རབ་གནས་འགྲོ་ཕན་རྒྱས་བྱེད་ཀྱི་ལྷན་ཐབས་ཆེས་རྒྱས་པ།
རབ་གནས་འགྲོ་ཕན་རྒྱས་བྱེད་ཀྱི་ལྷན་ཐབས་ཆེས་རྒྱས་པ་བཞུགས་སོ། །
ཤྲེ་ཡཱསྟུ། སྤྲོས་ལ་དགའ་བ་དགྱེས་པའི་ཕྱིར། །འགྲོ་ལ་ཕན་པ་རྒྱས་བྱེད་པའི།།ཆོ་གའི་རྒྱན་གྱུར་འདི་ན་ཀོ །འབྲེལ་མེད་མ་ཡིན་ཁུངས་དང་ལྡན། །དེ་ལ་སྦྱང་བའི་སྔོན་དུ། རྒྱབ་ཆོག་དཀྱིལ་འཁོར་གང་བྱེད་དང་འབྲེལ་བའི་ཁྲོ་བོའི་རྒྱལ་པོར་བསྐྱེད་ཅིང་གོ་ཆ་འགོད་པའི་ལུགས་ཀྱང་ཡོད། ཡང་བདེ་དགྱེས་སྡོམ་ཆེན་སོགས་ཁྲོ་རྒྱལ་མཆོག་རང་ཡིན་པས་ཁྲོ་བོ་གཞན་དུ་བསྒྱུར་མི་དགོས། དཔེར་ན་རང་དཔལ་སྡོམ་པའི་སྐུར་སྐྱེད་ན། གོ་ཆའི་མཆོག་ལུས་དཀྱིལ་ཡིན། དུས་འཁོར་གྱི་ཁྲོ་བོར་སྐྱེད་ན། ཕྱག་རྒྱ་རྒྱན་བཀོད་དང༌། འཕྲེང་སྔགས་གཉིས་མཁའ་འགྲོ་མའི་ས་བོན་གྱི་སྔགས་སོགས་བཟླས་ན་ཡང་དགོས་དོན་དང་འབྲེལ་བས་ལེགས་པ་ཡིན། ཁ་སྐོངས་དང་པོའོ། ཁྲུས་ཕལ་པའི་སྐབས་སུ་འདི་སྐད་ཅེས་བྱ་སྟེ། ཨོཾ་མི་མཐུན་བགེགས་དང་ལོག་འདྲེན་བསལ་བྱས་ནས། །བྱུར་དང་སྐལ་ངན་མ་ལུས་ཞི་གྱུར་ཏེ། །སྲིད་གསུམ་སྒྲིབ་གཉིས་མི་གཙང་སྦྱང་བའི་ཕྱིར།
ཁྲུལ་ཆལ་རྣམས་ཀྱི་དྲིལ་ཕྱིས་སྐུ་ལ་འབུལ། །ཨོཾ་ཧཱུཾ་ཏྲཱཾ་ཧྲཱིཿཨཱཿ ལན་གསུམ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ན་ཡེ་སྭཱཧཱ། གསུམ། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། གསུམ། ཨོཾ་ཧཱུཾ་ཏྲཱཾ་ཧྲཱིཿཁཾ་ཁ། རྒྱལ་བའི་སྐུ་ལ་ཉོན་མོངས་མི་མངའ་ཡང༌། །སེམས་ཅན་ལུས་ཀྱི་སྒྲིབ་པ་སྦྱངས་སླད་དུ། །ཆུ་གཙང་སྨན་སྤོས་འདག་ཆལ་འདི་ཕུལ་བས། །བདག་ཅག་དམ་པའི་སྐུ་མཆོག་ཐོབ་པར་ཤོགཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ན་ཡེ་སྭཱཧཱ། གསུམ། དགེ་བྱེད་ལྷ་དང་ལྷ་མོའི་ཚོགས། །དག་བྱེད་བདུད་རྩི་བུམ་པའི་ཆུས། །དགེ་ཞིང་བཀྲ་ཤིས་གླུ་྄དབྱངས་བཅས། །མི་བསྐྱོད་ཆབ་ཀྱིས་སྐུ་ཁྲུས་གསོལ། །ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ན་ཡེ་སྭཱཧཱ། དེ་དག་སྐུ་ལ་སོགས་བྱའོ། ཁྲུས་ཆལ་
གྱི་དབྱེ་བས་ལན་ལྔ་བྱེད་ན། ཐོག་མའི་སྔགས། ཨ་མྲྀ་ཏའི་དོད་དུ། ཡ་མཱནྟ་ཀྲྀཏ་དང༌། པྲཛྙཱནྟ་ཀྲྀཏ་དང༌། པདྨཱནྟ་ཀྲྀཏ་དང༌། ཨོཾ་ཨཱཿབཛྲ་ཧཱུཾ་ཀ་ར་ཧཱུཾ་ཧཱུཾ། ཞེས་སྦྱར་གཞན་འདྲ། ཕལ་ཁྲུས་དང་བཟང་ཁྲུས་ཀྱི་མཚམས་སུ། བོད་སྔ་མ་རྣམས་རྟེན་གསུམ་རྙིང་པ་ལ་སྐུ་ཁྲུས་རེ་མཛད་ཀྱིན་འདུག་པའང་ཤིན་ཏུ་སྤྲོས་པ་ལ་དགའ་ན་འགལ་བ་མེད་དོ། །དེ་ལྟར་ན་དེའི་ཁྲུས་ཆུ་ཡང་བུམ་པ་བརྒྱད་དུ་ལྡུགས་སོ། །དེ་ནས་བཟང་ཁྲུས་ཀྱི་སྐབས་ལ། ཇི་ལྟར་བལྟམས་པ་ནས། སྐུ་ཁྲུས་གསོལ། ཨོཾ་ཨཱཿབཻ་རོ་ཙ་ན་ཧཱུཾ་སྭཱཧཱ། ལན་གསུམ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། དེ་བཞིན་དུ། འདི་ནི་ཁྲུས་མཆོག ལ། ཨོཾ་ཨཱཿརཏྣ་སམྦྷ་ཝ་ཧཱུཾ་སྭཱཧཱ། དང༌། འདི་ནི་སྦྱིན་པའི་ལ། ཨོཾ་ཨཿཨ་མི་ཏ་བྷཱ་ཧཱུཾ་སྭཱཧཱ། འདི་ནི་ཚུལ་ཁྲིམས། ལ། ཨོཾ་ཨཱཿཨ་མོ་གྷ་སིདྡྷི་ཧཱུཾ་སྭཱཧཱ། འདི་ནི་བཟོད་པ། ལ། ཨོཾ་ཨཱཿལོ་ཙ་ནི་ཧཱུཾ་སྭཱཧཱ། འདི་ནི་བརྩོན་འགྲུས། ལ། ཨོཾ་ཨཱཿམཱ་མ་ཀཱི་ཧཱུཾ་སྭཱཧཱ། འདི་ནི་བསམ་གཏན། ལ། ཨོཾ་ཨཱཿཔཎྜ་ར་བ་སི་ནཱི་ཧཱུཾ་སྭཱཧཱ། འདི་ནི་ཤེས་རབ། ལ། ཨོཾ་ཨཱཿཏཱ་རེ་ཏཱ་ར་ཎི་ཧཱུཾ་སྭཱཧཱ། ཨོཾ་སརྦ་ཏ་ཐཱ༴ དད་པས་བདག་གིས་ཁྲུས་བགྱིའོ་རྗེས་ལ། ཨོཾ་ཨཱཿཨཀྵོ་བྷྱ་ཧཱུཾ་སྭཱཧཱ། གསུམ། ཨོཾ་སརྦ་ཏ་ཐཱ་ཞེས་སོགས་བརྗོད། གཞན་ཡང་ཁྲུས་གསོལ་གྱི་ཚིགས་བཅད་སྣ་ཚོགས་བརྗོད་པས་རུང་ངོ༌། དེ་ནས་དེ་མ་ཐག་ཏུ་སློབ་དཔོན་ནམ་ལས་བྱེད་ཀྱིས་ལས་བུམ་གྱི་ཆུ་ནས་ཅུང་ཟད་འཐོར་སྟངས་བྱེད་ཅིང༌། ཤོ་ལོ་ཀ་རེ་རེའི་མཐར་
རོལ་ཆེན་ཐུང་བ་རེ་བྱེད་བཞིན་དུ་གཞན་རྣམས་ཀྱིས་མེ་ཏོག་འཐོར་ཞིང༌། ཡངས་པའི་གྲོང་ཁྱེར་དུ་འཇུག་པའི་མདོ་ནས་གསུངས་པའི་ཤིས་བརྗོད་འདི་བྱའོ། །གང་ལ་སེར་སྣ་རྣམ་ཆགས་པ། །རྣམ་འཇོམས་དྲི་མ་མེད་མཛད་ཅིང༌། །ཐུགས་ཞི་གནོད་པ་མི་མངའ་དེས། ཁྱེད་ལ་བདེ་ལེགས་མཛད་པར་གྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་ལ་འཇུག་མཛད་ཅིང༌། །ཆོས་རྣམས་ཐམས་ཅད་སྟོན་པ་དེས། ཁྱེད་ལ་བདེ་ལེགས་མཛད་པར་གྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་ཞིག་བདེ་བར་མངའ་མཛད་དེས། ཁྱེད་ལ་བདེ་ལེགས་མཛད་པར་གྱུར། །སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། ཁྱེད་ལ་བདེ་ལེགས་མཛད་པར་གྱུར། །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་རྟེན་གྱུར་ཞིང༌། །གླིང་དང་དཔུང་གཉེན་གྱུར་པ་དེས། ཁྱེད་ལ་བདེ་ལེགས་མཛད་པར་གྱུར། །གང་ཞིག་ཆོས་ཀུན་མངོན་སུམ་གྱུར། །གཙང་ཞིང་བཀྲུ་བ་མི་མངའ་ཡང༌། །གསུམ་གཙང་གཙང་མར་མཛད་པ་དེས། ཁྱེད་ལ་བདེ་ལེགས་མཛད་པར་གྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་གང་འབྱོར་ཞིང༌། །དོན་གྲུབ་ཚོགས་ཀྱང་གྲུབ་པ་དེས། ཁྱེད་ལ་བདེ་ལེགས་མཛད་པར་གྱུར། །གང་ཞིག་སྐྱེས་པས་ས་རྣམས་ནི། །ནགས་
ཚལ་བཅས་པ་རབ་གཡོས་ཤིང༌། །སེམས་ཅན་ཐམས་ཅད་རབ་དགའ་དེས། ཁྱེད་ལ་བདེ་ལེགས་མཛད་པར་གྱུར། །བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཞིང༌། །བདུད་ཡིད་མི་བདེར་གྱུར་པ་དེས། ཁྱེད་ལ་བདེ་ལེགས་མཛད་པར་གྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུངས་པས། །ཐུབ་པའི་སྙན་པ་གང་བྱུང་དེས། ཁྱེད་ལ་བདེ་ལེགས་མཛད་པར་གྱུར། །ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཆོས་ཀུན་དབང་དུ་མཛད་པ་དེས། ཁྱེད་ལ་བདེ་ལེགས་མཛད་པར་གྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང༌། །འབྱུང་པོ་ཀུན་གྱི་བདེ་ལེགས་ནི། ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང༌། །ལྷ་རྣམས་ཀྱིས་ནི་བསམ་པ་ཡི། ཁྱེད་ཀྱི་འདོད་དོན་གང་ཡིན་པ། །དོན་དེ་དེ་རིང་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་གྱུར། །རྐང་བཞི་ཁྱེད་ལ་བདེ་ལེགས་ཤོག ཁྱེད་ཅག་ལམ་འགྲོ་བདེ་གྱུར་ཅིག །ཕྱིར་འོངས་རྣམས་ཀྱང་བདེ་ལེགས་གྱུར། །ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང༌། ཁྱེད་ལ་ཀུན་ཏུ་བདེ་ལེགས་ཤོག ཁྱེད་ཅག་སྡིག་པར་མ་གྱུར་ཅིག །དེ་ནས་སླར་ཡང་ལས་བུམ་གྱིས་སྐུ་ཁྲུས་གསོལ་ཏེ། ཇི་ལྟར་བལྟམས་པ༴ འདི་ནི་ཁྲུས་མཆོག༴
དེ་བཞིན་གཤེགས་དང༴ སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དེ་དག་སྐུ་ལ༴ དེའི་རྗེས་སུ། དེ་ནས་དེ་ལ་ཁ་དོག་ལེགས་བསྒྱུར་བའི། ཞེས་པ་ནས། གནྡྷེ་སྭཱཧཱའི་བར་བྱའོ། །སྤྲོས་པ་འདོད་པ་ལ་རབ་གནས་ཉིན་གང་ལ་བྱེད་ན་དངོས་གཞི་ལས་གཞན་ཐབས་མེད། ཉིན་གཉིས་མ་དང༌། ཉིན་གསུམ་མ་ལ་སྦྱང་ཁྲུས་རྒྱས་པ་འདི། སྟ་གོན་གྱི་ཉིན་མོ་བྱེད་པ་ཐོབ་ཐང་ཡིན་ནོ། །དེ་ནས་ཡིད་ཀྱིས་བསྲུང་བ་བྱའོ། ཁ་སྐོངས་གཉིས་པའོ། །དངོས་གཞི་ཁྲུས་གསོལ་གྲུབ་ནས་རྗེས་དྲན་གསོལ་བཏབ་དང་སེམས་བསྐྱེད་བྱ་སྟེ། སོ་སོའི་ལག་ཏུ་མེ་ཏོག་ཐོགས། ཐལ་མོ་སྦྱར་ལ། བདུག་སྤོས་འབུལ་བཞིན་དུ། གང་འདིར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་ནི་རྒྱུ་དང་འབྲས་བུའི་དགོས་པ་ཕུན་སུམ་ཚོགས་པ་དང་ལྡན་པ། ཆོས་ཐམས་ཅད་ཐུགས་སུ་ཆུད་པའི་སངས་རྒྱས་བཅོམ་ལྡན་འདས་འདི་བདག་གིས། རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་ཡང་དག་པར་ལྡན་པ་དང༌། སྟོབས་བཅུ་དང༌། མི་འཇིགས་པ་བཞི་དང༌། མ་འདྲེས་པའི་དྲན་པ་ཉེ་བར་བཞག་པ་གསུམ་དང༌། ཐུགས་རྗེ་ཆེན་པོ་ལ་སོགས་
པ་མདོར་ན་སློབ་པ་དང་མི་སློབ་པའི་སངས་རྒྱས་སུ་བྱེད་པའི་ཆོས་རྣམས་དང་ལྡན་པ། དེའི་སྐྱོན་གྱི་ཉེས་པ་ཐམས་ཅད་དང་བྲལ་ཞིང༌། བདེ་བར་གཤེགས་པའི་ཡོན་ཏན་གྱི་ཆོས་ཚད་མེད་པ་དང་ལྡན་པའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱི་བླ་ན་མེད་པའི་ཚུལ་ཁྲིམས་ལ་སོགས་པའི་ཕུང་པོ་ལྔ་དང་ཡང་དག་པར་ལྡན་པ་དང་ཆོ་འཕྲུལ་གསུམ་དང༌། ཏིང་ངེ་འཛིན་གསུམ་དང༌། བསླབ་པ་གསུམ་དང༌། ཚངས་པའི་གནས་བཞི་དང༌། བསམ་གཏན་བཞི་དང༌། འཕགས་པའི་བདེན་པ་བཞི་དང་ཡང་དག་པར་ལྡན་པ། དེའི་ཡང་དག་པ་ཕྱིན་ཅི་མ་ལོག་པའི་ཡེ་ཤེས་དང༌། ཤེས་བྱའི་ཡུལ་ཐམས་ཅད་བརྙེས་པས། ཉོན་མོངས་པ་ལ་སོགས་པ་རྣམས་མ་ལུས་པར་སྤངས་པ་དང༌། བདུད་བཞི་ལས་རབ་ཏུ་རྒྱལ་བའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །གང་འདི་བཅོམ་ལྡན་འདས་ཀྱི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་དང༌། བསོད་ནམས་དང་ཡེ་ཤེས་ཀྱི་ཚོགས་ཡང་དག་པར་བསགས་པ་དང༌། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཡང་དག་པར་བརྒྱན་པ་དང༌། དཔེ་བྱད་བཟང་པོ་བརྒྱད་ཅུས་རྣམ་པར་མཛེས་པ་དང༌། སྐྱེས་བུ་ཆེན་པོའི་སྐུ་ལྟ་བས་ཆོག་མི་ཤེས་པ་དང༌། མཐོང་ན་མི་མཐུན་པ་མེད་པ་སྟེ། དེའི་གཟུགས་ཀྱི་སྐུའི་འབྱོར་བ་མཐར་ཐུག་པ། འགྲོ་བ་མ་
ལུས་པའི་རྩ་ལག་ཏུ་གྱུར་པའི་སངས་རྒྱས་བཅོམ་ལྡན་འདས་འདི་བདག་གིས་རབ་ཏུ་གནས་པར་བགྱིའོ། །ཞེས་བརྗོད་ཅིང༌། རབ་ཏུ་གནས་པར་བགྱིའོ། །ཞེས་པའི་སྐབས་སུ་ཐམས་ཅད་ཀྱི་ཚིགས་མཐུན་པར་བརྗོད་ལ། རབ་ཏུ་གནས་བྱའི་རྟེན་ལ་མེ་ཏོག་གི་ཆར་དབབ། སྤོས་ཀྱིས་བདུག རོལ་མོ་དབུལ་ཞིང༌། ཨོཾ་ན་མོ་བྷ་ག་ཝ་ཏེ་ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ། སམྱཀ་སཾ་བུདྡྷཱ་ཡ། ཏདྱ་ཐཱ། ཨོཾ་མུ་ནེ་མུ་ནེ་མཧཱ་མུ་ན་ཡེ་སྭཱཧཱ། ཞེས་པ་དང༌། རབ་ཏུ་གནས་བྱའི་ལྷ་གང་ཡིན་གྱི་སྔགས་དང་འཁོར་ལོ་བསྒྱུར་བའི་སྔགས་བཟླ་བ་ནི། ཚིག་སྡེ་ཚན་རེ་རེའི་མཐར་བྱའོ། །དེ་ནས་སེམས་བསྐྱེད་པ་ནི། མཉམ་པར་བཞག་ནས་ཆོས་ཐམས་ཅད་ལ་མི་གནས་པའི་འདུ་ཤེས་བསྐྱེད་ནས། འགྲོ་བ་མཐའ་དག་དང་གང་གི་དོན་དུ་བྱ་བ་དེ་ལ་བྱམས་པ་དང༌། སྙིང་རྗེ་བྱང་ཆུབ་ཀྱི་སེམས་ཡུན་རིང་དུ་བསྒོམས་ལ། འདི་སྐད་ཅེས་བརྗོད་པར་བྱའོ། །ངོ་མཚར་ཆེན་པོ་གྲངས་མེད་པ་བསམ་གྱིས་མི་ཁྱབ་པ་དང་ལྡན་པའི་སངས་རྒྱས་བཅོམ་ལྡན་འདས་ཐམས་ཅད་ལ་བདག་ཕྱག་འཚལ་ཞིང་སྐྱབས་སུ་མཆིའོ། །དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སེམས་ཅན་ཐམས་ཅད་ཀྱི་དོན་དུ་དཀོན་མཆོག་གསུམ་གྱི་རྟེན་རབ་ཏུ་གནས་པར་བགྱིས་པས་དེའི་མཐུས། བདག་གིས་སེམས་ཅན་ཐམས་ཅད་ཀྱི་དབུགས་དབྱུང་ངོ༌། །འཁོར་བའི་གཅོང་རོང་ཆེན་པོ་ལས་བསྒྲལ་བར་བགྱིའོ། །ཕས་ཀྱི་རྒོལ་བ་བདུད་དང་ལོག་འདྲེན་ཐམས་ཅད་ཕམ་པར་བགྱིའོ། །སེམས་ཅན་
ཐམས་ཅད་ཀྱི་བག་ཆགས་ཀྱི་མཚམས་སྦྱོར་བའི་ཉོན་མོངས་པའི་རྟོགས་པ་ཐམས་ཅད་བསལ་བར་བགྱིའོ། །སེམས་ཅན་ཐམས་ཅད་ཀྱི་ང་རྒྱལ་གྱི་རི་བོ་བསྙིལ་པར་བགྱིའོ། །སེམས་ཅན་རྣམས་ཀྱི་སྐྱེ་བའི་ལྗོན་ཤིང་རྩད་ནས་བཅད་དོ། །འཆི་བདག་གི་ཉི་མ་ཕྱེ་མར་བརླག་གོ །མ་རིག་པའི་མུན་པ་བསལ་བར་བགྱིའོ། །མ་དད་པ་དང་ཕྱི་རོལ་པ་དག་དང༌། ལྟ་བ་ཕྱིན་ཅི་ལོག་པ་དག་ཡང་དག་པའི་ལྟ་བ་ལ་གཟུད་ཅིང་དད་པར་བསྒྱུར་རོ། །ལས་ཀྱི་ཆུ་བོ་བཟློག་པར་བགྱིའོ། །སྲིད་པའི་རྒྱ་མཚོ་སྐེམ་པར་བགྱིའོ། །ཆོས་ཀྱི་སྒྲོན་མེ་སྦར་བར་བགྱིའོ། །བྱང་ཆུབ་ཀྱི་ལམ་བསྟན་པར་བགྱིའོ། །བཟོད་པ་དང་དེས་པ་ལ་བཙུད་དོ། །བསམ་གཏན་གྱི་བདེ་བ་ལ་ཆེར་སྩལ་ཏོ། །འདོད་ཆགས་ཀྱི་མེ་དཔུང་ཞི་བར་བགྱིའོ། །ཞེ་སྡང་གི་མཚོན་ཆ་རྣོན་པོ་གཞོམ་པར་བགྱིའོ། བདེན་པ་ལ་གཟུད་དོ། །ཕྲག་དོག་གི་འཚུབ་མ་ཞི་བར་བགྱིའོ། །སེར་སྣའི་མདུད་པ་དགྲོལ་བར་བགྱིའོ། །སྡུག་བསྔལ་ཐམས་ཅད་ཞི་བར་བགྱིའོ། །འཇིགས་པ་མ་མཆིས་པ་དང༌། བདེ་བ་ཆེན་པོའི་གྲོང་ཁྱེར་དུ་འཇུག་ཅིང་གནས་པར་བགྱིའོ། །དེ་བས་ན་བདག་ལ་ལས་ཀྱི་དངོས་གྲུབ་ཀྱི་མཆོག་སྩལ་ཞིང་གནང་བར་མཛད་དུ་གསོལ། ཞེས་གསོལ་བ་བཏབ་ཅིང༌། མཛད་དུ་གསོལ་ཞེས་པའི་དུས་སུ་ཚོགས་པ་ཐམས་ཅད་ཀྱིས་ཀྱང༌། དེ་སྐད་བརྗོད་ཅིང་མེ་ཏོག་དོར་བར་བྱའོ། ཁ་འགེངས་གསུམ་པའོ། །ཡེ་ཤེས་སེམས་དཔའ་སྤྱན་འདྲེན་གྱི་སྐབས། མ་ལུས་སེམས་ཅན་སོགས་ཤོ་ལོ་ཀ་གསུམ་དང༌། མ་
ལུས་འགྲོ་བའི་རང་བཞིན་མངོན་སུམ་མཛད། །མི་བཟད་བདུད་ཀྱི་དཔུང་གིས་ཕྱག་བྱས་པ། །རང་བྱུང་མཐའ་ཡས་འགྲོ་བའི་རང་བཞིན་ཏེ། །སེམས་ཅན་སྙྀང་པོ་གཅིག་གྱུར་འདིར་གཤེགས་ཤིག །ཅེས་པའི་ཤོ་ལོ་ཀ་གཅིག་གང་བྱེད་འདམ་ཀ་ཡིན། རབ་གནས་ཉི་མ་སྦྲེལ་མ་བྱེད་ན། སྟ་གོན་གྱི་ཉིན་མོ། མ་ལུས་སེམས་ཅན་སོགས། དངོས་གཞིའི་ཉིན་མོ། མ་ལུས་འགྲོ་བའ༴སོགས་བྱ། ཕྱི་འབྲང་གི་བགེགས་བསྐྲད་པའི་རྗེས་ལ། ཡེ་ཤེས་པ་ལ་མཆོད་པ་རྒྱས་པ་བྱེད་ན། འདི་སྐད་ཅེས། ཛཿ་ཧཱུཾ་བཾ་ཧོ་བྷ་ག་ཝཱན་ཨེ་ཧྱེ་ཧི་མཧཱ་ཀཱ་རུ་ཎི་ཀ་དྲི་ཤྱ་ཧོ། ས་མ་ཡ་སྟཾ། ས་མ་ཡ་ཧོཿ བཅོམ་ལྡན་ཐུགས་རྗེས་བྱོན་པ་ལེགས། །བདག་ཅག་བསོད་ནམས་སྐལ་བ་ལྡན། །བདག་ལ་མཆོད་ཡོན་བཞེས་ནས་ཀྱང༌། །ཐུགས་ལ་དགོངས་ཤིང་གནང་བར་མཛོད། །བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་ལ་མཆོད་ཡོན་བཞེས་ནས་ཀྱང༌། །འདི་ཉིད་དུ་ནི་བཞུགས་སུ་གསོལ། །ཨོཾ་སརྦ་ཏ་ཐཱ་ག་ཏ་ག་ག་ན་ས་མ་ཡ་ཧཱུཾ་སྭཱཧཱ། མཆོད་ཡོན་དབུལ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་པས་ཁྲུས་གསོལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་
ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ཨོཾ་པདྨ་ཀ་མ་ལ་ཡ་སྟྭཾ། ཞེས་པས་གདན་ཕུལ། ལྷ་ལ་སོགས་པ་དྲི་ཡི་རྫས། །ཕྱོགས་དུས་ཀུན་ན་ཅི་ཡོད་པ། །ཚིམས་བྱེད་ཡིད་འོང་དང་ལྡན་པ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བཛྲ་གནྡྷེ་ཨཱཿཧཱུཾ། ཞིང་འདིའམ་རྒྱ་ཆེན་ཞིང་རྣམས་ན། །ལྷ་རྫས་མེ་ཏོག་ཡིད་འོང་བ། །ཆུ་དང་ཐང་སྐྱེས་ཡིད་བྱུང་རྣམས། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བཛྲ་པུཥྤེ༴ ཕྱོགས་དུས་ཀུན་ན་བདུག་སྤོས་དང༌། །ལྷ་རྫས་སྤོས་ཀྱི་ཤིང་ལ་སོགས། །དྲི་ཞིམ་ཡིད་འོང་གང་ཡོད་པ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བཛྲ་དྷུ་པ༴ འཇིག་རྟེན་འདིའམ་ཕྱོགས་བཅུ་ཡི། །རིན་ཆེན་མར་མེ་ལ་སོགས་པ། །སྣང་བའི་ཁྱད་པར་གང་ཡོད་པ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བཛྲ་ཨཱ་ལོ་ཀེ༴ འཇིག་རྟེན་འདིའམ་ཞིང་གཞན་ན། །ལྷ་དང་མི་ལ་སོགས་པའི་ཟས༌། །ཡོན་ཏན་ཀུན་ལྡན་གང་ཡོད་པ། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་བཛྲ་ནཻ་ཝེ་དྱ། དེ་ལས་གཞན་ཡང་མཆོད་པའི་ཚོགས༴ ཨོཾ་བཛྲ་ཤཔྟ། རོལ་མོ་བྱ། ཡོན་ཏན་རྒྱ་མཚོ་ཁྱེད་རྣམས་ལ། །བསྟོད་དབྱངས་ཡོན་ཏན་རྒྱ་མཚོས་བསྟོད། །བསྟོད་དབྱངས་སྙན་སྤྲིན་དེ་དག་ལས། །ངེས་པར་ཀུན་ཏུ་འབྱུང་
གྱུར་ཅིག །ཡང་རོལ་ཆེན་བྱ། དེ་རྗེས། བཅོམ་ལྡན་རྡོ་རྗེ་སེམས་དཔའ་མཆོག༴སོགས་སྦྲེལ་ལོ། ཁ་འགེངས་བཞི་པའོ། །ལྷ་ལ་དབང་བསྐུར་བའི་དུས་སུ། ཆུ་དབང་གི་ཐོག་མར་བརྗོད་པའི་བཀྲ་ཤིས་ནི། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་བྱེད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མ་ལུས་རྡོ་རྗེའི་རིགས་དང་ལྡན། །སྡང་བས་ཟིལ་མནན་སྐྱེ་བོ་རྣམ་པར་སྦྱོང་བྱེད་པ། །མི་བསྐྱོད་མགོན་པོ་ཞེས་བྱར་མཚན་གསོལ་དེ་ཡིས་ནི། །བཀྲ་ཤིས་དེས་ནི་དེ་རིང་ཁྱེད་ལ་དབང་རབ་བསྐུར། །བཀྲ་ཤིས་གང་ཞིག་མཐའ་དག་འཁོར་ལོའི་རིགས་དང་ལྡན། །རྣམ་པར་སྣང་མཛད་འཁོར་བའི་སྡུག་བསྔལ་རྟག་འཕྲོག་ཅིང༌། །རྨོངས་པས་ཟིལ་མནན་སྐྱེ་བོ་ཡོངས་སུ་སྦྱོང་བྱེད་པ། །བཀྲ་ཤིས་དེས་ནི་དེ་རིང་ཁྱེད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་རིན་ཆེན་རིགས་དང་ལྡན། །འཕོངས་པའི་སྡུག་བསྔལ་སྒྲོལ་བར་ཡོངས་སུ་རབ་བརྩོན་ཞིང༌། ཁེངས་པས་ཟིལ་མནན་འགྲོ་བ་ཡོངས་སུ་སྦྱོང་མཛད་པ། །བཀྲ་ཤེས་དེས་ནི་དེ་རིང་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་པའི་དྲ་བ་འཇོམས་པ་པོ། །ཆགས་པས་ཟིལ་མནན་
འགྲོ་བ་ཡོངས་སུ་སྦྱོང་མཛད་པ། །བཀྲ་ཤིས་དེས་ནི་དེ་རིང་ཁྱོད་ལ་དབང་རབ་བསྐུར། །བཀྲ་ཤིས་གང་ཞིག་མ་ལུས་ལས་ཀྱི་རིགས་དང་ལྡན། །བརྩེ་བའི་བདག་ཉིད་ལོག་པར་ལྟ་བ་ངེས་པར་སྤོང༌། །དེ་སྦྱོངས་ཐབས་སྟོན་དེ་ནི་ཀུན་ནས་སེལ་མཛད་པ། །བཀྲ་ཤིས་དེས་ནི་དེ་རིང་ཁྱོད་ལ་དབང་རབ་བསྐུར། །ཞེས་པ་འདི་འཇུག་པར་བྱའོ། ཁ་སྐོངས་ལྔ་པའོ། །སྤྱན་དབྱེ་བའི་སྐབས་སུ། དང་པོར་མཆོད་པ་བསྡུས་པ་ཞིག་སྔགས་དང་ཕྱག་རྒྱས་ཕུལ། དེ་ནས་གསེར་ཐུར་དངུལ་གྱི་ཀོང་བུར་བཞག་ནས། མར་དང་སྦྲང་རྩི་བསྐུས་པ་ཐོགས་ལ། ཐུར་ལྡན་སྨན་པའི་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །རྒྱལ་བ་རྣམས་ཀྱིས་ལྷ་ཚོགས་ཀྱི། །མི་ཤེས་པ་ཡི་རབ་རིབ་བསལ། །ཨོཾ་ཙཀྵུ་ཙཀྵུ་ས་མནྟ་ཙཀྵུ་བི་ཤོ་དྷ་ནི་སྭཱཧཱ། ཞེས་བརྗོད་ཅིང༌། མིག་སྨན་གྱིས་སྤྱན་ཕྱེ་ནས་རྡོ་རྗེའི་མིག་ཏུ་བྱིན་གྱིས་བརླབས་ལ། ཀུན་མཁྱེན་ཡེ་ཤེས་སྤྱན་ལྡན་སྐྱོན་བྲལ་ཡང༌། །གུས་པས་འཕགས་པའི་སྤྱན་ནི་དབྱེ་བགྱིས་པས། །ནམ་མཁའི་མཐའ་གཏུགས་གྱུར་པའི་སེམས་ཅན་རྣམས། །སངས་རྒྱས་ཡེ་ཤེས་སྤྱན་ནི་ཐོབ་པར་ཤོག །ཨོཾ་དཱི་བྱ་ནེ་ཏྲ་ཡ་སྭཱཧཱ། ཡེ་ཤེས་ཀྱི་སྤྱན་རྣམ་པར་དག་པ་དང་ལྡན་ཞིང༌། སེམས་ཅན་གྱི་དོན་ལ་འཇུག་པའི་མཐུ་ཕུན་སུམ་ཚོགས་པ་ལ་མངའ་བརྙེས་པར་གྱུར་ཅིག །ཅེས་བྱའོ། །གཉིས་པ་ན། སྙན་སོགས་དབྱེ་བའི་ཚིག་སྔགས་དང་བཅས་པ་རྒྱ་གཞུང་ཇི་ལྟ་བའི་མཐར། བོད་སྔོན་རབས་པའི་གསུང་ལས་འབྱུང་བའི་སྨོན་ལམ་
སྔགས་བཅས་ཀྱི་ཚིག་ཀྱང་སྦྱར་བ་ནི་འདི་ལྟར། གསེར་རམ་དངུལ་གྱི་རྣ་བྲུད་ཐོགས་ལ། འགྲོ་རྣམས་ཆོས་ཀྱིས་འཕོངས་པ་ལ། །རྒྱལ་བས་ཆོས་ཀྱི་དུང་བུད་ལྟར། །དེ་བཞིན་སེམས་ཅན་དོན་གྱི་ཕྱིར། །རྒྱལ་བའི་སྙན་ནི་དབྱེ་བར་བྱ། །ཨོཾ་དཱི་བྱ་ཀརྞཱ་ཡ་སྭཱཧཱ། ཞེས་སྙན་ཕྱེ་ནས། རྡོ་རྗེའི་སྙན་དུ་བྱིན་གྱིས་བརླབས་ལ། བསྙེན་བསྲིང་མི་མངའ་ཀུན་ཏུ་གསལ་བར་ལྡན། །ཐུབ་པའི་སྒྲ་འཛིན་ངོ་བོས་དག་ན་ཡང༌། །དག་བྱེད་འདི་ནི་བདག་གིས་འབུལ་ལགས་ཀྱིས། །སྐྱེ་བོས་རྟག་ཏུ་དམ་ཆོས་ཐོབ་པར་ཤོག །ཨོཾ་བཛྲ་ཀརྞ་ཤོ་དྷ་ཡ་ཨཱཿཧཱུཾ་སྭཱཧཱ། ཞེས་བྱའོ། །དེས་མཚོན་ཏེ། རྨང་ཚེར་ཐོགས་ལ། ཟག་བཅས་ཕུང་པོའི་དྲི་སྤངས་བས། །འགྲོ་བ་སེམས་ཅན་དོན་གྱི་ཕྱིར། །རྣམ་པར་དག་པའི་དྲི་བརྙེས་ལྟར། །རྒྱལ་བའི་ཤངས་ནི་དབྱེ་བར་བགྱི། ཨོཾ་དཱི་བྱ་གྷ་ཎཱ་ཡ་སྭཱཧཱ། དྲི་འཛིན་རྣམ་དག་ཚུལ་ཁྲིམས་ལས་འཁྲུངས་པ། །དགེ་བ་སྒྲུབ་ཕྱིར་སྐྱོན་ལས་ངེས་གྲོལ་ཡང༌། །མོས་པས་འཛིན་བཅད་དམ་པ་ཕུལ་བ་ཡིས། །འགྲོ་བས་ཡེ་ཤེས་བླ་མེད་ཐོབ་པར་ཤོག །ཨོཾ་བཛྲ་རོ་མ་དྷ་ར་ཎ་ཨཱཿཧཱུཾ་སྭཱཧཱ། ཞེས་བྱའོ། །ཞལ་ཐུར་ཐོགས་ལ། ཆོས་ཀྱིས་རོ་མཆོག་དགའ་བ་ཡིས། །འགྲོ་བ་ཐམས་ཅད་ཚིམ་མཛད་ལྟར། །རོ་མཆོག་བརྒྱ་ལྡན་ཞལ་ཟས་རྣམས། །འབུལ་ཕྱིར་རྒྱལ་བའི་ཞལ་དབྱེའོ། །ཨོཾ་དཱི་བྱ་མུ་ཁ་ཡ་སྭཱཧཱ། འོད་ཟེར་
སྟོང་གིས་ཕྱེ་བའི་པདྨ་དང༌། །བིམྤ་ལྟར་དམར་ཡིད་འོང་ཞལ་གྱི་སྒྲོས། །ལེགས་པར་ཕྱེ་བས་མཁའ་མཉམ་སེམས་ཅན་གྱི། །ཐར་པའི་གྲོང་ཁྱེར་སྒོ་མཆོག་དབྱེ་བར་ཤོག །ཨོཾ་བཛྲོདྒྷ་ཊ་ཡ་ཨཱཿཧཱུཾ་སྭཱཧཱ། ཞེས་བྱའོ། །ཚེམས་ཤིང་ཐོགས་ལ། རྒྱལ་བའི་ཚེམས་དཀར་བཞི་བཅུ་ལ། །མི་གཙང་རྡུལ་གྱིས་མ་གོས་ཀྱང༌། །བཀུར་བསྟི་རིན་ཆེན་ལྗོན་ཤིང་འདིས། །རྒྱལ་བའི་ཚེམས་ནི་དབྱེ་བར་བགྱི། །ཨོཾ་དཱི་བྱ་དནྟ་ཡ་སྭཱཧཱ། དཀར་ལ་ཐགས་བཟང་བཞི་བཅུ་ཚང་བས་ཚེམས། །བརྒྱད་ཁྲི་བཞི་སྟོང་ཆོས་ལ་མངའ་བསྒྱུར་ཡང༌། །བདག་ཅག་དད་པས་ཚེམས་ཤིང་འབུལ་ལགས་ཀྱི། །འགྲོ་བས་སངས་རྒྱས་གསུང་དབྱངས་ཐོབ་པར་ཤོག །ཨོཾ་བཛྲ་དནྟ་ཤོ་དྷ་ཡ་ཨཱཿཧཱུཾ་སྭཱཧཱ། བུམ་པའམ་དུང་ཆོས་ཏིལ་མར་སྐུ་ཕྱིས་དང་བཅས་པ་འབུལ། རྒྱལ་བ་ཡེ་ཤེས་སྐུ་ཅན་ལ། །ལས་དང་ཉོན་མོངས་དྲི་བྲལ་ཡང༌། །འགྲོ་ཀུན་སྒྲིབ་གཉིས་སྦྱང་བའི་སླད། ཁྲུས་གསོལ་བསྐུ་མཉེ་འབུལ་བར་བགྱི། །ཨོཾ་དཱི་བྱ་གཱ་ཏྲཱ་ཡ་སྭཱཧཱ། མཚན་དང་དཔེ་བྱད་མཐའ་ཡས་མངའ་བའི་སྐུ། །སྐྱོན་ཀུན་བྲལ་ཞིང་ཡོན་ཏན་ཀུན་རྫོགས་ཀྱང༌། །བདག་བློ་དང་མཚུངས་ཡོ་བྱད་འདི་འབུལ་བས། །འགྲོ་ཀུན་གཉིས་མེད་ཡེ་ཤེས་སྐུ་ཐོབ་ཤོག །ཨོཾ་བཛྲ་ཨ་བ་ཡ་བ་ཡ་ཤོ་དྷ་ཨཱཿཧཱུཾ་སྭཱཧཱ། དེའི་ཡན་ལག་ཏུ་སྤུ་གྲི་འབྲཻག་བཅད་སོ་མང་གསུམ་སྦྱོར་བར་འདོད་ན། སྐུ་གཟུགས་ཆགས་བྲལ་གྱི་རྣམ་པ་ཅན་ལ། སྤུ་གྲིའི་དབུ་སྐྲ་འབྲེག་ཚུལ་བྱ་ཞིང༌།
རྒྱལ་བའི་དབུ་སྐྲ་མཐོན་མཐིང་སྐྱོན་བྲལ་ཡང༌། །གཞན་དོན་བསྒྲུབ་ཕྱིར་ཁྱིམ་པའི་རྟགས་སྤངས་ཕྱིར། །དད་པས་གསེར་གྱི་འབྲེག་བཅད་ཕུལ་བ་ཡིས། །འགྲོ་ཀུན་སྡུག་བསྔལ་ཀུན་ལས་གྲོལ་བར་ཤོག །ཨོཾ་བཛྲ་ཀ་ཙ་མུ་ལེ་ཨཱཿཧཱུཾ་སྭཱཧཱ། ཁྲོ་བོ་མ་ཡིན་པ་རྣམས་ལ་སྐུ་སེན་འབྲེག་ཚུལ་བྱ། ཟངས་མདོག་ལྟར་མཛེས་ཡིད་འོང་སྐྱོན་བྲལ་ཡང༌། །བདག་ཅག་དད་པས་ཕྱག་དང་ཞབས་རྣམས་ཀྱི། །སེན་མོའི་འབྲེག་བཅད་ཕུལ་བས་འགྲོ་ཀུན་གྱིས། །སངས་རྒྱས་དཔེ་བྱད་བཟང་པོ་ཐོབ་པར་ཤོག། ཨོཾ་བཛྲ་ན་ཁ་ཚེ་ད་ཛི་ན་ཨཱཿཧཱུཾ་སྭཱཧཱ། ཆགས་ཆེན་གྱི་ཆ་བྱད་ཞི་བ་རྣམས་ལ་སྐྲ་བཤད་ཕུལ་ཏེ། དབུ་སྐྲ་རིན་ཆེན་ལྕང་ལོ་མ་འཁྲུགས་ཤིང༌། མཛེས་ཤིང་ལྟ་བས་མི་ངོམ་སྐྱོན་བྲལ་ཡང༌། །བདག་བློ་སྦྱངས་ཕྱིར་རྐྱེན་དང་འཚམ་པ་འདི། །ཕུལ་བའི་འགྲོ་ཀུན་དུག་གསུམ་བྲལ་བར་ཤོག །ཨོཾ་བཛྲ་བ་ལ་ཤོ་དྷ་ཡ་ཨཱཿཧཱུཾ་སྭཱཧཱ། ཞེས་པ་རྣམས་སོ། ཁ་འགེངས་དྲུག་པའོ། །མངའ་དབུལ་གྱི་སྐབས་དང་པོ་མཆོད་པའི་མངའ་དབུལ་ལ། འགྲོ་ཕན་རྒྱས་བྱེད་དུ་བྲིས་པ་ཉིད་ཀྱི་རྒྱས་པ་ལའང་ཆོག་པ་ཡིན་མོད་ཀྱང༌། སྤྲོས་པ་ལ་དགའ་ན་དང༌། ལར་ནས་མཆོད་པ་ཇི་ཙམ་རྒྱས་པ་བཟང་བས། མཆོད་པ་གསར་བ་མང་དུ་བཤམས་ཤིང་བྱིན་གྱིས་བརླབས། ནམ་མཁའ་མཛོད་ཀྱིས་སྔགས་རྒྱ་མང་དུ་བརྗོད། ཐོག་མར་བཀྲ་ཤིས་ལྷ་མོ་བརྒྱད་ཀྱིས་མཆོད་པ་ནི། །ཨོཾ་བཀྲ་ཤིས་ལྷ་མོ་པདྨ་ཅན། །དཀར་མོ་དཔལ་གྱི་བེའུ་འཛིན། །ཡེ་ཤེས་ལྷ་ལ་བདག་འབུལ་ན། །ཀུན་དུ་
དགེ་ཞིང་བཀྲ་ཤིས་ཤོག །ཨོཾ་གུ་རུ་བུདྡྷ་བོ་དྷི་སཏྭ་ས་པཱ་རི་ཝཱ་ར་མངྒ་ལ་ཤྲཱི་བཏསྱ་ཨཱཿཧཱུཾ་སྭཱཧཱ། ཨོཾ་བཀྲ་ཤིས་ལྷ་མོ་འཇིགས་བྱེད་མ། །དཀར་མོ་གསེར་གྱི་འཁོར་ལོ་འཛིན། །དཀྱིལ་འཁོར༴ ཀུན་ཏུ༴ མངྒ་ལ་ཙཀྲ༴ འོད་ལྡན་མ༴ སྔོན་མོ་པདྨའི་སྡོང་བུ་འཛིན། མངྒ་ལ་པདྨ་རྣམ་རྒྱལ་མ༴ མཐོན་ཀ་ཡིད་བཞིན་རྒྱལ་མཚན་འཛིན༴ མངྒ་ལ་དྷྭ་ཛ༴ མདངས་ལྡན་མ༴ དམར་སྐྱ་རིན་ཆེན་གདུགས་དཀར་འཛིན༴ མངྒ་ལ་ཚཱ་ཏྲཾ་ག༴ དཀར་ཤམ་མ༴ དམར་སྐྱ་གཏེར་གྱི་བུམ་བཟང་འཛིན༴ མངྒ་ལ་གྷ་ཊ༴ དྲི་མེད་མ༴ ལྗང་གུ་གཡས་འཁྱིལ་དུང་དཀར་འཛིན༴ མངྒ་ལ་ཤཾ་ཁ༴ ཡིད་གཞུངས་མ༴ མརྒཏ་མདོག་མཚུངས་གསེར་ཉ་འཛིན། །ཡེ་ཤེས༴ ཀུན་ཏུ༴ མངྒ་ལ་ཀན་ཀམཏསྱ༴ ཞེས་པས་མཆོད་དོ། །དེ་ནས་བར་འདིར་ཟས་མཆོག་དང༌། བྱུག་པ་དང་སོ་རྩི་རྣམས་ཕུལ་ནས། མཆོད་པའི་ཁྱད་པར་སྣ་ཚོགས་པ་འབུལ་བའི་སྐབས་སུ། འཆད་པར་འགྱུར་བ་ཉེ་བའི་རིན་ཆེན་སྣ་བདུན་ཡན་ཆད་ཇི་ལྟར་འོས་པ་བྱ་སྟེ། བླ་མ་ཡི་དམ་དཀྱིལ་འཁོར་ལྷ་ཚོགས་དང༌། །རབ་གནས་བྱིན་གྱིས་བརླབས་པའི་རྟེན་རྣམས་ལ། །དག་བྱེད་དྲི་བཟང་ཞལ་བསིལ་ཆུ་རྒྱུན་འདི། །ཕུལ་བས་འགྲོ་ཀུན་བདེ་ལེགས་ཐོབ་པར་ཤོག །ཨོཾ་གུ་རུ་བུདྡྷ་བོ་དྷི་སཏྭ་ས་པཱ་རི་ཝཱ་ར་ཨཉྩ་མ་ནཾ་པྲ་ཏཱིཙྪ་སྭཱཧཱ། དེ་བཞིན་དུ་ཚིག་རྐང་གསུམ་པ་ལ། ཞབས་ཀྱི་པདྨའི་དྲི་བཅིལ་རྡོ་རྗེའི་ཆུ། །པཱ་དྱཾ། ཀུན་ཏུ་
འཕོ་བའི་གདུང་སེལ་བསངས་གཏོར་མཆོག །པྲོ་ཀྵ་ཎཾ། ཡན་ལག་བརྒྱད་ལྡན་བདུད་རྩིའི་མཆོད་ཡོན་འདི། །ཨོཾ་གུ་རུ་བུདྡྷ་བོ་དྷི་སཏྭ་ས་པཱ་རི་ཝཱ་ར་ཨརྒྷཾ་པྲ་ཏཱིཙྪ་སྭཱཧཱ། ཞེས་བྱའོ། །ཨོཾ་པ་ཊ་ཧ་དང་ཅང་ཏེ་སོགས། དུང་དང་རྔ་སོགས་སྒྲ་དབྱངས་དང༌། །ཡིད་འཕྲོག་སིལ་སྙན་སྣ་ཚོགས་རྣམས། །འབུལ་གྱི་ཡང་དག་བཞེས་སུ་གསོལ། །ཤཔྟ། འདི་ཆུ་བཞི་ཉེར་སྤྱོད་དང་བཅས་པའི་སྤྱི་འགྲོ་ཡིན། དེ་བཞིན་དུ་མཆོད་ཡོན་ཉེར་སྤྱོད་སོགས་ལ། མཆོད་འཕྲེང་སྤྱི་འགྲོ་དྲུག་ལས། དང་པོ་ནི། ཆུ་བོ་གང་གཱའི་རྒྱུན་བཞིན་དུ། །མཆོད་ཡོན་རྒྱུན་ཡང་མི་འཆད་པ། །བླ་མ་ལྷ་ཡི་ཚོགས་ལ་འབུལ། །ཐུགས་རྗེས་འགྲོ་བའི་དོན་དུ་བཞེས། །ཨོཾ་སརྦ་ཏ་ཐཱ་སོགས་སྔགས་སྤྱི་དང་འདྲ། འདབ་རྒྱས་པདྨོའི་ཚལ་བཞིན་དུ། །མེ་ཏོག་རྒྱུན་ཡང་མི་འཆད་པ། །བླ་མ༴ ཐུགས་རྗེས༴ ཨོཾ་སརྦ༴ ཙནྡན་ནགས་ཚལ་ལྗོངས་བཞིན་དུ། །བདུག་སྤོས༴ རིན་ཆེན་ཉི་ཟླའི་འོད་བཞིན་དུ། །སྣང་གསལ༴ ཧུ་ལུནྟ་ཀའི་རྒྱུན་བཞིན་དུ། །དྲི་མཆོག༴ མ་རྨོས་འཁྲུངས་པའི་ལོ་ཏོག་བཞིན། །ཞལ་ཟས༴ ཀ་ལ་པིང་ཀའི་དབྱངས་བཞིན་དུ། །སེལ་སྙན༴ བླ་མ༴ ཐུགས་རྗེས༴ ཨོཾ་སོགས། སྤྱི་འགྲོ་གཉིས་པ་ནི། སྟོང་གསུམ་འདིའམ་སྟོང་གསུམ་གཞན་དག་ན། །ལྷ་རྫས་མཆོད་ཡོན་ཇི་སྙེད་མཆིས་པ་ཀུན། །
རྒྱལ་བ་སྲས་དང་བཅས་ལ་འབུལ་བར་བགྱི། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་ཨརྒྷཾ༴ དེ་བཞིན་དུ་མཆོད་ཡོན་ཞེས་པར་མེ་ཏོག་ནས། རོལ་མོའི་བར་དུ་སྤྲོ་ཞིང༌། སྔགས་ཀྱང་ཤཔྟའི་བར་རོ། །སྤྱི་འགྲོ་གསུམ་པ་ནི། འཇིག་རྟེན་འདིའམ་ཕྱོགས་བཅུའི་འཇིག་རྟེན་ན། །འཁོར་ལོ་སྒྱུར་བའི་རིག་པས་བྱིན་བརླབས་པའི། །ལྷ་རྫས་མཆོད་ཡོན་ཇི་སྙེད་མཆིས་པ་རྣམས། །རྒྱལ་བ་སྲས་དང་བཅས་ལ་འབུལ་བར་བགྱི། །ཨརྒྷཾ༴ དེ་བཞིན་དུ་རོལ་མོའི་བར་དུ་སྦྱར་བའམ། ཡང་ན། འཇིག་རྟེན་འདིའམ༴ ཁ་དོག་དབྱིབས་ལེགས་དྲི་ཞིམ་ཡིད་འོང་པའི། །མེ་ཏོག་སྣ་ཚོགས་སྐྱེ་བའི་ཤིང་རྣམས་ཀྱང༌། །རྒྱལ་བ༴ པུཥྤ༴ དེས་འོག་མ་རྣམས་ལའང་འགྲེ བསིལ་ཞིང་དྲི་ཞིམ་རེག་ན་གདུང་བ་སེལ། །ཡིད་འཕྲོག་དྲི་ཆབ་ཇི་སྙེད་མཆིས་པ་ཡང༌། །གནྡྷེ༴ ག་བུར་ལ་སོགས་ལེགས་པར་སྦྱར་བ་ཡི། །ལྷ་རྫས་བདུག་པའི་སྤོས་སྤྲིན་འཁྲིགས་པ་ཡང༌། །ངྷཱུ་པེ༴ ལྷ་རྫས་ལས་བྱུང་རིན་ཆེན་སྒྲོན་མེ་འབར། །ཕྱོགས་བཅུའི་མུན་པ་ཀུན་དུ་སེལ་བ་ཡང༌། །ཨཱ་ལོ་ཀེ༴ རོ་བརྒྱ་ལྡན་ཞིང་དྲི་བསྲུང་ཁ་དོག་བཟང༌། །སྭ་སྟི་ཀ་སོགས་ཞལ་ཟས་སྣ་ཚོགས་ཀྱང༌། །ནཻ་བི་ཏྱེ༴ པི་ཝང་ལ་སོགས་རོལ་མོའི་ཁྱད་པར་མང༌། །རྣར་སྙན་ཡིད་འོང་རོམ་མོ་ཅི་མཆིས་པ། །ཤཔྟ༴ སྤྱི་འགྲོ་བཞི་པ་ནི། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་བཟང་པོའི་མཆོད་
ཡོན་རྣམས། །རྒྱལ་བ་སྲས་དང་བཅས་ལ་འབུལ། །འགྲོ་བའི་དོན་དུ་བཞེས་སུ་གསོལ། །ཨརྒྷཾ་སོགས་ཤཔྟའི་བར་ལ་སྦྱར་རོ། །སྤྱི་འགྲོ་ལྔ་པ་ནི། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་མཆིས་པ་དང༌། །བདག་གིས་གུས་པར་བཤམས་པ་འདི། །ཇི་སྙེད་རྒྱལ་བ་སྲས་དང་བཅས། །དེ་སྙེད་རྣམས་ལ་བདག་འབུལ་ན། །ཐུགས་རྗེས་མངའ་བ་ཁྱེད་རྣམས་ཀྱིས། །ཅི་བདེ་བར་ནི་བཞེས་ནས་ཀྱང༌། །སེམས་ཅན་དོན་ཀུན་མཛད་དུ་གསོལ། །ཨརྒྷཾ་སོགས་རོལ་མོའི་བར་རོ། །སྤྱི་འགྲོ་དྲུག་པ་ནི། མཆོད་ཡོན་ཕལ་ཆེར་མཆོད་ཡོན་བླ་རེ་དང༌། །མཆོད་ཡོན་བཀོད་པས་འོད་ཟེར་རབ་བཀྱེ་སྟེ། །མཆོད་ཡོན་སྣ་ཚོགས་ཀུན་དུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ཨརྒྷཾ་སོགས་རོལ་མོའི་བར་དུ་སྦྱར་རོ། །དེ་ལྟར་སྤྱི་འགྲོ་བདུན་པོ་དེ་དག་ལས། གང་ཡང་རུང་བ་ཞིག་འདིར་བྱ་ཞིང༌། གཞན་དང་གཞན་དག་མཆོད་པའི་རིམ་པ་གོང་འོག་ཅི་རིགས་པ་རྣམས་ལ་སྦྱར་རོ། །ཡང་ཉེར་སྤྱོད་ལྔ་དང་སྦྱར་བ་ལྷ་མོའི་མཆོད་པ་ནི། དཀྱིལ་འཁོར་ཀུན་དུ་རྒྱལ་བ་མཉེས་བྱེད་པ། །མཛེས་ལྡན་དཀར་མོ་རྡོ་རྗེ་དྲིལ་བུ་དང༌། །མེ་ཏོག་སྤུངས་པའི་རིན་ཆེན་སྣོད་འཛིན་མ། །ནམ་མཁའ་གང་བས་དཀྱིལ་འཁོར་ལྷ་ཚོགས་མཆོད། །ཨོཾ་བཛྲ་པུཥྤེ་ཨཱཿཧཱུཾ་སྭཱཧཱ། ཚིགས་བཅད་ཀྱི་ཐོག་མཐའ་གཉིས་དང༌། སྔགས་ཀྱི་ཐོག་མཐའ་གཉིས་འགྲེའོ། །ཡིད་འོང་དུད་ཁ་རྡོ་རྗེ་དྲིལ་བུ་དང༌། །བདུག་
སྤོས་འཐུལ་བའི་རིན་ཆེན་སྣོད་འཛིན་མ། །དྷཱུ་པེ༴ ཀུན་སྣང་དམར་སེར་རྡོ་རྗེ་དྲིལ་བུ་དང༌། །མར་མེས་གང་བའི་རིན་ཆེན་སྣོད་འཛིན་མ། །ཨཱ་ལོ་ཀེ །གདུང་སེལ་ལྗང་ཁུ་རྡོ་རྗེ་དྲིལ་བུ་དང༌། །དྲི་མཆོག་བླུགས་པའི་རིན་ཆེན་སྣོད་འཛིན་མ། གྷནྡྷེ། ཞལ་བཟང་སྣ་ཚོགས་རྡོ་རྗེ་དྲིལ་བུ་དང༌། །བདུད་རྩིས་གང་བའི་རིན་ཆེན་སྣོད་འཛིན་མ། །ནཻ་ཝེ་ཏྱེ། ཞེས་སོགས་སོ། །དེ་ནས་འདོད་ཡོན་ལྔ་ལའང་རྫས་དང༌། ལྷ་མོའི་མཆོད་པ་གཉིས་ཀྱི། དང་པོ་ནི་མེ་ལོང་བསྟན་ལ། ཆོས་རྣམས་གཟུགས་བརྙན་ལྟ་བུ་སྟེ། །སྲིད་པའི་མཚོ་ལས་རྣམ་པར་རྒྱལ། །ཆོས་རྣམས་གཟུགས་བརྙན་ལྟ་བུ་ནི། །སེམས་ཅན་ཀུན་ལ་བསྟན་པར་བགྱི། །ཨོཾ་ཨཱཿབཛྲ་ཨཱ་དརྴ་ཧཱུཾ། སྔགས་ཀྱིས་ཐོག་མཐའ་འགྲེའོ། །པི་ཝཾ་བསྒྲེང་ཞིང༌། དེ་བཞིན་གཤེགས་པ་ཐམས་ཅད་ཀྱི། །སྒྲ་ཡི་རྗེས་སུ་འགྲོ་བ་ཡིས། །གང་གི་འཇིག་རྟེན་ཐམས་ཅད་དུ། །ཆོས་ཀྱི་འཁོར་ལོ་བསྐོར་བར་བགྱི། །ཨོཾ་ཨཱཿབཛྲ་ཝཱི་ཎི་ཧཱུཾ། དྲི་བྱུག་ཅིང༌། གང་གི་སངས་རྒྱས་ཞིང་ཀུན་དང༌། །འཇིག་རྟེན་པ་ཡི་ཁམས་ཀུན་ཏུ། །བླ་མེད་བསམ་མི་ཁྱབ་པའི་དྲི། །རང་གི་ལུས་ལས་སྤྲོ་བར་བྱ། །གྷནྡྷེ། རོ་བཅུད་ཕུལ་ལ། གང་གི་སངས་རྒྱས་བྱང་སེམས་དང༌། །སྲོག་ཆགས་གྱུར་པ་ཐམས་ཅད་ལ། །ལྷ་རྫས་དཔེ་མེད་རོ་ཡི་མཆོག །སྤྲུལ་ནས་སུ་ནི་སྦྱིན་པར་བྱ། །ཨོཾ་ཨཱཿབཛྲ་རཱ་སེ་ཧཱུཾ། གོས་ཟུང་ཕུལ་ལ། དེ་བཞིན་གཤེགས་པ་ཀུན་
དང་ཡང༌། །བྱང་ཆུབ་སེམས་དཔའ་སོགས་ཀུན་ལ། །ཡང་དག་སྦྱོར་བ་རེག་བྱའི་བདེ། །ངེས་པར་སྦྱར་བར་བྱ་བ་ཡིན། །སྤརྴེ་ཞེས་སོགས་སོ། །གཉིས་པ་ལྷ་མོ་ནི། སྔགས་རྒྱ་སྔ་མ་བཞིན་ལ། རྒྱལ་བ་རྣམས་ཀྱི་འདོད་འབྱུང་ལྷ་མོའི་ཚུལ། །གཟུགས་མཛེས་དཀར་མོ་མེ་ལོང་པདྨའི་སྣོད། །ཅང་ཏེའི་སྒྲ་འཁྲོལ་ཁ་ཊྭཱཾ་ལ་བརྟེན་མ། །ནམ་མཁའ་གང་བས་དཀྱིལ་འཁོར་ལྷ་ཚོགས་མཆོད། །འོག་མ་ལ་རྐང་པ་གཉིས་པ་གོ་བརྗེ། གཞན་འདྲ་སྟེ། དབྱངས་སྙན་སྔོན་མོའི་པི་ཝཾ་པདྨའི་སྣོད། །ཅེས་དང༌། དྲི་ལྡན་སེར་མོ་སྤོས་ཁང་པདྨའི་སྣོད། །ཅེས་དང༌། བཅུད་ལྡན་དམར་མོ་བཟའ་བཏུང་པདྨའི་སྣོད། །ཅེས་དང༌། བདེ་ལྡན་ལྗང་ཁུ་རས་བཟང་པདྨའི་སྣོད། །ཅེས་བྱའོ། །སྣ་ཚོགས་བསིལ་ཁྲོལ་སྙན་པའི་སྒྲ་ལྡན་མ། །ནམ་མཁའ་གང་བ་སོགས་འདོན་པ་བསྒྱུར་རོ། །རྒྱལ་བའི་དཀྱིལ་འཁོར་མཆོད་ལ་མངོན་དགའ་བའི། །གཟུགས་ཀྱི་ལྷ་མོ་མཛེས་པའི་མེ་ལོང་གཡོབ། །རྣམ་ཀུན་གཟུགས་ཀྱི་ངོ་མཚར་དང་འདྲེས་པ། །ཕྱོགས་དུས་ཀུན་འབྱུང་མཆོད་པས་མཉེས་གྱུར་ཅིག །ཨོཾ་རཱུ་པ་ཀཱ་མ་གུ་ཎ་བཛྲ་པུ་ཛི་ཏེ་ཨཿཧཱུཾ། དེ་བཞིན་དུ་རྐང་པ་ཐོགས་མཐའ་གཉིས་འདྲ་བ་ལ། སྒྲ་ཡི་ལྷ་མོ་སྙན་པའི་སྒྲ་དབྱངས་བསྐུལ། །རྣམ་ཀུན་སྒྲ་ཡི་སོགས་དང༌། ཤཔྟ། དྲི་ཡི་ལྷ་མོ་བདེ་སྤེལ་དྲི་བཟང་སྤྲོ། །རྣམ་ཀུན་དྲི་ཡ༴ གནྡྷེ། རོ་ཡི་ལྷ་མོ་རོ་བདའ་ཞལ་ཟས་
སྟོབ། །རྣམ་ཀུན་རོ་ཡི་ར་ས། རེག་གི་ལྷ་མོ་རེག་འཇམ་གོས་བཟང་སྟོབ། །རྣམ་ཀུན་རེག་གི༴ སྤརྴེ་སོགས་སོ། །ཡང་ན་འདོད་ཡོན་ལྔའི་ཚིགས་བཅད་སྤྱི་འགྲོ་རྣམས་སྦྱར་རོ། །བླ་མེད་ཀྱི་ཆོ་ག་དང་འབྲེལ་ན་དེ་ལྟར་བྱ་ལ། གཞན་དུ། པདྨའི་སྣོད་ཅེས་པར། ནོར་བུའི་སྣོད་ཅེས་དང༌། གཞན་ཡང་སྒེག་སོགས་ལྷ་མོ་བརྒྱད་ཀྱི་མཆོད་པ་ནི། རྣམ་མང་ཉམས་བརྒྱའི་འགྱུར་བ་དང་འདྲེས་པའི། །རྡོ་རྗེ་ལྷ་མོ་འགྱིང་སྒེག་དཀར་བའི་བཞིན། །ཟག་མེད་བདེ་བའི་སྙེམས་པ་རང་འཆང་མ། །མཁའ་མཉམ་རིག་མའི་བདེ་བས་མཉེས་གྱུར་ཅིག །ཨོཾ་ཨཱཿབཛྲ་ལཱ་སྱ་ཧཱུཾ། སྣ་ཚོགས་རིན་ཆེན་འཕྲེང་བས་ལག་སྦྲེལ་བའི། །རྡོ་རྗེ་ལྷ་མོ་གསེར་མདོག་མིག་བསྒྱུར་ཞིང༌། །རབ་མཛེས་འཛུམ་ཞལ་ཀུན་དགར་རབ་སྤེལ་མ། །མཁའ་མཉམ་རིག་མའི་བདེ་བས་མཉེས་གྱུར་ཅིག །མ་ལྱེ། དྲུག་ལྡན་རྡོ་རྗེའི་དབྱངས་སྙན་གླུར་ལེན་པའི། །རྡོ་རྗེ་ལྷ་མོ་ཆགས་ལྡན་ལྟ་ན་སྡུག །གཞོམ་མེད་ནཱ་དའི་སྒྲ་སྙན་རབ་བསྐུལ་མ། །མཁའ་མཉམ་རིག་མའི་བདེ་བས་མཉེས་གྱུར་ཅིག །གཱི་ཏཱི། ལང་ཚོ་རབ་བརྟས་སྒྱུ་འཕྲུལ་གར་བསྒྱུར་བའི། །རྡོ་རྗེ་ལྷ་མོ་མར་གད་རྡུལ་འཛིན་ཞིང༌། །ཀུན་རྟོག་འཕོ་བའི་སྒྱུ་ཐབས་རབ་བཅིལ་མ། །མཁའ་མཉམ༴ ནཱྀ་ཏྱ། ལྷ་རྫས་མེ་ཏོག་ཆར་མང་རབ་འབབས་པའི། །རྡོ་རྗེ་ལྷ་མོ་རབ་དཀར་ཟླ་བཞིན་ཅན། །རྣམ་མང་མཆོད་པའི་རྒྱན་དུ་རབ་སྤེལ་བ། །
མཁའ་མཉམ༴ པུཥྤེ། བདུག་པའི་སྤྲིན་ཕུང་མཁའ་དབྱིངས་ཀུན་འགེབས་པའི། །རྡོ་རྗེ་ལྷ་མོ་མཛེས་སྡུག་དུ་བའི་མདོག །རྣམ་དག་ཚུལ་ཁྲིམས་དྲི་བསུང་རབ་རྒྱས་མ། །མཁའ་མཉམ༴ དྷུ་པེ། གཞོན་ཚུལ་ཆོས་དབྱིངས་སྣང་བྱེད་འོད་འབར་བའི། །རྡོ་རྗེ་ལྷ་མོ་པདྨ་རཱ་གའི་མདོག །མུན་སེལ་སྔགས་ཀྱི་དེ་ཉིད་རབ་གསལ་མ། །མཁའ་མཉམ༴ ཨཱ་ལོ་ཀེ །ལང་ཚོས་རབ་དྲེགས་རྙོག་བྲལ་དྲིས་སྒེག་པའི། །རྡོ་རྗེ་ལྷ་མོ་མཚར་སྡུག་དཔྱིད་ཀྱི་མདངས། །མ་ལུས་སྲིད་པའི་གདུང་སེལ་བདེ་སྟེར་མ། མཁའ་མཉམ༴ གནྡྷེ། ཞེས་པ་གླུའི་སྦྱོར་བ་དང་བཅས་པས་བྱའོ། །དཔལ་བདེ་མཆོག་སོགས་རྣལ་འབྱོར་བླ་མེད་ཀྱི་དཀྱིལ་འཁོར་དང་འབྲེལ་བའམ། རབ་ཏུ་གནས་བྱའི་ལྷ་དེ་གསང་སྔགས་ནང་གི་ལྷ་ཡིན་ན། རིག་མ་བཅུ་དྲུག་སྦས་དོན་དང་སྦྱར་བའི་ཚིགས་བཅད་འདིས་མཆོད་པར་བྱ་སྟེ། དེ་ཡང་འདི་ལྟར། མཐོན་མཐིང་ལང་ཚོས་དྲེགས་པའི་ཡིད་འཕྲོག་མ། །རྡོ་རྗེ་རྒྱུད་མང་བསྒྲེང་བའི་རོལ་རྩེད་ཀྱིས། །སྒྲ་དབྱངས་རྒྱ་མཚོ་བསྐུལ་བ་ལ་བརྩོན་མ། །རྡོ་རྗེ་རིག་མའི་བདེ་བས་དགྱེས་པར་མཛོད། །ཅེས་དང༌། ཕྱག་རྒྱ་སོ་སོར་འཆའ་ཞིང༌། ཨོཾ་ཨཱཿབཛྲ་ཝཱི་ཎི་ཧཱུཾ། གསེར་མདོག་ཟུར་མིག་འདོད་པའི་མདའ་འཕེན་མ། །རྡོ་རྗེ་གླིང་བུ་བསྒྱུར་བའི་སྙན་འགྱུར་སྒྲ། །གཞོམ་མེད་ནཱ་དའི་དབྱངས་དང་རབ་འདྲེས་མ། །རྡོ་རྗེ༴ ཝངྶེ་ཏྲཾ། རབ་དམར་ཆགས་པས་མྱོས་པའི་ལུས་ཕྲ་མ། །རྡོ་རྗེ་རྫ་རྔ་བརྡུང་བའི་རྣམ་
འགྱུར་གྱིས། །མདའ་ཅན་དྲག་པོའི་སྙིང་གི་མྱོས་སེལ་མ། །རྡོ་རྗེ༴ མྲི་ཏཾ་གེ་ཧྲཱིཿ མར་གད་རྡུལ་གྱིས་བྱུགས་པའི་མིག་ཡངས་མ། །རྡོ་རྗེ་རྔ་ཆེན་སྒྲོགས་པའི་སྒྲ་བརྒྱ་པས། །གསང་ཆེན་དྷུ་ཏིའི་རང་སྒྲ་འབོད་མཁས་མ། །རྡོ་རྗེ༴ མུརྫི་ཨ། ཨིནྡྲ་ནཱི་ལའི་མདངས་ལྡན་བདེ་སྦྱིན་མོ། །རྡོ་རྗེ་དྲིལ་བུས་སྒེག་པའི་སྙེམས་པ་ཡི། །མཆོག་དགའི་ངོ་མཚར་སྟོན་པས་རབ་འགྱིང་མ། །རྡོ་རྗེ༴ ལཱ་སྱ་ཧཱུཾ། བིམ་པ་ལྟར་དམར་ཀུན་ཏུ་བཞད་པ་མོ། །ཀུ་མུད་འཛུམ་ཞལ་ཀུན་དགའི་ཟླ་སྣང་ཅན། །རྡོ་རྗེ་ཆགས་པས་རབ་རྒོད་བག་ཡངས་མ། །རྡོ་རྗེ༴ ཧ་སྱ་ཏྲཾ། ལི་ཁྲིའི་རྡུལ་ཆགས་འདོད་པའི་དབྱངས་མཁན་མ། །མི་ཟད་རྡོ་རྗེའི་ཚིག་འབྱིན་དྲུག་ལྡན་གླུ། །འཕྲོག་བྱེད་དགའ་མའི་དབྱངས་ལ་རབ་འཇུག་མ། །རྡོ་རྗེ༴ གཱི་ཏི་ཧྲཱིཿ སྔོ་ལྗང་འཁྲི་ཞིང་གཞོན་ནུའི་ལུས་ཅན་མ། །གཉེན་ལྕུག་འཁྲིལ་ལྡེམ་རྡོ་རྗེ་གར་གྱི་རོས། །འཕོ་བའི་སྒྱུ་རྩལ་ཀུན་ཏུ་རབ་འགོག་མ། །རྡོ་རྗེ༴ ནྲི་ཏྱ་ཨཱཿ ཁ་བ་དུང་ལྟར་རབ་དཀར་ཟླ་བཞིན་མ། །ཞིང་ཀུན་གང་བའི་མེ་ཏོག་གསར་པའི་ཆར། །རང་བྱུང་སི་ཧླའི་དྲི་བཟང་དང་འགྲོགས་མ། །རྡོ་རྗེ༴ པུཥྤེ་ཧཱུཾ། དུད་སྤྲིན་ལྟར་འགྲོ་ཨ་གར་དྲིས་སྒོས་མ། །རྡོ་རྗེ་བདུག་པའི་སྤྲིན་ཚོགས་སྟུག་པོའི་རྒྱུན། །ཀུན་རྟོག་ནགས་ཚལ་བསྲེགས་པ་ལས་འབྱིན་མ། །རྡོ་རྗེ༴ དྷཱུ་པེ་ཏྲཾ། གུར་གུམ་གཞོན་ནུའི་ལུས་ཅན་འོད་འབར་
མ། །ཉི་ཟླའི་རྣ་ཆ་གཡོ་ལྡན་རིན་ཆེན་སྒྲོན། །སྔགས་ཀྱི་དེ་ཉིད་གསལ་བ་ལས་འཆར་མ། །རྡོ་རྗེ༴ ཨཱ་ལོ་ཀེ་ཧྲཱིཿ འཆར་ཀའི་ཟླ་བའི་མདོག་ཅན་དྲིས་སྒེག་མ། །རྡོ་རྗེ་ག་བུར་ཙན་དན་སྦྱར་བའི་ཆུས། །ལུས་ཀུན་ཁྱབ་པའི་བསིལ་བདེ་ཡོངས་སྤེལ་མ། །རྡོ་རྗེ༴ གནྡྷེ་ཨཱཿ ཀུནྡའི་ཕུང་པོ་ལྟར་དཀར་གཟུགས་མཛེས་མ། །རབ་གསལ་གཟུགས་བརྙན་འཆར་བའི་མེ་ལོང་གཡོབ། །སྒྱུ་འཕྲུལ་རྡོ་རྗེའི་མིག་གི་བདུད་རྩི་མ། །རྡོ་རྗེ༴ རཱུ་པ་བཛྲི་ཎི་ཧཱུཾ། ཐུན་མཚམས་འོད་དམར་འཆར་བའི་མྱོས་ལྡན་མ། །རྣམ་པ་ཀུན་ལྡན་རོ་བརྒྱ་སྦྱར་བའི་གཡོས། །འདོད་ཆགས་རྡོ་རྗེའི་ཉམས་བརྒྱ་ལེགས་སྟོན་མ། །རྡོ་རྗེ༴ རཱ་ས་བཛྲི་ཎི་ཏྲཾ། གློག་ཕྲན་ལྟར་གཡོ་དཱུརྦའི་མདོག་ཅན་མ། །ལྷ་རྫས་ན་བཟས་རིག་པའི་བདེ་སྟོབ་ཅིང༌། །ཅི་དགར་འཁྱུད་པའི་རེག་གཉེན་བདེ་མཆོག་མ། །རྡོ་རྗེ༴ སྤརྴ་བཛྲི་ཎི་ཧྲཱིཿ ཀུ་མུད་རྒྱས་འདྲ་སྒྱུ་རྩལ་རྩེར་སོན་མ། །ཆོས་དབྱིངས་བདེ་བའི་འབྱུང་གནས་ཕྱག་རྒྱ་ཆེས། །མི་འགྱུར་འབྲས་བུའི་གནས་ལ་རྒྱས་འདེབས་མ། །རྡོ་རྗེའི་རིག་མའི་བདེ་བས་དགྱེས་པར་མཛོད། །དྷརྨཱ་དྷཱ་ཏུ་བཛྲི་ཎི་ཨཱཿ བྱ་སྤྱོད་རྣལ་འབྱོར་རྒྱུད་ཀྱི་ཆོ་ག་སོགས་ལ་བརྟེན་པ་ཡིན་ན། མཆོད་ལྷ་བཅུ་དྲུག་གི་ཚིགས་བཅད་བྱེད་པ་ལ། སྦས་དོན་དང་མ་སྦྱར་བའི་ཚིག་གཞན་གྱིས་བྱའོ། །དེ་ཡང་མཆོད་ཡུལ་གྱི་ལྷ་ལ་ཐོབ་མི་ཐོབ་དང་འོས་མི་འོས་མ་ཡིན་གྱི་འོན་ཀྱང་ལུགས་དེ་དང་དེའི་ཆོ་ག་དང་འབྲེལ་མི་འབྲེལ་གྱི་ཁྱད་པར་
གྱིས་ཡིན་ནོ། །འདི་ནི་གཏོར་མ་དང༌། དམ་ཚིག་གི་རྫས་ལ་སོགས་པ་ཐམས་ཅད་ལ་གོ་བར་བྱའོ། །དེ་ནས་རྒྱལ་སྲིད་སྣ་བདུན་གྱི་མཆོད་པ་བྱེད་ན། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན། སོགས་དང༌། ལྷ་རྫས་ལས་གྲུབ་ལྟེ་བ་ཤིན་ཏུ་ཟླུམ། །སོགས་སྤྱི་ཁྱབ་ཏུ་གྲགས་པ་རྣམས་ཀྱིས་མཆོད། ཤིན་ཏུ་སྤྲོས་པ་ལ་དགའ་ན་འདི་སྐད་ཅེས་བྱ་སྟེ། དྲི་མེད་འཛམ་བུ་ཆུ་བོའི་གསེར་བཟང་ལས། །བསོད་ནམས་བཟོ་བོས་མཆོག་ཏུ་རྣམ་སྤྲུལ་བ། །ལྷ་མིའི་མཛེས་པ་ཀུན་ལས་ཕུལ་བྱུང་ཞིང༌། །ལྟ་བས་མི་ངོམས་རྫུ་འཕྲུལ་ཤུགས་ཉིད་ལས། །རང་བྱུང་རྩིབས་སྟོང་ཏ་ལ་བདུན་སྲིད་དུ། །བྱུང་ཚེ་ཕྱོགས་ལས་རྒྱལ་བ་མཆོག་ཐོབ་པ། །རིན་ཆེན་འཁོར་ལོ་དམ་པ་འདི་ཕུལ་བས། །རྒྱལ་བྱེད་དྲན་པའི་འཁོར་ལོ་ཐོབ་པར་ཤོག །ཆུ་ཞིང་ཕུན་ཚོགས་ཐལ་དཀར་ཟླ་འོད་ཅན། །མཆེ་བ་དྲུག་ལྡན་དུལ་བས་སྤྱོད་པས་མཛེས། །སྔོན་ཆད་ལེགས་པར་བྱས་པའི་མཐུ་ཉིད་ལས། །རྫུ་འཕྲུལ་ཤུགས་ཀྱིས་མཁའ་ལ་རབ་འགྲོ་ཞིང༌། །མཁའ་ལྡིང་ས་སྲུངས་བུ་ལྟར་མགྱོགས་པ་ཡི། །ས་ཆེན་རྒྱ་མཚོ་འཁོར་བཅས་ཀུན་ཏུ་བསྐོར། །གླང་པོ་རིན་ཆེན་ཕུལ་བས་མཚན་མ་རྣམས། །འཇོམས་བྱེད་ཤེས་རབ་གླང་པོ་ཐོབ་པར་ཤོག །རབ་མཛེས་རྨ་བྱའི་མགྲིན་འདྲའི་སྤུ་སྟུག་ཅན། །ཡིད་བཞིན་ནོར་བུ་ལྟ་བུར་འདོད་པ་ཡི། །དོན་ཀུན་རྫོགས་པར་སྒྲུབ་བྱེད་ནམ་མཁའི་ལམ། །གུས་པར་སྤྱོད་པ་གསེར་གྱི་རྒྱལ་མཚན་ཅན། །ཅང་ཤེས་རླུང་
ལས་རྒྱལ་བ་སྤྲིན་གྱིས་ཤུགས། །ཡིད་ལྟར་མགྱོགས་པའི་རྟ་མཆོག་འདི་ཕུལ་བས། །མ་ལུས་ཆོས་ལ་མངོན་ཤེས་བགྲོད་པ་ཅན། །བརྩོན་འགྲུས་བཞོན་པ་མཆོག་གིས་འགྲོ་བར་ཤོག །ཀུན་ཏུ་མདོག་བཟང་མཚུངས་མེད་བཻཌཱུརྱ། ལེགས་པར་སྦྱངས་པའི་རིན་ཆེན་ཆ་བརྒྱད་པ། །བྱེད་པོ་མེད་ཅིང་ཕུན་ཚོགས་འོད་ཟེར་གྱིས། །མེ་དང་ཉི་མའི་འོད་ཀྱང་རྣམ་པར་གནོན། །དགའ་མགུར་འགྲོ་ཞིང་དགོས་པ་མཆོག་སྟེར་ལ། །འཁཽར་ཀུན་ཁྱབ་པའི་འོད་ཟེར་མཐའ་ཡས་ཅན། །བསམ་པ་རྫོགས་བྱེད་ནོར་བུ་འདི་ཕུལ་པས། །ཆོས་ཀྱི་སྣང་བའི་དགའ་བས་ཚིམས་པར་ཤོག །དགའ་ཚལ་ལྷ་ཡི་བུ་མོའི་གཟུགས་མཛེས་ཅན། །འདུལ་བའི་ཆོ་ག་ཕུན་ཚོགས་བསྟན་བཅོས་དང༌། །བཟོ་དང་སྙན་དངགས་སྒྱུ་རྩལ་ཀུན་ཤེས་ཤིང༌། །འཛུམ་ཞིང་སྙན་པར་སྨྲ་མཁས་མཚུངས་པའི་གཟུགས། །རེག་པ་མཆོག་ལྡན་ལུས་སེམས་བདེ་བའི་རྒྱུ། །ཧ་ཅང་ཆེ་ཆུང་མིན་པ་དྲི་བཟང་གཏེར། །ཕུལ་བས་སྒྲིབ་པ་ཀུན་ལས་རྣམ་ཐར་བའི། །ཤིན་ཏུ་སྦྱངས་པའི་བདེ་བས་འཚོ་བར་ཤོག །ལག་ན་རྡོ་རྗེ་སྲེད་མེད་བུ་ཡི་སྟོབས། །འཇམ་ཞིང་ཡིད་འོང་སྙན་པའི་ཚིག་ཀྱང་འབྱིན། །མཛངས་ཤིང་གསལ་ལ་ཡིད་གཞུང་ལྷ་མིག་ལྡན། ཁོར་ཡུག་གཏེར་གྱི་བདག་པོའི་དོན་ཀུན་བྱེད། །བྱམས་དང་སྙིང་རྗེ་མང་བ་དགེ་བའི་བདག །འདོད་དགུར་འཛུད་པའི་མི་མཆོག་འདི་ཕུལ་བས། །
འཇིག་རྟེན་འཇིག་རྟེན་འདས་པའི་ཕུན་ཚོགས་དོན། །ཀུན་འབྱོར་ཏིང་འཛིན་མཆོག་ལ་དབང་ཐོབ་ཤོག །དཔའ་ཞིང་བརྟུལ་ཕོད་ཡན་ལག་མཆོག་གི་གཟུགས། །ཕ་རོལ་དཔུང་འཇོམས་མི་མཐུན་མེད་བྱེད་པ། །སྔར་ལྡང་བསམ་པ་དགེ་ཞིང་ལྟ་བས་གོ །མ་སྨད་རྒྱས་ཤིང་རྫོགས་པའི་ལེགས་བྱས་ཅན། །འདོད་དགུར་འགྲོ་བའི་བློན་པོ་རིན་ཆེན་འདི། །ཕུལ་བས་ཇི་བཞིན་ཇི་སྙེད་ཆོས་རྣམས་ལ། །རྣམ་པར་མི་རྟོག་ཡེ་ཤེས་དམ་པ་ཡི། །རྩོལ་མེད་གནས་པའི་བཏང་སྙོམས་ཐོབ་པར་ཤོག །འདི་ལ་པུ་རུ་ཥ་རཏྣ་ཟེར་དགོས། ཉེ་བའི་རྒྱལ་སྲིད་འབུལ་བ་ནི། རལ་གྲི་ཉེ་བའི་རིན་པོ་ཆེ། །རྒྱལ་བ་སྲས་བཅས་རྣམས་ལ་འབུལ། །བླ་མེད་བྱང་ཆུབ་མཆོག་གི་ཆོས། །ཡེ་ཤེས་རལ་གྲི་ཐོབ་པར་ཤོགཁཌྒ་ཨུ་པ་རཏྣ༴ ཁང་ཁྱིམ་ཉེ་བའི་རིན་པོ་ཆེ། །རྒྱལ་བ༴ བླ་མེད༴ ཆོས་དབྱིངས་ཁང་བཟང་ཐོབ་པར་ཤོག །གྲྀ་ཧ་ཨུ་པ་རཏྣ༴ པགས་པ་ཉེ་བའི༴ རྒྱལ་བ༴ བླ་མེད༴ དགའ་བདེའི་གདིང་པ་ཐོབ་པར་ཤོག ཏྭ་ཀ་ཨུ་པ་རཏྣ། སྐྱེད་ཚལ་ཉེ་བའི༴ རྒྱལ་བ༴ བླ་མེད༴ རྣམ་འཕྲུལ་ཚལ་དུ་སྤྱོད་པར་ཤོག བཱ་ཊི་ཀ་ཨུ་པ་རཏྣ། གཟིམས་ཆ་ཉེ་བའི༴ རྒྱལ་བ༴ བླ་མེད༴ བསམ་གཏན་བདེ་བའི་ཡལ་ཐོབ་ཤོག། པརྻཾ་ག་ཨུ་པ་རཏྣ། གོས་བཟང་ཉེ་བའི༴ རྒྱལ་བ༴ བླ་མེད༴ རྒྱལ་སྲས་ཁྲེལ་ཡོད་གོས་ཐོབ་ཤོག །བསྟྲ་ཨུ་པ་རཏྣ། འཆིལ་ལྷམ་ཉེ་བའི༴
རྒྱལ་བ༴ བླ་མེད༴ ཐར་ལམ་བདེ་ལ་སྤྱོད་པར་ཤོག །མོ་ཙ་ཨུ་པ་རཏྣ༴ བསྡུ་ན། རལ་གྲི་ཁང་པ་པགས་པ་སྐྱེད་མོས་ཚལ། །མལ་ཆ་གོས་དང་འཆིལ་ལྷམ་རིན་པོ་ཆེ། །ཉེ་བའི་རིན་ཆེན་སྣ་བདུན་མཐའ་ཡས་པས། །རབ་ཏུ་གནས་བྱའི་དཀྱིལ་འཁོར་ལྷ་ཚོགས་མཆོད། །སཔྟ་ཨུ་པ་རཏྣ། ལྷ་ཡི་དབང་པོ་ལྷ་མིན་གཡུལ་རྒྱལ་ཚེ། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་རབ་གནས་ལྷ་ཚོགས་ལ། །བཀྲ་ཤིས་རྟགས་བརྒྱད་དག་གིས་མཆོད་པར་བགྱི། །མངྒ་ལ་ཨཥྟ་ཨང་ཀ །རྒྱས་པར་ན། ཇི་ལྟར་སྔོན་གྱི་སངས་རྒྱས་ལ། །སོགས་བྱའོ། །བསྟོད་པའི་ཁྱད་པར་ཡང་རྒྱུད་སྡེ་ལྔ་ལས་གསུངས་པའི་བསྟོད་པ་རྣམས་དང༌། ཡོངས་སུ་གྲགས་པའི་བསྟོད་པ་རྣམས་ཀྱིས་བསྟོད་པར་བྱའོ། ཁ་སྐོངས་བདུན་པའོ། །གསོལ་གདབ་བརྟན་བཞུགས་སོང་བའི། རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པའི་བསྟོད་པ་དེའི་རྗེས་སུ། །ཤིས་བརྗོད་རྨད་དུ་བྱུང་བ་འདི་བྱ་སྟེ། དེ་ཡང་འདི་སྐད་ཅེས། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨོ་རྒྱས་པ་འདབ་འདྲའི་སྤྱན་མངའ་བ། །བཀྲ་ཤིས་དེས་ནི་སྐྱེ་དགུ་ཞི་བྱེད་དང་པོའོ། །དེ་ཡི་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་
གཉིས་པ་ཡིན། །དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །སེམས་ཅན་ཀུན་ལ་ཕན་ཕྱིར་བྱང་ཆུབ་མངའ་བ་པོ། །དོན་རྣམས་ཐམས་ཅད་གྲུབ་པར་བརྟུལ་བ་ཡོངས་ལྡན་པ། །ཚོགས་ཀྱི་ལེགས་སྐྱེས་ཐུབ་པའི་བཀྲ་ཤིས་གང་བྱུང་བ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །འགྲོ་ལ་ཕན་ཕྱིར་དེ་བཞིན་གཤེགས་པ་དགའ་ལྡན་ལྷའི། །གཞལ་མེད་ཁང་གི་སྙིང་པོ་ནས་ནི་འདིར་གཤེགས་ཏེ། །དབང་བཅས་ལྷས་བསྐོར་བ་ཡི་བཀྲ་ཤིས་གང་བྱུང་བ། །བཀྲ་ཤིས༴ ལོ་མ་མེ་ཏོག་འོད་འབར་ཉམས་དགའ་ལུམྦུའི་ཚལ། །ལྷ་མང་དག་གིས་བསྟེན་པར་མགོན་པོ་བལྟམས་པ་ན། །སྲིད་པ་མཐར་ཕྱིན་པ་ཡི་བཀྲ་ཤིས་གང་བྱུང་བ། །བཀྲ་ཤིས༴ གྲོང་ཁྱེར་སེར་སྐྱའི་གནས་ནས་རྒྱལ་པོའི་ཕོ་བྲང་དུ།།ལྷུམ་ནས་བལྟམས་པ་སྟོན་པ་བདེ་གཤེགས་ཟས་གཙང་སྲས། །མྱུར་བསྐྲུན་བདུད་རྩིའི་ཆུས་གཏོར་བ་ཡི་བཀྲ་ཤིས་གང༌། །བཀྲ་ཤིས༴ གྲོང་ཁྱེར་དམ་པ་སེར་སྐྱའི་གནས་ཞེས་བྱ་བར་ནི། །རྨད་དུ་གྲགས་པ་ཆེན་པོ་ལྷ་ཡིས་མངོན་བསྟོད་པ། །བསམ་ལས་བདེ་སྒྲུབས་བསོད་ནམས་ཕུང་པོའི་བཀྲ་ཤིས་གང༌། །བཀྲ་ཤིས༴ དགྱེས་ཤིང་ནམ་ཕྱེད་གྲོང་ཁྱེར་ནས་ནི་མངོན་བྱུང་སྟེ། །དཀའ་ཐུབ་ཚུལ་དུ་མངོན་པར་གཤེགས་ཤིང་ཚངས་ལ་
སོགས། །ལྷ་ཡི་ཚོགས་ཀྱིས་ཡོངས་སུ་བསྐོར་བའི་བཀྲ་ཤིས་གང༌། །བཀྲ་ཤིས༴ རབ་ཏུ་འོད་འབར་གསེར་དང་འདྲ་བའི་སྐུ་མངའ་ཞིང༌། །བཻ་ཌཱུརྱ་ལྟར་སྔོ་བའི་རྩ་བཏིང་སྟེང་བཞུགས་ཏེ། །སྐྱིལ་མོ་ཀྲུང་བཅས་མི་གཡོ་མཆོག་གི་བཀྲ་ཤིས་གང༌། །བཀྲ་ཤིས༴ ཆུ་བོའི་འགྲམ་ན་ཙརྐའི་འཕྲེང་བས་ཡོངས་བསྐོར་བ། །ཤིན་ཏུ་རྨད་དུ་བྱུང་བའི་སྲིད་པ་སེལ་མཛད་པ། །ཀླུ་ཡི་རྒྱལ་པོས་ཕྱག་བྱས་པ་ཡི་བཀྲ་ཤིས་གང༌། །བཀྲ་ཤིས༴ ཤིང་རྒྱལ་དྲུང་གཤེགས་བྱམས་པའི་སྟོབས་ཀྱིས་བདུད་ཀྱི་ཕྱོགས། །མང་པོ་བརྟུལ་ཚེ་ས་སྟེང་དང་ནི་ནམ་མཁའ་ལ། །བཅོམ་ལྡན་བཀྲ་ཤིས་རྣམ་པ་སྣ་ཚོགས་གང་བྱུང་བ། །བཀྲ་ཤིས༴ སྡུག་བསྔལ་མཐའ་དག་གཞིག་ཕྱིར་རྡོ་རྗེ་གདན་བཞུགས་ཏེ། །ནམ་གྱི་ཐོ་རངས་བདུན་བཞི་པོ་དག་རྣམས་བཏུལ་བ། །སྟོན་པ་བདེ་བར་གཤེགས་པའི་བཀྲ་ཤིས་གང་ཡིན་པ། །བཀྲ་ཤིས༴ གྲོང་ཁྱེར་ཝཱ་རཱ་ཎཱ་སིར་དྲང་སྲོང་མཆོག་བཞུགས་ནས། །ཆོས་ཀྱི་འཁོར་ལོ་མཆོག་བསྟན་པ་ཡི་བཀྲ་ཤིས་གང༌། །ལྷ་ཡུལ་དེང་འདིར་ཤིན་ཏུ་རྨད་དུ་བྱུང་གྱུར་པ། །བཀྲ་ཤིས༴ བཀྲ་ཤིས་གང་ཞིག་ཕན་བྱེད་དམ་པ་དག་བྱེད་པ། །བསོད་ནམས་དག་བྱེད་འཕགས་པའི་སྐྱེ་བོས་མངོན་བསྟོད་པ། །བཅོམ་ལྡན་ཤཱཀྱ་ཐུབ་པ་སེང་གེས་གང་གསུངས་པ། །བཀྲ་ཤིས༴ མུ་སྟེགས་བྱེད་པ་ཀུན་གྱི་ང་རྒྱལ་གཞོམ་པ་དང༌། །འགྲོ་ལ་བདེ་བ་སྐྱེད་ཕྱིར་ཆོ་འཕྲུལ་དམ་པ་དག །ཉེ་བར་སྟོན་པ་རྒྱལ་པོའི་བཀྲ་
ཤིས་གང་ཡིན་པ། །བཀྲ་ཤིས༴ འགྲོ་ལ་ཕན་ཕྱིར་མཐོ་རིས་གནས་ནས་འདིར་གཤེགས་ཏེ། །ཚངས་པ་ལ་སོགས་ལྷ་ཚོགས་ལག་ན་རྔ་ཡབ་གདུགས། །སྣ་ཚོགས་ཐོགས་པས་ཡོངས་སུ་བསྐོར་བའི་བཀྲ་ཤིས་གང༌། །བཀྲ་ཤིས༴ དེ་བཞིན་གཤེགས་པ་ཞི་བའི་མཆོག་ཏུ་ཉེར་གཤེགས་པ། །མན་ད་ར་ཡི་མེ་ཏོག་མང་པོས་མངོན་མཆོད་པ། །ལྷ་མཆོག་རྣམས་ཀྱིས་མངོན་བསྟོད་པ་ཡི་བཀྲ་ཤིས་གང༌། །བཀྲ་ཤིས་དེས་ནི་སྐྱེ་དགུ་རྣམས་ལ༴ ལྷ་དབང་ཀླུ་དང་མི་ཡི་དབང་པོས་ཕྱག་བྱས་པ། །མཁའ་ལྡིང་གནོད་སྦྱིན་དྲི་ཟའི་དབང་པོས་མཆོད་གྱུར་པ། །དེ་བཞིན་གཤེགས་པ་སྟོབས་བཅུ་ལྡན་པའི་བཀྲ་ཤིས་གང༌། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག ཁ་སྐོངས་བརྒྱད་པའོ། །རྗེས་ཀྱི་སྐབས་ཡོན་བདག་བསྒོ་བ་དགོས་ན། དེའི་ཤིས་བརྗོད་ཀྱི་སྐབས་སུ། སྔོན་བཅོམ་ལྡན་འདས་ལ་གཟུགས་ཀྱི་ལྷ་མོ་འོད་འཆང་མས་མེ་ལོང་ཕུལ་བ་སོགས། །ཚིག་ལྷུག་པའི་ཤིས་བརྗོད་དེ་ཡང་རྫས་བརྒྱད་ཐམས་ཅད་ལ་སྦྱར་བས་རྒྱས་པར་འགྱུར་ལ། དེ་ནས་ཀུན་གྱི་མཐར་རྗེས་བསྡུ་བ་གྲུབ་པའི་སྐབས་སམ། རྒྱས་པའི་སྦྱིན་སྲེག་བྱེད་ན་དེའི་མཐར་ཡང་རུང་སྟེ། སྟོང་ཆེན་མོ་རབ་ཏུ་འཇོམས་པའི་མདོ་ལས་འབྱུང་བའི། དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་བཅད་རྨད་དུ་བྱུང་བས་ཤིས་བརྗོད་བྱ་སྟེ། འཇིག་རྟེན་འདིའམ་གཞན་དང་མཐོ་རིས་ན། །རིན་ཆེན་རྨད་བྱུང་རྒྱ་ཆེན་མཆོག་ཡོད་པ། །དེས་ནི་རྫོགས་པའི་སངས་རྒྱས་རིན་ཆེན་ལ། །ཅིས་ཀྱང་གྲངས་དང་བགྲངས་དང་ཆར་མི་ཕོད། །ངོ་མཚར་ཤིན་ཏུ་རྨད་བྱུང་
དཔག་མེད་དེ། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ནི་ཤིན་ཏུ་བདེ་ལེགས་ཤོག །ཞི་འགོག་བདུད་རྩི་ཤིན་ཏུ་གྱ་ནོམ་གང༌། །ཤཱཀྱ་ཐུབ་པས་མཉམ་བཞག་ཐུགས་ཆུད་པ། །ཆོས་དེ་དང་ནི་མཚུངས་པ་ཡོད་མིན་ཏེ། །དེ་མངོན་བྱས་ན་ཕྱིན་ཆད་མྱ་ངན་མེད། །ངོ་མཚར་ཤིན་ཏུ་རྨད་བྱུང་༴ དམ་པའི་ཆོས་ཀྱི་རིན་ཆེན༴ ཇི་ལྟར་ངའི༴ བདེན་པའི་འདིས་ནི༴ རྒྱལ་བས་གང་དག་གང་ཟག་བརྒྱད་གསུངས་པ། །དེ་དག་རྣམས་ནི་སྐྱེས་བུ་ཟུང་བཞི་སྟེ། །སྦྱིན་གནས་དེ་དག་ས་སྟེང་ཤིན་ཏུ་དཀོན། །དེ་དག་རྣམས་ལ་བྱིན་ན་དཔག་མེད་འགྱུར། །ངོ་མཚར་ཤིན་ཏུ་རྨད་བྱུང་དཔག་མེད་དེ། །དགེ་འདུན་རིན་ཆེན་གང་ཞིག༴ ཇི་ལྟར་ངའི༴ །བདེན་པ་འདིས༴ དམ་པ་གཙོ་བོ་མཆོག་སྦྱིན་གྱ་ནོམ་པ། །འོད་མཆོག་དཔའ་བོ་དམ་པ་མཆོག་གི་གནས། །ཤེས་རབ་དམ་པ་མཆོག་ནི་དམ་པ་མཆོག །མཆོག་མིན་མཆོག་མཁྱེན་འདི་ནི་བཅོམ་ལྡན་གཅིག །ངོ་མཚར་ཤིན་ཏུ་རྨད༴ རྫོགས་པའི་སངས་རྒྱས་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ ཏིང་འཛིན་དམ་པ་བར་ཆད་མེད་པ་གང༌། །མཐའ་ཡས་བློ་ལྡན་དེ་བཞིན་གཤེགས་གསུངས་པ། །ཏིང་འཛིན་དེ་བརྟན་རྡོ་རྗེ་དཔེར་བྱས་པ། །ཏིང་འཛིན་དེ་དང་མཚུངས་པའི་ཏིང་འཛིན་མེད། །ངོ་མཚར་ཤིན་ཏུ་རྨད༴ ཏིང་ངེ་འཛིན་གྱི་རིན་ཆེན༴ ཇི་
ལྟར་ངའི༴ བདེན་པ་འདིས་ནི༴ ཇི་ལྟར་སྒོ་གཏན་དམ་ཞིང་རབ་དམ་སྟེ། །སྟོབས་ཆེན་རླུང་བཞི་དག་གིས་མི་བསྐྱོད་པ། །དེ་ལྟར་མཁས་པ་བདེན་བཞི་མཐོང་གནས་པ། །འཇིག་རྟེན་སྨྲ་བ་རྣམས་ཀྱིས་འདིར་མི་གཡོ། །ངོ་མཚར་ཤིན་ཏུ༴ དགེ་འདུན་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ ཐམས་ཅད་ཟིལ་གནོན་ཀུན་མཁྱེན་ཐམས་ཅད་གཟིགས། །ཐམས་ཅད་མཁྱེན་པ་སྟོབས་རྣམས་ཀུན་དང་ལྡན། །ཀུན་གྱི་དམ་པ་འཛིན་པ་ཀུན་དང་བྲལ། །བསམ་པ་ཀུན་མཁྱེན་འདི་ནི་བཅོམ་ལྡན་གཅིག།ངོ་མཚར་ཤིན་ཏུ་རྨད་བྱུང་དཔག་མེད་དེ། །རྫོགས་པའི་སངས་རྒྱས་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ སྲིད་པ་འགོག་ཅིང་མི་གཡོ་འགྱུར་བ་མེད། །སྐྱོན་མེད་འཇིགས་པ་ཀུན་ལས་རྣམ་པར་གྲོལ། །ཤིན་ཏུ་འགག་ཅིང་གྱ་ནོམ་ངེས་པར་འབྱུང༌། །ཤིན་ཏུ་དྲི་མེད་ཞི་བ་བློས་མི་འཕྲོག །ངོ་མཚར་ཤིན་ཏུ༴ དམ་པའི་ཆོས་ཀྱི་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ ཤིན་ཏུ་སྡུག་བསྔལ་སྟོན་ཞིང་བདེ་སྦྱིན་པའི། །བདེན་རྣམས་མཐོང་སྟེ་གང་དག་བག་ཡོད་པ། །བདེན་ པ་རིན་ཆེན་རྣམས་ལ་དོགས 
་བྲལ་བ། །དེ་དག་སྐྱེ་བ་བརྒྱད་པ་ཕྱིས་མི་ལེན། །ངོ་མཚར་ཤིན་ཏུ༴ དགེ་འདུན་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ དམ་པ་རྣམས་ཀྱིས་དམ་པ་དོན་དམ་མཁྱེན། །མཆོག་དང་མཆོག་མིན་མཁྱེན་ཞིང་དོན་དམ་བརྩོན། །གཞན་
གྱིས་མི་འཕྲོག་དམ་པ་ཐུགས་ཆུད་རྟོགས། །ཤིན་ཏུ་སྡུག་བསྔལ་ཅན་གྱི་དཔུང་གཉེན་མཆོག །ངོ་མཚར་ཤིན་ཏུ༴ རྫོགས་པའི་སངས་རྒྱས་རིན་ཆེན༴ཇི་ལྟར་ངའི༴ བདེན་པ་འདིས་ན༴ འདུན་པ་སྐྱེད་ནས་རྣལ་འབྱོར་ལྡན་གྱུར་ཞིང༌། །གོ་ཏམ་བསྟན་ལ་རྟག་བརྩོན་རབ་གྲོལ་ཞིང༌། །གཞན་གྱིས་མི་བཀྲི་བ་དག་ཞིང་དེར་རེག །འདི་ལ་དེ་རེག་གྲངས་སུ་ཕྱིན་མི་འགྱུར། །ངོ་མཚར་ཤིན་ཏུ༴ དམ་ཆོས་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ བདེན་པ་མཐོང་བས་བརྗེད་པ་རྒྱ་ལམ་ན། །གལ་ཏེ་སྡིག་པ་འགའ་ཞིག་བྱས་གྱུར་ཀྱང༌། །དེ་ནི་དེ་འཆབ་པ་ཡི་འོས་མིན་ཏེ། །ཆོས་ཉིད་འདི་ནི་མོ་གཡོ་གནས་ཕྱིར་རོ། །ངོ་མཚར་ཤིན་ཏུ༴ དགེ་འདུན་རིན་ཆེན༴ ཇི་ལྟར་ངའི༴ བདེན་པ་འདིས་ནི༴ ལྷ་དང་བཅས་པའི་འཇིག་རྟེན་ཐམས་ཅད་ན། །སངས་རྒྱས་དང་ནི་ལྷག་པའི་མཚུངས་པ་མེད། །ལྷ་དང་མི་ཡི་སྟོན་པ་བླ་ན་མེད། །སྟོན་པ་དེད་དཔོན་སྨོན་པ་རྣམས་ཀྱི་མཆོག །ངོ་མཚར་ཤིན་ཏུ༴ རྫོགས་པའི་སངས་རྒྱས༴ ཇི་ལྟར་ངའི༴ བདེན་པ་འདིས་ནི༴ ས་གའི་ཟླ་བ་དང་པོར་ཐུབ་པ་ཡིས། །ནགས་ཁྲོད་ཆོས་ཀྱི་དམ་པར་རབ་བརྙེས་པ། །ཆོས་དེ་དང་ནི་མཚུངས་པའི་ལྷག་པ་མེད། །འདི་ལ་དེ་རེག་གྲངས་སུ་ཕྱིན་མི་འགྱུར། །ངོ་མཚར་ཤིན་ཏུ༴ དམ་པའི་ཆོས་ཀྱི་རིན་ཆེན༴ ཇི་ལྟར་ངའི༴
བདེན་པ་འདིས་ནི༴ སྡིག་པ་རྙིང་ཟད་གསར་དུ་བྱས་མེད་ལ། །རིམས་ནད་མེད་པས་འཇིགས་མེད་མྱ་ངན་བྲལ། །རྩ་བ་འགགས་པས་སྲིད་པ་མི་བསྐྱེད་པ། །བསྟན་པ་མར་མེ་བཞིན་དུ་འབར་བར་ཤོག །ངོ་མཚར་ཤིན་ཏུ༴དགེ་འདུན་རིན་ཆེན༴ ཇི་ལྟར་ངའི༴ བདེན་པ་འདིས་ནི་ཤིན་ཏུ་བདེ་ལེགས་ཤོག །ཅེས་པའོ། །མཆོད་འཕྲེང་ཚིགས་བཅད་ཀྱི་རིགས་དང༌། བཀྲ་ཤིས་ཀྱི་རིགས་རྣམས་གང་དང་གང་དུ་དགོས་པ་དེ་དང་དེར་སྦྱར་བས་ཆོག་པའི་ཕྱིར། གཅིག་ཏུ་ངེས་པ་མེད་མོད། འོན་ཀྱང་མི་མཁས་པས་ལྷོངས་སུ་གྱུར་རྫུ་བྱས་ན་སྐབས་སུ་མ་བབས་པའི་འདོན་པ་ཡོད་པས་དེ་འདྲ་འགོག་པའི་ཕྱིར་དང༌། འཚམ་ཞིང་འོས་པ་ལ་ཐེ་ཚོམ་མི་འཇུག་པའི་ཕྱིར། །འདིར་ངེས་ཅན་གྱི་ཚུལ་དུ་བྲིས་སོ། །དེ་ཡང་ཆོ་ག་འདི་དང་འབྲེལ་བའི་རབ་གནས་བྱེད་པར་འདོད་པས། གནས་སྐབས་པའི་རྡོ་རྗེ་སློབ་དཔོན་ཆུང་ངུའི་གོ་འཕང་ཞིག་མ་མཐའ་ཡང་ཐོབ་པར་བྱ། དེ་ནས་རབ་གནས་ཀྱི་ཆོ་ག་གཞུང་དང་ཁ་སྐོང་འདི་གཉིས་ཀ་བློ་ལ་ཤིན་ཏུ་བྱང་བར་བཟུང༌། ལག་ལེན་དང་གོ་བ་ལ་མཁས་པར་བྱའོ། །འགྲོ་ཕན་རྒྱས་བྱེད་ཉིད་རྒྱུད་གཞུང་གི་དགོངས་པ་ཚང་ལ་མ་ནོར་བ་རྒྱས་པའི་ལུགས་ཡིན་པས། བྱིན་རླབས་ཆེ་ཞིང༌། རྒྱུན་གྱི་ལག་ལེན་དུ་དེ་ཀས་ཆོག་ལ། སྤྲོས་པ་ལ་དགའ་བའི་ངོར་ཤིན་ཏུ་རྒྱས་པ་ཡང་རེས་འགའ་ངེས་པར་དགོས་ཀྱིན་འདུག་པས། དཔེ་འཛིན་ཕྲན་ཚེག་ཙམ་ལ་ཡང་རྩེགས་པའི་གླང་ཆུང་གི་སྙོམས་ལས་མ་བྱེད་ཅིག །ཤིན་ཏུ་རྒྱས་པ་ལ་ཁ་སྐོང་འདི་ཡོངས་རྫོགས་བྱ། ཅུང་ཟད་རྒྱས་པ་ཙམ་བྱེད་ན་ཇི་ལྟར་འཚམ་པ་བྱས་པས་ཆོག་གི་ཐམས་ཅད་ནག་འདེད་རང་མི་དགོས། དཔེར་ན་ཡངས་པའི་གྲོང་ཁྱེར་གྱི་ཤིས་བརྗོད་དང༌། རྗེས་དྲན་དང་སེམས་བསྐྱེད་
ཙམ་ཁ་བསྐངས་བས་ཀྱང་ལེགས་པོར་འོང་ངོ༌། །འགྲོ་ཕན་རྒྱས་བྱེད་དུ་བཤད་པ་དེ་དག་ཅུང་ཟད་ཀྱང་མ་ཆད་པར་བྱ་སྟེ། ཆོ་ག་རྒྱས་པ་ཉིད་ཀྱི་ལུགས་བྱེད་པའི་དབང་དུ་བྱས་པ་ཉིད་ཀྱི་ཕྱིར་རོ། །ཆོ་ག་རྣམ་པ་དུ་མ་ལ། །དགོས་པའི་ངག་འདོན་མཐའ་ཡས་ལས། །འབྲེལ་མེད་སྨྱོན་གཏམ་ལ་སོགས་སྤངས། །བཟང་པོ་འབའ་ཞིག་སྡེབས་པ་ཡིན།། །།ཞེས་པའང་རྒྱལ་ཁམས་པ་ཏཱ་ར་ནཱ་ཐས་བར་སྐབས་སུ་བརྗོད་པའོ། །གཅིག་ཞུས། མངྒ་ལཾ། །