ཆང་གི་ཉེས་དམིགས་སྟོན་པའི་གདམས་པ། ཉག་བླ་པདྨ་བདུད་འདུལ།

༄༅། །ཆང་གི་ཉེས་དམིགས་སྟོན་པའི་གདམས་པ། ན་མོ་གུ་རུ་རཏྣ་ཡ། དུས་གསུམ་སངས་རྒྱས་ངོ་བོ་ཉིད། །དྲིན་ལྡན་བླ་མའི་ཚོགས་ལ་འདུད། །རང་གིས་རང་ལ་དམ་ཞིག་བཞག །ཐུབ་དབང་རྡོ་རྗེ་འཆང་ཆེན་གྱིས། །མྱོས་གྱུར་བཏུང་བར་ལུང་མ་བསྟན། །བདེན་པར་གསུངས་ཤིང་རྫུན་མེད་པས། །གནམ་ས་གོ་ལོག་འགྱུར་ཡང་སྲིད། །རྒྱུ་འབྲས་བདེན་པས་བསླུ་མི་སྲིད། །ཆང་ནི་ཉེས་ཚོགས་ཀུན་གྱི་གཞི། །རྩ་བ་ཡིན་པ་རྒྱལ་བས་གསུངས། །བག་མེད་སྤྱོད་པས་ཚེ་འདིར་གཡེང་། །གདམས་ངག་ཟབ་མོ་རླུང་ལ་བསྐུར། །ཆང་གིས་རྙེད་དཀའི་དལ་འབྱོར་ཕུང་། །ཉོན་མོངས་རྒྱས་ཤིང་མི་དགེ་སྤྱོད། །ཆང་གིས་དགེ་བའི་དཔུང་ཚོགས་འཇོམས། །སྒོམ་སྒྲུབ་དགེ་སྦྱོར་གཡེང་ལ་ཤོར། །ཆང་གིས་མི་རྟག་དྲན་མི་བསྐུལ། །ཨ་འཐས་རྟག་འཛིན་རྒྱ་བྲག་བྱེད། །ཆང་གིས་འཁོར་བའི་ཉེས་མི་རྟོགས། །ཞེན་ཆགས་སྐྱིད་འདོད་བདེ་སྣང་ཤར། །ཆང་གིས་ལས་འབྲས་ཁྱད་དུ་བསད། །བག་ཆགས་ཉེས་དམིགས་མང་པོ་བསགས། །ཆང་གིས་ཚེ་དང་བཀྲག་མདངས་འཕྲོག །སྐྲ་དཀར་གཉེར་མ་ལྷག་པར་མགྱོགས། །ཆང་གིས་བསོད་ནམས་ཉམས་པར་བྱེད། །གསེར་དངུལ་ལ་སོགས་ཆང་རིན་སྟེར། །ཆང་གིས་ངག་འཆལ་འཁྲུལ་གཏམ་སྨྲ། །གསང་ཚིག་སྦས་སུ་མི་ཐུབ་ཕུང་། །ཆང་གིས་བཟའ་བཏུང་མང་པོ་དྲན། །མི་དགོས་དགུ་དགོས་སྣ་ཚོགས་དགོས། །ཆང་གིས་རྟོག་ཚོགས་དྲན་པ་མང་། །མི་དྲན་དགུ་དྲན་དུ་མ་དྲན། །ཆང་གིས་རྣམ་ཤེས་དབང་མེད་འཁྲུགས། །མངོན་ཤེས་མཁྱེན་པ་ཡོད་མོད་ཟེར། །ཆང་གིས་སྒྱུ་ལུས་འབྱུང་བཞི་འཁྲུགས། །དབང་ལྔ་ཚོགས་བརྒྱད་གསལ་ཏོ་ཟེར། །ཆང་གིས་དགའ་བྲིད་བདུད་ཀྱིས་བསླུས། །རིག་པ་དགུ་འགྱུར་གསལ་སྣང་འོང་། །ཆང་གིས་མི་བསླུ་གང་ཡང་མེད། །མཐོ་ནས་དམའ་ལ་མང་པོ་བབས། །ཆང་གིས་ནད་ཀྱི་སྣ་འདྲེན་པས། །བཅོས་མེད་ནད་ཀྱིས་མང་པོ་འཆི། །ཆང་གིས་གདོན་གྱི་སྣ་འདྲེན་པས། །འཐབ་རྩོད་འཁྲུགས་གཞི་མང་པོ་འོང་། །ཆང་གིས་རྒྱལ་ནད་སྙིང་རླུང་སློང་། །སྨྱོན་པ་བཞིན་དུ་ཅི་ཟེར་མེད། །ཆང་གིས་སྙིང་གཟེར་སེམས་འཁྲུགས་ཤིང་། །སྡང་སེམས་ཁོང་ཁྲོ་མེ་ལྟར་འབར། །ཆང་གིས་བདག་འཛིན་ང་རྒྱལ་ཆེ། །རྒྱལ་པོ་ལྟ་བུའི་འདུ་ཤེས་སྐྱེ། །ཆང་གིས་ཁྲེལ་དང་ངོ་ཚ་བོར། །སྡོམ་རལ་དམ་ཉམས་ལོག་གཡེམ་སྤྱོད། །ཆང་གིས་དོན་མེད་ཕྲག་དོག་བྱེད། །ཚིག་གི་བསྟོད་སྨད་ཙམ་ལ་བལྟ། །ཆང་གིས་མ་རིག་གཏི་མུག་འཕེལ། །བླུན་རྨོངས་དྲན་ཉམས་དབང་པོ་འཆོལ། །ཆང་གིས་མ་ཤི་གསོན་རོ་བྱེད། །དགྲ་བོ་ཡིན་ཡང་དེའི་དྲུང་འགྱེལ། །ཆང་གིས་འཆི་བདག་གཤེད་མ་བྱེད། །ཕལ་ཆེར་སྲོག་གཅོད་མང་པོ་འོང་། །མདོ་སྡེ་དྲན་པ་ཉེར་གཞག་ལས། །ཆང་གིས་གཡེང་བའི་མི་དག་ནི། །གསོན་ཡང་ཤི་བ་དག་དང་མཚུངས། །ཞེས་སོགས་བསླུ་བ་དུ་མར་བྱེད། །སྲོག་རྩོལ་ནང་དུ་རླུང་ཞུགས་ནས། །རྣམ་ཤེས་ལས་རླུང་རྟ་ལ་ཞོན། །བག་ཆགས་ཉོན་མོངས་ཐང་ལ་རྒྱུག །དགའ་འོ་བདེ་ཞིང་སྐྱིད་དོ་ཟེར། །ལས་རླུང་རྟ་རྒོད་མྱོས་གྱུར་བཏུང་། །སེམས་ཀྱི་བྱིས་པས་དེར་ཞོན་ནས། །ཐར་ལམ་གདམས་པ་ཕྱི་རུ་བཞག །ངུ་འབོད་ལྕགས་མཁར་ འབེན ་གཏོད་ཅིང་། །ཐར་མེད་འཁོར་བའི་ཐང་ནས་རྒྱུག །ཉིན་རེ་བཞིན་དུ་ས་ཚུགས་རེ། །ཕེབས་ཤིང་འགྲོས་བཞིན་བརྩོན་འགྲུས་ཀྱིས། །ནམ་ཞིག་སླེབས་པར་ཐེ་ཚོམ་མེད། །རྒྱུད་ལས་གསུངས་པ་འགྱུར་མེད་ནི། །སུ་ཞིག་ཆང་གིས་མྱོས་གྱུར་པ། །དེ་ལ་གེགས་ནི་མང་པོ་འབྱུང་། །སྔགས་པ་ཆང་གིས་མྱོས་གྱུར་གང་། །ངུ་འབོད་གནས་སུ་འཚོད་པར་འགྱུར། །གསུངས་བཞིན་ཆང་ནི་སྟོབས་ཆེ་བས། །བཙན་དུག་བཞིན་དུ་སྤང་བར་གཅེས། །དུས་གསུམ་སངས་རྒྱས་རྣམས་ཀྱིས་འདི་མ་གནང་། །རྒྱལ་སྲས་འཁོར་ཚོགས་བཅས་པས་དུག་བཞིན་སྤངས། །འཕགས་བོད་སྐྱེས་མཆོག་རྣམས་ཀྱིས་རྟག་ཏུ་སྨད། །དུག་ལྔ་སྨན་བསྒྱུར་གསང་རྫས་ཙམ་མ་གཏོགས། །མདོ་སྔགས་གང་གི་སྒོ་ནས་དགག་བྱར་གསུངས། །རྒྱལ་བས་ལུང་མ་བསྟན་པའི་མྱོས་གྱུར་བཏུང་། །ཉེས་དམིགས་སུམ་ཅུ་རྩ་ལྔ་བསྟན་པ་ལྟར། །ཉེས་ཀྱང་འགྱོད་མེད་རྗེས་སུ་ཡི་རང་བཞིན། །ཀུན་གྱིས་མྱོང་གྲོལ་བདུད་རྩི་བཏུང་བ་ལྟར། །མགྲོན་ཆེན་ཟས་མཆོག་ཟེར་ཞིང་ལོངས་སྤྱོད་དོ། །ཆང་གིས་ཉེས་བྲལ་ཡོན་ཏན་རྒྱས་པ་ནི། །གང་ལ་བལྟས་ཀྱང་ངས་ནི་མཐོང་མ་མྱོང་། །རང་གི་སྣང་བ་མ་དག་ཨེ་མ་ཡིན། །མཚོ་སྐྱེས་རྗེ་དང་གྲུབ་ཐོབ་བིཪྺ་པས། །ཆང་ཁལ་ལྔ་བརྒྱ་རེ་གསོལ་ངོམས་ཙམ་མེད། །ཉི་མ་བཙོན་དུ་བཟུང་བའི་ལོ་རྒྱུས་བཞིན། །གང་ལ་ཆང་གི་ཉེས་པ་མི་འབྱུང་ཞིང་། །ཉོན་མོངས་སྐྱོན་གྱིས་མ་གོས་པདྨ་ལྟར། །གསང་སྔགས་ཐེག་ཆེན་སྤྱོད་པ་ཡིན་ཤས་ཆེ། །བླུན་རྨོངས་བདག་འདྲས་བཏུང་བའི་ཡུལ་མ་ཡིན། །རྒྱལ་བས་གསུངས་ལ་བདེན་པར་མི་འཛིན་པ། །རྒྱུ་འབྲས་ཁྱད་དུ་བསད་ན་རང་ཉིད་ཕུང་། །ཨོ་རྒྱན་པདྨ་མེ་དཔུང་ཀློང་དུ་བཞུགས། །བཙན་དུག་བཞེས་དང་མཁའ་ལ་བྱ་བཞིན་འཕྱོ། །དེ་བཞིན་གྲུབ་ཐོབ་རྣམས་ཀྱིས་གྲུབ་པའི་རྟགས། །སོ་སོར་བྱེ་བ་ཕྲག་བརྒྱར་བསྟན་ནུས་སོ། །དེ་ལྟར་རང་ལ་ནུས་པ་ཨེ་ཡོད་དམ། །ཡོད་ན་ཆང་གི་སྐྱོན་གྱིས་ཅི་ཡིས་གོས། །མེད་ན་ཐེག་ཆེན་དམ་པའི་སྤྱོད་པ་ཡིས། །ཤེས་མེད་ཐེག་དམན་མང་པོ་ངན་སོང་ལྷུང་། །གསང་སྔགས་རྫས་ཙམ་མ་གཏོགས་པད་འབྱུང་གིས། །ཆང་མ་གནང་ཞིང་དགག་བྱ་ལོ་རྒྱུས་མང་། །ཐེག་ཆེན་ལྟ་བ་ནམ་མཁའ་དང་མཉམ་ཡང་། །རྒྱུ་འབྲས་རྡུལ་ཙམ་ཞིབ་དགོས་གསུངས་པ་ཡིན། །དགེ་སྡིག་རྣམ་པར་འབྱེད་པའི་མདོ་ལས་ཀྱང་། །ཚེ་འདིར་འབྲུ་ཆང་འཐུང་ཞིང་མྱོས་པ་ནི། །ཟངས་ཁུ་འཐུང་བའི་དམྱལ་བར་ལྷུང་ངོ་གསུངས། །དེ་ཕྱིར་རེ་དོགས་བྲལ་བའི་རྣལ་འབྱོར་པས། །དོན་ལ་མི་བརྒྱ་བསད་པས་མི་འཇིགས་ཀྱང་། །དངོས་སུ་ཤིག་སྲོག་ཙམ་ཡང་སུ་ཡིས་བཅད། །དེ་བཞིན་ཆང་ནི་གསང་སྔགས་རྫས་ཡིན་པས། །དོན་ལ་ཉོན་མོངས་སྐྱོན་གྱིས་མ་གོས་ཀྱང་། །དབང་ཡོད་སྨྱོན་ཆུ་འཐུང་བ་ཅི་བྱེད་དམ། །ཆང་ནི་ཉེས་ལྟུང་ཕོག་པ་ཀུན་གྱི་གཞི། །དང་པོ་བག་མེད་རྣམ་རྟོག་དོན་འཆོར་བདེ། །གཉིས་པ་གླང་ཆེན་སྨྱོན་ལྟུར་ཚུལ་ཁྲིམས་འཆོལ། །གསུམ་པ་དྲན་ཉམས་རོ་ལྟར་གཏི་མུག་འགྱུར། །ཐར་པའི་གེགས་བྱེད་ངན་འགྲོའི་རྒྱུ་ཡིན་ནོ། །དགའ་བ་ཅན་གྱིས་ཞུས་པའི་མདོ་ལས་ཀྱང་། །ཆང་འཐུང་བ་ལ་མངོན་པར་དགའ་བའི་མི། །བདག་ལ་ཕན་དང་གཞན་ལ་བདེ་མི་ནུས། །རྨོངས་དང་མདོག་ངན་བྱེད་པ་ཆང་ཡིན་ཏེ། །ཇི་ལྟར་ཧཱ་ལའི་དུག་བཞིན་དེ་མི་བཏུང་། །ཞེས་གསུངས་སྨྱོན་མིན་བཙན་དུག་སུ་ཡིས་འཐུང་། །དགའ་བྲིད་བདུད་ཀྱི་ལྕགས་ཀྱུ་རྣོན་པོའི་རྩེར། །གང་ཡང་བསླུ་བའི་ཤ་ཆང་རོ་སྦྱར་ནས། །ཞེན་ཆགས་བདག་འཛིན་ཟ་འདྲེས་ཟོས་གྱུར་ན། །རེ་ཞིག་སེམས་ཀྱི་ཉ་མོ་བསླུ་ཉེན་ཆེ། །སྡུག་བསྔལ་ཆེ་མྱོང་ངུ་འབོད་ནང་དུ་དྲངས། །མི་ལོ་བྱེ་ཕྲག་སོ་ལྔ་ཡང་འཕེལ་བར། །མེས་བསྲེག་འབར་བའི་སྡུག་བསྔལ་བརྣག་དགོས་སོ། །དེ་བཞིན་ཉེས་ལྟུང་ཆུང་ངུ་རེ་ཕོག་ན། །སྨྱོན་པའི་སྐྱེ་བ་ལྔ་བརྒྱ་རེ་བླང་དགོས། །དེ་སོགས་ཉེས་པ་གང་གིས་བགྲང་མི་ནུས། །འགྲོ་བའི་ཆང་འཐུང་ཉེས་སྒྲུབ་དག་པའི་ཆེད། །བདག་གིས་ཆང་ནི་ཡོངས་སུ་སྤང་བར་བྱ། །སྤངས་ན་སྔར་བཤད་ཉེས་པ་ཀུན་བྲལ་ནས། །རྟག་ཏུ་ལུས་སེམས་བདེ་དང་དགེ་སྦྱོར་འཕེལ། །ཡང་དག་མཁྱེན་དང་བློ་གསལ་རིག་པ་དྭངས། །ཐར་ལམ་ཟིན་སོགས་ཡོན་ཏན་དཔག་མེད་འབྱུང་། །ཞེས་པ་ཆང་གི་ཉེས་དམིགས་ནི། །བསམ་མི་ཁྱབ་ཅིང་སྤང་བའི་ཐབས། །རང་གིས་རང་ལ་གདམས་པ་འདི། །བྲག་དཀར་ནམ་མཁའི་རྫོང་གི་མགུལ། །སྤྲང་ཆེན་བདུད་འདུལ་མིང་ཅན་གྱིས། །བཀོད་པས་སེམས་ཅན་ཐམས་ཅད་ཀྱིས། །བག་མེད་མ་སྤང་རང་གྲོལ་དུ། །རྟོགས་ནས་ཁམས་གསུམ་གྲོལ་བར་ཤོག །