གནས་ལུང་གནས་ཀྱི་ངོ་སྤྲོད་ཀུན་གསལ་ཉི་མ། མཁན་ཆེན་ཤེས་བྱ་ཀུན་གཟིགས།
ན་མོ་གུ་ར་ཝེ། དེ་ཡང་གནས་ལུང་འདིར་སྔོན་གུ་རུ་རིན་པོ་ཆེ་དང་། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙཱ་ན་སོགས་རྫུ་འཕྲུལ་གྱིས་བྱོན་ནས་སྒྲུབ་པ་མཛད་ཅིང་བྱིན་གྱིས་བརླབས། དེ་ནས་ལྕམ་བླ་འགྱུར་མེད་རྒྱལ་མཚན་གྱིས་གནས་སྒོ་ཕྱེས་ནས་གོང་གི་གནས་ཡིག་མཛད། གནས་ཀྱི་དབྱིབས་པདྨ་ཁ་ཕྱེ་བ་དང་འདྲ་བ། རྒྱབ་རིའི་རྩེར་འཕགས་པ་རིགས་གསུམ་མགོན་པོའི་བླ་རི་ཡོད། དེའི་གཡས་ན་ཟངས་མདོག་དཔལ་རིའི་ཆགས་དབྱིབས་ཡོད། གནས་ཀྱི་ གཡོན་ཕྱོགས་ཀྱི་རི་རྩེར་གུ་རུའི་བཞུགས་ཁྲི་ཡོད། དེའི་འོག་རི་རྐེད་དུ 
་མཆོད་རྟེན་ཆ་བརྒྱད་རང་བྱོན་དང་། ཆོས་སྐྱོང་མ་གཟའ་དམ་གསུམ། གནོད་སྦྱིན་ཙིའུ་དམར་པོ་དང་བཅས་པའི་རྟེན་མཁར་ཡོད། གནས་ཀྱི་རྩེར་ལྕམ་བླའི་ཕྱག་བརྐོས་རྒྱལ་མཚན་རྩེ་མོའི་རྡོ་སྐུ། སྐོར་ལམ་
གཡོན་ཕྱོགས་དང་གནས་མདུན་དུ ་ཡེ་ཤེས་མཚོ་རྒྱལ་གྱི་ཞབས་རྗེས་གཉིས་ཡོད། གནས་ཀྱི་གཡས་ཕྱོགས་ཀྱི་རི་རྩེར་རྒྱ་སྤྲུལ་གསུམ་པས་བྱིན་གྱིས་བརླབས་པའི་མཁའ་སྤྱོད་མའི་གནས་དང་། དེའི་གོང་དུ་སྒྲུབ་ཆུ་བྱིན་ཅན་འཐུང་རྒྱུ་ཡོད། ཆུ་དེར་ཀླུ་མཆོད་དང་ཆུ་སྦྱིན་བྱས་ན་ཕན་ཡོན་ཆེ། དེའི་འགྲམ་ན་མཁའ་འགྲོའི་ཚོགས་གཞོང་དང་སྒྲུབ་ཆུའི་རྩེར་ཨོ་རྒྱན་པད་ཞྭ་རང་བྱོན་ཡོད། ཚོགས་གཞོང་གི་གཡས་ གཡོན་དུ ་སྨན་རཀ་གཏོར་གསུམ་མཚོན་བྱེད་ཆུ་དཀར་དམར་སོགས་རང་བྱུང་ཡོད། གནས་མདུན་དུ་མཆོད་པ་རྣམ་ལྔ་རང་བྱོན་གྱི་ཚུལ་དུ་ཡོད་པ་སོགས་མདོར་ན་ཟངས་མདོག་དཔལ་གྱི་རི་བོ་དང་ཁྱད་པར་མ་མཆིས་པའི་གནས་མཆོག་ཁྱད་འཕགས་ཤིག་ཡིན་པས་རྒྱས་པར་གནས་ཡིག་གསར་རྙིང་ལ་གཟིགས་པར་ཞུ། དགེ་ཞིང་བཀྲ་ཤིས་པར་གྱུར་ཅིག །སརྦ་མངྒ་ལཾ། ཞེས་པ་འདི་མཁན་ཤེས་བྱ་ཀུན་གཟིགས་ནས་བྲིས་པའོ། །