གསུམ་པ། རང་ཡུལ་དུ་ཕེབས་ཤིང་དུས་འགྱུར་གྱི་འཚུབ་མའི་ཁྲོད་སོགས་སུ་སྙིང་པོའི་ཉམས་ལེན་ལ་གཞོལ་ཞིང་ལྗགས་རྩོམ་ཅི་རིགས་གནང་བ་སོགས་ཀྱི་སྐོར།

ཟག་མེད་ཡེ་ཤེས་མཆོག་གི་ཕུང་པོ་ལ། །

ཀུན་བརྟགས་གཡོ་བའི་རྐྱེན་གྱིས་མི་གོས་ཀྱང་། །

བསླུ་མེད་ལས་ཀྱི་འབྲས་བུ་སྟོན་པའི་ཕྱིར། །

སྐུ་ངལ་ཅི་རིགས་གནང་ལ་གསོལ་བ་འདེབས། །

མི་བསྲུན་དཔུང་གི་ཤེད་མོང་ཆེར་ངོམ་ནས། །

འཇིགས་རུང་ཁྲོས་པའི་རུ་དར་གཟེངས་ན་ཡང་། །

རྒྱལ་སྲས་དཔའ་བོའི་སྙིང་སྟོབས་མཆོག་འབར་བས། །

སྙན་བརྒྱུད་གདམས་པས་མྱོས་ལའང་གསོལ་བ་འདེབས། །

དེ་ནས་རང་ཡུལ་དུ་ཕེབས་པའི་ཟླ་འགའི་རྗེས་ནས་རྫ་རྒྱལ་དགོན་དུ་བྱོན་ནས་སླར་ཡང་གྲུབ་དབང་ནམ་མཁའ་འཇིགས་མེད་མཆོག་ལས་རྗེ་ཉིད་ཀྱི་ཟབ་གཏེར་གྱི་ཆོས་སྐོར་ཕལ་ཆེར་གྱི་དབང་ལུང་དང་། གཞན་ཡང་ཟབ་རྒྱས་སྨིན་གྲོལ་གྱི་གདམས་པ་མང་དུ་གསན་པར་བྱས་ཤིང་། ཐུགས་དགོངས་དབྱེར་མེད་ཆོས་ཀྱི་དབྱིངས་སུ་འདྲེས་ནས་ཕྱིར་ཕེབས་པའི་ལམ་བར་དུ། རང་ཡུལ་གྱི་སྐྱ་སེར་འགས་ཁོང་ཅག་སྤྲུལ་སྐུ་ནམ་འཇིགས་ཀྱི་མདུན་དུ་ཞུ་སྣ་བྱེད་རོགས་ཞུས་པས། དེ་དག་ལ་གྲོགས་བྱས་ཏེ་ཚུར་ཕུག་ཁང་དགོན་དུ་བྱོན། སྐུ་གདུན་དུ་གཅར་བས་སྤྲུལ་བའི་སྐུ་ནམ་འཇིགས་རིན་པོ་ཆེས་ཐུགས་བརྩེ་ཡང་ཡང་གནང་ཞིང་། སླད་ཀྱི་ཆར་ཡང་ཞལ་མཇལ་ཡོང་བའི་ཞལ་ཏ་བཟང་པོ་ཅི་རིགས་དང་ཕྱག་རྟགས་སོགས་སྐྱེས་སུ་གནང་ཞིང་བླ་སློབ་འབྲལ་མི་ཕོད་པ་ལྟ་བུའི་སྒོ་ནས་རྗེ་ཉིད་ཚུར་རང་ཡུལ་དུ་ཕེབས་པ་ཡིན་འདུག་གོ ༈ །ཡང་མགོན་པོ་གང་གི་ཞལ་ནས། ང་སྤྲུལ་སྐུ་ནམ་འཇིགས་ཀྱི་སྐུ་མདུན་དུ་ཐེངས་རྗེས་མ་སོང་ནས་དབང་ལུང་ཁྲིད་གསུམ་མང་དུ་ཞུས་པ་ཡིན། དེ་ནས་ཁོང་ཡུམ་སྲས་ཕུག་ཁང་ཚེས་བཅུར་བྱོན་པས་བདག་ཀྱང་ཚུར་རང་ཡུལ་དུ་འོང་བའི་ལམ་ནས་རང་སྡེའི་སྐྱ་སེར་འགའ་དང་འཕྲད་པས་ཁོང་ཅག་སྤྲུལ་སྐུ་ནམ་འཇིགས་ཀྱི་སྐུ་མདུན་དུ་ཁྲིད་རོགས་བྱེད་དགོས་ཟེར་བས་དེ་དག་ལ་རོགས་བྱས་ཏེ་ཕྱིར་ཕུག་ཁང་དགོན་དུ་སོང་བ་ཡིན། ཁོང་ཚོ་ལ་མཇལ་ཁ་གནང་ཚར་བའི་ཕྱིན་ཉིན་བདག་སྐུ་དྲུང་དུ་གཅར་བས་སྤྲུལ་སྐུའི་ཞལ་ནས། འུ་གཉིས་ད་ཐུག་རྒྱུ་མ་རེད་བསམ་ཡང་ཐུག་ཐལ། ད་རུང་ཡང་ཐུག་རྒྱུ་རེད་གསུངས་ནས་རྒྱ་ནག་ནས་འབྲུ་མའི་དཀར་ཡོལ་ཞིག་ཏུ་རྒུན་འབྲུམ་གང་བླུགས་ཏེ་གནང་ནས་ཐུགས་ཧ་ཅང་བརྩེ་བརྩེ་མཛད་ཐལ། དེ་ནས་ང་ཕྱིར་ཡོང་བ་ཡིན། དེ་ཕྱིན་ཆད་ཁོང་དང་དངོས་སུ་མཇལ་བའི་བསོད་ནམས་ཡོད་མ་སོང་། ཁོང་གིས་ནི་འུ་གཉིས་ད་རུང་ཐུག་ནི་རེད་གོ་གསུངས་ཐལ། རྨི་ལམ་གྱི་ནང་ནས་ཁོང་ཅུང་རེ་མཇལ་གི་འདུག་པས་དེ་འདྲ་ལ་དགོངས་པ་ཡིན་མིན་མི་ཤེས། ཞེས་སོགས་ཞལ་འཕྲོས་སུ་ཕེབས་སོ། །དེ་ནས་རང་དགོན་གྱི་བཤད་གྲྭའི་ནང་དུ་བཞུགས་ནས་གསང་སྙིང་སྤྱི་དོན་འོད་གསལ་སྙིང་པོ། དབུ་མ་རྒྱན་གྱི་འགྲེལ་བཤད་འཇམ་དབྱངས་བླ་མ་དགྱེས་པའི་ཞལ་ལུང་། ཡོན་དགའི་ཡོན་ཏན་མཛོད་འགྲེལ། སྡོམ་འགྲེལ་རིག་འཛིན་འཇུག་ངོགས། གསང་སྙིང་ཞག་བཅུ་མ་སོགས་ལ་ཐོས་བསམ་ཟུང་འཇུག་ཏུ་གནང་ནས་རྒྱལ་བསྟན་རིན་པོ་ཆེ་འཛིན་སྐྱོང་སྤེལ་གསུམ་བྱེད་པའི་སྐབས་ཤིག་ན། དུས་འགྱུར་གྱི་འཚུབ་མ་ཆེན་མོས་བསིལ་ལྡན་བོད་ཀྱི་ཡུལ་གྲུ་མཐའ་དག་དབང་དུ་བསྒྱུར་བྱུང་བས་མགོན་པོ་མཆོག་ཉིད་ཀྱང་བཤད་གྲྭའི་ནང་ནས་བཞུགས་སུ་མ་སྟེར་བར་རང་ཁྱིམ་དུ་འབྱོན་དགོས་ཐུག་པ་ཡིན་འདུག་ཅིང་། དེ་ནས་བཟུང་མདོ་ཕྱོགས་ཀྱི་གཞུང་ཆེན་རྣམས་གསན་བཞེས་ཀྱི་དུས་ཚོད་ཀྱང་རེ་ཞིག་མཚམས་བཞག་པར་སྣང་ལ། ༈ དེ་ཡང་མགོན་པོ་གང་གི་ཞལ་ནས། ངེད་ཅག་བཤད་གྲྭ་ལ་བསྡད་ནས་ལོ་གཉིས་ཙམ་ནས་རྒྱ་དམག་ཐོན་ཐལ། རྒྱ་དམག་རྣམས་འདུ་ཁང་དཀར་ལྡིང་མའི་ནང་དུ་བསྡད་པས་ངེད་ཅག་གིས་ཆུ་ལེན་པ་སོགས་གཡོག་ལས་མང་དུ་བྱས། རྒྱ་དམག་མ་འོང་གོང་དུ་འདུ་ཁང་དཀར་ལྡིང་མའི་ཀ་བ་གཅིག་མགོ་མཇུག་རྗེས་འདུག་པས་ལྟས་ངན་པ་ཞིག་ཡིན་ས་རེད། ཕྱིས་སུ་བསྟན་པ་རིན་པོ་ཆེ་ལ་ཆག་འཇིག་དེ་ཙམ་ཞིག་ཐེབས་ཐལ། དེ་ནས་བཟུང་མི་ལོ་ཉི་ཤུ་ལྷག་ཅིག་ལ་ཐོས་བསམ་ལྟ་ཅི་ཡིག་ལྡེབ་གཅིག་ཀྱང་ཉར་མི་ཆོག་པའི་དུས་འགྱུར་གྱི་ཀློང་དུ་ཚུད་པས་སྔོན་ལས་ངན་བསགས་པའི་དབང་གིས་དཔེ་ཆ་ལྟ་བའི་གོ་སྐབས་མ་རྙེད་པ་ཡིན། ཞེས་ཞལ་འཕྲོས་སུ་ཕེབས་སོ། །རིམ་གྱིས་རྒྱ་དམག་གིས་རུ་བ་རྣམས་ཕར་འདེད་དང་ཚུར་འདེད་མང་དུ་བྱས་ཤིང་། གྲལ་རིམ་བཅོས་བསྒྱུར་གྱི་ལས་ཀ་མགོ་བཙུགས་ཏེ་འབྲོག་བདག་དང་འབྲོག་འབྲིང་འབྲོག་ཕྱུག་སོགས་དབྱེ་བ་མང་དུ་བཀར་ནས་རྒྱུ་ནོར་ཡོངས་རྫོགས་གོང་བཞེས་བྱས་པ་སོགས་ཀྱི་དབང་གིས་མུ་གེ་ཆེན་པོ་མཆེད་པ་དང་། རྡུང་རྡེག་དང་འཐབ་རྩོད་ཀྱི་ལས་འགུལ་འཇིགས་ཟང་ངེ་བ་སོགས་ཀྱིས་ཚེ་སྲོག་གི་དབང་པོ་འཕྲོག་ཅིང་། ཁྲི་མུན་དུ་བཙུད་པ་སོགས་བྱས་ཏེ་དམྱལ་བ་ས་སྟེང་དུ་བུད་པ་ལྟ་བུའི་ལས་འགུལ་དེས་མགོན་པོ་མཆོག་ལ་ཡང་སྐུ་ངལ་མང་དུ་གཏད་པ་ཡིན་ཏེ། བསྡུ་རུབ་བྱེད་པའི་སྐབས་སུ་ཕྱུགས་ལུག་གི་གྲངས་ཀ་སོགས་ལ་ཁྱིམ་ཚང་འདི་པ་ཚང་ལས་ལྷག་པའི་ཕྱུག་བདག་ཅིག་ཝ་ཤུལ་གྱི་སྡེ་བའི་ནང་དུ་མེད་པས་ཕྱུག་བདག་གི་ཆ་རྐྱེན་ཚང་ཞིང་། ཁྱད་པར་ཏུ། ཕལ་མོ་ཆེ་ན་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོའི་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ། །ཞེས་པ་བཞིན། བདུད་དང་དམ་སྲིས་ཡིད་བསླུས་ཤིང་ལོག་པར་སྨྲ་བ་ལ་ཕྱོགས་པའི་སྐྱེ་བོ་འགས་ཀྱང་འཐབ་རྩོད་སོགས་བྱེད་དགོས་པའི་གཏམ་ངན་གང་སར་བསྒྲགས་མོད། རྗེ་བླ་མ་མཆོག་གི་ཐུགས་རྗེའི་ར་བ་དཀར་པོའི་སྲུང་གུར་དུ་བཅུག་པའི་དབང་གིས་འཁོར་གཡོག་དང་མི་ཆེན་བླ་དྲག་གི་གྲལ་རིམ་མེད་པ་ཙམ་ལ་བརྟེན་ནས་ཁྱིམ་མི་གང་ལ་རྡུང་རྡེག་ཐེངས་གཅིག་ཙམ་ཡང་མ་བྱུང་བ་ཡིན་འདུག་གོ ༈ །དེ་ཡང་མགོན་པོ་གང་གི་ཞལ་ནས། རིམ་གྱིས་རུ་བ་རྣམས་ཕར་འདེད་ཚུར་འདེད་མང་དུ་བྱས་ཏེ་མཐར་འབྲོག་བདག་རྣམས་བསྡུ་རུབ་རྒྱབ་སོང་བ་རེད། ངེད་ཚང་ནི་རྒྱུ་ནོར་གྱི་ཐད་ནས་ནོར་ནག་སུམ་བརྒྱ་ལྷག་གི་བདག་པོ་ཡིན་མོད་མི་ཆེན་དང་བླ་དྲག་གི་གྲལ་རིམ་མེད་པས་འབྲོག་བདག་མ་བྱས་པ་རེད། འོན་ཀྱང་སྐྲག་སྔངས་སྡར་གསུམ་བསམ་གྱིས་མི་ཁྱབ་པ་རེ་མྱོང་དགོས་ཐུག་ཐལ། ཞེས་སོགས་ཞལ་འཕྲོས་སུ་ཕེབས་སོ། །དེ་ནས་མགོན་པོ་མཆོག་ཉིད་རུ་སྐོར་རེའི་ནོར་ལུག་གི་རྫི་བོར་སྐོས་ཏེ་སྐུ་ངལ་མང་དུ་གཏད་མོད། ཐུགས་སྟོབས་ཆེན་པོས་རྒྱལ་སྲས་བྱང་ཆུབ་སེམས་དཔའི་མཛད་པ་བདག་གིར་བཞེས་ནས་དུད་ཁྱིམ་གཉིས་ལ་གཡག་མུག་གེའི་ཤི་བའི་གློ་བ་ཞིག་ལས་ཟས་གཞན་པ་གང་ཡང་ཟ་རྒྱུ་མེད་པར་ལྟོགས་སྐོམ་གྱི་ན་ཟུག་བཟོད་དཀའ་བ་རེ་བྱུང་ཡང་། སེམས་ཅན་གཅིག་གི་སྲོག་ལ་ཡང་མ་རྒོལ་བར་བདག་བས་གཞན་གཅེས་ཀྱི་བསམ་པ་དྲག་པོས་དུས་འགྱུར་གྱི་འཚུབ་མ་དེ་ལས་བརྒལ་ཐབས་མཛད་པ་ཡིན་ལ། ༈ དེ་ཡང་མགོན་པོ་གང་གི་ཞལ་ནས། དེ་ནས་ང་ལ་མགོ་ཁྲིད་རྣམས་ཀྱིས་སྡེ་བའི་ལུག་མང་གི་རྫི་བོ་ལ་འགྲོ་དགོས་ཟེར་གི ངེད་ཚང་དང་བྱམས་བཟང་ཚང་ཟེར་བའི་དུད་ཁྱིམ་གཉིས་ལ་གཡག་མུག་གེས་ཤི་བའི་གློ་བ་ཞིག་ལས་ཟས་གཞན་པ་གང་ཡང་ཟ་རྒྱུ་མེད་པས་རྫི་བོ་ལ་འགྲོ་དུས་ལུག་གི་རྗེས་མ་ཆོད་ནས་དཀའ་ལས་ཧ་ཅང་མྱོང་ཐལ། དེའི་ཐོག་ལ་ནད་ཀྱིས་ཀྱང་ཧ་ཅང་ན་ཐལ། ནུབ་མོ་བྲོ་ཕྲུག་ཚང་ཟེར་བའི་དུད་ཁྱིམ་ཞིག་གིས་ང་འགྲུལ་བར་བོས་ནས་གྲོ་མ་ནག་པོ་རེ་སྦྱིན་གི སྐབས་དེར་ང་ལ་མཚོན་ན་ཤིན་ཏུ་ལྟོགས་སྐོམ་གྱིས་མནར་གྱིན་ཡོད་པས་བཀའ་དྲིན་ཆེན་པོ་ཡིན། དེ་དུས་མུག་གེས་ཤི་ལ་ཤི་ལ་རེ་བྱས་ཐལ། དགུན་སྨད་དང་དཔྱིད་ཀ་གཉིས་ལ་ལུག་གི་རྫི་བོར་སོང་བ་ཡིན། དེ་ནས་དབྱར་ཁ་རུ་བ་འོམ་ཁོག་ལ་དེད་ཐལ། དེ་དུས་ཀྱང་ལས་བྱེད་པ་འགའ་རེས་ང་ལ་ཆེད་གཏད་དུ་སྡིག་ལ་བཀོལ་བའི་བསམ་སྦྱོར་གྱིས་གཡག་འཚོ་རུ་བཞག་ཐལ། ཞོགས་པ་སྔ་མོ་ནམ་ལངས་དུས་ནོར་ལྷས་ན་ཡོད་མི་ཆོག་ཅིང་། དགོང་མོ་ཡང་སྐར་མ་མ་འཆར་བར་དུ་ལྷས་སུ་འདོགས་མི་ཆོག་ཟེར་གི དབྱར་གཅིག་ལ་དེ་རུ་ནོར་རྫི་ལ་སོང་བ་ཡིན། སྲིང་མོ་སྔ་མོ་ནས་ཡར་ལངས་ཏེ་ང་ལ་ཇ་འདྲ་སྐོལ་འོང་གི རྩམ་པ་ཉུང་ངུ་ཞིག་ལས་ཟ་རྒྱུ་གང་ཡང་མེད་པས་མུག་གེས་འཆི་ལ་ཁར་ཐུག་ཐལ། འདི་སྐོར་རྣམས་སུ་ཉིན་གར་རྫི་བོ་ལ་བུད་འགྲོ་ཚེ་དགོང་མོ་མགོ་ཁྲིད་རྣམས་ཀྱིས་ངེད་ཚང་གི་སྦྲ་བླངས་ནས་བསྡུ་རུབ་རྒྱབ་སོང་ཨེ་ཡོད་ན་བསམ་ནས་རི་མགོ་ནས་ཡང་ཡང་བལྟ་དགོས་ཐུག་གི ང་མཚམས་རེར་གྲོ་མ་འདྲ་རྐོ་སར་སོང་བས་གྲོ་རྐོན་ཐུ་མོ་འདྲ་ཞིག་ཡིན། སྡེ་བ་ཚོས་ལྐོག་ནས་ནོར་ལུག་འགའ་རེ་བཤས་འདུག་ཟེར་མོད། ཕ་རྒན་གྱི་གཙོས་ངེད་ཅག་ཁྱིམ་མི་རྣམས་ཀྱིས་སེམས་ཅན་གཅིག་གི་སྲོག་ལ་ཡང་རྒོལ་མ་མྱོང་། ཞེས་སོགས་ཞལ་འཕྲོས་སུ་ཕེབས། དེ་ལྟར་རྒྱལ་བསྟན་རིན་པོ་ཆེ་སྤྱི་ལ་ཆག་འཇིག་མང་དུ་བཟོས་ཤིང་ཁྱད་པར་དུ་བསྟན་རྩ་རབ་བྱུང་གི་སྡེ་རྣམས་སྐྱ་སར་ཕབས་ཏེ། དམར་སེར་རྟགས་ཀྱི་རྒྱལ་མཚན་བཙན་གྱིས་འདོར་དུ་བཅུགས་ཤིང་། གསུང་རབ་ཀློག་འདོན་དང་ཐོས་བསམ་ལྟ་ཅི་ཡིག་ལྡེབ་སྣ་གཅིག་ཀྱང་ཉར་མི་ཆོག་ཅིང་། བཟླས་བརྗོད་བྱེད་པ་ལྟ་ཅི་ཐ་ན་ཁ་ཙམ་འགུལ་ཡང་ཆད་ལས་འཇིགས་ཟང་ངེ་བ་རེ་བྱེད་པའི་དུས་སུ་ཡང་དམ་ཆོས་འདུལ་བའི་གཞུང་གི་ཕམ་ལྷག་གི་ཉེས་ལྟུང་ལྟ་ཅི་ཆོས་གོས་འབྲལ་བ་ཙམ་ཡང་མ་བྱུང་བར་སྐུ་སྲོག་དང་བསྡོས་ནས་བསླབ་པ་རིན་པོ་ཆེ་དཔྲལ་བའི་མིག་དང་ཁོག་པའི་སྙིང་བཞིན་དུ་བསྲུངས་བར་བྱས་པ་ཡིན་ལ། ༈ དེ་ཡང་མགོན་པོ་གང་གི་ཞལ་ནས། འདི་སྐོར་རྣམས་སུ་རྣམ་སྦྱར་དང་ཤམ་ཐབས་གཉིས་རྟེན་གྱི་ཐོག་ལ་བྱིན་རླབས་སྤོས་ནས་མི་འབྲལ་བར་བྱས་ཤིང་། ཆོས་གོས་ནི་ཉིན་མོར་སྐབས་སྐབས་སུ་མགོ་ཁྲིད་རྣམས་ཁྱིམ་སློག་ཏུ་འོང་གི་འདུག་པས་ཕ་དང་སྲིང་མོ་རྫི་བོ་ལ་འགྲོ་དུས་དེ་དག་ལ་བཅོལ་ཞིང་། རང་འགྲོ་དུས་རང་གིས་ཁུར་ཏེ་སོང་། སྐབས་རེར་མཚན་མོར་ཡང་ཁྱིམ་སློག་པ་འོང་གི་འདུག་པས་མཚན་མོར་ཆོས་གོས་ཁུར་ནས་རི་སྒང་རྣམས་སུ་སོང་ནས་མི་འབྲལ་བར་བྱས་པ་ཡིན། ཞེས་དང་། སྐོར་ཞིག་ཡི་གེ་རྣམས་དང་། ཐུབ་དགའ་ཡིད་བཞིན་ནོར་བུའི་ཕྱག་བརྒྱུད་ནས་ལོན་པའི་མཁན་པོ་ཀུན་དཔལ་གྱི་གཅོད་ཀྱི་ཌ་མ་རུ་དང་། རྗེ་མི་ལའི་སྐུ་འདྲ་ཞིག །གཟན་ཤམ་ཁ་ཤས། ད་དུང་ང་སྔོན་ལྕང་མ་ན་ཡོད་དུས་ཉིན་གཅིག་ལུང་མདའ་རུ་ལྕི་བ་སྒུམ་གི་སོང་བས་ཐོད་པ་ལེགས་པོ་ཞིག་སྙེད་པ་དེ་ལྕི་བ་སྒྱེ་གང་གི་ཁར་བཅུག་ནས་ཁུར་འོང་བའི་ལམ་ནས་སྡེ་བ་ཞིག་གིས་ནོར་མང་པོ་ཡོན་ཁར་འབུལ་བ་དང་གདོང་ཐུག་པས་ཧ་ཅང་རྟེན་འབྲེལ་ཡག་ཐལ་བསམ་པའི་ཐོད་པ་དེ་དང་། དུས་ངན་གྱི་སྐབས་སུ་མཎྜལ་འབུམ་ཐེར་གཅིག་བསོགས་ས་བྱེད་མྱོང་བའི་ལིའི་མཎྜལ་ཟངས་ཀྱི་ལྕགས་རི་ཅན་ཞིག་ཡོད་པ་དང་། ཐང་ག་ཁ་ཤས། ད་དུང་མཁན་པོ་བཙན་ལོས་ཐུབ་དགའ་ཡིད་བཞིན་ནོར་བུའི་ནབ་སྟོད་ཞིག་གནང་བ་དེ་ཐམས་ཅད་རྒྱ་ལག་ཏུ་ཤོར་ནས་གཏོར་སོང་བ་རེད། ཅེས་དང་། འདི་དུས་རྣམས་སུ་བླ་གྲྭ་ཁ་ཤས་རེ་ལྷན་ཏུ་འདུས་ནས་གསང་སྟབས་ཀྱིས་སྤྱི་སྒེར་གྱི་སྲུང་བ་ཅི་རིགས་འདོན་གི་འདུག་ཀྱང་མཚན་མོ་ཞིག་ལ་ཚོགས་བསྐང་གཅིག་འཚོགས་སར་སོང་བ་མ་གཏོགས་གཉོམ་ཆུང་གི་རང་ཚུགས་བཟུང་ནས་བསྡད་པ་ཡིན། རྗེས་སུ་ལས་བྱེད་པ་རྣམས་ཀྱིས་སྤྱི་སྲུང་སོགས་འཚོགས་པའི་དོན་དེ་དག་གོ་ནས་ཁོང་རྣམ་པ་ལ་འཐབ་རྩོད་མང་པོ་བྱས་ནས་བླ་མ་ཨུ་སྐྱབས་ཟེར་བ་ཞིག་ཀྱང་བཀྲོངས་ཐལ། ཞེས་སོགས་ཞལ་འཕྲོས་སུ་ཕེབས། ཡང་དག་པའི་གནད་ལ་བློ་མིག་ལྡོང་བའི་ཕལ་མོ་ཆེའི་མི་རྣམས་ཀྱིས་ནི་སྣམ་ཕྲན་གྱི་ཚལ་བུ་འགའ་ཞིག་གིས་ཡོངས་སུ་བལྟམས་པའི་ངུར་སྨྲིག་གི་གོས་གཟན་ཆུང་ངུ་ཙམ་ཞིག་མཚན་རེ་བཞིན་དུ་སྲོག་ལ་བསྡོས་པའི་ཉར་ཚགས་བྱེད་པ་འདི་ཅི་འདྲའི་བླུན་ཆེ་བ་ལ་སྙམ་པའི་ཀུན་རྟོག་ཅིག་ཀྱང་སྐྱེ་སྲིད་མོད། བློ་ལྡན་གྱི་གང་ཟག་རྣམས་ལ་ནི་དུས་ཀྱི་འཕོ་འགྱུར་ཆེན་པོ་འདི་ལྟ་བུའི་སྐབས་སུ་ཆོས་གོས་འབྲལ་སྤང་ཡན་ཆད་ཀྱི་བསླབ་པ་རིན་པོ་ཆེའི་བཅས་མཚམས་མཐའ་དག་བསྲུངས་བར་བྱས་པའི་རྣམ་ཐར་འདི་གཅིག་པུ་ཙམ་གྱིས་ཀྱང་རྒྱུ་མཚན་ཤེས་པའི་དད་པ་དབང་མེད་དུ་འཁྲུངས་ངེས་སོ། །དེ་ལྟར་ལུང་དང་རྟོགས་པའི་བསྟན་པ་རིན་པོ་ཆེ་སྣུམ་ཟད་ཀྱི་མར་མེ་བཞིན་དུ་གྱུར་ཅིང་། ལེགས་གཉིས་དང་བླང་དོར་འབྱེད་པའི་ཤེས་རབ་མེད་པའི་བླུན་ཞིང་རྨོངས་པའི་ཕལ་མོ་ཆེའི་མི་རྣམས་ལྟ་ཅི་ཅུང་ཟད་རྒྱུ་མཚན་ཤེས་པར་རློམས་པ་རྣམས་ཀྱང་ལྟ་བའི་རི་བོ་འགྱེལ། སྒོམ་པའི་རྒྱ་མཚོ་འཁྲུགས་ནས་ལོག་ལྟའི་བསམ་པ་དྲག་པོས་རྒྱུད་བསླད་ཅིང་ཉམ་ང་བའི་གཡང་ས་ཆེན་པོར་འགྲོ་བའི་སྐབས་སུ་སྐྱབས་ཡུལ་དཀོན་མཆོག་གསུམ་ཁོ་ན་ཐུགས་དམ་དུ་འཛིན་དགོས་པར་དགོངས་ནས་སྐྱབས་འགྲོ་བཞི་སྐོར་མ་བྱེ་བ་གཅིག་ལྗགས་བཟླས་མཛད་པ་དང་། སྐྱབས་འགྲོའི་བསླབ་བྱ་དང་ཕན་ཡོན་སོགས་ཀྱི་ལྗགས་རྩོམ་ཞིག་ཀྱང་གནང་བ་ད་ལྟ་གསུང་ཆོས་ཀྱི་ཁྲོད་དུ་བཞུགས། ཕྱག་ཕྲེང་ཡང་སྐབས་རེར་ལྷམ་གྱི་ནང་དུ་བཅུག་དགོས་པ་ལྟ་བུའི་སྐུ་ངལ་བྱུང་མོད། ཞུམ་པ་མེད་པའི་ཐུགས་སྟོབས་ཆེན་པོས་སྨིན་གཏེར་རྡོར་སེམས་ལ་བསྟེན་པའི་སྔོན་འགྲོ་འབུམ་ལྔ་མའི་བསགས་སྦྱང་གནད་དུ་སྨིན་པར་མཛད། འདི་སྐོར་ཡས་མས་ཤིག་ལ་སྙུན་གཞི་ཅུང་ཙམ་བཞེས་པའི་རྐྱེན་གྱིས་ནོར་ལུག་འཚོ་སྐྱོང་སོགས་ཀྱི་ཕྱག་ལས་ཀྱང་གནང་དཀའ་བར་གྱུར་ཡོད་འདུག་ལ་ཐུབ་དགའ་ཡིད་བཞིན་ནོར་བུ་སོགས་བརྒྱུད་གསུམ་བླ་མའི་གསོལ་འདེབས་སྙན་ཞིང་འཇེབས་པ། མཇལ་བ་ཙམ་གྱིས་མོས་གུས་ཀྱི་སྣང་བ་དབང་མེད་དུ་སྐྱེ་ནུས་པ་རེ་གསུངས་པའང་ད་ལྟ་བཞུགས། འདི་དུས་སུ་སྐྱབས་ཡུལ་དཀོན་མཆོག་གསུམ་སྤངས་ཤིང་རྒྱུ་འབྲས་ཡང་དག་གི་ལྟ་བ་ལས་བློ་ལོག་ན་ཐོབ་ཆེན་དཔོན་གྱི་གོ་ས་སོགས་སྟེར་ངེས་ཤིང་། གལ་ཏེ་ལས་འབྲས་དང་མཆོག་གསུམ་མ་སྤངས་བར་སྐྱབས་སུ་འགྲོ་ཞིང་། བསྙེན་སྒྲུབ་བཟླས་བརྗོད་སོགས་ལ་བརྩོན་པར་བྱས་ན་འཇིགས་རུང་གཤིན་རྗེ་ཁྲོས་པའི་ཁྲིམས་ལས་ལྟ་བུའི་མནར་གཅོད་ཀྱི་འོག་ནས་ཚེ་སྲོག་གི་ཉག་མ་ཕྲ་མོའང་མི་མངོན་པའི་དབྱིངས་སུ་རྒྱས་འདེབས་ངེས་པའི་སྐབས་སུ། ནང་དུ་བྱམས་སྙིང་རྗེ་བྱང་ཆུབ་ཀྱི་སེམས་འབའ་ཞིག་ལ་ཐུགས་དམ་བྱས་ཤིང་། ཕྱི་རུ་རུང་བའི་བྱིན་རླབས་དང་ལྡན་པའི་རྒྱལ་བའི་རྒྱལ་མཚན་གྱི་རྟགས་མ་དོར་བར་འབུམ་ལྔའི་བསགས་སྦྱང་དང་སྐྱབས་འགྲོ་བྱེ་བ་གཅིག་ལྗགས་བཟླས་མཛད་ཅིང་། མཚན་ལྡན་དགེ་བའི་བཤེས་གཉེན་དག་ལས་ཟབ་རྒྱས་ཀྱི་གདམས་པ་དུ་མ་ལྐོག་ཆོས་ཀྱི་ཚུལ་དུ་གསན་ཞིང་ཐུན་མོང་དང་ཐུན་མིན་གྱི་གདམས་པ་མང་པོར་ཉམས་ལེན་རྒྱུན་ཆགས་སུ་གནང་བའི་ཚུལ་རྣམས་ཐོས་ཚེ། སྲོག་དང་བྱ་དགར་དཀོན་མཆོག་གསུམ་མི་སྤངས། །ཞེས་དང་། སྣོད་བཅུད་སྡིག་པས་གང་བའི་ཚེ། །རྐྱེན་ངན་བྱང་ཆུབ་ལམ་དུ་བསྒྱུར། །ཞེས་དང་། དམ་པ་རྣམས་ནི་རྒུད་གྱུར་ཀྱང་། །ཆོས་དང་འགལ་བའི་ལས་མི་བྱེད། །ཅེས་པའི་ལུང་ཚིག་འདི་དག་ཡིད་ཀྱི་མེ་ལོང་གི་ངོས་སུ་ལྷང་ངེར་ཤར་ཞིང་། ཁྱད་པར་ཏུ་རྗེ་ཉིད་ཀྱི་གསུང་ལས། ལས་སྐྱིད་སྡུག་བཟང་ངན་གང་བྱུང་གི་དུས་ན། །སྐྱབས་དཀོན་མཆོག་གསུམ་ལས་རེ་ས་ནི་གཞན་མེད། །དུས་འདི་ནས་བྱང་ཆུབ་མ་ཐོབ་ཀྱི་བར་ཏུ། །ཡིད་ཁྱེད་ཤེས་དད་པས་སྐྱབས་འགྲོ་ལ་འབུངས་མཛོད། །ཅེས་པ་འདི་ཡང་བཅོས་མིན་དུ་དྲན་བྱུང་ངོ་། །དེ་ནས་རིམ་གྱིས་མཉམ་ལས་ཁང་བཙུགས་ནས་མགོན་པོ་མཆོག་འདི་མཉམ་ལས་ཀྱི་རྫི་བོར་ཕེབས་པའི་སྐབས་རྣམས་སུ་རྡོ་ལེབ་ཀྱི་ཐོག་རྣམས་སུ་ས་རིས་ཀྱི་རི་མོ་མཛད་པས་ཚེ་འདིར་བསླབས་མ་མྱོང་བའི་སྐར་རྩིས་ཀྱི་དགོངས་གནད་མང་པོ་ཐུགས་ལ་ཤར་ནས་བྱུང་བས་སྐར་རྩིས་ཀྱི་ལྗགས་རྩོམ་འགའ་ཞིག་གནང་ཡང་ཅུང་ཟད་རེ་འཐོར་ཞིག་ཏུ་་གྱུར་མེད་དམ་སྙམ་ལ། རེ་ཟུང་རེ་ད་ལྟའང་གསུང་ཆོས་ཀྱི་ཁྲོད་དུ་བཞུགས། ཕྱིས་སུ་བླ་མའི་བཀའ་བཞིན་དུ་ཐུན་མོང་རིག་གནས་ཀྱི་སྤྲོས་པ་བསྐྱུངས་བར་བྱས་ནས་འོད་གསལ་ཨ་ཏི་ཡོ་གའི་ཉམས་ལེན་འབའ་ཞིག་ལ་བརྩོན་པ་ཡིན་འདུག་ལ། ༈ དེ་ཡང་མགོན་པོ་གང་གི་ཞལ་ནས། དུས་ངན་གྱི་སྐབས་སུ་ང་རྒྱབ་རྡུང་སོགས་ལ་འཇིགས་ནས་སྐྱབས་འགྲོ་ཏག་ཏག་བཏོན་ནས་བསྡད་པ་ཡིན། སྐྱབས་འགྲོ་བྱེ་བ་གཅིག་ཐུབ་ཐལ། དེ་འཇིགས་སྐྱོབས་ཀྱི་སྐྱབས་འགྲོ་རེད། མཉམ་ལས་ཁང་གི་རྫི་བོར་འགྲོ་ཞོར་དུ་ངས་རྡོ་ལེབ་ཀྱི་ཐོག་ལ་སྐར་རྩིས་ཀྱི་རི་མོ་བྲིས་པས་སྔར་བསླབས་མ་མྱོང་བའི་དོན་མང་པོ་ཤེས་འོང་གི རྗེས་སུ་ཉི་མ་རྒྱ་ལོའི་སྐུ་མདུན་དུ་ཕྱིན་སྐབས་ཤིག་ལ། ངས་ཁོང་ལ་རྩིས་ཀྱི་རི་མོ་དེ་འདྲ་བྲིས་ཚུལ་སོགས་གང་ཡང་མ་ཞུས་ཀྱང་ཐུབ་དགའ་ཡིད་བཞིན་ནོར་བུས་རྩིས་ལ་མཐོང་གཟིགས་ཆེན་པོ་བྱེད་མི་དར་མོ་གསུངས་གི དེ་ནི་རྗེས་སུ་ངས་སྙིང་པོའི་ཉམས་ལེན་རེ་བྱེད་པ་ལ་ཅུང་ཟད་གནོད་དོགས་ཀྱིས་གསུངས་པ་ཡིན་སྙམ། དེ་ནས་བཟུང་སྐར་རྩིས་སོགས་ཐུན་མོང་རིག་གནས་ཀྱི་སྐོར་ལ་སྦྱང་བ་ཆེན་པོ་བྱེད་མ་མྱོང་། ཞེས་ཞལ་འཕྲོས་སུ་ཕེབས། དེ་ནས་མགོན་པོ་གང་ཉིད་མཉམ་ལས་ཁང་གི་འོ་ཆུར་མར་གསུམ་སོགས་ཀྱི་རྩིས་གཉེར་བར་བཞག་པས་དགོན་ནང་དུ་ཕྱག་ཕེབས་མཛད་དེ། ཐུན་མོང་མ་ཡིན་པའི་རིགས་ཀྱི་ཁྱབ་བདག་མགོ་ཚྭའི་ཉི་མ་རྒྱ་ལོ་མཆོག་ལས་སྙན་བརྒྱུད་ཀྱི་གདམས་པ་མང་པོ་ཞུ་བའི་མཐུན་རྐྱེན་འཛོམས་པར་གྱུར་ཏེ། སྤྱིར་མདོ་སྔགས་ཐེག་པ་རྒྱ་མཚོ་དང་། སྒོས་རྫོགས་ཆེན་སེམས་ཀློང་། ཁྱད་པར་དུ་ཨ་ཏི་མན་ངག་སྡེའི་ལྟ་སྒོམ་སྤྱོད་གསུམ་ལ་མངའ་བརྙེས་པ་མཁན་ཆེན་ཉི་མ་རྒྱ་ལོ་（མགོ་ཚྭ་ཉི་མ་རྒྱ་ལོ་མཆོག་ནི་རབ་བྱུང་བཅོ་ལྔ་བའི་མེ་རྟ་ལོར་ཝ་ཤུལ་ལྷ་སྡེ་རུ་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས་ཤིང་། རྒྱལ་ཡུམ་ཨརྱ་ཏཱ་རེ། གསང་བདག་ཕྱག་ན་རྡོ་རྗེ། དཔལ་ལྡན་ཟླ་བ་གྲགས་པ། མཁན་ཆེན་བྱང་ཆུབ་སེམས་དཔའ། དཔལ་ལྡན་ཨ་ཏི་ཤ རེབ་སྐོང་སྐལ་ལྡན་རྒྱ་མཚོ་སོགས་ཀྱི་རྣམ་སྤྲུལ་ཡིན་པར་གསུངས་ཤིང་། སྐུ་གཞོན་ནུའི་དུས་སུ་ཡང་ངེས་དོན་གྱི་དགེ་བའི་བཤེས་གཉེན་མང་པོ་ཞིག་ལས་ཐུན་མོང་དང་ཐུན་མིན་གྱི་གདམས་པ་མང་དུ་གསན། ཁྱད་པར་དུ་དགེ་མང་ཡོན་ཏན་རྒྱ་མཚོ་ལས་རབ་ཏུ་བྱུང་ནས་མཚན་ལ་ཡོན་ཏན་བཟང་པོ་ཞེས་སུ་གསོལ། མདོ་སྔགས་ཀྱི་གདམས་པ་རྒྱ་མཚོ་ལྟ་བུས་རྗེས་སུ་བཟུང་། རྫ་སྟོད་ལྕང་མ་རི་ཁྲོད་ཐོག་མར་ཕྱག་འདེབས་མཛད་ཚེ་དེ་རུ་ཕེབས་པས་ཐུབ་དགའ་ཡིད་བཞིན་ནོར་བུའི་འཁོར་གྱི་ཐོག་མ་དང་། རྫ་སྟོད་ལྕང་མ་ལུང་གི་སློབ་མའི་དང་པོ་ཡིན་པས་ཐུབ་དགའ་ཡིད་བཞིན་ནོར་བུས་ཤིན་ཏུ་ཐུགས་གཙིས་ཆེ་བར་གྲགས་ཏེ། ༈ དེ་ཡང་མགོན་པོ་གང་གི་ཞལ་ནས། ངེད་ཅག་ལྕང་མ་སྒར་ན་ཡོད་ཚེ་ཉི་མ་རྒྱ་ལོ་མཚམས་རེར་མ་གཏོགས་མི་བཞུགས་གི སྔོན་ཆད་ཡུན་རིང་ཞིག་ལ་བཞུགས་མྱོང་ཟིག །ཐུབ་དགའ་ཡིད་བཞིན་ནོར་བུས་ཧ་ཅང་ཐུགས་གཙིས་ཆེ་དར་གི སྐོར་ཞིག་ཐུབ་དགའ་ཡིད་བཞིན་ནོར་བུས་ཞལ་ནས་། རྒྱ་ལོ་ད་སངས་རྒྱས་དངོས་ཡིན་ནི་རེད་གསུངས་གི ཞེས་སོགས་ཞལ་འཕྲོས་ཕེབས་པ་ལྟར་ལ། ཐུན་མོང་མ་ཡིན་པའི་རིགས་ཀྱི་བདག་པོ་དགེ་རྩེ་ཀུན་བཟང་དཔལ་ལྡན་གྱི་མདུན་ནས་རྒྱལ་དབང་ཀློང་ཆེན་པ་ནས་རིག་འཛིན་འཇིགས་མེད་གླིང་བ། དེས་འཇིགས་མེད་རྒྱལ་བའི་མྱུ་གུ དེས་དཔལ་སྤྲུལ་རིན་པོ་ཆེ། དེས་མཁན་ཆེན་ཀུན་དཔལ་མཆོག་ལ་བརྒྱུད་པའི་འོད་གསལ་རྫོགས་པ་ཆེན་པོའི་གདམས་པ་མང་པོ། ཡིག་ཐོག་དང་གཞུང་ཐོག་ལ་མ་ལྟོས་པར་ཞལ་ནས་སྙན་བརྒྱུད་ཀྱི་ཚུལ་དུ་ཟླ་གཅིག་ལྷག་ཙམ་གྱི་ཡུན་ལ་གསན་བཞེས་མཛད་པས་ཟབ་དོན་མ་དང་མཁའ་འགྲོའི་ཐུགས་ཁྲག་གི་དྭངས་མ་དེ་དག་ཕ་ནོར་བུ་ལ་བྱིན་པའི་ཚུལ་གྱིས་གཏད་པ་ནས་བཟུང་འོད་གསལ་ཨ་ཏི་ཡོ་གའི་བྱ་རྩོལ་བློ་འདས་ཀྱི་དགོངས་པ་འབའ་ཞིག་ལ་ཐུགས་དམ་བྱས་པས་གངས་རིའི་ཁྲོད་འདིར་འགྲན་ཟླ་མེད་པའི་རྫོགས་ཆེན་གྱི་ཤིང་རྟ་གཅིག་པུར་གྱུར་ནས་ཞེ་ཆེན་རི་ཁྲོད་སོགས་སུ་བཞུགས་པའི་སྐོར་ཞིག་ལ། ཀོང་སྤྲུལ་རིན་པོ་ཆེ་པདྨ་དྲི་མེད་ལེགས་པའི་བློ་གྲོས་མཆོག་ཁམས་རྫོགས་ཆེན་དགོན་དུ་བྱོན་ནས་མཁས་གྲུབ་གཉིས་ལྡན་གྱི་བླ་མ་དམ་པ། ཨ་བུ་ལྷ་སྒང་དང་། མཁན་པོ་མགོན་རིས་སོགས་ལས་ཟབ་རྒྱས་ཀྱི་གདམས་པ་མང་དུ་ཞུས་ཤིང་། ཉམས་ལེན་གྱི་སྐོར་ལ་གེགས་སེལ་བོགས་འདོན་རྟོགས་འབུལ་ཞུ་བ་སོགས་བྱས་ནས་ཕྱིར་ཕེབས་ཚེ། རྟོགས་ལྡན་པདྨ་འོད་གསལ་ལམ་ཨ་སྐྱོ་བླ་མ་པམ་དགའ་སྐུ་མདུན་དུ་ཕེབས་ནས་ཁྱེད་རྫོགས་ཆེན་དགོན་དུ་བྱོན་ཚེ་མཁས་གྲུབ་དེ་དག་ལ་མཇལ་ལམ་ཞེས་མཁན་སྤྲུལ་འགའི་མཚན་ནས་ཞུས་པས་ཀོང་སྤྲུལ་རིན་པོ་ཆེས་དེ་དག་ཐམས་ཅད་ལ་མཇལ། གདམས་པ་ཡང་མང་དུ་ཐོབ་གསུངས། འོ་ན་མཁན་སྤྲུལ་དེ་དག་གི་ལྟ་བ་ཡང་ཧ་ཅང་མཐོ་ལོས་དར་ལགས་ཞུས་པས། སྤྱིར་ན་ཚོད་མེད་ཅིག་མཐོ་ཡང་ངེད་ཀི་ཕྱིང་རྩག་ཅན་མི་དོ་གི་གསུངས། ཕྱིང་རྩང་ཅན་ནི་ཉི་མ་རྒྱ་ལོ་སྟེ། ཞེ་ཆེན་རི་ཁྲོད་སོགས་སུ་བཞུགས་ཚེ་ཕྱིང་རྩག་ཅིག་མནབ་རྒྱུ་ཡོད་པས་ཟེར་བ་ཡིན་འདུག་གོ། ཡང་སྐོར་ཞིག་མཁྱེན་བརྩེ་ཆོས་ཀྱི་བློ་གྲོས་སོགས་མཁས་གྲུབ་གྱི་སྐྱེས་བུ་དམ་འགའི་མཚན་ནས་ཞུས་ཤིང་དེ་དག་དང་ཕྱིང་རྩག་ཅན་གཉིས་ལ་སུའི་ལྟ་བའི་མཐོ་ཞུས་ཚེ། ཐམས་ཅད་ལ་ངེད་ཀི་ཕྱིང་རྩག་ཅན་གྱི་མཐོ་ནི་རེད་གསུངས་པས། ངེད་ཀི་ཕྱིང་རྩག་ཅན་འདི་དེ་འདྲིའི་རྟོགས་པ་ཞིག་མཐོ་འམ་ལགས་ཞུས་པས། ཀོང་སྤྲུལ་རིན་པོ་ཆེའི་ཞལ་ནས་འདི་ལ་ཚོད་ཅིག་ཡོད་ནི་མ་རེད། སྔ་འགྱུར་རྙིང་མའི་ཕྱོགས་ནས་ཀུན་མཁྱེན་འཇིགས་མེད་གླིང་བ་དེ་འདི་ཡན་དེ་ན་ཡོད་ནི་རེད་ཟེར་དགོས་ནི་ཨེ་མིན། དེ་མིན་ངེད་ཀི་ཕྱིང་རྩག་ཅན་ལས་ལྷག་ཅིག་ཡོད་ནི་མ་རེད། ཅེས་གསུངས་པ་ཨ་སྐྱོ་བླ་མས་འཕན་ཤུལ་བདུད་འདུལ་ལ་གསུངས་ཤིང་དེའི་ཁོང་གི་ཚ་བུ་འགའ་ལ་གསུངས་པ་ལས་བདག་གིས་ཐོས་པ་ཡིན་ནོ། །མདོར་ན་བློ་འདས་རྫོགས་པ་ཆེན་པོའི་ལྟ་བ་མཐར་ཕྱིན་ནས་སྟོན་ནམ་གཡའ་དག་གི་ཀློང་ལྟ་བུའམ་རིན་པོ་ཆེ་གསེར་གླིང་དུ་ཕྱིན་པ་ལྟ་བུའི་ལྟ་བ་ཀློང་དུ་འཕོས་ཚུལ་རྗེ་ཉིད་ཀྱི་ཞེ་ཆེན་ཀོང་སྤྲུལ་ལ་ཕུལ་བའི་རྟོགས་འབུལ་ལས་གསལ་བ་ལྟར་ལ། རྒྱལ་ཡུམ་ཨརྱ་ཏཱ་རེ་ལ་རྩེ་གཅིག་ཏུ་བསྙེན་ནས་ཞལ་གཟིགས་ལུང་བསྟན་སོགས་མང་དུ་བྱུང་ཞིང་། ར་སྐོར་མཁན་པོ་ཐུབ་ནོར་དང་མགོན་པོ་མཆོག་སོགས་སྐལ་ལྡན་གྱི་སློབ་ཚོགས་བགྲང་ལས་འདས་པ་བསྐྱངས་ནས་མཐར་རབ་བྱུང་བཅུ་དྲུག་པའི་ལྕགས་བྱའི་ལོར་ཞིང་འདིའི་གདུལ་བྱ་རྫོགས་ཏེ་རང་སྣང་གཡུ་ལོ་བཀོད་པའི་ཞིང་ཁམས་སུ་ཕེབས་པ་ཡིན་ནོ། །མཆན།）མཆོག་ལས་སྨིན་གཏེར་རྡོར་སེམས་སྔོན་འགྲོའི་ཁྲིད་ཡིག་སོགས་སྔོན་འགྲོའི་སྐོར་དང་། མངའ་བདག་ཉིང་གི་བླ་མ་དམར་ཁྲིད་སོགས་དངོས་གཞི་ཟབ་དོན་གྱི་ཆོས་སྐོར་མང་པོ་དང་ཁྱད་པར་དུ་མཁན་ཆེན་ཀུན་དཔལ་མཆོག་གི་ཞལ་རྒྱུན། སྙན་བརྒྱུད་མན་ངག་གི་རྣོ་སོ་མ་ཉམས་པ་གསང་བའི་མཐར་ཐུག་པ་མང་པོ་སྙིང་ཕྱུང་ལག་མཐིལ་དུ་བཀྲམ་པ་ལྟ་བུའི་ཚུལ་གྱིས་རྗེ་བླ་མ་འདི་ལ་གཅེས་སྐལ་གྱི་ཚུལ་དུ་གདམས་པ་ཡིན་འདུག་གོ ༈ །དེ་ཡང་མགོན་པོ་གང་གི་ཞལ་ནས། ང་མཉམ་ལས་ཁང་གི་སྤོབ་རྒན་ཡིན་ཚེ་ཉི་མ་རྒྱ་ལོའི་སྐུ་མདུན་དུ་སོང་ནས་རྡོར་སེམས་སྔོན་འགྲོའི་ཁྲིད་ཡིག་དང་། ཚིག་གསུམ་གནད་བརྡེག །མངའ་བདག་ཉིང་གི་དམར་ཁྲིད་སོགས་གདམ་ངག་མང་པོ་ཞུས་པ་ཡིན། ཉིང་གི་དམར་ཁྲིད་གསུངས་བའི་སྐབས་ཤིག་ལ་གློ་བུར་དུ། ད་མངའ་བདག་གིས་མི་ཞུ་པད་མས་མི་གནང་གསུངས་ནས་ཕྱག་དཔེ་དེ་བདག་ལ་གཏད་ནས་ད་ལྟ་ཉིད་དུ་ཕྱིར་སོང་གསུངས་བས། བདག་ཕྱིར་སོང་བ་དང་མཉམ་དུ་ལས་བྱེད་པ་འགའ་ཞིག་འོང་ནས་ཁོང་གི་གཟིམ་ཁང་ནང་བསློགས་ནས་ཕྱག་དཔེ་རྣམས་བླངས་སོང་ཟིག །ཉིང་གི་དམར་ཁྲིད་ཀྱི་ཡི་གེ་ངའི་ལག་ཏུ་བཞག་ཡོད་པས་ཤོར་ནི་མ་རེད། རྗེས་ནས་ཡང་དེའི་ཐོག་ནས་གསུངས་ཏེ་མཇུག་གྲུབ་པར་བྱས་པ་རེད། ཅེས་སོགས་ཞལ་འཕྲོས་སུ་ཕེབས། འདི་སྐོར་ཞིག་ལ་གནས་བརྟན་བཅུ་དྲུག་གི་ཞལ་ཐང་ཞིག་ཡོད་པའི་མདུན་དེ་ན་གནས་བརྟན་དབུ་སེ་ཡོ་རེ་བའི་བགྲེས་ཉམས་ཅན་ཞིག་ཡོད་པ་རྩ་བའི་བླ་མ་ཐུབ་དགའ་ཡིད་བཞིན་ནོར་བུ་དངོས་ཡིན་པའི་དད་པ་དང་མོས་གུས་དྲག་པོས་གསང་སྟབས་ཀྱིས་ཕྱག་འབུལ་བཞིན་ཡོད་པའི་སྐབས་ཤིག་ན། གློ་བུར་ཏུ་མཐོན་པོའི་ས་ལ་གནས་པའི་ལས་བྱེད་པ་ལོ་ཙཱ་དཀོམ་དགའ་ཟེར་བ་ཞིག་ཡོད་པ་ཁྱིམ་དུ་འཛུལ་བྱུང་བས་ཐུགས་ཤིན་ཏུ་བསྔངས་ཀྱང་ཡོད་ཚད་མཐོང་ཐོས་སུ་གྱུར་ཚར་བས་ཐུགས་བཀོད་གཞན་མེད་པར་མུ་འཐུད་དུ་ཕྱག་འབུལ་བཞིན་བཞུགས་པས། ཁོས་ནི་མ་མཐོང་བ་ལྟ་བུས་དུད་པ་འཐེན་དགོས་པས་མེ་སློང་སར་འོང་བ་ཡིན་ཟེར་ནས་དུད་པ་ཞིག་འཐེན་ནས་ཕྱིར་སོང་བ་ལས། སྔ་ཕྱི་ཀུན་དུ་མགོན་པོ་མཆོག་ལ་གནོད་པའི་ལས་གང་ཡང་མ་བྱུང་ལ། སྤྱིར་འདི་སྐོར་ལ་ལྷ་སྐུ་བཤམས་པ་དང་ཕྱག་འཚལ་བ་སོགས་ཀྱི་ལས་དངོས་ལྟ་ཅི་ཐ་ན་ཁ་ཙམ་འགུལ་ཡང་བཟླས་བརྗོད་བྱེད་པར་བསྙད་བཏགས་ནས་འཇིགས་སུ་རུང་བའི་ཁྲིམས་ཐག་རེ་གཅོད་ངེས་མོད། མགོན་པོ་གང་གིས་ནི་སྐུ་ཐང་བཤམས་ཤིང་ཕྱག་འབུལ་བཞིན་ཡོད་པ་རྒྱལ་ཁབ་ཀྱི་ལས་བྱེད་ཆེ་གྲས་དེས་མཐོང་ཡང་མ་མཐོང་བའི་ཚུལ་ཀྱིས་ཕྱིར་སོང་ཞིང་། རྗེས་ནས་ཀྱང་གྲགས་འགུལ་གང་ཡང་མ་བྱུང་བ་འདི་ཤིན་ཏུ་ཡ་མཚན་ཏེ། གལ་ཏེ་ཁོ་རང་དོན་དངོས་སུ་དམ་པའི་སྐྱེས་བུ་འདི་དག་ལ་བློ་དཀར་ཞིང་དམ་ཆོས་རྣལ་མའི་གནས་ལ་དད་པ་ལོག་མེད་མཁན་ཞིག་ཡིན་ཏུ་ཆུག་ན་ཡང་། དོན་འདི་དག་གཞན་གྱིས་མཐོང་ཐོས་སུ་གྱུར་ན་རྒྱལ་ཁབ་ཀྱི་ལས་བྱེད་པ་ཞིག་གིས་མི་སེར་གྱི་ནག་ཉེས་ལ་གསང་སྐུང་བྱས་པས་ཁོ་རང་གི་གོ་གནས་ལ་ཧ་ཅང་གནོད་ངེས་པས་མ་མཐའ་ཡང་མགོན་པོ་མཆོག་ལ་འདི་རིགས་གཞན་ལ་གོ་ཐོས་སུ་ཤོར་མི་ཉན་ཚུལ་གྱི་དམ་བསྒྲགས་ཤིག་བྱེད་ངེས་ཀྱང་། མ་མཐོང་བ་ལྟར་བྱས་ནས་ཕྱིར་ཕེབས་སོང་བ་དེ་ཡང་བརྒྱུད་གསུམ་རིག་འཛིན་བླ་མའི་ཐུགས་རྗེ་དང་། རྩ་གསུམ་ཆོས་སྐྱོང་སྲུང་མའི་སྡོང་གྲོགས། མགོན་པོ་མཆོག་གི་གྲུབ་པའི་རྟགས་མཚན་ཞིག་གིས་ཁོས་མ་མཐོང་པའམ། མཐོང་ཡང་བརྗེད་ངེས་ཀྱི་ལས་སུ་གྱུར་བ་ལྟ་བུ་ཞིག་མིན་ནམ་སྙམ་མོད། གང་ལྟར་བླ་མ་དམ་པ་འདི་ལྟ་བུས་ཀྱང་ཐུགས་ལ་བཏགས་པའི་མི་བསོད་ནམས་ཅན་ཞིག་ཏུ་སྙམ་ལ། ༈ དེ་ཡང་མགོན་པོ་གང་གི་ཞལ་ནས། གནས་བརྟན་བཅུ་དྲུག་གི་ཐང་ཤར་ཞིག་གི་མདུན་ངོས་སུ་གནས་བརྟན་རྒན་པ་དབུ་ཡང་སེ་ཡོད་པ་ཞིག་འདུག་པ་ངས་དེ་ཐུབ་དགའ་ཡིད་བཞིན་ནོར་བུ་ཡིན་བསམ་ནས་ཕྱག་འདྲ་འཚལ་གི་ཡོད་ཀྱང་། གློ་བུར་དུ་ཐོང་ཟི་དཀོམ་དགའ་ཁྱིམ་ལ་འཛུལ་བཞག་ཐལ། ཤིན་ཏུ་སྐྲག་ཀྱང་ཡོད་ཚད་རིག་ཚར་བས་གསང་ཐབས་ནི་མེད་པས་མུ་འཐུད་དུ་ཕྱག་འཚལ་ནས་བསྡད་པས་ཁོས་མ་རིག་པ་ལྟ་བུས་ངས་དུ་བ་འཐེན་དགོས་པས་མེ་ཨེ་ཡོད་ཟེར་ཞིང་དུ་བ་འགའ་འཐེན་ནས་ཕྱིར་བུད་ཐལ། རྗེས་ནས་གོ་རྒྱུ་ཚོར་རྒྱུ་གཅིག་ཀྱང་ཡོད་མ་ཐལ། སྙིང་རྗེ་རྒད་པོ་དེ་ང་ལ་དྲིན་ཆེན་ཡིན། ངས་ད་དུང་བསྔོ་སྨོན་བྱེད་བཞིན་ཡོད། ཅེས་སོགས་ཞལ་འཕྲོས་སུ་ཕེབས་སོ། །ཡང་འདི་སྐོར་གྱི་དབྱར་དུས་ཤིག་ལ་ཉི་ཚེ་བའི་སེམས་ཅན་མང་པོའི་ལས་སྣང་གཟིགས་པ་དང་། ཁྱད་པར་དུ་སྲིད་པ་ཐ་མ་བའི་གང་ཟག་ཡིན་པའི་གནད་ཀྱིས་ཞིང་དང་བསམ་པའི་ཁྱད་པར་ལ་ལྟོས་མ་དགོས་པར་མཐོང་ཆོས་མྱོང་འགྱུར་གྱི་འབྲས་བུ་བདག་གིར་བཞེས་ཏེ་སྤྱན་གྱི་སྙུང་གཞི་བཞེས་པའི་ཚུལ་བསྟན་པ་ཡིན་ཞིང་། འདི་སྐོར་རྣམས་སུ་མཁན་ཆེན་ཉི་མ་རྒྱ་ལོ་མཆོག་གིས་ཀྱང་བརྩེ་བའི་ཞལ་གདམས་དང་ལས་འབྲས་ཀྱི་རྣམ་བཞག་མང་དུ་གསུངས་བ་ཡིན་འདུག་ལ། ༈ དེ་ཡང་མགོན་པོ་གང་གི་ཞལ་ནས། བདག་གིས་མཉམ་ལས་ཁང་གི་དབྱར་རྩྭ་རྣམས་ཉི་མར་སྐེམ་པའི་སྐབས་ཤིག་དབྱར་རྩྭ་རེ་ཟུང་གིས་ར་འགུལ་གྱིན་འདུག་པ་ཉི་མ་རྒྱ་ལོ་ལ་ཞུས་པས་དམྱལ་བ་ཉི་ཚེ་བའི་སེམས་ཅན་ཡིན་ནི་རེད། མི་འཁྲུགས་པའི་བསྙེན་པ་བཏོན་ནས་ཕུ་གྱིས་གསུངས་བས་དེ་ལྟར་བྱས་པ་ཡིན། སྐོར་ཞིག་ངེད་ཀྱི་སྲིང་མོའི་བྱིས་པ་ཞིག་གྲོངས་ནས་ཡོད་ཚེ། བྱིས་པ་གཞན་ཞིག་ལ་ཡང་འབྲི་ཁྲིད་མ་ཞིག་གིས་བརྡུང་ནས་གསོན་ལ་རེ་ཐག་ཆད་པ་ཙམ་བྱུང་བས་ཤིན་ཏུ་སེམས་གཅོང་སྟེ། ཉི་མ་རྒྱ་ལོའི་སྐུ་མདུན་དུ་སོང་ནས་ངེད་ཚང་གིས་ནི་ལྷ་མགོ་བཅད་ཅིང་དགོན་རྐུབ་ཕུད་སོང་བ་ལྟ་བུ་ཞིག་རེད། ལམ་འགྲོ་ཤིན་ཏུ་ཞན་འདུག་ཞུས་པས་ཁོང་ཅུང་ཟད་ཐུགས་ཁྲོས་པའི་ཚུལ་གྱིས། སྔོན་གྱི་ལས་ཅི་བསགས་ཅང་ཡོད་ཨེ་ཤེས་ན། དེ་ལ་འཕྲལ་རྐྱེན་རེ་འཛོམ་ཡོང་ཚེ་ལྷ་མགོ་མ་བཅད་དགོན་རྐུབ་མ་ཕུད་ཀྱང་ལས་འབྲས་མངོན་དུ་གྱུར་ཡོང་ནི་རེད་གསུངས་ཤིང་། ཅུང་ཙམ་ནས་ཐུགས་བརྩེ་བའི་རྣམ་པས་བྱིས་པ་གཅིག་པོ་དེ་ལ་སྐྱོན་ནི་མ་རེད་གོ་གསུངས་བས་སེམས་ཤིན་ཏུ་དགའ་ནས་ཕྱིར་ཡོང་བ་ཡིན། བྱིས་པ་ཡང་ཡར་དྲག་ཐལ། ཡང་སྐོར་ཞིག་བདག་གིས་ང་ནི་ངེད་ཚང་གི་ཚ་བོ་དང་ཚ་མོ་རྣམས་ལ་སྙིང་དམར་དང་གཅེས་འཛིན་ཧ་ཅང་ཆེ་བས་ང་ཤི་ཚེ་འདི་དག་ལ་ཆགས་འགྲོ་ན་ཐང་གི་ཞུས་ཚེ། ཁྱོད་ཀྱང་ཆགས་ནི་མ་རེད། ང་ཡང་ཆགས་ནི་མ་རེད་གསུངས་གི ཡང་སྐོར་ཞིག་ཁྱོས་ནི་ཚ་བུ་ཚ་མོ་རབ་གཅེས་དམར་ཆེ་བས་ཆགས་འགྲོ་ན་ཐང་གི་གསུངས་པས་ང་ནི་གཟའ་ཚང་འདི་ཆ་ལ་ཆགས་འགྲོ་ནི་ཡིན་ནས་ཡོད་གི ཞེས་སོོགས་དང་། ཁྱད་པར་དུ་སྐོར་ཞིག་ང་རྫ་ཆུའི་འགྲམ་རྒྱུད་ཅིག་ནས་ཡར་འོང་བའི་ཚེ་ན་སྡོམ་ནག་པོ་ཆེ་ཆུང་ལ་རྟ་ལུད་ཙམ་པ་ལྟ་བུ་ཞིག་མཐོང་བྱུང་བས་རིམ་གྱིས་མགོ་ནང་དུ་ནད་ཀྱིས་ཟིན་ནས་ཟུག་གཟེར་བསམ་ཡུལ་ལས་འདས་པ་མྱོང་ནི་རེད། སྨན་པ་རྣམས་ཀྱིས་བདག་གི་མགོ་སྲུབས་ཀྱང་འཐོར་འདུག་ཡོད་གི་གསུངས་གི དེ་ནས་སྨན་བཅོས་མང་དུ་བྱས་པས་མགོ་གསེང་གི་གཟེར་དེ་མིག་ལ་སྤར་ནས་མིག་ནང་དུ་གཟེར་མང་དུ་བརྒྱུགས་ཏེ། མཐར་འཁྲུལ་བའི་ཉམས་ཤིག་ལ་མིག་ གཡོན་པའི་ནང་དུ ་ཐོག་གིས་རྒྱབ་པའི་སྣང་བ་ཞིག་ཤར་བས་དེ་ནས་བཟུང་མིག་དེ་བསྒྲིབས་སོང་བ་རེད། སྔོན་ལྕང་མ་སྒར་ན་ཡོད་དུས་སྒམ་ཆུང་ངུ་ཞིག་གི་ཐོག་ཏུ་མཆོད་མེའི་སྐོང་ཆུང་ཞིག་ཡོད་པ་བསྒྲོན་ནས་མཚན་མོ་རྣམས་སུ་དཔེ་ཆར་བལྟས་པ་ཡིན། དེ་དུས་མིག་གཡས་པ་འདི་སྒྲོན་མེའི་འོད་ཕོག་སར་ཁེལ་བའི་རྐྱེན་གྱིས་ཅུང་སྡུག་ནི་རེད། གཡོན་མ་ཧ་ཅང་གསལ་ཡང་ལས་ངན་གྱི་དབང་གིས་དེ་སྒྲིབ་ཐལ། ཅེས་སོགས་ཞལ་འཕྲོས་སུ་ཕེབས་པས། བདག་གིས་ཁྱེད་ཀྱི་སྤྱན་སྒྲིབ་པ་འདི་སྔོན་བྱིས་པའི་སྐུ་དུས་སུ་སེམས་ཅན་གཞན་གྱིས་མིག་ཕུད་མྱོང་བའི་རྣམ་སྨིན་གྱི་འབྲས་བུ་ཞིག་ཡིན་ནི་རེད་གསུངས་ཨེ་ཐལ་གོ་ལགས་ཞུས་ཚེ། དེ་འདྲ་ཅང་ཨེ་ཡིན་མི་ཤེས། ལས་ངན་ཐམས་ཅད་ཚེ་འདིར་སྨིན་ཐུབ་པའི་སྐལ་བ་བཟང་པོ་ཞིག་ཅང་ཨེ་ཡོད་ན། གསུངས་བྱུང་བས་འདི་ཅུང་ཟད་སྐྱུང་བའི་ལས་སུ་བྱེད་སྙམ་ཡོད་མོད། མཁན་པདྨ་འོད་གསལ་དང་། མཆེད་གྲོགས་ཕུར་སེང་གཉིས་ཀྱིས་ཐུགས་ཐག་ཆོད་པོས་མགོན་པོ་གང་གིས་སྔོན་ཆད་འུག་འུ་ཆུང་（སྲིན་བྱའང་ཟེར་）ཞིག་གི་མིག་ཕུད་བཏང་བའི་རྣམ་སྨིན་ཡིན་པར་ཁོང་ཉིད་ཀྱི་ཞལ་ནས་དངོས་སུ་ཐོས་མྱོང་ཞེས་གསུངས་ཤིང་། ཁྱད་པར་དུ་མཁན་པདྨ་འོད་གསལ་ནས། ཐེངས་ཤིག་མགོན་པོ་གང་གིས། རྒྱུན་དུ་ཁོང་ལ་ཟ་འཕྲུག་ཅུང་ཟད་ལང་གི་འདུག་ཀྱང་སྔོན་ཆད་ཤིག་རྩག་མང་པོ་བསྐྱུར་མྱོང་བའི་རྣམ་སྨིན་ཡིན་རྒྱུ་རེད། ཅེས་ཞལ་ཏ་ཕེབས་མྱོང་ཞེས་གསུངས་བས་སྔ་མའི་དོན་དེ་ལ་ཡིད་ཆེས་ལྷག་པར་སྐྱེས་ཤིང་། ཁྱད་པར་རྒྱུ་འབྲས་བསླུ་བ་མེད་པའི་གནད་ཀྱིས་སྲིད་པ་ཐ་མ་བའི་གང་ཟག་རྣམས་ནི་བུ་ལོན་ཅན་ཡུལ་གཞན་དུ་འགྲོ་བ་དང་མཚུངས་པར་སྔོན་བསགས་པའི་ལས་ཀྱི་འབྲས་བུ་མཐའ་དག་ཚེ་དེར་སྨིན་པར་འགྱུར་བ་སྟོན་པ་ཐུགས་རྗེ་ཅན་ཡང་སྐུ་རྒྱབ་བསྙུངས་པ་དང་། ཞབས་ལ་སེང་ལྡེང་གི་ཚེར་མ་ཟུག་པ་ལྟ་བུ་ཡིན་པར་མདོ་རྒྱུད་རྣམས་ལས་མང་དུ་འབྱུང་བཞིན་ཡོད་པའི་དོན་དེ་དག་ཡིད་ལ་དྲན་པས་ཁོ་བོ་ཅག་གི་བླ་མ་མཆོག་འདིས་ནམ་རྒྱུན་དམའ་མོའི་ས་བཟུང་། ཧྲུལ་བོའི་གོས་མནབ་ནས་སྲིད་པ་ཐ་མ་བའི་གང་ཟག་ཅིག་ལྟ་ཅི། ཐ་ན་རང་བཞིན་གྱི་བན་རྒན་རྒྱུ་འབྲས་ཅན་ཞིག་གི་ཚོད་ཙམ་ན་ཡང་མེད་པའི་ཁེངས་སྐྱུང་གི་གསུང་འབའ་ཞིག་གནང་བ་ནི། མདོ་སྡེ་རྒྱན་ལས། སྒྱུ་མའི་རྒྱལ་པོ་སྒྱུ་མ་ཡི། །རྒྱལ་པོ་གཞན་གྱིས་ཕམ་པ་ལྟར། །གང་དག་གིས་ནི་ཆོས་མཐོང་བའི། །རྒྱལ་སྲས་དེ་དག་ང་རྒྱལ་མེད། །ཅེས་པ་ལྟར་ལ། དོན་དངོས་སུ་སྐྱེ་མཐའི་བྱང་ཆུབ་སེམས་དཔའ་ཞིག་ཡིན་པའི་གནད་ཀྱིས་ཞིང་དང་བསམ་པའི་ཁྱད་པར་སོགས་ལ་ལྟོས་མི་དགོས་པར། སྐུ་ཚེ་འདིར་བསགས་པའི་ལས་ཀྱི་འབྲས་བུ་མཐའ་དག་མཐོང་ཆོས་སུ་མྱོང་ཚུལ་སྟོན་པའི་མཛད་པ་འདི་གཅིག་པུས་ཀྱང་ཤེས་ལྡན་རྣམས་ལ་ནི་བཅོས་མིན་གྱི་དད་པ་རེ་འཁྲུངས་ངེས་པས། བདག་གིས་ད་ལམ་སྐལ་བ་བཟང་ཞིང་བློ་གྲོས་དང་ལྡན་པའི་གང་ཟག་རྣམས་ལ། ནམ་མཁར་འཕུར་ཞིང་ས་འོག་ཏུ་འཛུལ་སོང་ཟེར་བ་སྟོང་ལས་ལྷག་པའི་ལེགས་སྐྱེས་རྨད་དུ་བྱུང་བ་ཞིག་ཕུལ་ཡོད་སྙམ་པའི་འདུ་ཤེས་དགའ་ཡ་ལེ་བ་ཞིག་ཀྱང་ཐོལ་སྐྱེས་སུ་བྱུང་ངོ་། །བདག་ལ་དེའི་དོན་ཐད་ཀར་དུ་མི་གསུངས་པ་ནི་མགོན་པོ་མཆོག་ནི་རང་གི་ཡོན་ཏན་གསང་བ་ལ་ཐུགས་གཏིང་ནས་དགྱེས་ཤིང་། ཕྲན་བུས་རྗེ་ཉིད་ཀྱི་རྣམ་ཐར་འབྲི་བཞིན་ཡོད་པའི་གནད་ཀྱིས་ཀྱང་ཡིན་པར་ངེས་སྙམ་མོ། །སྤྱན་སྙུང་བཞིན་པའི་སྐབས་སུ་སྐྱེ་འཆི་ལ་དབང་ཐོབ་པའི་དབང་གིས་སྐུ་ཚེའི་འདུ་བྱེད་གཏོང་བར་ཕྱོགས་པའི་ཐུགས་འདུན་དེ་ཉིད། མཁན་ཆེན་ཉི་མ་རྒྱ་ལོ་མཆོག་གི་དུས་གསུམ་སྒྲིབ་མེད་དུ་མཁྱེན་པའི་ཐུགས་ཀྱིས་དགོངས་ནས་གསུང་འཕྲིན་བསྐུར་ཏེ། སྐུ་འདའ་མི་ཉན་པའི་བཀའ་ཕེབས་པ་རེད། ཅེས་མཁན་པདྨ་བཤད་སྒྲུབ་ཀྱི་ངག་ནས་ཐོས་སོ། །གཞན་ཡང་འདི་སྐོར་ཞིག་ལ། ཇི་སྐད་དུ། གང་ན་སྤྲོས་པའམ་རྩོད་པ་ཡོད་པ་ལས། །དཔག་ཚད་བརྒྱ་ཡི་ཕ་རོལ་འགྲོ་བ་མཆོག །གང་ན་ཉོན་མོངས་ཡོད་པ་དེ་དག་ཏུ། །ཡུད་ཙམ་ཞིག་ཏུ་གནས་ཤིང་འདུག་མི་བྱ། །ཞེས་པ་ལྟར་ཕ་ཡུལ་བདུད་ཀྱི་བཙོན་ར་རྒྱབ་ཏུ་བོར་ཏེ། ཚེ་འདིའི་འཁྲི་བ་བཅད་ཅིང་ཇོ་བོ་བཀའ་གདམས་པའི་གཏད་ས་ཆེན་པོ་བཞི་བདག་གིར་བཞེས་ནས་བསམ་ཡས་མཆིམས་ཕུའི་ཡངས་དབེན་དུ་ཕེབས་འཆར་གནང་མོད། སྐུའི་སྲིང་མོ་གཉིས་ཀྱིས་བཤོལ་མ་ཡང་ཡང་བྱས་པའི་དབང་གིས་ཕ་ཡུལ་སྤངས་ཤིང་། སྐུ་ཚེ་དབེན་རི་ནས་སྐྱེལ་བའི་མཛད་པ་དངོས་བདག་གིར་མ་བྱས་སོ། །དེ་ལྟར་རིགས་བདག་ཉི་མའི་མཚན་ཅན་དེས་བརྩེ་བས་རྗེས་སུ་བཟུང་། ཟབ་དགུའི་གདམས་པ་གནང་ནས། མཐར་མགོན་པོ་མཆོག་འདི་དོན་གྱི་རྒྱལ་ཚབ་ཏུ་བཞག་སྟེ་གདུལ་བྱའི་ལྷག་མ་སྐྱོང་དགོས་པའི་བཀའ་ཕེབས་ཚུལ་ནི། དུས་གསུམ་སྒྲིབ་མེད་དུ་གཟིགས་པའི་སྤྱན་དང་ལྡན་པ་གང་གི་མགུལ་དུང་དཀར་གཡས་སུ་འཁྱིལ་བའི་གདངས་ལས། ཕྱིན་ཆད་ཁྱོད་ཀྱིས་འོད་གསལ་ཨ་ཏི་ཡོ་གའི་ཁྲིད་དང་གདམས་པ་གནང་དགོས། ད་སྐབས་ཀུན་བཟང་ཐུགས་ཀྱི་བསྟན་པ་དར་བའི་སྐབས་ཡིན་པས་རྫོགས་པ་ཆེན་པོ་རྟོགས་ངེས་ཡིན་པས་ཁྱོད་ཀྱིས་བཤད་དགོས། ངས་མི་ཤེས་དང་མི་ཉན་ཟེར་མི་ཆོག །སྨིན་གཏེར་རྡོར་སེམས་སྔོན་འགྲོ་འདི་རྒྱུད་ཐག་ཧ་ཅང་ཉེ་བས་ཕྱིན་ཆད་འདི་འདོན་ས་སུ་ལོན་ལ་འདོན་དགོས་གསུངས་ཞིང་། སྣམ་སྦྱར་ཞིག་གནང་ནས་དགེ་མང་དགོན་པར་ཆེད་དུ་མངགས་ནས་ཆེན་པོའི་ས་ལ་བཞུགས་པའི་འདུལ་འཛིན་འགའ་ལ་ཆོས་གོས་འབྲལ་སྤངས་གནང་བ་དང་། ཞེ་ཆེན་སོགས་དགོན་གནས་མང་པོ་ནས་ཕེབས་པའི་བླ་སེར་རྣམས་ལ་དགེ་ཚུལ་དང་བསྙེན་རྫོགས་བསྒྲུབ་པ་སོགས་བྱེད་དུ་བཅུག་ཅིང་། ཕྱིན་ཆད་བསླབ་པ་ཞུ་མཁན་སུ་བྱུང་ཡང་སྡོམ་པ་སྦྱིན་དགོས་པའི་བཀའ་ཕེབས་ཤིང་། དཔེར་ན་གསང་སྔགས་ཀྱི་དབང་གི་སྐབས་སུ་དབུ་རྒྱན་དང་ཅོད་པཎ་གཏད་དེ་རྒྱལ་ཚབ་ཏུ་དབང་བསྐུར་བ་དང་མཚུངས་པར་མགོན་པོ་མཆོག་འདི་ལ་རྗེ་ཉིད་ཀྱི་སྤྱན་ཤེལ་དང་། ནབ་ནང་། གསོལ་ཞལ་རྣམས་ཀྱང་གནང་ཞིང་། ཁྱད་པར་ཏུ་སྐུ་འདའ་ལ་ཉེ་བའི་སྐབས་སུ་ཉིད་ཀྱི་གཟིམས་མལ་དུ་བཞུགས་སུ་གསོལ་བ་སོགས་དོན་གྱི་རྒྱལ་ཚབ་ཏུ་བཀོད་དེ་དོན་ཀུན་འགྲུབ་པའི་མགྲོན་པོ་བཞིན་དུ་གཞི་དབྱིངས་སྤྲོས་པ་དང་བྲལ་བའི་ནང་གསལ་འབྲས་བུ་ལྷུན་འགྲུབ་རིན་པོ་ཆེའི་སྦུབས་སུ་རེ་ཞིག་ངལ་གསོས་པར་གྱུར་ཏོ། །༈ དེ་ཡང་མགོན་པོ་གང་གི་ཞལ་ནས། ཉི་མ་རྒྱ་ལོའི་ཞལ་ནས་རྡོར་སེམས་སྔོན་འགྲོ་འདི་རྒྱུད་ཐག་ཧ་ཅང་ཉེ་བས་ཕྱིན་ཆད་འདོན་ས་སུ་ལོན་ལ་ཐོན་གསུངས་གི བདག་ནི་ཁ་ཐབས་ཞན་པས་འདོན་ས་ཅང་ལོན་རྒྱུ་མ་རེད་སྙམ་ཡང་ཕྱིས་སུ་རང་མགོན་གྱི་དགེ་འདུན་པ་རྣམས་དང་། ཁྲོ་ཤུལ་གོང་མའི་དགེ་འདུན་པ་རྣམས་ལ་སྔོན་འགྲོ་འདི་བཏོན་ཞིང་། དེའི་རྗེས་ནས་རང་ཡུལ་གྱི་དམངས་ཚོགས་ཚང་མ་དང་སྔ་ཕྱིར་ཆོས་གྲལ་དུ་འོང་བའི་སྐྱ་སེར་གྱི་སྡེ་འབོར་ཆེན་ལ་ཆོས་འདི་བཏོན་པས། འདིའི་ཐོག་ནས་འབུམ་ལྔ་བསགས་གྲངས་ཀྱང་སྟོང་ཕྲག་དུ་མར་ལོང་སོང་བས་དེ་ལ་དགོངས་ནི་ཡིན་ས་རེད། ཁྱད་པར་དུ་ཁོང་གིས་ང་ལ་སྣམ་སྦྱར་ཞིག་གནང་སྟེ་དགེ་མང་དགོན་དུ་མངགས་ནས་མཁན་དབང་ལོ་དང་། དབང་སྡེས་གཉིས་ཀྱི་ནབ་ཆོས་འབྲལ་སྤངས་བྱེད་པ་དང་། དགེ་འདུན་པ་འགའ་ལ་སྡོམ་པ་བསྒྲུབ་ཏུ་བཅུགས་ཤིང་། རྗེས་སུ་ཡང་བསླབ་པ་ཞུ་མཁན་སུ་བྱུང་ལ་སྡོམ་པ་སྦྱིན་དགོས་གསུངས་བས། བསླབ་པ་བྱིན་པའི་གྲངས་ཀ་ཡང་ཕལ་ཆེར་སྟོང་ཕྲག་གསུམ་ལ་ཉེ་བ་ཙམ་བྱུང་ཐལ། ད་དུང་ཡང་བླ་མའི་བཀའ་ཡིན་པས་བསླབ་པ་ཞུ་མཁན་སུ་བྱུང་ཡང་ཅི་ནུས་ཀྱིས་སྡོམ་པ་བསྒྲུབ་རྒྱུ་ཡིན། ཞེས་དང་། ཡང་སྐོར་ཞིག་ཉི་མ་རྒྱ་ལོས་ཁོང་གི་གསོལ་ཞལ་དང་། སྤྱན་ཤེལ། ནབ་ནང་རྣམས་བདག་ལ་གནང་གི སྤྱན་ཤེལ་དེ་ཡོད་ན་མིག་འདི་ཡང་མི་སྒྲིབ་ཤས་ཆེ་ཡང་སྤྱན་ཤེལ་དེ་གས་ཆག་ལ་ཤོར་ཐལ། ནབ་ནང་དེ་གྱོན་བསྡད་པ་ཡིན་ན་ཕལ་ཆེར་ནད་འདི་དག་གིས་ཟིན་མི་དགོས་པ་ཡིན་ན་ཐང་ཡང་དེ་ཡང་གྱོན་རྒྱུ་ཅང་མ་ལོན། གསོལ་ཞལ་དེ་དེང་སང་ཡང་ངེད་ཚང་གི་རྒྱུད་ན་ཡོད་རྒྱུ་རེད། སྐོར་ཞིག་ཁོང་གིས་ང་ལ་བཀའ་བཀྱོན་དང་བཅས་ཁྱོད་ཀྱིས་ཁེངས་སྐྱུང་ཏག་ཏག་བྱས་ནས་ཡོད་གི་ཟེར། ཕྱིན་ཆད་དེ་འདྲ་གཏན་ནས་བྱེད་མི་ཆོག །ད་སྐབས་ཀུན་བཟང་ཐུགས་ཀྱི་བསྟན་པ་དར་བའི་སྐབས་ཡིན་པས་རྫོགས་ཆེན་ཤོད་དང་གོ་ནི་རེད་གསུངས་གི ཁོང་སྐུ་འདའ་བའི་སྔར་ཉིན་དེར་བདག་སྐུ་དྲུང་དུ་ཕྱིན་པས། ཁོང་ཉིད་རྒྱུན་དུ་བཞུགས་པའི་གཟིམས་མལ་དེ་རུ་སྡོད་གསུངས་གི བླ་མའི་བཀའ་ཡིན་པས་མ་བསྡད་ན་མི་རུང་སྙམ་ཡང་ཁོང་ཉིད་རྒྱུན་དུ་བཞུགས་པའི་གཟིམས་མལ་དངོས་ཡིན་པས་འདུག་མི་ཕོད་པའི་དབང་གིས་གཟིམས་མལ་གྱི་མཐའི་ར་བའི་ཐོག་ཏུ་བྱམས་འདུག་བྱས་ཏེ་བསྡད་པ་ཡིན། དེའི་ནང་ནས་དངོས་སུ་འདུག་དགོས་རྒྱུ་ཞིག་ཡིན་ན་ཐང་ཡང་ང་ནི་འདུག་མ་ཕོད། ཅེས་སོགས་ཞལ་འཕྲོས་སུ་ཕེབས་སོ། །འདི་དུས་སུ་ཐེངས་ཤིག་རྫ་སྟོད་ལྕང་མ་ལུང་གི་དབེན་རིར་ཕེབས་ཙམ་བྱེད་སྐབས། མི་ལོ་བཅུ་ཕྲག་ལྷག་གི་ཡར་སྔོན་དུ་ལུང་རིགས་ཀྱི་སྒྲ་དབྱངས་སྒྲོག་ཅིང་། འཆད་རྩོད་ཀྱི་གློག་ཞག་འཁྱུགས་པའི་མང་ཐོས་ཚུལ་ལྡན་གྱི་མཆེད་གྲོགས་བརྒྱ་ཕྲག་ལྷག་གིས་ཉིན་མཚན་ཀུན་ཏུ་ཟབ་རྒྱས་ཀྱི་གདམས་པ་ལ་ལོངས་སུ་སྤྱད་ཅིང་། རྗེ་ཉིད་ཀྱིས་ཀྱང་བགྲང་བྱ་བདུན་གྱི་ཡུན་ལ་ཐོས་བསམ་མཛད་པས་ཐུགས་དབུས་ནས་འདོར་མི་ཐུབ་པའི་བརྩེ་འདང་ཟབ་ཅིང་དྲོད་ཁོལ་དང་སྣུམ་ཞག་འཁྱིལ་བའི་ཆོས་གྲྭ་ཉམས་དགའ་བ་དེ་ཉིད་ཤུལ་མ་ཙམ་དུ་གྱུར་ཅིང་། སྔོན་གྱི་དུས་སུ་ཐུགས་ནང་མཐུན་ཅིང་དམ་ཚིག་གཙང་བའི་མཆེད་གྲོགས་དེ་དག་གི་གཟིམ་ཆུང་གི་ཤུལ་ཡང་ས་འབུར་རེ་ཙམ་ལས་མ་མཆིས་ཤིང་། ཁྱད་པར་དུ་ཐུབ་དགའ་ཡིད་བཞིན་ནོར་བུ་མཆོག་གི་དགྱེས་ཞལ་ཟླ་བ་དཀར་པོའི་འཁོར་ཁྱིམ་དེ་ཉིད་མངོན་སུམ་དུ་བཞུགས་ཤིང་། ཟབ་རྒྱས་གདམས་པའི་བདུད་རྩི་མང་པོའི་ཆོས་ཆར་འཛད་མེད་དུ་བསྙིལ་མྱོང་བའི་གཙུག་ལག་ཁང་དེ་ཡང་གྱང་ཆག་ཐ་ཐོར་རེར་གྱུར་ནས་སྟེང་དུ་བྱ་བྲུན་མང་དུ་འཕང་བའི་རྐྱེན་གྱིས་སྟར་ཤིང་སྔོ་སྤུང་ངེ་བ་རེ་སྐྱེས་འདུག་པ་གཟིགས་པས། བགྲང་བྱ་བཅུ་ཕྲག་ལྷག་གི་ཡར་སྔོན་གྱི་གནས་འདིའི་སྣོད་བཅུད་ཐམས་ཅད་ཐུགས་ཀྱི་མེ་ལོང་གི་ངོས་སུ་ལྷང་ངེར་འཁོར་ནས། ཀྱེ་མ་རྩ་བའི་བླ་མ་བཀའ་དྲིན་ཅན་ཐུབ་དགའ་ཡིད་བཞིན་ནོར་བུའི་དགྱེས་ཞལ་འཛུམ་པའི་མདངས་བྱུང་ནས་ཟབ་རྒྱས་ཀྱི་གདམས་པ་མང་པོ་དངོས་སུ་གནང་ཚེ། སྙིང་དང་མིག་ལས་ལྷག་པའི་བརྩེ་བ་ཟབ་ཅིང་། མང་ཐོས་ཚུལ་ལྡན་གྱི་མཆེད་གྲོགས་དེ་དག་དང་ལྷན་ཏུ་གནས་འདིའི་རི་ཆུ་ནགས་གསུམ་ལ་བརྩེ་བ་ཟབ་མོ་ཞིག་ཆགས་ཡོད་ཀྱང་། དེ་རིང་ནི་བླ་མ་དང་མཆེད་གྲོགས་སོགས་མང་ཆེ་བས་ཞིང་བརྗེ་ཚར་ཅིང་། འགའ་ཞིག་ནི་ཁྲི་མུན་དུ་བཙུད་དེ་སྐུ་ངལ་སྣ་ཚོགས་མྱོང་བཞིན་ཡོད་ལ། ཡང་རེ་ཟུང་ནི་བདག་བཞིན་དུ་ཕྱུགས་ལུག་འཚོ་སྐྱོང་སོགས་བྱེད་བཞིན་འཇིགས་སྐྲག་དང་ངལ་དུབ་ཀྱི་ཀློང་ན་འཚོ་བཞིན་ཡོད་པས། གདན་ས་འདིར་ཐོས་བསམ་སྣ་གཅིག་བྱེད་པའི་སྐལ་བ་ལྟ་ཅི་ཐ་ན་མཇལ་སྐོར་ཐེངས་གཅིག་ཀྱང་བྱེད་པའི་གོ་སྐབས་མེད་པས་གནས་འདིའི་རི་ཆུ་ལུང་གསུམ་ཐམས་ཅད་སྟོང་ལྷང་ལྷང་གི་འཇིག་རྟེན་ཞིག་ཏུ་གྱུར་འདུག་པས་འདུས་བྱས་མི་རྟག་པའི་རང་འཚང་འདི་འདྲ་བ་ཞིག་ལོས་ཡིན་སྙམ་པའི་ཐུགས་སེམས་སྐྱོ་དུང་ངེ་བ་ཞིག་འཁྲུངས་བ་དང་ཆབ་ཅིག་ཏུ་གསོལ་འདེབས་དང་སྨོན་ལམ་ཤུགས་དྲག་པ་རེ་བྱས་ནས་དབེན་རི་ལྕང་མ་ལུང་གི་གནས་མཆོག་དེ་ཉིད་རེ་ཞིག་ཕྱིར་མིག་གི་ཀློང་ནས་བསྐྱུར་ཏེ་ཕྱིར་ཕེབས་པ་མིན་ནམ་སྙམ་མོ། །འདི་སྐོར་རྣམས་སུ་ཝ་ཤུལ་བླ་མ་བཟང་རིས་སོགས་ལས་འབྱུང་རྩིས་ཀྱི་སྐོར་དང་དབྱངས་འཆར་སོགས་ལ་ཡང་བསླབ་པར་བྱས་པ་ཡིན་འདུག་གོ །

འཇིགས་རུང་གཡུལ་ཆེན་ངོམ་པའི་མི་བསྲུན་དཔུང་། །

བསིལ་ལྗོངས་བསྟན་འགྲོའི་གཤེད་དུ་ཆས་པ་ན། །

མ་ངེས་ལས་ཀྱི་འབྲས་བུ་མྱོང་བའི་ཕྱིར། །

ངལ་བའི་རྣམ་ཐར་རིང་མོའི་དབུ་ཁྱུད་བྲིས། །

མཐོན་པོའི་ལྟག་རྒྱབ་འཐུག་པའི་ལས་བྱེད་ཚོས། །

གང་ལ་ཆེད་དུ་གཟས་བའི་བསམ་སྦྱོར་གྱིས། །

བསོད་ནམས་བརྒྱ་ལས་གྲུབ་པའི་ཞབས་ཟུང་དེས། །

རི་ལུང་སྟོང་ལ་རི་མོ་འགོད་དུ་བཅུག །

བསགས་པའི་རྒྱུ་ནོར་གོང་མའི་བུ་ཡིས་འཕྲོག །

འདུག་པའི་དགོན་གནས་གྱང་ཧྲུལ་ཧྲིག་གེར་བཏང་། །

འཇིགས་པའི་ང་རོ་སྲོག་གི་ཉག་མར་འཁུ། །

ལྟོགས་སྐོམ་ངལ་བའི་ཁུར་ཆེན་ཐོག་ཏུ་བབས། །

འཚོ་བཅུད་ཟས་ཀྱི་འབྱོར་བས་ཡོངས་བཏང་བས། །

འདུ་འཁྲུགས་འབྱུང་བས་སྐུ་སྲོག་འཕྲོག་སྙམ་བྱེད། །

དེའི་ཚེ་བརྩེ་ཆེན་རླུང་གི་ཤིང་རྟ་དེས། །

སྨོན་འཇུག་ཉིན་བྱེད་དབང་པོ་ཡིད་མཁར་དྲངས། །

མ་རུང་བདུད་སྡེས་ལྗོངས་འདི་ཡོངས་བཟུང་ཞིང་། །

ལྟ་ལོག་འབྱུང་བྱའི་གད་མོ་དགོད་པའི་དུས། །

མཆོག་གསུམ་མགོན་ལ་རེ་བའི་ཐུགས་སྟོབས་དེ། །

རྟ་གདོང་ཁྲོས་པའི་མེ་བཞིན་ཤུགས་ཀྱིས་འབར། །

གང་ཐུགས་ལྷོ་སྤྲིན་ཕྱུག་མོའི་ཕང་པ་རུ། །

མཁྱེན་རབ་བདུད་རྩིའི་ལྷ་ཆབ་མ་ཤོང་ནས། །

ཟབ་དོན་བཅུད་ཀྱིས་གཏམས་པའི་གསུང་གི་ཆར། །

སྙན་འཇེབས་དབྱར་རྔ་ལྡིར་བའི་དབྱངས་སུ་དྲངས། །

སྣོད་བཅུད་སྡིག་པའི་ལས་ཀྱིས་གང་ན་ཡང་། །

རྒྱལ་སྲས་དཔའ་བོའི་ཐུགས་བསྐྱེད་མི་ཉམས་པས། །

འབུམ་ཕྲག་ལྔ་བའི་བསགས་སྦྱང་ཚད་དུ་ཕྱིན། །

དགེ་སྦྱོར་ཆེན་པོའི་མཛད་པ་བདག་གིར་བྱས། །

དཔག་ཡས་ཡོན་ཏན་རྒྱ་མཚོས་ཕྱུག་པའི་སྐུ། །

འཇིགས་རུང་བདུད་པོ་ཁྲོས་པའི་སྡིགས་མོའི་འོག །

ནོར་ལུག་རྫི་བོར་ཕེབས་པའི་མཛད་པ་དེས། །

སེང་གེས་ཁྱི་གཡོག་བྱས་པའི་ཚུལ་ཏེ་མངོན། །

འོན་ཀྱང་ཐུགས་སྟོབས་པདྨ་དཀར་པོའི་ཚལ། །

མི་བསྲུན་བདུད་སྡེའི་འདམ་གྱིས་མ་ཁོག་པར། །

རིགས་ཀྱི་ཁྱབ་བདག་ཉི་མའི་དཀྱིལ་འཁོར་དེ། །

དད་གསུམ་འདབ་སྟོང་བཞད་པའི་རྒྱན་དུ་དྲངས། །

ཀྱེ་མ་དུས་ཀྱི་མུན་པ་འཐིབ་དུས་འདིར། །

རྩོལ་བཅས་ཐེག་པས་གདུལ་བྱ་འདུལ་དཀའ་བས། །

ཐེག་པའི་རྩེ་མོ་འོད་གསལ་གསང་བའི་མཛོད། །

སྐལ་བཟང་ལྷ་ཕྲུག་ཁྱེད་ལ་སྟེར་རོ་གསུངས། །

མངོན་ལྐོག་ཀུན་ཏུ་དམ་པའི་གཤེས་གཉེན་ཚོར། །

ཕྱི་ནང་ཉུལ་བའི་སོ་བ་མང་ན་ཡང་། །

རྩ་གསུམ་དམ་ཅན་སྲུང་མའི་སྡོང་གྲོགས་ཀྱིས། །

ཟབ་རྒྱས་གདམས་པའི་བསྒོ་སྐལ་ལོངས་སུ་སྤྱད། །

ཁྱད་པར་རིགས་བདག་ཉི་མའི་མཚན་ཅན་དེས། །

ཐུགས་བརྩེ་མཚུངས་པ་མེད་པས་བསྐྱངས་བའི་མཐར། །

བརྩེ་བའི་ཞལ་ཏ་ལེགས་པའི་སྐྱེས་དང་བཅས། །

བཟློག་མེད་བཀའ་ཡིས་བསྟན་པ་ཕྱག་ཏུ་གཏད། །

ཅེས་པའང་སྐབས་བསྡུ་བའི་ཚིགས་བཅད་དོ། །

ངེས་དོན་དགེ་བའི་བཤེས་གཉེན་མགོ་ཚྭ་༧མཁན་ཆེན་དཔལ་ལྡན་རྡོ་རྗེའི་རྣམ་པར་ཐར་བ་མདོ་ཙམ་བཀོད་པ་མཚུངས་མེད་རྗེ་བཙུན་བླ་མའི་ཞལ་ལུང་ལས་རང་ཡུལ་དུ་ཕེབས་ཤིང་དུས་འགྱུར་གྱི་ཁྲོད་དུ་སྙིང་པོའི་ཉམས་ལེན་ལ་གཞོལ་ནས་ལྗགས་རྩོམ་ཅི་རིགས་གནང་བ་སོགས་ཀྱི་སྐོར་དེ་རེ་ཞིག་རྫོགས་པར་བྱས་སོ།། །།