ཆེད་དུ་བརྗོད་པའི་ཚིག
མཁས་གྲུབ་བྱེ་བའི་གཙུག་རྒྱན ༧གཡུ་ཁོག་བྱ་བྲལ་བ་ཆོས་དབྱིངས་རང་གྲོལ་མཆོག་ནི་ཡང་གསང་སྙིང་ཐིག་གི་བསྟན་པ་སྤྱི་དང་། ཁྱད་པར་དུ་མདོ་ཁམས་ལི་གཙང་། གསེར་རྟ། ཨ་མདོ་མགོ་ལོག །རེབ་ཀོང་སོགས་ཡུལ་གྲུ་དུ་མར་ཀུན་མཁྱེན་ཡབ་སྲས་དང་། འཇམ་མགོན་མི་ཕམ་པའི་ལེགས་བཤད་དྲི་མ་མེད་པ་འཆད་ཉན་སྒོམ་སྒྲུབ་ཀྱིས་འཛིན་སྐྱོང་སྤེལ་གསུམ་མཛད་པའི་སྔ་འགྱུར་བསྟན་པའི་རྩ་ལག་ཆེན་པོ་ཉིད་དུ་ངེས་ཤིང་། ཡང་སྒོས་སུ་༧སྐྱབས་རྗེ་རྡོ་གྲུབ་རིན་པོ་ཆེ་ཐུབ་བསྟན་ཕྲིན་ལས་དཔལ་ བཟང་པོ་མཆོག་ལ་ཐུན་མོང་མ་ཡིན་པའི་དགོངས་བརྒྱུད་ཀྱི་རྟོགས་པ་གཅིག་ཏུ 
་འཕོས་ཏེ་བྱིན་རླབས་ཀྱི་ཆུ་བོ་ཆེན་པོ་གཅིག་འདྲེས་ཀྱི་ཚུལ་དུ་བཞུགས་པའི་བརྒྱུད་པའི་བླ་མ་ཉག་གཅིག་ལགས་པས། རང་ཅག་ལ་མཚོན་ན། གང་གི་བཀའ་དྲིན་རྒྱ་ཤུག་ཚིག་གུ་ཙམ། །རིལ་བུར་གཞལ་ཡང་ས་ཡིས་ལང་མི་འགྱུར། །ཞེས་པ་ལྟར་རོ། །
དེ་ཡང་ཇི་སྐད་དུ། གསེར་དང་བོང་བ་མཉམ་པའི་འཕགས་མཆོག་ལ། །གླིང་བཞིའི་ཕུན་ཚོགས་བསྟབས་ཀྱང་ཅི་བགྱི་སྟེ། །དེ་ཡི་ཐུགས་ལ་བརྣག་པའི་ཆོས་བཟུང་ན། །དགོངས་པ་ཡོངས་སུ་རྫོགས་པར་འགྱུར་ཞེས་གྲགས། །ཞེས་གསུངས་པ་ལྟར། རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་འཛིན་སྐྱོང་སྤེལ་བ་ལ། གསུང་རབ་ཀྱི་གླེགས་བམ་ཕྲ་མོ་པར་དུ་བསྐྲུན་པ་ནི་མེད་དུ་མི་རུང་བ་ལགས་ཤིང་། དམ་པ་རྣམས་ཀྱིས་བསྔགས་པར་བྱ་བའི་ཡུལ་དུ་གྱུར།
ད་ལན་གཡུ་ཁོག་མཁན་པོ་ཤེས་བྱ་ལགས་ཀྱིས་ལེགས་སྒྲིག་དང་དཔེ་སྐྲུན་མཐུན་འགྱུར་། དེ་བཞིན་གཡུ་མཁར་དགོན་པའི་མཁན་སྤྲུལ་རྣམས་དང་གསེར་བྲག་ཆེན་ཡར་ལུང་དགོན་གྱི་བླ་མ་བསོད་དར་སོགས་ཀྱིས་དཀའ་བ་དང་དུ་བླངས། ངལ་བ་ཁྱད་དུ་བསད་དེ་རྡོ་ཛི་སྨར་གསུམ་སོགས་སུ་ཕེབས་ནས་མ་དཔེ་འཚོལ་སྡུད་རྒྱ་ཆེར་གནང་བ་དང་། མཆོག་སྤྲུལ་མཉམ་མེད་ལགས་ནས་ཀྱང་མགོ་འདྲེན་རོགས་རམ་གནང་བ་བཅས་ལ་བརྟེན་ནས་ད་ལན་གཡུ་ཁོག་བྱ་བྲལ་རིན་པོ་ཆེའི་གསུང་འབུམ་ཕྱོགས་སྒྲིག་ཡོངས་སུ་གྲུབ་པ་དང་ཆབས་ཅིག །སི་ཁྲོན་མི་རིགས་དཔེ་སྐྲུན་ཁང་གིས་པར་སྐྲུན་གནང་བར་སྙིང་ཐག་པ་ནས་བཀའ་དྲིན་བླ་ལྷག་ཏུ་ཆེ་ཞུ་བ་ཡིན།
ཕྲན་ཐུབ་བསྟན་ཉི་མས་རབ་རྒྱན་ཤིང་བྱ་ཟླ་༣ཚེས་༨ལ་དགེ་བར་གུས་ཕུལ།