དཔལ་གཏུམ་པོ་ཁྲོ་བོ་ཆེན་པོ་མི་གཡོ་བླ་མེད་ཀྱི་སྒྲུབ་ཐབས་བདུད་ལས་རྣམ་པར་རྒྱལ་བ།
དཔལ་གཏུམ་པོ་ཁྲོ་བོ་ཆེན་པོ་མི་གཡོ་བླ་མེད་ཀྱི་སྒྲུབ་ཐབས་བདུད་ལས་རྣམ་པར་རྒྱལ་བ་བཞུགས་སོ། །
ཨོཾ་སྭཱ་སྟཱི། དཔལ་གཏུམ་པོ་ཁྲོ་བོ་ཆེན་པོ་མི་གཡོ་བའི་སྒྲུབ་ཐབས་བདུད་ལས་རྣམ་པར་རྒྱལ་བ་ཞེས་བྱ་བ། བླ་མ་ལ་ཕྱག་འཚལ་ལོ། །དཔལ་ལྡན་སྲིད་ཞིའི་ལམ་གཉིས་མངོན་བཅོམ་ནས། །འགྱུར་མེད་བདེ་བའི་རང་བཞིན་དཀྱིལ་འཁོར་ལས། །དཔག་ཡས་རིགས་ཀྱི་དཀྱིལ་འཁོར་ཚོགས་སྤྲོ་བ། །མི་གཡོ་མགོན་པོས་སྲིད་འདི་སྐྱོང་བར་མཛོད། །གང་གི་གཉིས་མེད་ཡེ་ཤེས་ནི། །གདོད་མའི་མགོན་པོ་མི་གཡོ་བ། །མ་བཅོས་རིམ་པ་མངོན་གྱུར་ཕྱིར། །བཅོས་མའི་རིམ་པའི་སྒྲུབ་ཐབས་མཚར། །འདིར་དཔལ་གཏུམ་པོ་ཁྲོ་བོའི་རྒྱུད་མི་གཡོ་བ་རྣལ་འབྱོར་བླ་ན་མེད་པར་ཡོངས་སུ་གྲགས་པའི་རིམ་པ་ལས་འོངས་པ་ལྷ་དགུའི་བདག་ཉིད་ཀྱི་བསྐྱེད་རིམ་བསྒོམ་པར་འདོད་པས། མཆོད་པ་ལ་སོགས་ཉེ་བར་མཁོ་བའི་ཡོ་བྱད་ཚོགས་པར་བྱས་ནས། །བླ་མ་གོང་མ་རྣམས་ཀྱི་ཕྱག་ལེན་ལྟར། སྐྱབས་འགྲོ་སེམས་བསྐྱེད་ཡིག་བརྒྱའི་སྒོམ་བཟླས་རྣམས་ཀྱང་ཇི་ལྟར་རིགས་པར་བྱའོ། །དེ་ནས་ལེགས་པར་སྦྱངས་པའི་མཎྜལ་ལ་དྲི་བཟང་གི་ཐིག་ལེ་བཀོད། མདུན་དུ་མཆོད་པ་བཤམས། ཐལ་མོ་སྦྱར་ཏེ། ཁྲོ་བོ་གཏུམ་པོ་ཁྲོས་པའི་མིག་ཅན་རལ་གྲི་གཡས་པའི་ཕྱག་མཛེས་ཤིང༌། ཞགས་པར་བཅས་
པའི་ཁུ་ཚུར་སྡིག་མཛུབ་བསྒྲེང་བར་བཅས་པ་གཞན་པའི་ཕྱག་གིས་ཏེ། པུས་མོ་ས་ལ་གཏོད་པའི་སྐུ་ནི་ངེས་པར་སྤྲིན་ནག་དང་འདྲ་བ། བགེགས་རྣམས་འཇོམས་མཛད་མགོན་པོ་མི་གཡོ་ཁྱོད་ཀྱིས་སྲིད་འདིའི་བགེགས་ཞི་མཛོད། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་སཏྭཱ་ཧཾ། རང་ཉིད་མི་གཡོ་བར་གྱུར། ལག་པ་གཉིས་སུ་ཟླ་བ་ལ་གནས་པའི་ཧཱུཾ་ཡིག་རེ་རེ། བཛྲ་པདྨ་ཧ་སྟོ྅ཧཾ། ལག་པ་གཡས་རལ་གྲིའི་ཕྱག་རྒྱ་བྱས་ལ། སྙིང་ག་དཔྲལ་བ་སྤྱི་བོ་རྣམས་སུ་རེག་ཅིང༌། ཨོཾ་ཧཱུཾ་ཏྲཾ་ཧྲི་ཁིཾ་ཧཱུཾ། ཕྲག་པ་ལ་སོགས་པ་རྣམས་སུ་རེག་ཅིང༌། ཕྲག་པ་གཡས་སུ་ཡ་མཱན་ཏ་ཀྲི་ཏ་ཧཱུཾ། གཡོན་དུ་པྲཛྙཱནྟ་ཀྲི་ཏ་ཧཱུཾ། ཁར་པདྨནྟ་ཀྲི་ཏ་ཧཱུཾ། གསང་བར་བི་གྷཱནྟན་ཀྲི་ཏ་ཧཱུཾ། ཨོཾ་ཧཱུཾ་སྭཱཧཱ་བཛྲཾ། རྡོ་རྗེ་བླངས། ཨོཾ་ཨཱཿསྭཱཧཱ་གྷནྚཾ་ དྲིལ་བུ 
་བླངས། རྡོ་རྗེ་གསོར་ཞིང༌། 
དྲིལ་བུ ་སྙིང་གར་ལན་བརྒྱད་དཀྲོལ། ཨོཾ་ཨཱཿཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ལན་བདུན་གྱི་བསང་ཆུ་བྱིན་གྱིས་བརླབས། ཨོཾ་ཨཱཿབི་གྷྣཱ་ནུ་ཏ་སཱ་ར་ཡ་ཧཱུཾ་ཕཊ། ཅེས་གནས་དང་ཡོ་བྱད་ལ་བསང་ཆུ་གཏོར། ཨོཾ་ཨཱ་བཛྲ་པུཥྤེ་ཧཱུཾ། སོགས་ཀྱིས་མཆོད་པ་བྱིན་གྱིས་བརླབས། ཐོད་པའི་ནང་དུ་དམ་རྫས་རྣམས་ཧཱུཾ་དང་མཾ་ལས་བྱུང་བའི་མི་བསྐྱོད་པ་ཡབ་ཡུམ་དུ་གྱུར། སྙོམས་པར་ཞུགས་པའི་རྗེས་ཆགས་ཀྱི་མེས་བདུད་རྩིར་བཞུ། ཨོཾ་སརྦ་བྷཀྵ་ཀཱ་མི་ནི་བྷཀྵ་ཤོ་དྷ་ནི་གུ་ཧྱ་བཛྲི་ཎི་ཀྲོ་དྷེ་ཤྭ་རི་སརྦ་དྲ་བྱཾ་བྱ་བི་ནི་ཤྭ་དྷ་ཡ་ཤྭ་དྷ་ཡ་ཧཱུཾ། ཨོཾ་ཨ་མྲྀ་ཏེ་ཨ་མྲྀ་ཏཾ་པྲ་ཝེ་ཤ་ཡ་ཧཱུཾ། ཞེས་ནང་མཆོད་བྱིན་གྱིས་བརླབས། རལ་གྲིའི་ཕྱག་རྒྱ་བསྣུན་སྟབས་སུ་བྱས་ལ། ཨོཾ་བཛྲ་ཡཀྵ་སརྦ་པཱ་ས་ནོཏཙྪ་ཊ་ཡ་ཧཱུཾ་ཕཊ་ཀྱིས་བགེགས་བསྐྲད། ཕྱག་རྒྱ་དེ་ཉིད་གཡས་སུ་བསྐོར། ཨོཾ་ཤྲཱི་ཙཎྜ་མ་ཧཱ་རོ་
ཥ་ཎ་རཀྵ་རཀྵ་མཾ་ཧཱུཾ་ཕཊ། རྡོ་རྗེའི་གུར་དུ་གྱུར། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞ་པཱ་ཡ་གྲྀཧྞ་པཱ་ཡ་ཧཱུཾ། ཨཱ་ན་ཡ་ཧོ་བྷ་ག་ཝན་བིདྱ་ར་ཛཱ་ཧཱུཾ་ཕཊ། ཨོཾ་ཨཱཿཧཱུཾ། ཞེས་གནས་གསུམ་དུ་མེ་ཏོག་རེག ཨོཾ་ཨཱཿབཛྲ་ས་ནེ་ཧཱུཾ། ས་ལ་དོར། གདོང་ལའང་སྔགས་དེས་དོར། མཎྜལ་ལ་དྲི་བཟང་བྱུགས་ཚུལ་བྱ། ཨོཾ་ཨཱ་ཏིཥྛ་བཛྲ་ཧཱུཾ། ཨོཾ་ཨཱཿབཛྲ་བྷུ་མི་ཧཱུཾ། མཎྜལ་འབྱུང་བཞི་རི་རབ་དང་བཅས་པའི་གཞལ་མེད་ཁང་དུ་གྱུར། ཧཱུཾ་ལན་དགུ དྲིའི་ཐིག་ལེའི་གནས་སུ་ཉི་མའི་དཀྱིལ་འཁོར་དགུར་གྱུར། རང་གི་སྙིང་ཁའི་ཧཱུཾ་ལས་འོད་ཟེར་འཕྲོས། གདོད་མ་ནས་གྲུབ་པའི་གཏུམ་པོ་ལྷ་དགུའི་དཀྱིལ་འཁོར་སྤྱན་དྲངས། ཨོཾ་ཙཎྜ་མ་ཧ་རོ་ཥ་ཎ་ས་པཱ་རི་ཝཱ་ར་ས་ཧི་ཏ་ཨཱ་གཙྪ་ཨཱ་གཙྪ་ཛཿཧཱུཾ་ཞེས་མཎྜལ་གྱི་སྟེང་དུ་བཞུགས་པར་བསམས། བཾ་ཞེས་པས་རང་གི་གདན་ལ་ཞེན་ཞིང་བཞུགས། ཧོ་ཞེས་པས་བདག་ལ་དགྱེས་ཏེ་དངོས་གྲུབ་སྩཽལ་བའི་ཕྱིར་དེ་འཕངས་མཐོ་བར་བཞུགས་པར་བསམ། ཨ་ཏྲ་མནྚ་ལེ་ཨ་དྷི་ཥྛཱ་ན་ཀུ་རུ་ཕཊ་སྭཱཧཱ། ཞེས་གསོལ་བ་བཏབ། ཨོཾ་ཤྲཱི་ཙཎྜ་མ་ཧཱ་རོ་ཥ་ཎ་བྷནྚ་ར་ཀ་ས་པ་རི་ཝཱ་རེ་པྲ་ཝ་ར་སཏྐཱ་རཱ་ཡ་པཱདྱཾ་པྲ་ཏི་ཙྪ་སྭཱཧཱ། ཨཉྩ་མ་ནཾ། བྲོ་ཀྵ་ནཾ། ཨརྒྷཾ་རྣམས་ཀྱིས་ཆུ་བཞི་ཕུལ། ན་མཿ སརྦ་ཏ་ཐཱ་ག་ཏ་སུ་ལ་ལི་ཏ་ན་མི་ཏ་ན་མ་ཏཻ་བྷ་ག་ཝནྟཾ་ཛཿཧཱུཾ་བཾ་ཧོཿཀུ་སུ་མ་ཨཉྫ་ལི་ནཱ་ཐ་ཧོཿ ཞེས་མེ་ཏོག་གཏོར། ཨོཾ་ཀྲ་ཥྞི་ཨ་ཙ་ལ་པུཥྤེ་པྲ་ཏཱིཙྪ་ཧཱུཾ་ཕཊ་དེ་བཞིན་དུ། ཤྭེ་ཏེ་ཨ་ཙ་ལ། བི་ཏ་ཨ་ཙ་ལ། རཀྷ་ཨ་ཙ་ལ། ཤྱཱ་སཾ་ཨ་ཙ་ལ། དེ་ཥ་བཛྲི་ཎཱི། མོ་ཧ་བཛྲི་ཎཱི། པི་ཤུུ་ཎ་བཛྲི་ནཱི། ར་ག་བཛྲི་ཎཱི། ཨཱིརྵྱ་བཛྲི་ཎཱི། ཞེས་པ་རྣམས་འདོན་པ་སྤོས་ནས་སོ་སོར་
མེ་ཏོག་ཕུལ། དེ་བཞིན་དུ། ནཻ་ཝེདྱ་བར་དུ་ཕུལ། ཨོཾ་བཛྲ་ས་ཏུ་སུ་སཾ་གྲ་ཧ་ཏ། བཛྲ་རཏྣ་མ་ནུཏྟ་རཾ། བཛྲ་དྷརྨ་གཱ་ཡ་ནཱི། བཛྲ་ཀརྨ་ཀ་རོད་བྷ་ཝེ། ཁྱབ་འཇུག་ཕྱི་མར་འཐག་པར་བྱེད་ཅིང་བདུད་ཀྱི་ཁེངས་པ་རབ་བཅིལ་དབང་ཕྱུག་ཀྱང་ནི་འཇོམས། །ཚངས་པའི་སྒོ་ར་དུམ་བུར་མཛད་དེ་ས་ཆུ་བྱིན་ཟ་རླུང་གི་ཁམས་རྣམས་ཉམས་བྱེད་པ། །འཇིགས་བྱེད་རི་རབ་གཟའ་ཚོགས་བཅས་པའི་མཐོ་རིས་ས་སྟེང་ས་འོག་སྐྱོང་དང་ཕྱོགས་སྐྱོང་ཀླུ། །འཇིག་རྟེན་གསུམ་གནོན་རྣམ་རྒྱལ་སྐུ་ཅན་དཔལ་ལྡན་མི་གཡོ་གཏུམ་ཆེན་ཁྲོ་བོ་རྒྱལ་གྱུར་ཅིག སོ་སོར་མཐེབ་སྲིན་གྱིས་ནང་མཆོད་གཏོར་ཞིང༌། ཨོཾ་ཀྲྀ་ཥྞ་ཨ་ཙ་ལ་ན་མཿ དེ་བཞིན་དུ། ཤྭེ་ཏ་ཨ་ཙ་ལ་སོགས། ཨིརྵྱ་བཛྲི་ཎིའི་བར་དུ་སོ་སོའི་མཚན་སྤེལ་ལ་འབུལ། ལྷ་རྣམས་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོས་ཐུགས་རྒྱུད་གང༌། དཀོན་མཆོག་གསུམ་ལ་བདག་སྐྱབས་མཆི། སོགས། ཡན་ལག་བདུན་པ་བྱ། སྤྲོ་ན་སྐབས་འདིར་འོག་ནས་འབྱུང་བ་ལྟར་དཀྱིལ་འཁོར་གྱི་གཏོར་མ་དང༌། ཆ་གསུམ་ནས་འབྱུང་བ་ལྟར་ཕྱོགས་སྐྱོང་བཅུའི་གཏོར་མ་དང༌། མཁའ་འགྲོ་སྤྱི་གཏོར་རྣམས་ཀྱང་འབུལ་ལོ། །རྡོ་རྗེ་སེམས་དཔའི་ཡི་གེ་བརྒྱ་པ་ལན་གསུམ། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་ནོངས་པ། །དེ་ཀུན་མགོན་པོས་བཟོད་མཛད་རིགས། །ཚུལ་ཁྲིམས་ཙནྡན་ལུས་ལ་བྱུགས། །བསམ་གཏན་གྱི་ནི་གོས་གྱོན་ཏེ། །བྱང་ཆུབ་ཡན་ལག་མེ་ཏོག་བཀྲམ། །ཇི་ལྟར་བདེ་བར་ཞུགས་སུ་གསོལ། ཛཿཧཱུཾ་བཾ་ཧོཿ ཞེས་དཀྱིལ་འཁོར་ཐམས་ཅད་བདག་ཉིད་
ལ་གཉིས་སུ་མེད་པར་ཐིམ། མངོན་རྟོགས་མདོར་བསྡུས་སུ་སྒོམ་པའི་ཚེ། ཨོཾ་ཨཱཿཏིཥྛ་བཛྲ། མན་ཆད་མཎྜལ་གྱི་མཆོད་པ་འདི་བོར་ལ། བསོད་ནམས་ཚོགས་གསོག་སྤྱི་དང་མཐུན་པ་ཞིག་བྱས་པས་ཀྱང་རུང་ངོ༌། །དེ་ནས་ཚད་མེད་བཞི་སྒོམས་ལ། ཨོཾ་ཤཱུ་ནྱ་ཏཱ་སོགས། རང་གི་སྙིང་གའི་ཧཱུཾ་ཡིག་ལས་འཕྲོས་པའི་མེ་ལྕེས་བདག་ལུས་ཁམས་གསུམ་སྣོད་བཅུད་དང་བཅས་པ་ཅིག་ཅར་བསྲེགས་ཏེ་སྟོང་པར་སྦྱངས། སྟོང་པའི་ངང་ལས་བར་དོའི་རྣམ་ཤེས་སྒྱུ་མ་ལྟ་བུའི་ལུས་དཀར་པོ་མཚན་དཔེས་སྤྲས་པ་མཉམ་བཞག་གི་ཕྱག་རྒྱའི་སྟེང་ན་པདྨ་དཀར་པོ་འཛིན་པ། རང་སྣང་གི་ཤེས་རབ་མས་འཁྱུད་ཅིང༌། པད་དཀར་དང་ཟླ་བའི་གདན་ལ་བཞུགས་པ་སྟེང་གི་ནམ་མཁའ་ལ་འཁོར་བར་གྱུར། འོག་ཏུ་ཡཾ་ལས་རླུང་གི་དཀྱིལ་འཁོར། རཾ་ལས་མེའི་དཀྱིལ་འཁོར། བཾ་ལས་ཆུའི་དཀྱིལ་འཁོར། ལཾ་ལས་སའི་དཀྱིལ་འཁོར་རྣམས་སྟེང་ནས་སྟེང་དུ་བརྩེགས་པ། དེའི་སྟེང་དུ་སུཾ་ལས་རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་གྲུབ་པ་ལྕོག་བརྒྱད་དང་ལྡན་པ། གསེར་གྱི་རི་བདུན་རོལ་པའི་མཚོ་བདུན་གླིང་བཅུ་གཉིས་རྒྱ་མཚོ་ཆེན་པོ་ཁོར་ཡུག་དང་བཅས་པ། རི་རབ་ཀྱི་རྩེ་མོར་ཨེ་ལས་ཆོས་འབྱུང་དཀར་པོའི་ནང་དུ། པཾ་ལས་སྣ་ཚོགས་པདྨའི་ལྟེ་བར། ཧཱུཾ་ལས་སྣ་ཚོགས་རྡོ་རྗེ་ཕྱོགས་ཀྱི་མདོག་ཅན་ལས་འོད་ཟེར་འཕྲོས། རྡོ་རྗེའི་ས་གཞིར་གུར་མི་བྱེད་ཅིང་བསྟན་པ་ཕྱི་རོལ་ཡེ་ཤེས་ཀྱི་མེ་དཔུང་དྲག་ཏུ་འབར་བས་བསྐོར་བ། སྣ་ཚོགས་རྡོ་རྗེའི་ལྟེ་བར། བྷྲུཾ་སེར་པོ་ལས་ཐར་པ་ཆེན་པོའི་གཞལ་ཡས་ཁང་གྲུ་བཞི་སྒོ་བཞི་པ། རྩིག་པ་རིམ་པ་ལྔ་དང༌། འདོད་ཡོན་
གྱི་སྣམ་བུ་དང༌། ཕ་གུ་དང༌། དྲྭ་ཕྱེད་དང༌། ཤར་བུ་དང༌། མདའ་ཡབ་ཀྱི་མཛེས་པ། སྒོ་བཞིའི་མདུན་ན་ཀ་བས་བཏེགས་པའི་རྟ་བབས། སྣམ་བུ་བཅུ་གཅིག་དང་ལྡན་པ། བསྲུང་བའི་འཁོར་ལོའི་ཕྱི་རོལ་དངོས་གྲུབ་འབྱུང་བའི་དུར་ཁྲོད་བརྒྱད་ཀྱིས་ཡོངས་སུ་བསྐོར་བའོ། །གཞལ་ཡས་ཁང་གི་ལྷ་སྣམ་ཤར་དཀར། ལྷོ་སེར༌། ནུབ་དམར། བྱང་ལྗང་དབུས་སྔོ་བ། འཕར་མ་གཅིག་དང་བཅས་པ། དབུས་སུ་སྣ་ཚོགས་པདྨ་འདབ་མ་བརྒྱད་པ། དེའི་ལྟེ་བ་དང་འདབ་མ་རྣམས་ལ། ཨ་ལས་ཟླ་བའི་དཀྱིལ་འཁོར་དགུ །དེ་རྣམས་ཀྱི་སྟེང་དུ་རཾ་ལས་ཉི་མའི་དཀྱིལ་འཁོར་དགུ དབུས་ཀྱི་གདན་གྱིས་སྟེང་དུ་ཧཱུཾ་ལས་མི་བསྐྱོད་པ་སྐུ་མདོག་སྔོན་པོ་རྡོ་རྗེ་དང་ དྲིལ་བུ ་འཛིན་པས་རང་འདྲ་བའི་ཡུམ་མཱ་མ་ཀཱི་ལ་འཁྱུད་པ། ཡབ་ཡུམ་སྙོམས་པར་ཞུགས་པའི་དགའ་བ་སྒྱུ་མ་ལྟ་བུའི་སྒྲས། རང་ཉིད་བར་དོའི་རྣམ་ཤེས་ལོངས་སྤྱོད་རྫོགས་པའི་སྐུ་དེ་ཉིད་ནཱ་དའི་རྣམ་པར་གྱུར་ཏེ་སྐར་མདའ་འཕོ་བ་ལྟར་ཡབ་ཀྱི་སྤྱི་བོ་ནས་ཞུགས། བྱང་ཆུབ་ཀྱི་སེམས་སུ་བཞུ་སྟེ་ལྷ་མོའི་པདྨར་སྤྲོས་པ་ཧཱུཾ་མཐིང་ཀར་གྱུར། དེ་ལས་འཕྲོས་པའི་འོད་ཟེར་གྱིས་སེམས་ཅན་ཐམས་ཅད་ཞེ་སྡང་རྡོ་རྗེའི་གོ་འཕང་ལ་བཀོད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས། ཧཱུཾ་ལ་ཐིམ་པ་ལས་རང་ཉིད་མི་གཡོ་བ་ནག་པོ་གཏུམ་པོ་ཁྲོ་བོའི་སྐུར་གྱུར་ཏེ། ཡུམ་གྱི་མཁའི་གཡས་ཕྱོགས་ཀྱི་མཐའ་ལས་ཕྱིར་ཕྱུང༌། ཨོཾ་ཀྲྀཥྞ་ཨ་ཙ་ལ་ཧུཾ་ཕཊ། རང་ཉིད་མི་གཡོ་བ་ཞེ་སྡང་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ནས་རྒྱུའི་རྡོ་རྗེ་འཛིན་པ་ལ་རྡོ་རྗེ་རལ་གྲིས་བརྡེགས་པས་ཡེ་ཤེས་ཀྱི་བདུད་རྩིའི་རང་བཞིན་དུ་ཞུ། མཱ་མ་ཀཱི་དང་ལྷན་ཅིག་བདུད་རྩི་དེ་ཉིད་གསོལ་བས་ཚིམ་ཞིང་དགྱེས་པ་ཆེན་པོས་རྗེས་ཆགས་ཀྱི་གདུང་བས་ཡོངས་སུ་འཁྱུད་པ་ལས། མཱ་མ་ཀཱི་ཞེ་སྡང་རྡོ་རྗེ་མའི་རྣམ་པར་འགྱུར། ཨོཾ་དེ་ཥ་བཛྲི་ཧཱུཾ་ཕཊ། དབུས་ཀྱི་གདན་གྱི་སྟེང་དུ་བདག་གཉིས་གཙོ་བོ་ཡབ་ཡུམ་གྱི་སྐུར་གྱུར་པ་ནི་མཐིང་ཀ་ཨིནྚ་ནཱི་ལའི་འོད་ཟེར་འབར་བའི་སྐུ བརྒྱད་གཉིས་ལོན་པའི་རྣམ་པ་ཅན། འཕྲེང་བག་ཆགས་ཤིར་གྲིམས་པ། ཞལ་གཅིག་ཕྱག་གཉིས་ཆེས་ཆེར་ཁྲོས་པ། རབ་ཏུ་གཏུམ་པས་ཁྲོ་གཉེར་བསྡུས་ཤིང༌། ཤིན་ཏུ་རྣོ་བས་མཆེ་བ་དང་བཅས་པ། ཡ་སོས་མ་མཆུའི་སྒྲོས་མནན་པ། སྟེང་འོག་ཏུ་ཕྱོགས་པར་ཡོ་བའི་གཡས་གཡོན་གྱི་སྤྱན་གཉིས་དང་སྤྱན་དབུས་མ་ཐད་ཀར་གཟིགས་པ་སྟེ་གསུམ་ཀའང་དམར་ཞིངཟླུམ་པ། ཟུར་ཕུད་ལྔ་དང་ལྡན་ཞིང་རིན་པོ་ཆེའི་ཅོད་པན་ཅན། ཕྱག་གཡས་འབར་བའི་རལ་གྲི་འཕྱར་བ། གཡོན་ཞགས་པ་དང་བཅས་པའི་སྡིགས་མཛུབ་འོག་ཏུ་ནོར་འཛིན་མ་ལ་གཏོད་པ། ཞབས་གཡས་པ་གྱེན་དུ་འདེགས་ཤིང་བརྡབས་པས་བདུད་བཞིའི་རང་བཞིན་ཚངས་པ་དབང་པོ་ཉེ་དབང་དྲག་པོ་རྣམས་སྐྲག་པར་མཛད་པ། ཞབས་གཡོན་གྱི་པུས་མོ་གདན་ལ་བཙུགས་པ། གཡོན་ངོས་སུ་འགྱིང་བག་དང་བཅས་ཏེ་མེ་དཔུང་འབར་བའི་དབུས་ན་བཞུགས་པའོ། །ཞབས་གཡས་གཡོན་གོ་བཟློག་ཀྱང་རུང་ངོ༌། །དེ་ལ་འཁྱུད་པའི་ཡུམ་ཞེ་སྡང་རྡོ་རྗེ་མ་ལོ་བཅུ་གཉིས་ལོན་པའི་རྣམ་པ་ཅན་ལང་ཚོ་ལ་བབས་ཤིང་ནུ་མ་རྒྱས་པ་
ཕྱག་གཡས་རྡོ་རྗེ་གྲི་གུག་འཕྱར་ཞིང༌། གཡོན་བདུད་བཞིའི་ཁྲག་གིས་གང་བའི་ཐོད་པ་ཡབ་ལ་སྟོབ་པ་དབུ་སྐྲ་ལྟག་པར་ཕྱེད་བཅིངས་སུ་བྱས་པ་བྱིན་པ་གཉིས་ཀྱིས་དགྱེས་པར་འཁྲིལ་བའི་སྐུ་ཅན་བཅོམ་ལྡན་འདས་དང་མཚུངས་པའི་ཤེས་རབ་མ་སྟེ། གཉིས་ཀའང་རིན་པོ་ཆེའི་དབུ་རྒྱན་སྙན་རྒྱན་མགུལ་རྒྱན་འོག་པག་གདུ་བུ་དོ་ཤལ་དོ་ཤལ་ཕྱེད་པ་རྐང་གདུབ་ཀྱི་གཡེར་ཁ་ལ་སོགས་པས་ཉེ་བར་བརྒྱན་པ། བདེ་བ་ཆེན་པོ་དང་སྟོང་པ་ཉིད་ཟུང་དུ་འཇུག་པའི་ངོ་བོར་དག་པའོ། །ཤེས་རབ་ཀྱི་མཁའ་ཨ་ལས་པདྨ་དམར་པོ་འདབ་མ་གསུམ་པ། བནྡྷུཀ་ལྟ་བུའི་རྡུལ་གྱིས་མཚན་པའི་ཟེའུ་འབྲུ་ལ་ཨས་མཚན་པ། ཐབས་ཀྱི་བསང་བ་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པ་ནོར་བུ་ལ་ཨོཾ་གྱིས་མཚན་པ། ལྷ་མོའི་སྤྱི་བོར་ཨོཾ་ཨཱཿཧུཾ། རྗེས་ཆགས་ཀྱི་རོལ་པ་ཆེན་པོ་དང་བཅས་པས་སྙོམས་པར་ཞུགས་པས་དགའ་བའི་སྒྲས། དེ་བཞིན་གཤེགས་པ་ཐམས་ཅད་རིགས་ལྔའི་རྣམ་པར་སྤྱན་དྲངས། ཡབ་ཀྱི་སྤྱི་བོ་ནས་ཞུགས་བྱང་ཆུབ་ཀྱི་སེམས་ཨ་ཝ་དྷུ་ཏཱིའི་ལམ་ནས་ཡུམ་གྱི་མཁར་བབས་པ་དཀར་དམར་རོ་གཅིག་ཏུ་འདྲེས་པ་ལས་ཐིག་ལེའི་གོང་བུ་བརྒྱད་དུ་གྱུར། དེ་རྣམས་ཧཱུཾ་ཡིག་བརྒྱད་དུ་གྱུར། དེ་རྣམས་ལས་འོད་ཟེར་འཕྲོས། སེམས་ཅན་ཐམས་ཅད་རིགས་བཞི་ཡབ་ཡུམ་གྱི་གོ་འཕངས་ལ་བཀོད། སླར་འདུས་ཏེ་ཐིམ་པ་ལས་ལྷ་བརྒྱད་དུ་གྱུར། ཡབ་རྣམས་ཡུམ་གྱི་བྷ་གའི་གཡས་ཀྱི་མཐའ་དང་ཡུམ་རྣམས་གཡོན་གྱི་མཐའ་ནས་སྤྲོས། ཨོཾ་ཤྭེ་ཏ་ཨ་ཙ་ལ་ཧཱུཾ་ཕཊ། མི་གཡོ་བ་དཀར་པོ་འཁོར་ལོས་མཚན་པའི་
རལ་གྲི་འཛིན་པ་ཤར་གྱི་གདན་གྱི་སྟེང་དུ་འཁོད། ཨོཾ་མ་ཧཱ་བཛྲི་ཧཱུཾ་ཕཊ། གཏི་མུག་རྡོ་རྗེ་མ་དཀར་མོ་འཁོར་ལོས་མཚན་པའི་གྲི་གུག་འཛིན་པ་ཤར་ལྷོའི་གདན་ལ་འཁོད། ཨོཾ་བཱི་ཏ་ཨ་ཙ་ལ་ཧཱུཾ་ཕཊ། མིག་གཡོ་བ་སེར་པོ་རིན་པོ་ཆེས་མཚན་པའི་རལ་གྲི་འཛིན་པ་ལྷོའི་གདན་ལ་འཁོད། ཨོཾ་བཱི་ཤུ་ན་བཛྲི་ཧཱུཾ་ཕཊ། ཕྲ་མ་རྡོ་རྗེ་མ་སེར་མོ་རིན་པོ་ཆེས་མཚན་པའི་གྲི་གུག་འཛིན་པ་ལྷོ་ནུབ་ཀྱི་གདན་ལ་འཁོད། ཨོཾ་རཀྟ་ཨ་ཙ་ལ་ཧཱུཾ་ཕཊ། མི་གཡོ་བ་དམར་པོ་པདྨའི་མཚན་པའི་རལ་གྲི་འཛིན་པ་ནུབ་ཀྱི་གདན་ལ་འཁོད། ཨོཾ་རཱ་ག་བཛྲི་ཧཱུཾ་ཕཊ། འདོད་ཆགས་རྡོ་རྗེ་མ་དམར་མོ་པདྨས་མཚན་པའི་གྲི་གུག་འཛིན་པ་ནུབ་བྱང་གི་གདན་ལ་འཁོད། ཨོཾ་ཤྱཱ་མ་ཨ་ཙ་ལ་ཧཱུཾ་ཕཊ། མི་གཡོ་བ་ལྗང་ཁུ་སྣ་ཚོགས་ཨུདྤ་ལས་མཚན་པའི་རལ་གྲི་འཛིན་པ་བྱང་གི་གདན་ལ་འཁོད། ཨོཾ་ཨིརྵ་བཛྲི་ཧཱུཾ་ཕཊ། ཕྲག་དོག་རྡོ་རྗེ་མ་ལྗང་ཁུ་ཨུདྤ་ལས་མཚན་པའི་གྲི་གུག་འཛིན་པ་བྱང་ཤར་གྱི་གདན་ལ་འཁོད། ཁྲོ་བོ་བཞི་པོ་ནི་བཅོམ་ལྡན་འདས་དང་མཚུངས་པ། འོན་ཀྱང་གཡོན་པའི་སྡིགས་མཛུབ་གྱེན་དུ་བསྒྲེང་པའོ། །ལྷ་མོ་བཞི་པོ་ནི་བཅོམ་ལྡན་འདས་མ་དང་མཚུངས་ཏེ་འོན་ཀྱངཕྱག་གཡས་གྲི་གུག་ནམ་མཁའ་ལ་འཕྱར་ཞིང༌། གཡོན་བདུད་བཞིའི་ཁྲག་གིས་རིམ་པས་གང་བའི་ཐོད་པ་ཐུགས་ཀར་འཛིན་པ། ཞབས་གཡས་ཀྱི་མཐིལ་དང་གཡོན་གྱི་པུས་མོ་ཉི་མའི་དཀྱིལ་འཁོར་ལ་གཏད་པའོ། །དེ་ནས་གཙོ་བོ་ཡབ་ཡུམ་རྗེས་སུ་ཆགས་པའི་བདེ་བ་ཆེན་པོ་འདོད་ཆགས་ཆེན་པོའི་དམ་ཚིག་གི་སྦྱོར་བ་ལས་བྱང་ཆུབ་སེམས་སུ་ཞུ་བར་གྱུར།
དེ་ནས་ལྷ་མོ་བཞིས་འགྲོ་བའི་དོན་ལ་བསྐུལ་བ་ནི། གཏི་མུག་རྡོ་རྗེ་མས། ཁྱབ་བདག་བྱམས་པ་རྣམས་སྤངས་ནས། །སྟོང་པའི་རང་བཞིན་དུ་མ་མཛད། ཁྱོད་དང་རྣམ་བྲལ་བདག་འགུམ་པས། །འགྲོ་ཀུན་སྟོང་པར་མ་མཛད་ཅིག ཕྲ་མ་རྡོ་རྗེ་མས། སྙིང་རྗེའི་སེམས་བྲལ་བདག་འགུམ་པས། །ཁྱབ་བདག་སྟོང་པར་མ་མཛད་ཅིག །བདག་གི་ལུས་འདི་སྡུག་བསྔལ་བས། །འཚོ་བ་དང་བྲལ་ཅི་སྟེ་མཛད། འདོད་ཆགས་རྡོ་རྗེ་མས། ཅི་སྟེ་མཁས་པ་ཁྱོད་ཀྱི་ནི། །དགའ་བ་སྤངས་ནས་སྟོང་པར་འཇུག །འཇིག་རྟེན་མ་ལུས་པ་རྣམས་དང༌། །བདག་གི་ཡིད་ནི་ཁྱོད་ལ་གཏད། ཕྲག་དོག་རྡོ་རྗེ་མས། ལང་ཚོ་དང་ལྡན་བཏང་སྙོམས་པའི། །མིག་ནི་སྟོང་པ་འབྲས་མེད་ཅན། །སྟོང་པའི་རང་བཞིན་ཉིད་སྤོང་ལ། །བདག་ལ་མཉམ་ཉིད་སྦྱོར་བ་མཛོད། ཅེས་པའི་གླུ་སྒྲ་སྙན་ལྟ་བུའི་ཡོངས་སུ་སད་དེ། ཐིག་ལེ་ལས་སྐད་ཅིག་གིས་བཅོམ་ལྡན་འདས་ཡན་ལག་མ་དང་བཅས་པ་སྔོན་བཞིན་དུ་གྲུབ་པར་གྱུར། ལྷ་ཐམས་ཅད་ཀྱི་དཔྲལ་བར་འཁོར་ལོ་དཀར་པོ་ཨོཾ་གྱིས་མཚན་པ། མགྲིན་པར་པདྨ་དམར་པོ་ཨཱཿཡིས་མཚན་པ། ཐུགས་ཀར་རྡོ་རྗེ་སྔོན་པོ་ཧཱུཾ་གིས་མཚན་པ། ཐུགས་ཀའི་ཧཱུཾ་གི་འོད་ཟེར་གྱིས་ཡེ་ཤེས་སེམས་དཔའ་གཏུམ་པོ་ལྷ་དགུའི་དཀྱིལ་འཁོར་ལ་སངས་རྒྱས་སྲས་དང་བཅས་པས་བསྐོར་བ་ཨོཾ་བཛྲ་ས་མཱ་ཛཿ པུཥྤེ་སོགས་ཀྱིས་མཆོད། ཨོཾ་ཙཎྜ་མ་ཧཱ་རོ་ཥ་ཎ་ས་པཱ་རི་ཝཱ་རཱ་ས་ཧི་ཏ་ཨཱ་གཙྪ་ཨཱ་གཙྪ་ཛཿཧཱུཾ་བཾ་ཧོཿ ཨ་ཏྲ་མཎྜལ་ཨདྷཥྛཱ་ནཾ་ཀུ་རུ་
ཧཱུཾ་ཕཊ་སྭཱཧཱ། ལན་གསུམ་གྱིས་མཐར། ཛཿཧཱུཾ་བཾ་ཧོཿགཉིས་སུ་མེད་པར་ཐིམ། སླར་ཡང་དབང་གི་ལྷ་དཀྱིལ་འཁོར་གྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿ པུཥྤེ་སོགས་ཀྱིས་མཆོད། ཨོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏཱ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གི་སྐུ་ཁྲུས་གསོལ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་གསུངས་ཤིང་དབང་བསྐུར་བས་ལྷ་ཐམས་ཅད་ཀྱི་སྐུ་གང་དྲི་མ་དག་ཆུའི་ལྷག་མ་སྤྱི་བོར་གནས་པ་ཡོངས་སུ་གྱུར་པ་ལས་གཙོ་བོ་ཡབ་ཡུམ་ལ་མི་བསྐྱོད་པ། ཤར་དང་ཤར་ལྷོ་པ་ལ་རྣམ་སྣང་ལྷོ་དང་ལྷོ་ནུབ་པ་ལ་རིན་འབྱུང་ནུབ་དང་ནུབ་བྱང་པ་ལ་འོད་དཔག་མེད་བྱང་དང་བྱང་ཤར་པ་ལ་དོན་གྲུབ་ཀྱིས་དབུ་བརྒྱན། རངགི་སྙིང་ག་ནས་སྤྲུལ་པའི་མཆོད་པའི་ལྷ་མོ་རྣམས་ཀྱིས་མཆོད་པར་བསམས་ལ། ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྷ་མོ་བརྒྱད་དང་བཅས་པས་མཆོད། ནང་མཆོད་གཏོར་མ་ལྟར་བྱིན་གྱིས་རླབས་ལ་སོ་སོའི་སྔགས་རེའི་མཐར་འབྲུ་གསུམ་གྱི་ནང་མཆོད་འབུལ་ཀྱིས་སྦྱངས། དཀྱིལ་འཁོར་པ་ཐམས་ཅད་ཀྱིས་གཙོ་བོ་ལ་བསྟོད་པར་བསམས་ལ། འོད་འཕྲོ་གཏུམ་པའི་སྤྱན་དང་འཇིགས་རུང་ཁྲོ་གཉེར་དང་ལྡན་ཚེམས་ཀྱིས་མ་མཆུ་མནན། གཡོན་པའི་པུས་མོ་ས་ལ་རྣམ་བཀོད་གཞན་པའི་ཞབས་ཀྱིས་གདུལ་དཀའི་བདུད་རྣམས་གནོན། སྲིད་གསུམ་འཇིགས་འཕྲོག་མཆོག་གིས་རལ་གྲིའི་ཕྱག་དང་ཁུ་ཚུར་སྡིགས་མཛུབ་ཞགས་པ་ཅན། རྟག་པར་ཨིནྚ་ནཱི་ལ་ལྟར་འབར་གཏུམ་ཆེན་ཁྲོ་བོ་མི་གཡོ་རྒྱལ་གྱུར་ཅིག ཞེས་བསྟོད་པར་བྱའོ། །དེ་ནས་རླུང་ཁ་སྦྱོར་
དྲག་ཏུ་བཟུང་ལ། ཆོས་ཐམས་ཅད་མཉམ་པ་ཉིད་སྒྱུ་མ་ལྟར་ཤེས་པའི་སྒོ་ནས་གཏི་མུག་རྡོ་རྗེ་མི་གཡོ་བ་དཀར་པོ་ལ་རྡོ་རྗེ་རལ་གྲིས་སྡིགས་པས་འོད་ཀྱི་ཕུང་པོར་གྱུར་ནས་བདག་ལ་ཐིམ། རང་ཉིད་མི་གཡོ་བ་དཀར་པོའི་གཟུགས་སུ་གྱུར་ནས་གཏི་མུག་རྡོ་རྗེ་མ་དང་ལྷན་ཅིག་འདོད་ཆགས་ཆེན་པོའི་དམ་ཚིག་གི་སྦྱོར་བ་ལ་གནས་པར་བསམས། སླར་ཡང་རང་སྣང་གི་ཡེ་ཤེས་ལས་གྲུབ་པའི་མི་གཡོ་བ་དཀར་པོ་དང་གཏི་མུག་རྡོ་རྗེ་མ་ཤར་དང་ཤར་ལྷོར་སྔར་བཞིན་འཁོད། རང་ཉིད་ཞེ་སྡང་རྡོ་རྗེའི་གཟུགས་ཀྱི་དབུས་སུ་གནས་པར་བསམས། དེ་བཞིན་དུ་རིགས་ལྷག་མ་གསུམ་ལའང་སྦྱར། དེ་ལྟར་ན་ཟླ་བ་གཅིག་ཉིད་ཀྱི་གཟུགས་བརྙན་དུ་མ་ཆུ་དང་མེ་ལོང་སོགས་ལ་འཆར་བ་བཞིན་དུ། རང་ཉིད་དཔའ་བོ་གཅིག་པུའི་རང་བཞིན་ལྷ་དགུའི་དཀྱིལ་འཁོར་དུ་འཆར་བ་སྣང་ལ་རང་བཞིན་མེད་པ་ལ་མཉམ་པར་བཞག དེ་ནས་དག་པ་དྲན་པ་ནི། སྒོམ་པའི་རིམ་པ་དག་པ་དང་བཅས་པ་རྒྱས་པར་རྒྱུད་ཀྱི་རྒྱལ་པོ་ཉིད་ལས་འབྱུང་བ་དེ་ཉིད་ཇི་ལྟ་བ་བཞིན་བརྗོད་པའམ། ཕྱག་ལེན་ལ་མདོ་ཙམ་བརྗོད་པར་མཛད་པ་ནི། གྲུ་བཞི་ཚངས་པའི་གནས་བཞི་སྟེ། །སྒོ་བཞི་བདེན་པ་བཞི་པོའོ། །བསམ་གཏན་བཞི་ཡི་རྟ་བབས་དང༌། །འཕགས་ལམ་བརྒྱད་ཀྱི་ཀ་བ་རྣམས། །སེམས་རྩེ་གཅིག་པས་འཕར་མ་དང༌། །པདྨ་སྐྱེ་གནས་དག་པ་ཉིད། །སྤྲུལ་པ་ཁ་དོག་སྣ་ཚོགས་པ། །གནས་ནི་གསུང་རབ་ཡན་ལག་དགུ །འདོད་ཆགས་ཆེན་པོས་ཕྱོགས་དམར་པོ། །རིགས་བཞི་དབྱེ་བས་མཚམས་རྣམས་ནི། །སེར་དང་ལྗང་སེར་ནག་པོ་སྟེ། །ཉི་ཟླ་ཁུ་ཁྲག་དག་པའོ། །
གཟུགས་སོགས་ཕུང་པོ་ལྔ་པོ་ནི། །འགྱུར་མེད་ཡེ་ཤེས་ལྔ་དག་པ། །གཏུམ་ཆེན་ལྔ་སྟེ་ཁམས་ལྔ་པོ། །སྟོང་པ་ལྔ་དག་ཡུམ་རྣམས་སོ། །ཤེས་རབ་ཐབས་དངོས་རལ་གྲི་ཞགས། །དབྱེར་མེད་རྡོ་རྗེ་སྡིགས་མཛུབ་སྟེ། །ཚངས་དང་ས་འོག་སྐྱོང་བའི་ཕྱག། སྟེང་དང་འོག་ཏུ་འཕྱར་ཞིང་གཏོད། །ཞབས་སྟབས་བདུད་བཞི་རྣམས་ཉེད་པ། །གཞོན་ནུ་མ་ཡི་བདེ་བ་ལ། །དགྱེས་སྤྱོད་ཞབས་གཞན་འཛིན་མར་གཏོད། །དེ་ཕྱིར་རྡོ་རྗེ་བྱང་ཆུབ་འདིའོ། །སྟོན་པ་རྒྱལ་བ་གཅིག་པུ་ཉིད། །ལྔ་ཡི་ཚུལ་གྱིས་ཡང་དག་གནས། །ཤེས་རབ་ཕ་རོལ་ཕྱིན་གཅིག་པུའང༌། །རྣམ་ལྔའི་ཚུལ་གྱིས་ཡང་དག་གནས། དེ་ནས་བཟླས་པ་ནི། སྙིང་གར་པད་ཉི་ལ་ཧཱུཾ་ཡིག་སྔགས་འཕྲེང་དང་བཅས་པ་གསལ་བཏབ་སྟེ། དེ་ལས་སྔགས་ཀྱི་འཕྲེང་བ་བྱུང༌། འཁོར་ལོ་ལྟར་འཁོར་བའི་ཚུལ་སྤྱི་དང་འདྲ་བར་བསྒོམས་ནས། ཨོཾ་ཙཎྜ་མཧཱ་རོ་ཥ་ཎ་ཧཱུཾ་ཕཊ། ཅེས་བྱ་བ་གསང་སྔགས་ཡི་གེ་བཅུ་པོ་འདི་ཉིད་གཙོ་བོར་བཟླ་ཞིང༌། གཞན་ཡང༌། ཨོཾ་ཨ་ཙ་ལ་ཧཱུཾ་ཧཾ། ཞེས་པ་དང༌། ཨོཾ་ཧཱུཾ་ཕཊ། ཅེས་པ་དང༌། ཧཱུཾ་ཧཱུཾ་ཧཱུཾ་ཞེས་པ་རྣམས་ཀྱང་སྙིང་པོའོ། །རྒྱུད་ལས་འཕྲེང་བའི་སྔགས་གཞན་ཡང་གསུངས་མོད། ཕྱག་ལེན་ལ་འདི་ཁོ་ན་བཟླ་བར་མཛད། ཨོཾ་ཧྲྃ་ཧྲྃ་ཧྲཽཾ་ཙཎྜ་རཱུ་པེ་ཙ་ཊ་ཙ་ཊ། པྲ་ཙ་ཊ་པྲ་ཙ་ཊ། ཀ་ཧ་ཀ་ཧ། པྲ་ཕུ་ར་པྲ་ཕུ་ར། པྲ་ཕཱ་ར་ཡ་པྲ་ཕཱ་ར་ཡ། ཧ་ན་ཧ་ན། གྲ་ས་གྲ་ས། བནྡྷ་བནྡྷ། ཛམྦྷ་ཡ་ཛམྦྷ་ཡ། སྟམྦྷ་ཡ་སྟམྦྷ་ཡ། མོ་ཧཱ་ཡ་མོ་ཧཱ་ཡ། སརྦ་ཤ་ཏྲཱུ་ནཱཾ། མུ་ཁ་བནྡྷ་ནཱཾ། ཀུ་རུ་ཀུ་རུ། སརྦ་ཊཱ་ཀི་ནཱི་ནཱཾ། གྲ་ཧ་བྷུ་ཏ། པི་ཤཱ་ཙ་བྱ་དྷི། ཡཀྵ་ཎཱཾ་ཏྲ་ས་ཡ་ཏྲ་ས་ཡ།
མ་ར་མ་ར། མཱ་ར་ཡ་མཱ་ར་ཡ། རུ་རུ་ཙཎྜ། ཙཎྜ་རུ་ཀ་རཀྵ་རཀྵ། ལྷ་སྦྱིན་ལ་ཙཎྜ་མ་ཧཱ་སེ་ནཿ སརྦཾ་ཨཱ་ཛྙ་པ་ཡ་ཏི། ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། རྩ་བའི་སྔགས་སོ། ན་མཿསརྦ་ཨ་ཤ་པ་རི་པཱུ་ར་ཀེ་བྷྱོཿ སརྦ་ཏ་ཐཱ་ག་ཏ་བྷྱཿ སརྦ་ཏྲཊ་ཨ་མོ་གྷ་ཙཎྜ་མ་ཧཱ་རོ་ཥ་ཎ་སྥོ་ཊ་ཡ་ཧཱུཾ།བྷྲ་མ་ཡ་བྷྲ་མ་ཡ་ཧཱུཾ། ཏྲཊ་མོ་ཧཾ། ཞེས་པ་ནི་མི་གཡོ་བ་རིགས་ལྔ་སྤྱིའི་སྔགས་སོ། །ཨོཾ་བཛྲ་ཡོ་གི་ནཱི་ཧཱུཾ་ཕཊ། ཨོཾ་པྲཛྙཱ་པ་ར་མི་ཏཱ་ཧཱུཾ་ཕཊ། ཨོཾ་བཽ་ཧེ་རི་ཧཱུཾ་ཕཊ། ཅེས་པ་གསུམ་ནི་ཡུམ་གྱི་སྙིང་པོའོ། །ཨོཾ་པི་ཙུ་པི་ཙུ་པྲཛྙཱ་ཝརྔྷ་ནི་ཛྭ་ལ་ཛྭ་ལ་མེ་ཝརྡྷ་ནི།དྷི་རི་དྷི་རི་བུརྔྷི་ཝརྡྷ་ནི་སྭཱཧཱ། ཞེས་པ་ནི་ཡུམ་གྱི་རྩ་སྔགས་དང་འཕྲེང་བ་བྱིན་གྱིས་རླབས་པའི་སྔགས་ཀྱང་ཡིན་ནོ། །གོང་དུ་བཤད་པའི་སོ་སོའི་མངལ་འབྱིན་གྱི་སྔགས་རྣམས་ཀྱང་ཅི་རིགས་པར་བཟླའོ། །དེ་ནས་མཐར་དཀྱིལ་འཁོར་བསྡུ་བར་འདོད་ན། རང་གི་སྙིང་གའི་ཧཱུཾ་དང་སྦྱོར་མཚམས་ནས་འོད་ཟེར་འཕྲོས་ཏེ། སྣོད་བཅུད་ཐམས་ཅད་རྟེན་དང་བརྟེན་པའི་དཀྱིལ་འཁོར་དུ་བྱས། དེ་རྣམས་འོད་དུ་ཞུ་སྒོམ་པའི་དཀྱིལ་འཁོར་ལ་ཐིམ་ཕྱོགས་ཀྱི་དཔའ་བོ་བཞི་པོ་བདག་ཉིད་ལ་ཐིམ་ལྷ་མོ་བཞི་པོའང་ཡུམ་ལ་ཐིམ་སྟེ་ཡབ་ཡུམ་རྗེས་ཆགས་ཀྱི་བདེ་བ་ཆེན་པོས་རྟེན་གྱི་དཀྱིལ་འཁོར་དང་བཅས་པ་འོད་གསལ་དུ་སྐད་ཅིག་གིས་ཐིམ་པར་གྱུར། དེ་ལས་རང་ཉིད་དཔའ་བོ་གཅིག་པའི་རྣམ་པར་གྱུར་པའི་གནས་གསུམ་བྱིན་གྱིས་རླབས། དགེ་བ་བྱང་ཆུབ་ཏུ་བསྔོས་ནས། ཐུན་མཚམས་ཀྱི་བྱ་བ་ལ་འཇུག གཏོར་མ་འབུལ་བར་འདོད་ན། ཁ་ཟས་བཟང་དགུ་ལས་བྱས་པའི་གཏོར་མ། ཉེར་སྤྱོད་ལྔ་དང༌། ནང་མཆོད་སོགས་འདུས་བྱས། མནྜལ་མཆོད་པའི་སྐབས་སུ་བཤད་པ་བཞིན་ཨ་མྲྀ་ཏ་དང་བསང་ཆུས་
སྦྱངས། མཆོད་པ་རྣམས་ཀྱང་སྔགས་ཙམ་གྱིས་བྱིན་གྱིས་རླབས། དེ་ནས ཨོཾ་སྭ་བྷ་ཝཱ་ཤུདྷ་སརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་ཡཾ་ལས་རླུང༌། རཾ་ལས་མེ། ཀཾ་ལས་མི་མགོའི་སྒྱེད་པུ་གསུམ་གྱིས་སྟེང་དུ། ཨ་ལས་པདྨའི་སྣོད་ཡངས་ཤིང་རྒྱ་ཆེ་བའི་ནང་དུ། བྷྲུཾ་ཨཾ་ཛིཾ་ཁཾ་ཧཱུཾ་ལས་ཤ་ལྔ། མཾ་ལཾ་པཾ་ཏཾ་བཾ་ལས་བདུད་རྩི་ལྔ་རྣམས་རང་རང་གི་ས་བོན་གྱིས་མཚན་པ། རླུང་གཡོས་མེ་སྦར་རྫས་རྣམས་ཞུ་བའི་རླངས་པ་དུ་བ་ལྟར་འཁྲིགས་པའི་དབུས་སུ་ཨོཾ་ལས་རལ་གྲིའི་རྩེ་མོ་ཐུར་དུ་བསྟན་པ་སྟེང་དུ་ཧཱུཾ་ཡིག་དང་བཅས་པ། དེ་ལས་བྱུང་བའི་འོད་ཟེར་གྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་ཐམས་ཅད་དང་འཇིག་རྟེན་ཁམས་ཀྱི་བདུད་རྩི་ཐམས་ཅད་བཀུག་ནས་ཧཱུཾ་ལ་ཐིམ། ཧཱུཾ་ཡིག་རལ་གྲི་དང་བཅས་པ་ལྷུངས་ནས་རྫས་རྣམས་དང་རོ་གཅིག་ཏུ་འདྲེས་པ་ལས་བདུད་རྩིའི་རྒྱ་མཚོ་ཆེན་པོ་ཡོངས་སུ་ཆད་པ་མེད་པར་འགྱུར། ཨོཾ་ཨཱཿཧཱུཾ། ལན་གསུམ་གྱིས་བྱིན་གྱིས་རླབས། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས་གཏུམ་པོ་ལྷ་དགུའི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། ཨོཾ་ཙཎྜ་ནས་ཛཿཧཱུཾ་བཾ་ཧོཿའི་བར་གོང་བཞིན། ལྷ་རྣམས་ཀྱི་ལྗགས་ཧཱུཾ་ལས་བྱུང་བའི་རྡོ་རྗེའི་སྦུ་གུས་གཏོར་མ་དྲངས་ནས་གསོལ་བར་གྱུར། ཨོཾ་ན་མོ་བྷ་ག་ཝ་ཏེ་ཤྲཱི་ཙནྚ་མ་ཧཱ་རོ་ཥ་ཎཱ་ཡ་དེ་ཝ་ཨ་སུ་ར་མ་ནུ་ཥྟྱ་དྲཱ་ས་ནཱ་ཡ། སམ་བྷ་མ་ར་ས་ལ་བི་ནཱ་ཤ་ནཱ་ཡ། རཏྣ་མུ་ཀུ་ཊ་ཀྲི་ཏ་སི་ར་སེ། ཨི་མཾ་བ་ལིང་གྲྀཧྞ་གྲྀཧྞ། སརྦ་བི་གྷྣཱཾ་ཧ་ར་ཧ་ར། ཙ་ཏུརྨཱ་ར་ན།
ནི་བཱ་ར་ཡ། ནི་བཱ་ར་ཡ། ཏྲཱ་ས་ཏྲཱ་ས། བྷྲ་མ་བྷྲ་མ། ཙྪིནྡྷ་ཙྪིནྡྷ། བྷིནྡྷ་བིནྡྷ། ནཱ་ཤ་ཡ་ནཱ་ཤ་ཡ། ཏ་པ་ཏ་པ། ཤོ་ཥ་ཡ་ཤོ་ཥ་ཡ། ཙྪེ་ད་ཙྪེ་ད། བྷེ་ད་བྷེ་ད། དུཥྟཾ་ས་ཏྭཾ་མཱ་མ་བི་རུདྡྷ་ཙིཏྟ་ཀྟྲན། བྷརྨིཾ་ཀུ་རུ་ཀུ་རུ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པ་ལན་བདུན་ལ་སོགས་པས་ཕུལ། ཆུ་བཞིན་སྔོན་དུ་འགྲོ་བའི་སྒོ་ནས་ཉེར་སྤྱོད་ལྔས་མཆོད། ཨོཾ་བཛྲ་ལཱ་སྱེ་ཧཱུཾ། ཨོཾ་བཛྲ་མཱ་ལེ་ཏྲཾ། ཨོཾ་བཛྲ་གྲི་རྟི་ཧྲིཿ ཨོཾ་བཛྲ་ནྲི་རྟི་ཨཱཿ ཨོཾ་བཛྲ་དྷུ་པེ་ཧཱུཾ། ཨོཾ་བཛྲ་པུཥྤེ་ཏྲཾ། ཨོཾ་བཛྲ་ཨཱ་ལོ་ཀེ་ཧྲིཿ ཨོཾ་བཛྲ་གནྡྷེ་ཨཱཿ ཀྱཻ་མཐའ་གཉིས་རྣམ་པར་མ་གཡོས་ཀྱང༌། །སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། །འཇིགས་བྱེད་ཆེན་པོས་འགྲོ་བ་ཀུན་སྒྲོལ་ཞིང༌། །སྲིད་པ་གསུམ་ན་དགྱེས་པའི་གར་མཛད་དེ། །སྲིད་པའི་ཆུ་བོ་སྐེམས་ཤིང་བདུད་རྣམས་འཇོམས། །སྲིད་པའི་རླུང་གིས་མི་གཡོ་ཐུགས་རྗེས་མགོན། །རབ་བརྗིད་མི་གཡོ་མགོན་ལ་ཕྱག་འཚལ་ལོ། །ཞེས་པས་བསྟོད། གོང་བཞིན་ནང་མཆོད་འབུལ། དངོས་གྲུབ་བླངས་ལ་ཡི་གེ་བརྒྱ་པས་བཟོད་པར་གསོལ། ཕྱོགས་སྐྱོང་བཅུ་དང་མཁའ་འགྲོ་སྤྱིའི་གཏོར་མའང་ཕུལ་ལ། འདོད་དོན་གསོལ་བ་གདབ་པའི་བར་དུ་བྱས་ནས། མ་རྙེད་ཡོངས་སུ་མ་ཚང་དང༌། སོགས་དང༌། རྫོགས་སངས་རྒྱས་དང་དེ་ཡི་སྲས། །མཆོད་འོས་ལྷ་དང་ཚངས་པ་སོགས། །འཇིག་རྟེན་སྐྱོང་རྣམས་ཆོ་ག་འདིས། །བྱ་བ་ནོངས་ནམས་བཟོད་པར་མཛོད། ཛཿཧཱུཾ་བཾ་ཧོཿ ཡེ་ཤེས་
ཀྱི་དཀྱིལ་འཁོར་བདག་ཉིད་ལ་ཐིམ སེ་གོལ་ཕྱིར་གཏོགས་ཅིང༌། ཨོཾ་གཙྪ་གཙྪ་སྭ་བྷཱ་ཝ་ནཱཾ། ཞེས་པས་འཇིག་རྟེན་པའི་ལྷ་རྣམས་དགྱེས་པ་དང་བཅས་ཏེ་རང་རང་གི་གནས་སུ་གཤེགས་པར་བསམ། ཐུན་མཚམས་ཐམས་ཅད་དུ་ལྷའི་ང་རྒྱལ་དང་མ་བྲལ་པར་སྤྱོད་ཅིང༌། དེ་ལྟར་བསྐྱེད་པའི་རིམ་པ་དང་བཟླས་བརྗོད་ལ་བརྩོན་པས་དེ་ཐམས་ཅད་ཀྱང་སྤྲོས་མེད་ཀྱི་ཡེ་ཤེས་མཆོད་ལ་རེག་པའི་ཕྱིར་འདི་ཉིད་རྒྱུད་ལས་འབྱུང་བའི་རིམ་པས་རྫོགས་པའི་རིམ་པ་སྒོམ་པར་བྱ་སྟེ། རིམ་གཉིས་ཀྱི་ཡེ་ཤེས་བརྟན་པ་ན་རིག་པ་བརྟུལ་ཞུགས་ཀྱི་སྤྱོད་པ་སྤྱད་པས་འབྲས་བུ་མཆོག་ལ་སྦྱར་བར་བྱའོ། །གཞན་ཡང་ཡེ་ཤེས་ཀྱི་སྟོབས་རྙེད་ནས་རང་གཞན་གྱི་དོན་དུ་འཕྲིན་ལས་རབ་འབྱམས་རྣམས་ཀྱང་སྒྲུབ་པར་བྱའོ། །མ་ལུས་བདུན་སྡེ་ཀླད་པ་འགེམས་བྱེད་པ། །གང་འདི་སྲིད་གསུམ་གཡུལ་ལས་རྣམ་རྒྱལ་བའི། །བླ་མེད་རྒྱལ་ཐབས་མཆོག་གྱུར་དེང་འདིར་སྤེལ། །སྲིད་ལས་རྒྱལ་འདོད་རྣམས་ཀྱིས་འདི་ལོང་ཤིག །འདིར་འབད་དགེ་བས་མཐའ་དག་འགྲོ་འདི་ཡི། །འཆིང་བ་གཅོད་བྱེད་དེ་ཡི་སྙིང་རྗེ་ཆེ། །བྱང་ཆུབ་མཆོག་ལ་མྱུར་བར་འདྲེན་མཛད་པ། །དཔལ་ལྡན་གཏུམ་པོའི་གོ་འཕང་མྱུར་ཐོབ་ཤོག །དཔལ་ལྡན་གཏུམ་པོ་ཁྲོ་བོ་ཆེན་པོ་མི་གཡོ་བ་ལྷ་དགུའི་སྒྲུབ་ཐབས་བདུད་ལས་རྣམ་པར་རྒྱལ་བ་ཞེས་བྱ་བ་འདི་ཡང༌། སེམས་ཅན་མང་པོ་ལ་ཕན་པར་མཐོང་ནས་རྒྱལ་ཁམས་པ་ཏཱ་ར་ནཱ་ཐས་ཉེ་བར་སྦྱར་ནས་བསྐུལ་བ་པོ་དང་ཡི་གེ་པ་ནི་སྡེ་སྣོད་འཛིན་པ་ཤཱཀྱ་བསྟན་འཛིན་ནོ།། །།མངྒ་ལཾ། །ཞུས་དག །