གསོལ་འདེབས་ཀྱི་སྐོར་རྣམས་ཕྱོགས་གཅིག་ཏུ་བསྡེབས་པ་འདོད་འབྱུང་ཡིད་བཞིན་བང་མཛོད།
གསོལ་འདེབས་ཀྱི་སྐོར་རྣམས་ཕྱོགས་གཅིག་ཏུ་བསྡེབས་པ་འདོད་འབྱུང་ཡིད་བཞིན་བང་མཛོད་ཅེས་བྱ་བ་བཞུགས་སོ། །
ན་མོ་མ་ཧཱ་གུ་རུ་རཏྣ་སརྦ་སིདྡྷི་ཧཱུྃ། དཔལ་ལྡན་བླ་མ་དུས་གསུམ་རྒྱལ་བའི་དཀྱིལ་འཁོར་ཀུན་བདག་ལྷ་ཡི་ལྷ། སྲིད་བཞིའི་ཁྱབ་བདག་མྱ་ངན་འདས་པའི་ཡེ་ཤེས་མཆོག་ལ་དབང་བསྒྱུར་བའི། སྐྱབས་མཆོག་དྲིན་ཅན་སངས་རྒྱས་མི་གཟུགས་གང་འདུལ་སྟོན་མཁས་ཁྱེད་ཞབས་ལ། རྣམ་པ་ཀུན་ཏུ་བདག་ནི་རབ་འདུད་རྩེ་ཆེན་ཐུགས་རྗེས་སྐྱབས་ཏུ་གསོལ། དེ་ཡང་ཁྱབ་བདག་གདོད་མའི་མགོན་པོ་ལྷུན་འགྲུབ་རིགས་ལྔའི་སངས་རྒྱས་ཞིང་ཁམས་རྒྱ་མཚོའི་སྤྲུལ་པའི་སྐུ་སོགས་དུས་གསུམ་རྒྱལ་བ་ཀུན་གྱི་སྐུ་གསུང་ཐུགས་ཀྱི་བཀོད་པའི་སྒྱུ་
འཕྲུལ་བསམ་གྱི་མི་ཁྱབ་པའི་བདག་ཉིད་དྲན་མཆོག་རྩ་བའི་བླ་མ་མཚུངས་བྲལ་རྗེ་བཙུན་མཆོག་དེའི་མཁྱེན་པའི་ཡེ་ཤེས་བརྩེ་བའི་ཐུགས་རྗེ་མཛད་པའི་ཕྲིན་ལས་སྐྱོབ་པའི་ནུས་མཐུ་བསམ་གྱི་མི་ཁྱབ་པ་མངའ་བའི་ཕྱིར། འགྲོ་བ་ཀུན་ལ་ཚད་མེད་ཐུགས་རྗེའི་གཟིགས་པ་གཡེལ་བ་མེད་ཅིང་ནམ་མཁས་གར་ཁྱབ་བརྟན་གཡོ་ཀུན་གྱི་སྣང་ཚུལ་མཐའ་དག་ལག་ཐིལ་དུ་ཀྱུ་རུ་རའི་འབྲས་བུ་བཞག་པ་ལྟར་སྒྲིབ་མེད་དུ་གཟིགས་པ་ཁོ་ན་ཉིད་ལས་མ་གཡོས་ཀྱང་། རང་ཉིད་འཁྲུལ་པའི་དྲི་མ་འཐུག་པོས་སྦགས་ཤིང་མ་རིག་
ལིང་ཏོག་གིས་ལྡོང་ཕྱིར་མ་ཡིས་བོར་བའི་ཁྱེའུ་ལྟར་རེ་ལྟོས་ཀྱི་གནད་གཞན་མེད་པས་འཁོར་བ་ངན་སོང་གི་འཇིགས་ཆེན་ཉིད་ལ་རབ་ཏུ་སྐྲག་ཅིང་ཕ་མཆོག་ཁྱེད་ལ་རམ་མདར་སྦྲོན་པའི་སྨྲེ་ངག་གདུང་བའི་དབྱངས་ཀྱིས་འོ་དོད་འབོད་ཅིང་མཆིས་པ་འདི་ལ་སྟོང་ཉིད་སྙིང་རྗེ་ཚད་མེད་ཀྱི་ངང་ནས་གསན་ཅིང་གཟིགས་སུ་གསོལ། ༈ ཕ་གཅིག་གསོལ་བ་འདེབས་སོ་རྗེ་བཙུན་གྱི་བླ་མ། །རེ་ས་གཞན་ན་མེད་དོ་ཐུགས་རྗེའི་བདག་ཉིད། །ཉམས་ཐག་འགྲོ་བ་ཀུན་ལ་གཡེལ་མེད་དུ་གཟིགས་དང་། །བྱིན་རླབས་ཡེ་ཤེས་ཆར་རྒྱུན་ད་ལྟ་རང་ཕོབས་ཅིག ༈ །དཔལ་ལྡན་བླ་མ་སྐྱེ་མེད་ཆོས་ཀྱི་སྐུ། ཁམས་གསུམ་སེམས་ཅན་གདུལ་བྱའི་གཉེན་གཅིག་པུ། །བདག་སོགས་རེ་ས་གཞན་ན་མ་མཆིས་པས། །ཉམ་ཐག་བུ་འབངས་ཡལ་བར་འདོར་ཕོད་དམ། །མི་ཤེས་མུན་ཐོམ་ཉོན་མོངས་འདམ་
དུ་བྱིང་། །བདག་ལྟའི་ལས་ངན་མཐའ་མེད་འཁོར་བའི་མཚོར། །སྡུག་བསྔལ་ཤེས་ཀྱང་འཁོར་བའི་ནུས་སྟོབས་བྲལ། །དེ་སླད་ཐུགས་རྗེའི་སྟོབས་ལྡན་ཁྱོད་འབོད་ན། །མཁྱེན་བརྩེའི་གྲུ་ཆེན་ཐུགས་རྗེའི་རླུང་ཤུགས་བསྐྱོད། །ནུས་པའི་བ་དན་དཀར་པོ་མངོན་འཕྱར་བའི། །བྱིན་རླབས་སྟོབས་ལྡན་ཐར་པའི་དེད་དཔོན་མཆོག །ངན་འགྲོའི་མཚོ་ཆེན་སྒྲོལ་ནུས་ཁྱེད་ལས་སུ། །མ་རིག་འཁྲུལ་རྟོག་གཅོང་ཆེན་གྱིས་གཟེར་ཞིང་། །དུག་ལྔའི་ནད་ཀྱི་ཐར་པའི་སྲོག་གཅོད་པའི། །སྡུག་བསྔལ་རྒྱུ་འབྲས་ཉིད་ཀྱིས་རྟགས་གདུང་བ། །བདག་འདྲ་འདོར་བ་ཕོད་དམ་བརྩེ་ཆེན་ཁྱེད། །རྟེན་འབྲེལ་འབྱུང་ལྡོག་དོན་ཀུན་རབ་མཁྱེན་ཅིང་། །རྒྱུ་འབྲས་ཆོས་ཀུན་གནད་ལ་མངའ་བརྙེས་པའི། །ཕན་བདེའི་གོ་འཕང་བླ་མེད་སྟེར་མཁས་རྗེ། །སྨན་པ་མཚུངས་མེད་ཁྱེད་མིན་
སུ་ལ་རེ། སྲིད་པའི་བདེ་བ་ལྟར་སྣང་སྡུག་ཆེན་ལ། གཏན་བདེར་འཛིན་པའི་འཁྲུལ་སྣང་ལོག་རྟོག་དགྲ། །བརྒྱད་ཁྲི་བཞི་སྟོང་དཔུང་ཆེན་ཚོགས་མང་པོས། །བྱང་ཆུབ་སྙིང་སྲོག་གཅོད་ལ་གཟིགས་རེ་རན། །དཔག་ཡས་མཁྱེན་རབ་བརྩེ་བའི་གོ་ཤུབས་ཅན། །ནུས་རྩལ་ཐོག་མེད་ཡེ་ཤེས་མཚོན་ཆར་གྱིས། །གདུལ་བྱའི་ལེགས་ལམ་གཅོད་པའི་ལོག་སྡེ་ཀུན། །མྱུར་དུ་མིང་གི་ལྷག་མར་མི་མཛད་དམ། །ཀྱེ་མ་ཀྱེ་མ་རྒྱལ་བའི་ཞིང་རབ་འབྱམ། །མ་ལུས་ཁྱོད་ཀྱི་འཕྲིན་ལས་ཀྱིས་ཁྱབ་བཞིན། །བདག་སོགས་ད་དུང་འཁོར་བའི་དོང་ཉིད་དུ། །མགོན་མེད་བསྐྱུར་བ་འདི་ལྟ་རིགས་བསམ་ཅི། །དྲིན་ཅན་ཕ་ཁྱོད་བསྐལ་བཟང་གདུལ་བྱའི་ངོར། །པདྨ་ལས་འཁྲུངས་རྡོ་རྗེ་ཐོད་ཕྲེང་རྩལ། རིགས་ལྔ་མཚན་བརྒྱད་རྣམ་འགྱུར་མཐའ་ཡས་པར། །བསྟན་མོད་བདག་འདྲའི་སྣང་ངོར་ཅིས་མི་བསྟོན། ལ་ལར་ཞི་ཚུལ་རབ་
དཀར་གངས་རིའི་འོད། །མངོན་གསལ་འགྲོ་བློའི་མུན་ཆེན་བཅོམས་མཛད་ན། །བདག་བློ་རྨོངས་པའི་མུན་ནང་རྟག་འཐུམ་ཀྱང་། །གསལ་བར་མི་མཛད་མགོན་ཁྱོད་ཅི་ཞིག་དགོངས། །འཕྲལ་ཡུན་བདེ་ལེགས་འདོད་དགུ་ཀུན་སྩོལ་བའི། བླ་མ་མཆོག་ཁྱེད་གསེར་མདོག་བརྗིད་པའི་ཞལ། །ལེགས་བསྟན་དངོས་གྲུབ་ཆར་ཆེན་འབེབས་མཛད་པའི། །འཕྲིན་ལས་དེ་ལྟའང་བདག་ལ་ཅིས་མི་སྩལ། ཁམས་གསུམ་དབང་བསྒྱུར་དཔལ་ལྡན་ཁྱེད་མཐུ་ཡིས། །བརྟན་གཡོ་མཐའ་དག་གདུལ་བྱར་མངོན་མཛད་ནས། །བདག་ནི་གསོལ་བ་འདེབས་པའི་སྐལ་ཙམ་ལས། །མདོ་འདི་ཁྱོད་ལ་ཉེ་རིང་ཅང་མཆིས་སམ། །ཐོག་མེད་ཕྲིན་ལས་རྫུ་འཕྲུལ་དྲག་སྩལ་གྱིས། །སེ་གོལ་ཡུན་ལའང་སྟོང་གསུམ་སྒྲོལ་ནུས་ན། །བདག་འདྲ་ཁོ་ན་སྡུག་བསྔལ་འདམ་ནང་དུ། །གཏན་དུ་
འདོར་བ་འདི་ལྟ་རུང་ལག་བསམ། །མཚན་ཙམ་ཐོས་པས་ངན་འགྲོ་སྟོངས་ནུས་པའི། །སྟོབས་ལྡན་ཁྱེད་ལ་བདག་ནི་དུས་ཀུན་ཏུ། །སྨྲེ་ངག་ང་རོའི་གསོལ་བ་འདེབས་འདི་ལ། །མི་གཟིགས་ཁྱེད་ཀྱི་ཐུགས་རྗེ་ཅིར་གྱུར་ཏམ། ཀྱེ་ཧོ། །ཡིད་བཞིན་གྱི་ནོར་བུ་རྗེ་བཙུན་བླ་མ་མཆོག །སྐུ་གསུམ་གྱི་ངོ་བོ་དཔལ་ལྡན་རྡོ་རྗེ་འཛིན། ཁམས་གསུམ་གྱི་འདྲེན་མཆོག་སངས་རྒྱས་མི་གཟུགས་ཅན། །སྐྱབས་གནས་ཀྱི་དམ་པ་ཕ་ཁྱོད་དུས་འདིར་དྲན། །ཡེ་ཤེས་ཀྱི་གཟིགས་པ་དྲི་མེད་མངའ་ན་ཡང་། །ལས་ཉོན་གྱིས་འཐུམ་པའི་སྐྱེ་བོ་བདག་སོགས་ལ། །རླབས་ཆེན་གྱི་ཐུགས་རྗེ་རྒྱུན་ཆད་མེད་པ་ཡིས། །གཡེལ་མེད་དུ་གཟིགས་ཤིག་རྗེ་བཙུན་ཆོས་ཀྱི་རྗེ། །ཉི་འོད་ལྟར་ཁྱབ་པའི་ཐུགས་རྗེ་རབ་ལྡན་པའི། །འཇིག་རྟེན་གྱི་འདྲེན་མཆོག་སངས་རྒྱས་མང་བྱོན་ཀྱང་། །བྱང་བསྟན་གྱི་ཕུག་ལྟར་རང་གི་སྐྱོན་གྱིས་བསྒྲིབ། །
བདག་ཉིད་ཀྱི་ལྟོས་ཡུལ་ཁྱེད་ལས་གཞན་མ་མཆིས། །ངན་སོང་གི་སྡུག་བསྔལ་དཔག་མེད་བཟོད་དཀའ་དང་། །རིགས་དྲུག་གི་ལས་སྣང་སྣ་ཚོགས་སྡུག་བསྔལ་སོགས། །རབ་འཇིགས་ཀྱི་འཁོར་བ་ཟོ་ཆུའི་ཁྱུད་མོ་བཞིན། །མཐའ་མེད་དུ་འཁྱམས་ལས་ཁྱོད་ཀྱིས་སྐྱབས་ཏུ་གསོལ། །སངས་རྒྱས་ཀུན་གཅིག་བསྡུས་རྡོ་རྗེའི་སློབ་དཔོན་མཆོག །བྱིན་རླབས་ཀྱི་གཏེར་མཛོད་ནུས་མཐུའི་མངའ་དབང་ཕྱུག །སྙིགས་དུས་ཀྱི་གདུལ་བྱ་མགོན་མེད་བདག་སོགས་ལ། །འབྲལ་མེད་དུ་གཟིགས་ཤིག་གསོལ་བ་སྙིང་ནས་འདེབས།། ༈ །།དུས་འདི་བཟུང་བྱང་ཆུབ་ཀྱི་མཐར་ཐུག་པར། །སྐྱབས་མཚུངས་བྲལ་རིགས་ཀུན་གྱིན་བདག་པོ་མཆོག །གནས་སྤྱི་གཙུག་བདེ་ཆེན་གྱི་ཡང་ཐོག་ཏུ། །སྐུ་མི་འགྱུར་གཟི་བརྗིད་གྱི་དཔལ་འབར་ཞིང་། །གསུང་མི་འགགས་ཚངས་དབྱངས་ཀྱི་ཆོས་སྒྲ་
སྒྲོགས། །ཐུགས་མི་གཡོ་མཉམ་ཉིད་ཀྱི་ཀློང་ཡངས་ནས། །བུ་མོས་པའི་གསོལ་འདེབས་ལ་བརྩེར་དགོངས་ཏེ། །གདན་པད་ཟླར་གཡོ་མེད་དུ་བཞུགས་སུ་གསོལ། །ཕྱི་སྣང་སྲིད་སྣོད་བཅུད་ཀྱི་ཞིང་ཀུན་དང་། །ལུས་ལོངས་སྤྱོད་གཏན་སྲིད་ཀྱི་མདུན་མར་བཅས། །ཕ་ཁྱོད་ལ་ལྟོས་མེད་དུ་མཆོད་པར་འབུལ། །བདག་སྐྱིད་སྡུག་ལེགས་ཉེས་དང་འཕྲལ་ཡུན་གྱི། །ལས་ལུས་ངག་ཡིད་གསུམ་བྱ་བྱེད་རྣམས། །དགེ་མི་དགེ་བཟང་ངན་དང་མཐོ་དམན་སོགས། །བློ་རྩིས་གདབ་ཐེ་ཚོམས་ཀྱིས་ཅི་ཞིག་བྱ། །ཀུན་ཁྱེད་ཀྱི་ཕྲིན་ལས་སུ་འགྱུར་བར་མཛོད། །མཐོ་སངས་རྒྱས་ཞིང་ཁམས་ཀྱི་བཀོད་པ་ཡང་། །དམའ་ན་རག་དམྱལ་ཁམས་ཀྱི་འཇིག་རྟེན་ཀུན། །དོན་ཁྱོད་ཀྱི་རྣམ་རོལ་ལས་གཞན་མིན་ཕྱིར། །བདག་གཞན་དུ་རེ་ལྟོས་ཀྱི་ཡུལ་དང་བྲལ།། ༈ །།དེ་ཕྱིར་དུ་བདག་དང་མཁའ་མཉམ་གྱི། །སེམས་ཅན་ཀུན་ཁྱོད་ཀྱིས་མ་བསྐྱངས་ན། །ཕ་མ་
དང་བྲལ་བའི་དྭ་ཕྲུག་ལྟར། །སྐྱབས་མེད་དུ་འདོར་བ་ཁྱོད་ཕོད་དམ། །འགྲོ་དྲུག་ཀུན་ལས་ཉོན་གྱི་དུཿཁས་གཟིར། །ཐར་མེད་ཀྱི་ངན་སོང་ལས་སྐྱོབ་ནུས་ཁྱོད། །གཞན་དོན་ལ་ངལ་མེད་ཀྱི་ཕྲིན་ལས་དེ། །དུས་སྐབས་འདིར་ངེས་བབས་སུ་མ་ལགས་སམ། །བདག་སོགས་ཀུན་ལུས་ལོང་གི་ཁྱུ་ཆེན་བཞིན། །མགོན་པོ་ཁྱེད་ལམ་མཁན་གྱི་དམིགས་བུ་ལགས། །འཇིགས་རུང་གི་ངན་སོང་གཡང་ཆེན་ལས། །བདེ་བླགས་སུ་དྲོངས་དང་ཐུགས་རྗེ་ཅན། །ལས་ངན་གྱི་དུག་ཆེན་ལོངས་སྤྱོད་པས། །སྡུག་བསྔལ་ལ་གཏན་དུ་སྤྱོད་བཞིན་དུ། །སྡུག་ཆེན་ལ་བདེ་བར་འཁྲུལ་བ་ཡི། །སྙིང་མེད་ཀྱི་སེམས་ཅན་ཐུགས་རྗེས་སྐྱོབས། བདེ་བ་ཉིད་དོན་དུ་གཉེར་ན་ཡང་། །བདེ་ཐབས་ཀྱི་མདུན་མ་མི་ཤེས་པར། །སྡིག་ཆེན་ལ་ཧབ་ཐོབ་བྱེད་པ་ཡིས། །སྨྱོན་པ་དང་འདྲ་བའི་འགྲོ་ལ་གཟིགས།།
༈ །།ཨེ་མ་ཧོཿ སྲིད་པ་གསུམ་ན་འགྲན་ཟླ་ཐམས་ཅད་དང་བྲལ་ཞིང་ལེགས་པའི་ཡོན་ཏན་མཐའ་དག་ལྷུན་གྱིས་གྲུབ་པ། རྒྱལ་བ་ཐམས་ཅད་ཀྱི་ངོ་བོ་འགྲོ་བ་ཐམས་ཅད་ཀྱི་འདྲེན་པ། འཁོར་བའི་གཡུལ་ངོ་བཟློག་པའི་དཔའ་བོ། །ཉོན་མོངས་གཅོང་ནད་འབྱིན་པའི་སྨན་པ། ངན་འགྲོའི་ཕྲང་ལས་སྒྲོལ་བའི་སྐྱེལ་མ། རིན་ཆེན་ཐར་གླིང་འཁྲིད་པའི་དེད་དཔོན། དགོས་འདོད་རེ་བ་བསྐོང་བའི་ནོར་བུ། བྱིན་རླབས་ཀྱི་གཏེར་མཛོད་ཐུགས་རྗེའི་བདག་ཉིད། སྐྱབས་གནས་ཀྱི་དམ་པ། དཔལ་ལྡན་བླ་མ་རྡོ་རྗེ་འཛིན་པ་ཆེན་པོ་སྙིང་ནས་མཁྱེན་ནོ། །བདག་སོགས་ཁམས་གསུམ་གྱི་སེམས་ཅན་ཐམས་ཅད་ལ་ཐུགས་རྗེས་གཟིགས་སུ་གསོལ། བྱིན་གྱིས་རླབས་དུ་གསོལ། ལམ་སྣ་འདྲེན་དུ་གསོལ། བར་ཆད་བསལ་དུ་གསོལ། མགོན་པོ་ཁྱེད་དང་གཉིས་སུ་མེད་པར་བྱིན་གྱིས་བརླབ་ཏུ་གསོལ། སྣང་སྲིད་ཐམས་ཅད་བླ་མའི་རྣམ་རོལ་དུ། བྱིན་རླབས་སྤྲིན་ཐིབ་ཐུགས་རྗེའི་
གློག་སྟོང་འཁྱུག །དངོས་གྲུབ་ཆར་འབེབས་ཟབ་ཆོས་འབྲུག་སྒྲ་ལྡིར། །སྨིན་གྲོལ་བྱང་ཆུབ་མྱུ་གུ་བསྐྱེད་དུ་གསོལ། ཨོཾ། ཆོས་དབྱིངས་སྐྱེ་མེད་ལྷུན་གྲུབ་ཆེན་པོའི་ངང་། །བླ་མ་སྟོང་ཉིད་ཆོས་སྐུར་ཡ་ལ་ལ། །བདག་གི་ཡིད་ལ་བྱིན་གྱིས་བརླབ་ནས་ཀྱང་། །རྟོག་བྲལ་ཆོས་སྐུ་འགྲུབ་པར་བྱིན་གྱིས་རློབས། ཨཱཿ རང་མདངས་འོད་གསལ་ཕོ་བྲང་ནས། །བླ་མ་གསལ་དག་ལོངས་སྐུར་ལམ་སེ་ལམ། །བདག་གི་ངག་ལ་བྱིན་གྱིས་བརླབས་ནས་ཀྱང་། །རང་གསལ་ལོངས་སྐུ་འགྲུབ་པར་བྱིན་གྱིས་རློབས། ཧཱུྃ། ཅིར་སྣང་དག་པ་ཤར་གྲོལ་ཞིང་ཁམས་ནས། །བླ་མ་གང་འདུལ་སྤྲུལ་སྐུར་འཁྱུག་སེ་འཁྱུག །བདག་གི་ལུས་ལ་བྱིན་གྱིས་རླབ་ནས་ཀྱང་། འགྲོ་འདུལ་སྤྲུལ་སྐུ་འགྲུབ་པར་བྱིན་གྱིས་རློབས། ཧྲཱིཿ ངོ་བོ་དབྱེར་མེད་བདེ་ཆེན་ཀློང་ཡངས་ནས། །བླ་མ་རང་བྱུང་ཡེ་ཤེས་མེར་རེ་རེ། བདག་གི་སྒོ་གསུམ་བྱིན་
གྱིས་རླབས་ནས་ཀྱང་། །སྐུ་གསུམ་ལྷུན་གྱིས་གྲུབ་པར་བྱིན་གྱིས་རློབས། །སྐྱེ་བ་འདི་དང་སྐྱེ་གཞན་ཐམས་ཅད་དུ། །དཔལ་ལྡན་བླ་མ་མཆོག་དང་དབྱེར་མེད་ཅིང་། །ཕྲིན་ལས་རྣམ་འཕྲུལ་རྒྱ་མཚོ་མཐའ་ཡས་ཀྱི། །འགྲོ་ལ་ཕན་བདེ་འབའ་ཞིག་སྒྲུབ་བྱེད་ཤོག །ཕྱོགས་བཅུའི་ཞིང་གི་རྒྱལ་བ་རྒྱ་མཚོའི་དྲུང་། །ཆོས་འཁོར་བསྐུལ་ཞིང་གུས་པས་མཆོད་པ་དང་། །སངས་རྒྱས་ཡོན་ཏན་མཐའ་དག་བདག་འགྲུབ་ནས། །བསྡུ་བ་རྣམ་བཞིས་འགྲོ་ཀུན་འདྲེན་པར་ཤོག །དཀྱིལ་འཁོར་ཀུན་བདག་བླ་མའི་ས་ནོན་ཅིང་། །མཆོག་གསང་རྡོ་རྗེ་ཐེག་ལ་མངའ་དབང་འབྱོར། །སྐད་ཅིག་ཙམ་ལའང་གྲངས་མེད་ཕྲིན་ལས་སྟོན། །འཁོར་བའི་རྒྱ་མཚོ་སྐེམ་པའི་མཐུ་ལྡན་ཤོག །ཅེས་པ་འདི་ནི་གྲུབ་རིགས་དམ་པའི་རྒྱུད་ལས་འཁྲུངས་པ་ཚེ་བརྟན་བསོད་ནམས་དཔལ་བཟང་པོས་བསྐུལ་བར་མཛད་པ་ལྟར། དཔལ་ལྡན་བླ་མ་མཆོག་ལ་གདུང་དབྱངས་ཀྱིས་གསོལ་བ་འདེབས་པ་བྱིན་རླབས་ཆར་འབེབས་ཅེས་བྱ་བ་འདི་ཉིད་གནས་
ཆེན་ཆུ་བོ་གཡས་འཁྱིལ་གྱི་སའི་སྙིང་པོ་མཚོ་རྫོང་ནོར་བུ་རིར་བཀོད་པའོ། །ཧྲཱིཿ རང་བྱུང་པདྨ་བཀོད་པའི་ཞིང་ཁམས་ནས། །རིགས་མཆོག་གཙོ་བོ་སྣང་བ་མཐའ་ཡས་ལ། །གསོལ་བ་འདེབས་སོ་བརྩེ་བས་རྗེས་བཟུང་ནས། །ཀ་དག་ཆོས་སྐུ་རྟོགས་པར་བྱིན་གྱིས་བརློབ། །གདངས་གསལ་འོད་ལྔ་ཚོམ་བུའི་དཀྱིལ་འཁོར་ནས། །ལོངས་སྤྱོད་རྫོགས་སྐུ་རིགས་ལྔའི་སངས་རྒྱས་ལ། གསོལ་བ༴ །ལྷུན་འགྲུབ་ལོངས་སྐུ་ཐོབ་བར་བྱིན་གྱིས་རློབས། །དཀར་གསལ་མདངས་ལྡན་རི་བོ་ཏ་ལ་ནས། །ཐུགས་རྗེའི་མངའ་བདག་སྤྱན་རས་གཟིགས་དབང་ལ། །གསོལ་བ༴ །འགྲོ་འདུལ་སྤྲུལ་སྐུ་འགྲུབ་པར༴ །བདེ་ཆེན་པདྨ་འོད་ཀྱི་ཕོ་བྲང་ནས། །འགྲོ་བའི་སྐྱབས་ཅིག་པདྨ་འབྱུང་གནས་ལ། །གསོལ་བ༴ །འཆི་མེད་རིག་འཛིན་ཐོབ་པར༴ །མི་འགྱུར་ལྷུན་འགྲུབ་དཔལ་གྱི་བསམ་ཡས་ནས། །ཆོས་རྒྱལ་ཆེན་པོ་ཁྲི་སྲོང་ལྡེ་བཙན་ལ། གསོལ་བ༴ །དག་སྣང་ཕྱོགས་མེད་
འབྱོངས་པར་བྱིན། མཁའ་སྤྱོད་རྣམ་དག་བདེ་ཆེན་ཕོ་བྲང་ནས། །མཁའ་འགྲོ་གཙོ་མོ་ཡེ་ཤེས་མཚོ་རྒྱལ་ལ། གསོལ་བ༴ །བདེ་སྟོང་ཡེ་ཤེས་སྐྱེ་བར༴ །གར་བཞུགས་བདེ་ཆེན་ཆོས་ཀྱི་ཕོ་བྲང་ནས། རིག་འཛིན་ཆེན་པོ་སངས་རྒྱས་གླིང་པ་ལ། །གསོལ་བ༴ །ཟབ་མོའི་གསང་མཛོད་འཛིན་པར་བྱིན༴ །ནགས་ཁྲོད་བདེ་ཆེན་བསམ་འགྲུབ་ཡང་དབེན་ནས། །རྒྱལ་བའི་གདུང་འཛིན་ཡེ་ཤེས་རྡོ་རྗེ་ལ། །གསོལ་བ༴ །རང་རིག་འོད་གསལ་རྟོགས་པར་བྱིན༴ །གཞན་དོན་ཕྲིན་ལས་རྨད་བྱུང་ཕོ་བྲང་ནས། །ལུང་ཟིན་ཆོས་བདག་གཞོན་ནུ་སེང་གེ་ལ། །གསོལ་བ༴ །འགྲོ་དོན་ལྷུན་གྱིས་གྲུབ་པར་བྱིན༴ །བདག་འཛིན་འཁྲུལ་རྟོག་རང་གྲོལ་ཕོ་བྲང་ནས། །བསྟན་པའི་སྒྲོན་མེ་གུ་རུ་འོད་ཟེར་ལ། །གསོལ་བ༴ །གནས་ལུགས་ཡེ་ཤེས་རྟོགས་པར༴ །ཡེ་གྲོལ་ལྷུན་འབྱམས་གདལ་ཁྱབ་ཕོ་བྲང་ནས། །གཉུག་མའི་དོན་སྟོན་ཚུལ་ཁྲིམས་རྒྱལ་མཚན་ལ། གསོལ་བ༴ །གང་ཤར་ཞེན་མེད་རྟོགས་པར༴
གཟུང་འཛིན་ལོག་རྟོག་ཚར་གཅོད་ཕོ་བྲང་ནས། མཐུ་སྟོབས་དབང་ཕྱུག་བསོད་ནམས་རྣམ་རྒྱལ་ལ། གསོལ་བ༴ །ངར་འཛིན་ཉོན་མོངས་ཐུལ་བར་བྱིན༴ །རང་གཞན་དོན་གཉིས་ལྷུན་འགྲུབ་ཕོ་བྲང་ནས། །མཁས་གྲུབ་མཆོག་གྱུར་ཨོ་རྒྱན་བསྟན་འཛིན་ལ། །གསོལ་བ༴ །མདོ་སྔགས་བསྟན་པ་དར་བར་བྱིན༴ །སྤྱི་གཙུག་ཉི་ཟླ་པདྨའི་གདན་སྟེང་ནས། །རྣམ་གྲོལ་ལམ་སྟོན་བསྟན་འཛིན་རྡོ་རྗེ་ལ། །གསོལ་བ༴ །དོན་གཉིས་ལྷུན་གྱིས་གྲུབ་པར༴ །ཞེན་ལོག་ངེས་འབྱུང་དྲག་པོའི་ཕོ་བྲང་ནས། །སྒྲུབ་པའི་སྲོག་ཤིང་སྣ་ཚོགས་རང་གྲོལ་ལ། །གསོལ་བ༴ །གཏན་འདུན་བྱང་ཆུབ་འགྲུབ་པར༴ །རང་སྣང་རྣམ་དག་བདེ་ཆེན་ཕོ་བྲང་ནས། །ཡི་དམ་ཞི་ཁྲོ་དམ་ཅན་ཆོས་སྐྱོང་ལ། །གསོལ་བ༴ །རྐྱེན་ངན་བར་ཆོད་ཞི་བར་བྱིན་གྱིས་རློབས། །དེ་ལྟར་བདག་ཅག་མོས་པའི་ཡིད་ཀྱིས་ནི། །ཐུགས་རྗེའི་མངའ་བདག་རྣམས་ལ་གསོལ་བཏབ་
པས། །འདི་དང་ཕྱི་མ་དུས་རྣམས་ཐམས་ཅད་དུ། །བརྩེ་བས་རྗེས་སུ་འཛིན་པར་མཛད་དུ་གསོལ། །ཡང་ནས་ཡང་དུ་འཁོར་བར་རབ་འཁྱམས་ཤིང་། །སྡུག་བསྔལ་གྱིས་གཟིར་སྐྱབས་མེད་བདག་ཅག་ལ། །ཐུགས་རྗེའི་འོད་ཟེར་ཞགས་པས་བཟུང་ནས་ཀྱང་། །འཁོར་བའི་རྒྱ་མཚོ་སྐེམ་པར་བྱིན་གྱིས་རློབས། །ཅེས་བླ་མ་དགོངས་པ་འདུས་པའི་རྒྱུད་རིམ་རྣམས་ལ་གུས་པས་གསོལ་བ་བཏབ་པའོ། །ནུབ་ཕྱོགས་བདེ་ཆེན་དབང་གི་ཕོ་བྲང་ནས། བཅོམ་ལྡན་སྣང་བ་མཐའ་ཡས་འོད་དཔག་མེད། །ཀུན་ཁྱབ་རང་བྱུང་དེ་ལ་གསོལ་བ་འདེབས། །སེམས་ཉིད་ཆོས་སྐུར་རྟོགས་པར་བྱིན་གྱིས་རློབས། །ཤར་ཕྱོགས་དཀར་གསལ་དག་པའི་ཕོ་བྲང་ནས། ཁརྶ་པཱ་ི་འཕགས་མཆོག་ཐུགས་རྗེ་ཅན། །འགྲོ་བའི་དེད་དཔོན་དེ་ལ་གསོལ་བ་འདེབས། །བརྡོས་བཅས་འོད་སྐུར་གྲོལ་བར་བྱིན་གྱིས་རློབས། །ལྷོ་ནུབ་པདྨ་འོད་ཀྱི་ཕོ་བྲང་ནས། །སྣང་སྲིད་ཟིལ་གནོན་འོད་འབར་ཐོད་ཕྲེང་རྩལ། །རྒྱལ་
བ་ཀུན་འདུས་དེ་ལ་གསོལ་བ་འདེབས། །ངར་འཛིན་འགོང་ པོ་ཞི་བར་བྱིན་གྱིས་རློབས། །བྱང་ཕྱོགས་གངས་ཅན་ལྗོངས་ཀྱི་འགྲོ་བའི་མགོན 
། །རིག་འཛིན་འཇའ་ཚོན་སྙིང་པོར་མཚན་བཟུང་ནས། །ཟབ་གཏེར་མཛོད་འཛིན་དེ་ལ་གསོལ་བ་འདེབས། །སྒྲུབ་པ་མཐའ་རུ་ཕྱིན་པར་བྱིན་གྱིས་རློབས། །གར་བཞུགས་བདེ་ཆེན་ཆོས་ཀྱི་ཕོ་བྲང་ནས། །རྒྱལ་བའི་བསྟན་འཛིན་མཁས་མཆོག་ལེགས་གྲུབ་སོགས། །ཟབ་ཆོས་བཀའ་བབས་རྣམས་ལ་གསོལ་བ་འདེབས། །དག་སྣང་ཕྱོགས་མེད་འབྱོངས་པར་བྱིན་གྱིས་རློབས། །རང་བྱུང་རོལ་པའི་དཀྱིལ་འཁོར་ཆེན་པོ་ནས། །སྣ་ཚོགས་སྒྱུ་མའི་རོལ་གར་སྟོན་མཛད་པ། །ཡི་དམ་ཞི་ཁྲོའི་ཚོགས་ལ་གསོལ་བ་འདེབས། །དངོས་གྲུབ་རྣམ་གཉིས་ཐོབ་པར་བྱིན་གྱིས་རློབས། །།།ནང་གནས་ཡུལ་ཉེ་བའི་དུར་ཁྲོད་ནས། །ལེགས་ཉེས་སྟངས་འཛིན་བཀའི་བྱ་ར་བ། །མཁའ་འགྲོ་དམ་ཅན་ཚོགས་ལ་
གསོལ་བ་འདེབས། །རྐྱེན་ངན་བར་ཆོད་ཞི་བར་བྱིན་གྱིས་རློབས། །སྐྱབས་མཆོག་རྣམས་ལ་གསོལ་བ་བཏབ་པའི་མཐུས། །མ་རིག་འཁྲུལ་པའི་སྣང་བ་རང་དག་ནས། །སྟོང་གསལ་སྤྲོས་དང་བྲལ་བའི་ཆོས་ཉིད་དོན། །ཡང་དག་གཏན་ལ་དབབ་པར་མཛད་དུ་གསོལ། །སྲིད་པའི་ངང་ཚུལ་རྨི་ལམ་སྒྱུ་མ་འདི། །རྟག་པར་འཛིན་པས་རྗེས་སུ་འབྲངས་བྱས་ནས། སྡུག་བསྔལ་དུ་མའི་དྲ་བས་བཅིངས་འདི་ལས། །མྱུར་བ་ཉིད་དུ་ཐར་བར་མཛད་དུ་གསོལ། །སྣང་སྟོང་སྒྱུ་མ་ཆུ་ཟླའི་དོན་རྟོགས་ཤིང་། །གྲགས་སྟོང་བདེན་མེད་བྲག་ཆ་ལྟ་བུ་དང་། །རིག་སྟོང་མཐའ་བྲལ་དབུ་མའི་ལྟ་བ་ཉིད། །འགྲོ་ཀུན་རབ་རྟོགས་ཀ་དག་མངོན་གྱུར་ཤོག །ཅེས། ཡང་ཟབ་དཀོན་མཆོག་སྤྱི་འདུས་ཀྱི་བླ་མ་རྒྱུད་པ་རྣམས་ལ་གསོལ་བ་བཏབ་པའོ།། ༈ །།བཅོམ་ལྡན་དྲུག་པ་ཆོས་སྐུ་རྡོ་རྗེ་འཆང་། ཡེ་ཤེས་མཁའ་འགྲོ་གྲུབ་ཆེན་ཚེམ་བུ་པ། །ལྷ་མིའི་གཙུག་རྒྱན་རྣམས་
ལ་གསོལ་བ་འདེབས། །རང་སེམས་ཆོས་སྐུར་རྟོག་པར་བྱིན་གྱིས་རློབས། །སྤྱི་བོ་ལྷས་པ་སྟག་སྡེ་བྲག་དམར་བ། །ལྷ་བཙུན་དགོན་པར་ཐུགས་རྗེ་བརྩོན་འགྲུས་པ། །འགྲོ་བའི་མགོན་པོ་རྣམས་ལ་གསོལ་བ་འདེབས། །བར་དོ་ལོངས་སྐུ་གྲོལ་བར་བྱིན་གྱིས་རློབས། །བྲག་ཁ་སེང་གེ་རིན་དཔལ་ཆོས་དཔལ་བ། །སྙེ་ཐང་བློ་བརྟན་བློ་གྲོས་རྣམ་རྒྱལ་སྟེ། །བསྟན་པའི་བདག་པོ་རྣམས་ལ་གསོལ་བ་འདེབས། །ཐུགས་རྗེ་སྤྲུལ་སྒྱུར་ནུས་པར་བྱིན་གྱིས་རློབས། །ཀརྨཱ་ཕྲིན་ལས་གཙུག་ལག་འཕྲེང་བ་དང་། །བསྟན་འཛིན་རྡོ་རྗེ་བསོད་ནམས་དབང་པོ་སོགས། །སྐྱེས་ཆེན་དམ་པ་རྣམས་ལ་གསོལ་བ་འདེབས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །གནས་དང་ཡུལ་དང་ཉེ་བའི་དུད་ཁྲོད་དང་། །སྒྱུ་ལུས་ཕུང་པོ་གཞལ་ཡས་ལ་གནས་པའི། །མཁའ་འགྲོ་དམ་ཅན་ཚོགས་ལ་གསོལ་བ་འདེབས། །ས་ལམ་བར་ཆད་ཞི་བར་
བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱི། །བརྡོས་བཅས་ཤ་ཁྲག་ཟག་མེད་འོད་སྐུར་གྲོལ། །རིག་པའི་ངོ་བོ་ཀ་དག་ཆོས་སྐུར་ཐིམ། །གཟུང་འཛིན་འཁྲུལ་སྣང་དག་པར་མཛད་དུ་གསོལ། །མཐོ་དམན་མེད་པའི་ལྟ་བའི་ལམ་བཟང་ལ། །གསལ་འགྲིབ་མེད་པའི་སྒོམ་པའི་གྲོགས་དང་བཅས། །བླང་དོར་མེད་པ་སྤྱོད་པས་རྒྱབ་བསྟོན་ནས། །རེ་དོག་མེད་པ་འབྲས་བུའི་སར་ཕྱིན་ཤོག །ཅེས། ཐུགས་རྗེ་ཆེན་པོའི་སྨར་ཁྲིད་རྒྱུད་པའི་གསོལ་འདེབས་འདི་ནི། གྲུབ་མཆོག་ཚེ་དབང་དོན་འགྲུབ་པས་བསྐུལ་བའི་ངོར་བཀོད་པའོ།། ༈ །།ཧྲཱིཿ ཆོས་དབྱིངས་འཕོ་འགྱུར་མེད་པའི་ཞིང་ཁམས་ནས། །རྒྱལ་བ་དགོངས་རྒྱུད་ཆོས་སྐུའི་བླ་མ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །ཀ་དག་མངོན་དུ་གྱུར་པར་བྱིན་གྱིས་རློབས། །རང་མདངས་འོད་གསལ་ལྷུན་འགྲུབ་ཕོ་བྲོང་ནས། །ལོངས་སྐུའི་རྣམ་འཕྲུལ་རིགས་
འཛིན་བརྡའ་རྒྱུད་ལ། །གསོལ་བ་འདེབས་སོ༴ །འོད་གསལ་མ་བུ་འཕྲོད་པར་བྱིན་གྱིས་རློབས། །གང་འདུལ་དེར་སྣང་སྤྲུལ་སྐུའི་ཞིང་ཁམས་ནས། །གང་ཟག་སྙན་རྒྱུད་སྤྲུལ་སྐུའི་བླ་མ་ལ། །གསོལ་བ༴ །གཞན་དོན་མཐའ་ཡས་འགྲུབ་པར་བྱིན་གྱིས་རློབས། །བརྒྱུད་པ་ཀུན་འདུས་རྩ་བའི་བླ་མ་ལ། །གསོལ་བ༴ །སྐྱེད་རྫོགས་ཉམས་ལེན་མཐའ་རུ་ཕྱིན་ནས་ཀྱང་། །གདོད་མའི་ཀུན་བཟང་གོ་འཕང་མྱུར་ཐོབ་ཤོག །ཅེས་པ་འདི་ནི། ལུང་རིག་སྨྲ་བ་ཨོ་རྒྱན་ལེགས་བཤད་ཀྱིས་བསྐུལ་ངོར། གཏེར་སྟོན་བདེ་ཆེན་གླིང་པའི་གདན་ས་པདྨ་ཆོས་གླིང་གི་ཆོས་གྲྭར་བཀོད་པའོ།། ༈ །།ཆོས་དབྱིངས་མཁའ་ལ་མཁྱེན་བརྩེའི་དཀྱིལ་འཁོར་རྒྱས། ཐུགས་རྗེའི་འོད་ཀྱི་འགྲོ་བློའི་མུན་སེལ་བ། །རིགས་ཀུན་ཁྱབ་བདག་བཅོམ་ལྡན་སྣང་མཐའ་ཡས། །ཀ་དག་ཆོས་ཀྱི་སྐུ་ལ་གསོལ་བ་འདེབས། །ཆོས་སྐུའི་དབྱིངས་ལས་གཟུགས་ཀྱི་སྐུར་བཞེངས་
ཏེ། གསལ་ལ་མ་འདྲེས་འོད་ལྔའི་ཚོམ་བུར་བཞུགས། །ཚེ་དཔག་མེད་པ་རིགས་ལྔ་འགྲོ་བའི་མགོན། །ལྷུན་གྲུབ་ལོངས་སྤྱོད་རྫོགས་ལ་གསོལ་བ་འདེབས། །དཔག་མེད་འགྲོ་ལ་ཐུགས་རྗེ་ཉི་འོད་ཀྱིས། །སྡུག་བསྔལ་རྒྱ་མཚོ་སྐེམ་མཛད་མཐུ་སྟོབས་ཅན། ཁམས་གསུམ་དབང་སྡུད་པདྨ་ཐོད་ཕྲེང་རྩལ། །ཐུགས་རྗེ་སྤྲུལ་པའི་སྐུ་ལ་གསོལ་བ་འདེབས། །མཁའ་སྤྱོད་བདེ་ཆེན་དབྱིངས་ཀྱི་མཁའ་འགྲོ་མ། །རྔ་ཡབ་གླིང་དུ་མ་ཅིག་དུང་སྨན་རྒྱལ། །བོད་ཡུལ་ཟབ་གཏེར་བཀའི་བསྡུ་བ་མཛད། །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །ཆོས་རྒྱལ་སྲས་མོ་མཚན་ལྡན་པདྨ་གསལ། །སྐྱེ་བར་རིམ་བརྒྱུད་ཟབ་གཏེར་གསང་མཛོད་འཛིན། །སྣོད་ལྡན་སྨིན་མཛད་རྒྱལ་སྲས་པདྨ་གླིང་། །རིག་འཛིན་གཙོ་མཆོག་དེ་ལ་གསོལ་བ་འདེབས། །གཏིང་དཔག་དཀའ་བའི་ཐུགས་ཀྱི་ཀློང་ཡང་ནས། །སྙན་རྒྱུད་གདམས་
པའི་བདུད་རྩི་དགའ་སྟོན་འགྱེད། །མུན་སེལ་ཟླ་བ་གྲགས་པས་ས་སྟེང་ཁྱབ། །རྒྱལ་བའི་གདུང་འཛིན་དེ་ལ་གསོལ་བ་འདེབས། །དཔག་མེད་བསོད་ནམས་འབྲས་བུ་ལེགས་སྨིན་མཐུས། །མ་རུང་བདུད་སྡེའི་དཔུང་ལས་རྣམས་པར་རྒྱལ། །གསང་སྔགས་བསྟན་པ་ཕྱོགས་མཐར་ཁྱབ་མཛད་པ། །རིག་འཛིན་ཆེན་པོའི་ཞབས་ལ་གསོལ་བ་འདེབས། །གཞུང་ལུགས་རབ་འབྱམས་ཐུགས་སུ་ཆུད་པའི་མཐུས། །མཁས་གྲུབ་དུ་མའི་གཙུག་གི་རྒྱན་དུ་གྱུར། །ཨོ་རྒྱན་བསྟན་འཛིན་འཆད་རྩོད་རྩོམ་ལ་དབང་། །དམ་ཆོས་སྒྲོན་མེ་དེ་ལ་གསོལ་བ་འདེབས། །བསྟན་པའི་རྩ་ལག་ཤཀྱའི་གདུང་འཛིན་ཞིང་། །བཻ་རོའི་རྣམ་སྤྲུལ་རྡོ་རྗེའི་སློབ་དཔོན་མཆོག །སྔ་འགྱུར་བསྟན་པའི་མངའ་བདག་དཔལ་བཟང་པོ། །རྩ་བའི་བླ་མའི་ཞབས་ལ་གསོལ་བ་འདེབས། །སྙིགས་དུས་ལས་ཀྱི་མནར་བའི་སེམས་ཅན་རྣམས། །
ཐར་པའི་ལམ་དུ་འཁྲིད་མཁས་དེད་དཔོན་མཆོག །རྒྱལ་དབང་པདྨའི་ཕྲིན་ལས་ལེགས་སྤྱོད་པའི། །དངོས་གྲུབ་ནུས་རྩལ་ལྡན་དེར་གསོལ་བ་འདེབས། །ཆོས་དབྱིངས་རབ་འབྱམས་རྒྱལ་བའི་དཀྱིལ་འཁོར་ནས། །སྣ་ཚོགས་སྐུར་སྟོན་ཕྲིན་ལས་ཡོངས་ཀྱི་བདག །དངོས་གྲུབ་ཀུན་སྩོལ་ཡི་དམ་ལྷ་ཚོགས་དང་། །ཆོས་སྐྱོང་སྲུང་མའི་ཚོགས་ལ་གསོལ་བ་འདེབས། །དེ་ལྟར་རྩེ་གཅིག་གདུང་བས་གསོལ་འདེབས་ན། །ཐུགས་རྗེའི་ཆུ་འཛིན་ཕུང་པོ་རབ་འཁྲིགས་ནས། །བྱིན་རླབས་མི་ཟད་བདུད་རྩིའི་ཆར་ཆེན་གྱིས། །དད་པའི་མྱུ་གུ་སྨིན་པར་མཛད་དུ་གསོལ། ཁམས་དྲུག་ལྡན་པ་དལ་འབྱོར་མི་ལུས་འདི། །འཆི་བདག་བདུད་ཀྱི་བཅོམ་པར་ཉེ་བ་ན། །དུས་མིན་འཆི་བའི་འཇིགས་ལས་སྐྱབས་ནས་ཀྱང་། །འཆི་མེད་རྡོ་རྗེའི་ལུས་སུ་བྱིན་གྱིས་རློབས། །ཕ་མར་གྱུར་པའི་རིགས་དྲུག་སེམས་ཅན་ཚོགས། །ཚེ་ཐུང་ནད་མང་སྡུག་བསྔལ་ཉམས་ཐག་ཀུན། །འཆི་མེད་བདུད་རྩིའི་
སྨན་གྱི་ཚིམ་བྱེད་ཅིང་། །རང་གཞན་དོན་གཉིས་ལྷུན་གྱིས་གྲུབ་པར་ཤོག །ཅེས་པ་ཚེ་ཁྲིད་རྡོ་རྗེ་འཕྲེང་བའི་བླ་མ་རྒྱུད་པའི་གསོལ་འདེབས་འདི་ཉིད་མདོ་ཁམས་སྤུ་འབོར་གྱི་བླ་མ་སྦྱིན་པ་བསྟན་འཕེལ་གྱིས་བསྐུལ་ངོར་བྲིས་པའོ།། ༈ །།ན་མོ་གུ་རུ་བྷྱཿ བསྐལ་མང་སྔོན་ནས་ཚོགས་གཉིས་རབ་བསགས་ཤིང་། །སྲིད་པའི་འགྲོ་བ་སྒྲོལ་བར་དམ་བཅས་པས། །ཞིང་འདིར་སྔ་འགྱུར་བསྟན་པའི་བདག་པོ་མཆོག །དྲིན་ཅན་རྩ་བའི་བླ་མར་གསོལ་བ་འདེབས། །ཐོག་མའི་མགོན་པོ་ཀུན་བཟང་ཆོས་ཀྱི་སྐུ། །ངེས་པ་ལྔ་ལྡན་གཟུགས་སྐུ་ལོངས་སྤྱོད་རྫོགས། །བསྟན་འགྲོའི་དོན་དུ་སྤྲུལ་པ་སྐུའི་ཚུལ། །དྲིན་ཅན་རྩ་བའི་བླ་མར༴ །ཚོགས་གཉིས་འབྲས་བུ་མཚན་དཔེའི་བརྒྱན་པའི་སྐུ། །ཡན་ལག་དྲུག་ཅུ་ཆོས་ཀྱི་སྒྲ་སྒྲོག་གསུང་། །ཆོས་ཀུན་ཇི་ལྟར་ཇི་སྙེད་མཁྱེན་པའི་
ཐུགས། །དྲིན་ཅན༴ །འགྲོ་མགོན་ཁྱེད་ཞབས་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་སྒོ་གསུམ་མཆོད་པར་འབུལ། །བསྐལ་པར་བསགས་པའི་ཉེས་ལྟུང་སྡིག་སྒྲིབ་བཤགས། །ངོ་མཚར་མཐའ་ཡས་མཛད་ཕྲིན་ཡི་རང་ངོ་། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །ཞིང་འདིར་བསྐལ་བརྒྱའི་བར་དུ་ཞབས་བརྟན་གསོལ། །འཁོར་གསུམ་ཡོངས་དག་ཆོས་ཀྱི་དབྱིངས་སུ་བསྔོ།། ༈ །།རྒྱལ་བ་སྲས་བཅས་ཐུགས་རྗེ་ནུས་མཐུ་དང་། །ཡི་དམ་ཆོས་སྐྱོང་བསྲུང་མའི་མཐུ་སྟོབས་ཀྱིས། །རྩ་བའི་བླ་མ་མཁས་མཆོག་ལེགས་གྲུབ་རྩལ། །སྐུ་ཚེ་བརྟན་ཞིང་ཕྲིན་ལས་རྒྱས་གྱུར་ཅིག །འགྲོ་ཀུན་རྒྱལ་བ་ཇི་སྙེད་ཡོད་པ་དང་། །བདག་གི་ལྷག་བསམ་རབ་དཀར་བདེན་སྟོབས་ཀྱིས། །བསམ་པའི་དོན་ཀུན་འབད་མེད་འབྱུང་བ་དང་། །སྨོན་ལམ་གང་བཏབ་དེང་འདིར་འགྲུབ་པར་ཤོག །ཅེས་པ་འདི་ནི་རང་གི་བསྟོད་པ་རང་གི་བྱེད་པ་འདི་
ནི་རིགས་པ་མ་ཡིན་མོད་ཀྱང་། མོས་འདུད་དུ་བྱེད་པའི་གང་ཟག་འགའ་ཞིག་གིས་ནན་གྱིས་བསྐུལ་བའི་ངོ་མ་ཆོག་ནས་བྲིས་པ་ལགས་ཤིང་། རང་མཐོང་གི་བསམ་པ་སོོགས་ཚུལ་མ་ཡིན་པའི་བློ་དང་མ་འདྲེས་པས་ཉེས་པ་ཆེར་མེད་དམ་བསམ་པ་དང་། གསང་སྔགས་ནང་པ་ལྟར་ན་རང་གི་ཕུང་ཁམས་སྐྱེ་མཆེད་ཐམས་ཅད་ལྷའི་རང་བཞིན་ལས་མ་འདས་པ་དང་། ཕྱག་རྫོགས་སོགས་ཀྱི་ལྟ་བ་ལྟར་ནའང་རང་རིག་པ་ལས་གཞན་པའི་སངས་རྒྱས་ལོགས་ན་མེད་པའི་དགོངས་པ་ལྟར་ན་ཕྱག་འཚལ་མཆོད་འབུལ་གཞན་དུ་བྱེད། ལ་མེད་པར་གསུངས་པ་སོགས་དང་བསྟུན་ན་ཚུལ་འདི་ལ་འགལ་བ་ཆེར་མི་ཡོང་བ་འདྲ་བསམ་ནས། བསྐུལ་བ་པོའི་འདོད་པ་དང་མཐུན་པར་གསོལ་འདེབས་ཡན་ལག་བདུན་པ་དང་བཅས་པ་སྤྲིན་གྱི་ང་རོ་ཞེས་བྱ་བ་འདི་བཀོད་པའོ། རྗེ་སངས་རྒྱས་ཀུན་འདུས་རིན་པོ་ཆེ། །དཔལ་སྐུ་བཞིའི་དབང་ཕྱུག་རྗེ་བཙུན་མགོན། །ཕ་འགྲོ་བའི་དེད་དཔོན་ཆོས་ཀྱི་རྒྱལ། །བདག་
མོས་པའི་བུ་ལ་ཐུགས་རྗེས་གཟིགས། །སྐུ་མཛེས་ཤིང་ཞི་དུལ་ཉན་ཐོས་ཚུལ། །གསུང་ཡན་ལག་དྲུག་ཅུ་ཆོས་སྒྲ་སྒྲོགས། །ཐུགས་འཁོར་འདས་དུས་གསུམ་ཐམས་ཅད་མཁྱེན། །བདག་རྨོངས་པའི་འགྲོ་ལ་ཐུགས་རྗེས་གཟིགས། །མགོན་བྱིན་རླབས་འབྱུང་གནས་བླ་མ་རྗེ། །ཡབ་དངོས་གྲུབ་ཀུན་སྩོལ་ལྷག་པའི་ལྷ། །མཁའ་འགྲོའི་དབང་ཕྱུག་ཕྲིན་ལས་མཛོད། །བདག་མགོན་སྐྱབས་མེད་ལ་ཐུགས་རྗེས་གཟིགས། །དབྱིངས་སྐྱེ་མེད་རང་བྱུང་ཆོས་ཀྱི་སྐུ། །མདངས་འགགས་མེད་རང་ཤར་ལོངས་སྤྱོད་རྫོགས། །རྩལ་སྣ་ཚོགས་རང་གྲོལ་སྤྲུལ་པའི་སྐུ། །བདག་འཁྲུལ་སྣང་ཅན་ལ་ཐུགས་རྗེས་གཟིགས། ཁྱེད་སྟོང་གསལ་དབྱིངས་ནས་ཐུགས་རྗེའི་ཕྲུལ། །འོད་མ་རིག་མུན་སེལ་སྒྲོན་མེ་མཆོག །ཟེར་ཕྱོགས་བཅུར་འཕྲོ་བའི་ཕྲིན་ལས་ཀྱིས། །བདག་མི་ཤེས་མུན་པ་བསལ་དུ་གསོལ། །གཏིང་དཔག་པར་དཀའ་བའི་སྡུག་བསྔལ་མཚོར། །ཉམས་ཐག་པའི་བདག་
སོགས་འགྲོ་བ་ཀུན། །རྗེ་མཐུ་སྟོབས་དབང་ཕྱུག་ཁྱོད་ཀྱིས་ནི། །ཞིང་རྣམ་དག་གླིང་དུ་ཁྲིད་དུ་གསོལ། །ལུས་བརྡོས་བཅས་ཟག་མེད་འོད་སྐུར་གྲོལ། །ངག་གྲགས་སྟོང་གསུང་གི་རྡོ་རྗེར་འགྲུབ། །ཡིད་བློ་འདས་བྱར་མེད་ཟད་སར་འཁྱོལ། །མགོན་ཁྱོད་དང་དབྱེར་མེད་གཅིག་པར་ཤོག །ཅེས་པ་འདི་ནི། བྲག་གསུམ་དར་མ་འདམ་མཚོར་གནས་མཇལ་ལ་ཕྱིན་ཚེ། བླ་མ་དྲན་པའི་གདུང་དབྱངས་གསོལ་འདེབས་སུ་སྨྲས་པའོ།། ༈ །།ཀ་དག་གདོད་མའི་མགོན་དང་དབྱེར་མེད་པའི། ཁ་བ་ཅན་འདིར་རྩོལ་མེད་ཆོས་ཀྱི་རྗེ། །ག་རུ་བཞུགས་ཀྱང་འགྲོ་བའི་དོན་ལ་བརྩོན། །ང་ཡི་རེ་བའི་སྐྱབས་གཅིག་དེ་ཉིད་ལ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །ཅ་ཅོ་བརྗོད་བྲལ་སྟོང་ཉིད་དོན་རྟོགས་ཀུན། །ཆ་ལུགས་ཁྲིམས་ལྡན་ཉན་ཐོས་ཚུལ་འཛིན་ཅིང་། །ཇ་སོགས་ལོངས་སྤྱོད་འདུ་འཛི་ཀུན་སྤངས་ཏེ། །ཉ་རྒྱས་ཟླ་ལྟར་ཡོན་ཏན་ཡོངས་རྫོགས་ལ། །གསོལ་བ༴ །
ཏ་ལའི་སྡོང་བཞིན་མཁྱེན་བརྩེའི་ལོ་འདབ་རྒྱས། །ཐ་མལ་སྐྱེ་བོ་ཐར་ལམ་འགོད་མཛད་པ། །ད་ལྟའི་དུས་འདིར་འགྲོ་བའི་འདྲེན་པ་མཆོག །ནམ་མཁའ་ལྟ་བུར་ཀུན་ཁྱབ་ཐུགས་རྗེ་ཅན། །གསོལ་བ༴ །པ་ཝ་སང་གི་གཞུང་ལུགས་རིགས་གནས་དག །ཕ་རོལ་ཕྱིན་པའི་ཆོས་སོགས་གང་འདུལ་གྱིས། །བ་གླང་ལྟ་བུར་རྨོངས་པའི་འགྲོ་ཀུན་ཀྱང་། །མ་རིག་མུན་པ་སངས་མཛད་གང་དེ་ལ། །གསོལ་བ༴ །ཙ་རླུང་ལས་རུང་འཁོར་འདས་སེམས་སུ་ཤེས། །ཚ་གྲང་ནད་སོགས་རྐྱེན་ངན་ལམ་དུ་ལྷོངས། །ཛ་ལནྔྷ་རའི་གནས་སོགས་ཡུལ་ཀུན་ཏུ། །ཝ་ལྟར་མྱུལ་ཀྱང་འགྲན་ཟླ་ཀུན་བྲལ་དེར། །གསོལ་བ་འདེབས་སོ༴ །ཞ་ལྟར་རྒྱུན་དུ་སྤྱི་བོར་འཁུར་བྱེད་ཅིང་། །ཟ་དང་འཐུང་བའི་ཕུད་ཀྱི་མཆོད་བྱེད་པའི། །འ་ཅག་དད་གུས་ཅན་གྱི་བུ་སློབ་ལ། །ཡ་མཚན་བྱིན་རླབས་རྒྱུན་ཆད་མེད་པ་རུ། གསོལ་བ༴ །ར་ས་ལ་སོགས་གནས་ཆེན་དུ་མ་དང་། །ལ་
ལུང་མང་པོར་གཞན་ཕན་རླབས་ཆེན་མཛད། །ཤ་རིའི་བུ་བཞིན་བསྟན་པའི་སྒྲོན་མེ་སྦར། །ས་སྟེང་འགྲོ་བ་ཀུན་གྱི་མགོན་གཅིག་པུ། །གསོལ་བ༴ །ཧ་ཅང་གདུང་ཤུགས་དྲག་པོས་གསོལ་བཏབ་མཐུས། །ཨ་ཏི་རྫོགས་ཆེན་ཉམས་ལེན་མཐར་ཕྱིན་ཞིང་། །སྐུ་བཞིའི་གོ་འཕང་མྱུར་དུ་ཐོབ་ནས་ཀྱང་། །རང་གཞན་དོན་འབྲས་ལྷུན་གྱིས་འགྲུབ་པར་ཤོག །ཅེས་པ་འདི་ནི་གནས་ཆེན་ཆུ་བོ་གཡས་འཁྱིལ་གྱི་སྒྲུབ་གྲྭ་ནས། དགེ་སློང་ཚེ་དབང་དཔལ་འབྱོར་གྱིས་བསྐུལ་ངོར་བཀོད་པའོ།། ༈ །།སྐྱབས་གནས་བསླུ་མེད་དཀོན་མཆོག་རྣམ་པ་གསུམ། །སངས་རྒྱས་ཀུན་འདུས་དཔལ་ལྡན་བླ་མ་རྗེ། །རྒྱལ་དང་རྒྱལ་སྲས་བླ་མའི་ཚོགས་བཅས་ལ། །གཡེལ་བ་མེད་པར་རྟག་ཏུ་ཕྱག་འཚལ་ལོ། ཨེ་མ། །དལ་འབྱོར་མི་ལུས་ལན་ཅིག་ཐོབ་དུས་འདིར། །དོན་མེད་ལས་ལ་མི་ཚེ་མ་སྐྱལ་བར། །དགོས་ངོ་ཤེས་པའི་དམ་པའི་ལྷ་ཆོས་ལ། །
དེ་རིང་ཉིད་ནས་བརྩོན་པར་མི་འཐད་དམ། །ཕྱི་སྣོད་འཇིག་རྟེན་ནམ་ཟླའི་འགྱུར་ལྡོག་དང་། །ནང་བཅུད་སེམས་ཅན་མི་རྟག་འཆི་བའི་ཚུལ། །འདི་དག་མཐོང་བཞིན་ད་དུང་ལོང་ཡོད་དུ། །ཡང་ཡེང་ངང་ལ་བསྡོད་པ་ཁྱེད་ཁོམ་མམ། །དེང་སང་ཚེ་ལོ་སུམ་ཅུ་ཁ་རལ་དུས། །ཚེ་མཐར་ཕྱིན་པ་ཉིན་སྐར་ལས་ཀྱང་དཀོན། །རླུང་དམར་ནང་གི་མར་མེ་ཇི་བཞིན་དུ། །ནམ་འཆི་ཆ་མེད་ཡིན་པ་མི་ཤེས་སམ། །རང་ཉིད་འཆི་བའི་དུ་ལ་བབ་ཙམ་ན། །གཅེས་པར་བསྐྱངས་པའི་ལུས་ཀྱང་བྱ་ཁྱིས་འདྲད། །བརྩིགས་ཤིང་བཟོས་པའི་ཁང་ཁྱིམ་ཤུལ་དུ་ལུས། །བརྩལ་ཞིང་བསགས་པའི་ནོར་རྣམས་གཞན་གྱིས་ཁྱེར། །ཡུན་དུ་འགྲོགས་པའི་གྲོགས་ཀྱང་སོ་སོར་འགྱེས། །བར་དོ་འཕྲང་ལ་གཅིག་པུར་འགྲོ་བའི་ཚེ། །དམ་པའི་ཆོས་དང་མཚན་ལྡན་བླ་མ་ལས། །སྐྱབས་ཀྱི་དམ་པ་གཞན་དུ་ཅང་འདུག་གམ། །སྙིང་པོ་མེད་པའི་འཇིག་རྟེན་བྱ་བ་འདི། །བྱས་ཀྱང་དོན་མེད་
ཆུ་ཡི་རི་མོ་འདྲ། རང་མགོ་རང་གིས་གཡོག་པ་འདི་སྤངས་ནས། །མདུན་མ་ཆོས་ཕྱོགས་དྲིལ་བ་མི་འཐད་དམ། །ད་རེས་མི་ལུས་དོན་ཡོད་མ་བྱས་ན། །ཡང་ཡང་རྙེད་དཀའི་དལ་འབྱོར་ཐོབ་མི་འགྱུར། །རིན་ཆེན་གླིང་ནས་སྟོང་ལོག་མ་བྱེད་པར། །རང་དོན་རང་གི་བསྒྲུབ་པའི་དུས་ལ་བབ། །འཁོར་བའི་གནས་ལ་བདེ་བ་ནམ་ཡང་མེད། །ངན་སོང་གསུམ་གྱི་སྡུག་བསྔལ་བཟོད་པར་དཀའ། །དེ་ལས་སྐྱབས་ཀྱི་མཆོག་གྱུར་བླ་མ་ལ། །འབྲལ་མེད་གུས་པའི་སྙིང་ནས་གསོལ་བ་ཐོབ། །ན་མོ་ཀ་དག་སྤྲོས་བྲལ་ཆོས་ཀྱི་སྐུ། །རང་བཞིན་ལྷུན་གྲུབ་གསལ་མདངས་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་གང་འདུལ་སྤྲུལ་པའི་སྐུ། །སྐུ་གསུམ་ཀུན་འདུས་དཔལ་ལྡན་བླ་མ་ལ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །བྱིན་རླབས་ཀུན་འབྱུང་རྩ་རྒྱུད་བླ་མའི་ཚོགས། །དངོས་
གྲུབ་སྩོལ་མཛད་ཡི་དམ་ཞི་ཁྲོའི་ལྷ། །འགལ་རྐྱེན་བར་ཆད་སེལ་བའི་མཁའ་འགྲོ་མ། །རྩ་གསུམ་གཅིག་བསྡུས་དཔལ་ལྡན་བླ་མ་ལ། །གསོལ་བ༴ །ལྷ་མིའི་སྟོན་པ་མཉམ་མེད་སངས་རྒྱས་དང་། །བདེན་གཉིས་ཟུང་འཇུག་ལུང་རྟོགས་དམ་པའི་ཆོས། །འཕགས་པའི་བསྟན་འཛིན་ཚོགས་མཆོག་དགེ་འདུན་ཏེ། །མཆོག་གསུམ་ཡོངས་འདུས་དཔལ་ལྡན་བླ་མ་ལ། །གསོལ་བ༴ །གདུལ་བྱའི་ཁམས་དང་མོས་པ་སྣ་ཚོགས་ལ། །གང་འདུལ་ཆོས་ཀྱི་འགྲོ་བ་སྨིན་མཛད་པའི། །རྒྱ་བོད་མཁས་གྲུབ་སྐྱེས་ཆེན་དམ་པའི་ཚོགས། །རྒྱལ་བའི་བསྟན་པ་རྒྱས་མཛད་ཐམས་ཅད་ལ། །གསོལ་བ༴ སྐྱེ་མེད་དབྱིངས་ལས་འགགས་མེད་རོལ་པའི་རྩལ། །སྣ་ཚོགས་གཟུགས་ཀྱིས་ཕྲིན་ལས་ཅིར་ཡང་སྟོན། །ཞི་དང་ཁྲོ་སོགས་ཡི་དམ་ལྷ་ཚོགས་དང་། །བསྟན་སྲུང་དམ་ཅན་རྒྱ་མཚོའི་ཚོགས་བཅས་ལ། །གསོལ་བ༴ །དེ་ལྟར་གསོལ་བ་བཏབ་པའི་
བྱིན་རླབས་ཀྱིས། །བདག་དང་མཁའ་མཉམ་འགྲོ་བ་མ་ལུས་ཀུན། ངན་སོང་འཁོར་བའི་འཇིགས་ལས་སྒྲོལ་ནས་ཀྱང་། །བདེ་ཆེན་ཐར་པའི་ཞིང་དུ་བསྒྲོད་པར་ཤོག །མ་རིག་རྨོངས་པའི་མུན་པས་རབ་འཐུམ་ཞིང་། །ཉོན་མོངས་དབང་གི་སྡིག་ལ་སྤྱོད་བྱེད་པའི། །ལས་ངན་རླུང་གིས་བསྐྱེད་པའི་འགྲོ་བ་རྣམས། །ཡང་དག་དགེ་ལེགས་ལམ་བཟང་ཞུགས་པར་ཤོག །དམྱལ་བའི་ཚ་གྲང་ཡི་དྭགས་བཀྲེས་སྐོམ་དང་། །དུད་འགྲོའི་བཀོལ་གཅོད་མི་ཡི་བྲེལ་འཕོང་དང་། །ལྷ་མིན་འཐབ་རྩོད་ལྷ་ཡི་འཕོ་ལྟུང་སོགས། །སྡུག་བསྔལ་ཀུན་བྲལ་བདེ་ལ་སྤྱོད་པར་ཤོག །སེམས་ཅན་ཀུན་གྱི་ཇི་ལྟར་འདོད་པའི་དོན། །གང་ལྟར་བསམ་པ་དེ་བཞིན་འགྲུབ་པ་དང་། །ཀུན་ཀྱང་དམ་པའི་ཆོས་ལ་རབ་སྤྱོད་
ནས། །རྫོགས་པའི་བྱང་ཆུབ་མྱུར་དུ་ཐོབ་པར་ཤོག །ཡངས་པའི་རྒྱལ་ཁམས་འཇིག་རྟེན་ཁམས་ཀུན་ཏུ། །ནད་མུག་འཁྲུག་རྩོད་ཉེར་འཚེ་ཀུན་ཞི་ཞིང་། །འགྲོ་ཀུན་དགའ་བདེའི་དཔལ་ལ་ལོངས་སྤྱོད་ནས། །སངས་རྒྱས་བསྟན་པས་ཕྱོགས་ཀུན་ཁྱབ་པར་ཤོག །དུས་གསུམ་རྒྱལ་བའི་ཐུགས་རྗེའི་བདེན་སྟོབས་དང་། །འགྲོ་ཀུན་དགེ་ཚོགས་ལས་བྱུང་ནུས་མཐུ་ཡིས། །སྨོན་ལམ་ཐམས་ཅད་གེགས་མེད་འགྲུབ་པ་དང་། །བདེ་ལེགས་ཡིད་བཞིན་འབྱུང་བའི་བཀྲ་ཤིས་ཤོག །ཅེས་པའི་མི་རྟག་རྒྱུད་བསྐུལ་གསོལ་འདེབས་སྨོན་ལམ་དང་བཅས་པ་འདི་ལྟ་བུ་ཞིག་དགོས་བཞེས། སངས་རྒྱས་རིག་འཛིན་གྱིས་བསྐུལ་ངོར་བྲིས་པའོ།། ༈ །།ན་མོ་གུ་ར་ཝེ། །དཔག་མེད་རྒྱལ་བའི་ཐུགས་རྗེའི་མཁའ་དབྱིངས་ལས། །འགྲོ་བློའི་མུན་སེལ་སྡུག་བསྔལ་ཆུ་བོ་སྐེམ། །ཕྲིན་ལས་འོད་གསལ་ཕྱོགས་མཐར་ཁྱབ་མཛད་པ། །དཔལ་ལྡན་བླ་མའི་སྐུ་ལ་གསོལ་བ་འདེབས། ཟབ་ཅིང་
རྒྱ་ཆེའི་གསུང་རབ་དམ་པའི་མཛོད། །བདེ་ལེགས་ཀུན་འབྱུང་དམ་ཆོས་ཡིད་བཞིན་ནོར། །དད་ལྡན་རེ་བ་སྐོངས་མཛད་ཐུགས་རྗེ་ཅན། །དཔལ་ལྡན་བླ་མའི་གསུང་ལ་གསོལ་བ་འདེབས། །ཀུན་ཁྱབ་ལྷ་ལམ་རབ་ཡངས་ཀློང་ཆེན་ལས། །རྣམ་དག་མཁྱེན་བརྩེའི་ཆུ་འཛིན་རབ་འཁྲིགས་ཏེ། །ཐུགས་རྗེའི་ཆར་གྱི་འགྲོ་བའི་ཚ་གདུང་སེལ། །དཔལ་ལྡན་བླ་མའི་ཐུགས་ལ་གསོལ་བ་འདེབས། །ངོ་མཚར་ཀུན་རྫོགས་ཡོན་ཏན་སྡོང་པོ་ལས། །གང་འདུས་ཕྲིན་ལས་ལོ་འདབ་ཕྱོགས་བཅུར་རྒྱས། །གདུལ་བྱའི་བྱ་ཚོགས་ཀུན་གྱི་གཉེན་གཅིག་པུ། །དཔལ་ལྡན་བླ་མ་མཆོག་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱི། །དུས་འདི་ནས་བཟུང་བྱང་ཆུབ་མཐར་ཐུག་བར། །མི་མཐུན་རྐྱེན་བྲལ་བསམ་དོན་ཆོས་བཞིན་འགྲུབ། །རང་གཞན་སྨིན་གྲོལ་ནུས་པར་བྱིན་གྱིས་
རློབས། །བསྐྱེད་རྫོགས་གཉིས་ལ་བརྟན་པ་ཐོབ་པ་དང་། །ལྟ་སྒོམ་སྤྱོད་གསུམ་མ་ནོར་མངོན་གྱུར་ཅིང་། །ཕྲིན་ལས་རྣམ་བཞི་ལྷུན་གྱི་གྲུབ་ནས་ཀྱང་། །གཞན་ཕན་དཔག་ཡས་འགྲུབ་པར་བྱིན་གྱིས་རློབས། །གཟུགས་སྒྲ་ལྷ་སྔགས་རོལ་པར་ཤར་བ་དང་། །དག་སྣང་མོས་གུས་ཕྱོགས་མེད་འབྱོངས་པ་དང་། །ཅིར་སྣང་གསལ་སྟོང་དབྱིངས་སུ་རོ་གཅིག་པས། །གདོད་མའི་གཏན་སྲིད་ཟིན་པར་བྱིན་གྱིས་རློབས། །ཅེས་པ་འདི་ནི། རིག་གྲོལ་ཡོན་ཏན་ལྡན་པ་ཨོ་རྒྱན་རིན་ཆེན་གྱི་ཐུགས་བཞེད་ལྟར་མཚམས་མལ་ནས་བྲིས་པའོ།། ༈ །།ན་མོ་གུ་རུ། །དུས་གསུམ་རྒྱལ་བ་ཐམས་ཅད་འདུས་པའི་སྐུ། །འགགས་མེད་ཆོས་སྒྲས་འགྲོ་ཀུན་སྨིན་མཛད་གསུང་། །མཁྱེན་བརྩེའི་བྱིན་རླབས་རྨད་བྱུང་ཟབ་གསལ་ཐུགས། །ཡོན་ཏན་ཀུན་འབྱུང་རྩ་བའི་བླ་མར་འདུད། །བག་མེད་འགྲོ་ལ་རིས་མེད་ཐུགས་རྗེ་ཡིས། །འཁོར་བའི་མཚོ་སྒྲོལ་ངན་འགྲོའི་གཡང་ལས་
སྐྱོབས། །བདེ་ཆེན་ཞིང་དུ་འགྲོ་ཀུན་འདྲེན་མཛད་པ། །ཐར་པའི་དེད་དཔོན་རྩ་བའི་བླ་མར་འདུད། །ཞིང་རྣམས་ཀུན་ཏུ་གྲངས་མེད་སྤྲུལ་པས་ཁྱབ། །སྣ་ཚོགས་འགྲོ་བའི་མོས་བློ་ཇི་བཞིན་དུ། ཚད་མེད་ཐུགས་རྗེ་རྨད་བྱུང་ཟློས་གར་གྱིས། །གདུལ་བྱ་བྱང་ཆུབ་སྙིང་པོར་མྱུར་འགོད་ཤོག །བརྩེ་ལྡན་ཁྱེད་ཀྱི་ཐུགས་རྗེ་རླབས་གཡོས་ཏེ། །བདག་སོགས་མོས་པའི་སྐལ་ལྡན་བུ་སློབ་རྣམས། །རྗེས་སུ་བཟུང་ཞིང་བྱིན་གྱིས་བརླབ་ནས་ཀྱང་། །སྒོ་གསུམ་སྨིན་ཅིང་གྲོལ་བར་མཛད་དུ་གསོལ། །རང་རིག་མི་འགྱུར་ཀ་དག་ཆོས་ཀྱི་སྐུ། །རང་ངོ་མ་རྟོགས་འཁྲུལ་པའི་གཟེབ་ཏུ་ཆུད། །རང་གསལ་ཐུགས་རྗེའི་འོད་ཀྱིས་གསལ་མཛོད་ལ། །རང་བྱུང་ཀློང་དུ་གྲོལ་བར་མཛད་དུ་གསོལ། །ཆོས་ཀུན་མཐར་ཐུག་རྫོགས་པ་ཆེན་པོའི་དོན། །སྣང་བཞི་མཐར་ཕྱིན་སྒྲོན་བཞི་གནད་དུ་ཚུད། །ཆོས་ཉིད་
ཀུན་བཟང་གོ་འཕངས་མྱུར་ཐོབ་ནས། །མཁའ་མཉམ་འགྲོ་ཀུན་འདྲེན་པའི་དཔལ་དུ་ཤོག །ཅེས་པ་འདི་ནི། གཙང་གི་ལ་སྟོད་སྲིད་གསུམ་རྣམ་རྒྱལ་ནས་རང་བཞིན་རྫོགས་པ་ཆེན་པོའི་རྣལ་འབྱོར་པ་གར་དབང་འོད་གསལ་རང་གྲོལ་གྱི་བསྐུལ་ངོར་བྲིས་པའོ།། ༈ །།ན་མོ་གུ་རུ་བྷྱཿ ངོ་བོ་ཡེ་ནས་ཀ་དག་ཆོས་ཀྱི་སྐུ། །རང་བཞིན་གསལ་ལ་མ་འགགས་ལོངས་སྤྱོད་རྫོགས། །ཐུགས་རྗེ་རོལ་རྩལ་ཀུན་ཁྱབ་སྤྲུལ་པའི་སྐུ། །སྐུ་གསུམ་སྟོན་མཆོག་རྣམས་ལ་གསོལ་བ་འདེབས། །དུས་གསུམ་རྒྱལ་བའི་ཐུགས་རྗེ་ལས་སྤྲུལ་ཏེ། །གྲངས་མེད་འགྲོ་ལ་གང་འདུལ་ཆོས་སྟོན་པ། །རྒྱ་བོད་མཁས་གྲུབ་གཏེར་སྟོན་རིགས་འཛིན་ཚོགས། །སྐྱེས་མཆོག་དམ་པ་རྣམས་ལ་གསོལ་བ་འདེབས། །གཞན་ཡང་ཞལ་མཐོང་གསུང་ཐོས་རྗེས་བཟུང་བའི། །རྩ་རྒྱུད་བླ་མ་བཀའ་དྲིན་ཅན་རྣམས་དང་། །སྐྱབས་མཆོག་རྒྱལ་དབང་པདྨ་འབྱུང་གནས་ལ། །རྩེ་གཅིག་
སྙིང་ནས་གུས་པས་གསོལ་༴ །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་སོགས་མཁའ་མཉམ་འགྲོ་བ་མ་ལུས་རྣམས། །བདེ་ཆེན་མཐར་པའི་ཞིང་དུ་མྱུར་ཕྱིན་ཏེ། །གདོད་མའི་ཀློང་དུ་མངོན་སངས་རྒྱས་པར་ཤོག །ཅེས་པ་འདི་ནི། གནས་ཆེན་མ་སྐུ་ལུང་གི་ཕྱོགས་སུ་སྒྲུབ་པའི་རྒྱལ་མཚན་འཛིན་པའི་བླ་མ་གཅོད་པ་བ་སངས་རྒྱས་བཀྲ་ཤིས་ཀྱིས། བདག་ལ་སྤྱིར་གསར་རྙིང་བཀའ་གཏེར་གྱི་བླ་མ་མཁས་གྲུབ་སྐྱེས་ཆེན་རྣམས་དང་། ཁྱད་པར་རང་ཉིད་ཀྱིས་ཞལ་མཇལ་གསུང་ཐོས་འབྲེལ་ཐོགས་ཀྱི་དྲིན་ཅན་ཐམས་ཅད་དང་། ཡང་དགོས་སུ་གུ་རུ་རིན་པོ་ཆེ་པདྨ་འབྱུང་གནས་དང་བཅས་པ་ལ་གསོལ་འདེབས་ཉུང་བསྡུས་ཤིག་དགོས་ཞེས་གསུངས་པའི་ངོར་འདི་བཞིན་བྲིས་ནས་མཚམས་མལ་ནས་ཕུལ་བའོ།། ༈ །།ན་མོ་གུ་ར་ཝེ། རྒྱལ་ཀུན་ཐུགས་རྗེའི་ལྷ་ལམ་ཡངས་པ་ལས། །མཚན་དཔེའི་ཆ་ཤས་ཡོངས་རྫོགས་འོད་ཟེར་གྱིས། །གདུལ་
བྱའི་ལམ་བཟང་མངོན་པར་སྣང་བྱེད་པ། །དཔལ་ལྡན་བླ་མའི་སྐུ་ལ་གསོལ་བ་འདེབས། །རབ་འབྱམས་རྒྱལ་བའི་གསུང་གི་གསང་བའི་མཛོད། །མ་ལུས་དབང་སྒྱུར་དམ་ཆོས་ཡིད་བཞིན་ནོར། །གྲངས་མེད་འགྲོ་ལ་སྩོལ་མཛད་སྐུ་དྲིན་ཅན། །དཔལ་ལྡན་བླ་མའི་གསུང་ལ་གསོལ་བ་འདེབས། །སྐྱབས་བྲལ་མགོན་མེད་སྲིད་པའི་འགྲོ་རྣམས་ལ། །ཚད་མེད་ཐུགས་རྗེ་དཔག་མེད་ཕྲིན་ལས་ཉིད། །རིས་མེད་ནམ་མཁའ་ལྟ་བུར་ཁྱབ་མཛད་པ། །དཔལ་ལྡན་བླ་མའི་ཐུགས་ལ་གསོལ་བ་འདེབས། །ཡོན་ཏན་རྒྱ་མཚོ་དཔག་མེད་འབྱུང་བའི་གནས། །ཕྲིན་ལས་འདོད་དགུར་བསྒྱུར་བའི་མཐུ་སྟོབས་ཅན། །སྐྱབས་གནས་ཀུན་འདུས་རྩ་བའི་བླ་མ་ལ། །རྩེ་ཅིག་སྙིང་ནས་གུས་པས་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འགལ་རྐྱེན་ཀུན་ཞི་མཐུན་རྐྱེན་ཆོས་
བཞིན་འགྲུབ། །ཚོགས་གཉིས་མྱུར་རྫོགས་སྒྲིབ་གཉིས་རབ་བྱང་སྟེ། ཁྱེད་དང་དབྱེར་མེད་གཅིག་པར་བྱིན་གྱིས་རློབས། ཅེས་པ་འདི་ཡང་། ཀོང་ཡུལ་ཉང་ཁ་སྨད་ཀྱི་སའི་ཐིག་ལེ་སྟག་རྩེ་རྣམ་པར་རྒྱལ་བའི་སྒང་ནས་མི་དབང་ཀརྨ་བསྟན་སྲུང་གིས་བསྐུལ་ངོར་བྲིས་པའོ།། ༈ །།རྒྱལ་བའི་བསྟན་འདིར་སྟོན་པའི་རྒྱལ་ཚབས་མཆོག ཁམས་གསུམ་ཆོས་ཀྱི་རྒྱལ་པོ་འགྲོ་བའི་མགོན། །གཙུག་ལག་རྒྱ་མཚོའི་སྤྲུལ་པའི་སྐུ་མཆོག་ནི། །བསྟན་འགྲོའི་དོན་དུ་མྱུར་དུ་འབྱོན་མཛད་གསོལ། །གྲངས་མེད་བསྐལ་མང་གོང་ནས་ཐུགས་བསྐྱེད་ལྟར། །འཁོར་བའི་མཚོར་ལྷུང་ཉམས་ཐག་འགྲོ་ཀུན་དང་། །བདག་སོགས་གདུལ་བྱའི་མགོན་སྐྱབས་དཔུང་གཉེན་དུ། །ཞིང་འདིར་སྤྲུལ་སྐུ་མྱུར་དུ་འབྱོན་མཛད་གསོལ། །རྩ་རྒྱུད་བླ་མ་ཡི་དམ་མཁའ་འགྲོའི་ཚོགས། །
ཆོས་སྐྱོང་སྲུང་མའི་བྱིན་རླབས་ནུས་མཐུ་དང་། །བདག་སོགས་ལྷག་བསམ་དག་པའི་བདེན་སྟོབས་ཀྱིས། །གསོལ་བཏབ་དོན་ལྡན་འགྲུབ་པར་མཛད་དུ་གསོལ། རྗེ་བཙུན་དམ་པ་གཙུག་ལག་རྒྱ་མཚོ་དགའ་བའི་དབྱངས་ཀྱི་སྤྲུལ་པའི་སྐུ་མྱུར་དུ་འབྱོན་པར་གསོལ་བ་བཏབ་པའོ།། ༈ །།ཀྱེ་མ། །ཟས་གཙང་སྲས་པོ་འགྲོ་བའི་བླ་མ་དེ། །རྩྭ་མཆོག་གྲོང་དུ་མི་རྟག་ཚུལ་བསྟན་ལྟར། །བསྟན་པའི་སྒྲོན་མེ་གཙུག་ལག་རྒྱ་མཚོ་དེ། །ལྕགས་ཕོ་རྟ་ལོ་ཐ་སྐར་ཟླ་བ་ཡི། །གྲལ་ཚེས་བདུན་གྱི་ཉི་མ་རྩེ་ཤར་དུས། །སྲས་མཁར་དགྱེས་མཛད་རྡོ་རྗེའི་ཕོ་བྲང་དུ། །ཟབ་གསལ་ཆོས་ཀྱི་འཁོར་ལོ་རྒྱུན་བཅད་དེ། །གདུང་བྱ་གཞན་དོན་གཤེགས་པའི་དུས་ཀྱང་བྱུང་། ཀྱེ་མ་ཀྱི་ཧུད་འཇིག་རྟེན་མགོན་པོ་ཁྱེད། །གདུལ་བྱའི་དོན་དུ་ཞིང་འདིར་མི་བཞུགས་པར། །ཆོས་ཀྱི་དབྱིངས་སུ་སྙོམ་པར་བཞུགས་པ་ན། །གངས་ཅན་བསྟན་
པའི་སྲོག་ཤིང་སུ་ཡིས་བྱེད། །སྙིགས་དུས་སེམས་ཅན་དམུ་རྒོད་འདུལ་དཀའ་ཡང་། །སྔོན་ནས་འགྲོ་བའི་དོན་དུ་ཐུགས་བསྐྱེད་པའི། །ཐུགས་རྗེའི་དམ་བཅའ་ཡལ་བར་འདོར་རུང་ངམ། །བདག་སོགས་ཉམས་ཐག་འགྲོ་ལ་རྩེར་དགོངས་ཏེ། །བསྟན་པའི་དོན་དུ་ཞིང་འདིར་མྱུར་བྱོན་ནས། །དམ་ཆོས་སྒྲོན་མེ་སྦར་བར་མཛད་དུ་གསོལ། །ཞེས་པ་འདི་ཡང་། རྗེ་དེ་ཉིད་མྱ་ངན་ལས་འདས་ཚེ་གདུང་བས་གསོལ་བ་བཏབ་པའོ།། ༈ །།སྐྱབས་གནས་བསླུ་མེད་རྩ་བའི་བླ་མ་ལ། །མོས་པའི་ཡིད་ཀྱིས་རྟག་ཏུ་གསོལ་བ་འདེབས། །བདག་སོགས་ཁམས་གསུམ་འཁོར་བའི་སེམས་ཅན་ལ། །ཐུགས་རྗེ་བརྩེ་བས་གཡེལ་མེད་གཟིགས་སུ་གསོལ། །རྙེད་དཀའི་དལ་འབྱོར་ལན་གཅིག་ཐོབ་དུས་འདིར། །གཏན་མདུན་ཆོས་ལ་བརྩོན་པ་དགོས་ནའང་། །ཡང་ཡེངས་ལེ་ལོའི་ངང་ལ་མི་ཚེ་འདས། །དོན་མེད་སྟོང་ལོག་མཁན་
ལ་ཐུགས་རྗེས་གཟིགས། །ཚེ་ལ་ངེས་མེད་བློ་གཏད་མི་ཐུབ་ཅིང་། །དོ་ནུབ་འཆི་བའི་ངེས་པའང་མེད་མོད་ཀྱང་། །ད་དུང་ལོ་བརྒྱའི་བར་དུ་སྡོད་རྩིས་ཀྱིས། །ཚེ་འདིའི་བྱ་བ་བསྒྲུབ་ལ་ཐུགས་རྗེས་གཟིགས། །ཕྱི་སྣོད་དབྱར་དགུན་ནམ་ཟླའི་འགྱུར་ལྡོག་དང་། །ནམ་བཅུད་སྐྱེ་འགྲོ་མི་རྟག་འཇིག་པའི་ཚུལ། །དེ་དང་མཚུངས་པ་རང་ཡང་འགྲོ་ངེས་ཀྱང་། །བསམ་མེད་དུད་འགྲོ་འདྲ་ལ་ཐུགས་རྗེས་གཟིགས། །འཆི་བའི་ཚེ་ན་ལུས་དང་ལོངས་སྤྱོད་དང་། །ཡུལ་དང་གཉེན་འཁོར་ནོར་རྫས་ལ་སོགས་པ། །ཅིས་ཀྱང་ཕན་པ་མེད་པ་ཤེས་བཞིན་དུ། །དོན་མེད་བྱ་བ་བསྒྲུབ་ལ་ཐུགས་རྗེས་གཟིགས། །དགེ་སྡིག་རྒྱུ་འབྲས་བླང་དོར་གནས་རྣམས་ཀུན། གོ་ཞིང་རིག་ཀྱང་སྤང་བླང་གོ་ལོག་བསྒྲུབ། །སླར་ཡང་འཁོར་བའི་ས་བོན་འདེབས་བྱེད་པ། །རང་གིས་རང་བསླུ་མཁན་ལ་ཐུགས་རྗེས་གཟིགས། །བྱམས་དང་སྙིང་རྗེ་དད་དང་མོས་གུས་སོགས། །དགེ་ལེགས་བསམ་
པ་རྒྱུད་ལ་མི་འབྱོང་བར། །མ་རིག་ཉོན་མོངས་ཐིབ་པོོས་ནོན་པ་ཡི། །ལས་ངན་འཁྲུལ་སྣང་ཅན་ལ་ཐུགས་རྗེས་གཟིགས། །ཐོས་བསམ་ཆོས་ལ་སྒྲོ་འདོགས་མ་ཆོད་ཅིང་། །སྒོམ་བསྒྲུབ་གདམས་པས་རང་རྒྱུད་མ་སྨིན་པར། །ཆོས་པར་རློམ་ནས་དཀོར་ལ་བག་མེད་སྤྱོད། །ངན་འགྲོའི་རྒྱུ་གསོགས་མཁན་ལ་ཐུགས་རྗེས་གཟིགས། །སྙིགས་དུས་ཆོས་མེད་སེར་གཟུགས་བདག་འདྲ་ལ། །སྐྱབས་མཆོག་རྣམས་ཀྱི་ཐུགས་རྗེའི་ཤུགས་བསྐྱེད་ནས། །ཉོན་མོངས་ལས་ཀྱི་འཁྲུལ་འཁོར་བཟློག་ནས་ཀྱང་། །མ་ནོར་དོན་གྱི་ལམ་ལ་འགོད་དུ་གསོལ། །རྨི་ལམ་ལྟ་བུའི་ཚེ་འདིའི་སྣང་བ་ཀུན། །སྒྱུ་མ་ལྟ་བུར་བདེན་མེད་རྟོགས་གྱུར་ཅིང་། །ཆུ་ཟླ་ལྟ་བུའི་སྣང་སྟོང་དབྱེར་མེད་དང་། །ནམ་མཁའ་ལྟ་བུའི་སྟོང་ཉིད་རྟོགས་པར་ཤོག །དཔལ་ལྡན་བླ་མའི་ཐུགས་རྗེའི་བྱིན་རླབས་ཀྱིས། །བདག་དང་མཁའ་མཉམ་སེམས་ཅན་
མ་ལུས་ཀུན། །འཁོར་བའི་འདམ་ལས་མྱུར་དུ་ཐར་ནས་ཀྱང་། །གདོད་མའི་ཀློང་དུ་གཏན་སྲིད་ཟིན་པར་ཤོག །ཅེས་པ་འདི་ཉིད་ཨཽ་རྒྱན་ཕྲིན་ལས་ཀྱིས་བསྐུལ་ངོར་བྲིས་པའོ།། ༈ །།ན་མོ་གུ་རུ། དུས་གསུམ་རྒྱལ་དང་རྒྱལ་སྲས་མ་ལུས་ཀྱི། །མཁྱེན་བརྩེ་ནུས་མཐུ་གཅིག་ཏུ་བསྡུས་པའི་དཔལ། །བདག་གི་སྐྱབས་གཅིག་དྲིན་ཅན་བླ་མ་ལ། །རྩེ་གཅིག་གུས་པའི་སྙིང་ནས་གསོལ་བ་འདེབས། །འཁོར་བའི་རྒྱ་མཚོ་ཕ་མཐའ་མི་མངོན་ཞིང་། །ལས་དང་ཉོན་མོངས་སྡུག་བསྔལ་རྦ་ཀློང་འཁྲུག །འདི་ལས་སྒྲོལ་མཛད་དེད་དཔོན་དམ་པ་མཆོག །དྲིན་ཅན་རྩ་བའི་བླ་མར་གསོལ་བ་འདེབས། །བདག་སོགས་ཁམས་གསུམ་འཁོར་བའི་སེམས་ཅན་རྣམས། །ཉོན་མོངས་ནད་ཀྱིས་རྟག་ཏུ་གཟིར་བ་ལས། །སྐྱོབས་མཛད་བྱམས་མགོན་སྨན་པའི་རྒྱལ་པོ་མཆོག །དྲིན་ཅན་རྩ་བའི་བླ་མའི་ཞབས་ལ་གསོལ་བ་
འདེབས། །རྩེ་གཅིག་དད་པའི་ཡིད་ཀྱིས་གསོལ་འདེབས་ཤིང་། །ཉམས་ཐག་ང་རོའི་འོ་དོད་འབོད་བཞིན་དུ། །ཁྱེད་ཀྱིས་ཐུགས་རྗེའི་སྤྱན་གྱིས་མི་གཟིགས་ན། །སྐྱབས་བྲལ་མགོན་མེད་སེམས་ཅན་སུ་ལ་རེ། །ཐུགས་རྗེའི་བདག་ཉིད་རྗེ་བཙུན་བླ་མ་ཁྱེད། །བྱིན་རླབས་ནུས་པའི་དཔུང་ཆེན་རབ་བསྐྱེད་ནས། །རྩེ་གཅིག་གསོལ་བ་འདེབས་པའི་སྐལ་ལྡན་ལ། །དངོས་གྲུབ་ཆར་ཆེན་དབབ་པའི་དུས་ལ་བབ། །འདི་ཕྱི་བར་དོ་དུས་ཀུན་ཐམས་ཅད་དུ། །བདག་ལ་ཁྱོད་ལས་སྐྱབས་གཞན་མ་མཆིས་ན། །བྱམས་པའི་ཐུགས་དང་བརྩེ་བས་རབ་དགོངས་ཏེ། །གཡེལ་བ་མེད་པར་རྟགས་ཏུ་གཟིགས་སུ་གསོལ། །དེ་ལྟར་ཁྱེད་ལ་གསོལ་བ་བཏབ་པའི་མཐུས། །བདག་དང་མཁའ་མཉམ་འགྲོ་བ་མ་ལུས་ཀུན། །ཚེ་འདི་ཉིད་ལ་དག་པའི་ཞིང་མཆོག་ཏུ།
ཁྱེད་དང་དབྱེར་མེད་གཅིག་པར་བྱིན་གྱིས་རློབས། །ཅེས་པ་འདི་ནི་དགེ་སློང་བཀྲ་ཤིས་ཀྱིས་བསྐུལ་ངོར་བྲིས་པའོ།། ༈ །།ཕྱོགས་དུས་རྒྱལ་བའི་ཕྲིན་ལས་གཅིག་བསྡུས་པ། །སྐུ་གསུམ་མངོན་གྱུར་རྒྱལ་དབང་པདྨ་འབྱུང་། །བྱིན་རླབས་གཟི་བརྗིད་འོད་སྟོང་རབ་འབར་ཞིང་། །བཀའ་བརྒྱུད་བླ་མ་རིག་འཛིན་འཁོར་གྱིས་བསྐོར། །སྐྱབས་གནས་ཀུན་དཔལ་མགོན་བླ་མ་ལ། །གསོལ་བ་འདེབས་སོ་བྱིན་རླབས་ཆར་རྒྱུན་ཕོབ། །ཞི་དང་ཁྲོ་སོགས་ཡི་དམ་ཀུན་གྱི་གཙོ། །གར་དགུའི་ཉམས་ལྡན་མ་རུངས་བདུད་དཔུང་འདུལ། ཁྲོ་རྒྱལ་འབར་བ་པདྨ་དྲག་པོ་རྩལ། །དཀྱིལ་འཁོར་ཡོངས་ཀྱི་སྤྱི་དཔལ་ཧེ་རུ་ཀ །ཡི་དམ་ཀུན་འདུས་དབང་དྲག་འབར་བ་ལ། །གསོལ་བ་འདེབས་སོ་མཆོག་མཐུན་དངོས་གྲུབ་སྩོལ། །ཞི་རྒྱས་དབང་དྲག་ཕྲིན་ལས་ཀུན་གྱི་མཛོད། །དམ་མེད་ཚར་གཅོད་དམ་ལྡན་བུ་བཞིན་སྐྱོང་། །མཁའ་འགྲོའི་གཙོ་མོ་
དཔལ་འབར་སེང་གདོང་ཅན། །མ་སྲིང་དམ་ཅན་རྒྱ་མཚོ་སྤྲིན་ལྟར་སྟིབས། །མཐུ་སྟོབས་མངའ་བདག་ཌཱ་ཀྐིའི་རྒྱལ་མོ་ལ། །གསོལ་བ་འདེབས་སོ་བར་ཆོད་བགེགས་ཚོགས་ཐུལ། །རྩ་གསུམ་ལྷ་ཚོགས་རྒྱལ་བའི་དཀྱིལ་འཁོར་ལ། །གུས་པའི་ཡིད་ཀྱིས་གསོལ་བ་བཏབ་པའི་མཐུས། །འགལ་རྐྱེན་ཀུན་ཞི་བསམ་དོན་ཆོས་བཞིན་འགྲུབ། དངོས་གྲུབ་མཆོག་ཐོབ་སྐུ་གསུམ་མངོན་གྱུར་ནས། །སྲིད་གསུམ་འགྲོ་ཀུན་ཐར་ལམ་འདྲེན་པར་ཤོག །ཞེས། ཡང་ཟབ་དཀོན་མཆོག་སྤྱི་འདུས་ཀྱི་རྩ་བ་གསུམ་ལ་གསོལ་བ་གདབ་པ་འདི་ཉིད་བསྟན་འཛིན་གྱིས་བསྐུལ་ངོར་བཀོད་པའོ།། ༈ །།གུ་རུ་པདྨ་སིདྡྷི་ཧཱུྃ། །བླ་མའི་རྣལ་འབྱོར་ཉམས་སུ་བླང་བར་འདོད་པས། །མཁའ་མཉམ་གྱི་སེམས་ཅན་ཐམས་ཅད་རྫོགས་བྱང་ལ་འགོད་ཕྱིར་དེ་ཉིད་ཉམས་སུ་ལེན་སྙམ་པའི་འདུན་པ་དང་ལྡན་པའི་ངང་ནས། །རང་ལུས་ཡི་དམ་གྱི་ལྷ་སྤྱན་
རས་གཟིགས་སམ་རྡོར་སེམས་ལ་སོགས་པ་གང་ལྟར་མོས་པ་སྐད་ཅིག་དྲན་རྫོགས་སུ་ལམ་གྱིས་བསྐྱེད་པའི་སྤྱི་བོར། སེང་ཁྲི་པདྨ་ཉི་ཟླའི་གདན་ལ་དཀོན་མཆོག་ཀུན་འདུས་ཀྱི་ངོ་བོ་རྩ་བའི་བླ་མ་ཉིད་ལ་རྣམ་པ་སློབ་དཔོན་ཆེན་པོ་པདྨ་འབྱུང་གནས་གསལ་བར་བྱ་སྟེ། དེ་ཡང་ཐིག་ལེ་ཉག་གཅིག་མཚོན་པའི་ཞལ་གཅིག །ཐབས་ཤེས་ཀྱི་ཕྱག་གཉིས་ཆོས་ཉིད་འགྱུར་མེད་ཀྱི་རྡོ་རྗེ་དང་དངོས་གྲུབ་མཛད་མེད་ཀྱི་ཀ་པཱ་ལའི་ནང་ན་ཚེ་བུམ་ཅན་བསྣམས་པ། བདེན་གཉིས་ཟུང་འཇུག་གི་སྐྱིལ་ཀྲུང་ཅན། ཐེག་པ་རིམ་པ་དགུའི་ཟབ་བེར། མདོ་སྔགས་ཟུང་འཇུག་གི་ཆོས་གོས། སྐུ་ལྔ་ཡོངས་རྫོགས་ཀྱི་འདབ་ལྡན་རིགས་ལྔ། དུག་གསུམ་རྩད་གཅོད་ཀྱི་ཁ་ཊྭཱཾ་ལ་སོགས་ཆས་རྣམས་རྫོགས་པ། འཇའ་འོད་ཀྱི་ཀློང་ན་བཞུགས་པར་གསལ་བའི་གནས་གསུམ་དུ་འབྲུ་གསུམ་གྱིས་མཚན་པ་ལས་འོད་འཕྲོས། རྔ་ཡབ་གླིང་ནས་རྗེ་བཙུན་པདྨ་ལ་འཁོར་
སངས་རྒྱས་བྱང་སེམས་གྲུབ་ཐོབ་རིག་འཛིན་ཡི་དམ་མཁའ་འགྲོ་ཆོས་སྐྱོང་སོགས་སྤྲིན་ཐིབ་པ་ལྟར་བྱོན་ནས་སྤྱི་བོའི་བླ་མ་ལ་ཐིམ་པས་བྱིན་རླབས་ཀྱི་གཟི་འོད་ཆེར་འབར་བར་བསམ་ལ། །སྣང་སྲིད་སྣོད་བཅུད་ལུས་དང་ལོངས་སྤྱོད་འདི་ཕྱི་བར་གསུམ་གྱི་མདུན་མ་ཐམས་ཅད་ལྟོས་མེད་མཎྜལ་དུ་འབུལ་ཞིང་མོས་གུས་རྩེ་གཅིག་པའི་ངང་ནས། །རྒྱལ་བ་ཀུན་འདུས་དཔལ་ལྡན་བླ་མ་ལ། །རྩེ་གཅིག་གུས་པས་ཡིད་ཀྱི་གསོལ་འདེབས་ན། །མཆོག་དང་ཐུན་མོངས་དངོས་གྲུབ་མ་ལུས་ཀུན། །མྱུར་དུ་སྩོལ་ཞིང་བྱིན་གྱིས་བརླབ་ཏུ་གསོལ། །ཞེས་གསོལ་བ་འདེབས་པ་ཅི་ནུས་བྱས་རྗེས། བླ་མའི་སྐུ་གསུང་ཐུགས་ལས་འོད་ཟེར་དཀར་དམར་མཐིང་གསུམ་འཕྲོས་ནས། རང་གི་ལུས་ངག་ཡིད་གསུམ་ལ་ཕོག །སྒོ་གསུམ་གྱི་སྒྲིབ་པ་དག །འབྲས་བུ་སྐུ་གསུམ་ཐོབ་པའི་རྟེན་འབྲེལ་མཐའ་དག་འགྲིག །མཐར་
བླ་མ་ཡང་འོད་དུ་ཞུ་ནས་རང་ལ་ཐིམ་པ་ཙམ་གྱིས་བཞི་རྫོགས་ཀྱི་དབང་རྣམས་དུས་གཅིག་ལ་ཐོབ། དེ་ནས་བླ་མ་བསྒོམ་རྒྱུ་སྒོམ་མཁན་བསྒོམ་པ་ཐམས་ཅད་རང་རིག་ཀ་དག་བློ་འདས་སུ་འུབ་ཆུབ་སྟེ། གསལ་སྟོང་ཟུང་འཇུག་སྒོམ་མེད་ཡེངས་མེད་ཀྱི་ངང་ལ་གནས་པ་ནི་དོན་དམ་པའི་བླ་མའི་རྣལ་འབྱོར་ཡང་དག་པ་སྟེ། འབྲས་བུ་ཡེ་རྫོགས་ཆེན་པོའི་དངོས་གྲུབ་རེ་དོགས་དང་བྲལ་བ། སྟན་ཐོག་དེ་ཉིད་དུ་ཐོབ་པར་གདོན་མི་ཟ་ཞིང་།། ༈ །།རྗེས་ཐོབ་ལམ་ཁྱེར་གྱི་གནད་ནི། འགྲོ་བའི་དུས་སུ་གཡས་ཕྱོགས་ཀྱི་ནམ་མཁར་བླ་མ་བཞུགས་པར་བསམ་ན་གར་འགྲོ་བསྐོར་བའི་རང་བཞིན་དུ་གྱུར། གཉིད་ཀྱི་དུས་སུ་སྙིང་པདྨ་འདབ་བཞི་ཁ་ཟུམ་པའི་དབུས་སུ་བླ་མ་བསྒོམ་ན་གཉིད་འོད་གསལ་དུ་འགྲོ་བའི་གདམས་པར་གྱུར། ཟས་སྐོམ་ལ་སྤྱོད་ཚེ་མགྲིན་པའི་རྩ་འཁོར་གྱི་དབུས་ན་བླ་མ་བསྒོམ་ན་བཟའ་བཏུང་ཚོགས་འཁོར་དུ་འགྱུར།
གཏུམ་མོ་བསྒོམ་ཚེ་ལྟེ་འོག་གི་མེ་ཉིད་ངོ་བོ་བླ་མར་མོས། བདེ་བ་ལམ་དུ་སློང་ན་སྤྱི་བོར་བླ་མ་ཧཾ་ཡིག་འཛག་པར་བསམ། ལུས་ལ་ནད་ཀྱི་རྣམ་པ་ཕྱི་ནང་གང་དུ་བྱུང་ཡང་ན་བའི་སར་བླ་མའི་སྐུ་ཕྲ་ལ་བསལ་བར་བསྒོམ་པའི་སྐུ་ལས་བདུད་རྩི་བབས་པས་ནད་ཐམས་ཅད་དག་པར་བསམ་ན་སྨན་གྱི་དམ་པར་འགྱུར། དེ་ལས་གཞན་པའི་དུས་ཐམས་ཅད་དུ་བླ་མ་སྤྱི་བོར་འབྲལ་མེད་བསྒོམ་ན་འཆི་ཀར་འཕོ་བ་ཡང་དེ་ཀས་ཆོག་ཅིང་། གལ་ཏེ་བར་དོར་འཁྱམས་པའི་ཚེ་ནའང་བར་དོའི་གདམས་པ་མཆོག་ཏུ་འགྱུར། མདོར་ན་བཀའ་མདོ་རྒྱུད་ལུང་མན་ངག་གསང་སྔགས་གསར་རྙིང་ཐམས་ཅད་ཀྱིས་དགོངས་བཞེས་གཅིག་ཏུ་མཐུན་པའི་གདམ་ངག་འདི་ལྟ་བུ་ལ་བློ་གཏད་ནས་རྒྱུན་ལྡན་དུ་ཉམས་ལེན་མ་བྱས་ན། ཤེས་ཤེས་མང་ཀྱང་དགོས་དུས་མི་ཕན་ཞིང་མི་ཚེ་ཧྲིལ་པོར་ཆོས་བྱས་པར་བརློམ་ཀྱང་འཆི་ཁར་བློའི་
གཏད་ས་གཅིག་ཀྱང་མེད་པ་འགྱོད་པ་དང་བཅས་པས་འཆི་ཞིང་། དེ་ཚེ་ཤུལ་དུ་དགེ་བ་བྱེད་པ་ལ་རེ་ཞིང་ཁ་ཆེམས་གཞོག་པ་རྣམས་ནི་མི་ཚེ་སྟོང་ཟད་བྱས་པ་དོན་མེད་རང་གི་རང་བསླུས་སུ་སོང་བ་ཡིན་པས། དེས་ན་ལམ་ཟབ་སྙིང་པོ་འདི་ལྟ་བུ་ལ་བརྩོན་པར་མཛད་ནས་རང་གཞན་གྱི་དོན་གཉིས་བསྒྲུབ་འཚལ། ཨེ་མ་སྔོན་ནས་ལས་འཕྲོའི་རྟེན་འབྲེལ་གྱིས། ཁྱབ་གདལ་ལྷུན་གྲུབ་མོས་གུས་ཞིང་ས་ལ། །ཀརྨ་རིག་འཛིན་ཟབ་དོན་ཆར་ཆེན་ཕབས། །སྐུ་གསུམ་ལོ་འབྲས་ལེགས་པར་སྨིན་པ་ནི། །སྨོན་ལམ་དག་པའི་ཤུགས་ལས་གྲུབ་པར་ངེས། །འདི་ལས་བྱུང་བའི་རྣམ་དཀར་དགེ་བའི་མཐུས། །འགྲོ་ཀུན་འཁོར་བའི་འཆིང་བ་རབ་གྲོལ་ཏེ། །བདེ་ཆེན་ཞིང་དུ་བདེ་བའི་ཆོས་སྤྱོད་པའི། །རྒྱུ་འབྲས་ཆོས་ལ་ཡང་དག་སྤྱོད་པར་ཤོག །ཅེས་པ་འདི། བོད་ཡུལ་དབུས་ཀྱི་རྒྱལ་ཁམས་ཀྱི་བྱེ་བྲག་གོང་དཀར་གྱི་ཕྱོགས་ནས། དད་ལྡན་ཁྱབ་
གདལ་ལྷུན་གྲུབ་ཀྱིས་བསྐུལ་བའི་ངོར་བཀོད་པའོ། ན་མོ་གུ་རུ། རྒྱལ་བ་ཀུན་འདུས་ཀྱི་ངོ་བོ་དམ་ཆོས་ཐམས་ཅད་ཀྱི་འབྱུང་གནས། །ཚོགས་མཆོག་དགེ་འདུན་གྱི་སྤྱི་དཔལ། །དྲིན་ཅན་བླ་མ་རང་མཁྱེན་ནོ། །སྡེ་སྣོད་རྒྱུད་ལུང་དང་མན་ངག །རབ་འབྱམས་ཆོས་ཀུན་གྱི་མཛོད་འཛིན། །དད་ལྡན་རེ་སྐོང་གི་ནོར་བུ། །ཡིད་བཞིན་འདོད་འབྱུང་རང་མཁྱེན་ནོ། །འཁོར་བ་སྡུག་བསྔལ་གྱི་འདམ་ལས། །ཟབ་དོན་མན་ངག་གི་གྲུ་བོས། །བདེ་ཆེན་ཐར་གླིང་དུ་སྒྲོལ་མཛད། །དེད་དཔོན་དམ་པ་རང་མཁྱེན་ནོ། །དུག་གསུམ་ཉོན་མོངས་ནད་ཀྱིས། །ཐོག་མཐའ་དུས་རིང་དུ་གཟིར་ལ། །དམ་ཆོས་བདུད་རྩི་ཡིས་ཕན་མཛད། །བདེ་བའི་འབྱུང་གནས་རང་མཁྱེན་ནོ། །རབ་འཇིགས་ངན་སོང་གི་དགྲ་ལས། །སྐྱོབས་མཛད་སྐྱབས་མགོན་གྱི་དམ་པ། །འཁོར་བའི་གཡུལ་ཟློག་གི་དཔའ་བོ། །ཐུགས་རྗེའི་
བདག་ཉིད་རང་མཁྱེན་ནོ།། ༈ །།བུ་གཅིག་མ་ལ་འབོད་འདྲའི་གདུང་དབྱངས་ཀྱིས། དུང་བའི་ང་རོའི་ཕ་ཁྱོད་འབོད་ལགས་ན། །དགོངས་པའི་ཀློང་ནས་བརྩེ་བའི་ཤུགས་ཕྱུངས་ཏེ། །ཐུགས་རྗེའི་རླབས་ཆེན་གཡོ་བའི་དུས་ལ་བབ། །སྒྲ་དང་ལྡན་པའི་ཚིག་གིས་འབོད་པའི་ཚེ། །རྨོངས་པའི་དུད་འགྲོའང་གོ་ཞིང་རྒྱུག་བྱེད་ན། །ཕ་ཁྱོད་དྲན་པས་དབྱངས་ཀྱི་བོས་པའི་ཚེ། །མོས་པའི་བུ་ལ་ཐུགས་རྗེས་མི་དགོངས་སམ། །བདག་གིས་མོས་གུས་གདུང་ཤུགས་དྲག་པོ་ཡིས། །སྐྱབས་གནས་ཁྱོད་ལ་གསོལ་བ་བཏབ་པའི་མཐུས། །མཆོག་དང་མཐུན་མོངས་དངོས་གྲུབ་མ་ལུས་པ། །མྱུར་དུ་སྩོལ་ཞིང་བྱིན་གྱིས་བརླབ་ཏུ་གསོལ། །ཅེས་པ་འདི་ནི་ཚེའི་རིག་བྱེད་འཛིན་པའི་དབང་པོ་ཀརྨ་འགྲོ་ཕན་གྱི་བསྐུལ་ངོར་བྲིས་པའོ།། ༈ །།རང་གི་སྤྱི་བོར་པད་ཉི་ཟླ་བའི་གདན་གྱི་སྟེང་དུ་ངོ་བོ་རྩ་བའི་བླ་མ་རྣམ་པ་སློབ་དཔོན་རིན་པོ་ཆེ་པདྨ་འབྱུང་གནས་
ཀྱི་སྐུ་མཚན་དང་དཔེ་བྱད་ཀྱི་བརྒྱན་པ་གསལ་བཏབ་ལ། དད་པ་མོས་གུས་ཀྱི་གདུང་ཤུགས་དང་ལྡན་པས་གསོལ་བ་འདི་ལྟར་དུ་གདབ་པར་བྱ་སྟེ། ན་མོ། །ཡེ་གྲོལ་ཀ་དག་གདོད་མའི་གནས་ལུགས་ལ། །རང་བྱུང་རང་རིག་སྤྲོས་མེད་བརྗོད་མཐའ་བྲལ། །འགྱུར་མེད་འོད་གསལ་ཀློང་ཡངས་འདུས་མ་བྱས། །བླ་མ་ཆོས་ཀྱི་སྐུ་ལ་གསོལ་བ་འདེབས། །རང་བཞིན་ལྷུན་གྲུབ་གསལ་དག་ཐིག་ལེའི་ཀློང་། །ཀུན་བཟང་གདངས་ལས་འགགས་མེད་རོལ་རྩལ་འཕྲོ། །ལྟ་བས་མི་ངོམ་སྣང་སྟོང་འོད་ཀྱི་སྐུ། །བླ་མ་ལོངས་སྤྱོད་རྫོགས་ལ་གསོལ་བ་འདེབས། །ཕྱོགས་བཅུ་མཐའ་ཡས་རབ་འབྱམས་ཞིང་ཁམས་སུ། །སྐུ་དང་མཛད་ཕྲིན་སྣ་ཚོགས་བསམ་ཡས་ཀྱིས། །གདུལ་བྱའི་རེ་བ་ཡིད་བཞིན་སྐོངས་མཛད་པ། །བླ་མ་སྤྲུལ་པའི་སྐུ་ལ་གསོལ་བ་འདེབས། །བླ་མ་ཡི་དམ་
མཁའ་འགྲོ་ཆོས་སྐྱོང་སོགས། །རྣམ་འགྱུར་ཆ་ལུགས་དུ་མར་སྣང་བ་ཀུན། །དབྱེར་མེད་བླ་མའི་ངང་དུ་རོ་གཅིག་པའི། །ཀུན་འདུས་བླ་མ་མཆོག་ལ་གསོལ་བ་འདེབས། །སྐྱབས་གནས་དཔལ་མགོན་རྩ་བའི་བླ་མ་ལ། །མོས་གུས་གདུང་བའི་གསོལ་བ་བཏབ་པའི་མཐུས། །སྨིན་གྲོལ་བྱིན་རླབས་ཆར་རྒྱུན་དབབ་ནས་ཀྱང་། །སྐུ་གསུམ་མངོན་དུ་འགྱུར་བར་བྱིན་གྱིས་རློབས། །ཅེས་བླ་མའི་རྣལ་འབྱོར་མདོར་བསྡུས་པ་འདི་ནི། ཆོས་མཛད་ཨོ་རྒྱན་དར་རྒྱས་ཀྱི་བསྐུལ་ངོར་བྲིས་པའོ། ༈ ཁམས་གསུམ་འགྲོ་བའི་སྐྱབས་མགོན་དམ་པ་ཉིད། །ཐུགས་རྗེ་ཆེན་པོས་དད་ལྡན་འགྲོ་བ་ཀུན། །མ་ནོར་ལམ་ལ་འགོད་མཛད་བཀའ་དྲིན་ཅན། །དྲིན་ཅན་རྩ་བའི་བླ་མར་གསོལ་བ་འདེབས། །སྐུ་མཆོག་མཐོང་བས་དད་པས་རྦ་རླབས་གཡོ། །ཚངས་དབྱངས་ཐོས་པས་ངན་འགྲོའི་གཡང་ས་གཅོད། །དྲན་པ་ཙམ་གྱིས་གྲོལ་བའི་ལམ་
ལ་འགོད། །དྲིན་ཅན་རྩ་བའི་བླ་མར་གསོལ་བ་འདེབས། །མཛད་པའི་ཕྲིན་ལས་ཡོན་ཏན་རྒྱ་མཚོ་ལས། །ངོ་མཚར་འདོད་འབྱུང་ཡིད་བཞིན་གཏེར་མཛད་ཀྱིས། །འགྲོ་བློའི་རེ་སྐོང་མཛད་པའི་རིན་པོ་ཆེ། །དྲིན་ཅན་རྩ་བའི་བླ་མར་གསོལ་བ་འདེབས། །ཁྱོད་མཐོང་ཐོས་དང་དྲན་དང་རེག་པས་ཀྱང་། །གནས་སྐབས་མཐའ་ཐུག་འདོད་དོན་མ་ལུས་ཀུན། །ཡོངས་སུ་འགྲུབ་ཅིང་གོ་འཕངས་མཆོག་ཐོབ་པའི། །སྐྱབས་མཆོག་ཁྱེད་ཀྱི་ཐུགས་རྗེས་དགོངས་ནས་ཀྱང་། །རྗེས་སུ་བཟུང་ཞིང་བྱིན་གྱིས་བརླབ་ཏུ་གསོལ། །ཅེས་པ་ནི་དད་ལྡན་བཟང་པོའི་མིང་ཅན་གྱིས་བསྐུལ་ངོར་སྦྱིན་པའོ།། ༈ །།རང་ཉིད་ཐ་མལ་སྤྱི་གཙུག་པད་ཉིའི་སྟེང་། །སྐུ་དྲིན་འཁོར་མེད་རྩ་བའི་བླ་མ་ཉིད། །རིགས་འདུས་རྒྱལ་བ་ཐོད་ཕྲེང་རྩལ་གྱི་སྐུ། །སྐུ་མདོག་དམར་པོ་ཞི་མ་ཁྲོ་ཡི་ཉམས། །ཅུང་ཟད་
འཛུམ་དང་བཞད་པའི་ཞལ་ལྡན་པ། །སྤྱན་གསུམ་ཟླུམ་ཞིང་དམར་བས་ཕྱོགས་བཅུར་གཟིགས། །དབུ་སྐྲ་ཐོར་ཚུག་རིན་ཆེན་སྲོག་ཞུ་གསོལ། །སྐུ་ལ་རིན་ཆེན་རུས་བརྒྱན་དར་དཔྱངས་མཛེས། །ཕྱག་གཉིས་རྡོ་རྗེ་དྲིལ་བུ་ཐུགས་ཀར་བསྣོལ། །ཞབས་གཉིས་གཡས་བསྐུམ་གཡོན་རྐྱང་དོར་སྟབས་ཚུལ། །འཇའ་འོད་རབ་འཁྲུང་མེ་དཔུང་འབར་བའི་ཀློང་། ཁམས་གསུམ་དབང་བསྡུས་སྲིད་གསུམ་ཟིལ་གནོན་པའི། །འཁོར་དུ་རྩ་རྒྱུད་བླ་མ་ཡི་དམ་དང་། །མཁའ་འགྲོ་ཆོས་སྐྱོང་སྤྲིན་ལྟར་སྟིབས་པའི་དབུས། །བརྗིད་པའི་སྐུ་ལས་ཆོས་གསུངས་ཚངས་དབྱངས་ལྡན། །ཐུགས་རྗེ་རྩེ་བས་བདག་ལ་དགོངས་པར་གསལ། །སྐུ་གསུང་ཐུགས་ནས་འོད་ཟེར་འཕྲོས་པ་ལས། །རྔ་ཡབ་གླིང་ནས་རྗེ་བཙུན་པདྨ་འབྱུང་། །འཁོར་བཅས་བྱོན་ནས་སྤྱི་བོའི་བླ་མར་ཐིམ། ཧཱུྃ། ཕྱི་ནང་སྣོད་བཅུད་སྣང་སྲིད་འཁོར་འདས་ཆོས། །དངོས་དང་དངོས་
མིན་བདག་ལུས་ལོངས་སྤྱོད་སོགས། །མ་ལུས་བློ་ཡིས་བླངས་ཏེ་འབུལ་ལགས་ན། ཁྱོད་དང་དབྱེར་མེད་གཅིག་པར་དངོས་གྲུབ་སྩོལ། གུ་རུ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཨཱཿཧཱུྃ། ན་མཿཤྲཱི་གུ་ར་ཝེ། སྲིད་ལས་རྣམ་གྲོལ་སྲིད་ཞིའི་རོལ་གར་སྟོན། །མཁྱེན་རབ་མཁའ་ལ་མཁྱེན་བརྩེའི་འོད་ཟེར་འཕྲོ། །གདུལ་ཀའི་འགྲོ་རྣམས་གདུལ་ཐབས་བསམ་ཡས་ཀྱིས། །སྐུ་གསུམ་ལ་འགོད་སྐུ་གསུམ་ཀུན་འདུས་པའི། །དཔལ་ལྡན་བླ་མ་བླ་མེད་སྐྱབས་མགོན་མཆོག །དངོས་གྲུབ་ཀུན་སྩོལ་ཀུན་བཟང་རྡོ་རྗེ་འཛིན། །བྱིན་རླབས་མཆོག་སྩོལ་མཆོག་གི་གོ་འཕངས་ལ། །ཁྱོད་ཀྱིས་བདག་དང་བདག་འདྲའི་སེམས་ཅན་རྣམས། །མྱུར་དུ་བཀོད་མཛོད་བཀོད་པ་མཐའ་ཡས་ཀྱི། །ཞིང་ཁམས་རྒྱ་ཆེན་རྒྱ་མཚོ་དཔག་མེད་པར། །ཡོངས་
སུ་འདྲེན་པར་འདྲེན་མཆོག་ཁྱེད་ཉིད་ལ། །མྱུར་དུ་གསོལ་ཞིང་གསོལ་བ་སྙིང་ནས་འདེབས། །ཐུགས་རྗེས་དགོངས་ཤིང་དགོངས་པས་ཉེར་བཟུང་སྟེ། །ཉོན་མོངས་འཁོར་བའི་འཁོར་ལོ་གཞོམ་དུ་གསོལ། །བདག་ཏུ་ལྟ་བའི་ལྟ་ངན་ཞིག་ཏུ་གསོལ། །ཀ་དག་ཀློང་དུ་ཀློང་གྲོལ་ཆེན་པོར་ཤོག །དེ་ལྟར་རྩེ་གཅིག་གསོལ་བ་བཏབ་པ་ལས། །བླ་མའི་སྐུ་གསུང་ཐུགས་ལས་འོད་འཕྲོས་ནས། །བདག་ལ་ཐིམ་པས་སྒོ་གསུམ་སྒྲིབ་པ་དག །སྐུ་གསུང་ཐུགས་ཀྱི་དངོས་གྲུབ་ཐོབ་གྱུར་ཅིང་། །སླར་ཡང་བླ་མ་འོད་ཞུ་རང་ལ་ཐིམ། །དུས་གསུམ་འགྱུ་དྲན་རྟོག་པའི་འཕྲོ་འདུ་ལ། །དགག་སྒྲུབ་བཅོས་སླད་རེ་དོགས་མེད་པའི་ངང་། །སྒོམ་མེད་ཡེངས་མེད་གནས་ལུགས་དོན་ལ་གློད། །གློད་ཅེས་བྱ་བའང་མིང་དང་ཚིག་ཙམ་སྟེ། །མིང་ཚིག་བརྗོད་པའི་ཡུལ་ལས་འདས་པར་བསྐྱུར། །བསྐྱུར་
མཁན་བསྐྱུར་རྒྱུ་གཉིས་སུ་མ་གྲུབ་པས། །གཉིས་མེད་ངང་དུ་ཡེངས་མེད་རིགས་པས་བསྐྱངས། །མཚོན་བྱེད་དཔེ་ཡི་བླ་མ་གཟུགས་ཙམ་སྟེ། །མཚོན་ཆ་དོན་གྱི་བླ་མ་རང་རིག་ཉིད། །རང་རིག་རང་ངོ་ཤེས་ན་བླ་མའི་མཆོག །འདི་དོན་རྟོགས་ན་སངས་རྒྱས་ལོག་ན་མེད། །ཡང་དག་སྙིང་པོའི་དོན་ལ་འདྲིས་པར་མཛོད།། ༈ །།བླ་མ་དྲན་དང་བསྒོམས་པ་ལས་བྱུང་བའི། །དགེ་བ་འདི་དང་དགེ་གཞན་ཀུན་བསྡོམས་ནས། །བླ་མེད་བླ་མ་མཆོག་གི་གོ་འཕངས་ལ། །བདག་དང་འགྲོ་ཀུན་མྱུར་དུ་རེག་པར་ཤོག །ཅེས་པ་འདི་ནི་མོང་ཡུལ་བདེ་ཆེན་དགོན་དུ་དད་ལྡན་གར་དབང་བསྟན་འཛིན་ལ་གདམས་པ་ཨིྀྠ།། ༈ །།ན་མོ་མ་ཧཱ་གུ་རུ་སརྦ་སིདྡྷི་ཧཱུྃ། །ངོ་བོ་ཀ་དག་སྤྲོས་བྲལ་ཆོས་ཀྱི་སྐུ། །རང་བཞིན་གསལ་ལ་མ་འགགས་ལོངས་སྤྱོད་རྫོགས། །ཐུགས་རྗེ་སྣ་ཚོགས་གང་འདུལ་སྤྲུལ་པའི་སྐུ། །སྐུ་གསུམ་དབྱེར་མེད་བསྟན་འཛིན་རྡོ་རྗེ་དཔལ། །
བཟང་པོའི་ཞབས་ལ་སྙིང་ནས་གསོལ་བ་འདེབས། །བྱིན་རླབས་ཆར་རྒྱུན་དབབ་པར་མཛད་དུ་གསོལ། །ཁྱེད་ཀྱི་ཐུགས་རྗེ་རྣམ་རོལ་འཕྲོ་འདུ་ལས། །ཕྱོགས་བཅུ་ཞིང་ཁམས་མཐའ་ཡས་རྒྱ་མཚོ་རུ། །གང་ལ་ཅིར་འདུལ་འགྲོ་བའི་དོན་མཛད་ཅིང་། །བདག་སོགས་སྣང་ངོར་པདྨ་ལེགས་གྲུབ་སྩལ། །རིག་འཛིན་རྣམ་པར་རྒྱལ་ལ་གསོལ་བ་འདེབས། །ཐུགས་རྗེ་གཡེལ་བ་མེད་པར་གཟིགས་སུ་གསོལ། །སངས་རྒྱས་བྱང་སེམས་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་དུ་མར་སྣང་བ་ཀུན། །དབྱེར་མེད་བླ་མའི་རོལ་པར་གཅིག་པའི་ངང་། །ཀུན་འདུས་བླ་མ་མཆོག་ལ་གསོལ་བ་འདེབས། །ཁྱོད་ཀྱིས་ཐུགས་རྗེས་བདག་སོགས་འགྲོ་བ་ཀུན། །ཆོས་དབྱིངས་ཀློང་དུ་གྲོལ་བར་མཛད་དུ་གསོལ། །ཅེས། རང་གི་སྐྱེ་བ་གོང་འོག་གཉིས་ཀྱི་གསོལ་འདེབས་ཞིག་དགོས་ཅེས་ཆོས་མཛད་མགོན་པོས་བསྐུལ་བའི་ངོ་མ་ཆོག་པར་བྲིས་པའོ། །
ན་མོ་གུ་ར་ཝེ། ཆོས་དབྱིངས་མཁའ་ལ་མཁྱེན་བརྩེའི་དཀྱིལ་འཁོར་རྒྱས། །མཛད་པའི་ཕྲིན་ལས་འོད་སྟོང་ཕྱོགས་བཅུར་འཕྲོ། །སྐུ་བཞིའི་བདག་ཉིད་དྲིན་ཅན་བླ་མ་ལ། །གསོལ་བ་འདེབས་སོ་མཆོག་མཐུན་དངོས་གྲུབ་སྩོལ། །སྔོན་ཚེ་འདྲེན་མཆོག་ཤཱཀྱ་སེང་གེ་ཉིད། །ཚོང་དཔོན་ཁྱེའུ་ཆུ་འབེབས་གྱུར་པའི་དུས། །དེ་ཡི་བུ་མཆོག་ཆུ་ཡི་སྙིང་པོ་ཞེས། །ཚོགས་གཉིས་འབྲས་བུ་སྨིན་ལ་གསོལ་བ་འདེབས། །མདོ་སྡེ་འཛིན་པའི་ཉེ་གནས་ཀུན་དགའ་བོ། །ཤཱཀྱའི་རིགས་འཁྲུངས་སྟོན་པའི་ཞབས་འབྲིང་མཛད། །འོད་སྲུངས་ཆེན་པོས་བསྟན་པའི་སྙིང་པོ་གཏད། །བཀའ་ཡི་བསྡུ་བ་པོ་ལ་གསོལ་བ་འདེབས། །སྤྱན་རས་གཟིགས་དངོས་སྲོང་བཙན་སྒམ་པོའི་དུས། །ཆོས་བློན་མཆོག་གྱུར་ཐོན་མི་སམྦྷོ་ཊ། །བོད་ཡུལ་མུན་པའི་སྨག་རུམ་བསེལ་
མཛད་པ། །འཇམ་དབྱངས་མི་གཟུགས་ཅན་ལ་གསོལ་བ་འདེབས། །མི་འགྱུར་ལྷུན་འགྲུབ་དཔལ་གྱི་བསམ་ཡས་སུ། །སྒྲ་བསྒྱུར་ཀུན་གྱི་མཆོག་གྱུར་བཻ་རོ་རྗེ། །དམ་ཆོས་སྒྲོན་མེ་སྦར་བའི་ཐུགས་རྗེ་ཅན། །བསྟན་པ་ཉིན་མོར་བྱེད་ལ་གསོལ་བ་འདེབས། །གཞན་ཡང་རྩོད་དུས་འགྲོ་ལ་བརྩེར་དགོངས་ཏེ། །འཇམ་དབྱངས་རྣམ་འཕྲུལ་པ་ཆེན་ས་སྐྱ་པ། །གྲུབ་པའི་དབང་ཕྱུག་ཁྱུང་པོ་རྣལ་འབྱོར་སོགས། །སྐྱེས་ཆེན་དམ་པ་རྣམས་ལ་གསོལ་བ་འདེབས། །བསམ་ཡས་མཐིལ་དུ་གཡག་ཆར་སྔོན་པོ་དང་། །གཡོ་རུ་གྲྭ་ནས་མཚུངས་བྲལ་རྡོ་རྗེ་གླིང་། །ཟབ་ལུང་གནས་སུ་ཀུན་སྐྱོང་གླིང་པ་སོགས། །རིག་འཛིན་གཏེར་བདག་རྣམས་ལ་གསོལ་བ་འདེབས། །སླར་ཡང་བསྟན་པའི་མི་རོ་སློང་ཕྱིར་དུ། །ཡོངས་འཛིན་དམ་པ་བསྟན་འཛིན་རྡོ་རྗེ་ཞེས། །སྔ་འགྱུར་བསྟན་པའི་སྒྲོན་མེ་མཆོག་གྱུར་པ། །
མཉམ་མེད་བླ་མ་རྗེ་ལ་གསོལ༴ །བླ་མ་ཡི་དམ་མཁའ་འགྲོ་ཆོས་སྐྱོང་ཚུལ། །དུ་མར་སྣང་ཡང་དབྱེར་མེད་བླ་མར་གཅིག །དྲན་མཆོག་རྒྱལ་པོ་སྣ་ཚོགས་རང་གྲོལ་རྩལ། །རྩ་བའི་བླ་མ་ཉིད་ལ་གསོལ་བ་འདེབས། །ཕྱོགས་བཅུའི་ཞིང་ཁམས་གྲངས་མེད་དཔག་ཡས་སུ། །གང་འདུལ་གཟུགས་ཀྱི་འགྲོ་བ་འདྲེན་མཛད་པ། །སྤྲུལ་དང་ཡང་སྤྲུལ་སྣ་ཚོགས་སྐུར་སྟོན་ལ། །རྩེ་གཅིག་གུས་པའི་ཡིད་ཀྱིས་གསོལ་བ་འདེབས། །མགོན་པོ་ཁྱོད་ཀྱི་ཐུགས་རྗེས་ཉེར་དགོངས་ཏེ། །བདག་སོགས་ཁམས་གསུམ་འགྲོ་བ་མ་ལུས་ཀུན། །ལས་ཉོན་སྡུག་བསྔལ་མཚོ་ལས་རབ་བསྒྲལ་ནས། །དཔལ་ལྡན་བླ་མའི་གོ་འཕངས་མྱུར་ཐོབ་ཤོག །ཅེས། རང་ཉིད་ཀྱི་སྐྱེས་རབ་གསོལ་འདེབས་ཞིག་དགོས་བཞེས་དབོན་པོ་རིན་ཆེན་གྱིས་ཡང་ཡང་བསྐུལ་བར་བརྟེན་ནས་
མཚུངས་མེད་དེ་ཉིད་གྱི་སྐྱེས་རབ་ལྟར་བཀོད་པ་ཡིན་ནོ། །ཨེ་མ་ཧོཿ ཀོ་ཤའི་མཚོ་གླིང་དྲི་མེད་པད་སྡོང་ལས། །རྒྱལ་བའི་སྤྱི་གཟུགས་པདྨ་འབྱུང་གནས་དཔལ། ཁམས་གསུམ་འགྲོ་བ་ཀུན་གྱི་སྐྱབས་གཅིག་པུ། །དྲིན་ཅན་བླ་མ་རྗེ་ལ་གསོལ་བ་འདེབས། །ཟ་ཧོར་ཡུལ་དུ་དགེ་སློང་སམྦྷ་ཝ། །ར་ག་ར་ཏིར་བློ་ལྡན་མཆོག་སྲེད་རྩལ། །དགའ་བ་ཚལ་དུ་པདྨའི་རྒྱལ་པོ་ཞེས། རྣམ་འགྱུར་བསམ་མི་ཁྱབ་ལ་གསོལ་བ་འདེབས། །མ་རིག་མུན་སེལ་ཉི་མའི་འོད་ཟེར་འཕྲོ། །ཤཱཀྱའི་བསྟན་འཛིན་ཤཱཀྱ་སེང་གེར་སྤྲུལ། །མུ་སྟེག་ལོག་འདྲེན་སེང་གེ་སྒྲ་ཡིས་བཅོམ། །གང་འདུལ་འགྲོ་བ་འདྲེན་ལ་གསོལ་བ་འདེབས། །གངས་ཅན་ཁྲོད་དུ་ལྷ་སྲིན་གདུག་པ་ཅན། །ཐུགས་རྗེས་གདུལ་ཕྱིར་གར་དགུའི་ཉམས་ལྡན་པ། །རྡོ་རྗེ་གྲོ་ལོད་དཔལ་ཆེན་དྲག་པོ་རྩལ། །བདུད་འདུལ་ཧེ་རུ་ཀ་ལ་གསོལ་བ་
འདེབས། །རྔ་ཡབ་གླིང་གི་ཟངས་མདོག་དཔལ་གྱི་རིར། །བགྲེས་རྒུད་མི་མངའ་རྡོ་རྗེའི་སྐུར་བཞུགས་ནས། གཞན་གྱིས་མི་ཐུལ་སྲིན་ཚོགས་ཆོས་ལ་བཀོད། །རཀྴ་ཐོད་ཕྲེང་རྩལ་ལ་གསོལ་བ་འདེབས། །སྙིགས་མའི་ཡང་སྙིགས་བསྟན་པའི་མཐའ་མ་འདིར། །འགྲོ་བའི་དོན་ཕྱིར་ཟབ་གཏེར་གྲངས་མེད་སྦས། །གཏེར་སྟོན་སོ་སོར་སྤྲུལ་ནས་འགྲོ་དོན་མཛད། །ཐབས་མཁས་ཐུགས་རྗེ་ཅན་ལ་གསོལ་བ་འདེབས། །མ་འོངས་ཤཱཀ་ཐུབ་བསྟན་པ་རྫོགས་པའི་ཚེ། །ཀླུ་ཡི་ཡུལ་དུ་ཟབ་གཏེར་འགྲོ་དོན་སྐྱོང་། །ཨོ་རྒྱན་སྤྲུལ་པ་དྲི་མེད་དཔལ་འཕྲེང་ཞེས། །ཟབ་གཏེར་བསྟན་ཞབས་སྐྱོང་ལ་གསོལ་བ་འདེབས། །རྩ་གསུམ་ཞི་ཁྲོ་རྒྱལ་བ་རྒྱ་མཚོའི་ཚོགས། །དུ་མར་སྣང་ཀུན་བླ་མར་རོ་གཅིག་པའི། །སྐྱབས་གནས་ཀུན་
འདུས་རྒྱལ་བ་པདྨ་འབྱུང་། །རིགས་ཀུན་ཁྱབ་བདག་རྣམས་ལ་གསོལ་བ་འདེབས། །ཐུགས་རྗེ་བརྩེ་བའི་དགོངས་པས་ཉེར་བཟུང་ནས། །བདག་དང་མཁའ་མཉམ་འགྲོ་བ་མ་ལུས་པ། །སྲིད་ཞིར་མི་གནས་མྱང་འདས་གྲོང་མཆོག་ཏུ། །ཁྱེད་དང་དབྱེར་མེད་གཅིག་པར་བྱིན་གྱིས་རློབས། །ཞེས་པ་འདི་དགེ་བཤེས་བསྟན་འཛིན་ལའོ། ན་མོ་མ་ཧཱ་གུ་རུ་ཡེ། སྲིད་ཞི་མ་ལུས་པའི་ཁྱབ་བདག །དུས་གསུམ་སངས་རྒྱས་ཀྱི་ངོ་བོ། །སྐྱབས་མཆོག་དྲིན་ཅན་གྱི་བླ་མ། །རྩེ་གཅིག་གསོལ་བ་རང་འདེབས་སོ། །ལུང་རྟོགས་དམ་ཆོས་ཀྱི་འབྱུང་གནས། །སྨིན་གྲོལ་ལེགས་བཤད་ཀྱི་མངའ་བདག །མཁྱེན་བརྩེ་ནུས་པ་ཡི་བདག་ཉིད། །ཐུགས་རྗེས་གཡེལ་མེད་དུ་གཟིགས་ཤིག །རྣམ་གྲོལ་དགེ་ལེགས་ཀྱི་ལམ་བཟང་། །སྟོན་མཛད་བྱམས་ལྡན་གྱི་བླ་མ། །ཚོགས་མཆོག་དགེ་འདུན་གྱི་སྤྱི་དཔལ། །རེ་ས་གཞན་
ན་མེད་དོ།། ༈ །།བླ་མ་ཡིད་བཞིན་གྱི་ནོར་བུ། །དངོས་གྲུབ་ཆར་ཆེན་རང་ཕོབ་དང་། བླ་མ་སྨན་མཆོག་གི་རྒྱལ་པོ། །འཁོར་བའི་གཅོང་ནད་རང་བསེལ་དང་། །བླ་མ་འདྲེན་མཆོག་གི་དེད་དཔོན། །ཐར་གླིང་བདེ་ཆེན་དུ་ཁྲིད་དང་། བླ་མ་སྟོབས་ལྡན་གྱི་དཔའ་བོ། །འཁོར་བའི་གཡུལ་ངོ་རང་ཟློག་དང་།། ༈ །།མོས་གུས་དད་པའི་ཆུ་འཛིན་ཐིབས་སེ་ཐིབ། །གསོལ་འདེབས་གདུང་དབྱངས་འབྲུག་སྒྲ་འུ་རུ་རུ། །ངེས་འབྱུང་བཟོད་མེད་མཆི་མ་ཤ་ར་ར། །རྩེ་གཅིག་སྙིང་ནས་གསོལ་བ་འདེབས་ལགས་ན། །ཐུགས་རྗེས་བྲེང་ཙམ་བདག་ལ་མི་དགོངས་སམ། །མགོན་མེད་འཁོར་བའི་སེམས་ཅན་བདག་སོགས་ལ། །ཕ་གཅིག་ཁྱེད་ཀྱིས་དགོངས་པས་ཉེར་བཟུང་ནས། །འབྲལ་མེད་བྱིན་གྱིས་རློབས་ཤིག་ཐུགས་རྗེ་ཅན། །ཅེས་པ་འདི་ཀུན་བཟང་རིག་འཛིན་ལའོ། །ཀ་དག་དང་པོའི་སངས་རྒྱས་ཀུན་
ཏུ་བཟང་། །ལྷུན་གྲུབ་ལོངས་སྐུའི་གཙོ་མཆོག་རྡོ་རྗེ་འཆང་། །གང་འདུལ་སྒྱུ་མའི་གར་མཁན་རྡོ་རྗེ་སེམས། །རིགས་ཀུན་ཁྱབ་བདག་རྣམས་ལ་གསོལ་བ་འདེབས། །གྲུབ་མཆོག་ཀུན་གྱི་གཙོ་བོ་དགའ་རབ་ཞབས། །གནས་ལྔ་རིག་པའི་མཆོག་གྱུར་ཤྲཱི་སིང་། ཁམས་གསུམ་ཟིལ་གནོན་རྒྱལ་བ་པདྨ་འབྱུང་། །རིག་འཛིན་ཁྱུ་མཆོག་རྣམས་ལ་གསོལ་བ་འདེབས། །ཅོག་རོ་ཀླུ་རྒྱལ་གཏེར་སྟོན་ཀརྨ་གླིང་། །སྲས་མཆོག་ཉི་ཟླ་མཚུངས་བྲལ་ཉི་ཟླ་འོད། །ནམ་མཁའ་རྒྱ་མཚོ་ཀུན་དགའ་ལྷུན་གྲུབ་སྟེ། །ཟབ་ཆོས་མངའ་བདག་རྣམས་ལ་གསོལ་བ་འདེབས། །བསོད་ནམས་རྣམ་རྒྱལ་བསོད་ནམས་རིན་ཆེན་དང་། །ངག་དབང་པདྨ་གྲུབ་མཆོག་བསོད་ནམས་དབང་། །དྲིན་ཅན་རྗེ་བཙུན་རྩ་བའི་བླ་མ་སོགས། །སྐྱབས་གནས་དམ་པ་རྣམས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། ཁམས་གསུམ་འཁོར་བ་བར་དོའི་སེམས་ཅན་
ཀུན།འཁྲུལ་སྣང་རང་གྲོལ་རང་བྱུང་ཡེ་ཤེས་མཆོག །མྱུར་དུ་རྟོགས་ནས་མངོན་སངས་རྒྱས་པར་ཤོག །ཅེས་བར་དོ་ཐོས་གྲོལ་གྱི་བླ་མ་བརྒྱུད་པའི་གསོལ་འདེབས་ཉུང་བསྡུས་འདི་དགེ་འདུན་བཀྲ་ཤིས་ལ་གདམས་པའོ།། ༈ །།ཆོས་དབྱིངས་མཁའ་ཁྱབ་ཡེ་ཤེས་གཞལ་ཡས་ཁང་། །སྐྱེ་མེད་དབྱིངས་ལས་འགགས་མེད་རྣམ་རོལ་ཅན། །ཀུན་བཟང་རྡོར་སེམས་དགའ་རབ་པདྨ་འབྱུང་། །སྐུ་གསུམ་སྟོན་པ་རྣམས་ལ་གསོལ་བ་འདེབས། །ཐོག་མེད་དུས་ནས་སྨོན་ལམ་རྒྱ་ཆེན་མཐུས། །སྣ་ཚོགས་ཐབས་ཀྱིས་བསྟན་པའི་སྒྲོན་མེ་སྦར། །བཻ་རོ་ལ་སོགས་རྗེ་འབངས་ཉི་ཤུ་ལྔ། །མཁྱེན་བརྩེའི་བདག་ཉིད་རྣམས་ལ་གསོལ་བ་འདེབས། །རྒྱལ་བས་བྱིན་རླབས་སྙིགས་དུས་འགྲོ་བའི་སྐྱབས། །སྨིན་གྲོལ་གདམས་པའི་ཆོས་མཛོད་འཛིན་པའི་དཔལ། །ཀུན་སྐྱོང་རྫ་ཡིག་རིག་འཛིན་ཡབ་སྲས་དང་། །བསྟན་འཛིན་རྡོ་རྗེའི་ཞབས་ལ་གསོལ་བ་འདེབས།
རྒྱལ་ཀུན་ཡེ་ནས་ཆོས་སྐུར་རོ་གཅིག་ཀྱང་། །མོས་བློའི་སྣང་ངོར་གང་འདུལ་གཟུགས་བརྙན་སྟོན། །བསོད་ནམས་དབང་པོ་རྩ་བའི་བླ་མ་དང་། །ཡི་དམ་ཆོས་སྐྱོང་ཚོགས་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཅིས་ཀྱང་དགོས་མེད་དྲན་པའི་ཞེན་ལོག་དང་། །སྣང་སྲིད་བླ་མར་འཆར་བའི་དག་སྣང་དང་། །ཐམས་ཅད་ཆོས་སྐུར་གྲོལ་བའི་གདེང་ཚད་བཅས། །རང་གཞན་དོན་གཉིས་འགྲུབ་པའི་དངོས་གྲུབ་མཆོག །མྱུར་དུ་སྩོལ་ཞིང་བྱིན་གྱིས་རླབས་ཏུ་གསོལ། ཞེས། རྡོར་སེམས་སྙིང་ཐིག་གི་བླ་མ་རྒྱུད་པའི་གསོལ་འདེབས་འདི་གནས་ཆེན་དུར་ཁྲོད་མགོ་དགུར་བཀོད་པའོ།། ༈ །།སྐྱབས་གནས་རྣམས་ལ་གུས་པས་བཏུད་བྱས་ནས། །བདག་དང་མ་རྒན་སེམས་ཅན་བསྒྲལ་བའི་ཕྱིར། །བླ་མེད་བླ་མ་མཆོག་གི་སྒྲུབ་པ་ལ། །ཞུགས་ནས་དེ་ཡི་གོ་འཕངས་ཐོབ་པར་བྱ། །རང་ལུས་སྐད་ཅིག་དྲན་
རྫོགས་རྡོ་རྗེ་སེམས། །དཀར་གསལ་རྡོར་དྲིལ་ཞི་འཛུམས་ལོངས་སྐུའི་ཚུལ། །ཡོངས་རྫོགས་འོད་འཕྲོར་གསལ་བའི་སྤྱི་བོའི་གཙུག །པདྨ་ཉི་ཟླ་བརྩེགས་པའི་ཁྲི་སྟེངས་སུ། །ངོ་བོ་དྲིན་ཅན་རྩ་བའི་བླ་མ་ཉིད། །རྣམ་པ་གུ་རུ་པདྨ་ཐོད་ཕྲེང་སྩལ། །སྐུ་མདོག་མཐིང་ནག་གཅེར་བུ་རུས་རྒྱན་ཅན། །གཡས་གཡོན་ཕྱག་གཉིས་རྡོ་རྗེ་དྲིལ་སྟབས་ཚུལ། །རྡོ་རྗེ་སྐྱིལ་ཀྲུང་གཟི་བརྗིད་མདངས་ལྡན་ཞིང་། །ཡུམ་ཆེན་མཚོ་རྒྱལ་དཀར་དམར་འོད་མདངས་ཅན། །གྲི་ཐོད་འཛིན་པས་ཡབ་ལ་འཁྲིལ་བར་བསྐྱེད། །ཕྱི་རིམ་མཐའ་སྐོར་རྒྱུད་པའི་བླ་མ་ནི། །ཀུན་བཟང་རྡོར་སེམས་དགའ་རབ་པད་འབྱུང་དང་། །བཻ་རོ་ཀུན་སྐྱོང་ཆོས་རྗེ་རྫ་ཡིག་པ། །རིག་འཛིན་ཡབ་སྲས་བསྟན་འཛིན་རྡོ་རྗེ་དང་། །བསོད་ནམས་དབང་པོ་ཡི་དམ་ཆོས་སྐྱོང་སོགས། །སྐྱབས་གནས་མ་ལུས་སྤྲིན་ཕུང་
ལྟར་བཞུགས་སམ། །དེ་དག་ཀུན་ཀྱང་ངོ་བོ་གཅིག་པ་ལ། །རྣམ་འགྱུར་ཆ་ལུགས་གང་འདུལ་རོལ་རྩལ་ཅན། །ངེས་མེད་སྣ་ཚོགས་ཆོ་རོལ་ཅིར་ཡང་སྟོན། །བདག་སོགས་བྱིན་གྱིས་རློབས་པའི་མཐུ་ལྡན་འགྱུར། ཨོཾ་ཨཱ་ཧཱུྃཿ། སྣང་སྲིད་སྣོད་བཅུད་བདག་ལུས་ལོངས་སྤྱོད་དང་། །འདི་ཕྱི་བར་གསུམ་མདུན་མ་ཐམས་ཅད་ཀུན། །སྐྱབས་གནས་རྣམས་ལ་མཆོད་པའི་མཎྜལ་དུ། །འབུལ་གྱི་ཐུགས་རྗེས་བཞེས་ལ་བྱིན་གྱིས་རློབས། བར་འདིར་གསོལ་འདེབས་རྒྱས་བསྡུས་ཅི་རིགས་བྱས་ལ། དེ་ནས་དབང་བཞི་བླང་བ་ནི། དེ་ལྟར་གསོལ་བ་བཏབ་པ་ལ་བརྟེན་ནས། །སྐྱབས་གནས་ཀུན་གྱི་གནས་གསུམ་འབྲུ་གསུམ་ལས། །འོད་འཕྲོས་བདག་གི་ལུས་ངག་ཡིད་གསུམ་ཐིམ། །སྒྲིབ་ཚོགས་ཀུན་དག་དབང་བཞི་ཡོངས་རྫོགས་ཐོབ། །སླར་ཡང་འཁོར་རྣམས་གཙོ་བོ་ཉིད་ལ་ཐིམ། །གཙོ་བོ་ཡབ་ཡུམ་རང་ལ་དབྱེར་མེད་ཐིམ།
མཚོན་བྱེད་དཔེ་ཡི་བླ་གཟུགས་བསྒོམ་པ་དང་། །མཚོན་བྱ་དོན་གྱི་བླ་མ་རང་རིག་གཉིས། །མཁའ་ལས་སྤྲིན་བྱུང་མཁའ་ལ་ཐིམ་པ་བཞིན། །སོ་སོ་མ་ཡིན་ཐ་དད་མེད་པར་འདྲེས། །འདྲེས་དང་མ་འདྲེས་སེམས་ཀྱི་བཏགས་པ་ཙམ། །ངོ་བོ་རང་བཞིན་ཐུགས་རྗེའི་རོལ་པ་ཉིད། །སྟོང་པའི་རང་མདངས་གསལ་བའི་བླ་མ་དེ། །སླར་ཡང་སྟོང་པ་ཉིད་དུ་ཕྱམ་གདལ་བར། །རིག་ཅིང་རྟོགས་ལ་བླ་མའི་རྣལ་འབྱོར་ཞེས། །མིང་དུ་བཏགས་པ་དག་སྣང་འཆར་སྒོའི་འཕྲུལ། །རང་བྱུང་ཡེ་ཤེས་གདོད་མའི་གནས་ལུགས་ལ། །བཟང་ངན་དགག་སྒྲུབ་བཟོ་བཅོས་མ་བྱས་པར། །སྒོམ་མེད་ཀློང་དུ་མ་ཡེངས་གནས་པར་བྱ། །འཁོར་འདས་བདེ་སྡུག་རེ་དོག་མེད་པ་ཡི། །དངོས་གྲུབ་ཐོབ་བྱ་ཐོབ་བྱེད་དབྱེར་མེད་པའི། །སྒྲུབ་ཐབས་མཆོག་གྱུར་གདམས་པའི་ཡང་སྙིང་ལ། །འདུ་འབྲལ་མེད་པར་ཉམས་སུ་བླང་བར་
བྱ། །འདི་ལས་བྱུང་བའི་དགེ་ཚོགས་ཇི་སྙེད་པ། །འདི་དོན་མ་རྟོགས་འཁྲུལ་པའི་འགྲོ་བ་ལ། །ཡོངས་སུ་བསྔོ་ཞིང་བསྔོ་བྱ་བསྔོ་བྱེད་ཀྱང་། །ཆོས་དབྱིངས་སྤྲོས་པ་མེད་པའི་ཀློང་དུ་ཕཊཿ རྡོར་སེམས་སྙིང་ཐིག་གི་བླ་མའི་རྣལ་འབྱོར་བསྒོམ་ཐབས་ངག་འདོན་དུ་བགྱིས་ཆོག་པ་འདི་བཞིན་དགོས་བཞེས། གཙང་རོང་གོང་ར་བའི་གྲུབ་ཆེན་པ་གྲོགས་མཆེད་རྣམས་ཀྱིས་བསྐུལ་ངོར་ཕོ་བྲང་ཆེན་པོ་རིན་ཆེན་སྤུངས་པ་དང་ཉེ་བའི་བླ་མའི་གདན་སར་བཀོད་པའོ།། ༈ །།ན་མོ་མ་ཧཱ་གུ་རུ་ནིརྨ་ཀཱ་ཡ་ཧཱུྃ། །ཕྱོགས་དུས་རྒྱལ་བའི་ཐུགས་རྗེའི་འོད་ཟེར་ལས། །འགྲོ་བའི་དོན་སླད་སྣ་ཚོགས་རོལ་གར་ཅན། །སྲིད་པར་གནས་ཀྱང་སྲིད་པས་མ་གོས་པའི། །དཔལ་ལྡན་བླ་མ་མཚུངས་མེད་སྤྱི་བོས་འདུད། །འདྲེན་མཆོག་ཤཱཀྱའི་དྲུང་ན་ཀུན་དགའ་བོ། །སྲོང་བཙན་སྤྱན་སྔར་མཁྱེན་རབ་ཐོན་མིའི་ཞབས། །ཟླ་མེད་སྐད་གཉིས་སྨྲ་བ་བཻ་རོ་རྗེ། །ཆོས་ཀྱི་སྤྱན་ལྡན་རྣམས་ལ་གསོལ་བ་འདེབས། །རྡོར་
གླིང་ཀུན་སྐྱོང་གླིང་པ་མཆོག་ལྡན་མགོན། །ཟབ་གཏེར་ཆོས་ཀྱིས་སྐྱེ་དགུ་སྨིན་གྲོལ་མཛད། །སླར་ཡང་སྙིང་པོའི་བསྟན་པ་སྤེལ་འཛད་པའི། །བསྟན་འཛིན་རྡོ་རྗེའི་ཞབས་ལ་གསོལ་བ་འདེབས། །བྱམས་པའི་ལྗོན་ཤིང་སྙིང་རྗེའི་ཡལ་ག་རྒྱས། །བྱང་ཆུབ་སེམས་ཀྱི་ལོ་འབྲས་དཔལ་གྱིས་ཕྱུག །ཟབ་དོན་སྙིང་པོའི་འབྲས་བུ་སྦྱིན་མཛད་པ། །དྲིན་ཅན་བླ་མ་མཆོག་ལ་གསོལ་བ་འདེབས། །སྣང་སྲིད་རྣམ་དག་རྒྱལ་བའི་དཀྱིལ་འཁོར་ཆེ། །ཅིར་སྣང་ཆོས་ཉིད་དབྱིངས་ཀྱི་རོལ་པ་ལ། །བཟང་ངན་བླང་དོར་དགག་སྒྲུབ་ལས་འདས་པ། །སྲིད་གསུམ་རྒྱལ་བའི་ཞིང་ལ་གསོལ་བ་འདེབས། །དེང་ནས་བཟུང་སྟེ་ཚེ་རབས་ཐམས་ཅད་དུ། །མཆོག་དངོས་གྲུབ་ནས་རྣམ་འཕྲུལ་རྒྱ་མཚོ་ཡིས། །མཁའ་མཉམ་འགྲོ་ཀུན་སྲིད་མཚོ་ལས་སྒྲོལ་བའི། །ཕྲིན་ལས་རྒྱལ་བ་ཀུན་དང་མཉམ་པར་ཤོག །ཅེས་པ་འདི་གནས་ཆེན་ཆུ་བོ་གཡས་འཁྱིལ་
གྱི་དགེ་འདུན་རྣམས་ཀྱི་ཞལ་འདོན་དུ་མཛད་ཆོག་པ་ཞིག་དགོས་ཞེས་གྲུབ་ཆེན་ཆོས་འཕེལ་བཟང་པོས་བསྐུལ་བ་ལྟར་བྲིས་པའོ།། ༈ །།ན་མཿམ་ཧཱ་གུ་རུ་སརྦ་སིདྡྷི་ཧཱུྃ། རྒྱལ་བ་ཀུན་དངོས་པདྨ་འབྱུང་གནས་དཔལ། །དེ་ཡིས་བྱིན་རླབས་བསྟན་འཛིན་རྡོ་རྗེའི་ཞབས། །གང་འདུལ་གཟུགས་སྤྲུལ་པདྨ་ལེགས་གྲུབ་རྩལ། །གསོལ་བ་འདེབས་སོ་བྱིན་རླབས་ཆར་ཆེན་ཕོབ། །དཀྱིལ་འཁོར་ཀུན་གཙོ་པདྨ་ཐོད་ཕྲེང་སྩལ། །བསྟན་པའི་གསལ་བྱེད་བསྟན་འཛིན་རྡོ་རྗེའི་ཞབས། །སྨིན་གྲོལ་མངའ་བདག་རིག་འཛིན་རྣམ་པར་རྒྱལ། །གསོལ་བ་འདེབས་སོ་དངོས་གྲུབ་ཆུ་རྒྱུན་སྩོལ། །སངས་རྒྱས་ཀུན་འདུས་པདྨ་སཾ་བྷ་ཝ། །དམ་ཆོས་མཛོད་འཛིན་བསྟན་འཛིན་རྡོ་རྗེའི་ཞབས། དགེ་འདུན་འདྲེན་མཆོག་སྣ་ཚོགས་རང་གྲོལ་རྗེ། །གསོལ་བ་འདེབས་སོ་མཁྱེན་པའི་སྤྱན་གྱིས་གཟིགས། ཁམས་གསུམ་དབང་བསྡུས་པདྨ་རྒྱལ་བའི་སྲས། །སྲིད་གསུམ་འགྲོ་སྒྲོལ་བསྟན་འཛིན་རྡོ་རྗེའི་ཞབས། །སྐུ་གསུམ་དོན་སྟོན་རྩ་
བའི་བླ་མ་རྗེ། །གསོལ་བ་འདེབས་སོ་བརྩེ་བའི་ཐུགས་ཀྱིས་དགོངས། །བྱིན་རླབས་ཀུན་འབྱུང་པདྨ་འབྱུང་གནས་དང་། །དངོས་གྲུབ་མཆོག་བརྙེས་བསྟན་འཛིན་རྡོ་རྗེའི་ཞབས། །ཕྲིན་ལས་ཐོགས་མེད་རྩ་བའི་བླ་མ་མཆོག །སྐྱབས་གནས་རྣམས་ལ་གསོལ་བ་སྙིང་ནས་འདེབས། །དེ་ལྟར་གུས་པས་གསོལ་བ་བཏབ་པའི་མཐུས། །དེང་ནས་བྱང་ཆུབ་མ་ཐོབ་བར། །གཡེལ་བ་མེད་པར་རྟག་པར་རྗེས་བཟུང་ནས། །ལུས་ངག་ཡིད་གསུམ་བྱིན་གྱིས་བརླབ་ཏུ་གསོལ། །ཐུགས་རྗེ་ཅན་གྱི་ཐུགས་རྗེས་མ་སྐྱབས་ན། །མགོན་མེད་ཉམ་ཐག་སེམས་ཅན་སུ་ལ་རེ། །བྱིན་རླབས་མཐུ་སྟོབས་ནུས་པའི་དཔུང་བསྐྱེད་ནས། །འཁོར་བའི་འདམ་ནས་མྱུར་དུ་དྲངས་དུ་གསོལ། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །བརྩེ་བ་ཆེན་པོས་བདག་ལ་མི་དགོངས་སམ། །ད་ལྟ་ཉིད་དུ་བྱིན་
གྱིས་རླབས་ཏུ་གསོལ། །ཁྱེད་ཀྱི་ཐུགས་དང་དབྱེར་མེད་གཅིག་པར་ཤོག །དེ་ལྟར་བདག་ཉིད་ཀྱི་སྐྱེ་བ་གོང་འོག་དང་། གུ་རུ་རིན་པོ་ཆེ་པདྨ་འབྱུང་གནས་དང་བཅས་པ་ལ་ལྷན་ཅིག་ཏུ་གསོལ་བ་བཏབ་ཆོག་པ་ཞིག་དགོས་བཞེས། ས་སྐྱོང་ལྷ་དབང་རྣམ་རྒྱལ་གྱི་ནན་ཏན་དུ་བསྐུལ་བ་ལ་བརྟེན་ནས་འདི་ལྟ་བུ་བཀོད་པ་ལགས་ཤིང་། བདག་འདྲ་ལས་དང་ཉོན་མོངས་ཀྱི་འདམ་དུ་གཏན་དུ་ཆུད་བཞིན་པའི་དབང་གིས། གཞན་རྒྱུད་བྱིན་གྱིས་རློབས་པའི་ནུས་པ་ནི་མངོན་སུམ་དུ་གསལ་བ་འདི་ཀ་ཡིན་མོད་ཀྱང་། བསྐུལ་པ་པོའི་ནན་མ་ཆོག་པར་འདི་ལྟར་བྲིས་པ་ལ་མཁྱེན་ཅན་རྣམས་ཀྱི་མི་འཁྲེལ་བར་གསོལ།། ༈ །།ན་མོ་མ་ཧཱ་གུ་རུ་ཡེ། དུས་གསུམ་རྒྱལ་ཀུན་གྱི་ངོ་བོ། །མཁྱེན་བརྩེ་ནུས་ལྡན་གྱི་བླ་མ། །རྩེ་གཅིག་གསོལ་བ་རང་འདེབས་སོ། །ཐུགས་རྗེས་གཡེལ་མེད་དུ་གཟིགས་དང་། །རབ་འབྱམས་དཀྱིལ་འཁོར་གྱི་སྤྱི་དཔལ། །མཆོག་མཐུན་
དངོས་གྲུབ་ཀྱི་འབྱུང་གནས། །དད་ལྡན་མོས་གུས་ཀྱི་འབོད་ལ། །བརྩེ་བའི་སྤྱན་གྱིས་རང་གཟིགས་དང་། །མཐའ་ཡས་ཞིང་ཁམས་ཀྱི་གདུལ་བྱ། །མ་ལུས་འདྲེན་མཛད་ཀྱི་དེད་དཔོན། །བདག་སོགས་ཉམས་ཐག་གི་འགྲོ་ལ། །དགོངས་པས་འདོར་མེད་དུ་སྐྱོབས་ཤིག འཁོར་བ་སྡུག་བསྔལ་གྱི་མེ་འོབ། །བཟོད་མེད་ཚ་གདུང་གི་ཟིར་ལ། །ཐུགས་རྗེའི་ཆུ་འཛིན་གྱིས་དཀྲིག་ཅིང་། །ཕན་བདེའི་ཆར་ཆེན་རང་ཕོབ་དང་། །དུག་གསུམ་རྒྱུ་འབྲས་ཀྱི་ནད་ཀྱིས། །ཐོག་མཐའ་བར་མེད་དུ་མནར་བའི། །སྙིང་རྗེའི་ཡུལ་གྱུར་གྱི་འགྲོ་ལ། །དམ་ཆོས་བདུད་རྩི་ཡིས་སྐྱོབ་དང་། །འཁོར་བ་ངན་སོང་གི་ལམ་དུ། །མི་ཤེས་བླུན་རྨོང་གི་འགྲོ་ལ། །ལམ་བཟང་འཁྲིད་མཁས་ཀྱི་མགོན་ཁྱེད། །ཡང་དག་ལམ་མཆོག་རང་སྟོན་ཅིག །ཉོན་མོངས་དུག་ལྔ་ཡི་དགྲ་བོས། །ཐར་ལམ་བར་
ཆོད་དུ་གྱུར་ཚེ། །དུག་ལྔ་ཡེ་ཤེས་སུ་སྒྲོལ་བའི། །སྟོབས་ལྡན་དཔའོ་ཁྱེད་མཁྱེན་ནོ། །གདུང་དབྱངས་འོ་དོད་ཀྱི་སྒྲ་ཡིས། །སྐྱབས་གནས་ཕ་ཁྱོད་ལ་འབོད་ན། །ཐུགས་རྗེས་བརྩེར་དགོངས་ཀྱི་ཀློང་ནས། །འབྲལ་མེད་བྱིན་གྱིས་རང་རློབས་ཤིག །བླ་མ་ཡིད་བཞིན་གྱི་ནོར་བུ། །བླ་མ་སྨན་མཆོག་གི་རྒྱལ་པོ། །བླ་མ་འཇིགས་སྐྱོབས་ཀྱི་དཔའ་བོ། །བླ་མ་ཐར་གླིང་གི་དེད་དཔོན། །བླ་མ་རེ་ལྟོས་ཀྱི་སྐྱབས་གནས། །བླ་མ་ཐུགས་རྗེ་ཡི་བདག་ཉིད། །གསོལ་བ་སྙིང་ནས་རང་འདེབས་སོ། །བྱིན་རླབས་ཆར་ཆེན་རང་ཕོབ་ཅིག །ད་ལྟ་ཉིད་དུ་བྱིན་གྱིས་རླབས་ཏུ་གསོལ། །མྱུར་བ་ཉིད་དུ་བྱིན་གྱིས་རླབས་ཏུ་གསོལ། །ཐུགས་རྗེས་ནུས་པའི་རྩལ་ཆེན་སྤྲུག་ནས་ཀྱང་། །མགོན་པོ་ཁྱོད་དང་དབྱེར་མེད་གཅིག་པར་ཤོག །ཅེས་པ་འདི་ནི། རིག་འཛིན་ཆེན་པོ་སོག་ཟློག་པའི་ཞབས་པད་ལ་རེག་པའི་དད་
ལྡན་ལྷུན་གྲུབ་གདལ་ཁྱབ་ཀྱིས་བསྐུལ་བའི་ངོར། དཔལ་སྐད་གཉིས་སྨྲ་བའི་དབང་པོ་མཆོག་གི་གདན་སར་བཀོད་པའོ།། ༈ །།ན་མཽཏྟ་རེ་བྷྱཿ། དལ་འབྱོར་རིན་ཆེན་ལན་ཅིག་ཐོབ་དུས་འདིར། །རང་གཞན་དོན་གཉིས་ལེགས་པར་བསྒྲུབ་སླད་དུ། །རིགས་འདུས་བླ་མའི་སྒྲུབ་པ་ཉམས་བླངས་ནས། །རྫོགས་པའི་བྱང་ཆུབ་དམ་པ་ཐོབ་པར་བྱ། །རང་ལུས་སྐད་ཅིག་ཡི་དམ་ལྷར་གསལ་བའི། །སྤྱི་གཙུག་སེང་ཁྲི་པདྨ་ཉི་ཟླའི་སྟེང་། །ངོ་བོ་རྗེ་བཙུན་རྩ་བའི་བླ་མ་ཉིད། །རྣམ་པ་གུ་རུ་མཚོ་སྐྱེས་རྡོ་རྗེའི་ཚུལ། །སྐུ་མདོག་མཐིང་ག་ཞལ་གཅིག་ཕྱག་གཉིས་པ། །རྡོ་རྗེ་དྲིལ་བུ་བསྣོལ་བས་ཡུམ་ལ་འཁྱུད། །ཡུམ་ཆེན་མནྡྷ་ར་བ་དཀར་དམར་མདངས། །གྲི་གུག་ཐོད་འཛིན་ཡབ་ཡུམ་འཁྲིལ་སྦྱོར་ཚུལ། །གཉིས་ཀ་ཞི་འཛུམ་དར་དང་རིན་ཆེན་རྒྱན། །རྡོ་རྗེ་སྐྱིལ་ཀྲུང་བཞུགས་པའི་མཐའ་སྐོར་དུ། །རྩ་རྒྱུད་བླ་མ་ཡི་དམ་མཁའ་འགྲོ་
དང་། །ཆོས་སྲུང་མ་ལུས་ཁྲོམ་ཚོགས་ལྟར་བཞུགས་པར། །བདག་ལུས་ལོངས་སྤྱོད་སྣང་སྲིད་སྣོད་བཅུད་ཀུན། །མཆོད་པར་འབུལ་གྱི་ཐུགས་རྗེས་བཞེས་སུ་གསོལ།། ༈ །།ན་མོ། །ཕྱོགས་དུས་རྒྱལ་བ་མ་ལུས་གཅིག་བསྡུས་པའི། །དཔལ་མགོན་བླ་མ་རྣམ་སྤྲུལ་རྒྱ་མཚོར་བཅས། །ཐུགས་རྗེའི་མངའ་བདག་རྣམས་ལ་གསོལ་བ་འདེབས། །བྱིན་རླབས་ཆར་ཕོབ་སྨིན་གྲོལ་དངོས་གྲུབ་སྩོལ། །ཅེས་གསོལ་འདེབས་ཚར་ཅི་མང་བྱས་ལ། དེ་ནས་དབང་གཞི་བླང་ཐབས་ནི། དེ་ནས་བླ་མའི་སྐུ་གསུང་ཐུགས་རྣམས་ལས། །འོད་འཕྲོས་བདག་གི་ལུས་ངག་ཡིད་གསུམ་ཕོག །སྒྲིབ་ཚོགས་ཡོངས་དག་དངོས་གྲུབ་ཀུན་ཐོབ་ཅིང་། །སླར་ཡང་འཁོར་རྣམས་གཙོར་ཐིམ་གཙོ་བོ་ཡང་། །རང་ལ་ཐིམ་ནས་ཆུ་ལ་ཆུ་བཞག་ལྟར། །གྱུར་པའི་མོས་ལ་རང་སེམས་འདི་ཉིད་ནི། །སྔོན་བསུ་རྗེས་གཅོད་བཟོ་བཅོས་ཀུན་སྤངས་ཏེ། །གང་ལྟར་འདུག་པ་དེ་ཀའི་ངང་ཉིད་
ལ། །རང་བབ་ངོ་བོ་ཤེས་པའི་ཐོག་ཏུ་གློད། །དྲན་མེད་ཞི་གནས་ཧད་པོ་མ་ཡིན་པའི། །སྤྲོས་བྲལ་སྟོང་གསལ་རིག་པའི་སྙིང་པོ་ཅན། །རྣམ་རྟོག་ཕྲ་རག་འགྱུ་དྲན་ལས་འདས་ཤིང་། །ཚོགས་དྲུག་མ་འགགས་དེ་རྗེས་མ་འབྲེངས་པའི། །གནས་ལུགས་དོན་ཐོག་རང་བབ་གློད་པ་ནི། །རྫོགས་ཆེན་དོན་གྱི་མཐར་ཐུག་སྙིང་པོ་ འདི་ལ་འགྱུ་བ། ཆེད་དུ་བཀག་དགོས་པ་ནི་མ་ཡིན་ཏེ་བློས་བྱས་དང་བྲལ་བའི་དོན། ཉིད། །དེ་ལ་རྣམ་རྟོག་ཕྲ་རག་གང་ཤར་ཡང་། །སྤོང་བསྒྱུར་དགགས་སོགས་དགྲར་འཛིན་མི་བྱ་བར། །གང་ཤར་ངོ་བོར་ཅེར་གྱི་བལྟ་བ་དང་། །བསྒོམ་རྒྱུའི་མཚན་མ་རྡུལ་ཙམ་མེད་མོད་ཀྱང་། །ཡེངས་འཕྲུལ་དབང་དུ་ཅུང་ཟད་མི་གཏོང་བ། །དྲན་རིག་རྩི་ཡིས་རྒྱུན་དུ་ཟིན་པ་ནི། །ཕྱག་ཆེན་ཉམས་ལེན་སྙིང་པོར་དྲིལ་བ་ཡིན། །ཕྱག་རྫོགས་བཞེད་སྲོལ་དབྱེར་མང་ན་ཡང་། ནད་དོན་སྒོམ་དོན་ཡེངས་མེད་
ཁོ་ནར་གཅིག །ལམ་འདིར་བརྟེན་པས་འབྲས་བུ་མཆོག་ལྷུན་གྲུབ། །ནད་གདོན་སྡུག་བསྔལ་སྒོམ་གྱི་རོལ་པར་གྲོལ། །བཟུང་འཛིན་མངོན་ཞེན་མ་བཤིག་རང་བཞིན་ཞིག །ས་སྐྱའི་ལམ་འབྲས། དེ་ཕྱིར་ཆོས་ཀུན་གནད་འགགས་གཅིག་བསྡུས། ཕ་དམ་པའི་ཞི་བྱེད་ ལ། །བརྩོན་པས་འབད་ནས་དོན་གཉིས་ ལམ་སྒྲོན་གྱི་གཅོད། འགྲུབ་པར་བྱ། །དེ་ལས་བྱུང་བའི་དགེ་ཚོགས་ཇི་སྙེད་མཐུས། །མཁའ་མཉམ་འགྲོ་ཀུན་ཆོས་ཀྱི་སྐུ་ཐོབ་ཤོག །ཅེས་པ་འདི་ནི། །ཡ་འབྲོག་སྣ་དཀར་རྩེ་ནས་རིག་སྔགས་འཛིན་པ་ཕྲིན་ལས་རྒྱ་མཚོའི་བསྐུལ་ངོར། གཙང་རོང་གོང་ར་ལྷུན་འགྲུབ་ཆོས་སྡིངས་སུ་བཀོད་པའོ།། ༈ །།འགྲོ་ལ་མ་ལས་ལྷག་པའི་བརྩེ་བ་ཅན། །བཅོམ་ལྡན་ཤཱཀྱའི་རྒྱལ་དང་མི་ཕམ་མགོན། །ཐོགས་མེད་དབྱིག་གཉེན་འཕགས་བཙུན་གྲོལ་སྡེ་གཉིས། །གསོལ་བ་འདེབས་སོ་བྱང་ཆུབ་སེམས་མཆོག་སྩོལ། །ཡོན་ཏན་བཤེས་གཉེན་སེང་བཟང་གང་བ་སྤེལ། །ཀུ་ས་ལི་
པ་ཆེ་ཆུང་གསེར་གླིང་པ། །བསྟན་པའི་སྲོག་ཤིང་ཇོ་བོ་ཨ་ཏི་ཤ །གསོལ་བ་འདེབས་སོ༴ །རྒྱལ་བ་འགྲོམ་དང་པུ་ཏོ་ཤ་ར་བ། །འཆད་ཁ་བ་དང་སོ་སྤྱིལ་ལྷ་འགྲོ་མགོན། །ལྷ་སྡིངས་ཁུ་དབོན་ཡོན་དཔལ་བདེ་བ་དཔལ། །གསོལ་བ༴ །ཀ་བཞི་པ་དང་བསོད་ནམས་གྲགས་པ་དང་། །བློ་སྦྱོང་མངའ་བདག་རྒྱལ་སྲས་ཐོགས་མེད་ཞབས། །དཔལ་ལྡན་བྱང་ཆུབ་རྒྱལ་དབང་མཚན་ཅན་ལ། །གསོལ༴ །སྐུ་ཞང་ཆོས་རྗེ་སངས་རྒྱས་དཔལ་འབྱོར་བ། །ཤཱཀ་དབང་ཆོས་གྲགས་ཀུན་སྤངས་པད་དཀར་མཚན། །ཝགྒིན་དྲ་དང་མི་ཕམ་འཇའ་མཚོན་པ། །གསོལ༴ །སྐུ་དྲིན་མཉམ་མེད་རྩ་བའི་བླ་མ་དང་། །ཕྱོགས་དུས་རྒྱལ་དང་རྒྱལ་སྲས་མ་ལུས་ལ། །རྩེ་གཅིག་གུས་པའི་ཡིད་ཀྱིས་གསོལ་འདེབས་ན། །བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །
ཐོག་མེད་དུས་ནས་འཁོར་བར་འཕེན་བྱེད་པའི། །བདག་འཛིན་འགོང་པོ་མ་རུངས་གདུག་པ་ཅན། །རྡུལ་དུ་རླག་ནས་བྱང་སེམས་རིན་པོ་ཆེ། །བདག་བས་གཞན་གཅེས་འཛིན་པར་བྱིན་གྱིས་རློབས། །ཚེ་རབས་དཔག་ཏུ་མེད་ནས་ད་ལྟའི་བར། །གཞལ་མེད་དྲིན་གྱིས་བསྐྱངས་པའི་ཕ་མ་ལ། །འཁོན་འཛིན་གནོད་འཚེའི་བསམ་སྦྱོར་གཏན་སྤངས་ནས། །ཕན་བདེའི་རྒྱུ་འབྲས་རྒྱ་ཆེན་སྦྱིན་བྱེད་ཤོག །བདག་ནི་ནམ་ཡང་ཅི་འདྲར་གྱུར་ཀྱང་སླའི། །འཁོར་བའི་རྒྱ་མཚོ་གཏིང་མཐའ་མ་སྟོང་བར། །རང་འདོད་ཀུན་བྲལ་རྒྱལ་སྲས་སྤྱོད་ཞུགས་ཏེ། །འགྲོ་བ་འདྲེན་ལ་རྟག་ཏུ་གཡེལ་མེད་ཤོག །ཐམས་ཅད་བླ་མེད་བྱང་ཆུབ་སར་འགོད་ཤོག །རྒྱལ་ཀུན་ཕྲིན་ལས་བདག་གི་འགྲུབ་པར་ཤོག །བྱང་ཆུབ་སྤྱོད་ལ་བར་ཆོད་མེད་པར་ཤོག །སྨོན་ལམ་བཏབ་པ་བཞིན་དུ་འགྲུབ་པར་ཤོག །
ཅེས། བློ་སྦྱོང་རྒྱུད་པའི་གསོལ་འདེབས་འདི་ནི། ཆོས་འདི་ཉིད་ལ་མོས་པའི་རྣལ་འབྱོར་པ་ཨ་རྒྱའི་ཤ་ཀ་ཞེས་བྱ་བའི་བསྐུལ་ངོར། བླ་མའི་གདན་ས་ལྷུན་གྲུབ་ཆོས་སྡིངས་སུ་བྲིས་པ་དགེའོ།། ༈ །།ཨོཾ་མ་ི་པདྨེ་ཧཱུྃ་ཧྲཱིཿ འོག་མིན་བདེ་ཆེན་ཞིང་ཁམས་ནས། །སྣང་བ་མཐའ་ཡས་འོད་དཔག་མེད། །ཆོས་ཀྱི་སྐུ་མཆོག་ལ་གསོལ་བ་འདེབས། །ཀ་དག་རྟོགས་པར་བྱིན་གྱིས་རློབས། །ཨོཾ་མ་ི་པདྨེ་ཧཱུྃ་ཧྲཱིཿ །རི་བོ་ཏ་ལའི་གནས་མཆོག་ནས། །འགྲོ་བའི་མགོན་མཛད་སྤྱན་རས་གཟིགས། །ལོངས་སྤྱོད་རྫོགས་སྐུ་ལ༴ །འོད་ལུས་འགྲུབ་པར༴ །ཨོཾ་མ་ི༴ །སྣ་ཚོགས་འགྲོ་འདུལ་ཞིངས་ཁམས་ནས། །གང་འདུལ་ཆོ་འཕྲུལ་ཅིར་ཡང་སྟོན། །པདྨ་འབྱུང་གནས་ལ༴ །འགྲོ་དོན་འགྲུབ་པར༴ །ཨོཾ༴ །སྨིན་གྲོལ་གདམས་པའི་མངའ་བདག་མཆོག །གུ་རུ་གཏེར་སྟོན་ཆོས་དབང་སྨན་ ཡར་ལུང་སྤྲུལ་སྐུ་ ལུང་པ། སངས་རྒྱས་དགའ་སྟོན་དབང་ཕྱུག་རྡོ་རྗེ་
ལ་གསོལ༴ །སྨིན་ཅིང་གྲོལ་བར་བྱིན༴ །ཨོཾ༴ །བཀའ་བབ་བྱིན་རླབས་མཛོད་འཛིན་པའི། །གཉན་སྟོན་པ་དང་སེ་སྡིངས་པ། །ཆོས་སྐུ་འོད་ཟེར་ལ༴ །འཁར་སོ་ཀུན་མཁྱེན་ དོན་གཉིས་འགྲུབ་པར༴ །ཨོཾ༴ །བདུད་དཔུང་འཇོམས་པའི་མཐུ་སྟོབས་ཅན། །དཔལ་འབྱོར་ སྒམ་པོ་རྟ་ཆུ་འདམ་ནས་ཛྙཱ་ན་བཛྲ། ཡོན་ཏན་བཟང་པོ། དབང་ཕྱུག་ནམ་མཁའི་མཚན། །རིག་འཛིན་ཡབ་སྲས་ལ་གསོལ་བ༴ །བར་ཆད་ཞི་བར༴ ཨོཾ༴ །སྔ་འགྱུར་བསྟན་པའི་སྒྲོན་མེ་མཆོག །བསྟན་འཛིན་རྡོ་རྗེ་ རྒྱལ་སྲས་ནམ་མཁའ་གུ་རུ། བསོད་ནམས་རྣམ་རྒྱལ། ཨོ་རྒྱན་བསྟན་འཛིན། དཔལ་བཟང་པོ། །རྩ་བའི་བླ་མ་ལ་གསོལ༴ །བསྟན་པ་དར་བར༴ །ཨོཾ༴ །སྣང་གཟུགས་ཐུགས་རྗེ་ཆེན་པོའི་སྐུ། །གྲགས་ཚད་རང་བྱུང་ཡིག་བདུན་སྒྲ། །དྲན་རྟོག་སྣ་ཚོགས་ཆོས་ཉིད་ཀློང་། །རང་གྲོལ་རྟོགས་པར་བྱིན༴ །ཨོཾ༴ །འདི་བཟུང་འཁོར་བ་མ་སྟོང་བར། །རང་དོན་ཞི་བདེ་མི་བསྒྲུབ་ཅིང་། །དཔག་མེད་འགྲོ་བ་འདྲེན་པ་ལ། །ངལ་བ་མེད་པར་བྱིན༴ །ཨོཾ་མ༴
ཕྱོགས་བཅུའི་རྒྱལ་བ་སྲས་བཅས་ཀྱིས། །འགྲོ་དོན་ཇི་ལྟར་མཛད་པ་ཀུན། །གཅིག་བསྡུས་མཐུ་སྟོབས་བདག་འགྲུབ་ནས། །འཁོར་བའི་རྒྱ་མཚོ་སྟོང་པར་ཤོག །ཨོཾ་མ་ི་པདྨེ་ཧཱུྃ་ཧྲཱིཿ ཆོས་དབང་གི་གཏེར་ཁའི་ཐུགས་རྗེ་ཆེན་པོ་ཡང་སྙིང་འདུས་པའི་བླ་རྒྱུད་གསོལ་འདེབས་འདི་རྣལ་འབྱོར་པ་སྐྱབས་མཆོག་དཔལ་གྱི་བསྐུལ་བའི་ངོར། གཙང་རོང་རིང་ལུང་ཕུག་རུ་བཀོད་པའོ། ཨོཾ་ཨཱ་ཧཱུྃ། །ཕྱི་ནང་སྣང་སྲིད་བདག་ལུས་དངོས་ཀུན་ཀྱང་། །མི་དམིགས་སྤྲོས་བྲལ་སྟོང་པའི་རངས་མདངས་ལས། །སྐད་ཅིག་དྲན་རྫོགས་ཆུ་ལ་ཆུ་བུར་བཞིན། །བདག་ཉིད་འཕགས་མཆོག་ཐུགས་རྗེ་སྤྱན་རས་གཟིགས། །ཞལ་གཅིག་ཕྱག་བཞི་ཐལ་སྦྱོར་འཕྲེང་བ་དང་། །པདྨ་དཀར་པོ་འཛིན་ཅིང་རྒྱན་གྱིས་མཛེས། །སྣང་ལ་དངོས་མེད་གསལ་སྟོང་ཟུང་འཇུག་སྐུར། །གསལ་བའི་སྤྱི་བོར་པདྨ་ཉི་ཟླའི་སྟེང་། །ངོ་བོ་དྲིན་ཅན་རྩ་བའི་བླ་མ་ཉིད། །རྣམ་པ་རྒྱལ་མཆོག་
འོད་དཔག་མེད་པའི་ཚུལ། །དམར་གསལ་མདངས་ལྡན་སྤྲུལ་སྐུའི་ཆ་ལུགས་ཅན། །སྐྱིལ་ཀྲུང་མཉམ་བཞག་ངུར་སྨྲིག་ན་བཟའ་མཛེས། །ཐུགས་རྗེའི་འོད་ཟེར་ཕྱོགས་བཅུར་འཕྲོ་བར་གསལ། །བདག་གི་འཁོར་འདས་དུས་གསུམ་བྱ་བྱེད་ཀྱི། །མདུན་མ་ཐམས་ཅད་གཞན་ལ་མེ་རེ་བར། །སྐྱིད་རུང་སྡུག་རུང་དཔལ་མགོན་བླ་མ་ལ། །བློ་རྩེ་གཅིག་ཏུ་གཏད་ཅིང་སྣོད་བཅུད་ཀུན། །ལྟོས་མེད་རྒྱལ་བ་མཆོག་ལ་མཎྜལ་དུ། །ཕུལ་ལ་གུས་པས་འདི་ལྟར་གསོལ་བ་གདབ། །ན་མོ་མ་ཧཱ་གུ་རུ་བྷྱཿ །སྤྱི་གཙུག་འབྲལ་མེད་ཀྱི་ཅོད་པ། །ཡིད་བཞིན་འདོད་འབྱུང་གི་ནོར་བུ། །སྐུ་དྲིན་འཁོར་མེད་ཀྱི་བླ་མ། །རྩེ་གཅིག་གསོལ་བ་རང་འདེབས་སོ། །དུས་གསུམ་རྒྱལ་ཀུན་གྱི་རོལ་པ། །སྣ་ཚོགས་གང་འདུལ་དུ་སྣང་བ། །ཐམས་ཅད་ཁྱེད་ཉིད་ཀྱི་རྣམ་འཕྲུལ། །ཀུན་བྱེད་བླ་མ་རང་མཁྱེན་ནོ། །བདག་སོགས་སྙིགས་དུས་ཀྱི་སེམས་ཅན། །རྣམ་མང་
སྡུག་བསྔལ་གྱིས་གཟེར་ལ། །མཁྱེན་བརྩེ་བྱིན་རླབས་ཀྱི་མངའ་བདག ཁྱེད་ཀྱིས་ཐུགས་རྗེས་རང་གཟིགས་ཤིག །བྱིན་རླབས་ཆར་ཆེན་རང་ཕོབ་ཅིག །དེ་ལྟར་རྩེ་གཅིག་གསོལ་བ་བཏབ་པའི་མཐུས། །བླ་མ་འོད་དཔག་མེད་པའི་མཉམ་བཞག་གི །སྟེང་ན་ཚེ་བུམ་བདུད་རྩིས་གང་བ་ནས། །དངོས་གྲུབ་བདུད་རྩིའི་ཆུ་རྒྱུན་ནར་གྱིས་བབ། །ཚངས་བུག་ནས་ཞུགས་ལུས་ནང་ཐམས་ཅད་གང་། །སྒྲིབ་བཞི་དག་ཅིང་དབང་བཞི་ཡོངས་རྫོགས་ཐོབ། ཁྱད་པར་འཆི་མེད་ཚེ་ཡི་དངོས་གྲུབ་རྙེས། །དེ་རྗེས་བླ་མ་འོད་ཞུ་རང་ལ་ཐིམ། །རྒྱལ་ཀུན་གཅིག་བསྡུས་བླ་མའི་ཐུགས་ཡེ་ཤེས། །བདག་གི་ཡིད་དང་དབྱེར་མེད་གཅིག་ཏུ་འདྲེས། །འདྲེས་ཞེས་བྱ་བའང་མིང་གི་ཐ་སྙད་ཙམ། །དོན་ལ་ཆོས་སྐུ་ཀུན་ཏུ་བཟང་པོ་ནས། །འཇག་མིག་ནང་གི་སྲིན་བུ་ཡན་ཆད་ཀུན། །བདེ་གཤེགས་སྙིང་པོར་ཡེ་ནས་གཅིག་པའི་དོན། །གནས་
ལུགས་ཉིད་ལ་བཟང་ངན་རྡུལ་ཙམ་མེད། །དེ་དོན་རྟོགས་དང་མ་རྟོགས་ཁྱད་པར་གྱིས། །སངས་རྒྱས་སེམས་ཅན་གཉིས་སུ་འཁྲུལ་གྲོལ་བྱུང་། །དོན་གྱི་སྙིང་པོའི་ཉམས་ལེན་མཐར་ཐུག་ནི། །ད་ལྟའི་རང་སེམས་ཐ་མལ་ཤེས་པ་ལ། །དགག་སྒྲུབ་བཟང་ངན་རྟོགས་ཚོགས་ཞེན་འཛིན་སོགས། །བཅོས་མའི་ལྷད་ཀྱིས་བསླད་པ་མ་ཡིན་པར། །གཤིས་ཀྱི་འདུག་ཚུལ་ཇི་ལྟར་འདུག་པ་དེ། །སྤྲོ་དང་བསྡུ་དང་མཚན་བཅས་དམིགས་གཏད་ཀུན། །རྒྱངས་ཀྱི་བསྐྱུར་ནས་རིག་པའི་ངོ་བོ་ལ། །ཅེར་གྱིས་བལྟ་བྱ་ལྟ་བྱེད་བྲལ་བ་བལྟ། །བསྐྱུར་དང་བལྟ་བའང་མིང་གི་འདུ་བྱེད་ལས། །ཡང་དག་དོན་ལ་བླང་དོར་བྱ་རྒྱུས་དབེན། །མ་བཅོས་ཆོས་སྐུ་བཅོས་མར་མ་སོང་ཞིང་། །དྲན་མེད་སྟོང་ལྟ་ཧད་པོར་མ་འབྱམས་པར། །མ་ཡེངས་མི་སྒོམ་རིག་པའི་རོལ་རྩལ་ཀུན། །གང་ཤར་ཆོས་ཉིད་དབྱིངས་ཀྱི་རོལ་པ་ལས། །གུ་ཡངས་
སྤྱོད་པའི་རྣལ་འབྱོར་ཆོས་ཀུན་རྟོགས། །བར་ཆད་ཀུན་གྱི་རྩ་བ་བདག་འཛིན་འདི། །ཁྲོལ་གྱི་ཐོང་དང་རྐྱེན་ངན་གཞི་རྩ་མེད། །ནད་གདོན་སྡུག་བསྔལ་སྡིག་སྒྲིབ་འཕྱག་མ་ཉིད། །སྒོམ་གྱི་བོག་དོན་ཡིན་ནོ་ལམ་དུ་འཁྱེར། །སྣང་སྲིད་སྣོད་བཅུད་སྐྱེ་འགྲོ་རྒྱལ་བའི་ཞིང་། །དཀྱིལ་འཁོར་གཅིག་ཏུ་ཤེས་པའི་དག་སྣང་སྦྱོངས། །མདོ་རྒྱུད་མན་ངག་རྒྱ་ཆེན་ཆོས་ཀུན་གྱི། །སྙིང་པོ་གཅིག་ཏུ་ཤེས་པས་ཉམས་སུ་ལོང་། །ཐེག་པའི་མཐར་ཐུག་རྫོགས་ཆེན་སྙིང་པོའི་དོན། །མ་རྟོགས་ཚེ་གཅིག་སངས་རྒྱས་འགྲུབ་པ་དཀའ། །དོན་རྟོགས་ཙམ་གྱིས་ཆོག་པར་མ་འཛིན་པར། །ཚེ་དང་སྒྲུབ་པ་མཉམ་ན་དོན་ཆེན་འགྲུབ། །འཇིག་རྟེན་འདི་ཡི་སྣང་བ་རྨི་ལམ་འདྲ། །ཡུད་ཙམ་འདི་ལ་གཏན་དོན་བསྒྲུབ་རེ་རན། །ད་ལྟ་མི་འབད་འཆི་བས་སླེབ་ཙ་ན། །འགྱོད་ཀྱང་ཕན་པ་མེད་པས་མྱུར་དུ་རེམ། །སྙིང་གཏམ་གདམས་
ངག་སྙིང་ལ་བཅགས་པ་ཡིས། །བླང་དོར་ཚུལ་བཞིན་གྱིས་དང་རྣལ་འབྱོར་པ། །འདི་ལྟར་གདམས་པའི་དགེ་བས་འགྲོ་ཀུན་ཀྱང་། །འདི་དོན་རྟོགས་ནས་སྲིད་ལས་མཐར་གྱུར་ཅིག །ཅེས་པ་འདི། མང་ཡུལ་གུང་ཐང་གི་ཕྱོགས་ནས་བྱོན་པའི་རྣལ་འབྱོར་པ་རྒྱཱ་ན་རཏྣ་ཅེས་བྱ་བས་མོས་གུས་གདུང་ཤུགས་ཆེན་པོས་བསྐུལ་ཏེ་སྙིང་གཏམ་གདམས་ངག་ཉམས་ལེན་གཅིག་ཆོག་བློ་བདེ་ཞིག་དགོས་གསུང་བའི་དགོངས་བཞེས་སྐོང་ཕྱིར། བླ་མའི་རྣལ་འབྱོར་ཚེ་སྒྲུབ་ཐུགས་རྗེ་ཆེན་པོའི་ལྷ་ཁྲིད་སྒོམ་དོན་གྱིས་གནད་བསྡུས་དང་བཅས་ཏེ་ཕྱོགས་གཅིག་ཏུ་བསྡོམས་པ་འདི་ནི། ཆོས་ཀྱི་རྒྱལ་པོ་རིམ་པར་བྱོན་པའི་ཕོ་བྲང་ཆེན་པོ་རིན་ཆེན་སྤུངས་པའི་ཡང་ཐོག་གི་གཟིམ་ཆུང་ཁམས་གསུམ་རྣམ་རྒྱལ་ནས་ཟབ་པར་གདམས་པ་ཨིྀྠ།། ༈ །།ན་མོ་གུ་རུ་ཝེ། རང་རིག་མཆོག་ཏུ་མི་འགྱུར་སྟོང་ཉིད་ཀྱི་རང་མདངས། །རྣམ་ཀུན་མཆོག་ལྡན་ཡེ་ཤེས་གདོད་མའི་མགོན་པོ། །སྣང་བ་མཐའ་ཡས་ཞེས་གྲགས་རིགས་ཀུན་གྱི་གཙུག་བརྒྱན། །ཕ་གཅིག་གསོལ་བ་
རང་འདེབས་སོ་བྱིན་གྱིས་རང་རློབས་ཤིག །རང་གསལ་འོད་ལྔ་ལྷུན་འགྲུབ་ཡེ་ཤེས་ཀྱི་སྣང་བས། །རྨོངས་པའི་མུན་པ་བསེལ་མཛད་ཟླ་འོད་ཀྱི་མདངས་ལྡན། །སྤྱན་རས་གཟིགས་དབང་ཞེས་གྲགས་སྙིང་རྗེའི་གཏེར་ཆེན། །ཕ་གཅིག་གསོལ་བ༴ །རང་བྱུང་པདྨའི་དབུས་ནས་འགྲོ་ཀུན་གྱི་གཉེན་གཅིག །སྲིད་པའི་རྒུད་པ་ཀུན་བྲལ་ཡིད་བཞིན་གྱི་ནོར་བུ། །པདྨ་འབྱུང་གནས་ཞེས་གྲགས་གྲུབ་མཆོག་གི་སྤྱི་དཔལ། །ཕ་གཅིག༴ །ཉོན་མོངས་གཅོང་རྙིང་གིས་གཟེར་ཁམས་གསུམ་གྱི་འགྲོ་ལ། །བདེ་སྟོང་ཡེ་ཤེས་སྨན་གྱིས་རང་གྲོལ་དུ་གསོལ་མཛད། །ཡེ་ཤེས་མཚོ་རྒྱལ་ཞེས་གྲགས་མ་ལས་ཀྱང་ལྷག་པའི། །ཕ་གཅིག༴ །ཏིང་འཛིན་རྒྱུན་ཆད་མེད་པའི་འོད་གསལ་གྱི་སྒྲོན་མེས། །གདུལ་བྱའི་ལམ་བཟང་སྣང་བྱེད་སྒྲིབ་བྲལ་གྱི་ཉི་མ། །ཏིང་འཛིན་བཟང་པོ་ཞེས་གྲགས་གྲུབ་ཐོབ་ཀྱི་རྒྱལ་པོ། །
ཕ་གཅིག༴ །སྙིགས་དུས་དམུ་རྒོད་ཀྱི་འགྲོ་བ་མགོན་མེད་ཀྱི་ཚོགས་ལ། །ཟབ་ཆོས་ཉི་མ་འབུམ་ཤར་མཁས་གྲུབ་ཀྱི་གཙུག་བརྒྱན། །འཇའ་ཚོན་སྙིང་པོ་ཞེས་གྲགས་རིག་འཛིན་གྱི་གཙོ་མཆོག །ཕ་གཅིག༴ །ཆོས་བརྒྱད་འགོང་པོས་ཟིན་པའི་སེར་གཟུགས་ཀྱི་ཚོགས་ལ། །མ་ནོར་ལམ་མཆོག་སྟོན་སླད་གང་འདུལ་གྱི་རོལ་པས། །སྣ་ཚོགས་རང་གྲོལ་ཞེས་གྲགས་དྲིན་ཅན་གྱི་བླ་མ། ཕ་གཅིག༴ །སྐྱབས་གནས་ནོར་བུའི་ཕྲེང་བ་དྲིན་ཅན་གྱི་ཚོགས་ལ། །གསོལ་བ་སྙིང་ནས་འདེབས་པའི་གདུང་དབྱངས་ཀྱི་ང་རོ། །ལྷང་ལྷང་འོ་དོད་འབོད་དོ་ཐུགས་རྗེས་རང་གཟིགས་དང་། །མ་ཁྱོད་བུ་ལ་མི་གཟིགས་བཏང་སྙོམས་སུ་འདོར་རམ། །ཐུགས་རྗེས་མྱུར་དུ་གཟིགས་དང་རྩ་རྒྱུད་ཀྱི་བླ་མ། །བྱིན་རླབས་ཆར་ཆེན་ཕོབ་དང་རྩ་རྒྱུད་ཀྱི་བླ་མ། །སྨིན་གྲོལ་ལམ་ལ་བཀོད་དང་རྩ་རྒྱུད་ཀྱི་བླ་མ། །རེ་ས་གཞན་ན་མེད་དོ་བླ་མ་རང་མཁྱེན་ནོ། །
ཞེས་པ་འདི་ཡང་དད་ལྡན་ཀརྨ་འགྲོ་ཕན་ལ་གདམས་པའོ།། ༈ །།ན་མོ་གུ་རུ། །རང་རིག་སྟོང་ཉིད་ཀྱི་ངོ་བོ་ཀུན་བཟང་སྣང་མཐའ་ཡས། །རང་མདངས་འགག་མེད་ཀྱི་འཆར་སྒོ་ལོངས་སྐུ་ཞི་ཁྲོའི་ཚོགས། །རྣམ་རོལ་ཐུགས་རྗེ་ལས་སྤྲུལ་པ་རིག་འཛིན་རྒྱུད་པར་བཅས། །གསོལ་བ་སྙིང་ནས་རང་འདེབས་སོ་རྩ་རྒྱུད་ཀྱི་བླ་མ་རྣམས། །འགྲོ་བློའི་མོས་ཁམས་དང་མཐུན་པའི་རྣམ་འགྱུར་བསམ་ཡས་པས། །ཞི་རྒྱས་དབང་དྲག་གི་ཕྲིན་ལས་སྣ་ཚོགས་མཛད་པ་པོ། །འདོད་འབྱུང་ཡིད་བཞིན་གྱི་ནོར་བུ་རྩ་བའི་བླ་མ་མཆོག །གསོལ་བ་སྙིང་ནས་རང་འདེབས་སོ་རེ་སའི་གཉེན་གཅིག་པུ། །ད་དུས་རྩོད་ལྡན་གྱི་མཐའ་མ་བདུད་རིགས་སྟོབས་རྒྱས་ཤིང་། །དམ་ཆོས་ཚུལ་བཞིན་དུ་སྤྱོད་ཀྱང་བར་ཆད་དབང་བརྩན་ཚེ། །མཐུ་སྟོབས་དབང་ཕྱུག་གི་ཕ་ཁྱོད་ར་མདར་འབོད་ལགས་ན། །ཐུགས་རྗེ་བྱིན་རླབས་ཀྱི་
དཔུང་ཆེན་མྱུར་དུ་བསྐྱེད་མཛོད་ལ། །འཁོར་བ་སྡུག་བསྔལ་གྱི་མཚོ་ལས་ད་ལྟ་བསྒྲལ་དུ་གསོལ། །ཞེས་པ་ནི་གུས་ལྡན་དགེ་འདུན་བཀྲ་ཤིས་ལའོ། ན་མོ་པདྨ་ཀཱ་ར་ཡེ། །མཁྱེན་པའི་ལྷ་ལམ་རབ་ཡངས་པར། །བརྩེ་བའི་འོད་ཟེར་འགྱེད་མཁས་པས། །འགྲོ་བའི་རེ་འདོད་སྐོང་བའི་ཕ། །པདྨ་ཐོད་ཕྲེང་རྩལ་ལ་གསོལ་བ་འདེབས། །ཆོས་སྐུ་སྟོང་ཉིད་མཁའ་དབྱིངས་ལས། །ལོངས་སྐུ་གསལ་མདངས་མཚན་དཔེའི་གཟུགས། །སྤྲུལ་སྐུ་གང་འདུལ་རོལ་གར་ཅན། །པདྨ་ཐོད་ཕྲེང༴ །རྣམ་པ་སྣ་ཚོགས་སྐུར་སྤྲུལ་ཀྱང་། །རང་བཞིན་རྒྱལ་བ་ཀུན་གྱི་དངོས། །ངོ་བོ་ཀུན་བཟང་སྣང་མཐའ་ཉིད། །པདྨ༴ །རྣམ་འགྱུར་ཞི་བས་འདུལ་བ་ལ། །དགེ་སློང་པདྨ་སམ་བྷ་ཝ། །མཁྱེན་རབ་བློ་ལྡན་མཆོག་སྲེད་རྩལ། །པདྨ༴ །ལ་ལར་རྒྱས་དང་དབང་སོགས་ཀྱི། །གདུལ་སླད་ཉི་མ་འོད་ཟེར་
དང་། །པདྨ་རྒྱལ་པོ་ཤཱཀྱ་སེང་། །པདྨ༴ །གང་དག་ཞི་དང་རྒྱས་སོགས་ཀྱི། །མི་ཐུལ་ལོག་འདྲེན་འདུལ་བའི་དཔལ། །རྡོ་རྗེ་གྲོ་ལོད་སེང་གེ་སྒྲ། །པདྨ༴ །རྒྱ་གར་འཕགས་པའི་ཡུལ་ཆེན་དུ། །སུམ་སྟོང་དྲུག་བརྒྱའི་ལོ་ཞུགས་ནས། །བདུད་བཏུལ་བསྟན་པ་འཕེལ་མཛད་པ། །བོད་ཡུལ་མུན་པའི་དམག་རུམ་དུ། །དམ་པའི་ཆོས་ཀྱི་སྒྲོན་མེ་སྦར། །འགྲོ་རྣམས་བདེ་ལ་བཀོད་མཛད་རྗེ། །པདྨ༴ །ད་དུས་སྙིགས་མ་ལྔ་བདོའི་ཚེ། །ལས་ཀྱི་མནར་བའི་འགྲོ་བ་ལ། །ཕ་མ་ལས་ལྷག་བརྩེ་བ་ཅན། །པདྨ༴ །འདི་དང་ཕྱི་མ་དུས་ཀུན་ཏུ། །རེ་ས་ཁྱོད་ལས་གཞན་མེད་ན། །རླབས་ཆེན་ཐུགས་རྗེའི་རྨད་བྱུང་གིས། །འབྲལ་བ་མེད་པར་གཟིགས་སུ་གསོལ། །བདག་དང་ཁམས་གསུམ་སེམས་ཅན་ཀུན། །མགོན་པོ་ཁྱོད་ཀྱིས་རྗེས་བཟུངས་ནས། །ཚེ་གཅིག་སངས་རྒྱས་འགྲུབ་
པ་ཡིས། དངོས་གྲུབ་དམ་པ་སྩལ་དུ་གསོལ། །ཅེས་པ་ནི། བྷ་ཏྲའི་མིང་ཅན་ལ་གནོད་མཛེས་མཁར་དུ་གདམས་པའོ།། ༈ །།ཀ་དག་གནས་ལུགས་གདོད་མའི་ཕོ་བྲོང་ནས། །ཀུན་བཟང་སྣང་བ་མཐའ་ཡས་རྡོ་རྗེ་འཆང་། །རྡོར་སེམས་སྤྱན་རས་གཟིགས་སོགས་སྐུ་གསུམ་ལྷ། །ངོ་བོ་རང་བཞིན་ཐུགས་རྗེར་གསོལ་བ་འདེབས། །ལྷུན་འགྲུབ་འོད་གསལ་ཀློང་ནས་རྡོ་རྗེའི་སྐུ། །དགའ་རབ་འཇམ་དཔལ་ཤྲཱི་སེང་པདྨ་འབྱུང་། །ཁྲི་སྲོང་ལྷ་སྲས་མཚོ་རྒྱལ་སྤྲུལ་པའི་སྐུ། །གང་འདུལ་དེར་སྟོན་རྣམས་ལ་གསོལ་བ་འདེབས། །སྤྱི་གཙུག་མོས་པ་རྒྱ་མཚོ་ཡིད་བཞིན་ནོར། །བསོད་ནམས་བླ་མ་བསོད་ནམས་རིན་པོ་ཆེ། །ངག་དབང་པདྨ་གྲུབ་མཆོག་བསོད་ནམས་དབང་། །རྩ་བའི་བླ་མ་མཆོག༴ །རྩ་རྒྱུད་བླ་མ་རབ་འབྱམས་ཞི་ཁྲོའི་ལྷ། །མཁའ་འགྲོ་ཆོས་སྲུང་ཚོགས་ལ་གསོལ་བཏབ་པས། །གདོད་མའི་གནས་ལུགས་ཇི་བཞིན་མངོན་གྱུར་ནས། །རྟོག་མེད་སྤྲུལ་པས་འགྲོ་
བ་འདྲེན་པར་ཤོག །བླ་མ་དགོངས་པ་འདུས་པའི་ཟབ་ཆོས་ཕྱག་རྫོགས་གཉིས་མཐུན་མོང་གི་བླ་བརྒྱུད་གསོལ་འདེབས་མདོར་བསྡུས་འདི་ནི། གཙང་ས་རྣལ་འབྱོར་གྲོགས་མཆེད་གསུམ་གྱིས་བསྐུལ་ངོར་གནས་ཆེན་དུར་ཁྲོད་མགོ་དགུར་བྲིས་པའོ། ཨོཾ་ཨཱཿཧཱུྃ། རིག་སྟོང་སྙིང་པོ་དོན་གྱི་་གཞལ་ཡས་ནས། །ཀུན་བཟང་རྡོ་རྗེ་འཆང་དང་རྡོ་རྗེ་སེམས། པདྨ་ཐོད་ཕྲེང་ཡུམ་ཆེན་མཚོ་རྒྱལ་ལ། །གསོལ་བ་འདེབས་སོ་ཡེ་ཤེས་རང་གསལ་སྩོལ། །དུང་མཚོ་རས་པ་སངས་རྒྱས་དྲང་སྲོང་རྗེ། །བདེ་ཆེན་རས་པ་རང་ཞིག་ཟངས་ཐལ་དང་། །རྣམ་གྲོལ་བཟང་པོ་རྒྱ་ལ་རས་པ་ལ། །གསོལ་བ༴ །རྒྱལ་མཚན་འོད་ཟེར་སངས་རྒྱས་བརྩོན་འགྲུས་དང་། །རྒྱལ་མཚན་ཡེ་ཤེས་བུདྡྷ་ཀེ་དྷཱུའི་ཞབས། །དགེ་འདུན་རིན་ཆེན་དགེ་འབུམ་རིན་རྡོར་རྗེ། །གསོལ་བ༴ །ངག་དབང་གྲགས་དང་གྲུབ་མཆོག་བློ་གྲོས་མཚན། །གཞན་ཕན་རྡོ་རྗེ་རྩ་བའི་བླ་མ་དང་། །
རྒྱལ་བའི་དཀྱིལ་འཁོར་རབ་འབྱམས་རིགས་བརྒྱ་ལ། །གསོལ༴ །ཚེ་གཅིག་སངས་རྒྱས་རྫོགས་ཆེན་ཡང་སྙིང་མཆོག །ཡེ་ཤེས་རང་སྣང་མངོན་སུམ་སྟོན་པའི་ཆོས། །འདི་ལ་བརྟེན་ནས་སྟན་ཐོག་འདི་ཉིད་དུ། །མངོན་སངས་རྒྱས་ནས་འཁོར་བ་དོང་སྤྲུགས་ཤོག །རྫོགས་ཆེན་ཡང་ཏི་བརྒྱུད་པའི་གསོལ་འདེབས་ཉུང་བསྡུས་འདི་ནི། ཆོས་འདི་ལ་མོས་པའི་དགེ་སློང་ཚུལ་ཁྲིམས་བཟང་པོས་བསྐུལ་ངོར་བཀོད་པའོ།། ༈ །།ཨོཾ་ཨཱཿཧཱུྃ། རིགས་ཀྱི་རིགས་མཆོག་རྒྱལ་ཀུན་རིགས་ཀྱི་བདག །ཀུན་བཟང་རྒྱལ་བ་རིགས་ལྔ་རྡོ་རྗེ་སེམས། །གསང་བདག་ཕྱག་རྡོར་སྐལ་ལྡན་རྒྱལ་པོ་ཛཿ །ཀུ་ཀུ་རཱ་ཛཱ་རྣམས་ལ་གསོལ་བ་འདེབས། །ཤཱཀྱ་སུ་ཏྲ་སིང་ཧ་རཱ་ཛཱ་དང་། །ཨུ་པ་རཱ་ཛཱ་གོ་མ་དེ་ཝིའི་ཞབས། །བཻ་ཏྲི་ཀ་མ་ལ་དང་ཨཱ་ཙརྱ། །ཛི་ན་མི་ཏྲ་རྣམས་ལ་གསོལ་བ་འདེབས། །རྡོ་རྗེ་བཞད་པ་ཉིན་བྱེད་སེང་གེ་དང་། །བདེ་བ་གསལ་མཛད་ཤཱཀྱ་
བོ་དྷའི་ཞབས། །སེ་ཀྱ་དེ་ཝ་སྒེག་པ་རྡོ་རྗེ་དང་། །ཆོས་བློན་དེ་བར་བཅས་ལ་གསོལ་བ་འདེབས། །རྒྱ་གར་མཁན་པོ་ཆོས་རྒྱལ་སྐྱོང་གི་མཚན། །གྲུབ་པའི་དབང་ཕྱུག་གནུབ་བན་མཐུ་སྟོབས་བདག །མ་ཧཱ་ཡོ་ག་རྒྱུད་པའི་བླ་མ་ལ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །རིགས་མཆོག་ཀུན་ཏུ་བཟང་དང་རིགས་ལྔའི་ལྷ། ཞི་དང་ཁྲོ་གར་སྟོན་མཛད་ཐུགས་རྗེ་ཅན། །འཇམ་དབྱངས་སྤྱན་རས་གཟིགས་དང་རྡོ་རྗེ་འཛིན། །གྲགས་ལྡན་ཕྱོགས་སྐྱོང་རྣམས་ལ་གསོལ་བ་འདེབས། །རིགས་འཛིན་སྐར་མདའ་གདོང་དང་ལང་ཀའི་བདག །ཀླུ་རྒྱལ་འཇོག་པོ་དྲི་མེད་ལི་ཙཱ་ཝི། །གསང་སྔགས་སྒྲོན་མས་འཇིག་རྟེན་སྣང་བྱེད་པ། །དམ་པའི་རིགས་ཅན་རྣམས་ལ་གསོལ་བ་འདེབས། །རྒྱལ་པོ་ཛ་དང་ཨུ་པ་རཱ་ཛའི་མཚན། ཨིནྜ་བོདྷི་ཀླུ་རྒྱལ་ནཱ་ག་པུ། །ག་ཡ་པཱུ་ཏྲ་ཀུ་ཀུ་རཱ་ཛཱ་
དང་། །རོ་ལངས་བདེ་བ་རྣམས་ལ་གསོལ་བ་འདེབས། །རྡོ་རྗེ་བཞད་པ་རཱ་ཛཱ་པྲ་ཧ་ཏི། །དྷ་ན་རཀྵི་ཏ་དང་ཧཱུྃ་ཀ་ར། །སྠི་ར་མ་ཏི་བདེ་བ་གསལ་མཛད་མཆོག །དྷརྨ་བོ་དྷི་རྣམས་ལ་གསོལ་བ་འདེབས། །མཁན་པོ་དྷརྨའི་མཚན་དང་བོར་འཛིན་ཞབས། །གཙུག་ལག་དཔལ་དགེ་བླ་ཤའི་ཚེ་བཙན་སྐྱེས། །སངས་རྒྱས་ཡེ་ཤེས་ལ་སོགས་ཨ་ནུའི་རྒྱུད། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །ཆོས་སྐུ་ཀུན་བཟང་ལོངས་སྐུ་རྡོ་རྗེ་སེམས། །སྤྲུལ་སྐུ་བཀའ་ཡི་སྡུད་པ་རྡོ་རྗེ་འཛིན། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། །དྷ་ན་ཏ་ལོ་རྣམས་ལ་གསོལ་བ་འདེབས། །རཱ་ཛཱ་ཧ་ཏི་སྲས་མོ་ས་ར་ནི། །བྱང་ཆུབ་མོ་དང་ཀླུ་རྒྱལ་འཇོག་པོའི་མཚན། །གཟུང་མ་ཨ་ར་ལི་དང་ཨཀྵྱོ་བྷྱཿ །ཀུ་ཀུ་རཱ་ཛཱ་བཅས་ལ་གསོལ་བ་འདེབས། །བུདྡྷ་པཱ་ལ་བུདྡྷ་ས་མ་དྷི། །
མ་ཧཱ་རཱ་ཛཱ་གོ་མ་དེ་ཝི་དང་། །སློབ་དཔོན་རབ་སྣང་ཁྲི་རྒྱལ་ཕྱི་མ་དང་། །མ་ཧཱ་རཱ་ཛཱ་རྣམས་ལ་གསོལ་བ་འདེབས། །དྲང་སྲོང་བྷ་ཥི་ཏ་དང་བདག་ཉིད་མ། །ན་ག་རྫུ་ན་དེ་ཝ་རཱ་ཛཱ་དང་། །འཇམ་དཔལ་ཕྱི་མ་རིག་འཛིན་དགེ་བསྙེན་ལེགས། །བུདྡྷ་གུ་ཧྱ་རྣམས་ལ་གསོལ་བ་འདེབས། ཤྲཱི་སིངྷ་དགེ་སློང་ཀུན་དགའ་མོ། །བི་མ་བཻ་རོ་ཙ་ན་གཡུ་སྒྲ་སྙིང་། །ཛྙཱ་ན་སོག་པོ་དཔལ་ཡེ་གནུབས་བན་མཆོག །རྫོགས་ཆེན་རྒྱུད་པ་རྣམས་ལ་གསོལ་བ་འདེབས། །ཡོ་ག་གསུམ་སོགས་མེད་དབང་སྨིན་གྲོལ་གྱི། །བྱིན་རླབས་ཆུ་བོ་མ་ལུས་གཅིག་འདུས་པའི། །གནུབས་བན་མཆོག་གི་ཐུགས་སྲས་རྣམ་བཞི་དང་། །དགེ་མཆེད་བཅོ་ལྔ་སོགས་ལ་གསོལ་བ་འདེབས། །གསང་བའི་བུ་གཅིག་ཡོན་ཏན་རྒྱ་མཚོ་དང་། །ཡེ་ཤེས་རྒྱ་མཚོ་བྱང་ཆུབ་རྣམ་པ་གསུམ། །
ནམ་མཁའ་ལྡེ་དང་ཞུ་སྟོན་ཟུར་ཆེན་རྗེ། །ཟུར་ཆུང་ཤེར་གྲགས་རྣམས་ལ་གསོལ་བ་འདེབས། །དེ་ཡི་སྲས་བཞི་སྐྱོ་སྟོན་ཤཱཀཱ་ཡེ་དང་། །གསང་བདག་ཤཱཀ་སེང་འགར་སྟོན་སྲེག་སྟོན་པ། །གླན་བན་རྡོ་རྗེ་འོད་དང་བརྩོན་འགྲུས་སེང་། །གླན་སྟོན་བསོད་རྒྱལ་རྣམས་ལ་གསོལ་བ་འདེབས། །བུདྡྷ་ཤྲཱི་ལྷ་འབུམ་བསོད་ནམས་མགོན། །ཤེར་དཔལ་གཟི་སྟོན་ཤཱཀ་བཟང་བསམ་རྡོར་མཚན། །མདོ་དབང་པད་ཚལ་རྒྱས་མཛད་འོད་སྟོང་ཅན། །ཟུར་སྟོན་ཐམས་ཅད་མཁྱེན་ལ་གསོལ་བ་འདེབས། །ཟུར་མོ་དགེ་འབུམ་ཤཱཀྱ་བཤེས་གཉེན་དང་། །མཁས་གྲུབ་ཆོས་འབུམ་དཀོན་བཟང་རྡོར་བཟང་རྗེ། །འཕགས་མཆོག་བྱ་བཏང་མཁས་གྲུབ་རྡོར་རྒྱལ་བ། །གཡུ་འབྲུག་རྡོ་རྗེ་རྣམས་ལ་གསོལ་བ་འདེབས། །གངས་ཅན་འགྲོ་བའི་སྐྱབས་གཅིག་སོག་ཟློག་པ། །མཁས་གྲུབ་ཀུན་གྱི་མཆོག་གྱུར་ལོ་
ཙ་བ། །སྨིན་གྲོལ་ནོར་བུའི་ཕྲེང་འཛིན་རྒྱུད་པར་བཅས། །བདག་སོགས་གུས་པའི་སྙིང་ནས་གསོལ་བ་འདེབས། །སྦྱང་བྱ་ལུས་ངག་ཡིད་དང་ཤེས་བྱའི་སྒྲིབ། །སྦྱོང་བྱེད་སྨིན་དབང་ཟབ་དོན་མངོན་གྱུར་ཅིང་། །སྦྱང་འབྲས་སྐུ་བཞིའི་གོ་འཕངས་མཆོག་ཐོབ་ནས། །འགྲོ་བ་ཀུན་ཀྱང་དེ་འདྲའི་སར་འགོད་ཤོག །འདུས་པ་མདོ་དབང་ཆེན་པོའི་བླ་བརྒྱུད་ཀྱི་གསོལ་འདེབས་ཉུང་ངུར་སྡོམ་པ་ཞིག་དགོས་ཞེས། རྣལ་འབྱོར་པ་ཨ་དྷི་ཤ་ཀ་སོགས་ཀྱིས་བསྐུལ་ངོར་གནས་ཆེན་ཆུ་བོ་གཡས་འཁྱིལ་གྱི་ཡང་དབེན་དུ་བཀོད་པའོ།། ༈ །།སྟོན་པའི་སྟོན་པ་ཀུན་བཟང་ཐོག་མའི་མགོན། །ལྷུན་གྲུབ་འོད་གསལ་སྐུར་སྟོན་རྡོ་རྗེ་སེམས། །ཐེག་པའི་ཡང་རྩེ་སྟོན་མཁས་དགའ་རབ་ཞབས། །སྐུ་གསུམ་དབྱེར་མེད་མཆོག་ལ་གསོལ་བ་འདེབས། །འཇམ་དཔལ་བཤེས་གཉེན་དྷ་ན་ཏ་ལོ་དང་། །ཐུ་བོ་
རཱ་ཛཱ་མེ་ཏོག་གསལ་སྒྲོན་མ། །འཇོག་པོ་བྱང་ཆུབ་མ་དང་ས་ར་ནི། །མཁན་པོ་རབ་སྣང་རྣམས་ལ་གསོལ་བ་འདེབས། །བུདྡྷ་ས་མན་ཀུ་ཀུ་རཱ་ཛཱ་ཆེ། །མ་ཧཱ་རཱ་ཛཱ་སྲས་མོ་གོ་མ་དེ། །ཨཱ་ཙར་ཨ་ལོ་ཀེ་དང་ཕྱི་རྒྱལ་ཕྱི། །དྲང་སྲོང་བྷ་ཥི་རྣམས་ལ་གསོལ་བ་འདེབས། །ཀླུ་སྒྲུབ་བདུད་རྩི་མ་དང་མཉྫུ་ཤྲཱི། །དེ་བ་རཱ་ཛཱ་བུདྡྷ་ཀུྚའི་མཚན། །ཀུན་དགའ་མོ་དང་ཤྲཱི་སིང་བཻ་རོ་རྗེ། །བི་མ་མི་དྲར་བཅས་ལ་གསོལ་བ་འདེབས། །ཛྙཱ་ན་ཀུ་མ་སོག་པོ་དཔལ་ཡེ་ཤེས། །འོ་བྲན་སངས་རྒྱས་ཡེ་ཤེས་བར་རྒྱུད་པའི། །རྫོགས་ཆེན་ བཻ་རོ་དང་བི་མ་གཉིས་རྒྱུད་པ་མཐར་ཆགས་མིན་ཀྱང་སྔ་འགྱུར་ཕྱི་འགྱུར་སོ་སོ་ནས་ཛྙཱ་ནར་འདུས་སོ། སེམས་བདེ་བརྒྱུད་པའི་བླ་མ་ལ། །གསོལ་བ་འདེབས་སོ་རང་བྱུང་ཡེ་ཤེས་སྟོན། །ཀུན་བཟང་རྡོར་སེམས་དགའ་རབ་འཇམ་དཔལ་དང་། །དྷ་ན་ཏ་ཐུའོ་རཱ་ཛ་མེ་ཏོག་གསལ། །ཀླུ་རྒྱལ་
གནོད་སྦྱིན་པ་ར་ནི་རབ་སྣང་། །བུདྡྷ་ས་མན་རྣམས་ལ་གསོལ་བ་འདེབས། །ཁྱི་རྒྱལ་མ་ཧཱ་རཱ་ཛ་ཨ་ལོ་ཀ །ཁྱི་རྒྱལ་ཕྱི་མ་བུདྡྷ་ཀུྚ་དང་། །འཇམ་དཔལ་བཟང་པོ་དྲང་སྲོང་བྷ་ཥི་ཏ། །གཟུང་མ་བདུད་རྩི་མ་ལ་གསོལ་བ་འདེབས། ཤིནྟིང་གརྦ་ཀླུ་སྒྲུབ་ཤྲཱི་སིང་ཧ། །ཀུན་དགའ་མོ་དང་བི་མ་བཻ་རོ་གཉིས། །རྫོགས་ཆེན་ཀློང་སྡེ་རྒྱུད་པའི་བླ་མ་ལ། །གསོལ་བ་འདེབས་སོ་ཀ་དག་ཀློང་གྲོལ་སྩོལ། །ཀུན་བཟང་རྡོར་སེམས་དགའ་རབ་བདེ་མཆོག་སྙིང་། །ཤྲཱི་སིང་ཧ་བི་མ་ཏིང་འཛིན་བཟང་། །འབྲོམ་སྟོན་ཡེ་ཤེས་སྙིང་དང་མྱང་དབང་ཕྱུག །ཡོན་ཏན་མཆོག་སོགས་རྣམས་ལ་གསོལ་བ་འདེབས། །རྫོགས་ཆེན་མན་ངག་གི་སྡེ་ལ་རྒྱུད་ལུགས་མི་གཅིག་པ་མང་ཀྱང་། འདི་སྡུད་པ་བྲམ་ཟེའི་སྐོར་གྱི་བརྒྱུད་པའོ། །སྐོར་ཐུང་རྔོག་སྟོན་གཙུག་གཞོན་ཤཱཀྱ་དབང་། །ཆུ་བོ་རི་པ་རྡོར་འོད་འགོས་དགེ་སློང་། །
ཤཱཀ་རྒྱལ་དཔལ་བཟང་རྡོར་རྒྱལ་བདེ་ལེགས་པ། །འཇམ་དབྱངས་བཤེས་གཉེན་རྣམས་ལ་གསོལ་བ་འདེབས། །ཆོས་དཔལ་བསྟན་འཛིན་བཟང་པོ་རཏྣ་གླིང་། །ཚེ་དབང་གྲགས་སོགས་རྒྱུད་པ་མུ་སྟེག་འཕྲེང་། །རྫོགས་ཆེན་མན་ངག་རྒྱུད་པའི་བླ་མ་ལ། །གསོལ་བ་འདེབས་སོ་རིག་པ་གཅེར་མཐོང་སྟོན། །ཀུན་བཟང་ཞི་ཁྲོ་རྡོར་འཆང་རྡོ་རྗེ་སེམས། །གསང་བདག་དགའ་རབ་འཇམ་དཔལ་ཤྲཱི་སིང་། །ཛྙཱ་ན་སཱུ་ཏྲ་བི་མ་མྱང་བན་དང་། །ལྡང་མ་ལྷུན་རྒྱལ་རྣམས་ལ་གསོལ་བ་འདེབས། །ལྕེ་བཙུན་སེང་དབང་ཞང་སྟོན་ཉི་མ་འབུམ། ཇོ་འབེར་སངས་རྒྱས་དབོན་པོ་མེ་ལོང་རྡོར། །རིག་འཛིན་ཀུ་མ་ཀློང་ཆེན་ཡང་གསང་རྒྱུ། །གསོལ་བ་འདེབས་སོ་སྣང་བཞི་མཐར་ཕྱིན་སྩོལ། །ཀུན་བཟང་རྡོར་སེམས་དགའ་རབ་འཇམ་དཔལ་དང་། །ཤྲཱི་སིང་ཛྙཱ་ན་སཱུ་ཏྲ་བི་མ་ལ། །པདྨ་འབྱུང་གནས་གཉགས་ལོ་ཀུ་མ་ར། །སློབ་མ་དཔལ་རྒྱས་བཅས་
ལ་གསོལ་བ་འདེབས། །ཀླུ་ཡི་དབང་ཕྱུག་ཀླུ་ཡི་རྒྱལ་མཚན་དང་། །འཕགས་པ་ཤེས་རབ་ཚུལ་རྒྱལ་ཞང་ཛྙཱ་ན། །ཡེ་ཤེས་ཚུལ་ཁྲིམས་སྤ་ཚབ་སྟོང་གྲགས་དང་། །བྱང་ཆུབ་སྙིང་པོར་བཅས་ལ་༴ །བྱང་སྒོམ་རིན་བཟང་
བྱང་པ་འཇམ་དཔལ་དང་། །ཤངས་པ་ནག་པོ་གླན་སྟོན་རྡོ་རྗེ་འོད། །བསོད་རྒྱལ་དངོས་གྲུབ་མགོན ་དང་ཤཱཀ་རྒྱལ་བ། །དཔལ་བཟང་རྡོར་རྒྱལ་རྣམས་ལ་གསོལ༴ །བདེ་ལེགས་པ་དང་འཇམ་དབྱངས་བཤེས་གཉེན་དང་། །ཆོས་དཔལ་བསམ་གཏན་བཟང་པོ་རཏྣ་གླིང་། །རྫོགས་ཆེན་སྤྱི་ཏི་རྒྱུད་པའི་བླ་མ་ལ། །གསོལ་བ་འདེབས་སོ་ཀུན་བཟང་དགོངས་པ་སྟོན། །གདོད་མའི་མགོན་པོ་ཀུན་བཟང་རྡོ་རྗེ་སེམས། །དགའ་རབ་འཇམ་དཔལ་ཤྲཱི་སིང་པདྨ་འབྱུང་། །དུང་མཚོ་རས་སོགས་གཏེར་གྱི་རྒྱུད་པ་དང་། །གཉགས་དང་ འདི་ཡན་རྒྱུད་པ་མི་གཅིག་པ་མང་ཀྱང་། འདི་ནས་གཅིག་པ་ཤས་ཆེའོ། ཡང་ཏི་བཀའ་མ་
ལྟར་ན། དཔལ་ཆེན་བརྒྱད་ལ༴ །ཀླུ་དབང་ཀླུ་རྒྱལ་སྦ་ཀླུ་འབྲོག་མི་དང་། །ཞང་སྟོན་ཁམ་པ་ཡེ་ཚུལ་སྤ་ཚབ་སྟོང་། །ནགས་ཤོད་ཡེ་སྙིང་བྱང་སྒོམ་རིན་ཆེན་བཟང་། །འཇམ་དཔལ་ཤངས་པར་བཅས་ལ༴ །སེམས་ཀློང་མན་ངག་ཡང་ཟབ་སྤྱི་ཡང་ཏི། །རྒྱུད་པའི་ཆུ་བོ་ཀུན་འདུས་ཆོས་ཀྱི་མཛོད། །གླན་སྟོན་རྡོར་འོད་གསོལ་རྒྱལ་དངོས་གྲུབ་མཚན། །བསམ་འཕེལ་དངོས་གྲུབ་མགོན་ལ༴ །ཤཱཀ་རྒྱལ་དཔལ་བཟང་རྡོ་རྗེ་རྒྱལ་མཚན་དང་། །བདེ་ལེགས་དཔལ་དང་འཇམ་དབྱངས་བཤེས་གཉེན་མཚན། །ཆོས་དཔལ་རྒྱལ་མཚན་ཆོས་རྗེ་བསམ་གཏན་བཟང་། །རིག་འཛིན་རཏྣ་གླིང་ལ༴ །རྒྱལ་སྲས་ཚེ་དབང་རྗེ་བཙུན་ངག་དབང་གྲགས། །ངག་དབང་ནོར་བུ་ནོར་བུ་ཡོངས་གྲགས་རྗེ། །མཚུངས་མེད་ནོར་བུ་དབང་རྒྱལ་ཚུལ་ཁྲིམས་མཚན། །གཞན་ཕན་རྡོ་རྗེའི་ཞབས་ལ་གསོལ་བ་འདེབས། །ཀུན་བཟང་རིགས་ལྔ་སྡུད་པོ་རིགས་གསུམ་མགོན། །ལྷ་ཀླུ་
གནོད་སྦྱིན་སྲིན་པོ་མེའི་རིག་འཛིན། །རྒྱལ་པོ་ཛ་དང་ཨིནྟྲ་བཱུ་ཏི་དང་། །ནཱ་ག་པུ་ཏྲི་རྣམས་ལ་གསོལ་བ་འདེབས། །གུ་ཧྱ་བོ་དྷི་ཁྲི་རྒྱལ་རོ་ལངས་བདེ། །རྡོ་རྗེ་བཞད་པ་མཁན་པོ་པྲ་ཧ་ཏི། །ཤཱཀྱ་རྣམ་གསུམ་དྷ་ན་རཀྵི་ཏ། །སྠི་ར་མ་ཏི་རྣམས་ལ་གསོལ༴ །བདེ་བ་གསལ་མཛད་དྷརྨཱ་བོ་དྷི་དང་། །བ་སུ་དྷ་ར་སངས་རྒྱས་ཡེ་ཤེས་སོགས། །ཨ་ནུ་ཡོ་ག་རྒྱུད་པའི་བླ་མ་ལ། །གསོལ་བ་འདེབས་སོ་མཆོག་གི་དངོས་གྲུབ་སྩོལ། །ཀུན་བཟང་རིགས་ལྔའི་སངས་རྒྱས་རིགས་གསུམ་མགོན། །དེ་ལས་གདུལ་བྱ་སོ་སོར་རིམ་བརྒྱུད་དེ། །འཇམ་དཔལ་གྲགས་ལྡན་མཆོག་སྐྱོང་རིན་ཆེན་འོད། །ཚངས་དང་ཀུན་སྒྲོལ་གཙུག་འཛིན་བརྒྱ་བྱིན་སོགས། །ལྷ་ཡི་རིག་འཛིན་འབུམ་ལ༴ །སྤྱན་རས་གཟིགས་དབང་ཀླུ་རྒྱལ་མགྲིན་ནག་པོ། །ཀླུ་མོ་ཁ་འདུལ་ཀླུ་མོ་འདུལ་ཚངས་མ། །
ཡིད་འོང་དགའ་བའི་ཀླུ་དང་ཀླུའི་རྒྱལ་པོ། །འཇོག་པོ་ཀླུ་ཚོགས་འབུམ་དང་གསང་བདག་སོགས། །གནོད་སྦྱིན་རིག་འཛིན་འབུམ༴ །རིགས་ཅན་དྲ་མ་ལྔ་དང་རྒྱལ་པོ་ཛ། །ཀུ་ཀུ་རཱ་ཛཱ་ཨིནྟྲ་བཱུ་ཏི་དང་། །སིང་ཧ་རཱ་ཛཱ་ཨུ་པ་གོ་མ་དྷི། །བུདྡྷ་ཀུྚ་མེ་ཏྲི་ཀ་མ་ལ། །སངས་རྒྱས་གསང་བར་བཅས༴ །རྨ་བན་རིན་ཆེན་མཆོག་དང་གཙུག་རིན་བཞོན། གྱོ་རེ་མཆོག་སྐྱོང་ཁྱུང་པོ་དབྱིག་གི་འོད། །དར་རྗེ་དཔལ་གྲགས་རྒྱལ་བའི་ཡོན་ཏན་དང་། །སངས་རྒྱས་ཡེ་ཤེས་ལ་སོགས་ཏནྡྲ་སྡེ། །བཅོ་བརྒྱད་རྒྱུད་པ་རྣམས་ལ་གསོལ་བ་འདེབས། ཀུན་བཟང་རྡོར་སེམས་དགའ་རབ་འཇམ་དཔལ་དང་། །དྷ་ན་ཏ་ལ་གཙུག་ལག་དཔལ་དགེ་བ། །།།།།ནག་པོ་བ་སུ་དྷཱ་ཛ་དང་། །སངས་རྒྱས་ཡེ་ཤེས་འཇམ་དཔལ་སྐུ་ཡི་རྒྱུད། །གསོལ་བ་འདེབས་སོ་སྐུ་ཡི་དངོས་གྲུབ་སྩོལ། །པདྨ་དབང་གི་རྒྱལ་པོ་ཧེ་རུ་ཀ །ནཱ་གརྫུ་ན་པདྨ་ཐོད་ཕྲེང་ཚལ། །
རྒྱལ་བ་མཆོག་དབྱངས་རྨ་བན་རིན་ཆེན་མཆོག །གཙུག་ཏུ་རིན་གཞོན་རྣམས་ལ༴ །ཁྱུང་པོ་དབྱིག་རྡོར་དར་རྗེ་དཔལ་གྱི་བྲག །ཁྱུང་པོ་དབྱིག་གི་འོད་དང་ཞང་རྒྱལ་ཡོན། །བུདྡྷ་ཛྙཱ་ན་པདྨ་གསུང་གི་རྒྱུད། །གསོལ་བ་འདེབས་སོ་གསུང་གི་དངོས་གྲུབ་སྩོལ། །ཀུན་བཟང་རིགས་ལྔ་རིག་གསུམ་མགོན་པོ་དང་། །དགའ་རབ་ཤྲཱི་སིང་ཨུ་པ་རཱ་ཛཱ་ཆེ། ཨིནྡྲ་བཱུ་ཏི་ཀུ་ཀུ་རི་པ་དང་། །རྡོ་རྗེ་འཕྲེང་བའི་འོད་ལ་གསོལ་བ་འདེབས། །རྡོ་རྗེ་སྣོན་པོ་ཤ་ར་ཚོགས་ཀྱི་དབང་། །བློ་གྲོས་གཟི་བརྗིད་དུར་ཁྲོད་བདེ་བ་དང་། ཁ་ཆེ་ཀུ་ཀུ་རི་པ་ཧཱུྃ་ཀ་ར། །པད་འབྱུང་བི་མ་གཉགས་དང་སངས་རྒྱས་ཡེ། །ཡང་དག་ཐུགས་ཀྱི་རྒྱུད་པའི་བླ་མ་ལ། །གསོལ་བ་འདེབས་སོ་ཐུགས་ཀྱི་དངོས་གྲུབ་སྩོལ། །ཀུན་བཟང་རྡོར་སེམས་འཇམ་དབྱངས་རྡོ་རྗེ་ཆོས། །ཚང་པ་ཐོར་ཚུགས་ཅན་དང་ཙ་ར་ཀ །ཐ་སྐར་ནབས་སོ་སྐྱེས་དང་ལྗང་སྔོན་དང་། །རྐང་ཐུབ་མྱུད་འཛིན་
ལ་གསོལ༴ །འགྲོ་སྐྱོབ་གཤོལ་མདའ་འཛིན་དང་མེ་བཞི་འཇུག །ཛི་ན་མི་ཏྲ་ཀླུ་རྒྱལ་འཇོག་པོ་དང་། །དགའ་བོ་ཉེར་དགའ་འབྱུང་ལྔའི་ལྷ་མོར་བཅས། །རིག་འཛིན་ལི་ཙ་ཝི་ལ༴ །དགའ་རབ་འཇམ་དཔལ་ཀུ་ཀུ་རཱ་ཛཱ་ཆེ། །ཨུ་པ་རཱ་ཛཱ་ཨོ་རྒྱན་ཐོར་ཅོག་ཅན། །སིང་ཧ་རཱ་ཛཱ་ཨིནྟྲ་བྷུ་ཏི་དང་། །མ་ཧཱ་རཱ་ཛཱ་རྣམས་ལ༴ །ཉིན་བྱེད་སེང་གེ་སངས་རྒྱས་གསང་བ་དང་། །བི་མ་པདྨ་འབྱུང་གནས་གཉགས་ཛྙཱ་ན། །སོག་པོ་འོ་བྲན་གནུབས་བན་བདུད་རྩིའི་རྒྱུད། །གསོལ་བ་འདེབས་སོ་ཡོན་ཏན་དངོས་གྲུབ་སྩོལ། ཀུན་བཟང་ཆེ་མཆོག་རྡོ་རྗེ་གཞོན་ནུའི་ལྷ། །རིགས་ལྔ་ཕྱག་རྡོར་ཨིནྡྲ་བྷུ་ཏི་དང་། །པྲ་ཆེན་ཧསྟི་པདྨ་སམ་བྷ་ཝ། །ཡུམ་ཆེན་མཚོ་རྒྱལ་རྣམ་ལ་གསོལ་བ་འདེབས། །ལྕེ་སྟོན་ཀུ་ཀུ་ལ་བྱེད་ལང་ལབ་དང་། །སྣ་ནམ་སྟོང་ཚབ་རྒྱ་སྟོན་ངབ་ཐུང་བ། །འགོས་སྟོན་རྡོར་རྒྱལ་དར་
སེང་ཡོན་རྡོ་རྗེ། །འདམ་སྟོན་གྲུབ་པ་རྣམས་ལ༴ །དངོས་གྲུབ་རྒྱལ་མཚན་དངོས་གྲུབ་མགོན་ཤཀ་རྒྱལ། །དཔལབཟང་རྡོར་རྒྱལ་དགེ་ལེགས་འཇམ་དབྱངས་མཚན། །ཆོས་དཔལ་བསམ་གཏན་རཏྣ་ཕུར་པའི་རྒྱུད། །གསོལ་བ་འདེབས་སོ་ཕྲིན་ལས་དངོས་གྲུབ་སྩོལ། ཁྱབ་བདག་རྡོར་འཆང་ཟླ་གསང་རིན་ཆེན་དང་། །རིགས་ལྔ་ཕྱག་རྡོར་དམ་པའི་རིགས་ཅན་ལྔ། །རྒྱལ་པོ་ཛ་དང་ཨུ་པ་ཁྱི་རྒྱལ་ཆེ། །སྠཱི་ར་མ་ཏི་ཉི་རྡོར་བྷ་ཧུ་ར། །སངས་རྒྱས་གསང་བ་མི་ལ་མི་དྲ། །དྷ་ན་སམ་སྐྲྀ་འབྲོག་མི་གཉགས་ཛྙཱ་ན། །རིན་ཆེན་མཆོག་དང་གཙུག་ཏུ་གྱེ་རེ་མཆོག །དར་རྗེ་རྒྱལ་བའི་ཡོན་ཏན་གནུབས་བན་ཆེ། །མ་མོ་རྦོད་གཏོང་རྒྱུད་པའི་བླ་མ་ལ། །གསོལ་བ་འདེབས་སོ་བར་ཆད་བགེགས་ཚོགས་བཟློག །རྒྱལ་མཆོག་རྡོར་འཆང་རིགས་ལྔ་གསང་བའི་བདག །རྒྱལ་པོ་ཛ་དང་ཨིནྡྲ་ཀླུའི་བྱང་ཆུབ། གུ་ཧྱ་
བོ་དྷི་ཀུ་ཀུ་རོ་ལངས་བདེ། །རྡོ་རྗེ་བཞད་པ་རྣམས་ལ་གསོལ་བ་འདེབས། །པྲ་ཆེན་ཧསྟི་ཤཱཀྱ་སེང་གེ་དང་། དྷ་ན་རཀྵི་སྠཱི་ར་མ་ཏིའི་མཚན། །བདེ་གསལ་དྷརྨ་བོ་དྷི་ཟླ་བ་མགོན། །དོལ་སྒང་ལྕེ་སྟོན་སོགས་ལ༴ ཁང་སར་བ་དང་འབུམ་གྲགས་དངོས་གྲུབ་རྒྱལ། །སྲས་ཆུང་དགེ་སློང་དངོས་གྲུབ་མགོན་ཤཱཀྱ་རྒྱལ། །དཔལ་བཟང་རྡོར་རྒྱལ་བདེ་ལེགས་བཀའ་སྲུང་རྒྱུད། །གསོལ་བ་འདེབས་སོ་བསྟན་སྲུང་ཕྲིན་ལས་སྩོལ། །སྔ་འགྱུར་རྒྱུད་སྡེ་དུ་མའི་ཆུ་བོ་ཀུན། །མ་ལུས་གཅིག་ཏུ་གཞོལ་བའི་ཆོས་ཀྱི་མཛོད། །རྒྱུད་འབུམ་བླ་རྒྱུད་ལ། །གཙང་རྒྱུད་དང་དབུས་རྒྱུད་གཉིས་ལྡན་ཡོད་ཀྱང་། འདི་མན་ཆད་གཙང་རྒྱུད་བཞིན་བཀོད་པ་ཡིན། །གནུབས་བན་སངས་རྒྱས་ཡེ་ཤེས་རིན་པོ་ཆེ། །གསང་བདག་མི་གཟུགས་ཅན་ལ་གསོལ༴ །ཡོན་ཏན་རྒྱ་མཚོ་ཡེ་ཤེས་མྱང་ཤེར་མཆོག །ཡེ་འབྱུང་ཟུར་ཆེན་ཟུར་ཆུང་སྐྱོ་སྟོན་དང་། །གསང་བདག་འགྲོ་མགོན་ཤཱཀ་རྒྱལ་ལྷ་རྗེ་
ཆེ། །ཐང་སྟོན་འབུམ་མེ་རྣམས་ལ༴ །བླ་སྐྱབས་ལྕེ་སྟོན་སྒྲུབ་འབུམ་དཔལ་ཡེ་ཤེས། །མཁས་བཙུན་སངས་རྒྱས་ཡེ་བཟང་གཡུ་སྟོན་དང་། །ཟུར་མོ་སྲས་བཙུན་ཤཱཀྱ་མི་ཏྲ་རྗེ། །སོག་པོ་དཔལ་ཡེ་རྣམས་ལ༴ །ཀུན་བཟང་དཔལ་བ་བསོད་ནམས་རྒྱལ་མཚན་དང་། །རྣམ་གྲོལ་བཟང་པོ་ཆོས་ཀྱི་དབང་པོའི་ཞབས། །ཀརྨ་ཆོས་སྐྱོང་བཀྲ་ཤིས་ལྷུན་གྱིས་གྲུབ། །གཞན་ཕན་མཆོག་གི་རྡོར༴ །བསྟན་པའི་སྙིང་པོ་ཡོ་ག་རྣམ་གསུམ་སོགས། །ཟབ་རྒྱས་ཆོས་ཀྱི་རྒྱ་མཚོས་རང་དང་གཞན། །སྨིན་གྲོལ་ལམ་གྱི་འབྲས་བུ་མངོན་གྱུར་པའི། །བྱིན་རླབས་མཐུ་དཔུང་སྐྱེད་ཅིག་བླ་མའི་ཚོགས། ཁམས་གསུམ་འཁོར་བའི་རྒྱ་མཚོ་མ་སྟོང་བར། །ཟབ་རྒྱས་ཆོས་ཀྱི་བསྟན་པ་མ་ནུབ་ཅིང་། །ཉན་འཆད་སྒོམ་པའི་ཉི་མ་འབུམ་ཤར་བས། །འགྲོ་ཀུན་ཐར་ལམ་སྣང་བའི་སྒྲོན་མེར་ཤོག །ཅེས་
གསང་སྔགས་སྔ་འགྱུར་གྱི་རྒྱུད་འབུམ་རིན་པོ་ཆེའི་བླ་མ་རྒྱུད་པའི་གསོལ་འདེབས་འདི་ལྟ་བུ་ཞིག་དགོས་ཞེས། །གཙང་གི་རྣལ་འབྱོར་པ་སྐྱབས་མཆོག་དཔལ་གྱི་ཡང་ཡང་བསྐུལ་མོད་ཀྱང་། རྒྱུད་སྡེ་རེ་རེའི་བླ་རྒྱུད་ཀྱང་མི་གཅིག་པ་མང་བའི་ཕྱིར་དང་། རྒྱུད་འབུམ་སྤྱི་བསྡོམས་ཉིད་ལའང་གཙང་རྒྱུད་དབུས་རྒྱུད་སོ་སོར་མཆིས་པའི་དབང་གིས་མཐའ་དག་ནི་བརྗོད་པར་མི་སྤོབས་ཤིང་། དེ་དག་ལས་བརྒྱུད་ལུགས་རེ་མདོར་བསྡུས་ཏེ་བཀོད་པའི་དགེ་བས་ཟབ་ཆོས་འདི་དག་འཇིག་རྟེན་ཀུན་ཏུ་དར་ཞིང་རྒྱས་པའི་ཆ་རྐྱེན་དུ་གྱུར་ཅིག། ༈ །།ཧྲཱིཿ བདེ་བ་ཅན་གྱི་ཞིང་མཆོག་དམ་པ་ནས། །བཅོམ་ལྡན་རིགས་ཀྱི་བདག་པོ་སྣང་མཐའ་ཡས། །དེང་འདིར་གསོལ་བ་འདེབས་པའི་བུ་རྣམས་ལ། །འཆི་མེད་ཚེ་ཡི་དངོས་གྲུབ་སྩོལ། །ཡེ་ཤེས་ལྔ་ལྡན་ཐིག་ལེའི་གཞལ་ཡས་ནས། །ལོངས་སྤྱོད་རྫོགས་སྐུ་རིགས་ལྔ་ཚེ་དཔག་མེད། །དེང་འདིར་གསོལ༴ འཆི་མེད་ཚེ༴ །རྣམ་དག་པདྨ་འོད་ཀྱི་ཕོ་བྲང་ནས། །ཚེ་དབང་གྲུབ་མཆོག་པདྨ་འཆི་མེད་སྐུ། །དེང་འདིར༴ །འཆི་མེད༴ །
སྙིགས་དུས་འགྲོ་ལ་ཕན་བདེ་སྩོལ་མཁས་པའི། །འདྲེན་མཆོག་རིག་འཛིན་ཧཱུྃ་ནག་མེད་འབར་མཚན། །དེང་འདིར༴ །འཆི་མེད༴ །རིག་སྟོང་རྫོགས་པ་ཆེན་པོའི་ཡང་དག་དོན། །མ་ནོར་སྟོན་མཛད་པདྨ་ལེགས་གྲུབ་སྩལ། །དེང་འདིར་༴ །འཆི་མེད༴ །དམ་ཆོས་ཚུལ་བཞིན་སྒྲུབ་པའི་སྐྱེས་བུ་རྣམས། །ལོང་མེད་འཆི་བདག་བདུད་ཀྱི་རབ་བཅོམས་པའི། །འཇིགས་ཆེན་འདི་ལས་མཐར་ན་བྱང་ཆུབ་ལམ། །མྱུར་དུ་བགྲོད་ནས་འགྲོ་ཀུན་འདྲེན་པར་ཤོག །ཞེས་པ་འདི་ནི། ཚེ་སྒྲུབ་གནམ་ལྕགས་རྡོ་རྗེའི་རྒྱུད་པའི་གསོལ་འདེབས་ཉུང་བསྡུས་སོ།། ༈ །ཁྱབ་བདག་རིགས་ཀྱི་བདག་པོ་འོད་དཔག་མེད། །འགྲོ་ལ་བརྩེ་བའི་བདག་ཉིད་སྤྱན་རས་གཟིགས། །གསོལ་བ་འདེབས་སོ་བདག་སོགས་གདུལ་བྱའི་ཚོགས། །སྐྱེད་མེད་ཀློང་དུ་གྲོལ་བར་བྱིན་གྱིས་རློབས། །གངས་
ཅན་འགྲོ་བའི་ཕ་གཅིག་སྲོང་བཙན་སྒམ། །སྣང་སྲིད་ཟིལ་གནོན་རྒྱལ་བ་པདྨ་འབྱུང་། །གསོལ་བ་འདེབས་སོ་དུས་མཐའི་འགྲོ་བ་ཀུན། །ཟག་མེད་འོད་སྐུར་གྲོལ་བར་བྱིན་གྱིས་རློབས། །རྩོད་ལྡན་འགྲོ་བའི་དེད་དཔོན་ལས་འཕྲོ་གླིང་། །དཀྱིལ་འཁོར་ལྷག་ཚོགས་རྒྱལ་བ་རྒྱ་མཚོར་བཅས། །གསོལ་བ་འདེབས་སོ་ཁམས་གསུམ་སེམས་ཅན་རྣམས། །ཐུགས་རྗེའི་ཟེར་གྱིས་གྲོལ་བར་བྱིན་གྱིས་རློབས། །རྩ་རྒྱུད་བླ་མ་རབ་འབྱམས་རྒྱལ་ཀུན་གྱི། །ཐུགས་རྗེ་གཅིག་བསྡུས་འཕགས་མཆོག་སྤྱན་རས་གཟིགས། ཁྱེད་ཀྱི་ཐུགས་རྗེ་ནུས་པའི་ཉི་འོད་ཀྱིས། །སྡུག་བསྔལ་སྲིད་མཚོ་སྐེམས་པར་ད་མཛོད་ཅིག །ཉོན་མོངས་ལས་ཀྱི་རླུང་ཆེན་བཟློག་ཏུ་གསོལ། །མ་རིག་མུན་པའི་དམག་རུམ་གསལ་དུ་གསོལ། །དངོས་གྲུབ་ཕན་བདེའི་ཆར་རྒྱུན་དབབ་ཏུ་གསོལ། །འགྲོ་རྣམས་བདེ་ཆེན་ཞིང་དུ་ཁྲིད་དུ་གསོལ། །ཅེས། འཕགས་པ་
ཐུགས་རྗེ་ཆེན་པོ་ངན་སོང་རང་གྲོལ་རྒྱུད་པའི་གསོལ་འདེབས་སོ། ཨོཾ་ཨཱཿཧཱུྃ། ཆགས་མེད་འགྲོ་ལ་ཐུགས་རྗེས་ཆགས་པའི་མགོན། །སྤྲོས་དང་བྲལ་ཡང་རྣམ་འགྱུར་སྤྲོ་མཁས་པ། ཁྱབ་བདག་ཀུན་བཟང་སྣང་བ་མཐའ་ཡས་ཀྱིས། །བདག་སོགས་བྱིན་གྱིས་རློབས་ཤིག་ཐུགས་རྗེ་ཅན། །ཟླ་བྲལ་ཐུགས་རྗེའི་ཟླ་སྣང་རབ་རྒྱས་པས། །འགྲོ་བློའི་མུན་སེལ་འགྲོ་མགོན་སྤྱན་རས་གཟིགས། །གདུག་པ་འདུལ་མཛད་གར་གྱི་དབང་ཕྱུག་དཔལ། །མཆོག་མཐུན་དངོས་གྲུབ་སྩོལ་གཅིག་ལྷག་པའི་ལྷ། །རྒྱལ་དང་དེ་སྲས་ཐུགས་རྗེ་གཅིག་བསྡུས་པ། །མཁྱེན་དང་བརྩེ་བའི་བདག་ཉིད་སྤྲུལ་པའི་སྐུ། །དཔལ་ལྡན་པདྨ་ཐོད་ཕྲེང་སྲིད་ཞིའི་དཔལ། །མགོན་མེད་བདག་སོགས་སྐྱོབ་ཅིག་འགྲོ་བའི་མགོན། །བདེ་སྟོང་ཡེ་ཤེས་སྩོལ་མཛད་མཚོ་རྒྱལ་མ། །གདོས་བཅས་འོད་སྐུར་གྲོལ་བ་ཏིང་འཛིན་བཟང་། །བདག་སོགས་
འགྲོ་བ་ཀུན་ཀྱང་ཁྱེད་བཞིན་དུ། །གཉིས་མེད་ཀློང་དུ་སྒྲོལ་ཅིག་དྲིན་ཅན་གཉིས། །ད་དུས་དུས་ངན་ངན་སྤྱོད་སྐྱེ་འགྲོ་ཀུན། །ཐར་ལམ་ལམ་བཟང་བཟང་པོར་འཁྲིད་མཛད་རྗེ། །དུས་གསུམ་གསུམ་རིག་རིག་འཛིན་འཇའ་ཚོན་སྙིང་། །སྐྱབས་མཆོག་མཆོག་དངོས་དངོས་གྲུབ་དུས་འདིར་སྩོལ། །སྐྱབས་གནས་ཀུན་ཀྱང་རྩ་བའི་བླ་མའི་སྐུར། །རང་རིག་ཀློང་དུ་དབྱེར་མེད་གཉིས་འཛིན་བྲལ། །འཕྲུལ་པའི་གཡུལ་ལས་རྣམ་པར་རྒྱལ་བའི་དཔལ། །ཡེ་ཤེས་ཐུགས་རྗེས་གཟིགས་ཤིག་དྲིན་ཅན་རྗེ། །བླ་མའི་བླ་མ་མཆོག་གྱུར་ཁྱེད་རྣམས་ཀྱིས། །འཁོར་བར་འཁོར་བ་བདག་སོགས་རྗེས་བཟུང་ནས། །ཐམས་ཅད་ཐམས་ཅད་མཁྱེན་པའི་གོ་འཕངས་ལ། །སྐད་ཅིག་སྐད་ཅིག་འདི་ལ་འགོད་དུ་གསོལ། །ཅེས་པ། རྟ་ཕག་ཡིད་བཞིན་ནོར་བུའི་རྒྱུད་པའི་གསོལ་འདེབས་ཏེ། དེ་ལྟར་ལེ་མཚན་གོང་འོག་འདི་རྣམས་ནི། ལྷ་
བཙུན་ཕྲིན་ལས་གསང་སྔགས་ཀྱི་བསྐུལ་ངོར་བཀོད་པའོ། །ཨོཾ་ཨཱཿཧཱུྃ། ཐབས་ཤེས་བདེ་སྟོང་མེ་རླུང་འདུ་འཕྲོ་ཡིས། །བཅུད་ལྡན་ཟག་མེད་བདུད་རྩིའི་རོལ་མཚོ་བསྐྱིལ། །ངོ་མཚར་རྨད་བྱུང་འདོད་ཡོན་སྣ་ཚོགས་འཕྲོ། །རབ་འབྱམས་རྒྱལ་བ་མ་ལུས་མཆོད་པར་གྱི། །སྤྲོས་བྲལ་སྟོང་ཉིད་ཡེ་ཤེས་སྣོད་མཆོག་ཏུ། །ཟག་མེད་བདེ་ཆེན་བདུད་རྩིས་ཡོངས་གངས་བས། །དགོངས་བརྒྱུད་བླ་མ་རྒྱལ་བའི་ཚོགས་མཆོད་པས། །རང་རིགས་རྟོགས་པ་མངོན་གྱུར་དངོས་གྲུབ་སྩོལ། །གསལ་མདངས་མ་འགགས་ལྷུན་གྲུབ་སྣོད་མཆོག་ཏུ། །ཞེན་མེད་འོད་གསལ་ཉམས་ཀྱི་བདུད་རྩིས་གཏམ། །བརྡའ་རྒྱུད་གྲུབ་མཆོག་རིན་ཆེན་རྣམས་མཆོད་པས། །སྣང་སྲིད་འོད་སྐུར་གྲོལ་བའི་དངོས་གྲུབ་སྩོལ། །ཅིར་སྣང་དག་པ་རབ་འབྱམས་སྣོད་ནང་དུ། །གངས་ཤར་རང་གྲོལ་འཛིན་མེད་བདུད་རྩིས་བཀང་།
སྙན་རྒྱུད་བཤད་སྒྲུབ་བླ་མ་ཀུན་མཆོད་པས། །འབད་མེད་ཡོངས་གྲོལ་ཆེན་པོའི་དངོས་གྲུབ་སྩོལ། །དྲིན་ཅན་བླ་མ་ཡི་དམ་དཀྱིལ་འཁོར་ལྷ། །རྩ་ཁམས་དག་པའི་དཔའ་བོ་རྣལ་འབྱོར་མ། །མ་རུངས་འཇོམས་མཛད་དམ་ཅན་རྒྱ་མཚོ་ལ། །ཟག་མེད་བདུད་རྩིའི་མཆོད་པ་འདི་འབུལ་གྱི། །མཆོག་མཐུན་དངོས་གྲུབ་དུས་འདིར་སྩལ་དུ་གསོལ། །ཅེས་པའི་ཇ་མཆོད་འདི། །སྦྱང་པ་མངོན་གྱུར་གྱི་རྣལ་འབྱོར་པ་ཤཱི་ལ་བྷ་དྲས་བསྐུལ་ངོར་བྲིས་པའོ།། ༈ །།ལྷ་བཅས་འཇིག་རྟེན་ཀུན་གྱི་མགོན་ཅིག་པུ། །འགྲོ་བ་ཡོངས་ལ་བདེ་ལེགས་སྩོལ་བའི་ཕ། །རྗེ་བཙུན་མཆོག་གི་བླ་མ་མཚུངས་མེད་རྗེ། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །མཐོང་ཐོས་དྲན་པ་ཙམ་གྱིས་སྲིད་པ་འཇིལ། །ཐར་པའི་ལམ་མཆོག་སྟོན་ལ་ངལ་མེད་པའི། །ཕ་ཁྱོད་སྙིང་རྗེའི་གཟིགས་ལ་མི་གཡེལ་བར། །གསོལ་
འདེབས་བུ་ལ་ཐུགས་ཀྱི་དགོངས་པར་མཛོད། །སྐྱེ་བ་ཀུན་ཏུ་དཔལ་ལྡན་བླ་མ་དང་། །རྟག་ཏུ་མི་འབྲལ་ཐེག་ཆེན་ཟབ་མོའི་དོན། །མངོན་དུ་གྱུར་ཞིང་དོན་གཉིས་མཐར་ཕྱིན་པར། །གསོལ་བཏབ་འབྲས་བུ་འགྲུབ་པར་མཛད་དུ་གསོལ། །ཅེས་པ་ནི། རྗེ་བཙུན་བླ་མ་མཆོག་གི་ཞབས་འབྲིང་བ་ནི་རྡེ་པ་རེ་ཞེས་པའི་བསྐུལ་ངོར་བཀོད་པའོ།། ༈ །།ན་མོ་གུ་རུ་བྷྱཿ མཁའ་མཉམ་འགྲོ་ཀུན་བདེ་ཆེན་ལ་འགོད་ཕྱིར། །བདག་གི་རྒྱལ་བ་ཀུན་འདུས་བླ་མ་སྒྲུབ། །རང་ཉིད་རིགས་འདུས་རྡོ་རྗེ་སེམས་དཔར་གསལ། །སྤྱི་གཙུག་སེང་ཁྲི་པད་ཟླའི་གདན་གྱི་སྟེང་། །དྲིན་ཅན་བླ་མ་ལོངས་སྤྱོད་རྫོགས་པའི་སྐུ། །མཐིང་གསལ་རྡོ་རྗེ་དྲིལ་འཛིན་སྐྱིལ་ཀྲུང་བཞུགས། །ཡུམ་ཆེན་མཛེས་འཛུམ་དཀར་དམར་གྲི་ཐོད་འཁྲིལ། །ཡབ་ཡུམ་གཉིས་
ཀ་དར་དང་རིན་ཆེན་རྒྱན། །འཇའ་འོད་ཀློང་ན་གཟི་མདངས་ལམ་མེར་བཞུགས། །ཀུན་བཟང་རྡོར་འཆང་པདྨ་འབྱུང་གནས་སོགས། །རྣམ་འགྱུར་ཆ་ལུགས་མིང་ཚུལ་ཅིར་སྣང་ཀུན། །དབྱེར་མེད་དྲིན་ཅན་བླ་མའི་རོལ་པར་གཅིག །སྣང་སྲིད་ཕྱི་ནང་དངོས་པོ་ལུས་ལོངས་སྤྱོད། །མཐའ་དག་གཏན་མདུན་བཅས་པ་མཆོད་པར་འབུལ།། ༈ །།མ་ཧཱ་གུ་རུ་སརྦ་སིདྡྷི་ཧཱུྃ། །མཐའ་ཡས་ཞིང་དུ་རྣམ་འཕྲུལ་སྣ་ཚོགས་ཀྱིས། །སྐྱེ་དགུའི་སྐྱབས་མགོན་དཔུང་གཉེན་གཅིག་པུ་ཉིད། །བདག་སོགས་སྣང་ངོར་རྡོ་རྗེའི་སློབ་དཔོན་ཚུལ། །སྟོན་མཛད་དྲིན་ཅན་བླ་མར་གསོལ་བ་འདེབས། །ཐོག་མེད་དུས་ནས་ལས་ཉོན་ཤུགས་གོམས་པས། །མཐའ་མེད་སྲིད་མཚོར་འཁྱམས་པའི་གདུལ་བྱ་ལ། །ཐོག་མེད་མྱུར་འགྱོགས་ཐུགས་རྗེའི་ལྕགས་ཀྱུ་ཡིས། །མཐའ་མེད་འཁོར་བའི་འདམ་ལས་མྱུར་དུ་དྲོངས།
དཀོན་མཆོག་བླ་མ་རྒྱལ་བ་རྒྱ་མཚོའི་ཚོགས། །གཅིག་བསྡུས་གཟུགས་སྐུའི་རོལ་གར་སྤྲུལ་མཁས་ཁྱོད། །བདག་ཉིད་དད་པའི་ཟེའུ་འབྲུ་མངོན་གསལ་རྩེར། །བྱང་ཆུབ་བར་དུ་གཡོ་མེད་བརྟན་བཞུགས་གསོལ། །ལས་ཉོན་དུག་ཆེན་ནད་ལས་གྲོལ་བར་མཛོད། །བདེ་ཆེན་ཡེ་ཤེས་སྣང་བ་རྒྱས་པར་མཛོད། །བཟོད་དཀའ་འཁོར་བའི་མཚོ་ཆེན་སྐེམ་པར་མཛོད། ཁྱབ་བདག་སྐུ་བཞིའི་དབང་ཕྱུག་མྱུར་ཐོབ་མཛོད། །བླ་མའི་སྐུ་ལས་བྱིན་རླབས་བདུད་རྩིའི་རྒྱུན། །ཆེར་བབས་ཚངས་བུག་ནས་ཞུགས་ལུས་ཀུན་ཁྱབ། །དབང་ཐོབ་སྒྲིབ་དག་སྐུ་བཞིའི་རྟེན་འབྲེལ་འགྲིགས། །སླར་ཡང་བླ་མ་འོད་ཞུ་རང་ལ་ཐིམ། །དུས་གསུམ་འགྱུ་དྲན་ཕྲ་རག་རྟོགས་ཚོགས་ཀུན། །མ་སྤངས་མི་འབྲེང་སྒོམ་ཡེངས་མེད་པའི་ཀློང་། །ཅིར་སྣང་རང་གྲོལ་གཤིས་ཀྱི་འདུག་
ཚུལ་ཐོག །མཉམ་ཡང་ཆེན་པོ་བླ་མའི་རྣལ་འབྱོར་དངོས། །སྒྲིབ་བྲལ་ཇི་བཞིན་རྟོགས་དེའི་དགེ་འབྲས་ཀུན། ཁམས་གསུམ་མ་རྒན་དོན་དུ་ཡོངས་སུ་བསྔོ། །ཅེས་པ་ནི། གུས་ལྡན་ཤཱཀྱ་བསྟན་འཛིན་སོགས་ཀྱི་བསྐུལ་ངོར་ལོང་ཡུལ་པདྨ་ཆོས་གླིང་ཞེས་བྱ་བའི་གནས་སུ་བཀོད་པའོ། །ཕྱོགས་བཅུ་དུས་གསུམ་རྒྱལ་བའི་དཀྱིལ་འཁོར་གྱི། །ཐུགས་རྗེ་གཅིག་བསྡུས་དཔལ་ལྡན་རྡོ་རྗེ་འཛིན། །དྲིན་ཅན་རྗེ་བཙུན་བླ་མ་ཆོས་ཀྱི་རྗེ། །བདག་གི་སྤྱི་གཙུག་དད་བརྒྱའི་འདབས་སྟོང་དབུས། །འབྲལ་བ་མེད་པ་རྟགས་ཏུ་བཞུགས་ནས་ཀྱང་། །དུས་འདི་ནས་བཟུང་བྱང་ཆུབ་མཐར་ཐུག་བར། །བྱམས་ཆེན་ཐུགས་རྗེས་བཟུང་ཞིང་བྱིན་བརླབས་ནས། །སྨིན་གྲོལ་མཆོག་གི་དངོས་གྲུབ་སྩོལ། །ཚེ་རབས་ཀུན་ཏུ་དཔལ་ལྡན་བླ་མ་དང་། །འབྲལ་མེད་ཐེག་ཆེན་ཆོས་ལ་གུས་སྤྱོད་ཅིང་། །རྣམ་མང་སྤྲུལ་པ་རྒྱ་མཚོ་མཐའ་ཡས་ཀྱིས། །འགྲོ་ལ་ཕན་པ་དཔག་མེད་
བསྒྲུབ་པར་ཤོག །ཕྱོགས་བཅུའི་ཞིང་གི་རྒྱལ་བ་སྲས་བཅས་ཀྱིས། །བྱང་ཆུབ་ཐུགས་བསྐྱེད་འགྲོ་ཕན་གང་མཛད་པའི། །རླབས་ཆེན་སྤྱོད་པའི་ཕྲིན་ལས་མ་ལུས་ཀུན། །གཅིག་བསྡུས་མཐུ་སྟོབས་བདག་གིས་འགྲུབ་པར་ཤོག །དཔལ་ལྡན་བླ་མའི་བྱིན་བརླབས་ནུས་སྟོབས་དང་། །རྒྱལ་བ་སྲས་བཅས་ཐུགས་རྗེ་རྨད་བྱུང་མཐུས། །རྣམ་དག་སྨོན་ལམ་བདེན་ཚིག་འགྲུབ་པ་དང་། །མཆོག་གི་དངོས་གྲུབ་མྱུར་དུ་ཐོབ་པར་ཤོག །ཅེས་པ་འདི། ཚེས་རི་རྒྱལ་མཚན་གྱི་རྩེ་མོ་རྣམ་པར་བཀོད་པ་ནས། ཀརྨ་ཆོས་ཉིད་དཔལ་བཟང་གིས་བསྐུལ་ངོར་བྲིས་པའོ།། ༈ །།ན་་མོ་གུ་རུ་རཏྣ་སརྦ་སིདྡྷི་ཧཱུྃ། །གྲངས་མེད་བསྐལ་མང་གོང་ནས་སེམས་བསྐྱེད་ཅིང་། །འགྲོ་ལ་ཕན་བདེ་སྒྲུབ་པར་དམ་བཅས་པའི། །སྨོན་ལམ་འབྲས་མཆོག་མངོན་གྱུར་དྲིན་ཅན་རྗེ། །རྟག་པར་སྤྱི་བོའི་རྒྱན་དུ་བཞུགས་སུ་གསོལ། །སྔོན་ཚེ་
རྒྱལ་བའི་ཞབས་འབྲིང་ཀུན་དགའ་བོ། །གངས་ཅན་བློ་མུན་བསེལ་མཛད་ཐོན་མིའི་ཞབས། །སྔ་འགྱུར་བསྟན་པའི་སྒྲོན་མེ་བཻ་རོ་རྗེ། །མཆོག་སྤྲུལ་ཟླ་མེད་རྣམས་ལ་གསོལ་བ་འདེབས། །ལྔ་རིགས་མཁས་པའི་གཙུག་རྒྱན་ས་པ་ཞབས། །མཆོག་དངོས་བདེ་བླག་གྲུབ་པའི་ཁྱུང་པོ་བ། །ཟབ་གཏེར་མངའ་བདག་མཚུངས་བྲལ་རྡོ་རྗེ་གླིང་། །འགྲོ་བའི་འདྲེན་མཆོག་རྣམས་ལ་གསོལ་བ་འདེབས། །ཞིང་ཁམས་ཀུན་ཉུལ་དཔའ་བོ་ཀུན་སྐྱོང་གླིང་། །སྙིགས་དུས་གདུལ་བྱ་འདྲེན་མཁས་མཆོག་ལྡན་མགོན། །བསྟན་པའི་སྲོག་ཤིང་བསྟན་འཛིན་རྡོ་རྗེ་དཔལ། །རྣམ་འདྲེན་མཚུངས་མེད་རྣམས་ལ་གསོལ༴ །ད་དུས་གདུལ་དཀའི་སྐྱེ་བོ་མཐའ་ཡས་རྣམས། །ཕན་བདེའི་ལམ་ལ་འཁྲིད་ཕྱིར་གང་འདུལ་གཟུགས། །སྤྲུལ་བསྒྱུར་ཟློས་གར་དུ་མས་འགྲོ་འདུལ་བ། །རྩ་བའི་
བླ་མ་མཆོག་དེར་གསོལ་བ་འདེབས། །དཀྱིལ་འཁོར་ཀུན་བདག་རྡོ་རྗེའི་སློབ་དཔོན་ཉིད། །སངས་རྒྱས་ཀུན་བདག་རྡོ་རྗེའི་སློབ་དཔོན་ཉིད། །སངས་རྒྱས་ཀུན་ལས་ལྷག་པའི་མཁྱེན་བརྩེ་ཅན། །མགོན་ཁྱོད་བསྐལ་བརྒྱར་ཞབས་པད་རབ་བརྟན་ཞིང་། །བདག་སོགས་འགྲོ་ལ་སྨིན་གྲོལ་དངོས་གྲུབ་སྩོལ། །ཅེས་པ་ཡང་དད་ལྡན་རིག་འཛིན་དབང་པོའི་མཚན་ཅན་ལའོ།། ༈ །།རྒྱལ་བའི་དཀྱིལ་འཁོར་རབ་འབྱམས་ཀུན་གྱི་གཙོ། །སྲིད་ཞིའི་ཁྱབ་བདག་དཔལ་མགོན་བླ་མ་མཆོག །སྤྱི་གཙུག་དད་བརྒྱའི་གེ་སར་སྙིང་པོའི་དབུས། །ཇི་སྲིད་བྱང་ཆུབ་བར་དུ་རྟག་བཞུགས་གསོལ། །བདག་དང་མཁའ་མཉམ་འགྲོ་ལ་རྩེར་དགོངས་ཏེ། །དབང་བཞིས་རྒྱུད་སྨིན་གདམས་པའི་དོན་གཉིས་འགྲུབ། །སྐུ་གསུམ་དབྱེར་མེད་མཆོག་ལ་མྱུར་འགོད་པའི། །ཐུགས་རྗེའི་ཕྲིན་ལས་རྨད་བྱུང་བསྟན་དུ་གསོལ། །སྐྱེ་བ་ཀུན་ཏུ་རྡོ་རྗེ་སློབ་དཔོན་དང་། །རྟག་པར་མི་འབྲལ་ཐེག་ཆེན་སྙིང་པོའི་དོན། །
མངོན་དུ་གྱུར་ནས་རྣམ་འཕྲུལ་རྒྱ་མཚོ་ཡིས། །འགྲོ་ཕན་མཐའ་ཡས་བདག་གི་འགྲུབ་གྱུར་རིག །ཅེས། དགེ་སློང་བརྩོན་འགྲུས་ཆོས་འཕེལ་གྲོགས་མཆེད་ལའོ།། ༈ །།སངས་རྒྱས་ཀུན་འདུས་དཔལ་ལྡན་བླ་མ་མཆོག །བདག་གི་སྤྱི་གཙུག་དད་པའི་མདྨོ་དབུས། །འབྲལ་བ་མེད་པར་རྟགས་ཏུ་བཞུགས་ནས་ཀྱང་། །སྨིན་གྲོལ་བདུད་རྩིས་བདག་སོགས་རྗེས་བཟུང་གསོལ། །མགོན་ཁྱོད་སྐུ་ཚེ་བསྐལ་བརྒྱར་ཞབས་བརྟན་ཞིང་། །ཟབ་རྒྱས་ཆོས་འཁོར་རྒྱུན་ཆད་མེད་པ་དང་། །ཐུགས་རྗེའི་ཕྲིན་ལས་རྣམ་རོལ་དཔག་མེད་ཀྱིས། །མཁའ་མཉམ་འགྲོ་ཀུན་གྲོལ་བར་མཛད་དུ་གསོལ། །སྐྱེ་བ་ཀུན་ཏུ་དཔལ་ལྡན་བླ་མ་དང་། །འབྲལ་མེད་ཆོས་ཀྱི་ཐུགས་རྗེས་རྟག་སྐྱོང་ཞིང་། །བླ་མེད་བྱང་ཆུབ་སྙིང་པོའི་གོ་འཕངས་ལ། །མྱུར་དུ་བསྒྲོད་ནས་འཁོར་བ་སྟོངས་པར་ཤོག །ཅེས། བསོད་ནམས་ཕུན་ཚོགས་ལ་གདམས་པའོ།། ༈ །།ན་མཿགུ་རུ་སརྦ་བུདྔྷ་བོ་དྷི་ས་ཏྭ་བྷྱཿ །རྒྱལ་བ་ཀུན་
གྱི་ཐུགས་རྗེའི་མཁའ་དབྱིངས་ལས། །ངོ་མཚར་རྨད་དུ་བྱུང་བའི་རིན་པོ་ཆེ། །འདོད་དགུའི་རེ་བ་སྐོངས་མཛད་ཆོས་ཀྱི་རྗེ། །མཆོག་གི་དཔལ་ལྡན་བླ་མར་གསོལ་བ་འདེབས། །བསྐལ་པ་གྲངས་མེད་རྒྱ་མཚོ་ཇི་སྲིད་དུ། །སྐྱེ་སྤྲུལ་དཔག་མེད་རྒྱ་མཚོ་དུ་མ་ཡིས། །གདུལ་བྱའི་ལེགས་ལམ་རྒྱ་མཚོ་སྣང་མཛད་པ། །བཀའ་དྲིན་འཁོར་མེད་མཆོག་ལ༴ །འགྲོ་བའི་རྣམ་འདྲེན་ཤཱཀྱའི་ཟླ་ཟེར་གྱིས། །ལེགས་སྨིན་དགྲ་བཅོམ་འཕགས་མཆོག་ཀུན་དགའ་བོ། །བསྟན་པའི་ཀུ་མུད་ཕྱོགས་མཐར་རྒྱས་མཛད་དེར། །གསོལ་བ་འདེབས་སོ་ཆོས་ཀུན་ཁོང་ཆུད་ཤོག །སྤྱན་རས་གཟིགས་དབང་སྲོང་བཙན་ཐུགས་རྗེའི་མཁར། །སྐྱེས་མཆོག་ཐོན་མིའི་མཁྱེན་རབ་རྟ་བདུན་འཕྱོ། །རིག་གནས་དམ་ཆོས་ཚ་ཟེར་སྟོང་འགྱོད་པར། །གསོལ་བ་འདེབས་སོ་འགྲོ་བློའི་མུན་སེལ་ཤོག །མདོ་སྔགས་རྒྱུ་འབྲས་གསུང་རབ་
ཁང་བཟང་ཚོགས། །མཛེས་བྱེད་སྒྲ་བསྒྱུར་ལྷ་བྲན་གྲངས་མེད་དབུས། །མཁྱེན་བརྩེའི་སྤྱན་སྟོང་བཀྲ་བ་བཻ་རོ་རྗེ། །གསོལ་བ་འདེབས་སོ་ཤེས་བྱ་ཀུན་མཁྱེན་ཤོག །རྒྱལ་བ་ཀུན་ཡབ་པད་འབྱུང་ཐུགས་རྗེའི་མཚོར། །ངོ་མཚར་འདོད་འབྱུང་གཏེར་འཛིན་དེད་དཔོན་མཆོག །ཆོས་ཀྱི་འབྱུང་གནས་མཚུངས་བྲལ་རྡོ་རྗེ་གླིང་། །གསོལ་བ་འདེབས་སོ་ཚེ་གཅིག་སངས་རྒྱས་ཤོག །དགའ་ལྡན་ཆོས་ཀྱི་ཕོ་བྲང་ས་སྐྱའི་གདུང་། །ཆོས་ཀྱི་སྤྱན་ལྡན་བྱམས་མགོན་ཀུན་དགའི་མཚན། །གནས་ལྔ་རིག་པའི་པ་ཆེན་བསྟན་པའི་བདག །གསོལ་བ་འདེབས་སོ་འགྲོ་བའི་འདྲེན་པར་ཤོག །སྟུག་པོ་བཀོད་མཚུངས་ཤངས་ཡུལ་ཞོང་ཞོང་ནས། །སྐལ་ལྡན་མཆོག་དངོས་སྟེར་མཛད་རྡོ་རྗེ་འཆང་། །ཐབས་མཁས་གང་འདུལ་གཟུགས་འཛིན་ཁྱུང་པོ་བ། །གསོལ་བ་འདེབས་སོ་སྒྱུ་ལུས་ལྟར་འགྲུབ་ཤོག །གུ་རུའི་གཏེར་ཆོས་
རིན་ཆེན་གསེར་གྱི་གླིང་། །ཟབ་དགུའི་བང་མཛོད་འདོད་འབྱུང་དབང་སྐུར་བ། །གདེང་ཅན་མཁའ་འགྲོའི་གཙོ་བོ་ཀུན་སྐྱོང་གླིང་། །གསོལ་བ་འདེབས་སོ་མཁའ་སྤྱོད་མྱུར་འགྲུབ་ཤོག །བོད་ཁམས་མཐའ་དམག་གདུགས་པས་གཙེས་པ་ལས། །ཡོངས་སུ་སྐྱོབས་མཛད་གདུལ་ཐབས་སྣ་ཚོགས་ཀྱིས། །འགྲོ་བ་སྐྱབས་མཛད་རིག་འཛིན་མཆོག་ལྡན་མགོན། །གསོལ་བ་འདེབས་སོ་གདུག་པ་ཐུལ་བར་ཤོག །སྙིགས་དུས་རྩོད་ལྡན་ཐ་མའི་དུས་ཉིད་ལའང་། །ཤཱཀྱའི་བསྟན་པ་རྨ་མེད་སྤེལ་མཛད་པའི། །སྔ་འགྱུར་སྙིང་པོའི་བསྟན་འཛིན་རྡོ་རྗེ་དཔལ། །གསོལ་བ་འདེབས་སོ་རྒྱལ་བསྟན་འཛིན་པར་ཤོག །སྣ་ཚོགས་འགྲོ་བའི་མོས་ཁམས་བསམ་ཡས་ལ། །དེ་དང་མཚམས་པའི་གང་འདུལ་ཕྲིན་ལས་ཀྱིས། །བྱང་ཆུབ་བླ་མེད་སྟེར་མཁས་ལེགས་གྲུབ་སྩལ། །གསོལ་བ་འདེབས་སོ་འགྲོ་ཕན་འགྲུབ་པར་ཤོག །སྔོན་རབ་
དགེ་འབྲས་དཔག་མེད་ལེགས་བསྐྲུན་ཅིང་། །རླབས་ཆེན་བྱང་ཆུབ་སྤྱོད་ལ་ངལ་མེད་པས། །ངོ་མཚར་སྐྱེས་རབ་འཕྲེང་བར་སྤྲུལ་མཛད་དེར། །གསོལ་བ་འདེབས་སོ་འབྲལ་མེད་བྱིན་གྱིས་རློབས། །དེ་ལྟར་གསོལ་བ་བཏབ་ལས་བྱུང་བའི་དགེས། །བདག་སོགས་འདི་གཟུངས་ཚེ་རབ་ཐམས་ཅད་དུ། །མཉམ་མེད་བླ་མ་མཆོག་གི་རྗེས་བཟུང་ནས། །རྟག་ཏུ་བསྟན་འགྲོའི་དོན་མཆོག་འགྲུབ་པར་ཤོག །ཅེས་པའི་སྐྱེས་རབ་གསོལ་འདེབས་འདི། །དགེ་སློང་ཆོས་བསྟན་འཛིན་དཔལ་བཟང་པོས་བསྐུལ་ངོར་བཀོད་པའོ།། ༈ །།ན་མོ་གུ་རུ། །རང་ཉིད་སྤྱི་གཙུག་སེང་ཁྲི་པད་ཟླའི་སྟེང་། །དྲིན་ཅན་རྗེ་བཙུན་རྩ་བའི་བླ་མ་ནི། །མཛེས་འཛུམ་མཚན་དཔེ་གཟི་འོད་འབར་བཞུགས་པའི། །མཐའ་སྐོར་རྒྱུད་པའི་བླ་མ་སྤྲིན་ལྟར་སྟིབས། །སྣང་སྲིད་བདག་ལུས་ལོངས་སྤྱོད་མ་ལུས་ཀུན། །མཆོད་པར་བཞེས་ལ་བདག་སོགས་སེམས་ཅན་རྣམས། །
ཐུགས་རྗེས་གཟུངས་ནས་འཁོར་བའི་རྒྱ་མཚོ་ལས། །མྱུར་དུ་སྒྲོལ་བའི་ཕྲིན་ལས་མཛད་དུ་གསོལ། །ཕྱོགས་བཅུའི་ཞིང་ཁམས་རྒྱ་མཚོ་མཐའ་ཡས་ཀྱིས། །དཀྱིལ་འཁོར་ལྷ་ཚོགས་རབ་འབྱམས་མ་ལུས་པའི། །ཐུགས་རྗེ་གཅིག་བསྡུས་དཔལ་ལྡན་བླ་མ་ཞེས། །གྲགས་པ་རབ་དཀར་ཀུན་ཁྱབ་དེར་ཕྱག་འཚལ། །ཞིང་ཁམས་རྒྱ་མཚོ་རྣམ་འཕྲུལ་དཔག་མེད་ཀྱིས། །འགྲོ་རེའི་མདུན་དུ་རྫུ་འཕྲུལ་བཀོད་པ་རེས། །ཕན་དང་བདེ་བ་བླ་མེད་སྟེར་བའི་བདག །མཚུངས་བྲལ་རྒྱལ་བ་མཆོག་དེར་གསོལ་བ་འདེབས། །གནས་སྐབས་འདོད་དོན་ཕྲ་མོ་ཙམ་ལའང་། །ཇི་ལྟར་སྨོན་པ་གེགས་མེད་སྩོལ་བྱེད་ན། །གཏན་གྱི་བདེ་བ་བླ་མེད་བྱང་ཆུབ་མཆོག །འདོད་ལ་ཅི་ཕྱིར་ཁྱོད་ཀྱི་སྦྱིན་མི་མཛད། །རྣམ་རོལ་བསམ་མི་ཁྱབ་པའི་ཞིང་ཀུན་ཏུ། །མཚན་དཔེ་ངོ་མཚར་དུ་མས་བརྒྱན་པའི་སྐུ། །
སྣ་ཚོགས་མཛད་པ་དུས་གསུམ་དུས་མེད་ཀུན། །རྒྱུན་ཆད་མེད་གང་ཁྱོད་ཀྱིས་ཕྲིན་ལས་ལགས། །དྲི་མེད་ཟླ་བའི་དཀྱིལ་འཁོར་ཉ་གང་བ། ཁྱོད་ཞལ་མཚུངས་ཡང་ཉེས་ཚོགས་ཆུ་འཛིན་གྱིས། །སྒྲིབ་མིན་ཐུགས་རྗེ་ཀུན་ཁྱབ་གཏེར་མཆོག་གི །ཡོན་ཏན་ཁྱོད་མཚུངས་འཇིག་རྟེན་གསུམ་ན་མེད། །འགགས་མེད་ཚངས་དབྱངས་རྡོ་རྗེ་ཆོས་ཀྱི་སྒོ། །བརྒྱད་ཁྲི་བཞི་སྟོང་གང་ལ་གང་འདུལ་གྱིས། །འགྲོ་ལ་ཆོས་ཆར་འབེབས་མཛད་ཐམས་ཅད་མཁྱེན། ཁྱོད་ཀྱི་ཕྲིན་ལས་དུས་དེ་འདི་ལགས་མོད། །ཟབ་ཡངས་གསལ་སྟོང་དབྱེར་མེད་ཆོས་ཀྱི་སྐུ། །ཡེ་ཐོག་དང་པོའི་སངས་རྒྱས་ཀུན་ཏུ་བཟང་། །དེ་ཉིད་མགོན་པོ་ཁྱེད་ཐུགས་གདོད་མའི་གཤིས། ཁོ་ན་ཉིད་འདྲར་བདག་ཀྱང་འགྱུར་བར་མཛོད། །དཔག་མེད་ཡོན་ཏན་རིན་ཆེན་དབང་གི་རྒྱལ། །སྐལ་ལྡན་འདོད་དགུར་བསྒྱུར་བའི་དངོས་གྲུབ་ཆར། །རྟོག་མེད་ཀློང་ནས་རྒྱུན་ཆད་མེད་ཕབ་པའི། །
མཐུ་སྟོབས་མངའ་ཁྱོད་བདག་ལ་གཟིགས་རེ་རན། །རིས་དྲུག་སེམས་ཅན་ནམ་མཁས་གར་ཁྱབ་སུ། །བསམ་མི་ཁྱབ་པའི་ཕྲིན་ལས་སྣ་ཚོགས་པས། །འགྲོ་བའི་སྐྱབས་མགོན་དཔུང་གཉེན་གཅིག་པུ་རུ། །གྱུར་ཁྱོད་སྐལ་དམན་བདག་འདྲ་འདོར་ཕོད་དམ། །ཞི་བས་དུལ་དང་རྒྱས་པ་དབང་དང་དྲག །གང་ལྟར་འདོད་པའི་གདུལ་བྱའི་ཡུལ་དེ་དང་། །མཆོག་ཏུ་མཐུན་པའི་ཐུགས་རྗེ་ཡིད་བཞིན་སྟེར། །ལས་ཀྱི་མནར་བ་བདག་ལ་སྩལ་དུ་གསོལ། །འཁོར་བ་ཐོག་མ་མེད་ནས་ད་བར་དུ། །མ་རིག་འཐུག་པོའི་མུན་ནང་རྟག་འཐུམ་ཞིང་། །ལས་ངན་འཁྲུལ་པའི་སྦུབས་སུ་རབ་ཆུད་པའི། །སྡུག་བསྔལ་འདམ་དུ་ཚུད་ལས་བསྒྲལ་དུ་གསོལ། །བསྐལ་བཟང་སངས་རྒྱས་སྟོང་དང་བྱང་ཆུབ་སེམས། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །མིང་དང་རྣམ་འགྱུར་སྣ་ཚོགས་ཅིར་བསྟན་ཀྱང་། །རྒྱལ་མཆོག་
ཁྱེད་ཀྱི་རོལ་པར་བདག་ཡིད་ཆེས། །ངོ་བོ་རང་བཞིན་ཐུགས་རྗེའི་མཁའ་དབྱིངས་སུ། །འདུས་བྱས་འདུས་མ་བྱས་པའི་ཆོས་རྣམས་ཀུན། །དབྱེར་མེད་བདེ་བ་ཆེན་པོར་རོ་གཅིག་པ། །འདི་ནི་མགོན་པོ་ཁྱེད་ཀྱི་རྣམ་ཐར་ལགས། །ཞི་དང་ཁྲོ་སོགས་སྣང་ཚུལ་དུ་མ་དང་། །གཙོ་དང་འཁོར་སོགས་རྣམ་འགྱུར་སྣ་ཚོགས་ཀུན། །རིགས་བདག་བླ་མ་ཁོ་ནའི་རོལ་གར་དུ། །གཅིག་ཉིད་དེ་ཕྱིར་གསོལ་བ་སྙིང་ནས་འདེབས། །སྐྱེ་བ་འདི་ནས་ཚེ་རབས་ཐམས་ཅད་དུ། །དཔལ་ལྡན་རྣམ་འདྲེན་མཆོག་ཉིད་རྟགས་བསྟེན་ཅིང་། །རིས་མེད་ཐུགས་རྗེའི་ཉི་འོད་སྒྲིབ་བྲལ་གང་། །བདག་ཡིད་དད་པའི་པད་ཚལ་སྨིན་མཛད་གསོལ། །བདག་གི་ལུས་དང་ལོངས་སྤྱོད་གཏན་མདུན་བཅས། །རྗེ་བཙུན་ཁྱེད་ལ་མཆོད་པར་འབུལ་ལགས་ན། །བྱང་ཆུབ་བླ་མེད་སྙིང་པོ་མ་ཐོབ་བར། །བརྩེ་ཆེན་ཐུགས་རྗེས་རྟགས་ཏུ་གཟུངས་དུ་གསོལ། །མཚུངས་
བྲལ་མཆོག་ལ་གསོལ་བ་བཏབ་པའི་མཐུས། །སྒོ་གསུམ་སྒྲིབ་དག་དབང་བཞིས་རྒྱུད་སྨིན་ཞིང་། །རང་གཞན་དོན་གཉིས་འབད་མེད་ལྷུན་གྲུབ་ནས། །འགྲོ་ཀུན་ཐར་པའི་ལམ་ལ་འགོད་བྱེད་ཤོག །ཅེས། རྩ་བའི་བླ་མ་ལ་བསྟོད་ཅིང་གསོལ་བ་གདབ་པ་འདི་ནི། །ཀོང་ཡུལ་གསང་བ་མཆོག་གི་སའི་ཐིག་ལེ་ནས་དད་ལྡན་ལྷ་དབང་དོན་འགྲུབ་ལ་གདམས་པའོ།། ༈ ན་མཿསརྦ་བུདྡྷ་གུ་རུ་རཏྣ་བྷྱཿ གཞིག་བྲལ་ཡེ་ཤེས་འཁོར་ལོའི་དབྱིངས་ཉིད་དུ། །མི་འགྱུར་ཀུན་འགྲོ་ཁྱབ་པའི་གར་གྱི་བདག །བསམ་ཡས་གདུལ་བྱའི་ཞིང་མང་དེ་སྙེད་དུ། །སྒྲིབ་བྲལ་མཆོག་གི་སྣང་བྱེད་རྣམས་ལ་འདུད། །རབ་འབྱམས་རྒྱལ་བའི་ཐུགས་རྗེའི་ཆུ་གཏེར་ལས། །མངོན་བྱུང་ངོ་མཚར་པདྨའི་ཟེ་འབྲུ་རྒྱས། །ལེགས་རྒོད་བྱིན་རླབས་སྦྲང་རྩིའི་འབྱུང་གནས་ཀྱི། །གེ་སར་ཡིད་བཞིན་སྙིང་པོ་དེ་ལ་འདུད། །
གཞལ་མེད་ཐུགས་རྗེའི་ཕྱོགས་སུ་ལྷུང་བྲལ་བའི། །རྒྱལ་བའི་ཉི་མ་ཀུན་ཀྱང་བཏང་སྙོམས་སུ། །མཛད་འདིར་མུན་བསེལ་སྒྲོན་ཅིག་ཀརྨ་པ། །ཐུགས་རྗེའི་ཆ་ཤས་ཡོངས་རྫོགས་དེ་ལ་འདུད། །བྱང་སེམས་གྲུ་བོ་སྨོན་འཇུག་བ་དན་འཕྱར། །ལས་འཕྲོའི་རླུང་ཆེན་ཡང་དག་རབ་བསྐྱོད་པས། །ཟབ་གཏེར་ནོར་གླིང་བསྒྲོད་པའི་དེད་དཔོན་མཆོག འགྲོ་བའི་དབུལ་བ་སེལ་བ་དེ་ལ་འདུད། །ཀརྨའི་གདུང་རིགས་སཱ་ལའི་ལྗོན་འཕྲེང་དབུས། །མངོན་མཐོ་ངེས་ལེགས་ཡལ་འདབ་ཁྱོན་ཡངས་པོས། །འགྲོ་ལ་ཕན་བདེའི་གྲིབ་བསིལ་སྦྱིན་པའི་སྟོབས། །མི་ཕམ་དགེ་ལེགས་དཔག་བསམ་དེ་ལ་འདུད། །དུས་རིང་ཐོག་མ་མེད་གོམས་མ་རིག་མུན། །ཐིབ་པོས་རབ་ལྡོངས་འགྲོ་ལ་ཆོས་ཀྱི་སྒྲོན། །སྣ་ཚོགས་རབ་སྦར་རང་བྱུང་ཡེ་ཤེས་དོན། །རང་གྲོལ་མངོན་སུམ་སྟོན་མཛད་དེ་ལ་འདུད། །
ཀྱེ་མ་མ་རིག་འཁྲུལ་པའི་རྒྱ་མཚོ་ཆེར། །མི་ཟད་སྡུག་བསྔལ་ཤུགས་དྲག་རྦ་ཀློང་གི། །དབང་མེད་བསྐྱོད་པའི་གྲུ་བོ་ཁ་ལོ་གང་། །ཐར་པའི་ཕྱོགས་སུ་བསྒྱུར་དང་དྲིན་ཅན་རྣམས། །རྟག་ཏུ་བླངས་དོར་ལ་རྨོངས་ཉེས་སྤྱད་པའི། །རྣམ་སྨིན་མི་ཟད་ཧ་ལའི་སྟོབས་དྲག་པོས། །བྱང་ཆུབ་སྙིང་སྲོག་གཅོད་པའི་ཟུག་རྔུ་འདི། །མྱུར་དུ་ཞི་བར་མཛོད་ཅིག་ཐུགས་རྗེ་ཅན། །ཕན་བདེའི་གྲོང་ཁྱེར་བསྒྲོད་ལམ་རྒྱུས་ཀྱི་དབེན། །ངན་སོང་འཁོར་མཚོར་ལས་ཉོན་གཤེད་མས་འཁྲིད། །ཉམས་ལེན་གོམས་ཤུགས་ཆུང་མཐུས་མི་བཟློག་ན། །བརྩེ་བས་གཅིག་ཆར་སྐྱོབ་ཅིག་སྐྱབས་གནས་རྗེ། །ལྷག་བསམ་སྨོན་པའི་ས་བོན་སྔོན་བསྐྲུན་ཀྱང་། །ཚོགས་གཉིས་ཆུ་རྒྱུན་ཆར་གྱིས་མ་རླན་ཞིང་། །མི་མཐུན་ཚ་གདུང་གིས་སྐེམ་མྱུ་གུ་ལ། །བྱིན་རླབས་ཆུ་རྒྱུན་ཕོབས་དང་རྗེ་བཙུན་
མགོན། །བླངས་དང་དོར་བའི་གནས་ལ་རབ་རྨོངས་ཞིང་། །སྲིད་དང་ཞི་བའི་ལམ་གོལ་འཁྱམས་པའི་བུ། །བདག་འདྲ་ད་དུང་མཐའ་མེད་འཁོར་དོང་འདིར། །འདོར་བར་ཕོད་དམ་འཕགས་མཆོག་དམ་པའི་ཚོགས། །མཁྱེན་པའི་དབྱིངས་ནས་བརྩེ་བའི་གློག་སྟོང་འགྱུ། །ཟབ་ཆོས་འབྲུག་སྒྲོག་ཐུགས་རྗེའི་སྤྲིན་ཆེན་སྟིབས། །བྱིན་རླབས་ཆར་ཆེན་དབབ་པའི་ཕྲིན་ལས་འཕྲུལ། །གང་དེ་མཛད་པའི་དུས་ནི་འདི་ལགས་མོད། །ཐུགས་རྗེས་གཟིགས་དང་དཔལ་ལྡན་བླ་མའི་ཚོགས། །བྱིན་གྱིས་རློབས་དང་ནུས་པའི་མངའ་བདག་རྣམས། །རྟག་པར་སྐྱོབ་ཅིག་རེ་སའི་གནས་རྣམས་ཀྱིས། །ད་ལྟ་ཉིད་དུ་སྨིན་གྲོལ་དངོས་གྲུབ་སྩོལ། །སྐྱེ་བ་འདི་དང་སྐྱེ་གཞན་ཐམས་ཅད་དུ། །རྣམ་གྲོལ་མགོན་པོ་མཆོག་གི་རྗེས་བཟུངས་སྟེ། །ཕྲིན་ལས་ནམ་མཁའ་ཇི་སྲིད་གནས་བར་དུ། །ལེགས་སྤྱོད་རྒྱལ་བ་ཀུན་དང་དབྱེར་མེད་ཤོག །ཅེས་པ་འདི་ནི། རིག་པ་འཛིན་པ་
ཚར་དུ་དངར་བའི་གདུང་ལས་འཁྲུངས་པ་རྒྱལ་སྲས་ཀརྨ་ལས་གྲུབ་ཀྱིས་བསྐུལ་བར་མཛད་པ་རྟེན་ནས་བྲིས་པའོ། །ན་མ་མ་ཧཱ་གུ་རུ་རཏྣ་སརྦ་སིདྡྷི་ཧཱུྃ། །མཆོག་ཏུ་མི་འགྱུར་བདེ་བ་ཆེན་པོའི་བདག་ཉིད་རྒྱལ་བ་སྐུ་བཞིའི་ངོ་བོ་ཁྱབ་བདག་འཁོར་ལོའི་མགོན་པོ་དཔལ་ལྡན་བླ་མ་རྡོ་རྗེའི་སློབ་དཔོན་མཚུངས་བྲལ་སྐྱབས་ཀྱི་དམ་པ་ཉིད། བདག་གི་སྤྱི་གཙུག་བདེ་ཆེན་རྩེ་མོ་རྣམ་པར་བཀོད་པའི་ཡང་ཐོག་ཏུ་མི་འགྱུར་རིན་པོ་ཆེ་སེང་གེའི་ཁྲི་ལ་འབྲལ་བ་མེད་པར་བཞུགས་སུ་གསོལ། བཞུགས་ནས་ཀྱང་ཐུགས་རྗེ་བརྩེ་བ་ཆེན་པོས་བདག་གི་ལུས་དང་ལོངས་སྤྱོད་མཐའ་དག་འདི་ཕྱི་གཏན་གྱི་མདུན་མ་དང་བཅས་པ་མཆོད་པའི་མཎྜལ་དུ་འབུལ་གྱིས་བཞེས་ནས། སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་མ་ལུས་པ་དུས་འདི་ཉིད་དུ་སྩལ་དུ་གསོལ། གུ་རུ་རཏྣ་མཎྜལ་པཱུ་ཛ་མཻ་གྷ་ས་མུ་དྲ་སྥ་ར་་ས་མ་
ཡེ་ཨཱཿཧཱུྃ།། ༈ །།ཨེ་མ། ཕྱོགས་བཅུ་རབ་འབྱམས་ཀྱི་ཞིང་ཁམས། །མ་ལུས་དབང་བསྒྱུར་གྱི་གཙོ་བོ། །རྗེ་བཙུན་དཔལ་ལྡན་གྱི་བླ་མ། །སྐུ་བཞིའི་དབང་ཕྱུག་རང་མཁྱེན་ནོ། །མཐའ་བྲལ་ཀ་དག་གི་ཀློང་ལས། །འགགས་མེད་རང་གསལ་གྱི་སྐུ་མཆོག །གང་འདུལ་སྒྱུ་འཕྲུལ་གྱི་གར་མཁན། །སྐུ་གསུམ་དབྱེར་མེད་རང་མཁྱེན་ནོ། །རྒྱུད་ལུང་མན་ངག་གི་རྒྱ་མཚོར། །སྨིན་གྲོལ་ཐེག་བརྒྱད་ཀྱི་བང་རིམ། །མངོན་མཐོ་ངེས་ལེགས་ཀྱི་གཟི་འབར། །ཐུགས་རྗེའི་ལྷུན་པོ་རང་མཁྱེན་ནོ། །མཁྱེན་པ་ལྷ་ལམ་གྱི་དབྱིངས་ནས། །བརྩེ་ཆེན་ཐུགས་རྗེའི་འོད་ཀྱིས། །གདུལ་བྱའི་པད་ཚལ་རྣམས་རྒྱས་མཛད། །བསྟན་པའི་ཉི་མ་རང་མཁྱེན་ནོ། །ལས་ངན་འཁོར་བ་ཡི་སེམས་ཅན། །ཉོན་མོངས་གཅོང་ནད་ཀྱིས་གཟིར་ལ། །ཕན་བདེའི་སྨན་མཆོག་གིས་ཞི་མཛད། །བདེ་བའི་འབྱུང་གནས་རང་མཁྱེན་ནོ། །རྣམ་མཁྱེན་སངས་རྒྱས་ཀྱི་ལམ་ལ། །ཐར་འདོད་
རྗེས་འཇུག་གི་གདུལ་བྱ། །མ་རིག་མུན་ཁྱམས་ལ་བརྩེ་མཛད། །ཐར་པའི་ལམ་མཁན་རང་མཁྱེན་ནོ། །ཚོགས་གཉིས་བདེ་ཆེན་གྱི་གླིང་དུ། །མྱུར་འགྱོགས་ཐོག་མེད་དུ་སྒྲོལ་བའི། །དེད་དཔོན་མཉམ་མེད་ཀྱི་བླ་མ། །སྲིད་ཞིའི་འཇིགས་སྐྱོབས་རང་མཁྱེན་ནོ། །བླ་མ་ཡིད་བཞིན་གྱི་ནོར་བུ། །བྱིན་རླབས་ཆར་ཆེེན་རང་ཕོབ་དང་། །བླ་མ་སྨན་མཆོག་གི་རྒྱལ་པོ། །འཁོར་བའི་གཅོང་ཆེན་རང་བསོལ་དང་། །བླ་མ་སྟོབས་ལྡན་གྱི་དཔའ་བོ། །ཉོན་མོངས་དཔུུང་ཆེན་རང་བཟློག་དང་། །བླ་མ་དེད་དཔོན་གྱི་དམ་པ། །ལས་ངན་མཚོ་ཆེན་ལས་སྒྲོལ་དང་། །བླ་མ་རེ་སའི་གཉེན་ཅིག །བླ་མ་སྐྱབས་གནས་ཀྱི་དམ་པ། །བླ་མ་ཀུན་རིག་གྱི་བདག་པོ། །བླ་མ་རྒྱལ་ཀུན་གྱི་ངོ་བོ། །གཡེལ་མེད་ཐུགས་རྗེ་ཡི་གཟིགས་དང་། །འབྲལ་མེད་བྱིན་གྱིས་རང་རློབས་དང་། །རྟག་ཏུ་རྗེས་སུ་རང་གཟུངས་དང་། །རེ་ས་གཞན་
ན་རང་མེད་དོ། །དཔལ་ལྡན་བླ་མ་དུས་གསུམ་སངས་རྒྱས་མཁྱེན་ནོ། །འདྲེན་མཆོག་རྒྱལ་པོ་རྗེ་བཙུན་བླ་མ་མཁྱེན་ནོ། །བྱིན་རླབས་མཚུངས་མེད་རྩ་བའི་བླ་མ་མཁྱེན་ནོ། །བཀའ་དྲིན་འཁོར་མེད་བླ་མ་དམ་པ་མཁྱེན་ནོ།། ༈ །།དཔལ་ལྡན་བླ་མའི་སྐུ་ལ་གསོལ་བ་འདེབས་སོ། །ལུས་ལ་ཟག་མེད་བདེ་ཆེན་བསྐྱེད་དུ་གསོལ། །དཔལ་ལྡན་བླ་མའི་གསུང་ལ་གསོལ་བ་འདེབས། །ངག་ལ་ཐོག་མེད་ནུས་པ་སྦར་དུ་གསོལ། །དཔལ་ལྡན་ཐུགས་ལ༴ །སེམས་ལ་རྟོགས་མེད་ཡེ་ཤེས་བསྐྱེད་དུ་གསོལ། །སྐུ་གསུང་ཐུགས་ཀྱི་བྱིན་གྱིས་རླབས་ནས་ཀྱང་། །སྒོ་གསུམ་རྡོ་རྗེ་གསུམ་དུ་འགྱུར་བར་མཛོད། །གང་འདུལ་སྤྲུལ་བསྒྱུར་ཅིར་ཡང་སྟོན་མཛད་པ། །དཔལ་ལྡན་བླ་མའི་སྐུ་ཡི་རྣམ་ཐར་ལགས། །རྣམ་ཐར་དེ་ནི་བདག་ཀྱང་མྱུར་འགྲུབ་ནས། །གང་འདུལ་སྤྲུལ་པས་འགྲོ་བ་འདྲེན་པར་ཤོག །རྣམ་མང་གདུལ་བྱའི་དཔལ་དུ་ཆོས་སྟོན་པ། །དཔལ་ལྡན་བླ་མའི་གསུང་
གི་རྣམ་ཐར་ལགས། །རྣམ་ཐར་དེ་བཞིན༴ །ཆོས་སྒོ་དུ་མས་འགྲོ་བ་སྨིན་བྱེད་ཤོག །དྲན་པ་ཙམ་གྱི་ཡེ་ཤེས་འཆར་མཛད་པ། །དཔལ་ལྡན་བླ་མའི་ཐུགས་ཀྱི་རྣམ་ཐར་ལགས། །རྣམ་ཐར་དེ་བཞིན༴ །འགྲོ་ལ་སངས་རྒྱས་ལག་བཅངས་སྟོན་པར་ཤོག །གསོལ་བ་བཏབ་པས་འདོད་དགུ་འབྱུང་བ་ཡི། །དཔལ་ལྡན་བླ་མའི་ཡོན་ཏན་རྣམ་ཐར་ལགས། །རྣམ་ཐར་དེ་བཞིན༴ །འགྲོ་ལ་འདོད་དགུའི་ཆར་ཆེན་འབེབ་པར་ཤོག །སྤྱི་བོར་བསྒོམས་པའི་བར་ཆད་ཀུན་ཞི་བ། །དཔལ་ལྡན་བླ་མའི་ཕྲིན་ལས་རྣམ་ཐར་ལགས། །རྣམ་ཐར་དེ་བཞིན༴ །འགྲོ་བའི་ལས་ཉོན་བར་ཆད་བསེལ་བར་ཤོག །བླ་མ་ཡི་དམ་མཁའ་འགྲོ་ཆོས་སྐྱོངས་སོགས། །རྣམ་འགྱུར་མཚན་གྲངས་སྣ་ཚོགས་སྤྱིར་སྣང་ཡང་། །དབྱེར་མེད་བླ་མའི་ངོ་བོར་བདག་ཡིད་ཆེས། །བླ་མ་ཁྱེད་རང་ལྟ་བུར་བདག་འགྲུབ་ཤོག །མི་མཐུན་བར་ཆད་ཞི་བར་བྱིན་གྱིས་རློབས། །ཆོས་མཐུན་འདོད་དགུ་འབྱུང་
བར་བྱིན་གྱིས༴ །ཚམ་དང་སྒྲུབ་པ་མཉམ་པར༴ །རང་གཞན་དོན་གཉིས་འགྲུབ་པར༴ །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །ཅེས་པ་འདི་ནི། སྐྱེ་བར་དུ་མའི་སྤྱོད་པ་ལ་གོམས་པའི་སྐྱེས་མཆོག་གསང་སྔགས་བསྟན་འཛིན་རྡོ་རྗེས་བསྐུལ་བར་མཛད་པའི་ངོར་བཀོད་པའོ།། ༈ །།ན་མོ་གུ་རུ་སྲིད་དང་ཞི་བའི་ཁྱབ་བདག་འཁོར་འདས་ཀུན་གྱི་སྤྱི་དཔལ་དཀྱིལ་འཁོར་ཐམས་ཅད་ཀྱི་གཙོ་མཆོག་སངས་རྒྱས་ཀུན་འདུས་ཀྱི་ངོ་བོ་བཀའ་དྲིན་འཁོར་མེད་ཀྱི་རྗེ་བཙུན་དྲན་མཆོག་རྒྱལ་པོ་རྩ་བའི་བླ་མ་དམ་པ་ཉིད། བདག་གི་སྤྱི་གཙུག་བདེ་ཆེན་འཁོར་ལོའི་ཡང་རྩེར་སྐུ་མཚན་དཔེ་གཟི་བརྗིད་ཀྱི་ཕུང་པོ་དཔལ་དུ་འབར་ཞིང་གསུང་གྲགས་སྟོང་ཚངས་དབྱངས་ཀྱི་ཆོས་སྒྲ་རྒྱུན་ཆད་མེད་པ། ཐུགས་མི་རྟོགས་མཉམ་ཉིད་ཡེ་ཤེས་ཆེན་པོའི་ཀློང་ནས་ཐུགས་རྗེ་རྒྱུན་མི་ཆད་པར་གཟིགས་ཏེ་འབྲལ་མེད་རྟག་ཏུ་བཞུགས་སུ་གསོལ་ཞིང་། བདག་གི་ལུས་དང་ལོངས་སྤྱོད་འཁོར་འདས་དུས་གསུམ་གྱི་དགེ་རྩ་
མཐའ་དག་གཏན་གྱི་མདུན་མར་བཅས་པ་མཆོད་པའི་མཎྜལ་དུ་འབུལ་གྱིས་བཞེས་སུ་གསོལ། བཞེས་ནས་འདི་གཟུངས་བྱང་ཆུབ་ཀྱི་བར་དུ་བརྩེ་ཆེན་རྒྱུན་ཆད་མེད་པའི་ཐུགས་རྗེས་སྐྱོབ་ཅིང་བྱིན་གྱིས་རླབས་ཏུ་གསོལ། ཨེ་མ་ཀྱ་ཧོཿ། དུས་གསུམ་སངས་རྒྱས་ཀྱི་སྤྱི་གཟུགས། །ཆགས་བྲལ་དམ་ཆོས་ཀྱི་འབྱུང་གནས། །རིག་གྲོལ་དགེ་འདུན་གྱི་གཙུག་རྒྱན། །དཔལ་ལྡན་བླ་མ་རང་མཁྱེན་ནོ། །ཀུན་བཟང་སྐྱེ་མེད་ཀྱི་དབྱིངས་ནས། །ཞི་ཁྲོ་འགགས་མེད་ཀྱི་དཀྱིལ་འཁོར། །ཐམས་ཅད་གཅིག་བསྡུས་ཀྱི་པད་འབྱུང་། །དབྱེར་མེད་རྗེ་བཙུན་རང་མཁྱེན་ནོ། །ཐོགས་མེད་བྱིན་རླབས་ཀྱི་གཏེར་མཛོད། །འདོད་དགུ་དངོས་གྲུབ་ཀྱི་འབྱུང་གནས། །འགྲོ་འདུལ་ཕྲིན་ལས་ཀྱི་མངའ་བདག །མཚུངས་མེད་ཆོས་རྗེ་རང་མཁྱེན་ནོ། །བདག་འདྲ་ལས་ངན་གྱི་སེམས་ཅན། །དུག་གསུམ་ཉོན་མོངས་ཀྱི་སྡོང་པོ། །འཁོར་བའི་གཅོང་ནད་ཀྱི་ཉམ་ཐག །འདི་འདྲ་
འདོར་བ་རུ་ཕོད་དམ། ཁམས་གསུམ་འཁོར་བའི་བརྩོན་རྭ། །ཅི་བྱས་སྡུག་བསྔལ་གྱི་འཁྲུལ་འཁོར། །ཐར་མེད་ལས་ངན་གྱི་རྒྱ་མཚོ། །འདི་ལས་ད་ལྟ་རང་དྲོངས་དང་། །མ་རིག་འཁྲུལ་སྣང་གི་མུན་པར། །བདག་འཛིན་ལྕགས་སྒྲོགས་ཀྱི་འཆིངས་བས། །བཅིངས་འདི་བརྩན་ཐབས་སུ་གྲོལ་བར། །མཐུ་ཆེན་ཁྱོད་ཀྱི་རང་མཛོད་དང་། །བདེ་ཆེན་བྱང་ཆུབ་ཀྱི་ལམ་ལ། །བསྒྲོད་འདོད་རྒྱལ་བསྟན་ལ་ཞུགས་ཀྱང་། །ཟབ་དོན་ཉམས་ལེན་གྱིས་དབེན་པའི། །ཆོས་མེད་བདག་འདྲ་ལ་གཟིགས་དང་། །རྒྱུད་ལུང་མན་ངག་གི་ཆུ་བོ། །བརྩེ་བས་རྒྱུན་ལྡན་དུ་ཕབ་ཀྱང་། །བདག་བློ་བསྲ་འཐས་སུ་ལུས་པའི། །ལས་ངན་སེམས་ཅན་ལ་སྐྱོབས་དང་། །ཐོག་མེད་ད་བར་གྱི་འཁོར་བར། །རྫ་མཁན་འཕང་ལོ་ལྟར་འཁྱམས་པ། །བདག་འདྲ་བརྩེ་ཆེན་གྱིས་སྐྱབས་ནས། །མྱུར་དུ་སྨིན་གྲོལ་རང་མཛོད་ཅིག །ཨེ་མ་རྒྱལ་བ་ཀུན་གཙོ་བླ་མ་རྗེ། །ཐུགས་རྗེ་ནུས་
པའི་བདག་ཁྱོད་གང་དུ་བཞུགས། །བུ་ཡིས་གསོལ་བ་འདེབས་འདི་དགོངས་མཛོད་ལ། །བྱིན་རླབས་ཐུགས་རྗེའི་དཔུང་ཆེན་སྐྱེད་དུ་གསོལ། ཁྱེད་ཀྱི་ཐུགས་རྗེ་ཕྱོགས་རིས་མེད་ན་ཡང་། །རེ་ལྟོས་བཅས་པའི་བུ་ལ་ཁྱད་པར་དུ། །བརྩེ་བས་མི་དགོངས་ཡལ་བར་འདོར་མཛད་ན། །ཐུགས་སྐྱེད་གོ་ཆ་ཆེན་པོའང་ཅིར་འགྱུར་གྲགས། །དེས་ན་ལས་ཉོན་ཕུང་པོའི་གདུལ་བྱ་བདག །སྙིང་ནས་གསོལ་བ་འདེབས་ལ་ཉེར་དགོངས་ཏེ། །ཐུགས་རྗེ་རྒྱུན་ཆད་མེད་པའི་ཕྲིན་ལས་དེ། །དུས་འདི་ཁོ་ན་ཉིད་དུ་མཛོད་གཅིག་ཕ། །ལས་ཉོན་སྒྲིབ་ཚོགས་དག་པར་བྱིན་གྱིས་རློབས། །འགལ་རྐྱེན་བར་ཆད་ཞི་བར༴ །ཅི་བསམ་ལྷུན་གྱིས་འགྲུབ་པར༴ །མི་ཚེ་ཆོས་ལ་འདྲིལ་བར༴ །རང་གཞན་དོན་གཉིས་འགྲུབ་པར༴ ཁྱོད་དང་དབྱེར་མེད་གཅིག་པར༴ །ཚེ་གཅིག་སངས་རྒྱས་འགྲུབ་པར༴ །གསོལ་བཏབ་དོན་ལྡན་འགྲུབ་པར༴ །ཅེས་པ་འདི་ཡང་
རིག་པ་འཛིན་པ་ཀརྨ་ལས་གྲུབ་ལའོ། །ན་མོ་གུ་རུ། མཐའ་ཡས་ཞིང་ཁམས་རྒྱ་མཚོ་དཔག་མེད་ན། །སྣ་ཚོགས་ཕྲིན་ལས་འདོད་སྟེར་རོལ་པ་ཅན། །རབ་འབྱམས་རྒྱལ་བ་སྲས་བཅས་མ་ལུས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རིགས་སྟོང་སྤྲོས་པ་བྲལ་བ་ཆོས་ཀྱི་སྐུ། །གསལ་མདངས་འགགས་མེད་ཤར་བ་ལོངས་སྤྱོད་རྫོགས། །རྣམ་འཕྲུལ་ཅིར་ཡང་སྟོན་མཛད་སྤྲུལ་པའི་སྐུ། །གསོལ་བ་འདེབས་སོ༴ །བསྐལ་མང་ཐོག་མེད་དུས་ནས་ཐུགས་བསྐྱེད་ཅིང་། །འདོད་འབྱུང་ཆོས་སྒོ་གྲངས་མེད་འགྲོ་ལ་སྟོན། །རྒྱ་བོད་མཁས་གྲུབ་གསར་སྙིང་སྐྱེས་ཆེན་ཚོགས། །གསོལ་བ༴ །གདུལ་བྱ་དུ་མའི་མོས་བློ་སྣ་ཚོགས་པར། །འདུལ་བྱེད་ཆ་ལུགས་རྣམ་འགྱུར་མཐའ་ཡས་པས། །དངོས་གྲུབ་སྩོལ་མཛད་ཡི་དམ་ལྷ་ཚོགས་ལ། །གསོལ་བ༴ །དོན་དམ་ཆོས་དབྱིངས་སྐྱེ་བ་མེད་པ་ལས། །ལོག་རྟོག་གདུག་པ་འདུལ་བར་སྐུར་སྤྲུལ་པའི། །བསྟན་སྲུང་
ཆོས་སྐྱོང་རྒྱལ་བ་རྒྱ་མཚོ་ལ། །གསོལ་བ༴ །རྒྱལ་བ་སྲས་བཅས་བླ་མ་ཡི་དམ་ལྷ། །མཁའ་འགྲོ་དམ་ཅན་སོ་སོར་སྣང་བ་ཀུན། །གཅིག་བསྡུས་དཔལ་ལྡན་བླ་མ་རིགས་ཀྱི་བདག །གསོལ་བ༴ །སྐྱབས་གནས་རྒྱལ་བ་སྲས་བཅས་ཡི་དམ་ལྷ། །རྩ་རྒྱུད་བླ་མ་མཁའ་འགྲོ་ཆོས་སྐྱོངས་ལ། །དད་མོས་གདུང་བས་གསོལ་བ་བཏབ་པའི་མཐུས། །སྨིན་གྲོལ་བྱིན་རླབས་ཆར་ཆེན་དབབ་ཏུ་གསོལ། །ལས་ངན་སྡིག་སྒྲིབ་མ་ལུས་བྱང་བ་དང་། །ནད་གདོན་བར་ཆད་ཐམས་ཅད་ཞི་བ་དང་། །མཐུན་རྐྱེན་བསམ་པ་མཐའ་དག་འགྲུབ་པ་ཡི། །བྱིན་བརླབས་དངོས་གྲུབ་དེང་འདིར་སྩལ་དུ་གསོལ། །ཉོན་མོངས་འཁོར་བའི་འདམ་ལས་ཐར་བ་དང་། །ཐེག་ཆེན་དམ་པའི་ཆོས་དང་མཇལ་བ་དང་། །མཚན་ལྡན་བླ་མ་མཆོག་གི་རྗེས་བཟུང་སྟེ། །ཚེ་གཅིག་ཐར་ལམ་བསྒྲོད་པར་མཛད་དུ་གསོལ། །རང་དོན་ཆོས་སྐུ་མངོན་དུ་འགྱུར་བ་དང་། །གཞན་དོན་གཟུགས་སྐུས་འགྲོ་བ་
བ་འདུལ་བ་དང་། །ཕྲིན་ལས་ཐོགས་མེད་ཕྱོགས་བཅུར་འགྱེད་པ་ཡི། །མཆོག་གི་དངོས་གྲུབ་མྱུར་དུ་སྩལ་དུ་གསོལ། །ཅེས་པ་ནི། །མི་དབང་ཀརྨ་དོན་འགྲུབ་ལ་གདམས་པའོ།། ༈ །།ན་མཿགུ་རུ་རཏྣ་བྷྱཿ །དཔལ་ལྡན་ཚོགས་གཉིས་དུ་མའི་རྒྱ་མཚོ་ལས། །ལེགས་བྱུང་ཐེག་བརྒྱད་བང་རིམ་མངོན་མཐོའི་རྩེར། །སྨིན་གྲོལ་ཁང་བཟང་དབང་བསྒྱུར་ལྷ་ཡི་ལྷ། །མཚུངས་མེད་བླ་མ་མཆོག་ལ་གསོལ་བ་འདེབས། །གྲངས་མེད་སྔོན་ནས་བྱང་ཆུབ་ཐུགས་བསྐྱེད་ཅིང་། །སྨོན་ལམ་རབ་དཀར་ས་བོན་ཆེར་བསྐྲུན་པས། །ཕན་བདེའི་སྡོང་པོ་བྱིན་བརླབས་ལོ་འབྲས་ཕྱུག །འདོད་འབྱུང་དཔག་བསམ་མཆོག་ལ་གསོལ༴ །ཐོས་བསམ་ཆུ་གཏེར་དབུས་སུ་ལེགས་བསྒྲོད་ཅིང་། །རིམ་གཉིས་ཟབ་མོའི་ནོར་བུ་ལོན་པའི་མཐུས། །གདུལ་བྱའི་དབུལ་བ་སེམས་ལ་མངའ་བརྙེས་པ། །དེད་དཔོན་དམ་པ་མཆོག་ལ་གསོལ་བ་འདེབས། །རྒྱལ་བ་ཀུན་འདུས་དཀྱིལ་འཁོར་ཀུན་གྱིས་གཙོ། །མཉམ་མེད་བླ་མ་
མཆོག་ལ་གསོལ་བཏབ་པས། །རང་གཞན་དོན་གཉིས་ལྷུན་གྲུབ་སྨིན་གྲོལ་གྱི། །དངོས་གྲུབ་མ་ལུས་མྱུར་དུ་སྩལ་དུ་གསོལ། །ཅེས་པ་འདི་ནི། དཔལ་ལྡན་བསམ་འགྲུབ་བདེ་ཆེན་ནས་དགེ་སློང་ཀུན་དགའ་སྙིང་པོ་ལའོ།། ༈ །།ཨོཾ་ཨཱཿཧཱུྃ་ཧྲཱིཿ བདེ་ཆེན་དབང་དྲག་རོལ་པའི་ཕོ་བྲང་ནས། ཧྱ་གྲྀ་ཝ་ཀླུ་འདུལ་ཧེ་རུ་ཀ །དུས་གསུམ་རྒྱལ་བ་འདུས་པའི་བཅོམ་ལྡན་འདས། །གསོལ་བ་འདེབས་སོ་མཆོག་མཐུན་དངོས་གྲུབ་སྩོལ། །ཆོས་སྐུ་སྟོང་ཉིད་ཞི་བའི་དབྱིངས་ཆེན་ལས། །ལོངས་སྐུ་གསལ་མདངས་ཉི་མ་འབུམ་གྱི་གཟི། །སྤྲུལ་སྐུ་འོད་བརྒྱས་མ་རིགས་མུན་ཚོགས་འཇོམས། །གསོལ་བ་འདེབས་སོ་ནད་གདོན་བར་ཆད་བཟློག །བྱམས་ཆེན་ངང་ལས་ཁྲོ་བོ་འབར་བའི་གཟུགས། །མཐིང་ནག་ཞལ་དཀྱིལ་ཆུ་འཛིན་འཁྲིགས་པ་ལས། །སྤྱན་གསུམ་གློག་སྟོང་བསྐལ་པ་བསྲེག་བཞིན་བརྗིད། །གསོལ་བ་འདེབས་སོ་གདུག་
པའི་གདོན་ཚོགས་འཐུལ། །སྲིད་གསུམ་ཟ་བར་འཆས་འདྲའི་ཞལ་གདངས་ཤིང་། །ཀཻ་ལ་ཤ་འཕྲེང་དཀྲིག་མཚུངས་མཆེ་དབལ་ཅན། །དྲག་པོའི་སྐན་སྒྲས་འབྱུང་པོའི་སྙིང་སྲོག་གཅོད། །གསོལ་བ་འདེབས་སོ་བགེགས་དཔུང་རྡུལ་དུ་རློག །རབ་འབར་སྨ་ར་ཨག་ཚོམ་མེ་སྤུངས་དང་། །གནམ་ལྕགས་རལ་པ་སྲིད་རྩེར་འཕྱོ་བ་ལས། །ཁྲོ་ཚོགས་རྡོ་རྗེའི་ཚ་ཚ་སྐར་ལྟར་འཕྲོ། །གསོལ་བ་འདེབས་སོ་དགྲ་བགེགས་གཞོབ་བསྲེག །ལྕགས་ཀྱུ་འབར་བས་དགྲ་བགེགས་སྙིང་བཟུང་ནས། །རྣོ་དབལ་རལ་གྲིས་གཟུགས་ཕུང་དུམ་བུར་བཏུབ། །ལྕགས་ཀྱི་སྡིག་པས་གནོད་བྱེད་རྔམ་ཟས་བྱེད། །གསོལ་བ་འདེབས་སོ་དགྲ་བགེགས་ཚར་ཆོད་མཛོད། །རི་རབ་ལྟ་བུ་བརྗིད་པའི་སྐུ་མཆོག་གི །རྔམ་པའི་ཞལ་ནས་ཧ་ཧའི་གད་རྒྱངས་སྒྲོགས། །སྲིད་གསུམ་གཡོ་འཁྲུགས་འཐོར་བའི་འཇིགས་གཟུགས་སྟོན། །གསོལ་བ་འདེབས་སོ་ལས་ཉོན་སྲིད་རྩ་གཅོད། །ཐོད་སྐམ་རིན་ཆེན་རིགས་
ལྔའི་དབུ་རྒྱན་དང་། །ཕྱག་ཞབས་རིན་ཆེན་གདུབ་སྐོར་གཡོ་བའི་འོད། ཁམས་སུ་མུན་པ་བསེལ་བའི་གཟི་མདངས་ཅན། །གསོལ་བ་འདེབས་སོ་ཡེ་ཤེས་སྣང་བ་སྩོལ། །བདུད་སྲིན་མ་རུངས་བསྒྲལ་བའི་མགོ་འཕྲེང་ཚོགས། །གླད་ཞག་ཁྲག་གིས་སྦག་རྣམས་སྦྲུས་ཐག་བཅས། །དཔལ་ཆེན་སྐུ་ལ་དཔའ་བའི་རྟགས་འཆང་བ། །གསོལ་བ་འདེབས་སོ་བསྟན་པའི་རཱུ་དགྲ་སྒྲོལ། །དར་ནག་བེར་ཆེན་རྡོ་རྗེའི་གསང་གོས་དང་། །ཀོ་རློན་གཡང་གཞི་སྟག་ཤམ་སྦྲུལ་ཆུན་བརྒྱན། །པད་ཉི་ཀླུ་གདོན་གདན་ལ་གར་དགུས་རོལ། །གསོལ་བ་འདེབས་སོ་དབང་དང་དངོས་གྲུབ་སྩོལ། །མེ་དཔུང་ཀློང་ནས་གཏུམ་ཆེན་ཁྲག་འཐུང་སྐུའི། །སྤྲུལ་པ་ཡང་སྤྲུལ་གྲངས་མེད་འཁོར་ཚོགས་བཅས། །རང་བཞིན་དབྱིངས་ནས་འདིར་གཤེགས་བདག་ལ་དགོངས། །བྱང་ཆུབ་བར་དུ་འབྲལ་བ་མེད་པར་མཛོད། །ལུས་
དང་ལོངས་སྤྱོད་སྣང་སྲིད་འདོད་ཡོན་ཀུན། ཁྱེད་ལ་མཆེད་འབུལ་གུས་པས་བསྟོད་བགྱི་ན། །དམིགས་མེད་བརྩེ་བ་ཆེན་པོས་ཉེར་གཟིགས་ནས། ཁྱེད་དང་དབྱེར་མེད་གཅིག་ཏུ་བྱིན་གྱིས་རློབས། །ཅེས། དཔལ་རྟ་མགྲིན་ནཱ་ག་ཀླུ་འདུལ་ལ་སྐུ་མདོག་ཕྱག་མཚན་ཆ་ལུགས་ཀྱི་སྒོ་ནས་བསྟོད་ཅིང་གསོལ་བ་འདེབས་པ་འདི་ཡང་། རིག་འཛིན་ཀརྨ་ལས་གྲུབ་ཀྱིས་བསྐུལ་ངོར་བཀོད་པའོ།། ༈ །།ཨཱཿཨོཾ་ཧཱུྃ། །ཡེ་ཐོག་དང་པོའི་སངས་རྒྱས་བོན་གྱི་སྐུ། །ཀུན་བཟང་མཆོག་དང་དྲན་པ་ནམ་མཁའི་མཚན། །ཚེ་དབང་རིག་འཛིན་པདྨ་མཐོང་གྲོལ་ལ། །གསོལ་བ་འདེབས་སོ་ཀ་དག་མངོན་གྱུར་ཤོག །བོན་དབྱིངས་ཀློང་ནས་ཐུགས་རྗེའི་རྣམ་འཕྲུལ་མཆོག །ལོ་ཆེན་བཻ་རོ་མཁའ་འགྲོ་སྲིད་པའི་རྒྱལ། །ཟབ་གཏེར་མངའ་བདག་བོན་ཞིག་གཡུང་དྲུང་གླིང་། །གསོལ་བ་འདེབས་སོ་ཡེ་ཤེས་རང་གསལ་སྩོལ། །རང་དོན་མངོན་གྱུར་གཞན་དོན་ལྷུན་གྲུབ་པའི། །མཚུངས་མེད་བསོད་བློ་གཡུང་དྲུང་
རྒྱལ་མཚན་ཞབས། །རིག་པ་རང་ཤར་བླ་མ་གསས་ཆེན་པོ། །གསོལ་བ་འདེབས་སོ་འགྲོ་དོན་འགྲུབ་པར་ཤོག །བླ་མ་སྲས་ཆུང་སྦྱིན་པ་རྒྱལ་མཚན་དང་། །སྔགས་འཆང་ཁྲོ་གསལ་ནམ་མཁའ་རྒྱལ་པོའི་མཚན། །ནམ་མཁའ་དབང་ལྡན་རིག་འཛིན་ལྷུན་གྱིས་གྲུབ། །གསོལ་བ་འདེབས་སོ་མཆོག་མཐུན་དངོས་གྲུབ་སྩོལ། །བསྟན་པ་འོད་ཟེར་ཚུལ་ཁྲིམས་རིན་ཆེན་དང་། །དྲིན་ཅན་རྗེ་བཙུན་རྩ་བའི་བླ་མ་དང་། །གཡུང་དྲུང་ཟབ་མོ་རྒྱུད་པའི་བླ་མ་ལ། །མི་ཕྱེད་དད་པས་སྙིང་ནས་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །མི་འགྱུར་བོན་གྱི་ངོ་བོར་བྱང་ཆུབ་ཅིང་། །སྟོང་གསལ་འགགས་མེད་གཡུང་དྲུང་ཐུགས་རྗེའི་འཕྲུལ། །གཤེན་རབ་སྤྲུལ་བསྒྱུར་དུ་མས་འགྲོ་འདྲེན་པའི། །ཕྲིན་ལས་རྒྱལ་བ་ཀུན་དང་དབྱེར་མེད་ཤོག །ཅེས་པ། བོན་ཁྲིད་ཟབ་མོ་སྐུ་གསུམ་བཅུད་འདྲིལ་གྱི་བླ་མ་བརྒྱུད་པའི་གསོལ་འདེབས་འདི་
ནི། བླ་མ་དམ་པ་བློ་གྲོས་རྒྱལ་མཚན་གྱི་ཐུགས་བཞེད་ལྟར་བཀོད་པའོ། །ན་མོ་གུ་རུ། །རང་ཉིད་ཐ་མལ་མདུན་གྱི་ནམ་མཁའ་རུ། །རིན་ཆེན་སེང་ཁྲི་ཉི་ཟླ་པདྨའི་སྟེང་། །སྐྱབས་གནས་དཀོན་མཆོག་རབ་འབྱམས་རྒྱལ་བའི་ཚོགས། །མ་ལུས་སྤྲིན་ཕུང་འཁྲིག་བཞིན་བཞུགས་པར་གྱུར། །བདག་གི་འཁོར་འདས་དུས་གསུམ་དགེ་རྩ་ལས། །བྱུང་བའི་མཆོད་ཚོགས་རྒྱ་མཚོ་ཡོངས་འབུལ་ཞིང་། །འགལ་རྐྱེན་སྒྲིབ་པའི་རིགས་རྣམས་ཅི་མཆིས་པ། གནོང་འགྱོད་དྲག་པོས་མཐོལ་བཤགས་བྱང་གྱུར་ཅིག །བདག་དང་མཁའ་མཉམ་འགྲོ་ཀུན་དུས་འདི་ནས། །བྱང་ཆུབ་བར་དུ་བླ་མ་ཀུན་ཏུ་བཟང་། །སྤྲུལ་འཁོར་བཅས་ལ་སྙིང་ནས་སྐྱབས་སུ་མཆི། །འཁོར་བ་དོང་སྤྲུག་སྐུ་གསུམ་མངོན་གྱུར་ཤོག །འགྲོ་ཁམས་ཡེ་སངས་རྒྱས་པ་ཆོས་སྐུའི་དོན། །མ་རིག་ལྷན་སྐྱེས་དྲི་མས་སྦག་པ་ལས། །རང་གྲོལ་ཡེ་ཤེས་མངོན་སུམ་རྟོག་པ་རུ། །བླ་མེད་བྱང་ཆུབ་སེམས་
མཆོག་བསྐྱེད་པར་བགྱི། །རང་གི་སྤྱི་གཙུག་དྲི་མེད་པད་ཟླའི་ཁྲིར། །སྐད་ཅིག་དྲན་རྫོགས་དཔལ་ལྡན་རྡོ་རྗེ་སེམས། །སྟོང་གསལ་ཐུགས་ཀར་ཧཱུྃ་ལ་ཡིག་བརྒྱས་བསྐོར། །འོད་འཕྲོས་བདག་གཞན་ཉེས་ཚོགས་ཀུན་དག་གྱུར། །ཨོཾ་བཛཱ་ས་ཏྭ་ས་མ་ཡ་རྡོར་སེམས་འོད་ཞུ་རང་དང་དབྱེར་མེད་པའི། །སྤྱི་གཙུག་པད་སྡོང་ཁྲི་འཕངས་བརྩེགས་པ་ཡི། །འཇའ་འོད་གུར་ནང་རྩ་བའི་བླ་མ་ནས། །ཀུན་བཟང་འོད་མི་འགྱུར་བ་མན་ཆད་ཀྱི། །རྒྱུད་པའི་བླ་མ་ཚར་དངར་བཞུགས་རྣམས་ལ། །སྣང་སྲིད་སྣོད་བཅུད་འཁོར་འདས་ཀྱིས་བསྡུས་པའི། །བརྟན་གཡོ་མཐའ་དག་མཆོད་པའི་མཎྜལ་དུ། །རྟག་པར་འབུལ་གྱིས་ཐུགས་རྗེས་བཞེས་ནས་ཀྱང་། །ལྷན་སྐྱེས་ཡེ་ཤེས་མཆོག་གི་དངོས་གྲུབ་སྩོལ། །བར་འདིར་གསོལ་འདེབས་རྒྱས་བསྡུས་ཅི་རིགས་བྱས་ལ། །དེ་ནས་སྙིང་ནས་གསོལ་བ་བཏབ་པའི་འཐུས། །བླ་མ་རྣམས་ཀྱི་
སྐུ་ལས་ཡེ་ཤེས་ཀྱི། །བདུད་རྩིའི་རྒྱུན་བབས་བདག་གི་ཚངས་བུག་ཞུགས། །བདེ་ཆེན་འཁོར་ལོའི་རྩ་འདབ་སོ་གཉིས་པོ། །བདུད་རྩིས་གང་བས་ལུས་ཀྱི་སྒྲིབ་པ་དག །བུམ་དབང་ཐོབ་ནས་སྤྲུལ་སྐུའི་རྟེན་འབྲེལ་འགྲིགས། །ལོངས་སྤྱོད་འཁོར་ལོའི་རྩ་འདབ་བཅུ་དྲུག་གང་། །གསང་བའི་དབང་ཐོབ་ལོངས་སྐུའི་རྟེན་འབྲེལ་འགྲིགས། །ཆོས་ཀྱི་འཁོར་ལོའི་རྩ་འདབ་བརྒྱད་གང་བས། །ཤེར་ཡེའི་དབང་ཐོབ་ཆོས་སྐུའི་རྟེན་འབྲེལ་འགྲིགས། །སྤྲུལ་འཁོར་རྩ་འདབ་དྲུག་ཅུ་རྩ་བཞི་གང་། །ཚིག་དབང་ཐོབ་ནས་ངོ་བོ་ཉིད་སྐུ་ཐོབ། །སླར་ཡང་བླ་བརྒྱུད་གཅིག་ལ་གཅིག་ཐིམ་ནས། །ཀུན་འདུས་འདྲེན་ཆོག་རྩ་བའི་བླ་མ་ཉིད། །འོད་དུ་ཞུ་ནས་བདག་དང་དབྱེར་མེད་ཐིམ། །སྒྲིབ་པ་ཀུན་དག་དབང་རྣམས་ཡོངས་རྫོགས་ཐོབ། །དྲིན་ཅན་མཚོན་བྱེད་དཔེའི་བླ་མ་དང་། །རང་རིག་མཚོན་བྱ་དོན་གྱི་བླ་མ་དང་། །གཉིས་
མེད་རང་གྲོལ་ཆེན་པོའི་གནས་ལུགས་དང་། །སྒོམ་མེད་ཡེངས་བྲལ་ཆོས་ཀྱི་དབྱིངས་སུ་ཕཊཿ །སྤྲོས་བཅས་སྤྲོས་པ་མེད་པའི་ཆོས་རྣམས་ཀྱི། །ཡང་སྙིང་བླ་མ་བསྒོམ་ཞིང་སྒྲུབ་པའི་མཐུ། །འདུས་བྱས་འདུས་མ་བྱས་པའི་དགེ་ཚོགས་ཀུན། །གཅིག་བསྡུས་མ་རྒན་འགྲོ་བ་ཡོངས་ལ་བསྔོ། །ཅེས། རྫོགས་པ་ཆེན་པོ་སྙིང་པོ་གསེར་གྱི་ཡང་བཞུན་གྱི་འཁྲིད་ཀྱི་སྔོན་འགྲོའི་རིམ་པ་འགའ་ཞིག་གི་གསོལ་འདེབས་ངག་འདོན་དུ་བྱས་ཆོག་པ་འདི་བཞིན་གྱིས་ཞེས། ལྷ་བཙུན་ཀརྨ་གཞན་ཕན་བཟང་པོས་བསྐུལ་བ་ལ་བརྟེན་ནས་བཀོད་པ་ཨིྀྠ།། ༈ །།ན་མོ་བུདྡྷཱ་ཡ། སྲིད་གསུམ་འགྲན་ཟླ་ཀུན་བྲལ་ལྷ་ཡི་ལྷ། །ཆོས་དང་འཕགས་པའི་དགེ་འདུན་འབྱུང་གནས་གཙོ། །རྒྱལ་བ་ཐུབ་དབང་འགྲོ་མགོན་ཤཱཀྱའི་སྲས། །གསོལ་བ་འདེབས་སོ་སླབ་གསུམ་མཐར་ཕྱིན་སྩོལ། །ཤཱ་རིའི་བུ་དང་གནས་
བརྟན་སྒྲ་གཅན་འཛིན། །བྲམ་ཟེ་སྒྲ་གཅན་འཛིན་དང་ཀླུ་གྲུབ་ཞབས། །ཡོན་ཏན་ལྷུན་གྲུབ་རིན་ཆེན་བཤེས་གཉེན་ལ། །གསོལ་བ་འདེབས་སོ༴ །ཆོས་ཀྱི་བཟང་པོ་ཡོན་ཏན་རྒྱ་མཚོ་དང་། །ཆོས་ཀྱི་འཕྲེང་བ་བློ་གྲོས་འབྱུང་གནས་སྦས། །པ་ཆེན་ཤཱཀྱ་ཤྲི་བྱང་ཆུབ་དཔལ། །གསོལ༴ །དབང་ཕྱུག་གྲགས་པ་གཞོན་ནུ་བྱང་ཆུབ་དང་། །གནས་བརྟན་ཡོན་རྒྱལ་ཡོན་ཏན་བློ་གྲོས་ཞབས། །འདུལ་འཛིན་སེང་གེ་དཔལ་དང་རབ་འབྱོར་སེང་། །གསོལ༴ །ཆོས་གྲུབ་སེང་གེ་མཚུངས་མེད་དབྱངས་ཅན་བཟང་། །དཀོན་མཆོག་ཡན་ལག་དབང་ཕྱུག་རྡོ་རྗེའི་ཞབས། །གཙུག་ལག་རྒྱ་མཚོ་རྩ་བའི་བླ་མ་རྗེ། །གསོལ༴ །བསྟན་པའི་གཞི་མ་སྡེ་སྣོད་གསུམ་གྱི་སྙིང་། །བསླབ་གསུམ་རིན་ཆེན་ཁང་བཟང་དམ་པ་རུ། །འཁྲིད་མཛད་རྒྱལ་བ་སྲས་དང་བརྒྱུད་པར་བཅས། །བདག་སོགས་གུས་པའི་གསོལ་བ་སྙིང་ནས་འདེབས། །དེང་ནས་བཟུང་སྟེ་སྐྱེ་བ་ཐམས་ཅད་དུ། །རྒྱལ་བསྟན་དྲི་མེད་ལ་ཞུགས་བཤེས་གཉེན་མཆོག །
དམ་པས་རྗེས་བཟུང་སྡོམ་གསུམ་མཐར་ཕྱིན་པས། །རིན་ཆེན་བསྟན་ལ་བྱ་བ་བྱེད་པར་ཤོག །བག་ཆགས་ངན་གོམས་ཉོན་མོངས་རླུང་ཤུགས་ཀྱིས། །མི་བསྐྱོད་རྒྱལ་སྲས་མཛད་སྤྱོད་ཉེར་ཞུགས་ཏེ། །ཚུལ་ཁྲིམས་ཏིང་འཛིན་ཤེས་རབ་སྦྱང་ཡོན་ཀུན། །མངོན་གྱུར་རྣམ་མཁྱེན་ཐོབ་ནས་འགྲོ་འདྲེན་ཤོག །ཅེས། པ་ཆེན་ཤཱཀྱ་ཤྲཱི་ནས་བརྒྱུད་པའི་སྡོམ་རྒྱུན་དེང་སང་གྲུབ་མཐའ་ཕལ་མོ་ཆེ་དང་། ཁྱད་པར་རྒྱལ་བ་ཡབ་སྲས་བརྒྱུད་པའི་མཁན་བརྒྱུད་རྣམས་ལ་གསོལ་བ་འདེབས་པ་འདི་བཞིན་དགོས་ཞེས། ལྷ་བཙུན་ཀརྨ་གཞན་ཕན་བཟང་པོས་བསྐུལ་བ་ལྟར་བཀོད་པ་དགེའོ།། ༈ །།ན་མོ་གུ་རུ། །སྤྱི་གཙུག་དྲི་མེད་སེང་ཁྲི་པད་ཟླའི་སྟེང་། བཀའ་དྲིན་མཉམ་མེད་རྩ་བའི་བླ་མའི་སྐུ། བྱིན་རླབས་མཚན་དཔེ་གཟི་འོད་རབ་འབར་བ། །རྒྱལ་བའི་དཀྱིལ་འཁོར་ཀུན་འདུས་བཞུགས་པའི་དྲུང་། །སྣང་སྲིད་སྣོད་བཅུད་བདག་ལུས་ལོངས་སྤྱོད་ཀུན། ལྟོས་མེད་མཆོད་
པའི་མཎྜལ་ཉིད་དུ་འབུལ། །ཐུགས་རྗེས་བཞེས་ལ་འདི་གཟུངས་བྱང་ཆུབ་བར། །འབྲལ་མེད་རྟག་ཏུ་བྱིན་གྱིས་བརླབ་ཏུ་གསོལ། །ཨེ་མ་ཧོཿ །དུས་གསུམ་རྒྱལ་བའི་སྐུ་མཆོག་ཀུན་འདུས་ཤིང་། །དམ་ཆོས་ཡིད་བཞིན་འབྱུང་བའི་རིན་པོ་ཆེ། །འཕགས་མཆོག་འདུས་པའི་གཙུག་རྒྱན་ཆོས་ཀྱི་རྗེ། །དྲིན་ཅན་རྩ་བའི་བླ་མར་གསོལ་བ་འདེབས། །རབ་འབྱམས་ཕྱོགས་བཅུའི་ཞིང་ཁམས་ཇི་སྙེད་པར། །རྨད་བྱུང་མཛད་པ་ཕྲིན་ལས་དཔག་མེད་པས། །མཐའ་ཡས་གདུལ་བྱ་འདྲེན་པའི་རོལ་གར་ཅན། །བླ་མ་ཡིད་བཞིན་འདོད་འབྱུང་གཙུག་གིས་མཆོད། །བདག་སོགས་དད་ལྡན་གདུལ་བྱ་རྣམས་ཀྱི་ཕྱིར། །བསྐལ་མང་གྲངས་མེད་གོང་ནས་ད་བར་དུ། །དཔག་མེད་ཐུགས་རྗེའི་རྣམ་འཕྲུལ་འགྱེད་མཁས་པ། ཁྱེད་ཀྱིས་ད་དུང་བདག་སོགས་སྐྱབས་ཏུ་གསོལ། །ནམ་མཁའ་མཉམ་པའི་འགྲོ་བ་བདག་འདྲའི་རིགས། །ལས་དང་ཉོན་མོངས་བག་ཆགས་ཚན་ཆོས་པས། །
གཏིང་མཐའ་མེད་པ་འཁོར་བའི་རྒྱ་མཚོར་འཁྱམས། །བླ་མ་མཁྱེན་པས་གཟིགས་ལ་ཐུགས་རྗེས་སྐྱོབ། །ཞི་དང་རྒྱས་པ་དབང་དྲག་སྣ་ཚོགས་ཀྱི། །ཐུགས་རྗེའི་ཕྲིན་ལས་སྒོ་བརྒྱ་ཕྱེས་མཛོད་ལ། །སྡུག་བསྔལ་འཁོར་བའི་འདམ་ཆུད་བུ་རྣམས་ཀྱི། །རེ་ས་གཞན་ན་མེད་དོ་ཐུགས་རྗེས་སྐྱོབས། །བྱིན་རླབས་ཐུགས་རྗེ་འགྲན་ཟླ་མ་མཆིས་པའི། །དཔལ་ལྡན་བླ་མ་ཡིད་བཞིན་ནོར་བུ་ལ། །གསོལ་བ་བཏབ་པས་དབང་བཞིའི་ཆར་ཕབས་ཏེ། །སྐུ་བཞིའི་སྒོ་འཕངས་ཚེ་འདིར་འགྲུབ་པར་ཤོག །བདག་ནི་དེང་ནས་སྐྱེ་བ་ཐམས་ཅད་དུ། །མཉམ་མེད་བླ་མ་མཆོག་ཉིད་མ་གཏོགས་པ། །གསོལ་འདེབས་སྐྱབས་ཡུལ་གཞན་ན་མ་མཆིས་པས། །སྐྱབས་གནས་མཆོག་དང་འབྲལ་བ་མེད་པར་ཤོག །དཔལ་མགོན་བླ་མས་རྗེས་སུ་བཟུང་བའི་མཐུས། །འཁོར་བ་ངན་འགྲོའི་སྡུག་བསྔལ་མི་མྱོང་ཞིང་། །དལ་འབྱོར་ཐེག་ཆེན་
རིགས་སྐྱེས་སྨིན་གྲོལ་ལམ། །མཐར་ཕྱིན་ཆོས་སྐུའི་གོ་འཕངས་མངོན་གྱུར་ཤོག །རང་དོན་བརྩན་ས་ཟིན་ནས་གཞན་དོན་དུ། །གང་འདུལ་ཐུགས་རྗེས་མཐའ་ཡས་སྤྲུལ་པའི་སྐུས། །མ་རྒན་མཁའ་ཁྱབ་འགྲོ་རྣམས་ཐར་ལམ་ལ། །ལེགས་འཁོད་མཐོང་ཐོས་དྲན་རེག་སྨིན་གྲོལ་ཤོག །དེ་སྲིད་གར་སྐྱེའི་གནས་སྐབས་ཀུན་ཏུ་ཡང་། །བྱང་ཆུབ་སྒྲུབ་པའི་འགལ་རྐྱེན་ཀུན་ཞི་ཞིང་། །བསམ་དོན་ཆོས་དང་མཐུན་པར་འགྲུབ་པ་སོགས། །སྨོན་ལམ་གང་བཏབ་གེགས་མེད་འབྱུང་བར་ཤོག །ཅེས་པ་འདི་ནི་དད་ལྡན་ཆོས་མཛད་ཚེ་རིང་རྒྱལ་པོ་ལ་ཉེ་བར་གདམས་པའོ།། ༈ །།ཕྱོགས་བཅུ་དུས་བཞིའི་རྒྱལ་བ་མ་ལུས་ཀུན། །གཅིག་ཏུ་བསྡུས་ནས་འགྲོ་བ་འདྲེན་པའི་སྐུ། །དཔལ་ལྡན་བླ་མ་བྱིན་རླབས་གཏེར་མཛོད་འཛིན། །བདག་གི་སྤྱི་བོའི་རྒྱན་དུ་འབྲལ་མེད་བཞུགས། །ལུས་དང་ལོངས་སྤྱོད་དུས་གསུམ་དགེ་བ་ཀུན། །ཟག་མེད་མཆོད་པའི་
མཆོག་ཏུ་འབུལ་ལགས་ན། །ཐུགས་རྗེ་གཟིགས་ནས་བདག་དང་མཁའ་མཉམ་གྱི། །སེམས་ཅན་སྡུག་བསྔལ་འདམ་ལས་དྲངས་དུ་གསོལ། །ལས་ཉོན་སྡིག་སྒྲིབ་མ་ལུས་དག་པར་ཤོག །ཆོས་མཐུན་འདོད་དགུ་མ་ལུས་འབྱུང་བར་ཤོག །མཆོག་མཐུན་དངོས་གྲུབ་མ་ལུས་ཐོབ་པར་ཤོག །རང་གཞན་དོན་ཀུན་ཐོགས་མེད་འགྲུབ་པར་ཤོག །ཅེས་པ་འདི་མཁས་བཙུན་དཔལ་བཟང་ལ་གདམས་པའོ།། ༈ །།ན་མོ་གུ་རུ། །སྤྱི་གཙུག་ཐབས་ཤེས་དྲི་མེད་པད་ཟླའི་སྟེང་། །སྐུ་དྲིན་འཁོར་མེད་རྩ་བའི་བླ་མ་ཉིད། །མཚན་དཔེའི་གཟི་འོད་དཔལ་འབར་བཞུགས་པ་ལ། །སྣང་སྲིད་བདག་ལུས་ལོངས་སྤྱོད་མཆོད་པ་འབུལ། །དེང་ནས་བཟུང་སྟེ་བྱང་ཆུབ་མཐར་ཐུག་བར། །སྐྱབས་གནས་སྙིང་པོ་རྗེ་བཙུན་བླ་མ་མཆོག །གུས་པས་མཆོད་ཅིང་རྩེ་གཅིག་གསོལ་བ་འདེབས། །ཡིད་བཞིན་ནོར་བུ་བླ་མ་མཆོག་ཉིད་དང་། །འབྲལ་
མེད་ཐུགས་ཀྱི་དགོངས་པ་ཉེར་བཟུངས་ཏེ། །བར་ཆད་ཀུན་གཞི་འདོད་དགུ་མ་ལུས་འགྲུབ། །ཚེ་གཅིག་སངས་རྒྱས་འགྲུབ་པའི་དངོས་གྲུབ་སྩོལ། །བླ་མའི་སྐུ་གསུང་ཐུགས་ལས་འོད་འཕྲོས་པས། །བདག་ལ་རབ་ཕོགས་སྒྲིབ་ཚོགས་མ་ལུས་དག །དབང་དང་དངོས་གྲུབ་ཀུན་ཐོབ་བླ་མ་ཡང་། །འོད་དུ་ཞུ་སྟེ་རང་ལ་དབྱེར་མེད་ཐིམ། །རང་རིག་སྤྲོས་བྲལ་རྫོགས་པ་ཆེན་པོའི་དོན། །མ་ནོར་མངོན་གྱུར་འགྲོ་བ་འདྲེན་པར་ཤོག །ཅེས་པ་ནི་གུས་ལྡན་ཚེ་དབང་བརྟན་འཕེལ་ལའོ། །ན་མ་ཤྲཱི་མ་ཧཱ་གུ་རུ་རཏྣ་མཱུ་ལ་བྷྱཿ །དཔལ་དུས་གསུམ་གྱི་སངས་རྒྱས་མ་ལུས་མི་ལུས་ལུས་པ་མེད་པའི་དཀྱིལ་འཁོར་མཐའ་དག་ཡོངས་སུ་རྫོགས་པའི་སྤྱི་དཔལ་ཆེན་པོ་རྒྱལ་བ་སྐུ་བཞིའི་བདག་ཉིད་དམ་པ་ཕྱོགས་བཅུ་རབ་འབྱམས་ཀྱི་ཞིང་ཁམས་ཀུན་ཏུ་ངོ་མཚར་སྤྲུལ་པའི་གར་གྱི་སྒྱུ་འཕྲུལ་མངོན་པར་འདུ་མཛད་པ་ཉིད་ལས་ཁྱད་པར་རྨད་དུ་བྱུང་བའི་ཐུགས་རྗེས་སྙིགས་མའི་ཐ་མ་
རྩོད་ལྡན་རྨུ་རྒོད་ཀྱི་གདུལ་བྱ་བདག་སོགས་ཉོན་མོངས་གཅོང་ཆེན་གྱི་གཟིར་བའི་སྐྱེ་བོ་རྣམས་འདུལ་ཕྱིར་སངས་རྒྱས་མི་གཟུགས་རྡོ་རྗེ་སློབ་དཔོན་གྱི་ཚུལ་དུ་སྤྲུལ་པའི་རྒྱལ་བ་ཉིད། དེང་ཡང་ལས་ངན་སྒྲིབ་པས་འཐུམ་པའི་བུ་འབངས་བདག་འདྲར་བརྩེ་ཆེན་རྒྱུན་ཆད་མེད་པའི་ཐུགས་རྗེས་ཉེ་བར་དགོངས་ཏེ། སྤྱི་གཙུག་བདེ་ཆེན་རྩེ་མོ་རྣམ་པར་བཀོད་པའི་གནས་སུ་ཐབས་ཤེས་ཉི་ཟླ་པདྨའི་གདན་ལ་ཡོངས་སུ་བཞུགས་ཤིང་། ལུས་དང་ལོངས་སྤྱོད་གཏན་མདུན་དང་བཅས་པ་མཆོད་པའི་མཎྜལ་དུ་འབུལ་བ་ཟག་མེད་རོལ་པ་ཆེན་པོར་བཞེས་ནས། གདུང་ཤུགས་གུས་པའི་གསོལ་འདེབས་སྨྲེ་ངག་ང་རོའི་དབྱངས་འདི་ཕའི་སྙན་དུ་གསན་ཏེ་བུའི་རེ་བ་བསྐོངས་ཤིང་དམིགས་མེད་སྙིང་རྗེའི་ཀློང་ནས་ཐུགས་རྗེ་བྱིན་རླབས་ཀྱི་ཆར་ཆེན་ད་ལྟ་ཉིད་དུ་དབབ་པར་མཛད་དུ་གསོལ། ཨེ་མ། ཕ་གཅིག་སྙིང་ནས་རང་དྲན་ནོ་དྲིན་ཅན་
གྱི་བླ་མ། །ཉམས་ཐག་ལས་ངན་གྱིས་མནར་བའི་བུ་འབངས་ལ་གཟིགས་དང་། །ལྷང་ལྷང་འོ་དོད་ཀྱི་གདུང་དབྱངས་སྙན་དབང་དུ་གསན་ནམ། །ཕ་ཁྱེད་བུ་ལ་རང་བརྩེ་བས་བྱིན་རླབས་ཀྱི་ཆར་ཕོབ། །ཡ་གི་སངས་རྒྱས་ཀྱི་ཞིང་ཁམས་གྲངས་མེད་ཀྱི་བཀོད་པར། །གང་འདུལ་དེར་སྣང་གི་དཀྱིལ་འཁོར་ཇི་སྙེད་ཅིག་མཆིས་ཀྱང་། །བདག་འདྲའི་བློ་གཏད་ཀྱི་ཡུལ་གྱུར་ཕ་མཆོག་ཁྱེད་ཁོ་ནར། །བསམ་ཤིང་རྩེ་གཅིག་ཏུ་དྲན་ནོ་དུས་གསུམ་གྱི་སངས་རྒྱས། །མ་གི་ཁམས་གསུམ་གྱི་འཁོར་བ་གཏིང་མེད་ཀྱི་རྒྱ་མཚོར། །ཐོག་མེད་ད་བར་དུ་འཁྱམས་ཤིང་ཡང་སྲིད་དུ་འཁོར་བས། །ད་ནི་སྐྱབས་གནས་ཀྱི་ལྟོས་ས་གང་ན་ཡང་མ་མཆིས། །བརྩེ་བས་གཡེལ་མེད་དུ་གཟིགས་དང་དྲན་མཆོག་གི་རྒྱལ་པོ། །ཚེ་གང་གཏན་དུ་རང་འབད་ཀྱང་དོན་མེད་ཀྱི་བྱ་བྱེད། །ཅི་བྱས་སྡུག་བསྔལ་གྱི་སྒོ་ཐབས་ལས་ཉོན་གྱི་འཁྲུལ་འཁོར། །དམ་ཆོས་བྱེད་འདོད་ཀྱི་
ངང་དུ་མི་ཚེ་འདི་སྟོང་ཟད། །བདག་འདྲར་རྒྱུན་ལྡན་དུ་སྐྱོབ་དང་ཐུགས་རྗེ་བདག་ཉིད། ཁྱེད་ཀྱི་ཐུགས་རྗེ་དང་ཕྲིན་ལས་ཕྱོགས་རིས་དང་བྲལ་ཡང་། ཅི་བྱ་གཏོས་མེད་ཀྱི་བུ་ང་ལས་དབང་དུ་འདོར་ན། །ཚད་མེད་ཐུགས་སྐྱེད་ཀྱི་གོ་ཆ་དོན་མེད་དུ་འགྱུར་གྲང་། །སྟོབས་ཆེན་རྫུ་འཕྲུལ་གྱི་མཐུ་ལྡན་ད་དུས་ལ་བབས་སོ། །ཐུགས་རྗེས་ད་ལྟ་རང་གཟིགས་དང་མཚན་ལྡན་གྱི་བླ་མ། །བྱིན་རླབས་ཆར་རྒྱུན་རང་ཕོབ་གཅིག་སངས་རྒྱས་ཀུན་གཅིག་བསྡུས། །ལས་ཉོན་བར་ཆད་ལས་སྐྱོབས་ཅིག་དྲིན་ཅན་གྱི་རྗེ་བཙུན། །མཆོག་མཐུན་དངོས་གྲུབ་ཀུན་སྩོལ་ཅིག་ཡིད་བཞིན་གྱི་ནོར་བུ། །ཅེས་པ་འདི་ཡང་དགེ་སློང་དྷརྨ་ཤཱ་དྷར་ལ་གདམས་པ་ཨིྀྠ།། ༈ །།ན་མོ་གུ་རུ། །མཆོག་མི་འགྱུར་བདེ་ཆེན་གྱི་ཞིང་ཁམས་ནས། །དཔལ་ཀུན་བཟང་ཡབ་ཡུམ་ལ་གསོལ་བ་འདེབས། །གདངས་འགག་མེད་འོད་གསལ་གྱི་སྒྱུ་འཕྲུལ་སྐུ། །
དཔལ་རྡོ་རྗེ་སེམས་དཔའ་ལ་གསོལ༴ །སྐུ་སྣང་སྟོང་འཇའ་ལུས་ཀྱི་ཟློས་གར་ཅན། །དཔལ་དགའ་རབ་རྡོ་རྗེ་ལ༴ །ལམ་གྲུབ་པ་མཆོག་བརྙེས་ཀྱི་རྫུ་འཕྲུལ་བདག །རྗེ་ཤྲཱི་སིང་ཧ་ལ༴ །སྐྱབས་སངས་རྒྱས་ཀུན་འདུས་ཀྱི་ཐུགས་རྗེ་ཅན། །རྗེ་པད་འབྱུང་ཡབ་ཡུམ༴ །ཆོས་ཟབ་དགུའི་གཏེར་མཛོད་ཀྱི་རང་དབང་ཅན། །རྗེ་ཀརྨ་གླིང་པ་ལ༴ །ཐར་ལམ་གྱི་དེད་དཔོན་དམ་པ་མཆོག །སྲས་ཉི་ཟླ་ཆོས་རྗེ་ལ༴ །དོན་གཉིས་ཀྱི་འབྲས་བུ་ཆེར་སྨིན་པ། །རྗེ་སཱུརྱ་ཙནྟྲ་ལ༴ །ཐེག་ཆེན་གྱི་བསྟན་པའི་སྲོག་ཤིང་འཛིན། །རྗེ་ནམ་མཁའ་རྒྱ་མཚོ་ལ༴ །བྱང་སེམས་ཀྱི་བརྟུལ་ཤུགས་ཕན་བདེའི་གཏེར། །རྗེ་ཀུན་དགའ་ལྷུན་གྲུབ་ལ༴ །སྙིགས་དུས་ཀྱི་འགྲོ་མགོན་མཐུ་སྟོབས་བདག །རྗེ་རིག་འཛིན་ཡབ་སྲས༴ །ཕྱོགས་མེད་ཀྱི་འགྲོ་དོན་ཆོས་ཆར་འབེབ། །རྗེ་བསོད་ནམས་རིན་ཆེན༴ །གསང་སྔགས་ཀྱི་བསྟན་སྲོག་འཛིན་པའི་དཔལ། །རྗེ་ངག་གི་དབང་པོ༴ །སངས་རྒྱས་ལག་
བཅངས་སུ་སྤྲོས་མཁས་པ། །རྗེ་བསོད་ནམས་དབང་པོ་ལ༴ །རྗེ་ཀུན་གྱི་ཐུགས་རྗེ་གཅིག་བསྡུས་པ། །ཕ་རྩ་བའི་བླ་མ་ལ༴ །རྗེ་ཡིད་བཞིན་ནོར་བུ་ཚར་དངར་བ། ཁྱེད་རྒྱུད་པའི་བླ་མ་ཐུགས་རྗེ་ཅན། །བདག་གསོལ་བ་འདེབས་པའི་བུ་འབངས་ལ། །དངོས་བྱིན་གྱིས་རློབས་ཤིག་བླ་མའི་ཚོགས། །ཀུན་གཅིག་བསྡུས་རྩ་བའི་བླ་མ་མཆོག །ཕྱོགས་དུས་ཀྱི་སངས་རྒྱས་སྲས་བཅས་དང་། །ལྷ་ཡི་དམ་མཁའ་འགྲོ་ཆོས་སྐྱོང་སོགས། །མཚན་རྣམ་འགྱུར་སྤྲུལ་ཚོགས་ཅིར་བསྟན་ཀྱང་། །དོན་འགྱུར་མེད་དྲིན་ཅན་ཁྱོད་ཀྱི་འཕྲུལ། །བདག་རེ་ས་གཞན་ན་མ་མཆིས་པས། །དུས་འདི་ནས་མཐར་ཐུག་བྱང་ཆུབ་བར། །མགོན་ཁྱེད་ཀྱི་ཐུགས་རྗེས་སྐྱབས་ཏུ་གསོལ། །བདག་ལས་ངན་མ་རིག་སྒྲིབ་པས་འཐུམ། །དོན་མེད་ཀྱི་བྱ་བ་སྣ་ཚོགས་ལ། །ལོང་མེད་ཀྱི་མི་ཚེ་ཆེར་འདས་ཤིང་། །ཉོན་མོངས་ཀྱི་འདམ་དུ་རབ་བྱིང་བས། །རང་བྱུང་གི་
རིག་པ་ཆོས་སྐུའི་དོན། །མ་རྟོག་པས་འཁོར་བར་འཁོར་ཞིང་འཁྱམས། །འཁྲུལ་སྣང་གི་རྦ་ལ་གཡེང་གཡེང་ནས། །བདེ་ཆེན་གྱི་སྐམ་སར་བསྒྲོད་དུས་མེད། །ཐུགས་རྗེ་ཅན་གྱིས་ཐུགས་རྗེས་དང་གཟིགས་ལ། །ཉོན་མོངས་ཀྱི་འཁྲུལ་འཁོར་གཞོམ་པ་དང་། །ལོག་རྟོག་གི་གཅོང་ཆེན་ཞི་བ་དང་། །ཐར་ལམ་གྱི་ཞིང་དུ་འཁྲིད་དུ་གསོལ། །རང་སེམས་སངས་རྒྱས་ཀྱི་ཡེ་ཤེས་ཆེ། །བདེ་ཆེན་ལྷན་སྐྱེས་ཀྱི་རང་ཞལ་དེ། །ད་ལྟ་མངོན་སུམ་དུ་མཐོང་ནས་ཀྱང་། །ཚེ་གཅིག་བྱང་ཆུབ་ཀྱི་དངོས་གྲུབ་སྩོལ། །ཐུགས་རྗེ་ཅན་གྱིས་གཟིགས་ཤིག་རྗེ་བཙུན་བླ་མ་མཆོག །བྱིན་རླབས་ཆར་རྒྱུན་ཕོབ་ཅིག་དྲིན་ཅན་རིན་པོ་ཆེ། །ཉམས་རྟོགས་ཡེ་ཤེས་སྩོལ་ཅིག་སངས་རྒྱས་མི་གཟུགས་ཅན། །མཆོག་མཐུན་དངོས་གྲུབ་སྩོལ་ཅིག་ལྷ་ཡི་ལྷ་གཅིག་བུ། །རང་གཞན་དོན་གཉིས་ལྷུན་གྲུབ་སྨིན་ཅིང་གྲོལ་བར་མཛོད། །རྒྱལ་བ་ཀུན་འདུས་དཔལ་ལྡན་བླ་མ་མཁྱེན་ནོ། །
ཅེས་བརྒྱ་ཕྲག་ལ་སོགས་ཅི་རིགས་པར་མོས་གུས་དྲག་པོས་གསོལ་བ་ཕུར་ཚུགས་སུ་བཏབ་པའི་མཐར། ཀཱ་ཡ་ཨ་བྷི་ཥཱིཉྩ་ཨོཾ། ཝཱ་ཀ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུྃ། སརྦ་ཨ་བྷི་ཥིཉྩ་ཧྲཱིཿ ལུས་ལ་སྐུའི་བྱིན་གྱིས་རློབས། །ལུས་སྤྲུལ་པས་གཞན་དོན་འགྲུབ་པར་ཤོག །ངག་ལ་གསུང་གི་བྱིན་གྱིས་རློབས། །ངག་ཆོས་སྒྲས་འགྲོ་བ་སྨིན་པར་ཤོག །ཡིད་ལ་ཐུགས་ཀྱི་བྱིན་གྱིས་རློབས། །ཡིད་རང་གྲོལ་ཆོས་སྐུ་མངོན་འགྱུར་ཤོག །ཕ་བླ་མའི་སྐུ་གསུང་ཐུགས་ཡེ་ཤེས། །བདག་སྒོ་གསུམ་དབྱེར་མེད་གཅིག་གྱུར་ཏེ། །དོན་སྤྲོས་མེད་ཆོས་དབྱིངས་ཐིག་ལེའི་ཀློང་། །མཆོག་ངོ་བོ་ཉིད་སྐུ་རྟགས་འགྲུབ་ཤོག །དཔལ་ལྡན་བླ་མ་སྒོམ་ཞིང་སྒྲུབ་པ་ཡི། །དགེ་བ་འདི་དང་ཚེ་རབ་དགེ་ཚོགས་རྣམས། །མ་ལུས་མཁའ་མཉམ་འགྲོ་བ་སངས་རྒྱས་ལམ། །ཐོབ་ཕྱིར་བསྔོ་བ་སྨོན་ལམ་ཀུན་འགྲུབ་ཤོག །
ཅེས་བར་དེ་ཐོས་གྲོལ་གྱི་རྒྱུད་རིམ་གསོལ་འདེབས་དབང་བཞི་བླངས་བ་དང་བཅས་པ་འདི་ནི་རང་གི་རིགས་རྒྱུས་ལས་བྱུང་བ་མཆོག་གྲུབ་སྙིང་པོ་ལ་ཆེད་དུ་གདམས་པའོ། །ཕྱོགས་དུས་རྒྱལ་བ་མ་ལུས་གཅིག་བསྡུས་པའི། །བླ་མ་རིགས་བདག་རྒྱལ་པོ་ཐུགས་རྗེ་ཅན། །བདག་སོགས་ཁམས་གསུམ་འཁོར་བའི་སེམས་ཅན་ལ། །གཡེལ་མེད་ཐུགས་རྗེ་ཆེན་པོས་གཟིགས་སུ་གསོལ། །འགལ་རྐྱེན་བར་ཆད་མ་ལུས་ཞི་བ་དང་། །མཆོག་མཐུན་དངོས་གྲུབ་མྱུར་དུ་ཐོབ་པ་དང་། །ཚེ་དང་སྒྲུབ་པ་མཉམ་སྟེ་རང་གཞན་དོན། །མྱུར་འགྲུབ་རྒྱལ་བ་ཁྱེད་དང་དབྱེར་མེད་ཤོག །ཅེས་པ་ནི། དད་འབྱོར་ལྡན་པ་ཏིང་འཛིན་དབང་མོ་ལའོ། །རྒྱལ་བ་སྐུ་བཞི་དབྱེར་མེད་པའི། །བླ་མ་སངས་རྒྱས་ཀུན་གྱི་དངོས། །བདག་དང་མཁའ་མཉམ་འགྲོ་བ་ལ། །དམིགས་མེད་ཐུགས་རྗེ་ཆེན་པོ་ཡི། །དུས་དང་རྣམ་པ་ཐམས་ཅད་དུ། །བརྩེ་བས་བྱིན་རླབས་ཆར་ཆེན་ཕོབ། །བདག་འདྲ་ལས་ངན་འཁོར་བར་འཁྱམས། །ཉོན་མོངས་སྡུག་བསྔལ་གྱིས་གཟིར་བ།
འདི་ལ་སྐྱབས་མ་མཆིས་པས། །ཐུགས་རྗེས་གཟིགས་ཤིག་བླ་མ་རྗེ། །བྱིན་གྱིས་རློབས་ཤིག་རྒྱལ་བ་མཆོག །ཚེ་གཅིག་སངས་རྒྱས་མྱུར་ཐོབ་པའི། །དངོས་གྲུབ་སྩོལ་ཅིག་སྐུ་དྲིན་ཅན། །གསོལ་བ་འདེབས་པའི་བུ་འབངས་ལ། །རྟག་པར་རྗེས་སུ་བཟུངས་ནས་ཀྱང་། །མགོན་པོ་ཁྱེད་དང་དབྱེར་མེད་ཤོག །ཅེས་པ་འདི་ནི་སྐལ་ལྡན་ཚུལ་ཁྲིམས་དབང་པོ་ལ་གདམས་པའོ། །ན་མཿསརྦ་བུདྡྷ་སུ་སཾ་གྲ་མ་ཧཱ་གུ་རུ་རཏྣ་བྷྱཿ གང་གི་ཐུགས་རྗེ་ཟླ་ཤེལ་སྙིང་པོ་ནི། །གུས་ལྡན་རབ་དྭངས་མཚོ་མོར་རྟག་འཆར་བའི། །རྨད་བྱུང་བདེ་སྟེར་རོལ་པའི་འོད་སྟོང་ཅན། །རྗེ་བཙུན་སྐུ་བཞིའི་དབང་ཕྱུག་སྤྱི་བོས་འདུད། །སྨོན་ལམ་རྒྱ་ཆེན་གདུལ་བྱའི་དཔལ་དུ་བསྐྲུན། །ཐུགས་རྗེ་ཚད་མེད་སྐལ་ལྡན་སྨིན་གྲོལ་སྟེར། །ཕྲིན་ལས་མཐའ་ཡས་བྱང་ཆེན་ལམ་མཁར་རབ། །ངོ་མཚར་འབྱུང་གནས་དེ་ལ་གསོལ་བ་འདེབས། །སྙིང་ནས་དྲན་ནོ་བླ་མ་སངས་རྒྱས་དྲན། །ཐུགས་རྗེས་
གཟིགས་དང་རྒྱལ་བའི་ཕྲིན་ལས་པ། །གསོལ་བ་འདེབས་སོ་གཡེལ་མེད་བརྩེ་བས་སྐྱོངས། །བྱིན་གྱིས་རློབས་ཅིག་ལས་ངན་སེམས་ཅན་ལ། །རེ་ས་གཞན་མེད་དྲིན་ཅན་ཆོས་ཀྱི་རྗེ། །འདོར་བར་འཕོད་དམ་སྙིགས་དུས་གདུལ་བྱའི་ཚོགས། །སྒྲིབ་མེད་གཟིགས་པ་མངའ་ཁྱེད་གང་ན་བཞུགས། །འབྲལ་མེད་མཁྱེན་བརྩེའི་ཕྱག་གིས་བཟུང་དུ་གསོལ། །ཨོཾ། །སངས་རྒྱས་ཀུན་གྱི་འགྱུར་མེད་དྲི་བྲལ་སྐུ། །མ་ལུས་དཔལ་ལྡན་བླ་མའི་རྫུ་འཕྲུལ་བཀོད། ཁོ་ན་ཉིད་དུ་ངེས་ཤེས་རྩེ་གཅིག་ཤར། །བདག་ལུས་དེ་བཞིན་ཉིད་དུ་དབྱེར་མེད་ཤོག །ཨཱཿ །རྒྱལ་གསུང་རབ་འབྱམས་ཆོས་སྒོ་ཇི་སྙེད་ཀུན། །དོན་གཅིག་བླ་མ་མཆོག་གི་གསུང་འགགས་མེད། །གྲགས་སྟོང་རྡོ་རྗེའི་སྔགས་སུ་ལྷུན་གྲུབ་པའི། །དབྱིངས་སུ་བདག་གི་ངག་ཀྱང་དབྱེར་མེད་ཤོག །ཧཱུྃ། །ཆོས་སྐུ་ཁྱབ་གདལ་རྒྱལ་བའི་ཐུགས་ཡེ་ཤེས། །གདོད་མའི་ཉིད་ནས་རང་རིག་གནས་ལུགས་དོན། །མ་བཅོས་ཡང་དག་དོན་
གྱི་བླ་མའི་ངང་། །འདུ་འབྲལ་མེད་པའི་འབྲས་བུ་རྟོགས་པར་ཤོག །ཧྲཱིཿ །སྣང་གྲགས་ཡེ་ནས་བླ་མའི་དཀྱིལ་འཁོར་དབྱིངས། །དྲན་རིག་རང་བྱུང་རང་གྲོལ་ཡེ་ཤེས་ཀྱི། །ཕྱི་ནང་གསང་བ་དེ་ཉིད་དབྱེར་མེད་ཀློང་། །བླ་མ་སྐུ་བཞི་འབྲལ་མེད་མངོན་གྱུར་ཤོག །ཅེས་པ་ནི། །དགེ་བཤེས་བསྟན་འཛིན་ཕུན་ཚོགས་ལའོ།། ༈ །།ན་མོ་གུ་རུ་བྷྱཿ །ཚོགས་གཉིས་ཆུ་གཏེར་ཐུགས་རྗེའི་རླབས་ཕྲེང་ཅན། །སྨོན་ལམ་ཡེ་ཤེས་ཡོན་ཏན་དུ་མས་གཏམས། །གདུལ་བྱའི་ཡིད་བཞིན་འདོད་གཏེར་འབྱུང་གནས་ཆེ། །རྗེ་བཙུན་བླ་མ་རྒྱལ་བ་ཀུན་གྱི་དངོས། །མཁྱེན་པའི་ལྷ་ལམ་བརྩེ་ཆེན་འོད་སྟོང་ཅན། །རྨད་བྱུང་ཕྲིན་ལས་ནམ་མཁའི་མཐར་ཁྱབ་པས། །འགྲོ་བའི་ལས་ཉོན་མུན་ཆེན་བསེལ་མཁས་གང་། །བསྟན་པའི་སྒྲོན་མེ་མཆོག་དེར་སྙིང་ནས་འདུད། །གསོལ་བ་འདེབས་སོ་བླ་མ་འགྲོ་བའི་མགོན། །ཐུགས་རྗེས་གཟིགས་དང་ལས་ལས་སེམས་ཅན་ལ། །བྱིན་
གྱིས་རློབས་ཅིག་རེ་སའི་སྐྱབས་ཅིག་པུ། །འབྲལ་མེད་མཁྱེན་བརྩེའི་སྤྱན་གྱིས་གཟིགས་སུ་གསོལ། །བདག་སོགས་འདི་གཟུང་བྱང་ཆུབ་མཐར་ཐུག་བར། །སྐྱབས་མཆོག་ཁྱེད་ཀྱི་རྟགས་པར་རྗེས་བཟུང་སྟེ། །ལས་ངན་འཁོར་བའི་མཚོ་ལས་མྱུར་སྒྲོལ་ཞིང་། །རྣམ་གྲོལ་བྱང་ཆུབ་སྙིང་པོ་མངོན་གྱུར་ཤོག །སྐྱེ་ཞིང་སྐྱེ་བར་དལ་འབྱོར་དམ་ཆོས་ལྡན། །བསྟན་དང་འགྲོ་བའི་དོན་ལ་རྟག་བརྩོན་ཞིང་། །རང་གཞན་སྨིན་གྲོལ་ཐོས་བསམ་སྒོམ་མཐར་ཕྱིན། །ཀུན་མཁྱེན་རྒྱལ་བའི་གོ་འཕངས་མཆོག་ཐོབ་ཤོག །ཅེས་པ་འདི། །དད་ལྡན་ཀརྨ་མངོན་ལེགས་དང་ཀརྨ་སྒྲུབ་རྒྱུད་གྲོགས་མཆེད་གཉིས་ལའོ།། ༈ །།ན་མོ་སྭ་ཙིཏྟ་བུདྡྷ་ཡ། །སྲིད་ཞི་གཏན་སྒྲོལ་མཆོག་གི་དམ་བཅའ་དང་། །སྨོན་ལམ་ཐུགས་རྗེའི་ཉི་འོད་གསལ་འབར་བས། །མཁའ་ཁྱབ་འགྲོ་ལ་དགེ་ལེགས་ལམ་སྟོན་པ། །རྣམ་འདྲེན་བླ་མ་མཆོག་ཞབས་
སྙིང་ནས་འདུད། །དུས་གསུམ་རྟག་ཏུ་འགྲོ་ཕན་ངལ་མེད་པས། །རྣམ་འཕྲུལ་རྒྱུན་མི་ཆད་པའི་ཟློས་གར་ནི། །འཕགས་མཆོག་ཀུན་དགའ་ཐོན་མི་སམྦྷོ་ཊ། །ལོ་ཆེན་བཻ་རོ་གཏེར་སྟོན་རྡོ་རྗེ་གླིང་། །འཇམ་དངོས་ས་པ་གྲུབ་མཆོག་ཁྱུང་པོ་ཞབས། །གཡག་ཆར་སྔོན་པོ་ཀུན་སྐྱོང་མཆོག་ལྡན་མགོན། །མཚུངས་བྲལ་བསྟན་འཛིན་ལེགས་གྲུབ་སྩལ། །ལ་སོགས་སྲིད་པ་ཇི་སྲིད་གནས་བར་དུ། །གང་འདུལ་ཕྲིན་ལས་གཏེར་ཆེན་རོལ་པའི་བདག །མཉམ་མེད་རྒྱལ་བའི་སྤྱི་གཟུགས་ཁྱེད་ཞབས་ལ། །བདག་སོགས་སྙིང་ནས་གུས་པས་གསོལ་བ་འདེབས། །ཚེ་གཅིག་སངས་རྒྱས་འགྲུབ་པའི་དངོས་གྲུབ་སྩོལ། །ཅེས་པ་འདི་ནི། །གཙང་རོང་གི་བཙུན་པ་སུ་སིདྡྷི་ལའོ། །ན་མོ་མ་ཧཱ་གུ་རུ་གུ་་སིདྡྷི་ཧཱུྃ། །འགྲོ་ལ་ཕན་བདེའི་སྤྱན་གྱིས་བསྐྱངས་མཛད་པའི། །བླ་མ་རིགས་འདུས་རྒྱལ་བ་
སྨན་གྱི་བླ། །སྙིགས་དུས་འགྲོ་བ་འདུལ་སླད་སྐུ་སྤྲུལ་པ། །མཚུངས་མེད་བླ་མ་མཆོག་ལ་གསོལ་བ་འདེབས། །བདག་དང་མཁའ་མཉམ་རིས་དྲུག་སྐྱེ་འགྲོ་རྣམས། །འཁོར་བ་མེ་འོབ་སྡུག་བསྔལ་བརྒྱས་གང་བའི། །རབ་འཇིགས་ཁྲི་མུན་ཆེན་པོར་རྟག་ཆུད་པ། །འདི་ལས་སྐྱོབས་ཅིག་དཔལ་ལྡན་བླ་མ་རྗེ། །སྙིང་ནས་དྲན་ནོ་རེ་སའི་སྐྱབས་གཅིག་པུ། །བརྩེ་བས་གཟིགས་དང་ཐུགས་རྗེའི་བདག་ཉིད་ཁྱོད། །བྱིན་གྱིས་རློབས་ཤིག་ལས་ངན་སེམས་ཅན་ལ། ཁྱེད་ཀྱི་ཕྲིན་ལས་བྲི་གང་མེད་ན་ཡང་། །བདག་འདྲ་རྨོངས་པའི་བུ་ཡིས་འབོད་ལགས་ན། །གཡེལ་བ་མེད་པར་རྗེས་སུ་བཟུངས་ནས་ཀྱང་། །རྣམ་མཁྱེན་སངས་རྒྱས་ས་ལ་འགོད་དུ་གསོལ། །ན་མོ་བདག་གིས་དཔལ་ལྡན་བླ་མ་བསྒྲུབ་པ་ཡིས། །དགེ་བ་འདི་དང་དགེ་གཞན་ཅི་མཆིས་མཐུས། །མཁའ་མཉམ་ཕ་མ་འགྲོ་བ་མ་ལུས་ཀུན། །བདག་གིས་འདྲེན་
པའི་ནུས་ལྡན་ཉིད་གྱུར་ཅིག །གང་དུ་སྐྱེས་ཀྱང་དལ་འབྱོར་དམ་ཆོས་དང་། །རྣམ་འདྲེན་མཆོག་བརྙེད་དགེ་ལེགས་ཕུན་ཚོགས་དོན། །རབ་འགྲུབ་རང་གཞན་ཕན་བདེ་སྒྲུབ་ལ་མཁས། །འགལ་རྐྱེན་བར་ཆད་མེད་པ་ཉིད་གྱུར་ཅིག །ཡིད་ལ་འདོད་དགུའི་དཔལ་ཀུན་ལྷུན་གྲུབ་ནས། །ལྷ་དང་བླ་མ་མཉེས་ཤིང་དམ་ཚིག་ལྡན། །མཐོང་ཐོས་དྲན་རེག་འགྲོ་བ་བདེ་ལ་འགོད། །རྒྱལ་ཀུན་ཕྲིན་ལས་མ་ལུས་བདག་འགྲུབ་ཤོག །ཅེས་པ་འདི་ནི་གསོ་རིག་འཛིན་པ་སྨན་བླ་ཚེ་དབང་ལ་གདམས་པའོ། །ན་མོ་མ་ཧཱ་གུ་རུ་བྷྱཿ རང་གི་སྤྱི་གཙུག་སྟོང་ཉིད་དུ། །རིན་ཆེན་ཁྲི་དང་པད་ཟླའི་ཁར། །སྐྱབས་གནས་རྩ་བའི་བླ་མ་དེ། །སློབ་དཔོན་པདྨའི་ཆ་བྱད་ཚུལ། །ཞལ་གཅིག་ཕྱག་གཉིས་མཛེས་འཛུམ་ཅན། །ཕྱག་གཡས་རྡོ་རྗེ་ཐུགས་ཀར་འཛིན། །གཡོན་པ་མཉམ་གཞག་ཐོད་པ་བསྣམས། །མཆན་ཁུང་གཡོན་དུ་ཁ་ཊཾྭཱ་དང་། །དབུ་ལ་
འདབ་ལྡན་རིགས་ལྔས་མཚན། །ན་བཟའ་ཟབ་བེར་ཕོད་ཀ་དང་། །ཆོས་གོས་འོད་ཟེར་འབར་བས་མནབས། །ཞབས་གཉིས་རྡོ་རྗེ་དཀྱིལ་ཀྲུང་བཞུགས། །འཇའ་འོད་ལྔ་ལྡན་འཁྱིལ་བའི་སྐུའི། །སྤྱི་བོར་ཨོཾ་དང་མགྲིན་པར་ཨཱཿ །ཐུགས་ཀར་ཧཱུྃ་གི་མཚན་པ་ཅན། །བདག་སོགས་མོས་པའི་བུ་རྣམས་ལ། །འབྲལ་མེད་ཐུགས་རྗེས་གཟིགས་མཛད་ཅིང་། །བྱིན་རླབས་ཆར་ཆེན་འབེབས་བཞུགས་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། །སྐྱབས་གནས་བླ་མ་བསྒྲུབ་པ་ཡི། །དགེ་བ་འདི་དང་ཚེ་རབས་ཀྱི། །དགེ་ཀུན་གཅིག་ཏུ་བསྒོམ་པའི་མཐུས། །བདག་དང་འགྲོ་ཀུན་བྱང་ཆུབ་ཤོག །ཅེས་དད་ལྡན་བསོད་ནམས་ཆོས་འཕེལ་ལའོ། །ན་མོ་གུ་རུ། །ཆོས་ཀུན་གདོད་ནས་དག་པའི་གནས་ལུགས་མཆོག །ཡེ་ཤེས་རང་གསལ་མངོན་སུམ་ནོར་བུའི་གཏེར། །འགྲོ་ཁམས་མོས་པ་རྒྱ་མཚོར་སྩོལ་མཁས་པ། །སྣ་ཚོགས་རང་
གྲོལ་ཞབས་ལ་གསོལ་བ་འདེབས། །བསྐལ་མང་དུ་མར་འགྲོ་ཕན་ཁོ་ནའི་ཐུགས། །མངོན་པར་བྱང་ཆུབ་མཆོག་ཏུ་བསྐྱེད་མཛད་ལྟར། །སྙིགས་མཐའི་འགྲོ་བ་སྡུག་བསྔལ་བརྒྱས་གཟིར་ཀུན། །སྐྱོབས་ཕྱིར་བསྐལ་བརྒྱར་གཡོ་མེད་ཞབས་བརྟན་གསོལ། །བདག་དང་མཁའ་མཉམ་མ་གྱུར་སེམས་ཅན་རྣམས། །ལྷན་སྐྱེས་མ་རིག་སྒྲིབ་བྲལ་ཆོས་ཀྱི་སྐུ། །རང་བྱུང་དོན་གྱི་སངས་རྒྱས་མངོན་གྱུར་པའི། །དངོས་གྲུབ་མཆོག་ཉིད་མྱུར་དུ་འགྲུབ་པར་ཤོག །ཅེས་པ་འདི་ནི། རིག་འཛིན་ཆེན་པོ་ཀུན་རྣམ་པའི་གྲྭ་པ་རྣམས་ཀྱིས་བསྐུལ་ངོར་བཀོད་པའོ།། ༈ །།ན་མོ་གུ་རུ། ཀ་དག་རིག་སྟོང་གི་ཞིང་ཁམས། །ཀློང་ཆེན་ཁྱབ་གདལ་གྱི་བདག་ཉིད། །ཆོས་སྐུ་སྤྲོས་བྲལ་གྱི་བླ་མ། །གསོལ་བ་སྙིང་ནས་རང་འདེབས་སོ། །མ་བཅོས་མཐའ་བྲལ་གྱི་ཐུགས་རྗེས། །འདུ་འབྲལ་གཉིས་མེད་དུ་གཟིགས་
དང་། །རང་གསལ་ལྷུན་གྲུབ་ཀྱི་ཞིང་ཁམས། །ཡེ་ཤེས་ལྔ་རྫོགས་ཀྱི་དཀྱིལ་འཁོར། །གསལ་མདངས་ལོངས་སྐུའི་བླ་མ། །གསོལ་བ་སྙིང་ནས་རང་འདེབས་སོ། །རང་མདངས་འགགས་མེད་ཀྱི་ཐུགས་རྗེས། །འཛིན་མེད་རང་གྲོལ་དུ་གཟིགས་དང་། །རོལ་རྩལ་སྣ་ཚོགས་ཀྱི་ཞིང་ཁམས། །དག་པ་རབ་འབྱམས་ཀྱི་ཕོ་བྲང་། །རྣམ་འགྱུར་སྤྲུལ་སྐུ་ཡི་བླ་མ། །གསོལ་བ་སྙིང་༴ །གང་འདུལ་དེར་སྟོན་གྱི་ཐུགས་རྗེས། །སྲིད་ཞི་གཏན་སྒྲོལ་དུ་གཟིགས་དང་། །དག་སྣང་ཕྱོགས་མེད་ཀྱི་ཞིང་ཁམས། །ཕྲིན་ལས་རྣམ་འཕྲུལ་གྱི་འབྱུང་གནས། །སྐུ་བཞི་ཡོངས་རྫོགས་ཀྱི་བླ་མ། །གསོལ་བ༴ །དམིགས་མེད་བརྩེ་ཆེན་གྱི་ཐུགས་རྗེས། །ལས་ངན་བདག་སོགས་ལ་གཟིགས་དང་། །ཨེ་མ་ཧོཿ། དྲན་པ་ཙམ་གྱི་འཁྲུལ་སྣང་འཇིགས་པ། །ཐུགས་རྗེ་ནུས་ལྡན་གྱི་བླ་མ་མཁྱེན་ནོ། །མཐོང་ཐོས་ཙམ་གྱི་དག་སྣང་འཆར་བ། །འབྲེལ་ཚད་དོན་ལྡན་གྱི་བླ་མ་མཁྱེན་ནོ། །བསྒོམ་པ་ཙམ་གྱིས་ཉམས་རྟོགས་བསྐྱེད་པ། །སངས་རྒྱས་མངོན་
སུམ་གྱི་བླ་མ་མཁྱེན་ནོ། །གསོལ་བ་བཏབ་པས་བྱིན་རླབས་འབྱུང་བ། །སྐྱབས་གནས་གཅིག་ཆོག་གི་བླ་མ་མཁྱེན་ནོ། །དྲིན་ཅན་རྗེ་བཙུན་ཁྱེད་ཀྱི་ཐུགས་རྗེ་ལ་ཕྱོགས་རིས་མེད་ཀྱང་། །བདག་འདྲ་ལས་ངན་གྱི་འགྲོ་ལ་བརྩེ་བས་གཟིགས་ནས། །འཁོར་བ་སྡུག་བསྔལ་གྱི་མཚོ་ལས་མྱུར་དུ་བསྒྲལ་ནས། །ཚེ་གཅིག་བྱང་ཆུབ་ཀྱི་ལམ་ལ་དྲངས་ཏུ་གསོལ། །ཅེས་པ་ནི་ཆོས་དབྱིངས་དཔལ་མོ་ལའོ།། ༈ །།ན་མོ་གུ་རུ། །གདོད་ནས་དག་པ་ཆེན་པོ་ཆོས་ཀྱི་སྐུ། །འགགས་མེད་མཚན་དཔེའི་སྐུར་སྟོན་ལོངས་སྤྱོད་རྫོགས། །ཅིར་སྣང་གང་འདུལ་སྒྱུ་འཕྲུལ་སྤྲུལ་པའི་སྐུ། །སྐུ་གསུམ་བླ་མ་མཆོག་གི་ཞབས་པད་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །འཁོར་འདས་དགེ་ཚོགས་མཆོད་འབུལ་སྡིག་པ་བཤགས། །མཛད་ཕྲིན་ཀུན་ལ་ཡི་རངས་ཆོས་འཁོར་བསྐུལ། །བསྐལ་བརྒྱར་འགྲོ་བའི་དོན་དུ་ཞབས་བརྟན་གསོལ། །བདག་དང་མཁའ་
མཉམ་འགྲོ་བ་ཐམས་ཅད་ལ། །རྗེ་བཙུན་ཁྱེད་ཀྱི་ཐུགས་རྗེས་རབ་གཟིགས་ནས། །བྱིན་རླབས་བདེ་ཆེན་ཡེ་ཤེས་དངོས་གྲུབ་ཀྱིས། །བདག་རྒྱུད་སྨིན་ཅིང་གྲོལ་བར་མཛད་དུ་གསོལ། །སྐྱེ་བ་འདི་ནས་ཚེ་རབས་ཀུན་ཏུ་ཡང་། །དལ་འབྱོར་དམ་ཆོས་ལྡན་པའི་ལུས་ཐོབ་ནས། །བླ་མ་བདེ་ཆེན་ཡེ་ཤེས་དངོས་གྲུབ་ཀྱིས། །བླ་མ་མཆོག་བསྟེན་སྒྲུབ་པ་མཐར་ཕྱིན་ཏེ། །རང་གཞན་དོན་གཉིས་ཡང་དག་འགྲུབ་པར་ཤོག །ཅེས་པ་ནི་ཆོས་ཀྱི་དབང་མོ་ལའོ།། ༈ །།ཕྱོགས་དུས་རྒྱལ་དང་རྒྱལ་སྲས་ཐུགས་རྗེའི་བདག །མ་ལུས་གཅིག་བསྡུས་འགྲོ་བའི་འདྲེན་པ་མཆོག །རབ་འབྱམས་དཀྱིལ་འཁོར་ཀུན་གཙོ་དྲིན་ཅན་རྗེ། །བདེ་ཆེན་འཁོར་ལོའི་རྒྱན་དུ་རྟགས་བཞུགས་གསོལ། །གླིང་བཞི་རིན་ཆེན་ཞིང་ཁམས་བྱེ་བྲག་བརྒྱ། །བདག་གཞན་ཕུང་ཁམས་སྐྱེ་མཆེད་ལུས་ལོངས་སྤྱོད། །དྲན་རིགས་སྐྱེ་མཆེད་རང་བྱུང་མཆོད་པར་བཅས། །མ་ལུས་ལྟོས་མེད་མཆོད་པའི་མཎྜལ་དུ། །འབུལ་གྱི་བདག་
སོགས་མཁའ་ཁྱབ་གདུལ་བྱའི་ཚོགས། །བརྩེ་ཆེན་རྒྱུན་ཆད་མེད་པའི་ཐུགས་རྗེ་ཡིས། །འབྲལ་མེད་ཉེར་བཟུང་བྱིན་རླབས་ཡེ་ཤེས་མཆོག །དོན་དམ་བདེ་བ་ཆེན་པོའི་དངོས་གྲུབ་སྩོལ། །སྐྱབས་གནས་བླ་མ་མཆོག་གི་ཞབས་པད་ལ། །གུས་པས་ཕྱག་འཚལ་སྒོ་གསུམ་གཏན་མདུན་ཀུན། །ཉེར་མཆོད་ཉམས་ཆགས་སྒྲིབ་ཚོགས་སྙིང་ནས་བཤགས། །རྨད་བྱུང་རྣམ་ཐར་ཡིད་རངས་ཐེག་ཆེན་གྱི། །ཆོས་འཁོར་བསྐོར་ཞིང་བསྐལ་བརྒྱར་བཞུགས་གསོལ་འདེབས། །འདིས་མཚོན་འཁོར་འདས་དུས་གསུམ་དགེ་ཚོགས་ཀུན། །རྣམ་མཁྱེན་བྱང་ཆུབ་ཁོ་ནའི་རྒྱུར་བསྔོ་བའི། །དགེ་བས་མཁའ་མཉམ་འགྲོ་དོན་ཀུན་འགྲུབ་ཤོག །འདི་ནས་ཟུངས་སྟེ་ཚེ་རབས་ཐམས་ཅད་དུ། །མཉམ་མེད་བླ་མ་མཆོག་དང་དབྱེར་མེད་པའི། །རྣམ་འཕྲུལ་དཔག་ཡས་ཕྲིན་ལས་རྒྱ་ཆེན་པོས། །བསྟན་དང་འགྲོ་ལ་ཕན་བདེའི་མཆོག་འགྲུབ་ཤོག །འཁོར་བའི་རྒྱ་མཚོ་མ་སྟོང་དེ་
སྲིད་དུ། །འགྲོ་ལ་འདོད་དགུའི་ཕན་བདེ་སྩོལ་བ་ཡི། །དངོས་གྲུབ་རྒྱ་མཚོའི་མཛོད་དབང་མཐུ་སྟོབས་བདག །མཚུངས་བྲལ་རྒྱལ་བ་ཁྱེད་བཞིན་བདག་འགྲུབ་ཤོག །ཅེས་པ་འདི་ནི། །དོན་གཉེར་མང་པོས་ཡང་ཡང་བསྐུལ་ཏེ། ཟབ་ཆོས་དབང་ལུང་འཁྲིད་སོགས་ཞལ་ཕྱེ་བའི་སྐབས་རྣམས་སུ་མཎྜལ་ཡན་ལག་བདུན་པ་སྨོན་ལམ་དང་བཅས་པ་ཐམས་ཅད་ཚང་མ་མདོར་བསྡུས་ཞིག་ཚོགས་འདོན་དུ་དགྱིད་རུང་བ་དགོས་བཞེས་ཟེར་བ་རྣམས་ཀྱི་ཆེད་དུ་བཀོད་ནས་སྤར་དུ་ཡང་སྒྲུབ་སོ།། ༈ །།ཆོས་སྐུ་འདུས་མ་བྱས་པའི་མཁའ་ཀློང་ནས། །ཐུགས་རྗེ་འགགས་མེད་རོལ་པའི་འཕྲོ་འདུ་ཤར། །གང་འདུལ་ཆུ་ཟླའི་གར་གྱི་འགྲོ་བ་འདྲེན། །མཚུངས་བྲལ་དྲིན་ཅན་བླ་མ་སྙིང་ནས་དྲན། །སྤྲོས་དང་བྲལ་ཡང་སྤྲུལ་པའི་སྤྲོ་བསྡུ་མཁན། །སྐྱེ་བ་མེད་ཀྱང་སྐྱེ་འཆིའི་སྣང་ཚུལ་ཙམ། །འགྲོ་ལ་བསྟན་པ་སྐྱེས་ཆེན་རྒྱུད་མར་བྱོན། །དཔལ་ལྡན་ཀརྨ་རིག་འཛིན་རྣམ་པར་རྒྱལ། །ཞབས་པད་སྤྱི་བོའི་རྒྱན་དུ་རྟགས་བཞུགས་གསོལ། །སོ་ཐར་བྱང་སེམས་གསང་སྔགས་
ཐེག་པའི་ཆོས། །མངའ་དབང་འབྱོར་པའི་རིག་འཛིན་གྲུབ་ཚོགས་ཀུན། །དགོངས་པའི་རྩེ་མོ་གཅིག་དྲིལ་མངའ་གསོལ་བའི། །རྗེ་བཙུན་མཁས་མཆོག་པདྨ་ལེགས་གྲུབ་རྩལ། །འབྲལ་མེད་རྟག་ཏུ་ཐུགས་རྗེས་གཟིགས་མཛད་གསོལ། །ཆོས་ཀུན་སྙིང་པོའི་མཐར་ཐུག་ངེས་དོན་གྱི། །ཟབ་བཅུད་གཏེར་ཁ་ཕྱེས་པས་གདུལ་བྱའི་ཚོགས། །བླ་མེད་མཆོག་གསང་སྙིང་པོར་བཀོད་མཛད་པའི། །འདྲེན་མཆོག་མཚུངས་མེད་སྣ་ཚོགས་རང་གྲོལ་རྩལ། །ཁྱེད་བཞིན་བདག་སོགས་སྐུ་གསུམ་མངོན་གྱུར་མཛོད། །ཡིད་བཞིན་ནོར་བུ་མཉམ་མེད་བླ་མ་ལ། །དད་དུང་གུས་པའི་དྲན་ཅིང་གསོལ་བཏབ་པས། །བདག་སོགས་འགྲོ་བ་ཀུན་ཀྱང་ཁྱེད་ཞབས་དྲུང་། །མྱུར་དུ་བླ་མེད་བྱང་ཆུབ་རེག་པར་ཤོག །ཅེས་པ་འདི་ཡང་ཆོས་དབྱིངས་དཔལ་མོས་བསྐུལ་ངོར་བྲིས་པའོ།། ༈ །།སྲིད་པའི་འཆིང་བ་ལས་གྲོལ་ཀྱང་། །འདམ་གྱི་པདྨོ་ཇི་བཞིན་དུ། །སྲིད་པ་ཉེ་བར་
བཞེས་ཚུལ་གྱིས། །འགྲོ་བ་འདུལ་མཛད་ཁྱེད་ཕྱག་འཚལ། །སྤྲོས་བྲལ་ཆོས་སྐུ་རོ་གཅིག་པའི། །རྣམ་པར་རོལ་པ་འགགས་མེད་ཀྱིས། །གང་ལ་གང་འདུལ་ཐུགས་རྗེའི་གཏེར། །ཡིད་བཞིན་ནོར་བུ་ཁྱེད་ཕྱག་འཚལ། །གྲངས་མེད་བསྐལ་པར་བྱང་ཆུབ་ཏུ། །ཐུགས་བསྐྱེད་ཚོགས་གཉིས་ལེགས་བསྐྲུན་པ། །ཕན་བདེའི་ལོ་འདབ་ཕྱོགས་བཅུར་རྒྱས། །འདོད་འབྱུང་དཔག་བསམ་ཁྱེད་ཕྱག་འཚལ། །འཁོར་བ་སྡུག་བསྔལ་རྒྱ་མཚོ་རུ། །ལས་ཉོན་གཅོང་ཆེན་གྱིས་གདུང་པའི། །འགྲོ་ལ་བདེ་ཆེན་སྩོལ་མཁས་པ། །སྨན་པ་བླ་མེད་ཁྱེད་ཕྱག་འཚལ། །སྐྱེ་བ་མཐའ་དག་འགྲོ་བའི་མགོན། །ཁོ་ནར་མཛད་ཕྲིན་སྣ་ཚོགས་པ། །རྣམ་པར་འཕྲུལ་པའི་འབྱུང་གནས་མཆོག །ཐབས་ཆེན་དཔའ་བོ་ཁྱེད་ཕྱག་འཚལ། །འཕགས་པ་ཀུན་དགའ་སམྦྷོ་ཊ། །
བཻ་རོ་ཙ་ན་རྡོ་རྗེ་གླིང་། །ཁྱུང་པོ་རྣལ་འབྱོར་ས་པ་སོགས། །མཁས་གྲུབ་ཀུན་དངོས་ཁྱེད་ཕྱག་འཚལ། །སྙིགས་མའི་འགྲོ་བ་འདུལ་དཀའི་སྐྱབས། །མཆོད་ལྡན་མགོན་པོ་ལ་སོགས་དང་། །བསྟན་འཛིན་རྡོ་རྗེ་དཔལ་བཟང་པོའི། །སྐྱེ་བ་རིམ་རྒྱུད་ཁྱེད་ཕྱག་འཚལ། །སླར་ཡང་ཐུགས་རྗེས་ཉེར་སྤྲུལ་པའི། །དཔག་ཡས་ཕྲིན་ལས་མི་ཟད་པའི། །སྲིད་པ་ཇི་སྲིད་འགྲོ་སྒྲོལ་མཛད། །ཆོས་ཀྱི་རྒྱལ་པོ་ཁྱེད་ཕྱག་འཚལ། །བདག་སོགས་ལས་ཀྱི་མནར་བ་ཡི། །སྐྱེ་འགྲོ་མ་ལུས་རྗེས་བཟུང་སྟེ། །ཐར་ལམ་བྱང་ཆུབ་སྙིང་པོའི་སར། །མྱུར་དུ་འཁོད་པར་མཛད་དུ་གསོལ། །ཅེས་བྱང་ཆུབ་མཚོ་མོ་ལའོ།། ༈ །།ན་མོ། །སྐྱབས་གནས་རྒྱལ་བ་མ་ལུས་གཅིག་བསྡུས་པའི། །བླ་མ་རིགས་བདག་རྒྱལ་པོ་ཧེ་རུ་ཀ །དམིགས་མེད་བརྩེ་ཆེན་ཐུགས་རྗེའི་ཀློང་ཡང་ནས། །མཆོག་དངོས་ཚེ་འདིར་འགྲུབ་པར་བྱིན་གྱིས་རློབས། །དེང་ནས་བླ་མེད་བྱང་ཆུབ་མ་ཐོབ་པར། །ཆོས་
མིན་བསམ་སྦྱོར་སྐད་ཅིག་མི་འབྱུང་ཞིང་། །ཡང་དག་སྙིང་པོ་ངེས་དོན་མཆོག་བསྒྲུབ་པས། །རང་གཞན་ཆོས་དབྱིངས་ཀློང་གྲོལ་ཆེན་པོར་ཤོག །ཅེས་པ་ནི། །རྒྱལ་སྲས་རིག་འཛིན་ལྷུན་གྲུབ་ཀྱི་བཞེད་པ་བསྐོངས་ཕྱིར་བྲིས་པའོ།། ༈ །།ཕྱོགས་དུས་རྒྱལ་བའི་སྤྱི་གཟུགས་མཆོག །པདྨ་ཐོད་ཕྲེང་སྤྲུལ་པའི་དབྱིངས། །སྣ་ཚོགས་རང་གྲོལ་སྙིང་རྗེའི་གཏེར། །ནམ་མཁའ་འཇིག་མེད་ཡིད་བཞིན་ནོར། །སྐྱབས་གནས་ཐུགས་རྗེའི་འབྱུང་གནས་རྣམས། །འདི་གཟུངས་རྫོགས་པའི་བྱང་ཆུབ་བར། །འབྲལ་མེད་བདེ་ཆེན་འཁོར་ལོའི་རྒྱན། །སྙིང་ནས་གུས་པས་གསོལ་བ་འདེབས། །དལ་འབྱོར་སྟོང་ཟད་མི་འགྱུར་ཞིང་། །ཞེན་ལོག་ངེས་འབྱུང་དྲག་པོ་ཡིས། །ཚེ་འདི་ཆོས་ཀྱི་འདའ་ནུས་ཤིང་། །ཀུན་བཟང་དགོངས་པ་མངོན་གྱུར་ཤོག །ཅེས། དབོན་པོ་ནམ་མཁའ་ལྷུན་གྲུབ་ལའོ།། ༈ །།གྲངས་མེད་བསྐལ་པའི་གོང་ནས་ཐུགས་བསྐྱེད་ཅིང་། ཁམས་གསུམ་འགྲོ་བ་འདྲེན་ཕྱིར་བསམ་བཞིན་དུ། །ངོ་མཚར་སྐྱེས་རབས་འཕྲེང་བར་ལེགས་བརྒྱུད་
པའི། །རྣམ་འདྲེན་རིམ་པར་བྱོན་ལ་གསོལ་བ་འདེབས། །འཕགས་པ་ཀུན་དགའ་ཐོན་མི་སམྦྷོ་ཊ། །ལོ་ཆེན་བཻ་རོ་གཏེར་སྟོན་རྡོ་རྗེ་གླིང་། ཁྱུང་པོ་རྣལ་འབྱོར་ས་པ་ཀུན་སྐྱོངས་གླིང་། །མཆོག་ལྡན་མགོན་པོ་རྣམས་ལ་གསོལ་བ་འདེབས། །སྙིགས་མ་ལྔ་བདོའི་མུ་རྒོད་གདུལ་བྱ་ལ། །ཐབས་མཁས་ཐུགས་རྗེས་ལམ་བཟང་སྟོན་མཛད་པ། །བསྟན་འཛིན་རྡོ་རྗེ་མཁས་མཆོག་ལེགས་གྲུབ་རྩལ། །གང་འདུལ་དེར་སྣང་མཆོག་ལ༴ །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །རྒྱལ་བའི་སྤྱི་གཟུགས་དཔལ་ལྡན་བླ་མ་དང་། །དབྱེར་མེད་མི་ཟད་རྒྱན་གྱི་འཁོར་ལོ་ལ། །དབང་འབྱོར་ཕྲིན་ལས་རབ་འབྱམས་མཐའ་ཡས་ཀྱི། །བསྟན་དང་འགྲོ་བའི་དོན་ཆེན་འགྲུབ་པར་ཤོག །ངོ་བོ་སྐྱེ་མེད་ཆོས་ཀྱི་སྐུ་འགྲུབ་ཅིང་། །རང་བཞིན་འགགས་མེད་གཟུགས་སྐུའི་དཀྱིལ་འཁོར་རྒྱས། །སྣ་ཚོགས་གང་འདུལ་སྤྲུལ་སྐུའི་རོལ་རྩལ་སྟོན། །སྐུ་བཞི་དབྱེར་མེད་ངོ་བོ་ཉིད་འགྲུབ་ཤོག །ཅེས་པ་ནི། གསང་སྔགས་རྒྱུད་སྡེ་རབ་འབྱམས་
ཀྱི་ཐོས་པ་འཛིན་པ་ཀརྨ་མདོ་སྡེས་བསྐུལ་ངོར་བཀོད་པའོ།། ༈ །།ཕྱོགས་བཅུ་གང་གའི་ཀླུང་གི་བྱེ་སྙེད་ཀྱི། །སངས་རྒྱས་མ་ལུས་གཅིག་ཏུ་བསྡུས་པའི་སྐུ། །སྐྱབས་མཆོག་རྗེ་བཙུན་བླ་མ་རིན་པོ་ཆེ། །བདག་ཡིད་དད་བརྒྱས་འདབ་སྟོང་དབུས་བཞུགས་གསོལ། །དེང་ནས་བཟུང་སྟེ་ཚེ་རབ་ཀུན་ཏུ་ཡང་། །དལ་འབྱོར་རིན་ཆེན་ལེགས་ཐོབ་བསྟན་ལ་ཞུགས། །དགེ་བའི་བཤེས་ཀྱི་རྗེས་བཟུང་སྒྲུབ་ལ་བརྩོན། །རང་གཞན་དོན་གཉིས་མངོན་དུ་འགྱུར་བར་ཤོག །བླ་མ་ཡི་དམ་རྒྱལ་བའི་དཀྱིལ་འཁོར་ཀུན། །གཅིག་བསྡུས་སྙིང་ནས་བསྒོམ་ཞིང་གསོལ་བཏབ་པས། །དོན་དམ་ཆོས་སྐུ་ཡེ་ཤེས་བླ་མ་དངོས། །མཆོག་འགྲུབ་མཁའ་མཉམ་འགྲོ་བ་འདྲེན་པར་ཤོག །ཅེས་པ་ནི། རྣལ་འབྱོར་འཇའ་ལུས་བསྟན་འཛིན་ལའོ།། ༈ །།དུས་གསུམ་རྒྱལ་བ་ཀུན་གྱི་སྤྱི་གཟུགས་མཆོག །བླ་མེད་བླ་མ་པདྨ་སམ་བྷ་ཝ། །རིག་འཛིན་གཙོ་བོ་མཚུངས་མེད་འཇའ་ཚོན་སྙིང་། །གང་འདུལ་དེར་སྣང་སྣ་ཚོགས་རང་གྲོལ་རྩལ། །
གྲུབ་ཐོབ་རྒྱལ་པོ་ནམ་མཁའ་འཇིགས་མེད་ཞབས། །གསོལ་བ་སྙིང་ནས་འདེབས་སོ་ཐུགས་རྗེས་གཟིགས། །འཇིག་རྟེན་སྒྱུ་མའི་འཁྲུལ་འཁོར་རབ་འཇིག་ཅིང་། །ཆོས་བརྒྱད་འཁོར་བའི་འཁོར་ལོ་རྒྱུན་ཆད་ནས། །མི་མེད་དབེན་པའི་རི་ཁྲོད་འགྲིམ་ནུས་པས། །གྲུབ་ཐོབ་རྒྱུད་པའི་རྣམ་ཐར་འཁྱོང་བར་ཤོག །རང་རིག་གདོད་མའི་གནས་ལུགས་ཇི་བཞིན་ཉིད། །མ་ནོར་མངོན་སུམ་རྟོགས་པ་ཆོས་ཀྱི་སྐུའི། །གཏན་སྲིད་ཟིན་ནས་མཁའ་ཁྱབ་འགྲོ་བ་ལ། །ཐེག་མཆོག་ཆོས་ཀྱི་དགའ་སྟོན་འགྱེད་པར་ཤོག །དེ་ལྟར་བུའི་གསོལ་བ་སྙིང་ཐག་པ་ནས་བཏབ་ཅིང་། དོན་དམ་པ་རང་གི་རིག་པ་བྱང་ཆུབ་ཀྱི་སྙིང་པོ་ཐིག་ལེ་ཉག་གཅིག་སྟོང་གསལ་ཟུང་འཇུག་སྤྲོས་པའི་མཐའ་ཐམས་ཅད་ལས་འདས་པའི་རང་ཤེས་རིག་པའི་རྒྱལ་པོ་ཉིད་ཡང་དག་དོན་གྱི་བླ་མ་ཆོས་ཀྱི་སྐུ་ཡིན་པ་ལ་ཡིན་པར་ཤེས་པའི་བཅོས་མིན་གྱི་དད་པ་བརྟན་པོ་བཟོ་མེད་རང་བབས་ལྷུག་པ་བསྒོམ་མེད་
ཡེངས་མེད་གུ་ཡངས་ཁྱབ་གདལ་ཆེན་པོས་དུས་འདའ་བར་བྱ་ཞིང་། །ཅིར་སྣང་བླ་མའི་རོལ་བ། གང་བྱུང་བྱིན་རླབས་ཀྱི་རང་བཞིན། ཅི་བྱེད་བླ་མའི་ཞབས་ཏོག །སྨྲ་བརྗོད་གསོལ་འདེབས་ཀྱི་རང་བཞིན་ཁོ་ནར་རྟོགས་ན། །དངོས་གྲུབ་ཐོབ་བྱ་ཐོབ་བྱེད་ཀྱི་མཚན་འཛིན་རང་སར་གྲོལ་ཞིང་། མཚོན་བྱེད་དཔེའི་བླ་མའི་སྐུ་དྲིན་གྱི་མཚམས་སྦྱར་ཏེ། མཚོན་བྱ་དོན་གྱི་བླ་མ་སྐུ་བཞི་དབྱེར་མེད་ངོ་བོ་ཉིད་དང་འདུ་འབྲལ་མེད་པའི་གཏན་སྲིད་ཟིན་པའི་ཐབས་ཟབ་མོ་ལ་རྣམ་པ་ཀུན་ཏུ་ཉམས་སུ་བླང་བར་མཛད་ཚལ། ཅེས་སྐལ་ལྡན་གྱི་རྣལ་འབྱོར་དད་ཅན་ཀུན་བཟང་ལྷུན་འགྲུབ་འོད་ཀློང་ལ་གདམས་པ་ཨིྀྠ།། ༈ །།ཆོས་དབྱིངས་ཁྱབ་གདལ་ཡེ་ཤེས་སྙིང་པོའི་ཀློང་། །རང་གསལ་རང་རིག་འདུས་མ་བྱས་པའི་གཤིས། །ཡེ་ཐོག་གདོད་མའི་བླ་མ་ཆོས་ཀྱི་སྐུ། །འགགས་མེད་གསལ་རིགས་ལོངས་སྐུ་མཚན་དཔེའི་དཔལ། །ཅིར་འཆར་སྣང་སྲིད་རང་གྲོལ་སྤྲུལ་པའི་སྐུ། །ཤེས་རིག་
རྒྱལ་པོ་སྐུ་བཞི་དབྱེར་མེད་ལ། །གཉིས་འཛིན་མཚན་མ་བྲལ་བས་གསོལ་བ་འདེབས། །བཅོས་སླད་གཟའ་གཏད་བྲལ་བའི་ཐུགས་རྗེས་གཟིགས། །རེ་དོག་དགག་སྒྲུབ་བྲལ་བར་བྱིན་གྱིས་རློབས། །མཐའ་བྲལ་ཕྱོགས་ལྷུངས་མེད་པའི་ཞིང་ཁམས་སུ། །བདག་སོགས་མཁའ་ཁྱབ་འགྲོ་ཀུན་གྲོལ་བར་ཤོག །ཅེས། ཆོས་མཛད་ཀརྨ་ཀློང་ཡང་ལའོ།། ༈ །།ན་མཿགུ་རུ་བྷྱཿ །རབ་འབྱམས་རྒྱལ་བའི་དཀྱིལ་འཁོར་ལྷུན་རྫོགས་པའི། །དཔལ་ལྡན་པདྨ་ཐོད་ཕྲེང་ཧེ་རུ་ཀ །སྲིད་ཞི་ཀུན་གྱི་ཁྱབ་བདག་རྣམ་འདྲེན་མཆོག །རྩ་བའི་བླ་མ་རྗེ་ལ་གསོལ་བ་འདེབས། །ཕྱོགས་བཅུ་མཐའ་ཡས་འཇིག་རྟེན་གྲངས་མེད་ཀྱི། །གདུལ་བྱའི་ཁམས་དབང་མོས་པ་དང་མཚུངས་པའི། །རྣམ་འཕྲུལ་རྒྱ་མཚོ་འགྱོད་པའི་མཐུ་སྟོབས་བདག །མཚུངས་མེད་དྲིན་ཅན་བླ་མར་གསོལ༴ །དེང་ནས་བཟུངས་ཏེ་བྱང་ཆུབ་མཆིས་བར་དུ།
དཔལ་ལྡན་བླ་མའི་ཐུགས་རྗེ་ཟབ་མོ་ཡི། །ཉེར་བཟུང་ཐེག་མཆོག་སྙིང་པོར་རང་བྱན་ཚུད། །ཚེ་གཅིག་བྱང་ཆུབ་དམ་པ་ཐོབ་པར་ཤོག །རང་དོན་ཀ་དག་མངོན་དུ་འགྱུར་བར་ཤོག །གཞན་དོན་གཟུགས་སྐུས་འགྲོ་བ་འདྲེན་པར་ཤོག །རྣམ་འཕྲུལ་དུ་མས་འཁོར་བ་སྟོངས་པར་ཤོག །རྗེ་བཙུན་ཁྱེད་དང་དབྱེར་མེད་གཅིག་པར་ཤོག །ཅེས་སྙིང་ཐག་པ་ནས་གསོལ་བ་རྩེ་གཅིག་ཏུ་བཏབ་ཅིང་། །མཚོན་བྱེད་དཔེ་ཡི་བླ་མ་ལ་ཀུན་རྫོབ་ཚིག་གི་གསོལ་བ་བཏབ་པ་དེ་ཉིད་ཀྱང་། །དོན་དམ་པར་ནི་རང་སེམས་ཀྱི་གསལ་ཆའི་བྱེ་བྲག་ཙམ་ལས་མ་འདས་ཤིས། །རང་རིག་སྐུ་གསུམ་དབྱེར་མེད་ལྷུན་གྲུབ། །རང་བྱུང་མཚོན་བྱ་དོན་གྱི་བླ་མ་ཡེ་གདོད་མ་ནས་རང་དང་ལྷན་ཅིག་འདུ་འབྲལ་མེད་པའི་རང་ཞལ་མཇལ་ཐབས་མ་བཅོས་ལྷུག་པའི་གནས་ལུགས་ལ་རང་རིག་རང་ངོ་ཤེས་ཙམ་བསྐྱངས་ན། །སྐད་ཅིག་ཉིད་ལ་གདོད་མའི་མགོན་
པོའི་གོ་འཕངས་ཐོབ་བྱ་ཐོབ་བྱེད་ལས་འདས་པའི་གཏན་སྲིད་ཟིན་པར་ཐེ་ཚོམ་མེད་དོ། །ཅེས་པ་ནི། དབུ་མཛད་ནམ་མཁའ་རྒྱ་མཚོ་ལའོ།། ༈ །།དཀྱིལ་འཁོར་མ་ལུས་ཀུན་གྱི་ཁྱབ་བདག་མཆོག །སྐྱབས་གནས་རྗེ་བཙུན་རྡོ་རྗེ་འཛིན་པ་ལ། །རབ་དད་གུས་པས་སྙིང་ནས་གསོལ་བ་འདེབས། །གཡེལ་མེད་ཐུགས་རྗེས་རྟག་ཏུ་གཟིགས་མཛོད་ལ། །འདི་ནས་བཟུངས་སྟེ་ཚེ་རབས་ཐམས་ཅད་དུ། །ཟབ་གསང་རྡོ་རྗེ་ཐེག་པའི་བདུད་རྩི་ཡི། །སྨིན་གྲོལ་དགའ་སྟོན་རྒྱུན་ཆད་མེད་སྩོལ་ཞིང་། །བྱམས་ཆེན་མཁྱེན་བརྩེའི་ཕྱག་གི་སྐྱབས་ཏུ་གསོལ། །དག་པ་རབ་འབྱམས་རྒྱལ་བའི་ཞིང་ཀུན་ལས། །རྨད་བྱུང་བདེ་ཆེན་པདྨ་འོད་ཀྱི་གནས། །གང་དེར་རྒྱལ་བ་ཁྱེད་དང་དབྱེར་མེད་པའི། །པདྨ་འབྱུང་གནས་ཞབས་པད་གཙུག་བསྟེན་ཤོག །དེ་ཞབས་སྤྱི་བོར་ཉེར་བསྟེན་མཐུ་སྟོབས་ཀྱིས། །མཆོག་དངོས་བདེ་བླག་འགྲུབ་ནས་གང་འདུལ་གྱི། །སྤྲུལ་
བསྒྱུར་ཆུ་ཟླ་ཇི་བཞིན་རོལ་པའི་གར། །འགྲོ་ཁམས་རྒྱ་མཚོར་འགྱེད་པར་ནུས་འགྲུབ་ཤོག །ཅེས་པ་འདི་ནི། རྣལ་འབྱོར་པ་དྷརྨ་ཙཀྐྲ་ལའོ།། ༈ །།དཔལ་ལྡན་བླ་མ་སངས་རྒྱས་ཀུན་གྱི་དངོས། །རྣམ་འཕྲུལ་གྲངས་མེད་གདུལ་བྱའི་དཔལ་དུ་ཤར། །ངོ་མཚར་སྒྱུ་འཕྲུལ་ཐུགས་རྗེའི་འབྱུང་གནས་མཆོག །སྣ་ཚོགས་རང་གྲོལ་སྙིང་ནས་དྲན་ནོ་ཕ། །ཐུགས་རྗེས་གཟིགས་དང་རིག་འཛིན་རྣམ་པར་རྒྱལ། །བྱིན་གྱིས་རློབས་ཤིག་མཁས་མཆོག་ལེགས་གྲུབ་སྩལ། །གདུང་བའི་གསོལ་བ་འདེབས་པའི་བུ་འབངས་ལ། །བརྩེ་ཆེན་རྒྱུན་ཆད་མེད་པར་གཟིགས་སུ་གསོལ། །མཚོན་བྱེད་དཔེ་ཡི་བླ་མ་སྤྲུལ་པའི་སྐུ། །མཚོན་བྱ་དོན་གྱི་བླ་མའི་ངོ་བོ་དང་། །གཉིས་མེད་་ཁྱབ་གདལ་གདོད་མའི་གནས་ལུགས་ངང་། །མངོན་སངས་རྒྱས་ནས་འཁོར་བ་དོང་སྤྲུག་ཤོག །ཅེས་པ་ནི་མཐོང་གྲོལ་རྒྱལ་པོ་ལའོ། ཀ་དག་གདོད་མའི་མགོན་པོ་ཆོས་ཀྱི་སྐུ། །ལྷུན་གྲུབ་གསལ་མདངས་ལོངས་སྤྱོད་རྫོགས་པའི་ངང་། །དབྱེར་མེད་རང་རིག་བླ་
མ་སྤྲུལ་པའི་སྐུ། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། །སྐུ་དྲིན་འཁོར་མེད་རྩ་བའི་བླ་མ་དང་། །སྐུ་གསུམ་དབྱེར་མེད་རང་སེམས་སངས་རྒྱས་གཉིས། །དོན་དམ་དབྱིངས་སུ་འདུ་འབྲལ་མེད་པའི་ངང་། །ཆོས་ཉིད་ཡངས་པ་ཆེན་པོར་གྲོལ་བར་ཤོག །ཅེས་གསོལ་བ་བཏབ་པ་ལ་འདས་མ་འོངས་ད་ལྟར་གྱི་རྟོགས་པ་གང་ཤར་ལ་རྗེས་ཕྱིར་མི་འབྲངས། གཉན་པོས་མ་བསླད། བཟོ་བཅོས་མི་བྱ་བར། གང་ཤར་དེ་ཀའི་ངོ་བོ་ཧྲིག་གེར། རྗེན་ནེ། གུ་ཡངས་ཆམ་མིར་ཉམས་སུ་བླངས་བ་ཉིད་དུས་དང་རྣམ་པ་ཐམས་ཅད་དུ་མ་ཡེངས་བར་བྱའོ། །ཅེས་བྱ་བཏང་ཆོས་དབྱིངས་ཟག་མེད་ལའོ།། ༈ །།ན་མོ་སྲས་བཅས་རྒྱལ་བ་མ་ལུས་གཅིག་བསྡུས་པའི། །བླ་མ་ཡིད་བཞིན་ནོར་བུ་རིན་པོ་ཆེ། །བདག་སྙིང་དད་བརྒྱས་ཟེའུ་རྒྱས་པའི་དབུས། །འགྱུར་མེད་རྡོ་རྗེའི་སྐུ་རུ་བཞུགས་སུ་གསོལ། །དཔག་ཏུ་མེད་པའི་མཁྱེན་བརྩེ་ནུས་སྟོབས་ཀྱི། །ཡེ་ཤེས་
གཟིགས་པ་སྒྲིབ་མེད་རྟག་མངའ་བའི། །ཐུགས་རྗེ་མི་ཟད་དངོས་གྲུབ་མཆོག་གི་རྒྱུན། །བདག་སོགས་འདུལ་བྱའི་ཚོགས་ལ་སྩལ་རེ་རན། །སྐྱེ་བ་འདི་བཟུངས་བླ་མེད་བྱང་ཆུབ་བར། །མཉམ་མེད་བླ་མའི་གདུལ་བྱར་བདག་གྱུར་ཏེ། །རང་གཞན་དོན་གཉིས་བགེགས་མེད་འགྲུབ་པ་རུ། །གསོལ་བཏབ་སྨོན་ལམ་ཇི་བཞིན་འགྲུབ་པར་ཤོག །ཅེས། ཆོས་དབང་ཡེ་ཤེས་ལའོ།། ༈ །།སྐུ་དྲིན་མཉམ་མེད་རྗེ་བཙུན་བླ་མ། །རྒྱལ་བ་ཀུན་གྱི་སྤྱི་གཟུགས་ཆེན་པོ། །སྙིགས་དུས་སེམས་ཅན་བདག་འདྲའི་གདུལ་བྱར། །བརྩེ་བ་ཆེན་པོས་ཐུགས་རྗེས་གཟིགས་དང་། །སྙིང་ནས་འབོད་དོ་བླ་མ་སངས་རྒྱས། །ཉིན་མཚན་རྟག་ཏུ་གདུང་བའི་དབྱངས་ཀྱིས། །གསོལ་བ་འདེབས་པའི་བུ་ལ་དགོངས་ནས། །བྱིན་རླབས་དངོས་གྲུབ་ཆར་རྒྱུན་ཕོབ་དང་། །རྡོ་རྗེའི་སྐུ་ལ་སྐྱེ་འཆི་མེད་ཀྱང་། །དད་ལྡན་འགྲོ་བའི་སྐྱབས་མགོན་མཛད་ཕྱིར། །བསྐལ་བརྒྱར་མི་འགྱུར་རྡོ་རྗེའི་གདན་ལ། །བརྟན་བཞུགས་ཆོས་ཀྱི་སྒྲོན་མེ་སྦོར་དང་། །བདག་
ལུས་ལོངས་སྤྱོད་གཏན་འདུན་ཐམས་ཅད། །རྗེ་བཙུན་ཁྱོད་ལ་མཆོད་པ་འབུལ་གྱི། །འདི་གཟུངས་མཐར་ཐུག་བྱང་ཆུབ་བར་དུ། །སྐྱབས་མཆོག་ཉིད་ཀྱི་གདུལ་བྱར་ཤོག་ཅིག །ཅེས་དཔལ་གྱི་རྒོད་ཚང་གི་གནས་སུའོ།། ༈ །།ཨེ་མ། །དུས་གསུམ་རྒྱལ་བ་རབ་འབྱམས་མ་ལུས་ཀུན། །ཆོས་དབྱིངས་ཡེ་ཤེས་དབྱིངས་སུ་དབྱེར་མེད་ཀྱང་། །སྣ་ཚོགས་གདུལ་བྱ་སོ་སོར་གང་འདུལ་གྱི། །རྣམ་འཕྲུལ་བསམ་ཡས་འགྱེད་ལ་གུས་ཕྱག་འཚལ། ༡ །འོག་མིན་རྡོ་རྗེའི་མཁའ་དབྱིངས་ཆོས་སྐུའི་ཞིང་། །གདོད་མའི་སངས་རྒྱས་ཀུན་བཟང་རྡོ་རྗེ་འཆང་། །འོད་གསལ་ལོངས་སྐུའི་ཞིང་དུ་རིགས་ལྔའི་ཚུལ། །མངོན་པར་བྱང་ཆུབ་མཆོག་ལ་གསོལ༴ ༢ །མི་འཇེད་བྱེ་བ་ཕྲག་བརྒྱར་སངས་རྒྱས་སྟོང་། །གསང་སྔགས་རྒྱུད་སྡེ་རབ་འབྱམས་དཀྱིལ་འཁོར་ལྷ། །མ་དག་འགྲོ་བློའི་སྣང་ངོ་རིགས་མཐུན་གཟུགས། །ཀུན་དངོས་རྩ་བའི་བླ་མར་གསོལ་བ་འདེབས། ༣ །རྒྱལ་ཀུན་དོན་དམ་སྤྲོས་བྲལ་འདུས་མ་བྱས། །མཉམ་རྫོགས་ཐིག་ལེ་
ཆེན་པོར་རོ་གཅིག་པའི། །ཐུགས་རྗེའི་གོང་བུ་རྗེ་བཙུན་བླ་མ་མཆོག །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། ༤ །ཀྱེ་མ་བདག་སོགས་ཁམས་གསུམ་འགྲོ་བའི་ཚོགས། །ཐོག་མེད་བག་ཆགས་ངན་གོམས་ལས་ཉོན་ཅན། །ལྷན་སྐྱེས་མ་རིག་སྒྲིབ་པས་རྟག་འཐུམས་པའི། །རྨོངས་པའི་མུན་ཆེན་གསལ་བར་མཛད་དུ་གསོལ། ༥ །རྟག་ཏུ་བདེ་བ་དོན་དུ་གཉེར་ན་ཡང་། །གཏན་བདེ་བྱང་ཆུབ་སྒྲུབ་ཐབས་མི་ཤེས་པར། །ལོག་མིན་སྡུག་བསྔལ་རྒྱུ་ཐབས་ཁོ་ནར་བརྩོན། །ཐར་པའི་མྱུ་གུ་སྐེམ་ལ་ཐུགས་རྗེས་གཟིགས ༦ །ཕུན་ཚོགས་དལ་འབྱོར་དམ་པ་ཐོབ་གྱུར་ཅིང་། །བསྟན་དང་དགེ་བའི་བཤེས་གཉེན་འཛོམ་དུས་འདིར། །འཁོར་བའི་རུ་བཟློག་གཏན་སྲིད་མི་ཟིན་པར། །དོན་མེད་མགོ་སྟོང་མཁན་ལ་ཐུགས་རྗེས་གཟིགས། ༧ །སྐྱེས་པའི་མཐའ་མ་འཆི་ལས་འདས་པ་མེད། །སྐད་ཅིག་རེས་སོང་ཚེ་ལ་སྣོན་མེད་འཕྲི། །ཤི་ཁར་འགྱོད་ཚེ་ཕན་མེད་འདུན་མ་ཐལ། །སྙོམ་ལས་ཕྱི་ཤོལ་
མཁན་ལ་ཐུགས་རྗེས་གཟིགས། ༨ །དེ་རིང་ཕན་ཆད་ཡེངས་འཕྲུལ་མི་ཚེ་འདས། །ཡང་ཡང་ཕུན་ཚོགས་འདི་འདྲ་བརྙེད་པར་དཀའ། །དབང་པོ་ཚང་ཀྱང་མདོ་དོན་མ་ཤེས་པའི། །སེར་གཟུགས་སྙིང་པོ་མེད་ལ་ཐུགས་རྗེས་གཟིགས། ༩ །ཡིད་བཞིན་ནོར་བུ་སྙེད་དུས་ཡལ་བར་དོར། །ནམ་ཞིག་ངན་འགྲོར་ལྷུང་ཚེ་འགྱོད་ཀྱང་ཕྱིས། །མཐའ་མེད་ངན་འགྲོའི་སྡུག་བསྔལ་དར་རེ་དྲག །ལས་ངན་རྨོངས་པའི་འགྲོ་ལ་ཐུགས་རྗེས་གཟིགས། ༡༠ །ཀྱེ་མ་ཧོཿ །སྙིགས་མ་རྩོད་ལྡན་ཐ་མའི་དུས་ངན་འདིར། །བསྟན་པ་ནུབ་ཕྱོགས་ཤིང་སྐྱེ་འགྲོ་ཀུན། །བདེ་བའི་གོ་སྐབས་བྲལ་འདིར་ལོང་མེད་དུ། །དམ་ཆོས་རྩེ་གཅིག་ནུས་པར་བྱིན་གྱིས་རློབས། ༡༡ །འཁོར་བའི་མཚན་ཉིད་རང་བཞིན་དུ། །གྲོགས་ངན་བདུད་ཀྱིས་བསླུ་ཕྱིར་མི་འབྲངས་ཤི །སྐྱིད་འདོད་ལྟོ་གོས་ཞེན་པས་བཅིང་མིན་པར། །ཆོས་ཕྱིར་དཀའ་སྤྱད་ནུས་པར་བྱིན་གྱིས་རློབས། ༡༢ །དགྲ་གཉེན་ཆགས་སྡང་འགྲན་སེམས་ཕྲག་དོག་
གི། །རྐྱེན་ཚོགས་དུ་མས་རང་བློ་བདུད་ཀྱིས་ཁྱེར། །འཁོར་བ་པ་ལས་དུག་ལྔ་ཆེས་རག་པའི། །ཉོན་མོངས་དགྲ་བོ་ཞི་བར་བྱིན་གྱིས་རློབས། ༡༣ །ངུར་སྨྲིག་གོས་ཀྱིས་ཀླུབས་ཤིང་སྐྱེ་བོ་ཡིས། །བཀུར་ཞིང་དད་ཟས་ལ་སྤྱོད་དགེ་སྦྱོང་དུ། །བརློམ་ཀྱང་ཆོས་བརྒྱད་མཁར་སོ་མ་ཞིག་པའི། །བློ་འདི་ལས་སུ་རུང་བར་བྱིན་གྱིས་རློབས། ༡༤ །ཐོས་བསམ་ཚིག་ལ་སྦྱངས་ཀྱང་ནེ་ཙོའི་ངག །ཟབ་དོན་སྒོམ་ལ་ཞུགས་ཀྱང་གོ་ཡུལ་ཙམ། །རྒྱུ་འབྲས་རྟེན་འབྲེལ་ཤེས་ཀྱང་དྲེད་པོར་ཤོར། །རང་སེམས་རང་གི་འཐུལ་བར་བྱིན་གྱིས་རློབས། ༡༥ །བསླབ་གསུམ་བརྡོམ་པ་ཚུལ་ཆོས་དྲི་མས་སྦག །གཞན་དོན་སེམས་བསྐྱེད་ལོ་འདོད་ཁོང་གཅོང་ཅན། །རིམ་གཉིས་ཏིང་འཛིན་རེ་དོག་ཟེབ་རྒྱས་བཅིངས། །ཆོས་བརྒྱད་དྲི་མ་བྲལ་བར་བྱིན་གྱིས་རློབས། ༡༦ །རང་སྐྱོན་མ་རིག་ལིང་ཐོག་འཐུག་པོ་ཡི། །ཕ་རོལ་གཞན་གྱི་ཡོན་ཏན་མི་མཐོང་བར། །བསྐུར་འདེབས་ལོག་ལྟའི་དུག་ཆེན་རབ་བཞི་ནས། །
དག་སྣང་ཕྱོགས་མེད་འབྱོངས་པར་བྱིན་གྱིས་རློབས། ༡༧ །རང་ལ་ཚིག་ཟུར་ཅུང་ཟད་མི་བཟོད་ཀྱང་། །གཞན་ལ་གནོད་ཚེ་བྱེད་པའི་སྙིང་ཁམས་ཅན། །ཆོས་མིན་བསམ་སྦྱོར་མཐའ་དག་གཏན་སྤངས་ཏེ། །རྒྱལ་སྲས་སྤྱོད་ལ་འཇུག་པར་བྱིན་གྱིས་རློབས། ༡༨ །དཀོར་ཟས་མེ་མདག་འདྲ་ལ་ཚིམ་མེད་སྤྱོད། །གཉིད་དང་གཡེང་བ་ཕྱོགས་ལ་དུས་འདའ་བཞིན། །སྒྲུབ་པ་བྱས་ཞེས་ངོ་སོར་སྒྲོག་བྱེད་པའི། །རང་ཕུང་སྤྱོད་དང་བྲལ་བར་བྱིན་གྱིས་རློབས། ༡༩ །སངས་རྒྱས་དངོས་མཚུངས་བླ་མས་ཐབས་མང་པོས། །ལམ་ཟབ་སངས་རྒྱས་ལག་བཅངས་སྤྲད་ན་ཡང་། ཁ་ལྟ་གོ་དྲེད་མཁན་གྱི་བུ་འབངས་ལ། །ཉམས་རྟོགས་མྱུ་གུ་སྐྱེ་བར་བྱིན་གྱིས་རློབས། ༢༠ །ཀྱི་ཧུད། །ལས་ཉོན་མང་པོ་བདག་འདྲའི་གདུལ་བྱ་ལ། །མཁྱེན་བརྩེ་ནུས་ལྡན་སངས་རྒྱས་བླ་མ་རྗེ། །ཐུགས་རྗེ་རྨད་དུ་བྱུང་བའི་མཐུ་སྟོབས་ཅན། །མྱུར་བ་ཉིད་དུ་བསྐྱེད་པར་མཛད་དུ་གསོལ། ༢༡ །
འདི་གཟུངས་རྣམ་པ་ཀུན་ཏུ་སྐྱབས་ཀྱི་མཆོག །དཀོན་མཆོག་ཀུན་འདུས་བླ་མ་རྗེ་བཙུན་ལས། །རེ་ལྟོས་བློ་གཏད་གཞན་ན་མ་མཆིས་པས། །འབྲལ་མེད་ཐུགས་རྗེ་ཞག་པས་བཟུང་དུ་གསོལ། ༢༢ །ལས་ངན་འཁྲུལ་པའི་རླུང་གི་མི་བསྐྱོད་པར། །དམ་ཆོས་ཆིག་དྲིལ་ནུས་པར་བྱིན་གྱིས་རློབས། །བར་ཆད་ངན་རྐྱེན་དབང་དུ་མི་འཆོར་བར། །ཚེ་དང་སྒྲུབ་པ་མཉམ་པར་བྱིན་གྱིས་རློབས། ༢༣ ཁམས་གསུམ་འཁོར་བར་གཏན་འཁྱམ་མི་འགྱུར་ཞིང་། །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །རང་དོན་ཞི་བདེ་སྒྲུབ་པ་མ་ཡིན་པར། །མཁའ་མཉམ་ཕ་ལ་འགྲོ་དྲུག་སྒྲོལ་བར་ཤོག ༢༤ །ཅེས་རང་གི་རང་ཉིད་ལ་མི་རྟགས་པའི་བསྐུལ་བ་དང་། །སྐྱོན་ཚང་མ་ལུས་པ་དྲུང་ནས་ཕྱུངས་ཏེ་དམ་པའི་ཆོས་ལ་ནན་ཏན་དུ་བསྐུལ་ཞིང་། །བླ་མ་རྗེ་བཙུན་མཆོག་ལ་གདུང་བས་གསོལ་བ་འདེབས་པ་དང་བཅས་པ་འདི་ནི། །དད་ཅན་གྱི་སྐལ་ལྡན་ཚུལ་ཁྲིམས་དབང་པོས་བསྐུལ་ངོར་བཀོད་པའོ།། ༈ །།བླ་ན་མེད་པའི་སྐྱབས་མཆོག་
རིགས་ཀྱི་བདག །མཉམ་མེད་རྗེ་བཙུན་བླ་མ་སངས་རྒྱས་དངོས། །སྲིད་དང་ཞི་བའི་ཁྱབ་བདག་འཁོར་ལོའི་མགོན། །སྙིང་ནས་གསོལ་བ་འདེབས་སོ་བྱིན་གྱིས་རློབས། །ཐུགས་རྗེ་ཕྱོགས་མེད་ཀུན་ལ་ཁྱབ་ན་ཡང་། །ལས་ཉོན་ཕུང་པོའི་གདུལ་བྱ་བདག་སོགས་ལ། །གང་དུ་བཞུགས་ཀྱང་ཡེ་ཤེས་གཟིགས་པ་ཡིས། །གཡེལ་བ་མེད་པར་རྟག་ཏུ་གཟིགས་མཛད་གསོལ། །སྐྱེ་བ་འདི་ནས་ཚེ་རབས་ཐམས་ཅད་དུ། །རྗེ་བཙུན་ཁྱེད་ཀྱི་གདུལ་བྱར་གྱུར་ནས་ཀྱང་། །དམ་ཆོས་ཟབ་དོན་བདུད་རྩིའི་ཆར་ཆེན་གྱིས། །བདག་དང་མཁའ་མཉམ་འགྲོ་བ་སྨིན་གྲོལ་ཤོག །ཅེས་མཁྱེན་རབ་དབང་ཕྱུག་ལའོ།། ༈ །།ཀྱེ་མ། དྲིན་ཅན་བླ་མ་དཀོན་མཆོག་རིན་པོ་ཆེ། །སྙིང་ནས་འབོད་དོ་རེ་སའི་སྐྱབས་གནས་རྣམས། །མཁྱེན་པས་གཟིགས་དང་ལས་ངན་སེམས་ཅན་ལ། །ཐུགས་རྗེས་བཟུངས་ཅིག་མྱུར་དུ་བྱིན་གྱིས་རློབས། །ཀྱེ་མ། མི་ལུས་ཐོབ་ཅིང་དབང་པོ་ཚང་བ་དང་། །ཆོས་དང་མཇལ་ཞིང་
བླ་མ་མཆོག་རྙེད་ཀྱང་། །ད་དུང་ཡེང་མ་ལམ་ལ་མི་ཚེ་སྐྱེལ། །བརྩོན་འགྲུས་ཆོས་ལ་ནུས་པར་བྱིན་གྱིས་རློབས། །ཟས་གོས་འཇིག་རྟེན་ཆེད་དུ་འབད་པ་རེམ། །དམ་ཆོས་གཏན་འདུན་དོན་ལ་ཕྱི་ཤོལ་ཆེ། །གོ་ཞིང་རིག་པའི་ངང་ནས་སྙོམ་ལས་ཅན། །བློ་སེམས་ལས་སུ་རུང་བར་བྱིན་གྱིས་རློབས། །སྡིག་དང་དོན་མེད་ལས་ལ་བསུན་པ་མེད། །སྒྲུབ་དང་དགེ་སྦྱོར་ཕྱོགས་ལ་སྤྲོ་ནུས་ཞན། །གཉིད་དང་རྣམ་གཡེང་ལོང་གཏམ་ལ་གོམ་པའི། །བག་ཆགས་ཆོས་ལ་འབྱུང་བར༴ །གྲོགས་ངན་བདུད་ཀྱི་བསླུ་ཕྱིར་འབྲེང་བ་དང་། །ལས་ངན་མི་དགེ་ངན་གོམས་ཆེ་བ་དང་། །ལྟར་སྣང་ཚེ་འདིའི་བྱ་བ་བསྒྲུབ་པ་སོགས། །ཅིས་ཀྱང་འབྱུང་བ་མེད་པར༴ །དོ་ནུབ་ཙམ་ཡང་མི་འཆིའི་བློ་གཏད་མེད། ཁ་བཤད་ཚིག་གི་ཆོས་ཀྱི་དགོས་དུས་བསླུ། །སང་བྱ་གནང་བྱར་མི་ཚེ་མི་ཟད་པར། །ལོང་མེད་སྒྲུབ་ལ་བརྩོན་པར༴ །རང་སྐྱོན་ཉོན་མོངས་མེ་སྤུངས་འབར་བ་ཡི། །རང་བརྒྱུད་བསྲེགས་པའི་ཐལ་བས་གཞན་
སུན་འབྱིན། །ད་དུང་གཞན་སྐྱོན་རྟོགས་པའི་བློ་ཉེས་པོ། །དག་སྣང་གཏིང་ནས་འབྱོངས་པར༴ །ཐོག་མེད་ད་ལྟའི་བར་དུ་ཡང་ནས་ཡང་། །ཆོས་མེད་འཁོར་བའི་རྒྱ་མཚོར་འཁྱམས་ལགས་ཀྱི། །ད་ནི་དམ་ཆོས་སྙིང་ནས་བསྒྲུབ་ནུས་ཤིང་། །བྱང་ཆུབ་ལམ་སྣང་ཟིན་པར༴ །དལ་འབྱོར་སྙིང་པོ་ལོན་པར༴ །འཆི་བ་སྙིང་ནས་དྲན་པར༴ །ཅིས་ཀྱང་དགོས་མེད་ཤེས་པར༴ །དག་སྣང་མོས་གུས་སྐྱེ་བར༴ །ཆོས་དང་རང་རྒྱུད་འདྲེ་བར༴ །སྙིང་རྗེ་བྱང་སེམས་འབྱོངས་པར༴ །དཀའ་དཔྱད་ཆོས་ཕྱིར་ནུས་པར༴ །སྒྲུབ་ལ་བར་ཆད་མེད་པར༴ །ཉམས་རྟོགས་མཐའ་རུ་ཕྱིན་པར༴ །ངར་འཛིན་ཞེན་འདོད་ཟད་པར༴ །དོན་གཉིས་ལྷུན་གྲུབ་འབྱུང་བར༴ །ཚེ་གཅིག་སངས་རྒྱས་འགྲུབ་པར་བྱིན་གྱིས་རློབས། །ཅེས་པ་འདི་མཆོག་གྲུབ་སྙིང་པོ་ལའོ།། ༈ །།སྒྲིབ་བྲལ་ཡེ་ཤེས་མཆོག་གི་གཟིགས་པ་ནི། །རྟག་པར་གཡེལ་བ་མེད་པའི་སྐྱབས་མཆོག་རྗེ། ཁམས་གསུམ་
ཟླ་མེད་རྒྱལ་བ་འཇའ་ཚོན་སྙིང་། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །དོན་དམ་སྐྱེ་འཆིའི་མཚན་མ་མི་མངའ་ཡང་། །ལྟར་སྣང་གཟུགས་སྐུའི་ཉི་མ་དབྱིངས་ནུབ་ན། །འཁོར་བའི་མུན་འཁྱམས་ལྟོས་བཅས་བུ་འབངས་རྣམས། །ལམ་སྟོན་ཡེ་ཤེས་སྒྲོན་མེ་སུ་ལ་རེ། །ཆོས་ཉིད་བདེ་ཆེན་དག་པའི་དགོངས་ཀློང་ནས། །འགགས་མེད་མཁྱེན་བརྩེའི་རོལ་པའི་ཐུགས་རྗེའི་འཕྲུལ། །རྨད་བྱུང་ཕྲིན་ལས་སྒོ་བརྒྱ་ཕྱེས་མཛོད་ལ། །བདག་སོགས་མཁའ་ཁྱབ་གདུལ་བྱ་དྲངས་ཏུ་གསོལ། །ཅེས་རིག་འཛིན་ཆེན་པོ་དེ་ཉིད་དགོངས་པ་ཆོས་ཀྱི་དབྱིངས་སུ་ཐིམ་པའི་ཚེ་གདུང་བས་གསོལ་བ་བཏབ་པའོ།། ༈ །།ཨེ་མ་ཧོཿ སྣང་སྲིད་གཟུགས་ཀྱི་སྣང་བ་ཇི་སྙེད་པ། །མ་ལུས་དཔལ་ལྡན་བླ་མའི་སྒྱུ་འཕྲུལ་སྐུར། །གདོད་ནས་ལྷུན་གྱིས་གྲུབ་པའི་ཡེ་ཤེས་ཀྱི། །སྤྲུལ་སྐུའི་ཞིང་ཁམས་རབ་འབྱམས་དབང་བསྒྱུར་ཤོག །སྣ་ཚོགས་སྒྲ་སྐད་བསམ་འདས་ཇི་སྙེད་ཀྱང་། །བླ་མ་ལོངས་སྐུའི་འགགས་མེད་གསུང་རྡོ་རྗེར། །རྒྱུན་ཆད་མེད་པའི་ཆོས་
སྒྲར་ལེགས་རྟོགས་ནས། །གང་འདུལ་ཆོས་ཆར་འགྲོ་ལ་འབེབས་པར་ཤོག །བདག་གཞན་ཡིད་ཀྱི་དྲན་བསམ་འདུ་འཕྲོའི་ཚོགས། །མཐའ་དག་བླ་མ་ཆོས་སྐུའི་དབྱིངས་གཅིག་པར། །ཐིག་ལེ་ཉག་གཅིག་ཀློང་དུ་ཡོངས་གྲོལ་སྟེ། །སྐུ་གསུམ་དབྱེར་མེད་མངོན་དུ་འགྱུར་བར་ཤོག །ཅེས། རང་གི་བུ་མོ་ནོར་བཟང་ཆོས་ཀྱིས་དབང་པོས་བསྐུལ་ངོར་བཀོད་པའོ།། ༈ །།ན་མོ་མ་ཧཱ་གུ་རུ་རཏྣ་པཱ་ད་མཱུ་ལེ། །དེ་ཡང་སྲིད་དང་ཞི་བ་འཁོར་བ་མྱང་འདས་ལ་སོགས་རྣམ་གྲངས་ཀྱི་གདགས་གཞི་བསམ་ལས་འདས་པའི་རོལ་པ་མ་ལུས་པའི་ཁྱབ་བདག་འཁོར་ལོའི་དབང་ཕྱུག་ནི་དཔལ་ལྡན་བླ་མ་རྡོ་རྗེའི་སློབ་དཔོན་ཞེས་གྲགས་པའི་བདག་ཉིད་ཁོ་ནར་མདོ་རྒྱུད་མན་ངག་མཁས་གྲུབ་མཐའ་དག་མགྲིན་གཅིག་པ་ཉིད་དུ་ཟད་ཅིང་། དེ་ལ་མཆོད་དང་བསྟོད་བསྒོམ་བགྱིས་ན་རྒྱལ་བའི་དཀྱིལ་འཁོར་མ་ལུས་པ་ལ་མཆོད་སྒྲུབ་བགྱིད་པར་འགྱུར་བ་ཉིད་དང་། རྡོ་རྗེའི་སློབ་དཔོན་གང་དེ་ཡང་ཕྱོགས་བཅུ་རབ་འབྱམས་ཀྱི་ཞིང་ཁམས་སོ་སོར་ནི་
གང་ལ་གང་གིས་འདུལ་བའི་སྐུ་དང་རྣམ་འགྱུར་བརྗོད་ལས་འདས་པ་དང་། ཕྲིན་ལས་ཀྱི་འཕྲུལ་བཀོད་བློའི་ར་བ་ལས་བརྒལ་བའི་ཆོས་ཅན་ཡིན་པའི་ཕྱིར། མཚན་དང་གདུལ་བྱེད་ཀྱི་ལྡོག་པར་ནི་ཞིང་ཁམས་ལ་ལར་སངས་རྒྱས་སྤྲུལ་པའི་སྐུ་ཞེས་མཛད་པ་བཅུ་གཉིས་ཀྱི་ཚུལ་སྟོན་པར་གནང་བ་དང་། ལ་ལར་ལོངས་སྤྱོད་རྫོགས་སྐུ་ཁ་སྦྱོར་ཡན་ལག་བདུན་ལྡན་གྱི་ཚུལ་དུ་སྟོན་པ་དང་། དེ་བཞིན་དུ་ལྷ་རྣམས་ལ་ལྷ་དང་། ལྷ་མ་ཡིན་རྣམས་ལ་ལྷ་མིན་དང་། བྱོལ་སོང་རྣམས་ལ་ནི་བྱོལ་སོང་གི་དབང་པོའི་ཚུལ་དང་། ཡི་དྭགས་རྣམས་ལ་དེ་དང་དམྱལ་བ་ལ་དེའི་བདག་པོའི་བཀོད་པའི་ཟོལ་གྱིས་འདུལ་བ་དང་མི་རྣམས་ལ་མི་གཟུགས་ཀྱི་སྣང་བརྙན་སྟོན་པ་དེ། དོན་དམ་པར་ནི་སྤྲོ་བསྡུའི་དམིགས་མཚན་གྱིས་དབེན་པའི་ཆོས་ཉིད་ཀྱི་ཀློང་ལས་འགགས་མེད་རང་བྱུང་གི་རོལ་རྩལ་ཅིར་ཡང་སྣང་ཚོགས། དེས་ན་བསམ་གྱི་མི་ཁྱབ་པའི་ཆོས་ཉིད་ཀྱི་དོན་དྲན་པར་བྱ་ཡི། བདག་གི་འདྲེན་པ་འདི་ནི་མིའོ། །ཟག་པ་
དང་མ་བྲལ་བའོ། །ཀུན་ནས་ཉོན་མོངས་པའི་ཤུན་པ་དང་བཅས་པ་ཉིད་དོ། །ཅེས་ཡིད་ཀྱི་ལམ་དུ་བཅང་བར་གྱུར་ན་ལྷན་སྐྱེས་ཡེ་ཤེས་མཆོག་གི་ཆོས་ཀྱི་སྐུའི་དོན་ལ་བསྒྲིབ་པར་འགྱུར་བས། གཟུགས་སྒྲ་སེམས་ཀྱི་རི་མོ་གང་ལྟར་སྣང་ཡང་རང་ཉིད་ཀྱི་མཐོང་བ་དག་དང་མ་དག་གི་རྐྱེན་ཚུལ་ཁོ་ན་ཉིད་དུ་ངེས་པར་ཤེས་པར་བྱས་ལ། བླ་མ་སངས་རྒྱས་ཆོས་ཀྱི་སྐུ་ཡེ་ནས་ཇི་བཞིན་པའི་གནས་ལུགས་ཀྱི་གདེང་ཚད་བློའི་མཐིལ་ཕུར་དུ་བཅངས་ཏེ། རྟག་པ་རྒྱུན་གྱི་འཁོར་མོར་རང་གི་ཕུང་ཁམས་སྐྱེ་མཆེད་ཐམས་ཅད་རིགས་བརྒྱ་རིགས་ལྔའི་རང་བཞིན་ཡེ་གདོད་མ་ནས་ཡིན་པར་ངེས་པ་ཉིད་ཀྱི་བདེ་ཆེན་འཁོར་ལོའི་ཡང་རྩེའམ། ཆོས་ཀྱི་འཁོར་ལོའི་གཞལ་ཡས་སུ། དཔལ་ལྡན་བླ་མ་ཡིད་བཞིན་ནོར་བུ་ཉིད་ཀྱི་སྐུའི་སྣང་བསྙན་བཟོ་བཅོས་མཚན་རྟོག་གིས་མ་བསྒྱུར་མ་བསླད་པར། སྟོང་གསལ་ཟུང་འཇུག་གམ་རང་རིག་དང་གཉིས་སུ་མ་ཡིན། གཉིས་སུ་བྱར་མེད་པའི་དྲན་རིག་འཛིན་མེད་
རང་བབ་རང་ཤར་རང་གྲོལ་ཆེན་པོར་བཟློག་པའི་ངང་ནས། །ཤུགས་འབྱུང་མགྲིན་པའི་རྫ་རྔ་ལྷུང་ལྷུང་གི་དབྱངས་སུ་འདི་ལྟར་བསྒྲགས་པར་བྱའོ། །ཨེ་མ་ཀྱེ་ཧོཿ །ཕ་གཅིག་དྲན་ནོ་དེ་དུས་གསུམ་གྱི་སངས་རྒྱས་དྲན། །ཕ་གཅིག་དྲན་ནོ་དེ་རྗེ་བཙུན་གྱི་བླ་མ་དྲན། །སྙིང་ནས་འབོད་དོ་དེ་གདུང་དབྱངས་ཀྱི་འོ་དོད་འབོད། །གསོལ་བ་འདེབས་སོ་དེ་ཐུགས་རྗེ་ཡི་སྤྱན་གྱིས་གཟིགས། ༡ །གནས་ཡ་གི་ཤེད་བདེ་ཆེན་གྱི་འོག་མིན་ན། །ཕ་རྒྱལ་བ་མཆོག་དྲིན་ཅན་གྱི་བླ་མ་རྗེ། །སྐུ་སྣང་སྟོང་ནི་འཇའ་འོད་ཀྱི་དཀྱིལ་འཁོར་རྒྱས། །གསུང་ཟབ་སྙན་གྱི་ཆོས་དབྱངས་དེ་ལྷངས་སེ་ལྷངས། ༢ །ཐུགས་མཁྱེན་བརྩེ་དང་ཡེ་ཤེས་ཀྱི་ཀློང་ཡངས་ནས། །བུ་དད་ལྡན་དང་མཁའ་མཉམ་གྱི་གདུལ་བྱ་ལ། །དུས་རྒྱུན་ལྡན་དུ་བརྩེ་ཆེན་གྱི་གཟིགས་པ་དེ། །རྗེ་མཚན་ལྡན་གྱི་རྣམ་ཐར་ཅིག་མ་ལགས་སམ། ༣ །ཁྱེད་སྒྲིབ་བྲལ་གྱི་སྤྱན་རས་ཕྱོགས་བཅུ་ཡི། །གནས་མ་ལུས་ཀུན་ལྷམ་མེར་གཟིགས་མངའ་ན། །བདག་དུས་ངན་དུ་སྐྱེས་པའི་བུ་འབངས་འདི། །གཏན་མཐའ་མེད་དུ་འཁོར་
བར་མནར་འཇུག་གམ། ༤ །ལས་ངན་གོམས་འཕྲུལ་ཞེན་གྱི་བག་ཆགས་དང་། །རྐྱེན་བློ་བུར་འགལ་མཐུན་གྱི་གཟེབ་རྒྱ་སོགས། །ལམ་བླ་མེད་བྱང་ཆུབ་ཀྱི་བར་ཆད་ཚོགས། །འདི་ཞི་བར་བྱིན་གྱིས་ཤིག་མི་རློབས་སམ། །ལུས་ཉམས་ཐག་ཉོན་མོངས་ཀྱི་མལ་ནང་ན། །སེམས་འཁྲུལ་འཁོར་གཅོང་ཆེན་གྱིས་ཟིན་པའི་ཤུགས། །ངག་འོ་དོད་སྨྲེ་ངག་གི་གདུང་དབྱངས་སྒྲ། །ཕ་རྗེ་བཙུན་དབང་མེད་དུ་དྲན་པས་འབོད། ༦ །ཚེ་མི་རྟག་འཆི་ངེས་ཀྱི་ལྷག་མ་ནི། །ལོ་ཟླ་ཞག་འགའ་ཞིག་གནས་རིང་འདིར། །ལས་འཁྲུལ་འབྱམས་ཆོས་མིན་དང་སྙོམ་ལས་དགྲ། །བཟློག་ངེས་པར་དམ་ཆོས་ཤིག་སྒྲུབ་བྱིན་རློབས། ༧ །གཏན་མདུན་མའི་ཡང་རྩེ་ཚེ་གཅིག་འདིར། །ལམ་སྒྲུབ་པ་སྙིང་པོར་ཆིག་དྲིལ་དུ། །འབད་ནུས་ལ་བར་ཆད་མི་འབྱུང་བར། །འབྲས་མངོན་གྱུར་ཆོས་སྐུར་གྲོལ་བར་མཛོད། ༨ །མཆོག་མཐུན་མོངས་དངོས་གྲུབ་ཀྱི་གཏེར་མཛོད། །སྐུ་གང་འདུལ་དེར་སྟོན་
གྱི་རྫུ་འཕྲུལ་དང་། །ཐུགས་མཉམ་ཉིད་ཡེ་ཤེས་ཀྱི་ཟློས་གར་སོགས། །ཕ་ཁྱེད་དང་ཚུལ་མཐུན་གྱིས་འགྲོ་སྒྲལ་ཤོག། ༩ ༈ །།ཨེ་མ་ཧོཿ །མཁྱེན་དང་བརྩེ་དང་མཛད་པའི་ཕྲིན་ལས་ལ། །ཚད་མེད་རྒྱལ་བ་ཀུན་ལས་ལྷག་པའི་རྗེ། །གང་གི་ཡོན་ཏན་བསྐལ་བརྒྱར་རྡོ་རྗེའི་ལྕེ། །འབུམ་ཕྲག་དུ་མས་བརྗོད་པར་སུ་ཞིག་སྤོབས། ༡༠ །ལས་ཉོན་འཁོར་བའི་གྲུ་ཆེན་འབྱུང་གནས་ཆེར། །ལས་དབང་བཙན་པོས་རབ་འཕྱན་བདག་སོགས་འགྲོ། །ལོག་རྟོག་རླུང་དྲག་ཤུགས་ཆེན་གྱིས་བསྐྱོད་པའི། །ལོག་ལམ་སྲིན་གླིང་ལས་སྐྱོབས་ལྷ་ཡི་ལྷ། ༡༡ །དལ་འབྱོར་དལ་ཁོམ་ལྡན་པའི་གྲུར་བརྟེན་ནས། །བླ་མེད་བླ་མ་མཆོག་གསུངས་ཡིད་བཞིན་ནོར། །རབ་བླངས་རབ་ཞི་དོན་གཉེར་སྐྱེ་བོ་དག །སྐྱབས་བྲལ་སྐྱབས་ཀྱི་མཆོག་ཁྱེད་སྙིང་ནས་དྲན། ༡༢ །སྣ་ཚོགས་ལས་ལ་ཐོག་མེད་ད་ལྟ་བར། །སྣ་ཚོགས་སྤྱད་ཀྱང་དོན་མེད་སྡུག་བསྔལ་ལུས། །སྣ་ཚོགས་བླངས་ལ་ད་ནི་ཡིད་རབ་སྐྱེ། །སྣ་ཚོགས་རང་གྲོལ་
ཕ་དེས་གཟིགས་རེ་རན། ༡༣ །སྲིད་པའི་ངང་ཚུལ་ཚུལ་མིན་ཡིད་བྱེད་ལ། །རྟགས་པར་རབ་ཞེན་ཞེན་པས་རང་ཉིད་བཅིང་། །འདུས་བྱས་མི་རྟག་རྟག་ཏུ་རེ་བས་ཕུང་། །ཐུགས་རྗེས་མྱུར་གཟིགས་གཟིགས་པ་དྲི་མེད་མཆོག ༡༤ །མཆོག་ཏུ་དག་པའི་སྐུ་དང་ཚངས་དབྱངས་གསུང་། །གསུང་རབ་སྙིང་པོའི་བཅུད་ལྡན་འདོད་འཇོའི་དཔལ། །དཔལ་ལྡན་མཚུངས་བྲལ་ཁྱེད་ཐུགས་ཇི་བཞིན་དུ། །དུ་མའི་ཆོས་ཀུན་རང་བྱན་ཚུད་པར་ཤོག ༡༥ །རབ་དད་དད་དང་དང་བའི་ཡིད་རྩེ་གཅིག །གཅིག་འདི་འདི་ཉིད་ཉིད་ལས་གཞན་པ་ཡི། །ཡི་དམ་དམ་ཆོས་ཆོས་ཀུན་རྗེ་བཙུན་ཁྱེད། ཁྱེད་ལས་ལས་གཞན་གཞན་དུ་བདག་མི་སེམས། ༡༦ །སྐྱེ་བ་འདི་གཟུངས་མཐར་ཐུག་བྱང་ཆུབ་ཀྱི། །གོ་འཕང་མངོན་དུ་མ་གྱུར་དེ་སྲིད་དུ། །སྐྱབས་གནས་རྒྱལ་བའི་ཁྱབ་བདག་བླ་མ་ཁྱེད། །བདག་སྙིང་དད་རྒྱའི་ཟེའུ་འབྲུར་དབྱེར་མེད་ཤོག ༡༧ །རབ་འབྱམས་ཕྱོགས་མཐའ་བཏུག་པའི་ཞིང་། །
རྣམ་པར་ཡོངས་དག་དཀྱིལ་འཁོར་བཀོད། །གྲངས་མེད་དེ་སྙེད་རྒྱལ་བ་ཁྱེད། །འགྲོ་འདུལ་རྣམ་འཕྲུལ་མ་ལགས་སམ། ༡༨ །གང་གི་རྨད་བྱུང་ཐུགས་རྗེ་ལ། །བྲི་གང་ཕྱོགས་སུ་ལྷུང་བའི་མཐའ། །མི་མངའ་དེ་སླད་རྨོངས་པའི་འགྲོ། །ཉམས་ཐག་བུ་ང་ཅིས་མི་གཟིགས། ༡༩ །འགྲོ་རེའི་མདུན་དུ་གང་འདུལ་གྱི། །སྤྲུལ་བཀོད་དེ་སྙེད་སྟོན་པའི་ཕྱིར། །བདག་དང་བདག་འདྲའི་གདུལ་སྐལ་དུ། །མགོན་ཁྱོད་མངོན་དུ་འགྱུར་ལགས་སོ། ༢༠ །མ་རིག་ལྷན་སྐྱེས་རང་སྒྲིབ་ཀྱིས། །རང་ལ་གདོད་ནས་སྒྲིབ་པའི་མུན། །བསལ་མཁས་ཐུགས་རྗེའི་སྣང་བྱེད་ཁྱེད། །བདག་གི་དཔལ་དུ་ཤར་བར་གྱུར། ༢༡ །བསྙེལ་དང་གཡེལ་བའི་སྐྱོན་ཚོགས་ནི། །ནམ་ཡང་ཐུགས་རྗེ་ལ་མི་མངའ། །དེ་ཕྱིར་རྟག་པར་རྒྱུན་འཁོར་མོར། །དད་ལྡན་བུ་ལ་གཟིགས་སུ་གསོལ། ༢༢ །བྱིན་རླབས་མི་ཟད་ཆུ་རླུང་ལ། །གུས་ལྡན་སྐྱེ་འགྲོ་ཇི་སྙེད་པས། །སྤྱད་ཀྱང་རྒྱུན་ཆད་གཏན་བྲལ་བ། །བདག་གི་རྒྱུད་ལ་དབབ་པར་མཛོད། ༢༣ །བདག་དང་འགྲོ་བའི་ལས་ཉོན་ཁམས་ཟབ་
མོ། །ཇི་སྲིད་དེ་བར་མགོན་ཁྱེད་ཚད་མེད་ཀྱི། །སྙིང་རྗེའི་ཟློས་གར་བསྒྱུར་བ་མི་དམན་པས། །སྡུག་བསྔལ་འཁོར་མཚོ་ཆེན་ལས་བསྒྲལ་དུ་གསོལ། ༢༤ །བླ་མ་སངས་རྒྱས་བྱང་སེམས་ཡི་དམ་ལྷ། །མཁའ་འགྲོ་དམ་ཅན་རྒྱ་མཚོར་བཏགས་པའི་མཚན། །སྣ་ཚོགས་འཆང་བའི་མགོན་གཅིག་དྲིན་ཅན་རྗེ། །ཁྱེད་ཀྱི་གོ་འཕངས་མྱུར་དུ་འགྲུབ་གྱུར་ཅིག ༢༥ །མཁའ་ཁྱབ་འགྲོ་འདི་བདག་གི་ཕ་དང་མ། །ཁོ་ན་ལས་གཞན་མིན་ཀྱང་བདག་ཉིད་ཀྱིས། །སྒྲོལ་བའི་ནུས་མེད་དེ་ཕྱིར་སངས་རྒྱས་མཆོག །གང་ཁྱེད་བདག་དང་འགྲོ་ཀུན་གྲོལ་བར་མཛོད། ༈ །ཀྱཻ་རྗེ་བཙུན་དམ་པ་དཔལ་ལྡན་བླ་མ་རྒྱལ་བ་མ་ལུས་གཅིག་ཏུ་བསྡུས་པའི་ངོ་བོར་གྱུར་པའི་བདག་ཉིད་ཆེན་པོ་མཁྱེན་བརྩེ་ནུས་པ་ཕུལ་དུ་བྱུང་བའི་སྐྱབས་གནས་ཀྱི་རྒྱལ་པོ་མཆོག་གི་ཞབས་ལ་སྙིང་ནས་སྐྱབས་སུ་མཆིའོ། །ཐུགས་རྗེས་གཟིགས་སུ་གསོལ། བྱིན་གྱིས་རླབས་ཏུ་གསོལ། ལམ་སྣ་དྲངས་ཏུ་གསོལ། བར་ཆད་
བསལ་དུ་གསོལ། །རྗེ་ཉིད་དང་གཉིས་སུ་མེད་པར་བྱིན་གྱིས་རླབས་ཏུ་གསོལ། དེ་ལྟར་གསོལ་བ་བཏབ་པས་བླ་མའི་སྐུ། །འོད་དུ་ཞུ་ནས་རང་ལ་དབྱེར་མེད་ཐིམ། །ཀུན་རྫོབ་གཟུགས་སྐུའི་བླ་མ་སྤྲུལ་པའི་སྐུ། །དོན་དམ་རང་རིགས་ཆོས་སྐུའི་དབྱིངས་སུ་འདྲེས། ༢༧ །འདྲེས་དང་མ་འདྲེས་བློ་ཡི་བཏགས་པ་ལས། །གདོད་ནས་གཉིས་མེད་རང་བབ་གཤིས་ཀྱི་ངང་། །སྒྲིབ་ཚོགས་འཁྲུལ་པའི་བག་ཆགས་རང་བཞིན་དག །བསྐུར་ཐོབ་མཚན་བཅས་དབང་གི་བརྫུན་ཕུག་དིབ། ༢༨ །སྐུ་བཞིའི་ངོ་བོར་ཡེ་ནས་ལྷུན་གྱིས་གྲུབ། །རྟོགས་མེད་གཞན་དོན་རྩོད་བྲལ་ཤུགས་ལ་འབྱུང་། །དུས་གསུམ་དུས་མེད་བླ་མའི་རྣལ་འབྱོར་ཆེ། །མཐར་ཐུགས་དོན་གྱི་སྙིང་པོ་ཨེ་མ་ཧོཿ ༢༩ །དེ་དོན་མ་རྟོགས་འཁྲུལ་པའི་སེམས་ཅན་ཀུན། །རང་སྣང་ལོག་པའི་ལས་ལམ་རྒྱུན་ཆད་ཅིང་། །བདེ་ཆེན་འདུ་འབྲལ་མེད་པའི་མཁའ་དབྱིངས་སུ། །འགྱུར་མེད་དོན་གྱི་བླ་མ་མཆོག་འགྲུབ་ཤོག ༣༠ །ཅེས་པའི་གསོལ་འདེབས་འདི་ནི་སྤྲུལ་པའི་སྐུ་མཆོག་རྣམ་རོལ་ཆོས་
ཀྱི་རྒྱལ་མཚན་པས་བསྐུལ་བར་མཛད་པའི་ངོར་བཀོད་པའོ།། ༈ །།ན་མོ་གུ་རུ། །བདེ་ཆེན་འཁོར་ལོ་དོན་གྱི་འོག་མིན་ན། །རྒྱུད་པ་ཀུན་འདུས་རྩ་བའི་བླ་མ་ཉིད། །སངས་རྒྱས་ཀུན་ལས་ལྷག་པའི་ཐུགས་རྗེ་ཅན། །མཚན་དཔེའི་གཟི་འབར་འཇའ་འོད་སྐུ་རུ་བཞུགས། །བདག་དང་འགྲོ་བའི་ལུས་སྲོག་ལོངས་སྤྱོད་ཀུན། །ལྟོས་མེད་མཆོད་པར་འབུལ་གྱི་བཞེས་ནས་ཀྱང་། །ཚད་མེད་ཐུགས་རྗེ་མྱུར་འགྱོགས་ལྕགས་ཀྱུ་ཡིས། །སྡུག་བསྔལ་ཉམས་ཐག་བུ་འབངས་དྲངས་ཏུ་གསོལ། །ཚེ་འདིའི་སྣང་བ་རྨི་ལམ་ལྟ་བུ་ནུབ། །བཟློག་མེད་འཆི་བདག་ཞགས་པ་དམ་པོས་བཅིངས། །རབ་འཇིགས་བར་དོའི་འཕྲང་ཆེན་འགྲིམ་ཁ་འདིར། །ཐུགས་རྗེས་མྱུར་དུ་གཟིགས་དང་བླ་མ་རྗེ། །ལོངས་སྤྱོད་གཉེན་འདུན་གཅེས་པའི་ལུས་དང་བཅས། །ཕན་མེད་ཤུལ་དུ་བཞག་ནས་རང་རིག་འདི། །དབང་མེད་འཁྲུལ་སྣང་རླུང་གིས་མི་སྐྱོད་པར། །ལམ་མཆོག་འཕོ་བའི་ཟབ་དོན་མངོན་གྱུར་ཤོག །བསླུ་བྱེད་ཚེ་འདིའི་ཞེན་འཛིན་བྲལ་
བ་དང་། །ལོག་ལམ་འཁྲུལ་པའི་བག་ཆགས་མི་འཆར་བར། །གསལ་སྟོང་འཛིན་མེད་རིག་པ་རྗེན་པ་འདི། །རྗེ་བཙུན་བླ་མའི་ཐུགས་དང་དབྱེར་མེད་པར། །ཆོས་དབྱིངས་སྐྱེ་མེད་ཀློང་དུ་གྲོལ་བར་ཤོག །ཅེས་པ་འདི་འཕོ་བའི་རིགས་གང་ལ་ཡང་གསོལ་འདེབས་ཟུར་གསལ་མི་འདུག་པས་འདི་ལྟ་བུ་ཅིག་དགོས་ཞེས་རྣལ་འབྱོར་ཚུལ་ཁྲིམས་བཟང་པོས་བསྐུལ་ངོར་བཀོད་པའོ།། ༈ །།ན་མསྶྭ་ཙིཏྟ་དི་དྷརྨ་ཀཱ་ཡ་གུ་རུ་བྷྱཿ །གང་གི་ཐུགས་རྗེའི་གཟིངས་མཆོག་ནི། །ངེས་པར་ཆུང་མིན་ཁྱོན་ལྡན་པས། །འཇིགས་རུང་ཆུ་སྲིན་འབྱུང་ རང་སེམས་བླ་མ་གདོད་མའི་ཆོས་སྐུ་ལ་ཕྱག་འཚལ་ལོ། གནས་རླབས། །སྒྲོལ་མཛད་དེད་དཔོན་བླ་མ་མཆོད། །མཁྱེན་བརྩེ་སྟོང་གི་བཀྲ་བའི་འདྲེན་བྱེད་ནི། །གང་ལ་མངའ་དེས་མ་རྒན་ཉམས་ངའི་གཡང་། །མཐར་འཕྱན་བག་ཆགས་སྟུག་པོའི་སྐྲ་ཤད་ཅན། །སྐྱོབས་ནུས་དེ་ལ་སུ་ཡི་ཕྱག་འོས་མིན། །དེ་ལས་རྣམ་འདྲེན་ཐུགས་རྗེའི་གཟི་འབར་བཻཌཱུརྱ། །ཟློག་མེད་མོས་པའི་མགོ་སྐྱེས་ནགས་ཀྱི་རྩེར་ཡང་དག །རབ་
མཐོའི་རྒྱལ་མཚན་མངོན་གསལ་ཏོག་ཏུ་ལེགས་བཀོད་པས། སྲིད་གསུམ་ཉིན་དང་མཚན་སྣང་འཕོང་བའང་འཕྲོག་འདི་མཚར། ཨེ་མ་གདོད་ནས་ཡེ་དག་རང་རིག་གི། །གཤིས་ལ་བཅོས་བསྒྱུར་དབེན་ཀྱང་རོལ་རྩལ་གྱི། །འདུ་བྱེད་ཕུང་ཁམས་ལྷག་པའི་ལྷའི་དཀྱིལ་འཁོར། །ལྷུན་གྲུབ་ཡེ་ཤེས་ལྔ་གདངས་རབ་གསལ་འབར། །ཕྱི་དང་ནང་ངམ་བར་དང་བླ་འོག་ཅེས། །ཀུན་བཏགས་བློ་སྣང་ལྟོས་འགྲོའི་མདུད་པ་བརྒྱ། །བཀྲོལ་མེད་རང་སར་ཤིག་གི་གྲོལ་བའི་ངོར། །འགགས་མེད་ཅིར་སྣང་སྒྱུ་མའི་སྒྱུ་འཕྲུལ་གར། །དོན་གྱི་འོག་མིན་བདེ་ཆེན་འཁོར་ལོའི་ཞིང་། །རབ་གསལ་ཤེལ་གྱི་གུར་ཁང་ག་བུར་དྲི། །བཟང་ལྡན་མུ་ཏིག་གེ་སར་འཕྲེང་མཛེས་སྟོང་། །གཏི་མུག་ཆོས་དབྱིངས་བུདྡྷ་གུ་རུའོ། །རོ་འདུས་ཙཀྲ་པདྨ་རཱ་ག་ཡི། །སྐྱེད་ཚལ་ཐུན་མཚམས་འོད་ལ་རྒོད་པའི་ཞིང་། །གང་དབུས་འདོད་ཆགས་སོར་རྟོགས་ཡེ་ཤེས་སུ། །ལྷུན་གྲུབ་ངོ་མཚར་པདྨ་གུ་རུར་ཤར། །དྲན་པ་རྣམ་བཀོད་
དྷརྨ་ཙཀྐྲ་ཞེས། །མཐོན་ཁ་ཆེན་པོ་འབར་བའི་གཞལ་ཡས་ཁང་། །མཛེས་ལྡན་ཞེ་སྡང་མེ་ལོང་ཡེ་ཤེས་ཀྱི། །རྣམ་འགྱུར་བཛྲ་གུ་རུར་རང་བཞིན་གྲུབ། །སྐྱེས་བྱེད་སྤྲུལ་འཁོར་གསེར་གྱི་ས་གཞི་ནི། །མུན་པ་འཕྲོག་ནུས་འདབ་ཡངས་འབུམ་བརྡལ་བའི། །དབུས་དེར་ང་རྒྱལ་མཉམ་ཉིད་ཡེ་ཤེས་ཉིད། །རཏྣ་གུ་རུ་སྐུ་ཡི་ལྷུན་པོར་བརྗིད། །རབ་བདེ་མྱོང་བྱེད་ལྷ་ཡི་དགའ་ཚལ་ནི། །མ་རྒ་ཏ་ཡི་ནགས་ལྗོངས་རབ་ཡངས་པར། །རྟག་ཏུ་ཡང་དག་རོལ་བ་བླ་མའི་སྐུ། །ཕྲག་དོག་བྱ་གྲུབ་ཀརྨ་གུ་རུའོ། །ཀུན་ནས་ཀུན་ཏུ་འདུ་འབྲལ་ཡོངས་དབེན་པའི། །རྩ་ཁམས་རླུང་ཐིག་སྣ་ཚོགས་གྲངས་ཡས་ཀྱི། །བཀོད་པ་མ་ལུས་བླ་མའི་སྒྱུ་འཕྲུལ་ལ། །ཡི་དམ་དཔའ་བོ་མཁའ་འགྲོར་གྲགས་ཏེ་མཚར། །ཨ་ལ་ལ་ཧོ་སྣང་སྲིད་རིག་རྩལ་ཉིད། །གཅིག་དང་དུ་མར་འཛིན་པའི་སྨིག་རྒྱུ་ལ། །ཞེན་མིན་སྐུ་གསུམ་བླ་མའི་ཆུ་གཏེར་དང་། །མི་འབྲལ་སྐལ་མཆོག་གདེང་ཅན་དབང་པོར་གྱུར། །བཟོད་མ་ཉིད་ནས་རང་རིག་བླ་མ་དངོས། །
ངོ་བོ་ཆོས་སྐུ་རང་བཞིན་ལོངས་སྤྱོད་རྫོགས། །རྣམ་རོལ་སྤྲུལ་སྐུ་དོན་ལ་དབྱེར་མེད་པའི། །ཡེ་ཤེས་རྡོ་རྗེ་ཡེ་གྲོལ་གཤིས་ཀྱི་ངང་། །བསྐྱེད་དང་བསྟིམ་དང་བསྒྲུབ་དང་བསྡུ་བ་སོགས། །སྣ་ཚོགས་བྱིས་པ་བྲིད་བྱེད་སྤྲོས་པའི་ཆོས། །མཐའ་དག་མཉམ་ཉིད་ཆེན་པོར་ལ་ཟློས་པའི། །ཆོས་ཉིད་དབྱིངས་ལ་དུས་གསུམ་འཕོ་འགྱུར་བྲལ། །བག་ཆགས་གཡོ་བའི་སྤྲིན་ཚོགས་ལང་ལོང་གི །ཆོ་འཕྲུལ་རང་བྱུང་རང་ཐིམ་རང་གྲོལ་ལ། །བཅོས་བསྒྱུར་དགགས་སྒྲུབ་མི་དགོས་དག་པའི་མཁའ། །གདོད་ནས་ཡངས་པ་ཆེན་པོར་ལྷུན་གྲུབ་ཉིད། །འདོད་ལྔ་ཚོགས་དྲུག་ཡུལ་སྣང་སྒྱུ་འཕྲུལ་རྨི་ལམ་གྱི། །རྒྱལ་སྲིད་གང་ལ་ཞེན་དང་སྤོང་བགེགས་གནས་བསྒྱུར་སོགས། །བློ་ཡི་བྱེ་བྲག་དུ་མའི་རང་ངོར་ཐེག་པའི་རིམ། །མ་ལུས་བདེན་དང་བདེན་མིན་འཛིན་རྟོག་སྐབས་འདིར་མིན། །རང་རིག་ཐ་དད་བླ་མ་ཡང་ནི་གཞན་པ་དང་། །བྱིན་རླབས་རེ་ལྟོས་འབྲས་བུ་ཐོབ་བྱར་འཛིན་པ་སོགས། །ཐུན་མོངས་གདུལ་ངོར་སྤྲོས་ཚོགས་ཤིང་རྟའི་
འཁོར་ལོ་བརྒྱ། །བསྐྱོད་པའི་རྩོལ་བས་ཐང་ལ་བགྲོད་ཀྱི་ཆུ་བོར་མིན། །གཞི་ཉིད་ནས་ལ་འབྲས་བུའང་དེར། །གྲུབ་མོད་འོན་ཀྱང་རྟེན་འབྲེལ་ཐབས། །མྱུག་སོགས་ཁྱད་དུ་གསོད་མིན་པར། །ཀུན་ཤོང་ནམ་མཁའི་བློ་ལྡན་གཅེས། །ཀ་ཡེ་རྨོངས་པ་དག་ལྟའི་ཚིག །མུ་ཅོར་སྨྲས་འདི་རྒྱལ་མཆོག་དངོས། །ཉིད་ཀྱི་སྤྱན་སྔར་བྲིམ་བཟོད་པ། །ཅི་མཆིས་འོན་ཀྱང་ནོངས་ཀུན་བཤགས། །གསང་དོན་ཡང་དག་གནད་སྙིང་པོ། །ཆ་ཙམ་འདིར་བཀོད་དགེ་བའི་ཟླ། །དམར་ཕྱོགས་ཀྱིས་དབེན་འགྲོ་བློ་ཡི། །ཡེ་ཤེས་ཀུན་མུ་ཏ་རྒྱས་བྱེད་ཤོག །ཅེས། བླ་མའི་རྣལ་འབྱོར་ཟབ་དོན་སྙིང་པོར་གྱུར་བ་གང་ཟག་བློ་རབ་ཀྱི་གདུལ་ངོ་དང་མཐུན་ཅིང་སྙན་ངག་གི་བརྒྱན་པ་ཞིག་དགོས། ཞེས། སྐུ་རིན་པོ་ཆེས་བཀའ་བསྩལ་པ་བཞིན་བཀོད་ནས་ཕུལ་བ་དགེ།། ༈ །།ན་མ་དྷརྨ་ཀཱ་ཡ་སམྦྷོ་ཀཱ་ཡ་ནིརྨ་ཀཱ་ཡ་ཤསྟྲ་དཱ་ཤ་ཡ། ངོ་བོ་ཀ་དག་སྤྲོས་བྲལ་ཆོས་ཀྱི་སྐུ། །རང་བཞིན་ལྷུན་གྲུབ་གསལ་མདངས་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་གང་འདུལ་སྤྲུལ་པའི་སྐུ། །དབྱེར་མེད་རང་རིག་བླ་
མར་རྟོགས་པས་འདུད། །ཆོས་སྐུའི་གནས་ནི་བསམ་འདས་ཆོས་དབྱིངས་ཞིང་། །སྟོན་པ་གདོད་ནས་རང་རིག་ཀུན་ཏུ་བཟང་། །རང་གསལ་ཡེ་ཤེས་རྒྱ་མཚོའི་འཁོར་ཚོགས་ལ། །བརྗོད་མེད་མ་བཅོས་ཅོག་བཞག་ཆོས་འཁོར་ཆེ། །དུས་བཞི་འཕོ་འགྱུར་མེད་པར་བསྐོར་བ་ལས། །ཀུན་རྫོབ་འདུས་བྱས་ཕུན་ཚོགས་ལྔ་ལྡན་གྱི། །མིང་དང་མཚན་མས་དབེན་པའི་ཆོས་ཉིད་ཀློང་། །དོན་དེ་འགྲོ་བ་ཀུན་གྱིས་རྟོགས་གྱུར་ཅིག །ཆོས་སྐུའི་ངང་ལས་ཡེ་ཤེས་རང་གསལ་གྱི། །གནས་ནི་རང་སྣང་སྟུག་པོ་བཀོད་པའི་ཞིང་། །སྟོན་པ་རིགས་ལྔའི་སངས་རྒྱས་འཁོར་ཚོགས་ནི། །རྒྱལ་བ་རབ་འབྱམས་ཆོས་ནི་ཡེ་ཤེས་ལྔའི། །དགོངས་པར་དུས་གསུམ་རྒྱུན་ཆད་མེད་བཞུགས་འདུས། །སྤྲུལ་པའི་དང་པོ་གནས་ནི་དགའ་ལྡན་བརྩེགས། །སྟོན་པ་ཁྱེའུ་སྣང་བ་དམ་པའི་འོད། །པད་སྡོང་ཁྲི་འཕངས་ལས་འཁྲུངས་སྤྲུལ་པའི་འཁོར། །བསྐལ་བཟང་སངས་རྒྱས་སྟོང་དང་རྩ་གཉིས་ལ། །བསྟན་པའི་སྙིང་
པོ་ཐལ་འགྱུར་རྩ་བའི་རྒྱུད། །ལ་སོགས་རྫོགས་ཆེན་རྒྱུད་མཆོག་བཅུ་བདུན་གསུང་། །སྟོན་འཁོར་ངོ་བོ་གཅིག་ཀྱང་སྤྲུལ་པ་མཛད། །ཚེ་ལོ་དཔག་མེད་དུས་ན་བྱོན་དེར་འདུད། །གཉིས་པ་གནས་ནི་མི་འཇེད་འཇིག་རྟེན་འདིར། །སྟོན་པ་ཁྱིའུ་འོད་མི་འཁྲུག་པ་ཉིད། །འོད་ལྔའི་སྒོ་ལྔ་ལས་འཁྲུངས་སྤྲུལ་པའི་འཁོར། །བདེར་གཤེགས་རྡོ་རྗེ་རིན་ཆེན་པད་ཕྲིན་ལས། །རིགས་ཀྱི་མཁའ་འགྲོ་འབུམ་ཕྲག་གཉིས་རྣམས་ལ། །ཆོས་ནི་སྐུ་གསུང་ཐུགས་ཡོན་ཕྲིན་ལས་རྒྱུད། །དུས་ནི་ཚེ་ལོ་བྱེ་བ་ཐུབ་པའི་ཚེ། །འགྲོ་འདུལ་རྣམ་སྤྲུལ་དེ་ལྟར་བསྟན་ལ་འདུད། །གསུམ་པ་གནས་ནི་འོད་ཀྱི་ཕུང་པོའི་ཞིང་། །སྟོན་པའི་མཚན་ནི་འཇམ་དཔལ་འཇིག་སྐྱོབ་སྟེ། །དྲོད་ཤེར་སྐྱེས་ལས་སྐུ་བལྟམས་དེ་ཡི་འཁོར། །རང་བཞིན་བྱམས་སེམས་འབུམ་དང་ལམ་གནས་འབུམ། །སེམས་སྦྱངས་འབུམ་དང་སེམས་འདུལ་འབུམ་ཕྲག་དང་། །ས་གནས་འབུམ་དང་ཕྱིར་མི་ལྡོག་འབུམ་སྟེ། །འབུམ་ཕྲག་དྲུག་ལ་འཁོར་བ་དོང་སྤྲུག་ཆོས། །ཚེ་ལོ་འབུམ་གྱི་དུས་ན་
གསུངས་དེར་འདུད། །བཞི་པ་གནས་ནི་ཆགས་འབྱུང་མངལ་སྣང་ཞིང་། །ལྷ་དབང་མཆོག་གའི་ཡབ་དང་རྩེ་ལྡན་ཡུམ། །དེ་གཉིས་སྲས་སུ་གཞོན་ནུ་རོལ་པ་ནི། །རྣམ་པར་རྩེ་བ་ཞེས་བྱའི་སྟོན་པ་འཁྲུངས། །འཁོར་ནི་སྤྲུལ་པའི་གནོད་སྦྱིན་སྟོང་ཕྲག་དང་། །ཡབ་ཡུམ་སྤྲུལ་པའི་རིག་འཛིན་གྲངས་མེད་ལ། །རྫོགས་ཆེན་བྱ་སྩོལ་བྲལ་བ་སེམས་སྡེའི་རྒྱུད། །ཚེ་ལོ་བརྒྱད་ཁྲིའི་དུས་ན་གསུང་དེར་འདུད། །ལྔ་པའི་གནས་ནི་སུམ་ཅུ་རྩ་གསུམ་གྱི། །འཚོ་བྱེད་ལྡུམ་རར་སྟོན་པ་རྡོ་རྗེ་འཆང་། །འཁོར་ནི་ཐུན་མོངས་མཐུ་མིན་རྣམ་གཉིས་ལས། །ཐུན་མོངས་བརྒྱ་བྱིན་སྲས་ཡུམ་རིགས་གསུམ་མགོན། །རྣམས་ལ་གདུང་བསེལ་ཕར་ཕྱིན་དྲུག་ཆོས་གསུང་། །ཐུན་མོངས་མིན་འཁོར་ཐུབ་པ་རྣམ་དྲུག་དང་། །ལྷ་བུ་ནོར་བཟང་དང་བཅས་བདུན་པོ་ལ། །ཐིག་ལེ་ཀུན་གསལ་རྒྱུད་སོགས་རྫོགས་ཆེན་ཆོས། །ཚེ་ལོ་བདུན་ཁྲིའི་དུས་ན་གསུངས་དེར་འདུད། །དྲུག་
པ་གསང་མཆོག་མེ་རི་འབར་བ་ཞེས། །རི་རབ་བྱང་གི་བང་རིམ་སྟེང་ཉིད་ན། །སྟོན་པ་གཞོན་ནུ་དཔའ་བོ་སྟོབས་ལྡན་གྱིས། །འཁོར་དུ་བྱང་སེམས་སྤྲིན་གྱི་ཤུགས་ཅན་བདུན། །གནོད་སྦྱིན་ལེགས་སྤྱོད་དང་ནི་ཌཱཀྐིའི་ཚོགས། །རྣམས་ལ་ཕ་རྒྱུད་མ་རྒྱུད་ཁྱད་པར་དུ། །རིག་པ་རང་ཤར་ཆེན་པོའི་རྒྱུད་ལ་སོགས། །ཚེ་ལོ་དྲུག་ཁྲིའི་དུས་ན་གསུངས་དེར་འདུད། །བདུན་པ་སྲིན་ཕུག་རུ་ལུའི་སྒྲ་ལྡན་གྱི། །དུར་ཁྲོད་ཆེན་པོར་སྟོན་པ་སྤྲུལ་པའི་གཟུགས། །དྲང་སྲོང་ཁྲོས་པའི་རྒྱལ་པོར་བསྟན་ནས་ནི། །འཁོར་དུ་ཐུབ་དྲུག་ནོར་བཟང་བདུན་གྱི་སྟེང་། །སྲིན་པོ་བྱེ་བ་ཕྲག་ལ་བསྟན་པའི་ཆོས། །མ་གཤིན་ཕུར་གསུམ་རྒྱུད་སྡེ་དཔག་མེད་རྣམས། །དྲེགས་བྱེད་གདུག་པ་འདུལ་བའི་དོན་དུ་གསུངས། །ཚེ་ལོ་ཁྲི་པའི་དུས་ན་བྱོན་དེར་འདུད། །བརྒྱད་པ་འཛམ་གླིང་བྱ་རྒོད་སྤུངས་རིའི་གནས། །སྟོན་པ་དགྲ་བཅོམ་གསེར་འོད་དམ་པ་ནི། །རྒྱལ་པོ་སེང་བཟང་མཛེས་མ་འོད་ལྡན་ཡུམ། །གཉིས་ལས་སྐུ་བལྟམས་
འཁོར་ནི་ཉན་ཐོས་མཆོག །ཀུན་དགའ་བ་སོགས་རྫུ་འཕྲུལ་ལྡན་རྣམས་ལ། །བསྟན་པ་དམ་ཆོས་འདུལ་བ་ལུང་ཆེན་ནི། །བམ་པོ་ལྔ་བརྒྱ་ཤོ་ལོ་སྟོང་བདུན་བརྒྱ། །ཚེ་ལོ་ལྔ་སྟོང་དུས་ན་གསུངས་དེར་འདུད། །དགུ་པ་བྱང་ཕྱོགས་གཡུ་ཡི་སྨིན་མ་ཅན། །རང་བྱུང་བདེ་བྱེད་མཆོད་རྟེན་དྲུང་ཉིད་ན། །སྟོན་པ་བརྩེ་བ་རོལ་བའི་བློ་གྲོས་ཀྱི། །ས་བརྒྱད་བྱང་སེམས་གློག་འབྱུང་འོད་ཟེར་དང་། །བློ་གྲོས་བཟང་སོགས་སེམས་དཔའ་གྲངས་མེད་ལ། །ཆོས་ནི་ཀུན་བྱེད་སེམས་ལུང་ཁུ་བྱུག་རོལ། །ཀུན་བཟང་ཆེ་བ་རང་གནས་རྒྱུད་ལ་སོགས། །ཚེ་ལོ་སྟོང་ཐུབ་དུས་ན་གསུངས་ལ་འདུད། །བཅུ་པ་གནས་ནི་ལྷོ་ཕྱོགས་བདེ་ལྡན་གྱི། །བྱ་རྒོད་སྤུངས་རིར་སྟོན་པ་འོད་སྲུངས་ཆེས། །འཁོར་ནི་ཐུབ་དྲུག་བྲམ་ཟེ་མགོན་སེམས་རྣམས། །ཉན་ཐོས་གཟུགས་སུ་སྤྲུལ་ལ་དམ་པའི་ཆོས། །མདོ་སྡེ་འབུམ་ཕྲག་ཉེར་ལྔ་ཁྱད་པར་དུ། །རྫོགས་ཆེན་ཨ་ཏི་བཀོད་པ་ཆེན་པོ་ནི། །ཚིགས་སུ་
བཅད་པ་འབུམ་ཕྲག་དྲུག་ལ་སོགས། །ཚེ་ལོ་ལྔ་བརྒྱའི་དུས་ན་གསུངས་དེར་འདུད། །བཅུ་གཅིག་ནས་ནི་རྡོ་རྗེ་གདན་དྲུང་གི །བྱང་ཆུབ་སྙིང་པོར་སྟོན་པ་མངོན་རྫོགས་རྒྱལ། །བྲམ་ཟེ་ལེགས་ལྡན་མཁའ་འགྲོ་དཔལ་བྱིན་གྱིས། །ཡབ་ཡུམ་ལས་འཁྲུངས་དམ་པའི་འཁོར་ཚོགས་ནི། །རིགས་གསུམ་མགོན་སོགས་སེམས་དཔའ་དཔག་མེད་ལ། །དམ་ཆོས་ངེས་པ་དོན་གྱི་མདོ་སྡེའི་ཚིག །ཤོ་ལོ་ཀ་ནི་སྟོང་ཕྲག་ལྔ་ཉིད་བདག །ཚེ་ལོ་སུམ་བརྒྱའི་དུས་ན་གསུངས་དེར་འདུད། །བཅུ་གཉིས་གནས་ནི་མགོན་མེད་ཟས་བྱིན་གྱིས། །ཀུན་དགའ་ར་བར་སྟོན་པ་ཤཱཀྱའི་རྒྱལ། །ཐུན་མོངས་འཁོར་དུ་དགེ་སློང་ཕ་མ་དང་། །དགེ་གཉེན་ཕ་མ་ལ་སོགས་རྣམ་བཞི་ལ། །བདེན་པ་རྣམ་བཞིས་བསྡུས་པའི་རྒྱུ་ཡི་ཆོས། །ལན་གྲངས་བཅུ་གཉིས་འདས་ཏེ་བསྐོར་མཛད་པའི། །དུས་ནི་ཚེ་ལོ་བརྒྱ་པའི་རྩོད་ལྡན་ལ། །མཛད་པ་བཅུ་གཉིས་ཚུལ་བསྟན་དེ་ལ་འདུད། །དེ་ལྟར་ཆོས་ཉིད་དབྱིངས་ལས་གཟུགས་སྐུའི་དཔལ། །སྤྲུལ་
སྐུའི་སྟོན་པ་གྲགས་ཆེན་བཅུ་གཉིས་ཀྱི། །རྣམ་པར་རོལ་པའི་སྒྱུ་འཕྲུལ་ཕྲིན་ལས་ལ། །ངོ་མཚར་དད་བརྒྱས་རབ་བཏུད་ཕྱག་བགྱིའོ། །གདུལ་བྱའི་འགྲོ་བའི་ཕུང་པོ་ལྔ་དང་ནི། །འབྱུང་ལྔ་ཁམས་ལྔ་ཉོན་མོངས་དུག་ལྔ་སོགས། །སྦྱོང་ཕྱིར་ཕུན་སུམ་ཚོགས་པ་ལྔ་ལྡན་གྱི། །འདུལ་བྱེད་དུས་གསུམ་དུས་མེད་བསྟན་ལ་འདུད། །ཆོས་སྐུ་ཀུན་བཟང་གཅིག་གི་རོལ་པ་ལས། །ལོངས་སྤྲུལ་རྣམ་འགྱུར་འདི་དང་དེ་བཞིན་གཞན། །གྲངས་མེད་བསྟན་ཀྱང་དོན་ལ་སྤྲོ་བསྡུས་ཤོག །དབྱིངས་དང་ཡེ་ཤེས་དབྱེར་མེད་ཨེ་མ་ཧོཿ ༈ །།རྡོར་སེམས་དགའ་རབ་འཇམ་དཔལ་ཤྲཱི་སིང་། །ཛྙཱ་ན་བི་མ་མྱང་བན་ལྡང་མ་ལྷུན། །ལྕེ་བཙུན་ཞང་སྟོན་ཉི་འབུམ་ཇོ་འབེར་དང་། །འཁྲུལ་ཞིག་ཆེ་དང་གྲུབ་ཐོབ་མེ་ལོང་རྡོར། །ཀུ་མ་རཱ་ཛཱ་སྣ་ཚོགས་རང་གྲོལ་ཞབས། །བྱ་བྲལ་ཆོས་རྗེ་གཞན་ཕན་ནམ་མཁའི་མཚན། །འོད་གསལ་ཀློང་ཡངས་བསོད་ནམས་རིན་ཆེན་རྗེ། །ངག་གི་དབང་དང་གྲུབ་མཆོག་བསོད་ནམས་དབང་། །སྐུ་དྲིན་མཉམ་མེད་རྩ་བའི་བླ་མ་སོགས། །
ཆོས་ཀུན་སྙིང་པོའི་མཐར་ཐུག་རྫོགས་པ་ཆེ། །གནས་ལུགས་རང་ཞལ་མངོན་སུམ་སྟོན་མཛད་པའི། །རྩ་བརྒྱུད་བླ་མར་ཕྱག་འཚལ་གསོལ་བ་འདེབས། །དག་པ་གཉིས་ལྡན་གདོད་མའི་གནས་ལུགས་མཆོག །བདེར་གཤེགས་སྙིང་པོས་འགྲོ་བ་ཀུན་ཁྱབ་ཀྱང་། །མ་རྟོག་དབུལ་པོའི་ཁྱིམ་གྱིས་གཏེར་བཞིན་རྨོངས། །སྒྲིབ་བྲལ་ཆོས་ཁམས་དགེ་བ་མངོན་གྱུར་ཤོག །སེམས་ཅན་ཁམས་གང་ཇི་སྙེད་ཡོད་པ་དང་། །མཚུངས་པའི་བདེར་གཤེགས་ཐུགས་རྗེའི་བཀོད་སྤྲུལ་གྱིས། །ཁྱབ་བཞིན་འགྲོ་འདི་ལས་ཉོན་སྒྲིབ་པས་ལྡོངས། །དག་པ་རབ་འབྱམས་ཞིང་ལ་དབང་བསྒྱུར་ཤོག །ཐ་མལ་ཤེས་པ་བཟོ་མེད་ཆོས་སྐུ་དངོས། །རྟག་པར་རང་ལ་འབྲལ་མེད་བཞུགས་བཞིན་དུ། །མ་རྟོགས་བློས་བྱས་བཅོས་མའི་འཇུར་སྒོམ་གྱིས། །བཅིངས་ལས་རང་གྲོལ་གནས་ལུགས་རྟོག་པར་ཤོག །ཚོགས་དྲུག་རང་སྣང་སྒྱུ་མའི་རོལ་རྩལ་དུ། །མ་ཤེས་ཡུལ་དང་བདག་ཏུ་འཁྲུལ་པའི་བློ། །ཐོག་མེད་ནས་གོམས་ད་དུང་གཟུང་འཛིན་ལ། །སྦྱངས་པས་ཅི་བྱ་རང་
ཚང་རིགས་གྲོལ་ཤོག །བདག་དང་གཞན་དང་འཁོར་བ་མྱང་འདས་སོགས། །ཐ་དད་བཟང་ངན་འཛིན་བློས་ད་བར་ཕུང་། །ད་ནི་ཡེ་གྲོལ་རང་བབས་གཉུག་མའི་ཀློང་། །ཕྱམ་གདལ་མཉམ་ཉིད་ཆེན་པོར་གྲོལ་བར་ཤོག །ཐེག་པའི་ཡང་རྩེ་རྩོལ་མེད་ཨ་ཏིའི་ལམ། །རྩོལ་བཅས་བགྲོད་འདོད་འབྲས་བུ་རེ་བའི་བདུད། །རང་ལས་བྱུང་བས་རང་སྲོག་མི་གཅོད་པར། །མཉམ་རྫོགས་བྱང་ཆུབ་གཏན་སྲིད་ཟིན་པར་ཤོག །མཚན་བཅས་བསྐྱེད་རྫོགས་འཛིན་པའི་གཏོད་ཕུར་བུད། །ལྟ་སྒོམ་སྤྱོད་འབྲས་ས་ལམ་རྫུན་ཁྲིགས་ཡལ། །ཐོབ་བྱ་ཐོབ་བྱེད་བྱང་ཆུབ་མངོན་ཞེན་བྲལ། །གདོད་མའི་ཆོས་སྐུར་འགྲོ་ཀུན་ལྷུན་རྫོགས་ཤོག འདི་ལྟར་གསང་ཆེན་ཨ་ཏི་ཡོ་གའི་འབྱུང་ཁུངས་ལོ་རྒྱུས་རྣམས་ལས་རྒྱ་ཆེར་བྱུང་བའི་གྲགས་ཆེན་གྱི་སྟོན་པ་བཅུ་གཉིས་རྣམས་ཀྱི་ཕུན་སུམ་ཚོགས་པ་ལྔ་ལྡན་འདི་དག །ཐེག་པའམ་གྲུབ་མཐའ་གཞན་གྱིས་ལོ་རྒྱུས་དག་ལ་མ་གྲགས་པ་ཤས་ཆེ་བའི་དབང་གིས། དིང་སང་གི་མཁས་པར་རློམ་པའི་བླུན་པོ་ང་རྒྱལ་ཅན་དག་གི་ཐུགས་ལ་ཤོང་བར་དཀའ་ཞིང་
ལར་ཡང་། རྒྱལ་བ་རྣམས་ཀྱི་མཛད་ཕྲིན་རྣམ་རོལ་གྱི་སྒྱུ་འཕྲུལ་དང་ཐེག་ཆེན་གྱི་ཆོས་ཚུལ་ཟབ་མོ་ལ་ཕ་མཐའ་མི་མངོན་ཞིང་སོ་སོ་སྐྱེ་བོའི་བློའི་ར་བ་ལས་བརྒལ་བ་ཡིན་མོད་ཀྱང་། རང་དང་མི་མཐུན་པའི་ཆོས་ཐམས་ཅད་མི་བདེན་པར་བལྟ་བ་ལ་གོམས་པའི་བློ་ཅན་མང་བ་དང་ཁྱད་པར་ཐེག་པའི་རྩེ་མོ་རྫོགས་པ་ཆེན་པོ་ལས་དམ་པའི་ཆོས་ཡང་དག་པ་མ་ཡིན་ནོ་ཞེས་མགྲིན་པའི་རྔ་གསང་མཐོན་པོར་སྒྲོགས་ལ་བརྩོན་པའི་གང་ཟག་གི་རྒྱ་མཚོའི་གོས་ཅན་ཁྱབ་པའི་དུས་འདི་འདྲར། ཚུལ་འདི་དག་ཡི་གེའི་ལམ་དུ་སྣང་བར་བྱས་རུང་གཞན་ཡིད་གཟུགས་རྔུ་ལྡང་བའི་རྐྱེན་ལས་མ་མཆིས་ཀྱང་། ཐོས་བསམ་གྱི་མིག་འཕངས་མི་དམའ་བའི་དགེ་སློང་བསྟན་འཛིན་ཕུན་ཚོགས་པས་ཆེད་གཉེར་དུ་བསྐུལ་བའི་ངོར། གསོལ་འདེབས་སུ་བགྱིས་ནས་གསལ་བར་བཀོད་པའི་དགེ་བས། འགྲོ་བ་ཐམས་ཅད་ཐེག་མཆོག་སྙིང་པོའི་བསྟན་པ་ལ་གུས་པས་འཇུག་པའི་རྒྱུར་གྱུར་ཅིག། ༈ །།ན་མོ་གུ་རུ། །གཟོད་པ་ཉིད་ནས་སྤྲོས་ཀུན་ཉེར་ཞི་བའི། །ཆོས་དབྱིངས་འདུས་མ་བྱས་དབྱིངས་ཀུན་ཏུ་བཟང་། །འགགས་མེད་སྒྱུ་འཕྲུལ་དཔལ་ལྡན་བླ་མའི་སྐུར། །སྟོན་མཛད་གཞན་ཕན་རྡོ་རྗེར་གསོལ་བ་འདེབས། །གང་སྐུ་མཚན་དཔེའི་ཉི་མ་ཐུགས་རྗེའི་འོད། །གདུལ་
བྱའི་གླིང་ཀུན་ཕྱོགས་ལྷུངས་མེད་ཁྱབ་ན། །ཅི་སླད་བདག་སོགས་མུན་གླིང་རབ་འཁྱམས་པའི། །ཚུལ་འདི་འདོར་བ་ཕོད་དམ་རྗེ་བཙུན་མཆོག །སྐྱེ་འཆིས་དབེན་བཞིན་སྐྱེ་འཆིའི་སྣང་ཚུལ་དུ། །བདག་སོགས་རྨུ་རྒོད་གདུལ་བྱར་སྟོན་མོད་ཀྱང་། །ཡེ་ཤེས་ཐུགས་རྗེ་བྲི་གང་མ་མཆིས་ཚེ། །རྟག་པར་བརྩེ་བས་གཟིགས་ཤིག་དགོངས་སུ་གསོལ། །རབ་འབྱམས་ཞིང་ཀུན་སྟོན་པ་གང་ཇི་སྙེད། །མ་ལུས་མགོན་ཁྱོད་སྤྲུལ་པའི་རོལ་གར་དུ། །གྱུར་མོད་དེང་འདིར་བདག་སོགས་རྨོངས་པའི་བུ། །རོ་ཡུལ་གཞན་མེད་སྙིང་རྗེས་མི་གཟིགས་སམ། །རྒྱལ་བ་རྣམས་ལ་འགྲོ་བའི་དོན་ཉིད་ལས། །གཞན་པའི་མཛད་པ་ནམ་ཡང་མཆིས་མིན་ན། །སྐྱབས་མེད་ཉམས་ཐག་བུ་འབངས་གདུང་དབྱངས་ཀྱི། །གསོལ་བ་འདེབས་སོ་ཕ་ཁྱོད་གཟིགས་རེ་རན། །རིན་ཆེན་དབང་གི་རྒྱལ་པོ་ཇི་བཞིན་དུ། །རྩོལ་མེད་གདུལ་བྱའི་རེ་བ་རྟགས་བསྐོངས་ན། །བཀའ་འབངས་སྡུག་བསྔལ་འཁོར་མཚོར་མི་བསྒྱུར་བར། །རྫུ་འཕྲུལ་སྤྲུལ་པའི་ཟློས་གར་བསྒྱུར་མཛད་
གསོལ། །ཆོས་དབྱིངས་ཞི་བདེར་སྙོམས་པར་མི་བཞུགས་པར། །ཐུགས་རྗེའི་འོད་དཀར་གདུལ་བྱའི་དད་མཚོ་རུ། །སྣང་མཛད་མུན་བསེལ་ཆོས་ཀྱི་སྒྲོན་མེ་ཡི། །བསྟན་འགྲོའི་སྒྲོན་མ་སླར་ཡང་མཛད་གསོལ་འདེབས། །བདག་སོགས་སྐྱེ་བ་འདི་གཟུངས་བྱང་ཆུབ་བར། །རྣམ་འདྲེན་ཁྱོད་ཀྱིས་འབྲལ་མེད་རྗེས་བཟུང་ཞིང་། །དམ་གཙང་མཉེས་གསུམ་མཐར་ཕྱིན་དོན་གཉིས་འགྲུབ། །རྗེ་བཙུན་བླ་མའི་གོ་འཕངས་ཐོབ་པར་ཤོག །ཕྱོགས་དུས་རྒྱལ་བ་སྲས་བཅས་ལྷག་པའི་ལྷ། །བསླུ་མེད་བདེན་པ་གྲུབ་པའི་དཀོན་མཆོག་གིས། །ཐུགས་རྗེ་ནུས་སྟོབས་མཐུ་ཡི་བདག་སོགས་ཀྱིས། །གསོལ་བ་བཏབ་པའི་མྱུར་འགྲུབ་བྱིན་གྱིས་རློབས། །ཅེས་པ་འདི་ནི། རྗེ་བཙུན་ཐམས་ཅད་མཁྱེན་པ་གཞན་ཕན་མཆོག་གི་རྡོ་རྗེ་དེ་ཉིད་གཟུགས་སྐུའི་སྣང་བསྙན་ཆོས་དབྱིངས་སུ་ཐིམ་པའི་ཚེ་གསོལ་བ་བཏབ་པའོ།། ༈ །།ཨེ་མ་ཧོཿ །གདོད་མ་ནས་ཡེ་གྲོལ་འགྱུར་མེད་གཤིད། །ཀ་དག་གི་གནས་ལུགས་རང་རིག་ལ། །ཀུན་བཟང་ཆོས་སྐུར་མཚན་གསོལ་བར། །ཡིན་ལུགས་རྟོགས་པས་གསོལ་བ་འདེབས། །སྐྱེ་མེད་དུ་
ཤིགས་སེ་ཤིག །རང་གྲོལ་དུ་བྱིན་གྱིས་རློབས། །ཆོས་ཉིད་ཀྱི་ཀློང་ལས་རང་བྱུང་གདངས། །ལྷུན་གྲུབ་ཀྱི་འོད་གསལ་ལོངས་སྤྱོད་རྫོགས། །རིགས་ལྔ་རྡོར་འཆང་རྡོ་རྗེ་སེམས། །རང་གསལ་ངང་ནས་གསོལ་བ་འདེབས། །སྣང་སྟོང་དུ་ཡ་ལ་ལ། །འོད་ལུས་སུ་བྱིན་གྱིས་རློབས། །སྐུ་གཉིས་ཀྱི་ཐུགས་རྗེ་ཤུགས་འབྱུང་རྩལ། །ཀུན་ཁྱབ་ཀྱི་རོལ་གར་སྤྲུལ་པའི་སྐུ། །པྲཛྙཱ་བྷ་ཝ་དགའ་རབ་ཞབས། །རང་བབས་ཀློང་ནས་གསོལ་བ་འདེབས། །འགག་མེད་དུ་ཁྲོ་ལོ་ལོ། །ཤར་གྲོལ་དུ་བྱིན་གྱིས་རློབས། །བསོད་ནམས་དང་ མཁྱེན་པའི་བདག་ཉིད་ ཡེ་ཤེས་ཚོགས་གཉིས་མཐུ། །མངོན་གྱུར་གྱི་འབྲས་བུ་མཐར་ཕྱིན་པ། །ཤྲཱི་སིངྷ་པ་གྲུབ་མཆོག །མོས་གུས་སེམས་ཀྱི་གསོལ་བ་འདེབས། །བཅོས་མིན་དུ་ལམ་སེ་ལམ། །འབད་མེད་དུ་བྱིན་གྱིས་རློབས། །དུས་གསུམ་གྱི་རྒྱལ་བའི་ཕྲིན་ལས་ཀུན། །གཅིག་བསྡུས་ཀྱི་ངོ་བོ་ཐུགས་རྗེ་ཅན། །འཆི་མེད་རྡོ་རྗེ་པདྨ་འབྱུང་། །གདུང་ཤུགས་དྲག་པོས་གསོལ་བ་འདེབས། །གང་བྱུང་ཀུན་ཐུགས་རྗེར་
གོ། །ཡོངས་གྲོལ་དུ་བྱིན་གྱིས་རློབས། །རྒྱལ་ཡུམ་གྱི་རྡོ་རྗེ་རྣལ་འབྱོར་ཉིད། །ཟབ་གཏེར་གྱི་བཀའ་ཡི་བསྡུ་བ་མོ། །ཡེ་ཤེས་མཚོ་རྒྱལ་མཁའ་འགྲོའི་གཙོ། །དག་སྣང་ཡིད་ཀྱིས་གསོལ་བ་འདེབས། །ཚོགས་དྲུག་གི་འཆར་སྣང་ཀུན། །བདེ་ཆེན་དུ་བྱིན་གྱིས་རློབས། །མཐའ་ཡས་ཀྱི་ཤེས་བྱ་ཇི་སྙེད་རྣམས། །མཁྱེན་རབ་ཀྱི་གནས་ལུགས་ཇི་བཞིན་གཟིགས། །པདྨ་ལས་འབྲེལ་ཀློང་ཆེན་ཞབས། །མོས་པའི་བུ་ཡིས་གསོལ་བ་འདེབས། །ཆོས་ཀུན་གྱི་སྙིང་པོའི་དོན། །ཁོང་ཆུད་དུ་བྱིན་གྱིས་རློབས། །དེ་ཉིད་ཀྱི་ཐུགས་སྲས་འགྲོ་བའི་མགོན། །རྗེ་གུ་རུ་ཡེ་ཤེས་རབ་འབྱམས་དང་། །མཁས་གྲུབ་ཆོས་རྗེ་བསམ་གཏན་པ། །རྗེས་འཇུག་དད་པས་གསོལ་བ་འདེབས། །རང་གཞན་གྱི་དོན་གཉིས་ཀུན། །ལྷུན་གྲུབ་ཏུ་བྱིན་གྱིས་རློབས། །གནས་ལུགས་ཀྱི་ལྟ་བའི་གདེངས་ཐོབ་བཞིན། །འོད་གསལ་གྱི་ཟབ་བཞེས་རྩོན་མཛད་པ། །ཡེ་ཤེས་མཆོག་བརྙེས་སྦྱིན་པ་བཟང་། །གྲུབ་མཆོག་དེ་ལ་གསོལ་བ་འདེབས། །བག་ཆགས་ཀྱི་འཁྲུལ་
སྣང་འདི། །གཞི་མེད་དུ་བྱིན་གྱིས་རློབས། །མཁས་གྲུབ་ཀྱི་སྐྱེས་ཆེན་དུ་མ་ཡིས། །ཞལ་གདམས་ཀྱི་བདུད་རྩི་རྒྱུད་སྨིན་པ། །ཟབ་ལུང་ཆོས་རྗེ་ཤཱཀྱའི་མཚན། །འཁྲུལ་ཞིག་ཆེ་ལ་གསོལ་བ་འདེབས། །ལས་ཉོན་གྱི་རྩ་ལག་ཀུན། །གཏིང་ཐོན་དུ་བྱིན་གྱིས་རློབས། །ཆོས་ཀུན་གྱི་ཡང་རྩེ་ཨ་ཏིའི་དོན། །ཇི་བཞིན་དུ་རྟོག་ནས་གཞན་དོན་མཛད། །བསོད་ནམས་རིན་ཆེན་རྫོགས་ཆེན་པ། །སྙིང་ཐིག་བདག་པོར་གསོལ་བ་འདེབས། །གདོས་བཅས་ཀྱི་སྒྱུ་ལུས་འདི། །ལྷག་མེད་དུ་བྱིན་གྱིས་རློབས། །རིག་འཛིན་གྱི་གདུང་རབ་མཚར་དངར་དབུས། །མཁྱེན་རྟོགས་ཀྱི་ཉི་འོད་གསལ་འབར་ཅན། །ངག་དབང་པདྨ་རྣམ་པར་རྒྱལ། །ཕྲིན་ལས་ཅན་ལ་གསོལ་བ་འདེབས། །སྨིན་གྲོལ་གྱི་ལམ་བཟང་ལ། །མྱུར་འགྲོད་དུ་བྱིན་གྱིས་རློབས། །ཞེན་ལོག་དང་ངེས་འབྱུང་སྙིང་རུས་མཐུས། །ཉམས་རྟོགས་ཀྱི་གཏེར་ཁ་ནང་ནས་ཕྱེས། །གྲུབ་ཐོབ་ཆེན་པོ་བསོད་ནམས་དབང་།
འགྲན་ཟླ་བྲལ་དེར་གསོལ་བ་འདེབས། །བདག་འཛིན་་གྱི་འཆིང་བ་ཀུན། །བརྩན་ཆོད་དུ་བྱིན་གྱིས་རློབས། །སྙིགས་དུས་ཀྱི་གདུལ་བྱ་བློ་དྲེད་རྣམས། །མ་ནོར་བའི་ལམ་ལ་འཁྲིད་མཁས་པ། །མཚུངས་བྲལ་རྩ་བའི་བླ་མ་རྗེ། །སྐུ་དྲིན་ཅན་ལ་གསོལ་བ་འདེབས། །སྒོ་གསུམ་གྱི་བྱ་བྱེད་ཀུན། །ཆོས་མཐུན་དུ་བྱིན་གྱིས་རློབས། །སྣང་སྲིད་ཀུན་ཡི་དམ་དཀྱིལ་འཁོར་ལྷ། །རྩ་རླུང་ཐིག་དཔའ་བོ་མཁའ་འགྲོའི་ཚོགས། །མ་སྐྱེད་རྫོགས་པའི་ངོ་བོར་གྲུབ། །ཟུང་འཇུག་ངང་དུ་གསོལ༴ །བདེ་གསལ་དང་མི་རྟོག་ཆེ། །འཛིན་མེད་དུ་བྱིན་གྱིས་རློབས། །སྐུ་གསུམ་གྱི་སྟོན་པ་རིག་འཛིན་རྒྱུད། །བཀའ་སྡོད་ཀྱི་སྲུང་མ་སྤྲུལ་འཁོར་བཅས། །སྐྱབས་གནས་ཐུགས་རྗེའི་གཏེར་རྣམས་ལ། །རྒྱུན་ཆད་མེད་པར་གསོལ༴ །དངོས་གྲུབ་ཆར་ཆེན་ཕོབ། སྨིན་གྲོལ་བྱིན༴ ༈ །།ཨོཾ་ཨཱཿཧཱུྃ། ཨོཾ། སྐྱེ་འཆི་འཕོ་འགྱུར་མི་མངའ་བའི། །ཡེ་ཤེས་རྡོ་རྗེའི་སྐུ་མཆོག་ནི། །ཡང་དག་གྲུབ་པ་ཁྱེད་བཞིན་དུ། །
བདག་ལུས་འོད་སྐུར་གྲོལ་བར་མཛོད། །ཨཱཿ །བརྗོད་མེད་ཀློང་ལས་འགགས་མེད་ཀྱི། །ཆོས་སྒྲས་འགྲོ་བ་སྨིན་ནུས་པ། །དེ་བཞིན་བདག་གི་ངག་འདི་ཉིད། །གྲགས་སྟོང་ཆོས་གསུང་མངའ་བརྙེས་མཛོད། ཧཱུྃ། །འཁྲུལ་རྟོགས་བསམ་པའི་འདུ་འཕྲོ་གང་། །མ་བཀའ་མི་འཛིན་ཡེ་གྲོལ་ཐུགས། །ཡེ་ཤེས་ཀློང་ཡངས་ཁྱེད་ཐུགས་བཞིན། །བདག་ཡིད་ཆོས་ཉིད་ཀློང་གྲོལ་མཛོད། །ཧྲཱིཿ །ཡིད་བཞིན་འདོད་འབྱུང་དབང་རྒྱལ་ལས། །ལྷག་པའི་ཡོན་ཏན་ཀུན་རྫོགས་ཤིང་། །ཕྲིན་ལས་གང་འདུལ་རོལ་གར་ཅན། ཁྱེད་བཞིན་བདག་སོགས་མྱུར་འགྲུབ་མཛོད། །སརྦ་དྷརྨ་ཨ་ལ་ལ་ཧོཿ ཐམས་ཅད་གཉུག་མ་རང་རིག་གཤིས་ཀྱི་ཀློང་། །འགགས་མེད་རྩལ་སྣང་བླ་མ་ལྷ་ཡི་ཚུལ། །དབྱེར་མེད་དེ་ཕྱིར་བདག་གཞན་ཐ་དད་དུ། །འཛིན་པའི་འཁྲུལ་རྟོགས་རྦ་རླབས་ཆུ་རུ་ཐིམ། །ཕཊཿ མཚོན་བྱེད་དཔེའི་བླ་མ་བརྒྱུད་པར་བཅས། །བྱིན་རླབས་རྫུ་འཕྲུལ་བཀའ་དྲིན་བསམ་ཡས་ཀྱི། །བདག་སོགས་གདུལ་
བྱའི་སེམས་རྒྱུད་ཡོངས་སྨིན་ནས། །མཚོན་ཆ་དོན་གྱི་བླ་མར་རིག་གྲོལ་ཤོག །རང་རིགས་ཀུན་བཟང་དུག་ལྔ་ཡེ་ཤེས་ལྔ། །འབྱུང་ལྔ་ཡུལ་ལྔ་ཚོགས་བརྒྱད་སེམས་དཔའ་དང་། །སེམས་བྱུང་ལྔ་བཅུ་ཁྲག་འཐུང་དཀྱིལ་འཁོར་སོགས། །ཕུང་ཁམས་གདོད་ནས་དག་པར་ངོ་ཤེས་ཤོག །འཁོར་བ་མྱང་འདས་བཟང་ངན་ཆོས་ཅན་དུ། །མ་གྲུབ་བཞིན་དུ་བློས་བཏགས་འཁྲུལ་སྣང་ཚོགས། །རྨི་ལམ་ལས་ཀྱང་རྨི་ལམ་ཆེན་པོ་འདིའི། །རྫུན་འཚང་གཏིང་ནས་རིག་སྟེ་གྲོལ་བར་ཤོག །སྒོ་གསུམ་ལས་རླུང་རྐྱེན་གྱིས་ཁ་བསྒྱུར་བས། །བར་གཅོད་ནད་གདོན་དགྲ་འདྲེ་སྐྱིད་སྡུག་སོགས། །ཐམས་ཅད་རང་སེམས་འཆར་སྒོར་ཐག་ཆོད་པའི། །གདེངས་ཐོབ་དགག་སྒྲུབ་སྤང་བླངས་བྲལ་བར་ཤོག །གནས་སྐབས་འདོད་དོན་ཕྲ་མོ་ཞེ་འདོད་ཀྱིས། །ཀུན་བཏགས་བློ་བཟོའི་བསྐྱེད་རིམ་མི་སྒོམ་པར། །ལྷ་ཉིད་རང་ལ་རང་ཉིད་ལྷར་ཤེས་པའི། །འཁྱེར་སོ་གསུམ་གྱི་དམ་ལས་འདའ་མེད་ཤོག །རྫོགས་རིམ་བཞི་པར་གནས་མཁན་ལྷག་
གི་མཐོང་། །ལྷག་མཐོང་བློས་བྱས་མ་སླད་ཞི་བར་གནས། །གཉིས་མེད་ཐ་མལ་ཤེས་རིག་ཟངས་ཐལ་འདི། །གང་བྱུང་སྒོམ་གྱི་ངོ་བོར་ལམ་ལྷོངས་ཤོག །མཉམ་གཞག་ཞེན་པས་འཇུར་འཛིན་མ་ཡིན་ཞིང་། །རྗེས་ཤེས་འཁྲུལ་པའི་ཐག་རུལ་མི་འཐུད་པར། །གནས་འགྱུ་དབྱེར་མེད་མཉམ་རྗེས་རོ་གཅིག་པའི། ཁྲེག་ཆོད་རིག་པ་བཟོ་མེད་ངོ་ཤེས་ཤོག །སྒོ་གསུམ་བྱ་བ་དགུ་ཐོངས་གནས་གསུམ་སྟེམ། །སྒྲོན་དྲུག་རྟེན་འབྲེལ་གོམས་ཐོབ་གཏན་ཕེབས་ནས། ཁ་དོག་དབྱིབས་ལ་ཞེན་པའི་ལྷད་མེད་པར། །ཐོད་རྒལ་སྣང་བཞི་མཐའ་རུ་ཕྱིན་པར་ཤོག །དེ་ཚེ་འཁྲུལ་པའི་ཡུལ་སྣང་མི་འབྱུང་ཀྱང་། །སྨོན་ལམ་ཐུགས་རྗེ་མཐུན་པའི་གདུལ་བྱ་ལ། །ཆོས་སྐུའི་དབྱིངས་ནས་གཟུགས་སྐུའི་སྒྱུ་འཕྲུལ་གྱི། །མཁའ་ཁྱབ་འགྲོ་བའི་དོན་ཆེན་འགྲུབ་པར་ཤོག །རྒྱལ་རྣམས་ཡེ་ཤེས་དབྱིངས་སུ་རོ་གཅིག་པའི། །རང་མདངས་དཔལ་ལྡན་བླ་མ་རྒྱུད་བཅས་རྣམས། །བསྒོམས་
ཤིང་གསོལ་འདེབས་སྨོན་ལམ་འདི་བཏབ་པའི། །དགེ་བས་འཁོར་བ་དོང་ནས་སྤྲུག་པར་ཤོག །ཟབ་ཆོས་མཁའ་འགྲོ་ཡང་ཏིག་དངོས་གྲུབ་ལྗོན་ཤིང་གི་བླ་མ་རྒྱུད་པ་རྣམས་ལ་གསོལ་བ་གདབ་པ་ཉམས་ལེན་གྱི་ངོ་སྤྲོད་གསལ་འདེབས་སུ་གྱུར་བ་གཞོམ་མེད་རྡོ་རྗེའི་དབྱངས་ཞེས་བྱ་བ་འདི་ཉིད། རིག་འཛིན་ཀརྨ་ལས་གྲུབ་ཀྱི་བཞེད་པ་ལྟར་སྣ་ཚོགས་རང་གྲོལ་གྱི་རྣལ་འབྱོར་པས་ཤར་ཕྱོགས་དཔལ་གྱི་རི་བོའི་ངོགས་སུ་བྲིས་པ་སིདྷནྟུ། །ཨོཾ་ཨཱཿཧཱུྃ། ཆོས་ཉིད་མི་འགྱུར་གདོད་ནས་དག་པའི་སྐུ། །རིག་གདངས་འགགས་མེད་མཚན་དཔེའི་དཀྱིལ་འཁོར་བཀྲ། །ཀུན་བཟང་ཞི་ཁྲོ་རྡོར་སེམས་རྡོ་རྗེ་འཛིན། །དགོངས་བརྒྱུད་བླ་མས་དེང་འདིར་བྱིན་གྱིས་རློབས། །ཆོས་སྐུའི་དབྱིངས་ལས་གཟུགས་སྐུའི་སྒྱུ་འཕྲུལ་རྩལ། །གང་འདུལ་སྤྲུལ་སྐུའི་ཆུ་ཟླ་འགྲོ་ལ་འགྱེད། །དགའ་རབ་འཇམ་དཔལ་བཤེས་གཉེན་ཤྲཱི་སིང་། །རིག་འཛིན་བརྒྱུད་པས་དེང་འདིར་བྱིན་གྱིས་རློབས། །ཛྙཱ་ན་སཱུ་ཏྲ་བི་མ་ལ་མི་ཏྲ། །ཟག་མེད་འཕོ་བ་ཆེན་པོའི་སྐུར་བཞེངས་ཏེ། །གསང་བ་སྙིང་ཏིག་ཆོས་ཀྱི་འཛིན་པ། །བརྡཱ་བརྒྱུད་བླ་མས་དེང་
འདིར་བྱིན་གྱིས་རློབས། །བི་མས་རྗེས་བཟུངས་མྱང་བན་ཏིང་འཛིན་བཟང་། །གནས་ལུགས་མངོན་གྱུར་ལྡང་མ་ལྷུན་རྒྱལ་མཚན། །ཟག་མེད་འཇའ་ལུས་ལྕེ་བཙུན་སེང་དབང་ཞབས། །སྙན་བརྒྱུད་སྤེལ་མཛད་རྣམས་ཀྱི་བྱིན་གྱིས༴ །སྙིང་ཏིག་བཀའ་གཏེར་བདག་པོ་རྒྱལ་བ་ཞང་། །བཤད་སྒྲུབ་བསྟན་པ་དར་མཛད་ཉི་མ་འབུམ། །མངོན་སུམ་འོད་གསལ་སྟོན་པའི་ཇོ་བེར་བ། །གྲུབ་ཐོབ་བརྒྱུད་པ་རྣམས་ཀྱི་བྱིན་གྱིས་རློབས། །འཁྲུལ་ཞིག་སེང་གེ་རྒྱབ་པ་སངས་རྒྱས་དབོན། །གྲུབ་རྟགས་རྫུ་འཕྲུལ་མངའ་བརྙེས་མེ་ལོང་རྡོར། །བི་མའི་རྣམ་འཕྲུལ་རིག་འཛིན་གཞོན་ནུ་རྒྱལ། །རྫོགས་ཆེན་བདག་པོ་རྣམས་ཀྱི་བྱིན༴ །མཁྱེན་པའི་ཀློང་ཆེན་མདོ་རྒྱུད་རབ་འབྱམས་གཟིགས། །དྲི་མེད་ཡེ་ཤེས་སྣང་བའི་འོད་ཟེར་འགྱེད། །སྔ་འགྱུར་བསྟན་པའི་ཉི་མ་གཅིག་པུ་པ། །ཀུན་མཁྱེན་ཆེན་པོས་དེང་འདིར་བྱིན༴ །བྱ་བྲལ་ཆོས་རྗེ་བཀྲ་ཤིས་འབྱུང་
གནས་དང་། །གཞན་ཕན་རྡོ་རྗེ་དེ་སྲས་ནམ་མཁའི་མཚན། །འོད་གསལ་ཀློང་ཡང་བསོད་ནམས་རིན་ཆེན་ཞབས། །སྙིགས་དུས་འདྲེན་མཆོག་རྣམས་ཀྱི་བྱིན༴ །གསང་སྔགས་ཆོས་མཛོད་འཛིན་པ་ངག་གི་དབང་། །དངོས་འཛིན་འཁྲུལ་ཞིག་བསོད་ནམས་དབང་པོ་མཆོག །བཀའ་དྲིན་ཟླ་མེད་རྩ་བའི་བླ་མའི་བར། །སངས་རྒྱས་དངོས་བྱོན་རྣམས་ཀྱི་བྱིན༴ །དེ་ལྟར་གསོལ་བ་འདེབས་པའི་གདུང་དབྱངས་འདི། །ཡེ་ཤེས་གཟིགས་པ་མངའ་བའི་བླ་མ་རྣམས། །སྒྲིབ་མེད་ལྷ་སྙན་དག་པས་གསན་མཛོད་ལ། །དམིགས་བྲལ་ཐུགས་རྗེ་ཆེན་པོས་ཉེར་དགོངས་གསོལ། །བདག་དང་མཁའ་མཉམ་མར་གྱུར་འགྲོ་བ་ཀུན། །གཟོད་ནས་དག་པའི་ཆོས་ཉིད་ཡིན་བཞིན་དུ། །ཡིན་པར་མ་ཤེས་བག་ཆགས་རྟོག་སྒྲིབ་ཀྱིས། །དུས་གསུམ་རྒྱུན་དུ་འཐུམ་འདི་གསལ་དུ་གསོལ། །འཁོར་འདས་མཉམ་ཉིད་ཡེ་སངས་རྒྱས་པའི་གཞིར། །བླང་དོར་མཚན་འཛིན་དགག་སྒྲུབ་མི་འཚལ་ཡང་། །སྒོམ་བྱེད་སྒོམ་བློ་མང་པོས་བསླད་པས་འཕུང་། །
སྒོམ་འཛིན་བཅོས་མའི་མདུད་རྒྱ་ཞིག་ཏུ་གསོལ། །སྣང་སྲིད་སྣོད་བཅུད་དངོས་པོར་བཟུང་བ་ཡི། །འཁྲུལ་ལ་ཡང་འཁྲུལ་བསྣོན་ཅིང་ཞེན་བྱེད་པ། །འདི་ཀུན་རང་སྣང་འོད་གསལ་ཐིག་ལེའི་ཀློང་། །ཤེས་རབ་རང་བྱུང་སྒྲོན་མར་ཐིམ་མཛད་གསོལ། །མངོན་སུམ་སྣང་བ་སྒྱུ་འཕྲུལ་སྤྲུལ་པའི་སྐུ། །གཉིད་དང་རྨི་ལམ་སྣང་བ་ལོངས་སྐུའི་ཚུལ། །འཆི་བ་འོད་གསལ་ཆོས་སྐུར་མ་བུ་འདྲེས། །འཁྲུལ་པའི་རྒྱུན་ཐག་རྩད་ནས་མཆོད་མཛད་གསོལ། །ཆོས་ཉིད་བར་དོ་ལོངས་སྐུའི་འཆར་སྣང་དང་། །སྲིད་པ་བར་དོ་སྤྲུལ་སྐུའི་རྩལ་མདངས་རྣམས། །ཐམས་ཅད་རང་རིག་ཆོས་སྐུར་ཐག་ཆོད་པའི། །གདེངས་ཐོབ་སྐུ་གསུམ་རྒྱལ་སར་འཁོད་མཛད་གསོལ། །ས་ལམ་རིམ་པ་མ་རྩལ་ངང་གི་སྒྲོད། །རང་གཞན་དོན་གཉིས་མ་འབད་ལྷུན་གྱིས་གྲུབ། །སྤྲུལ་པའི་ཟློས་གར་རྩོལ་མེད་འགྲོ་ལ་སྣང་། །འཁོར་བའི་རྒྱུ་འབྲས་གཏན་ཟད་མཛད་དུ་གསོལ། །གསང་བ་བླ་ན་མེད་པ་འོད་གསལ་རྡོ་རྗེ་
སྙིང་པོའི་རྒྱུད་སྡེ་འབུམ་ཕྲག་དྲུག་ཅུའི་ཡང་སྙིང་གི་མ་ལའི་སྙིང་ཐིག་ཟབ་པ་སྤོད་བཞི་དང་དེ་དག་གི་དོན་མདོར་བསྡུས་པ་ཟབ་ཆོས་བླ་མ་ཡང་ཏིག་ཡིད་བཞིན་ནོར་བུ་དང་བཅས་པའི་བླ་བརྒྱུད་ལ་གསོལ་བ་གདབ་པ་བདུད་རྩིའི་འདོད་འཇོ་ཞེས་བྱ་བ། །སྣ་ཚོགས་རང་གྲོལ་གྱི་བཀོད་པ་གུ་རུ་ཨ་དྷིཥྛ་ནམ། ན་མོ་གུ་རུ། །སྤྱི་གཙུག་བདེ་ཆེན་འོག་མིན་དུ། ཁྱབ་བདག་རྒྱལ་བ་ཀུན་ཏུ་བཟང་། །རྡོ་རྗེ་འཆང་ཆེན་རྡོར་སེམས་བཅས། །དབྱིངས་ནས་བརྩེར་དགོངས་ཐུགས་རྗེས་གཟིགས། །སྤྲུལ་པའི་རིག་འཛིན་རོ་ལངས་བདེ། །མཉྫུ་མི་ཏྲ་ཤྲཱི་སིང་། །ཡེ་ཤེས་མདོ་དང་བི་མ་ལ །དབྱིངས་ནས༴ །མྱང་བན་ཆེ་དང་བློ་གྲོས་དབང་། །རིན་ཆེན་འབར་དང་ལྷུན་རྒྱལ་ག །ལྕེ་བཙུན་སེང་དབང་ཤངས་པ་རས། །དབྱིངས་ནས༴ །ཟྭ་སྟོན་ཆོས་འབར་དགྱེར་སྟོན་ཞབས། །གཉན་སྟོན་ཤེས་རབ་རྩེ་མོ་བ། །ཀུ་མ་རཱ་ཛ་རྒྱལ་བ་གཡུང་། །དབྱིངས་ནས༴ །ཐུགས་སྲས་དགེ་འདུན་བཟང་པོ་དང་། །མཁས་གྲུབ་རྒྱལ་སྲས་ཆོས་རྗེའི་ཞབས། །མོན་རྫོང་རས་དང་ཐོད་སྨྱོན་པ། །དབྱིངས་ནས༴ །
བྱ་བཏང་ཆོས་ཉིད་རང་གྲོལ་རྗེ། །གྲུབ་ཐོབ་ཉི་ཟླ་གྲགས་པའི་མཚན། །མཁས་མཆོག་ཀུན་བཟང་ཀློང་ཡངས་པ། །དབྱིངས་ནས༴ །སྐད་གཉིས་སྨྲ་བ་གཞན་ཕན་རྡོར། །རྗེ་བཙུན་རྩ་བའི་བླ་མ་མཆོག །ཞི་ཁྲོ་རབ་འབྱམས་བཀའ་བསྲུངས་བཅས། །དབྱིངས་ནས༴ །སྐྱབས་གནས་བླ་མ་རྒྱུད་པར་བཅས། །ཟག་མེད་ཡེ་ཤེས་དགོངས་ཀློང་ནས། །རྒྱུན་ཆད་མེད་པའི་ཐུགས་རྗེ་ཡིས། །མོས་པའི་བུ་ལ་གཟིགས་སུ་གསོལ། །ལས་ཉོན་སྒྲིབ་ཚོགས་དག་པ་དང་། །ཉམས་རྟོགས་ཡེ་ཤེས་འབར་བ་དང་། །གཉིས་འཛིན་འཁྲུལ་སྣང་རང་གྲོལ་ཏེ། །སྣང་བཞི་མཐར་ཕྱིན་བྱིན་གྱིས་རློབས། །ཚེ་འདི་དུས་འདི་སྐད་ཅིག་འདིར། །བྱིན་རླབས་རྩལ་དབང་ཐོབ་ནས་ཀྱང་། །སྐུ་གསུམ་དབྱེར་མེད་མངོན་གྱུར་ནས། །གཞན་ཕན་ལྷུན་གྲུབ་འབྱུང་བར་ཤོག །པ་ཆེན་བི་མ་ལ་ནས་རྒྱུད་པའི་རྫོགས་ཆེན་ཟབ་མོ་ཡང་ཏིག་ལ་དཔེ་རྒྱུད་དང་སྙན་རྒྱུད་གཉིས་ཡོད་པ་ལས་དཔེ་རྒྱུད་ནི་གཏེར་ནས་བྱོན་པ་ཡིན་ཀྱང་བླ་མ་ཡང་ཏིག་དང་བརྒྱུད་
རིམ་གཅིག་ཚེ། གསོལ་འདེབས་ཀྱང་ཟུར་དུ་མི་དགོས་ཀྱི། སྙན་བརྒྱུད་གསང་སྐོར་གྱི་བླ་མ་བརྒྱུད་རིམ་ལ་གསོལ་བ་འདེབས་པ་མདོར་བསྡུས་དངོས་གྲུབ་ཆར་འབེབས་ཅེས་བྱ་བ་ཨིྀྠ། །ཨོཾ་ཨཱཿཧཱུྃ། འདི་ལྟར་འཁོར་འདས་ཆོས་རྣམས་ཀུན། །གདོད་ནས་རང་སེམས་ཆོས་ཀྱི་སྐུར། །ལྷུན་གྱིས་གྲུབ་པའི་སྤྲོས་བྲལ་དབྱིངས། །ཐིག་ལེ་ཉག་གཅིག་ཁྱབ་གདལ་ངང་། །དེ་ལྟར་མ་རྟོགས་འཁྲུལ་པའི་འགྲོར། །བཟོད་མེད་སྙིང་རྗེའི་མདངས་ཆེན་གྱིས། ཁྱབ་བདག་བླ་མའི་གོ་འཕངས་ལ། །འགོད་ཕྱིར་བྱང་ཆུབ་སེམས་མཆོག་བསྐྱེད། །སྐད་ཅིག་དྲན་རྫོགས་རང་ཉིད་ཀྱི། །སྒོ་གསུམ་བླ་མའི་དཀྱིལ་འཁོར་དུ། །མཁའ་ལ་འཇའ་ཤར་ལྟ་བུར་གསལ། །ཐིག་ལེ་ཉག་གཅིག་མཚོན་པའི་ཞལ། །ཞི་འཛུམ་འགྲོ་ལ་ཐུགས་རྗེས་གཟིགས། །ཐབས་ཤེས་ཟུང་འཇུག་ཕྱག་གཉིས་ཀྱིས། །ཆོས་ཉིད་འགྱུར་མེད་རྡོ་རྗེ་དང་། །དངོས་གྲུབ་འཛད་མེད་ཐོས་པ་འཛིན། །བདེ་སྟོང་ལྷན་སྐྱེས་མཚོ་རྒྱལ་ཡུམ། ཁ་ཊཱཾཱྭ་ཚུལ་དུ་མཆན་ཁུང་བརྒྱན། །དབུ་ལ་ཡེ་ཤེས་ལྔ་ལྡན་
གྱི། །འདབ་ལྡན་རིགས་ལྔ་གཟི་བརྗིད་འབར། །སྐུ་ལ་ཐེག་པ་རིམ་དགུ་ཡི། །ཟབ་བེར་དགུ་རྩེགས་ལྷབ་ལྷུབ་དང་། །མདོ་སྔགས་ཟུང་འཇུག་ཆོས་གོས་གསོལ། །ཞབས་གཉིས་སྲིད་ཞི་མཉམ་རྫོགས་ཀྱི། །སྐྱིལ་ཀྲུང་པད་ཟླའི་གདན་ལ་བཞུགས། །སངས་རྒྱས་ཡོན་ཏན་མ་ལུས་ཀུན། །རྫོགས་ཕྱིར་མཚན་དང་དཔེ་བྱད་ལྡན། །ཨ་འཐས་གདོས་བཅས་མ་ཡིན་པར། །སྟོང་གསལ་འོད་སྐུར་ལམ་སེ་ལམ། །ཐུགས་རྗེའི་འོད་འབར་འཁྱིལ་ལི་ལི། །རི་རྒྱལ་ལྷུན་པོ་ལྟ་བུའི་སྐུ། ཁམས་གསུམ་དབང་བསྡུད་ཟིལ་གྱིས་གནོན། །ནམ་མཁའི་མཐར་ཐུག་ཞིང་ཁམས་ཀུན། །སྤྲུལ་པས་རྣམ་འགྱུར་དུ་མས་ཁྱབ། །བརྟན་གཡོ་འཁོར་འདས་མ་ལུས་ཀྱང་། ཁྱབ་བདག་བླ་མ་གཅིག་པུའི་འཁྲུལ། །མཐའ་ཡས་ཞིང་ཁམས་འབྱམས་ཀྱི། །སངས་རྒྱས་བྱང་སེམས་དཀྱིལ་འཁོར་ལྷ། །མཁའ་འགྲོ་ཆོས་སྐྱོང་ལ་སོགས་པ། །མཚན་དང་ཆ་ལུགས་རྣམ་འགྱུར་གྱི། །རོལ་གར་སྣ་ཚོགས་ཅིར་བསྟན་ཀྱང་། །
རིགས་བདག་བླ་མ་ཁོ་ན་ཡི། །ངོ་བོ་ཡིན་ལ་ཡིན་ཤེས་པའི། །ངེས་ཤེས་སྙིང་ནས་ཐག་ཆོད་ཅིང་། །བླ་མ་སངས་རྒྱས་བླ་མ་ཆོས། །ཀུན་བྱེད་རྒྱལ་པོ་ཀུན་ཁྱབ་སྐུ། །རང་གི་སྒོ་གསུམ་ཐ་མི་དད། །བླ་མའི་སྐུ་གསུང་ཐུགས་རང་བཞིན། །དབྱེར་མེད་གདོད་ནས་ལྷུན་གྲུབ་པའི། །ཐུགས་ཀར་གསེར་གྱི་རྡོ་རྗེ་ནི། །རྩེ་ལྔ་གྱེན་དུ་ལངས་པ་ཡིས། །ལྟེ་བ་ཐུགས་སྲོག་ཧཱུྃ་ཡིག་ནི། །འོད་ཟེར་ལྔ་ཡི་མདངས་ཅན་གསལ། །རྡོ་རྗེ་དེ་ཡི་ཕྱི་སྐོར་དུ། །བཛྲ་གུ་རུའི་སྔགས་འཕྲེང་ཡང་། །འཇའ་འོད་ལྔ་ལྡན་ཁ་དོག་ཅན། །གཡས་སྐོར་འཁོར་འདས་འོད་ཟེར་ཚོགས། །ཕྱོགས་བཅུར་འཕྲོས་པས་རྒྱལ་ཀུན་ལ། །མཆོད་པ་ཕུལ་ཞིང་དངོས་གྲུབ་དང་། །བྱིན་རླབས་དབང་རྣམས་འོད་ཀྱི་ཚུལ། །ཚུར་བྱུང་རང་ལ་གཉིས་མེད་ཐིམ། །རང་གི་ཐུགས་རྗེའི་འོད་ཟེར་ནི། །འགྲོ་དྲུག་སེམས་ཅན་ཀུན་ལ་འཕྲོས། །ཀུན་གྱི་སྡིག་སྒྲིབ་སྡུག་བསྔལ་ཞི། །ཐམས་ཅད་བླ་མའི་སྐུ་རུ་གྱུར། །སྣང་སྲིད་ཐམས་ཅད་བླ་མའི་སྐུ། །སྒྲ་གྲགས་བཛྲ་གུ་རུའི་སྔགས། །དྲན་རྟོགས་
ཡེ་ཤེས་རྣམ་རོལ་ཐུགས། །བཟའ་བཏུང་ཚོགས་ཀྱི་འཁོར་ལོ་ཉིད། །གོས་རྒྱན་གདན་དང་གནས་ཁང་ཡུལ། །ཚོགས་དྲུག་མཐའ་དག་མཆོད་པའི་རྫས། །གང་ཤར་ཅིར་སྣང་ཡེ་ཤེས་ཀྱི། །རྣམ་རོལ་ཆོས་ཉིད་འཁོར་ལོ་ལ། །དགག་སྒྲུབ་བཟང་ངན་ཞེན་འཛིན་གྱི། །བཅོས་བསླད་སྒྲོ་སྐུར་མི་བྱ་བར། །རང་རིག་གཉུག་མ་མ་བཅོས་པ། །བསྒོམ་བྱ་སྒོམ་བྱེད་མེད་པའི་ཀློང་། །ཡེངས་འཁྲུལ་བྲལ་བར་ལྷོད་ཀྱི་གློད། །སྐྱིད་སྡུག་ལེགས་ཉེས་ཚ་གྲང་དང་། །དགྲ་འདྲེ་རྐྱེན་ངན་ན་ཚ་དང་། །འཆི་བ་ལ་སོགས་གང་བྱུང་ཀྱང་། །བླ་མའི་ཐུགས་རྗེ་བྱིན་རླབས་ཉིད། །ཡིན་པར་བློ་ཐག་རྦད་ཀྱི་བཅད། །ཅི་ཕྱིར་ཞེ་ན་བཟང་ངན་དང་། །བདེ་སྡུག་འཛིན་པ་རྣམ་རྟོག་ཙམ། །རྣམ་རྟོག་འཁྲུལ་ཕྱིར་འབྲེང་ན་བསླུ། །རང་རིག་བླ་མ་ཆོས་ཀྱི་སྐུ། །བརྟན་གཡོ་འཁོར་འདས་ཀུན་ལ་ཁྱབ། །ཀུན་ཁྱབ་རང་རིག་ངོ་བོ་ལ། །བདེ་སྡུག་བཟང་ངན་མ་གྲུབ་ཅིང་། །བདེ་སྐྱིད་སྣང་
མཁན་རང་གི་སེམས། །ཉོན་མོངས་དུག་ལྔ་སྡུག་བསྔལ་དང་། །བཏང་སྙོམས་སྣང་བ་ཀུན་མང་སེམས། །སེམས་ལ་བཟང་ངན་བདེ་སྡུག་གི །དགག་སྒྲུབ་སྤྲོས་པས་དབེན་པས་ན། །གང་ཤར་ཆོས་ཉིད་ཡེ་ཤེས་དབྱིངས། །འགག་མེད་རང་བྱུང་རིག་རྩལ་གྱི། །རང་སྒྲ་སྔགས་ཀྱི་ཆུ་རྒྱུན་ནི། །རྒྱུན་མི་ཆད་པར་བཟླ་བར་བྱའོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཐུན་མཚམས་སུ་བསྐྱེད་རིམ་བསྡུ་བར་སྤྲོ་ན། སྣོད་བཅུད་བདག་བསྐྱེད་སྔགས་འཕྲེང་རྡོ་རྗེ་དང་བཅས་པ་ཐམས་ཅད་ཐུགས་སྲོག་ཧཱུྃ་ལ་ཐིམ་ཞིང་། ཧཱུྃ་ཡང་འཇའ་ཡལ་བ་ལྟར་གྱུར་པའི་ངང་ནས། གདོད་མའི་གནས་ལུགས་ཡེ་ཤེས་ཆོས་ཀྱི་སྐུའི་རང་ཞལ་བལྟ་ཞིང་། དགེ་བ་འགྲོ་ལ་བསྔོ། སླར་རྒྱུན་སྤྱོད་ཐམས་ཅད་བླ་མའི་ལམ་ཁྱེར་གྱི་ངང་ནས་བྱ་བ་སྟེ། འོན་ཀྱང་ཚུལ་འདི་ནི་གསང་སྔགས་ཀྱི་བསྐྱེད་རིམ་སྤྱི་འགྲོ་ལྟར་ཡིན་མོད་ཀྱི། ཁྱད་པར་བླ་ན་མེད་པ་ཟབ་མོ་བསྐྱེད་རྫོགས་ཟུང་འཇུག་གི་ཉམས་ལེན་ལྟར་ན། བསྐྱེད་པ་དང་བསྡུ་བ་སོགས་ཐུན་མཚམས་རེས་འཇོག་ཏུ་མི་བྱ་སྟེ། རྣམ་པ་ཐམས་ཅད་དུ། སྣོད་བཅུད་བླ་མའི་དཀྱིལ་འཁོར། ངག་རླུང་གི་འགྲོ་འོང་དང་སྒྲ་གྲགས་སྔགས་ཀྱི་རང་བཞིན། སེམས་
ཀྱི་འགྱུ་དྲན་རྟོགས་ཚོགས་ཐམས་ཅད་རང་བྱུང་རང་གྲོལ་ཡེ་ཤེས་ཆེན་པོར་ལ་བཟློ་བ་ཁོ་ན་རྒྱུན་ཆད་མེད་པར་ཉམས་སུ་བླངས་ཞིང་། ཐ་མལ་འཁྲུལ་འཛིན་གྱི་དབང་དུ་སྐད་ཅིག་ཀྱང་ཤོར་བར་བྱེད་པ་ནི་བླ་མེད་ཀྱི་སྨིན་གྲོལ་བསྐྱེད་རྫོགས་མཐའ་དག་གི་སྙིང་པོའི་ཡང་སྙིང་ལགས་ཚེ་དེ་ལྟར་ཐུགས་ཉམས་སུ་བཞེས་ཚལ། ༣ ཞེས་པའི་བྱ་སྒྲུབ་འདི་ནི། རྒྱ་བོད་ཀྱི་མཚམས། དར་རྩེ་མོའི་ཤར་ཕྱོགས་ལ་མོ་རྩེ་ཞེས་བྱ་བའི་དབེན་གནས་ནས། བླ་མ་རིན་པོ་ཆེ་གྲུབ་པའི་དབང་ཕྱུག་བྱམས་པ་ངག་དབང་ཀུན་དགའ་བསོད་ནམས་པའི་བཞེད་པ་སྐོང་ཕྱིར་རྒོད་ཕུག་ནས་བྲིས་ཏེ་ཕུལ་བའོ།། ༈ །།རབ་འབྱམས་ཕྱོགས་བཅུའི་ཞིང་གི་རྒྱལ་བ་ཀུན། །བསམ་ཡས་ཕྲིན་ལས་རོལ་གར་ཇི་སྙེད་ཀྱང་། དབྱེར་མེད་རིགས་བདག་བླ་མ་གཅིག་པོའི་འཕྲུལ། །ཡིན་ལ་ཡིན་པར་རྟོགས་པས་གསོལ་བ་འདེབས། །གང་སྐུ་མཚན་དཔེའི་ཉི་མ་ཐུགས་རྗེའི་འོད། །བསྟན་འགྲོའི་པད་ཚལ་སྐྱོང་བར་མི་མཛད་པར། །ཞི་དབྱིངས་ནུབ་རེའི་ཕག་ཏུ་གཤེགས་མཛད་ན། །རྨོངས་ཐོམ་མུན་འཁྱམས་གདུལ་བྱ་སུ་ཡིས་
འདྲེན། །གདོད་ནས་རབ་དག་ཆོས་སྐུའི་མགོན་པོ་ཁྱོད། །སྐྱེ་འཆི་འཕོ་འགྱུར་སྤྲོས་མཚན་མི་དམིགས་ཀྱང་། །བདག་སོགས་རྟགས་འཛིན་ཅན་གྱི་བུ་འབངས་རྣམས། །དོར་ནས་ལྷ་ཡི་ལྷ་ཁྱོད་གཤེགས་ཕོད་དམ། །དེ་ཕྱིར་མཁྱེན་བརྩེའི་ཀློང་ནས་སྤྲུལ་པའི་གར། །བསྟན་འགྲོའི་འདོད་པ་འཇོ་བའི་ཡིད་བཞིན་ནོར། །མོས་གུས་དད་བརྒྱའི་རྒྱལ་མཚན་རྩེར་འབར་བའི། །དབང་གི་རྒྱལ་པོ་སྤྲུལ་པའི་སྐུར་འབྱོན་གསོལ། །སྙིགས་མཐའི་སེམས་ཅན་ལས་ཉོན་རྦ་རླབས་འཁྲུག །རྒྱལ་བ་གཞན་གྱི་གདུལ་ཡུལ་མ་གྱུར་བ། །བདག་སོགས་སྐྱབས་བྲལ་སྐྱེ་བོ་ཉམས་ཐག་རྣམས། །བརྩེ་ཆེན་ཁྱོད་ཀྱི་སླར་ཡང་སྐྱོབ་མཛད་གསོལ། །མཚན་དཔེ་འབར་བའི་སྐུ་མཆོག་སྟོན་མཛད་ཅིང་། །ཐེག་མཆོག་ངེས་གསང་ཆོས་འཁོར་བ་དང་། །ཕྲིན་ལས་ངོ་མཚར་བཀོད་པ་རྒྱ་མཚོ་ཡི། །དུས་མཐའི་འགྲོ་འདྲེན་མཛད་པར་སྙིང་ནས་གསོལ། །གནས་ལུགས་ཕྱག་རྒྱ་ཆེན་པོ་གདོད་མའི་གཤིས། །མ་བཅོས་ཆོས་
སྐུ་རང་བབས་གཉུག་མ་འདི། །རྗེ་བཙུན་བླ་མ་ཁྱེད་ཐུགས་འོད་གསལ་ཆེར། །རོ་མཉམ་འདུ་འབྲལ་མེད་པར་བདག་གྲོལ་ཤོག །སྒོམ་འཛིན་ཞེན་པའི་སྒྲོགས་གིས་མ་བཅིངས་ཤིང་། །བག་ཆགས་ངན་གོམས་འཁྲུལ་ཕྱིར་མི་འབྲང་བར། །མ་ཡེངས་མི་སྒོམ་འཛིན་མེད་བློ་ལས་ངང་། །མགོན་པོ་ཁྱོད་ཀྱི་ཕྲིན་ལས་ཀུན་འགྲུབ་ཤོག །གང་ཤར་འཛིན་བྲལ་རིག་པའི་མེ་ལོང་ནང་། །བཟང་ངན་བདེ་སྡུག་རི་མོ་ཅིར་འཆར་རྣམས། །གང་བྱུང་བླ་མའི་བྱིན་རླབས་ཁོ་ན་རུ། །ཤེས་ནས་མཁའ་མཉམ་འགྲོ་ཕན་སྒྲུབ་བྱེད་ཤོག །དེ་ལྟར་མོས་གུས་གདུང་ཤུགས་དྲག་པོ་ཡིས། །དཔལ་ལྡན་བླ་མའི་སྤྲུལ་སྐུ་མྱུར་འབྱོན་ཕྱིར། །གསོལ་འདེབས་སྨོན་ལམ་བཏབ་པའི་བདེན་སྟོབས་ཀྱིས། །རྒྱལ་མཆོག་ཁྱེད་ཀྱི་གོ་འཕངས་མྱུར་ཐོབ་ཤོག །ཅེས་པ་འདི། །ལྷ་སྲས་ཀྱི་སྐྱེ་མཐའ་འབྲི་གུང་ཆོས་རྗེ་ཆོས་ཀྱི་གྲགས་པ་དེ་ཉིད་ཞིང་ཁམས་སུ་གཤེགས་ཚེ་སྤྲུལ་པའི་སྐུ་མྱུར་འབྱོན་གྱི་གསོལ་བ་འདེབས་པའི་ཚིགས་སུ་བཅད་པ། ཤར་ཁ་བླ་མ་རིན་ཆེན་ནོར་
བུས་བསྐུལ་བར་མཛད་པ་བཞིན་བཀོད་པའོ། །ཨོཾ་སྭསྟི་སིདྡྷན་ཏུ། །ཕྱོགས་བཅུ་དུས་བཞིའི་རྒྱལ་བ་མ་ལུས་ཀུན། །རྗེ་བཙུན་དཔལ་ལྡན་བླ་མ་རྡོ་རྗེ་འཆང་། །གསང་གསུམ་མི་ཟད་རྒྱན་གྱི་འཁོར་ལོར་རྫོགས། །ཞབས་པད་སྤྱི་བོའི་གཙུག་ཏུ་གུས་པས་མཆོད། །གང་སྐུ་མཚན་དཔེའི་གཟི་འབར་རྟ་ལྗང་ཅན། །རབ་འབྱམས་གདུལ་བྱ་རིས་མེད་ལྷ་ལམ་དུ། །ཕྲིན་ལས་འོད་བརྒྱ་དགྱེས་པའི་རྣམ་པར་ཐར། །ནམ་ཡང་འགྲིབ་མེད་མཛད་པར་གསོལ་བ་འདེབས། ཁྱོད་གསུང་བདེན་དོན་བཅུ་གཉིས་ཆོས་སྒྲའི་དབྱངས། །སྐལ་ལྡན་རྣ་བའི་བཅུད་དང་ཡིད་ཀྱི་གསོས། །རྒྱུན་ཆད་མེད་པའི་དགའ་སྟོན་སྩོལ་བའི་དཔྱིད། །རྟགས་པར་རེ་སྐོངས་མཛད་པར་གསོལ་བ་འདེབས། །ཉིད་ཐུགས་ཆོས་དབྱིངས་ཟབ་མོའི་ཆུ་གཏེར་ཆེ། །རྨད་བྱུང་ཡོན་ཏན་དཔལ་གྱི་ཡོངས་གཏམས་པས། །དད་ལྡན་ཀླུ་དབང་ཉེར་ཚོའི་བསྟི་གནས་མཆོག །མི་ཟད་འདོད་འབྱུང་ཟད་པར་གསོལ་བ་འདེབས། །ཇི་ལྟར་མཚན་མོའི་བདག་པོ་སྐྱེ་འབྲིའི་ཚུལ། །སྣང་ཡང་དོན་
ལ་སྐྱེ་འབྲིས་མ་གོས་ལྟར། །མགོན་ཁྱོད་སྐྱེ་འཆི་འཕོ་གྱུར་བྲལ་བཞིན་དུ། །སྐྱེ་འཆིའི་སྣང་ཚུལ་མི་སྟོན་བརྟན་ཞུགས་གསོལ། །ཞིང་ཁམས་ཇི་སྙེད་གདུལ་བྱ་དེ་སྙེད་དང་། །མཚུངས་པར་སྤྲུལ་པའི་རོལ་གར་སྟོན་བཞིན་དུ། །ཞིང་འདིར་བདག་སོགས་འདུལ་མཁས་ཐུགས་རྗེའི་གཏེར། །མཆོག་གི་སྤྲུལ་སྐུ་བསྐལ་བརྒྱར་ཞབས་བརྟན་གསོལ། །དཔག་བསམ་ཤིང་དང་བུམ་བཟང་ཡིད་བཞིན་ནོར། །རིས་མེད་འདོད་དགུའི་ཆར་རྒྱུན་འབྱུང་བ་ཡང་། །གསོལ་བ་འདེབས་པའི་རྟེན་འབྲེལ་ལ་ལྟོས་བཞིན། །བདག་གིས་གསོལ་བ་བཏབ་དོན་འགྲུབ་པར་མཛོད། །སྲིད་ཞི་འཁོར་འདས་སྣང་སྲིད་སེམས་ཀྱི་འཕྲུལ། །སེམས་ཉིད་གཟོད་ནས་ཡོངས་དག་ཆོས་ཀྱི་དབྱིངས། །དེ་ཉིད་བླ་མ་ཁྱོད་སྐུར་ཆོས་སྐུའི་ངང་། །འདུ་འབྲལ་མེད་པར་བདག་སོགས་གྲོལ་བར་ཤོག །རབ་འབྱམས་རྒྱལ་བ་རྒྱལ་སྲས་བླ་མ་ལྷ། །མཁའ་འགྲོ་ཆོས་སྲུང་ཐུགས་རྗེའི་ནུས་སྟོབས་དང་། །བདག་སོགས་དད་གུས་གདུང་བས་གསོལ་
བཏབ་མཐུས། །བསྐལ་བརྒྱར་ཞབས་བརྟན་ཕྲིན་ལས་གོང་འཕེལ་ཤོག །དེ་ལྟར་ཁམས་གསུམ་འགྲོ་བའི་འདྲེན་པ་རྒྱལ་མཆོག་སྤྲུལ་པའི་སྐུ་ཉིད་བསྐལ་པ་ནས་བསྐལ་པའི་བར་དུ་ཞབས་པད་མི་འགྱུར་རྡོ་རྗེའི་གདན་ལས་གཡོ་བ་མེད་པར་བརྟེན་ཞིང་། །སྐལ་བ་ཐ་དད་དང་། འཚམས་པའི་ཆོས་ཀྱི་བདུད་རྩི་རྒྱུན་ཆད་མེད་པར་སྩོལ་བས་གདུལ་བྱ་རྣམས་བྱང་གྲོལ་ལ་འགོད་པར་གསོལ་བ་སྙིང་ཁོང་རུས་པའི་དཀྱིལ་ནས་བཏབ་པ་འདི་ནི། ཡུལ་མཐའ་ཁོབ་ལས་ཡང་ཁོབ་ཉིད་དུ་གྱུར་བའི་ནགས་ཁྲོད་དབེན་པར་གནས་བཅས་པའི་སྤོང་བ་པ་རྒན་པོ་མཁས་མཆོག་པདྨ་ལེགས་གྲུབ་རྩལ་གྱིས། དངོས་འབྱོར་ཟང་ཟིང་གི་མཆོད་པ་མ་མཆིས་ཀྱང་། །དད་མོས་གདུང་ཤུགས་དྲག་པོས་ཀུན་ནས་བླངས་ཤིང་། སྒྲུབ་པའི་མཎྜལ་དང་བཅས་ཏེ་གསོལ་བ་བཏབ་པ་ལ་བརྟེན་ནས། བདག་སོགས་མཁའ་མཉམ་གྱི་འགྲོ་བ་ལས་དོན་གྱི་གཅོང་རོང་དུ་ལྷུང་ཞིང་སྡུག་བསྔལ་གྱི་རྦ་ཀློང་དྲག་པོར་འཁྲུག་པ་རྣམས་ལ་བརྩེ་བ་ཆེན་པོས་ཉེ་བར་དགོངས་ནས་ཞབས་པད་བསྐལ་བརྒྱར་བརྟན་པ་དང་། བདག་རྒན་པོ་ཡང་ཇི་སྲིད་གཟུང་འཛིན་གྱི་རི་མོ་མ་ཞིག་གི་བར་དེ་སྲིད་ཀྱི་སྐྱེ་བའི་འཕྲེང་བ་ཇི་
སྙེད་པར་འབྲལ་མེད་ཐུགས་རྗེས་གཡེལ་བ་མེད་པར་བསྐྱངས་ཤིང་གཟིགས་པར་མཛད་དུ་གསོལ། ཞེས་པ་འདི། པ་ཆེན་བི་མ་དང་ཆོས་རྒྱལ་དྭགས་པོ་ལྷ་རྗེ་སོགས་ཀྱིས་རྣམ་པར་འཕྲུལ་པ། སྒམ་པོ་མཆོག་གི་སྤྲུལ་སྐུའི་བརྟན་བཞུགས་སུ་ཕུལ་བའོ། །རྒྱལ་བ་ཁྱབ་བདག་ཡེ་ཤེས་རྡོ་རྗེའི་སྐུ། །སངས་རྒྱས་ཀུན་གྱི་གསང་བའི་མཛོད་འཆང་བ། །དམིགས་མེད་ཀློང་ནས་ཐུགས་རྗེའི་འོད་ཟེར་གྱི། །སྐལ་ལྡན་བྱིན་རློབས་སྨིན་གྲོལ་དངོས་གྲུབ་སྩོལ། །སྒྲིབ་བྲལ་ཤེས་རབ་ཟབ་མོས་ཆོས་ཀུན་གཟིགས། །ཟག་མེད་ཏིང་འཛིན་བཟང་པོའི་ཕྲིན་ལས་ཀྱི། །རོལ་གར་སྟོན་མཛད་ཏེ་ལོ་འགྲོ་བའི་མགོན། །སྐལ་ལྡན་བྱིན་རློབས་སྨིན་གྲོལ༴ །མཁྱེན་པའི་ཡེ་ཤེས་གནས་ལྔ་རིག་པའི་མཆོག །བཀའ་དཔྱད་མཐར་ཕྱིན་དོན་གྱི་དངོས་གྲུབ་བརྙེས། །མཁའ་འགྲོའི་དབང་ཕྱུག་དཔལ་ལྡན་ནཱ་རོ་པ། སྐལ་ལྡན་བྱིན༴ །སྔོན་བྱང་ལས་འཕྲོ་རབ་སད་ཆོས་ཀྱི་ཕྱིར། །འཕགས་ཡུལ་ལན་མང་བགྲོད་པའི་བློ་གྲོས་སྟོབས། །
རྨད་བྱུང་མི་ཡི་སེང་གེ་ལོ་ཙྭ་བ། སྐལ་ལྡན༴ །སྙན་བརྒྱུད་ཟབ་མོ་རྡོ་རྗེའི་དབང་མཛོད་ཐོབ། །བླ་མའི་བཀའ་བཞིན་སྒྲུབ་པའི་རྒྱལ་མཚན་འཛིན། །གངས་ཅན་གྲུབ་ཐོབ་རྒྱལ་པོ་མི་ལ་རྗེ། །སྐལ་ལྡན༴ །དཔག་མེད་བསོད་ནམས་ཚོགས་ལས་བསྐྲུན་པའི་སྐུ། །འདོད་འབྱུང་ཡོན་ཏན་རིན་ཆེན་འགྲོ་ལ་སྩོལ། །བཀའ་བརྒྱུད་ཀུན་གྱི་འབྱུང་གནས་སྒམ་པོ་པ། །སྐལ་ལྡན༴ །དུས་གསུམ་ཀུན་མཁྱེན་མཚུངས་པ་མེད་པའི་རྗེ། །ཡེ་ཤེས་སྒྱུ་འཕྲུལ་གར་མཁན་རས་ཆེན་ཞབས། །ཆོས་ཀུན་དགོངས་པའི་ཀློང་གྲོལ་སྤོམ་བྲག་པ། །སྐལ་ལྡན་བྱིན༴། རྟ་མཆོག་ཧེ་རུ་ཀ་དངོས་པཀྴིའི་མཚན། །ཌཱ་ཀིས་བྱིན་རླབས་གྲུབ་མཆོག་ཨོ་རྒྱན་པ། །ཤེས་བྱའི་ཆོས་ཀུན་མཁྱེན་གཟིགས་རང་བྱུང་ཞབས། །སྐལ་ལྡན༴ །ཐབས་མཁས་གདུལ་བྱའི་རེ་བསྐོངས་རྒྱལ་བ་གཡུང་། །ཡེ་ཤེས་རོལ་པའི་སྒྱུ་འཕྲུལ་རྡོ་རྗེའི་སྐུ། །ཆོས་དབྱིངས་མཁའ་ལ་སྤྱོད་
མཛད་གར་གྱི་དབང་། སྐལ་ལྡན༴ །དེ་བཞིན་གཤེགས་ཀུན་ངོ་བོ་ཆོས་དཔལ་བཟང་། །མཐུ་སྟོབས་ནུས་ལྡན་ཆོས་དཔལ་ཡེ་ཤེས་དང་། །མཐོང་ཐོས་དྲན་རེག་དོན་ལྡན་ཆོས་ཀྱི་གྲགས། །སྐལ་ལྡན༴ །མཁས་གྲུབ་བསྟན་པའི་སྲོག་འཛིན་འཇམ་དཔལ་བཟང་། །རྒྱལ་སྲས་སེམས་དཔའ་གཽ་ཤྲི་རིན་པོ་ཆེ། །ཆོས་ཀྱི་སྤྱན་སྔ་ཡེ་ཤེས་དཔལ་བཟང་པོ། །སྐལ་ལྡན༴ །ཐམས་ཅད་མཁྱེན་པའི་དབང་པོ་གཙུག་ལག་ཕྲེང་། །རྒྱལ་བ་གར་གྱི་དབང་པོ་དཀོན་མཆོག་འབངས། །རྗེ་བཙུན་གཙུག་ལག་རྒྱ་མཚོ་དགའ་བའི་དབྱངས། །སྐལ་ལྡན་བྱིན་རློབས་སྨིན་གྲོལ་དངོས་གྲུབ་སྩོལ། །སངས་རྒྱས་ཐམས་ཅད་གདུལ་བྱའི་སྐལ་ངོ་དང་། །རྗེས་སུ་མཐུན་པའི་རྫུ་འཕྲུལ་བཀོད་པའི་གཏེར། །མཐའ་དག་བླ་མ་གཅིག་པུའི་ངོ་བོར་རྫོགས། །གསོལ་བ་འདེབས་སོ་སྨིན་གྲོལ་དངོས་གྲུབ་སྩོལ། ༢ ཐུགས་རྗེ་ནུས་པའི་བདག་ཉིད་བླ་མ་རྗེ། །རྩ་
བ་བརྒྱུད་པར་བཅས་ལ་གསོལ་བཏབ་པས། །ཆོས་ཀུན་མཐར་ཐུག་ཡེ་ཤེས་ཕྱག་རྒྱ་ཆེ། །རང་གྲོལ་མངོན་སུམ་རྟོགས་པར་བྱིན་གྱིས་རློབས། །གཟོད་ནས་ཡོངས་དག་གནས་ལུགས་ཆོས་ཀྱི་སྐུ། །མ་གཅོས་ལྷུན་གྲུབ་གཉུག་མའི་ཡེ་ཤེས་དངོས། །མ་རིག་ལྷན་སྐྱེས་དྲི་མས་སྒྲིབ་འདི་ལས། །རང་གྲོལ་རང་རིག་རང་ཞལ་མཇལ་བར་ཤོག །མཐའ་བཅས་མཐའ་བྲལ་སྒྲོ་བཏགས་སྣ་ཚོགས་ཀྱིས། །དངོས་མེད་དངོས་པོར་བསྒྲུབ་པའི་ཐོས་བསམ་ལ། །མི་ཚེའི་ཉི་མ་སྟོང་ཟད་མི་བྱེད་པར། །བལྟ་བའི་བརྡར་ཤ་ནང་ནས་ཆོད་པར་ཤོག །བསྒོམ་དུ་མེད་པའི་རང་བྱུང་ཡེ་ཤེས་དོན། །མ་ཡེངས་མི་འཛིན་རང་སོར་མི་འཇོག་པར། །སྒོམ་འདོད་སྩོལ་བས་ཐོག་མེད་ད་བར་འཁྲུལ། །མ་བསྒོམ་བཅོས་མིན་ཡེ་ཤེས་མངོན་གྱུར་ཤོག །ཚོགས་དྲུག་ཅིར་སྣང་གང་ཤར་ཆོས་ཉིད་རྩལ། །འཆར་བྱ་འཆར་བྱེད་གདོད་ནས་རྣམ་དག་ཀྱང་། །སྤོང་ལེན་དགག་སྒྲུབ་ཐག་བརྒྱའི་མདུད་པས་
བཅིངས། །ད་ནས་སྤྲོས་མེད་རང་གྲོལ་ཤེས་པར་ཤོག །ཉམས་རྟོགས་ཞེ་འདོད་གཡའ་ཡིས་མ་གོས་ཤིང་། །ལམ་རྟགས་སྒྱུ་མའི་ལྟད་མོར་མི་ཞེན་པར། །ཐོབ་བྱ་ཐོབ་བྱེད་མཚན་འཛིན་ལས་འདས་པའི། །འབྲས་བུའི་རྒྱལ་པོ་ཆོས་ཉིད་གདེངས་ཐོབ་ཤོག །སྤྲོས་བྲལ་ཆོས་སྐུ་མངོན་དུ་གྱུར་ནས་ཀྱང་། །འགག་མེད་གཟུགས་སྐུ་མཚན་དཔེའི་འོད་དཀར་ནི། །གང་ལ་གང་འདུལ་སྤྲུལ་པའི་ཟློས་གར་ཚོགས། །གདུལ་བྱའི་ཆུ་སྣོད་ཇི་སྙེད་ཡོངས་གང་ཤོག །རྩོད་མེད་བསྒྲུབ་བརྒྱུད་བླ་མར་གསོལ་བཏབ་པའི། །བྱིན་རླབས་དགེ་འབྲས་ནུས་མཐུ་བསམ་ཡས་ཀྱིས། །བདག་སོགས་མཁའ་མཉམ་འགྲོ་བ་མ་ལུས་ཀུན། །རྡོ་རྗེ་འཆང་དབང་བླ་མ་མཆོག་འགྲུབ་ཤོག །ཞེས། ཕྱག་རྒྱ་ཆེན་པོ་ཡི་གེ་བཞི་པའི་བླ་བརྒྱུད་གསོལ་འདེབས་འདི་ནི་སྤྲུལ་པའི་སྐྱེས་མཆོག་མི་ཕམ་མགོན་པོས་བསྐུལ་བར་མཛད་པའི་ངོར་བཀོད་པ་སྟེ། སྤྱིར་ཕྱག་རྒྱ་ཆེན་པོའི་བླ་བརྒྱུད་ཀྱི་རྩ་བ་ནི་རྡོ་རྗེ་འཆང་ནས། བྱང་སེམས་བློ་གྲོས་རིན་ཆེན། དཔལ་
ས་ར་ཧ། རི་ཁྲོད་དབང་ཕྱུག །མཻ་ཏྲེ་པ། དེ་ནས་མར་པ་ལོ་ཙཱ་ལ་བརྒྱུད་པ་དང་། མི་ཏྲི་པའི་རྒྱ་གར་གྱི་སློབ་མ་ཐ་དད་ལས་བརྒྱུད་ལུགས་ཀྱང་མང་མོད་ཀྱི་སྐབས་འདིར་ཡི་གེ་བཞི་པ་འདི་ཉིད་ཏེ་ལོ་ནཱ་རོ་ནས་བརྒྱུད་ཚུལ་དང་མཐུན་པར་བཀོད་པ་ཡིན་ལ། འདི་ལ་བོད་དུ་ཡང་རྗེ་སྒམ་པོ་པ་ཡན་ཆད་གཅིག་པ་ལས། དེ་ནས་ཕག་མོ་གྲུ་པ་ལ་བརྒྱུད་ཅིང་། ཕག་གྲུ་ནས་གླིང་དང་རྒྱ་རས། དེ་ལས་དབོན་རས་སོགས་འབྲུག་པའི་གདན་ས་བརྒྱུད་པ་དང་། རྒོད་ཚང་པ་ནས་སྟོད་འབྲུག་སོགས་འབྲུག་བརྒྱུད་དང་། ཡང་། ཕག་གྲུ་ནས་འབྲི་སྟག་ཐིལ་གསུམ་སོ་སོར་བརྒྱུད་ཚུལ་སོགས་མཐའ་ཡས་མོས་ཀྱང་། འདི་ནི་སྒམ་པོ་པ་ནས་དུས་མཁྱེན་སོགས་ཀརྨ་བཀའ་བརྒྱུད་ལྟར་བཀོད་པ་སྟེ། བླ་བརྒྱུད་ཀྱི་མཚན་རྣམས་ནི་མཚལ་རྟག་ཏུ་བྲིས་པ་ལས་ཤེས་པར་འགྱུར་རོ།། ༈ །།ན་མོ་རིགས་འདུས་བདེར་གཤེགས་རྡོ་རྗེ་འཆང་། །ཕྱོགས་དུས་དཀོན་མཆོག་གསུམ་དངོས་ལ། །བདག་དང་འགྲོ་བ་མ་ལུས་པ། །བྱང་ཆུབ་བར་དུ་སྐྱབས་སུ་མཆི། །ནམ་མཁའ་ཁྱབ་པའི་སེམས་ཅན་རྣམས། །སྡུག་བསྔལ་མཚོ་ལས་བསྒྲལ་བའི་ཕྱིར། །རྩ་བ་གསུམ་གྱི་གོ་འཕང་མཆོག །མ་ཐོབ་བར་དུ་སྒྲུབ་
པར་བྱ། ཞེས་པས་སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་ནས། ཧྲཱིཿམ། །སྐད་ཅིག་དྲན་རྫོགས་བདུད་བཞི་པད་ཉིའི་སྟེང་། །རང་ཉིད་རྟ་ཕག་ཡབ་ཡུམ་འཁྲིལ་སྦྱོར་ཚུལ། ཁྲོ་ཆས་ཡོངས་རྫོགས་གྲི་གུག་ཐོད་ཁྲག་བསྣམས། །དབུ་སྐྲ་རལ་པའི་ཁྲོད་ནས་རྟ་ཞལ་དང་། །ཕག་ཞལ་རང་སྒྲས་ཁམས་གསུམ་ཟིལ་གྱིས་གནོན། །ཞབས་གཉིས་དོར་སྟབས་གར་དགུའི་ཉམས་དང་ལྡན། །མེ་སྤུངས་ཀློང་ན་རི་རབ་ཙམ་གྱི་སྐུ། །སྲིད་གསུམ་འགྲན་ཟླ་བྲལ་བར་བརྗིད་ཅིང་འགྱིང་། །སྣང་ལ་རང་བཞིན་མེད་པར་གསལ་བ་ཡི། །སྤྱི་བོའི་གཙུག་སྟེང་པདྨ་འདབ་བཞིའི་དབུས། །ཉི་མ་ཟླ་བ་རྩེགས་པའི་གདན་སྟེང་དུ། །སངས་རྒྱས་ཐམས་ཅད་གཅིག་ཏུ་བསྡུས་པའི་དཔལ། །ཨོ་རྒྱན་གུ་རུ་སྨན་པའི་ཚུལ་བསྟན་པ། །རྗེ་བཙུན་ཆེན་པོ་མ་ཧཱ་གུ་འི་སྐུ། །དཀར་དམར་ཞི་འཛུམ་མཛེས་པའི་ཞལ་གདངས་ཅན། །དར་དཀར་གོས་དང་སྐུ་རག་མཆིན་
ཁས་མཛེས། །བེར་དམར་གསེར་གྱི་ཐིག་ཅན་ལྷུབ་སུ་གསོལ། །དབུ་སྐྲ་ཐོར་ལྕོག་མེ་ཏོག་ཕྲེང་བས་རྒྱན། །ཕྱག་གཡས་པུས་མོའི་སྟེང་དུ་མཆོག་སྦྱིན་གྱིས། །སྨན་རྒྱལ་གསེར་མདོག་སྡོང་པོ་རབ་རྒྱས་འཛིན། །ཕྱག་གཡོན་མཉམ་བཞག་བདུད་རྩིའི་བུམ་པ་བསྣམས། །ལྟ་བས་མི་ངོམ་མཚན་དཔེའི་གཟི་འོད་འབར། །རྡོ་རྗེ་སྐྱིལ་ཀྲུང་འོད་ལྔའི་ཀློང་བཞུགས་པའི། །ཕྱོགས་བཞིའི་པད་འདབ་དཀར་སེར་དམར་ལྗང་སྟེང་། །ཡེ་ཤེས་མཁའ་འགྲོ་རིགས་བཞི་ཕྱོགས་མདོག་ཅན། །ཐམས་ཅད་ཕྱག་གཡས་གྲི་གུག་གཡོན་ཚེ་བུམ། །རིན་ཆེན་རུས་རྒྱན་དར་དབྱངས་དུ་མས་མཛེས། །གཙོ་ལ་ཞལ་ལྟ་གར་སྟབས་བཞེངས་པར་གསལ། །གཙོ་བོའི་ཐུགས་ཀར་ཟླ་བའི་གདན་གྱི་སྟེང་། །ཧཱུྃ་ཡིག་མཐིང་ཁའི་མཐའ་སྐོར་སྔགས་ཀྱི་ཕྲེང་། ཁ་དོག་ལྔ་ལྡན་གཡས་བསྐོར་འཁྱིལ་ལེ་བ། །དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས། །སངས་རྒྱས་བྱང་སེམས་བླ་མ་ཡི་དམ་ལྷ། །མཁའ་འགྲོ་ཆོས་
སྐྱོང་ལ་སོགས་སྐྱབས་གནས་ཀུན། །རིགས་འདུས་མ་ཧཱ་གུ་འི་ཆ་ལུགས་སུ། །བྱོན་ནས་གཙོ་བོ་ཉིད་ལ་དབྱེར་མེད་ཐིམ། །སྐྱབས་གནས་ཀུན་འདུས་ཡེ་ནས་ཡིན་བཞིན་དུ། སླར་ཡང་བྱིན་རླབས་གོང་བུ་གཅིག་འདུས་པའི། །རྩ་བའི་བླ་མ་ཧཱ་གུ་་ལ། །སྣོད་བཅུད་སྣང་སྲིད་བདག་ལུས་ལོངས་སྤྱོད་དང་། །སྒོ་གསུམ་གཏན་འདུན་ཐམས་ཅད་མཆོད་པར་འབུལ། །བཞེས་ལ་ཚེ་གཅིག་སངས་རྒྱས་དངོས་གྲུབ་ཞུ། །ཨེ་མ། །རྒྱལ་བའི་དཀྱིལ་འཁོར་གྲངས་མེད་ཀུན། །ཐ་དད་གདུལ་བྱའི་སྣང་ཚུལ་ཙམ། །བདག་གི་སྐལ་ངོར་གུ་་རྗེ། །རྩ་བའི་བླ་མ་ཁོ་ན་ཉིད། །ཞབས་ཀྱི་པདྨོར་ཕྱག་འཚལ་ཞིང་། །སྙིང་ནས་གུས་པས་གསོལ་བ་འདེབས། །འདི་གཟུངས་བླ་མེད་བྱང་ཆུབ་བར། །སྐྱབས་ཡུལ་གཞན་ན་མ་མཆིས་ཀྱི། །གཡེལ་མེད་ཐུགས་རྗེའི་སྤྱན་གྱིས་གཟིགས། །ལས་ཉོན་འགལ་རྐྱེན་བར་ཆད་བསེལ། །སྒོ་གསུམ་ཆོས་སུ་སྨིན་
གྲོལ་བས། །རང་གཞན་བྱང་ཆུབ་ལམ་འཁོད་མཛོད། །ཅེས་གསོལ་བ་རྩེ་གཅིག་ཏུ་གདབ་ཅིང་། སླར་ཡང་གསོལ་འདེབས་ཀྱི་བཟླས་པ་འདི་ལ་དུས་རྒྱུན་ལྡན་དུ་འབད་པར་བྱའོ། །ཨོཾ་ཨཱཿབཛྲ་གུ་་ཨ་ཡུཿཛྙཱ་ན་སིདྡྷི་ཧཱུྃ། ཞེས་ཐུགས་ཀའི་ཧཱུྃ་ཡིག་སྔགས་འཕྲེང་དང་བཅས་པ་ལ་སེམས་གཏད་ཅིང་མོས་གུས་ཆེན་པོའི་ངང་ནས་བཟླ། ཐུན་མཚམས་སོགས་ལ་སྨན་གྱི་དངོས་གྲུབ་བསྡུ་བའི་སྔགས་འདི་ཉིད་བཟླ་བར་སྤྲོ་ནའང་བརྒྱ་སྐོར་ཙམ་དུ་བཟླ་སྟེ། ཨོཾ་ཨཱཿཧཱུྃ་སྭཱ་ཧཱ། ཨ་མྲྀ་ཏ་ཛཱི་ཝནྟི་བྷེ་ཥ་ཛྱ་སརྦ་སིདྡྷི་ཧཱུྃ་ཧོཿ དེ་ནས་མཐའ་སྐོར་གྱི་མཁའ་འགྲོ་བཞི་གཙོ་བོ་ཉིད་དང་བཅས་པ་འོད་་ཀྱི་གོང་བུར་གྱུར་ནས་རང་ཉིད་ཀྱི་སྤྱི་བོར་ཐིམ་པས་དབང་བཞི་ཡོངས་རྫོགས་ཐོབ་ཅིང་། མཚོན་བྱེད་དཔེའི་བླ་མ་བསྒོམ་ཞིང་བསྒྲུབ་པ་དེ་དག་ཀྱང་མཚོན་བྱ་དོན་གྱི་བླ་མའི་སྤྲུལ་བསྒྱུར་ལས་མ་འདས་པའི་དོན་གྱི་སྙིང་པོ་རང་གི་རིག་པ་གསལ་ལ་དངོས་པོར་མ་གྲུབ་པ། སྟོང་ལ་ཧད་པོར་མ་སོང་བ། དེ་གཉིས་ཡ་བྲལ་དུ་མ་ཡིན་པའི་རང་སེམས་ཀྱི་འདུག་ཚུལ་ལམ་བབས་ཚུལ་ཇི་ལྟར་སྣང་བ་དེ་ཉིད་ཀྱི་ཐོག་ཏུ་བཟོ་བཅོས་དགག་སྒྲུབ་བློས་བྱས་གང་ཡང་མི་བྱ་བར། །རང་གི་རང་ངོ་རིག་ཙམ་དུ། །ལྷོད་དེ། ཤིག་གེ གུ་ཡངས་ཆམ་
མེ་བ་འཇོག་པ་ནི་ཡང་དག་དོན་གྱི་བླ་མའི་རྣལ་འབྱོར་མཐར་ཐུག་པ་ཡིན་ཏེ། རང་སེམས་རང་ངོ་རིག་པ་དེ་ཉིད་བླ་མ་ཆོས་སྐུའི་རང་ཞལ་མཇལ་བ་ཡིན་ཚེ། །དུས་དང་རྣམ་པ་ཀུན་ཏུ། །འགྲོ་འདུག །ཟ་ཉལ། སྐྱིད་སྡུག་ཉིན་མཚན་འཆི་ཁ་དང་བཅས་པའི་དུས་ཐམས་ཅད་དུ་རང་སེམས་གང་ཤར་རང་ངོ་རིག་པ་བྱ་བ་དང་མི་འབྲལ་བ་ནི། བཀའ་མདོ་བརྒྱུད་རྒྱུད་ལུང་མན་ངག་ཕྱག་རྫོགས་སོགས་ཀུན་གྱི་དགོངས་དོན་གཅིག་ཏུ་མཐུན་པའི་གནད་ཀྱི་སྙིང་པོ་དམ་པ་ལགས་ཤིང་། དེ་ལྟར་ཉམས་སུ་ལེན་པའི་ཚེ། བཟང་ངན་གྱི་རྣམ་པར་རྟོག་པ་ཅིག་ཁྱུགས་ཀྱི་བྱུང་བ་དང་། དེ་ལ་དགག་སྒྲུབ་སོགས་ཐབས་དང་གཉེན་པོ་གཞན་ཅི་ཡང་མི་བྱ་བར། རྣམ་རྟོགས་ཤར་བ་དེ་ཀ་རང་ངོ་ཧྲིག་གིས་རིག་པར་བྱ་བ་ཁོ་ནས་རྣམ་རྟོགས་ཁོ་རང་རང་གྲོལ་དུ་འགྲོ་བ་ཆོས་ཉིད་ཡིན་པས་ན། བཅོས་བསླད་གཞན་གང་ཡང་མི་དགོས་པ་ལགས་པས་དེ་ལྟར་ཐུགས་དགོངས་ཟབ་མོར་བཅགས་ངོས། དགེ་སྦྱོར་གང་བྱེད་ཕ་མ་སེམས་ཅན་མཁའ་ཁྱབ་ཐམས་ཅད་རྫོགས་བྱང་ཐོབ་སླད་ཁོ་ནར་དམིགས་ནས། སྒོ་གསུམ་སྒོམས་ལས་སུ་ལུས་པར་དལ་འབྱོར་དོན་ཡོད་དུ་མཛད་འཚལ། དེ་ལྟར་བྱིན་རླབས་བླ་སྒྲུབ་ཀྱི་བླ་མའི་རྣལ་འབྱོར་རྩ་བ་གསུམ་གཅིག་དྲིལ་དུ་སྒྲུབ་
པའི་ཉམས་ལེན་རྒྱུན་ཁྱེར་འདི་ཉིད། འཚོ་མཛད་བསོད་ནམས་རབ་བརྟན་གྱི་དོན་དུ། རྗེ་བཙུན་སོག་ཟློག་པ་ཆེན་པོའི་ཞལ་གདམས་ལས་བྱུང་བ་ལྟར་བཀོད་པ་དགེ། ༈ །།ཧཱུྃ། ཆོས་སྐུ་ཀུན་བཟང་སྣང་མཐའི་དབྱིངས་ཆེན་ལས། །ལོངས་སྐུ་རྡོར་འཆང་རིགས་ལྔའི་ཉ་རྒྱས་ཤར། །སྤྲུལ་སྐུ་གདུལ་བྱའི་རོལ་མཚོར་ཤཱཀ་ཐུབ་ཚུལ། །དབྱེར་མེད་པདྨ་འབྱུང་གནས་སྤྱི་བོས་མཆོད། །མ་དག་སྣང་ངོར་དུག་ལྔའི་རྒྱུ་འབྲས་ཀུན། །དག་པ་ཆེན་པོའི་རང་བཞིན་གཟུགས་ཀྱི་སྐུ། །ཐོད་ཕྲེང་རིག་ལྔ་ཡེ་ཤེས་རང་གསལ་ལྷ། །གསོལ་འདེབས་བྱིན་རླབས་ཆར་ཆེན་དབབ་ཏུ་གསོལ། །རྣམ་ཤེས་ཚོགས་བརྒྱད་གནས་དག་སྤྲུལ་པ་བརྒྱད། །གང་འདུལ་དེར་སྣང་ཆ་ལུགས་སྒྱུ་འཕྲུལ་གཟུགས། །སྣ་ཚོགས་ངོ་མཚར་ཕྲིན་ལས་མཚན་བརྒྱད་ཤར། །གསོལ་འདེབས་བྱིན་རླབས་ཆར་ཆེན་དབབ་ཏུ་གསོལ། །དྷ་ན་ཀོ་ཤའི་མཚོ་གླིང་པད་སྡོང་ལས། །མཚན་དཔེ་ཡོངས་རྫོགས་ལོངས་སྐུའི་ཆ་བྱད་བལྟམས། །སྐལ་ལྡན་རྒྱལ་པོ་རེ་སྐོངས་
པད་འབྱུང་ལ། །གསོལ་འདེབས་བྱིན་རླབས༴ །རྒྱལ་སྲིད་ཆོས་ཀྱིས་བསྐྱངས་ནས་སྨིན་གྲོལ་བཀོད། །དུར་ཁྲོད་གནས་བྱོན་མཁའ་འགྲོའི་ཚོགས་དཔོན་མཛད། །པདྨ་རྒྱལ་པོ་ཁམས་གསུམ་དབང་སྡུད་རྗེ། །གསོལ་འདེབས༴ །ཤེས་བྱའི་ཆོས་ཀུན་མཁྱེན་པའི་རྩེ་མོར་སོན། །འཆི་མེད་འཇའ་ལུས་རྡོ་རྗེའི་ཚེ་དབང་གྲུབ། །བློ་ལྡན་མཆོག་སྲེད་མཁས་པའི་གཙུག་གི་རྒྱན། །གསོལ་འདེབས༴ །རྫུ་འཕྲུལ་ཐབས་ཀྱི་ཟ་ཧོར་རྒྱལ་ཁམས་བཏུལ། །པ་ཆེན་ལྔ་བརྒྱའི་དབུས་ན་ཟླ་མེད་ཀྱི། །སྨྲ་བའི་སེང་གེ་པདྨ་སམ་བྷ་ཝ། །གསོལ་འདེབས༴ །གནས་ཆེན་བརྒྱད་དུ་དཔའ་བོ་ཆེན་པོའི་གཟུགས། །མི་འཇིགས་བརྟུལ་ཞུགས་རོལ་པས་འགྲོ་བ་འདུལ། །ཉི་མ་འོད་ཟེར་ཧེ་རུ་ཀ་དཔལ་མཆོག །གསོལ་འདེབས་བྱིན༴ །རྡོ་རྗེའི་གདན་དུ་སྟོན་པའི་རྒྱལ་ཚབ་མཛད། །ལོག་པར་སྨྲ་བའི་ལྟ་སྒྲུབ་ངན་པ་བསྣུབས། །ཤཱཀྱ་སེང་གེ་བསྟན་པའི་རྒྱལ་མཚན་འཛིན། །
གསོལ་འདེབས༴ །ཕྱི་རོལ་མུ་སྟེག་གདུག་པའི་ངན་སྔགས་དང་། །ལོག་པའི་རྫུ་འཕྲུལ་ཐུགས་རྗེའི་མཐུ་ཡིས་བསྒྲལ། །སེང་གེ་སྒྲ་སྒྲོག་བདུད་ལས་རྣམ་པར་རྒྱལ། །གསོལ་འདེབས༴ །གངས་ཅན་བོད་ཡུལ་ལྷ་སྲིན་དྲེགས་པའི་ཚོགས། །གཏུམ་དྲག་བརྔམ་པའི་སྤྲུལ་བསྒྱུར་དུ་མས་བཏུལ། །རྡོ་རྗེ་གྲོ་ལོད་གདུལ་དཀའ་འདུལ་བའི་དཔལ། །གསོལ་འདེབས༴ །སྒྲུབ་གནས་བྱིན་རླབས་ཆོས་གཏེར་འཇིག་རྟེན་བཀང་། །བོད་ཁམས་སྨིན་མཛད་ལྷོ་ནུབ་རྔ་ཡབ་གཤེགས། །སྲིན་པོའི་ཁ་གནོན་སྐྱེ་འགྲོའི་སྐྱབས་གཅིག་པུ། །གསོལ་འདེབས་བྱིན༴ །བསྐལ་བཟང་རྒྱལ་བ་སྟོང་གི་བསྟན་པའི་ཡུན། །དེ་སྲིད་རྣམ་འཕྲུལ་དུ་མས་འགྲོ་བ་འདྲེན། །རྒྱལ་ཀུན་ཕྲིན་ལས་གཅིག་བསྡུས་གུ་རུ་རྗེ། །གསོལ་འདེབས་བྱིན་རླབས་ཆར་ཆེན་དབབ་ཏུ་གསོལ། །བདག་སོགས་མཁའ་ཁྱབ་སེམས་ཅན་སྡུག་བསྔལ་ཅན། །རེ་ས་གཞན་མེད་ཁྱེད་ཀྱི་སྐྱོབས་མཛོད་ལ། །བར་ཆད་ཀུན་ཞི་ཆོས་ཀྱི་བསམ་དོན་འགྲུབ། །པད་འབྱུང་སྐུ་གསུང་ཐུགས་དང་གཉིས་
མེད་མཛོད། །རྒྱལ་བ་རབ་འབྱམས་ཐུགས་རྗེའི་བདག་ཉིད་ཀུན། །གཅིག་བསྡོམས་གདུལ་དཀའི་འགྲོ་བ་འདྲེན་པའི་དཔལ། ཁྱབ་བདག་པདྨའི་གོ་འཕངས་བདག་འགྲུབ་ནས། །འཁོར་བ་དོང་སྤྲུག་ཆོས་ཉིད་ཀློང་གྲོལ་ཤོག །ཅེས། ཨོ་རྒྱན་རིན་པོ་ཆེ་སྐུ་གསུམ་རིགས་ལྔ་མཚན་བརྒྱད་ལ་གསོལ་བ་འདེབས་པ་འདི་ནི་དབོན་པོ་བསྟན་པ་རིག་འཛིན་མཆེད་བཅས་ཀྱི་བསྐུལ་ངོར་བཀོད་པའོ། །གདོད་མའི་ཡེ་ཤེས་བྲི་གང་བྲལ་བའི་གནས་ལུགས་དོན། །མཁས་མང་ཀུན་དང་གྲུབ་པ་མཆོག་བརྙེས་མ་ལུས་ཀྱིས། །ཡང་དག་གཟིགས་པའི་དྲི་བྲལ་པདྨའི་ཆོས་ཉིད་ལྟར། །ཡོན་ཏན་ལེགས་རྫོགས་མཆོག་དངོས་གྲུབ་པའི་རྒྱུར་གྱུར་གང་། །སྤྲོས་ཀུན་ཞི་ཡང་འགགས་མེད་རང་རྩལ་བསམ་ཡས་འཕྲོ། །ཕྲིན་ལས་རྣམ་པར་རོལ་པའི་བདག་ཉིད་རིག་པའི་སྐུ། །ལོག་རྟོག་འཕྲུལ་འཛིན་སྐྱོན་ལས་རྣམ་པར་རབ་རྒྱལ་བས། །སྣ་ཚོགས་སྣང་བའི་བདེན་ཞེན་རང་གྲོལ་གཉུགས་མའི་གཤིས། །གཟོད་མ་ཉིད་ནས་རང་
ལ་རང་ཆས་གཉིས་མེད་བཞིན། །གཉིས་སུ་བཟུང་བས་ཀུན་རྟོགས་ཕྱིར་ལྟའི་ར་རི་ཀུན། །ད་ནས་རབ་ཞི་རང་དག་ཆེན་པོའི་ངེས་ཤེས་ཀྱི། །རང་རིག་བླ་མར་རང་བབས་ངང་ནས་གསོལ་བ་འདེབས། །ཐ་དད་མིན་ལ་ཐ་དད་འཛིན་པའི་རྨི་ལམ་དང་། །འདུ་འབྲལ་མེད་ལ་འདུས་ཤིང་འབྲལ་སྣང་ཉིང་འཁྲུལ་ཚོགས། །རང་རིག་བླ་མ་ཀུན་ཁྱབ་ཆོས་སྐུར་སྒྲིབ་མུན་ལ། །བསལ་བཞག་བྲལ་བའི་ཡེ་ཤེས་སྣང་བས་ཁྱབ་མཛད་གསོལ། །གསོལ་བ་འདེབས་ཡུལ་འདེབས་བྱེད་མཁན་པོ་བྱ་རྩོལ་གྱི། །དམིགས་མཚོན་འཇུར་མདུད་ནམ་མཁར་ལྟོས་འགྲོའི་མདུད་ལྟར་གྲོལ། །བླ་མེད་བླ་མའི་གོ་འཕངས་མཆོག་ལ་མཁའ་མཉམ་གྱི། །མ་རྒན་མཐའ་དག་རབ་འགོད་སྲིད་ཞི་གཏན་སྒྲོལ་ཤོག །ཅེས་པ་འདི་ནི། རྒྱལ་བའི་སྤྱི་གཟུགས་མཆོག་གི་སྤྲུལ་སྐུ་བཟང་པོའི་ཞབས་ཀྱི་གསུང་གི་རྒྱུ་འཕྲུལ་ལས། །བདག་རྒན་པོ་ལ་གསོལ་བ་འདེབས་རྒྱུ་མིང་གི་ཕྲེང་བས་བཀྲ་བར་བགྱིས་པ་དགོས་ཞེས་བཀའ་སྩལ་བར་བརྟེན་
དེ་ལྟ་བུའི་དངོས་དོན་ནི་སངས་རྒྱས་ཀྱི་སེམས་ཅན་ལ་གསོལ་བ་གདབ་པར་འགྲོ་བས་ན་འོས་ཤིང་འཚམས་པའི་དོན་པོར་མ་གྱུར་ལ། འོན་ཏེ་མ་ཕུལ་ནའང་བཀའི་ཆུ་ཀླུང་བཟློག་པའི་རྟེན་འབྲེལ་ལོག་མིན་དུ་འགྱུར་དོགས་པས། དེ་བས་ན་གསུང་གི་གསང་བའི་འདུ་འགོད་འདི་ལ་བསམ་མི་ཁྱབ་ཀྱི་དགོངས་པ་གཞན་དག་ཡོད་པར་གོར་མ་ཆགས་སོ་ཞེས་རང་ཉིད་ལ་རང་བློས་མོས་པ་བགྱིས་ནས། གནས་འདི་ལྟ་བུ་ལ་སྤྱིའི་དོན་དང་ཡི་གེའི་དོན་གྱི་འཇུག་པར་མི་རུང་གི སྦས་པའི་དོན་དང་མཐར་ཐུག་ཀྱི་དོན་ལས་བརྩམས་ཏེ། བླ་མ་ཆོས་ཀྱི་སྐུ་ལ་གསོལ་བ་འདེབས་པའི་བརྡ་དོན་ལ་རང་མིང་གི་ཕྲེང་བས་ཀྱང་མཚོན་པར་བྱས་ནས་ཕུལ་བ་ལ་སྒྲིབ་པར་མ་གྱུར་ཅིག །ན་མོ་གུ་རུ་རཏྣ་བྷྱཿ དཔག་ཏུ་མེད་པའི་མཁྱེན་བརྩེ་དང་། །མི་ཟད་ཐུགས་རྗེའི་གཏེར་མངའ་བ། །སྐྱབས་གནས་དཀོན་མཆོག་བླ་མ་ལ། །བདག་ཉིད་གུས་པས་སྐྱབས་སུ་མཆི། །ཐོག་མ་མེད་ནས་ལས་ཉོན་གྱིས། །འཁོར་བའི་རྒྱ་མཚོ་རབ་བྱིང་ཞིང་། །སྡུག་བསྔལ་རྒྱུ་དང་འབྲས་བུས་མནར། །ཉམ་ཐག་བདག་ལ་ཐུགས་རྗེས་གཟིགས། །དལ་འབྱོར་འཛོམ་པའི་ལུས་ཐོབ་ཀྱང་། །དམ་ཆོས་
ཚུལ་བཞིན་མི་སྒྲུབ་པར། །ཟིན་མེད་འཇིག་རྟེན་བྱ་བས་གཡེངས། །སྐལ་དམན་བདག་ལ་ཐུགས་རྗེས་གཟིགས། །ལང་ཚོའི་ཉི་མ་ནུབ་རིར་གཞོལ། །ནམ་འཆི་ཆ་མེད་ཡ་ང་བར། །ཕྱི་མའི་གཏན་འདུན་མི་འགྲུབ་པའི། །ལས་ངན་བདག་ལ་ཐུགས་རྗེས་གཟིགས། །སྒྱུ་མའི་ཕུང་པོ་སོར་བའི་ཚེ། །འཁོར་བ་གར་སྐྱེས་སྡུག་བསྔལ་ལས། །ནམ་ཡང་བདེ་བ་མི་འབྱུང་ན། །སྐྱབས་མེད་བདག་ལ་ཐུགས་རྗེས་གཟིགས། །རྟག་ཏུ་སྒོ་གསུམ་དམ་ཆོས་ལ། །སེམས་ཀྱང་འཁོར་བའི་བག་ཆགས་ཤུགས། །ཨ་འཐས་འཁྲུལ་པའི་མགོ་འཁོར་གྱིས། །རྨོངས་པ་བདག་ལ་ཐུགས་རྗེས་གཟིགས། །དུས་གསུམ་དྲི་མེད་ཀུན་མཁྱེན་པའི། །བླ་མ་མཆོག་དང་སངས་རྒྱས་སྲས། །སྐྱབས་གནས་ལྷ་ཡི་ལྷ་མཆོག་རྣམས། །དད་ལྡན་བདག་ལ་ཐུགས་རྗེས་གཟིགས། །རེ་སའི་སྐྱབས་མཆོག་བླ་མ་ལ། ཁ་ཞེ་མེད་པའི་མོས་གུས་ཀྱིས། །གསོལ་བ་རྩེ་གཅིག་འདེབས་ལགས་ན། །ཐུགས་རྗེའི་ཆར་ཆེན་དབབ་ཏུ་གསོལ། །ལས་ཉོན་
སྡིག་སྒྲིབ་བྱང་བ་དང་། །རྐྱེན་ངན་བར་ཆད་ཀུན་ཞི་ཞིང་། །ཆོས་མཐུན་འདོད་དགུ་མྱུར་འགྲུབ་ནས། །ལམ་སྣ་ཟིན་པར་བྱིན་གྱིས་རློབས། །བླ་མ་སངས་རྒྱས་བྱང་སེམས་དང་། །ཡི་དམ་མཁའ་འགྲོ་ཆོས་སྲུང་ཚོགས། །མ་ལུས་ཐུགས་རྗེའི་ནུས་སྟོབས་ཀྱིས། །གསོལ་བ་བཏབ་དོན་འགྲུབ་པར་ཤོག །ཅེས་པ་འདི་ནི། གནས་ཆེན་པོ་ལྷ་ཞོལ་ནཱ་ག་ཀོ་ཊའི་ཕོ་བྲང་དམ་པ་ནས། རྒྱལ་སྲས་སྤྲུལ་པའི་སྐྱེད་ཡུམ་རྡོ་རྗེ་བུ་ཁྲིད་ཀྱི་བཞེད་པ་སྐོངས་ཕྱིར་མཐའ་ཁོབ་ཀྱི་རི་ཁྲོད་ནས་ཕུལ་བ་དགེ མ་ལུས་རྒྱལ་བའི་དཀྱིལ་འཁོར་བསམ་ཡས་ཀུན། །དབྱེར་མེད་རྡོ་རྗེའི་སློབ་དཔོན་སྐུར་རྫོགས་པའི། །ངོ་མཚར་རྣམ་ཐར་རྒྱན་གྱི་རོལ་པ་ལ། །བདག་ཡིད་དད་པས་གསོལ་བ་སྙིང་ནས་འདེབས། །འོད་དཔག་མེད་མགོན་ཆོས་སྐུའི་རང་མདངས་ལས། །སྤྱན་རས་གཟིགས་དབང་གཟུགས་སྐུའི་འོད་དཀར་ཤར། །པདྨ་འབྱུང་གནས་སྤྲུལ་སྐུ་ཆུ་ཟླའི་གར། །གདུལ་བྱའི་ཞིང་ཀུན་ཁྱབ་ལ་གསོལ་བ་འདེབས། །
མངལ་སྐྱོན་དྲི་བྲལ་པདྨའི་ལྷུམས་ལས་འཁྲུངས། །རྒྱལ་པོའི་སྲས་མཛད་རྒྱལ་ཁམས་ཆོས་ལ་བཀོད། །གནས་ཆེན་དུར་ཁྲོད་བརྟུལ་ཞུགས་རྩལ་གྱིས་བཅགས། །དཔའ་བོ་མཁའ་འགྲོའི་གཙོ་ལ་གསོལ་བ་འདེབས། །ཤཱཀྱའི་བསྟན་བཞུགས་རིག་པའི་གནས་ཀུན་མཁྱེན། །འཆི་མེད་སྐུ་གྲུབ་བདུད་དང་མུ་སྟེགས་བཏུལ། །ཆོས་ཀྱི་སྒྲོན་མེས་རྒྱལ་བསྟན་གསལ་བར་མཛད། །སྟོན་པའི་རྒྱལ་ཚབས་མཆོག་ལ་གསོལ་བ་འདེབས། །གངས་ཅན་བོད་དུ་གདུག་པའི་འདྲེ་སྲིན་བཏུལ། །ས་གཞི་བྱིན་རླབས་གཙུག་ལག་འདུས་སྡེས་བཀངས། །དུས་གསུམ་ལུང་བསྟན་ཟབ་གཏེར་ཆོས་མཛོད་གཏམས། །སྙིགས་མཐའི་འགྲོ་མགོན་མཆོག་ལ་གསོལ་བ་འདེབས། །རྔ་ཡབ་གླིང་བྱོན་སྲིན་པོའི་ཁ་གནོན་བཞུགས། །དུས་བཟང་ཚེས་བཅུར་སྤྲུལ་པས་བོད་ཁམས་འགེངས། །ནམ་མཁས་གར་ཁྱབ་ཐུགས་རྗེའི་བཀོད་པས་ཁྱབ། །སྐྱབས་གནས་ཀུན་འདུས་རྗེ་ལ་གསོལ་བ་འདེབས། །
རིས་མེད་བསྟན་ལ་སྤྲུལ་པའི་མཛད་ཕྲིན་ནི། །བསམ་མི་ཁྱབ་ཀྱང་བདག་སོགས་འདུལ་སྐལ་དུ། །སྙིགས་དུས་འདྲེན་མཆོག་འཛམ་གླིང་གྲགས་པ་ཉིད། །སྤྲུལ་པའི་འཕྲེང་བར་བྱོན་ལ་གསོལ་བ་འདེབས། །ཐམས་ཅད་ངོ་བོ་རྩ་བའི་བླ་མའི་སྐུར། །ལྷུན་གྱིས་རྫོགས་ལ་ངེས་ཤེས་རྩེ་གཅིག་གིས། །དུས་གསུམ་རྒྱུན་དུ་གསོལ་བ་འདེབས་པའི་བུ། །བརྩེ་བས་སྐྱོང་ཞིང་བྱིན་གྱིས་བརླབས་ཏུ་གསོལ། །འདི་ནས་མཐར་ཐུག་བྱང་ཆུབ་མ་ཐོབ་བར། །དེ་སྲིད་སྐྱབས་གནས་བླ་མ་མཆོག་ཁྱེད་ཀྱི། །གདུལ་བྱར་གྱུར་ནས་སྒོ་གསུམ་སྨིན་ཅིང་གྲོལ། །རང་གཞན་དོན་ཀུན་ཆོས་ཀྱིས་འགྲུབ་པར་ཤོག །ཅེས། ཨོ་རྒྱན་རིན་པོ་ཆེ་ལ་རྣམ་ཐར་གྱི་སྒོ་ནས་གསོལ་བ་འདེབས་པ་མདོར་བསྡུས་འདི་ནི། སྐྱབས་མཆོག་རྒྱལ་བའི་སྤྱི་གཟུགས་བཟང་པོའི་ཞབས་ཀྱི་ཕྱག་ཕྱི་བ་བསོད་ནམས་རབ་མཛེས་པས་བསྐུལ་ངོར་བཀོད་པའོ། །ཨོཾ་ཨཱཿཧཱུྃ ཀུན་ཁྱབ་ཆོས་དབྱིངས་དག་པའི་སྣོད་ཆེན་པོར། །རང་རིག་
ལྷན་སྐྱེས་ཡེ་ཤེས་བདུད་རྩིས་བཀང་། །ཚོགས་དྲུག་འདོད་ཡོན་འཛིན་མེད་རང་གྲོལ་གྱི། །མཆོད་པ་འཁོར་འདས་དུས་གསུམ་ཡོངས་ཁྱབ་འདི། །ཕྱོགས་བཅུའི་རྒྱལ་བ་ཀུན་གཙོ་སྨན་གྱི་བླ། །རིགས་ལྔ་ཡི་དམ་ལྷ་ཚོགས་མཁའ་འགྲོ་མ། །དྲང་སྲོང་རིག་འཛིན་བརྒྱུད་བཅས་བཀའ་སྲུང་ཚོགས། །མཆོད་འོས་སྐྱབས་གནས་མ་ལུས་མཆོད་པར་བགྱི། །རང་ལུས་སྣང་སྟོང་རྟ་ཕག་ཡབ་ཡུམ་དང་། །སེམས་ཉིད་གདོད་མའི་ཡེ་ཤེས་གུ་་རྗེ། །འགག་མེད་རིག་རྩལ་རྣམ་རོལ་ཌཱ་ཀིར་བཅས། །རང་རིག་འདུ་འབྲལ་མེད་པའི་བདུད་རྩིས་མཆོད། །ཕྱི་ནང་སྣོད་བཅུད་རྒྱལ་བའི་དཀྱིལ་འཁོར་ལ། །དངོས་འབྱོར་ཡིད་སྤྲུལ་ཟག་མེད་བདུད་རྩི་ཡི། །མཆོད་པ་ཕུལ་བས་བདག་སོགས་འགྲོ་བ་ཀུན། །དམ་ཆོས་བདུད་རྩིས་སྨིན་ཅིང་གྲོལ་བར་ཤོག །ཅེས། གསོ་བ་རིག་པ་འཛིན་པ་རྣམས་ལ་ཕན་ཕྱིར། བླ་སྒྲུབ་སྡུག་བསྔལ་མུན་སེལ་དང་མཐུན་པའི་ཇ་མཆོད་འདི་ཉིད་བླ་མ་དྲུང་འཚོ་བ་གཞན་ཕན་བཟང་པོས་བསྐུལ་བར་མཛད་
པའི་ངོར་བཀོད་པ་དགེ་ལེགས་འཕེལ། །ཨེ་མ། གདོད་མའི་ཁྱབ་བདག་ཀུན་བཟང་རྡོ་རྗེ་འཆང་། །འོག་མིན་ཞིང་དུ་སྨན་རྒྱལ་རིགས་ལྔར་བསྟན། །བཻ་ཌཱུརྱ་ཞིང་མཆོག་སྤྲུལ་སྨན་གྱི་བླ། །དབྱེར་མེད་མ་ཧཱ་གུ་ར་གསོལ་བ་འདེབས། །དཔལ་ལྡན་འཕྲེང་བ་ཀླུ་སྒྲུབ་དཔའ་བོ་དང་། །འཚོ་བྱེད་གཞོན་ནུ་སྐྱེས་བུ་མེ་ལྷ་སོགས། །འཕགས་ཡུལ་འཆི་མེད་དགོས་འདོད་སྩོལ་མཁས་ཀུན། །གཅིག་བསྡུས་མ་ཧཱ་གུ་ར་གསོལ་བ་འདེབས། །པདྨ་འབྱུང་གནས་དམ་པ་སངས་རྒྱས་དང་། །ཟླ་འོད་གཞོན་ནུ་མཉམ་ཉིད་རྡོ་རྗེ་སོགས། །སྙིགས་དུས་འགྲོ་བའི་སྐྱབས་མགོན་ཐམས་ཅད་ཀྱི། །ངོ་བོ་མ་ཧཱ་གུ་ར་གསོལ་བ་འདེབས། །འགྲོ་བའི་ལས་ཉོན་རྒྱུ་འབྲས་ཟུག་རྔུ་ཀུན། །སེལ་མཛད་གསོ་རིག་བརྒྱུད་པའི་བླ་མ་དང་། །དྲིན་ཅན་རྩ་བའི་བླ་མར་བཅས་རྣམས་ཀྱི། །སྤྱི་གཙུག་མ་ཧཱ་གུ་ར་གསོལ་བ་འདེབས། །བདག་དང་མཁའ་མཉམ་ཕ་མ་སེམས་ཅན་རྣམས། །
དུག་གསུམ་ནད་དང་འཁྲུལ་པའི་དོན་གྱིས་གཟིར། །འདི་ལས་སྐྱོབས་མཛད་སྐྱབས་མཆོག་བླ་མ་རྗེ། །བརྩེར་གཟིགས་བྱང་ཆུབ་གོ་འཕངས་ལ་འགོད་གསོལ། །ཨོཾ་ཨཱཿཧཱུྃ་མ་ཧཱ་གུ་རུ་གུ་་སིདྡྷི་ཧཱུྃ། ཞེས་པ་འདི་ཡང་འཚོ་མཛད་གཞན་ཕན་བཟང་པོས་བསྐུལ་བ་དོན་ལྡན་དུ་བགྱིས་པའོ། །ཕྱོགས་དུས་རྒྱལ་བ་སྲས་བཅས་མ་ལུས་པའི། །ཐུགས་རྗེ་མཉམ་མེད་འཛམ་གླིང་གྲགས་པའི་སྐུར། །གཅིག་བསྡུས་དཔལ་ལྡན་ཕྲིན་ལས་བཟང་པོའི་ཞབས། །དད་བརྒྱའི་གཙུག་འཚོར་རྡོ་རྗེའི་སྐུ་བརྟན་ཞིང་། །རང་རིག་དངོས་སྟོན་ཡོངས་འཛིན་ཐུགས་རྗེའི་བདག །འགྲོ་ཀུན་བདེ་ཆེན་ཡེ་ཤེས་དབང་བསྒྱུར་གྱི། །ཕྲིན་ལས་ཞི་དྲག་དུ་མས་ཆོས་ཉིད་གཞིར། །ཀློང་གྲོལ་རྣམ་འདྲེན་མཆོག་ལ་གསོལ་བ་འདེབས། །སྣ་ཚོགས་གདུལ་བྱའི་སྐལ་བ་དང་མཐུན་པར། །རང་གྲོལ་ཕྱག་རྒྱ་ཆེན་པོའི་དངོས་གྲུབ་ཀྱིས། །བདག་སོགས་མཁའ་མཉམ་འགྲོ་ཀུན་སྨིན་མཛད་དེ། །ཚེ་གཅིག་
སངས་རྒྱས་ཐོབ་ནས་གང་འདུལ་གྱི། །རྣམ་འཕྲུལ་བསྟན་པའི་སྒྲོན་མེ་འགྱེད་པར་ཤོག །ཅེས། དད་པའི་ཡུལ་གྱུར་རྣམ་པ་གསུམ་ལ་གསོལ་བ་འདེབས་པ་སྨོན་ལམ་གྱི་མཐའ་རྟེན་དང་བཅས་པ་ཉུང་ངུར་བསྡུས་པ་དགོས་ཞེས། དད་ལྡན་མ་ི་བྷ་དྲས་བསྐུལ་བ་ལྟར་བཀོད་པ་སྟེ་མཚན་རྣམས་མཚལ་ཡིག་ཏུ་བྲིས་པ་ལས་ཤེས་པར་བྱ་རྒྱུའོ། །ན་མོ་གུ་རུ་རཏྣ་སརྦ་སིདྡྷི་ཧཱུྃ། ཕྱོགས་བཅུུའི་སངས་རྒྱས་བྱང་སེམས་ཡི་དམ་ལྷ། །བླ་མ་བརྒྱུད་བཅས་མཁའ་འགྲོ་ཆོས་སྐྱོང་སོགས། །མཚན་དང་རྣམ་འགྱུར་ཆ་ལུགས་ཅིར་བསྟན་ཡང་། །རྩ་བའི་བླ་མའི་ངོ་བོར་ཐག་ཆོད་པའི། །ངེས་ཤེས་དད་པས་ཕྱག་འཚལ་སྐྱབས་སུ་མཆི། །བདག་གི་སྒོ་གསུམ་མཎྜལ་མཆོད་པར་འབུལ། །དམ་ཚིག་ཉམ་ཆག་ཅི་མཆིས་སྙིང་ནས་བཤགས། །ཅི་མཛད་ལེགས་པར་མཐོང་བའི་ཡི་རང་འབུལ། །མཁའ་མཉམ་འགྲོ་ལ་ཐུགས་རྗེའི་ཆོས་འཁོར་བསྐུལ། །སྐྱེ་འཆི་འཕོ་འགྱུར་བྲལ་བའི་སྐུར་བཞུགས་གསོལ། །བདག་གིས་དགེ་བའི་རྩ་བ་གང་བསགས་
ཀུན། །རྗེ་བཙུན་ཁྱེད་ཀྱི་ཐུགས་དགོངས་རྫོགས་ཕྱིར་བསྔོའོ། །འདི་ཕྱི་བར་དོ་ཚེ་རབ་ཀུན་ཏུ་ནི། །སྐྱིད་སྡུག་ལེགས་ཉེས་བཟང་ངན་ཅི་བྱུང་ཡང་། །དྲིན་ཅན་སྐྱབས་མཆོག་ཁྱེད་ཉིད་མ་གཏོགས་པ། །རེ་ཡུལ་གཞན་ནས་མེད་པས་གསོལ་བ་འདེབས། །དམིགས་མེད་ཐུགས་རྗེ་ཕྱོགས་རིས་མེད་ན་ཡང་། །གསོལ་འདེབས་བུ་ལ་ལྷག་པར་བརྩེ་བ་ཅན། ཁྱོད་ཀྱི་ཐུགས་དགོངས་ཟག་མེད་མཁའ་ལོང་ལས། །བྱིན་རླབས་རྒྱུན་ཆད་མེད་པའི་དངོས་གྲུབ་སྩོལ། །དམ་ཆོས་སྙིང་པོ་སྐྱེད་རྫོགས་ཟུང་འཇུག་དོན། །ཐེག་པའི་ཡང་རྩེ་རྫོགས་པ་ཆེན་པོའི་བཅུད། །བདག་རྒྱུད་སྨིན་ཅིང་གྲོལ་བའི་བཀའ་དྲིན་སྩོལ། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །ལམ་ལོག་འཁྲུལ་པའི་བར་ཆད་མི་འབྱུང་ཤོག །བདག་འཛིན་ཆགས་སྡང་ཞེན་པས་མི་འཆིང་ཤོག །ས་ལམ་ཉམས་རྟོགས་ཡོན་ཏན་མཐར་ཕྱིན་ཤོག །སྐུ་གསུམ་མངོན་གྱུར་འགྲོ་དོན་ལྷུན་གྲུབ་ཤོག །ཅེས་པ་འདི། བླ་མ་ཤཱཀྱ་བསྟན་འཕེལ་གྱིས་བསྐུལ་བར་མཛད་པའི་ངོར་
རྒོད་ཕུག་བྲག་གི་ཡང་དབེན་དུ་བྲིས་པའི་དགེ་ལེགས་བཀྲ་ཤིས་ཀྱི་ཆེན་དང་ལྡན་གདུལ་བྱའི་ཞིང་ལ་འབབས་པར་གྱུར་ཅིག །རང་གི་སྤྱི་གཙུག་འཇའ་འོད་འཁྱིལ་བའི་ཀློང་། །པདྨ་ཉི་ཟླ་བརྩེགས་པའི་གདན་གྱི་སྟེང་། །དྲིན་ཅན་རྗེ་བཙུན་རྩ་བའི་བླ་མ་ཉིད། །ཨོ་རྒྱན་སློབ་དཔོན་པདྨའི་ཆ་ལུགས་ཅན། །པད་ཞྭ་རྒོད་ལྡེམ་དར་དཔྱང་དབུ་ལ་མཛེས། །ཕོས་ཀ་ཆོས་གོས་བེར་གྱི་ན་བཟས་བརྗིད། །རྡོ་རྗེ་ཐོད་པ་ཁ་ཊྭཱཾ་ཕྱག་མཚན་བསྣམས། །དཀར་དམར་མདངས་ལྡན་ཞི་འཛུམ་མཛེས་པའི་སྐུ། །རྡོ་རྗེ་སྐྱིལ་ཀྲུང་བག་དྲོ་ལྷུན་ཆགས་བཞུགས། །སྣང་ལ་རང་བཞིན་མ་གྲུབ་འོད་ཀྱི་སྐུའི། །སྤྱི་བོ་མགྲིན་པ་སྙིང་གའི་གནས་གསུམ་ལ། །འཇའ་འོད་ལྔ་ལྡན་ཐིག་ལེ་རེ་ཡི་ནང་། །ཨོཾ་དཀར་ཨཱཿདམར་ཧཱུྃ་མཐིང་གསུམ་གྱིས་མཚན། །སྐྱབས་གནས་ཀུན་འདུས་མ་ཧཱ་གུ་རུ་ལ། །བདག་གི་སྒོ་གསུམ་གཏན་འདུན་མཆོད་པར་འབུལ། །འདི་བཟུང་བྱང་ཆུབ་བར་དུ་ཐུགས་རྗེས་བཟུང་། །ཚེ་གཅིག་སངས་རྒྱས་
འགྲུབ་པའི་དངོས་གྲུབ་སྩོལ། །ཅེས་མོས་པས་བསྐྱེད་ལ། བར་འདིར་གསོལ་འདེབས་ལེའུ་བདུན་དང་གཞན་ཡང་གུ་རུའི་གསོལ་འདེབས་གང་མང་། རྩ་བའི་བླ་མའི་གསོལ་འདེབས་སོགས་ཇི་ཙམ་ནུས་པ་བྱས་ལ། དེ་ནས་ཉམས་ལེན་དངོས་ནི། སྤྱི་བོའི་བླ་མ་ལ་མོས་གུས་རྩེ་གཅིག་མ་ཡེངས་པའི་ངང་ནས་གསལ་འདེབས་ཀྱི་སྔགས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་ཉིན་མཚན་འགྲོ་འདུག་ནམ་དུའང་རྒྱུན་མ་ཆད་པར་བཟླས་པས་ཆོག་ཅིང་། །སྐབས་སྐབས་སུ་བླ་མའི་གནས་གསུམ་གྱི་ཡིག་འབྲུ་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པ་རང་གི་སྤྱི་བོ་མགྲིན་པ་སྙིང་ག་གསུམ་དུ་ཐིམ་པས། སྐུ་གསུང་ཐུགས་ཀྱི་བྱིན་བརླབས་དང་དབང་བཞི་ཡོངས་རྫོགས་ཐོབ་པའི་མོས་པ་བྱ། །གཞན་ཡང་དུས་རྟག་ཏུ་བླ་མ་སྤྱི་བོར་འབྲལ་མེད་བཞུགས་པ་ལ་མོས་གུས་ཁ་ཞེ་མེད་པར་རྩེ་གཅིག་ཏུ་བྱ་བ་དང་། ཁྱད་པར་འཇིགས་སྐྲག །ན་ཚ། རྐྱེན་ངན། སྡུག་བསྔལ། འཆི་བ་དང་བཅས་པ་ཅི་བྱུང་ཀྱང་དེ་མ་ཐག་བླ་མ་དྲན་པར་བྱས་ལ་སེམས་གཞན་དུ་མ་ཡེངས་བར་བློ་ཁེལ་བ་གཅིག་པུས་ཆོག །ཤི་ཁར་བླ་མ་སྤྱི་བོར་བཞུགས་པ་ལ་སེམས་རྩེ་གཅིག་གཏད་ན་
འཕོ་བ་དེ་ལས་ལྷག་པ་བྱ་རྒྱུ་མེད་པ་དང་། ལར་ཉམས་སུ་ལེན་ནུས་ན་ཚེ་འདིའི་ཉམས་ལེན་འདི་གཅིག་པུས་ཆོག་པས་ན། གསོལ་འདེབས་ཀྱི་བཟླས་པ་རྒྱུན་ཆད་མེད་པར་འབད་པར་བྱའོ། །ཅེས། བླ་མའི་རྣལ་འབྱོར་སྙིང་པོར་དྲིལ་བ་འདི་ཉིད། ཡོན་ཏན་དབང་ཕྱུག་གིས་བསྐུལ་ངོར་རྒོད་ཕུག་མྱ་ངན་མེད་པའི་ནགས་ཁྲོད་དུ་བཀོད་པ་དགེའོ། །བདག་ཉིད་ཕུང་ཁམས་སྐྱེ་མཆེད་བཟོད་མ་ནས། །ཡི་དམ་ལྷ་ཡི་དཀྱིལ་འཁོར་ལྷུན་གྲུབ་པའི། །སྙིང་གའི་མི་ཤིགས་ཐིག་ལེ་འོད་ལྔའི་ཀློང་། །བཀའ་བརྒྱུད་བླ་མ་སྐྱབས་གནས་ཀུན་ངོ་བོ། །མཚན་གྲངས་དུ་མར་བསྟན་ཡང་རེ་ཞིག་འདིར། །བཻ་རོའི་འོད་ཟེར་སྣ་ཚོགས་རང་གྲོལ་ནི། །དཀར་དངས་འཛམ་གླིང་གྲགས་པའི་ཞལ་དབྱིབས་ལྟར། །མཛེས་འཛུམ་བརྩེ་བའི་ཉམས་ལྡན་གཟུགས་བཟང་བ། །ཆོས་གོས་རྣམ་གསུམ་པན་ཞྭ་ལེབ་ཞར་གསོལ། །ཆོས་འཆད་མཉམ་བཞག་སྐྱིལ་ཀྲུང་ཞི་དུལ་ཚུལ། །སྣ་ཚོགས་པདྨའི་སྟེང་དུ་འོད་སྐུར་བཞུགས། །ཞལ་མཐོང་ཙམ་གྱི་ཚེ་འདིའི་སྣང་བ་འགའ། །
དྲན་པ་ཙམ་གྱི་འཁྲུལ་པའི་འཛིན་པ་ཞི། །གསོལ་བ་བཏབ་པས་ཏིང་འཛིན་སྒོ་བརྒྱ་འབྱེད། །བྱིན་རླབས་ཐུགས་རྗེའི་བདག་ཉིད་བླ་མ་ལ། །འཁོར་འདས་སྣོད་བཅུད་བདག་ལུས་གཏན་འདུན་བཅས། །མཆོད་པར་འབུལ་གྱི་ཚེ་གཅིག་འདི་ཉིད་ལ། ཁྱེད་དང་དབྱེར་མེད་འགྲུབ་པའི་དངོས་གྲུབ་སྩོལ། །གུ་རུ་རཏྣ་མཎྜལ་པཱུ་ཛ་མེ་གྷ་ས་མུ་ཏྲ་སྥ་ར་་ས་མ་ཡེ་ཨཱཿཧཱུྃ། ཞེས་པའང་། རིག་འཛིན་ཆོས་ཉིད་ཀློང་གྲོལ་དཔལ་བཟང་པོའི་ཐུགས་ལྟར་རྒོད་ཚང་ཕུག་ནས་ཕུལ་བ་མངྒ་ལཾ། མཚུངས་བྲལ་ཆོས་ཀྱི་རྗེ་རྒྱལ་སྲས་རིན་པོ་ཆེའི་ཞལ་སྔ་ནས། བདག་ལ་རང་མིང་གསལ་པོར་བྱས་པའི་གསོལ་འདེབས་རྒྱུན་ཁྱེར་དུ་བྱས་ཆོག་པ་དགོས་ཤེས་བཀའ་ཕེབས་ནའང་། སྤྱིར་ཡང་གསོལ་བ་གདབ་ཡུལ་དུ་རུང་བ་ནི་སྐྱོན་ཀུན་ཟད་ཅིང་ཡོན་ཏན་ཐམས་ཅད་ཡོངས་སུ་རྫོགས་པའི་དགེ་བའི་བཤེས་གཉེན་གྱི་མཚན་ཉིད་དང་ལྡན་པ་ཞིག་དགོས་མོད་ཀྱི། བདག་འདྲ་ལས་ཉོན་གྱི་རྒྱ་མཚོར་ཀུན་རྟོག་གི་རྦ་རླབས་དྲག་པོར་འཁྲུག་པས་དབང་མེད་དུ་བསྐྱོད་བཞིན་པ་མངོན་སུམ་ཚད་མས་གྲུབ་གདའ་བར་གསོལ་བ་བཏབ་རུང་
གདབ་པ་པོ་ངལ་བའི་རྒྱུར་ཟད་མོད་ལ། དེ་བས་ཀྱང་། སངས་རྒྱས་བྱང་སེམས་བཀའ་བརྒྱུད་བླ་མའི་ཐུགས་རྗེའི་གཏེར་ལྡན་རྣམས་ལ་གསོལ་བ་གདབ་པ་ལེགས་ཤིང་། འོན་ཀྱང་བཞེད་དོན་གྱི་བཀའ་སྩལ་ཞལ་ལོག་ཏུ་མ་གྱུར་ཙམ་ཁོ་ན་ལ་བསམ་ཏེ། འདི་བཞིན་ཕུལ་བ་ལགས་ཀྱི། དེས་ན་རྒྱལ་བ་རྣམས་ཀྱི་ཐུགས་ཡེ་ཤེས་ཀྱི་སྙིང་པོ་ནི། སེམས་ཅན་ཀུན་གྱི་ཁམས་དབང་རྟོག་ཚོགས་ཐམས་ཅད་དང་ཐ་མི་དད་པར་རྡོ་རྗེའི་དཀྱིལ་འཁོར་ཉིད་དུ་ཡེ་གྲུབ་ཆེན་པོའི་རྒྱས་བཀབ་ཅིང་། གནས་སྐབས་སུ་ཡང་གསལ་འདེབས་ཀྱི་བརྗོད་བྱར་བདག་གི་མིང་ཙམ་སྨོས་ཀྱང་མོས་གུས་ཀྱི་འབེན་གྱི་གཏད་སོ་ནི། རྒྱལ་དབང་པདྨ་ཀཱ་ར། དྲན་མཆོག་འཛམ་གླིང་གྲགས་པ། རྗེ་བཙུན་བྷ་དྲ་བཛྲ་རྣམས་དབྱེར་མ་མཆིས་པའི་གསང་གསུམ་མི་ཟད་རྒྱན་འཁོར་ལ་རྩེ་གཅིག་ཕུར་ཚུགས་སུ་ཡིད་གཏོད་པའི་ངང་ནས་གྲགས་སྟོང་མགྲིན་པའི་རྔ་སྒྲ་འདི་ལྟར་དུ་བསྒྲག་པར་ཞུའོ། །ཨེ་མ་ཧོཿ གདོད་ནས་དག་པའི་སེམས་ཉིད་འོད་གསལ་བ། །འགགས་མེད་སྒྱུ་འཕྲུལ་བླ་མའི་སྣང་བ་ཤར། །འཆར་མཁན་འཆར་རྒྱུ་གཉིས་མེད་ཡེ་གྲོལ་
ཆེ། །སྣ་ཚོགས་རང་གྲོལ་ཞབས་ལ་གསོལ་བ་འདེབས། །སྲིད་ཞི་འཁོར་འདས་བླ་མའི་དཀྱིལ་འཁོར་ལ། །དག་དང་མ་དག་གཉིས་འཛིན་འཇུར་མདུད་ཟད། །དེ་ཉིད་མཁས་མཆོག་པདྨ་ལེགས་སྒྲུབ་སྩལ། །རང་སྣང་འཛིན་མེད་ངོ་བོར་གསོལ་བ་འདེབས། །མ་ལུས་རྒྱལ་བའི་མཁྱེན་རྩེའི་ཉི་གཞོན་འབུམ། །གདུལ་བྱའི་བློ་མུན་སེལ་ལ་རོ་གཅིག་པར། །མངོན་གྱུར་ཀརྨ་རིག་འཛིན་རྣམ་པར་རྒྱལ། །ངེས་ལེགས་ལམ་བཟང་སྣང་ལ་གསོལ་བ་འདེབས། །རྒྱལ་རྣམས་འགྲོ་བའི་དོན་ལས་གཞན་མི་མཛད། །ཐུགས་རྗེའི་འོད་ལ་གསལ་འགྲིབ་མི་མངའ་ཡང་། །བདག་བློའི་རེ་བ་མ་རྫོགས་གདུང་ཤུགས་ཀྱི། །གསོལ་བ་བཏབ་ལ་དབྱིངས་ནས་དགོངས་པར་མཛོད། །སྣང་གྲགས་རྟོག་ཚོགས་བླ་མའི་དཀྱིལ་འཁོར་དུ། །ལྷུན་གྱི་གྲུབ་ཀྱང་མ་རིག་ལྷན་སྐྱེས་ཀྱིས། །འཁྲུལ་པའི་མུན་ལྡོང་བདག་དང་བདག་འདྲའི་ཚོགས། །ནམ་མཁའ་མཉམ་པའི་འགྲོ་ལ་ཐུགས་རྗེས་གཟིགས། །མཚན་དཔེ་བཟང་པོ་རྡོ་རྗེ་སྐུའི་ངོ་བོ། །ཆོས་གསུང་ཛམ་
ཕྱོགས་མཐར་གྲགས་པའི་དབྱངས། །སྒྲིབ་བྲལ་པདྨའི་འབྱུང་གནས་ཟབ་དབྱངས་ཐུགས། །ཡེ་ཤེས་འཁོར་ལོ་རོ་གཅིག་བླ་མ་མཁྱེན། ཀྱེ་ཧོ། །སྐྱབས་ཀུན་ངོ་བོ་གཅིག་བསྡུས་པ། །བླ་མ་སངས་རྒྱས་ཆོས་ཀྱི་སྐུ། །རང་རིག་གཉུག་མའི་ཡེ་ཤེས་སུ། །འདུ་འབྲལ་མེད་པར་བྱིན་གྱིས་རློབས། །རང་ལ་གནས་པའི་ཆོས་ཉིད་དོན། །རང་ངོ་མ་ཤེས་གཉིས་འཛིན་གྱི། །འཁོར་བའི་ཁམས་སུ་འཁྱམས་པ་ལས། །རང་གྲོལ་མཛོད་ཅིག་དྲིན་ཅན་མ། །བདེ་སྡུག་སེམས་ཀྱི་བཏགས་པ་ལ། དངོས་འཛིན་ཨ་འཐས་གདོན་གྱིས་རླམས། །རང་སྣང་གཞན་དུ་འཁྲུལ་པ་འདི། །གཏན་ཟད་མཛོད་ཅིག་ནུས་ལྡན་རྣམས། །སྲིད་པའི་བདེ་འབྱོར་སྒྱུ་མའི་འཕྲུལ། །མི་རྟག་འཇིག་པའི་ཆོས་ཅན་ལ། །ཞེན་ཆགས་རང་མགོ་རང་བསླུའི་སེམས། །ཡོངས་གྲོལ་མཛོད་ཅིག་སྐྱབས་མཆོག་རྣམས། །བདག་དང་འབྲེལ་ཐོགས་ཇི་སྙེད་དང་། །མཁའ་ཁྱབ་མ་རྒན་
སེམས་ཅན་གྱི། །ལྟོས་ཡུལ་བླ་མ་རྗེ་ལས་མེད། །འབྲལ་མེད་ཐུགས་རྗེས་སྐྱབས་མཛད་གསོལ། །བླ་མ་སངས་རྒྱས་བྱང་སེམས་ཉན་རང་ཡི་དམ་ལྷ། །མཁའ་འགྲོ་དམ་ཅན་ཆོས་བསྲུངས་ཞེས་བྱའི་རྣམ་འགྱུར་མཚན་མཐའ་དག་དྲིན་ཅན་རྗེ་བཙུན་བླ་མར་དབྱེར་མེད་གང་། །རང་སེམས་མ་བཅོས་རང་བབས་ཀློང་དུ་ཨེ་མ་ཧོ། ཞེས་པ་འདི་ཡང་། རིག་འཛིན་ཆོས་ཉིད་ཀློང་གྲོལ་དཔལ་བཟང་པོ་གང་གི་ཐུགས་བཞེད་བསྐོང་བའི་སླད་དུ། དཔལ་རིའི་རྒོད་ཕུག་ནས་མི་རྒན་སྣ་ཚོགས་རང་གྲོལ་གྱིས་ཕུལ་བ་མངྒ་ལཾ། །ན་མོ་གུ་རུ། སྤྱི་བོའི་གཙུག་ན་པདྨ་ཉི་ཟླའི་སྟེང་། །ངོ་བོ་དྲིན་ཅན་རྩ་བའི་བླ་མ་ཉིད། །སྐྱབས་མཆོག་རྒྱལ་དབང་པདྨ་འབྱུང་གནས་སྐུ། །མཛེས་འཛུམ་མཚན་དཔེ་གཟི་བརྗིད་འོད་དུ་འབར། །པད་ཞྭ་ཟབ་བེར་ཆོས་གོས་ན་བཟའ་དང་། །རིན་ཆེན་སྙན་རྒྱན་ལ་སོགས་མཛེས་པར་སྤྲས། རྡོ་རྗེ་ཐོད་པ་ཁ་ཊྭཱཾ་ཕྱག་མཚན་ལྡན། །སྣང་ལ་རང་བཞིན་མ་གྲུབ་འཇའ་འོད་སྐུར། རྡོ་རྗེ་སྐྱིལ་
ཀྲུང་བག་དྲོ་ལྷུན་ཆགས་བཞུགས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །སངས་རྒྱས་བྱང་སེམས་དཀོན་མཆོག་རིན་པོ་ཆེ། །ཐམས་ཅད་གཅིག་ཏུ་འདུས་པའི་ངོ་བོ་ཉིད། །བདག་སོགས་འཁོར་བའི་སེམས་ཅན་སྐྱབས་མེད་ཚོགས། །འདི་ཕྱི་བར་དོའི་གནས་སྐབས་ནམ་དུའང་། །འབྲལ་མེད་ཐུགས་རྗེས་གཟིགས་ཤིག་བྱིན་གྱིས་རློབས། །ཚེ་གཅིག་སངས་རྒྱས་འགྲུབ་པའི་དངོས་གྲུབ་ཞུའོ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ཞེས་དད་པ་དང་མོས་གུས་རྩེ་གཅིག་པའི་ངང་ནས་གསོལ་འདེབས་ཀྱི་བཟླས་པ་འདི་ལ་གཅིག་དྲིལ་དུ་འབད་ཅིང་། ན་ཚ་སྡུག་བསྔལ་ལེགས་ཉེས་འཇིག་སྐྲག་འཁྲུལ་སྣང་རྐྱེན་ངན་བར་ཆད་ཀྱི་རྣམ་པ་ཅི་དང་ཅི་ལྟ་བུ་བྱུང་ཀྱང་། སྤྱི་བོའི་བླ་མ་དྲན་ཞིང་གསོལ་འདེབས་ལ་བློ་ཁེལ་བ་གལ་ཆེ་བ་དང་། འཆི་ཁའི་དུས་སུ་ཡང་རྣམ་པར་རྟོགས་པ་གཞན་དུ་མ་ཡེངས་པར་སྤྱི་བོའི་བླ་མ་ཉིད་ལ་དད་བདུན་རྩེ་གཅིག་པའི་ངང་ལ་དབུགས་སོང་ནས་ངན་སོང་གི་སྐྱེ་སྒོ་ཁེགས་ནུས་པ་ཁྱེར་གཅིག་དྲེལ་དུ་ཐུགས་
ཉམས་སུ་ཞེས་འཚལ། ཞེས་པ་འདི་ཡང་རྒྱལ་ཡུམ་རྡོ་རྗེ་བུ་འཁྲིད་ཀྱི་ཐུགས་བཞེད་སྐོང་ཕྱིར་ཕུལ། །ན་མོ་གུ་ར་ཝེ། ལྷར་བཅས་འཇིག་རྟེན་མ་ལུས་ཐམས་ཅད་ཀྱི། །སྐྱབས་དང་སྐྱོབ་པར་གྱུར་པའི་སངས་རྒྱས་ཀུན། །གཅིག་བསྡུས་ཐུགས་རྗེའི་འདོད་འཇོ་ཟླ་མེད་པའི། །དཔལ་ལྡན་བླ་མ་མཆོག་ཞབས་སྤྱི་བོས་འདུད། །གང་ལ་གང་གིས་འདུལ་བའི་ཕྲིན་ལས་ཀྱི། །སྒྱུ་འཕྲུལ་ཆུ་སྣོད་ཇི་སྙེད་མཚུངས་པའི་ཟླ། །བགྲང་ཡས་སོ་སྐྱེའི་བློ་ཡི་ཡུལ་མིན་ཀྱང་། རང་སྐལ་མཚམས་པར་སྟོན་མཛད་བླ་མར་འདུད། །མགོན་པོ་ཟས་གཙང་སྲས་ཀྱི་བསྟན་འདི་ལ། །གྲུབ་པའི་རིག་འཛིན་གཙུག་རྒྱན་སམ་བྷ་ཝ། །གངས་ཅན་སྒྲུབ་རྒྱུད་རྩ་ལག་འཛམ་གླིང་གྲགས། །རྣམ་འདྲེན་ཉི་ཟླ་ཟུང་དེར་གསོལ་བ་འདེབས། །དེ་ཉིད་སླར་ཡང་སྙིགས་མཐའི་འགྲོ་འདྲེན་དུ། །མཆོག་སྤྲུལ་མཚན་དཔེའི་སྐུར་བྱོན་སུ་བཛྲ། སྒྲུབ་པའི་སྲོག་ཤིང་པདྨ་སུ་སིདྡྷི། །གང་འདུལ་དེར་སྣང་ཟུང་
ལ་གསོལ་བ་འདེབས། །རྒྱལ་བསྟན་ལྷ་ལམ་ཡངས་པའི་དབྱིངས་ཆེན་དུ། །བསྟན་པ་རབ་འབྱམས་རྒྱུ་སྐར་རྣམ་བཀྲ་བའི། །ཆོས་དང་ཆོས་དོན་དྲི་མེད་ལ་སྤྱོད་པ། །ཀུན་ལ་དག་སྣང་རིས་མེད་གསོལ་བ་འདེབས། །སྣང་གྲགས་སྲིད་གསུམ་བཟོད་ནས་ཡོངས་དག་པའི། །བདེ་གཤེགས་སྙིང་པོས་མ་ཁྱབ་གནས་མེད་ཕྱིར། །ཐམས་ཅད་རྒྱལ་བའི་དཀྱིལ་འཁོར་ལྷུན་གྲུབ་ཏུ། །རྟོགས་ཤིང་ངེས་པའི་སྒོ་ནས་གསོལ་བ་འདེབས། །དེ་ལྟར་གསོལ་བ་བཏབས་པའི་དོན་གྱི་སྙིང་། །བདག་གཞན་ནམ་མཁའ་ཁྱབ་པའི་སེམས་ཅན་རྣམས། །རང་ངོ་རང་རིག་རང་བྱུང་ཆོས་སྐུ་དངོས། །ལྷན་སྐྱེས་དྲི་མས་མ་སྒྲིབ་མཐོང་བར་ཤོག །གསོལ་བ་འདེབས་ཡུལ་འདེབས་མཁན་གཉིས་འཛིན་གྱི། །སྦྲུལ་མདུད་ཆོས་ཉིད་མཁའ་ལ་རང་གྲོལ་ཏེ། །སྐུ་གཉིས་མངོན་གྱུར་སྲིད་པ་ཇི་སྲིད་བར། །སྤྲུལ་པས་འགྲོ་བ་འདྲེན་ལས་གཡེལ་མེད་ཤོག །ཅེས་པའི་གསོལ་འདེབས་འདི་ཉིད། རྒྱལ་བ་ཤཱཀྱའི་རྒྱལ་ཚབ་
མཚུངས་པ་མེད་པ་བདག་ཉིད་ཆེན་པོ་པུ་་རཏྣའི་རིགས་དང་ཆོས་ཀྱི་རིང་ལུགས་ཡང་དག་པར་འཛིན་པའི་སྐྱེས་ཆེན་མཐུ་སྟོབས་བསྟན་འཛིན་དབང་པོའི་སྡེའི་བཀའ་བཞིན། སྤོང་བ་རྒན་པོ་སྣ་ཚོགས་རང་གྲོལ་གྱིས་བྲིས་ནས་ཕུལ་བ་མངྒ་ལཾ། ཨེ་མ་ཧོ། སངས་རྒྱས་ཐམས་ཅད་ཀྱི་མཁྱེན་བརྩེ། །ཐུགས་རྗེ་ནུས་པ་ཀུན་གཅིག་བསྡུས། །འཇིགས་མེད་དགའ་བ་ཡི་རྡོ་རྗེ། །གསོལ་བ་སྙིང་ནས་རང་འདེབས་སོ། །སྙིགས་དུས་ཆོས་མེད་ཀྱི་སེར་གཟུགས། ལོག་འཚོ་དཀོར་དྲེད་ཀྱི་ཚོགས་ལ། །གདམས་ངག་རྣམ་ཐར་གྱིས་སྟོན་མཛད། །སྣ་ཚོགས་རང་གྲོལ་ཞབས་མཁྱེན་ནོ། །དམ་པ་རྣམ་གཉིས་ཀྱི་ཐུགས་རྗེ། །ཉེ་རིང་ཕྱོགས་རིས་དང་བྲལ་ཡང་། །ལས་ཉོན་འཁྲུལ་རྟོགས་གིས་རྨོངས་པའི། །གདུལ་བྱ་བདག་འདྲ་ལ་གཟིགས་པ། །སྐྱེ་བ་གྲངས་མེད་ནས་ད་བར། །འཁོར་བར་གཏན་ཁྱམས་སུ་ལུས་ཏེ། །ཐར་པའི་གོ་སྐབས་ཀྱིས་དབེན་ལ། །བརྩེ་བས་ལམ་སྣ་ཞིག་དྲོངས་དང་། །མི་ལུས་ལན་གཅིག་ཙམ་ཐོབ་འདིར། །དམ་པའི་ལྷ་ཆོས་རང་བསམ་ཀྱང་། །
སྙོམས་ལས་ལེ་ལོ་ལ་འཆོར་ན། །སྒོ་གསུམ་སྨིན་གྲོལ་དུ་མཛོད་དང་། །རང་སེམས་བཟོ་མེད་དུ་བཞག་ཀྱང་། །རྣམ་རྟོག་རྦ་རླབས་ཀྱིས་བསྐྱོད་ནས། །བག་ཆགས་ངན་རྗེས་སུ་འབྲེང་ན། །གང་ཤར་རང་གྲོལ་དུ་མཛོད་དང་། །མི་ཚེ་རྨི་ལམ་གྱི་ཡུན་ཙམ། འཁྲུལ་སྣང་ཞེན་འཛིན་ལ་འབྱམས་འདི། །གཏན་ཆོད་ཉམས་ལེན་ལ་ཆིག་དྲིལ། །ནུས་པར་བྱིན་གྱིས་རང་རློབས་ཤིག །འདི་ནས་ཚེ་རབས་ཀྱི་འཕྲེང་བར། །རྗེ་བཙུན་རྣམ་གཉིས་ཀྱིས་རྗེས་བཟུང་། རང་གཞན་དོན་གཉིས་ཀུན་མྱུར་འགྲུབ། །སངས་རྒྱས་གོ་འཕངས་ལ་འཁོད་མཛོད། །ཅེས་པའི་མཐར། །སྐྱབས་མཆོག་བླ་མ་རིན་ཆེན་རྣམ་གཉིས་མཁྱེན་ནོ། །ཞེས་བརྒྱ་སྟོང་ཁྲི་འབུམ་གྲངས་མེད་དུ་གསོལ་བ་རྩེ་གཅིག་གདབ་པར་བྱའོ། དེ་ལྟར་གསོལ་བ་འདེབས་པ་འདི་ནི། མཉམ་མེད་ཟླ་འོད་གཞོན་ནུའི་རིགས་དབོན་མ་ཉམས་པ་ལས་འཁྲུངས་པའི་སྐུ་མདུན་ཆོས་མཛད་མ་རིག་འཛིན་དབང་མོའི་བཞེད་སྐོངས་སུ་སྤོང་བ་པ་ལེགས་གྲུབ་རྩལ་གྱི་མཚམས་ནས་ཕུལ་བ་ཤུ་བྷམ། །
ཀྱེ་ཧོ། །ཕྱོགས་དུས་ཀྱི་རྒྱལ་བ་མ་ལུས་པའི། །སྤྱི་གཟུགས་ལ་དཔལ་ལྡན་བླ་མ་ཞེས། །མདོ་རྒྱུད་དང་མན་ངག་ཀུན་ལ་གྲགས། །མོས་གུས་ཀྱིས་གསོལ་བ་སྙིང་ནས་འདེབས། །ཆོས་དབྱིངས་ཀྱི་དགོངས་ཀློང་རོ་གཅིག་ཀྱང་། །གདུལ་བྱ་ལ་འདུལ་བྱེད་ཐ་དད་ཀྱི། །ཟློས་གར་ཉིད་མི་ཟད་རྒྱན་འཁོར་ལོར། །སྤྲུལ་བསྒྱུར་དུ་མཛད་ལ་གསོལ་བ་འདེབས། །གསང་སྔགས་ཀྱི་སྟོན་པ་པདྨ་འབྱུང་། །གངས་ཅན་གྱི་མགོན་པོ་འཛམ་གླིང་གྲགས། །གསར་རྙིང་གི་བསྟན་པའི་གཙུག་རྒྱན་མཆོག །རྩོད་མེད་དུ་གྱུར་ལ་གསོལ་བ་འདེབས། །ཟབ་གཏེར་གྱི་མངའ་བདག་འཇའ་མཚོན་སྙིང་། །སྙིགས་དུས་ཀྱི་སྐྱབས་གཅིག་བཟང་པོའི་ཞབས། །སྒྲུབ་རྒྱུད་ཀྱི་སྲོལ་འཛིན་ལེགས་གྲུབ་རྩལ། །མཆོག་གསུམ་གྱི་ངོ་བོར་གསོལ་བ་འདེབས། །རབ་འབྱམས་ཀྱི་ཞིང་ཀུན་ཡོངས་གང་བའི། །བསྟན་པ་དང་བསྟན་འཛིན་རྣམ་དག་ཀུན། །སངས་རྒྱས་ཀྱི་ཕྲིན་ལས་རོ་མཉམ་པར། །རིས་མེད་ཀྱི་དད་པས་གསོལ་བ་
འདེབས། །སྐྱབས་གནས་ཀུན་འགྲོ་བའི་དོན་ཆེན་ལས། །གཡེལ་མེད་ལ་བསྙེལ་བའི་སྐབས་བྲལ་ཡང་། །བདག་ཡིད་ཀྱི་རེ་འདོད་མ་ཟད་པས། །གདུང་ཤུགས་ཀྱི་འབད་ལ་ཐུགས་རྗེས་དགོངས། །ལས་ངན་གྱི་སྒྲིབ་ཚོགས་དག་པ་དང་། །འགལ་རྐྱེན་གྱི་བར་ཆད་ཞི་བ་དང་། །ཆོས་བཞིན་གྱི་བསམ་པ་ཀུན་འགྲུབ་པར། །བྱིན་གྱིས་རང་རློབས་ཤིག་བླ་མ་རྣམས། །མི་ཚེ་འདི་ཆོས་ཀྱི་འདའ་བ་དང་། །ཆོས་མིན་གྱི་བསམ་པ་མི་སྐྱེ་བར། །ཆོས་ཕྱག་རྒྱ་ཆེན་པོའི་དངོས་གྲུབ་ཀྱིས། །ཚེ་གཅིག་བྱང་ཆུབ་ལ་འགོད་པར་ཤོག །ཅེས་པ་འདི་དཔལ་ལྡན་སྒམ་པོ་པའི་གདུང་རིགས་དྲི་མ་མེད་པ་ལས་འཁྲུངས་པའི་ལྕམ་མོ་ཆོས་ཉིད་དབང་མོའི་བཞེད་པ་སྐོངས་ཕྱིར། སྣ་ཚོགས་རང་གྲོལ་གྱི་མིང་འཛིན་པའི་སྤོང་བ་རྒན་པོས་ཕུལ་བ་ཨ་ཐཱ། གསོལ་འདེབས་འདིའི་མཇུག་ཏུ། རྒྱལ་བ་ཀུན་འདུས་རྩ་བའི་བླ་མ་མཁྱེན་ནོ། །ཞེས་པ་ཡང་བརྒྱ་སྟོང་སོགས་ཅི་ནུས་འཕྲེང་བ་ལ་འདྲེན་པ་ཡང་བྱིན་རླབས་ལྷག་པར་མྱུར་བ་ལགས་སོ། །
མཚུངས་པ་མེད་པའི་སྐུ་དྲིན་སྩོལ་མཛད་པའི། །རྗེ་བཙུན་དཔལ་ལྡན་རྩ་བའི་བླ་མ་ཉིད། །དགོངས་པ་སངས་རྒྱས་ཀུན་དང་དབྱེར་མེད་ཀྱང་། །གང་འདུལ་སྐྱེས་རབས་སྟོན་དེར་གསོལ་བ་འདེབས། །ཐུབ་དབང་ཉེ་གནས་འཕགས་པ་ཀུན་དགའ་བོ། །སྲོང་བཙན་སྤྱན་སྔར་ཐོན་མི་སམྦྷོ་ཊ། །ཨོ་རྒྱན་དྲུང་དུ་ལོ་ཆེན་བཻ་རོའི་ཞབས། །བསྟན་པའི་སྒྲོན་མེ་རྣམས་ལ་གསོལ་བ་འདེབས། །རྔོག་ལོ་ཆེན་པོ་བློ་ལྡན་ཤེས་རབ་དང་། །ས་སྐྱ་པ་ཆེན་གཡག་སྡེ་པ་ཆེན་དང་། །པ་ཆེན་འབུམ་ཕྲག་གསུམ་པ་བྱ་འདུལ་འཛིན། །མཁས་པའི་གཙུག་རྒྱན་རྣམས་ལ་གསོལ་བ་འདེབས། ཁྱུང་པོ་རྣལ་འབྱོར་དཔལ་ཆེན་ཆོས་ཡེ་དང་། །གཉལ་སྟོན་སངས་རྒྱས་གྲགས་དང་ཟུར་ཁར་བ། །རྫ་ཡིག་ཆོས་རྗེ་ཚུལ་ཁྲིམས་རྒྱལ་མཚན་སོགས། །གྲུབ་པའི་དབང་ཕྱུག་རྣམས་ལ་གསོལ་བ་འདེབས། །གཏེར་སྟོན་རྡོ་རྗེ་གླིང་དང་ཀུན་སྐྱོང་གླིང་། །གཡག་ཆར་སྔོན་མོ་བསམ་གཏན་བདེ་ཆེན་གླིང་། །མཆོག་
ལྡན་མགོན་པོ་ཤེས་རབ་འོད་ཟེར་སོགས། །ཟབ་གཏེར་མངའ་བདག་རྣམས་ལ་གསོལ་བ་འདེབས། །བསྐལ་པའི་མཐའ་མ་རྩོད་ལྡན་སྙིགས་དུས་འདིར། །མདོ་སྔགས་ཟུང་འཇུག་ཁྱད་པར་སྔ་འགྱུར་གྱི། །བསྟན་པ་སྤེལ་མཛད་བསྟན་འཛིན་རྡོ་རྗེ་དང་། །སྣ་ཚོགས་རང་གྲོལ་ཞབས་ལ་གསོལ་བ་འདེབས། །སངས་རྒྱས་མཛད་པ་བསམ་གྱིས་མི་ཁྱབ་ཕྱིར། །ལས་ལུས་གཅིག་ལས་གཅིག་བརྒྱུད་མ་ཡིན་ཏེ། །སྐུ་གསུང་ཐུགས་ཡོན་ཕྲིན་ལས་རྣམ་འཕྲུལ་ཚོགས། །དཔག་མེད་འགྲོ་བ་འདྲེན་དེར་གསོལ་བ་འདེབས། །དེ་ལྟར་སྤྲུལ་པའི་རྣམ་གྲངས་འདི་དང་གཞན། །ཕྱོགས་བཅུའི་ཞིང་ཁམས་ཀུན་ཏུ་རྡུལ་སྙེད་སྐུ། །ཇི་སྙེད་རྣམས་ལ་མོས་པས་གསོལ་བཏབ་པའི། །དགེ་བའི་བདག་སོགས་བླ་མ་མཆོག་འགྲུབ་ཤོག །སྒོ་གསུམ་ཉམས་ཆགས་དྲི་མས་མ་གོས་ཤིང་། །ཞབས་གཏོགས་རྣམ་གསུམ་མཉེས་པ་མཐར་ཕྱིན་
ཏེ། །སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཀུན། །བདག་གི་རྒྱུད་ལ་དེང་འདིར་འཇུག་པར་ཤོག །འདི་ནས་བྱང་ཆུབ་བར་གྱི་སྐྱབས་གནས་མཆོག །རྗེ་བཙུན་བླ་མ་ལས་གཞན་མི་སེམས་ཤིང་། །གང་གི་མཛད་ཕྲིན་ཡོན་ཏན་དེ་འདྲར་བདག །མྱུར་འགྲུབ་མཁའ་ཁྱབ་སེམས་ཅན་སྨིན་གྲོལ་ཤོག །ཅེས་པ་འདི་ཡང་རང་གི་གཅུང་པོས་བསྐུལ་བ་བཞིན་བཀོད་པའོ། །དཔལ་ལྡན་ཚོགས་གཉིས་སྤྲིན་ཕུང་ལས། །བྱིན་རླབས་ཡེ་ཤེས་བདུད་རྩིའི་ཆར་ཆེན་གྱིས། །དད་ལྡན་གདུལ་བྱའི་ཞིང་སར་བྱང་ཆུབ་ཀྱི། །མྱུ་གུ་སྨིན་མཛད་རྗེ་བཙུན་ཆོས་ཀྱི་རྒྱལ། །དཔག་མེད་བསྐལ་པའི་གོང་ནས་ཐུགས་བསྐྱེད་དེ། ཁམས་གསུམ་འགྲོ་ལ་བརྩེ་བའི་གཞན་དབང་གིས། །རྨད་བྱུང་རྣམ་འཕྲུལ་མཐའ་ཡས་འགྱེད་མཛད་པའི། །ཐུགས་རྗེའི་བདག་ཉིད་བླ་མ་རིན་པོ་ཆེ། །བདག་སོགས་རྩོད་ལྡན་སྙིགས་མའི་གདུལ་བྱ་རྣམས། །ལས་ཉོོན་སྡུག་བསྔལ་འཁྲུལ་འཁོར་དྲག་པོས་གཡེངས། །བསླུ་བྱེད་ཚེ་འདིའི་འདུན་མས་
མི་ཚེ་ཟད། །དལ་འབྱོར་སྟོང་ལོག་མཁན་ལ་ཐུགས་རྗེས་གཟིགས། །ནམ་འཆི་ཆ་མེད་དེ་ཡང་མྱུར་དུ་འཆི། །འཆི་ཁར་དགོས་ངེས་དམ་པའི་ལྷ་ཆོས་ལ། །འབད་པར་མ་ནུས་ལྟོ་གོས་རྩོལ་བས་མནར། །སྙོམས་ལས་ལེ་ལོ་ཅན་ལ་བརྩེ་བས་གཟིགས། །འཆི་བའི་ནང་པར་ཅིས་ཀྱང་མི་སྟོངས་ཤིང་། །དགེ་སྡིག་རྒྱུ་འབྲས་བསླུ་མེད་རྗེས་འབྲང་ཞིང་། །འཁོར་བ་གར་སྐྱེས་བདེ་བའི་གོ་སྐབས་མེད། །དེ་ལས་སྐྱོབས་ཕྱིར་ཐར་པའི་ལམ་དུ་དྲོངས། །ད་རེས་དལ་འབྱོར་ལེགས་ཐོབ་ཆོས་དང་མཇལ། །གཏན་གྱི་འདུན་མ་བསྒྲུབ་པའི་དུས་གཅིག་འདིར། །བར་ཆད་ངན་རྐྱེན་དབང་དུ་མི་འགྱུར་བར། །བྱང་ཆུབ་ལམ་སྣ་ཟིན་པར་བྱིན་གྱིས་རློབས། །དམ་ཚིག་སྡོམ་ལྡན་ཐོས་བསམ་བསྒོམ་ལ་བརྩོན། །བླ་མ་མཉེས་ཤིང་འགྲོ་ལ་ཕན་པ་འགྲུབ། །རང་དོན་མཐར་ཕྱིན་གཞན་དོན་ལྷུན་གྲུབ་པར། །གསོལ་བཏབ་སྨོན་ལམ་དོན་ལྡན་འབྱུང་བར་ཤོག །
ཅེས་པ་འདི་ནི། །ཡོན་ཏན་དབང་ཕྱུག་གིས་བསྐུལ་ངོར་བྲིས་པའོ། །སྒྲིབ་བྲལ་ཡེ་ཤེས་མཆོག་གི་གཟིགས་པ་ནི། །རྟག་པར་གཡེལ་བ་མེད་པའི་སྐྱབས་མཆོག་རྗེ། ཁམས་གསུམ་ཟླ་མེད་རྒྱལ་བ་འཇའ་ཚོན་སྙིང་། །སྙིང་ནས་གསོལ་བ་འདེབས་སོ་ཐུགས་རྗེས་གཟིགས། །དོན་དམ་སྐྱེ་འཆིའི་མཚན་མ་མི་མངའ་ཡང་། །ལྟར་སྣང་གཟུགས་སྐུའི་ཉི་མ་དབྱིངས་ནུབ་ན། །འཁོར་བའི་མུན་འཁྱམས་ལྟོས་བཅས་བུ་འབངས་རྣམས། །ལམ་སྟོན་ཡེ་ཤེས་སྒྲོན་མེ་སུ་ལ་རེ། །ཆོས་ཉིད་བདེ་ཆེན་དག་པའི་དགོངས་ཀློང་ནས། །འགགས་མེད་མཁྱེན་བརྩེ་རོལ་པའི་ཐུགས་རྗེའི་འཕྲུལ། །རྨད་བྱུང་ཕྲིན་ལས་སྒོ་བརྒྱ་ཕྱེས་མཛོད་ལ། །བདག་སོགས་མཁའ་ཁྱབ་གདུལ་བྱ་དྲངས་དུ་གསོལ། ཅེས་པ་ནི། རིག་འཛིན་ཆེན་པོ་དེ་ཉིད་དགོངས་པ་ཆོས་ཀྱི་དབྱིངས་སུ་ཐིམ་པའི་ཚེ་གདུང་བས་གསོལ་བ་བཏབ་པའོ། །མི་མཇེད་ཞིང་གི་སྟོན་པ་ཤཱཀྱའི་དབང་། །མཆོག་གསང་གདུལ་བྱའི་སྐལ་ངོར་རྡོ་རྗེ་འཆང་། ཁ་བ་ཅན་དུ་བདུད་འདུལ་པདྨ་འབྱུང་། །དབྱེར་མེད་འཛམ་གླིང་གྲགས་པར་
གསོལ་བ་འདེབས། །དེ་ཉིད་རྩོད་ལྡན་མཐའ་མའི་གདུལ་བྱ་ལ། །དཔལ་ལྡན་བཟང་པོ་དགའ་བའི་རྡོ་རྗེ་སྤྲུལ། །ཆོས་ཉིད་ཀློང་གྲོལ་པདྨ་ལེགས་གྲུབ་བཅས། །སྐྱབས་མཆོག་རྣམ་གསུམ་ཞབས་ལ་གསོལ་བ་འདེབས། །རབ་འབྱམས་ཞིང་ཁམས་རྒྱ་མཚོའི་སངས་རྒྱས་ཀུན། །དྲིན་ཅན་བླ་མ་གཅིག་པུའི་ཟློས་གར་དུ། །ཡིན་པར་ཤེས་པའི་དད་པ་བརྟན་པོ་ཡིས། །གསོལ་བ་འདེབས་ལ་ཐུགས་རྗེས་གཟིགས་སུ་གསོལ། །ཚད་མེད་མཁྱེན་བརྩེ་རྨད་བྱུང་ནུས་སྟོབས་མཐུས། །བདག་སོགས་མཁའ་ཁྱབ་སེམས་ཅན་ལས་ཉོན་གྱི། །བག་ཆགས་འཁྲུལ་འཁོར་སྡུག་བསྔལ་རྒྱུ་འབྲས་ལ། །གཏན་དུ་སྤྱོད་འདི་ཡང་དག་ལམ་དུ་དྲོངས། །འཇིག་རྟེན་འཁྲུལ་ཞོན་སྣང་བ་བཟློག་ཏུ་གསོལ། །ཉོན་མོངས་དུག་ལྔའི་གཅོང་རྙིང་སྦྱང་དུ་གསོལ། །ང་བདག་འཛིན་པའི་སྒྱེལ་དུ་གསོལ། །འཁོར་བའི་ས་བོན་དྲུངས་ནས་ཕྱུང་དུ་གསོལ། །དེང་ནས་བྱང་ཆུབ་མངོན་དུ་མ་གྱུར་བར། །རྣམ་འདྲེན་དམ་པའི་
ཞབས་པད་ཉེར་བསྟེན་ཞིང་། །ཟབ་གསང་ཆོས་མཛོད་ཐོབ་ནས་ཉམས་བླངས་ཏེ། །སྨིན་གྲོལ་གོ་འཕངས་ས་ལམ་ཐར་ཕྱིན་ཤོག །འགལ་རྐྱེན་ཉེར་འཚེ་མེད་ཅིང་སྐུ་གཉིས་འགྲུབ། །སྨོན་ལམ་ཐུགས་རྗེའི་སྟོབས་ཀྱི་མཁའ་མཉམ་འདྲེན། །དཔལ་ལྡན་བླ་མའི་ཕྲིན་ལས་ཇི་སྙེད་ཀུན། །བདག་གིས་འགྲུབ་པར་བྱིན་གྱིས་བརླབ་ཏུ་གསོལ། །ཞེས་པ་འདི་ནི་རྒྱལ་བའི་སྤྱི་གཟུགས་རྗེ་བཙུན་བཟང་པོའི་ཞབས་ཀྱི་མཉེས་གསུང་སྒྲུབ་པའི་ཉེ་གནས་པ་ཐུབ་བསྟན་རབ་དགའི་བཞེད་པ་ཇི་ལྟ་བར། རྒན་པོ་པདྨ་ལེགས་གྲུབ་གྱིས་ཆོས་དབྱིངས་འོད་གསལ་རྩེ་མོའི་དབེན་ཁྲོད་ནས་ཕུལ་བ་མངྒ་ལཾ། བྷ་ཝནྟུ། ན་མོ་གུ་རུ། སེམས་ཉིད་གདོད་ནས་དག་པའི་ངོ་བོ་གང་། །བླ་མ་ཆོས་ཀྱི་སྐུ་རུ་ལྷུན་གྱིས་གྲུབ། །རང་བབས་མ་བཅོས་ངང་ནས་གསོལ་བ་འདེབས། ཁྱབ་གདལ་ཆོས་དབྱིངས་ཀློང་ནས་བྱིན་གྱིས་རློབས། །འགག་མེད་རང་གསལ་ཡེ་ཤེས་ཟང་ཐལ་གང་། །བླ་མ་ལོངས་སྤྱོད་རྫོགས་སྐུའི་རང་བཞིན་ཤར། །འཛིན་མེད་བློ་འདས་ངང་ནས་གསོལ་བ་འདེབས། །ཤར་གྲོལ་དུས་
མཉམ་ཆེན་པོར་བྱིན་གྱིས་རློབས། །སྣ་ཚོགས་ཅིར་ཡང་འཆར་བའི་སྒྱུ་འཕྲུལ་གང་། །བླ་མ་སྤྲུལ་པའི་སྐུ་རུ་མ་གྱུར་མེད། །དགག་སྒྲུབ་རང་གྲོལ་ངང་ནས་གསོལ་བ་འདེབས། །ཡེངས་མེད་དྲན་རིག་འཁོར་ཡུག་བྱིན་གྱིས་རློབས། །གཟུགས་སྣང་བླ་མ་སྤྲུལ་སྐུར་ཤེས་པ་དང་། །གྲགས་ཚད་བླ་མ་ལོངས་སྐུར་རང་གྲོལ་ཞིང་། །རྟོག་ཚོགས་བླ་མ་ཆོས་སྐུར་རོ་གཅིག་པས། །ལས་སྣང་ཆགས་སྡང་རྗེས་སུ་མི་འབྲེང་ཤོག །འཁྲུལ་པའི་ངོ་བོ་གཞི་ལ་མ་གྲུབ་ཀྱང་། །མེད་བཞིན་སྣང་བའི་བག་ཆགས་ངན་གོམས་འདིས། །འཁོར་བ་ཐོག་མཐའི་བར་མེད་གཏན་ཕུང་བསྒྲུབས། །ད་ནས་གཞི་མེད་རྩ་བྲལ་ཀློང་གྲོལ་ཤོག །བླ་མའི་མཆོག་རབ་རང་སེམས་སངས་རྒྱས་ལ། །མོས་གུས་སྙིང་པོ་རང་རིག་དྲན་པ་ཡིས། །གསོལ་བ་འདེབས་མཁན་རོ་མཉམ་མཐུས། །བྱིན་རླབས་ཕྱག་རྒྱ་ཆེན་པོ་མངོན་གྱུར་ཤོག །འཁོར་བ་མྱང་འདས་དངོས་པོ་མཚན་མའི་གཟུགས། །ཡེ་ནས་མི་དམིགས་ཆོས་སྐུར་
རོ་གཅིག་ཀྱང་། །དེ་ལྟར་མ་རྟོགས་རྨི་ལམ་ལྟ་བུའི་འགྲོ། །ཐམས་ཅད་གདོད་མའི་ཡེ་ཤེས་ལ་འགོད་ཤོག །ཅེས་པ་འདི། བླ་མ་མི་ཕམ་བསྟན་པའི་རྡོ་རྗེའི་བཞེད་པ་སྐོངས་ཕྱིར་སྤོང་བ་པ་རྒན་པོ་སྣ་ཚོགས་རང་གྲོལ་གྱི་མིང་འཛིན་པས། །ཤར་ཕྱོགས་ཀོང་པོ་གི་ཡུལ་མཐའ་ཟད་པའི་ནགས་ཁྲོད་ནས་ཕུལ་བ་མངྒ་ལཾ། ཆོས་དབྱིངས་ཡེ་ཤེས་སྒྱུ་མའི་རོལ་བ་ལས། །ཐུགས་རྗེ་མཚན་དཔེའི་སྐུར་སྣང་ངོ་མཚར་གཏེར། །གདུལ་བྱའི་བློ་མུན་སེལ་བའི་ཉི་མ་མཆོག །དཔལ་ལྡན་བླ་མའི་ཞབས་པད་གཙུག་གིས་མཆོག །རྒྱལ་བའི་རྒྱལ་ཚབ་མཉམ་མེད་འཛམ་གླིང་གྲགས། །སྙིགས་དུས་གདུལ་བྱའི་མགོན་དུ་སླར་བྱོན་ནས། །སྒྲུབ་བརྒྱུད་བསྟན་པའི་སྒྲོན་མེ་སྤྲུལ་པའི་སྐུ། །བཟང་པོ་རྡོ་རྗེའི་ཞབས་ལ་གསོལ་བ་འདེབས། །ཐུགས་རྗེ་གཟིགས་ཤིག །ཐུགས་རྗེས་གཟིགས་ཤིག །ཐུགས་རྗེས་གཟིགས་ཤིག །ཆོས་སྐུའི་རང་ཞལ་མཐོང་བར་བྱིན་གྱིས་རློབས་ཤིག །རྒྱལ་བའི་གདུང་ལས་རྒྱལ་བ་དངོས་བྱོན་ནས། །རྒྱལ་བསྟན་དྲི་མེད་འཛིན་སྐྱོང་སྤེལ་བ་ཡི། །མཛད་ཕྲིན་མཆོག་ཏུ་
གྱུར་པའི་ཟླ་འོད་ཅན། །ཆོས་ཉིད་ཀློང་གྲོལ་ཞབས་ལ་གསོལ་བ་འདེབས། །ཐུགས་རྗེས་གཟིགས༴ །མ་རིག་འཁྲུལ་ཞེན་དག་པར་བྱིན་གྱིས་རློབས་ཤིག །སྙིགས་དུས་ཉོན་མོངས་ཕུང་པོའི་ཆོས་གཟུགས་རྣམས། །རང་རྒྱུད་དྲེད་པོར་འཆོར་བའི་གཅོང་ཆེན་ལ། །ཐབས་མཁས་ཐུགས་རྗེའི་སྨན་གྱི་གསོ་མཛད་པ། །སྣ་ཚོགས་རང་གྲོལ་ཞབས་ལ་གསོལ་བ་འདེབས། །ཐུགས་རྗེས་གཟིགས་ཤིག༴ །གང་ཤར་ལམ་དུ་ལྷོང་བར་བྱིན་གྱིས་རློབས་ཤིག །སངས་རྒྱས་ཐམས་ཅད་བླ་མའི་ངོ་བོར་འདུས། །མཚོན་བྱེད་དཔེ་ཡི་བླ་མ་རྣམ་གསུམ་དང་། །མཚོན་བྱ་དོན་གྱི་བླ་མ་རང་རིག་འདི། །དབྱེར་མེད་གདོད་མའི་ཡེ་ཤེས་མངོན་གྱུར་ཏེ། །མཁའ་ཁྱབ་འགྲོ་བ་སངས་རྒྱས་སར་འགོས་ཤོག །ཅེས་པ་འདི། དད་ལྡན་སྒམ་པོ་ཡེ་ཤེས་རབ་གསལ་གྱི་བསྐུལ་ངོ་ལྟར་བྲིས་པའོ། །བསྐལ་བཟང་འདྲེན་པ་སྟོང་གི་གསེར་རིའི་དབུས། །ཐུགས་རྗེའི་མཐུ་སྟོབས་མངོན་འཕགས་ལྷུན་པོའི་དབང་། །ཟས་གཙང་སྲས་ཀྱི་རྒྱལ་ཚབ་ཐུ་བོ་རུ། །
དབང་སྐུར་ཟླ་འོད་གཞོན་ནུར་གྱུར་པ་ཉིད། །ལྔ་བདོའི་རྣམ་འགྱུར་དར་བའི་བསིལ་ལྡན་ཡུལ། །གང་འདིར་བསྟན་གཉིས་སྒྲོན་མ་སྦར་བའི་མགོན། །ལྷ་ལམ་ཁྱབ་པའི་དབུས་ནས་སྒྲུན་བྲལ་ཉིད། །འཛམ་གླིང་གྲགས་པའི་འོད་ཟེར་ཚར་དངར་གདུང་། །དྲི་མེད་སྒྲུབ་རྒྱུད་བསྟན་སྲོག་འཛིན་པའི་དཔལ། །ཆོས་ཉིད་ཇི་བཞིན་གཟིགས་པ་མངོན་གྱུར་གྱིས། །ཆོས་ཅན་ཇི་སྙེད་ཡེ་ཤེས་ཀློང་གྲོལ་བའི། །འདྲེན་པ་མཆོག་ཁྱེད་བསྐལ་བརྒྱར་ཞབས་བརྟན་གསོལ། །རྒྱལ་དགོངས་གདོད་ནས་ཡོངས་དག་འགྱུར་མེད་གཤིས། །འཁོར་འདས་དུས་གསུམ་རོ་མཉམ་ཆེན་པོ་རུ། །འཚོ་ཞིང་གཞེས་ལས་ནམ་ཡང་མ་གཡོས་བཞིན། །གདུལ་བྱའི་སྣང་ངོར་དེ་ལྟར་གསོལ་བ་འདེབས། །མི་ཟད་ཐུགས་རྗེའི་གཏེར་མངའ་རྒྱལ་བའི་ཚོགས། །འཆི་མེད་རིག་འཛིན་གྲུབ་དབང་སྤྲུལ་འཁོར་བཅས། །བྱིན་རླབས་མཐུ་དང་ཆོས་ཉིད་བདེན་སྟོབས་ཀྱིས། །གསོལ་བ་བཏབ་པ་དོན་ལྡན་འགྲུབ་བྱིན་རློབས། །རྒྱལ་སྲས་རིན་པོ་ཆེ་ཆོས་ཉིད་ཀློང་གྲོལ་དཔལ་
བཟང་པོའི་སྐུ་ཚེ་བརྟན་བཞུགས་སུ་སྣ་ཚོགས་རང་གྲོལ་གྱིས་ཕུལ་བ་མངྒ་ལཾ། །རབ་འབྱམས་རྒྱལ་བའི་དཀྱིལ་འཁོར་བསམ་ཡས་ཀྱི། ཁྱབ་བདག་མཚུངས་བྲལ་པདྨ་སམ་བྷ་ཝའི། །བསྟན་པའི་ཡང་སྙིང་ཕྲིན་ལས་རྒྱ་མཚོའི་མཛོད། །དབང་བསྒྱུར་མཆོག་གི་སྤྲུལ་སྐུ་ཞབས་བརྟན་གསོལ། །གྲངས་མེད་བསྐལ་པར་ཐུགས་བསྐྱེད་ས་བོན་ལས། །བསླུ་མེད་ལེགས་ཚོགས་ལྗོན་པའི་དཔལ་ཡོན་གྱི། །གྲིབ་བསིལ་ཕན་བདེའི་ཁྱོན་ཡངས་འགྲོ་བའི་སྐྱབས། །དཔག་བསམ་མཆོག་གི་སྤྲུལ་སྐུ་ཞབས་བརྟན་གསོལ། །འདོད་འབྱུང་རིན་ཆེན་བྱང་སེམས་དབང་གི་རྒྱལ། །ཚོགས་གཉིས་ཆུ་གཏེར་ཆེ་ལས་ལེགས་འོངས་པས། །བསྐལ་བཟང་དམ་ཆོས་འདོད་པ་འཇོ་བའི་དཔལ། །རེ་སྐོང་མཆོག་གི་སྤྲུལ་སྐུ་ཞབས་བརྟན་གསོལ། །བྱམས་པའི་རྫིང་བུར་སྙིང་རྗེའི་མྱུ་གུ་འཁྲུངས། །གཞན་ལ་ཕན་པར་དགའ་བའི་འདབ་བརྒྱ་བཞད། །རིས་མེད་བཏང་སྙོམས་ཆེན་པོའི་ཟིལ་མངར་འགྱེད། །དྲི་བྲལ་མཆོག་གི་
སྤྲུལ་སྐུ༴ །འགྱུར་མེད་སྐུ་ཡི་རྡོ་རྗེ་མཚན་དཔེའི་གཏེར། །འགག་མེད་གསུང་གི་གསང་བ་ཟབ་རྒྱས་བཅུད། །དམིགས་མེད་ཐུགས་རྗེའི་འོད་བརྒྱས་ཞིང་ཀུན་ཁྱབ། །མི་ཟད་རྒྱན་གྱི་འཁོར་ལོ་ཞབས་བརྟན་གསོལ། །བདག་སོགས་མཁའ་མཉམ་འགྲོ་བ་ལས་ཉོན་གྱི། །སྡུག་བསྔལ་མི་ཟད་མཚོ་ཆེན་མྱུར་སྐེམ་ནས། །མཆོག་ཏུ་མི་འགྱུར་ཀུན་ཏུ་བཟང་པོ་ཡི། །གོ་འཕང་བླ་ན་མེད་ལ་འགོད་མཛད་གསོལ། །རྒྱལ་བ་སྲས་བཅས་དཀོན་མཆོག་རིན་པོ་ཆེ། །རྩ་གསུམ་ལྷ་ཚོགས་བདེན་པའི་སྟོབས་མངའ་བ། །མ་ལུས་བྱིན་རླབས་མཐུ་ལས་སྨོན་པའི་དོན། །མྱུར་འགྲུབ་ཆོས་དང་བཀྲ་ཤིས་གོང་འཕེལ་ཤོག །ཅེས་པ་འདི་ནི། །ཐུབ་བསྟན་རྡོ་རྗེའི་བྲག་གི་གདན་སར་རིག་འཛིན་མཆོག་གི་སྤྲུལ་སྐུར་བརྟན་བཞུགས་སུ་ཕུལ་བའོ།། ༈ །།ན་མ་སྶརྦ་བུདྡྷ་བོདྔྷི་སཏྭ་གུ་རུ་རཏྣ་བྷྱཿ གང་ཞིག་ཕྱོགས་བཅུ་རབ་འབྱམས་ཞིང་ཀུན་གྱི། །སངས་རྒྱས་བྱང་སེམས་རྣམ་འགྱུར་གང་སྣང་བ། །མ་ལུས་རིགས་བདག་བླ་མ་ཁོ་ན་ཡི། །རྣམ་པར་འཕྲུལ་པའི་
ཟློས་གར་འབའ་ཞིག་སར། །མདོ་རྒྱུད་མན་ངག་མཐའ་དག་དགོངས་མཐུན་ན། །མ་དག་འགྲོ་བློའི་སྣང་ངོར་ཐ་མལ་པའི། །མི་གཟུགས་ཕལ་པར་ལྟ་བའི་ལོག་འཁྲུལ་ནི། །ད་ནས་རྣམ་པ་ཀུན་ཏུ་གཏན་སྤངས་ཏེ། །བླ་མ་སངས་རྒྱས་བླ་མ་ཆོས་དགེ་འདུན། །ཡི་དམ་ལྷ་དང་མཁའ་འགྲོ་ཆོས་སྲུང་སོགས། །སྐྱབས་གནས་དཀོན་མཆོག་མ་ལུས་བླ་མའི་སྐུར། །དབྱེར་མེད་ངེས་ཤེས་བརྟན་པོས་རྒྱུད་བསྐུལ་བས། །གསོལ་བ་སྙིང་ནས་འདེབས་སོ་བླ་མ་རྗེ། །བདག་སོགས་མཁའ་མཉམ་འགྲོ་བ་ལས་ཉོན་གྱི། །བག་ཆགས་སྡུག་བསྔལ་ཤུགས་དྲག་རྦ་ཀློང་འཁྲུག །ཉམ་ཐག་འཁོར་བའི་མཚོ་ལས་བསྒྲལ་དུ་གསོལ། །དུས་འདི་ནས་བཟུང་མཐར་ཐུག་བྱང་ཆུབ་བར། །མཉམ་མེད་བླ་མ་མཆོག་གིས་ཞབས་པད་ལ། །ཉེར་བསྟེན་མཉེས་གསུམ་མཐར་ཕྱིན་བྱིན་རླབས་ཞུགས། །བླ་མ་སྐུ་བཞི་དབྱེར་མེད་བདག་འགྲུབ་ཤོག །རྒྱལ་བ་མ་ལུས་བླ་མའི་
ངོ་བོར་གཅིག །བླ་མ་རང་རིག་ཆོས་སྐུར་ཡོངས་རྫོགས་པ། །ཡེ་ནས་ཡིན་པའི་གནས་ལུགས་མངོན་གྱུར་ཏེ། །འགྲོ་ཀུན་དོན་དམ་བླ་མའི་སར་འགོད་ཤོག །ཅེས་པ་ནི། ཟན་ཡངས་མི་འགྱུར་ལྷུན་གྱིས་གྲུབ་པའི་ཕོ་བྲང་ཆེན་པོ་ནས། ལྷ་སྲས་མཉྫུ་ནཱ་ཐ་ལ་ཕུལ་བའོ། །ན་མོ་གུ་རུ་བྷྱཿ གང་ཞིག་འཇིགས་རུང་འཁོར་བའི་མཚོ་ཆེན་ལས། །ངེས་པ་ཁོ་ནར་སྐྱོབས་ནུས་སྐྱབས་ཀྱི་མཆོག །དཀོན་མཆོག་མ་ལུས་འདུས་པ་བླ་མའི་ཞབས། །རྟག་པར་སྤྱི་བོས་རྒྱན་དུ་གུས་པས་མཆོད། །སངས་རྒྱས་ཐམས་ཅད་གདུལ་བྱའི་བསྐལ་ངོ་དང་། །ཉེ་བར་མཚུངས་པའི་སྒྱུ་འཕྲུལ་ཉིད་ལགས་ན། །བདག་སོགས་སྙིགས་དུས་གདུལ་བྱ་སོ་སོ་ཡི། །གང་ལ་མོས་པའི་བླ་མ་དེ་སངས་རྒྱས། །ཡི་དམ་མཁའ་འགྲོ་ཆོས་སྐྱོང་ཀུན་ཀྱང་དེ། །གང་ལ་གང་གིས་འདུལ་བའི་དེ་ཚུལ་གྱི། །རྣམ་འགྱུར་གྲངས་མེད་སྟོན་ཡང་དོན་དམ་པར། །ཡེ་ཤེས་ངོ་བོ་གཅིག་གི་རང་རྩལ་ཉིད། །ཡིན་ལ་ཡིན་པར་རྟགས་པའི་ངེས་ཤེས་དང་། །ལེགས་
ཉེས་ཐུགས་རྗེར་གོ་བའི་མོས་གུས་དང་། །གང་བྱུང་བྱིན་རླབས་ཤེས་པའི་བློ་ཁེལ་བཅས། ཁ་ཞེ་སྙིང་མཐུན་དད་པས་གསོལ་འདེབས་ན། །རྒྱལ་བའི་ཐུགས་རྗེར་ཉེ་རིང་མ་མཆིས་ཀྱང་། །བྱིན་རླབས་འཇུག་སྒོ་མོས་གུས་རྗེས་འགྲོའི་ཕྱིར། །བདག་སོགས་སྐྱེ་བ་འདི་ནས་བྱང་ཆུབ་བར། །འབྲལ་མེད་ཐུགས་རྗེས་ཉེར་བཟུང་བྱིན་གྱིས་རློབས། །མ་རིག་ལས་ཉོན་སྒྲིབ་ཚོགས་བྱང་བ་དང་། །གནས་སྐབས་འགལ་རྐྱེན་བར་ཆད་ཞི་བ་དང་། །དགོས་འདོད་བསམ་དོན་ཆོས་མཐུན་འགྲུབ་པ་སོགས། །ཐུན་མོང་དངོས་གྲུབ་ཀུན་གྱི་རེ་སྐོང་གསོལ། །ལེགས་པར་བརྟགས་བཞིན་སྙིང་པོས་དབེན་པའི་ཆོས། །འདི་སྣང་རྨི་ལམ་ཙམ་ལ་མི་ཞེན་པར། །རྒྱལ་ཀུན་བགྲོད་པ་གཅིག་པའི་དམ་ཆོས་ལ། །ལེགས་བརྩོན་རང་རྒྱུད་སྨིན་གྲོལ་གཞན་ཕན་འགྲུབ། །ཚེ་གཅིག་སངས་རྒྱས་གོ་འཕངས་མངོན་གྱུར་ཤོག །ཅེས་པ་ནི། མི་དབང་རིན་ཆེན་སྒང་པ་པདྨ་རྡོ་རྗེ་ལ་ཕུལ་བའོ། །སྭསྟི་པྲ་ཛ་བྷྱཿ
གང་གི་རང་བཞིན་ཆོས་དབྱིངས་འདུས་མ་བྱས། །སྤྲོས་པའི་མཚན་མ་ཀུན་ཞི་ཡེ་ཤེས་སྐུའི། །རང་གདངས་འགག་མེད་སྒྱུ་འཕྲུལ་ཆུ་ཟླའི་གར། །བྱིན་རླབས་བླ་མར་སྣང་བའི་སྐུ་ལ་འདུད། །ཡེ་ཤེས་སྤྲུལ་པའི་ཞིང་ཁམས་རབ་འབྱམས་ཀུན། །ཐུགས་རྗེ་ཚད་མེད་སྐུ་ཡི་བཀོད་པའི་ཕྲུལ། །ཇི་སྙེད་བསྟན་ཡང་ངོ་བོ་དབྱེར་མེད་པའི། །རིགས་ཀུན་ཁྱབ་བདག་བླ་མའི་ཞབས་ལ་འདུད། །བདག་དང་མཁའ་མཉམ་སེམས་ཅན་འདི་དག་ལ། །དམིགས་མེད་ཀློང་ནས་བརྩེ་ཆེན་ཐུགས་རྗེ་ཡིས། །རྒྱུན་ཆད་མེད་པར་གཟིགས་པ་དྲི་མེད་ཀྱི། །སྟོབས་ལྡན་མཆོག་ལ་གསོལ་བ་སྙིང་ནས་འདེབས། །འཁོར་བ་ཐོག་མེད་ནས་བཟུང་ད་ལྟའི་བར། །མ་རིག་ལྷན་སྐྱེས་སྒྲིབ་པ་ཚན་རེ་ཆེ། །ལས་ཉོན་འཁྲུལ་པའི་མུན་པར་འཐུམས་པ་འདི། །བླ་མའི་ཐུགས་རྗེའི་འོད་ཀྱི་བསལ་དུ་གསོལ། །ཚེ་འདིར་དལ་འབྱོར་ཐོབ་ཅིང་བསྟན་ལ་ཞུགས། །དམ་ཆོས་སྤྱོད་པའི་སྐལ་བར་ལྡན་ན་ཡང་། །བག་
ཆགས་ངན་གོམས་ལྟོ་གོས་དོན་ལ་གཡེང་། །མི་ཚེ་སྟོང་ཟད་གྱུར་འདིར་ཐུགས་རྗེས་གཟིགས། ཁ་ཆོས་ཟ་ཆོག་ཙམ་གྱི་སློབ་གཉེར་དང་། །ལྟར་སྣང་ཆོས་པའི་གཟུགས་བརྙན་ཙམ་འདི་ཡིས། །འཆི་ཁར་ལམ་སྣ་ཟིན་པའི་ཐབས་མ་མཆིས། །དམ་ཆོས་སྙིང་ནས་ནུས་པར་བྱིན་གྱིས་རློབས། །ཉིན་མོ་རྣམ་གཡེང་མཚན་མོ་གཉིས་ཀྱི་ངང་། །བར་མཚམས་བཟའ་བཏུང་ཚེ་འདིའི་དོན་ལ་འབྱམས། །དཀོར་དང་ཉེས་ལྟུང་འཁུར་རྩ་ཞོར་ལ་འགྲུབ། །བློ་རྒྱུད་དགེ་ལ་འགྱུར་བར་ཐུགས་རྗེས་གཟུང་། །ད་ལྟའི་སྣང་བ་རྨི་ལམ་ཡུན་ཙམ་འདི། །ཡེངས་མ་ལམ་ལ་མི་ཚེ་ཏུག་གི་ཟད། །ལུས་སེམས་བྲལ་ནས་བར་དོར་འཁྱམས་དུས་དེར། །སྐྱབས་མགོན་བླ་མ་མཆོག་གི་མཛད་དུ་གསོལ། །ཚེ་འདིར་འགལ་རྐྱེན་བར་ཆད་མེད་པ་དང་། །ཆོས་མིན་བསམ་སྦྱོར་རྒྱུད་ལ་མི་སྐྱེ་ཞིང་། །སྡོམ་གསུམ་དམ་ཚིག་ཉམས་ཆགས་མེད་པ་ཡིས། །ཐོས་བསམ་སྒོམ་གསུམ་མཐའ་རུ་
ཕྱིན་པར་ཤོག །མོས་གུས་ཆེན་པོས་བླ་མ་དཀོན་མཆོག་མཉེས། །དག་སྣང་འབྱོངས་པས་མཆེད་གྲོགས་དམ་སེལ་མེད། །སྙིང་རྗེ་བྱང་སེམས་འགྲོ་ལ་ཕན་པ་འགྲུབ། །ཆོས་དང་རང་རྒྱུད་གཏིང་ནས་འདྲེས་པར་ཤོག །སྐྱེད་རིམ་ཞིང་ཁམས་དག་པ་རབ་འབྱམས་ཤར། །རྫོགས་རིམ་རྟོག་ཚོགས་ཡེ་ཤེས་རྡོ་རྗེར་གྲོལ། །ཟུང་འཇུག་མི་ཟད་དོན་གྱི་འཁོར་ལོར་གྲུབ། །ཚེ་གཅིག་རྡོ་རྗེ་འཆང་དབང་མངོན་གྱུར་ཤོག །དེ་ལས་ཐུགས་རྗེ་ཕྲིན་ལས་ཐོགས་མེད་ཀྱིས། །སྤྲུལ་པ་རྒྱ་མཚོས་ནམ་མཁའ་གར་ཁྱབ་པར། །འགྲོ་བའི་ཁམས་དབང་བསམ་པ་དང་མཚུངས་པའི། །གཞན་ཕན་འཁོར་མཐའ་ཇི་སྲིད་འགྲུབ་གྱུར་ཅིག །ཅེས་པ་ནི། །ཤཱཀྱ་ལྷུན་གྲུབ་ཀྱིས་བསྐུལ་ངོར་རོ། །ཨོཾ་ཨཱཿཧཱུྃ། ཆོས་སྐུའི་ཞིང་ཁམས་འོད་གསལ་རྡོ་རྗེ་སྙིང་། །ལོངས་སྐུའི་ཞིང་ཁམས་ཚངས་པ་རྔ་སྒྲའི་གནས། །སྤྲུལ་པ་སྐུ་ཡི་ཞིང་ཁམས་ཚངས་ཆེན་ཏེ། །སྐུ་གསུམ་ཞིང་མཆོག་རྣམས་ལ་ཕྱག་འཚལ་ལོ། །སངས་རྒྱས་སྤྲུལ་པས་མཛད་པ་མངོན་
བསྟན་པའི། །འཛམ་གླིང་བྱང་ཆུབ་སྙིང་པོ་རྡོ་རྗེ་གདན། །བྱ་རྒོད་སྤུངས་རི་དཔལ་ལྡན་འབྲས་སྤུངས་ཆེ། །ཤམ་བྷ་ལ་སོགས་རྣམས་ལ་ཕྱག་འཚལ་ལོ། །ཆོས་འཁོར་སོ་སོའི་གནས་དང་རྒྱལ་བྱེད་ཚལ། །ནཻ་རཉྫ་ནར་རྩྭ་མཆོག་དུར་ཁྲོད་བརྒྱད། །ཨོ་རྒྱན་སྤྲུལ་པའི་ཞིང་སོགས་ཡུལ་ཉེར་བཞི། །མཆོག་གི་གནས་ཆེན་ཀུན་ལ་ཕྱག་འཚལ་ལོ། །ཏི་སེ་ལ་ཕྱི་དཔལ་འབར་ཡོལ་མོ་གངས། །ཟབ་ལུང་མཁར་ཆུ་སྟག་ཚང་ཏིལ་གྲོ་དང་། །ཆོས་འཁོར་ལྷ་ས་ཡེར་པ་སྒྲགས་ཡང་རྫོང་། །དཔལ་གྱི་བསམ་ཡས་རྣམས་ལ་ཕྱག་འཚལ་ལོ། །མཆིམས་ཕུ་ཁྲ་འབྲུག་ཡར་ལུང་ཤེལ་གྱི་བྲག །ཤམ་བུ་མཁའ་སྤྱོད་རྩཱ་རི་དྭགས་ལྷ་སྒམ། །འབྲི་སྟག་ཚལ་ཐེལ་ར་སྒྲེང་མཚུར་ར་ལུང་། །ས་དགེའི་གདན་ས་ཀུན་ལ་ཕྱག་འཚལ་ལོ། །རྒྱ་བོད་བལ་ཡུལ་ལྷོ་མོན་ཨེ་གཉལ་བྱར། །དྭགས་ཀོང་མདོ་ཁམས་བོད་དང་བོད་ཆེན་པོ། །ཧོར་འཇང་རྒྱ་ནག་ལ་སོགས་ཡུལ་ཀུན་གྱི། །སྒྲུབ་
གནས་གཙུག་ལག་རྟེན་གསུམ་ཕྱག་འཚལ་ལོ། །རྒྱལ་བ་རིགས་གསུམ་སྤྲུལ་པའི་སྐྱེས་མཆོག་ཚོགས། །ཆོས་རྒྱལ་བྱང་སེམས་གྲུབ་ཐོབ་རིག་འཛིན་དང་། །གུ་རུ་ཆེན་པོས་བྱིན་བརླབས་ཞབས་བཅགས་པའི། །སྦས་ཡུལ་གནས་ཆེན་རྣམས་ལ་ཕྱག་འཚལ་ལོ། །ཕྱི་ནང་གཞན་གསུམ་བཟོད་ནས་དཀྱིལ་འཁོར་ཆེར། །ཡོངས་གྲུབ་སྣོད་བཅུད་རྟེན་དང་བརྟེན་པའི་ཚུལ། །མ་ལུས་ཡེ་ཤེས་རྡོ་རྗེའི་ཞིང་ཆེན་པོར། །ལྷུན་གྲུབ་དག་པ་རབ་འབྱམས་ལ་ཕྱག་འཚལ། །མ་རྟོགས་ཡུལ་སེམས་གཉིས་འཛིན་མཐོལ་ཞིང་བཤགས། གང་ཤར་ཆོས་ཉིད་རོལ་བའི་མཎྜལ་འབུལ། །སྣང་སྲིད་རྣམ་བཞག་སྐུ་གསུམ་ཞིང་ཆེན་པོར། །བདག་སོགས་མཁའ་མཉམ་འགྲོ་ཀུན་སྒྲོལ་བར་ཤོག །ཅེས་པ་འདི་ལྟ་བུ་ཞིག་དགོས་ཞེས་ལེགས་བཤད་མཐར་ཕྱིན་གྱིས་བསྐུལ་ངོར་བྲིས་པ་དགེའོ། །ཕྱོགས་དུས་རྒྱལ་བ་ཐམས་ཅད་ཀྱི། །ཐུགས་རྗེ་བྱིན་རླབས་གཅིག་བསྡུས་སྐུ། །བླ་མ་ཡིད་བཞིན་ནོར་བུ་མཆོག །ཞབས་ལ་ཕྱག་འཚལ་སྐྱབས་སུ་མཆི། །ཡེ་ཤེས་རྡོ་རྗེའི་སྐུ་ཉིད་ལ། །སྐྱེ་ཆེའི་མཚན་མ་དང་བྲལ་ཡང་། །བདག་སོགས་འཁྲུལ་རྨོངས་སྣང་ངོ་རུ། །འཆི་མེད་རྡོ་རྗེའི་སྐུ་བརྟན་
གསོལ། །དུས་འདི་ནས་བཟུང་བྱང་ཆུབ་བར། །རྒྱལ་བ་ཁྱེད་ཀྱི་ཞབས་པད་དྲུང་། །འབྲལ་མེད་མཉེས་གསུང་བསྒྲུབ་ནུས་ཤིང་། །ཕྲིན་ལས་འགྲོ་ཕན་རྒྱ་ཆེན་ཤོག །ཅེས་པ་ནི་སྦྱིན་བདག་བསོད་ནམས་ཆོས་འཕེལ་བཟའ་མིས་བསྐུལ་ངོར་རོ། །ན་མོ་གུ་རུ། རྒྱལ་བའི་མཛད་པ་དཔག་མེད་ཀྱིས། །གདུལ་བྱའི་ཞིང་དང་གང་འཚམ་པའི། །རྣམ་པར་འཕྲུལ་པ་རྒྱ་མཚོའི་ཚོགས། །བསམ་མི་ཁྱབ་ལ་གུས་ཕྱག་འཚལ། །བྱང་སེམས་མེ་ཏོག་ཟླ་ཚེས་དང་། །ཟླ་འོད་གཞོན་ནུ་བི་མ་ལ། །མཉམ་མེད་འཛམ་གླིང་གྲགས་པ་སོགས། །སྔོན་བྱོན་རྣམས་ལ་གུས་ཕྱག་འཚལ། །ཀུན་མཁྱེན་བཀྲ་ཤིས་རྣམ་པར་རྒྱལ། །མཆོག་སྤྲུལ་ནོར་བུ་བརྒྱན་པ་ཉིད། །སླར་ཡང་བདག་སོགས་གདུལ་བྱའི་ངོར། །བཟང་པོ་རྡོ་རྗེར་གུས་ཕྱག་འཚལ། །ཐུབ་པའི་ཞབས་འབྲིང་ཀུན་དགའ་བོ། །ཐོན་མི་ལོ་ཆེན་བཻ་རོ་དང་། །རྡོར་གླིང་ལ་སོགས་གཏེར་སྟོན་གྱི། །སྐྱེ་བརྒྱུད་རྣམས་ལ་གུས་ཕྱག་འཚལ། །རྔོག་
ལོ་ས་པ་བྱ་འདུལ་དང་། ཁྱུང་པོ་རྣལ་འབྱོར་རྫ་ཡིག་པ། །གཡག་སྡེ་པ་ཆེན་གཉལ་སྟོན་སོགས། །མཁས་གྲུབ་རིམ་བརྒྱུད་གུས་ཕྱག་འཚལ། །དུས་མཐའི་འགྲོ་བ་བདག་སོགས་ཀྱི། །སྐྱབས་མགོན་བསྟན་འཛིན་རྡོ་རྗེ་དང་། །མཁས་མཆོག་པདྨ་ལེགས་གྲུབ་སྩལ། །རྩ་བའི་བླ་མར་གུས་ཕྱག་འཚལ། །རྒྱལ་བའི་ཁྱབ་བདག་པད་འབྱུང་རྗེ། །དྲིན་ཅན་མཆོག་སྤྲུལ་རྣམ་གཉིས་བཅས། །བདག་ཡིད་གུས་པས་ཕྱག་འཚལ་ཞིང་། །སྙིང་ནས་སྐྱབས་མཆི་ཐུགས་རྗེས་གཟིགས། །སངས་རྒྱས་མ་ལུས་འདུས་པའི་སྤྱི་གཟུགས་མཆོག །ཟླ་བྲལ་སྐྱབས་གནས་སྤྲུལ་པའི་སྐུ་རྣམ་གཉིས། །སྙིགས་དུས་གདུལ་བྱ་མགོན་མེད་བདག་སོགས་ལ། །བརྩེ་བས་དགོངས་ཏེས་བསྐལ་བརྒྱར་ཞབས་བརྟན་གསོལ། །སྒྱུ་འཕྲུལ་ཡེ་ཤེས་རྡོ་རྗེའི་སྐུ་མཆོག་ལ། །སྐྱེ་འཆི་འཕོ་འགྱུར་མཚན་མ་མི་མངའ་ཡང་། །བདག་སོགས་གདུལ་དཀའི་སྐྱེ་བོ་སྐལ་དམན་ལ། །སྐྱོ་བར་
མི་མཛད་ཐུགས་རྗེས་སྐྱངས་མཛད་གསོལ། །བདག་གི་ཚེ་འདི་ཕྱི་མ་བར་དོ་དང་། །སྐྱེ་བའི་ཕྲེང་བརྒྱུད་མཐར་ཐུག་བྱང་ཆུབ་བར། །རེ་ཡུལ་དྲིན་ཅན་རྣམ་གཉིས་མ་གཏོགས་པ། །སྐྱབས་གནས་གཞན་ན་མ་མཆིས་ཐུགས་རྗེས་དགོངས། །སྒོ་གསུམ་གཏན་འདུན་མཐའ་དག་མཆོད་པར་འབུལ། །ཉེས་ལྟུང་སྡིག་སྒྲིབ་ཅི་མཆིས་མཐོལ་ཞིང་བཤགས། །མཛད་ཕྲིན་ཀུན་ལ་ཡི་རངས་བཀའ་བཞིན་སྒྲུབས། །མཁའ་མཉམ་འགྲོ་ལ་གང་འདུལ་ཆོས་འཁོར་བསྐུལ། །ཞི་བའི་དབྱིངས་སུ་མི་བཞུགས་བསྟན་འགྲོ་སྐྱོང་། །དགེ་ཚོགས་མ་ལུས་དགོངས་པ་རྫོགས་ཕྱིར་བསྔོ། །སྒྱུ་ལུས་ཟང་ཟིང་ཆོས་ཀྱི་ཞབས་ཏོགས་ཀུན། །རྗེ་བཙུན་རྣམ་གཉིས་མཉེས་པའི་རྒྱུར་གྱུར་ཅིག །ཚེ་རབས་ཐམས་ཅད་བླ་མའི་གདུལ་བྱ་དང་། །འཁོར་དུ་གྱུར་ནས་དམ་ཆོས་ཤ་སྟག་གིས། །བདག་རྒྱུད་སྨིན་ཅིང་གྲོལ་ཏེ་བསྟན་འགྲོའི་དོན། །
འབད་མེད་ཡང་དག་འགྲུབ་པར་བྱིན་གྱིས་རློབས། །ལོག་ལམ་བདུད་ཀྱི་བར་ཆད་མི་འཇུག་པར། །བྱང་ཆུབ་སྙིང་པོའི་གོ་འཕངས་མངོན་གྱུར་ནས། །ཕ་མར་གྱུར་པའི་མཁའ་ཁྱབ་སེམས་ཅན་ཀུན། །སངས་རྒྱས་ས་ལ་མྱུར་དུ་འགོད་བྱེད་ཤོག །ཅེས་པ་འདི་ནི། དོན་གཉིས་མཆོག་གྲུབ་ཀྱི་ངོར་བྲིས་པའོ། །ཨོཾ་ཨཱཿཧཱུྃ། གདོད་མའི་གནས་ལུགས་ཁྱབ་གདལ་ཆེ། །ཕྱོགས་རིས་མ་གྲུབ་ཀུན་ཏུ་མཉམ། །མ་བཅོས་རང་བབས་ཆོས་སྐུའི་ཀློང་། །འཛིན་མེད་ངང་ནས་གསོལ་བ་འདེབས། །ངོ་བོ་སྟོང་པ་ཆེན་པོ་ཡི། །རང་གདངས་མ་འགག་འོད་དུ་གསལ། །གསལ་དང་སྟོང་པ་ཟུང་འཇུག་པའི། །སྣང་ཚུལ་རིག་པས་གསོལ་བ་འདེབས། །རྣམ་པ་སྣ་ཚོགས་སྒྱུ་མའི་འཕྲུལ། །མེད་བཞིན་སྣང་ལ་སྣང་བཞིན་སྟོང་། །རོལ་རྩལ་སྣ་ཚོགས་འཕྲོ་འདུ་ལས། །བདག་འཛིན་བྲལ་བས་གསོལ་བ༴ །ཨེ་མ། རང་སེམས་སངས་རྒྱས་སྐུ་གསུམ་འདི། །རང་ལ་གནས་ཀྱང་
མ་རིག་པས། །འཁོར་བའི་འཁྲུལ་འཁོར་ཤུགས་དྲག་པོས། །བསྐྱོད་འདི་རང་གི་ལས་ཀྱི་མཐུ། །ཐོག་མ་མེད་ནས་ད་ལྟའི་བར། །འགྲོ་བ་རིས་དྲུག་ཐ་དད་ཀྱི། །ལུས་ངན་བླངས་ཤིང་ལས་ངན་སྤྱད། །ད་དུང་བསུན་དང་སྐྱོ་བ་མེད། །བདག་ཏུ་འཛིན་པའི་བག་ཆགས་ཀྱིས། །ཆགས་སྡང་ལས་ཉོན་དུག་ལྔའི་སེམས། །མ་བསླབ་ཤེས་པའི་ངན་གོམས་ཅན། །གཡོ་སྒྱུའི་ལས་ཀྱི་རང་ཕུང་སྒྲུབ། །བཟང་པོའི་བག་ཆགས་མི་དྲན་པར། །ངན་པའི་བློ་སྣ་ཟད་མེད་འཕེལ། །སྙིགས་དུས་ཆོས་གཟུགས་བདག་འདྲ་བས། །ཆོས་ཀྱི་མདོ་དོན་ཅི་ཡིས་འགྲུབ། །དག་སྣང་མིག་འཕང་དམའ་བ་དང་། །ལོག་ལྟའི་མགོ་ཁྱེར་མཐོ་བ་དང་། །རྒྱུ་འབྲས་ལས་སྤྱོད་རྩིང་བ་ཡིས། །ཐར་པའི་ལམ་སྣ་ག་ལ་ཟིན། །ཉིན་མཚན་གཡེང་བས་འདའ་བྱེད་ཅིང་། །བག་མེད་དཀོར་ལ་ལོངས་སྤྱོད་པའི། །རབ་བྱུང་གཟུགས་ཀྱི་ངར་འཛིན་ཅན། །འཆི་ཁར་
བློ་གདེངས་གང་ལ་བྱེད། །འཇིག་རྟེན་སྐྱེ་བོས་མཆོད་པའི་ཡུལ། །གཤིན་གསོན་དཀོར་ལ་ངོམ་མེད་དུ། །སྤྱད་ཀྱང་རང་ཉིད་ཤི་མ་ཐག །གར་འགྲོ་གར་སྐྱེའི་ངེས་པ་ཅི། །སེམས་རྒྱུད་ཆོས་ཀྱི་མ་ཐུལ་བཞིན། །ཆོས་ཀྱི་ཚིག་ཙམ་བརྗོད་ཤེས་ཀྱང་། །ནེ་ཙོའི་འདོན་པ་ཇི་ལྟ་བར། །རང་གཞན་སུ་ལ་ཕན་པར་ནུས། །རྩ་བ་བཞི་ཡང་མི་བསྲུང་ཞིང་། །དགེ་སྦྱོང་ཆོས་བཞི་མི་ཤེས་པར། །དགེ་འདུན་དཀོར་ལ་ཧམ་པ་ཡི། །བཙུན་གཟུགས་རང་མཐོང་རང་བསླུ་མཁན། །བདག་དང་བདག་འདྲའི་ཆོས་རྫུ་རྣམས། །དཀོན་མཆོག་ཡེ་ཤེས་སྤྱན་མངའ་བས། །གསེལ་བར་གཟིགས་ཤིང་ཁྲེལ་ན་ཡང་། །དུས་མཐའ་འགྲོ་ལ་སྙིང་རྗེས་དགོངས། །རྒྱལ་བའི་ཕྲིན་ལས་ནུས་པ་བསམ་མི་ཁྱབ། །ལས་ངན་འགྲོ་བའི་བློ་རྒྱུད་ཆོས་ལ་བསྒྱུར། །མི་རྟག་ངེས་འབྱུང་སྙིང་ལ་དྲན་ནས་ཀྱང་། །དམ་པའི་ཆོས་ལ་འབུངས་ནུས་བྱིན་གྱིས་རློབས། །འཁོར་བའི་གཞན་ཆགས་བདག་གཞན་ཕྱོགས་འཛིན་
དང་། །འཇིག་རྟེན་ཆོས་བརྒྱད་སྐྱིད་འདོད་རྣམ་གཡེང་ལས། །ལྟོ་གོས་ཚེ་འདིའི་དགོས་ཆ་བསྒྲུབ་པ་སོགས། །ཆོས་པའི་རྐང་འདྲེན་མི་བྱེད་བྱིན་གྱིས་རློབས། །རང་ལ་ཚིག་ཟུར་མཐོ་དམན་མི་བཟོད་བཞིན། །གཞན་ལ་སྐུར་འདེབས་བརྙས་བཅོས་བྱེད་པ་ལ། །ཉམ་ང་སྤུ་ཙམ་མེད་པའི་སྙིང་སྟོབས་དང་། །ལོག་རྟོག་རྒྱུད་ལ་མི་སྐྱེར་བྱིན་གྱིས་རློབས། །འདི་ཕྱི་ཀུན་ཕུང་ཤ་ཆང་བུད་མེད་ལ། །ངོས་ལྐོག་དུ་མར་སྤྱོད་བཞིན་ཚུལ་འཆོས་ཀྱིས། །དད་རྫས་དཀར་ཟས་ཚིམ་པ་མེད་སྤྱོད་པའི། །རང་གཞན་གཉིས་ཕུང་མི་བྱེད་བྱིན་གྱིས་རློབས། །རྒྱུ་འབྲས་རྣམ་དབྱེ་ཙམ་ཡང་མ་གོ་བར། །ཐོས་བསམ་སྒོམ་གསུམ་ཡོད་རྫུའི་སྟོང་ཟོབ་དང་། །ལྟོ་ཕྱིར་ཟོལ་ཟོག་མི་བྱེད་དགུ་བྱེད་པའི། །ཆོས་པའི་ཕུང་འདྲེར་མི་འགྱུར་བྱིན་གྱིས་རློབས། །རང་མ་སྨིན་པར་གཞན་གྱི་འདྲེན་པ་དང་། །མི་ནུས་བཞིན་དུ་གཞན་དོན་བྱེད་ལོ་
དང་། །རང་འདོད་ཕུག་གཅུག་ནོར་རྫས་འདོད་པ་ཡིས། །བརྫུས་མའི་འགྲོ་ཕན་མི་བྱེད་བྱིན་གྱིས་རློབས། །མདོར་ན་འདི་བཟུང་བྱང་ཆུབ་མ་ཐོབ་བར། །སྒོ་གསུམ་དམ་པའི་ཆོས་ཀྱི་གཞུང་བཞིན་དུ། །གཡོ་ཟོལ་སྤངས་ནས་བླ་མ་མཉེས་སྒྲུབ་ཅིང་། །དམ་པའི་རྣམ་ཐར་ཚུལ་བཞིན་སྤྱོད་བྱིན་རློབས། །ལེགས་པར་སྤྱད་པའི་རྒྱུ་འབྲས་བསླུ་མེད་ཀྱི། །ལེགས་ལམ་མཐར་ཕྱིན་རང་གཞན་དོན་བཟང་འགྲུབ། །ནམ་མཁས་གར་ཁྱབ་ཕ་མ་སེམས་ཅན་ཀུན། །ཡང་དག་བྱང་ཆུབ་ལམ་ལ་འགོད་པར་ཤོག །ཅེས། བྱང་ཆུབ་འོད་ཟེར་གྱི་ངོར་བྲིས་པའོ། །ན་མ་མ་ཧཱ་གུ་་ཡེ། །རྒྱལ་བ་ཀུན་གྱི་བདག་ཉིད་སྨན་གྱི་བླ། །ཡེ་ཤེས་མཁའ་འགྲོའི་གཙོ་མོ་དཔལ་ལྡན་འཕྲེང་། ཁམས་གསུམ་འགྲོ་བའི་སྐྱབས་གཅིག་གཡུ་ཐོག་མགོན། །གསོལ་བ་འདེབས་སོ་བྱིན་རླབས་ཆར་རྒྱུན་ཕོབ། །ཐུགས་སྲས་མཆོག་གྱུར་མཁས་གྲུབ་སུམ་སྟོན་ཞབས། །དཔལ་ལྡན་གཞོན་ནུ་གཙང་སྟོན་སངས་རིན་དང་། །མཁས་བཙུན་
རིན་དྷོར་དོན་གྲུབ་རྒྱལ་མཚན་དཔལ། །གསོལ་བ་འདེབས་སོ་བྱིན་རླབས༴ །བྲང་ཏི་དཀོན་སྐྱབས་དཔལ་ལྡན་འཚོ་བྱེད་དང་། །འཚོ་བྱེད་རིན་ཆེན་རྣལ་འབྱོར་བསོད་ནམས་དབང་། །རྣལ་འབྱོར་ཆེན་པོ་རི་ཁྲོད་ཞིག་པོ་རྗེ། །གསོལ་བ༴ །བཻ་རོས་བྱིན་རླབས་མཚུངས་མེད་ཟུར་མཁར་བ། །བཤད་པའི་མངའ་བདག་ལེགས་བྱུང་པདྨ་སྐྱབས། །ཟར་བན་བྱམས་པ་སློབ་དཔོན་མགོན་པོ་དཔལ། གསོལ་བ༴ །འགྲོ་དོན་པ་དང་སྨན་བླ་དོན་ཀུན་གྲུབ། །ཐམས་ཅད་མཁྱེན་པ་ནོར་བུ་བརྒྱན་པའི་མཆོག །འཇའ་མཚོན་སྙིང་པོ་སྣ་ཚོགས་རང་གྲོལ་རྗེ། །གསོལ་བ༴ །ཡི་དམ་རྟ་ཕག་མཁའ་འགྲོ་སྡེ་ལྔའི་ཚོགས། །བཀའ་སྲུང་དམ་ཅན་སྡེ་དགུ་སྤྲུལ་འཁོར་བཅས། །སྨན་གྱི་ལྷ་མོ་དྲང་སྲོང་རིག་འཛིན་ལ། །གསོལ་བ༴ །མདོ་རྒྱུད་མན་ངག་བསྟན་བཅོས་ཀུན་གྱི་བཅུད། །འགྲོ་ལ་ཕན་པའི་སྙིང་པོ་གསོ་རིག་གི །ཚིག་དོན་མན་ངག་ལག་ལེན་གནད་མཐའ་དག །ཚུལ་བཞིན་རྒྱུད་ལ་འབྱོར་བར་བྱིན་
གྱིས་རློབས། །མཁས་རློམ་ང་རྒྱལ་ཆགས་སྡང་འགྲན་སེམས་དང་། །ཕྲག་དོག་གཡོ་སྒྱུ་ཁེ་གྲགས་ཟས་ནོར་འདོད། །ཆོས་བརྒྱད་ལ་སོགས་ལོག་པའི་སེམས་རིགས་ཀྱི། །དྲི་མ་རྡུལ་ཙམ་མེད་པར་བྱིན་གྱིས་རློབས། །འདོད་ཆགས་ཞེ་སྡང་གཏི་མུག་རྒྱུ་ཡི་ནད། །རླུང་དང་ཁྲག་མཁྲིས་བད་ཀན་རྐྱེན་གྱི་ནད། །ངན་སོང་གསུམ་གྱི་སྡུག་བསྔལ་འབྲས་བུའི་ནད། །མ་ལུས་དྲུངས་ནས་འབྱིན་པར་བྱིན་གྱིས་རློབས། །མཁའ་ཁྱབ་འགྲོ་བ་ཕ་མ་ཤ་སྟག་ཀུན། །ལས་ཉོན་འཁྲུལ་པའི་གཅོང་གིས་ཉམ་ཐག་པ། །ཐམས་ཅད་བྱང་ཆུབ་སེམས་ཀྱི་སྨན་མཆོག་གིས། །གཏན་བདེ་རྫོགས་བྱང་གོ་འཕང་ལ་འཁོད་ཤོག །ཅེས། སྨན་གྱི་རྒྱུད་བཞི་སོགས་གསོ་རིག་སྤྱིའི་བླ་རྒྱུད་གསོལ་འདེབས་འདི་ནི། །གཞན་ཕན་ནོར་བུས་བསྐུལ་ངོར་བྲིས་པའོ། །ཡེ་གྲོལ་གདོད་མའི་གནས་ལུགས་འདུས་མ་བྱས། །རང་རྩལ་འགག་མེད་སྣང་བའི་བླ་མ་ནི། །རང་དང་འདུ་འབྲལ་མཚན་མས་མ་གོས་པར། །ཡིན་ལུགས་ཇི་བཞིན་རྟོགས་པས་གསོལ་བ་འདེབས། །མེད་
བཞིན་སྣ་ཚོགས་སྣང་བའི་བག་ཆགས་གཟུགས། །གང་ལ་བདེན་པར་བཟུང་བའི་རྨི་ལམ་ལ། །ལེགས་ཉེས་དུ་མར་བཏགས་པའི་བར་ཆད་གེགས། །ལྟོས་འགྲོའི་མདུད་བཞིན་གྲོལ་བར་བྱིན་གྱིས་རློབས། །འཁོར་དང་མྱ་ངན་འདས་པས་ཉེར་བསྡུས་པའི། །ཆོས་ཀུན་རང་སེམས་གཅིག་པུའི་འདུ་འགོད་དུ། །ཤེས་ཀྱང་མཁྲིས་ནད་མ་བྱང་དུང་མདོག་ལྟར། །ལོག་འཁྲུལ་འཛིན་པ་ཞི་བར་བྱིན་གྱིས་རློབས། །བདག་མ་གྲུབ་ལ་བདག་ཏུ་འཛིན་བློ་དང་། །དེ་ལ་བརྟེན་ནས་གཞན་ཞེས་ཐ་དད་བཟུང་། །དེ་ལས་ཆགས་སྡང་ཀུན་སློང་དུ་མ་འཕེལ། །གཉིས་འཛིན་རབ་རིབ་ཞི་བར་བྱིན་གྱིས་རློབས། །བཟང་པོའི་བག་ཆགས་བྱང་བའི་གོ་སྐབས་བྲལ། །ལོག་མིན་བག་ཆགས་ངན་གོམས་རྩི་ཡིས་ཐེབས། །བྱང་ཆུབ་དམ་པའི་སྤྱོད་ལ་མི་འཇུག་པའི། །བློ་སེམས་ཆོས་ཀྱིས་ཐུལ་བར་བྱིན་གྱིས་རློབས། །ཆོས་ཀྱིས་རྣམ་གྲངས་བགྲང་ཡས་ཇི་སྙེད་པའི། །
དགོས་དོན་རང་རྒྱུད་འདུལ་ཐབས་གཅིག་པུར་མངག །དེ་ཕྱིར་གང་ཐོས་ལག་ཏུ་ལོངས་པ་དང་། །བསྐེམ་ཁེངས་ཁོང་སྲན་མེད་པར་བྱིན་གྱིས་རློབས། །གྲུབ་མཐའ་མཐའ་དག་རང་རང་ས་ན་བཟང་། །རྣམ་མཁྱེན་བར་དུ་གྲུབ་མཐའི་ཚད་ཟིན་དཀའ། །མཐར་ཐུག་དོན་ལ་གྲུབ་མཐའི་དངོས་པོས་དབེན། །གཅིག་ཤེས་ཀུན་གྲོལ་ཆེན་པོར་བྱིན་གྱིས་རློབས། །སྡོམ་དང་དམ་ཚིག་རིམ་པ་བསམ་ཡས་པ། །ཐམས་ཅད་ཉོན་མོངས་རང་གར་མི་འཆོར་ཐབས། །གནད་ཀྱི་དམ་པར་ཐ་མའི་ཨ་འཐས་བློ། །སྐད་ཅིག་ཙམ་ཡང་མི་འབྱུང་བྱིན་གྱིས་རློབས། །བསྐུར་ཐོབ་མཚན་འཛིན་སྤྲོས་བྱིས་རྩེད་ཀྱི། །དབང་དང་དབྱིབས་ལ་ལྷར་བཟུང་སྐྱེད་རིམ་སོགས། །དང་པོའི་ལས་ཅན་ཁྲིད་པའི་ཟློས་གར་ལ། །མི་ཞེན་དགོས་དོན་སྙིང་པོ་ལོན་བྱིན་རློབས། །སྐྱེད་རྫོགས་མངོན་དུ་མ་གྱུར་ཐུན་མོང་གི །ལས་ཚོགས་ཕྲ་མོས་རང་བློ་མི་གཡེང་བར། །དགོས་མེད་དྲག་
བསྙེན་པ་ལེགས་ཐེམས་ཏེ། །མཁའ་མཉམ་མཐར་གླིང་སྒྲོལ་ནུས་བྱིན་གྱིས་རློབས། །མཚན་བཅས་མཚན་མེད་རྫོགས་རིམ་ཟབ་མོ་ཡི། །ཡང་སྙིང་སྒོ་གསུམ་ཡེ་ཤེས་རྡོ་རྗེ་ཉིད། །བསྒྲུབ་ལ་མི་འབད་ཟག་བཅས་ཡོན་ཏན་ཙམ། །ཆོག་འཛིན་ཞེན་པས་མི་འཆིང་བྱིན་གྱིས་རློབས། །ཆེན་པོ་གསུམ་སོགས་ངེས་དོན་ཟབ་མོའི་གསང་། །བཟང་བཟང་མཐོའི་མཐོའི་མིང་ལ་ཕོ་རུས་ཀྱིས། །བདག་ཏུ་བཟུང་བའི་སྒོམ་ཆེན་མི་བྱེད་པར། །རང་རིག་རྗེན་པ་སྐྱོང་བར་བྱིན་གྱིས་རློབས། །ནམ་མཁའ་སྤྲིན་དང་རྒྱ་མཚོའི་རླབས་བཞིན་དུ། །སྣ་ཚོགས་གང་ལྟར་ཤར་ཡང་སེམས་ཉིད་ལས། །མིན་བཞིན་བཟང་ངན་འབྱེད་དང་སྤོང་ལེན་སོགས། །ཆུ་ལ་རི་མོ་མི་འདྲིར་བྱིན་གྱིས་རློབས། །ཉམས་རྟོགས་སྐྱེ་དང་མི་སྐྱེའི་རེ་དོགས་དང་། །ཡོན་ཏན་ལྟར་སྣང་ཕྲ་མོར་དགའ་བྲོད་སོགས། །ལྷ་བུའི་བདུད་ཀྱིས་མ་བསླུས་ཡང་དག་པའི། །གྲུབ་
རྟགས་བདག་འཛིན་ཞི་བར་བྱིན་གྱིས་རློབས། །རྣམ་རྟོག་གཉེན་པོས་གཞོམ་ལ་མི་རེ་དང་། །རྣམ་རྟོག་ཉིད་ལས་གཞན་པའི་སྒོམ་མི་འཚོལ། །རྣམ་རྟོག་ཤར་མཁན་འཆར་རྒྱུ་ངོ་ཤེས་གསུམ། །རང་རིག་གཅིག་པུས་ཆོག་པར་བྱིན་གྱིས་རློབས། །ཆ་བུར་ལུས་དང་དབུགས་ཀྱི་ཐག་པ་དང་། །བདག་ཏུ་འཛིན་པའི་སེམས་ཀྱི་རི་མོ་རྣམས། །མ་ཡལ་དེ་སྲིད་རྩོལ་མེད་དྲན་རིག་དང་། །མ་བྲལ་འཁྲུལ་རྗེས་མི་འབྲང་བྱིན་གྱིས་རློབས། །རང་རིག་མ་སྨིན་གཞན་དོན་ལྟར་སྣང་གི །རྙེད་ཚོལ་འགྲོ་དོན་གཉིས་ཕུང་མི་བྱེད་པར། །དུས་བབས་རྩོལ་མེད་འགྲོ་དོན་རླབས་པོ་ཆེར། །འཁོར་བ་དོང་སྤྲུགས་ནུས་པར་བྱིན་གྱིས་རློབས། །དེ་ལྟར་གསོལ་བ་གདབ་དང་སྨོན་པའི་ཚིག །འདི་ནི་ཕྱི་རུ་མ་ཡིན་རང་རྒྱུད་ཀྱི། །ཀུན་ཁྱབ་ཆོས་སྐུའི་བླ་མར་གསོལ་བཏབ་པས། །བྱིན་རླབས་རང་གི་རྒྱུད་ལ་འབབ་
གྱུར་ཅིག །ཅེས། སྐྱེ་བ་ནས་སྐྱེ་བར་དམ་པའི་མཛད་པ་ལ་གོམས་པ་ཡང་དག་མཐར་སོན་པས་ཤེས་བྱའི་ཆོས་སོ་ཅོག་ལ་མི་འཕྲོག་པའི་སྤོབས་པ་བརྙེས་ཤིང་། ཆོས་དོན་ཆོས་བཞིན་སྤྱོད་པའི་རང་དབང་ཅན། །སྤྲུལ་པའི་སྐྱེས་མཆོག་ཆོས་ཀྱི་ཉི་འོད་མཚན་དོན་མཐུན་པ་གང་གི་བཞེད་སྐོངས་སུ་ཕུལ་བ་ཤུ་བྷམ། །སངས་རྒྱས་ཐམས་ཅད་རྩ་བའི་བླ་མའི་སྐུར། །དབྱེར་མེད་གདོད་ནས་གཅིག་པའི་ངོ་བོ་ནི། །སྣ་ཚོགས་རང་གྲོལ་པདྨ་ལེགས་གྲུབ་རྩལ། །ཞབས་ལ་ཕྱག་འཚལ་སྐྱབས་མཆི་གསོལ་བ་འདེབས། །དུས་འདི་ནས་བཟུང་མཐར་ཐུག་བྱང་ཆུབ་བར། །རེ་ས་སྐྱབས་ཡུལ་གཞན་ན་མ་མཆིས་པས། །དམིགས་མེད་ཐུགས་རྗེས་རྟག་ཏུ་གཟིགས་ནས་ཀྱང་། །སྒོ་གསུམ་སྐུ་གསུང་ཐུགས་ཀྱིས་བྱིན་གྱིས་རློབས། །རྡོ་རྗེའི་སྐུ་ལ་སྐྱེ་འཆིའི་འཕོ་འགྱུར་གྱི། །མཚན་འཛིན་བྲལ་ཡང་བདག་སོགས་གདུལ་བྱའི་ཚོགས། །གཉིས་འཛིན་བློ་ཡི་འཁྲུལ་རྟོག་མ་ཟད་བར། །སྤྱི་བོའི་རྒྱན་དུ་འབྲལ་མེད་བཞུགས་ནས་ཀྱང་། །
བདག་སོགས་འགྲོ་ལ་ཐུགས་རྗེས་དགོངས། །ནད་གདོན་བར་ཆད་ཞི་བར་བྱིན་གྱིས་རློབས། །བསམ་དོན་ཆོས་བཞིན་འགྲུབ་པར་བྱིན་གྱིས་རློབས། །ལས་ཉོན་སྡིག་སྒྲིབ་དག་པར་བྱིན༴ །སྒོ་གསུམ་དགེ་ལ་འཁོད་པར་བྱིན༴ །འབྲེལ་ཚད་ཐར་ལམ་འདྲེན་པར་བྱིན༴ །ཚེ་དང་སྒྲུབ་པ་མཉམ་པར་བྱིན༴ །འཆི་ཁར་གནད་གཅོད་མེད་པར་བྱིན༴ །བར་དོར་རང་ངོ་ཤེས་པར་བྱིན༴ །ངན་འགྲོ་སྐྱེ་སྒོ་ཆོད་པར་བྱིན༴ །མྱུར་དུ་སངས་རྒྱས་ཐོབ་པར་བྱིན༴ །མཁའ་མཉམ་གཞན་དོན་འགྲུབ་པར་བྱིན་གྱིས་རློབས། །ཅེས་པ་འདི་ནི། དད་ལྡན་བྱང་ཆུབ་རིན་ཆེན་ལའོ། །ན་མོ་གུ་རུ་རཏྣ་བྷྱཿ ཆོས་དབྱིངས་འདུས་མ་བྱས་པའི་ཞིང་མཆོག་ནས། །རྒྱལ་ཀུན་རྡོ་རྗེ་འཆང་དུ་རོ་གཅིག་པའི། །རྣམ་རོལ་ཡེ་ཤེས་སྒྱུ་མའི་ཟློས་གར་འཕྲེང་། །རྩ་རྒྱུད་བླ་མར་སྙིང་ནས་གསོལ་བ་འདེབས། །རིགས་ཀུན་ཁྱབ་བདག་གང་འདུལ་ཡེ་ཤེས་སྐུ། །མཐའ་ཡས་གདུལ་བྱའི་ཡུལ་མཐུན་སྤྲུལ་མཛད་པས། །ཞིང་འདིར་བདག་སོགས་
སྣང་ངོར་ཐུགས་རྗེའི་གཏེར། །རྩ་བའི་བླ་མར་སྙིང་ནས་གསོལ་བ་འདེབས། །གྲངས་མེད་སྔོན་ནས་ཆོས་སྐུར་སངས་རྒྱས་ཀྱང་། །སྙིགས་དུས་གདུལ་བྱའི་དངོས་འཛིན་གཞིག་པའི་སླད། །ཆོས་བརྒྱད་དྲི་སྤངས་བྱང་ཆུབ་དཔལ་བཟང་པོ། །འཁྲུལ་ཞིག་མཆོག་དེར་སྙིང་ནས་གསོལ་བ་འདེབས། །གངས་ཅན་སྒྲུབ་རྒྱུད་སྲོག་འཛིན་ཀུན་དགའ་དཔལ། །ལ་སོགས་མཁས་གྲུབ་དུ་མའི་ཐུགས་བཅུད་ཀྱི། །གསང་མཛོད་འཛིན་པ་བློ་གྲོས་གྲགས་པ་དཔལ། །གྲུབ་དབང་མཆོག་དེར་སྙིང་ནས་གསོལ་བ་འདེབས། །རང་དོན་འབྲས་བུའི་རྩེ་མོར་ལེགས་སོན་ཡང་། །གཞན་དོན་ལས་འབྲས་བསླུ་མེད་སྤང་བླང་གནས། །སྟོན་ལ་ཐབས་མཁས་མི་ཕམ་བསྟན་འཛིན་རྗེ། །ཡོངས་འཛིན་མཆོག་དེར་སྙིང་ནས་གསོལ་བ་འདེབས། །རྒྱལ་བའི་རྒྱལ་མཆོག་འཇིག་རྟེན་དབང་ཕྱུག་གི། །ཕྲིན་ལས་ཡང་དག་བསྒྲུབ་ལ་ངལ་མེད་
པའི། །དཔལ་ལྡན་ཀརྨ་ལྷུན་གྲུབ་རྣམ་པར་རྒྱལ། །སྐྱབས་གནས་མཆོག་དེར་སྙིང་ནས་གསོལ་བ་འདེབས། །རྡོ་རྗེའི་ཕུང་ཁམས་སྐྱེ་མཆེད་སྣོད་བཅུད་ཀུན། །གཟོད་ནས་ཡོངས་དག་གསང་གསུམ་དཀྱིལ་འཁོར་ཆེ། །ལྷུན་གྲུབ་འཁོར་ལོ་སྡོམ་པ་བདེ་བའི་མཆོག །སྤྲུལ་འཁོར་བཅས་དེར་སྙིང་ནས་གསོལ་བ་འདེབས། །རྒྱལ་བསྟན་རིན་ཆེན་སྐྱོང་བར་གཉེར་བླངས་ཏེ། །ལོག་འདྲེན་ཚར་གཅོད་དམ་ལྡན་བུ་བཞིན་སྐྱོང་། །མ་ཧཱ་ཀ་ལ་ལྕམ་དྲལ་སྡེ་དཔུང་བཅས། །བསྟན་སྲུང་མཆོག་དེར་སྙིང་ནས་གསོལ་བ་འདེབས། །ངོ་བོ་དབྱེར་མེད་སྣང་ཚུལ་ཐ་དད་པའི། །ཐུགས་རྗེའི་སྤྲུལ་བསྒྱུར་བླ་མ་ཡི་དམ་ལྷ། །མཁའ་འགྲོ་ཆོས་སྲུང་སྐྱབས་གནས་དཀོན་མཆོག་ལ། །རྩེ་གཅིག་གུས་པས་སྙིང་ནས་གསོལ་བ་འདེབས། །རིན་ཆེན་བསྟན་པ་བཤད་སྒྲུབ་ཉམས་ལེན་གྱི། །སྲོག་འཛིན་ཐོས་བསམ་སྒོམ་བརྩོན་འདུས་སྡེ་རྣམས། །མི་མཐུན་བར་ཆད་བདུད་ལས་རྣམ་རྒྱལ་ཞིང་།
བསྟན་པ་ཕྱོགས་མཐར་འཕེལ་རྒྱས་བྱིན་གྱིས་རློབས། །བསྟན་སྲོག་ཚུལ་བཞིན་འཛིན་པའི་རྣམ་འདྲེན་དང་། །ཚོགས་བསམ་དབེན་པར་སྤྱོད་པའི་དགེ་འདུན་ཀུན། །བཞེད་མཐུན་བྱང་ཆུབ་བསྒྲུབ་ལ་བར་ཆད་མེད། །རང་གཞན་དོན་གཉིས་མཐར་ཕྱིན་བྱིན་གྱིས་རློབས། །བདག་སོགས་མགོན་ཁྱོད་གདུལ་བྱར་གྱུར་པ་ཀུན། །རྣམ་གཡེང་ཆོས་བརྒྱད་ཉོན་མོངས་ལས་ངན་དབང་། །མི་འཆོར་ཟབ་དོན་སྙིང་པོས་རྒྱུད་གྲོལ་ཏེ། །ཚེ་གཅིག་བྱང་ཆུབ་འགྲུབ་པར་བྱིན་གྱིས་རློབས། །བླ་མ་རྒྱལ་བ་རབ་འབྱམས་སྤྲུལ་འཁོར་བཅས། །ཐུགས་རྗེའི་མཁའ་ཁྱབ་འགྲོ་ཀུན་རྗེས་བཟུང་ནས། །མངོན་པར་མཐོ་དང་ངེས་ལེགས་དཔལ་འབྱོར་གྱི། །བཀྲ་ཤིས་འཇིག་རྟེན་ཡོངས་ལ་ཁྱབ་གྱུར་ཅིག །ཅེས། རྗེ་བཙུན་དཔལ་ལྡན་བླ་མ་གྲུབ་པའི་གཙུག་རྒྱན་འཁྲུལ་ཞིག་ཆེན་པོ་ཁྱི་ཐུལ་བ་ཞེས་མཚན་གྱི་གྲགས་དཀར་ལྷ་ལམ་ཁྱབ་པ་གང་གིས་ཐུགས་རྗེའི་སྒྱུ་འཕྲུལ་ཡེ་ཤེས་སྐུའི་བཀོད་
འཕྲེང་རིམ་བྱོན་རྣམས་ལ་གསོལ་བ་འདེབས་པའི་ཚིགས་སུ་བཅས་པ་འདི་ནི། རྗེ་བཙུན་མཆོག་དེའི་ཐུགས་རྗེ་དང་ཆོས་ཀྱི་བཀའ་དྲིན་ལས་འཁྲུངས་པའི་སྐྱེས་ཆེན་དམ་པ་ཀརྨ་མི་ཕམ་མགོན་པོའམ་མཚན་གཞན། ངེས་དོན་མཐར་ཕྱིན་དཔལ་བཟང་པོར་ཐུགས་བསམ་རྣམ་པར་དག་པས་བསྐུལ་བར་མཛད་པའི་བཞེད་དགོངས་དང་མཐུན་པར་བཀོད་པས་བཀྲ་ཤིས་བྱིན་རླབས་ཀྱི་དཔལ་དུ་འབར་བར་གྱུར་ཅིག །ཨོཾ་ཨཱཿཧཱུྃ། གནས་ལུགས་ཕྱག་རྒྱ་ཆེན་པོ་གདོད་མའི་གཤིས། །སྐྱེ་འགག་གནས་དང་འགྲོ་འོང་མཚན་མས་དབེན། །བརྗོད་བྲལ་ལྷན་སྐྱེས་ཡེ་ཤེས་ངོ་བོ་ཉིད། །མ་བཅོས་ལྷུན་གྲུབ་འདི་ནི་བླ་མའི་སྐུ། །ཆོས་སྐུ་ཁྱབ་གདལ་ཆེན་པོར་གསོལ་བ་འདེབས། །ཡེ་གྲོལ་འགྱུར་མེད་ཀློང་ནས་བྱིན་གྱིས་རློབས། །ཞེ་འདོད་རྩོལ་སྒྲུབ་ངལ་བའི་བར་ཆད་ཀུན། །རང་སར་རང་གྲོལ་ཉིད་དུ་འགྲུབ་པར་ཤོག །ཆོས་ཉིད་གསལ་སྟོང་ཟུང་འཇུག་རང་གདངས་ལས། །འགག་མེད་འཆར་སྒོའི་སྣང་བ་རབ་འབྱམས་ཀུན། །སྣང་ཡང་བདེན་འཛིན་ཞེན་པས་མ་བཅིངས་པ། །
རང་གསལ་འཛིན་མེད་འདི་ནི་བླ་མའི་སྐུ། །ལོངས་སྐུ་མཚན་རྫོགས་ཆེན་པོར་གསོལ་བ་འདེབས། །མི་ཟད་རྒྱན་འཁོར་ཀློང་ནས་བྱིན་གྱིས་རློབས། །ཡུལ་སེམས་ཐ་དད་བཟུང་བའི་འཁྲུལ་རྟོག་ཀུན། །མ་སྤངས་རང་གྲོལ་ཉིད་དུ་འགྱུར་བར་ཤོག །རྩལ་མདངས་ཅིར་ཡང་འཆར་བའི་སྒྱུ་འཕྲུལ་གྱི། །བཀོད་པ་འབུམ་ཕྲག་སྟོན་ཡང་ངོ་བོས་སྟོང་། །སྣང་སྟོང་ཐ་དད་མེད་པའི་རང་བཞིན་གྱི། །ཀུན་བྱེད་རྒྱལ་པོ་འདི་ནི་བླ་མའི་སྐུ། །སྤྲུལ་སྐུ་འགྲོ་འདུལ་ཆེན་པོར་གསོལ་བ་འདེབས། །ཤར་གྲོལ་དུས་མཉམ་ཀློང་ནས་བྱིན་གྱིས་རློབས། །སྒྱུ་མ་བདེན་པར་བཟུང་བའི་བག་ཆགས་ཀྱི། །ཨ་འཐས་གཞི་རྩ་མེད་པར་ཞི་བར་ཤོག །སྐུ་གསུམ་དབྱེར་མེད་རིགས་བདག་བླ་མ་ཉིད། །རང་སེམས་གཉུག་མ་འདི་དང་ཐ་དད་མེད། །གཉིས་མེད་རང་ངོ་ཤེས་པའི་མོས་གུས་ཀྱིས། །གསོལ་བ་འདེབས་བྱ་འདེབས་བྱེད་མ་དམིགས་པའི། །བཅོས་
མིན་མོས་གུས་ཐ་མལ་ཤེས་རིག་ལ། །བཅོས་མའི་ལྷད་ཀྱི་མ་བསླད་མ་བསྒྱུར་བ། །བླ་མ་རང་རིག་སྒོམ་ཡེངས་ལས་འདས་པའི། །ཀློང་དུ་འཁོར་འདས་དུས་གསུམ་འབྲལ་མེད་ཧཱུྃ། །གནས་ལུགས་གདོད་མའི་ཡེ་ཤེས་སྤྲོས་མཚན་གྱི། །དྲི་མས་མ་སྒྲིབས་དོན་དམ་བླ་མ་ཡི། །རང་ཞལ་མངོན་སུམ་མཇལ་བ་འདི་ཇི་བཞིན། །མཁའ་མཉམ་ཕ་མ་འགྲོ་ཀུན་སྐྱེ་མེད་ཨཱཿ བདག་ཉིད་འདི་བཟུང་སྐྱེ་བའི་འཕྲེང་བརྒྱུད་མཐར། །བདག་ཏུ་འཛིན་པའི་རི་མོ་མ་ཡལ་བར། །དེ་སྲིད་ཟང་ཟིང་བསྡུ་ཐབས་མ་ཡིན་པའི། །འགྲོ་དོན་རླབས་ཆེན་སྤྱོད་པའི་སྤྲུལ་སྐུར་ཨོཾ། །རྟག་ཏུ་གཞན་ལ་ཕན་པ་ཡང་དག་གི །བྱང་སེམས་སྤྱོད་པ་ངལ་མེད་སྒྲུབ་བྱེད་ཅིང་། །ངར་འཛིན་ཆོས་བརྒྱད་བདུད་ཀྱིས་མ་བཅོམས་པར། །བླ་མ་མཆོག་གི་གོ་འཕངས་མྱུར་འགྲུབ་ཤོག །ཅེས། ངེས་དོན་དང་མཐུན་པའི་སྐུ་གསུམ་གསོལ་འདེབས་འདི་བཞིན་བྲིས་པ་དགོས་ཞེས། གཙང་ཕྱོགས་རྒྱལ་བྱེད་ཚལ་གྱི་ཆོས་གྲྭ་ཆེན་པོའི་མཁན་
རིན་པོ་ཆེ་མི་ཕམ་ཆོས་འཕེལ་བའི་བསྐུལ་ངོར་བཀོད་པའོ། །ན་མོ་གུ་རུ། བདག་ལུས་ཕུང་པོ་ཁམས་དང་སྐྱེ་མཆེད་ཆོས། །མཐའ་དག་གཟོད་མ་ཉིད་ནས་ཡོངས་དག་པའི། །རང་བཞིན་དཔལ་ལྡན་བླ་མའི་དཀྱིལ་འཁོར་དུ། །སྣང་སྲིད་སྣོད་བཅུད་ཅིར་སྣང་དེ་བཞིན་ནོ། །འོན་ཀྱང་མོས་བློས་རང་གསལ་གདབ་པའི་ཕྱིར། །སྤྱི་གཙུག་དད་བརྒྱའི་འདབ་སྟོང་ཉི་ཟླའི་སྟེང་། །དྲན་མཆོག་རྗེ་བཙུན་བླ་མ་མཚན་དཔེའི་སྐུར། །སྣང་སྟོང་རང་རིག་ངོ་བོར་ལམ་མེར་ཤར། །མཆོད་བྱ་མཆོད་བྱེད་གཉིས་སྣང་རྟོག་པའི་འཕྲེང་། །ཀུན་རྫོབ་སྒྱུ་མའི་མཎྜལ་མ་ཡིན་པར། །རང་སེམས་བླ་མའི་ངོ་བོར་ཐག་ཆོད་པའི། །གང་དག་དོན་གྱི་མཎྜལ་འབུལ་བར་བགྱི། །ཨོཾ་གུ་རུ་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་་ས་མ་ཡེ་ཨཱཿཧཱུྃ། ཨེ་མ་ཧོཿ གདོད་ནས་རྣམ་དག་གི་ཞིང་ཁམས། །ཡེ་གྲོལ་ཀ་དག་གི་ཀློང་ནས། །
རང་རིག་ཆོས་སྐུ་ཡི་བླ་མ། །སྒོམ་མེད་བློ་འདས་རང་མཁྱེན་ནོ། །འོད་གསལ་ལྷུན་གྲུབ་ཀྱི་ཞིང་ཁམས། །སྣང་སྲིད་ཡོངས་དག་གི་དཀྱིལ་འཁོར། །འགག་མེད་ལོངས་སྐུ་ཡི་བླ་མ། །ཡེངས་མེད་འཛིན་བྲལ་རང་མཁྱེན་ནོ། །སྣ་ཚོགས་སྒྱུ་འཕྲུལ་གྱི་རོལ་རྩལ། །ཅིར་ཡང་ངེས་མེད་ཀྱི་གར་མཁན། །ཀུན་བྱེད་སྤྲུལ་སྐུ་ཡི་བླ་མ། །འཁྲུལ་མེད་རང་གྲོལ་རང་མཁྱེན་ནོ། །སྐུ་གསུམ་དབྱེར་མེད་ཀྱི་གནས་ལུགས། །སངས་རྒྱས་ལག་བཅངས་སུ་སྟོན་མཛད། །སྐུ་དྲིན་མཚུངས་མེད་ཀྱི་རྗེ་བཙུན། །རྩ་བའི་བླ་མ་རང་མཁྱེན་ནོ། །ཆོས་ཐམས་ཅད་བློ་ཡི་སྣང་ཚུལ་ཙམ། །སངས་རྒྱས་ཀུན་གདུལ་བྱའི་བསྐལ་ངོར་སྤྲུལ། །བདག་ཉིད་ཀྱི་རང་སྐལ་ཇི་བཞིན་དུ། །སངས་རྒྱས་ཞེས་ཁྱེད་ལས་གཞན་སུ་གང་། །རབ་འབྱམས་ཀྱི་ཞིང་དང་གདུལ་བྱ་དང་། །འདུལ་བྱེད་དང་འདུལ་ཐབས་ཇི་སྙེད་པ། །ཐམས་ཅད་ཀྱང་བླ་མའི་སྒྱུ་འཕྲུལ་ལས། །དོན་གཞན་དུ་
བདག་ནི་མི་སེམས་སོ། །ཐུགས་རྗེ་ལ་བསྐུལ་བར་མི་འཚལ་ཞིང་། །བྱིན་རླབས་ལ་རྒྱུན་ཆད་མེད་མོད་ཀྱང་། །བདག་ཡིད་ཀྱི་མོས་པའི་གདུང་དབྱངས་འདི། །རྗེ་བླ་མའི་སྙན་དུ་གསན་ལགས་སམ། །བདག་ཐོག་མེད་དུས་ནས་ད་བར་དུ། །ལས་ཉོན་མོངས་མ་རིག་འཁྲུལ་པ་འཐུམས། །རྗེ་ཐུགས་རྗེའི་ཉི་མ་གསལ་འབར་ཁྱེད། །སྙིང་ཐག་པས་གསོལ་འདེབས་འབད་ལ་གཟིགས། །རྗེ་སྐུ་གསུམ་ངོ་བོ་དབྱེར་མེད་ཉིད། །བདག་གདུལ་བྱའི་ཁམས་ལ་ཡོངས་ཁྱབ་ཀྱང་། །བློ་མ་རིག་རྨོངས་པས་གཉིས་སུ་སྣང་། །ད་གཉིས་མེད་དུ་འགྲུབ་པར་བྱིན་གྱིས་རློབས། །བདག་ཆོས་གཟུགས་སྙོམས་ལས་རྣམ་གཡེང་མཁྱེན། །ཕ་ཁྱེད་ལས་རེ་ས་གཞན་མེད་པས། །ཐུགས་སྙིང་རྗེ་ཆེན་པོའི་དབྱིངས་རུམ་ནས། །སྐུ་རྫུ་འཕྲུལ་གྱི་བཀོད་པ་བསྟན་དུ་གསོལ། །ཆོས་བརྒྱད་ཁྲི་བཞི་སྟོང་བསམ་ཡས་ཀྱང་། །
དོན་འགྲོ་བ་འདུལ་ཐབས་གཅིག་ཉིད་ཕྱིར། །གནད་ཟབ་མོ་ངེས་དོན་བདུད་རྩིའི་ཆར། །བདག་མོས་པའི་བུ་ཡི་རྒྱུད་ལ་ཕོབ། །སེམས་འཁྲུལ་རྟོག་གི་རྫུན་སྣང་རྨི་ལམ་བཞིན། །འདིས་རང་ཕུང་དུ་འཁོར་བའི་བཙོན་རར་འཇུག །ད་ཅོག་བཞག་གི་ཀློང་དུ་ཆམ་གྲོལ་བར། ཁྱེད་ཐུགས་རྗེའི་མཐུ་ཡིས་མཛད་རེ་རན། །བདག་ཁམས་གསུམ་འཁོར་བའི་སེམས་ཅན་ལ། །ཕ་ཐུགས་རྗེའི་གཏེར་མངའ་རྗེ་བཙུན་ཁྱེད། །དུས་རྟག་ཏུ་གཡེལ་མེད་བརྩེ་ཆེན་གྱིས། །གཟིགས་མཛོད་དང་ལྷ་ཡི་ལྷ་གཅིག་པུ། །ཀྱེ་ཧོ། །བདག་དང་བླ་མ་གསོལ་བ་གདབ་པ་གསུམ། །དོན་ལ་རང་རིག་ཆོས་སྐུར་རོ་གཅིག་ཀྱང་། །མངོན་དུ་མ་གྱུར་རྨོངས་པའི་བུ་འབངས་ལ། །ཐུགས་རྗེས་མྱུར་དུ་གཟིགས་དང་བླ་མ་མཆོག །འཁོར་འདས་སྣང་གྲགས་བདེ་སྡུག་རྟོག་ཚོགས་ཀུན། །རང་སེམས་འཆར་སྒོ་སེམས་ཉིད་བླ་མའི་ཐུགས། །གཉིས་སུ་མེད་ཀྱང་ཞེན་འཛིན་རྦ་ལ་
གཡེང་། །འཁྲུལ་ཞེན་ཆུ་རྒྱུན་ཆོད་ཅིག་བླ་མ་མཁྱེན། །འདི་ཕྱི་བར་དོ་ལུས་ངག་སེམས་སྣང་ཀུན། །རྨི་ལམ་ཡུལ་བཞིན་བདེན་པས་དབེན་ན་ཡང་། །ད་དུང་ཨ་འཐས་འཁྲུལ་ཕྱིར་འབྲང་བའི་བུ། །བདག་འདྲའི་སྡུག་བསྔལ་བསལ་མཛོད་བླ་མ་མཁྱེན། །དགྲ་འདྲེ་ནད་རྐྱེན་སེམས་ཀྱིས་བཏགས་པ་ཙམ། །སེམས་ཉིད་སྒྱུ་མའི་ལུས་ལ་ཞེན་པས་ཕུང་། །ཞེན་འཛིན་བདག་ཏུ་བཟུང་བའི་ཆགས་སྡང་ཅན། །རྐྱེན་ངན་ལམ་དུ་ལོངས་མཛོད་བླ་མ་མཁྱེན། །ཡུལ་འཁོར་ཟས་གོས་ལོངས་སྤྱོད་གཡེང་བའི་རྒྱུ། །སྐྱིད་འདོད་ཚེ་འདིའི་འདུན་མས་མི་ཚེ་ཟད། །འཆི་ཁར་ལག་སྟོང་འགྲོ་སྙིང་མེད་པོ། །ཞེན་ལོག་རྒྱུད་ལ་འཆར་མཛོད་བླ་མ་མཁྱེན། །དོན་དམ་ཆོས་ཉིད་མངོན་དུ་མ་གྱུར་བར། །རྟེན་འབྲེལ་རྒྱུ་འབྲས་བསླུ་བ་མེད་པའི་ཚུལ། །གོ་ཞིང་ཤེས་ཀྱང་མི་དགེ་ཞོར་གསོག་མཁན། །
བློ་ཁ་ཆོས་ལ་བསྒྱུར་མཛོད་བླ་མ་མཁྱེན། །སྐྱེ་འཆི་འཁོར་བའིའཁྲུལ་འཁོར་ཤུགས་དྲག་པོས། །རྟག་པ་རྒྱུན་དུ་སྲིད་པའི་འཁོར་ལོར་འཁྱམས། །ད་ནས་ཡང་དག་བྱང་ཆེན་ལམ་བཟང་ལ། །མྱུར་བ་ཉིད་དུ་ཁྲིད་མཛོད་བླ་མ་མཁྱེན། །ཨ་ལ་ལ་ཧོ། །ངོ་མཚར་སྤྲུལ་བསྒྱུར་གང་འདུལ་རོལ་བ་ཡིས། །འགྲོ་རྣམས་བདེ་བླག་སྒྲོལ་བའི་ཡ་མཚན་དེ། །བླ་མ་མཆོག་ཁྱེད་སྐུ་ཡི་རྣམ་པར་ཐར། །དེ་བཞིན་བདག་ལུས་སྤྲུལ་པའི་སྐུ་འགྲུབ་ཤོག །ཟབ་རྒྱས་ཐ་དད་འགྲོ་བའི་མོས་སྐལ་དང་། །རྗེས་མཐུན་དམ་ཆོས་འདོད་དགུའི་ཆར་ཕབས་པས། །གདུལ་བྱ་སྨིན་མཛད་ཁྱེད་གསུང་རྣམ་པར་ཐར། །དེ་བཞིན་བདག་ངག་ལོངས་སྐུར་ལྷུན་གྲུབ་ཤོག །རྟོག་མེད་ཐུགས་རྗེ་རྨད་བྱུང་ཡེ་ཤེས་ཀྱི། །དབྱིངས་ཉིད་གདོད་མའི་མགོན་པོར་དངོས་ཀུན་ལ། ཁྱབ་འདི་ཁྱེད་ཐུགས་རྣམ་ཐར་འདུས་མ་བྱས། །དེ་བཞིན་བདག་ཡིད་ཆོས་སྐུ་མངོན་གྱུར་ཤོག །ལྷ་
སྔགས་དཀྱིལ་འཁོར་ཞིང་ཁམས་ཆོས་ཀུན་ཀྱང་། །དོན་ལ་རྒྱལ་བ་ཁྱེད་ལས་གཞན་མི་དམིགས། །སངས་རྒྱས་གཅིག་དུས་ཉིད་ལ་གསོལ་བཏབ་པས། །སྐུ་བཞི་དབྱེར་མེད་བདག་གི་རྟགས་འགྲུབ་ཤོག །ཨོཾ་ཨཱཿཧཱུྃ་ཧོ། །སྲིད་ཞི་ཀུན་མཉམ་རྫོགས་ཀྱི་མཁའ་དབྱིངས་སུ། ཁྱབ་བདག་གི་རྒྱལ་མཆོག་ཀུན་ཏུ་བཟང་། །དུས་གསུམ་གྱི་སངས་རྒྱས་བསྐྱེད་པའི་ཡབ། །དྲིན་ཅན་གྱི་བླ་མར་བདག་ཡིད་ཆེས། །དྲང་དོན་དང་ངེས་དོན་རབ་འབྱམས་ཆོས། །མ་ལུས་ཀྱི་སྙིང་པོའི་བཅུད་མཐར་ཐུག །རང་སེམས་དང་སངས་རྒྱས་བླ་མ་གསུམ། །དབྱེར་མེད་དུ་གཅིག་པའི་བཀའ་དྲིན་ཐོབ། །འཁོར་བ་དང་ལམ་དང་མྱང་འདས་གསུམ། །ཐ་མལ་གྱི་ཤེས་པ་པོ་མའི་སྟེང་། །མཉམ་འཇོག་ལ་དགའ་འདམ་མ་དགོས་པའི། །བདག་བློ་དེ་ཁྱེད་ཐུགས་གཅིག་པུར་གཏོད། ཁམས་གསུམ་གྱི་འདྲེན་མཆོག་སྐྱབས་གནས་ཀུན། །དུས་གཅིག་ཏུ་བདག་མདུན་བྱོན་གྱུར་ནའང་། །བདག་
ཡིད་ནི་ཕ་མཆོག་ཁྱེད་ལས་གཞན། །སྐྱབས་གནས་ཀྱི་ལྟོས་ཡུལ་འཚོལ་མ་ལགས། །སྐུ་གསུང་ཐུགས་ཡེ་ཤེས་རྡོ་རྗེ་ཆེ། །ཡོངས་རྫོགས་ཀྱི་བྱིན་རླབས་དབང་གི་མཆོག །བསྐུར་ཐོབ་ཀྱི་མཚན་མའི་འཛིན་རྟོག་བཅས། །རང་གྲོལ་ཀློང་ཡངས་ཀྱི་ངང་དུ་གདལ། །མཚུངས་བྲལ་དྲིན་ཅན་བླ་མ་དེ། །བདག་དང་འདུ་འབྲལ་ཡེ་མེད་བཞིན། །ངེས་ཤེས་མོས་གུས་དྲག་པོ་ཡིས། །གསོལ་བ་བཏབ་དོན་མྱུར་འགྲུབ་ཤོག འཇིག་རྟེན་འཁྲུལ་པའི་འདུན་མ་ལ། །ཞེན་པས་མི་ཚེ་མི་སྐྱེལ་བར། །གྲུབ་ཐོབ་རྒྱུད་པའི་རྣམ་ཐར་འཁྱོངས། །ཚེ་དང་སྒྲུབ་པ་མཉམ་པར་ཤོག །ཀུན་རྫོབ་སྤྲོས་བཅས་འདུ་བྱེད་ཀྱི། །ཆོས་ལ་བློ་ཁ་མི་ཡེངས་པར། །བྱང་ཆུབ་ཚེ་འདིར་འགྲུབ་ནུས་པའི། །ཟབ་དོན་རྩེ་གཅིག་སྒོམ་པར་ཤོག །རང་རྒྱུད་ཆོས་ཀྱི་མ་སྨིན་པར། །ལྟར་སྣང་གཞན་དོན་བསླུ་བྲིད་ཀྱིས། །གཉིས་ཕུང་དོན་མེད་མི་བྱེད་པར། །དམ་བཅས་མཐའ་རུ་ཕྱིན་པར་ཤོག །ཆོས་
སྐུའི་གཏན་སྲིད་མ་ཟིན་བར། །མངོན་ཤེས་གྲུབ་རྟགས་ལྟར་སྣང་གི། །རང་མཐོང་འགོང་པོས་མི་བསླུ་བར། །སྣང་བཞི་མཐའ་རུ་ངེས་ཕྱིན་ཤོག །སྐུ་གསུམ་སྒོ་འཕང་མངོན་གྱུར་ཚེ། །འབད་མེད་ཐུགས་རྗེའི་རོལ་གར་གྱིས། །འཁོར་མཚོ་དོང་ནས་སྤྲུགས་ནུས་པའི། །ཕྲིན་ལས་ནམ་མཁའ་མཉམ་པར་ཤོག །དེ་ལྟར་བདག་གིས་དཔལ་ལྡན་བླ་མ་མཆོག །བསྒོམས་ཤིང་བསྒྲུབས་དང་གསོལ་བ་བཏབས་པ་ཡི། །དགེ་བ་འདིས་མཚོན་ཚེ་རབས་ཐམས་ཅད་ཀྱི། །རྣམ་དཀར་ཇི་སྙེད་འགྲོ་བའི་དོན་དུ་བསྔོ། །གཞི་དང་ལམ་དང་འབྲས་བུར་བཏགས་པ་དང་། །ལྟ་སྒོམ་སྤྱོད་སོགས་མིང་དུ་ཅིར་བརྗོད་པའི། །ཉམས་ལེན་བླ་མ་རང་སེམས་དབྱེར་མེད་ཀྱི། །དོན་འདི་འགྲོ་བ་ཀུན་གྱིས་རྟོགས་འགྲུབ་ཤོག །བདག་དང་སེམས་ཅན་བླ་མ་ཞེས་པའི་མིང་། །ཀུན་ཀྱང་ད་ལྟའི་རིག་པ་བཅོས་མིན་འདིར། །ཅོག་བཞག་ཁྱབ་གདལ་རང་བབས་གཉུག་མའི་གཤིས། །
མཉམ་ཡངས་རྫོགས་པ་ཆེན་པོའི་ཀློང་དུ་ཕཊཿ ཅེས། ཡང་དག་དོན་གྱི་བླ་མའི་རྣལ་འབྱོར་གསོལ་འདེབས་སྨོན་ལམ་དང་བཅས་པ་འདི་ཉིད། རང་གི་གཅུང་པོ། སྤྲོས་མེད་གཅིག་ཅར་ལ་མོས་པའི་རྣལ་འབྱོར་སུ་རྒྱརྨ་ཏིའི་ཉམས་ལེན་རྒྱུན་ཁྱེར་དུ་གདམས་པའོ།། ༈ །།དུས་གསུམ་རྒྱལ་རྣམས་ཆོས་སྐུ་དབྱེར་མེད་ཀྱང་། །འདུལ་བྱའི་སྐལ་ངོར་རྣམ་འགྱུར་མཐའ་ཡས་པའི། །མཚན་དང་མཛད་པ་རྒྱ་མཚོའི་ཕྲིན་ལས་གཏེར། །དབང་བསྒྱུར་རྩ་བའི་བླ་མར་གསོལ་བ་འདེབས། །ཤཱཀྱའི་དབང་པོའི་ཡབ་མཆེད་ལས་འཁྲུངས་ཤིང་། །མདོ་སྡེ་འཛིན་མཆོག་རྒྱལ་བའི་ཞབས་འབྲིང་མཛད། །འོད་སྲུངས་རྗེས་སུ་སྟོན་པའི་རྒྱལ་ཚབ་མཆོག །འཕགས་པ་ཀུན་དགའ་བོ་ལ་གསོལ་བ་འདེབས། །སྟོད་ལུང་སྐུ་འཁྲུངས་ཆོས་རྒྱལ་སྲོང་བཙན་གྱི། །ཆོས་བློན་འཕགས་ཡུལ་རིག་པའི་གནས་ལྔ་སྦྱངས། །བོད་ཡུལ་ཡི་གེའི་བསྟན་པ་བཙུགས་མཛད་པ། །ཐོན་མི་སམྦྷོ་ཊ་ལ་གསོལ་བ་འདེབས། །
གཙང་དུ་སྐུ་འཁྲུངས་རྒྱ་གར་མཁས་པ་ནི། །ཉེར་ལྔའི་དྲུང་དུ་ཐེག་པ་ཀུན་ལ་སྦྱངས། །ལོ་ཙཱའི་ཡང་རབ་འཇའ་ལུས་འོད་སྐུར་བཞུགས། །བཻ་རོ་ཙ་ནའི་ཞབས་ལ་གསོལ་བ་འདེབས། །ཡ་འབྲོག་རྔོག་རིགས་སྐུ་འཁྲུངས་བཀའ་གདམས་སྦྱངས། །རྒྱ་བལ་བོད་ཀྱི་མཁས་གྲུབ་མ་ལུས་བསྟེན། །དཔལ་ལྡན་གསང་ཕུར་སྡེ་སྣོད་ཆོས་གྲ་བཙུགས། །བློ་ལྡན་ཤེས་རབ་ཞབས་ལ་གསོལ་བ་འདེབས། །གཡུང་དུ་འཁྲུངས་ནས་དགའ་བ་གདོང་ལ་སོགས། །ཆོས་གྲ་མང་པོར་ཐོས་བསམ་སྒྲོ་འདོགས་བཅད། །ཟུལ་ཕུར་འདུལ་གྲའི་བསྟན་སྲོག་ཆོས་ཀྱིས་བཟུང་། །བྱ་འདུལ་བརྩོན་འགྲུས་འབར་ལ་གསོལ་བ་འདེབས། །ས་སྐྱའི་གདུང་ལས་འཇམ་དབྱངས་རྣམ་འཕྲུལ་བྱོན། །གནས་ལྔ་མཐར་ཕྱིན་བལ་པོར་མུ་སྟེགས་བཏུལ། །གངས་ཅན་མཁས་པའི་མཆོག་གྱུར་ས་པ་ཆེ། །ཀུན་དགའ་རྒྱལ་མཚན་ཞབས་ལ་གསོལ་
བ་འདེབས། །རྒྱ་གར་ལྷོ་ཕྱོགས་པ་གྲུབ་ཀུན་གྱི་གཙོ། །བོད་བྱོན་བུ་དོང་ཨེ་ཡི་ཆོས་གྲ་བཏབས། །གླེགས་བམ་གདོན་ཅན་རྫུ་འཕྲུལ་མཐུ་ཡིས་བཏུལ། །པ་ཆེན་འབུམ་ཕྲག་གསུམ་པར་གསོལ་བ་འདེབས། །སྙེ་མོར་སྐུ་འཁྲུངས་བོན་དང་རྫོགས་ཆེན་མཁས། །རྒྱ་གར་མཁས་གྲུབ་ཆེན་པོ་བརྒྱ་བདུན་ཅུའི། །ཞབས་ཟིན་བོད་དུ་ཤངས་པ་བཀའ་རྒྱུད་དར། །གྲུབ་ཐོབ་ཁྱུང་པོའི་ཞབས་ལ་གསོལ་བ་འདེབས། །གཙང་རོང་གཡག་སྡེར་འཁྲུངས་ནས་གསར་རྙིང་གི། །རྣམ་འདྲེན་མང་བསྟེན་མདོ་སྔགས་ཀུན་ལ་མཁས། །རྫོགས་ཆེན་སེམས་ཕྱོགས་བསྟན་པ་སྤེལ་མཛད་པ། །པ་ཆེན་བརྩོན་འགྲུས་དར་ལ་གསོལ་བ་འདེབས། །འབྲི་གུང་ཕྱོགས་འཁྲུངས་སྐྱོབས་པའི་ཉེ་གནས་མཛད། །ཙཱ་རིའི་གནས་སུ་མཆོག་གི་དངོས་གྲུབ་བརྙེས། །གནས་ཆེན་རྣམས་སུ་སྒྲུབ་གྲའི་བསྟན་པ་བསྐྱངས། །དཔལ་ཆེན་ཆོས་ཡེའི་ཞབས་ལ་གསོལ་བ་འདེབས། །
གྲ་ཕྱི་ཁང་དམར་རིག་འཛིན་རྒྱུད་དུ་འཁྲུངས། །གུ་རུའི་ཟབ་གཏེར་ཆེ་ཆུང་བརྒྱ་རྩ་བརྒྱད། །སྒོ་ཕྱེས་སྨིན་གྲོལ་ཆོས་ཀྱི་ཉི་མ་ཤར། །གཏེར་སྟོན་རྡོ་རྗེ་གླིང་པར་གསོལ་བ་འདེབས། །ཤངས་སུ་འཁྲུངས་ནས་ཟབ་ལུང་གནས་སྒོ་ཕྱེས། །རྡོར་གླིང་སྐྱེ་བའི་བག་ཆགས་གསལ་དྲན་པས། །སྔར་གྱི་གཏེར་མཛོད་ཀུན་ལ་རང་དབང་བསྒྱུར། །པདྨ་ཀུན་སྐྱོང་གླིང་པར་གསོལ་བ་འདེབས། །ཡར་ཀླུངས་འཁྲུངས་ནས་ཛམ་ལའི་དངོས་གྲུབ་ཐོབ། །མདོ་རྒྱུད་སེམས་གསུམ་ལ་མཁས་རྔོ་ཐེལ་བཞུགས། །དཔལ་ཆེན་ཡང་དག་ལྷ་ཚོགས་ཞལ་གཟིགས་པ། །གཉལ་སྟོན་སངས་རྒྱས་གྲགས་ལ་གསོལ་བ་འདེབས། །སྟོད་དུ་སྐུ་འཁྲུངས་ཆོས་དང་བོན་གཉིས་ཀའི། །ཤེས་བྱ་མ་ལུས་མངོན་གྱུར་གཏེར་སྒོ་ཕྱེས། །བཀའ་སྲུང་བྲན་བཀོལ་བརྟུལ་ཞུགས་མཐར་ཕྱིན་པའི། །གཡག་ཆར་སྔོན་མོའི་ཞབས་ལ་གསོལ་བ་འདེབས། །ལྷོ་བྲག་
བན་པར་སྐུ་འཁྲུངས་པད་གླིང་གིས། །ཆོས་ཀྱིས་བདག་པོར་དབང་བསྐུར་རྒྱལ་ཚབ་བསྐོས། །མཐའ་དམག་བཟློག་ཅིང་སྐལ་ལྡན་སྨིན་གྲོལ་མཛད། །རིག་འཛིན་མཆོག་ལྡན་མགོན་པོར་གསོལ་བ་འདེབས། །ཤར་ཕྱོགས་དྭགས་ཡུལ་ལ་ཐོག་ཟུར་མཁར་འཁྲུངས། །སྨན་རྒྱལ་གཡུ་ཐོག་དངོས་མཇལ་བྱིན་རླབས་ཞུགས། །གསོ་རིག་བསྟན་པའི་སྲོག་བཟུང་ཕྱགས་རྫོགས་ཀྱི། །མངའ་བདག་མཉམ་ཉིད་རྡོ་རྗེར་གསོལ་བ་འདེབས། །མདོ་ཁམས་ཀ་ཐོག་སྐུ་འཁྲུངས་ཐོས་བསམ་སྦྱངས། །བོད་ཡུལ་མཁས་གྲུབ་ཀུན་བསྟེན་མཆོག་མཐུན་གྲུབ། །རྫ་ཡིག་ལ་སོགས་སྒྲུབ་སྡེ་དཔག་མེད་སྤེལ། །ཚུལ་ཁྲིམས་རྒྱལ་མཚན་ཞབས་ལ་གསོལ་བ་འདེབས། །བྱང་ཕྱོགས་འཁྲུངས་ནས་ཨེ་ཝཾ་ཆོས་གྲ་རུ། །མདོ་ཕྱོགས་སྦྱངས་མཐར་སྔགས་ཀྱི་དངོས་གྲུབ་བརྙེས། །ཟབ་གཏེར་མང་བཞེས་འགྲོ་དོན་མཐའ་རུ་ཕྱིན། །འཕྲང་པོ་ཤེར་འོད་ཞབས་ལ་གསོལ་
བ་འདེབས། །ཀོང་པོ་ང་ལར་གྲུབ་ཐོབ་རྒྱུད་འཁྲུངས་ནས། །དྭགས་ཕྱོགས་མདོ་སྔགས་སྦྱངས་ཤིང་སྨིན་གྲོལ་བརྙེས། །ཀོང་ལོང་སྔ་འགྱུར་བསྟན་པའི་སྒྲོན་མེ་མཆོག །མཚུངས་མེད་བསྟན་འཛིན་རྡོ་རྗེར་གསོལ་བ་འདེབས། །སྣ་ཚོགས་གདུལ་བྱར་སྣ་ཚོགས་འདུལ་ཐབས་ཀྱི། །ཐུགས་རྗེའི་སྒྱུ་འཕྲུལ་སྲིད་པ་ཇི་སྲིད་བར། །རྒྱུན་ཆད་མེད་སྟོན་དྲིན་ཅན་རང་གྲོལ་རྗེར། །གསོལ་བ་སྙིང་ནས་འདེབས་སོ་ཐུགས་རྗེས་གཟིགས། །གང་གི་སྐྱེས་རབས་ངོ་མཚར་མཛད་པའི་འཕྲེང་། །ཡོན་ཏན་རྗེས་སུ་དྲན་ཕྱིར་གསོལ་བཏབས་པས། །མགོན་ཁྱོད་རྒྱལ་བ་ཀུན་གྱི་ཡེ་ཤེས་དང་། །དབྱེར་མེད་གོ་འཕང་བདག་ཀྱང་འགྲུབ་པར་ཤོག །ཅེས་པའི་སྐྱེ་རྒྱུད་རྣམས་ཀྱི་རྣམ་ཐར་མདོར་བསྡུས་གསོལ་འདེབས་སུ་བགྱིས་པ་འདི་ནི། ལོང་ཡུལ་པདྨ་ཆོས་གླིང་གི་སྒྲུབ་སྡེ་ནས་བླ་མ་ཆོས་དབྱིངས་ཡོངས་གྲོལ་གྱིས་བསྐུལ་ངོར་བཀོད་པའོ།། ༈ །།ཨོཾ་ཨཱཿཧཱུྃ། ཆོས་དབྱིངས་འདུས་མ་བྱས་པའི་མཁའ་ཀློང་ལས་།
འགག་མེད་རང་གསལ་ཡེ་ཤེས་རྒྱུ་མའི་སྐུ། །རྒྱལ་ཀུན་ཐུགས་རྗེའི་འོད་ཟེར་གུ་རུ་རྗེ། །གསོལ་བ་འདེབས་སུ་བྱེད་ན། གསོལ་བ་འདེབས་སོ་ཞེས་ཁ་བསྒྱུར་རོ། །མཆོད་པར་འབུལ་ལོ་མཆོག་ཐུན་དངོས་གྲུབ་སྩོལ། །རྒྱལ་ཡུམ་ཤེར་ཕྱིན་དབྱིངས་ལས་མཚན་དཔེའི་སྐུ། །མཁའ་སྤྱོད་གྲུབ་པའི་རྒྱལ་མོ་མནྡ་ར། །ཟབ་གཏེར་བཀའ་ཡི་བསྡུ་མཛད་མཚོ་རྒྱལ་མ། །མཆོད་པར་འབུལ་ལོ༴ །དྷ་ན་ཀོ་ཥའི་མཚོ་དབུས་པད་སྡོང་ལས། །སྐྱོན་བྲལ་ཡོན་ཏན་རྫོགས་པའི་སྐུར་བྱོན་པ། །ཡན་ལགས་བདུན་ལྡན་མཚོ་སྐྱེས་རྡོ་རྗེའི་སྐུ། །མཆོད་པར་འབུལ་ལོ༴ །རྒྱལ་སྲས་ཚུལ་བཟུང་མངའ་འབངས་ཐར་ལམ་བཀོད། །བརྟུལ་ཞུགས་སྤྱོད་པས་བསིལ་ཚལ་དུར་ཁྲོད་གཤེགས། །སྣང་སྲིད་དབང་སྡུད་པདྨ་རྒྱལ་པོ་ལ། །མཆོད་པ་འབུལ་ལོ༴ །གདོད་ནས་ཆོས་ཀུན་ཐུགས་ཀྱི་ཀློང་རྫོགས་ཀྱང་། །གདུལ་བྱའི་སྣང་ངོར་རབ་བྱུང་ཐོས་བསམ་མཛད། །པ་ཆེན་
གཙུག་རྒྱན་པདྨ་སམ་བྷ་ཝ། མཆོད་པ་འབུལ་ལོ༴ །མཐའ་དག་ཤེས་བྱའི་གནས་ལ་བྱང་ཆུབ་སྟེ། །འཆི་མེད་རིག་པ་འཛིན་པ་རྡོ་རྗེའི་སྐུ། །ཡོངས་གྲུབ་བློ་ལྡན་མཆོག་སྲེད་འགྲོ་བའི་མགོན། །མཆོད་པ་འབུལ་ལོ༴ །གནས་ཡུལ་དུར་ཁྲོད་ཉེ་བའི་ཞིང་ཀུན་ཏུ། །ཕྱོགས་ལས་རྣམ་རྒྱལ་བརྟུལ་ཞུགས་མཐར་ཕྱིན་མཛད། །མཁའ་འགྲོའི་དབང་ཕྱུག་ཉི་མ་འོད་ཟེར་དཔལ། །མཆོད་པ་འབུལ་ལོ༴ །ཤཱཀྱའི་བསྟན་ལ་ཤཱཀྱའི་སྲོལ་བཟུང་ནས། །བསྟན་པའི་རྒྱལ་མཚན་ཕྱོགས་བཅུར་འཛུག་མཛད་པ། །སྟོན་པའི་རྒྱལ་ཚབས་ཤཱཀྱ་སེང་གེའི་ཞབས། །མཆོད་པ་འབུལ་ལོ༴ །ལོག་རྟོག་གྲུབ་མཐའ་ངན་པ་ཚར་བཅད་ཅིང་། །བདུད་ཀྱི་སྡེ་དཔུངས་དྲག་རྩལ་མཐུ་ཡིས་བཅོམ། །བསྟན་སྲུང་རྒྱལ་པོ་སེང་གེའི་སྒྲ་ཆེན་སྒྲོག །མཆོད་པ་འབུལ་ལོ༴ །
གངས་ཅན་ལྷ་སྲིན་གདུག་པའི་བར་ཆད་ཀུན། །ཏིང་འཛིན་རྣམ་རོལ་གར་དགུའི་ཉམས་ཀྱིས་བཏུལ། །བགེགས་འདུལ་དྲག་པོ་རྡོ་རྗེ་གྲོ་ལོད་རྩལ། །མཆོད་པ་འབུལ་ལོ༴ །སྤྲུལ་པའི་ཞིང་མཆོག་རྔ་ཡབ་པདྨ་འོད། །རིག་འཛིན་དཔའ་བོ་མཁའ་འགྲོའི་ཚོགས་དབུས་ནས། །ཐུགས་རྗེ་རྒྱུན་ཆད་མེད་གཟིགས་ཐོད་ཕྲེང་རྩལ། །མཆོད་པ་འབུལ་ལོ༴ །མགོན་ཁྱོད་མཆོད་ཅིང་གསོལ་བ་བཏབ་པའི་མཐུས། །མཁའ་མཉམ་འགྲོ་དང་བདག་སོགས་གདུལ་བྱའི་ཚོགས། །ལས་ཉོན་བར་ཆད་ཞི་ཞིང་ཆོས་དོན་འགྲུབ། །ཚེ་གཅིག་བྱང་ཆུབ་དངོས་གྲུབ་སྩལ་དུ་གསོལ། །ཅེས་གུ་རུ་རིན་པོ་ཆེ་པདྨ་འབྱུང་གནས་ཡབ་ཡུམ་སྤྲུལ་པའི་མཚན་བརྒྱད་དང་བཅས་པ་རྣམས་ལ་གསོལ་འདེབས་ཇ་མཆོད་གང་དགོས་ཀྱིས་ཆོག་པ་འདི་བཞིན་དགོས་ཞེས། །རྒྱ་བོད་མཚམས་ཀྱི་ལ་མོའི་རྩེའི་དབེན་གནས་ནས། བླ་མ་རིན་པོ་ཆེ་བྱམས་པ་ངག་དབང་ཀུན་དགའ་བསོད་ནམས་པས་
བསྐུལ་བ་ལྟར་བཀོད་པ་དགེའོ། །ཨེ་མ་ཧོཿ སྲིད་དང་ཞི་བ་འཁོར་བ་མྱང་འདས་སོགས། །སྣང་སྲིད་བརྟན་གཡོའི་དངོས་པོ་ཇི་སྙེད་ཀུན། །ཆོས་སྐུ་ཁྱབ་གདལ་ཆེན་པོའི་ཞིང་ཁམས་ལས། །མ་འདས་བདག་གཞན་དུས་གསུམ་མཚན་མས་དབེན། ༡ །རང་གསལ་འགག་མེད་སྒྱུ་འཕྲུལ་བདག་ལུས་ཀྱི། །ཕུང་ཁམས་སྐྱེ་མཆེད་ཆོས་ལྟར་གང་སྣང་བ། །མ་ལུས་རྡོ་རྗེ་གསུམ་གྱི་དཀྱིལ་འཁོར་དུ། །གདོད་ནས་ལྷུན་གྲུབ་མ་སྒོམས་རང་བཞིན་ཤར། ༢ །བདེ་ཆེན་འཁོར་ལོར་འདབ་སྟོང་ཉི་ཟླའི་སྟེང་། །ཀུན་བཟང་རྡོར་འཆང་ལ་སོགས་རིགས་བདག་གི །མཚན་དང་ཆ་ལུགས་བཀོད་པ་ཅིར་བསྟན་ཡང་། ༣ །ཐམས་ཅད་ཡོངས་འདུས་མ་ཧཱ་གུ་རུ་རྗེ། །འདས་དང་མ་བྱོན་ད་ལྟའི་སངས་རྒྱས་དང་། །ཞལ་མཐོང་གསུང་ཐོས་འབྲེལ་ཐོགས་བླ་མ་ཀུན། །ཐམས་ཅད་ཨོ་རྒྱན་ཆེན་པོའི་རྣམ་རོལ་འཕྲུལ། །ཡིན་ལ་ཡིན་པར་ཐག་ཆོད་མོས་གུས་ཀྱིས། ༤ །
ཕྱག་འཚལ་སྐྱབས་མཆི་མཆོད་འབུལ་སྡིག་པ་བཤགས། །ཡི་རངས་ཆོས་འཁོར་བསྐུལ་དང་བརྟན་བཞུགས་གསོལ། །དགེ་རྩ་བསྔོ་བའི་དབང་དང་གསོལ་འདེབས་ཡུལ། ཁོ་ན་གཅིག་པུར་རྩ་བའི་བླ་མ་འོ། ༥ །དུས་གསུམ་སྒྲིབ་མེད་མཁྱེན་པའི་པདྨ་འབྱུང་། །བྱིན་རླབས་ཐུགས་རྗེའི་བདག་ཉིད་རྗེ་བཙུན་མཆོག །བདག་སོགས་ཁམས་གསུམ་འཁོར་བའི་སེམས་ཅན་རྣམས། །བརྩེ་བས་གཡེལ་མེད་གཟིགས་ཤིག་བྱིན་གྱིས་རློབས། ༦ །ཡུན་གྱི་ལས་ངན་སྡིག་སྒྲིབ་སྦྱང་དུ་གསོལ། །འཕྲལ་གྱི་ནད་གདོན་བར་ཆད་བསལ་དུ་གསོལ། །ཡིད་ལ་འདོད་དགུ་ཆོས་བཞིན་འགྲུབ་མཛད་གསལ། །མྱུར་དུ་ཐར་པའི་གོ་འཕང་ཐོབ་མཛད་གསོལ། ༧ །སྐྱེ་བ་འདི་ནས་མཐར་ཐུག་སངས་རྒྱས་ཀྱི། །འབྲས་མཆོག་མངོན་དུ་མ་གྱུར་དེ་སྲིད་བར། །ལེགས་ཉེས་སྐྱིད་སྡུག་བཟང་ངན་ཅི་བྱུང་ཡང་། །སྐྱབས་དང་རེ་ཡུལ་གཞན་དུ་མི་འཚོལ་
བའི། །བློ་གཏད་བུ་ལ་ཡལ་བར་མ་འདོར་བར། །འདི་ཕྱི་བར་དོ་གནས་སྐབས་ནམ་དུ་ཡང་། །བདག་དང་ཕ་མ་མཁའ་མཉམ་འགྲོ་བ་ཀུན། །ཐུགས་རྗེས་བཟུང་ནས་ཁྱེད་དང་དབྱེར་མེད་ཤོག །ཅེས་པ་འདི་ནི། ཁྱིམ་པའི་གཟུགས་ཀྱི་ཟབ་དོན་སྤྱོད་པ་དྷརྨ་པཱ་ལའི་མིང་ཅན་གྱིས་བསྐུལ་ངོར་གདམས་པ་དགེའོ། །ན་མོ་གུ་རུ་རཏྣ་བྷྱཿ གདོད་མའི་གནས་ལུགས་ཀྱི་ཞིང་ཁམས། །མ་བཅོས་རང་བབས་ཀྱི་ཀློང་ནས། །རང་གྲོལ་ཆོས་སྐུ་ཡི་བླ་མ། །གསོལ་བ་སྙིང་ནས་རང་འདེབས་སོ། །མཐའ་བྲལ་གཉུག་མ་ཡི་སེམས་ཉིད། །རང་གྲོལ་བྱིན་གྱིས་རང་རློབས་ཤོག །འགག་མེད་རང་གསལ་གྱི་ཞིང་ཁམས། །སྟོང་གསལ་འཛིན་མེད་ཀྱི་ཀློང་ནས། །རང་གྲོལ་ལོངས་སྐུ་ཡི་བླ་མ། །གསོལ་བ་སྙིང་ནས་རང་འདེབས་སོ། །སྣང་སྟོང་དབྱེར་མེད་ཀྱི་མཚན་ཉིད། །རང་གྲོལ་བྱིན་གྱིས་རང་རློབས་ཤིག །རྩལ་མདངས་ཅིར་ཡང་དུ་འཆར་བའི། །
རོལ་རྩལ་སྣ་ཚོགས་ཀྱི་རྣམ་འགྱུར། །རང་གྲོལ་སྤྲུལ་སྐུ་ཡི་བླ་མ། །གསོལ་བ་སྙིང་ནས་རང་འདེབས་སོ། །ཚོགས་དྲུག་བཟང་ངན་གྱི་ཞེན་རྟོག །རང་གྲོལ་བྱིན་གྱིས་རང་རློབས་ཤིག །རྗེ་བཙུན་རང་གྲོལ་གྱི་བླ་མ། །རང་སེམས་རིག་ཐོག་ཏུ་བཞུགས་ཀྱང་། །གཉིས་འཛིན་ངན་གོམས་ཀྱི་བུ་ལ། །ཐུགས་རྗེས་གཡེལ་མེད་དུ་གཟིགས་ཏེ། །འདི་བཟུང་བྱང་ཆུབ་ཀྱི་བར་དུ། །འབྲལ་མེད་བྱིན་གྱིས་རང་རློབས་ཤིག །བླ་མའི་སྐུ་ཡི་བྱིན་རླབས་ཀྱིས། །ལུས་སྤྲུལ་སྐུ་འགྲུབ་པར་མཛད་དུ་གསོལ། །རྗེ་བཙུན་གསུང་གི་བྱིན་རླབས་ཀྱིས། །ངག་ལོངས་སྐུར་སྨིན་པར་མཛད་དུ་གསོལ། །སྐྱབས་གནས་ཐུགས་ཀྱི་བྱིན་རླབས་ཀྱིས། །ཡིད་ཆོས་སྐུར་གྲོལ་བར་མཛད་དུ་གསོལ། །རྗེ་བླ་མའི་གོ་འཕངས་བདག་འགྲུབ་ནས། །མཁའ་མཉམ་འགྲོ་ཀུན་འདྲེན་པར་ཤོག །འདི་ནི་རྣམ་པ་གསོལ་འདེབས་སུ་བྱས་ཀྱང་དོན་ངོ་སྤྲོད་གསོལ་འདེབས་ཁོ་ན་ཡིན་
ནོ། །ཅེས་པ་འདི། ཛྙཱ་ན་གྷའི་བསྐུལ་ངོར་བྲིས་པའོ། ཁམས་གསུམ་འདྲེན་མཆོག་རྒྱལ་བ་ཤཱཀྱའི་དབང་། །བསྟན་པའི་མངའ་བདག་མཆོག་ལ་གསོལ་བ་འདེབས། །མཁྱེན་པའི་འབྱུང་གནས་བྱམས་མགོན་འཇམ་དཔལ་དབྱངས། །ས་བཅུའི་དབང་ཕྱུག་གཉིས་ལ་གསོལ་བ་འདེབས། །རྒྱལ་བས་ལུང་བསྟན་འཛམ་གླིང་མཁས་པའི་གཙོ། །འཕགས་མཆོག་ཀླུ་སྒྲུབས་ཞབས་ལ་གསོལ༴ །དགའ་ལྡན་གནས་བྱོན་བྱམས་པས་རྗེས་སུ་བཟུང་། །འཕགས་པ་ཐོགས་མེད་ཞབས་ལ་གསོལ༴ །པདྨར་བརྫུས་སྐྱེས་འཇའ་ལུས་འོད་སྐུར་གྲོལ། །ཨཱརྻ་དེ་ཝའི་ཞབས་ལ༴ །སྨོན་ལམ་སྟོབས་ཀྱིས་མངོན་པའི་བསྟན་པ་གསོས། །མཁས་མཆོག་དབྱིག་གཉེན་ཞབས་ལ༴ །འཇམ་དབྱངས་དངོས་མཇལ་བཀའ་ཡི་དགོངས་དོན་འཁྲོལ། །ཕྱོགས་ཀྱི་གླང་པོའི་ཞབས་ལ༴ །ཚད་མ་སྡེ་བདུན་ཕ་
རོལ་རྒོལ་བ་འཇོམས། །ཆོས་ཀྱི་གྲགས་པའི་ཞབས་ལ༴ །འདུལ་བའི་བསྟན་ལ་སྟོན་པའི་ཕྲིན་ལས་མཛད། །དགྲ་བཅོམ་ཡོན་ཏན་འོད་ལ་གསོལ༴ །འདུལ་གཞུང་རྒྱ་མཚོའི་ཕ་མཐར་སོན་པའི་རྗེ། །གནས་བརྟན་ཤཱཀྱ་འོད་ལ་གསོལ༴ །འཛམ་གླིང་མཁས་པའི་རྒྱན་དྲུག་སྡེ་སྣོད་འཛིན། །ཀླུ་སྒྲུབ་ཐོགས་མེད་མཆོག་གཉིས་གཙུག་གི་རྒྱན། །ཟབ་མོ་ལྟ་བ་རྒྱ་ཆེན་སྤྱོད་པ་ཡི། །ཤིང་རྟའི་སྲོལ་བྱེད་རྣམས་ལ་གསོལ་བ་འདེབས། །ཐུབ་བསྟན་སྙིང་པོ་སྡེ་སྣོད་གསུམ་གྱི་དོན། །མུན་སྤྲུལ་ལོག་ལྟའི་གྲུབ་མཐས་མ་བསླད་པར། །ཡང་དག་ལྟ་སྤྱོད་ཟུང་འབྲེལ་དྲི་མེད་ཀྱིས། །རིན་ཆེན་བསྟན་སྲོག་འཛིན་པར་བྱིན་གྱིས་རློབས། །ཐ་སྙད་ཚིག་གི་མཐའ་ལ་མི་འབྱམས་པར། །ངེས་པ་དོན་གྱི་མཛོད་ལ་དབང་ཐོབ་སྟེ། །རང་གཞན་གྲུབ་མཐའ་རྒྱ་མཚོའི་ཕ་མཐར་ཕྱིན། །ཀུན་མཁྱེན་རྒྱལ་བ་མཆོག་དང་དབྱེར་མེད་ཤོག །
ཅེས་པ། འཕགས་ཡུལ་གྱི་མཁས་པ་རྒྱན་དྲུག་མཆོག་གཉིས་རྣམས་ལ་གསོལ་བ་འདེབས་པ་འདི་ནི། བདེ་ལེགས་དཔལ་འབྱོར་བས་བསྐུལ་ངོར་བཀོད་པའོ། རང་ལུས་འདི་ཡེ་གདོད་མ་ནས་རྒྱལ་བའི་དཀྱིལ་འཁོར་ཉིད་དུ་ལྷུན་གྱིས་གྲུབ་པ་ཡིན་ལ་ཡིན་པར་ཤེས་པའི་སྤྱི་བོའི་སྟེང་དུ་བླ་མ་བརྒྱུད་པ་རྣམས་ཐོ་བརྩེགས་སུ་གཅིག་གི་སྟེང་ན་གཅིག་མ་རེག་ཙམ་འཇའ་འོད་འཁྱིལ་ལེ་བཞུགས་པར་བསམ་ཞིང་། རང་བྱུང་རང་གསལ་རང་རིག་འདི། །མཆོད་པའི་མཎྜལ་ཀུན་གྱི་རབ། །རང་རིག་བླ་མ་ཉིད་མཆོད་པས། །རང་གྲོལ་ཆེན་པོའི་དངོས་གྲུབ་སྩོལ། ཨོཾ་ཨཱཿཧཱུྃ། འོད་གསལ་རྡོ་རྗེ་སྙིང་པོ་ཀུན་ཁྱབ་ཞིང་། །མཐའ་དབུས་བྲལ་བའི་སྟོན་པ་ཀུན་ཏུ་བཟང་། །ཡེ་གྲོལ་གདོད་མའི་སངས་རྒྱས་ཆོས་ཀྱི་སྐུ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ལོངས་སྤྱོད་རྫོགས་པ་ཚངས་པ་རྔ་སྒྲའི་ཞིང་། །རྒྱལ་བའི་དཀྱི་འཁོར་རྒྱ་མཚོའི་ཁྱབ་བདག་མཆོག །རྒྱུད་སྡེ་རྒྱ་ཆེན་སྟོན་མཛད་
རྡོ་རྗེ་འཆང་། །གསོལ་བ༴ །ཚངས་ཆེན་སྤྲུལ་སྐུའི་ཞིང་དུ་འགྲོ་འདུལ་གྱིས། །མཚན་དཔེའི་སྐུ་བསྟན་ཞི་དང་ཁྲོ་ཚོགས་ཀྱི། །སྒྱུ་འཕྲུལ་གར་མཁན་རྡོ་རྗེ་སེམས་དཔའ་ལ། གསོལ་བ༴ །རྒྱལ་རྣམས་ཐུགས་རྗེས་བཀའ་བགྲོས་མི་ཡུལ་དུ། །ཟབ་དོན་རྫོགས་ཆེན་སྟོན་པར་རབ་བསྔགས་པའི། །སྤྲུལ་སྐུ་དགའ་རབ་རྡོ་རྗེ་མཁའ་འགྲོའི་དབང་། གསོལ་བ༴ །རྒྱ་ནག་ཡུལ་འཁྲུངས་རྒྱ་གར་མཁས་གྲུབ་ཀྱི། །གཙུག་རྒྱན་འགྲན་ཟླ་བྲལ་བ་རྫོགས་ཆེན་བདག །ཤྲཱི་སིངྷ་འཇའ་ལུས་ཟག་མེད་སྐུ། །གསོལ༴ །རྒྱལ་བ་ཀུན་གྱི་ཐུགས་རྗེ་ནུས་མཐུ་ཀུན། །གཅིག་བསྡུས་གེ་སར་པདྨའི་སྦུབས་ལས་བྱོན། ཁམས་གསུམ་ཟིལ་གནོན་པདྨ་ཐོད་ཕྲེང་ཞབས། །གསོལ༴ །ལྷ་ལྕམ་ནུས་འབྱིན་གསལ་ལེ་སྨོན་ལམ་སྟོབས། །ཡང་དག་སྨིན་པས་གུ་རུའི་གཏེར་མཛོད་ཐོབ། །བསྟན་གཉིས་གླིང་པ་པདྨ་ཚེ་དབང་རྒྱལ། །གསོལ༴ །གཏེར་བཏོན་དེ་ཡི་སྲས་ཀྱི་ཐུ་བོར་གྱུར། །དམ་
ཆོས་སངས་རྒྱས་དགོངས་འདུས་ཆོས་ཀྱི་བདག །རིག་འཛིན་བདེ་ཆེན་བཟོད་པ་འགྲོ་བའི་མགོན། །གསོལ༴ །དགའ་རབ་རྡོ་རྗེ་སྙིགས་དུས་མཐའ་ཁོབས་ཀྱི། །གདུལ་བྱ་འདུལ་ཕྱིར་རྫོགས་ཆེན་ཉམས་ལེན་གྱི། །གྲུབ་བརྙེས་མཁའ་ལ་འཕུར་མཛད་ངག་དབང་གྲགས། །གསོལ༴ །ཛྙཱ་ན་ཀུ་མ་དུས་མཐའི་འགྲོ་འདྲེན་སྤྲུལ། །བོད་ཡུལ་བདེ་ཐབས་བརྟེན་ཅིང་འབྲེལ་འབྱུང་གི །མངའ་བདག་རིག་འཛིན་བློ་གྲོས་རྒྱལ་མཚན་དཔལ། །གསོལ༴ །གངས་ཅན་མཁས་དང་གྲུབ་པའི་གཙོ་བོ་མཆོག །སྔ་འགྱུར་བསྟན་པའི་སྒྲོན་མ་གཅིག་པུ་པ། །མ་ཧཱ་ལོ་ཙཱ་གཞན་ཕན་རྡོ་རྗེའི་ཞབས། །གསོལ༴ །འདུས་བྱས་སྒྱུ་མའི་རང་ཚུལ་རིག་ནས་ཀྱང་། །སྒྲུབ་རྒྱུད་གོང་མའི་རྣམ་ཐར་མཛད་སྲོལ་ཚུལ། །སྟོན་ལ་ངེས་མེད་རྗེ་བཙུན་རང་གྲོལ་ཞབས། །གསོལ་བ༴ །ཉང་སྟོད་ཚེ་སྤྲུལ་
མཁའ་འགྲོའི་གསང་ཕུག་ནས། །གཏེར་བྱོན་རྫོགས་ཆེན་འབུམ་ཕྲག་དྲུག་ཅུའི་བཅུད། །ཟབ་ཆོས་རྫོགས་ཆེན་ཕུང་པོ་ཟག་མེད་ལ། །གསོལ་བ༴ །རྩ་བ་རྒྱུད་པའི་བླ་མ་ཐུགས་རྗེའི་བདག །བདག་དང་གཉིས་སུ་མེད་ཀྱང་གཉིས་འཛིན་གྱི། །འཁྲུལ་པས་བསྐྱེད་པའི་ལུས་ངག་ཡིད་ཀྱི་རྒྱ། །རང་ཞིག་ཟག་མེད་འོད་སྐུར་གྲོལ་ནས་ཀྱང་། །མཁའ་ཁྱབ་འགྲོ་བའི་དོན་ཆེན་འགྲུབ་གྱུར་ཅིག །ཅེས་གསོལ་བ་བཏབ་པས་བླ་མ་ཐམས་ཅད་གོང་ནས་རིམ་པ་ལྟར་གཅིག་ཐིམ་ནས་རྩ་བའི་བླ་མ་ལ་ཐིམ། བླ་མ་ཉིད་ཀྱང་རང་གི་སྤྱི་བོར་ཐིམ་སྟེ། བླ་མ་རང་རིག་དབྱེར་མེད་དུ་མཉམ་པར་བཞག་པར་བྱའོ། །ཞེས་པ་འདི་ནི་དཔོན་པོ་ངེས་འབྱུང་བཟང་པོས་བསྐུལ་ངོར་བྲིས་པ་དགེའོ།། ༈ །།ན་མཿསརྦ་བུདྡྷ་མ་ཧཱ་གུ་རུ་བྷྱཿ ཕྱོགས་བཅུ་དུས་བཞིའི་རྒྱལ་བ་མ་ལུས་པའི། །སྐུ་དང་ཞིང་ཁམས་རྣམ་འགྱུར་མཐའ་དག་ཀུན། །གདུལ་བྱ་སོ་སོའི་སྐལ་ངོར་བསྟན་
པ་ཙམ། །དོན་ལ་རྩ་བའི་བླ་མར་མ་འདུས་མེད། །རིགས་བརྒྱ་རིགས་ལྔ་གསང་ཆེན་རིག་གཅིག་སོགས། །ཀུན་གྱི་ཁྱབ་བདག་ཀུན་བཟང་རྡོ་རྗེ་འཆང་། །རྗེ་བཙུན་བླ་མ་ལས་གཞན་མ་མཆིས་པར། །ཐག་ཆོད་ངེས་པ་བརྙེད་པས་གུས་ཕྱག་འཚལ། །སྐྱབས་གནས་དཀོན་མཆོག་རྒྱལ་བའི་དཀྱིལ་འཁོར་དང་། །དཔའ་བོ་རྣལ་འབྱོར་མ་ཚོགས་ཆོས་སྲུང་བཅས། །ཀུན་ཀྱང་རིགས་བདག་རྗེ་བཙུན་བླ་མའི་སྤྲུལ། ཁོ་ནར་ངེས་པ་བརྙེས་པས་སྐྱབས་སུ་མཆི། །མཁས་མང་བྱེ་བའི་ལེགས་བཤད་མཐའ་ཡས་ཀྱི། །མཆོག་དང་སྙིང་པོར་གྱུར་པ་ངེས་པའི་དོན། །པདྨ་ཐོད་ཕྲེང་དགོངས་བཞེད་ཇི་ལྟ་བར། །ལེགས་པར་སྟོན་མཛད་དེ་ལ་གསོལ་བ་འདེབས། །གྲུབ་པའི་སྐྱེས་ཆེན་མཐའ་དག་གཤེགས་ཤུལ་ནི། །རྩལ་གསུམ་རྫོགས་པའི་རི་དགས་རྒྱལ་པོ་བཞིན། །འཇིགས་བྲལ་དབེན་པའི་རི་ངོགས་ཏིང་འཛིན་གྱི། །རོལ་གར་
སྟོན་བཞིན་འཕོ་འགྱུར་མེད་གསོལ་འདེབས། །རྒྱལ་བ་གཞན་གྱི་གདུལ་བྱར་མ་བྱར་པའི། །སྙིགས་མ་ལྔ་བདོའི་སེམས་ཅན་བདག་སོགས་འགྲོ། །སྣ་ཚོགས་ལས་ཉོན་འཁྲུལ་སྣང་སྒྲོགས་ཚུད་ལས། །རང་གྲོལ་བདེ་ཆེན་ཐོབ་པར་བྱིན་གྱིས་རློབས། ། མགོན་པོ་ཁྱོད་ཀྱི་ཐུགས་རྗེའི་ཉི་འོད་ལ། །ཕྱོགས་རིས་གསལ་འགྲིབ་བྲལ་ཡང་རྨོངས་པའི་འགྲོ། །བདག་སོགས་འདི་ནས་བྱང ་ཆུབ་མ་ཐོབ་བར། ཁྱེད་ཀྱི་གདུལ་བྱའི་མཆོག་ཏུ་འགྱུར་བར་ཤོག །སྐྱེ་ནས་སྐྱེ་བར་དལ་འབྱོར་ཕུན་ཚོགས་ཐོབ། །ཐེག་ཆེན་བསྟན་བཞུགས་ཐོས་བསམ་སྒོ་མཐར་ཕྱིན། །ཚུལ་མིན་གནས་གྲོག་ཟས་དང་སྤྱོད་ལོག་གི །དྲི་བྲལ་རྒྱལ་སྲས་སྤྱོད་ལ་འཇུག་གནས་ཤོག །འཇིག་རྟེན་ཆོས་བརྒྱད་བདུད་ཀྱི་བསླུ་བྲིད་དང་། །བར་ཆད་རྐྱེན་གྱིས་མ་བསྐྱོད་རྒྱལ་བ་ཉིད། །གང་དུ་བཞུགས་དེར་མཉེས་གསུམ་བསྒྲུབ་པ་ཡིས། །ཐུགས་རྗེས་
བདག་རྒྱུད་སྨིན་ཅིང་གྲོལ་བར་ཤོག །བསྐྱེད་དང་རྫོགས་ཆེན་ལམ་མཆོག་ཟབ་མོའི་དོན། །ཀ་དག་ལྷུན་གྲུབ་ཁྲེག་ཆོད་ཐོས་རྒལ་གྱི། །ཉམས་ལེན་མངོན་གྱུར་གནས་ལུགས་ཆོས་ཀྱི་སྐུའི། །གཏན་སྲིད་ཟིན་ནས་སྤྲུལ་པས་འགྲོ་འདྲེན་ཤོག །མདོར་ན་བདག་དང་མཁའ་ཁྱབ་ཕ་མའི་ཚོགས། །རྗེ་བཙུན་རང་གྲོལ་མཆོག་གི་ཐུགས་རྗེ་ཡིས། །སྐད་ཅིག་ཙམ་ཡང་གཡེལ་བ་མེད་གཟིགས་ཏེ། །བླ་མ་མཆོག་དང་དབྱེར་མེད་འགྲུབ་གྱུར་ཅིག །ཅེས། སྐྱེས་མ་ཐག་ནས་ལས་སྨོན་འབྲེལ་བས་རང་ལ་ལྟོས་པ་སྙིང་ནས་།།།།།བའི་དད་བཙུན་རཏྣ་དཀོན་མཆོག་ཚུལ་ཁྲིམས་ཤི་ལས་བསྐུལ་བ་བཞིན་བྲིས་པ་མངྒ་ལཾ་བྷ་ཝནྟུ། །དགེའོ། །དགེའོ། །དགེའོ། གཅིག་ཞུས།