དབང་གི་ལྷ་མོའི་སྒྲུབ་པ་ཁམས་གསུམ་ཡིད་དབང་འགུགས་པའི་ལྕགས་ཀྱུ།

དམ་ཆོས་ཡང་ཟབ་པདྨའི་ཐུགས་ཐིག་ལས༔ དབང་གི་ལྷ་མོའི་སྒྲུབ་པ་ཁམས་གསུམ་ཡིད་དབང་འགུགས་པའི་ལྕགས་ཀྱུ་བཞུགས༔

ན་མོ་པདྨ་ཌཱཀྐི་ཧཱུྃ༔ རྒྱལ་ཡུམ་གསུང་གི་ལྷ་མོར་འདུད༔ དེ་ཡི་སྒྲུབ་པའི་ཐབས་ཟབ་མོ༔ སྣང་བ་མཐའ་ཡས་ཐུགས་ཀློང་ནས༔ ལེགས་བརྒྱུད་ནཱ་གརྫུ་ན་ཡིས༔ མཁས་པ་པདྨ་ཐོད་ཕྲེང་ལ༔ སྙན་བརྒྱུད་ཐུགས་ཀྱིས་བརྣག་པའི་ཆོས༔ བདག་ཉིད་ཌཱཀྐིའི་རྗེ་མོ་ཡི༔ ཐུགས་དབྱིངས་སྟོང་གསལ་སྒྲོམ་དུ་སྦས༔ དུས་བབས་ལས་སྐལ་ལྡན་པ་ཡི༔ འགྲོ་ཕན་གཞན་དོན་མཐར་ཕྱིན་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་སྦྱོར་དངོས་རྗེས་གསུམ་ལས༔ ཤིན་ཏུ་དབེན་ཞིང་ཉམས་དགའ་བ༔ ས་མདོག་དམར་ཅིང་སྣུམ་བག་ལྡན༔ དབང་གི་རྒྱུན་འབེབས་རྩི་ཤིང་རྒྱས༔ སྒྲུབ་པའི་གནས་སུ་ཤེས་པར་བྱ༔ བཀྲ་ཤིས་ས་ལ་གཞོན་ནུ་མའི༔ རྡུལ་གྱིས་ཆག་ཆག་བཏབ་པའི་སྟེང་༔ ཐིག་བརྒྱད་དཀྱིལ་འཁོར་སྤྱི་ལྟར་ལ༔ དབུས་སུ་ཟླ་གམ་པད་འདབ་བཞི༔ ལྕགས་ཀྱུ་པདྨ་དམར་པོའི་ཕྲེང་༔ ཚོམ་བུ་དབང་མདོག་ལྷ་ཡི་གྲངས༔ དབང་གི་གཏོར་མ་རྒྱན་ལྡན་པ༔ ལྕགས་ཀྱུ་ཧྲཱིཿཡིག་མཚན་པ་ལ༔ སྐུ་རྟེན་དར་དམར་གུར་གྱིས་བརྒྱན༔ ཚེས་བརྒྱད་ཤིས་པའི་དུས་སུ་བརྩམས༔ སྒྲུབ་པའི་དབང་ཐོབ་དམ་ཚིག་གཙང་༔ བསྟན་དང་འགྲོ་ལ་ཕན་པའི་ཕྱིར༔ དབང་གི་ཕྲིན་ལས་བསྒྲུབ་འདོད་པས༔ དང་པོ་སྐྱབས་སུ་འགྲོ་བ་ནི༔ མདུན་མཁར་ཚོགས་ཞིང་གསལ་བཏབ་སྟེ༔ ཧྲཱིཿ སངས་རྒྱས་ཆོས་དང་དགེ་འདུན་སྐྱབས་ཀུན་གྱི༔ བདག་ཉིད་རྗེ་བཙུན་བླ་མ་རིག་བྱེད་མ༔ སྒོ་གསུམ་གུས་པས་བྱང་ཆུབ་སྙིང་པོའི་བར༔ གཞན་དོན་སངས་རྒྱས་བསྒྲུབ་ཕྱིར་སྐྱབས་སུ་མཆི༔ ལན་གསུམ༔ སྨོན་འཇུག་སེམས་མཆོག་བསྐྱེད་པ་ནི༔ ཧྲཱིཿ རྒྱལ་ཀུན་གསུང་གི་ལྷ་མོ་ཁྱོད་བསྒྲུབས་ནས༔ མཐའ་ཡས་འགྲོ་ཀུན་སྲིད་པའི་སྡུག་བསྔལ་ལས༔ བདེ་ཆེན་ཡེ་ཤེས་མཆོག་གི་དབུགས་དབྱུང་ཕྱིར༔ བྱང་ཆུབ་སེམས་བསྐྱེད་ནམ་ཡང་བཏང་མི་བྱ༔ ལན་གསུམ༔ ཚོགས་ཞིང་སྤྱན་སྔར་ཚོགས་བསགས་ནི༔ ཧྲཱིཿ ཤེས་རབ་དབྱིངས་ལས་ཤར་བའི་དབང་གི་ལྷ༔ བདག་ལུས་དཔག་མེད་སྤྲུལ་ཏེ་གུས་ཕྱག་འཚལ༔ དངོས་བཤམས་ཡིད་སྤྲུལ་བླ་མེད་མཆོད་སྤྲིན་འབུལ༔ དངོས་གྲུབ་རྒྱུན་གཅོད་ཉེས་པའི་ཚོགས་ཀུན་བཤགས༔ ཟག་བཅས་ཟག་མེད་དགེ་ལ་རྗེས་ཡི་རང་༔ ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ༔ འགྲོ་དོན་མཛད་རྣམས་བསྐལ་བརྒྱར་བཞུགས་གསོལ་འདེབས༔ འགྲོ་ཀུན་སངས་རྒྱས་འཐོབ་པར་བྱ་བའི་ཕྱིར༔ དུས་གསུམ་དགེ་ཚོགས་ཟག་མེད་དབྱིངས་སུ་བསྔོ༔ དེ་ནས་བགེགས་ཀྱི་གཏོར་མ་ནི༔ རཾ་ཡཾ་ཁཾ་གིས་བསྲེགས་གཏོར་བཀྲུས༔ ཨོཾ་ཨཱཿཧཱུྃ་གིས་བདུད་རྩིར་བསྒྱུར༔ རང་ཉིད་དབང་ཆེན་རྒྱལ་པོ་ཡི༔ ང་རྒྱལ་བརྟན་པོས་བཀའ་བསྒོ་ནི༔ ཧྲཱིཿ འཁོར་འདས་བདག་གཞན་ཡེ་ནས་མ་གྲུབ་ཀྱང་༔ གཉིས་འཛིན་དབང་གིས་གནོད་བྱེད་ཀུན་བརྟགས་འདྲེ༔ ལན་ཆགས་བླ་གླུད་གཏོར་མས་ཚིམ་པར་གྱིས༔ གནས་འདིར་ཡང་དག་བྱང་ཆུབ་སྒྲུབ་པ་ལ༔ བར་གཅོད་མ་བྱེད་གཞན་དུ་འགྲོ་བར་གྱིས༔ གལ་ཏེ་བཀའ་དང་དམ་ལས་འདས་པ་ན༔ བདག་ཉིད་ཁྲོ་རྒྱལ་སྐུ་ལས་མེ་མཚོན་ཐུན༔ འཕྲོས་པས་རྡུལ་དུ་བརླག་པར་གདོན་མི་ཟ༔ ཧཱུྃ་བཞིའི་སྔགས་དང་ཐུན་གྱིས་བསྐྲད༔ བསྲུང་བའི་འཁོར་ལོ་བསྒོམ་པ་ནི༔ ཧྲཱིཿ སྟེང་འོག་ཕྱོགས་མཚམས་རིགས་ལྔའི་ཕྱག་མཚན་དང་༔ འཇིགས་བྱེད་ཁྲོ་བཅུ་མེ་དཔུང་འབར་བས་གཏམས༔ སྲུང་བའི་གུར་ཁང་རྡོ་རྗེའི་ཆོས་བདུན་ལྡན༔ ལོག་འདྲེན་ནམ་ཡང་རྒྱུ་བའི་སྐབས་མེད་གྱུར༔ ཨོཾ་ཧཱུྃ་ཏྲཾ་ཧྲཱིཿཨཱཿབཛྲ་ཀྲོ་ཏ་ཛྭ་ལ་རཀྵ་རཀྵ་བྷྲུཾ༔ དབྱིངས་ནས་བྱིན་ཆེན་དབབ་པ་ནི༔ སྤོས་བསྲེག་རོལ་མོ་གདུང་དབྱངས་ཀྱིས༔ ཧཱུྃ༔ སྟོང་ཆེན་དབྱིངས་ལས་ཤར་བའི་རྗེ་བཙུན་མ༔ རིག་བྱེད་དབང་གི་ལྷ་མོ་སྤྲུལ་འཁོར་བཅས༔ མཁའ་ལ་སྤྲིན་གྱི་ཕུང་པོ་འཁྲིགས་པ་ལྟར༔ མཛེས་སྡུག་སྐུ་ཡི་གར་བསྒྱུར་ལམས་སེ་ལམ༔ ཚངས་དབྱངས་གསུང་གི་གླུ་ལེན་ཀྱུ་རུ་རུ༔ ཟིལ་གནོན་ཐུགས་ཀྱི་དགོངས་ཀློང་ཏ་ལ་ལ༔ གནས་འདིར་བདག་ཅག་སྐལ་ལྡན་འདུས་པའི་འཁོར༔ དམ་རྫས་སྨན་རཀ་ཉེར་སྤྱོད་ཡོ་བྱད་རྫས༔ སྐུ་གསུང་ཐུགས་རྟེན་གནས་དང་སྤྱན་གཟིགས་རྣམས༔ བདེ་ཆེན་ཞིང་གི་རྟེན་དང་བརྟེན་པ་རུ༔ ད་ལྟ་སྐད་ཅིག་ཉིད་ལ་བྱིན་གྱིས་རློབས༔ ཨོཾ་ཨཱཿཧཱུྃ་མ་ཧཱ་གུ་རུ་པདྨ་ཌཀྐི་ཧྲཱིཿཛྙཱ་ན་ཨ་བེ་ཤ་ཡ་ཕཻཾ་ཕཻཾ༔ ཞེས་བརྗོད་རོལ་མོ་དྲག་ཏུ་དཀྲོལ༔ མཆོད་རྫས་བསངས་སྦྱངས་བྱིན་བརླབ་ནི༔ སྭ་བྷ་ཝཱ་ཡི་སྔགས་བརྗོད་ཅིང་༔ ཧྲཱིཿ སྟོང་པའི་ངང་ལས་རང་ཤར་རྟེན་འབྲེལ་རྫས༔ སྨན་གཏོར་རཀྟ་ཕྱི་ནང་མཆོད་པའི་ཚོགས༔ ཡེ་ཤེས་ཟག་མེད་ཀུན་ཏུ་བཟང་པོའི་འཕྲུལ༔ གཅིག་ལས་དུ་མར་འཆར་བའི་རྣམ་རོལ་ཅན༔ བློ་འདས་རྒྱལ་བའི་ཞིང་ཀུན་ཁྱབ་པར་གྱུར༔ ཨོཾ་བཛྲ་ཨརྒྷཾ་ནས་ཤཔྟ་ཨཱཿཧཱུྃ༔ སརྦ་པཉྩ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སརྦ་པཱུ་ཛ་ཨཱཿཧཱུྃ༔ དེ་ཡིས་སྔོན་འགྲོའི་ལས་རིམ་རྫོགས༔ ས་མ་ཡཱ༔ དངོས་གཞི་རྟེན་དང་བརྟེན་པར་བཅས༔ ཏིང་འཛིན་གསུམ་གྱིས་འདི་བཞིན་བསྐྱེད༔ ཧྲཱིཿ འདི་ལྟར་འཁྲུལ་བས་བསྡུས་པའི་སྣང་སྲིད་ཆོས༔ མ་སྐྱེས་མི་འགགས་སྤྲོས་པ་མེད་པའི་དབྱིངས༔ དུས་གསུམ་རྒྱལ་བ་ཀུན་གྱི་ཡུམ་ཆེན་མོ༔ ཤེས་རབ་ཕ་རོལ་ཕྱིན་མ་དེ་ཀ་འོ༔ ཨོཾ་ཤུ་ནྱ་ཏ་ཛྙཱ་ན་སྭ་བྷ་ཝ་ཨཱཿ དེ་ལྟར་མ་རྟོགས་མཁའ་ཁྱབ་འགྲོ་བ་རྣམས༔ བདག་མེད་ཆོས་ལ་བདག་རྟོག་མཚན་མར་བཟུང་༔ སྲིད་གསུམ་དུཿཁ་དྲག་པོས་མནར་བ་ཀུན༔ སྐུ་གསུམ་འདུ་འབྲལ་མེད་ལ་འགོད་པར་བྱ༔ མ་ཧཱ་ཀ་རུ་ཎི་ཀ་ས་མ་དྷཱི་ཧཱུྃ༔ སྟོང་ཉིད་སྙིང་རྗེ་ཟུང་འཇུག་རང་རིག་ཧྲཱིཿ དྭངས་གསལ་པདྨ་རཱ་གའི་འོད་ཟེར་འབར༔ དེ་ལས་རཾ་ཡཾ་ཁཾ་འཕྲོས་དངོས་འཛིན་ཆོས༔ བསྲེགས་གཏོར་བཀྲུས་ཏེ་མི་དམིགས་སྟོང་པར་སྦྱངས༔ སླར་ཡང་ཧྲཱིཿ་ཡིག་སྟོང་ཆེན་ནམ་མཁའ་ལ༔ འོད་ཟེར་འཕྲིག་འགུལ་ཉི་མའི་སྙིང་པོ་ལྟར༔ འཁོར་འདས་དབང་བསྒྱུར་སྣང་སྲིད་ཟིལ་གྱིས་གནོན༔ ཨེ་ཡཾ་ཁཾ་རཾ་ལཾ་ཡིག་འཕྲོ་འདུ་ལས༔ ཨེ་ལས་ནམ་མཁའ་མཐིང་ནག་བློ་འདས་དབྱིངས༔ ཡཾ་ལས་རླུང་དཀྱིལ་ལྗང་ནག་རྒྱ་གྲམ་དབྱིབས༔ ཁཾ་ལས་ཆུ་མཚོ་དཀར་པོ་ཟླུམ་པོར་འཁྱིལ༔ རཾ་ལས་དམར་གསལ་མེ་རི་ཕྱི་ནས་འཁྲིགས༔ ལཾ་ལས་ས་གཞི་པདྨ་དམར་པོའི་མདངས༔ སོར་རྟོག་ཡེ་ཤེས་རང་རྩལ་བདེ་ཆེན་ཞིང་༔ དེ་སྟེང་ཁ་དོག་ལྔ་ལྡན་བྷྲུཾཿཡིག་ལས༔ རིན་ཆེན་ཕོ་བྲང་ཤར་ཤེལ་ལྷོ་བཻཌཱུར༔ ནུབ་ཕྱོགས་བྱུ་རུ་བྱང་ཕྱོགས་ཨིནྡྲ་ནཱི༔ དབུས་ཉིད་ཟླ་གམ་དམར་པོ་འོད་དུ་འབར༔ དེ་ཕྱིར་སྣ་ཚོགས་པདྨ་འདབ་བཞི་མཛེས༔ སྒོ་གྲུ་རྟ་བབས་འདོད་རྣམས་ཕ་གུ་དང་༔ དྲྭ་ཕྱེད་ཤར་བུ་མདའ་ཡབ་ཆོས་འཁོར་གདུགས༔ ཐབས་ཤེས་ཟུང་འཇུག་རི་དྭགས་ཕོ་མོས་མཚན༔ མཁའ་ལས་ཧྲཱིཿདམར་དབུས་ཀྱི་ཟླ་གམ་སྟེང་༔ པདྨ་ཉི་མ་དབང་ཕྱུག་ཁྱོ་ཤུག་དང་༔ འཇིགས་བྱེད་དུས་ཀྱི་སྒྲ་གཅན་བསྣོལ་བའི་ཁར༔ མ་བཅོས་རང་བྱུང་སྐད་ཅིག་དྲན་རྫོགས་སུ༔ པདྨ་ཌཱཀྐི་ཀུ་རུ་ཀུལླེ་དམར༔ ཁྲོ་འཛུམ་རྔམ་བཞད་ཞལ་གྱི་མཆེ་བ་གཙིགས༔ ཕྱག་བཞིའི་དང་པོ་གཉིས་ཀྱི་པདྨ་ཡི༔ ལྕགས་ཀྱུ་ཞགས་པ་དེ་འོག་མེ་ཏོག་མདའ༔ ཨུཏྤལ་གཞུར་འགེངས་ཞབས་གཉིས་འདོར་སྟབས་བགྲད༔ དར་སྔོན་སྟོད་གཡོགས་ལྗང་ཁྲའི་སྨད་དཀྲིས་ཀླུབས༔ རིན་ཆེན་དབུ་རྒྱན་ཨུཏྤལ་དོ་ཤལ་དང་༔ ནོར་བུའི་སྙན་རྒྱན་དབུ་སྐྲ་འཕྱང་འཕྲུལ་ལ༔ མུ་ཏིག་ཟར་ཚག་དབང་སྔོན་གཙུག་རྒྱན་རྔམ༔ མདུན་གཡས་བཀའ་སྡོད་མ་ཧཱ་དེ་ཝ་དམར༔ གཅེར་བུ་ལིང་ག་བསྒྲེང་ཞིང་བདེ་ཉམས་རྒྱས༔ དར་གྱི་སྟོད་གཡོགས་རིན་ཆེན་རྒྱན་ཆས་བརྗིད༔ སྤྱི་བོར་ཟླ་ཚེས་གཡོན་མདུན་ཨུ་མ་དམར༔ ལྷ་མོའི་ཆ་བྱད་གཉིས་ཀས་ཁམས་གསུམ་གྱི༔ སྐྱེ་འགྲོའི་ཡིད་འགུགས་ལྕགས་ཀྱུ་ཞགས་པ་འཛིན༔ སྤྱི་བོར་རིགས་བདག་པདྨ་ཧེ་རུ་ཀ༔ སྐུ་མདོག་དམར་པོ་ཁྲོ་བོའི་ཆ་བྱད་ཅན༔ གཡས་པས་པད་ཕྲེང་གཡོན་པས་དབང་གི་རྒྱ༔ རྟ་སྐད་རྔམ་འཚེར་དེ་ཡི་སྤྱི་བོ་རུ༔ སྣང་མཐའ་སྤྲུལ་སྐུའི་ཆ་ལུགས་མཚན་དཔེ་འབར༔ གཙོ་མོའི་ཐུགས་ཀར་ཉི་སྟེང་པདྨ་དམར༔ འདབ་བརྒྱད་ལྟེ་བར་ཧྲཱིཿལས་སྔགས་འབྲུས་བསྐོར༔ དེ་ལས་ཛ་ཧཱུྃ་བཾ་ཧོ་བཞི་སྤྲོས་པས༔ ཤར་དུ་ཁམས་གསུམ་བླ་ཡིད་འགུགས་བྱེད་མ༔ ལྷོ་རུ་སྲིད་གསུམ་སྣང་སེམས་འཆིང་བྱེད་མ༔ ནུབ་ཏུ་ཆེ་བཙན་ཡིད་དབང་རྨོངས་བྱེད་མ༔ བྱང་དུ་ཁེངས་ལྡན་འདོད་པས་མྱོས་བྱེད་མ༔ ཀུན་ཀྱང་དབང་མདོག་གཅེར་བུ་ཆགས་པའི་ཉམས༔ བདེ་བའི་གར་འཁྱུགས་ལྕགས་ཀྱུ་ཞགས་པ་བསྣམས༔ དབུ་སྐྲ་ཕྱམ་འགྲོལ་ཨུཏྤལ་དོ་ཤལ་དང་༔ དར་གྱི་སྟོད་གཡོགས་སྙན་རྒྱན་ནོར་བུས་སྤྲས༔ དེ་མཐར་ལྷ་དང་དྲང་སྲོང་དབང་གི་ལྷ༔ ཀུན་ཀྱང་རྗེ་ཡི་འཁོར་དུ་འབངས་བསྡུས་བཞིན༔ ཁབ་ལེན་རྡོ་དང་ལྕགས་ཕྱེའི་སྣང་ཚུལ་ལྟར༔ རང་དབང་བྲལ་བས་བྲན་དུ་འཁོད་པར་བསམ༔ དེ་ནས་དབང་བསྐུར་རྒྱས་གདབ་ནི༔ ཧྲཱིཿ གཙོ་འཁོར་གནས་ལྔར་ཨོཾ་ཨཱཿཧཱུྃ་སྭཱ་ཧཱ༔ དེ་ལས་འོད་འཕྲོས་རིགས་ལྔ་ཡབ་ཡུམ་བཅུ༔ སྤྱན་དྲངས་ཡེ་ཤེས་དབང་བསྐུར་གསོལ་བཏབ་པས༔ ཀུན་གྱི་ཐུགས་ནས་ཡུམ་སྤྲོས་བུམ་པའི་ཆུས༔ གློ་བུར་སྒྲིབ་གཉིས་བཀྲུས་ཤིང་ཡེ་ཤེས་ལྔའི༔ དབང་རྟགས་སྣང་མཐའ་བླ་མའི་ངོ་བོ་རུ༔ བཞུགས་པ་ཁམས་གསུམ་སྲིད་ཞིའི་དབང་ཕྱུག་ཆེ༔ འཁྲུལ་མེད་རྒྱལ་ཀུན་སྤྱི་དཔལ་ཆེན་པོར་གྱུར༔ དེ་ནས་ཡེ་ཤེས་ལྷ་ཚོགས་རྣམས༔ སྤྱན་འདྲེན་སྤོས་རོལ་དབྱངས་དང་བཅས༔ ཧྲཱིཿ སྐྱེ་འགག་གཉིས་མེད་ཆོས་སྐུ་བདེ་བ་ཆེ༔ གཤེགས་བྱོན་སྐྱེ་བྲི་མེད་པར་རྟག་བཞུགས་ཀྱང་༔ རང་དབང་མངོན་དུ་མ་གྱུར་ཁམས་གསུམ་འགྲོ༔ ཚད་མེད་སྙིང་རྗེས་སྒྲོལ་ཕྱིར་སྤྱན་འདྲེན་གཤེགས༔ ཧྲཱིཿ རྒྱལ་ཀུན་སོར་རྟོག་ཡེ་ཤེས་རང་རྩལ་ལས༔ ཆགས་མེད་ཆགས་པ་ཆེན་པོའི་ཚུལ་བསྟན་ནས༔ བསྟན་འགྲོའི་ཕན་བདེ་སྤེལ་མཛད་དབང་གི་ལྷ༔ བཅོམ་ལྡན་རིག་བྱེད་དབང་མོ་གཤེགས་སུ་གསོལ༔ ཁམས་གསུམ་མོ་རྒྱུད་ཆགས་པའི་སྒྱུ་ཐབས་ཀྱིས༔ རང་དབང་བརྟན་པ་བྲལ་བར་དབང་བསྡུས་ནས༔ ཟག་མེད་བདེ་ལ་འགོད་མཛད་སྙིང་རྗེའི་གཏེར༔ ལྷ་ཆེན་མ་ཧཱ་དེ་ཝ་གཤེགས་སུ་གསོལ༔ སྲིད་གསུམ་ཕོ་རྒྱུད་དཔའ་ཟིལ་རབ་བཅོམ་ནས༔ དཀའ་ཐུབ་བརྟན་པ་ཟློག་བྱེད་ལང་ཚོའི་དཔྱིད༔ གདུལ་དཀའི་བློ་སེམས་འགུགས་མཛད་ཆགས་པའི་ཡུམ༔ བཙུན་མོ་ཨུ་མ་དེ་ཝི་གཤེགས་སུ་གསོལ༔ ཁམས་གསུམ་སྣོད་བཅུད་སྐྱེ་རྒུའི་བླ་ཡིད་སེམས༔ འགུགས་འཆིང་རྨོངས་དང་མྱོས་བྱེད་ཕྲ་མེན་མ༔ དགའ་སྤྲོ་དངས་བའི་ཚུལ་གྱིས་སྤྱན་འདྲེན་ན༔ གང་འདོད་ཕྲིན་ལས་བསྒྲུབ་ཕྱིར་གཤེགས་སུ་གསོལ༔ རྒྱལ་ཀུན་ཐུགས་ཀྱི་བདག་ཉིད་སྣང་མཐའ་ཡས༔ འཁོར་འདས་ཡོངས་ལ་དབང་བསྒྱུར་ཧྱཱ་གྷྲི༔ གཞན་ཡང་དབང་གི་ལྷ་ཚོགས་གཙོ་དང་འཁོར༔ མཆོག་ཐུན་དངོས་གྲུབ་སྩོལ་ཕྱིར་གཤེགས་སུ་གསོལ༔ ཨོཾ་ཨཱཿཧཱུྃ་མ་ཧཱ་གུ་རུ་ཧྱཱ་གྷྲི་ཝ་པདྨ་ཌཀྐཱི་ནི་ཛཿཧཱུྃ་བཾ་ཧོ་བཛྲ་ས་མ་ཡཱ་ཛ་ཛ༔ བརྟན་པར་བཞུགས་སུ་གསོལ་བ་ནི༔ ཧྲཱིཿ དབྱིངས་ནས་དྲངས་པའི་ཤེས་རབ་སྤྲུལ་པའི་ལྷ༔ ཐབས་ཀྱིས་བསྐྱེད་པའི་གཞན་དབང་མཚན་མའི་སྐུར༔ ཡེ་ནས་འདུ་འབྲལ་མེད་ཀྱང་རིམ་གཉིས་ཀྱིས༔ ཚོགས་རྫོགས་དངོས་གྲུབ་སྩོལ་ཕྱིར་བརྟན་པར་བཞུགས༔ བཛྲ་ས་མ་ཡཱ་ཏིཥྛ་ལྷན༔ གུས་པས་བརྡ་ཕྱག་འཚལ་བ་ནི༔ ཧྲཱིཿ ཀུན་ཏུ་རྨོངས་པས་སྲིད་པར་འཁྱམས་པའི་འགྲོ༔ བདེ་ཆེན་ཞིང་གི་དཔལ་དང་ཡོན་ཏན་ལ༔ མངོན་པར་སྤྱོད་ནས་སྟོབས་བཅུ་ཡོངས་རྫོགས་ཕྱིར༔ བདག་རྟོག་ང་རྒྱལ་བྲལ་བས་བརྡ་ཕྱག་འཚལ༔ ཁམས་གསུམ་འགྲོ་ཀུན་སྐུ་གསུམ་ཞིང་ཁམས་སུ༔ མངོན་པར་སྒྲོལ་མཛད་དབང་གི་ལྷ་མོ་ཡི༔ རང་མདངས་སྤྲུལ་འཁོར་མ་ལུས་ཡོངས་རྫོགས་ལ༔ དམིགས་མེད་རང་མདངས་ལྟ་བའི་ཀློང་དུ་འདུད༔ མ་ཧཱ་གུ་རུ་ཀུ་རུ་ཀུལླེ་ན་མོ་ན་མ་ཡ་དྷཱི༔ ཕྱི་ནང་མཆོད་པའི་སྤྲིན་ཚོགས་འབུལ་བ་ལ༔ དང་པོ་ཕྱི་མཆོད་རྣམ་ལྔ་གུས་པས་འབུལ༔ ཧྲཱིཿ ཡིད་འོང་འདབ་སྟོང་མེ་ཏོག་ཀུན་ཏུ་མཛེས༔ ལྷན་སྐྱེས་སྦྱར་བྱུང་བསུང་ཞིམ་མངར་བའི་དྲི༔ རང་བྱུང་རྫས་ཀྱི་སྣང་གསལ་མུན་པ་སེལ༔ བཟང་པོའི་སྨན་དང་སྦྱར་བའི་དྭངས་བསིལ་ཆུ༔ རོ་བརྒྱ་ནུས་ལྡན་འཆི་མེད་བདུད་རྩིའི་ཟས༔ སྙན་འཇེབས་ཡིད་འཕྲོག་སྒྲ་སྙན་རོལ་མོའི་ཚོགས༔ དབང་མཛད་ལྷ་མོ་འཁོར་དང་བཅས་ལ་འབུལ༔ བཞེས་ནས་བཀྲེན་ཅན་བསོད་ནམས་མི་ལྡན་པའི༔ བདག་སོགས་འགྲོ་ཀུན་བྱང་ཆུབ་སྙིང་པོའི་བར༔ མངོན་མཐོའི་འབྱོར་བས་འཚོ་བའི་དངོས་གྲུབ་སྩོལ༔ ཨོཾ་ཀུ་རུ་ཀུལླེ་ཧྲཱིཿས་པཱ་རི་ཝཱ་རི་ཨརྒྷཾ་ནས་ཤཔྟ་མ་ཧཱ་པཱུ་ཛ་པྲ་ཏིཥྩ་ཡེ་སྭཱ་ཧཱ༔ ནང་མཆོད་ཐོག་མར་སྨན་སྦྲེང་འདི་སྐད་དོ༔ ཧྲཱིཿ རང་བྱུང་བདེ་བ་ཆེན་པོའི་ཐོད་སྣོད་དུ༔ རྩ་བ་བརྒྱད་ལ་ཡན་ལག་སྟོང་སྦྱར་བའི༔ འཆི་མེད་བདུད་རྩི་སྨན་གྱི་མཆོད་པ་འདི༔ རྩ་གསུམ་དབང་གི་ལྷ་ལ་མཆོད་པར་འབུལ༔ ཨོཾ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྤྲོ་ན་བརྒྱུད་པའི་སྨན་མཆོད་སྦྱར༔ མཐེབ་སྲིན་གྱིས་བླངས༔ གནས་གསུམ་དུ་གཏུགས༔ ཀཱ་ཡ་ཝཀྐཱ་ཙིཏྟ་སརྦ་སིདྡྷི་ཧྲཱིཿ རཀྟའི་མཆོད་པ་འབུལ་བ་ནི༔ ཧྲཱིཿ རང་བྱུང་ཡུམ་གྱི་མཁའ་དབྱིངས་སྣོད་མཆོག་ཏུ༔ བདེ་སྟོང་ཟུང་འཇུག་དབང་རྫས་ལི་ཁྲིའི་རྡུལ༔ ཆགས་མེད་ཆགས་པའི་རྫས་མཆོག་དམ་པ་འདི༔ རིག་བྱེད་ལྷ་མོའི་དཀྱིལ་འཁོར་ལྷ་ལ་འབུལ༔ མ་ཧཱ་རཀྟ་ཁ་རཾ་ཁཱ་ཧི༔ དམ་རྫས་གཏོར་མའི་མཆོད་པ་ནི༔ ཧྲཱིཿ ཟབ་ཡངས་རིན་ཆེན་སྣ་ཚོགས་གཏོར་གཞོང་དུ༔ འབྲུ་སྨན་དཀར་མངར་ཤ་ཁྲག་གཏོར་མ་བཤམས༔ སྔགས་དང་ཕྱག་རྒྱ་ཏིང་འཛིན་བདེན་པའི་མཐུས༔ དབང་གི་ལྷ་མོ་སྤྲུལ་བར་བཅས་ལ་འབུལ༔ མ་ཧཱ་བྷ་ལིངྟ་ཁ་རཾ་ཁཱ་ཧི༔ གསང་བ་སྦྱོར་སྒྲོལ་དོན་དམ་མཆོད་པ་ལས༔ དང་པོ་སྦྱོར་མཆོད་བདེ་བའི་ངང་དུ་འབུལ༔ ཧྲཱིཿ ཆགས་ཅན་ཡིད་འགུགས་རིགས་ལྔའི་ཕྱག་རྒྱ་མར༔ འདུ་ཤེས་གསུམ་ལྡན་བདེ་མཉམ་སྦྱོར་བའི་བཅུད༔ ཉི་ཟླའི་དྭངས་མ་གཅིག་ཏུ་འདྲེས་པའི་རྫས༔ སྣང་སྲིད་ཟག་མེད་དཀྱིལ་འཁོར་ལྷ་ལ་འབུལ༔ ཨོཾ་ཀུ་རུ་ཀུལླེ་ཧྲཱིཿ མ་ཧཱ་སུ་ཁ་བྷོ་དྷི་ཙིཏྟ་པུ་ཛ་ཧོ༔ ལོག་འདྲེན་སྒྲོལ་ཕྱིར་བསྒྲལ་མཆོད་འབུལ་བ་ནི༔ ཧྲཱིཿ ལྷན་སྐྱེས་མ་རིག་སྲིད་པའི་དགྲ་བགེགས་རྣམས༔ སྐུ་གསུམ་རྟོག་བྲལ་བྲུབ་ཁུང་འབར་བར་བཀུག༔ ལྷ་སྔགས་ཏིང་འཛིན་ཡེངས་མེད་མཚོན་ཆས་བསྒྲལ༔ དབང་མཛད་དཀྱིལ་འཁོར་ལྷ་ཚོགས་དགྱེས་ཕྱིར་འབུལ༔ མ་ཧཱ་ཏ་ན་སརྦ་པུ་ཙ་ཧོ༔ དབྱིངས་རིག་གཉིས་མེད་གསང་མཆོད་ནི༔ ཧྲཱིཿ དམིགས་མེད་རང་བྱུང་སྤྲོས་བྲལ་དབྱིངས་ཀྱི་ཀློང་༔ ཟག་བྲལ་འཕོ་མེད་རིག་པའི་ཡེ་ཤེས་ཆེ༔ ཅིར་ཡང་འདུ་འབྲལ་མེད་པ་མཆོད་པའི་མཆོག༔ ཐམས་ཅད་གཏན་མེད་རང་གྲོལ་ངང་དུ་འབུལ༔ མ་ཧཱ་དྷརྨ་དྷརྟུ་པུ་ཛ་ཨཱཿཧཱུྃ༔ དེ་ནས་སྒོ་གསུམ་གུས་པས་བསྟོད་པ་ནི༔ ཧྲཱིཿ སྲིད་དང་ཞི་བའི་ཆོས་ཁམས་མ་ལུས་པ༔ ཀུན་ཀྱང་བློ་ཡིས་བཏགས་པའི་འཁྲུལ་བའི་རྩལ༔ རང་བཞིན་མེད་པ་དབྱིངས་ཀྱི་མཁའ་ཀློང་དུ༔ སྡུད་མཛད་ཆགས་བྲལ་དབང་གི་ལྷ་མོར་བསྟོད༔ སྐུ་མདོག་དམར་མོ་འོད་དང་གཟི་བརྗིད་འབར༔ ཐིག་ལེ་ཉག་གཅིག་ཁྲོ་འཛུམ་ཆགས་པའི་ཞལ༔ ཚད་མེད་ཕྱག་བཞིས་འགྲོ་ཁམས་དབང་དུ་སྡུད༔ བཅོམ་ལྡན་འདས་མ་རིག་བྱེད་དབང་མོར་བསྟོད༔ དབང་གི་ལྕགས་ཀྱུས་འགུགས་ཤིང་ཞགས་པས་འཆིང་༔ ཨུཏྤལ་མདའ་གཞུས་སྐྱེ་རྒུའི་སྙིང་རྩ་འདར༔ སྲིད་ཞིར་མི་གནས་སྒྲ་གཅན་གདན་དུ་བརྫིས༔ འཁོར་འདས་སྤྱི་དཔལ་གསུང་གི་བདག་མོར་བསྟོད༔ དབང་ཕྱུག་ཆེན་པོས་མོ་རྒྱུད་བྲན་དུ་འཁོལ༔ ཨུ་མ་དེ་ཝས་ཕོ་རྒྱུད་ལས་ལ་མངགས༔ རིགས་བཞིའི་ཕྲ་མེན་གླིང་བཞིའི་ཕྱྭ་གཡང་སྡུད༔ འཇིག་རྟེན་དྲེགས་པའི་རྗེ་བོར་སྟོན་ལ་འདུད༔ རིགས་ཀྱི་ཁྲོ་བོ་དབང་གི་རྟ་སྐད་འཚེར༔ ལོག་འདྲེན་ཚར་གཅོད་ས་ལམ་བར་ཆད་སེལ༔ མཐའ་ཡས་འོད་ལྡན་རྒྱུད་དྲུག་འགྲོ་ཀུན་སྒྲོལ༔ བདེ་ཆེན་དབང་གི་ལྷ་ལ་ཕྱག་འཚལ་བསྟོད༔ གཞན་ཡང་དབང་གི་ལས་ཀྱིས་བསྟན་དང་འགྲོར༔ བདེ་སྐྱིད་སྤེལ་ཅིང་ཉེས་ཀུན་སེལ་མཛད་པའི༔ ལྷ་དང་སྲུང་མ་དམ་ཅན་རྒྱ་མཚོ་ལ༔ སྒོ་གསུམ་གུས་པ་ཆེན་པོས་བསྟོད་པར་བགྱི༔ འདོད་པའི་དོན་ལ་གསོལ་བ་འདི་བཞིན་འདེབས༔ ཧོ༔ དགོངས་ཤིག་བཅོམ་ལྡན་འདས་མ་དབང་གི་ལྷ༔ བསྟན་འགྲོར་ཕན་པའི་དམ་བཅའ་ལྷུར་བླངས་ཏེ༔ རྩེ་གཅིག་སེམས་ཀྱིས་འཕགས་མ་ཁྱོད་སྒྲུབ་ན༔ དགྱེས་པའི་ཞལ་བསྟན་བརྩེ་བའི་ཐུགས་ཀྱིས་དགོངས༔ སྐྱེ་རྒུ་དབང་སྡུས་བདག་གི་བྲན་དུ་ཁོལ༔ ཟས་གོས་འབྲུ་ནོར་བུ་དཔལ་རིགས་རྒྱུད་འཁོར༔ ཐམས་ཅད་མ་ལུས་ཡིད་ལ་འདོད་པའི་དོན༔ ནོར་བུའི་གཏེར་བཞིན་ཐོགས་མེད་དེང་སྩོལ་ཅིག༔ ཅེས་དང་འཛབ་བཟླས་ཀྱི་དམིགས་པ་ལ༔ བསྙེན་དང་སྒྲུབ་པ་ལས་ལ་སྦྱོར༔ དང་པོ་བསྙེན་པའི་རིམ་པ་ནི༔ བདག་ཉིད་དབང་གི་ལྷ་མོའི་ཐུགས་ཀ་རུ༔ ཉི་དཀྱིལ་སྟེང་ དུ་པདྨ་འདབ་བརྒྱད་དམར༔ ལྟེ་བར་ཧྲཱིཿདམར་མར་མེ་ལྟ་བུར་གསལ༔ སྔགས་འབྲུ་གཡོན ་བཀོད་འོད་ཟེར་གཡས་སུ་འཁོར༔ ཡེངས་མེད་སྔགས་ཀྱི་རྒྱལ་པོ་འདི་ཉིད་བཟླ༔ ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ༔ རྡོ་རྗེའི་བཟླས་དང་ཡིད་བཟླས་བྱ༔ དེ་ནས་ཤུབ་བུར་བཟླ་བར་བྱ༔ གྲངས་བསྙེན་འབྲུ་འབུམ་ལས་སུ་རུང་༔ དུས་བསྙེན་ཟླ་བ་བརྒྱད་དུ་འོ༔ མཚན་མའི་བསྙེན་པ་རྟགས་དང་སྦྱར༔ རྟགས་ནི་ཞལ་མཐོང་གསུང་ཐོས་དང་༔ རྨི་ལམ་ཁྲོམ་འདུ་ཉི་ཟླ་འཆར༔ དར་ཕྱར་དུང་འབུད་ཁྲི་ལ་འདུག༔ བུད་མེད་བཟང་མོས་ཟས་གོས་སྟེར༔ རིག་བྱེད་འགྲུབ་ལ་ཉེ་བའི་རྟགས༔ ས་མ་ཡཱ༔ སྒྲུབ་པའི་བསྙེན་དམིགས་འདི་ལྟར་རོ༔ རང་ཉིད་ལྷ་མོའི་ཐུགས་ཀར་པད་ཉིའི་སྟེང་༔ རྟ་མཆོག་རྒྱལ་པོ་ཁྲོ་འཛུམ་འདོར་སྟབས་བགྲད༔ རྒྱན་མེད་པད་ཕྲེང་དབང་རྒྱས་ལྕགས་ཀྱུ་གདེངས༔ རལ་ཁྲོད་རྟ་སྐད་སྒྲ་ཡིས་ཁམས་གསུམ་འགུགས༔ དེ་ཡི་ཐུགས་དབུས་ཙིཏྟ་པད་རཱ་གའི༔ རྡོ་རྗེ་རྩེ་ལྔའི་ཁོང་གསེང་ཉི་མའི་སྟེང་༔ ཧྲཱིཿདམར་མཐའ་ལ་སྔགས་འབྲུ་གཡས་སུ་འཁོར༔ གསལ་སྣང་བརྟན་པོས་སྒྲུབ་པའི་སྔགས་འདི་བཟླ༔ ཨོཾ་ཧྲཱིཿཧྱ་གྷྲི་ཝ་ཀུ་རུ་ཀུལླེ་པ་ཤཾ་སིདྡྷི་ཧཱུྃ༔ ཞེས་པ་འབུམ་ཕྲག་དྲུག་ཏུ་བཟླ༔ དངོས་ཉམས་ལུས་འདར་སེམས་འཕྱོ་དང་༔ རྨི་ལམ་རྟ་སྐད་འཚེར་དང་གཞན༔ ཆེ་བཙན་འདུ་སོགས་རྟགས་མང་འབྱུང་༔ རེ་དོགས་མེད་པར་སྲིད་ཞིའི་ཆོས༔ མཉམ་པར་བརྡལ་བའི་ངང་མདངས་བསྐྱངས༔ ས་མ་ཡཱ༔ ལས་སྦྱོར་དམིགས་པ་འདི་ལྟ་སྟེ༔ རང་ཉིད་དབང་གི་ལྷ་མོའི་ཐུགས་ཀ་རུ༔ རྟ་མཆོག་ཐུགས་ཀར་ཧྲཱིཿདམར་སྔགས་ཕྲེང་འཁོར༔ འོད་ཟེར་ཡར་འཕྲོས་མཆོད་པའི་ལྷ་མོ་ཡིས༔ རྒྱལ་བ་མཆོད་ཅིང་སྐུ་གསུང་ཐུགས་ཀྱི་དབྱིག༔ དངོས་གྲུབ་འབྲུ་གསུམ་རྣམ་པར་ཚུར་བསྡུས་ནས༔ བདག་ཐིམ་རྒྱལ་ཀུན་སྤྱི་མེས་ཡུམ་ཆེན་མོར་གྱུར༔བསམ་བཟླས་པའི་སྔགས་འདི་ནན་ཏན་བྱ༔ ཨོཾ་ཀུ་རུ་ཀུལླེ་ཧྲཱིཿ ཧྱ་གྷྲི་ཝ་སརྦ་སིདྡྷི་ཧཱུྃ༔ ཞེས་དང་༔ སླར་ཡང་འོད་ཟེར་དམར་པོ་ནི༔ གློག་ཞགས་ལྟར་མྱུར་འགྲོ་བ་ཡོངས་ལ་ཕོག༔ ཀུན་ཀྱང་བདག་ལ་མོས་ཤིང་དབང་འདུས་ནས༔ ཐམས་ཅད་རིག་བྱེད་ལྷ་མོའི་གསང་གསུམ་དང་༔ དབྱེར་མེད་བདེ་བ་ཆེན་པོའི་ངང་མདངས་བསྐྱངས༔ གོང་གི་སྔགས་དེ་འབྲུ་འབུམ་རེ༔ ཆགས་པའི་སེམས་ཀྱིས་བཟླ་བར་བྱ༔ གཞན་ཡང་དབང་སྡུད་ལས་སྦྱོར་གྱི༔ དམིགས་གནད་ཟུར་གསལ་དག་ལས་ཤེས༔ ས་མ་ཡཱ༔ རྗེས་སུ་ཚོགས་ཀྱི་རིམ་པ་ནི༔ སྲིད་པའི་འདོད་ཡོན་བཟའ་བཏུང་རིགས༔ ཤིང་ཏོག་ཤ་ཆང་དཀར་མངར་ཟས༔ བདུད་རྩིས་བསངས་སྦྱངས་སྔགས་ཀྱིས་བརླབས༔ ཧྲཱིཿ བདག་ཉིད་ལྷ་ཡི་ཐུགས་ནས་རཾ་ཡཾ་ཁཾ༔ འཕྲོས་པས་མ་དག་ཉེས་སྐྱོན་བསྲེགས་གཏོར་བཀྲུས༔ ཨོཾ་ཨཱཿཧཱུྃ་གིས་ཟག་མེད་བདུད་རྩི་ལྔ༔ རྩ་གསུམ་ལྷ་ཚོགས་མཉེས་པའི་དཔྱིད་དུ་གྱུར༔ ཨོཾ་ཨཱཿཧཱུྃ༔ ལན་གསུམ། ཚོགས་ཞིང་ལྷ་ཚོགས་སྤྱན་འདྲེན་བྱ་བ་ནི༔ ཧྲཱིཿ བདེ་ཆེན་དབང་གི་དཀྱིལ་འཁོར་ཡངས་པ་ནས༔ བདེ་སྟོང་དབྱེར་མེད་བཅོམ་ལྡན་རིག་བྱེད་མ༔ རིགས་ཀྱི་བདག་པོ་རྟ་མཆོག་སྣང་མཐའ་ཡས༔ བཀའ་སྡོད་སྤྲུལ་འཁོར་མ་ལུས་དབྱིངས་ནས་བཞེངས༔ ཞལ་ཟས་འདོད་ཡོན་ཚོགས་ཀྱི་དགའ་སྟོན་ལ༔ སྐྱེ་མེད་ཀློང་ནས་འགགས་མེད་ཚུལ་གྱིས་གཤེགས༔ འདིར་འཚོགས་སྐལ་ལྡན་ཕོ་མོ་དམ་རེ་གཙང་༔ ཚོགས་ཁང་སྤྲུལ་པའི་གྲོང་ཁྱེར་བཀོད་རེ་ལེགས༔ ཚོགས་རྫས་ཡོ་བྱད་སྣ་ཚོགས་དྭངས་རེ་སྤྲོ༔ འདིར་གཤེགས་རྡོ་རྗེའི་གླུ་གར་དགྱེས་པར་རོལ༔ གུ་རུ་དྷེ་ཝ་ཌཱཀྐི་ནི་ཀུ་རུ་ཀུལླེ་ཧྲཱིཿ བཛྲ་ས་མ་ཡཱ་ཛ་ཛཿ དེ་ནས་ཚོགས་ཀྱི་བསྐང་བ་བྱ་བ་ནི༔ སྨན་རཀ་གཏོར་མ་མར་མེ་རྣམ་བཞི་པོ༔ བརྒྱའམ་ཉེར་གཅིག་གང་འཛོམས་རིག་མའམ༔ མཚན་ལྡན་བུ་མོས་བཏེགས་ཏེ་འབུལ་བར་བྱ་༔ ནམ་མཁའ་མཛོད་ཀྱི་སྔགས་ཀྱིས་ཀུན་བཟང་གི༔ མཆོད་པའི་སྤྲིན་གྱིས་རྒྱལ་བའི་ཞིང་ཁམས་ཀུན༔ ཁྱབ་པར་བསམ་ལ་སྙན་པའི་དབྱངས་དང་བཅས༔ ཧྲཱིཿ བཀའ་དྲིན་རྨད་དུ་བྱུང་བའི་དཀྱིལ་འཁོར་ནས༔ སྣང་བ་མཐའ་ཡས་པདྨ་རིགས་ཀྱི་གཙོ༔ རྟ་མཆོག་རྒྱལ་པོ་འཁོར་འདས་ཡོངས་ཀྱི་དཔལ༔ དབང་གི་ལྷ་མོས་འགྲོ་ཁམས་ཟིལ་གྱིས་གནོན༔ ཀླུ་སྒྲུབ་སྙིང་པོ་གསུང་གི་གྲུབ་བརྒྱའི་གཙོ༔ པདྨ་འབྱུང་གནས་གངས་ཅན་ཕན་བདེའི་སྲོག༔ དགོངས་ཤིག་རྩ་བ་བརྒྱུད་པའི་བླ་མ་རྣམས༔ མི་མངོན་དབྱིངས་ནས་བསྐང་བའི་གནས་འདིར་གཤེགས༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་སྤྲིན་འབུལ༔ ཉམས་ཆག་ཉེས་ཀུན་བརྗོད་བྲལ་ཀློང་དུ་བཤགས༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ ཧྲཱིཿ ཁྱད་པར་ཐུགས་དམ་བསྐང་བའི་རྫས་ཀྱི་མཆོག༔ རྟོག་མེད་བདེ་སྐྱོང་འཁོར་ལོའི་སྣོད་མཆོག་ཏུ༔ ཟག་བྲལ་རྩ་བརྒྱད་སྟོང་སྦྱར་ཨ་མྲྀ་ཏ༔ རྒྱུ་དྲུག་རྩ་བ་ཆགས་པའི་སིནྡྷུ་ར༔ དུག་ལྔ་སེར་སྣ་དབྱིངས་གྲོལ་དམར་ཆེན་པོ༔ ཕྱི་ནང་གསང་བའི་དམ་རྫས་འབྲུ་སྨན་བཅུད༔ གང་འདོད་དམིགས་པའི་གཏེར་འབྱུང་བྷ་ལིངྟ༔ སྐུ་ཡི་དམ་ཚིག་ཉམས་པ་དབྱིངས་སུ་བསྐང་༔ བརྟན་གཡོ་སྣོད་བཅུད་མུན་སེལ་འོད་དུ་གསལ༔ ཡེ་ཤེས་ལྔ་ལྡན་ཞུན་ཆེན་སྒྲོན་མེ་འབར༔ ཐུགས་དམ་བསྐང་བའི་རྫས་མཆོག་འདི་དག་གིས༔ བདག་ལུས་འགྱུར་མེད་ལྷ་སྐུར་བྱིན་གྱིས་རློབས༔ སེམས་ཅན་ཀུན་གྱི་ལུས་ལ་དབང་བསྒྱུར་ནས༔ བདག་གི་བྲན་དུ་ཁོལ་ལ་ཟིལ་གྱིས་གནོན༔ མཐར་ཐུག་བྱང་ཆུབ་མཆོག་གི་ས་ལ་སྦྱོར༔ གསུང་གི་དམ་ཚིག་ཉམས་པ་དབྱིངས་སུ་བསྐང་༔ བདག་གི་ངག་ལ་གསུང་གིས་བྱིན་གྱིས་རློབས༔ སེམས་ཅན་ཀུན་གྱི་ངག་ལ་བདག་དབང་བསྒྱུར༔ སྙན་གྲགས་བསྟོད་བསྔགས་སྒྲོགས་ལ་ཟིལ་གྱིས་གནོན༔ མཐར་ཐུག་བྱང་ཆུབ་མཆོག་གི་ས་ལ་སྦྱོར༔ ཐུགས་ཀྱི་དམ་ཚིག་ཉམས་པ་དབྱིངས་སུ་བསྐང་༔ བདག་ཡིད་འཕོ་མེད་ཐུགས་སུ་བྱིན་གྱིས་རློབས༔ སེམས་ཅན་ཀུན་གྱི་ཡིད་ལ་བདག་དབང་བསྒྱུར༔ དད་མོས་ཆགས་པའི་སེམས་ཀྱི་བྲན་དུ་གྱིས༔ མཐར་ཐུག་བྱང་ཆུབ་མཆོག་གི་ས་ལ་སྦྱོར༔ ཧྲཱིཿ དངོས་གྲུབ་འདོད་རྒུའི་ཆར་འབེབས་དཀྱིལ་འཁོར་ནས༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ ཞི་ཆགས་ཁྲོ་བོའི་གར་མཛད་ཡི་དམ་ལྷ༔ གཤིན་རྗེ་རྟ་མཆོག་ཡང་དག་ཆེ་བའི་མཆོག༔ རྡོ་རྗེ་གཞོན་ནུ་མ་མོ་རིག་པ་འཛིན༔ མཆོད་བསྟོད་དྲག་སྔགས་སྒྲུབ་སྡེ་བརྒྱད་ཀྱི་གཙོ༔ ཁྱད་པར་ཚེ་རབས་སྔོན་ནས་ད་ལྟའི་བར༔ ལས་ཀྱིས་འབྲེལ་ཞིང་མེ་ཏོག་ཕོག་པའི་ལྷ༔ མི་མངོན་དབྱིངས་ནས་བསྐང་བའི་གནས་འདིར་གཤེགས༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་སྤྲིན་འབུལ༔ ཉམས་ཆག་ཉེས་ཀུན་བརྗོད་བྲལ་ཀློང་དུ་བཤགས༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ ཧྲཱིཿ བར་ཆད་ཀུན་སེལ་ཕྲིན་ལས་དཀྱིལ་འཁོར་ནས༔ བདེ་བའི་ཡེ་ཤེས་རང་གནས་སྟོན་པའི་མ༔ རང་བྱུང་བཅུ་དྲུག་དགའ་བའི་འབྱུང་གནས་མོ༔ དབྱིངས་ཀྱི་ཡུམ་ལྔ་སྒྲོལ་མ་དཀར་སྔོན་ཡུམ༔ ཁྱད་པར་དབང་གི་ལྷ་མོ་རིག་བྱེད་མ༔ འདས་དང་མ་འདས་ཡེ་ཤེས་འཇིག་རྟེན་དང་༔ ལས་དང་ཤ་ཟ་སྤྲུལ་འཁོར་དམ་ཚིག་ཅན༔ ཞིང་རྡུལ་གྲངས་མཉམ་མ་སྲིང་ཌཀྐཱིའི་ཚོགས༔ མི་མངོན་དབྱིངས་ནས་བསྐང་བའི་གནས་འདིར་གཤེགས༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་སྤྲིན་འབུལ༔ ཉམས་ཆག་ཉེས་ཀུན་བརྗོད་བྲལ་ཀློང་དུ་བཤགས༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ ཧྲཱིཿ སློབ་དཔོན་བཀའ་གཏད་དམ་བླངས་དཀྱིལ་འཁོར་ནས༔ ཚེ་རབས་ལས་དང་སློབ་དཔོན་ཕ་མེས་བརྒྱུད༔ མགོན་པོ་སྡེ་ལྔ་རལ་གཅིག་དཔལ་ལྷ་མོ༔ དུད་སོལ་བསྟན་སྐྱོང་གཟའ་བཙན་ཤན་པ་དམར༔ རྡོར་ལེགས་པེ་ཧར་དཀོར་སྲུང་དམ་ཚིག་ཅན༔ ཁྱད་པར་དབང་གི་བཀའ་སྡོད་དབང་ཕྱུག་ཆེ༔ ཡབ་ཡུམ་ཕྲ་མེན་ལས་བྱེད་སྲུང་མའི་ཚོགས༔ མི་མངོན་དབྱིངས་ནས་བསྐང་བའི་གནས་འདིར་གཤེགས༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་སྤྲིན་འབུལ༔ ཉམས་ཆག་ཉེས་ཀུན་བརྗོད་བྲལ་ཀློང་དུ་བཤགས༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ དེ་ལྟར་བསྐང་བཤགས་ཕུལ་བའི་བྱིན་རླབས་ཀྱིས༔ བསྟན་འགྲོའི་དོན་དུ་བྱང་ཆུབ་སེམས་བསྐྱེད་ནས༔ དབང་གི་ཕྲིན་ལས་ཐོགས་མེད་འདིར་བརྩམས་པས༔ གང་བཅོལ་ཕྲིན་ལས་འགྲུབ་པར་མཛད་དུ་གསོལ༔ ཅེས་བརྗོད་ཡི་གེ་བརྒྱ་པས་ནོངས་པ་བཤགས༔ དེ་ནས་ཚོགས་ཕུད་རིམ་པ་གསུམ་དུ་སྤྲོས༔ དང་པོ་དཀྱིལ་འཁོར་ལྷ་ལ་འབུལ་བ་ནི༔ ཧྲཱིཿ འདོད་ཡོན་དྲུག་ལྡན་ཚོགས་ཀྱི་མཆོད་པ་འདི༔ དབང་གི་ལྷ་མོའི་དཀྱིལ་འཁོར་ལྷ་ལ་འབུལ༔ བདག་གཞན་ཚོགས་གཉིས་རྫོགས་ཤིང་སྒྲིབ་གཉིས་སྦྱངས༔ སྐུ་བཞི་ཡེ་ཤེས་འགྲུབ་པའི་དངོས་གྲུབ་སྩོལ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་ཀུ་རུ་ཀུལླེ་གྷ་ན་ཙཀྲ་པུ་ཛ་ཧོ༔ གཉིས་པ་བཤགས་ཚིག་བརྗོད་ཅིང་འབུལ༔ ཧོ༔ དབང་གི་ལྷ་མོ་གཙོ་འཁོར་དགོངས་སུ་གསོལ༔ བདག་གི་ཐོག་མེད་དུས་ནས་ད་ལྟའི་བར༔ སྡོམ་གསུམ་ཉམས་ཆག་བགྱིས་དང་བགྱིད་དུ་བསྩལ༔ མི་འཆབ་འགྱོད་སེམས་དྲག་པོས་བཤགས་ཤིང་བསྡམས༔ ཉེས་པ་སོར་ཆུད་ཚངས་པའི་དངོས་གྲུབ་སྩོལ༔ ཡི་གེ་བརྒྱ་པས་ནོངས་པ་བཤགས་པར་བགྱི༔ གསུམ་པ་ཚོགས་ཀྱི་ཐ་མ་བསྒྲལ་སྟབས་ནི༔ ཧཱུྃ་ཧྲཱིཿ དངོས་འཛིན་འཁྲུལ་སྣང་ལས་ཤར་དགྲ་དང་བགེགས༔ དམིགས་པའི་ལིང་ག་འདི་ལ་ཁུག་ཅིག་ཛ༔ རང་རིག་ཡེ་ཤེས་ལས་སྤྲུལ་ཕུར་པས་གདབ༔ སྔགས་ཀྱི་མཚོན་ཆས་གཏུབས་པའི་ཕུང་ཁམས་རྫས༔ ཤ་ཁྲག་དྭངས་མ་བདུད་རྩིར་བྱིན་བརླབས་ནས༔ སྤྲུལ་པའི་ལྷ་ཚོགས་དགྱེས་ཕྱིར་ཞལ་དུ་བསྟབས༔ མ་ཧཱ་ཧ་ལ་པཉྩ་མཾ་ས་རཀྟ་ཀེང་ནི་རི་ཏི་ཁཱ་ཧི༔ ཞེས་བརྗོད་དམིགས་མེད་ངང་དུ་བཞག༔ དེ་ནས་དཀྱིལ་འཁོར་གཙོ་བོ་སློབ་དཔོན་ལ༔ གུས་པས་ཕྱག་བཅས་ཐབས་ཤེས་རྫས་བཟུང་ནས༔ ཧོ༔ དགོངས་ཤིག་བདེ་གཤེགས་རྒྱལ་བ་སྲས་དང་བཅས༔ ཀུན་གྱི་བདག་ཉིད་རྡོ་རྗེ་སློབ་དཔོན་ཆེ༔ གདན་གསུམ་དཀྱིལ་འཁོར་ལྷ་ཡི་གྲོང་ཁྱེར་དུ༔ ཡུལ་དྲུག་ཚོགས་ཀྱི་མཆོད་པ་བཞེས་སུ་གསོལ༔ ཅེས་བརྗོད་བསྣོལ་མའི་ཕྱག་རྒྱས་དྲངས༔ དེ་ནས་བླ་མས་འདི་སྐད་དོ༔ ཨེ་མ་ཧོ༔ འདོད་པའི་ཡོན་ཏན་རང་བཞིན་མེད་པ་སྟེ༔ དངོས་པོར་བཟུང་བས་སྲིད་པའི་སྡུག་བསྔལ་བསྐྱེད༔ བདག་མེད་མཉམ་པར་རོལ་བའི་ལམ་གྱི་གྲོགས༔ སྤང་བླང་དགག་སྒྲུབ་མེད་པར་བདག་གིས་སྤྱོད༔ ཨ་ལ་ལ་ཧོ༔ དེ་ནས་ཚོགས་ཀྱི་ལྷག་མ་ཁ་ཕྲུ་གདབ༔ ཕཻཾ་གྱིས་སྤྱན་དྲངས་ཚིལ་ཆེན་དུད་པ་གཏོང་༔ རྐང་གླིང་ཐོད་རྔ་དང་བཅས་འདི་སྐད་དོ༔ ཧྲཱིཿ སྔོན་གྱི་བདེ་གཤེགས་དཔལ་ཆེན་ཧེ་རུ་ཀས༔ དྲེགས་པ་རུ་ཏྲའི་བྲན་གཡོག་དཔུང་དང་བཅས༔ དྲག་པོའི་ཕྲིན་ལས་ཀྱིས་བཏུལ་བྲན་དུ་བཀོལ༔ དཀྱིལ་འཁོར་མཐའ་གྲལ་ལྷག་མའི་ཟས་ལ་དབང་༔ འདིར་གཤེགས་དམ་རྫས་ཕ་འབབ་འདི་བཞེས་ལ༔ སྒྲུབ་པོའི་གེགས་སེལ་མཐུན་རྐྱེན་ལས་བཞི་སྒྲུབས༔ ཨོཾ་ཨུཥྩི་ཊ་བྷ་ལིངྟ་ཁཱ་ཧི༔ དེ་ནས་ཐུགས་དམ་དབྱིངས་སུ་བསྐུལ་བ་ནི༔ ཧཱུྃ༔ འཇིགས་རུང་གར་དགུས་རྔམ་པའི་ཕོ་བྲང་ནས༔ མ་རུངས་གདུག་པ་ཞིང་བཅུའི་ཁྲི་སྟེང་དུ༔ དབང་མཛད་ཁྲོས་པའི་རྒྱལ་མོ་རིག་བྱེད་མ༔ དབང་གི་ཕྲིན་ལས་བསྒྲུབ་ཕྱིར་སྐུར་བཞེངས་ཤིག༔ དངོས་པོ་མེད་ལ་དངོས་པོར་བཟུང་བ་ཡིས༔ སྲིད་པའི་བདེ་བས་ཁེངས་པའི་རྒྱལ་བློན་དང་༔ ཆགས་པའི་རྦ་རླབས་ཁོང་ནས་གཡོ་བ་ཡི༔ དྲེགས་ལྡན་བཙུན་མོའི་སྙིང་རྩ་ད་བསྒུལ་ཅིག༔ རིན་ཆེན་འབྲུ་ནོར་ཀ་ཆ་དཀོར་དང་ནོར༔ པདྨའི་ལྕགས་ཀྱུས་ཟུངས་ལ་ཞགས་པས་ཆིངས༔ བདག་གི་བསྟན་པའི་གསོས་དང་དགེ་འདུན་སྡེ༔ བཤད་སྒྲུབ་འཚོ་བའི་མཐུན་རྐྱེན་འདིར་སྩོལ་ཅིག༔ བླ་མ་དཀོན་མཆོག་མཆོད་པའི་ཡོ་བྱད་དང་༔ ངན་སློང་དབུལ་པོའི་རེ་འདོད་སྐོང་བའི་ཕྱིར༔ འཇུངས་པའི་ཟས་ནོར་དབང་མེད་མཐུ་ཡིས་ཕྲོག༔ ཕན་བདེ་སྤེལ་ལ་བྱང་ཆུབ་གྲོགས་མཛོད་ཅིག༔ ཅེས་བསྐུལ༔ ཆད་ཐོའི་རིམ་པ་འདི་བཞིན་བྱ༔ ཧྲཱིཿ སྔོན་ཚེ་བསྐལ་པ་དང་པོའི་དུས་ཀྱི་ཚེ༔ དབང་ཆེན་རྒྱལ་པོ་པདྨ་ཧེ་རུ་ཀས༔ འཁོར་འདས་དབང་བསྒྱུར་རྟ་སྐད་གསུམ་བསྒྲགས་ཚེ༔ སྲིད་ཞིའི་ཁམས་ཀུན་དབང་བསྡུས་བྲན་དུ་བཀོལ༔ གནས་གསུམ་མཁའ་འགྲོས་རྒྱལ་བསྟན་བསྲུང་བ་དང་༔ རྣལ་འབྱོར་ཚེ་བསྲིང་སྒྲུབ་པའི་གྲོགས་བྱ་ཞེས༔ ཇི་ལྟར་ཞལ་བཞེས་དམ་རྫས་གཏོར་མ་ལོངས༔ ཅི་བཅོལ་ལས་ཀུན་ཐོགས་མེད་འགྲུབ་པར་མཛོད༔ ཧྲཱིཿ དེ་འོག་རིག་བྱེད་དབང་གི་ལྷ་མོ་ཡིས༔ ཁམས་གསུམ་ཆེ་བཙན་དབང་ཕྱུག་ཡབ་ཡུམ་སོགས༔ དྲེགས་པ་མ་ལུས་དབང་བསྡུས་ཟིལ་མནན་ཚེ༔ གསུང་གི་རིག་འཛིན་ཀླུ་སྒྲུབ་སྙིང་པོ་སོགས༔ གྲུབ་བརྙེས་རིག་འཛིན་དུ་མས་བསྙེན་སྒྲུབ་བརྩམས༔ དམ་ཅན་སྤྱི་དང་དབང་ཕྱུག་འཁོར་བཅས་ཀྱིས༔ བཀའ་ཡི་དམ་རྫས་མཆོད་གཏོར་ལེན་པ་དང་༔ སྔགས་ཀྱི་རྣལ་འབྱོར་གང་བཅོལ་ལས་སྒྲུབ་ཅིང་༔ རྒྱལ་བསྟན་སྐྱོང་ལ་འདོད་དགུའི་ཆར་འབེབས་ཞེས༔ ཇི་ལྟར་ཞལ་བཞེས་བཞིན་དུ་ཕྲིན་ལས་མཛོད༔ ཧྲཱིཿ དེ་འོག་རྩོད་ལྡན་སྙིགས་མའི་དུས་བབས་ཚེ༔ རྒྱལ་ཀུན་སྤྱི་གཟུགས་པདྨ་འབྱུང་གནས་ཀྱིས༔ གྲུབ་པའི་རྒྱལ་མོ་མཁར་ཆེན་མཚོ་རྒྱལ་སོགས༔ ལས་སྐལ་ལྡན་པའི་ལང་གྲོ་ལོ་ཙཱ་དང་༔ འོ་བྲན་དབང་ཕྱུག་ཨ་ཙར་གསལ་སྣང་རྣམས༔ རིག་བྱེད་ལྷ་མོའི་སྨིན་གྲོལ་གདམས་པ་ཡིས༔ རྗེས་སུ་བཟུང་ཚེ་དཔལ་ལྡན་སྔགས་སྲུང་དང་༔ དབང་ཕྱུག་ཆེན་པོ་རིགས་བཞིའི་ཕྲ་མེན་མས༔ ཟབ་ཆོས་བརྒྱུད་འཛིན་བུ་བཞིན་སྐྱོང་བ་དང་༔ ཟས་ནོར་གོས་སོགས་མཐུན་རྐྱེན་སྒྲུབ་པོ་ཞེས༔ ཇི་ལྟར་ཞལ་བཞེས་ཁས་བླངས་དམ་བཅས་བཞིན༔ གནས་སྐབས་འཚོ་བའི་ཟས་ནོར་མཐུན་རྐྱེན་སྤྲོད༔ སྐྱེ་འགྲོ་ཕོ་མོའི་བློ་སེམས་ཡེངས་སུ་ཆུག༔ གནས་སྐབས་བྲན་ཁོལ་མཐར་ཐུག་གང་འབྲེལ་ཀུན༔ བྱང་ཆུབ་སྙིང་པོ་ཐོབ་པར་མཛད་དུ་གསོལ༔ བྷ་ལིངྟ་ས་མ་ཡཱ་པུ་ཛ་ཁཱ་ཧི༔ ཞེས་བརྗོད་གཏོར་མ་གཙང་སར་གཤེགས༔ བཤལ་ཆུ་འབྲུ་གསུམ་བརྗོད་པ་ཡིས༔ བདུད་རྩིར་བྱིན་བརླབས་འདི་བཞིན་འབུལ༔ ཧྲཱིཿ རྒྱལ་བའི་བསྟན་པ་སྐྱོང་བར་ཞལ་བཞེས་པའི༔ མ་རུངས་འཇིགས་པའི་གཟུགས་སྟོན་བདུད་མོ་བཞི༔ ཡིད་འོང་སྒེག་མཛེས་བཞད་ཚུལ་ལྷ་མོ་བཞི༔ ཚེ་སྲིང་དཔལ་སྐྱེད་ནོར་བདག་གནོད་སྦྱིན་བཞི༔ བསྟན་མ་བཅུ་གཉིས་བཤལ་ཆུ་གཏོར་མ་ལོངས༔ སངས་རྒྱས་བསྟན་པ་ཡུན་ཏུ་བསྲིང་བ་དང་༔ ལྟ་ལོག་མུ་སྟེགས་དྲུངས་ནས་འབྱིན་པ་སོགས༔ བསྟན་དང་འགྲོ་ལ་བདེ་སྐྱིད་ལེགས་པའི་ཚོགས༔ གོང་དུ་འཕེལ་ཞིང་རྒྱས་པའི་ཕྲིན་ལས་མཛོད༔ མ་མ་ཧྲིང་ཧྲིང་བྷ་ལིངྟ་ཁ་ཁ་ཁཱ་ཧི༔ གཏོར་གཞོང་ཁ་སྦུབ་དམ་སྲི་དགུག་གཞུག་བྱ༔ ཧྲཱིཿ ཆོས་དང་སྲིད་ལ་བར་དུ་གཅོད་པ་ཡི༔ དམ་སྲིའི་སྡེ་དཔུང་མ་ལུས་འདིར་ཁུག་ལ༔ སྟོང་ཆེན་རི་རབ་འབར་བའི་འོག་ཏུ་མནན༔ ཐར་མེད་ཆུ་སྲིན་རྔམ་པའི་ཁ་རུ་བཏབ༔ ཇི་སྲིད་བྱང་ཆུབ་སེམས་མཆོག་མ་སྐྱེས་བར༔ ནམ་ཡང་ལྡང་བ་མེད་པར་རྒྱས་གདབ་བོ༔ ཨོཾ་ལཾ་ཨཱཿལཾ་ཧཱུྃ་ལཾ་སྟྭཾ་བྷ་ཡ་ནན་ནན༔ རྗེས་ལ་མཆོད་བསྟོད་ཚེ་འགུགས་དང་༔ དངོས་གྲུབ་ལེན་པ་འདི་བཞིན་བྱ༔ ཧྲཱིཿ རིག་བྱེད་དབང་གི་ལྷ་མོ་འཁོར་བཅས་ཀྱི༔ མཚན་དཔེ་འཇོ་སྒེག་སྐུ་ཡི་དཀྱིལ་འཁོར་ནས༔ འགྱུར་བ་མེད་པའི་ཚེ་དང་གཟི་བརྗིད་དཔལ༔ ད་ལྟ་ཉིད་དུ་བདག་གི་ལུས་ལ་སྩོལ༔ ཚངས་དབྱངས་དྲུག་ཅུ་གསུང་གི་དཀྱིལ་འཁོར་ནས༔ འགག་པ་མེད་པའི་མཐུ་ནུས་རིག་སྔགས་དཔལ༔ ད་ལྟ་ཉིད་དུ་བདག་གི་ངག་ལ་སྩོལ༔ འཁྲུལ་མེད་མཁྱེན་བརྩེ་ཐུགས་ཀྱི་དཀྱིལ་འཁོར་ནས༔ རྣམ་ཀུན་མཆོག་ལྡན་སྟོང་ཉིད་སྙིང་རྗེའི་གཏེར༔ ད་ལྟ་ཉིད་དུ་བདག་གི་ཡིད་ལ་སྩོལ༔ ཁ་སྦྱོར་བདུན་དང་སྟོབས་བཅུ་མི་འཇིགས་བཞི༔ རྣམ་གྲོལ་ཡེ་ཤེས་མཆོག་གི་དངོས་གྲུབ་སྩོལ༔ རྩ་སྔགས་ཤམ་བུར༔ ཀཱ་ཡ་ཝཀྐ་ཙིཏྟ་སིདྡྷི་ཧཱུྃ༔ དེ་ནས་ནོངས་པ་བཤགས་པ་ནི༔ ཧྲཱིཿ རིག་བྱེད་དབང་གི་ལྷ་མོའི་དཀྱིལ་འཁོར་ནས༔ ཚེ་རབས་ནས་གོམས་ལས་ཉོན་སྡིག་སྒྲིབ་ཀུན༔ རྣམ་མཁྱེན་ཐོབ་པའི་གེགས་སུ་གྱུར་པ་རྣམས༔ གནོང་འགྱོད་དྲག་པོས་མཐོལ་ཞིང་བཤགས་པར་བགྱི༔ བརྩེ་བའི་ཐུགས་ཀྱིས་མཐོལ་བཤགས་དེང་བཞེས་ནས༔ ཚངས་པ་མཆོག་གི་དངོས་གྲུབ་འདིར་སྩོལ་ཅིག༔ ཡི་གེ་བརྒྱ་པ་ལན་གསུམ་བརྗོད༔ དེ་ནས་སྐུ་གསུང་ཐུགས་རྟེན་ལ༔ བརྟན་བཞུགས་རྩ་བའི་སྔགས་ཤམ་དུ༔ སུ་པྲ་ཏིཥྛ་བཛྲ་བརྗོད༔ བདག་བསྐྱེད་བསྐྱེད་རིམ་བསྡུ་བ་ནི༔ ཧྲཱིཿ ཀུན་བརྟགས་སྣང་བ་སྒོམ་པའི་བསྐྱེད་རིམ་ལྷ༔ དམིགས་མེད་སྤྲོས་བྲལ་སྟོང་པའི་དབྱིངས་སུ་ཨཿ སླར་ཡང་རྗེས་ཐོབ་རིག་བྱེད་དབང་གི་ལྷ༔ ཕྱག་རྒྱ་གཅིག་པའི་གནས་གསུམ་ཨོཾ་ཨཱཿཧཱུྃ༔ རྩ་སྔགས་བརྗོད་ཅིང་རང་གི་ལུས༔ རྡོ་རྗེའི་གོ་ཆས་གཏམས་པར་བསམ༔ བཛྲ་རཀྵ་རཀྵ་ཧཱུྃ་བྷྲུཾ༔ ཡེ་ཤེས་མེ་ཡི་ཀློང་དུ་བཞུགས་པར་བསམ༔ ཛྭ་ལ་རཾ་ཛྙཱ་ན་ཧཱུྃ་ཨཱཿ དགེ་ཚོགས་འགྲོ་ལ་བསྔོ་བ་ནི༔ ཧྲཱིཿ བདག་གཞན་ཀུན་གྱི་དུས་གསུམ་དགེ་བའི་ཚོགས༔ བསྟན་འགྲོར་ཕན་ཕྱིར་བྱང་ཆུབ་ཆེན་པོར་བསྔོ༔ དེ་མཐུས་གནས་སྐབས་སྲིད་གསུམ་དབང་འདུས་ནས༔ མཐར་ཐུག་འགྲོ་བའི་དེད་དཔོན་མཆོག་འགྲུབ་ཤོག༔ ཤིས་པ་བརྗོད་ཅིང་མེ་ཏོག་འཐོར༔ ཨེ་མ་ཧོ༔ རྒྱལ་ཀུན་རིགས་བདག་བཅོམ་ལྡན་འདས༔ སྣང་བ་མཐའ་ཡས་བཀྲ་ཤིས་ཤོག༔ འཁོར་འདས་དབང་བསྒྱུར་ཧེ་རུ་ཀ༔ རྟ་མཆོག་རྒྱལ་པོའི་བཀྲ་ཤིས་ཤོག༔ རྒྱལ་ཡུམ་གོས་དཀར་དབང་གི་ལྷ༔ རིག་བྱེད་དབང་མོའི་བཀྲ་ཤིས་ཤོག༔ གྲུབ་བརྙེས་སྣང་སྲིད་ཟིལ་གྱིས་གནོན༔ པདྨ་རྒྱལ་པོའི་བཀྲ་ཤིས་ཤོག༔ ཅེས་བརྗོད་ཤིས་པས་དགེ་བར་འགྱུར༔ དགའ་སྟོན་བུ་མོ་ཁྱེའུ་དང་༔ ཁྲིམས་ལྡན་ཟས་ཀྱིས་མཉེས་པར་བྱ༔ ས་མ་ཡཱ༔ དེ་ལྟར་ཟབ་ཆོས་མཁའ་འགྲོའི་བརྡ༔ རྟེན་འབྲེལ་འཕྲོ་ཅན་གྱུར་པ་ཡང་༔ སྔོན་སྨོན་ལས་འཕྲོ་དབང་བཙན་མཐུས༔ ཨ་ཙར་འོ་བྲན་དཔལ་དབང་སྤྲུལ༔ ཟུང་གིས་རྟེན་འབྲེལ་འཕྲོ་མཐུད་ལས༔ རྩ་གསུམ་ལྷ་དང་བླ་མ་ཡི༔ བྱིན་རླབས་མཐུ་ཡིས་ཕབ་པའོ༔