སྔོན་འགྲོ་ཀུན་ལས་བཏུས་པ།

པཱུརྦཀཱསརྦཾཏབིཙིཏཿབིཛཧརཾ།

སྔོན་འགྲོ་ཀུན་ལས་བཏུས་པ་བཞུགས་སོ། །

ན་མོ་གུ་རུ་བྷྱཿ དེ་ལ་འདིར་རྫོགས་པ་ཆེན་པོ་ཀློང་ཆེན་སྙིང་ཏིག་གི་ཕྱི་ནང་གི་སྔོན་འགྲོའི་རིམ་པ་རྒྱུན་དུ་ཇི་ལྟར་ཉམས་སུ་ལེན་པའི་ཚུལ་མཁས་གྲུབ་རྣམས་ཀྱིས་སྔོན་འགྲོ་རྒྱས་བསྡུས་གསུངས་པ་རྣམས་ལས་བཏུས་པ་ནི། དེ་ཡང་ཐོག་མར་ཐོ་ར ངས་ལྡང་བའི་དུས་ལ་བབ་པ་ན། མདུན་གྱི་ནམ་མཁར་རྩ་བའི་བླ་མ་ཨོ་རྒྱན་རྡོ་རྗེ་འཆང་གི་རྣམ་པ་ལ་འཁོར་དཔའ་བོ་དང་མཁའ་འགྲོའི་ཚོགས་ཀྱིས་བསྐོར་བས་ཌཱ་མ་རུའི་སྒྲ། དབྱངས་ཡིག་བཅུ་དྲུག་དང་། གསལ་བྱེད་སོ་བཞིའི་སྔགས་ཀྱི་གདངས་སུ་བསྒྲགས་པས་བསྐུལ་ཏེ་གཉིད་ལས་སད་པར་བསམ་ཞིང་། རང་ཉིད་གཞི་ལུས་ཀྱི་ངོ་བོ་མཁའ་འགྲོ་ཡེ་ཤེས་མཚོ་རྒྱལ་ཡིན་པ་ལ། རྣམ་པ་རྗེ་བཙུན་རྡོ་རྗེ་རྣལ་འབྱོར་མ་དང་། ཞིང་ཁམས་ཀྱི་བཀོད་པ་དང་བཅས་པ་གསལ་བཞིན་པའི་ངང་ནས་ལྡང་སྟེ། བླ་མ་བཞེངས་བསྐུལ་གྱི་གསོལ་འདེབས་འདི་ལ་ཕྱི་ནང་གཉིས་ལས། དང་པོ་ཕྱིའི་ཡོངས་འཛིན་དགེ་བའི་བཤེས་གཉེན་ནི། བླ་མ་མཁྱེན་སོགས། བླ་མ་མཁྱེན་ཞེས་བརྗོད་པ་དང་པོའི་ཚེ། རང་གཞན་གྱི་རྒྱུད་ལ་ངེས་འབྱུང་གི་བསམ་པ་སྐྱེ་བའི་ཆེད་དུ། བླ་མ་དང་། སངས་རྒྱས་དང་། ཆོས་སྐུ་གསུམ་དང་། གཉིས་པའི་ཚེ་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་སྐྱེ་བའི་ཆེད་དུ། ཡི་དམ་དང་། དམ་ཆོས། ལོངས་སྐུ་གསུམ་དང་། གསུམ་པའི་ཚེ་སྣང་སྲིད་རྣམ་དག་གི་དག་སྣང་རྒྱུད་ལ་སྐྱེ་བའི་ཕྱིར། མཁའ་འགྲོ་དང་། དགེ་འདུན། སྤྲུལ་སྐུ་གསུམ་དང་། ཡང་ན་དང་པོའི་དུས་དཀོན་མཆོག་གསུམ་དང་། གཉིས་པའི་དུས་རྩ་བ་གསུམ་དང་། གསུམ་པའི་དུས་སྐུ་གསུམ་སྟེ་སྐྱབས་གནས་ཀུན་འདུས་ཀྱི་ངོ་བོར་གསལ་ལ་བརྗོད་པའི་རྐྱེན་གྱིས་བླ་མའི་ཐུགས་རྗེས་རང་གི་སྙིང་དབུས་པདྨ་འདབ་བཞིའམ་འདབ་ བརྒྱད་ལས། དངས་འདོད་ཡིད་ཆེས་ཀྱི་དད་པའི་གེ་སར་བཞད་པ་ནས། འདི་ཕྱི་བར་དོ་གསུམ ་གྱི་སྡུག་བསྔལ་རྒྱུ་འབྲས་དང་བཅས་པ་སེལ་བའི་སྐྱབས་གཅིག ཐར་བ་དང་ཐམས་ཅད་མཁྱེན་པའི་ལམ་སྟོན་པའི་བདག་ཉིད། དྲིན་ཆེན་རྩ་བའི་བླ་མ་ཡར་ལ་བཞེངས་ནས་རྩ་དབུ་མའི་ལམ་བརྒྱུད་དེ་སྤྱི་བོའི་སྟེང་གི་ནམ་མཁར་དགྱེས་བཞིན་དུ་བཞུགས་པར་བསམ། དགོས་པ་ཅིའི་ཕྱིར་ཞེ་ན། རྒྱུ་ལས་དང་ཉོན་མོངས་པ་དྲག་པོས་བསྐྱེད་པའི་འབྲས་བུ་སྡུག་བསྔལ་ཆེན་པོས་མནར་ཞིང་གཟིར་བའི་སྐལ་བ་ངན་པ་བདག་ཉིད་ལ་ལས་ཉོན་སྡུག་བསྔལ་རྣམས་ལས་སྐྱོབ་པའི་ཕྱིར་དུ། བདག་གི་སྤྱི་བོར་བདེ་ཆེན་གྱི་འཁོར་ལོའི་སྟེང་དུ་པདྨ་དང་ཉི་ཟླའི་གདན་ལ་འདི་ནས་བྱང་ཆུབ་ཀྱི་བར་དུ་རིགས་དང་དཀྱིལ་འཁོར་ཀུན་གྱི་ཁྱབ་བདག་དེ་ཉིད་རྒྱན་དུ་བཞུགས་སུ་གསོལ། ཞེས་པ་དང་། གཉིས་པ་ནང་གི་ཡོངས་འཛིན་དགེ་བའི་བཤེས་གཉེན་ནི། དྲན་དང་ཤེས་བཞིན་སོགས། དྲན་ཤེས་བག་ཡོད་དང་ཕྱིན་དྲུག་རྣམས་ཡིན་ལ། དྲན་པ་ནི་ཆོས་ཐམས་ཅད་ཀྱི་དངོས་གཞི་ཡིན་པའི་ཚུལ། བཤེས་སྤྲིང་ལས། དབང་ཕྱུག་ལུས་གཏོགས་དྲན་པ་བདེ་གཤེགས་ཀྱིས། །བགྲོད་པ་གཅིག་པུའི་ལམ་དུ་ཉེ་བར་བསྟན། །དེ་ནི་བསྒྲིམས་ནས་མངོན་པར་བསྲུང་བགྱི་སྟེ། །དྲན་པ་ཉམས་པས་ཆོས་ཀུན་འཇིག་པར་འགྱུར། །ཞེས་དབང་ཕྱུག་ཅེས་རྒྱལ་པོ་ལ་བོས་ནས། སྤྱོད་ལམ་གྱི་གནས་སྐབས་ཐམས་ཅད་དུ། ལུས་ལ་སོགས་པར་གཏོགས་པའི་དྲན་པ་ནི་བདེ་བར་གཤེགས་ཀྱིས། ཐར་ལམ་འདོད་པ་ཐམས་ཅད་འདི་ནས་ཞུགས་དགོས་པའི་ཕྱིར་བགྲོད་པ་གཅིག་པུའི་ལམ་དུ་ཉེ་བར་བསྟན་པ་སོགས་དང་། ཤེས་བཞིན་ནི་ཕུན་སུམ་ཚོགས་པ་ཐམས་ཅད་ཀྱི་འབྱུང་གནས་སུ་བསྟན་ཏེ། ཆོས་ཐམས་ཅད་ཀྱི་མིང་ཚིག་གི་རིམ་པ་ཤེས་པ་དང་། དེ་ལ་བརྟེན་པའི་དོན་རྣམས་མ་འདྲེས་པར་ཤེས་པ་དང་། མངོན་པར་མཐོ་བའི་བདེ་བ་འདོད་པའི་རྒྱུ་འབྲས་ཤེས་པ་དང་། ངེས་པར་ལེགས་པ་ཐར་བ་དང་ཐམས་ཅད་མཁྱེན་པའི་གོ་འཕང་བསྒྲུབ་པའི་རྒྱུ་འབྲས་ལེགས་པར་ཤེས་པའི་སྡེ་བཞིའི་དཔལ་གྱི་འབྱུང་གནས་ཤེས་བཞིན་ཡིན་ལ། ཤེས་བཞིན་མེད་ན། སྤྱོད་འཇུག་ལས། ཤེས་བཞིན་མེད་པའི་སེམས་ལྡན་པའི། །ཐོས་དང་བསམ་དང་སྒོམ་པ་ཡང་། །གློ་རྡོལ་བུམ་པའི་ཆུ་བཞིན་དུ། །དྲན་པ་ལ་ནི་དེ་མི་གནས། །ཞེས་དང་།བག་ཡོད་ནི་དགེ་བའི་ཆོས་ཐམས་ཅད་ཀྱི་རྩ་བ་སྟེ། ཟླ་བ་སྒྲོན་མའི་མདོ་ལས། ཚུལ་ཁྲིམས་ཐོས་དང་གཏོང་དང་དེ་བཞིན་བཟོད། །དགེ་བའི་ཆོས་སུ་བརྗོད་པ་ཇི་སྙེད་པ། །ཀུན་གྱི་རྩ་བ་བག་ཡོད་འདི་ཡིན་ཏེ། །གཏེར་ཐོབ་བྱེད་ཅེས་བདེ་བར་གཤེགས་པས་བསྟན། །ཞེས་སོ། །དེ་ལྟར་དྲན་ཤེས་བག་ཡོད་དང་བཅས་པ་ཀུན་ཀྱང་བླ་མའི་ཐུགས་རྗེ་བྱིན་རླབས་ཀྱིས་རང་རྒྱུད་ལ་བཞེངས་ཏེ་ཡོངས་སུ་གསལ་བར་མཛད་དུ་གསོལ་ཞེས་བསམ། ཕྱི་ནང་གི་ཡོངས་འཛིན་གང་ནས་གསུངས་ཤེ་ན། སྡུད་པ་ལས། སངས་རྒྱས་བྱང་ཆུབ་མཆོག་ཞུགས་བྱང་ཆུབ་སེམས་དཔའ་དག །ཕ་རོལ་ཕྱིན་དང་བཅས་ཏེ་དགེ་བའི་བཤེས་སུ་བསྟེན། །དེ་དག་རྗེས་སུ་སྟོན་བྱེད་འདི་ནི་བསྒྲུབ་པའི་ས། །རྒྱུ་རྣམ་གཉིས་ཀྱིས་སངས་རྒྱས་བྱང་ཆུབ་མྱུར་དུ་རྟོགས། །ཞེས་གསུངས། མི་ཕམ་རིན་པོ་ཆེའི་སྡུད་འགྲེལ་ལས། སངས་རྒྱས་བཅོམ་ལྡན་འདས་རྣམས་དང་བྱང་ཆུབ་མཆོག་ལ་ཞུགས་པའི་བྱང་ཆུབ་སེམས་དཔའ་དག་དང་། ལམ་ཕ་རོལ་ཏུ་ཕྱིན་པ་དང་བཅས་ཏེ་དགེ་བའི་བཤེས་སུ་བསྟེན་པར་བྱའོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་དེ་དག་ནི་ཐེག་པ་ཆེན་པོ་འདི་གཞན་ལ་རྗེས་སུ་སྟོན་པར་བྱེད་པ་ཡིན་པས་ཕྱིའི་ཡོངས་འཛིན་ཞེས་བྱ་ལ། དེ་དག་གི་བསྟན་པ་ལ་ལམ་ཕ་རོལ་ཏུ་ཕྱིན་པ་འདི་ནི་ཉམས་སུ་ལེན་པའམ་བསྒྲུབ་པར་བྱ་བའི་སའམ་གནས་ཡིན་པས་ནང་གི་ཡོངས་འཛིན་ཞེས་བྱའོ། །དེ་ལྟར་ཕྱི་ནང་གི་ཡོངས་འཛིན་དེས་ཐེག་པ་མཆོག་གི་ལམ་ལས་ལམ་གཞན་དུ་མི་ལྟུང་བར་འཛིན་པས་ན་ཡོངས་འཛིན་གཉིས་པོ་དེ་བསྟེན་པའི་རྒྱུ་རྣམ་པ་དེ་གཉིས་ཀྱིས་སངས་རྒྱས་ཀྱི་བྱང་ཆུབ་མྱུར་དུ་རྟོགས་པར་འགྱུར་ཏེ་མཚུངས་པ་མེད་པའི་རྒྱུ་ཕུན་སུམ་ཚོགས་པར་གྱུར་པའི་ཕྱིར་རོ། །ཞེས་གསུངས། མཁས་འཇུག་ལས་ཀྱང་། ཕྱི་ཡི་ཡོངས་འཛིན་ཐེག་ཆེན་ཚུལ་བཞིན་སྟོན་པའི་དགེ་བའི་བཤེས་གཉེན་བསྟེན་པར་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ཐབས་ཀྱི་རྣམ་པ་ཀུན་གྱི་མཆོག་དང་ལྡན་པ། མཐའ་ཐམས་ཅད་དང་བྲལ་བའི་མཉམ་པ་ཉིད་སངས་རྒྱས་འཐོབ་པ་ལ་ཉེ་བའི་ཐབས་ཀྱི་དམ་པར་གྱུར་པ། མཐར་འཛིན་དང་དམིགས་པ་ཅན་འབྲས་ཡུམ་ལ་རིང་ཞིང་ཐེག་ཆེན་ལམ་གྱི་མི་མཐུན་ཕྱོགས་སུ་གྱུར་པ་རྣམས་ཀྱི་གཉེན་པོར་གྱུར་པའི་ལམ་ཡང་དག་པ་ཟབ་ཅིང་རྒྱ་ཆེ་བ་ཟུང་དུ་འཇུག་པའི་གདམས་ངག་ཚང་ལ་མ་ནོར་བ་ནོད་པར་བྱས་ནས་དེ་བཞིན་ཡིད་ལ་བྱ་བ་ནང་གི་ཡོངས་འཛིན་དང་མ་བྲལ་བར་བྱའོ། །ཞེས་གསུངས། དེ་ནས་ལུས་གནད་རྣམ་སྣང་ཆོས་བདུན་ནི། རྐང་པ་རྡོ་རྗེ་སྐྱིལ་ཀྲུང་ངམ་སྐྱིལ་ཀྲུང་ཕྱེད་པ་བཅའ། ལག་པ་མཉམ་བཞག རྒལ་ཚིག་དོང་ཙེ་ལྟར་བརྩེགས། དཔུང་པ་ལྷོད་དེ་བརྒྱངས། མགྲིན་པ་ཨེན་ཙམ་དགུགས། མཆུ་སོ་མ་རེག་པར་དབུགས་དལ་བའི་ངང་ནས་ལྕེ་ཡ་རྐན་ལ་སྦྱར། མིག་གཉིས་སྣ་རྩེར་ཕབ་པ་སྟེ་བདུན་ནོ། །དེ་ལྟར་ལུས་གནད་ལེགས་པར་བཅོས་ཏེ། རླུང་རོ་དགུ་ཕྲུགས་སུ་བསལ་བ་ནི། ལག་པ་གཡོན་པ་རྡོ་རྗེའི་ཁུ་ཚུར་བརླའི་རྩ་བོ་ཆེའི་སྟེང་ནས་མནན། གཡས་པ་རྡོ་རྗེ་རྩེ་གསུམ་པའི་ཕྱག་རྒྱས་སྣ་བུག་གཡས་པ་བཀག་སྟེ་གཡོན་ནས་ལན་གསུམ་དང་། གཡས་ནས་ཀྱང་སྔ་མ་བཞིན་ལན་གསུམ་དང་། ལག་གཉིས་རྡོ་རྗེའི་ཁུ་ཚུར་གྱིས་བརླ་རྩ་གཉིིས་མནན་ཏེ་སྣ་བུག་གཉིས་ནས་མཉམ་དུ་ལན་གསུམ་སྟེ་དགུ་ཕྲུགས་སུ་འབུད། དེ་ཡང་སྣ་བུག་གཡས་ནས་ཞེ་སྡང་གི་རླུང་དཀར་པོ། དེ་བཞིན་དུ་གཡོན་དུ་འདོད་ཆགས་ཀྱི་རླུང་དམར་པོ། མཉམ་དུ་གཏི་མུག་གི་རླུང་ནག་པོར་གསུངས། ངག་བྱིན་གྱིས་བརླབས་པ་ནི། ༀ་ཨཱཿཧཱུྃ། ལྕེ་དབང་སོགས། སྐུ་གསུམ་གྱི་ས་བོན་བྱིན་གྱིས་བརླབས་པའི་སྔགས་ནི། ༀ་ཨཱཿཧཱུྃ་གསུམ་བརྗོད་པས་ངག་གི་ཉེས་པ་ཐམས་ཅད་འབྱུང་བའི་སྒོར་གྱུར་པ་ལྕེ་ཡི་དབང་པོ་དེ་ཉིད་ཀྱི་དབུས་སུ་རཾ་ཡིག་དམར་པོ་སངས་རྒྱས་ཐམས་ཅད་ཀྱི་ཡེ་ཤེས་ཆེན་པོའི་རང་བཞིན་ལས་བྱུང་བའི་མེས་ངག་གི་སྒྲིབ་པ་ཐམས་ཅད་བསྲེགས་ནས། རྒྱལ་བ་ཐམས་ཅད་ཀྱི་གསུང་རྡོ་རྗེའི་ངོ་བོ་འོད་དམར་གྱི་རྣམ་པའི་དབྱིབས་རྡོ་རྗེ་རྩེ་གསུམ་པ་ལྟེ་བ་ཟླུམ་པོ་ཁོང་སྟོང་གི་སྦུབས་སུ། དབྱིངས་ཤེས་རབ་ཀྱི་ཡི་གེ་ཨ་ལི་ཁ་དོག་དམར་པོ་དང་། གསལ་བྱེད་ཐབས་ཀྱི་ཡི་གེ་ཀ་ལི་དཀར་པོ་དང་། མཐའ་སྐོར་དུ་ཐབས་ཤེས་གཉིས་མེད་ཀྱི་ཡི་གེ་རྟེན་འབྲེལ་སྙིང་པོ་མཐིང་གའི་མདོག་ཅན་འོད་འཚེར་བའི་མུ་ཏིག་གི་ཕྲེང་བ་ལྟ་བུའི་ཡིག་འབྲུ་རྣམས་ལས་འོད་ཟེར་དཀར་དམར་མཐིང་གསུམ་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་འཛིན་པ་དཔག་ཏུ་མེད་པ་སྤྲོས་ཏེ། ཕྱོགས་བཅུའི་རྒྱལ་བ་སྲས་དང་བཅས་པ་ལ་མཆོད་པས་ཐུགས་དགྱེས་ཤིང་མཉེས་པར་བྱས། འོད་ཟེར་རྣམས་སླར་འདུས་ཏེ་དབྱངས་གསལ་རྟེན་སྙིང་དང་བཅས་པ་ཆར་བབས་པ་བཞིན་རང་གི་ངག་ལ་ཐིམ་པས་ངག་གི་སྒྲིབ་པ་ཐམས་ཅད་དག་ནས་རྒྱལ་བ་རྣམས་ཀྱི་གསུང་རྡོ་རྗེའི་ངོ་བོ་བརྗོད་དུ་མེད་པ་དང་། རྣམ་པ་གསུང་ཚངས་པའི་དབྱངས་ཡན་ལག་དྲུག་ཅུའི་བྱིན་རླབས་དང་། མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་པར་བསམ་ལ། དེ་རྣམས་ལན་བདུན་རེ་བརྗོད། འདི་ཡན་ཆད་ཀྱི་གོ་རིམ་ཟབ་དོན་བདུད་རྩིའི་ཉིང་ཁུ་ལྟར་བྱས་སོ། །སྔོན་འགྲོ་དངོས་ལ་ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ་ཐུན་མོང་ལ་བློ་ལྡོག་རྣམ་པ་བཞི་དང་། རང་སྐྱོན་ངོས་བཟུང་གནད་ཀྱི་མན་ངག་དང་གཉིས། དང་པོ་ལ། དལ་འབྱོར་རྙེད་པར་དཀའ་བ། ཚེ་མི་རྟག །ལས་རྒྱུ་འབྲས། འཁོར་བའི་ཉེས་དམིགས་དང་བཞི་ལས། དང་པོ་དལ་འབྱོར་རྙེད་དཀའ་ལ། སྤྱི་དང་། བྱེ་བྲག་གཉིས། དང་པོ་ལ། དལ་འབྱོར་གྱི་ངོ་བོ་བསམ་པ། དེ་རྒྱུའི་སྒོ་ནས་རྙེད་དཀའ་ཚུལ་དང་། གྲངས་ཀྱི་སྒོ་ནས་རྙེད་དཀའ་ཚུལ་དང་ གསུམ་ལས། དང་པོ་ལ་གཉིས། དལ་བ་བརྒྱད ་ནི། ད་རེས་དམྱལ་བ་སོགས། མི་ཁོམ་པའི་གནས་བརྒྱད་དུ་སྐྱེས་ན་ཆོས་བྱེད་པའི་མཐུ་མེད་པས་དལ་བ་མ་ཡིན་པའི་ཚུལ། ད་རེས་ཀྱི་སྐྱེ་བ་འདིར་དམྱལ་བ། ཡི་དྭགས། དུད་འགྲོ་དང་། ཚེ་རིང་ལྷ་སྟེ་མི་མ་ཡིན་པའི་མི་ཁོམ་པ་བཞི་དང་། མཐའ་འཁོབ་ཀླ་ཀློ། ལོག་ལྟ་ཅན། སངས་རྒྱས་མ་བྱོན་པའི་ཞིང་དང་། དབང་པོ་ལྐུགས་པ་སྟེ་མིའི་མི་ཁོམ་པ་བཞི་དང་བྲལ་ཏེ། དེ་ལྟར་མི་ཁོམ་པ་བརྒྱད་ལས་ཐར་བའི་དལ་བ་ཐོབ་པ་ཞེས་བྱ་སྟེ་བརྒྱད་པོ་གོ་རིམ་ངེས་ཅན་དུ་རེ་རེ་ནས་ཐུན་རེར་བསམ། གཅིག་ལེགས་པར་བསམས་པ་རྫོགས་ནས་གཞན་ལ་སྤོ། གཉིས་པ་འབྱོར་བ་བཅུ་ནི། མིར་གྱུར་དབང་པོ་སོགས། མིར་གྱུར། དབང་པོ་ལྔ་ཚང་བ་དང་། ཡུལ་དབུས་སྐྱེས། ལས་མཐའ་མ་ལོག་བསྟན་ལ་དད་པ་སྟེ་རང་ཉིད་ལ་འབྱོར་བ་ལྔ་ཚང་བ་དང་། སངས་རྒྱས་བྱོན། ཆོས་གསུངས། བསྟན་པ་གནས་པ་དང་། དེ་ལ་འཇུག་སྲོལ་ཡོད་པ་དང་། བཤེས་གཉེན་དམ་པས་ཟིན་པ་དང་གཞན་འབྱོར་ལྔ་པོའང་རེ་རེ་ནས་བཟུང་ཐམས་ཅད་རྫོགས་པར་བསམ་མོ། །ཤེར་འབྱུང་གི་འགྲེལ་ཆེན་སོགས་སུ་མི་ཁོམ་པ་བརྒྱད་ལས་ལྡོག་པའི་མི་ལ་དལ་འབྱོར་དུ་བཞེད་ལ། མི་ཁོམ་པ་བརྒྱད་བྲལ་གྱི་མི་ལ་འབྱོར་པ་ཚང་ཚུལ་ནི། མིར་སྐྱེས་པས་མི་ཉིད་དང་། ཀླ་ཀློ་སོགས་ཀྱི་ནང་དུ་མ་སྐྱེས་པས་ཡུལ་དབུས་སུ་སྐྱེས་པ་དང་། གླེན་ལྐུགས་སོགས་མིན་པས་དབང་པོ་ཚང་བ་དང་། ལོག་ལྟ་ཅན་མིན་པས་གནས་དད་དང་། ལས་མཐའ་མ་ལོག་པ་གཉིས་བསྟན་པར་ཤཱནྟི་པས་གསུངས་པར་བཤད་ཅིང་། མུན་བསྐལ་ལས་ལྡོག་པའི་སྒྲོན་མེའི་བསྐལ་པར་སྐྱེས་པས་གཞན་འབྱོར་ལྔ་ཡང་བསྡུས་པར་གསུངས་ལ། མདོ་དང་སློབ་དཔོན་ཁ་ཅིག་གིས་འབྱོར་བ་བཅུ་ལྡན་ལ་དལ་འབྱོར་དུ་གསུངས་ཏེ། མི་ཁོམ་བརྒྱད་སྤང་པ་ནི་དེའི་ནང་དུ་འདུས་པས་སོ་ཞེས་བཞེད་ལ། བི་བྷུ་ཏི་སོགས་འགའ་ཞིག་གིས་མི་ཁོམ་པ་བརྒྱད་སྤངས་ཤིང་འབྱོར་བཅུ་ལྡན་པ་ལ་དལ་འབྱོར་དུ་བཤད་པ་དང་། འགའ་ཞིག་གིས་མི་ཁོམ་བརྒྱད་བྲལ་དགག་པ་དང་འབྱོར་བ་བཅུ་ལྡན་སྒྲུབ་པའི་ཡོན་ཏན་ཡིན་པས་མི་ཟློས་པར་ཡང་བཤད་དོ།། སྐལ་ལྡན་འཇུག་ངོགས་ལས། མི་མ་ཡིན་པའི་མི་ཁོམ་པ་བཞིར་མ་སྐྱེས་པའི་ཁྱད་པར་གྱི་ལྡོག་པ་ནི་མིར་གྱུར་པ་ཉིད་དོ། །དབང་པོ་མ་ཚང་བ་ལས་ལྡོག་པ་ནི་དེ་ཚང་བའོ། །ཡུལ་མཐའ་འཁོབ་ལས་ལྡོག་པ་ནི་ཡུལ་དབུས་སོ། །ལོག་ལྟ་ཅན་ལས་ལྡོག་པ་ནི་དད་པ་ཅན་ཏེ་ལས་མཐའ་མ་ལོག་པའང་དེའི་ཁྱད་པར་གྱི་ཆོས་སོ། །མུན་བསྐལ་ལས་ལྡོག་པ་ནི་སྒྲོན་མེའི་བསྐལ་པ་སྟེ་དེའི་ཁྱད་པར་གྱི་ཆོས་ནི་སངས་རྒྱས་བྱོན་པ་དང་། དེས་ཆོས་གསུངས་པ་དང་། བསྟན་པ་གནས་པ་དང་། གདུལ་བྱ་དེའི་རྗེས་སུ་འཇུག་པ་དང་། དེ་ལ་བླང་དོར་སྟོན་པའི་བཤེས་གཉེན་ཡོད་པ་རྣམས་ཡིན་གསུངས། ཀུན་བཟང་བླ་མའི་ཞལ་ལུང་ལས་དལ་འབྱོར་གྱི་རང་བཞིན་ཉེར་བཞི་གསུངས་པའང་དལ་འབྱོར་གྱི་དབྱེ་བསྡུ་འདི་ལྟར་བཞེད་པ་ཡིན་ནོ། །དེ་ལྟར་དལ་འབྱོར་བཅོ་བརྒྱད་པོ་འདི་ལ་མཁས་པ་ཁ་ཅིག་གིས་གཉིས་ཀའི་དོན་བསྡུས་སུ་བཞེད། མཆན། ཐམས་ཅད་རང་ཉིད་ལ་ཚང་བའི་གནས་དམ་ཆོས་སྒྲུབ་པའི་རྟེན་མཆོག་ཏུ་གྱུར་པ་མི་ལུས་རིན་པོ་ཆེ་ཐོབ་ཀྱང་། འཆི་བའི་རྐྱེན་མང་པོས་ནམ་འཆི་ངེས་པ་མེད་པའི་ཚེ་སྲོག་སྤངས་ནས་འཇིག་རྟེན་ཕ་རོལ་ཉིད་དུ་སོན་པར་འགྱུར་ན་བདག་གིས་ཅི་བྱར་ཡོད། དེ་བས་ན་ད་ལྟ་ཉིད་ནས་དམ་པའི་ཆོས་ལ་འབད་སྙམ་དུ་སྙིང་ནས་བསམ་པ་ནི་རང་སྟོབས་དང་། གཞན་སྟོབས་བརྒྱུད་གསུམ་བླ་མའི་ཐུགས་རྗེས་རང་རྒྱུད་ལ་དགེ་བའི་བསམ་པ་འབྱུང་བར་བྱ་བའི་ཕྱིར། རང་གི་བློ་སྣ་ཉིད་དམ་པའི་ཆོས་ཚུལ་བཞིན་སྒྲུབ་པའི་ཕྱོགས་ལ་སྒྱུར་ཅིག་མ་ཧཱ་གུ་རུ་པདྨ་འབྱུང་གནས་མཁྱེན་ནོ། །དེ་ཡང་ཐར་པའི་ལམ་ལས་གོལ་བའི་རྟག་ཆད་དང་། རང་དོན་ཡིད་བྱེད་ཀྱི་ལམ་དམན་པར་མ་གཏོང་ཀུན་མཁྱེན་ཆོས་ཀྱི་རྗེ་དྲི་མེད་འོད་ཟེར་མཁྱེན་ནོ། །དེ་གཉིས་ཀྱི་དོན་བརྒྱུད་དགོངས་པའི་བྱིན་རླབས་རྒྱུད་ལ་འཕོས་ཏེ་གཉིས་སུ་མེད་པར་གྱུར་པའི་དྲིན་ཆེན་རྩ་བའི་བླ་མ་དང་དབྱེར་མེད་པའི་རིག་འཛིན་ཆེན་པོ་འཇིགས་མེད་གླིང་པ་མཁྱེན་ནོ། །འདི་ནི་འོག་མ་ཀུན་ལ་བསྒྲེའོ། །དེ་ལྟར་དལ་འབྱོར་བཅོ་བརྒྱད་པོ་དེ་རེ་རེའང་ལྡན་དཀའ་ན་རང་ལ་ཐམས་ཅད་ཚང་འདུག་པ་འདི་ཤིན་ཏུ་རྙེད་པར་དཀའ། ཆོས་ཀྱི་རྟེན་ཁྱད་པར་ཅན་འདི་ཤིན་ཏུ་རྙེད་དཀའ་འོ་ཞེས་སྤྱིར་བསམ། འདི་སྔར་ཡང་རྙེད་དཀའ། ཕྱིས་ཡང་ཡང་མི་རྙེད་པས་ད་ལྟ་དོན་ཞིག་བསྒྲུབ་པར་བྱ་བསམ་དགོས་སོ། །

གཉིས་པ་རྒྱུའི་སྒོ་ནས་རྙེད་དཀའ་ཚུལ་ནི། ད་རེས་དལ་རྟེན་སོགས། ད་རེས་དལ་བའི་ལུས་རྟེན་བཟང་པོ་འདི་ལ་དམ་པའི་ཆོས་བསྒྲུབ་ཏེ་དོན་ཡོད་པར་མ་བྱས་ན། ཕྱི་ནས་ཐར་པ་ཚུལ་བཞིན་བསྒྲུབ་པའི་ལུས་རྟེན་འདི་འདྲ་མི་རྙེད་པའི་ཚུལ་ནི། བདེ་འགྲོའི་ལུས་རྟེན་འདི་ལ་བསོད་ནམས་དགེ་བའི་རྒྱུ་ཟད་པར་གྱུར་ན་ཤི་བའི་འོག་ཏུ་ངན་པར་སོང་བ་དམྱལ་བ། ངན་པར་འགྲོར་འགྱུར་ཡི་དྭགས་དང་། ལོག་པར་ལྟུང་བ་དུད་འགྲོའི་གནས་རྣམས་སུ་འཁྱམས་པར་འགྱུར་ཞེས་ཁ་ཅིག་གིས་བཞེད་ཀྱང་། འདིར་སྐད་གཉིས་ཤན་སྦྱར་ལས། ས་འོག་གི་འཇིག་རྟེན་ལ་དུད་འགྲོ་ཡི་དྭགས་དམྱལ་བ་གསུམ་ཡོད་པ་དེ་དག་གི་སྤྱི་མིང་དུ། ངན་འགྲོ། ངན་སོང་། ལོག་པར་ལྟུང་བ། ཞེས་ཟེར་གསུངས། དེ་དག་གིས་དགེ་སྡིག་གི་ངོ་མི་ཤེས་ཤིང་དམ་པའི་ཆོས་ཀྱི་སྒྲ་ཙམ་ཡང་མི་ཐོས་ན་ཆོས་བསྒྲུབ་པ་ལྟ་ཞོག །གལ་ཏེ་བདེ་འགྲོ་ཐོབ་ཀྱང་ལམ་སྟོན་དགེ་བའི་བཤེས་གཉེན་དང་མི་མཇལ་བ་ལོང་བ་ཐང་དཀྱིལ་དུ་ལུས་པ་ལྟ་བུར་གྱུར་ཚེ་མཚང་རེ་ཆེ་སྟེ་སྐྱོན་ཆེན་པོ་ཡིན་ནོ། །འདི་དཔེ་ཡི་སྒོ་ནས་བསྟན་པ་ཡིན་ཞེས་བཞེད་ཚུལ་ཡང་ཡོད་དོ། །དཔེ་དངོས་བསྟན་པ་ནི། ཟླ་བའི་སྙིང་པོའི་མདོ་དང་། མྱ་ངན་ལས་འདས་པའི་མདོ་སོགས་དང་། བཤེས་སྤྲིང་སོགས་ལས་བསྟན་པ་བཞིན་ནོ། །གསུམ་པ་གྲངས་ཀྱི་སྒོ་ནས་རྙེད་དཀའ་ཚུལ་ནི། སེམས་ཅན་ཙམ་གྱི་སོགས། སྤྱིར་སེམས་ཅན་ཡིན་ཙམ་གྱི་གྲངས་དང་རིམ་པ་ལ་ལྟོས་ཤིང་ལེགས་པར་བསམ་ན་མི་ལུས་ཙམ་ཐོབ་པ་ཡང་སྲིད་མཐའ་མ་ཁེགས་པ་ཙམ་ཡིན་ཏེ། འདི་ལྟར་དམྱལ་བ་ནི་མཚན་མོའི་སྐར་མ་ཙམ་ལ་ཡི་དྭགས་ནི་ཉིན་མོའི་སྐར་མ་ཙམ། ཡི་དྭགས་མཚན་མོའི་སྐར་མ་ཙམ་ལ་དུད་འགྲོ་ཉིན་མོའི་སྐར་མ་ཙམ། དུད་འགྲོ་མཚན་མོའི་སྐར་མ་ཙམ་ལ་བདེ་འགྲོ་ཉིན་མོའི་སྐར་མ་ཙམ་ལས་མེད་ལ། མི་ཡང་ཆོས་མེད་སྡིག་ལ་སྤྱོད་པ་མཐོང་ཆོས་སུ་གྱུར་པ་འདི་དག་ནི་མཚན་མོའི་སྐར་མ་ཙམ་མང་བས་མི་ལུས་ཙམ་པོ་པ་དང་། དགེ་སྡིག་འདྲེས་མར་སྤྱོད་པ་ནི་ཉིན་མོའི་སྐར་མ་ཙམ་ལས་མེད་པས་མི་ལུས་ཁྱད་པར་བ་ཞེས་བཞེད། ཡང་དགེ་སྡིག་འདྲེས་མར་སྤྱོད་པ་ནི་མཚན་མོའི་སྐར་མ་ཙམ་དུ་མང་ན། དམ་པའི་ཆོས་ཚུལ་བཞིན་སྤྱོད་པའི་མི་ལུས་རིན་པོ་ཆེ་ནི་ཉིན་མོའི་སྐར་མ་ཙམ་ལས་མེད་པས་ཆོས་མེད་སྡིག་སྤྱོད་བདག་གི་བློ་སྣ་མྱུར་དུ་དམ་པའི་ཆོས་ཕྱོགས་ལ་སྒྱུར་ཅིག་སོགས་གོང་ལྟར། གཉིས་པ་བྱེ་བྲག་ཏུ་བསམ་པ་ལ་གཉིས་ལས། དང་པོ་འཕྲལ་བྱུང་རྐྱེན་གྱི་མི་ཁོམ་པ་བརྒྱད་ནི། གལ་ཏེ་མི་ལུས་སོགས། འཕྲལ་བྱུང་ཞེས་པ་ནི། རང་རྒྱུད་ལ་འདི་དག་འཕྲལ་དང་འཕྲལ་དུ་འབྱུང་ཉེ་བས་འཕྲལ་བྱུང་ཞེས་གསུངས། དེ་ཡང་གལ་ཏེ་སྔོན་བསགས་བསོད་ནམས་ཀྱི་མཐུ་ལས་ལྷ་ཆོས་བསྒྲུབ་པའི་མི་ཡི་ལུས་རྟེན་ཡིད་བཞིན་གྱི་ནོར་བུ་རིན་པོ་ཆེ་དགོས་འདོད་ཀུན་འབྱུང་ལྟ་བུ་ཐོབ་སྟེ་དམ་ཆོས་དར་བའི་ཡུལ་གླིང་དུ་ཕྱིན་ཡང་། ལུས་རྟེན་བཟང་པོ་ཐར་པ་དང་ཐམས་ཅད་མཁྱེན་པའི་ལམ་སྒྲུབ་ནུས་ཀྱི་རྟེན་ཁྱད་པར་ཅན་ཡིན་ལ། འོན་ཀྱང་སྡིག་སྡུག་གི་གནོད་པ་ཐམས་ཅད་འབྱུང་བའི་བློ་ལས་སུ་མི་རུང་བ་བྱུར་པོ་ཆེ་ཡི་སེམས་མི་བསྲུན་པ་སྤྲེའུ་ལྟ་བུ་འདི་ཐར་བ་བསྒྲུབ་པའི་རྟེན་དུ་མི་རུང་ཞིང་སྡུག་བསྔལ་གྱི་རྒྱུ་བསྒྲུབ་པའི་ལས་སུ་འགྱུར་ཏེ། སེམས་ལས་སུ་མི་རུང་བའི་ཕྱིར་རོ་ཞེས་སྤྱིར་བསྟན་ནས། ཁྱད་པར་ལྟ་སྤྱོད་ཕྱིན་ཅི་ལོག་ཏུ་སྟོན་པའི་བདུད་ཀྱི་བཤེས་གཉེན་གྱིས་ཟིན་ན་རང་བློ་ལོག་ལམ་དུ་བསྒྱུར་བས་ཡང་དག་པའི་ཆོས་དང་རྒྱབ་འགལ་བ་དང་། ༡ རང་རྒྱུད་ཀྱི་དུག་ལྔ་ཉོན་མོངས་པ་ཤིན་ཏུ་རགས་ཤིང་འཁྲུགས་པའི་རིགས་ཅན་རྣམས་ནི། ཆོས་བསྒྲུབ་འདོད་ཀྱི་བློ་རེ་འགའ་ཙམ་སྐྱེས་ཀྱང་རང་རྒྱུད་ཀྱི་དུག་ལྔ་དབང་ཆེ་བས་ཕལ་ཆེར་དེའི་དབང་དུ་སོང་སྟེ་ཆོས་ཡང་དག་པ་མི་འགྲུབ། ༢ སྔོན་བསགས་ཀྱི་ལས་ངན་བྱས་པ་རྣམས་ཆོས་ལ་བརྩོན་འགྲུས་བྱེད་དུས་ལས་ངན་གྱི་འབྲས་བུ་རང་ཐོག་ཏུ་བབས་པས་སྡུག་བསྔལ་གྱི་མཚོ་ཆེན་རྡོལ་བའི་ཚེ་རང་བྱས་ཀྱི་ལས་འབྲས་སུ་མི་ཤེས་པར་ཆོས་ལ་ཡི་ཆད་སྐྱེ་བ་དང་། ༣ ཆོས་ལ་སློབ་པར་འདོད་ཀྱང་བརྩོན་འགྲུས་ཅུང་ཟད་ཀྱང་མེད་པའི་ལེ་ལོ་ཅན་ནི་རྣམ་གཡེང་དང་ཕྱི་བཤོལ་གྱི་དབང་དུ་སོང་སྟེ་ཆོས་མི་འགྲུབ་པ་དང་། ༤ རང་ལ་རང་དབང་མེད་པར་གཞན་ཁོལ་བྲན་གཡོག་རྣམས་ལ་ཆོས་བྱེད་འདོད་ཀྱི་བློ་རེ་འགའ་ཡོད་ཀྱང་གཞན་དབང་དུ་སོང་ནས་ཆོས་བསྒྲུབ་ཏུ་མི་སྟེར། ༥ ཚེ་འདིའི་ལྟོ་གོས་སམ་ནད་གདོན་དང་རྒྱལ་པོའི་ཆད་པ་སོགས་ཀྱི་འཇིགས་པ་ལས་སྐྱོབ་པའི་ཆེད་དུ་ཆོས་སྒོར་ཞུགས་ཀྱང་སྙིང་ནས་ཆོས་ལ་ངེས་ཤེས་མེད་པས་སྔོན་གྱི་བག་ཆགས་རྙིང་བས་ཆོས་མ་ཡིན་པ་ལ་སྤྱོད། ༦ རྙེད་བཀུར་སྙན་གྲགས་སོགས་ཚེ་འདི་སྒྲུབ་པའི་བསམ་པས། གྲུབ་རྫུན་དང་། གཏེར་རྫུན། མ་ཎི་པ་རྫུན་པ་སོགས་གཞན་སྣང་དུ་ཆོས་པ་ལྟར་བཅོས་ཀྱང་ཅི་བྱས་ངན་སོང་གི་རྒྱུར་སོང་བ་ནི་ཐར་པའི་ལམ་དང་བྲལ། ༧ ཤིན་ཏུ་བླུན་ཞིང་རྨོངས་པའི་རིགས་ཅན་ཤེས་རབ་ཀྱི་སྣང་བ་ཅུང་ཟད་ཀྱང་མེད་པ་རྣམས་ནི་ཆོས་སྒོར་ཞུགས་ཀྱང་ཆོས་ཀྱི་ཚིག་དོན་ཕྲན་བུ་ཙམ་ཡང་ཤེས་མི་ནུས་ན་ཐོས་བསམ་སྒོམ་གསུམ་བྱེད་པའི་སྐལ་བ་མེད་ཅིང་། ༨ གཞན་ཡང་སྡིག་པའི་གྲོགས་སོགས་གློ་བུར་དུ་འཕྲལ་བྱུང་རྐྱེན་གྱི་མི་ཁོམ་པ་བརྒྱད་པོ་གང་རུང་བདག་གི་རྒྱུད་ལ་ཆོས་ཀྱི་མི་མཐུན་པའི་ཕྱོགས་འགལ་ཟླར་བྱུང་ཞིང་ལྷག་པའི་ཚེ། བློ་སྣ་སོགས། དེ་ཡང་རང་རྒྱུད་ལ་ཞིབ་ཏུ་བརྟགས་ནས་དེ་དག་རེ་རེ་ནས་གཉེན་པོ་བརྟེན་དགོས་ཏེ། བདུད་ཀྱིས་ཟིན་པའི་གཉེན་པོ་ཐུགས་རྒྱུད་ན་བྱང་ཆུབ་སེམས་ཀྱིས་ཟིན་པའི་ལྟ་སྤྱོད་རྣམ་དག་གི་བཤེས་གཉེན་བསྟེན། དུག་ལྔའི་གཉེན་པོ་ལ་འདོད་ཆགས་ཀྱི་གཉེན་པོར་མི་སྡུག་པ། ཞེ་སྡང་གི་གཉེན་པོར་བྱམས་པ། གཏི་མུག་གི་གཉེན་པོར་ཁམས་ཀྱི་རབ་དབྱེ། ང་རྒྱལ་གྱི་གཉེན་པོར་དམན་ས་བཟུང་ནས་ཕྱག་འཚལ་བ་སོགས། ཕྲག་དོག་གི་གཉེན་པོར་རྗེས་སུ་ཡི་རང་རྣམས་བསྒོམ་དགོས། ལས་ངན་ཐོག་བབས་ཀྱི་གཉེན་པོར་ཆོས་ལ་ཡི་ཆད་མི་སྐྱེ་བར་ལས་རྒྱུ་འབྲས་བསླུ་བ་མེད་པ་ལ་ཡིད་ཆེས་བསྐྱེད་ནས་སྔོན་གྱི་ལས་ངན་བསགས་པ་ལ་འགྱོད་བཤགས་བྱེད་དགོས། ལེ་ལོའི་གཉེན་པོར་འཆི་བ་མི་རྟག་པ་སྙིང་ནས་དྲན་ཞིང་རྟག་སྦྱོར་དང་གུས་སྦྱོར་གྱི་བརྩོན་འགྲུས་རྩོམ་དགོས། གཞན་ཁོལ་བྲན་གཡོག་གི་གཉེན་པོར་བླ་མ་དང་ཕྱུག་པོའི་བྲན་གཡོག་དབང་མེད་དུ་གྱུར་པ་ལ་དེ་ལས་ཐར་བའི་ཐབས་ལེགས་པོ་ཞིག་ལ་འབད་དགོས། འཇིགས་སྐྱོབ་ཀྱི་གཉེན་པོར་ངེས་འབྱུང་གི་བསམ་པ་དང་བྱང་ཆུབ་ཀྱི་སེམས་རྣམ་དག་ཞིག་གིས་ཟིན་པ་བྱེད་དགོས། ཆོས་ལྟར་བཅོས་པའི་གཉེན་པོར་འཇིག་རྟེན་ཚེ་འདི་སྒྲུབ་པའི་བསམ་སྦྱོར་གྱི་ཉེས་དམིགས་ཤིན་ཏུ་ཆེ་བར་ཤེས་ནས་སྤང་དགོས། བླུན་རྨོངས་ཀྱིས་ནི་ཐོས་ཀྱང་ཚིག་མི་གོ །བསམ་ཀྱང་དོན་མི་ཤེས། བསྒོམ་ཀྱང་གནས་ལུགས་ཀྱི་རྟོགས་པ་མི་སྐྱེ་བ་སྔོན་ཆོས་སྤང་སོགས་ལས་ངན་བྱས་པའི་སྒྲིབ་པ་ཡིན་པས་དེའི་གཉེན་པོར་སྟོབས་བཞི་ཚང་བའི་བཤགས་པ་དང་། ཤེས་རབ་བསྐྱེད་པའི་ལྷ་འཕགས་པ་འཇམ་དཔལ་དབྱངས་ལ་གསོལ་བ་འདེབས་དགོས། གཉིས་པ་རིས་ཆད་བློ་ཡི་མི་ཁོམ་པ་བརྒྱད་ནི། སྐྱོ་ཤས་ཆུང་ཞིང་སོགས། རིས་ཆད་ཅེས་པ་ནི། རང་གི་རྒྱུད་དང་ཐར་པ་དང་ཐམས་ཅད་མཁྱེན་པའི་གོ་འཕང་གཉིས་རིས་སུ་གཅོད་པས་ན་རིས་ཆད་ཅེས་གསུངས། དེའང་ངན་སོང་དང་འཁོར་བའི་ཉེས་པ་བཤད་དམ། ཚེ་འདིའི་སྡུག་བསྔལ་ཅི་ལྟ་བུ་ལའང་སྐྱོ་ཤས་ཆུང་ཞིང་སྐྲག་པའི་བློ་གཏན་ནས་མི་སྐྱེ་ན་ཆོས་ལ་འཇུག་པའི་རྒྱུ་ངེས་འབྱུང་གི་བློ་རྩ་བ་ནས་མི་སྐྱེ། ༡ ཡང་དག་པའི་ཆོས་དང་བླ་མ་ལ་མོས་གུས་དང་དད་པའི་ནོར་དང་བྲལ་ན་བསྟན་པའི་འཇུག་སྒོ་འགགས་ཏེ་ཐར་པའི་ལམ་དུ་མི་ཚུད། ༢ འཁོར་བའི་བདེ་བ་ལ་འདོད་སྲེད་ཀྱི་ཞགས་པས་དམ་པོར་བཅིངས་ནས་དམ་པའི་ཆོས་བྱེད་ལོང་མེད་པ་དང་། ༣ ལུས་ངག་ཡིད་གསུམ་གྱི་ཀུན་སྤྱོད་ཤིན་ཏུ་རྩུབ་པའི་རིགས་ཅན་རྣམས་ནི་ཡང་དག་པའི་བཤེས་གཉེན་དང་འཕྲད་ཀྱང་དམ་པའི་ལམ་དུ་བསྒྱུར་དཀའ། ༤ མི་དགེ་སྡིག་པའི་ལས་དང་རྣམ་སྨིན་ལ་མི་འཛེམ་པས་སྒོ་གསུམ་ཉེ་བར་མ་ཞི་བ་ནི་དམ་པའི་ཡོན་ཏན་དང་བྲལ་ཏེ་ཆོས་ལས་ཕྱིར་ཕྱོགས། ༥ ཆོས་སྒོར་ཞུགས་ཀྱང་སྒོ་གསུམ་ཆོས་འགལ་གྱི་ལས་བྱས་པ་ཐམས་ཅད་ལས་མཐའ་ལོག་ལམ་དུ་ཞུགས་པ་ཡིན་གསུངས་པས་རང་རྒྱུད་ལ་ཡོན་ཏན་མཚན་ཉིད་པ་མི་སྐྱེ། ༦ སོར་བྱང་གི་ལམ་ལ་ཞུགས་ནས་སེམས་བསྐྱེད་དང་སྡོམ་པ་ཉམས་ཤིང་འཆལ་ན་འགྲོ་ས་ངན་སོང་ལས་མེད་པས་མི་ཁོམ་པའི་གནས་ལས་མི་ཐར། ༧ གསང་སྔགས་ཀྱི་དབང་བཞི་ཐོབ་ཀྱང་བླ་མ་དང་མཆེད་གྲོགས་ལ་དམ་ཚིག་ཉམས་ཤིང་རལ་བ་ན་རང་གཞན་ཕུང་ལ་སྦྱོར་བས་དངོས་གྲུབ་ཀྱི་སྐལ་བ་ཆད་པ་༨ སྟེ་རིས་ཆད་བློ་ཡི་མི་ཁོམ་པ་རྣམ་པ་བརྒྱད་ཅེས་བྱ་སྟེ། བདག་ལ་དམ་པའི་ཆོས་ཀྱི་འགལ་ཟླར་ལྷག་པའི་ཚེ་བློ་སྣ་སོགས། དེ་ཡང་སྐྱོ་ཤས་ཆུང་བའི་གཉེན་པོ་ནི། ཁམས་གསུམ་འཁོར་བ་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་ཚུལ་ཤེས་པར་བྱས་ནས་ངེས་འབྱུང་གི་བློ་བསྐྱེད། དད་མེད་ཀྱི་གཉེན་པོ་ནི། ཆོས་དང་བླ་མའི་ཡོན་ཏན་ལ་ཡང་ཡང་བསམ་སྟེ་ཕྱིར་མི་ལྡོག་པའི་དད་པ་བསྐྱེད། འདོད་སྲེད་ཀྱི་གཉེན་པོ་ནི། འཁོར་དང་ལོངས་སྤྱོད་མི་རྟག་པར་སྒྱུ་མ་ལྟ་བུར་ཤེས་པས་ཆགས་ཞེན་གྱི་འཁྲི་བ་གཅོད། ཀུན་སྤྱོད་ངན་པའི་གཉེན་པོ་ནི། སྒོ་གསུམ་ཞི་ཞིང་དུལ་བ་ལ་བསྟེན་ནས་རང་སེམས་ཆོས་ཀྱིས་འདུལ། མཁས་པ་འགའ་ཞིག་གིས་ཀུན་སྤྱོད་ངན་པ་ལ་གཉེན་པོ་མེད་གསུངས། མི་དགེ་སྡིག་སྤྱོད་ཀྱི་གཉེན་པོ་ནི། ལས་རྒྱུ་འབྲས་ལ་ཡིད་ཆེས་ནས་སྡིག་པ་ལ་བཤགས་སྡོམ་བྱེད་དགོས། ཆོས་ལ་སེམས་པ་བྲལ་ཞིང་ལས་མཐའ་ལོག་པའི་གཉེན་པོ་ནི། དམ་པའི་ཆོས་ལ་འཕྲད་དཀའ་བའི་འདུན་པ་བསྐྱེད་དེ་སྒོ་གསུམ་ཆོས་འགལ་གྱི་ལས་སྤང་དགོས། སོར་བྱང་གི་སྡོམ་པ་ཉམས་པའི་གཉེན་པོ་ནི། སོ་ཐར་གྱི་སྡོམ་པ་ཉམས་ན་ཕྱིར་བཅོས་ནས་ཚུལ་ཁྲིམས་ཡང་དག་པར་བསྲུང་། ཇོ་བོ་རྗེ་ལ་པཎྜི་ཏ་ག ཅིག་གིས། ཚུལ་ཁྲིམས་རྣམ་པར་དག་པའི་རྒྱུ་གང་ལགས་ཞུས་པས། བྱང་ཆུབ་ཀྱི་སེམས་ཡིན་ཞེས་གསུངས་པ་སོགས་ཚུལ་ཁྲིམས་ཀྱི་རྒྱུ་ལའང་བསླབ་པར་བྱ། བྱང་སེམས་ཀྱི་སྨོན་འཇུག་གཉིས་ཉམས་ན་ཐུན་གྱི་དྲུག་ཆ་མ་འདས་གོང་དུ་བཤགས་ན་རྩ་ལྟུང་དུ་མི་འགྱུར་བས་བཤགས་དགོས། དམ་ཚིག་རལ་བའི་གཉེན་པོ་ནི། སྔགས་སྡོམ་ཉམས་ན་བྱང་སེམས་བཞིན་གཉེན་པོ་སླེབ་པ་དང་། སྔགས་རྒྱུད་རྣམས་ལས་ཇི་སྐད་གསུངས་པ་བཞིན་བཤགས་སྦྱངས་བྱས་ནས་དམ་ཚིག་བསྲུང་དགོས། དེ་ལྟ་བུའི་དལ་བའི་རང་བཞིན་ཉེར་བཞི་དང་། འབྱོར་བ་བཅུ་སྟེ་སུམ་ཅུ་སོ་བཞི་པོ་འདི་རྣམས་རང་རྒྱུད་ལ་ལེགས་པར་བརྟགས་ནས་མི་ཚང་བར་འདུག་ན་ཐབས་དུ་མས་འབད་ལ་ཚང་བར་བྱ། ཚང་བར་འདུག་ན་དགའ་བ་བསྒོམ། དེ་ལྟར་དོན་ཆེན་པོ་རྙེད་པ་འདི་དེ་སྔ་སྔ་དྲོ་གཅིག་ཀྱང་དོན་མེད་འདུག་པ་རེ་སྐྱོ། ད་མྱུར་དུ་འཇིག་ཅིང་སྙིང་པོ་མེད་པས་འདི་ལས་ཡུན་གྱི་རྟེན་ཞིག་སྒྲུབ་པ་ལས་དོན་མེད་ཆུད་ཟོས་མི་བྱ་ཞེས་ཡང་ཡང་བསམ་ལ་བློ་རྒྱུད་འགྱུར་བ་ཐོན་པའི་བར་དུ་ཅིས་ཀྱང་འབད། འདིའི་གྲུབ་འབྲས་བློ་ལ་སྔར་དང་མི་འདྲ་བའི་འགྱུར་བ་ཐོན་པ་དེ་ཡིན། དེ་ཆེ་ཆུང་གང་རུང་མ་བྱུང་བར་གསལ་པོར་བསམ་དགོས་གསུངས། སྔོན་འགྲོ་ཐར་ལམ་རབ་གསལ་སྐབས་བློ་ལྡོག་རྣམ་བཞི་གསུངས་པ་ལས། དལ་འབྱོར་རྙེད་དཀའ་ཨུ་དུམ་ཝ་ར་འདྲ། །རྙེད་ན་དོན་ཆེན་ཡིད་བཞིན་ནོར་ལས་ལྷག །འདི་འདྲ་རྙེད་པ་ད་རེས་ཙམ་ཞིག་ལ། །དོན་ཆེན་གཏན་གྱི་འདུན་མ་མི་སྒྲུབ་པར། །དོན་མེད་ཆུད་ཟོས་གྱུར་བ་བདག་ཅག་ལ།། དཀོན་མཆོག་ཀུན་འདུས་བླ་མས་ཐུགས་རྗེས་གཟིགས། །དལ་འབྱོར་དོན་ཡོད་བྱེད་པར་བྱིན་གྱིས་རློབས། །ཞེས་གསུངས། གཉིས་པ་ཚེ་མི་རྟག་པ་ནི། ད་ལྟ་ནད་དང་སོགས། ད་ལྟ་ལུས་ལ་འདུ་བ་རྣམ་བཞིའི་ནད་དང་སེམས་ལ་སྡུག་བསྔལ་གྱི་ཚོར་བ་ཆེན་པོས་མ་གཟིར་ཞིང་། གཞན་གྱི་བྲན་ཁོལ་དང་གྲོགས་ངན་ལ་སོགས་གཞན་དབང་ཉིད་དུའང་མ་གྱུར་བས་རང་ཉིད་ཀྱི་ལུས་སེམས་ལ་རང་དབང་ཐོབ་ཅིང་དམ་ཆོས་སྒྲུབ་པའི་རྒྱུ་རྐྱེན་རྟེན་འབྲེལ་ལེགས་པར་འགྲིག་པའི་དུས་འདིར། སྙོམ་ལས་ངང་དུ་དལ་འབྱོར་ཆུད་གས ན་པར་གྱུར་ཏེ་འཆི་བ་གློ་བུར་དུ་སླེབས་པར་གྱུར་ན། རང་གི་འཁོར་གཡོག་རྣམས་དང་། སྡིག་སྡུག་གི་སྒོ་ནས་བསགས་པའི་ལོངས་སྤྱོད་དང་། ད་ལྟ་ཤིན་ཏུ་བརྩེ་བའི་གཉེན་ཉེ་དུ་སོགས་འབྲེལ་བ་རྣམས་ལ་ཡུན་རིང་པོར་མི་འབྲལ་ཞིང་འགྲོགས་པར་བལྟ་བ་ལྟ་ཅི་སྨོས། དེར་མ་ཟད་ཟས་གོས་སོགས་ཀྱིས་གཅེས་པར་བསྐྱངས་ཤིང་བདག་ཏུ་བཟུང་བའི་ལུས་འདི་ཡང་རིང་པོར་མི་ཐོགས་པར། མལ་གྱི་ནང་ནས་གོས་མེད་གཅེར་བུར་ཕྱུང་སྟེ་ས་ཕྱོགས་སྟོང་པར་བསྐྱལ་ནས། ཝ་དང་བྱ་རྒོད་ཁྱི་སོགས་ཀྱི་སྡེར་མོ་དང་སོ་ཡིས་ཤ་ལྤགས་འདྲད་ཅིང་འཇིགས་པའི་སྒྲ་དང་བཅས་ནས་ཟ་བའི་དུས། རྣམ་པར་ཤེས་པ་སྲིད་པ་བར་མ་དོའི་ཡུལ་ན་ལས་དཀར་ནག་འབའ་ཞིག་གི་རྗེས་སུ་འབྲང་ཞིང་འཇིགས་སྐྲག་གི་རྣམ་པ་བསམ་གྱིས་མི་ཁྱབ་པའི་འཁྲུལ་སྣང་ཤིན་ཏུ་ཚབ་ཆེན་པོ་ལ་སྤྱོད་པར་འགྱུར་བས། དུས་ད་ལྟ་ཉིད་དུ་རང་གཞན་གྱི་བློ་སྣ་དམ་པའི་ཆོས་ཕྱོགས་ལ་སྒྱུར་ཅིག་ཅེས་སོགས་དེ་ལྟར་ནམ་འཆི་ཆ་མེད་ཡིན་པས་ཚེ་མཐར་ཐུག་པར་ཨེ་འདུག་མི་ཤེས། ཐམས་ཅད་འདུག་ཤོམ་གྱི་ངང་ནས་འཆི་ཚུལ། རྒས་སམ་གཞོན་པའི་སྐབས་ནམ་འཆི་ཆ་མེད། འཆི་རྐྱེན་ནི་མང་། ཟས་ཟོས་པས་ནད་རེད་ནས་ཤི་བ་སོགས་དཔེ་ལས་ངེས་མེད་སྣ་ཚོགས་བསམ་ནས། ད་ལོ་ཡོད་ཀྱང་སང་ཕོད་གཤིན་གྲལ་དུ་ཡོད་ན་ཅི་ཆ། ལོ་སྟོད་གསོན་ཀྱང་ལོ་སྨད་འཆིའམ། དེ་བཞིན་དུ་ཟླ་སྟོད་ཟླ་སྨད་ནས་སྔ་དྲོ་ཕྱི་འཕྲེད་ཀྱི་བར་དུ་ཇེ་ཐུང་ཇེ་ཐུང་བློ་སྣ་བསྟུངས་ལ་བསམ། དེ་ཙམ་ཨེ་འཆིའམ་སྙམ་ན་མི་འཆི་བའི་གདེང་མེད་ཚུལ། འཆི་རྐྱེན་ངེས་པ་མེད་ལུགས། ཚེ་ཡི་འཕེན་པ་ཅི་ཡོད་ཆ་མེད། ཐམས་ཅད་གསོན་དུ་རེ་བ་དང་མི་ཤི་བའི་འདུན་པ་བྱེད་གྲབ་ཁོ་ནའི་ངང་དུ་འཆི་བ་ལས་མེད་ན། རང་གིས་རང་བསླུས་ཏེ་མི་འཆི་སྙམ་པས་ཅི་བྱ། ད་དུང་མི་འཆི་སྙམ་དང་གློ་བུར་མི་འདོད་བཞིན་འཆི་བ་ཐོག་ལྟར་འབབ་པ་ཡིན་སྙམ་དུ་ངེས་མེད་འདི་གཙོ་ཆེར་བསམ་ནས། མྱུར་དུ་ཆོས་ཤིག་བྱ། འཆི་ཁར་དབུགས་སྣེ་རིང་ཐུང་སར་སླེབ་དུས་ཆོས་དྲན་པས་མིི་ཕན། ད་རེས་ནད་སོགས་རང་དབང་མེད་པ་ཅི་ཡང་མེད་སྐབས་འདིར་ཆོས་ལ་ཅིས་མི་འབད་སྙམ་པའི་བློ་སྣ་ཐུང་ཧ་རེ་མ་སོང་བར་བསམ་མོ་གསུངས། ཐར་ལམ་རབ་གསལ་ལས། འདུས་བྱས་ཐམས་ཅད་མི་རྟག་གློག་བཞིན་གཡོ། །སྣོད་བཅུད་གང་ལ་བསམ་ཀྱང་འཇིག་པའི་ཆོས། །འཆི་བར་ངེས་ཤིང་ནམ་འཆི་ཆ་མེད་ཀྱང་།། རྟག་འཛིན་སེམས་ཀྱིས་རང་མགོ་བསྐོར་ནས་སུ། །བག་མེད་ངང་དུ་གནས་པ་བདག་ཅག་ལ། །དཀོན་མཆོག་ཀུན་འདུས་བླ་མས་ཐུགས་རྗེས་གཟིགས། །མི་རྟག་འཆི་བ་དྲན་པར་བྱིན་གྱིས་རློབས། །ཞེས་གསུངས། གསུམ་པ་ལས་རྒྱུ་འབྲས་ནི། དགེ་སྡིག་ལས་ཀྱི་སོགས། སྤྱིར་འཁོར་འདས་ཀྱི་སྣང་ཚུལ་ཐམས་ཅད་རྒྱུ་འབྲས་རྟེན་འབྲེལ་བསླུ་མེད་ཀྱི་དབང་གིས་ཡིན་ཞིང་། ཁྱད་པར་བདེ་བ་ཕྲ་རགས་ཐམས་ཅད་དགེ་འབྲས། མི་བདེ་བ་ཐམས་ཅད་མི་དགེ་བའི་འབྲས་བུ་ལ་རག་ལས་ཏེ་རང་དབང་མེད་ཚུལ་བསམ་མོ། །བྱེ་བྲག་ཏུ་བསམ་པ་ནི། སྤང་བྱ་མི་དགེ་བའི་ལས་བཅུ་དང་། བསྒྲུབ་བྱ་དགེ་བའི་ལས་བཅུའི་རེ་རེ་བཞིན། རྣམ་སྨིན་གྱི་འབྲས་བུ། བྱེད་པ་རྒྱུ་མཐུན་དང་། མྱོང་བ་རྒྱུ་མཐུན་གྱི་འབྲས་བུ། དབང་གི་འབྲས་བུ། སྐྱེས་བུ་བྱེད་པའི་འབྲས་བུའོ། །དེ་དག་རིམ་བཞིན་མཐར་ཆགས་སུ་བསམ་མོ། །དེ་ཡང་དགེ་སྡིག་ལས་ཀྱི་རྣམ་སྨིན་རང་ཉིད་ཀྱི་ཕྱི་བཞིན་འབྲངས་ཏེ། སྲིད་པ་ཐ་མ་པ་རྣམས་ལའང་སྨིན་ཚུལ་དང་། ད་ལྟ་སེམས་ཅན་གྱི་བདེ་མི་བདེ་སྣ་ཚོགས་སངས་རྒྱས་ཀྱི་ཕྱག་གིས་ཀྱང་མི་ཁེགས་པ་འདི་བཞིན་ལས་འབྲས་ནི་ནམ་ཡང་མི་བསླུ་བར་ཡིད་ཆེས་བསྐྱེད་ལ་བསམ། དེས་ན་དགེ་སྡིག་གི་ལས་ཕྲ་མོ་ཡང་། རང་བྱས་རང་ལ་སྨིན་པ་ལས་འོས་མེད་པས་སྨན་དང་དུག་གི་ནུས་པ་ལྟར། རང་དོན་ཤེས་པས་བླང་དོར་འཆུག་མི་ཉན་ཚུལ་ནན་ཏན་བསམ་ཞིང་། རང་དོན་སྒྲུབ་པ་ལ་ལས་རྣམས་བླང་དོར་ཚུལ་བཞིན་བྱ་བ་ལས་གཞན་མེད་པར་ཐག་ཆོད་པའི་བར་དུ་བསམ་མོ་གསུངས། ཐར་ལམ་རབ་གསལ་ལས། དཀར་ནག་ལས་འབྲས་ནམ་ཡང་ཆུད་མི་ཟ། །རྒྱུ་འབྲས་བསླུ་བ་མེད་པའི་ལམ་འདི་ལས། །འཁོར་དང་མྱ་ངན་འདས་པའི་ཆོས་སུ་སྣང་། །རང་བྱས་རང་ལ་སྨིན་པར་ངེས་ན་ཡང་། །ཚུལ་བཞིན་འཇུག་ལྡོག་མི་ནུས་བདག་ཅག་ལ། །དཀོན་མཆོག་ཀུན་འདུས་བླ་མས་ཐུགས་རྗེས་གཟིགས། །དགེ་སྡིག་བླང་དོར་བགྱིད་པར་བྱིན་གྱིས་རློབས། །ཞེས་གསུངས། བཞི་པ། འཁོར་བའི་ཉེས་དམིགས་ཀྱི་ཁྲིད་ལ། ངན་སོང་གསུམ་དང་། མཐོ་རིས་གསུམ་སྟེ་གཉིས་ལས། དང་པོ་ལ་ངན་སོང་ གསུམ་ལས། དང་པོ་དམྱལ་བ་ལ་སྡེ་ཚན་བཅོ་བརྒྱད ་ལས། ཚ་དམྱལ་བརྒྱད་ནི། ཁྱད་པར་དམྱལ་བའི་སོགས། དེ་ཡང་འཁོར་བ་གང་དུ་སྐྱེས་ཀྱང་སྡུག་བསྔལ་ཁོ་ན་ལས་བདེ་བ་སྐད་ཅིག་ཙམ་ཡང་མེད་ལ། ཁྱད་པར་དུ་སྡུག་བསྔལ་ཤིན་ཏུ་ཆེ་བ་དམྱལ་བའི་འཇིག་རྟེན་གྱི་ཁམས་ཉིད་དུ་སོན་པར་གྱུར་ན། གནས་དེ་དག་ཐམས་ཅད་ཀྱི་གཞི་དང་འཁོར་ཡུག་ཀུན་མགར་གྱི་ལྕགས་བསྲེགས་ལྟ་བུ་ལས་རྡོག་པ་བཞག་ས་ཙམ་གྱི་བདེ་བར་མངོན་པ་ཡང་མེད་པར་མེ་ལྕེ་འབར་བའི་ཀློང་ཤིན་ཏུ་དབལ་ཚ་བ་ཁོ་ན་ཡིན་ཏེ། ཡང་སོས་ཞེས་བྱ་བ་ནི། ལྕགས་བསྲེགས་ཀྱི་ས་གཞིར་མདག་མེ་འབར་བའི་ཀློང་དུ་དམྱལ་བའི་སེམས་ཅན་གྲངས་མེད་ལྷན་ཅིག་ཏུ་འདུས་ཏེ། ཕན་ཚུན་ཐམས་ཅད་ཀྱང་དགྲ་མི་ཤ་བོ་མཐོང་བ་ལྟར་ཁོང་ཁྲོའི་སེམས་ཀྱིས་མཚོན་ཆ་བརྡེག་རེས་འབའ་ཞིག་བྱེད་པས་ཐམས་ཅད་མཚོན་གྱིས་མགོ་ལུས་རྣམས་འདྲལ་ཞིང་ཤི། ནམ་མཁའ་ལས་ཡང་སོས་པར་གྱུར་ཅིག་ཅེས་པའི་སྒྲ་གྲགས་མ་ཐག་ཐམས་ཅད་ཡང་སོས་ནས་སྔར་བཞིན་འཐབ་པས་སྡུག་བསྔལ་བ་དང་། ཐིག་ནག་ནི། གཤིན་རྗེའི་ལས་མཁན་འཇིགས་སུ་རུང་བ་རྣམས་ཀྱིས་དམྱལ་བའི་སེམས་ཅན་དེ་དག་གི་ལུས་མགལ་དུམ་བཞིན་དུ་བསྒྱེལ་ཏེ་སྤྱི་བོ་ནས་རྐང་མཐིལ་གྱི་བར་ཐིག་ནག་པོ་བཞི་བརྒྱད་བཅུ་དྲུག་སུམ་ཅུ་སོ་གཉིས་ལ་སོགས་པ་བཏབ་ནས་ལྕགས་ཀྱི་སོག་ལེ་མེ་འབར་བས་སྤྱི་བོ་ནས་རྐང་མཐིལ་ལ་ཐུག་གི་བར་གཤོག་ཅིང་འདྲལ་བ་དང་། དེ་མ་ཐག་སླར་འབྱར་བ་ཡང་ཡང་གཤོ ག་པས་སྡུག་བསྔལ་བ་དང་། བསྡུས་འཇོམས་ནི། ལྕགས་བསྲེགས་ཀྱི་གཏུན་ཆེན་པོ་ཡུལ་ལྗོངས་ཙམ་པ་རེའི་ནང་དུ་དམྱལ་བའི་སེམས་ཅན་གྲངས་མེད་པ་བླུགས་ནས། ལྕགས་ཀྱི་ཐོ་ལུམ་ཆེན་པོ་མེ་འབར་བས་ཏིལ་བཞིན་དུ་འཚིར་ཞིང་བརྡུང་བ་དང་། ལུང་པ་ཕན་ཚུན་གྱི་རི་ཐམས་ཅད་སྔར་རང་གིས་གང་བསད་པའི་སྲོག་ཆགས་ར་ལུག རི་དྭགས་ལ་སོགས་པའི་མགོ་བརྙན་དུ་གྱུར་པའི་རྭ་རྩེར་མེ་འབར་བས་རྡུང་ཁ་བཀྱེ་བའི་བར་དུ་ཕྱེ་མར་འཐག་ཀྱང་དེ་མ་ཐག་སོས་ནས་ཡང་འཇོམས་པ་སོགས་སྡུག་བསྔལ་བ་དང་། ངུ་འབོད་ནི། སྒོ་མེད་པའི་ལྕགས་བསྲེགས་ཀྱི་ཁང་ཁྱིམ་མེ་འབར་བའི་ནང་དུ་འཚེད་ཅིང་འོ་དོད་འབོད་པས་སྡུག་བསྔལ་བའོ། །ངུ་འབོད་ཆེན་པོ་ནི། གཤིན་རྗེ་རྣམས་ཀྱིས་ཐོ་བ་ལ་སོགས་པས་བརྡེག་ཅིང་ལྕགས་ཀྱི་ཁྱིམ་མེ་འབར་བ་ཉིས་རིམ་དུ་བཅུག་ནས་སྒོ་ཕྱི་ནང་གཉིས་ཀ་ལྕགས་ཞུན་གྱིས་ཞལ་བ་བྱས་ཤིང་། མེའི་དུ་བ་མཆེད་པས་མུན་ནག་འཐུམས་པོར་སྒོ་ནང་མ་ལས་ཐར་ཀྱང་ཕྱི་མ་ལས་མི་ཐར་སྙམ་དུ་འོ་དོད་དྲག་པོ་འབོད་པས་སྡུག་བསྔལ་བའོ། །ཡིད་བཞིན་མཛོད་ལས་ངུ་འབོད་ཆེན་པོ་དང་། ངུ་འབོད་ཞེས་གསུངས། ཚ་བ་ནི། མེ་འབར་བའི་ལྕགས་ཀྱི་གསལ་ཤིང་རྩེ་གཅིག་པ་སོགས་དང་མདུང་ཐུང་གིས་ལུས་ཐལ་མར་འབིགས་པས་སྡུག་བསྔལ་བའོ། །བདེན་གཉིས་ཤིང་རྟ་ལས། ཚ་བ་ནི་ལྕགས་ཀྱི་གསལ་ཤིང་འབར་བས་ལུས་ཀྱི་གཞུང་འབིགས་ཤིང་ཀླད་པར་ཐལ་མར་འབྱིན་ལ། དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་འབྱུང་བའོ། །ཡང་སླ་ང་རབ་ཏུ་འབར་བར་བསྲེགས་པ་དང་། ལྕགས་ཀྱི་གཞི་ཀུན་ནས་འབར་བ་ལ་གན་རྐྱལ་དུ་བསྙལ་ནས་ལྕགས་ཀྱི་ཐོ་བ་འབར་བས་བརྡུང་བའོ། །ཞེས་གསུངས་པ་དང་། ལག་ལེན་འདེབས་པ་ལས། ཚ་བ་ནི་ལྕགས་ཀྱི་ཡོལ་གོར་ཁྲོ་ཆུ་འབར་བར་འཚོད་ཅིང་། སྟེང་དུ་འཐོན་པའི་རེས་ལ་མགོ་ལ་ཐོ་ལུམ་བསྣུན་ནས་དྲན་པ་ཉམས་པའང་བདེ་བར་བསྒོམ་པས་སྡུག་བསྔལ་ལོ། །ཞེས་གསུངས། རབ་ཏུ་ཚ་བ་ནི། ཡོན་མཛོད་འགྲེལ་ཆུང་གསེར་གྱི་ཐུར་མ་ལས། མདུང་ཐུང་རྩེ་གསུམ་པས་ལུས་ཀྱི་གཞུང་མས་ནས་གྱེན་དུ་འབིགས་པས་ཕྲག་གོང་གཉིས་དང་ཀླད་པར་ཟིངས་འཐེན་ཏེ། ཕྱི་ནས་ལྕགས་བསྲེགས་ལེབ་མོའི་ཐག་པས་དཀྲིས་ཤིང་། ཁྲོ་ཆུ་ཁོལ་མའི་ནང་དེར་འཚོད་པ་དང་བཅས་པའོ། །ཞེས་གསུངས། ལག་ལེན་འདེབས་པ་ལས། རབ་ཏུ་ཚ་བ་ནི་ལྕགས་ཁྱིམ་འབར་བའི་ནང་དུ་གསལ་ཤིང་རྩེ་གསུམ་པས་ཕྲག་པ་གཉིས་དང་སྤྱི་བོ་ལ་ཐལ་མར་འབིགས་ཤིང་། ལྕགས་བསྲེགས་ཀྱི་སྣམ་བུས་ལུས་ལ་དཀྲིས་པས་ཤིན་ཏུ་སྡུག་བསྔལ་ལོ། །ཞེས་གསུངས། མནར་མེད་ནི། ལྕགས་ཁྱིམ་མེ་འབར་བ་ཉེ་འཁོར་ལྷག་པ་བཅུ་དྲུག་གིས་བསྐོར་ཞིང་ཀུན་ནས་རབ་ཏུ་ཚ་བའི་མེས་ལུས་མར་མེའི་སྡོང་བུ་ལྟར་བསྲེགས་ཤིང་འོ་དོད་འབོད་པའི་སྒྲ་ཙམ་ལས། མེ་དང་ལུས་གཉིས་སུ་མེད་ཅིང་སོ་སོར་བལྟར་མི་མངོན་པ་སོགས་དམྱལ་བ་གཞན་བདུན་པོའི་སྡུག་བསྔལ་ཡང་ཚང་ཞིང་མྱོང་དགོས་པའོ། །དེ་ལྟར་ཚ་བའི་དམྱལ་བ་བརྒྱད་ཚན་གཅིག་ཡོད་པ་བློ་ལ་བླང་ཞིང་བསམ་མོ། །གྲང་དམྱལ་བརྒྱད་ནི། གངས་རི་སྟུག་པོའི་སོགས། སྤྱི་མཐུན་དུ་གཞི་དང་འཁོར་ཡུག་ཐམས་ཅད་གངས་རི་སྟུག་པོའི་འདབས་འབྱོར་དང་ཆབ་རོམ་ཆུ་འཁྱགས་ཀྱི་ཁྲོད། དེ་ཡང་གཅོང་རོང་ཡ་ང་བའི་གནས་རྣམས་སུ་ཉིན་མཚན་གྱི་དབྱེ་བ་མེད་པར་རྟག་ཏུ་ཁ་བ་བུ་ཡུག་འབའ་ཞིག་འཚུབས་པས་ལུས་སྦྲེབས་པ་དེར། བྱིས་པ་བཙས་མ་ཐག་པ་ལྟ་བུའི་ལུས་ལ་གྲང་བའི་རེག་བྱ་བཟོད་དཀའ་བའི་སྟེང་དུ་རླུང་གིས་བཏབ་པའི་རྐྱེན་གྱིས་ལུས་ཀྱི་ལང་ཚོ་གཞོན་ཤ་ཆགས་པ་ལ་ཆུ་བུར་ཐོལ་གྱིས་བྱུང་བ་ནི་ཆུ་བུར་ཅན་དང་། ཆུ་བུར་དེ་དག་ལྷག་པར་གྲང་བས་རྡོལ་ནས་རྨར་སོང་བ་ན་ཆུ་བུར་རྡོལ་བ་ཅན། སྨྲེ་སྔགས་རྒྱུན་མི་ཆད་པར་འདོན་པ་ཨ་ཆུ་ཆུ་ཟེར་བ་དང་། དེའང་ཚོར་བ་ཤིན་ཏུ་གྲང་བའི་སྡུག་བསྔལ་བརྣག་ཅིང་བཟོད་པར་དཀའ་བ་ཡིས། ལུས་ཟུངས་ཀྱིས་རབ་ཏུ་བཏང་ཞིང་ཟད་ནས་འཆི་ཁའི་ནད་པ་བཞིན་དུ་སྐད་ཀྱི་གདངས་ཆག་པས་ཤུགས་རིང་གིས་ཀྱེ་ཧུད་འདོན་ཅིང་སྨྲ་བ་ནི་ཀྱེ་ཧུད་འདོན་པ་དང་། གྲང་བའི་ཟུག་རྔུ་མི་བཟོད་པར་སོ་འཐམས་ཏེ་སྐད་མི་ཐོན་པ་སོ་ཐམ་ཐམ་པ་དང་། ཕྱི་ཡི་པགས་པ་མདོག་སྔོན་པོར་སོང་ནས་བཞི་ཚལ་དུ་འགས་པ་ཨུཏྤལ་ལྟར་གས་པ་དང་། ནང་གི་ཤའུ་དམར་པོ་ཐོན་པ་ཡང་ཤིན་ཏུ་གྲང་ནས་བརྒྱད་ཚལ་དུ་གས་པ་པདྨ་ལྟར་གས་པ་དང་། དེ་ལས་ཀྱང་ལྷག་པར་གྲང་བས་དམར་ནག་ཏུ་གྱུར་པ་བཅུ་དྲུག་དང་། སུམ་ཅུ་སོ་གཉིས་ལ་སོགས་གྲངས་མེད་པར་གས་ཏེ་པདྨ་ཆེན་པོ་ལྟར་གས་པའོ། །དེ་ལྟར་གས་པའི་རྨ་ནང་དུ་སྲིན་བུ་ལྕགས་ཀྱི་མཆུ་ཅན་མང་པོ་ཞུགས་ནས་ཟ་ཞིང་གྲང་བའི་སྡུག་བསྔལ་མི་འདྲ་བའི་མྱོང་ཚུལ་བརྒྱད་ལ་མིང་བརྒྱད་དུ་ཆགས་པའོ། །ལག་ལེན་འདེབས་པ་ལས་ནི། ཆུ་བུར་ཅན། ཆུ་བུར་རྡོལ་བ། སོ་ཐམ་པ། ཨ་ཆུ། ཀྱེ་ཧུད་འདོན། ཨུཏྤལ་ལྟར་གས། པདྨ་ལྟར་གས། པདྨ་ལྟར་ཆེན་ཞེས་དང་། མཁས་འཇུག་སྡོམ་བྱང་ལས། ཨ་ཆུ་ཀྱེ་ཧུད་སོ་འཐམ་པ། །ཆུ་བུར་ཅན་དང་ཆུ་བུར་རྡོལ། །པདྨ་པད་ཆེན་ལྟར་གས་པ། །ཨཏྤལ་ལྟར་གས་གྲང་དམྱལ་བརྒྱད། །ཅེས་དེ་ལྟར་ཚ་དམྱལ་དང་གྲང་དམྱལ་གྱི་གོང་འོག་གི་གོ་རིམ་མི་འདྲ་བར་གསུངས་པས་ཚེ་ཚད་ཀྱང་དེ་ལྟར་རང་རང་གི་གཞུང་ལས་ཤེས་པར་བྱའོ། །ཉེ་འཁོར་ལྷག་པ་བཅུ་དྲུག་ནི། དེ་བཞིན་སྤུ་གྲིའི་སོགས། ཚ་དམྱལ་བརྒྱད་ཀྱི་འཁོར་དུ་ཕྱོགས་བཞི་སོ་སོ་ན་ཡོད་པར་བཤད་ལ། དེ་བཞིན་སྤུ་གྲིའི་ཐང་ལ་མཚོན་ཆ་སྣ་ཚོགས་རྩྭ་ལྟར་སྐྱེས་པས་རྐང་པ་གཤོ ག་པ་དང་། རལ་གྲིའི་ཚལ་དུ་ལྕགས་ཀྱི་སྡོང་པོ་ལ་རལ་གྲི་མང་པོ་ལོ་མ་ལྟར་སྐྱེས་པ་རླུང་གིས་བསྐྱོད་པས་ལུས་ལ་བཅད་གཏུབ་བྱེད་པ་དང་། རོ་མྱགས་ཀྱི་འདམ་ནི་མི་རོ་སོགས་རོ་རུལ་པ་འབའ་ཞིག་གི་འདམ་དུ་ཚུད་དེ་སྡུག་བསྔལ་བ་དང་། ཐལ་ཚན་གྱི་ཆུ་བོ་རབ་མེད་ནི་མདག་མེ་རབ་ཏུ་འབར་བའི་ཀློང་དུ་ཚུད་དེ་ཤིན་ཏུ་སྡུག་བསྔལ་བའོ། །དེ་ལྟར་མནར་མེད་པའི་ཉེ་འཁོར་བ་ལྷག་པ་བཅུ་དྲུག་དང་། འགྱུར་བ་ཅན་ཞེས་པ་ནི། ཁ་ཅིག་གིས་ཤལ་མ་རིར་བཞེད། ཉི་ཚེ་བ་ནི། འགྱུར་བ་ཅན་སོགས། སྡུག་བསྔལ་རྣམ་པར་འགྱུར་བ་ཅན། སྒོ་དང་། ཀ་བ་དང་། སྐད་གཉིས་ཤན་སྦྱར་ལས། ཕྲུ་བ་སྟེ་རྫ་མ་སོགས་སྐམ་པར་མི་བསྲེག་ཅིང་ནང་དུ་ཇ་སོགས་བསྐོལ་སྣོད་དོ། །ཞེས་གསུངས། ཐབ་དང་། ཐག་པ་སོགས་ཡོ་བྱད་ཅི་སྙེད་པ་དང་། དེ་ལྟར་བེམ་པོ་ཕལ་ཆེར་ལ་རྣམ་ཤེས་ཞུགས་ནས་དུས་རྟག་ཏུ་སྡུག་བསྔལ་གྱི་ཁུར་ཆེན་པོས་སེམས་ཀྱི་ཐོག་ཏུ་བཀོལ་ཞིང་ཉེར་ལེན་ཚོར་བ་རྩུབ་མོ་ཉིན་རེ་བཞིན་རྒྱུན་དུ་སྤྱོད་པའི་ཉི་ཚེ་བའམ་གློ་བུར་འགྱུར་བའི་སྡུག་བསྔལ་ཕན་ཚུན་ཉམས་སུ་མྱོང་བ་ཞེས་བྱ་སྟེ། ཀུན་མཁྱེན་ཆེན་པོས། ཁ་ཅིག་གིས་ཚེ་ཉི་མ་རེ་ལས་མེད་པས་ཉི་ཚེ་བ་ཞེས་འདོད་ཀྱང་། མི་འཐད་དེ། ལྕགས་ཀྱི་ཁྱིམ་དུ་སྐྱེས་པའི་རབས་ལས། ད་དུང་ཡང་ནི་མང་པོ་ཞིག །ཕྱིར་ཡང་དམྱལ་བ་འདིར་གནས་སོ། །ཞེས་སོ། ཁ་ཅིག་གིས་གཅིག་པུར་གྲོགས་མེད་པའི་ཕྱིར་ཉི་ཚེ་བའོ་ཞེས་འདོད་པའང་མི་འཐད་དེ། སྔོན་གྲོ་བཞིན་སྐྱེས་ཀྱིས་གཙུག་ལག་ཁང་དུ་དགེ་སློང་ལྔ་བརྒྱ་ཙམ་གནས་པ་གཟིགས་པ་བཞིན་ནོ། །ཞེས་གསུངས། དེ་ལྟར་དམྱལ་གནས་རྣམ་གྲངས་བཅོ་ བརྒྱད་པོ་གང་ལས་འབྱུང་བའི་རྒྱུ་ཡི་གཙོ་བོ་ཞེ་སྡང་དྲག་པོའི་ཀུན་སློང་ཡིན་པས། དེས་ན་དུག་གསུམ ་གྱི་ཀུན་སློང་ངན་པ་སྐྱེས་པའི་ཚེ། སྐད་ཅིག་དེ་མ་ཐག་ཏུ་དེའི་རྒྱུན་བཅད་དེ་བློ་སྣ་དམ་པའི་ཆོས་ཕྱོགས་ལ་སྒྱུར་ཅིག་སོགས། ༈གཉིས་པ་ཡི་དྭགས་ཀྱི་སྡུག་བསྔལ་བཤད་པ་ལ་གཉིས་ལས། བྱིང་གནས་ལ་སྤྱི་མཐུན་གྱི་སྡུག་བསྔལ་ནི། དེ་བཞིན་ཕོངས་ལ་སོགས། དམྱལ་བའི་སྡུག་བསྔལ་དེ་བཞིན་དུ་ཡི་དྭགས་ཀྱི་གནས་ནའང་སྤྱི་མཐུན་གྱི་སྡུག་བསྔལ་ནི། ཟས་སྐོམ་གྱིས་དབུལ་ཞིང་ཕོངས་ལ་རྡོ་གསེག་དང་ཚེར་མ་ལ་སོགས་པའི་ས་ཕྱོགས་ཤིན་ཏུ་ཉམས་མི་དགའ་བའི་ཡུལ་དུ། བཟའ་བཏུང་དང་ལོངས་སྤྱོད་ཀྱི་དངོས་པོ་རྣམས་མིང་ཡང་མི་གྲགས་པར་གྱུར་ན་མྱོང་བ་ལྟ་ཅི་སྨོས། ཟས་དང་སྐོམ་ལོ་བཅུ་གཉིས་ཙམ་དང་ཟླ་བ་མང་པོའི་བར་ལའང་མི་རྙེད་པས་ཤིན་ཏུ་བཀྲེས་ཤིང་སྐོམ་པས་གདུང་བ་དང་། ཡི་དྭགས་རྣམས་ཀྱི་ལུས་ནི་པགས་རུས་གཉིས་ཀྱི་བར་ན་ཤ་མེད་པས་རིད་ཅིང་སྐེམ་པ་ལས་ལྡང་བའི་ནུས་སྟོབས་ཙམ་ཡང་ཉམས་ཤིང་ཤིན་ཏུ་སྡུག་བསྔལ་བའོ། །དེ་ལ་ནང་གསེས་སུ་དབྱེ་ན། ཕྱིའི་སྒྲིབ་པ་ཅན། ནང་གི་སྒྲིབ་པ་ཅན། སྒོས་ཁུར་གྱི་སྒྲིབ་པ་ཅན་གསུམ་མོ།། མཁའ་ལ་རྒྱུ་བ་ནི། བཙན་དང་རྒྱལ་པོ་འདྲེ་ལ་སོགས་པ་རྣམས་ཏེ། དེ་དག་ཀྱང་རྟག་ཏུ་འཇིགས་སྐྲག་འཁྲུལ་སྣང་གི་སྡུག་བསྔལ་འབའ་ཞིག་ལ་སྤྱོད་དགོས་པའོ།། དེ་ལྟ་བུ་གང་ལས་འབྱུང་བའི་རྒྱུ་ཡི་གཙོ་བོ་ནི་སེར་སྣ་དང་འཇུར་གེགས་ཡིན་པས་རང་གིས་ཀྱང་དེ་ལྟ་བུའི་ལས་དུ་མ་བསགས་ཟིན། དེར་སྐྱེས་པ་རྣམས་ལ་སྙིང་རྗེ་བསྒོམ་དགོས་སོ། །གསུམ་པ་དུད་འགྲོ་ལ་གཉིས་ལས། བྱིང་ན་གནས་པ་ནི། གཅིག་ལ་སོགས། ཕྱིའི་རྒྱ་མཚོ་ཆེན་པོའི་ཀློང་རྣམས་དང་ཆུ་གཏེར་ཆེན་པོ་བཞིའི་ཁྱོན་ལ་གནས་པ་སྟེ། དེ་ཡང་སྔོན་གྱི་གཏི་མུག་ལ་གོམས་པའི་མཐུས་གླེན་རྨོང ས་ཀྱི་སྡུག་བསྔལ་ཡོད་པ་གཞིར་བཞག་ལ། བྱེ་བྲག་ཏུ་ཚ་གྲང་བཀྲེས་སྐོམ་ལ་སོགས་དཔག་ཏུ་མེད་ཅིང་། ཕན་ཚུན་སྦྲུལ་དང་ཆུ་སྲིན་སོགས་ཆེ་བས་ཆུང་བ་རྣམས་ཁྱུར་མིད་བྱེད་ཅིང་ཟ། ཆེ་བ་ལའང་རྣམ་གྲངས་མང་སྟེ། ཇི་སྐད་དུ། དཔག་ཚད་བརྒྱ་བའི་ཞེང་ལྡན་པའི། །ཏི་མིད་ཞེས་བྱའི་ཉ་མིད་ཡོད། །དེ་མིད་པ་ཡི་ཉ་མིད་ཡོད། །དེ་ཡང་མིད་པའི་ཉ་མིད་ཡོད། །ཅེས་གསུངས། ཆུང་ངུས་ཆེན་པོ་འབིགས་པ་ལ་སོགས་པའི་གླིང་བར་མུན་ནག་གི་རྒྱ་མཚོ་ན་ཡོད་པ་རྣམས་ནི་རང་གི་ཡན་ལག་བརྐྱང་བསྐུམ་ཙམ་ཡང་མི་མཐོང་ཞིང་། བཤད་མ་ཐག་པ་ལྟར་གཅིག་ལ་གཅིག་གིས་ཟ་བར་བྱེད་པ་ལ་སོགས་པའི་སྡུག་བསྔལ་དཔག་ཏུ་མེད་དོ། །ཁ་འཐོར་བ་ནི། གསོད་པའི་འཇིགས་པ་སོགས། མིས་བདག་ཏུ་མ་བཟུང་བ་བྱ་དང་རི་དྭགས་སོགས་གཅིག་གིས་གཅིག་ཟ་སྟེ། ཁྲས་བྱེའུ། བྱེའུས་འབུ་ཟ་བ་ལ་སོགས་པ་དང་། རྔོན་པ་དང་གཅན་གཟན་ལ་སོགས་པས་གསོད་པའི་འཇིགས་པ་ཆེ་ཞིང་། རྟ་སོགས་མིས་བདག་ཏུ་བཟུང་བ་རྣམས་ལ་བཀོལ་ཞིང་སྤྱོད་པས་ཉམ་ཐག་ལ་བླང་དོར་གྱི་གནས་མི་ཤེས་པར་རྨོངས་པ་སོགས་ཕ་མཐའ་མེད་པའི་སྡུག་བསྔལ་གྱིས་མནར་ཞིང་གཟིར་བའི་ཚུལ་རྣམས་བློ་ལ་བླངས་ནས་སྔར་བཞིན་བསྒོམ། དེར་སྐྱེ་བའི་རྒྱུའམ་ས་བོན་ནི་བླང་དོར་གྱི་གནས་མི་ཤེས་པའི་གཏི་མུག་མུན་པར་འཁྱམས་པ་བདག་གི་བློ་སྣ་མྱུར་དུ་སོགས། ༈ གཉིས་པ་མཐོ་རིས་གསུམ་གྱི་སྡུག་བསྔལ་ནི། ཟག་བཅས་ཀྱི་དགེ་བས་མཐོ་རིས་གསུམ་དུ་སྐྱེས་ཀྱང་། མཁས་འཇུག་རྩ་བ་ལས། འཁོར་བའི་བདེ་བ་ལྟར་སྣང་བ་ཐམས་ཅད་ཀྱང་མཐར་འགྱུར་བའི་སྡུག་བསྔལ་དང་། ཚ་གྲང་བཀྲེས་སྐོམ་ནད་སོགས་ངོ་བོ་ཉིད་ཀྱིས་སྡུག་བསྔལ་བ་སྡུག་བསྔལ་གྱི་སྡུག་བསྔལ་དང་། ཟག་བཅས་ཀྱི་ཕུང་པོ་མཐའ་དག་སྲིད་པ་ཉེ་བར་ལེན་པའི་རྒྱུ་ཡིན་པས་ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ་པོས་བཅིང་བའི་ཕྱིར་རོ། །ཞེས་གསུངས། དེ་འདྲའི་འཁོར་བ་སྡུག་བསྔལ་གྱི་རང་བཞིན་ལ་བདེ་བར་སེམས་པའི་རང་སེམས་ཕྱིན་ཅི་ལོག་འདི། ཇི་ལྟར་སྐྱིད་ཀྱང་མི་ངོམས། ཇི་ལྟར་སྡུག་ཀྱང་མི་སྐྱོ་བས་འཁོར་བ་ལས་མ་ཐར་བར་སྡུག་བསྔལ་གྱི་འདམ་དུ་ཚུད་པའི་རང་མཚང་ནན་ཏན་བསམ་ཞིང་། འཁོར་བ་འདིར་སྐྱེ་ཤིའི་ཁ་བརྒྱུད་པས་སྡུག་བསྔལ་ཚད་མེད་མཐའ་མེད་མྱོང་བ་ལ་ཤིན་ཏུ་ཡིད་དབྱུང་ནས་ད་རེས་གཏན་དུ་བདེ་བའི་གོ་འཕང་བསྒྲུབ་པར་བྱའོ་སྙམ་དུ་བསམ་མོ། །ཞེས་གསུངས། ཐར་ལམ་རབ་གསལ་ལས། བཟོད་པར་དཀའ་བའི་སྡུག་བསྔལ་མང་དང་ལྡན། །བདེ་བར་སྣང་བས་ཡིད་བསླུས་འགྱུར་བ་ཅན། །ཟག་བཅས་ཕུང་པོ་མཐའ་དག་སྡུག་བསྔལ་རྒྱུ། །ཁམས་གསུམ་འཁོར་བ་མེ་ཡི་འོབས་འདྲ་ཡང་། །དེ་ལྟར་མི་ཤེས་ཆགས་ལྡན་བདག་ཅག་ལ། །དཀོན་མཆོག་ཀུན་འདུས་བླ་མས་ཐུགས་རྗེས་གཟིགས། །ངེས་འབྱུང་བསམ་པ་སྐྱེ་བར་བྱིན་གྱིས་རློབས། །ཞེས་གསུངས། དེ་ལྟར་བློ་ལྡོག་རྣམ་པ་བཞིས་བློ་ལེགས་པར་སྦྱངས་ཏེ་དངོས་གཞི་ཐུན་མོང་མ་ཡིན་པའི་སྒོར་འཇུག་པ་ལ་ནི། དབང་བཞི་ཡོངས་སུ་རྫོགས་པ་ཐོབ་ཅིང་དབང་སྲོག་དམ་ཚིག་གིས་བཟུང་སྟེ། ཁྱད་པར་གྱི་སྔོན་འགྲོའི་སྒོ་ནས་སྐུ་གསུམ་དང་སེམས་རིག་གི་སྣ་ཁྲིད་དེ་གཟོད་ཉམས་ཁྲིད་དམར་བཅིང་དུ་བྱེད་པའི་ཚེ། དལ་འབྱོར་གྱི་རྟེན་ལ་སྙིང་པོ་ལེན་ཚུལ་ནི། སངས་རྒྱས་ལས་ཀྱང་འཕྲད་པར་དཀའ་བ་གསང་སྔགས་རྡོ་རྗེ་ཐེག་པ་ཡིན་པས། དེ་ཡང་བསྒྲུབ་བྱ་སངས་རྒྱས་ཀྱི་གོ་འཕང་དེ་ལ་ཆོས་གཟུགས་གཉིས་ཡོད། བསྒྲུབ་ཚུལ་ལ་རིང་ལམ་རྒྱུའི་ཐེག་པ། ཉེ་ལམ་སྔགས་ཀྱི་ཐེག་པ། མྱུར་ལམ་མཐར་ཐུག་འོད་གསལ་རྫོགས་པ་ཆེན་པོའི་ལམ་དང་གསུམ་དུ་བཞེད་ལ། འདིར་ནི་ཆོས་གཟུགས་གཉིས་དངོས་སུ་ལམ་དུ་བྱེད་པ་ཁྲེགས་ཆོད་དང་ཐོད་རྒལ་གཉིས། སྐྱེ་འཆིའི་མཚན་འཛིན་གྱི་རྟོག་པ་དབྱིངས་སུ་གྲོལ་ནས་འཆི་མེད་གཉུག་མའི་སེམས་མངོན་དུ་གྱུར་པ་དང་། འཁོར་བའི་རྒྱུ་ཀུན་འབྱུང་ལས་དང་ཉོན་མོངས་པ་ལམ་བདེན་དུ་ཤར་བ་དང་། འབྲས་བུ་སྡུག་བསྔལ་གྱི་བདེན་པ་འགོག་བདེན་དུ་སད་དེ་དེའི་ངོར་སྣང་སྲིད་དག་པ་རབ་འབྱམས་སུ་ཤར་བ་ནི་རང་རང་གི་མི་མཐུན་ཕྱོགས་ཀྱིས་བརྫི་མི་ནུས་ཤིང་རང་ས་ཟིན་པས་ན་ཐུན་མོང་མ་ཡིན་པའི་བློ་ལྡོག་རྣམ་བཞི་རྒྱུད་ལ་སྐྱེ་བའི་ཚད་ཡང་དག་ཏུ་བཞེད་པ་ཡིན་ལ། དེ་ཡང་བློ་ལྡོག་རྣམ་བཞིས་བློ་སྦྱངས་ཁུལ་བྱས་ཀྱང་ཕུགས་སྙོགས་ས་ཅི་ཡང་མེད་པ་དང་འདི་མི་འདྲ་གསུངས། དེ་ནས་ཐར་བའི་ཕན་ཡོན་དྲན་ཏེ་དེའི་རྒྱུ་འབྲས་ལ་དགའ་སྤྲོ་བསྐྱེད། མཐུན་རྐྱེན་དགེ་བའི་བཤེས་གཉེན་བསྟེན་ཚུལ་ནི། ནོར་ཅི་ཡོད་འབུལ་བའི་སྙིང་ཁམས། ལས་ཆོས་སུ་མཐོང་བའི་དད་པ། བཀའ་ཇི་ལྟར་སྩལ་བའི་སྒྲུབ་པ་གསུམ་དགོས་ཞེས་ཀུན་མཁྱེན་གཉིས་པས་བཞེད་པ་ལྟར་ལེགས་པར་བསྟེན་ནས། གཉིས་པ་རང་སྐྱོན་ངོས་བཟུང་གནང་བའི་མན་ངག་ནི། ཆོས་ལམ་ཞུགས་ཀྱང་སོགས། དམ་ཆོས་འདུལ་བའི་ལམ་ལ་ཞུགས་ཤིང་སོ་ཐར་གྱི་སྡོམ་པ་བླངས་ཀྱང་འཁོར་བར་ཞེན་ལོག་གི་ངེས་འབྱུང་དང་བྲལ་བས་ཉེས་པར་སྤྱོད་པ་ཕམ་ལྟུང་སོགས་ཀྱིས་རང་རྒྱུད་མི་སྡོམ་ཞིང་འཆལ་བ། ཐེག་ཆེན་གྱི་སྒོར་ཞུགས་ནས་བྱང་ཆུབ་མཆོག་ཏུ་སེམས་བསྐྱེད་ཀྱང་གཞན་ཕན་དོན་དུ་གཉེར་བའི་བྱང་ཆུབ་ཀྱི་སེམས་དང་བྲལ་བ། གསང་སྔགས་རྡོ་རྗེའི་ཐེག་པའི་སྨིན་བྱེད་དབང་བཞི་ཟབ་མོ་ལེགས་པར་ཐོབ་ཀྱང་གྲོལ་བྱེད་ཀྱི་ལམ་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་གཉིས་མི་བསྒོམ་པའི་རིགས་ཅན་རྣམས་ནི། ལམ་གོལ་ཏེ་ལོག་པའི་ལམ་དུ་སོང་བ་ཡིན་པས། ལམ་ལོག་པ་འདི་ལས་མྱུར་དུ་བླ་མས་བསྒྲལ་དུ་གསོལ། གནས་ལུགས་ཀྱི་ལྟ་བ་མ་རྟོགས་བཞིན་རྟོགས་རྫུན་གྱིས་ལས་འབྲས་ཁྱད་གསོད་རྔམ་པོ་ཆེ་ངག་ནས་སྨྲ་ཞིང་། ལུས་ཀྱིས་ཐོ་ཅོའི་སྤྱོད་པ་གྲུབ་པའི་ཆ་ལུགས་སུ་བརྫུ་བ་ཅན་དང་། སྒོམ་པ་ཡེངས་ཀྱང་སྤྱི་འབྱམས་གཤིས་ཤོར་གྱི་གོ་ཡུལ་ཙམ་ལ་བརྟེན་ནས། ཡེངས་དང་མ་ཡེངས་ཁྱད་མེད་ལ་སོགས་ཚིག་སྐམ་གྱི་འུད་གོག་ཤིན་ཏུ་ཆེ་བས་ཉམས་མྱོང་ཕྱེ་མར་འཐག་པ་དང་། མ་ཆགས་ཞེན་མེད་ཀྱི་སྤྱོད་པ་ཡོན་ཏན་ཅན་ལས་ནོར་ཞིང་ཆགས་སྲེད་ཀྱི་དབང་གིས་དགེ་སྡིག་གི་བླང་དོར་འཆོལ་ཉོག་ཏུ་སྤྱོད་ཀྱང་རང་སྐྱོན་ལ་མི་སེམས་པའི་ཆོས་དྲེད་འདི་ཉིད་ཆོས་མིན་ལས་བླ་མས་མྱུར་དུ་བསྒྲལ་དུ་གསོལ། སྲིད་པའི་ཡོ་བྱད་ལ་ཆགས་ཤིང་ཤིན་ཏུ་ཞེན་པ་རྣམས་ནི། སང་ནང་པར་འཆི་བའི་དུས་ལ་བབས་པར་ཤེས་ན་ཡང་ད་དུང་གནས་ཁང་ཟས་གོས་ནོར་དང་ལོངས་སྤྱོད་རྣམས་ལ་སྲེད་ཅིང་ཆགས་པ་དང་། གཞོན་པའི་ན་ཚོད་ཡོལ་ནས་རྒས་ཤིང་འཁོགས་པའི་གནས་སུ་གྱུར་ན་ཡང་འཁོར་བ་ལས་ཐར་འདོད་ཀྱི་ངེས་འབྱུང་དང་། སྡུག་བསྔལ་ལ་སྐྱོ་ཤས་བྲལ་བ་དང་། ཐོས་བསམ་སྒོམ་པའི་ཤེས་རབ་ཆུང་ཡང་ཁྲོན་པའི་སྦལ་པ་ལྟར་ཕྲན་བུ་རེ་ཤེས་པ་དེ་ཡོན་ཏན་ཅན་དུ་རློམ་སྟེ་ང་རྒྱལ་བྱེད་པ་དེ་ནི། མ་རིག་པའི་དབང་དུ་སོང་བ་ཡིན་པས་འདི་ལས་བླ་མས་བསྒྲལ་དུ་གསོལ། ཆོས་པར་ཁས་འཆེས་པ་འགའ་ཞིག་གིས་སེམས་ཆགས་སྡང་རྨོངས་སོགས་སྐྱེ་བའི་རྐྱེན་ཁར་འཆོར་བ་ཡང་མི་ཤེས་པར་འདུ་འཛི་དང་རྣམ་གཡེང་གི་དབང་དུ་སོང་ནས་བདེ་སྡུག་རོ་སྙོམས་མི་ནུས་བཞིན་དུ་གནས་སྐོར་སོགས་མཆོག་ཡིན་སེམས་པ་ནི། ཀུན་མཁྱེན་འཇིགས་མེད་གླིང་པས། ཕུགས་སྤྲང་སྙོགས་འཁྱེར་བའི་སྔ་ལྟས་སུ་ཤར་བས། ཞེས་གསུངས་པ་ལྟར་རོ། །ལུས་དབེན་པ་མི་མེད་ཀྱི་གནས་ལ་བརྟེན་ནས་ཡུན་རིང་བསྒོམ་ལོ་བྱས་ཀྱང་། སེམས་མ་རིག་བདེན་འཛིན་གྱིས་དྲངས་པའི་ཉོན་མོངས་པའི་རྟོག་ཚོགས་ལས་དབེན་པ་མ་ཐོབ་པར་རང་རྒྱུད་ཤིང་སྐམ་ལྟར་དུ་རེངས་ཤིང་གྱོང་བའོ། །ཕྱིའི་ཀུན་སྤྱོད་འཇམ་ཞིང་དུལ་བར་བསྟན་ནས་གཞན་རྒྱུད་འདུལ་བའི་དམ་ཆོས་སྨྲ་བར་བྱེད་ཁུལ་བྱས་ན་ཡང་། ནང་རང་རྒྱུད་ཀྱི་ཆགས་སྡང་གྲ་མ་ཉམས་ཤིང་མ་ཞིག་པའི་སྤྱོད་པ་བྱི་ལའི་སྟོན་པ་ལྟ་བུ་འཇིག་རྟེན་ཆོས་བརྒྱད་ཀྱི་དབང་དུ་སོང་བ་སྟེ། ཆོས་བརྒྱད་ནི། མཁས་འཇུག་སྡོམ་བྱང་ལས། རྙེད་བདེ་གྲགས་བསྟོད་འདོད་གྱུར་ཅིང་། །མ་རྙེད་སྡུག་བསྔལ་མི་སྙན་དང་། །སྨད་པ་དག་ནི་མི་འདོད་པ། །འཇིག་རྟེན་ཆོས་བརྒྱད་ཅེས་སུ་བཤད། །ཅེས་གསུངས་པ་ལྟར། འཇིག་རྟེན་ཆོས་བརྒྱད་ཀྱི་དབང་དུ་གྱུར་པ་འདི་ལས་མྱུར་དུ་བླ་མ་ཐུགས་རྗེ་ཅན་གྱིས་བསྒྲལ་དུ་གསོལ། མ་རིག་བདག་ཏུ་འཛིན་པའི་གཉིད་འཐུག་པོ་འདི་ལས་མྱུར་དུ་སད་པར་བྱེད་པའི་ཐབས་བླ་མས་བསྟན་དུ་གསོལ། རྒྱུ་མ་རིག་པ་ལས་བྱུང་བའི་ཁམས་གསུམ་འཁོར་བའི་བཙོན་ར་རྒྱལ་པོའི་ཁྲི་མུན་ལྟ་བུ་ལས་ཉོན་ལྕགས་སྒྲོག་གིས་དམ་དུ་བསྡམས་པ་འདི་ལས་མྱུར་དུ་དབྱུང་ཞིང་ཐར་བ་དང་ཐམས་ཅད་མཁྱེན་པའི་གོ་འཕང་ལ་འགོད་པར་མཛད་དུ་གསོལ། ཞེས་སྐྱབས་གནས་ཀུན་འདུས་ཀྱི་ངོ་བོ་དཔལ་མགོན་བླ་མ་དམ་པ་ཁྱེད་མཁྱེན་ནོ་སྙམ་དུ་བསམ་ལ་འབོད་པ་དྲག་པོས་ཐུགས་རྗེ་སློང་བར་བྱའོ། །གཉིས་པ་ཐུན་མོང་མ་ཡིན་པའི་སྔོན་འགྲོ་ལའང་དྲུག་ལས། དང་པོ་སྐྱབས་སུ་འགྲོ་བ་ལ་རྒྱུ་སྐྱབས་དང་འབྲས་སྐྱབས། སྐྱབས་སུ་འགྲོ་ཚུལ་དང་གཉིས། དང་པོ་ནི། སེམས་ཉིད་ངལ་གསོའི་འགྲེལ་བ་ལས། དེའང་མཚན་ཉིད་ཀྱི་ཐེག་པས་ཆོས་སྐུ་མཐར་ཐུག་རང་གི་རྒྱུད་ལ་ཐོབ་པར་འདོད་པ་ནི་འབྲས་བུའི་སྐྱབས་འགྲོ་ཡིན་ལ་དེ་མ་ཐོབ་ཀྱི་བར་དུ་དཀོན་མཆོག་གསུམ་ལ་ལམ་གྱི་སྐྱེལ་མར་སྐྱབས་སུ་འགྲོ་བ་ནི་དེ་ཐོབ་པའི་རྒྱུ་བྱེད་པས་རྒྱུའི་སྐྱབས་འགྲོ་ཞེས་བྱའོ། །ཞེས་དང་། གསང་སྔགས་པས་ནི་རང་ལ་ཡོད་པའི་སེམས་ཉིད་སངས་རྒྱས་སུ་ད་ལྟ་རང་ཆས་སུ་གནས་པ་མངོན་དུ་མཐོང་བར་འདོད་ནས། ཐུན་མོང་གི་ཡུལ་ཕྱི་རོལ་གྱི་དཀོན་མཆོག་གསུམ་ལ་སྐྱབས་སུ་འགྲོ་ཞིང་། ཐུན་མོང་མ་ཡིན་པ་རང་གི་སེམས་ཉིད་གདོད་མ་ནས་མ་སྐྱེས་པའི་ངང་དུ་མཉམ་པར་འཇོག་གོ། །དེའང་དཀྱིལ་འཁོར་སོ་སོའི་དཀོན་མཆོག་གསུམ་དང་། བསྟན་པ་སྤྱིའི་དཀོན་མཆོག་གསུམ་གཉིས་ཀ་རྒྱུའི་སྐྱབས་ཡུལ་དུ་འདོད་ལ། དེ་ལ་སྐྱབས་སུ་འགྲོ་བ་ནི་རྒྱུའི་སྐྱབས་འགྲོའོ། །རང་གི་སེམས་ཉིད་རང་བྱུང་གི་ཡེ་ཤེས་དཀོན་མཆོག་གསུམ་ཡེ་ནས་གནས་པ་ནི་འབྲས་བུའི་སྐྱབས་ཡུལ་ཏེ། དེ་ལ་བླང་དོར་དང་བཅོས་བསླད་མེད་པར་རྩེ་གཅིག་ཏུ་འཇོག་པ་ནི་འབྲས་བུའི་སྐྱབས་འགྲོའོ། །ཞེས་གསུངས། དེ་ལྟར་གཉུག་མའི་སེམས་དེ་ཉིད་གདོད་ནས་འབྲས་བུའི་དཀོན་མཆོག་གསུམ་གྱི་བདག་ཉིད་དུ་བཞུགས་པ་ཡིན་ལ། དེ་རྒྱུའི་དཀོན་མཆོག་གསུམ་གྱི་ཐུགས་རྗེ་ལ་བརྟེན་ནས་སད་ཅིང་རྟོགས་པར་བྱས་ན་ཡིད་ཤེས་བདེ་མྱུར་དུ་སྐྱོབས་པས་མཚན་འཛིན་གྱི་རྟོག་ཚོགས་ཐམས་ཅད་འོད་གསལ་གཉུག་མའི་ཀློང་དུ་བག་ཆགས་བསོག་ལོང་མེད་པར་རང་གྲོལ་དུ་འགྲོ་བའོ། །གཉིས་པ་སྐྱབས་སུ་འགྲོ་ཚུལ་ལ། ཡུལ་གྱི་ཁྱད་པར་ནི། དཀོན་མཆོག་གསུམ་དངོས་སོགས། ཐུན་མོང་ཐེག་པའི་ལུགས་ལ། སྐུ་བཞི་ཡེ་ཤེས་ལྔ་ལྡན་གྱི་སངས་རྒྱས་ལ་སྟོན་པ། ལུང་དང་རྟོགས་པའི་བདག་ཉིད་ཀྱི་ཆོས་ལ་ལམ། རིག་གྲོལ་ཕྱིར་མི་ལྡོག་པའི་དགེ་འདུན་ལ་ལམ་སྒྲུབ་པའི་གྲོགས་སུ་མོས་ཏེ་དཀོན་མཆོག་གསུམ་ལ་ལམ་གྱི་སྐྱེལ་མ་ལྟ་བུར་འགྲོ་ཞིང་། མ་འོངས་པ་ན་རང་རྒྱུད་ལ་དེ་གསུམ་དངོས་སུ་གྲུབ་པར་འདོད་པས་སྐྱབས་སུ་འགྲོ་བ་དང་། ཐུན་མོང་མ་ཡིན་པ་གསང་སྔགས་སྤྱིའི་ཚུལ་གྱིས། སྤང་རྟོགས་མཐར་ཕྱིན་པ་བདེ་བར་གཤེགས་པའི་ངོ་བོ་ལས་ཕྱེ་བའི། བྱིན་རླབས་ཀྱི་རྩ་བ་བླ་མ་ལ་སྒོ་གསུམ་འབུལ། དངོས་གྲུབ་ཀྱི་རྩ་བ་ཆོས་སྐུ་ཞི་བའི་ངང་ལས་གཟུགས་སྐུ་ཞི་ཁྲོ་རབ་འབྱམས་སུ་ཤར་བའི་ཡི་དམ་ལ་བསྟེན། བར་ཆད་སེལ་བའི་རྩ་བ་ཆོས་ཉིད་སྐྱེ་བ་མེད་པའི་མཁའ་ལ་འགག་མེད་ཐུགས་རྗེའི་ཤུགས་ཀྱིས་འགྲོ་བའི་ཡེ་ཤེས་མཁའ་འགྲོ་ལ་གྲོགས་ཀྱི་ཚུལ་དུ་བྱས་ནས་དེ་ལྟ་བུའི་རྩ་བ་གསུམ་ལ་སྐྱབས་སུ་འགྲོ་བ་དང་། ཁྱད་པར་ཐབས་མཆོག་རྡོ་རྗེ་སྙིང་པོའི་ལུགས་ཀྱིས། སྐུ་བསྒྲུབ་པར་བྱ་བའི་རྟེན་རྩ་ཡི་དྭངས་མ་ཆེན་པོ་སྤྲུལ་སྐུར་བསྟེན། གསུང་བསྒྲུབ་པར་བྱ་བའི་རྟེན་མི་ཤིགས་རླུང་ལྔ་ལོངས་སྐུར་སྦྱོང་། ཐུགས་བསྒྲུབ་པར་བྱ་བའི་རྟེན་ཐིག་ལེའི་རང་བཞིན་ཆོས་སྐུར་དག་པའི་མྱུར་ལམ་ལ་སྐྱབས་སུ་འགྲོ་བའོ། །དེ་ལྟ་བུའི་རྡོ་རྗེའི་ལུས་ཀྱི་དྭངས་མའི་རྩ་རླུང་ཐིག་ལེ་ཁྱད་པར་ཅན་དེ་ལ། བརྟེན་པ་འགྱུར་མེད་ཀྱི་བདེ་བ་ཆེན་པོ་དང་། རྣམ་ཀུན་མཆོག་ལྡན་གྱི་སྟོང་པ་ཆེན་པོ་ཟུང་འཇུག་འདུ་འབྲལ་མེད་པའི་འོད་གསལ་བའི་ཐིག་ལེ་ཆེན་པོའི་རྩལ་ལས་ཤར་བའི། རྩ་རླུང་ཐིག་ལེ་ཕྲ་རགས་དང་སྙིགས་མར་གྱུར་པ་ཐམས་ཅད་ཐབས་ཀྱིས་ཟིན་ན་དག་པ་ཡེ་ཤེས་ཀྱི་སྣང་བ་དང་། ལམ་དུ་མ་ལོང་ན་མ་དག་འཁྲུལ་བའི་སྣང་བ་འཆར་བ་ཡིན་ལ། དེ་ལྟར་རྡོ་རྗེའི་ལུས་ཀྱི་གནས་ལུགས་དེ་ཉིད་རྒྱུད་ལུང་མན་ངག་གསུམ་ནས་ཇི་སྐད་བཤད་པ་བཞིན་ཤེས་པ་གལ་ཆེ། མཐར་ཐུག་བསླུ་བ་མེད་པ་གནས་ལུགས་རྡོ་རྗེའི་སྐྱབས་འགྲོ་ནི། སྐྱབས་ཡུལ་དེ་དག་གི་ཐུགས་རྒྱུད་ལ་བཞུགས་པའི་གཉིས་མེད་རང་བྱུང་གི་ཡེ་ཤེས་བྱང་ཆུབ་ཀྱི་སེམས་ངོ་བོ་སྟོང་པ་ཆོས་ཀྱི་དབྱིངས་རྣམ་ཀུན་མཆོག་ལྡན་གྱི་སྟོང་ཉིད། རང་བཞིན་གསལ་བ་ལྷུན་གྱིས་གྲུབ་པའི་ཡེ་ཤེས། ཐུགས་རྗེ་ཀུན་ཁྱབ་ཀྱི་ཡེ་ཤེས་ཏེ་དོན་གྱི་དཀྱིལ་འཁོར་ཆེན་པོ་རང་རྒྱུད་ལ་བསྒྲུབ་བྱར་བྱེད་པ་དང་། དེ་ཡང་ངོ་བོ་སྟོང་པ་ཆོས་སྐུ་དང་། བླ་མ། སངས་རྒྱས་དཀོན་མཆོག །རང་བཞིན་གསལ་བ་ལོངས་སྐུ་དང་། ཡི་དམ། ཆོས་དཀོན་མཆོག །ཐུགས་རྗེ་ཀུན་ཁྱབ་སྤྲུལ་སྐུ་དང་། མཁའ་འགྲོ། དགེ་འདུན་དཀོན་མཆོག་ཡིན་གསུངས། དེ་ཡང་ཁ་ཅིག་ན་རེ། སངས་རྒྱས་ཆོས་དང་དགེ་འདུན་གསུམ་ལ། གསང་སྔགས་ཀྱི་སྐྱབས་གནས་ཐུན་མོང་མ་ཡིན་པ་རྣམས་མ་འདུས་སོ་ཞེ་ན། དེ་ནི་འདིར་འདུ་སྟེ། བླ་མ་ནི་སྐྱེ་འཕགས་གང་རུང་ལས་མ་འདས་པའི་ཕྱིར་སངས་རྒྱས་དང་དགེ་འདུན་གང་རུང་ལས་མི་འདའ་ལ། ཡི་དམ་ནི་སྤྱིར་བཏང་ཡེ་ཤེས་པ་གཅིག་ཡིན་པར་འདོད་དགོས་ལ། བྱེ་བྲག་རྣམ་འགྱུར་གྱི་སྒོ་ནས་ཞི་ཁྲོ་གང་རུང་ལས་མ་འདས་ཏེ་དེས་ན་དེ་ནི་སངས་རྒྱས་སུ་འདུའོ། །དཔའ་བོ་མཁའ་འགྲོ་ནི་རིག་འཛིན་ནང་གི་དགེ་འདུན་དུ་གཤིན་རྗེ་གཤེད་ཀྱི་རྒྱུད་ལ་སོགས་པ་ནས་གསལ་པོར་གསུངས་ཕྱིར་དེར་འདུའོ། ཁྱད་པར་རྩ་བ་གསུམ་ལྟ་བུར་མཚོན་ན། སྤྱིར་བཏང་བླ་མ་རྣམས་སངས་རྒྱས་དང་དགེ་འདུན་གང་རུང་ལས་མ་འདས་ཀྱང་། བྱེ་བྲག་རང་ལ་སྨིན་གྲོལ་གྱི་གདམས་པ་དངོས་སུ་གནང་བའི་བླ་མ་དེ་ལྷག་པར་བཀའ་དྲིན་ཤིན་ཏུ་ཆེ་བས། དེ་ཉིད་བྱིན་རླབས་ཀྱི་རྩ་བར་ཤེས་པའི་ཕྱིར་སྐྱབས་སུ་འགྲོ་བ་དང་། ཡི་དམ་ཞི་ཁྲོ་ཐམས་ཅད་སངས་རྒྱས་ལས་མ་འདས་ཀྱང་། རང་གི་མེ་ཏོག་གང་ལ་ཕོག་པའི་ཚེ་རབས་སྔོན་གྱི་ལས་འབྲེལ་ཡོད་པའི་ལྷ་དེ། དངོས་གྲུབ་ཐམས་ཅད་ཀྱི་རྩ་བར་ཤེས་ནས་ལྷག་པའི་ལྷར་འཛིན་པ་དང་། དཔའ་བོ་མཁའ་འགྲོ་ཐམས་ཅད་རིག་འཛིན་ནང་གི་དགེ་འདུན་དུ་ཤེས་ནས་སྐྱབས་སུ་སོང་བ་ཡིན་ཡང་། རང་ལ་ལྷག་པར་ཉེ་ཞིང་འགོ་བ་དེ་ཉིད་བར་ཆད་སེལ་བའི་རྩ་བར་ཤེས་ནས་བསྒྲུབ་ཅིང་མཆོད་པ་སྟེ། འདི་དག་ནི་སྤྱི་ལས་བྱེ་བྲག་ཏུ་བྱས་པའོ། །དེ་ཡང་སྐྱེས་བུ་ཆེན་པོའི་བློས་དུས་འདི་ནས་བཟུང་སྟེ་བླ་མེད་བྱང་ཆུབ་སྙིང་པོའི་གོ་འཕང་མ་ཐོབ་ཀྱི་བར་དུ་སྐྱབས་སུ་མཆིའོ་སྙམ་སྟེ། སྐྱབས་སུ་འགྲོ་བའི་ཡུལ་ཚོགས་ཞིང་གསལ་འདེབས་པ་ནི། རང་ཉིད་གང་དུ་འདུག་པའི་ས་ཕྱོགས་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བའི་གཞིར། དཔག་བསམ་ལྗོན་ཤིང་ཡལ་ག་ལྔ་པ། ལོ་འདབ་དང་མེ་ཏོག་འབྲས་བུ་ཕུན་སུམ་ཚོགས་པ་ལ་རིན་པོ་ཆེའི་འཕྱང་འཕྲུལ་དྲིལ་གཡེར་ལ་སོགས་པས་རྣམ་པར་བརྒྱན་པ་ནམ་མཁའི་དབྱིངས་ཀུན་ཁྱབ་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་གདན་ལ། སངས་རྒྱས་ཀུན་འདུས་ཀྱི་ངོ་བོ་རྩ་བའི་བླ་མ་ཨོ་རྒྱན་རྡོ་རྗེ་འཆང་སྐུ་མདོག་སྔོན་པོ་ཞབས་དྲུང་རིན་པོ་ཆེས། སྐྱབས་འགྲོའི་སྐབས་འདིར་སྐུ་མདོག་སྔོན་པོར་གསུངས་པ་ཀུན་མཁྱེན་རང་ཉིད་ཀྱི་ཞལ་རྒྱུན་ལྟར་ཡིན་གསུངས། དེ་ནི་བླ་མ་གསང་འདུས་ལས། མཐིང་ནག་ཞལ་གཅིག་ཕྱག་གཉིས་པ༔ གཅེར་བུ་སྤྱན་གསུམ་རུས་རྒྱན་ཅན༔ ཕྱག་གཡས་རྡོ་རྗེ་ཐུགས་ཀར་འཛིན༔ ཕྱག་གཡོན་དྲིལ་བུ་ཡུམ་ལ་འཁྱུད༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ དེ་ཡི་པང་གཡོན་རིག་མ་ནི༔ ཡེ་ཤེས་མཁའ་འགྲོ་མཚོ་རྒྱལ་མ༔ བཅུ་དྲུག་ལོན་པའི་གཞོན་ཚུལ་ཅན༔ ཞེས་སོགས་གསུངས། མཆན། རྡོ་རྗེ་དང་དྲིལ་བུ་འཛིན་པ། ཡུམ་མཚོ་རྒྱལ་དཀར་མོ་གྲི་གུག་ཐོད་པ་འཛིན་པ་དང་མཉམ་པར་སྦྱོར་བ། དར་དང་རུས་པའི་རྒྱན་གྱིས་བརྒྱན་ཅིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་དབུ་གཙུག་ཏུ་རྫོགས་ཆེན་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་ཤིང་། གཞན་ཡང་རྩ་བརྒྱུད་ཀྱི་བླ་མ་དམ་པ་རྣམས་དང་། རྒྱུད་སྡེ་ཆེན་པོ་དྲུག་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས། གནས་གསུམ་གྱི་དཔའ་བོ་མཁའ་འགྲོ་བསམ་གྱིས་མི་ཁྱབ་པས་མཐའ་ནས་བསྐོར་བ། མདུན་གྱི་ཡལ་ག་ལ་སངས་རྒྱས་ཤཱཀྱ་ཐུབ་པ་སོགས་དུས་ གསུམ་གྱི་སངས་རྒྱས་སྤྲུལ་སྐུའི་རྣམ་པ་ཅན་རྣམས་དང་། གཡས་ཀྱི་ཡལ་གར་ཉེ་བའི་སྲས་བརྒྱད ་ལ་སོགས་པ་ཐེག་པ་ཆེན་པོའི་དགེ་འདུན། གཡོན་གྱི་ཡལ་ག་ལ་ཤཱ་རིའི་བུ་དང་མོའུ་གལ་གྱི་བུ་ལ་སོགས་པ་ཉན་ཐོས་ཀྱི་དགེ་འདུན་འཕགས་པའི་ཚོགས། རྒྱབ་ཀྱི་ཡལ་གར་ཆོས་དཀོན་མཆོག་གླེགས་བམ་བརྩེགས་པའི་རྣམ་པ་ཅན་ཁ་དོག་དམར་པོ་ཨཱ་ལི་ཀཱ་ལིའི་རང་སྒྲ་སྒྲོགས་པ། དེ་དག་གི་བར་མཚམས་ཐམས་ཅད་ཡེ་ཤེས་དང་ལས་ལས་གྲུབ་པའི་ཆོས་སྲུང་དམ་ཅན་རྒྱ་མཚོའི་ཚོགས་ཀྱིས་བར་མེད་དུ་གང་བ། འདིར་ལས་ལས་གྲུབ་པ་ཞེས་པ་ནི། འཇིག་རྟེན་ལས་འདས་ཀྱང་འཇིག་རྟེན་པའི་སྐྱེ་རྒྱུད་ལྟར་ལས་ཉོན་ལས་གྲུབ་པའི་ལུས་དེ་ཉིད་མ་སྤངས་བར་ད་དུང་འཇིག་རྟེན་པའི་རྣམ་པར་སྣང་བ་དབང་ཕྱུག་ཉེར་བརྒྱད་ལྟ་བུ་སྟེ། དཔེར་ན་རྡོ་རྗེ་མི་ཡི་སྲིན་མོ་མགྲིན་བཅུའི་ཆུང་མ་བྱེད་དུས་སྲིན་ཞལ་ཡིན་པ་ལས་རུ་ཏྲས་འཕྲོག་པ་ན་ཁོ་མགོ་བརྙན་ལ་དགའ་བས་སྲིན་ཞལ་གཡག་གདོང་དུ་ཞལ་བསྒྱུར་བ་སོགས་སོ་གསུངས། ཐམས་ཅད་ཀྱང་མཁྱེན་བརྩེ་ནུས་གསུམ་གྱི་ཡོན་ཏན་དཔག་ཏུ་མེད་པས་བདག་ཉིད་ལ་རྗེས་སུ་བརྩེ་ཞིང་འདྲེན་པའི་དེད་དཔོན་ཆེན་པོར་མངོན་སུམ་དུ་བཞུགས་པར་བསམ་ལ། དེའི་མདུན་དུ་རང་ཉིད། རང་གི་མདུན་གཡས་སུ་ཕ། གཡོན་དུ་མ། མདུན་དུ་གནོད་བྱེད། མཐའ་བསྐོར་ཀུན་ཏུ་རིགས་དྲུག་གི་སེམས་ཅན་ཐམས་ཅད་ལུས་གུས་པའི་ཐལ་མོ་སྦྱར། ངག་ནས་སྐྱབས་འགྲོའི་ཚིག་འུར་དིར་གྱིས་བརྗོད། ཡིད་ཀྱིས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་མ་ལ་འདྲེན་པ། ཡི་དམ་དང་སངས་རྒྱས་ལ་སྟོན་པ། ཆོས་ལ་ལམ། མཁའ་འགྲོ་ཆོས་སྐྱོང་དགེ་འདུན་ལ་ལམ་སྒྲུབ་པའི་ཟླ་གྲོགས་ཞུ་བའི་ཚུལ་གྱིས་བདག་ཅག་རྣམས་ཁྱེད་ལ་བརྟེན། ཁྱེད་ལ་འབུལ། ཁྱེད་ལས་གཞན་པའི་སྐྱབས་དང་རེ་ས་མེད་པས་ཅི་མཛད་ཁྱེད་མཁྱེན་སྙམ་པའི་གདུང་བ་དྲག་པོས་སྐྱབས་སུ་འགྲོ་བར་མོས་ཏེ་སྐྱབས་འགྲོ་ཅི་འགྲུབ་ཏུ་བྱ། མཐར་སྐྱབས་ཡུལ་རྣམས་ཀྱི་ཐུགས་ཀ་ནས་འོད་ཟེར་འཕྲོས། བདག་དང་སེམས་ཅན་ཐམས་ཅད་ཀྱི་ལུས་སེམས་ལ་ཞུགས། སྒྲིབ་གཉིས་བག་ཆགས་དང་བཅས་པ་ཐམས་ཅད་དག །ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ལ་སོགས་པ་གོང་དུ་འཕེལ་ཞིང་རྒྱས་པར་བསམ་ལ་སེམས་འཛིན་མེད་ཀྱི་ངང་དུ་ཅུང་ཟད་རེ་མཉམ་པར་བཞག་གོ ཞེས་གསུངས། ཡང་ན། དཔལ་སྤྲུལ་རིན་པོ་ཆེའི་སྔོན་འགྲོའི་དམིགས་རིམ་བསྡུས་པ་ལས། ཐུན་མཐར། བདག་དང་སེམས་ཅན་ཐམས་ཅད་བྱ་ཁྱུ་འུར་རྡོས་དཀྲོགས་པ་ལྟར་འུར་དིར་གྱིས་སྐྱབས་ཡུལ་ལྷ་ཚོགས་རྣམས་ལ་ཐིམ། སྐྱབས་ཡུལ་རྣམས་ཀྱང་རིམ་པར་འོད་དུ་ཞུ་ནས་མདུན་གྱི་སངས་རྒྱས་ཐམས་ཅད་ཤཱཀྱ་ཐུབ་པ་ལ་ཐིམ། གཡས་ཀྱི་བྱང་སེམས་ཐམས་ཅད་འཕགས་པ་སྤྱན་རས་གཟིགས་ལ་ཐིམ། གཡོན་གྱི་ཉན་རང་འཕགས་པའི་དགེ་འདུན་ཐམས་ཅད་ཤཱ་རིའི་བུ་ལ་ཐིམ། དེ་ཐམས་ཅད་རྒྱབ་ཀྱི་ཆོས་ལ་ཐིམ། ཆོས་དཀོན་མཆོག་ཐམས་ཅད་ཀྱང་ཨོ་རྒྱན་ཆེན་པོ་ལ་ཐིམ། མཐའ་བསྐོར་གྱི་བླ་མ་ཡི་དམ་ཆོས་སྐྱོང་སྲུང་མའི་ཚོགས་དང་བཅས་པ་ཐམས་ཅད་ཀྱང་ཨོ་རྒྱན་ཆེན་པོ་ལ་ཐིམ། བླ་མ་ཡང་མཐའ་ནས་རིམ་པར་འོད་དུ་ཡལ་ཏེ་མི་དམིགས་པའི་ངང་ལ་དར་ཅིག་མཉམ་པར་བཞག ཅེས་གསུངས། འདི་ནི་དོན་དམ་པའི་སྐྱབས་འགྲོའམ་མཐར་ཐུག་སྔགས་ཀྱི་འབྲས་སྐྱབས་ཡིན་ཞེས་པའང་ཡོད། མི་ཕམ་རིན་པོ་ཆེས། ཐུན་མཐར་སྐྱབས་ཡུལ་འོད་དུ་ཞུ། རང་སོགས་སེམས་ཅན་ཀུན་ལ་ཐིམ་པས་ཐམས་ཅད་སངས་རྒྱས་པར་བསམ་ཞིང་དགེ་བ་བསྔོ་བར་བྱའོ། །ཞེས་གསུངས། བསླབ་བྱ་དང་ཕན་ཡོན་གཞན་ལས་ཤེས་པར་བྱའོ། །

༈ གཉིས་པ་སེམས་བསྐྱེད་ནི། རྒྱས་པར་ཐེག་ཆེན་ལམ་གྱི་ཁྱད་པར་འབྱེད་ཆོས་སེམས་བསྐྱེད་ཀྱི་ཕན་ཡོན། སྡོམ་པ་ལེན་ཚུལ། བསླབ་བྱ་སོགས་ཞིབ་ཏུ་ཤེས་པར་བྱ། ཚོགས་ཞིང་སྔར་ལྟར་གསལ་བའི་སྤྱན་སྔར་རང་གཞན་ཀུན་འཁོད་པར་དམིགས་ནས། སེམས་བསྐྱེད་ལེན་པའི་དམ་བཅའ་བརྟན་པོས་སེམས་བསྐྱེད་ཀྱི་ཚིག །ཧོཿ སྣ་ཚོགས་སྣང་བ་སོགས། ཞེས་ལན་གསུམ་སོགས་ཇི་ལྟར་རིགས་པ་བརྗོད། མགོ་འདྲེན་བྱེད་ཧོཿ ཞེས་པ་ནི། ངོ་མཚར་བའི་ཚིག་ཡིན་ཏེ། ངོ་ཅི་ཞིག་མཚར་ན། སེམས་ཅན་ཐམས་ཅད་རང་རིག་འོད་གསལ་བའི་དབྱིངས་སུ་ངལ་གསོ་བའི་ཕྱིར་དུ་ཚད་མེད་བཞི་ཡི་ངང་དུ་སེམས་བསྐྱེད་པ་འདི་ངོ་མཚར་ཞེས་བཞེད་པ་དང་། ཁ་ཅིག་གིས་སྙིང་རྗེ་བའི་ཚིག་སྟེ། སྙིང་རྗེ་བའི་ཡུལ་སྡུག་བསྔལ་བའི་སེམས་ཅན་རྣམས་སོ་ཞེས་འདོད། ཡང་ཁ་ཅིག་གིས་སྐྱོ་བའི་ཚིག་ཏུ་འདོད་པའང་ཡོད་དོ། །སེམས་ཅན་རང་རང་གི་སྔོན་ལས་སྣ་ཚོགས་བསགས་པའི་དབང་གིས་བདེ་སྡུག་སྣ་ཚོགས་པ་རང་སེམས་ཕྱིན་ཅི་ལོག་གི་སྣང་བ་འདི་དག་དཔེ་ཆུ་ནང་གི་ཟླ་བའི་གཟུགས་བརྙན་སྣང་ཡང་དཔྱད་ན་བདེན་པར་མ་གྲུབ་པ་ལྟར། ཡུལ་དང་ཡུལ་ཅན་གཉིས་ཀ་ཐོག་མའི་གཞི་དུས་དང་། མཐར་ཕྱིན་འབྲས་དུས་ན་མེད་པས་གློ་བུར་འཁྲུལ་བའི་སྣང་བ་རྫུན་པ་བསླུ་བའི་ཆོས་ཅན་གྱི་སྣང་བ་འདི་དག་ཀྱང་། ལས་སྣ་ཚོགས་པའི་རྐྱེན་གྱིས་སོ་སོར་རིས་སུ་བྲིས་པ་ལྟ་བུ་སྟེ། ལས་ནི་རི་མོ་མཁན་དང་འདྲ། གསུངས་པ་བཞིན་ཆུ་གཅིག་པོ་ལའང་རིགས་དྲུག་གི་སེམས་ཅན་རྣམས་ཀྱིས་མཐོང་བ་མི་འདྲ་བའི་སྣང་བ་རྣམས་ཀྱང་ལས་དང་བག་ཆགས་ལས་བྱུང་བའི་གཟུང་འཛིན་འཁྲུལ་བའི་བློ་མ་ཟད་ཀྱི་བར་འགོག་ཏུ་མེད་པར་འཁོར་བའི་འཁོར་ལོ་རྒྱུན་མ་ཆད་པར་ལུ་གུ་རྒྱུད་དུ་འཁྱམས་པའི་འགྲོ་བ་འདི་དག་ཐམས་ཅད་ཀྱི་ལས་སྣང་བག་ཆགས་དང་བཅས་པ་བྲལ་ནས་རང་རང་གི་རིག་པའི་ཡེ་ཤེས་འོད་གསལ་གྱི་དབྱིངས་སུ་སོན་ཏེ། མི་དགེ་བའི་ལས་སྣ་ཚོགས་ཀྱིས་ངལ་ཞིང་དུབ་པ་རྣམས་སངས་རྒྱས་ཀྱི་གོ་འཕང་ལ་དབུགས་འབྱིན་གྱི་ངལ་གསོ་ཐོབ་པར་བྱ་བའི་ཕྱིར། སྡུག་བསྔལ་རྒྱུ་འབྲས་གཉིས་དང་བྲལ་འདོད་ཀྱི་སྙིང་རྗེ་ཚད་མེད། དེའི་རྒྱུ་ཉེ་རིང་ཆགས་སྡང་གཉིས་དང་བྲལ་བར་འདོད་པའི་བློ་ནི་བཏང་སྙོམས་ཚད་མེད། བདེ་བ་རྒྱུ་འབྲས་གཉིས་དང་ལྡན་པར་འདོད་པ་བྱམས་པ་ཚད་མེད། བདེ་བ་རྒྱུ་འབྲས་གཉིས་དང་མི་འབྲལ་བར་འདོད་པ་དགའ་བ་ཚད་མེད་དེ། ཚད་མེད་སྔ་མ་གཉིས་ཀྱི་སྙིང་རྗེའི་མཐུས་མཁའ་ཁྱབ་ཀྱི་སེམས་ཅན་ལ་དམིགས་པ་དང་། ཕྱི་མ་གཉིས་ཀྱི་འཇོག་ཚུལ་ནི་བླ་ན་མེད་པའི་བདེ་བ་འོད་གསལ་ཆོས་སྐུ་ཐོབ་འདོད་ཀྱི་བྱམས་པ་ཚད་མེད། དེ་དང་མི་འབྲལ་བར་འདོད་པ་དགའ་བ་ཚད་མེད་གཉིས་ནི་ཤེས་རབ་སྟོབས་ཀྱིས་རྫོགས་པའི་བྱང་ཆུབ་ལ་དམིགས་པ་སྟེ། དེ་ལྟ་བུའི་ཚད་མེད་རྣམ་པ་བཞི་ཡིས་བློ་ཡང་ཡང་སྦྱངས་པའི་མཐར། དེའི་ངང་ནས་སེམས་ཅན་ཐམས་ཅད་རྣམ་གྲོལ་གཏན་གྱི་བདེ་བ་ལ་འགོད་པའི་སླད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཅི་ནས་ཀྱང་ཐོབ་ངེས་པ་ཞིག་བྱའོ་སྙམ་པ་སྨོན་པ་དང་། དེའི་ཆེད་དུ་ལམ་ཟབ་མོ་འདི་ཉིད་ཀྱིས་མཚོན་ཏེ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བསླབས་ནས་འཁོར་བ་ན་སེམས་ཅན་གཅིག་ཀྱང་མི་གནས་པ་དེ་ཙམ་དུ་བརྩོན་འགྲུས་བརྩམ་པར་བྱའོ་སྙམ་པ་འཇུག་པ་སེམས་བསྐྱེད་དོ། །སྤྲོ་ན་བར་འདིར་བདག་གཞན་མཉམ་བརྗེའི་བློ་སྦྱོང་དང་། ཁྱད་པར་དབུགས་འགྲོ་འོང་དང་བསྟུན་ཏེ་བདེ་སྡུག་གཏོང་ལེན་གྱི་དམིགས་པའང་ཉམས་སུ་བླང་ཞིང་། བདག་མེད་རྣམ་གཉིས་ཀྱི་ངེས་པས་དྲངས་པའི་ཞི་ལྷག་ཟུང་འཇུག་དོན་དམ་པའི་བྱང་ཆུབ་ཀྱི་སེམས་ཀྱང་ཅི་རིགས་སུ་བསྒོམ་པ་ཤིན་ཏུ་གལ་ཆེ་སྟེ། ཇོ་བོ་རྗེའི་རྣམ་ཐར་ལས། བོད་དུ་བྱོན་ནས་དགེ་བཤེས་སྟོན་པ་ལ་སོགས་པ་ལ་སེམས་བཟང་པོ་གྱིས། བྱང་ཆུབ་ཀྱི་སེམས་མེད་ན་ཆོས་མང་པོ་མཉན་པ་དང་། བལྟ་བ་དང་། བསམ་པ་དང་། བསྒོམ་པ་དང་། བསྐྱེད་རིམ་དང་། རྫོགས་རིམ་དང་། དབུ་མའི་ལྟ་བ་བསྒོམ་པ་དང་། བཟླས་བརྗོད་ལ་སོགས་པ་གང་བྱས་ཀྱང་ཕན་མེད། བྱང་ཆུབ་ཀྱི་སེམས་ཀྱིས་མ་ཟིན་པའི་དགེ་སྦྱོར་དང་། བྱང་ཆུབ་ཀྱི་སེམས་ལ་གནོད་པའི་དགེ་སྦྱོར་ཐམས་ཅད་བདུད་ཀྱི་ལས་ཡིན་ཞེས་གསུངས། མཐར་བདག་དང་སེམས་ཅན་ཐམས་ཅད་སྐྱབས་ཡུལ་རྣམས་ལ་ཐིམ། དེ་རྣམས་ཀྱང་དབུས་ཀྱི་བླ་མ་ལ་ཐིམ། དེ་ཡང་ཆོས་སྐུ་སྤྲོས་བྲལ་གདོད་མའི་དབྱིངས་སུ་བསྟིམས་ནས་མཉམ་པར་བཞག་གོ་གསུངས། ཡང་ན། ཐུན་མཐར་ཚོགས་ཞིང་རྣམས་མཐའ་ནས་རིམ་བཞིན་འོད་དུ་ཞུ་ནས་དབུས་ཀྱི་བླ་མ་ལ་ཐིམ། དེ་ཡང་འོད་དུ་ཞུ་སྟེ་རང་གི་སྤྱི་བོ་ནས་ཐིམ་པས་དེ་དག་གི་ཐུགས་རྒྱུད་ན་བཞུགས་པའི་དོན་དམ་བྱང་ཆུབ་ཀྱི་སེམས་རང་རྒྱུད་ལ་ལྷང་གིས་སྐྱེས་པར་བསམ་ཞིང་དགེ་བ་བསྔོ། སྨོན་པའི་བསླབ་བྱ་བདག་གཞན་མཉམ་པ་བརྗེ་བ་བདག་བས་གཞན་གཅེས་རྣམས་བསྒོམ་པ་དང་། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱའོ། །

གསུམ་པ་བླ་མ་རྡོ་རྗེ་སེམས་དཔའི་སྒོམ་བཟླས་ནི། རྡོ་རྗེ་སེམས་དཔས་སྔོན་སློབ་པ་ལམ་གྱི་གནས་སྐབས་སུ་ཐུགས་བསྐྱེད་པའི་ཚེ། མ་འོངས་པ་ན་བདག་མངོན་པར་རྫོགས་པར་སངས་རྒྱས་པའི་ཚེ། སེམས་ཅན་གང་མཚམས་མེད་པ་ལྔ་དང་། དམ་ཚིག་གི་སྒྲིབ་པ་ཅན་རྣམས་ཀྱིས་ང་ཡི་མིང་ཐོས་པ། བདག་ཡིད་ལ་བྱེད་པ་དང་། གསང་སྔགས་ཀྱི་རྒྱལ་པོ་ཡི་གེ་བརྒྱ་པ་བཟླས་པ་ཙམ་གྱིས་དེའི་སྡིག་ལྟུང་ལྷག་མེད་དུ་བྱང་ཞིང་དག་པར་གྱུར་ཅིག །དེ་ལྟར་མ་གྱུར་གྱི་བར་དུ་བདག་འཚང་མི་རྒྱ་བར་ཤོག་ཅིག་ཅེས་པ་དང་། དམ་ཚིག་ཉམས་ཆགས་ཅན་རྣམས་ཀྱི་མདུན་དུ་བདག་གནས་ནས་སྒྲིབ་པ་ཐམས་ཅད་སྦྱོང་བར་ཤོག་ཅིག་ཅེས་པའི་སྨོན་ལམ་གྱི་མཐུ་ཡོངས་སུ་གྲུབ་པས་ཐུགས་བསྐྱེད་གཞན་དང་མི་འདྲ་ཞིང་། ལྷག་པའི་ལྷ་རིགས་བརྒྱ་རིགས་ལྔ་སོགས་གཅིག་ཏུ་འདུས་པའི་རང་བཞིན་རིགས་བརྒྱའི་ཁྱབ་བདག་གསང་ཆེན་རིགས་གཅིག་རྡོ་རྗེ་སེམས་དཔའ་ཡིན་པས་ལྷ་གཞན་དང་མི་འདྲ་བ་དང་། ཕྱོགས་བཅུའི་སངས་རྒྱས་རེ་རེའི་མདུན་དུ་ཕྱིན་ནས་བཤགས་པའི་ཐབས་འབད་པ་བས། དཀྱིལ་འཁོར་ཐམས་ཅད་ཀྱི་སྤྲོ་དང་སྡུད་པའི་བྱེད་པོ་བླ་མ་དང་རྡོ་རྗེ་སེམས་དཔའ་གཉིས་སུ་མེད་པར་བསྒོམས་ནས་བཤགས་པ་བྱེད་ན་སྔ་མ་ལས་ཁྱད་པར་དུ་གྱུར་པ་ཡིན་གསུངས། དེ་ཡང་སྦྱང་བྱ་དང་སྦྱོང་བྱེད་གཉིས་ལས། སྦྱང་བྱ་སྒྲིབ་པ་བཞི་ནི། ལས་ཀྱི་སྒྲིབ་པ་རང་བཞིན་གྱི་སྡིག་པ་དང་བཅས་པའི་ལྟུང་བ་གཉིས། ཉོན་མོངས་པའི་སྒྲིབ་པ་ནི། མགོན་པོ་བྱམས་པས། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་འདོད། །ཅེས་མི་མཐུན་ཕྱོགས་སེར་སྣ་དང་འཆལ་ཚུལ་ལ་སོགས་པའི་རྣམ་རྟོག་གང་ཡིན་པ་དེ་ནི་ཕར་ཕྱིན་ཡོངས་སུ་དག་པའི་གེགས་ཉོན་མོངས་པའི་སྒྲིབ་པ་ཡིན་པར་འདོད་དོ། །ཤེས་སྒྲིབ་ནི། མགོན་པོ་བྱམས་པས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །ཅེས་འཁོར་གསུམ་དུ་རྣམ་པར་རྟོག་པ་གང་ཡིན་པ་དེ་ནི་ཕར་ཕྱིན་ཡོངས་སུ་རྫོགས་པའི་གེགས་ཤེས་བྱའི་སྒྲིབ་པ་ཡིན་པར་འདོད་དོ། །བག་ཆགས་ཀྱི་སྒྲིབ་པ་ནི། མདོ་ལྟར་ན་རྩི་སྣོད་ལྟར་ཤེས་བྱའི་སྒྲིབ་པ་ཤིན་ཏུ་ཕྲ་བའི་གནས་སྐབས་དང་། སྔགས་ལྟར་ན་གཉེན་པོ་རྡོ་རྗེ་ལྟ་བུའི་ཡེ་ཤེས་ཀྱིས་བཅོམ་བྱའི་སྣང་གསུམ་འཕོ་བའི་བག་ཆགས་དེ་ཡིན་ནོ། །སྒྲིབ་པ་བཞི་པོ་དེས་གང་ལ་སྒྲིབ་ན། རང་བཞིན་གྱི་སྡིག་པས་གནས་སྐབས་མཐོ་རིས་ལ་བསྒྲིབ། བཅས་ལྟུང་གིས་གནས་སྐབས་མཐོ་རིས་དང་། མཐར་ཐུག་བྱང་ཆུབ་གསུམ་ལ་སྒྲིབ། ཉོན་སྒྲིབ་ཀྱིས་ཐར་པ་ལ་སྒྲིབ། ཤེས་སྒྲིབ་དང་བག་ཆགས་ཀྱི་སྒྲིབ་པ་གཉིས་ཀྱིས་ཐམས་ཅད་མཁྱེན་པའི་གོ་འཕང་ལ་སྒྲིབ་པའོ། །སྦྱོང་བྱེད་གཉེན་པོ་སྟོབས་བཞིའི་སྒོ་ནས་འདིར་སྒྲིབ་པ་ཇི་ལྟར་སྦྱོང་བའི་ཚུལ་ནི། ཨཱཿ བདག་ཉིད་ཐ་མལ་སོགས། ཨཱཿ ཆོས་ཉིད་སྐྱེ་བ་མེད་པའི་དོན་དྲན་པའི་ངང་ནས། བདག་ཉིད་ཐ་མལ་དུ་གནས་པའི་སྤྱི་བོ་རུ། པད་དཀར་འདབ་མ་བརྒྱད་པ་སྡོང་བུ་སོར་བཞི་ཙམ་ཚངས་བུག་ཏུ་ཟུག་པའི་ལྟེ་བར་ཟེའུ་འབྲུ་དམར་སེར་གྱི་ཚད་དང་མཉམ་པའི་ཟླ་དཀྱིལ་དཀར་བསིལ་ཉ་གང་བའི་གདན་གྱི་དབུས་སུ། དབྱིངས་རིག་དབྱེར་མེད་མཚོན་པའི་ཧཱུྃ་ཡིག་དཀར་པོ་ཡོངས་སུ་གྱུར་པ་ལས། སྐད་ཅིག་གིས་ངོ་བོ་རྩ་བའི་བླ་མ་ཡིན་པ་ལ་རྣམ་པ་རྡོ་རྗེ་སེམས་དཔའ་སྐུ་མདོག་དཀར་གསལ་འོད་ཟེར་འཕྲོ་ཞིང་། ཞི་འཛུམ་མཚན་དཔེའི་ཉམས་འགྱུར་ཡོངས་སུ་རྫོགས་པ་ལ། དར་དཀར་པོའི་སྟོད་གཡོགས། ཁ་དོག་སྣ་ཚོགས་པའི་སྨད་དཀྲིས། ཅོད་པན། ཟི་ལྡིར་ནི་དར་མཐིང་ཁྲའི་ཅོད་པན་ལྟག་པ་ནས་ཕྱིར་འཕྱང་པ། གར་གྱི་ཕུ་དུང་ནི་བྲིས་ཆ་རྙིང་པ་རྣམས་སུ་འབྱུང་བའི་སྟོད་གཡོགས་ལྟ་བུ་ལ་ཕུ་དུང་ཐུང་ངུ་ཡོད་པ་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། ཕྱག་གདུབ། ཞབས་གདུབ། སྐ་རགས། རིན་པོ་ཆེའི་དོ་ཤལ་ལྟེ་འོག་ཡན་འཁོར་བ། སེ་མོ་དོ་ནི་ནུ་མའི་བར་སླེབ་པའི་དོ་ཤལ་ཐུང་བ་ཞེས་གསུངས། སྐད་གཉིས་ཤན་སྦྱར་ལས། དོ་ཤལ་ཏེ་མུ་ཏིག་སོགས་ཀྱི་རྒྱན་ཕྲེང་ལྟེ་འོག་སླེབ་པ། དོ་ཤལ་ཕྱེད་པ་སྟེ་སེ་མོ་དོ་ཞེས་པར་འབོད་པ་ནུ་མའི་བར་སླེབ་པ། རྐང་གདུབ་སྟེ་ལོང་ཚིགས་ཀྱི་རྒྱན་འཁོར་བའོ།། ཞེས་གསུངས་པ་སྟེ་རིན་པོ་ཆེའི་རྒྱན་ བརྒྱད་དོ། །དེ་ལྟར་ལོངས་སྤྱོད་རྫོགས་པའི་རྒྱན་ཆས་བཅུ་གསུམ ་གྱིས་སྐུ་ལ་སྤྲས་པ། ཞལ་གཅིག་ཕྱག་གཉིས་ཕྱག་གཡས་རིག་སྟོང་གི་རྡོ་རྗེ་རྩེ་ལྔ་པ་ཐུགས་ཀར་གཏོད་པ། གཡོན་སྣང་སྟོང་གི་དྲིལ་བུ་དཀུ་ལ་བརྟེན་ནས་འཛིན་ཅིང་། སྲིད་ཞི་གཉིས་ཀྱི་མཐའ་ལ་མི་གནས་པའི་བརྡར་ཞབས་རྡོ་རྗེ་སྐྱིལ་མོ་ཀྲུང་གིས་བཞུགས་པའི་པང་དུ། ཡུམ་སྙེམས་མ་དཀར་མོ་པད་དཀྱིལ་མཆན། ཕྱག་གཡས་སྐྱེ་ཤི་རྩད་ནས་གཅོད་པའི་གྲི་གུག་དང་། གཡོན་བདེ་ཆེན་སྦྱོར་བའི་བརྡར་ཐོད་པ་ཡེ་ཤེས་ཀྱི་བདུད་རྩིས་གང་བ་འཛིན་པ་དང་མཉམ་པར་འཁྲིལ་བའི་སྐུ་ཅན་དུ་གསལ་བཏབ་ནས། ཁྱོད་ལ་སྐྱབས་སུ་གསོལ་ཞིང་སྡིག་པ་སྦྱོང་བར་མཛད་དུ་གསོལ་ཞེས་མོས་གུས་གདུང་ཤུགས་དྲག་པོས་བདག་གི་ཤེས་རྒྱུད་ཀྱི་སྡིག་སྒྲིབ་ཐམས་ཅད་དག་པ་ཞིག་ཁྱེད་མཁྱེན་ནོ་སྙམ་པ་རྟེན་གྱི་སྟོབས། ༡ སྔར་བྱས་ཀྱི་སྡིག་པ་ལ་སྙིང་ནས་འགྱོད་སེམས་དྲག་པོས་མཐོལ་ལོ་བཤགས་སོ་སྙམ་པ་རྣམ་པར་སུན་འབྱིན་པའི་སྟོབས། ༢ ཕྱིན་ཆད་སྲོག་ལ་བབ་ཀྱང་སྡིག་པའི་ལས་མི་བྱེད་སྙམ་པ་ཉེས་བྱས་སྡོམ་པའི་སྟོབས། ༣ སྔར་བྱས་ཀྱི་གཉེན་པོར་བླ་མ་རྡོ་རྗེ་སེམས་དཔའ་ཡབ་ཡུམ་གཉིས་སུ་མེད་པ་ཁྱོད་ཀྱི་ཐུགས་ཀར་ཟླ་བ་ཉ་གང་བ་རྒྱས་པའི་སྟེང་དུ། ཧཱུྃ་ཡིག་གི་མཐའ་མར་ཡིག་བརྒྱའི་སྔགས་ཕྲེང་དཀར་པོ་སྤུ་ཤད་ཀྱིས་བྲིས་པ་ལྟ་བུ་གཡས་བསྐོར་དུ་གསལ་ལ། ཅུང་ཟད་བཟླས་པས་སྔགས་ཀྱི་ཐུགས་རྒྱུད་བསྐུལ་བས་ཧཱུྃ་ཡིག་སྔགས་ཕྲེང་དང་བཅས་པ་ལས་བདེ་ཆེན་གྱི་བདུད་རྩི་དཀར་པོ་འོད་ཟེར་དང་བཅས་པ་དཔག་ཏུ་མེད་པ་བབས། ཡབ་ཡུམ་གྱི་སྐུ་ཡི་དབྱིབས་བརྒྱུད་དེ་བདེ་ལ་རོལ་བའི་སྦྱོར་མཚམས་ནས་བྱུང་། པདྨའི་སྡོང་བུ་ལ་འཁྲི་བའི་ཚུལ་གྱིས་བདུད་རྩི་བྱང་ཆུབ་སེམས་ཀྱི་སྤྲིན་ཆེན་པོ་ག་བུར་གྱི་རྡུལ་ལྟར་འཛག་ཅིང་རང་གི་ཚངས་བུག་ནས་ཞུགས་པ་དེ་ཡིས། ཤ་འུད་ཆེན་པོའི་སྣ་ལ་སྦུར་མི་ཆགས་པ་ལྟར་བདག་དང་ཁམས་གསུམ་སེམས་ཅན་ཐམས་ཅད་ཀྱི་མི་དགེ་བའི་ལས་དང་ཉོན་མོངས་པ་སྡུག་བསྔལ་གྱི་རྒྱུ་དང་། དེ་དག་གི་འབྲས་བུ་ནད་ཐམས་ཅད་རྣག་ཁྲག་དང་། གདོན་ཐམས་ཅད་སྲོག་ཆགས། སྡིག་སྒྲིབ་ཉེས་ལྟུང་དམ་གྲིབ་མ་ལུས་པ་དུད་སོལ་ཁུ་རླངས་ཀྱི་རྣམ་པས་བ་སྤུའི་བུ་ག་དང་འོག་སྒོ་གཉིས་ནས་འཐོན། ས་རིམ་པ་དགུའི་འོག་ཏུ་འཆི་བདག་གླང་དམར་པོའི་རྣམ་པར་གནས་པའི་ཁ་གདངས་པ་ནས་ཞུགས། ལྟོ་བར་ཚུད་པས་མི་མཐུན་པའི་ཕྱོགས་དེ་ཐམས་ཅད་བྱང་བར་མཛད་དུ་གསོལ་བསམ་ལ། ཡི་གེ་བརྒྱ་པ་རབ་ཅི་ནུས། འབྲིང་བརྒྱ་རྩ། ཐ་མའང་ཉེར་གཅིག་ལ་ཉུང་མཐའ་བྱས་པ་བཟླ་བ་གཉེན་པོ་ཀུན་ཏུ་སྤྱོད་པའི་སྟོབས་༤ སོ། །དེ་ནས་མཐར་ཐུན་འཇོག་ཁར། འཆི་བདག་ལས་ཀྱི་གཤིན་རྗེ་ལ་སོགས་པ་ཐམས་ཅད་ངོམས་ཤིང་ཚིམས། ལན་ཆགས་འཁོར། བུ་ལོན་སོད། ཤ་མཁོན་བྱང་། སྡིག་སྒྲིབ་དག །གཤིན་རྗེའི་ཁ་ལག་སྦར་གསུམ་ཡང་ཟུམ། ས་གས་པ་ཡང་སོས་ཏེ་དུས་མིན་གྱི་འཆི་བ་བསླུས་པར་བསམ། དེ་ལྟར་སྟོབས་བཞིའི་གནད་དང་ལྡན་པས་ཉམས་སུ་བླངས་པའི་མཐར། འཁོར་ལོ་བཞིའི་གནས་རྣམས་ཀྱང་བདུད་རྩིས་སྐྱ་མེར་གྱིས་ཁེངས་པས་སྒོ་གསུམ་ཆ་མཉམ་གྱི་སྡིག་སྒྲིབ་བག་ཆགས་དང་བཅས་པ་དག །བདེ་སྟོང་དགའ་བ་བཞིའི་ཡེ་ཤེས་རྒྱུད་ལ་སྐྱེས་པས་ལུས་སེམས་ཟག་མེད་ཀྱི་བདེ་བས་ཁྱབ་པར་བསམ། མཇུག་བཤགས་སྡོམ་བྱ་བ་ནི། སླར་ཡང་མོས་གུས་གདུང་ཤུགས་དྲག་པོས། མགོན་པོ་བདག་ནི་སོགས། སྐྱབས་གསོལ་གྱི་ཚིག་བརྗོད་པ་དང་། རང་རྒྱུད་ཀྱི་སྡིག་ལྟུང་དག་པ་ལ་རྡོ་རྗེ་སེམས་དཔའ་ཐུགས་དགྱེས་པས་ཞལ་འཛུམ་མདངས་སུ་བཞད་ཅིང་། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གསུང་གིས་དངོས་སུ་གནང་བ་བྱིན་པ་དང་ཆབས་གཅིག་བདེ་སྟོང་ཆེན་པོའི་ངོ་བོར་འོད་དུ་ཞུ་ནས་རང་ལ་ཐིམ་པའི་རྐྱེན་ལས། རང་ཉིད་ཀྱང་སྐད་ཅིག་གིས་རྡོ་རྗེ་སེམས་དཔའ་ཡབ་ཡུམ་སྐུ་མདོག་ཕྱག་མཚན་རྒྱན་ཆ་ལུགས་སོགས་མ་འདྲེས་ཤིང་ཡོངས་སུ་རྫོགས་པ་སྣང་སྟོང་མེ་ལོང་ནང་གི་གཟུགས་བརྙན་ལྟ་བུར་གསལ་བའི་ཐུགས་ཀར་ཟླ་དཀྱིལ་གྱི་དབུས་སུ་ཐུགས་སྲོག་ཧཱུཾ། ཕྱོགས་བཞིར་ༀ་བཛྲ་ས་ཏྭའི་སྔགས་ཀྱི་ཡིག་འབྲུ་རྣམས་གསལ་བ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས། འཕགས་པ་མཆོད། བྱིན་རླབས་དང་དངོས་གྲུབ། འདིར་ཞབས་དྲུང་རིན་པོ་ཆེས། བླ་མ་ཉག་བླ་ལ་ཡིག་འབྲུ་དང་འོད་ཟེར་དཀར་པོར་གསལ་ཀྱང་རུང་གསུངས། མཆན། ཐམས་ཅད་ཚུར་འདུས་རང་ལ་ཐིམ། སླར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཕྱི་སྣོད་ཀྱི་འཇིག་རྟེན་འོག་མིན་མངོན་པར་དགའ་བའི་ཞིང་དང་། ནང་བཅུད་ཁམས་གསུམ་གྱི་སེམས་ཅན་ཐམས་ཅད་རྡོར་སེམས་རིགས་ལྔའི་གོ་འཕང་ལ་བཀོད། དེ་ཐམས་ཅད་དང་རང་ཉིད་ལྷན་ཅིག་པས་བཟླས་པར་བསམ་ལ་ཞེས་གསུངས། ཕྱག་རྡོར་དྲག་པོ་གསུམ་འདུལ་གྱི་རྒྱུད་ལས། ༀ་བཛྲ་ས་ཏྭ་ཧཱུཾ། ཞེས་པ་འབུམ་ཕྲག་གཅིག་བརྗོད་ན། རྩ་བའི་དམ་ཚིག་ཉམས་པ་ཞི་བར་འགྱུར་རོ། །ཞེས་གསུངས་པས། ཡང་སྙིང་ཅི་ནུས་སུ་བཟླ་བ་ནི་ཁྱད་པར་བསྐྱེད་རིམ་ལ་བརྟེན་པའི་སྒྲིབ་སྦྱོང་དང་། མཐར་ཐུག་ལྷ་སྔགས་ཀྱི་སྤྲོས་པ་འོད་གསལ་གཉུག་མའི་ངང་དུ་བསྡུས་ཏེ། སྦྱང་བྱ་སྦྱོང་བྱེད་ཀྱི་རྟོག་ཚོགས་ཐམས་ཅད་གཟོད་མ་ནས་རང་བཞིན་གྱིས་མ་གྲུབ་པའི་རིག་སྟོང་དོན་གྱི་རྡོ་རྗེ་སེམས་དཔའི་རང་ཞལ་བལྟ་ཞིང་མཉམ་པར་འཇོག་པ་ནི་དོན་དམ་རྫོགས་རིམ་ལ་བརྟེན་པའི་སྒྲིབ་པ་སྦྱོང་ཚུལ་བླ་ན་མེད་པའོ། །ཞེས་གསུངས། ཇི་སྐད་དུ། ཨཱཿ ཡིག་སྐྱེ་བ་མེད་པའི་ཆོས་ཉིད་དོན། །གཞི་ལམ་འབྲས་བུ་དབྱེར་མེད་བྱང་ཆུབ་སེམས། །སྦྱང་བྱ་སྦྱོང་བྱེད་ལས་འདས་རྫོགས་པ་ཆེར། །རྣམ་གྲོལ་རིག་སྟོང་སོར་བཞག་བཤགས་པའི་རྒྱལ། །ཞེས་གསུངས་སོ། ། བཞི་པ་མཐུན་རྐྱེན་ཚོགས་བསགས་པ་མཎྜལ་གྱི་ཁྲིད་ནི། ༀ་ཨཱཿཧཱུྃ། སྟོང་གསུམ་འཇིག་རྟེན་སོགས། །མདུན་གྱི་ནམ་མཁར་ཚོགས་ཞིང་སྐྱབས་ཡུལ་ལྟར་གསལ་བཏབ་སྟེ་རིན་པོ་ཆེ་ལ་སོགས་པའི་མཎྜལ་བྱི་དོར་བྱས་ལ། དྲི་བཟང་དང་བ་བྱུང་གི་ཆུས་བྱུག་པར་མེ་ཏོག་གི་ཚོམ་བུ་རང་རང་གི་གཞུང་ལྟར་བཀོད་པ་དམིགས་རྟེན་ཏུ་བྱ། རྒྱུན་དུ་མ་གྲུབ་ན་དམིགས་པས་ཀྱང་རུང་སྟེ། གང་ལྟར་ཡང་། ཐུན་མོང་སྤྲུལ་སྐུའི་མཎྜལ་གླིང་བཞི་རི་རབ་ལྷ་གནས་དང་བཅས་པའི་སྟོང་གསུམ་འཇིག་རྟེན་བྱེ་བ་ཕྲག་བརྒྱའི་ཞིང་ན། རྒྱལ་སྲིད་རིན་ཆེན་སྣ་བདུན་ལ་སོགས་པ་ལྷ་མིའི་ཡོ་བྱད་ཀྱི་འབྱོར་བ་ཕུན་སུམ་ཚོགས་པས་ཡོངས་སུ་གཏམས་ཤིང་གང་བ་དང་། བྱེ་བྲག་ཏུ་བདག་གི་ལུས་ལོངས་སྤྱོད་དགེ་ཚོགས་དང་བཅས་པ་ལྟོས་མེད་དུ་ཡོངས་སུ་འབུལ་གྱིས། དམ་པ་ཆོས་ཀྱི་འཁོར་ལོས་འགྲོ་བ་རྣམས་ཐར་བ་དང་ཐམས་ཅད་མཁྱེན་པའི་ལམ་ལ་བསྒྱུར་བའི་རྒྱལ་སྲིད་དམ་པ་སྤྲུལ་པའི་སྐུ་ཐོབ་པར་ཤོག་ཅིག་སྙམ་པའོ། །དེའི་སྟེང་གི་ནམ་མཁར་ཐུན་མིན་ལོངས་སྐུའི་མཎྜལ་འོག་མིན་བདེ་ཆེན་སྟུག་པོ་བཀོད་པའི་ཞིང་ན། ངེས་པ་ལྔ་ལྡན་རིགས་ལྔའི་ཚོམ་བུའི་རྣམ་པ་ཅན་ལ། སྒེག་སོགས་འདོད་ཡོན་གྱི་ལྷ་མོ་གྲངས་མེད་པས་མཆོད་པའི་སྤྲིན་ཕུང་བསམ་གྱིས་མི་ཁྱབ་ཅིང་མཐའ་ཡས་པ་ཐོགས་པ་ཕུལ་བས་ལྷུན་གྲུབ་ལོངས་སྐུའི་ཞིང་ལ་སྤྱོད་པར་ཤོག་ཅིག་སྙམ་པའོ། །དེའི་སྟེང་གི་དབྱིངས་ལ་ཁྱད་པར་ཆོས་སྐུའི་མཎྜལ་གནས་ལུགས་རང་བྱུང་གི་ཡེ་ཤེས་དེ་ཉིད་སེམས་ཀྱི་ཆོས་ཉིད་དུ་གདོད་ནས་གཞོན་ནུ་བུམ་སྐུའི་ཚུལ་དུ་བཞུགས་པ་ཡིན་ལ། དེ་ལྟར་སྣང་སྲིད་རྣམ་པར་དག་པ་གཞོན་ནུ་བུམ་པའི་སྐུའི་གཞི་ལ། ཐུགས་རྗེ་མ་འགགས་འོད་གསལ་གྱི་སྣང་ཆ་ཆོས་ཉིད་རོལ་བའི་རྒྱན་དུ་ཤར་བའི་སྐུ་དང་ཐིག་ལེའི་འཛིན་པ་རྣམ་པར་དག་པའི་ཞིང་སྐུ་ཕོ་བྲང་གསུམ་གྱི་སྣང་ཆ་ཚོམ་བུའི་ཚུལ་དུ་ཕུལ་བས་ཀུན་བཟང་ཆོས་སྐུའི་ཞིང་ལ་སྤྱོད་པར་ཤོག་ཅིག་སྙམ་པའོ། །བསྡུ་ན། ས་གཞི་སྤོས་ཆུས་སོགས། མཎྜལ་ཚོམ་བུ་བདུན་མ་འདི་ཉིད་སྤྲུལ་སྐུའི་མཎྜལ་ཡིན་ཀྱང་། སྤྲུལ་སྐུ་སྐུ་གསུམ་གྱི་བདག་ཉིད་ཡིན་པས་སྐུ་གསུམ་གྱི་མཎྜལ་དུ་དམིགས་ཀྱང་རུང་མོད་གསུངས་པས་འདི་ཁོ་ན་ཕུལ་ཡང་ཆོག་གསུངས། གཞན་ཡང་། བཞེད་སྲོལ་འགའ་ན། མི་མཇེད་ཀྱི་འཇིག་རྟེན་བྱེ་བ་ཕྲག་བརྒྱའི་ཞིང་ཁམས་སྤྲུལ་སྐུའི་ལྷ་ཚོགས་ལ་འབུལ་བ་དང་། ནང་རང་ལུས་ཀྱི་མཎྜལ་པགས་པ་དབང་ཆེན་གསེར་གྱི་ས་གཞི། ཁྲག་དྲི་བཟང་གི་ཆག་ཆག །ཡན་ལག་བཞི་གླིང་བཞི། ཉིང་ལག་རྣམས་གླིང་ཕྲན། མིག་གཉིས་ཉི་ཟླ། དབང་ཡུལ་གཞན་རྣམས་མཆོད་པའི་ལྷ་མོ་རྣམས་སུ་མོས་ནས་ལོངས་སྐུའི་ལྷ་ཚོགས་ལ་འབུལ་བ་དང་། གསང་བ་ཆོས་སྐུའི་མཎྜལ་ཀ་དག་གདོད་མའི་གཞི་ལ་ལྷུན་གྲུབ་སྣང་བ་བཞི་པོ་ཚོམ་བུའི་ཚུལ་དུ་བཀོད་དེ་ཆོས་སྐུའི་ལྷ་ཚོགས་ལ་འབུལ་བ་སོགས། དེ་ལྟར་སྔ་འགྱུར་རང་ལུགས་ཀྱི་མཎྜལ་བཀའ་གཏེར་རང་རང་གི་གཞུང་ན་གསལ་བས་དེར་བལྟ་བར་བྱའོ། །ས་སྐྱའི་འགྲོ་མགོན་ཆོས་རྒྱལ་འཕགས་པའི་གསུང་ཚོམ་བུ་སོ་བདུན་མ་ཡོངས་གྲགས་ལྟར་དང་། ཡོ་གའི་རྒྱུད་ཀྱི་དགོངས་པ་སློབ་དཔོན་སངས་རྒྱས་གསང་བའི་བཞེད་པ་ནི། ཚོམ་བུ་བཅུ་གསུམ་མ་སྟེ། རི་རབ་གླིང་བཞི་གླིང་ཕྲན་བཅས་བསྡོམས་པའོ། །སློབ་དཔོན་ཛེ་ཏ་རི་དགྲ་ལས་རྣམ་པར་རྒྱལ་བའི་བཞེད་པ་ནི། གླིང་བཞི་གླིང་ཕྲན་རི་རབ་དང་བཅས་པའི་སྟེང་དུ་ཉི་ཟླ་གདུགས་རྒྱལ་མཚན་བཞི་བསྣན་པས་ཚོམ་བུ་བཅུ་བདུན་པའོ། །སློབ་དཔོན་འཇམ་དཔལ་གྲགས་པའི་བཞེད་པ་ནི། རི་གླིང་གླིང་ཕྲན་བཅས་ཀྱི་སྟེང་དུ་རྒྱལ་སྲིད་བདུན། གཏེར་བུམ། ཉི་ཟླ་བཅས་བསྣན་པས་ཚོམ་བུ་ཉེར་གསུམ་པའོ། །དུས་ཀྱི་འཁོར་ལོའི་རྒྱུད་ཀྱི་དགོངས་པ་ནི། ཚོམ་བུ་ཉེར་གསུམ་པ་དེ་གའི་སྟེང་དུ་སྒྲ་གཅན་དང་དུས་མེ་གཉིས་བསྣན་པས་ཚོམ་བུ་ཉེར་ལྔ་པའོ། །ཚོམ་བུ་བཅུ་གསུམ་པར་ཉི་ཟླའི་ཚོམ་བུ་དོར། བཅུ་བདུན་པར་ལྷོ་བྱང་དུ་གདུགས་དང་རྒྱལ་མཚན། ཉེར་ གསུམ་པར་ཕྱོགས་མཚམས་བརྒྱད ་དུ་རྒྱལ་སྲིད་བདུན་དང་གཏེར་བུམ། ཤར་ནུབ་ཏུ་ཉི་ཟླ། ཉེར་ལྔ་པར་ལྷོ་བྱང་དུ་སྒྲ་གཅན་དང་དུས་མེ་འགོད་པར་བྱའོ། །ཞེས་གསུངས་སོ། ། ལྔ་པ་བདུད་བཞི་ཅིག་ཆར་དུ་གཅོད་པ་ཀུ་སཱ་ལུའི་ཚོགས་གསོག་ལ། དེ་ཡང་ངོ་བོ་ཕ་རོལ་ཏུ་ཕྱིན་པ། སྔགས་དང་རྗེས་སུ་མཐུན་པའི་མདོ་སྔགས་དགོངས་པ་ཟུང་འབྲེལ། དམ་ཆོས་བདུད་ཀྱི་གཅོད་ཡུལ་ཞེས་བྱ་བ། འཁོར་བར་འཆིང་བྱེད་ཀྱི་བདུད་བཞི་པོ་སེམས་ཀྱི་སྙེམ་རྟོག་ངར་འཛིན་ཁོ་ནའི་སྟེང་དུ་གཅོད་པར་བྱེད་པ་ཡིན་ལ། སྤྱིར་བཀའ་སྲོལ་འདིའི་རང་སྐད་དུ། ཟུང་བཞི་ཡ་བརྒྱད་ཀྱིས་ཁོག་ཕུབ། མཚོན་པ་དཔེ་དྲུག་གིས་ཆེ་བ་བརྗོད། ཅེས་གསུངས་ཏེ། དང་པོ་ནི། ཞུ་བ་པོའི་གང་ཟག་གིས་དབྱེ་ན་ཕོ་བརྒྱུད་མོ་བརྒྱུད་གཉིས། ངོ་བོས་དབྱེ་ན་གཞུང་ཁྲིགས་ཅན་དང་ཁ་འཐོར་གཉིས། ཡོངས་ལ་གྲགས་ཚུལ་གྱིས་དབྱེ་ན་སྔ་དར་ཕྱི་དར་གཉིས། བྱོན་ཚུལ་གྱིས་དབྱེ་ན་བཀའ་མ་གཏེར་མ་གཉིས་ཏེ་ཟུང་བཞི་ལ་ཡ་བརྒྱད་དུ་བྱུང་ངོ་། མཚོན་པ་དཔེ་དྲུག་ནི། གཅོད་འདི་གངས་དཀར་དང་འདྲ་སྟེ་གངས་ལ་ཁ་བ་བབས་ཀྱང་དཀར་ལ་མ་བབས་ཀྱང་དཀར་བ་བཞིན་དུ། གཅོད་མཁན་རྣལ་འབྱོར་པ་ལ་ཐོས་པའི་ཤེས་རབ་ཡོད་ཀྱང་ལེགས་ལ་མེད་ཀྱང་ཆོག་པའོ། །སེང་གེ་དང་འདྲ་སྟེ་དེས་མང་པོ་ཟིལ་གྱིས་གནོན་ལ་གཅིག་པུར་ཉམ་ང་མེད་པ་བཞིན། གཅོད་བྱེད་པ་མང་པོ་དང་འགྲོགས་ཀྱང་ཆོག་ལ་གཅིག་པུར་འགྲིམས་ཀྱང་ཆོག་པའོ། །རྔ་བོ་ཆེའི་སྐད་དང་འདྲ་སྟེ་རྔ་ཆེན་ལ་རོལ་མོ་གཞན་གྱི་སྒྲ་ཡོད་ཀྱང་ཆོག་ལ་མེད་ཀྱང་ཆོག་པ་བཞིན་འདི་ལ་དགེ་སྦྱོར་གྱི་གྲོགས་གཞན་ཡོད་མེད་ཀྱང་ཁྱད་མེད་པའོ། །དངོས་གྲུབ་ཀྱི་ཆུ་མིག་དང་འདྲ་སྟེ་གྲུབ་ཆུ་ལ་མི་མང་ཉུང་གི་ཚོད་དང་འཚམས་པར་འབྱུང་བ་བཞིན་ལུགས་འདིར་གང་ཟག་གི་བློ་ཚོད་དང་འཚམས་པར་བསླབ་ཏུ་ཡོད་པའོ། །གསེར་གཡུ་ཆག་པའི་དུམ་བུ་དང་འདྲ་སྟེ་ཆེ་ན་རིན་ཐང་ཆེ་ལ་ཆུང་ནའང་དེ་དང་འཚམས་པའི་རིན་ཐང་ཡོད་པ་བཞིན་གཅོད་སྐོར་རྒྱ་ཆེར་ཤེས་ན་ཡོན་ཏན་དཔག་ཏུ་མེད་ལ་ཅུང་ཟད་ཤེས་པས་ཀྱང་རང་གཞན་ལ་ཕན་ཐོགས་པའོ། །རྟ་བཟང་པོའི་སྤུ་དང་འདྲ་སྟེ་རྟ་མཆོག་གཟུགས་འགྲོས་ལེགས་པ་ལ་སྤུ་མདོག་ཁྱད་པར་མེད་པ་བཞིན། གཅོད་ཡུལ་མཐར་ཕྱིན་པའི་གང་ཟག་དེ་མཆོག་དམན་གང་ཡིན་ཀྱང་གཞན་ལས་བྱིན་རླབས་ཆེ་བར་གསུངས་སོ། །གཅོད་ཡུལ་གྱི་རྣམ་བཞག་མདོར་བསྡུས་ལས། གཅོད་ཡུལ། གཅོད་བྱ། གཅོད་བྱེད། ཇི་ལྟར་གཅོད་ཚུལ་བཞི། དང་པོ་ནི། ཇི་ལྟར་ཤིང་གཅོད་པ་ན་གཅོད་ཅིང་འགྱེལ་བའི་ཡུལ་ནི་ས་གཞི་ཡིན་པ་ལྟར། འཁྲི་བ་བཅད་ནས་ཞེན་མེད་དུ་གནས་པའི་ཡུལ་ནི་ཆོས་དབྱིངས་རིག་པ་བྱང་ཆུབ་སེམས་ཀྱི་ཀློང་ཡིན་ཏེ། དེ་ལ་གནས་པ་ནི་འཕགས་པའི་གནས་པ་རྣམ་ཐར་སྒོ་གསུམ་གྱི་རང་བཞིན་ཅན་ནོ། །དེའི་ངང་དུ་བདུད་བཞི་རྒྱུ་བ་མེད་པར་ནམ་མཁའ་ལྟར་མཉམ་པ་ལ་བདུད་བཞི་དབྱིངས་སུ་གཅོད་པའམ་གཅོད་ཡུལ་ཞེས་གསུངས་སོ། །གཅོད་བྱ་ནི་འཁྲི་བ་སྟེ། ཉ་ལྕགས་ཀྱུས་བཟུང་བ་བཞིན་དུ་བདུད་བཞི་དང་འབྲེལ་བའི་དྲྭ་བ་ལྟ་བུ་ཡིན་ནོ། །གཅོད་བྱེད་ནི་བདག་མེད་རྟོགས་པའི་ཤེས་རབ་སྟེ་རལ་གྲི་བཞིན་ནོ། །ཞེས་དང་། ཇི་ལྟར་གཅོད་ན་ཡུལ་བཞི་པོ་བདེན་པ་མེད་པར་མཐོང་བས་ཡུལ་ཅན་དེར་འཛིན་གྱི་ཞེན་པ་ཆོད་པས་ན་ཡུལ་ཡུལ་ཅན་གྱི་བར་ལག་འབྲེལ་བའི་འཁྲི་བ་ཆད་པའོ། །ཞེས་དང་། སེམས་ཅན་ཐམས་ཅད་ལ་བར་དུ་གཅོད་ཅིང་མི་འདོད་པ་སྐྱེད་པའི་རིགས་བསྡུ་ན་བཞིར་འདུ་བས་དེ་ཆོད་ན་བར་ཆོད་ཀྱི་གཡུལ་ལས་རྣམ་པར་རྒྱལ་བས་ན་བདུད་བཞི་གཅོད་པ་ཡིན་ཏེ། མ་ཅིག་ཡེ་ཤེས་ཀྱི་མཁའ་འགྲོ་མའི་ཞལ་ནས། ཐོགས་བཅས་ཡུལ་གྱི་འཁྲི་བ་བཅད། །ཐོགས་མེད་ཡིད་ཀྱི་འཁྲི་བ་བཅད། །དགའ་སྤྲོ་ཞེན་པའི་འཁྲི་བ་བཅད། །སྙེམས་བྱེད་བདག་གི་འཁྲི་བ་བཅད། །ཅེས་གསུངས་པ་ལྟར། བདུད་ཀྱི་རྒྱར་འཆིང་ཞིང་ལྟུང་བ་ནི་རྣམ་པར་རྟོག་པའི་འཁྲི་བ་བཙན་པོའི་སྟོབས་ཀྱིས་ཡིན་པས་ན་དེ་གཅོད་དགོས་སོ། །དེ་གང་ལ་འཁྲི་ན་སེམས་ཉིད་ཀྱི་ངང་དུ་རྣམ་པར་རྟོག་པའི་སེམས་ལ་འཁྲི་སྟེ། དོན་དམ་པར་སེམས་ཉིད་ལ་འཁྲི་ཞིང་བཅིང་བ་མེད་ཀྱང་རྣམ་པར་རྟོག་པའི་དབང་གིས་འཁྲི་བ་ལྟར་སྣང་བ་ནི། མཁའ་ལ་སྤྲིན་འཁྲིགས་པ་ལྟར་མི་རྟོག་པའི་རང་ཞལ་བསྒྲིབ་ཅིང་། ཇི་བཞིན་མཐོང་བ་ལ་བར་དུ་བཅད་པའམ་འཁྲི་བ་ཞེས་བཤད་དོ། །གང་འཁྲི་ན་བདུད་བཞི་པོའོ། །ཇི་ལྟར་འཁྲི་ན། ཐོགས་བཅས་ཀྱི་རིགས་ནི་སེམས་དང་ཡུལ་འབྲེལ་བས་འཁྲི་སྟེ། དེ་ཡུལ་དུ་བྱས་པ་ལས་ཆགས་སྡང་དང་གནོད་འཇིགས་མང་པོ་སྐྱེ་བ་ཡིན་པས་སོ། །ཐོགས་མེད་ནི་ཡིད་ཀྱི་འཁྲི་བ་སྟེ་ཡིད་ལ་ལམ་གྱིས་ཤར་བ་ཙམ་པོ་དེ་ཡལ་བར་མ་དོར་བར་ཆེས་ཆེར་འཛིན་པའི་དབང་གིས་ཀུན་ཉོན་སྣ་ཚོགས་འཕེལ་བའོ། །དགའ་ཞིང་སྤྲོ་བའི་བདུད་ནི་ཞེན་པའི་འཁྲི་བ་སྟེ། གང་ཞེན་པ་དེ་ལ་དེས་འཆིང་བ་ཕག་ལ་མི་གཙང་བ་བཞིན་ནོ། །ངའོ་ཞེས་སོགས་སུ་སྙེམས་པའམ་བདག་ཏུ་རྟོག་པར་བྱེད་པའི་བདུད་ནི་བདག་བདག་ཅེས་འཛིན་པའི་ཡུལ་གྲུབ་གྲུབ་མོ་འདྲ་བ་དེའི་ཚུལ་གྱིས་འཁྲིའོ། །དེས་ན་གཟུང་འཛིན་གྱི་འཇུག་པ་དབྱིངས་སུ་མ་ནུབ་བར་དུ་ཐོགས་བཅས་ལ་སོགས་པའི་ཡུལ་དེ་དག་གི་སྣང་བ་ཙམ་མི་ཁེགས་ཀྱང་། སྣང་ཡང་མི་བདེན་ཞིང་བདེན་པར་བཟུང་ན་བདུད་ཀྱི་རྒྱར་འཆིང་བའི་ཚུལ་ཅན་དུ་ཤེས་ནས་དེར་འཛིན་པའམ་འཁྲི་བ་ཆོད་པ་ནི་ལམ་གྱི་གཅོད་དང་། མཐར་གོམས་པ་ཀློང་དུ་གྱུར་པ་ན་སྣང་ཞེན་ཐམས་ཅད་གྲོལ་ཏེ་ཆོས་སྐུ་ཆེན་པོར་རོ་མཉམ་པ་ནི་འབྲས་བུའོ། །དེ་ལྟ་ནའང་འཁྲི་བ་ཇི་ལྟར་གཅོད་སྙམ་ན། གང་འཁྲི་རྒྱུའི་ཡུལ་བཞི་པོ་དེ་ལ་དེར་འཛིན་གྱི་དབང་གིས་དེ་དག་ཡལ་བར་མ་དོར་བར་དང་དུ་བླང་བས་ན་འཁྲི་བ་བྱུང་བའི་ཕྱིར། ཡུལ་དེ་དག་རང་བཞིན་མེད་པར་ངེས་པའི་སྒོ་ནས་དེའི་རྗེས་སུ་མི་འབྲང་བར་ཕཊཿ ཅེས་བརྗོད་པས་ལིང་གིས་བསྐྱུར་ཏེ་རོ་མཉམ་ཆེན་པོར་གནས་པ་ནི་འཁྲི་བ་བཅད་པ་སྟེ། །དེ་ལྟར་འཁྲི་བ་ཆོད་པ་དེ་ལ་ཡུལ་བཞི་པོའི་གནོད་པ་རྒྱུ་བའི་གོ་སྐབས་མེད་དོ། །ཞེས་གསུངས། བདུད་བཞི་ལམ་དུ་འཁྱེར་ཚུལ་ནི། མ་རི་ནའི་སྒྲ་ལས་བདུད་ཅེས་བྱ་སྟེ། མ་རྟོགས་བར་དུ་སྐྱོན་སྡུད་ལ། རྟོགས་ནས་ཡོན་ཏན་སྡུད་པར་བྱེད་པའོ། །གཅོད་པའི་དུས་ནི་ས་མ་ཐོབ་པའི་གང་ཟག་ཚོགས་ལམ་ལ་གནས་པ་རྣམས་ནི་འཇིག་རྟེན་པའི་ལམ་ཡིན་པས། དེའི་དུས་སུ་སེམས་ལ་དབང་མ་ཐོབ་པས་ནད་སོགས་མི་འདོད་བཞིན་དུ་འོང་བ་དང་། རྫུ་འཕྲུལ་དང་མངོན་ཤེས་མ་ཐོབ་པས་འབྱུང་བ་བཞི་ལ་ཐོགས་ཏེ། དེའི་དུས་སུ་ཐོགས་བཅས་ཀྱི་བདུད་ཆོད་པར་དཀའ་འོ། །ཐོགས་མེད་ཀྱི་བདུད་ནི་ས་མ་ཐོབ་ཀྱང་གཅོད་ཡུལ་གྱི་མན་ངག་དང་ལྡན་པས་ཚོགས་སྦྱོར་གྱི་དུས་སུ་གཅོད་ནུས་ལ། མཐོང་ལམ་འཇིག་རྟེན་ལས་འདས་པའི་ལམ་ཡིན་པས་ཐོགས་བཅས་ཀྱི་བདུད་འབྱུང་བ་བཞི་དང་། དུག་དང་མཚོན་ལ་སོགས་པ་གཅོད་པར་ནུས་སོ། །ལམ་དུ་འཁྱེར་ཤེས་ན་བདུད་མ་ཡིན་པར་བསྟན་པ་ནི། ཐོགས་མེད་ཀྱི་བདུད་དེ་གཅོད་ནུས་ཚེ་ཡོན་ཏན་གྱི་སྒོ་འབྱེད་པ་སྟེ། ནང་བདེ་སྡུག་རོ་སྙོམས། ཕྱི་རུ་འཁོར་འདས་རོ་སྙོམས་པར་འགྱུར་ཏེ་ཡོན་ཏན་གྱི་སྣ་འདྲེན་པའི་ཕྱིར་བདུད་མ་ཡིན་ནོ། །ཐོགས་བཅས་ཀྱི་བདུད་ལ་བརྟེན་ནས། ཉམས་ལེན་གྱི་དྲོད་ཐོབ། བརྟུལ་ཞུགས་ཀྱི་ངར་དང་བཅས། རྟོགས་པ་གདེངས་དང་ལྡན་པས། རྫུ་འཕྲུལ་འཆར་བའི་སྣ་འདྲེན། གཞན་དོན་འབྱུང་བའི་གྲོགས་བྱེད་པའི་ཕྱིར་བདུད་མ་ཡིན་ནོ། །སྙེམས་བྱེད་ཀྱི་བདུད་ནི། ནང་གི་ཉམས་ལེན་གྱི་གདེངས་ཐོབ། དགེ་སྦྱོར་གྱི་དྲོད་སྐྱེལ་ཉམས་ཀྱི་ནུས་པ་རྙེད་པ་དེ་ཡིན་ལ། སྙེམས་བྱེད་དེ་མེད་ན་གཅོད་ཀྱི་གདམས་ངག་དང་ཉམས་ལེན་མེད་པའི་ཕྱིར་རོ། །ལས་དང་པོ་བ་རྣམས་ཀྱིས་གཅོད་བྱེད་པའི་དུས་སུ་སྙེམས་དགོས་ཏེ། ཆོ་འཕྲུལ་བྱུང་བའི་དུས་སུ་སྟོང་ཉིད་ལྟ་བའི་ངང་དུ། གཏོང་ཕོད་ལིང་བསྐྱུར་དང་། ཉམས་ལེན་གྱི་ཞེ་གདེངས་དགོས་པས་དེ་ཁོ་ན་སྙེམས་ཡིན་ཏེ་བདུད་མ་ཡིན་ནོ། །དགའ་བྲོད་ཀྱི་བདུད་ནི། གཅོད་བྱེད་པའི་དུས་སུ་ན་ཚ་སོགས་འགལ་རྐྱེན་གྱི་བར་ཆད་བྱུང་ན་དགའ་བར་ལྟ་སྟེ། དེ་ཅིའི་ཕྱིར་ཞེ་ན། རྐྱེན་དེ་ལ་བརྟེན་ནས་འགལ་རྐྱེན་དེས་ཚོགས་རྫོགས། སྒྲིབ་པ་འདག ལས་ངན་འཛད། དགེ་སྦྱོར་གྱི་བོགས་ཐོན། ལམ་གྱི་གེགས་སེལ། བདེ་སྡུག་རོ་སྙོམས་ལམ་དུ་ཁྱེར་བས་རྫོགས་པའི་བྱང་ཆུབ་འཐོབ་བོ་སྙམ་པ་དེ་ནི་དགའ་བྲོད་ཀྱི་བདུད་དོ། །གཅོད་ཀྱི་བརྗེད་ཐོ་ལས། སེམས་ཚོལ་གྱིས་གཞི་རྩ་ཆོད་པར་བྱས་ནས་རྣམ་པར་མི་རྟོག་པའི་དབྱིངས་ལ་ཤེས་པ་གཏད་དེ་དབྱིངས་རིག་བསྲེ་བ་ལ་སྦྱར་ན་མི་རྟོག་པའི་དབྱིངས་དེ་སྟོང་ཉིད་ཀྱི་རང་བཞིན་དུ་ཇེ་གསལ་ལ་འོང་བ་ཡིན་གྱི། གཞི་རྩ་མ་ཆོད་པར་ཡུམ་དོན་ངོ་འཕྲོད་ལུགས་མེད། དེ་ནས་དབྱིངས་རིག་བསྲེ་བ་དངོས་ལ། རིག་པ་ཕུང་པོའི་གཟེབ་ཀྱིས་བཏུམ་ནས་གཅེར་བུར་འབུད་མི་ཐུབ་པ་དེ། དམིགས་པས་རྟེན་དང་ཕྲལ་ཏེ་གཅེར་བུར་བཏོན་ནས་དབྱིངས་ལ་བསྲེ་བ་ནི། རིག་པ་རྟེན་མེད་དུ་ཕྱུང་ནས་དབྱིངས་རིག་བསྲེ་བ་ཞེས་པར་འགྱུར་ཏེ་གཅོད་ཀྱི་ཁྱད་ཆོས་ཐུན་མོང་མ་ཡིན་པ་ཡིན་གསུངས། སེམས་ཀྱི་ཐིག་ལེ་མས་རིམ་ནས་སྤར་ཏེ་ལུས་སེམས་བྲལ་ལུགས་འདི་ལ་རིགས་དྲུག་གནས་སྦྱོང་ཡང་ཚང་ཞེས་འབྲུག་ཆེན་པས་གསུངས། དེ་ལྟར་དབྱིངས་རིག་བསྲེ་བ་ཚད་ལྡན་ཞིག་བྱུང་ན་དེའི་སྟེང་ནས་གཟན་སྐྱུར་བྱས་ན་ལུས་ལ་རང་ལུས་སུ་མི་འཛིན་པར་རྩྭ་དང་རྩིག་པ་ལྟ་བུའི་བློ་འཆར་བདེ་བས་གཅེས་འཛིན་གྱི་འཁྲི་བ་བཙན་ཐབས་སུ་གཅོད་པའི་མན་ངག་གི་རལ་གྲི་རྣོན་པོའོ། །དབྱིངས་རིག་བསྲེ་བ་བྱང་ཚེ་ལུས་སེམས་མ་ཕྲལ་བར་ཡུམ་དོན་བསྐྱང་ནའང་འདྲ་གསུངས། དེའང་ནམ་མཁའ་སྒོ་འབྱེད་དུས་དབྱིངས་རིག་བསྲེས་ཐོག་དེར་རྩེ་གཅིག་བཞག །དེ་ལ་མི་གནས་ན་གཟན་སྐྱུར་གྱིས་ཞེན་འཛིན་བཅད་དེ། དེ་ཀའི་ངང་ལ་ཡང་དབྱིངས་རིག་བསྲེ་སྟེ། འདིའི་དམིགས་རིམ་ཐམས་ཅད་ཡུམ་དོན་སྐྱོང་བའི་རྣམ་འགྱུར་དང་རྩལ་སྦྱོང་ཡིན་གསུངས། ཞེས་དང་། དེའང་འདིའི་དབྱིངས་རིག་བསྲེ་ཐད། ཤེས་པ་རྟེན་མེད་དུ་བཞག་པས་གློ་བུར་བའི་དམིགས་རྟེན་ཅན་གྱི་བློའི་སྤྲོས་པ་ཤས་ཇེ་ཆུང་ལ་རིམ་གྱིས་སོང་ནས། རྟེན་མེད་ཀྱི་ཤེས་རིག་གཉུག་མའི་ཆ་ཞིག་རྗེན་ལ་བུད་ཡོང་། དེ་ཀ་བཟོ་མེད་རང་བབས་སུ་བསྐྱང་བ་ལས་ལྷག་པ་ནི་རྫོགས་ཆེན་ཁྲེགས་ཆོད་ལ་ཡང་མ་མཐོང་ངོ་། །ཞེས་གསུངས། དེ་ཡང་ཚོགས་ཞིང་སྔར་གསལ་བཞིན་པའི་འོག་ཏུ་གནོད་བྱེད་ཀྱིས་གཙོས་པའི་རིགས་དྲུག་སེམས་ཅན་ཐམས་ཅད་སྐད་ཅིག་གིས་གསལ་བཏབ་ལ། ཕཊཿ ལུས་གཅེས་འཛིན་བོར་བས་ལྷ་བདུད་བཅོམ། །ཞེས་སོགས་བརྗོད་པ་དང་ཆབས་གཅིག་རང་ལུས་ལ་གཅེས་འཛིན་གྱི་ཞེན་པ་བོར་བས་ལྷའི་བུའི་བདུད་བཅོམ། རང་སེམས་ཀྱི་ངོ་བོ་ཐིག་ལེ་དཀར་པོ་སྲན་མ་ཙམ་པ་ཞིག་སྤྱི་བོ་ཚངས་པའི་སྒོ་ནས་ནམ་མཁའི་དབྱིངས་ལ་ཐོན་ཏེ་དབྱིངས་རིག་དབྱེར་མེད་དུ་བསྲེས་ནས་མཉམ་པར་བཞག་པས་འཆི་བདག་གི་བདུད་བཅོམ། དེ་ནས་སྐད་ཅིག་གིས་རང་རིག་ཡེ་ཤེས་ཀྱི་མཁའ་འགྲོ་ཁྲོས་མ་ནག་མོར་གྱུར་ཏེ་དར་དང་རུས་པའི་ཕྱག་རྒྱ་ལྔས་བརྒྱན་པ། སྤྱི་བོར་ཕག་ཞལ་གྱིས་མཚན་པའི་ཕྱག་གཡས་པ་ན་ཉོན་མོངས་པའི་བདུད་བཅོམ་པའི་མཚོན་བྱེད་གྲི་གུག་ནམ་མཁའ་ལ་འཕྱར་བས། གཟུགས་ཕུང་པོའི་བདུད་བཅོམ་པ་ཐོད་པ་སྨིན་མཚམས་ནས་བྲེགས་ཏེ། གཡོན་ལས་བྱེད་ཀྱི་ཚུལ་གྱིས་སྟོང་གསུམ་དང་མཉམ་པར་གྱུར་པའི་བྷནྡྷ་ཐོགས་པ་དེ་ཉིད། སྐུ་གསུམ་གྱི་མཚོན་བྱེད་མི་མགོའམ་ཐོད་པའི་སྒྱེད་པུ་རི་རབ་ཙམ་གསུམ་གྱི་ཁར་བཞག་པའི་ནང་དུ་སྟོང་གསུམ་གང་བའི་བམ་རོ་དེ་ཉིད་དུམ་བུར་བཅད་དེ་བླུགས། འོག་ནས་ཨ་ཐུང་ལས་ཡེ་ཤེས་ཀྱི་མེ་འབར་བ་དང་། སྟེང་ནས་ཧཾ་ཡིག་དཀར་པོ་མགོ་ཐུར་བསྟན་དུ་གནས་པ་ལས་བདུད་རྩིའི་རྒྱུན་འཛག་སྟེ་ཞུ་ཞིང་ཁོལ། འབྲུ་གསུམ་གྱི་ནུས་པས་ༀ་བརྗོད་པས་མ་དག་པའི་དངོས་པོ་ཐམས་ཅད་རླངས་པ་སྔོ་དམར་གྱི་རྣམ་པས་ཕྱིར་ཐོན་ཏེ་སྦྱངས། ཨཱཿས་དག་པ་ཡེ་ཤེས་ཀྱི་བདུད་རྩི་བསམ་གྱིས་མི་ཁྱབ་པར་སྤེལ། ཧཱུྃ་གིས་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་འདོད་དགུའི་ལོངས་སྤྱོད་ཅིར་ཡང་འཆར་བའི་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་བསྒྱུར་བར་བསམ་ལ། འབྲུ་གསུམ་མང་དུ་བརྗོད། དེ་ནས་རང་གི་ཐུགས་ཀ་ནས་མཆོད་པའི་ལྷ་མོ་དཔག་ཏུ་མེད་པ་སྤྲོས་ཏེ། ཡར་མཆོད་ཡུལ་དཀོན་མཆོག་སྲིད་ཞི་དང་། མགོན་པོ་ཡོན་ཏན་གྱི་མགྲོན་རྣམས་ལ་མཆོད་པས་ཐུགས་རྒྱུད་ཟག་མེད་ཀྱི་བདེ་བས་ཚིམ་སྟེ་ཐུགས་དམ་བསྐངས། རང་གཞན་སེམས་ཅན་ཐམས་ཅད་ཀྱི་ཚོགས་གཉིས་རྫོགས། སྒྲིབ་གཉིས་བྱང་ནས། མཆོག་དང་ཐུན་མོང་གི་དངོས་གྲུབ་རྣམ་པ་གཉིས་ཐོབ་པར་བསམ། མར་རིགས་དྲུག་འཁོར་བའི་མགྲོན་ལ་དཀར་འགྱེད་དང་ཁྲ་འགྱེད་བྱས་པས་མཉེས་ནས་བུ་ལོན་དང་ལན་ཆགས་བྱང་བར་བསམ། ཁྱད་པར་དུ་གནོད་བྱེད་བགེགས་རིགས་ཀྱི་ཚོགས་རྣམས་ལ་བྱིན་པས་སོ་སོའི་གང་འདོད་པའི་ཡོ་བྱད་དང་། ཤ་ཁྲག་རུས་པའི་ཕུང་པོར་གྱུར་ནས་ལོངས་སྤྱད་པས་ཚིམ། ལན་ཆགས་དང་བུ་ལོན་བྱང་། ནད་གདོན་དང་བར་ཆད་གདུག་སེམས་དབྱིངས་སུ་ཞི། རྐྱེན་ངན་གྲོགས་སུ་ཤར་བ་དང་། འཁོར་བའི་རྩ་བ་བདག་འཛིན་རྡུལ་དུ་བརླགས་ཤིང་ལུས་ཟག་མེད་འཇའ་ཚོན་གྱི་སྐུ་དང་། སེམས་རྟོག་མེད་ཆོས་ཀྱི་སྐུ་རུ་གནས་གྱུར། མཐར་མཆོད་བྱ་དང་མཆོད་ཡུལ་སོགས་ཀྱིས་མཚོན་གཟུང་འཛིན་གྱི་རྟོག་ཚོགས་མ་ལུས་པ་ཀུན་རང་བཞིན་གྱིས་མ་གྲུབ་པའི་སེམས་ཀྱི་གཤིས་ལུགས་འོད་གསལ་རྫོགས་པ་ཆེན་པོའི་དབྱིངས་སུ་སྦྱངས་ནས་འཁོར་གསུམ་གྱི་མཚན་མ་དང་བྲལ་བའི་མ་བཅོས་གཉུག་མའི་ཀློང་དུ་ཨཿ ཞེས་ངལ་གསོའོ། །དྲུག་པ་དངོས་གཞིའི་ཉམས་རྟོགས་ཀྱི་སྒོ་འབྱེད་བླ་མའི་རྣལ་འབྱོར་གྱི་ཁྲིད་ལ། རྣམ་བཤད་པདྨ་དཀར་པོ་ལས། དུས་གསུམ་རྒྱལ་བའི་སྤྱི་དཔལ་ཨོ་རྒྱན་ཆེན་པོ་དེ་ཉིད་རང་བྱུང་གདོད་མའི་ཆོས་ཀྱི་སྐུ་ཡེ་ནས་རྣམ་པར་གྲོལ་བ་ཀུན་ཏུ་བཟང་པོ་དང་གཉིས་སུ་མེད་པ་ཆོས་སྐུའི་དབྱིངས་ལས་ལྔ་ལྡན་ལོངས་སྤྱོད་རྫོགས་པའི་སྐུར་ལྷུན་གྱིས་གྲུབ་ཅིང་། དེའི་རང་མདངས་སྤྲུལ་པའི་རོལ་པ་བསམ་གྱིས་མི་ཁྱབ་པའི་ཚུལ་དུ་ཤར་བ་ཉིད་སངས་རྒྱས་ཉག་གཅིག་གི་སྤྱོད་ཡུལ་ལས་གཞན་པའི་ཡུལ་མིན། ཞེས་དང་། རང་ཅག་གི་གནས་འཛམ་བུའི་གླིང་འདིར་ཡང་སྐུ་གཅིག་མཚན་བརྒྱད་འཕྲུལ་མཚན་ཉི་ཤུ་སོགས་ཀྱི་བཀོད་པ་དང་། ཡང་སྤྲུལ་བསམ་གྱིས་མི་ཁྱབ་པ་དང་བཅས་ཏེ་སངས་རྒྱས་ཀྱི་བསྟན་པ་སྤེལ་བར་མཛད་ལ། ད་ལྟ་རྔ་ཡབ་གླིང་དུ་དབུས་ན་ཟངས་མདོག་དཔལ་རི་པདྨ་འོད་སྟེང་འོག་བར་གསུམ་སྤྲུལ་པའི་བཀོད་པ་གསུམ་དང་། སྲིན་པོའི་གླིང་ཆེན་པོ་ཉེར་གཅིག་ཏུ་མཚན་དང་སྐུ་ཡི་རྣམ་འགྱུར་ཐ་དད་པའི་སྤྲུལ་པ་རེ་རེར་བཞུགས་པ་སོགས་ཀྱིས་མཚོན་ནས། མདོར་ན་ཆོས་ཀྱི་དབྱིངས་ཀྱིས་ཀླས་པར་མཛད་པ་མཐའ་ཡས་ཤིང་། ཞེས་དང་། མ་འོངས་ཀླ་ཀློས་ཉེན་པའི་ཚེ། སྟག་ཤམ་གསང་ལུང་ལས། པད་འབྱུང་ང་ཉིད་དྲག་པོ་འཁོར་ལོ་ཅན། །རྗེ་འབངས་ཉེར་ལྔ་རིགས་ལྡན་དཔུང་དང་བཅས། །ཞེས་སོགས་ཀླ་ཀློ་མཐར་བྱེད་ཅིང་གསང་སྔགས་ཀྱི་བསྟན་པ་སྤེལ་བར་གསུངས། པདྨ་བཀའ་ཡི་ཐང་ཡིག་ལས་ལྷ་ལྕམ་ལ་གསུངས་པ། སྔོན་ཚེ་སྣང་བ་མཐའ་ཡས་འོད་དཔག་མེད༔ རི་བོ་ཏ་ལར་མགོན་པོ་སྤྱན་རས་གཟིགས༔ དྷ་ན་ཀོ་ཤར་པདྨ་འབྱུང་གནས་སྐུ༔ མཚོན་ཚུལ་ཙམ་ལ་གསུམ་དུ་སྣང་གྱུར་ཀྱང༔ དོན་ལ་དབྱེར་མེད་སོ་སོར་ཐ་མི་དད༔ ཆོས་དབྱིངས་གནས་སུ་ཀུན་ཏུ་བཟང་པོ་དང༔ སྟུག་པོ་བཀོད་པར་རྡོ་རྗེ་འཆང་ཆེན་པོ༔ རྡོ་རྗེ་གདན་དུ་ཐུབ་པ་ཆེན་པོ་ཉིདཿ གཉིས་མེད་པདྨ་ང་རུ་ལྷུན་གྱིས་གྲུབ༔ འགྲོ་དོན་ཀུན་ལས་བྱིན་རླབས་རྨད་པོ་ཆེ༔ ཞེས་དང་། བླ་མ་དགོངས་འདུས་སྐུ་རྒྱུད་ཤེལ་གྱི་རི་བོ་ལས༔ དྲི་མེད་མཚོ་གླིང་གེ་སར་རྒྱས་པའི་སྟེང༔ མངལ་གྱིས་མ་གོས་པདྨ་བཛྲ་རྩལ༔ བདེ་བའི་རོ་འབྱིན་ལྷ་ལྕམ་མནྡཱ་ར༔ ཐབས་ཤེས་བདེ་སྟོང་གར་གྱི་དབང་ཕྱུག་མཆོག༔ རྒྱལ་བ་ཡོངས་ཀྱི་ཐུགས་བཅུད་འདུས་པ་སྟེ༔ དེ་ཡི་རྩལ་ལས་རྣམ་འཕྲུལ་དུ་མར་སྣང༔ ཞེས་དང་། བླ་མ་སྒྲུབ་པའི་གསང་ཐེམ་གནད་ཡིག་ལས༔ ང་བསྒྲུབ་སངས་རྒྱས་ཐམས་ཅད་འགྲུབ༔ ང་མཐོང་སངས་རྒྱས་ཐམས་ཅད་མཐོང ༔ ང་ནི་བདེ་གཤེགས་འདུས་པ་ཡིན༔ ཞེས་དང་། གུ་རུ་ཆོས་ཀྱི་དབང་ཕྱུག་གི་གཏེར་བྱོན་སྙིང་ཐིག་ཚིག་བདུན་པའི་གསོལ་འདེབས་ལས། གཞན་ཡང་སྐྱབས་གྱུར་རེ་ས་རྣམས༔ ཨོ་རྒྱན་བདག་ལ་རྫོགས་པར་སོམས༔ ཞེས་གསུངས། སྐྱབས་ཡུལ་གསལ་གདབ་པ་ནི། ཨེ་མ་ཧོ། རང་སྣང་ལྷུན་གྲུབ༴ སོགས་བརྗོད་པ་དང་ཆབས་གཅིག །འདི་ལྟར་ནམ་མཁས་གར་ཁྱབ་ཐམས་ཅད་རང་གི་སྣང་བས་ཁྱབ་ཚད་ཀྱི་ཞིང་ཁམས་ཐམས་ཅད་ལ་ཐ་མལ་གྱི་འཛིན་སྟངས་དབྱིངས་སུ་ཐིམ་པ་ལས་རང་བྱུང་ལྷུན་གྲུབ་ཏུ་ཤར་བའི་དག་པ་རབ་འབྱམས་ཀྱི་ཞིང་། དབྱིབས་དང་རྒྱན་དང་། བཀོད་པ་རབ་ཏུ་རྫོགས་པ་ཟངས་མདོག་དཔལ་རི་པདྨ་འོད་ཀྱི་ཕོ་བྲང་ཆེན་པོ་སྟེང་འོག་བར་གསུམ་སྤྲུལ་པའི་དབུས་སུ། རང་ཉིད་གཞི་ལུས་ཀྱི་དངོས་པོ་དེ་ཉིད་དཔལ་རིའི་ཞིང་གི་གཙོ་མོ་མཚོ་རྒྱལ་ཡིན་པས་རང་ཉིད་དེར་བྱིན་གྱིས་རློབས་ན་གུ་རུའི་ཐུགས་རྒྱུད་བསྐུལ་བ་དང་། པདྨ་འོད་ཀྱི་ཞིང་ལ་དབང་སྒྱུར་བའི་རྟེན་འབྲེལ་གྱི་གནད་ཆེ་བས་ངོ་བོ་མཚོ་རྒྱལ་ལ། རྣམ་པ་རྡོ་རྗེ་རྣལ་འབྱོར་མ་ཞལ་གཅིག་ཕྱག་གཉིས་སྐུ་མདོག་དམར་གསལ་གཡས་གྲི་གུག་དང་། གཡོན་ཐོད་པ་ཁྲག་གིས་གང་བ་འཛིན་ཅིང་། གྲུ་མོ་གཡོན་ན་ཁ་ཊྭཱཾ་ག་འཆང་བ། པད་ཉི་བམ་རོའི་གདན་ལ་ཞབས་གཡས་བརྐྱང་ཞིང་། གཡོན་ཅུང་ཟད་བསྐུམ་པའི་ཞབས་གཉིས་དོར་སྟབས་ཀྱིས་བཞུགས་པ། སྐུ་གཅེར་མོ་དར་དང་རུས་པའི་རྒྱན་གྱིས་བརྒྱན་ཅིང་མེ་ཏོག་གི་ཆུན་འཕྱང་ཅན་ནོ། །མཚན་མའི་རྟོག་པའི་སྒྲིབ་གཡོག་དང་བྲལ་བ་མཚོན་བྱེད་སྐུ་གཅེར་བུ། མི་འགྱུར་བའི་བདེ་བ་ཆེན་པོ་དགའ་བ་བཅུ་དྲུག་དང་ལྡན་པ་མཚོན་བྱེད་བཅུ་དྲུག་ལོན་པའི་ན་ཚོད་ཅན། དབྱིངས་དང་ཡེ་ཤེས་ཕྱོགས་མེད་དུ་རྒྱས་པ་མཚོན་བྱེད་དབུ་སྐྲ་གྲོལ་བ། ཆོས་དབྱིངས་མཚོན་བྱེད་རུས་པའི་འཁོར་ལོ། མགུལ་རྒྱན་མཉམ་ཉིད། རྣ་ཆ་སོར་རྟོག གདུ་བུ་མེ་ལོང་། སྐ་རགས་བྱ་གྲུབ་སྟེ་རུས་པའི་ཕྱག་རྒྱ་ལྔས་སྤྲས་པའོ། །དེ་ལྟར་གསལ་ཞིང་མོས་གུས་ཀྱི་སྤྱན་གསུམ་མདུན་གྱི་ནམ་མཁར་བཞུགས་པའི་བླ་མའི་ཐུགས་ཀར་རིངས་པའི་ཚུལ་གྱིས་གཟིགས་པའི་སྤྱི་བོའི་ཐད་ཀར། མདུན་གྱི་ནམ་མཁའི་གནས་སུ་སྣ་ཚོགས་པདྨ་འབུམ་བརྡལ། དེའི་ཟེའུ་འབྲུ་དང་ཚད་མཉམ་པའི་ཉི་ཟླའི་དཀྱིལ་འཁོར་གྱི་སྟེང་དུ་སྐྱབས་གནས་ཀུན་འདུས་ཀྱི་ངོ་བོ་རྩ་བའི་བླ་མ་དང་དབྱེར་མེད་པའི་རྣམ་པ་ཨོ་རྒྱན་མཚོ་སྐྱེས་རྡོ་རྗེ་སྤྲུལ་པའི་སྐུ་དེ་ཉིད་ཀྱི་སྐུ་མདོག་དཀར་ལ་དམར་བའི་མདངས་དང་ལྡན་པ་གཞོན་ནུ་ལོ་བརྒྱད་ལོན་པའི་ཤ་ཚུགས་ཅན། སྤྱན་གཉིས་ལྟ་སྟངས་ཧྲིག་གེར་གཟིགས་པ། སྐུ་ལ་ནང་དུ་རྡོ་རྗེའི་གསང་གོས་དཀར་པོ་དང་། དེའི་སྟེང་དུ་རིམ་པར་འདུང་མ་དམར་པོ་དང་། བླ་གོས་བཙག་ཁ། སྣམ་སྦྱར་ངུར་སྨྲིག་གསེར་གྱི་མེ་ཏོག་གི་རི་མོས་སྤྲས་པ་དང་། ཟ་འོག་གི་བེར་དམར་སྨུག་རྣམས་བརྩེགས་མར་གསོལ་བ། ཞལ་གཅིག་ཕྱག་གཉིས་པ། ཕྱག་གཡས་རྡོ་རྗེ་རྩེ་ལྔ་པ་ནམ་མཁར་འཕྱར་བའི་ཚུལ་དང་། གཡོན་མཉམ་བཞག་གི་སྟེང་ན་ཀ་པཱ་ལའི་དབུས་སུ་འཆི་མེད་ཡེ་ཤེས་ཀྱི་བདུད་རྩིས་གང་བའི་ཚེའི་བུམ་པ་དང་། གྲུ་མོ་གཡོན་དུ་ཡུམ་མནྡཱ་ར་བ་སྦས་པའི་ཚུལ་གྱིས་ཁ་ཊཱཾ་རྩེ་གསུམ་གྱི་རྣམ་པར་བསྣམས་པ། དབུ་ལ་འདབ་མ་ལྔ་པ་དང་ལྡན་པའི་པདྨའི་མཉེན་ཞུ་གསོལ་ཞིང་ཁྲོ་འཛུམ་མཚན་དཔེའི་གཟི་བྱིན་མཆོག་ཏུ་འབར་བ། ཞབས་གཉིས་རྒྱལ་པོ་རོལ་པའི་འདུག་སྟངས་ཀྱིས་བཞུགས་པའི་མཐའ་སྐོར་ཀུན་ཏུ་འཇའ་ཚོན་གྱི་གུར་ཕུབ་ཅིང་། འོད་ལྔའི་ཟེར་ཐག་གི་དྲྭ་བ་མིག་མང་རིས་སུ་འབྲེལ་བའི་ནང་ཁོངས་འཇའ་འོད་ཀྱི་ཐིག་ལེ་ཟླུམ་པོར་འཁྱིལ་བའི་ཀློང་དུ། རྩ་བའི་བླ་མའི་ཐུགས་ཡེ་ཤེས་ཆེན་པོའི་རྣམ་རོལ་ལས་ཤར་བའི་རྒྱ་གར་གྱི་རིག་འཛིན་བརྒྱད། རྣལ་འབྱོར་གྱི་དབང་ཕྱུག་བརྒྱད་ཅུ་རྩ་བཞི། བོད་ཀྱི་གྲུབ་ཆེན་རྗེ་འབངས་ཉེར་ལྔ་སོགས་རྒྱ་བོད་ཀྱི་པཎ་གྲུབ་རིག་པ་འཛིན་པའི་ས་ལ་བཞུགས་པ་རྣམས་དང་། རྒྱུད་སྡེ་ཆེན་པོ་དྲུག་དང་འབྲེལ་བའི་ཡི་དམ་ཞི་ཁྲོ་རབ་འབྱམས། གནས་ཉེར་བཞི། ཡུལ་སོ་གཉིས། དུར་ཁྲོད་ཆེན་པོ་ བརྒྱད་ན་བཞུགས་པའི་གནས་གསུམ ་གྱི་དཔའ་བོ་མཁའ་འགྲོ་ཆོས་སྐྱོང་སྲུང་མ་ནོར་ལྷ་གཏེར་བདག་གི་ཚོགས་དང་བཅས་པ་སྤྲིན་གྱི་ཕུང་པོ་གཏིབ་པ་ལྟར་བཞུགས་ཤིང་། དེ་ཐམས་ཅད་ཀྱང་གསལ་སྟོང་ཟུང་འཇུག་ཆུ་ཟླ་དང་འཇའ་ཚོན་ལྟ་བུ་ཐ་མལ་གྱི་ཤེས་པ་རང་འགགས་སུ་འགྲོ་བར་གསལ་བཏབ། ཞེས་ཞབས་དྲུང་རིན་པོ་ཆེས་ན་བཟའ་སོགས་གོང་འོག་གི་གོ་རིམ་ལེགས་པར་བསྡེབས་པ་འདི་ཉིད་གསལ་བདེ་བ་ཡིན་ནོ། །ཧཱུྃ་ཨོ་རྒྱན་ཡུལ་གྱི་སོགས། ཚིག་བདུན་གསོལ་འདེབས་མོས་གུས་ཀྱི་གདུང་ཤུགས་དྲག་པོ་དང་བཅས་ཏེ་བསྐུལ་བས་རྔ་ཡབ་དཔལ་རི་སྤྲུལ་བའི་ཞིང་ནས་ཨོ་རྒྱན་པདྨ་ཐོད་ཕྲེང་རྩ་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་ཏིལ་གྱི་གང་བུ་ཁ་ཕྱེ་བ་བཞིན། ལྷོ་ནུབ་ཀྱི་མཚམས་ནས་ཡེར་གྱིས་བྱོན་ཏེ་དམ་ཚིག་པ་དང་དབྱེར་མེད་རོ་གཅིག་ཏུ་འདྲེས་པར་བལྟའོ།། ཚིག་བདུན་འདི་ཡི་རྣམ་བཤད་ནི། པདྨ་དཀར་པོ་ལས། ཕྱི་གསོལ་འདེབས་དཀྱུས་མའི་ཚིག་དོན་བཤད་པ། ནང་སྦས་དོན་གྲོལ་ལམ་དང་ཐབས་ལམ་ལྟར་བཤད་པ། ཡང་གསང་ཐུན་མིན་རྫོགས་ཆེན་འོད་གསལ་སྙིང་ཐིག་གི་དགོངས་པ་ལྟར་བཤད་པ་རྣམས་ལས་ཤེས་པར་བྱའོ། །ཡན་ལག་བདུན་པ་འབུལ་བ་ནི། ཧྲཱིཿ བདག་ལུས་ཞིང་གི་སོགས། བདག་ཉིད་རྡོ་རྗེ་རྣལ་འབྱོར་མར་གསལ་བའི་ཐུགས་ཀ་ནས་སྤྲུལ་པའི་ལུས་ཐ་མལ་བའི་ཚུལ་གྱིས་ཞིང་གི་རྡུལ་སྙེད་དུ་རྣམ་པར་སྤྲུལ་ཏེ་དེ་རྣམས་དང་ལྷན་ཅིག་ཏུ་ཁམས་གསུམ་གྱི་སེམས་ཅན་ཐམས་ཅད་ཀྱང་མིའི་གཟུགས་སུ་གྱུར་ཏེ་སྒོ་གསུམ་གུས་པ་ཆེན་པོས་ཕྱག་འཚལ་བར་གསུངས་པ་དང་། དངོས་སུ་བཤམས་པ་དང་། ཡིད་ཀྱིས་ཀུན་ཏུ་བཟང་པོའི་མཆོད་སྤྲིན་མཁའ་དབྱིངས་ཁྱབ་པར་སྤྲུལ་ཞིང་ཏིང་འཛིན་ཟབ་མོའི་མཐུས། སྣང་ཞིང་སྲིད་པའི་ཆོས་སོ་ཅོག་མཆོད་པའི་ཕྱག་རྒྱར་དམིགས་ཏེ་འབུལ་བའོ། །ཚེ་རབས་འཁོར་བ་ཐོག་མ་མེད་པ་ནས་སྒོ་གསུམ་གྱིས་བསགས་པའི་མི་དགེ་བའི་ཁ་ན་མ་ཐོ་བའི་ལས་རྣམས་ཀུན་ཀྱང་། གནོང་འགྱོད་དྲག་པོས་བཤགས་པས་སྡིག་སྒྲིབ་ཐམས་ཅད་རང་གི་ལྕེ་ཐོག་ཏུ་ནག་ཕུང་གིས་འདུས་པ་ལ། ཚོགས་ཞིང་རྣམས་ཀྱི་སྐུ་གསུང་ཐུགས་ལས་འོད་ཟེར་བྱུང་བ་ཕོག་པས་དྲི་མ་བཀྲུས་པ་བཞིན་དག་པར་བསམ་ལ་ཕྱིས་མི་བྱེད་པར་གཉེན་པོས་སྡོམ་པ་ཀུན་རྫོབ་དང་། རྗེས་ལ་སྡིག་པ་རང་བཞིན་གྱིས་མ་གྲུབ་པར་ཤེས་ནས་འོད་གསལ་ཆོས་སྐུའི་ངང་དུ་སྡིག་ལྟུང་དབྱིངས་སུ་བཞག་ནས་བཤགས་པ་ནི་དོན་དམ་མོ། །ཀུན་རྫོབ་དང་དོན་དམ་པའི་བདེན་པ་གཉིས་ཀྱིས་བསྡུས་པའི་འཁོར་འདས་ལམ་གསུམ་གྱི་དགེ་བའི་ཚོགས་ཀུན་ལ་དགའ་ཞིང་ཕྲག་དོག་མེད་པར་རྗེས་སུ་ཡི་རང་བ་དང་། ཕྱོགས་བཅུའི་རྒྱལ་བ་སྲས་དང་བཅས་པ་ལ་རིགས་ཅན་གསུམ་གྱི་གདུལ་བྱར། ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའི་ཐེག་པ་གསུམ་ལས་བརྩམས་ཏེ་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། ཇི་སྲིད་འཁོར་བ་མ་སྟོངས་བར་དེ་སྲིད་དུ་སྐུ་མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པ་དང་། དེ་ལྟར་བསགས་པའི་དགེ་བའི་རྩ་བས་མཚོན་དུས་གསུམ་དུ་བསགས་པའི་དགེ་བའི་རྩ་བ་ཀུན། སེམས་ཅན་ཐམས་ཅད་བྱང་ཆུབ་ཆེན་པོའི་གོ་འཕང་ཐོབ་པའི་རྒྱུར་ཡོངས་སུ་བསྔོ་བ་སྟེ། ཡན་ལག་བདུན་གྱི་དམིགས་པ་རྣམས་དྲན་བཞིན་པས་ཕྱག་དང་བཅས་ཏེ་ལན་ཇི་ལྟར་རིགས་པར་བྱའོ། །ཁྲིད་ཡིག་དྲན་པ་ཉེར་བཞག་ལས། ཧྲཱིཿ བདག་ལུས་ཞིང་གི་རྡུལ་སྙེད་དུ། །སོགས་བརྗོད་ཅིང་འདིའི་ཁོངས་སུ་ཕྱག་འབུམ་ཡང་འགྲོ་བར་བྱེད་པ་ལག་ལེན་ཡིན་ནོ། །ཞེས་གསུངས། ཕྱག་སྐྱབས་འགྲོ་དང་སྦྲེལ་བ་ནི་གཞན་ལུགས་ཡིན་ནོ། །བཞེད་པ་འགའ་ན། ཐུན་མཐར་ཚོགས་ཞིང་གི་ལྷ་ཚོགས་རྣམས་ལས་འོད་ཟེར་འཕྲོས་པས་སྤྲུལ་བ་རྣམས་སྤྲུལ་གཞིར་བསྡུ་ཞིང་། སེམས་ཅན་རྣམས་འོད་དུ་ཡལ་ནས་ཚོགས་ཞིང་ལ་ཐིམ་པར་ཡང་གསུངས། ཕུར་ཚུགས་སུ་གསོལ་བ་འདེབས་ཤིང་རྒྱུད་རྡོ་རྗེ་བཞིའི་ངོ་བོར་བསྒྲུབ་པ་ལ། དང་པོ་དངོས་གྲུབ་བསྒྲུབ་པ་ནི། རྗེ་བཙུན་གུ་རུ་སོགས། འདི་ལྟར་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པ་ནི་རང་སེམས་ལྷན་ཅིག་སྐྱེས་པའི་ཡེ་ཤེས་རྟོགས་པ་ལ་རག་ལས་ཤིང་། རྟོགས་པ་སྐྱེ་བ་བླ་མའི་བྱིན་རླབས་དང་། བྱིན་རླབས་འཇུག་པ་མོས་གུས་ཀྱི་རྟེན་འབྲེལ་ཁོ་ན་ལ་རག་ལས་པས་ན། རང་གི་རྩ་བའི་བླ་མ་དེ་ཉིད་ཡོན་ཏན་གྱི་ངོས་ནས་སངས་རྒྱས་དང་མཉམ་ཞིང་། བཀའ་དྲིན་གྱི་ངོས་ནས་སངས་རྒྱས་ལས་ཀྱང་ཆེས་ཆེར་ལྷག་པར་ཐག་བཅད། ངེས་ཤེས་བསྐྱེད། མི་ཕམ་རིན་པོ་ཆེས། དེ་ཡང་རང་ལུགས་རྡོ་རྗེ་རྩེ་མོའི་གྲུབ་མཐའ་སྙོགས་མི་སྙོགས་ཀྱི་གནད་ནི། ཐོས་བསམ་རྒྱ་ཆེན་པོ་དང་བསགས་སྦྱང་ཕྱི་ཚུལ་སོགས་ཇི་ལྟར་ཕུན་སུམ་ཚོགས་པར་བྱས་ཀྱང་། དེ་ཁོ་ནས་ཐུན་མིན་ལམ་གྱི་གྲུབ་མཐའ་ཟིན་པའི་ངེས་པ་མེད་ཅིང་། རྫོགས་པ་ཆེན་པོའི་དོན་བརྒྱུད་དང་ལྡན་པའི་བླ་མ། སེམས་ཉིད་ཆོས་སྐུར་ངོ་སྤྲོད་པའི་མན་ངག་སྙན་ཁུང་དུ་བརྒྱུད་ནུས་པ། རང་དང་སྐལ་བ་མཉམ་པའི་མི་ཡི་ཚུལ་དུ་བསྟན་པའི་བཤེས་གཉེན་ཆེན་པོ་དེ་ལྟ་བུ་གང་ན་ཡོད་ཀྱང་། ཡོན་ཏན་དེ་ཁོ་ནས་སངས་རྒྱས་དང་མཚུངས་པར་རྙེད་དཀའ་བའི་འདུ་ཤེས་ཀྱིས་སྒོ་གསུམ་གཡོ་ཟོལ་མེད་པར་གུས་པས་བསྟེན་ནས་ཐུགས་མཛོད་ལོན་པ་དེ་གཅིག་པུས་རྡོ་རྗེ་སྙིང་པོའི་གྲུབ་མཐའ་སྙོགས་པ་འབྱུང་བས་ན། རྒྱལ་བ་རིག་འཛིན་བརྒྱུད་པ་དང་བཅས་པས་ཡང་ཡང་གསུངས་པ་ལྟར། གསང་སྔགས་སྙིང་པོའི་ལམ་འཚོལ་བ་རྣམས་ཀྱིས་བླ་མ་མཚན་ཉིད་དང་ལྡན་པ་དབང་བཞི་པའི་ཡེ་ཤེས་ལ་མྱོང་བ་ཅན་བསྟེན་པར་བྱ་བ་ལས། གཞན་གང་གིས་ཀྱང་མི་ཕན་པ་འདི་ཁོ་ན་མི་ཤེས་སུ་མི་རུང་བའི་གནད་ཡིན་པས། རིག་འཛིན་གོང་མ་རྣམས་ཀྱི་ལམ་མ་ནོར་བ་འདི་ལ་ལམ་ཉིད་དུ་ངོ་ཤེས་པའི་ངེས་ཤེས་སུ་ལ་ལྡན་པ་དེ་ལ་གསང་སྔགས་སྙིང་པོའི་སྐལ་བ་ཡོད་པའི་ཕྱིར། ཐོབ་གྲངས་དང་བཟླས་གྲངས་བླ་མ་མང་པོ་བསྟེན་པའི་གྲངས་ཙམ་ཞིག་ལ་བློ་གདེངས་མི་འཆའ་བར། རང་སེམས་ཆོས་སྐུར་ངོ་སྤྲོད་པའི་མན་ངག་ཟབ་མོ་དཔལ་ལྡན་བླ་མའི་ཞལ་ནས་མཉན་ཏེ། དེ་ལ་ནན་ཏན་སྙིང་པོར་བྱ་བ་འདི་ཁོ་ན། བཤད་བཤད་ཀྱི་སྙིང་པོ། སྒྲུབ་སྒྲུབ་ཀྱི་འབྲས་བུ། བཙལ་བཙལ་གྱི་དོན་པོ་ཡིན་པས་གནད་འདི་མ་སྟོར་བར་གྱུར་པ་ཅིས་ཀྱང་གལ་ཆེའོ། །ཞེས་གསུངས་པ་ལྟར། རྗེ་བཙུན་མ་ཧཱ་གུ་རུ་རིན་པོ་ཆེ་ཁྱེད་ནི་སངས་རྒྱས་ཐམས་ཅད་ཀྱི་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་རྣམས་ཀྱི་བྱིན་རླབས་ཐམས་ཅད་གཅིག་ཏུ་འདུས་པའི་དཔལ་དང་ལྡན་པ། སེམས་ཅན་ཡོངས་ཀྱི་སྐྱབས་དང་མགོན་གཅིག་པུར་གྱུར་པ་ལ། བདག་གིས་གཅེས་པར་བཟུང་བའི་ལུས་དང་། དེ་གསོ་བར་བྱེད་པའི་ལོངས་སྤྱོད། བློ་སྙིང་བྲང་གསུམ་དང་བཅས་པ་ཆགས་ཞེན་གྱི་ལྟོས་པ་མེད་པར་ཁྱོད་ལ་འབུལ་ཞིང་གཏད་པ་ཡིན་པས། དུས་འདི་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ། སྐྱིད་སྡུག་ལེགས་ཉེས་མཐོ་དམན་ཀུན་ཅི་བྱུང་ཡང་རྗེ་བཙུན་ཆེན་པོ་པདྨ་འབྱུང་གནས་ཁྱེད་ཁོ་ན་མཁྱེན་ནོ་སྙམ་པའི་རེ་ལྟོས་ལིང་བསྐྱུར་གྱི་ཚུལ་གྱིས་ལུས་ཀྱི་བ་སྤུ་གཡོ་བ། མིག་ནས་མཆི་མ་འཁྲུག་པ། བློ་སྣ་བླ་མས་ཕྲོགས་པ། བསམ་རྒྱུ་བླ་མ་ལས་མེད་པ། ལུས་སེམས་ཚུགས་མི་ཐུབ་པའི་མོས་གུས་གདུང་ཤུགས་དྲག་པོས། རྗེ་བཙུན་གུ་རུ་རིན་པོ་ཆེ༔ སོགས། གྲངས་བསོགས་ཚུལ་གྱི་བཞེད་སྲོལ་ལ། སྔོན་འགྲོའི་ཁྲིད་ཡིག་དྲན་པ་ཉེར་བཞག་ལས། རྗེ་བཙུན་གུ་རུ་རིན་པོ་ཆེ༔ ཁྱེད་ནི་སངས་རྒྱས་ཐམས་ཅད་ཀྱིཿ སོགས་ནས། རྗེ་བཙུན་ཆེན་པོ་པད་འབྱུང་མཁྱེན༔ ཡན་ཆད་ཚར་ཅི་ནུས་བཟླས་རྗེས། བདག་ལ་རེ་ས་གཞན་ན་མེད༔ ཅེས་པ་ནས། སྒྲིབ་གཉིས་སྦྱོངས་ཤིག་ནུས་མཐུ་ཅན༔ ཡན་ཆད་ཚར་འོས་མཚམས་ཀྱི་རྗེས་སུ། གསོལ་འདེབས་རྒྱུད་བསྐུལ་གྱི་རྣལ་འབྱོར་བཛྲ་གུ་རུ་ལ་ཆིག་སྒྲིལ་དུ་བྱ་གསུངས། ཞབས་དྲུང་རིན་པོ་ཆེའི་བཞེད་ཚུལ་ནི་འདི་ཉིད་ལྟར་ཡིན་ནོ། །དཔལ་སྤྲུལ་རིན་པོ་ཆེའི་དངོས་སློབ་མཁས་གྲུབ་ཆེན་པོ་དཔལ་གྱི་སེང་གེའི་བཞེད་པ་ལ། དངོས་གྲུབ་བསྒྲུབ་པའི་དུས། དང་པོ་སྐྱབས་འགྲོའི་ཚུལ་དུ། རྗེ་བཙུན་གུ་རུ་རིན་པོ་ཆེཿ སོགས་ཅི་ནུས་བརྗོད། དེ་ནས་སིདྡྷི་བརྒྱ་རེ་སོང་མཚམས་ལན་རེ་བརྗོད། དེ་ལྟར་ཐུན་གཅིག་ལ་བསྙེན་པ་ཅི་ཙམ་བཟླ་བའི་སུམ་གཉིས་ཙམ་སོང་ནས། དངོས་གྲུབ་བསྐུལ་བའི་དུས་སུ། བདག་ལ་རེ་ས་སོགས། སིདྡྷི་ཕྲེང་སྐོར་རེའི་མཚམས་སུ་ལན་རེ་བརྗོད་གསུངས། བླ་མ་ལུང་རྟོགས་ཀྱི་ཕྱག་བཞེས་ལ། ཚིག་བདུན་གསོལ་འདེབས་སྐབས། ཌཱ་དྲིལ་འདྲ་ཡོད་ན་དཀྲོལ། ཚར་བདུན་དང་ལྔ་གསུམ་སོགས་མོས་གུས་མ་སྐྱེས་བར་འདོན། སྤྲོ་ན། ཧཱུྃ་བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས༔ སོགས་དང་། ནང་སྒྲུབ་རིག་འཛིན་འདུས་པ་ལས། གནས་མཆོག་འདི་རུ་བྱིན་ཕོབ་ལ༔ སོགས་བརྗོད། བླ་རྣམ་སྐབས་ཉིན་རེར་ལེའུ་བདུན་མ་ཚར་རེ་འགྲོ་དགོས་པས། ལེའུ་བདུན་མའི་ལེའུ་རེ་རེ་བཏོན་ནས། ཀུན་བཟང་བླ་མའི་ཞལ་ལུང་ལྟར་བསོགས་དཀའ་ན། རྗེ་བཙུན་གུ་རུ་རིན་པོ་ཆེ༔ སོགས་ནས་པད་འབྱུང་མཁྱེནཿ བར་ལན་གསུམ་བརྗོད་དེ་སིདྡྷི་སྟོང་ཕྲག་རེའི་མཚམས་རྗེ་བཙུན་གུ་རུ་ཚར་གསུམ་རེ་བརྗོད། དེ་ལྟར་ཐུན་གཅིག་གི་ཕྱེད་ཙམ་སོང་ནས་སྟོང་ཕྲག་རེའི་མཚམས་སུ། བདག་ལ་རེ་ས་གཞན་ན་མེད༔ སོགས་ཚར་གསུམ་རེ་བཏོན་ནས་སིདྡྷི་བཟླ། ཐུན་གྲོལ་ཚེ་བརྒྱུད་པའི་གསོལ་འདེབས་མན་ཆད་འདོན་དགོས་གསུངས། ཀུན་བཟང་བླ་མའི་ཞལ་ལུང་ལས། དངོས་གྲུབ་བསྒྲུབ་པའི་དུས་སུ། རྗེ་བཙུན་གུ་རུ་རིན་པོ་ཆེ༔ སོགས་ནས། རྗེ་བཙུན་ཆེན་པོ་པད་འབྱུང་མཁྱེན༔ བར་སོང་ནས། གསོལ་འདེབས་རྒྱུད་བསྐུལ་གྱི་འཛབ་བཛྲ་གུ་རུ་ཁོ་ན་ལ་འབད། སིདྡྷི་བརྒྱ་རེ་སོང་མཚམས། རྗེ་བཙུན་གུ་རུ་རིན་པོ་ཆེ༔ ལ་སོགས་པ་སྔར་ལྟར་བྱ། དེ་ལྟར་བསྙེན་པ་ཅི་ཙམ་བཟླ་བའི་ཕྱེད་ཙམ་སོང་ནས། དངོས་གྲུབ་བསྐུལ་བའི་དུས་སུ། སིདྡྷི་ཕྲེང་སྐོར་རེའི་མཚམས་སུ། བདག་ལ་རེ་ས་གཞན་ན་མེད༔ སོགས་ནས། སྒྲིབ་གཉིས་སྦྱོངས་ཤིག་ནུས་མཐུ་ཅན༔ ཡན་ཆད་ཚར་རེ་བྱ། ཞེས་གསུངས། དངོས་གྲུབ་བསྐུལ་བ་ནི། བདག་ལ་རེ་ས་སོགས། བདག་ལ་ནི་བླ་མ་རིན་པོ་ཆེ་ཁྱེད་མ་གཏོགས་སྐྱབས་གནས་རེ་ས་གཞན་ན་མེད་དོ། །ད་ལྟ་མི་དགེའི་ལས་སྟོབས་ཆེ་བའི་དུས་ངན་ཞིང་། བསོད་ནམས་དམན་པས་སྲོག་རྒུད་པ་ཚེ་ཡི་སྙིགས་མ། ཁྱིམ་པའི་དགེ་ཕྱོགས་རྒུད་པ་ཉོན་མོངས་པའི་སྙིགས་མ། རབ་བྱུང་གི་དགེ་ཕྱོགས་རྒུད་པ་ལྟ་བའི་སྙིགས་མ། ལུས་རྒུད་པ་སེམས་ཅན་གྱི་སྙིགས་མ། ལོངས་སྤྱོད་རྒུད་པ་དུས་ཀྱི་སྙིགས་མ་སྟེ་སྙིགས་མའི་འགྲོ་བ་བདག་ཅག་རྣམས། ཤིན་ཏུ་མི་བཟོད་པའི་སྡུག་བསྔལ་སྣ་ཚོགས་ཀྱི་འདམ་དུ་བྱིང་བ་འདི་ལས་མྱུར་དུ་སྐྱོབས་ཤིག་མ་ཧཱ་གུ་རུ། སྐུ་བུམ་དབང་། གསུང་གསང་དབང་། ཐུགས་ཤེར་དབང་། དབྱེར་མི་ཕྱེད་པ་ཚིག་དབང་སྟེ་དབང་བཞི་བསྐུར་བར་མཛོད་ཅིག་མཁྱེན་པའི་ཡེ་ཤེས་མངའ་བའི་བྱིན་རླབས་ཅན། ཉམས་དང་རྟོགས་པའི་ཡོན་ཏན་སྤོར་ཅིག་བརྩེ་བའི་ཐུགས་རྗེ་ཅན། སྒྲིབ་གཉིས་བག་ཆགས་དང་བཅས་པ་མྱུར་དུ་སྦྱོངས་ཤིག་ནུས་མཐུ་ཅན་ཞེས་འདོད་དོན་གསོལ་འདེབས་དང་། ༀ་ནི་སངས་རྒྱས་སྤྲུལ་སྐུའི་སྙིང་པོ། ཨཱཿ ནི་སངས་རྒྱས་ལོངས་སྐུའི་སྙིང་པོ། ཧཱུྃ་ནི་སངས་རྒྱས་ཆོས་སྐུའི་སྙིང་པོ། བཛྲ་ནི་རྡོ་རྗེ་སྟེ་དབྱིངས་རིག་དབྱེར་མི་ཕྱེད་པའི་ཡེ་ཤེས་སོ། །རྣམ་བཤད་པདྨ་དཀར་པོ་ལས། གུ་རུ་ནི་ཡོན་ཏན་ཐམས་ཅད་ཀྱིས་ལྕི་བ་བླ་མ་སྟེ་གོང་ན་མེད་པ། པདྨ་ནི་ཨོ་རྒྱན་ཆེན་པོའི་མཚན་གྱི་ཐོག་མ། སིདྡྷི་ནི་དོན་དུ་གཉེར་བྱ་མཆོག་ཐུན་གྱི་དངོས་གྲུབ། ཧཱུྃ་ནི་དངོས་གྲུབ་དེ་ལྟ་བུ་སྩོལ་ཅིག་པར་དོན་གྱིས་བསྐུལ་བའོ། །ཞེས་གསུངས། ཟབ་དོན་བདུད་རྩིའི་ཉིང་ཁུ་ལས། ༀ་ཨཱཿ ཧཱུྃ་ཞེས་རྡོ་རྗེ་གསུམ་གྱི་ས་བོན་གྱིས་ཐོག་དྲངས་ཏེ། བཛྲ་ནི་མཚན་རྟོག་གི་སྤྲོས་པས་མི་ཕྱེད་པའི་ཕྱིར་ཆོས་ཀྱི་སྐུ་དང་། གུ་རུ་ནི་དེའི་ངང་ལས་ཁ་སྦྱོར་ཡན་ལག་བདུན་དང་ལྡན་པའི་ཡོན་ཏན་གྱི་ཁུར་ལྕི་བས་ན་ལོངས་སྐུ། པདྨ་ནི་དེའང་སོ་སོར་རྟོག་པའི་ཡེ་ཤེས་ཀྱི་རིག་གདངས་གསུང་པདྨའི་རིགས་སུ་ཤར་བས་ན་སྤྲུལ་སྐུ་སྟེ། དེ་ལྟ་བུའི་སྐུ་གསུམ་དབྱེར་མེད་པའི་བླ་མ་ཨོ་རྒྱན་ཆེན་པོར་ཡོན་ཏན་རྗེས་སུ་དྲན་པས། སེམས་ཀྱི་གཤིས་སྤྲོས་པ་དང་བྲལ་བའི་རང་རྩལ་མོས་གུས་སུ་དུང་ངེ་བའི་ངང་ནས་གསོལ་བ་གདབ་ཅིང་། དེ་ལྟར་གསོལ་བ་བཏབ་པའི་མཐུ་ལས། སིདྡྷི་སྟེ་མཆོག་ཐུན་མོང་གི་དངོས་གྲུབ་ཐམས་ཅད། ཧཱུྃ་ཞེས་བདག་གི་ཤེས་རྒྱུད་ལ་དུས་ད་ལྟ་ཉིད་དུ་སྩོལ་ཅིག་སྙམ་པའི་དོན་དྲན་པར་བྱ་བ་དང་། སྐབས་སུ་ཕྱི་སྣོད་ཀྱི་འཇིག་རྟེན་ཟངས་མདོག་དཔལ་རིའི་ཕོ་བྲང་། ནང་བཅུད་ཀྱི་སེམས་ཅན་ཨོ་རྒྱན་དཔའ་བོ་མཁའ་འགྲོའི་ཚོམ་བུ། སྒྲར་གྲགས་པ་ཐམས་ཅད་སྔགས་ཀྱི་རང་སྒྲ། གསང་བ་སེམས་ཀྱི་འཕྲོ་འདུ་རང་གྲོལ་བྱ་ལམ་རྗེས་མེད་དུ་ཤེས་པའི་ངང་ནས་བཟླས་པ་ལ་འབད། མཐར་རྩ་བརྒྱུད་ཀྱི་བླ་མ་རྣམས་ཀྱི་ཡོན་ཏན་དྲན་བཞིན་དུ་བརྒྱུད་པའི་གསོལ་འདེབས་ནི། ཨེ་མ་ཧོ། རྒྱ་ཆད་ཕྱོགས་ལྷུང་སོགས་ནས། སྩོལ་ཞེས་པའི་བར་དང་། འདི་ཕྱི་བར་དོ་གསུམ་གྱི་སྨོན་ལམ་ལ། རབ་ཚེ་འདིར་གྲོལ་བར་སྨོན་པ་ནི། སྲིད་ལས་ངེས་པར་སོགས། ཚེ་འདིར་སྲིད་པ་འཁོར་བའི་གནས་ལས་ངེས་པར་འབྱུང་བའི་ཞེན་ལོག་གིས། རྡོ་རྗེའི་བླ་མ་དོན་དང་ལྡན་པ་དཔྲལ་བའི་མིག་བཞིན་དུ་བསྟེན་ནས། དེ་ཡིས་ཅི་གསུང་གི་བཀའ་བསྒྲུབ་ཅིང་གདམས་པ་ཟབ་མོའི་ཉམས་ལེན་ལ་ལྟེམ་རྐྱང་སྟེ་ཐང་ལྷོད་མེད་པའི་བསྒྲུབ་ཚུགས་ཞེ་རུས་ཀྱི་སྒོ་ནས། བླ་མའི་ཐུགས་རྒྱུད་ཀྱི་དགོངས་པའི་བྱིན་རླབས་ཐམས་ཅད་བདག་གི་རྒྱུད་ལ་འཕོ་བར་ཤོག་ཅིག །སྣང་སྲིད་འཁོར་འདས་ཐམས་ཅད་ཀྱི་གནས་ཚུལ་ཡེ་ནས་དག་པ་རབ་འབྱམས་འོག་མིན་གྱི་ཞིང་དུ་ལུང་རིགས་མན་ངག་གསུམ་གྱིས་གཏན་ལ་ཕབས་ཏེ། ཐ་མལ་མ་དག་པའི་སྣང་ཞེན་ལྷ་སྐུར་རྫོགས་པ་དང་། སྒྲ་གྲགས་བདེ་ཆེན་སྔགས་སུ་དག །དྲན་རྟོག་འོད་གསལ་ཆོས་སྐུར་སྨིན་ཏེ་དག་རྫོགས་སྨིན་གསུམ་མཐར་ཕྱིན་པའི་འབྲས་བུ་ནི། སྤང་བླང་བྱ་རྩོལ་མེད་པའི་རྫོགས་པ་ཆེན་པོ་ཤེས་ཉམས་ཡིད་དཔྱོད་ལས་འདས་པའི་སྣང་ཉམས་རང་བྱུང་རིག་པའི་རང་གདངས་ཆོས་ཉིད་མངོན་སུམ་གྱི་སྣང་བ་དབྱིངས་ཐིག་རིག་གསུམ་རྗེན་པར་མཐོང་བར་ཤོག །དངོས་འཛིན་མཚན་མའི་རྟོག་པ་ལས་རྣམ་པར་གྲོལ་བའི་འཇའ་ཟེར་དང་ཐིག་ལེའི་སྦུབས་སུ། སྐུ་ཕྱེད་དང་རྐྱང་པ་དང་འོད་ལྔའི་ཐིག་ལེའི་ཚོམ་བུ་ཉམས་ཀྱི་སྣང་བ་གོང་དུ་འཕེལ་བ་དང་། རིག་རྩལ་ཡོངས་སུ་རྫོགས་ཏེ་རང་སྣང་ལོངས་སྐུའི་ཞིང་སྐུ་ཕོ་བྲང་གསུམ་ལམ་སྣང་དུ་ཤར་ཏེ་ཚད་ལ་ཕེབས་པ་དང་། ཆོས་ཅན་གྱི་སྣང་བ་མཐའ་དག་ཆོས་ཉིད་ཀྱི་ཀློང་དུ་ཟད་ནས་བློ་འདས་འོད་གསལ་ཆེན་པོའི་དབྱིངས་སུ་སངས་རྒྱས་ཏེ། གཞོན་ནུ་བུམ་སྐུའི་གནས་ལུགས་མངོན་དུ་གྱུར་ནས་གཏན་སྲིད་ཟིན་པར་ཤོག །དབང་པོ་འབྲིང་བར་དོར་གྲོལ་བར་སྨོན་པ་ནི། ཤིན་ཏུ་རྣལ་འབྱོར་སོགས། ཚེ་འདིར་འབད་རྩོལ་ཆུང་བས་ཤིན་ཏུ་ཟབ་པའི་རྣལ་འབྱོར་སྣང་བཞིའི་ཡེ་ཤེས་རང་གི་ཉམས་འོག་ཏུ་མ་ཆུད་པ་དེ་ཡིས། རགས་ལུས་དྭངས་མའི་དབྱིངས་སུ་མ་གྲོལ་ན། ནམ་ཞིག་ཚེ་ཡི་འདུ་བྱེད་བསྡུ་བའི་ཚེ། འཆི་བ་འོད་གསལ་ཀ་དག་ཆོས་སྐུའི་དགོངས་པ་ཤར་ནས་རང་ངོ་ཤེས་ཏེ་སངས་རྒྱས་པ་དང་། གལ་ཏེ་དེར་གྲོལ་བར་མ་གྱུར་ན་ཆོས་ཉིད་བར་དོའི་སྣང་ཆ་སྒྲ་འོད་ཟེར་གསུམ་སོགས་རང་སྣང་དུ་ངོ་ཤེས་ནས་ལོངས་སྤྱོད་རྫོགས་སྐུར་གྲོལ་བ་དང་། དེ་ལྟར་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་ཟབ་མོའི་ལམ་གྱི་རྩལ་རྫོགས་ནས་དེ་གཉིས་གང་རུང་དུ་མ་པང་དུ་བུ་འཇུག་པ་ལྟ་བུར་གཉིས་མེད་ཀྱི་ཚུལ་དུ་གྲོལ་བར་ཤོག་ཅིག །དབང་པོ་ཐ་མ་རང་བཞིན་སྤྲུལ་སྐུའི་ཞིང་དུ་གྲོལ་བར་སྨོན་པ་ནི། གསང་ཆེན་འོད་གསལ་སོགས། གསང་ཆེན་འོད་གསལ་ཐེག་པ་མཆོག་གི་རྩེ་མོར་གྱུར་པ། སངས་རྒྱས་གཞན་ནས་མི་འཚོལ་བར་སེམས་ཉིད་ཆོས་སྐུའི་རང་ཞལ་མངོན་དུ་གྱུར་ཏེ་གདོད་མའི་ས་ལ་མ་གྲོལ་ན། ཡུན་རིང་མ་བསྒོམས་ཀྱང་སངས་རྒྱས་པའི་ཆོས་མཐོང་གྲོལ་ཙཀྲ་སྟེ་འཁོར་ལོ། ཐོས་གྲོལ་ཞི་ཁྲོའི་རྒྱུད་དང་གཟུངས་སྔགས་སོགས། མྱོང་གྲོལ་དམ་རྫས། རེག་གྲོལ་བཏགས་གྲོལ་དང་མུ་ཏྲ། འཕྲད་ཅིང་དྲན་པས་གྲོལ་བ་འཕོ་བ་དང་ལྔའི་ལམ་མཆོག་རྣམས་ལ་བརྟེན་ནས་རང་བཞིན་སྤྲུལ་པའི་ཞིང་ཁམས། ཤར་ཕྱོགས་མངོན་པར་དགའ་བ། ལྷོ་ཕྱོགས་དཔལ་དང་ལྡན་པ། ནུབ་ཕྱོགས་པདྨ་བརྩེགས་པ། བྱང་ཕྱོགས་ལས་རབ་གྲུབ་པ། དབུས་ཕྱོགས་མེ་རི་འབར་བ་སྟེ་རྣམ་གྲོལ་དབུགས་ཆེན་འབྱིན་པའི་ཞིང་མཆོག་ལྔ་དང་། ཁྱད་པར་རིགས་འདུས་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དུ། བླ་མ་རིག་འཛིན་རྒྱ་མཚོའི་ཚོགས་ཀྱི་གཙོ་བོ་མཆོག་ཏུ་གྱུར་པ་ཨོ་རྒྱན་གྱི་རྗེས། གསང་ཆེན་རྡོ་རྗེ་ཐེག་པའི་ཆོས་ཀྱི་དགའ་སྟོན་འགྱེད་པའི་སར། སྲས་ཀྱི་ཐུ་བོར་སྐྱེས་ནས་ལས་ཉོན་སྡུག་བསྔལ་མཐའ་དག་ལས་དབུགས་དབྱུང་སྟེ་རང་དོན་མཐར་ཕྱིན། མཐའ་ཡས་ཁམས་གསུམ་འགྲོ་བའི་མངོན་མཐོ་དང་ངེས་ལེགས་ཀྱི་ཉེར་འཚོར་བདག་ཉིད་འགྱུར་བར་ཤོག །དེ་ལྟར་སྨོན་པའི་ལེགས་ཚོགས་འགྲུབ་པར་བྱེད་པའང་། རིག་འཛིན་རྒྱལ་བ་རྒྱ་མཚོའི་བྱིན་རླབས་དང་། ཆོས་ཀྱི་དབྱིངས་བསམ་གྱིས་མི་ཁྱབ་པའི་བདེན་པ་ཆེན་པོའི་མཐུ་ཡིས། དལ་འབྱོར་གྱི་ལུས་རྟེན་འདི་ལ་རྫོགས་སྨིན་སྦྱང་གསུམ་གྱི་རྟེན་འབྲེལ་མངོན་དུ་གྱུར་ནས་དོན་གཉིས་མཐར་ཕྱིན་རྫོགས་པའི་སངས་རྒྱས་ཀྱི་གོ་འཕང་ཐོབ་པར་ཤོག །དངོས་གྲུབ་ཞུ་བ་སྟེ་ལམ་དབང་བླང་བ་ནི། གུ་རུའི་སྨིན་མཚམས་ནས་སོགས། པདྨ་འོད་དུ་བགྲོད་པའི་ཐེམ་སྐས་ལས། དབང་ལེན་སྐབས་འདིར་འཁོར་གྱི་བླ་མ་དང་མཁའ་འགྲོ་རྣམས་ཀྱང་གཙོ་བོ་དང་དགོངས་པ་གཅིག་ཏུ་བཞུགས་ནས་དབང་སྐུར་བའི་མཛད་པ་ལ་ཐུགས་གཏད་པར་བསམ་ན་བྱིན་རླབས་ཀྱི་ཚན་ཆེ་བར་རྟོགས་སོ། །ཞེས་གསུངས། སྙིང་པོའི་དོན་གསལ་ལས། དེ་ལྟར་གསོལ་བ་བཏབ་པས་རྩ་གསུམ་ལྷ་ཚོགས་རྣམས་འོད་དུ་ཞུ་ནས་གཙོ་བོ་གུ་རུ་རིན་པོ་ཆེ་ལ་ཐིམ། དེའི་གནས་གསུམ་དུ་འབྲུ་གསུམ་གསལ། ཞེས་གསུངས། ཟབ་དོན་བདུད་རྩིའི་ཉིང་ཁུ་ལས། མོས་གུས་གདུང་ཤུགས་དྲག་པོ་བྱས་པས་འཁོར་རྣམས་རྩ་བའི་བླ་མ་ལ་ཐིམ། བླ་མ་སྐྱབས་གནས་ཀུན་འདུས་ཀྱི་ངོ་བོར་བཞུགས་པ་ལས་དབང་བཞི་ངག་འདོན་གྱི་དཀྱུས་ནས་གསལ་བ་ལྟར་བླངས་རྗེས་བླ་མའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་དུ་བསྲེས་ཏེ་རང་སེམས་རིག་སྟོང་རྗེན་པ་སྐད་ཅིག་མའི་ངང་མདངས་བརྐྱངས་ནས་བཟླས་པ་བྱ། ཞེས་གསུངས། གསོལ་འདེབས་ཀྱི་བསྙེན་པའི་ཚད་ཀྱང་འབུམ་ཕྲག་བརྒྱ་ཐམ་པ་ཁོ་ནའོ། །རྡོ་རྗེ་སློབ་དཔོན་གྱིས་དབང་བཞི་ཡོངས་རྫོགས་བསྐུར་ཞིང་སྨིན་པར་བྱས་པ་ནི་གཞིའི་དབང་དང་། དེ་ནས་བླ་མའི་རྣལ་འབྱོར་གྱི་ཚེ་རང་ཉིད་ཀྱིས་དབང་བཞི་ལེན་པ་ནི་ལམ་གྱི་དབང་དང་། མཐར་ཐུག་འབྲས་དུས་ཀྱི་འོད་ཟེར་ཆེན་པོའི་དབང་བསྐུར་ཐོབ་ནས་སངས་རྒྱས་པ་ནི་འབྲས་བུའི་དབང་ངོ་། །མཐར་ཐུན་བསྡུ་བའི་ཚེ། ནམ་ཞིག་ཚེ་ཡི་སོགས། ནམ་ཞིག་ཚེ་ཡི་དུས་བྱས་པའི་ཚེ། རང་གི་སྣང་བ་ཐམས་ཅད་ལྷོ་ནུབ་རྔ་ཡབ་གླིང་ཟངས་མདོག་དཔལ་རིའི་ཞིང་། སྣང་སྟོང་ཟུང་འཇུག་སྤྲུལ་པའི་ཞིང་ཁམས་མངོན་སུམ་དུ་གསལ་བའི་དབུས་སུ། གཞི་ལུས་རྡོ་རྗེ་རྣལ་འབྱོར་མ་ཉིད་བླ་མའི་ཐུགས་ཀའི་འོད་ཀྱི་རྐྱེན་ལས། གསལ་ཞིང་འཚེར་བའི་འོད་ཀྱི་གོང་བུ་རུ་གྱུར་ནས། རྗེ་བཙུན་ཆེན་པོ་པདྨ་འབྱུང་གནས་དང་རང་རིག་དབྱེར་མེད་བདེ་བ་ཆེན་པོར་སངས་རྒྱས་ཏེ། མཆོག་ཏུ་མི་འགྱུར་བའི་བདེ་བ་ཆེན་པོ་དང་། རྣམ་ཀུན་མཆོག་ལྡན་གྱི་སྟོང་ཉིད་ཟུང་དུ་འཇུག་པའི་རང་རྩལ་ཆོ་འཕྲུལ་གྱི་ཡེ་ཤེས་ཆེན་པོའི་རོལ་བ་ལས། ཁམས་གསུམ་གྱི་སེམས་ཅན་མ་ལུས་པ་ཐར་བ་དང་རྣམ་མཁྱེན་གྱི་ས་ལ་འདྲེན་པའི་དེད་དཔོན་དམ་པ་མཆོག་གི་སྤྲུལ་སྐུ་རུ་རྗེ་བཙུན་པདྨས་དབུགས་དབྱུང་བར་མཛད་དུ་གསོལ། གསོལ་བ་ཡིད་ཁྱེད་ཤེས་ཀྱི་དད་པས་སྙིང་གི་དཀྱིལ་ནས་འདེབས་པ་ལགས་ཀྱི། མཆུ་འདབ་རླུང་གིས་བསྐྱོད་པའི་ཁ་ཙམ་དང་ཚིག་ཙམ་ནེ་ཙོའི་འདོན་པ་ལྟ་བུ་མ་ཡིན་ནོ། །མཁྱེན་བརྩེ་ནུས་པའི་བྱིན་རླབས་ཀྱང་ཟག་མེད་ཐུགས་ཀྱི་ཀློང་ནས་སྩོལ་ལ། བསམ་པའི་དོན་ཀུན་ཆོས་མཐུན་ཡིད་བཞིན་དུ་འགྲུབ་པར་མཛད་དུ་གསོལ། ཟབ་དོན་བདུད་རྩིའི་ཉིང་ཁུ་ལས། ཞེས་བརྗོད་པ་དང་ཆབས་ཅིག་རྫོགས་རིམ་བསྡུ་བའི་དམིགས་པ་ནི། བླ་མ་ལ་གདུང་བ་དྲག་པོའི་རྐྱེན་གྱིས་བདག་ཉིད་ལ་ཐུགས་རྗེའི་འཇུག་པས་ལྷག་པར་དགོངས་ཏེ། ཞལ་འཛུམ་པ་དང་སྤྱན་རྗེས་ཆགས་སུ་གཡོ་བའི་ངང་ཐུགས་ཀ་ནས་འོད་ཟེར་དམར་པོ་དྲོད་ཚ་ལམ་པ་ཞིག་ཐོན། རང་རྡོ་རྗེ་རྣལ་འབྱོར་མར་གསལ་བའི་སྙིང་ཁར་རེག་པའི་མོད་ལ་ལུས་སེམས་བདེ་ཕྲིལ་གྱིས་སོང་མཐར་འོད་དམར་པོ་བདེ་བ་ཆེན་པོའི་ངོ་བོར་ཞུ་ནས། རླུང་སེམས་གཉིས་མེད་ཀྱི་རང་བཞིན་འོད་ཀྱི་གོང་བུ་སྲན་མ་ཙམ་དུ་གྱུར། དེ་ཉིད་ཀྱང་མཐར་མེ་སྟག་ཡལ་བ་བཞིན་གུ་རུ་རིན་པོ་ཆེའི་ཐུགས་ཀར་འདྲེས་པའི་ངང་ལ་མཉམ་པར་བཞག །དེ་ལས་ལྡང་བའི་ཚེ་དྭངས་པའི་ཆུ་ལས་ཉ་འཕར་བ་བཞིན་གཞི་ལུས་ཞིང་ཁམས་ཀྱི་བཀོད་པ་དང་བཅས་སྔར་བཞིན་གསལ་ལ། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྤྱི་བོར་པདྨའི་གདན་བཞུགས་ལ། །སོགས། གསོལ་འདེབས་བསྔོ་སྨོན་སྤྱི་དང་། ཟངས་མདོག་དཔལ་རིའི་སྨོན་ལམ་དཔལ་རིའི་གསང་ལམ་ཡང་གདབ། ཐུན་མཚམས་རྣམས་སུ་ཐུན་མོང་འཁྱེར་སོ་གསུམ་གྱི་རྣལ་འབྱོར་བཟླས་དམིགས་ཀྱི་སྐབས་སུ་བཤད་པ་བཞིན་དང་། ཁྱད་པར་བཟའ་བཏུང་གི་ཕུད་བདུད་རྩིའི་རང་བཞིན་དང་། གོས་ལྷ་རྫས་ཀྱི་ན་བཟར་བསམ་ལ་སྤྱི་བོའི་བླ་མ་ལ་འབུལ། ཚོགས་དྲུག་གི་སྣང་བར་བཟང་ངན་ལེགས་ཉེས་གང་ཤར་ཡང་ཐ་མལ་གྱི་རྟོག་པའི་རྗེས་སུ་མི་འབྲང་བར་ལྷ་སྔགས་ཡེ་ཤེས་ཀྱི་རིག་གདངས་རྒྱུན་བསྐྱང་། ནུབ་མོ་ཉལ་བའི་ཚེ་རང་གཞན་ཐམས་ཅད་ཀྱི་དོན་དུ་གསོལ་འདེབས་བསམ་པ་ལྷུན་གྲུབ་མ་དང་། ཁྱད་པར་སྐུ་གསུམ་ཞིང་ཁམས་སྦྱོང་བའི་སྨོན་ལམ་གྱི་མཐར། སྤྱི་བོའི་བླ་མ་ཚངས་པའི་བུ་ག་ནས་མར་ཡེར་གྱིས་བྱོན་ནས། རང་གི་སྙིང་པདྨ་འདབ་བཞིའི་རྣམ་པར་གནས་པའི་ནང་དུ་བྱོན། དེའི་འོད་ཟེར་གྱིས་རང་ལུས་ཀྱི་ནང་ཐམས་ཅད་གང་བའི་གསལ་ལམ་མེ་བ་ལ་སེམས་གཏད་དེ། བླ་མའི་ཐུགས་དང་རང་སེམས་དབྱེར་མེད་དུ་བསྲེས་པའི་ངང་ཉམས་ལེན་གྱི་རྒྱུན་བརྐྱངས་ཏེ་གཉིད་ལོག་པའམ། ཡང་ན་འོད་ཟེར་དེས་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དུ་གསལ་བ་ལ་ཕོག་པས་ལན་ཚྭ་ཆུར་བཅུག་པ་བཞིན་འོད་དུ་ཞུ། ནང་བཅུད་སེམས་ཅན་ལྷར་གསལ་བ་ལ་ཐིམ། དེ་རང་ལ་ཐིམ། རང་སྙིང་གའི་བླ་མ་ལ་ཐིམ། དེ་ཡང་མི་དམིགས་པ་འོད་གསལ་དུ་སྦྱངས་པའི་སྣང་བ་ནང་གསལ་རིག་སྟོང་རྗེན་པ་ཐིམ་ལ་མ་རྨུགས་པའི་ངང་དུ་རྣམ་རྟོག་གཞན་གྱིས་བར་མ་ཆོད་པར་ཁམས་གསོ། གལ་ཏེ་སད་ན་འཕྲོ་རྒོད་རྒྱ་འབྱམས་རྨི་ལམ་སོགས་བསམ་གཞིག་གི་འཕྲོ་བཅད་དེ་འོད་གསལ་གྱི་ངང་མདངས་ཁྱབ་གདལ་དུ་བརྐྱངས་པས་གཉིད་ཀྱི་འོད་གསལ་དང་རྨི་ལམ་ཟིན་པར་འགྱུར་ལ། སླར་ཡང་ཐོ་རངས་ལྡང་བའི་རྣལ་འབྱོར་སོགས་ཇི་སྐད་བཤད་པ་བཞིན་ཐུན་བཞི་སོགས་སུ་ཉམས་སུ་བླང་ངོ་། །གཞན་ཡང་ནམ་འཆི་བའི་དུས་ལ་བབ་པའི་ཚེ། རྫོགས་རིམ་བསྡུ་བའི་དམིགས་པ་དང་བཅས་དབྱིངས་རིག་བསྲེས་ཏེ་མཉམ་པར་བཞག་པ་ནི་འཕོ་བ་ཐམས་ཅད་ཀྱི་རྒྱལ་པོ་ཡིན་ཅིང་གལ་ཏེ་འཕོ་བ་མ་ཐེབ་ན་བར་དོར་འཁྱེར་སོ་གསུམ་གྱི་རྣལ་འབྱོར་དྲན་པས་གྲོལ་བར་འགྱུར་ལ། མདོར་ན་མོས་གུས་དང་དམ་ཚིག་རྣམ་པར་དག་པས་སྔོན་འགྲོའི་ལམ་འདི་ཁོ་ན་མཐར་ཕྱིན་པས་ཀྱང་དངོས་གཞི་ལ་མི་ལྟོས་པར་རྔ་ཡབ་དཔལ་གྱི་རི་བོར་དབུགས་དབྱུང་། དག་པའི་ཞིང་ཁམས་དེར་རིག་འཛིན་རྣམ་པ་བཞིའི་ལམ་ཉི་ཟླའི་བགྲོད་པ་ལས་ཀྱང་མྱུར་བས་ཀུན་ཏུ་བཟང་པོའི་ས་ལ་ཕྱིན་པར་འགྱུར་བ་ནི་ངེས་པའོ། །དེ་ལྟ་བུའི་སྔོན་འགྲོའི་ཚུལ་ལ་ཉམས་མྱོང་སྐྱེས་པ་ན། རིམ་གྱིས་དངོས་གཞིར་བུམ་དབང་གི་ལམ་རིག་འཛིན་ཞི་དྲག་གི་བསྐྱེད་རིམ། གསང་དབང་གི་ལམ་རླུང་དང་གཏུམ་མོ། ཤེར་དབང་གི་ལམ་སྦས་དོན་ཐབས་ལམ། དབང་བཞི་པའི་ལམ་ལ་ཁྲེགས་ཆོད་དང་ཐོད་རྒལ་ཡན་ལག་དང་བཅས་པ་རྣམས་ལ་ཉམས་ལེན་སྙིང་པོར་དྲིལ་ནས་ཚེ་གཅིག་གིས་ཟུང་འཇུག་རྡོ་རྗེ་འཛིན་པའི་གོ་འཕང་མངོན་དུ་བརྙེས་པའི་ཐབས་ལ་འབད་པར་བྱའོ། །ཞེས་གསུངས་སོ། ༈ །འོད་གསལ་རྫོགས་ཆེན་ཀློང་ཆེན་སྙིང་ཏིག་གི། །སྔོན་འགྲོའི་བསྡུས་འགྲེལ་ཀུན་ལས་བཏུས་པ་ཡི། །ཆོས་སྦྱིན་སྤར་གྱི་འཕྲུལ་ཆེན་བསྐྲུན་པའི་དགེས། །བདག་གཞན་མཁའ་ཁྱབ་ཡིད་ཅན་རྒྱ་མཚོ་ཀུན། །ཚེ་རབས་ཀུན་ཏུ་དཔལ་ལྡན་བླ་མའི་དྲུང་། །འབྲལ་མེད་མན་ངག་ཟབ་མོ་ལ་བརྟེན་ནས། །ས་ལམ་རྟོགས་པའི་ཡོན་ཏན་མཐར་ཕྱིན་ཏེ། །ཟུང་འཇུག་སྐུ་བཞིའི་གོ་འཕང་མྱུར་ཐོབ་ཤོག །དགེའོ། །དགེའོ། །དགེའོ། །སརྦ་དཱ་ཱཀ་ལྱ་ཎཱ་ཱཾབྷ་ཝ་ཏུ།།