བར་དོ་དྲུག་གི་རྩ་ཚིག །གཏེར་ཆེན་ཀརྨ་གླིང་པ།
༄༅། །བར་དོ་དྲུག་གི་རྩ་ཚིག་བཞུགས་སོ༔ ཀྱཻ་མ༔ བདག་ལ་སྐྱེ་གནས་བར་དོ་འཆར་དུས་དེར༔ ཚེ་ལ་ལོངས་མེད་ལེ་ལོ་སྤངས་བྱས་ནས༔ ཐོས་བསམ་སྒོམ་གསུམ་མ་ཡེངས་ལམ་ལ་འཇུག༔ སྣང་སེམས་ལམ་སློང་སྐུ་གསུམ་མངོན་གྱུར་ཅིག༔ མི་ལུས་ལན་ཅིག་ཐོབ་པའི་དུས་ཚོད་འདིར༔ ཡེངས་མ་ལམ་ལ་སྡོད་པའི་དུས་ཚོད་མིན༔ ཀྱཻ་མ་བདག་ལ་རྨི་ལམ་བར་དོ་འཆར་དུས་དེར༔ གཏི་མུག་རོ་ཉལ་བག་མེད་སྤང་བྱས་ནས༔ དྲན་མེད་ཡེངས་མེད་གནས་ལུགས་ངག་ལ་འཇུག༔ རྨི་ལམ་བཟུང་ནས་སྤྲུལ་བསྒྱུར་འོད་གསལ་སྦྱངས༔ དུད་འགྲོ་བཞིན་དུ་ཉལ་བར་མ་བྱེད་ཅིག༔ གཉིད་དང་མངོན་གསུམ་འདྲེས་པའི་ཉམས་ལེན་གཅེས། ཀྱཻ་མ་བདག་ལ་བསམ་གཏན་བར་དོ་འཆར་དུས་དེར༔ རྣམ་གཡེང་འཁྲུལ་བའི་ཚོགས་རྣམས་སྤངས་བྱས་ནས༔ ཡེངས་མེད་འཛིན་མེད་མཐའ་བྲལ་ངང་ལ་འཇོག༔ བསྐྱེད་རྫོགས་གཉིས་ལ་བརྟན་པ་ཐོབ་པར་བྱ༔ བྱ་བ་སྤངས་ནས་རྩེ་གཅིག་སྒོམ་དུས་འདིར༔ ཉོན་མོངས་འཁྲུལ་བའི་དབང་དུ་མ་བཏང་ཅིག༔ ཀྱཻ་མ་བདག་ལ་འཆི་ཁ་བར་དོ་ འཆར་དུས་དེར༔ ཀུན་ལ་ཆགས་སེམས 
་ཞེན་འཛིན་སྤངས་བྱས་ནས༔ གདམ་ངག་གསལ་བའི་ངང་ལས་མ་ཡེངས་འཇུག༔ རང་རིག་སྐྱེ་མེད་ནམ་མཁའི་དབྱིངས་སུ་འཕོ༔ འདུས་བྱས་ཤ་ཁྲག་ལུས་དང་བྲལ་ལ་ཁད༔ མི་རྟག་སྒྱུ་མ་ཡིན་པར་ཤེས་པར་བྱ༔ ཀྱཻ་མ་བདག་ལ་ཆོས་ཉིད་བར་དོ་འཆར་དུས་དེར༔ ཀུན་ལ་སྔངས་སྐྲག་འཇིགས་སྣང་སྤངས་བྱས་ནས༔ གང་ཤར་རང་སྣང་རིག་པ་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགག་ལ་ཐུག་པའི་དུས་གཅིག་འོངས༔ རང་སྣང་ཞི་ཁྲོའི་ཚོགས་ལ་མ་འཇིགས་ཤིག༔ ཀྱཻ་མ་བདག་ལ་སྲིད་པ་བར་དོ་
འཆར་དུས་དེར༔ འདུན་པ་རྩེ་གཅིག་སེམས ་ལ་བཟུང་བྱས་ནས༔ བཟང་པོ་ལས་ཀྱི་འཕྲོ་ལ་ནན་གྱིས་མཐུད༔ མངལ་སྒོ་བཀག་ནས་རུ་ལོག་དྲན་པར་བྱ༔ སྙིང་རུས་དག་སྣང་དགོས་པའི་དུས་གཅིག་ཡིན༔ མིག་སེར་སྤངས་ལ་བླ་མ་ཡབ་ཡུམ་བསྒོམ༔ འཆི་བ་འོངས་སྙམ་མེད་པའི་བློ་རིང་པོ༔ དོན་མེད་ཚེ་འདིའི་བྱ་བ་བསྒྲུབས་བསྒྲུབས་ནས༔ ད་རེས་སྟོང་ལོག་བྱས་ན་ཤིན་ཏུ་འཁྲུལ༔ དགོས་ངོ་ཤེས་པ་དམ་པའི་ལྷ་ཆོས་ཡིན༔ ད་ལྟ་ཉིད་དུ་ལྷ་ཆོས་མི་བྱེད་དམ༔ གྲུབ་ཆེན་རྣམས་ཀྱི་ཞལ་ནས་འདི་སྐད་གསུངས༔ བླ་མའི་གདམས་ངག་སེམས་ལ་མ་བཞག་ན༔ རང་གིས་རང་ཉིད་བསླུ་བར་མི་འགྱུར་རམ། ཞེས་གསུངས་སོ། བར་དོ་ཐོས་གྲོལ་གྱི་རྩ་ཚིག་འདི༔ འཁོར་བ་མ་སྟོང་བར་དུ་མ་རྫོགས་སོ༔
༈ བར་དོའི་འཕྲང་སྒྲོལ་གྱི་སྨོན་ལམ་འདི་སྐད་དོ༔ བླ་མ་ཡི་དམ་མཁའ་འགྲོའི་ཚོགས་ལ་ཕྱག་འཚལ་ལོ༔ བརྩེ་བ་ཆེན་པོས་ལམ་སྣ་དྲང་དུ་གསོལ༔ བདག་ནི་འཁྲུལ་བས་འཁོར་བར་འཁྱམས་པའི་ཚེ༔ ཐོས་བསམ་སྒོམ་གསུམ་མ་ཡེངས་འོད་ལམ་ལ༔ བཀའ་རྒྱུད་བླ་མ་རྣམས་ཀྱིས་ལམ་སྣ་དྲོངས༔ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ་ནས་སྐྱོར༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ གཏི་མུག་དྲག་པོའི་འཁོར་བར་འཁྱམས་པའི༴ ཆོས་དབྱིངས་ཡེ་ཤེས་གསལ་བའི་འོད་ལམ་ལ༔ བཅོམ་ལྡན་རྣམ་པར་སྣང་མཛད་ལམ་སྣ༴ ཡུམ་མཆོག་དབྱིངས་ཕྱུག་མ་ཡིས་རྒྱབ་ནས༴ བར་དོ༴ ཡང་དག༴ ཞེ་སྡང་དྲག་པོའི་འཁོར་བར་འཁྱམས༴ མེ་ལོང་ཡེ་ཤེས་གསལ་བའི་འོད༴ བཅོམ་ལྡན་རྡོ་རྗེ་སེམས་དཔས་ལམ་སྣ༴ ཡུམ་མཆོག་སངས་རྒྱས་སྤྱན་མས༴ བར་དོ༴ ཡང་དག༴ ང་རྒྱལ་དྲག་པོས་འཁོར༴ མཉམ་ཉིད་ཡེ་ཤེས་གསལ་བའི༴ བཅོམ་ལྡན་རིན་ཆེན་འབྱུང་ལྡན་ལམ༴ ཡུམ་མཆོག་མ་མ་ཀི་ཡིས༴ བར་དོ༴ ཡང་དག༴ འདོད་ཆགས་དྲག་པོས་འཁོར་བར༴ སོར་རྟོག་ཡེ་ཤེས་གསལ༴ བཅོམ་ལྡན་སྣང་བ་མཐའ་ཡས་ལམ༴ ཡུམ་མཆོག་གོས་དཀར་མོས་རྒྱབ་ནས་སྐྱོར༔ བར་དོ༴ ཡང་དག༴ ཕྲག་དོག་དྲག་པོའི༴ བྱ་གྲུབ་ཡེ་ཤེས་གསལ་བའི༴ བཅོམ་ལྡན་དོན་ཡོད་གྲུབ་པའི་ལམ༴ ཡུམ་མཆོག་དམ་ཚིག་སྒྲོལ་མས་རྒྱབ་ནས༴ བར་དོ༴ ཡང་དག༴ བག་ཆགས་དྲག་པོས་འཁོར༴ ལྷན་སྐྱེས་ཡེ་ཤེས་གསལ་བའི༴ དཔའ་བོ་རིག་འཛིན་རྣམས་ཀྱིས་ལམ་སྣ༴ ཡུམ་མཆོག་མཁའ་འགྲོའི་ཚོགས་ཀྱིས་རྒྱབ༴ བར་དོ༴ ཡང་དག༴ འཁྲུལ་སྣང་དྲག་པོས་འཁོར༴ སྔངས་སྐྲག་འཇིགས་སྣང་སྤངས་པའི་འོད༴ བཅོམ་ལྡན་ཞི་ཁྲོའི་ཚོགས་ཀྱི་ལམ༴ དབང་ཕྱུག་མཁའ་འགྲོའི་ཚོགས་ཀྱིས་རྒྱབ༴ བར་དོ༴ ཡང་དག༴ ཀྱཻ་མ༔ ནམ་མཁའི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་མཐིང་གའི་ཞིང་ཁམས་མཐོང་བར་ཤོག༔ ཆུ་ཡི་ཁམས་རྣམས་དགྲ་རུ་མི་ལྡང་ཞིང༔ སངས་རྒྱས་དཀར་པོའི་ཞིང་ཁམས༴ ས་ཡི་ཁམས་རྣམས་དགྲ་རུ་མི༴ སངས་རྒྱས་སེར་པོའི་ཞིང་ཁམས་མཐོང་༴ མེ་ཡི་ཁམས་རྣམས་དགྲ༴ སངས་རྒྱས་དམར་བོའི་ཞིང་ཁམས༴ རླུང་གི་ཁམས་རྣམས༴ སངས་རྒྱས་ལྗང་གུའི་ཞིང་ཁམས༴ འཇའ་ཚོན་ཁམས་རྣམས་དགྲ༴ སངས་རྒྱས་སྣ་ཚོགས་ཞིང་ཁམས༴ སྒྲ་འོད་ཟེར་གསུམ་སྒྲ་རུ་མི༴ ཞི་ཁྲོ་རབ་འབྱམས་ཞིང་ཁམས་མཐོང་བར༴ སྒྲ་རྣམས་ཐམས་ཅད་རང་སྒྲར་ཤེས་པར་ཤོག༔ འོད་རྣམས་ཐམས་ཅད་རང་འོད་ཤེས་པར་ཤོག༔ ཟེར་རྣམས་ཐམས་ཅད་རང་ཟེར་ཤེས་པར་ཤོག༔ བར་དོར་རང་ངོ་རང་གི་ཤེས་པར་ཤོག༔ སྐུ་གསུམ་ཞིང་ཁམས་མངོན་དུ་འགྱུར་བར་ཤོག༔ བར་དོ་འཕྲང་སྒྲོལ་གྱི་སྨོན་ལམ་ཞེས་བྱ་བ་ཨོ་རྒྱན་པདྨ་འབྱུང་གནས་ཀྱིས་མཛད་པ༔ འཁོར་བ་མ་སྟོང་བར་དུ་མ་རྫོགས་སོ༔
༈ བར་དོའི་སྨོན་ལམ་འཇིགས་སྐྱོབ་ཅེས་བྱ་བ་འདི་ལྟར༔ ཀྱཻ་མ༔ བདག་ནི་ཚེ་ཡི་འཕེན་པ་ཟད་པའི་ཚེ༔ འཇིག་རྟེན་འདི་ནས་ཉེ་དུས་མི་སྟོང་སྟེ༔ རང་ཉིད་གཅིག་པུར་བར་དོར་འཁྱམས་ཙམ་ན༔ རྒྱལ་བ་ཞི་ཁྲོའི་ཐུགས་རྗེའི་ཤུགས་ཕྱུངས་ནས༔ མ་རིག་མུན་པའི་སྨག་རུམ་སེལ་བར་ཤོག༔ དགའ་བའི་གྲོགས་དང་བྲལ་ནས་གཅིག་པུར་འཁྱམས༔ རང་སྣང་སྟོང་བའི་གཟུགས་བརྙན་འཆར་དུས་དེར༔ སངས་རྒྱས་རྣམས་ཀྱིས་ཐུགས་རྗེའི་ཤུགས་ཕྱུངས་ནས༔ སྔངས་སྐྲག་བར་དོའི་འཇིགས་པ་མི་འབྱུང་ཤོག༔ ཡེ་ཤེས་གསལ་བའི་འོད་ལྔ་འཆར་དུས་དེར༔ མི་འཇིགས་མི་སྐྲག་རང་ངོ་ཤེས་པར་ཤོག༔ ཞི་དང་ཁྲོ་བོའི་སྐུ་གཟུགས་འཆར་དུས་དེར༔ མི་འཇིགས་གདེངས་ཐོབ་བར་དོ་ངོ་ཤེས་ཤོག༔ ལས་ངན་དབང་གིས་སྡུག་བསྔལ་མྱོང་ཙམ་ན༔ རྒྱལ་བ་ཞི་ཁྲོའི་སྡུག་བསྔལ་སེལ་བར་ཤོག༔ ཆོས་ཉིད་རང་སྒྲ་འབྲུག་སྟོང་ལྡིར་ཙམ་ན༔ ཐེག་ཆེན་ཆོས་ཀྱི་སྒྲ་རུ་འགྱུར་བར་ཤོག༔ སྐྱབས་མེད་ལས་ཀྱི་རྗེས་སུ་འབྲང་དུས་དེར༔ རྒྱལ་བ་ཞི་ཁྲོས་བདག་སོགས་བསྐྱབས་ཏུ་གསོལ༔ བག་ཆགས་ལས་ཀྱིས་སྡུག་བསྔལ་མྱོང་ཙམ་ན༔ འོད་གསལ་བདེ་བའི་ཏིང་འཛིན་འཆར་བར་ཤོག༔ སྲིད་པ་བར་དོ་བརྫུས་ཏེ་སྐྱེས་ཙམ་ན༔ ཕྱིར་ལོག་བདུད་ཀྱི་ལུང་བསྟན་མི་འབྱུང་ཤོག༔ གང་དུ་བསམ་པ་དབང་གིས་སླེབས་ཙམ་ན༔ ལས་ངན་འཁྲུལ་བའི་འཇིགས་སྐྲག་མི་འབྱུང་ཤོག༔ གཅན་གཟན་ཁྲོ་བོས་ངར་སྐད་འདོན་པའི་ཚེ༔ ཡི་གེ་དྲུག་པའི་ཆོས་སྒྲ་འགྱུར་བར་ཤོག༔ ཁ་ཆར་རླུང་དང་མུན་པས་དེད་པའི་ཚེ༔ ཡེ་ཤེས་གསལ་བའི་ལྷ་མིག་མཐོང་བར་ཤོག༔ རིགས་མཐུན་ནང་ཚན་བར་དོའི་སེམས་ཅན་རྣམས༔ མིག་སེར་མེད་ཅིང་མཐོ་རིས་སྐྱེ་བར་ཤོག༔ ཤིན་ཏུ་ཉོན་མོངས་བཀྲེས་ཤིང་སྐོམ་པའི་ཚེ༔ ལྟོགས་སྐོམས་ཚ་གྲང་སྡུག་བསྔལ་མི་འབྱུང་ཤོག༔ ཕྱི་མ་ཕ་མའི་འདུ་འཕྲོད་མཐོང་ཙམ་ན༔ རྒྱལ་བ་ཞི་ཁྲོ་ཡབ་ཡུམ་ཉིད་མཐོང་ཤོག༔ གར་སྐྱེས་རང་དབང་ཐོབ་ནས་གཞན་དོན་དུ༔ མཚན་དཔེས་བརྒྱན་པའི་ལུས་མཆོག་ཐོབ་པར་ཤོག༔ བདག་ཉིད་སྐྱེས་པའི་ལུས་མཆོག་ཐོབ་གྱུར་ནས༔ མཐོང་ཐོས་ཐམས་ཅད་མྱུར་དུ་གྲོལ་བར་ཤོག༔ ལས་ངན་ཐམས་ཅད་རྗེས་སུ་མི་འབྲང་ཞིང་༔ བསོད་ནམས་གང་ཡོད་འཕེལ་ཞིང་རྗེས་འབྲང་ཤོག༔ གང་དང་གང་དུ་སྐྱེ་བ་དེ་དང་དེར༔ ཚེ་རབས་ཡི་དམ་ལྷ་དང་མཇལ་བར་ཤོག༔ སྐྱེ་མ་ཐག་ཏུ་སྨྲ་ཞིང་འགྲོ་ཤེས་ཏེ༔ སྐྱེ་བ་དྲན་ཅིང་མི་བརྗེད་གཟུང་ཐོབ་ཤོག༔ ཡོན་ཏན་ཆེ་ཆུང་འབྲིང་དང་སྣ་ཚོགས་པ། །ཐོས་བསམ་མཐོང་བ་ཙམ་གྱིས་ཤེས་གྱུར་ཅིག །གང་དུ་སྐྱེས་པས་ཡུལ་དེར་བཀྲ་ཤིས་ཤོག །སེམས་ཅན་ཐམས་ཅད་བདེ་དང་ལྡན་གྱུར་ཅིག །རྒྱལ་བ་ཞི་ཁྲོ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །ཀུན་བཟང་ཞི་ཁྲོ་རབ་འབྱམས་ཐུགས་རྗེ་དང་། །ཆོས་ཉིད་རྣམ་པར་དག་པའི་བདེན་སྟོབས་དང་། །སྔགས་འཆང་རྩེ་གཅིག་སྒྲུབ་པའི་བྱིན་རླབས་ཀྱིས། །སྨོན་ལམ་བཏབ་པ་དེ་བཞིན་འགྲུབ་གྱུར་ཅིག །བར་དོའི་སྨོན་ལམ་འཇིགས་སྐྱོབ་མ་ཞེས་བྱ་བ་འཁོར་བ་མ་སྟོང་བར་དུ་མ་རྫོགས་སོ༔ བཀྲ་ཤིས་དཔལ་དུ་འབར་བའི་དགེ་ལེགས་སྩོལ། དགེའོ། །དགེའོ། །དགེའོ། །མངྒ་ལམ།
༈ བསླུ་མེད་དཀོན་མཆོག་གསུམ་གྱི་ངོ་བོ་ཉིད། །ངན་སོང་འཇིགས་ལས་སྒྲོལ་བའི་དཔའ་བོ་ཆེ། །དག་པའི་ཞིང་དུ་འདྲེན་པའི་དེད་དཔོན་མཆོག །མགོན་པོ་འོད་དཔག་མེད་ལ་ཕྱག་འཚལ་ལོ། །གནད་གཅོད་གཤིན་རྗེའི་འཇིགས་ལས་བསྐྱབ་ཏུ་གསོལ། །འཇིགས་རུང་བར་དོའི་འཕྲང་ལས་བསྒྲལ་དུ་གསོལ། །བཟོད་དཀའ་ངན་འགྲོའི་གཡང་ལས་དྲོངས་དུ་གསོལ། །ཞིང་མཆོག་བདེ་བ་ཅན་ལ་ཁྲིད་དུ་གསོལ། །རེ་ས་གཞན་ན་མེད་དོ་ཐུགས་རྗེས་ཟུང་། །