ཟབ་མོ་གཞན་སྟོང་དབུ་མའི་བརྒྱུད་འདེབས།
ཟབ་མོ་གཞན་སྟོང་དབུ་མའི་བརྒྱུད་འདེབས་བཞུགས་སོ།
ན་མོ་གུ་རུ། ཟབ་མོ་གཞན་སྟོང་དབུ་མའི་བརྒྱུད་འདེབས། རྒྱལ་བ་སྲས་བཅས་ལ་ཕྱག་འཚལ་ལོ། །དཔལ་ལྡན་ཡེ་ཤེས་ལྔ་ལྡན་སྐུ་ གསུམ་དངོས། །བརྒྱད 
་ཁྲི་བཞི་སྟོང་ཆོས་ཀྱི་འབྱུང་གནས་ཏེ། །འཕགས་ཚོགས་འདུས་པའི་ཚོགས་ཀྱི་གཙོ་བོ་མཆོག །བཅོམ་ལྡན་ཐུབ་པའི་དབང་པོར་གསོལ་བ་འདེབས། །ཐོག་མེད་དུས་ནས་བྱང་ཆུབ་སངས་རྒྱས་ཀྱང་། །འགྲོ་བའི་དོན་དུ་རྒྱལ་སྲས་ཚུལ་སྟོན་པ། །རྒྱལ་བའི་རྒྱལ་ཚབ་ཆེན་པོར་དབང་བསྐུར་བརྙེས། །མགོན་པོ་བྱམས་པའི་ཞབས་ལ་གསོལ་བ་འདེབས། །ཡེ་ཤེས་ཞི་བའི་འོད་བྱེད་ས་བརྙེས་ཤིང་། །མི་ཕམ་མགོན་པོའི་ཞལ་ལུང་བདུད་རྩི་ཐོབ། །འཛམ་གླིང་འདི་ན་ཐེག་ཆེན་བསྟན་པའི་བདག །འཕགས་པ་ཐོགས་མེད༴ གསང་བདག་རྡོ་རྗེ་འཛིན་དང་གཉིས་སུ་མེད། །མ་ལུས་རྒྱལ་བའི་བཀའ་རྣམས་ཐུགས་སུ་ཆུད། །སངས་རྒྱས་བསྟན་པའི་ཉིན་བྱེད་གཅིག་པུར་གྱུར། །རྒྱལ་སྲས་དབྱིག་གཉེན༴ ཕྲ་ཞིང་རྟོགས་དཀའ་དྲང་སྲོང་ཆེན་པོའི་ལམ། །བདེ་གཤེགས་སྙིང་པོའི་ལེགས་བཤད་སེང་གེའི་སྒྲ། །རིང་ནས་ནུབ་པ་སླར་ཡང་གསལ་མཛད་པའི། །གངྒཱ་མཻ་ཏྲིའི༴ གཉིས་འཛིན་འཁྲུལ་བའི་དྲི་མ་གཏན་ནས་སྤངས། །བརྟུལ་ཞུགས་སྤྱོད་མཛད་ཨ་ཝ་དྷཱུ་ཏཱི་པ། །མི་ཕམ་ཞལ་གཟིགས་ཕྱོགས་ཀུན་རྒྱུ་བའི་ཚུལ། །དགའ་བ་གྲགས་པའི༴
ཐེག་མཆོག་གཞུང་ལུགས་རྒྱ་མཚོའི་ཕ་རོལ་སོན། །ཚངས་སྤྱོད་དཔལ་གྱིས་བརྒྱན་པའི་དགེ་སློང་སྟེ། །གནས་ལུགས་ཟབ་མོའི་དོན་གཟིགས་ཁ་ཆེ་བ། །འབྱུང་གནས་ཞི་བའི༴ བགྲང་ཡས་མཁས་གྲུབ་བྱོན་པའི་རིགས་སུ་འཁྲུངས། །དཔག་ཡས་ལྷག་པའི་ལྷ་ཡིས་བྱིན་གྱིས་བརླབས། །མཐའ་ཡས་གསུང་རབ་ལེགས་མཁྱེན་རྣལ་འབྱོར་མཆོག །བྲམ་ཟེ་སཛྫ་ན་ལ༴ བདེ་མཆོག་འཁོར་ལོའི་ཞལ་གཟིགས་མཁས་པའི་ཕུལ། །ཕྱོགས་འདིར་གཞན་སྟོང་དབུ་མའི་སྒྲ་བསྒྲགས་ཤིང༌། །དཔེ་མེད་གྲོང་དུ་རྡོ་རྗེའི་སྐུ་བརྙེས་པ། །དགའ་ལོ་ཙཱ་བའི་རྡོ་རྗེའི་ཞབས་ལ༴ མི་ཕམ་གཞུང་ལ་མཁས་པའི་ཕུལ་དུ་གྱུར། །དབུ་མའི་ལམ་ལས་ཆོས་ཉིད་ཟབ་མོ་གཟིགས། །སྡོམ་བརྩོན་དམ་པ་བཙན་རིགས་ཁ་བོ་ཆེ། །དྲི་མེད་ཤེས་རབ༴ དགྲ་གཉེན་ཆགས་སྡང་སྤངས་ཏེ་གཞན་ཡུལ་བྱོན། །ཟབ་མོའི་མདོ་དང་རྒྱུད་སྡེ་དུ་མ་མཁྱེན། །རྒྱལ་ཚབ་བྱམས་པས་རྗེས་བཟུང་ལ་སྟོད་པ། །དར་མ་བརྩོན་འགྲུས༴ རང་བྱུང་ཡེ་ཤེས་གཅིག་ཅར་ཐུགས་ལ་འཁྲུངས། །ཞལ་མཐོང་ཀུན་ཡང་ལམ་སྣ་ཟིན་པར་གྲགས། །སྙིང་པོའི་བསྟན་པ་གསལ་མཛད་དོལ་པ་གཉན། །ཡེ་ཤེས་འབྱུང་གནས༴ འཕགས་མཆོག་གཉིས་ཀྱི་དགོངས་པ་གཅིག་ཏུ་གཟིགས། །ཐེག་ཆེན་མངོན་པའི་བསྟན་པ་གསལ་མཛད་པ། །བྱང་ཆུབ་སྐྱབས་དང་
གཞོན་ནུ་བྱང་ཆུབ་སྟེ། །འཇད་སྟོན་སྐུ་མཆེད༴ སྡོམ་བརྩོན་ཆོས་སྐྱོང་བྲན་དུ་འཁོལ་བ་པོ། །སྡེ་སྣོད་འཛིན་པ་མཐུ་སྟོབས་བསམ་མི་ཁྱབ། །ཕྱག་རྡོར་ཞལ་གཟིགས་ཆོས་རྗེ་སྐྱོ་སྟོན་པ། །སྨོན་ལམ་ཚུལ་ཁྲིམས༴ འཕགས་པ་མི་གཡོ་མགོན་པོའི་བྱིན་རླབས་ཀྱིས། །བཀའ་དང་བསྟན་བཅོས་མཐའ་དག་ཐུགས་སུ་ཆུད། །མཁས་པའི་མཁས་པ་ཆོས་ཀྱི་རྒྱལ་མཚན་འཛིན། །བཅོམ་ལྡན་རལ་གྲིའི༴ མང་ཐོས་མཐར་ཕྱིན་དམ་པའི་ཆོས་ཀྱི་མཛོད། །ཉན་བཤད་སྒོ་ནས་བསྟན་པ་ཉིན་མོར་མཛད། །ཆེ་དགུས་ཞབས་ལ་བཏུད་པའི་བཤེས་གཉེན་མཆོག །སྐྱི་སྟོན་འཇམ་པའི་དབྱངས་ལ༴། གངས་རིའི་ཁྲོད་འདིར་ངེས་དོན་བསྟན་པའི་བདག །འགྲན་མེད་དམ་པ་ཆོས་ཀྱི་འཁོར་ལོ་བསྐོར། །འཇིག་རྟེན་དབང་མགོན་པོའི་རྣམ་འཕྲུལ་ཇོ་ནང་པ། །ཀུན་མཁྱེན་ཆེན་པོའི༴ བློ་གསལ་འདུས་པ་དམ་པ་ཀུན་གྱི་རྒྱན། །རིག་པའི་དབང་ཕྱུག་ཕས་ཀྱི་རྒོལ་བ་འཇོམས། །མཁས་མཆོག་རྣམས་ཀྱི་བླ་མ་ཀུན་དགའ་དཔལ། །ཉ་དབོན་ཆོས་རྗེའི༴ བླ་མས་བྱིན་བརླབས་འགྲོ་བའི་དོན་ཆེན་འགྲུབ། །སྙིང་རྗེ་ཆེན་པོས་རྒྱལ་བའི་སྲས་སུ་ཆུད། །བདེ་གཤེགས་སྙིང་པོའི་དོན་ལ་ངེས་པ་འཁྲུངས། །ཆོས་དཔལ་མགོན་པོའི༴ འདུལ་མངོན་རྒྱ་མཚོའི་ཕ་རོལ་སོན་ནས་ཀྱང༌། །ཕྱི་མའི་དུས་ན་གཞུང་བརྒྱ་སྨྲ་བའི་མཆོག །དམ་པའི་སྤྱོད་ལྡན་བྱང་ཆུབ་ཐུགས་གཉིས་འབྱོངས། །བློ་གྲོས་བཟང་པོ་རྒྱ་མཚོའི༴ ཟབ་མོའི་དོན་ལ་ཏིང་འཛིན་བརྟན་པ་ཐོབ། །ཀུན་རྫོབ་སྒྱུ་མ་ལྟ་བུར་མངོན་སུམ་གཟིགས། །གཉིས་འཛིན་འཁྲུལ་པ་ཞིག་པའི་དོན་ཡོད་དཔལ། །བྱམས་མགོན་གཉིས་པར་གྲགས་ལ༴ མདོ་སྔགས་གཞུང་ལུགས་ངེས་གསང་ཀུན་གཟིགས་ནས། །ལོག་སྨྲ་མཐའ་དག་ཡང་དག་རིགས་པས་སེལ། །བསྟན་པའི་མངའ་བདག་གནས་ལྔ་རིག་པའི་ཕུལ། ཤཱཀྱ་མཆོག་ལྡན༴ མཁས་མཆོག་གང་དེའི་གསུང་གི་གསང་བ་ལས། །ནམ་ཡང་གཡོ་བ་མེད་པའི་བློ་གྲོས་ཅན། །མཁས་པའི་དབང་
ཕྱུག་འོད་གསལ་རྡོ་རྗེའི་ཐུགས། །དོན་ཡོད་གྲུབ་པའི༴ ཕྱོགས་འཛིན་སྤངས་ཏེ་དམ་པའི་ཆོས་ཀྱི་སྒོ། །མཐའ་དག་གསན་ཞིང་ཐུགས་སུ་ཆུད་གྱུར་ནས། །སྐལ་བཟང་ཡིད་ཀྱི་རེ་བ་སྐོང་མཛད་པའི། །འཇམ་མགོན་གྲུབ་པའི་དཔའ་བོར༴ རྒྱལ་བ་དགེས་པའི་ལམ་ལས་མཐར་ཐུག་བརྙེས། །དམ་ཆོས་བདུད་རྩིའི་རྒྱ་མཚོར་དབང་བསྒྱུར་བ། །ཐར་འདོད་འགྲོ་བ་ཀུན་གྱི་དེད་དཔོན་མཆོག །ཀུན་དགའ་རྒྱལ་མཚན༴ རླབས་ཆེན་ཏིང་འཛིན་གཟུངས་དང་སྨོན་ལམ་གྱི། །ཆུ་གཏེར་དབུས་ན་ཡེ་ཤེས་རི་བོའི་རྒྱལ། །གཞན་ཕན་ལྷ་དབང་ཚོགས་བཅས་ཀུན་གྱིས་བསྟེན། །གྲགས་ལྡན་གྲུབ་པ་མཆོག་ལ༴ དུས་གསུམ་སངས་རྒྱས་ཀུན་གྱིས་བྱིན་བརླབས་པས། །དུས་མཐར་བཤེས་གཉེན་གཟུགས་ཀྱིས་འགྲོ་དོན་མཛད། །དུས་རྣམས་ཀུན་ཏུ་འགྲོ་ཀུན་ཐར་བར་འགོད། །རྩ་བའི་བླ་མའི་ཞབས་ལ་གསོལ་བ་འདེབས། །སྟོང་ཉིད་སྙིང་རྗེ་ཟུང་དུ་འཇུག་པ་དང༌། །ཞི་ལྷག་ཏིང་འཛིན་ཉམས་མྱོང་གོང་འཕེལ་གྱིས། །གཉིས་སྣང་འཁྲུལ་བའི་དྲི་མ་ཀུན་བསལ་ནས། །དྲི་བྲལ་བདེ་གཤེགས་སྙིང་པོ་མངོན་འགྱུར་ཤོག །ཕྱིས་བརྒྱུད་པའི་བླ་མ་གཞན་འཇུག་ན་ཡང་དུས་གསུམ་སངས་རྒྱས་སོགས་ཀྱི་གོང་དུ་འཇུག །དུས་གསུམ་སངས་རྒྱས་སོགས་ཀྱི་ཤླཽ་ཀ་དེ་རྩ་བའི་བླ་མའི་གསོལ་འདེབས་སུ་བྱའོ། །ཡེ་ཤེས་འབྱུང་གནས་ཀྱི་རྗེས་ལ་དགེ་བཤེས་ཐོ་གར་གནམ་ལྡེ་འཇུག་པའང་ཡོད་མོད་མི་དགོས་ལ། འདི་ལ་བརྒྱུད་པའི་ཁྱད་པར་གཞན་འཇད་སྟོན་སྐུ་མཆེད་ཀྱི་རྗེས་ལ་ཞང་མྱ་ངན་མེད། ལོ་མཆོག་པ། སྤང་ལོ། བྱང་རྩེ། ཉ་དབོན་སོགས་དེད་ཀྱང་ཆོག་པར་གྲགས་ལ། ཐོགས་མེད་སྐུ་མཆེད་ཉེ་བརྒྱུད་ལ་མི་དགོས་ཀྱང་ལུགས་འདིའི་ཤིང་རྟའི་སྲོལ་འབྱེད་ཡིན་པའི་ཕྱིར་ངེས་པར་འཇུག་དགོས་ལ། རྣམ་པ་གཅིག་ཏུ་རིང་བརྒྱུད་ལ་མོས་ན་སྐུ་མཆེད་ཀྱི་རྗེས་སུ་བླཽ་གྲོས་བརྟན་པ། ཡོན་ཏན་བླཽ་གྲོས། གང་སྤེལ། དྷརྨ་མ་ཏི། བྷ་བྱ་མི་ཏྲ། རཏྣ་མི་ཏྲ། ཤནྟི་པ། མཻ་ཏྲི་བ་རྣམས་བརྒྱུད་པ་ཡིན་པས་དེ་བཞིན་འདེད་ལ། ཡང་གཞན་སྟོང་གི་ལྟ་
བའི་རིམ་པ་ཀླུ་སྒྲུབ་ནས་བརྒྱུད་པ་ནི། སྟོན་པ་ཐུབ་པའི་དབང་པོ། ཕྱག་ན་རྡོ་རྗེ། སྒྲ་གཅན་འཛིན་བཟང་པོ། ཀླུ་སྒྲུབ། ཤ་ཝ་རི། མཻ་ཏྲི་བ་མན་ཆད་སྔར་བཞིན་ནོ། །འདི་ནི་འཁོར་ལོ་ཐ་མའི་མདོ་དགོངས་འགྲེལ་དང་བཅས་པ་ཐམས་ཅད་ཀྱི་དགོངས་དོན་གཅིག་ཏུ་དྲིལ་བའི་དམར་ཁྲིད་ཀྱི་བརྒྱུད་པ་ཡིན་ལ། བྱམས་ཆོས་སྡེ་ལྔ་སོ་སོའི་ཁྲིད་ལ་བརྒྱུད་པ་ཐ་དད་དུ་ཡོད་དོ། །གཞན་སྟོང་དབུ་མའི་ལྟ་ཁྲིད་ཀྱི་བརྒྱུད་འདེབས་འདི་ཡང་ཏཱ་ར་ནཱ་ཐས་སྨྲས་པའོ། །ཞུས་དག།