རིག་འཛིན་ལུང་རིག་གླིང་པ་ཉིད་ཀྱི་སྐྱེ་ཕྲེང་གསོལ་འདེབས་ལས་ཅན་སྙིང་གི་དགའ་སྟོན།

༄༅། རིག་འཛིན་ལུང་རིག་གླིང་པ་ཉིད་ཀྱི་སྐྱེ་ཕྲེང་གསོལ་འདེབས་ལས་ཅན་སྙིང་གི་དགའ་སྟོན་ཞེས་བྱ་བ་བཞུགས་སོ།། ཨེ་མ་ཧོ། གདོད་མའི་གཞི་ལས་གཞི་སྣང་བྱེ་བྲག་པ། །འཁོར་འདས་བར་ལག་གྱེས་པའི་དུས་སྐབས་སུ། །རང་བཞིན་གནས་རིགས་རྒྱས་འགྱུར་གྱིས་གསོས་མཛད། །རིགས་བདག་རྗེ་བཙུན་སྒྲོལ་མར་གསོལ་བ་འདེབས། །དེ་ཡི་ཐུགས་རྗེའི་རང་གདངས་འཁོར་གྱི་ཚུལ། །བྱ་གྲུབ་ཡེ་ཤེས་རང་མདངས་ལྗང་གསལ་མཛེས། །གཡས་པ་མཆོད་སྦྱིན་ཨུཏྤལ་གཡོན་མཉམ་བཞག །རིན་ཆེན་དར་གོས་ཕྱེད་སྐྱིལ་སེམས་མའི་ཚུལ། །མཐིང་འོད་གཟི་བརྗིད་འབར་མར་གསོལ་བ་འདེབས། །ཟས་གཙང་སྲས་ཀྱི་དྲུང་དུ་དགེ་བསྙེན་ཚུལ། །དཀར་དམར་མཛེས་སྡུག་རབ་བྱུང་ཤ་འགག་སྔོ། །མཉམ་བཞག་ལྷུང་བཟེད་འོ་མས་གང་བ་བསྣམས། །ཕྱེད་སྐྱིལ་དབུ་ཟླུམ་བླ་གོས་ཤམ་ཐབས་དམར། །འཕགས་མ་ཨུཏྤལ་མདོག་ལ་གསོལ་བ་འདེབས། །འཕགས་ཡུལ་པདྨའི་རིག་མ་དཀར་དམར་མདངས། །མེ་ཏོག་ཐོད་བཅིང་ཨུཏྤལ་ཕྲེང་བ་དང་། །ནོར་བུའི་སྙན་རྒྱན་སྨད་གོས་འཇའ་ཚོན་མདངས། །པུས་བཙུགས་ཐོད་ཆང་གུས་པས་མཆོད་པའི་ཚུལ། །བྲམ་ཟེ་དཔལ་སྐྱེས་མ་ལ་གསོལ་བ་འདེབས། །བོད་ཡུལ་པད་འབྱུང་ཐུགས་ཀྱི་གཟུངས་མ་མཆོག །བོད་ཀྱི་བུ་མོ་མུ་ཏིག་སྟོད་གཡོག་ཁྲ། །ཕུར་བ་མཁར་གདེངས་གཡོན་པས་ཐོད་ཆང་བསྣམས། །དཀར་དམར་མཛེས་སྡུག་གཡུ་ཐོད་རིན་ཆེན་བརྒྱན། །མཁའ་འགྲོ་མཚོ་རྒྱལ་ཞབས་ལ་གསོལ་བ་འདེབས། །མཁར་ཆེན་བརྒྱུད་འཁྲུངས་དབུ་སྐྲ་ཕྱམ་བརྡལ་ཅན། །དཀར་དམར་ཁྲོ་འཛུམ་ཕུར་བུ་མཁའ་ལ་གདེངས། །གསང་གོས་སྔོན་པོ་གཟན་དཀར་རོལ་བའི་སྟབས། །དཔལ་གྱི་དབང་ཕྱུག་ཞབས་ལ་གསོལ་བ་འདེབས། །རྣལ་འབྱོར་དབང་ཕྱུག་བཞད་པ་རྡོ་རྗེའི་དྲུང་། །མི་མོ་རྒན་ཉམས་དར་གོས་སྨུག་པོ་ཅན། །མཉམ་བཞག་སྐྱིལ་ཀྲུང་གཉུག་མའི་རང་ཞལ་བལྟ། །རྣལ་འབྱོར་གཤིན་རྡོར་མོ་ལ་གསོལ་བ་འདེབས། །བོད་ཡུལ་སྔགས་འཆང་བཀྲ་ཤིས་སྟོབས་རྒྱལ་གྱི། །གསང་ཡུམ་སྔགས་སྐྱེས་གཞོན་ཚུལ་དཀར་དམར་མདངས། །གཡས་གཡོན་ཕྱག་གཉིས་ཐབས་ཤེས་ཚོགས་རྫས་བསྣམས། །བཞེངས་སྟབས་གོས་སྔོན་སྙན་རྒྱན་ཕྲེང་གདུབ་མཛེས། །ཡིད་འཛིན་དབང་མོར་གྲགས་ལ་གསོལ་བ་འདེབས། །ལས་རིགས་དཔའ་བོ་ཀརྨ་གླིང་པ་ཡི། །ལས་ཀྱི་ཕྱག་རྒྱ་སྨུག་ནག་ཁྲོས་ཉམས་གཟུགས། །གཡས་པས་སྣང་གསལ་ཕྱག་གཡོན་བདུད་རྩིའི་བུམ། །དར་དམར་ཐོད་དཀྲིས་སྙན་གཡུ་བཞེངས་སྟབས་ཚུལ། །བདེ་སྟོང་ཡེ་ཤེས་དབང་མོར་གསོལ་བ་འདེབས། །བདེ་གཤེགས་དྲུག་པ་སེང་སྒྲའི་སྒྱུ་འཕྲུལ་གར། །གང་དེའི་རྗེས་བཟུང་རྣལ་འབྱོར་གོས་དཀར་ཅན། །དབུ་སྐྲ་ཕྱམ་བརྡལ་ངལ་བསོའི་ཕྱག་རྒྱ་མཛད། །སྐྱིལ་ཀྲུང་གཡོ་མེད་ཤིང་དྲུང་སྒོམ་ཆེན་ཚུལ། །ཀརྨ་དཔལ་དང་ལྡན་ལ་གསོལ་བ་འདེབས། །འཇམ་དབྱངས་ས་ཆེན་བླ་མས་རྗེས་བཟུང་ཚེ། །གྲོང་པའི་བན་སྔགས་སྨུག་སྐྱ་བགྲེས་ཉམས་ཅན། །ཁྱིམ་པའི་གོས་དཀར་ལག་གཉིས་ཁྲུས་བུམ་བསྒྲེངས། །པུས་བཙུགས་གུས་ཚུལ་འཇམ་དཔལ་མདུན་ནས་བཞུགས། །ཀུན་དགའི་མཚན་འཆང་དེ་ལ་གསོལ་བ་འདེབས། །སྟོན་པའི་ཞལ་སྐྱིན་རྗེ་བཙུན་ཙོང་ཁ་པའི། །ཐུགས་སྲས་སྐུ་མདོག་དཀར་དམར་ཆོས་གོས་གསོལ། །ཞྭ་སེར་ཅོད་པཎ་ཕྱག་གཉིས་ཆོས་འཆད་རྒྱས། །ཨུཏྤལ་སྟེང་ནས་རལ་གྲི་གླེགས་བམ་འཛིན། །རྡོ་རྗེ་སྐྱིལ་ཀྲུང་ཁྲི་བེར་གསེར་རིས་ཅན། །མཁས་གྲུབ་དགེ་ལེགས་དཔལ་ལ་གསོལ་བ་འདེབས། །གཏེར་ཆེན་སངས་རྒྱས་གླིང་པའི་སྲས་ཀྱི་ཚུལ། །དམར་སྨུག་སྒེག་ཉམས་སྔགས་བཙུན་བླ་གོས་དཀར། །ཤམ་ཐབས་སྨུག་པོ་མགུལ་ཕུར་ཐོར་ཅོག་ཅན། །གཡས་གཡོན་རྡོར་དྲིལ་སག་ལྷྭམ་རོལ་སྟབས་བཞུགས། །ཡེ་ཤེས་རྡོ་རྗེར་གྲགས་ལ་གསོལ་བ་འདེབས། །གཏེར་བདག་གླིང་པའི་བརྒྱུད་འཛིན་སྔགས་འཆང་ཚུལ། །མདོག་སྨུག་དབུ་སྐྲ་ཕྱམ་བརྡལ་ཨོག་ཚོམ་ཅན། །བླ་གོས་དཀར་པོ་སྟོད་འགག་སྔོ་ཁྲ་དང་། །པད་ཞྭ་རྡོར་དྲིལ་བསྣོལ་སྟབས་མགུལ་ཕུར་བརྒྱན། །སྐྱིལ་ཀྲུང་བེར་ཕྱམ་སྨུག་པོ་ཕྱི་ནས་ཀླུབས། །རིན་ཆེན་རྣམ་པར་རྒྱལ་ལ་གསོལ་བ་འདེབས། །ཁམས་ཞིག་ཉི་གྲགས་དཀར་དམར་ཁྲོ་འཛུམ་རྔམས། །གོས་དཀར་ལྕང་ལོ་མགུལ་ཕུར་པད་ཞྭ་དམར། །གཟིག་སྤགས་བེར་ཕྱམ་ཕྱག་གཡོན་གཏེར་སྒྲོམ་དང་། །གཡས་པས་ཆོས་འཆད་པད་སྟེང་རྡོར་དྲིལ་བསྣོལ། །ཤར་གཏེར་བདག་པོར་གྱུར་ལ་གསོལ་བ་འདེབས། །རོ་གཅིག་དོན་རྟོགས་དགེ་སློང་རྡོ་རྗེ་འཛིན། །དཀར་དམར་རབ་བྱུང་པད་ཞྭ་ཆོས་འཆད་རྒྱས། །ཨུཏྤལ་སྟེང་ དུ་གཡས་གཡོན ་རྡོ་རྗེ་དྲིལ། །སྐྱིལ་ཀྲུང་གིས་བཞུགས་ཨོག་ཚོམ་སྨ་ར་རྔམ། །ཛྙ་ན་སེང་ཧར་གྲགས་ལ་གསོལ་བ་འདེབས། །མཁས་མཆོག་གཞོན་ཚུལ་དཀར་དམར་གསང་གོས་སྔོ། །བླ་གོས་དཀར་པོ་ཤམ་ཐབས་དམར་སྨུག་མཛེས། །སག་ལྷམ་འཇའ་རིས་ཕྱེད་སྐྱིལ་རྒྱ་ཞྭ་གསོལ། །འཇིགས་མེད་སྐལ་བ་བཟང་པོར་གསོལ་བ་འདེབས། །རྣལ་འབྱོར་དབང་ཕྱུག་སྨུག་ནག་རབ་བྱུང་ཆས། །པཎ་ཞུ་རྣ་རིང་གསོལ་ཞིང་ཞབས་ཕྱེད་སྐྱིལ། །ཕྱག་གཉིས་ཌ་རུ་རྐང་གླིང་སྒྲོག་པའི་ཚུལ། །དཀོན་མཆོག་དབང་ཕྱུག་ཞབས་ལ་གསོལ་བ་འདེབས། །བཀའ་དྲིན་མཚུངས་མེད་བླ་མ་དཀར་དམར་མཛེས། །པཎ་ཆེན་ཆས་ཅན་ཕྱག་གཡས་ཆོས་འཆད་རྒྱས། །ཨུཏྤལ་སྟེང་ནས་ཤེས་རབ་རལ་གྲི་དང་། །ཕྱག་གཡོན་སྤྲུལ་འཁོར་མཉམ་བཞག་པུསྟི་བསྣམས། །རིག་འཛིན་ལུང་རིག་གླིང་པར་གསོལ་བ་འདེབས། །འདི་འོག་བསམ་ཡས་ཉེ་འདབས་དགེ་སློང་མ། །ཆོས་གོས་རྣམ་གསུམ་གསོལ་ཞིང་སྐྱིལ་ཀྲུང་བཞུགས། །ཕྱག་གཡས་ཕྲེང་བ་གཡོན་པས་པུསྟི་བསྣམས། །དཀོན་མཆོག་དབང་མོར་གྲགས་ལ་གསོལ་བ་འདེབས། །སོག་པོ་གུར་དཀར་སེམས་མ་དཀར་དམར་མདངས། །གཡས་པས་ཆོས་འཆད་གཡོན་པས་མཉམ་བཞག་མཛད། །ཞབས་གཉིས་ཕྱེད་སྐྱིལ་དར་གོས་སྣ་ཚོགས་གསོལ། །དགེ་ལེགས་ཆོས་འཕེལ་བཟང་མོར་གསོལ་བ་འདེབས། །བྱང་ཁོག་རྟ་རྣར་དགེ་མ་རབ་བྱུང་ཆས། །གཡས་པས་ཨུཏྤལ་གཡོན་པས་སྤོས་ཕོར་ཐོགས། །ཞབས་གཉིས་བཞེངས་སྟབས་ཞི་དུལ་རྣམ་པ་ཅན། །དཔལ་གྱི་སྒྲོན་མ་ཉིད་ལ་གསོལ་བ་འདེབས། །རྔ་ཡབ་དཔལ་རིར་སྲིན་དཔོན་སྨུག་ནག་རྔམས། །མི་ལྤགས་སྟོད་གཡོག་སྟག་ཤམ་མགོ་ཕྲེང་དང་། །ཐོད་སྐམ་དབུ་རྒྱན་ཕྱག་གཡས་རྡོ་རྗེ་དང་། །གཡོན་པས་བྷན་དྷ་ཞབས་གཉིས་ཕྱེད་སྐྱིལ་ཅན། །རཀྴ་མྱུ་གུ་རྩལ་ལ་གསོལ་བ་འདེབས། །ལྷ་ལྡན་པདྨའི་རྒྱལ་ཚབ་མི་ཤ་མདོག །དར་བེར་སྔོ་ཁྲ་ཕྱག་གཡས་ཕུར་བ་དང་། །གཡོན་པས་མཉམ་བཞག་གཏེར་གྱི་སྒྲོམ་བུ་འཛིན། །ཟབ་གཏེར་དབང་ཕྱུག་བྱང་ཆུབ་གླིང་པའམ། །བདེ་ཆེན་དངོས་གྲུབ་ཉིད་ལ་གསོལ་བ་འདེབས། །དགའ་ལྡན་གནས་སུ་བྱང་སེམས་དཀར་དམར་མཛེས། །ཕྱག་གཡས་སྐྱབས་སྦྱིན་གཡོན་པས་ཨུཏྤལ་བསྣམས། །ལོངས་སྐུའི་ཆ་བྱད་སེམས་དཔའི་སྐྱིལ་ཀྲུང་བཞུགས། །བྱམས་པའི་དབང་ཕྱུག་ཞབས་ལ་གསོལ་བ་འདེབས། །རྡོ་རྗེ་གདན་དུ་རྣམ་མཁྱེན་རྫོགས་སངས་རྒྱས། །དུང་མདོག་མཚན་བཟང་དཔེ་བྱད་སྤྲུལ་སྐུའི་ཆས། །སྐྱིལ་ཀྲུང་ཕྱག་གཉིས་ས་གནོན་མཉམ་བཞག་མཛད། །བདེ་གཤེགས་རྣམ་འདྲེན་རྒྱལ་པོར་གསོལ་བ་འདེབས། །དེ་ལྟར་སྐྱབས་ཀུན་བདག་ཉིད་བླ་མ་རྗེའི། །རྣམ་ཐར་དྲན་བཞིན་མོས་པས་གསོལ་བཏབ་མཐུས། །བདག་གཞན་ཕ་མ་རིགས་དྲུག་སེམས་ཅན་རྣམས། །རྔ་ཡབ་དཔལ་རིར་མྱུར་དུ་དྲང་དུ་གསོལ། །ཅེས་སྔོན་གྱི་སྐྱེ་ཕྲེང་ལ་སྒྲོ་བཏགས་པའི་སྐུ་མདོག་ཕྱག་མཚན་དང་ལྡན་པའི་གསོལ་འདེབས་སྨོན་ལམ་དང་བཅས་པ་འདི་ནི་རང་གི་སློབ་བུ་ལྷ་བཟོ་པྲ་ཛྙའི་མིང་གིས་བསྐུལ་ངོར་རྒྱ་སྤྲུལ་མིང་པ་ལུང་རྟོགས་བསྟན་པའི་ཉི་མ་དཔལ་བཟང་པོར་འབོད་པ་རང་ཉིད་ཀྱིས་སྨྲས་པ་བཞིན་ཡི་གེ་པ་ནི་བཙུན་ཆུང་རིག་འཛིན་དོན་གྲུབ་ཀྱིས་བགྱིས་པ་དུས་ཀུན་ཏུ་དགེ་བར་གྱུར་ཅིག་གུ། དགེའོ།། དགེའོ།། དགེའོ།།