བཀའ་གདམས་ཀྱི་སྐྱེས་བུ་དམ་པ་རྣམས་ཀྱི་གསུང་བགྲོས་ཐོར་བུ། ཇོ་བོ་བཀའ་གདམ་པའི་དགེ་བཤེས་རྣམས།

༄༅། །བཀའ་གདམས་ཀྱི་སྐྱེས་བུ་དམ་པ་རྣམས་ཀྱི་གསུང་བགྲོས་ཐོར་བུ་བཞུགས་སོ། །བླ་མ་དམ་པ་རྣམས་ལ་གུས་པས་ཕྱག་འཚལ་ལོ། །ཇོ་བོ་ཆེན་པོ་རྗེ་ལྷ་གཅིག་བོད་ཡུལ་དབུས་སུ་བྱོན་པའི་དུས་ན། ཇོ་བོའི་སློབ་མ་ཁུ་རྔོག་འབྲོམ་གསུམ་གྱིས། ཇོ་བོ་རྟེན་གྱི་གང་ཟག་ཅིག་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པར་བྱེད་པ་ལ། བཀའ་བསྟན་བཅོས་ཀྱི་གཞུང་དང་། བླ་མའི་གདམས་ངག་གཉིས་གང་གཙོ་ལགས་ཞུས་པས། ཇོ་བོའི་ཞལ་ནས། གཞུང་བས་གདམས་ངག་གཙོ་གསུངས། དེ་ཅི་སྟེ་ལགས་ཞུས་པས། སྡེ་སྣོད་གསུམ་ཁ་ཏོན་དུ་འཆད་ཤེས་ཤིང་ཆོས་ཐམས་ཅད་ཀྱི་མཚན་ཉིད་ལ་མཁས་ཀྱང་། ཉམས་སུ་ལེན་པའི་དུས་ན་བླ་མའི་གདམས་ངག་གི་ལག་ལེན་མེད་ན་ཆོས་དང་གང་ཟག་སོ་སོར་འགྲོ་གསུངས། བླ་མའི་གདམས་ངག་གི་ལག་ལེན་ཡང་འུབས་ཀྱིས་དྲིལ་ན། སྡོམ་པ་གསུམ་ལ་གནས་པར་བྱ་བ་དང་། སྒོ་གསུམ་དགེ་བ་ལ་འབད་པ་ལས་གདའ་ཡེ་ཞུས་པས། ཇོ་བོའི་ཞལ་ནས། སྡོམ་པ་གསུམ་ལ་གནས་པ་དག་ཀྱང་ཁམས་གསུམ་འཁོར་བ་ལས་ཡིད་མ་བྱུང་ན་སླར་འཁོར་བའི་རྒྱུ་བྱེད། ཉིན་མཚན་དུ་སྒོ་གསུམ་དགེ་བ་ལ་འབད་ཀྱང་། རྫོགས་པའི་བྱང་ཆུབ་ཏུ་བསྔོ་མ་ཤེས་ན་ཕྱིན་ཅི་ལོག་གི་རྟོག་པ་འགའ་ཞིག་གིས་འཛད། མཁས་བཙུན་སྟོན་སྒོམ་དུ་ཡོད་ཀྱང་། འཇིག་རྟེན་ཆོས་བརྒྱད་ལ་བློ་མ་ལོག་ན། ཅི་བྱས་ཚེ་འདིའི་འདུན་མར་སོང་ནས་ཕྱི་མའི་ལམ་མི་རྙེད་གསུངས། །

༈ ཡང་ཁུ་རྔོག་འབྲོམ་གསུམ་གྱིས། ཇོ་བོ་ལ་ལམ་གྱི་ཆོས་ཐམས་ཅད་ཀྱི་མཆོག་གང་ལགས་ཞུས་པས། ཇོ་བོའི་ཞལ་ནས། མཁས་པའི་མཆོག་བདག་མེད་ཀྱི་དོན་རྟོགས་པ་ཡིན། བཙུན་པའི་མཆོག་སེམས་རྒྱུད་ཐུལ་པ་ཡིན། ཡོན་ཏན་གྱི་མཆོག་ཕན་སེམས་ཆེ་བ་ཡིན། གདམས་ངག་གི་མཆོག་རྟག་ཏུ་རང་སེམས་ལ་ལྟ་བ་ཡིན། གཉེན་པོའི་མཆོག་གང་ཡང་རང་བཞིན་མེད་པར་ཤེས་པ་ཡིན། སྤྱོད་པའི་མཆོག་འཇིག་རྟེན་པ་དང་མི་མཐུན་པ་ཡིན། དངོས་གྲུབ་ཀྱི་མཆོག་ཉོན་མོངས་པ་ཇེ་ཆུང་ལ་སོང་བ་ཡིན། གྲུབ་རྟགས་ཀྱི་མཆོག་འདོད་པ་ཇེ་ཆུང་ལ་སོང་བ་ཡིན། སྦྱིན་པའི་མཆོག་མ་ཆགས་པ་ཡིན། ཚུལ་ཁྲིམས་ཀྱི་མཆོག་སེམས་ཞི་བ་ཡིན། བཟོད་པའི་མཆོག་དམན་ཆ་བཟུང་བ་ཡིན། བརྩོན་འགྲུས་ཀྱི་མཆོག་བྱ་བ་ཐོངས་པ་ཡིན། བསམ་གཏན་གྱི་མཆོག་བློ་མ་བཅོས་པ་ཡིན། ཤེས་རབ་ཀྱི་མཆོག་གང་ལ་ཡང་ངར་འཛིན་མེད་པ་ཡིན། དགེ་བའི་བཤེས་གཉེན་གྱི་མཆོག་མཚང་ལ་རྒོལ་བ་ཡིན། གདམས་ངག་གི་མཆོག་མཚང་ཐོག་ཏུ་འབེབས་པ་ཡིན། གྲོགས་ཀྱི་མཆོག་དྲན་པ་དང་ཤེས་བཞིན་ཡིན། སྐུལ་མའི་མཆོག་དགྲ་བགེགས་དང་ན་ཚ་སྡུག་བསྔལ་ཡིན། ཐབས་ཀྱི་མཆོག་བཅས་བཅོས་མེད་པ་ཡིན། ཕན་བཏགས་པའི་མཆོག་ཆོས་ལ་བཙུད་པ་ཡིན། ཕན་ཐོགས་པའི་མཆོག་ཆོས་ལ་བློ་སྣ་འགྱུར་བ་ཡིན་གསུངས། །

༈ འབྲོམ་སྟོན་པས་ཆོས་ཐམས་ཅད་ཀྱི་མཐར་ཐུག་གང་ལགས་ཞུས་པས། ཆོས་ཐམས་ཅད་ཀྱི་མཐར་ཐུག་སྟོང་ཉིད་སྙིང་རྗེའི་སྙིང་པོ་ཅན་ཡིན་གསུངས། དཔེར་ན་འཇིག་རྟེན་ན་སྨན་དཔའ་བོ་ཆིག་ཐུབ་བྱ་བ་ནད་ཐམས་ཅད་ཀྱི་གཉེན་པོར་འགྲོ་བ་ཞིག་ཡོད་པ་ཡིན། དཔེ་དེ་བཞིན་དུ་སྨན་དཔའ་བོ་ཆིག་ཐུབ་ལྟ་བུ། ཆོས་ཉིད་སྟོང་པ་ཉིད་ཀྱི་དོན་རྟོགས་ན་ཉོན་མོངས་པ་ཐམས་ཅད་ཀྱི་གཉེན་པོར་འགྲོ་བ་ཡིན་གསུངས། འོ་ན་སྟོང་པ་ཉིད་རྟོགས་ཟེར་བ་ཀུན་ཀྱི་ཆགས་སྡང་ཁ་མ་བྲི་བར་གདའ་བ་ཅི་ལགས་ཞུས་པས། ཇོ་བོའི་ཞལ་ནས་དེ་ཀུན་ཁ་སྟོང་དུ་སོང་བ་ཡིན། སྟོང་པ་ཉིད་ཀྱི་དོན་གཤའ་མར་རྟོགས་ན་ལུས་ངག་ཡིད་གསུམ་རས་བལ་རྡོག་པས་མནན་པའམ། ཕྱེ་ཐུག་ལ་ཟོ་མར་བསྐྱུར་བ་བཞིན་དུ་འགྲོ། སློབ་དཔོན་ཨཱརྱ་དེ་ཝའི་ཞལ་ནས། ཆོས་རྣམས་ཀྱི་གནས་ལུགས་སྟོང་པར་འདུག་གམ་མི་འདུག་སྙམ་དུ་ཐེ་ཚོམ་ཟོས་པ་ཙམ་གྱིས་ཀྱང་སྲིད་པ་ཧྲུལ་པོར་འགྲོ་གསུངས། དེས་ན་སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་ན་སྨན་དཔའ་བོ་ཆིག་ཐུབ་དང་མཚུངས་ཏེ། ལམ་གྱི་ཆོས་ཐམས་ཅད་དེའི་ཁོངས་ན་ཡོད་གསུངས། སྟོང་པ་ཉིད་རྟོགས་པའི་ཁོངས་ན། ལམ་གྱི་ཆོས་ཐམས་ཅད་ཇི་ལྟར་བདོག་ཞུས་པས། ཇོ་བོའི་ཞལ་ནས། ལམ་གྱི་ཆོས་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་ཏེ། སྟོང་པ་ཉིད་ཀྱི་དོན་ཕྱིན་ཅི་མ་ལོག་པ་ཞིག་རྟོགས་ན་ཕྱི་ནང་གི་དངོས་པོ་མཐའ་དག་ལ་ཞེ་འདོད་འཛིན་ཆགས་མེད་པས་སྦྱིན་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། འཛིན་ཆགས་མེད་པ་ལ་མི་དགེ་བའི་དྲི་མས་མ་གོས་པས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་ལ་ང་དང་ང་ཡིར་འཛིན་པའི་ཁོང་ཁྲོ་མེད་པས་བཟོད་པའི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་རྟོགས་པའི་དོན་ལ་སེམས་མངོན་པར་སྤྲོ་བ་དང་ལྡན་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། དེ་ལ་དངོས་པོར་འཛིན་པའི་གཡེང་བ་དང་བྲལ་བས་བསམ་གཏན་གྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད། གང་ལ་ཡང་འཁོར་གསུམ་དུ་རྟོག་པའི་ཡིད་དང་བྲལ་བས་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱུན་ཆད་མེད་པར་ཡོད་གསུངས།

༈ འོ་ན་དོན་རྟོགས་པ་ཞིག་ལ་སྟོང་པ་ཉིད་ཀྱི་ལྟ་སྒོམ་ཁོ་ནས་སངས་རྒྱ་བ་ལགས་སམ་ཞུས་པས། འདི་ལྟར་སྣང་ཚོད་གྲགས་ཚོད་འདི་ཐམས་ཅད་རང་གི་སེམས་ལས་མ་བྱུང་བ་མེད། སེམས་རིག་པ་སྟོང་པ་ཡིན། དེ་རིག་སྟོང་གཉིས་མེད་དུ་རྟོགས་པ་དེ་ལྟ་བ་ཡིན། དེ་ལ་མ་ཡེངས་པར་དྲན་པ་རྒྱུན་ཆགས་སུ་གནས་པ་དེ་སྒོམ་པ་ཡིན།  དེའི་ངང་ནས་སྒྱུ་མ་ལྟ་བུས་ཚོགས་གཉིས་གསོག་པ་དེ་སྤྱོད་པ་ཡིན། དེ་ད་ལྟ་ཉམས་འོག་ཏུ ་ཚུད་པ་ཞིག་ཡོད་ན་རྨི་ལམ་དུ་འོང་། རྨི་ལམ་དུ་བྱུང་ན་འཆི་ཁར་འོང་། འཆི་ཁར་བྱུང་ན་བར་དོར་འོང་། བར་དོར་བྱུང་ན་མཆོག་གི་དངོས་གྲུབ་ཐོབ་ངེས་པ་ཡིན་གསུངས།

༈ ཇོ་བོ་རྗེ་སྙེ་ཐང་ན་བཞུགས་པའི་ཚེ། ཞང་སྣ་ཆུང་སྟོན་པ་དང་། ཀྱུ་ར་སྟོན་པ་དང་། ལྷང་ཚང་སྟོན་པ་གསུམ་གྱིས་ཚད་མའི་གྲུབ་མཐའ་ཞུས་པས། ཇོ་བོའི་ཞལ་ནས། ཕྱི་རོལ་མུ་སྟེགས་པ་དང་ནང་པ་སངས་རྒྱས་པའི་གྲུབ་མཐའ་མང་དུ་ཡོད་དེ། དེ་ཐམས་ཅད་རྣམ་པར་རྟོག་པའི་ཕྲེང་བ་ཡིན། རྣམ་རྟོག་བགྲང་གིས་མི་ལང་དགོས་པ་མེད། ཚེ་ལ་ལོང་མེད་པས་སྙིང་པོའི་དོན་བསྡུ་བའི་དུས་ཡིན་གསུངས། ཞང་སྣ་ཆུང་སྟོན་པས། སྙིང་པོའི་དོན་ཇི་ལྟར་བསྡུ་ཞུས་པས། ཇོ་བོའི་ཞལ་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་བྱང་ཆུབ་ཀྱི་སེམས་སྦྱོངས། དེ་རྣམས་ཀྱི་དོན་དུ་ཚོགས་གཉིས་གསོག་པ་ལ་འབད་པར་གྱིས། དེ་ལས་བྱུང་བའི་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་རྫོགས་པའི་བྱང་ཆུབ་ཏུ་བསྔོས། དེ་ཐམས་ཅད་ཀྱི་རང་བཞིན་སྟོང་པ། མཚན་ཉིད་རྨི་ལམ་སྒྱུ་མ་ལྟ་བུར་ཤེས་པར་གྱིས་གསུངས།

༈ ཇོ་བོ་རྗེ་ཉིད་དང་པོ་མངའ་རིས་སུ་བྱོན་པའི་དུས་ན། མངའ་རིས་སུ་ལོ་གཉིས་བཞུགས་ནས། ལྷ་བྱང་ཆུབ་འོད་ཀྱིས་དབུ་མཛད་པ་རྣམས་ལ་གདམས་པ་མང་པོ་གནང་ནས་རྒྱ་གར་དུ་གཤེགས་པར་དགོངས་ནས་ལམ་དུ་བཞུད་ཁར། ལྷ་བྱང་ཆུབ་འོད་ཀྱིས་ད་དུང་ཞལ་གདམས་ཞིག་ཞུ་བྱས་པས། ཇོ་བོའི་ཞལ་ནས་སྔར་གྱི་ཆོས་དེས་ཆོག་གསུངས་པ་ལ། ལྷས་ནན་བསྐྱེད་པས་གདམས་པ་འདི་གནང་བའོ། །ཨེ་མའོ། །མཁྱེན་པ་མཐོ་ཞིང་ཐུགས་དགོངས་ཤིན་ཏུ་གསལ་བའི་གྲོགས་དག་ལ། །རང་འཁོས་མེད་པའི་བློ་དམན་བདག་གིས་མཆིད་གྲོས་གསོལ་བར་མི་རིགས་ཀྱང་། །སྙིང་བས་གཅེས་པའི་གྲོགས་པོ་དམ་པ་ཁྱེད་ཀྱིས་བདག་ལ་བསྐུལ་བས་ན། །བྱིས་པ་བློ་ཆུང་བདག་གིས་གྲོགས་ཀྱི་ཐུགས་ལ་མཆིད་གྲོས་འདི་འདེབས་སོ། །གྲོགས་དག་བྱང་ཆུབ་མ་ཐོབ་བར་དུ་བླ་མ་དགོས་པས་བཤེས་གཉེན་དམ་པ་སྟེན། གནས་ལུགས་མ་རྟོགས་བར་དུ་ཐོས་པ་དགོས་པས་བླ་མའི་གདམས་ངག་ཉོན། །ཆོས་ནི་ཤེས་པ་ཙམ་གྱིས་སངས་མི་རྒྱ་བས་ཤེས་པས་མི་ཆོག་ཉམས་སུ་ལོངས། །སེམས་ལ་གནོད་པའི་ཡུལ་དང་ཐག་བསྲིངས་རྟག་ཏུ་དགེ་བ་འཕེལ་སར་སྡོད། །བརྟན་པ་མ་ཐོབ་བར་དུ་འདུ་འཛིས་གནོད་པས་དབེན་པའི་ནགས་ཁྲོད་སྟེན། །ཉོན་མོངས་སྐྱེ་བའི་གྲོགས་པོ་སྤོངས་ལ་དགེ་འཕེལ་གྲོགས་སྟེན་དེ་སེམས་ཟུངས། །ནམ་ཡང་བྱ་བའི་ལས་ལ་ཟིན་པ་མེད་པས་ཞོག་ལ་ལྷན་གྱིས་སྡོད། །ཉིན་མཚན་རྟག་ཏུ་དགེ་བ་བསྔོ་ཞིང་རྟག་ཏུ་རང་སེམས་བྱ་ར་གྱིས། །མན་ངག་ཡོད་པས་བསྒོམ་པ་མིན་ནམ་ཅི་བྱེད་བླ་མའི་གསུང་བཞིན་སྒྲུབས། །གུས་པ་ཆེན་པོས་བསྒྲུབས་ན་རིང་པོར་མི་ཐོགས་འབྲས་བུ་འཕྲལ་དུ་འབྱུང་། །སྙིང་ནས་ཆོས་བཞིན་བྱས་ན་སྟོ་རྒྱབ་གཉིས་ཀ་ཞོར་ལ་འབྱུང་ཚུལ་འདུག །གྲོགས་དག་འདོད་པ་རྣམས་ལ་ཚ་ཆུ་འཐུང་བཞིན་ངོམས་པ་མེད་པས་ཆོག་ཤེས་མཛོད། །དྲེགས་རློམ་ང་རྒྱལ་ཁེངས་པའི་སེམས་ཀུན་སྨོད་ལ་ཞི་ཞིང་དུལ་བར་གྱིས། །བསོད་ནམས་ཟེར་བའི་འདུ་འཛི་དེ་ཡང་ཆོས་ཀྱི་བར་ཆད་ཡིན་པས་སྤོངས། །རྙེད་དང་བཀུར་སྟི་བདུད་ཀྱི་ཞགས་པ་ཡིན་པས་སྲང་ཁའི་རྡོ་བཞིན་སོལ། །བསྟོད་དང་གྲགས་པའི་ཚིག་རྣམས་བསླུ་བྲིད་ཡིན་པས་མཆིལ་སྣབས་བཞིན་དུ་དོར། །ད་ལྟའི་བདེ་སྐྱིད་གཉེན་གསུམ་འཛོམས་ཡང་ཡུད་ཙམ་ཡིན་པས་རྒྱབ་ཏུ་སྐྱུར། །འདི་བས་ཕྱི་མ་རིང་བས་ཕྱི་མའི་རྒྱགས་ཕྱེ་ནོར་རྣམས་གཏེར་དུ་སྦོས། །ཐམས་ཅད་བོར་ནས་འགྲོ་བས་ཅིས་ཀྱང་བྱར་མེད་གང་ལའང་ཞེན་མེད་ཀྱིས། །དམན་པ་རྣམས་ལ་སྙིང་རྗེ་སྐྱེད་ལ་ཁྱད་དུ་གསོད་དང་བརྙས་པ་སྤོངས། །དགྲ་ཟིན་སྡེ་རིས་ཀུན་ལ་ཞེན་ཅིང་ཆགས་པའི་ཕྱོགས་རིས་མེད་པར་མཛོད། །ཡོན་ཏན་ཅན་ལ་ཕྲག་དོག་མི་བྱ་གུས་པར་གྱིས་ལ་ཡོན་ཏན་བླང་། །གཞན་སྐྱོན་མི་བརྟགས་རང་སྐྱོན་བརྟགས་ལ་རང་སྐྱོན་ཁྲག་ངན་བཞིན་དུ་ཕྱུང་། རང་དགེ་མི་བསམ་གཞན་དགེ་བསམ་ལ་ཀུན་ལ་བྲན་བཞིན་གུས་པར་མཛོད། །འགྲོ་བ་ཀུན་ལ་ཕ་མའི་འདུ་ཤེས་སྐྱེད་ལ་བུ་བཞིན་བྱམས་པར་གྱིས། །རྟག་ཏུ་འཛུམ་པའི་བཞིན་དང་བྱམས་པའི་ཡིད་ཀྱིས་ཁྲོ་མེད་གསོང་པོར་སྨྲོས། །འབྲེལ་མེད་སྨྲ་བ་མང་ན་འཁྲུལ་པ་འབྱུང་བས་ཚོད་བཟུང་རན་པར་སྨྲོས། །དོན་མེད་བྱ་བ་མང་ན་དགེ་སྦྱོར་འཆག་པས་ཆོས་མིན་བྱ་བ་ཞོག །སྙིང་པོ་མེད་པའི་ལས་ལ་རྩོལ་བ་མ་ཆེ་ངལ་བ་དོན་མེད་ཡིན། །གང་ཡང་འདོད་ཁར་མི་འཆི་ཕ་རོལ་ལས་ལས་གྲུབ་པས་ལྷོད་ཀྱིས་གློད་ན་བདེ། །ཀཱ་ཡེ་དམ་པས་ཁྲེལ་ན་ཤི་དང་འདྲ་བས་གཡོ་མེད་དྲང་པོར་སྲོང་། །ཚེ་འདིའི་བདེ་སྡུག་སྔ་མའི་ལས་ལས་བྱུང་བས་གཞན་ལ་གྱོད་མི་གདབ། །བདེ་བ་ཐམས་ཅད་བླ་མའི་བྱིན་རླབས་ལགས་པས་དྲིན་དུ་གཟོ་བར་མཛོད། །རང་རྒྱུད་མ་ཐུལ་བར་དུ་གཞན་རྒྱུད་མི་ཐུལ་བས་ན་ཐོག་མར་རང་རྒྱུད་ཐུལ། །མངོན་ཤེས་མེད་པར་གཞན་དག་སྨིན་པར་མི་ནུས་པས་ན་སྒྲུབ་ལ་བརྩོན་པར་མཛོད། །བསགས་པའི་ནོར་རྣམས་བཞག་ནས་འགྲོ་བར་ངེས་པས་ནོར་ཕྱིར་སྡིག་མ་གསོག །ལོངས་སྤྱོད་གཡེང་བ་འདི་ལ་སྙིང་པོ་མེད་པས་སྦྱིན་པ་ཡོན་གྱིས་བརྒྱན་པ་ཐོངས། །ཚེ་འདིར་མཛེས་ཤིང་ཕྱི་མར་བདེ་བས་རྟག་དུ་ཚུལ་ཁྲིམས་རྣམ་དག་སྲུངས། །སྙིགས་མའི་དུས་ན་ཞེ་སྡང་བདོ་བས་ཁྲོ་མེད་བཟོད་པའི་གོ་ཆ་གྱོན། །ལེ་ལོའི་དབང་གིས་ད་རུང་ལུས་པས་སྒྲུབ་པའི་བརྩོན་འགྲུས་མེ་ལྟར་སྦོར། །ཡེངས་མ་ལམ་དུ་མི་ཚེ་ཟད་པས་ད་ནི་བསམ་གཏན་བྱ་བར་རན། །ལོག་ལྟའི་དབང་གིས་གནས་ལུགས་དོན་མི་རྟོགས་པས་ཡང་དག་དོན་ལ་གཞིག །གྲོགས་དག་འཁོར་བའི་འདམ་རྫབ་འདི་ན་སྐྱིད་མེད་ཐར་པའི་སྐམ་སར་གཤེགས། །བླ་མའི་གདམས་ངག་ཚུལ་བཞིན་སྒོམས་ལ་འཁོར་བའི་སྡུག་བསྔལ་ཆུ་བོ་སྐོམས། །རང་གི་སེམས་ལ་ཆོངས་དང་ཁ་ཚིག་མིན་གྱིས་གྲོས་ལ་གསན་པར་རིགས། །དེ་ལྟར་མཛད་ན་བདག་ཀྱང་དགའ་ལ་རང་གཞན་ཀུན་ཀྱང་སྐྱིད་པར་མཆིས། །རྨོངས་པ་བདག་གིས་གདམས་ངག་འདི་ལ་ཁྱེད་ཀྱིས་ཅིས་ཀྱང་གསན་པར་ཞུ། །ཞེས་ཇོ་བོ་རྗེ་ལྷ་གཅིག་གིས་ལྷ་བཙུན་བྱང་ཆུབ་འོད་ལ་གདམས་པའོ།

༈ ཇོ་བོ་ཡེར་པའི་བྲག་ལ་བཞུགས་པའི་ཚེ། འོལ་རྒོད་པ་ཡེ་ཤེས་འབར་བ་ལ་གདམས་པ་ནི། །བཅོམ་ལྡན་འདས་འཕགས་མ་སྒྲོལ་མ་ལ་ཕྱག་འཚལ་ལོ། །བླ་མ་དམ་པ་རྣམས་ལ་ཕྱག་འཚལ་ལོ། །རིགས་ཀྱི་བུ་ཁྱོད་ཀྱིས་ཁོ་བོའི་ཚིག་འདི་དག་ལ་ལེགས་པར་དགོངས་ཤིག །སྤྱིར་ན་སྙིགས་མའི་དུས་ཀྱི་མི་རྣམས་ཀྱི་ཚེ་ནི་ཡུན་ཐུང་ཤེས་བྱའི་རྣམ་པ་མང་བས། རང་གི་ཚེའི་ཚད་ཀྱང་ཇི་ཙམ་ཐུབ་པར་ངེས་པ་མེད་པས་མྱུར་དུ་རང་གི་འདོད་པ་དང་དུ་བླང་བ་ལ་འབད་པར་གྱིས་ཤིག །ཡོ་བྱད་ལ་སོགས་པའི་འཚོ་སྐྱོང་གི་བྱ་བ་ལ་ཁྱིམ་པ་དང་འདྲ་བར་བྱས་ནས་ང་དགེ་སློང་ངོ་ཞེས་མ་སྨྲ་ཞིག །དགོན་པ་ན་གནས་ཀྱང་འཇིག་རྟེན་འདིའི་བྱ་བ་ཉམས་པ་དང་ཉམས་སུ་དོགས་པའི་སྡུག་བསྔལ་དང་ལྡན་པར་བྱས་ནས། ང་དགེ་སློང་དགོན་པ་བ་ཡིན་ཞེས་མ་སྨྲ་ཞིག །སེམས་ཚེ་འདིའི་འདོད་པ་ལ་འདུན་པ་དང་གནོད་སེམས་ལ་སོགས་པ་དང་མ་བྲལ་བར་བྱས་ནས། ང་དགེ་སློང་དགོན་པ་བ་ཞེས་མ་སྨྲ་ཞིག་དགོན་པ་ན་གནས་ཀྱང་འཇིག་རྟེན་པ་དང་འདྲིས་པ་མི་སྤོང་ཞིང་། གང་དང་ལྷན་ཅིག་འདུག་པ་དེ་དག་དང་བྲེ་མོའི་གཏམ་དང་། ཁྱིམ་པའི་གཏམ་ལ་སོགས་པས་དུས་ཡོལ་བར་བྱེད་ཅིང་། ང་དགེ་སློང་དགོན་པ་བ་ཞེས་མ་སྨྲ་ཞིག །རང་ལ་ཕ་རོལ་གྱི་གནོད་པ་ཕྲ་མོ་ལ་ཡང་མི་བཟོད་ཅིང་། གཞན་ལ་ཕན་འདོགས་པ་ཕྲ་མོའང་བྱེད་མི་ནུས་པར་ང་དགེ་སློང་བྱང་ཆུབ་སེམས་དཔའོ་ཞེས་མ་སྨྲ་ཞིག །གལ་ཏེ་དེ་ལྟར་སྨྲས་ན་འཇིག་རྟེན་པ་ལ་རྫུན་ཆེན་པོ་སྨྲས་པའོ། །འོན་ཀྱང་འཇིག་རྟེན་པ་ལ་དེ་ལྟར་སྨྲ་རུ་བཏུབ་པ་སྲིད་ཀྱང་། གཅིག་ཏུ་ཀུན་ཏུ་ཐོགས་པ་མེད་པའི་སྤྱན་དང་ལྡན་པ་རྣམས་ལ་མི་བཏུབ་བོ། །གཉིས་སུ་ལས་རྒྱུ་འབྲས་རང་གི་རྗེས་སུ་འབྲང་བས་མི་བཏུབ་བོ། །གསུམ་དུ་གང་ཟག་ཆོས་ཀྱི་སྤྱན་དང་ལྡན་པ་རྣམས་ལ་མི་བཏུབ་བོ། །གཞན་ཡང་ཁྱོད་ཀྱིས་བྱང་ཆུབ་ཏུ་སེམས་བསྐྱེད་པའི་དུས་ན་ལྷ་དང་བླ་མའི་སྤྱན་སྔར་ཇི་ལྟར་ཁས་བླངས་པ་དེ་དྲན་པར་གྱིས་ཤིག །བཟོད་པའི་ཡུལ་ཁྱད་པར་ཅན་དང་འཕྲད་པའི་ཚེ་བཟོད་པར་མི་བྱེད་པར་དེ་ལྟར་དཀའ་ཞེས་མ་སྨྲ་ཞིག །དཀའ་ཡང་མི་བྱར་མི་བཏུབ་པ་དྲན་པར་གྱིས་ཤིག །དཀའ་བ་དང་མི་དཀའ་བའི་རྟོག་དཔྱོད་དེ་ནི་དང་པོ་ཁས་མ་བླངས་དམ་མ་བཅས་པའི་དུས་ན་ཡིན་གྱི། ཁས་བླངས་དམ་བཅས་ནས་དེ་ཉིད་ལས་ཉམས་ན་ལྷ་དང་བླ་མ་བསླུས་པ་ཡིན་པས་དེས་ན་དཀའ་ཡང་མི་བྱར་མི་རུང་བ་དྲན་པར་གྱིས་ཤིག །གཞན་ཡང་དགོན་པར་གནས་པའི་དགོས་པ་ནི། འཇིག་རྟེན་པ་དང་འདྲ་བ་སྤོང་ཞིང་། ཉེ་དུ་ལ་ཞེན་པ་སྤོང་བ་ཡིན། དེ་སྤངས་པས་འདོད་པ་ལ་འདུན་པ་ལ་སོགས་པ་རྟོག་པ་དང་གཡེང་བའི་རྒྱུ་རྐྱེན་ཐམས་ཅད་མེད་པར་བྱས་ནས། རང་གི་བྱང་ཆུབ་ཀྱི་སེམས་རིན་པོ་ཆེ་ལ་བལྟ་བ་ཡིན་པས། འཇིག་རྟེན་པའི་བྱ་བ་ཉམས་ཀྱིས་དོགས་པའི་སེམས་ཀྱི་རྗེས་སུ་སྐད་ཅིག་ཀྱང་མ་འབྲང་ཞིག །སྔར་ཆོས་ཚུལ་བཞིན་དུ་མ་སྤྱད་ཅིང་། བློ་གོམས་སྟོབས་ཆུང་བའི་དབང་གིས་འཇིག་རྟེན་པའི་རྣམ་པར་རྟོག་པ་ཡང་དང་ཡང་དུ་སྐྱེ་ཞིང་དབང་ཆེ་བས། དེ་ལ་གཉེན་པོའི་སྟོབས་ཁྱད་པར་ཅན་མ་བསྟེན་ན་དགོན་པ་ན་གནས་པ་ལ་དོན་མེད་དོ། །དེ་ན་གནས་པའི་བྱ་དང་རི་དྭགས་བཞིན་ནོ། །དེ་ད་ལྟ་དཀའ་བས་ཕྱིས་བྱ་སྙམ་དུ་མ་སེམས་ཤིག །ལོང་བའི་ལག་ཏུ་ནོར་བུ་རིན་པོ་ཆེ་འོང་ན་ཕྱིས་རྙེད་པར་མི་འགྱུར་རོ། །ཉམས་ལེན་བྱེད་དུས་ན་ཡང་ལོ་དང་ཟླ་བ་མ་བགྲང་བར་རྟོགས་པ་ཆེ་ཆུང་རང་གི་སེམས་ལ་རང་གི་བློའི་གོམས་སྟོབས་ཆེ་ཆུང་ལ་ལྟོས། ཉོན་མོངས་པ་ཁ་བྲིད་མ་བྲིད་ལ་ལྟོས། རྟག་ཏུ་རང་གི་སེམས་ལ་བྱ་ར་གྱིས། རང་ལ་རང་སྡུག་མ་བྱེད། རང་གིས་རང་མ་སླུ། ལྷ་དང་བླ་མ་མ་སླུ། རང་ཕུང་གཞན་ཕུང་མ་བྱེད། ཚེ་འདིའི་བྱ་བ་ཉམས་ཀྱང་ཉམས་པར་བྱ་རྒྱུ་དེ་ཉམས་པ་ཡིན། དཔེར་ན་རང་གི་མདུན་ན་མི་གཙང་བའི་ཕུང་པོ་ཞིག་འདུག་ན་དེ་རང་གིས་མྱུར་དུ་ཕྱགས་ལ་དོར་དགོས་པ་ལ། གཞན་ཞིག་གིས་ཀྱང་གྲོགས་བྱས་ནས་དོར་ན་ཅིའི་ཕྱིར་མི་དགའ། དེ་བཞིན་དུ་ཚེ་འདིའི་རྣམ་པར་རྟོག་པ་ཐམས་ཅད་ནི་རང་གི་གཉེན་པོ་ཡོད་ཚད་ཀྱིས་སྤོང་དགོས་པའོ། །བླ་མ་དང་གྲོགས་ཁྱད་པར་ཅན་གྱིས་སྤོང་གྲོགས་བྱས་པ་ལ་ཁྱོད་ཅིའི་ཕྱིར་མི་དགའ། ལྷ་དང་བླ་མའི་སྤྱན་སྔར་སེམས་ཅན་གྱི་དོན་བྱེད་པར་ཁས་བླངས་ནས་སྦྱིན་པའི་ཡུལ་ལ་བྱེ་བྲག་མ་ཕྱེད། ཡུལ་ལ་བྱེ་བྲག་ཡོད་ཀྱང་རང་གི་བྱང་ཆུབ་ཀྱི་སེམས་སྦྱོང་བ་ལ་བྱེ་བྲག་མེད་དོ། །གནོད་པར་བྱེད་པ་ལ་ཁོང་མ་ཁྲོ། གནོད་པར་བྱེད་པ་ལ་ཁོང་ཁྲོ་ན་བཟོད་པ་ཇི་ཙམ་ན་བསྒོམ། ཉོན་མོངས་པ་ནམ་བྱུང་ཙ་ན་གཉེན་པོ་དྲན་དགོས་པ་ཡིན། ཉོན་མོངས་པ་ཁ་རྒྱལ་དུ་བཏང་བའི་ཆོས་ཀྱིས་དགོས་པ་ཅི་ཡོད། དེ་བས་ན་ཁྱོད་ཀྱིས་བྱང་ཆུབ་ཀྱི་སེམས་རིན་པོ་ཆེར་བལྟ་བ་ལ། དྲན་པ་ཉམས་པའི་བུ་གའི་སྐབས་སྐད་ཅིག་ཙམ་ཡང་མེད་པར་གྱིས་ལ་ལྟོས་ཤིག །གང་དྲན་པ་ཉམས་པའི་བུ་ག་དོད་ན་དེ་ནས་ཉོན་མོངས་པའི་བདུད་འཇུག །དེ་ཞུགས་ན་བྱང་ཆུབ་ཀྱི་སེམས་ལ་བར་དུ་གཅོད། དེ་བཅད་ན་གཞན་དོན་དང་ལ་ཆེ་སྟེ་རང་ཉིད་ཀྱང་ངན་སོང་ལས་འོས་མེད་དོ་སོམས་ཤིག །ངས་ཆོས་བྱས་སྙམ་ཡང་དོན་མེད་སྟོང་པར་འགྲོ། རིགས་ཀྱི་བུ་ཐ་མར་འཆི་བའི་ཚེ་ན། བླ་མ་དང་གྲོགས་ཁྱད་པར་ཅན་རྣམས་མྱ་ངན་དང་ཡི་མུག་སྐྱེ་རུ་མ་གཞུག་ཅིག །གཞན་ཡང་འཇིག་རྟེན་པ་ཆོས་ལ་མོས་པ་རྣམས་ཡི་མུག་ཅིང་ཐེ་ཚོམ་དུ་མ་གཞུག་ཅིག །རང་གི་སེམས་དང་བཀའ་ལུང་གཉིས་བསྟུན་ནས་ཞུ་དག་ཡང་ནས་ཡང་དུ་མ་བྱས་ན་ངས་ཆོས་བྱས་སྙམ་ཡང་ཆོས་དང་གང་ཟག་ཏུ་འཛོལ་ནས། འཆི་བའི་ཚེ་ན་བྱང་ཆུབ་ཀྱི་སེམས་འབྱོངས་པའི་རྟགས་མེད་པར་ངན་སོང་གི་རྟགས་བྱུང་ཙ་ན་གཞན་ཡི་མུག་དང་མྱ་ངན་སྐྱེ་བ་ལས་འོས་མེད་དོ། །དེ་བས་ན་ངས་མི་ཚེ་ཆོས་ལ་བསྐྱལ་སྙམ་པའི་ང་རྒྱལ་དང་ལྡན་པའི་ཆོས་ལ་ཡེ་ལེ་ཕྱོད་ངེ་བྱས་ནས་འཆི་ཁར་ལག་སྟོང་མ་བྱེད་ཅིག །མདོར་ན་དགོན་པ་ན་གནས་ཀྱང་ཚེ་འདིའི་བྱ་བ་མ་ཐོངས། འདོད་པའི་འདུན་པ་ལ་བློ་མ་ལོག་ན་ཆོས་ཀྱིས་ཕན་མ་ཐོགས། བྱ་བ་མ་བྱས་ཞེས་བྱ། ཚེ་འདི་ཕྱི་གཉིས་ཀ་མ་ཉམས་པ་ཞིག་བྱ་སྙམ་ན་ཆོས་ཞོར་ཁྲིད་དུ་སོང་བ་ཡིན། ཞོར་ཁྲིད་དེ་ཡང་ཁ་ཆོས་ཟ་ཆོས་ཚུལ་འཆོས་ཤིག་ལས་མི་འོང་། དེ་བས་ན་གྲོགས་ཁྱད་པར་ཅན་ལ་རྟེན། གྲོགས་ངན་པ་དང་མ་འགྲོགས། གནས་ངེས་མེད་དུ་སྡོད། གཞི་གཅིག་ལ་ཟག་གསོག་གིན་མ་སྡོད། ཅི་བྱེད་ཆོས་དང་བསྟུན་ལ་གྱིས། ཅི་བྱས་ཉོན་མོངས་པའི་གཉེན་པོར་འགྲོ་བ་གྱིས། དེ་ལྟར་བྱས་ན་ཡང་དག་པའི་ཆོས་ཡིན་པས་དེ་ལ་བརྩོན་པར་གྱིས། བརྒྱ་ལ་རང་གི་རྒྱུད་ལ་ཡོན་ཏན་སྐྱེས་ན་ང་རྒྱལ་གྱིས་མ་རློམས་ཤིག །བདུད་གྱི་དབང་དུ་འགྲོའོ། །བས་མཐའི་གནས་སུ་གནས་ནས་བདག་ཉིད་ཞི་བ་དང་དུལ་བར་གྱིས། འདོད་པ་ཆུང་བ་དང་ཆོག་ཤེས་པར་གྱིས། རང་གི་ཡོན་ཏན་ལ་མ་ལྟ། གཞན་གྱི་སྐྱོན་མ་ཚོལ། འཇིགས་པ་དང་བག་ཚ་བ་མེད་པར་གྱིས། རྣམ་པར་རྟོག་པ་མ་ཆེ། བསམ་པ་བཟང་པོ་གྱིས། ལོག་པ་ལ་མ་ཡེངས་པར་རྒྱུན་དུ་ཆོས་སོམས། དམན་ས་ཟུང་། འཕམ་ཁ་ལོང་། ཡུས་ཁ་སྐྱུངས། ཞེ་འདོད་ཐོངས། བརྩེ་སེམས་སྐྱེད། གང་ལ་ཡང་ཚོད་རིག་པར་གྱིས། མགུ་སླ་ཞིང་གསོ་སླ་བ་ཞིག་དགོས། རི་དྭགས་ལྟར་འཇིག་རྟེན་པ་ལ་བྲོས། མི་ཆོས་མ་སྤངས་ན་ཆོས་པ་མིན་ནོ། །སོ་ནམ་རྣམ་བཞི་མ་སྤངས་ན་རབ་ཏུ་བྱུང་བ་མིན་ནོ། །འདོད་པ་མ་སྤངས་ན་དགེ་སློང་མིན་ནོ། །བྱམས་སྙིང་རྗེ་མེད་ན་བྱང་ཆུབ་སེམས་དཔའ་མིན་ནོ། །བྱ་བ་མ་ཐོངས་ན་སྒོམ་ཆེན་མིན་ནོ། །འདོད་པར་མ་འཁོར་ཅིག །མདོར་ན་དགོན་པ་ན་གནས་ནས་བྱ་བ་མ་མང་བར་ཆོས་འབའ་ཞིག་བསྒོམས་ལ་ནམ་འཆི་བའི་ཚེ་སེམས་ལ་འགྱོད་པ་མེད་པ་ཞིག་གྱིས་ཤིག །ཅེས་གསུངས།

ཡང་ཇོ་བོའི་ཞལ་ནས། ད་ལྟ་སྙིགས་མའི་དུས་སུ། ཕོ་སོ་འདོན་པའི་དུས་མ་ཡིན་སྙིང་རུས་འདོན་པའི་དུས་ཡིན། ཆེ་ས་བཟུང་བའི་དུས་མ་ཡིན་དམན་ས་བཟུང་བའི་དུས་ཡིན། འཁོར་གཡོག་བསྟེན་པའི་དུས་མ་ཡིན་དབེན་པ་བསྟེན་པའི་དུས་ཡིན། སློབ་མ་བསྲེལ་བའི་དུས་མ་ཡིན་རང་ཉིད་བསྲེལ་བའི་དུས་ཡིན། ཚིག་རྗེས་བཟུང་བའི་དུས་མ་ཡིན་དོན་ལ་བསམ་པའི་དུས་ཡིན། ཕན་ཚུན་འགྲོ་བའི་དུས་མ་ཡིན་ས་གཅིག་ཏུ་སྡོད་པའི་དུས་ཡིན་གསུངས་སོ། །

༈ དགེ་བཤེས་སྟོན་པ་ལ་སློབ་མ་སྐུ་མཆེད་གསུམ་གྱིས། ཐམས་ཅད་མཁྱེན་པའི་ལམ་ཐམས་ཅད་ཀྱི་དོན་མདོར་བསྡུས་ནས་ཉམས་སུ་བླང་བའི་ཐབས་ཤིག་ཞུ་ལགས་ཞུས་པས། འབྲོམ་སྟོན་པའི་ཞལ་ནས། རྟེན་གྱི་གང་ཟག་ཅིག་ཐམས་ཅད་མཁྱེན་པའི་སངས་རྒྱས་འཐོབ་པར་བྱེད་པ་ལ་ལམ་གྱི་འཇུག་སྒོ་བསླབ་བྱ་བསམ་གྱིས་མི་ཁྱབ་པ་ཞིག་ཡོད་ཀྱང་རྒྱུད་ལ་སྐྱེ་བར་བྱ་རྒྱུའི་དངོས་པོ་གཅིག་ལས་མེད། གཅིག་པོ་གང་ཡིན་ན་སྟོང་ཉིད་སྙིང་རྗེའི་སྙིང་པོ་ཅན་ཡིན། དེ་ལ་བྱེ་བྲག་ཏུ་ཕྱེ་ན་སྟོང་པ་ནི་དོན་དམ་བྱང་ཆུབ་ཀྱི་སེམས་ཏེ། ཆོས་ཐམས་ཅད་ཀྱི་རང་བཞིན་ནམ་གནས་ལུགས་ཡེ་ནས་སྐྱེ་མེད་དུ་རྟོགས་པ་དེ་ཡིན། སྙིང་རྗེ་ནི་ཀུན་རྫོབ་བྱང་ཆུབ་ཀྱི་སེམས་ཏེ། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོ་སྐྱེས་པ་དེ་ཡིན། དེས་ན་ཐེག་པ་ཆེན་པོའི་ལམ་ཉམས་སུ་ལེན་པ་རྣམས་ཀྱིས་དང་པོ་བྱང་ཆུབ་ཀྱི་སེམས་གཉིས་པོ་དེ་རྒྱུད་ལ་མ་སྐྱེས་པ་སྐྱེ་བར་བྱེད་པའི་ཐབས་ལ་འབད་ཅིང་། བར་དུ་ཡང་བྱང་ཆུབ་ཀྱི་སེམས་རྣམ་པ་གཉིས་རྒྱུད་ལ་སྐྱེས་པ་དེ་ཉིད་ལ་སྦྱངས་པས། ཐ་མ་མཐར་ཕྱིན་པའི་འབྲས་བུ་ཆོས་སྐུ་དང་གཟུགས་སྐུ་མངོན་སུམ་དུ་ཐོབ་ངེས་པ་ཡིན། དེ་ལ་དང་པོ་བྱང་ཆུབ་ཀྱི་སེམས་རྣམ་པ་གཉིས་རྒྱུད་ལ་མ་སྐྱེས་པ་སྐྱེ་བར་བྱེད་པའི་ཐབས་མང་ཡང་། མདོར་བསྡུས་ནས་ཉམས་སུ་ལེན་པ་ལ། ཐབས་ཀྱི་རྩ་བ་གསུམ། ཡན་ལག་གི་གཙོ་བོ་དགུ་ལས་མེད། དང་པོ་རྩ་བ་གསུམ་ནི། བློ་སྦྱང་བ་དང་། ཚོགས་བསག་པ་དང་། ཏིང་ངེ་འཛིན་བཙལ་བ་དང་གསུམ་དུ་འདུས། དེ་དག་གི་ཡན་ལག་གི་གཙོ་བོ་དགུ་ནི། དང་པོ་བློ་སྦྱོང་བའི་ཐབས་མང་ཡང་། མི་རྟག་པ་བསྒོམ་པ་དང་། བྱམས་སྙིང་རྗེ་བསྒོམ་པ་དང་། བདག་མེད་གཉིས་བསྒོམ་པ་དང་གསུམ་གཙོ་བོ་ཡིན་ཏེ། བློ་སྦྱོང་གི་ཐབས་སུ་དེ་གསུམ་ཁོ་ན་ཆེ་ཞིང་གཞན་ཐམས་ཅད་དེའི་ཁོངས་སུ་འདུས། ཚོགས་བསག་པ་ལ་བསག་ཐབས་མང་ཡང་། བླ་མའི་བསྙེན་བཀུར་དང་། དཀོན་མཆོག་གི་མཆོད་པ་དང་། དགེ་འདུན་གྱི་བསྙེན་བཀུར་དང་གསུམ་གཙོ་བོ་ཡིན་ཏེ། ཚོགས་གསོག་གི་ཐབས་སུ་དེ་གསུམ་ཁོ་ན་ཆེ་ཞིང་འདུས། ཏིང་ངེ་འཛིན་བཙལ་བ་ལ་བཙལ་ཐབས་མང་ཡང་། ཚུལ་ཁྲིམས་རྣམ་པར་དག་པ་བསྲུང་བ་དང་། བརྒྱུད་པའི་བླ་མ་ལ་གསོལ་བ་གདབ་པ་དང་། ལུས་སེམས་དབེན་པ་བསྟེན་པ་དང་གསུམ་གཙོ་བོ་ཡིན་ཏེ། ཞི་གནས་ལྷག་མཐོང་གི་ཏིང་ངེ་འཛིན་བཙལ་བའི་ཐབས་སུ་དེ་གསུམ་ཁོ་ན་ཆེ་ཞིང་འདུས། དེ་ལྟར་དོན་དགུ་བོ་དེ་དྲིལ་ནས་ཉམས་སུ་བླངས་པས་བྱང་ཆུབ་ཀྱི་སེམས་རྣམ་པ་གཉིས་ངམ་ངམ་ཤུགས་ཀྱིས་རྒྱུད་ལ་སྐྱེ་སྟེ། དོན་དམ་བྱང་ཆུབ་ཀྱི་སེམས་སྐྱེས་ཙ་ན། ཕྱི་ནང་གི་ཆོས་ཐམས་ཅད་སྟོང་པ་སྐྱེ་མེད་སྤྲོས་བྲལ་དུ་ལྷན་གྱིས་རྟོགས་པ་འབྱུང་། དེ་ཙམ་ན་རང་གི་ནང་དུ་བློ་བདེ་རྙེད་པ་ཡིན། ཀུན་རྫོབ་བྱང་ཆུབ་ཀྱི་སེམས་སྐྱེས་ཙ་ན། དེ་ལྟར་མ་རྟོགས་པའི་སེམས་ཅན་རྣམས་ལ་བྱམས་སྙིང་རྗེ་ལྷག་པར་སྐྱེ་སྟེ། བྱ་རྒྱུ་སེམས་ཅན་གྱི་དོན་ལས་མེད་པ་ཞིག་འབྱུང་། དེ་ཙ་ན་ཅི་བྱས་སེམས་ཅན་གྱི་དོན་དུ་འགྱུར་བ་ཞིག་འོང་བ་ཡིན། དེ་གཉིས་ཟུང་དུ་འབྲེལ་ཏེ་སྟོང་པའི་དུས་ཉིད་ན་མ་འགགས་པའི་སེམས་ཅན་ལ་སྙིང་རྗེ་ལྷག་པར་སྐྱེ་ལ། སྙིང་རྗེའི་དུས་ཉིད་ན་བདག་དང་སེམས་ཅན་གྱི་དངོས་པོ་མ་མཐོང་སྟེ། སྣང་བ་སྒྱུ་མ་ལྟ་བུའི་ངོ་བོ་སྟོང་བར་རྟོགས་ཏེ་ཟུང་འབྲེལ་དུ་སྐྱེས་ཙ་ན་ཐེག་པ་ཆེན་པོའི་ལམ་ཕྱིན་ཅི་མ་ལོག་པར་ཚུད་པ་ཡིན། དེ་ཉིད་ལ་སྦྱངས་བས་གོམས་པ་མཐར་ཕྱིན་ཙ་ན་ཆོས་སྐུ་དང་གཟུགས་སྐུ་ལྷུན་གྲུབ་ཐོབ་པ་ཡིན་ཏེ། དོན་དམ་བྱང་ཆུབ་ཀྱི་སེམས་སྟོང་པ་ཉིད་ལས་ཆོས་སྐུ། ཀུན་རྫོབ་བྱང་ཆུབ་ཀྱི་སེམས་སྙིང་རྗེས་ལས་གཟུགས་སྐུ། དེ་གཉིས་དབྱེར་མེད་དུ་སྦྱངས་པ་ལས་ཆོས་སྐུ་དང་གཟུགས་སྐུ་དབྱེར་མེད་དུ་ཐོབ་གསུངས།

༈ ཡང་འབྲོམ་སྟོན་པ་སྐུ་མཆེད་གསུམ་གྱིས། བདག་དོན་དང་གཞན་དོན་ཕུན་སུམ་ཚོགས་པ་བྱེད་པ་ལ། ལྟ་བ་དང་སྤྱོད་པ་གཉིས་གལ་གང་ཆེ་ལགས་ཞུས་པས། སྟོན་པའི་ཞལ་ནས། རྟེན་གྱི་གང་ཟག་ཅིག་ཐེག་པ་ཆེན་པོའི་སྒོར་ཞུགས་ནས། བདག་གཞན་གྱི་དོན་ཕུན་སུམ་ཚོགས་པར་བྱེད་པ་ལ། ལྟ་བ་རྣམ་པར་དག་པ་དང་། སྤྱོད་པ་རྣམ་པར་དག་པ་གཉིས་ཟུང་དུ་འབྲེལ་དགོས། ཡ་བྲལ་གྱིས་མི་བཏུབ་གསུངས། འོ་ན་ལྟ་སྤྱོད་རྣམ་པར་དག་པ་ཇི་ལྟར་ལགས་ཞུས་པས། སྟོན་པའི་ཞལ་ནས་། ལྟ་བ་རྣམ་པར་དག་པ་ནི། དོན་དམ་པར་ཆོས་ཐམས་ཅད་དངོས་པོ་ཅིར་ཡང་མ་གྲུབ་པས། ཡོད་མེད་རྟག་ཆད་ལ་སོགས་པའི་མཐའ་ཐམས་ཅད་དང་བྲལ་བར་རྟོགས་ལ། ཀུན་རྫོབ་ཏུ་ཕྱི་ནང་གི་ཆོས་ཐམས་ཅད་རྨི་ལམ་སྒྱུ་མ་སྤྲུལ་པ་ལྟ་བུར་ཤེས་ཤིང་། དེ་ཡང་རང་གི་སེམས་སྣང་འབའ་ཞིག་ཏུ་རྟོགས་ཏེ། དངོས་པོ་གང་ལ་ཡང་ཡིད་མི་གཏོད་ཅིང་གང་གི་ཡང་རྗེས་སུ་མི་འབྲང་བ་ཞིག་ཡིན། སྤྱོད་པ་རྣམ་པར་དག་པ་ནི། ཀུན་རྫོབ་རྨི་ལམ་སྒྱུ་མ་ཙམ་དུ་ལས་དཀར་ནག་གི་འབྲས་བུ་མི་བསླུ་བར་ཤེས་ཏེ། ལས་རྒྱུ་འབྲས་ལ་འཛེམ་ཞིང་། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོས་སེམས་ཅན་གྱི་དོན་ལ་བརྩོན་པ་ཞིག་ཡིན། དེ་ལྟ་བུའི་ལྟ་སྤྱོད་རྣམ་པར་དག་པ་དེ་ཡང་བྱང་ཆུབ་ཀྱི་སེམས་རྣམ་པ་གཉིས་རྒྱུད་ལ་སྐྱེས་པ་ཞིག་ངང་གིས་འབྱུང་གསུངས། འོ་ན་ལྟ་སྤྱོད་ཡ་བྲལ་བ་ལ་སྐྱོན་ཅི་ཡོད་ཞུས་པས། སྟོན་པའི་ཞལ་ནས། ལྟ་བ་རྣམ་པར་དག་པ་ཞིག་ཡོད་ཀྱང་སྤྱོད་པ་རྣམ་པར་མ་དག་སྟེ། ལས་རྒྱུ་འབྲས་ལ་མི་འཛེམ་ཞིང་སྤྱོད་པ་རྩིང་པོར་ཤོར་ན་བདག་གཞན་གཉིས་ཀའི་དོན་མི་ནུས་ཏེ་ལྟ་བ་དེ་ཡང་གོལ་བར་འགྲོ། སྤྱོད་པ་རྣམ་པར་དག་པ་ཞིག་ཡོད་ཀྱང་དངོས་པོའི་གནས་ལུགས་མ་རྟོགས་ན་བདག་གཞན་གཉིས་ཀའི་དོན་མི་ནུས་ཏེ་སྤྱོད་པ་དེ་ཡང་གོལ་བར་འགྲོ། དེས་ན་ལྟ་སྤྱོད་ཟུང་དུ་མ་འབྲེལ་ན་ལམ་ལོག་པར་སྟོང་བས་ཟུང་འཇུག་ལ་བསླབ་དགོས་གསུངས།

༈ ཡང་སྟོན་པ་ལ་སྐུ་མཆེད་གསུམ་གྱིས། དབེན་པར་ཉམས་སུ་ལེན་པ་དང་། སེམས་ཅན་ལ་ཆོས་ཀྱིས་ཕན་འདོགས་པ་གཉིས་ཁེབས་གང་ཆེ་ལགས་ཞུས་པས། སྟོན་པའི་ཞལ་ནས། རང་རྒྱུད་ལ་ཉམས་རྟོགས་ཅི་ཡང་མེད་པའི་ལས་དང་པོ་བའི་གང་ཟག་གིས་སེམས་ཅན་ལ་ཆོས་ཀྱིས་ཕན་བཏགས་ཀྱང་མི་ཐོགས་ཏེ། བྱིན་རླབས་སྣོད་སྟོང་བ་བྱོ་བ་དང་འདྲ་སྟེ། བྱིན་རླབས་ལ་འོང་རྒྱུ་མེད། གདམས་ངག་སྦང་མ་མ་མནན་པར་བསིངས་པའི་ཆང་དང་འདྲ་སྟེ། གདམས་ངག་ལ་རོ་བཅུད་མེད། དྲོད་ཐོབ་པ་ལ་བརྟན་པ་མ་ཐོབ་པའི་མོས་པ་སྤྱོད་པའི་གང་ཟག་གིས་སེམས་ཅན་གྱི་དོན་བྱེད་མི་བཏུབ་སྟེ། བྱིན་རླབས་བུམ་པ་གང་བྱོ་དང་འདྲ་སྟེ། གཞན་གང་ཙ་ན་རང་ཉིད་སྟོང་བར་འགྱུར། གདམས་ངག་སྒྲོན་མེ་ལག་བརྒྱུད་དང་འདྲ་སྟེ། གཞན་གསལ་ཙ་ན་རང་ཉིད་འགྲིབ་པར་འགྱུར། ས་ཐོབ་ནས་མར་སེམས་ཅན་གྱི་དོན་འགྲུབ་ཚད་བྱ་བ་ཡིན་ཏེ། བྱིན་རླབས་བུམ་པ་བཟང་པོའི་དངོས་གྲུབ་དང་འདྲ་སྟེ། གཞན་ཐམས་ཅད་སྨིན་པར་བྱས་ཀྱང་རང་ལ་གང་སྟོང་མེད། གདམས་ངག་མར་མེའི་གཞི་མ་དང་འདྲ་སྟེ། གཞན་གསལ་བར་བྱས་ཀྱང་རང་ལ་འགྲིབ་པ་མེད་པ་ཡིན། དེས་ན་ད་ལྟ་སྙིགས་མའི་དུས་འདིར་སོ་སོའི་སྐྱེ་བོས་དབེན་པར་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་བློ་གོམས་པར་བྱ་བ་མ་ཡིན་པར་སེམས་ཅན་ལ་དངོས་སུ་ཕན་གདགས་པའི་དུས་མ་ཡིན། རང་རྒྱུད་ཀྱི་ཉོན་མོངས་པ་བསྲུང་བའི་དུས་ཡིན། དཔེར་ན་སྨན་ཆེན་པོའི་ལྗོན་ཤིང་གི་མྱུ་གུ་དེ་གཅོད་པའི་དུས་མ་ཡིན་བསྲུང་བའི་དུས་ཡིན་གསུངས་སོ། །

༈ སྟོན་པ་ལ། ཁམས་སྟོན་ཅིག་གིས། བདག་མེད་གཉིས་ཀྱི་དོན་ལོགས་སུ་ཞུས་པས། སྟོན་པའི་ཞལ་ནས། ཡ་ཀི་སྤྱི་བོའི་གཙུག་ནས། མ་ཀི་རྐང་བའི་མཐིལ་ཡན་ཆད་ལ་ཤེས་པས་གཞིག་ཅིང་བཙལ་ཀྱང་བདག་བྱ་བའི་དངོས་པོ་གཅིག་ཀྱང་མ་རྙེད་པ་དེ་ཀ་གང་ཟག་གི་བདག་མེད་ཡིན། འཚོལ་མཁན་གྱི་ཤེས་པ་དེ་ཡང་རང་བཞིན་མེད་པར་ཤེས་པ་དེ་ཆོས་ཀྱི་བདག་མེད་ཡིན་གསུངས། འཕན་ཡུལ་སྦས་ཀྱི་འབྲོམ་ཟ་ལོ་འཚོ་མོས་ར་སྒྲེང་དུ་ནས་ཡ་བཞི་བཅུ་ཕུལ་ནས། མིང་པོ་འབྲོམ་ཚིགས་པས་ད་རེས་གཏམ་བཏང་བ་ལ་དགེ་བའི་བཤེས་གཉེན་པ་ལགས། འདི་ན་བཞུགས་པའི་གྲྭ་པ་འདི་རྣམས་ཀྱང་ཐམས་ཅད་མཁྱེན་པའི་སངས་རྒྱས་ཐོབ་པར་བྱ་བའི་དོན་དུ་འདུས་པ་ལགས། བདག་ཅག་མིང་སྲིང་ཡང་དེ་ཉིད་ཐོབ་པར་བྱ་བའི་དོན་དུ་མཆིས་པ་ལགས་པས། དགེ་བའི་བཤེས་གཉེན་པ་ལ་ཇོ་བོ་རྗེ་ལྷ་གཅིག་གི་གདམས་ངག་བུམ་པ་གང་བྱོའི་ཚུལ་དུ་མངའ་བ་ལགས་པས། དེ་རིང་སངས་རྒྱས་ཐོབ་པར་བྱ་བའི་གདམས་ངག་མི་གསང་བར་ཞུ་འཚལ་ཞེས་ཞུས་པས། དགེ་བཤེས་སྟོན་པའི་ཞལ་ནས། དང་པོ་འཆི་བ་མི་རྟག་པ་དང་ལས་རྒྱུ་འབྲས་མང་དུ་སྒོམས་ལ། རང་གིས་ཁས་བླངས་པའི་སྲུང་སྡོམ་ཀུན་དག་པར་བྱ། བྱམས་པ་དང་སྙིང་རྗེ་མང་དུ་སྒོམས་ལ་། བྱང་ཆུབ་ཀྱི་སེམས་བརྟན་པར་བྱ། དེའི་ཕྱིར་ཚོགས་གཉིས་ཐབས་སྣ་ཚོགས་ཀྱི་སྒོ་ནས་བསགས། སྡིག་པ་ཐབས་སྣ་ཚོགས་ཀྱི་སྒོ་ནས་སྦྱང་བ་ལ་འབད་པར་བྱ། ཆོས་ཐམས་ཅད་འཁོར་གསུམ་མི་དམིགས་པའི་རྩིས་ཟིན་པས། དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་རྫོགས་པའི་བྱང་ཆུབ་ཏུ་བསྔོ་བར་བྱ། དེ་ལྟར་བྱས་ན་ཇོ་བོ་རྗེ་དང་མ་མཇལ་སྙམ་པའི་མྱ་ངན་བྱ་མི་དགོས། སངས་རྒྱས་པར་བྱེད་པ་ལ་ཆོས་དེ་ལས་མེད། ཕྱིས་ནས་འབྲོམ་རྒད་པོ་དང་མ་ཕྲད་སྙམ་པའི་མྱ་ངན་བྱ་མི་དགོས། ཆོས་དེ་ལས་མེད་གསུངས།

༈ དགེ་བཤེས་སྟོན་པ་ལ། དགེ་བསྙེན་ཞིག་གིས། བྱམས་པ་དང་སྙིང་རྗེ་བྱང་ཆུབ་ཀྱི་སེམས་དང་མ་བྲལ་ན། དངོས་སམ་བརྒྱུད་ནས་རྟག་ཏུ་གཞན་དོན་འབྱུང་བའི་རྒྱུ་མ་ལགས་སམ་ཞུས་པས། སྟོན་པའི་ཞལ་ནས། གཞན་དོན་ཕུན་སུམ་ཚོགས་པ་འབྱུང་བའི་རྒྱུ་ཡིན་པ་ཨ་ཅང་ཆེ་སྟེ། རང་ལ་རང་དོན་ཕུན་སུམ་ཚོགས་པའི་རྒྱུར་འགྱུར་ཏེ། བྱམས་པ་དང་སྙིང་རྗེ་བྱང་ཆུབ་ཀྱི་སེམས་དང་མ་བྲལ་ན་ངན་སོང་གསུམ་དུ་སྐྱེ་མི་སྲིད་དེ། ད་ལྟ་ཉིད་ནས་ཕྱིར་མི་ལྡོག་པ་ཞེས་བྱར་བཏུབ། གལ་ཏེ་སྔོན་གྱི་ལས་ངན་ཚབ་པོ་ཆེ་དང་། ད་ལྟའི་གློ་བུར་གྱི་རྐྱེན་དྲག་པོའི་དབང་གིས་ངན་སོང་དུ་སྐྱེ་སྲིད་ཀྱང་བྱམས་པ་དང་སྙིང་རྗེ་བྱང་ཆུབ་ཀྱི་སེམས་སྐད་ཅིག་མ་གཅིག་དྲན་པ་ཙམ་གྱིས་དེ་མ་ཐག་ཏུ་ངན་སོང་གི་སྐྱེ་གནས་དེ་ཉིད་ལས་ཐར་ནས་མཐོ་རིས་ལྷ་དང་མིའི་གོ་འཕང་ཁྱད་པར་ཅན་འཐོབ་ངེས་པ་ཡིན། དེ་ཡང་སྤྱོད་འཇུག་ལས། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་རང་བདེ་འདོད་ལས་བྱུང་། མང་དུ་བཤད་ལྟ་ཅི་ཞིག་དགོས། །བྱིས་པ་རང་གི་དོན་བྱེད་དང་། །ཐུབ་པ་གཞན་གྱི་དོན་མཛད་པ། །འདི་གཉིས་ཀྱི་ནི་ཁྱད་པར་ལྟོས། །ཞེས་གསུངས་པ་ལྟར་རོ། །དེས་ན་བྱམས་སྙིང་རྗེ་བྱང་ཆུབ་ཀྱི་སེམས་ནི་རང་གཞན་གཉིས་ཀའི་དོན་ཆེན་པོ་འགྲུབ་པའི་རྒྱུ་ཡིན་གསུངས།

༈ ཡང་རྭ་སྒྲེང་དུ། ཇོ་བོ་ཞིག་གིས་ཕྱི་སྐོར་བྱས་པས། དགེ་བཤེས་སྟོན་པའི་ཞལ་ནས། ཇོ་བོ་བསྐོར་བ་བྱེད་པ་ཡང་གློ་བ་དགའ་སྟེ། དེ་བས་ཆོས་ཤིག་རང་བྱས་ན་མི་དགའ་འམ་གསུངས། དེར་ཇོ་བོ་དེའི་བསམ་པ་ལ། བསྐོར་བ་བྱས་པ་ལས་ཀྱང་ཐེག་པ་ཆེན་པོའི་མདོ་ཀློག་པ་ཁེབས་ཆེའམ་སྙམ་ནས། ཀུན་དགའ་ར་བའི་ཁྱམས་སུ་མདོ་བཀླགས་པས། སྟོན་པའི་ཞལ་ནས། ཆོས་ཀློག་པ་ཡང་གློ་བ་དགའ་སྟེ། དེ་བས་ཀྱང་ཆོས་ཤིག་བྱས་ན་མི་དགའ་འམ་གསུངས། ཡང་ཁོའི་བསམ་པ་ལ། ཀློག་པ་བས་ཀྱང་ཏིང་ངེ་འཛིན་བསྒོམ་ན་ཁེབས་ཆེ་བའི་བརྡ་ཡིན་སྙམ་ནས། ཀློག་པ་བཤོལ་ནས་མལ་དུ་མིག་ཟིམ་མེར་བསྡད་པས། ཡང་སྟོན་པའི་ཞལ་ནས། བསྒོམ་པ་ཡང་གློ་བ་དགའ་སྟེ། དེ་བས་ཀྱང་ཆོས་ཤིག་རང་བྱས་ན་མི་དགའ་འམ་གསུངས། དེར་ཁོས་གཞན་བྱ་ཐབས་མ་རྙེད་ནས། དགེ་བཤེས་པ་ལགས་འོ་ན་བདག་གིས་ཆོས་ཇི་ལྟ་བུ་ཞིག་བགྱི་ཞུས་པས། སྟོན་པའི་ཞལ་ནས། ཇོ་བོ་ཚེ་འདི་བློས་ཐོངས། ཚེ་འདི་བློས་ཐོངས་གསུངས་སྐད། དེས་ན་ཚེ་འདི་བློས་མ་ཐོང་ན་ཅི་བྱས་ཀྱང་ཆོས་སུ་མ་སོང་སྟེ། འཇིག་རྟེན་ཆོས་བརྒྱད་ལས་མ་འདས་ལ། ཚེ་འདིའི་རྣམ་པར་རྟོག་པ་བློས་ཐོང་ན་ཅི་བྱས་ཆོས་བརྒྱད་དང་མ་འདྲེས་པས་ཐར་པའི་ལམ་དུ་སོང་བ་ཡིན་གསུངས།

༈ ཡང་དགེ་བཤེས་སྟོན་པ་ལ། པུ་ཏོ་བས། ཆོས་དང་ཆོས་མ་ཡིན་པའི་གནམ་ཐིག་གང་ལགས་ཞུས་པས། སྟོན་པའི་ཞལ་ནས། ཉོན་མོངས་པའི་གཉེན་པོར་འགྲོ་ན་ཆོས་ཡིན། མི་འགྲོ་ན་ཆོས་མིན། འཇིག་རྟེན་པ་ཀུན་དང་མི་མཐུན་ན་ཆོས་ཡིན། མཐུན་ན་ཆོས་མིན། བཀའ་ལུང་དང་མཐུན་ན་ཆོས་ཡིན། མི་མཐུན་ན་ཆོས་མིན། རྗེས་བཟང་ན་ཆོས་ཡིན། རྗེས་ངན་ན་ཆོས་མིན་གསུངས། །

༈ དགེ་བཤེས་དགོན་པ་བའི་ཞལ་ནས། ཐམས་ཅད་མཁྱེན་པའི་རྩ་བ་ཚོགས་གཉིས་ལ་ཐུག །ཚོགས་གཉིས་ཀྱི་རྩ་བ་བྱང་ཆུབ་ཀྱི་སེམས་ལ་ཐུག །བྱང་ཆུབ་སེམས་ཀྱི་རྩ་བ་བྱམས་སྙིང་རྗེ་ལ་ཐུག །དེ་ཐམས་ཅད་ཀྱི་བསླབ་བྱའི་རྩ་བ་ཕ་རོལ་ཏུ་ཕྱིན་པ་དྲུག་ལ་ཐུག །དེ་ཡང་སྦྱིན་པའི་རྩ་བ་འཛིན་ཆགས་མེད་པ་ལ་ཐུག །ཚུལ་ཁྲིམས་ཀྱི་རྩ་བ་གྲོགས་བཟང་བསྟེན་པ་ལ་ཐུག །བཟོད་པའི་རྩ་བ་དམན་ས་འཛིན་པ་ལ་ཐུག །བརྩོན་འགྲུས་ཀྱི་རྩ་བ་འཆི་བ་བསྒོམ་པ་ལ་ཐུག །བསམ་གཏན་གྱི་རྩ་བ་དབེན་པ་བསྟེན་པ་ལ་ཐུག །ཤེས་རབ་ཀྱི་རྩ་བ་རང་སེམས་ལ་ལྟ་བ་ལ་ཐུག །བྱིན་རླབས་ཀྱི་རྩ་བ་རང་གི་མོས་གུས་ལ་ཐུག །དངོས་གྲུབ་ཀྱི་རྩ་བ་སྡོམ་པ་དང་དམ་ཚིག་ལ་ཐུག །ཡོན་ཏན་གྱི་རྩ་བ་ཐོས་བསམ་སྒོམ་གསུམ་ལ་ཐུག །གཞན་དོན་གྱི་རྩ་བ་རང་འདོད་མེད་པ་ལ་ཐུག །རང་དོན་དང་གཞན་དོན་གཉིས་ཀའི་རྩ་བ་སྒོམ་སྒྲུབ་ལ་ཐུག་གསུངས། །

༈ ཡེར་བའི་ཞལ་བཙུན་གྱི་ཞལ་ནས། འོ་སྐོལ་སྙིང་ཐག་པ་ནས་ཐར་པ་དོན་དུ་གཉེར་ན། དུས་རྒྱུན་ཏུ་འཆི་བ་མི་རྟག་པ་ཡིད་ལ་བསམ་པ་དང་མ་བྲལ་བས། བསམ་སྤྱོད་འཕགས་པའི་རིགས་བཞི་ལ་གནས་པར་བྱེད་དགོས་གསུངས། འཕགས་པའི་རིགས་བཞི་ནི། ཆོས་གོས་ངན་ངོན་ཙམ་གྱིས་ཆོག་པ་དང་། བསོད་སྙོམས་ངན་ངོན་ཙམ་གྱིས་ཆོག་པ་དང་། མལ་ཆ་ངན་ངོན་ཙམ་གྱིས་ཆོག་པ་དང་། ན་བའི་གསོས་སྨན་ལ་སོགས་པའི་ཡོ་བྱད་ངན་ངོན་ཙམ་གྱིས་ཆོག་པ་ཞིག་ཡིན། ཡང་ན་འདོད་པ་ཆུང་བ། ཆོག་ཤེས་པ། གསོ་སླ་བ། དགང་སླ་བ་བཞི་ཡིན། འདོད་པ་ཆུང་བ་ནི། འཚོ་བའི་ཡོ་བྱད་ཀྱི་དངོས་པོ་བཟང་པོ་དང་མང་པོའི་ཞེ་འདོད་མེད་ཅིང་། བདོག་པའི་དངོས་པོ་ཐམས་ཅད་སྤངས་པ་ཡིན། ཆོག་ཤེས་པ་ནི་དངོས་པོ་ཆུང་ངུ་ཉུང་ངུ་ངན་ངོན་གྱིས་ཆོག་ཤེས་པ་ཡིན། གསོ་སླ་བ་ནི། ཆོས་གོས་དང་། མལ་ཆ་དང་། ཁ་ཟས་ངན་ངོན་ཆང་ཙམ་གྱིས་འཚོ་བ་ཡིན། དགང་སླ་བ་ནི། བསོད་སྙོམས་དང་རྙེད་པ་དང་བཀུར་སྟི་ངན་ངོན་ཆུང་ཆུང་གིས་བློ་ཁེངས་པ་ཡིན། དེ་ལྟར་འཕགས་པའི་རིགས་བཞི་ལ་གནས་པའི་གང་ཟག་དེའི་རྒྱུད་ལ་ནི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་གནས་པས་དེའི་ཕྱིར་འཕགས་པའི་རིགས་བཞི་ལ་གནས་པ་ཞེས་བྱ། ཚེ་འདིའི་འདོད་པས་ཀུན་ནས་བསླངས་ཏེ། འཕགས་པའི་རིགས་བཞི་ལ་མི་གནས་པ་དེའི་རྒྱུད་ལ་ནི། འཁོར་བ་ངན་སོང་གི་རྒྱུ་སྡིག་པ་མི་དགེ་བ་ཐམས་ཅད་གནས་པས། བདུད་ཀྱི་རིགས་ལ་གནས་པ་ཞེས་བྱའོ། །དེས་ན་འོ་སྐོལ་གྱིས་ཚེ་འདི་ལ་འདོད་པ་མ་སྤངས་ན། ཚེ་རབས་གཞན་དུ་ཡང་འདོད་པའི་དབང་དུ་འགྲོ་བས་ཚེ་འདིའི་འདོད་པ་ཐམས་ཅད་སྤངས་ལ་འཕགས་པའི་རིགས་བཞི་ལ་གནས་པར་བྱེད་དགོས། ཚེ་འདིའི་འདོད་པ་སྤོང་བ་ལ་གཉེན་པོ་དུས་རྒྱུན་ཏུ་མི་རྟག་པ་བསྒོམ་པ་གལ་ཆེ། མི་རྟག་པ་སྔ་དྲོ་ཞིག་མ་བསྒོམས་ཀྱང་ཉི་མ་ཕྱེད་ན་ཚེ་འདི་པར་ཆ་གསུངས།

༈ ཡང་ཡེར་པའི་ཞང་བཙུན་གྱི་ཞལ་ནས། ཐམས་ཅད་མཁྱེན་པའི་སངས་རྒྱས་ཐོབ་པར་འདོད་ན། མ་འདྲེས་པ་རྣམ་པ་གསུམ་དགོས་ཏེ། དགེ་བ་ཚེ་འདིའི་རྣམ་རྟོག་དང་མ་འདྲེས་པ་ཞིག་དགོས། ལུས་ངག་གི་སྤྱོད་པ་ཉོན་མོངས་པ་དང་མ་འདྲེས་པ་ཞིག་དགོས། བསྒོམ་པ་རང་སངས་རྒྱས་དང་མ་འདྲེས་པ་ཞིག་དགོས། མདོར་ན་རྟོགས་པ་ཕུལ་དུ་ཕྱིན་པའི་སྤྱོད་པ་ཞིག་དགོས། རྟོགས་པ་ཕུལ་དུ་ཕྱིན་པའི་ཚད་གང་ཡིན་ཞེ་ན། ཡངས་སར་ཡངས་པ་ཡིན་ཏེ་ལྟ་བ་ཡངས་དགོས། དོགས་སར་དོགས་པ་ཡིན་ཏེ་སྤྱོད་པ་དོགས་དགོས། དཔའ་སར་དཔའ་བ་ཡིན་ཏེ་ཉོན་མོངས་པ་ལ་གཉེན་པོ་དཔའ་བ་ཞིག་དགོས། ཞུམ་སར་ཞུམ་པ་ཞིག་དགོས་ཏེ། གཞན་གྱིས་རྒོལ་བ་ལ་སོགས་པ་ལ་བཟོད་པ་ཐོབ་པའི་ཞུམ་པ་ཞིག་དགོས་གསུངས། །

༈ དགེ་བཤེས་པུ་ཏོ་བ་ལ་དགེ་བསྙེན་ཞིག་གིས་ཆོས་གཅིག་ཏུ་བྱ་བ་ལ་གལ་གང་ཆེ་ལགས་ཞུས་པས། པུ་ཏོ་བའི་ཞལ་ནས། ཆོས་གཅིག་ཏུ་བྱ་བ་ལ་མི་རྟག་པ་བསྒོམ་པ་འདི་གལ་ཆེ་སྟེ། འཆི་བ་མི་རྟག་པ་འདི་བསྒོམས་ན། དང་པོ་ཆོས་ལ་འཇུག་པའི་རྒྱུ་བྱེད། བར་དུ་དགེ་སྦྱོར་ལ་བསྐུལ་བའི་རྐྱེན་བྱེད། ཐ་མ་ཆོས་ཉིད་མཉམ་པ་ཉིད་རྟོགས་པའི་གྲོགས་བྱེད། ཡང་མི་རྟག་པ་འདི་བསྒོམས་ན། དང་པོ་ཚེ་འདིའི་གདོས་ཐག་གཅོད་པའི་རྒྱུ་བྱེད། བར་དུ་འཁོར་བ་མཐའ་དག་ལ་ཞེན་པ་ལྡོག་པའི་རྐྱེན་བྱེད། ཐ་མར་མྱ་ངན་ལས་འདས་པའི་ལམ་དུ་འཇུག་པའི་གྲོགས་བྱེད། ཡང་མི་རྟག་པ་འདི་བསྒོམས་ན། དང་པོ་དད་པ་སྐྱེ་བའི་རྒྱུ་བྱེད། བར་དུ་བརྩོན་འགྲུས་རྩོམ་པའི་རྐྱེན་བྱེད། ཐ་མ་ཤེས་རབ་སྐྱེ་བའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་རྒྱུད་ལ་སྐྱེས་ན། དང་པོ་ཆོས་འཚོལ་བའི་རྒྱུ་བྱེད། བར་དུ་ཆོས་སྒྲུབ་པའི་རྐྱེན་བྱེད། ཐ་མར་ཆོས་མཐར་ཕྱིན་པའི་གྲོགས་བྱེད། ཡང་མི་རྟག་པ་འདི་བསྒོམས་ཤིང་རྒྱུད་ལ་སྐྱེས་ན། དང་པོར་གོ་ཆའི་བརྩོན་འགྲུས་རྩོམ་པའི་རྒྱུ་བྱེད། བར་དུ་སྦྱོར་བའི་བརྩོན་འགྲུས་རྩོམ་པའི་རྐྱེན་བྱེད། ཐ་མར་ཕྱིར་མི་ལྡོག་པའི་བརྩོན་འགྲུས་རྩོམ་པའི་གྲོགས་བྱེད་གསུངས་སོ། །

༈ དགེ་བཤེས་པུ་ཏོ་བ་ལ། རྐྱང་ཆ་རྡོབ་ཚུལ་གྱིས་གདམས་ངག་ཞུས་པས། པུ་ཏོ་བའི་ཞལ་ནས། ཁྱོད་ཀྱིས་འཆི་བ་མི་རྟག་པ་མང་དུ་སོམས་དང་། དེར་འཆི་ངེས་པའི་བློ་ཞིག་བྱུང་ན་སྡིག་པ་སྤོང་བ་ལ་དཀའ་རྒྱུ་མེད། དགེ་བ་བསྒྲུབ་པ་ལ་དཀའ་རྒྱུ་མེད་པ་ཞིག་འོང་གི དེའི་སྟེང་དུ་བྱམས་པ་དང་སྙིང་རྗེ་མང་དུ་སྒོམས་དང་། དེ་རྒྱུད་ལ་སྐྱེས་ན་སེམས་ཅན་གྱི་དོན་བྱེད་པ་ལ་དཀའ་རྒྱུ་མེད་པ་ཞིག་འོང་གི དེའི་སྟེང་དུ་ཁྱོད་ཀྱིས་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་མང་དུ་སྒོམས་དང་། དེ་རྒྱུད་ལ་སྐྱེས་ན་འཁྲུལ་པ་སྤོང་བ་ལ་དཀའ་རྒྱུ་མེད་པ་ཞིག་འོང་གི་གསུངས།

༈ ཡང་པུ་ཏོ་བས་འཁོར་རྣམས་ལ་སྤྱིར་གསུངས་པ། སྤྱིར་སངས་རྒྱས་བཅོམ་ལྡན་འདས་ཀྱིས་སེམས་ཅན་གྱི་རིགས་སམ་ཉོན་མོངས་པའི་བྱེ་བྲག་བརྒྱད་ཁྲི་བཞི་སྟོང་ཡོད་པ་ལ་དགོངས་ནས་དེའི་གཉེན་པོར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་དེ་ཐམས་ཅད་ཀྱང་མདོར་བསྡུ་ན། རྗོད་བྱེད་ཚིག་གི་དབང་དུ་བྱས་ནས་སྡེ་སྣོད་རིན་པོ་ཆེ་གསུམ་དུ་འདུས། བརྗོད་བྱ་དོན་གྱི་དབང་དུ་བྱས་ན་བསླབ་པ་རིན་པོ་ཆེ་གསུམ་དུ་འདུས། བསླབ་པ་རིན་པོ་ཆེ་གསུམ་པོ་དེ་ཡང་། དང་པོ་ལྷག་པའི་ཚུལ་ཁྲིམས་ལ་བརྟེན་ནས་ལྷག་པའི་ཏིང་ངེ་འཛིན་སྐྱེ། དེ་ལ་བརྟེན་ནས་ལྷག་པའི་ཤེས་རབ་སྐྱེ། དེས་ཉོན་མོངས་པ་རྩད་ནས་སྤངས་ནས་སངས་རྒྱས་པ་ཡིན། དེས་ན་བསླབ་པ་གསུམ་གྱི་དང་པོ་ལྷག་པ་ཚུལ་ཁྲིམས་ཀྱི་བསླབ་པ་ནི་ཀུན་གྱི་གཞི་མ་ཡིན་པས་ལས་དང་པོ་པའི་བསླབ་བྱའི་གཙོ་བོ་ཚུལ་ཁྲིམས་ལ་བྱེད་དགོས། ཚུལ་ཁྲིམས་ཀྱི་མི་མཐུན་ཕྱོགས་འདོད་ཆགས་ཡིན་པས། སྤྱིར་ཉོན་མོངས་པ་ཐམས་ཅད་ཀྱི་རྩ་བ་ཡང་འདོད་ཆགས་ཡིན་ཏེ། འདོད་ཆགས་ལ་བརྟེན་ནས་ཉོན་མོངས་པ་མཐའ་དག་སྐྱེ། དེས་ལས་ངན་བསགས་ནས་འཁོར་བར་འཁྱམས་པ་ཡིན། འདོད་ཆགས་སྤོང་བ་ལ་དེའི་གཉེན་པོར་མི་སྡུག་པ་བསྒོམ་པའི་ཆོས་བསྟན་པས། དེ་ལ་མི་སྡུག་པ་བསྒོམ་པའི་ཐབས་ལ་ལྔ་སྟེ། དང་པོ་མ་དང་བུ་སྲིང་གི་རྣམ་པར་བསྒོམ་པ་ནི། འདོད་ཆགས་ཀྱི་ཡུལ་བུད་མེད་ཀྱི་རྣམ་པ་མངོན་དུ་གྱུར་པའི་ཚེ། རང་བས་རྒན་པ་ལ་ཆགས་པ་སྐྱེས་ན་དེ་ལ་མའི་འདུ་ཤེས་བསྒོམ། རང་དང་མཉམ་པ་ལ་ཆགས་པ་སྐྱེས་ན་དེ་ལ་སྲིང་མོའི་འདུ་ཤེས་བསྒོམ། རང་བས་གཞོན་པ་ལ་ཆགས་པ་སྐྱེས་ན་དེ་ལ་བུ་མོའི་འདུ་ཤེས་བསྒོམས་པས་ཆགས་པ་ལྡོག་གོ །དེ་ལྟར་བསྒོམས་པས་ཆགས་པ་མ་ལྡོག་ན། གཉིས་པ་ངོ་ཚ་ཤེས་པ་དང་ཁྲེལ་ཡོད་ཀྱི་རྣམ་པ་བསྒོམ་པ་ནི། བདག་གིས་ཚུལ་བཞིན་མ་ཡིན་པ་ཡིད་ལ་བྱས་ན། ཀུན་ཏུ་ཐོགས་པ་མེད་པའི་ཡེ་ཤེས་ཀྱི་སྤྱན་དང་ལྡན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་མཁྱེན་ཅིང་གཟིགས་པས་དེ་དག་གི་ཐུགས་ཀྱིས་ཁྲེལ་བས་བདག་སྐྱོབ་པར་མི་འགྱུར་རོ། །བདག་གིས་ཚུལ་བཞིན་མ་ཡིན་པའི་སྤྱོད་པ་བྱས་པར་གྱུར་ན། སའི་ལྷ་དང་བར་སྣང་གི་ལྷ་རྣམས་ཀྱིས་སྐྱེ་བོ་རྣམས་ལ་བསྒྲགས་ནས་ཚེ་འདིར་ཡང་གྲགས་པ་ངན་པས་ཁྱབ་པར་འགྱུར་ལ། ཕྱི་མ་ཡང་ངན་སོང་དུ་འགྲོ་སྙམ་དུ་བསམ་ཞིང་། གོང་འོག་ཐམས་ཅད་དུ་ངོ་ཚ་དང་ཁྲེལ་འཛེམ་རྗེས་སུ་དྲན་པར་བསྒོམས་པས་ཆགས་པ་ལྡོག་གོ །གལ་ཏེ་དེ་ལྟར་བསྒོམས་ཀྱང་ཆགས་པ་མ་ལྡོག་ན། གསུམ་པ་མི་གཙང་ཞིང་དྲི་ང་བའི་རྣམ་པར་བསྒོམ་པ་ལ། དང་པོ་མི་གཙང་བ་ཅིག་ཅར་དུ་བསྒོམ་པ་ནི། བུད་མེད་ཀྱི་ལུས་དེ་ཉིད་མི་གཙང་བའི་རྫས་སུམ་ཅུ་རྩ་དྲུག་གི་རྐྱལ་པ། སྲིན་བུའི་རིགས་བརྒྱད་ཁྲིའི་གྲོང་ཡིན་ཏེ། དཔེར་ན་དབྱར་གྱི་ཁྱི་རོ་རུལ་པའི་ནང་ན། སྲིན་འབུས་ཁེངས་པ་དང་འདྲ་བར་ཡིད་ལ་བྱའོ། །རིམ་གྱིས་བསྒོམ་པ་ནི། དང་པོ་བུད་མེད་ཀྱི་ལུས་དེ་རྣམ་པར་དམར་བར་བསྒོམ། དེ་ནས་རྣམ་པར་རྣག་པའི་རྣམ་པར་བསྒོམ། དེ་ནས་རྣམ་པར་བམ་པར་བསྒོམ། དེ་ནས་རྣམ་པར་སྔོ་པ། དེ་ནས་རྣམ་པར་འབུས་གཞིག་པ། དེ་ནས་རྣམ་པར་ཟོས་པ། དེ་ནས་རུས་པའི་འདུ་ཤེས་བསྒོམས་པས་ཆགས་པ་ལྡོག་གོ །གལ་ཏེ་དེས་ཀྱང་ཆགས་པ་མ་ལྡོག་ན། བཞི་པ་དགྲ་དང་གཤེད་མའི་རྣམ་པར་བསྒོམ་པ་ནི། བུད་མེད་འདི་ནི་བདག་གི་ཆོས་དང་མཐུན་པའི་ཡིད་ཕམ་པར་བྱེད་པའི་དགྲའོ། །ཐར་པའི་སྲོག་གཅོད་པའི་གཤེད་མའོ། །དཀར་པོའི་ལོ་ཐོག་འཇོམས་པར་བྱེད་པའི་སེར་བའོ། །ཕུན་སུམ་ཚོགས་པ་ཐམས་ཅད་འཕྲོག་པར་བྱེད་པའི་ཆོམ་རྐུན་མའོ། །དགེ་བའི་རྩ་བ་ཐམས་ཅད་ཀྱི་བར་དུ་གཅོད་པར་བྱེད་པའི་བདུད་མོའོ། །འཁོར་བའི་སྡུག་བསྔལ་ལས་ཐར་དུ་མི་སྟེར་བའི་བཙོན་སྲུང་མའོ། །ཉོན་མོངས་པ་མཐའ་དག་ཀུན་ནས་སློང་བར་བྱེད་པའི་དཀྲུགས་མའོ། །སྡུག་བསྔལ་ཐམས་ཅད་ཀྱི་འབྱུང་གནས་སུ་གྱུར་པ་དམྱལ་བའི་མེ་ཁང་ལྟ་བུའོ་སྙམ་དུ་བསམས་པས་ཆགས་པ་ལྡོག་པར་ངེས་སོ། །གལ་ཏེ་དེས་ཀྱང་མ་ལྡོག་ན། ལྔ་པ་སྒྱུ་མ་བསླུ་བྲིད་ཀྱི་རྣམ་པར་བསྒོམ་པ་ནི། དཔེར་ན་སྒྱུ་མ་མཁན་གྱིས་སྐྱེས་པ་དང་བུད་མེད་དང་རྟ་དང་གླང་པོ་ལ་སོགས་པའི་གཟུགས་བྱད་ཕུན་སུམ་ཚོགས་པར་སྤྲུལ་ནས་སྐྱེ་བོ་ཕལ་པོ་ཆེ་སླུ་བར་བྱེད་དོ། །དེ་བཞིན་དུ་སྤྱིར་ཆོས་ཐམས་ཅད་རྫུན་པ་སླུ་བ་རང་བཞིན་མེད་པ་སྒྱུ་མ་དང་མཚུངས་པ་ལ་ཞེན་ཅིང་ཆགས་པས་སེམས་ཅན་རྣམས་འཁོར་བ་ན་སྡུག་བསྔལ་ལོ། །ཁྱད་པར་དུ་རྫུན་ཞིང་སླུ་བ་མནོག་ཆུང་བ་ཉེས་པ་ཆེ་བའི་བུད་མེད་ཀྱི་གཟུགས་ཀྱིས་སྔར་ཡང་བདག་བར་མ་དོ་ཀུན་ཏུ་བསླུས་པ་ཡིན་ལ། ད་རེས་ཀྱང་བསླུ་རུ་འོང་སྙམ་དུ་བསྒོམས་པས་ཆགས་པ་ལྡོག་གོ །དེ་ལྟར་ཐབས་གང་བསྒོམས་ཀྱང་ཆགས་པ་ལྡོག་ཏུ་མ་བཏུབ་ན་བདུད་ཞུགས་པ་ཡིན་པས་དགེ་བའི་བཤེས་གཉེན་ལ་བདུད་བཟློག་པའི་ཐབས་ཞུས་ལ་འབད་པར་བྱའོ་ཞེས་གསུངས། །

༈ དགེ་བཤེས་སྤྱན་སྔ་བས་འཁོར་སྤྱི་ལ་ཚོགས་སུ་གསུངས་པ། སྤྱིར་ཆོས་ཐམས་ཅད་བསྡུ་ན་གཉིས་སུ་འདུས་ཏེ། གཞན་ལ་གནོད་པ་སྤོང་བ་དང་། ཕན་གདགས་པ་གཉིས་སུ་སྡེ་སྣོད་གསུམ་དང་ཐེག་པ་ཆེ་ཆུང་ཐམས་ཅད་འདུས། ཆོས་དེ་གཉིས་ཉམས་སུ་ལེན་པ་ལ་བཟོད་པ་གལ་ཆེ། བཟོད་པ་མེད་ན་ཚུར་ལ་གནོད་པ་བྱེད་པ་ལ་ཕར་ལན་བྱེད་དུ་འགྲོ། དེ་ལྟར་བྱས་ཙ་ན་གནོད་པ་ལས་ལོག་པ་མེད། དེ་མེད་ཙ་ན་ཕན་འདོགས་པ་མེད། དེས་ན་ཆོས་མགོ་འདོན་པ་ལ་བཟོད་པ་དགོས། དེ་ལ་བཟོད་པའི་བསྒོམ་ཐབས་ལ་བཞི་སྟེ། མདའ་ལེན་འབེན་འཛུགས་ཀྱི་ཚུལ་གྱིས་བསྒོམ་པ་དང་། བྱམས་སྙིང་རྗེའི་ཚུལ་གྱིས་བསྒོམ་པ་དང་། སློབ་དཔོན་སློབ་མའི་ཚུལ་གྱིས་བསྒོམ་པ་དང་། ཆོས་ཉིད་ཀྱི་ཚུལ་གྱིས་བསྒོམ་པའོ། །དང་པོ་མདའ་ལེན་འབེན་འཛུགས་ཀྱི་ཚུལ་གྱིས་བསྒོམ་པ་ནི། དཔེར་ན་འབེན་མ་བཙུགས་ན་མདའ་མི་འཕོག་ལ། མདའ་ཕོགས་པ་དེ་འབེན་བཙུགས་པས་ལེན་པ་ཡིན། དེ་བཞིན་དུ་ཚེ་སྔ་མའི་ལས་ཀྱིས་འབེན་བཙུགས་པས། ཚེ་འདི་ལ་གནོད་པའི་མདའ་འཕོག་སྟེ། དེས་ན་ཚེ་འདི་ལ་གཞན་གྱིས་གནོད་པ་བྱུང་བ་དེ་རང་གི་ཚེ་སྔ་མའི་ལས་ངན་བསགས་པས་ལེན་པ་ཡིན་པས། གཞན་ལ་ཁྲོ་བར་མི་རིགས་ཏེ། སྤྱོད་འཇུག་ལས། འདི་ལྟར་ཕར་གནོད་མ་བྱས་ན། །འགའ་ཡང་ཚུར་ལ་གནོད་མི་བྱེད། །བདག་གིས་སྔོན་ཆད་སེམས་ཅན་ལ། །འདི་འདྲ་བ་ཡི་གནོད་པ་བྱས། །དེས་ན་སེམས་ཅན་འཚེ་བྱེད་པའི། །བདག་ལ་གནོད་པ་འདི་འབྱུང་རིགས། །ཞེས་སོ། །དེར་མ་ཟད། ཚེ་འདི་རང་དུའང་། ཚེ་སྟོད་ལ་གཞན་ལ་གནོད་པ་བྱས་པའི་ལན་ཚེ་སྨད་ལ་འོང་། དེ་བཞིན་དུ་ལོ་སྔ་ཕྱི་དང་། ཟླ་བ་ལྔ་ཕྱི་དང་། ཞག་སྔ་ཕྱི་ལ་འོང་། ད་ལྟ་ཉིད་དུའང་གཞན་ལ་གཟན་པའི་ཚིག་དང་། སྦྱོར་བ་ངན་པའི་འབེན་བཙུགས་ན་དེ་ཀའི་སྟེང་དུ་ཚིག་ངན་ལ་སོགས་པའི་མདའ་འོང་། དེས་ན་ཐམས་ཅད་རང་གིས་འབེན་བཙུགས་པས་ཕ་རོལ་གྱིས་གནོད་པའི་མདའ་བྱུང་བ་ཡིན་པ་ཤེས་པར་བྱས་ལ་གཞན་ལ་ཁྲོ་བར་མི་བྱ་གསུངས། བྱམས་སྙིང་རྗེའི་ཚུལ་གྱིས་བསྒོམ་པ་ནི། དཔེར་ན་སྨྱོན་པ་ཞིག་གཞན་ལ་གནོད་པ་བྱེད་པ་ལ། གཞན་ཤེས་པ་སོ་ན་གནས་པ་ཀུན་སྨྱོན་པའི་ཁ་ཟླ་མི་བྱེད་པར། རེ་སྡུག་སྙིང་རེ་རྗེ་ཟེར་ཞིང་ལན་མི་བྱེད། དེ་བཞིན་དུ་བདག་ལ་གནོད་པ་བྱེད་པ་དེ་ཡང་ཉོན་མོངས་པ་དྲག་པོའི་གདོན་གྱིས་བརླམས་པའི་སྨྱོན་པ་ཆེན་པོ་ཡིན། རེ་སྡུག་སྙམ་དུ་སྙིང་རྗེ་བསྒོམ། དེ་ཡང་གདོན་གྱིས་བརླམས་པའི་སྨྱོན་པ་དེ་སྨྱོ་ཚབས་ཆུང་སྟེ་རང་གཞན་གྱི་ལུས་སྲོག་ལ་གནོད་པ་ཙམ་ལས་མི་བྱེད་པས་གནོད་ཚབས་ཆུང་། ལོ་འགའ་ཟླ་བ་འགའ་ཞག་འགའ་ཙམ་གྱི་སྨྱོན་པ་ཡིན་པས་ཡུན་ཐུང་། དེ་བས་ཤེས་པ་སོ་ན་གནས་པའི་མི་སེམས་ཅན་ལ་གནོད་པ་བྱེད་པ་འདི་སྨྱོ་ཚབས་ཆེ་སྟེ། འཁོར་བ་ཐོག་མ་མེད་པ་ནས་ཐ་མ་མེད་པར་ཉོན་མོངས་པའི་དབང་དུ་སོང་བས་ཡུན་རིང་། ལུས་ངག་ཡིད་གསུམ་གྱི་སྒོ་ནས་ལས་མི་དགེ་བ་ལ་བག་མེད་པར་སྤྱད་པས་ངན་སོང་གསུམ་གྱི་སྡུག་བསྔལ་སྐྱེད་པས་གནོད་ཚབས་ཆེ། དེ་བས་སྙིང་རྗེ་ཚབས་དེ་ཉིད་ཆེ་བས། བདག་ལ་གནོད་པ་བྱེད་པ་དེ་ལ་བྱམས་སྙིང་རྗེ་བསྒོམ་ཞིང་ཁྲོ་བར་མི་བྱ། སྤྱོད་འཇུག་ལས། གལ་ཏེ་ཉོན་མོངས་དབང་གྱུར་པས། །བདག་སྡུག་ཉིད་ཀྱང་གསོད་བྱེད་ན། །དེ་ཚེ་དེ་དག་གཞན་ལུས་ལ། །གནོད་མི་བྱེད་པར་ཇི་ལྟར་འགྱུར། །དེ་ལྟར་ཉོན་མོངས་དབང་གྱུར་པས། །བདག་གསོད་ལ་སོགས་སོ། །སློབ་དཔོན་སློབ་མའི་ཚུལ་དུ་བསྒོམ་པ་ནི། དཔེར་ན་བསླབ་པ་འབོག་པའི་མཁན་པོ་མེད་ན་སྡོམ་པ་མེད། ཆོས་འཆད་པའི་སློབ་དཔོན་མེད་ན་ཤེས་རྒྱ་མེད། དེ་བཞིན་དུ་གནོད་པ་སྐྱེལ་བའི་དགྲ་མེད་ན་བཟོད་པ་སྒོམ་པའི་ཡུལ་མེད་པས་གཞན་གྱིས་བདག་ལ་གཤེ་བ་ལ་སོགས་པ་དེ་དག་བཟོད་པ་སྟེར་བའི་སློབ་དཔོན་དུ་ཤེས་པར་བྱས་ནས། དེ་ལ་དགའ་བ་དང་དྲིན་དུ་གཟོ་བ་བསྒོམ་ཞིང་། བདག་བཟོད་པ་ལེན་པའི་སློབ་མར་བསྒོམས་ལ་ཁྲོ་བར་མི་བྱ་གསུངས། ཆོས་ཉིད་ཀྱི་ཚུལ་དུ་བསྒོམ་པ་ནི། དོན་དམ་པར་ན་བདག་ལ་གནོད་པར་བྱ་བའི་ཡུལ་དང་། གཞན་གནོད་བྱེད་ཀྱི་མཁན་པོ་དང་། གནོད་པའི་དངོས་པོ་ཐམས་ཅད་ཆོས་ཉིད་སྟོང་པ་ཉིད་ཡིན་ལ། ད་ལྟར་གྱི་བདག་ལ་རྒོལ་བ་ལ་སོགས་པར་སྣང་བ་འདི་ཐམས་ཅད་རང་སེམས་འཁྲུལ་པའི་ཆོ་འཕྲུལ་རྨི་ལམ་སྒྱུ་མ་ལྟ་བུ་ཡིན་པས་ཁྲོ་བར་མི་རིགས་ཏེ། སྤྱོད་འཇུག་ལས། དེ་ལྟར་སྟོང་པའི་ཆོས་རྣམས་ལ། །ཐོབ་པ་ཅི་ཡོད་ཤོར་ཅི་ཡོད། །མི་དགར་ཅི་ཡོད་དགར་ཅི་ཡོད། །ཡོངས་སུ་བརྙས་པའང་ཅི་ཞིག་ཡོད། །ཅེས་སོ། །དེས་ན་རྨི་ལམ་གྱི་དགྲ་ལ་གཉིད་སད་ནས་དེ་དག་རང་བཞིན་མེད་པར་ཤེས་ནས་མི་ཁྲོ་བ་ལྟར། ད་ལྟར་གྱི་དགྲ་ཡང་དོན་དམ་པར་རང་བཞིན་མེད་པར་རྨི་ལམ་དང་འདྲ་བས། དེ་ལ་ཞེ་སྡང་མི་བྱ་བར་བཟོད་པ་བསྒོམས་གསུངས། །

༈ ཡང་དགེ་བཤེས་སྤྱན་སྔ་བའི་ཞལ་ནས། ཐར་པ་དང་ཐམས་ཅད་མཁྱེན་པ་ཐོབ་པར་བྱེད་པ་ལ། འཇིག་རྟེན་པ་མཐའ་དག་དང་མི་མཐུན་པ་ཞིག་ལ་བསླབ་དགོས། དེ་ལ་འཇིག་རྟེན་པ་རྣམས་ནི། སེམས་ཅན་ལས་སངས་རྒྱས་གཅེས་པར་འཛིན། གཞན་ལས་རང་གཅེས་པར་འཛིན། གནོད་པ་བྱེད་པ་ལས་ཕན་འདོགས་པ་གཅེས་པར་འཛིན། སྡུག་བསྔལ་ལས་བདེ་བ་གཅེས་པར་འཛིན། འོ་སྐོལ་དེ་དག་ལས་གོ་ལྡོག་དགོས་པས། དེ་ལ་སངས་རྒྱས་ལས་སེམས་ཅན་གཅེས་པར་འཛིན་དགོས། དེ་ཅི་སྟེ་ཞེ་ན། སངས་རྒྱས་ལ་མི་གུས་པ་ཙམ་ཡང་མི་འོང་། དེ་བས་ན་སེམས་ཅན་ལ་རྒྱུ་མཚན་བཞིས་གཅེས་པར་འཛིན་དགོས་ཏེ། འཁོར་བའི་སེམས་ཅན་རྣམས་བདག་གི་ཕ་མ་ཡིན་དགོས་པའི་སྒོ་ནས་གཅེས་པར་འཛིན་དགོས། ཕ་མ་རྣམས་འཁོར་བ་ན་སྡུག་བསྔལ་བས། བདག་གིས་ཕན་གདགས་དགོས་པའི་སྒོ་ནས་གཅེས་པར་འཛིན་དགོས། སེམས་ཅན་ལ་ཕན་བཏགས་པས་རང་དོན་ཤུགས་ཀྱིས་འགྲུབ་པའི་སྒོ་ནས་གཅེས་པར་འཛིན་དགོས། སེམས་ཅན་ལ་ཕན་བཏགས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་བྱས་ཤིང་མཉེས་པར་བྱས་པར་འགྱུར་བའི་སྒོ་ནས་གཅེས་པར་འཛིན་དགོས་སོ། །ཡང་འཇིག་རྟེན་པ་རྣམས་གཞན་ལས་རང་གཅེས་པར་འཛིན་ཏེ། འོ་སྐོལ་རང་ལས་གཞན་གཅེས་པར་འཛིན་དགོས། དེ་ཅི་སྟེ་ཞེ་ན། ཚེ་ཐོག་མ་མེད་པ་ནས་རང་གིས་རང་སྡུག་ཏུ་བཅུག་པ་ལས། གཞན་སུས་ཀྱང་སྡུག་ཏུ་མ་བཅུག །ད་ལྟ་ཉོན་མོངས་ཀྱིས་སྡུག་ཏུ་བཅུག་ཟེར་ཏེ། ཉོན་མོངས་པ་དང་བདག་གཉིས་ལ་གཉིས་སུ་མ་མཆིས། དེས་ན་སྔོན་འཁོར་བ་ཐོག་མ་མེད་པ་ནས་སྡུག་ཏུ་འཇུག་མཁན་གྱི་དགྲ་བདག་རང་ཡིན་པས། དགྲ་ལ་གནོད་པ་ཅི་སྐྱོལ་བྱེད་དགོས་པ་ཡིན། དེ་བས་གཞན་གཅེས་པར་འཛིན་དགོས། དེ་ཅི་སྟེ་ཞེ་ན། སེམས་ཅན་གཞན་ལ་བརྟེན་ནས་ཚོགས་བསགས་པས། འཇིག་རྟེན་གྱི་བདེ་བ་ཐམས་ཅད་འབྱུང་བས་གཅེས་པར་འཛིན་དགོས། སེམས་ཅན་ལ་བརྟེན་ནས་བྱང་ཆུབ་ཀྱི་སེམས་རྣམ་པ་གཉིས་བསྒོམ་པས་མྱ་ངན་ལས་འདས་པའི་ཡོན་ཏན་ཐམས་ཅད་འབྱུང་བས་གཅེས་པར་འཛིན་དགོས་སོ། །ཡང་འཇིག་རྟེན་ན་གནོད་པ་བྱེད་པ་ལས་ཕན་འདོགས་པ་གཅེས་པར་འཛིན་ཏེ། འོ་སྐོལ་དེ་ལས་ལྡོག་དགོས། དེ་ཅི་སྟེ་ཞེ་ན། འཇིག་རྟེན་ན་ཕན་ཆེ་བ་ཕ་མ་ཡིན་ཏེ། ཕ་མས་བུ་ལ་ཡུལ་ཞིང་། མཁར་ཁང་། གསེར་གཡུ། རྟ་ཕྱུགས། ཆུང་མ་བྲན་གཡོག་ལ་སོགས་པ་འབོག་སྟེ། ཆོས་དང་བསྟུན་ན་དེ་ལས་གནོད་པ་ཆེ་བ་མེད། འདོད་པ་སྦྱིན་པ་དེ་ཚོ་ལ་བརྟེན་ནས་ལས་དང་ཉོན་མོངས་པ་ཆེར་སྐྱེད་ཅིང་བསགས་ནས་མཐར་དམྱལ་བར་གྲོགས་ཀྱིས་སྐྱུར་ནུས་ཏེ། ད་ལྟ་འཕྲལ་དུ་ཕན་འདོགས་པ་ལྟར་སྣང་ཡང་། ནམ་ཕུགས་སུ་སྡུག་བསྔལ་དང་སྦྱར་བས། ཚེ་འདིའི་ཕ་མ་དྲིན་ཅན་ལས་དགྲ་རུ་ཆེ་བ་མེད། དེ་བས་ན་གནོད་པ་བསྐྱལ་བ་ལ་གཅེས་པར་འཛིན་དགོས། དེ་ཅི་སྟེ་ཞེ་ན། དགྲས་གནོད་པ་བྱས་པ་ལ་བརྟེན་ནས། བཟོད་པ་བསྒོམས་པས་བསོད་ནམས་ཚད་མེད་པ་ཐོབ། དགྲའི་གནོད་པ་ལ་བརྟེན་ནས་བརྩོན་འགྲུས་བརྩམས་པས། ལམ་གོང་ནས་གོང་དུ་བགྲོད་ཅིང་དངོས་གྲུབ་ཐམས་ཅད་ཐོབ་པས་གནོད་པ་སྐྱེལ་བ་རྣམས་གཅེས་པར་འཛིན་དགོས་གསུངས། ཡང་འཇིག་རྟེན་པ་ནི་སྡུག་བསྔལ་ལས་བདེ་བ་གཅེས་པར་འཛིན་ཏེ། འོ་སྐོལ་དེ་ལས་ལྡོག་སྟེ། བདེ་བ་ལས་སྡུག་བསྔལ་གཅེས་པར་འཛིན་དགོས། དེ་ཅི་སྟེ་ཞེ་ན། ཉལ་བའི་བདེ་བ་དང་གཉིད་ཀྱི་བདེ་བ་དང་། འཁྲིག་པའི་བདེ་བ་དང་། ལེ་ལོའི་བདེ་བ་དང་། གོས་དང་ཁ་ཟས་ཀྱི་བདེ་བ་ལ་ཞེན་ཏེ། དེ་ཐམས་ཅད་སྡུག་བསྔལ་གྱི་རྒྱུ་ཡིན། དེ་བས་ན་སྡུག་བསྔལ་ལ་གཅེས་པར་འཛིན་དགོས། དེ་ཅི་སྟེ་ཞེ་ན། བླ་མ་དང་དགེ་འདུན་གྱི་བྱ་བ་བྱེད་པའི་སྡུག་བསྔལ་དང་། ཚུལ་ཁྲིམས་ཀྱི་དཀའ་ཐུབ་ཀྱི་སྡུག་བསྔལ་དང་། སྒོ་གསུམ་དགེ་སྦྱོར་གྱི་སྡུག་བསྔལ་གྱིས་ཚོགས་རྫོགས་སྒྲིབ་པ་དག་ནས། བདེ་བ་ཆེན་པོའི་གོ་འཕང་འཐོབ་པས་ན་གཅེས་པར་འཛིན་དགོས་གསུངས། ལུས་ཀྱི་ན་ཚ་དང་སེམས་ཀྱི་སྡུག་བསྔལ་ལ་བརྟེན་ནས་འཁོར་བ་ལས་ཡིད་འབྱུང་ཞིང་། ངེས་འབྱུང་གི་སེམས་སྐྱེ་བས་སྡུག་བསྔལ་ལ་གཅེས་པར་འཛིན་དགོས་གསུངས། དེ་ལྟར་འཇིག་རྟེན་པ་དང་མི་མཐུན་པའི་ཆོས་བཞི་ཡོད་ན། མོ་མ་རྣོན་པོའི་མོ་བཟང་བ་བཞིན་ཅི་ཡང་བྱ་མི་དགོས། བཞི་པོ་དེ་མེད་ན་མོ་ངན་པ་བཞིན་ཅི་བྱས་ཀྱང་མི་ཕན་གསུངས།

༈ ཡང་དགེ་བཤེས་སྤྱན་སྔ་བའི་ཞལ་ནས། ད་ལྟ་གང་ཟག་དྲག་ཤོས་ཀུན་ཀྱང་རང་གི་ཆོས་ཚེ་འདི་དང་འདྲེས་པ་ཞིག་ལས་མེད་གསུངས། དང་པོ་ཁ་ཞན་གྱིས་དོགས་ནས་སྡེ་བ་རེ་ལ་ཟུར་འཇུས་བྱེད། འདྲེས་ཁྱེར་གྱིས་དོགས་ནས་ཁྲོ་བོའི་བསྙེན་པ་རེ་སྐྱེལ། ནམ་ཕུགས་ཚུན་ཆད་ལྟོགས་ཀྱིས་དོགས་ནས་ཀ་ཅའི་གསོག་རུམ་བྱེད། གཏམ་ངན་གྱིས་ཕོག་གིས་དོགས་ནས་ཚུལ་འཆོས་སྣ་ཚོགས་བྱེད། དེ་ཚོའི་གསེབ་ནས་སངས་རྒྱ་བ་ཞིག་འདོད་དེ་དེ་མི་འོང་། དཔེར་ན་ལུག་ཅིག་བཤས་པས་རྐྱལ་པ་ཆུ་ཐུབ་པ་གཅིག་དང་། སྤུ་བྲང་ལག་པས་མི་ཐེག་པ་གཉིས་འདོད་དེ་དེ་མི་འོང་གསུངས། འོ་ན་གང་གཙུགས་བྱ་ཞེ་ན། འོ་ཅག་ལ་སུས་གནོད་པ་སྐྱེལ་དུ་བྱུང་ཡང་དེའི་ལན་མ་བྱས་པར་བཟོད་པ་བསྒོམས་པས། དེ་ལ་ཁ་དྲག་པོ་སུས་ཀྱང་སྟེམ་དུ་མེད་པ་ཡིན། དེས་ན་ཁ་དྲག་གི་གཙོ་བོ་བཟོད་པ་བསྒོམ་པ་ཡིན་པས། སྡེ་བ་ལ་འཇུ་བའི་དོན་མེད་གསུངས། འོ་ཅག་ལ་འདྲེ་བགེགས་ཀྱིས་གླགས་ཚོལ་དུ་བྱུང་ཡང་། ང་བདག་རི་བོང་གི་རྭ་བཞིན་ཀུན་རྫོབ་དུ་ཡང་མེད་པར་ཤེས་ཏེ། ལུས་སྲོག་འདྲེ་ལ་བྱིན་པས་དེ་ལ་སྟོང་གསུམ་ལྷ་འདྲེས་ཀྱང་གནོད་པ་སྐྱེལ་དུ་མེད་པ་ཡིན། དེས་ན་ནུས་མཐུའི་གཙོ་བོ་བདག་མེད་རྟོགས་པ་ཡིན་པས་ཁྲོ་བོའི་བཟླས་པ་བྱ་བའི་དོན་མེད་གསུངས། འོ་ཅག་ལ་ལྟོ་རྒྱབ་ཀྱི་འཚོ་བས་ཕོངས་ཀྱང་བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་གི་ཐ་མ་འཆི་བ་ལ་གཏད་པས་དད་ལྡན་ཀུན་གྱིས་མཆོད་གནས་བྱེད་པ་ཡིན། དེས་ན་ལོངས་སྤྱོད་ཀྱི་གཙོ་བོ་ཆགས་མེད་ཡིན། ཀ་ཅའི་གསོག་རུམ་བྱ་བའི་དོན་མེད་གསུངས། འོ་ཅག་ལ་མིས་འཕྱར་ཀ་བཏང་ཡང་རང་སེམས་ལ་ཟོལ་ཟོག་མེད་པ་ཞིག་བྱས་པས། མཇུག་ཏུ་ཀུན་གྱི་ཡིད་དུ་འོང་བ་ཡིན། དེས་ན་གྲགས་སྙན་གྱི་གཞི་མ་བསམ་སྤྱོད་སྐྱོན་མེད་པ་ཅིག་ཡིན་པས། ཚུལ་འཆོས་བྱ་བའི་དོན་མེད་གསུངས། །

༈ ཡང་དགེ་བཤེས་སྤྱན་སྔ་བའི་ཞལ་ནས། སྤྱིར་གང་ཟག་གི་བདག་དང་། ཆོས་ཀྱི་བདག་གཉིས་ལ་བརྟེན་ནས་ཉོན་མོངས་དང་ཕྱིན་ཅི་ལོག་མཐའ་དག་རྒྱས། སྒོས་འོ་སྐོལ་ལ་གང་ཟག་གི་བདག་ཁོ་ནས་གནོད་པ་བསྐྱལ་བས། ཐོས་བསམ་སྒོམ་གསུམ་གྱི་ཤེས་རབ་ཀྱིས་བརླག་པར་བྱ་རྒྱུའམ་མེད་པར་བྱ་རྒྱུ་གང་ཟག་གི་བདག་ཡིན་ཏེ། འུ་ཅག་ཐོས་བསམ་སྒོམ་གསུམ་བྱས་ཀྱིན། ང་བདག་ཇེ་ཆེར་སོང་ནས་བཟོད་སྲན་ཤའུ་ལས་ཆུང་། ཀོ་ལོང་གཙང་བཙན་ལས་དམ་པར་འདུག་པ་འདི། ཐོས་བསམ་སྒོམ་གསུམ་གྱི་ཤེས་རབ་ལོག་པར་སོང་བའི་རྟགས་ཡིན། ཕྱིའི་སྣང་བ་སྟོང་སྟོང་པོར་བྱས་ནས་ནང་གི་ང་བདག་ལ་སྐྱི་ཤུས་ཡང་མ་སོང་བ་འདི། དཔེར་ན་འབེན་དྲུང་དུ་བཞག་ནས་མདའ་རྒྱང་དུ་འཕེན། རྐུན་མ་ནགས་ལ་ཤོར་ནས་རྗེས་སྤང་ལ་གཅོད། འདྲེ་ཤར་སྒོར་བཞག་ནས་གཏོར་མ་ནུབ་སྒོར་སྐྱེལ་བ་ཡིན་གསུངས། །

༈ དགེ་བའི་བཤེས་གཉེན་ཕུ་ཆུང་བའི་ཞལ་ནས། འོ་སྐོལ་གྱིས་དལ་བ་འབྱོར་པ་མིའི་ལུས་ཐོབ་ཏུ་ཡེ་མ་ཐོབ་པ་ཞིག་ཐོབ། ཐོབ་ནས་ཀྱང་གཏན་དུ་གནས་པའི་མཐུ་མེད་དེ་འཆི་དགོས། འཆི་བའི་ཚེ་ན་ཚེ་འདིའི་རྣམ་པར་རྟོག་པ་དང་ཕུན་སུམ་ཚོགས་པ་ཐམས་ཅད་ལ་པུ་ས་ལའི་འདབ་མ་ཙམ་ཡང་དབང་བྱར་མེད་ཅིང་མི་འགྲོགས། དེས་ན་ཤེས་པ་ཆེ་ཆུང་། སྒོ་དྲག་ཞན། འདུན་མ་མཁས་མི་མཁས། ཐམས་ཅད་དུས་དེར་གསལ་བ་ཡིན། རང་འཆི་བའི་ཚེ་དགའ་ཡ་ལེ། བྲོད་སུ་རེ་བ་ཞིག་བྱུང་ན་ཤེས་ཆེ། སྒོ་དྲག །འདུན་མ་མཁས། རང་མགོ་ཐོན་པ་ཞེས་བྱ། དེའི་དུས་ན་གཤིན་རྗེའི་གཟུགས་དང་། ངན་སོང་གི་རྣམ་པ་ཝལ་ཝལ་བྱུང་ན་འདུན་མ་མ་མཁས་རང་མགོ་མ་ཐོན་པ་ཡིན། འོ་ཅག་ཕལ་ཆེར་ནི་ཚེ་འདིའི་གྲོས་འདུན་བྱེད་བྱེད་ནས་ལམ་ལོག་པར་སོང་བ་ཁོ་ན་མང་། ཡང་དག་པར་རྫོགས་པའི་སངས་རྒྱས་ནི་ལོག་པར་གསུང་མི་སྲིད། སློབ་དཔོན་ཀླུ་སྒྲུབ་ལ་སོགས་པ་བསྟན་བཅོས་རྩོམ་པ་པོ་རྣམས་ཀྱང་ལོག་པར་གསུང་མི་སྲིད། དགེ་བའི་བཤེས་གཉེན་དམ་པ་རྣམས་ལོག་པར་གསུང་མི་སྲིད། འོ་ན་ལམ་ལོག་ཏུ་གང་གིས་བཅུག་ན་ཚེ་འདིའི་འདོད་པས་ལམ་ལོག་ཏུ་བཅུག་པས། དེ་བས་ན་རྟག་ཏུ་འཆི་བ་བསམས་ལ། འཆི་བ་རྗེས་སུ་དྲན་པས་ཚེ་འདི་ལ་མ་ཆགས་པ་ཞིག་དགོས། འཁོར་བ་མཐའ་དག་གི་ཉེས་དམིགས་བསྒོམས་ལ་སྐྱོ་བ་རྗེས་སུ་དྲན་པས་འཁོར་བ་མཐའ་དག་ལ་མ་ཆགས་པ་ཞིག་དགོས། བྱམས་སྙིང་རྗེ་བྱང་ཆུབ་ཀྱི་སེམས་བསྒོམས་ལ། སེམས་ཅན་རྗེས་སུ་དྲན་པས་རང་དོན་ལ་མ་ཆགས་པ་ཞིག་དགོས། ཆོས་རྣམས་ཀྱི་གནས་ལུགས་སྟོང་པ་ཉིད་བསྒོམས་ལ། བདག་མེད་རྗེས་སུ་དྲན་པས་དངོས་པོ་དང་མཚན་མ་ལ་མ་ཆགས་པ་ཞིག་དགོས་གསུངས། །

༈ ཡང་དགེ་བཤེས་ཕུ་ཆུང་བའི་ཞལ་ནས། ཆོས་ནན་ཏན་ཉམས་སུ་ལེན་ན། བྱང་བུ་སྣ་འོལ་བ་ལྟ་བུ་ཞིག་དགོས། དཔེར་ན་བྱང་བུ་མིག་འོལ་བ་དེ་ཁྲབ་ལ་སྡེབ་ཏུ་མི་བཏུབ་པ་ལྟར། ཚེ་འདི་པའི་མི་དང་སྡེབ་དུ་མི་བཏུབ་པ་ཞིག་དགོས། མཐུན་འཇུག་དང་མི་དགའ་ཆེས་ན་བདུད་ཀྱིས་འཁྱེར། མི་མ་མགུ་བ་འདོད་ཐོག་ཡིན། ཁོ་མ་མགུ་བས་ཁོ་རང་མི་འོང་། ཁོས་འཕྱར་ཁ་བཏང་བས་གཞན་མི་འོང་། དེ་ཙ་ན་རྒྱགས་ཕྱེ་ཞོ་རེ་ལས་མེད་ཀྱང་དེའི་བར་དུ་བློ་སེམས་བདེ་འབོལ་ལེ་དགེ་སྦྱོར་བྱར་ཡོད། དགེ་སྦྱོར་འཕེལ་ཙ་ན་ཡོན་ཏན་ངང་གིས་སྐྱེ། དེ་ཙ་ན་གཞན་དོན་ཡང་ལྷུན་གྲུབ་ཏུ་འབྱུང་བ་ཡིན་གསུངས།

༈ ཡང་དགེ་བཤེས་ཕུ་ཆུང་བའི་ཞལ་ནས། འདོད་པ་བསྟེན་པའི་བདེ་བ་ལས་འདོད་པ་སྤངས་པའི་བདེ་བ་བདེ་ཚབས་ཆེ། ཚིག་མང་པོ་ཤེས་པ་ལས་དོན་གཅིག་རྒྱུད་ལ་སྐྱེས་ན་དེ་ཤེས་ཚབས་ཆེ། ཟང་ཟིང་མང་པོས་ཕན་བཏགས་པ་ལས་ཆོས་ཀྱིས་ཕན་བཏགས་ན་བཏགས་ཚབས་ཆེ། ཚེ་འདིའི་སྡུག་བསྔལ་གྱིས་འཇིགས་པ་ལས་ཕྱི་མའི་སྡུག་བསྔལ་གྱིས་འཇིགས་པ་འཇིགས་ཚབས་ཆེ། སྒྲོ་འདོགས་ཕྱིའི་ཐ་སྙད་ལ་གཅོད་པ་ལས་སྒྲོ་འདོགས་ནང་གི་སེམས་ལ་བཅད་པ་ཆོད་ཚབས་ཆེ་གསུངས།

༈ དགེ་བཤེས་སྨྱུག་རུམ་པའི་ཞལ་ནས། མངོན་པར་མཐོ་བ་དང་། ངེས་པར་ལེགས་པའི་བྱང་ཆུབ་ཐོབ་པར་འདོད་པས་འཁོར་བ་ལ་བཙོན་རའི་འདུ་ཤེས་བསྐྱེད་པར་བྱའོ། །ལུས་སྲོག་ལ་ཆུ་བུར་གྱི་འདུ་ཤེས་བསྐྱེད་པར་བྱའོ། །སྡིག་པའི་གྲོགས་པོ་ལ་དགྲ་མི་ཤ་བོའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ཡིད་བཞིན་གྱི་ནོར་བུ་རིན་པོ་ཆེའི་འདུ་ཤེས་བསྐྱེད་པར་བྱའོ། །ཉོན་མོངས་པ་ལ་སྦྲུལ་དུག་ཅན་གྱི་འདུ་ཤེས་བསྐྱེད་པར་བྱའོ། །སྡིག་པའི་ལས་ལ་བཙན་དུག་གི་འདུ་ཤེས་བསྐྱེད་པར་བྱའོ། །འདོད་པའི་ཡོན་ཏན་ལ་མེ་མ་མུར་གྱི་འདུ་ཤེས་བསྐྱེད་པར་བྱའོ། །སྙན་པ་དང་གྲགས་པ་ལ་བྲག་ཆའི་འདུ་ཤེས་བསྐྱེད་པར་བྱའོ། །རྙེད་པ་དང་བཀུར་སྟི་ལ་རྒྱའམ་དོལ་གྱི་འདུ་ཤེས་བསྐྱེད་པར་བྱའོ། །གྲོགས་ངན་པ་ལ་འགོ་བག་ཅན་གྱི་རིམས་ནད་ཀྱི་འདུ་ཤེས་བསྐྱེད་པར་བྱའོ། །གྲོགས་བཟང་པོ་ལ་མཁར་རྫོང་བཙན་པོའི་འདུ་ཤེས་བསྐྱེད་པར་བྱའོ། །སེམས་ཅན་ཐམས་ཅད་ལ་ཕ་དང་མའི་འདུ་ཤེས་བསྐྱེད་པར་བྱའོ། །སྦྱིན་པ་ལ་འདོད་འཇོའི་བ་མོའི་འདུ་ཤེས་བསྐྱེད་པར་བྱའོ། །ཚུལ་ཁྲིམས་ལ་རིན་པོ་ཆེའི་རྒྱན་གྱི་འདུ་ཤེས་བསྐྱེད་པར་བྱའོ། །བཟོད་པ་ལ་གོ་ཆ་བཟང་པོའི་འདུ་ཤེས་བསྐྱེད་པར་བྱའོ། །བརྩོན་འགྲུས་ལ་ཅང་ཤེས་ཀྱི་རྟའི་འདུ་ཤེས་བསྐྱེད་པར་བྱའོ། །བསམ་གཏན་ལ་གཏེར་ཆེན་པོའི་འདུ་ཤེས་བསྐྱེད་པར་བྱའོ། །ཐོས་བསམ་སྒོམ་གསུམ་གྱི་ཤེས་རབ་ལ་སྒྲོན་མེའི་འདུ་ཤེས་བསྐྱེད་པར་བྱའོ་གསུངས།

༈ དགེ་བཤེས་ཁམས་པ་ལུང་པའི་ཞལ་ནས། དལ་འབྱོར་རྙེད་པ་ཤིན་ཏུ་དཀའ་བས། ཚུལ་ཁྲིམས་མིག་གི་འབྲས་བུ་བཞིན་དུ་སྲུངས། སྒྱུ་མའི་ཕུང་པོ་ནམ་འཇིག་ཆ་མེད་པས་ལུས་ངག་ཆོས་སྤྱོད་ལ་འབོད། འདུས་བྱས་ཀྱི་དགེ་བ་ཐམས་ཅད་ལུང་མ་བསྟན་ཡིན་པས་སེམས་ཅན་གྱི་དོན་དུ་སྨོན་ལམ་རྒྱ་ཆེན་པོ་ཐོབ། གང་ཡང་མི་རྟག་སྒྱུ་མ་ཡིན་པས་ཅི་ལ་ཡང་བདེན་པར་མ་འཛིན་པར་ཞེན་པ་ཐོངས་གསུངས།

༈ དགེ་བཤེས་འབེན་འཇག་པས་ཐུགས་ལ་གྲོས་འདེབས་མཛད་པ། དེ་རིང་ཙམ་གྱི་ཚེ་ལའང་དབང་བྱར་མེད་པས་གཏན་དུ་སྡོད་ཙིས་མ་བྱེད་བཙུན་པ། ཕུང་པོ་སྒྱུ་མའི་རང་བཞིན་འདི་ལ་བདག་ཏུ་མ་ཞེན་བཙུན་པ། གཉིས་སུ་མེད་པའི་རང་བཞིན་འདི་ལ་གཉིས་སུ་མ་འཛིན་བཙུན་པ། དེ་མ་རྟོགས་ཀྱི་སེམས་ཅན་རྣམས་ལ་བྱམས་པ་དང་སྙིང་རྗེ་སྐྱེད་དང་བཙུན་པ། སྐྱེ་བ་གཏན་གྱི་སོ་ནམ་ཚེ་ཐུང་འདི་ལ་བྱེད་དགོས་ཀྱི་བརྩོན་འགྲུས་སྙིང་སྟོབས་སྐྱེད་དང་བཙུན་པ། ཞེས་གསུངས་སོ།

༈ དགེ་བཤེས་ཁ་རག་སྒོམ་ཆུང་སྤྱན་སྔར་བྱོན་ཙ་ན། རྒྱལ་གྱི་སྟོན་པ་ཡེ་ཤེས་གཟུངས་ཀྱིས། དགེ་བའི་བཤེས་གཉེན་ལ་ཆོས་སྤྱོད་བྱ་ཐབས་ཤིག་ཞུ་བྱས་པས། དགེ་བའི་བཤེས་གཉེན་ཁ་རག་པའི་ཞལ་ནས། ཆོས་སྤྱོད་ཀྱི་བྱ་ཐབས་རིམ་པ་གསུམ་ཡོད་དེ། ཆོས་སྤྱོད་ཐ་མ་ནི། སེམས་ཅན་ལ་གནོད་པ་མི་སྐྱེལ་བ་ཞིག་ཡིན། ཆོས་སྤྱོད་འབྲིང་བོ་ནི། སེམས་ཅན་ལ་ཕན་འདོགས་པ་ཞིག་ཡིན། ཆོས་སྤྱོད་རབ་ནི། བདག་དང་སེམས་ཅན་མི་དམིགས་པས་སྐྱེ་བ་མེད་པའི་དོན་བསྒོམ་པ་ཡིན་གསུངས། །

༈ ཡང་དགེ་བཤེས་ཁ་རག་པའི་ཞལ་ནས། དད་པ་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས་དགེ་བའི་བཤེས་གཉེན་བསྟེན་ཅིང་མདོ་སྡེ་བལྟ། བརྩོན་འགྲུས་མེད་པའི་མི་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས་འཆི་བ་མི་རྟག་པ་བསྒོམ་ཞིང་ལེ་ལོ་སྤོངས། ང་རྒྱལ་ཅན་གྱི་གང་ཟག་ལ་ཡོན་ཏན་གྱི་རྣམ་པ་གང་ཡང་མི་འབྱུང་བས་རང་མགོ་སྨད་ལ་དམན་ཆ་ཟུང་། ཆོས་དེ་གསུམ་དང་ལྡན་ན་ཉན་ཐོས་ཀྱི་རྟེན་དུའང་རུང་། བྱང་ཆུབ་སེམས་དཔའི་རྟེན་དུའང་རུང་། གསང་སྔགས་ཀྱི་རྟེན་དུའང་རུང་། མདོར་ན་ཡོན་ཏན་ཐམས་ཅད་ཀྱི་རྟེན་དུ་རུང་བ་ཡིན་གསུངས། །

༈ ཡང་དགེ་བཤེས་ཁ་རག་པའི་ཞལ་ནས། འཁོར་བ་ལས་འཕག་ཏུ་མི་སྟེར་བ་འདོད་ཆགས་ཡིན་པས་འདོད་ཆགས་ལ་སྐྱོན་དུ་མི་ལྟ་ན་གོལ། དགེ་བའི་རྩ་བ་རྩད་ནས་འཇོམས་པར་བྱེད་པ་ཞེ་སྡང་ཡིན་པས་ཞེ་སྡང་ལ་སྐྱོན་དུ་མི་ལྟ་ན་གོལ། ཡོན་ཏན་ཁྱད་པར་ཅན་གོང་ནས་གོང་དུ་སྐྱེར་མི་སྟེར་ཞིང་དགེ་བའི་རྩ་བ་ཉམས་སྨོད་པར་བྱེད་པ་ང་རྒྱལ་ཡིན་པས་ང་རྒྱལ་ལ་སྐྱོན་དུ་མི་ལྟ་ན་གོལ། ལྷ་དང་མིའི་ལོངས་སྤྱོད་ཕུན་སུམ་ཚོགས་པ་ཐོབ་པར་བྱེད་པ་སྦྱིན་པ་ཡིན་པས་སྦྱིན་པ་ཁྱད་དུ་གསོད་ན་གོལ། བདེ་འགྲོའི་རྟེན་ཁྱད་པར་ཅན་ཐོབ་པར་བྱེད་པ་ཚུལ་ཁྲིམས་ཡིན་པས་ཚུལ་ཁྲིམས་ཁྱད་དུ་གསོད་ན་གོལ། ཐེག་པ་ཆེན་པོའི་ཆོས་ཐམས་ཅད་ཀྱི་རྩ་བ་སྙིང་རྗེ་ཡིན་པས་སྙིང་རྗེ་ཁྱད་དུ་གསོད་ན་གོལ། ཐམས་ཅད་མཁྱེན་པ་སྒྲུབ་པར་བྱེད་པའི་ཐབས་ཁྱད་པར་ཅན་བྱང་ཆུབ་སེམས་དཔའི་སྡོམ་པ་ཡིན་པས་བྱང་ཆུབ་སེམས་དཔའི་བསླབ་པ་ཁྱད་དུ་གསོད་ན་གོལ། མཆོག་ཐུན་མོང་གི་དངོས་གྲུབ་མྱུར་དུ་ཐོབ་པར་བྱེད་པ་གསང་སྔགས་ལ་རག་ལས་པས་གསང་སྔགས་ཀྱི་དམ་ཚིག་ཁྱད་དུ་གསོད་ན་གོལ་གསུངས། །

༈ ཡང་དགེ་བཤེས་ཁ་རག་པའི་ཞལ་ནས། ལྟ་བའི་མཐར་ཐུག་ཁས་ལེན་ཐམས་ཅད་དང་བྲལ་བ་ཡིན། སྒོམ་པའི་མཐར་ཐུག་ཡིད་ལ་བྱ་རྒྱུ་ཐམས་ཅད་དང་བྲལ་བ་ཡིན། སྤྱོད་པའི་མཐར་ཐུག་བླང་དོར་ཐམས་ཅད་དང་བྲལ་བ་ཡིན། ཉམས་ལེན་གྱི་མཐར་ཐུག་ཉམས་མྱོང་ཐམས་ཅད་དང་བྲལ་བ་ཡིན་གསུངས། །

༈ དགེ་བཤེས་བྲག་རྒྱབ་པའི་ཞལ་ནས། འོ་སྐོལ་སྙིང་ནས་ཆོས་བཞིན་བྱེད་པར་འདོད་ན། དུས་རྒྱུན་དུ་འཆི་བ་མི་རྟག་པ་བསྒོམས་ལ། ཚེ་འདིའི་འདུན་མ་རྒྱབ་ཏུ་བོར་དགོས། འོ་སྐོལ་ལ་ཚེ་འདིར་བདེ་སྐྱིད་སྙན་གསུམ་བྱུང་ཡང་། རང་གི་བློ་ཆོས་སུ་མ་སོང་ན་དེ་ཐམས་ཅད་བསླུ་བྲིད་ཡིན་ཏེ། དེ་རྣམས་དང་འོ་སྐོལ་གཉིས་འབྲེལ་པ་མེད་པར་མྱུར་དུ་འབོར་དགོས། ནམ་ཡང་འབོར་བར་ཆབས་གཅིག་པ་ལ། ད་ལྟ་བློས་བཏང་ན་དོན་ཅན་དུ་འགྲོ་བ་ཡིན། ཚེ་འདི་བློས་མ་ཐོངས་ན་མཁས་བཙུན་སྟོན་སྒོམ་དུ་གྲགས་ཀྱང་ཚེ་འདིའི་ཆེ་ཐབས་འབའ་ཞིག་བྱེད་བྱེད་ནས་ཏབ་ཏེབ་ཀྱི་ལུང་བ་འགེངས་དགོས། དེ་ཙ་ན་སྟབས་དང་ཤུགས་ཀྱིས་སྡིག་པ་མི་དགེ་བ་ལ་འབགས་ནས་ཆོས་དང་ཇེ་མི་མཐུན་འགྲོ་སྟེ། གཞུག་དེ་གའི་འཕྲོ་ལ་རང་མི་འཆི་བསམ་པ་ཞིག་ལ་ཚེ་འདིའི་ལས་མཇུག་ན་རེ་ཞིག་ཆགས་དང་བཅས་བཞིན་དུ་འཆི་སྟེ། དེ་འགྲོ་ས་ངན་སོང་ལས་འོས་མེད། འཆི་བ་མི་རྟག་པ་རྒྱུད་ལ་སྐྱེས་ཤིང་ཚེ་འདི་བློས་ཐོངས་ན། སྔར་མཁས་བཙུན་དུ་མ་གྲགས་ཀྱང་མིས་མ་ཚོར་བར་དོན་ཐམས་ཅད་འགྲུབ་ནས་འོང་བ་ཡིན། དེ་ལྟ་བུ་དེ་ནམ་འཆི་ཡང་། སྔ་གོང་ནས་འཆི་ཆས་འབའ་ཞིག་བྱས་པའི་སྟོབས་ཀྱིས་ཅི་ལ་ཡང་ཆགས་ཐོགས་མེད་པར་དགའ་བཞིན་སྤྲོ་བཞིན་དུ་འཆི་བ་ཞིག་འོང་བ་ཡིན་གསུངས། དེས་ན་འོ་སྐོལ་འཆི་བ་མི་རྟག་པ་འདི་ཞེ་ལ་བཞག་ནས། རང་གིས་སྔར་བྱས་ཚད། ད་ལྟ་མི་བྱེད། ཕྱིས་བྱ་བར་སེམས་པ་ཀུན་ཚེ་འདི་དང་འདྲེས་མ་འདྲེས་བལྟས་ལ་གལ་ཏེ་ཚེ་འདི་དང་འདྲེས་མར་འདུག་ན་ཉོན་མོངས་པ་དང་འདྲེས་པ་ཡིན་པས། ཉོན་མོངས་པ་དང་སྡིག་པ་ཆོས་ལྟར་བཅོས་པ་ཐམས་ཅད་སྤོང་དགོས། དེ་དག་སྤོང་བར་བྱེད་པ་ལ། དུས་རྟག་ཏུ་དྲན་པའི་བྱ་ར། ཤེས་བཞིན་གྱི་ལྟ་རྟོག །བག་ཡོད་ཀྱི་ཟོན་ཡང་དང་ཡང་དུ་བྱེད་དགོས། ཚེ་འདིའི་ཀུན་ནས་བསླངས་ནས་འབད་རྩོལ་ཇི་སྙེད་བྱས་ཀྱང་འཆི་བའི་ནངས་པར་སྒྲེན་མོ་ལག་པ་སྟོང་པར་འགྲོ་དགོས་པ་ཡིན། དེས་ན་འཆི་བ་སྔས་སུ་བཅུག་ལ་ཚེ་འདིའི་རྣམ་པར་རྟོག་པ་དང་མ་འདྲེས་པའི་ཆོས་ཤིག་བྱེད་དགོས། དེ་ཡང་ལག་ལེན་དུ་བྱས་ན། སང་ཕོད་དང་སྐྱེ་བ་ཕྱི་མ་གཉིས་སྔོན་ལ་གང་འོང་ངེས་པ་མེད་པས། ད་ནས་སང་ཕོད་དེང་སང་ཚུན་ཆད་དུ་ལོངས་སྤྱོད་ཅི་ཡོད་པ་ཚོགས་སུ་བཏང་བ་དང་། སེམས་ལ་འགྱོད་པ་ཅི་ཡོད་བཤགས་སྡོམ་བྱ་བ་དང་། དམིགས་པ་གང་ཡོད་ལ་བློ་སྦྱང་བ་དང་། ཆོས་སྤྱོད་གང་ཤེས་ལ་ཅི་ནུས་འབད་པ་དང་། སེམས་ཅན་གྱི་དོན་དུ་ཅི་འགྱུར་གྱི་སྨོན་ལམ་གདབ་པ་ལ་སོགས་པ་བྱ་ཐབས་དེ་ལས་མེད་པ་ཞིག་དགོས། ཟླ་བ་ཕྱི་མ་དང་ཚེ་ཕྱི་མ་གཉིས་སྔོན་ལ་གང་འོང་ངེས་པ་མེད་པས། ད་ནས་ཟླ་བ་ཕྱི་མ་ཚུན་ཆད་དུ་བྱ་ཐབས་དེ་ལས་མེད་པ་ཞིག་བྱ་དགོས། དེར་མ་ཟད་དེང་སང་ནངས་པར་དང་སྐྱེ་བ་ཕྱི་མ་གཉིས་ཀྱང་སྔོན་ལ་གང་འོང་ངེས་པ་མེད་པས། ད་ནས་སང་ནངས་པར་ཚུན་ཆད་དུ་བྱ་ཐབས་དེ་ལས་མེད་པ་ཞིག་བྱ་དགོས། ཐ་ན་དོ་ནུབ་ཀྱི་ཚེ་ལ་ཡང་དབང་བྱར་མེད་པས་དེ་རིང་གི་ཉི་མ་ལ་ལོངས་སྤྱོད་ཚོགས་སུ་བཏང་བ་དང་། སེམས་ཀྱིས་འགྱོད་བཤགས་བྱ་བ་དང་། སྨོན་ལམ་རྒྱ་ཆེན་པོ་གདབ་པ་དང་། ཏིང་ངེ་འཛིན་བསྒོམ་པ་ལ་སོགས་པ་བྱ་ཐབས་དེ་ལས་མེད་པ་ཞིག་བྱེད་དགོས། སྐྱེས་པའི་ནངས་པར་ནས་སྔོན་ལ་སྡོད་པ་འཆི་བ་ལས་མེད། འཆི་བ་དེ་ཡང་ནམ་འོང་ཆ་མེད་པས་དོ་ནུབ་འཆི་བ་ལྟ་བུའི་སྤྱོད་པ་ཞིག་རྒྱུན་ཏུ་བྱེད་དགོས་གསུངས། །

༈ དགེ་བཤེས་སྣེ་ཟུར་བའི་ཞལ་ནས། དགྲ་ཟིན་གྱི་རྣམ་པར་རྟོག་པས་སངས་མི་རྒྱ་བས་སེམས་ཅན་ཐམས་ཅད་ཕ་མར་མཉམ་པར་ཤེས་དགོས། ཐ་མལ་གྱི་རྣམ་པར་རྟོག་པས་སངས་མི་རྒྱ་བས་སེམས་ཅན་ཐམས་ཅད་ཡི་དམ་གྱི་ལྷར་མཉམ་པར་ཤེས་དགོས། མཚན་མའི་རྣམ་པར་རྟོག་པས་སངས་མི་རྒྱ་བས་སེམས་ཅན་ཐམས་ཅད་ཆོས་ཉིད་སྟོང་པ་ཉིད་དུ་མཉམ་པར་ཤེས་དགོས་གསུངས། །

༈ དགེ་བཤེས་གླང་རི་ཐང་པའི་ཞལ་ནས། གང་ཟག་གི་ཚོད་གང་ཟག་གིས་མི་ཟིན་པས་སུ་ལ་ཡང་སྐུར་པ་མི་གདབ། སངས་རྒྱས་ཀྱི་ཆོས་ཐམས་ཅད་འབྲས་བུ་དང་བཅས་པ་ཡིན་པས། ཆོས་ལ་བཟང་ངན་དུ་མི་སྤྱད། ཐེག་པ་ཆེན་པོ་ལ་བྱ་རྒྱུ་སེམས་ཅན་གྱི་དོན་ལས་མེད་པས་གཞན་དོན་གྱི་གོ་ཆ་མ་ཆུང་། རང་བཙན་ས་མ་ཟིན་པར་གཞན་དྲང་བར་མི་ནུས་པས་དབེན་པར་སྒོམ་སྒྲུབ་ལ་ནན་ཏན་བྱ་གསུངས།

༈ དགེ་བཤེས་ཤ་ར་པའི་ཞལ་ནས། བུད་མེད་ཉོན་མོངས་པའི་རྩ་བ་ཡིན་པས་ས་ཕྱོགས་སུ་མི་བསྟེན། ཆང་ཉོན་མོངས་པའི་རྩ་བ་ཡིན་པས་འཆི་ཡང་མི་འཐུང་། འགྲོ་འདུག་ཉོན་མོངས་པའི་རྩ་བ་ཡིན་པས་རྒྱུ་འགྲུལ་མ་མང་། ཡོ་བྱད་ཀྱི་གསོག་སྲུང་ཉོན་མོངས་པའི་རྩ་བ་ཡིན་པས་འཛིན་ཆགས་སྤང་གསུངས། །

༈ དགེ་བཤེས་བྱ་ཡུལ་བའི་ཞལ་ནས། ཐར་པ་དང་ཐམས་ཅད་མཁྱེན་པའི་ལམ་གྱི་གཞི་རྟེན་ཡིན་པས་ཚུལ་ཁྲིམས་རྣམ་དག་སྲུང་། ཐར་པ་དང་ཐམས་ཅད་མཁྱེན་པའི་ལམ་གྱི་སྲོག་ཤིང་ཡིན་པས་བྱང་ཆུབ་ཀྱི་སེམས་སྦྱོངས། ཐར་པ་དང་ཐམས་ཅད་མཁྱེན་པའི་ལམ་གྱི་སྐས་ཡིན་པས་རྟག་ཏུ་ཚོགས་གཉིས་བསག་པ་ལ་འབོད། ཐར་པ་དང་ཐམས་ཅད་མཁྱེན་པའི་ལམ་མཁན་ཡིན་པས་རྟག་ཏུ་དགེ་བའི་བཤེས་གཉེན་སྟེན་གསུངས། །

༈ ཡང་དགེ་བཤེས་བྱ་ཡུལ་བའི་ཞལ་ནས། གཟུང་འཛིན་གཉིས་ཙན་དན་དང་དེའི་དྲི་ལྟ་བུ་ཡིན། འཁོར་འདས་གཉིས་ཆུ་དང་འཁྱགས་པ་ལྟ་བུ་ཡིན། སྣང་སྟོང་གཉིས་ནམ་མཁའ་དང་སྤྲིན་ལྟ་བུ་ཡིན། རྣམ་རྟོག་དང་ཆོས་ཉིད་གཉིས་རྒྱ་མཚོ་དང་རླབས་ལྟ་བུ་ཡིན་གསུངས། །

༈ དགེ་བཤེས་སྟོད་ལུང་པའི་ཞལ་ནས། སྙིང་ནས་ཐར་བ་དོན་དུ་གཉེར་ན། མཁས་པ་ལས་ཀྱང་བཙུན་པའི་རྗེས་སུ་འབྲང་དགོས། འཆད་པ་པོ་ལས་ཀྱང་སྒྲུབ་པ་པོའི་རྗེས་སུ་འབྲང་དགོས། མི་ཆེན་པོ་ལས་ཀྱང་དམན་ཆ་འཛིན་པའི་རྗེས་སུ་འབྲང་དགོས། གྲོགས་ཤེས་རབ་ཅན་ལས་ཀྱང་དད་པ་ཅན་གྱི་རྗེས་སུ་འབྲང་དགོས། ཆོས་མ་ཤེས་ནས་རྡུགས་པ་མེད། ཆོས་བཞིན་མི་བྱེད་པའི་མི་དང་འགྲོགས་པས་ལན་པ་ཡིན་གསུངས། །

༈ ཡང་དགེ་བཤེས་སྟོད་ལུང་པའི་ཞལ་ནས། བཏགས་པའི་སྣང་བ་ལ་བདེན་པར་མ་འཛིན། འདུས་བྱས་ཀྱི་ཆོས་ལ་བློ་ལྟོས་མ་འཆའ། སྒྱུ་མ་ཞིག་པ་ལ་མྱ་ངན་མ་བྱེད། འདོད་པ་དང་ཉོན་མོངས་པ་ལ་གཉེན་པོ་མ་ཆུང་། འཇིག་རྟེན་ཆོས་བརྒྱད་དང་དུ་མ་ལེན། སྡིག་པའི་གྲོགས་པོ་ལ་ཕྱི་ཐག་མ་རིང་། ཉེ་དུ་འབྲེལ་པ་ལ་བརྩེ་དུང་མ་ཆེ། བླ་མ་དང་དཀོན་མཆོག་ལ་དད་གུས་མ་ཆུང་། ལུས་དང་ལོངས་སྤྱོད་ལ་ཆགས་པ་མ་ཆེ། ཐོས་བསམ་སྒོམ་གསུམ་ལ་བརྣག་པ་མ་ཆུང་། རྙེད་བཀུར་འདུ་འཛི་ལ་ཟུར་བསྟོད་མ་བྱེད། ཉམས་ལེན་དཀའ་ཐུབ་ལ་སྡུག་སྲན་མ་ཆུང་། གཞན་ཕན་ཞེན་མེད་ཀྱི་སྙིང་རྗེ་མ་ཆུང་གསུངས།

༈ དགེ་བཤེས་རྣམ་འབར་བའི་ཞལ་ནས། ཁམས་གསུམ་འཁོར་བ་ལས་ཡིད་མ་ཕྱུང་ན་ཐར་པ་ལ་བློ་མི་འཇུག་པས་འཁོར་བ་མཐའ་དག་གི་ཉེས་དམིགས་བསྒོམ། ཆགས་ཞེན་བཙན་ཐབས་སུ་མ་བཅད་ན་འདོད་ཡོན་གྱི་འཁྲི་བ་མི་ཆོད་པས་བདོག་པའི་དངོས་པོ་མཆིལ་མའི་ཐལ་བ་བཞིན་དུ་སྤང་། རང་ལ་ཉེར་ལེན་མེད་ན་དགེ་བའི་བཤེས་གཉེན་གྱི་བྱིན་རླབས་མི་འཇུག་པས་བླ་མ་ལ་སངས་རྒྱས་ཀྱི་འདུ་ཤེས་སྐྱེད། དུས་རྒྱུན་དུ་མི་རྟག་པ་མ་བསྒོམ་ན་ཚེ་འདི་པར་ཆ་བས། ལོང་མེད་རྒྱུད་ལ་བསྟེན། ནང་གི་བློ་མ་འབྱོངས་ན་ལྷག་པའི་བསམ་པས་རྟག་མི་ཐུབ་པས་དབེན་པར་བྱང་ཆུབ་ཀྱི་སེམས་སྦྱོངས་གསུངས། །

༈ དགེ་བཤེས་འཆིམ་ཕུ་པ་ལ་སྔགས་པ་ཞིག་གིས་གདམས་ངག་ཅིག་ཞུས་པས། སྣང་བ་འདི་སྒྱུ་མ་ཡིན་གྱི་བདེན་པར་མ་འཛིན། ཕུང་པོ་ཤ་ཁྲག་ཡིན་གྱི་བདག་འཛིན་མ་ཆེ། ཡོ་བྱད་སྔོན་བསགས་ཡིན་གྱི་འབད་རྩོལ་མ་ཆེ། ཅི་བྱས་སྡུག་བསྔལ་ཡིན་གྱི་བྱ་བྱེད་མ་མང་། འཁོར་བ་སྡུག་བསྔལ་ཡིན་གྱི་དང་དུ་མ་ལེན། གདམས་ངག་ཕྱིས་ཉི་མ་རིང་ཙ་ན་བྱ་ཡིས་གསུངས། །

༈ དགེ་བཤེས་ཤ་བོ་སྒང་པའི་ཞལ་ནས། འོ་སྐོལ་དུས་ད་རེས་དལ་འབྱོར་མི་ལུས་ཐོབ། དགེ་བའི་བཤེས་གཉེན་དང་མཇལ། ཐེག་པ་ཆེན་པོའི་ཆོས་དང་འཕྲད་པའི་དུས་འདིར་སྐྱེ་བ་ཕྱི་མའི་མལ་ཅི་འཆོས་དང་། ཐར་པ་དང་ཐམས་ཅད་མཁྱེན་པའི་རྐང་ཅི་ཚུགས་བྱ་དགོས། དང་པོ་སྐྱེ་བ་ཕྱི་མའི་མལ་ཅི་ཆོས་བྱེད་པ་ལ། སྡིག་བཅུ་རྩད་ནས་སྤངས་ལ་དགེ་བཅུ་དང་དུ་བླང་དགོས་ཏེ། དེ་ལ་ཚེ་འདི་ཁྱད་དུ་གསོད་དགོས། ཐར་པ་ཐོབ་པར་བྱེད་པ་ལ། འཁོར་བ་མཐའ་དག་ལ་བློ་ལྡོག་དགོས། ཐམས་ཅད་མཁྱེན་པའི་རྐང་འཛུགས་པར་བྱེད་པ་ལ། བྱང་ཆུབ་ཀྱི་སེམས་རྒྱུད་ལ་སྦྱང་དགོས། དེ་ལྟ་བུའི་བློ་རྣམ་པ་གསུམ་པོ་དེ་སྐྱེ་བ་ལ་བསོད་ནམས་བསག་དགོས། བསོད་ནམས་མ་བསགས་ན་ཆོས་རང་མི་གོ བག་རེ་གོ་ཡང་རྒྱུད་ལ་མི་སྐྱེ། བྲག་བྲིག་སྐྱེས་ཀྱང་ཡལ་ནས་ཕན་མི་ཐོགས། དེས་ན་སྔར་འཁོར་བར་འཁྱམས་པ་ཡང་བསོད་ནམས་མ་བསགས་ཤིང་། བསོད་ནམས་མ་ཡིན་པ་བསགས་པས་ལན། ཚེ་འདིར་ཡང་རང་འདོད་པ་བཞིན་མི་འོང་བ་ཐམས་ཅད་བསོད་ནམས་མ་བསགས་ཤིང་། སྡིག་པ་མི་དགེ་བའི་ལས་རྩད་ནས་མ་སྤངས་པས་ལན། དེས་ན་ཆོས་ཐམས་ཅད་ཀྱི་རྩ་བ་བསོད་ནམས་བསག་པ་དང་། སྡིག་པ་སྦྱང་བ་གཉིས་སུ་འདུས་གསུངས། །

༈ ཡང་ཤ་བོ་བའི་ཞལ་ནས། འོ་སྐོལ་གྱི་ཚེ་འདི་ཕྱིའི་སྡུག་བསྔལ་གྱི་རྒྱུ་ཐམས་ཅད་ཚེ་འདིའི་འདོད་པ་ཡིན་པས། ཚེ་འདིའི་འདོད་པའི་བསྒྲུབ་བྱ་སྐྱུར་དགོས། ཚེ་འདི་འདོད་པའི་བསྒྲུབ་བྱ་ཆེས་ཙ་ན་ཐུགས་མི་བདེ། གང་རྒྱུག་ཆ་མེད། དེ་ཙ་ན་སྡིག་སྡུག་གཏམ་ངན་གསུམ་དུས་གཅིག་ལ་ཐོག་ཏུ་འོང་། དེས་ན་འདོད་པའི་བློ་སྣ་མང་པོ་འདི་ལྡོག་དགོས། འདོད་པའི་བློ་སྣ་ལྡོག་ཏུ་བཏུབ་ཙ་ན་སྐྱིད་མགོ་དང་བདེ་མགོ་ཚུགས་པ་ཡིན། དེས་ན་འོ་ཅག་ཚེ་འདི་ཕྱི་ཐམས་ཅད་དུ་བདེ་བ་བསྒྲུབ་པ་ལ། ཡས་རྟགས་སུ་སྙིང་ལ་ཅི་ཡང་མི་འདོད་ལ། ཅི་ཡང་མི་སོག་པ་ཅིག་དགོས། རྙེད་པ་མི་འདོད་ཙ་ན་རྙེད་པའི་མཆོག་ཡིན། སྙན་པ་མི་འདོད་ཙ་ན་སྙན་པའི་མཆོག་ཡིན། གྲགས་པ་མི་འདོད་ཙ་ན་གྲགས་པའི་མཆོག་ཡིན། འཁོར་མི་འདོད་ཙ་ན་འཁོར་གྱི་མཆོག་ཡིན། སྙིང་ནས་ཆོས་བྱེད་ན་བློ་རྩེ་སྤྲང་པོ་ལ་གཏད་དགོས། སྤྲང་པོའི་ཐ་མ་འཆིར་འཇུག་ནུས་པ་ཞིག་དགོས་པ་ཡིན། བློ་སྣ་དེ་ལྟ་བུ་ཞིག་སྐྱེས་ན་ལྷ་འདྲེ་མི་དང་གསུམ་གྱིས་འོ་བརྒྱལ་དུ་མི་འཇུག་ངེས་པ་ཡིན། ཚེ་འདིའི་འདོད་པ་ལ་བསྐམ་ཤ་འཚལ་ཙ་ན། རང་དམའ་རང་གིས་ཕབ། རང་སྡུག་རང་གིས་བྱས། མིས་འཕྱ་ལ་རང་སྡུག་པ། ཕྱི་མ་ངན་སོང་དུ་འགྲོ་བ་རྣམས་འོང་བ་ཡིན། དེས་ན་གཞན་ལ་ཡུས་ཁ་སྐྱུངས། དམན་ཆ་ཟུངས། འདོད་པ་སྐྱུངས། ཆོས་མིན་གྱི་བྱ་བ་ཐམས་ཅད་བོར་ནས་ཆོས་བཞིན་དུ་བསྒྲུབ་པ་ལ་ནན་ཏན་བྱས་ན། རང་སྐྱིད་ལ་མིས་སྨོན་པ་ཕྱི་མ་ལ་བྱང་ཆུབ་ཐོབ་པ་རྣམས་འོང་བ་ཡིན། མདོར་ན་འོ་སྐོལ་གྱིས་མ་བརྩམས་རྒུ་ལ་བརྩམས། མི་ཤེས་རྒུ་ཤེས། མ་བྱས་རྒུ་བྱས། ཁ་ནས་ཇི་སྐད་སྨྲས་ཀྱང་ཚེ་འདིའི་འདོད་པ་ལ་བློ་མ་ལོག་ན། ཚེ་འདི་ཕྱི་གཉིས་ཀྱི་བདེ་བ་བཙལ་ཐབས་མེད། འདོད་པ་མཐའ་དག་ལ་བློ་ལོག་ན་བདེ་བ་བཙལ་མི་དགོས་གསུངས།

༈ ཡང་དགེ་བཤེས་ཤ་བོ་པའི་ཞལ་ནས། རང་དབང་རང་གིས་མ་ཐོབ་པར་གཞན་གྱི་དབང་བྱར་འདོད་པ་འདི་མིན། རྒྱུད་ལ་ཡོན་ཏན་མེད་པར་གཞན་གྱི་སློབ་དཔོན་བྱ་བར་འདོད་པ་འདི་ཡང་མིན། དད་པ་ཆེ་ལ་སྡིག་པ་ལ་མི་འཛེམ་པ་འདི་ཡང་མིན། སྟོང་ཉིད་ལ་དགའ་ལ་བདག་འཛིན་ཆེ་བ་འདི་ཡང་མིན། ཤེས་རབ་ཆེ་ལ་ཆོས་དང་ཆོས་མིན་ངོ་མི་ཤེས་པ་འདི་ཡང་མིན། བློ་རྣོ་ལ་ཆོས་མི་གོ་བ་འདི་ཡང་མིན། སྡིག་ཕྲན་ཚེགས་ལ་འཛེམ་ལ་རྔམས་ཆེ་བ་ལ་མི་འཛེམ་པ་འདི་ཡང་མིན། ཕན་སེམས་ཆེ་ལ་གནོད་པ་ལས་མ་ལོག་པ་འདི་ཡང་མིན། གཅིག་པུར་སྡོད་མི་ཚུགས་ལ་མི་དང་འགྲོག་མི་ཤེས་པ་འདི་ཡང་མིན། བཙུན་པོ་འདོད་ལ་བཟོད་པ་ཆུང་བ་འདི་ཡང་མིན། འཕྲལ་གང་གཏོང་ཕོད་ཆེ་ལ་གཏིང་ལྷོད་ཡངས་ཆུང་པ་འདི་ཡང་མིན། ཆོས་མཐོ་ལ་རང་རྒྱུད་དམའ་བ་འདི་ཡང་མིན། སློབ་དཔོན་བཟང་ལ་རང་སྤྱོད་ངན་པ་འདི་ཡང་མིན། ཆོས་སློབ་པ་ལ་དགའ་ལ་ཉམས་སུ་ལེན་པ་ལ་མི་དགའ་བ་འདི་ཡང་མིན། དབེན་པ་བྱ་བར་འདོད་ལ་མི་དད་ཆེ་བ་འདི་ཡང་མིན། བཟང་པོ་འདོད་ལ་འདོད་པ་ཆེ་བ་འདི་ཡང་མིན། ཐར་པ་ཐོབ་པར་འདོད་ལ་ཅི་བྱས་ཆོས་བརྒྱད་དུ་ཤོར་བ་འདི་ཡང་མིན་གསུངས། །

༈ ཡང་དགེ་བཤེས་ཤ་བོ་པས་བདག་མཆོག་མཛད་པ། རང་རྒྱུད་དམའ་མོ་ལ་ཆོས་མཐོན་པོ་འདོད་པའི་གོ་ནོར་པོ་འདི། རང་བསྐྱེད་མི་འདོན་པར་སྐྱེད་ཅིག་འོང་དུ་རེ་བའི་བསམ་པ་རྒས་པོ་འདི། ཆོས་གཞན་ལ་གལ་ཆེ་སྡིག་རང་ལ་གལ་ཆེ་བ་བཞིན་བྱེད་པའི་སྙིང་མེད་པོ་འདི། རུང་བ་གཞན་ལ་བཅོལ་ནས་མི་རུང་བ་རང་གིས་བྱེད་པའི་གོ་ལོག་པོ་འདི། ཡར་བསྐྱེད་ལས་མར་བསྐྱེད་ཆེ་བའི་བདེ་པའི་རྦབ་ལྟ་བུ་འདི། ཁས་བླངས་རྒྱས་ལ་ལག་ལེན་བསྡུས་པ་ཤེས་པའི་རྒྱས་བསྡུས་མཁན་འདི། ཉོན་མོངས་པ་ཚོ་ལ་གཉེན་པོ་རྫུད་པའི་ཚེ་ལ་ངན་པ་འདི། ཡོན་ཏན་གཞན་གྱིས་མཐོང་དུ་རེ། སྐྱོན་གཞན་གྱིས་མཐོང་གིས་དོགས་པའི་རེ་དོགས་ཅན་འདི། མཆེད་གྲོགས་ལ་རྒྱལ་ཁ་སྒུག་ཉེ་དུ་འབྲེལ་བའི་ཕྱོགས་ལ་ཐུབ་ཁ་ལེན་པ་འདི། གཉེན་པོ་ལ་རྒྱལ་ཁ་སྒུག་ཉོན་མོངས་ཀྱི་ཕྱོགས་སུ་བུབ་ཁ་ལེན་པ་འདི། ཚེ་འདི་ལ་རྒྱལ་ཁ་སྒུག་ཕྱི་མ་ལ་བུབ་ཁ་ལེན་པ་འདི། གནོད་པ་བྱེད་པ་ལ་རྒྱལ་ཁ་སྒུག །ཕན་འདོགས་པ་ལ་བུབ་ཁ་ལེན་པ་འདི། གཞན་ལ་གནོད་པ་བྱས་པ་དེ་རང་ལ་གནོད་པ་བྱས་པ་མ་གོ་བ་འདི། གཞན་ལ་ཕན་བཏགས་པ་དེ་རང་ལ་ཕན་བཏགས་པ་མ་གོ་བ་འདི། གནོད་པ་དང་སྡུག་བསྔལ་ཆོས་ཀྱི་མཐུན་རྐྱེན་དུ་མ་གོ་བ་འདི། འདོད་པ་དང་བདེ་བ་ཆོས་ཀྱི་འགལ་རྐྱེན་དུ་མ་གོ་བ་འདི། ཆོས་གཞན་ལ་གལ་ཆེ་བ་སྐད་ཟེར་ཞིང་རང་ཆོས་བཞིན་མི་བྱེད་པ་འདི། སྡིག་པ་གཞན་བྱེད་པ་ལ་འཕྱ་ཞིང་རང་བྱེད་འཕྲོ་མི་གཅོད་པ་འདི། རང་སྐྱོན་ཆེན་པོ་ཡང་མ་ཚོར་བར་མི་སྐྱོན་ཕྲ་མོ་ཙམ་ཡང་ཚོར་བ་འདི། ལན་མེད་ན་ཕན་འདོགས་འཕྲོ་གཅོད་པ་འདི། ཆོས་པ་གཞན་ལ་བསྙེན་བཀུར་བྱེད་པ་མཐོང་ན་ཁོས་མི་བཟོད་པ་འདི། མཐོན་པོ་ལ་བྱམས་ལ་དམའ་མོ་ལ་སྡང་བ་འདི། ཚེ་ཕྱི་མའི་གཏམ་རྣ་བར་མི་སྙན་པ་འདི། གཞན་གྱིས་སྐྱོན་བཅོས་ན་ཀོ་ལོང་དམ་པ་འདི། སྡིག་པ་གཞན་གྱིས་མ་ཚོར་བས་ཆོག །དགེ་བ་གཞན་གྱིས་ཚོར་དགོས་པ་འདི། ཕྱིའི་སྤྱོད་ལམ་ལེགས་ན་ནང་གི་སེམས་རྒྱུད་མ་ལེགས་ཀྱང་ཆོག་པ་འདི། ཟང་ཟིང་འདོད་པ་བསྒྲུབ་པ་ལ་བདེ་སྐྱིད་བྱེད་པ་འདི། བདེ་བ་ནང་ནས་མི་འཚོལ་བར་བདེ་བ་ཕྱི་ནས་འཚོལ་བ་འདི། སངས་རྒྱས་ཀྱི་རྗེས་སུ་སློབ་པར་དམ་བཅས་ནས་འཇིག་རྟེན་པའི་རྗེས་སུ་སློབ་པ་འདི། བྱང་ཆུབ་སེམས་དཔའ་རྣམས་དང་གྲོས་མཐུན་བྱས་ནས་དམྱལ་བའི་ཟོང་ཚགས་བྱེད་པ་འདི། ལུས་ལོངས་སྤྱོད་དུས་གསུམ་གྱི་དགེ་བ་སེམས་ཅན་ལ་བསྔོས་ནས་ང་བདག་མི་གཏོང་བ་འདི། སྡིག་པའི་གྲོགས་པོ་བྱམས་པ་འདི་ཕུང་བའི་སྣ་འདྲེན་ཡིན་པར་མ་གོ་བ་འདི། དགེ་བའི་གྲོགས་པོ་སྡང་བ་ཕན་འདོགས་པར་མ་གོ་བ་འདི། ཡིན་མིན་ལ་དུས་མང་པོ་འདའ་ཡིས་མི་དང་ཀླེ་བོ་མ་བྱེད། སྲེད་པ་མང་པོ་འཕེལ་གྱི་ཡིད་ཀྱིས་རྒྱལ་སྲིད་མ་སྐྱོང་། ཁེ་བས་ཉེན་ཆེ་བའི་ཁས་ལེན་ལ་མ་དགའ། དོན་མེད་དགེ་སྦྱོར་འཆག་གི་བྱ་བ་མ་མང་། ཞེས་ཐུགས་ལ་ཁྲེལ་བདས་ཤིང་གྲོས་བཏབ་པོ། །

༈ ཇོ་བོ་རྗེའི་བཀའ་བརྒྱུད་སྐྱེས་བུ་དམ་པ་རྣམས་ཀྱི་སྙིང་གཏམ་བཀའ་གདམས་པ་རྣམས་ཀྱི་ཞལ་གདམས་ཁ་ཐོར་པ་རྣམས་བཙུན་པ་ལྕེ་སྒོམ་གྱིས་ཅུང་ཟད་བསྡུས་ནས་ཕྱོགས་གཅིག་ཏུ་བཀོད་པའོ། །

༈ བླ་མ་དམ་པ་རྣམས་ལ་ཕྱག་འཚལ་ལོ། །དེ་ལ་གསུམ་ཚན་དྲུག་དང་། བཞི་ཚན་དྲུག་དང་། ལྔ་ཚན་བརྒྱད་དང་། དྲུག་ཚན་ལྔ་དང་། བདུན་ཚན་དུ་བསྡུས་ནས་སྟོན་ནོ། །གསུམ་ཚན་དང་པོ་དགོས་གསུམ་ནི། ༡ དང་པོ་འཆི་བས་འཇིགས་པ་ཞིག་དགོས། བར་དུ་ཤི་ཡང་མི་འགྱོད་པ་ཞིག་དགོས། ཐ་མ་ཤི་བས་མི་འཇིགས་པ་ཞིག་དགོས་སོ། །༢ ཆོས་གསུམ་སྤང་བ་ལ། སྐྱེས་པའི་ཡུལ་སྤང་། ཁྱིམ་དང་ཐབ་སྤང་། ལས་དང་བྱ་བ་སྤང་ངོ་། །༣ དང་དུ་བླང་བ་རྣམ་པ་གསུམ་ལ། བླ་མ་དང་དུ་བླང་ན་གདམས་ངག་འབྱུང་། སྒོམ་པ་དང་དུ་བླང་ན་ཉམས་སྐྱེ། ཏིང་ངེ་འཛིན་དང་དུ་བླང་ན་རྟོགས་པ་འཕེལ་ལོ། ། ༤ ད་ནོར་བ་གསུམ་དུ་མི་བཏང་བ་ལ། ཆོས་པ་དང་འཆོས་པ་ནོར་ར་རེ། ལྟ་བ་དང་སྨྲ་བ་ནོར་ར་རེ། སྒོམ་པ་དང་དགོངས་པ་ནོར་ར་རེ། ༥ སྒོམ་ཐབས་གསུམ་ལ། དང་པོ་བརྡ་སྒོམ། བར་དུ་བརྡ་དོན་བསྲེས་ལ་བསྒོམ། ཐ་མར་སེམས་ཀྱི་དོན་བསྒོམ་མོ། །༦ དོགས་པ་མི་བྱ་བ་གསུམ་ལ། རྒས་ཁར་ལྟོགས་ཀྱི་དོགས་པ་མི་བྱ། རྒྱབ་བརྟེན་དང་བྲལ་གྱི་དོགས་པ་མི་བྱ། རྒྱལ་ཁམས་ཀྱིས་འཕྱ་ཡི་དོགས་པ་མི་བྱའོ། །

༈ བཞི་ཚན་དྲུག་ལ། མཆོག་བཞི་ནི། ༡ དྲན་པའི་ཐག་པ་མ་ཆད་ན་བསྒོམ་པའི་མཆོག །འཁོར་བ་མི་རྟག་པར་ཤེས་ན་འདུ་ཤེས་ཀྱི་མཆོག །ལུས་ངག་ཐུབ་པ་སྡོམ་པའི་མཆོག །དགེ་སྦྱོར་འཕེལ་བ་བསྙེན་པའི་མཆོག་གོ། ༢ མིན་པ་བཞི་ལ། སྡིག་ལ་མི་འཛེམ་ན་ཆོས་པ་མིན། འདུལ་ཁྲིམས་མེད་ན་བཙུན་པ་མིན། དམ་ཚིག་མེད་ན་སྔགས་པ་མིན། འཛིན་པ་མི་གཏོང་ན་དམ་པ་མིན་ནོ། །༣ རྩ་བ་བཞི་ལ། ཆང་བུད་མེད་ལ་དགའ་ན་ཉེས་པའི་རྩ་བ། ལས་དང་བྱ་བ་ལ་དགའ་ན་གཡེང་བའི་རྩ་བ། ནོར་རྫས་ལ་འཛིན་པ་ཆེ་ན་འཆིང་བའི་རྩ་བ། ཁ་དྲག་ལ་འབྱོར་ལྕོགས་ཆེ་ན་སྡིག་པའི་རྩ་བའོ། །༤ གོལ་ས་བཞི་ལ། གཟུང་འཛིན་མ་སྤངས་ན་ཁ་ལྟ་ཡིན་པས་གོལ། ཉོན་མོངས་མ་སྤངས་ན་མིང་གི་སྒོམ་ཆེན་ཡིན་པས་གོལ། ཕྱོགས་རིས་མ་སྤངས་ན་སྤྱོད་པ་ཚུལ་འཆོས་ཡིན་པས་གོལ། བྱ་བ་མ་ཐོངས་ན་སྐྱེ་བོ་ཐ་མལ་ཡིན་པས་གོལ་ལོ། །༥ འདྲ་བ་བཞི་ལ། གཞན་ལ་ཆོས་འཆད་ཅིང་རང་མི་སྤྱོད་ན་མི་ནག་གྲོ་སྲུང་འཆད་པ་དང་འདྲ། སྔགས་ནོར་དུ་འཚོང་བ་ནི་སྨན་དུག་ཏུ་བརྗེ་བ་དང་འདྲ། གདམས་ངག་ཆེ་ལ་རྒྱུད་མ་ཐུལ་བ་ནི་རིན་པོ་ཆེ་ཐོགས་ནས་སྤྲང་པ་འདྲ། མི་ཆོས་བཏང་ནས་ཁྱིམ་ལ་འཐོགས་ན་འདམ་ནས་ཐར་ནས་རྒྱ་རུ་ཚུད་པ་འདྲའོ། །༦ དགོས་པ་བཞི་ལ། དགེ་བའི་བཤེས་གཉེན་སྡིག་པའི་གྲོགས་པོར་མ་སོང་བ་ཞིག་དགོས། ཡི་དམ་གྱི་ལྷ་བདུད་དུ་མ་སོང་བ་ཞིག་དགོས། སྟོང་ཉིད་བསྒོམ་པ་ཉོན་མོངས་པའི་གཉེན་པོར་སོང་བ་ཞིག་དགོས་སོ། །

༈ ལྔ་ཚན་བརྒྱད་ལ། ༡ འཕྲང་ལྔ་ལ། ཐོན་པར་དཀའ་བ་འཁོར་བའི་འཕྲང་། ཆོས་ལས་ཁྱོགས་པ་འདུ་ཤེས་ཀྱི་འཕྲང་། རང་གཅིག་པུར་སྡོད་པ་བཏུད་ཀྱི་འཕྲང་། གདམས་པས་ངོམས་པ་ཐོས་པའི་འཕྲང་། སྤྱོད་པ་ཐོ་ཅོ་བགེགས་ཀྱི་འཕྲང་ངོ་། །༢ ལོག་པ་ལྔ་ལ། གང་སུ་ལས་ཀྱང་ལྷག་པར་བྱ་བའི་ཕྱིར་ཐོས་པ་བྱེད་པ་ལོག །རྙེད་པ་དང་གྲགས་པའི་ཕྱིར་གཞན་ལ་ཆོས་འཆད་པ་ལོག །སྒོམ་གྱི་གདམས་པ་མེད་པར་བསམ་གཏན་ལ་སྙོམས་པར་འཇུག་པ་ལོག །རྙེད་བཀུར་འོང་ལ་རེ་ནས་ཚུལ་ཁྲིམས་བསྲུང་བ་ལོག །ཐམས་ཅད་དབང་དུ་བསྡུ་བའི་སྦྱིན་པ་གཏོང་བ་ལོག་གོ། ༣ འཆོར་བ་ལྔ་ལ། ཤེས་རབ་ཆེ་ཞིང་མང་དུ་ཐོས་ལ་ངོ་སོ་མཐོ་ན་འཆད་ཁ་སྟོན་པར་འཆོར་ཏེ་བསྒོམ་མི་ཁོམ། བློ་རྣོ་ཞིང་ནོར་དད་ཆེ་ན་ཆོ་ག་མཁན་ནམ་ཚོང་དཔོན་དུ་འཆོར། མཐུ་ཆེ་ཞིང་རྩལ་དྲག་ན་ཁ་བསྲུང་དང་སྐྱེལ་མར་འཆོར། སྨྲ་མཁས་ཤིང་སྦྱོར་བ་བཟོ་ན་གཙོ་བོ་དང་གཡེང་བ་ལ་འཆོར། མི་ཤེས་ལ་ནན་ཏན་ཆུང་ན་ཐ་མལ་གྱི་སྤྱོད་པར་འཆོར་ཏེ་བསྒོམ་མི་ཁོམ་མོ། །༤ གཙོ་བོ་ལྔ་ལ། ལྟ་བའི་གཙོ་བོ་ལས་རྒྱུ་འབྲས་ལ་ཡིད་ཆེས་པ། དགེ་སྦྱོར་གྱི་གཙོ་བོ་སེམས་ཅན་ལ་མི་གནོད་པ། སྒྲུབ་པའི་གཙོ་བོ་སྲུང་སྡོམ་མ་ཉམས་པ། དམ་བཅའི་གཙོ་བོ་ཐུབ་པ། སྤྱོད་པའི་གཙོ་བོ་བསྙེན་སྒྲུབ་པའོ། །༥ རང་རྐྱ་ཐུབ་པ་ལྔ་ལ། གདམས་ངག་ལ་རང་བྱན་ཆུབ་པས་རང་རྐྱ་ཐུབ་པ། གཉེན་པོས་རྐྱེན་ཐུབ་པ། དད་པས་ཁམས་སོས་པ། ཚུལ་ཁྲིམས་ངོ་ལྐོག་མེད་པ། བར་ཆད་ཀྱི་གནོད་པ་ཕྲ་མོ་སེལ་ནུས་པའོ། །༦ ཡིན་པ་ལྔ་ལ། འདོད་པ་དང་བྲལ་ན་བདེ་བ་ཡིན། དམིགས་པ་དང་བྲལ་ན་སྟོང་པ་ཡིན། བཞག་པ་དང་བྲལ་ན་མི་རྟོག་པ་ཡིན། རྩོལ་བ་དང་བྲལ་ན་ཆོས་ཉིད་ཡིན། འདོད་པ་ཐག་ཆོད་ན་འབྲས་བུ་ཡིན་ནོ། །༧ རྗེ་ལྷ་གཅིག་གི་དྲིས་ལན་ལྔ་ལ། ལྟ་བ་རྟོགས་ན་བསྒོམ་དགོས་སམ་མི་དགོས། སངས་རྒྱས་བྱ་བ་ལ་ཐབས་ཤེས་རབ་འབྲེལ་དགོས་སམ་མི་དགོས། བྱང་ཆུབ་སེམས་དཔའི་སྡོམ་པ་ལ་སོ་སོ་ཐར་པའི་སྡོམ་པ་རྟེན་དུ་དགོས་སམ་མི་དགོས། ཤེས་རབ་ཡེ་ཤེས་ཀྱི་དབང་ལ་ཚངས་པར་སྤྱོད་པའི་དགེ་བསྙེན་ཡན་ཆད་ཀྱིས་གནང་ངམ་མི་གནང་དང་ལྔའོ། །༨ མི་ཟས་མི་འཇུ་བའི་ཚད་ལྔ་ལ། བཙན་དུག་ལ་ལོངས་སྤྱོད་པ་དང་། གནང་བ་ལ་ལོངས་སྤྱོད་པ་དང་། འདག་མེ་ལ་ལོངས་སྤྱོད་པ་དང་། བུ་ལོན་ལ་ལོངས་སྤྱོད་པ་དང་། མེ་ལྕེ་འབར་བ་ལ་ལོངས་སྤྱོད་པ་དང་ལྔའོ། །

༈ དྲུག་ཚན་ལྔ་ལས། ༡ གླེན་པ་དྲུག་ནི། སྡུག་བསྔལ་གྱི་རྩ་བར་གྱུར་པའི་འཁོར་འདམ་ལ་དགའ་ཞིང་བརྩེ་གདུང་བྱེད་པ་འདི་ཡང་གླེན། ཕུང་པོ་མི་རྟག་བརྙན་པོ་ལྟ་བུ་ལ་ལྷག་པར་བཀུར་སྟི་བྱེད་པ་འདི་ཡང་གླེན། དབུལ་ཡང་ལྷག་མ་ལུས་པའི་ནོར་རྫས་ལ་སྡིག་དང་བསྡོས་ནས་གསོག་པ་འདི་ཡང་གླེན། སྡུག་བསྔལ་ཆེན་པོ་ནམ་འོང་ཆ་མེད་པར་ཚེ་འདི་འབའ་ཞིག་གི་ཞལ་ཏ་བྱེད་པ་འདི་ཡང་གླེན། ད་ལྟའི་སྡུག་བསྔལ་ཕྲན་ཚེགས་མི་བཟོད་པར་ཤི་ནས་ངན་སོང་དུ་སྡུག་བསྔལ་བཟོད་དུ་རེ་བ་འདི་ཡང་གླེན། ཟབ་ལ་རྒྱ་ཆེ་བའི་ཆོས་ལ་མི་སྤྱོད་པར་རང་གིས་རང་སྡུག་ཤོམ་པ་འདི་ཡང་གླེན་ནོ། །༢ མི་རིགས་པ་དྲུག་ལ། བཙུན་པོ་དང་རྟོགས་པ་ཅན་འདོད་ཀྱང་འཁོར་བ་ལས་བློ་མ་ལོག་པ་མི་རིགས། དགེ་སློང་བསྟན་པ་ལ་མ་ཞུགས་པ་འདི་ཡང་མི་རིགས། ཤེས་རབ་ཅན་ཆོས་མ་གོ་བ་འདི་ཡང་མི་རིགས། པཎྚི་ཏ་ལས་རྒྱུ་འབྲས་ལ་མི་འཛེམ་པ་འདི་ཡང་མི་རིགས། དད་པ་ཅན་སྡིག་ལ་འབག་པ་འདི་ཡང་མི་རིགས། དགེ་བ་ཅན་ངན་སོང་དམྱལ་བར་འགྲོ་བ་འདི་ཡང་མི་རིགས་སོ། །༣ འཁྲུལ་པ་དྲུག་ལ། ལེགས་པའི་གདམས་ངག་མི་འཚོལ་བར་དོན་མེད་ཐ་སྙད་སློབ་པ་འདི་ཡང་འཁྲུལ། རི་ཁྲོད་དགོན་པ་མི་འགྲིམ་པར་འཁོར་བའི་མུན་ཁང་བརྩིགས་པ་འདི་ཡང་འཁྲུལ། གཅིག་པུར་དོན་ཉིད་མི་སེམས་པར་འཁོར་མང་ནང་དུ་ཆོས་བྱེད་འཁྲུལ། བདག་མེད་བསམ་གཏན་མི་བསྒོམ་པར། ལོངས་སྤྱོད་འདུ་འཛི་བྱེད་པ་འཁྲུལ། སྦྱིན་པ་ཆགས་མེད་མི་གཏོང་བར། སེར་སྣས་ཟས་ནོར་གསོག་པ་འཁྲུལ། དགེ་ཆོས་ཚུལ་བཞིན་མི་སྤྱོད་པར། མི་ཆོས་སེམས་འཛིན་བྱེད་པ་འཁྲུལ་ལོ། །༤ ངོ་ཚ་བ་དྲུག་ལ། དམ་ཆོས་ཉི་མ་ཤར་བ་ལྟ་བུའི་སྒོར་ཞུགས་ནས། །མངོན་སྤྱོད་ངན་པ་བྱེད་པ་འདི་ཡང་ངོ་རེ་ཚ། །འཇིག་རྟེན་མགོན་པོའི་སྤྱན་སྔར་ཁས་བླངས་ནས། །སྤྱོད་པ་བབ་ཅོལ་བྱེད་པ་ངོ་རེ་ཚ། །བྱང་ཆུབ་མཆོག་ཏུ་སེམས་བསྐྱེད་ནས། །གཞན་ལ་སྐུར་བ་འདེབས་པ་འདི་ཡང་ངོ་རེ་ཚ། །ཕུང་པོ་མི་གཙང་རྒྱན་གྱིས་བརྒྱན་པ་ལ། །ཤིན་ཏུ་ཕྱི་བདར་བྱེད་པ་འདི་ཡང་ངོ་རེ་ཚ། །ཐེག་པ་ཆེན་པོ་ཡིན་ཞེས་ཁས་བླངས་ནས། །ཤེས་རབ་སྙིང་རྗེ་བྲལ་བ་འདི་ཡང་ངོ་རེ་ཚ། །གསང་སྔགས་ཟབ་མོའི་སྒོར་ཞུགས་ནས། །དམ་ཚིག་མི་བསྲུང་ལེ་ལོ་བྱེད་པ་འདི་ཡང་ངོ་རེ་ཚའོ། །༥ ངོ་ཤེས་པ་དྲུག་ལ། བླ་མ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བྱེད་པ་པོ་ངོ་ཤེས་པ། དམ་ཚིག་གཞི་ལྟ་བུར་ངོ་ཤེས་པ། རང་ལུས་ལྷའི་དཀྱིལ་འཁོར་དུ་ངོ་ཤེས་པ། སེམས་ཅན་སངས་རྒྱས་སུ་ངོ་ཤེས་པ། སྣང་སྲིད་རྨི་ལམ་སྒྱུ་མ་ལྟ་བུར་ངོ་ཤེས་པའོ། །༦ ཡང་དག་པའི་གདམས་ངག་དྲུག་ལ། དུག་ལྔའི་དགྲ་ནང་ནས་ཞིའམ་མ་ཞི་ལྟ། འཁོར་བའི་ནང་དང་བྲལ་ལམ་མ་བྲལ་ལྟ། བདུད་བཞིའི་དམག་དཔུང་ཆོམས་སམ་མ་ཆོམ་ལྟ། མཉམ་རྗེས་མཉམ་མམ་མ་མཉམ་ལྟ། མངོན་དུ་རྒྱུ་ལ་གནས་སམ་མི་གནས་ལྟ། གཉུག་མའི་ལམ་དང་ཕྲད་དང་མ་ཕྲད་ལྟའོ། །

༈ བདུན་ཚན་གཅིག་ལ། ཕན་མེད་བདུན་ནི། སྐྱབས་འགྲོ་ནས་སྔགས་ཀྱི་བར་དུ་སྡོམ་པ་ཐམས་ཅད་བླངས་ཀྱང་། འཇིག་རྟེན་པའི་ཆོས་ལས་བློ་མ་ལོག་ན་ཕན་མེད། དུས་རྒྱུན་དུ་གཞན་ལ་ཆོས་འཆད་ཀྱང་། རང་གི་ང་རྒྱལ་མ་ཞི་ན་ཕན་མེད། ཡར་སྐྱེད་སྟོན་ཀྱང་། སྐྱབས་འགྲོའི་ཆོས་གཞུག་ཤོར་ན་ཕན་མེད། ཉིན་མཚན་མེད་པར་དགེ་སྦྱོར་ལ་འབད་ཀྱང་། བྱང་ཆུབ་ཀྱི་སེམས་ཀྱིས་མ་ཟིན་ན་ཕན་མེད། ཀུན་བརྟགས་གཞན་དབང་ལ་སོགས་པ་གཏན་ལ་ཕེབས་ཀྱང་། སྒྱུ་མ་ལྟ་བུར་མ་ཤེས་ན་ཕན་མེད། སྡེ་སྣོད་གསུམ་ཤེས་ཀྱང་། བླ་མ་ལ་མོས་གུས་མེད་ན་ཕན་མེད། སྟོང་པ་ཉིད་བསྒོམས་ཀྱང་། ཉོན་མོངས་པའི་གཉེན་པོར་མ་སོང་ན་ཕན་མེད་དོ། །ཁ་རག་སྒོམ་ཆུང་གི་གདམས་པ། དགེ་བཤེས་ལྷོ་པས་ཡི་གེར་བཀོད་པའི་གདམས་པ་བསྐུལ་འདེབས་ཁ་ཐོར་བ་རྫོགས་སོ། །

༈ ན་མོ་གུ་རུ། ཕ་རིན་པོ་ཆེ་ལྕེ་སྒོམ་གྱི་ཞལ་ནས། སྣང་སྲིད་སེམས་སུ་ཤེས། སེམས་ཉིད་སྟོང་པར་རྟོགས། རྟོགས་པ་ལ་མཆོག་འཛིན་མེད་ན་ལྟ་བའི་མཐར་ཐུག་ཡིན། མ་ཡེངས་པའི་རྩི་ཡིས་བཟུང་། མ་བཅོས་པའི་ངང་ལ་བཞག །དམིགས་གཏད་དང་དེར་འཛིན་མེད་པ་ནི་སྒོམ་པའི་མཐར་ཐུག་ཡིན། མི་མཐུན་པ་ལམ་དུ་བྱས། མཐུན་ཡུལ་གྱི་ཞེན་པ་བཅད། བླང་དོར་དང་དགག་སྒྲུབ་མེད་པ་ནི། སྤྱོད་པའི་མཐར་ཐུག་ཡིན། ཅི་བྱུང་བདེན་མེད་དུ་ཤེས། བཟང་ངན་ལ་སྤང་བླང་མེད། གལ་མེད་བྱུང་རྒྱལ་དུ་གཏོང་བ་ནི། གེགས་སེལ་མཐར་ཐུག་ཡིན། སྣང་བ་བན་བུན་དུ་སོང་། འཁྲུལ་པ་ཤག་ཤིག་ཏུ་ཞིག །ཞེན་པ་ལང་ལོང་དུ་ལོག་པ་ནི། དྲོད་རྟགས་ཀྱི་མཐར་ཐུག་ཡིན། བདག་འཛིན་གྱི་རྟོད་ཕུར་ཐོན། གང་ཡང་བདག་མེད་དུ་རྟོགས་པས་ཕྱི་ནང་གི་འདོད་པ་ཟད། རེ་དོགས་ཀྱི་ཐག་པ་ཆོད་པ་ནི། གནས་སྐབས་ཀྱི་འབྲས་བུ་ཡིན། རིག་པ་གཞི་ལ་དག །ཆོས་སྐུ་རང་ས་ཟིན། བདག་མེད་གཞན་དོན་མཛད་པ་ནི། མཐར་ཐུག་གི་འབྲས་བུ་ཡིན། ལར་ནི་མཐར་ཐུག་ལའང་། མཐར་ཐུག་གི་བཟའ་གཏད་མེད། གནས་སྐབས་དེའི་མཐར་ཐུག་ཡིན་ནོ། །དེ་བས་ན་གཞི་སྟོང་པ་གྲག་སྟོང་ཡིན་པས་གྲག་སྟོང་ལ་དོན་དུ་མ་འཛིན། ལམ་འཁྲུལ་པ་བློས་བཏགས་ཡིན་པས་བློས་བཏགས་ལ་དགག་སྒྲུབ་མ་བྱེད། འབྲས་བུ་སྐུ་གསུམ་མིང་སྟོང་ཡིན་པས་མིང་སྟོང་ལ་རེ་དོགས་མ་བྱེད། ཅེས་གསུངས་སོ། །

༈ ན་མོ་གུ་རུ། ཡང་དག་པའི་ཆོས་བཅུ་ནི། ལས་རྒྱུ་འབྲས་ལ་ཡིད་ཆེས་པ་ནི། དབང་པོ་ཐ་མའི་ཡང་དག་པའི་ལྟ་བ་ཡིན། ཕྱི་ནང་གི་ཆོས་ཐམས་ཅད་སྣང་བ་དང་སྟོང་པ་དང་རིག་པ་དང་སྟོང་པ་ཟུང་འཇུག་བཞིར་རྟོགས་པ་ནི། དབང་པོ་འབྲིང་གི་ཡང་དག་པའི་ལྟ་བ་ཡིན། བལྟ་བྱ་ལྟ་བྱེད་རྟོགས་པ་གསུམ་དབྱེར་མེད་པར་རྟོགས་པ་ནི། དབང་པོ་རབ་ཀྱི་ཡང་དག་པའི་ལྟ་བ་ཡིན། དམིགས་པ་རྩེ་གཅིག་པའི་ཏིང་ངེ་འཛིན་ལ་གནས་པ་ནི། དབང་པོ་ཐ་མའི་ཡང་དག་པའི་སྒོམ་པ་ཡིན། ཟུང་འཇུག་བཞིའི་ཏིང་ངེ་འཛིན་ལ་གནས་པ་ནི། དབང་པོ་འབྲིང་གི་ཡང་དག་པའི་སྒོམ་པ་ཡིན། བསྒོམ་བྱ་སྒོམ་བྱེད་ཉམས་མྱོང་གསུམ་མེད་ཅིང་མི་དམིགས་པའི་ངང་ལ་གནས་པ་ནི། དབང་པོ་རབ་ཀྱི་ཡང་དག་པའི་སྒོམ་པ་ཡིན། ལས་རྒྱུ་འབྲས་མིག་གི་འབྲས་བུ་བཞིན་དུ་བསྲུང་བ་ནི། དབང་པོ་ཐ་མའི་ཡང་དག་པའི་སྤྱོད་པ་ཡིན། ཆོས་ཐམས་ཅད་རྨི་ལམ་སྒྱུ་མའི་ཚུལ་གྱིས་སྤྱོད་པ་ནི། དབང་པོ་འབྲིང་གི་ཡང་དག་པའི་སྤྱོད་པ་ཡིན། གང་ཅི་ལ་ཡང་མི་སྤྱོད་པ་ནི། དབང་པོ་རབ་ཀྱི་ཡང་དག་པའི་སྤྱོད་པ་ཡིན། བདག་འཛིན་ཉོན་མོངས་རྣམ་རྟོག་སོགས་ཇེ་ཆུང་ལ་སོང་བ་ནི། དབང་པོ་རབ་འབྲིང་ཐ་གསུམ་ཀའི་ཡང་དག་པའི་དྲོད་རྟགས་ཡིན། དེ་ནི་ཡང་དག་པའི་ཆོས་བཅུའོ། །ཞེས་པ་ལྕེ་སྒོམ་གྱིས་གསུངས་སོ། །

༈ སྐྱེ་བ་འདི་དང་ཚེ་རབས་ཐམས་ཅད་དུ། །དཀོན་མཆོག་གསུམ་དང་ནམ་ཡང་མི་འབྲལ་ཞིང་། །ཆོས་ཕྱིར་སྲོག་ལའང་ཕངས་པ་མེད་པ་ཡི། །སྙིང་སྟོབས་ཆེན་པོས་འགྲོ་དོན་བྱེད་པར་ཤོག །།བདག་ཀྱང་རྟག་ཏུ་དལ་འབྱོར་མཆོག་ཐོབ་ཅིང་། །ཐུབ་བསྟན་སྒོར་ཞུགས་བསླབ་གསུམ་རྒྱན་གྱིས་མཛེས། །འབྲེལ་ཚད་དོན་ལྡན་འགྲོ་ཀུན་སྲིད་མཚོ་ལས། །བསྒྲལ་ནས་རྫོགས་པའི་སངས་རྒྱས་ཐོབ་པར་ཤོག །ལུས་ནི་ངུར་སྨྲིག་གསུམ་གྱི་རྒྱན་འཆང་ཞིང་། །ངག་ནི་སྡེ་སྣོད་གསུམ་གྱི་ཆོས་སྒྲ་སྒྲོག །ཡིད་ནི་བྱང་ཆུབ་སེམས་ཉིད་འདྲེས་པ་ཡིས། །དོན་དམ་ཕྱག་རྒྱ་ཆེན་པོའི་དབང་ཐོབ་ཤོག །ཇི་ལྟར་དུས་གསུམ་རྒྱལ་བ་སྲས་བཅས་ཀྱི། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཐུགས་བསྐྱེད་སྨོན་ལམ་མཛད་སྟོབས་ཅི་འདྲ་བ། །དེ་འདྲ་ཁོ་ནར་བདག་ཀྱང་འགྱུར་བར་ཤོག །བདག་གིས་ལྷག་བསམ་སྨོན་ལམ་ཅི་བཏབ་པ། །དེ་ནི་སེམས་ཅན་ཀུན་གྱིས་འགྲུབ་གྱུར་ཅིག །བདག་གིས་ལེགས་སྤྱད་དགེ་བ་ཅི་བགྱིས་པས། །བསོད་ནམས་མཐུ་ཡིས་འགྲོ་ཀུན་སངས་རྒྱས་ཤོག །ཅེས་པའི་སྨོན་ལམ་འདི་ནི་ཆོས་རྗེ་འབྲི་གུང་པ་དཀོན་མཆོག་རཏྣས་མཛད་པའོ། །