གཤིན་པོར་འཕོ་ལུང་མཚམས་སྦྱོར་དང་བཅས་པ་ཡིད་ཆེས་ཐུགས་རྗེའི་ལྕགས་ཀྱུ།

༄༅།། གཤིན་པོར་འཕོ་ལུང་མཚམས་སྦྱོར་དང་བཅས་པ་ཡིད་ཆེས་ཐུགས་རྗེའི་ལྕགས་ཀྱུ་ཞེས་བྱ་བ་སྲིད་གསུམ་རང་གྲོལ་བཞུགས་སོ།།

༄༅།། ན་མོ་ཨ་མི་ཏ་བྷ་ཡ། སྔོན་དུས་དགེ་སློང་ཆོས་ཀྱི་འབྱུང་གནས་ཞེས། །རྣམ་དག་སྨོན་ལམ་བཏབ་འབྲས་དུས་སྨིན་པས། །གང་མཚན་ཐོས་དང་ཡིད་ལ་དྲན་པས་ཀྱང་། །བདེ་ཆེན་ཞིང་དུ་འདྲེན་མཛད་འོད་དཔག་མེད། །པདྨ་རཱ་གའི་ལྷུན་པོའི་མདངས་ཕྲོག་སྐུ། །ཚེ་རབས་གཏན་གྱི་འདུན་མར་སྐྱབས་འཚོལ་བས། །བདག་སོགས་སྐྱེ་འཆིའི་དུཿཁས་མནར་བའི་འགྲོ། །ཐར་ལམ་བྱང་ཆུབ་ཐོབ་པའི་མགོན་མཛོད་ཅིག །གང་ཞིག་ཚེ་ཡི་འདུ་བྱེད་ཉེར་བོར་ནས། །འཆི་བའི་སྨག་རུམ་སྟུག་པོར་ལྷུང་བའི་འགྲོར། །བྱམས་བརྩེའི་ལྕགས་ཀྱུས་དྲང་བྱེད་གདམས་པའི་མཆོག །གསུང་རབ་ཀུན་ལས་ཉེར་བསྡུས་འདི་རུ་ངོམས། །དེ་ཡང་སེམས་ཅན་འཆི་ཁ་མའི་རིགས་སྡིག་པོ་ཆེ་བཙན་ཐབས་སུ་སངས་རྒྱས་པའི་གདམས་པ་འདི་ལ་དོན་གསུམ་སྟེ། སྦྱོར་བ། དངོས་གཞི། རྗེས་དང་གསུམ་ལས། དང་པོ་ནི། ཚེ་འདས་དབུགས་དང་བྲལ་མ་ཐག་པའམ། ཤི་ནས་ཡུན་རིང་སོང་བ་དང་། མིང་བྱང་ལ་ཡང་རྣམ་ཤེས་བཀུག་ནས་ལམ་སྟོན་གནས་སྤར་སོགས་བྱེད་པར་ཨོ་རྒྱན་ཆེན་པོས་གཏེར་ཁ་གྲངས་མེད་པར་གསུངས་པའི་ཕྱིར་འདིར་ཡང་དེ་བཞིན་བྱ་བ་ལ། དང་པོ་བདག་ཉིད་ཡི་དམ་ཐུགས་རྗེ་ཆེན་པོའི་ཏིང་ངེ་འཛིན་ལ་གནས་པར་བྱ་བ་ནི། གནས་ཆེན་རི་བོ་ཏ་ལའི་ཕོ་བྲང་དུ། །སངས་རྒྱས་གསུང་གི་སྤྲུལ་པ་སྤྱན་རས་གཟིགས། །སྟེང་འོག་ཕྱོགས་བཞིར་གསུང་གི་འགྲོ་དོན་མཛད། །གསུང་གི་བྱང་ཆུབ་སེམས་དཔའི་འཁོར་གྱིས་བསྐོར། །སྤྱན་རས་གཟིགས་ཀྱི་ལྷ་ཚོགས་ལ་གསོལ་བ་འདེབས། །ན་མོ། སྐྱབས་གནས་མཆོག་གྱུར་རྣམས་ལ་སྐྱབས་སུ་མཆི། །འགྲོ་རྣམས་སངས་རྒྱས་ཐོབ་པར་སེམས་བསྐྱེད་དོ། །གཟུང་འཛིན་སྣོད་བཅུད་མི་དམིགས་སྟོང་པའི་ངང་། །སྐད་ཅིག་དྲན་རྫོགས་པད་ཉི་ཟླ་སྟེང་དུ། །རང་ཉིད་འཕགས་མཆོག་ཐུགས་ཆེན་སྤྱན་རས་གཟིགས། དཀར་གསལ་ཞལ་གཅིག་ཕྱག་བཞི་ལོངས་སྤྱོད་རྫོགས། །རྩ་བའི་ཕྱག་གཉིས་ཐལ་སྦྱར་ནོར་བུ་འཛིན། །འོག་མ་གཉིས་ཀྱིས་ཤེལ་ཕྲེང་པད་དཀར་བསྣམས། །ཞབས་གཉིས་རྡོ་རྗེའི་དཀྱིལ་མོ་ཀྲུང་གིས་བཞུགས། །སྤྱི་གཙུག་རིགས་བདག་སངས་རྒྱས་སྣང་མཐའ་ཡས། །ཐུགས་ཀར་གུ་རུ་པདྨ་འབྱུང་གནས་གསལ། །དེ་ཡི་ཐུགས་ཀར་ཟླ་སྟེང་ཧྲཱིཿཡིག་མཐར། །ཡི་གེ་དྲུག་མའི་སྔགས་ཀྱིས་བསྐོར་བ་ལས། །འོད་འཕྲོས་འཁོར་འདས་ཡོངས་ཁྱབ་རྒྱལ་བ་མཆོད། །སེམས་ཅན་ཀུན་སྨིན་སྣོད་བཅུད་འཕགས་པའི་ཞིང་། །སྟོང་གསལ་རང་གྲོལ་དག་པ་རབ་འབྱམས་ཀློང་། །ཀུན་ཀྱང་མ་ཎིའི་སྒྲ་དབྱངས་དི་རི་རི། །བྱིན་རླབས་དངོས་གྲུབ་ཚུར་འདུས་རང་ཉིད་ཀྱི། །སྐུ་དང་སྔགས་འཁོར་གནས་ཁང་ཡུལ་ཁམས་ལ། །ཐིམ་པས་གཟི་བཀྲག་མཐུ་ནུས་རབ་ཏུ་འབར། །ནད་གདོན་སྡིག་སྒྲིབ་ལྷ་འདྲེའི་གདུག་རྩུབ་ཞི། །ཚེ་བསོད་དཔལ་རྒྱས་སྣང་བ་དབང་དུ་བསྡུས། །གནོད་བྱེད་དགྲ་བགེགས་ཆོས་ཉིད་དབྱིངས་སུ་ཐིམ། །མ་ཡེངས་མི་སྒོམ་མཐའ་བྲལ་ཆོས་སྐུའི་ངང་། །རང་བྱུང་རིག་པ་དོན་གྱི་འཛབ་འདི་བཟླས། །ཨོཾ་མ་ཎི་པདྨེ་ཧཱུྃ་ཧྲཱིཿ ཅི་མང་བཟླ་ཞིང་བྱམས་སྙིང་རྗེས་ངང་ནས་རྟེན་བསྐྱེད་པ་ནི། ཨོཾ་མ་ཧཱ་ཤཱུ་ནྱ་ཏ་སོགས་བསངས། སྭ་བྷ་ཝཱས་སྦྱངས། མདུན་གྱི་རྟེན་སྣང་བ་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་སྟེང་དུ་ནྲྀ་ཡིག་ཡོངས་སུ་གྱུར་པ་ལས་ཚེ་ལས་འདས་པ་གཞོན་ནུའི་ཚུལ་ལ་མཛེས་ཤིང་ཡིད་དུ་འོང་བ་གོས་དཀར་པོ་དང་བཅས་ཏེ་ལུས་ངག་ཡིད་གསུམ་ཞི་ཞིང་དུལ་བ། དཀོན་མཆོག་གསུམ་དང་བླ་མའི་ངོ་བོ་ཐུགས་རྗེ་ཆེན་པོའི་དཀྱིལ་འཁོར་དུ་སྐྱབས་སུ་འགྲོ་སྙམ་པས་མོས་གུས་དང་ལྡན་པ་གཅིག་ཏུ་གྱུར། དེ་ནས་རྟེན་འགུགས་པ་ནི། བདག་ཉིད་ཐུགས་རྗེ་ཆེན་པོར་གསལ་བའི་ཐུགས་ཀ་ནས་བྱམས་བརྩེའི་འོད་ཟེར་ལྕགས་ཀྱུའི་དབྱིབས་ཅན་སྤྲིན་གྱི་ལྕུག་མ་ལྟར་མྱུར་བ་འཕྲོས་པས་ཚེ་འདས་ཀྱི་རྣམ་ཤེས་འཇིག་རྟེན་བདུན་པོ་གང་ན་ཡོད་པ་དེ་ལ་རེག་པ་ཙམ་གྱིས་སྐད་ཅིག་ཡུད་ཙམ་ལ་བཀུག་ནས་ཕུང་པོ་དང་དབྱེར་མེད་དུ་ཐིམ་པར་བསམ་ཞིང་། ཚེ་འདས་ཀྱི་རྣམ་ཤེས་བཀུག་བསྟིམས་ནས། ན་མོ། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། དྲིན་ཆེན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། ཡི་དམ་རྒྱུད་སྡེ་དྲུག་གི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། གནས་གསུམ་དཔའ་བོ་མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། ཁྱད་པར་དུ་བཅོམ་ལྡན་འདས་མགོན་པོ་འོད་དཔག་ཏུ་མེད་པའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བདེན་པ་དང་། རྒྱལ་བ་གང་གི་ཐུགས་བསྐྱེད་དང་སྨོན་ལམ་རྒྱ་ཆེན་པོའི་སྟོབས་ཀྱིས་འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པའི་རྣམ་པར་ཤེས་པ་འཁོར་བ་སྡུག་བསྔལ་གྱི་གནས་ཡུལ། ས་འོག་ས་སྟེང་ས་བླ་འགྲོ་བ་རིགས་དྲུག་ལམ་རྒྱུད་ལྔ། སྲིད་པ་བར་མ་དོ་གང་ན་ཡོད་ཀྱང་རྟེན་ཕུང་པོ་འདི་ལ་ཁུག་ཅིག ནྲིཿཨ་ཀར་ཤ་ཡ་ཛ་ཛ༔ ལན་གྲངས་ཅི་ནུས་བལྡབས་མཐར། ཛཿཧཱུྃ་བཾ་ཧོ། ཆུ་ལ་ཆུ་བཞག་པ་བཞིན་དུ་གྱུར་ནས་དགའ་བ་དང་གུས་པ་དད་པའི་སེམས་ཀྱིས་བག་ཕེབས་བཞིན་དུ་གནས་པར་བསམ་ལ། མཐེབ་སྐྱུ་དང་ཏིང་ལོ་ཆངས་བུ་དང་བཅས་པ། ཨོཾ་བཛྲ་ཨ་མྲྀ་ཏེ་ཧཱུྃ་ཕཊ། ཨོཾ་སྭཱ་བྷ་ཝས་བསང་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་དུ་ལན་ཆགས་བགེགས་ཀྱི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ། ལན་གསུམ། ཨོཾ་སརྦ་བྷུ་ཏ་ཨ་ཀར་ཤ་ཡ་ཛ་ཛ། ལན་གསུམ་གྱིས་བཀུག་མཐར། ཨོཾ་སརྦ་བིགྷྣན་ན་མཿསརྦ་ཏ་ཐཱ་ག་ཏ་བྷྱོ་བྷི་ཤྭ་མུ་ཥེ་བྷྱ༔སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨེ་མཾ་ག་ག་ན་ཁཾ་གྷྲི་ཧྞ་ཨེ་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི་སྭཱ་ཧཱ། མཐེབ་སྐྱུ་གཡས་བསྐོར་བཅས་ལན་གསུམ་དང་། ཨོཾ་སུམ་བྷ་ནི་སོགས་ཏིང་ལོ་ཆངས་བུ་གཡོན་བསྐོར་བཅས་ལན་གསུམ་གྱི་མཐར་ཐུན་རྫས་ཐོགས་ཏེ། ཧྲཱིཿཔདྨ་ཏ་ཀྲི་ཏ་བཛྲ་ཀྲོ་ཏ་ཧྱཱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ། རང་ཉིད་སྐད་ཅིག་གི་རྟ་མཆོག་ཧེ་རུ་ཀ་ཁྲོ་གཏུམ་བཟོད་པར་དཀའ་བའི་གཟི་བརྗིད་བསྐལ་མེ་ལྟར་འབར་བར་གྱུར། ཧཱུྃ། སྟོང་ཉིད་དབྱིངས་ལས་རང་ཤར་བའི། །སྙིང་རྗེ་ཆེན་པོའི་སྐུར་བཞེངས་པ། །བྱང་ཆུབ་མཆོག་གི་ལྷ་ཆེན་པོ། །ཉོན་མོངས་བདུད་སྡེ་འདུལ་བའི་སྐུ། །དབང་ཆེན་འབར་བའི་ཆོ་འཕྲུལ་གྱིས། །ཐར་པའི་ལམ་ལ་འཚེ་བྱེད་བདུད། །ཟ་འདྲེ་སྲོག་གཅོད་རྡུལ་དུ་རློགས། །ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། རྩ་གསུམ་རྒྱལ་བ་རྒྱ་མཚོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང་། བཅོམ་ལྡན་འདས་མགོན་པོ་འོད་དཔག་ཏུ་མེད་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུས། ཚེ་ལས་འདས་པ་འདི་ལ་གསོན་གྱི་དུས་སུ་ཚེ་སྲོག་ལ་བར་དུ་གཅོད་པ་དང་། གཤིན་གྱི་དུས་སུ་ཐར་ལམ་ལ་བར་དུ་གཅོད་པར་བྱེད་པའི་གསོན་བདུད་གཤིན་ལྕགས་སྤྱི་དང་། ཁྱད་པར་དུ་དྲི་ཟ་འཆི་ཁ་མའི་སེམས་ལ་ཉེ་བར་འཇུག་པའི་རིགས་དང་། དྲི་ཟ་ཁྱབ་བྱེད་དང། གནོད་སྦྱིན་སྨྲ་འདོད་དང་། ཡི་དྭགས་གཤིན་རྗེའི་ཆད་པ་ལ་སོགས་པ་ལན་ཆགས་དང་ཤ་འཁོན་གཉེར་བའི་རིགས་རྣམས་མཆོད་སྦྱིན་གྱི་གཏོར་མ་འདིས་ཚིམས་པར་གྱིས་ལ་འདིར་མ་གནས་པར་གཞན་ཏུ་དེངས་ཤིག །གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་རྡོ་རྗེའི་མེ་རབ་ཏུ་འབར་བ་འདིས་བགེགས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་གྱུར་ཏ་རེ། ཨོཾ་སུམ་བྷ་ནི་སོགས་ཀྱིས་བགེགས་བསྐྲད། བཛྲ་རཀྵ་རཀྵ་ཧཱུྃ་གིས་སྲུང་འཁོར་བྱས་ནས། སྐྱབས་སུ་འགྲོ་བ་ནི། མདུན་གྱི་ནམ་མཁར་ནུབ་ཕྱོགས་བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པ་ནམ་མཁའ་ལ་འཇའ་ཚོན་ཇི་བཞིན་གསལ་བར་གྱུར་པར་བསམ་ལ། ན་མོ། དེང་ནས་བཟུང་སྟེ་བླ་མེད་ བྱང་ཆུབ་བར། །བདག་སོགས་རིགས་དྲུག་འཁོར་བའི་སེམས་ཅན་རྣམས། །མགོན་པོ ་འོད་དཔག་མེད་པའི་ལྷ་ཚོགས་ལ། །ལུས་ངག་ཡིད་གསུམ་གུས་པས་སྐྱབས་སུ་མཆི།། ལན་གསུམ་སོགས་གང་ནུས་བལྡབ། སེམས་བསྐྱེད་པ་ནི། ཧོ། ཐོག་མཐའ་མེད་པ་རིགས་དྲུག་རྒྱུད་ལྔའི་འགྲོ། །འོད་དཔག་མེད་པའི་གོ་འཕང་ལ་འགོད་ཕྱིར། །སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་ནས། །ཟབ་ལམ་འཕོ་བའི་རྣལ་འབྱོར་བསྒོམ་པར་བྱ།། གོང་ལྟར་བྱའོ།། ཚོགས་བསགས་ཡན་ལག་བདུན་གྱིས་རྒྱུད་སྦྱང་བ་ནི། ན་མོ། བདག་ལུས་རབ་འབྱམས་རྒྱ་མཚོའི་རྡུལ་སྙེད་དུ། །སྤྲུལ་ནས་འཆི་མེད་མགོན་པོར་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་པ་དཔག་མེད་ཀུན། །བདེ་ཆེན་ཞིང་གི་ལྷ་ཚོགས་རྣམས་ལ་འབུལ། །ལུས་ངག་ཡིད་གསུམ་སྡིག་སྒྲིབ་ཉེས་ལྟུང་རྣམས། །གནོང་འགྱོད་དྲག་པོའི་སེམས་ཀྱིས་མཐོལ་ལོ་བཤགས། །བདེན་གཉིས་ཀྱིས་བསྡུས་དགེ་ཚོགས་ཇི་སྙེད་ལ། །སྙིང་ནས་དགའ་བས་རྗེས་སུ་ཡི་རང་ངོ་། །གདུལ་བྱའི་དབང་པོ་སྐལ་བ་བསམ་པ་བཞིན། །ཆོས་འཁོར་རྒྱུན་ཆད་མེད་པར་བསྐོར་བར་བསྐུལ། །རྒྱལ་བ་སྲས་བཅས་མྱ་ངན་མི་འདའ་བར། །སྲིད་མཐའི་བར་དུ་བཞུགས་པར་གསོལ་བ་འདེབས། །འདིས་མཚོན་དུས་གསུམ་བསགས་པའི་དགེ་ཚོགས་ཀུན། །འགྲོ་རྣམས་བདེ་ཆེན་ཞིང་ཁམས་ཐོབ་ཕྱིར་བསྔོ།། དེ་དག་གི་དམིགས་རིམ་རྣམས་ཀྱང་གསལ་ཐེབ་པར་བྱའོ། །གཞན་ཡང་ཚད་མེད་རྣམ་བཞི་དམིགས་འདོན་ཡ་མ་བྲལ་བའི་ངང་ནས། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་སོགས། གྱུར་ཅིག ལན་གསུམ་མཐར་སྨོན་འཇུག་བྱང་ཆུབ་མཆོག་ཏུ་སེམས་བསྐྱེད་པ་ནི། བྱང་ཆུབ་སྙིང་བོར་མཆིས་ཀྱི་བར། སོགས་ལན་གསུམ། ཇི་ལྟར་སྔོན་གྱི་བདེ་གཤེགས་ཀྱིས། སོགས། བསླབ་པར་བགྱི། ལན་གསུམ། དེང་དུས་བདག་ཚེ་འབྲས་བུ་ཡོད། སོགས། དགའ་བར་གྱིས། མཉམ་བཞག་གི་ངང་ནས་རླུང་ཞིག་ཕར་བཏང་བའི་ཚེ། བདག་གི་དུས་གསུམ་གྱི་དགེ་ཚོགས་བདེ་སྐྱིད་གང་ཡོད་རྣམས་དམིགས་ཡུལ་དེ་ལ་ཐིམ་པས་དེ་ཉིད་བདེ་བ་དང་ལྡན་སྡུག་བསྔལ་དང་བྲལ་བར་བསམ། ཡང་རླུང་ཞིག་ཚུར་རྔུབ་ཚེ་དམིགས་ཡུལ་དེ་ཉིད་ཀྱི་སྡིག་སྒྲིབ་ཉེས་ལྟུང་ཐམས་ཅད་རྡོ་ཁབ་ལེན་ལ་ལྕགས་ཕྱེ་འདུ་བ་བཞིན་རང་ཉིད་ཀྱི་སྒོ་གསུམ་ལ་ཐིམ་པས་སྒོ་གསུམ་གྱི་ཉེས་ཚོགས་ཤེལ་གོང་ཕྱིས་པ་ལྟར་དག་པར་བསམ་མོ།། སྤྱི་དོན་གཉིས་པ་འཕོ་བ་དངོས་ལ་གསུམ་སྟེ། དང་པོ་ཚེ་འདས་ཀྱིས་ཤིའམ་མ་ཤིའི་རང་ངོ་འཕྲོད་ཕྱིར་ངོ་སྤྲོད་པ་དང་། ཟབ་ལམ་འཕོ་བའི་ལོ་རྒྱུས་བཤད་པ། ཐུན་མོང་གི་སྔོན་འགྲོས་རྒྱུད་སྦྱངས་ནས་ཐུན་མིན་གྱི་ལམ་ཟབ་མོས་གནས་སྤར་བའོ། །དང་པོ་ནི། བྱམས་དང་སྙིང་རྗེ་ཡ་མ་བྲལ་བའི་ངང་ནས། འོ་འཇིག་རྟེན་འདི་ནས་འཇིག་རྟེན་ཕ་རོལ་ཏུ་ཚེ་དུས་ལས་འདས་པ་ཆྒཻ་མོ་ཁྱོད་ཤི་བ་ཡིན་ནོ།། ཞེས་ལན་གསུམ་བོས་ལ། དེ་ཡང་འཆི་བ་ཞེས་བྱ་བ་ཁྱོད་ཉིད་གཅིག་པུར་ཤི་བ་མ་ཡིན་ཏེ། སྐྱེ་འགྲོ་ཐམས་ཅད་འཆི་བའི་རང་བཞིན་ཅན་ཡིན་པར་ཆེད་དུ་བརྗོད་པའི་ཚོམས་ལས། ཀྱཻ་མ་འདུས་བྱས་ཐམས་ཅད་མི་རྟག་སྟེ། །སྐྱེས་ནས་འཆི་བའི་ཆོས་ཅན་ཡིན། །གསུངས་པས་མི་གཅིག་ཁོ་ནར་མ་ཟད་སྣོད་བཅུད་ཐམས་ཅད་རྨི་ལམ་སྒྱུ་མའི་རང་བཞིན་ཡིན་ཏེ། ཐེག་པ་ཆེན་པོའི་མདོ་རྒྱ་ཆེར་རོལ་པ་ལས། སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་འགྲོ་ནམ་མཁའི་གློག་དང་འདྲ། །རི་གཟར་འབབ་ཆུ་བཞིན་ཏུ་མྱུར་མགྱོགས་འགྲོ། །ཞེས་གསུངས་པ་ལྟར། ད་ལྟ་འགྲོ་བ་ཐམས་ཅད་ཀྱི་རྟེན་གཞི་ས་ཆེན་པོ་རི་རབ་གླིང་བཞི་ཁོར་ཡུག་དང་བཅས་པ་ཡང་མཐར་མེ་བདུན་གྱིས་བསྲེགས་པའི་ཐལ་བ་ཆུས་བཤལ་རླུང་གིས་གཏོར་ནས་ནམ་མཁའ་སྟོང་པར་འགྱུར་དགོས་པའི་དུས་འབྱུང་བ་ཡིན་ཏེ། འཕགས་པ་ཏིང་འཛིན་རྒྱལ་པོའི་མདོ་ལས། ནམ་ཞིག་འཇིག་རྟེན་ཁམས་འདི་འབྱུང་བ་དང་། །འཇིག་རྟེན་ཐམས་ཅད་ནམ་མཁར་གྱུར་པའི་ཚེ། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་དང་། འཛམ་གླིང་མཛེས་རྒྱན་ཀླུ་ཡི་དབང་པོའི་ཞལ་ནས། ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེག་པའི་ལུས་ཅན་འདི་དག་ནི། །ཐལ་བ་ཡང་ནི་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨོས་ཅི་དགོས། །ཞེས་དང་། གཞན་ཡང་འཇིག་རྟེན་གྱི་ཁམས་སུ་བྱོན་པ་ལྷ་དང་བཅས་པའི་སྟོན་པ་སངས་རྒྱས་དེའི་བསྟན་པ་རིན་པོ་ཆེ་རྣམས་ཀྱང་མྱ་ངན་ལས་འདས་ཤིང་ཡུན་དུ་མི་གནས་ཏེ། སློབ་དཔོན་དཔའ་བོས། ཇི་སྟེ་སངས་རྒྱས་རྣམས་ཀྱི་སྐུ། །མཚན་དང་དཔེ་བྱད་ཀྱིས་བརྒྱན་པ། །རྡོ་རྗེའི་སྐུ་ཡང་མི་རྟག་ན། །ཕལ་པ་གཞན་ལ་སྨོས་ཅི་དགོས། །ཞེས་དང་། མི་རྟག་པའི་ཚོམ་ལས། མཚན་སྟོང་གིས་འབར་བདེ་གཤེགས་སྙིང་པོའི་སྐུ། །བསོད་ནམས་བརྒྱ་ལས་གྲུབ་པའང་མི་རྟག་སྟེ། །འགྲོ་བའི་དོན་གཤེགས་རྒྱལ་བ་ཉི་མ་འདྲ། །དམ་ཆོས་མཛོད་ཀྱི་ཟླ་བ་ནུབ་ལ་ལྟོས། །ཞེས་གསུངས་པ་ལྟར། །སྲིད་པ་གསུམ་ན་ཆེ་བའི་ཚངས་པ་དང་བརྒྱ་བྱིན་དབང་ཕྱུག་ཁྱབ་འཇུག་ལ་སོགས་པ་ཡང་མི་རྟག་སྟེ། ཀུན་མཁྱེན་ཀློང་ཆེན་པས། ཚངས་དང་བརྒྱ་བྱིན་དྲག་པོ་མིག་སྟོང་ལྡན། །སྲེད་མེད་བུ་ཡང་མི་རྟག་ཕ་རོལ་འགྲོ། །ཞེས་དང་། ཀུན་མཁྱེན་ལྔ་པ་ཆེན་པོས། འཇིག་རྟེན་གསལ་བར་བྱེད་པའི་ཉི་ཟླ་ཡང་། །སྔོན་བསགས་བཟང་པོའི་འཕེན་པ་ཟད་པའི་མཐར། །རང་གི་ལག་པ་བརྐྱང་བསྐུམ་མི་མཐོང་བར་། །མུན་པའི་མལ་དུ་ཉལ་འབྱུང་མཆི་མ་བཀུ། །ཞེས་གསུངས་པས་མུན་སེལ་གྱི་སྒྲོན་མེ་སྟོབས་དང་ལྡན་པ་འདི་དག་ལ་ཡང་རྟག་པ་ཡོད་པ་མ་ཡིན། གཞན་ཡང་གླིང་བཞིར་དབང་བསྒྱུར་ནུས་པའི་འཁོར་ལོས་སྒྱུར་བ་རྣམས་ཀྱང་མི་རྟག་སྟེ། ཆེད་དུ་བརྗོད་པའི་ཚོམས་ལས། རིན་ཆེན་བདུན་ལྡན་རྒྱལ་པོ་དང་། །གཞན་ཡང་རྒྱལ་ཕྲན་བློན་པོ་དང་། །དགེ་སྦྱོང་བྲམ་ཟེ་ཁྱིམ་བདག་སོགས། །འགྲོ་བ་འདི་ཀུན་མི་རྟག་སྟེ། །རྨི་ལམ་འགྲོ་བ་ཇི་བཞིན་ནོ། །ཞེས་གསུངས། ཡིད་བཞིན་རིན་པོ་ཆེའི་མཛོད་ལས། ཕྱི་ནང་དུས་བཞི་ན་ཚོད་འགྱུར་བས་ན། །མི་རྟག་འཆི་བར་ངེས་ཀྱི་རྟག་འཛིན་སྤོངས། །གཟུགས་ནི་རྡུལ་ཕྲན་དུས་ནི་སྐད་ཅིག་མ། །བར་སྣང་གློག་འགྱུ་བཞིན་ཏུ་མི་རྟག་གིས། །གསུངས་པས་དུས་ཀྱང་རིམ་པར་འགྱུར་ལ། སྔོན་བསྐལ་པ་རྫོགས་ལྡན། གསུམ་ལྡན། གཉིས་ལྡན། ད་ལྟ་རྩོད་ལྡན་དུ་གྱུར་པ་དང་། ན་ཚོད་ཀྱང་མངལ་ནས་སྐྱེས་པ། རྒས་ཤིང་འཁོགས་པ། ན་ཞིང་རྒུད་པ། ཤི་ཞིང་སྟོང་པ་སྟེ་སྣོད་བཅུད་དུས་བཞིར་འགྱུར་བ། གཟུགས་སྣང་ལོ་གཅིག་ལ་ཡང་དཔྱིད་ས་བོན་རྨོ་བརྐོའི་དུས། དབྱར་ལོ་འདབ་རླན་རྒྱས། སྟོན་འབྲུ་བཅུད་སྨིན་པ། དགུན་ས་སྐམ་རྡོ་འཁྱགས་ཏེ་རིམ་གྱིས་འགྱུར་བ། གཟུགས་སྣང་རགས་པ་རྣམས་ཀྱང་མཐར་རྡུལ་ཕྲན་དུ་ཡལ། ནང་སེམས་ཀྱི་འགྱུར་བ་དང་། སྐྱེ་འགྲོའི་བདེ་སྡུག འཁོར་བའི་སྣང་ཚུལ་ཐམས་ཅད་སྐད་ཅིག་གིས་མི་རྟག་པར་འགྱུར་བ་ཡིན་ཏེ། འཁོར་བའི་ཆོས་འདི་དག་མི་རྟག་པ་མཐའ་བཞིས་བསྡུས་ཏེ། ཀློང་ཆེན་པས། མཐའ་བཞིས་བསྡུས་ཕྱིར་རྟག་པ་འགའ་ཡང་མེད། གསུངས་པས། སྐྱེས་པ་མི་རྟག་སྟེ་མཐའ་འཆི། འདུས་པ་མི་རྟག་སྟེ་མཐའ་བྲལ། བསགས་པ་མི་རྟག་སྟེ་མཐའ་འཛད། མཐོན་པོ་མི་རྟག་སྟེ་མཐའ་ལྷུང་བར་འགྱུར་བ་འདི་དག་ནི་འདུས་བྱས་སྤྱིའི་ངང་ཚུལ་ཡིན་ཞིང་། ཁྱད་པར་ཁྱེད་ཉིད་འཇིག་རྟེན་འདིར་གནས་པའི་ཚེ་ཡང་འགྲོ་བ་མཆོག་དམན་བར་བ་ཇི་ཙམ་ཞིག་ངེས་པ་མེད་པར་ཤི་བ་དེ་བཞིན་དུ། ད་ལྟ་ཁྱོད་ཀྱང་སྐྱེ་འགྲོ་སེམས་ཅན་འགྲོ་བའི་ལམ་པོ་ཆེ་དེར་ཞུགས་པ་ཡིན་མ་གཏོགས་ཁྱེད་ཉིད་གཅིག་པུའི་སྟེང་དུ་འཆི་བའི་སྡུག་བསྔལ་གྱིས་མནར་བ་མ་ཡིན་པས་སྔངས་སྐྲག་འཇིགས་གསུམ་གྱི་སྡུག་བསྔལ་གང་ཡང་མ་བྱེད། འཁོར་བར་འཁྱམས་པའི་རྩ་བ་ཡང་ཆགས་ཞེན་ཡིན་པས་ཕ་མ་བུ་དང་ཆུང་མ་མཛའ་བཤེས་གཉེན་འདུན་འཁོར་འབངས་ལོངས་སྤྱོད་གང་ལའང་མ་ཆགས་མ་ཞེན་པར་གྱིས། དེ་རྣམས་ཀྱིས་ནི་འཆི་བ་ལས་མི་སྐྱོབ་སྟེ། བུ་མོ་རིན་ཆེན་གྱིས་ཞུས་པའི་མདོ་ལས། འཆི་བའི་དུས་ལ་བབས་ཙ་ན། ཕ་མས་མི་ཕན་གཉེན་འདུན་མིན། །བུ་དག་སྐྱབས་སུ་འགྱུར་མ་ཡིན། །ལང་ཚོ་མ་ཡིན་སྟོབས་ཀྱང་མིན། །ཞེས་གསུངས་པས། འཆི་བ་ལ་ཐབས་གང་གིས་ཀྱང་ལྡོག་ཏུ་མེད་དེ། མི་ཆོས་ནས་གྲོས་དང་གཏམ་དང་ཤགས་དང་རྩལ་དང་དབང་དང་གཡོ་སྒྱུས་མི་སྟོངས། ལྷ་ཆོས་ནས་ཀྱང་སྨན་རྩིས་མོ་དཔྱད་བསྲུང་བཟློག་བཅུད་ལེན་རྫས་དང་སྨན་སྔགས་གང་གིས་ཀྱང་མི་སྐྱོབས་ཤིང་། རང་གི་རྗེས་སུ་མི་འབྲང་། རང་ཉིད་ལས་ཀྱི་རྗེས་སུ་འབྲང་དགོས་པའི་ཚུལ། རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་འགྱུར་ན། །ལོངས་སྤྱོད་གཉེན་དང་མཛའ་བཤེས་རྗེས་མི་འབྲང་། །སྐྱེ་བོ་དེ་ནི་གང་ནས་གར་འགྲོ་ཡང་། །ལས་ནི་ལུས་དང་གྲིབ་མ་བཞིན་དུ་འགྲོགས། །ཞེས་གསུངས་པ་ལྟར་གང་ལ་ཡང་ཆགས་ཞེན་གྱི་འཁྲི་བ་རྦད་ཀྱིས་ཆོད་ལ་སྐྱོབས་ངེས་པ་བླ་མ་དཀོན་མཆོག་གསུམ་ཡིན་པས་གསོལ་བ་རྩེ་གཅིག་ཏུ་ཐོབ་ལ་གདམས་ངག་གི་གནད་རྣམས་ཡིད་ལ་མ་བརྗེད་པར་ཟུངས་དང་། ངས་ཁྱོད་ལ་འཆི་ཁར་བར་དོའི་ངོ་སྤྲོད་མི་གསལ་བ་གསལ་གདབ་པ་སྒེག་མོ་མེ་ལོང་ལ་བལྟ་བ་ལྟ་བུའི་གདམས་ངག་སྟོན་པ་ཡིན་ལ། དེ་ཡང་འཆི་བའི་དུས་འདི་ལྟར་འབྱུང་བ་ཡིན་ཏེ། དེ་ཡང་ས་ས་ལ་ཐིམ་པས་ལུས་ལྗི་ཞིང་ལྡང་མི་ནུས་ཤིང་མིག་ཡུལ་དུ་གཟུགས་མི་གསལ། ཆུ་ལ་ཆུ་ཐིམ་པས་ཁ་ཆུ་སྣ་ཆུ་ཟག་ཅིང་རྣ་བ་མི་གསང་། མེ་ལ་མེ་ཐིམ་པས་ལུས་དྲོད་སྡུད་ཅིང་ཁ་སྣ་སྐམ་སྣས་དྲི་མི་ཚོར། རླུང་ལ་རླུང་ཐིམ་པས་མིག་གྱེན་ལ་ལྡོག་ཅིང་དབུགས་ངར་ངར་རྐང་ལག་གཡོབ་ཅིང་ལྕེས་རོ་མི་ཚོར། དེ་ཡིས་ཚེ་འདེགས་བྱེད་ཀྱི་རླུང་བྲོས་པས་ལུས་མི་ཐེག །སྒྱིད་པ་ལུག་ཅིང་ཡན་ལག་རྣམས་མི་འདུ། སྨྲ་བ་ཤིན་ཏུ་དཀའ་བ་འབྱུང་ངོ་། །བཀྲག་བསྐྱེད་ཀྱི་རླུང་བྲོས་པས་ལུས་དང་ཁ་སྣའི་སྒོར་བལ་དུད་ཆགས། ཁ་སྐོམ་གཤིན་དྲི་བསྣོམ། དྭངས་སྙིགས་འབྱེད་པའི་རླུང་བྲོས་པས་བཟའ་བཏུང་མི་ལེན་ལུས་སྟོབས་འཆོར། མེ་མཉམ་གྱི་རླུང་བྲོས་པས་ལུས་ཀྱི་དྲོད་རྣམས་རིམ་གྱིས་མཐའ་ནས་དབུས་སུ་སྡུད། འདིའི་དུས་མིག་ནས་རང་རིག་གི་འོད་ཟེར་དུང་གི་ཐག་པ་ལྟ་བུ་ལ་རྡོ་རྗེ་སེམས་དཔའི་སྣ་ཐག་བྱུང་བར་ངོ་ཤེས་ནས་རིག་པ་རྩེ་གཅིག་ཏུ་གཏོད་པའི་འདུན་པ་དྲག་པོས་ཡར་གྱི་ཟང་ཐལ་དུ་སྐད་ཅིག་ལ་འགྲོ་བར་འགྱུར་རོ།། ཤི་མ་ཐག་པའི་གང་ཟག་གམ་ནང་དུ་དབུགས་མ་ཆད་པའི་རིགས་ལ་སྐབས་འདིར་འཕོ་བ་འདེབས་དགོས་པས་མཚམས་སྦྱོར་བྱ་བའམ་ཡང་ན་སྔར་གྱི་འཕྲོར། དུས་དེར་མ་གྲོལ་ན་བསྐལ་པ་ལས་ཀྱི་རླུང་བྲོས་པས་ཤེས་པ་ཟ་ཟི་ཕྱད་ཕྱོད་བྱེད་ཅིང་རྩ་ཕྲན་གྱི་ཁྲག་རྣམས་སྲོག་རྩའི་ནང་ན་འདུ། དེ་ཡི་ཚེ་ཕྱི་ཡི་སྣང་བ་ས་སྲོས་པ་བཞིན་ལྗི་འཐིབ་ཀྱིས་སོང་། རིག་པ་སྙིང་གི་དཀྱིལ་དུ་འདུས་ནས་དྲན་པ་ཉམས། དུས་དེར་སྲོག་རྩའི་ནང་ནས་ཁྲག་ཐིགས་གཅིག་སྙིང་གི་དཀྱིལ་དུ་བརྒྱབ་པས་མིག་སྐྱ་ལོག་གིས་འགྲོ། ཁྲག་ཐིགས་གཉིས་བརྒྱབ་པའི་ཚེ་མགོ་ཁུག་པ་ཞིག་ཡོང་ནས་དབུགས་ཕྱིར་ཧ་ཞེས་མདའ་གང་དུ་འཕེན། ཐིགས་པ་གསུམ་རྒྱབ་པས་ཨིག་ཅིང་དབུགས་འདོམ་གང་དུ་འཕོ་ཞིང་དབུགས་ཆད། ལུས་ཀྱིས་རེག་བྱ་མི་ཚོར། དེ་དུས་རིག་པ་སྙིང་དུ་ཁྲོག་གིས་བརྒྱལ་ནས་མི་གཅིག་ཟན་ཟ་བའི་ཡུན་ཙམ་དུ་དྲན་པ་དང་རྟོག་ཚོགས་གང་ཡང་མེད་དོ། །དེ་ནས་རོ་རྐྱང་གི་དྭངས་མ་རྣམས་ཨ་ཧཾ་ལ་འདུས། ཕ་ལས་ཐོབ་པའི་སྲོག་འཛིན་བྱང་སེམས་ཧཾ་གི་དབྱིབས་ཅན་ཐུར་དུ་བབས་པ་ན་སྟོང་སང་དཀར་ལམ་གྱི་སྣང་བ་ཤར་བས་ཞེ་སྡང་ལས་གྱུར་པའི་རྟོག་པ་སོ་གསུམ་འགགས། མ་ལས་ཐོབ་པའི་མཉམ་གནས་ཀྱི་དྭངས་མ་རཀྟ་ཨ་ཐུང་གི་དབྱིབས་ཅན་གྱེན་དུ་ལོག་པར་སྟོང་སེང་དམར་ལམ་པའི་སྣང་བ་ཤར་བས་འདོད་ཆགས་ལས་གྱུར་པའི་རྟོག་པ་བཞི་བཅུ་འགགས། དེ་གཉིས་ཀྱི་བར་དུ་རྣམ་ཤེས་གྱད་སྟོབས་ཆེན་གྱིས་སེ་གོལ་ལན་བདུན་གཏོག་པའི་ཡུན་ཙམ་ཞིག་འཐུམ་ནས་སྟོང་སངས་ནག་ལམ་པའི་སྣང་བ་ཤར་བས་གཏི་མུག་ལས་གྱུར་པའི་རྟོག་པ་བདུན་འགགས། དེའི་ཚེ་རླུང་རྣམ་པར་ཤེས་པ་ལ་ཐིམ་པས་ནང་དབུགས་ཆད། རྣམ་པར་ཤེས་པ་ནམ་མཁའ་ལ་ཐིམ་པས་སེམས་དབྱིངས་སུ་ཐིམ་སྟེ་དར་ཅིག་བརྒྱལ། དེ་སངས་མ་ཁད་ལ་ཞི་བ་ཆོས་ཀྱི་སྐུའི་ནམ་མཁའ་ཞེས་བྱ་བ་དབྱར་མ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུ་འཆར་ཏེ་དེ་ཉིད་ངོས་ཟིན་ཙམ་གྱིས་ཀ་དག་གི་གཞི་ལ་རང་གྲོལ་བའོ། །དེར་མ་གྲོལ་ན་ཆོས་ཉིད་བར་དོའི་ཁྱབ་བྱ་ཕུང་པོ་ལྔ་ལ་ཁྱབ་བྱེད་སངས་རྒྱས་ཀྱི་སྐུ་དང་རིགས་དང་ཞིང་ཁམས་ཐམས་ཅད་རང་ཆས་སུ་ཡོད་པའི་གནད་ཀྱིས་རང་གི་རིག་རྩལ་མིག་ནས་ཡེ་ཤེས་ཀྱི་སྣང་བ་འོད་ལྔའི་ཟེར་ཐག་ཤར་བ་སོགས་སྐུ་དང་ཞིང་ཁམས། རྣམ་སྣང་རྡོར་སེམས་རིན་འབྱུང་སྣང་མཐའ་དོན་གྲུབ་རྣམས་གཙོ་འཁོར་ཡབ་ཡུམ་ཚོམ་བུའི་དཀྱིལ་འཁོར། ཞི་ཁྲོའི་ལྷ་ཚོགས་ནམ་མཁའི་མཐའ་ཀླས་པར་གཟི་བཀྲག་དཔག་ཏུ་མེད་པར་ཤར་བ་རྣམས་རང་སྣང་དུ་ངོ་ཤེས་ཤིང་གསལ་སྟོང་གི་ངང་དུ་ཞོག་ཅིག །བར་དོ་ལོངས་སྤྱོད་རྫོགས་པའི་སྐུ་ཞི་ཁྲོའི་ལྷ་ཚོགས་དང་དབྱེར་མེད་དུ་སངས་རྒྱས་པར་འགྱུར་རོ། །དེ་དང་ལྷན་དུ་འོད་བཀྲག་མེད་པའི་རིགས་གང་ཤར་ནའང་རིགས་དྲུག་ཏུ་སྐྱེ་བའི་འོད་ཡིན་པས་མ་ཆགས་མ་ཞེན་ཅིག །གོང་གི་ཡེ་ཤེས་ལ་གདེང་མ་ཐོབ་ན་ཟུང་འཇུག་ཡེ་ཤེས་ལ་ཐིམ་པའི་དུས་སུ་རང་གི་སྙིང་ག་ནས་སྟེང་གི་ནམ་མཁའ་ལ་ཡེ་ཤེས་བཞི་ལྡན་གྱི་སྣང་བ་འོད་མཐིང་ཀ་དང་། དཀར་པོ་དང་། སེར་པོ་དང་། དམར་པོའི་སྣམ་བུའི་སྟེང་དུ་སོ་སོའི་ཁ་དོག་དང་མཐུན་པའི་ཐིག་ལེ་དྭངས་གསལ་ཐིག་ཕྲན་ལྔ་ལྔས་བརྒྱན་པ་དང་། དེའི་སྟེང་དུ་འོད་ཟླུམ་རྨ་བྱའི་གདུགས་འཁོར་བ་ལྟ་བུའང་འཆར། འདི་དུས་ཕུང་པོ་བདག་འཛིན་ལས་གྲོལ་བས་ལུས་འོད་གསལ་ཆོས་ཉིད་ཀྱི་རང་ངོ་ལ་གནས། འབྱུང་བ་དང་ཉོན་མོངས་པ་ཕྲ་རགས་ལས་གྲོལ་བའི་རང་སྣང་ངོ་ཤེས་པ་ནི་གྲོལ་བ་ལུས་ཀྱི་གནད་དོ། །དེ་ནས་ཡེ་ཤེས་ལྷུན་གྲུབ་ལ་ཐིམ་པའི་དུས་ནི། ཡེ་ཤེས་ཀྱི་སྣང་བ་དེ་དག་སྟེང་འོད་ཟླུམ་དེ་ལ་འདུས་ནས་ཀ་དག་གི་སྣང་བ་ནམ་མཁའ་སྤྲིན་མེད་ལྟ་བུའི་ངང་ལས་དག་པ་ཞི་ཁྲོའི་ཞིང་ཁམས་དང་། མ་དག་འགྲོ་དྲུག་གི་སྣང་བ་མཐའ་ཡས་པ་སྐད་ཅིག་ལ་འཆར་ཏེ། སྐབས་དེར་རང་སྣང་ལ་སྒྲོ་འདོགས་ཆོད་པས་གྲོལ་བ་ཐོབ་ནི་མཐར་ཕྱིན་པ་ངོ་ཤེས་པའི་གནད་དོ། སྐབས་འདིར་སྣང་བའི་འཆར་ལུགས་བརྒྱད་དང་། དབང་པོ་ལ་སོགས་པའི་མངོན་པར་ཤེས་པ་དྲུག་ཚན་དྲུག་དང་། སྐུ་གསུམ་གྱི་མངོན་ཤེས་སུམ་ཚན་གསུམ་རྣམས་རྗེས་སུ་དྲན་པ་དྲུག་བརྟེན་ནས་ལྷུན་གྲུབ་ཏུ་གདེང་ཐོབ་པའི་ཐིམ་ལུགས་བརྒྱད་ཀྱི་སྒོ་ནས་གདོད་མའི་དབྱིངས་སུ་མངོན་པར་བྱང་ཆུབ་པ་ནི་ལྷུན་གྲུབ་ལོངས་སྐུའི་བར་དོ་ལ་གྲོལ་བ་ཐོབ་པའོ། །དེ་དག་ཏུ་མ་གྲོལ་ན་སྲིད་པ་བར་དོ་རྨི་ལམ་གྱི་སྣང་བ་ལྟར་དབང་པོ་ཚང་ཞིང་རྫུ་འཕྲུལ་དང་ལྡན་པ། ཀུན་ཏུ་རྒྱུ་ཞིང་འཇིགས་པ་དང་ལྡན་པ་བར་དོར་ཅི་ཙམ་གནས་པའི་ཕྱེད་སྔ་མའི་གཟུགས་དང་བག་ཆགས་སུ་སྣང་ལ། ཕྱེད་ཕྱི་མ་གང་དུ་སྐྱེ་བའི་གཟུགས་དང་སྣང་བ་འཆར་ཏེ། དེའི་ཚེ་བར་དོ་ནང་ཚན་དང་ལྷ་མིག་དག་པས་མཐོང་ཞིང་། གཞན་གྱིས་མི་མཐོང་། སྔར་བས་དྲན་པ་བདུན་འགྱུར་གྱིས་གསལ་ལ་མངོན་ཤེས་ཕྲ་མོ་གསལ། དབང་པོ་ཀུན་ཚང་བ་དེ་རྡོ་རྗེ་གདན་དང་མའི་མངལ་གཉིས་མ་གཏོགས་གང་ལའང་ཐོགས་པ་མེད་པར་ཡད་ཡུད་ཕྱད་ཕྱོད་བལ་འདབ་རླུང་གིས་བསྐྱོད་པ་ལྟར་འགྲོ་ཞིང་ཡུད་ཙམ་རེ་ལ་གར་ཡང་སླེབས་པས་རང་གི་ཁྱིམ་དང་ཉེ་འཁོར་རྣམས་རྨི་ལམ་ཙམ་དུ་འཕྲད་ནས་སྔོན་གྱི་བྱ་བར་བག་ཆགས་ཀྱིས་འཇུག་པར་བྱེད་ཀྱང་ལུས་རྒྱའི་རྟེན་མེད་པས་རང་དབང་མི་ཐོབ། སེམས་སྐྱོ་ཞིང་བག་གྲང་། ཚིག་པ་ཟ། སྙིང་མི་དགའ། སྐྱི་ཟིང་ཟིང་བྱེད། འབྱུང་བཞིའི་རླུང་གིས་བསྐྱོད་པས་རླུང་གིས་གཡེང་བ། སས་ནོན་པ། ཆུས་ཁྱེར་བ། མེས་ཚིག་པ་སྡུག་བསྔལ་ཀྱིས་འཇིགས་སྣང་ཆེ་བས་ལུས་དང་བྲལ་བར་ཤེས་ཏེ་ཤི་བ་ཡིན་འདུག་སྙམ་ནས་སྡུག་བསྔལ་ཆེན་པོས་བརྒྱལ་ནས་འཆི་ཆུང་རེ་བྱེད། རགས་པའི་ལུས་རྟེན་མེད་པར་ཉམ་ཐག་པས་ལུས་ཤིག་ཐོབ་ན་ཅི་འདྲ་ཞིག་བྱུང་ཡང་ཆོག་སྙམ་པ་འབྱུང་བར། དེ་ཡི་ཚེ་གང་ལ་ཐུག་ཀྱང་གནས་ངན་དུ་མི་འཇུག་བསམ་པའི་གཉེན་པོ་དང་དྲན་འདུན་གལ་ཆེ་ཞིང་། སྤང་བླང་གི་སྐྱེ་གནས་ངོས་ཟིན་དགོས་པས། དེ་ཡང་དུག་གསུམ་གྱི་ལས་སྣང་གཡང་ས་དམར་ཟེང་ངེ་བ་དང་། སྐྱ་ཆད་དེ་བ་དང་། ནག་ངམ་མེ་བ་བཟོད་དཀའ་བ་མཐོང་ན་ངན་སོང་གསུམ་དུ་ལྟུང་བའི་ལྟས་དང་། ལྷ་མི་གཉིས་སུ་སྐྱེ་ན་འོད་དཀར་པོ་འདོམ་གང་བས་བརྒྱན་པ་མགོ་བོ་གྱེན་དུ་བསྟན། ལྷ་མིན་དང་དུད་འགྲོར་སྐྱེ་ན་སེར་པོ་སྣང་བས་མགོ་འཕྲེད་དུ་བལྟ། དམྱལ་བ་དང་ཡི་དྭགས་ནག་པོར་སྣང་བས་མགོ་ཐུར་དུ་བལྟས་ནས་འགྲོ་སྙམ་བྱེད་པའོ། །ཡང་སྐྱེ་གནས་སོ་སོར་འཇུག་དུས་ལྷ་ཁང་དང་སྐྱེད་མོས་ཚལ་ནི་ལྷ་ཡི་སྐྱེ་གནས། འོད་ཀྱི་འཁོར་ལོ་ནི་ལྷ་མ་ཡིན། གནམ་རྨུག་པ་མི་ལུས་ཙམ་པོ་བ། སྐྱེ་བོ་མང་པོའི་དབུས་མི་ལུས་རིན་པོ་ཆེ། ས་ཕུག་སྤྱིལ་པོ་བྱོལ་སོང་། གྲོག་པོ་སྟོང་པ་དང་ཕུག་རྡུགས་ཡི་དྭགས། མུན་ནག་ཆར་མུན་དྲག་པོ་དམྱལ་བའི་སྐྱེ་གནས། མུན་ནག་འཐུག་ཅིང་བུ་ཡུག་གིས་བདས་པ་གྲང་དམྱལ་རྣམས་སོ། །ཁྱད་པར་མི་ལ་ལུས་འཕགས་གླིང་དུ་སྐྱེ་ན་ངང་པ། སྒྲ་མི་སྙན་དུ་ཉ། བ་གླང་སྤྱོད་དུ་གླང་། འཛམ་བུའི་གླིང་དུ་མི་ཕོ་མོ་སྤྱོད་པའི་ཉམས་འཆར། འདིའི་དུས་དབང་པོ་གསུམ་གྱི་ན་རིམ་ལྟར། མི་ཡི་མངལ་སྒོ་ལ་སོགས་པ་བདེན་མེད་དུ་ཤེས་པའམ་ཞེན་ལོག་གིས་བཀག་ནས་ཤར་ཕྱོགས་མངོན་པར་དགའ་བ་ལ་སོགས་ཡིད་ལ་བྱས་པས་འགྲོ་དྲུག་གི་མངལ་དུ་མི་འཇུག་པར་བགགས་ནས་དག་པའི་ཞིང་དུ་པདྨ་ལ་བརྫུས་ཏེ་སྐྱེས་ནས་སངས་རྒྱས་པར་འགྱུར་རོ། །འབྲིང་བདག་གཞན་སྣོད་བཅུད་ཐམས་ཅད་སྣང་སྟོང་ལྷ་སྐུ་སྒྱུ་མ་ལྟ་བུའི་ཡི་དམ་བསྐྱེད་རིམ་དུ་གསལ་གདབ་ཅིང་གཞན་འཁྲིག་པ་བརྟེན་པར་མཐོང་ན་ཆགས་སྡང་དང་མིག་སེར་སྤངས་ཏེ་བླ་མ་ཡབ་ཡུམ་དུ་བསྒོམ་ལ་ཆགས་སེམས་བདེ་སྟོང་ཀ་དག་ལྷུན་གྲུབ་ཀྱི་དགོངས་དོན་ཉམས་སུ་བླང་བས་མངལ་སྒོ་ཁེགས་ནས་དེར་གྲོལ་ལོ། །མངལ་དུ་འཇུག་ན་མངལ་སྣོད་ཆོས་འབྱུང་དུ་གསལ་བའི་ནང་ན་པདྨ་ཉི་ཟླའི་གདན་སྟེང་དུ་ཨོཾ་ཨཱཿཧཱུྃ་སོགས་ཀྱི་ས་བོན་དུ་གསལ་གདབ་ནས། ཕ་མ་ཡི་དམ་ཡབ་ཡུམ་དུ་ཤེས་པའི་ངང་ནས་མངལ་དུ་ཞུགས་པས་མི་ལུས་ཡིད་བཞིན་ནོར་བུ་ལྟ་བུ་ཐོབ་སྟེ་ཐེག་པ་ཆེན་པོ་ལ་སྤྱོད་པའི་དགེ་བའི་བཤེས་གཉེན་དང་མཇལ་ཞིང་ཐེག་པ་ཆེན་པོའི་ལྟ་སྒོམ་རྣམས་ལ་ཚུལ་བཞིན་ཉམས་སུ་བླངས་པས་གྲོལ་བར་འགྱུར་རོ། །ཐ་མ་རྣམས་བླ་མ་དང་ཕྱོགས་བཅུའི་དཀོན་མཆོག་གསུམ་ལ་སྐྱབས་སུ་འགྲོ་བར་བྱས་པས་སྐྱེ་གནས་ངན་པ་ལས་ལྡོག་སྟེ་མཐོ་རིས་ལྷ་མིའི་ལུས་ལོན་ནས་དཀོན་མཆོག་གསུམ་ལ་མི་ཕྱེད་པའི་དད་ལྡན་དུ་གྱུར་ནས་དམ་པའི་ཆོས་ལ་སྤྱོད་པར་འགྱུར་རོ། །གཞན་ཡང་ཁྱོད་ཀྱི་ཤུལ་ན་ཡོད་པ་རྣམས་ཀྱིས་ཀྱང་དཀོན་མཆོག་མཆོད་པ་དང་སྦྱིན་གཏོང་སོགས་དགེ་བ་ཆེན་པོ་སྒྲུབ་པ་འདི་དག་གིས་ཁྱོད་ལ་ཕན་ཐོགས་ཆེན་པོར་འགྱུར་བས་སྡུག་བསྔལ་མི་འཚལ་ཞིང་། ཁྱད་པར་ད་ལམ་བདག་ཅག་གི་སངས་རྒྱས་ལག་བཅང་གི་གདམས་པ་སྡིག་པོ་ཆེ་བཙན་ཐབས་སུ་སངས་རྒྱས་པའི་ཆོས་སྐད་ཅིག་གི་རྫོགས་སངས་རྒྱས་པའི་ཆོས་སྒོ་ཕྱེ་ནས་ཁྱོད་དག་པ་མཁའ་སྤྱོད་ཀྱི་གནས་སུ་སྤར་བ་ཡིན་པས་དགའ་བ་དང་སྤྲོ་བའི་སེམས་སྐྱེད་ཅིག དེ་ཡང་རིན་ཆེན་འདུས་པའི་རྒྱུད་ལས། བུག་པ་དགུ་ཡི་སྟེང་རོལ་ན། །བདེ་བ་ཅན་དུ་འགྲོ་བའི་སྒོ། །བག་ཆགས་ལུས་རྒྱ་ཞིག་པའི་ཚེ། །མཚམས་མེད་ལྔ་ལ་སྤྱོད་པ་ཡང་། །གྲོལ་བར་འགྱུར་བ་ཐེ་ཚོམ་མེད། །ཅེས་གསུངས་པ་ལྟར་དུ་བསྒོམ་པ་ལ་ཁྱོད་ཚེ་འདིའི་སྣང་བ། ཉེ་འབྲེལ། རྒྱུ་རྫས་ལོངས་སྤྱོད། ཡུལ་འཁོར་གང་ལ་ཆགས་ཤིང་ཞེན་ན་འཁོར་བའི་སྡུག་བསྔལ་ལས་ཐར་བའི་དུས་མེད་པར་འཆིང་བས་མ་ཆགས་མ་ཞེན་པར་ཟབ་ལམ་འཕོ་བའི་གདམས་པ་འདི་ལྟར་དུ་གསལ་ཐོབ་ཅིག གཉིས་པ་འཕོ་བའི་ལོ་རྒྱུས་བཤད་པ་གཞན་ལས་ཤེས་པར་བྱའོ། །གསུམ་པ་ཐུན་མོང་གི་སྔོན་འགྲོས་རྒྱུད་སྦྱང་བ་ནི། སྔོན་འགྲོ་རྒྱས་བསྡུས་གང་རུང་དང་། སྐབས་འདིར་ཚེ་འདས་ལ་གཤེགས་སྐྱེམས་ཀྱི་ཚུལ་དུ་འདོད་ཡོན་བསྔོ་བའམ་ཡང་ན་མཇུག་ཏུ་བསྔོའོ།། རྒྱལ་བ་ཀུན་འདུས་རྗེ་བཙུན་བླ་མ་མཁྱེན་ནོ། སོགས་སྙིང་ཐིག་གི་ཐར་ལམ་གསལ་བྱེད་ལྟ་བུའི་མཇུག་ཏུ་ལྟུང་བཤགས་ཚར་ཅི་ནུས་བར་དོའི་རྩ་ཚིག མཚན་བྱིན་རླབས་ཅན་སོགས་ཀྱི་རྗེས་སུ། ད་ནི་ཁྱོད་ལ་མྱུར་ལམ་ཟབ་མོ་འཕོ་བའི་གདམས་པ་འདེབས་པའི་སྐབས་སུ་བབས་པ་ཡིན་པས་སེམས་ཡེངས་འཁྲུལ་སྤོངས་ལ་དམིགས་པ་འདི་བཞིན་ཏུ་མཛོད་ཅིག ཨོཾ་མ་ཧཱ་ཤཱུ་ནྱ་ཏ་སོགས་ཀྱིས་བསངས། ཨོཾ་སྭ་བྷ་ཝ་སོགས། སྟོང་པའི་ངང་ལས་པདྨ་དང་ཉི་མའི་དཀྱིལ་འཁོར་གྱི་དབུས་སུ་བམ་རོ་གན་རྐྱལ་དུ་ཕྱོགས་པའི་སྟེང་དུ་ཁྱོད་རང་གི་རིག་པ་ཆུ་ལས་ཉ་འཕར་བའི་ཚུལ་དུ་སྐད་ཅིག་གིས་རྗེ་བཙུན་རྡོ་རྗེ་རྣལ་འབྱོར་མ་སྐུ་མདོག་དམར་མོ་པདྨ་རཱ་གའི་ལྷུན་པོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུའི་གཟི་བྱིན་རབ་ཏུ་འབར་བ། ཞལ་གཅིག་ཕྱག་གཉིས་སྤྱན་གསུམ་པ། ཕྱག་གཡས་ཀྱིས་གྲི་གུག་ནམ་མཁར་ཕྱར་བ། གཡོན་པས་ཐོད་ཁྲག་ཐུགས་ཀར་འཛིན་པ། ཞབས་གཡས་བསྐུམ་པའི་རྟིང་པ་གསང་བར་གཏོད་ཅིང་གཡོན་བརྐྱངས་པའི་གར་སྟབས་ཀྱིས་བམ་རོའི་སྙིང་གར་བརྫིས་པ། ཐོད་སྐམ་ལྔས་དབུ་བརྒྱན། ཐོད་རློན་ལྔ་བཅུའི་དོ་ཤལ། སྤྱི་བོའི་འཁོར་ལོ། སྙན་ཆ། ཕྱག་ཞབས་ཀྱི་གདུ་བུ། མགུལ་རྒྱན། སྐ་རགས་ཏེ་རུས་པའི་ཕྱག་རྒྱ་ལྔས་བརྒྱན་པ། མི་རོའི་སྐྲ་ལས་བྱས་པའི་མཆོད་ཕྱིར་ཐོགས་ཕྲག་གོང་གཡོན་ནས་མཆན་ཁུང་གཡས་སུ་འཁྱུད་པ། ཡབ་ཧེ་རུ་ཀའི་ངོ་བོ་ཁ་ཊཱཾ་ཀ་མཆན་ཁུང་གཡོན་ན་བསྒྲེང་ཚུལ་གྱིས་འཛིན་པ། དབུ་སྐྲ་ནག་པོ་སིལ་བུར་གྲོལ་ཞིང་ཐུར་དུ་འཕྱང་བ། སྤྱི་གཙུག་ན་ཕག་ཞལ་ནག་པོ་ངུར་སྒྲ་སྒྲོག་པས་གཡས་ངོས་སུ་བལྟ་ཞིང་གྱེན་དུ་ཕྱོགས་པ། ཁྲོ་འཛུམ་ཆགས་པའི་ཉམས་ཅན། ཞལ་མཆེ་བའི་མྱུ་གུ་བཞི་བཅུ་ཅུང་ཟད་བཞད་པ། གཅེར་བུ་གཞོན་ཚུལ་བཅུ་དྲུག་ལོན་པའི་ལང་ཚོ་དར་ལ་བབ་ཅིང་ནུ་མ་རྒྱས་པ། བདེ་སྟོང་ཡེ་ཤེས་ཀྱི་ཉམས་རྒྱས་པའི་སྐུ་སྣང་ལ་རང་བཞིན་མེད་པ་ཆུ་ཟླའི་རོལ་གར་བཞིན། དྭངས་གསལ་འོད་ཀྱི་རང་བཞིན་སྟོང་ཆེན་སྒྲིབ་ཐོགས་དང་བྲལ་བའི་ལུས་གསལ་ཐོབ་ལ། མ་དག་པ་འཁོར་བའི་སྒོ་དགུ་པོ་ལས་རྣམ་ཤེས་ཐོན་ན་མིག་ནས་མི། སྣ་ནས་གནོད་སྦྱིན། རྣ་བ་ནས་གྲུབ་པའི་ལྷ་སྟེ་མིའམ་ཅི། ཁ་ནས་ཡི་དྭགས། ལྟེ་བ་ནས་འདོད་ལྷ་དྲུག །དཔྲལ་བ་ནས་གཟུགས་ཁམས་ཀྱི་ལྷ། ཆུ་ལམ་ནས་དུད་འགྲོ། བཤང་ལམ་ནས་དམྱལ་བ་རྣམས་སུ་འགྲོ་བས་དེ་དག་བཀག་དགོས་པར་བྱང་གི་སྒོ་སྲུང་ནཱ་རོ་བས། སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཐར་པ་ཡང་དག་ལམ། །སྒོ་བརྒྱད་བཅད་ནས་སྒོ་གཅིག་ཕྱེ། །ཞེས་གསུངས་པས་ཚངས་བུག་མ་གཏོགས་སྒོ་གཞན་བརྒྱད་པོ་ཧཱུྃ་དམར་པོ་འབར་བའི་རྣམ་པ་རེས་བཀག་པས་བསེར་བུ་ཙམ་ཡང་རྒྱུ་བའི་སྐབས་དང་བྲལ་བར་བསམ། ཧཱུྃ་དགུ་བརྗོད་པས་སྒོ་བརྒྱད་མཚོག་མ་དང་བཅས་པ་བཅད་པས་དམར་ལམ་ལམ་ཡོད་པར་བསམ། ཚངས་བུག་རྒྱ་མཐོངས་ལྟར་ཧད་པོར་སོང་བའི་ལུས་དབུས་དྲང་པོར་བྱང་ཆུབ་མཁའ་སྤྱོད་ཀྱི་ལམ་རྩ་ཨ་ཝ་དྷཱུ་ཏི་ཕྱི་དཀར་ལ་ནང་དམར་བ། སྦ་སྨྱུག་ཙམ་གྱི་ཡར་སྣེ་ཚངས་བུག་ཏུ་སླེབས་པ། རྒྱ་མཐོངས་ལྟར་གསལ་བ། མར་སྣེ་ལྟེ་འོག་སོར་བཞིར་སླེབ་པ་ཁ་ཟུམ་ཞིང་ཕུག་རྡུགས་སུ་འགགས་པ། ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་ཞིང་འོད་འབར་བ། རྒྱ་སྐྱེགས་ཀྱིས་བཙོས་པ་ལྟར་དམར་ལ་དྭངས་པའི་ཉམས་ཅན། པདྨའི་འདབ་མ་ལྟར་སྲབ་པའི་མཚན་ཉིད་བཞི་ལྡན་གྱི་སྙིང་གའི་ཐད་དུ། སྨྱུག་མ་ཚིགས་ཀྱིས་བཅད་པ་ལྟ་བུའི་ནང་ན་པདྨ་དམར་པོ་འདབ་མ་བཞི་པ་ཟེའུ་འབྲུ་དང་བཅས་པའི་སྟེང་དུ་ཁྱོད་ཀྱི་རླུང་སེམས་འདུས་པའི་ངོ་བོ་རྣམ་ཤེས་མི་འགྱུར་བའི་ཐིག་ལེ་ཡུངས་དཀར་གྱི་འབྲུ་ཙམ་དཀར་ལ་དམར་བ། གསལ་ལ་འཚེར་བ། སྣུམ་ལ་འདྲིལ་བ། དྭངས་གསལ་འོད་ཀྱི་རང་བཞིན་ཅན་ཚངས་བུག་གི་ལམ་ནས་འཕུར་ལ་ཁད་ཀྱིས་འདར་ཕྲིལ་གྱིས་གནས་པར་བསམ། ཚངས་བུག་གི་ཐད་ཀྱི་ཁྲུ་གང་ཙམ་གྱི་ནམ་མཁར་རིན་པོ་ཆེའི་ཁྲི་རྐང་རྨ་བྱ་བརྒྱད་ཀྱིས་བཏེགས་པའི་སྟེང་དུ། པདྨ་སྟོང་ལྡན་ཟླ་བའི་གདན་ལ་ངོ་བོ་རང་གི་རྩ་བའི་བླ་མ་ལ་རྣམ་པ་མགོན་པོ་འོད་དཔག་ཏུ་མེད་པ་སྐུ་མདོག་དམར་པོ་མཚན་དཔེ་ཡོངས་རྫོགས་ཀྱི་གཟི་བྱིན་ཉི་མ་བྱེ་བའི་དཔལ་ལས་ལྷག་པ། མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། ན་བཟའ་ཆོས་གོས་རྣམ་གསུམ་གསོལ་ཞིང་མཉམ་བཞག་གི་ཕྱག་རྒྱས་ལྷུང་བཟེད་བདུད་རྩིས་གང་བ་བསྣམས་པ། ཞབས་རྡོ་རྗེ་དཀྱིལ་ཀྲུང་གིས་བཞུགས་པའི་གཡས་སུ་སྤྱན་རས་གཟིགས་དབང་ཕྱུག གཡོན་དུ་མཐུ་ཆེན་ཐོབ། གཞན་ཡང་བདེ་གཤེགས་མཆེད་བརྒྱད། དེ་དག་གི་མཐའ་བསྐོར་དུ་ལམ་ཟབ་མོ་འདི་ཉིད་ཀྱི་བརྒྱུད་པའི་བླ་མ་ཐམས་ཅད་ཀྱང་སྐུ་མཚན་དཔེའི་རོལ་གར་གང་འདུལ་གདུལ་བྱའི་མོས་ངོར་ཅིར་ཡང་འཆར་བ། གསུང་གྲག་སྟོང་ཆོས་ཉིད་ཀྱི་རང་སྒྲ་སྒྲོགས་པ། ཐུགས་ཟབ་གསལ་གཉིས་མེད་ཀྱི་ཏིང་ངེ་འཛིན་བརྒྱ་ཕྲག་དུ་མར་འཇུག་ཅིང་ལྡང་བ། ཡོན་ཏན་དང་ཕྲིན་ལས་བསམ་གྱིས་མི་ཁྱབ་པའི་འཇུག་པ་གློག་ལྟར་མྱུར་བས་མཁའ་མཉམ་གྱི་འགྲོ་ལ་སྐད་ཅིག་ཀྱང་མི་གཡེལ་བ། ཁྱད་པར་དམིགས་ཡུལ་ཁྱོད་རང་ལ་མཁྱེན་པའི་ཡེ་ཤེས་ཀྱིས་དགོངས། བྱམས་པའི་ཐུགས་ཀྱིས་བརྩེ། དགྱེས་པའི་ཞལ་གྱིས་ཕྱོགས། འཛུམ་པའི་སྤྱན་གྱིས་གཟིགས་ཏེ་ཁྱོད་རང་བདེ་ཆེན་དག་པའི་ཞིང་དུ་འདྲེན་པའི་དེད་དཔོན་དུ་བྱོན་པར་བསྒོམ་ལ་མོས་གུས་ཁ་ཙམ་ཚིག་ཙམ་མ་ཡིན་པར་ཐུགས་རྗེ་དང་ཡོན་ཏན་རྗེས་སུ་དྲན་པའི་མོས་གུས་སྙིང་དཀྱིལ་ནས་བཟོད་མེད་དུ་འབར་ཞིང་གདུང་ཤུགས་དྲག་པོས་གསོལ་བ་འདི་ལྟར་དུ་ཐོབ་ཅིག །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ།། ཞེས་བརྒྱ་རྩ་བརྒྱད་སོགས་དལ་ཁོམ་དང་བསྟུན། བདག་དང་འཕོ་བྱ་ཟུང་འཇུག་གི་རྣམ་པས་ཤིན་ཏུ་སྙན་པའི་དབྱངས་ཀྱིས། ཨེ་མ་ཧོ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །རྟོགས་ལྡན་སང་གྷ་བྷ་ཏྲ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འཇིགས་མེད་ཕྲིན་ལས་འོད་ཟེར་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །རྒྱལ་སྲས་གཞན་ཕན་མཐའ་ཡས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འཇིགས་མེད་ཡེ་ཤེས་རྡོ་རྗེ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཡོངས་འཛིན་སངས་རྒྱས་བཟང་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །སྐལ་ལྡན་ལུང་རིག་གླིང་པ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །མཚུངས་མེད་གཞན་ཕན་བཟང་པོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །འགྱུར་མེད་བློ་གྲོས་མཐའ་ཡས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཡི་དམ་ཞི་ཁྲོ་རབ་འབྱམས་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །གནས་གསུམ་མ་མོ་མཁའ་འགྲོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས། །སངས་རྒྱས་འོད་དཔག་མེད་ལ་ཕྱག་འཚལ་ལོ། །ཆོས་སྐྱོང་དམ་ཅན་རྒྱ་མཚོ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། ཞེས་བརྗོད་ཅིང་དམིགས་པ་གསལ་བས། བདག་གིས་ཧིཀ་དང་ཕཊ་ཀྱི་སྒྲས་བསྐུལ་བས་ཁྱེད་རང་གི་སྙིང་གའི་རིག་པ་སེམས་ཀྱི་ངོ་བོ་འོད་ཀྱི་ཐིག་ལེ་དེ་ཉིད་སྐར་མདའ་ལྟར་ཡལ་ནས་འོད་དཔག་མེད་ཀྱི་ཐུགས་ཀར་ཐིམ་པར་བསམ། ཧིཀ བདུན་བརྗོད་པས་རྣམ་ཤེས་སྤར་ཞིང་། ཡང་གསོལ་འདེབས་འབྲིང་པོ་ནི། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །གཏེར་སྟོན་ཉི་ཟླ་སངས་རྒྱས་ལ་གསོལ་བ་འདེབས། །མཚུངས་མེད་ནམ་མཁའ་རྒྱལ་མཚན་ལ་གསོལ་བ་འདེབས། །རྟོགས་ལྡན་སང་ག་བྷ་ཏྲ་ལ་གསོལ་བ་འདེབས། །ཕ་རྒོད་དྲི་མེད་བློ་གྲོས་ལ་གསོལ་བ་འདེབས། །ཆོས་རྗེ་སངས་རྒྱས་རྒྱལ་མཚན་ལ་གསོལ་བ་འདེབས། །མཚུངས་མེད་མ་ཏིའི་མཚན་ཅན་ལ་གསོལ་བ་འདེབས། །ཡོངས་འཛིན་ཕུན་ཚོགས་རྣམ་རྒྱལ་ལ་གསོལ་བ་འདེབས། །འདྲེན་མཆོག་ཀརྨ་ཆོས་རྒྱལ་ལ་གསོལ་བ་འདེབས། །སྔགས་འཆང་པདྨ་དབང་དྲག་ལ་གསོལ་བ་འདེབས། །ཐུགས་ཆེན་ཀརྨ་ཆགས་མེད་ལ་གསོལ་བ་འདེབས། །གྲུབ་ཐོབ་པདྨ་རིག་འཛིན་ལ་གསོལ་བ་འདེབས། །འདྲེན་མཆོག་ནམ་མཁའ་འོད་གསལ་ལ་གསོལ་བ་འདེབས། །འགྱུར་མེད་ཐེག་མཆོག་བསྟན་འཛིན་ལ་གསོལ་བ་འདེབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །ངེས་དོན་བསྟན་འཛིན་བཟང་པོ་ལ་གསོལ་བ་འདེབས། །ནམ་མཁའ་ཚེ་དབང་མཆོག་གྲུབ་ལ་གསོལ་བ་འདེབས། །མི་འགྱུར་ནམ་མཁའི་རྡོ་རྗེ་ལ་གསོལ་བ་འདེབས། །དྲིན་ཆེན་རྩ་བའི་བླ་མ་ལ་གསོལ་བ་འདེབས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་བགྲོད་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས །ཡང་གོང་ལྟར་ཧིཀ་དང་ཕཊ་ཀྱིས་སྤར་ཞིང་དམིགས་པ་སྲང་ལ་གཅུན་པར་བྱའོ། །གསོལ་འདེབས་བསྡུས་པ་ནི། སངས་རྒྱས་འོད་དཔག་མེད་དང་རིན་ཆེན་གཙུག་ཏོར་ཅན་གྱི་མཚན་ཅི་ནུས་བརྗོད་ལ། སངས་རྒྱས་འོད་དཔག་མེད་ལ་ཕྱག་འཚལ་ལོ། །ཨོ་རྒྱན་པདྨ་འབྱུང་གནས་ལ་གསོལ་བ་འདེབས། །དྲིན་ཆེན་རྩ་བའི་བླ་མས་ཐུགས་རྗེས་ཟུངས། །རྩ་བ་བརྒྱུད་པའི་བླ་མས་ལམ་སྣ་དྲོངས། །ཟབ་ལམ་འཕོ་བ་འབྱོང་བར་བྱིན་གྱིས་རློབས། །མྱུར་ལམ་འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། །ཚེ་འདས་འདི་ནས་ཚེ་འཕོས་གྱུར་མ་ཐག །བདེ་བ་ཅན་དུ་སྐྱེ་བར་བྱིན་གྱིས་རློབས།། ཧིཀ་དང་ཕཊཿབདུན་རེའི་སྒྲས་འཕོ་ཞིང་མཐར་འཕོ་བྱ་འཕོ་བྱེད་འཕོ་ཡུལ་རང་གི་རིག་པ་བརྗོད་བྲལ་ཀ་དག་གི་ཀློང་དུ་མཉམ་པར་འཇོག་པ་ནི་དོན་གྱི་འཕོ་བའོ།། འོན་ཀྱང་སྤྱི་བོ་སྐྲང་བ་དང་། སྐྲ་ལི་བ་དང་། ཆུ་སེར་ཁོལ་བ་སོགས་འཕོ་བའི་རྟགས་ཐོན་པ་གལ་ཆེ་བས་གཞན་ཡང་ཀུན་མཁྱེན་འཇིགས་མེད་གླིང་པའི་གཏེར་ཁ་ནས་བྱུང་བ་དང་། གནམ་ཆོས་སོགས་གང་འདོད་པའི་མཚན་བརྗོད་ཀྱི་རིམ་པ་སྤྱི་དང་། ཁྱད་པར་སྨན་ལྷ་མཆེད་བརྒྱད་ཀྱི་མཚན་བརྗོད་པ་སོགས་དང་དམིགས་པ་གསལ་བ་གནད་དུ་ཆེ་བ་ལགས་སོ།། ཀྱེ་མ་ཚེ་འདས་རྣམ་ཤེས་རྟེན་དང་བཅས། །འོད་བུན་ནེ་སངས་རྒྱས་ཐུགས་ཀར་འཕོས། །ཀློང་དབྱེར་མེད་ཕྱམ་གཅིག་བྱང་ཆུབ་ནས། །སྐུ་བདེ་ཆེན་ཞིང་གི་རྒྱན་དུ་ཤོག ཕཊཿཅི་མང་བརྗོད་ཅིང་བསྔོ་བ་སྨོན་ལམ་རྣམས་བྱས་ལ་ཀ་དག་གི་ངང་ལ་མཉམ་པར་བཞག་གོ། །དེ་ནས་ཚེ་འདས་ལྷར་གསལ་བ་ལ་འདོད་ཡོན་ཚོགས་ཀྱི་འཁོར་ལོར་དམིགས་ནས་ཕུལ་ལ་བཟང་པོ་སྤྱོད་པའི་སྨོན་ལམ་དང་བདེ་སྨོན་ཅི་ནུས་བྱའོ། །བདག་ཉིད་ལྷར་གསལ་བ་ལས་ལྡང་སྟེ་སྤྱོད་ལམ་ལ་འཇུག་པར་བྱའོ། །ཨེ་མ། སྐྱེ་སྲིད་འཁྲུལ་བའི་མལ་ནས་ཕ་རོལ་ཏུ། །ངེས་པར་འགྲོ་བ་འཁོར་བའི་ཆོས་ཉིད་ལ། །ལེགས་པར་བསམ་ནས་གཞན་ལ་འདོམས་པ་པོ། །བདག་ཀྱང་དམ་པའི་ཆོས་ལ་འབད་པར་རིགས། །མདོ་སྔགས་གཞུང་ལུགས་ཀུན་གྱི་རྩེ་མོའི་ཕུལ། །རྨད་བྱུང་ཟབ་ལམ་མ་བསྒོམས་སངས་རྒྱས་ཆོས། །གང་ལ་ཐེ་ཚོམ་སྨད་རྣམས་རྡོ་རྗེ་ཡི། །དམྱལ་བར་དབུགས་དང་བྲལ་མ་ཐག་ཏུ་འགྲོ། །ཞེས་འདི་རྒྱལ་གསུང་བདེན་པའི་ཚིག་ཡིན་ཕྱིར། །ཐེ་ཚོམ་བྲལ་བར་ཡིད་ཆེས་ཉམས་བླངས་པས། །གཏན་བདེའི་བྱང་ཆུབ་ལག་རྩེར་སྩོལ་བའི་ཕྱིར། །དོན་གཉིས་འགྲུབ་ཐབས་མཆོག་འདིར་བརྩོན་པའི་མཐུས། །བདག་གཞན་འགྲོ་བ་སྤྱི་དང་ཁྱད་པར་དུ། །འབྲེལ་ཐོགས་ཚེ་འདས་བདེ་ཆེན་ཞིང་ཁམས་སུ། །པདྨའི་སྦུབས་ལ་བརྫུས་ཏེ་སྐྱེས་ནས་ཀྱང་། །རྣམ་འདྲེན་འོད་དཔག་མེད་པས་རྗེས་འཛིན་ཤོག ཅེས་པའང་དད་དམ་ནོར་གྱིས་ཕྱུག་པ་རིགས་དབོན་ས་མནྟ་བྷ་ཏྲའི་ངོར། སྤྲུལ་གཟུགས་འཛིན་པ་ལུང་རྟོགས་བསྟན་པའི་ཉིན་བྱེད་དཔལ་བཟང་པོས་དམ་པའི་གསུང་རབ་རྣམས་ལས་བཏུས་ཤིང་རང་བཟོའི་དྲི་མས་མ་བསླད་པར་བགྱིས་པ་འདིས་ཀྱང་མཐོང་ཐོས་དྲན་རེག་འོད་དཔག་མེད་པའི་གོ་འཕང་ཐོབ་པའི་རྒྱུར་གྱུར་ཅིག དགེའོ།། དགེའོ།། དགེའོ།།