གནས་ལུང་དཔལ་གྱི་རི་བོའི་དཀར་ཆགས་དད་ལྡན་དགའ་བ་སྐྱེད་བྱེད། ལོ་ཆེན་བཻ་རོ་ཙཱ་ན།
༁ྃ༔ གནས་ལུང་དཔལ་གྱི་རི་བོའི་དཀར་ཆགས་དད་ལྡན་དགའ་བ་སྐྱེད་བྱེད་ཅེས་བྱ་བ་བཞུགས་སོ༔
ན་མོ་གུ་རུ་དྷེ་ཝ་ཊཱཀྐི་ནི་ཡེ༔
ཡེ་ནས་ རང་རིག 
་གཞན་དུ་མ་འཁྲུལ་བའི༔
ཐོག་མའི་མགོན་པོ་ཀུན་བཟང་སྣང་མཐའ་དང༔
སྤྱན་རས་གཟིགས་དབང་གུ་རུ་པད་འབྱུང་སོགས༔
སྐུ་གསུམ་རྒྱལ་བ་རྣམས་ལ་གུས་པས་འདུད༔
ཆོས་སྐུའི་ཞིང་མཆོག་རབ་འབྱམས་ནམ་མཁར་ཁྱབ༔
ལོངས་སྐུའི་ཞིང་ཁམས་མ་འདྲེས་འོད་ལྔར་གྲུབ༔
སྤྲུལ་སྐུའི་འདུལ་ཞིང་འཛམ་གླིང་བྱེ་ཕྲག་བརྒྱ༔
དེ་དག་གང་འདུལ་སྣང་ངོར་ལྷུན་གྱིས་གྲུབ༔
ཁྱད་པར་འཇིག་རྟེན་ཞིང་ཁམས་གཅིག་པུ་འདིར༔
མ་སྲིང་མཁའ་འགྲོ་རྒྱ་མཚོ་འདུ་བའི་གནས༔
ཡུལ་མཆོག་ཆེན་པོ་ཉི་ཤུ་རྩ་བཞི་དང༔
སུམ་ཅུ་རྩ་གཉིས་གནས་ཀྱི་མཆོག་ཏུ་གྲགས༔
འཛམ་གླིང་འདིའི་དབུས་རྒྱ་གར་རྡོ་རྗེ་གདན༔
སྐལ་བཟང་རྣམ་འདྲེན་སྟོང་ཕྲག་བྱོན་པའི་ཡུལ༔
དེ་ཡི་བྱང་ཕྱོགས་བསིལ་ལྡན་གངས་ལྗོངས་འདི༔
རྒྱལ་སྲས་རིགས་གསུམ་མགོན་པོ་སྤྱི་དང་ནི༔
ཁྱད་པར་སྤྱན་རས་གཟིགས་དང་པད་འབྱུང་གི༔
གདུལ་ཞིང་ཆེད་དུ་བསྔགས་པ་ཡིན་ནོ་ཞེས༔
མདོ་སྔགས་རྒྱུད་ལུང་ཀུན་ནས་གསལ་བར་གསུངས༔
ལྗོངས་འདིར་ཡོངས་སུ་གྲགས་པའི་གནས་ཆེན་ནི༔
ལུང་ལྔ་ལྗོངས་གསུམ་ལྗོངས་ཆེན་བཅོ་བརྒྱད་དང༔
རི་ཆེན་བཞི་དང་མཚོ་ཆེན་རྣམ་པ་བཞི༔
ཁྱད་འཕགས་གནས་ཆེན་བརྒྱ་རྩ་བརྒྱད་དང་ནི༔
སྦས་གནས་ཆེན་པོ་སྟོང་དང་བརྒྱ་ཕྲག་ཡོད༔
སྟོད་ཀྱི་གངས་དཀར་ཏེ་སེ་ནས་བཟུང་སྟེ༔
མངའ་རི་སྐོར་གསུམ་དབུས་གཙང་རུ་བཞི་དང༔
མཐའ་འཁོབ་རོང་བརྒྱད་ཀློ་མོན་ཀོང་པོའི་ཡུལ༔
མདོ་ཁམས་སྒང་དྲུག་སྨད་ཀྱི་རྒྱ་ནག་བར༔
རྒྱལ་དང་རྒྱལ་སྲས་འཕགས་པའི་ཚོགས་རྣམས་ཀྱིས༔
སྐུ་དངོས་དང་ནི་སྤྲུལ་པ་དཔག་མེད་ཀྱིས༔
ཞབས་ཀྱིས་བཅགས་ཤིང་བསྟན་འགྲོའི་དོན་ཆེད་དུ༔
སྐུ་གསུང་ཐུགས་ཡོན་ཕྲིན་ལས་ལྔ་ཡི་གནས༔
རང་རང་ཡུལ་དང་མཐུན་པར་བྱིན་གྱིས་བརླབས༔
གངས་ཁྲོད་རི་བྲག་རྣམས་ལ་སྒྲུབ་གནས་མཛད༔
མ་འོངས་དོན་ཕྱིར་ཆོས་ནོར་གཏེར་ཁ་སྦས༔
ལྷ་སྔགས་ཕྱག་རྒྱ་སྐུ་དང་ཕྱག་ཞབས་རྗེས༔
མི་འགྱུར་རྡོ་ཡི་རི་མོ་བཀོད་ནས་བཞག༔
སྨད་ཀྱི་མདོ་ཁམས་འཛིན་མའི་ཡུལ་ལྗོངས་འདིར༔
བསོ་ཐོག་སྐུ་དང་བ་གནས་གསུང་གི་གནས༔
བྲག་དཀར་བཅུ་གསུམ་ཐུགས་ཀྱི་གནས་སུ་གྲགས༔
ཡོན་ཏན་ཕྲིན་ལས་གནས་ཕྲན་བསམ་མི་ཁྱབ༔
དེ་དག་སྤྱི་དོན་ཙམ་ཡིན་ཁྱད་པར་དུ༔
མ་སྲིང་མཁའ་འགྲོའི་འདུ་གནས་ཀུན་གྱི་མཆོག༔
རྒྱ་གར་དུར་ཁྲོད་བསིལ་བའི་ཚལ་གཉིས་པ༔
ཨོ་རྒྱན་མཁའ་སྤྱོད་གནས་ལུང་དཔལ་གྱི་རི༔
སྤང་རི་ཤེལ་རི་རྫ་རི་རྣམ་པ་གསུམ༔
ཕྱི་ལྟར་རི་བོ་ནང་ནི་གཞལ་མེད་ཁང༔
གསང་བ་རྩ་གསུམ་ལྷ་ཡི་ཕོ་བྲང་ཡིན༔
གཡས་རི་གསང་བདག་གཡོན་རི་འཇམ་དཔལ་དབྱངས༔
དབུས་རི་འཕགས་པ་སྤྱན་རས་གཟིགས་དབང་གི༔
བྱིན་གྱིས་བརླབས་པའི་སྒྲུབ་གནས་ངོ་མཚར་ཅན༔
དེ་ན་རང་བྱོན་རྟེན་མཆོག་བཞུགས་ཚུལ་ཡང༔
ཕྱག་རྡོར་རི་ལ་ཞི་ཁྲོའི་དཀྱིལ་འཁོར་དང༔
རྡོ་རྗེ་ཕུར་བའི་ལྷ་ཚོགས་རང་བྱོན་བཞུགས༔
སྤྱན་རས་གཟིགས་དབང་རི་ལ་རྟ་མགྲིན་གྱི༔
དཀྱིལ་འཁོར་དང་ནི་བཅུ་གཅིག་ཞལ་གྱི་སྐུ༔
སྒྲོལ་མ་དཀར་སྔོན་གཉིས་དང་བཅས་པ་བཞུགས༔
འཇམ་དཔལ་རི་ངོས་བྲག་རིར་གཤིན་རྗེ་ཡི༔
དཀྱིལ་འཁོར་དང་ནི་ཡ་མནྟ་ཀའི་སྐུ༔
དེ་ཡི་སྒྲུབ་ཐབས་ཕྱག་མཚན་དང་བཅས་བཞུགས༔
གཏེར་སྒྲོམ་བྲག་ལ་ཆོས་ནོར་རྫས་གཏེར་དང༔
གཏེར་སྲུང་མ་མགོན་ལྕམ་དྲལ་ཕྱག་མཚན་ཡོད༔
བྲག་དམར་པོ་ཏི་བརྩེགས་འདྲའི་རི་རྒྱུད་དེར༔
འཕགས་པའི་གནས་བསྟན་བཅུ་དྲུག་རང་བྱོན་བཞུགས༔
གནས་བདག་རི་ལ་དམ་ཅན་མགར་ནག་གི༔
སྐུ་དང་ཕྱག་མཚན་ཐོ་བ་མགར་རྡོ་ཡོད༔
དཔལ་གཏོར་རི་ལ་དྲེགས་པའི་སྲོག་ཡིག་དང༔
སྲུང་མའི་བསྐང་རྟེན་སྒྲུབ་རྫས་རང་བྱུང་ཡོད༔
གནས་འདིའི་མཐའ་སྐོར་གཡས་གཡོན་མདུན་རྒྱབ་ན༔
རང་བྱོན་མཆོད་རྟེན་བརྒྱ་རྩ་བརྒྱད་དང་ནི༔
རྒྱལ་སྲས་བརྒྱད་ཀྱི་ཕྱག་མཚན་སོགས་ཀྱང་ཡོད༔
སྒོ་སྲུང་ཕ་ཝཾ་རྡོ་ཁེང་རྣམ་པ་བཞི༔
བདུད་བཙན་ཀླུ་དང་མ་མོའི་བླ་རྡོ་ཡོད༔
ཕྱོགས་བཞིར་ཞི་རྒྱས་དབང་དྲག་ཕྲིན་ལས་བཞིའི༔
སྒྲུབ་ཕུག་བཞི་དང་བར་དོའི་འཕྲང་ལམ་བཞི༔
བྱིན་རླབས་འབྱུང་བའི་སྒྲུབ་ཆུ་རྣམ་བཞི་ཡོད༔
གནས་སྲུང་བྲག་བཙན་རྡོ་རྗེ་དྲག་རྩལ་འདིའི༔
ངོ་བོ་དམ་ཅན་མགར་བ་ནག་པོ་ཡིན༔
གསང་མཚན་སྐུ་ལྷ་གཡུ་འབྲུག་ལྷ་རྩེ་ཞེས༔
མཆོད་ན་དཔལ་དང་གྲགས་པ་སྤེལ་ནུས་ཤིང༔
ཁྲོས་ཚེ་བར་ཆད་མ་རུང་སྣ་ཚོགས་རྩོམ༔
དེ་ཕྱིར་འདི་ཉིད་མཆོད་དུས་གཙང་སྦྲར་རེམས༔
དེ་ནས་གནས་འདིར་མངའ་གསོལ་མཛད་ཚུལ་ཡང༔
སྤྲེལ་ལོ་སྤྲེལ་གྱི་ཟླ་བའི་བཅོ་ལྔའི་ཉིན༔
རྒྱལ་བའི་དབང་པོ་པདྨ་ཀཱ་ར་དང༔
བི་མ་མི་ཏྲ་བོ་དྷི་ས་ཏྭ་རྗེ༔
ལོ་པཎ་བཻ་རོ་མཁའ་འགྲོ་མཚོ་རྒྱལ་སོགས༔
རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས༔
གནས་འདིར་རྫུ་འཕྲུལ་ཤུགས་ཀྱིས་བྱོན་ནས་སུ༔
རྩ་བ་གསུམ་གྱི་དཀྱིལ་འཁོར་ཞལ་ཕྱེས་ཚེ༔
ཕྱོགས་བཅུར་བཞུགས་པའི་སངས་རྒྱས་བྱང་སེམས་དང༔
བླ་མ་རིག་འཛིན་ཡི་དམ་ཞི་ཁྲོའི་ལྷ༔
མ་སྲིང་མཁའ་འགྲོ་དམ་ཅན་ཆོས་སྐྱོང་བཅས༔
སྤྲིན་ལྟར་གཏིབ་ནས་བྱིན་རླབས་ཆར་བཞིན་ཕབས༔
ཁྱད་པར་འཕགས་མཆོག་རིགས་གསུམ་མགོན་པོ་ཡིས༔
སྒྲུབ་གནས་མཚོར་བཅས་རབ་གནས་མངའ་གསོལ་མཛད༔
པད་འབྱུང་བི་མ་བཻ་རོ་མཚོ་རྒྱལ་སོགས༔
རྗེ་འབངས་རྣམས་ཀྱིས་སྨིན་གྲོལ་ཆོས་འཁོར་བསྐོར༔
དྲེགས་ཚོགས་སྡེ་བརྒྱད་དབང་བསྡུས་དམ་ལ་བཞག༔
སློབ་དཔོན་པདྨ་བོ་དྷི་ས་ཏྭ་དང༔
བི་མ་མི་ཏྲ་བཻ་རོ་མཚོ་རྒྱལ་སོགས༔
རྗེ་འབངས་རྣམས་ཀྱི་སྐུ་རྗེས་ཕྱག་ཞབས་རྗེས༔
མ་སྲིང་མཁའ་འགྲོས་བྲོ་གར་འཆམ་རྗེས་སོགས༔
རང་རང་གྲུབ་རྟགས་རྨད་བྱུང་ཁྱད་པར་ཅན༔
མི་འགྱུར་རྡོ་ཡི་རི་མོར་གསལ་བར་བཀོད༔
གནས་ཀྱི་དཀར་ཆགས་བཻ་རོ་ཙ་ནས་བཀོད༔
མ་འོངས་དོན་ཕྱིར་ཆོས་ནོར་གཏེར་མང་སྦས༔
ལས་ཅན་བུ་དང་འཕྲད་པའི་སྨོན་ལམ་བཏབ༔
གནས་བདག་སྲུང་མ་རྣམས་ལ་གཉེར་དུ་གཏད༔
དེ་ལྟར་ཡོན་ཏན་ལྡན་པའི་གནས་ཆེན་འདིར༔
གང་ཞིག་ལྷག་བསམ་རྣམ་པར་དག་པའི་བློས༔
ཉ་སྟོང་ཚེས་བཅུ་ལ་སོགས་དུས་ཆེན་ལ༔
ཕྱག་དང་བསྐོར་བ་ཚུལ་བཞིན་བྱེད་ནུས་ན༔
མི་དགེའི་སྒྲིབ་སྦྱོང་ཚོགས་གཉིས་མྱུར་རྫོགས་ནས༔
མངོན་མཐོ་ངེས་ལེགས་ཡོན་ཏན་མ་ལུས་འབྱུང༔
གནས་མདུན་འདི་རུ་མཚམས་སྒྲུབ་ཚོགས་འཁོར་དང༔
བསང་གསུར་ཆུ་གཏོར་སྒྱུ་ལུས་མཆོད་སྦྱིན་སོགས༔
ཟག་བཅས་ཟག་མེད་དགེ་བ་གང་བྱས་ཀྱང༔
ཕན་ཡོན་གཞན་ལས་འབུམ་འགྱུར་ཁྱད་དུ་འཕགས༔
ཁྱད་པར་སྤྲེལ་ལོ་སྤྲེལ་གྱི་ཟླ་བའི་དུས༔
རྒྱ་བོད་གནས་ཆེན་ཀུན་ཀྱི་གནས་བདག་དང༔
ཞིང་སྐྱོང་མ་སྲིང་མཁའ་འགྲོ་འདིར་འདུས་ནས༔
བསྐོར་ཕྱག་མཆོད་འབུལ་མངའ་གསོལ་རབ་གནས་མཛད༔
དེ་དུས་ངེས་འབྱུང་བློ་ལྡན་གང་ཞིག་གིས༔
དད་གུས་མོས་པས་ཕྱག་སྐོར་བྱས་ནས་སུ༔
ཚོགས་གཏོར་མཆོད་པ་ཕུལ་ན་སངས་རྒྱས་ཞིང༔
གངྒའི་ཀླུང་ལ་བསྙེན་བཀུར་བྱས་དང་མཉམ༔
འདི་དུས་མཐའ་སྐོར་གཅིག་བྱས་ཕན་ཡོན་ཚད༔
མཁའ་སྤྱོད་དཔལ་གྱི་ཙ་རི་བསྐོར་དང་མཚུངས༔
ལོ་འདིར་སྒྲུབ་གནས་མཐོང་ཐོས་འབྲེལ་ཚད་ཀྱི༔
སྔོན་ལས་འཕྲལ་རྐྱེན་ནད་གདོན་བར་ཆད་སེལ༔
ཚེ་བསོད་དཔལ་འཕེལ་ཚོགས་རྫོགས་སྒྲིབ་སྦྱང་ནས༔
བླ་མེད་བྱང་ཆུབ་རིང་པོར་མི་ཐོག་ཐོབ༔
གནས་འདིར་དད་པས་རྗེས་སུ་ཡི་རང་ཀྱང༔
བསོད་ནམས་ཕུང་པོ་གཞན་ལས་ཁྱད་དུ་འཕགས༔
ཚུལ་འདི་དད་ལྡན་བུ་རྣམས་ཡིད་ལ་ཞོག༔
དད་མེད་ལོག་ལྟ་ཅན་ལ་གསང་རྒྱ་སྡོམ༔
ས་མ་ཡཱ༔ རྒྱ་རྒྱ་རྒྱ༔
དེ་ལྟར་གནས་ཀྱི་དཀར་ཆགས་མདོར་བསྡུས་འདི༔
བདག་འདྲ་ལོ་པཎ་བཻ་རོ་ཙ་ནས་བཀོད༔
དཔེ་ཚན་གསུམ་དུ་བྲིས་ནས་གཏེར་དུ་སྦ༔
དམ་ཅན་དྲེགས་པའི་ཚོགས་ལ་གཉེར་དུ་གཏད༔
ལས་ཅན་བུ་དང་འཕྲད་ཚེ་ཕྱག་ཏུ་སྤྲོད༔
དེ་དུས་ཀུན་ལ་སྤེལ་བའི་གྲོགས་ལྡན་མཛོད༔
སྐལ་མེད་ཐེ་ཚོམ་ཅན་གྱི་དབང་པོ་སྣུབས༔
སྐལ་ལྡན་ལས་ཅན་རྣམས་ཀྱི་བསམ་དོན་སྒྲུབ༔ ས་མ་ཡཱ༔ རྒྱ་རྒྱ་རྒྱ༔