དཔལ་སྤྲུལ་ནམ་མཁའ་འཇིགས་མེད་ཀྱི་རྣམ་ཐར་ཆ་ཤས་དང་གསུང་འབུམ་བཞུགས་བྱང་ངོ་མཚར་གསེར་གྱི་སྙེ་མ།

༄༅། །དཔལ་སྤྲུལ་ནམ་མཁའ་འཇིགས་མེད་ཀྱི་རྣམ་ཐར་ཆ་ཤས་དང་གསུང་འབུམ་བཞུགས་བྱང་ངོ་མཚར་གསེར་གྱི་སྙེ་མ་ཞེས་བྱ་བ་བཞུགས་སོ། །

ཐུགས་བསྐྱེད་ཚོགས་གཉིས་རྟ་བདུན་ཤིང་རྟ་ཡིས། །

ཉེར་དྲངས་གཟུགས་སྐུའི་བཀོད་པ་ཉིན་མོའི་མགོན། །

སྲིད་པའི་ལྗོངས་འདིར་ཤར་མཛད་ཤཱཀྱའི་ཏོག །

བསྐལ་བཟང་རྣམ་འདྲེན་བཞི་པ་གང་དེར་འདུད། །

རྒྱལ་ཀུན་གསང་གསུམ་ཡེ་ཤེས་སྒྱུ་མའི་འཕྲུལ། །

མ་ལུས་གཅིག་བསྡུས་སྙིགས་འགྲོའི་མགོན་པོ་མཆོག །

སངས་རྒྱས་གཉིས་པ་མཚོ་སྐྱེས་རྡོ་རྗེ་དེས། །

བྱིན་རླབས་རྟོགས་པའི་ཕ་ཕོག་སྙིང་ལ་སྩོལ། །

སྒྲིབ་གཉིས་དྲི་མའི་ཉེས་ཚོགས་ཀུན་ནས་དབེན། །

ཟབ་གསང་ཉམས་ཀྱིས་རྟོགས་པའི་རྩལ་ཆེན་རྫོགས། །

འབྲེལ་ཚད་རིག་འཛིན་ཞིང་ལ་འགོད་མཛད་པ། །

སྔ་འགྱུར་མཁས་གྲུབ་རིམ་བྱོན་ཚོགས་ལ་འདུད། །

མཁྱེན་པའི་ཡེ་ཤེས་གོམ་སྟབས་གཅིག་གིས་ཤེས་བྱའི་གནས་ཀུན་ས་ལེར་གཟིགས། །

རྩ་ཐིག་རླུང་གི་གནད་ལ་དབང་འབྱོར་མ་དག་ལས་རླུང་རྒྱུ་བ་བྲལ། །

ཟབ་གཏེར་མན་ངག་དབྱར་གྱི་རྔ་ཆེན་ནོར་འཛིན་ཁྱོན་ལ་ཡོངས་སུ་སྒྲོགས། །

མཁས་གྲུབ་རྒྱ་མཚོའི་འཁོར་ལོའི་བསྒྱུར་མཛད་ནམ་མཁའ་འཇིགས་མེད་གཏན་གྱི་སྐྱབས། །

པདྨའི་རྒྱལ་ཚབ་གཏེར་ཆེན་ཆོས་ཀྱི་རྗེ། །

གང་གི་ངོ་མཚར་མཛད་པའི་ཆ་ཤས་དང་། །

གྲོལ་བ་བཞི་ལྡན་དགོངས་གཏེར་ཟབ་མོ་རྣམས། །

ལྷག་བསམ་བཟང་པོས་བཞུགས་བྱང་འབྲི་ལ་མོས། །

ཞེས་བསྟོད་ཕྱག་དང་དམ་བཅའི་ཚིག་ཕྲེང་སྔོན་དུ་བསྟར་ནས་འདིར་གང་གླེང་བར་བྱ་བ་ནི། དེ་ལ་ཨོ་རྒྱན་སངས་རྒྱས་གཉིས་པའི་རྒྱལ་ཚབ་ཆེན་པོ། ངེས་དོན་བསྟན་པའི་སྣང་བྱེད་གཅིག་པུ། ཟབ་གཏེར་མན་ངག་རྒྱ་མཚོའི་མངའ་བདག །གཏེར་ཆེན་ཆོས་ཀྱི་རྒྱལ་བོ་ཁྲག་འཐུང་ནམ་མཁའ་འཇིགས་མེད་པདྨ་མཁའ་ཀློང་ཡངས་བ་རྩལ་འདི་ཉིད། ངེས་པའི་དོན་དུ་སྐུ་གསུམ་རྒྱལ་བ་ཀུན་དང་རྣམ་དབྱེར་མ་མཆིས་པའི་བདག་ཉིད་ཅན་ཡིན་ཀྱང་། གདུལ་བྱ་གཞན་སྣང་གི་ངོ་ཁར་གང་ལ་གང་འདུལ་གྱི་མཛད་པ་མཐའ་ཡས་ཤིང་འགྲོ་འདུལ་སྤྲུལ་བའི་ཟློས་གར་ཉིད་ཀྱི་ཞལ་གསུང་སྐྱེ་ཕྲེང་གསོལ་འདེབས་ལས་གསལ་བ་ལྟར་བསྟན་ཚུལ་མཛད་པའི་ནང་ཚན། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོའི་སྐུ་སྐྱེ་དེ་མ་ཐག་པ་ཡིན་པར་ཡོངས་ལ་གྲགས་པ་ལྟར། སྔོན་ཁྲག་འཐུང་བདུད་འཇོམས་གླིང་པ་རྫ་ཆུ་ཁར་ཕེབས་ནས་དཔལ་དགེ་རིན་པོ་ཆེ་དང་མཇལ་བར་དགོངས་དུས་དཔལ་དགེ་ཚང་གིས་དུད་ཁྱིམ་ཞིག་ན་ཆོ་ག་ཞིག་གསུང་ནས་ཚོགས་འཁོར་གྱི་མགོ་ན་ཐུག་ཡོད་པ་དང་ཁེལ། སྐབས་དེར་དཔལ་དགེས་ངའི་ཚོགས་དེ་བདུད་འཇོམས་ལ་དྲོངས་ཐོང་། ངེད་གཉིས་ཕ་བུ་ཞིག་ལ་འགྱུར་བའི་རྟེན་འབྲེལ་ཡོད་ཅེས་གསུངས་བ་དང་མཐུན་པར་རྗེས་སོར་སྤྲུལ་སྐུ་ནམ་འཇིགས་འཁྲུངས་ཞེས་པའི་ལོ་རྒྱུས་འདུག །ཡང་ཐེངས་ཤིག་རྫ་རྒྱལ་དགོན་དུ་ནམ་མཁའ་འཇིགས་མེད་ཉིད་ཀྱིས་སེར་སྐྱ་མང་པོར་ཀར་གླིང་ཞི་ཁྲོའི་དབང་གནང་བའི་ཞལ་འཕྲོས་སུ། དཔལ་སྤྲུལ་རིན་པོ་ཆེའི་སྐུའི་སྤྲུལ་བ་ཐུབ་དགའ་ཡིད་བཞིན་ནོར་བུ་ཡིན་པས་སྐུ་མཛད་པའི་ཡོན་ཏན་དང་འགྲོ་དོན་རྒྱ་ཆེ་བ་ཡིན། གསུང་གི་སྤྲུལ་བ་དགེ་གོང་བོད་པ་སྤྲུལ་སྐུ་ཡིན་པས་མདོ་སྔགས་རིག་པའི་གནས་ཀུན་ལ་འགྲན་ཟླ་བྲལ་བའི་མཁས་པ་ཆེན་པོ་ཡིན། ང་ནི་ཐུགས་ཀྱི་སྤྲུལ་བ་ཡིན་པས་རྣམ་པར་མི་རྟོག་པའི་ཏིང་ངེ་འཛིན་ལ་དབང་འབྱོར་བས། དོན་ལ་ངེས་པའི་གདེངས་རྙེད་ན། །ཐུགས་ལས་ཆོས་གཏེར་འབུམ་ཕྲག་བརྡོལ། །ཞེས་གསུངས་བ་ལྟར་དག་སྣང་དགོངས་གཏེར་གྱི་ཆོས་བཀའ་རབ་འབྱམས་ལ་དབང་བ་ཡིན་པས་འདི་དག་ངེད་གསུམ་གྱི་སོ་སོའི་ཐུན་མོང་མ་ཡིན་པའི་ཁྱད་ཆོས་སུ་གྲུབ་པ་ཡིན། རྗེས་སོར་ངེད་ཚོ་སྐུ་འདའ་བའི་སྐབས་སུ་ཡང་། དཔེར་ན་མི་ཕལ་བ་ཞིག་ཤི་བའི་དབང་དུ་བཏང་ན་ཐོག་མར་ལུས་ཀྱི་འགྲོ་འདུག་སོགས་བྱ་བྱེད་ཀྱི་ནུས་པ་ཉམས་པ་ལྟར་དང་པོ་ཐུབ་དགའ་ཚང་སྐུ་འདའ་རྒྱུ་རེད། དེ་ནས་མི་དེའི་སྨྲ་བརྗོད་ཀྱི་ནུས་སྟོབས་ཤོར་བ་ལྟར་བོད་པ་སྤྲུལ་སྐུ་འདའ་རྒྱུ་རེད། དེ་ནས་མཐའ་མཇུག་ཏུ་ཡིད་ཤེས་སྲོག་གི་དབང་པོ་འགག་པ་ལྟར་ཁོང་རྣམ་པ་གཉིས་ཀྱི་འཕྲོ་ནས་ང་རང་ཤི་རྒྱུ་ཡིན་ནི་རེད། ཅེས་གསུངས་བ་ཇི་ལྟ་བ་བཞིན་རྗེས་མ་ཁོང་རྣམ་པ་གསུམ་སྐུ་འདའ་སྔ་ཕྱི་དེ་བཞིན་བྱུང་བར་དངོས་སློབ་དག་གི་ཞལ་རྒྱུན་དུ་འདུག །འོན་ཀྱང་སྐབས་འགར་ཉིད་ཀྱི་ཞལ་འཕྲོས་སུ་དཔལ་སྤྲུལ་རིན་པོ་ཆེའི་མཚན་གྱི་ཅོད་པཎ་གསོལ་བ་ནི་དགོས་དབང་གིས་ཡིན་པ་ལས། ངེས་པའི་དོན་དུ་ཁོ་བོ་ལྷ་བཙུན་ནམ་མཁའ་འཇིགས་མེད་ཀྱི་ཡང་སྤྲུལ་ནམ་མཁའ་འཇིགས་མེད་ཀྱི་མཚན་ཅན་བཞི་བརྒྱུད་པའི་ཐ་མ་ཡིན། ངས་ལྷ་བཙུན་ནམ་མཁའ་འཇིགས་མེད་ཀྱི་སྐྱེ་བ་བཞེས་པའི་དུས་སུ་ཕག་མོའི་ཌཱ་རིའི་སྒྲ་ལས་རིག་འཛིན་སྲོག་སྒྲུབ་ཅེས་པའི་ཐུགས་གཏེར་ཡང་བྱུང་བ་ཡིན་ཞེས་གསུངས་སྲོལ་འདུག །དེ་ལྟ་བུའི་གཏེར་ཆེན་མཆོག་གི་རིགས་རུས་ཀྱི་ཆེ་བ་དང་སྐུ་བལྟམས་ཚུལ་ནི། ཁྲག་འཐུང་བདུད་འཇོམས་རྡོ་རྗེའི་རྣམ་ཐར་ན་གསལ་བར་བསྟན་པ་ལྟར། སོ་ཟུར་གནུབས་གསུམ་སྔགས་པའི་རྒྱལ་བོར་གྲགས་པའི་ནང་ཚན། པདྨའི་དངོས་སློབ་གནུབས་ཆེན་སངས་རྒྱས་ཡེ་ཤེས། དགེ་སློང་ནམ་མཁའི་སྙིང་པོ། གནུབས་སྟོན་ཡོན་ཏན་རྒྱ་མཚོ་སོགས་གྲུབ་པ་ཐོབ་པ་བཅོ་བརྒྱད་བར་མ་ཆད་དུ་བྱོན་པའི་གནུབས་རིགས་ཀྱི་རྒྱུད་དུ་བྱུང་བ། གར་དབང་བདུད་འཇོམས་གླིང་བ་ཞེས་མཚན་སྙན་གྱི་གྲགས་པ་སྲིད་ན་མཐོ་བ། འབྲེལ་ཚད་དོན་ལྡན་གྱི་སྤྲུལ་བའི་གཏེར་སྟོན་ཆེན་པོ། སྐུ་དངོས་ཀྱི་སློབ་མ་འཇའ་ལུས་པ་ཆེན་པོ་བཅུ་གསུམ། འབྲིང་བ་ལྔ་བརྒྱ། ཐ་ན་ཞབས་འདེགས་པ་དང་། གསུང་ཐོས་པ་ཙམ་ལ་ཡང་འཆི་ཁར་བླ་མའི་སྣང་བ་ཤར་ནས་དྲོད་རྟགས་མེད་པ་ནི་སྲིད་མཐའ་མ་ཁེགས་ཙམ་དུ་གྱུར་བ་གང་གི་རིགས་ཀྱི་མྱུ་གུ་འཛིན་པ། ཕྱི་ལྟར་གུ་རུ་མཚན་བརྒྱད། ནང་ལྟར་བྱང་སེམས་བརྒྱད། གསང་བ་སྒྲུབ་པ་བཀའ་བརྒྱད་ཀྱི་ཟློས་གར། རྡོ་གྲུབ་བསྟན་པའི་ཉི་མ་སོགས་རིགས་སྲས་བརྒྱད་ཀྱི་ནང་ཚན་༼ཁྲག་འཐུང་བདུད་འཇོམས་གླིང་པའི་གདུང་སྲས་གུ་རུ་མཚན་བརྒྱད་ཀྱི་སྤྲུལ་བའི་རོལ་གར་བརྒྱད་ནི། མཁའ་འགྲོ་ཆེ་བ་ཁྲ་བཟའ་བསོད་ནམས་མཚོའི་སྲས་ཆེ་བ་རྡོ་གྲུབ་བསྟན་པའི་ཉི་མ། ཆུང་བ་ཚ་སྤྲུལ་པདྨ་རྡོ་རྗེ་དང་། མཁའ་འགྲོ་འབྲིང་བ་སྐེ་བཟའ་སངས་རྒྱས་མཚོ་ལ་སྲས་ཆེ་བ་མཁྱེན་བརྩེ་ཡེ་ཤེས་རྡོ་རྗེའི་ཡང་སྤྲུལ་འཛམ་གླིང་དབང་རྒྱལ། འབྲིང་བ་ཆེ་ཡོལ་རིག་འཛིན་ཆེན་པོའི་ཡང་སྤྲུལ་མི་ཕམ་རྡོ་རྗེ། ཆུང་བ་ཀློང་ཆེན་ཡང་སྤྲུལ་དྲི་མེད་འོད་ཟེར་དང་། མཁའ་འགྲོ་ཆུང་བ་ཨ་སྐྱབས་བཟའ་སྐལ་བཟང་སྒྲོན་མ་ལ་སྲས་ཆེ་བ་ཨ་པང་སྐུ་ཆེན་ཡང་སྤྲུལ་ལྷ་ཆེན་སྟོབས་རྒྱལ། འབྲིང་བ་དཔལ་སྤྲུལ་ཡང་སྲིད་ནམ་མཁའ་འཇིགས་མེད། ཆུང་བ་གསང་བདག་རྡོ་རྗེ་དགྲ་འདུལ་བཅས་ཡིན་པར་གསུངས།༽གུ་རུ་ཉི་མ་འོད་ཟེར་གྱི་ཕྲིན་ལས་ཀྱི་རོལ་གར། གྲུབ་དབང་ནམ་མཁའ་འཇིགས་མེད་མཆོག །རྒྱལ་ཡུམ་ཏཱ་རེའི་རྣམ་འཕྲུལ་མཁའ་འགྲོ་ཨ་སྐྱབས་བཟའ་སྐལ་བཟང་སྒྲོན་མའི་སྲས་སུ་ཕྱི་ལོ་༡༨༨༩བོད་རབ་ཚེས་ས་མོ་གླང་གི་ལོར་མདོ་ཁམས་གསེར་མོ་ལྗོངས་བླ་རུང་རི་ཁྲོད་དུ་ངོ་མཚར་བའི་རྟགས་མཚན་དང་བཅས་ཏེ་སྐུ་བལྟམས་སོ། །སྐུ་ན་ཆུང་ངུའི་དུས་སུ་ངོ་མཚར་བའི་མཛད་པ་ལྷན་སྐྱེས་སུ་མངའ་ཚུལ་ནི། ཉིད་ཀྱི་ཞལ་གསུང་རྣམ་ཐར་གསོལ་འདེབས་ལས། བལྟམས་ཚེ་ཉེ་འཁོར་རླུང་གི་རྒྱལ་མཚན་དང་། །རྫི་ཕྱོགས་དཔག་ཚད་བསུང་ཞིམ་གདུགས་ཀྱིས་འགེབས། །ཟླ་བ་གཅིག་ནས་འཕགས་པས་རྗེས་སུ་བཟུང་། །མངལ་གྱི་དྲི་མ་མེད་ལ་གསོལ་བ་འདེབས། །ཞེས་གསུངས་བ་ལྟར་སྐུ་འཁྲུངས་ནས་ཞག་བདུན་ཕྲག་གཅིག་གི་རིང་ལ་གཟིམས་སྦྲའི་སྟེང་དུ་འཇའ་ཤར་བ་དང་།མེ་ཏོག་གི་ཆར་བབས་པ། ཁོར་ཡུག་ཏུ་དྲི་བཟང་གིས་ཁྱབ་པ་སོགས་ལེགས་པའི་རྟགས་མཚན་མང་དུ་བྱུང་བ་དང་།ཟླ་གཅིག་ཙམ་གྱི་རྗེས་ནས་འཕགས་མཆོག་སྤྱན་རས་གཟིགས་ཀྱིས་ཞལ་གཟིགས་ཤིང་བྱིན་གྱིས་བརླབས་པ་སོགས་ངོ་མཚར་བའི་བཀོད་པ་མང་དུ་སྣང་། ཡང་རྣམ་ཐར་གསོལ་འདེབས་ལས། ལོ་གསུམ་དུས་ནས་ཐབས་ཤེས་ཆོས་གཏེར་སྒྲོམ། །ཨ་ལི་ཀཱ་ལི་མ་བསླབས་རང་ཤེས་ནས། །སྐྱེ་བོ་ཀུན་གྱི་བླ་དྭགས་དེར་ཆགས་པའི། །མཁྱེན་གཟིགས་སྦས་གསང་བརྟོལ་ལ་གསོལ་བ་འདེབས། །ཞེས་པ་ལྟར་དགུང་ལོ་གཅིག་ཙམ་གྱི་དུས་ཨ་ར་པ་ཙ་བཟླ་བ་དང་། ལོ་གསུམ་ལོན་སྐབས་ཨ་ལི་ཀཱ་ལི་མ་བསླབས་པར་རང་ཤུགས་སུ་ངག་ནས་རྡོལ་བ་སོགས་ཀྱི་ངོ་མཚར་བའི་མཛད་པ་མང་དུ་བྱུང་བ་དང་། ཡང་རྣམ་ཐར་གསོལ་འདེབས་ལས། ཀློག་སློབ་མཁན་པོ་རིག་འཛིན་རྡོ་རྗེ་ཡིས། །བྱིས་པའི་ངང་ཚུལ་འགོག་ཕྱིར་ཕོ་བྲང་གི །སྒོ་དང་སེང་སྐར་གཏན་པར་བཅད་གྱུར་ཀྱང་། །ཟང་ཐལ་རང་བྱོན་མཛད་ལ་གསོལ་བ་འདེབས། །ཞེས་པ་ལྟར་རིམ་གྱིས་ཀློག་སློབ་མཁན་པོ་རིག་འཛིན་རྡོ་རྗེའི་མདུན་ནས་ཡི་གེ་སྦྱོང་སྐབས། བྱིས་པའི་སྤྱོད་པ་འགོག་ཕྱིར་སྒོ་དང་རབ་གསལ་བཅད་ནས་ཁང་སྟོང་ནང་བཅུག་སྐབས། ཁོང་གིས་མིག་བཙུམ་སྟེ་དཀོན་མཆོག་གསུམ་ལ་གསོལ་བ་བཏབ་ནས་རྒྱུག་པས་ཕྱི་རོལ་ལ་ཐོན་སོང་གསུངས་པ་དང་། ཡང་རྣམ་ཐར་གསོལ་འདེབས་ལས། བརྟུལ་ཞུགས་མཆོག་ཏུ་གྲུབ་པའི་དབང་འབྱོར་ལས། །གྲོགས་ཀྱི་དམ་པ་ངག་དབང་ཕྲིན་ལས་མདུན། །བྱིའུ་བསད་དེ་སླར་ཡང་ཞག་གི་མཐར། །བསླང་བས་ངོ་མཚར་འབར་ལ་གསོལ་བ་འདེབས། །ཞེས་པ་ལྟར་སྐབས་ཤིག་ན་བྱེའུ་དང་དམར་ཞིག་ལ་རྡོ་བརྒྱབ་པས་ཤི་སོང་བ། རྟ་ཤུལ་འཕན་ཁོ་ཟེར་བས་ཨ་ཁ་འདི་འདྲའི་སྤྲུལ་སྐུ་མཚར་བོ་ཞེས་ཁྲེལ་དགོད་བྱས་པས་ཁོང་ངོ་ཚ་ལྟ་བུ་སྐྱེས་ནས་བྱེའུ་ཡི་རྣམ་ཤེས་ཕུང་བོ་ལ་ཕྱིར་བསྟིམས་པས་བདེ་བར་སྔར་བཞིན་འཕུར་བར་མཛད་པས་ཁོ་རང་ངོ་མཚར་དུ་གྱུར། ཡང་ཀརྨ་དབང་དྲག་ཟེར་བའི་གྲོགས་པོ་ཞིག་དང་ལྷན་ཅིག་ཡོད་སྐབས་ཕུག་རོན་ཞིག་ལ་མདའ་ཞིག་གིས་བརྒྱབ་ནས་བསད་པར་བྱས། ཕྱི་ཉིན་བདེ་བར་སླར་སོས་པའི་ཐུགས་བསྐྱེད་གནང་བས་སྔར་བཞིན་གྱུར་བ་དང་། དཀོན་མཆོག་བསྟན་འཛིན་ཟེར་བ་མྱུར་དུ་འཆི་བར་ལུང་བསྟན་པ་ལྟར་གྱུར་བས་ཐམས་ཅད་ཡིད་ཆེས་ཀྱི་གནས་ལ་བཀོད། ཡང་རྣམ་ཐར་གསོལ་འདེབས་ལས། ཕ་ཅིག་དམ་པ་བདུད་འཇོམས་རྡོ་རྗེ་ཡིས། །སྐལ་བཟང་སྟོང་ལ་ཆོས་འཁོར་བསྐོར་བའི་དབུས། །ཐོག་བཅས་མཁར་གྱི་རྩེ་ནས་འཕུར་རྩལ་ཕྱིན། །ཡང་དག་ལྟ་བ་བསྐྱེད་ལ་གསོལ་བ་འདེབས། །ཞེས་གསུངས་པ་ལྟར་ཕ་ཡབ་བདུད་འཇོམས་ཚང་གིས་སྐབས་ཤིག་ལ་ཡུལ་མགོ་ལོག་ཏུ་ཆོས་གསུང་སྐབས། སྲས་ཁོང་ཉིད་དགུང་ལོ་གསུམ་གྱི་དུས་སུ་ཁང་བ་གཉིས་བརྩེགས་ཅན་སུམ་ཐོག་གི་ཚད་ཡོད་པ་ཞིག་གི་སྟེང་ན་ཡོད་ཚེ་དེར་བྱི་ལ་ཞིག་བྱུང་བ་ཉམས་མཚར་གྱིས་བདས་པས་དེར་ཡོད་ཀྱི་མི་ཚང་མས་སྲས་མཁར་ཐོག་ནས་ལྷུང་སོང་ཞེས་ཅི་བྱ་གཏོལ་མེད་དུ་གྱུར་སྐབས། ཁོང་ཉིད་ཁྲོམ་རྣམས་ཀྱི་སྟེང་གི་ནམ་མཁའ་ནས་ལྡིང་སྐོར་ལན་གསུམ་མཛད་དེ་ཕྱིར་མཁར་ཐོག་ཏུ་འཕུར་སྟབས་ཀྱིས་བྱོན་པར་མཛད་པ་རྟ་ཤུལ་རྒན་རིམ་མང་པོས་མཐོང་བྱུང་བས་ཀུན་ཀྱང་ཡ་མཚན་གྱི་གནས་ལ་བཀོད་པར་གྲགས།

རིམ་གྱིས་རྫ་རྒྱལ་དགོན་དང་ལས་སྨོན་རྟེན་འབྲེལ་གྱི་ཆེ་བ་དུས་སུ་སྨིན་ཏེ་འབྲེལ་བ་བྱུང་ཚུལ་ནི། ཐོག་མར་སྐྱེས་བུ་དམ་པ་མང་པོའི་དགོངས་ཉམས་དང་ལུང་བསྟན་ལྟར་ཡིག་འཕྲིན་སོགས་ཀྱི་ལམ་ནས་ཀྱང་དཔལ་སྤྲུལ་རིན་པོ་ཆེའི་ཡང་སྲིད་གང་ཉིད་ལ་རྫ་རྒྱལ་སྡེ་དགོན་གཉིས་ཀྱིས་སྐུ་བདག་ཅི་རིགས་བྱས་ཚུལ་འདུག་ལ། ཁྱད་པར་གཏེར་ཆེན་བདུད་འཇོམས་ཡུམ་སྲས་དང་བཅས་པ་དགོས་པའི་གནད་མང་པོ་ལ་གཟིགས་ནས་རྫ་ཆུ་ཁར་བསྐྱར་དུ་ཕེབས་སྐབས། མཚམས་སྤྲུལ་ཀུན་བཟང་བདེ་ཆེན་རྡོ་རྗེ་མཆོག་དང་ཁོང་གི་མཁའ་འགྲོ་ཡེ་ཤེས་དབང་མོ་གཉིས་དགོན་པའི་ཉེ་འགྲམ་དུ་ནག་སྒར་བྱས་ནས་བཞུགས་ཡོད་པ་ལ། ནུབ་གཅིག་མཚན་དཀྱིལ་ཙམ་ལ་ཁོང་གི་མདུན་གཉེར་ཨ་མཆོད་དཔལ་ལོ་ལ་བོས་ནས། མྱུར་དུ་འབྲོག་ཐོག་ལ་ཆ་དང་འཕྲིན་འཕྲོད་དུ་ཆུགས། སང་ཉིན་སྐྱ་མི་བརྒྱ་མན་ལ་མི་ཉུང་བ་ཞིག་ཉི་རྩེ་དགོན་ཐོག་ལ་ཤར་དུས་འཛོམས་ཐུབ་པ་བྱེད་དགོས་གསུངས། ཕྱིའི་ནངས་བར་ཁྲོམ་རྫ་དཔོན་པོ་ལི་ཐར་སོགས་སྐྱ་མི་བརྒྱ་ལྷག་འཛོམས་བྱུང་བ་དང་། དགེ་སྐོས་སོགས་ཀྱིས་རྒྱ་གླིང་དུང་དམར་སོགས་མཆོད་བསྐོར་ཆ་ཚང་དང་། ཁ་བཏགས། ཇ་བསྐོལ་ཆས་སོགས་ཁུར་ནས་འགྲོ་དགོས་ཚུལ་གསུངས་བ་ལྟར་ཐམས་ཅད་ལམ་ལ་ཆས་ཤིང་། དོས་བོས་ལི་ཞེས་པའི་ཐད་དུ་བསླེབས་ཚེ། ད་ཚང་མས་ངལ་གསོས་ལ་ཇ་བསྐོལ། ཡར་མར་ན་མགྲོན་པོ་འདྲ་ཡོང་ཁུ་ཡོད་མེད་ལ་ལྟོས་ཞེས་བཀའ་བསྩལ་བ་ལྟར་འཁོར་གཡོག་རྣམས་ཀྱིས་ཡང་ཡང་བལྟས་ཚེ། བར་སྐབས་ཤིག་ལ་སྐྱ་མི་ཉ་ཉོག་འགའ་འོང་བཞིན་འདུག་ཞུས་པས། ད་ཚང་མས་ཁ་བཏགས་གྲ་སྒྲིག་དང་། སྤོས་སྣ་རྒྱ་གླིང་སོགས་ཀྱིས་བསུ་བ་བྱོས་གསུངས་བ་ལྟར་བསུ་བ་བྱས་ཚེ། རྒད་པོ་ཚ་རུ་ནག་པོ་ཅན་ཞིག་དང་། བུད་མེད་ཅིག །དྲེལ་དཀར་པོ་ཞིག་ལ་བྱིས་པ་གཉིས་བཀལ་ཡོད་པ་སྐུ་འཁོར་དང་བཅས་བྱུང་བ་ལ། མཚམས་སྤྲུལ་མཆོག་གིས་བྱིས་པ་ཅིག་ཤོས་དེའི་མགུལ་དུ་ཁ་བཏགས་སྒྲོན་ནས་སྐུ་བདག་དངོས་སུ་བརྒྱབ་པར་གྲགས་ལ། དུས་ཕྱིས་བལྟས་ཚེ་རྒད་པོ་ཚ་རུ་ནག་པོ་ཅན་དེ་གཏེར་ཆེན་བདུད་འཇོམས་ཚང་དང་། བུད་མེད་དེ་ཨ་སྐྱབས་བཟའ་སྐལ་བཟང་སྒྲོན་མ་དང་། བྱིས་པ་གཉིས་དེ་དཔལ་སྤྲུལ་ནམ་མཁའ་འཇིགས་མེད་དང་། སྤྲུལ་སྐུ་ལྷ་སྟོབས་གཉིས་ཡིན་པར་གྲགས། ཕྱིས་སུ་དགུང་ལོ་བཅོ་བརྒྱད་ལ་སོན་སྐབས་སླར་ཡང་གཏེར་ཆེན་བདུད་འཇོམས་ཚང་དང་། རྫ་རྒྱལ་སྡེ་དགོན་གཉིས་ཀྱིས་ཆེད་དུ་གྲ་སྒྲིག་དང་བསུ་སྐྱེལ་སོགས་རྒྱས་སྤྲོས་ཀྱི་ཚུལ་དུ་བྱས་ཤིང་། རྟ་ཤུལ་དཔོན་པོ་ཚེ་སྒྲུབ་མགོན་སོགས་མི་སྣ་ཆེ་ཁག་མང་པོས་སྐྱེལ་མ་དང་བཅས་ཁོང་རྒྱལ་སྲས་སེམས་དཔའ་ཆེན་པོ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོའི་ཡང་སྲིད་འཁྲུལ་མེད་དུ་རྫ་རྒྱལ་དགོན་ཕུན་ཚོགས་ནོར་བུའི་གླིང་དུ་གསེར་ཁྲིར་མངའ་གསོལ་བའི་དུས་དེ་ནས་བཟུང་དགོན་དེའི་བསྟན་པའི་བདག་པོར་གྱུར་ཞིང་མདོ་ཁམས་རྫ་རྒྱུད་ཀྱི་ཕྱོགས་སུ་མཛད་པ་དང་ཕྲིན་ལས་ཀྱི་དབུ་བརྙེས་པ་ཡིན་ནོ། །ཁོང་གིས་མཚན་ལྡན་དགེ་བའི་བཤེས་གཉེན་བསྟེན་ཞིང་དབང་ཁྲིད་ཀྱི་གདམས་པ་གསན་ཚུལ་ནི། རྣམ་ཐར་གསོལ་འདེབས་ལས། སོ་སོར་ཡང་དག་རིག་པའི་དོན་བརྙེས་ཤིང་། །ལྟ་བ་སེང་ཆེན་རྩལ་གསུམ་རབ་རྫོགས་ཀྱང་། །རྒྱུ་མཐུན་དོན་ཚོལ་བླ་མ་མང་དུ་བསྟེན། །མཁས་པའི་དབང་པོ་མཆོག་ལ་གསོལ་བ་འདེབས། །ཞེས་གསུངས་པ་ལྟར་སྤྱིར་དོན་གཉིས་མཐར་སོན་གྱི་འཕགས་པའི་སར་བཞུགས་ཀྱང་། གདུལ་བྱ་གཞན་ངོ་ལ་དགོངས་ནས་ཀུན་མཁྱེན་མི་ཕམ་རྒྱ་མཚོ། མུ་ར་བདེ་ཆེན་བཟང་པོ། དགེ་མང་མཁན་ཆེན་ཡོན་ཏན་རྒྱ་མཚོ། མཚམས་སྤྲུལ་ཀུན་བཟང་བདེ་ཆེན་རྡོ་རྗེ། ཕུག་ཁང་འགྱུར་མེད་ངེས་དོན་དབང་པོ་སོགས་མཚན་ལྡན་དགེ་བའི་བཤེས་གཉེན་དུ་མ་ཚུལ་བཞིན་དུ་བསྟེན་ཏེ། མདོ་སྔགས་གཞུང་ལུགས་རྒྱ་མཚོ་ལ་སྦྱངས་བའི་ཚུལ་མཛད་ཅིང་། དེ་དག་ལས་འཇམ་མགོན་མི་ཕམ་རིན་པོ་ཆེ་ནི་མཇལ་ཙམ་བྱས་ནས་ཆོས་བཀའ་ཅི་རིགས་གསན་མོད་ཡུན་རིང་བསྟེན་པའི་གོ་སྐབས་མ་བྱུང་། ཁྱད་པར་དུ་ཐུན་མིན་རིགས་ཀྱི་བདག་པོ་ཡབ་གཅིག་བདུད་འཇོམས་གླིང་བ་དང་། མཁན་ཆེན་ཀུན་བཟང་དཔལ་ལྡན། མཁན་ཆེན་སྒྲ་དབྱངས་རྒྱ་མཚོའི་ཞབས་པད་ལ་བསྟེན་ནས།༼གནུབས་ཟུར་མཁན་ཆེན་སྒྲ་དབྱངས་རྒྱ་མཚོ་ནི། ཁོང་གི་འཁྲུངས་ཡུལ་གསེར་རྟ་ཏུག་རྒྱ་ཚོ་བ་ནས་ཡིན། ཁོང་ཉིད་སྐུ་ན་གཞོན་པའི་སྐབས་ཀཿཐོག་ལ་བྱོན་ནས་སློབ་གཉེར་མཛད་དེ་མཁན་པོའི་མཚན་གསོལ་བ་ཡིན་པར་གྲགས། བླ་མའི་གཙོ་བོ་ནི་དགེ་གོང་མཁན་ཆེན་ཀུན་བཟང་དཔལ་ལྡན་དང་། གནུབས་ཟུར་ཡང་སྤྲུལ་མདོ་རྒྱུད་རྒྱ་མཚོ། ཀཿཐོག་མཁན་ཆེན་ནུས་ལྡན། དགེ་མང་མཁན་པོ་ཡོན་དགའ་སོགས་ཡིན་པར་འདུག །དེ་ལས་ཀྱང་མཁན་ཆེན་ཡོན་ཏན་རྒྱ་མཚོ་ནི་ཐུན་མིན་གྱི་རྩ་བའི་བླ་མ་ཡིན་ཏེ། ཁོང་ཉིད་ལྷ་སར་ཕེབས་ཏེ་ཇོ་བོ་ཡིད་བཞིན་ནོར་བུའི་མདུན་ནས་དགེ་བའི་བཤེས་གཉེན་ཚད་ལྡན་ཞིག་དང་འཕྲད་པའི་སྨོན་ལམ་བཏབ། དེ་ནས་རྫ་ཆུ་ཁར་བྱོན་སྐབས་མཁན་པོ་ཡོན་དགའ་ཚང་གིས་ཡོན་ཏན་མཛོད་ཀྱི་འགྲེལ་བ་བརྩམས་ནས་མཇུག་གྲུབ་མ་རག་པ་ཡིན་པས་རྟེན་འབྲེལ་ལེགས་པར་འགྲིགས། སྐབས་དེར་མཁན་པོ་ཡོན་དགས་ཁོང་ལ་ཡོན་ཏན་མཛོད་འགྲེལ་གྱི་ཁྲིད་ལུང་གི་རྒྱུན་གནང་ནས་གཞན་ལ་འཆད་སྤེལ་དགོས་པའི་བཀའ་གནང་། ཁོང་གིས་རྫ་སྟོད་ཀྱི་དགོན་གནས་དང་དབེན་ས་དུ་མ་ནས་སྦྲ་ཆུང་ཞིག་ཕུབ་ཏེ་ཡུན་རིང་ཙམ་ལ་བཞུགས་ཤིང་། བཞུགས་གནས་ཀྱི་ལུང་བ་དག་གི་མིང་ལ་དེང་སྐབས་ཀྱང་སྒྲ་དབྱངས་ལུང་བ་ཞེས་ཐོགས་ཡོད། སྐབས་དེར་གྲུབ་དབང་ནམ་མཁའ་འཇིགས་མེད་ཀྱིས་མཇལ་ནས་ཐུན་མིན་གྱི་བླ་སློབ་ཏུ་གྱུར། ཐུབ་དགའ་ཡིད་བཞིན་ནོར་བུ་དང་ཁོང་གཉིས་ཆོས་གྲོགས་ཡིན་ཞིང་ཁོང་སྐུ་ཡོན་ཧ་ཅང་ཆེ་བར་གླེང་། འོན་ཀྱང་ཁོང་ནི་ཐུགས་གཤིས་གྱོང་ཉམས་སྟོན་ཞིང་ཨ་སྐྱོའི་ཚུལ་མཛད་པར་དགྱེས་པ་དང་། སློབ་མ་སྐྱོང་བ་ལྟ་བུའི་འདུ་འཛི་སོགས་ལ་ཐུགས་གཏན་ནས་མི་དགྱེས་པའི་བླ་མ་དམིགས་བསལ་བ་ཞིག་ཡིན་པས་མཐུན་སྣང་དུ་མཛད་པ་དང་ཕྲིན་ལས་དེ་ཙམ་མ་རྒྱས་པ་འདྲ། ཕྱིས་སུ་གནུབས་ཟུར་དགོན་ནང་དུ་བྱོན་ནས་དབྱར་གནས་མཁན་པོ་མཛད་ཅིང་། ཡོན་ཏན་མཛོད་རྩ་འགྲེལ་སོགས་ཀྱི་ཆོས་ཁྲིད་རེ་ཟུང་སྤྲུལ་སྐུ་བློ་གྲོས་དབང་བོ་སོགས་འཁོར་བཅོ་ལྔ་ཡས་མས་ལ་གནང་ནས་དུས་ཡུན་ངེས་ཅན་ཞིག་ལ་བཞུགས། མཐར་སྐུ་ཚེའི་སྨད་དུ་སྔོན་པདྨ་འགྲོ་འདུལ་རྡོ་རྗེས་གཟའ་སྒྲུབ་ཡུལ་གྱི་སྒོག་གི་དྲང་སྲོང་ཕུག་པ་ཞེས་པའི་སྒྲུབ་ཕུག་ཁྱད་པར་ཅན་ཞིག་ཡོད་པ་དེར་བྱོན་ནས་བཞུགས། སྒྲུབ་ཕུག་དེ་ནས་སྐུ་མདའ་ཁར་ཚོགས་འཁོར་ཞིག་བསྐོར་དུ་བཅུག་ནས་ཤི་རྒྱུ་ཞིག་ལ་ཁོང་ཉིད་ལས་སྐྱིད་པ་མེད་ཚུལ་གསུངས་ཤིང་ཚོགས་དྲངས་རྗེས་འདས་ཚུལ་བསྟན། སྐུ་གདུང་དེ་ཉིད་སྒྲུབ་ཕུག་ཀླད་ཟུར་གྱི་ཁ་སླས་ཤིག་ཡོད་ས་དེ་ནས་ཞུགས་ལ་སྦྱངས་ཤིང་ད་ལྟ་རྡོ་ཡི་ས་རྟགས་ཤིག་མཇལ་རྒྱུ་ཡོད་པར་གྲགས། གྲུབ་དབང་ནམ་མཁའ་འཇིགས་མེད་མཆོག་གིས་ཁོང་ཉིད་བླ་མ་གཞན་ལས་གལ་ཆེན་དུ་བརྩི་བ་དང་། ནམ་རྒྱུན་སྒྲ་ལོ་ཡིད་བཞིན་ནོར་བུ་ཞེས་གསོལ་འདེབས་གནང་ཞིང་། ཁོང་གི་རྣམ་སྣང་ལས་གྲུབ་པའི་རྟེན་གལ་ཆེན་ཞིག་མགུལ་དུ་བཞེས་ཡོད་པར་མ་ཟད། ཉིན་བཞིན་དབུ་ཐོག་ཏུ་བཞག་ནས་གསོལ་འདེབས་དང་བྱིན་རླབས་ཞུ་བའི་རྣམ་ཐར་ངོ་མཚར་བ་སྣང་། སྤྱིར་གྲུབ་དབང་ཁོང་གི་གསུང་རྣམས་ན་ཀུན་བཟང་རྣམ་གཉིས་ཀྱི་ཞབས་རྡུལ་སྤྱི་བོས་ལེན་པ་ཞེས་འཁོད་ཡོད་པ་དེ་ནི་མཁན་ཆེན་ཀུན་བཟང་ཆོས་གྲགས་དང་། མཁན་ཆེན་ཀུན་བཟང་སྒྲ་དབྱངས་རྒྱ་མཚོ་རྣམ་གཉིས་ཡིན་པར་གསུངས། གྲུབ་དབང་མཆོག་གི་བླ་མ་གཞན་རྣམས་ནི་ཡོངས་སུ་གྲགས་ཤིང་རྣམ་ཐར་སོགས་རྒྱས་བསྡུས་ཅི་རིགས་བཞུགས་ཡོད་པས་གསལ་བཤད་མ་དགོས་མོད། མཁན་པོ་སྒྲ་དབྱངས་ཉིད་ཁོང་གི་ཐུན་མིན་གྱི་བླ་མ་གལ་ཆེན་ཞིག་ཏུ་གྱུར་ཡོད་པས། དེ་ཉིད་ཀྱི་ལོ་རྒྱུས་ཤེས་རྒྱུ་ནི་ཤིན་ཏུ་མཁོ་གལ་ཆེ་ཡང་། རྣམ་ཐར་སོགས་ཡོངས་སུ་མ་གྲགས་པས་འདྲི་རྩད་ཅུང་བྱས་ཀྱང་འདི་ཙམ་ལས་འབྲི་རྒྱུ་མ་བྱུང་ངོ་། །༽ཟབ་རྒྱས་སྨིན་གྲོལ་གྱི་གདམས་པ་རྒྱ་མཚོ་ཆིག་བརྒྱུད་དུ་གསན་ནས་ནང་ཐུགས་ཀྱི་སྲས་གཅིག་པུར་གྱུར། དུས་ཀུན་ཏུ་མདོ་སྔགས་ཀྱི་གཞུང་སྤྱི་དང་། ཁྱད་པར་གསང་སྔགས་བླ་མེད་ཀྱི་རྒྱུད་སྡེ་ཐམས་ཅད་ལ་དཔེ་གཟིགས་དང་ཐུགས་དཔྱོད་རྒྱ་ཆེར་གནང་ནས་བཞུགས་པ་ལས་རང་གར་བག་མེད་སོས་དལ་དུ་ཅུང་ཟད་ཀྱང་མི་བཞུགས་པའི་རྣམ་ཐར་སྣང་། སྔོན་སྨོན་རྟེན་འབྲེལ་དུས་སུ་སྨིན་ནས་དགོངས་གཏེར་གྱི་གཏད་རྒྱ་སད་དེ་ཟབ་མོའི་ཆོས་གཏེར་ཕབ་ཚུལ་ནི། རྣམ་ཐར་གསོལ་འདེབས་ལས། ཤིན་ཏུ་མཐོ་འཇམ་རྡོ་རྗེ་བྲག་གི་ངོས། །གཞན་བརྟེན་ཟླ་བོར་བཅས་ཏེ་བདེ་མྱུར་འཛེགས། །ས་གཏེར་བསོད་ནམས་དུས་སུ་སྨིན་པ་ཡིས། །པདྨའི་བརྒྱུད་འཛིན་ཆེ་ལ་གསོལ་བ་འདེབས། །ཞེས་དང་། རྨ་གཡང་ནོར་གྱི་བདག་པོའི་ཉེ་འདབ་སུ། །གཏིང་ཟབ་ཆུ་ཞེང་ཡངས་པའི་རྒྱ་མཚོ་ལས། །གྲོགས་བཅས་གཞན་བརྟེན་རྫུ་འཕྲུལ་སྟོབས་ཆེན་པོའི། །མ་བྱིང་བདེ་བར་བཞུད་ལ་གསོལ་བ་འདེབས། །ཞེས་གསུངས་བའི་དོན་ལྟར་སྐབས་ཤིག་ལ་གྲོགས་ཡིད་བཟང་ཟེར་བ་དང་ཁོང་གཉིས་ལྷན་ཅིག་རྨ་གཡང་ནོར་གྱི་བདག་པོའི་ཉེ་འདབས་ཁྲུས་བྱེད་སྟོང་རི་མཚོ་ནག་གི་སྟེང་ནས་མ་བྱིང་བར་བདེ་བར་ཕེབས་ཏེ་བྲག་དཀར་རྡོ་རྗེ་རྩེ་ལྔ་ལ་ས་གཏེར་བཞེས་པར་བྱོན་ཚེ་སྙིགས་མའི་འགྲོ་བའི་བསོད་ནམས་ཀྱི་སྐལ་བས་མ་འཆུན་པས་ས་གཏེར་གྱི་སྐལ་བ་མ་འབྱོར་ཡང་ངོ་མཚར་རྫུ་འཕྲུལ་གྱི་བཀོད་པ་རྒྱ་ཆེར་བསྟན་པའི་རྣམ་ཐར་མང་དུ་སྣང་། སྤྱིར་དགོངས་གཏེར་ཟབ་མོའི་ཆོས་བཀའ་འདི་རྣམས་ནི་སྔོན་རྒྱལ་དབང་པདྨ་ཀཱ་རའི་ཟབ་མོ་གཏེར་གྱི་ཆོས་མཛོད་རྣམས་མི་ནུབ་པར་བྱ་ཕྱིར་ས་གཏེར་དུ་སྦས་པའི་གཏེར་སྒྲོམ་ཕྱག་ཏུ་མ་སོན་ཀྱང་། སྨོན་ལམ་དབང་བསྐུར་གྱི་སྟོབས་ཀྱིས་ཆོས་ཉིད་དགོངས་པའི་ཀློང་མཛོད་ལས་འགག་པ་མེད་པར་རང་ཤར་བ་ཡིན་པར་གསུངས་ཏེ། དེ་ཡང་གཏེར་ལུང་ལས། རྒྱུད་དང་མན་ངག་སྙིང་པོའི་དོན་བསྡུས་ཏེ༔ རྒྱུད་འཛིན་མཆོག་གྱུར་ག་གཱ་ཨ་བྷྱ་ལ༔ བརྒྱུད་གསུམ་དབྱེར་མེད་པདྨ་འབྱུང་གནས་ཀྱིས༔ རྒྱུད་ལ་བྱིན་རླབས་སྨོན་ལམ་དབང་བསྐུར་ཐོབ༔ ཅེས་དང་། དེ་སྐད་མ་ཧཱ་གུ་རུ་པད་འབྱུང་གིས༔ སྙིགས་མའི་འགྲོ་ལ་རྗེས་སུ་བརྩེ་བས་གདམས༔ སྨོན་ལམ་དབང་བསྐུར་གཏད་རྒྱ་གྲོལ་བ་ལས༔ ག་གཱ་ཨ་བྷྱ་དེ་ཡི་སྐལ་བར་བབས༔ ཞེས་གསུངས་པ་ལྟར་རོ། །ཁྱད་པར་དུ་ཟབ་གསང་མན་ངག་ཡོངས་ཀྱི་སྤྱི་ཕུད་འོད་གསལ་ཐིག་ལེ་ཉག་གཅིག་གི་དོན་གསལ་བར་སྟོན་པའི་ཁྲིད་ཡིག །ཡེ་ཤེས་སྒྲོན་མེའི་ཆེ་བ་རང་ལ་གནས་པའི་རྒྱན་འདི་ཉིད་ནི། སྔོན་སྤྲུལ་བའི་གཏེར་སྟོན་ཆེན་པོ་འདི་ཉིད་ལྷ་ལྕམ་པདྨ་གསལ་གྱི་སྐྱེ་བ་བཞེས་པའི་ཚེ་ཨོ་རྒྱན་ཆེན་པོས་གཏད་རྒྱ་མཛད་པ་དེ་ཉིད་མངོན་དུ་སད་པ་ཡིན་པར་གསུང་སྟེ། གཏེར་ལུང་ལས། ཁྱད་པར་ཆོས་ཀྱི་སྐལ་བས་རབ་མཐོ་བ༔ ལྷ་ལྕམ་ཁྱོད་རང་གདམས་པ་འདི་ལོངས་ལ༔ བར་དོའི་འོད་གསལ་རང་ཞལ་མཐོང་བའི་དུས༔ མི་འགྱུར་གསེར་གྱི་ཐུར་མའི་ལག་ལེན་མཛོད༔ ཁྱོད་ཀྱང་འདི་ནས་སྐྱེ་བ་མང་རབས་ཤིག༔ ལོངས་སྐུའི་ཞིང་ཉུལ་འགྲོ་དོན་དུས་བབས་ནས༔ གཏེར་སྟོན་བཅུ་ཕྲག་ཚུལ་གྱི་གདམས་ཟབ་འདིས༔ ཁམས་གསུམ་འཁོར་བ་དོང་སྤྲུགས་དབང་ཐོབ་ཤོག༔ དེ་ནས་ཡང་ངས་སངས་རྒྱས་མཛད་པ་སྟོན༔ ཁྱེད་ནི་རྔ་ཡབ་དཔལ་གྱི་རི་བོ་རུ༔ པདྨ་ང་ཡི་རྒྱལ་ཚབ་དམ་པར་འགྱུར༔ རིག་འཛིན་ཡོངས་ཀྱི་དབང་པོ་ཞེས་སུ་གྲགས༔ དེ་ཕྱིར་སྐྱེ་བ་བདུན་བརྒྱུད་སོང་བའི་དུས༔ རྡོ་སྨར་མཚམས་ཀྱི་འཛིན་མའི་ཐིག་ལེ་རུ༔ གནུབས་ཀྱི་རིགས་སྐྱེས་ནམ་མཁའ་འཇིགས་མེད་པ༔ དེ་དང་འཕྲད་ནས་འགྲོ་དོན་ལྷུན་གྲུབ་ཕྱིར༔ མཚོ་རྒྱལ་ཁྱོད་ཀྱིས་མཁའ་འགྲོའི་བརྡ་རུ་དྲིལ༔ བཀའ་འདིའི་བསྟན་པ་རྣམ་པར་སྐྱོང་བ་དང་༔ བསྟན་འཛིན་ཕྲིན་ལས་ཕྱོགས་བཅུར་སྤེལ་བའི་གྲོགས༔ ཡིད་བཞིན་དབང་གི་རྒྱལ་བོ་ཉིད་ལ་བཅོལ༔ ཞེས་སོགས་གསུངས་ནས་དེ་ཉིད་ཀྱིས་རྫུ་འཕྲུལ་ཆེན་པོའི་ཡི་གེ་ལ་བཀོད་དེ། ཁྲུས་བྱེད་སྟོང་རི་མཚོ་ནག་གི་གཡས་ངོགས། བྲག་དཀར་རྡོ་རྗེ་རྩེ་ལྔ་ལ་གཏེར་དུ་སྦས་ནས་ཆོས་སྲུང་ལ་གཏད་རྒྱ་བྱས་པ་དེ་ཉིད། དུས་རྟགས་མངོན་དུ་གྱུར་ནས་འདོན་པའི་སྐབས་ལ་བབས་ནའང་། རྟེན་འབྲེལ་གྱི་སྣ་ཁ་ལོག་ནས་ས་གཏེར་གྱི་སྐལ་བ་མ་འབྱོར་ཡང་། སྨོན་ལམ་དབང་བསྐུར་གྱི་སྟོབས་ལས་དགོངས་པའི་ཀློང་དུ་རང་ཤར་བ། མི་ལོ་ཉེར་གཅིག་གི་བར་དུ་བཀའ་རྒྱ་བཏབ་མཐར། ཕ་གཅིག་བདུད་འཇོམས་དཔའ་བོའི་བྱིན་རླབས་ཀྱི་མཐུ་ལ་བརྟེན་ནས། ཆོས་བདག་རིག་འཛིན་འགྱུར་མེད་རྣམ་རྒྱལ་སོགས་ཀྱིས་བསྐུལ་བ་ལྟར། དགུང་ལོ་སོ་བདུན་པ་ཤིང་མོ་གླང་གི་ལོ་ལ་ཕབ་པར་མཛད་གསུངས་བ་དང་། ཡང་སྐལ་ལྡན་གྱི་སློབ་མ་ཞིག་གིས་གནས་ལུགས་མཐར་ཐུག་གི་གནད་གསང་ལས་བརྩམས་པའི་ཆོས་བཀའ་ཞིག་གསུང་བའི་ཞུ་བ་ཕུལ་བ་ལ། ཁོང་གིས་འཇམ་མགོན་མི་ཕམ་རིན་པོ་ཆེས་ངེས་ཤེས་སྒྲོན་མེ་གསུང་བའི་ཚུལ་ལྟར། དལ་གཅིག་མཉམ་པར་བཞག་ནས་ཕ་གཅིག་བདུད་འཇོམས་དཔའ་བོ་ལ་གསོལ་བ་བཏབ་པས། རྟོགས་པ་དོན་གྱི་འདྲ་འབག་རྡོ་རྗེ་དོ་ཧའི་རྩེ་མོ་ཞེས་བྱ་བ་ཞིག་མ་བཅོས་ཐོལ་བྱུང་གི་ཚུལ་དུ་འབྲི་གནང་མཛད་པ་དང་། ཡང་ཁྲོ་བོ་ཞེས་པ་ཤིང་མོ་གླང་གི་ལོར་ཧོར་ཟླ་བརྒྱད་པའི་ཚེས་བཅུའི་ནུབ་མོར་ཨོ་རྒྱན་གྱི་མཁན་པོ་པདྨ་རྡོ་རྗེ་ཡིན་ཟེར་བའི་རྣལ་འབྱོར་བ་རུས་རྒྱན་ཅན་ཞི་བའི་ཉམས་དང་ལྡན་པ་སྐུ་མདོག་དམར་གསལ་ཕྱག་གཉིས་གྲི་ཐོད་འཛིན་ཅིང་གར་སྟབས་ལང་ལིང་བསྒྱུར་བ་ཞིག་གིས། དཔེ་ཆུང་ཐོགས་པའི་མཁའ་འགྲོ་ཞིག་ལ་དེ་ང་ལ་སྟོན་ཟེར་བས། དངུལ་གྱི་ཤོག་བུ་ལ་སུ་ཝརྞའི་རི་མོ་བཀྲ་བ་ཞིག་ཟུར་སྟོན་བྱས་ནས། ངས་འདོན། ཁྱེད་ཀྱིས་ཉོན་གསུངས་ཏེ། དེང་སང་ཆོས་ལ་འཐེན་རྩོད་བྱེད་ནའང་༔ ཐམས་ཅད་རང་རང་སོ་སོར་བདེན་དོན་འགྲུབ༔ ཕྱོགས་གང་གདོན་གྱིས་ཟིན་གང་ངན་འགྲོའི་རྒྱུ༔ འོན་ཀྱང་རྒྱུད་ཀྱི་དགོངས་པ་བབ་སོ་གཅིག༔ ཌྷ་ཌྷ་ཌྷ༔ ཞེས་གསུངས་ཤིང་བརྡ་ཡིག་དེ་ལ་བརྟེན་ནས་དག་སྣང་རིན་པོ་ཆེའི་སྒྲོམ་བུ་ཞེས་བྱ་བའི་གནས་ལུགས་མཐར་ཐུག་མ་ཡིན་དགག་གི་ལྟ་བ་གཏན་ལ་འབེབས་བྱེད་ཀྱི་ཆོས་ཚན་ལྡེབ་སུམ་ཅུ་ལྷག་ཙམ་ཞིག་ད་ལྟ་གསུང་འབུམ་ཁྲོད་དུ་བཞུགས། ཡང་རྨི་ལམ་འོད་གསལ་གྱི་ངོགས་སུ་མ་ཧཱ་ཙི་ནའི་མཁན་པོ་ཞིག་དང་བུད་མེད་གཉིས་དྲི་བ་དང་དྲིས་ལན་གྱི་སྒོ་ནས་གསུང་བའི་ས་དཔྱད་རིན་ཆེན་བང་མཛོད་ཅེས་བྱ་བ་ཞིག་ཀྱང་ཡོད་ལ། དེ་སོགས་ཀྱིས་མཚོན་པའི་ཟབ་མོ་གཏེར་གྱི་ཆོས་སྡེ་ཐམས་ཅད་ཀུན་ཀྱང་། རྗོད་བྱེད་ཀྱི་ཚིག་ལེགས་པ། བརྗོད་བྱའི་དོན་བརླིང་བ་ཤ་སྟག་ཏུ་འདུག་ཅིང་། ཆེ་ས་ནས་རྫོགས་ཆེན་ཨ་ཏི་ཡོ་གའི་མན་ངག་དང་། ཆུང་ས་ནས་ལས་ཕྲན་ཚེགས་སྒྲུབ་པའི་རྫས་སྔགས་ཡན་ཆད་ཁྲིད་ཡིག་དང་ཆོ་ག་སོགས་མང་པོ་བཞུགས། གཞན་ཉམས་དང་རྨི་ལམ་གྱི་ངོགས་སུ་མི་མིན་གྱི་ཡུལ་ལྷ་སོགས་དང་འཕྲད་ཚུལ་དང་། ཕྲིན་ལས་ཀྱི་གྲོགས་དང་བསྟན་པའི་གཉེར་ཁ་གཏད་ཚུལ་ཤིན་ཏུ་མང་བར་འདུག་པ་གསུང་འབུམ་གྱི་ཆོས་ཚན་ཁག་ན་གསལ། དེ་ལྟར་ཉིད་ཀྱི་གཏེར་ལུང་འགའ་ན་གསལ་བ་རྣམས་དྭངས་བ་རེ་བསྐྱེད་པའི་ཆེད་དུ་བྲིས་པ་མ་གཏོགས། གཞན་དག་ཆེན་ཡེ་ཤེས་ཀྱི་ཆོ་རོལ་མཐའ་དག་སུ་ཞིག་གིས་འབྲི་བར་ནུས། སྤྱིར་དམ་པ་འདིས་ཟབ་གསང་མན་ངག་གི་རྫོགས་ཁྲིད་རྒྱས་བསྡུས་རྣམས་དང་། ཡི་དམ་གྱི་ལྷ་སོ་སོའི་སྒྲུབ་ཐབས་ཀྱི་ཆོ་ག་སོགས་ཐམས་ཅད་རྣམ་པར་དཔྱོད་པའི་བློ་གྲོས་མངའ་བའི་མིག་བཟང་གིས་མཇལ་ན་ཡང་ཟབ་སྙིང་པོའི་རྒྱུད་ཆེན་བཅུ་བདུན་སོགས་རྒྱུད་སྡེ་སོ་སོའི་དགོངས་པ་དང་སྦྱར་བ་ཤ་སྟག་ཡིན་ནོ། །གཏེར་ཆེན་ཉིད་ཀྱི་ཞལ་ནས། གཏེར་ཆོས་འདི་ཚོ་ལ་ནོར་འཁྲུལ་གྱི་ཆ་ཡོད་རྒྱུ་མ་རེད། གལ་ཏེ་ཡོད་ན་ཨོ་རྒྱན་རིན་པོ་ཆེ་ལ་ཞུ་དགོས། འབྲི་གུང་ཟངས་ཤོག་དམར་པོའི་འགྲེལ་བ་དེ། ང་རང་གིས་རྣམ་པར་དཔྱད་ནས་བརྩམས་པ་ཡིན་པས་དེ་ང་རང་ལ་ཟེར་དགོས་གསུངས། སྤྱིར་གཏེར་ཆོས་རྣམས་སུ་ཡེ་ཤེས་སྒྱུ་འཕྲུལ་དྲྭ་བ་ལས༔ གསུང་ཡོད་པ་ནི་ཐོག་མར་ས་གཏེར་དུ་སོང་བ་ཕྱིས་དགོངས་གཏེར་དུ་བབས་པ་ཡིན། ཡང་ལྡིང་མ་སྙིང་ཐིག་གསུང་བ་དེ། ལྡིང་མ་སྙིང་ཐིག་ཅེས་པའི་ཆོས་ཚན་ཤིན་ཏུ་རྒྱ་ཆེ་བ་ཞིག་ཕབ་རྒྱུ་ཡོད་ཀྱང་ཆོས་ཕུད་ཙམ་དུ་སྒྱུ་འཕྲུལ་གཏོར་དབང་དེ་དང་། དེ་ཉིད་གསལ་རྒྱན་གྱི་སྐེད་པ་མན་ཆད་ཕབ་པ་ཡིན། ཞི་ཁྲོ་སྒྱུ་འཕྲུལ་གྱི་ཆོས་ཚན་འདི་ཚོ་སྒྱུ་འཕྲུལ་འབྲིང་བོའི་དབང་དུ་བྱས་པ་ཡིན། སྒྱུ་འཕྲུལ་རྒྱས་པ་དེ་ཕབ་ན་ཆེས་རྒྱ་ཆེ་བ་ཡོད་པར་གསུངས། དེ་ལས་གཞན་པའི་རྡོ་རྗེ་སེམས་དཔའི་དགོངས་ཉམས་ལས༔ གསུངས་བ་སོགས་ཆོས་ཚན་ཕལ་ཆེར་ཐོག་མ་ནས་དགོངས་གཏེར་དུ་གཏད་རྒྱ་བྱས་པ་ཡིན། འོན་ཀྱང་ཟངས་ཤོག་ཅན་གྱི་འགྲེལ་བ་དང་། གཞན་སྟོང་ཐུན་དང་། ཞལ་གདམས་སྣ་ཚོགས། རྩ་རླུང་སྤྱི་ཆིངས་སོགས་ལྗགས་རྩོམ་མཛད་པ་ཡང་མང་དུ་སྣང་ངོ་། །ཡང་གཏེར་ཆེན་ཉིད་ཀྱི་ཞལ་ནས། ང་རང་གིས་བྲིས་པའི་གཏེར་ཆོས་འདི་ཚོ་སུས་ཉམས་སུ་བླངས་ན་སྒྲུབ་པའི་འབྲས་བུ་རེ་འབྱིན་ངེས་ཅན་ཡིན། ང་རང་གི་ཚིག་གཅིག་གིས་བསླད་མ་ཞུགས། རྒྱལ་དབང་པདྨ་འབྱུང་གནས་ཀྱིས་ཆོས་ཉིད་དགོངས་པའི་ཀློང་ལ་གཏེར་དུ་སྦས་པ་དེ་ཇི་ལྟ་བ་བཞིན་ཕབ་པ་ཡིན། ཁྱོད་ཀྱིས་ཕོབས་དང་དགོས་པ་ཡོད་གསུངས། མ་ཟད་ཆོས་འདི་ལ་འབྲེལ་བ་ཐོགས་ཙམ་གྱིས་ཀྱང་མ་འོངས་པ་ན་རིགས་ལྡན་ལྕགས་འཁོར་ཅན་འབྱོན་ཚེ། བདག་ཀྱང་དེའི་དམག་དཔོན་ཆེ་ཤོས་ཤིག་ཡིན་པས་དེའི་འཁོར་དུ་སྐྱེ་བ་ལ་ཐེ་ཚོམ་མི་དགོས་གསུངས་ཤིང་། གཏེར་ལུང་ལས༔ དེའི་མཐུས་དེང་འདིར་སྐལ་ལྡན་བརྒྱ་ཕྲག་དང་༔ བསྟན་པ་ཕྱི་དར་དུས་སུ་སྟོང་ཕྲག་བདུན༔ ཚེ་ལོ་བཅུ་ལ་འབུམ་ཕྲག་བཅོ་བརྒྱད་ལ༔ སངས་རྒྱས་འབྲས་བུ་བླ་མེད་ལག་ཏུ་གཏོད༔ ཅེས་རྡོ་རྗེའི་གསུང་འདི་རྣམས་འགྲོ་དོན་དང་ཕྲིན་ལས་ཤིན་ཏུ་ཆེ་བར་གསུངས་ཡོད་དོ། །ཡང་བར་སྐབས་ཤིག་ལ་ཚིག་གསུམ་གནད་དུ་བརྡེག་པའི་སྤྱི་འགྲེལ་དེ་ཁོ་ན་ཉིད་གསལ་བའི་རྒྱན་གྱི་དབུ་ནས་ལྗགས་རྩོམ་མཛད་སྐབས་ལུང་ཁུངས་ཤིག་དྲན་མི་དྲན་བྱས་པས་དཔེ་གཟིགས་མཛད། མཁའ་འགྲོས་ཁྱེད་ཀྱིས་ཅི་མཛད་ཞུས་པས་ལོ་རྒྱུས་གསུངས་བས། འོ་བརྒྱལ་དེ་འདྲ་མི་དགོས་གསུངས་ཏེ། ཕྱག་མཐིལ་ལ་བརྡ་ཡིག་འགའ་བྲིས་ནས་གཏེར་ཆེན་ལ་བསྟན་པས། དེའི་རྐྱེན་བྱས་ནས་དེ་མན་ཆད་མཁའ་འགྲོའི་བརྡ་མཛོད་ལས་ཕབ་པ་ཡིན་ཞེས་གསུང་སྲོལ་ཡོད། དེ་ཉིད་གསལ་རྒྱན་གྱི་སྤྱི་འགྲེལ་རང་གི་སྐེད་ཙམ་ན་ལྡིང་མ་སྙིང་ཐིག་ལས་གསུངས་བའི་མཆན་རྟགས་གནང་ཡོད་པ་དེ་མན་ཆད་ཡིན་ཞེས་གསུངས། མདོར་ན་དགོངས་གཏེར་ཟབ་མོའི་ཆོས་བཀའ་འདི་རྣམས་ནི་ཉིད་ཀྱི་ཞལ་ནས་ཀྱང་། དེ་ཡང་བརྒྱུད་གསུམ་ཆུ་བོ་གཅིག་འདུས་རྒྱལ་དབང་པདྨ་ཀཱ་ར་དེས། བདག་ཁྲག་འཐུང་ནམ་མཁའ་འཇིགས་མེད་ལ། བཀའ་གཏེར་དག་སྣང་མང་པོའི་བཅུད་བསྡུས་ཏེ་རང་སྣང་དོན་གྱི་འོག་མིན་དུ་བརྡ་ཡིག་ཆུ་གཏེར་ཨོ་རྒྱན་གྱི་འཕྲུལ་ཡིག་བཅས་སྩལ་བའོ་ཞེས་གསུངས་བ་ལྟ་བུའོ། །གཏེར་ཆེན་མཆོག་གིས་སྨིན་གྲོལ་ཟབ་མོའི་ཆོས་འཁོར་བསྐོར་སྐབས་ངོ་མཚར་གྱི་བཀོད་པ་སྣ་ཚོགས་སྣང་ཚུལ་ནི། རྣམ་ཐར་གསོལ་འདེབས་ལས། ཟབ་མོའི་ཆོས་ཀྱི་འཁོར་ལོའི་ཐོག་མ་རུ། །མཁའ་འགྲོ་འབར་བའི་ལུང་བསྟན་དབུགས་དབྱུང་གིས། །རྗེས་བརྗོད་མེ་ཏོག་ཆར་བ་ཐོ་ཕྱིར་འཁྲོལ། །བཀའ་བབས་གྲུབ་ཐོབ་ཆེན་པོར་གསོལ་བ་འདེབས། །ཞེས་གསུངས་བ་ལྟར། ཟབ་གཏེར་སྨིན་གྲོལ་གྱི་ཐོག་མ་སྐལ་ལྡན་འགའ་ལ་གསུང་སྐབས་མ་དང་མཁའ་འགྲོ་འདུ་བའི་བརྡ་རྟགས་སུ་རྒོད་ཀྱི་ཐུལ་ཕྲན་བབས་པ་དང་། ནམ་མཁའ་ལ་འཇའ་སྤྲིན་སྣ་ཚོགས་འཆར་བར་མཛད་པའི་རྣམ་ཐར་ངོ་མཚར་བ་ཡོད་པ་དང་། ཡང་རྣམ་ཐར་གསོལ་འདེབས་ལས། མཁའ་འགྲོའི་ལུང་བསྟན་ཡི་དམ་དངོས་གྲུབ་ཐོབ། །བཀའ་དྲིན་ཅན་གྱི་བླ་མས་རྗེས་གནང་བས། །འཆད་དང་རྩོམ་པའི་བར་ཆད་དབྱིངས་སུ་ཞི། །ཕྲིན་ལས་རང་དབང་ཐོབ་ལ་གསོལ་བ་འདེབས། །ཞེས་གསུངས་པ་ལྟར་ཐེངས་གཅིག་དམ་པ་མཆོག་གིས་རྫོགས་རིམ་བར་དོ་དྲུག་གི་ཁྲིད་ཨ་རིག་རྫའི་མ་ཆུའི་རྡོ་མཁར་རྩར་གསུང་སྐབས། དགུན་ཟླ་འབྲིང་བོའི་ཟད་མཚམས་ཡིན་ཀྱང་། ཉིན་བཞིན་འཇའ་འོད་ཀྱི་གུར་ཕུབ་པ་དང་། ལྔ་ཚོམ་གྱི་ཐིག་ལེ་སོགས་ཀུན་ལ་མངོན་པར་སྣང་བ་དང་། གཏེར་ཆེན་གྱི་གསུང་སྒྲ་དེ་ཐག་རིང་བའི་ཤག་མདོ་སོགས་ནས་གསལ་བོར་ཐོས་པ་དང་། གནས་དེར་རུ་ཤན་མཛད་སྐབས་མི་ཡིས་མ་བཀྲོལ་བའི་རོལ་མོ་མང་པོ་དང་། སྙན་འཇེབས་ཀྱི་སྒྲ་སྣ་ཚོགས་གྲགས་པ་དང་། འཇའ་འོད་ཀྱི་བཀོད་པ་སོགས་ངོ་མཚར་རྨད་དུ་བྱུང་བ་སྣང་བར་མ་ཟད། དེ་ཡི་ཕྱི་ལོ་སྔར་གྱི་ཆོས་གསུང་བའི་ཟླ་ཚེས་དེ་ཤར་སྐབས་འཇའ་འོད་དང་སྒྲ་དབྱངས་སྣ་ཚོགས་གནས་དེར་སྣང་འདུག་ཅེས་ཀུན་གྱིས་གླེང་། སྐབས་ཤིག་གཏེར་ཆེན་ཉིད་ཀྱི་གསུང་ཡེ་ཤེས་སྒྱུ་འཕྲུལ་དྲྭ་བའི་ཞི་ཁྲོའི་དབང་ཞིག་བསྐུར་བའི་དུས་སུ་དེར་འཁོད་ཀྱི་སློབ་མ་མང་པོའི་སེམས་ལ་གང་ཤར་བ་དག་སྒྲིབ་མེད་གསལ་གཟིགས་ཀྱིས་གསུང་བས་འགའ་ཞིག་ངོ་མཚར་བ་དང་ཁ་སྐྱེངས་བ་ཡང་བྱུང་། ཡང་ཐེངས་གཅིག་དག་ཅིང་སྒྲོས་ལེགས་པ་འབྲི་མྱུར་མཁས་པ་ཆོས་བདག་རིག་འཛིན་འགྱུར་མེད་རྣམ་རྒྱལ་སོགས་ཡི་གེ་པ་གསུམ་གྱིས་ཆོས་ཚན་ཐ་དད་པ་གསུམ་དུས་ཐོག་གཅིག་ལ་ཕབ་པར་མཛད་ཚེ་གཏེར་ཆེན་རིན་པོ་ཆེས་ཡིག་མཁན་སོ་སོ་ལ་ཆགས་ཐོགས་མེད་པར་གསུངས་བར་མཛད་པ་དང་། ཟབ་གཏེར་འབྲི་བྱེད་ཀྱི་སྣག་བུམ་ཡང་དགུན་གྱི་གྲང་ངར་ཤིན་ཏུ་བདོ་བའི་དུས་སུ་གང་དུ་བཞག་ཀྱང་ནམ་འབྲི་ན་འབྲི་ཐུབ་པ་ཡོད་པར་གྲགས། སྐབས་ཤིག་སྟག་ཐོག་ནང་དུ་བྱོན་པས་ཧོར་བླ་ཐེག་མཆོག་ཟེར་བས་ཕྲག་དོག་བྱས། ཡུལ་འདིར་ནག་ཕྱོགས་ཁ་དར་བས་ཆོས་བཤད་བྱས་དུས་དབྱར་ཐོག་སེར། དགུན་གངས་ཞོད་བྱུང་ནས་མི་བདེ་ཟེར། གཏེར་ཆེན་ཁོང་གིས་དམ་པ་ཆོས་ཀྱི་འཁོར་ལོ་བསྐོར་ནས་བཞུགས་ཚེ། ཐོག་སེར་གྱི་གུར་ཁང་ཕུབ་པས་དེར་འཁོད་ཀྱི་སྐྱེ་བོ་ཀུན་ཟིང་ཟིང་དུ་གྱུར་ནས་འཁུ་འཕྲིགས་རྣམ་རྟོག་ཟ་བའི་དུས། གཏེར་ཆེན་མཆོག་གིས། དཔལ་གསང་བའི་བདག་པོའི་སྦྲུལ་ཞགས་དེས་ཀླུ་རྒྱལ་རྗེ་དམངས་བཞི་བཅིངས། ཤིང་བུ་འབྲུག་ལ་བསྒོམ། གྲི་ལྕགས་ཀྱིས་ས་ཐེལ་མནན་ཏེ། ལྟ་སྟངས་དང་སྡིག་མཛུབ་ནམ་མཁའི་དབྱིངས་སུ་བསྟན་ཚེ་འབྲུག་དཀར་སེར་དམར་ལྗང་བཞི་ས་ལ་ལྷུང་ནས་གྲགས་རྒྱུ་མེད་པར་གནས། སེར་བ་གློ་བུར་དུ་ཆད། ནམ་མཁའི་སྤྲིན་དེངས་ནས་ཉི་མའི་འོད་སྣང་བཀྲ་བ་བྱུང་། སླར་ཏིང་ངེ་འཛིན་གྱི་ཕྱག་རྒྱ་བཀྲོལ་བས། འབྲུག་རྣམས་ཐག་པ་ལྟ་བུར་རྗེན་ལ་བུད་ནས་ནམ་མཁར་འཕུར་སོང་བ་སྐྱེ་བོ་མང་པོའི་ལྟད་མོར་མངོན། ཡང་སྐབས་ཤིག་ན་དགུན་འབྲིང་གི་ཚེས་བཅོ་ལྔ་ལ་དཔལ་དགེའི་རྡོ་འབུམ་ཆེན་མོའི་རྩར་བདེ་ཆེན་ཞིང་སྒྲུབ་ཅིག་གསུངས་ནས། སྒྲོན་མེ་མང་པོ་ཐང་ནས་མངོན་པར་བསྟར་བས། རླུང་གིས་བསྐྱོད་པ་ཙམ་ཡང་མ་བྱས་པའི་སྟེང་། ནམ་མཁའ་ལ་འཇའ་འོད་ཀྱི་ཐིག་ལེ་བཀྲ་བ་སོགས་འབྱོར་ལྡན་སྦྱིན་བདག་གི་ཚོགས་ཀུན་དད་གསུམ་གྱི་ལྷ་ཕྱག་འཚལ་བའི་གནས་ལ་བཀོད། ལྐོག་གྱུར་མངོན་གཟིགས་ཀྱི་ལུང་བསྟན་མང་དུ་བསྩལ་ནས་གདུལ་བྱ་རྣམས་དད་མོས་ཀྱི་གནས་ལ་བཀོད་ཚུལ་ནི། རྣམ་ཐར་གསོལ་འདེབས་ལས། མ་ཧཱ་ཙི་ནའི་དམག་གི་དཔུང་ཆེན་ཀྱང་། །དུས་གསུམ་སྒྲིབ་མེད་འཆད་པའི་མངོན་ཤེས་ལ། །ཡིད་ཆེས་ཐོབ་པས་སྤྱི་བོའི་རྒྱན་དུ་བསྟོད། །མཁྱེན་གཟིགས་འགྲན་ཟླ་མེད་ལ་གསོལ་བ་འདེབས། །ཞེས་པ་ལྟར་ཟླ་རྒྱལ་དགོན་དུ་རྒྱ་དམག་བྱུང་བས། ཁོང་གིས་དགོན་པ་མ་ཕྱུང་དང་མི་སྐྱོན་གསུང་ཡང་མ་ཉན་པར་ཐམས་ཅད་ཡུལ་བུད་ནས་བྲོས། དགོན་ཁག་གཞན་སུ་ལ་ཡང་མ་སྐྱོན། ཁོང་རྣམས་ཡུལ་བུད་ནས་མཁར་ར་ལ་བསླེབས་དུས། དངུལ་དཀར་སྒྲོན་མའི་སྔོན་ནས། ད་མི་འདུག་འགྲོ། རྒྱ་དམག་བསླེབ་རན་ཐལ་གསུངས་ཀྱང་ཁོང་བླ་མ་རྒྱུས་མེད་ཡིན་པའི་སྟབས་ཀྱིས་འགའ་ཞིག་གིས་ཡིད་རྟོན་མ་བྱས། ཁོང་གིས་ཡིད་ཆེས་སྐྱེ་ཕྱིར་དུ། ཉིན་ཕྱེད་ཅིག་གི་ལམ་ན་རྫ་རྒན་རག་པ་ཟེར་བའི་མགོ་ན་རྒྱ་དམག་གིས་རྒྱང་མཐོང་བཙུགས་ནས་སོ་རྒྱབ་ཡོད་ཚུལ་ཤའི་མིག་གིས་གསལ་བོར་མཐོང་བས། རང་ཅག་བྲོས་ན་ཐར་བར་འདུག་གསུངས་ཀྱང་བདེན་དུ་འཛིན་མཁན་དཀོན་པས་ཅི་མི་སྙམ་དུ་ལུས། ཁོང་བླ་སློབ་ཚང་མ་བྲོས་ཤིང་། གཞན་གསུང་ལ་མ་ཉན་པ་ཚོའི་སྟེང་དུ་ཕྱི་ཉིན་རྒྱ་དམག་ཐོན་ནས་མི་བདུན་བསད། སྡེ་བ་གཏོར། རྒྱུ་ཟོག་བླངས་ནས་ཉེས་མེད་ཁྲིམས་ཀྱི་ཆད་པ་ཁུར་དགོས་བྱུང་སོང་། དེ་ནས་རྒྱ་འོག་ནས་ཡར་བྲོས་པས་མགོ་བཏགས་ལ་ཁ་ནས་རྒྱ་བཅོ་བརྒྱད་འོང་བ་གངས་ལུང་ནས་རི་བོས་མ་སྒྲིབ་པར་མཐོང་འདུག་ཅེས། རིག་ལི། བུ་ཆུང་། དཀོན་སྡིས། ཚོས་རྒོད་རྣམས་ལ་གསུངས་བས། ཚོས་རྒོད་དཔོན་རྒན་སོགས་ངོ་ལེན་ལ་སོང་བས་བྲ་འཇོང་ལ་ཁ་ནས་རྒྱ་དམག་དང་འཕྲད་ནས་འཁྲུགས་པས་རྒྱ་ངོ་ལོན་སོང་། མགར་བའི་ཁྲ་ལོ་ཟེར་བ་རྒྱ་དམག་གིས་དེ་སྐབས་བཟུང་སོང་བས་ཡུལ་དགོན་གཉིས་ནས་ད་མི་ཐར་བསད་འགྲོ་ངེས་ཅན་ཡིན་ཟེར་ནས་གཏེར་ཆེན་མཆོག་ལ་དགོངས་པ་ཞིག་ཞུས་པས། ཁོང་གིས་མི་སྐྱོན་ངེས་ཅན་ཡིན། རྟ་དཀར་པོ་ཞིག་ཁྲིད་ནས་ཐར་འོང་། མཁའ་འགྲོ་གསལ་ཁྱབ་དབང་མོས་གསུངས་བའི་ཉམས་ཤར་ཞེས་ལུང་བསྟན་གནང་བས་ཐམས་ཅད་ཐེ་ཚོམ་དུ་གནས། ཞག་བཅུ་གཅིག་གི་ཉིན་རྟ་དཀར་པོ་ཞིག་ཞོན། གཅིག་ཁྲིད་ནས་མདོ་སྟོད་ལ་བདེ་བར་ཐར་འོང་བ་ཡིན། ཡང་འབྱོར་ལྡན་ཟེར་བ་བལ་ཡུལ་གྱི་དགྲ་དང་འཕྲད་ནས་བསད་སོང་ཟེར་ནས་ཤུལ་མི་རྣམས་མྱ་ངན་གྱིས་ནོན། སྤུན་ཟླ་ནས་རྟ་སྒ་མ་ཞིག་དང་། མེ་མདའ་སོགས་རོ་ཆ་ཁྱེར་ནས་རོགས་མི་ལྔ་བཅས་རང་ཡུལ་ལ་བསླེབས་བྱུང་། བླ་མ་དང་སྤྲུལ་སྐུ་འགའ་ལ་སྐྱེ་རྟགས་ཞུས་པས་རྫོགས་ཆེན་དགོན་གྱི་གྲྭ་ལུས་ཤིག་ལེན་འགྲོ་གསུངས་ནས་འཕོ་རྟ་སོགས་བཞེས་སོང་། གཏེར་ཆེན་རིན་པོ་ཆེས། བྱང་ཆོག་འགའ་བྱས་པས་རྣམ་ཤེས་མི་ཁུག་པར་འདུག །ཤི་མེད་པ་འདྲ་གསུངས་པ་ལ་ཐམས་ཅད་ཀྱིས་དམག་རོགས་ཀུན་ཀྱིས་བསད་པ་མཐོང་ཞིང་། སྤུན་ཡས་རོ་ཆས་ཁུར་ནས་ཐོན་བྱུང་དུས་མ་ཤི་བ་ག་ལ་སྲིད་ཅེས་ཁྲེལ་དགོད་ལྷང་ལྷང་བྱས། ཟླ་ཕྱེད་ཙམ་སོང་དུས་མ་ཤི་བར་དགྲའི་བཙོན་འོག་ཏུ་བཟུང་ཡོད་པའི་སྐད་ཆ་གསལ་བོར་གོ་ཞིང་མཐར་རང་ཁྱིམ་ལ་བདེ་བར་འབྱོར། ཡང་སྐབས་ཤིག་ལ་ཕ་ཅིག་བདུད་འཇོམས་གླིང་བས་ཉམས་སྣང་འོད་གསལ་གྱི་འཆར་སྒོར་ཁོང་གི་ཡང་སྲིད་རྗེས་མ་ཀོང་པོ་པདྨ་བཀོད་དུ་སྐུ་འབྱོན་པར་དགོངས་ཏེ། འཁྲུལ་མེད་རྡོ་རྗེའི་ལུང་བསྟན་གནང་བའི་དགོངས་དོན་གྱི་གནད་གསང་ཀུན་གྱིས་མ་རྟོགས་པར་བྲེལ་འཚུབ་བྱེད་སྐབས་ཁོང་ཡང་པདྨ་བཀོད་དུ་བྱོན་གྲབ་བྱས་ནས་ཉིན་ཞག་གཉིས་ཀྱི་བར་ལ་སོང་སྟེ། ཕྱིར་ལོག་ཡོང་བས་བླ་མ་འཇམ་དཔལ་གྱིས་ཁྱེད་མི་འགྲོ་བ་ཅི་ཡིན་ཟེར། ངས་བལྟས་ན་སྒར་བ་ལྔ་བརྒྱ་བོ་འདི་ཕལ་ཆེར་ཕྱིར་རང་ཁྱིམ་ལ་ཐོན་དཀའ་མོ་ཡིན་སྙམ། དེའི་ཕྱིར་ང་མི་འགྲོ་བ་ཡིན་གསུངས་བས། བླ་མ་འཇམ་དཔལ་གྱིས་ཁོ་ཁྱེད་དང་འབྲལ་མི་ཕོད་ཟེར་ནས་ངུས། ཁྱེད་མ་ངུ་དང་འཕྲད་པའི་དུས་སྐབས་ཡོད་པ་ཁག་ཁུར་གསུང་། ལོ་བཞི་ནས་སྒར་བ་དེ་ཚོ་ཕལ་ཆེར་མ་བདེ་བར་སོང་། ཁོ་མ་སྐྱོན་པར་བདེ་བར་ཕྱིར་མཇལ་བའི་སྐལ་བ་ཐོབ་བྱུང་། ཡང་བྲག་དམར་རི་ཁྲོད་ན་བཞུགས་སྐབས་ཤིག་ལ། ནུབ་ཇ་གསོལ་དུས་ལ་ཨེ་རྣམ་ཤེས་ཤིག་ཐོན་བྱུང་གསུངས། མདུན་འཁོར་ཞིག་གིས་རྣམ་ཤེས་བཟང་ངན་ཅི་འདྲ་རེད་ཞུས་པས། ང་རང་གི་བུ་མོའི་རྣམ་ཤེས་ཡིན་འདུག་གསུངས། ཕྱི་ཉིན་ཟླ་དགོན་ནས་སྲས་མོ་འདས་སོང་ཟེར་ནས་བསུ་མ་ཐོན། སྐབས་ཤིག་དུད་ཁྱིམ་ཞིག་ལ་བྱིས་པ་ཡ་མ་ཞིག་ཡོད་པ་སྐྱབས་འཇུག་ཞུ་རུ་འོང་བ་ལ། ཨེ་ཅི་འདྲ་བའི་མི་ཚེ་རིང་བོ་ཅན་ཞིག་འདུག །སྐྱེ་སྔོན་རྟ་མགྲིན་བསྙེན་སྒྲུབ་བྱས་པའི་གང་ཟག་ཅིག་གི་སྐྱེ་བ་ཡིན་འདུག །མིང་ལ་རྟ་མགྲིན་ཚེ་རིང་ཐོགས་གསུངས་ཏེ་ཚེ་འགུགས་སོགས་གནང་ནས་ཡོན་བདག་ཕྱིར་སོང་། དེ་སྐབས་མདུན་འཁོར་གྱི་སློབ་མ་ཞིག་ཡོད་པ་ལ་བྱིས་པ་དེ་ཞག་བདུན་ལས་ཚེ་མི་འདུག་ཀྱང་། རྒད་པོ་དེ་ང་ལ་དད་མོས་ཆེར་མེད་པས་དྲང་པོར་མ་སྨྲས། རྗེས་སོར་ང་རང་གིས་མི་ཤེས་ཁི་སྨྲས་དང་མ་སྨྲས་མི་འདུག །ཁྱེད་ཀྱིས་ཟེར་མི་དགོས་གསུངས་ཀྱང་། སློབ་མ་དེས་བསམ་པར་དེ་ལུགས་ཟེར་དགོས་མ་གཏོགས་བླ་མ་ལ་ཕྱིས་སུ་སྐྱོན་འདོགས་བྱེད་ཡོང་སྙམ་ནས་རྗེས་སུ་རྒྱུགས་ནས་དྲང་པོར་བཤད་པས་དེའི་ཉིན་ནས་བགྲང་བའི་ཞག་བདུན་པར་ཤི་སོང་ངོ་། །ཡང་ཐེངས་གཅིག་སྤྲུལ་སྐུ་འཁོར་དང་བཅས་པ་རྩེ་རེའི་དུང་འཁོར་བསྐོར་རྒྱུ་དང་ཁྲི་འདུའི་ཇོ་བོ་མཇལ་དུ་འགྲོ་སྐབས་ལམ་ནས་རྩེ་རེ་ནས་ཡིན་པའི་བུད་མེད་གསུམ་གྱིས་མཇལ་ཁ་ཞུས་ནས། ཁོང་ཅག་གིས་ཁྱིམ་མི་ལ་གསང་སྟེ་ལྐོག་ནས་ལྷ་སར་འགྲོ་བ་ཡིན་པས། ཁྱེད་ཀྱིས་ཁོང་ཅག་ལྷ་སར་བདེ་བར་ཐོན་ཐུབ་མིན་གྱི་དགོངས་པ་གསུངས་རོགས་དང་། ཐུགས་གཏད་སྐྱབས་འཇུག་དང་ཕྱག་མདུད་གནང་རོགས་ཞུས་སྐབས་ཁོང་གིས་བུད་མེད་གསུམ་ལས་གཉིས་ལ་ཐད་ཀར་འདི་ཐོགས་གསུངས་ནས་ཕྱག་མདུད་གནང་ཞིང་། གསུམ་པ་དེ་ལ་ཐུགས་བསམ་ཅུང་ཙམ་བཞེས་ནས་ད་ཁྱོད་ཀྱིས་ཀྱང་འདི་ཐོགས་ཨེ་རེད་ཙམ་གསུངས་ནས་གནང་། མཐར་ཁོང་གིས་སེམས་བདེ་བདེ་གྱིས་ནས་སོང་དང་སྐྱོན་མེད་ཚུལ་གསུངས་བ་དང་། ཁོང་རྣམས་སོང་ནས་ཅུང་ཙམ་འགོར་རྗེས་ཁོང་གིས་བུད་མེད་རྗེས་མ་དེ་ལ་མདུད་པ་མ་བྱིན་ན་སེམས་སྡུག་ཨེ་མི་འགྲོ་བསམ་པ་ཡིན་མ་གཏོགས། མོ་རང་ཤི་རན་འདུག་ཡོད་ཁུ། གཞན་གཉིས་ལ་སྐྱོན་མི་འདུག་ཚུལ་འཁོར་རྣམས་ལ་གསུངས་སྐབས། ཡུམ་ཤེས་རབ་མཚོས་དེས་ན་ཁོང་ཅག་ལ་ངེས་པར་བཤད་དགོས། མ་བཤད་ན་བུད་མེད་དེ་ཁྱིམ་མི་ལ་ངོ་ཐུག་མི་ཐུབ་པ་དང་། རོགས་པ་གཉིས་ལ་དཀའ་ལས་ཆེ་ཚུལ་ཞུས་པས། ཁོང་གིས་དེ་ལྟར་བཤད་ན་ཁོང་གསུམ་པོའི་དགེ་བཅག་རེད་འགྲོ་བས་བཤད་མི་ཉན་ཚུལ་གསུང་བ་ལ། མོས་ནན་གྱིས་ཞུས་ཤིང་། ཁོང་ཚོ་ཚུར་བོས་ནས་དེ་ལུགས་བཤད། རྗེས་སུ་སྤྲུལ་སྐུ་འཁོར་བཅས་ཀྱིས་གནས་མཇལ་གྲུབ་ནས་ཕྱིར་བྱོན་སྐབས་བུད་མེད་དེ་ཤི་བས་བསྔོ་རྟེན་འབྱོར་ཚུལ་འདུག །ཡང་ཐེངས་གཅིག་ཕུག་ཁང་དགོན་ནང་ན་བཞུགས་སྐབས་ནུབ་གཅིག་ཁོང་ཉིད་སྒོར་བྱོན་དུས་ཁོང་གི་སློབ་མ་འཇིགས་རྣམ་དང་སྨན་བླ་གཉིས་ཀྱིས་ཁོང་གི་ཕྱག་གཡས་གཡོན་བརྟེན་ནས་ཡོང་བ་ལ་ཁོང་གིས་སློབ་མ་སྨན་བླ་ལ། ཁྱོད་འདི་གྲི་ཤི་ལ་བུད་འགྲོ་བ་འདྲ། ཧ་ཅང་གཟབ་གཟབ་དགོས་ཚུལ་གསུང་བ་དང་། ལོ་འགའི་རྗེས་ནས་བླ་མས་གཏེར་རྡོ་སྔོན་པོ་སྟེང་དུ་ཨ་ཡིག་དཀར་པོ་དོད་ཡོད་པ་ཞིག་གནང་ནས། འདི་ཁྱོད་ཀྱི་ལུས་དང་མ་འབྲལ། དེ་ལྟར་བྱས་ན་ཁྱོད་གྲི་གེགས་ལས་སྐྱོབ་ཨེ་མི་ཐུབ་སོགས་ནན་གྱིས་གསུང་བ་ལྟར་སྲུང་འཁོར་དེ་ནམ་རྒྱུན་ཁོའི་ལུས་དང་མ་འབྲལ་བར་བཏགས་པ་ལ། དུས་ཕྱིས་གསར་བརྗེ་སོགས་ཀྱི་དུས་འགྱུར་བྱུང་རྗེས་ཀྱི་སྐབས་ཡས་མས་ཤིག་ལ་ཁོ་རང་གིས་འབྲོག་ཐོག་ན་རྟ་འགའ་ཞིག་བསྲུང་ནས་བསྡད་ཡོད་པ་ལ། ནངས་མོ་ཞིག་ལ་རྟ་རྣམས་ག་ཤེད་ཅིག་ལ་འདྲོགས་སོང་བ་དང་། ཁོ་རང་བྲེལ་འཚུབ་ངང་ཡར་ལངས་ནས་རྗེས་བདའ་བ་ན། རྟ་རྣམས་དེ་དང་ཐག་ཡེ་མི་རིང་བའི་ས་ཞིག་འདུག་པ་ལ། ཁོ་རང་གིས་ནམ་རྒྱུན་གྱི་ཞོན་རྟ་ཧ་ཅང་གཡུང་མོ་ཞིག་ཡོད་པ་དེ་ལ་སྐ་རག་གིས་སྲབ་ལྟ་བུ་ཞིག་བྱས་ནས་ཞོན་ཏེ་རྟ་གཞན་རྣམས་ལ་འདྲོགས་བསླངས་ནས་འདེད་སྐབས་ཁོའི་རྟ་ཡང་འདྲོགས་ནས་དེར་རྟ་གྲིར་བསད་པ་རེད། ཉིན་དེར་བྲེལ་འཚུབ་ཆེ་བས་སྲུང་འཁོར་དེ་འདོགས་རྒྱུ་ལྷག་སོང་བར་བཤད་རྒྱུ་འདུག །ཡང་ཐེངས་ཤིག་དྲུག་ཁྲིད་གསུང་སྐབས་ཤིག་ལ། བླ་མ་དམར་སྒྲིས་ཟེར་བ་སྐུ་མདུན་དུ་སོང་བ་ལ། ཁོང་གིས་ཁྱོད་ཇི་འདྲ་སྡུག་ཐུག་ན་ཡང་། རྫ་ཆུ་མ་འཐུང་། རྫ་ཆུ་གཏན་ནས་འཐུང་མི་ཉན་ཞེས་ཡང་ཡང་གསུངས་བ་ལ་སློབ་མ་གཞན་དག་གིས། ཁོ་རང་རྗེས་མ་རྫ་ཆུས་དུག་ནས་ཤི་བ་ལྟ་བུ་འབྱུང་རྒྱུ་ཡིན་ནམ་ཞེས་ཚོད་དཔག་སྣ་ཚོགས་བྱས། རྗེས་ནས་དུས་འགྱུར་བྱུང་སྟེ་ཆོས་ལུགས་ལ་བཀག་སྡོམ་དང་དགག་པ་སྣ་ཚོགས་གཏོང་སྐབས་ཁོ་རང་ནུབ་ཅིག་སེམས་སྡུག་མ་བཟོད་པར་རྫ་ཆུའི་ནང་ལ་ལྕེབ་ནས་རང་སྲོག་བཅད་བཏང་བར་གྲགས། ཡང་ཁོང་གི་ཞལ་ནས་སྤྱིར་དུར་ས་ལ་དཔྱད་པ་བྱེད་དགོས་ཚེ་ས་དཔྱད་ཀྱི་ཤེས་བྱ་ཡག་པོ་ཡོད་པ་ཙམ་གྱིས་མི་ཆོག་པར་གཞན་སེམས་ཤེས་པའི་ངོ་ཤེས་ངེས་པར་ལྡན་དགོས་ཏེ། གལ་ཏེ་སའི་དཔྱད་ལེགས་པོ་ཞིག་ཡིན་ཀྱང་ས་བདག་དེ་དམར་དུར་ལེན་མཁན་ཞིག་མིན་ན་ཕན་པ་མེད་པ་དང་། དམར་དུར་ལེན་མཁན་ཞིག་ཡིན་ན་སའི་དཔྱད་དེ་ཙམ་མ་ལེགས་ཀྱང་མི་སྐྱོན་དེ་དཔེར་ན། གསེར་ཉ་ལུང་བ་འདིའི་ས་དཔྱད་ཀྱི་ངོས་ནས་བལྟས་ན་སའི་དཔྱད་ཆེས་ལེགས་པོ་ཞིག་མིན་པར་བོན་ཅོག་ལྟ་བུ་ཞིག་ཡིན་མོད། འོན་ཀྱང་ས་བདག་དེ་དམར་དུར་ཧ་ཅང་ལེན་མཁན་ཞིག་ཡིན་པས་དུར་ས་ལེགས་པོ་འདུག་ཅེས་དུར་ས་འདི་གསར་འདེབས་བྱས་ཤིང་ཕྱིས་སུ་ཨ་རིག་ཡུལ་སྡེ་འདིའི་དུར་ས་ཆེ་ཤོས་ལྟ་བུ་ཞིག་ཆགས་ཡོད། དབོན་རུ་སྟོད་མའི་དཔོན་པོ་རིན་ཆེན་ཚེ་རྒྱལ་ཟེར་བ་དེ་གཏེར་ཆེན་མཆོག་ལ་ཧ་ཅང་དད་མདུན་ཆེ་ཞིང་སློབ་མ་ཆེ་གྲས་ཤིག་ཡིན། སྐབས་ཤིག་དཔོན་ཚང་སར་ཟླ་བ་གཅིག་ལྷག་བཞུགས་ནས་གསལ་རྒྱན་རྣམ་གཉིས་སོགས་ཀྱི་བཀའ་ཁྲིད་གནང་སྐབས་སྐྱུ་རའི་བསམ་གཏན་རྣམ་རྒྱལ་ཁོང་གིས་ཀྱང་དེའི་གྲས་ནས་ཞུ་བའི་སྐལ་བ་ཐོབ་སོང་གསུང་ཀི སྐབས་དེ་དུས་ལ་ཉིན་གཅིག་གྲྭ་བ་རྣམས་སྒོ་ཁར་བྱོན་ནས་ཁོང་གཅིག་པོ་སྤྱན་བཙུམ་ནས་གཟིམས་ཡོད་པ་འདྲ་བོ་བྱས་ནས་བཞུགས་འདུག །ཅུང་ཞིག་ནས་ཧ་བོ་ཧ་བོ་གསུངས་ནས་ཡང་སྔར་བཞིན་བཞུགས་འདུག །དེ་ནས་སྐབས་ཤིག་ལ་གསོལ་ཇ་དྲངས་ནས་ཁྱེད་ཀྱིས་ཅི་ཞིག་གསུང་ཀི་འདུག །ང་ཡང་སྐྲག་སོང་ཞུས་པས་ངས་ཅི་ཟེར་གསུང་བས་ལོ་རྒྱུས་ཞུས་པས། འོ་ཡ་ཡ་ཁྱེད་ཚོ་ཅང་སྐྲག་དགོས་ནི་མ་རེད་གདའ། དེ་རིང་འབྲུ་ཆུའི་གྲུ་བརྡིབས་པས་ཚང་མས་ང་ལ་འབོད་པ་བྱེད་ཀི་འདུག་ཀྱང་དེའི་ནང་ནས་མི་ལྔ་སྐྱོབས་མ་ཐུབ་པར་ཁུར་ཤོར་སོང་གསུངས། དེའི་ཉིན་འགའ་ནས་རྫོགས་ཆེན་རིན་པོ་ཆེའི་གཉེར་བ་སོགས་མི་ལྔ་སྒ་མཆོད་རྟེན་དཀར་པོའི་གྲུ་ཁ་ནས་གྲུ་བརྡིབས་ནས་ཤི་སོང་བའི་ལོ་རྒྱུས་དངོས་དག་ཚོར་བྱུང་ཟེར། ཉིན་གཅིག་སྒྲོན་གསལ་ཆོས་ཁྲིད་གསུང་བཞིན་པའི་སྐབས་ཅིག་ལ༑ ཡ་ཡ་ཁྱོད་ཐོན་སོང་ནས་གསུང་བས་ཅི་རེད་ཞུས་པས་ཁྲོམ་རྫ་རྒད་པོ་ང་ལ་རྩིས་ཆེན་བྱེད་མི་འདྲ་ཅིག་ཡོད་པས་ཁོ་ཤི་བའི་རྣམ་ཤེས་དེ་རེད་གསུངས་བས་ཉིན་གསུམ་གྱི་མཚམས་ནས་བསྔོ་སྨོན་ཞུ་མི་འབྱོར་སོང་ཟེར། དཔོན་རུའི་དཔོན་པོའི་མཚམས་གཡོག་བྱེད་མི་གྲྭ་བ་སྨྱོ་ཉམས་དོད་པ་འདྲ་བ་ཞིག་ཡོད་པ་དེས་སྐབས་ཤིག་ཁོང་ལ་གསོལ་ཇ་དྲངས་བས། ཁྱོད་རང་ཉིན་འགའ་ནས་རྐང་བ་ཆག་འགྲོ་ས་རེད་གསུངས། ཅི་ཞིག་བྱས་ན་ཕན་ཞུས་པས་དམིགས་བརྩེ་མ་འབུམ་ཞིག་འདོན་ན་མི་སྐྱོན་གསུངས་བས་ཁོས་གཟབ་ནན་བྱས་ནས་བཏོན་པས་ཉིན་གསུམ་ཀྱི་མཚམས་ཁང་བ་སུམ་ཐོག་གི་སྐས་མགོ་ནས་ལྷུང་སོང་ཡང་རྨས་སྐྱོན་ཙམ་ལས་ཆེར་མ་སྐྱོན་འདུག །ཡང་སྒྲོན་མ་གསལ་རྒྱན་ཀྱི་འབྲས་བུའི་རྣམ་གཞག་གསུང་སྐབས་ཤིག་ལ་སྤྱན་ནམ་མཁའ་ལ་གཟིགས་ནས་ཅི་འདྲའི་ངོ་མཚར་ཆེན་པོ་རེད། ཁྱེད་ཚོས་ལྟོས་དང་གསུངས། དེ་རིང་ས་ཐོབ་ཀྱི་སེམས་དཔའ་ཅིག་སྐུ་གཤེགས་ནས་ཤི་བོ་མང་པོ་དག་པའི་ཞིང་ལ་འདྲེན་འགྲོ་ཀི་འདུག །ངོ་མཚར་ཆེ་ཀི་འབྲས་བུའི་སྐབས་ནས་བཤད་པ་དེ་ཚོ་དང་འདྲ་འདུག་གསུངས། དེའི་ཉིན་བྲག་མགོ་མཚམས་རྒན་ཟེར་བའི་བླ་མ་མཚམས་པ་ས་སྐྱའི་བླ་མ་ངོ་མཚར་ཅན་ཞིག་ཡོད་པ་སྐུ་གྲོངས་བ་དང་ཁེལ་འདུག །སྐབས་དེར་ལོ་ཐོ་སོགས་གང་ཡང་ལྟ་རྒྱུ་མེད་པར་མ་ཟད་ཡར་ངོས་མར་ངོས་གང་ཡིན་ལ་དོ་སྣང་དང་གང་ཡིན་མ་ངེས་མོད། ཁོང་གཟིམས་འདུག་པ་ལ་སྐབས་ཤིག་འབོད་པ་གནང་ནས་ཅིག་ལྟོས་གདའ། ཚེས་བཅོ་ལྔའི་ཟླ་བ་གཟས་བཟུང་བ་འདྲ་གསུངས་བས་ཏག་ཏག་འགྲིགས་འདུག་པས། ང་ཚོས་ཚེས་གྲངས་གང་ཡིན་ཤེས་ཀི་མེད་པ་ལ་ཁྱེད་ཀྱིས་ཅི་ལྟར་དགོངས་ནི་རེད་ཞུས་པས། ཕྱིའི་ཉི་ཟླ་དང་ནང་གི་རྩ་ཐིག་རླུང་གི་གནད་གཅིག་པ་ཡིན་པས་ངས་དེ་ཙམ་མི་ཤེས་ཟེར་ནི་ཨི་རེད་གསུངས། སྒྲོན་གསལ་སྐབས་སོགས་སུ་ལུང་འགའ་ད་ལྟ་རྒྱུད་བཅུ་བདུན་དང་ཚིག་དངོས་དང་མི་མཐུན་པ་ལྟ་བུར་འདུག་ཀྱང་ང་ལ་ཨོ་རྒྱན་པདྨས་འདི་འདྲ་གསུངས་སོང་གསུངས། སྐབས་སྐབས་སུ་གནའ་གཏམ་དང་ཞལ་མཚར་སོགས་མང་དུ་གསུངས་ཀྱང་དོན་དུ་སེམས་ལ་ཕན་པའི་གདམས་ངག་དང་ཕྱི་མཐའ་གཟིགས་པའི་ལུང་བསྟན་འབའ་ཞིག་རེད་འདུག་ཟེར། ཐེངས་ཤིག་དཔོན་རིན་ཆེན་ཚེ་རྒྱལ་གློ་བུར་དུ་རྐང་བ་དྲེགས་ནད་ཀྱིས་ཟིན་ནས་མཚན་གང་པོར་གཟེར་བས། ཕྱི་ཉིན་མི་གཉིས་ནམ་མཁའ་འཇིགས་མེད་ཀྱི་སྐུ་མདུན་དུ་གཏང་བས་ཁོང་གཉིས་འོང་བའི་སྐབས་ལམ་ཁ་ཞིག་ནས་སྤྲུལ་སྐུ་ཚང་ས་ཆ་གཞན་ཞིག་ལ་ཕེབས་པ་དང་འཕྲད་བྱུང་བས་ལོ་རྒྱུས་རྣམས་ཞིབ་དུ་ཞུས་པས། ཁོང་གི་དུ་བ་ཚག་གསུམ་གསོལ་ཞིང་། ཚག་རོ་རྣམས་ཤོག་དྲིལ་བྱས་ཏེ་འདི་ཆུ་ལ་སྦངས་ནས་རྐང་བ་ལ་བཀུས་དང་སྐབས་ཤིག་ལ་མི་སྐྱོན་གསུངས། ཡང་ཕྱག་བྲིས་ཤིག་གནང་ནས་གསུང་ཤོག་འདི་ཁོ་ལ་སྤྲོད་ཐོངས་གསུང་བས་དེའི་ངོ་ན་ཁྱོད་རང་སྐབས་ཤིག་ལ་མི་སྐྱོན། རྗེས་སོར་ཡང་ན་ངོ་འདུག །དེ་དུས་རྒྱ་སྨན་པ་ཞིག་ལ་འཕྲད་འོང་གསུངས་ཡོད། ཕྱིས་སུ་ཟི་ལིང་སྟོད་རྒྱའི་ཚོགས་འདུ་ཅིག་ལ་འགྲོ་དགོས་བྱུང་སྐབས་དེ་དུས་ཡང་རྐང་བ་ན་བྱུང་བས་རྒྱའི་སྨན་པ་མགོ་སེར་ཅིག་ལ་ཐུག་ནས་ཁོས་སྨན་བཅོས་བྱས་ནས་སངས་དྲགས་ལ་སོང་ཟེར། ཡང་དཔོན་རུ་སྟོད་མའི་བཟང་པོ་ཟེར་བ་དེས་ཟོག་འགའ་བོར་བྱུང་བས་བཙལ་དུ་འགྲོ་སྐབས་དུད་ཁྱིམ་ཞིག་ལ་མགྲོན་པོར་སོང་། དེར་བླ་མ་དཔོན་གཡོག་འགས་འདོན་པ་གསུང་གིན་འདུག་པ་ལ་ཅུང་ཙམ་ནས་ཇ་གསོལ་སྐབས་ཁོས་བླ་མ་དེར་ངའི་ཟོག་འགའ་བོར་ཤོར་བས་ང་ལ་གསུང་བརྟགས་ཤིག་གནང་རོགས་ཞུས་པས། ཟོག་ནི་ཁྱོད་མ་ཐོན་སྔོན་སླས་ལ་ཐོན་ཚར་པས་ཅང་མི་སྐྱོན་ཡང་། དེ་བས་ཁྱོད་ལ་གྲི་སྲི་ཅིག་ལངས་བས་གྲི་ཤིའི་ཉེན་ཁ་འདུག་པས་གཟབ་དགོས་ས་རེད་གསུངས། ཁོ་རང་བླ་མ་ལ་རྒྱུས་མེད་སྟབས་ཐེ་ཚོམ་ངང་ཕྱིར་སོང་བས་ཟོག་ཐོན་འདུག་པས་ངོ་མཚར་སྐྱེས་ནས་ཁྱིམ་མིར་ལོ་རྒྱུས་བཤད་པས་ཕ་རྒན་གྱིས་བུ་ཆེ་བ་ལོ་ཉེར་གཅིག་སྟེང་ཇག་ལ་སོང་ནས་བསད་ཤོར་བས་ད་ལོ་དེའི་ཀེག་ལ་ཁྱོད་རང་ཁེལ་འདུག་པས་ད་ཁོང་ལ་སྐྱབས་འཇུག་ཞུ་རུ་འགྲོ་དགོས་ཚུལ་ལབ་པ་སོགས། མདོར་ན་ནམ་རྒྱུན་དུ་སློབ་མ་རྣམས་ཀྱི་རྒྱུད་ལ་ལོག་ལྟ་དང་ཚུལ་མིན་གྱི་སྤྱོད་པ་རྣམས་སྒྲིབ་མེད་དུ་མཁྱེན་ཅིང་གཟིགས་པ་སོགས་ཀུ་རེ་ཉམས་མཚར་ཚུན་ཆད་གང་གསུངས་བ་ཐམས་ཅད་དགོངས་པ་ཤ་སྟག་ཡིན་པར་ཡོངས་སུ་གྲགས་པ་ཞིག་ཡིན་པ་ལས། སྐབས་འགའ་དང་ཐེངས་ཁ་ཤས་ཙམ་མ་ཡིན་མོད་ཐམས་ཅད་ཡིག་ཐོག་དུ་འབྲི་བའི་ངལ་བ་མ་བྱས་ཀྱང་དཔེར་བརྗོད་ཙམ་ལ་འགའ་བཀོད་པ་ཡིན་ནོ། །སྣང་སེམས་དབང་བསྒྱུར་གྱི་རྟོགས་པའི་རྩལ་ཆེན་རྫོགས་པས་རྨད་བྱུང་གྲུབ་པའི་མཛད་པ་བསྟན་ཚུལ་ནི༑ རྣམ་ཐར་གསོལ་འདེབས་ལས། ཁྱད་པར་ཤེས་པས་བཏང་བའི་བེམ་པོ་ནི། །ངན་སེམས་འབྱུང་པོས་སྦྲན་ནས་ཡུལ་ཁམས་འགའ། །ཕུང་ལ་ཉེ་བར་སྦྱོར་དུས་ཏིང་འཛིན་གྱིས། །མཐུ་སྟོབས་ནུས་པས་བཏུལ་ལ་གསོལ་བ་འདེབས། །ཞེས་གསུངས་པ་ལྟར་ཉིན་ཞིག་རྗེ་ཉིད་གློ་བུར་དུ་དགོན་ནང་ལ་བྱོན་པས། དེར་ཁང་བ་ཐོག་བརྩེགས་ཤིག་གི་འོག་ཁང་དུ་མི་ཞིག་ཤི་ནས་བེམ་པོ་བཞག་འདུག་པར་གྲྭ་དཔོན་གཡོག་འགས་གཤིན་ཆོག་འདོན་བཞིན་འདུག་སྐབས། ཅུང་ཞིག་ནས་བེམ་པོ་འགུལ་ནས་རོ་ལངས་བྱུང་བ་ལ། གྲྭ་བ་རྣམས་སྐྲག་ནས་བྲོས་ལ་ཉེ་བ་ན། བླ་མས་གནས་འདྲེན་གྱི་ནང་ནས་འཕོ་བ་གསུང་སྐབས་དང་ཁེལ་ཡོད་པ། གཏེར་ཆེན་མཆོག་གིས་ཧིཀ་སྒྲ་འགའ་ཞིག་བརྗོད་པས་བེམ་རོའི་ཁ་སྣ་ནས་དུད་ཁུ་དང་རྣག་ཁྲག་འཛགས་ཏེ་དྲི་ངན་ཐུ་ལེར་སོང་ནས་རོ་ལངས་བཏུལ་བར་མཛད་པའི་ལོ་རྒྱུས་འདུག །སྐབས་ཤིག་སྐུ་འཁོར་འགའ་དང་བཅས་དགོན་པའི་ཉེ་འགྲམ་བྲ་འཇོང་ཞེས་པའི་ལུང་བའི་ནང་དུ་ཆིབས་གོང་ནས་ཕེབས་ཚེ་ཆིབས་རྟ་འདྲོགས་པས། ཆིབས་གོང་ནས་ལྷུང་བས་ཨ་ར་ར་ཞེས་ལན་འགའ་གསུངས་བས། ཞབས་ཕྱི་བ་ཚོ་མགྱོགས་མྱུར་གྱིས་སྐུ་རྩར་བཅར་ནས་སྐུ་ལུས་ལ་མ་བདེ་བ་ཨེ་བྱུང་ཞུས་པས། ང་རང་ལ་མ་བདེ་བ་མ་བྱུང་ཡང་། སྐལ་ཆད་པོ་ངས་སྡར་སྐད་ཤོར་ནི་བོ་ས་གནམ་གཉིས་ཀར་དོད་ཐལ་གསུངས་ནས་བྱོན། ད་ལྟ་ས་ཐོག་དེར་ཨ་ཡིག་རང་བྱུང་གི་རྣམ་པ་དང་། ནམ་མཁར་ར་ཡིག་རང་བྱུང་དངོས་སུ་མཇལ་རྒྱུ་ཡོད། བར་སྐབས་ཤིག་ལ་སྟོད་རྒྱ་ཟེར་བའི་དམག་མང་ཞིག་འོང་ནས་དགོན་ཁག་མང་པོ་གཏོར་བས་བསྟན་པ་ལ་གནོད་པ་ཚབས་ཆེན་བཟོ་བར་ཉེ་བ་ན། གཏེར་ཆེན་ཁོང་གི་བསྟན་སྲུང་ཡོངས་ཀྱི་གཙོ་བོ་ཡིད་བཞིན་དབང་གི་རྒྱལ་བོའི་ཕྲིན་ལས་བསྐུལ་བས་མ་རུང་བའི་འཁྲུགས་འཚུབ་ལེགས་པར་ཞི་སོང་བ་ཡིན་ཞེས་གསུང་སྲོལ་འདུག །གཞན་ཡང་དུས་རྒྱུན་རང་དགར་བཞུགས་ཡོད་པའི་སྐབས། ད་ཟླ་བ་གཅིག་གི་མཚམས་དང་ཟླ་བ་ཕྱེད་སོགས་ཀྱི་དུས་ཕྱི་རོལ་གྱི་ཉི་ཟླ་གཟའ་འཛིན་ཡོད་མེད་ནང་གི་རྩ་ཐིག་རླུང་གི་གནད་ལ་བརྟེན་ནས་གསལ་བོར་ཤེས་ཐུབ་པ་དང་། གཞན་བུད་མེད་མོ་ནད་ཀྱིས་ཚབ་ཆེན་ཟིན་པ་ལ་ཆེད་དུ་ལུས་འབྲེལ་གནང་བས་རྩ་ཐིག་རླུང་གི་གནད་ལ་དབང་འབྱོར་བའི་རྟགས་སུ་ཉིད་ཀྱིས་ཐིག་ལེ་ཡར་འདྲེན་གྱི་ཚུལ་གྱིས་ནད་བཞེས་ཏེ་ཕྱིས་ནངས་བར་གཏེར་ཆེན་ཉིད་ཀྱི་དྲི་ཆུ་ཁྲག་ཏུ་གྱུར་ཞིང་དེ་ཉིད་ནད་ལས་གྲོལ་བར་མཛད་པ་སོགས་ཡ་མཚན་གྱི་རྣམ་པར་ཐར་བ་ཆེས་མང་པོ་ཞིག་ནི་ཤིན་ཏུ་ངོ་མཚར་བའི་གནས་སུ་གྱུར་བ་སྨྲོས་མ་དགོས་མོད། གཏེར་ཆེན་ཉིད་ལ་མཚོན་ན་ཐེངས་གཅིག་ཙམ་མིན་པར་རྒྱུན་ལྡན་གྱི་མཛད་པའི་ཆ་ཤས་ཙམ་ཞིག་ཏུ་མངོན་ནོ། །ཡང་ཞལ་གསུང་རྣམ་ཐར་གསོལ་འདེབས་ལས། རོ་སྙོམས་སྤྱོད་པ་ལྷུར་ལེན་ཐོག་མ་ན། །གཞན་དག་ཡིད་ཆེས་དབུགས་དབྱུང་སྦྱིན་པའི་སླད། །སྲ་མཁྲེགས་ལྕགས་དང་སྤོས་ཀྱི་རིང་བུར་ནི༑ ༑རྡོ་རྗེའི་མདུད་པ་བོར་ལ་གསོལ་བ་འདེབས། །ཞེས་གསུངས་པ་ལྟར་སྲ་འཁྲེགས་ཀྱི་ལྕགས་དང་། སྤོས་ཀྱི་རེངས་བུ་སོགས་ལ་མདུད་པ་གནང་བར་མ་ཟད། ཡང་དེ་ཉིད་ལས། གྲི་གུས་བྲང་གཤགས་ལྷ་ཚོགས་མཐོང་སྟོན་དུ། །ཡུམ་གྱིས་མ་བཟོད་ཁྱིམ་ཐབ་རྩོད་པར་བསམ། །སླར་ནི་ཅི་ཡང་མ་ཉེས་བདེར་གཟིགས་པའི། །རྣམ་ཐར་གཞལ་མེད་མཆོག་ལ་གསོལ་བ་འདེབས། །ཞེས་གསུངས་བ་ལྟར་གྲི་ཡིས་བྲང་གཤགས་ནས་རྩ་གསུམ་ཞི་ཁྲོའི་དཀྱིལ་འཁོར་གྱི་བཀོད་པ་སྣང་བར་བྱས་པ་སོགས་སྣང་སེམས་དབང་བསྒྱུར་གྱི་གྲུབ་པའི་ས་མཐོར་བཞུགས་པས་རྨད་བྱུང་བརྟུལ་ཞུགས་ཀྱི་སྤྱོད་པ་བགྲང་ལས་འདས་པར་མཛད་པ་ནི་སྨྲོས་མ་དགོས་སོ། །གདན་ས་གསར་བཏབ་གནང་ཞིང་སྐལ་ལྡན་གྱི་བུ་སློབ་མང་དུ་བསྐྱང་ཚུལ་ནི། སྤྱིར་ཁོང་གི་སྐུ་གོང་མའི་གདན་ས་དངོས་ཟླ་རྒྱལ་དགོན་ཡིན་པས་དེར་གཏན་བཞུགས་གནང་ན་ཡང་། ཕྱི་ལོ་༡༩༡༩ ས་ལུག་ལོར་དགུང་གྲངས་སོ་གཅིག་བཞེས་པའི་སྐབས། ཁྱད་པར་དུ་དག་པ་ཡེ་ཤེས་ཀྱི་འཁོར་ལོ་ལས། མཁའ་འགྲོ་གསལ་ཁྱབ་དབང་མོ་ཡིས༔ སྒྲུབ་གནས་བྲག་དམར་མཆོང་རྫོང་ལ༔ དབེན་གནས་འོད་གསལ་ལྷུན་གྲུབ་གླིང་༔ ཕྱག་བཏབ་བསྟན་འགྲོ་ཕན་ཆེ་ཞིང་༔ དེ་རུ་བསྡད་པའི་སེམས་ཅན་ཀུན༔ ཐར་ལམ་ཟིན་པ་ཤ་སྟག་འབྱུང་༔ ཞེས་ལུང་བསྟན་པ་ལྟར། ཆོས་བདག་པདྨ་བློ་གྲོས་སོགས་ཀྱིས་རྟེན་འབྲེལ་གྱི་སྣ་དྲངས་ནས་མཁའ་འགྲོ་རྡོ་རྗེ་ཕག་མོའི་སྒྲུབ་གནས་བྲག་དམར་མཆོང་རྫོང་ངམ་དབེན་གནས་འོད་གསལ་ལྷུན་གྲུབ་གླིང་གི་རི་ཁྲོད་ཕྱག་བཏབ་མཛད་ནས་དེར་སྒོམ་གྲྭ་ལྟ་བུ་ཞིག་ཆགས། ཆོས་བདག་རིག་འཛིན་འགྱུར་མེད་རྣམ་རྒྱལ་སོགས་ཀྱིས་འདུ་ཁང་དང་བླ་མ་རྣམས་ཀྱི་གཟིམ་ཁང་། ཁྱད་པར་གཏེར་ཆེན་མཆོག་གི་གསུང་ཆོས་རྣམས་སྤར་ཤིང་ལ་བརྐོས་ནས་སྤར་ཁང་སོགས་གསར་བཞེངས་རྒྱ་ཆེར་མཛད། དེ་ནས་རིམ་བཞིན་གདན་ས་དེའི་སྟེང་ནས་གྲུབ་རྗེ་བླ་མས་ཉིད་ཀྱི་གསུང་ཆོས་དག་གཙོ་བྱས་པའི་དབང་ཁྲིད་བཤད་པ་མན་ངག་སོགས་གནང་སྟེ་བླ་གྲྭ་ཇོ་མོ་མི་སྐྱ་སོགས་རིག་འཛིན་འདུས་པའི་སྡེ་ཉིས་བརྒྱ་ཙམ་རྒྱུན་འདུག་བྱས་ཏེ་རི་ཁྲོད་དེ་ཉིད་དུ་ཆོས་ཀྱི་འཁོར་ལོ་རྒྱ་ཆེར་བསྐོར་བ་ཡིན་ལ། སྤྱིར་དཔལ་སྤྲུལ་ནམ་མཁའ་འཇིགས་མེད་ཁོང་ནི་ཨ་རིག་རྫའི་སྡེ་དགོན་སྐྱ་སེར་ཡོངས་ལ་དབང་ཁྲིད་ཟབ་མོའི་འབྲེལ་ཞིང་། གསོལ་བ་འདེབས་སའི་བླ་མ་གཅིག་པུར་གྱུར་ཡོད། ཁོང་གིས་ཀྱང་བྲག་དམར་རི་ཁྲོད་གཙོ་བོར་གྱུར་བའི་དགོན་སྡེ་འདི་ཉིད་ལ་གཞན་ལས་ལྷག་པའི་བརྩེ་གཟིགས་དང་། ལུགས་གཉིས་ཀྱི་འབྲེལ་འདྲིས་ཧ་ཅང་ཟབ་པས་གདན་ས་གཉིས་པ་ལྟ་བུ་ཆགས་ཡོད། ཁོང་གི་གསུང་ཆོས་རྣམས་ཀྱི་དབང་ཁྲིད་ལུང་གསུམ་གྱི་བརྒྱུད་འཛིན་གཙོ་ཆེ་ཤོས་རྒྱལ་བ་ཕུག་ཁང་དགོན་འདི་གར་འབྲེལ་ཡོད། གཏེར་ཆེན་མཆོག་གི་གསུང་རྣམས་དེང་སང་མཇལ་དུ་ཡོད་པ་དེ་ཐུགས་སྲས་ཆོས་བདག་རིག་འཛིན་འགྱུར་མེད་རྣམ་རྒྱལ་གྱི་བཀའ་དྲིན་ཡིན། ཕྱིས་སུ་བསྟན་པ་ཡང་དར་གྱི་སྐབས་སུ་གྲུབ་དབང་ཤེས་རབ་མེ་འབར་ཡབ་སྲས་ཀྱིས་གསུང་ཆོས་ཀྱི་པར་ཤིང་གསར་བཞེངས་གནང་། མཁན་ཆེན་བླ་མ་བསོད་ནམས་ཚེ་རིང་སོགས་བླ་མ་རྣམས་ཀྱིས་དབང་ལུང་གི་རྒྱུན་སྤེལ་ནས་མ་ཉམས་པར་བཞུགས་ཡོད་པ་ཡིན། སྤྱིར་སྔ་ཕྱི་ཀུན་ཏུ་ཁོང་ཉིད་ཀྱི་བཞུགས་ཡུལ་རྫ་ཆུ་ཁ་དང་། ཡབ་ཡུལ་གསེར་རྟ་དང་། མགོ་ལོག །ཡུལ་ཤུལ་རྫ་སྟོད་སོགས་ཕྱོགས་ཀྱི་སྡེ་དགོན་མང་པོ་ལ་ཐུན་མོང་དང་ཐུན་མིན་གྱི་ཆོས་སྐོར་སྣ་ཚོགས་གདུལ་བྱའི་ཁམས་དབང་དང་བསྟུན་ནས་ཟླ་ཁྲིད་མང་པོ་གནང་ཞིང་། ཕྱོགས་སོ་སོ་ནས་ཆོས་ཞུ་བ་ཡང་བགྲངས་ལས་འདས་པ་ཞིག་འོང་ཡང་། དེ་ཐམས་ཅད་ལ་རང་རང་གི་མོས་པ་དང་བསྟུན་པའི་སྒོ་ནས་རྗེས་སུ་བཟུང་བར་མཛད་པ་ཡིན། ལར་བླ་མ་གཞན་རྣམས་ཀྱིས་ནི་གདུལ་བྱ་སྤྱི་འགྲོས་དང་མཐུན་པའི་ཁྲིད་དང་གདམས་ངག་སོགས་གནང་བ་ཡིན་མོད། གཏེར་ཆེན་བླ་མ་མཆོག་གིས་གང་ཟག་སོ་སོའི་ཁམས་དབང་མོས་པ་མ་འདྲེས་པར་མཁྱེན་པའི་མངོན་ཤེས་དང་། ཟབ་དང་རྒྱ་ཆེ་བའི་གནས་ལ་རྣམ་པར་དཔྱོད་པའི་བློ་གྲོས་མཆོག་ཏུ་མངའ་བའི་སྟོབས་ཀྱིས། ཤེས་རབ་ཁྱད་པར་ཅན་དག་ལ་མདོ་རྒྱུད་མན་ངག་གི་ལུང་དང་སྦྱར་ནས་རྒྱ་ཆེ་བ་པཎྚི་ཏའི་ལུགས་ཀྱིས་གདམས་ངག་ངོ་སྤྲོད་གནང་བ་དང་། དད་པ་དང་མོས་གུས་མཆོག་ཏུ་མངའ་ཞིང་ཤེས་རབ་དེ་ཙམ་མི་ལྡན་པའི་རིགས་ལ་ཟབ་པ་ཀུ་ས་ལའི་ལུགས་ཀྱིས་གདམས་ངག་གི་རིམ་པ་མི་གཅིག་པ་སྣ་ཚོགས་གནང་བའི་ངོ་མཚར་གྱི་ཆེ་བ་ཁྱད་དུ་འཕགས་པ་ཡོད། སྤྱིར་གཏེར་ཆེན་རིན་པོ་ཆེ་འདི་ཉིད་ཀྱིས་མཚན་ལྡན་དགེ་བའི་བཤེས་གཉེན་དམ་པ་རྣམས་མཉེས་པ་གསུམ་གྱི་སྒོ་ནས་བསྟེན་ཞིང་མདོ་སྔགས་ཟབ་རྒྱས་ཀྱི་གནས་ལ་སྦྱངས་བའི་ཚུལ་མཛད་ཅིང་། ཁྱད་པར་བརྒྱུད་གསུམ་ཆུ་བོ་གཅིག་འདུས་རྒྱལ་དབང་པདྨ་ཀཱ་རའི་དོན་བརྒྱུད་དགོངས་པའི་བྱིན་ཆེན་སྙིང་ལ་འཕོས་ནས་ཟབ་མོ་གཏེར་གྱི་བཀའ་བབས་པ་དང་། མན་ངག་གསང་བ་ཟབ་མོའི་དོན་ཐུགས་ཉམས་སུ་བཞེས་ནས་རྩ་གནས་ཡི་གེ་སྤྲིན་གྱི་བཀོད་པར་ཤར་ཏེ། གཟུངས་དང་སྤོབས་པའི་བློ་གྲོས་ཀྱི་གཏེར་སྒོ་ཐམས་ཅད་ཅིག་ཆར་ཕྱེས་ནས་མདོ་སྔགས་ཀྱི་ཆོས་ཀུན་མི་མཁྱེན་པ་དང་མི་གཟིགས་པ་གཅིག་ཀྱང་མེད་པར་རང་དབང་འབྱོར་བ་འདི་ནི་གཞན་ལ་མེད་པའི་རྣམ་ཐར་ཡོངས་ཀྱི་ཁྱད་ཆོས་གཙོ་བོ་ཡིན་ཏེ། རྣམ་ཐར་གསོལ་འདེབས་ལས། རང་གྲོལ་མངོན་སུམ་སྟོན་པའི་བསྟན་པ་དངོས། །དེ་ཡི་གཟུགས་བརྙན་ཐེག་པའི་རིམ་པ་བརྒྱད། །ཤེས་རབ་གསུམ་གྱིས་དོན་བཅུད་གཅིག་ཏུ་བསྡུས། །མན་ངག་ཁྲིགས་སུ་སྡེབས་ལ་གསོལ་བ་འདེབས། །ཞེས་གསུངས་བ་ལྟར་རོ། །ཁོང་ཞལ་བཞུགས་པའི་སྐབས་དེར་ཡུལ་རྫ་ཆུ་ཁ་འདིར་སྔ་འགྱུར་བསྟན་པའི་གསོས་སྨན་དུ་གྱུར་བ་ནི་ཐུབ་དགའ་ཡིད་བཞིན་ནོར་བུ་གཅིག་པུར་གྱུར་ཡོད་ཅིང་། ཁོང་རྣམ་པ་གཉིས་ཐུགས་སྣང་ཤིན་ཏུ་མཐུན་པར་མ་ཟད་བླ་སློབ་རེས་མོས་སུ་གྱུར་ཡོད་པ་དང་། ཐུབ་དགའ་ཡིད་བཞིན་ནོར་བུའི་སློབ་མ་ཞིག་ཡིན་ཕྱིན་ཕལ་ཆེར་དཔལ་སྤྲུལ་ནམ་མཁའ་འཇིགས་མེད་ཀྱི་སློབ་མར་མ་གྱུར་བ་མེད་ལ། མན་ངག་རྫོགས་པ་ཆེན་པོའི་ཟབ་ཁྲིད་ཀྱི་སྐོར་རྣམས་གཏེར་ཆེན་ཁོང་གི་མདུན་ནས་ཞུ་དགོས་ཞེས་ནམ་རྒྱུན་བཀའ་སློབ་བསྩལ་བ་དང་། མཁན་ཆེན་ཁོང་ཉིད་སྐུ་འདའ་བ་ལ་ཉེ་སྐབས་ཕྱོགས་ཀྱི་སྐྱེས་ཆེན་དམ་པ་མང་པོས་བཞུགས་ཞུས་ནན་དུ་བྱས་ཀྱང་ཞལ་བཞེས་མ་གནང་བ་ལ། གཏེར་ཆེན་མཆོག་གིས་བཀའ་གསུང་ཧ་ཅང་ནན་པོས་ཞུ་བསྐུལ་ཕུལ་བར་ཞལ་ངོ་གཅོག་མ་ཐུབ་པར་སྤྲེལ་ཟླའི་ཚེས་བཅུ་བར་དུ་སྐུ་ཚེ་བསྲིང་བར་མཛད་པའི་རྣམ་ཐར་ངོ་མཚར་བ་སྣང་། གཞན་ཡང་རྫོང་གསར་མཁྱེན་བརྩེ་ཆོས་ཀྱི་བློ་གྲོས་ཀྱིས་སློབ་ཚོགས་མང་པོའི་དབུས་སུ་རྫ་ཆུ་ཁའི་དཔལ་སྤྲུལ་ནམ་མཁའ་འཇིགས་མེད་དེ་ལྷུན་གྲུབ་རིག་འཛིན་གྱི་ས་ལ་བཞུགས་ཡོད་ནི་རེད། དེང་སང་གི་རྟོག་གེ་བ་ཁ་ཤས་ཀྱིས་ཁོང་གི་གསུང་ཆོས་དེ་ཚོར་འཐད་མི་འཐད་ལབ་པ་དེ་ཚོ་རང་གི་ཉེས་པ་བསགས་པའི་རྒྱུ་རེད་ཞེས་དངོས་སུ་གསུངས་བ། ཁྲ་ཆོག་མཁན་ཆེན་ཀརྨ་ཚེ་བརྟན་གྱིས་གསན་པའི་རྐྱེན་གྱིས་ཁོང་གི་ཡིད་འཕྲོག་ནས་བཅོས་མིན་གྱི་དད་པ་དང་མོས་གུས་སྐྱེས་ཏེ། ཕྱིས་སུ་ཆེད་དུ་གྲུབ་དབང་ནམ་མཁའ་འཇིགས་མེད་ཀྱི་མདུན་ལ་ཕེབས་ནས་གསལ་རྒྱན་རྣམ་གཉིས་ཀྱིས་གཙོས་པའི་ཉིད་ཀྱི་ཆོས་སྐོར་རྣམས་གསན་པས་ངེས་པ་དོན་གྱི་རིགས་བདག་ཏུ་གྱུར། ཚོགས་པའི་དབུས་ནས་ཆོས་ཀྱི་བདག་པོར་མངའ་གསོལ་བ་དང་བརྒྱུད་པ་སྤེལ་དགོས་པའི་བཀའ་ཁྲོལ་བ་དང་། མ་ཕྱིའི་ཕྱག་དཔེ་མཆན་དང་བཅས་པ་གནང་བར་མཛད་པས་ཕྱིས་སུ་མདོ་ཁམས་ལྷོ་ཟླའི་ཕྱོགས་སུ་བརྒྱུད་འཛིན་ཆེ་ཤོས་སུ་གྱུར་ཞིང་གསུང་གི་ཕྲིན་ལས་རྒྱ་ཆེར་སྤེལ་ཡོད་ལ། ཁོང་གི་གསུང་འཕྲོས་ལ། སྔ་མོ་གསར་རྙིང་གི་མཁས་པ་མང་པོའི་ཞལ་སྒོ་འགྲིམས་མྱོང་ཡང་། མདོ་སྔགས་གཉིས་ཀ་ལ་ངེས་པ་དོན་གྱིས་མཁས་པ་ནི་དཔལ་སྤྲུལ་ནམ་མཁའ་འཇིགས་མེད་ལས་ལྷག་ཅིག་མཇལ་མ་མྱོང་བས་རྒྱལ་དབང་ཨོ་རྒྱན་ཆེན་པོའི་རྒྱལ་ཚབ་དངོས་ཡིན་ཞེས་ཡང་ཡང་གསུངས་བའི་བཤད་རྒྱུན་འདུག །ཡང་ཐུགས་སྲས་བུ་སློབ་ཡོངས་ཀྱི་གཙོ་བོ་ཕུག་ཁང་མཁན་ཆེན་བསོད་ནམས་ཚེ་རིང་ཁོང་ཉིད་སྐུ་ན་གཞོན་དུས་སྐབས་ཤིག་ལ་མཐུ་དང་ངན་སྔགས་ལ་དབང་ཐོབ་པ་ཞིག་བྱེད་དགོས་དགོངས་ནས་དྲག་པོ་སྔགས་ཀྱི་ལས་སྦྱོར་ལ་ཅུང་སློབ་སྦྱོང་དང་ཉམས་ལེན་བྱས་པས་དར་ནག་གཡབ་པས་མེ་སྟག་འཕྲོ་ནུས་པ་ཞིག་བྱུང་ཡང་། རིགས་ཀྱི་བདག་པོ་སྤྲུལ་སྐུ་ནམ་མཁའ་འཇིགས་མེད་ཀྱིས་ཉིན་ཞིག་གློ་བུར་དུ་འབོད་མི་བཏང་བྱུང་བས་སྐུ་དྲུང་དུ་སོང་བས། ཁྱོད་ཀྱིས་གཞན་ཕན་བྱང་ཆུབ་སེམས་ལ་ཉམས་ལེན་བྱས་ནས་ཐར་བ་བྱང་ཆུབ་སྒྲུབ་དགོས་རྒྱུ་དེ་མི་སྒྲུབ་པར་འདི་འདྲའི་རིགས་དེ་ཚོ་ཆོས་པ་རྣམ་དག་གི་བར་ཆད་དུ་འགྱུར་ཉེན་ཆེ་གསུངས་ནས་བཀའ་བཀྱོན་གནང་བས་རྫས་སྦྱོར་ཡིག་ཆ་ཐམས་ཅད་མེ་ལ་བསྲེགས། ཡང་སྐབས་ཤིག་ན་ཁོང་ལ་གྲུབ་དབང་རིན་པོ་ཆེས། ངས་བྲིས་པའི་ཆོས་ཚན་དེ་རྣམས་སྔར་ཁྱོད་ཀྱིས་ཐོབ་ཟིན་པ་དང་། མ་ཐོབ་པ་གང་ཅི་རིགས་ཀུན་ཁྱོད་ཀྱིས་གཞན་ལ་འཆད་སྤེལ་གྱིས་དང་བཀའི་གནང་བ་སྦྱིན་པ་ཡིན་གསུངས། ཡང་ཐེངས་ཤིག་སྐུ་མདུན་དུ་སོང་བ་ན། ངས་གཤིན་རྗེ་ཐོག་ཆར་ཟེར་བ་ཞིག་ཕབ་ཡོད། སྨད་ལས་ནི་རྒྱ་རོང་ནམ་སྤྲུལ་ལ་ཕབ་པའི་སྐལ་བ་ཡོད། དབང་ནི་འབྲི་མ་ཁོམ་ཡང་། སྨིན་གླིང་དྲག་འཇོམས་དང་གཤིན་རྗེ་ཚེ་བདག་སོགས་དབང་གང་ཐོབ་ཀྱང་དེས་འཐུས། ཁྱོད་ལ་ང་རང་གིས་བཀའ་གཏད་ཅིག་བྱེད་གསུངས་ནས་བྱིན་ཕབ་དེ་གསུངས་བས་ཁོང་སྟན་གྱི་སྟེང་དུ་སྡོད་མི་ཚུགས་པའི་ཉམས་ཤིག་བྱུང་གསུང་བ་སོགས་ཀྱི་ཞལ་རྒྱུན་འདུག །མདོར་ན་གཏེར་ཆེན་བླ་མ་ཉིད་ཀྱིས་སྐུ་ཚེ་གང་བོར་རང་དོན་དུ་སྒོམ་སྒྲུབ་ཉམས་ལེན་དང་། གཞན་དོན་དུ་གདུལ་བྱ་སོ་སོའི་ཁམས་དབང་དང་བསྟུན་པའི་དབང་ཁྲིད་གདམས་ངག་སོགས་ཆོས་བཀའ་སྣ་ཚོགས་ཆེད་དུ་བསྩལ་བ་དང་། དགོངས་གཏེར་ཟབ་མོའི་ཆོས་སྐོར་རྣམས་ཕབ་པ་དང་། ལྐོག་གྱུར་མངོན་སུམ་དུ་གཟིགས་པའི་ལུང་བསྟན་གནང་བ་དང་། ཉམ་ཐག་གི་ནད་པ་ལ་སྨན་སྦྱིན་དང་། གཤིན་པོ་རྣམས་ལ་ལམ་སྟོན་བསྔོ་སྨོན་གནང་བ་སོགས་དམ་པའི་རྣམ་ཐར་འབའ་ཞིག་གིས་དུས་འདའ་བ་ལས་ཆོས་མིན་གྱི་སྤྱོད་པ་ཞིག་གནང་བའི་སྐབས་ཡོད་པ་མིན་ནོ༑ ༑འདའ་ཁའི་ཞལ་ཆེམས་སོགས་གནང་ནས་སྐུ་ཐ་མའི་མཛད་པ་བསྟན་ཚུལ་ནི། མཐར་སྐུ་ན་བགྲེས་པའི་སྐབས་ལ་ཉེ་བ་ན། མཐའ་དམག་འཇིགས་པའི་རུ་མཚོན་ཀུན་ནས་གཟིངས་ཏེ་ཐམས་ཅད་ཟིང་ཟིང་དུ་གྱུར་བའི་ཚེ། མ་འོངས་འབྱུང་འགྱུར་གྱི་དགོངས་པ་དང་ལུང་བསྟན་མང་དུ་གནང་ཞིང་ཟླ་རྒྱལ་དགོན་དུ་བཞུགས། དེའི་སྐོར་ཨ་རིག་རྫ་ཡི་སློབ་མ་ཨ་ཁུ་གྲགས་རྒྱམ་སོགས་ལ་གསུང་གླེང་འདྲ་གནང་ནས་བཞུགས་སྐབས། གློ་བུར་དུ་ཞལ་ཨ་རིག་ཕྱོགས་ལ་གྱུ་སྟེ། སྤྱན་ཆབ་ལོ་མའི་ཟིལ་བ་ལྟར་འཐོར་ནས་ད་ཨ་རིག་རྫ་བསད་གཏུབ་བྱེད་ཀྱིན་འདུག །ཚང་མས་ང་ལ་འབོད་པ་བྱེད་བཞིན་འདུག་མོད། བདག་གིས་ཅི་ཡང་བྱེད་རྒྱུ་ནི་མི་འདུག་གསུང་། དུས་དེར་སྒོ་རི་མོའི་ངོས་ནས་ཨ་རིག་རྫ་རྒྱ་དམག་གིས་གཏོར་བའི་དུས་ཁྲིག་ཁྲིག་ཡིན་འདུག །ད་ནི་ཁྱེད་རང་སློབ་མ་ཚོ་ཚང་མ་རང་རང་གི་ལམ་ལ་སོང་། དམ་ཚིག་རྣམ་པར་དག་པ་རེ་བསྲུངས་ནས་མོས་གུས་དང་གསོལ་འདེབས་བྱས་ན་རང་ཅག་དུས་ཀུན་འབྲལ་བ་ཡོད་ནི་མ་རེད། ཁ་སང་དེ་རིང་གི་དུས་འདིར་བླ་མ་དང་སློབ་མ། གྲྭ་རོགས་དང་གྲོགས་མཆེད་ཚོ་ལྷན་དུ་འདུག་པའི་དུས་མ་རེད། ཡར་མར་གྱི་བྱ་བཞག་འདི་ཚོ་ལ་ལྟོས་དང་གཟབ་གཟབ་རེ་བྱེད་དགོས་སོགས་གསུང་འཕྲོས་ཅི་རིགས་གནང་། ཉིན་གཅིག་དེ་ཕྱོགས་ཀྱི་གསར་བརྗེ་བ་འགས་འོ་བརྒྱལ་ཚབ་ཆེན་ཞུས་ནས་ཕྱིར་ཁྱིམ་ལ་བྱོན་དུས། མཁའ་འགྲོས་དེ་རིང་ཁྱེད་ཀྱིས་འོ་བརྒྱལ་ཆེན་པོ་རིག་བྱུང་ཞུས་པ་ལ། སྐྱོན་མ་བྱུང་། ང་རང་ཕོ་རོག་རྒྱལ་པོའི་མགོ་ནས་བལྟས་བསྡད་པས་ཁོ་ཚོས་ང་རང་གི་གྱོན་པ་དེ་ཡར་དྲུད་མར་དྲུད་བྱས་སོང་། ང་མ་དཀའ་ཡང་། གཡག་དམར་རིལ་ཅན་དེ་ལ་དཀོར་སྲུང་གིས་སྡང་མིག་ཅིག་བལྟས་བྱུང་བས་དེ་མ་བཟང་གསུང་། དེ་ནུབ་རྒད་པོ་རྫ་ཆུའི་ནང་དུ་ལྷུང་སོང་ཟེར། ཡང་བུད་མེད་ཅིག་གིས་ཧ་ཅང་མི་འོས་པའི་འོ་རྒྱལ་ཚབ་ཆེན་ཞུས་པ། ཕྱིས་སུ་མོ་ལ་སྦྲུལ་ཞིག་སྐྱེས་འོང་བས་ཡུལ་དེའི་མི་ཚང་མས་ཡོངས་གྲགས་སུ་སྦྲུལ་སྐྱེ་མ་ཞེས་འབོད་སྲོལ་བྱུང་འདུག་པ་སོགས་དེ་འདྲའི་ལོ་རྒྱུས་མང་དུ་འདུག །དེ་ལྟར་དུས་ཀྱི་འཚུབ་ཆ་ཆེས་ཆེར་ལྡང་བའི་སྐབས་དགུང་གྲངས་དོན་གཉིས་པ་ཕྱི་ལོ༡༩༦༠བོད་རབ་བྱུང་༡༦པའི་ཀུན་ལྡན་ཞེས་པ་ལྕགས་ཕོ་བྱི་བའི་ལོར་ཡུལ་མི་སློབ་འབངས་ཡོངས་ལ་མ་འོངས་འབྱུང་འགྱུར་གྱི་ལུང་བསྟན་སྤྱི་སྒེར་སོ་སོ་ལ་གསུངས་ཤིང་། ཁོང་གི་ཞལ་ཆེམས་ཀྱི་གཙོ་བོ་ནི་ཁྱེད་ཅག་གིས་ལས་རྒྱུ་འབྲས་ལ་ཡིད་ཆེས་དང་། ལྷ་དང་བླ་མ་ལ་གསོལ་འདེབས་སོགས་གལ་ཆེ། འདི་ལྟ་བུའི་དུས་འཁྲུགས་ཀྱི་རྒུད་པ་འདི་དག་ཀྱང་ལས་འབྲས་བསླུ་བ་མེད་པ་ལ་བརྟེན་ནས་བྱུང་བ་ཡིན་པས། བསྔོ་བ་དང་སྨོན་ལམ་བཟང་པོས་མཚམས་སྦྱར་རྒྱུ་གལ་ཆེ། སྙིང་རྗེ་བའི་ཡུལ་ཡིན་པ་ལས་ཁོང་ཁྲོ་བའི་ཡུལ་མིན་ཚུལ་སོགས་ནན་གྱིས་གསུངས་ཤིང་། མན་ངག་གི་གནད་དང་ལྡན་ན་འདི་ཚོ་ཚང་མ་འཁོར་འདས་རུ་ཤན་རེའི་གོ་ཆོད་ཀི་འདུག་གསུངས། སྐབས་དེར་རྔ་སྐས་ཁུག་ཏུ་སྦྲ་ཆེན་པོ་ཞིག་ཕུབས་ནས་རྫ་སྟོད་ཕྱོགས་གཙོ་བོར་གྱུར་བའི་མི་སྣ་མང་པོ་ཞིག་ལ་འཐབ་རྩོད་འཛིན་གྲྭ་བསྡུས་ཏེ་ཉིན་འགའ་ལ་འཐབ་རྩོད་དང་འདྲི་རྩད་ནན་པོ་བྱས་ཤིང་། མི་འགྱང་བར་ཕྱོགས་སོ་སོའི་བཙོན་ཁང་ལ་འདེད་རྒྱུ་ཡིན་པའི་རྟགས་མཚན་མངོན་པ་ན། ཁོང་གིས་གསང་ཡུམ་སོགས་ལ། ད་ནི་ང་རང་ཤི་སོང་ན་དགའ་བ་འདྲ། འདི་ཕན་ལ་གསོན་ནས་བསྡད་ན་དགོས་པ་ཆེན་པོ་མེད་པ་དང་། ཐག་རིང་ཞིག་ལ་འགྲོ་དགོས་ན་ལོ་རྒས་པས་དཀའ་ཚེགས་ལས་མེད་པ་འདྲ་སོགས་གསུང་འཕྲོས་ཅི་རིགས་བསྩལ་ཞིང་། བོད་ཟླ་དང་པོ་ཆོ་འཕྲུལ་ཟླ་བའི་མར་ངོས་ཚེས་ཉེར་བརྒྱད་ལ་བསམ་བཞིན་གཟུགས་སྐུའི་བཀོད་པ་དབྱིངས་སུ་བསྡུ་བའི་ཚུལ་བསྟན་པར་ཁོང་གི་དངོས་སློབ་དམ་པ་རྫ་རྒྱལ་མཁན་པོ་འབུམ་པ་ཐར་མཆོག་གི་ཞལ་རྒྱུན་ཁུངས་དག་འདུག་པས་རྗེས་འཇུག་སྐལ་བཟང་གི་སློབ་བུ་ཡང་སློབ་རྣམས་ཀྱིས་དུས་ཚེས་འདི་དང་བསྟུན་ནས་རྗེས་དྲན་འདས་མཆོད་ཀྱི་ཕྱག་ལས་སོགས་བསོད་ནམས་དགེ་བའི་ལས་སྣ་ཚོགས་བསྒྲུབ་པ་ཤིན་ཏུ་གལ་ཆེའོ། །སྐུ་གདུང་རིན་པོ་ཆེ་ནི་སུས་མི་ཚོར་བར་ལྐོག་ནས་རྫ་ཆུའི་ནང་དུ་གཤེགས་གསོལ་བྱས་ཤིང་། དེ་སྐབས་མཚན་མོར་ཆུ་ནང་དེ་ཀ་རུ་འཇའ་དང་འོད་ཕུང་འཁྲིགས་པ་སོགས་ངོ་མཚར་བའི་རྟགས་མཚན་སྣ་ཚོགས་འཆར་བར་ཡུལ་མི་རྣམས་ལ་གླེང་རྒྱུ་འདུག །ཐུགས་སྲས་བུ་སློབ་གཙོ་བོ་དག་གི་མཚན་ཐོ་ཆེ་ལོང་ཙམ་བཀོད་པ་ནི། སྐྱབས་རྗེ་གཏེར་ཆེན་བླ་མ་འདིའི་ཞལ་སློབ་ཏུ་གྱུར་བའི་བསྟན་འཛིན་གྱི་སྐྱེས་བུ་བགྲངས་ལས་འདས་པ་ཞིག་ཕྱོགས་དང་ཕྱོགས་སུ་མཆིས་ན་དེ་ཀུན་འབྲི་མི་ནུས་ཀྱང་། སྐབས་འདིར་ཕྱིན་ཆད་ལོ་རྒྱུས་ཀྱི་མཚམས་སྦྱོར་ལ་ཅུང་ཕན་ཕྱིར་ཡོངས་གྲགས་ཀྱི་དངོས་སློབ་གཙོ་བོ་འགའི་མཚན་ནས་བརྗོད་ན། སྙིགས་དུས་འགྲོ་བའི་སྐྱབས་གཅིག་ཆོས་རྗེ་འཇིགས་མེད་ཕུན་ཚོགས་འབྱུང་གནས། ཨ་རིག་པཎ་ཆེན་བླ་མ་པདྨ་ཚེ་དབང་ལྷུན་གྲུབ། ཁྲ་ཆོག་མཁན་ཆེན་ཀརྨ་ཚེ་བརྟན། རྒྱ་རོང་འཇའ་ལུས་པ་ཡེ་ཤེས་འབྱུང་གནས། འབྲི་གུང་ཟངས་ཤོག་ཅན་གྱི་འགྲེལ་བ་སྐུལ་མི་རྩེ་སྤྲུལ་ལྔ་པ་དཀོན་མཆོག་ངག་དབང་ཕྲིན་ལས། སྒྲུབ་བརྒྱུད་སྐུ་ཕྲེང་བརྒྱད་པ་དཀོན་མཆོག་བསྟན་འཛིན་ཐུབ་བསྟན་རྒྱལ་མཚན། རྫ་རྒྱལ་མཁན་ཆེན་འབུམ་པ་ཐར། འཇུ་ཉུང་མཁན་ཆེན་རིག་རྩལ་རྡོ་རྗེ། ཕུག་ཁང་མཁན་ཆེན་བསོད་ནམས་ཚེ་རིང་། མགོ་ཚྭའི་མཁན་ཆེན་དཔལ་ལྡན་རྡོ་རྗེ། དགེ་མང་མཁན་ཆེན་པདྨ་དབང་རྒྱལ། སྲས་མོ་མཁའ་འགྲོ་ཀུན་བཟང་དབང་མོ། ཆོས་བདག་རིག་འཛིན་འགྱུར་མེད་རྣམ་རྒྱལ། གྲུབ་དབང་ཤེས་རབ་མེ་འབར། ཕུག་ཁང་མགོན་བླ་པདྨ་འོད་ཟེར། དཔལ་ཁྱུང་སྔགས་དགོན་གྱི་སྤྲུལ་པདྨ་ཀུན་དགའ། ཀཿཐོག་རྨོག་ཚ་སྤྲུལ་སྐུ། བྱ་བྲལ་ནམ་མཁའ་ཡེ་ཤེས། རྡོ་ཁོག་གཅོད་པ། གོ་འཇོའི་མཁས་གྲུབ། ཆོས་བདག་པདྨ་བློ་གྲོས། ཆོས་བདག་ཤེས་རབ་བློ་འཕེལ། མགོ་ཚྭའི་ཨ་གྲགས། རྫ་རྒྱལ་རྟོགས་ལྡན་དགེ་གྲགས། གནུབས་ཟུར་སྤྲུལ་སྐུ་བློ་གྲོས་དབང་བོ། ཕུག་ཁང་མཁན་ཆེན་ཨ་ཁུ་གྲགས་རྒྱམ། སྐྱུ་རའི་བསམ་གཏན་རྣམ་རྒྱལ་སོགས་མཁན་སྤྲུལ་གསེར་རིའི་འཕྲེང་བ་ཚར་དུ་དངར་བ་ལྟ་བུའི་བསྟན་འཛིན་གྱི་སྐྱེས་བུ་དམ་པ་མང་པོས་གངས་ལྗོངས་ཀྱི་ཁྱོན་མ་ལུས་ པ་ཡོངས་སུ་གང་བར་བྱས ་སོ། །སྤྱིར་ཁོང་གི་ཐུན་མིན་དང་ཐུན་མོང་གི་མཛད་པའི་རྣམ་པར་ཐར་བ་བསམ་གྱིས་མི་ཁྱབ་པ་ཞིག་ཡོད་མོད་ཀྱང་། ཡི་གེའི་གཟུགས་སུ་བཀོད་པ་ཉུང་བས་ཕྱིས་སུ་ངག་རྒྱུན་དང་ཡིག་ཆ་ཁག་ཏུ་དེ་ཙམ་ལས་མི་འདུག །གཏེར་ཆེན་མཆོག་གི་བརྒྱུད་འཛིན་ཐུགས་སྲས་ཡོངས་ཀྱི་ཐུ་བོ་ཀུན་གཟིགས་མཁན་ཆེན་པདྨ་དབང་ལྷུན་གྲུབ་མཆོག་གི་ཞལ་སྔ་ནས་མཛད་པའི་རྣམ་ཐར་གྱི་ཆེ་བ་ལེགས་པར་བསྟན་པའི་བསྟོད་ཚིག་ཚན་པ་གཉིས་བཞུགས་པ་དེ་ཉིད་ཕྱི་རབས་གདུལ་བྱ་ཡོངས་ཀྱི་དད་མོས་ཀྱི་གསོས་དང་། ལོ་རྒྱུས་ཀྱི་ཆེ་བ་ཉིད་ཡང་དག་པར་མཚོན་ཕྱིར་འདིར་ཆ་ཚང་བར་དཀྱུས་སུ་བཀོད་ན།

༈ དཔལ་ལྡན་བླ་མ་དམ་པའི་རྣམ་ཐར་ཟག་མེད་ཡོན་ཏན་རྒྱ་མཚོའི་གནས་ལས་ཕྱུང་བའི་ཆ་ཤས་ངོ་མཚར་བདུད་རྩིའི་ཟིལ་དངར་ཞེས་བྱ་བ་བཞུགས་སོ། །

ཁྱད་ཆོས་དྲུག་གི་ཐོག་མའི་གཞི་ལ་མངོན་བྱང་ཆུབ་ནས་ཡེ་ཤེས་སྣང་བའི་རྩལ་ཆེན་རྫོགས། །ཟག་པ་མེད་པའི་རང་སྣང་ཡོངས་དག་བདུན་ལྡན་གར་གྱི་འཕོ་མེད་ལོངས་སྐུའི་སྤྲིན་ཆེན་བཀོད། །སྣ་ཚོགས་སྒྱུ་མའི་རྣམ་པར་རོལ་པས་གང་འདུལ་ཐབས་ཆེན་འགྲོ་གནས་ཁྱབ་པར་སྤྲུལ་པར་ཤར། །སྐུ་གསུམ་ཡོངས་རྫོགས་མངའ་བདག་འདྲེན་མཆོག་ནམ་མཁའ་འཇིགས་མེད་ཚེ་རབས་ཕྲེང་བར་གཏན་གྱི་སྐྱབས། །མགོན་ཁྱོད་སྙིགས་ལྔའི་འགྲོ་ལ་རྗེས་ཆགས་པས། །རབ་ཟབ་གདམས་པའི་བདུད་རྩིའི་སྒོ་ཕྱེ་ཞིང༌། །སྣང་སེམས་དབང་བསྒྱུར་རྨད་བྱུང་ཐབས་མཆོག་གིས། །གདུལ་འགྲོའི་བདེན་ཞེན་འཆང་བ་བཙན་ཐབས་གཅོད། །ཡེ་ཤེས་སྒྱུ་མའི་བཀོད་པ་གངས་ཅན་མཚོ། །རྣམ་མཁྱེན་ཉིད་ལས་གཞན་གྱིས་གཞལ་འོས་ཅི༑ ༑འོན་ཀྱང་དད་པའི་མྱུ་གུ་སློང་བའི་ཕྱིར། །ཆ་ལས་ཆ་ཙམ་ངག་གི་ལམ་དུ་སྤེལ། །རྗེ་ཉིད་མཚན་དཔེའི་དཀྱིལ་འཁོར་ཤར་ཙམ་ན། །འཇམ་དཔལ་ཡི་གེ་དྲུག་པའི་རིག་སྔགས་ཆེ། །ཐོགས་མེད་བཟླས་པས་འཁོར་ཀུན་དད་ཅིང་བསྔགས། །སྐྱེས་ཐོབ་བློ་གྲོས་འདབ་བརྒྱའི་ཟེའུ་འབྲུ་དགོད། །སྔོན་སྦྱངས་ཟག་མེད་ཡེ་ཤེས་ནོར་བུའི་འོད། །མངལ་གྱི་དྲི་མས་མ་སྦགས་མངོན་རྟགས་སུ། །མིང་གཞིའི་ཡི་གེའི་གཟུགས་དང་སྒྲ་གདངས་སོགས། །མ་བསླབས་མཁྱེན་པའི་འོད་སྣང་རྣམ་པར་བཀྲ། །སྣང་ཚུལ་གཞོན་ནུའི་རོལ་རྩེད་ལ་བརྩོན་ནས། །ཕུག་རོན་བྱེའུ་མདའ་རྡོས་བསད་པ་ཡང༌། །ཉིན་ཞག་འདས་མཚམས་ཤི་བ་སླར་བསླངས་ནས། །འདབ་མའི་ཟློས་གར་སྒྱུར་བའི་བྱ་བ་བཀོད། །རཏྣའི་མིང་ཅན་སྐྱེས་བུའི་ཚེའི་འདུ་བྱེད། །ཉེ་བར་གཏུགས་པའི་ལྐོག་གྱུར་དངོས་པོ་ཡང༌། །ལྷའི་སྤྱན་དྲི་མ་མེད་པས་ལེགས་གཟིགས་ནས། །ལུང་བསྟན་མེ་ལོང་གསལ་བས་གཞན་ཡིད་འཕྲོག །སུམ་ཐོག་མཁར་གྱི་རྩེ་ལས་འཕུར་ཐབས་ཀྱིས། །མཁའ་ལ་ཐོགས་མེད་བགྲོད་པའི་ངོ་མཚར་གྱིས། །སྐྱེ་བོའི་མིག་ལ་ཡ་མཚན་བཀོད་པ་སྟོན། །སྣང་སེམས་དབང་བསྒྱུར་གྲུབ་པའི་རྩལ་ཆེན་ངོམས། །གཏིང་བྲལ་མཚོ་ཡི་སྟེང་ནས་གྲོགས་དང་བཅས། །ལེགས་པར་བྱོན་དང་བཞུད་པའི་བརྟུལ་ཞུགས་ཀྱིས། །བྱིས་རྣམས་དད་དང་མོས་པའི་གནས་ལ་བཀོད། །ཆོས་ཀུན་དབང་བསྒྱུར་རྫུ་འཕྲུལ་རྩལ་ཆེན་རྫོགས། །མགོན་ཁྱོད་དྲག་ཤུལ་ཏིང་འཛིན་ལ་རོལ་པས། །བྱད་མས་རྦད་པའི་ཐོག་སེར་སླར་བཟློགས་ནས། །མི་བཟད་གློག་ཞགས་འཁྱུག་པའི་སྒྲ་བརྒྱ་བ། །སྟོབས་བཅོམ་ས་ལ་ཕབ་པའི་དཔལ་རྩལ་ངོམས། །དགུན་དུས་གྲང་རླུང་བདོ་བའི་དུས་ཀྱི་ཚེ། །གསུང་རྟེན་ཆོས་ཕུང་རྡོ་འབུམ་ཆེན་པོ་ལ། །སྒྲོན་མེའི་ཕྲེང་བའི་བཀོད་པ་ལེགས་བསྟར་བ། །མེ་ལྕེ་མི་གཡོ་འཇའ་འོད་རྣམ་པར་བཀྲ། །སྦས་གནས་འགྲིམ་ལ་མངོན་ཕྱོགས་སྐྱེ་བོའི་དབུས། །འབྱུང་འགྱུར་སྟོན་པའི་བདེན་གསུང་མ་ཀུ་རར། །ལྐོག་གྱུར་མངོན་པར་བཀྲ་བའི་གར་མཁན་གྱིས། །དེར་འཁོད་བློ་སྣང་ངེས་ཤེས་གནས་ལ་བཀོད། །རི་ཀླུང་དུ་མས་བསྐལ་བའི་དམག་སྡེ་ཡང༌། །མངོན་སུམ་དངོས་བཞིན་གཟིགས་པའི་མཁྱེན་སྤྱན་གྱིས། །ལེགས་ཉེས་འཆད་པའི་རྣམ་གཞག་གཏན་ཚིགས་ཀྱིས། །ཐེ་ཚོམ་མཁན་ཡང་དད་པའི་སྤུ་ལོང་གཡོས། །ལྷ་དང་ཌཱ་ཀིས་མངོན་སུམ་ལུང་སྟོན་ཞིང༌། །ཀུན་འབྱུང་རྒྱུ་འབྲས་དག་མཉམ་ངོ་བོར་རོལ། །གཡོ་མེད་དགོངས་པ་ཆོས་ཟད་གནས་ལ་ཕྱིན། །ཀུན་བཟང་གདོད་མའི་མགོན་པོའི་ཞལ་སྐྱིན་དངོས། །གསང་འཛིན་དགའ་རབ་དཔའ་བོ་ཇི་བཞིན་དུ། །གསང་ཆེན་རྒྱུད་སྡེ་རྒྱ་མཚོའི་མཛོད་ལ་དབང༌། །གསང་བ་སེམས་ཀྱི་གནས་ལུགས་ལེགས་སྟོན་པས། །གསང་སྔགས་བསྟན་པའི་དེ་ཉིད་གསལ་བར་མཛད། །མཚོར་འཁྲུངས་རྒྱལ་བ་མཆོག་གི་རྒྱལ་ཚབ་ཆེ། །ཟབ་མོའི་ཆོས་གཏེར་ལ་དབང་ཆོས་ཀྱི་མཛོད། །གྲུབ་པའི་དབང་ཕྱུག་ཆེན་པོ་དབང་བཅུའི་འབྱོར། །ཕུན་ཚོགས་དགེ་མཚན་བྱེ་བའི་དགེ་ལེགས་སྩོལ། །ཞེས་པའི་བསྟོད་ཚིག་འདི་ཉིད་ཆོས་བདག་རིག་འཛིན་འགྱུར་མེད་རྣམ་རྒྱལ་གྱིས་ངོ་མཚར་བའི་རྣམ་ཐར་གྱི་སྙིང་བོ་འགའ་ཞིག་ཟིན་བྲིས་སུ་བགྱིས་ནས་འདི་ལྟ་བུ་ཞིག་དགོས་ཞེས་རྩོམ་པར་བསྐུལ་བ་ལྟར་ཀུན་གཟིགས་མཁན་ཆེན་བླ་མས་མཛད་པ་ཡིན་སྐད་འདུག །

༈ ཡང་བསྟོད་པ་ཚན་གཅིག་ནི། ཨོཾ་སྭ་སྟི། སྐུ་གསུམ་རྒྱལ་བ་ཀུན་དང་དགོངས་པ་མཉམ། །བརྡ་བརྒྱུད་རིག་འཛིན་རྒྱ་མཚོར་སྤྱོད་ཡུལ་གཅིག །སྙན་བརྒྱུད་མན་ངག་བྱེ་བའི་མཛོད་འཆང་བའི། །བཀའ་བབ་གཏེར་གྱི་མངའ་བདག་བླ་མར་འདུད། །གང་གི་གསང་གསུམ་ལྷ་ལམ་དོ་རས་ཀྱང༌། །ངེས་འོས་མ་ཡིན་ས་མཆོག་བཅུ་བས་ཀྱང༌། །སྤྱོད་ཡུལ་མིན་ན་བདག་འདྲ་བྱིས་པའི་བློ། །ཀུན་རྟོག་བྱེའུའི་རྩལ་གྱིས་ཇི་ལྟར་གཞལ། །འོན་ཀྱང་ངོ་མཚར་གཏམ་གྱི་འོད་ཕྲེང་གིས། །དད་གསུམ་པད་ཚལ་འབྱེད་ལ་སྤྲོ་བ་བརྟས། །གསུང་མཆོག་མ༵་ཎི་མཆོད་སྡོང་བརྩེགས་པ་ལས། །གྲུབ་གཉིས་ཆུ༵་རྒྱུན་འབེབས་པའི་བསྟི་གནས་དེར། །གང་དེའི་དགོངས་ཀློང་ཟག་མེད་ཆོས་ཀྱི་གཏེར། །ཟབ་ལས་ཆེས་ཟབ་རྫོགས་རིམ་བར་དོའི་ཁྲིད། །དམ་གཙང་རྣལ་འབྱོར་ཕོ་མོའི་སྐལ་བཟང་དུ། །བྱིན་རླབས་ཞལ་རླངས་དང་བཅས་སྩོལ་བའི་དུས། །རྨད་བྱུང་ངོ་མཚར་བཀོད་པ་འདི་ལྟར་སྣང༌། །སྣ་ཚོགས་འོད་ལྔ་འབར་བའི་འཇའ་ཚོན་གུར། །ལྔ་ཕྲག་ཚོམ་བུའི་ཐིག་ལེ་གྲངས་མེད་པས། །སྤྲིན་བྲལ་ལྷ་ལམ་ཁེངས་པའི་ཆོ་འཕྲུལ་གྱིས། །དགུན་ར་སྨིན་དྲུག་ཟླ་བ་གཅིག་གི་བར། །དེར་འཁོད་སྐྱེ་བོ་ངོ་མཚར་གནས་ལ་བཀོད། །གང་གི་གསུང་གསང་མགུལ་གྱི་བུམ་བཟང་ལས། །སྨིན་གྲོལ་ཆོས་ཀྱི་ཟབ་གསང་འཆད་པའི་སྒྲས། །གནས་ཡུལ་འགྱང་གིས་བསྐལ་བའི་ཤག་མདོ་སོགས། །སྐྱེ་བོ་དུ་མའི་རྣ་བའི་བདུད་རྩི་རུ། །མངོན་སུམ་མྱོང་དེ་རྒྱལ་གསུང་ཁྱད་ཆོས་དངོས། །ཡང་གཅིག་གནས་དེར་རུ་ཤན་མཛད་པའི་སྐབས། །སྙན་འཇེབས་སྒྲ་གསང་ཆེན་པོ་གྲགས་པ་དང༌། །མི་ཡིས་མ་བཀྲོལ་སྣ་ཚོགས་རོལ་མོའི་སྒྲས། །རྣལ་འབྱོར་ཕོ་མོའི་སྙན་གསང་ངོ་མཚར་བྱས། །ཁ་དོག་ལྔ་པའི་དབང་པོའི་ཚོན་རིས་ཀྱིས། །རེ་ཁཱ་གསར་བའི་འོད་ཕྲེང་ཅིར་ཡང་བཀྲ། །དེ་བཞིན་རྩ་རླུང་རིས་འབུད་མཛད་པའི་སྐབས། །ཌ་དྲིལ་རྐང་གླིང་འཁྲོལ་བའི་སྒྲ་སྐད་ཀྱིས། །འུ་ཅོར་ཤོད་དང་མཛོ་རྒན་སྒང་སོགས་སུ། །རྫི་འུར་འཁོད་པའི་སྐྱེ་བོ་ངོ་མཚར་བྱས། །འདི་ལས་དཔག་ན་གཞོམ་བྲལ་རྡོ་རྗེའི་གསུང༌། །ཇི་བཞིན་དབྱིངས་ནས་ཕབ་པའི་ལག་རྗེས་དངོས། །ཡང་གཅིག་བགྲང་བྱ་རྗེས་མ་གསར་ཚེས་ཀྱི། །སྔར་གྱི་ཆོས་གསུངས་དགུན་ར་ཤར་བའི་དུས། །དྲི་མེད་འོད་ལྔ་འབར་བའི་འཇའ་གུར་དང༌། །དུང་ཆེན་སྦྲེལ་མ་ལྟ་བུའི་སྒྲ་གསང་དག །གནས་དེའི་སྐྱེ་བོའི་མངོན་སུམ་ཡུལ་དུ་སྣང༌། །འཕོ་མེད་དུས་ལ་དབང་བའི་གྲུབ་རྗེ་དེས། །དུས་ཀྱང་དཔའ་བོའི་འདུ་བར་བྱིན་བརླབས་པའི། །དན་དཔང་ཕྱི་རབས་ཡུལ་དུ་བཞག་མིན་ནམ། །ཡང་གཅིག་བགྲང་བྱ་སྔོན་མའི་དུས་ཀྱི་ཚེ། །གསུང་མཆོག་མཆོད་སྡོང་བཞུགས་པའི་བསྟི་གནས་དེར། །ཟབ་ལམ་གཅོད་ཀྱི་གདམས་ཁྲིད་བསྩལ་བའི་དུས། །ཡར་མར་ཚེས་བཅུའི་ཚོགས་ཀྱི་དགའ་སྟོན་སྐབས། །དྲི་བྲལ་དཀར་གསལ་རྒོད་ཀྱི་ཐུལ་ཕྲན་ཆར། །མཐོང་རེག་སྤྱོད་ཡུལ་བཏུབ་པའི་ངོ་མཚར་དེས། །ཞིང་སྔགས་ལྷན་སྐྱེས་སྡེ་ལྔའི་ཌཱཀྐི་རྣམས། །ཚོགས་ཀྱི་འདུ་བར་ཕེབས་པའི་ཆོ་འཕྲུལ་དངོས། །དག་ཅིང་སྒྲོས་ལེགས་ཤིན་ཏུ་མྱུར་སྐྱེན་པའི། །རྡོ་རྗེ་འཛིན་པ་ཨཀྵ་ར་བི་ཛ། །ལ་སོགས་ཡིག་མཁན་མཁས་པ་གསུམ་རེ་ཡིས། །གང་གི་ཟབ་གཏེར་ཆོས་ཚན་ཐ་དད་གསུམ། །དུས་གཅིག་བྲིས་ཀྱང་ཟག་མེད་དགོངས་པའི་གཏེར། །ཆགས་ཐོགས་མེད་པར་སོ་སོར་མ་འཁྲུགས་པར། །སྡེབ་ལེགས་ཚིག་བརླིང་དོན་ཟབ་འཆད་པ་འདིས། །རྒྱལ་ཀུན་གསུང་གི་རྡོ་རྗེ་གསང་བའི་མཛོད། །གཏད་རྒྱ་ཡོངས་རྫོགས་སད་པའི་ཁྱད་ཆོས་དངོས། །གྲང་ལྷགས་ཤིན་ཏུ་བདོ་བའི་དགུན་གྱི་དུས། །ཟབ་གཏེར་ཡི་གེའི་རིས་བྱེད་སྣག་བུམ་ཡང༌། །གང་དུ་བཞག་ཀྱང་འཁྱགས་རོམ་མི་ཆགས་པར། །ནམ་ཡང་རང་གར་བྲིར་བཏུབ་ངོ་མཚར་སྣང༌། །དེ་ལྟར་ངོ་མཚར་གཏམ་གྱི་སྦྱོར་བ་འདི། །ཁྱབ་བདག་བླ་མ་གང་གི་ཞལ་སློབ་འགས། །སྒྲོ་སྐུར་མེད་པར་ཡི་གེར་བཏབ་པ་རྣམས། །སླར་ཡང་ཚིགས་བཅད་ཕྲེང་བར་སྡེབས་ཤིག་ཅེས། །མང་ཐོས་ཚུལ་ལྡན་པུཎྱའི་མཚན་ཅན་གྱིས། །བཀའ་ལུང་མེ་ཏོག་སིལ་མ་ལན་འགར་འཐོར། །རྐྱེན་དེས་གནས་དུས་གཅིག་གི་སྐྱེ་བོ་ལ། །སྣང་ཚུལ་ལས་བརྩམས་ངོ་མཚར་གཏམ་འདི་བྱས། །གཞན་དུ་ཡུལ་དུས་བྱེ་བྲག་སྣ་ཚོགས་སུ། །དངོས་སྣང་སྒྱུ་མར་དབང་བསྒྱུར་ངོ་མཚར་དང༌། །བྱིན་རླབས་ཆོ་འཕྲུལ་ངོམ་པའི་ཡ་མཚན་གཏམ། །མཐའ་དག་ཡི་གེར་འགོད་པར་སུ་ཡིས་ནུས། །ཚུལ་འདི་རང་བཟོས་མ་ཡིན་ཁུངས་ལྡན་དག །གྲགས་འདོད་མ་ཡིན་རྣམ་དཀར་དད་མོས་གསོས། །ཞེན་པས་མ་ཡིན་རྨད་བྱུང་ངོ་མཚར་གཏམ། །མུ་ཅོར་མ་ཡིན་དྭངས་པའི་ཡིད་ཀྱིས་བྲིས། །འདི་བྲིས་རྣམ་དཀར་རིན་ཆེན་རྟ་བདུན་གྱིས། །གང་གི་ཟབ་གཏེར་མན་ངག་ཉིན་བྱེད་དབང༌། །འགྲོ་ཁམས་གླིང་བཞིའི་མཁའ་ལ་ལེགས་དྲངས་ཏེ། །སྨིན་གྲོལ་འོད་སྣང་ནུབ་མེད་འབར་གྱུར་ཅིག །

ཅེས་པ་འདི་ནི་མ་ཆུའི་རྡོ་མཁར་རྩར་གྲུབ་དབང་ནམ་མཁའ་འཇིགས་མེད་ཀྱིས་བར་དོ་དྲུག་ཁྲིད་ཀྱི་ཆོས་ཀྱི་འཁོར་ལོ་བསྐོར་སྐབས་ངོ་མཚར་བའི་ཆོ་འཕྲུལ་དང་གྲུབ་པའི་རྟགས་མཚན་མང་དུ་བྱུང་བ་རྣམས་ཁོང་གི་བུ་སློབ་དམ་པ་ཕུག་ཁང་མཁན་ཆེན་བསོད་ནམས་ཚེ་རིང་གིས་ཟིན་བྲིས་སུ་བགྱིས་ནས་དེ་ལྟར་རྩོམ་པར་བསྐུལ་བ་ལྟར་མཛད་པར་གྲགས་སོ། །

དེ་ལྟ་བུའི་རྨད་བྱུང་རྣམ་ཐར་གྱི་མཛད་པ་རྒྱ་མཚོའི་མངའ་བདག་གཏེར་ཆེན་མཆོག་གི་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ལས་བྱུང་བའི་ཐེག་པ་རིམ་དགུ་མཚོན་པའི་པོད་གྲངས་ཅན་བཞུགས་པ་དེ་རྣམས་ཀྱི་དཀར་ཆག་ཉུང་བསྡུས་སུ་བཀོད་པ་ལ།