་དཀྱིལ་འཁོར་བརྒྱད་དང༌། སྐུའི་ལྷ་ཆེན་འཁོར་བཅས་ལ་དཀྱིལ་འཁོར་བཅུ་གཉིས་ཏེ་ཉི་ཤུ། དེ་ལྟར་ན་དྲུག་བརྒྱ་དང༌། བརྒྱ་སོ་གཉིས་དང༌། ཉི་ཤུ་རྩ་དགུ་དང༌། ཉི་ཤུ་རྣམས་བསྡོམས་པས། བདུན་བརྒྱ་དང་བརྒྱད་ཅུ་གྱ་གཅིག་བྱུང་ལ། དཔལ་ལྡན་རྒྱུ་སྐར་ནང་གི་དུས་འཁོར་རྒྱས་པ་དང༌། དཀྱིལ་འཁོར་བཅུ་གཅིག་གམ་བཅུ་གཉིས་བསྡོམས་པའི་རྒྱུ་སྐར་གྱི་དཀྱིལ་འཁོར་ཉིད་ཀྱང་བསྣན་ན། བདུན་བརྒྱ་བརྒྱད་ཅུ་གྱ་གསུམ་མོ། །གཙོ་བོ་དུས་འཁོར་གྱི་དཀྱིལ་འཁོར་སྔར་བཤད་པའི་བཅོ་ལྔ་དང༌། ཕྱི་མ་འདི་གཉིས་ཏེ་དཀྱིལ་འཁོར་བཅུ་བདུན་ལ་གཙོ་བོའི་ཞལ་ཕྱག་མང་ཉུང་མི་འདྲ་བའི་དབྱེ་བ་དང༌། གཙོ་བོ་དུས་
འཁོར་ཉིད་ལ་རིགས་ལྔ་གོ་འཕོ་ཚུལ་དང༌། སྦྱིན་སྲེག་གི་ཐབ་ཀྱི་དཀྱིལ་འཁོར་བཅུ་ལ་སོགས་པ་དང༌། སྒྱུ་འཕྲུལ་དྲྭ་བ་རིགས་གསུམ་ལ་གཙོ་བོ་གོ་འཕོ་སྦྱར་ན། ད་དུང་མང་པོར་འགྱུར་མོད་ཀྱི་རེ་ཞིག་དེའི་སྤྲོས་པ་བཞག་གོ །གོང་དུ་བཤད་པ་ལྟར་གཙོ་བོའི་ཞལ་ཕྱག་གི་གྲངས་ཀྱང་ཞལ་གཅིག་ཕྱག་གཉིས་པ་དང༌། ཞལ་གཉིས་ཕྱག་བཞི་པ་དང༌། ཞལ་གསུམ་ཕྱག་དྲུག་སྐུ་མདོག་ལྗང་སྔོ་གཉིས་དང༌། ཞལ་བཞི་ཕྱག་བརྒྱད་པ་དང༌། ཞལ་བཞི་ཕྱག་ཉེར་བཞི་པ་དང༌། ཞལ་བཞི་ཕྱག་ཉེར་དྲུག་པ་དང༌། ཞལ་ལྔ་ཕྱག་བཅུ་པ་དང༌། ཞལ་དྲུག་ཕྱག་དྲུག་པ་དང༌། ཞལ་བརྒྱད་ཕྱག་བཅུ་དྲུག་པ་དང༌། ཞལ་བཅུ་གཉིས་ཕྱག་ཉེར་བཞི་པ་དང༌། དེ་ལ་ཡང་དོན་གྱིས་ཐོབ་པའི་ཉེར་དྲུག་པ་སྟེ། གསལ་བར་གོ་ནུས་པ་བཅུ་གཉིས་པོ་དེ་དག་ཡིན་ནོ། །གཙོ་བོའི་ཞལ་ཕྱག་མི་འདྲ་བའི་དབྱེ་བ་འདི་དག་མོས་པ་སོ་སོ་དང་དབང་པོ་ཐ་དད་པའི་དབྱེ་བས་ཉེར་མཁོ་ཆེ་བར་གཏོགས་པ་ཙམ་ཡིན་ཞིང༌། བོད་ཀྱི་དུས་འཁོར་བ་འགའ་ཞིག་ལུས་ཀྱི་དཀྱིལ་འཁོར་ཡང་བཞེད་དེ། རྒྱུད་འགྲེལ་གྱི་དངོས་བསྟན་ལྟར་ན། རྟེན་དང་བརྟེན་པའི་དཀྱིལ་འཁོར་རྣམས་ལུས་ལ་དག་སྦྱོར་དུ་བཤད་པ་ཡིན་གྱི། འཁོར་ལོ་སྡོམ་པའི་ལུས་དཀྱིལ་ལྟར་མཐའ་གཞན་དུ་དོགས་པ་མེད་པའི་རྐང་ཚུགས་ལུས་དཀྱིལ་དག་པ་པར་གསུངས་པ་མ་ཡིན་ལ། བླ་མའི་མན་ངག་གི་རྒྱུན་དང་ལྡན་པ་ཡིན་ན་ནི་མི་འགལ་ཏེ། གསང་འདུས་འཕགས་སྐོར་གྱི་ལུས་དཀྱིལ་ལྟ་བུ་རྒྱ་གཞུང་གི་ཁུངས་ཅན་དང༌། ཀྱེ་རྡོར་ལུས་དཀྱིལ་ལྟ་བུ་མན་ངག་སྙན་བརྒྱུད་དུ་བཞེད་པ་བཞིན་ཡིན་ལ། རང་གི་བློས་དཔྱད་པ་ཡིན་ན་ནི་སྙིང་པོ་མེད་དོ། །ཡང་དེ་དག་གི་བསམ་པ། རྒྱུད་འདིར་ལུས་དཀྱིལ་མ་བསྟན་ན་
ལུས་དཀྱིལ་སྟོན་པའི་རྒྱུད་གཞན་ལས་རྒྱུད་འདི་མི་ཟབ་པར་སོང་དོགས་པར་སྣང་སྟེ། དེ་ལྟར་མ་ཡིན། སྤྱིར་ལུས་དཀྱིལ་ནི། བསྐྱེད་རིམ་ལ་བལྟོས་ནས་ཅུང་ཟད་གཞན་ལས་ཟབ་པའི་ཕྱོགས་སུ་བསྔགས་པའི་སྐབས་ཤིག་ཡོང་མོད། དེ་འདྲ་ལས་བརྒྱ་སྟོང་གི་ཟབ་པའི་རྫོགས་རིམ་གྱི་གནད་རྒྱུད་སྡེ་གཞན་ལས་མི་གསལ་བ་འདིར་རྒྱ་ཆེར་བཤད་པས་རྒྱུད་འདིའི་ཆེ་བ་དེ་ཕྱོགས་ནས་བསམས་པས་ཆོག་ཅིང༌། གཞན་ཡང་ཟབ་ཁྱད་ཤིན་ཏུ་མང་བའི་ཕྱིར་ལུས་དཀྱིལ་གྱི་ཕྱོགས་ཁོ་ན་ལ་འགྲམ་མཆུ་ལྡང་མི་དགོས་སོ། །གཞན་ཡང་ཕྱིས་ཀྱི་དུས་འཁོར་བ་ཁ་ཅིག་རྒྱུད་འགྲེལ་ལས་དངོས་སུ་ཟིན་པའི་དཀྱིལ་འཁོར་སུམ་བརྒྱ་བཅུ་གཅིགཤུགས་ཀྱིས་བསྟན་པ་སྟོང་དྲུག་བརྒྱ་སོགས་ཀྱི་རྣམ་གཞག་བྱེད་པའང་ཇི་ལྟར་འོས་པ་རྟག་པར་བྱའོ། །དེ་ལ་རྒྱུད་ཀྱི་རྒྱལ་པོ་འདི་ལས་དཀྱིལ་འཁོར་གྱི་རྣམ་གཞག་མང་ཞིང༌། བསྐྱེད་རིམ་གྱི་ཆོ་ག་ཡང་ཤིན་ཏུ་རྒྱས་པར་གསུངས་ན། གཞན་དུ་བསྐྱེད་རིམ་ལ་སྨད་ཅིང༌། རྫོགས་རིམ་ལ་བསྔགས་པ་དག་ཤས་ཆེའོ། །འདུས་པ་ལ་སོགས་པ་འགའ་ཞིག་རྫོགས་རིམ་སྦས་ཤིང་བསྐྱེད་རིམ་རྩལ་དུ་བཏོན་པ་དང༌། དགྱེས་རྡོར་ལྟར་བུ་རྫོགས་རིམ་མ་སྦས་ཀྱང་བསྐྱེད་རིམ་ལ་བསྔགས་པ་ཆེས་ཆེ་བའང་ཡོད་དོ། །དེ་ལ་འདིར་བསྐྱེད་རིམ་སྨད་པ་ནི་ངེས་དོན་གྱི་ལམ་མ་ཡིན་པ་དང༌། རྫོགས་པའི་བྱང་ཆུབ་སྒྲུབ་པ་ལ་མེད་ན་མི་འབྱུང་གི་རྒྱུ་ཡང་མ་ཡིན་ཞིང༌། བསྐྱེད་རིམ་གྲུབ་པ་ཙམ་ལ་སངས་རྒྱས་དངོས་སུ་རློམ་པ་སོགས་བཀག་པ་ཡིན་ལ། གཞན་འགར་རྫོགས་རིམ་སྦས་པ་ནི་དེའི་སྐལ་བ་མེད་པ་ལ་དགོངས་པ་དང༌། རང་གར་འཇུག་པ་དགག་པའི་དོན་ཡིན་གྱི། ལས་དང་པོ་པ་ལ་མི་འཁོ་བ་དང༌།
སངས་རྒྱས་ལ་སྒྲིབ་པར་འཆད་པ་མ་ཡིན་ལ། བསྐྱེད་རིམ་ལ་བསྔགས་པ་ནི། ལས་དང་པོ་བ་ཤས་ཆེ་ཞིག་ལ་དགོས་ངེས་པ་དང༌། དང་པོ་རྫོགས་རིམ་གྱི་སྐལ་བ་མེད་པ་རྣམས་དེ་གོམས་ན་སྐལ་ལྡན་དུ་འགྱུར་བ་དང༌། གནས་སྐབས་ཀྱི་ཕན་ཡོན་ཆེས་མང་བར་ཡོད་པ་དང༌། ཕྲ་མོ་དང་འཇིག་རྟེན་པའི་དངོས་གྲུབ་གྲུབ་ན། སླར་བྱང་ཆུབ་ཀྱི་རྒྱུ་ཚོགས་ཁྱད་པར་ཅན་དུའང་འགྱུར་བར་དགོངས་པ་ཡིན་གྱི། ངེས་དོན་གྱི་ལམ་སོགས་སུ་འཆད་པ་མ་ཡིན་པས་དེ་རྣམས་དགོངས་པའི་གནད་ལ་མི་མཐུན་པ་ནི་མེད་དོ། །འོན་ཀྱང་ཕྱོགས་གཅིག་ནས་བསྔགས་པ་ཆེ་བའི་རྒྱུ་མཚན་གྱིས་གསང་འདུས་དགྱེས་རྡོར་སོགས་ལ་འཇུག་པ་རྣམས་བསྐྱེད་རིམ་ལ་གཙོ་བོར་བྱེད་པ་དང༌། རྒྱུད་འདི་ལ་ཞུགས་པ་རྣམས་རྫོགས་རིམ་ལ་གཙོ་བོར་བྱེད་པ་འབྱུང་བ་ནི། རྒྱུད་དེ་དང་དེ་ལས་བསྟོད་པ་དང་སྨད་པ་མཛད་པའི་རྗེས་སུ་ཞུགས་པ་ཡིན་པས་ཚུལ་དང་མི་མཐུན་པ་མ་ཡིན་ཞིང༌། རིགས་པ་ཡང་ཡིན་ཏེ་དེ་ལྟར་བསྟོད་སྨད་མཛད་པ་ལ། གནས་སྐབས་རྗེས་འཇུག་རྣམས་ལ་འཇུག་ཚུལ་གྱི་དགོས་པ་ཞིག་འབྱུང་དགོས་པའི་ཕྱིར་རོ། །དེ་བས་ན་འདུས་པ་བ་སོགས་བསྐྱེད་རིམ་ཁོ་ན་སྒོམ་པར་སྤྲོ་བ་ལ་ད་ལྟ་འཕྲལ་མར་རྫོགས་རིམ་མ་བྱུང་ན་མི་རུང་བའི་འདོད་པ་གཏུགས་པོའི་ནན་ཆགས་ཀྱང་མི་བྱ་ལ། དུས་ཀྱི་འཁོར་ལོར་ཞུགས་པ་དག་རྫོགས་རིམ་གཙོ་བོར་བྱེད་པ་ལ་ལས་དང་པོ་པ་ལ་རྫོགས་རིམ་མི་འབྱུང་ཞེས་བཤད་ཅིང༌། བསྐྱེད་རིམ་ལ་ངེས་པར་སློབ་དགོས་པར་ནན་གྱིས་འཆད་པ་འདི་དག་ནི་སྐལ་བའི་རིམ་པ་དང་བསྟུན་ནས་སྐྱོང་མི་ཤེས་པའི་བླུན་རྟགས་ལ་ལམ་ཆ་ཚང་བ་གྲུ་བཞིར་འཁྱེར་བ་ཡིན་ནོ་སྙམ་
པའི་མངོན་པའི་ང་རྒྱལ་གྱི་གདོན་ཆེན་པོ་ཞུགས་པ་མི་གསལ་བ་དང་མི་མཁས་པ་དང་མ་རིག་པ་ཆེན་པོའོ། །གཞན་ཡང་དཀྱིལ་འཁོར་འཁོར་ལོ་ཆེ་བ་དག་ལ་བཤད་སྒོམ་ཙམ་བྱས་པའི་ཡུས་ཀྱིས་ཆོ་ག་བསྡུས་པ་དང་ལྷ་ཉུང་ངུའི་སྒྲུབ་ཐབས་ལ་བརྙས་པ་བྱེད་པ་ནི་ཆོས་སྤངས་པ་ཡིན་ཞིང༌། དེ་ལྟ་བུ་སངས་རྒྱས་ཀྱིས་གསུངས་ཤིང༌། གྲུབ་པ་རྣམས་ཀྱིས་ཀྱང་བཤད་པ་ལ་སྐུར་བ་བཏབ་པས་ཉེས་པའི་ཁུར་ཆེན་པོ་འཁུར་བ་དག་གོ །དེ་བཞིན་དུ་སྐད་ཅིག་གིས་དཀྱིལ་འཁོར་བསྐྱེད་པ་རྫོགས་རིམ་ཐོབ་པ་ལ་ཡིན་གྱི། གཞན་ལ་མི་རུང་ངོ་ཞེས་པའང་དེ་དང་འདྲ་སྟེ། དེ་དག་གི་འཐད་པ་དང་རྒལ་ལན་འདིར་རྒྱས་པར་མ་སྨོས་ སོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། བསྒོམ་བྱ་དཀྱིལ་འཁོར་གྱི་རྣམ་གྲངས་བསྟན་པའི་སྡེ་ཚན་ཏེ་བཅུ་གཅིག་པའོ།། །།གསུམ་པ་རྒྱུད་འདིའི་རིམ་གཉིས་ཀྱི་གོ་རིམ་ལ་གཞན་གྱིས་བརྟགས་པའི་མཐའ་དགག་པ་ནི། སྐབས་འདིར་མཁས་པར་གྲགས་པ་འགའ་དྲང་དོན་གྱི་ལམ་ལ་ཞེན་པ་ཐལ་ཆེས་པའི་འདོད་ཚུལ་ཞིག་ལ་དཔྱད་པར་བྱ་སྟེ། དེ་ལ་ཁ་བ་ཅན་འདིར་དུས་འཁོར་བ་གོང་མ་ཕལ་ཆེར་དང༌། བར་སྐབས་སུ་བྱོན་པ་རྣམས་ཀྱང་སྟེ། བསྐྱེད་རིམ་མཆོག་སྒྲུབ་པའི་ལམ་མ་ཡིན་ནོ་ཞེས་པ་དང༌། སངས་རྒྱས་ཐོབ་པའི་རྒྱུ་མ་ཡིན་ནོ་ཞེས་སོགས་རགས་བཤད་དུ་མཛད་པ་ལ། ཕྱིས་ཀྱི་འགའ་ཞིག་ཞེ་སྡང་ཁོང་ནས་འཁྲུགས་པས་ཚིག་ལ་འཁྲི་བའི་ཚུལ་གྱིས་དགག་པ་བྱེད་ལ། གཞན་མང་པོ་དག་ཀྱང་དེ་ལ་རྗེས་སུ་ཡི་རང་བ་དག་སྣང་ངོ༌། །དགག་པ་ཇི་ལྟར་བརྗོད་པ་ཡང་འདི་སྐད་དུ། བསྐྱེད་རིམ་མ་བསྒོམས་ན་རྫོགས་རིམ་ཁོ་ན་ལ་འབད་ཀྱང་མཆོག་
མི་ཐོབ་སྟེ། དེའི་ལྷན་ཅིག་བྱེད་རྐྱེན་དང་བྲལ་བའི་ཕྱིར། དཔེར་ན་ཆུ་ལུད་དང་བྲལ་ན་མྱུ་གུ་མི་སྐྱེ་བ་བཞིན་ནོ། །ཞེས་པ་འདི་ནི་རིག་པ་དང་པོའོ། །ཡང་ཐབས་དང་བྲལ་བའི་ཤེས་རབ་ཇི་ཙམ་བསྒོམས་ཀྱང༌། མཐར་ཐུག་མི་ཐོབ་པ་ཐེག་ཆེན་སྤྱིའི་ལུགས་ཡིན་ལ། སྔགས་ཀྱི་སྐབས་འདིར་ཐབས་ནི་བསྐྱེད་རིམ་ཡིན་པས་བསྐྱེད་རིམ་ངེས་པའི་ལམ་མོ་སྙམ་པ་ནི་རིག་པ་གཉིས་ པའོ། །གཟུགས་སྐུ་ཐོབ་པའི་ཆེད་དུ་གཟུགས་སྐུའི་རྣམ་པ་ཅན་གྱི་ལྷའི་རྣལ་འབྱོར་བསྒོམ་དགོས་ཏེ། ཆོས་སྐུ་ཐོབ་པའི་ཕྱིར་དུ་ཆོས་སྐུའི་རྣམ་པ་ཅན་གྱི་སྟོང་ཉིད་བསྒོམ་དགོས་པའི་ཕྱིར། དེས་ན་བསྐྱེད་རིམ་བསྒོམ་དགོས་པར་འགྲུབ་པོ་སྙམ་པ་ནི་རིག་པ་གསུམ་པའོ། །ཡང་སངས་རྒྱ་བ་ལ་བསྐྱེད་རིམ་ངེས་པར་དགོས་པའི་ལམ་མ་ཡིན་ན། རྒྱུད་སྡེ་འོག་མ་གསུམ་ལ་ཕར་ཕྱིན་ཐེག་པ་དང་ཐུན་མོང་མ་ཡིན་པའི་ཟབ་ཁྱད་མེད་པར་འགྱུར་སྙམ་པ་ནི་བཞི་པའོ། །བླ་མེད་ཀྱི་རྒྱུད་གཞུང་ཕལ་ཆེར་ལས་བསྐྱེད་རིམ་གསུངས་པས། དེ་མི་སྒོམ་པར་སྨད་ན་རྒྱུད་གཞུང་ཕལ་ཆེར་ལ་སྐུར་བ་འདེབས་པར་འགྱུར་སྙམ་པ་ནི་ལྔ་པའོ། སྔགས་ལམ་དུ་བསྐྱེད་རིམ་ལ་མ་བལྟོས་པར་སངས་རྒྱས་ཐོབ་པའི་ལམ་ཡོད་ན། མདོ་ལམ་དུ་སྦྱིན་སོགས་ཀྱི་སྤྱོད་པ་ལ་མ་བསླབས་པར་སངས་རྒྱ་བའི་ལམ་ཡོད་པར་ཐལ་ལོ་སྙམ་པ་ནི་དྲུག་པའོ། །དེ་ལྟར་ན་རིགས་པའི་གནོད་བྱེད་དུ་རློམ་པ་དྲུག་པོ་དེ་དག་ནི་འཐད་པ་མ་ཡིན་ཏེ་རིམ་པ་བཞིན་དུ་སྦྱར་ན། དང་པོ་མི་འཐད་དེ་བསྐྱེད་རིམ་མེད་ཀྱང་འབྲས་བུ་སངས་རྒྱས་ཀྱི་ལྷན་ཅིག་བྱེད་རྐྱེན་མེད་པར་མི་འགྱུར་ཏེ། སངས་རྒྱས་ཀྱི་སས་བསྡུས་པའི་ལམ་བདེན་གྱི་ཆོས་རྣམས་ཀྱི་ལྷན་ཅིག་བྱེད་རྐྱེན་ནི། རྒྱུན་མཐའ་དང་རྒྱུན་མཐའི་སྔ་ལོགས་ཀྱི་གཞན་དོན་གྱི་སྤྱོད་པ་
རྣམས་ཡིན་གྱི། བསྐྱེད་རིམ་ནི་དེ་འདྲ་མ་ཡིན་པའི་ཕྱིར་དང༌། ཐེག་པ་མཆོག་འདིར་ཉེ་རྒྱུའི་དབང་བསྐུར་བ་ནི། དེའི་ལྷན་ཅིག་བྱེད་རྐྱེན་གྱི་གཙོ་བོ་ཡིན་པའི་ཕྱིར་རོ། །བསྐྱེད་རིམ་ནི་སངས་རྒྱས་ཀྱི་ལྷན་ཅིག་བྱེད་རྐྱེན་རང་མ་ཡིན་ཏེ། ཡུན་རིང་འདས་པའི་སྔ་རོལ་གྱི་རྒྱུའི་ཚོགས་པ་ལ་ཕན་འདོགས་བྱེད་ཙམ་ཡིན་དུ་ཆུག་ཀྱང༌། སངས་རྒྱས་ཐོབ་པ་ལ་ཉེ་བའི་དུས་སུ་ལྟ་ཅི་སྨོས། འཇིག་རྟེན་ལས་འདས་པའི་ཡེ་ཤེས་སྐྱེ་བའི་སྔ་རོལ་ཉེ་བ་ན་ཡང་མེད་པའི་ཕྱིར་རོ། །གཉིས་པ་མི་རུང་སྟེ། ཤེས་རབ་དང་བྲལ་བའི་ཐབས་དང༌། ཐབས་དང་བྲལ་བའི་ཤེས་རབ་ཀྱིས་སངས་རྒྱས་མི་ཐོབ་པ་བདེན་མོད་ཀྱང༌། ཐེག་པ་འདིར་ཡང་ཐབས་ཡིན་ན་བསྐྱེད་རིམ་ཡིན་པས་ཏ་ག་ལ་ཁྱབ། ཐབས་ཀྱི་གཙོ་བོ་མཐར་ཐུག་ཀྱང་མིན་ནོ། །རྫོགས་རིམ་ནི་ཤེས་རབ་རྐྱང་པ་མ་ཡིན་ཏེ། ཐབས་དཔག་ཏུ་མེད་པ་དང་བཅས་པའི་ཕྱིར་ རོ། །དེ་ཡང་ཇི་ལྟ་བུ་ཞེ་ན། མཉམ་གཞག་ཏུ་སྤྲོས་བྲལ་གྱི་སྟོང་པ་དང་སྦྱོར་རྒྱུའི་ཐབས་ཐུན་མོང་མ་ཡིན་པ་ནི་ཞུ་བདེ་འགྱུར་མེད་དང༌། མི་འགྱུར་བའི་བདེ་བ་དང༌། རླུང་འགོག་པའི་ཐབས་དང༌། རྩ་དག་པའི་རྣལ་འབྱོར་སོགས་ཡིན་ལ། སྟོང་གཟུགས་ཕྱག་རྒྱ་ཆེན་པོ་ཡང་སྤྲོས་བྲལ་དང་སྦྱོར་རྒྱུའི་ཐབས་སུ་འགྱུར་ཞིང༌། རྗེས་ཐོབ་ཀྱི་ཐབས་ཐུན་མོང་མ་ཡིན་པ་མང་པོའང་ཡོད། མདོ་ལམ་དང་ཐུན་མོང་གི་ཐབས་མཁས་ཀྱི་ཁྱད་པར་ཐམས་ཅད་ཀྱང་རྫོགས་རིམ་ལ་ཚང་བར་ཡོད་པའི་ཕྱིར། བསྐྱེད་རིམ་མེད་ན་ཐབས་དང་བྲལ་བའོ་སྙམ་དུ་སེམས་པ་ནི། གྲོང་གང་ན་གདོལ་བའི་རིགས་མེད་ན་མི་མེད་པའི་སྐྱོན་དུ་འཛིན་པ་དང་འདྲའོ། །འདིར་ཐབས་དང་བྲལ་བའི་ཤེས་རབ་རྐྱང་པ་མི་རུང་བ་ཐེག་ཆེན་སྤྱི་ལུགས་ཡིན་ཟེར་བ་ལྟར་ན། ཐེག་
དམན་ལ་ཐབས་དང་བྲལ་བས་ཆོག་པར་སེམས་པ་འདྲ་སྟེ་ཡེ་མི་ཆོག་གོ །ཐེག་དམན་རང་ཉིད་ལ་བལྟོས་པའི་ཐབས་ངེས་པར་དགོས་ལ། ཐབས་ཉེ་ཚེ་བ་ནི་ཡིན་མོད་ཀྱི། ཐེག་དམན་དུ་ཤེས་རབ་ཀྱང་ཉེ་ཚེ་བའོ། །གསུམ་པ་ཡང་མི་འཇུག་སྟེ། ཆོས་སྐུའི་རྣམ་པ་ཡིན་ན་སྟོང་པའི་རྣམ་པ་ཙམ་ཡིན་པས་ཀྱང་མ་ཁྱབ། གཟུགས་སྐུའི་རྣམ་པ་ལམ་དུ་བྱེད་དགོས་ན་ཞལ་ཕྱག་གི་རྣམ་པ་ཡིན་པས་ཀྱང་མ་ཁྱབ་ཅིང༌། ལྷའི་རྣལ་འབྱོར་ཡིན་ན་བསྐྱེད་རིམ་ཡིན་པས་ཀྱང་མ་ཁྱབ་པའི་ཕྱིར། ཅལ་ཅོལ་དེ་ལྟ་བུ་མི་འཚལ་ལ། རྫོགས་རིམ་གྱིས་ལྷ་སྐུ་དེ་སྔོན་བསྐྱེད་རིམ་བསྒོམས་པའི་མཐུ་ལས་བྱུང་བའོ་སྙམ་ན། འདི་ནི་དྲང་དོན་གཙོ་ཆེ་བའི་ལམ་རིམ་འགའ་ཞིག་གི་ཕྱོགས་ཙམ་མཐོང་བས་ངེས་དོན་མཐར་ཐུག་ལས་ཕྱིར་ཕྱོགས་པར་ཟད་དེ། སྔོན་རྣམ་རྟོག་གིས་བསྐྱེད་པའི་ལྷ་སྐུ་བསྒོམས་པའི་བག་ཆགས་སད་པའི་ཤུགས་ལས་ཕྱིས་ལྷ་སྐུའི་གསལ་སྣང་ཤར་བ་དེ་ནི་མན་ངག་པ་འགའ་ཞིག་རྣམ་རྟོག་སྔོན་སོང་གི་དྲོད་ཅེས་བྱ་བར་མིང་འདོགས་པ་དོན་ལ་ཉམས་སྣང་ཙམ་ཡིན་པས། རྒྱུའི་དབང་གིས་བསྐྱེད་རིམ་དུ་གཏོགས་སུ་ནི་རུང་ལ། རྫོགས་རིམ་གྱི་ལྷ་སྐུའི་ཕྱོགས་ཙམ་ཡང་མ་ཡིན་ནོ། །འོ་ན་འཕགས་སྐོར་ལས་དེ་འདྲ་དེ་ལུས་དབེན་གྱི་ལྷ་སྐུར་བཤད་པས་ཅིའི་ཕྱིར་རྫོགས་རིམ་མིན་སྙམ་ན། ངེས་དོན་སྦས་ཏེ་བཤད་པ་ན་དེ་འདྲ་རུང་དུ་ཡོད་ཀྱང༌། དགོངས་དོན་མཐར་ཐུག་ཐོག་མར་དགེ་བའི་དུས་ཀྱི་སྟོང་གཟུགས་ལ་ལུས་དབེན་དུ་དགོངས་སོ། །དེས་ན་སྔོན་ལྷ་སྐུའི་རྣམ་རྟོག་གོམས་པའི་བག་ཆགས་ཡོད་པ་དེ། རྩ་རླུང་གི་མན་ངག་གིས་རིག་པ་ཅུང་ཟད་དྭངས་པ་ན་རྐྱེན་དེ་ལས་སྐབས་དེར་རྟོག་པས་ཆེད་གཏད་མ་བསྒོམས་ཀྱང༌། ལྷ་སྐུར་ཤར་བ་དེ་ནི་དོན་དམ་
གྱི་ལྷ་སྐུ་རང་ཤར་མ་ཡིན་ཏེ། དེ་ཉིད་རང་ལ་བརྟན་པ་མ་ཐོབ་ན་འཕྲལ་འཕྲལ་དུ་ཉམས་པར་ཡང་འགྱུར་ཞིང༌། དེ་རང་ལ་བལྟོས་པའི་བརྟན་པ་ཐོབ་ཏུ་ཆུག་ཀྱང་ལུས་བརྗེས་པའི་འོག་ཏུ་རྗེས་སུ་མི་འབྲང་ངོ༌། །གདོད་མའི་ལྷ་སྐུ་སེམས་ཀྱི་ཆོས་ཉིད་དུ་གནས་པ་དེ་རྐྱེན་རྟོག་བཅས་མ་ཡིན་པ་རྣམ་པར་མི་རྟོག་པའི་ཏིང་ངེ་འཛིན་གྱིས་རླུང་སེམས་དབུ་མར་འགགས་པའི་ཡེ་ཤེས་སྐྱེས་པས་མཐོང་བའི་སྟོང་གཟུགས་ཀྱི་ལོངས་སྤྱོད་རྫོགས་སྐུ་དེ་ནི་རྫོགས་རིམ་པའི་ལྷ་ཡིན་ནོ། །འདི་ལ་བསྐྱེད་རིམ་སྔོན་དུ་འགྲོ་མི་དགོས། འདི་བསྐྱེད་རིམ་ལས་བྱུང་བ་ཡང་མ་ཡིན་ཏེ། དེ་དང་འདི་རྒྱུ་འབྲས་ཀྱི་འགྲོས་ཐ་དད་པ་ཁོ་ན་ཡིན་པའི་ཕྱིར། ཤར་ཕྱོགས་སུ་ཁྲེ་རྒོད་གྱི་ཞིང་ལ་ཆུ་དྲངས་པས་ནུབ་ཕྱོགས་སུ་འབྲས་ཀྱི་ལོ་ཐོག་སྨིན་པ་ལ་མི་ཕན་པ་བཞིན་ནོ། །བཞི་པ་ཡང་ལེགས་པར་མ་སྨྲས་ཏེ། བླ་མེད་ཀྱི་ལམ་དུ་བསྐྱེད་རིམ་མི་དགོས་ན། རྒྱུད་སྡེ་འོག་མ་གསུམ་ལ་ཕར་ཕྱིན་ཐེག་པ་ལས་ལྷག་པའི་ཁྱད་ཆོས་མེད་པར་འགྱུར་ཟེར་བ་ནི། འབྲེལ་མེད་བྱུང་རྒྱལ་དུ་སྨྲ་བ་ཡིན་ཏེ། ཚིག་འདིའི་ཤུགས་ལ་རྒྱུད་སྡེ་འོག་མ་གསུམ་ལ་བསྐྱེད་རིམ་ཡོད་ཅེས་པར་འགྱུར་ན། དེ་ནི་ཁྱེད་ཉིད་ཀྱང་མི་འདོད་དོ། །བསྐྱེད་རིམ་སངས་རྒྱས་ཐོབ་པའི་རྒྱུ་ངེས་པ་ཅན་མ་ཡིན་པར་ཁོ་བོ་ཅག་འདོད་ཀྱི། བསྐྱེད་རིམ་མདོ་དང་ཐུན་མོང་པའམ། ལེགས་པའི་ཆོས་མ་ཡིན་པར་མི་འདོད་པས། བླ་མེད་འདིར་བཤད་པའི་བསྐྱེད་རིམ་དེ་མདོ་ལ་མེད་པའི་ཟབ་ཁྱད་ཀྱི་རྣམ་གྲངས་ཙམ་ཡིན་པ་ཏ་འདོད་ལ། རྒྱུད་སྡེ་འོག་མ་གསུམ་ཀྱི་ལྷའི་རྣལ་འབྱོར་ཡང་མདོ་ལ་མེད་པའི་ཟབ་ཁྱད་ཙམ་ཡིན་མོད། ཟབ་ཁྱད་དེ་ཙམ་ཁོ་ནས་ཟད་པ་མ་ཡིན་ཏེ། རྒྱུད་སྡེ་འོག་མ་ལ་རིག་སྔགས་ཀྱི་བཟླས་པ་དང་
མཚན་མེད་ཀྱི་རྣལ་འབྱོར་ལ་འཇུག་པའི་རིམ་པ་དང༌། ལྷ་ལ་མཆོད་པ་དང་རྫས་ཀྱི་སྦྱོར་བ་ལ་སོགས་པ། མདོར་ན་ལྷའི་རྣལ་འབྱོར་མ་ཡིན་པའི་ཁྱད་ཆོས་གཞན་དུ་མས་ཀྱང་མདོ་ལས་ཟབ་པར་འཇོག་ཐུབ་པའི་ཕྱིར་རོ། །ལྔ་པ་ཡང་བྱུང་རྒྱལ་དུ་སྨྲ་བ་སྟེ། བསྐྱེད་རིམ་སངས་རྒྱས་ཀྱི་ངེས་པའི་རྒྱུ་མ་ཡིན་ན། རྒྱུད་ཕལ་ཆེར་ལས་བསྐྱེད་རིམ་བཤད་པས་རྒྱུད་དེ་ཐམས་ཅད་ལ་སྐུར་པ་བཏབ་པར་འགྱུར་ཞེས་པ་འདི་ཚིག་གི་ཧང་རྡེག་མ་གཏོགས་དོན་གྱིས་སྟོངས་ཏེ། འོ་ན་རྒྱུད་མང་པོ་ཞིག་ལས་སྦྲུལ་གྱིས་ཟིན་པའི་དུག་གསོ་བ་བཤད་ན། སྦྲུལ་དུག་གསོ་བ་དེ་སངས་རྒྱས་ཐོབ་པ་ལ་ངེས་པར་དགོས་པའི་ལམ་ཡིན་ནམ་ཅི། དེ་མིན་ཞེས་སྨྲ་ན་རྒྱུད་ཕལ་ཆེར་ལ་སྐུར་བ་བཏབ་པར་འགྱུར་བ་སོགས་ཧ་ཅང་ཐལ་ཆེས་སོ། །དེ་བཞིན་དུ་ཆར་འབེབས་ལ་སོགས་པ་ཕྲ་མོ་ཐམས་ཅད་ལ་སྦྱར་བར་བྱའོ། །དེས་ན་བསྐྱེད་རིམ་ལར་མ་བཤད་པའི་ཡང་བླ་མེད་ཀྱི་རྒྱུད་ཡོད་ལ། ཕལ་ཆེར་ན་བཤད་མོད་ཀྱང་སངས་རྒྱས་ཐོབ་པ་ལ་མེད་ན་མི་འབྱུང་གི་རྒྱུ་ཡིན་པར་བཤད་པ་མི་སྣང་བས་ཅིའི་ཕྱིར་སྐུར་པ་བཏབ་པར་འགྱུར། ཡང་འདི་སྐད་ཅེས་བྱ་སྟེ། གྲངས་མེད་གསུམ་དུ་ཚོགས་གསོག་པ་དེ་སངས་རྒྱས་སྒྲུབ་པ་ལ་ངེས་པར་དགོས་སམ་མི་དགོས། དགོས་ན་གསང་སྔགས་ཀྱི་མྱུར་ལམ་མེད་པར་འགྱུར་ལ། མི་དགོས་ན་མདོ་སྡེ་ཕལ་ཆེར་ལ་སྐུར་བ་བཏབ་པར་འགྱུར་ཏེ། མདོ་སྡེ་རྣམས་ལས་གྲངས་མེད་གསུམ་དུ་ཚོགས་བསགས་ནས་སངས་རྒྱས་པར་བཤད་པའི་ཕྱིར། ཞེས་ཁྱབ་མཚུངས་སུ་བརྗོད་ན་ལན་ཅི་སྨྲ། དྲུག་པ་ནི། འདྲ་མཚུངས་བརྗོད་པ་ཙམ་དུ་ཟད་པས་སྙིང་པོ་མེད་དེ། བསྐྱེད་རིམ་ལ་མ་བལྟོས་པར་སངས་རྒྱ་བ་ཡོད་ན།
སྦྱིན་སོགས་མ་སྤྱད་པར་དེ་ཡོད་པར་འཕེན་པ་འདི་ནི། སྦྱིན་སོགས་དང་བསྐྱེད་རིམ་ངོ་བོ་གཅིག་པ་ཡང་མ་ཡིན། རྣམ་པ་འདྲ་བ་ཡང་མ་ངེས། དོད་ཐུབ་ཀྱི་རྒྱུ་མཚན་ཡང་མེད་པས་འབྲེལ་མེད་ཡིན་ལ། ལར་ནས་མདོ་ལམ་ཁོ་ནས་རྫོགས་པའི་སངས་རྒྱས་ཐོབ་པ་མེད་པའི་ཕྱིར་དང༌། ཉིད་ཀྱང་དོན་དེ་འདོད་པའི་ཕྱིར། འདི་སྐད་ཅེས་བྱ་སྟེ། ཕར་ཕྱིན་ཐེག་པ་ལ་སྦྱིན་སོགས་སྤྱོད་པ་དང་སྟོང་ཉིད་སྒོམ་པ་ཁོ་ནས་སངས་རྒྱ་བའི་ལམ་ཡོད་པར་ཐལ། སྔགས་ཀྱི་ཐེག་པ་ལ་རིམ་པ་གཉིས་སྒོམ་པ་ཁོ་ནས་རྫོགས་པའི་སངས་རྒྱས་ཐོབ་པའི་ལམ་ཡོད་པའི་ཕྱིར། ཁྱབ་སྒྲིགས་འདི་ཁྱེད་ལ་ངེས་པར་འཇུག་པ་ཡིན་ཏེ། སྦྱིན་སོགས་ཀྱི་དོད་བསྐྱེད་རིམ་གྱིས་ཐུབ་པ་དང༌། ཤེར་ཕྱིན་གྱི་དོད་རྫོགས་རིམ་གྱིས་ཐུབ་པའི་སྟོབས་མཉམ་པར་ཁྱོད་ཀྱིས་སྨྲས་པའི་ཕྱིར་རོ། །གཞན་ཡང་མདོ་སྔགས་གཉིས་ལམ་གྱི་རྐང་སོ་སོ་ཡིན་ཞིང༌། དེ་དང་དེའི་དོད་ཐུབ་ཙམ་ཡིན་དུ་ཆུག་ཀྱང༌། དངོས་པོ་དེ་ཐ་དད་པའི་ཁྱད་ཆོས་དོད་ཐུབ་སོ་སོ་ལ་བྱ་བྱེད་ཐམས་ཅད་ཀྱང་འདྲ་བར་བརྩི་དགོས་པ་མ་ཡིན་ཏེ། དཔེར་ན་མཁར་ཤིན་ཏུ་མཐོན་པོ་ལ་སྒོ་ཡོད་པའི་དོད་ཤོད་ཁང་ལ་ཡང་དེ་ཉིད་རང་གི་སྒོ་ཡོད་པ་དེ་ཡིན་མོད་ཀྱི། དེ་སྒོ་མ་བརྒྱུད་པར་ལྟག་སྒོར་ཏེ་འཇུག་ནུས་ཀྱང༌། མཁར་ལ་དེ་ལྟར་མི་ནུས་པའི་ཁྱད་པར་ཡོད་པ་བཞིན་ནོ། །གཞན་ཡང་ཁྱེད་ཀྱི་དེ་ལ་ཁ་ཅིག་འདི་སྐད་ཅེས། ཕར་ཕྱིན་ཐེག་པའི་གདུལ་བྱ་རབ་སངས་རྒྱ་བ་ལ། ཉན་རང་གི་ལམ་ངེས་པར་སྔོན་དུ་གཏོང་དགོས་པར་ཐལ། གསང་སྔགས་ཀྱི་གདུལ་བྱ་རབ་སངས་རྒྱ་བ་ལ་བསྐྱེད་རིམ་ངེས་པར་སྔོན་དུ་འགྲོ་དགོས་པའི་ཕྱིར། ཞེས་ཟེར་བ་དག་ཀྱང་ཡོད་དེ། ཁྱེད་ཀྱི་ཁྱབ་མཚུངས་དེ་ལ་ཁྱབ་མཚུངས་ཀྱི་ལན་དེ་ཡང་འཇུག་པར་ནི་སྣང་ངོ༌། །
ཡང་ལུང་གི་གནོད་བྱེད་དུ་བསམ་ནས་འདི་སྐད་ཅེས། དུས་ཀྱི་འཁོར་ལོའི་སྒྲུབ་ཐབས་ལེའུའི་མིང་དོན་འབྲེལ་མེད་དུ་ཐལ་བ་དང༌། ལེའུ་ལྔའི་གོ་རིམ་ངེས་པའི་རྒྱུ་མཚན་འབྲེལ་མེད་དུ་ཐལ་བ་དང༌། དེ་བཞིན་དུ་དགོས་སོགས་ཆོས་བཞིའི་རྣམ་གཞག་དང་འགལ་བ་དང༌། དབང་བདུན་གྱི་འབྲས་བུ་གསུངས་ཚུལ་དང་འགལ་བ་དང༌། རྡོ་རྗེ་འཆང་གི་རྒྱུར་ཚོགས་གསུམ་ཀར་ལ་བསླབ་དགོས་པར་འགལ་བ་དང༌། བསྐྱེད་རིམ་གྱི་ཕྱི་ནང་གི་སྦྱང་གཞི་སྦྱོང་བའི་རྣམ་གཞག་གསུངས་པ་དང་འགལ་བ་དང༌། མངོན་རྟོགས་ཀྱི་ཐོག་མཐའི་སེམས་བསྐྱེད་སྨོན་ལམ་དང་འགལ་བའི་ཕྱིར་བསྐྱེད་རིམ་སངས་རྒྱས་ཐོབ་པའི་རྒྱུ་ངེས་པ་ཅན་ཡིན་ནོ། །ཞེས་སེམས་ཤིང་ཡི་གེར་འབྲི་སྟེ། དེ་དག་ཀྱང་དོན་མ་རྟོགས་པའམ། གཡོ་སྒྱུའི་སྒོ་ནས་ཚིག་གིས་སྙད་འཚོལ་བ་ཙམ་ལས། དོན་ཐོག་ཏུ་ཕེབས་པའི་ངེས་བཟུང་གི་ཚིག་གཅིག་ཀྱང་མི་སྣང་ངོ༌། །དེ་ལྟར་རྩོད་པ་དོན་ཚན་བདུན་གྱི་དང་པོ་ནི། འགྲེལ་ཆེན་ལས་དེ་ལྟར་བསྐྱེད་པའི་རིམ་པ་དང་རྫོགས་པའི་རིམ་པས་དུས་ཀྱི་འཁོར་ལོའི་སྒྲུབ་ཐབས་འཇམ་དཔལ་གྱིས་གསུངས་སོ། །ཞེས་གསུངས་པས། བསྐྱེད་རིམ་དུས་འཁོར་གྱི་སྒྲུབ་ཐབས་མ་ཡིན་ན་ཚིག་དེ་འབྲེལ་མེད་དུ་འགྱུར་སྙམ་པའོ།། འདི་ལ་སྒྲུབ་ཐབས་ལེའུའི་དོན་གྱི་གཙོ་བོ་ཡང་བསྐྱེད་རིམ་མ་ཡིན་ཏེ། ལེའུ་དེར་རྫོགས་རིམ་གྱི་རྣམ་གཞག་གལ་ཆེ་བ་ཐམས་ཅད་གསལ་ལ་རྫོགས་པར་བཤད་པའི་ཕྱིར་རོ། །དེས་ན་དུས་ཀྱི་འཁོར་ལོའི་སྒྲུབ་ཐབས་ཞེས་པའི་སྒྲུབ་ཐབས་ཀྱི་གཙོ་བོ་ནི་རྫོགས་རིམ་ཡིན་ནོ། །དེ་ལྟ་མོད་ཀྱི་བསྐྱེད་རིམ་ཀྱང་སྒྲུབ་ཐབས་ཀྱི་རྣམ་གྲངས་ཡིན་ལ། སྔགས་ཀྱི་སྒོར་ཞུགས་པ་ཆེས་མང་པོ་ཞིག་ལ་ཉེ་བར་མཁོ་ཞིང་ལེགས་པའི་ཆ་ལག་ནི་ཡིན་པར་ཅིག་ཀྱང་འདོད་དེ། འདི་ལ་
ནི་རང་གཞན་གཉིས་ཀ་རྩོད་པ་མེད་མོད། འོན་ཀྱང་སྒྲུབ་ཐབས་ཞེས་པའི་མིང་ཁོ་ནས་དེ་དང་དེའི་གོ་འཕང་ཐོབ་བྱེད་ཡིན་མི་དགོས་ཏེ། ཀླུའི་རྒྱལ་པོའི་སྒྲུབ་ཐབས་ཞེས་སོགས་སམ་འཇིག་རྟེན་ལྷའི་སྒྲུབ་ཐབས་མཐའ་ཡས་པ་ཡོད་པ་བཞིན་ ནོ། །འདིར་ཡང་དེ་དག་དང་མཚུངས་ཏེ། དཔེར་ན་འབྱུང་པོའི་སྒྲུབ་ཐབས་ཀྱིས་འབྱུང་པོ་བསྒྲུབས་ཤིང་འགྲུབ་ན། རང་ཉིད་འབྱུང་པོ་དེར་འགྱུར་བ་མ་ཡིན་གྱི། འབྱུང་པོ་དེ་དང་སྤྱོད་ཡུལ་མཐུན་པར་གྱུར་ཏེ། དངོས་སུ་མཐོང་ཞིང་གཏམ་ཡང་འགྲེལ། རང་གི་དགོས་པ་འགའ་ཞིག་དེས་སྒྲུབ་པར་བྱེད་དོ། །དེ་བཞིན་དུ་བསྐྱེད་རིམ་གྱི་སྒོ་ནས་ཡི་དམ་དེ་དང་དེ་འགྲུབ་པ་ཞེས་པའང་ཡི་དམ་གྱི་ལྷ་དེ་དང་དེའི་ཞལ་མཐོང་བ་དང་གསུང་ཐོས་པ་དང་ཞི་སོགས་ཕྲ་མོའི་ལས་སམ། གྲུབ་པའི་ཁྱད་པར་ཅི་རིགས་པའི་བཀའ་དྲིན་ཐོབ་པ་ལ་ཟེར་གྱི། སྐབས་དེར་ཡི་དམ་གྱི་ལྷའི་གོ་འཕང་ཐོབ་པ་མ་ཡིན་ནོ། །སྒྲུབ་ཐབས་ཞེས་པ་ཁོ་ནས་གོ་འཕང་ཐོབ་བྱེད་ཀྱི་རྒྱུ་ཡིན་པར་འགྲོ་ན། ཁྱེད་ཉིད་ལའང་བསྐྱེད་རིམ་སྒྲུབ་ཐབས་མ་ཡིན་པར་འགྱུར་ཏེ། དེས་དེ་མི་ཐོབ་པའི་ཕྱིར། མ་ཚད་བའི་རྒྱུ་ནི་འབྲས་བུ་སྐྱེད་པ་ལ་ནུས་པ་མེད་པའོ། །དེས་དེར་གལ་ཏེ་མི་འགྲོ་ན་ཁྱེད་ཀྱིས་ལུང་འགལ་དུ་སྨྲས་པ་དེ་འགྲེལ་མེད་དོ། །དེས་ན་ཁྱེད་དག་ལས་ཁ་ཅིག་འདི་སྐད་དུ་བསྐྱེད་རིམ་སངས་རྒྱས་ཀྱིས་རྒྱུ་མ་ཡིན་ཞེས་ཟེར་བ་ནི། སྒྲུབ་ཐབས་ཞེས་པའི་མིང་དོན་ཙམ་ལ་ཡང་གོ་བ་མ་རྙེད་པའོ། །ཞེས་སྤྲེའུའི་འབག་གྱོན་པ་ལྟར་འཁྲབ་པར་བྱེད་དེ། ཕྱོགས་འཛིན་ཕྲག་དོག་གིས་གདོན་གྱིས་བསླད་པས་རང་གིས་སྒྲུབ་ཐབས་ཞེས་པའི་ཚིག་དོན་ཙམ་ཡང་མ་གོ་བཞིན་དུ་མཁས་པ་ལ་སྐུར་བ་འདེབས་པ་ངོ་ཚ་མེད་ཅིང་བག་མེད་པར་གྱུར་པའོ། །
གཉིས་པ་ནི། འགྲེལ་ཆེན་ལས། མངོན་པར་དབང་བསྐུར་བ་སྔོན་དུ་འགྲོ་བ་ནི། བསོད་ནམས་ཀྱི་ཚོགས་དཀྱིལ་འཁོར་གྱི་འཁོར་ལོ་སྒོམ་པ་གོམས་པས་འོག་མིན་གྱི་སྲིད་པའི་མཐར་ཐུག་པའི་འཇིག་རྟེན་པའི་དངོས་གྲུབ་སྒྲུབ་ པའོ། །འཇིག་རྟེན་པའི་དངོས་གྲུབ་སྔོན་དུ་འགྲོ་བ་ནི། བསོད་ནམས་དང་ཡེ་ཤེས་ཀྱི་ཚོགས་དག་སྟེ། སྟོང་པ་ཉིད་དང་སྙིང་རྗེ་ཀུན་རྫོབ་དང༌། དམིགས་པ་མེད་པའི་བག་ཆགས་ཀྱི་སྟོབས་ཀྱིས་རྡུལ་ཕྲ་རབ་འདུས་པ་ལས་འདས་ཤིང༌། དཀྱིལ་འཁོར་ལ་སོགས་པ་རྣམ་པར་རྟོག་པའི་སྒོམ་པ་དང་བྲལ་བ་ཕྱག་རྒྱ་ཆེན་པོའི་ཡེ་ཤེས་ཀྱི་དངོས་གྲུབ་སྒྲུབ་པའོ་ཞེས། སྒྲུབ་ལེ་དང་ཡེ་ཤེས་ལེའུའི་གོ་རིམ་སྟོན་པ་སྟེ། སྟོང་པ་ཉིད་དང་སྙིང་རྗེ་ཞེས་པའི་རྫོགས་རིམ་དེ་ནི་དཀྱིལ་འཁོར་གྱི་འཁོར་ལོ་སྒོམ་པ་ཞེས་པའི་བསྐྱེད་རིམ་སྔོན་དུ་འགྲོ་དགོས་པ་ཡིན་པས། སངས་རྒྱས་སྒྲུབ་པ་ལ་བསྐྱེད་རིམ་མི་དགོས་ན། རྫོགས་རིམ་གྱི་སྔོན་དུ་བསྐྱེད་རིམ་འགྲོ་དགོས་པ་དང་འགལ་ཏེ། སངས་རྒྱས་རྫོགས་རིམ་ལས་བྱུང་ལ། དེ་བསྐྱེད་རིམ་ལས་བྱུང་བས་སོ་སྙམ་པའོ། །གཞན་ཡང་འདིས་སྐབས་འདི་དག་ཏུ་གཞན་གྱི་འདོད་པ་རྟགས་སུ་བཀོད་པ་ཡིན་པའི་ཁུངས་སུ་ལོག་པར་རློམས་ཏེ། བསྐྱེད་རིམ་མཆོག་གི་རྒྱུར་འགྱུར་བ་མི་སྲིད་པའི་ཕྱིར་མི་རུང་བའི་ཕྱིར་ཞེས་ཡང་ཡང་སྨྲ་བ་ནི། རང་གི་ཐལ་འགྱུར་བཀོད་པ་དེ་དག་གི་ཁྱབ་པ་སྒྲུབ་བྱེད་ལ་བསམ་པར་འདུག་ཀྱང༌། ཕྱོགས་སྔ་མས་ཁས་ལེན་མེད་པ་ཁོ་ན་རྟགས་སུ་བཀོད་འདུག་པས་ཐལ་འགྱུར་ཡང་དག་ཏུ་འགྱུར་བ་ལ་རྟགས་ཁས་བླངས་དང་ལྡན་པ་དགོས་པ་མ་དྲན་པའམ། ཕྱོགས་སྔ་མ་རྣམས་མི་ཟེར་བ་ལ་ཟེར་བ་ལྟར་བཅོས་ནས་དགག་པ་བྱེད་པར་བརྫུས་པ་རང་གི་འཁོར་ཚོགས་བསླུ་བའི་ཚིག་ཙམ་དུ་ཟད་
དོ། །དེ་ཡང་ཅི་ཡིས་ཤེས་ཞེ་ན། སྔ་མ་རྣམས་བསྐྱེད་རིམ་མཆོག་གི་དངོས་གྲུབ་ཀྱི་རྒྱུའི་རིགས་སུ་འགྲོ་བ་མི་སྲིད་ཅེས་པའམ། རྒྱུའི་རྣམ་གྲངས་སུ་ཡང་མི་རུང་བ་ཞེས་ཞེ་ཕུགས་སུ་ཡང་མི་འདོད་ལ་ངག་ནས་ཀྱང་མ་སྨྲས་སོ། །རྒྱུ་མ་ཡིན་ཞེས་གསུངས་མོད་ཀྱི། དེ་ནི་མེད་ན་མི་འབྱུང་བའི་རྒྱུ་མ་ཡིན་པའི་དོན་ཏེ། རྒྱུའི་རྣམ་གཞག་གཞན་རྣམས་ནི་རྒྱུའི་རྣམ་གྲངས་ཀྱི་དབྱེ་བ་ཙམ་དུ་ཟད་ལ། ཡིད་བརྟན་ཐུབ་པ་དང་བརྟགས་དཔྱད་ཐུབ་ངེས་ཤེས་པ་ངེས་པ་ཅན་གྱི་རྒྱུ་ནི། མེད་ན་མི་འབྱུང་བའི་རྒྱུ་ཁོ་ན་ཡིན་པའི་ཕྱིར་རོ། །དེས་ན་ཁྱེད་དག་གིས་མཆོག་གི་དངོས་གྲུབ་ཀྱི་རྒྱུར་བསྐྱེད་རིམ་དགོས་པའི་སྒྲུབ་བྱེད་དང༌། མི་དགོས་པར་འདོད་པ་ལ་གནོད་བྱེད་དུ་རློམ་པ་ཚིག་གི་འཕྲེང་བ་རྒྱུད་རིང་པོ་དག་གླེགས་བམ་སོ་སོ་ཐ་དད་པ་རྣམས་སུ་ཡང་ཡང་སྐྱོར་ཟློས་ཀྱི་ཚུལ་གྱིས་ཡི་གེར་བྱས་མོད། མེད་ན་མི་འབྱུང་གི་རྒྱུ་ཡིན་མིན་དཔྱད་པ་ལས་བརྩམས་ཏེ། ཡང་དག་པའི་དགག་སྒྲུབ་ཀྱི་རིག་པ་སྤྲོ་རྒྱུ་ནི་གཅིག་ཀྱང་མེད་དོ། །དེའི་ཕྱིར་ཁྱེད་རིན་པོ་ཆེ་ལྟ་བུའི་གང་ཟག་ཏུ་རློམ་ཡང༌། རྩ་བ་མེད་པར་མང་དུ་སྨྲ་ཞེས་བྱ་བའི་དོན་དེ་ཁྱེད་དག་རང་ལ་ཚང་འདུག་པ་ངོ་ཤེས་པར་མཛད་འཚལ་ལོ། །སྐབས་ཀྱི་ལན་ནི། འོ་ན་ཁྱེད་ལྟར་ན་རྫོགས་རིམ་སྒོམ་པའི་སྔོན་དུ་འཇིག་རྟེན་པའི་དངོས་གྲུབ་གྲུབ་པ་དགོས་པར་འགྱུར་ཏེ། འཇིག་རྟེན་པའི་དངོས་གྲུབ་སྔོན་དུ་འགྲོ་བ་ནི་བསོད་ནམས་དང་ཡེ་ཤེས་ཀྱི་ཚོགས་དག་སྟེ། ཞེས་སོགས་གསུངས་པའི་ཕྱིར་རོ། །དེའི་ཕྱིར་འདིར་སྔོན་དུ་འགྲོ་བ་ཞེས་གསུངས་པ་ནི། གང་ཅི་ཡང་རུང་བ་བསྐྱེད་རིམ་དང་ཐུན་མོང་གི་དངོས་གྲུབ་ཀྱང་སྒྲུབ་པ་དང༌། རྫོགས་རིམ་དང་མཆོག་གི་དངོས་གྲུབ་ཀྱང་སྒྲུབ་པར་བྱེད་པ་ཞིག་ཡོད་ན། དེ་ལ་རྫོགས་རིམ་གྱི་ཡེ་ཤེས་སྐྱེས་ཟིན་པའི་རྗེས་སུ་བསྐྱེད་རིམ་སྒོམ་པ་དོན་མེད་པ་དང༌།
མཆོག་ཐོབ་པའི་རྗེས་སུ་ཐུན་མོང་སྒྲུབ་མི་དགོས་པའི་ཕྱིར། ཐོག་མ་བསྐྱེད་རིམ་བསྒོམས་ནས། ཕྱིས་རྫོགས་རིམ་སྒོམ་པ་དང༌། ཐུན་མོང་ཐོག་མར་བསྒྲུབས་ནས་ཕྱིས་མཆོག་སྒྲུབ་པ་ལས་འོས་མེད་པའི་ཕྱིར། བསྐྱེད་རིམ་མཐར་ཕྱིན་པ་ཞིག་སྒོམ་ཕྱིན་ཆད་རྫོགས་རིམ་གྱི་ཡེ་ཤེས་མ་ཐོབ་པའི་སྔོན་དུ་སྒོམ་དགོས་སོ། །དེས་ན་བསྐྱེད་རིམ་ཞིག་སྒོམ་ཕྱིན་ཆད་དམིགས་གསལ་མ་གཏོགས། རྫོགས་རིམ་གྱི་སྔོན་འགྲོར་གཏོང་དགོས་པས་ཁྱབ་ཀྱང་རྫོགས་རིམ་གྱི་སྔོན་འགྲོ་ཡིན་ན་བསྐྱེད་རིམ་ཡིན་པས་མ་ཁྱབ་པས། རྫོགས་རིམ་སྒོམ་ན་བསྐྱེད་རིམ་སྔོན་དུ་འགྲོ་དགོས་པས་མ་ཁྱབ་བོ། །ལེའུའི་གོ་རིམ་འཆད་པ་འདི་ཀུན་ལ་ཁྱབ་མཐའ་རྩིར་མེད་དེ། རྫོགས་རིམ་གྱི་སྔོན་དུ་བསྐྱེད་རིམ་བསྒོམས་པ་ཅི་རིགས་པར་འབྱུང་ལ། རྫོགས་རིམ་གྱི་རྗེས་སུ་བསྐྱེད་རིམ་སྒོམ་པ་མང་པོ་མི་འབྱུང་ན། རྒྱུ་མཚན་དེ་ཙམ་གྱི་སྒོ་ནས་གཉིས་པོའི་རྣམ་གཞག་འཆད་པའི་ཚེ། སྔོན་དུ་བསྐྱེད་རིམ་དང་ཕྱིས་རྫོགས་རིམ་བཤད་ན། འཆད་ཚུལ་གྱི་གོ་རིམ་དེ་ཚུལ་དང་མཐུན་པར་ཡོད་ཅེས་པའི་དོན་ཡིན་པས་སོ།། དཔེར་ན་སེམས་བསྐྱེད་དང་གདམས་ངག་གི་གོ་རིམ་འཆད་པའི་ཚེ། སེམས་བསྐྱེད་པ་རྣམས་གདམས་ངག་འཚོལ་བར་འགྱུར་བས། གཞུང་དུ་རྣམ་གཞག་འཆད་པའི་ཚེ་ཡང༌། སེམས་བསྐྱེད་ཀྱི་རྗེས་སུ་གདམས་ངག་བསྟན། ཞེས་པ་ཡང༌། སེམས་བསྐྱེད་ཉི་ཤུ་རྩ་གཉིས་ཀར་རྒྱུད་ལ་སྐྱེས་ཟིན་པའི་རྗེས་སུ་གཞི་ནས་གདམས་ངག་འཚོལ་བའི་དོན་མ་ཡིན་གྱི། དང་པོར་སེམས་གཅིག་བསྐྱེད་ནས་དེ་རྗེས་གདམས་ངག་འཚོལ་བ་མང་དུ་འབྱུང་བ་ཙམ་ལ་དགོངས་ནས་གོ་རིམ་དེ་ལྟར་བསྟན་ཏོ། །ཕྱིས་ནི་སེམས་བསྐྱེད་ལ་རྟག་ཏུ་གནས་བཞིན་པས་གདམས་ངག་རྒྱུན་ཆགས་སུ་འཚོལ་བའི་ཕྱིར་སྔ་ཕྱིའི་གོ་རིམ་མེད་དེ་མཉམ་པར་འཇུག་
གོ །གཞན་ཡང་མདོ་སྡེ་རྒྱན་གྱི་ལེའུའི་གོ་རིམ་དང༌། བྱང་ཆུབ་སེམས་དཔའི་སའི་གོ་རིམ་ལ་སོགས་པས་མཚོན་ཏེ། གཞུང་རྣམས་ཀྱི་ལེའུའི་གོ་རིམ་ཕལ་ཆེར་དེ་འདྲ་བ་མང་པས་འདིར་ལེའུ་ལྔའི་གོ་རིམ་ལ་བརྟེན་ནས་རྩོད་པ་འདི་ནི་སྨྲ་རྒྱུ་ཟད་པའི་འབྲེལ་མེད་ཁོ་ནའོ། །དེས་ན་སྒྲུབ་ཐབས་ལེའུ་ལས། རྫོགས་རིམ་དང་མཆོག་གི་དངོས་གྲུབ་ཀྱང་བཤད་མོད་ཀྱི། དེའི་རྣམ་གཞག་ཡེ་ཤེས་ལེའུ་ན་རྒྱས་ལ། བསྐྱེད་རིམ་ཀྱང་ཡེ་ལེར་མང་དུ་བཤད་མོད་ཀྱི། རྒྱུད་འདིའི་བསྐྱེད་རིམ་གྱི་གཙོ་བོ་ཡིན་པས། དཔལ་དུས་ཀྱི་འཁོར་ལོ་ཆོས་དབྱིངས་གསུངས་དབང་གི་དཀྱིལ་འཁོར་ཞེས་བྱ་བ། སྐུ་གསུང་ཐུགས་ཡོངས་རྫོགས་ཀྱི་སྒྲུབ་ཐབས་སྦྱོར་དངོས་རྗེས་གསུམ་གྱི་ཁྲིགས་ཆགས་ཅན་དེ་སྒྲུབ་ལེན་ཡོད་པ། བསྐྱེད་རིམ་ཞིག་སྒོམ་ཕྱིན་རྫོགས་རིམ་གྱི་སྔོན་དུ་ཡོད་པས་བསྐྱེད་རིམ་རྒྱས་བཤད་འཆད་པའི་ལེའུ་དེ། རྫོགས་རིམ་རྒྱས་བཤད་ཀྱི་ལེའུའི་སྔོན་དུ་འདོན་ཞེས་པའི་དོན་ཙམ་ཞིག་ཡིན་པས། ཉམས་མྱོང་རྒྱུད་ལ་སྐྱེད་པའི་སྐབས་སུ་ཁྱབ་མ་ཁྱབ་རྩི་བའི་དགག་སྒྲུབ་ཀྱི་རྒྱབ་རྟེན་དུ་ཡོད་པའི་གོ་སྐབས་ནམ་ཡང་ག་ལ་ཞིག། གསུམ་པ་ནི། བརྗོད་བྱ་རྗོད་བྱེད་དགོས་པ་ཉིང་དགོས་རྣམས་སྟོན་པའི་སྐབས། འགྲེལ་ཆེན་ལས། དེ་ནས་དཀྱིལ་འཁོར་དུ་ཞུགས་པ་ལས་འཇིག་རྟེན་པའི་དབང་སྦྱིན་པས་བསོད་ནམས་ཀྱི་ཚོགས་ཀྱིས་དོན་བྱེད་པ་ནི་དགོས་ པའོ། །ཤེས་རབ་ཆེན་པོ་འཇིག་རྟེན་ལས་འདས་པའི་དབང་བཞི་པ་སྦྱིན་པས། རིས་མེད་པ་ཕྱག་རྒྱ་ཆེན་པོའི་དངོས་གྲུབ་ཐོབ་པ་དང༌། བསོད་ནམས་དང་ཡེ་ཤེས་ཀྱི་ཚོགས་ཀྱིས་དོན་བྱེད་པ་ནི་དགོས་པའི་དགོས་པ་སྟེ། ཞེས་གསུངས་པས། བསྐྱེད་རིམ་དགོས་པ་དང༌། རྫོགས་རིམ་ལས་མཆོག་འགྲུབ་པ་ཉིང་དགོས་སུ་གསུངས་
ན། བསྐྱེད་རིམ་མཆོག་གི་རྒྱུ་མ་ཡིན་པར་འདོད་པ་ལ་ཚིག་དེ་འབྲེལ་མེད་དུ་འགྱུར་ཏེ། ཉིང་དགོས་དགོས་པ་ལ་བལྟོས་ཤིང་འབྲེལ་བའི་ཕྱིར་རོ་སྙམ་དུ་བསམ་པའོ།། འདི་ནི་ཕྱིས་བོད་ན་གྲགས་ཆེ་བའི་མདོ་གཞུང་གི་འགྲེལ་པ་ཕལ་ཆེར་ན། དགོས་པའི་དགོས་པ་ལ་ཉིང་དགོས་ཞེས་ཟེར་བ་དང༌། ཉིང་དགོས་དགོས་པ་ལ་འབྲེལ། དེ་ཡང་རྗོད་བྱེད་ལ་འབྲེལ། དེ་ཡང་བརྗོད་བྱ་ལ་འབྲེལ། ཞེས་འབྲེལ་བའི་རྣམ་གཞག་བྱེད་པ་དེ་ལ་བྱིས་པའི་དུས་ནས་བག་ཆགས་བརྟས་པས་ཤེས་པ་ཧད་པོར་སོང་སྟེ། དུས་འཁོར་ལུགས་ཀྱི་དགོས་སོགས་ཆོས་བཞི་ལ་གཞིག་པ་མ་ཆུག་ཅིང༌། འབྲེལ་པའི་ས་མཚམས་ངོས་མ་ཟིན་པའི་འཆལ་གཏམ་སྟེ། དུས་འཁོར་འདིར་ནི་འགྲེལ་ཆེན་ལས། ལེའུ་ལྔའི་ངོ་བོ་ཉིད་ཀྱི་གནས་པའི་བཅོམ་ལྡན་འདས་དུས་ཀྱི་འཁོར་ལོ་ནི་བརྗོད་པར་བྱ་བའོ། །འདི་སྟོན་པར་བྱེད་པའི་ལེའུའི་ཚོགས་རྒྱུད་ཀྱི་རྒྱལ་པོ་ནི་རྗོད་པར་བྱེད་པའོ། །བརྗོད་བྱ་རྗོད་བྱེད་འདི་དག་ཕན་ཚུན་བརྗོད་བྱ་རྗོད་བྱེད་ཀྱི་མཚན་ཉིད་ནི་འབྲེལ་བ་སྟེ། ཞེས་བརྗོད་བྱ་དང་རྗོད་བྱེད་ལ་འབྲེལ་བ་གསུངས་ཀྱི། རྗོད་བྱེད་དང་དགོས་པ་ལ་དང་དགོས་པ་དང་ཉིང་དགོས་ལ་འབྲེལ་བ་མ་བཤད་དོ། །དེའི་རྒྱུ་མཚན་ཡང༌། བདེ་བླག་ཏུ་ནི་རྟོགས་པ་ཞེས་བྱ་བ་རྩོམ་པའི་དགོས་པ་ཡིན། ཞེས་པ་ལྟར། བརྗོད་བྱའི་དོན་བདེ་བླག་ཏུ་རྟོགས་པ་དགོས་པར་འཇོག་ན། དེ་རྗོད་བྱེད་ཀྱི་གཞུང་ལ་རག་ལས་པས། དགོས་པ་རྗོད་བྱེད་ལ་འབྲེལ་དགོས་པ་ཡིན་ཡང༌། འདིར་བསྐྱེད་རིམ་བསྒོམས་པས་ཐུན་མོང་གི་དངོས་གྲུབ་འགྲུབ་པ་དགོས་པར་བཤད་པ། དེ་ན་རེས་འགའ་གཞུང་ཚིག་ལ་བལྟོས་པའི་གནས་སྐབས་ཀྱང་ཡོད་མོད་ཀྱི། མཐའ་གཅིག་ཏུ་བལྟོས་པའང་མིན་པས།
གཞུང་དང་དེ་ལ་འབྲེལ་བའི་རྣམ་གཞག་མ་མཛད་ལ། ཉིང་དགོས་དང་རྗོད་བྱེད་ཀྱང་དེ་དང་འདྲ། སྐབས་འདིའི་ཉིང་དགོས་ནི་དགོས་པ་ལ་ཤིན་ཏུ་མི་འབྲེལ་ཏེ། རྫོགས་རིམ་བསྒོམས་པས་མཆོག་གི་དངོས་གྲུབ་ཐོབ་པ་ཉིང་དགོས་ཡིན་པར་གསུངས་ལ། དེ་ལ་འཇིག་རྟེན་པའི་དངོས་གྲུབ་སྔོན་དུ་འགྲོ་བ་ལྟ་ཅི་སྨོས། དེ་སྔོན་སོང་རྒྱུད་འདིའི་ལུགས་ལ་མང་པོའང་མེ་དེ་ཉུང་བའི་ཕྱིར་རོ། །གལ་ཏེ་མང་པོ་ཡོད་དུ་ཆུག་ཀྱང་དེ་ལ་བལྟོས་པ་ནི་མ་ཡིན་ནོ། །ཅི་སྟེ་ལུགས་འདིར་ཡང་ཕྱོགས་རེའི་སྒོ་ནས་འབྲེལ་བའི་རྣམ་གཞག་བྱེད་ན་ནི། དངོས་སུ་མ་གསུངས་ཀྱང་ཉིང་དགོས་རྗོད་བྱེད་ལ་འབྲེལ། དགོས་པ་ཡང་རྗོད་བྱེད་ལ་འབྲེལ། ཞེས་བརྗོད་ན་རུང་བ་ཙམ་ཡིན་གྱི། ཉིང་དགོས་དང་དགོས་པ་ལ་འབྲེལ་བ་ཡེ་མི་འཐད་དོ། །དེའི་རྒྱུ་མཚན་ཡང་ཉིང་དགོས་དངོས་ནི་མཆོག་གི་དངོས་གྲུབ་ཡིན་ལ། རྫོགས་རིམ་སྒོམ་པ་དེའི་ཞོར་བྱུང་སྒྲུབ་པ་ཙམ་དུ་གསུངས་ཀྱི། ཉིང་དགོས་དངོས་སུ་སྟོན་པ་མིན་ནོ། །དེ་བཞིན་དུ་འཇིག་རྟེན་པའི་དངོས་གྲུབ་ཀྱི་སྒོ་ནས་སེམས་ཅན་གྱི་དོན་བྱེད་པ་ནི་དགོས་པ་ཡིན་ལ། བསྐྱེད་རིམ་སྒོམ་པ་ནི་དེའི་ཞར་བྱུང་རྒྱུ་ཚོགས་ཙམ་དུ་བསྟན་པ་ཡིན་པས། བསྐྱེད་རིམ་ནི་དགོས་པ་དངོས་མ་ཡིན་ནོ། །དཔེར་ན་ཟས་ཀྱི་རྒྱུ་མང་པོ་བསགས་པའི་དགོས་པ་ནི། ཁ་ཟས་བཟང་པོ་ཟོས་པས་ལུས་བརྟས་པར་བྱེད་པའོ་ཞེས་ཟེར་ན། ལུས་བརྟན་པ་ནི་དགོས་པ་ཡིན་གྱི། ཟས་ཟ་བ་ཙམ་དགོས་པ་མ་ཡིན་ཏེ། དགོས་པ་དེ་སྒྲུབ་བྱེད་ཀྱི་ཐབས་ཙམ་དུ་ཞོར་རམ་ཤུགས་ལ་བསྟན་པ་ནི་ཡིན་ནོ། །འོ་ན་ལུས་བརྟས་པ་ནི་དགོས་པའོ་ཞེས་བརྗོད་རིགས་ཀྱི། ཟབ་སྨོས་པ་ནི་ལྷག་བརྗོད་དོ་སྙམ་ན། ཟས་ཀྱི་རྒྱུ་འབྲུ་སོགས་མང་པོ་གསོག་པར་བྱེད་པ་ལ། བསགས་པའི་དགོས་པ་ཅི། ལུས་བརྟས་པའི་ཕྱིར་རོ། །ཞེས་
བརྗོད་ན་འདི་རྣམས་བསགས་པས་འཁྱུད་སྤྱད་ཀྱི་ཚུལ་གྱིས་ལུས་སྟོབས་རྒྱས་པར་འགྱུར་བ་ཡིན་ནམ་ཅི་སྙམ་དུ་དགོས་ནས་ངེས་པ་མི་རྙེད་པ་ལ། དེ་རྣམས་ཁ་ཟས་སུ་བསྒྲུབས་ཏེ་ཟོས་པ་ཞེས་བརྗོད་པས། ལུས་བརྟས་བྱེད་ཀྱི་ཐབས་ལ་ངེས་པ་རྙེད་པར་འགྱུར་རོ། །དེ་བཞིན་དུ་འདིར་ཡང་སྦྱར་ཏེ། དུས་ཀྱི་འཁོར་ལོའི་གཞུང་འདིའི་དགོས་པ་ནི་ཐུན་མོང་གི་དངོས་གྲུབ་བོ། །ཉིང་དགོས་ནི་མཆོག་གི་དངོས་གྲུབ་བོ། །ཞེས་བརྗོད་ན། དེ་ནི་དེ་ལྟར་ཡིན་དུ་ཆུག་ཀྱང༌། དེའི་ཐབས་གང་ཡིན་མ་ཤེས་ཏེ། གླེགས་བམ་ལ་མཆོད་པས་སམ། ཁ་འདོན་དུ་བྱས་པས་སམ། དོན་བཤད་པས་ཡིན་ཞེས་སོགས་ཐེ་ཚོམ་དུ་འགྱུར་རོ།། དེ་ལ་འདི་སྐད་ཅེས། དེ་དག་ལས་མ་ཡིན་གྱི། གཞུང་འདི་ལས་བསྐྱེད་རིམ་དང་རྫོགས་རིམ་གཉིས་བསྟན་ལ། བསྐྱེད་རིམ་བསྒོམས་པས་དགོས་པ་དེ་འགྲུབ་ཅིང༌། རྫོགས་རིམ་བསྒོམས་པས་ཉིང་དགོས་འགྲུབ་སྟེ། དགོས་པ་ཉིང་དགོས་དེ་དག་སྒྲུབ་པའི་ཐབས་ནི་དེའོ་ཞེས་ངེས་པ་སྟོན་པར་བྱེད་པའོ། །དེས་ན་གཞུང་འདིར་ནི་ཉིང་དགོས་ཅེས་པ་ཤིན་ཏུ་དགོས་པའམ། དགོས་པ་ཆེན་པོའི་དོན་ཡིན་གྱི། དགོས་སོགས་ཆོས་བཞིའི་ནང་གི་དགོས་པ་གཅིག་ཐོག་མར་ངོས་བཟུང་ནས། དེའི་ཡང་དགོས་དོན་གྲུབ་འབྲས་ཙམ་ཉིང་དགོས་ཡིན་པར་ནི་མི་འཆད་ལ། སྤྱིར་ནས་དགོས་པ་བླ་ན་མེད་པ་ཡིན་པའི་ཕྱིར། དགོས་པའི་དགོས་པ་ཞེས་མིང་འཇོག་ཏུ་ནི་རུང་སྟེ། དེ་བཞིན་གཤེགས་པ་ལ་ལྷའི་ལྷ་ཞེས་ཟེར་བ་དང༌། གཞན་ཡང་མཁས་པའི་མཁས་པ་དང་རྒྱལ་པོའི་རྒྱལ་པོ་བཞིན་ནོ། །གཞན་ཡང་སྒྲ་དང་མིན་དཔྱད་ལ་སོགས་པའི་གཞུང་འགའ་ལས། རྙེད་པ་དང་གྲགས་པ་དགོས་པ་དང༌། བསོད་ནམས་ཉིང་དགོས་སུ་འདོད་པ་དང༌། རིག་
བྱེད་དང་འབྲེལ་བར་རྟོག་གེའི་གཞུང་འགའ་ཞིག་ལས། ཕ་རོལ་སུན་འབྱིན་ཅིང་རང་གཞུང་འཛུགས་པ་དགོས་པ་དང༌། གྲོལ་བ་ཉིང་དགོས་སུ་འཆད་པ་སོགས་ཡོད་པས། དེ་དག་དང་མཚུངས་པར་བསྟན་པས་འདུལ་བའི་དགོས་པའང་ཡོད་དེ། མདོར་ན་འགྲེལ་ཆེན་གྱི་དགོས་སོགས་ཆོས་བཞི་སྟོན་བྱེད་ཀྱི་སྐབས་འདི་དག་ལ་གོ་བ་འཁྲུལ་མེད་འདི་ལྟར་ཤར་ན། ཟ་ཟི་ལངས་པའི་རྩོད་པ་དེ་འདྲ་ཐོག་མ་ཉིད་ནས་ཡོད་དོན་མེད་པ་ལགས་ན། སློབ་དཔོན་མེད་པར་གསང་སྔགས་ལ་རང་གར་ཞུགས་པའམ། རིག་པ་གླེགས་བམ་ལས་བཀླགས་པས་ཉེས་སོ། །གཞན་ཡང་ཁྱེད་ཀྱི་བརྗོད་ཚུལ་འདི་ལ་འགྲེལ་ཚིག་མ་གོ་བའམ། ངན་གཡོར་སྨྲ་བའི་སྐྱོན་ཞིག་ཀྱང་སྣང་སྟེ། འགྲེལ་པར་བསོད་ནམས་ཀྱི་ཚོགས་ཀྱིས་དོན་བྱེད་པ་ཞེས་པ་ལ། བསོད་ནམས་ཀྱི་ཚོགས་ཞེས་པ་སྤྱིར་བརྗོད་པས། བྱེ་བྲག་བསྐྱེད་རིམ་ལ་ཡང་གོ་ནུས་པ། རེ་ཞིག་དེ་ལྟར་ཡིན་དུ་ཆུག་ཀྱང་དོན་བྱེད་པ་ཞེས་པའི་གོ་བ་སྦས་ཏེ་བསྐྱེད་རིམ་གྲུབ་པ་དགོས་པ་དང༌། ཞེས་འཆད་ཅིང༌། བསོད་ནམས་དང་ཡེ་ཤེས་ཀྱི་ཚོགས་ཀྱིས་དོན་བྱེད་པ་ཞེས་པ། རྫོགས་རིམ་བསོད་ནམས་དང་ཡེ་ཤེས་གཉིས་ཀའི་རང་བཞིན་ཡིན་པས་ཕྱག་རྒྱ་ཆེན་པོའི་དངོས་གྲུབ་འགྲུབ་པ་ཞེས་འཆད་པ་དེ་ཡང་ཟོལ་འཇོག་ཏུ་སྣང་ངོ༌། །དོན་བྱེད་པ་ཞེས་པ་སྒོམ་པ་ཙམ་མ་ཡིན་ཏེ། དེ་ལས་སེམས་ཅན་གྱི་དོན་བྱེད་པ་ཉིད་ལ་འཇོག་དགོས་པ་ལ། བསྐྱེད་རིམ་གྱི་སྒོ་ནས་སེམས་ཅན་གྱི་དོན་བྱེད་པ་ནི་ལས་ཚོགས་དང༌། ཐུན་མོང་གི་དངོས་གྲུབ་ཀྱི་སྒོ་ནས་ཡིན་ན། རྫོགས་རིམ་སྒོམ་པའི་སྔོན་དུ་ཐུན་མོང་གི་དངོས་གྲུབ་བམ། ལས་ཚོགས་སྒྲུབ་དགོས་སོ་ཞེས་པར་སོང་བས། རང་ལ་སྐྱོན་ཞུགས་ཀྱི་དོགས་ནས་དེའི་དོན་གསལ་པོར་མ་སྨྲས་པས་སོ། །དེས་ན་ཉིང་དགོས་ལ་
རང་དོན་ཕྱག་རྒྱ་ཆེན་པོའི་དངོས་གྲུབ་ཐོབ་པ་དང༌། གཞན་དོན་ཚོགས་གཉིས་ཀར་གྱི་སྒོ་ནས་སྤྱོད་ལ། དེའི་ཤུགས་ལ་དགོས་པའི་སྐབས་སུ། རང་དོན་ཐུན་མོང་གི་དངོས་གྲུབ་དང༌། གཞན་དོན་བསོད་ནམས་ཀྱི་ཚོགས་ཁོ་ནས་སྤྱོད་པའོ། །ཞེས་པའི་དོན་ནོ། །བཞི་པ་ནི། རྒྱུད་ལས། དབང་བདུན་གྱིས་ནི་མངོན་པར་དབང་བསྐུར་ཡོན་ཏན་དབང་གིས་ས་བདུན་གྱི་ནི་དབང་ཕྱུག་ཉིད་དུ་འགྱུར། །ཞེས་དང༌། དེའི་འགྲེལ་བར་ཡང༌། གལ་ཏེ་དཀྱིལ་འཁོར་གྱི་འཁོར་ལོ་མངོན་སུམ་དུ་བྱེད་ན། ཚེ་འདི་ཉིད་ཀྱིས་ས་བདུན་གྱི་དབང་ཕྱུག་ཉིད་དུ་འགྱུར་རོ། །ཞེས་གསུངས་ཏེ། བསྐྱེད་རིམ་མཆོག་གི་རྒྱུར་མི་རུང་ན། ས་བདུན་གྱི་རྒྱུར་གསུངས་པ་དང་འགལ་ལོ་སྙམ་པའོ། །སྐྱོན་དེ་ནི་འཇུག་པ་མ་ཡིན་མོད། ཁྱེད་ཀྱིས་ནི་བྱིས་འཇུག་གི་དབང་དོན་བསྐྱེད་རིམ་ཡིན་ལ། དཀྱིལ་འཁོར་གྱི་འཁོར་ལོ་མངོན་སུམ་ཞེས་པ་ཡང༌། བསྐྱེད་རིམ་ལ་བརྟན་པ་ཐོབ་པའི་གང་ཟག་དེ་ཚེ་འདིར་ས་བདུན་པ་ངེས་པར་ཐོབ་ཅེས་པར་གོ་འདུག་སྟེ། དེ་ནི་ཉིད་ཅག་རང་གི་ལུགས་ལ་ཡང་མི་རུང་སྟེ། རྫོགས་རིམ་གྱི་འཛིན་པ་ཙམ་ཐོབ་ཀྱང༌། རྗེས་དྲན་མ་ཐོབ་ན་ཚེ་འདིར་སངས་རྒྱས་མི་ཐོབ་ཅེས་ཁྱེད་རང་བཞེད་པ་དང་ནི་འགལ་བ་ཆེན་པོ་འོང་ལ། བྱིས་དབང་ཐོབ་པས་ས་བདུན་གྱི་དབང་ཕྱུག་ཏུ་དག་པ་བྱེད་པའི་རྒྱུ་མཚན་བསྐྱེད་རིམ་བརྟན་ན་ཚེ་འདིར་ས་བདུན་པའི་བར་དུ་ནི་ཐོབ་ངེས་ལ། དེ་ལས་ལྷག་པ་མ་ངེས་ སོ། །ཞེས་བསམ་པར་འདུག་སྟེ། དེ་ལྟར་ན་དབང་གོང་མ་དང་ས་སྦྱར་བ་རྣམས་ལའང་རིགས་བསྒྲེས་པས། ཤེར་དབང་ས་བཅུ་པ་ལ་འཇོག་པའི་རྒྱུ་མཚན་རྗེས་དྲན་སྔོན་དུ་གྱུར་པས་ཚེ་འདིར་ས་བཅུ་པ་ནི་ཐོབ་པར་ངེས་ལ། དེ་བས་ལྷག་པ་མ་ངེས་པའི་རྒྱུ་མཚན་དུ་བྱེད་དགོས་སོ། །དེ་ཡང་འདོད་ན་རྗེས་དྲན་ཐོབ་ན་ཚེ་དེ་
ལ་འབྲས་བུའི་སངས་རྒྱས་ཐོབ་ངེས་པར་རང་འདོད་པ་དང་འགལ་ལོ། །གཞན་ཡང་བསྐྱེད་རིམ་བརྟན་པའི་གང་ཟག་དེ་ཚེ་དེ་ལ་རྫོགས་པའི་སངས་རྒྱས་ཐོབ་ངེས་པར་ཐལ་བར་འགྱུར་ཏེ། དེ་འདྲ་དེ་ཚེ་དེ་ལ་སྔགས་ལམ་གྱི་ས་བདུན་པ་ནི་ཐོབ་དེས། ས་བདུན་པ་དེ་ཡང་ཁྱེད་ཀྱི་ལུགས་ལ་ཏིང་ངེ་འཛིན་གྱི་ཡན་ལག་ཡིན་པར་འདོད་མོད། རྗེས་དྲན་ཐོབ་ཕྱིན་མ་ཤི་བའི་སྔོན་རོལ་ཏུ་ངེས་པར་འཚང་རྒྱ་བ་ཡིན་པའི་ཕྱིར། ཞེས་པའི་སྐྱོན་འདི་ཡང་འཇུག་གོ །དེས་ན་བྱིས་འཇུག་གི་དབང་བདུན་བསྐུར་བས་མ་འོངས་པ་ན་ས་བདུན་ཐོབ་པའི་རྟེན་འབྲེལ་སྒྲིག་པ་ཡིན་ཞིང༌། སྔར་སྔགས་ལམ་གྱིས་རྒྱུད་མ་སྦྱངས་པ་ཞིག་ལ་བྱིས་འཇུག་གི་དབང་བདུན་བསྐུར་བའི་ཚེ། སློབ་དཔོན་གྱི་སྒྱུ་མའི་རིག་སྔགས་ལ་སོགས་པས་སྤྲུལ་པ་མ་ཡིན་པར་སློབ་མ་ཉིད་ཀྱི་དགེ་བའི་མཐུ་ལས་ལྷ་ངོ་བསྟན་པ་སོགས་ལ་དཀྱིལ་འཁོར་གྱི་འཁོར་ལོ་མངོན་སུམ་དུ་མཐོང་བར་གྱུར་ན། སྒྲུབ་པ་པོ་དེས་ཚེ་དེ་ལ་ས་བདུན་པ་ཐོབ་པར་འགྱུར་བའི་ལྟས་སོ། །ཞེས་པ་ནི་འགྲེལ་ཚིག་གི་དོན་ཡིན་ནོ། དེའི་ས་བདུན་པ་ནི། ཁོ་བོ་ཅག་ཏིང་ངེ་འཛིན་གྱི་རིམ་པར་འདོད་ཀྱང་དེ་བས་ཀྱང་བཟང་བ་འཕགས་ས་བདུན་པ་ཡིན་ཞིང༌། ངེད་ཀྱི་ལུགས་ལ་མཆོག་གི་དངོས་གྲུབ་ནི་ཐོབ་ཟིན་པས། ཚེ་འདིར་རྫོགས་པའི་སངས་རྒྱས་ཀྱང་ཐོབ་པར་འགྱུར་བ་ལ་ཐེ་ཚོམ་མེད་མོད་ཀྱི། བྱིས་དབང་གི་སྐབས་སུ་ས་བརྒྱད་པ་ཡན་ཆད་ཐོབ་པར་འགྱུར་བའི་ལྟས་མི་འཆར་བས། སྐབས་དེར་དཀྱིལ་འཁོར་དངོས་སུ་མཐོང་བ་དེ་ས་བདུན་གྱི་ལྟས་ཡིན་གྱི། གོང་མ་རྣམས་ཀྱི་ལྟས་མ་ཡིན་པའི་དོན་ནོ། །དེ་ལྟ་བུ་མ་མཐོང་ཡང་དབང་བདུན་བསྐུར་བས་མ་འོངས་པ་ན་ས་བདུན་ཐོབ་པའི་རྟེན་འབྲེལ་འགྲིག་པར་བྱེད་མོད་ཀྱི། ས་བདུན་ཐོབ་བྱེད་ཀྱི་རྒྱུ་ཡིན་ན། དབང་བདུན་བསྐྱེད་རིམ་དང་བཅས་པ་
ཡིན་མི་དགོས་པས། རྩོད་པ་དེ་ཡང་དོན་དང་བྲལ་བ་ཡིན་ཏེ། མདོ་སྡེ་རྣམས་ལས་སངས་རྒྱས་ལ་ལའི་མཚན་བཟུང་བ་ཙམ་གྱིས་ཕྱིར་མི་ལྡོག་པའི་ས་ཐོབ་པར་བཤད་ན། ཕྱིར་མི་ལྡོག་པའི་རྒྱུར་དེ་མེད་དུ་མི་རུང་བ་མ་ཡིན་པ་བཞིན་ནོ། །ལྔ་པ་ནི། འགྲེལ་ཆེན་དུ། དེའི་ཕྱིར་བསོད་ནམས་དང་ཚུལ་ཁྲིམས་ཀྱི་ཚོགས་དག་ལས་ཡེ་ཤེས་ཀྱི་ཚོགས་སོ། །དེ་ལྟར་ཚོགས་གསུམ་གྱིས། རིགས་ཀྱི་བུ་ཁྱོད་ཡང་དག་པར་རྫོགས་པའི་སངས་རྒྱས་ཉིད་དུ་འགྱུར་རོ། །ཞེས་གསུངས་ཤིང༌། དེའི་བསོད་ནམས་ཀྱི་ཚོགས་ནི་བསྐྱེད་རིམ་ལ་ཡང་ཡང་དུ་གསུངས་པས། དེ་སངས་རྒྱས་ཀྱི་རྒྱུ་མ་ཡིན་པ་འགལ་སྙམ་ན། ཚོགས་གསུམ་ཀར་རྫོགས་རིམ་ཁོ་ན་ལས་འགྲུབ་པ་ཡོད་ལ། བསྐྱེད་རིམ་རང་ཉིད་བསོད་ནམས་ཀྱི་ཚོགས་ཤས་ཆེ་བ་ཙམ་ཡིན་དུ་ཆུག་ཀྱང༌། བསོད་ནམས་ཀྱི་ཚོགས་ལ་བསྐྱེད་རིམ་དུ་མ་ངེས་པས་རྩོད་པ་འདི་ཡང་དོན་ལས་ཕྱིར་ཕྱོགས་པའོ། །དེས་ན་བསྐྱེད་རིམ་གྱི་སྐབས་སུ་བསོད་ནམས་ཞེས་གསུངས་པ་ཙམ་དང༌། རྫོགས་རིམ་གྱི་སྐབས་སུ་ཡེ་ཤེས་ཁོ་ནའི་ངེས་བཟུང་མི་མཛད་པར་ཚོགས་གཉིས་ཀར་སྨོས་པས་ཀྱང་ཕྱོགས་ལྷུང་སྤངས་པའི་ཡིད་ཅན་གྱིས་བལྟས་ན་གོ་བར་ནུས་ལ། གཞན་ཡང་མི་འབྱུང་བའི་བདེ་བ་ཚོགས་གསུམ་ཡོངས་སུ་རྫོགས་པའི་བདག་ཉིད་དུ་གསུངས་ཏེ། སྲུང་བ་འདི་ཉིད་ཁོ་ན་ཡིས། །སྐྱེ་བ་འདི་ལ་སངས་རྒྱས་ཉིད། །ཚུལ་ཁྲིམས་ཚོགས་ནི་ཡང་དག་རྫོགས། །བསོད་ནམས་ཡེ་ཤེས་ཡང་དག་ལྡན། ཕ་རོལ་ཕྱིན་བཅུ་ཐོབ་པ་ཡི། །རྫོགས་པའི་སངས་རྒྱས་དུས་གསུམ་འཇུག།ཅེས་གསུངས་པ་དང༌། བསྐྱེད་རིམ་ལ་ཡང་བསོད་ནམས་ཁོ་ནས་མ་ཁྱབ་སྟེ། ཡེ་ཤེས་ཚོགས་ཀྱི་ཆ་ཤས་ཡོད་པར་ཡེ་ཤེས་
ཚོགས་གསོག་རང་གིས་ཀྱང་ཤེས་ལ། ཐིག་ལེ་དང་ཕྲ་མོའི་རྣལ་འབྱོར་ཡང་ཚུལ་ཁྲིམས་དང་ཡེ་ཤེས་ཀྱི་ཚོགས་སུ་ཤིན་ཏུ་གསལ་བའི་ཕྱིར། བསོད་ནམས་ལ་བསྐྱེད་རིམ་དུ་ག་ལས་ཀྱང་ངེས་ཏེ། བསྐྱེད་རིམ་ཡང་བསོད་ནམས་ཀྱི་ཚོགས་ཁོ་ནར་མ་ངེས་ལ། འོན་ཀྱང་བསོད་ནམས་ཤས་ཆེ་བ་ཙམ་ཡིན་པས། བསྐྱེད་རིམ་བསོད་ནམས་ཀྱི་ཚོགས་སོ་ཞེས་འཇོག་པ་ནི་ལེགས་པ་ཡིན་ཡང༌། ལུགས་འདིའི་བསོད་ནམས་ཀྱི་ཚོགས་ལ་བསྐྱེད་རིམ་གྱིས་ཁྱབ་པ་ནམ་ཡང་གཏན་ནས་མིན་ཡང༌། དེར་མ་ཟད་བསོད་ནམས་ཀྱི་ཚོགས་ཀྱི་གཙོ་བོ་ཡང་བསྐྱེད་རིམ་མིན་ཏེ། བསྐྱེད་རིམ་ནི་ལས་དང་པོ་པ་རྣམས་ཀྱིས་བསྒོམ་བྱ་ཡིན་པས། རྫོགས་རིམ་གྱི་རྣལ་འབྱོར་དངོས་སུ་རྒྱུད་ལ་སྐྱེས་པ་ཡན་ཆད་ལ་མི་དགོས་ཤིང༌། སངས་རྒྱས་ཐོབ་པའི་རྒྱུའི་བསོད་ནམས་ཀྱི་གཙོ་བོ་རྣམས་ནི། སྤྱིར་རྫོགས་རིམ་དང་སྒོས་སུ་འཕགས་ལམ་དུ་སྒྲུབ་ཅིང༌། ཡང་སྒོས་སུ་ས་གོང་མ་གོང་མ་རྣམས་སུ་གཙོ་བོར་འགྲུབ་པ་ཡིན་པས། ཕྱོགས་བཅུ་དུས་གསུམ་གྱི་བསྐྱེད་རིམ་ཐམས་ཅད་གཅིག་ཅར་བསྡོམས་ཀྱང༌། རྫོགས་པའི་སངས་རྒྱས་ཀྱི་བ་སྤུའི་ཁུང་བུ་གཅིག་འགྲུབ་པའི་བསོད་ནམས་ཚོགས་ཀྱི་ཆ་ཤས་སུ་ཡང་མི་སླེབ་བོ། །འོ་ན་བསོད་ནམས་ཀྱི་གཙོ་བོ་གང་ཞེ་ན། འགྲེལ་ཆེན་ལས། དེའི་ཕྱིར་བསོད་ནམས་ཀྱི་ཚོགས་ཀྱི་དོན་དུ་སེམས་ཅན་ལ་ཕན་པར་བྱའོ། །ཡེ་ཤེས་ཀྱི་ཚོགས་ཀྱི་དོན་དུ་མཆོག་ཏུ་མི་འགྱུར་བའི་ཡེ་ཤེས་བསྒོམ་པར་བྱའོ། །སེམས་ཅན་གྱི་དོན་མ་གཏོགས་པར་བསོད་ནམས་ཀྱི་ཚོགས་དང༌། མཆོག་ཏུ་མི་འགྱུར་བའི་ཡེ་ཤེས་སྒོམ་པར་མ་གཏོགས་པར་ཡེ་ཤེས་ཀྱི་ཚོགས་སུ་འགྱུར་བ་ཡོད་པ་མ་ཡིན་ནོ། །ཞེས་གསུངས་ཏེ། མི་འགྱུར་བའི་
བདེ་བ་རྣམ་པ་ཀུན་ལྡན་དུ་ཤར་བ་ན། སེམས་ཅན་དཔག་ཏུ་མེད་པ་སྨིན་གྲོལ་དུ་བྱེད་པ་ཉིད་བསོད་ནམས་ཀྱི་ཚོགས་ཀྱི་གཙོ་བོ་ཡིན་ནོ། །དེ་ཡང་དཔྱད་ན་བསྐྱེད་རིམ་བསོད་ནམས་སུ་འཇོག་པའི་སྐབས་སུ་ཀྱང༌། བསོད་ནམས་ཀྱི་ཚོགས་ཀྱི་རྒྱུ་དང་ཆ་ཤས་དང༌། བསག་པར་བྱ་རྒྱུའི་ཡན་ལག་ཙམ་ཡིན་གྱི། ཚོགས་དངོས་སུ་མི་འགྱུར་ཏེ། མཆོག་མི་འགྱུར་ལས། གོམས་པའི་དབང་གིས་ཕུང་པོ་དང་ཁམས་དང་སྐྱེ་མཆེད་ལ་སོགས་པ་དཀྱིལ་འཁོར་གྱི་འཁོར་ལོའི་རྣམ་པར་འགྱུར་ཏེ། དེ་ཉིད་ཀྱིས་ན་སངས་རྒྱས་ཉིད་དུ་ཡང་དེ་བཞིན་གཤེགས་པས་གསུངས་སྙམ་པ་དེ་ནི་མ་ཡིན་ཏེ། གང་གི་ཕྱིར་བསོད་ནམས་དང་ཡེ་ཤེས་ཀྱི་ཚོགས་མེད་པའི་ཕྱིར་རོ། །ཞེས་གསུངས་ན་བསྐྱེད་རིམ་ཁོ་ན་བསོད་ནམས་ཚོགས་ཀྱི་ལམ་ཆ་ཚང་བ་ཇི་ལྟར་ཡིན། གཞན་དོན་སེམས་ཅན་གྱི་དོན་སྤྱོད་པ་ཡང་བསྐྱེད་རིམ་པས་ཉེ་ཚེ་ཙམ་ཞིག་གོ །དྲུག་པ་ནི། སྒྲུབ་ལེར་ཕྱི་ནང་གི་སྦྱང་གཞི་རྣམས་བསྐྱེད་རིམ་གྱིས་སྦྱོང་བའི་རྣམ་གཞག་རྒྱས་པར་གསུངས་པ་མི་འཐད་པར་འགྱུར་ཏེ། བསྐྱེད་རིམ་སངས་རྒྱས་ཀྱི་རྒྱུ་མ་ཡིན་ན། དེས་དེ་དག་སྦྱོང་མི་ནུས་པའི་ཕྱིར་རོ་སྙམ་པ་སྟེ། དེ་ཡང་སྐྱེས་བུ་ཞིག་གིས་བསྐྱེད་རིམ་བསྒོམས་ན། དེས་སངས་རྒྱས་ཐོབ་པ་ལ་ཆ་ཙམ་ཡང་མི་ཕན་པར་ཁས་བླངས་པ་ཡིན་ན་སྐྱོན་དེ་འཇུག་ཀྱང༌། དེ་ནི་མཁས་པ་སུ་ཡང་འདོད་མཁན་མེད་དེ། དུད་འགྲོ་ལ་ཟས་ཁམ་གཅིག་བྱིན་པ་ཡང་སངས་རྒྱས་སྒྲུབ་པ་ལ་ཕན་པའི་ཕྱོགས་ཁོ་ན་ཡིན་ནོ། །སངས་རྒྱས་ཀྱི་རྒྱུར་ངེས་པར་དགོས་པའི་ཡན་ལག་མིན་ཞེས་སྨྲས་པ་ལ་ཐལ་འགྱུར་དེ་འཕེན་ན་ནི། ཤིན་ཏུ་ཁྱབ་པ་མ་ངེས་སོ། །དཔེར་ན་སེམས་བསྐྱེད་ཀྱིས་ཟིན་པས་བྲམ་ཟེ་དྲག་པོའི་བུ་ལ་བ་ལང་བྱིན་ལ། རྗེས་བྱང་ཆུབ་ཆེན་པོར་བསྔོ་
བས་རྒྱས་ཐེབས་པའི་སྦྱིན་པ་དེ་སངས་རྒྱས་ཀྱི་རྒྱུ་ཚོགས་ཡིན་ཡང་སངས་རྒྱས་ཐོབ་པར་བྱེད་པ་ལ་དེ་ངེས་པར་དགོས་པ་མ་ཡིན་པ་བཞིན་ནོ། །དེས་ན་བསྐྱེད་རིམ་བསྒོམས་པས་སྦྱང་བྱ་སྲིད་པ་སྐྱེ་བའི་རིམ་པ་དེ་དག་གི་སྒྲིབ་པ་མགོ་ནོན་གྱི་ཚུལ་གྱིས་སྦྱོང་ཞིང༌། རྫོགས་པའི་སངས་རྒྱས་ཀྱི་རྡོ་རྗེ་བཞི་ཐོབ་པ་ལ་ཅུང་ཟད་ཉེ་བར་བྱེད་པ་སོགས་ཀྱི་སྒོ་ནས། སྦྱང་བྱ་དང་སྦྱངས་འབྲས་དེ་དག་སྦྱོར་བ་ཡིན་གྱི། སྤྱིར་སྲིད་པ་སྐྱེ་རིམ་གྱི་སྒྲིབ་པ་མགོ་གནོན་པ་དང༌། རྡོ་རྗེ་བཞི་དང་ཅུང་ཟད་ཉེ་བར་བྱེད་པ་ལ། དེ་དག་བསྒོམ་དགོས་པས་ཁྱབ་པ་ག་ལ་ཡིན། །བདུན་པ་ནི། སངས་རྒྱས་ཐོབ་པའི་ཕྱིར་དུ་བསྐྱེད་རིམ་སྒོམ་པར་དམ་འཆའ་བ་དང༌། བསྐྱེད་རིམ་བསྒོམས་པའི་དགེ་བ་ལས་སངས་རྒྱས་ཐོབ་པར་སྨོན་ལམ་འདེབས་པ་མི་རུང་བར་འགྱུར་ཏེ། བསྐྱེད་རིམ་སངས་རྒྱས་ཀྱི་རྒྱུ་མ་ཡིན་པའི་ཕྱིར་རོ། །ཟེར་རོ། །དེ་ནི་དགག་པའི་རྣམ་གྲངས་མང་པོ་དགོས་པ་བྱུང་བས་ཚིག་གི་དཔུང་བསྐྱེད་པའི་ཕྱིར་དུ་དྲན་དགུ་སྨྲ་བར་ཟད་དེ་ཤིན་ཏུ་མི་བརླིང་བས་མི་འཐད་པར་རྟོགས་པར་བླའོ། །འོན་ཀྱང་འདི་སྐད་ཅེས་བྱ་སྟེ། སངས་རྒྱས་ཐོབ་པའི་རྒྱུར་ཁྱིམ་གྱི་ཡང་ཐོག་ཏུ་བུད་མེད་དང་ཁྱི་ལ་ཟན་ཁམ་ཕྱེད་གཤགས་སུ་བགོས་ཏེ་སྟེར་དགོས་པ་ཡིན་པར་ཐལ། དེ་ལྟར་བྱིན་པའི་དགེ་བ་དེ་སངས་རྒྱས་ཀྱི་རྒྱུར་སེམས་བསྐྱེད་དུ་ཡང་རུང་སངས་རྒྱས་སུ་བསྔོ་བར་ཡང་རུང་བའི་ཕྱིར་ཞེས་པ་དང་བྱེ་བྲག་མེད་དོ། །ཡང་ཁ་ཅིག་བསྐྱེད་རིམ་སངས་རྒྱས་ཀྱི་རྒྱུ་མིན་ཞེས་པ་ལ་སྔར་བཤད་པ་དེ་དག་དང་མཚུངས་རུང་དུ་འགོག་པའི་ལུགས་བྱས་ནས། དངོས་རྒྱུ་མ་ཡིན་པས་སངས་རྒྱས་ཐོབ་པ་ལ་མི་དགོས་ན། རྫོགས་རིམ་གྱི་ཡན་ལག་དང་པོ་ལྔ་དང༌། ཏིང་ངེ་འཛིན་གྱི་ཡང་སྐད་ཅིག་མ་ཐ་མ་མ་གཏོགས་
ཐམས་ཅད་མི་དགོས་པར་འགྱུར་རོ། །ཞེས་སྨྲ་བ་ནི་ཁས་ལེན་མེད་པའི་ཐལ་འགྱུར་ཏེ། དངོས་རྒྱུ་མ་ཡིན་པའི་ཕྱིར་མི་དགོས་སོ་ཞེས་སྔ་ཕྱི་སུ་ཡང་མི་སྨྲའོ། །དེས་ན་གོང་དུ་བཤད་པ་ལྟར། བསྐྱེད་རིམ་གྱི་སངས་རྒྱས་ཐོབ་པ་ལ་གེགས་བྱེད་དོ་ཞེས་ཀྱང་ཡེ་མི་སྨྲ་ལ། སངས་རྒྱས་ཐོབ་པ་ལ་ཕན་འདོགས་པར་མི་བྱེད་དོ་ཞེས་ཀྱང་མི་འདོད་དོ། །ལས་དང་པོ་པའི་གང་ཟག་ཤས་ཆེ་བ་ཞིག་གིས་བསྒོམ་དགོས་པ་ཙམ་དུ་མ་ཟད་ཕན་ཡོན་ཡང་ཆེས་ཆེ་ཞིང༌། དེ་བསྒོམས་པས་རྣལ་འབྱོར་བ་མང་པོ་ཞིག་ལ་རྫོགས་རིམ་གྱི་ཉམས་རྟོགས་ཀྱང་སྐྱེ་བླ་ལ། གེགས་མེད་སྐྱེ་ཕུལ་ཆེ་བ་སོགས་མཆོག་དང་འབྲེལ་བའི་ཕན་ཡོན་མང་པོ་ཡོད་ཅིང༌། རྫོགས་རིམ་ལ་མ་བརྟེན་པར་ཡང་ལས་ཚོགས་དང་ཐུན་མོང་གི་དངོས་གྲུབ་རྣམས་དངོས་གནས་ལ་འགྲུབ་ཅིང་འགྲུབ་པར་ཁོ་བོ་ཅག་ཀྱང་འདོད་པས་ཁོ་བོ་ཅག་ཀྱང་བསྐྱེད་རིམ་གུས་པས་ལེན་པར་བྱེད་དོ། །འོན་ཀྱང་དམིགས་གསལ་མ་གཏོགས་རྫོགས་རིམ་གྱི་རྟོགས་པ་སྐྱེས་ཕྱིན་ཆད་བདུད་རྩི་རྙེད་ན་ཁ་ཟས་གཞན་འདོར་བའི་དཔེས་བསྐྱེད་རིམ་དོར་བྱ་ཡིན་པ་དང༌། སྔགས་ཀྱི་ཆེད་དུ་བྱ་བའི་གང་ཟག་དབང་པོ་རབ་ལ་བསྐྱེད་རིམ་མི་དགོས་པ་དང༌། ཆེད་དུ་བྱ་བའི་གདུལ་བྱར་གཏོགས་པ་དབང་པོ་འབྲིང་དང་དམན་པ་ལ་ཡང་དབང་པོའི་ཁྱད་པར་གྱིས་རྫོགས་རིམ་ཁོ་ནས་ཁྲིད་ཆོག་པ་ཡང་སྲིད་པ་དང༌། བསྐྱེད་རིམ་སངས་རྒྱས་ཐོབ་པ་ལ་མེད་ན་མི་འབྱུང་གི་རྒྱུ་མ་ཡིན་ནོ་ཞེས་ནི་སྨྲ་སྟེ། དེ་ཉིད་དོན་ལ་གནས་པའང་ཡིན་པས་བསྐྱེད་རིམ་ལ་ཁོ་བོ་ཅག་སྐུར་བ་འདེབས་པ་མ་ཡིན་ནོ། འདི་ལས་ཟློག་སྟེ་སྨྲ་ན་ཆུང་ངུ་ལ་ཆེན་པོར་སྒྲོ་འདོགས་སྨྲ་བའོ། །བསྐྱེད་རིམ་མཆོག་གི་རྒྱུ་མིན་ཞེས་སྨྲས་པ་
ལ་ཉེས་པ་ཆེན་པོ་མི་བཟད་པར་རྩི་བ་ནི། འཕགས་པ་སྤྱན་རས་གཟིགས་ལ་སྐུར་པ་འདེབས་པ་ཡིན་ཏེ། མཆོག་མི་འགྱུར་ལས། དེའི་ཕྱིར་རྣལ་འབྱོར་པས་ཕྱག་རྒྱ་ཆེན་པོའི་དངོས་གྲུབ་གྱི་དོན་དུ་རྣམ་པར་རྟོག་པའི་སྒོམ་པ་མི་བྱའོ། །ཞེས་དང༌། གཟུགས་ལ་སོགས་པ་རྟོག་པའི་དཀྱིལ་འཁོར་གྱི། །འཁོར་ལོ་སྒོམ་པ་གོམས་པར་གྱུར་པས་ནི། །གྲུབ་པ་འཇིག་རྟེན་པ་དག་འགྲུབ་འགྱུར་གྱི། །འདོད་པའི་དངོས་གྲུབ་ཆེན་པོ་ག་ལ་ཞིག །ཞེས་གསུངས་ཤིང༌། སེམས་འགྲེལ་སྐོར་གསུམ་ནི་འདི་ལྟ་བུའི་ཚིག་རིགས་ཤིན་ཏུ་མང་བའི་ཕྱིར་རོ། །ཡང་རིག་པའི་སྙིང་པོ་འདི་ཡིན་ཏེ། སངས་རྒྱས་ཐོབ་པ་ལ་བསྐྱེད་རིམ་མེད་ན་མི་འབྱུང་གི་རྒྱུ་མ་ཡིན་ཏེ། བསྐྱེད་རིམ་མ་བསྒོམས་པར་རྫོགས་པའི་སངས་རྒྱས་ཐོབ་པ་དཔག་ཏུ་མེད་པ་ཡོད་པའི་ཕྱིར་མ་གྲུབ་ན། དེ་ཡོད་ཏེ་སྦྱོར་ལམ་བཟོད་པ་མན་ཆད་མདོ་ལུགས་ཀྱིས་བགྲོད་ནས། ཐེག་པ་བླ་ན་མེད་པ་ལ་ཞུགས་ཏེ། སངས་རྒྱས་ཐོབ་པར་བྱེད་པ་ཐམས་ཅད་ཀྱིས་བསྐྱེད་རིམ་ལན་ཅིག་ཀྱང་སྒོམ་མི་དགོས་པའི་ཕྱིར་ཏེ། དཔེར་ན་ས་བཅུའི་ཐ་མར་སྔགས་ལ་འཇུག་པ་བཞིན་ནོ། །ཡང་དབང་པོ་རྣོན་པོས་ལས་དང་པོ་པ་ཉིད་ནས་བསྐྱེད་རིམ་སྤངས་ཀྱང་རྡོ་རྗེ་འཛིན་པའི་སྐུ་མངོན་དུ་བྱེད་ནུས་པ་ཡིན་ཏེ། སྐུ་དེ་འགྲུབ་པ་ལ་ངེས་པར་དགོས་པ་མེད་ན་མི་འབྱུང་གི་རྒྱུ་ཚོགས་གསུམ་པོ་གྲངས་ཚང་བའི་ཕྱིར་རོ། །ཞེས་པའོ། །དེས་ན་བསྐྱེད་རིམ་མཆོག་སྒྲུབ་པ་ལ་ངེས་པར་དགོས་པར་འདོད་པའི་རྒལ་ལན་འདི་དག་སྤྱི་ལྡོག་ནས་གནད་ཆུང་བ་ལྟ་བུར་འདུག་ཅིང༌། སྐབས་འདིར་ཧ་ཅང་སྤྲོས་པ་ཐལ་ཆེས་བ་ལྟར་གྱུར་མོད་ཀྱི། དུས་འཁོར་བ་སྔ་རབས་མཁྱེན་པའི་དཀྱིལ་འཁོར་ཤེས་བྱ་རབ་འབྱམས་སུ་ཤར་ཞིང༌། མངོན་པར་རྟོགས་
པའི་གོ་འཕང་ཤིན་ཏུ་མཐོ་བར་གཤེགས་པ་དག་མགྲིན་གཅིག་ཏུ་བཞེད་པ་དང༌། རིགས་ལྡན་སྤྲུལ་པའི་སྐུ་ཆོས་རྗེ་ཐམས་ཅད་མཁྱེན་པ་དོལ་པོ་པ་སོགས་རང་ལུགས་ཀྱི་བླ་མ་རྣམས་ཀྱང་དེ་ཁོ་ན་ལྟར་བཞེད་པ་ལ། སློབ་དཔོན་གཞོན་བློ་ཕྱིན་ཆད་བྱུང་བའི་མཁས་པ་འགའ་ཞིག་གིས་ཆོས་དང་གང་ཟག་ལ་སྡང་ཤུགས་ཀྱིས་ཀུན་ནས་བླངས་ཏེ་སྐྱོན་མེད་པ་ལ་སྐྱོན་དུ་འདོགས་ཚུལ་རྣམ་གྲངས་མང་མང་འདྲ་བ་བཀོད་པ་ན། མཁས་རློམ་རྣམས་ཀྱང་མགོ་འཁོར་བར་འགྱུར་བ་དང༌། སྐྱེ་བོ་མང་པོ་ཆོས་དང་གང་ཟག་ལ་སྐུར་པ་འདེབས་པའི་སྡིག་པ་སྒོ་ཆེན་འབྱེད་པར་འགྱུར་བ་མཐོང་ནས། དེ་དག་ལ་ཕན་པའི་ཕྱིར་རྩོད་པ་ལྟར་སྣང་གི་འཚང་རྣམས་ཅུང་ཟད་བསྒྲགས་པ་ཡིན་གྱི། ཞིབ་མོར་ན་མཐའ་ཡས་པ་དཔྱད་དུ་ཡོད་ དོ། །འོན་ཀྱང༌། སྐྱེ་བོ་ཕལ་ཆེར་ཕལ་ལ་ཆགས་ཤིང་ཤེས་རབ་རྩལ་མེད་པས་ན་ལེགས་བཤད་རྣམས། །དོན་དུ་མི་གཉེར་ཁོ་ནར་མ་ཟད་ཕྲག་དོག་དྲི་མ་དག་གིས་སྡང་བར་ཡང༌། །ཞེས་གསུངས་པ་ལྟར་ཡིན་པས། གཞན་དག་ལ་ཕན་པ་དཀའ་ཡང༌། རང་ལུགས་འཛིན་པ་རྣམས་བླ་མ་གོང་མའི་གྲུབ་མཐའ་ལ་ཐེ་ཚོམ་མི་སྐྱེ་ཞིང༌། ངེས་པ་རྙེད་པའི་དགོས་པ་ཁྱད་པར་ཅན་ཡོད་དོ། །ཞེས་པ་དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། བསྐྱེད་རྫོགས་ཀྱི་ངེས་པ་གོ་རིམ་ལ་ལོག་རྟོག་དགག་པའི་སྡེ་ཚན་ཏེ་བཅུ་གཉིས་པའོ།། །།དེ་ལྟར་བསྐྱེད་པའི་རིམ་པ་རྟོགས་པར་བྱས་ནས། དེའི་རྗེས་སུ་ངེས་པའི་ལམ་མཆོག་གི་བསྙེན་པ་རྫོགས་པའི་རིམ་པའི་རྣམ་གཞག་ལེགས་པར་རྟོགས་དགོས་ཏེ། དེ་ནི་གཞན་དུ་བཤད་ཟིན་ཏོ། །རྩ་བའི་བཞི་པ་དེ་ལྟར་བསྒྲུབས་པའི་འབྲས་བུ་ལ།
དངོས་འབྲས་ཐུན་མོང་གི་འབྱོར་བ་དང༌། བརྒྱུད་འབྲས་ཕྱག་རྒྱ་ཆེན་པོའི་དངོས་གྲུབ་ལ་སྦྱོར་བའོ། །དང་པོ་ལ། སྒྲུབ་པོ་རྣལ་འབྱོར་པའི་ཁྱད་པར་དང༌། དེས་ཇི་ལྟར་སྒྲུབ་པའི་ཚུལ་ལོ། །དང་པོ་ནི། བསྡུས་པའི་རྒྱུད་ཀྱི་རྒྱལ་པོ་ལས། ཁྱབ་བདག་གི་ནི་དཔལ་ལྡན་སྔགས་དང་སངས་རྒྱས་གཟུགས་དང་རྣལ་འབྱོར་པ་ཡིས་དང་པོར་བསྒྲུབ་པ་བྱ། །ཕྱི་ནས་ཉི་མའི་དབྱེ་བ་རྣམས་ཀྱིས་གནས་པ་ཡོན་ཏན་དཔག་ཏུ་མེད་པའི་ལས་རྣམས་འགྲུབ་པར་འགྱུར། །སྔགས་དང་གཟུགས་བརྙན་མ་གྲུབ་པར་ནི་སྲིད་གསུམ་གནས་སུ་ཅི་ཡང་འགྲུབ་པར་འགྱུར་བ་ཉིད་མ་ཡིན། །དེ་ཕྱིར་རྒྱལ་པོ་རང་སེམས་དྲི་མ་རྣམ་པར་བྲལ་བ་དག་ལ་སྔགས་དང་གཟུགས་ནི་བསྒྲུབ་པར་བྱ། །ཞེས་པ་དང༌། དང་པོར་དཔལ་ལྡན་དུས་ཀྱི་འཁོར་ལོ་དང་ནི་སྲིད་གསུམ་སྐྱེད་མ་འབད་པ་ཡིས་ནི་བསྒྲུབ་པར་བྱ། །དེ་ནས་ས་གཞིའི་གནས་དག་ཏུ་ནི་གང་ཞིག་ཞི་བ་ལ་སོགས་ལས་རྣམས་དག་ཀྱང་བསྒྲུབ་པར་བྱ། །ཞེས་གསུངས་ཏེ། འདི་ལ་གཞུང་གི་དངོས་བསྟན་སྒྲ་ཇི་བཞིན་པ་ལྟར་ན་སྔགས་ཀྱི་ནུས་པ་ལས་སུ་རུང་བ་དང༌། ལྷའི་གཟུགས་བརྙན་གྱི་གསལ་སྣང་ལ་བརྟན་པ་ཐོབ་ན། རིམ་པས་དངོས་གྲུབ་རྣམ་པ་གསུམ་ཡང་འགྲུབ་པར་འགྱུར་ན། ཕྲ་མོ་ལས་བཅུ་གཉིས་སོགས་ཐོགས་པ་མེད་པ་འགྲུབ་པ་ལྟ་སྨོས་ཀྱང་ཅི་དགོས། དེ་གཉིས་མ་གྲུབ་ན་དངོས་གྲུབ་ནམ་ཡང་མི་འགྲུབ་ཅིང༌། ལས་ཚོགས་རྣམས་ཀྱང་ཇི་བཞིན་དུ་མི་འགྲུབ་ཅེས་པའོ། །ལྷ་དང་སྔགས་ཀྱི་རྣལ་འབྱོར་ཡང་དཔལ་དུས་ཀྱི་འཁོར་ལོ་ཡབ་ཡུམ་གྱི་དེ་དག་འགྲུབ་ན། ཕྲ་མོ་དང་གྲུབ་པ་ཐམས་ཅད་འགྲུབ་པར་འགྱུར་གྱི། ལྷ་གཞན་རྣམས་ཀྱིས་ནི་ཕྱོགས་རེ་ལས་མི་འགྲུབ་པའམ། དེ་ཡང་ཤིན་ཏུ་དཀའ་ཚེགས་དང་བཅས་པ་འགྲུབ་པའོ། །ཞེས་
པའི་དོན་ཡིན་ལ་འགྲེལ་ཆེན་གྱིས་བཀྲལ་བ་ལྟར་སྒྲ་ཇི་བཞིན་མ་ཡིན་པ་ནི། སྔགས་ནི་རླུང་དབུ་མར་ཆུག་ཅིང་སྲོག་ཐུར་འདྲེས་པ་དང༌། སངས་རྒྱས་གཟུགས་ནི་སྟོང་གཟུགས་ལ་བརྟན་པ་ཐོབ་པ་སྟེ། དེ་གཉིས་བསྡོམས་ནས་སྲོག་གཟུགས་གྲུབ་ན། ལས་དང་དངོས་གྲུབ་དེ་ཐམས་ཅད་འབད་རྩོལ་མེད་པར་འགྲུབ་ཅིང༌། གཞན་དུ་ན་མི་འགྲུབ་པ་དང༌། ཡང་དཔལ་ལྡན་དུས་ཀྱི་འཁོར་ལོ་ཞེས་པ་འགྱུར་མེད་བདེ་བ་སྟེ། དེའི་རྒྱུ་ཞུ་བདེ་འགྱུར་མེད་དུ་འཆིང་ཐུབ་པ་ཞིག་དང༌། སྲིད་གསུམ་སྐྱེད་མ་སྣ་ཚོགས་ཡུམ་ནི། འོད་གསལ་རྣམ་ཀུན་མཆོག་ལྡན་གྱི་སྐུ་ཡིན་པར་བཤད་དེ། དེ་གཉིས་ལས་དང་དངོས་གྲུབ་ཐམས་ཅད་ཀྱི་ཕ་མ་ལྟ་བུར་གསུངས་ཏེ་དོན་གཞན་རྣམས་སྔར་བཤད་པ་དང་འདྲའོ། །འོ་ན་བསྐྱེད་རིམ་ཁོ་ནས་ལས་ཚོགས་ཀྱང་མི་འགྲུབ་པར་ཐལ་བར་འགྱུར་སྙམ་ན། མ་ཡིན་ཏེ། བསྐྱེད་རིམ་གྱི་གསལ་སྣང་མཐར་བྱེད་པ་བས་ཀྱང་ལམ་ཟབ་མོ་སྦྱོར་བ་ཡན་ལག་དྲུག་པ་ཉམས་སུ་བླངས་ན་སྲོག་གཟུགས་སྒྲུབ་པ་དཀའ་བ་མ་ཡིན་ལ། སྲོག་གཟུགས་གྲུབ་པའི་རྣལ་འབྱོར་པས་རྫས་སྔགས་འཁྲུལ་འཁོར་གང་ལ་ཡང་མ་བརྟེན་པར་ཕྲ་མོ་ལས་ཐམས་ཅད་བསམ་པ་ཙམ་གྱིས་འགྲུབ་ཅིང༌། དེ་གྲུབ་པ་ནས་རྗེས་དྲན་གྱི་རིམ་པ་ལ་གནས་པའི་བར་དུ་ཐུན་མོང་གི་དངོས་གྲུབ་འདོད་པ་ཡང་སྲིད་ལ་གལ་ཏེ་འདོད་ན་དཀའ་བ་མེད་པར་མྱུར་དུ་འགྲུབ་པོ།། ཏིང་ངེ་འཛིན་གྱི་སྦྱོར་བ་ལ་ཞུགས་ནས་ནི་འདོད་པར་མི་བྱེད་མོད། གཞན་དོན་དུ་ཞོར་བྱུང་གི་ཚུལ་གྱིས་དེ་དག་མི་འབྱུང་བར་ངེས་པ་ཡང་མ་ཡིན་ནོ། །སྲོག་གཟུགས་གྲུབ་པ་ལ་བརྟེན་ནས་དེ་རྣམས་འགྲུབ་ཚུལ་ལ་དཔགས་ན། བསྐྱེད་རིམ་ཁོ་ནའི་སྒོ་ནས་དེ་དག་སྒྲུབ་པ་ནི་ཚེགས་ཆེ་ཞིང་འགྲུབ་ཚུལ་
ཞན་པར་དགོངས་ནས། འགྲེལ་པས་དེ་ལྟར་བཀྲལ་བ་ཡིན་ལ། བསྐྱེད་རིམ་ཉིད་ཀྱིས་སྒྲུབ་པར་བྱེད་པ་ལ་ཡང་རགས་པའི་རླུང་ཁམས་ལྔའི་མཚན་ཉིད་ཅན་བཅིངས་པའི་བུམ་ཅན་བརྟན་པས་ཞུ་བདེའི་འགྱུར་བ་ཁེགས་ནུས་པ་དང༌། ལྷ་སྐུ་དང་སྔགས་ཀྱི་སྒྲ་གཟུགས་ལ་གསལ་སྣང་བརྟན་པོ་གྲུབ་ན་སྲོག་གཟུགས་གྲུབ་པ་རྗེས་མཐུན་པ་ཙམ་ཡིན་པས། རྫས་འཁྲུལ་འཁོར་སྦྱིན་སྲེག་དང་བཟླས་སོགས་ལ་མ་བལྟོས་པར་བསམ་གཏན་ཁོ་ནས་ལས་ཐམས་ཅད་འགྲུབ་ཅིང༌། དངོས་གྲུབ་ཀྱང་འགྲུབ་པའི་སྐལ་བ་ཅན་ཡིན་གྱི། དེ་མ་ཐོབ་ན་དངོས་གྲུབ་ཆེ་འབྲིང་གཉིས་མི་འགྲུབ་ཅིང༌། མིག་སྨན་སོགས་དངོས་གྲུབ་ཆུང་ངུ་ལ་གྲུབ་ཙམ་སྲིད་ཀྱང་དབང་མི་འབྱོར་བ་དང༌། ཕྲ་མོ་བསམ་གཏན་གྱི་ལས་ཀྱང་ཐོགས་མེད་དུ་མི་འགྲུབ་བོ། །དེའི་ཕྱིར་རྒྱུད་ཚིག་གི་དོན་སྒྲ་ཇི་བཞིན་པ་དེ་ལྟར་ཡིན་ལ། སྐལ་བ་དམན་པས་དེ་ཡང་མ་གྲུབ་ན། དམ་ཚིག་ལ་གནས་ཤིང་བརྟུལ་བ་དྲག་པོས་སེམས་རྣམ་གཡེང་གི་དབང་དུ་མ་བཏང་བར་རྣམ་རྟོག་རྒྱུན་ཆགས་ཀྱི་ཏིང་ངེ་འཛིན་དང༌། བཟླས་པ་བྱེ་བ་སོགས་བཟླས་ནས། སྦྱིན་སྲེག་དང་རྫས་དང་འཁྲུལ་འཁོར་སོགས་ལས་ཀྱི་ཡན་ལག་མ་ཉམས་པར་བསྒྲུབས་ན། ཕྲ་མོ་རྣམས་ནི་མི་རིང་བར་ངེས་པར་འགྲུབ་ལ། རིང་དུ་འབད་ན་མིག་སྨན་ལ་སོགས་པ་ཅུང་ཟད་འགྲུབ་པའང་ཡོད་དོ། །དེ་ལྟར་དངོས་གྲུབ་ཀྱི་གཞི་ཏིང་ངེ་འཛིན་གྱི་ཁྱད་པར་ཤེས་པར་བྱས་ནས། དེ་དང་མཐུན་པར་བསྒྲུབ་པར་བྱའོ། །གཉིས་པ་ནི་ཇི་ལྟར་སྒྲུབ་པའི་ཚུལ་ལ་གཉིས་ཏེ། ཕྲ་མོ་ལས་སྣ་ཚོགས་ཀྱི་འབྱོར་བ་དང༌། ཆེན་པོ་བདེ་བ་རྣམ་གསུམ་གྱི་དངོས་གྲུབ་བོ། །དང་པོ་ནི། རྒྱུད་ལས། རེངས་པ་དང་ནི་ཞི་དང་དབང་དང་སྲིད་པ་འཇིག་པ་དག་ནི་ཞལ་གྱིས་
དབྱེ་བ་རྣམས་ཀྱིས་བྱེད། །འབྱུང་བ་རྣམས་ཀྱི་དཀྱིལ་འཁོར་ལ་གནས་ལྷ་མིན་ལག་འགྲོའི་རིགས་འདི་བསྒོམས་པ་ཡིས་ནི་བསྒྲུབ་པར་བྱ། །དཀར་པོ་ཡིས་ནི་ཞི་དང་རྒྱས་པ་བྱེད་དེ་རང་གི་ཡིད་ལ་དམར་པོ་ཡིས་ནི་དགུག་དང་དབང༌། །སེར་པོས་རེངས་དང་རྨོངས་པ་དག་སྟེ་ནག་པོའི་སྤྲིན་དང་མཚུངས་པས་བསད་པ་དང་ནི་བསྐྲད་པའོ། །ཞེས་གཙོ་བོ་ཉིད་ཀྱི་སྐུ་གཅིག་ལས། མདུན་ཞལ་ནག་པོས་བསད་བསྐྲད། གཡས་ཞལ་དམར་པོས་དབང་དགུགགཡོན་ཞལ་དཀར་པོས་ཞི་རྒྱས། རྒྱབ་ཞལ་སེར་པོས་རྨོངས་རེངས་ལྟ་བུ་རྣམ་པ་མ་བསྒྱུར་བའི་ལྷ་སྐུ་གཅིག་ཉིད་ཀྱིས་ལས་ཐམས་ཅད་སྒྲུབ་པའམ། རྩ་ཞལ་དང་སྐུ་ལུས་ཁ་དོག་བསྒྱུར་ནས་རང་རང་གི་ཕྱོགས་སུ་ཞལ་ཕྱོགས་ཏེ། ལས་རྣམས་སྒྲུབ་པར་ཡང་གསུངས་ཤིང༌། ཡང་ཞི་རྒྱས་གཞིལ་གསུམ། དབང་དགུག་བསྐྱོད་གསུམ་སྟེ་འཇམ་པོ་དྲུག །ཕྱག་ཉེར་བཞི་པའི་རྣལ་འབྱོར་གྱིས་སྒྲུབ་པ་དང༌། བསད་བསྐྲད་དབྱེ་གསུམ། རྨོངས་རེངས་གདབ་གསུམ་སྟེ་རྩུབ་པོ་དྲུག་ཕྱག་ཉེར་དྲུག་པའི་རྣལ་འབྱོར་གྱིས་བྱེད་པའང་ཡོད་ལ། ཡང་གཙོ་བོ་དུས་ཀྱི་འཁོར་ལོ་ལ་ལས་བྱེད་རྣལ་འབྱོར་མ་སུམ་ཅུ་སོ་དྲུག་གིས་བསྐོར་བ་ཁོ་ནས་ལས་ཐམས་ཅད་སྒྲུབ་པའང་ཡོད་དོ། །ཡང༌། ཞི་བ་ལ་ནི་བསམ་གཏན་དག་ཀྱང་ཞི་བ་རི་བོང་འཛིན་པ་ལྟར་དཀར་ལྷ་ནི་ཞི་བའི་གཟུགས། ཞེས་སོགས་ལྷ་རེ་རེ་ཉིད་ས་བོན་དང༌། སྐུ་མདོག་དང་གདན་དང་ཉམས་ཐ་དད་དུ་བསྒྱུར་ནས་ལས་ཐ་དད་འགྲུབ་ཚུལ་ཡང་བཤད་ཅིང༌། ཡང་ན། རྒྱལ་པོ་ཞི་དང་རྒྱས་པ་དག་ཀྱང་སྲས་བཅས་རྒྱལ་བའི་རིགས་དང་ལྷ་མོ་རྣམས་ཀྱིས་འགྲུབ་པར་འགྱུར། །ཞེས་སོགས་ཀྱི་དོན་ནི། གཤེགས་པ་ཡབ་ཡུམ་དང་སེམས་དཔའ་ཡབ་
ཡུམ་གྱིས་ཞི་བ་དང༌། རྒྱས་པ་དང༌། དུས་མེད་པ་དང༌། རིམས་ཞི་བ་རྣམས་སྒྲུབ་པར་བྱེད་ལ། ཁྲོ་བོ་ཁྲོ་མོ་རྣམས་ཀྱི་བསད་བསྐྲད་ཀྱི་ལས་དང༌། ཙར་ཙི་ཀཱ་ལ་སོགས་པ་རྣལ་འབྱོར་མ་རྣམས་ཀྱིས་དབང་དགུག་གི་ལས་དང༌། རབ་གཏུམ་མ་རྣམས་ཀྱིས་རྨོངས་རེངས་གདབ་གསུམ་གྱི་ལས་དང༌། དབྱིངས་ཕྱུག་མ་དང་ཤེར་ཕྱིན་མས་ལས་ཐམས་ཅད་འགྲུབ་བོ། །དེ་ལ་རང་དུས་ཀྱི་འཁོར་ལོ་དཔའ་བོ་གཅིག་པར་བསྒོམས་ནས། ཐུགས་ཀར་ཆུའི་དཀྱིལ་འཁོར་ལ་ཨུ་ཡིག་ལས་བྱུང་བའི་ལྷ་དཀར་པོས་རྒྱས་པ་དང༌། ཞི་བ་སྒྲུབ་པ་བསྔགས་དེ་བཞིན་དུ་གཞན་རྣམས་ཀྱང་རིགས་འགྲེ་སྟེ། དམར་པོས་དབང་དགུག་དང༌། ནག་པོས་དབྱེ་བསྐྲད་དང༌། སྔོན་པོས་བསད་པ་དང༌། ལྗང་ཁུས་སླར་གསོ་བར་གསུངས་སོ། །ཡང༌། གཙོ་བོའི་ཐུགས་ཀར་པདྨའི་དབུས་སུ་རི་བོང་ཅན་དང་ཉི་མ་མེ་ཡི་སྟེང་དུ་རྡོ་རྗེ་ནི། ཞེས་སོགས་ཤོ་ལོ་ཀ་བཅོ་ལྔས་ལས་ཚོགས་ཀྱི་དམིགས་པ་རྒྱས་པར་གསུངས་ཏེ། དེ་ཡང་ཞི་བ་ལ་མཚོན་ན་རང་ཉིད་དུས་ཀྱི་འཁོར་ལོ་ཡུམ་ཅན་གྱི་ཐུགས་ཀར་པདྨ་ཟླ་ཉི་སྒྲ་གཅན་ལ། ཧཱུཾ་ལས་རྡོ་རྗེ་ནག་པོ་རྩེ་ལྔ་འོད་ལྔ་འཕྲོ་བའི་ལྟེ་བར་ཛཿལས་ལྕགས་ཀྱུའོ། །དེའི་འོད་ཀྱི་འཕྲོ་འདུ་དང༌། བྱང་ཆུབ་ཀྱི་སེམས་སུ་ཞུ་ནས་ལྷ་སོ་སོའི་ས་བོན་དུ་གྱུར་པ་རྣམས་ལྷར་སྒོམ་པ་ཡིན་ཏེ། ཡུམ་གྱི་པདྨར་ཟླ་ཉིའི་དབུས་སུ་ཝ་ཡིག་དང་པད་དཀར་ལས་ཕོ་ཉ་མཆོག་སྦྱིན་དང་པད་དཀར་འཛིན་པའམ། ཕོ་ཉ་མོ་སྐྱབས་སྦྱིན་དང་ཨུཏྤལ་འཛིན་པ་རྒྱན་དང་ན་བཟའ་དང་སྐུ་མདོག་དཀར་པོ་གླང་ཆེན་དཀར་པོ་ལ་ཞོན་པ། བསྒྲུབ་བྱའི་ཁྱིམ་དུ་ཕོ་ཉར་གཏོང་ངོ༌། །དེས་བསྒྲུབ་བྱ་དཀྱིལ་འཁོར་དུ་བཀུག །གཙོ་བོས་བཀའ་སྩལ་ཏེ། ཡུམ་རྣམས་ཀྱིས་བདུད་རྩིའི་བུམ་པས་དེ་ལ་ཁྲུས་བྱེད་ཅིང༌། ནུས་མ་རྣམས་ཀྱིས་
མཆོད། སེམས་མ་དྲུག་གིས་ཉམ་པ་གསོ་བ་དང༌། གཟུངས་མ་བཅུ་གཉིས་ཀྱིས་ཚིམ་པར་བྱེད་པ་དང༌། རྣལ་འབྱོར་མ་རྣམས་ཀྱིས་འཇིགས་པ་མེད་པར་བྱེད་པ་དང༌། ཁྲོ་མོ་བཅུས་སྐྱོང་བར་བྱེད་པ་དང༌། ཀླུ་མོ་རྣམས་ཀྱིས་འོ་དག་བྱེད་པ་དང༌། ལྷ་ཆེན་གྱི་བཙུན་མོ་བཅུ་གཉིས་པོ་རྣམས་ཀྱིས་འཁྱུད་པར་བྱེད་པ་དང༌། རབ་གཏུམ་མ་རྣམས་ཀྱིས་སྲུང་བ་བྱེད་པར་བསམ་ཤིང༌། ངག་བཟླས་སམ། འགོག་བཟླས་ཀྱིས་བསྐུལ་བས་ཞི་རྒྱས་ཀྱི་ལས་ཐམས་ཅད་འགྲུབ་པར་འགྱུར་ཏེ། ལས་གཞན་རྣམས་ལའང་རིགས་འགྲེའོ། །དེ་བཞིན་དུ་འབྱུང་བ་དྲུག་གི་ས་བོན་གྱི་ལས་དང༌། ཟད་པར་རྣམས་ཀྱི་ལས་དང༌། གླང་པོ་ཆེ་དང༌། སྦྲུལ་དང༌། རྟ་དང༌། མ་ཧེ་དང༌། བསེ་དང༌། སེངྒེ་ལ་སོགས་པ་སྲོག་ཆགས་གདུག་པ་ཅན་གཞོམ་པ་སོགས་ལས་ཀྱི་དབྱེ་བ་མཐའ་དག་བསྒྲུབ་པར་བྱའོ།། ཡང་གསལ་སྣང་དང་རླུང་གི་སྦྱོར་བ་མ་གྲུབ་ན། བསམ་གཏན་སྔར་དང་མཐུན་པའི་སྟེང་དུ་སྦྱིན་སྲེག་གི་སྒོ་ནས་ལས་རྣམས་འགྲུབ་པར་འགྱུར་རོ། །གལ་ཏེ་དེ་ཙམ་གྱིས་ཀྱང་འགྲུབ་པར་དཀའ་ན་དེ་དག་གི་སྟེང་དུ་འཁྲུལ་འཁོར་གྱིས་འགྲུབ་པར་འགྱུར་རོ། །དེ་ཡང༌། རིག་བྱེད་དང་ནི་འདབ་བརྒྱད་ཉིད་དང་མི་ཡི་བདག་པོ་སོ་དང་ཆུ་གཏེར་དྲུག་དང་གཉིས་སྐྱེས་ལ། ཞེས་མཚན་བརྗོད་ཀྱིའམ། འཇམ་དཔལ་གྱི་འཁྲུལ་འཁོར་རྒྱས་པ་དང༌། རྩིབས་བརྒྱད་ལ་ནི་ཕྱོགས་དང་ཕྱོགས་བྲལ་དུ་གནས་བཅུ་གཉིས་རྩིབས་དང་བཅུ་དྲུག་རྩིབས་ལ་བར་དུ་ཡང༌། ཞེས་སོགས་ཀྱི་གཤིན་རྗེ་གཤེད་ཀྱི་འཁོར་ལོ་ཡི་གེ་འཕོ་བའི་ངེས་པ་དང་བཅས་པ་དང༌། ཡི་གེ་རྣམས་ཀྱི་ཡན་ལག་མཆོག་ལས་མདུན་དུ་དབྱངས་ཀྱིས་འཁྱུད་པ་དག་ནི་མ་རུ་རབ་ཏུ་འགྱུར། །ཞེས་སོགས་འཇམ་དཔལ་གྱི་འཁྲུལ་འཁོར་
དངོས་རྣམས་གསུངས་ཏེ། དེ་དག་ནི་ལས་ཐམས་ཅད་བྱེད་པའོ། །ལས་སྣ་ཚོགས་ཀྱི་རྣམ་པའི་རབ་དབྱེ་རྒྱས་པ་ནི། སྦྱིན་སྲེག་གི་ཆོ་ག་ནང་གི་མུན་སེལ་དང༌། སྤྱི་ཆིངས་ནོར་བུ་ཆུ་དྭངས་ལས། དུས་གསུམ་སངས་རྒྱས་ཀུན་གྱི་སྤྱི་གཟུགས་ཀུན་མཁྱེན་ཆེན་པོས་བསྡུ་བར་མཛད་པ་ལྟར་ཤེས་པར་བྱ་ཞིང༌། རྩ་བའི་འཁྲུལ་འཁོར་སོགས་ཀྱི་དབྱེ་བ་རྣམས་ནི། ཕན་གནོད་སུམ་ཅུར་གྲགས་པའི་བསྟན་བཅོས་རྙིང་པ་ལོགས་སུ་ཡོད་པ་དང༌། ལག་ལེན་གནད་རྣམས་བླ་མའི་མན་ངག་ལས་ཤེས་པར་བྱའོ། །གཉིས་པ་ཆེན་པོ་བདེ་བ་རྣམ་གསུམ་གྱི་དངོས་གྲུབ་ནི། འབྱོར་པ་སྣ་ཚོགས་ཀྱི་བདེ་བ་རྫས་ཀྱི་གྲུབ་པ་དང༌། འདོད་པ་སྣ་ཚོགས་ཀྱི་བདེ་བ་ལུས་ཀྱི་གྲུབ་པ་དང༌། རྫུ་འཕྲུལ་སྣ་ཚོགས་ཀྱི་བདེ་བ་སྔགས་ཀྱི་རིག་པ་འཛིན་པའི་གྲུབ་པའོ། །དང་པོ་ནི་རྒྱུད་ལས། གྲུབ་པ་ལྕགས་གསུམ་གྱིས་བཅིངས་མཁའ་ལ་འགྲོ་བའི་ཤ་ཡི་རིལ་ལུས་མཁའ་ལ་སྤྱོད་པ་ཉིད་དག་སྟེར། ཞེས་སོགས་རིལ་ལུ་དང་མིག་སྨན་གྱི་དངོས་གྲུབ་སྒྲུབ་ཚུལ་གསལ་བར་གསུངས་ཤིང༌། གྲུབ་པ་བརྒྱད་ཀར་སྟེར་བའི་རོ་ལངས་སྒྲུབ་ཚུལ་རྒྱས་པར་གསུངས་པ་དང༌། གཞན་ཡང༌། རལ་གྲི་རེག་པ་བཅུད་ཀྱི་དབང་པོ་བདུད་རྩིའི་འབྲས་བུ་རིལ་ལུ་རོ་ཙ་ན་དང་མིག་སྨན་དང༌། རྐང་པ་བྱུག་དང་ཤིང་ལྷམ་དག་དང་འཇིག་རྟེན་པ་ཡི་དངོས་གྲུབ་བརྒྱད་པོ་ཁྱོད་ཀྱིས་བདག་ལ་སྩོལ། །ཞེས་གསུངས་པ་ལྟར་གྱི་དངོས་གྲུབ་བརྒྱད་དང༌། གཞན་ཡང་རྒྱུད་དང་རྒྱུད་དུ་འབྱུང་བའི་དངོས་གྲུབ་སྣ་ཚོགས་པ་དག་རྣལ་འབྱོར་པས་སྒྲུབ་པར་བྱེད་དེ། དེ་ཡང་གཅིག་ལ་མཚོན་ན་སྔགས་དང་གཟུགས་བརྙན་གྲུབ་པའི་རྣལ་འབྱོར་པས་སྦྱིན་སྲེག་མཆོད་སྦྱིན་བཟླས་པ་ལ་སོགས་
པའི་སྒོ་ནས། དངོས་གྲུབ་ཀྱི་དོན་དུ་རང་འདོད་པའི་ལྷ་ལ་རིང་དུ་གསོལ་བ་གདབ་པར་ བྱའོ། །བསྐྱེད་པའི་རིམ་པ་ལ་དྲོད་ཐོབ་ན། གྲུབ་པ་བརྒྱད་རྣམས་འགྲུབ་པ་ལ་དཀའ་བ་མེད་ལ། དྲོད་ཇི་བཞིན་མ་ཐོབ་ཀྱང་གཉིད་དང་བཀྲེས་སྐོམ་ལ་སོགས་པས་མི་གནོད་ཅིང༌། ཏིང་ངེ་འཛིན་བརྟེན་ན་འགྲུབ་ཏུ་རུང་སྟེ། གསོལ་བ་བཏབ་པས་ཇི་ཞིག་ལྟར་ན་ལྷས་སྣང་བ་སྩོལ་བར་འགྱུར་རོ། །གལ་ཏེ་དེས་རིལ་བུ་འགྲུབ་པར་འགྱུར་ཞེས་གསུངས་ན། སྒྲོན་མེ་ལྔའི་རིལ་བུ་བྱས་ཏེ། ལྕགས་གསུམ་གྱིས་དཀྲིས་ནས། དཀྱིལ་འཁོར་རྒྱས་པའམ་མཎྜལ་སོགས་རྒྱས་བསྡུས་ཇི་ལྟར་འོས་པའི་གནས་སུ་བཞག་ནས། དེ་སྔགས་ཀྱི་ཡིག་འབྲུའི་རང་བཞིན་དུ་མོས་ཤིང༌། སྔགས་ཀྱི་ཡིག་འབྲུའི་ཡེ་ཤེས་པ་རྒྱུན་མི་འཆད་པར་བསྟིམ་པ་དང་ལྷན་ཅིག་ཏུ་ཨོཾ་ཀཱ་ལ་ཙཀྲ་ཨཱ་ཛྙཱ་སིདྡྷ་གུ་ལི་ཀཱཾ་སཱ་དྷ་ཡ་སྭཱཧཱ། ཞེས་བཟླས་པས། འབར་བ་དང་འོད་དང་དུ་བ་འཐུལ་བ་སོགས་བྱུང་ན་གྲུབ་པ་སྟེ། རང་གི་ཁར་བཅུག་པ་སོགས་ཀྱིས་མཁའ་ལ་འགྲོ་བ་དང་མི་སྣང་བ་སོགས་ཇི་ལྟར་འོས་པ་འགྲུབ་ པོ། །མཁའ་ལྡིང་གི་སྒྲུབ་ཐབས་ལ་བརྟེན་ནས་ཀྱང་ལྷ་དང་འབྱུང་པོ་མངག་གཞུག་ཏུ་སྒྲུབ་པའི་དངོས་གྲུབ་སོགས་བཤད་དོ། །དངོས་གྲུབ་འདི་རྣམས་སྔགས་མཐུས་སྒྲུབ་པ་ཡིན་ན། གོང་དུ་བསྟན་པ་ལྟར་རླུང་དང་གཟུགས་བརྙན་ལ་རྩེ་གཅིག་པའི་ཏིང་ངེ་འཛིན་ཐོབ་ཅིང༌། སྟོང་པ་ཉིད་ལ་གསལ་སྣང་ཅུང་ཟད་ཐོབ་པས་སྔགས་ཀྱི་ནུས་པ་རྙེད་པ་རྣམས་ཚང་བ་དགོས་ལ། སྔོན་གྱི་ལས་འཕྲོ་བ་བརྟེན་ནས་ལྷ་དང་སྒྲུབ་པ་པོ་བླ་མའི་བྱིན་རླབས་ཀྱི་སྟོབས་ཀྱིས་འགྲུབ་པ་ལ་ནི་ངེས་པ་མེད་དོ། །རིག་པ་འཛིན་པའི་དངོས་གྲུབ་འཆད་པར་
འགྱུར་བ་ཕྱི་མ་གཉིས་ནི། དྲོད་ཐོབ་པ་སོགས་སྒྲུབ་པ་པོ་རང་ཉིད་ལ་མཚན་ཉིད་རྫོགས་པར་མེད་ན། ལས་འཕྲོའམ་གཞན་གྱི་བྱིན་རླབས་ཁོ་ནས་འགྲུབ་པ་ནི་མེད་དོ། །གཉིས་པ་འདོད་པ་སྣ་ཚོགས་ཀྱི་བདེ་བ་ལུས་ཀྱིས་འགྲུབ་པར་བཤད་པར་བྱ་སྟེ། དེ་ལ་ཚེ་འདིར་སྔགས་ཀྱི་སྤྱོད་པ་སྤྱད་པས་ཚེ་དེ་ཉིད་ལ་ལུས་འདི་གནས་གྱུར་ཏེ། དེ་དང་དེའི་དངོས་གྲུབ་ཐོབ་ན་ནི། རྣལ་འབྱོར་པ་དེ་དང་དེ་ལུས་ཀྱི་དངོས་གྲུབ་འགྲུབ་པ་ཞེས་བྱ་ཡི། ཤི་བའི་འོག་ཏུ་བར་དོའམ་རིག་པ་འཛིན་པའི་གནས་སུ་སྐྱེས་ནས་དངོས་གྲུབ་དེ་འདྲ་བ་ཐོབ་པ་ལ་ནི། དངོས་གྲུབ་དེའི་ངོ་བོ་ལུས་ཀྱི་དངོས་གྲུབ་ཡིན་དུ་ཆུག་ཀྱང༌། རྣལ་འབྱོར་པ་དེ་དང་དེའི་ལུས་ཀྱི་དངོས་གྲུབ་ཐོབ་ཅེས་པའི་ཐ་སྙད་མི་འཇོག་གོ །གཞན་ཡང་ལུས་གནས་གྱུར་པའི་གྲུབ་པ་ནི། རིག་པ་འཛིན་པའི་རྒྱལ་པོར་ངེས་པ་ཡིན་ལ། སྐྱེ་བ་འཕོས་ནས་རིག་འཛིན་གྱི་ས་ཐོབ་པ་ལ། དེའི་རྒྱལ་པོར་གྱུར་པའང་སྲིད་མོད་ཀྱི་ཕལ་ཆེར་ཕལ་བ་ཉིད་དོ། །དེ་ལ་རླུང་དང་གཟུགས་བརྙན་དང་ཕྲ་མོ་དང་ཐིག་ལེ་ལ་བརྟན་པ་ཐོབ་པ་ཕྱི་རོལ་ཀྱི་དོན་སྒྱུ་མ་ལྟ་བུར་རིག་པ་ཞིག་གིས་གོམས་པ་བརྟན་པར་བྱས་པ་ན། རྫས་དང་སྔགས་སོགས་ལ་མ་བལྟོས་པར་ཏིང་ངེ་འཛིན་ཁོ་ནའི་སྟོབས་ཀྱིས་དུག་ལ་སོགས་པ་བདུད་རྩིར་བསྒྱུར་བ་དང༌། འབྱུང་བ་བཞི་དང་སྲོག་ཆགས་སོགས་ཀྱིས་གནོད་པར་མི་འགྱུར་བ་སོགས་ཏིང་ངེ་འཛིན་གྱི་དྲོད་རྙེད་པ་ན། རིག་པའི་བརྟུལ་ཞུགས་ཀྱི་སྤྱོད་པ་བྱའོ། །དེ་ཡང་རྒྱུད་འདི་ལས། ཨ་ཝ་དྷཱུ་ཏཱི་དང་ཀུན་བཟང་དང་ཕྱོགས་ལས་རྣམ་རྒྱལ་སོགས་གསུངས་པ་ཕལ་ཆེར་ནི། རྫོགས་རིམ་གྱི་སྤྱོད་པ་ཡིན་པས་འདིར་མི་འཆད་ལ། སྤྲོས་བཅས་སྤྲོས་མེད་ཤིན་ཏུ་སྤྲོས་མེད་ཀྱི་སྤྱོད་པ་གསུམ་པོ་འདི། རྫོགས་རིམ་དུ་མ་
ཟད་བསྐྱེད་རིམ་གྱི་སྐབས་སུ་ཡང་ངེས་པར་འཇུག་ཅིང༌། སྤྲོས་བཅས་སོགས་ཀྱི་ཐ་སྙད་རྒྱུད་འགྲེལ་དངོས་ལས་ཧ་ཅང་གསལ་བར་མ་གསུངས་ཀྱང༌། དོན་ནི་གསལ་ཞིང་རྒྱས་པར་བསྟན་ལ་རྒྱ་བོད་ཀྱི་མཁས་པའི་གསུང་སྒྲོས་དང་མན་ངག་ལས་ཀྱང་འབྱུང་བ་ཡིན་ནོ། །དེ་ལ་དང་པོར་དུར་ཁྲོད་ལ་སོགས་པའི་གནས་རྣམས་སུ་མཚན་མོ་རྒྱུ་ཞིང་བརྟུལ་ཞུགས་ཀྱི་སྤྱོད་པ་ལ་ཡོངས་སུ་ཞུགས་པ་ན། སེམས་བརྟན་ནམ་མི་བརྟན་བརྟགས་ཏེ། བརྟན་ན་གསང་བའི་སྤྱོད་པ་ཇི་ལྟར་འོས་པ་སྤྱད་དེ། དེའི་ཚེ་མངོན་ཤེས་ཐོབ་ཅིང་འགྲོ་བ་ཕལ་པ་ལ་ལྐོག་ཏུ་གྱུར་པ་ལྷ་ལ་སོགས་པ་རྣམས་ཀྱང་ཅི་རིགས་པར་རྣལ་འབྱོར་པ་དེ་ལ་མངོན་དུ་འགྱུར་རོ། །དེ་ནས་དེས་རྒྱུད་འདིར་གསུངས་པའི་ངེས་པ་ལ་བརྟེན་ཏེ། ཡུལ་འཁོར་ཆེན་པོ་རེ་རེ་ན་ཡང་ཡུམ་ཆེན་བཞི་བཅུ་རྩ་བརྒྱད་ཚང་བར་ཡོད་པས་དེ་ཙམ་དུ་རྒྱུ་བས་ཀྱང་ཆོག་ལ། མོས་པའི་དབང་གིས་ཀཱ་མ་རཱུ་པ་ལ་སོགས་པ་ཡུལ་བཞི་བཅུ་རྩ་བརྒྱད་པོ་དངོས་སུ་ཡང་རྒྱུ་བར་བྱ་སྟེ། དེ་དག་ཏུ་རྣལ་འབྱོར་མ་རྣམས་ཀྱི་འདུ་བ་ཐོབ་པར་འགྱུར་ཞིང༌། དེ་ཐོབ་ན་དེ་དང་ལྷན་ཅིག་རིག་པའི་བརྟུལ་ཞུགས་སྤྱད་པས་དངོས་གྲུབ་ཐོབ་ པོ། །དེ་ལ་དབང་ལེར་གསུངས་པའི་བརྡ་དང་བརྡའི་ལན་རྣམས་ཀྱང་ཞིང་དངོས་སམ་རྗེས་མཐུན་པར་རྒྱུ་བའི་སྐབས་དེར་དགོས་པ་ཡིན་ལ། རིག་བརྟུལ་དངོས་གཞིའི་ཚོགས་ཀྱི་འཁོར་ལོའི་སྐབས་སུའང་དགོས་སོ། །དེ་ལ་སྤྲོས་བཅས་དང་སྤྲོས་མེད་ཀྱི་སྤྱོད་པ་གང་རུང་གིས་འདོད་པ་སྣ་ཚོགས་པའི་བདེ་བ་སྟེ། འདོད་ཁམས་ཀྱི་རིག་འཛིན་འགྲུབ་པ་ཡིན་ཞིང༌། དེ་ཡང་དང་པོར་རིལ་ལུ་མིག་སྨན་ལ་སོགས་པའི་དངོས་གྲུབ་ཆུང་ངུ་རྣམས་བསྒྲུབས་ནས། དེ་རྗེས་རིག་
པའི་བརྟུལ་ཞུགས་ལ་བརྟེན་ཏེ། འདོད་པའི་ཁམས་ཀྱི་ལུས་ཀྱི་དངོས་གྲུབ་སྒྲུབ་པའང་ཡོད། ཡང་ཕལ་ཆེར་དེ་འདྲ་དེ་དག་སྔོན་དུ་འགྲོ་དགོས་པའང་མ་ཡིན་ཏེ། དྲོད་ཐོབ་པ་ཉིད་ནས་དངོས་གྲུབ་གཞན་མི་སྒྲུབ་པར་རིག་པའི་བརྟུལ་ཞུགས་སྤྱད་པ་ཁོ་ནས་འདོད་པའི་རིག་པ་འཛིན་པ་འགྲུབ་པོ། །དེ་གྲུབ་ན་འདོད་པའི་ལྷ་རྣམས་དང་སྐལ་བ་མཉམ་པ་ཞེས་བྱ་སྟེ། སྐལ་མཉམ་གྱི་དོན་འདྲ་བ་ཡིན་ལ། དེ་ཡང་དངོས་རང་མིན་པའི་དོན་དང་ལུས་དང་ལོངས་སྤྱོད་དང་རྫུ་འཕྲུལ་དང་ཚེ་རྣམས་འདོད་ལྷ་རིགས་དྲུག་པོ་གང་རུང་གི་གཙོ་བོ་གཙོ་བོ་རྣམས་ལས་ངན་པ་ནི་ནམ་ཡང་མ་ཡིན་ལ། མཉམ་པ་ཁོ་ནའམ་འདྲ་མཚུངས་ཀྱིས་ལྷག་པའོ། །སྒྲུབ་པ་པོ་རང་ཉིད་ཀྱི་འདོད་པས་ནི་ངེས་པ་མེད་པས་འདོད་ཁམས་ཀྱི་ལྷ་ཞེས་པ་གཙོ་བོ་སྨོས་པའི་ཚིག་སྟེ། ཀླུ་དང་ལྷ་མིན་གནོད་སྦྱིན་ལ་སོགས་པ་ས་འོག་སྟེང་ས་བླ་གསུམ་ཀར་གྱི་རིག་འཛིན་ཡོད་ལ། དེ་དག་ཀྱང་རྣལ་འབྱོར་བའི་འདོད་པས་གཙོ་བོར་བཞག་པ་ཡིན་པས། སྟེང་འོག་བར་གསུམ་གྱི་རིག་འཛིན་ལ་བཟང་ངན་གྱི་ཁྱད་པར་དབྱེ་བའང་དཀའོ། །དེས་ན་ཏིང་ངེ་འཛིན་ལ་ཁྱད་པར་མེད་ཀྱང་འདོད་པའི་སྟོབས་ཀྱིས་གནས་གཞན་མཐོ་དམན་སོ་སོར་སོང་སྟེ་དེར་གནས་པའང་ཡོད་དོ། །ཡང་སྒྲུབ་པ་པོས་འདོད་པའི་ཁམས་ཀྱི་ལྷ་སྤྱི་ལ་དམིགས་ཀྱང་བསོད་ནམས་ཀྱི་དབང་གིས་གནས་མཐོ་དམན་སོ་སོར་སོང་བའང་ཡོད། དེ་གཉིས་ཀར་ལ་འདུག་གནས་གཞན་དུ་མ་སོང་བར་འདི་ཉིད་དུ་འདུག་བཞིན་དུ་གཞན་འཕྲུལ་དབང་བྱེད་ཀྱི་འདོད་ཡོན་ཉམས་སུ་མྱོང་བ་ལྟ་བུ་སྟེང་མཁའ་སྤྱོད་འདོད་ལྷ་རིགས་དྲུག་དང༌། ས་སྟེང་གི་གནོད་སྦྱིན་འབྱུང་པོའི་གནས་དང༌། ས་འོག་གི་ཀླུ་དང་ལྷ་མིན་སོགས་ཀྱི་ལུས་དང་ཚེ་དང་ལོངས་སྤྱོད་
དང༌། གནས་དང་འཁོར་གྱི་བདེ་བ་ཐམས་ཅད་གནས་འདི་ཉིད་དུ་མྱོང་བ་ཡང་ཡོད་དོ། །གང་ལྟར་ཡང་ཞིང་གི་རྣལ་འབྱོར་མ་བསྒྲུབས་ཏེ། དངོས་སུ་དེ་དང་ལྷན་ཅིག་སྤྱོད་པ་ཡིན་ན། དེས་བསྟན་པའི་ཆོ་གས་དངོས་གྲུབ་འགྲུབ་པར་འགྱུར་ལ། ཞིང་སྣ་ཚོགས་སུ་མི་རྒྱུ་བར་གནས་གཅིག་ཏུ་འདུག་པ་ལ་ནི། སྤྲོས་བཅས་སྤྲོས་མེད་ཀྱི་སྐབས་སུ་ཚོགས་ཀྱི་དཀྱིལ་འཁོར་ངེས་ཅན་དུ་བྱ་སྟེ། དེ་ལ་ལྷ་མང་བའི་ཕྱོགས་སུ་སྣ་ཚོགས་ཞིག་འབྱུང་མོད་ཀྱང༌། གཙོ་བོར་རྣལ་འབྱོར་མ་སུམ་ཅུ་རྩ་བདུན་གྱི་དཀྱིལ་འཁོར་ལྟ་བུ་བྱ་སྟེ། དེ་ཡང་རིགས་སུམ་ཅུ་རྩ་བདུན་ནམ། ལོ་བཅུ་གཅིག་མ་ནས་བཞི་བཅུ་རྩ་བརྒྱད་ཀྱི་བར་དུ་རིགས་དང་མཐུན་པའི་ལོ་གྲངས་ཅན་ནམ། ཡང་རང་རིགས་མ་སྲིང་ལ་སོགས་པ་ཉེ་དུའི་མིང་གིས་རྣམ་པར་བཏགས་པ་རང་རིགས་དང་མཐུན་པ་རྣམས་ཏེ། གསུམ་པོ་དེ་དག་གང་རུང་ལས། དངོས་སམ། རྗེས་མཐུན་ནམ། དེ་དང་དེར་མོས་པས་ཀྱང་རུང་སྟེ། དབུས་ཀྱི་གཙོ་བོ་ཡབ་ཡུམ་གཉིས་མེད་ཀྱི་དབང་དུ་བྱས་ནས། ལྷ་སུམ་ཅུ་རྩ་བདུན་གྱི་དཀྱིལ་འཁོར་ཡིན་ལ། འབྲིང་པོ་ནི་ལྷ་དགུའམ་བཅུ་ལ་སོགས་པའོ།། ཉུང་བའི་ཕྱོགས་ནི་འགྲེལ་ཆེན་ལས། ཕྱི་རོལ་ཏུ་ཡང་དེ་བཞིན་གཤེགས་པ་ལྔའི་རིགས་ཅན་གྱི་བུད་མེད་རྣམས་འཛིན་པ་ནི། བུད་མེད་ཀྱི་སྤྱོད་པ་སྟེ་ཞེས་གསུངས་པས། ལྷ་ལྔ་ལ་སོགས་པ་ཡང་རུང་ངོ༌། །འཕྲུལ་དང་ལྡན་པ་ཡིན་ན་མ་གཏོགས་གཅིག་གམ་གཉིས་ཀྱིས་སྤྲོས་བཅས་ཀྱི་བྱ་བ་མི་འགྲུབ་པས། རིག་མ་བཞི་ནི་ཉུང་མཐའ་ལ་དགོས་སོ། །དེ་ལྟ་བུའི་རིག་མའི་ཚོགས་དང་ལྷན་ཅིག་ཏུ་དཀྱིལ་འཁོར་གྱི་འཁོར་ལོ་ཡིད་ཀྱིས་སྤྲུལ་ཏེ། རིག་མ་རྣམས་ཀྱི་འདོད་ཡོན་ལྔ་ལ་སྤྱོད་བཞིན་པས་ནང་དུ་ལྷན་ཅིག་
སྐྱེས་པའི་བདེ་སྟོང་སྒོམ་པའི་མཉམ་བཞག་དང༌། ཐུན་མཚམས་རྣམས་སུ་ཚོགས་ཀྱི་འཁོར་ལོའི་རོལ་པ་སྔགས་དང་ཕྱག་རྒྱ་དང་བརྡ་དང་གླུ་དང་གར་ལ་སོགས་པའི་སྤྲོས་པ་རྒྱ་ཆེན་པོ་སྤྱོད་ཅིང༌། འཇིག་རྟེན་གྱི་ཆོས་བརྒྱད་དང་བདེ་སྡུག་སོགས་སྣང་བ་སྣ་ཚོགས་དང་ཉོན་མོངས་སོགས་རྣམ་རྟོག་ཐམས་ཅད་སྤྲོས་བྲལ་གྱི་རྣམ་པ་ཅན་གྱི་ཞུ་བདེ་ལྷན་ཅིག་སྐྱེས་པའི་དབྱིངས་དེར་རོ་མཉམ་དུ་བྱེད་པ་ཉིད་ཡིན་ནོ། །རླུང་དང་གཟུགས་བརྙན་རྗེས་མཐུན་པ་དེའི་མཐུ་ལས་བདེ་བ་ཉིད་ཀྱི་རང་སྣང་བ་ལས་གཟུགས་སྣང་རྣམས་ལྷ་སྐུ་དང༌། སྒྲ་སྣང་རྣམས་སྔགས་དང༌། ཇི་ལྟ་བ་དང་ཇི་སྙེད་པའི་ཕྱོགས་ལ་རྗེས་སུ་འཇུག་པའི་གསལ་སྣང་གི་ཤེས་པ་རྟག་ཏུ་སྐྱེ་བར་འགྱུར་རོ།། འདོད་ཡོན་བཟང་ངན་ཐམས་ཅད་ལ་ལྷ་སྣང་གི་འདོད་པ་ལྔ་པོས་རྒྱས་བཏབ་པས། དེ་དག་ཐམས་ཅད་དེའི་ངོ་བོར་སྣང་བར་འགྱུར་རོ། །ཞུ་བདེ་གཡོ་བ་མེད་པར་ཐིག་ལེ་ཤིན་ཏུ་འགགས་པ་དེ་དང་ལྷར་སྣང་གཉིས་རླུང་དང་འདྲེས་པ་དེ་སྲོག་རྩོལ་བཀག་པའི་སྦྱོར་བས། རྩ་དང་ཐིག་ལེ་སོགས་རགས་པའི་ལུས་ཀུན་ལ་ཡང་ཡང་འདྲེས་པའི་ཚུལ་གྱིས་ཞུགས་པ་ན། ཐོག་མར་ལུས་ཀྱི་ཁམས་ཕྲ་རིམ་ནས་དྭངས་མར་འགྱུར་ཞིང༌། གཞན་རྣམས་དྭངས་མར་གྱུར་པ་ན། རགས་ཤོས་དེ་ཡང་རིམ་པས་དྭངས་མའི་ནང་དུ་བག་ལ་ཞ་ཞིང་ཟད་པར་འགྱུར་ཏེ། ལུས་གནས་གྱུར་ནས་སྔོན་ཇི་ལྟར་བསྒོམས་པ་གོམས་པའི་རྣམ་པ་ཅན་གྱི་ལྷའི་སྐུ་འདོད་དགུར་གྱུར་པའི་གཟུགས་འདོད་ཁམས་ཀྱི་ལྷ་རྣམས་དང་སྐལ་བ་མཉམ་པ་ཕྲ་ཡང་གི་ཡོན་ཏན་བརྒྱད་དང་ལྡན་པ་ཐོབ་པར་འགྱུར་ཞིང༌། གནས་དང་ལོངས་སྤྱོད་དང་འཁོར་རྣམས་སྔགས་ཀྱིས་སྤྲུལ་པའམ་ལྷ་རྫས་ཀྱི་རང་བཞིན་དེ་ཡང་རང་ལ་ཇི་ལྟར་སྣང་བ་དེ་ཙམ་ཁྱབ་པར་འགྱུར་ཏེ།
ལུས་ཀྱི་རིག་པ་འཛིན་པ་གྲུབ་པ་ཞེས་བྱའོ། །གལ་ཏེ་སྤྲོས་མེད་ཀྱི་སྤྱོད་པ་བྱེད་ན། སྔགས་དང་ཕྱག་རྒྱ་སོགས་རོལ་པ་ཉུང་ཟད་ཙམ་ལས་མི་བྱེད་པ་ཡིན་ལ། འཁོར་ཚོགས་མང་ཉུང་ལ་ནི་ངེས་པ་མེད་དེ། ཚོགས་ཀྱི་དཀྱིལ་འཁོར་གྱི་ལྷ་བཞི་ལྔ་སོགས་ཉུང་ངུས་ཀྱང་འགྲུབ་ཅིང༌། མང་པོའི་ཀྱང་ཕན་འདོགས་པ་ཁོ་ན་ལས་སྐྱོན་དུ་མི་འགྱུར་ལ། རིག་མ་གཅིག་ཁོ་ནས་ཀྱང་སྤྲོས་མེད་ཀྱི་བྱ་བ་བདེ་བླག་ཏུ་འགྲུབ་པར་འགྱུར་རོ། །སྤྲོས་བཅས་སྤྲོས་མེད་ཀྱི་སྤྱཽད་པའི་སྐབས་འདིར་ཞི་བ་ལ་སོགས་པ་ལས་ཀྱི་རབ་འབྱམས་རྒྱ་ཆེན་པོས་འགྲོ་བའི་དོན་སྤྱོད་པར་ཡང་བཤད་ལ། དེའི་ཕྱིར་སྒྲུབ་པ་པོའི་འདོད་པ་ཡོད་ན་ཤིན་ཏུ་སྤྲོས་མེད་ཀྱིས་ཀྱང་འགྲུབ་པར་ཐེ་ཚོམ་མེད་མོད། ཁ་ཅིག་དེ་ལྟ་བུའི་གཞན་དོན་སྒྲུབ་པ་ལ་སྤྲོས་བཅས་བསྔགས་ཀྱི། སྤྲོས་མེད་སྟོབས་ཆུང་ངོ་ཟེར་བ་ནི། སྤྱོད་པ་གསུམ་པོ་མོས་སྐལ་སོ་སོའི་ངོར་ཟབ་མི་ཟབ་འདྲ་ལ། ངོ་བོའི་སྟེང་ནས་ཕྱི་མ་ཕྱི་མ་མཆོག་ཡིན་པར་གསུངས་པ་དང་འགལ་བར་འགྱུར་ཏེ། གང་རྗེས་ཐོབ་ཏུ་གཞན་དོན་སྤྱོད་པ་ལ་མཐུ་ཆེ་བ་དེ། མཉམ་བཞག་གི་ཡེ་ཤེས་ཀྱང་བཟང་བར་གྲུབ་པའི་ཕྱིར་རོ།། །།གསུམ་པ་རྫུ་འཕྲུལ་སྣ་ཚོགས་ཀྱི་བདེ་བ་སྔགས་ཀྱི་རིག་འཛིན་གྲུབ་པ་བཤད་ན། འདི་ནི་གཟུགས་ཁམས་ཀྱི་ལྷ་དང་སྐལ་བ་མཉམ་པའི་རིག་འཛིན་ཞེས་བྱ་སྟེ། འོག་མིན་གྱི་སྲིད་པའི་མཐར་ཐུག་པའི་འཇིག་རྟེན་པའི་དངོས་གྲུབ་ཅེས་བྱ་བ་དེ་ཡིན་ནོ། །དེ་ཡང་སྔར་བཤད་མ་ཐག་པ་ལྟར་གྱི་འདོད་ཁམས་ཀྱི་རིག་པ་འཛིན་པ་དེ་གྲུབ་ནས། བསྐྱེད་རིམ་པ་ཉིད་ལ་བལྟོས་པའི་ཤིན་ཏུ་སྤྲོས་མེད་ཀྱི་སྤྱོད་པས་རིག་འཛིན་འདི་སྒྲུབ་པར་བྱེད་པའམ། ཡང་ན་སྔར་གྱི་སྤྲོས་བཅས་སྤྲོས་མེད་གང་རུང་གི་སྤྱོད་པ་དེ་
སྤྱད་པས་ཁམས་དྭངས་མ་རྣམས་ལྷ་རྫས་ཀྱི་ལུས་སུ་གྱུར་ཞིང༌། རགས་པ་ཡོངས་རྫོགས་གནས་མ་གྱུར་ཙམ་རང་ཉིད་འདོད་ཁམས་ཀྱི་ལྷར་འགྱུར་ཚད་པའི་སྐབས་དེར། སྔར་གྱི་སྤྱོད་པའི་འཕྲོ་བཏུལ་ནས་ཤིན་ཏུ་སྤྲོས་མེད་ཀྱི་སྤྱོད་པ་སྤྱད་པས་གཟུགས་ཀྱི་རིག་པ་འཛིན་པ་འདི་ཐོབ་པར་འགྱུར་རོ། །དེ་ཡང་འདི་ལུས་གནས་གྱུར་པའི་ཕྱིར། ལུས་ཀྱི་རིག་འཛིན་ཡིན་པར་མ་ཟད་སྔ་མ་ལས་ཀྱང་ལུས་ལྷག་གོ །སྔ་མ་ནི་མི་ལ་བལྟོས་ན་ཆེས་ཕྲ་མོད་ཀྱི། ལྷ་རྫས་ཉིད་ལ་བལྟོས་པའི་ལུས་རགས་པ་ཡིན་པས། སྔགས་དང་ལུས་གཉིས་ལས་ལུས་སྟོབས་ཆེ་བའི་ཕྱིར་ལུས་ཀྱི་རིག་འཛིན་ཞེས་སྤྱི་མིང་བྱེ་བྲག་ལ་འདོགས་པའི་སྐབས་ཡོད་པ་དང༌། འདི་ནི་སྔགས་ཏེ་རླུང་གི་རང་བཞིན་འོད་ལུས་ཁོ་ན་ཡིན་པས་ལྷ་རྫས་ཀྱི་ནང་ནས་ཀྱང་ཕྲ་བའི་ལུས་ཏེ། ལུས་ལས་ཀྱང་སྔགས་སྟོབས་ཆེ་བའི་ཕྱིར་སྔགས་ཀྱི་རིག་འཛིན་ཞེས་བྱའོ། །དེ་ལ་མིའི་རྟེན་ཅན་རགས་པའི་ལུས་འདོད་ལྷར་སྒྱུར་བའི་ཕྲུགས་ཅིག་དང༌། དེ་གཟུགས་ཀྱི་ལྷར་སྒྱུར་བའི་ཕྲུགས་ཅིག་སྟེ། ལུས་གནས་སྒྱུར་བའི་ཕྲུགས་གཉིས་བརྒྱུད་དགོས་པ་ནི་ཅུང་ཟད་དབང་པོ་བརྟུལ་བ་ཡིན་ལ། སྤྱོད་པ་དང་པོ་གཉིས་ཀྱིས་དྭངས་མ་རྒྱས་པར་བྱས་པའི་མཚམས་སུ་སྤྱོད་པ་ཕྱི་མས་སྙིགས་མ་ཟད་པར་བྱེད་པ་འདོད་ལྷའི་ལུས་བརྒྱུད་མ་དགོས་པར་མི་ལུས་གནས་བསྒྱུར་བའི་ཕྲུགས་གཅིག་པོ་དེ་ལ་གཟུགས་ཁམས་ཀྱི་དངོས་གྲུབ་འགྲུབ་པ་ནི། སྐབས་འདིའི་དབང་པོ་རྣོན་པོའོ། །དེ་ལ་གོང་དུ་བཤད་པ་དང་མཚུངས་པར་དཀྱིལ་འཁོར་རྒྱས་བསྡུས་ནི་འདི་ལ་ཡང་གདམ་ཀ་ཡིན་མོད་ཀྱི། འོན་ཀྱང་ལྷ་མོ་ཀླུ་མོ་མི་མོ་ལ་སོགས་པ་ལས་ཀྱི་ཕྱག་རྒྱ་སྤངས་ཤིང༌། ཡེ་ཤེས་ཀྱི་ཕྱག་རྒྱ་ཁོ་ན་
ཡིན་ལ། ཕྲ་མོའི་རྣལ་འབྱོར་གྲུབ་པས་བསྐྱེད་རིམ་ཕྲ་རགས་ཐམས་ཅད་མཐར་ཕྱིན་པའི་ཕྱིར། རང་གི་མོས་པས་ཉུང་བ་ལ་དགའ་ན་མ་གཏོགས། ལྷ་ཚོགས་མངས་ཉུང་ལ་སྒྲུབ་དཀའ་སླའི་ཁྱད་པར་མེད་ དོ། །ཡེ་ཤེས་ཀྱི་ཕྱག་རྒྱ་དེ་ཡང་བསྐྱེད་རིམ་པ་གསལ་སྣང་ཐོབ་མ་ཐག་པའི་སྐབས་ཀྱི་དེ་དང་མི་འདྲ་སྟེ། འདིར་སྔགས་ཀྱི་སྤྲུལ་པའི་ལྷ་སྐུ་ལ་ཡེ་ཤེས་ཀྱི་ལྷས་དངོས་སུ་བྱིན་གྱིས་བརླབས་པས། ལྷའི་གཙོ་བོ་ཆེས་རྫུ་འཕྲུལ་ཆེ་བ་གཅིག་དང་ཁྱད་པར་མེད་པའི་བྱ་བ་བྱེད་དོ། །ལུས་རྟེན་དང་ཏིང་ངེ་འཛིན་བཟང་ངན་གྱི་ཁྱད་པར་མ་གཏོགས། སྒོམ་ཚུལ་ནི་སྔར་བཤད་པའི་སྤྱོད་པའི་སྐབས་དང་འདྲ་བ་ལས། ཁྱད་པར་ནི་མས་བརྟན་གྱི་དུས་ལྟེ་བར་དགའ་བའི་ཡེ་ཤེས་དང་ས་རླུང་གི་དྭངས་མ་འདྲེས་པའི་རྡོ་རྗེ་སྤྲོ་བ་བསྒོམས་པས། རྩ་སོགས་ལུས་ཐམས་ཅད་ཁྱབ་ཅིང་བརྟན་པ་ཉིད་གཙོ་བོར་བསྒོམས་ན། བསམ་གཏན་དང་པོའི་ལྷ་དང་སྐལ་བ་མཉམ་པ་དང༌། དེའི་སྟེང་དུ་སྙིང་གར་མཆོག་དགའ་ཆུ་རླུང་བསྣན་ན་བསམ་གཏན་གཉིས་པ་དང༌། དེའི་སྟེང་དུ་མགྲིན་པར་ཁྱད་དགའ་མེ་རླུང་བསྣན་ན་བསམ་གཏན་གསུམ་པ་དང༌། དེའི་ཡང་སྟེང་དུ་དཔྲལ་བར་ལྷན་སྐྱེས་རླུང་གི་རླུང་དང་འདྲེས་པས་རྩ་རླུང་ཐིག་ལེ་ཐམས་ཅད་དབང་དུ་བྱས་ན་བསམ་གཏན་བཞི་པ་དང་སྐལ་བ་མཉམ་པའི་རིག་པ་འཛིན་པར་འགྱུར་ཏེ། དེ་དག་ལ་ཡང་ནང་ཚན་དུ་མོས་པ་དང་བསོད་ནམས་ཀྱི་དབང་གིས་གནས་གཞན་མཐོ་དམན་དུ་འགྲོ་བ་སོགས་གསུམ་ནི་སྔར་བཤད་པ་དང་འདྲའོ། །དེ་ལ་སྔར་འདོད་ལྷའི་རིག་འཛིན་གྲུབ་ཟིན་པ་ནི། འདོད་ཁམས་ཀྱིས་བསྡུས་པའི་ལྷའི་ལུས་རགས་པ་དེ་བདེ་བ་སོགས་ཀྱིས་རྒྱས་
བཏབ་པའི་མིའི་ལུས་དང་མི་འདྲ་སྟེ། དཀའ་ཚེགས་ཆུང་ངུས་ཇེ་དྭངས་ཇེ་དྭངས་སུ་སོང་བ་ཁོ་ན་ལས། གཟུགས་ཁམས་ཀྱི་ལྷ་རྫས་སུ་འགྱུར་བ་ཡིན་ལ། གནས་གྱུར་རིམ་པ་གཅིག་ཁོ་ན་ལ་ནི། སྤྱོད་པ་ཕྱེད་སྤྱད་པས་མིའི་རྟེན་ལས་བྱུང་བའི་དྭངས་མ་ཤིན་ཏུ་རྒྱས་པ་རྣམས་འདོད་ཁམས་ཀྱི་ལྷ་རྫས་སུ་འགྱུར། རགས་པ་མིའི་རྫས་སུ་ཡོད་པའི་སྐབས་དེར་ཤིན་ཏུ་སྤྲོས་མེད་ཀྱི་སྤྱོད་པ་ཕྱེད་སྤྱད་པས་འདོད་པའི་ལྷ་རྫས་དེ་གཟུགས་ཀྱི་ལྷ་རྫས་སུ་འགྱུར་ཞིང་དེའི་ནང་དུ་རགས་པ་བག་ལ་ཞ་བའི་ཚུལ་དུ་ཐིམ་ཞིང་ཟད་པར་འགྱུར་རོ། །ཤིན་ཏུ་སྤྲོས་མེད་ཀྱི་སྐབས་འདིར་ཡེ་ཤེས་ཀྱི་ཕྱག་རྒྱ་ཉིད་ཀྱི་རང་སྣང་ལ། སྔགས་དང་ཕྱག་རྒྱ་སོགས་རོལ་པའི་བཀོད་པ་རྒྱ་ཆེན་པོ་འབྱུང་བའང་ཡིན་མོད་ཀྱི། འདི་ལ་རྩོལ་བ་ཡང་མི་དགོས་ཤིང༌། ཕྱི་རོལ་གཞན་རྒྱུད་ཀྱིས་བསྡུས་པའི་མི་དང་ལྷ་སོགས་ཀྱི་འགྲོ་བའི་བྱེད་པ་མེད་ལ། དེ་ལ་དེར་མ་ཟད་རང་ལུས་ཙམ་མ་གཏོགས། གཟུགས་ཅན་གྱི་དངོས་པོའི་བྱེད་པ་མེད་པའི་ཕྱིར་སྤྲོས་བཅས་སོགས་སུ་མི་འགྱུར་རོ། །འདིར་གཟུགས་མེད་པའི་རིག་པ་འཛིན་པ་ཡོད་དམ་མེད་ཅེ་ན། ཅུང་ཟད་ནི་ཡོད་དེ་སྔར་བཤད་པ་དང་འདྲ་བ་ལས་གཙུག་ཏོར་ནམ་མཁའི་རླུང་ཁོ་ནས་དབང་བྱས་པའི་ལྷན་སྐྱེས་ཟད་མཚམས་སུ་ལྷ་སྐུ་སྤྲོས་པ་ལས་ཐོབ་པར་འགྱུར་བ་ཡིན་ཀྱང༌། གཟུགས་མེད་པ་ནི་འོད་ལུས་ཧ་ཅང་ཕྲ་གྲགས་པ་ཐལ་ཆེས་པས་བདེ་བའི་ཡེ་ཤེས་སྟོབས་ཆུང་ངུ་སོང་ནས་ཆགས་ཆེན་གྱི་ལམ་རྒྱུད་ལ་སྐྱེ་བའི་རྟེན་ངན་དུ་སོང་བ་དང༌། རྫུ་འཕྲུལ་མངོན་ཤེས་སོགས་ཀྱང་སྟོབས་བྲི་བའི་ཕྱིར། དམིགས་གསལ་གྱི་དགོས་པ་ཁྱད་པར་ཅན་ཡོད་ན་མ་གཏོགས། ཆེད་གཉེར་གྱིས་སྒྲུབ་པར་འོས་པ་མ་ཡིན་ཞིང༌། ལམ་གྱི་
རྟེན་དུ་བསམ་གཏན་བཞི་པའི་རིག་འཛིན་ལས་ངན་པས་ན། ཐུན་མོང་གི་དངོས་གྲུབ་ཀྱི་མཐར་ཐུག་པ་བཟང་ཤོས་འོག་མིན་པ་དང་སྐལ་བ་མཉམ་པ་ཉིད་ལ་གསུངས་ཤིང༌། གཟུགས་མེད་ཀྱི་རིག་པ་འཛིན་པའི་རྣམ་གཞག་གསལ་བར་མ་བསྟན་པ་ཡིན་ནོ། །སྤྱིར་རྒྱུད་འདི་ལས། ས་སོགས་ཟད་པར་བཞིའི་ཏིང་ངེ་འཛིན་གྱིས་བསམ་གཏན་བཞི་དང༌། སྟོང་པའི་ཟད་པར་གྱིས་གཟུགས་མེད་དུ་འགྲོ་བར་བཤད་པ་ནི། སོ་སོའི་ཏིང་ངེ་འཛིན་གྱིས་དེར་འགྲོ་བ་ཉིད་ཡིན་ལ། འདི་དག་ནི་བརྟུལ་ཤུགས་ཀྱི་སྤྱོད་པས་ཟད་པར་ལྔ་ལ་མ་བལྟོས་པར་དེ་དང་དེ་འགྲུབ་པ་ཡིན་ཞྀང༌། དེ་དག་ན་གནས་པའི་འགྲོ་བ་ཕལ་པ་དང་སྤྱོད་ཚུལ་གཅིག་པར་ཡང་མ་ངེས་སོ།། །།གཉིས་པ་བརྒྱུད་འབྲས་ཕྱག་རྒྱ་ཆེན་པོའི་དངོས་གྲུབ་ལ་སྦྱོར་ཚུལ་ཕྱོགས་ཙམ་བསྟན་པ་ནི། ཚུལ་འདི་དག་པ་འབྲས་བུའི་རྣམ་གཞག་དང་གཅིག་སྟེ། དེ་ལ་འདི་སྙམ་དུ་འོ་ན་རིག་པ་འཛིན་པ་དེ་གཉིས་ཐོབ་ན། དེ་ཙམ་གྱིས་འཇིག་རྟེན་ལས་འདས་པ་མ་ཡིན་པའི་ཕྱིར་མཐར་ལྟུང་ཞེ་ན་མི་ལྟུང་སྟེ། རྟག་ཏུ་ཡེ་ཤེས་ཀྱི་ལྷས་བཟུང་བའི་ཕྱིར་དང༌། དེ་བཞིན་གཤེགས་པས་གསུངས་པའི་རིག་སྔགས་ཀྱི་འབྲས་བུ་ཆེན་པོ་གྲུབ་པ་དག་སླར་ཉམས་པར་མི་འོས་པའི་ཕྱིར་རོ། །དེས་ན་གལ་ཏེ་རྟག་པ་མཐར་བཟུང་བ་ལ་རྫོགས་རིམ་མི་སྒོམ་པ་ཞིག་ཡོད་ནའང༌། བདག་མེད་པ་དང༌། སྟོང་པ་ཉིད་དང༌། ལྷའི་རྣལ་འབྱོར་དང༌། སྙིང་རྗེ་ཆེན་པོ་དང་ཐབས་ལ་མཁས་པའི་སྤྱོད་པ་དང་བཅས་པའི་ཕྱིར། ས་ལམ་གྱི་ཡོན་ཏན་གོང་འཕེལ་དུ་འགྱུར་མོད། སྤྱིར་རིག་པ་འཛིན་པའི་གནས་དེ་ཐོབ་ནས་ཡུན་རིང་ཐུང་ཇི་ལྟར་འོས་པ་ན། རྫོགས་པའི་རིམ་པ་ལ་འཇུག་པ་ཁོ་ན་ཉིད་ཀྱི་ཕྱིར་ཡན་ལག་དྲུག་གི་རིམ་པས་གཉིས་སུ་མེད་པའི་
ཡེ་ཤེས་ཀྱི་སྐུ་འགྲུབ་ཅིང༌། དེ་ནས་ཀུན་ཏུ་འོད་ལ་སོགས་པའི་ས་རྣམས་བགྲོད་ནས། སྐུ་བཞི་ཡེ་ཤེས་ལྔ་དང་ལྡན་པ་དཔལ་ལྡན་རྡོ་རྗེ་སེམས་དཔའ་དུས་ཀྱི་འཁོར་ལོའི་གོ་འཕང་ཐོབ་པར་འགྱུར་རོ། །འོ་ན་མིའི་སྐྱེ་བ་ཉིད་ཁོ་ན་ལ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་བ་མ་ཡིན་ནམ་སྙམ་ན། སྤྱིར་ནི་ཁམས་དྲུག་ལྡན་པ་རྡོ་རྗེའི་ལུས་དང་ལྡན་པ་མིའི་རྟེན་ཁོ་ནས་འགྲུབ་པར་བཤད་པ་ནི་མི་གཙང་བའི་ལུས་ཤ་ཁྲག་རུས་པའི་གསེབ་ན་རྫོགས་པའི་སངས་རྒྱས་སུ་ཁྲོང་ངེ་བར་ཡོད་པའི་དོན་མ་ཡིན་གྱི། དང་པོར་སྔགས་ལ་ཞུགས་པའི་རྟེན་ཁོ་ན་ལས་ཚེ་མ་འཕོས་འཆི་བས་བར་མ་ཆད་པ་ཉིད་དུ་མཆོག་འགྲུབ་པ་ཞིག་ཡོད་ལ། དེ་སྔགས་ལ་དང་པོར་འཇུག་པའི་རྟེན་ནི། ཁམས་དྲུག་ལྡན་ཁོ་ན་ཡིན་པ་ཞིག་དགོས་ཞེས་པ་ཡིན་གྱི། སྐྱེ་བ་སྔ་མའི་ལས་འཕྲོ་ཅན་དང༌། ཚེ་རབས་མང་པོར་སྦྱངས་པས་ནི། ལྷ་དང་ཀླུ་ལ་སོགས་པ་འགྲོ་བ་གཞན་རྣམས་ཀྱི་རྟེན་ལ་ཡང་མཆོག་ཐོབ་པ་ངེས་པར་ཡོད་དོ། །འོན་ཀྱང་འདིར་འདོད་གཟུགས་ཀྱི་རིག་འཛིན་དེ་དག་རྫོགས་རིམ་ལ་བརྟེན་ནས་མཆོག་ཐོབ་པ་དེ་ཡང་ཁམས་དྲུག་ལྡན་པའི་སྐྱེ་བ་དེ་ལ་མཆོག་གི་དངོས་གྲུབ་གྲུབ་པ་ཉིད་ཡིན་ཏེ། སྔགས་དང་ཏིང་ངེ་འཛིན་གྱི་སྟོབས་ལས་མིའི་ལུས་ཀྱི་རིགས་རྒྱུན་དེ་དག་རིག་པ་འཛིན་པའི་ལུས་སུ་བསྒྱུར་བ་ཡིན་པས། ལུས་ཀྱི་རིགས་རྒྱུན་ཡང་གཅིག་པ་དང༌། འཆི་བ་དང་བར་དོས་རྒྱུན་མ་བཅད་པའི་ཕྱིར་ཚེའི་རྒྱུན་ཡང་གཅིག་པོ་དེ་ཉིད་ལ་གནས་པ་ཡིན་པའི་ཕྱིར། ཚེ་གཅིག་ལུས་གཅིག་ལ་མཆོག་གི་དངོས་གྲུབ་འགྲུབ་པ་ཁོ་ན་ཡིན་ནོ། །ཡང་དབང་པོ་རྣོན་པོ་འགའ་ཞིག་ཐུན་མོང་གི་དངོས་གྲུབ་དེ་དག་མི་སྒྲུབ་ལ། བསྐྱེད་རིམ་བརྟན་ཡང་རུང་མིན་ཡང་རུང་སྟེ།
རྫོགས་པའི་རིམ་པའི་རྣལ་འབྱོར་ལ་བརྟེན་ནས་མ་དག་པའི་ལུས་གནས་གྱུར་ནས་ཟུང་འཇུག་གི་སྐུ་འགྲུབ་ཅིང༌། རྟེན་དེ་ལ་བརྟེན་ནས་ཁྱབ་བདག་རྡོ་རྗེ་འཆང་གི་སྐུ་ཐོབ་པར་བྱེད་པ་དེ་ཡང་གོང་དུ་བཤད་པའི་རིག་པ་དེ་ཉིད་ཀྱིས་ཤེས་ཏེ། ཚེ་གཅིག་ལུས་གཅིག་ལ་རྡོ་རྗེ་འཆང་ཆེན་པོའི་གོ་འཕང་ཐོབ་པ་ཞེས་བྱའོ། །དེ་ལྟར་ན་སྐལ་བ་དང་ལྡན་པ་དག་གིས་ཡང་དག་པའི་དབང་བསྐུར་བ་ནོད་ནས་རྟག་ཏུ་དམ་ཚིག་ལ་གནས་བཞིན་པས་ལམ་རིམ་པ་གཉིས་ལ་ནན་ཏན་དུ་འབད་ན། མཆོག་དང་ཐུན་མོང་གི་དངོས་གྲུབ་ཕུན་སུམ་ཚོགས་པའི་དགའ་སྟོན་རྒྱ་ཆེན་པོ་ལ་རྟག་ཏུ་སྤྱོད་པར་འགྱུར་རོ། །དཔལ་དུས་ཀྱི་འཁོར་ལོའི་བསྐྱེད་རིམ་རྣམ་པར་བཤད་པ་ལས། བསྐྱེད་རིམ་ཉིད་ཀྱི་འབྲས་བུ་མངོན་དུ་བྱེད་ཚུལ་གཏན་ལ་དབབ་པའི་སྡེ་ཚན་ཏེ་བཅུ་གསུམ་པའོ།། །།འདིར་སྨྲས་པ། མཐའ་ཡས་རྒྱལ་བ་ཀུན་གྱི་གསང་བའི་མཛོད་གྱུར་ཆོས་སྒོ་དེ་ནི་དང་པོའི་སངས་རྒྱས་དུས་འཁོར་ཏེ། །མ་ལུས་རྒྱལ་བའི་སྲས་ཀྱིས་བགྲོད་གཅིག་ལམ་དང་གྲུབ་པའི་དབང་པོ་ཀུན་གྱིས་རྟག་ཏུ་བསྟེན་བྱ་ཉིད། །མཁས་མང་བྱེ་བའི་མགོ་བོས་གཏུགས་དེ་ཁ་དང་སྙིང་གི་སྒོ་ལ་ནམ་ཡང་རྒྱུན་ཆད་མེད་བགྲོད་པ། །མཐའ་དག་འགྲོ་བའི་ཉེར་འཚོ་ཟབ་དང་རྒྱ་ཆེ་དེ་ནི་ཕལ་བའི་བློ་ཡིས་གཏིང་མཐའ་མི་དཔོགས་མོད། །དམ་པའི་དྲིན་དང་སྔོན་བསགས་དགེ་བའི་དབང་ལས་ལེགས་བྱས་ཀུན། །ངེས་པར་བློ་ཡི་སྟོབས་སུ་སྨིན་པས་འཁྲུལ་མེད་དེས་གསང་གི །གནས་དོན་ཇི་བཞིན་ལེགས་པར་བཤད་འདི་རྡོ་རྗེའི་ཐེག་པ་ལ། །ལེགས་ཞུགས་སྐྱེ་བོ་རྣམས་ཀྱི་བསོད་ནམས་དཔལ་དུ་བསྐྲུན་པ་ཉིད། །
ཕྱོགས་ལྷུང་ཆང་གིས་མྱོས་ཤིང་ཚིག་དོར་ལྷུར་ལེན་པ། །དྲེགས་པའི་མལ་དུ་གཏི་མུག་གཉིད་སེང་མཁས་རློམ་ཅན། །དེ་དག་སད་བྱེད་ལེགས་བཤད་འདི་ནི་རྔ་ཆེན་དང༌། །རབ་མཚུངས་མྱོས་པ་སེལ་བྱེད་སྨན་མཆོག་དབང་པོ་ ཉིད། །རྣམ་པར་རྟོགས་པའི་སྒོམ་པ་ལས་འདས་ཞེས། གསུངས་ཀྱང་རྟོག་པའི་རྣམ་འཕྲུལ་བརྒྱས་རྩེན་པ། །བློ་གྲོས་ཡངས་པའི་འཁོར་སར་འགལ་མེད་འཇུག །དེ་འདྲ་འདི་ཡང་བླ་མ་དམ་པའི་དྲིན། །དེ་སླད་རྣམ་པར་བཤད་པའི་འོད་སྟོང་འདིས། །བློ་དམན་རྣམས་ཀྱི་མ་རིག་མུན་བསལ་ཏེ། །ཤེས་བྱའི་ཚད་ལས་ལན་བརྒྱར་འཕགས་པ་ཡི། །ཡེ་ཤེས་འདྲེན་པ་ཀུན་མཁྱེན་སར་བགྲོད་ ཤོག །བདག་ཀྱང་གནས་སྐབས་ཐམས་ཅད་ དུ། །བླ་མ་དམ་པ་མཉེས་བྱེད་ ཅིང༌། །མཁའ་ཁྱབ་འགྲོ་བ་ཐམས་ཅད་ཀྱི། མགོན་དང་སྐྱབས་སུ་འགྱུར་བར་ ཤོག །མཁས་པ་རྣམས་ལ་ལེགས་བཤད་སྙིང་གི་གསོས། སྒྲུབ་པོ་རྣམས་ཀྱི་ངེས་དོན་བདུད་རྩིའི་དཔལ། །གྲུབ་མཆོག་རྣམས་ཀྱིས་ཡང་ཡང་སྤྱད་པ་འདི། །དོན་གཉེར་རྣམས་ལ་བརྩེ་བའི་སེམས་ཀྱིས་སྤེལ། །དཔལ་དུས་ཀྱི་འཁོར་ལོའི་བསྐྱེད་རིམ་གྱི་རྣམ་པར་བཤད་པ་དངོས་གྲུབ་ཉེར་འཚོ་ཞེས་བྱ་བ་འདི་ནི། དོན་གཉེར་མང་པོས་བསྐུལ་བའི་ངོར། རྒྱལ་ཁམས་པ་ཏཱ་ར་ནཱ་ཐ་མིང་གཞན་ཀུན་དགའ་སྙིང་པོའི་སྒྲུབ་གནས་ཀྱི་རྒྱལ་པོ་དཔལ་གྱི་ཇོ་ནང་དུ་མིག་དམར་གྱི་ལོ་ལ་བཀོད་པའོ།།
སྨས་པ། གཟུང་འཛིན་ཀུན་བྲལ་བདེ་ཆེན་བྱང་ཆུབ་གླིང་། །ཡེ་ཤེས་ཆོས་སྐུ་འཁོར་འདས་ཀུན་ཁྱབ་བདག །ཡི་དམ་རྒྱུད་སྡེ་རབ་འབྱམས་སྤྲོ་ཞིང་བསྡུ། །དོན་དམ་གནས་ལུགས་བདེ་གཤེགས་སྙིང་པོ་རྒྱལ། ༡ །འགྱུར་མེད་ཡེ་ཤེས་བདེ་བ་ཆེན་པོས་སྟོང་ཉིད་སྣང་བའི་ནམ་མཁའི་མཛེས་མ་དག་ལ་དགའ་བའི་འགྲོགས་པ་ལྷུང་ལེན་པ། ཕྱི་ནང་དུས་གཞན་དུ་མེད་རྣམས་ཀུན་དུས་ཀྱི་གཟུགས་ལྡན་ལྷ་ལམ་ཡངས་བར་བརྒྱ་བྱིན་ན་དབང་གཞུའི་རིམ་མོ་བཞིན་རྣམས་ཀུན་ལྡན་པ་སྣ་ཚོགས་དགའ་མའི་ཆུ་སྐྱེས་བདེ་བའི་རིག་ལ་སྲེད་ཕྱག་གཉིས་ཞགས་པས་ཡུམ་ལ་འཁྱད་པར་མཛོད། ཞབས་གཡོན་དཀར་པོ་བསྐུམ་ཞིང་གཡས་དམར་བརྐྱངས་བས་དབང་ཕྱུག་འདོད་ལྷའི་མགོན་པོ་དག་གི་སྙིང་ཁར་གར་མཛད་ཁྱོད་ལ་འདུད། ༢ སྒྲིབ་བྲལ་ཆོས་སྐུའི་དབྱིངས་སུ་བསམ་གཏན་བདེ་བས་དབེན་ཀྱན་སྙིང་རྗེ་ཆེན་པོས་རབ་ཏུ་བསྐྱོད་ཏེ་འགྲོ་ལ་བརྩེ་བར་གཟིགས། སྤྲོས་པའི་ཚིག་གིས་བརྗོད་པ་སྤངས་ཀྱང་ཁྱོད་གསུངས་གཅིག་གིས་སྒྲ་སྐད་སྣ་ཚོགས་མ་ལུས་ཅིག་ཆར་གསལ་བར་སྟོན་པར་མཛོད། བསོད་ནམས་འབུམ་ཕྲག་དུ་མས་བསྐྲུན་པའི་མཚན་དཔེའི་བརྒྱན་པའི་སྐུ་ཡིས་ཞིང་ཁམས་རབ་འབྱམས་རྣམས་སུ་གཟུགས་སྐུ་ཅིག་ཆར་སྟོན། དྲི་མེད་ཤཱཀྱའི་རྒྱལ་རྒྱུད་ལས་འཁྲུངས་ལྕགས་ཕོ་སྤྲེལ་གྱིས་ཟླའི་བདུན་པར་ལུམ་བའི་ཚལ་བསྟམས་ཟས་གཙང་སྲས་ལ་འདུད། ༣ རྒྱལ་བ་རྣམས་དང་རྒྱ་བོད་མཁས་གྲུབ་ཀུན་གྱི་མདོ་སྔགས་བསྟན་བཅོས་ཡོངས་ལ་དབང་བསྒྱུར་བདག་པོ་འདི། ད་སྐབས་རྒྱ་བོད་མཁས་མང་གཟུང་ལུགས་སྨྲ་བ་རྣམས་ཀྱིས་ཕུག་ནི་ཁོང་ལ་གཏུགས་པར་མཛད་པ་ཡིན། ཁྱད་པ་རང་སེམས་དོན་ལྟ་བའི་བརྒྱུད་འཛིན་འདི་ཡང་
འཛམ་གླིང་མཁས་པ་ཡོགས་ཀྱིས་བསྟོད་བསྔགས་བརྗོད་བཞིན་འདུག ལྷ་མི་འགྲོ་བ་ཀུན་གྱི་སྐྱབས་གཅིག་ཀུན་དགའ་སྙིང་པོ་ཏཱ་ར་ནཱ་ཐར་གུས་པས་ཕྱག་གི་ཡུལ། ༤ སྟོན་པས་བྱ་རྒོད་ཕུང་པོའི་རིར། ཤེས་རབ་ཕ་རོལ་ཕྱིན་ཚུལ་བཞིན་བཞིན། ཆོས་བསྟན་དཔལ་ལྡན་འབྲས་སྤུངས་སུ། དེ་བཞིན་གསང་སྔགས་ཚུལ་རབ་བསྟན། ༥ རྒྱུད་དོན་གསལ་མཛད་ཟླ་བ་བཟང་པོའི་ཞབས། རྒྱུད་འདི་སྡུད་མཛད་འཇམ་དཔལ་གྲགས་པ་རྗེ། རྒྱས་འགྲེལ་མཛད་མཁན་པདྨ་དཀར་པོ་ཡིན། རྣམ་གསུམ་ཞབས་པད་སྤྱི་མོའི་རྒྱན་དུ་བླངས། ༦ རྒྱུད་རྣམས་མ་ལུས་འཕགས་ཡུལ་བོད་ལྗོངས་སུ། སྤྱན་དྲངས་གྲུབ་དབང་དུ་མའི་ཉམས་བཞེས་མཛད། ཇོ་ནང་ཆེན་བའི་དཔག་བསམ་ལྗོན་ཤིང་གསུངས། དེའི་དོན་ཇི་བཞིན་དངོས་སུ་ཉེར་འཚོས་བྲལ། ༧ རྒྱལ་བསྟན་ལ་གུའི་གྱངང་ངག་བཟང་གིས། གཅིག་ལས་དུ་མ་འབྱུང་བའི་འཁྲུལ་གྱི་གཞི། སྥྱི་ལོ་ཅིག་སྟོང་དགུ་བརྒྱ་གོ་བརྒྱད་ལོར། ཞ་མའི་ཐོག་དྲངས་ཡེ་ཤེས་བཟང་གིས་གཙོའི། ༨ མཁ་ཁྱབ་འགྲོ་མང་དོན་དུ་སྤར་བསྐྲུན་བྱས། བསྟན་འཛིན་སྡེ་རྒྱས་སྤུ་ཚེ་འདུ་བྱེད་བརྟན། ཐོས་བསམ་སྒོམ་པའི་བྱ་བ་རྟག་ཏུ་འཕེལ། འཆད་རྩོད་རྩོམ་གསུམ་ཆོས་སྤྱོད་འཕེལ་བར་ཤོག། ༩ དུས་བཞི་སྙོམས་ཤིང་ཆར་ཆུ་དུས་སུ་བབ། ལོ་ཕྱུགས་འཕེལ་ཞིང་ནད་རིགས་མ་ལུ་ཞི། ལོ་བརྒྱ་འཚོ་ཞིང་ལོངས་སྤྱོད་སྐལ་བ་བཟང་། དགེ་བ་བཅུ་པོ་རྟག་ཏུའཕེལ་བར་ཤོག །༡༠ བདག་གི་དུས་གསུམ་བཟགས་པའི་དགེ་བ་དང་། ཕྱོགས་བཅུའི་བརྒྱལ་བ་སྲས་བཅས་དེག་ཆོགས་རྣམས། གཅིག་ཏུ་བསྒནོམས་པའི་མཐུ་སྟོབས་མ་ལུས་པ། འཇམ་དཔལ་
ཀུན་བཟང་སྨོན་ལམ་ལྟ་བུར་ཤོག ༡༡ བསོད་ནམས་འདི་ཡིས་ཐམས་ཅད་གཟིགས་པ་ཉིད། ཐོབ་ནས་ཉེས་པའི་དགྲ་ཏནམས་ཕན་བྱེད་ཅིང་། སྐྱེ་ན་འཆིའི་རྦ་ཀློང་བ་ཁྲུབས་པ་ཡི། སྲིད་པའི་མཚེ་ལས་འགྲོ་བ་སྒྲོལ་བར་ཤོག ༡༣ ཅེཏཱ་ར་ནཱ་ཐའི་དུས་འཁོར་བསྐྱེད་རིམ་གྱི་ཁྲིད་ཡིག་དངོས་གྲུབ་ཉེར་འཚོའི་སྤར་བྱང་དངོས་གྲུབ་མྱུར་རྩོལ་ཞེས་བྱ་བ་འདི་འཛམ་ཐང་གཙང་ཆེན་དགོན་གྱིས་མཁན་གུརྵཱབྷཊ་འམ་ཤཱཀྱའི་དགེ་སློང་བློ་བཟང་ཆོས་འཕེལ་གྱིས་རྗེ་ཏཱ་ར་ནཱ་ཐའི་གསུང་འབུམ་གྱི་སྤར་བསྐོ་སྐབས་སྤང་བྱང་སྨོན་ཚིག་འདི། ༡༩༩༨རབ་བྱུང་བཅུ་བདུན་པ་ས་ཕོ་སྟག་ལོའི་དཔྱིད་འབྲིང་དང་བོའི་ཟླའི་ཚེ་བཅོ་ལྔའི་དུས་ཆེན་ཉིན་རྣམ་དཀར་གྱིད་བྱ་བརྩམ། རྐང་འཐུང་གི་རིགས་ཐམས་ཅད་མདོག་འགྱུར། འདབ་ཆགས་ཀྱི་རིགས་ཐམས་ཅད་ཀྱིས་སྐད་སྙན་སྣ་ཚོགས་སྒྲོག་པའི་མགོ་བ་རྩམ། འབབ་ཆུའི་རིགས་མདོག་འགྱུར། རྒྱ་མཚོའི་གོས་ཀྱི་མདགོ་ལྗང་གསལ་ཏུ་འབྱུང་བའི་དབུ་བསྡུམ། འགྲོ་བ་མ་ལུས་བའི་ཡིད་སེམས་སྤྲོ་བ་འཕེལ་བའི་རྣམ་འགྱུར་དོམས་པ་སོགས་མདོར་ན་ཕྱི་ནང་སྣོད་བཅུད་མ་ལུས་པས་བདེ་སྐྱིད་རྨས་མཆོགས་གསུམ་གྱིས་མཛད་འཕྲིན་ཡིན་པར་ཆེས་སྙེད། སྤར་བྱང་འདི་ཡངས་མཁན་ཉིན་ནས་མཛད་པའོ། སྤར་འདི་འཛམ་ཐར་བསམ་འགྲུབ་ནོར་བུའི་གླིང་དུ་བཞུགས། སརྦ་མངྒ་ལཾ། བཀྲ་ཤིས། །
ཤོག་སྟོང་།