ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྤྱི་དོན།
ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱི་སྤྱི་དོན་བཞུགས་སོ། །།
ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་འདི་འཆད་པ་ལ། བཤད་བྱ་གཞུང་གི་རང་བཞིན་ངོས་བཟུང་བ་དང༌། གཞུང་དོན་གཏན་ལ་དབབ་པ་གཉིས། དང་པོ་བཤད་བྱའི་གཞུང་ངོས་བཟུང་བ་ནི། །འདིར་ཁམས་གསུམ་ན་རྒྱུ་བའི་འགྲོ་བ་རྣམས་ཀྱི། སྐྱབས་དང༌། མགོན་དང༌། དཔུང་གཉེན་གྱི་མཆོག་ཏུ་གྱུར་པའི་བདག་ཅག་གི་སྟོན་པ་དེས། སྲིད་པའི་སྡུག་བསྔལ་བརྒྱ་ཕྲག་གཞོམ་པའི་ཐབས་སུ་སྐལ་བ་དང་ལྡན་པའི་གདུལ་བྱ་རྣམས་ལ། དམ་པའི་ཆོས་ཀྱི་བདུད་རྩི་ཇི་སྙེད་ཅིག་སྩལ་བ་རྣམས་ཀྱི་ནང་ནས་ཆེས་ཤིན་ཏུ་ཟབ་པ་དང་ལྡན་པ་ནི། རྒྱལ་བ་ཀུན་གྱི་བགྲོད་པ་གཅིག་པའི་ལམ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེ་ཉིད་ཡིན་ལ།
འདིའི་དགོངས་པ་འགྲེལ་བའི་བསྟན་བཅོས་ལ་དུ་མ་ཞིག་ཡོད་ཀྱང༌། གཙོ་བོར་གྱུར་པ་ནི་ཤིང་རྟའི་སྲོལ་འབྱེད་ཆེན་པོ་བཞི་ཞེས་སྔ་མ་རྣམས་ལ་གྲགས་སོ། །དེ་ཡང་བདག་ཉིད་ཆེན་པོ་ཀླུ་སྒྲུབ་ཞབས་ཀྱིས་ནི། བསྒྲུབ་བྱ་བདེན་དངོས་དང༌། སྒྲུབ་བྱེད་རྟོག་གེའི་རིག་པ་འགོགས་པ་གཉིས་ཀྱི་དབང་དུ་མཛད་ནས། དབུ་མ་རིག་པའི་ཚོགས་ལྔ་ལ་སོགས་པ་མཛད་དོ། ཟབ་མོ་དབུ་མའི་ལྟ་བའི་ཤིང་རྟའི་སྲོལ་ཆེན་པོ་འབྱེད་པར་མཛད། སློབ་དཔོན་ཆེན་པོ་ཕྱོགས་ཀྱི་གླང་པོས་ནི་ཡུམ་བསྡུས་པའི་གཙོ་བོའི་དོན་སོ་གཉིས་སུ་བསྡུས་ནས་འཆད་དེ། དེ་ཡང༌། །རྟེན་དང་དབང་དུ་བྱ་བ་དང༌། །ལས་ནི་སྒོམ་པ་དང་བཅས་དང༌། །རབ་དབྱེ་རྟགས་དང་ལྟུང་བ་དང༌། །ཕན་ཡོན་བཅས་པར་ཡང་
དག་བརྗོད། ཅེས་པ་ལྟར་ལས། རབ་དབྱེ་ལ་སྟོང་ཉིད་བཅུ་དྲུག་དང༌། སྒོམ་པ་ལ་རྣམ་གཡེང་གི་རྟོག་པ་བཅུའི་གཉེན་པོ་བཅུར་ཕྱེ་བས་སོ་གཉིས་སོ། །ཡུམ་རྒྱས་འབྲིང་གཉིས་དང་ཁྲི་བརྒྱད་སྟོང་གི་རྒྱ་ཆེར་བཤད་པ་ཡུམ་གཞུང་འགྲེལ་གནོད་འཇོམས་ལས་ནི་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་ཡུམ་དོན་འགྲེལ་བར་བྱེད་དོ། སྒོ་གསུམ་ནི། མགོ་སྨོས་པས་གོ་བ་རྣམས་ལ་བསྡུས་ཏེ་བསྟན་པའི་སྒོ། སྤྲོས་ནས་གོ་བ་རྣམས་ལ་འབྲིང་དུ་བསྟན་པའི་སྒོ། ཚིག་ལ་འཆེལ་བ་རྣམས་ཀྱི་དོན་དུ་རྒྱས་པར་བསྟན་པའི་སྒོ་དང་གསུམ། རྣམ་གྲངས་བཅུ་གཅིག་ནི། དང་པོ་ཤཱ་རིའི་བུ་ལ་བཀའ་སྩལ་པ། ༡ དེ་ནས་རབ་འབྱོར་གྱིས་བཤད་པ། ༢ དེ་ནས་བརྒྱ་བྱིན་དང༌། ༣ རབ་འབྱོར་དང༌། ༤ བྱམས་པ་དང༌། ༥ རབ་འབྱོར་དང༌། ༦ བརྒྱ་བྱིན་དང༌། ༧ རབ་འབྱོར་དང༌། ༨ བྱམས་པ་དང༌། ༩ རབ་འབྱོར་དང༌། ༡༠ དེ་ནས་ཀུན་དགའ་བོ་ལ་བཀའ་སྩལ་ནས་ཡོངས་སུ་གཏད་པའོ། །རྒྱལ་བ་མ་ཕམ་པས་ཡུམ་གྱི་ལུས་དངོས་བརྒྱད་དང་དོན་བདུན་ཅུར་དྲིལ་ཏེ་རྣལ་འབྱོར་པའི་ཉམས་སུ་ལེན་པའི་རིམ་པ་དང་སྦྱར་ནས་མངོན་པར་རྟོགས་པའི་རྒྱན་མཛད་དོ། ༡༡ །དེ་ལྟར་ན་བཞི་པོ་འདིས་དགོངས་འགྲེལ་གཞན་ལ་མ་ལྟོས་པར་ཡུམ་གྱི་དགོངས་པ་རེ་འགྲེལ་བས་ཤིང་རྟའི་སྲོལ་འབྱེད་དོ་ཞེས་འཆད་ཀྱང༌། བརྒྱད་སྟོང་དོན་བསྡུས་སུ་ནི་རྣམ་གཡེང་གི་
རྟོག་པ་བཅུའི་གཉེན་པོར་སྒྲུབ་པ་ལ་གདམས་པས་མདོའི་འགྲེལ་ཚུལ་དང༌། ངོ་བོ་ཉིད་གསུམ་གྱིས་མདོ་འགྲེལ་ཚུལ་རྣམས་དབུས་མཐའ་དང་ཐེག་བསྡུས་ཇི་ལྟ་བ་བཞིན་སྣང་བས། བྱམས་ཆོས་ལས་ལོགས་སུ་སྲོལ་བཏོད་པ་མིན་ལ། གཞུང་འགྲེལ་ནི། སྟོང་ཉིད་བཅུ་དྲུག་དང༌། སྐྱེ་འགགས་ཀུན་བྱང་མེད་པའི་སྐབས་སུ་རྩ་ཤེའི་ལུང་དྲངས་ནས། ཀླུ་སྒྲུབས་ཞབས་ཀྱི་རིག་པ་ཇི་ལྟ་བ་བཞིན་དུ་འཆད་འདོད་པར་འདུག་པས་རིག་ཚོགས་ལས་བཤད་སྲོལ་ཟུར་དུ་བྱེད་པ་མ་ཡིན་ནོ། །དེའི་ཕྱིར་སློབ་དཔོན་ཆོས་ཀྱི་བཤེས་གཉེན་བཞེད་པ་ལྟར་ཡུམ་གྱི་བརྗོད་བྱ་ལ་སྙིང་པོའི་དོན་དམ་པའི་བདེན་པ་དང༌། རྒྱ་ཆེ་བ་མངོན་རྟོགས་ཀྱི་རིམ་པ་གཉིས་ཀྱི། དང་པོ་རིག་ཚོགས་དང༌། གཉིས་པ་རྒྱན་གྱིས་བཀྲལ་བ་ཡིན་ཞེས་པ་ལྟར་རམ། ཡང་ན་དངོས་བསྟན་སྟོང་ཉིད་ཀྱི་དོན་རིག་ཚོགས་དང༌། ཤུགས་བསྟན་སྟོང་ཉིད་བཤད་པ་ན་གདུལ་བྱའི་རྒྱུད་ལ་མངོན་རྟོགས་སྐྱེ་ཚུལ་གྱི་རིམ་པ་རྣམས་རྒྱན་གྱིས་བཀྲལ་བས། །རྗེ་བཙུན་དང་ཀླུ་སྒྲུབ་ཞབས་གཉིས་ཀྱི་ཤེར་ཕྱིན་འགྲེལ་ཚུལ་གཉིས་སུ་བྱུང་ངོ་ཞེས་བྱ་བར་ཡང་གནས་སོ། །དེ་དག་ལས་མངོན་པར་རྟོགས་པའི་རྒྱན་ནི་འདིར་གང་བཤད་པར་བྱ་བའི་ཆོས་སོ། །དེ་ལྟ་བུའི་ཡུམ་གྱི་རྒྱན་དེའི་རྗེས་སུ་འབྲང་བའི་འགྲེལ་བ་ལ་ཡང་མདོ་དང་སྦྱར་བའི་འགྲེལ་བ་བཅུ་གཉིས། མ་
སྦྱར་བ་དགུ་སྟེ་རྒྱ་འགྲེལ་ཉེར་གཅིག་ཡོད་ལ། མདོ་སྦྱོར་རྣམས་ཀྱིས་གང་ལ་སྦྱར་བ་རྩ་བའི་མདོ་ནི། ཡུམ་རྒྱས་པ་འབུམ། འབྲིང་པོ་ཉི་ཁྲི། བསྡུས་པ་བརྒྱད་སྟོང་པ་གསུམ། སྡུད་པ་དང་བཞི་པོ་ལ་ཅི་རིགས་པར་སྦྱར་བ་ཡིན་ལ། གཞན་དུ་སྡུད་པ་དང་སྦྱར་བས་ཁྲི་བརྒྱད་སྟོང་པར་དོན་གྱིས་སྦྱར་བར་འགྱུར་བ་ཡིན་ལ། ཤེས་རབ་ཁྲི་པ་དང་ཡང་སྦྱར་དུ་ཡོད་པར་མངོན་ནོ། །འགྲེལ་བྱེད་དེ་དག་ལས་འདིར་གང་གི་རྗེས་སུ་འབྲང་ནས་འཆད་ཅེ་ན། གཙོ་བོར་འཕགས་སེང་གཉིས་ཀྱི་རྗེས་སུ་འབྲངས་ནས་འཆད་ལ། འགྲེལ་བཤད་གཞན་ལས་ཀྱང་ལེགས་པའི་ཆ་ཅི་རིགས་པ་བླངས་ཏེ་འཆད་པར་བྱེད་དོ། །དོན་གཉིས་པ་གཞུང་དོན་གཏན་ལ་དབབ་པ་ལ་སྤྱིའི་དོན་གསུམ་སྟེ། རྗོད་བྱེད་དོན་ལྡན་གྱི་མཚན། བརྗོད་བྱ་དེ་ལྡན་གྱི་གཞུང༌། གང་གིས་བསྒྱུར་བའི་འགྱུར་བྱང་བཤད་པའོ། དང་པོ་མཚན་བཤད་པ་ལ་དངོས་དང་ཞར་ལས་བྱུང་བ་གཉིས། དང་པོ་མཚན་བཤད་པ་དངོས་ལ་གསུམ། མཚན་བསྒྱུར་བ། མཚན་བཤད་པ། མཚན་གྱི་དགོས་ཆེད་དོ། །དང་པོ་མཚན་བསྒྱུར་བ་ནི། རྒྱ་གར་ཞེས་པ་འདུལ་བ་ཚིག་ལེ་ལས། །མཉན་ཡོད་གནས་བཅས་ཙམ་པ་ཀ༌།ཝ་ར་ཎཱ་སི་ཡངས་པ་ཅན། །རྒྱལ་པོའི་ཁབ་ནི་དྲུག་པ་སྟེ། །འདི་དག་གྲོང་ཁྱེར་ཆེན་པོར་ཤེས། ཞེས་པ་ལྟར་གྲོང་ཁྱེར་ཆེན་པོ་དྲུག་གནས་པའི་ཕྱོགས་ལ་འདོད་རྒྱལ་དུ་བརྡའ་བྱས་པ་སྟེ། ཡུལ་དེ་པ་
རྣམས་ཀྱི་སྐད་དུ་བསྟན་བཅོས་འདིའི་མིང་ལ། ཨ་བྷི་ནས་ཤཱ་སྟྲའི་བར་རོ། །དེ་བོད་ཀྱི་སྐད་དུ་བསྒྱུར་ན། །ཤེས་ནས་ཞེས་བྱ་བའི་བར་རོ། ཨ་བྷི་ས་མ་ཡ་ནི་མངོན་པར་རྟོགས་པ། ཨ་ལཾ་ཀཱ་ར་ནི་རྒྱན། ནཱ་མ་ནི་ཞེས་བྱ་བ། པར་མི་ཏ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི། ཨུ་པ་དེ་ཤ་ནི་མན་ངག་གི། ནི་བསྟན་བཅོས་སོ། །གཉིས་པ་མཚན་བཤད་པ་ནི། །ཤེས་ཕྱིན་ནི་འདིའི་རྩ་བའི་མདོའོ། །མན་ངག་ནི་མདོའི་དོན་བདེ་བླག་ཏུ་རྟོགས་པར་བྱེད་པའོ། །བསྟན་བཅོས་ནི། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའོ། །མངོན་པར་རྟོགས་པ་ནི། །རྒྱལ་བའི་ཡུམ་གྱི་དོན་ཟབ་མོ་རྣམས་ལ་བློ་མངོན་དུ་ཕྱོགས་པས་དོན་མ་ནོར་བར་རྟོགས་པ་སྟེ་མངོན་རྟོགས་བརྒྱད་དོ། །རྒྱན་ནི། རང་བཞིན་གྱི་རྒྱན་ཡུམ་གྱི་ལུས་བཟང་པོ་ལ། མཛེས་བྱེད་ཀྱི་རྒྱན་དོན་བདུན་ཅུ་བཀྲ་བ་ཉིད། གསལ་བྱེད་ཀྱི་རྒྱན་བསྟན་བཅོས་འདིར་སྣང་བ་ན་མཁས་པ་རྣམས་དགའ་བ་བསྐྱེད་པའི་ཕྱིར་ཏེ། མདོ་སྡེ་རྒྱན་ལས། གཟུགས་རྒྱན་རང་བཞིན་ཡོན་ཏན་ལྡན་པ་མེ་ལོང་ནང་སོང་ན། །མཐོང་བའི་དབང་གིས་མི་རྣམས་རབ་ཏུ་དགའ་བའི་མཆོག་སྐྱེད་པ། །དེ་བཞིན་ལེགས་གསུང་རྟག་ཏུ་རང་བཞིན་ཡོན་ཏན་ལྡན་པ་ཡི། །ཆོས་ཀྱང་དོན་རྣམས་ཕྱེ་བས་མཁས་རྣམས་འདི་ན་དགའ་མཆོག་སྐྱེད། །ཅེས་པ་ལྟར་རོ། །ཞེས་བྱ་བ་ནི་
མིང་དོན་འབྲེལ་བ་བརྗོད་པའོ། །གསུམ་པ་མཚན་སྐད་གཉིས་ཤན་སྦྱར་དུ་བཞག་པའི་དགོས་པ་ནི། ཆོས་ལ་ཡིད་ཆེས་སྐྱེ། སྐད་ལ་བག་ཆགས་འཇོག །རྒྱུད་ལ་བྱིན་རླབས་འབྱུང་བའོ། །ཞར་བྱུང་འགྱུར་མཐར་ཕྱིན་པའི་ཕྱིར་ཡན་ལག་འགྱུར་ཕྱག་མཛད་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཞེས་པ་སྟེ། སྐྱབས་འགྲོ་བདུན་ཅུ་པ་ལས། །མ་རིག་གཉིད་ནི་རྒྱུན་བཅད་ཅིང༌། །ཡང་དག་ཡེ་ཤེས་ངེས་འབྱུང་བའི། །གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་པ་ལྟར་མ་རིག་པའི་གཉིད་རྒྱུན་ཆད་པས་སངས་བ་སྟེ་གཉིད་སད་པ་ལྟ་བུ་དང༌། །ཤེས་བྱ་ལ་ནི་བློ་རྣམས་རྒྱས། །རྨོངས་པའི་ཟུམ་པ་བཅོམ་པས་ན། །སངས་རྒྱས་པདྨ་ལྟར་རྣམ་རྒྱས། །ཞེས་པ་ལྟར་ཡང་དག་པའི་ཡེ་ཤེས་ཀྱིས་མི་ཤེས་པའི་ཟུམ་པ་བཅོམ་ཞིང༌། །ཤེས་བྱ་ལ་བློ་རྒྱས་པ་པད་འདབ་རྒྱས་པ་བཞིན་ཏེ། དེ་འདྲ་བའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བའོ། །གཉིས་པ་བརྗོད་བྱ་དེ་ལྡན་གྱི་གཞུང་བཤད་པ་ལ། སྤྱིའི་ཆིངས་དང་གཞུང་དངོས་བཤད་པའོ། །དང་པོ་ནི། བསྟན་བཅོས་མངོན་པར་རྟོགས་པའི་རྒྱན་འདི་ཉིད་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་དགོངས་པ་འགྲེལ་པ་ན་དོན་དུ་ཞིག་གིས་བཀྲལ་ཞེ་ན། དེ་ཡང་རྣམ་བཤད་རིག་པར། །མདོ་
དོན་སྨྲ་བ་དག་གིས་ནི། །དགོས་པ་བསྡུས་པའི་དོན་བཅས་དང༌། །ཚིག་དོན་བཅས་དང་མཚམས་སྦྱོར་བཅས། །བརྒལ་ལན་བཅས་པར་བསྙད་པར་བྱ། །ཞེས་བཤད་ཐབས་ཀྱི་ཡན་ལག་ལྔས་མདོ་བཤད་དོ། །ཞེས་འབྱུང་སྟེ། འདི་ཡང་བྱམས་པ་ཉིད་ཀྱི་མན་ངག་བརྒྱུད་པའོ། །དེ་ལྟར་རྒྱལ་བ་བྱམས་པས་ཀྱང་མདོ་འཆད་པ་ན་བཤད་ཐབས་ལྔ་ཡིས་འཆད་པར་མཛད་དེ། དགོས་འབྲེལ་གྱིས་དགོས་དོན་དང༌། །ལུས་རྣམ་གཞག་གིས་བསྡུས་དོན་དང༌། ཡན་ལག་རྒྱས་བཤད་ཀྱིས་ཚིག་གི་དོན་དངོས་སུ་བསྟན་ཅིང༌། །མཚམས་སྦྱོར་ཤུགས་ལ་བསྟན་པ་དང༌། བརྒལ་པ་དང་ལན་ནི་ཕལ་ཆེར་ཤུགས་ལ་བསྟན་ནོ། །དེ་ལྟར་ཡན་ལག་ལྔས་བཤད་པའི་དགོས་པ་ནི། རྣམ་བཤད་རིག་པར། །མདོ་དོན་ཆེ་བ་ཉིད་ཐོས་ནས། །ཉན་པ་དང་ནི་འཛིན་པ་ལགས། །ཉན་པ་པོ་ནི་གུས་བྱེད་པས། །ཐོག་མར་དགོས་པ་བརྗོད་པར་བྱ། །དེ་འགྲུབ་དེ་ནི་བསྡུས་དོན་ལས། །བསྡུས་པའི་དོན་ནི་ཚིག་དོན་ལས། །གོ་རིམས་རིག་པ་སྔ་ཕྱི་དག །མི་འགལ་བ་ནི་གཉིས་ལས་སོ། །ཞེས་པ་ལྟར་རོ། །གཉིས་པ་གཞུང་དོན་དངོས་བཤད་པ་ལ་གསུམ། །རྩོམ་པ་ལ་འཇུག་པའི་བྱ་བ། །བརྩམ་བྱ་གཞུང་གི་རང་བཞིན། །བརྩམ་པ་མཐར་ཕྱིན་པའི་ཚུལ་ལོ། །དང་པོ་རྩོམ་པ་ལ་འཇུག་པའི་བྱ་བ་ལ་གཉིས། གདུལ་བྱ་དང་བ་བསྐྱེད་
པའི་ཡན་ལག་མཆོད་བརྗོད། རྟོག་ལྡན་བསྟན་བཅོས་ལ་འཇུག་པའི་ཡན་ལག་དགོས་འབྲེལ་ལོ། །དང་པོ་མཆོད་པར་བརྗོད་པའི་དོན་འདི་བཤད་ཐབས་ལྔའི་སྒོ་ནས་བཀྲལ་ཏེ། །དང་པོ་མཚམས་སྦྱོར་གྱི་དོན་ནི། །བསྟན་བཅོས་འདི་ཉིད་རྩོམ་པའི་དང་པོར་འཕགས་པ་བྱམས་པས་རང་དོན་དང་གཞན་དོན་གྱི་དགོས་པ་ཁྱད་པར་ཅན་གཟིགས་ནས་སྲས་བཞིའི་ཡུམ་ལ་ཕྱག་འཚལ་པའོ། །གཉིས་པ་དགོས་པའི་དོན་ལ། རང་དོན་གྱི་དགོས་པ་དང༌། གཞན་དོན་གྱི་དགོས་པ་གཉིས། དང་པོ་རང་དོན་གྱི་དགོས་པ་ནི། རང་ཉིད་ཀྱི་སྤྱོད་པ་སྐྱེས་བུ་དམ་པ་རྣམས་ཀྱི་སྤྱོད་པ་དང་མཐུན་པར་སྟོན་པའི་ཕྱིར་རོ། །གཞན་དོན་གྱི་དགོས་པ་ནི། གདུལ་བྱ་གཞན་དག་ལ་རབ་ཏུ་དང་བ་བསྐྱེད་པའི་ཆེད་དུ་སྟེ། འདི་ལའང༌། གནས་སྐབས་ཀྱི་དགོས་པ་དང༌། མཐར་ཐུག་གི་དགོས་པ་དང༌། དེ་དག་གིས་གྲུབ་པའི་དོན་དང་གསུམ། །དང་པོ་གནས་སྐབས་ཀྱི་དགོས་པ་ལ་ཡང༌། ཐོས་པ་དང༌། དད་བ་དང༌། གུས་པའི་དགོས་པའོ། །དང་པོ་ཐོས་པའི་དགོས་པ་ནི་དད་བ་སྐྱེ་བ་སྟེ། འདི་ལ་སྐྱེ་ཚུལ་གཉིས་ལས། གང་ཟག་གཙོ་བོར་བྱས་ནས་འཇུག་པའམ་ཚིག་ཙམ་ལས་ཡིད་ཆེས་སྐྱེ་བའི་དབང་བརྟུལ་དད་པའི་རྗེས་འབྲང་རྣམས་ནི། རྒྱུ་ཡུམ་འདིས་སྲས་བཞིའི་བཞེད་པ་སྒྲུབ་པའི་ཡོན་ཏན་གྱི་བདག་ཉིད་ཐོས་ནས། ཚུལ་བརྟགས་དཔྱད་མ་བྱས་པར་ཚིག་ཐོས་མ་ཐག་ཏུ་མྱུར་
དུ། ཡུལ་རྒྱལ་བའི་ཡུམ་ལ་ངོ་བོ་དང་བ་རབ་ཏུ་ཆེན་པོ་སྐྱེ་བའོ། །གཉིས་པ་ཆོས་གཙོ་བོར་བྱས་ནས་འཇུག་པའམ། དོན་ལ་བརྟགས་དཔྱད་བྱས་ནས་འཇུག་པའི་དབང་རྣོན་ཆོས་ཀྱི་རྗེས་འབྲང་རྣམས་ནི། རྒྱུ་དང་ཡུལ་སྔར་དང་འདྲ་བ་ལས་ཚུལ་དེ་ལྟར་བསྟན་པ་ལ་རིག་པ་ཡང་དག་གི་གནོད་པ་ཡོད་མེད་སྔོན་དུ་བཏང་ནས་གནོད་པ་མ་མཐོང་ན་དེའི་རྗེས་སུ། ངོ་བོ་རབ་ཏུ་མི་འཕྲོག་པའི་དང་བ་སྐྱེ་པའོ། །གཉིས་པ་དང་པའི་དགོས་པ་ནི། །རྒྱུ་རབ་ཏུ་དང་བ་སྐྱེས་པ་དེ་ལས། མཁྱེན་གསུམ་དེ་ཡུམ་གྱི་བརྗོད་བྱར་བྱེད་པའི་གསུང་རབ་ཡུམ་གྱི་མདོ་དང༌། མདོ་དེ་ལ་བརྟེན་པའི་གསུང་རབ་བསྟན་བཅོས་ལ། རྣམ་པ་ཐམས་ཅད་དུ། གཟུང་བ་དང༌། བཅང་བ་དང༌། བཀླག་པ་དང༌། ཀུན་ཆུབ་པར་བྱ་བ་དང༌། རྣལ་འབྱོར་དུ་བྱ་བའི་དོན་དུ་གུས་པའམ། དོན་གཉེར་གྱི་འདུན་པ་རབ་ཏུ་དྲག་པོ་སྐྱེའོ། །གསུམ་པ་གུས་པའི་དགོས་པ་ནི། དེ་ལྟར་དོན་དུ་གཉེར་བའི་རྗེས་ལ། ཐོས་པ་དང༌། བསམ་པ་དང༌། བསྒོམས་པ་ལས་བྱུང་བའི་ཤེས་རབ་གསུམ་རིམ་གྱིས་བསྐྱེད་ནས་འཇུག་པར་འགྱུར་རོ། །ཤེས་རབ་གསུམ་པོ་དེ་ཡང་བྱེ་སྨྲ་རྣམས། །ཐོས་སོགས་ལས་བྱུང་བློ་རྣམས་ནི། །མིང་དང་གཉིས་ཀ་དོན་ཡུལ་ཅན། །ཞེས་འདོད་ཀྱང༌། དུས་གཅིག་ཏུ་
མིང་དོན་གཉིས་ཀ་དམིགས་པ་མི་སྲིད་པས། བསམ་བྱུང་མེད་པར་འགྱུར་ཕྱིར་འདིར་གསུང་རབས་མཉན་པ་ལས་སྐྱེས་པའི་ཤེས་རབ་ནི་ཐོས་བྱུང༌། དེ་དོན་རིག་པས་བརྟགས་པ་ལས་ངེས་པ་རྙེད་པའི་ཤེས་རབ་ནི་བསམ་བྱུང༌། ངེས་པ་རྙེད་པ་དེ་ཉིད་རྩེ་གཅིག་པའི་ཏིང་ངེ་འཛིན་གྱིས་བསྒོམ་པ་ལས་བྱུང་བ་ནི་བསྒོམས་བྱུང་གི་ཤེས་རབ་ཏུ་འདོད་པར་བྱའོ། །གཉིས་པ་མཐར་ཐུག་གི་དགོས་པ་ནི། དེ་ལྟར་ཞུགས་པ་ལས་ལེགས་པའི་མཆོག་བྱང་ཆུབ་ཐོབ་པར་འགྱུར་རོ། །གསུམ་པ་དེ་དག་གི་གྲུབ་དོན་ནི། དང་བ་ལས་གུས། གུས་པ་ལས་ཞུགས། ཞུགས་པ་ལས་ལེགས་པའི་མཆོག་ཐོབ་པ་དེའི་ཕྱིར། བཅོམ་ལྡན་འདས་མ་ལ་རབ་ཏུ་དང་བ་ནི་ལེགས་པ་ཐམས་ཅད་འཐོབ་པའི་རྒྱུ་རྣམས་ཀྱི་ནང་ནས་རྒྱུའི་གཙོ་བོ་ཡིན་ནོ། །ཞེས་གྲུབ་བོ། །གསུམ་པ་བསྡུས་པའི་དོན་ནི། སྦྱིར་མཆོད་བརྗོད་ཀྱི་ཡུལ་དང༌། དེ་ལ་བསྟོད་ཚུལ་ལ་དུ་མ་ཞིག་ཡོད་ཀྱང༌། འདིར་ནི་བསྟན་བཅོས་ཀྱི་བརྗོད་བྱ་བསྟོད་ཕྱག་གི་ཡུལ་ཡིན་ཞིང༌། བསྟོད་ཚུལ་ཡང་ཡུམ་དེའི་སྲས་བཞིའི་ཐུན་མོང་མ་ཡིན་པའི་བཞེད་དོན་སྒྲུབ་པའི་སྒོ་ནས་བསྟོད་པ་སྟེ། དེ་ཡང་ཡུམ་མཁྱེན་པ་གསུམ་པོ་དེས་ཀྱང༌། ཉན་རང༌། བྱང་སེམས། སངས་རྒྱས་ཀྱི་མངོན་རྟོགས་མཐའ་དག་ཡིན་པའི་ཚུལ་གྱིས་བསྡུས་པས་མངོན་རྟོགས་བརྒྱད་ཀ་བསྟོད་ཕྱག་གི་ཡུལ་གྱི་ཡུམ་ཡིན་ནོ། །སྐབས་འདི་
དག་ཏུ། །ཡུམ་དང་ཤེར་ཕྱིན་ཁྱད་མེད་ལྟ་བུར་བཤད་པ་ནི། དེ་གཉིས་ཟག་མེད་ཀྱི་ཕུང་པོ་སྐྱེད་པ་དང་གསོ་བའི་སྒོ་ནས་བྱེད་ལས་མཚུངས་པ་ཙམ་དུ་བཞག་གིས། གཞན་དུ་ན། ཡུམ་མཚན་ཉིད་པའི་དོན་སྲས་ཀྱི་བཞེད་པ་སྒྲུབ་པ་ཡིན་པ་དང༌། ཤེར་ཕྱིན་མཚན་ཉིད་པའི་དོན་རང་བཞིན་མེད་རྟོགས་ཀྱི་བློ་དམ་པ་ཡིན་པས་དེ་གཉིས་ཁྱད་མེད་པ་མིན་ནོ། བཞི་པ་ཚིག་གི་དོན་ནི། རྐང་པ་དང་པོ་གསུམ། སློབ་དཔོན་ཨ་དུ་ལ་བཞེད་པ་ལྟར། རྟེན་ཐབས་འབྲས་བུ་གསུམ་དང༌། །དེའི་འཐད་པ་བསྣན་ནས་བཞི་རེའི་སྒོ་ནས་འཆད་དོ། །རྐང་པ་དང་པོ་ལ་རྟེན་ནི། བྱང་སེམས་ཀྱི་སྡེ་སྣོད་ལས། ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ། །རང་རྒྱལ་རྣམས་ནི་རྐྱེན་གྱི་འདུ་ཤེས་ལྡན། །ཞེས་པ་ལྟར་རང་ཉིད་ཀྱིས་ཀྱང་སྒྲ་བཅས་སུ་ཉན་དགོས་ཤིང༌། གདུལ་བྱ་ལའང་སྒྲ་བཅས་སུ་ཐོས་པར་བྱེད་པའི་ཉན་ཐོས་དང༌། དེའི་ཕྱོགས་སུ་བསླན་པ་རྟེན་འབྲེལ་རྟོགས་པའི་རྐྱེན་ཙམ་གྱིས་བྱང་ཆུབ་ཐོབ་ཀྱིས་ཆོས་བཤད་པ་དང་ཉན་པ་སྒྲ་ལ་མི་ལྟོས་པའི་རང་སངས་རྒྱས་ཏེ་བསམ་པ། རང་ཉིད་གཅིག་པུ་ཞི་བ་མྱ་ངན་ལས་འདས་པ་ཐོབ་པར་འདོད་པ་རྣམས་ཀྱིས་སོ། །ཐབས་ནི། བྱིས་པས་བདག་དང་བདག་གིར་འཛིན་པ་དང༌། འཕགས་པས་བདག་མེད་པར་གཏན་ལ་ཕབས་ནས་བདག་འཛིན་སྤོང་བའི་གཞིར་གྱུར་པས་གཞི་སྟེ། ཕུང་པོ་ཁམས་དང་སྐྱེ་མཆེད་
ཐམས་ཅད། གང་ཟག་གི་བདག་དང༌། གཟུང་བས་གདོད་མ་ནས་སྟོང་པར་ཤེས་པའི་གཞི་ཤིས་པ་ཉིད་ཀྱིས་སོ། །འབྲས་བུ་ནི་ཕུང་པོ་ལྷག་མ་དང་བཅས་པ་དང༌། ཕུང་པོ་ལྷག་མ་མེད་པའི་མྱ་ངན་ལས་འདས་པ་ཉོན་མོངས་པ་དང༌། སྡུག་བསྔལ་ཉེ་བར་ཞི་བའི་ཉེར་ཞི་རྣམ་པ་གཉིས་བོའོ། །འོ་ན་དེ་གཉིས་ཀྱི་ཁྱད་པར་ཅི་ལྟ་བུ་ཞེ་ན། །འདིའི་མཐའ་དཔྱད་པ་ལ་གསུམ། ཉན་ཐོས་སྡེ་པ་དང༌། སེམས་ཙམ་པ་དང༌། དབུ་མ་པའི་ལུགས་སོ། །དང་པོ་ཉན་ཐོས་ཀྱི་ལུགས་ལ། ལྷག་མ་ཡོད་མེད་ཀྱི་དོན། མྱང་འདས་གང་ལ་འདོད་པའོ། །དང་པོ་ལྷག་བཅས་ལྷག་མེད་ཀྱི་ཁྱད་པར་ནི། ཁ་ཅིག་ཀུན་འབྱུང་མ་ལུས་པར་སྤངས་ཀྱང་སྡུག་བསྔལ་མ་སྤངས་པ་དང༌། སྡུག་བསྔལ་ཡང་མ་ལུས་པར་སྤངས་པ་ནི་ཁྱད་པར་ཡིན་ཞེས་འཆད་པ་ནི་མི་འཐད་དེ། དགྲ་བཅོམ་ལ་ཡང་སྲིད་འཕེན་ངེས་ཀྱི་ལས་ཉོན་མ་ལུས་པར་ཟད་ཀྱང༌། སོ་སྐྱེའི་གནས་སྐབས་ན་བྱས་པའི་ལས་དགེ་བའམ་མི་དགེ་བ་དུ་མ་ཡོད་པར་གཞུང་ཆེན་པོ་རྣམས་ལས་བཤད་པའི་ཕྱིར་རོ། །དེས་ན་ཉོན་མོངས་མ་ལུས་པར་སྤངས་ཀྱང༌། ཕུང་པོའི་རྒྱུན་མ་ལོག་པ་དང༌། ཕུང་པོའི་རྒྱུན་ཆད་པ་གཉིས་ཁྱད་པར་དུ་འདོད་དེ་རིག་པ་དྲུག་ཅུ་པའི་འགྲེལ་པར་ཕྱོགས་སྔར་དྲངས་བ་ལྟར་རོ། །སྡེ་པ་གཉིས་ཀས་ཀྱང་དགྲ་བཅོམ་བ་ཚེའི་འདུ་བྱེད་་བཏང་ནས་རིག་པ་ཕྱི་མར་མཚམས་
མི་སྦྱོར་བར་ཞི་བའི་དབྱིངས་འབའ་ཞིག་པར་འདོད་དོ། །གཉིས་པ་མྱ་ངན་ལས་འདས་པ་ནི། འདུས་བྱས་མ་བྱས་གཉིས་ལས། འདུས་མ་བྱས་པ་སྟེ། དེ་ལ་ཁ་ཆེ་བྱེ་སྨྲ་རྣམས་འགོག་པ་གཉིས་དང་ནམ་མཁའ་སྟེ་འདུས་མ་བྱས་གསུམ་དུ་འདོད། ཡུལ་དབུས་ཀྱི་བྱེ་སྨྲ་རྣམས་དེ་བཞིན་ཉིད་བསྣན་ནས་བཞིར་འདོད། དེ་ལྟར་འདུས་མ་བྱས་བཞི་ལས། གཉིས་ཀས་ཀྱང་མྱང་འདས་གཉིས་ཀ་སོ་སོར་བརྟགས་འགོག་ཏུ་འདོད་ཅིང༌། ཁྱད་པར་ནི་བྱེ་སྨྲ་མ་ཡིན་དགག་གི་ངོ་བོར་འདོད་པས་རྫས་ཡོད་དང༌། མདོ་སྡེ་པས་མེད་དགག་གི་ངོ་བོར་འདོད་པས་བཏགས་ཡོད་དུ་འདོད་དོ། །གཉིས་པ་སེམས་ཙམ་པའི་ལུགས་ནི། །ལྷག་མ་ཡོད་མེད་ཀྱི་དོན་སྔར་དང་འདྲ་ལ། ངོ་བོ་ནི། བསྡུ་བར་ཆོས་དབྱིངས་ཤིན་ཏུ་དག་པའི་མཚན་ཉིད་དུ་བཤད་ཅིང༌། བྱེ་བཤད་འགྲེལ་པར་སོ་སོར་བརྟགས་འགོག་ཏུ་བཤད་དོ། །ལུགས་འདིས་ཀྱང་ལྷག་མེད་ཀྱི་ཚེ་རིག་པ་རྒྱུན་ཆད་དུ་འདོད་ཅིང༌། དེའི་ཚེ་སྒྲིབ་པ་གཉིས་ལམ་གྱིས་སྤངས་པའི་ཟད་པ་མེད་ཀྱང༌། རྟེན་མེད་པས་རང་གི་ངང་གིས་དེ་དག་ལོག་པ་ཡོད་པས་ཐེག་པ་ཆེ་ཆུང་གི་མྱང་འདས་ལ་སྤངས་པའི་ཁྱད་མེད་ཀྱང་སྨོན་ལམ་གྱི་སྟོབས་དང༌། རིགས་ཀྱི་ཁྱད་པར་ལས་གཞན་དོན་བྱེད་མི་བྱེད་ཀྱི་ཁྱད་པར་ཡོད་པར་འདོད་དོ། །གསུམ་པ་དབུ་མ་པའི་ལུགས་ནི། །སྤྱིར་མྱང་
འདས་བཞིར་གསུང་རབ་ལས་འབྱུང་སྟེ། རང་བཞིན་དང༌། མི་གནས་པ་དང༌། ལྷག་བཅས་དང༌། ལྷག་མེད་ཀྱི་མྱང་འདས་སོ། །དེ་ལ་དང་པོ་ནི་ཆོས་རྣམས་ཀྱི་རང་བཞིན་སྤྲོས་པ་མཐའ་དག་དང་བྲལ་བའོ། །གཉིས་པ་ནི་སངས་རྒྱས་དང་བྱང་སེམས་ཀྱི་མྱང་འདས་སོ། །ཐ་མ་གཉིས་ལ་གཉིས་ལས། ཐེག་དམན་གྱི་དབང་དུ་བྱས་པ་ནི། དགྲ་བཅོམ་པ་ཚེའི་འདུ་བྱེད་མ་བཏང་བ་ན་ཉོན་མོངས་པ་སྤངས་ཀྱང་ལས་ཉོན་གྱིས་འཕགས་པའི་སྡུག་བསྔལ་གྱི་ལྷག་མ་ཡོད་པ་ནི་ལྷག་བཅས་ཡིན་ལ། །སྐུ་ཚེའི་འདུ་བྱེད་བཏང་བ་ན། སྡུག་བསྔལ་གྱི་ཕུང་པོ་རགས་པ་འདོར་ཞིང་དག་པའི་ཞིང་ཁམས་སུ་པདྨའི་སྦུབས་སུ་ཡིད་ཀྱི་ལུས་ཀྱིས་གནས་པ་ན་ལྷག་མེད་དུ་བཞེད་པར་མངོན་ནོ། །ཐེག་ཆེན་གྱི་དབང་དུ་བྱས་པ་ནི། སྐུ་གསུམ་ལ་འཇུག་པའི་སྐོར། །ཕུང་པོར་བཅས་པའི་མྱ་ངན་འདས། །ཐུབ་སྐུ་གཉིས་ལ་བཞག་པ་ཡིན། །ཕུང་པོ་ཀུན་དང་གྲོལ་བའི་ཕྱིར། །ཆོས་ཀྱི་སྐུ་ལ་ཕུང་པོ་མེད། །ཅེས་སྐུ་གསུམ་ལ་ལྷག་བཅས་དང་ལྷག་མེད་དུ་བཞག་པ་ནི་གསེར་འོད་ཀྱི་ལུང་དོན་དང་ཡང་མཐུན་ནོ། །བཞི་པ་དེའི་འཐད་པ་ནི། །གང་ཟག་གི་བདག་འཛིན་ནི་ཉོན་མོངས་དང་སྡུག་བསྔལ་ཐམས་ཅད་ཀྱི་རྩ་བ་ཡིན་ལ། །གཞི་ཤེས་ཀྱིས་གང་ཟག་གི་བདག་མེད་རྟོགས་པས་བདག་འཛིན་འཇོམས་ཤིང་དེ་ལོག་པས་སྡུག་བསྔལ་ཀུན་ལས་གྲོལ་བའི་མྱང་འདས་ཐོབ་པ་
འཐད་དོ། །རྐང་པ་གཉིས་པ་ལ་ཡང་བཞི་ལས། རྟེན་ནི། ཏིང་འཛིན་རྒྱལ་པོ་ལས། །བདུད་རྩི་ཐོབ་བྱེད་ལམ་ནི་འདི་ཡིན་གྱི། །ལམ་ངན་སྤོངས་ལ་ལམ་ལ་མནོས་ཤིག་ཅེས། །ལྟ་ངན་སེམས་ཅན་མཐོང་ནས་གོ་བྱེད་དེ། །རྒྱུ་དེས་བྱང་ཆུབ་སེམས་དཔའ་ཞེས་བརྗོད་དོ། ཞེས་པ་ལྟར་བྱང་ཆུབ་སེམས་དཔའ་གདུལ་བྱའི་འཁོར་བ་ཇི་སྲིད་པར་འགྲོ་བའི་དོན་བྱེད་པར་འདོད་པ་རྣམས་སོ།།ཐབས་ནི། ལམ་གསུམ་པོ་ཐམས་ཅད་དོན་དམ་པར་སྐྱེ་བ་མེད་པར་དང༌། ཐ་སྙད་དུ་རྒྱུ་ངོ་བོ་འབྲས་བུ་རྣམས་རྟོགས་པའི་ངོ་བོ་ཉིད་ཀྱིས་སོ། །འབྲས་བུ་ནི། འགྲོ་བ་མཐའ་དག་གི་འདོད་པའི་དོན་མངོན་མཐོ་ངེས་ལེགས་སོ། །འཐད་པ་ནི། །གཞན་ལ་ལམ་མ་ནོར་བར་སྟོན་པ་ལ་རང་གིས་ལམ་ཅི་ལྟ་བ་བཞིན་རྟོགས་པ་སྔོན་དུ་འགྲོ་དགོས་ཏེ། རྣམ་འགྲེལ་ལས། །ཐབས་བྱུང་དེ་རྒྱུ་ལྐོག་གྱུར་པས། །དེ་འཆད་པ་ནི་དཀའ་བ་ཡིན། ཞེས་པ་ལྟར་རོ། རྐང་པ་གསུམ་པ་ལ་ཡང་སྔར་ལྟར་བཞི་ལས། རྟེན་ནི། སྐུ་གསུང་ཐུགས་ཉེས་སྤྱོད་མཐའ་དག་ལས་ཡང་དག་པར་བསྡམས་པས་ཐུབ་པ་བཅོམ་ལྡན་འདས་རྣམས་སོ། །ཐབས་ནི། རྣམ་པ་ཐམས་ཅད་སྐྱེ་བ་མེད་པར་ཐུགས་སུ་ཆུད་པའི་རྣམ་མཁྱེན་གང་དང་ཡང་དག་པར་ལྡན་པ་དེ་ཡིས་སོ། །འབྲས་བུ་ནི། བརྗོད་བྱ་དོན་གྱི་རྣམ་པ་ཀུན་དང་ལྡན་ཞིང་རྗོད་བྱེད་ཚིག་གི་
སྤྲོས་པ་སྣ་ཚོགས་པ་དང་བཅས་པའི་ཆོས་ཀྱི་འཁོར་ལོ་འདི་གསུངས་བའོ། །འདིར་ཆོས་འཁོར་གྱི་མཐའ་དཔྱད་པ་ལ་བཞི། ཆོས་འཁོར་གྱི་ངོ་བོ། ངེས་ཚིག །དབྱེ་བ། ཚད་དོ། དང་པོ་ངོ་བོ་ལ། བྱེ་སྨྲ་རྣམས་མཐོང་ལམ་ཁོ་ན་ཆོས་འཁོར་དུ་འདོད་དེ། ལྔ་སྡེ་ལ་ཝཱ་ར་ཎཱ་སཱིར་ཆོས་བསྟན་པས་མཐོང་ལམ་སྐྱེས་པ་ན་གནོད་སྦྱིན་རྣམས་ཀྱིས་ཆོས་ཀྱི་འཁོར་ལོ་བསྐོར་རོ་ཞེས་བསྒྲགས་པ་དང༌། འཁོར་ལོ་རིན་པོ་ཆེ་དང་ཆོས་མཐུན་པ་མཐོང་ལམ་པ་ཡོད་པའི་ཕྱིར་ཏེ། མཐོང་ལམ་གྱིས་བདེན་པ་མྱུར་དུ་རྟོགས་པར་བྱེད་བས་མྱུར་དུ་འགྲོ་བ་དང༌། བདེན་པ་སྔ་མའི་དམིགས་རྣམས་འདོར་བ་དང༌། ཕྱི་མ་ལ་འཇུག་པ་དང༌། བར་ཆད་མེད་ལམ་གྱིས་སྤང་བྱའི་ཐོབ་པ་གཅོད་པས་མ་རྒྱལ་བ་ལས་རྒྱལ་བར་བྱེད་པ་དང༌། རྣམ་གྲོལ་གྱི་ལམ་གྱིས་སྤང་བྱ་དང་བྲལ་བའི་བྲལ་ཐོབ་འདྲེན་པས་རྒྱལ་བ་རྣལ་དུ་འགོད་པ་དང༌། ཁམས་གོང་གི་བདེན་པ་ལ་དམིགས་པས་འཕར་བ་དང༌། འོག་མའི་བདེན་པ་ལ་དམིགས་པས་འབབ་པའི་ཆོས་མཐུན་པ་ཡིན་ནོ། །ཞེས་འདོད་དོ། །བཙུན་པ་དབྱངས་སྒྲོགས་གིས། འཕགས་ལམ་ཡན་ལག་བརྒྱད་ཆོས་འཁོར་ཡིན་ཏེ། ངག་ལས་མཐའ་འཚོ་བ་གསུམ་ཚུལ་ཁྲིམས་ཡིན་པས་ཏིང་འཛིན་དང་ཤེས་རབ་ཀྱི་རྟེན་བྱེད་པས་རྟེན་པའི་ལྟེ་བ་དང་མཚུངས། ལྟ་བ་རྟོགས་པ། རྩོལ་བ་རྣམས། ཤེས་རབ་ཀྱི་བསླབ་པ་ཡིན་པས་མི་མཐུན་ཕྱོགས་
གཅོད་པའི་ཕྱིར་གཅོད་པའི་རྩིབས་དང་ཆོས་མཚུངས། ཏིང་འཛིན་ནི། ལྟ་སོགས་རྩེ་གཅིག་པའི་ཚུལ་གྱིས་དམིགས་པ་ལ་འཛིན་པའི་ཕྱིར། སྡུད་པའི་མུ་ཁྱུད་དང་ཆོས་མཐུན་པ་ཡིན་ཏེ། དེས་ན་འཁོར་ལོ་དང་ཆོས་མཐུན་ནོ་ཞེས་འདོད། དེ་དག་ནི་སྒྲུབ་བྱེད་ཕྱོགས་རེ་བ་ལ་འཁྲུལ་པས་ལུགས་དེ་དག་དོར་ལ་འདིར་ནི་ལུང་དང་རྟོགས་པའི་ཆོས་ཐམས་ཅད་ཆོས་འཁོར་དུ་འདོད་པར་བྱ་སྟེ། ཆོས་འཁོར་གསུམ་གྱིས་གསུང་རབ་ཐམས་ཅད་བསྡུས་པ་དང༌། ལམ་ཐམས་ཅད་ལ་ཡང་ཆོས་འཁོར་གྱི་དོན་དམིགས་པའི་ཕྱིར་རོ། །གཉིས་པ་ཆོས་འཁོར་གྱི་ངེས་ཚིག་ནི། ཡང་དག་བའི་ལྟ་བ་ལ་སོགས་པའི་ཆོས་ཀྱི་རང་བཞིན་ཡིན་པ་དང༌། རྒྱུད་གཅིག་ནས་གཅིག་ཏུ་བརྒྱུད་དེ་མཐུན་པར་བསྐོར་བའི་དོན་གྱིས་ཆོས་འཁོར་རོ། །གསུམ་པ་དབྱེ་བ་ནི། རྟོགས་པའི་ཆོས་འཁོར་དང་ལུང་གི་ཆོས་འཁོར་གཉིས། རྟོགས་པའི་ཆོས་འཁོར་ལ་ལམ་ལྔ། ལུང་གི་ཆོས་ལ་དབྱེ་ན་ཇི་སྐད་དུ། །མདོ་སྡེ་དབྱངས་བསྙད་ལུང་བསྟན་དང༌། །ཚིགས་བཅད་ཆེད་བརྗོད་རྟོགས་པ་བརྗོད། །དེ་ལྟར་བྱུང་དང་གླེང་གཞི་དང༌། །ཤིན་ཏུ་རྒྱས་པ་སྐྱེས་རབས་བཅས། །གཏན་ལ་ཕབ་རྨད་བྱུང་ཆོས་ཏེ། །དེ་ལྟར་ཡན་ལག་བཅུ་གཉིས་གསུངས། ཞེས་པ་ལྟར་ཡན་ལག་བཅུ་གཉིས་སོ། །དེ་ཡང་བསྡུ་ན་སྡེ་སྣོད་གསུམ་དུ་འགྱུར་ཏེ། མདོ་སྡེ་
སོགས་དང་པོ་ལྔ་ཉན་ཐོས་ཀྱི་མདོ་སྡེའི་སྡེ་སྣོད། གཙོ་བོ་གླེང་གཞི། འཁོར་རྟོགས་བརྗོད། དེ་ལྟ་བུ་བྱུང༌། སྐྱེས་རབས་དང་བཞི་འདུལ་བའི་སྡེ་སྣོད། དཔེ་གཅིག་ལ་སྐྱེས་རབས་ནི་ཐེག་ཆེན་གྱི་འདུལ་བའི་སྡེ་སྣོད་ཟེར་བ་ཞིག་འདུག །མཚམས་འདིར་གསུང་རབས་ཡན་ལག་བཅུ་གཉིས་དང་ཆོས་བཅུའི་དབྱེ་བ་ལས་ལུང་རྟོགས་གཉིས་སུ་བསྡུ་ཚུལ་དཀའ་འགྲེལ་ལོ། །རྨད་དུ་བྱུང་བ་དང༌། ཤིན་ཏུ་རྒྱས་པ་གཉིས་བྱང་སེམས་ཀྱི་མདོ་སྡེའི་སྡེ་སྣོད། གཏན་ལ་དབབ་པར་བསྟན་པའི་སྡེ་ཐེག་པ་ཆེ་ཆུང་གཉིས་ཀའི་མངོན་པའི་སྡེ་སྣོད་དོ། དེ་ནི་ཀུན་བཏུས་ཀྱི་ལུགས་ཡིན་ལ། གཞི་བསྡུ་བར་ནི། ཤིན་ཏུ་རྒྱས་པ་ཐེག་ཆེན་གྱི་སྡེ་སྣོད་དང༌། གཞན་རྣམས་ཉན་ཐོས་དང་ལྡན་པའི་སྡེ་སྣོད་དུ་བྱས་ནས་གཉིས་ཀ་མདོ་སྡེའི་སྡེ་སྣོད་དུ་འཆད་དེ་འདི་དང་མི་མཐུན་ནོ། །དེ་ལས་གླེང་གཞི་གཙོ་འཁོར་བཞི་གཅིག་ཏུ་བྱས་ན་གསུང་རབས་ཡན་ལག་དགུ་ཡིན་པར་ལང་གཤེགས་འགྲེལ་པ་ལས་བཤད་དོ། །བཞི་པ་ཚད་ནི། ཁ་ཅིག་ཤཱ་རིའི་བུས་བྱས་པའི་ཆོས་ཀྱི་ཕུང་པོ་ཞེས་པའི་བསྟན་བཅོས་ལ་ཤོ་ལོ་ཀ་དྲུག་སྟོང་ཡོད་པས་དེ་ཙམ་མོ་ཟེར། ལ་ལ་ཕུང་པོ་ཁམས་སྐྱེ་མཆེད་བདེན་པ་རྟེན་འབྲེལ་ལ་སོགས་པ་ལས་བརྩམས་ནས་གཏམ་རྒྱུད་ཚང་བ་རེ་དང༌། གཞན་སྤངས་བྱ་རེའི་གཉེན་པོ་རྫོགས་པ་རེ་ལ་འདོད་པ་ཡོད་ཀྱང༌། འདིར་ཐེག་པ་ཐུན་མོང་བ་དང༌། ཐུན་མོང་མ་ཡིན་པའི་ལུགས་
གཉིས་ལས། དང་པོ་ལྟར་ན། ཆོས་ཕུང་རེ་ལ་ཤོ་ལོ་ཀ་སྟོང་ཕྲག་རེར་འདོད་དེ་ཀུན་བཏུས་འགྲེལ་པའི་ལུགས་སོ། །གཉིས་པ་ལྟར་ན། དབང་པོའི་གླང་པོ་ཆེ་རབ་བརྟན་གྱིས་བཀུར་བར་འོས་པའི་སྣག་ཚས་ནི་ཆོས་ཀྱི་ཕུང་པོ་གཅིག་འདྲི་བར་ནུས་སོ། །ཞེས་གསུངས་སོ། །དེ་ལྟར་བྱས་ན་དྲིན་ལན་བསབ་པ་ལས། འཕགས་པ་ལྷས་བྱིན་གྱིས། གླང་པོ་ཆེ་ལྔ་སྟོང་གིས་བཀུར་བར་བྱ་བའི་གླེགས་བམ་རྣམས་ཁ་ཏོན་དུ་རྗོད་པར་བྱེད་དོ། །ཞེས་གསུངས་པ་ཡང་རིགས་པར་འགྱུར་རོ། །ཆོས་ཕུང་དེ་སྙེད་ཡོད་ན་འཛམ་བུའི་གླིང་ན་དེ་ཙམ་མི་སྣང་བ་ཅི་ཞེ་ན། འཇིག་རྟེན་གྱི་ཁམས་གཞན་དང༌། ཀླུ་རྣམས་ཀྱི་གནས་ན་ཕལ་ཆེར་ཡོད་དེ། སློབ་སྤྲིན་ལས། །བསྟན་པ་རིན་ཆེན་མཆོག་ལྟར་བཟང་ལ་འཕན་མེད་པ། །རྣམ་པར་དག་ཚུལ་གང་ཡིན་ཀླུ་མགོ་གདེངས་ཀ་ཅན། །ཆེན་པོ་རྣམས་ཀྱིས་གཙུག་གི་རྒྱན་བཞིན་གུས་མཆོད་དེ། །ས་ཡི་གཏིང་ན་གནས་པའི་རབ་རིབ་སེལ་བར་མཛད། ཅེས་པ་ལྟར་རོ། །བཞི་པ་དེའི་འཐད་པ་ནི། ཇི་ལྟ་ཇི་སྙེད་ཀྱི་རྣམ་མཁྱེན་སྔོན་དུ་སོང་ན་གདུལ་བྱའི་ཁམས་དང༌། །བསམ་པ་བག་ལ་ཉལ་རྣམས་དང་རྗེས་སུ་མཐུན་པར་ཆོས་ཀྱི་འཁོར་ལོ་བསྐོར་ནུས་ལ། དེ་སྔོན་དུ་མ་སོང་ན་འདི་ལྡོག་པའི་ཕྱིར། ཆོས་འཁོར་མ་ལུས་པ་བསྐོར་བ་རྣམ་མཁྱེན་གྱི་འབྲས་བུར་གྲུབ་བོ། །རྐང་བ་བཞི་
པའི་དོན་བཤད་པ་ལ་དངོས་དང༌། ཡུམ་སྲས་སུ་འགྱུར་ཚུལ་གཉིས། དང་པོ་ནི། དེ་ལྟར་ཉན་ཐོས་དང་དེའི་ཤུགས་བསྟན་རང་སངས་རྒྱས་དང༌། བྱང་ཆུབ་སེམས་དཔའི་ཚོགས་དང་བཅས་པ་སྟེ། དེ་དག་གིས་བསྐོར་བའི་སངས་རྒྱས་རྣམས་ཀྱི་ཡུམ་དེ་ལ་ཕྱག་འཚལ་ལོ། །ཞེས་གསུངས་ཏེ་སངས་རྒྱས་ཀྱི་ཡུམ་ཞེས་གསུངས་པ་ནི་སྲས་ཀྱི་གཙོ་བོ་བསྟན་པར་བཞེད་ནས་ཡིན་གྱི། དོན་དུ་འཕགས་པ་བཞི་ཀའི་ཡུམ་ཡིན་ནོ། །གཉིས་པ་ཡུམ་སྲས་སུ་འགྱུར་ཚུལ་ནི། །འདིར་མངོན་རྟོགས་ཡུམ་དང༌། །གང་ཟག་སྲས་སུ་འཇོག་པ་ནི། མ་དད་བུ་ལྟར་ངོ་བོ་བསྐྱེད་པས་ཡུམ་སྲས་སུ་འཇོག་པ་མིན་ནོ། །འོ་ན་ཅི་ཞེ་ན། འཇིག་རྟེན་སྐྱེས་བུ་འགའ་ཞིག་ལ་ཕན་ཆེན་པོ་འདོགས་པ་དེ་ལ་འདི་ནི་བདག་གི་མའོ་ཞེས་བརྗོད་པ་ལྟར་གང་ཟག་གསུམ་གྱི་མངོན་རྟོགས་ཀྱིས་ཀྱང༌། རང་རང་གི་མཐར་ཐུག་གི་བཞེད་དོན་གསུམ་རྫོགས་པར་སྒྲུབ་པས་གང་ཟག་དེ་དག་གི་ཡུམ་ཡིན་ནོ། །གཞན་ཡང་ཡུམ་འདིས་སྲས་དེ་དག་གི་རྒྱུད་ལ་གནས་སྐབས་ཀྱི་བཞེད་པ་ཟག་མེད་ཀྱི་ཕུང་པོ་མ་སྐྱེས་པ་བསྐྱེད་པ་དང༌། སྐྱེས་ཟིན་རྒྱུན་གནས་པར་བྱེད་པའི་ཕྱིར་ཡང་ཡུམ་ཡིན་ནོ། །མཐར་ཐུག་གི་འདོད་པ་རྫོགས་པར་སྒྲུབ་པ་ལ་གནས་སྐབས་སུ་ཟག་མེད་ཀྱི་ཕུང་པོ་སྐྱེད་པ་དང་གསོ་བ་སྔོན་དུ་འགྲོ་དགོས་པའི་ཕྱིར་རོ། །དེ་ལྟར་མཐར་ཐུག་དང༌། གནས་
སྐབས་ཀྱི་བཞེད་པ་སྒྲུབ་ཚུལ་ལས་ཡུམ་དུ་བཞག་ཅིང༌། འོན་ཀྱང་རྣམ་མཁྱེན་ནི་སངས་རྒྱས་ཀྱི་ས་ཁོ་ནར་ཡོད་པས་སངས་རྒྱས་ཀྱི་གསོ་བའི་ཡུམ་ཙམ་དུ་རུང་ཡང༌། སྐྱེད་པའི་ཡུམ་དུ་མི་གཟུང་ངོ༌། །ལྔ་པ་བརྒལ་ལན་གྱི་སྒོ་ནས་འཆད་པ་ལ་དང་པོ་བརྒལ་བ་ནི། མཆོད་བརྗོད་ཀྱི་སྐབས་སུ་མཁྱེན་གསུམ་གྱི་སྒོ་ནས་བསྟོད་པས་བརྗོད་བྱ་དང་མཐུན་པའི་བསྟོད་ཕྱག་ཡིན་པའི་ཕྱིར། ཤུགས་ལ་དེ་གསུམ་བརྗོད་བྱར་བྱེད་པའི་བསྟན་བཅོས་ཤིག་བརྩམ་པར་ཁས་བླང་བ་ལ་ཁ་ཅིག་ན་རེ། མཁྱེན་གསུམ་བརྗོད་བྱར་བྱེད་པའི་བསྟན་བཅོས་ཞིག་རྩོམ་པར་བྱེད་པ་ལ། མཁྱེན་གསུམ་ངོ་བོའི་སྒོ་ནས་མཚོན་མི་ནུས་པས་ཡུལ་དང་འབྲེལ་བར་བསྟན་དགོས་ལ། དེ་ཡང་ཆོས་རབ་ཏུ་རྣམ་འབྱེད་ཀྱི་ཤེས་རབ་བསྐྱེད་པའི་ཕྱིར་གཞི་ཕུང་ཁམས་སྐྱེ་མཆེད་ཀྱི་གྲངས་རབ་དབྱེ་ཙམ་དང༌། མི་མཐུན་ཕྱོགས་སྤོང་བ་ཙམ་གྱི་ཕྱིར་གཉེན་པོའི་ཕྱོགས་མ་ལུས་པའམ་བྱང་ཆུབ་གསུམ་གྱི་ལམ་ཙམ་དང༌། ཤེས་བྱའི་ཆོས་ཀྱི་རྣམ་གྲངས་མ་ལུས་པ་ཤེས་པའི་ཕྱིར་དུ་རྫས་བཏགས་ལ་སོགས་པའི་རྣམ་པའི་རབ་དབྱེ་ཙམ་ཞིག་བརྗོད་བྱར་སྡུད་པ་འདི་གསུམ་ལས་གང་ཡིན། དང་པོ་ལྟར་ན། །མངོན་པའི་བསྟན་བཅོས་དང་ཟློས་པར་འགྱུར་ཞིང༌། གཉིས་པ་ལྟར་ན་སྤང་བྱ་གང་གི་གཉེན་པོ་གང་ཡིན་པ་མི་ཤེས་པས་བསྟན་བཅོས་བརྩམ་པ་ལ་དགོས་
པ་མེད་པར་འགྱུར་ལ། གསུམ་པ་ལྟར་ན་རྣམ་པ་གཞི་བཅས་ཤིག་སྟོན་ནམ་གཞི་མེད་ཅིག་སྟོན། དང་པོ་རྣམ་པ་སྟོན་པ་ན་གཞི་ཡང་སྟོན་དགོས་པས་མངོན་པ་དང་ཟློས་པར་འགྱུར་ལ། གཉིས་པ་ལྟར་ན་གཞིའི་དོན་རྟོགས་པ་མེད་པར་ཐལ་ཏེ། རྣམ་པ་གཞི་མེད་པ་རྟོགས་པས་བཏགས་ཙམ་ཞིག་བསྡུས་པའི་ཕྱིར་རོ་ཞེ་ན། དེའི་ལན་ནི། འདིར་ནི་དེ་ལྟར་གཞི་གཉེན་རྣམ་པ་ཕྱོགས་རེ་བརྗོད་བྱར་བསྡུས་ནས་ཡུམ་ཕྱོགས་རེ་བའི་རྒྱན་དུ་བྱེད་པ་ནི་མ་ཡིན་ཏེ། གཞི་གཉེན་རྣམ་པའི་ཕྱོགས་གསུམ་ཆར་གྱི་དོན་རྣམས་བརྗོད་བྱར་བསྡུས་པའི་སྒོ་ནས་ཀྱང་མཁྱེན་པ་གསུམ་ཀའི་རྒྱན་དུ་བྱེད་པའི་ཕྱིར་བཤད་དགོས་མ་བཤད་པའི་སྐྱོན་ཡང་མེད་ལ་དགོས་པ་ཡུལ་ཅན་མཁྱེན་པ་གསུམ་ཤེས་པའི་ཆེད་དུ། ཚུལ་གོལ་ས་དང་རྒྱུ་དང་ཐོབ་བྱར་བསྟན་པས་མངོན་པའི་བསྟན་བཅོས་དང་ཟློས་པའི་སྐྱོན་ཡང་མེད་དོ། །དེ་ལྟར་མཁྱེན་པ་གསུམ་གྱི་རྒྱན་དུ་གྲུབ་ན་མཁྱེན་པ་གསུམ་གྱིས་ཉན་རང་དང་བྱང་སེམས་དང་སངས་རྒྱས་ཀྱི་མངོན་རྟོགས་མཐའ་དག་བསྡུས་པས་ཡུམ་མཐའ་དག་གི་རྒྱན་དུ་གྲུབ་པ་ཡིན་ཏེ། རྒྱལ་བའི་ཡུམ་རྒྱས་འབྲིང་བསྡུས་གསུམ་ལས་གང་ཟག་བཞིའི་མངོན་རྟོག་རྣམས་མཁྱེན་གསུམ་གྱིས་བསྡུས་པར་བཤད་པའི་ཕྱིར་རོ། །གཉིས་པ་རྟོག་ལྡན་བསྟན་བཅོས་ལ་འཇུག་པའི་ཡན་ལག་དགོས་འགྲེལ་བཤད་པ་ལ་གསུམ། དགོས་པ་དང༌། བསྡུས་པ་
དང༌། ཚིག་གི་དོན་ནོ། །དང་པོ་དགོས་པ་ནི། བསྟན་བཅོས་འདི་ལ་བརྗོད་བྱ། དགོས་པ། ཉིད་དགོས། འབྲེལ་པ་བཞི་ཕལ་ཆེར་མེད་དམ་སྙམ་པའི་དོན་མི་འགྱུར་གྱི་དོགས་པ་བཞི་བསལ་ནས། དེ་བཞི་ཕལ་ཆེར་ཡོད་ལས་ཆེ་སྙམས་པའི་དོན་འགྱུ་གྱི་ཐེ་ཚོམ་བཞི་བསྐྱེད་དེ་རྟོག་ལྡན་བསྟན་བཅོས་ལ་འཇུག་པ་སྟེ། །གང་ཕྱིར་འཇིག་རྟེན་དོན་གཉེར་ནི། །ཐེ་ཚོམ་ལས་ཀྱང་འཇུག་ཕྱིར་རོ། །ཞེས་པ་ལྟར་རོ། །དེ་ཡང་དབང་བརྟུལ་ལ་ངེས་པ་དང༌། དབང་རྣོན་ལ་ཐེ་ཚོམ་དུ་སྐྱེ་ཞིང༌། ཐེ་ཚོམ་ལས་བསྟན་བཅོས་ལ་འཇུག་པའི་ཚུལ་ཡང༌། བསྟན་བཅོས་ལུས་ཀྱི་སྔོན་དུ་དགོས་འབྲེལ་གྱི་ངག་བཀོད་པ་ན་ངག་འདིས་ཇི་ལྟར་དམ་བཅས་པ་ལྟར་བསྟན་བཅོས་ལ་ཞུགས་ཏེ་ཡོད་མེད་བརྟགས་ལ་ཡོད་ན་ནི་འཇུག་ཅིང་མེད་ན་ནི་ལྡོག་པར་བྱའོ་སྙམ་དུ་བསམ་ནས་འཇུག་པར་འགྱུར་རོ། །གཉིས་པ་བསྡུས་པའི་དོན་ལ་གསུམ། དགོས་འབྲེལ་བཞི་ངོས་བཟུང༌། དེ་ངག་གིས་བསྟན་པའི་ཚུལ། བསྟན་བྱ་བཞིར་གྲངས་ངེས་པའོ། །དང་པོ་ལ་གསུམ། ངག་ཙམ་དང༌། དགོས་འབྲེལ་ངག་དང༌། བསྟན་བཅོས་ལུས་ལ་ཡོད་པའི་དགོས་འབྲེལ་ལོ། །དང་པོ་ངག་ཙམ་ལ་ཡོད་པའི་དགོས་འབྲེལ་ནི། བདེན་ཚིག་ཐམས་ཅད་ལ་དགོས་འབྲེལ་བཞི་བརྩིར་རུང་སྟེ། དོན་བདེན་པ་སྟོན་པའི་ངག་གིས་བསྟན་བྱ་ནི་བརྗོད་བྱ་ཡིན་ལ། དེ་ལས་དེ་རྟོགས་
པ་ནི་དགོས་པ། དེ་ལས་སྐྱེས་བུའི་དོན་གྲུབ་པ་ཉིང་དགོས། དེ་དག་སྔ་ཕྱི་འབྲེལ་པ་ནི་འབྲེལ་པའོ། །གཉིས་པ་དགོས་འབྲེལ་ངག་ལ་ཡོད་པའི་དགོས་འབྲེལ་བཞི་ནི། །བསྟན་བཅོས་ལུས་ལ་ཡོད་པའི་དགོས་འབྲེལ་ནི་བརྗོད་བྱ། ངག་ལས་རྟོག་ལྡན་ལ་ཐེ་ཚོམ་མམ་ངེས་པ་སྐྱེས་པ་དགོས་པ། དེ་ལས་བསྟན་བཅོས་ལ་འཇུག་པ་ཉིད་དགོས། དེ་དག་སྔ་མ་མེད་ན་ཕྱི་མ་མི་འབྱུང་བའི་ཆ་ནི་འབྲེལ་པའོ། །གསུམ་པ་ནི་གཞུང་དུ་སྟོན་ནོ། །གཉིས་པ་ངག་གིས་བསྟན་ཚུལ་ནི། གཙོ་ཕལ་ལ་དངོས་བསྟན་དང༌། ཤུགས་བསྟན་དུ་བྱེད་ན་ཉིད་དགོས་དངོས་དང་གཞན་རྣམས་ཤུགས་ལ་བསྟན་ནོ། །སྒྲས་ཟིན་མ་ཟིན་ལ་བྱེད་ན་འབྲེལ་པ་ཤུགས་ལ་དང༌། གཞན་གསུམ་དངོས་སུ་བསྟན་ཏོ། །གསུམ་པ་གྲངས་ངེས་ནི། རྟོག་ལྡན་བསྟན་བཅོས་ལ་འཇུག་པའི་གེགས་བཞི་སྟེ། འདི་ལྟར་འདི་ལ་དགོས་པ་མེད་པ་དང༌། ཡོད་ཀྱང་དེ་སྒྲུབ་མི་ནུས་པ་དང༌། ནུས་ཀྱང་དེ་དམ་པས་འདོད་བྱ་མིན་པའི་ཕྱིར་དང༌། ཡིན་ཀྱང་དེ་སྒྲུབ་པའི་ཐབས་སླ་བ་གཞན་ཡོད་སྙམས་པའམ། །ཡང་ན་དེ་འདི་ལ་མ་འབྲེལ་ལོ་སྙམ་པའོ། །དེ་ལ་རིམ་པ་ལྟར་བྱ་རོག་སོ་རྟོག་ལྟ་བུ་མིན་པར་སྦྱིར་དགོས་པ་ཡོད་པ་དང༌། དགོས་པ་དེ་ཡང་འཇོག་པོའི་གཙུག་རྒྱན་ལེན་པའི་བསྟན་བཅོས་ལྟ་བུ་མིན་པར་སྒྲུབ་ནུས་པ་དང༌། སྒྲུབ་ནུས་ཀྱི་དགོས་པ་དེ་ཡང་མ་བག་མར་ལེན་
པ་ལྟ་བུ་མིན་པར་སྐྱེས་བུའི་དོན་མཆོག་དང༌། དགོས་པ་མཆོག་དེ་སྒྲུབ་པའི་ཐབས་ཀྱང་བསྟན་བཅོས་ལ་མ་འབྲེལ་བ་མཐོ་རིས་ཀྱི་དོན་དུ་ཕྱུགས་ཀྱི་མཆོད་སྦྱིན་བྱེད་པ་ལྟ་བུ་མིན་པར་བསྟན་བཅོས་འདི་ལ་འབྲེལ་པར་མཐོང་བ་ཙམ་གྱིས་འཇུག་པས་བཞིར་གྲངས་ངེས་ཏེ། དེ་ལས་མང་མི་དགོས་ལ་ཉུང་ན་མི་ཐུས་པས་སོ། །ཁ་ཅིག་ན་རེ། བདེ་མཆོག་སྟོད་འགྲེལ་དུ་རྗོད་བྱེད་ཕུན་སུམ་ཚོགས་པ་དང་ལྔ་གསུངས་པ་དང་གཤིས་བརྗོད་བྱ། དགོས་པ་འབྲེལ་པ་གསུམ་དུ་བསྟན་པས་མང་ཉུང་ཁེག་པའི་གྲངས་ངེས་མིན་ཞེས་འཆད་ཀྱང༌། མི་འཐད་དེ། རྟོགས་ལྡན་གྱི་འཇུག་པ་ལ་རྗོད་བྱེད་སྒྲིགས་ལེགས་པ་ཙམ་གཙོ་བོ་མིན་པ་དང༌། གསུམ་དུ་བསྟན་པ་ནི་དགོས་པ་གཉིས་བསྡུས་ནས་བསྟན་པར་འདོད་པའི་ཕྱིར་རོ། །གསུམ་པ་ཚིག་དོན་ལ་གསུམ། དགོས་སོགས་བཞི་དང་ལྡན་པའི་བསྟན་བཅོས་ཀྱི་རང་བཞིན། དེའི་སྒྲ་བཤད། ཚིག་དོན་དངོས་སོ། །དང་པོ་བསྟན་བཅོས་ཀྱི་རང་བཞིན་ལ་ལུགས་གཞན་བསྟན་པ་དང༌། འཐད་ཕྱོགས་ངོས་བཟུང་བ་གཉིས། དང་པོ་ནི། མཛོད་ལས། །ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག །ཚིག་གམ་མིང་ཡིན་དེ་དག་ནི། །གཟུགས་དང་འདུ་བྱེད་དག་ཏུ་འདུས། ཞེས་པའི་དོན་ཚོགས་གསུམ་བཀའི་རང་བཞིན་དུ་འདོད་པ་བྱེ་མདོ་གཉིས་ཀ་མཐུན་ཀྱང་
མདོ་སྡེ་པས་ཚོགས་གསུམ་སྒྲ་སྤྱིའི་ཕྲེང་བར་འདོད་པས་ལྡན་མིན་དང༌། བྱེ་སྨྲས་དེ་གསུམ་ངག་གི་རིག་བྱེད་ཀྱི་སྒྲ་རང་མཚན་ལ་འདོད་པས་གཟུགས་ཀྱིས་བསྡུས་པར་འདོད་པས་ལུགས་དེ་གཉིས་ཀྱིས་ནི་བསྟན་བཅོས་བེམ་པོའི་ངོ་བོར་འདོད་ལ། རྟོག་གེ་པ་རྣམས་ནི། དངོས་ཀྱི་རྗོད་བྱེད་སྒྲ་སྤྱི་དང༌། ཞེན་པའི་རྗོད་བྱེད་སྒྲ་རང་མཚན་པར་འདོད་དོ། །གཉིས་པ་ལ་གཉིས། བཀའ་དང་བསྟན་བཅོས་ཀྱི་མཚན་གཞིའོ། །དང་པོ་ནི། ཆོས་སྟོན་པ་པོར་སྣང་བ་གཟུགས་སྐུ་གཉིས་དང༌། དེས་བསྟན་པར་སྣང་བ་གསུང་རབ་ཡན་ལག་བཅུ་གཉིས་ལྟ་བུ་ནི། གདུལ་བྱའི་གཞན་སྣང་འབའ་ཞིག་ལ་འཇོག་པས་བཀའ་ཐམས་ཅད་ཀྱང༌། སངས་རྒྱས་ཀྱི་ཡེ་ཤེས་སྒྱུ་མ་ལྟ་བུས་བདག་རྐྱེན་དང་གདུལ་བྱའི་རྒྱུད་དག་པས་རྒྱུའི་རྐྱེན་བྱས་པ་ལ་བརྟེན་ནས་གདུལ་བྱ་དེའི་ཤེས་པ་མིང་ཚིག་ཡི་གེའི་རྣམ་པ་དེ་དང་དེར་སྣང་བ་ཡིན་པའི་ཕྱིར། ཉན་པ་པོའི་རྒྱུད་དང་འབྲེལ་གྱིས། སངས་རྒྱས་ཀྱི་རྒྱུད་དང་མ་འབྲེལ་སྟེ། གཞན་དུ་ན་སངས་རྒྱས་ལ་ནང་གི་ཤེས་པ་ཕྱི་རོལ་གྱི་སྒྲར་ཞེན་པའི་མ་རིག་པ་ཡོད་པས་སྒྲིབ་པ་མ་ལུས་པ་སྤངས་པ་མི་སྲིད་པས་སོ། །ཉན་པ་པོའི་རྣམ་རིག་དེ་ཡང་སངས་རྒྱས་ཀྱི་མཐུ་ལས་བྱུང་བའི་ཕྱིར་དེས་བྱས་པར་བཞག་སྟེ། དཔེར་ན་རྨི་ལམ་ན་སྔགས་ལ་སོགས་
པ་ལྷའི་མཐུས་རྙེད་པའི་རྣམ་རིག་ཉིད་རང་གི་ཤེས་པ་ཡིན་ཀྱང་ལྷས་བྱས་ཞེས་བརྗོད་པ་བཞིན་ནོ། །དེས་ན་བཤད་སྦྱར་དང༌། རྒྱན་སྣང་དང༌། ཉི་ཤུ་པའི་འགྲེལ་བཤད་དང༌། རྒྱུད་གཞན་གྲུབ་པའི་འགྲེལ་པ་སོགས་ལས་བཤད་པ་ལྟར་མིང་ཚིག་ཡི་གེའི་རྣམ་པར་སྣང་བའི་ཤེས་པ་ཉན་པ་པོའི་རྒྱུད་ཀྱིས་བསྡུས་པ་ཉིད་ལུང་དུ་འདོད་པར་བྱའོ། །གཉིས་པ་བསྟན་བཅོས་ཀྱི་མཚན་གཞི་ནི། དབུས་མཐའི་འགྲེལ་བཤད་ལས། མིང་དང་ཚིག་དང་ཡི་གེའི་ཚོགས་སུ་སྣང་བའི་རྣམ་པར་རིག་པ་རྣམས་ནི་བསྟན་བཅོས་སོ། །ཡང་ན་འཇིག་རྟེན་ལས་འདས་པའི་ཡེ་ཤེས་ཐོབ་པར་བྱེད་པའི་སྒྲའི་ཁྱད་པར་དུ་སྣང་བའི་རྣམ་པར་རིག་པ་རྣམས་ནི་བསྟན་བཅོས་སོ། །ཞེས་གཉིས་འབྱུང་བའི་སྔ་མ་ནི་བསྟན་བཅོས་ཙམ་ཞིག་དང༌། ཕྱི་མ་ནི་ཁྱད་པར་ཅན་གྱི་ངོས་འཛིན་ནོ། དེ་ཡང་སོ་སྐྱེ་དང་ས་བཅུ་པ་ལ་ཐུག་གི་འཕགས་པ་ལ་ནི་གདུལ་བྱ་དང་གཉིས་ཀའི་སྣང་བ་ལ་བསྟན་བཅོས་བཞག་སྟེ། ས་བཅུ་པ་ལ་ཡང་རང་གི་ཤེས་པ་ཉིད་ལོངས་སྐུར་སྣང་བ་ལ་ཕྱི་རོལ་གྱི་སངས་རྒྱས་ངང་མིང་ཚིག་སོགས་སུ་སྣང་བ་ལ་ཕྱི་རོལ་གྱི་དེ་བཞིན་གཤེགས་པའི་གསུང་དུ་ཞེན་པ་ཡོད་པས། ཞེན་པ་ཕྲ་མོ་ཡོད་པ་དེ་སྲིད་དུ་ཉན་པ་པོ་ལ་མིང་ཚིག་ཇི་ལྟར་སྣང་བ་ལྟར་འཆད་པ་པོ་ལ་ཡང་དེ་དང་
རྗེས་སུ་མཐུན་པར་འབྱུང་བས་སོ། །དེས་ན་སྒྲ་སྤྱིའི་ཕྲེང་བ་ལ་འདོད་ན་བསྟན་བཅོས་དངོས་མེད་དུ་འགྱུར་བས་སྐྱེས་བུས་མ་བྱས་པར་འགྱུར་བས་རིག་བྱེད་པའི་སྨྲ་བ་ཁས་བླང་དགོས་སོ། །ངག་གི་སྒྲ་རང་མཚན་པ་ལ་འདོད་ན་ཡང༌། ངག་ཏུ་མ་ཐོན་ན་བསྟན་བཅོས་མ་བརྩམ་པ་དང༌། བསེ་རུ་ལྟ་བུས་ཀྱང་གདུལ་བྱ་ལ་ཆོས་མ་བསྟན་པར་འགྱུར་རོ། །གཉིས་པ་སྒྲ་བཤད་པ་ནི། ཅིའི་ཕྱིར་བསྟན་བཅོས་ཞེས་བྱ་ཞེ་ན། སློབ་མའི་རྒྱུད་འཆོས་པའི་ཕྱིར་ཏེ། དེ་ཡང་སློབ་མའི་རྒྱུད་ལ་བསླབ་པ་གསུམ་བསྐྱེད་ནས་ལུས་ངག་ཡིད་གསུམ་ཚོགས་པར་དབྱུང་དུ་མི་རུང་བ་ལས་བཟློག་པ་དང༌། དབྱུང་དུ་རུང་བའི་ལས་ལ་འཇུག་པར་བྱེད་པའོ། །དེ་ལྟར་ན་ཕུང་རྣམ་འབྱེད་དང༌། རྣམ་བཤད་རིག་པར་ཡང་བཤད་པ་ལྟར། ངེས་ཚིག་འདི་དག་ཚང་བས་ན་རྒྱལ་བའི་བཀའ་ཡང་བསྟན་བཅོས་སུ་འདོད་པར་བྱའོ། །གསུམ་པ་ཚིག་གི་དོན་ལ་བཞི་ལས། བརྗོད་བྱ་ནི། སྟོན་པ་སངས་རྒྱས་ཀྱིས་ཡུམ་འདི་ལས་བཤད་པའི་རྣམ་མཁྱེན་སངས་རྒྱས་ཁོ་ནའི་ལམ་ཡིན་པ་གང་དང༌། དེས་མཚོན་པའི་ལྷག་མ་བདུན་དང་བཅས་པའོ། །ཉིང་དགོས་ནི། བྱང་སེམས་ལས་གཞན་གྱིས་མྱོང་བ་མ་ཡིན་པའི་རྣམ་མཁྱེན་དེ་བློ་དང་ལྡན་པ་བྱང་སེམས་ཀྱིས་ཡུམ་གྱིས་མདོ་ཡི་དོན་དངོས་བརྒྱད་ཇི་བཞིན་དུ་ངེས་པའི་བདག་ཉིད་བྱང་ཆུབ་ཀྱི་སེམས་དང༌། ཆོས་
སྒྲུབ་པའི་སྤྱོད་པ་ཕར་ཕྱིན་བཅུ་ཤེས་བཞིན་དང་བཅས་པའི་དྲན་པ་ལ་བཞག་ནས་ས་བཅུ་བགྲོད་དེ་མཐོང་བ་སྟེ་མངོན་དུ་བྱེད་པར་འགྱུར་བའོ། །དགོས་པ་ནི། ཉིང་དགོས་ཀྱི་ཕྱིར་དུ་མདོ་ཡི་བརྗོད་བྱ་རྣམས་རྒྱན་ལ་བརྟེན་ནས་བདེ་བླག་ཏུ་སྟེ་ཚེགས་ཆུང་དུས་རྟོགས་པ་ཞེས་བྱ་བ་ནི་རྒྱན་རྩོམ་པའི་དགོས་པ་ཡིན་ནོ། །འབྲེལ་པ་ནི་ཤུགས་ཀྱིས་ཏེ་དེ་ཡང་རྩོམ་པའི་དགོས་པ་ཞེས་པས། དགོས་པ་དང་བསྟན་བཅོས་འབྲེལ་པ་དང༌། ཕྱིར་ཞེས་པས་དགོས་པ་གཉིས་འབྲེལ་པར་འཕངས་སོ། །གཉིས་པ་བརྩམ་བྱ་གཞུང་གི་རང་བཞིན་བཤད་པ་ལ་གསུམ། རྒྱསཔ་ལ་དད་པ་ལ་བརྒྱད། འབྲིང་ལ་དད་པ་ལ་དྲུག །བསྡུས་པ་ལ་དད་པ་ལ་གསུམ་དུ་དབྱེ་བའོ། །དང་པོ་རྒྱས་པ་ལ་དད་པ་ལ་བརྒྱད་དུ་དབྱེ་བ་ལ་གཉིས། ལུས་རྣམ་པར་བཞག་པ་དང༌། ཡན་ལག་རྒྱས་པར་བཤད་པའོ། །དང་པོ་ལུས་རྣམ་པར་བཞག་པ་ལ་གཉིས་ཏེ། སྤྱིའི་དོན་དང༌། ཡན་ལག་གི་དོན་ནོ། །སྤྱིའི་དོན་ལ་བཞི་སྟེ། དགོས་པ། མཚན་ཉིད། དབྱེ་བ། ངེས་ཚིག་གོ། །དང་པོ་དགོས་པ་ནི། འཆད་ཉན་སླ་བའི་ཕྱིར་ཏེ་དེ་ཡང་དཀྱུས་བརྟན་པའི་རྟ་ཚམ་ཚོམ་མེད་པར་རྒྱུག་པ་ལྟར་ཉན་པའི་གདུལ་བྱ་རྣམས་ཀྱིས་རྒྱས་བཤད་ཀྱི་དོན་ཚན་རྣམས་མ་འཛིང་པའི་སྒོ་ནས་བདེ་བླག་ཏུ་རྟོགས་པར་བྱ་བའི་ཕྱིར་དང༌། དཀྱུས་མཐོང་བའི་ཁ་ལོ་
བས་རྟ་ལེགས་པར་ཚར་གཅོད་ནུས་པ་ལྟར། རྒྱས་བཤད་དུ་བསྟན་བཅོས་ཀྱི་དོན་རྣམ་པར་དབྱེ་བར་བྱས་པས་མ་འཛིངས་པའམ་མ་འཁྲུགས་པ་ཉིད་ཀྱིས་འཆད་པ་པོས་བཤད་པར་བྱ་སླ་བར་བྱམས་པས་གཟིགས་ནས་སོ། །གཉིས་པ་ལུས་ཀྱི་མཚན་ཉིད་ནི། །ཡན་ལག་དུ་མ་ཚོགས་པ་སྟེ། ཇི་སྐད་དུ། །ཚོགས་དང་ལུས་དང་འདུས་པ་ནི། རྣམ་གྲངས་དག་སྟེ། ཞེས་པ་ལྟར་རོ། །གསུམ་པ་དབྱེ་བ་ནི། །ཚིགས་སུ་བཅད་པ་བཅོ་ལྔ་ནི་རྗོད་བྱེད་སྒྲའི་ལུས་དང༌། དངོས་བརྒྱད་དམ་དོན་བདུན་ཅུ་ནི་བརྗོད་བྱ་དོན་གྱི་ལུས་སོ། །བཞི་པ་པ་ངེས་ཚིག་ནི། །ངོ་བོ་ཉིད་དུ་གྲུབ་པ་དང༌། བསགས་པ་དང༌། ཡན་ལག་ལ་ཁྱབ་པ་དང༌། དེའི་རྟེན་བྱེད་པས་ལུས་སོ། །གཉིས་པ་ཡན་ལག་གི་དོན་ལ། ལུས་མདོར་བསྟན་པ་དང༌། རྒྱས་པར་བཤད་པ་གཉིས། དང་པོ་མདོར་བསྟན་པ་ལ་ཡང་གཉིས་ཏེ། གྲངས་ཀྱི་སྒོ་ནས་ཡུམ་གྱི་དབྱེ་བ། དབྱེ་བ་མིང་གིས་ཁྱད་པར་དུ་བྱས་པའི་ཚུལ་ལོ། །དང་པོ་གྲངས་ཀྱི་སྒོ་ནས་ཡུམ་གྱི་དབྱེ་བ་ལ་གསུམ། ཚིག་གི་དོན་བཤད། བརྒྱད་ཚན་གསུམ་གྱི་ཁྱད་པར་དཔྱད། ཤེར་ཕྱིན་གྱི་དངོས་བཏགས་བསྟན་པའོ། །དང་པོ་ནི། མཆོད་བརྗོད་དུ་བརྗོད་བྱ་ལ་བསྟོད་ཕྱག་བྱས་པའི་ཤེར་ཕྱིན་དེ་ཇི་ལྟར་བྱས་པས་འཆད་ཅེ་ན། ཤེར་ཕྱིན་དོན་དངོས་པོ་བརྒྱད་དུ་ཕྱི་བའི་ཚུལ་
གྱིས་སོ། །གཉིས་པ་བརྒྱད་ཚན་གསུམ་གྱི་ཁྱད་པར་ནི། དོན་བསྡུས་སྒྲོན་མེར། །མངོན་རྟོགས་ཤེས་རྒྱུད་རིམ་པ་སྟེ། །དངོས་པོ་བརྒྱད་ནི་བརྗོད་བྱ་ལ། །སྐབས་ནི་རྗོད་བྱེད་་གསུངས། །ཞེས་པ་ཤནྟི་པའི་གཞུང་ལ་གསལ་ཁ་མི་སྣང་ཡང༌། དེ་བཞིན་དུ་འདོད་པར་བྱའོ། །གསུམ་པ་ཤེར་ཕྱིན་གྱི་དངོས་བཏགས་དཔྱད་པ་ལ་གཉིས། འདོད་པ་དགོད་པ་དང༌། །དེའི་འཐད་ཕྱོགས་བསྟན་པའོ། །དང་པོ་འདོད་པ་དགོད་པ་ནི། སྤྱིར་འདི་ལ་བཞེད་པ་མི་འདྲ་བ་ལྔ་སྟེ། ཡུམ་གསུམ་གནོད་འཇོམས་ལས་ནི། སངས་རྒྱས་ཀྱི་སའི་མཉམ་གཞག་རྡོར་ཏིང་སྣང་མེད་ནི་ཤེར་ཕྱིན་དངོས་དང༌། རྗེས་ཐོབ་སྣང་བཅས་ཀྱི་ངོ་བོ་རྟོག་བཅས་དང་རྟོག་མེད་ཀྱི་ཡེ་ཤེས་བཞི་ནི་ཤེར་ཕྱིན་བཏགས་པ་བ་དང༌། ཉན་རང་དགྲ་བཅོམ་པའི་ཡེ་ཤེས་རྣམས་ཤེར་ཕྱིན་གྱི་འབྲས་བུ་དང་གཞུང་རྣམས་རྒྱུ་ཡིན་པས་བཏགས་པ་བ་དང༌། མོས་སྤྱོད་དང་ས་བཅུའི་རྟོགས་པ་ཐམས་ཅད་ཀྱང་ཤེར་ཕྱིན་གྱི་མིང་ཙམ་འཇུག་པས་བཏགས་པ་བར་བཞེད། སློབ་དཔོན་ཕྱོགས་གླང་གི་ཞལ་སྔ་ནས་ནི། །ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་ལམ་དག་ལ་དེ་སྒྲ་ཡིན། ཞེས་བཤད་དེ། །འདིའི་དོན་སྔ་རབས་པ་ཕལ་ཆེར། སངས་
རྒྱས་རྣམས་ཀྱི་གཉིས་སུ་མེད་པའི་ཡེ་ཤེས་སྒྱུ་མ་ལྟ་བུ་ནི་དངོས་དང༌། གཞུང་ལམ་གཉིས་བཏགས་པ་པར་འདོད། དག་ལྡན་ལས་ནི། ས་བཅུའི་མཉམ་གཞག་རྣམས་ཤེར་ཕྱིན་མཚན་ཉིད་པ་དང༌། སོ་སྐྱེ་དང་སངས་རྒྱས་ཀྱི་ས་གཉིས་དེའི་རྒྱུ་དང་འབྲས་བུ་ཡིན་པས་བཏགས་པ་བར་བཞེད། དེ་ལྟར་བཞེད་པའི་རྒྱུ་མཚན་ཡང་ཡུམ་མདོ་ལས། རྣམ་གཡེང་གི་རྟོག་པ་བཅུའི་གཉེན་པོ་བྱེད་པ་ཞིག་ཤེར་ཕྱིན་ལ་བརྩོན་པར་གསུངས་པས། མོས་སྤྱོད་ཀྱིས་དེའི་གཉེན་པོ་བྱེད་མི་ནུས་ཤིང༌། སངས་རྒྱས་ལ་ཡང་གཉེན་པོའི་བྱ་བ་དང་བྲལ་བས་བཏགས་པ་བའོ་སྙམ་དུ་དགོངས་སོ། །ཡེ་ཤེས་ཞབས་ཀྱིས་ནི། ཤེས་རབ་ནི་ཆོས་རབ་ཏུ་རྣམ་འབྱེད་དང༌། ཕ་རོལ་ནི། མོས་སྤྱོད་ཀྱི་དུས་ན་བདག་མེད་པར་ཡིད་ཆེས་པ་དང༌། ས་ཐོབ་ལ་རྟོག་པ་ཐམས་ཅད་ཀྱིས་དབེན་པ་ལ་གསུང་ངོ༌། །བི་མ་ལ་མི་ཏྲས་ནི། དོན་དམ་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཆོས་ཀྱི་སྐུ་དང༌། སེམས་བསྐྱེད་པ་ནས་ངེས་འབྱུང་སྒྲུབ་པའི་མཚན་ཉིད་ཀྱི་བར་ནི་རྒྱུ་ཡི་ཤེར་ཕྱིན་དུ་བཞེད་དོ། །གཉིས་པ་དེའི་འཐད་ཕྱོགས་བསྟན་པ་ནི། སློབ་དཔོན་ཕྱོགས་ཀྱི་གླང་པོའི་གསུང་དེ་དགོངས་པ་བཙལ་ན། རྒྱན་སྣང་དང༌། བརྒྱད་སྟོང་དོན་བསྡུས་ཀྱི་འགྲེལ་པ་ལས་བཤད་བ་ལྟར་གཙོ་བོ་དང་ཕལ་བ་ལ་བཞེད་པར་སྣང་ལ། དེ་ལྟ་ན་ཡང༌། གཞུང་
ནས་དོན་མཛད་པ་མེད་པའི་ཕྱིར་རོ། །རྫོགས་སྨིན་སྦྱངས་ན་ནི་ཞི་བའི་དབྱིངས་ལ། རྟག་ཏུ་གནས་ཀྱང་ལྷུན་གྲུབ་ཏུ་གཟུགས་སྐུ་གཉིས་ཀྱིས་གཞན་དོན་མཛད་པའི་ཕྱིར་ཞི་བར་མི་ལྟུང་ངོ༌། །དེས་ནས་བརྒྱད་པ་ལ་དེ་བཞིན་གཤེགས་པ་རྣམས་ཀྱིས་མ་བསྐུལ་ན་མྱ་ངན་ལས་འདའ་བར་གསུངས་པ་ཡང་དེ་ལ་དགོངས་སོ། །ལམ་ཤེས་ལ་དབྱེ་ན་ལམ་ཤེས་གསུམ། གཞི་ཐམས་ཅད་གང་ཟག་གི་བདག་གིས་སྟོང་པར་རྟོགས་པའི་ཏི་ཚེ་བའི་མཁྱེན་པ་གཞི་ཤེས་ཀྱི་མཚན་ཉིད། དབྱེ་ན་ཉན་རང་གི་གཞི་ཤེས་གཉིས། མཁྱེན་གསུམ་གྱི་རྟོགས་པ་ལ་རང་དབང་ཐོབ་པར་བྱ་བའི་ཕྱིར་སྐྱེ་མེད་གསུམ་བསྡུས་ཏེ་སྒོམ་པའི་སེམས་དཔའི་རྣལ་འབྱོར་རྣམ་རྫོགས་སྦྱོར་བའི་མཚན་ཉིད། དབྱེ་ན་སྦྱོར་བ་ཉི་ཤུ། རྣམ་རྫོགས་སྦྱོར་བ་ལ་བརྟེན་ནས་སྐྱེ་མེད་གསུམ་བསྡུས་ཏེ་སྒོམ་པ་ལ་དབང་དུ་གྱུར་པའི་སེམས་དཔའི་རྣལ་འབྱོར་རྩེ་མོའི་སྦྱོར་བའི་མཚན་ཉིད། དབྱེ་ན་བདུན། མཁྱེན་གསུམ་གྱི་ཤེས་རྣམ་ཅིག་ཆར་དུ་སྐྱེ་བའི་རྟོགས་པ་བརྟན་པོར་བྱ་བའི་ཕྱིར་མཁྱེན་གསུམ་གྱི་རྣམ་པ་རྣམས་རིམ་གྱིས་སྒོམ་པའི་སེམས་དཔའི་རྣལ་འབྱོར་མཐར་གྱིས་པའི་མཚན་ཉིད། དབྱེ་ན་བཅུ་གསུམ། མཁྱེན་གསུམ་རིམ་གྱིས་སྒོམ་པ་མཐར་ཐུག་པའི་སེམས་དཔའི་རྣལ་འབྱོར་སྐད་ཅིག་མའི་མཚན་ཉིད། ལྡོག་པས་
དབྱེ་ན་བཞི། སྦྱོར་བ་བསྒོམ་པའི་འབྲས་བུ་མཐར་ཐུག་ཟག་མེད་ཀྱི་ཡན་ལག་དུ་མ་དང་ལྡན་པ་ཆོས་སྐུའི་མཚན་ཉིད། དབྱེ་ན་སྐུ་བཞིའོ། །གཉིས་པ་གྲངས་ངེས་པ་ནི། གང་ཟག་གཅིག་འཚང་རྒྱ་བ་ལ་ཤེས་པར་བྱ་བའི་ཡུལ་དང༌། ཉམས་སུ་ལེན་པའི་ལམ་དང༌། ཐོབ་པར་བྱ་བའི་འབྲས་བུ་གསུམ་དུ་གྲངས་ངེས་པས་དང་པོ་ལ་མཁྱེན་གསུམ། གཉིས་པ་ལ་སྦྱོར་བཞི། གསུམ་པ་ལ་ཆོས་སྐུར་ངེས། ཤེས་བྱ་མཁྱེན་གསུམ་དུ་ངེས་པ་ཡང༌། ཚོང་པ་ཚོང་གི་ཁེ་ཐོས་ན་དེའི་ཐབས་ལ་འཇུག་པ་ལྟར། དང་པོ་འབྲས་བུ་ལ་བྲོད་པ་སྐྱེད་པའི་དོན་དུ་རང་གཞན་གྱི་དོན་གཉིས་དང་ལྡན་པའི་རྣམ་མཁྱེན་བསྟན། དེ་ཤེས་ན་དེའི་ཐབས་ལ་འཇུག་པས་དེའི་ཐབས་ལ་ལམ་ཤེས་དང༌། དེའི་གོལ་ས་ཤེས་པ་ཡང་གཞི་ཤེས་ལ་རག་ལས་པས་དེ་ནས་གཞི་ཤེས་བསྟན་ཏོ། །ཉམས་ལེན་སྦྱོར་བ་བཞིར་ངེས་པ་ནི། མཁྱེན་གསུམ་གཏན་ལ་ཕབ་པ་ཙམ་གྱིས་མི་ཆོག་པས་དེ་ཉམས་སུ་ལེན་དགོས་ལ། དེ་ལ་ཡང་ལམ་གྱི་རྟོགས་པ་རང་རྒྱུད་ལ་མ་སྐྱེས་པ་སྐྱེད་པར་བྱེད་པ་དང༌། སྐྱེས་ཟིན་ཁྱད་པར་དུ་བྱེད་པ་གཉིས་སུ་ཡོད་པས་བཞིར་གྲངས་ངེས་ཏེ། རྣམ་ཀུན་ནི་མ་ཐོབ་པ་ཐོབ་བྱེད་དང༌། རྩེ་མོ་ནི་ཐོབ་པའི་སྐབས་དང༌། མཐར་ཕྱིན་པ་ནི་ཐོབ་ཟིན་ཁྱད་པར་དུ་སྐྱེད་བྱེད་དང༌། སྐད་ཅིག་མ་ནི་དེ་གྲུབ་པའི་སྐབས་ཙམ་ཡིན་པས་
སྟོང་ཕྲག་བརྒྱ་པ་ལྟ་བུ་ནི། སྔར་བཤད་པ་ལྟར་གདུལ་བྱའི་རྒྱུད་ཀྱི་རྣམ་རིག་མིང་ཚིག་ཏུ་སྣང་བ་ཙམ་ཡིན་པས་ཤེར་ཕྱིན་མཚན་ཉིད་པ་མིན་ནོ། །དེས་ན་ལམ་ནི་ཕལ་པ་ཡིན་ཀྱང་མཚན་ཉིད་པར་མི་འགལ་ཏེ་མི་ཕལ་པ་བཞིན་ནོ། །འོ་ན་ལམ་ཇི་ལྟ་བུ་ཞིག་ལ་འདོད་ཅེ་ན། འདི་ལ་བཞི། མཚན་གཞི། མཚན་ཉིད། ས་མཚམས། ངེས་ཚིག་གོ། །དང་པོ་ནི། ཐེག་ཆེན་འཕགས་ལམ་གསུམ་གྱིས་ཆོས་ཐམས་ཅད་རང་བཞིན་མེད་པར་རྟོགས་པའི་ཆ་རྣམས་མཚན་གཞི། གཉིས་པ་ནི། ཆོས་ཐམས་ཅད་སྤྲོས་བྲལ་མངོན་སུམ་དུ་རྟོགས་པའི་མཁྱེན་པ་གང་མི་གནས་པའི་མྱང་འདས་སུ་ཕྱིན་པའམ་ཕྱིན་བྱེད་དོ། །གསུམ་པ་ས་མཚམས་ནི། མཚན་ཉིད་པ་ཐེག་ཆེན་འཕགས་ལམ་གསུམ་ན་ཡོད་ལ་བཏགས་པ་བ་ཚོགས་སྦྱོར་ནས་ཡོད་དོ། །བཞི་པ་ངེས་ཚིག་ནི། ཤེས་པ་ཐམས་ཅད་ཀྱི་རབ་ཡིན་པས་ན་ཤེས་རབ་སྟེ་དོན་དམ་པ་ལ་དམིགས་པའི་ཕྱིར་དང༌། ཤེས་རབ་ཐམས་ཅད་ཀྱི་དམ་པ་ཡིན་པས་ན་ཕ་རོལ་དུ་ཕྱིན་པ་སྟེ་མི་གནས་པའི་མྱང་འདས་སུ་ཕྱིན་པའམ་ཕྱིན་བྱེད་ཡིན་པའི་ཕྱིར་རོ། །གཉིས་པ་དབྱེ་བ་མིང་གིས་ཁྱད་པར་དུ་བྱས་པའི་ཚུལ་ལ་ལྔ། དངོས་བརྒྱད་ཀྱི་མཚན་ཉིད། གྲངས་ངེས་པ། གོ་རིམ་ངེས་པ། ས་མཚམས། ཟློས་པ་སྤོང་པའོ། །
དང་པོ་ནི། ཇི་ལྟ་ཇི་སྙེད་ཀྱི་རྣམ་པ་མ་ལུས་པ་སྐད་ཅིག་མ་གཅིག་ལ་མངོན་སུམ་མཁྱེན་པ་རྣམ་མཁྱེན་གྱི་མཚན་ཉིད། དབྱེ་ན་ཇི་ལྟ་ཇི་སྙེད་ཀྱི་རྣམ་མཁྱེན་གཉིས། ལམ་གསུམ་རང་བཞིན་མེད་པར་རྟོགས་ཤིང་རྫོགས་སྨིན་སྦྱངས་ནས་ཡང་དག་མཐའ་མངོན་དུ་བྱེད་པའི་སློབ་ལམ་ལམ་ཤེས་ཀྱི་མཚན་ཉིད། འདིའི་སྐབས་སུ་རྫོགས་པ་ནི་སྨོན་ལམ་རྫོགས་པ་དང༌། སྨིན་པ་ནི་གདུལ་བྱའི་རྒྱུད་སྨིན་པ། སྦྱོང་བ་ནི་སངས་རྒྱས་ཀྱི་ཞིང་སྦྱོང་བ་གསུམ་ཡིན་ལ། ཡང་དག་མཐའ་ནི། དབུས་མཐའ་དང༌། ཀུན་བཏུས་དང༌། ཡུམ་མདོ་དང༌། རྒྱན་སྣང་རྣམས་ལས་དེ་བཞིན་ཉིད་དམ་ཆོས་ཀྱི་དབྱིངས་ཀྱི་མིང་གི་རྣམ་གྲངས་སུ་བཤད་ལ། རྒྱུད་བླ་ལས། ཡང་དག་མཐའ་ནི་འདུས་བྱས་ཀྱི་རྣམ་པ་ཐམས་ཅད་དབེན་པ་སྟེ། ཞེས་འབྱུང་བའི་ཕྱིར་སྤྲོས་པ་དང་མཚན་མ་ཐམས་ཅད་ཀྱིས་སྟོང་པའི་ཞེ་བའི་དབྱིངས་མྱང་འདས་ཙམ་ལ་བྱའོ། །དེ་མངོན་དུ་བྱས་པའི་དོན་ཡང་ཟབ་མོ་བརྒྱད་ཀྱི་གསུམ་པར་བཤད་པ་ལྟར་ཞི་བ་ཕྱོགས་གཅིག་པ་དེ་ཉིད་ལ་ཆེད་ཆེར་བྱས་ནས་རྟག་ཏུ་དེ་ལ་མཉམ་པར་གཞག་ནས་གནས་པ་ཡིན་གྱི་དེ་མངོན་དུ་བྱས་པ་ཙམ་ལ་ནི་མ་ཡིན་ནོ། །སློབ་ལམ་དུ་དེ་ལྟར་ཞུགས་ན་ཆད་པའི་མཐར་ལྷུང་སྟེ་ཚོགས་ཡོངས་སུ་མ་རྫོགས་པར་རང་ཉིད་ཞི་བའི་དབྱིངས་སུ་རྟག་ཏུ་གནས་པ་ན། །རྗེས་ཐོབ་ལ་གཟུགས་སྐུ་སྣང་
སོ། །འོ་ན་རྒྱུ་འབྲས་སྐོར་གཅིག་གིས་ཆོག་མོད། གཉིས་ཀྱིས་ཅི་བྱ་ཞེ་ན། དབང་དུ་བྱེད་པ་རྒྱུ་འབྲས་མེད་ན་འབད་མེད་ལྷུན་གྲུབ་ཀྱི་ཆོས་སྐུ་མི་འཐོབ་ལ། བརྟན་པ་རྒྱུ་འབྲས་མེད་ན་ཆོས་གཅིག་མངོན་དུ་བྱས་པ་ན་ཆོས་ཐམས་ཅད་མངོན་དུ་བྱེད་པའི་རྣམ་མཁྱེན་མི་ཐོབ་པས་གཉིས་ཀ་དགོས་སོ། །མཐར་གྱིས་པས་མཁྱེན་གསུམ་རིམ་གྱིས་སྒོམ་པའི་དོན་ནི། སྦྱིན་པ་ལྟ་བུ་གཅིག་ཀྱང་ཚུལ་ཁྲིམས་ལ་སོགས་པའི་དཀར་ཆོས་གཞན་དང་རིམ་པ་ལྟར་སྦྲེལ་ནས་ཉམས་སུ་ལེན་པའོ། །སྐད་ཅིག་མ་ནི། དེ་ལྟར་ཡིད་ལ་བྱེད་པ་རིང་དུ་འདྲིས་པས་ཟག་མེད་གཅིག་མངོན་དུ་བྱས་པ་ན། ཐམས་ཅད་མངོན་དུ་བྱེད་ནུས་པ་སྟེ་མཐར་ཐུག་པའི་སྐབས་སོ། །རྣམ་ཀུན་ནི། གཙོ་བོར་མཉམ་གཞག་ནི་སྙིང་པོའི་དོན་ལ་གོམ་པར་བྱས་ནས་མངོན་རྟོགས་སྐྱེད་བྱེད་ཡིན་ལ། མཐར་གྱིས་པ་ནི་གཙོ་བོར་རྗེས་ཐོབ་ན་སྐྱེས་པ་དང་མ་སྐྱེས་པའི་མངོན་རྟོགས་ཡིད་ལ་བྱེད་པའི་སྒོམ་ཡིན་ནོ། །དེ་ལྟར་ཐོས་བསམ་གྱིས་གཏན་ལ་ཕབ་ནས་སྦྱོར་བས་ཉམས་སུ་བླངས་པའི་འབྲས་བུ་ནི་ཆོས་སྐུ་གཅིག་པུར་ཟད་པས་གྲངས་ངེས་སོ། །གསུམ་པ་གོ་རིམ་ངེས་པ་ནི། མཁྱེན་གསུམ་ནི་དེ་ལྟར་བཤད་ན་ཉན་པ་པོས་རྟོགས་སླ་བས་བཤད་པའི་གོ་རིམ་ཡིན་ལ། སྦྱོར་བཞི་ནི་རྒྱུ་འབྲས་དོན་གྱི་གོ་རིམ་ཡིན་ནོ། །བཞི་པ་ས་མཚམས་
ནི། མཁྱེན་གསུམ་ནི་རྟེན་ངེས་པ་ཅན་ཡིན་པས། སངས་རྒྱས་བྱང་སེམས་ཉན་རང་རྣམས་ལ་སོ་སོར་ཡོད། དེ་ཡང་གཞི་ཤེས་ལམ་ཤེས་གཉིས་ནི་ཚོགས་ལམ་ནས་མི་སློབ་པའི་བར་ན་ཡོད་དོ། །རྣམ་ཀུན་ཚོགས་ལམ་ཆུང་ངུ་ནས་ས་བཅུ་རྒྱུན་མཐའི་བར་ན་ཡོད། རྩེ་མོ་དྲོད་ནས་རྒྱུན་མཐའི་བར་ན་ཡོད། རིམ་གྱིས་པ་ཚོགས་ལམ་ནས་རྒྱུན་མཐའི་བར་ན་ཡོད། དེ་ཡང་ཐོས་བསམ་གྱིས་ཡུལ་དུ་བྱས་པའི་མངོན་རྟོགས་རིམ་གྱིས་ཡིད་ལ་བྱེད་པའི་རིམ་གྱིས་པ་ནི་ཚོགས་ལམ་ནས་གཙོ་ཆེ་བར་ཡོད་ལ། བསྒོམས་བྱུང་གིས་ཉམས་སུ་མྱོང་བའི་མངོན་རྟོགས་ཡིད་ལ་བྱེད་པའི་མཐར་གྱིས་པ་ནི་དྲོད་ནས་ཡིན་ནོ། །སྐད་ཅིག་མ་ནི་ས་བཅུའི་ཐ་མ་ན་ཡོད། ཆོས་སྐུ་ནི་སངས་རྒྱས་ཀྱི་ས་ཁོ་ན་ན་ཡོད་དོ། །ལྔ་པ་ཟློས་སྤོང་ལ་བཞི་སྟེ། དང་པོ་མཁྱེན་གསུམ་དང་རྣམ་ཀུན་ཏུ་བཤད་པའི་མཁྱེམ་གསུམ་གྱི་སྦྱོར་བ་ཟློས་སོ་ཞེ་ན། ད་ནི་རྒྱུ་མཚན་གསུམ་གྱིས་མི་ཟློས་ཏེ། མཁྱེན་གསུམ་ནི་རྣམ་པ་སོ་སོར་ངེས་པ་དང༌། རྣམ་ཀུན་གྱི་རྣམ་པ་མ་ལུས་པའི་ཡུལ་ཅན་ཡིན་པའི་ཕྱིར་དང༌། མཁྱེན་གསུམ་ནི་མཚོན་བྱེད་དང་མཚོན་བྱའི་སྒོ་ནས་ཤེས་བྱར་བསྟན་པས་མཚན་ཉིད་པ་དང༌། རྣམ་ཀུན་ནི་ཉམས་ལེན་གྱི་སྒོ་ནས་བསྟན་པས་སྦྱོར་བ་ཡིན་པའི་ཕྱིར་དང༌། མཁྱེན་གསུམ་དུ་བཤད་པ་ནི་ཐོས་བསམ་གྱི་ཡུལ་དུ་བསྟན་པ་ཡིན་ལ། རྣམ་ཀུན་ཏུ་བཤད་པ་ནི་དྲི་མ་སྤོང་
པའི་གཉེན་པོའི་ཕྱིར་སྐྱེད་པ་ཡིན་པས་མི་ཟློས་སོ། །གཉིས་པ་ལམ་ཤེས་དང༌། རྣམ་མཁྱེན་ཟློས་པར་འགྱུར་ཏེ། སའི་ཚོགས་ལ་སོགས་པར་མཐོང་སྒོམ་གཉིས་བཤད་པ་དེ་ཉིད་ལམ་ཤེས་སུ་ཡང་བཤད་པའི་ཕྱིར་ཞེ་ན། རྣམ་མཁྱེན་དུ་བཤད་པ་ནི། རྒྱུ་དང་འབྲས་བུའི་ཆོས་མ་ལུས་པ་མཁྱེན་པ་གཅིག་རྣམ་མཁྱེན་ཡིན་ནོ། །ཞེས་དེ་མཚོན་པའི་དོན་དུ་ཡིན་ལ། ལམ་ཤེས་སུ་བཤད་པ་ནི། རྒྱལ་སྲས་རྣམས་ཀྱི་ལམ་ཤེས་ནི་རྣམ་མཁྱེན་དུ་བཤད་པ་ཉིད་མ་ཡིན་ནོ་སྙམས་པའི་དོགས་པ་བསལ་བ་དང༌། ལམ་གསུམ་ཤེས་པའི་ལམ་ཤེས་ཡུལ་གྱིས་མཚོན་ནས་བསྟན་པའི་ཕྱིར་མི་ཟློས་སོ། །གསུམ་པ་ནི། ལམ་ཤེས་དང་གཞི་ཤེས་ཟློས་ཏེ། སྐབས་གཉིས་པར་ཉན་རང་གི་ལམ་ཡང་བསྟན་པའི་ཕྱིར་ཞེ་ན། སྐབས་གཉིས་པར་བཤད་པ་ནི་ཡུལ་ཅན་ལམ་ཤེས་མཚོན་པའི་དོན་དུ་ཡིན་ལ། གསུམ་པར་བཤད་པ་ནི། མི་རྟག་པ་ལ་སོགས་པའི་སྒྲོ་འདོགས་དང་བྲལ་བ་གཉེན་པོ་གཞི་ཤེས་སུ་བསྟན་པས། དེས་འཕང་བའི་ཟློག་ཕྱོགས་རྣམས་ཉན་རང་གི་ལམ་ཡིན་པར་བསྟན་པ་དང༌། དེའི་ལམ་ལོགས་སུ་རང་དབང་དུ་བསྟན་པའི་ཕྱིར་མི་ཟློས་སོ། །བཞི་པ་ནི་རྣམ་མཁྱེན་དང་ཆོས་སྐུ་ཟློས་ཏེ། གཉིས་ཀར་གཉིས་ཀ་བསྟན་པའི་ཕྱིར་ཞེ་ན། མི་ཟློས་ཏེ། དང་པོར་ནི་ཡུལ་དང་བརྒྱད་པར་ནི་འབྲས་
བུའི་སྒོ་ནས་བཤད་པའི་ཕྱིར་དང༌། ཡང་མཚོན་བྱེད་དང་ངོ་བོའི་སྒོ་ནས་བསྟན་པ་ཡིན་པས་སོ། །གཉིས་པ་ལུས་རྒྱས་པར་བཤད་པ་ལ་བརྒྱད། དང་པོ་རྣམ་མཁྱེན་རྒྱས་པར་བཤད་པ་ལ། རྒྱུས་འབྲས་བུའམ། ཡུལ་གྱིས་ཡུལ་ཅན་ནམ། ཤེས་བྱ་གཙོ་བོའི་སྒོ་ནས་མཚོན་པར་བྱེད་པའི་མཚོན་བྱེད་ཀྱི་ཆོས་བཅུ་སྟེ། དང་པོ་སེམས་བསྐྱེད་ཀྱི་མཚན་ཉིད་དང་ས་མཚམས་འོག་ཏུ་འཆད། ཐེག་ཆེན་སེམས་བསྐྱེད་ཀྱི་དོན་དུ་གཉེར་བྱ་ཐོབ་པའི་ཐབས་མ་ནོར་བར་འདོམས་པའི་རྗོད་བྱེད་གདམས་ངག་གི་མཚན་ཉིད། ས་མཚམས་འོག་ཏུ་འཆད། ཐེག་ཆེན་ཚོགས་ལམ་གྱི་རྗེས་སུ་སྐྱེས་པའི་མངོན་རྟོགས་གང་མོས་སྤྱོད་ཀྱི་སས་བསྡུས་པ་ཐེག་ཆེན་ངེས་འབྱེད་ཡན་ལག་གི་མཚན་ཉིད། དབྱིངས་གང་འདིར་སྨོས་སྒྲུབ་པའི་རྟེན་གཞི་བྱེད་པ་རིགས་ཀྱི་མཚན་ཉིད། སྒྲུབ་པོའི་ཤེས་བྱར་གྱུར་ པ་དམིགས་པའི་མཚན་ཉིད། གང་གི་དབང་དུ་བྱས 
་ནས་བྱར་སེམས་སྒྲུབ་པ་ལ་འཇུག་པར་འགྱུར་བའི་འབྲས་བུ་མཐར་ཐུག་ཆེད་དུ་བྱ་བའི་མཚན་ཉིད། ཐེག་ཆེན་སེམས་བསྐྱེད་ལ་བརྟེན་ནས་བླ་མེད་བྱང་ཆུབ་ཀྱི་ཆེད་དུ་དོན་གཉིས་སྒྲུབ་པའི་བྱ་བ་སྒྲུབ་པ་སྤྱིའི་མཚན་ཉིད་དེ། དེ་ཀུན་ལ་སྦྱར་ནས། དེ་གང་ཞིག །ཕར་ཕྱིན་རེ་རེའི་ནང་དུ་དྲུག་དྲུག་ཚང་བར་བསྡུས་ནས་ཉམས་སུ་ལེན་པ་གོ་སྒྲུབ་ཀྱི་མཚན་ཉིད། སྒོམ་བྱུང་གཙོ་བོར་གྱུར་པའི་སྒོ་ནས་ཐེག་ཆེན་ལ་འཇུག་པའི་བྱ་བ་
འཇུག་སྒྲུབ་ཀྱི་མཚན་ཉིད། བྱང་ཆུབ་ཆེན་པོར་དངོས་སུ་འབྱིན་པ་ཚོགས་སྒྲུབ་ཀྱི་མཚན་ཉིད། འབྱུང་ས་མཐར་ཐུག་ཏུ་གདོན་མི་ཟ་བར་འབྱིན་བྱེད་ངེས་འབྱུང་སྒྲུབ་པའི་མཚན་ཉིད་དོ། །དེ་དག་གི་དབྱེ་བ་དང་ས་མཚམས་ནི། ངེས་འབྱེད་བཞི་སྦྱོར་ལམ་དུ་ཡོད། རིགས་ལ་རྟེན་ཆོས་ཀྱི་དབྱེ་ན་བཅུ་གསུམ་དྲོད་ནས་རྒྱུན་མཐའི་བར། དམིགས་པ་བཅུ་གཅིག་ལ་ས་མཚམས་མེད། ཆེད་དུ་བྱ་བ་གསུམ་སངས་རྒྱས་ཀྱི་ས་ན། གོ་སྒྲུབ་དྲུག་ཚོགས་ལམ་ནས་རྒྱུན་མཐའི་བར། འཇུག་སྒྲུབ་དགུ་དྲོད་ནས་རྒྱུན་མཐའི་བར། ཚོགས་སྒྲུབ་བཅུ་བདུན་ལས་བཅོ་ལྔ་སྦྱོར་ལམ་ཆོས་མཆོག་དང༌། ས་དང་གཉེན་པོའི་ཚོགས་གཉིས་མཐོང་ལམ་དང་སྒོམ་ལམ་དུ། ངེས་སྒྲུབ་བརྒྱད་ས་བཅུ་པའི་ཁྱད་པར་ལམ་ན་ཡོད་དོ། །གཉིས་པ་ལམ་ཤེས་ཀྱི་ལུས་རྒྱས་པར་བཤད་པ་ལ། ལམ་ཤེས་མཚོན་པའི་ཆོས་བཅུ་གཅིག་སྟེ། ལམ་ཤེས་སྐྱེ་རུང་གི་རྟེན་ང་རྒྱལ་བཅོམ་པ། སྐྱེ་བའི་ཡུལ་ངེས་པ་དང་མ་ངེས། རང་བཞིན་འཁོར་བ་མི་འདོར་བ། བྱེད་ལས་གཞན་འཁོར་དུ་སྡུད་པ་སོགས་ཏེ་ལམ་ཤེས་ཀྱི་ཡན་ལག་བཞི། གང་ཟག་གི་བདག་མེད་ཙམ་རྟོགས་པའི་ཉི་ཚེ་བའི་མཁྱེན་པ་སློབ་མ་ཉན་ཐོས་ཀྱི་ལམ་གྱི་མཚན་ཉིད། དབྱེ་ན་འཕགས་ལམ་དང་སྦྱོར་ལམ་གཉིས། བདག་མེད་ཕྱེད་དང་གཉིས་རྟོགས་པའི་
ཉི་ཚེ་བའི་མཁྱེན་པ་བསེ་རུ་རང་རྒྱལ་ལམ་གྱི་མཚན་ཉིད་དབྱེ་བ་སྔར་དང་འདྲ། ཟག་མེད་བསྒོམ་ལམ་མ་སྐྱེས་གོང་གི་བདག་མེད་གཉིས་རྟོགས་པའི་འཇིག་རྟེན་ལས་འདས་པའི་ཡེ་ཤེས་ཐེག་ཆེན་མཐོང་ལམ་གྱི་མཚན་ཉིད། དབྱེ་ན་དྲུག །སྒོམ་ལམ་གྱི་འབྲས་བུར་གྱུར་པའི་ཕན་ཡོན་སྒོམ་ལམ་བྱེད་པའི་མཚན་ཉིད། དབྱེ་ན་བཅུ་དྲུག །བྲག་བཅས་སྒོམ་ལམ་གང་ཡུམ་ཡོན་ཏན་ཅན་ཡིན་པ་ལ་དེ་ལྟར་ངེས་པའི་ཚུལ་གྱིས་འཛིན་པ་མོས་པ་སྒོམ་ལམ་གྱི་མཚན་ཉིད། དབྱེ་ན་ཉེར་བདུན། མོས་པ་གསུམ་སྒོམ་པའི་བྱང་སེམས་ལ་སངས་རྒྱས་བྱང་སེམས་གོང་མ་རྣམས་ཐུགས་དགྱེས་པའི་ཆ་དང་དེའི་དོན་གནས་ཀྱི་ཡོན་ཏན་བརྗོད་པའི་ཆ་གང་རུང་བསྟོད་བཀུར་བསྔགས་གསུམ་གྱི་མཚན་ཉིད། དབྱེ་ན་ཉེར་བདུན། ཟག་བཅས་སྒོམ་ལམ་གང་གཞན་དོན་དུ་དགེ་བ་རྫོགས་པའི་བྱང་ཆུབ་ཀྱི་ཡན་ལག་ཏུ་བྱེད་པ་བསྔོ་བ་སྒོམ་ལམ་གྱི་མཚན་ཉིད། དབྱེ་ན་བཅུ་གཉིས། ཟག་བཅས་སྒོམ་ལམ་གང་རང་གཞན་གྱི་དགེ་བ་ལ་མངོན་པར་དགའ་བ་ཡི་རང་སྒོམ་ལམ་གྱི་མཚན་ཉིད། དབྱེ་ན་ཀུན་རྫོབ་དང་དོན་དམ་ཡུལ་ཅན་གྱི་ཡི་རང་གཉིས། ཟག་མེད་སྒོམ་ལམ་གང་རྟོགས་པ་མཐར་ཐུག་གི་རྒྱུར་གྱུར་པ་སྒྲུབ་པ་སྒོམ་ལམ་གྱི་མཚན་ཉིད། དབྱེ་ན་ལྔ། ཐེག་ཆེན་ཟག་མེད་སྒོམ་ལམ་གང་སྤང་བ་མཐར་ཐུག་གི་རྒྱུར་གྱུར་བ་རྣམ་དག་སྒོམ་ལམ་གྱི་མཚན་ཉིད།
དབྱེ་ན་སྒོམ་སྤང་དགུའི་གཉེན་པོ་དགུའོ། །གསུམ་པ་གཞི་ཤེས་ཀྱི་ལུས་རྒྱས་པར་བཤད་པ་ལ་གཞི་ཤེས་མཚོན་པའི་ཆོས་དགུ་སྟེ། རང་བཞིན་མེད་རྟོགས་ཀྱི་ཤེས་རབ་ཀྱིས་སྲིད་པའི་རྒུད་པ་བཟློག་པའི་མཁྱེན་པ་ཤེས་པས་སྲིད་ལ་མི་གནས་པའི་གཞི་ཤེས་ཀྱི་མཚན་ཉིད། སེམས་བསྐྱེད་ཁྱད་ཅན་གྱི་སྟོབས་ཀྱིས་ཞི་བའི་རྒུད་པ་བཟློག་པའི་མཁྱེན་པ་སྙིང་རྗེས་ཞི་ལ་མི་གནས་པའི་གཞི་ཤེས་ཀྱི་མཚན་ཉིད། ཤེས་བྱ་ལམ་འབྲས་གསུམ་ལ་མཚན་མར་འཛིན་པས་བཅིངས་ཤིང་དེའི་གཉེན་པོ་བྱེད་མི་ནུས་པའི་གཞི་ཤེས་ཐབས་མ་ཡིན་པས་རིང་བའི་གཞི་ཤེས་ཀྱི་མཚན་ཉིད། ཐབས་ཤེས་ཁྱད་ཅན་དང་ལྡན་པའི་མཁྱེན་པ་ཐབས་ཀྱིས་རིང་བ་མ་ཡིན་པའི་གཞི་ཤེས་ཀྱི་མཚན་ཉིད། གཞིའི་གནས་ལུགས་ལ་ཕྱིན་ཅི་ལོག་ཏུ་ཞུགས་པའི་འཛིན་པས་བཅིང་བས་བྱང་སེམས་ཀྱི་སྤང་བྱར་གནས་པའི་གཞི་ཤེས་མི་མཐུན་ཕྱོགས་ཀྱི་མཚན་ཉིད། གཞི་རང་བཞིན་མེད་པར་རྟོགས་པས་དེ་ལ་མཚན་མར་འཛིན་པའི་གཉེན་པོ་བྱེད་ནུས་པའི་མཁྱེན་པ་གཉེན་པོ་གཞི་ཤེས་ཀྱི་མཚན་ཉིད། གཞི་གཟུགས་སོགས་ལ་ཞེན་པ་བཀག་ནས་སྒོམ་པའི་ལམ་གང་ཉན་རང་གི་སྦྱོར་བ་ཤུགས་ལ་འཕེན་བྱེད་གཞི་ཤེས་སྦྱོར་བའི་མཚན་ཉིད། དབྱེ་ན་བཅུ། གཞི་ཤེས་ཀྱི་སྦྱོར་བ་སྒོམ་པའི་རྣམ་པ་གང་ཡུལ་དང་ཡུལ་ཅན་དུ་རློམ་པ་
ལ་འགོག་བྱེད་སྦྱོར་བ་དེའི་མཉམ་ཉིད་ཀྱི་མཚན་ཉིད། དབྱེ་ན་བཞི་བཅུ། སྒྲོ་འདོགས་སོ་གཉིས་དང་བྲལ་བའི་བདེན་པ་གསར་མཐོང་གང་ཐེག་དམན་གྱི་མཐོང་ལམ་ཤུགས་ལ་འཕེན་བྱེད་མཐོང་ལམ་གྱི་མཚན་ཉིད་དོ། །བཞི་པ་རྣམ་ཀུན་མཚོན་པར་བྱེད་པའི་ཆོས་བཅུ་གཅིག་སྟེ། ཡུལ་ལམ་མཁྱེན་པའི་ཁྱད་པར་གང་སྦྱོར་བའི་བསྒོམ་བྱར་གྱུར་པ་རྣམ་པའི་མཚན་ཉིད། དབྱེ་ན་བརྒྱ་དང་དོན་གསུམ། དབང་དུ་བྱ་བའི་ཕྱིར་མཁྱེན་གསུམ་བསྡུས་ཏེ་སྒོམ་པའི་སེམས་དཔའི་རྣལ་འབྱོར་སྦྱོར་བའི་མཚན་ཉིད། དབྱེ་ན་ཉི་ཤུ། སྦྱོར་བ་བསྒོམས་པས་གནས་སྐབས་དང་མཐར་ཐུག་ཏུ་ཐོབ་བྱ་ཡོན་ཏན་གྱི་མཚན་ཉིད། དབྱེ་ན་བཅུ་བཞི། སྦྱོར་བ་སྐྱེས་པ་དང་ཁྱེད་པར་དུ་འགྲོ་བ་ལ་བར་དུ་གཅོད་པའི་བདུད་ལས་སྐྱོན་གྱི་མཚན་ཉིད། དབྱེ་ན་ཞེ་དྲུག །སྦྱོར་བའི་ངོ་བོ་འམ་ནུས་པ་མཚོན་བྱེད་ཀྱི་མཁྱེན་པ་མཚན་ཉིད་ཀྱི་མཚན་ཉིད། དབྱེ་ན་གོ་གཅིག །བྲལ་བའི་ཁྱད་པར་ལ་ཕན་འདོགས་བྱེད་གང་རྣམ་བྱང་དབང་པོའི་ངོ་འོར་མ་གྱུར་པའི་གནས་སྐབས་ཀྱི་ལམ་ཐར་པ་ཆ་མཐུན་གྱི་མཚན་ཉིད། བྱེ་བྲག་ཏུ་ཐེག་ཆེན་གྱི་ནི། བླ་མེད་བྱང་ཆུབ་ཏུ་བགྲོད་པའི་གོ་སྐབས་ཕྱེ་ཤུལ་ཞེས་སྦྱར། སེམས་ཅན་ལ་དམིགས་པའི་རྣམ་པ་ཁྱད་པར་བ་དང་ལྡན་ཞིང་བསྒོམས་བྱུང་གཙོ་བོར་གྱུར་པའི་མོས་སྤྱོད་ཀྱི་ཡེ་ཤེས་ངེས་འབྱེད་ཆ་མཐུན་གྱི་མཚན་ཉིད། སྲིད་
ཞི་གང་དུ་ཡང་མི་ལྷུང་བར་ངེས་པའི་རྟགས་དང་ལྡན་པའི་སེམས་དཔའ་ཕྱིར་མི་ལྡོག་པའི་མཚན་ཉིད། དབྱེ་ན་སྦྱོར་མཐོང་སྒོམ་གསུམ་ལ་གནས་པ་གསུམ། འཁོར་འདས་གཉིས་རང་བཞིན་མེད་པར་རྟོགས་ནས་སྒོམ་པའི་སྦྱོར་བ་སྲིད་ཞི་མཉམ་ཉིད་ཀྱི་སྦྱོར་བའི་མཚན་ཉིད། རང་གི་སྣོད་བཅུད་ཀྱི་ཞིང་གཉིས་ཉེས་པ་དང་བྲལ་བར་བྱེད་པའི་སྦྱོར་བ་ཞིང་དག་སྦྱོར་གྱི་མཚན་ཉིད། དབྱེ་ན་སྣོད་བཅུད་ཀྱི་ཞིང་དག་སྦྱོར་གཉིས། ཐབས་མཁས་ཀྱི་ཡུལ་བཅུ་མངོན་དུ་བྱ་བ་ལ་དུས་དང་དུས་མིན་ཤེས་པའི་སྦྱོར་བ་ཐབས་མཁས་སྦྱོར་བའི་མཚན་ཉིད། ལྔ་པ་རྩེ་མོའི་ཆོས་བརྒྱད་དེ། བསྡུས་སྒོམ་རབ་ཏུ་གྱུར་པར་མཚོན་བྱེད་གང་དྲོད་ཀྱིས་བསྡུས་པ་རྟགས་ཀྱི་མཚན་ཉིད། དབྱེ་ན་བཅུ་གཉིས། བསྡུས་སྒོམ་རབ་ཏུ་གྱུར་པ་འཕེལ་བའི་ཆ་གང་སྦྱོར་ལམ་རྩེ་མོས་བསྡུས་པ་རྣམ་འཕེལ་གྱི་མཚན་ཉིད། དབྱེ་ན་བཅུ་དྲུག །མཁྱེན་གསུམ་གྱི་རྟོགས་པ་ཅི་རིགས་པ་དང་སེམས་ཅན་གྱི་དོན་མི་གཏོང་བ་ལ་བརྟན་པ་ཐོབ་པའི་རྩེ་མོ་གང་བཟོད་པས་བསྡུས་པ་ངེས་བརྟན་གྱི་མཚན་ཉིད། དབྱེ་ན་བརྟན་པ་གཉིས། བྱང་སེམས་བཞིའི་སེམས་བསྐྱེད་ལ་ཡི་རང་བའི་དོན་ལ་སེམས་རྩེ་གཅིག་ཏུ་གནས་པའི་རྩེ་མོ་གང་ཆོས་མཆོག་གིས་བསྡུས་པ་སེམས་ཀུན་ཏུ་གནས་པའི་མཚན་ཉིད། བསྡུས་སྒོམ་རབ་གྱུར་གང་མཐོང་སྤང་རྟོགས་པའི་ཐུན་མོང་མ་ཡིན་པའི་གཉེན་པོ་བྱེད་
པ་མཐོང་ལམ་རྩེ་མོའི་མཚན་ཉིད། བསྡུས་སྒོམ་རབ་གྱུར་གང་སྒོམ་སྤང་རྟོག་པའི་ཐུན་མོང་མ་ཡིན་པའི་གཉེན་པོ་བྱེད་པ་སྒོམ་ལམ་རྩེ་མོའི་མཚན་ཉིད། དབྱེ་ན་རྣམ་པ་བཞི་བཞི། བསྡུས་སྒོམ་རབ་གྱུར་གང་རྣམ་མཁྱེན་གྱི་དངོས་རྒྱུར་གྱུར་པ་བར་ཆད་མེད་རྩེའི་མཚན་ཉིད། བདེན་གཉིས་འགལ་བར་འཛིན་པའི་མི་ཤེས་པ་ལོག་སྒྲུབ་ཀྱི་མཚན་ཉིད། དབྱེ་ན་བཅུ་དྲུག་གོ། །དྲུག་པ་མཐར་གྱིས་པའི་ཆོས་བཅུ་གསུམ་སྟེ། མཐར་གྱིས་པ་སྤྱིའི་མཚན་ཉིད་སྦྱར་ནས། སྦྱིན་པ་རིམ་ལྡན་དུ་སྒོམ་པ་སྦྱིན་པའི་མཐར་གྱིས་པའི་མཚན་ཉིད། དེ་བཞིན་དུ་གཞན་ལྔ་ལ་ཡང་འགྲེ། དེ་བཞིན་གཤེགས་པའི་ཡོན་ཏན། དོན་དམ་པར་མི་དམིགས་ཤིང་ཀུན་རྫོབ་ཏུ་ཕྱིན་ཅི་མ་ལོག་པར་རིམ་ལྡན་དུ་དྲན་པ་སངས་རྒྱས་རྗེས་སུ་དྲན་པའི་མཚན་ཉིད། དེ་བཞིན་དུ་དེ་བཞིན་གཤེགས་པའི་ཡོན་ཏན་ཞེས་པའི་གནས་སུ། དགེ་མི་དགེ་ལུང་མ་བསྟན་གྱི་ཆོས་དང༌། སློབ་པ་ཕྱིར་མི་ལྡོག་པའི་ཚོགས་དང༌། སྡོམ་པ་གསུམ་དང༌། ཆོས་དང་ཟང་ཟིང་གི་སྦྱིན་པ་དང༌། ལྷར་སྐྱེས་པའི་འཕགས་པ་ཞེས་སྦྱར་བ། ཆོས་དང༌། དགེ་འདུན་དང༌། ཚུལ་ཁྲིམས་དང༌། གཏོང་བ་དང༌། ལྷ་རྗེས་སུ་དྲན་པའི་མཐར་གྱིས་པ་རྣམས་ཀྱི་མཚན་ཉིད། ཆོས་ཐམས་ཅད་དོན་དམ་པར་ངོ་བོ་ཉིད་མེད་པར་རྟོགས་ནས་རིམ་གྱིས་སྒོམ་པ་
དངོས་མེད་ངོ་བོ་ཉིད་ཀྱི་མཐར་གྱིས་པའི་མཚན་ཉིད་ཡིན་ནོ། །བདུན་པ་སྐད་ཅིག་མ་ལ་ལྡོག་པས་ཕྱེ་ན་རྣམ་པ་བཞི་སྟེ། རྣམ་པར་སྨིན་པ་མིན་པའི་ཆོས་ཐམས་ཅད་དང༌། རྣམ་སྨིན་གྱི་ཆོས་ཐམས་ཅད་དང༌། ཆོས་ཐམས་ཅད་མཚན་ཉིད་མེད་པ་དང༌། ཆོས་ཐམས་ཅད་གཉིས་སུ་མེད་པར་སྐད་ཅིག་མ་གཅིག་ལ་རྟོགས་པ་བཞིའོ། །བརྒྱད་པ་ཆོས་སྐུའི་ཆོས་བཞི་ནི། །དབྱིངས་རང་བཞིན་གྱིས་དག་པ་ལ་གློ་བུར་གྱི་དྲི་མ་མ་ལུས་པས་ཀྱང་དག་པ་ངོ་བོ་ཉིད་སྐུའི་མཚན་ཉིད། གདུལ་བྱའི་ནང་ནས་བྱང་སེམས་འབའ་ཞིག་ལ་སྣང་བའི་གཟུགས་སྐུ་གང་སྤྲུལ་སྐུའི་བདག་རྐྱེན་དུ་གྱུར་པ་ལོངས་སྐུའི་མཚན་ཉིད། ལོངས་སྐུའི་བདག་རྐྱེན་ལས་གྱུར་པའི་སྐུ་གང་དག་པ་དང་མ་དག་པའི་འགྲོ་བ་དུ་མའི་འདུལ་བྱེད་སྤྲུལ་སྐུའི་མཚན་ཉིད། སངས་རྒྱས་ཀྱི་གནས་ཡོངས་སུ་གྱུར་པའི་མཐར་ཐུག་པའི་ཡེ་ཤེས་ཆོས་སྐུའི་མཚན་ཉིད། ཆོས་སྐུའི་བདག་རྐྱེན་བྱས་པ་ལས་བྱུང་བའི་རྣམ་པར་དཀར་བའི་ཡོན་ཏན་མཛད་པའི་མཚན་ཉིད་དེ། །དེ་ཡན་གྱིས་ལུས་རྣམ་པར་བཞག་པ་དེ་སོང་ངོ༌། །གཉིས་པ་ཡན་ལག་རྒྱས་པར་བཤད་པ་ལ་གསུམ། ཤེས་བྱ་མཁྱེན་པ་གསུམ། ཉམས་ལེན་སྦྱོར་བ་བཞི། འབྲས་བུ་ཆོས་སྐུའི་ཡན་ལག་རྒྱས་པར་བཤད་པའོ། །དང་པོ་ཤེས་བྱ་མཁྱེན་པ་གསུམ་བཤད་པ་
ལ་གསུམ། ཐོབ་བྱ་རྣམ་མཁྱེན། ཐོབ་བྱེད་ལམ་ཤེས། སྤང་བྱ་གཞི་ཤེས་ཀྱི་ཡན་ལག་རྒྱས་པར་བཤད་པའོ། །དང་པོ་རྣམ་མཁྱེན་བཤད་པ་ལ་བཞི། ལམ་གྱི་རང་བཞིན་སེམས་བསྐྱེད་པ། སེམས་བསྐྱེད་དག་བྱེད་གདམས་ངག་ནོད་པ། །གདམས་པའི་འབྲས་བུ་ངེས་འབྱེད་ཡན་ལག། གདམ་པའི་དོན་ཕྱིན་ཅི་མ་ལོག་པར་སྒྲུབ་པའོ། །དང་པོ་ལམ་གྱི་རང་བཞིན་སེམས་བསྐྱེད་པ་ལ་གསུམ། སེམས་བསྐྱེད་སྐྱེ་བའི་རྟེན། བརྟེན་པ་སེམས་བསྐྱེད་ཀྱི་རང་བཞིན། རང་བཞིན་དེས་བསྐྱེད་ཀྱི་ཕན་ཡོན་ནོ། །དང་པོ་རྟེན་ལ་ལུས་རྟེན་དང་སེམས་རྟེན་གཉིས། དང་པོ་ལུས་རྟེན་ནི་ལམ་ཤེས་ཀྱི་མདོ་ལས་ལྷའི་བུ་དུ་མས་བྱང་ཆུབ་ཏུ་སེམས་བསྐྱེད་པ་དང༌། ཀླུའི་རྒྱལ་པོ་རྒྱ་མཚོའི་ཞུས་པ་ལས་ཀླུ་ཉི་ཁྲི་ཆིག་སྟོང་གིས་སེམས་བསྐྱེད་པར་བཤད་པ་ལྟར་ཡིན་པས་སོ་ཐར་རྟེན་དང༌། མི་ཁོམས་པ་ཐམས་ཅད་དང་བྲལ་བ་དགོས་པ་མིན་ནོ། །སེམས་རྟེན་ནི། རྒྱལ་བ་ལ་དམིགས་པའི་དད་པ། སེམས་ཅན་ལ་དམིགས་པའི་སྙིང་རྗེ། བྱང་སེམས་ཀྱི་ཕན་ཡོན་ཐོས་པ་དང་གསུམ་ཡིན་ཏེ། དཀོན་མཆོག་སྒྲོན་མེར། །རྒྱལ་དང་རྒྱལ་བའི་ཆོས་ལ་དད་གྱུར་ཅིང༌། །རྒྱལ་སྲས་རྣམས་ཀྱི་སྤྱོད་ལ་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ན། །སྐྱེས་བུ་ཆེན་པོ་རྣམས་ཀྱི་སེམས་སྐྱེའོ། །ཞེས་དང༌། རྒྱན་ལས།
དེ་ཡི་རྩ་བ་སྙིང་རྗེར་འདོད། ཅེས་པ་ལྟར་རོ། །གཉིས་པ་བརྟེན་པ་སེམས་བསྐྱེད་ཀྱི་རང་བཞིན་ལ། མཚན་གཞི། མཚན་ཉིད། རབ་དབྱེའོ། །དང་པོ་མཚན་གཞི་ལ་བཞེད་ཚུལ་ལྔ་སྟེ། སློབ་དཔོན་ཐོགས་མེད་ནི་སྨོན་ལམ་སེམས་བསྐྱེད་ཀྱི་ངོ་བོར་བཞེད་དེ། བྱང་ས་ལས། བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ། །ཞེས་འབྱུང༌། སློབ་དཔོན་དབྱིག་གཉེན་ནི། སེམས་བསྐྱེད་ཀྱི་ངོ་བོ་སེམས་པ་ལ་བཞེད་དེ་རྒྱན་འགྲེལ་ལས་དེ་ལྟར་གསུངས། འོན་ཀྱང་རྒྱན་ལས། །བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། ཞེས་གྲོགས་འདུན་པ་དང་བཅས་པའི་སེམས་པ་སྨོན་ལམ་དུ་གསུངས་པས་སྐུ་མཆེད་དགོངས་པ་གཅིག་ཏུ་འབབ་པའོ། །སློབ་དཔོན་འཕགས་པས་ནི། སེམས་བསྐྱེད་པ་ཞེས་བྱ་བ་ལ། སེམས་ནི་རྣམ་པར་ཤེས་པ་སྟེ་ཞེས་ངོ་བོ་སེམས་ལ་བཞེད་ཅིང་དེ་ཡང༌། སྒོ་ལྔའི་རྣམ་ཤེས་ཁ་ཕྱིར་བལྟས་འབའ་ཞིག་ཡིན་པ་དང༌། ཀུན་གཞི་དང༌། ཉོན་ཡིད་ལུང་མ་བསྟན་ཡིན་པ་ལ་དགོངས་ནས། དེ་དག་ལམ་བཞག་པར་དཀར་ཆོས་ཀུན་གྱི་རྟེན་དུ་རུང་བ་ཡིད་ཀྱི་རྣམ་ཤེས་ལ་མཚན་གཞིར་བཤད་དོ། །དེ་བཞིན་དུ་སློབ་དཔོན་སེང་གེ་བཟང་པོས་ཀྱང༌། མདོ་སྡེ་རྒྱན་ལས་སེམས་བསྐྱེད་ཀྱི་མཚན་ཉིད་་
སྟོན་པ་ན། །སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །དོན་གཉིས་ལྡན་པའི་སེམས་འབྱུང་བ། ཞེས་པའི་རྐང་པ་ཐ་མས་སེམས་སུ་བཤད་པར་འདུག་སྙམ་དུ་དགོངས་ཤིང་དེ་ཡང་སེམས་པ་གྲོགས་སུ་ཡོད་པའི་སེམས་ཤིག་སེམས་བསྐྱེད་དུ་བསྟན་སྙམ་དུ་དགོངས་སོ། །དེ་ལ་སྤྲོ་པ་ཆེ་བ་ནི་གོ་ཆའི་བརྩོན་འགྲུས་ཀྱིས་ཡུན་རིང་པོར་དཀའ་བ་སྤྱོད་པ་ལ་མི་སྐྱོ་བའོ། །རྩོམ་པ་ཆེ་བ་ནི་སྦྱོར་བའི་བརྩོན་འགྲུས་ཀྱིས་གོ་ཆ་ཇི་བཞིན་དུ་སྒྲུབ་པའོ། །དོན་ཆེ་བ་ནི་བདག་གཞན་ལ་ཕན་པའི་ཆེད་དོ། །འབྱུང་བ་ཆེ་བ་ནི་བྱང་ཆུབ་ཆེན་པོ་འགྲུབ་པའོ། །དེ་ཡང་ཚིག་དང་པོ་གཉིས་ཀྱིས་སྐྱེས་བུ་བྱེད་པ་དང༌། དེའི་འོག་མ་གཉིས་ཀྱིས་དོན་བྱེད་པ་དང༌། འབྲས་བུ་ཡོངས་སུ་འཛིན་པའི་ཡོན་ཏན་བསྟན་ཏོ། །དོན་གཉིས་ནི་བྱང་ཆུབ་དང་གཞན་དོན་ལ་དམིགས་པའོ། །སློབ་དཔོན་བུདྡྷ་ཤྲཱི་ནི་དོན་གཉེར་གྱི་འདུན་པ་ཉིད་སེམས་བསྐྱེད་དུ་འདོད་ཅིང་སེམས་དང་སེམས་བྱུང་རྫས་གཅིག་ཏུ་འདོད་དོ། །སློབ་དཔོན་་པ་ནི་ཡིད་དང་འདུན་པ་གཉིས་ཆར་ལ་འདོད་དེ་དག་ལྡན་ལས། སེམས་བསྐྱེད་པའི་དངོས་པོ་ཞེས་བྱ་བ་ལ་སེམས་ནི་ཡིད་དང་འདོད་པ་སྟེ། ཞེས་སོ། །གཉིས་པ་མཚན་ཉིད་ནི། གཞན་དོན་དུ་རྫོགས་པའི་བྱང་ཆུབ་འདོད་པ་དང་མཚུངས་ལྡན་དུ་འབྱུང་བའི་སེམས་སོ། །གསུམ་པ་རབ་དབྱེ་ལ་བཞི་སྟེ། ངོ་བོ། སྐྱེ་ཚུལ། ས་
མཚམས། བཞེད་ཚུལ་གྱི་སྒོ་ནས་དབྱེ་བའོ། །དང་པོ་ངོ་བོའི་སྒོ་ནས་དབྱེ་ན་སྨོན་པ་དང༌། འཇུག་པའི་བྱང་ཆུབ་ཀྱི་སེམས་གཉིས། འདི་ལ་གཉིས། ལུགས་གཞན་དགོང་པ་དང༌། འཐད་ཕྱོགས་བསྟན་པའོ། །དང་པོ་ལ་བཞེད་ཚུལ་མི་འདྲ་བ་བཞི་སྟེ། ཡེ་ཤེས་ཞབས་ནི། སྨོན་པ་བྱང་ཆུབ་ཀྱི་སེམས་ནི་འཇིག་རྟེན་པ་ཐམས་ཅད་ཀྱི་ཡིན་ལ། འཇུག་པ་བྱང་ཆུབ་ཀྱི་སེམས་ནི་རབ་ཏུ་དགའ་བ་ནས་བརྩམས་ཏེའོ། །ཞེས་ས་ཐོབ་མ་ཐོབ་ལ་འདོད་ཅིང༌། ཚིག་གསལ་ལས་ཆོ་གས་བླངས་མ་བླངས་ལ་བཤད་ཅིང༌། གཞན་ཡང་ཕྱིར་མི་ལྡོག་ཐོབ་མ་ཐོབ་དང༌། འབྲས་བུ་དང་རྒྱུ་ལ་དམ་བཅའ་བ་ལ་འདོད་པ་རྣམས་སོ། །གཉིས་པ་འཐད་ཕྱོགས་བསྟན་པ་ནི། བསླབ་བཏུས་སུ། བྱང་ཆུབ་ཀྱི་སེམས་དེ་ནི་རྣམ་པ་གཉིས་ཏེ་བྱང་ཆུབ་ཏུ་སྨོན་པའི་སེམས་དང༌། བྱང་ཆུབ་ཏུ་འཇུག་པའི་སེམས་སོ། །སྡོང་པོ་བཀོད་པའི་མདོ་ལས་གསུངས་པ། རིགས་ཀྱི་བུ་སེམས་ཅན་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྨོན་པ་དེ་དག་ཀྱང་དཀོན་ནོ། །དེ་བས་ཀྱང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཆས་པའི་སེམས་ཅན་ཤིན་ཏུ་དཀོན་ནོ། །ཞེས་འབྱུང་བ་ལྟ་བུའོ། །ཞེས་དང༌། སྤྱོད་འཇུག་ལས། །བྱང་ཆུབ་སེམས་དེ་མདོར་བསྡུ་ན། །རྣམ་
པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་བཞིན་ཤེས་པར་བྱ། ཞེས་གསུངས་པ་རྣམས་དགོངས་པ་གཅིག་པས་དེ་ལྟར་དུ་བཤད་དོ། །དེ་ཡང་ཤེར་འབྱུང་གིས་ལུང་འདི་དྲངས་ནས་གཞན་དོན་དུ་ཡང་དག་པར་རྫོགས་པའི་བྱང་ཆུབ་འདོད་པ་ཉིད་ལས་མི་འདའ་ཡང༌། ལུས་དང་ངག་དང་ཡིད་ཀྱི་ལས་ཡོད་པ་དང་མེད་པ་ལས་མཚན་ཉིད་ཐ་དད་པར་རྟོགས་པར་བྱ་ཞེས་པ་ལྟར་ཡིན་པས། དང་པོར་སེམས་ཅན་ལ་དམིགས་པའི་སྙིང་རྗེ་ཆེན་པོ་སྐྱེ་ལ། དེ་ལ་བརྟེན་ནས་འདི་མཐའ་དག་སྲིད་པ་ལས་བསྒྲལ་བའི་ཕྱིར་དུ་སངས་རྒྱས་ཐོབ་པར་བྱའོ་སྙམ་པའི་བསམ་པ་རྐྱང་པ་སྐྱེས་པ་སྨོན་པ་དང༌། དེ་ནས་སྡོམ་པ་བཟུང་བ་ལ་སོགས་པས་བླ་ན་མེད་པའི་བྱང་ཆུབ་ཀྱི་སྤྱོད་པ་ཕྱིན་དྲུག་སྣ་གཅིག་ལ་ཞུགས་ན་ཡང་འཇུག་པའི་གོ་ཆོད་དོ། །དེས་ན་སྨོན་འཇུག་གཉིས་ངོ་བོ་གཞན་དོན་དུ་སངས་རྒྱས་ཐོབ་པར་བྱའོ་སྙམ་པའི་བསམ་པ་ཅན་དུ་མཚུངས་ཀྱང་བྱང་ཆུབ་སྒྲུབ་པའི་བྱ་བས་ཟིན་མ་ཟིན་ཡོད་པས་འདི་གཉིས་འགལ་ཏེ། དཔེར་ན་ཡུལ་དེར་འགྲོ་འདོད་པའི་བློ་སྐྱེས་པ་ཙམ་དང༌། དེའི་རྗེས་སུ་ལམ་དུ་ཞུགས་ནས་འགྲོ་བའི་བྱ་བས་ཟིན་པ་ལྟ་བུའོ། །དེའི་ཕྱིར་སྨོན་པ་
ནི་དང་པོའི་སེམས་ཁོ་ནའོ། །དེ་ལྟར་ཡང་བསྒོམ་རིམ་དང་པོ་ལས། འགྲོ་བ་དེ་དག་ལ་ཕན་པའི་ཕྱིར་སངས་རྒྱས་སུ་གྱུར་ཅིག་ཅེས་གང་ཐོག་མར་དོན་དུ་གཉེར་བ་དེ་ནི་སྨོན་པའི་སེམས་སོ། །གང་ཕན་ཆད་སྡོམ་པ་བཟུང་བ་སྟེ་ཆོ་ག་རྣམས་ལ་ཞུགས་པ་དེ་ནི་འཇུག་སེམས་སོ། །ཞེས་གསུངས་སོ། །གཉིས་པ་སྐྱེ་ཚུལ་གྱི་དབྱེ་བ་ནི། །བརྡའ་ལས་བྱུང་བ་དང༌། སྒོམ་སྟོབས་ཀྱིས་སྐྱེས་པ་གཉིས་སོ། །དང་པོ་ནི། རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་སོ། དེ་ལ་གཞན་གྱིས་བསྟན་ཅིང་གཞན་གྱི་ངག་གི་རིག་བྱེད་ལས་སེམས་བསྐྱེད་པ་གང་ཡིན་པ་དེ་ནི་བླང་བ་བརྡའ་ལས་བྱུང་བའི་སེམས་བསྐྱེད་ཡིན་ལ། དེ་སྐྱེ་བ་ལ་ཡང་རྣམ་པ་མང་སྟེ། གྲོགས་སྟོབས་ལས་སྐྱེ་བ་ནི་དགེ་བའི་བཤེས་གཉེན་ལས་སོ། །རྒྱུ་སྟོབས་ལས་ནི་རིགས་ཀྱི་མཐུ་དང༌། དགེ་རྩའི་སྟོབས་ལས་ཏེ་རིགས་རྒྱས་པ་ལས་དང༌། མང་དུ་ཐོས་པའི་སྟོབས་དང༌། དགེ་བ་གོམས་པའི་སྟོབས་ལས་ཏེ་ཚེ་འདི་ལ་རྟག་ཏུ་ཉན་འཛིན་འཆད་པ་ལ་སོགས་པ་ལས་སྐྱེ་བ་ཡང་ཡོད་དོ། །དེ་ཡང་དང་པོ་མི་བརྟན་ལ་ལྷག་མ་བཞི་བརྟན་པའོ། །གཉིས་
པ་ནི། རྒྱན་ལས། །རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཆོས་དང་སེམས་ཅན་རྣམས་དང་ནི། །དེ་ཡི་བྱ་བ་སངས་རྒྱས་ཉིད། །མཆོག་ལ་སེམས་མཉམ་རྙེད་པའི་ཕྱིར། །དེ་ཡིས་རབ་དགའ་ཁྱད་པར་འཕགས། །ཞེས་སོ། །དེ་ལ་ཚིགས་བཅད་དང་པོའི་རྐང་བ་དང་པོས་ལུང་དམ་པ་མནོས་པ་དང༌། གཉིས་པས་རྒྱུ་དམ་པ་བསྒྲུབ་པ་དང༌། གསུམ་པས་ཁོང་དུ་ཆུད་པ་དམ་པ་རྟོགས་པའི་ཁྱད་པར་བསྟན་ཏེ། ཁྱད་པར་དེ་གསུམ་གྱིས་སེམས་བསྐྱེད་པ་དོན་དམ་པ་ཉིད་དུ་སྟོན་ཏོ། །དེ་ཡང་ས་རབ་ཏུ་དགའ་བ་ཐོབ་པས་དེའི་རབ་དགའ་ཁྱད་པར་དུ་འཕགས་པའི་རྒྱུ་སྟོན་ཏེ། དེ་ལ་ཆོས་དང༌། སེམས་ཅན་དང༌། སངས་རྒྱས་དང་སེམས་ཅན་གྱི་བྱ་བ་ལ་སེམས་མཉམ་པ་རྣམས་ནི་རིམ་པ་ལྟར་ཆོས་བདག་མེད་པ་དང༌། བདག་གཞན་མཉམ་པ་ཉིད་དང༌། སངས་རྒྱས་དང་རང་གི་ཆོས་དབྱིངས་དབྱེར་མེད་པར་རྟོགས་པ་དང༌། བདག་གི་སྡུག་བསྔལ་དང་འདྲ་བར་གཞན་གྱི་སྡུག་བསྔལ་ཡང་ཟད་པར་འདོད་པའི་ཕྱིར་རོ། །གསུམ་པ་ས་མཚམས་ཀྱི་དབྱེ་བ་ནི། མོས་སྤྱོད་ཀྱི་ས་ལ་མོས་པས་བྱུང་བ་དང༌། ས་དང་པོ་བདུན་ལ་ལྷག་བསམ་དག་པ་དང༌། ས་བརྒྱད་པ་སོགས་
གསུམ་ལ་རྣམ་པར་སྨིན་པ་དང༌། སངས་རྒྱས་ཀྱི་ས་ལ་སྒྲིབ་པ་སྤངས་པའི་སེམས་བསྐྱེད་དོ། །ཁ་ཅིག་སངས་རྒྱས་ལ་སེམས་བསྐྱེད་མེད་དེ། ཡོད་ན་སྤྲིན་ལྟ་བུ་ཡོད་དགོས་པ་ལ་དེ་མེད་དེ། རྒྱན་ལས། །རྒྱལ་སྲས་རྣམས་ཀྱི་སེམས་བསྐྱེད་པ། །སྤྲིན་དང་འདྲ་བར་བཤད་པ་ཡིན། །ཞེས་བཤད་པས་ཤེ་ན་ཉེས་པ་མེད་དེ། རྒྱལ་སྲས་ལ་ཡོད་པས་སངས་རྒྱས་ལ་ཡོད་པ་མི་ཁེག་ལ། རྒྱལ་སྲས་རྣམས་ཀྱིས་ཐོབ་པར་བྱ་བའི་སེམས་བསྐྱེད་ཅེས་ཀྱང་དགོངས་པ་བརྟགས་ནུས་ཏེ། དེ་ལྟ་མིན་ན་སྔར་གྱི་ས་མཚམས་དང་འགལ་ཞིང་དོན་དམ་སེམས་བསྐྱེད་ཀྱང་མེད་པར་ཧ་ཅང་ཐལ་ལོ། །འོ་ན་སངས་རྒྱས་ལ་འདོད་པ་ཡོད་པར་འགྱུར་ལ། དེ་ལྟ་ན་དེ་རྟོག་པ་ཡིན་པས་མི་རིགས་ཤེ་ན། དེ་ལ་ཡང་ཉེས་པ་མེད་དེ། ཟླ་འོད་ལས། སངས་རྒྱས་ལ་དོན་དུ་གཉེར་བྱེད་ཀྱི་སེམས་རྟོག་བཅས་མེད་ཀྱང༌། དོན་དུ་གཉེར་བྱའི་སེམས་རྟོག་མེད་ཡོད་པ་དང་ཡང་ན་འདུན་པ་སློབ་ལམ་དུ་རྟོགས་པ་ཡིན་ཀྱང་སངས་རྒྱས་ཀྱི་སར་རྟོག་མེད་ཡིན་ནོ་ཞེས་བཤད་པ་གཉིས་གང་ལྟར་ཡང་ཁས་བླང་རུང་བས་མི་འགལ་ལོ། །བཞི་པ་བཞེད་ཚུལ་གྱི་དབྱེ་བ་ནི། སེམས་ཅན་ཐམས་ཅད་སངས་རྒྱས་ལ་བཀོད་ནས་རང་ཉིད་སངས་རྒྱ་བར་འདོད་པ་ཕྱུགས་རྫི་ལྟ་བུ་དང༌། བདག་གཞན་ཐམས་ཅད་དུས་མཉམ་དུ་
སངས་རྒྱ་བར་འདོད་པ་མཉན་པ་ལྟ་བུ་དང༌། རང་ཉིད་སངས་རྒྱས་ནས་གཞན་གྲོལ་བར་འདོད་པ་རྒྱལ་པོ་ལྟ་བུའི་སེམས་བསྐྱེད་དང་གསུམ་མོ། །གསུམ་པ་ཕན་ཡོན་ནི། སྤྱོད་འཇུག་ལས། །བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང༌། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། ཞེས་དང༌། སེམས་འགྲེལ་ལས། །བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་ཐོབ་ཅིང༌། །འཁོར་བར་གཞན་དོན་སྒྲུབ་པ་ཡི། །ཐབས་གཞན་ཡོད་པ་མ་ཡིན་ནོ། །ཞེས་བཤད་པས་གནས་སྐབས་དང་མཐར་ཐུག་གི་འབྲས་བུ་དང་མདོར་ན་དཔལ་བྱིན་གྱིས་ཞུས་པར། །བྱང་ཆུབ་སེམས་ཀྱི་བསོད་ནམས་གང༌། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། ཞེས་གསུངས་པ་རྣམས་སོ། །གཉིས་པ་སེམས་བསྐྱེད་དག་བྱེད་གདམས་ངག་ནོད་པ་ལ་ལྔ། ནོད་པའི་རྟེན། རྒྱུ་གང་ལས་ནོད་པ། ཡུལ་གང་ལ་ནོད་པ། ནོད་བྱའི་ངོ་བོ། ས་མཚམས་སོ། །དང་པོ་ནི་སྤྱིར་གདམས་ངག་ཉན་པ་ཙམ་ཞིག་ཉན་རང་ལ་ཡང་ཡོད་ལ། བྱེ་བྲག་ཐེག་པ་ཆེན་པོའི་གདམས་ངག་ལ་
ཡང་ཕལ་པ་དང་ཁྱད་པར་ཅན་གཉིས་ལས་འདིར་བསྟན་པ་ནི་ཕྱི་མ་སྟེ། དེ་ཡང་སངས་རྒྱས་དངོས་ལས་ཉན་ན་ཚོགས་ལམ་ཆེན་པོ་སོན་པ་ཞིག་དགོས་སྟེ། རྒྱན་ལས། །བསམ་གཏན་ལས་ཐོབ་མངོན་པར་ཤེས། །མངོན་པར་བསྒྲུབས་པའི་སྒོ་ནས་ཏེ། །སངས་རྒྱས་དཔག་ཏུ་མེད་པ་ལ། །མཆོད་པའི་ཕྱིར་དང་མཉན་པའི་ཕྱིར། །འཇིག་རྟེན་ཁམས་ནི་རྣམས་སུ་འགྲོ། །ཞེས་སོ། །གཉིས་པ་རྒྱུ་གང་ལས་ནོད་པ་ནི། རྒྱན་ལས། །དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལས་ཞི་གནས་དང༌། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེན་རྙེད་པར་འགྱུར། ཞེས་པ་ལྟར་ཆོས་རྒྱུན་ཏིང་ངེ་འཛིན་ལ་བརྟེན་ནས་སོ། །འདི་ལ་གསུམ་ལས། དང་པོ་མཚན་ཉིད་ནི། གང་ལ་མཉམ་པར་བཞག་ན་རྒྱལ་བ་རྣམས་ལས་གསུང་རབ་ཀྱི་ཚིག་དོན་བགྲངས་པ་ལས་འདས་པ་འཛིན་པར་ནུས་པའི་དྲན་ཤེས་དང་ཏིང་ངེ་འཛིན་མཚུངས་ལྡན་ནོ། །གཉིས་པ་སྒྲ་བཤད་པ་ནི། ཆོས་གསུང་རབ་ཀྱི་ཚིག་དོན་རྒྱུན་ནམ་བར་མ་ཆད་དུ་འཛིན་པར་ནུས་པའོ། །གསུམ་པ་ས་མཚམས་ནི། ཁྱད་པར་ཅན་ཆོས་མཆོག་ན་ཡོད་ལ་སྤྱིར་ཚོགས་ལམ་ཆེན་པོ་ན་ཡོད་དོ། །གསུམ་པ་ཡུལ་གང་ལས་ནོད་པ་ནི། ཁ་ཅིག་སངས་རྒྱས་ཁོ་ན་ཞེས་
འདོད་པ་ཡོད་ཀྱང༌། ཕྱོགས་བཅུ་ན་བཞུགས་པའི་སངས་རྒྱས་ལ་སོགས་པ་ཞེས་པ་ལྟར། སངས་རྒྱས་དང་ཐེག་ཆེན་གདམས་ངག་སྟོན་ནུས་ཀྱི་དགེ་བཤེས་ཀྱིས་ཀྱང་ཆོག་སྟེ། ཡུམ་གྱི་མདོ་ལྟ་བུའི་གདམས་པ་ལྟར་སྒྲུབ་པ་ཐེག་ཆེན་གྱི་གདམས་ངག་ལ་ཡང་སྟོན་པ་པོ་ཉན་ཐོས་ཀྱང་དུ་མ་ཡོད་པའི་ཕྱིར་རོ། །བཞི་པ་ནོད་བྱའི་ངོ་བོ་ནི། །ཁ་ཅིག་སངས་རྒྱས་ཀྱིས་དངོས་སུ་འདོམས་པའི་ངག་ཅེས་པ་མི་འཐད་དེ། གདམས་ངག་ཁྱད་ཅན་ལ་ཡང་སྟོན་པ་པོ་སངས་རྒྱས་སུ་མ་ངེས་པ་སྔར་བསྟན་ལ། སྤྱིར་བཀའ་ཡིན་པར་ཡང་མ་ངེས་ཏེ། མངོན་རྟོགས་རྒྱན་ལྟ་བུ་ལ་ཡང་གདམས་ངག་ཁྱད་ཅན་གྱི་དོན་ལེགས་པར་ཚང་བའི་ཕྱིར་རོ། །དེའི་ཕྱིར་ཐེག་ཆེན་གྱི་རིགས་ཅན་འཚང་རྒྱ་བའི་ལམ་ཆ་ཚང་སྟོན་པའི་མདོ་དང་བསྟན་བཅོས་ཐམས་ཅད་གདམས་ངག་ཁྱད་ཅན་ཡིན་ནོ། །འདི་ལ་ཁ་ཅིག་འདོམས་པའི་ངག་དང་གདམས་པ་ལྟར་སྒྲུབ་པ་གཉིས་ཀ་ཡང་གདམས་ངག་ཏུ་འདོད་པ་ཡོད་ཀྱང་གདམས་ངག་ནི་རྗོད་བྱེད་མཚན་ཉིད་པ་ཡིན་ལ་བསྟན་པ་ལྟར་སྒྲུབ་པ་ནི་གདམས་ངག་གི་འབྲས་བུ་ཡིན་ནོ། །ལྔ་པ་ས་མཚམས་ནི། ལས་དང་པོ་པའི་ས་ནས་སངས་རྒྱས་ཀྱི་སའི་བར་དུ་ཡོད་པར་ཤེར་འབྱུང་གིས་བཤད་ལ། ཚིག་གསལ་ལས་བར་ཆད་མེད་ལམ་ལ་དེ་དོན་དུ་གཉེར་བ་མེད་དེ། །རང་བྱུང་གི་ཡེ་ཤེས་སྐྱེད་ནུས་པའི་ཕྱིར་རོ། །ཞེས་བཤད་ཀྱང༌། གདམས་ངག་ངེས་པར་ཉན་དགོས་པའི་
དབང་དུ་བྱས་ན་ཕྱི་མ་ལྟར་དང༌། སྟོན་པ་པོའི་ས་མཚམས་འཛིན་ན་སྔ་མ་ལྟར་རོ། །དེ་ལྟ་བུའི་གདམས་ངག་གི་དོན་དེ་ལ་ཡང༌། གདམས་ངག་དངོས་བསྟན་པ་དང༌། རྟོགས་དཀའ་བ་བྱེ་བྲག་ཏུ་བཤད་པ་གཉིས། གདམས་ངག་དངོས་ལ་བཞི། སྒྲུབ་པ་རང་གི་ངོ་བོ། དམིགས་ཡུལ་བདེན་པ་བཞི། རྟེན་དཀོན་མཆོག་གསུམ། སྒྲུབ་པ་ཕུན་ཚོགས་ཀྱི་རྒྱུ་ལ་གདམས་པའོ། །དང་པོ་སྒྲུབ་པ་རང་གི་ངོ་བོ་ནི། །སྦྱོར་བ་ཕྱིན་དྲུག་གིས་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ། རྟོགས་བྱ་ཆོས་སྐུ་ཐོབ་པར་བྱེད་པའི་ཕྱིར་སེམས་བསྐྱེད་ཀྱི་སྐབས་སུ་མདོ་ལས་བཤད་པའི་དཀར་ཆོས་རྣམས་སྒྲུབ་པའི་ཐབས་ཡིན་པས་ཉན་ཐོས་དང་རང་རྒྱལ་རྣམས་དང་ཐུན་མོང་མ་ཡིན་པ། དེ་དག་ལས་ཁྱད་པར་དུ་འཕགས་པ་ཡིན་ཏེ། མདོ་ལས། ཤཱ་རིའི་བུ་གལ་ཏེ་འཛམ་བུའི་གླིང་འདི་དགེ་སློང་ཤཱ་རིའི་བུ་དང་མོའུ་འགལ་གྱི་བུ་ལྟ་བུ་ཤ་སྟགས་གིས་འདི་ལྟ་སྟེ་དཔེར་ན། འདམ་བུའམ། འོད་མ་འམ། བུར་ཤིང་ངམ། སྨྱིག་མའི་ཚལ་ལམ། འབྲས་ཀྱི་ཞིང་ངམ། ཏིལ་གྱི་ཞིང་ལྟར་ཡོངས་སུ་གང་བར་གྱུར་ཀྱང༌། དེ་དག་གི་ཤེས་རབ་དེས་ནི་བྱང་ཆེན་ཡུམ་ལ་སྤྱོད་པའི་ཤེས་རབ་ཉིན་གཅིག་བསྒོམས་པའི་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང༌། བརྒྱ་སྟོང་ནས་བྱེ་བ་བརྒྱ་སྟོང་གི་ཆ་
དང༌། གྲངས་སུ་དང་ཆར་ཡང་བགྲང་བར་ཡང༌། རྒྱུར་ཡང༌། དཔེར་ཡང་ཉེ་བར་མི་འགྲོའོ། །ཤཱ་རིའི་བུ་དེ་ལྟར་ཡུམ་ལ་སྤྱོད་པའི་བྱང་ཆེན་གྱིས་ཤེས་རབ་ཉིན་གཅིག་བསྒོམས་པ་གང་ཡིན་པ་དེས་ནི་ཉན་རང་ཐམས་ཅད་ཀྱི་ཤེས་རབ་ཟིལ་གྱིས་གནོན་པར་བྱེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ། འདི་ལྟར་བྱང་ཆེན་གྱི་ཤེས་རབ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བའི་དོན་དུ་ཉེ་བར་གནས་པ་ཡིན་ཏེ་ཉན་ཐོས་དང་རང་སངས་རྒྱས་ཐམས་ཅད་ཀྱི་ཤེས་རབ་ནི་དེ་ལྟ་མ་ཡིན་ནོ། །ཞེས་སོ། །གཉིས་པ་དམིགས་ཡུལ་བདེན་པ་བཞི་བཤད་པ་ལ་ལྔ། སྒྲ་བཤད། རང་བཞིན། གཅིག་ཐ་དད། གྲངས་ངེས་པ། གོ་རིམ་ངེས་པའོ། །དང་པོ་བདེན་པའི་སྒྲ་དོན་ནི། བསྡུ་བ་ལས། བདེན་པའི་དོན་གང་ཞེ་ན་སྨྲས་པ། བསྟན་པ་དང་མི་མཐུན་པ་མེད་པའི་མཚན་ཉིད་ཀྱི་དོན་དང༌། དེ་མཐོང་ན་རྣམ་པར་དག་པའི་རྒྱུར་འགྱུར་བའི་དོན་ནི་བདེན་པའི་དོན་ནོ། །ཞེས་སོ། །དེ་ལ་དང་པོའི་དོན་ནི། དེ་བཞིན་གཤེགས་པས་མི་རྟག་སོགས་སུ་ཇི་ལྟར་དུ་བསྟན་པ་དེ་ལྟར་དུ་གནས་པས་བདེན་པ་ཞེས་པ་སྟེ་ཡུལ་དང༌། ཕྱི་མ་ནི་ཇི་ལྟར་གནས་པ་དེ་ལྟར་མཐོང་ན། བློ་ཕྱིན་ཅི་མ་ལོག་པ་བསྐྱེད་པ་ཞེས་པ་སྟེ་ཡུལ་ཅན་གྱི་སྟེང་ནས་ཡིན་ཏེ་འདི་ནི་བདེན་པ་ཙམ་གྱི་སྒྲ་དོན་ནོ། །འཕགས་པའི་བདེན་པ་
ཞེས་པའི་དོན་ནི། །འཕགས་པ་རྣམས་ཀྱིས་བདེན་པ་རྣམས་ཇི་ལྟར་བདེན་པ་དེ་ལྟར་གཟིགས་པས་བློ་དང་དོན་གཉིས་ཀས་བདེན་པའི་ཕྱིར་འཕགས་པའི་ཡིན་ལ། བྱིས་པ་རྣམས་ལ་དོན་ལ་བདེན་ཀྱང་བློ་ངོར་དེ་ལྟར་མ་རྟོགས་པས་དེའི་བདེན་པར་མ་བཞག་གོ། །དོན་དེ་ཡང་མཛོད་འགྲེལ་ལས། འཕགས་པས་བདེ་བར་གང་གསུངས་པ། །དེ་ནི་གཞན་གྱི་སྡུག་བསྔལ་རིག །གཞན་གྱིས་བདེ་བར་གང་འཛིན་པ། །དེ་ནི་འཕགས་པས་སྡུག་བསྔལ་རིག །ཅེས་སོ། །གཉིས་པ་རང་བཞིན་ལ་མཚན་གཞི་དང༌། མཚན་ཉིད་དོ། །དང་པོ་མཚན་གཞི་ནི། །མ་དག་པའི་སྣོད་བཅུད་ཀྱི་འཇིག་རྟེན་གཉིས་ནི་སྡུག་བདེན་དང༌། ཟག་བཅས་ཀྱི་ལས་ཉོན་ཐམས་ཅད་ཀུན་འབྱུང་གི་མཚན་གཞི། འགོག་བདེན་གྱི་མཚན་གཞི་ནི། ཀུན་བཏུས་ལས་དུ་མ་ཞིག་བཤད་ཀྱང་བསྡུ་ན་བརྡའ་དང་དོན་དམ་པའི་འགོག་པ་གཉིས་སོ། །དེ་གཉིས་ཀྱི་དོན་ཡང་བརྡས་ཅི་ལྟ་བུ་ཞེ་ན། །འཇིག་རྟེན་པའི་ལམ་གྱིས་ས་བོན་ཉམས་སྨད་པས་འགོག་པ་གང་ཡིན་པ་སྟེ་ཞེས་དང༌། དོན་དམ་པས་ཅི་ལྟ་བུ་ཞེ་ན། འཕགས་པའི་ཤེས་རབ་ཀྱིས་ས་བོན་ཀུན་ཏུ་བཅོམ་པའི་འགོག་པ་གང་ཡིན་པའོ། །ཞེས་གསུངས་པས་སོ་སྐྱེ་ལ་སྤངས་པ་ཙམ་ཡོད་ཀྱང་འགོག་བདེན་བཏགས་པ་བ་ལས་མེད་དེ་ས་
བོན་དྲུང་མ་ཕྱུང་བས་སོ། །ཁ་ཅིག་འགོག་བདེན་ལ་དེ་བཞིན་ཉིད་ཀྱིས་ཁྱབ་པར་འདོད་ཅིང༌། གཞན་དག་བཟློག་སྟེ་འདོད་པ་ནི་གཉིས་ཀས་ཀྱང་ཞིབ་ཏུ་མ་བརྟགས་པ་སྟེ། ཀུན་བཏུས་ལས། མཚན་ཉིད་ཀྱི་ཅི་ལྟ་བུ་ཞེ་ན། དེ་བཞིན་ཉིད་དང་ལམ་དང་ཉོན་མོངས་པ་མི་འབྱུང་བ་སྟེ་གང་དུ་འགོག་པ་དང༌། གང་གིས་འགོག་པ་དང༌། གང་འགོག་པ་ཞེས་དེ་བཞིན་ཉིད་དགག་གཞི། སྤང་བྱ་ལམ་གྱིས་བཅོམ་པའི་ཆ་གང་འགོག་པའི་རང་བཞིན་ཡིན་པར་བཤད་པ་དང༌། ཡང་དེ་ཉིད་ལས་རྣམ་གྲངས་འདིས་ནི་དེ་བཞིན་ཉིད་ལ་དམིགས་པ་གང་དུ་ཟག་པ་དང་བཅས་པའི་དངོས་པོ་འགགས་པ་དེ་འགོག་པའི་མཚན་ཉིད་དོ། །ཞེས་སྤང་བྱ་ལམ་གྱིས་བཀག་ཆ་ལ་ཡང་འགོག་བདེན་དུ་བཤད་པས་མེད་དགག་སོ་སོར་བརྟགས་འགོག་གི་རང་བཞིན་ཡང་དེར་འདོད་དགོས་པ་ཡིན་ཏེ། དཔེར་ན་བུམ་པས་དབེན་པའི་ས་ཕྱོགས་དང་དེའི་སྟེང་གི་བུམ་པ་བཀག་ཆ་གཉིས་ཀ་བུམ་མེད་ཡིན་པ་ལྟར། འཕགས་རྒྱུད་ཀྱི་དེ་བཞིན་ཉིད་དང༌། དེའི་སྟེང་དུ་ལམ་གྱིས་སྤང་བྱ་བཀག་ཆ་གཉིས་ཀའང་འགོག་བདེན་ཡིན་པས། འགོག་བདེན་ལ་དེ་བཞིན་ཉིད་ཀྱིས་མ་ཁྱབ་ཅིང༌། འགོག་བདེན་མཚན་ཉིད་པ་ཡིན་ན་འདས་ལམ་གྱིས་སྤང་བྱའི་ས་བོན་དྲུང་ཕྱུང་བ་དགོས་ཀྱིས་འཇིག་རྟེན་པའི་ལམ་གྱིས་སྤང་བྱའི་ས་བོན་ཉམས་སྨད་པ་ཡང་འགོག་བདེན་བཏགས་པ་བར་གསུངས་པའི་ཕྱིར་དེ་བཞིན་ཉིད་ལ་འགོག་བདེན་གྱིས་མ་ཁྱབ་བོ། །གཞན་ཡང་རྒྱུད་བླ་ལས་གསུངས་པ་ལྟར་སེམས་ཀྱི་རང་བཞིན་དྲི་བྲལ་དུ་གནས་གྱུར་པའང་འགོག་བདེན་དུ་
འདོད་དགོས་སོ། །ལམ་བདེན་ནི། ཀུན་བཏུས་ལས། ལམ་གང་གིས་སྡུག་བསྔལ་ཡོངས་སུ་ཤེས་པ་དང༌། ཀུན་འབྱུང་བ་སྤོང་བ་དང༌། འགོག་པ་མངོན་དུ་བྱེད་པ་དང་ལམ་སྒོམ་པ་སྟེ་འདི་ནི་ལམ་གྱི་མཚན་ཉིད་མདོར་བསྡུས་པའོ། །ཡང་ལམ་ལྔ་སྟེ། ཚོགས་ཀྱི་ལམ་དང༌། སྦྱོར་བའི་ལམ་དང༌། མཐོང་བའི་ལམ་དང༌། སྒོམ་པའི་ལམ་དང༌། མཐར་ཕྱིན་པའི་ལམ་མོ་ཞེས་པའི་རྗེས་སུ་འབྲངས་ནས་ལམ་ལྔ་ཀ་ལ་ལམ་བདེན་དུ་འདོད་ལ། ཁ་ཅིག་ཚོགས་སྦྱོར་ནི་ལམ་བདེན་གྱི་འཁོར་ཙམ་ཡིན་པ་ལ་དགོངས་ནས་དེ་སྐད་དུ་གསུངས་ཏེ། ཀུན་བཏུས་འགྲེལ་བར། རབ་ཏུ་དབྱེ་བ་འདི་ཡང་ལམ་གྱི་བདེན་པ་འཁོར་དང་བཅས་པའི་སྐབས་ཀྱིས་རིག་པར་བྱའོ། །ཞེས་སོ། །གཞན་དག་ལམ་གྱི་ཆོས་བཞི་དང༌། དག་གསལ་གཉེན་པོའི་ཕྱོགས་རྣམས་མ་ཚང་བས་མི་སློབ་ལམ་དང་ཚོགས་སྦྱོར་ལམ་གྱི་འབྲས་བུ་དང་རྒྱུ་ཡིན་པའི་ཕྱིར་ལམ་མཚན་ཉིད་པ་མིན་པས་མཐོང་སྒོམ་གཉིས་ཁོ་ན་ལམ་མཚན་ཉིད་པའོ། །ཞེས་སྨྲ་བ་ཡང་ལྷ་དགའ་བར་བྱེད་པ་སྟེ། རྒྱུད་བླ་མའི་འགྲེལ་པར། འདིས་ནི་སྔར་བཤད་པའི་ཚུལ་གྱིས་སྐྱེ་བ་མེད་པ་དང༌། འགག་པ་མེད་པས་རབ་ཏུ་ཕྱེ་བའི་ཐུབ་པ་རྣམ་པར་བྱང་བའི་བདེན་པ་གཉིས་ཀྱི་མཚན་ཉིད་འདོད་ཆགས་དང་བྲལ་བའི་ཆོས་ཀྱི་སྐུ་ཅན་ཞེས་གསུངས་པའི་ཕྱིར་དང༌། གཞན་ཡང་སངས་རྒྱས་ཀྱིས་འདུས་
བྱས་རྟོགས་པ་དེ་དག་ལམ་མིན་ན་བདེན་པ་བཞི་གང ་དུ་ཡང་བཞག་ཏུ་མེད་པས། བདེན་བཞི་
གང་ཡོད་མིན་པའི་འཕགས་པའི་མངོན་རྟོགས་ཡོད་པར་འགྱུར་བ་དང༌། སངས་རྒྱས་ཀྱི་སར་སྤང་བྱ་དངོས་སུ་སྤོང་བ་དང་དེ་ལས་གོང་དུ་འགྲོར་མེད་ཀྱང༌། སྤང་བྱ་འཇོམས་པའི་མཐུ་ཐོགས་པ་མེད་པ་མངའ་ཞིང༌། གདུལ་བྱ་ཐར་པར་འབྱིན་པའི་མཐུ་ཕུན་ཚོགས་ཀྱི་མཁྱེན་པ་དང༌། སེམས་ཕྱིན་ཅི་མ་ལོག་པར་སྒྲུབ་པ་ཡོད་ལ། ཐེག་པ་དང་ལམ་གཉིས་ཀ་ལ་ཆེན་པོ་དག་གིས་འདིས་འགྲོ་བ་དང་འདིར་འགྲོ་བ་གཉིས་གསུངས་པ་དང༌། འདིར་ཡང་རྣམ་པ་སོ་དགུ་ལམ་བདེན་དུ་གསུངས་པས་མི་སློབ་ལམ་ལམ་བདེན་དུ་འཐད་ལ། ཚོགས་སྦྱོར་ནི་ཐེག་པ་རང་རང་གི་བྱང་ཆུབ་ཏུ་བགྲོད་པར་བྱེད་པའི་མངོན་རྟོགས་བདག་མེད་རྟོགས་པའི་རྣལ་འབྱོར་ཡིན་པས་ལམ་མཚན་ཉིད་པ་ཡིན་ནོ། །གལ་ཏེ་དེ་དག་གིས་སྤང་བྱའི་ས་བོན་དྲུང་འབྱིན་མི་ནུས་ཤིང་བདག་མེད་དོན་སྤྱི་ཙམ་དུ་འཇལ་བའི་ཕྱིར་ལམ་མིན་ཞེ་ན། དེ་ལྟ་ན་མངོན་གྱུར་ཡིན་ན་སྤང་བྱ་མ་ཡིན་དགོས་ཏེ། གཉེན་པོ་ཡིན་ན་ས་བོན་འབའ་ཞིག་འཇོམས་དགོས་པས་སོ། །ལྐོག་གྱུར་ཡིན་ན་མ་རྟོགས་པས་ཁྱབ་དགོས་ཏེ། དོན་སྤྱིའི་ཚུལ་དུ་རྟོགས་པ་ལ་དེ་མ་རྟོགས་པས་ཁྱབ་པས་སོ། །དེའི་ཕྱིར་རྒྱང་འཕེན་པ་བཞིན་ཡུལ་རྟོགས་བྱེད་ཀྱི་ཚད་མལ་མངོན་སུམ་གཅིག་པུ་ལས་མེད་པ་དང༌། གཞན་ཡང་སོ་སྐྱེ་ལ་ལམ་ཞུགས་དང༌། ཐབས་ཤེས་ཟུང་འབྲེལ་གྱི་ཉམས་ལེན་དང༌། རྫོགས་བྱང་ལས་ཕྱིར་མི་ལྡོག་
ཀྱང་མེད་པ་རོ་ལས་བླང་དགོས་པར་འགྱུར་རོ། །གཉིས་པ་མཚན་ཉིད་ནི། བདེན་པ་རེ་རེ་ལ་རྣམ་པ་བཞི་བཞི་སྟེ་བཅུ་དྲུག་གོ། །དེ་ཡང་གང་ཞེ་ན། བདེན་པ་དང་པོ་ལ་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པའོ། །གཉིས་པ་ལ་རྒྱུ་དང༌། ཀུན་འབྱུང་བ་དང༌། རབ་ཏུ་སྐྱེ་བ་དང༌། རྐྱེན་ནོ། །གསུམ་པ་ལ། །འགོག་པ་དང༌། ཞི་བ་དང༌། གྱ་ནོམས་པ་དང༌། ངེས་འབྱུང་ངོ༌། །བཞི་པ་ལ་ལམ་དང༌། རིག་པ་དང༌། སྒྲུབ་པ་དང༌། ངེས་འབྱིན་ནོ། །བཅུ་དྲུག་པོ་འདི་ཡི་སོ་སོའི་ངོས་འཛིན་ནི་གཞུང་ལས་འཆད་པས་མི་བརྗོད་དོ། །འོ་ན་བཅུ་དྲུག་ཏུ་འཇོག་པ་ཅི་ཞེ་ན། རྟག་པ་དང༌། བདེ་བ་དང༌། བདག་གི་བ་དང༌། བདག་ཏུ་ལྟ་བ་སྤྱོད་པ་རྣམས་ཀྱི་གཉེན་པོར་རིམ་པ་བཞིན་དང་པོ་བཞིའོ། །རྒྱུ་མེད་པ་དང༌། རྒྱུ་གཅིག་པུ་དང༌། འགྱུར་བ་དང༌། བློ་སྔར་བཏང་བ་ལྟ་བ་སྤྱོད་པ་རྣམས་ཀྱི་གཉེན་པོར་གཉིས་པའི་བཞིའོ། །ཐར་པ་མེད་པ་དང༌། སྡུག་བསྔལ་ལ་ཐར་པ་ཡིན་པ་དང༌། བསམ་གཏན་གྱི་བདེ་བ་གྱ་ནོམ་པ་ཡིན་པ་དང༌། ཐར་པ་ནི་གཏན་དུ་མི་ལྡོག་པ་མིན་ནོ་སྙམ་དུ་ལྟ་བ་སྤྱོད་པ་རྣམས་ཀྱི་གཉེན་པོར་གསུམ་པའི་བཞིའོ། །ལམ་མེད་པ་དང༌། ལམ་འདི་ངན་པ་དང༌། གཞན་ཡང་ལམ་ཡིན་པ་དང༌། ལམ་འདི་ཡང་ལྡོག་གོ་སྙམ་དུ་ལྟ་བ་སྤྱོད་པ་
རྣམས་ཀྱི་གཉེན་པོར་བཞི་པའི་བཞིའོ། །དེས་ན་ལྟ་བ་སྤྱོད་པ་བཅུ་དྲུག་པོ་དེ་དག་གི་ཕྱིར་དུ་རྣམ་པ་བཅུ་དྲུག་གོ། །གཞན་ཡང་ཉོན་མོངས་པ་ལས་བྱུང་བའི་འདུ་བྱེད་སྡུག་བསྔལ་གྱི་མཚན་ཉིད། སྡུག་བསྔལ་གྱི་བདེན་པ་སྐྱེད་པ་ཀུན་འབྱུང་གི་མཚན་ཉིད། དེ་གཉིས་ཀ་ཉེ་བར་ཞི་བ་འགོག་པའི་མཚན་ཉིད། དོན་གསུམ་པོ་སྒྲུབ་པ་ལམ་གྱི་མཚན་ཉིད། ཅེས་ཀྱང་བསྡུ་བ་ལས་བཤད་དོ། །གསུམ་པ་གཅིག་ཐ་དད་ནི། འགོག་བདེན་དང་གཞན་གསུམ་གཅིག་པ་བཀག་པའི་ཐ་དད་ཡིན་ལ། །གཞན་གསུམ་ནི་འཕགས་པའི་མཉམ་གཞག་གི་ལམ་བདེན་དང་སྡུག་ཀུན་གཉིས་རྫས་ཐ་དད་ལ། རྗེས་ཐོབ་ཀྱི་ལམ་བདེན་ནི་སྡུག་བདེན་དང་མི་འགལ་ལོ། །སྡུག་ཀུན་གཉིས་ཀྱང་ཀུན་འབྱུང་ལ་སྡུག་བདེན་གྱིས་ཁྱབ་ལ་སྡུག་བདེན་ལ་དེས་མ་ཁྱབ་སྟེ། དཔེར་ན་ཀུན་གཞི་དང༌། སྣོད་ཀྱི་འཇིག་རྟེན་དང༌། དབང་པོ་ལྔ་དང༌། གཞན་ཡང་མ་བསྒྲིབས་ལུང་མ་བསྟན་ཟག་བཅས་རྣམས་ལྟ་བུའོ། །བཞི་པ་གྲངས་ངེས་པ་ནི། ཅིའི་ཕྱིར་བདེན་པ་བཞིར་གྲངས་ངེས་ཤེ་ན། རྟོག་ལྡན་གྱིས་བླང་དོར་བྱ་བའི་ཡན་ལག་ལ་ནག་ཕྱོགས་དང་དཀར་ཕྱོགས་གཉིས་སུ་ངེས་ལ་དེ་རེ་རེ་ལ་ཡང་རྒྱུ་འབྲས་གཉིས་གཉིས་སུ་ངེས་པའི་ཕྱིར་རོ། །དེ་ཡང་ཤེས་བྱ་ཐམས་ཅད་བདེན་བཞིར་འདུས་པ་ནི་མ་ཡིན་ཏེ། དེ་བཞིན་ཉིད་བདེན་བཞིར་མ་
འདུས་པར་བཤད་ཅིང༌། སོ་སོར་བརྟག་མིན་གྱི་འགོག་པ་འདུ་བྱེད་ཉེ་བར་ཞི་བ་ཡིན་ཀྱང་འགོག་བདེན་མིན་པར་བཤད་ལ་གཞན་དུ་ཡང་ན་འདུས་པས་སོ། །ལྔ་པ་ནི། དང་པོར་ལམ་སྒོམ་པ་པོའི་ཇི་ལྟར་གཏན་ལ་འབེབས་པའི་རིམ་པ་དང་བསྟུན་པ་སྟེ། རྒྱུད་བླ་ལས། །ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རེག་པར་བྱ་ཞིང་བསྟན་པར་བྱ། །ཞེས་སོ། །གསུམ་པ་རྟེན་དཀོན་མཆོག་གསུམ་བཤད་པ་ལ་བཞི། སྐྱབས་གསུམ་སོ་སོའི་ངོ་བོ། །གནས་སྐབས་ཀྱི་སྐྱབས་གསུམ། མཐར་ཐུག་གི་སྐྱབས་གཅིག །དཀོན་མཆོག་གི་སྒྲ་བཤད་པའོ། །དང་པོ་སྐྱབས་གསུམ་སོ་སོའི་ངོ་བོ་ལ་གཉིས། ཉན་ཐོས་སྡེ་པ་དང༌། ཐེག་ཆེན་པའི་ལུགས་སོ། །དང་པོ་ཉན་ཐོས་པའི་ལུགས་ནི་མཛོད་ལས། །གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང༌། །མྱ་ངན་འདས་ལ་སྐྱབས་སུ་འགྲོ། །ཞེས་པ་ལྟར། །སངས་རྒྱས་ལ་སྐྱབས་སུ་འགྲོ་བ་ནི་སངས་རྒྱས་སུ་བྱེད་པའི་ཆོས་མི་སློབ་པ་ལ་སྐྱབས་སུ་འགྲོ་བ་ཡིན་ཏེ་སངས་རྒྱས་ཀྱིས་ཟད་པ་དང་མི་སྐྱེ་བ་ཤེས་པ་ཡིན་ལ་འཁོར་དང་བཅས་ན་ཟག་མེད་ཀྱི་ཕུང་
པོ་ལྔའོ། །དགེ་འདུན་ལ་སྐྱབས་སུ་འགྲོ་བ་ནི། དགེ་འདུན་དུ་བྱེད་པའི་ཆོས་སློབ་པ་དང་སངས་རྒྱས་མ་གཏོགས་པའི་མི་སློབ་པ་ལ་ཡིན་ཏེ། དེ་ཡང་གང་ཞིག་ཐོབ་པས་གང་ཟག་བརྒྱད་པོ་ལྷ་དང་བཅས་བས་ཀྱང་ལམ་ལས་མི་ཕྱེད་པས་དགེ་འདུན་ཞེས་བརྗོད་པ་སྟེ། གང་ཟག་བརྒྱད་པོའི་རྒྱུད་ཀྱི་ཟག་མེད་ཀྱི་ཕུང་པོ་ལྔའོ། །ཆོས་ལ་སྐྱབས་སུ་འགྲོ་བ་ནི། སོ་སོར་བརྟགས་འགོག་མྱང་འདས་ལ་ཡིན་ཏེ་འཕགས་པ་རྣམས་ཀྱི་མྱང་འདས་གཉིས་སོ། །དེ་ལ་བྱེ་སྨྲ་བའི་ལུགས་ཀྱིས་སངས་རྒྱས་དང་དགེ་འདུན་གཉིས་ཀའི་རྟེན་ལུས་ནི་སྡུག་བདེན་ཡིན་པས་སངས་རྒྱས་དང་དགེ་འདུན་མིན་པར་འདོད་ལ། འོ་ན་སངས་རྒྱས་ལ་ངན་སེམས་ཀྱིས་ཁྲག་ཕྱུང་བས་མཚམས་མེད་དུ་མི་འགྱུར་ཞེས་སྨྲ་བ་ལ། རྟེན་ལ་གནོད་པ་བྱས་པས་བརྟེན་པ་ལ་ཡང་གནོད་པས་མཚམས་མེད་དུ་འགྱུར་ཞེས་ལན་འདེབས་ཤིང༌། སློབ་དཔོན་གྱིས་བསྟན་བཅོས་ལས་སངས་རྒྱས་དང་སངས་རྒྱས་སུ་བྱེད་པའི་ཆོས་ཞེས་འབྱུང་བས་མི་སློབ་པ་ཁོ་ན་སངས་རྒྱས་ཞེས་མི་འབྱུང་ཞིང༌། རྟེན་སངས་རྒྱས་སུ་མ་བཀག་པས་དེ་བསྟན་བཅོས་ལ་ཀླན་ཀར་མི་རུང་བར་གསུངས་སོ། །བསྟན་བཅོས་ཀྱི་དགོངས་པ་དེ་ལྟ་མིན་ན། སངས་རྒྱས་དང་དགེ་འདུན་གྱི་འཇིག་རྟེན་པའི་ཡིད་མངོན་དུ་བྱས་པ་ན་སངས་རྒྱས་དང་དགེ་འདུན་མིན་པར་འགྱུར་ཏེ་སློབ་པ་དང་མི་སློབ་པ་ཟག་མེད་ཡིན་པས་དེ་དང་འཇིག་རྟེན་
པའི་ཡིད་གཉིས་མངོན་གྱུར་དུ་ལྷན་ཅིག་ཏུ་མི་གནས་པས་དེའི་ཚེ་སློབ་མི་སློབ་མེད་ལ་རྟེན་ཡང་དེ་དག་མིན་པས་སོ། །ཞེས་སོ། །དེས་ན་སློབ་དཔོན་གྱིས་རྟེན་སངས་རྒྱས་སུ་བཤད་པ་ནི་མདོ་སྡེ་བས་ཀྱང་འདོད་པར་མངོན་པས་ཁྱད་དེ་ཙམ་མ་གཏོགས་མཐུན་ནོ། །གཉིས་པ་ཐེག་ཆེན་པའི་ལུགས་ལ་གསུམ་ལས། དང་པོ་སངས་རྒྱས་ནི། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པས། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། ཅེས་སོ། །དེ་ཡང་རིམ་པ་ལྟར། སྐྱེ་འཇིག་གནས་གསུམ་གྱིས་སྟོང་པ། འབད་རྩོལ་དང་རྣམ་རྟོག་ཐམས་ཅད་ཉེ་བར་ཞི་བ། སྒྲ་དང་རྟགས་ལ་སོགས་པའི་གཞན་རྐྱེན་གྱིས་རྟོགས་པ་མིན་གྱིས་སངས་རྒྱས་ཉིད་ཀྱི་རང་བྱུང་གི་ཡེ་ཤེས་ཀྱིས་རྟོགས་པར་བྱ་བ་སྟེ་གསུམ་དང༌། གསུམ་པོ་དེ་ཇི་ལྟ་བ་བཞིན་དུ་མཁྱེན་པ་དང༌། མཁྱེན་པ་ལྟར་གཞན་ལ་སྟོན་པའི་བརྩེ་བ་དང༌། བསྟན་པས་གདུལ་བྱའི་འབྲས་བུ་སྡུག་བསྔལ་དང་རྒྱུ་ཉོན་མོངས་གཉིས་སྤོང་བའི་ནུས་པ་གསུམ་ལས། དང་པོ་གསུམ་རང་དོན། ཕྱི་མ་གསུམ་གཞན་དོན་ཏེ་དབྱེ་གཞི་གཉིས་ཀྱང་བགྲང་བས་བརྒྱད་དོ། །གཉིས་པ་ཆོས་ནི། རྒྱུད་བླ་ལས། །བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་
ཉིད་ཀྱི། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང༌། །ལམ་གྱི་བདེན་པ་དག་གིས་བསྡུས། །གོ་རིམ་ཇི་བཞིན་དེ་དག་ཀྱང༌། །ཡོན་ཏན་གསུམ་གསུམ་གྱིས་རིག་བྱ། ཞེས་སོ། །དེ་ཡང་རིམ་པ་ལྟར། སྒྲ་རྟོག་གི་ཡུལ་མིན་ཞིང་འཕགས་པའི་མཉམ་གཞག་གི་ཡུལ་ཡིན་པ་དང༌། ཟག་བཅས་ཀྱི་ལས་ཉོན་ཅི་རིགས་པ་སྤོང་བ། །དེ་གཉིས་ཀྱི་རྒྱུ་གཙང་བདེ་རྟག་བདག་སོགས་སུ་སྒྲོ་འདོགས་པའི་བློ་སྤང་བ་གསུམ་ལས་སྔ་མ་རང་བཞིན་རྣམ་དག་དང༌། ཕྱི་མ་གཉིས་གློ་བུར་དྲི་བྲལ་གྱི་ཆའོ། །ཡང་ལམ་གྱི་ངོ་བོ་ཉོན་མོངས་དང་ཉེ་ཉོན་གྱིས་དག་པ། ཤེས་བྱའི་དེ་ཁོ་ན་ཉིད་གསལ་བར་བྱེད་པ། དུག་གསུམ་ལ་སོགས་པའི་མུན་པ་རྣམས་རྣམ་པར་འཇོམས་པ་གསུམ་མོ། །དེ་ལྟར་གསུམ་ཚན་གཉིས་ལས་དང་པོ་འགོག་བདེན་དང་ཕྱི་མ་ལམ་བདེན་ཡིན་ལ་དབྱེ་བ་དྲུག་དབྱེ་གཞི་གཉིས་དང་བརྒྱད་དོ། །འདིར་འགོག་ལམ་ནི་ཐེག་ཆེན་གྱི་འགོག་ལམ་ལ་བཟུང་དགོས་ལ་ལམ་བདེན་ཡང་ཐེག་ཆེན་གྱི་མཐོང་སྒོམ་གཉིས་ཁོ་ནར་འགྲེལ་པ་ལས་བཤད་དོ། །གསུམ་པ་དགེ་འདུན་ནི། རྒྱུད་བླ་ལས། །ཇི་བཞིན་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །
ཅེས་སོ། །དེ་ཡང་རིམ་པ་ལྟར། ཆོས་དང་གང་ཟག་ཞེས་བྱ་བའི་འགྲོ་བ་རྣམས་ཀྱི་བདག་གཉིས་ཉེ་བར་ཞི་བའི་བདག་མེད་པའི་མཐའ་རྟོགས་པའི་ཇི་ལྟ་བ་རིག་པ། བདག་གཉིས་ཀྱིས་སྟོང་པའི་དེ་བཞིན་ཉིད་དེ་སེམས་ཅན་ཐམས་ཅད་ལ་ཁྱབ་པར་མཐོང་བའི་ཇི་སྙེད་པ་རིག་པ། ཡེ་ཤེས་དེ་གཉིས་རང་རིག་པའི་ཚུལ་གྱིས་རྟོགས་པའི་ནང་གི་ཡེ་ཤེས་གཟིགས་པའི་རིག་པ། ཆགས་པ་ཉོན་སྒྲིབ་དང༌། ཐོགས་པ་ཤེས་སྒྲིབ་གཉིས་ཅི་རིགས་པར་དག་པའི་གཟིགས་པ་དེ་དག་པའི་ཡོན་ཏན་དང་བཞི་ལྡན་ནོ། །གཉིས་པ་གནས་སྐབས་ཀྱི་སྐྱབས་གསུམ་ནི། རྒྱུད་བླ་ལས། །སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། ཞེས་པ་ལྟར་ཐུན་མོང་གི་མདོ་ལས་དགོས་ པ་གསུམ་གྱི་ཕྱིར། གང་ཟག་དྲུག་གི་དབང་དུ་བྱས ་ནས། རྐང་གཉིས་རྣམས་ཀྱི་མཆོག་སངས་རྒྱས་དང༌། འདོད་ཆགས་དང་བྲལ་བའི་མཆོག་མྱང་འདས་ལ་ཆོས་དང༌། ཚོགས་རྣམས་ཀྱི་མཆོག་སྐྱེས་བུ་ཟུང་བཞི་ལ་དགེ་འདུན་དུ་བཞག་གོ། །དེ་ཡང་དགོས་པ་གསུམ་ནི་སྐྱབས་གསུམ་གྱི་ཡོན་ཏན་བསྟན་པའི་ཕྱིར་ཡིན་ལ། གང་ཟག་དྲུག་ནི་སྐྱབས་གསུམ་གྱི་ནང་ནས་རིམ་བཞིན་སངས་རྒྱས་ཆོས་དགེ་འདུན་ལ་བྱ་བ་བྱེད་པར་འདོད་པའི་
གང་ཟག་དང་ཐེག་ཆེན་རང་རྒྱལ་ཉན་ཐོས་ཀྱི་རིགས་ཅན་གསུམ་མོ། །དེ་ཡང་རྒྱུའི་སྐྱབས་འགྲོའི་དབང་དུ་བྱས་ན་རིགས་ཅན་རེ་རེས་ཀྱང་གསུམ་ཀ་ལ་སྐྱབས་སུ་བྱེད་ཀྱང་འདི་ནི་རང་རང་གི་ཐུན་མོང་མ་ཡིན་པའི་ཐོབ་བྱ་འབྲས་བུའི་སྐྱབས་འགྲོའི་དབང་དུ་བྱས་པའི་ཕྱིར་རོ། །དེ་ལྟར་ན་ཚུལ་འདི་ནི་ཐེག་པ་གསུམ་ལ་གནས་པ་རྣམས་རིམ་གྱིས་ཐེག་ཆེན་ལ་དྲང་བའི་ཆེད་ཡིན་པས་དྲང་དོན་ནོ། །གསུམ་པ་མཐར་ཐུག་གི་སྐྱབས་གཅིག་ནི་སངས་རྒྱས་ཁོ་ན་ཡིན་ཏེ། རྒྱུད་བླ་ལས། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། ཞེས་སོ། །འོ་ན་མཐར་ཐུག་གི་སྐྱབས་ལ་སྐྱབས་གསུམ་མ་ཚང་བར་འགྱུར་ཞེ་ན། ཉེས་པ་མེད་དེ། སངས་རྒྱས་ཀྱི་ཐུགས་རྒྱུད་ཀྱི་འགོག་ལམ་ཆོས་ཡིན་ལ། ཆོས་ཀྱི་སྐུ་ཐོབ་པ་ན་ཐེག་གསུམ་གྱི་ཚོགས་ཀྱང་མཐར་ཕྱིན་པར་འགྱུར་བའི་ཕྱིར། རྒྱུད་བླ་ལས། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། ཞེས་སོ། །བཞི་པ་དཀོན་མཆོག་གི་སྒྲ་བཤད་ནི། རྒྱུད་བླ་ལས། །འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཉིད་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་སོ། །བཞི་པ་སྒྲུབ་པ་ཕུན་ཚོགས་ཀྱི་རྒྱུ་ལ་གདམས་པ་ལ་བཞི། སྒྲུབ་པའི་མི་མཐུན་
ཕྱོགས་སྤོང་བ་དང༌། སྒྲུབ་པ་ལ་གཞན་དྲིང་མི་འཇོག་པ་དང༌། སྒྲུབ་པའི་ཡོན་ཏན་ཐམས་ཅད་རྫོགས་པ་དང༌། སྒྲུབ་པ་མཐར་ཐུག་པའི་རྒྱུ་ལ་གདམས་པའོ། །དང་པོ་ནི་སྒྲུབ་པའི་གཙོ་བོ་བརྩོན་འགྲུས་ཡིན་ལ། དེའི་སྤང་བྱ་ཡང༌། སྤྱོད་འཇུག་ལས། །ལེ་ལོ་ངན་ལ་ཞེན་པ་དང༌། །སྒྱིད་ལུག་བདག་ཉིད་བརྙས་པའོ། །ཞེས་པ་ལྟར་གསུམ་ལས། །དང་པོ་སྙོམ་ལས་འཛིན་པ་སྤོང་བྱེད་མ་ཞེན་པའི་བརྩོན་འགྲུས་ལ་གདམས་པ། །གཉིས་པ་སྒྱིད་ལུག་པའི་ལེ་ལོ་སྤོང་བྱེད་མི་ངལ་བའི་བརྩོན་འགྲུས་ལ་གདམས་པ། གསུམ་པ་བདག་ཉིད་བརྙས་པའི་ལེ་ལོ་སྤོང་བྱེད་ལམ་ཡོངས་སུ་འཛིན་པའི་བརྩོན་འགྲུས་ལ་གདམས་པ་དང་གསུམ་མོ། །གཉིས་པ་སྒྲུབ་བ་ལ་གཞན་དྲིང་མི་འཇོག་པ་སྤྱན་ལྔ་བརྗོད་བྱར་བྱས་པ་ལ་འདོམས་ཏེ་འདི་ལ་བཞི། མཚན་ཉིད། ས་མཚམས། རྒྱུ། དགོས་པའོ། །དང་པོ་མཚན་ཉིད་ནི། དཔག་ཚད་བརྒྱ་ནས་སྟོང་གསུམ་ཚུན་ཆད་ཀྱི་དངོས་པོ་རྣམས་སོ་སོར་ངེས་པའི་ཡུལ་ཅན་ཤའི་སྤྱན། ཕྱོགས་བཅུའི་སེམས་ཅན་ཐམས་ཅད་ཀྱི་འདི་ནས་གཞན་དུ་འཆི་འཕོ་བ་དང་གཞན་ནས་འདིར་སྐྱེ་བ་མཐོང་བའི་ཡུལ་ཅན་ལྷའི་སྤྱན། འདུས་བྱས་མ་བྱས་ཀྱི་ཆོས་ཐམས་ཅད་ལ་ཅིར་ཡང་མི་རྟོག་པའི་ཡུལ་ཅན་ཤེས་རབ་ཀྱི་སྤྱན། འཕགས་པའི་གང་ཟག་
ཐམས་ཅད་ཀྱི་དབང་པོ་རྣོ་རྟུལ་ལ་སོགས་པ་རྣམས་རྟོགས་པའི་ཡུལ་ཅན་ཆོས་ཀྱི་སྤྱན། ཇི་ལྟ་བ་དང་ཇི་སྙེད་ཀྱི་ཆོས་ཐམས་ཅད་མངོན་དུ་ཕྱོགས་པར་རྫོགས་པར་བྱང་ཆུབ་པ་སྟེ་རྟོགས་པའི་ཡུལ་ཅན་སངས་རྒྱས་ཀྱི་སྤྱན་ནོ། །སྤྱན་དང་པོའི་ཡུལ་སྟོང་གསུམ་ཚུན་ཆད་དུ་ངེས་སམ་ཞེ་ན། ཉི་སྣང་ལས། དེ་ནི་རྣམ་པར་སྨིན་པ་ལས་བྱུང་བ་ཉིད་ཀྱིས་ཡུལ་སོ་སོར་ངེས་པ་ཉིད་ཡིན་པའི་ཕྱིར་རོ། །ཤའི་མིག་ནི་བདག་པོའི་འབྲས་བུའི་ཡུལ་ཅན་ཡིན་ལ་དེ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱིས་བསྡུས་པ་ཡིན་པའི་ཕྱིར་རོ། །ཞེས་ཡུལ་ངེས་པར་གསུངས་སོ། །འདི་ལྟར་ན་ཤའི་སྤྱན་ནི་ལས་ཀྱི་རྣམ་སྨིན་ལས་བྱུང་བའི་མིག་དབང་ཁྱད་པར་ཅན་ཞིག་ལ་འདོད་ཅིང༌། ལྷའི་སྤྱན་ཀྱང་དགེ་བའི་ལས་ཀྱི་རྣམ་སྨིན་ཙམ་ལས་བྱུང་བར་བཞེད་དེ་འདི་ནི་འཕགས་པ་དང་སློབ་དཔོན་གྱི་བཞེད་པའོ། །གསུམ་གྱི་གནོད་འཇོམས་ལས་ནི། གཟུགས་ཐམས་ཅད་ལ་འཇུག་པའི་ཤེས་པ་ནི་ཤའི་མིག །ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་ཤེས་པ་ནི་ལྷའི་མིག །ཐམས་ཅད་མཁྱེན་པའི་ཡེ་ཤེས་ནི་ཤེས་རབ་ཀྱི་མིག །གནས་དང་གནས་མ་ཡིན་པ་མཁྱེན་པ་མ་གཏོགས་པའི་ཤེས་པ་དགུ་པོ་ནི་ཆོས་ཀྱི་མིག །རྡོ་རྗེ་ལྟ་བུའི་ཏིང་ངེ་འཛིན་གྱི་ཡེ་ཤེས་ནི་སངས་རྒྱས་ཀྱི་སྤྱན་ཡིན་ནོ་ཞེས་གསུངས། །འགྲེལ་ཆེན་ལས། རྫུ་འཕྲུལ་
ཀྱི་རྐང་པ་བསྒོམས་པའི་མཐུས་སྟོང་གསུམ་གྱི་གཟུགས་ཆེ་ཆུང་ཐམས་ཅད་མཐོང་བའི་རྣམ་སྨིན་གྱི་མིག་གྲུབ་པ་ཤའི་སྤྱན། བསམ་གཏན་དང་པོ་ལ་སོགས་པ་བསྒོམས་བས་གྲུབ་པ་ཕྱོགས་བཅུ་དུས་གསུམ་གྱི་གཟུགས་ཆེ་ཆུང་ཐམས་ཅད་མཐོང་བ་འཕྲུལ་གྱི་སྤྱན་ནམ་ལྷའི་སྤྱན། རྣམ་པར་མི་རྟོག་པའི་ཡེ་ཤེས་ནི་ཤེས་རབ་ཀྱི་སྤྱན། གསུང་རབ་ཡན་ལག་བཅུ་གཉིས་ལ་ཐོགས་མེད་དུ་འཇུག་པ་ནི་ཆོས་ཀྱི་སྤྱན། ཟག་བཅས་ཟག་མེད་ལ་སོགས་པའི་ཆོས་ཐམས་ཅད་ཐུགས་སུ་ཆུད་པ་ནི་སངས་རྒྱས་ཀྱི་སྤྱན་ནོ་ཞེས་འཆད། གཞན་ཡང་འགྲེལ་ཆེན་ལས། འཕྲུལ་གྱི་སྤྱན་ལ་ལས་དང་བསྒོམས་པའི་འབྲས་བུའོ། །དང་པོ་ནི་ལྷ་རྣམས་ལ་རང་གི་ལས་ཀྱི་མཐུས་དབང་པོ་དྭངས་པའི་མིག་ཐོབ་ནས་གཟུགས་ཐོགས་མེད་དུ་མཐོང་བའོ། །གཉིས་པ་ནི་རྣལ་འབྱོར་པས་ཏིང་ངེ་འཛིན་བསྒོམས་པའི་མཐུས་ཐོབ་པ་སྟེ་དེས་སེམས་ཅན་རྣམས་ཀྱི་འཆི་འཕོ་དང་སྐྱེ་བ་མཐོང་བར་ཡང་བཤད་དོ། །འདིར་འཕྲུལ་གྱི་སྤྱན་ནི་ལྷའི་སྤྱན་ནོ། །ཀ་ཤིས་མདོར་བསྡུ་ན་སྤྱན་རྣམ་པ་བཞི་སྟེ། གཟུགས་འཛིན་པ་དང༌། དོན་དམ་པའི་བདེན་པ་འཛིན་པ་དང༌། ཀུན་རྫོབ་ཀྱི་བདེན་པ་འཛིན་པ་དང༌། རྣམ་པ་ཐམས་ཅད་དུ་ཤེས་བྱ་འཛིན་པའོ། །གཟུགས་འཛིན་པའང་རྣམ་པ་གཉིས་ཏེ་ལས་ཀྱི་འབྲས་བུ་
དང་བསྒོམས་པའི་འབྲས་བུའོ། །ཞེས་སོ། །གཉིས་པ་ས་མཚམས་ནི། །དང་པོ་གཉིས་ཚོགས་ལམ་ནས་ཡོད། གསུམ་པ་མཐོང་ལམ་མཉམ་གཞག །བཞི་པ་མཐོང་ལམ་རྗེས་ཐོག །ལྔ་པ་ལ་རྗེས་མཐུན་པས་བདུན་པ་ནས་དང༌། མཚན་ཉིད་པ་སངས་རྒྱས་ཀྱིས་ཁོ་ནར་ཡོད་དོ། །གསུམ་པ་རྒྱུ་ནི། ཕྱིན་དྲུག་ལ་སློབ་པ་དང་རྫུ་འཕྲུལ་གྱི་རྐང་པ་སྒོམ་པའོ། །བཞི་པ་འབྲས་བུ་ནི། མཐར་ཐུག་བླ་ན་མེད་པའི་བྱང་ཆུབ་ཏུ་འཚང་རྒྱ་བ་དང༌། གནས་སྐབས་སུ་གཞན་དོན་སྒྲུབ་པ་ན་རང་ཉིད་ཀྱིས་དེའི་ཐབས་རྣམས་ཤེས་པས་གཞན་ལ་རག་མ་ལས་བའོ། །གསུམ་པ་སྒྲུབ་པའི་ཡོན་ཏན་ཐམས་ཅད་རྫོགས་པ་མངོན་པར་ཤེས་པ་དྲུག་ལ་གདམས་པ་སྟེ། འདི་ལ་ལྔ། རྟེན་གྱིས། བརྟེན་པའི་མཚན་ཉིད། ཁྱད་པར། ས་མཚམས། དགོས་པའོ། །དང་པོ་རྟེན་གྱིས་ནི། མངོན་ཤེས་དང་པོ་ལྔ་བསམ་གཏན་བཞིའི་དངོས་གཞི་དག་པ་གང་རུང་ལ་བརྟེན་ནས་སྒྲུབ་ལ་དྲུག་པ་ནི་རབ་ཀྱི་མཐར་ཕྱིན་པའི་བསམ་གཏན་བཞི་པ་ལ་བརྟེན་ནས་སྒྲུབ་པོ། །དེ་ཡང་ཀུན་བཏུས་པའི་ལུགས་ཀྱི་བསམ་གཟུགས་བརྒྱད་ཀའི་དངོས་གཞི་ལས་ཡོན་ཏན་ཁྱད་པར་ཅན་གྱི་རྟེན་དུ་རུང་བ་ཐམས་ཅད་ལ་རབ་མཐའི་བསམ་གཏན་དང་གཟུགས་མེད་དུ་འདོད་དོ། །མཛོད་ལས། །
ཟག་ཟད་མངོན་ཤེས་སྟོབས་བཞིན་ནོ། །ཞེས་ཟག་པ་ཟད་པའི་སྟོབས་དང་ཟག་ཟད་ཀྱི་མངོན་ཤེས་འདྲ་བར་ས་ཐམས་ཅད་པར་བཤད་པ་ནི་བྱེ་སྨྲའི་ལུགས་ཡིན་པས་མི་གནོད་དོ། །དེའི་ཕྱིར་མདོ་སྡེ་རྒྱན་ལས། །བསམ་གཏན་བཞི་པ་ཤིན་ཏུ་དག་ཐོབ་ནས། །མི་རྟོག་ཡེ་ཤེས་ཡོངས་སུ་བཟུང་བ་དང༌། །ཇི་ལྟར་རྣམ་གནས་ཡིད་ལ་བྱེད་པ་ལས། །མཐུ་གྲུབ་པ་ཡི་དམ་པ་ཐོབ་པར་འགྱུར། །ཞེས་རྟེན་བསམ་གཏན་བཞི་པ་དང་གནས་ཡེ་ཤེས་མི་རྟོག་པ་དང་ནི་ལྡན། ཇི་ལྟར་རྣམ་པར་བཞག་པའི་ཆོས་ཡིད་ལ་བྱས་ན་མཐུ་འགྲུབ་པར་གསུངས་སོ། །འོ་ན་མངོན་ཤེས་སྒྲུབ་པའི་རྣམ་གནས་སམ་ཡིད་བྱེད་གང་ཞེ་ན། དང་པོའི་རྣམ་གནས་ནི་ལུས་ཡང་པ་དང༌། གཉིས་པ་ནི་སྒྲས་ཁྱབ་པ་དང༌། གསུམ་པ་ནི་བདག་ལུས་འདི་འདྲ་བ་ལ་སེམས་འདི་ལྟ་བུ་སྣང་བས་གཞན་ལ་ཡང་ལུས་འདི་ལྟ་བུ་དང་ལྡན་པས་སེམས་འདི་འདྲ་བར་ཡོད་ཅེས་མོས་པའོ། །བཞི་པ་ནི་ཡིད་ཤེས་འགགས་མ་ཐག་པའི་མཚན་མ་བཟུང་ནས་ལུགས་བཟློག་ཏུ་ཉིད་མཚམས་སྦྱོར་བའི་བར་རྣམས་ཡིད་ལ་བྱེད་པའོ། །ལྔ་པ་ནི་ཕྱོགས་རྣམས་སྣང་བས་ཁྱབ་པ་དང༌། དྲུག་པ་ནི་ཆོས་རྣམས་ལ་བདག་མེད་དོ་ཞེས་ཡིད་ལ་བྱེད་པའོ། །འོ་ན་རྟེན་དང་བརྟེན་པར་འགྱུར་ཚུལ་ཇི་ལྟ་བུ་ཞེ་ན། འདི་ནི་
མཁར་གཞོང་ལ་རྒྱ་ཤུག་བརྟེན་པ་དང༌། ས་བོན་ལས་མྱུ་གུ་སྐྱེ་བ་ལ་དེ་ལ་བརྟེན་ཞེས་པ་ལྟ་བུ་ཡང་མིན་ནོ། །འོ་ན་ཅི་ཞེ་ན། །བརྟེན་པར་བཤད་པ་དེ་རྣམས་ས་གང་དང་ གང་གི་ངོ་བོར་སྐྱེས་པ་ལ་བརྟེན་པའི་ཐ་སྙད་བྱས ་པ་སྟེ། ཚུལ་འདི་ནི་ལམ་གྱི་སེམས་རྟེན་ཐམས་ཅད་ལ་རིག་པར་བྱ་སྟེ་ཆོས་མངོན་པ་བའི་ཐུན་མོང་མ་ཡིན་པའི་བརྡའོ། །གཉིས་པ་བརྟེན་པའི་མཚན་ཉིད་ནི། ས་གཡོ་བ་དང༌། གཅིག་ཏུ་གྱུར་ནས་མང་པོ་དང༌། མང་པོར་གྱུར་ནས་གཅིག་ཏུ་འགྱུར་བ་ལ་སོགས་པ་ཡུལ་དང༌། དེ་དག་ཇི་ལྟ་བ་བཞིན་དུ་སྟོན་པར་བྱེད་པའི་སྒོམ་བྱུང་གི་ཏིང་ངེ་འཛིན་དང་ཤེས་རབ་ནི་མངོན་ཤེས་ཡིན་ཏེ་རྫུ་འཕྲུལ་གྱི་མངོན་ཤེས་དང༌། འཇིག་རྟེན་གྱི་ཁམས་ཐམས་ཅད་ན་གནས་པའི་སྒྲ་ཆུང་ངུ་དང་ཆེན་པོ་ཐམས་ཅད་ཐོས་པར་བྱེད་པའི་བསྒོམས་བྱུང་གི་ཏིང་ངེ་འཛིན་དང་ཤེས་རབ་ནི་ལྷའི་རྣ་བའི་མངོན་ཤེས། སེམས་ཅན་གཞན་གྱི་སེམས་འདོད་ཆགས་དང་བཅས་པ་དང་ཆགས་པ་དང་བྲལ་བ་སོགས་ཤེས་པའི་བསྒོམས་བྱུང་གི་ཏིང་ངེ་འཛིན་དང་ཤེས་རབ་གཞན་སེམས་ཤེས་པའི་མངོན་ཤེས། རང་གཞན་གྱི་ཚེ་རབས་དཔག་ཏུ་མེད་པ་རྗེས་སུ་དྲན་པའི་སྒོམ་བྱུང་གི་ཏིང་ངེ་འཛིན་དང་ཤེས་རབ་སྔོན་གནས་རྗེས་དྲན་གྱི་མངོན་ཤེས། ཕྱོགས་བཅུའི་སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་དང་དེ་དག་གི་གཟུགས་མཆོག་དམན་འབྲིང་ཐམས་ཅད་མཐོང་བར་བྱེད་པའི་སྒོམ་བྱུང་གི་ཏིང་ངེ་འཛིན་དང་ཤེས་རབ་ལྷའི་མིག་གི་མངོན་ཤེས། ཆགས་སོགས་ཉོན་མོངས་པ་དང་གཟུང་འཛིན་
དུ་རྟོག་པའི་ཤེས་སྒྲིབ་སོགས་ཀྱི་ས་བོན་སྤངས་བའམ་སྤོང་པར་བྱེད་པའི་སྒོམ་བྱུང་གི་ཏིང་ངེ་འཛིན་དང་ཤེས་རབ་ཟག་པ་ཟད་པའི་མངོན་ཤེས་ཡིན་ནོ། །ལྷའི་རྣ་བའི་སྐབས་སུ་མདོ་ལས་མིའི་ལས་འདས་པ་ཞེས་པ་ནི་བསམ་གཏན་གྱིས་བསྒྲུབ་པ་ལ་རྒྱ་མཚོ་སྤྲིན་གྱིས་བཤད། གཞན་སེམས་ཤེས་པའི་མངོན་ཤེས་ཀྱིས་སེམས་བྱུང་ཡང་ཤེས་ཀྱང་དང་པོ་སྒོམ་དུས་ཀྱི་འཕེན་པ་ལ་ལྟོས་ནས་སེམས་ཤེས་ཞེས་བཤད། སྤྱན་ལྔའི་ནང་ཚན་ལྷའི་མིག་དང་མིག་གི་མངོན་ཤེས་གཉིས་སྔ་མ་སྔོན་གྱི་ལས་དང་ཕྱི་མ་ཚེ་འདིར་བསམ་གཏན་བསྒོམས་པ་ལས་བྱུང་བའི་ཁྱད་ཡིན་པར་འཕགས་སེང་བཞེད། མཛོད་ལས། །མིག་དང་རྣ་བའི་མངོན་ཤེས་ནི། །ལུང་དུ་མ་བསྟན་ལྷག་རྣམས་དགེ། །ཞེས་གསུངས་ལ། ཀུན་བཏུས་ལས་དྲུག་ཀ་ཡང་ངོ་བོ་ཤེས་རབ་དང་ཏིང་ངེ་འཛིན་དུ་བཞེད། མིག་རྣ་གཉིས་དབང་པོ་དང་ལྷག་མ་བཞི་ཡིད་ལ་བརྟེན་ནོ། །གསུམ་པ་ཁྱད་པར་ནི། འཇིག་རྟེན་པ་དང་ཉན་རང་གི་མངོན་ཤེས་ནི་རང་དང་མཚུངས་པ་དང༌། རང་བས་དམའ་བ་རྣམས་ཀྱི་སེམས་ལ་སོགས་པ་ཤེས་པར་ཟད་ཀྱིས། བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱི་མངོན་པར་ཤེས་པས་ནི་སངས་རྒྱས་བཅོམ་ལྡན་འདས་སོགས་གོང་མ་རྣམས་ཀྱི་ཐུགས་ལ་སོགས་པ་ཤེས་སོ་ཞེས་གནོད་འཇོམས་ལས་གསུངས་ཤིང༌། །སྤྱིར་མངོན་ཤེས་
རྣམས་ས་གང་ལ་བརྟེན་པའི་ས་དེ་དང་འོག་སར་རྫུ་འཕྲུལ་སོགས་སྟོན་ནུས་ཀྱི་གོང་སར་མི་ནུས་ཞེས་མཛོད་ལས་གསུངས་སོ། །བཞི་པ་ས་མཚམས་ནི། མངོན་ཤེས་དང་པོ་ལྔ་ཕྱི་རོལ་པ་དང་ཡང་ཐུན་མོང་ཡིན་ལ་ཐེག་ཆེན་གྱི་ཚོགས་ལམ་ཆེན་པོ་ནས་ཅི་རིགས་པར་ཡོད་དོ། །ཟག་ཟད་ཀྱི་མངོན་ཤེས་ནི་སྤྱིར་ཉན་རང་ལ་ཡང་མཚན་ཉིད་པ་ཡོད་ཀྱང་འདི་ནི་སྒྲིབ་པ་གཉིས་ཀའི་ཟག་པ་ཟད་པ་ཡིན་པར་འགྲེལ་པས་བཤད་ཅིང༌། སངས་རྒྱས་ཀྱི་སྤྱན་དང་ཟག་ཟད་ཀྱི་མངོན་ཤེས་གཉིས་ཀས་བརྒྱད་པ་ལ་འཐོབ་ཅིང་སངས་རྒྱས་ཀྱི་སར་ཡོངས་སུ་རྫོགས་པར་དག་ལྡན་ལས་བཤད་དོ། །ལྔ་པ་དགོས་པ་ནི། སེམས་ཅན་རྣམས་ཆོས་མཉམ་པ་ཉིད་ལ་དགོད་པ་དང༌། འཕགས་པའི་སྐྱེ་བོ་ཐམས་ཅད་བྱམས་པ་དང༌། ཡིད་དུ་འོང་བའི་ཡུལ་དང་འཕྲད་པ་དང༌། ལྷ་རྣམས་ཀྱིས་ཕྱག་བྱ་བར་འོས་པ་དང༌། ལུང་བསྟན་པ་ཐོབ་པའོ་ཞེས་མདོའི་དོན་འཕགས་པས་གསུངས་སོ། །བཞི་པ་སྒྲུབ་པ་མཐར་ཐུག་པའི་རྒྱུ་ལ་གདམས་པ་ནི་མཐོང་ལམ་དང་སྒོམ་ལམ་གཉིས་ལ་གདམས་པ་གཉིས་ཏེ་ལམ་འདི་གཉིས་ཀྱང་སྤང་པ་ལ་ཁྱད་ཡོད་ཀྱི་ཆོས་ཉིད་རྟོགས་ཚུལ་ལ་ཁྱད་མེད་དེ་དཔེར་ན་བཀྲུ་བཤལ་གྱི་ཆུ་སྔ་ཕྱི་གཉིས་ཆུའི་ངོས་ནས་ཁྱད་མེད་ཀྱང་དྲི་མ་དག་ཚུལ་ལ་ཁྱད་ཡོད་པ་བཞིན་ནོ། །གཉིས་པ་རྟོགས་དཀའ་བ་བྱེ་བྲག་ཏུ་བཤད་པ་ནི། རྟེན་
དཀོན་མཆོག་ལ་གདམས་པའི་སྐབས་སུ་དགེ་འདུན་དཀོན་མཆོག་གི་མདོར་བྱང་ཆུབ་སེམས་དཔའི་དགེ་འདུན་གྱི་དབྱེ་བ་མང་པོ་ཞིག་གསུངས་པ་དེ་དག་ཤེས་སླ་བའི་ཕྱིར་བཤད་པ་སྟེ་འདི་ལ་གཉིས། མཚོན་བྱེད་དཔེའི་དགེ་འདུན་དང༌། མཚོན་བྱ་དོན་གྱི་དགེ་འདུན་ནོ། །དང་པོ་མཚོན་བྱེད་དཔེའི་དགེ་འདུན་ལ་གསུམ། །སྤྱིའི་རྣམ་པར་བཞག་པ། སོ་སོའི་རང་བཞིན་བསྟན་པ། འབྲས་བུ་བཞིར་འཇོག་པའི་རྒྱུ་མཚན་ནོ། །དང་པོ་སྤྱིའི་རྣམ་པར་བཞག་པ་ལ་བཞི། དགེ་འདུན་གྱི་གྲངས། བརྡའ་སྦྱོར་བའི་ཚུལ། །ཞུགས་གནས་གང་ལ་བཞག །འབྲས་བུ་རྣམས་འཐོབ་པའི་ཚུལ་ལོ། །དང་པོ་དགེ་འདུན་གྱི་གྲངས་ནི། སྐྱེས་བུ་ཟུང་བཞི་འམ་གང་ཟག་ཡ་བརྒྱད་དེ། རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། །དགྲ་བཅོམ་པ་བཞི་ལ་རེ་རེར་ཞུགས་པ་དང་གནས་པ་གཉིས་རེ་ཕྱེན་བརྒྱད་དོ། །གཉིས་པ་བརྡའ་སྦྱོར་ཚུལ་ནི། འབྲས་བུ་ཐོད་རྒལ་བ་དང༌། རིམ་གྱིས་པ་དང༌། སྤང་བྱ་ཅིག་ཆར་བའོ། །འབྲས་བུ་ཐོད་རྒལ་བ་འདི་ལ་འབྲས་བུ་ཐོབ་ཚུལ་གྱི་སྒོ་ནས་ཐོད་རྒལ་བ་ཞེས་བྱ་ལ། །སྤང་བྱ་སྤོང་ཚུལ་གྱི་སྒོ་ནས་ཆགས་བྲལ་སྔོན་སོང་ཞེས་བྱའོ། །རིམ་གྱིས་པ་ནི། སྤང་བྱ་སྤོང་ཚུལ་དང་འབྲས་བུ་ཐོབ་ཚུལ་གཉིས་ཀ་རིམ་གྱིས་པ་ཡིན་ནོ། །ཅིག་ཆར་བ་ནི་
སྤང་བྱ་སྤོང་ཚུལ་གྱི་སྒོ་ནས་ཅིག་ཆར་བར་བཞག་གོ། །གསུམ་པ་ཞུགས་གནས་གང་ལ་བཞག་པ་ནི། ཐོད་རྒལ་བ་ལ་འབྲས་བུ་བར་པ་གཉིས་ཀྱི་ཞུགས་གནས་བཞི་སྲིད་ཀྱི། གཞན་མི་སྲིད་དོ། །རིམ་གྱིས་པ་ནི་ཞུགས་གནས་བརྒྱད་ཀ་ལ་བཞག་གོ། །ཅིག་ཆར་བ་ནི། །རྒྱུན་ཞུགས་དགྲ་བཅོམ་གཉིས་ལ་གདམས་པར་ཀུན་བཏུས་རྩ་འགྲེལ་ལས་བཤད་ལ། དེ་གཉིས་ཀྱི་ཞུགས་པ་ལ་ཡང་བརྩིས་ན་སྦྱར་རུང་ངོ༌། །བཞི་པ་འབྲས་བུ་རྣམས་ཐོབ་ཚུལ་ལ་གསུམ། འབྲས་བུ་དེ་དག་ལམ་གང་གིས་དང༌། དུས་ནམ་གྱི་ཚེ་དང༌། ས་གང་ལ་བརྟེན་ནས་འཐོབ་པའོ། །དང་པོ་ལམ་གང་གིས་འཐོབ་པ་ནི། འབྲས་བུ་དང་མཐའ་གཉིས་ཐོབ་བྱེད་ཀྱི་ལམ་ཡིན་ན་འདས་ལམ་ཡིན་པས་ཁྱབ། འབྲས་བུ་བར་པ་གཉིས་ཐོད་རྒལ་བས་འདས་ལམ་གྱིས་ཐོབ་ཅིང༌། རིམ་གྱིས་པས་འཇིག་རྟེན་པའི་ལམ་དང་འདས་ལམ་གཉིས་ཀས་ཐོབ་བོ། །གཉིས་པ་དུས་ནམ་གྱི་ཚེ་ཐོབ་པ་ནི་རྒྱུན་ཞུགས་དང་ཐོད་རྒལ་བའི་འབྲས་བུ་གཉིས་བཅུ་དྲུག་པ་ཐོབ་པ་དང་མཉམ་དུ་ཐོབ་པས་ཁྱབ། མཐར་གྱིས་བའི་འབྲས་བུ་བར་པ་གཉིས་བཅུ་དྲུག་པ་ཐོབ་རྗེས་སུ་མདོན་དུ་བྱེད་པས་ཁྱབ་བོ། །གསུམ་པས་གང་ལ་བརྟེན་པ་ནི། རྒྱུན་ཞུགས་དང་ཕྱིར་འོང་ཐོབ་བྱེད་ཀྱི་ལམ་ཡིན་ན་བསམ་གཏན་དང་པོའི་ཉེར་བསྡོགས་ལ་བརྟེན་པས་ཁྱབ་ལ་
མཐར་གྱིས་པའི་ཕྱིར་མི་འོང་ཡང་དེ་དང་འདྲ། །ཐོད་རྒལ་བའི་ཕྱིར་མི་འོང་ཐོབ་བྱེད་ཀྱི་ལམ་ནི་བསམ་གཏན་ས་དྲུག་གང་རུང་ལ་བརྟེན་ཅིང༌། དགྲ་བཅོམ་པའི་འབྲས་བུ་ནི་ཟག་མེད་ས་དགུ་གང་རུང་ལ་བརྟེན་ནས་མངོན་དུ་བྱེད་དོ། །གཉིས་པ་སོ་སོའི་རང་བཞིན་བསྟན་པ་ལ་གསུམ། ཐོད་རྒལ་བ། རིམ་གྱིས་པ། ཅིག་ཆར་བའོ། །དང་པོ་ཐོད་རྒལ་བ་ལ་ཞུགས་པ་དང་གནས་པའོ། །དང་པོ་ཞུགས་པ་ལ་གཉིས་ལས་ཕྱིར་འོང་ཞུགས་པ་ནི། མཐོང་ལམ་གྱི་སྔོན་དུ་འཇིག་རྟེན་པའི་ལམ་གྱིས་འདོད་པའི་སྒོམ་སྤང་དྲུག་པ་སྤངས་ལ་བདུན་བརྒྱད་སྤངས་པའམ་མ་སྤངས་ཀྱང་རུང༌། དགུ་པ་མ་སྤངས་པ་དང༌། སྡུག་བསྔལ་ལ་ཆོས་བཟོད་ནས་ལམ་རྗེས་བཟོད་ཀྱི་བར་གང་ཡང་རུང་བ་ལ་གནས་པ་རྟོགས་པའི་ཁྱད་པར་ཏེ་སྤང་རྟོགས་དེ་གཉིས་དང་ལྡན་པའོ། །གཉིས་པ་ཕྱིར་མི་འོང་ཞུགས་པ་ནི། མཐོང་ལམ་གྱི་སྔོན་དུ་འདོད་པའི་སྒོམ་སྤང་དགུ་པ་སྤངས་ལ། བསམ་གཏན་དང་པོ་ནས་གོང་མ་ཅི་ཡང་མན་ཆད་ལ་ཆགས་པ་དང་བྲལ་བའམ་མ་བྲལ་ཡང་རུང་བའི་སྤངས་པ་དང༌། རྟོགས་པའི་ཁྱད་པར་སྔ་མ་ལྟ་བུ་དང་ལྡན་པའོ། །ཁ་ཅིག་ཀུན་བཏུས་སུ་ཞུགས་པ་དང་པོ་སྦྱོར་ལམ་ནས་བཟུང་བའི་རིག་པ་འདི་ལ་ཡང་བསྒྲེས་ནས་སྦྱོར་ལམ་ནས་དང་པོའི་
མཚམས་འཛིན་པའང་ཡོད་དོ། །གཉིས་པ་གནས་པ་ནི། སྔར་གྱི་ཞུགས་པ་དེས་ཕྱིས་བཅུ་དྲུག་པ་ཐོབ་པ་དང་ཕྱིར་འོང་དང་ཕྱིར་མི་འོང་འབྲས་གནས་སུ་འགྱུར་ཞིང་སྔར་གྱི་ཞུགས་པ་དབང་བརྟུལ་དད་པ་དང༌། དབང་རྣོན་ཆོས་ཀྱི་རྗེས་འབྲང་གཉིས་ལ། ཕྱིས་འབྲས་བུ་ཐོབ་པ་ན་དད་མོས་དང༌། མཐོང་ཐོབ་ཅེས་པའི་ཐ་སྙད་དང་ལྡན་པར་འགྱུར་རོ། །གཉིས་པ་རིམ་གྱིས་པ་ལ་བཞི། རྒྱུན་ཞུགས། ཕྱིར་འོང༌། ཕྱིར་མི་འོང༌། དགྲ་བཅོམ་མོ། །དང་པོ་རྒྱུན་ཞུགས་ལ། ཞུགས་པ་དང་གནས་པ་གཉིས་ལས། དང་པོ་ཞུགས་པ་ནི། མཛོད་ལྟར་ན་སྡུག་བསྔལ་ལ་ཆོས་བཟོད་ནས་ལམ་རྗེས་བཟོད་ཀྱི་བར་ལ་གནས་པ་དང༌། ཀུན་བཏུས་ལྟར་ན་སྦྱོར་ལམ་ནས་ལམ་རྗེས་བཟོད་ཀྱི་བར་ལ་གནས་པ་སྟེ་གང་ལྟར་ཡང་འདོད་ཉོན་དྲུག་པ་མ་སྤངས་པའོ། །དེ་ལ་དབྱེ་ན་མཐོང་ལམ་གྱི་སྔོན་དུ་སྒོམ་སྤང་གཅིག་ཀྱང་མ་སྤངས་པ་དང༌། གཅིག་ནས་ལྔའི་བར་གང་རུང་སྤངས་བ་གཉིས་སོ། །གཉིས་པ་གནས་པ་ནི། སྔར་གྱི་སྤངས་བ་དེ་ཉིད་དང་ལྡན་པའི་སྟེང་དུ་བཅུ་དྲུག་པ་ཐོབ་པའི་ཉན་ཐོས་སོ། །དེའི་ཁྱད་པར་ལ་དེ་ལྟར་ཐོགས་ན་ལན་བདུན་པ་དང༌། རིགས་ནས་རིགས་སྐྱེ་གཉིས་སོ། །དང་པོ་ནི། སྤངས་བའི་ཁྱད་པར་འདོད་པའི་སྒོམ་སྤང་གཅིག་ཀྱང་མ་སྤངས་པ། རྟོགས་པའི་ཁྱད་པར་རྒྱུན་དུ་
ཞུགས་པའི་འབྲས་བུ་ལ་གནས་ལ། སྐྱེ་བའི་ཁྱད་པར་འདོད་པར་སྐྱེ་བ་བདུན་ལེན་པའོ། །སྐྱེ་བ་ལེན་ཚུལ་ཡང་མིའི་རྟེན་ལ་རྒྱུན་ཞུགས་ཐོབ་ན་མིར་ལན་དྲུག་ལྷར་ལན་བདུན་བླངས་ཤིང་མཐར་མིར་སྐྱེས་ནས་འདའ་ལ། ལྷའི་རྟེན་ལ་ཐོབ་ནའང་ལྷར་ལན་དྲུག་མིར་ལན་བདུན་སྐྱེས་ནས་མཐར་ལྷའི་རྟེན་ལ་འདའོ། །དེ་ལྟར་ན་ལྷ་མིའི་སྐྱེ་སྲིད་བཅུ་བཞི་པར་སྲིད་བཅུ་བཞི་སྟེ་ཉེར་བརྒྱད་ལེན་ཀྱང་བདུན་ཚན་དུ་འདྲ་བའི་ཕྱིར་ལན་བདུན་པ་ཞེས་བྱ་སྟེ། །གནས་བདུན་ལ་མཁས་པའི་དགེ་སློང་དང་ཤིང་འདབ་མ་བདུན་པ་བཞིན་ནོ། །གཉིས་པ་རིགས་ནས་རིགས་སྐྱེ་ཡང་ཁྱད་པར་གསུམ་ལྡན་ཏེ། འདོད་ཉོན་གསུམ་མམ་བཞི་སྤངས་ལ་ལྔ་བ་མ་སྤངས་པའི་སྤང་བ་དང༌། དེའི་གཉེན་པོ་ཟག་མེད་ཀྱི་དབང་པོ་ཐོབ་པའི་རྟོགས་པ་དང༌། འདོད་པའི་ལྷ་མི་རིགས་མཐུན་གཅིག་ཏུ་སྐྱེ་བ་གཉིས་སམ་གསུམ་ལེན་པའོ། །ལྔ་པ་མ་སྤངས་པ་ནི། ལྔ་པ་སྤངས་ན་ཁམས་ལས་འདའ་མི་དགོས་པས་དྲུག་པ་ཡང་སྤང་བར་འགྱུར་ལ། དེ་ལྟ་ན་ཕྱིར་འོང་དུ་འགྱུར་བའི་ཕྱིར་རོ། །འདིས་སྒོམ་སྤངས་སྤངས་བ་རྣམས་བཅུ་དྲུག་པའི་སྔོན་དུ་སྤངས་བ་དང་རྗེས་སུ་སྤངས་བ་གཉིས་ཀ་ཡོད་དོ། །གཉིས་པ་ཕྱིར་འོང་ལ་ཞུགས་གནས་གཉིས། ཞུགས་པ་ནི་རྒྱུན་ཞུགས་འབྲས་གནས་དེས་ཕྱིར་འོང་ཐོབ་ཕྱིར་བརྩོན་པ་ན་སྒོམ་སྤང་ལྔའི་བར་གང་ཡང་མ་
སྤངས་བའམ་དྲུག་པ་སྤོང་བ་ལ་བརྩོན་པའི་བར་རོ། །གཉིས་པ་ཕྱིར་འོང་གནས་པ་ནི། ཞུགས་པ་དེས་འདོད་ཉོན་དྲུག་པ་སྤངས་བ་ན་ཕྱིར་འོང་ཡིན་ལ། དེ་ཡང་དྲུག་པ་སྤངས་བའི་རྣམ་གྲོལ་ལམ་ལ་གནས་བཞིན་པ་ན་འབྲས་གནས་ཙམ་པོ་དང༌། དགུ་པའི་བར་སྤོང་བ་ལ་བརྩོན་ན་ཁྱད་པར་ཅན་ནོ། །ཕྱི་མའི་ཁྱད་པར་ཚེ་གཅིག་བར་ཆད་གཅིག་པ་ནི། ཉོན་མོངས་པ་བདུན་པ་དང་བརྒྱད་པ་སྤངས། དེའི་གཉེན་པོ་ཟག་མེད་ཀྱི་དབང་པོ་ཐོབ། སྐྱེ་བ་ལྷག་མ་གཅིག་ལུས་པའོ། །གསུམ་པ་ཕྱིར་མི་འོང་ལ། ཞུགས་པ་དང་གནས་པ་གཉིས། དང་པོ་ཞུགས་པ་ནི། ཕྱིར་འོང་དེ་ཉིད་བདུན་པ་ནས་དགུ་པའི་བར་སྤོང་བ་ལ་བརྩོན་པའོ། །གཉིས་པ་གནས་པ་ནི། ཞུགས་པ་དེས་སྒོམ་སྤང་དགུ་པ་སྤངས་པ་ན་ཕྱིར་མི་འོང་ཡིན་ཏེ། འདི་ལ་ཁམས་གོང་མར་འགྲོ་བ་དང༌། རྟེན་དེ་ཉིད་ལ་འདའ་བ་གཉིས། དང་པོ་ལ་གསུམ། གཟུགས་དང༌། གཟུགས་མེད་དུ་ཉེར་འགྲོ་དང༌། དེ་དག་གི་རྟེན་བསམ་པའོ། །དང་པོ་གཟུགས་སུ་ཉེར་འགྲོ་ལ། བར་དོར་དང༌། སྐྱེས་ནས་འདའ་བ་དང༌། གོང་དུ་འཕོ་བ་སྟེ་གསུམ་མོ། །དང་པོ་ནི་ཚངས་ཆེན་མ་གཏོགས་པའི་གཟུགས་ཀྱི་བར་དོ་བཅུ་དྲུག་གང་རུང་དུ་སྐྱེས་ནས་རྟེན་དེ་ལ་འདའ་བའི་ཕྱིར་མི་འོང་སྟེ་འདི་ལ་བར་སྲིད་གྲུབ་མ་ཐག་དང༌། གྲུབ་ནས་སྐྱེ་སྲིད་འཚོལ་
བའི་སྣང་བ་མ་བྱུང་ཙམ་དང༌། སྐྱེ་སྲིད་དུ་འགྲོ་བར་སེམས་པའི་ཚེ་ལྷག་མེད་དུ་འདའ་བ་གསུམ་མོ། །གཉིས་པ་སྐྱེས་ནས་འདའ་བ་ནི། གཟུགས་ཀྱི་གནས་རིགས་བཅུ་དྲུག་གི་སྐྱེ་སྲིད་དུ་ཉིད་མཚམས་སྦྱར་ནས་རྟེན་དེ་ལ་ལྷག་བཅས་སུ་འདའ་བའི་ཕྱིར་མི་འོང་སྟེ། འདི་ལ་སྐྱེས་ཙམ་ནས་འདའ་བ་དང༌། མངོན་པར་འདུ་བྱེད་པ་མེད་པས་འདའ་བ་དང༌། མངོན་པར་འདུ་བྱེད་པ་གང་རུང་དུ་དང་བཅས་པས་གཅིག་ཁོ་ན་འདའ་བ་གསུམ་མོ། །དེ་ལ་ཕྱི་མ་གཉིས་ཀྱི་ཁྱད་པར་ནི་འབད་མི་དགོས་པར་ལམ་ངང་གིས་འབྱུང་བ་དང༌། མི་འབྱུང་བའི་ཁྱད་ཡིན་ལ། དང་པོ་ནི་ལམ་ཆེས་དང་གིས་འབྱུང་ཞིང་ཕྲ་རྒྱས་ཆེས་ཆུང་བ་ཡིན་པས་གཉིས་པ་དང༌། ཁྱད་པར་ཡོད་ཅེས་སློབ་དཔོན་བཞེད་དེ་ཀུན་བཏུས་ཀྱང་དེ་ལྟར་རོ། །གནས་གཙང་ལྔར་སྐྱེས་པའི་སྐྱེས་འདའ་བ་ནི་སྤེལ་མ་རྣམས་བསྒོམ་དགོས་སོ། །གསུམ་པ་གོང་དུ་འཕོ་བ་ནི། གཟུགས་ཁམས་ཀྱི་སྐྱེ་སྲིད་དུ་ལན་གཉིས་བརྒྱུད་ནས་འདའ་བའི་ཕྱིར་མི་འོང་སྟེ། འདི་ལ་རྒྱུའི་སྒོ་ནས་བསམ་གཏན་སྤེལ་མ་སྤེལ་དང༌། འབྲས་བུའི་སྒོ་ནས་འོག་མིན་དང་སྲིད་རྩེར་འགྲོ་བ་གཉིས་སོ། །དང་པོ་ནི་གཟུགས་ཀྱི་སྐྱེ་སྲིད་དུ་སྐྱེ་བ་གཉིས་བརྒྱུད་ནས་འོག་མིན་གྱི་རྟེན་ལ་འདའ་བའི་ཕྱིར་མི་འོང་སྟེ། འདི་ལ་འཕར་བ། ཕྱེད་འཕར། གནས་
ཐམས་ཅད་དུ་འཆི་འཕོ་བ་གསུམ། དེ་ལ་འཕར་བ་ནི་སྤེལ་མ་ལྔ་བསྒོམས་པས་གྲུབ་པའི་ཚེ་བསམ་གཏན་དང་པོའི་རོ་མྱང་སྟེ་བསམ་གཏན་ཕྱི་མ་གསུམ་ལས་ཉམས་པ་ཚངས་རིས་སུ་སྐྱེས་ནས་སྔོན་གོམས་པའི་མཐུས་བསམ་གཏན་བཞི་པ་སྤེལ་ནས་བར་པ་རྣམས་དོར་ཏེ། འོག་མིན་དུ་སྐྱེས་ནས་འདའ་བའོ། །ཕྱེད་དུ་འཕར་བ་ནི་སྔར་ལྟར་ཚངས་རིས་སུ་སྐྱེས་ནས་བར་པ་རྣམས་དོར་ཏེ་གནས་གཙང་རྣམས་སུ་སྐྱེས་ནས་གཞན་འགའ་ཞིག་དོར་ཏེ་འོག་མིན་དུ་འདའ་བའོ། །གནས་ཐམས་ཅད་དུ་འཆི་འཕོ་བ་ནི། སྔར་ལྟར་ཚངས་རིས་སུ་སྐྱེས་ནས་ཚངས་ཆེན་མ་གཏོགས་པའི་གནས་གཞན་ཐམས་ཅད་དུ་བརྒྱུད་ནས་འོག་མིན་དུ་འདའ་བའོ། །གཙོ་བོ་གཅིག་ཏུ་ཟད་པས་འགྲན་ཟླ་མེད་པའི་ལས་བསགས་པ་དང༌། ལོག་ལྟའི་གནས་ཡིན་པའི་ཕྱིར་ཚངས་ཆེན་དུ་འཕགས་པ་མི་སྐྱེའོ་ཞེས་མཛོད་འགྲེལ་ལས་བཤད་དོ། །ཐེག་ཆེན་པ་ལྟར་ན་རྒྱུ་མཚན་དེ་མ་ངེས་ཏེ། མ་ཐོབ་པའི་བྱང་ཆེན་གྱི་རྣམ་སྨིན་གྱི་སྐྱེ་བ་འཆད་པར་འགྱུར་བས་ཤེས་སོ། །འདི་དག་གནས་གཙང་དུ་སྐྱེ་བའི་རྒྱུ་སྤེལ་མ་སྒོམ་ཚུལ་ཇི་ལྟ་བུ་ཞེ་ན། འདིའི་མཐའ་དཔྱད་པ་ལ་གཉིས། སྒོམ་པའི་རྟེན། བརྟེན་པའི་སྒོམ་མོ། །དང་པོ་སྒོམ་པའི་རྟེན་ནི། དགྲ་བཅོམ་དང་ཕྱིར་མི་འོང་བསམ་གཏན་བཞི་པའི་སེམས་ཐོབ་བས་བསྒོམ་ལ། དེ་ཡང་དང་པོར་འདོད་པའི་ཁམས་
སུ་གླིང་གསུམ་དག་ཏུ་སྤེལ་བར་བྱེད་ལ། ཕྱིས་ནི་ཡོངས་སུ་ཉམས་པ་གཟུགས་ཁམས་སུ་སྤེལ་བར་བྱེད་དོ། །གཉིས་པ་བརྟེན་པའི་སྒོམ་ལ་གསུམ། སྤེལ་བའི་སྦྱོར་བ། གྲུབ་པའི་ཚད། སྤེལ་མ་དངོས་སོ། །དང་པོ་ནི་ཟག་མེད་ཀྱི་བསམ་གཏན་བཞི་པ་རྒྱུན་ལྡན་དང༌། དེ་ནས་དེ་ཉིད་ཟག་བཅས་རྒྱུན་ལྡན་དང༌། དེ་ནས་ཟག་མེད་རྒྱུན་ལྡན་ལ་འཇུག་ལ། དེ་ནས་རྒྱུན་ཕྲི་ནས་སྐད་ཅིག་མ་གཉིས་ལ་སྤེལ་ལོ། །དེ་ལྟར་དང་པོ་བཞི་པ་སྤེལ་བ་ནི་བཞི་པ་དེ་ཡང༌། སྐྱོན་བརྒྱད་ལས་གྲོལ་བས་ལས་སུ་རུང་ཞིང་ཏིང་ངེ་འཛིན་གསལ་བའི་ཕྱིར་རོ། །གཉིས་པ་གྲུབ་པའི་ཚད་ནི། བྱེ་སྨྲའི་ལུགས་སྐད་ཅིག་མ་ལ་བརྟེན་ནས་གྲུབ། ཅེས་བཤད་ཀྱང༌། རྟོག་དཔྱོད་ཡིད་བདེ་མི་བདེ་དབུགས་འབྱུང་རྔུབ་བདེ་སྡུག །སློབ་དཔོན་གྱི་རང་འགྲེལ་ལས། སངས་རྒྱས་མ་གཏོགས་སྐད་ཅིག་སྤེལ་མི་ནུས་པས། རྒྱུན་ཆགས་གསུམ་ལ་ཇི་སྲིད་འདོད་བར་སྙོམས་པར་འཇུག་པའི་སྒོ་ནས་རྫོགས་པ་ཡིན་ནོ། །ཞེས་སོ། །དེ་ལྟར་དང་པོར་བསམ་གཏན་བཞི་པ་སྤེལ་ནས་ཕྱིས་ནི་བསམ་གཏན་གཞན་དང་ཡང་སྤེལ་ལོ། །གསུམ་པ་སྤེལ་བ་དངོས་ནི། འབྲས་བུ་གནས་གཙང་ལྔར་སྐྱེ་བའི་རྒྱུ་སྤེལ་མ་སྒོམ་པ་ལྔ་སྟེ། གསུམ་སྤེལ་ནས་བཅོ་ལྔ་སྤེལ་གྱི་བར་རོ། །སྤེལ་སྒོམ་ལ་འདི་ལྔར་ངེས་པ་ནི་མ་ཡིན་ཏེ། འདི་ལྔ་བཞི་པ་
ཁོ་ན་སྤེལ་བ་ཡིན་ལ་གཞན་དང་ཡང་སྤེལ་བར་བཤད་པས་སོ། །འདི་དག་གི་སྤེལ་ཚུལ་ནི། ཟག་མེད་གཉིས་ཀྱི་བར་དུ་ཟག་བཅས་གཅིག་ཆུད་པ་གསུམ་སྤེལ། དེ་ནས་དེ་འདྲ་བ་བསྐྱར་བས་འབྲིང་དྲུག་སྤེལ། ཆེན་པོ་དགུ་སྤེལ། ཤིན་ཏུ་ཆེ་བ་བཅུ་གཉིས་སྤེལ། ཤིན་ཏུ་ཆེས་ཆེ་བ་བཅོ་ལྔ་སྤེལ་ལོ། །དེ་ལྟར་ན་ལྷག་མ་རྣམས་ལའང་སྤེལ་ལུགས་ཁྱད་མེད་པས་གསུམ་སྤེལ་ནུས་ན་ཐམས་ཅད་ནུས་པར་འགྱུར་སྙམ་ན། དཀྱུས་ཐོག་རེ་ལ་གསུམ་སྤེལ་ལ་སོགས་པ་ཚན་པ་རེ་སྤེལ་ནུས་ཀྱང་གཞན་སྤེལ་མི་ནུས་པས་ཉེས་པ་མེད་དོ། །དེ་ལ་གནས་གཙང་དུ་སྐྱེ་བའི་རྒྱུ་ནི་ཟག་བཅས་ཡིན་ཏེ། ཟག་མེད་ནི་སྲིད་པ་གཅེད་པས་སོ། །ཟག་བཅས་ཟག་མེད་ནི་ཟག་མེད་བདེན་པའི་རྣམ་པ་ཅན་དང༌། ཟག་བཅས་འཇིག་རྟེན་པའི་དགེ་བ་དག་པ་བ་ཡིན་པ་ཙམ་མོ། །གཉིས་པ་སྲིད་རྩེར་འགྲོ་ནི། སྙོམས་འཇུག་རྣམས་ཀྱི་རོ་མྱང་ཞིང་འབྲས་བུ་ཆེའི་བར་དུ་སྐྱེ་ཞིང་གནས་གཙང་བོར་ཏེ་གཟུགས་མེད་དུ་རིམ་གྱིས་སྐྱེས་ནས་སྲིད་རྩེར་འདའ་བའོ། །གཉིས་པ་གཟུགས་མེད་ཉེར་འགྲོ་ནི། གཟུགས་ཀྱི་ཀུན་སྦྱོར་ཟད་པའི་མཐུས་འདི་ནས་གཟུགས་སུ་མི་འགྲོ་བར་གཟུགས་མེད་དུ་སྐྱེ་བ་ལེན་པའོ། །འདིར་སྐྱེ་བ་ལ་བར་དོ་མེད་པས། སྐྱེས་ཙམ་ནས་འདའ་བ་དང༌། བྱེད་བཅས་དང༌། བྱེད་མེད་དང༌། གོང་འཕོ་དང་བཞི་ཡོད་དོ། །དབྱེ་བ་འདི་དག་འདོད་པར་ཚེ་གྱུར་གྱི་ཕྱིར་མི་འོང་
ལ་མི་རུང་སྟེ། འདོད་པར་ཚེ་གྱུར་ཞེས་པ་ནི་ཚེ་སྔ་མ་ལ་འབྲས་བུ་དང་པོ་གཉིས་གང་རུང་ཐོབ་ནས་འདིར་ཕྱིར་མི་འོང་ཐོབ་པའོ། །གསུམ་པ་དེ་དག་གི་རྟེན་བསམ་པ་ནི། གཟུགས་སུ་ཉེར་འགྲོ་ལྔ་དང་གཟུགས་མེད་ཉེར་འགྲོ་བཞི་པོ་དེ་འདོད་ཁམས་དང་ཁམས་གོང་མ་གང་གི་རྟེན་བྱེད་ཅེ་ན་འདི་དག་གི་རྩོམ་པ་དང་པོ་འདོད་རྟེན་པ་ལ་བྱེད་དགོས་སོ། །གཉིས་པ་རྟེན་དེ་ཉིད་ལ་འདའ་བ་ནི། གཟུགས་དང་གཟུགས་མེད་དུ་ཉེར་འགྲོ་ལས་གཞན་པའི་ཕྱིར་མི་འོང་སྟེ། འདི་ཁམས་གོང་མར་མི་སྐྱེ་ཞིང་ཕྱིར་མི་འོང་ཡིན་པས་འདོད་པར་ཡང་མི་སྐྱེ་བས་སོ། །འདིས་འགོག་པའི་སྙོམས་འཇུག་ཐོབ་ན་ཕྱིར་མི་འོང་ལུས་ཀྱིས་མངོན་སུམ་དུ་བྱེད་པ་ཞེས་བྱའོ། །བཞི་པ་དགྲ་བཅོམ་པ་ལ་གཉིས། དང་པོ་ཞུགས་པ་ནི། ཕྱིར་མི་འོང་འབྲས་གནས་ཀྱིས་གཟུགས་ཀྱི་སྒོམ་སྤང་དང་པོ་སྤངས་པ་ལ་བརྩོན་པ་ནས་སྲིད་རྩེའི་དགུ་པའི་བར་སྤོང་བ་ལ་བརྩོན་པའོ། །གཉིས་པ་འབྲས་གནས་ནི། ཞུགས་པ་དེས་སྲིད་རྩེའི་སྒོམ་སྤང་དགུ་པ་སྤང་བ་ན་དགྲ་བཅོམ་པ་ཡིན་ལ། འདི་ལ་སྒྲིབ་པ་སྤོང་ཚུལ་གྱིས་ཕྱེ་ན། ཉོན་མོངས་དང་སྙོམས་འཇུག་སྒྲིབ་པ་གཉིས་ཀ་ལས་གྲོལ་ན་གཉིས་ཀའི་ཆ་ལས་རྣམ་གྲོལ་དང༌། ཉོན་སྒྲིབ་ཁོ་ན་ལས་གྲོལ་བ་ཤེས་རབ་ཀྱི་ཆ་ལས་རྣམ་གྲོལ་ལོ། །དེ་གཉིས་ལ་རྒྱན་ཅན་དང༌། རྒྱན་མེད་ཅེས་ཀྱང་ཟེར་རོ། །དབང་པོས་ཕྱེ་ན་དད་མོས་དང་མཐོང་ཐོབ་གཉིས་ཏེ། །བྱེ་བྲག་སྨྲ་བ་རྣམས་དབང་རྟུལ་འདི་དགྲ་
བཅོམ་ལས་ཉམས་ནས་རྒྱུན་ཞུགས་བར་དུ་འགྲོ་བར་ཡོད་པར་འདོད་ལ། མདོ་སྡེ་པས་དགྲ་བཅོམ་ལས་ཉམས་མི་སྲིད་ཅིང་མཐོང་ཆོས་ལ་བདེ་གནས་ཙམ་ལས་ཉམས་པ་ཡོད་པར་འདོད་དེ། སློབ་དཔོན་སྐུ་མཆེད་ཀྱང་དེ་ཉིད་ལེགས་པར་མཛད་དོ། །གསུམ་པ་གཅིག་ཆར་བ་ནི། བསམ་གཏན་གྱི་སེམས་མ་ཐོབ་གོང་དུ་མཐོང་ལམ་མངོན་དུ་བྱས་ནས་ཉེར་བསྡོགས་དང་པོ་ལ་བརྟེན་པའི་འདས་ལམ་གྱིས་ཁམས་གསུམ་གྱི་སྒོམ་སྤང་རྣམས་དགུར་དྲིལ་ནས་སྤོང་བའོ། །དེ་ཡང་འཆི་དུས་ཀྱི་སྔོན་ནམ་དེ་ལ་ཉེ་བའི་ཚེ་ཕལ་ཆེར་དགྲ་བཅོམ་དུ་འགྱུར་ལ། དེ་མ་ཐོབ་ན་འདོད་པར་སྐྱེས་པའི་རྟེན་ལ་འདའ་ཞིང༌། ལུང་གི་བསྟན་པ་ནུབ་པ་དང་འདོམས་ན་སྲིད་པ་ཐ་མའི་ཚེ་སློབ་དཔོན་ལ་མ་ལྟོས་པར་བྱང་ཆུབ་ཐོབ་ནས་རང་རྒྱལ་དུ་འགྱུར་ཏེ་སློབ་པའི་དུས་ནའང་ཉན་ཐོས་ཀྱིས་མ་ཁྱབ་པ་འདིས་ཤེས་པར་བྱའོ། །གསུམ་པ་འབྲས་བུ་བཞིར་ངེས་པའི་རྒྱུ་མཚན་ནི། མཐོང་སྤང་སྤངས་ཙམ་གྱིས་རྒྱུན་ཞུགས་དང༌། སྒོམ་སྤང་ལ་གཉིས་ལས་འདོད་པའི་སྒོམ་སྤང་དྲུག་པ་སྤངས་པ་ཕྱིར་འོང་དང༌། དགུ་པ་སྤངས་པ་ཕྱིར་མི་འོང་དུ་བཞག་གོ། །གོང་མའི་སྒོམ་སྤང་སྤངས་པ་ནི་དགྲ་བཅོམ་ཡིན་ལ། འདོད་པ་ལ་གཉིས་བཞག་པ་ནི་དེ་ལས་མྱུར་དུ་འདའ་བའི་ཕྱིར་རོ། །འབྲས་བུ་འདི་དག་དང་པོར་ཁམས་གང་དུ་ཐོབ་ཚུལ་ཡང་མཛོད་ལས། འདོད་པར་གསུམ་
ཐོབ་ཐ་མ་ནི། གསུམ་དུའོ་ཞེས་སོ། །གཉིས་པ་མཚོན་བྱ་དོན་གྱི་དགེ་འདུན་བཤད་པ་ལ་ལྔ། གང་ལས་དབྱེ་བའི་གཞི། ཇི་ལྟར་ཕྱེ་བའི་གྲངས། ཕྱེ་བ་སོ་སོའི་རང་བཞིན། དེ་དག་གང་གི་མཚོན་བསམ་པ། ཁྱད་པར་གྱི་ཆོས་གཞན་བསྟན་པའོ། །དང་པོ་ནི་འཕགས་པའི་དགེ་འདུན་ནོ། །གཉིས་པ་ཇི་ལྟར་ཕྱེ་བའི་གྲངས་ལ། སྤྱིར་མདོ་ལས་རྒྱལ་སྲས་ཞེ་བརྒྱད་གསུངས་ཀྱང་མདོ་དང་རྒྱན་སྦྱར་བའི་དབང་དུ་ན་དགེ་འདུན་ཉི་ཤུ་འདྲེན་ཏེ། འདི་ལ་སྒྲ་ཇི་བཞིན་པ་དང༌། ཇི་བཞིན་མ་ཡིན་པར་འདྲེན་པ་གཉིས། དང་པོ་ནི། བུདྡྷ་ཤྲཱི་དང་པ་སྟེ་རྩ་བའི་སྒྲ་ཇི་བཞིན་དུ་ཉི་ཤུ་འདྲེན་པས་སོ། །གཉིས་པ་ལ་གཉིས། འཕགས་པ་དང༌། སློབ་དཔོན་གྱི་ལུགས་སོ། །འདི་གཉིས་ནི་ས་བཅད་གསུམ་པའི་སྐབས་སུ་འཆད་པར་འགྱུར་རོ། །གསུམ་པ་ཕྱེ་བ་སོ་སོའི་རང་བཞིན་ནི། སློབ་དཔོན་འཕགས་པའི་རྗེས་སུ་འབྲངས་ནས་འཆད་ན་འདི་ལ་བཞི། བརྒྱད་པ། ཆགས་བྲལ་སྔོན་སོང༌། མཐར་གྱིས་པ། རང་རྒྱལ་མིང་ཅན་གྱི་བྱང་སེམས་སོ། །དང་པོ་བརྒྱད་པ་ལ་གཉིས་ལས་དང་པོ་ནི། ལམ་ཤེས་ཀྱི་མཐོང་ལམ་སྐད་ཅིག་དང་པོ་བཅོ་ལྔ་གང་རུང་ལ་གནས་པའི་བྱང་སེམས་དབང་རྟུལ་དད་པའི་ལམ་གྱི་རྗེས་སུ་འབྲང་བ་གཞན་དོན་གྱི་དབང་གིས་བསམ་བཞིན་དུ་སྐྱེས་པ་མ་ཡིན་པར་
ལས་དང་བསོད་ནམས་ཀྱི་དབང་གིས་མིའི་ནང་ནས་མི་རྣམས་ཀྱི་ནང་དུ་སྐྱེས་པའོ། །གཉིས་པ་རྟོགས་པ་སྔ་མ་ལྟ་བུའི་དབང་རྣོན་ཤེས་རབ་ཀྱི་ལམ་གྱི་རྗེས་སུ་འབྲང་བ་ནི་སངས་རྒྱས་ཀྱི་ཞིང་གཞན་དང༌། དགའ་ལྡན་གྱི་ལྷའི་རིས་ནས་ཤི་འཕོས་ནས་འདིར་སྐྱེས་པའོ། །གཉིས་པ་ཆགས་བྲལ་སྔོན་སོང་ལ། ཞུགས་པ་དང་གནས་པ་གཉིས། དང་པོ་ཕྱིར་འོང་དང་ཕྱིར་མི་འོང་ལ་ཞུགས་པ་དད་མོས་དང༌། རིགས་མཚུངས་པའི་དབང་རྟུལ་ནི། བྱང་ཆེན་ཐབས་མི་མཁས་པས་བསམ་གཏན་དང་ཕར་ཕྱིན་སྒྲུབ་ཅིང་ལྷ་ཚེ་རིང་པོར་སྐྱེས་ནས་དེ་ནས་འདོད་པའི་ཁམས་ཀྱི་ལྷ་དང་མིར་སྐྱེས་པའོ། །གཉིས་པ་འབྲས་བུ་བར་པ་གཉིས་ལ་ཞུགས་པ་མཐོང་ཐོབ་དང་རིགས་མཚུངས་པའི་དབང་རྣོན་ནི། ཐབས་ལ་མཁས་པའི་སྒོ་ནས་བསམ་གཟུགས་ལ་སྙོམ་པར་འཇུག་ཅིང་བསམ་གཏན་གྱི་དབང་གིས་མ་ཡིན་པར། གང་ན་སངས་རྒྱས་བཅོམ་ལྡན་འདས་བཞུགས་པ་དེ་དག་ཏུ་སྐྱེ་བར་འགྱུར་ཞིང་བསྐལ་པ་བཟང་པོ་འདི་ལ་བླ་མེད་རྫོགས་བྱང་དུ་འཚང་རྒྱ་བའོ། །འདིར་ཞུགས་པ་བཞི་དབང་པོའི་སྒོ་ནས་བསྲེས་ཏེ་གཉིས་གཉིས་སུ་བགྲང་བ་ནི། །དབང་པོ་རྣོ་རྟུལ་གྱི་མདོ་རེ་རེ་ལས་མེད་པས་སོ། །གཉིས་པ་འབྲས་གནས་ལ་གཉིས། དང་པོ་ཆགས་བྲལ་སྔོན་སོང་གི་ཕྱིར་འོང་དང་ཐོབ་གཉིས་ཀྱི་སེམས་དཔའ་ནི། བྱང་ཆེན་ཚེ་གཅིག་གིས་ཐོགས་པ་བསམ་གཟུགས་
ཚད་མེད་སོགས་ལ་སྙོམས་པར་འཇུག་ཅིང༌། སངས་རྒྱས་བཞུགས་པའི་ཞིང་རྣམས་སུ་སྐྱེས་ནས། སླར་ཡང་དགའ་ལྡན་གྱི་ལྷ་དང་སྐལ་བ་མཉམ་པར་སྐྱེས་ནས་སངས་རྒྱས་ཀྱི་ཞིང་སྣ་ཚོགས་སུ་སངས་རྒྱ་བ་སྟེ། འདི་ནི་འཇིག་རྟེན་འདིར་ལན་གཅིག་འོང་ནས་སངས་རྒྱས་ཀྱི་ཞིང་གཞན་དུ་མྱ་ངན་ལས་འདའ་བས་ལན་ཅིག་ཕྱིར་འོང་ངོ༌། །གཉིས་པ་དེའི་ཕྱིར་མི་འོང་འབྲས་གནས་དད་ཐོབ་གཉིས་ཀྱི་སེམས་དཔའ་ནི། བྱང་ཆེན་མངོན་ཤེས་དྲུག་ཐོབ་པ་གང་དག་གཟུགས་དང་གཟུགས་མེད་དུ་མི་སྐྱེ་ཞིང༌། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སངས་རྒྱས་རྣམས་མཉེས་པར་བྱེད་པ་སྟེ་འདི་གང་དུ་སྐྱེས་པ་དེར་མི་འོང་བས་ཕྱིར་མི་འོང་ངོ། །གསུམ་པ་མཐར་གྱིས་པའི་མིང་ཅན་གྱི་བྱང་སེམས་ལ་གསུམ། རྒྱུན་ཞུགས། ཕྱིར་འོང༌། ཕྱིར་མི་འོང་གི་མིང་ཅན་གྱི་དགེ་འདུན་ནོ། །དང་པོ་རྒྱུན་ཞུགས་ཀྱི་མིང་ཅན་ལ་གཉིས། རྒྱུན་ཞུགས་འབྲས་གནས་མིའི་རིགས་ནས་རིགས་སྐྱེའི་སེམས་དཔའ་ནི། བསམ་གཟུགས་ཚད་མེད་རྣམས་བསྐྱེད་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར། རྒྱལ་རིགས་བྲམ་ཟེ་ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་རྣམས་སུ་སྐྱེ་བའོ། །ལྷའི་རིགས་ནས་རིགས་སྐྱེའི་སེམས་དཔའ་ནི་སྔར་ལྟར་ལས་རྒྱལ་ཆེན་རིགས་བཞི་ནས་གཞན་འཕྲུལ་དབང་
བྱེད་ཀྱི་ལྷ་རྣམས་དང་སྐལ་པ་མཉམ་པར་སྐྱེ་བའོ། །གཉིས་པ་ཕྱིར་འོང་གི་མིང་ཅན་བར་ཆད་གཅིག་པའི་སེམས་དཔའ་ནི། བྱང་ཆེན་བསམ་གཏན་བཞི་ཐོབ་པ་ནས་སངས་རྒྱས་ཀྱི་ཆོས་མ་འདྲེས་པའི་བར་དུ་ཐོབ་ནས། འཕགས་པའི་བདེན་པ་བཞི་པོ་རྣམས་ཐོབ་པ་ཡིན་ཀྱང་དེ་དག་མངོན་དུ་མི་བྱེད་པ་ཚེ་གཅིག་གིས་ཐོགས་པའོ། །གསུམ་པ་ཕྱིར་མི་འོང་གི་མིང་ཅན་ལ་བརྒྱད་ལས། དང་པོ་ཕྱིར་མི་འོང་བར་དོར་འདའ་བའི་སེམས་དཔའ་ནི། བྱང་ཆེན་བསམ་གཟུགས་མི་འཇིགས་སོགས་ནས་མ་འདྲེས་པའི་བར་ཐོབ་པ་གང་དག་ཚངས་རིས་ནས་འོག་མིན་གྱི་ལྷའི་བར་དུ་སྐྱེ་བར་འགྱུར་ཞིང༌། དེར་སངས་རྒྱས་ནས་སེམས་ཅན་གྱི་དོན་བྱེད་པའོ། །འདི་ཁམས་གསུམ་གྱི་བར་པ་གཟུགས་ཁམས་ཀྱི་གནས་གང་རུང་གཅིག་ཏུ་སངས་རྒྱས་ནས་འདིར་བྱང་ཆུབ་པ་སོགས་སྟོན་པའི་ཕྱིར་བར་དོར་འདའ་བའོ། །གཉིས་པ་སྐྱེས་ནས་འདའ་བའི་སེམས་དཔའ་ནི། བྱང་ཆེན་གང་དག་སེམས་དང་པོ་བསྐྱེད་པ་ཉིད་ཀྱིས་བྱང་ཆུབ་ཏུ་འཚང་རྒྱ་ཞིང་ཞེས་སོགས་གསུང་སྟེ། འོག་མིན་ནས་དགའ་ལྡན་དུ་དེ་ནས་འཛམ་བུའི་གླིང་དུ་གཤེགས་ནས་ཁྱིམ་ནས་ངེས་པར་འབྱུང་སྟེ་བྱང་ཆུབ་ཀྱི་ཤིང་དྲུང་དུ་སྐྱིལ་ཀྲུང་བཅས་མ་ཐག་ཏུ་སེམས་བསྐྱེད་པ་སྟེ་ཕུང་པོ་ལྷག་བཅས་ཀྱིས་འདའོ། །གསུམ་པ་འདུ་བྱེད་དང་བཅས་པས་འདའ་བ་ནི། བྱང་ཆེན་ཕྱིན་དྲུག་ལ་སྤྱོད་པ་འཇིག་རྟེན་གྱི་ཁམས་
ནས་འཇིག་རྟེན་གྱི་ཁམས་སུ་འདོང་ཞིང་སེམས་ཅན་གྱི་དོན་ལ་རྟག་ཏུ་བརྩོན་པའོ། །འདི་སེམས་ཅན་གྱི་དོན་ལ་བརྩོན་པའི་ཕྱིར་འདུ་བྱེད་དང་བཅས་ཏེ་འདའ་བའོ། །བཞི་པ་འདུ་བྱེད་མེད་པར་འདའ་བའི་སེམས་དཔའ་ནི། བྱང་ཆེན་སེམས་དང་པོ་བསྐྱེད་པ་ཉིད་ཀྱིས་བྱང་ཆུབ་སེམས་དཔའི་སྐྱོན་མེད་པ་ལས་ཡང་དག་པར་འདའ་ཞིང༌། ཕྱིར་མི་ལྡོག་པའི་ས་ལ་ཡང་ངེས་པར་གནས་ནས་སངས་རྒྱས་ཀྱི་ཆོས་ཐམས་ཅད་བསྐྲུན་པར་བྱེད་པའོ། །འདི་རིགས་ཀྱི་ཁྱད་པར་ལས་ཆེས་མྱུར་བར་བྱང་ཆུབ་པའི་ཕྱིར་བྱེད་མེད་དུ་འདའ་བའོ། །ལྔ་པ་ལ་གཟུགས་སུ་ཉེར་འགྲོ་ལ་གཉིས་ཀྱི་དང་པོ་འོག་མིན་འགྲོ་ལ་འཕར་བ་གསུམ་ལས། དང་པོ་འཕར་བའི་སེམས་དཔའ་ནི། བྱང་ཆེན་བསམ་གཏན་བཞི་བསྒྲུབས་ཏེ་བསམ་གཏན་ལས་ཡོངས་སུ་ཉམས་ནས་བསམ་གཏན་དང་པོ་བསྒྲུབས་ཏེ་ཚངས་རིས་ཀྱི་ལྷ་རྣམས་སུ་སྐྱེ་ཞིང་བསམ་གཏན་རྣམས་བསྒྲུབས་ནས་འོག་མིན་ཉིད་དུ་སངས་རྒྱས་ནས་ཞིང་སྣ་ཚོགས་སུ་བླ་མེད་རྫོགས་བྱང་དུ་འཚང་རྒྱ་བའོ། །ཕྱེད་དུ་འཕར་བའི་སེམས་དཔའ་ནི། ཚངས་པའི་འཇིག་རྟེན་ནས་ཤི་འཕོས་ནས་གནས་གཙང་གཅིག་གམ་གཉིས་ལས་བརྒལ་ཏེ་འོག་མིན་དུ་སྐྱེས་ནས་སོགས་སྔར་ལྟར་རོ། །གནས་ཐམས་ཅད་དུ་འཆི་འཕོ་བའི་སེམས་དཔའ་ནི། བྱང་ཆེན་གང་དག་བདག་ཉིད་
ཀྱི་ལུས་དེ་བཞིན་གཤེགས་པའི་སྐུ་ལྟ་བུར་བསྟན་ནས་དགའ་ལྡན་གྱི་གནས་སྦྱངས་ནས་ཚངས་རིས་ནས་འོག་མིན་གྱི་ལྷའི་བར་དུ་སྐྱེས་ཏེ་ཐབས་ལ་མཁས་པས་ངན་སོང་གི་འགྲོ་བ་ལ་ཆོས་སྟོན་པའོ། །གཉིས་པ་སྲིད་རྩེའི་མཐར་ཐུག་འགྲོ་བའི་སེམས་དཔའ་ནི། བྱང་ཆེན་བསམ་གཟུགས་སྒྲུབ་པར་བྱེད་པ་དག་ཚངས་རིས་ནས་དགེ་རྒྱས་ཀྱི་བར་དང༌། ནམ་མཁའ་མཐའ་ཡས་ནས་སྲིད་རྩེའི་བར་དུ་སྐྱེ་ཞིང་སངས་རྒྱས་ཀྱི་ཞིང་སྣ་ཚོགས་སུ་སྐྱེ་བར་འགྱུར་བའོ། །དྲུག་པ་གཟུགས་ཀྱི་ཆགས་བཅོམ་གཟུགས་མེད་ཉེར་འགྲོའི་སེམས་དཔའ་ནི། བྱང་ཆེན་བསམ་གཟུགས་ལ་སྙོམས་པར་འཇུག་ཅིང་ནམ་མཁའ་མཐའ་ཡས་ནས་སྲིད་རྩེའི་བར་དུ་སྐྱེ་ཞིང༌། སངས་རྒྱས་ཀྱི་ཞིང་སྣ་ཚོགས་སུ་སྐྱེ་བའོ། །འདི་ནི་འདི་ནས་ཤི་འཕོས་ནས་གཟུགས་སུ་མ་སོང་བར་གཟུགས་མེད་དུ་སྐྱེའོ། བདུན་པ་མཐོང་ཆོས་ཚེ་འདི་ལ་ཞི་བ་མྱ་ངན་ལས་འདའ་བའི་སེམས་དཔའ་ནི། བྱང་ཆེན་ཕྱིན་དྲུག་ལ་སྤྱོད་པའི་ཚེ་ལུས་ལ་སྐྱེས་བུ་ཆེན་པོའི་མཚན་སོ་གཉིས་ཀྱིས་བརྒྱན་ཞིང་དབང་པོ་ཡོངས་སུ་དག་པ་བླ་ན་མེད་པ་དང་ལྡན་ཏེ། ནམ་ཡང་ངན་སོང་སོགས་སུ་མི་སྐྱེ་ཞིང༌། སེམས་ཅན་གང་གིས་བྱང་ཆེན་དེ་མཐོང་བ་དེ་དག་ཀྱང་སེམས་རབ་ཏུ་དང་བ་དེ་ཉིད་ཀྱིས་རིམ་གྱིས་ཐེག་པ་གསུམ་གྱིས་ཡོངས་སུ་མྱ་ངན་ལས་འདའ་བར་བྱེད་པའོ། །འདི་བྱང་ཆེན་དེ་གང་གིས་
མཐོང་བ་དེ་མྱ་ངན་ལས་འདའ་བས་མཐོང་ཆོས་ཞིའོ། །བརྒྱད་པ་ལུས་མངོན་བྱེད་ཀྱི་སེམས་དཔའ་ནི། བྱང་ཆེན་ཡུམ་ལ་བརྩོན་པ་གང་བསམ་གཟུགས་ཚད་མེད་ནས་འགོག་པའི་བར་ལ་སྙོམས་པར་འཇུག་ཅིང་ཐོད་རྒལ་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་སྣ་ཚོགས་སུ་འཚང་རྒྱ་བའོ། །ཅིའི་ཕྱིར་ལུས་མངོན་བྱེད་ཅེས་བྱ་ཞེ་ན། མྱང་འདས་དང་འཕྲ་བའི། འགོག་སྙོམས་སེམས་མེད་པའི་ལུས་ལ་བརྟེན་ཏེ་སྐྱེད་པས་སོ་ཞེས་འཆད་དེ་བྱེ་སྨྲ་དང་མཐུན་ནོ། །སློབ་དཔོན་དབྱིག་གཉེན་ནི། འགོག་པ་ལས་ལང་བ་ན་འགོག་པ་ནི་མྱང་འདས་དང་འདྲ་བར་ཆེས་ཞི་བ་ཡིན་ནོ། །སྙམ་དུ་སེམས་པས་རྣམ་ཤེས་དང་བཅས་པའི་ལུས་ཉོན་མོངས་ཞི་བ་སྔོན་མ་ཐོབ་པ་ཐོབ་པས་ལུས་མངོན་བྱེད་དོ། །ཞེས་བཞེད་དོ། །བཞི་པ་བསེ་རུ་ལྟ་བུའི་བྱང་སེམས་ནི། བྱང་ཆེན་གང་དག་སངས་རྒྱས་མི་བཞུགས་ཤིང་ཉན་ཐོས་རྣམས་ཀྱང་མེད་པའི་འཇིག་རྟེན་གྱི་ཁམས་སུ་རང་བྱང་ཆུབ་ཏུ་མངོན་པར་རྫོགས་པར་འཚང་རྒྱ་ཞིང་སེམས་ཅན་དཔག་ཏུ་མེད་པ་ཐེག་པ་གསུམ་གྱིས་ཡོངས་སུ་སྨིན་པར་བྱས་ནས་བླ་མེད་རྫོགས་བྱང་དུ་འཚང་རྒྱ་བའོ། །ཞེས་སོ། །དེ་ལྟར་ན་དབང་པོ་རྟུལ་དང་རྣོན་པོ་དག་ཅེས་པས་ཞུགས་པ་དང་པོ་ཆགས་བྲལ་སྔོན་སོང་གི་ཞུགས་པ་གཉིས་དང་གསུམ་བསྟན་ཅིང༌། དད་དང་མཐོང་ཐོབ་ཅེས་
པས་ཆགས་བྲལ་སྔོན་སོང་གི་འབྲས་གནས་གཉིས་ཀ་བསྟན་ལ། འོག་མིན་འགྲོ་འཕར་གསུམ་གྱི་དབྱེ་གཞི་ཡིན་པས་ངོར་ལ་གཞན་རྣམས་སྒྲ་ཇི་བཞིན་དུ་བགྲང་ངོ༌། །སློབ་དཔོན་སེང་གེ་བཟང་པོའི་བཞེད་བལྟར་ན། རྒྱུན་ཞུགས་ལ་ཞུགས་གནས་གཉིས། ཞུགས་པ་ལ་དབང་པོ་རྣོ་རྟུལ་གཉིས། གནས་པ་ལ་ཙམ་ཁྱད་གཉིས། ཁྱད་པར་ཅན་ལ་རིགས་སྐྱེ་གཉིས། ཕྱིར་འོང་ལ་ཞུགས་གནས་གཉིས། །གནས་པ་ལ་ཙམ་ཁྱད་གཉིས། ཕྱིར་མི་འོང་ལ་ཞུགས་གནས་གཉིས། གནས་པ་ལ་བར་དོར་སྐྱེས་ནས་བྱེད་བཅས། བྱེད་མེད་ཀྱིས་འདའ་བ་བཞི། གོང་འཕོ་དང་ལྔ། གོང་འཕོ་ལ་འོག་མིན་འགྲོ་དང༌། སྲིད་རྩེར་འགྲོ་བའི་གཟུགས་ཀྱི་ཆགས་བཅོམ་གཉིས། འོག་མིན་འགྲོ་ལ་འཕར་བ་གསུམ། གཟུགས་ཀྱི་ཆགས་བཅོམ་ལ་མཐོང་ཆོས་ཞི་དང་ལུས་མངོན་བྱེད་གཉིས་སོ། །དེ་ལྟར་ན་རྒྱུན་ཞུགས་ལ་ལྔ། ཕྱིར་འོང་གསུམ། ཕྱིར་མི་འོང་བཅུ། དེའི་སྟེང་དུ་དགྲ་བཅོམ་ཞུགས་པ། རང་རྒྱལ་དང་ཉི་ཤུའོ། །དེ་ཡང་རྩ་བར་བསྟན་པ་བཅུ་བདུན་ཁ་བསྐང་གསུམ་བྱེད་པ་འགྲེལ་པ་དོན་གསལ་དང་རྒྱན་སྣང་གི་དགོངས་པའོ། །འདིའི་སྲིད་རྩེར་འགྲོ་བའི་དབྱེ་བ་ལ་མཐོང་ཆོས་ཞི་དང༌། ལུས་མངོན་བྱེད་བྱས་པ་རྒྱུན་ཞུགས་འབྲས་གནས་ཙམ་པོ་བ། ཕྱིར་འོང་འབྲས་གནས་ཙམ་པོ་བ། །དགྲ་བཅོམ་ཞུགས་པ། འགལ་ལོ་ཞེ་
ན། ཉན་ཐོས་ཀྱི་དབང་དུ་བྱས་ན་བདེན་ལ། བྱང་སེམས་ནི་བསམ་གཟུགས་བརྒྱད་ཀ་བསྒོམས་པས་སྲིད་རྩེ་མཐར་ཐུག་འགྲོ་ཞེས་བྱ་བ། གཟུགས་མེད་ཀྱི་ཏིང་འཛིན་ལ་འཇུག་ནུས་པས་གཟུགས་ཀྱི་ཆགས་བཅོམ་ཞེས་བཤད་པ་ཙམ་ཡིན་པས་མི་འགལ་ལོ་ཞེས་འབུམ་ཕྲག་གསུམ་པ་གསུང་བར་བྱང་ཡེ་འཆད་དོ། །བཞི་པ་དེ་དག་ གང་གིས་མཚོན་བསམ་པ་ནི། དགེ་འདུན་འདི་དག་འདྲ་བ་རྒྱུ་མཚན་དུ་བྱས ་ནས་ཐེག་ཆེན་ལ་ཐེག་དམན་གྱི་མིང་གིས་བཏགས་ནས་བསྟན་ན་གང་དཔེར་བྱེད་ཅེ་ན། འཕགས་པས་ནི་ཐོད་རྒལ་བ་དང་རིམ་གྱིས་པ་གཉིས་དང་མཚུངས་པར་བཤད་ཅིང༌། སློབ་དཔོན་གྱིས་ཐམས་ཅད་རིམ་གྱིས་པ་དང་མཚུངས་པར་བཤད་ལ། ཅིག་ཆར་བ་དང་སྦྱར་བ་ནི་འགྲེལ་པ་སུས་ཀྱང་མ་བཤད་དོ། །འོ་ན་དེ་དག་དང་ཆོས་མཚུངས་དུ་ཞིག་གིས་སྦྱར་ཞེ་ན། སྤངས་རྟོགས་དང་སྐྱེ་བ་ལེན་ཚུལ་དང་གསུམ་གྱིས་སྦྱར་རོ། །འོན་ཀྱང་སྤང་བ་ལ་ལྟོས་ནས་བྱང་སེམས་ལ་ཉན་ཐོས་ཀྱི་རྒྱུན་ཞུགས་དང་ཕྱིར་འོང་ལ་སོགས་པར་བཞག་པ་ནི། དེ་དག་ལ་དེ་དག་གི་མིང་གིས་འདོགས་པའི་ཆོས་མཐུན་པའི་རྒྱུ་མཚན་ཁྱད་པར་ཅན་བསྟན་པར་འདོད་ནས་རྣམ་བཞག་བྱས་པ་ཙམ་ཡིན་གྱི་ཉན་ཐོས་ཀྱི་སྤངས་པའི་རིམ་པ་ཇི་བཞིན་དུ་འདོད་ནས་བཞག་པ་མ་ཡིན་པར་ངེས་སོ་ཞེས་བདག་ཉིད་ཆེན་པོས་གསུངས་པ་ལྟར་རོ། །
ལྔ་པ་ཁྱད་པར་གྱི་ཆོས་གཞན་བསྟན་པ་ལ་གསུམ། མདོའི་དཀའ་གནས། དགེ་འདུན་གྱི་ས་མཚམས། མཚན་ཉིད་པ་དང་བཏགས་པ་བ་བསམ་པའོ། །དང་པོ་ནི་བྱང་སེམས་འཕགས་པ་ལྷ་ཚེ་རིང་པོར་སྐྱེ་བ་མི་འཐད་ཅེ་ན། དེ་ནི་ཚེ་སྔ་མ་ཞིག་ལ་དེར་སྐྱེས་ཕྱིས་མིའི་ནང་དུ་འཕགས་ལམ་ཐོབ་པ་ན་དེ་དབང་རྟུལ་དུ་བཞག་པས་སོ། །ཡང་སྲིད་རྩེར་འགྲོ་དང་གཟུགས་ཀྱི་ཆགས་བཅོམ་གཟུགས་མེད་དུ་སྐྱེ་བར་བཤད་པ་དང༌། སྡུད་པ་སོགས་ལས་བྱང་སེམས་གཟུགས་མེད་དུ་མི་སྐྱེ་བར་བཤད་པ་འགལ་ཞེ་ན། ཉེས་པ་མེད་དེ། སྐྱེ་བར་གསུངས་པ་དེར་སྐྱེ་བའི་རྒྱུ་གཟུགས་མེད་ཀྱི་སྙོམས་འཇུག་ཐོབ་པ་ཙམ་ལ་དགོངས་པའོ། །ཡང་འཕར་བ་གསུམ་གྱི་སྐབས་སུ། བསམ་གཏན་དང་པོའི་རོ་མྱང་ནས་ཕྱི་མ་གསུམ་ཉམས་པ་དང༌། བསམ་གཏན་གྱི་དབང་གིས་ལྷ་གནས་རྣམས་སུ་སྐྱེ་བར་བཤད་པ་མི་འཐད་དེ། ས་མཐོན་པོར་ཆུད་པའི་བྱང་སེམས་ལ་དེ་དག་འགལ་ལོ་ཞེ་ན། ཉེས་པ་མེད་དེ། དང་པོ་བྱང་འཕགས་དབང་བརྟུལ་ཐབས་མི་མཁས་པ་འགའ་ཞིག་ལ་བསམ་པའམ། ཡང་ན་སོ་སྐྱེའི་དུས་སུ་རོ་མྱང་བ་ལ་དགོངས་ལ། གཉིས་པ་ནི་འདོད་བཞིན་དུ་སྙོམ་འཇུག་གི་སེམས་དེ་དག་ལ་བརྟེན་ནས་སྐྱེ་བས་སོ། །གཉིས་པ་ས་མཚམས་ནི། འཕགས་པའི་བཞེད་པས་རྗེས་འབྲང་གཉིས་མཐོང་ལམ་པ་དང༌། ལྷག་མ་རྣམས་སྒོམ་ལམ་པ་ཡིན་ལ་ཁྱད་
པར་དུ་ཞུགས་པ་བཞི་པ་ས་བཅུ་པ་ལས་གསུངས་སོ། །སློབ་དཔོན་ནི་རྒྱུན་ཞུགས་ཙམ་པོ་མཐོང་ལམ་དང༌། ལྷག་མ་རྣམས་བསྒོམ་ལམ་པར་བཞེད་དོ། །གོང་ལྟར་ཡང་འདི་དག་ས་རིམ་ཅན་ལ་སྦྱོར་བ་མི་འཐད་པར་གོ་སྟེ། ཆོས་འབྲང་དང་བར་ཆད་གཅིག་པའི་སྐབས་སུ་ཡང་མདོ་ལས་དེ་དག་སྐྱེ་བ་གཅིག་གིས་ཐོགས་པར་བཤད་པས་སོ། །གསུམ་པ་མཚན་བཏགས་བསམ་པ་ནི། འོ་ན་འདིར་རྒྱུན་ཞུགས་སོགས་བཤད་པ་འདི་དངོས་ཀྱི་སྒྲའམ་འོན་ཏེ་བཏགས་པ་བ་ཡིན་ཞེ་ན་བཏགས་པ་བ་ཡིན་ཏེ། དགོངས་གཞི་ཕྱིར་མི་ལྡོག་པ་འཁོར་ལོའི་མདོ་ལས་གསུང་པ་ལྟར་རྒྱུན་ཞུགས་སོགས་ཀྱི་སྒྲ་ཙམ་འཇུག་པའི་རྒྱུ་མཚན་ལ་དགོངས་ནས། དགོས་པ་དགེ་འདུན་ནི། ཉན་ཐོས་ཀྱི་སྐྱེས་བུ་ཟུང་བཞི་ཁོ་ནའོ་སྙམས་ནས་བྱང་སེམས་ལ་དགེ་འདུན་དུ་མི་མོས་པ་ཡོད་པ་དེ་བཟློག་པའི་ཕྱིར་དུ་སྐྱེས་བུ་ཟུང་བཞིའི་བརྡའ་མཛད་དོ། །དངོས་ལ་གནོད་བྱེད་ནི། བྱང་སེམས་ཡིན་པའི་ཉན་རང་དང་དགྲ་བཅོམ་མཚན་ཉིད་པ་ཡོད་པར་འགྱུར་ལ། དེའི་ཕྱིར་ཐེག་པ་གསུམ་འཆོལ་བར་འགྱུར་རོ། །དེ་ཡན་གྱིས་གདམས་ངག་བཤད་པའི་རིམ་པ་དེ་སོང་ངོ༌། །གསུམ་པ་གདམ་པའི་འབྲས་བུ་ངེས་འབྱེད་ཡན་ལག་ལ་གཉིས། སྦྱོར་ལམ་སྐྱེ་བའི་རྟེན། བརྟེན་པ་སྦྱོར་བའི་ལམ་མོ། དང་པོ་ལུས་རྟེན་ནི། རང་འགྲེལ་ལས། གསུམ་ནི་མི་དག་གི་ནང་
ཁོ་ན་དང་གླིང་གསུམ་དུ་སྐྱེད་པར་བྱེད་དོ། སྔོན་བསྐྱེད་པ་རྣམས་ནི་ལྷ་དག་གི་ནང་དུའང་མངོན་དུ་བྱེད་དོ། །བཞི་པ་ནི། ལྷ་རྣམས་ཀྱི་ནང་དུ་ཡང་སྐྱེད་པར་བྱེད་དོ། །ཞེས་བཤད་དོ། དེས་ན་མཐོང་ལམ་སྐྱེ་བའི་རྟེན་ལ་སྐྱེ་དགོས་སོ། །སེམས་རྟེན་ནི། གཙོ་བོར་བསམ་གཏན་ས་དྲུག་གང་ཡང་རུང་བ་ལ་བརྟེན་ནོ། །གཉིས་པ་བརྟེན་པ་སྦྱོར་བའི་ལམ་ལ་བཞི། ངོ་བོ། དབྱེ་བ། ཕྱེ་བའི་བློ་གང་ཡིན་བརྟགས་པ། ཁྱད་པར་རོ། །དང་པོ་ངོ་བོ་ལ་གཉིས། ཐུན་མོང་དང༌། སོ་སོའི་ངོ་བོའོ། །དང་པོ་ཐུན་མོང་གི་ངོ་བོ་ནི། ཐོས་པ་དང་བསམ་པ་དང་བསྒོམ་པས་ངེས་པར་རྟོགས་པ་སྟེ། དེ་ཡང་སྒོམ་བྱུང་གཙོ་ཆེ་བའོ། །གཉིས་པ་སོ་སོའི་ངོ་བོ་ནི། བྱང་སེམས་མཉམ་པར་བཞག་པས་ཡིད་ཀྱི་བརྗོད་པ་ལས་མ་གཏོགས་པར་གཟུགས་ལ་སོགས་པའི་དོན་རྣམས་མ་མཐོང་གི་ཡིད་ཀྱིས་བརྗོད་པ་ཁོ་ན་རང་སྤྱིའི་མཚན་ཉིད་དུ་སྣང་བར་མཐོང་བ་སྣང་བ་ཐོབ་པའི་ཏིང་ངེ་འཛིན་ནམ་ཆོས་ལ་ངེས་རྟོག་གི་བཟོད་པ་དང་པོ་ནི་དྲོད་དོ། །དྲོད་དུ་ཐོབ་པའི་ཆོས་ཀྱི་སྣང་བ་དེ་ཉིད་ཇེ་ཆེར་འཕེལ་བར་བྱ་བའི་ཕྱིར་མི་གནས་པའི་བྱེད་པས་བརྩོན་འགྲུས་བརྟན་པོ་རྩོམ་པ་ནི་སྣང་བ་མཆེད་པའི་ཏིང་ངེ་འཛིན་ཏེ་རྩེ་མོའོ། །དེ་ལྟར་བརྩོན་འགྲུས་བརྩམས་པས་ཆོས་ཀྱི་སྣང་བ་ཤས་ཆེར་འཕེལ་ནས་སེམས་ཙམ་ལ་གནས་ཏེ་ཡུལ་དུ་སྣང་བ་འདི་ནི་ནང་གི་སེམས་ཁོ་ནར་ཟད་དོ་ཞེས་རྟོགས་
པའོ། །དེ་ནས་དོན་དུ་སྣང་བ་རྣམས་ནི་སེམས་ཁོ་ནར་ཟད་ཀྱིས་སེམས་ལས་གཞན་མིན་ནོ། །ཞེས་མཐོང་སྟེ་དེའི་ཚེ་ནི་གཟུང་བའི་གཡེང་བ་སྤངས་ལ་འཛིན་པའི་གཡེང་བ་འབའ་ཞིག་ལུས་སོ། །འདི་ནི་གཟུང་མེད་ཀྱི་ཕྱོགས་གཅིག་ལ་ཞུགས་པ་དང༌། འཛིན་པ་མེད་པའི་རྗེས་སུ་སོང་བའི་ཕྱིར་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པའི་ཏིང་ངེ་འཛིན་ཏམ་བཟོད་པའོ། །དེ་ལྟར་གཟུང་བའི་གཡེང་བ་སྤངས་ནས་འཛིན་པའི་གཡེང་བ་ཙམ་ལ་གནས་པ་དེ་ཡང་འདི་སྙམ་དུ་དེ་ལྟར་གཟུང་བ་མེད་ན་འཛིན་པ་ཡང་ཡོད་པར་མི་རིགས་སོ་ཞེས་འཛིན་པའི་གཡེང་བ་ལ་ཆགས་པ་ཡང་དེ་མ་ཐག་ཏུ་སྤངས་ནས་དེ་མ་ཐག་པའི་ཏིང་ངེ་འཛིན་ལ་རེག་པར་བྱེད་དེ་འདི་ནི་དེ་མ་ཐག་པའི་ཏིང་ངེ་འཛིན་ཞེས་བྱའོ། །འདི་ནི་འདིའི་མཇུག་དེ་མ་ཐག་ཏུ་ས་དང་པོར་འཇུག་པས་དེ་མ་ཐག་པའི་ཏིང་ངེ་འཛིན་ཞེས་བྱ་སྟེ་ཆོས་མཆོག་གོ། །དེ་ལྟར་ན་དང་པོ་གསུམ་གྱིས་གཟུང་མེད་ལ་སྒོམ་བྱུང་གི་ངེས་པ་རྙེད་ཀྱང་སེམས་ཙམ་དུ་ཞེན་པས་འཛིན་པའི་གཡེང་བ་མ་ཞི་ལ། བཞི་པས་ནི་སེམས་ཙམ་དུ་ཡང་མི་འཛིན་པས་འཛིན་མེད་ལ་སྒོམ་བྱུང་གི་ངེས་པ་རྙེད་དོ། །དེ་ལྟར་བཞི་པོ་འདི་དག་ནི་བདག་མེད་པའི་དོན་ལ་ལྷག་པར་མོས་པས་མོས་སྤྱོད་ཀྱིས་ཞེས་ཀྱང་བྱའོ། །གཉིས་པ་དབྱེ་བ་ནི། ངོ་བོས་ཕྱེ་ན་དྲོད་རྩེ་བཟོད་མཆོག་བཞི་ཡོད་ལ། ཆེ་འབྲིང་
གིས་ཕྱེ་ན་བཅུ་གཉིས་ཏེ་རེ་རེ་ལ་གསུམ་གསུམ་ཡོད་པས་སོ། །གཞན་ཡང་དྲོད་རྩེ་གཉིས་དང༌། བཟོད་པ་དང་ཆོས་མཆོག་ལ་ཆོས་ལ་ངེས་སེམས་ཀྱི་བཟོད་པ་ཆེ་འབྲིང་ཆུང་གསུམ་དུ་བཤད་དོ། །གསུམ་པ་ཕྱེ་བའི་བློ་གང་ཡིན་བརྟགས་པ་ནི། སྦྱོར་ལམ་མཉམ་བཞག་བདག་མེད་པའི་དོན་ལ་མངོན་སུམ་དུ་ནི་མི་འདོད་དེ། སོ་སྐྱེའི་རྒྱུད་ལ་ཉོན་ཡིད་མངོན་གྱུར་དུ་མི་འཇུག་པའི་སྐབས་སྲིད་པར་ཐལ་བའི་ཕྱིར་ཏེ། །བདག་མེད་མངོན་སུམ་དུ་རྟོགས་པའི་བློ་མངོན་དུ་གྱུར་པའི་ཚེ་བདག་ལྟ་མངོན་དུ་གྱུར་པ་འགལ་བས་སོ། །དེས་ན་སྦྱོར་ལམ་དུ་བདག་མེད་པ་ལ་དམིགས་པ་ནི་བདག་མེད་ཀྱི་དོན་སྤྱི་རང་ལ་སྣང་བ་ལ་དེར་མོས་ནས་འཛིན་པའི་དོན་སྤྱི་འཇལ་བའི་བློ་ཡིན་པའི་ཕྱིར་སྒྲ་དོན་སྣང་བའི་རྟོག་པ་ཡིན་ལ། ཚོགས་ལམ་དུ་བདེན་བཞིའི་དོན་རིག་པའི་ངེས་པའི་འདུ་བྱེད་མ་ཉམས་པ་ལ་དེ་ལྟར་དྲན་པའི་བཅད་ཤེས་ཀྱང་ཡོད་ཅིང༌། བདག་མེད་ཀྱི་ཁྱད་པར་འགའ་ཞིག་ལ་རྗེས་དཔག་ཀྱང་ཡོད་དོ། །དེ་ལྟར་ན་སྦྱོར་ལམ་རང་གི་ངོ་བོ་འཁྲུལ་ཤེས་ཡིན་ཀྱང་ཐ་མལ་བའི་བློ་ལྟར་རྣམ་པ་ཐམས་ཅད་དུ་འཁྲུལ་ཤེས་མ་ཡིན་ཏེ། ཆོས་ཀྱི་དབྱིངས་རྣམ་པར་དག་པའི་རྒྱུ་སྦྱོར་ལམ་དེ་གཅིག་དུ་བྲལ་སོགས་ཀྱི་རྟགས་ལ་བརྟེན་པའི་རྗེས་དཔག་ཡིན་ཟེར་བ་ཡོད་དོ། མཐུན་པ་ཐོས་པའི་བག་ཆགས་བརྟས་པས་བསྐྱེད་པའི་ཕྱིར་རོ། །དོན་གྱི་དབང་འདི་གཟིགས་ནས། །རྗེས་སུ་མཐུན་ལ་ཕྱིན་ཅི་ལོག །
རྗེས་སུ་འབྲེལ་བཅས་བཟློག་པ་དང༌། །ཕྱིན་ཅི་མ་ལོག་ཕྱིན་ཅི་ལོག །རྗེས་སུ་འབྲེལ་མེད་སྒོམ་པའོ། །ཞེས་རྗེ་བཙུན་གྱིས་གསུངས་པའི་དོན་འགྲེལ་པ་ན་མཁས་མཆོག་དབྱིག་གཉེན་གྱིས་མ་འཁྲུལ་པའི་རྗེས་སུ་མཐུན་པའི་འཁྲུལ་ཤེས་ནི་སོ་སྐྱེ་རྣམས་ཀྱི་སྒོམ་ལམ་དང༌། ཕྱིན་ཅི་ལོག་གི་སྒོམ་སྤང་དང་འབྲེལ་བ་རང་གི་ངོ་བོ་མ་འཁྲུལ་པ་ནི་འཕགས་པ་སློབ་པའི་སྒོམ་ལམ་དང༌། ཕྱིན་ཅི་ལོག་དང་རྗེས་འབྲེལ་གཉིས་ཀ་མེད་པ་ནི་མི་སློབ་པའི་སྒོམ་ལམ་ལ་གསུངས་ཤིང༌། འགྲེལ་བཤད་དུ་ཡང་དང་པོ་དྲན་ཉེ་ནས་སྟོབས་སྒོམ་པའི་བར་དང༌། གཉིས་པ་བྱང་ཆུབ་ཡན་ལག་བདུན་དང་ལམ་གྱི་ཡན་ལག་སྒོམ་པའི་བར་ལ་གསུང་ངོ༌། །དེས་ན་ཚུར་མཐོང་གིས་ཆོས་ཉིད་མངོན་སུམ་གྱིས་རྟོགས་པ་ཡོད་པར་འདོད་པར་ནི་མཁས་པ་རྣམས་ཀྱིས་མཉན་པ་ཙམ་ཡང་སྤངས་ཏེ། ཐམས་ཅད་མཁྱེན་པ་ཞི་བ་འཚོས། །ཚུ་རོལ་མཐོང་བ་ཐམས་ཅད་ཀྱི། །སེམས་ནི་དེ་ལ་ནོར་པའི་ཕྱིར། །ཡང་དག་དངོས་པོ་ཅུང་ཟད་ཀྱང༌། །མངོན་སུམ་དག་གིས་གྲུབ་པ་མེད། ཅེས་དང༌། རྒྱལ་བའི་རྒྱལ་ཚབས་ཀྱིས། ཕྲ་ཕྱིར་ཐོས་པའི་ཡུལ་མིན་ཕྱིར། །དོན་དམ་ཡིན་ཕྱིར་བསམ་བྱ་མིན། །ཆོས་ཉིད་ཟབ་ཕྱིར་འཇིག་རྟེན་པའི། །སྒོམ་པ་ལ་སོགས་ཡུལ་མ་ཡིན། །གང་ཕྱིར་གཟུགས་ལ་དམུས་ལོང་བཞིན། །བྱིས་པས་དེ་སྔོན་མཐོང་
མ་མྱོང༌། ཞེས་པ་ལྟར་ཁས་བླང་ངོ༌། །བཞི་པ་ཐེག་ཆེན་སྦྱོར་ལམ་གྱི་ཁྱད་པར་ལ་གསུམ། དམིགས་རྣམ་རྒྱུ་གསུམ། །ངེས་འབྱེད་བཞིའི་གྲངས་བཞིན་སྤང་བྱ་བཞི། མཚུངས་ལྡན་རྟོག་པ། ཡོངས་འཛིན་དགེ་བའི་བཤེས་ཀྱི་ཁྱད་པར་རོ། །དང་པོ་དམིགས་རྣམ་རྒྱུ་གསུམ་གྱི་ཁྱད་པར་ནི། དམིགས་པ་མི་རྟག་སོགས་ཀྱིས་ཁྱད་པར་དུ་བྱས་པའི་བདེན་བཞི་རྣམ་པ་མངོན་པར་ཞེན་པ་ཐམས་ཅད་འགོག་པ་སྟེ་ཆོས་ཀྱི་བདག་མེད་དང་མཐུན་པའི་རྣམ་པ། རྒྱུ་ཐེག་པ་གསུམ་ཆར་གྱི་རྟོགས་རིགས་ཚང་བར་སྐྱེད་པའི་རྒྱུའོ། །གཉིས་པ་མཚུངས་ལྡན་རྟོག་པའི་ཁྱད་པར་ལ་གཉིས། སྤང་བྱ་རྟོག་པ། སྤོང་བྱེད་གཉེན་པོའོ། །དང་པོ་སྤང་བྱ་རྟོག་པ་བཤད་པ་ལ་བདུན། །གང་གིས་རྟོག་པའི་ངོ་བོ། གང་ལ་རྟོག་པའི་ཡུལ། ཇི་ལྟར་རྟོག་པའི་ཚུལ། རྟོག་པ་དེའི་རབ་དབྱེ། གྲངས་ངེས་པ། གོ་རིམ་ངེས་པ། མུ་བརྩི་བའོ། །དང་པོ་ལ་གཉིས། སྤྱི་དང༌། བྱེ་བྲག་ཏུ་བསམ་པའོ། དང་པོ་སྤྱིར་བསམ་པ་ནི། མཛོད་ལས། རྟོག་དང་དཔྱོད་བརྩིང་ཞི་བ་ཉིད། ཅེས་རྩིང་བའི་རྣམ་པ་ཅན་དང༌། རྣམ་འགྲེལ་ལས། ཤེས་གང་གང་ལ་སྒྲ་དོན་འཛིན། །དེ་ནི་དེ་ལ་རྟོག་པ་ཡིན། ཞེས་མིང་དོན་འདྲེར་རུང་དུ་འཛིན་པ་དང༌། དབུས་མཐའ་ལས། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། ཞེས་གཉིས་སུ་སྤང་བའི་ཁམས་གསུམ་པའི་བློ་ཐམས་ཅད་ལ་རྟོག་པར་
བཤད་པ་རྣམས་ལས་འདི་བར་པ་ཡིན་ནོ། །གཉིས་པ་བྱེ་བྲག་ཏུ་བསམ་པ་ནི། འོ་ན་རྟོག་པ་འདི་དག་དགག་པའམ་སྒྲུབ་པའི་རྣམ་པ་ཅན་གང་ཡིན་ཞེ་ན། སྔ་རབས་པ་ཕལ་མོ་ཆེ་དགག་རྟོག་ཏུ་འདོད་ཀྱང་རྩ་འགྲེལ་གང་ལས་ཀྱང་དགག་རྟོག་ཏུ་བསྟན་པ་མེད་པས་སྒྲུབ་རྟོག་ཏུ་འདོད་པར་བྱའོ། །དགག་རྟོག་མིན་ན་འདི་ཁྱད་པར་བྱེད་ཆོས་སུ་ཇི་ལྟར་འགྱུར་ཞེ་ན། རྟོག་པ་བྱེད་ཆོས་སུ་འགྲོ་བ་དགག་པའི་རྣམ་པ་ཅན་ཡིན་པས་མིན་གྱི་རང་གིས་སྐྱེད་པའི་མཐོང་སྒོམ་གྱི་ལམ་གྱིས་ཟད་པར་བྱ་ནུས་པས་རང་འབྲས་ཀྱི་སྤང་བྱར་ལྡན་པའི་སྒོ་ནས་ཡིན་ནོ། །གཉིས་པ་གང་ལ་རྟོག་པའི་ཡུལ་ནི། གཟུང་བ་དང༌། འཛིན་པ་གཉིས་ཡིན་ནོ། འོ་ན་འདིའི་གཟུང་འཛིན་གང་ལ་བྱེད་ཅེ་ན། སྤྱིར་སངས་རྒྱས་བ་ལ་གཟུང་འཛིན་གྱི་འཇོག་ཚུལ་གསུམ་སྟེ། སྐྱེ་མཆེད་དང༌། ཤེས་དང་ཤེས་བྱ་དང༌། བདག་དང་བདག་གི་དབང་དུ་བྱས་པའོ། །དང་པོ་ལྟར་ན་ཡུལ་དྲུག་གཟུང་བ་དང༌། དབང་པོ་དྲུག་འཛིན་པ་ཡིན་ལ། གཉིས་པ་ལྟར་ན་བེམ་པོ་ཐམས་ཅད་གཟུང་བ་དང༌། ཤེས་པ་ཐམས་ཅད་འཛིན་པའོ། །གསུམ་པ་ལྟར་ན་བདག་ནི་འཛིན་པ་དང་བདག་གི་བ་ནི་གཟུང་བའོ། །དེ་ལ་འདིར་ནི་ཕྱི་མའི་དབང་དུ་བྱས་པ་སྟེ་གཟུང་བ་ནི་རྫས་བཏག་གི་བདག་གིས་སྤྱད་པར་བྱང་སྟེ་བཟའ་བྱའོ། འཛིན་པ་ནི་དེ་ལ་སྤྱོད་པར་བྱེད་པ་པོ་སྟེ་ཟ་བ་པོའོ། ཕྱི་མ་འདི་
བདག་གམ་སེམས་ཅན་དུ་རྟོག་པར་བཤད་ཀྱང་དེ་དག་དངོས་མིན་གྱི་དེ་དག་ཏུ་སྒྲོ་བཏགས་པའི་གཞི་ཕུང་པོ་ཁམས་སྐྱེ་མཆེད་ཀྱི་ཆོས་ཙམ་ཞིག་ལ་བཟུང་ངོ༌། །དེ་ཡང་རྟག་གཅིག་རང་དབང་ཅན་གྱི་གང་ཟག་ཡུལ་ལ་འཛིན་པ་པོར་མི་ཞེན་ཀྱང་བདག་དེས་དབེན་པའི་ཆོས་ཙམ་ཞིག་ལ་འཛིན་པ་པོ་སྒྲོ་འདོགས་སྐྱེ་ལ། ཆོས་དེ་ལ་ཡང་དོན་དམ་རྫས་གྲུབ་ཀྱི་དངོས་པོར་བཟུང་ནས་ཞེན་པ་དང༌། དོན་ལ་མ་གྲུབ་པའི་བཏགས་པ་ཙམ་དུ་བཟུང་ནས་དེ་ལྟར་རྟོག་པ་གཉིས་སུ་འགྱུར་རོ། །གསུམ་པ་ཇི་ལྟར་རྟོག་པའི་ཚུལ་ནི། ཡུལ་དེ་དག་ལ་རྟོག་པས་ཇི་ལྟར་ཞེན་ཞེ་ན། ཀུན་བྱང་གི་གཟུང་བ་ལ་དམིགས་ནས་རིམ་པ་ལྟར་འདི་ནི་མཐའ་གཅིག་ཏུ་དོར་བྱའི་གཟུང་བའོ་སྙམ་དུ་མི་མཐུན་པར་འཛིན་པ་དང༌། འདི་ནི་མཐའ་གཅིག་ཏུ་བླང་བྱའི་གཟུང་བའོ་སྙམ་དུ་མཐུན་པར་འཛིན་པ་གཟུང་རྟོག་དང་པོའི་ཞེན་ཚུལ་ལོ། །འདི་ནི་ཐེག་དམན་གྱི་ལམ་ཡིན་པས་འདི་ལས་ལྡོག་པ་དང༌། འདི་ནི་ཐེག་ཆེན་གྱི་ལམ་ཡིན་པས་འདི་ལ་འཇུག་པར་བྱའོ་སྙམ་དུ་ཞེན་པ་ནི་གཟུང་རྟོག་གི་གཉིས་པའི་ཞེན་ཚུལ་ལོ། །གང་ཟག་ཏུ་བཏགས་པའི་གཞི་རྫས་སུ་གྲུབ་པ་དང༌། དེར་བཏགས་པའི་གཞི་བཏགས་པ་ཙམ་འདི་ནི་ཡུལ་རྣམས་ཀྱི་འཛིན་པ་པོའམ། ལོངས་སྤྱོད་པ་པོའོ། །སྙམ་དུ་ཞེན་པ་ནི་འཛིན་རྟོག་གཉིས་་རྩེ་མོའི་སྐབས་ཀྱིས་སོ། ཀྱི་ཞེན་ཚུལ་ལོ། །དེ་ལྟར་ན་འདིར་སེམས་ཅན་དང་སྐྱེས་བུ་
ཞེས་པ་ནི་ཆོས་དང་གང་ཟག་གཉིས་ཀྱི་ནང་ནས་གང་ཟག་འབའ་ཞིག་ལ་བསམ་པ་ནི་མིན་གྱི་ཡུལ་འཛིན་པ་པོ་ཙམ་གྱི་མཚོན་བྱེད་དོ། །བཞི་པ་རྟོག་པ་དེའི་རབ་དབྱེ་ནི། །རྩ་བ་གཟུང་རྟོག་དང་འཛིན་རྟོག་གཉིས། གཟུང་རྟོག་ལ་ཀུན་ནས་ཉོན་མོངས་ཕྱོགས་ཀྱི་གཟུང་རྟོག་དང༌། རྣམ་བྱང་ཕྱོགས་ཀྱི་གཟུང་རྟོག་གཉིས། འཛིན་རྟོག་ལ་རྫས་འཛིན་རྟོག་པ་དང༌། བཏགས་འཛིན་རྟོག་པ་གཉིས། བཞི་པོ་རེ་རེ་ལ་ཡང་དགུ་རེ་སྟེ། ལས་རྒྱུ་འབྲས་དང་དེ་ཁོ་ན་ཉིད་ལ་རྨོངས་པའི་མ་རིག་པ་དང༌། མ་རིག་པས་ཀུན་ནས་བསླང་བའི་ལས་ཀྱིས་བསྐྱེད་པའི་གཟུགས་སོགས་ཟག་བཅས་ཀྱི་ཕུང་པོ་དང༌། མིང་བཞི་གཟུགས་དང་བཅས་པ་ལ་བདག་དང་བདག་གི་བར་ཞེན་པ་དང༌། འཇིག་ལྟས་ཞེན་པའི་ཡུལ་ལ་མཐར་ལྟས་རྟག་ཆད་ཀྱི་མཐའ་གཉིས་སུ་ཞེན་པ་དང༌། དེ་ལྟར་ཞེན་པས་ཀུན་ཉོན་དང་རྣམ་བྱང་གི་སྐྱོན་ཡོན་མི་ཤེས་པ་དང༌། དེ་ལྟར་མ་ཤེས་པས་སྦྱིན་པ་ནས་མ་འདྲེས་པའི་བར་གྱི་འཕགས་ལམ་ལ་མི་གནས་པ་དང༌། དེ་ལྟར་ལམ་ལས་གོལ་བས་ཆོས་རྣམས་ལ་ཕྱིན་ཅི་ལོག་ཏུ་དམིགས་པ་དང༌། དེ་ལྟར་ཕྱིན་ཅི་ལོག་ཏུ་དམིགས་པས་བདག་གི་ཆ་ལ་ཆགས་པ་དང་གཞན་གྱི་ཆ་ལ་སྡང་བ་དང༌། རྣམ་པར་དག་པ་མྱང་འདས་བརྒྱུད་ནས་བསྐྱེད་པའི་སྡུག་བསྔལ་ཏེ་མཐོ་རིས་སྐྱེད་པའི་ཟག་བཅས་རྣམས་ཀྱང་སྐྱེ་བའི་རྒྱུ་ཡིན་པ་དགུ་
གཟུང་རྟོག་དང་པོའི་ཞེན་ཡུལ་ལོ། །རྣམ་བྱང་དུ་མ་སྤུང་བའི་ཕུང་པོ་དང༌། སྐྱེ་བའི་སྒོའི་དོན་སྐྱེ་མཆེད་དང༌། རིགས་ཀྱི་དོན་ཁམས་དང༌། སྐྱེ་བའི་དོན་རྟེན་འབྲེལ་མ་བྱུང་བ་ལས་བྱུང་བ་སྟེ་ལུགས་ལྡོག་དང༌། ཟབ་མོ་སྤྲོས་པ་དང་བྲལ་བའི་སྟོང་ཉིད་དང༌། དོན་གཉིས་ཕུན་ཚོགས་ཀྱི་ཕ་རོལ་ཏུ་ཕྱིན་བྱེད་ཕར་ཕྱིན་དང༌། མཐོང་སྤང་གི་སྤང་བྱ་དང་འབྲལ་བར་བྱེད་པ་མཐོང་ལམ་དང༌། བསམ་གཟུགས་ཀྱི་ངོ་བོ་སྒོམ་ལམ་དང༌། བསླབ་པ་ཡོངས་སུ་རྫོགས་པའི་མི་སློབ་པའི་ལམ་དང་དགུ་ནི་གཟུང་རྟོག་གཉིས་པའི་ཞེན་ཡུལ་ལོ། །བདག་སྟེ་ཡུལ་གྱི་འཛིན་པ་པོ་གཞན་ལ་མ་ལྟོས་པའི་རང་དབང་ཅན་དང༌། བདག་ཟླ་མེད་པའི་གཅིག་པུ་དང༌། བདག་རྣམ་ཤེས་ཀྱི་གོ་འབྱེད་པའི་རྒྱུ་དང༌། བདག་ལྟ་བ་པོ་ནས་ཤེས་པ་པོའི་རྫས་དང༌། བདག་མ་རིག་པ་ནས་རྒ་ཤིའི་བར་གྱི་ཀུན་ནས་ཉོན་མོངས་པ་གསུམ་དང༌། བདག་འཇིག་རྟེན་པའི་བསམ་གཟུགས་ཀྱི་འགོག་པ་ལས་འདོད་ཆགས་བྲལ་བ་དང༌། བདག་བདེན་བཞིའི་མཚན་ཉིད་མངོན་དུ་མཐོང་བའི་མཐོང་ལམ་དང༌། བདག་རྣམ་ཐར་མཐར་གནས་ཀྱི་ངོ་བོར་གྱུར་པའི་སྒོམ་ལམ་དང༌། བདག་དེ་ཡང་དག་པར་དགོས་པ་བསྒྲུབས་ཟིན་པའི་མི་སློབ་ལམ་གྱི་རྟེན་གྱི་རྫས་སུ་རྟོག་པ་ནི་འཛིན་རྟོག་དང་པོ་དགུའོ། །གཟུགས་སོགས་ཀྱི་ཕུང་པོ། མིག་སོགས་ཀྱི་སྐྱེ་མཆེད། གཟུགས་ཀྱི་ཁམས་སོགས་ཁམས་བཅོ་བརྒྱད། མ་རིག་
སོགས་རྟེན་འབྲེལ་བཅུ་གཉིས། ཕྱོགས་མཐུན་སོ་བདུན་གྱི་རྣམ་བྱང༌། རྣམ་ཐར་སྒོ་གསུམ་གྱི་ངོ་བོ་མཐོང་ལམ། བསམ་གཏན་གཟུགས་མེད་ཀྱི་སྒོམ་ལམ། ཉན་ཐོས་སོགས་ལས་ཕུལ་དུ་བྱུང་བའི་སྟོང་ཉིད་རྟོགས་པའི་ཁྱད་པར་གྱི་ལམ། སྟོབས་ལ་སོགས་པ་མི་སློབ་པའི་ལམ་རྣམས་ཀྱི་རྟེན་བཏགས་པ་ཙམ་གྱི་འཛིན་པའོ། །སྙམ་དུ་ཞེན་པ་དང་དགུ་ནི་འཛིན་རྟོག་གཉིས་པའོ། །དེ་ལྟར་རྟོག་པ་སུམ་ཅུ་རྩ་དྲུག་པོ་དེ་ཁམས་ཀྱིས་དབྱེ་ན་ཁམས་གསུམ་རེ་རེ་ལ་སོ་དྲུག་རེ་བརྩིས་པས་བརྒྱ་དང་བརྒྱད་དོ། །ལྔ་པ་གྲངས་ངེས་པ་ནི། བརྟག་བྱ་ལ་གཟུང་འཛིན་གཉིས་སུ་གྲངས་ངེས་པས་དེ་ལ་རྟོག་པ་ཡང་གཉིས་ཡིན་ལ། གཟུང་པ་ལ་ཡང་ཀུན་བྱང་ངམ་ཐེག་པ་ཆེ་ཆུང་གི་རྣམ་བྱང་གཉིས་སུ་ངེས་པས་གཟུང་རྟོག་གཉིས་དང༌། འཛིན་པར་ཞེན་པའི་ཡུལ་ལ་ཡང་རྫས་བཏགས་སུ་ངེས་པའི་དེའི་ཡུལ་ཅན་གྱི་རྟོག་པ་གཉིས་སུ་གྲངས་ངེས་སོ། །རེ་རེ་ལ་དགུ་དགུར་ཕྱེ་བ་ནི་གདུལ་བྱ་འཁོར་དུ་ཉེ་བའི་བསམ་པ་ཅན་ལ་བསྟན་པ་ཡིན་གྱི་དངོས་པོ་ལ་གནས་པའི་གྲངས་ངེས་མིན་ནོ། །དྲུག་པ་གོ་རིམ་ངེས་པ་ནི། རྩ་བའི་རྟོག་པ་ནི་ངེས་འབྱེད་བཞིའི་གོ་རིམ་དང་བསྟུན་ལ་ཡན་ལག་དགུ་དགུར་ཕྱེ་བ་ནི་བརྗོད་འདོད་ཙམ་དུ་ཟད་ཀྱི་རྒྱུ་མཚན་མེད་དོ། །བདུན་པ་མུ་བཞི་བརྩི་བ་ནི། གཟུང་རྟོག་ཡིན་ལ་འཛིན་རྟོག་མ་ཡིན་པའི་མུ་ཡུལ་དྲུག །འཛིན་རྟོག་ཡིན་ལ་
གཟུང་རྟོག་མ་ཡིན་པ་སྐད་ཅིག་མ་གཅིག་དང་ལྡན་པའི་རྣམ་རིག །གཉིས་ཀ་ཡིན་པ་སྐད་ཅིག་མ་གཞན་གྱི་རྣམ་རིག །གཉིས་ཀ་མ་ཡིན་པ་རྣམ་པ་དེ་དག་དང་བྲལ་བའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ཡང་མུ་དང་པོ་ནི་སེམས་བྱུང་མ་གཏོགས་པའི་ཆོས་དང་བཅས་པའི་ཡུལ་དྲུག་ལ་རྟོག་པ་ཡིན་ལ། གཉིས་པ་དང་གསུམ་པའི་ཁྱད་ནི་རྗེས་སུ་སྐྱེས་པའི་ངེས་ཤེས་ཀྱི་ཡུལ་དུ་མ་བྱས་པ་དང་བྱས་པའོ། །འདི་ནི་ཉི་སྣང་ལས་འབྱུང་བ་ལྟར་བཀོད་པ་སྟེ། གཟུང་འཛིན་གྱི་རྟོག་པ་བཤད་པའི་ཞར་ལ་སྤྱི་སྐད་ལ་གྲགས་ཚོད་ཀྱི་གཟུང་འཛིན་ལ་མུ་བརྩིས་པ་ཡིན་ཏེ་སྐབས་འདིའི་གཟུང་འཛིན་དང་མི་གཅིག་གོ། །གཉིས་པ་སྤོང་བྱེད་གཉེན་པོ་ནི་རྩེ་སྦྱོར་དུ་འཆད་དོ། །གསུམ་པ་ཡོངས་འཛིན་དགེ་བའི་བཤེས་ཀྱི་ཁྱད་པར་ནི། སློབ་དཔོན་འཕགས་པའི་བཞེད་པ་ལྟར་བཤད་ན། རྩ་བའི་རྐང་པ་དང་པོས་ནང་གི་ཡོངས་འཛིན་ཐབས་མཁས་དང༌། གཉིས་པས་ཕྱིའི་ཡོངས་འཛིན་དགེ་བའི་བཤེས་གཉེན་དང༌། གསུམ་པས་དེ་གཉིས་ཀའི་མི་མཐུན་ཕྱོགས་བསྟན་ཏེ། དང་པོ་ནི། སྐྲག་པ་དང༌། དངངས་པ་དང༌། ཤིན་ཏུ་དངངས་པ་སྟེ་སྐྲག་པ་ཆུང་འབྲིང་ཆེ་གསུམ་གྱི་གཉེན་པོར། སེམས་མི་འགོང༌། ཡང་དག་པར་མི་འགོང༌། ཡང་དག་པར་འགོང་བར་མི་འགྱུར་བའི་རྒྱུ་རྣམ་མཁྱེན་ཡིད་བྱེད་དང་ལྡན་པས། ཕུང་སོགས་རྣམ་ཐར་སྒོ་གསུམ་གྱི་རང་བཞིན་དུ་མི་དམིགས་པའི་ཚུལ་གྱིས་རྟོགས་ཤིང་
གཞན་ལ་སྟོན་པའི་སྦྱིན་པ། དེ་ལྟར་རྟོགས་པ་ལ་མཆོག་འཛིན་མེད་པའི་ཚུལ་ཁྲིམས། དེ་ལྟར་འདོད་ཅིང་བཟོད་ལ་སོ་སོར་རྟོག་པའི་བཟོད་པ། དེ་ལྟར་རྟོག་ཅིང་རྣམ་མཁྱེན་ཡིད་བྱེད་མི་འདོར་བའི་བརྩོན་འགྲུས། ཐེག་དམན་ཡིད་བྱེད་ཀྱི་སྐབས་མི་འབྱེད་པ་བསམ་གཏན། ཕུང་པོ་ནས་མ་འདྲེས་པའི་བར་གྱི་ཆོས་རྣམས་རང་རང་གི་སྟོང་ཉིད་ཀྱིས་མི་སྟོང་ཞིང་སྟོང་པ་ཉིད་དང་དབྱེར་མེད་པར་ཤེས་པའི་ཤེས་རབ་རྣམས་སོ། །གཉིས་པ་ཕྱིའི་ཡོངས་འཛིན་ནི། གཟུགས་ནས་མ་འདྲེས་པའི་བར་གྱི་ཆོས་རྣམས་ངོ་བོ་ཉིད་མེད་པར་སྟོན་པ་དང༌། ཐབས་ལ་མཁས་པ་དང༌། བདུད་ཀྱི་ལས་རྣམས་སྟོན་པ་དང༌། དགེ་རྩ་རྣམས་ཉན་རང་གི་སར་བསྔོར་མི་འཇུག་པའི་དགེ་བའི་བཤེས་གཉེན་ནོ། །གསུམ་པ་དེ་གཉིས་ཀའི་མི་མཐུན་ཕྱོགས་ནི། །ནང་གི་ཡོངས་འཛིན་ཐབས་མཁས་ཀྱི་མི་མཐུན་ཕྱོགས་རྣམ་མཁྱེན་ཡིད་བྱེད་དང་བྲལ་བས་ཕར་ཕྱིན་ནས་མ་འདྲེས་པའི་བར་རྣམས་སྒོམ་པ་ན་དེ་དག་ཏུ་རློམ་པས་དངང་བ་སོགས་སུ་འགྱུར་བའོ། །ཕྱིའི་ཡོངས་འཛིན་དགེ་བཤེས་ཀྱི་མི་མཐུན་ཕྱོགས་ནི། ཕྱིན་དྲུག་སྟོན་པའི་གཞུང་ལ་འདི་ནི་སངས་རྒྱས་ཀྱི་གསུངས་པ་མ་ཡིན་གྱི་སྙན་དངགས་མཁན་གྱི་རང་བཟོའོ་ཞེས་གཞུང་སྤོང་བ་དང༌། ཕྱིན་དྲུག་ལས་བཟློག་ནས་ཉན་ཐོས་ཀྱི་སྡེ་སྣོད་ལ་སྦྱོར་བར་བྱེད་པ་ལམ་སྤོང་བ་དང༌། གཟུགས་ནས་རྣམ་མཁྱེན་གྱི་བར་རྣམས་
བདག་དང་བདག་གིས་སྟོང་ན་སངས་རྒྱས་ནས་ཅི་བྱ་ཞེས་འབྲས་བུ་སྤོང་བའི་སྡིག་གྲོགས་སོ། །དེས་ན་མི་མཐུན་ཕྱོགས་དེ་གཉིས་བོར་བ་ནི་ཡོངས་འཛིན་ཡིན་ནོ། །བཞི་པ་གདམས་པའི་དོན་ཕྱིན་ཅི་མ་ལོག་པར་སྒྲུབ་པ་ལ་བཞི་སྒྲུབ་པའི་རྟེན། སྒྲུབ་པའི་དམིགས་པ། སྒྲུབ་པའི་ཆེད་དུ་བྱ་བ། སྒྲུབ་པ་རང་གི་ངོ་བོའོ། །དང་པོ་སྒྲུབ་པའི་རྟེན་ལ་གཉིས། རྟེན་རིགས་དང་བརྟེན་ཆོས་སྒྲུབ་པ་བཅུ་གསུམ་མོ། །དང་པོ་ལ་བཞི། རིགས་ཀྱི་ངོ་བོ། རིགས་སུ་འགྱུར་ཚུལ། རིགས་ཀྱི་རབ་དབྱེ། རིགས་ཀྱི་ངེས་ཚིག་གོ། །དང་པོ་ལ་གསུམ། ཉན་ཐོས་སྡེ་པ། སེམས་ཙམ་པ། དབུ་མ་པའི་ལུགས་སོ། །དང་པོ་ཉན་ཐོས་པའི་ལུགས་ནི། འདུལ་བ་ལས། ཆོས་གོས་དང༌། བསོད་སྙོམས་དང༌། གནས་མལ་ངན་ངོན་གྱིས་ཆོག་ཤེས་པ་འཕགས་པའི་རིགས། སྤང་བ་དང༌། སྒོམ་པ་ལ་དགའ་བ་འཕགས་པའི་རིགས་ཏེ་བཞི་བཀའ་སྩལ་ལ། ངོ་བོ་ནི་སེམས་བྱུང་འདོད་ཆགས་མེད་པའོ། །དེ་ཡང་དང་པོ་གསུམ་གྱིས་ལམ་སྒྲུབ་པའི་ཚུལ་བསྟན་ལ། ཕྱི་མས་ལམ་དངོས་བསྟན་ཞིང་དེ་གཉིས་ཀྱིས་རིམ་བཞིན་སྔ་མས་བདག་གི་བའི་དངོས་པོ་ལ་སྲེད་པ་དེའི་ཚེ་ཞི་བར་བྱེད་ལ། ཕྱི་མས་བདག་དང་བདག་གི་བ་གཉིས་ཀ་ལ་སྲེད་པ་གཏན་དུ་ཞི་བར་བྱེད་དོ། །དེ་དག་རིགས་སུ་འགྱུར་ཚུལ་ནི། རང་འགྲེལ་ལས། འདི་དག་ལས་འཕགས་པ་རྣམས་སྐྱེ་བས་ན་འཕགས་
པའི་རིགས་ཏེ་ཞེས་སོ། །དབང་པོ་རྣོ་རྟུལ་གྱི་ཁྱད་པར་ལ་ཡང་རིགས་སུ་འཇོག་སྟེ། མཛོད་ལས། ཁ་ཅིག་དང་པོ་ནས་དེའི་རིགས། །ཁ་ཅིག་སྦྱངས་པ་ལས་གྱུར་ཏོ། ཞེས་སོ། དེ་ལྟར་རིགས་ཙམ་ཞིག་གྲགས་ཀྱང་རིགས་གཉིས་ཀྱི་རྣམ་བཞག་བྱས་པ་ནི་མེད་དོ། །གཉིས་པ་སེམས་ཙམ་པའི་ལུགས་ལ་འདུས་བྱས་ལ་རིགས་སུ་འདོད་པ་དང༌། ཆོས་ཉིད་ལ་རིགས་སུ་འདོད་པ་གཉིས། འདུས་བྱས་ལ་རིགས་སུ་འདོད་པ་ལ་ཀུན་གཞི་རྣམ་པར་བཞག་པ་དང་མ་བཞག་པ་གཉིས་ཡོད། དང་པོ་ཀུན་གཞི་རྣམ་པར་བཞག་པའི་རིགས་ནི། དོན་གསང་ལས། ཡོངས་སུ་གྲུབ་པ་ཡང་རྣམ་པ་གཉིས་ཏེ་རྟག་པ་དང་མི་རྟག་པའོ། །མི་རྟག་པ་གང་ཡིན་པ་དེ་ནི་རྣམ་པ་གཉིས་ཏེ། ཡང་དག་པའི་ཡེ་ཤེས་ཀྱི་བདག་ཉིད་དང་ས་བོན་གྱི་བདག་ཉིད་དོ། །ས་བོན་གྱི་བདག་ཉིད་ཀྱང་རང་བཞིན་དུ་གནས་པ་དང༌། །ཡང་དག་པར་བསྒྲུབས་པ་གཉིས་ཏེ་ཞེས་རང་བཞིན་གནས་རིགས་ཀུན་གཞིའི་སྟེང་གི་ཟག་མེད་སྐྱེད་པའི་ནུས་པ་ལ་གསུངས་པ་དང༌། ཐེག་བསྡུས་ལས་ཀྱང༌། དེ་ལ་ཐོས་པའི་བག་ཆགས་ཀྱི་ས་བོན་ཆུང་ངུ་དང༌། འབྲིང་དང༌། ཆེན་པོ་ཡང་ཆོས་ཀྱི་སྐུའི་ས་བོན་དུ་བལྟ་སྟེ། ཀུན་གཞི་རྣམ་པར་ཤེས་པའི་གཉེན་པོ་ཡིན་པས་ཀུན་གཞི་རྣམ་པར་ཤེས་པའི་ངོ་བོ་ཉིད་མ་ཡིན། ཞེས་ཀུན་གཞི་ལ་འོ་ཆུ་
བཞིན་ལྷན་ཅིག་གནས་པ་དེ་ཙམ་འཕེལ་བ་དེ་ཙམ་གྱིས་ས་བོན་རྣམས་ཟད་ནས་གནས་འགྱུར་བར་གསུངས་སོ། །གཞན་ཡང་མདོ་རྒྱན་དང་བསྡུ་པ་ལས་ཀྱང་གསུངས་པ་ལྟར། ཀུན་གཞིའི་སྟེང་གི་ཟག་མེད་བསྐྱེད་ནུས་ཀྱི་ས་བོན་ལ་རིགས་སུ་བཞེད། ཀུན་གཞི་རྣམ་པར་མ་བཞག་པ་ནི། བྱང་ས་ལས། དེ་ལ་རིགས་གང་ཞེ་ན། མདོར་བསྡུ་ན་རྣམ་པ་གཉིས་ཏེ་རང་བཞིན་གྱིས་གནས་པ་དང་ཡང་དག་པར་བསྒྲུབས་པའོ། །དེ་ལ་རང་བཞིན་གྱིས་གནས་པའི་རིགས་ནི་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། དེ་ནི་གཅིག་ནས་གཅིག་ཏུ་བརྒྱུད་དེ་འོང་བ་ཐོག་མ་མེད་པའི་དུས་ཅན་ཆོས་ཉིད་ཀྱིས་ཐོབ་པ་དེ་ཡིན་ནོ། །དེ་ལ་ཡང་དག་པར་བསྒྲུབས་པའི་རིགས་ནི་སྔོན་དགེ་བའི་རྩ་བ་གོམས་པར་ བྱས་པ་ལས་ཐོབ་པ་གང ་ཡིན་པ་སྟེ། ཞེས་པ་ལྟར་ཡིན་ལ་འདིའི་སྐྱེ་མཆེད་དྲུག་གི་ཁྱད་པར་ཞེས་པ་ནི། །སེམས་ཅན་གྱི་ཤེས་རྒྱུད་ཁམས་དང་སྐྱེ་གནས་སོགས་གང་དུ་ཡང་བར་མ་ཆད་དུ་འཇུག་པའི་སྟེང་གི་བྱང་ཆུབ་ཐོབ་པའི་ནུས་པ་དོན་བྱེད་པའི་རྫས་སུ་ཡོད་ཀྱང༌། གུད་དུ་རང་རྐྱ་ཐུབ་པའི་རྫས་ཡོད་མིན་པས་གདགས་གཞི་དང་དེ་ཉིད་དང་གཞན་གང་དུ་ཡང་བརྗོད་དུ་མེད་པ་ཞིག་ལ་འདོད་པས་སྐྱེ་མཆེད་དྲུག་ཉིད་ཀྱང་རིགས་མིན་ལ་དེ་ལས་གཞན་པ་ཡང་མིན་ནོ། །རྒྱས་འགྱུར་ཀྱི་རིགས་ནི་རང་བཞིན་དུ་གནས་པའི་རིགས་དེ་ཉིད་ཐོས་བསམ་སྒོམ་གསུམ་གྱིས་བརྟན་
པར་བྱས་པས་ན་མིང་གཞན་རྒྱས་འགྱུར་ཞེས་བཏགས་པ་ཙམ་མོ། །གཞན་ཡང་རྒྱ་མཚོ་སྤྲིན་ལས་ངེས་མ་ངེས་དང༌། དམན་ལམ་སྔོན་དུ་མ་སོང་བ་དང་སོང་བའི་རིགས་ལ་ཡང་རང་བཞིན་དང་རྒྱས་པར་བཤད་པ་ཡོད་དོ། །ཆོས་ཉིད་ལ་རིགས་སུ་འདོད་པ་ནི། རྒྱན་འདིར་ཆོས་ཉིད་རིགས་སུ་བསྟན་པ་ལ་ཤནྟི་པས་ཀྱང་དེ་ལ་རིགས་སུ་བཤད་པ་བཞིན་ནོ། །གསུམ་པ་དབུ་མ་པའི་ལུགས་ནི། ཆོས་བཅུ་པའི་མདོ་ལས། དུ་བ་ལས་ནི་མེར་ཤེས་དང༌། །ཆུ་སྐྱར་ལས་ནི་ཆུང་ཤེས་ལྟར། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། ཞེས་པ་དང་མཐུན་པར་དབུ་མ་ལ་འཇུག་པ་ལས། སོ་སོའི་སྐྱེ་བོ་དུས་ནའང་སྟོང་ཉིད་ཐོས། །ནང་གི་དགའ་བ་ཡང་དང་ཡང་དུ་ལྡང༌། །དགའ་བ་ལས་བྱུང་མིག་ནི་མཆི་མས་བརླན། །ལུས་ཀྱི་སྤུ་ལྡང་བ་ཡང་སྐྱེ་བར་འགྱུར། །དེ་ལ་རྫོགས་སངས་རྒྱས་བློའི་ས་བོན་ཡོད། ཞེས་ལུས་ཀྱི་མཚན་མ་དེ་དག་གི་རྒྱུ་ལ་བཤད་པ་དང༌། ཕལ་པོ་ཆེ་ལས། ཀྱེ་རྒྱལ་བའི་སྲས་བྱང་ཆུབ་སེམས་དཔའི་རིགས་ཞེས་བྱ་བ་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། ཞེས་པ་དང་མཐུན་པར་རྒྱན་འདིར་ནི་ཆོས་ཀྱི་དབྱིངས་ལ་རིགས་སུ་གསུངས་སོ། །དེ་བཞིན་དུ་རྒྱུད་བླར་ཡང༌། སྤྱིར་རིགས་ལ། དཀོན་མཆོག་གསུམ་པོ་འདི་ཡི་རིགས། །ཐམས་ཅད་གཟིགས་པ་
རྣམས་ཀྱི་ཡུལ། །དེ་ཡང་རྣམ་བཞི། ཞེས་ཁམས་བྱང་ཆུབ་ཡོན་ཏན་ཕྲིན་ལས་བཞི་ཀ་རིགས་སུ་བཤད་པ་ཡང་ཡོད་ལ། བྱེ་བྲག་ཏུ། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང༌། །ཡང་དག་བླང་བ་མཆོག་ཉིད་དོ། །ཞེས་རིགས་གཉིས་སུ་གསུངས་པའི་གཏེར་གྱི་དཔེས་མཚོན་པའི་རང་བཞིན་གནས་རིགས་ནི། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བསལ་དང་བཞག་མེད་ཆོས་ཉིད་ཀྱང༌། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་རྒུ་འདིས་མྱོང་ངོ༌། །ཞེས་བསལ་བཞག་དང་བྲལ་བའི་ཆོས་ཉིད་ལ་གསལ་བར་གསུངས་སོ། །གཉིས་པ་རིགས་སུ་འགྱུར་ཚུལ་ནི། སྤྱིར་སེམས་ཅན་གྱི་ཤེས་རྒྱུད་ལ་ཡོན་ཏན་སྐྱེ་རུང་ཞིང༌། སྒྲིབ་པ་སྤང་དུ་རུང་བའི་རྒྱུ་ཙམ་ཞིག་ལ་རིགས་སུ་འཇོག་པར་དབུ་སེམས་གཉིས་ཀ་མཐུན་ཞིང་སྤང་དུ་རུང་ཡང་དྲི་མ་གློ་བུར་བར་སོང་བས་ཡིན་ལ། གློ་བུར་བའི་དོན་ལ་མི་མཐུན་ཏེ་འདི་ལྟར་དབུ་མ་པ་རྣམས་ནི་དྲི་མ་ཞེས་པ་བློས་བཏགས་ནས་བཞག་པ་ཙམ་ཡིན་གྱི་དོན་ལ་རྫས་སུ་མ་གྲུབ་པའི་སྟོང་ཉིད་ཡིན་པས་གློ་བུར་བར་འཇོག་གོ། །སེམས་ཙམ་པ་རྣམས་ནི་དྲི་མ་ནི་སེམས་དང་སེམས་ལས་བྱུང་བ་གཞན་དབང་གི་ངོ་བོ་ཡིན་པས། རྫས་སུ་བདེན་ཡང༌། ཕུང་པོའི་གནས་ལུགས་ལ་གོལ་བའི་གཙང་བདེ་རྟག་བདག་ཏུ་འཛིན་པའི་
ཚུལ་མིན་ཡིད་བྱེད་ཀྱིས་བསྐྱེད་པས་དེ་ཡུལ་སུན་ཕྱུང་བའི་སྒོ་ནས་བཟློག་པར་ནུས་ལ། དེ་ལོག་པ་ན་འབྲས་བུར་གྱུར་བའི་ཆགས་སོགས་ཀྱང་རང་གི་ངང་གིས་ལྡོག་པར་འགྱུར་བའི་ཕྱིར་འབྲལ་རུང་ཡིན་པས་གློ་བུར་བར་འདོད་དོ། །དེས་ན་དབུ་མ་པ་ནི་སེམས་ཀྱི་རང་བཞིན་གཤིས་ལ་ཅིར་ཡང་མ་གྲུབ་པའི་སྟོང་ཉིད་དེ་རྟོགས་པ་ན་ཐ་སྙད་དུ་སྒྱུ་མ་ལྟ་བུའི་འཛིན་པ་མཐའ་དག་ཞི་བར་འགྱུར་ཞིང༌། སྒྱུ་མ་ལྟ་བུའི་གཉེན་པོ་མཐའ་དག་སྐྱེ་བར་འགྱུར་བས། སེམས་ཀྱི་རང་བཞིན་དེ་ཉིད་ལ་ཀུན་རྫོབ་ཀྱི་ངོས་ནས་སྒྲོ་བཏགས་ཏེ་འདི་ནི་རང་བཞིན་དུ་གནས་པའི་རིགས་སོ་ཞེས་འཇོག་གོ། །སེམས་ཙམ་པ་ནི་སེམས་ཀྱི་རང་བཞིན་འོད་གསལ་བ་དེ་གཤིས་ལ་རང་གི་ངོ་བོས་དུས་ཐམས་ཅད་དུ་གྲུབ་ཅིང་དྲི་མ་དེ་དག་དེ་ལ་གཉེན་པོས་འབྲལ་དུ་རུང་ལ། ཅི་ཙམ་བྲལ་བ་དེ་ཙམ་དུ་ཡོན་ཏན་མཐའ་དག་སྐྱེད་པར་འགྱུར་བས་དེ་གཉིས་ཀྱི་གཞི་བྱེད་པས་ཆོས་ཉིད་རིགས་སུ་འདོད་དོ། །དེ་ལྟ་ན་ཆོས་ཉིད་རིགས་སུ་འདོད་པར་མཚུངས་ཀྱང་དྲི་མའི་སྦྱང་གཞི་བདེན་པར་འདོད་མི་འདོད་མི་འདྲ་བས་རིགས་སུ་འཇོག་པའི་རྒྱུ་མཚན་མི་མཚུངས་སོ། །དེས་ན་སེམས་ཙམ་གྱི་སྐབས་སུ་དྲི་མ་གདོད་ནས་ཟད་པར་གསུང་བ་རྣམས་ཕྱིན་ཅི་ལོག་གི་རྒྱུ་མཚན་གྱིས་བསྐྱེད་པས་གནས་ལུགས་ལ་མ་ཞུགས་པ་ཙམ་ལ་བཤད་ཀྱི། ངོ་བོ་ཉིད་མེད་པར་སྨྲ་བ་ལྟར་བློས་བཏགས་པའི་མིང་ཙམ་དུ་
མི་བཤད་དེ་འདྲེས་པར་འགྱུར་བའི་ཕྱིར་རོ། །དྲི་མ་ཟད་མེད་སྐྱེ་མེད་ཀྱང་ལུགས་ཕྱི་མ་འདིའི་ཁྱད་ཆོས་ཡིན་པས་འདི་ལྟར་ན་སྤང་བྱ་རང་བཞིན་མེད་པར་ཤེས་པ་ཙམ་ལ་སྤངས་པའི་ཐ་སྙད་འདོགས་ཀྱི་སྤང་གཉེན་རྫས་ཐ་དད་དུ་བདེན་པར་མི་འདོད་དེ། སྒྱུ་མའི་གླང་པོས་སྒྱུ་མའི་གླང་པོ་གཞན་ཞིག་ཕམ་པར་བྱས་པ་ལྟར་རོ། །གཞན་ཡང་འདུས་བྱས་ལ་རིགས་སུ་འཇོག་པ་ནི་དེས་ཟག་མེད་སྐྱེད་པས་ཡིན་ལ་ཆོས་ཉིད་རིགས་སུ་འཆད་པ་ནི། དེ་ལ་དམིགས་པས་ཡོན་ཏན་སྐྱེད་པ་ཙམ་ལ་རིགས་སུ་འཇོག་གོ། །དེ་ལྟར་དམིགས་རྐྱེན་དང་རྒྱུའི་རྐྱེན་གཉིས་ཀྱི་སྒོ་ནས་རིགས་སུ་འགྱུར་རོ། །གསུམ་པ་རིགས་ཀྱི་རབ་དབྱེ་ནི། ཐེག་པ་གསུམ་གྱི་རིགས་དང་མ་ངེས་པའི་རིགས་དང་རིགས་ཆད་པ་ལྔར་ལང་གཤེགས་ལས་གསུངས་ཏེ། ཕྱི་མ་ནི་གྲོལ་དཀའ་བ་ཙམ་ལ་དགོངས་ཀྱི་རིགས་གཏན་ཆད་མི་སྲིད་དེ། དྲི་མ་སྤང་དུ་མི་རུང་ན་སེམས་ཀྱི་རང་བཞིན་དུ་ཐལ་བར་འགྱུར་ལ། དེ་ལྟ་ན་སྲིད་པ་ལས་བརྒལ་བ་མི་སྲིད་པར་འགྱུར་ཏེ་མེ་ལ་མེའི་ཚ་བ་བཞིན་ནོ། །བཞི་པ་རིགས་ཀྱི་ངེས་ཚིག་ནི། རྒྱན་ལས། ཡོན་ཏན་ནི། །སྒྲོལ་བའི་དོན་དུ་ཤེས་པར་བྱ། ཞེས་པ་ལྟར་འདི་ལས་ཡོན་ཏན་དག་སྐྱེ་ཞིང་འབྱུང་བས་རིགས་སོ། མིང་གི་རྣམ་གྲངས་ནི། བྱང་ས་ལས། རིགས་དེ་ནི་གཞི་ཞེས་ཀྱང་བྱ། སྟོན་པ་དང༌། རྒྱུ་དང༌། རྟེན་དང༌། ཉེར་གནས་དང༌། ས་བརྒྱད་པའི་དབང་དུ་བྱས་ནས། སྔོན་དུ་འགྲོ་བ་
དང༌། གནས་ཞེས་ཀྱང་བྱའོ། །ཞེས་སོ། །གཉིས་པ་བརྟེན་ཆོས་སྒྲུབ་པ་བཅུ་གསུམ་བཤད་པ་ལ་གཉིས། སྒྲུབ་པ་བཅུ་གསུམ་སྤྱིར་བསྟན་པ་དང༌། སྒྲུབ་པ་བཅུ་གཉིས་པ་བྱེ་བྲག་ཏུ་བཤད་པའོ། །དང་པོ་སྒྲུབ་པ་བཅུ་གསུམ་སྤྱིར་བསྟན་པ་ནི། བདག་མེད་པ་རྟོགས་པའི་ཆོས་ངེས་འབྱེད་བཞི་དང༌། མཐོང་སྒོམ་གཉིས་ཏེ་རྟོགས་པའི་ཆོས་དྲུག་དང༌། གཉེན་པོ་བར་ཆད་མེད་ལམ་དང༌། སྤོང་བ་རྣམ་གྲོལ་གྱི་ལམ་དང༌། སྤོང་གཉེན་གྱི་རྣམ་རྟོག་དེ་དག་ཡོངས་སུ་གཏུགས་པ་སྟེ་སྤོང་བ་དང༌། སྲིད་ཞི་གཉིས་ཀར་མི་གནས་པར་བྱེད་པའི་ཤེས་རབ་སྙིང་རྗེར་བཅས་པ་དང༌། སློབ་མ་ཉན་ཐོས་དང་ཐུན་མོང་མིན་པའི་ལམ་དང༌། སྐལ་བ་དང་འཚམ་པར་གཞན་དོན་གོ་རིམ་བཞིན་སྒྲུབ་པ་དང༌། ཡེ་ཤེས་རྩོལ་བ་མི་མངའ་བར་འཇུག་པ་དང་བཅུ་གསུམ་གྱི་རྟེན་ལ་རིགས་ཞེས་བྱའོ། །གཉིས་པ་སྒྲུབ་པ་བཅུ་གཉིས་པ་བྱེ་་དགུ་པ་དང་བཅུ་པའི་རྗེས་ཐོབ་་བྲག་ཏུ་བཤད་པ་ནི། གཞན་དོན་གོ་རིམ་བཞིན་་རྒྱུན་མཐའི་་སྒྲུབ་པ་ནི་རང་རང་གི་སྐལ་བ་མཐུན་པར་ཐེག་པ་གསུམ་གྱི་ལམ་ལ་འགོད་པ་ཡིན་ལ། དེ་ཐབས་གང་གིས་འགོད་ན། ལྡེམ་དགོངས་བཞི་དང་དགོངས་པ་བཞིའི་སྒོ་ནས་སོ། །འདིའི་མཐའ་དཔྱད་པ་ལ་གསུམ། དགོངས་ལྡེམ་དགོངས་ཀྱི་ངོ་བོ། དེ་གཉིས་ཀྱི་ཁྱད་པར། དྲང་ངེས་གང་ཡིན་བསམ་པའོ། །
དང་པོ་ལ་གཉིས། དགོངས་པ་དང༌། ལྡེམ་དགོངས་སོ། །དང་པོ་ནི་མདོ་སྡེ་རྒྱན་ལས། མཉམ་པ་ཉིད་དང་དོན་གཞན་དང༌། །དེ་བཞིན་དུ་ནི་དུས་གཞན་དང༌། །གང་ཟག་གི་ནི་བསམ་པ་ལ། །དགོངས་པ་རྣམ་པ་བཞིར་ཤེས་བྱ། །ཞེས་པ་ལྟར་བཞི་ལས། མཉམ་པ་ཉིད་ལ་དགོངས་པ་ནི། ད་ཉིད་དེའི་ཚེ་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སུ་གྱུར་ཏོ། ཞེས་པ་ལྟ་བུ་སྟེ། ཆོས་ཀྱི་སྐུ་མཉམ་པའོ། །དོན་གཞན་ལ་དགོངས་པ་ནི། ཆོས་ཐམས་ཅད་ནི་ངོ་བོ་ཉིད་མེད་པ་མ་སྐྱེས་པའོ་ཞེས་སོགས་གསུངས་པ་ལྟ་བུ་སྟེ། སྒྲ་ཇི་བཞིན་མ་ཡིན་པས་སོ། །དུས་གཞན་ལ་དགོངས་པ་ནི། གང་དག་བདེ་བ་ཅན་དུ་སྐྱེ་བར་སྨོན་ལམ་འདེབས་པ་དེ་དག་དེར་སྐྱེ་བར་འགྱུར་རོ་ཞེས་པ་ལྟ་བུ་སྟེ་ཤི་འཕོས་མ་ཐག་མི་སྐྱེ་ཡང་དུས་གཞན་ནའོ་སྙམ་དུ་དགོངས་པའོ། །གང་ཟག་གི་བསམ་པ་ལ་དགོངས་པ་ནི། དགེ་རྩ་འགའ་ཞིག་ཁ་ཅིག་ལ་ནི་བསྔགས་ལ། ཆུང་ངུས་ཆོག་ཤེས་པ་ཁ་ཅིག་ལ་ནི་སྨད་པ་ལྟ་བུའོ། །གཉིས་པ་ལྡེམ་དགོངས་ནི། རྒྱན་ལས། གཞུག་པ་ལྡེམ་པོར་དགོངས་པ་དང༌། །མཚན་ཉིད་ལྡེམ་པོར་དགོངས་པ་གཞན། །གཉེན་པོ་ལྡེམ་པོར་དགོངས་པ་དང༌། །བསྒྱུར་བ་ལྡེམ་པོར་དགོངས་པ་སྟེ། །ཞེས་པ་ལྟར་བཞི་ལས། དང་པོ་གཞུག་པ་ལྡེམ་དགོངས་ནི། ཉན་ཐོས་རྣམས་བསྟན་པ་ལ་གཞུག་པའི་དོན་དུ་སྐྲགས་པ་སྤང་
བའི་ཕྱིར་གཟུགས་སོགས་ཡོད་པར་བསྟན་པའོ། །གཉིས་པ་མཚན་ཉིད་ལྡེམ་པོར་དགོངས་པ་ནི། མཚན་ཉིད་གསུམ་ལ་དགོངས་ནས་ཆོས་ཐམས་ཅད་ངོ་བོ་ཉིད་མེད་པ་སོགས་སུ་བསྟན་པའོ། དེ་ཡང༌། ཀུན་བཏགས་རྫས་སུ་མེད་པས་མཚན་ཉིད་དང༌། གཞན་དབང་རང་ལས་མི་སྐྱེ་གཞན་ལས་སྐྱེ་བས་སྐྱེ་བ་དང༌། ཡོངས་གྲུབ་དོན་དམ་པ་མི་རྟོག་ཡེ་ཤེས་ཀྱི་དོན་ནམ་དམིགས་པ་ཡིན་ཞིང་གཞན་དབང་ལས་ལོགས་སུ་མེད་པའི་ཕྱིར་དོན་དམ་ངོ་བོ་ཉིད་མེད་པ་ལ་དགོངས་ནས་ངོ་བོ་ཉིད་མེད་པར་བཤད་པ་ལྟར་རོ། །གསུམ་པ་གཉེན་པོ་ལྡེམ་པོར་དགོངས་པ་ནི། རྒྱན་ལས། སངས་རྒྱས་ཆོས་ལ་བརྙས་པ་དང༌། །ལེ་ལོ་ཅུང་ཟད་ཆོག་འཛིན་དང༌། །ང་རྒྱལ་འདོད་ཆགས་སྤྱོད་པ་དང༌། །འགྱོད་དང་མ་ངེས་ལྡོག་པ་ནི། །སེམས་ཅན་རྣམས་ཀྱི་སྒྲིབ་པ་སྟེ། །དེ་ཡི་གཉེན་པོར་ཐེག་མཆོག་གསུངས། ཞེས་པ་ལྟར། ཉེས་པ་བརྒྱད་གདུལ་བའི་ཕྱིར་དུ་བསྟན་པ་ལྟ་བུ་སྟེ། སངས་རྒྱས་ལ་བརྙས་པའི་གཉེན་པོར་དགོངས་པ་དང་པོ་བཤད་པ་དང༌། ལུང་གི་ཆོས་ལ་བརྙས་པའི་གཉེན་པོར་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ལ་བསྙེན་བཀུར་བྱས་ན་གཟོད་ཐེག་ཆེན་གྱི་རྟོགས་པ་སྐྱེའོ་ཞེས་གསུངས་པ་ལྟ་བུའོ། །འདི་ཐེག་བསྡུས་སུ་དོན་གཞན་ལ་དགོངས་པར་བཤད་ལ། དེའི་དོན་བཤད་སྦྱར་
དུ་ལུང་ལས་དོན་གཞན་ཐེག་ཆེན་གྱི་རྟོགས་པའི་ཆོས་ལ་དགོངས་ནས་གསུངས་པར་བཤད་དོ། །ལེ་ལོའི་སྒྲིབ་པའི་གཉེན་པོར་ནི་དུས་གཞན་ལ་དགོངས་པར་བཤད་པ་དང༌། དེ་བཞིན་གཤེགས་པ་ཟླ་འོད་དྲི་མེད་ཀྱི་མཚན་སྨོས་པ་ཙམ་གྱིས་བླ་ན་མེད་པའི་བྱང་ཆུབ་ཏུ་ངེས་པ་ཡིན་ནོ། །ཞེས་པ་ལྟ་བུའོ། །ཅུང་ཟད་ཙམ་གྱིས་ཆོག་པར་འཛིན་པའི་གཉེན་པོར་ནི། །ལ་ལར་སྦྱིན་སོགས་སྨད་ལ་གཞན་བསྔགས་པ་ལྟ་བུའོ། །ང་རྒྱལ་ལ་སྤྱོད་པའི་གཉེན་པོར་སངས་རྒྱས་ལ་ལའི་ཕུན་ཚོགས་བསྔགས་པ་ལྟ་བུའོ། །འདོད་ཆགས་ལ་སྤྱོད་པའི་གཉེན་པོར་སངས་རྒྱས་ཀྱི་ཞིང་གི་འབྱོར་བ་བསྔགས་པ་ལྟ་བུའོ། །འགྱོད་པའི་གཉེན་པོར་གང་དག་སངས་རྒྱས་བྱང་སེམས་ལ་གནོད་པ་བྱེད་པ་དེ་དག་མཐོ་རིས་སུ་འགྲོའོ་ཞེས་པ་ལྟ་བུའོ། །མ་ངེས་པ་ལྡོག་པའི་སྒྲིབ་པའི་གཉེན་པོར་ཉན་ཐོས་རྣམས་ལུང་བསྟན་པ་དང༌། ཐེག་པ་གཅིག་ཏུ་བཤད་པ་ལྟ་བུའོ། །འདི་དང་དགོངས་པ་དང༌། ལྡེམ་དགོངས་གཉིས་པ་རྣམས་སེམས་ཙམ་ཁོ་ནའི་འདོད་པའོ། །བཞི་པ་བསྒྱུར་བ་ལྡེམ་དགོངས་ནི། །བརྗོད་བྱ་ཟབ་མོ་གཞན་དུ་འདྲེན་པ་ལ་བལྟ་སྟེ། ཇི་སྐད་དུ། སྙིང་པོ་མེད་ལ་སྙིང་པོར་ཤེས། །ཕྱིན་ཅི་ལོག་ལ་ལེགས་པར་གནས། །ཉོན་མོངས་པས་ནི་རབ་ཉོན་མོངས། །བྱང་ཆུབ་དམ་པ་ཐོབ་པར་འགྱུར་
ཞེས་པ་ལྟ་བུའོ། །སྙིང་པོ་ནི་སེམས་ཀྱི་རྣམ་གཡེང་ངོ༌། །དེ་མེད་པ་ནི་སྙིང་པོ་མེད་པའོ། །ཕྱིན་ཅི་ལོག་ནི་གཙང་བདེ་རྟག་བདག་ལས་ལོག་པའོ། །ཉོན་མོངས་པ་ནི་ཡུན་རིང་བོར་དཀའ་སྤྱད་ཀྱིས་ངལ་བའོ། །དེ་དག་ནི་རྒྱན་ལས། ཉན་ཐོས་དང་ནི་ངོ་བོ་ཉིད། །དེ་བཞིན་ཉེས་པ་གདུལ་བ་དང༌། །བརྗོད་པ་ཟབ་པ་ཉིད་ལ་ནི། །ལྡེམ་པོར་དགོངས་པ་རྣམ་པ་བཞི། ཞེས་པ་ལྟར་རོ། །གཉིས་པ་དེ་གཉིས་ཀྱི་ཁྱད་པར་ནི། བཤད་སྦྱར་དུ། དགོངས་པ་ནི་ཡིད་ལ་བཞག་པ་ཙམ་ཡིན་གྱིས་ཕ་རོལ་ལ་ལྟོས་པར་ནི་ཁས་མི་ལེན་ཏོ། །ལྡེམ་པོར་དགོངས་པ་ནི། །དེ་ཉིད་ཕ་རོལ་གཟུང་བ་ལ་ལྟོས་པའོ། ཞེས་པ་ལྟར་སྒྲས་ཟིན་ཚོད་དེ་ཚིག་དེའི་དགོངས་པ་མིན་པར་ལོགས་སུ་བཤད་ནས་འདི་ལ་བསམས་ཏེ་གསུངས་སོ་ཞེས་སྨྲ་བ་པོའི་བསམ་པ་སྟོན་པའི་ཆ་ནས་དགོངས་པ་ཡིན་ལ། །ཐད་ཀར་མི་སྟོན་པར་འཁྱོག་པོའི་ངག་གིས་བསྟན་པའི་དགོས་པ་འདིའོ་ཞེས་དགོས་པ་སྟོན་པའི་ཆ་ནས་ལྡེམ་པོར་དགོངས་པ་སྟེ། ལྡེམ་པོའམ་ལྡེའུའི་ངག་ནི་འཁྱོག་པོ་ཡིན་པས་སོ། །དེས་ན་དགོངས་ལྡེམ་དགོངས་གཉིས། དྲང་དོན་གྱི་གཞུང་གཅིག་ལ་འཇོག་ཚུལ་ཐ་དད་པས་བཞག་པ་ཡིན་ཏེ། དེ་ཡང་འདི་ལ་དགོངས་ནས་སོ། །ཞེས་དང༌། འདིའི་ཆེད་དུ་གསུངས་སོ། །ཞེས་པ་གཉིས་སོ། དགོངས་པ་
ལ་ཕ་རོལ་གཟུང་བ་ལ་མི་ལྟོས་ཞེས་པ་ནི་དེའི་ཆ་ནས་དགོངས་པར་མི་འཇོག་ཅེས་པ་ཡིན་ལ། །ལྡེམ་དགོངས་ལ་དེ་ཉིད་ཅེས་པས་གཉིས་ཀ་གཞི་གཅིག་ལ་བརྩི་བ་ཡིན་ཏེ་དགོངས་པ་དང་པོ་དང་ཐ་མ་གཉིས་གཉེན་པོ་ལྡེས་དགོངས་སུ་བཤད་པ་ལྟ་བུའོ། །གསུམ་པ་དྲང་ངེས་གང་ཡིན་བསམ་པ་ནི་འདི་དག་ཐམས་ཅད་དྲང་དོན་ཡིན་ཏེ། དགོངས་པ་ནི་སྒྲས་ཟིན་ལས་དགོངས་པ་གཞན་དུ་བཙལ་དགོས་ལ། ལྡེམ་དགོངས་ནི་སྒྲ་ཇི་བཞིན་པ་མིན་པའི་ངག་ཡིན་པའི་ཕྱིར་རོ། །འོ་ན་ཐམས་ཅད་བསྒྱུར་བ་ལྡེམ་དགོངས་སུ་འགྱུར་ཞེ་ན། འདོད་པ་ཡིན་ཏེ་འདི་དག་ལྡོག་པས་ཕྱེ་བ་ཙམ་ཡིན་པའི་ཕྱིར་རོ། །འདི་དག་ཐམས་ཅད་དྲང་དོན་ཡིན་ན་ཐེག་བསྡུས་ལས། གཉེན་པོ་ལ་ལྡེམ་པོར་དགོངས་པ་ནི་གང་དུ་སྤྱོད་པ་བརྒྱད་ཁྲི་བཞི་སྟོང་གི་གཉེན་པོར་བསྟན་པའོ། ཞེས་གསུངས་པས་བཀའ་ཐམས་ཅད་དྲང་དོན་དུ་འགྱུར་ཞེ་ན། དེ་ནི་འདོད་ཆགས་དང༌། ཞེ་སྡང་དང་ང་རྒྱལ་དང༌། རྣམ་རྟོག་ལ་སོགས་པའི་གཉེན་པོར་རིམ་པ་ལྟར་མི་སྡུག་པ། བྱམས་པ། ཁམས་ཀྱི་རབ་དབྱེ། དབུགས་འབྱུང་རྔུབ་བགྲང་བ་སོགས་ཀྱི་གཉེན་པོས་རྫོགས་པར་སྤངས་བར་བསྟན་པ་རྣམས་སྒྲ་ཇི་བཞིན་པ་མིན་ཏེ་དེ་དག་རེ་རེས་མ་ལུས་པ་སྤང་མི་ནུས་པས་སོ། །དེས་ན་དབང་པོ་གདུལ་དཀའ་བ་རྣམས་གཉེན་པོ་ཉི་ཚེ་བསྒོམ་པ་ལ་གཞུགས་པའི་ཕྱིར་དེ་ལ་དགོངས་པ་ཡིན་གྱི་བཀའ་ཐམས་ཅད་གཉེན་
པོ་ལ་ལྡེམ་དགོངས་སུ་བསྟན་པ་མིན་ནོ། །གཉེན་པོ་ལ་ལྡེམ་དགོངས་མི་སྡུག་པ་སྒོམ་པ་སོགས་ལ་རྒྱན་གྱི་བཤད་སྦྱར་དང་དེའི་འགྲེལ་ཆེན་གཉིས་ཀྱིས་བཤད་དོ། །གཉིས་པ་སྒྲུབ་པའི་དམགས་པ་ལ། རབ་དབྱེ་དང་ཇི་ལྟར་དམིགས་པའི་ཚུལ་གཉིས། དང་པོ་རབ་ཏུ་དབྱེ་བ་ནི་བཅུ་གཅིག་སྟེ། དགེ་སྦྱོང་གི་ཚུལ་ཟག་མེད་བར་ཆད་མེད་ལམ་དང་ཚུལ་ཁྲིམས་སོགས་དགེ་བ། སྲོག་གཅོད་པ་ལ་སོགས་མི་དགེ་བ། དགེ་མི་དགེ་གང་ཡང་མ་ཡིན་པའི་སྒོ་གསུམ་གྱི་ལས་དང་འབྱུང་བཞི་དབང་པོ་ལྔ་སོགས་ལུང་མ་བསྟན་དང་གསུམ། བྱིས་པའི་སྐྱེ་བོ་ཐམས་ཅད་ཀྱི་རྒྱུད་དང་འབྲེལ་བའི་ཕུང་ཁམས་སྐྱེ་མཆེད་དགེ་བཅུ་བསམ་གཟུགས་ཚད་མེད་མངོན་ཤེས་རྣམས་འཇིག་རྟེན་པའི་ལམ་དང༌། འཕགས་པའི་སྐྱེ་བོ་ཐམས་ཅད་ཀྱི་རྒྱུད་ཀྱིས་བསྡུས་པའི་བསམ་གཏན་བྱང་ཕྱོགས་རྣམ་ཐར་སྒོ་གསུམ། དབང་པོ་གསུམ། ཏིང་ངེ་འཛིན་གསུམ། རྣམ་ཐར་མཐར་གནས་སོགས་འཇིག་རྟེན་ལས་འདས་པའི་ལམ་མོ། །འཇིག་རྟེན་ལས་འདས་མ་འདས་འདི་ལ་སྤྱིར་ཞི་རགས་དང་བདེན་པའི་རྣམ་པ་ཅན་དང༌། སྣང་བཅས་སྣང་མེད་དང༌། ས་ཐོབ་མ་ཐོབ་ལ་བཤད་པ་ཡོད་ཀྱང་འདིར་ནི་རྒྱུད་དབང་བཙན་དུ་ བྱས་པ་ཡིན་ནོ། །གང ་ཟག་གི་བདག་ཏུ་ལྟ་བའི་གཉེན་པོ་བྱེད་ནུས་པ་མ་ཡིན་པ་མ་འོངས་པའི་ཕུང་པོ་ལ་འདུན་བ་དང༌། ད་
ལྟར་བའི་ཕུང་པོ་ལ་ལྷག་པར་ཆགས་པའི་ཕུང་པོ་ཁམས་སྐྱེ་མཆེད་བསམ་གཟུགས་ཚད་མེད་རྣམས་ཟག་བཅས་དང༌། གང་ཟག་གི་བདག་དེར་ལྟ་བའི་གཉེན་པོ་དྲན་པ་ཉེར་བཞག་སོགས་ཟག་མེད་དོ། །ཟག་བཅས་ཟག་མེད་ཀྱི་དོན་ལ་ཡང་ཀུན་བཏུས་ལས། ཟག་པ་དེའི་བདག་ཉིད་དང་ཟག་པ་དང་འབྲེལ་བ་དང༌། ཟག་པས་བཅིངས་བ་དང༌། ཟག་པའི་རྗེས་སུ་འབྲེལ་བ་དང༌། ཟག་པའི་རྗེས་སུ་མཐུན་པ་དང༌། ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་ཟག་པའི་སྒོ་དྲུག་དང་འབྲེལ་མ་འབྲེལ་དང༌། མཛོད་ནས་དམིགས་པ་དང་མཚུངས་ལྡན་གང་རུང་གི་སྒོ་ནས་ཟག་པ་རྒྱས་མི་རྒྱས་ལ་ཟག་བཅས་ཟག་མེད་དུ་བཤད་པ་ཡོད་ཀྱང་འདིར་ནི་ཟག་པའི་གཉེན་པོ་བྱེད་མི་བྱེད་ལ་བཞག་པས་མི་མཐུན་ནོ། །རྒྱུ་རྐྱེན་ལ་རགས་ལས་པ་ཁམས་གསུམ་དང༌། བྱང་ཕྱོགས་ནས་མ་འདྲེས་པའི་བར་འདུས་བྱས་དང༌། རྒྱུ་ལ་མི་ལྟོས་པ་དེ་བཞིན་ཉིད་དང་འགོག་པ་གཉིས་ནམ་མཁའ་རྣམས་འདུས་མ་བྱས་དང༌། འཕགས་པའི་སྐྱེ་བོ་ཕལ་ཆེ་བའི་རྒྱུད་ལས་འབྱུང་བའི་བསམ་གཟུགས་མངོན་ཤེས་སོགས་ཐུན་མོང་བ་དང༌། ཡང་དག་པར་རྫོགས་པའི་སངས་རྒྱས་ཀྱི་རྒྱུད་ལས་འབྱུང་བའི་སྟོབས་བཅུ་སོགས་ཐུན་མོང་མ་ཡིན་པའོ། །ཐུན་མོང་ཡིན་མིན་འདི་ལ་ཡང་ཆོས་དང་རྒྱུད་དབང་བཙན་དུ་བྱས་པ་གཉིས་ལས། ཆོས་ཀྱི་དབང་དུ་བྱས་ན་སྟོབས་དང་མ་འདྲེས་པ་
སོགས་སངས་རྒྱས་ཁོ་ན་ལ་ཡོད་པ་རྣམས་སངས་རྒྱས་ཀྱི་ཐུན་མོང་མ་ཡིན་པ་དང༌། རྒྱུད་ཀྱི་དབང་དུ་བྱས་ན་སྒྲིབ་པ་མ་ལུས་པ་དག་པའི་རྒྱུད་ལ་ཡོད་པའི་ཕྱིར་སངས་རྒྱས་ཀྱི་སའི་སྤྱན་དང་མངོན་ཤེས་སོགས་ཐམས་ཅད་ཀྱང་ཐུན་མོང་མ་ཡིན་པ་ཡིན་པས་འདིར་རྒྱུད་ཀྱི་དབང་དུ་བྱས་པར་ཉི་སྣང་ལས་བཤད་དོ། །གཉིས་པ་ཇི་ལྟར་དམིགས་ཚུལ་ནི། དང་པོར་བྱང་སེམས་ལ་བདག་གི་བླང་བྱ་དོར་བྱ་བཏང་སྙོམས་སུ་བྱ་བ་གང་ཡིན་སྙམ་པའི་བློ་སྐྱེ་བས། དེ་ལ་ལྟོས་ཏེ་དང་པོ་གསུམ་མོ། །དེ་ནས་བླང་བྱ་ཉེ་བར་བཟུང་ནས་དེ་ལ་ཡང་དང་པོ་དང་ཕྱིས་བླང་བྱ་གང་སྙམ་པ་ལས་འཇིག་རྟེན་པའི་ལམ་དང་འདས་པ་གཉིས་སོ། །དེ་ནས་ཕྱི་མ་དེའི་སྤང་བྱ་དང་ངོ་བོ་གང་སྙམ་པས་ཟག་པ་ཡོད་མེད་དོ། །ཟག་མེད་དེའི་དམིགས་ པ་གང་སྙམ་པས་འདུས་བྱས ་ཀུན་རྫོབ་དང་འདུས་མ་བྱས་དོན་དམ་མོ། །དེ་ནས་འདུས་བྱས་བཞག་ནས་འདུས་མ་བྱས་ལ་དམིགས་པའི་འབྲས་བུ་ལ་ཐུན་མོང་ཡིན་མིན་གཉིས་སོ། །འདུས་ བྱས་ལ་དམིགས་པ་ལ་ཡང་འབྲས་བུ་ཡོད་མོད་ཀྱིས་འཕགས་པའི་གང ་ཟག་རྣམས་ནི་འདུས་མ་བྱས་རྟོགས་ཚུལ་གྱིས་རབ་ཏུ་ཕྱེ་བ་ཡིན་པས་འདུས་བྱས་ལ་དམིགས་པའི་འབྲས་བུ་མ་བསྟན་ནོ། །གསུམ་པ་སྒྲུབ་པའི་ཆེད་དུ་བྱ་བ་ནི་ཆེན་པོ་གསུམ་སྟེ། འདི་ལ་ཟླ་འོད་དང་དག་ལྡན་གྱི་དགོངས་པ་ལྟར་ན། རྡོ་རྗེ་ལྟ་བུ་
ལ་སོགས་པ་སེམས་ཆེན་པོ། ལྟ་བ་ཐམས་ཅད་སྤང་བའི་དོན་དུ་ཆོས་སྟོན་པ་སྤོང་བ་ཆེན་པོ། བྱང་ཆུབ་ཀྱི་སེམས་ལ་སོགས་པ་ལ་ཞེན་པ་མེད་པ་རྟོགས་པ་ཆེན་པོའོ། །འདི་ལྟར་ན་ཆེན་པོ་གསུམ་བྱང་སེམས་ཀྱིས་བྱས་ནས་མཆོག་ཉིད་ཆེན་པོ་སངས་རྒྱས་ལ་འདོད་དོ། །འཕགས་པའི་བཞེད་པ་ལྟར་ན། བསྒྲུབ་བྱ་དང༌། སྒྲུབ་བྱེད་གཉིས་ལས། དང་པོ་ནི། སེམས་ཅན་གྱི་ཕུང་པོ་ཆེན་པོ་དང༌། །སེམས་ཅན་གྱི་སྡེ་ཆེན་པོ་ཉིད་ཀྱི་མཆོག་ཏུ་གྱུར་པ་མཆོག་ཆེན་པོ། སྒྲིབ་གཉིས་མ་ལུས་པར་སྤངས་པ་སྤང་བ་ཆེན་པོ། ཇི་ལྟ་དང་ཇི་སྙེད་ཐམས་ཅད་རྟོགས་པས་ཡུལ་གང་ལ་ཡང་ཆགས་པ་དང་བྲལ་བའི་རྟོགས་པ་ཆེན་པོའོ། །དེ་ལ་སེམས་ཅན་གྱི་ཕུང་པོ་ནི་སྤྱི་དང་སྡེ་ནི་རིགས་ལ་སོགས་པ་ཁྱད་པར་རོ། །གཉིས་པ་དེ་སྒྲུབ་པར་བྱེད་པ་ནི་བྱང་ཆུབ་སེམས་དཔའ་རྣམས་ལ་ཡོད་པ་སྟེ། སེམས་ཅན་ཀུན་གྱི་མཆོག་ཉིད་དུ་བྱེད་པའི་སེམས་རྣམ་པ་དྲུག་དང༌། ལྟ་བ་ཐམས་ཅད་སྤང་བའི་སླད་དུ་མི་དམིགས་པའི་ཚུལ་གྱིས་སེམས་ཅན་རྣམས་ལ་ཆོས་སྟོན་པ་དང༌། ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ཡིན་ཞིང་ཁམས་གསུམ་དུ་མ་གཏོགས་པའི་བྱང་ཆུབ་ཀྱི་སེམས་ཆགས་པ་མེད་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོར་འཇོག་པའི་རྒྱུ་གསུམ་མོ། །དེ་ལ་སེམས་རྣམ་པ་དྲུག་ནི། རྡོ་
རྗེ་ལྟ་བུའི་སེམས་དང༌། རླབས་པོ་ཆེའི་སེམས་དང༌། མི་སྒུལ་བའི་སེམས་དང༌། ཕན་པའི་སེམས་དང༌། ཆོས་ལ་ཀུན་དགའ་བས་ཡུམ་གྱི་རྣལ་འབྱོར་ལ་བརྩོན་པའི་སེམས་དང༌། རྣམ་བྱང་གི་ཆོས་ཐམས་ཅད་ལ་གནས་ནས་སེམས་ཅན་ཀུན་གྱི་མཆོག་ཏུ་འགྱུར་བར་བྱ་བའི་སེམས་སོ། །དང་པོ་ནི། སེམས་ཅན་ཀུན་གྱི་དོན་དུ་སྲིད་པ་ཇི་སྲིད་པར་གོ་གྱོན་ཏེ་ལུས་དཔག་ཏུ་མེད་པ་འཛིན་ཅིང་བདོག་པ་ཐམས་ཅད་ཡོངས་སུ་གཏོང་བ་དང༌། སེམས་ཅན་ལ་སེམས་མཉམ་ཞིང་ཐེག་གསུམ་གྱིས་མྱ་ངན་ལས་འདས་ཀྱང་ཆོས་ཐམས་ཅད་སྐྱེ་མེད་དུ་ཤེས་པས་འདས་པ་མེད་པར་རྟོགས་པ་དང༌། ཉན་རང་གི་ཡིད་བྱེད་དང་མ་འདྲེས་པའི་སེམས་ཀྱིས་ཕྱིན་དྲུག་ལ་སྤྱད་དེ་ཆོས་རྣམས་ཚུལ་གཅིག་ཏུ་རྟོགས་པར་བྱེད་པ་དང༌། སེམས་ཅན་རེ་རེའི་དོན་དུ་ཡང་དེ་རྣམས་མྱ་ངན་ལས་མ་འདས་ཀྱི་བར་དུ་དེ་དག་གི་སྡུག་བསྔལ་མྱང་བར་བྱའོ་ཞེས་ཁས་བླངས་ནས་ཕྱིས་རང་གི་ཚོགས་ཡོངས་སུ་རྫོགས་པར་བྱ་སྟེ་བྱང་ཆུབ་འདོད་པའོ། །གཉིས་པ་ནི། སེམས་དང་པོ་བསྐྱེད་ཕྱིན་ཆད་ཆགས་སོགས་དང་ཉན་རང་གི་སེམས་མི་བསྐྱེད་པའོ། །གསུམ་པ་ནི། ཐེག་ཆེན་སེམས་བསྐྱེད་ཀྱིས་རློམ་པ་མེད་པའོ། །བཞི་པ་ནི། སེམས་ཅན་སྐྱོབ་ཅིང་མི་གཏོང་ལ་དེས་རློམ་པ་མེད་པའོ། །ལྔ་པ་ནི། ཆོས་ཐམས་ཅད་ཀྱི་དབྱེར་མེད་
པའི་དེ་བཞིན་ཉིད་ལ་ལན་མང་དུ་ཡིད་ལ་བྱེད་པའོ། །དྲུག་པ་ནི། སྟོང་པ་ཉིད་ཆོས་སོ་བདུན་སྟོབས་མི་འཇིགས་པ་སོ་སོ་ཡང་དག་པར་རིག་པ་མ་འདྲེས་པ་དང༌། རྡོ་རྗེ་ལྟ་བུ་ནས་ནམ་མཁའ་ལྟར་ཆགས་པ་མེད་པས་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་གྱི་བར་ལ་གནས་པའོ། །དེ་ལ་ཆེད་དུ་བྱ་བ་དངོས་ནི་བསྒྲུབ་བྱ་སངས་རྒྱས་ཀྱི་ས་ན་ཡོད་པ་ཉིད་ཡིན་ནོ། །བཞི་པ་སྒྲུབ་པ་རང་གི་ངོ་བོ་ལ་གཉིས། སྤྱིའི་ངོ་བོ་དང༌། སོ་སོའི་དོན་ནོ། །དང་པོ་ལ་གཉིས། ཡུལ་དང་སྦྱོར་བའི་སྒྲུབ་པའོ། །དང་པོ་ནི། མཁྱེན་གསུམ་གྱི་ཡུལ་ལ་ཐོས་བསམ་གྱིས་ཉམས་སུ་ལེན་པའི་སྤྱིའི་སྒྲུབ་པ་སྟེ་སྦྱིན་སོགས་སུ་མགོ་མིག་མ་བཏོད་པའི་སྤྱིའི་སྒྲུབ་པའོ། །གཉིས་པ་ནི། རྣམ་ཀུན་ལ་སོགས་པ་མངོན་རྟོགས་སྦྱོར་བ་བཞི་སོ་སོར་ཕར་ཕྱིན་དྲུག་གི་རྟེན་ཅན་དུ་སྒྲུབ་པའོ། །དེ་ཡང་ཕྱིན་དྲུག་ལ་འབད་རྩོལ་གྱིས་གོམས་པར་བྱེད་པའི་བྱ་བ་ནི་རྣམ་ཀུན། དེ་དྲུག་ལ་འབད་རྩོལ་ཞི་བའི་རྣམ་པས་སྒོམ་པའི་བྱ་བ་ནི་རྩེ་མོ། དེ་དྲུག་ལ་ནུས་པ་མཐར་ཐུག་ཐོབ་པའི་དོན་དུ་དཀར་ཆོས་གཞན་དང་སྦྲེལ་ཞིང་རིམ་ཅན་དུ་སྒོམ་པ་རིམ་གྱིས། དེ་དག་རེ་རེས་རྟོགས་པར་བྱེད་པའི་སྒོམ་པའི་བྱ་བ་སྐད་ཅིག་མའི་སྒྲུབ་པའོ། །ཆོས་སྐུ་ནི་བྱ་བ་ཡོངས་སུ་ཆད་པའི་གནས་སྐབས་ཡིན་པས་བྱ་བའི་ཡུལ་མ་ཡིན་ནོ། །གཉིས་པ་སོ་སོའི་དོན་ལ་བཞི། ཐེག་ཆེན་ལ་གོ་བགོས་པ་དང༌། ཞུགས་
པ་དང༌། ཞུགས་པ་མཐར་ཕྱིན་བྱེད་དང༌། མཐར་ཕྱིན་པའི་སྒྲུབ་པའོ། །དང་པོ་ནི། གོ་ཆའི་སྒྲུབ་པ་ཡིན་ཏེ། འདི་ལ་དྲུག །ཕྱིན་དྲུག་གི་རང་བཞིན། གྲངས་ངེས་པ། གོ་རིམ་ངེས་པ། སྒྲུབས་པའི་ཚུལ། བསྒྲུབ་པའི་འབྲས་བུ། སྒྲ་བཤད་པའོ། །དང་པོ་ལ་སྦྱིན་པ་ནི། གཏོང་བའི་སེམས་དཔའ་ཆོས་བཞི་ལྡན་ནོ། །ཆོས་བཞི་ནི། མི་མཐུན་ཕྱོགས་སེར་སྣ་ཉམས་པ་དང༌། ཆོས་ཀྱི་བདག་མེད་རྟོགས་པས་རྣམ་པར་མི་རྟོག་པ་དང་ལྡན་པ་དང༌། གང་འདོད་པ་བྱིན་པས་འདོད་པ་རྫོགས་པར་བྱེད་པ་དང༌། སྦྱིན་པས་བསྡུས་ནས་ཐེག་གསུམ་གྱི་སྐལ་བ་ཇི་ལྟ་བ་བཞིན་དུ་སྨིན་པར་བྱེད་པའོ། །དེ་བཞིན་དུ་སྤོང་སེམས་དང༌། མི་འཁྲུགས་པ་དང༌། དགེ་བ་ལ་སྤྲོ་བ་དང༌། སེམས་རྩེ་གཅིག་པ་དང༌། ཆོས་རབ་ཏུ་རྣམ་འབྱེད་ཆོས་བཞི་ལྡན་ནོ། །དེ་ལ་མི་མཐུན་ཕྱོགས་ནི་རང་རང་གི་སྐབས་ཀྱི་ཡིན་ལ། འདོད་པ་རྫོགས་པར་བྱེད་པ་ནི། རིམ་པ་ལྟར་ལུས་ངག་གི་སྒོ་ནས་གཞན་ལ་གནོད་པ་བསྡམ་པ་དང༌། གཞན་གྱི་གནོད་པར་ བྱས་པ་བཟོད་བས་དང༌། སེམས་ཅན་རྣམས་ཀྱི་ལས་སུ་བྱ་བ་གང ་དང་ གང་གི་གྲོགས་བྱེད་པས་དང༌། སྤྲུལ་པ་བྱས ་ནས་སེམས་ཅན་གྱི་ཡིད་བཞིན་དུ་སྤྲུལ་པས་དང༌། སེམས་ཅན་གྱི་ཐེ་ཚོམ་གཅོད་པས་འདོད་པ་ཡོངས་
སུ་རྫོགས་པར་བྱེད་དོ། །དེ་དག་རེ་རེ་ཡང་གསུམ་གསུམ་དུ་ཕྱེ་བས་བཅོ་བརྒྱད་དུ་འགྱུར་བ་ནི། དང་པོ་ལ་ཆོས། ཟང་ཟིང༌། མི་འཇིགས་པའོ། །གཉིས་པ་ལ་སེམས་ཅན་དོན་བྱེད་དགེ་བ་ཆོས་སྡུད་སྡོམ་པའོ། །གསུམ་པ་ལ་གནོད་པ་ལ་ཇི་མི་སྙམ་པ། སྡུག་བསྔལ་དང་ལེན། ཆོས་ལ་ངེས་སེམས་སོ། །བཞི་པ་ལ་གོ་ཆ་སྦྱོར་བ་སེམས་ཅན་གྱི་དོན་བྱ་བའོ། །ལྔ་པ་ལ་མཐོང་ཆོས་བདེར་གནས། ཡོན་ཏན་མངོན་པར་སྒྲུབ་པ། སེམས་ཅན་གྱི་དོན་བྱ་བའོ། །དྲུག་པ་ལ་ཀུན་རྫོབ་དོན་དམ་སེམས་ཅན་ལ་དམིགས་པའོ། །གཉིས་པ་གྲངས་ངེས་པ་ནི། བསླབ་གསུམ་རྒྱུད་ལ་སྐྱེད་པ་ལ་དྲུག་དགོས་པའི་ཕྱིར་ཏེ། ལོངས་སྤྱོད་ལ་མི་ལྟ་ན་ཚུལ་ཁྲིམས་ལེན་ཞིང༌། དེ་གཤེ་བ་་རྣམ་པར་མི་རྟོག་པའི་སྦྱོར་བ། དངོས་གཞི་རྗེས་ལ་ཐོབ་པའི་ཤེས་རབ་བོ། ལ་སླར་མི་གཤེ་བ་སོགས་ཀྱི་བཟོད་པས་སྲུང་བའི་ཚུལ་ཁྲིམས་སྒྲུབ་པ་ལ་དང་པོ་གསུམ་མོ། །ཐ་མ་གཉིས་ཀྱིས་སེམས་དང་ཤེས་རབ་ཀྱི་བསླབ་པ་རྣམ་པ་གཉིས་བསྡུས་སོ། །བརྩོན་འགྲུས་ནི་ཐམས་ཅད་ཀྱི་གྲོགས་ཡིན་པས་གསུམ་ཆར་ལ་གཏོགས་སོ། །གསུམ་པ་གོ་རིམ་ངེས་པ་ནི། རྒྱན་ལས། སྔ་མ་ལ་བརྟེན་ཕྱི་མ་སྟེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། ཞེས་སོ། དེ་ལ་སྐྱེ་བའི་རིམ་པ་ནི། ལོངས་སྤྱོད་ལ་
མི་ལྟ་ན་ཚུལ་ཁྲིམས་ལེན་ནོ། །ཚུལ་ཁྲིམས་དང་ལྡན་ན་བཟོད་དོ། །བཟོད་པ་དང་ལྡན་ན་བརྩོན་འགྲུས་རྩོམ་མོ། །བརྩོན་འགྲུས་བརྩམས་ན་ཏིང་ངེ་འཛིན་སྐྱེའོ། སེམས་མཉམ་པར་བཞག་ན་ཇི་ལྟ་བ་བཞིན་ཤེས་སོ། །དམན་མཆོག་ནི་སྔ་མ་རྣམས་དམན་ལ་ཕྱི་མ་རྣམས་བཟང་བའོ། །རགས་ཕྲའི་རིམ་པ་ནི་སྔ་མ་རྣམས་ལ་འཇུག་པ་དང་བྱ་སླ་ལ་ཕྱི་མ་རྣམས་ལ་དེ་དག་ཆེས་དཀའ་བའོ། །བཞི་པ་སྒྲུབ་ཚུལ་ནི། རྒྱན་ལས། རེ་བ་མེད་པའི་སྦྱིན་པ་དང༌། །ཡང་སྲིད་མི་འདོད་ཚུལ་ཁྲིམས་དང༌། །ཐམས་ཅད་ལ་ནི་བཟོད་པ་དང༌། །ཡོན་ཏན་ཀུན་འབྱུང་བརྩོན་འགྲུས་དང༌། །དེ་བཞིན་བསམ་གཏན་གཟུགས་མེད་མིན། །ཤེས་རབ་ཐབས་དང་ལྡན་པ་ཡིས། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱིས་ཡང་དག་སྦྱོར། ཞེས་པ་བཞིན་ཡིན་ལ། ཡང་ན་ཐེག་བསྡུས་ལས། བྱང་ཆུབ་ཀྱི་སེམས་ལ་བརྟེན་པས་བརྟེན་དམ་པ། དངོས་པོ་ཐམས་ཅད་སྤྱོད་པས་དངོས་པོ་དམ་པ། སེམས་ཅན་གྱི་དོན་དུ་སྤྱོད་པས་ཆེད་དུ་བྱ་བ་དམ་པ། འཁོར་གསུམ་དུ་མི་རྟོག་པས་ཟིན་པས་ཐབས་ལ་མཁས་པ་དམ་པ། བྱང་ཆུབ་ཏུ་བསྔོས་པས་བསྔོ་བ་དམ་པ། སྒྲིབ་པ་གཉིས་དག་པར་བྱས་པའི་དག་པ་དམ་པ་སྟེ་རེ་རེ་ཡང་དམ་པ་དྲུག་ལྡན་དུ་སྒྲུབ་པར་བཤད་པ་ལྟར་རོ། །འདིར་གོ་སྒྲུབ་དངོས་ཀྱི་དབང་དུ་བྱས་ན་ཕ་རོལ་ཏུ་ཕྱིན་
པ་དྲུག་པོ་རེ་རེ་ལ་ཡང་དྲུག་དྲུག་ཚང་བར་ཉམས་སུ་ལེན་པ་སྟེ། འདིའི་སྐབས་སུ་སྦྱིན་པའི་གོ་ཆ་ནི། གནོད་འཇོམས་གཉིས་ལེ་བརྒྱད་མ། ཁྲི་བརྒྱད་སྟོང་བ་རྣམས་ལས། དགེ་རྩ་སེམས་ཅན་དང་ཐུན་མོང་དུ་བྱས་ཏེ་བྱང་ཆུབ་ཏུ་བསྔོ་བ་ལ་བཤད་ལ། རང་དེ་ལ་གནས་ནས་གཞན་དེ་ལ་འགོད་པར་བཤད་པ་ཡང་ཡོད་དོ། །ཚུལ་ཁྲིམས་ཀྱི་གོ་ཆ་ནི། ཉན་རང་གི་བློ་དང་མ་འདྲེས་པ་ལ་ཐམས་ཅད་བཞེད་དོ། །བཟོད་པ་ནི། གནོད་འཇོམས་གཉིས་སུ་འཁོར་གསུམ་མི་དམིགས་པ་ལ་བཤད་ཅིང༌། གཞན་རྣམས་སྐྱེ་བོ་ཐམས་ཅད་ཀྱིས་གཤེ་བ་སོགས་ལ་ཁོང་མི་ཁྲོ་བ་ལ་བཞེད་དོ། །བརྩོན་འགྲུས་ནི། གནོད་འཇོམས་ལས་སེམས་ཅན་གྱི་དོན་དུ་བསྔོས་པས་དགེ་བ་ལ་བརྩོན་པ་འཕེལ་བ་དང༌། གཞན་རྣམས་དགེ་བ་འདོད་པའི་འདུན་པ་དྲག་པོ་བསྐྱེད་པ་ལ་བཞེད། བསམ་གཏན་གྱི་གོ་ཆ་ནི། ཉི་སྣང་དང་རྒྱན་སྣང་དུ་ཐེག་པ་གཞན་དང་མ་འདྲེས་པས་དགེ་རྩ་བ་བསྔོ་བ་ལ་བཤད་ཅིང་ལེ་བརྒྱད་མ་དང་ཁྲི་བརྒྱད་སྟོང་པར་ཡང་དེ་བཞིན་བཤད། གཞན་རྣམས་རྣམ་མཁྱེན་ལ་སེམས་རྩེ་གཅིག་པ་ཙམ་ལ་བཞེད་དོ། །ཤེས་རབ་ནི། ཉི་སྣང་དང་རྒྱན་སྣང་དུ་སྒྱུ་མའི་འདུ་ཤེས་ཉེ་བར་གནས་པས་འཁོར་གསུམ་མི་དམིགས་པ་དང༌། གནོད་འཇོམས་ལས་ཀུན་རྫོབ་ལ་བརྟེན་ནས་བྱང་ཆུབ་ཏུ་བསྔོ་བ་དང་དོན་དམ་ལ་བརྟེན་ནས་
འཁོར་གསུམ་མི་དམིགས་པ་ལ་བཤད་དེ་འདི་གཉིས་འདྲ་ལ། ལེ་བརྒྱད་མར་དགེ་རྩས་རློམ་སེམས་སུ་མི་བྱེད་ཅིང་མི་དམིགས་པ་རྐྱང་པ་དང༌། ཁྲི་བརྒྱད་སྟོང་པ་ལས་བསྔོ་བ་ལ་ཤེས་རབ་ཏུ་བཤད་དོ། །ལྔ་པ་བསྒྲུབས་པའི་འབྲས་བུ་ནི། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་བརྩོན་པས་བརྫིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་དོན་ཀུན་འགྲུབ། །བདུན་པོ་འདི་དག་མ་ལུས་པ། །ཅིག་ཆར་ཕ་རོལ་ཕྱིན་པ་ཡིས། །ཡེ་ཤེས་བསམ་མི་ཁྱབ་པའི་ཡུལ། །རྣམ་པ་ཐམས་ཅད་མཁྱེན་ཉིད་ཐོབ། །ཅེས་གནས་སྐབས་དང་མཐར་ཐུག་གི་འབྲས་བུ་གསུངས་པ་ལྟར་རོ། །དྲུག་པ་སྒྲ་བཤད་པ་ནི། རྒྱན་ལས། དབུལ་བ་འདོར་བར་བྱེད་པ་དང༌། །བསིལ་བ་ཐོབ་དང་ཁྲོ་བཟོད་དང༌། །མཆོག་སྦྱོར་བ་དང་ཡིད་འཛིན་དང༌། །དོན་དམ་ཤེས་པའི་ཕྱིར་བཤད་དོ། །ཞེས་པ་ལྟར་རོ། །གཉིས་པ་འཇུག་པའི་སྒྲུབ་པ་ལ་གཉིས་འཇུག་སྒྲུབ་དངོས་བཤད་པ་དང༌། རྟོགས་དཀའ་བ་བྱེ་བྲག་ཏུ་བཤད་པའོ། །དང་པོ་ནི་འཇུག་སྒྲུབ་དགུ་སྟེ། རྣམ་རྟགས་མཚན་མ་རྣམས་ནམ་མཁའ་དང་འདྲ་བར་མི་དམིགས་པར་ཡིད་ལ་བྱེད་པའི་བསམ་གཟུགས་སྒོམ་པ་དང༌། འདིའི་རྣམ་རྟགས་མཚན་མ་གསུམ་ནི། སྤང་གཉེན་ཕན་ཡོད་གསུམ་མམ། ཞི་རགས་
ཚོར་བ་རོ་མྱང་གསུམ་མོ། །ཉན་རང་ཡིད་བྱེད་དང་བྲལ་ཞིང་རྣམ་མཁྱེན་ལ་དམིགས་པའི་ཕྱིན་དྲུག །བྱང་ཕྱོགས་ནས་མ་འདྲེས་པའི་བར་སྒོམ་པའི་ལམ། ཕ་རོལ་ཏུ་ཕྱིན་པ་དྲུག་དང་ལྡན་པའི་ཚད་མེད། སྟོང་ཉིད་བཅོ་བརྒྱད་ཀྱི་རང་བཞིན་དམིགས་མེད། སྦྱིན་པ་སྦྱིན་པོ་སྦྱིན་ཡུལ་སོགས་དམིགས་པ་མེད་པའི་འཁོར་གསུམ་རྣམ་དག །བྱང་ཕྱོགས་སོགས་ལམ་གྱི་ཆོས་ལ་མངོན་ཞེན་མ་ལུས་པར་འགགས་པའི་ཆེད་དུ་བྱ་བ། སེམས་ཅན་ཡོངས་སུ་སྨིན་པར་བྱེད་པའི་མངོན་ཤེས། ལྷ་དང་བཅས་པས་བསྐོར་བར་མི་ནུས་པའི་ཆོས་ཀྱི་འཁོར་ལོ་བསྐོར་བའི་རྒྱུ་རྣམ་མཁྱེན་ཏེ་འཇུག་ཡུལ་ཐེག་ཆེན་དགུ་ལ་འཇུག་པའི་སྒྲུབ་པ་དགུའོ། །གཉིས་པ་རྟོགས་དཀའ་བྱེ་བྲག་ཏུ་བཤད་པ་ལ། བསམ་གཏན་གཟུགས་མེད་དང༌། ཚད་མེད་བྱེ་བྲག་ཏུ་བཤད་པའོ། །དང་པོ་བསམ་གཟུགས་བཤད་པ་ལ་བཞི། གང་གིས་ཐོབ་བྱེད་ཀྱི་རྒྱུ། གང་ཞིག་ཐོབ་བྱའི་ངོ་བོ། དེ་ལྟར་ཐོབ་པའི་རྟགས། ཐོབ་པ་པོའི་གང་ཟག་གོ། །དང་པོ་གང་གིས་ཐོབ་བྱེད་ཀྱི་རྒྱུ་ལ་གསུམ། བསམ་གཏན་དང་པོའི་ཐོབ་བྱེད་བཤད། ལྷག་མ་དེ་དང་མཚུངས་པར་བསྟན། ལམ་དགུ་པ་གང་དུ་གཏོགས་བསམ་པའོ། །དང་པོ་བསམ་གཏན་དང་པོའི་ཐོབ་བྱེད་ནི། ཡིད་བྱེད་བདུན་ཏེ། དང་པོར་འདོད་པ་ནི་སྡུག་བསྔལ་ཆེས་རྒྱས་ཤིང་མ་ཞི་བ་དང༌། ཆེས་ཚེ་ཐུང་ལ་བསམ་གཏན་དང་པོ་ནི་དེ་ལས་བཟློག་པས་རགས་པ་དང་ཞི་བའོ།
ཞེས་ཐོས་བསམ་འདྲེས་མར་ཡིད་ལ་བྱེད་པ་ནི་ཁམས་གོང་འོག་གི་མཚན་ཉིད་སོ་སོར་གཅོད་པས་མཚན་ཉིད་རབ་ཏུ་རིག་པའི་ཡིད་བྱེད་དོ། །དེ་ལྟར་གོང་འོག་ལ་ཞི་རགས་སུ་མོས་པར་བྱས་པ་ལས་ཐོས་བསམ་ལས་འདས་ནས་ཞི་གནས་དང་ལྷག་མཐོང་དུ་སོན་པ་ནི་མོས་པ་ལས་བྱུང་བའི་ཡིད་ལ་བྱེད་པའོ། །དེ་ཡུན་རིང་དུ་འདྲེས་པར་བྱས་པའི་མཐུས་ཐོག་མཁོ་ནར་འདོད་པའི་ཉོན་མོངས་ཆེན་པོ་གསུམ་སྤོང་བའི་ལམ་སྐྱེ་བར་འགྱུར་ཞིང་སྐྱེས་པའི་ལམ་དེ་དང་ལྡན་པའི་ཡིད་བྱེད་ནི་རབ་ཏུ་དབེན་པའི་ཡིད་བྱེད་དོ། །དེས་འདོད་པའི་ཉོན་མོངས་དང་དེའི་ཕྱོགས་ཀྱི་གནས་ངན་ལེན་དང་བྲལ་བར་བྱས་པ་ན་དེ་ནས་ཉོན་མོངས་སྤོང་བ་དང་དེས་དབེན་པ་ལ་དགའ་བར་འགྱུར་ཞིང༌། དེ་གཉིས་ལ་ཕན་ཡོན་དུ་མཐོང་ནས་དབེན་པ་ལས་སྐྱེས་པའི་དགའ་བདེ་ཆུང་ངུས་རེག་པ་ན། གཉིད་རྨུགས་དང་རྒོད་པ་དང་བྲལ་བར་བྱ་བའི་ཕྱིར་དུས་དུས་སུ་རབ་ཏུ་དྭངས་པར་འགྱུར་བའི་ཡིད་ཕྱེད་ཀྱིས་དང་བར་བྱེད་ཅིང༌། སྐྱོ་བར་འགྱུར་བའི་ཡིད་བྱེད་ཀྱིས་སྐྱོ་བར་བྱེད་པ་ནི་དགའ་བ་སྡུད་པའི་ཡིད་བྱེད་དེ་ཉོན་མོངས་པ་འབྲིང་གསུམ་སྤོང་བའི་གནས་སྐབས་སོ། །རབ་ཏུ་དང་བ་དང་སྐྱོ་བར་འགྱུར་བའི་ཡིད་བྱེད་ནི་རིམ་པ་ལྟར། སྤོང་བ་ལ་འདོད་པ་དང༌། མ་སྤང་བ་ལ་ཉེས་དམིགས་ཀྱི་རྣམ་པར་སྒོམ་པའོ། །དེ་ལྟར་སྤོང་བ་ལ་བརྩོན་པ་ན་རྒྱུའམ་
གནས་ཀྱང་རུང་སྟེ་དགེ་བ་ལ་སྦྱོར་བའི་གེགས་བྱེད་པའི་འདོད་པའི་ཀུན་དཀྲིས་མི་འབྱུང་བ་ན་འདི་སྙམ་དུ། ཅི་འདི་བདག་ལ་ཡོད་བཞིན་དུ་མི་མྱོང་ངམ། འོན་ཏེ་མེད་པས་མི་མྱོང་སྙམ་ནས་སྡུག་པའི་རྣམ་པ་ཡིད་ལ་བྱས་པས་འདོད་པ་ལ་འདུན་པ་འབྱུང་བ་ན། འདི་སྙམ་དུ་བདག་གི་སེམས་འདོད་པ་ལ་ཆགས་པ་དང་མ་བྲལ་ལོ་སྙམ་དེས་སྤང་བྱ་ལྷག་མ་སྤང་བའི་ཕྱིར་ཞི་རགས་སུ་སྒོམ་པ་ནི་དཔྱོད་པའི་ཡིད་བྱེད་དོ། །དེ་ལྟར་དུས་དུས་སུ་སྤང་མ་སྤངས་དཔྱོད་པ་ན་སྤང་བྱ་མངོན་གྱུར་མ་སྤངས་པ་སྤང་བའི་ཕྱིར་འདོད་པའི་ཉོན་མོངས་ཆུང་ངུ་གསུམ་གྱི་གཉེན་པོ་སྐྱེས་པ་ནི། སྦྱོར་བ་མཐར་ཐུག་པའི་ཡིད་བྱེད་དེ། དེ་ཡང་རེ་ཞིག་ཙམ་སྤང་བ་ཡིན་གྱི། གཏན་སྤངས་པ་ནི་མིན་ཏེ། ས་བོན་དྲུང་མ་ཕྱུང་བའི་ཕྱིར་ཏེ། འཇིག་རྟེན་པའི་ལམ་ལ་དེའི་ནུས་པ་མེད་པས་སོ། །དེའི་མཇུག་ཐོགས་སུ་རེ་མཐུས་བསམ་གཏན་དང་པོའི་དངོས་གཞི་ལ་འཇུག་ཅིང་དངོས་གཞི་དང་ལྡན་པའི་ཡིད་བྱེད་སྐྱེས་པ་ནི་སྦྱོར་བའི་འབྲས་བུ་ཡིད་ལ་བྱེད་པའོ། །དེ་ལྟར་ཡིད་བྱེད་བདུན་དུ་གྲངས་ངེས་པ་ཡང༌། ཉེར་བསྔོགས་ཀྱིས་ས་འོག་མའི་སྤང་བྱ་མ་སྤངས་ཤིང་གོང་མའི་ཐོབ་བྱ་མ་ཐོབ་ན་དངོས་གཞི་མི་ཐོབ་པས་དེའི་ཕྱིར་བདུན་དུ་བཞག་སྟེ། འདི་ལྟར་ཉེར་བསྔོགས་ཀྱི་ལམ་གྱི་རྒྱུ་དང༌། ངོ་བོ་དང༌། འབྲས་བུ་གསུམ་ལས་དང་པོ་མ་སྐྱེས་པ་སྐྱེད་པར་བྱེད་པ་ལ་ཡིད་
བྱེད་དང་པོ་གཉིས་ཏེ། དང་པོས་སྤང་བྱ་ཐོབ་བྱ་ཤེས་པར་བྱས་ནས་སེམས་གཏོད་པར་བྱེད་ཅིང༌། གཉིས་པས་དེའི་དོན་དུ་བརྩོན་འགྲུས་རྩོམ་པས་སོ། །སྐྱེས་ཟིན་ཁྱད་པར་དུ་བྱེད་པ་ཡིད་བྱེད་ལྔ་པ་སྟེ། དེས་སྤངས་མ་སྤང་བརྟགས་ནས་སྤང་བྱ་ལྷག་མ་མཐར་འབྱིན་པར་བྱེད་པས་སོ། །དེ་གསུམ་ནི་རྒྱུའོ། །གཉིས་པ་ངོ་བོ་ནི། གསུམ་པ་བཞི་པ་དྲུག་པ་སྟེ་ས་འོག་མའི་ཉོན་མོངས་ཆེ་འབྲིང་ཆུང་གསུམ་འཇོམས་པས་སོ། །གསུམ་པ་འབྲས་བུ་ནི་ཡིད་བྱེད་བདུན་པའོ། །གཉིས་པ་ལྷག་མ་དེ་དང་མཚུངས་པར་བསྟན་པ་ནི། བསམ་གཏན་དང་པོ་ལ་ཇི་ལྟ་བར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དུ་ཡང་དེ་བཞིན་ནོ། །འོན་ཀྱང་མངོན་པའི་སྤྱི་སྐད་ལ་ཁམས་གོང་མ་ན་སེམས་ལོང་རྩོམ་པའི་ཚེ་སེམས་ལོང་མེད་པར་ཏིང་ངེ་འཛིན་དུ་འགྲོ་བས་གོང་མའི་ས་ལ་བསམ་བྱུང་དང་གཟུགས་མེད་ན་ཐོས་བྱུང་མེད་པར་བཤད་པས། དེའི་ལྟར་ན་གཟུགས་མེད་ཀྱི་རྟེན་ལ་སྒོམ་ན་ཡིད་བྱེད་དང་པོ་ལ་ཐོས་བསམ་གཉིས་ཀ་དང༌། གཟུགས་ཀྱི་རྟེན་ལ་སྒོམ་ན་བསམ་བྱུང་མེད་དོ། །གཞན་ཡང་བསམ་གཏན་བཞི་པའི་ཉེར་བསྡོགས་ནས་སྲིད་རྩེའི་ཉེར་བསྡོགས་ཀྱི་བར་ལས་དེར་ཚོར་བའི་དགའ་བདེ་མེད་པས་དགའ་བ་སྡུད་པའི་ཡིད་བྱེད་ཀྱི་དོན་སྤོང་བ་ལ་ཡོན་ཏན་དུ་མཐོང་བ་ཙམ་ལ་བཤད་དོ། །བསམ་གཏན་དང་པོའི་ཉེར་བསྡོགས་ཀྱི་ཡིད་བྱེད་དང་པོ་འདི་འདོད་པ་ཡིན་གྱི་གོང་སར་
མི་གཏོགས་ལ་འདིའི་རིག་པ་ལྷག་མ་རྣམས་ལའང་ཤེས་པར་བྱའོ། །གསུམ་པ་ལམ་དགུ་པ་གང་དུ་གཏོགས་བསམ་པ་ནི། སྦྱོར་བའི་མཐའི་འབྲས་བུ་ཡིད་བྱེད་དངོས་གཞིར་འདོད་པ་ལྟར་ན་ཉེར་བསྡོགས་ཀྱི་རྣམ་གྲོལ་ལམ་དགུ་པ་ལ་དངོས་གཞིས་ཁྱབ་པར་མངོན་ལ། མཛོད་པ་ནི་བསམ་གཏན་དང་པོ་གསུམ་གྱི་རྣམ་གྲོལ་ལམ་དགུ་པ་ལ་ཉེར་བསྡོགས་དང་དངོས་གཞིའི་ངོ་བོར་སྐྱེ་བ་གཉིས་འདོད་ལ། བཞི་པ་ཡན་ཆད་ལ་ནི་དངོས་གཞིས་ཁྱབ་པར་འདོད་དོ། །དེ་ཡང་མཛོད་དུ་ཉེར་བསྡོགས་ཀྱི་ཚོར་བ་བཏང་སྙོམས་ཁོ་ནར་འདོད་པས་བསམ་གཏན་དང་པོ་གསུམ་གྱི་ཉེར་བསྡོགས་དང་དངོས་གཞི་ལ་ཚོར་བའི་དབང་པོ་རིགས་མི་འདྲ་བ་ཡོད་པས་དབང་པོ་འཕོ་དཀའ་ལ། ལྷག་མ་རྣམས་ལ་བཏང་སྙོམས་ཁོ་ནར་ངེས་པས་དབང་པོ་འཕོ་མི་དཀའོ་སྙམ་དུ་བསམས་སོ། །དེ་ལྟར་ཉེར་བསྡོགས་ཀྱི་ཡིད་བྱེད་དྲུག་གི་ངོས་འཛིན་དེ་ནི། འཇིག་རྟེན་པའི་ལམ་གྱིས་འོག་ས་ལས་འདོད་ཆགས་དང་བྲལ་བའི་དབང་དུ་བྱས་ཀྱིས་དྲུག་པོ་དེར་གྲངས་ངེས་པ་ནི་མིན་ཏེ། མཐོང་ལམ་དང་སྒོམ་ལམ་ཟག་མེད་རྣམས་དང་པོའི་ཉེར་བསྡོགས་ལ་བརྟེན་པ་ཡོད་ཅིང༌། དེ་གཉིས་ཞི་རགས་ཀྱི་རྣམ་པ་ཅན་དུ་འགལ་ལ། ཁྱད་པར་དུ་མཐོང་ལམ་འདོད་པའི་སྒོམ་སྤང་གི་གཉེན་པོར་མི་རུང་བས་སོ། །སྤྱིར་ཞི་རགས་སུ་ལྟ་བའི་ལམ་འདིས་འདོད་པ་ལྟ་བུའི་ཉོན་མོངས་མངོན་གྱུར་མ་ལུས་པ་སྤང་
བར་འདོད་པ་ལ། བྱེ་སྨྲ་རྣམས་ཅི་ཡང་མན་ཆད་ཀྱི་མཐོང་སྤང་དང་སྒོམ་སྤང་གཉིས་ཀ་དང༌། མདོ་སྡེ་པ་རྣམས་སྒོམ་སྤང་རྣམས་སྤོང་བར་འདོད་དོ། །འོན་ཀྱང་ཞིབ་ཏུ་དཔྱད་ན་བྱིས་པས་ཞི་རགས་སུ་སྒོམ་པའི་ལམ་གྱིས་འདོད་པའི་སྒོམ་སྤང་གི་ཉོན་མོངས་ཀྱང་མངོན་གྱུར་མ་ལུས་པ་སྤོང་མི་ནུས་ཏེ། འདོད་པའི་རྟེན་ཅན་གྱི་ཉོན་ཡིད་འཕགས་ལམ་མ་ཐོབ་པར་ལྡོག་པ་མི་སྲིད་ལ། དེ་འདོད་པའི་སར་གཏོགས་པའི་སྒོམ་སྤང་གི་ཉོན་མོངས་ཡིན་པས་སོ། །ཉེར་བསྡོགས་བརྒྱད་པོ་དེ་ཡང༌། དང་པོ་མ་གཏོགས་པ་རྣམས་དག་པ་བ་ཁོ་ན་དང༌། དང་པོ་ལ་དག་པ་བ་དང་ཟག་མེད་གཉིས་ཡོད་ལ། ཁ་ཅིག་རོ་མྱོང་ཅན་དང་གསུམ་ཡོད་དེ། དངོས་གཞི་ལ་འགྲན་འཛུག་པས་སོ་ཞེས་འདོད་དོ། །གཉིས་པ་གང་ཞིག་ཐོབ་བྱའི་ངོ་བོ་ལ་གསུམ། འཇིག་རྟེན་པ་དང༌། འཇིག་རྟེན་ལས་འདས་པའི་ལམ་དང༌། དེ་དག་གི་རྣམ་བཞག་དཔྱད་པའོ། །དང་པོ་འཇིག་རྟེན་པའི་ལམ་ལ་གཉིས། ཉོན་མོངས་ཅན་དང༌། དག་པ་བའོ། །དང་པོ་ཉོན་མོངས་ཅན་ནི། གང་ཉོན་མོངས་པར་བྱ་བའི་གཞི་དང༌། གང་གི་ཉོན་མོངས་པར་བྱེད་པའི་ཆོས་དང༌། ཇི་ལྟར་ཉོན་མོངས་པར་བྱེད་པའི་ཚུལ་དང་གསུམ་མོ། །དང་པོ་གང་ཉོན་མོངས་པར་བྱ་ན། བསམ་གཏན་དང་གཟུགས་མེད་པའི་དངོས་གཞི་དག་པ་བའོ། །གང་གིས་ཉོན་མོངས་པར་
བྱེད་ན། རྩ་ཉོན་གྱི་ནང་ནས་ཁོང་ཁྲོ་ནི་ཁམས་གོང་གི་སེམས་ལ་མེད་པས་དེ་བོར་བའི་ལྷག་མ་བསྒྲིབས་ལ་ལུང་དུ་མ་བསྟན་པའི་སྲེད་ལྟ་ང་རྒྱལ་མ་རིག་པ་བཞི་ཡིན་ལ་དེ་ཡང་གོང་མ་གཉིས་ཀྱི་ས་པའོ། །ཇི་ལྟར་ཉོན་མོངས་པར་བྱེད་ན། དག་པ་བའི་སྙོམས་འཇུག་དེ་དག་ལ་མཉམ་པར་བཞག་པ་ན་དེ་ལ་འདོད་ཆགས་སྐྱེས་ནས་སྔར་དགེ་བ་ཡིན་ཀྱང་ཕྱིས་ཉོན་མོངས་དང་མཚུངས་ལྡན་དང༌། དེ་བཞིན་དུ་བདག་གིས་འདི་ཐོབ་ཀྱིས་གཞན་གྱིས་མིན་ནོ། ཞེས་ང་རྒྱལ་དང༌། ལམ་དང་ལམ་མིན་ལ་རྨོངས་པའི་མཐུས་འདི་དག་ནི་ཐར་ལམ་ཡིན་ལས་ཆེ་སྙམ་པ་དང༌། ཐར་ལམ་ཡིན་པ་ལ་དེ་ལས་བཟློག་པར་ཐེ་ཚོམ་ཟོས་ནས་དེ་དང་ལྡན་པ་དང༌། སྙོམས་འཇུག་དེ་དག་ལ་བརྟེན་ནས་མངོན་ཤེས་ཀྱིས་སྔོན་དང་ཕྱི་མའི་མཐའ་འགའ་ཞིག་མཐོང་བ་ན་དེ་ལ་འཇིག་རྟེན་རྟག་སོགས་སུ་ལོག་ལྟ་སྐྱེས་པས་དེ་དང་ལྡན་པར་སོང་བའོ། །འོ་ན་གཟུགས་མེད་མངོན་ཤེས་ཀྱི་རྟེན་མིན་པས་དེ་ལ་ལྟ་བས་ཉོན་མོངས་བར་བྱེད་ཚུལ་གང་ཞེ་ན། བདེན་མོད་ཀྱི་འོན་ཀྱང་གཟུགས་མེད་ལ་ནི་སྔར་ལྟ་ལོག་རྒྱུད་ལ་ལྡན་བཞིན་དུ་སྙོམས་འཇུག་དག་ཐོབ་པ་ན་བདག་གི་ལྟ་བ་འདི་ནི་མཆོག་སྟེ་འདིའི་མཐུས་ཏིང་འཛིན་འདི་ཐོབ་པས་སོ། །ཞེས་ལྟ་ངན་ལ་མཆོག་འཛིན་གྱི་ལྟ་བ་སྐྱེས་པས་ཉོན་མོངས་པ་ཅན་དུ་བྱེད་དོ། །ཉོན་མོངས་པ་བཞིར་བྱེད་པ་ནི་ཉི་འོག་བྱེ་སྨྲ་དང་མཐུན་ལ་ཁ་ཆེ་བྱེ་སྨྲ་ནི་ཉོན་
མོངས་ཅན་ལ་སྲེད་པ་ཤས་ཆེ་བའི་རོ་མྱོང་ཅན་གཅིག་པུ་འདོད་དོ། །འདི་དག་སྙོམས་འཇུག་མཚན་ཉིད་པ་མ་ཡིན་ཀྱང་སྔར་སྙོམས་འཇུག་གི་རྫས་ཡིན་པ་ཙམ་ལ་བསམས་ནས། སྙོམས་འཇུག་གི་དབྱེ་བ་ལ་བགྲངས་ཏེ་ས་བོན་རུལ་བ་བཞིན་ནོ། །གཞན་ཡང་འདི་ལུང་མ་བསྟན་པ་དང༌། འདི་ལ་དེའི་ཡན་ལག་རྣམས་ཀྱང་མི་ལྡན་པའི་ཕྱིར་རོ། །གཉིས་པ་དག་པ་ནི། བསམ་གཏན་དང༌། གཟུགས་མེད་འཇིག་རྟེན་པའི་དགེ་བ་སྟེ། རང་སའི་ཀུན་དཀྲིས་དང་བྲལ་བས་དག་པ་བའམ་རྣམ་བྱང་ཞེས་བྱའོ། །དེ་ལ་དབྱེ་ན་ཉམས་པ་དང༌། གནས་པ་དང༌། ཁྱད་པར་དང༌། ངེས་འབྱེད་ཆ་མཐུན་བཞི་ཡོད་དེ། རིམ་པ་ལྟར་རང་གི་མཇུག་ཐོགས་སུ་རགས་པའི་ཉོན་མོངས་དང༌། རང་དང་གོང་སའི་དག་པ་བ་དང་ཟག་མེད་ཀྱི་ལམ་སྐྱེ་བ་དང་རྗེས་སུ་མཐུན་པའོ། །སྲིད་རྩེ་ལ་གོང་ས་མེད་པས་ཁྱད་པར་ཆ་མཐུན་དོར་རོ། །གཉིས་པ་འཇིག་རྟེན་ལས་འདས་པ་ནི། བསམ་གཏན་བཞི་དང་གཟུགས་མེད་དང་པོ་གསུམ་སྟེ་བདུན་ལ་འཇིག་རྟེན་ལས་འདས་པའི་ལམ་རྟེན་གྱི་སྲིད་རྩེ་ལ་མིན་ཏེ་ཟག་མེད་ཀྱི་ལམ་ནི་རང་ཡུལ་གསལ་བར་གཅོད་ལ། ས་འདི་ནི་འདུ་ཤེས་ཀྱི་རྒྱུ་བ་ཤིན་ཏུ་མི་གསལ་བའི་ཕྱིར་རོ། །ཞེས་མངོན་པ་གོང་འོག་ནས་བཤད་ཀྱང༌། སློབ་དཔོན་སེང་གེ་བཟང་པོ་ནི་ཉན་ཐོས་ཀྱིས་སྒོམ་པ་ན་ཐབས་མི་མཁས་པས་དེ་ལྟར་ཡིན་ཀྱང༌། བྱང་སེམས་
ཀྱིས་འདི་སྒོམ་པ་ན་ཐབས་ལ་མཁས་པས་ཟག་མེད་དུ་འགྱུར་བར་བཤད་དོ། །སྤྱིར་ན་དང་པོའི་ཉེར་བསྡོགས་དང་དངོས་གཞི་ལ་ཙམ་ཁྱད་གཉིས་སུ་བྱས་ནས་ཟག་མེད་དགུར་བཤད་དོ། །གསུམ་པ་དེ་དག་གི་རྣམ་བཞག་བཤད་པ་ལ་གསུམ། བསམ་གཏན་གྱི་ཡན་ལག་དང༌། གཟུགས་མེད་ཀྱི་དམིགས་རྣམ་དཔྱད་པ་དང༌། དེ་དག་བསྒོམས་པའི་འབྲས་བུ་བཤད་པའོ། །དང་པོ་བསམ་གཏན་གྱི་ཡན་ལག་ལ་གསུམ། རྫས་བཏགས་ཀྱི་ཁྱད་པར། ཡན་ལག་གི་ངོ་བོ། གྲངས་ངེས་པའི་ཚུལ་ལོ། །དང་པོ་ནི། །སྤྱིར་བསམ་གཏན་གྱི་ཡན་ལག་ལ་མིང་གི་སྒོ་ནས་བཅོ་བརྒྱད་ཡོད་དེ། མཛོད་ལས། དང་པོ་ལ་ལྡ་རྟོག་དཔྱོད་དང༌། །དགའ་དང་བདེ་དང་ཏིང་འཛིན་རྣམས། །གཉིས་པ་ལ་ནི་ཡན་ལག་བཞི། །རབ་དང་དང་ནི་དགའ་བ་སོགས། །གསུམ་པ་ལ་ལྔ་བཏང་སྙོམས་དང༌། །དྲན་དང་ཤེས་བཞིན་བདེ་དང་གནས། །མཐའ་ན་བཞི་དྲན་བཏང་སྙོམས་དང༌། །བདེ་མིན་སྡུག་མིན་ཏིང་འཛིན་རྣམས། །ཞེས་པ་ལྟར་རོ། །དེ་དག་བྱེ་སྨྲ་རྣམས་རྫས་བཅུ་གཅིག་ཏུ་འདོད་དེ། །རྟོག་དཔྱོད་དགའ་བདེ་ཚོར་བ་སེམས་བདེ་ཏིང་འཛིན་རབ་དང་དྲན་ཤེས་བཞིན་འདུ་བྱེད་བཏང་སྙོམས་ཚོར་བ་བཏང་སྙོམས་ཀྱི་རྫས་སོ། །གོང་མ་ལྟར་ན་དགའ་བདེ་གཉིས་རྫས་གཅིག་ཡིན་ཞིང༌། རབ་དང་ནི་དྲན་ཤེས་བཞིན་བཏང་སྙོམས་གསུམ་གྱི་ངོ་བོ་ཡིན་པས་རྫས་དགུ་དང་ལྷག་མ་བཏགས་ཡོད་དུ་
འདོད་དོ། །ཡང་ན་བདེ་བ་རྣམས་ཀྱང་ཡིད་ཤེས་འཁོར་གྱི་ཚོར་བ་སིམ་པར་གཅིག་པས་རྫས་གཅིག་ཏུ་བགྲངས་ནས་བརྒྱད་དུ་བྱའོ། །གཉིས་པ་ཡན་ལག་གི་ངོ་བོ་ལ་བཞི། དང་པོ་བསམ་གཏན་དང་པོའི་ཡན་ལག་ལྔ་ལས་རྟོག་པ་ནི་ངོ་བོ་ཙམ་ཚོལ་བའོ། །དཔྱོད་པ་ནི་ཞིབ་ཏུ་དཔྱོད་པ་སྟེ་གཉིས་ཀ་ཡང་ནང་གི་བརྗོད་པ་ངག་ཀུན་ནས་སློང་བའོ། །འདི་གཉིས་བསམ་གཏན་གཞན་གསུམ་ལ་ཡང་སས་བསྡུས་པའི་ཚུལ་གྱིས་མེད་ཀྱིས་ཀུན་འབྱུང་བའི་སྒོ་ནས་ཡོད་པར་རྟོག་དཔྱོད་ཀྱིས་ལས་བཤད་དོ། །དེ་གཉིས་ཆར་ཀྱང་སེམས་པ་དང་ཤེས་རབ་གཉིས་ཆར་ལ་བཏགས་པའོ། །དགའ་བདེ་ནི་རིམ་པ་ལྟར་ཚོར་བ་ཡིད་བདེ་དང་སེམས་བྱུང་ཤིན་སྦྱང་གི་བདེ་བ་ལ་བྱེ་སྨྲ་རྣམས་འདོད། དེ་ལྟར་འདོད་པའི་རྒྱུ་མཚན་ཡང་བདེ་བ་ལུས་ཚོར་ཡིན་ན་དབང་ཤེས་ཀྱི་ས་པ་ཡིན་ལ་དབང་ཤེས་ནི་ཕྱི་རོལ་དུ་གཡེང་བས་བསམ་གཏན་ལ་མེད་ལ། ཡིད་ཤེས་འཁོར་གྱི་ཚོ་པར་མི་རུང་སྟེ། དགའ་བ་ཡང་ཚོར་བ་ཡིད་བདེ་ཡིན་པས་དེ་གཉིས་ཅིག་ཆར་འབྱུང་ན་རྫས་མཚུངས་ཉམས་ལ། རིམ་གྱིས་འོང་ན་བསམ་གཏན་དང་པོ་དང་གཉིས་པ་གཉིས་ཡན་ལག་ལྔ་པ་དང་བཞི་པར་མི་འགྱུར་ཏེ། ཡན་ལག་རྣམས་ནི་ཅིག་ཆར་འབྱུང་བས་སོ་སྙམ་དུ་བསམ་པའོ། །ཡང་མཛོད་ལས། གཞན་དག་ན་རེ། སེམས་ལས་བྱུང་
བའི་བདེ་བའི་དབང་པོ་ནི་བདེ་བ་ཁོ་ན་སྟེ་བསམ་གཏན་གསུམ་ཆར་ན་ཡང་ལུས་ཀྱི་བདེ་བ་ཁོ་ན་ཡན་ལག་ཏུ་བཞག་གོ། །ཞེས་ཟེར་རོ། །ཞེས་བསམ་གཏན་དང་པོ་གསུམ་གྱི་བདེ་བ་ནི་ལུས་ཚོར་ཁོ་ན་ཡིན་ཏེ་ཤིན་སྦྱངས་ནི་བསམ་གཏན་བཞི་པ་ལ་ཤིན་སྦྱང་གི་བདེ་བ། ཡང་ཡོད་ལ། བསམ་གཏན་གསུམ་པའི་མདོར། བདེ་བ་ལུས་ཀྱིས་མྱོང་ལ་ཞེས་རང་གི་སྒྲས་གསུངས་པའི་ཕྱིར་ལུས་ཚོར་རོ་་ཤིན་སྦྱངས་ཙམ་ནི་མིན་ཏེ་བདེ་བས་ཁྱབ་པར་བྱའོ། ཞེས་འདོད་དོ། ཉན་ས་ལས། གཟུགས་ལུས་ཀྱིས་ཤིན་སྦྱང་དང་ཡིད་ལུས་ཀྱི་ཚོར་བའི་བདེ་བ་མྱོང་བར་བཤད། ཀུན་བཏུས་འགྲེལ་པར། བསམ་གཏན་དང་པོ་གཉིས་ནས་ཡིད་ཤེས་འཁོར་གྱི་ཚོར་བ་སིམ་པར་མྱོང་བ་ཉིད་ཀྱིས་དབང་པོ་རྟེན་བཅས་ཀྱི་ལུས་ལས་སུ་རུང་བར་བྱས་པས་ལུས་དང༌། རང་དང་མཚུངས་ལྡན་གྱི་ཡིད་ཤེས་འཁོར་བཅས་དགའ་རྣམས་ཀྱིས་ཚིམ་པར་བྱས་པས་སེམས་ལ་ཕན་འདོགས་པའི་བྱ་བ་གཉིས་བྱེད་པས་རིམ་པ་ལྟར་བདེ་བ་དང་དགའ་བ་ཞེས་འཇོག་གོ་ཞེས་བཤད་དེ་ཕྱི་མ་གཉིས་མཐུན་ལ་འདི་གཉིས་མཛོད་རྩ་འགྲེལ་དང་མི་མཐུན་ནོ། །ཏིང་ངེ་འཛིན་ནི་རང་དང་མཚུངས་ལྡན་གྱི་སེམས་སེམས་བྱུང་རྣམས་དམིགས་པ་གཅིག་ལ་སྡུད་པར་བྱེད་པའོ། །དེ་ལྡ་ལས་རྟོག་པ་ཆེས་རགས་པས་དེ་ལ་སྐྱོན་དུ་བལྟས་ནས་བསྒོམ་པས་དེ་གཅིག་པུ་ལ་ཆགས་པ་དང་བྲལ་བ་ལ་དང་པོའི་དངོས་གཞི་ཁྱད་པར་ཅན་ནོ་ཞེས་མཛོད་པ་རྣམས་འཆད་དོ།
གཉིས་པ་བསམ་གཏན་གཉིས་པའི་ཡན་ལག་བཞི་ལས། རབ་ཏུ་དང་བ་ནི། མཛོད་ལས། མཉམ་གཞག་གིས་བསམ་གཏན་དང་པོ་ལས་ངེས་པར་འབྱུང་པ་ལ་ཆེས་དད་པའོ་ཞེས་འདོད་ཀྱང༌། བསྡུ་བ་ལས་དྲན་ཤེས་བཞིན་བཏང་སྙོམས་ཀྱི་ངོ་བོ་ཉིད་དུ་འདོད། ཡན་ལག་ལྷག་མ་རྣམས་ནི་སྔར་ལྟར་རོ། །འདི་རྟོག་དཔྱོད་གཉིས་ཆར་དང་བྲལ་བར་མངོན་པ་གོང་འོག་དང་ཡུམ་མདོ་རྣམས་སུ་གསུངས་སོ། །གསུམ་པ་བསམ་གཏན་གསུམ་པའི་ཡན་ལག་ལྔ་ལས་བདེ་བ་ནི། ཡིད་ཤེས་འཁོར་གྱི་ཚོར་བ་སིམ་པ་དེ་ཉིད་དགའ་བའི་གཡོ་བ་དང་བྲལ་བར་གྱུར་པ་ཙམ་མོ། །དྲན་པ་དང་ཤེས་བཞིན་དགའ་བའི་ཀུན་དཀྲིས་ཟློག་པའི་དམིགས་རྣམ་འཛིན་པ་དང་དེ་ལྡན་མི་ལྡན་གྱི་བྱར་བྱེད་པའོ། །བཏང་སྙོམས་ནི་རྟོག་དཔྱོད་དང་དགའ་བའི་སྐྱོན་དང་བྲལ་བས་དེ་དག་གིས་མི་མཉམ་པ་མེད་པའོ། །དེ་ལྟར་ན་དྲན་ཤེས་བཏང་སྙོམས་གསུམ་དང་པོར་ཡོད་ཀྱང་རྟོག་དཔྱོད་ཀྱིས་བསླད་པ་དང༌། གཉིས་པར་ཡང་དགའ་བའི་སྐྱོན་གྱིས་བསྒྲིབས་པས་རབ་དང་ཞེས་སྨོས་སོ། །བཞི་པ་བསམ་གཏན་བཞི་བའི་ཡན་ལག་ནི། །རྟོག་དཔྱོད་ཡིད་བདེ་མི་བདེ། དབུགས་འབྱུང་རྔུབ་བདེ་སྡུག་གི་སྐྱོན་བརྒྱད་དང་བྲལ་བས་དེ་དག་གིས་ཡོངས་སུ་དག་པའོ། །རྟོག་དཔྱོད་དང་དགའ་བདེ་འདི་དག་ཀྱང༌། བཞི་པར་ལྟོས་ནས་གཡོ་བའི་སྐྱོན་དུ་བཤད་ཀྱིས་
རང་ས་ལ་ལྟོས་ན་སྐྱོན་མིན་ཏེ། ཏིང་ངེ་འཛིན་ལ་ཕན་འདོགས་པའི་ཕྱིར་རོ། །བསམ་གཏན་དེ་དག་གི་ཁྱད་པར་ཡང་རིམ་པ་བཞིན་ཏིང་ངེ་འཛིན་དང༌། ཕན་འདོགས་པ་དང༌། ཡོངས་སུ་དག་པ་རྣམས་ཡོངས་སུ་རྫོགས་མ་རྫོགས་ཀྱི་ཁྱད་པར་རོ། །གསུམ་པ་གྲངས་ངེས་པ་ནི། བསམ་གཏན་གྱི་ཡན་ལག་འདི་རྣམས་གཉེན་པོ་དང༌། ཕན་ཡོན་དང༌། དེ་གཉིས་ཀྱི་གནས་ཀྱི་སྒོ་ནས་བཞག་སྟེ། རྟོག་དཔྱོད་རབ་དང༌། དྲན་ཤེས་བཏང་སྙོམས་གསུམ། དྲན་དང་བཏང་སྙོམས་ཡོངས་སུ་དག་པ་རྣམས་གཉེན་པོའི་ཡན་ལག་སྟེ་འོག་སའི་ཉོན་མོངས་རྣམས་སྤོང་བས་སོ། །དེ་ཡང་ཉེར་བསྡོགས་ཀྱི་སྐབས་ཀྱི་གཉེན་པོས་རྒྱུན་ཡིན་ལ་དངོས་གཞིའི་ཚེ་ན་ནི་འོག་སའི་ཐག་སྲིད་བྱེད་ཙམ་ཡིན་གྱི་སྤང་གཉེན་དངོས་མིན་ནོ། །དགའ་བདེ་ཟུང་གཉིས་དང་བདེ་བ་དང་ཚོར་བ་བཏང་སྙོམས་རྣམས་ནི་འོག་ས་ལས་གཉེན་པོ་རྒྱལ་བ་ན་ཐོབ་པའི་ཕན་ཡོན་གྱི་ཡན་ལག་གོ། །ཐམས་ཅད་ཀྱི་གནས་ཀྱི་ཡན་ལག་ཏིང་ངེ་འཛིན་ཏེ། དེས་གཉེན་པོ་དང་ཕན་ཡོན་རྣམས་་དང་པོ་དང་གཉིས་པར་་གསུམ་པར་་སྐྱེད་བས་སོ། དེས་ན་དེ་གསུམ་གྱི་དབང་དུ་བྱས་ཏེ་ཡན་ལག་དེ་རྣམས་སུ་གྲངས་ངེས་ཀྱི་ཡན་ལག་དེ་དག་གང་ཡང་མིན་པའི་སྙོམས་འཇུག་གི་བསམ་གཏན་མེད་པ་ནི་མ་ཡིན་ཏེ། གཞན་དུ་ན་ཡན་ལག་དེ་དག་དང་མཚུངས་པར་ལྡན་པའི་
སེམས་པ་དང་འདུ་ཤེས་ལ་སོགས་པའི་སེམས་སེམས་བྱུང་རྣམས་ས་དགུ་པོ་གང་ཡང་མིན་པར་འགྱུར་ཏེ། བསམ་གཏན་གྱི་སྙོམས་འཇུག་ནི་མིན་ལ་གཞན་ཡིན་པར་ཡང་མི་རུང་བའི་ཕྱིར་རོ། །དེ་ལྟར་རྟོག་དཔྱོད་སྤང་བས་གཉིས་པ་དང༌། དགའ་བ་སྤང་བས་གསུམ་པ་དང༌། བདེ་བ་སྤང་བས་བཞི་པར་འཇོག་པའི་ཕྱིར་བསམ་གཏན་རྣམས་ལ་ཡན་ལག་གི་སྒོ་ནས་འོག་ས་ལས་འདའ་བ་ཞེས་བྱའོ། །གཉིས་པ་གཟུགས་མེད་ཀྱི་དམིགས་རྣམས་བཤད་པ་ལ། དང་པོ་ནམ་མཁའ་མཐའ་ཡས་ནི་བསམ་གཏན་བཞི་པ་ཐོབ་པའི་རྣལ་འབྱོར་པ་དེས་གཟུགས་ལ་སྐྱོན་དང་གཟུགས་མེད་ལ་ཡོན་ཏན་དུ་མཐོང་ནས་གཟུགས་ཀྱི་འདུ་ཤེས་བཟློག་པའི་ཕྱིར། ཁ་དོག་དང་དབྱིབས་དང་རེག་བྱ་སོགས་ཀྱི་མཚན་མ་དང་བྲལ་བའི་ནམ་མཁའི་འདུ་ཤེས་ཁོ་ན་བསྒོམ་པ་ན། སྔོ་སེར་སོགས་སུ་སྣང་བའི་གཟུགས་དང༌། གྱང་དང་རྩིག་པ་སོགས་སུ་སྣང་བའི་ཐོགས་པ་དང༌། གོས་རྒྱན་སྐྱེད་མོས་ཚལ་རི་ལ་སོགས་པར་སྣང་བའི་སྣ་ཚོགས་པའི་འདུ་ཤེས་རྣམས་ནུབ་སྟེ། དེ་དག་ལ་ཡིད་གཏད་ཀྱང་ཐམས་ཅད་ནས་ཐམས་ཅད་དུ་མི་འབྱུང་བའོ། །དེ་བཞིན་དུ་འོག་མ་གསུམ་ལ་ཡང༌། སྔ་མའི་འདུ་ཤེས་རྣམས་རགས་པར་མཐོང་ནས་དེ་བཟློག་པའི་ཕྱིར། རིམ་བཞིན་ནམ་མཁའི་ཡུལ་ཅན་གྱི་རྣམ་ཤེས་ཀྱིས་ཐམས་ཅད་ཁྱབ་པར་མོས་པ་དང༌། གཟུགས་ཅན་
དང་གཟུགས་མེད་ཀྱི་དམིགས་པ་བཙལ་བ་ན་ཅི་ཡང་མ་རྙེད་ནས་དམིགས་པ་ཅི་ཡང་མེད་དོ་སྙམ་དུ་མོས་པ་དང༌། འདུ་ཤེས་རགས་པ་ནི་ཡོད་པ་མ་ཡིན་ཕྲ་བ་ནི་མེད་པ་མིན་ནོ་སྙམ་དུ་མོས་པའོ། །འདི་དག་བསམ་གཏན་བཞིན་དུ་ཡན་ལག་རྣམ་པར་བཞག་ཏུ་མེད་པས་དམིགས་པའི་སྒོ་ནས་འོག་མ་ལས་འདའ་བ་ཞེས་བྱའོ། །གསུམ་པ་དེ་དག་བསྒོམས་པའི་འབྲས་བུ་བཤད་པ་ནི། ཀུན་བཏུས་ལས། བསམ་གཏན་དང་པོ་ལ་ཆུང་འབྲིང་ཆེན་པོར་བསྒོམས་པས་བསམ་གཏན་དང་པོའི་སྐྱེ་བ་གསུམ་མོ། །བསམ་གཏན་དང་པོ་ལ་ཇི་ལྟ་བར་ལྷག་མ་རྣམས་ལ་ཡང་དེ་བཞིན་ནོ། །ཞེས་པ་ལྟར་དང༌། གཟུགས་མེད་རྣམས་ལ་ཡང་གཟུགས་མེད་པས་བླ་འོག་གིས་ཕྱེ་བའི་གནས་མེད་ཀྱང་ཚེ་རིང་ཐུང་གིས་སྐྱེ་བ་མཐོ་དམའ་དང་ཉོན་མོངས་མང་ཉུང་གིས་བཟང་ངན་ཡོད་དོ། །འོ་ན་ཆུང་འབྲིང་ཆེན་པོར་བསྒོམ་པའི་དོན་གང་ཞེ་ན། གུས་སྦྱོར་དང་རྒྱུན་སྦྱོར་གཉིས་ཀ་མེད་ན་ཆུང་ངུ་དང༌། གང་རུང་གཅིག་ཡོད་ན་འབྲིང་དང༌། གཉིས་ཀ་ཡོད་ན་ཆེན་པོའོ། ཞེས་འཆད་དོ། །གསུམ་པ་དེ་ལྟར་ཐོབ་པའི་རྟགས་ནི། བསམ་གཏན་ཐོབ་པའི་ཚེ་ལུས་སའི་འོག་ཏུ་བྱིང་བར་སྣང་བ་ལྟ་བུ་དང༌། གཟུགས་མེད་ལ་ལུས་ནམ་མཁའ་ལ་འཕུར་བ་ལྟ་བུའི་རྟགས་འབྱུང་ངོ༌། །བཞི་པ་ཐོབ་པ་པོའི་གང་ཟག་ནི། བསམ་གཏན་གཟུགས་མེད་རང་ས་དང༌། །འོག་སའི་རྟེན་
ཅན་འོག་གོང་མེད། ཅེས་སྤྱིར་བཏང་དང༌། སྲིད་རྩེའི་འཕགས་པ་ཅི་ཡང་མེད། །མངོན་སུམ་བྱས་ནས་ཟག་པ་ཟད། །ཅེས་དམིགས་བསལ་གསུང་བ་ལྟར་རོ། །གཉིས་པ་ཚད་མེད་བཤད་པ་ལ་བཞི། རྒྱུ་ངོ་བོ། དབྱེ་བ་སྒྲ་བཤད་པའོ། །དང་པོ་རྒྱུ་ནི། རྒྱན་ལས། བདེ་དང་སྡུག་བསྔལ་དེ་རྒྱུ་ལས། །བྱང་ཆུབ་སེམས་དཔའི་སྙིང་རྗེ་སྟེ། །རྒྱུ་དང་བཤེས་གཉེན་རང་བཞིན་ལས། །བྱང་ཆུབ་སེམས་དཔའི་སྙིང་རྗེའོ། །ཞེས་སོ། དེ་ལ་ཕྱེད་སྔ་མས་ཚོར་བ་བདེ་སྡུག་གཉིས་དང༌། དེ་གཉིས་འདྲེན་བྱེད་ཚོར་བ་བཏང་སྙོམས་ཏེ། ཚོར་བ་གསུམ་ལ་དམིགས་ནས་སྡུག་བསྔལ་གསུམ་དང་བྲལ་བར་འདོད་པའི་སྙིང་རྗེ་བར་བྱེད་པའི་ཕྱིར་སྙིང་རྗེའི་དམིགས་པ་བསྟན་ཏོ། །ཕྱེད་ཕྱི་མས་རྐྱེན་ལྷག་མ་གསུམ་བསྟན་ཏེ། རྒྱུ་ནི་རྒྱུའི་རྐྱེན་ཏེ་ཀུན་གཞིའི་སྟེང་གི་ཟག་མེད་ཀྱི་ས་བོན་ནོ། བཤེས་གཉེན་ནི་བདག་པོའི་རྐྱེན་ཏེ་ཚད་མེད་སྟོན་པ་པོའོ། །རང་བཞིན་དེ་མ་ཐག་རྐྱེན་དེ་སྔ་ལོགས་ཀྱི་རིག་པའོ། །རྐྱེན་ལྷག་མ་འདི་གསུམ་ནི་བཞི་ག་ལ་སྦྱར་ལ། རྐྱེན་དང་པོ་ནི་ངོ་བོའི་སྐབས་སུ་འཆད་དོ། །གཉིས་པ་ངོ་བོ་ལ། སྤྱི་དང་བྱེ་བྲག་གཉིས། དང་པོ་ནི་རྒྱན་ལས། བརྟན་པའི་ཚངས་པ་མི་མཐུན་སྤངས། །རྣམ་པར་མི་རྟོག་ཡེ་ཤེས་ལྡན། །དམིགས་པ་རྣམ་པ་གསུམ་ལ་འཇུག །སེམས་
ཅན་རྣམས་ནི་ཡོངས་སྨིན་བྱེད། ཅེས་ཁྱད་པར་བཞི་དང་ལྡན་པར་བསྟན་ཏེ། མི་མཐུན་ཕྱོགས་སྤངས་པའི་ཁྱད་པར་ནི་རིམ་པ་ལྟར། གནོད་སེམས་དང༌། རྣམ་འཚེ་དང༌། མི་དགའ་བ་དང༌། གནོད་སེམས་དང་འདོད་ཆགས་རྣམས་སྤངས་པའོ། །གཉེན་པོའི་ཁྱད་པར་ནི་དེ་དག་གི་གཉེན་པོ་ཐོབ་པའོ། །དམིགས་པའི་ཁྱད་པར་ནི་སེམས་ཅན་དང་ཆོས་དང་དམིགས་པ་མེད་པ་ལ་དམིགས་པའོ། །བྱེད་ལས་ཀྱི་ཁྱད་པར་ནི་སེམས་ཅན་སྨིན་པར་བྱེད་པའོ། །གཉིས་པ་བྱེ་བྲག་གི་ངོ་བོ་ནི། ཀུན་བཏུས་སུ་བྱམས་པ་གང་ཞེ་ན་བསམ་གཏན་ལ་བརྟེན་ཏེ་སེམས་ཅན་རྣམས་ལ་བདེ་བ་དང་ཕྲད་པར་ཤོག་ཅིག་པའི་བསམ་པའི་གནས་པ་ཡང་དག་པར་འབྱོར་བའི་ཏིང་ངེ་འཛིན་དང་ཤེས་རབ་གང་ཡིན་པ་དང༌། དེ་དག་དང་མཚུངས་པར་ལྡན་པའི་སེམས་དང་སེམས་ལས་བྱུང་བའི་ཆོས་རྣམས་སོ། །དེ་བཞིན་དུ་ལྷག་མ་རྣམས་ལ་ཡང་ཐོག་མཐའ་འདྲ་བ་ལས། སྡུག་བསྔལ་དང་བྲལ་བར་ཤོག་ཅིག་པའི། བདེ་བ་དང་མི་འབྲལ་བར་ཤོག་ཅིག་པའི། ཕན་པའི་བསམ་པ་གནས་པ་ཡང་དག་པར་འབྱོར་པའི་ཞེས་གསུངས་སོ། །དེ་དག་གིས་ཀྱང་གནས་དང༌། དམིགས་པ་དང༌། རྣམ་པ་དང༌། ངོ་བོ་དང༌། གྲོགས་བསྟན་ཏེ། དང་པོ་ནི་བསམ་གཏན་བཞིའི་དངོས་གཞི་དག་པ་བ་གང་རུང་ངོ༌། །གཉིས་པ་སེམས་ཅན་ཐམས་ཅད་ཡིན་ལ་
ཁྱད་པར་ཅུང་ཟད་ཕྱེ་ན། བདེ་བ་དང་མི་ལྡན་པ། སྡུག་བསྔལ་དང་ལྡན་པ། བདེ་བ་དང་ལྡན་པ། ཉེ་རིང་དུ་གཅོད་པའི་རྒྱུ་ཆགས་སྡང་དང་ལྡན་པའི་སེམས་ཅན་ནོ། །གསུམ་པ་ནི་འཕྲད་པར་འདོད་པ་སོགས་སོ། །བཞི་པ་ནི་ཏིང་ངེ་འཛིན་དང་ཤེས་རབ་བོ། །ལྔ་པ་ནི་སེམས་དང་སེམས་བྱུང་ངོ༌། །གསུམ་པ་དབྱེ་བ་ནི། སེམས་ཅན་དང་ཆོས་དང་དམིགས་པ་མེད་པ་ལ་དམིགས་པའི་བྱམས་སོགས་གསུམ་མོ། །དེ་ལ་དང་པོ་ནི། བྱམས་སོགས་སྐྱེ་བའི་ཡུལ་སེམས་ཅན་ནམ་གང་ཟག་གི་རྫས་ཀྱི་ངོ་བོར་གྱུར་པ་གཅིག་དམིགས་ནས་སྙིང་རྗེ་སོགས་སྐྱེ་བའོ། །གཉིས་པ་ནི། སྡུག་བསྔལ་པ་པོའི་སེམས་ཅན་གྱི་རྫས་མ་གྲུབ་ཀྱང༌། ཆོས་ཙམ་ཞིག་གི་ངོ་བོའི་སྡུག་བསྔལ་བ་པོ་དམིགས་ནས་བྱམས་སོགས་སྐྱེ་བའོ། །གསུམ་པ་ནི། ཆོས་ཙམ་དུ་ཡང་མི་དམིགས་པ་གཟུང་འཛིན་དང་བྲལ་བའི་དེ་བཞིན་ཉིད་དུ་དམིགས་པའི་བྱམས་སོགས་སོ། །ཡང་ན་འདི་དག་གི་ཡུལ་བདེ་བ་དང་ཕྲད་པར་འདོད་པ་དང༌། སྡུག་བསྔལ་གྱིས་ཉམ་ཐག་པ་དང༌། བདེ་བ་དང་མི་འབྲལ་བར་འདོད་པ་དང༌། ཉོན་མོངས་ཅན་གྱི་སེམས་ཅན་ནི་དང་པོའི་ཡུལ་དང༌། ཚད་མེད་སྟོན་པའི་བསྟན་བཅོས་དང༌། དེ་བཞིན་ཉིད་ནི་ཐ་མ་གཉིས་ཀྱི་ཡུལ་ཏེ། རྒྱན་ལས། །བརྟན་པ་རྣམས་ཀྱིས་དེ་དག་བདེ་འདོད་དང༌། །སྡུག་བསྔལ་གྱིས་ཉམ་ཐག་དང་བདེ་བ་དང༌། །ཉོན་མོངས་ཅན་དང་དེ་དག་བསྟན་ཆོས་དང༌།
དེ་ཡི་དེ་བཞིན་ཉིད་ལ་རབ་ཏུ་འཇུག །ཅེས་སོ། །དང་པོ་ནི་སོ་སྐྱེ་དང༌། གཉིས་པ་ནི་ཉན་རང་ཐུན་མོང་བ་དང༌། གསུམ་པ་ནི་སངས་རྒྱས་བྱང་སེམས་ཀྱིའོ། །ཞེས་་བློས་བཤད་ལ། །བློ་གྲོས་མི་ཟད་པའི་མདོ་ལས། ཐོག་མ་སེམས་བསྐྱེད་པ་དང༌། སྤྱོད་པ་ལ་ཞུགས་་མུ་སྟེགས་པ་དང་ཐུན་མོང་པ། མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་སེམས་གསུམ་གྱི་བྱམས་སོགས་ལ་རིམ་པ་བཞིན་བཤད་དོ། །བཞི་པ་སྒྲ་བཤད་ནི་གནོད་འཇོམས་སུ། སེམས་ཅན་ཚད་མེད་པ་ལ་དམིགས་པ་དང༌། ཚོགས་ཚད་མེད་པའི་རྒྱུར་གྱུར་པ་དང༌། ཆོས་ཚད་མེད་པ་ཐོབ་པའི་རྒྱུར་གྱུར་པ་དང༌། ཡེ་ཤེས་ཚད་མེད་པའི་སྤྱོད་ཡུལ་དུ་གྱུར་པའི་ཕྱིར་ཚད་མེད་པ་ཞེས་བྱའོ། །ཞེས་བཤད་པ་ནི་སོ་སོའི་སྒྲ་བཤད་ཡིན་ལ། འདི་དག་བསྒོམས་པས་ལྷ་ཚངས་པར་སྐྱེ་བས་ཚངས་པའི་གནས་པ་ཞེས་ཀྱང་བྱའོ། །གསུམ་པ་ཚོགས་ཀྱི་སྒྲུབ་པ་ལ་གཉིས། སྤྱིར་བསྟན་པ་དང༌། །རྟོགས་དཀའ་བྱེ་བྲག་ཏུ་བཤད་པའོ། །དང་པོ་སྤྱིར་བསྟན་པ་ནི། ཚོགས་ཀྱི་སྒྲུབ་པ་ལ་དབྱེ་ན་བཅུ་བདུན་ཏེ། སེམས་ཅན་རྣམས་སྡུག་བསྔལ་དང་བྲལ་འདོད་ཀྱི་རྣམ་པ་ཅན་སྙིང་རྗེ། རང་ཡང་ཕར་ཕྱིན་ལ་གནས་ཤིང༌། གཞན་ཡང་ཕར་ཕྱིན་ལ་འགོད་པའི་ཕར་ཕྱིན་དྲུག །གཞན་དོན་ལ་རྩེ་གཅིག་ཏུ་གནས་པའི་ཞི་གནས། ཆོས་རྣམས་སྒྱུ་མ་ལྟར་རྟོགས་པའི་ལྷག་
མཐོང༌། ཤེས་རབ་ཀྱི་མཐུས་སྲིད་བར་མི་འཆིང་ཞིང༌། སྙིང་རྗེའི་མཐུས་སྲེད་པ་སྤངས་པའི་གྲོལ་བ་མི་གཉེར་བ་ཟུང་འཇུག་གོ། །རྣམ་མཁྱེན་ཡིད་བྱེད་ཀྱི་ཕྱིན་དྲུག་ལ་སྤྱོད་ཅིང་མི་དམིགས་པའི་ཚུལ་གྱིས་སེམས་ཅན་རྣམས་དང་ཐུན་མོང་དུ་བྱས་ཏེ་རྫོགས་བྱང་དུ་བསྔོ་བའི་ཐབས་མཁས། ཡུལ་སྟོང་ཉིད་ཉི་ཤུ་མངོན་དུ་བྱེད་པའི་ཡེ་ཤེས། དཔའ་བར་འགྲོ་བ་ནས་བཟུང་སྟེ་ནམ་མཁའ་ལྟར་ཆགས་པ་མེད་པས་རྣམ་པར་གྲོལ་ཞིང་གོས་པ་མེད་པའི་ཏིང་ངེ་འཛིན་གྱི་བར་ཏིང་ངེ་འཛིན་བརྒྱ་རྩ་གཅིག་ནི་བསོད་ནམས་ཀྱི་ཚོགས། དྲན་པ་ཉེར་བཞག་ནས་མ་འདྲེས་པའི་བར་གྱི་ཐེག་པ་ཆེན་པོ་ལ་སློབ་པ་ལམ་གྱི་ཚོགས། །དྲན་ཤེས་ཀྱིས་ཆོས་ཀྱི་ཚིག་དོན་འཛིན་པ་གཟུངས་ཀྱི་ཚོགས། ཡོན་ཏན་གྱི་རྟེན་བྱེད་པ།སའི་ཚོགས། ཉེས་པ་སེལ་བའི་གཉེན་པོ་གཉེན་པོའི་ཚོགས་རྣམས་སོ། །གཉིས་པ་རྟོགས་དཀའ་བྱེ་བྲག་ཏུ་བཤད་པ་ལ། གཟུངས་དང༌། ཡེ་ཤེས་དང༌། ས་དང༌། གཉེན་པོའི་ཚོགས་བྱེ་བྲག་ཏུ་བཤད་པ་བཞི། །དང་པོ་གཟུངས་ཀྱི་ཚོགས་བྱེ་བྲག་ཏུ་བཤད་པ་ལ་བཞི། ངོ་བོ་་དབྱེ་བ་་བྱེད་ལས་་ས་མཚམས་སོ། །དང་པོ་ངོ་བོ་ལ་གཉིས་ལས། ཐུན་མོང་གི་ངོ་བོ་ནི། དྲན་པ་དང་ཤེས་རབ་ཁྱད་པར་ཅན་ནོ། །ཐུན་མོང་མིན་པའི་ངོ་བོ་ལ། བཟོད་པ་ཐོབ་པའི་རྒྱུར་གྱུར་པ་དང༌། གསང་སྔགས་དང༌།
ཚིག་གམ་ཆོས་དང༌། དོན་གྱི་གཟུངས་ཏེ་བཞིའོ། །དང་པོ་ནི་ཨ་ར་པ་ཙན་ལ་སོགས་པའི་ཡི་གེ་དེ་དག་སྐྱེ་འགགས་དང་འབྱུང་བ་དང་དངོས་པོ་མེད་པ་ལ་སོགས་པའི་དོན་དུ་མོས་ནས་བསྒོམ་པ་ཡོངས་སུ་རྫོགས་པ་ན། དེའི་དོན་ལ་མི་སྐྲག་པའི་བཟོད་པ་སྐྱེ་སྟེ་དེའི་རྒྱུར་འགྱུར་བའི་དྲན་ཤེས་ནི་བཟོད་པའི་གཟུངས་སོ། དེས་ན་བཟོད་པ་ཉིད་ལ་མི་བྱ་བར་དེའི་རྒྱུ་ལ་བྱའོ། །གཉིས་པ་ནི་བྱང་སེམས་ཏིང་ངེ་འཛིན་ལ་དབང་ཐོབ་པས་སེམས་ཅན་གྱི་ཡམས་དང་ཉེར་འཚེ་འཁྲུགས་པ་སྡིག་པ་ལ་སོགས་པ་ཟད་པའི་ཆེད་དུ་ཆོ་གའི་ཁྱད་པར་འདི་ལྟ་བུས་དོན་དེ་འགྲུབ་པར་གྱུར་ཅིག །ཅེས་ཏིང་ངེ་འཛིན་དང་སྨོན་ལམ་གྱི་མཐུས་བྱིན་གྱིས་རློབས་ཅིང་བརླབ་པ་ལྟར་དུ་དོན་དེ་སྒྲུབ་པ་ལ་རིང་དུ་གནས་པ་སྟེ། དེ་ཡང་དེ་ལྟར་སྒྲུབ་པའི་དྲན་ཤེས་ནི་གཟུངས་མཚན་ཉིད་པ་ཡིན་ལ་སྔགས་ཀྱི་ཡི་གེ་རྣམས་ཡུལ་ལ་ཡུལ་ཅན་ནམ་རྒྱུ་ལ་འབྲས་བུའི་མིང་གིས་བཏགས་ནས་སྔགས་ཀྱི་གཟུངས་ཞེས་བྱའོ། །ཡང་མནྟྲིའི་མ་ན་ཤེས་པ་དང༌། ཏྲ་ཡ་སྐྱོབ་པ་སྟེ་ཡེ་ཤེས་དང་སྙིང་རྗེ་ནི། ཉིད་ཤེས་པ་དང༌། འགྲོ་བ་སྐྱོབ་པས་གསང་སྔགས་སོ། །རྣམ་མཁྱེན་གྱི་གཞིར་གྱུར་པས་གསང་སྔགས་ཀྱི་གཞི་ཞེས་ཀྱང་བྱའོ། །གསུམ་པ་ནི། ས་ཐོབ་ནས་ཕྱོགས་བཅུའི་སངས་རྒྱས་ཀྱིས་སྔོན་མ་ཐོས་པའི་ཆོས་ཀྱི་རྣམ་གྲངས་གྲངས་མེད་པ་བསྟན་པ་རྣམས་དུས་གཅིག་ལ་འཛིན་པར་ནུས་པའོ། །བཞི་པ་ནི་རིམ་པ་དེ་ལྟ་བུས་ཆོས་ཀྱི་དོན་འཛིན་པར་
ནུས་པའོ། །དེ་ལྟར་ཨ་ལ་སོགས་པའི་ཡི་གེ་དེ་དག་ལ་བརྟེན་ནས་ཆོས་དེ་དག་ལ་རྟོག་པར་བྱེད་པ་ན། དྲན་ཤེས་ཀྱི་གཟུངས་དེ་དག་སྐྱེ་བས་དེ་དག་ལ་གཟུངས་ཀྱི་སྒོ་ཞེས་བྱའོ། །གཉིས་པ་དབྱེ་བ་ནི། ཚེ་འདིར་ཆེད་དུ་མ་བཙལ་ཀྱང་སྐྱེ་བ་སྔ་མར་སྦྱངས་པའི་རྣམ་སྨིན་གྱིས་ཐོབ་པ་དང༌། འདིར་ཐོས་བསམ་ལ་འབད་པས་ཆོས་ཀྱི་ཚིག་དོན་དུ་མ་མྱུར་བར་འཛིན་ནུས་པ་དང༌། སྒོམ་བྱུང་གི་ཏིང་ངེ་འཛིན་གྱི་སྟོབས་ཀྱིས་འཛིན་པར་ནུས་པའི་གཟུངས་གསུམ་ལས། དང་པོ་གཉིས་ནི་ཆུང་ངུ་དང་ཕྱི་མ་ནི་ཆེན་པོ་ཡིན་ལ། དེ་ལ་ཡང་ས་ལ་མ་ཞུགས་པ་མོས་པ་སྤྱོད་པ་རྣམས་ཀྱི་ཆུང་ངུ། མ་དག་ས་བདུན་གྱི་འབྲིང༌། དག་པ་ས་གསུམ་གྱི་ཆེན་པོའོ། །གསུམ་པ་བྱེད་ལས་ནི། ཆོས་རང་གིས་འཛིན་ཅིང་གཞན་ལ་སྟོན་པའོ། །བཞི་པ་ས་མཚམས་ནི། གནོད་འཇོམས་ལས། བཟོད་པའི་གཟུངས་མོས་སྤྱོད་དང༌། ལྷག་མ་རྣམས་ས་དང་པོ་སོགས་ལ་ཐོབ་པར་བཤད་ལ། ཕྱི་མ་འདི་ཏིང་ངེ་འཛིན་གྱིས་ཐོབ་པའི་གཟུངས་ཀྱི་དབང་དུ་བྱས་ལ། མོས་སྤྱོད་ནི་ཚོགས་སྦྱོར་གཉིས་ཀ་ལ་བྱས་ནས་སྔ་མ་ལ་བཟོད་པའི་རྒྱུ་ཉིད་དང༌། ཕྱི་མ་ལ་བཟོད་པ་ཉིད་ཐོབ་བོ། རྣམ་སྨིན་དང་ཐོས་པ་ལ་གོམས་པ་ནི་ལམ་དུ་མ་ཞུགས་པ་ལ་ཡང་ཡོད་དོ། །གཉིས་པ་ཡེ་ཤེས་ཀྱི་ཚོགས་རྟོགས་དཀའ་བ་བྱེ་བྲག་ཏུ་བཤད་པ་ལ་གཉིས། ཡུལ་སྟོང་ཉིད་དང་ཡུལ་
ཅན་ཡེ་ཤེས་བཤད་པའོ། །དང་པོ་ཡུལ་སྟོང་ཉིད་བཤད་པ་ལ་གཉིས། སྤྱི་དང་ཡན་ལག་གི་དོན་ནོ། །དང་པོ་སྤྱིའི་དོན་ལ་གཉིས། དོན་སྨྲ་དང༌། ཐེག་ཆེན་པའི་ལུགས་སོ། །དང་པོ་ནི་ཕུད་ཁམས་སྐྱེ་མཆེད་ནི་སྟོང་གཞི་ཡིན་ལ། མུ་སྟེགས་བྱེད་ཀྱིས་ཀུན་བརྟགས་པའི་རྟག་པ་དང་གཅིག་པུའི་བདག་ནི་དགག་བྱའོ། །དེ་ལྟར་ན་གང་ཟག་གི་བདག་ནི་མེད་ཀྱི་དེའི་བདག་མེད་ནི་ཡོད་ལ་དེ་ཡང་དགག་གཞི་ཕུང་སོགས་གསུམ་མམ་བདེན་པ་བཞིའི་ཁྱད་པར་དུ་བྱས་པའི་དགག་པ་སྟེ། མདོ་ལས། འདི་ན་བདག་དང་སེམས་ཅན་མེད། །ཆོས་འདི་རྒྱུ་དང་བཅས་ལས་བྱུང༌། ཞེས་སོ། །གཉིས་པ་ལ་གཉིས། རྣམ་པར་ཤེས་པར་སྨྲ་བ་དང༌། ངོ་བོ་ཉིད་མེད་པར་སྨྲ་བའི་ལུགས་སོ། །དང་པོ་ནི། །གཞན་དབང་ནི་དགག་གཞི་དང༌། བདག་གཉིས་སུ་ཀུན་བརྟགས་པའི་ཆ་ནི་དགག་བྱ་དང༌། གཞན་དབང་ཀུན་བརྟགས་ཀྱིས་གདོད་མ་ནས་སྟོང་པའི་ཆ་ཡོངས་གྲུབ་ཏུ་འདོད་དེ། གྲུབ་ནི་དེ་ལ་སྔ་མ་ཕོ། །རྟག་ཏུ་མེད་པར་གྱུར་པ་གང༌། ཞེས་སོ། །དེས་ན་ཀུན་བརྟགས་རང་གི་ངོ་བོའམ་མཚན་ཉིད་ཀྱིས་སྟོང་ལ་གཞན་དབང་དང༌། ཡོངས་གྲུབ་ནི་བཏགས་པས་སྟོང་གི་རང་གི་ངོ་བོས་ནམ་ཡང་སྟོང་པར་མི་འདོད་དོ། །མདོར་ན་འདིའི་ལུགས་ཀྱི་ཐུན་མོང་མ་ཡིན་པའི་དགག་བྱ་ནི་ཆོས་བདག་ཡིན་ལ། དེ་ཡང་ཀུན་བརྟགས་འབའ་ཞིག་ལ་འདོད་ཅིང་མཚན་ཉིད་
གཞན་གཉིས་ཐོགས་མེད་སྐུ་མཆེད་ཀྱི་གཞུང་རྩོད་མེད་གང་དུའང་རང་སྟོང་དུ་སྒྲུབ་པ་མེད་དོ། །གཉིས་པ་ངོ་བོ་ཉིད་མེད་པར་སྨྲ་བའི་ལུགས་ནི། འདུས་བྱས་བཀག་ནས་འདུས་མ་བྱས་པ་དང༌། དེ་བཞིན་དུ་དངོས་པོ་བཀག་ནས་དངོས་མེད་དང༌། ཡོད་པ་བཀག་ནས་མེད་པ་དང༌། གཞན་དངོས་བཀག་ནས་རང་དངོས་དང༌། སྟོང་པ་བཀག་ནས་མི་སྟོང་པ་ཤུལ་དུ་སྒྲུབ་པ། མདོར་ན་ཆ་འགའ་ཞིག་འགོག་འགའ་ཞིག་སྒྲུབ་པ་བླང་དོར་ལས་མ་འདས་པ་ཉི་ཚེ་བའི་སྟོང་པ་མ་ཡིན་གྱི། སྤྲོས་པའི་དྲ་བ་མཐའ་དག་གཅོད་པར་བྱེད་པའི་སྟོང་པ་ཉིད། ཆོས་གང་ཡང་མ་བརྟགས་ན་ཉམས། །དགའ་བ་སྒྱུ་མ་ལྟ་བུར་འཁྲུལ་ངོར་སྣང་ཡང་དོན་དམ་པར་གདོད་མ་ནས་རང་གི་ངོ་བོས་སྟོང་པས་ཅིའི་ངོ་བོར་ཡང་མི་དམིགས་པ་ཡིན་ཏེ། དབུ་མ་རྩ་བ་ལས། འདུས་བྱས་གྲུབ་པར་མ་གྱུར་ན། །འདུས་མ་བྱས་ལ་ཅི་ཞིག་འགྲུབ། ཅེས་སོ། །གཉིས་པ་ཡན་ལག་གི་དོན་ལ། སྟོང་པ་ཉིད་ནི་དབྱེ་གཞི། དབྱེ་བའི་ངོ་བོ་གྲངས་ཉི་ཤུར་འདོད་དེ། དང་པོ་ནང་སྟོང་པ་ཉིད་ནི་མདོ་ལས། །ནང་སྟོང་པ་ཉིད་གང་ཞེ་ན། ནང་གི་ཆོས་རྣམས་ཞེས་བྱ་བ་ནི། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ལ་བརྗོད་དོ། དེ་ལ་ཐེར་ཟུག་ཏུ་གནས་པ་མེད་པ་དང༌། འཇིག་པ་མེད་པའི་ཕྱིར་མིག་ནི་མིག་གིས་སྟོང་ངོ༌། །ཞེས་
གསུངས་ཏེ། འདི་ལ་སྟོང་པའི་གཞི། སྟོང་པའི་ཚུལ། སྟོང་པའི་ཐ་སྙད། ཐ་སྙད་ཀྱི་རྒྱུ་མཚན་དང་བཞིས་བསྟན་ཏོ། །དང་པོ་ནི་དབང་པོ་དྲུག་གོ། །གཉིས་པ་སྟོང་ཚུལ་ལ་ཐེར་ཟུག་གི་དོན་ལ་འཇུག་པའི་སྒོ་ནི་གནས་པའི་དོན་ཡིན་ལ་དེ་ལས་བཀག་པས་རྒྱུ་རྐྱེན་ཚོགས་པར་གནས་པ་མེད་ལ་དེ་ལ་སྐྱེ་བ་མེད་པས་འཇིག་པ་ཡང་མེད་དོ། །དེས་ན་སྐྱེ་འགགས་མེད་པའི་ཕྱིར་མིག་སོགས་དེ་དེས་སྟོང་ཞེས་པའོ། །འཇུག་པའི་འགྲེལ་བཤད་དུ། །ཐེར་ཟུག་ཏུ་གནས་པའི་དོན་རྣམ་པར་མི་འགྱུར་བ་ལ་བཤད་ནས། དེས་འགྱུར་བ་བཀག་པ་ན་རེ་ཞིག་གནས་ནས་ཕྱིས་འཇིག་གམ་སྙམ་པ་བཟློག་པའི་ཕྱིར་འཇིག་པ་མ་ཡིན་ཞེས་སྨོས་པས་སོ། །ཞེས་སོ། །འབུམ་གྱི་གནོད་འཇོམས་ལས། དེ་གཉིས་མེད་པའི་དོན་རྟག་པ་དང༌། མི་རྟག་པར་མེད་དེ་དེའི་ཕྱིར་དབང་པོ་དྲུག་ལ་དོན་དམ་པར་དངོས་པོ་མེད་དེ་གཞན་དུ་ན་དེ་གཉིས་ཀྱི་དངོས་པོར་འགྱུར་དགོས་པས་སོ། །ཞེས་གསུངས་ཏེ་སྟོང་ཚུལ་འདི་ཀུན་ལ་འདྲའོ། །གསུམ་པ་སྟོང་པའི་ཐ་སྙད་ནི། ནང་སྟོང་པ་ཉིད་ཅེས་པའོ། ཐ་སྙད་འདོགས་པའི་རྒྱུ་མཚན་ནི། མིག་སོགས་ནང་གི་ཆོས་ཡིན་པས་སོ། །གཉིས་པའི་སྟོང་གཞི་ནི་ཡུལ་ལྔའོ། །ཐ་སྙད་ནི་ཕྱི་སྟོང་པ་ཉིད་ཅེས་པའོ། །ཐ་སྙད་འདོགས་པའི་རྒྱུ་མཚན་ནི། སེམས་ཀྱིས་མ་ཟིན་པའི་ཕྱིར་རོ། །གསུམ་པ་ནི། སྟོང་གཞི་དབང་པོ་རྟེན་གྱིས་བསྡུས་པའི་ཡུལ་
ལྔའོ། །ཐ་སྙད་ནི་ཕྱི་ནང་སྟོང་པ་ཉིད་ཅེས་པའོ། །རྒྱུ་མཚན་སེམས་ཀྱིས་ཟིན་པ་དང་དབང་པོས་མ་བསྡུས་པའི་ཕྱིར་རོ། །བཞི་པའི་སྟོང་གཞི་ནི། ཆོས་ཐམས་ཅད་སྟོང་ཉིད་དུ་ཤེས་པའམ། འཇུག་པ་ལྟར་ན་ཆོས་རྣམས་རང་བཞིན་མེད་པ་ཉིད་དོ། །ཐ་སྙད་ནི་སྟོང་པ་ཉིད་སྟོང་པ་ཉིད་དོ། །རྒྱུ་མཚན་འདིས་སྟོང་པ་ཉིད་དུ་འཛིན་པ་ཞི་བར་བྱེད་པའོ། །ལྔ་པའི་སྟོང་གཞི་ནི་ཤར་ལ་སོགས་པ་ཕྱོགས་བཅུའོ། །ཐ་སྙད་ནི་ཆེན་པོ་སྟོང་པ་ཉིད་དོ། །རྒྱུ་མཚན་དབྱིབས་ཤིན་ཏུ་ཆེ་བས་སོ། །དྲུག་པའི་སྟོང་གཞི་མྱང་འདས་དང་ལམ་གཞི་མཐུན་པའོ། །ཐ་སྙད་ནི་དོན་དམ་པ་སྟོང་པ་ཉིད་དོ། །རྒྱུ་མཚན་ཐོབ་བྱའི་དོན་མཆོག་ཡིན་པས་སོ། །བདུན་པའི་སྟོང་གཞི་རྐྱེན་ལས་སྐྱེས་པ་ཁམས་གསུམ་མོ། །ཐ་སྙད་ནི་འདུས་མ་བྱས་སྟོང་པ་ཉིད་དོ། །རྒྱུ་མཚན་མཐའ་གཅིག་ཏུ་མ་གྲུབ་པས་གཉེན་པོས་བསྒྱུར་ནུས་པའོ། །བརྒྱད་པའི་སྟོང་གཞི་ནི་མ་སྐྱེས་པ་སྐྱེ་འགགས་གནས་པ་ལས་གཞན་དུ་འགྱུར་བ་མེད་པའོ། །ཐ་སྙད་ནི་འདུས་མ་བྱས་སྟོང་པ་ཉིད་དོ། །རྒྱུ་མཚན་སྐྱེ་བ་སོགས་ཀྱིས་དབེན་པའོ། །དགུ་པའི་སྟོང་གཞི་རྟག་ཆད་ཀྱི་མཐས་སྟོང་པའི་མཐའ་འདས་སོ། །ཐ་སྙད་མཐའ་ལས་འདས་པ་སྟོང་པ་ཉིད་དོ། །རྒྱུ་མཚན་མཐའ་འམ་ཆར་འཇོག་པའི་རྒྱུ་མཚན་དབུས་ན་ཅུང་ཟད་ཀྱང་མ་གྲུབ་པའོ། །འདི་དག་ལྡན་དུ་ལོངས་
སྐུ་ལ་བཤད་དོ། །བཅུ་པའི་སྟོང་གཞི་ཐོག་མཐའ་དབུས་དང་བྲལ་བར་འཁོར་བའོ། །ཐ་སྙད་ཐོག་མ་དང་ཐ་མ་མེད་པ་སྟོང་པ་ཉིད་དོ། །རྒྱུ་མཚན་ཐོག་མ་ལ་སོགས་པ་ཆོས་ཉིད་ཀྱི་རྗེས་སུ་སྐྱེས་པའམ་ཆོས་ཉིད་ཇི་ལྟ་བ་བཞིན་གྱུར་པའོ། །བཅུ་གཅིག་པའི་སྟོང་གཞི་ནི། འཁོར་བ་དེ་དག་པའི་ཕྱོགས་སམ་དག་ལྡན་ལས། དོར་བྱ་མ་ཡིན་པའི་ཐེག་ཆེན་ལ་བཤད་པ་དང༌། གནོད་འཇོམས་གཉིས་སུ་དོར་བ་ཕུང་པོ་ཡིན་ལ་དེ་མེད་པ་ལྷག་མེད་ཀྱི་མྱང་འདས་དེ། འོད་སྲུང་གི་གསུང་རབ་ལས་ཕུང་པོ་ལ་དོར་བ་ཞེས་འབྱུང་ལ། སྔར་གྱི་མྱང་འདས་ལྷག་བཅས་མྱང་འདས་ཡིན་པས་མི་ཟློས་སོ། །ཞེས་འཆད་དོ། །ཐ་སྙད་དོར་བ་མེད་པ་སྟོང་པ་ཉིད་དོ། །བཅུ་གཉིས་པའི་སྟོང་གཞི་འདུས་བྱས་མ་བྱས་ཀྱི་སྟོང་ཉིད་དོ། །ཐ་སྙད་རང་བཞིན་སྟོང་པ་ཉིད་དོ། །རྒྱུ་མཚན་ཡེ་ནས་སྟོང་པས་དེ་སྟོང་པར་འཕགས་ པ་གང་གིས་ཀྱང་མ་བྱས ་པས་འདུས་བྱས་འགྱུར་པ་དང༌། འདུས་མ་བྱས་མི་འགྱུར་བས་གནོད་པར་མི་ནུས་པའོ། །བཅུ་གསུམ་པའི་སྟོང་གཞི། ཕུང་ཁམས་སྐྱེ་མཆེད་རེག་པ་ཚོར་བ་གཟུགས་ཡོད་མེད་འདུས་བྱས་འདུས་མ་བྱས་སོ། །ཐ་སྙད་ཆོས་ཐམས་ཅད་སྟོང་པ་ཉིད་དོ། །རྒྱུ་མཚན་དེས་ཆོས་ཀུན་བསྡུས་པས་སོ། །བཅུ་བཞི་པའི་སྟོང་གཞི་སྐྱེ་བ་དང་འགགས་པ་སོགས་དང༌། གཟུགས་སུ་རུང་བ་ཉམས་སུ་མྱོང་བ་སོགས་སོ། །ཐ་སྙད་རང་གི་མཚན་ཉིད་སྟོང་བ་ཉིད་དོ།
རྒྱུ་མཚན་སྤྱི་དང་ཁྱད་པར་གྱི་མཚན་ཉིད་ཡིན་པའོ། །བཅོ་ལྔ་པའི་སྟོང་གཞི་འདས་སོགས་དུས་གསུམ་མོ། །ཐ་སྙད་མི་དམིགས་པ་སྟོང་པ་ཉིད་དོ། རྒྱུ་མཚན་དེ་དག་རེ་རེ་ལ་གཞན་གཉིས་མི་དམིགས་པའོ། །བཅུ་དྲུག་པའི་སྟོང་གཞི་རྒྱུ་རྐྱེན་དུ་མ་སྦྱོར་བའམ་འདུས་པ། ཐ་སྙད་དངོས་པོ་མེད་པའི་ངོ་བོ་ཉིད་སྟོང་པ་ཉིད་དོ། །རྒྱུ་མཚན་འདུས་པའི་སྤྱི་ཚོགས་ཙམ་ཡང་དངོས་པོར་མེད་པས་སོ། །བཅུ་བདུན་པའི་སྟོང་གཞི་ཕུང་པོ་ལྔའོ། །ཐ་སྙད་དངོས་པོ་སྟོང་པ་ཉིད་དོ། །རྒྱུ་མཚན་ཉེར་ལེན་གྱི་དངོས་པོ་ཡིན་པའོ། །བཅོ་བརྒྱད་པའི་སྟོང་གཞི་ནམ་མཁའ་དང་འགོག་པ་གཉིས་དང་དེ་བཞིན་ཉིད་དོ། །ཐ་སྙད་དངོས་མེད་སྟོང་པ་ཉིད། རྒྱུ་མཚན་དེ་དག་དངོས་མེད་ཡིན་པའོ། །འདིར་མཚན་གཞི་དང་གོང་དུ་མཚན་ཉིད་ཀྱི་ངོས་ནས་བསྟན་པས་འདུས་མ་བྱས་སྟོང་པ་ཉིད་དང་མི་ཟློས་སོ། །བཅུ་དགུ་པའི་སྟོང་གཞི་ཆོས་རྣམས་ཀྱི་ཕྱིན་ཅི་མ་ལོག་པའི་ངོ་བོའོ། །ཐ་སྙད་རང་གི་ངོ་བོ་སྟོང་པ་ཉིད་དོ། །རྒྱུ་མཚན་འཕགས་པ་རྣམས་ཀྱི་ཤེས་པ་དང་མཐོང་བས་གསར་དུ་མ་བྱས་པའོ། །ཤེས་པ་དང་མཐོང་བའི་དོན། གནོད་འཇོམས་ལས། ཤེས་པ་མི་རྟོག་ཡེ་ཤེས་དང༌། མཐོང་བ་དེའི་རྗེས་ཐོབ་ལ་བཤད། ཉི་སྣང་ལས། རྗེས་དཔག་དང་འཁྲུལ་པ་བསལ་བའི་ཕྱིར་མཐོང་བ་དང་ཤེས་པ་སྨོས་ཞེས། མངོན་སུམ་པ་དང་མ་འཁྲུལ་བ་ལ་བཤད་དོ།
འདི་ནི་རང་བཞིན་སྟོང་པ་ཉིད་དང་མི་ཟློས་པ་ནི་མདོར་བསྡུས་པ་དང༌། རྒྱས་པར་ཕྱེ་བ་ཐ་དད་པས་སོ། །ཉི་ཤུ་པའི་སྟོང་གཞི་ནི། ཆོས་གཞན་གྱི་ངོ་བོའོ། །ཐ་སྙད་གཞན་གྱི་ངོ་བོ་སྟོང་པ་ཉིད་དོ། །རྒྱུ་མཚན་ནི་ཆོས་རྣམས་ཀྱི་མཆོག་གམ། །ཡང་ན་གཞན་ནི་ཕུལ་དུ་བྱུང་བའི་ཡེ་ཤེས་དང་ངོ་བོ་ནི་དེའི་ཡུལ་ལམ། ཡང་ན་འཁོར་བ་ལས་གཞན་ནམ་ཕ་རོལ་ཡང་དག་པའི་མཐའོ་ཞེས་འཇུག་འགྲེལ་ལས་བཤད་ལ། དག་ལྡན་ལས། འདི་ནི་དམ་པ་ཡིན་པའི་ཕྱིར་གཞན་ཡང་ཡིན་ལ་གཞན་གྱིས་མ་བྱས་པའི་ངོ་བོ་ཉིད་ཡིན་པས་འདི་ནི་གཞན་གྱི་ངོ་བོ་སྟེ་དེ་བཞིན་ཉིད་དོ་ཞེས་སོ། །འདིར་ནི་གཞན་དུ་འཇོག་ཚུལ་དེ་ལྟར་བྱས་ནས་དེ་སྟོང་པ་ཉིད་དུ་བཤད་ལ་སྔ་མར་འཕགས་པ་རྣམས་ཀྱིས་མ་བྱས་པའི་རང་གི་ངོ་བོ་ཉིད་དུ་བཤད་ནས། དེ་སྟོང་ཉིད་དུ་བཤད་པ་ཙམ་འདི་གཉིས་ཀྱི་ཁྱད་པར་རོ། །གཉིས་པ་ཡུལ་ཅན་ཡེ་ཤེས་ནི། ཡུལ་སྟོང་ཉིད་ཉི་ཤུས་ཤུགས་ཀྱིས་འཕང་བ་ཡིན་ཏེ། སྟོང་ཉིད་དང་པོ་གསུམ་གྱིས་ཚོགས་ལམ་དང་ངེས་འབྱེད་དང་པོ་གསུམ་དང༌། བཞི་པས་ཆོས་མཆོག་འཕངས་སོ། །ལྔ་པ་དང་དྲུག་པས་ས་དང་པོ་དང་གཉིས་པ་འཕེན་ཏེ། དེ་གཉིས་ཀྱིས་ཆོས་དབྱིངས་ཀུན་ཏུ་འགྲོ་བ་དང་མཆོག་གི་དོན་དུ་རྟོགས་པ་ན། ཆོས་དབྱིངས་དེ་སྟོང་པར་རྟོགས་ལ་དེའི་ཚེ་རང་བཞིན་ཅན་ཕྱོགས་བཅུ་དང་མྱང་འདས་ཀྱང་སྟོང་པར་རྟོགས་སོ། །འདུས་བྱས་མ་བྱས་སྟོང་
པ་ཉིད་ཀྱིས་ས་གསུམ་པ་དང་བཞི་པ་འཕེན་ཏེ། དེ་གཉིས་ཀྱིས་ཆོས་དབྱིངས་རྒྱུ་མཐུན་པའི་དོན་གྱི་མཆོག་དང་ཡོངས་སུ་འཛིན་པ་མེད་པའི་དོན་དུ་རྟོགས་པ་ན་དེ་སྟོང་པར་རྟོགས་ལ། དེའི་ཚེ་རང་བཞིན་ཅན་འདུས་བྱས་འཁོར་བ་དང་ཡོངས་སུ་འཛིན་པ་མེད་པའི་འདུས་མ་བྱས་ཀྱང་སྟོང་པར་རྟོགས་སོ། །མཐའ་འདས་དང་ཐོག་མཐའ་མེད་པ་སྟོང་པ་ཉིད་གཉིས་ཀྱིས་ས་ལྔ་པ་དང་དྲུག་པ་འཕེན་ཏེ། དེ་གཉིས་ཀྱིས་ཆོས་དབྱིངས་རྒྱུད་དང་ཐ་དད་པ་མེད་པ་དང༌། ཀུན་ནས་ཉོན་མོངས་དང་རྣམ་དག་མེད་པའི་དོན་དུ་རྟོགས་པ་ན་དེ་སྟོང་པར་རྟོགས་ལ། དེ་ལྟ་ན་དེའི་རང་བཞིན་ཅན་རྟག་ཆད་ཀྱི་མཐའ་དང་བྲལ་བ་དབུས་ཀྱི་རང་བཞིན་དང༌། འཁོར་བ་ཆོས་དབྱིངས་ཀྱི་རྗེས་སུ་སྐྱེས་ཀྱང་སྟོང་པར་རྟོགས་སོ། །དོར་བ་མེད་པ་སྟོང་པ་ཉིད་ཀྱིས་ས་བདུན་པ་འཕེན་ཏེ་ཆོས་དབྱིངས་མདོ་སོགས་ཀྱི་མཚན་མ་ཐ་དད་མེད་པའི་དོན་དུ་རྟོགས་པ་ན་དེ་སྟོང་པར་རྟོགས་ལ། དེའི་རང་བཞིན་ཅན་དོར་བ་མེད་པ་ཡང་སྟོང་པ་ཉིད་དུ་རྟོགས་སོ། །རང་བཞིན་དང་ཆོས་ཐམས་ཅད་སྟོང་པ་ཉིད་ཀྱིས་ས་བརྒྱད་པ་འཕེན་ཏེ། དེ་ཆོས་དབྱིངས་བྲི་འཕེལ་མེད་པ་དང་རྣམ་པར་མི་རྟོག་པ་དང༌། ཞིང་དག་པ་ལ་དབང་བའི་རྟེན་དུ་རྟོགས་པ་ན་དེ་སྟོང་ཉིད་དུ་རྟོགས་ལ། དེ་ལྟ་ན་དེའི་རང་བཞིན་ཅན་རང་གི་ངོ་བོ་རང་བཞིན་དང་རྣམ་འགྱུར་ཆོས་ཐམས་ཅད་སྟོང་པར་རྟོགས་པས་སོ། །རང་གི་མཚན་ཉིད་དང་
མི་དམིགས་པ་སྟོང་པ་ཉིད་ཀྱིས་ས་དགུ་པ་འཕེན་ཏེ། དེས་ཆོས་དབྱིངས་ཡེ་ཤེས་ལ་དབང་བའི་གནས་ཉིད་དུ། རྟོགས་ལ་དེ་ལྟ་ན་དེའི་མཚན་ཉིད་མཐའ་དག་དུས་ཐམས་ཅད་དུ་ཤེས་པའི་ཡེ་ཤེས་ཀྱི་རྟེན་དུ་གྱུར་པ་མཚན་ཉིད་དང་དུས་རྣམས་སྟོང་པར་རྟོགས་སོ། །དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་དངོས་པོ་སྟོང་པ་ཉིད་ཀྱིས་ས་བཅུ་པ་འཕེན་ཏེ། དེས་ཆོས་དབྱིངས་ལས་ལ་དབང་བའི་གནས་སུ་སྟོང་པར་རྟོགས་ལ། དེ་ལྟ་ན་དེའི་རིགས་ཅན་ཚོགས་པ་དང་ཡན་ལག་གི་རྟེན་ཀྱང་སྟོང་པར་རྟོགས་སོ། །དངོས་པོ་མེད་པ་དང་རང་གི་ངོ་བོ་དང་གཞན་གྱི་ངོ་བོ་སྟོང་པ་ཉིད་ཀྱིས་སངས་རྒྱས་ཀྱི་ཡེ་ཤེས་འཕེན་ཏེ། དེས་ཉོན་སྒྲིབ་དང་ཤེས་སྒྲིབ་བག་ཆགས་དང་བཅས་པ་སྤང་བ་དང༌། རང་བྱུང་ཉིད་ཐོབ་པ་ན་དེ་སྟོང་པར་རྟོགས་ལ། དེ་ལྟ་ན་དེའི་རང་བཞིན་ཅན་ཆགས་པ་དང་གནོད་པར་བྱེད་པ་ལ་སོགས་བའི་ཉོན་མོངས་ཀྱིས་སྟོང་པའི་ནམ་མཁའ་དང༌། གཟུང་འཛིན་ཤེས་སྒྲིབ་དང་བྲལ་བའི་སྟོང་ཉིད་དང༌། གཞན་ལ་མི་ལྟོས་པའི་བྱེད་པ་པོ་སྟོང་པར་རྟོགས་པས་སོ། །དེ་ལྟར་ས་མཚམས་སོ་སོར་མཛད་པ་ཡང་རྗེས་ཀྱི་ཚེ་ཆོས་ཅན་དེ་དང་དེ་དག་ལ་ངེས་པ་འདྲེན་ཚུལ་རེ་ཡོད་པ་གཙོ་ཆེ་བས་ཡིན་གྱི་ངེས་ནས་ནི་མིན་ནོ། །གསུམ་པ་སའི་ཚོགས་རྟོགས་དཀའ་བ་བཤད་པ་ལ་གསུམ། ཁྱད་པར་གྱི་གཞི་སའི་ངོ་བོ། ཁྱད་པར་གྱི་ཆོས་སའི་རྣམ་བཞག །ཁྱད་པར་དེ་ལྡན་གྱི་སའི་ངེས་ཚིག་གོ། །དང་
པོ་ངོ་བོ་ལ་གཉིས། རང་བཞིན་དངོས་དང་དབྱེ་བའོ། །དང་པོ་སའི་རང་བཞིན་ནི། འཇིག་རྟེན་ལས་འདས་པའི་ཡེ་ཤེས་སྙིང་རྗེ་ཁྱད་པར་ཅན་གྱིས་ཟིན་པའི་རྟོགས་པ་གང་ཡོན་ཏན་གྱི་རྟེན་དུ་གྱུར་པ་ནི་སྐབས་འདིའི་སའི་ངོ་བོའོ། །གཉིས་པ་དབྱེ་བ་ནི། དབྱེ་གཞི་བྱང་འཕགས་ཀྱི་ས་ཙམ་ཞིག་གོ། །དབྱེ་ངོ་བཅུའོ། །ཕྱེ་བའི་ཐ་དད་ནི་དངོས་པོ་ཐ་དད་དེ་སྔ་ཕྱི་རྒྱུ་འབྲས་ཡིན་པས་སོ། །གྲངས་ངེས་ནི་ཡོངས་སྦྱོང་མི་འདྲ་བ་བཅུ་ཡོད་པས་ཡིན་ཞེས་རྒྱན་སྣང་ལས་གསུངས་སོ། །བཅུ་ནི་ཁྱད་པར་ཅན་གྱི་དབང་དུ་བྱས་པ་ཡིན་ལ་ཕལ་པ་ནི་དད་པ་དང་མོས་སྤྱོད་ཀྱི་ས་ཡང་ཡོད་དོ། །གཉིས་པ་ཁྱད་པར་གྱི་ཆོས་སའི་རྣམ་བཞག་ལ་བདུན། ཤས་ཆེ་བ་དང་ཀུན་རྫོབ་པའི་ཡོན་ཏན་དང༌། སྐྱེ་བ་འཛིན་པའི་ཚུལ་དང་གཉེན་པོ་རྟོགས་པ་དང་སྤང་བྱ་མི་མཐུན་ཕྱོགས་དང་ས་ཐོབ་པའི་རྟགས་དང་འབྲས་བུའི་ཁྱད་པར་རོ། །དང་པོ་ཤས་ཆེ་བ་ནི། ས་བཅུ་པོ་རེ་རེ་ལ་ཕར་ཕྱིན་བཅུ་རིམ་པ་བཞིན་ཤས་ཆེ་བ་ནི་ཁྱད་པར་ཅན་དང༌། དེ་རེ་རེ་ལ་ཐམས་ཅད་ཀྱང་སྒྲུབ་པ་ནི་ཁྱད་པར་མེད་པའོ། །གཞན་ཡང་ས་དང་པོར་ཆོས་ཉིད་རྟོགས་ནས་གཉིས་པར་ཚུལ་ཁྲིམས་དང༌། གསུམ་པར་ཏིང་ངེ་འཛིན་དང༌། བཞི་པར་ཕྱོགས་མཐུན་ལ་མཁས་པའི་ཤེས་རབ། ལྔ་པར་ཆོས་ཀྱི་དེ་ཉིད་བདེན་བཞི་ལ་མཁས་པའི་ཤེས་རབ། དྲུག་པར་རྟེན་འབྲེལ་ལུགས་འབྱུང་ལྡོག་
ལ་མཁས་པའི་ཤེས་རབ་ལ་སློབ་ཅིང༌། ས་ལྷག་མ་བཞིར་བསླབ་པ་གསུམ་ལ་བསླབ་པའི་འབྲས་བུ། བདུན་པར་མཚན་མེད་འདུ་བྱེད་དང་བཅས་པ་ལ་གནས། བརྒྱད་པར་མཚན་མེད་མངོན་པར་འདུ་བྱེད་མེད་པ་དང༌། ཞིང་དག་པ་ལ་དབང༌། དགུ་པར་སེམས་ཅན་ཡོངས་སུ་སྨིན་པ་འགྲུབ། བཅུ་པར་ཏིང་ངེ་འཛིན་དང་གཟུངས་རྣམས་འགྲུབ་པ་ནི་བསླབ་པ་གསུམ་ལ་སློབ་ཚུལ་ལོ། །ཡང་ས་དང་པོར་ཟག་མེད་ཀྱི་ཕུང་པོའི་རྟེན་ཆོས་ཉིད་རྟོགས་ནས་གཉིས་པར་ཚུལ་ཁྲིམས། གསུམ་པར་ཏིང་འཛིན་བཞི་པ་ལྔ་པ་དྲུག་པ་རྣམས་སུ་ཤེས་རབ་ཀྱི་ཕུང་པོ་སྤྱོད་ལ། ས་ལྷག་མ་བཞིར་འབྲས་བུ་བཞིའི་གེགས་བཞི་དང༌། སངས་རྒྱས་ཀྱི་ས་ལ་ཐོགས་སྒྲིབ་སྦྱོང་བས་རིམ་པ་ལྟར་རྣམ་པར་གྲོལ་བ་དང༌། གྲོལ་བའི་ཡེ་ཤེས་གཉིས་སྦྱོང་བར་གསུངས་པ་ནི་ཟག་མེད་ཀྱི་ཕུང་པོ་སྦྱོང་ཚུལ་ལོ། །གཉིས་པ་ཀུན་རྫོབ་པའི་ཡོན་ཏན་ནི། ས་དང་པོ་ལ་ཡོན་ཏན་བརྒྱ་ཕྲག་བཅུ་གཉིས་སྐད་ཅིག་ལ་ཐོབ་སྟེ། ཏིང་ངེ་འཛིན་བརྒྱ་ཐོབ་ཅིང་དེ་དག་ལ་འཇུག་པ་དང༌། སངས་རྒྱས་བརྒྱ་མཐོང་བ་དང༌། དེ་རྣམས་ཀྱི་བྱིན་རླབས་ཀྱང་ཤེས་པ་དང༌། འཇིག་རྟེན་གྱི་ཁམས་བརྒྱ་གཡོ་བར་བྱེད་པ་དང༌། ཞིང་པ་རྒྱར་ཡང་འགྲོ་བ་དང༌། འཇིག་རྟེན་གྱི་ཁམས་བརྒྱ་སྣང་བར་བྱེད་པ་དང༌། སེམས་ཅན་བརྒྱ་སྨིན་པར་བྱེད་པ་དང༌། བསྐལ་པ་བརྒྱར་གནས་པར་བྱེད་པ་དང༌།
བསྐལ་པ་བརྒྱ་ལ་སྔོན་དང་ཕྱི་མའི་མཐར་འཇུག་པ་དང༌། ཆོས་ཀྱི་སྒོ་བརྒྱ་འབྱེད་པ་དང༌། ལུས་བརྒྱ་ཀུན་ཏུ་སྟོན་པ་དང༌། ལུས་རེ་རེ་ལ་འཁོར་བྱང་ཆུབ་སེམས་དཔའ་བརྒྱ་བརྒྱ་དང་ལྡན་པར་སྟོན་པའོ། །འདི་ནི་འཇུག་པར་གསུངས་པ་ཡིན་ལ། ཡོན་ཏན་དང་པོ་ལ་འཇུག་པར། ཏིང་ངེ་འཛིན་ལ་འཇུག་ལྡང་བྱེད་པར་བཤད། ཡོན་ཏན་དགུ་པ་ནི་བྱང་ས་ལས། སྔོན་གྱི་མཐའ་དང་ཕྱི་མའི་མཐའ་བསྐལ་པ་བརྒྱར་ཡང་ཡེ་ཤེས་མཐོང་པས་འཇུག་པར་བྱེད་དོ། ཞེས་པ་ལྟར་རོ། །དེ་ལ་གཡོ་བས་ནི་གདུལ་བྱར་འདུན་པར་བྱེད་ལ། འགྲོ་བ་དང་སྣང་བས་ནི་གདུལ་བྱའི་གནས་སུ་སོང་སྟེ་མཐོང་ནས་སྨིན་པར་བྱེད་དོ། །སྔོན་དང་ཕྱི་མཐའ་ལ་འཇུག་པ་ནི། སེམས་ཅན་གྱི་སྡིག་པ་དང་འབྲལ་བའི་ཆེད་དུ་ལས་ཀྱིས་འཁོར་བར་འགྲོ་བའི་ཚུལ་སྟོན་ནོ། །ཆོས་སྒོ་བརྒྱ་འབྱེད་པ་ནི་རང་གི་བློ་གྲོས་སྨིན་པའི་ཆེད་དུ་ཆོས་ཀྱི་རྣམ་གྲངས་ཀྱི་དོན་སེམས་པའོ། །དེ་བཞིན་དུ་ས་གཉིས་པ་ལ་ཡོན་ཏན་དེ་དག་སྟོང་ཕྲག་བཅུ་གཉིས་དང༌། གསུམ་པ་ལ་འབུམ་ཕྲག་བཅུ་གཉིས། བཞི་པ་ལ་བྱེ་བ་ཕྲག་བརྒྱ་དང་བཅུ་གཉིས་དང༌། ལྔ་པ་ལ་བྱེ་བ་ཕྲག་སྟོང་དང་བཅུ་གཉིས་དང༌། དྲུག་པ་ལ་བྱེ་བ་བརྒྱ་ཕྲག་སྟོང་དང་བཅུ་གཉིས་དང༌། བདུན་པ་ལ་བྱེ་བ་ཁྲག་ཁྲིག་འབུམ་ཕྲག་བཅུ་གཉིས་ཐོབ་པོ། །བརྒྱད་པ་ལ་སྟོང་གསུམ་གྱི་འཇིག་རྟེན་གྱི་ཁམས་འབུམ་གྱི་རྡུལ་
དང་མཉམ་པ་དང༌། དགུ་པ་ལ་སྟོང་གསུམ་གྱི་འཇིག་རྟེན་གྱི་ཁམས་གྲངས་མེད་པ་འབུམ་ཕྲག་བཅུའི་རྡུལ་ཕྲ་རབ་ཀྱི་རྡུལ་ཇི་སྙེད་པ་དེ་སྙེད་དང༌། བཅུ་པ་ལ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཕྲ་རབ་ཀྱི་རྡུལ་སྙེད་དང་མཉམ་པའི་ཡོན་ཏན་ཐོབ་བོ། །གསུམ་པ་སྐྱེ་བ་འཛིན་ཚུལ་ལ་གཉིས། དབང་དང་རྣམ་སྨིན་གྱི་སྐྱེ་བའོ། །དང་པོ་ནི་མོས་སྤྱོད་པ་རྣམས་འདོད་པར་སྐྱེ་བ་ལས་དང༌། ས་ཐོབ་པ་རྣམས་དུད་འགྲོ་སོགས་དམན་གནས་སུ་སྐྱེ་བ་སྨོན་ལམ་དང༌། བསམ་གཏན་གྱི་དབང་གིས་གཟུགས་ཁམས་སུ་སྐྱེ་བ་བཟློག་ནས་འདོད་པར་སྐྱེ་བ་ཏིང་ངེ་འཛིན་དང༌། སྤྲུལ་པས་དགའ་ལྡན་གྱི་གནས་ལ་སོགས་པར་སྐྱེ་བ་དབང་འབྱོར་པའི་དབང་གི་སྐྱེ་བའོ། །གཉིས་པ་རྣམ་སྨིན་གྱི་སྐྱེ་བ་ནི། ས་བཅུ་ལ་གནས་པ་རྣམས་རིམ་བཞིན། ཕལ་ཆེར་འཛམ་བུའི་གླིང་དང༌། གླིང་བཞི་དང༌། སུམ་ཅུ་རྩ་གསུམ་དང༌། འཐབ་བྲལ་དང༌། དགའ་ལྡན་དང༌། འཕྲུལ་དགའ་དང༌། གཞན་འཕྲུལ་དབང་བྱེད་ཀྱི་རྒྱལ་པོ་དང༌། སྟོང་གི་བདག་པོ་ཚངས་པ་དང༌། སྟོང་གསུམ་གྱི་བདག་པོ་ཚངས་པ་ཆེན་པོ་དང༌། གནས་གཙང་མའི་ལྷའི་རྒྱལ་པོ་རྣམས་སུ་སྐྱེ་བ་འཛིན་ཏོ། །བཞི་པ་གཉེན་པོ་རྟོགས་པ་ལ་གཉིས། རྟོགས་ཚུལ་དང༌། དེ་མཉམ་རྗེས་གང་ཡིན་བསྟན་པའོ། །དང་པོ་རྟོགས་ཚུལ་ནི། ས་དང་པོར་ཆོས་དབྱིངས་རྒྱུད་ཐམས་ཅད་ལ་ཁྱད་པར་མེད་པར་ཀུན་ཏུ་འགྲོ་
བའི་དོན་དུ་དང༌། ས་གཉིས་པར་དེ་སྒྲིབ་པ་སྤང་རུང་དུ་རྟོགས་པས་མཆོག་གི་དོན་དང༌། ས་གསུམ་པར་ཐོས་པ་ཚོལ་བ་ནི་ཆོས་ཉིད་རྟོགས་པའི་རྒྱུ་མཐུན་པ་སྟེ་རྒྱུའི་མཆོག་ཏུ་རིག་པས་རྒྱུ་མཐུན་པ་དོན་གྱི་མཆོག་ཏུ་དང༌། ས་བཞི་པར་ཆོས་ལ་སྲེད་པ་ཡང་ལོག་པས་ཆོས་ཉིད་ཡོངས་སུ་འཛིན་པ་མེད་པའི་དོན་དུ་དང༌། ས་ལྔ་པར་བདག་གཞན་ཐམས་ཅད་ཀྱི་རང་བཞིན་ཆོས་ཉིད་དུ་རྟོགས་པས་དེ་རྒྱུད་ཐ་དད་པ་མེད་པའི་དོན་དུ་དང༌། ས་དྲུག་པར་རྟེན་འབྲེལ་གྱི་ཆོས་ཉིད་ལ་ཉོན་མོངས་རྣམ་བྱང་དུ་འགྱུར་བའི་ཆོས་གང་ཡང་མེད་པར་རྟོགས་པས་དེ་ཉོན་མོངས་དང་རྣམ་དག་མིན་པའི་དོན་དུ་དང༌། ས་བདུན་པར་ཆོས་དབྱིངས་ལ་མདོ་ལ་སོགས་པའི་ཆོས་ཀྱི་མཚན་མ་ཐ་དད་པ་མི་འབྱུང་བས་དེ་ཐ་དད་མེད་པའི་དོན་དུ་དང༌། ས་བརྒྱད་པར་མི་སྐྱེ་བའི་ཆོས་ལ་བཟོད་པ་ཐོབ་པས་ཀུན་བྱང་བྲི་འཕེལ་མེད་པར་རྟོགས་པས་དེ་བྲི་མེད་འཕེལ་མེད་ཀྱི་དོན་དང༌། ཉོན་ཡིད་དང་སྒོ་ལྔའི་ཤེས་པ་ཡུལ་དང་བཅས་པ་གནས་གྱུར་པས་རིམ་པ་ལྟར་ཆོས་ཉིད་མི་རྟོག་ཡེ་ཤེས་དང་ཞིང་དག་པ་ལ་དབང་བའི་གནས་སུ་དང༌། ས་དགུ་པར་སོ་སོ་ཡང་དག་པར་རིག་པ་བཞི་ཐོབ་པས་ཆོས་ཉིད་དེ་ཡེ་ཤེས་ལ་དབང་བའི་གནས་སུ་དང༌། ས་བཅུ་བར་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་བས་ཆོས་ཉིད་ལས་ལ་དབང་བའི་གནས་ཉིད་དུ་རྟོགས་ཏེ། དབང་དེ་གཉིས་ནི་རྣམ་པར་རྟོག་པ་
ཡིད་ཤེས་གནས་གྱུར་པ་ལས་འབྱུང་བའོ། །དེ་ལྟར་ཆོས་དབྱིངས་བཅུ་ལ་སྒྲིབ་པའི་ཉོན་མོངས་ཅན་མ་ཡིན་པའི་མི་ཤེས་པ་ཤེས་སྒྲིབ་བཅུ་ཡང་གཉེན་པོ་ས་བཅུས་རིམ་པ་ལྟར་སྤོང་སྟེ་དེ་དག་གི་མི་མཐུན་ཕྱོགས་ཡིན་པས་སོ། །གཉིས་པ་དེ་མཉམ་རྗེས་གང་ཡིན་བསྟན་པ་ལ་གཉིས། འཐད་པའི་ཕྱོགས་དགོད། །དེ་མི་འཐད་པར་འདོད་པ་དགག་པའོ། །དང་པོ་འཐད་ཕྱོགས་དགོད་པ་ནི། དབུས་མཐར་བཤད་པའི་རྟོགས་ཚུལ་དེ་དག་མཉམ་གཞག་དང་རྗེས་ཐོབ་ཀྱི་རྟོགས་ཚུལ་གང་ཡིན་ཞེ་ན། རྗེས་ཐོབ་ཀྱི་ངེས་པ་འདྲེན་ཚུལ་ཐ་དད་པ་རེ་ཡོད་པས་དེའི་རྟོགས་ཚུལ་ཡིན་ནོ། །མཉམ་གཞག་ཏུ་ཆོས་ཉིད་རྟོགས་པའི་ཚུལ་ལ་ནི་མི་འདྲ་བ་ཁས་བླང་དུ་མི་རུང་སྟེ་དབྱེ་བ་དེ་དག་ཆོས་ཉིད་ལ་ཡོད་ན་ནི་ཆོས་ཉིད་ཆ་དུ་མའི་བདག་ཉིད་དུ་འགྱུར་ཞིང༌། ཆོས་ཅན་ལ་མ་ལྟོས་པར་ཆོས་ཉིད་ལ་དབྱེ་བ་མེད་པར་བཤད་པ་རྣམས་དང་འགལ་ལ། ཆོས་ཉིད་ལ་དབྱེ་བ་མེད་ཀྱང་མཉམ་གཞག་གིས་དེ་ལྟར་རྟོགས་ན་ནི་ཐེག་ཆེན་འཕགས་པའི་མཉམ་གཞག་དེ་ཆོས་ཉིད་ལ་འཁྲུལ་ཤེས་སུ་འགྱུར་ཏེ་ཟླ་བ་གཉིས་སྣང་གི་ཤེས་པ་བཞིན་ནོ། །འོ་ན་མཉམ་གཞག་གི་ཡུལ་གང་ཞེ་ན། འདི་ལ་མཉམ་གཞག་སྣང་མེད་དུ་འདོད་པ་དང༌། སྣང་བཅས་སུ་འདོད་པ་གཉིས་ལས། དང་པོ་ནི་སྤྱོད་འཇུག་ལས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་
རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། ཞེས་པ་ལྟར། ཡུལ་དེ་ལ་ཤེས་པ་མི་སྐྱེ་བའི་དོན་ཏེ་མཐོང་བ་མེད་པ་ཁོ་ནའི་སྒོམ་པ་ནི་མཐོང་བའོ་ཞེས་བརྗོད་དོ། །གཉིས་པ་ནི། འཕགས་གྲོལ་དང་སློབ་དཔོན་གཉིས་ཀྱིས། ཆོས་ཉིད་ཙམ་མཉམ་གཞག་གི་ཡུལ་ཡིན་པ་དང༌། མཉམ་གཞག་གཟུང་འཛིན་གྱི་རྣམ་པ་ཅན་དང༌། ཡུལ་དང་བྲལ་བའི་ལུགས་རྣམས་བཀག་ནས། བདེན་དངོས་མེད་པའི་རྟེན་འབྲེལ་སྒྱུ་མ་ལྟ་བུ་མ་ཡིན་དགག་མཉམ་གཞག་གི་དམིགས་པར་བཤད་ཅིང༌། དེ་ཡང་ཡུལ་ཡུལ་ཅན་ཐ་དད་པ་ནི་མ་ཡིན་གྱི་མཉམ་གཞག་རང་རིག་གི་ཚུལ་གྱིས་ཉམས་སུ་མྱོང་བའི་སྣང་བ་རང་བཞིན་གྱིས་སྟོང་པ་ཡིན་ནོ། །ཆོས་ཉིད་ལ་ལྟོས་ནས་ནི་སྣང་བ་གྲུབ་པ་ཡང་མི་བཞེད་དོ། །དེ་གཉིས་ལས་རེ་ཞིག་ལུགས་ཕྱི་མ་འདི་ཉིད་ཁས་བླང་བར་བྱའོ། །གཉིས་པ་དེ་མི་འཐད་པར་འདོད་པ་དགག་པ་ལ་གཉིས། ལྟར་སྣང་གི་རྩོད་པ་དགོད། ཡང་དག་གི་ལན་གྱིས་དགག་པའོ། །དང་པོ་རྩོད་པ་ནི། ཐེག་ཆེན་འཕགས་པའི་རྟོགས་པ་མི་འཐད་པར་འགྱུར་ཏེ། ཆོས་ཉིད་རྟོགས་པ་མེད་པའི་ཕྱིར། གཞན་ཡང་ཤེས་སྒྲིབ་མ་ལུས་པ་སྤང་པའི་སྤངས་པ་མི་འཐད་པར་འགྱུར་ཏེ། ཆོས་ཐམས་ཅད་ཀྱི་རང་བཞིན་སྤྲོས་བྲལ་རྟོགས་པ་མེད་པའི་ཕྱིར། གཞན་ཡང་རང་བཞིན་གནས་རིགས་ཐེག་གསུམ་གྱི་རྟོགས་པ་གོང་ནས་གོང་དུ་
བགྲོད་པའི་རྟེན་དུ་མི་འཐད་དེ་ཆོས་ཉིད་ལ་རྟེན་དང་བརྟེན་པ་མེད་པའི་ཕྱིར། མཉམ་གཞག་གི་ཡུལ་གྱི་སྣང་བ་སྒྱུ་མ་ལྟ་བུ་དེ་དོན་དམ་དུ་ཡོད་པར་འགྱུར་ཏེ། ཐེག་ཆེན་འཕགས་པའི་མཉམ་གཞག་གི་ཡུལ་ན་ཡོད་པས་སོ། །ཁྱབ་པ་ཡོད་དེ། དེ་དོན་དམ་དཔྱོད་བྱེད་ཀྱི་རིག་པ་མཐར་ཐུག་ཡིན་པས་སོ། །ཆོས་ཉིད་དེ་ས་བཅུའི་བྱང་ཆུབ་སེམས་དཔས་ཀྱང་ཕྱོགས་རེ་ལས་མ་རྟོགས་ཤིང་སངས་རྒྱས་ཁོ་ནས་མཐའ་དག་རྟོགས་པར་བཤད་པ་རྣམས་ཀྱང་མི་འཐད་དེ། ས་དང་པོ་ནས་ཇི་ལྟ་བ་རྟོགས་པ་རྫོགས་པས་སོ་ཞེ་ན། །གཉིས་པ་ལན་ནི། ཐལ་བ་དང་པོ་གཉིས་ཀྱིས་ཆོས་ཉིད་མ་རྟོགས་ཞེས་པའི་དོན་ནི། །ཆོས་ཉིད་མཉམ་གཞག་གིས་གཉིས་སྣང་དུ་མ་གྲུབ་པའི་དོན་ལ་བྱེད་ན་ནི། ཁྱབ་པ་མ་ངེས་ཏེ། ཆོས་ཉིད་རྟོགས་པའི་དོན་སྤྲོས་པའི་ཆོས་གང་ཡང་མ་གཟིགས་པ་ལ་འདོད་པས་སོ། །འོན་ཏེ་མཉམ་གཞག་སྤྲོས་པ་མཐའ་དག་ཉེ་བར་ཞི་བའི་ཚུལ་གྱིས་མ་རྟོགས་པ་ལ་བྱེད་ན་གཏན་ཚིགས་མ་གྲུབ་བོ། །མདོར་ན་གཤིས་ལུགས་དང༌། ཆོས་ཉིད་དང༌། རང་བཞིན་སྤྲོས་བྲལ་རྣམས་རྟོགས་ཞེས་པའི་དོན་ཡེ་ཤེས་ལ་འཛིན་པ་མཐའ་དག་ཉེ་བར་ཞི་བས་དེ་རྣམས་ལ་དམིགས་པའི་ཤེས་པ་མི་སྐྱེ་བ་ལ་བྱེད་ཀྱི། དངོས་སུ་ན་འགའ་ཞིག་གིས་དམིགས་བྱ་དམིགས་བྱེད་དུ་བྱས་པ་མིན་ནོ། དཔེར་ན་ཤེས་པ་ཡུལ་ཇི་ལྟ་བ་དེའི་རྣམ་པར་སྐྱེས་པ་ན་རང་དུས་ལ་ཡུལ་དེ་མེད་ཀྱང་རྟོགས་པར་འཇོག་པ་དང་འདྲ་བར་
མཉམ་གཞག་གིས་ཆོས་ཉིད་མཐའ་གང་དུ་ཡང་མི་གནས་པ་དང་མཐུན་པར་མཐའ་གང་དུ་ཡང་མི་འཛིན་པ་ན་དེ་དང་དེ་རྟོགས་པར་ཐ་སྙད་ བྱས་པ་སྟེ། དབུ་མ་ལ་འཇུག་པ་ལས། གང ་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། །དེ་ཚེ་དེ་རྣམས་བསྟེན་ལས་དེ་ཡིས་དེ་ཉིད་རྟོགས་པར་བརྗོད་བྱ་སྟེ། །ཇི་ལྟར་སེམས་ནི་གང་གི་རྣམ་པ་ཅན་དུ་གྱུར་པ་དེ་ཡི་ཡུལ། །དེ་ཡོངས་ཤེས་པ་དེ་བཞིན་ཐ་སྙད་ཉེ་བར་བརྟེན་ནས་རིག་པ་ཡིན། ཞེས་སོ། །རང་བཞིན་གནས་རིགས་མི་འཐད་པར་ཐལ་བ་ཡང་མེད་དེ། ཆོས་ཉིད་ནི་རང་བཞིན་སྤྲོས་བྲལ་ཡིན་ལ་དེ་ཡང་སྤྲོས་པ་མ་གཟིགས་པའི་ཚུལ་གྱིས་མཁྱེན་པས་ཐེག་གསུམ་གྱི་ཡོན་ཏན་རྣམས་གོང་དུ་འཕེལ་བ་ཙམ་ལ་བསམས་ནས་རྟེན་དང་བརྟེན་པར་བཤད་ཀྱི་རྟེན་བརྟེན་པ་མཚན་ཉིད་པ་མིན་ནོ། །སྣང་བ་ཐེག་ཆེན་འཕགས་པའི་མཉམ་གཞག་གི་ཡུལ་དུ་ཡོད་ཀྱང་དོན་དམ་དུ་མ་གྲུབ་པར་མི་འགྱུར་ཏེ། །དེས་དེ་བདེན་པར་མ་གཞལ་གྱིས་བདེན་མེད་དུ་གཞལ་བའི་ཕྱིར་རོ། །དེ་ལྟ་མིན་ན་ཐུབ་པའི་མཁྱེན་པ་ལ་ཡུལ་མེད་དགོས་ཏེ་དོན་དམ་དཔྱོད་བྱེད་ཀྱི་རིགས་པ་མཐར་ཐུག་ཡིན་པའི་ཕྱིར་རོ། །དེའི་ཡུལ་ཡིན་ན་དོན་དམ་དུ་གྲུབ་པར་ཐལ་ལོ། །མདོ་དག་ལས་ཆོས་ཉིད་ཕྱོགས་རེ་བ་དང་ཡོངས་རྫོགས་རྟོགས་པའི་ཁྱད་གསུངས་པ་ཡང༌། དམན་པའི་རིགས་ཅན་ཁ་ཅིག་ཐེག་པ་ལ་དྲངས་པའི་ཕྱིར་ཆོས་དེ་རྟོགས་དཀའ་བ་དང༌། རྟོགས་པའི་ཕན་ཡོན་སོགས་
བཤད་ཀྱི་སྒྲ་ཇི་བཞིན་པ་མིན་ནོ། །དེ་ལྟར་ཆོས་ཉིད་ནི་ཀུན་རྫོབ་པའི་ངོས་ནས་ཡེ་ཤེས་ཀྱི་ཡུལ་དུ་གྲུབ་པ་དང༌། དེ་རྟོགས་སོ་ཞེས་ཉེ་བར་གདགས་ཀྱི་དོན་དམ་པར་ནི་དེ་ལྟར་མིན་པར་མདོ་དང་བསྟན་བཅོས་དུ་མ་ལས་གསུངས་སོ། །ལྔ་པ་སྤང་བྱ་མི་མཐུན་ཕྱོགས་ལ། ཤེས་སྒྲིབ་ཕལ་ཆེ་བ་དང༌། ཉོན་སྒྲིབ་ཀྱི་དབང་དུ་བྱས་པའོ། །དང་པོ་ཤེས་སྒྲིབ་ལ་ཐུན་མོང་བ་ནི། འཆད་པར་འགྱུར་བའི་གཟུང་འཛིན་གྱི་རྣམ་རྟོག་བརྒྱ་རྩ་བརྒྱད་རྣམས་སོ། །ཐུན་མོང་མ་ཡིན་པ་ནི། ས་བཅུ་པོ་རེ་རེ་ལ་ཤིན་ཏུ་རྨོངས་པ་གཉིས་གཉིས་དང༌། དེའི་གནས་ངན་ལེན་མི་མཐུན་ཕྱོགས་རེ་རེ་སྟེ། འདི་ལྟར་ས་དང་པོ་ལ་གང་ཟག་དང་ཆོས་ལ་མངོན་ཞེན་དང་ངན་སོང་བའི་ཉོན་མོངས་པ་དང༌། གཉིས་པ་ལ་ལྟུང་བ་ཕྲ་མོའི་འཁྲུལ་པ་དང༌། ལས་ཀྱི་རྣམ་པ་སྣ་ཚོགས་པ་དང༌། གསུམ་པ་ལ་འདོད་ཆགས་ཀྱི་ས་དང༌། ཐོས་པའི་གཟུངས་ཡོངས་སུ་རྫོགས་པ་ལ་དང༌། །བཞི་པ་ལ་སྙོམས་འཇུག་ལ་སྲེད་པ་དང༌། ཆོས་ལ་སྲེད་པ་དང༌། ལྔ་པ་ལ་འཁོར་བ་ལ་གཅིག་ཏུ་མི་ཕྱོགས་ཤིང་མངོན་དུ་ཕྱོགས་པ་་འདོད་པའི་་ཀུན་ཏུ་རྨོངས་པ་་ཡིད་ལ་བྱེད་པ་དང༌། མྱང་འདས་ལ་གཅིག་ཀུན་ཏུ་རྨོངས་པ་ཏུ་མི་ཕྱོགས་ཅིང་མངོན་དུ་ཕྱོགས་པ་ཡིད་ལ་བྱེད་པ་དང༌། དྲུག་པ་ལ་འདུ་བྱེད་ཀྱི་འཇུག་པ་མངོན་སུམ་དུ་བྱ་བ་ལ་དང༌། མཚན་མ་མང་པོ་ཀུན་ཏུ་འབྱུང་བ་དང༌། ཀུན་ཏུ་རྨོངས་པ། ཀུན་ཏུ་རྨོངས་པ། བདུན་པ་ལ་མཚན་མ་ཕྲ་མོ་
འབྱུང་བ་དང༌། མཚན་མེད་ཡིད་ལ་བྱེད་པའི་ཐབས་མཁས་དང༌། བརྒྱད་པ་ལ་མཚན་མེད་ལ་རྩོལ་བ་དང༌། མཚན་མ་རྣམས་ལ་མི་དབང་བ་དང༌། དགུ་པ་ལ་ཆོས་བསྟན་པ་དང་ཆོས་ཀྱི་ཚིག་དང་ཡི་གེ་དཔག་ཏུ་མེད་པ་དང༌། མ་པ་གཅིག་ཏུ་པས་ཐབས་ལ་ཀུན་ཏུ་རྨོངས་པ་དང༌། མཚན་མ་མེད་པ་བཅོས་་པ་ཀུན་ཏུ་རྨོངས་པ་དང༌། གོང་ནས་གོང་དུ་ཤེས་རབ་དང༌། སྤོབས་པ་ལ་གཟུངས་ཀྱི་དབང་ལ་དང༌། སྤོབས་པའི་དབང་ལ་དང༌། བཅུ་པ་ལ་མངོན་ཤེས་ཆེན་པོ་ལ་དང༌། གསང་བ་ཕྲ་མོ་ལ་འཇུག་པ་ལ་དང༌། བཅུ་གཅིག་པ་ལ་ཤེས་བྱ་ཐམས་ཅད་ལ་ཆགས་པ་ཤིན་ཏུ་ཕྲ་མོ་དང༌། ཐོགས་པ་ཤིན་ཏུ་ཀུན་ཏུ་རྨོངས་པ་དང༌། རྨོངས་པ་གཉིས་ཀུན་ཏུ་རྨོངས་པ་་སོ། །གཉིས་པ་ཉོན་སྒྲིབ་ཀྱི་དབང་དུ་བྱས་པ་ལ་བཞི། མཐོང་སྤང་ལོག་ཞུགས་དང༌། སྒོམ་སྤང་སའི་སྒོ་ནས་དབྱེ། དེ་ལྟར་ཕྱེ་བའི་རྣམ་བཞག་དཔྱད། ཇི་ལྟར་སྤོང་ཚུལ་ལོ། །དང་པོ་ལ་གཉིས། སྤྱིའི་གྲངས་དང༌། ལོག་པར་འཇུག་ཚུལ་ལོ། །དང་པོ་སྤྱིའི་གྲངས་ལ་བཤད་ཚུལ་གསུམ་ལས་ཀུན་བཏུས་སུ་ནི། ཁམས་གོང་གི་རྟེན་ལ་ཁོང་ཁྲོའི་ས་བོན་ཡོད་ཀྱང་མངོན་དུ་རྒྱུ་མེད་པའམ། ས་བོན་དེ་འཇོག་བྱེད་འདོད་པའི་སར་གཏོགས་ཁོ་ན་ཡིན་ཞིང་དེའི་རྣམ་སྨིན་ཀྱང་འདོད་པ་ཁོ་ནར་མྱོང་བ་ལ་དགོངས་ནས་གོང་མའི་ས་ལ་ཁོང་ཁྲོ་བོར་ནས་འདོད་པ་དང་ཁམས་གོང་གི་
ས་ལ་ཡོད་པའི་ཕྲ་རྒྱས་བཅུ་དང་དགུ་རྣམས་བདེན་པ་བཞི་ཀ་ལ་ཁྱད་མེད་པར་ལོགས་ཞུགས་སུ་བཤད་དེ་བརྒྱ་དང་བཅུ་གཉིས་སོ། །རྣམ་པར་གཏན་ལ་དབབ་པ་བསྡུ་བར་ཁམས་གསུམ་ཀའི་སྡུག་བསྔལ་མ་གཏོགས་པའི་བདེན་པ་ལྷག་མ་གསུམ་ལ་ལྟ་བ་དང་པོ་གཉིས་འཇུག་པ་དོར་པས་གོ་བཞིའོ། །མཛོད་ལས་ནི། འདོད་པ་ན་སྡུག་བསྔལ་ལ་བཅུ་དང༌། ཀུན་འབྱུང་འགོག་པ་གཉིས་ལ་ལྟ་བ་དང་པོ་གཉིས་དང༌། མཆོག་འཛིན་ཐ་མ་སྟེ་གསུམ་དང་ལམ་ལ་ལྟ་བ་དང་པོ་གཉིས་ཁོ་ན་དོར་བས་བདེན་བཞི་ལ་རིམ་པ་ལྟར་བཅུ་དང་བདུན་བདུན་བརྒྱད་ཡིན་ལ་གོང་མར་ཁོང་ཁྲོ་ཡང་དོར་བས་དགུ་དང་དྲུག་དྲུག་བདུན་ལོག་པར་འཇུག་པས་སྤྱིར་གྱ་བརྒྱད་དོ། །གཉིས་པ་ལོག་པར་འཇུག་ཚུལ་ནི། གལ་ཏེ་མཐོང་སྤང་རྣམས་ལོག་ཞུགས་ཀྱི་སྒོ་ནས་འཆད་ན། འཇུག་མཁན་ནི་དུ། འཇུག་ཡུལ་ནི་གང༌། འཇུག་ཚུལ་ཇི་ལྟ་བུ་ཞེ་ན། འཇུག་པ་པོ་ནི། རྩ་ཉོན་དང་མཚུངས་ལྡན་དུ་འབྱུང་བའི་ཉེ་ཉོན་དང༌། དེ་ལས་གཞན་པའི་སེམས་བྱུང་གཙོ་སེམས་དང་བཅས་པ་མཐའ་ཡས་ཀྱང་གཙོ་བོ་དང་རིགས་བསྡུ་ན་བཅུ་སྟེ། འདོད་ཆགས་ཁོང་ཁྲོ་ང་རྒྱལ་མ་རིག་པ་ཐེ་ཚོམ་འཇིག་ལྟ་མཐར་ལྟ་ལྟ་བ་མཆོག་འཛིན་ཚུལ་ཁྲིམས་དང་བརྟུལ་ཞུགས་མཆོག་འཛིན་ལོག་ལྟ་སྟེ་མདོར་ན་ལྟ་མིན་ལྔ་དང་ལྟ་བ་ལྔའོ། །འཇུག་པའི་ཡུལ་ཡང་གསལ་བའི་དབྱེ་བ་མཐའ་ཡས་ཀྱང་བདེན་པ་
བཞིའོ། །འཇུག་ཚུལ་བདེན་བཞིའི་ཐུན་མོང་གི་མཚན་ཉིད་ གང་ཟག་གི་བདག་གིས་སྟོང་པ་དེ་ཇི་སྲིད་མངོན་སུམ་དུ་མ་བྱས ་པ་དེ་སྲིད་དུ་བཅུ་པོ་འདིས་ཟག་བཅས་ཀྱི་ལས་དངོས་སུ་སྐྱེད་ཅིང་རང་གི་རིགས་འདྲ་སྔ་མས་ཕྱི་མ་རྣམས་བསྐྱེད་པ་དང༌། ཕྱི་མའི་རྣམ་སྨིན་འཕེན་པ་དང་འགྲུབ་པར་བྱེད་པས་སྡུག་བསྔལ་འཕེན་པར་བྱེད་པའི་ཕྱིར། སྡུག་ཀུན་གཉིས་ཀྱི་རྒྱུ་དང༌། དེ་གཉིས་ལ་དམིགས་ནས་ཀྱང་འདི་དག་འཕེལ་བར་འགྱུར་བའི་ཕྱིར་དེ་གཉིས་ཀྱང་བཅུ་པོ་འདིའི་རྒྱུ་དང་གཞི་བྱེད་ལ་གང་གི་ཚེ་བདེན་པ་བཞི་ གང་ཟག་གི་བདག་གིས་སྟོང་པར་མངོན་དུ་བྱས་པ ་དེའི་ཚེ་དེ་དག་གིས་ཕན་ཚུན་དུ་འཕེལ་བར་བྱེད་པ་ལྡོག་པའི་ཕྱིར་བཅུ་པོ་འདི་སྡུག་ཀུན་ལ་ལོག་པར་ཞུགས་པ་ཡིན་ཏེ། དེ་གཉིས་ཀྱི་རང་བཞིན་མཐོང་བས་སྤོང་བའི་ཕྱིར་རོ། །དེ་བཞིན་དུ་བདེན་བཞིའི་བདག་མེད་པར་མ་མཐོང་ན་འཁོར་བ་ལ་མངོན་པར་དགའ་བའི་དབང་གིས་ཐར་བ་རྒྱུ་འབྲས་ལ་གཡང་སར་འདུ་ཤེས་ནས་སྐྲག་པར་འགྱུར་ལ། མཐོང་བ་ན་སྐྲག་པ་དེ་ཡང་ཉོན་མོངས་པ་བཅུ་སྤོང་བའི་སྒོ་ནས་ལྡོག་པའི་ཕྱིར་འགོག་ལ་མ་སྐྲག་པའི་གནས་མ་ཡིན་པ་ལ་སྐྲག་སྟེ་སྤོང་བའི་ཉོན་མོངས་པ་བཅུ་དེ་གཉིས་ལ་ལོག་པར་ཞུགས་པའོ། །དེ་ཡང་དངོས་སུ་དང༌། བརྒྱུད་ནས་སེམས་ལོག་པ་ལ་དང༌། དབང་གིས་ལོག་ཞུགས་གསུམ་གྱིས་རིག་པར་བྱའོ། །དེ་ལ་དངོས་སུ་ལོག་ཞུགས་ནི་ལྟ་བ་དང་པོ་གཉིས་དང་ལྟ་བ་ཐ་མ་སྟེ་གསུམ་དང༌། མ་རིག་པ་དང་ཐེ་ཚོམ་སྟེ་ལྟ་མིན་གཉིས་དང་ལྔ་ནི་བདེན་པ་ལ་དངོས་སུ་ལོག་ཞུགས་ཏེ། རིམ་པ་ལྟར་
བདེན་པ་ལ་བདག་དང་བདག་གི་བར་འཛིན་པ་དང༌། རྟག་པ་དང་ཆད་པར་འཛིན་པ་དང༌། བདེན་པའི་རྣམ་པ་དེ་དག་མེད་དོ་ཞེས་སྐུར་པའམ་དེ་དག་གི་ཇི་ལྟར་གསུངས་པ་ལས་གཞན་པའི་རྣམ་པར་སྒྲོ་འདོགས་པ་དང༌། བདེན་པའི་རང་བཞིན་ལ་རྨོངས་པ་དང༌། དེ་དག་དེ་ལས་བསྟན་པ་ལྟར་ཡིན་མིན་ཡིད་གཉིས་ཐབས་བདེན་པ་ལ་ཉོན་མོངས་པ་གཞན་གྱིས་བར་མ་ཆོད་པར་ཕྱིན་ཅི་ལོག་ཏུ་འཛིན་པའི་ཕྱིར་རོ། །ཀུན་བཏུས་ལས། ཐེ་ཚོམ་གཉེན་པོ་ལ་ལོག་ཞུགས་སུ་བཤད་པ་ནི་བདེན་བཞི་གཉེན་པོའི་ཡུལ་ཡིན་པ་ལ་དགོངས་སོ། །གཉིས་པ་ནི་ལྟ་བ་ལ་མཆོག་འཛིན་གཉིས་དང༌། ལྟ་མིན་ལ་འདོད་ཆགས་ང་རྒྱལ་གཉིས་ཏེ་བཞི་ནི་བརྒྱུད་ནས་ལོག་ཞུགས་ཡིན་ཏེ། རིམ་པ་ལྟར་དངོས་སུ་ལོག་ཞུགས་ཀྱི་ལྟ་བ་ལ་མཆོག་ཏུ་སྒྲོ་འདོགས་པ་དང༌། ལྟ་ངན་དང་འབྲེལ་བའི་སྤྱོད་ངན་ལ་དག་གྲོལ་ངེས་འབྱིན་དུ་ལྟ་བ་དང༌། ལྟ་ངན་གྱིས་སེམས་ཁེངས་པ་དང༌། ལྟ་ངན་ལ་སྲེད་པར་བྱེད་པས་བདེན་པ་དང་བར་དུ་དམིགས་ཚུལ་གཞན་གྱིས་ཆོད་པའི་ཉོན་མོངས་ལ་ཕྱིན་ཅི་ལོག་ཏུ་དམིགས་པའི་ཕྱིར་རོ། །གསུམ་པ་ནི། །ཁོང་ཁྲོ་ནི་དབང་གི་ལོག་ཞུགས་ཡིན་ཏེ་རང་གི་ལྟ་བ་དང་མི་མཐུན་པའི་ལྟ་བ་ལ་ཀུན་ནས་མནར་སེམས་པའི་དབང་གིས་ལོག་པར་ཞུགས་པའི་ཕྱིར་རོ། །གཉིས་པ་སྒོམ་སྤང་ལ་སའི་སྒོ་ནས་དབྱེ་བ་ལ་གཉིས། མཚན་ཉིད་དང་དབྱེ་བའོ། །དང་པོ་ལ་སྤྱིའི་མཚན་ཉིད་ནི། མི་ཤེས་པ་གང་ཞིག་སྒོམ་ལམ་གྱི་གཞོམ་བྱར་གྱུར་པའོ། །དེའི་ཉོན་སྒྲིབ་དང་ཤེས་སྒྲིབ་ཀྱི་མཚན་ཉིད་ནི། རིམ་པ་ལྟར་ཉོན་མོངས་དང་ཉོན་མོངས་ཅན་
མ་ཡིན་པའི་མི་ཤེས་པ་གང་ཞིག་སྒོམ་ལམ་གྱིས་གཞོམ་བྱར་གྱུར་པའོ། །གཉིས་པ་ལ་འཆད་ཚུལ་གཉིས་ལས། དང་པོ་ཀུན་བཏུས་ཀྱི་ལུགས་ལ། འདོད་ཁམས་ན་སྒོམ་སྤང་དྲུག་སྟེ། འཇིག་ལྟ་མཐར་ལྟ། འདོད་ཆགས་ཁོང་ཁྲོ་ང་རྒྱལ་མ་རིག་པའོ། །ཁམས་གོང་ན་ཁོང་ཁྲོ་མ་གཏོགས་པ་ལྔའོ། །དེ་ལ་སས་ཕྱེ་ན་ཞེ་དྲུག་སྟེ་འདོད་པ་ན་དྲུག །བསམ་གཟུགས་བརྒྱད་ན་བཞི་བཅུའོ། །ས་དང་ཆེ་འབྲིང་གིས་ཕྱེ་ན་ས་དགུ་པོ་རེ་རེ་ལ་ཁོང་ཁྲོ་མ་གཏོགས་པ་ལྔ་ལ་དགུ་དགུར་ཕྱེ་ནས་གྱ་གཅིག་པ་ལྔ་དང༌། འདོད་པར་ཁོང་ཁྲོ་དགུར་ཕྱེ་བས་བཞི་བརྒྱ་དང་བཅུ་བཞིའོ། །གཉིས་པ་མཛོད་ཀྱི་ལུགས་ལ། །ངོ་བོའི་སྒོ་ནས་ཕྱེ་ན་འདོད་ཆགས་ཁོང་ཁྲོ་ང་རྒྱལ་མ་རིག་པ་བཞི། །གོང་མར་ཁོང་ཁྲོ་བོར་བས་གསུམ་གསུམ་སྟེ་ཁམས་ཀྱིས་ཕྱེ་ན་བཅུའོ། །དེ་ས་དང་ཆེ་འབྲིང་གིས་ཕྱེ་ན་ཉིས་བརྒྱ་དང་ང་གཉིས་སོ། །འདི་ནི་བྱེ་སྨྲ་ལྟ་བ་གཉིས་མཐོང་སྤང་ཁོ་ནར་འདོད་པའི་ལུགས་ཡིན་ལ། སྔ་མ་ནི་ཕུང་པོ་ལྔའི་རབ་བྱེད་ཀྱི་འགྲེལ་པར་ལྟ་བ་ཐ་མ་གསུམ་དང༌། ཐེ་ཚོམ་ནི་ཀུན་བཏགས་པ་ཁོ་ན་ཡིན་ལ། ལྷག་མ་རྣམས་ནི་ཀུན་བཏགས་ལྷན་སྐྱེས་གཉིས་ཀ་ཡིན་ནོ། །ཞེས་པ་ལྟར་དེ་མདོ་སྡེ་པ་ཡང་དེ་ལྟར་རོ། །གསུམ་པ་དེ་ལྟར་ཕྱེ་བའི་རྣམ་བཞག་དཔྱད་པ་ནི། མཐོང་སྤང་ནི་གྲུབ་མཐའ་ངན་པས་
ཡིད་བསླད་པས་བསྐྱེད་པའི་རགས་པའི་ཆ་ཡིན་པས་བདེན་པ་མངོན་སུམ་དུ་མཐོང་བ་ཙམ་གྱིས་སྤོང་བའི་ཕྱིར་བདེན་པའི་རྣམ་པ་ལ་ལོག་ཞུགས་ཀྱི་སྒོ་ནས་བཤད་ལ། སྒོམ་སྤང་ནི་གྲུབ་མཐའ་ངན་པས་ཀུན་བཏགས་པ་ལས་མ་བྱུང་ཡང་ཐོག་མ་མེད་པ་ནས་རྗེས་སུ་ཞུགས་པ་ལྷན་སྐྱེས་ཀྱི་ཆ་ཕྲ་བ་ཡིན་པས་བདེན་པ་མཐོང་བ་གོམས་པས་ཆེ་འབྲིང་ནས་སྤང་དགོས་ཀྱི་མཐོང་ཙམ་ནས་སྤང་མི་ནུས་པའི་ཕྱིར་སའི་སྒོ་ནས་ཆེ་འབྲིང་དུ་བཞག་གོ། །མཐོང་སྤང་དང་སྒོམ་སྤང་ལ་ཀུན་བཏགས་དང་ལྷན་སྐྱེས་ཞེས་པའི་དོན་ནི། །ཕྱི་རོལ་པའི་གྲུབ་མཐས་བློ་མ་བསྒྱུར་བ་དང་བསྒྱུར་བར་ལ་བྱའི་མངོན་གྱུར་དང་བག་ལ་ཉལ་ལ་མི་བྱའོ། །དེ་ལྟར་ན་མཐོང་སྤང་བདེན་པ་དང༌། སྒོམ་སྤང་ཡུལ་ལ་ལོག་ཞུགས་ཡིན་ནོ། །བསྡུ་བ་དང་ཀུན་བཏུས་སུ་མཐོང་སྤང་མི་འདྲ་བ་གཉིས་བཞག་པ་ནི། རགས་ཞིབ་ཀྱི་དབང་གིས་ཡིན་ལ། ཐེག་ཆེན་སྐབས་སུ་མཐོང་སྤང་དང་སྒོམ་སྤང་གཉིས་ཀ་ཀུན་བཏུས་ཀྱི་ལུགས་ཁས་བླང་བར་བྱའོ། །བཞི་པ་ཇི་ལྟར་སྤྱོད་ཚུལ་ལ་གཉིས་ལས། མཐོང་སྤང་ཇི་ལྟར་སྤོང་ཚུལ་ནི། བསྡུ་བ་དང་མཛོད་ལས། འདོད་པའི་སྡུག་བསྔལ་མཐོང་སྤང་སྡུག་བསྔལ་ལ་ཆོས་བཟོད་ཆོས་ཤེས་གཉིས་དང༌། ཁམས་གོང་གི་སྡུག་བསྔལ་ལས་མཐོང་སྤང་སྡུག་བསྔལ་ལ་རྗེས་བཟོད་རྗེས་ཤེས་གཉིས་ཀྱིས་སྤོང་ལ། བདེན་པ་ལྷག་མ་
རྣམས་ལ་ཡང་དེ་བཞིན་ཏེ་ཁམས་གོང་འོག་གཉིས་ཀྱི་གཉེན་པོ་རྣམས་ཐ་དད་པར་བཤད་དོ། །དེ་ནི་ཉན་ཐོས་ཀྱི་ཡིན་པར་འབྲེ་བཞེད་དོ། །ཀུན་བཏུས་ཀྱི་ལུགས་ནི་འོག་ཏུ་འཆང་པར་འགྱུར་རོ། །གཉིས་པ་སྒོམ་སྤང་སྤོང་ཚུལ་ལ་གསུམ། ཆོས་མངོན་པ་ནས་གསུངས་པའི་ཚུལ། དེའི་དགོངས་པ་གང་ཡིན་བརྟགས་པ། སྤང་གཉེན་གྱི་ཁྱད་པར་གཞན་བསྟན་པའོ། །དང་པོ་ནི། ཉོན་མོངས་པ་རྣམས་ལ་སྤོང་བའི་ཚུལ་གཉིས་ཏེ། ཞི་རགས་ཀྱི་རྣམ་པའི་སྒོ་ནས་སྤོང་བ་དང༌། བདག་མེད་པའི་རྣམ་པའི་སྒོ་ནས་སྤོང་བ་གཉིས་སོ། །དེ་ཡང་ས་དགུ་ལ་སྒོམ་སྤང་དགུ་དགུར་དབྱེ་བའི་གཉེན་པོ་ལ་འཇིག་རྟེན་པ་དང་འཇིག་རྟེན་ལས་འདས་པའི་སྒོམ་ལམ་ཡང་རྫས་དེ་སྙེད་དེ་འོན་ཀྱང་སྲིད་རྩེའི་སྤང་བྱ་དགུ་པ་ནི་འཇིག་རྟེན་པའི་སྒོམ་ལམ་གྱིས་སྤོང་བ་མེད་དོ། །དེ་ཡང་དང་པོ་ས་མངོན་གྱུར་དང་གཉིས་པས་བག་ལ་ཉལ་སྤོང་ཞིང་དང་པོ་ནི་མུ་སྟེགས་དང་ཡང་ཐུན་མོང་བ་དང༌། གཉིས་པ་ནི་ཆོས་འདི་པའི་ཐུན་མོང་མ་ཡིན་པའི་ལམ་མོ། །འཇིག་རྟེན་ལས་འདས་པའི་སྒོམ་ལམ་གྱིས་སྤང་བྱ་སྤོང་ཚུལ་ཡང་གཉིས་ཏེ་ཉན་ཐོས་འགའ་ཞིག་གིས་ཁམས་དང་ས་མ་ཕྱེ་བར་བསྡོམས་ནས་གང་ཟག་གི་བདག་མེད་པར་བསྒོམས་པས་ཁམས་གསུམ་གྱི་ཉོན་མོངས་ཆུང་འབྲིང་ཆེན་པོ་རྣམས་ཅིག་ཆར་དུ་སྤོང་བ་དང༌། ཕྱེ་སྟེ་
ས་རྣམས་ལ་རིམ་ཅན་དུ་བསྒོམས་པས་རིམ་གྱིས་སྤོང་བའི་ཚུལ་གཉིས་གསུངས་ནས་ཐེག་ཆེན་ལ་མི་འདྲ་བའི་ཁྱད་པར་མ་མཛད་དོ། །གཉིས་པ་དེའི་དགོངས་པ་གང་ཡིན་བརྟགས་པ་ནི། ཞི་རགས་ཀྱི་རྣམ་པ་ཅན་གྱིས་ལམ་གྱིས་ཁམས་རྣམས་ལས་འདའ་བར་གསུངས་པ་ནི། གདུལ་བྱ་དབང་བརྟུལ་སྲིད་པ་ལ་ཡོན་ཏན་དུ་ལྟ་ཞིང༌། སྤོང་བའི་བློ་མི་འཇུག་པ་རེ་ཞིག་བདག་མེད་བསྟན་པའི་སྣོད་དུ་མ་གྱུར་པ་རྣམས་བདག་མེད་པའི་དོན་ལ་རིམ་གྱིས་དྲང་བའི་ཐབས་སུ་གསུང་བ་ཙམ་ཡིན་པས་ལམ་དེས་ནི་ས་དེ་དག་ཏུ་ཉོན་མོངས་མངོན་གྱུར་པ་ཡང་ཐམས་ཅད་ལྟ་ཞོག །ས་དེ་དག་ལ་སྲེད་པའི་སྒོ་ནས་མཆོག་ཏུ་ལྟ་བ་ཙམ་ཞིག་ཉམས་སྨོད་པར་བྱེད་ཀྱི་སྲེད་པ་ཡང་མངོན་གྱུར་པ་ཐམས་ཅད་འགོག་པར་མི་ནུས་ཏེ། དེས་དེའི་རྒྱུ་བདག་དང་བདག་གིར་འཛིན་པ་ལ་མི་གནོད་པའི་ཕྱིར། དེས་ན་ཞི་རགས་ཀྱི་རྣམ་པ་ཅན་ནི་རྒྱུད་སྣོད་རུང་དུ་བྱེད་པ་ཙམ་ཡིན་ལ། །ཐེག་པ་གསུམ་ཀའི་ཉོན་མོངས་ལས་གྲོལ་བར་བྱེད་པའི་ལམ་ནི་བདག་མེད་པའི་རྣམ་པ་ཅན་ཡིན་ཏེ་ཉོན་མོངས་མངོན་གྱུར་དང་བག་ལ་ཉལ་གཉིས་ཀ་ཡང་གང་ཟག་གི་བདག་མེད་མོས་པ་ཡིད་བྱེད་དང་དེ་ཁོ་ན་ཉིད་ཡིད་བྱེད་ཀྱིས་སྤོང་བར་ཤེས་པར་བྱའོ། །གསུམ་པ་སྤང་གཉེན་གྱི་ཁྱད་པར་གཞན་བསྟན་པ་ལ་གསུམ། རིམ་དང་ཅིག་ཆར་དུ་སྤོང་བ། སྤང་
བྱའི་ངོ་བོ། སྤངས་ཤིང་གྲོལ་བའི་དོན་གང་ཡིན་བརྟགས་པའོ། །དང་པོ་རིམ་དང་ཅིག་ཆར་ནི། དེ་ཡང་ཁམས་གསུམ་ལ་མ་ཕྱེ་བར་སྒོམ་སྤང་རྣམ་རྟོག་ལ་སྤང་དཀའ་སླ་དགུ་ཡོད་པས་གཉེན་པོ་ཆེ་ཆུང་དགུས་སྤོང་བའོ། །འདི་དག་ཀྱང་བྱང་སེམས་ཀྱིས་ཁམས་གསུམ་གྱི་ཆུང་འབྲིང་ཆེན་པོ་རྣམས་ཐད་སོ་ཐད་སོར་དྲིལ་ཏེ་ཅིག་ཆར་དུ་སྤོང་སྟེ་ཁམས་གསུམ་གྱི་ཆོས་ཐམས་ཅད་བདག་གཉིས་གྱིས་སྟོང་པའི་སྤྲོས་པ་དང་བྲལ་བར་བསྒོམས་པས་དངོས་པོར་མངོན་པར་ཞེན་པ་ཟློག་ལ་དེ་ལོག་པ་ན་དེའི་རྒྱུ་ཅན་གྱི་ཁམས་གསུམ་གྱི་གཟུང་འཛིན་གྱི་རྟོག་པ་མཐའ་དག་ཀྱང་འགག་པར་འགྱུར་ཏེ་བུད་ཤིང་ཟད་པའི་མེ་བཞིན་ནོ། །གཉིས་པ་སྤང་བྱའི་ངོ་བོ་ནི། ཉོན་མོངས་མངོན་གྱུར་དང་བག་ལ་ཉལ་གཉིས་ལས་བག་ལ་ཉལ་སྤོང་བ་གཙོ་བོར་བྱེད་དེ། གཏན་ལ་དབབ་པ་བསྡུ་བ་ལས། ཀུན་ནས་དཀྲིས་པ་ལས་སྤངས་ལ་བག་ལ་ཉལ་ལས་མ་སྤངས་ན་ནི་ཡང་དང་ཡང་དུ་ཀུན་ནས་དཀྲིས་པ་འབྱུང་བར་འགྱུར་གྱི། བག་ལ་ཉལ་ལས་སྤངས་ན་ནི་བག་ལ་ཉལ་དང༌། ཀུན་ནས་དཀྲིས་པ་གཉིས་ཀ་གཏན་འབྱུང་བར་མི་འགྱུར་བའི་ཕྱིར་རོ། །ཞེས་པ་ལྟར་རོ། །གསུམ་པ་སྤངས་ཤིང་གྲོལ་བའི་དོན་ནི། གཉེན་པོ་ནུས་ལྡན་རྒྱུད་ལ་སྐྱེས་སྟོབས་ཀྱིས་ཤེས་རྒྱུད་སྔར་སྤང་བྱ་དེའི་སྣོད་དུ་གྱུར་པ་ལ་སྣོད་མ་ཡིན་པར་གནས་གྱུར་ནས་སྤང་བྱ་དེའི་རྒྱུན་སྐྱེ་བའི་
སྐབས་མེད་པར་བྱས་པའོ། །དྲུག་པ་ས་ཐོབ་པའི་རྟགས་ནི། ས་དང་པོ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཏེར་བྱེ་བ་ཁྲག་ཁྲིག་སྟོང་གིས་ཡོངས་སུ་གང་བ་དང༌། གཉིས་པ་ལ་འཇིག་རྟེན་དེ་ལག་མཐིལ་ལྟ་བུར་གྱུར་པ་ལ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པ་དང༌། གསུམ་པ་ལ་བདག་ཉིད་དཔའ་ཞིང་ལག་ན་གོ་ཆ་སྲ་བ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བ་དང༌། བཞི་པ་ལ་ཕྱོགས་བཞི་ནས་རླུང་གི་དཀྱིལ་འཁོར་བཞི་ས་ཐམས་ཅད་དང་ལྡན་པའི་ས་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་པར་འཐོར་བ་དང༌། ལྔ་པ་ལ་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱི་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པ་དང༌། དྲུག་པ་ལ་ཐེམ་སྐས་བཞི་དང་ལྡན་པའི་རྫིང་གསེར་གྱི་བྱེ་མ་བརྡལ་བ་དྭངས་ཤིང་རྙོག་པ་མེད་པ་ལ་ཆུ་ཡན་ལག་བརྒྱད་དང་ལྡན་པས་ཡོངས་སུ་གང་བ། མེ་ཏོག་ཨུཏ་པ་ལ་དང༌། ཀུ་མུ་ད་དང༌། པདྨ་དཀར་པོས་བརྒྱན་པའི་ཆུ་མཐོང་ནས་དེ་ལ་བདག་ཉིད་རྩེ་དགའ་བས་ལོངས་སྤྱོད་པར་མཐོང་ངོ༌། །བདུན་པ་ལ་ངོས་གཡས་གཡོན་གཉིས་ན་སེམས་ཅན་དམྱལ་པའི་གཡང་ས་མཐོང་སྟེ། དེ་ལ་བདག་ཉིད་མ་སྨས་མ་ཉམས་པར་སླར་ལྡོག་པ་དང༌། བརྒྱད་པ་ལ་ཕྲག་པ་གཉིས་ན་རི་དྭགས་ཀྱི་རྒྱལ་པོ་སེངྒེ་རལ་པ་ཅན་ཅོད་པན་ཐོགས་པ་
གཅན་གཟན་ཕྲ་མོ་ཐམས་ཅད་སྐྲག་པར་བྱེད་ཅིང་གནས་པ་དང༌། དགུ་པ་ལ་འཁོར་ལོ་སྒྱུར་བའི་རྒྱལ་པོ་མཐོང་སྟེ་སྐྱེ་བོ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ཏེ་མགོ་བོའི་སྟེང་ན་རིན་པོ་ཆེ་རྣམ་པ་སྣ་ཚོགས་པས་སྤྲས་པའི་གདུགས་དཀར་པོ་འཛིན་པ་དང༌། བཅུ་པ་ལ་དེ་བཞིན་གཤེགས་པའི་སྐུ་མཐོང་སྟེ་གསེར་ལྟ་བུ་འོད་འདོམ་གང་བ་ཚངས་པ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་ཆོས་སྟོན་པར་རྨི་ལམ་ན་མཐོང་ངོ༌། །ལྟས་འདི་དག་ཀྱང་ས་བཅུ་ལ་ཕར་ཕྱིན་བཅུ་ཤས་ཆེ་བ་དང་བསྟུན་པའི་ལྟས་སུ་ཤེས་པར་བྱ་ཞིང༌། ས་དྲུག་པའི་ལྟས་ལ་རྫིང་སངས་རྒྱས་ཀྱི་བསྟན་པ། ཐེམ་སྐས་བཞི་ནི་དེ་ལ་འཇུག་པའི་སྒོ་གྲུབ་མཐའ་བཞི། གསེར་གྱི་བྱེ་མ་བརྡལ་པ་གཞི་རིགས་དྭངས་ཤིང་རྙོག་པ་མེད་པ་རང་བཞིན་དང་གློ་བུར་རྣམ་དག །ཇི་སྐད་དུ། བསིལ་དང་ཞིམ་དང་ཡང་དང་འཇམ། །དྭངས་དང་དྲི་མ་མེད་པ་དང༌། །འཐུང་ན་ལྟོ་ལ་མི་གནོད་དང༌། །མགྲིན་པ་ལ་ནི་མི་གནོད་པའོ། །ཞེས་པའི་ཡན་ལག་བརྒྱད་ཀྱི་ཆུས་གང་བ་ནི་འཕགས་ལམ་ཡན་ལག་བརྒྱད་དོ། །མེ་ཏོག་རིགས་གསུམ་གྱིས་གང་ཟག་རིགས་གསུམ་མཚོན་ཏེ། ཨུཏ་པ་ལ་ནི་ཉི་མས་ཀྱང་འབྱེད་ལ་གཞན་གྱི་ཚེ་ཡང་འབྱེད་སྲིད་པས་ཉན་ཐོས་དང༌། ཀུ་མུ་ད་ཉི་མས་
ཟུམ་པ་དང་ཟླ་བས་འབྱེད་པར་བྱེད་པས་ཉི་མ་ལྟ་བུའི་སངས་རྒྱས་མ་བྱོན་པའི་ཚེ་འབྱུང་བས་དེ་རང་རྒྱལ་དང་པདྨ་དཀར་པོ་ལྟ་བུའི་བྱང་སེམས་ནི་བྱང་སེམས་མཆོག་ཡིན་ནོ་ཞེས་འཆད་དོ། །འདི་དག་རྨི་ལྟས་ཀྱི་རྟགས་ཡིན་ན་དྲོད་ནས་གཉིད་ལ་སོགས་པའི་སྒྲིབ་པ་ལྔ་དང་མི་འགྲོགས་པ་ཅི་ཞེ་ན། གཉིད་ལ་ཡུལ་ལ་འཇུག་པའི་ཤེས་པ་རང་དབང་མེད་པར་བྱེད་པ་ཉོན་མོངས་ཅན་དང༌། ལུས་རྟས་པར་བྱེད་པ་དགེ་བར་བགྲངས་པའི་གཉིད་གཉིས་ཡོད་པས་སྔ་མ་མེད་ཀྱང་ཕྱི་མ་ཡོད་པས་སྐྱོན་མེད་དོ། །མཚན་མ་འདི་དག་སྐབས་མ་ཡིན་པར་བྱུང་ན་སྔགས་སམ་བདུད་ཀྱི་མཐུར་ཤེས་པར་བྱའོ། །བདུན་པ་འབྲས་བུ་ནི། མཐར་་ཐུག་པའི་འབྲས་བུ་སངས་རྒྱས་ཀྱི་ས་དང༌། གནས་སྐབས་ཀྱི་འབྲས་བུ་ནི་ས་ཕྱི་མ་རྣམས་སོ། །གསུམ་པ་ཁྱད་པར་དེ་ལྡན་གྱི་སའི་ངེས་ཚིག་ནི། བྱང་ཆུབ་ལ་ནི་ཉེ་བ་དང༌། །སེམས་ཅན་དོན་སྒྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །ཞེས་པ་དང་པོ་དང༌། གཉིས་པ་ནི། འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། ཞེས་ཏེ། རྩོལ་བའི་དྲི་མ་ནི་ཐེག་པ་གཞན་ཡིད་ལ་བྱེད་པའོ། །གསུམ་པ་ནི། ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་པ། ཏིང་ངེ་འཛིན་གྱི་སྟོབས་ཀྱིས་ཆོས་ཚད་མེད་ཚོལ་བའི་ཕྱིར་གཞན་དག་ལ་ཆོས་
ཀྱི་སྣང་བ་ཆེན་པོ་བྱེད་པར་གསུངས་པའི་ཕྱིར་རོ། །བཞི་པ་ནི། འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེག་པས་འོད་འཕྲོ་ཅན། ཞེས་ཕྱོགས་མཐུན་གྱི་བདག་ཉིད་ཀྱི་ཤེས་རབ་དེས་སྒྲིབ་གཉིས་སྲེག་པ་ཉེ་བར་གནས་པའོ། །ལྔ་པ་ནི། སེམས་ཅན་རྣམས་ཡོངས་སྨིན་བྱེད་ཅིང༌། །རང་གི་སེམས་ཀྱང་སྲུང་བའི་ཕྱིར། །བློ་ལྡན་རྣམས་ཀྱིས་སྦྱངས་དཀའ་བ། །དེ་ཕྱིར་སྦྱངས་དཀའ་ཞེས་བྱའོ། །ཞེས་སེམས་ཅན་སྨིན་པ་ལ་བརྩོན་པ་དང་དེའི་ལོག་སྒྲུབ་ཀྱིས་རང་གི་སེམས་ཉོན་མོངས་པར་མི་འགྱུར་བ་སྟེ་བྱ་བ་གཉིས་བྱེད་པར་གསུངས་པས་སོ། །དྲུག་པ་ནི། འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བཤད། ཅེས་ཡུམ་ལ་བརྟེན་ནས་སྲིད་ཞིའི་མཐར་མི་གནས་པའི་འཁོར་འདས་མཉམ་པ་ཉིད་མངོན་དུ་གྱུར་བར་གསུངས་བས་སོ། །བདུན་པ་ནི། བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དེ། ཞེས་བགྲོད་པ་གཅིག་པའི་ལམ་ས་བརྒྱད་པ་ལ་བར་མ་ཆད་དུ་འབྲེལ་བས་འབད་རྩོལ་གྱིས་འདུ་བྱེད་པའི་སྦྱོར་བའི་མཐར་ཕྱིན་པའི་ཕྱིར་རོ། །བརྒྱད་པ་ནི། འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཞེས་ངེས་པར་བརྗོད།
ཅེས་མཚན་མ་དང་མཚན་མེད་གཉིས་ལ་རྩོལ་བའི་འདུ་ཤེས་ཀྱིས་མི་གཡོ་བར་གསུངས་སོ། །དགུ་པ་ནི། སོ་སོ་ཡང་དག་རིག་བློ་བཟང༌། །ས་དེ་ལེགས་པའི་བློ་གྲོས་ཡིན། ཞེས་སོ། །བཅུ་པ་ནི། སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། ཞེས་ཏིང་ངེ་འཛིན་དང་གཟུངས་གྱི་སྤྲིན་གྱིས་ཐོབ་པའི་རྟེན་ནམ་མཁའ་ལྟ་བུ་ལ་ཁྱབ་པས་ཆོས་ཀྱི་སྤྲིན་ནོ། །ས་འདི་དག་གི་ཡོངས་སྦྱོང་ནི་བསམ་དང་ཕན་པའི་དངོས་ཉིད་དང༌། ཞེས་པ་ལ་སོགས་གཞུང་ལས་བཤད་པ་རྣམས་ཏེ་ས་བཞི་པའི་ཡོངས་སྦྱོང་གི་སྐབས་སུ་བཤད་པའི་སྦྱངས་བའི་ཡོན་ཏན་བཅུ་གཉིས་ཅུང་ཟད་བཤད་པ་ལ། སོ་སོའི་དབྱེ་བ་དང་ཐུན་མོང་གི་སྒྲ་བཤད་པ་གཉིས། དང་པོ་ནི་བསོད་སྙོམས་དང༌། ཆོས་གོས་དང༌། གནས་མལ་གྱི་དབང་དུ་བྱས་པ་གསུམ་དང༌། གསུམ་དང་དྲུག་སྟེ། ཟས་བཟང་པོ་ལ་ཆགས་པའི་གཉེན་པོར་འདྲེས་པའི་ཁྱིམ་ན་ཇི་རྙེད་པ་ཙམ་ཟ་བས་རྙེད་པས་ཆོག་པ་དང༌། ཁྱིམ་རྣམས་སུ་མཐར་གྱིས་བླངས་ཤིང་བརྒྱུས་ཏེ་ཇི་ཐོབ་པ་ཟའི་བདག་གིས་ཁྱིམ་འདི་ནས་ཇི་ཙམ་འདོད་པའི་བཟའ་བཅའ་འཐོབ་བོ་སྙམ་ནས་མགོ་འཕང་བསྟོད་དེ་མི་འགྲོ་བ་མཐར་གྱིས་སློང་བའི་བསོད་སྙོམས་པ་སྟེ་འདི་གཉིས་ཕྱེ་ན་སྦྱངས་བའི་ཡོན་ཏན་བཅུ་གསུམ་དང༌། མ་ཕྱེ་ན་བཅུ་གཉིས་སོ། །ཟས་མང་པོ་ལ་ཆགས་པའི་གཉེན་པོར་སྟན་གཅིག་ལ་འདུག་ནས་ཟའི་དེ་ལས་ལངས་
ནས་མ་ཡིན་པའི་སྟན་གཅིག་པ་དང༌། ཟས་ཀྱི་ཕྱིར་འདུག་ནས་ཇི་ཙམ་གྱིས་བདག་འཚོ་བའི་ཟས་ཐམས་ཅད་མ་བླང་བའི་བར་དུ་མི་ཟ་ཞིང་འདིས་འཚོའོ་སྙམ་དུ་དང༌། དེའི་འོག་ཏུ་ཐམས་ཅད་ཅིག་ཆར་བླང་ནས་ཟ་བའི་ཕྱིས་མི་ལེན་པ་གཉིས་སོ། །གོས་མང་པོ་ལ་ཆགས་པའི་གཉེན་པོར་སྣམ་སྦྱར་བླ་གོས་མཐང་གོས་གསུམ་གྱིས་འཚོ་བར་བྱེད་ཅིང་དེ་ལས་ལྷག་པའི་གོས་མི་འཆང་བའི་ཆོས་གོས་གསུམ་པ་དང༌། ཆོས་གོས་གསུམ་དང་གོས་ལྷག་ཅི་འཆང་བ་ཐམས་ཅད་པ་ལ་ལས་བྱས་པ་ཤ་སྟག་འཆང་བའི་ཕྱིར་པ་བའམ། ཟླ་འོད་དུ་བལ་གྱི་དང་གསོ་མ་ལ་སོགས་པ་གྱོན་པ་ཕྱིང་པ་པའོ། ཞེས་པ་ལྟ་བུ་དང༌། ཕྱག་དར་ཁྲོད་དུ་བོར་བའི་གོས་གཤང་གཅི་སོགས་ཀྱིས་གོས་པའི་མི་གཙང་བ་རྣམས་བོར་ནས་ཐག་གི་བ་བླང་ནས་བཀྲུས་ཤིང་དྲུབས་ཏེ་ཁ་དོག་བསྒྱུར་ནས་འཆང་བའི་ཕྱག་དར་ཁྲོད་པའོ། །འདི་གཉིས་ནི་ཆོས་གོས་འཇམ་པོ་དང་བཟང་པོ་ལ་ཆགས་པ་སྤང་བའི་ཕྱིར་རོ། །འདུ་འཛི་ལ་ཆགས་པ་སྤང་བའི་ཕྱིར་གྲོང་ལས་རྒྱང་གྲགས་ཀྱིས་བཅད་པར་གནས་པའི་དགོན་པ་བ་དང༌། ཤིང་དྲུང་ན་གནས་འཆའ་བའི་ཤིང་དྲུང་པ་དང༌། སྟེང་མ་གཡོགས་པར་གནས་པའི་བླ་གབ་མེད་པ་དང༌། སྐྱེ་བོ་ཤི་འོ་ཅོག་འདོར་བའི་གནས་སུ་གནས་འཆའ་བའི་དུར་ཁྲོད་པ་སྟེ་དེ་བཞི་ནི་གནས་མལ་ལ་ཆགས་པ་སྤང་བར་བྱ་བའི་ཕྱིར་རོ། །གློས་འབེབས་པ་དང་ཉལ་བའི་བདེ་བ་ལ་ཆགས་པའི་
གཉེན་པོར་ཁྲིའམ་ཁྲིའུ་འམ་རྩྭ་བཏིང་བ་ལ་ཙོག་བུར་བསྡད་ནས་དུས་ཡོལ་བར་བྱེད་ཅིང་རྒྱབ་བམ་གློས་མི་བརྟེན་པའི་ཙོག་པུ་བ་དང༌། ལན་ཅིག་རྩྭ་དང་ལོ་མ་ཇི་ལྟར་བཏིང་བ་ལ་མལ་འཆའ་བར་བྱེད་ཀྱི་ཡང་ཡང་མི་བརྗེ་མི་འཆོས་པའི་གཞི་ཇི་བཞིན་པ་ནི་སྟན་དང་གདིང་བ་དང་དགབ་པ་ལ་ཆགས་པ་སྤང་བའི་ཆེད་དོ། །འདི་དག་ནི་ཉན་ས་དང་ཟླ་འོད་ལྟར་རོ། །ཁ་ཅིག་ཕྱི་མ་འདི་གཉིས་སྤྱོད་ལམ་གྱི་དབང་དུ་བྱས་པར་མཛད་ནས་གནས་མལ་གྱི་དབང་དུ་བྱས་པ་བཞིར་འཆད་དོ། །གཉིས་པ་ཐུན་མོང་གི་སྒྲ་བཤད་པ་ནི། དཔེར་ན་བལ་མ་བཤིག་མ་སྨེལ་བ་ན་སྐུད་པར་མི་རུང་ལ། དེ་ལས་ཟློག་པ་ནི་རུང་བ་བཞིན་དུ་བསོད་སྙོམས་ཆོས་གོས་གནས་མལ་ལ་ཆགས་པ་ན། སེམས་ལས་སུ་མི་རུང་བ་ལས། ཡོན་ཏན་འདི་དག་གིས་ཚངས་སྤྱོད་གནས་པར་བྱ་བའི་ཕྱིར་སེམས་ལས་རུང་དུ་སྦྱོང་བས་སྦྱངས་པའི་ཡོན་ཏན་ཞེས་བྱའོ། །གསུམ་པ་གཉེན་པོའི་ཚོགས་རྟོགས་དཀའ་བ་ནི། །གཟུང་བ་དང་འཛིན་པའི་རྣམ་པར་རྟོག་པ་བཞི་ཚན་གཉིས་ཉིད་ཞི་བར་བྱེད་པའི་གཉེན་པོ་མཐོང་སྒོམ་མཉམ་གཞག་གི་རྟོགས་པ་བརྒྱད་ནི་གཉེན་པོའི་ཚོགས་ཡིན་ནོ། །གལ་ཏེ་གཉེན་པོའི་ཚོགས་ལམ་གཉིས་ཀྱི་བདག་ཉིད་དུ་སྟོན་པ་ན་སའི་ཚོགས་སུ་འདུས་པས་དེ་ལས་ལོགས་སུ་བཤད་པ་དོན་མེད་ཅེ་ན། གཉེན་པོའི་ཚོགས་ལམ་གཉིས་ཀྱི་བདག་ཉིད་དུ་གྱུར་པར་མ་བསྟན་ན་དེ་གཉིས་ལས་ལོག་ན་ཡོད་དམ་སྙམ་པའི་དོགས་པ་སྲིད་པས་
དེ་སྤང་བར་བྱ་བའི་ཕྱིར་ཡིན་ནོ། །བཞི་པ་ངེས་འབྱུང་སྒྲུབ་པ་ནི། ཡང་དག་པ་མ་ཡིན་པའི་ཀུན་ཏུ་རྟོག་པ་གཟུང་འཛིན་མེད་བཞིན་དུ་དེར་ལོག་པར་སྣང་བའི་རང་བཞིན་ཁམས་གསུམ་པའི་འཇིག་རྟེན་རྣམས་བདེན་མེད་དུ་རྟོགས་པས་ཟིལ་གྱིས་མནན་ཏེ་བགྲོད་བྱའི་གནས་ཆེན་པོ་གསུམ་དུ་ངེས་པར་འབྱུང་བ་ཆེད་དུ་བྱ་བ་དང༌། ནམ་མཁའ་ལྟ་བུའི་མཉམ་པ་ཉིད་ཀྱི་སྟོང་ཉིད་རྟོགས་པའི་ཡེ་ཤེས་དྲི་མེད་ཀྱིས་ཤེས་བྱ་མཐའ་དག་ལ་ཁྱབ་པར་བྱེད་པའི་མཉམ་ཉིད་དང༌། སེམས་ཅན་ཚད་མེད་པ་ཐར་པའི་ལམ་དུ་ཁྲིད་པར་བྱེད་པ་སེམས་ཅན་ཐམས་ཅད་ཀྱི་ཐོབ་བྱའི་དོན་དང༌། ནམ་མཁའ་དང་འདྲ་བར་འགྲོ་འོང་གི་འབད་རྩོལ་དང་བྲལ་བ་འབད་མེད་ལྷུན་གྲུབ་ཀྱི་ངེས་འབྱུང་དང༌། སྔོན་མཐའ་རྟག་པ་དང༌། ཕྱི་མཐའ་ཆད་པ་དང༌། དེ་གཉིས་ཀྱིས་བཞག་པའི་དབུས་ཀྱང་མེད་པ་མཐའ་འདས་མི་གནས་པའི་མྱང་འདས་སུ་ངེས་པར་འབྱུང་བ་དང༌། ཐེག་ཆེན་ལ་བསླབ་པས་དུས་གསུམ་གྱི་འཕགས་པས་རྣམ་མཁྱེན་ཐོབ་པའི་ཕྱིར་ཐེག་གསུམ་སོ་སོའི་ཡོན་ཏན་གྱི་རིགས་རྫོགས་པའི་གནས་སྐབས་ཁྱད་པར་ཅན་ཐོབ་པའི་མཚན་ཉིད་ངེས་འབྱུང་དང༌། ཆོས་ཀྱི་རྣམ་པ་ཐམས་ཅད་མཁྱེན་ཡང་ཞེན་པ་མེད་པ་རྣམ་པ་ཐམས་ཅད་མཁྱེན་པར་ངེས་འབྱུང་དང༌། འཁོར་གསུམ་དུ་དམིགས་པ་དང་བྲལ་བའི་ཕྱིན་དྲུག་གིས་བསྡུས་པའི་ཁྱད་པར་གྱི་
ལམ་གྱི་ཡུལ་ཅན་ངེས་འབྱུང་སྟེ། དེ་ལྟར་མི་སློབ་པའི་ལམ་ན་བདུན་དང༌། སློབ་ལམ་ན་གཅིག་སྟེ་མཐར༌།ཐུག་གི་ངེས་པར་འབྱུང་ས་བརྒྱད་དུ་འབྱིན་པར་བྱེད་པ་ནི་ངེས་འབྱུང་སྒྲུབ་པ་བརྒྱད་དེ་ཆོས་ཐམས་ཅད་དམིགས་སུ་མེད་པའི་ཚུལ་ཅན་ནོ། །ཞེན་མེད་བྱང་ཆུབ་སེམས་ཀྱིས་གཞི་བཟུང་ནས། །ཞེན་མེད་གདམས་ངག་ཉན་ཞིང་སྒྲུབ་ལ་ཞུགས། །ཞེན་མེད་འབྱུང་བ་བརྒྱད་དུ་ངེས་འབྱུང་བ། །རྣམ་མཁྱེན་ལམ་བཟང་ཡིན་ཞེས་འདིར་བཤད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་གྱིས་རྣམ་མཁྱེན་གྱི་སྐབས་ཏེ་སྐབས་དང་པོའི་སྤྱི་དོན་རྫོགས་སོ། །གཉིས་པ་ཐོབ་བྱེད་ལམ་ཤེས་ཀྱི་ཡན་ལག་རྒྱས་པར་བཤད་པ་ལ་གཉིས། ལམ་གྱི་ཡན་ལག་དང༌། ཡན་ལག་ཅན་གྱི་ལམ་མོ། །དང་པོ་ལམ་གྱི་ཡན་ལག་ལ་གཉིས། ལམ་ཤེས་སྐྱེ་བའི་རྟེན་དང༌། བརྟེན་པ་ལམ་ཤེས་ཀྱི་ཁྱད་པར་རོ། །དང་པོ་ལམ་ཤེས་སྐྱེ་བའི་རྟེན་ནི། ལམ་ཤེས་ཀྱི་མདོ་འཆད་པའི་སྐབས་སུ་དེ་བཞིན་གཤེགས་པའི་རང་བཞིན་གྱི་འོད་ཀྱིས་ལྷ་རྣམས་ཀྱི་འོད་མོག་མོག་པོར་མཛད་པས་ང་རྒྱལ་བཅོམ་ནས་ལམ་ཤེས་སྐྱེ་བའི་སྣོད་དུ་རུང་དུ་མཛད་ཅིང་དེས་མཚོན་ནས་ང་རྒྱལ་བཅོམ་པ་ཉིད་ལམ་ཤེས་ཀྱི་སྣོད་ཡིན་པ་ཤེས་པར་མཛད་པ་དང༌། མངོན་འབྱུང་གི་མདོ་ལས། ང་རྒྱལ་དང་ཞུམ་པ་གཉིས་ཀ་དང་བྲལ་དགོས་
པར་གསུངས་པས་དེ་ལྟར་རོ། །གཉིས་པ་བརྟེན་པ་ལམ་ཤེས་ཀྱི་ཁྱད་པར་ལ་གསུམ། སྐྱེ་ཚུལ་དང༌། ངོ་བོ་དང་བྱེད་ལས་ཀྱི་ཁྱད་པར་རོ། །དང་པོ་སྐྱེ་ཚུལ་གྱི་ཁྱད་པར་ནི། ཡུམ་མདོ་ལས། ལྷའི་བུ་གང་དག་གིས་བླ་མེད་རྫོགས་བྱང་དུ་སེམས་མ་བསྐྱེད་པ་དེ་དག་གིས་ཀྱང་བླ་མེད་རྫོགས་བྱང་དུ་སེམས་བསྐྱེད་པར་བྱའོ། །གང་ཡང་དག་པར་སྐྱོན་མེད་པ་ལ་ཞུགས་པ་དེ་དག་ལ་ནི་བླ་མེད་རྫོགས་བྱང་དུ་སེམས་བསྐྱེད་པའི་མཐུ་མེད་དེ། །དེ་དག་གིས་འཁོར་བའི་རྒྱུད་ཀྱིས་ས་མཚམས་བཅད་པའི་ཕྱིར་རོ། །ཞེས་དང༌། འོན་ཀྱང་དེ་དག་བླ་མེད་རྫོགས་བྱང་དུ་སེམས་བསྐྱེད་ན་དེ་དག་ལ་ཡང་རྗེས་སུ་ཡི་རང་བར་བྱའོ། །ཞེས་མདོ་སྔ་ཕྱི་གཉིས་གསུང་པའི་དོན་གནས་སྐབས་ངེས་པ་སེམས་བསྐྱེད་པའི་རྒྱུད་ཁོ་ན་ལ་ལམ་ཤེས་སྐྱེ་བ་དང༌། མཐར་ཐུག་མ་ངེས་པ་རིགས་ཅན་གསུམ་གྱི་གདུལ་བྱ་གང་ཡང་སེམས་བསྐྱེད་ནས་བླ་མེད་རྫོགས་བྱང་དུ་འགྱུར་བར་བསྟན་པའོ། །དེ་ལ་མདོ་སྔ་མ་ནི། ཡང་དག་པ་ཉིད་དུ་ངེས་པའི་དོན་ཉན་ཐོས་ཀྱི་ལམ་ཐམས་ཅད་དུ་རྟོགས་པ་དང༌། ས་མཚམས་བཅད་པའི་དོན། ཉོན་མོངས་མ་ལུས་པར་སྤངས་པས་འཁོར་བར་སྐྱེ་བའི་རྒྱུ་ལོག་པ་ལ་བཤད་དོ། །ཕྱི་མ་ནི་ཉན་རང་དགྲ་བཅོམ་སོགས་ཀྱང་བླ་མེད་རྫོགས་བྱང་དུ་འགྱུར་བར་བསྟན་པ་སྟེ། འདིའི་མཐའ་དཔྱད་པ་ལ་གསུམ། ཐེག་གསུམ་ལ་དྲང་ངེས་
སུ་འདོད་ཚུལ། ཉན་རང་ཐེག་ཆེན་དུ་གང་ནས་འཇུག་པ། འཁོར་བ་ལ་མཐའ་ཡོད་མེད་དོ། །དང་པོ་ལ་གཉིས། ངེས་དོན་དང༌། དྲང་དོན་དུ་འདོད་པའི་ལུགས་སོ། །དང་པོ་ཐེག་གསུམ་ངེས་དོན་དུ་འདོད་པ་ལ་གཉིས། མདོ་གང་གི་རྗེས་སུ་འབྲང་བ་དང༌། དེའི་དོན་ཇི་ལྟར་བཤད་པའོ། །དང་པོ་མདོ་གང་གི་རྗེས་སུ་འབྲང་བ་ནི། དགོངས་པ་ངེས་པར་འགྲེལ་པ་ལས་ཉན་ཐོས་ཞི་བ་བགྲོད་པ་ཐེག་ཆེན་དུ་ལྡོག་མི་སྲིད་པ་དང༌། ཡོངས་སུ་འགྱུར་བ་ཐེག་ཆེན་དུ་ལྡོག་སྲིད་པ་དང༌། ཐེག་གཅིག་དྲང་དོན་དང༌། ཐེག་གསུམ་ངེས་དོན་དུ་གསུངས་པ་དང༌། ཆོས་བཅུ་པ་དང་དཀོན་མཆོག་སྤྲིན་གྱི་མདོ་རྣམས་ཀྱི་རྗེས་སུ་འབྲངས་པར་འཆད་དོ། །གཉིས་པ་དེའི་དོན་ཇི་ལྟར་བཤད་པ་ལ་གསུམ། རང་གི་ལུགས་དགོད་པ། དེ་ལ་ནང་འགལ་སྤང་བ། མདོ་གཞན་དང་འགལ་བ་སྤང་བའོ། །དང་པོ་རང་ལུགས་དགོད་པ་ནི། བསྡུ་བར། ཉན་ཐོས་ལྷག་མེད་ནས་ཐེག་ཆེན་དུ་ལྡོག་མི་སྲིད་པ་དང༌། ལྷག་བཅས་ནས་ལྡོག་པར་བཤད་ཅིང་ལྡོག་ཚུལ་ཡང༌། །རྫུ་འཕྲུལ་གྱི་མཐུས་ཚེ་བསྲིངས་ནས་བྱང་ཆུབ་སྒྲུབ་ལ། རང་གི་ལུས་མྱ་ངན་ལས་མི་འདའ་བར་བྱིན་གྱིས་རློབ་ཅིང་སྤྲུལ་པའི་ལུས་ཀྱིས་གཞན་ངོར་ལྷག་མེད་དུ་འདའ་ཚུལ་བསྟན་ནས་ལུས་སྔ་མ་ལྷ་རྣམས་ཀྱིས་ཀྱང་མི་མཐོང་བར་དབེན་པར་གནས་ཏེ་ཚོགས་ཡོངས་སུ་རྫོགས་པར་
བྱེད་དོ། །དེའི་ཚེ་རང་དོན་ལ་དགའ་བས་ལམ་སྒོམ་པ་ལ་བག་མེད་པར་གྱུར་བ་དང་སངས་རྒྱས་བྱང་སེམས་ཀྱིས་བསྐུལ་བར་བཤད་ཅིང༌། ལྷག་མེད་ན་རིག་པ་ཕྱི་མ་མཚམས་མི་སྦྱོར་བས་འདུས་མ་བྱས་ཀྱི་དབྱིངས་དྲི་མ་མེད་པ་འབའ་ཞིག་ལུས་ལ་སྒྲིབ་པ་མ་ལུས་པ་ལོག་པར་དེ་བཞིན་གཤེགས་པ་དང༌། ཁྱད་པར་མེད་ཀྱང་སྔོན་སྨོན་ལམ་མ་བཏབ་པ་དང༌། ལྡང་བའི་བསམ་པ་མེད་པར་མྱ་ངན་ལས་འདས་པས་དེ་བཞིན་གཤེགས་པའི་མཛད་པ་ནི་མི་བྱེད་དོ། །ཞེས་འདུས་བྱས་རྒྱུན་ཆད་དུ་བཤད་ཅིང༌། པས་ཀྱང༌། ཐེག་གསུམ་ངེས་དོན་ཡིན་པར་སྒྲུབ་བྱེད་དུ་མས་སྒྲུབ་པར་བྱེད་དོ། །འོ་ན་ངེས་དོན་ཡིན་པའི་སྒྲུབ་བྱེད་གང་ཞེ་ན། ལུང་དང་རིག་པ་གཉིས་ལས། ལུང་ནི་སྔར་བཤད་པའི་དགོངས་འགྲེལ་དུ་གསུངས་པ་དང༌། ལང་གཤེགས་ལས་རིགས་ལྔར་གསུངས་པ་དང༌། བློ་གྲོས་མི་ཟད་པར་བསྟན་པ་ལས་ཀྱང༌། གསུམ་པོ་འདི་དག་ངེས་པར་འབྱིན་པར་བྱེད་པའི་ཐེག་པ་ཡིན་ནོ། །ཞེས་དང༌། ཁམས་སྣ་ཚོགས་པའི་མདོ་ལས་ཀྱང༌། སེམས་ཅན་རྣམས་ཁམས་སྣ་ཚོགས་པར་བསྟན་པ་དང༌། དེ་བཞིན་དུ་མདོ་སྡེ་གཞན་ལས་ཀྱང༌། ཐེག་གསུམ་སོ་སོར་གསུངས་བ་རྣམས་ཡིན་ནོ། །གཉིས་པ་རིག་པ་ནི། སེམས་ཅན་ཁ་ཅིག་ནི་གཞན་ལ་ཕན་པའི་བསམ་པ་ཅན་དང༌། གཞན་དག་
ནི་ཕ་རོལ་པོ་སྡུག་བསྔལ་བ་ལ་དགའ་བ་དང༌། དེ་བཞིན་དུ་ཁ་ཅིག་ནི་སྲིད་པའི་བདེ་བ་ཙམ་འདོད་ཅིང་བསོད་ནམས་བྱེད་ལ། གཞན་དག་ནི་དེ་ལས་བཟློག་ནས་བདག་ཐར་པར་བྱ་བའི་ཕྱིར་བརྩོན་པ་དང༌། ལ་ལ་ནི་གཞན་ཁོ་ན་གྲོལ་བར་བྱ་བར་སེམས་ཤིང་རྫོགས་བྱང་གི་རྒྱུར་སྦྱིན་སོགས་སྒྲུབ་པ་ཡོད་ལ། དེས་ན་སེམས་ཅན་ལ་རྒྱུ་འདོད་པ་ཐ་དད་པ་ཡོད་པར་དཔོག་སྟེ། འབྲས་བུ་གཅིག་ཐ་དད་ནི་རྒྱུ་དེས་བྱས་པའི་ཕྱིར་རོ། །འདོད་པ་ཐ་དད་པ་དེ་ཡང་རིགས་ཀྱི་བྱེ་བྲག་མེད་ན། །མེད་པས་རིགས་ཐ་དད་པར་གྲུབ་ལ། །དེ་ལྟར་ན་འབྲས་བུ་ཐེག་པ་ཡང་སྣ་ཚོགས་པ་ཡིན་ནོ། །ཞེས་པ་དང༌། དགྲ་བཅོམ་པས་སྲིད་པའི་ཀུན་སྦྱོར་མ་ལུས་པ་སྤངས་བས་དེར་སྐྱེ་བ་མི་ལེན་ལ། དེའི་ཕྱིར་སྐྱེ་བ་དུ་མ་བརྒྱུད་ནས་ཐོབ་པར་འདོད་པའི་བྱང་ཆུབ་ཐོབ་པ་མི་སྲིད་ཅེས་པའོ། །གཉིས་པ་དེ་ལ་ནང་འགལ་སྤངས་པ་ནི། བསྡུ་བར་དགྲ་བཅོམ་སྐྱེ་བ་མི་ལེན་པ་དང༌། མཐར་ཐུག་རིགས་ཐ་དད་པར་བཤད་པ། རྒྱུད་བླའི་འགྲེལ་པར། དཔལ་ཕྲེང་གི་མདོ་དྲངས་ནས་བསམ་གྱིས་མི་ཁྱབ་པའི་འཆི་འཕོ་དང་སྐྱེ་བ་ཡོད་པར་བསྟན་པ་དང༌། ཐེག་པ་གཉིས་རེ་ཞིག་པའི་ལམ་དུ་བསྟན་པ་དང༌། དམ་ཆོས་པད་དཀར་གྱི་ལུང་དྲངས་ནས་ཉན་ཐོས་རྣམས་དེ་བཞིན་གཤེགས་པས་བསྐུལ་ནས་ཐེག་ཆེན་ལ་འཛུད་པར་གསུངས་པ་རྣམས་དང་འགལ་
ཞེ་ན། དང་པོ་དང་མི་འགལ་ཏེ། རྒྱུད་བླར་བཤད་པ། འགྱུར་བའི་ཉན་ཐོས་དབང་པོའི་ལུས་ཀྱིས་དབེན་པར་གནས་པ་ལ། ཁམས་གསུམ་པའི་སྐྱེ་འཆི་ལས་འདས་ཀྱང་ཤེས་སྒྲིབ་ཀྱི་རྟེན་བག་ལ་ཉལ་དང༌། དེས་ཀུན་ནས་བསླང་བའི་ལས་དང༌། དེ་གཉིས་ལ་བརྟེན་པའི་ཡིད་ལུས་ཡོད་པ་ལ་དགོངས་ནས་མ་རིག་བག་ཆགས་ཀྱི་ས་དང༌། ཟག་མེད་ཀྱི་ལས་ཀྱིས་རྒྱུ་རྐྱེན་བྱས་པའི་ཡིད་ལུས་ཀྱིས་སྐྱེ་བ་ལེན་པར་བཤད་ཀྱི། དགྲ་བཅོམ་པ་ཤི་ནས་རིག་པ་ཕྱི་མར་མཚམས་སྦྱོར་བ་མིན་ནོ། །གཉིས་པ་ཡང་མི་འགལ་ཏེ། ཉན་རང་གི་འབྲས་བུ་འབྲོག་དགོན་པའི་དབུས་སུ་གྲོང་ཁྱེར་སྤྲུལ་པ་ལྟར་རེ་ཞིག་བར་བཤད་པ། ཉན་རང་ལ་སྤང་བ་ཉི་ཚེ་བ་ལས་མེད་པས། མྱང་འདས་མཚན་ཉིད་པ་ཡོད་པ་དྲང་དོན་དུ་བསྟན་གྱི་ཉན་རང་ཐམས་ཅད་ཐེག་ཆེན་དུ་ཟློག་པའི་སྒོ་ནས་ཐེག་གསུམ་དྲང་དོན་དུ་བསྟན་པ་མིན་ནོ། །གསུམ་པ་ཡང་མི་འགལ་ཏེ། དགོངས་འགྲེལ་དང༌། བསྡུ་བ་གཉིས་ཀར་དེ་བཞིན་གཤེགས་པས་ཐེག་ཆེན་ལ་བསྐུལ་བའི་ཉན་ཐོས་ནི་ཡོངས་སུ་འགྱུར་བ་ལ་བཤད་ཀྱི་ཞི་བགྲོད་ལ་མིན་པ་དང༌། འདིར་ཡང་དམིགས་བསལ་མེད་པའི་ཕྱིར་རོ། །ཞེས་སོ། །གསུམ་པ་མདོ་གཞན་དང་འགལ་བ་སྤོང་བ་ནི། །གལ་ཏེ་ཐེག་གསུམ་ངེས་དོན་ཡིན་ན་པད་དཀར་སོགས་ལས་ཐེག་པ་ནི་གཅིག་ཁོ་ནའོ། །
ཞེས་ཐེག་གཅིག་ངེས་དོན་དང༌། ཐེག་པ་གསུམ་དྲང་དོན་དུ་གསུངས་པ་དང༌། ཤཱ་རིའི་བུ་ལ་སོགས་པ་ཉན་ཐོས་ཆེན་པོ་རྣམ་སངས་རྒྱས་སུ་འགྱུར་བར་གསུངས་པ་རྣམས་ཇི་ལྟར་དྲང་ཞེ་ན། མདོ་སྡེ་རྒྱན་ལས། ཆོས་དང་བདག་མེད་གྲོལ་བ་རྣམས། །མཚུངས་ཕྱིར་རིགས་ནི་ཐ་དད་ཕྱིར། །བསམ་གཉིས་ཐོབ་ཕྱིར་སྤྲུལ་པའི་ཕྱིར། །མཐར་ཐུག་ཕྱིར་ན་ཐེག་གཅིག་ཉིད། ཅེས་པ་འདིའི་སྒོ་ནས་འགལ་བ་སྤོང་བར་བྱེད་དེ། །དེ་ལ་ཐེག་པ་གཅིག་ཏུ་གསུངས་པ་ནི་དགོངས་གཞི་བདུན་པོ་འདི་ལ་དགོངས་ནས་ཡིན་ཏེ། བདུན་ནི་བགྲོད་བྱའི་ཐེག་པའང་གང་ཟག་གསུམ་གྱི་ཆོས་ཀྱི་དབྱིངས་ནམ་མཁའ་ལྟར་ཐ་དད་མེད་པར་མཚུངས་པ་དང༌། བགྲོད་པ་པོའི་ཐེག་པ་གང་ཟག་གསུམ་བདག་མེད་པར་མཚུངས་པ་དང༌། གང་གི་ཆེད་དུ་བགྲོད་པའི་ཐེག་པ་འབྲས་བུ་རྣམ་གྲོལ་རྣམས་མཚུངས་པ་དང༌། རིགས་ཐ་དད་པར་མཚུངས་པ་ནི། ཉན་ཐོས་ཀྱི་རིགས་མ་ངེས་པ་རྣམས་ཐེག་ཆེན་དུ་ཞུགས་ནས་སངས་རྒྱ་བར་འགྱུར་བས་རིགས་ཐ་དད་པ་གཉིས་ཀྱང་ལམ་གཅིག་ཏུ་ཞུགས་པ་དང༌། བསམ་པ་གཉིས་ཐོབ་པ་ནི། དེ་བཞིན་གཤེགས་པས་ས་དང་པོ་ནས་བདག་དང་སེམས་ཅན་གྱི་རང་བཞིན་ལ་གཉིས་སུ་མེད་པ་མཉམ་པ་ཉིད་བརྙེས་པ་དང༌། ཉན་ཐོས་སུ་རིགས་ངེས་པ་ཁ་ཅིག་རེ་ཞིག་བྱང་སེམས་ཀྱི་སྤྱད་པ་སྤྱོད་པ་ན། དེ་བཏང་
ནས་ཉན་ཐོས་ཀྱི་ཐེག་པར་ཞུགས་ཏེ་དེའི་མྱང་འདས་ཐོབ་པ་ན། དེ་བཞིན་གཤེགས་པས་སྔོན་བདག་གིས་བྱང་སེམས་ཀྱི་སྤྱོད་པ་སྤྱད་པས་སངས་རྒྱས་སོ། །ཞེས་དགོངས་པ་བཞིན་དུ་དེ་ལ་ཡང་སངས་རྒྱས་ཀྱི་མཐུས་བདག་སྔོན་བྱང་སེམས་ཀྱི་སྤྱོད་པ་སྤྱད་པས་འཚང་རྒྱ་བར་འགྱུར་རོ་སྙམ་པའི་བསམ་པ་མཚུངས་པ་ཐང་ཅིག་ཙམ་རྙེད་པ་དང༌། སྤྲུལ་པ་ནི་གདུལ་བའི་དོན་དུ་ཉན་ཐོས་ཀྱི་ཐེག་པས་ལན་དུ་མར་མྱ་ངན་ལས་འདའ་ཚུལ་བསྟན་པ་དང༌། མཐར་ཐུག་པ་ནི་ཐེག་ཆེན་དེ་ལས་ཁྱད་པར་དུ་འཕགས་པའི་ཆོས་མེད་པ་སྟེ་ངེས་ན་བདུན་ཐོ་དེ་ལ་དགོངས་ནས་ཐེག་པ་གཅིག་ཏུ་ངེས་པར་གསུངས་པའི་དགོས་པ་ནི། དེ་ཉིད་ལས། ཁ་ཅིག་དག་ནི་དྲང་ཕྱིར་དང༌། །གཞན་དག་རྗེས་སུ་བཟུང་བའི་ཕྱིར། །མ་ངེས་རྣམས་ལ་ཐེག་གཅིག་བསྟན། ཞེས་པ་སྟེ། ཁ་ཅིག་ནི། ཉན་ཐོས་དང༌། གཞན་དག་ནི་བྱང་སེམས་རིགས་མ་ངེས་པའོ། །ཉན་ཐོས་སངས་རྒྱས་སུ་ལུང་བསྟན་པ་དང་མི་འགལ་ཏེ། དེ་ནི་སྤྲུལ་པའི་ཉན་ཐོས་སམ་ཡོངས་སུ་འགྱུར་བའི་ཉན་ཐོས་ལ་དགོངས་པའི་ཕྱིར་རོ། །ཞེས་ཟེར་རོ། །གཞན་ཡང་འདི་དག་གིས་ཡུལ་ངེས་ཀྱི་མདོ་ངེས་དོན་དང༌། ཁྱབ་པའི་མདོ་དྲང་དོན་དང༌། དེའི་དོན་རིགས་ཀྱིས་ཁྱབ་པ་ལ་འདོད་པར་བཤད་དོ། །གཉིས་པ་ཐེག་གསུམ་དྲང་དོན་དུ་འདོད་པ་ལ་གཉིས། མདོ་གང་གི་རྗེས་སུ་
འབྲང་བ་དང༌། ཇི་ལྟར་རྣམ་བཞག་བྱས་པའི་ཚུལ་ལོ། །དང་པོ་ནི། ལང་གཤེགས་ལས། ཇི་སྲིད་སེམས་ནི་འབྱུང་གི་བར། །ཐེག་པ་རྣམས་ལ་ཐུག་པ་མེད། །སེམས་ནི་ཡོངས་སུ་གྱུར་པ་ན། །ཐེག་པ་མེད་ཅིང་འགྲོ་བ་མེད། །ཐེག་པའི་རྣམ་བཞག་ཡོད་མིན་ཉིད། །ཐེག་པ་གཅིག་ཏུ་ང་སྨྲའོ། །བྱིས་པ་རྣམས་ཀྱང་དྲང་དོན་དུ། །ཐེག་པ་ཐ་དད་ང་སྨྲའོ། །ཞེས་དང༌། པད་དཀར་བདེན་པ་པོའི་ལེའུ་ལ་སོགས་པའི་མདོ་རྣམས་ཀྱི་རྗེས་སུ་འབྲང་ངོ༌། །གཉིས་པ་ཇི་ལྟར་རྣམ་བཞག་བྱས་པའི་ཚུལ་ལ། །སློབ་དཔོན་གྱིས་མདོའི་དོན་ཇི་ལྟར་བཤད་པ་དང༌། རྗེས་འཇུག་གིས་དེ་ལ་རྩོད་པ་སྤོང་བའི་ཚུལ་ལོ། །དང་པོ་ནི་སེམས་འགྲེལ་ལས། ཐེག་པ་གཉིས་པོ་དག་ཀྱང་ནི། །ཐེག་པ་ཆེན་པོར་འབྱུང་བས་ན། །སྲིད་པའི་ལམ་གྱིས་དུབ་པ་རྣམས། །ངལ་གསོའི་དོན་དེ་དེ་ཉིད་མིན། ཞེས་དང༌། དཔེ་མེད་པར་བསྟོད་པ་ལས་ཀྱང༌། །ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོའི་ཐེག་དབྱེར་མ་མཆིས་ཀྱང༌། །ཁྱོད་ཀྱི་སེམས་ཅན་གཞུག་ཕྱིར་དུ། །ཐེག་པ་གསུམ་དུ་གསུངས་པའོ། །ཞེས་སོ། །དེ་ལ་སྔ་མ་ནི་ཉན་རང་རྣམས་མཐར་ཐེག་ཆེན་དུ་འཇུག་དགོས་པས་ཐེག་གསུམ་དྲང་དོན་དང༌། ཕྱི་མས་ནི་དེ་ཁོ་ན་ཉིད་ཀྱི་དོན་མ་རྟོགས་ན་སྲིད་པ་ལས་འདའ་བའི་ཐེག་པ་མཚན་ཉིད་པར་མི་རུང་ལ། དེ་ཁོ་ན་ཉིད་ལ་དབྱེར་མེད་པས་དེ་རྟོགས་པའི་བློ་ལ་
ཡང་རྟོགས་ཚུལ་ཐ་དད་མེད་པའི་ཕྱིར། ཐེག་དམན་དང་ཐེག་ཆེན་གཉིས་རྟོགས་ཚུལ་ཐ་དད་པའི་སྒོ་ནས་ཐེག་གསུམ་དུ་གསུངས་པ་དྲང་དོན་དུ་བསྟན་ཏེ་དྲང་དོན་དུ་འཇོག་ཚུལ་གཉིས་གསུངས་སོ། །ཕྱི་མ་འདི་ཉན་རང་གི་ཐེག་པས་ཆོས་རང་བཞིན་མེད་པར་རྟོགས་པའི་ཁུངས་སུ་ཡང་འགྱུར་རོ། །གཉིས་པ་རྗེས་འཇུག་གིས་དེ་ལ་རྩོད་པ་སྤང་བ་ནི། རྣམ་རིག་པ་རྣམས་ཀྱིས་དྲངས་བའི་ལུང་གནོད་བྱེད་དུ་མི་འགྱུར་ཏེ། ཐང་ཅིག་ཙམ་རིགས་སོ་སོར་ངེས་པ་ལ་དགོངས་ནས་ཐེག་གསུམ་དུ་གསུངས་ཀྱི་གཏན་དུ་ངེས་པའི་རྒྱུ་མཚན་གྱིས་མིན་པའི་ཕྱིར་ཏེ། ལང་གཤེགས་ལས། རིགས་མེད་པར་གསུངས་བ་ལ་ཡང་ནམ་ཞིག་སངས་རྒྱས་ཀྱི་མཐུས་དགེ་རྩ་སློང་བར་གསུངས་པའི་ཕྱིར་རོ། །རིག་པས་ཀྱང་སྒྲུབ་པར་མི་ནུས་ཏེ། སྒྲུབ་པ་དང་མོས་པ་ཐ་དད་པའི་སྒོ་ནས་ཐེག་གསུམ་དུ་ངེས་པར་འདོད་ན། སེམས་ཅན་རྣམས་ལ་སྒྲུབ་ཚུལ་དང་མོས་ཚུལ་བགྲང་བ་ལས་འདས་པ་ཡོད་པས་ཐེག་པའི་གྲངས་ཀྱང་དེ་སྙེད་དུ་འགྱུར་ལ། སྒྲུབ་ཚུལ་དང་འདོད་པའི་བྱེ་བྲག་ངེས་པ་ཡང་མ་གྲུབ་སྟེ། གཞན་ལ་ཕན་པར་འདོད་པའི་བསམ་པ་ཅན་ཁ་ཅིག་སྡིག་གྲོགས་དང་འཕྲད་པ་ལ་སོགས་པའི་སྒོ་ནས་གཞན་སྡུག་བསྔལ་བ་ལ་མངོན་པར་དགའ་བ་ཅན་དུ་འགྱུར་བར་སྣང་ལ། །གཞན་སྡུག་བསྔལ་བ་ལ་དགའ་བ་དེ་དག་ཀྱང་དགེ་བའི་བཤེས་གཉེན་དང་ཕྲད་པ་ལ་སོགས་
པའི་དབང་གིས་དེ་ལས་བཟློག་པ་ཉིད་དུ་འགྱུར་བའི་ཕྱིར། །འདོད་པ་ཐ་དད་པ་ལས་རིགས་གསུམ་དང་དེ་ལས་ཐེག་གསུམ་དུ་ངེས་པ་ཡང་མི་འགྲུབ་བོ། །དགྲ་བཅོམ་པའི་སྐྱེ་བ་ཆད་པར་འདོད་པ་ཡང་མི་རིགས་ཏེ་ཡུམ་དང་དཔལ་ཕྲེང་དུ། ལས་ཉོན་གྱི་སྐྱེ་འཆི་ཆད་ཀྱང་བསམ་གྱིས་མི་ཁྱབ་པར་བསྒྱུར་བའི་སྐྱེ་འཆི་ཡོད་པ་དང༌། དེ་དག་གི་ཟད་པ་དང་མི་སྐྱེ་བ་ཤེས་པ་ཡང་དྲང་དོན་དུ་གསུངས་པའི་ཕྱིར་རོ། །དེས་ན་སྲིད་པ་གསུམ་གྱི་ཉོན་མོངས་སྤངས་པས་ཁམས་གསུམ་དུ་སྐྱེ་བ་ལྡོག་གི་དག་པའི་ཞིང་གི་པད་མའི་སྦུབས་སུ་བརྫུས་ཏེ་སྐྱེས་ནས་ཟག་མེད་ཀྱི་དབྱིངས་ལ་གནས་པ་ནི་མི་ལྡོག་གོ། །གཉིས་པ་ཉན་རང་ཐེག་ཆེན་དུ་གང་ནས་འཇུག་པ་ནི། དགོངས་འགྲེལ་གྱི་འགྲེལ་པ་རྒྱ་ནག་མ་ལས་ས་བརྒྱད་པར་འཇུག་པར་བཤད་པ་ཡོད་ཀྱང་མཁས་པ་ཕལ་མོ་ཆེ་ཚོགས་ལམ་ནས་འཇུག་པ་འཐད་པར་བཞེད་དོ། །འདི་དག་ཟག་མེད་ཀྱི་དབྱིངས་ལས་ལྡང་ཚུལ་ནི། ལང་གཤེགས་ལས། ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །དཔེར་ན་སྐྱེས་བུ་མྱོས་པ་ནི། །མྱོས་འགྱུར་མེད་ན་སངས་པ་ལྟར། །དེ་བཞིན་དེ་དག་ང་ཡི་སྐུ། །སངས་རྒྱས་ཆོས་ཤེས་བྱ་བ་ཐོབ། །ཅེས་པ་ལྟར་རོ། །དུས་ཇི་ཙམ་གྱིས་བྱང་ཆུབ་ཐོབ་ཅེ་ན། ཁ་ཅིག་བསྐལ་པ་གྲངས་མེད་པ་གཅིག་དང༌། ཁ་ཅིག་གྲངས་མེད་བཞི་བཅུས་བྱང་སེམས་གཞན་ལས་བུལ་
བར་འདོད་དོ། །གསུམ་པ་འཁོར་བ་ལ་མཐའ་ཡོད་མེད་ནི། འཁོར་བའི་རང་བཞིན་མཐའ་ཡས་ཤིང་ནམ་མཁའ་ལྟར་ཟད་པ་མེད་པའི་ཕྱིར་མཐའ་མེད་དོ་ཞེས་འདོད་པ་དང༌། གསེར་གྱི་གཡའ་ལྟར་གཉེན་པོའི་ཕྱོགས་ཀྱིས་ཟད་པར་ནུས་པའི་ཕྱིར་མཐའ་ཡོད་དོ། །ཞེས་འདོད་པ་གཉིས་ལས་སློབ་དཔོན་ཀྱང་ཕྱི་མར་བཞེད་པར་མངོན་ཞིང༌། །ཨ་བྷ་ཡས་ལུང་རིག་གཉིས་ཀའི་སྒོ་ནས་མཐའ་ཡོད་དུ་སྒྲུབ་པར་བྱེད་ཀྱང༌། སྤྱིར་འཁོར་བ་ལ་མཐའ་ཡོད་མེད་གཉིས་ཀ་བཅོམ་ལྡན་འདས་ཀྱིས་གསུང་ཞིང༌། གཉིས་ཀ་ལ་སྒྲུབ་བྱེད་ཡོད་མོད་ཀྱང༌། འབྲས་བུ་འབྱུང་རུང་ཡིན་ཀྱང་འབྱུང་ངེས་ལ་འཁྲུལ་པའི་ཕྱིར་དང༌། སེམས་ཅན་གྱི་ཁམས་ལ་ནམ་མཁའ་ལྟར་མང་ཉུང་གི་ཚད་མ་གྲུབ་པས་འགྲིབ་པ་མི་མངོན་པའི་ཕྱིར་དང༌། ཐོག་མ་དང་ཐ་མ་མེད་པ་སྟོང་པ་ཉིད་ཀྱི་སྟོང་རྒྱུ་ཆོས་ཅན་འཁོར་བ་ལ་བཤད་པས་རེ་ཞིག་མཐའ་མེད་ཀྱི་ལུགས་བསྐྱོ་ན་བདེ་ཡང་ལུང་དུ་བསྟན་པར་མི་བྱ་བ་ཡིན་པས་རྡོ་གལ་མི་ཆེ་བོ། །གཉིས་པ་ངོ་བོའི་ཁྱད་པར་ནི། བླ་མེད་བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔའ་རྣམས། །ཉོན་མོངས་པ་རྣམས་ལ་རང་དབང་ཐོབ་པར་བྱས་ནས་དུས་ཡུན་རིང་པོར་བྱང་ཆུབ་སྒྲུབ་པར་བྱེད་དེ། འཁོར་བར་སྐྱེ་བ་ལེན་པའི་རྒྱུ་ཉོན་མོངས་པ་ལམ་གྱི་གནས་སྐབས་ཀྱི་རྣམ་པ་ཐམས་ཅད་དུ་མི་སྤོང་
བ་ཡིན་ཏེ། འཁོར་བ་ཇི་སྲིད་གནས་ཀྱི་བར་དུ་སེམས་ཅན་གྱི་དོན་བྱེད་པར་ཞུགས་པ་ཉིད་ཀྱི་ཕྱིར་རོ། །འོ་ན་མི་སྤང་བའི་ཉོན་མོངས་དེ་གང་ཞེ་ན། འདིའི་ལན་ལ་གཉིས། །སྐྱེ་བ་ལེན་པའི་རྒྱུ་བསྟན། །དེ་བརྒལ་ལན་གྱིས་གཏན་ལ་ཕབ་པའོ། །དང་པོ་སྐྱེ་བ་ལེན་པའི་རྒྱུ་བསྟན་པ་ལ་གཉིས་ལས། བསྟན་བཅོས་ལས་བཤད་པ་ནི། ཉི་སྣང་ལས། བྱང་ཆུབ་སེམས་དཔའ་ལ་མ་རིག་པ་དང་ལྟ་བའི་ཟག་པ་བག་ལ་ཉལ་ཙམ་ཡང་མེད་ལ། འདོད་པ་དང་སྲིད་པའི་སྲིད་པས་བསྡུས་པའི་བག་ལ་ཉལ་ཡོད་པར་གསུངས་ཤིང༌། དེའི་སྒྲུབ་བྱེད་དུ་བསམ་བཞིན་དུ་སྲིད་པ་ལེན་པ་བཀོད་དོ། །དེ་གཉིས་ནི་འདོད་པ་དང་ཁམས་གོང་གི་འདོད་ཆགས་ཀྱི་གནས་ངན་ལེན་ལ་བཤད་པས་དེ་ལྟར་འདོད་དགོས་སོ། །གཉིས་པ་མདོ་ནས་བཤད་པ་ལ་ཡང་གཉིས་ལས། བློ་གྲོས་རྒྱ་མཚོའི་མདོ་ལས་བཤད་པ་ནི། ཇི་སྐད་དུ། དེ་དག་གམ་འཁོར་བའི་རྒྱུ་དགེ་བའི་རྩ་བ་དང་མཚུངས་པར་ལྡན་པའི་ཉོན་མོངས་པ་གང་ཞེ་ན། འདི་ལྟ་སྟེ། བསོད་ནམས་ཀྱི་ཚོགས་ཡོངས་སུ་བཙལ་བས་མི་ངོམ་པ་དང༌། བསམ་བཞིན་དུ་སྲིད་པར་སྐྱེ་བ་ཡོངས་སུ་འཛིན་པ་དང༌། སངས་རྒྱས་དང་འཕྲད་པ་དོན་དུ་གཉེར་བ་དང༌། སེམས་ཅན་ཡོངས་སུ་སྨིན་པར་བྱ་བས་མི་སྐྱོ་བ་དང༌། །དམ་པའི་ཆོས་འཛིན་པ་ལ་བརྩོན་པ་དང༌། སེམས་ཅན་གྱི་བྱ་བ་ཅི་ཡོད་པ་
ལ་འགྲུས་པ་དང༌། ཆོས་ལ་ཆགས་པའི་བྱ་བ་དང་མ་བྲལ་བ་དང༌། ཕ་རོལ་ཏུ་ཕྱིན་པའི་ཀུན་ཏུ་སྦྱོར་བ་རྣམས་མི་འདོར་བ་སྟེ། ཞེས་པ་འདི་བརྒྱད་དོ། །འདི་དག་ནི་དགེ་རྩ་ཡིན་ན་ཉོན་མོངས་མིན་པས་དགེ་རྩ་དང་མཚུངས་ལྡན་གྱི་ཉོན་མོངས་ཞེས་པ་མི་འཐད་པར་དྲིས་པ་ནི་དེ་ཉིད་ལས། བཅོམ་ལྡན་འདས་གང་གི་ཚེ་དེ་དག་དགེ་བའི་རྩ་བ་ལགས་ན་དེ་རྒྱུ་ཅིའི་སླད་དུ་ཉོན་མོངས་པ་ཞེས་བགྱི་ཞེས་པའོ། །ལན་དུ་ཉོན་མོངས་དངོས་མིན་ཀྱང་དེའི་མིང་གིས་འདོགས་པའི་རྒྱུ་མཚན་ནི་དེ་དང་བྱེད་ལས་མཚུངས་པས་ཡིན་ཏེ། ཉོན་མོངས་པས་ཁམས་གསུམ་དུ་སྦྱོར་བ་འདིས་ཀྱང་དེར་སྦྱོར་བས་སོ། །དངོས་ལ་གནོད་བྱེད་ནི། སེམས་ཉེ་བར་ཉོན་མོངས་པར་བྱེད་མི་ནུས་པས་སོ། ཞེས་གསུངས་པ་ནི། །བློ་གྲོས་རྒྱ་མཚོ་འདི་ལྟར་དེ་ལྟ་བུའི་རང་བཞིན་གྱི་ཉོན་མོངས་པ་དེ་དག་གིས་བྱང་ཆུབ་སེམས་དཔའ་ཁམས་གསུམ་དུ་ཀུན་ཏུ་སྦྱོར་ལ། ཁམས་གསུམ་པ་ཡང་ཉོན་མོངས་པ་ལས་ཀུན་ཏུ་བྱུང་བ་ཡིན་ནོ། །ཞེས་དང༌། ཇི་སྲིད་ཁམས་གསུམ་པར་ཀུན་ཏུ་སྦྱོར་བས་ཡིན་གྱིས་སེམས་ཉེ་བར་ཉོན་མོངས་པས་ནི་མ་ཡིན་ནོ། ཞེས་སོ། །བཏགས་པའི་དགོས་པ་ནི། མདོ་ལས་མ་ཟིན་ཀྱང་བྱང་སེམས་ནི་གཞན་དོན་ལྷུར་ལེན་པ་ཡིན་ནོ་ཞེས་བསྟན་པའི་ཕྱིར་ཡིན་ཏེ། གཞན་དོན་དུ་སྲིད་པར་ཉིད་མཚམས་སྦྱོར་བའི་ཕྱིར་རང་དོན་དུ་ཉོན་
མོངས་པ་ཡང་མི་སྤོང་བར་ཤེས་པའོ། །གཉིས་པ་དཔལ་ཕྲེང་གི་མདོ་ལས་འབྱུང་བ་ནི། ཇི་སྐད་དུ། །བཅོམ་ལྡན་འདས་དཔེར་ན་ལེན་པའི་རྐྱེན་གྱིས་ཟག་པ་དང་བཅས་པའི་རྒྱུ་ལས་སྲིད་པ་གསུམ་འབྱུང་བ་དེ་བཞིན་དུ། བཅོམ་ལྡན་འདས་མ་རིག་པའི་བག་ཆགས་ཀྱི་སའི་རྐྱེན་གྱིས་ཟག་པ་མེད་པའི་ལས་ཀྱི་རྒྱུ་ལས་བྱུང་བ། དགྲ་བཅོམ་པ་དང༌། རང་སངས་རྒྱས་དང༌། དབང་ཐོབ་པའི་བྱང་ཆུབ་སེམས་དཔའ་རྣམས་ཀྱི་ཡིད་ཀྱི་རང་བཞིན་གྱི་ལུས་གསུམ་འབྱུང་སྟེ། ཞེས་པ་སྟེ། འདིས་ཀྱང་ཟག་བཅས་ཀྱི་ལས་ཉོན་ལ་མི་འདོད་དོ། །དེ་ལ་མ་རིག་པའི་བག་ཆགས་ཀྱི་ས་ནི། བསྡུ་བ་ལས། དེ་བཞིན་གཤེགས་པའི་ཡེ་ཤེས་ཉག་གཅིག་གིས་སྤོང་བར་བཤད་པའི་ཟག་བཅས་ཀྱི་གནས་ངན་ལེན་ཕྲ་མོ་སྟེ། དེའི་དཔེ་ལ་སྔ་རབས་པ་དག །གླ་རྩི་བླུགས་པའི་སྣོད་ན་དེ་མེད་ཀྱང་དྲི་མནམ་པ་བཞིན་དུ་ཉོན་མོངས་དང༌། ཉེ་ཉོན་རྣམས་སྤངས་ཀྱང་དེ་དག་གི་རྟེན་བྱས་པའི་བག་ལ་ཉལ་ལོ་ཞེས་འཆད་དོ། །ཟག་མེད་ཀྱི་ལས་ནི། །ཉོན་མོངས་དང་མ་འདྲེས་ལ་སྲིད་པའི་རྒྱུར་གྱུར་པའི་སེམས་པ་སྟེ་སྔར་བསྟན་པ་བརྒྱད་པོ་ལྟ་བུར་མངོན་ནོ། །གཉིས་པ་དེ་བརྒལ་ལན་གྱིས་གཏན་ལ་དབབ་པ་ལ་གཉིས། བཏགས་པའི་མཐའ་དགག །གནས་པའི་དོན་དགོད་པའོ། །དང་པོ་བཏགས་པའི་མཐའ་དགག་པ་ནི། །བོད་སྔ་རབས་པ་ཁ་ཅིག་
ཉོན་མོངས་མི་སྤོང་བའི་དོན་ནི། བྱང་སེམས་ཀྱིས་སེམས་ཅན་གྱི་དོན་བྱེད་པ་ལ་སྲིད་པར་སྐྱེ་བ་ལེན་དགོས་ལ། དེ་ལ་ཡང་རྒྱུ་ཉོན་མོངས་དགོས་པས་དེ་རྩབས་དང་རུ་མ་བཞིན་དུ་འཇོག་པ་ཡིན་ནོ་ཞེས་ཟེར་བ་དང༌། ཨ་དུ་ལ་དྷ་ཤ་ནི། ཉོན་མོངས་པ་ལ་སྡུག་བསྔལ་བསྐྱེད་པ་དང༌། གཉེན་པོ་སྐྱེ་བའི་གེགས་བྱེད་པ་དང༌། སྲིད་པར་སྐྱེ་བ་ལེན་པ་དང༌། རང་གི་རིགས་འདྲ་སྐྱེད་པའི་ནུས་པ་བཞི་ཡོད་པ་ལས། དང་པོ་གཉིས་སྤོངས་ཤིང་ཕྱི་མ་གཉིས་མི་སྤོང་ཞེས་འདོད་པ་ལ། །ཉན་ཐོས་ཀྱིས་དེ་གང་གིས་སྤོང༌། ཉོན་མོངས་ཀྱི་རྩ་བ་མ་རིག་པ་དང་འཛིན་སྟངས་འགལ་བའི་གང་ཟག་གི་བདག་མེད་ལ་གོམས་པས་ཤེ་ན། འོ་ན་བྱང་སེམས་ཀྱི་ས་དེའི་སྟེང་དུ་ཆོས་ཀྱི་བདག་མེད་ལ་ཡང་གོམས་པར་བྱས་པས་ཉོན་མོངས་འཇོག་པར་འདོད་ཀྱང་སྤང་དགོས་ཏེ། འགལ་བ་སྟོབས་ལྡན་གྲུབ་པས་སོ། །གཞན་ཡང་ལམ་ཤེས་ཟག་བཅས་སུ་བཤད་པའི་ཟག་པ་དེ་ཡང་མ་རིག་པ་དང་སྲེད་པ་སོགས་ལ་འདོད་དགོས་པས་སངས་རྒྱས་ལ་ཡང་འདོད་དགོས་ཏེ། དེ་ལམ་ཤེས་ཀྱིས་ནི་རྣམ་པ་ཐམས་ཅད་དུ་མི་སྤོང་ལ་གཉེན་པོ་གཞན་ཡང་མེད་པས་སོ། །གཞན་ཡང་སྐྱེ་བ་ལེན་པ་ལ་རྒྱུ་མ་རིག་པ་དང༌། །སྲེད་པ་སོགས་དགོས་ན། ཉན་རང་དགྲ་བཅོམ་ཐེག་ཆེན་དུ་ཞུགས་པས་
སྲིད་པ་ཇི་ལྟར་འཛིན། མ་རིག་བག་ཆགས་ཀྱི་ས་དང་ཟག་མེད་ཀྱི་ལས་ཀྱིས་སོ་ཞེ་ན། བྱང་སེམས་ལ་དེ་གར་སོང༌། དེས་ན་བྱང་སེམས་ཀྱི་དེ་ནི་སྙིང་རྗེ་དང་སྨོན་ལམ་དང་སེམས་བསྐྱེད་སོགས་ཀྱི་དགེ་རྩ་ཉིད་ཡིན་ལ། དེ་ཡང་ཉོན་མོངས་དང་བྱེད་ལས་མཚུངས་པས་དེར་བཏགས་པའོ། །ཞེས་སྔོན་གྱི་མཁས་པ་བྱང་ཡེ་གསུངས་པ་ནི་མདོ་འགྲེལ་གྱི་གནད་མཁྱེན་པའི་བཤད་པའོ། །དེ་ལ་འདི་སྐད་ཀྱང་བརྗོད་པར་བྱ་སྟེ། གལ་ཏེ་སྐྱེ་བ་ལེན་པའི་རྒྱུ་ལས་ཉོན་མཚན་ཉིད་པ་ཡིན་ན་བྱང་སེམས་འཕགས་པ་དེ་དག་ལས་དབང་གིས་སྐྱེ་བར་ཐལ་བ་དང༌། སྐྱེ་བ་བླང་བ་དེ་ལ་འགྲོ་བ་དེ་དང་དེའི་སྡུག་བསྔལ་གྱིས་གནོད་པར་འགྱུར་ན་དེ་ཡང་མི་རིགས་ཏེ། རྒྱུད་བླ་མར། འཕགས་པས་འཆི་དང་རྒ་བ་དང༌། །ན་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཅེས་སོ། །གཞན་ཡང་བློ་གྲོས་རྒྱ་མཚོའི་མདོ་ལས་བཤད་པའི་སྐྱེ་རྒྱུ་དང་འདིར་བསྟན་ཉོན་མོངས་གཅིག་ཏུ་སྒྲིགས་པ་དང༌། ཉོན་མོངས་བཏགས་པ་བ་མིན་པར་འདོད་པ་ནི་ཤིན་ཏུ་ཡང་འགལ་ལོ། །གཉིས་པ་གནས་པའི་དོན་དགོད་པ་ནི། འཕགས་པ་དང་སློབ་དཔོན་གྱིས་བྱང་སེམས་དང་ཉན་རང་གིས་ཉོན་མོངས་མི་སྤོང་བ་དང་སྤོང་བར་གསུངས་པའི་དོན་ནི་ཅི། །ཉོན་མོངས་པ་དེ་ཡང་གང་ཞེ་ན། དའི་དོན་ནི་སྤྱིར་
ཉོན་མོངས་པ་མི་སྤོང་བ་དང༌། །བྱེ་བྲག་ཏུ་སྐྱེ་བ་ལེན་པའི་རྒྱུ་ཉོན་མོངས་པ་མི་སྤོང་བ་ནི་སྐྱེ་བ་ལེན་པ་ལ་ཉོན་མོངས་རྒྱུར་དགོས་ནས་མི་སྤོང་བར་བཤད་པ་མ་ཡིན་ཏེ། དེ་དག་སྤང་བྱ་མ་ཡིན་ན་ཉོན་མོངས་པ་ཡིན་པར་འགལ་ལ། ཡིན་ན་ལམ་ཤེས་ཀྱིས་མི་སྤོང་ཞིང་དེ་ལས་གཞན་པའི་གཉེན་པོ་ཡང་མེད་པའི་ཕྱིར། སངས་རྒྱས་པ་ན་ཡང་ཡོད་པར་འགྱུར་ལ། །འདིའི་སྐྱེ་རྒྱུ་ལ་ཉོན་མོངས་མཚན་ཉིད་པ་དགོས་ན་མདོ་གཉིས་དང་འགལ་བའི་ཕྱིར་རོ། །འོ་ན་ཅི་ཞེ་ན། །ཉོན་མོངས་ཀྱི་འབྲས་བུ་སྲིད་པ་ལ་སྐྲགས་ནས་དེ་བློས་འདོར་བ་ཉན་ཐོས་ལྟ་བུ་མ་ཡིན་པར་གཞན་དོན་དུ་སྲིད་པར་ཉིང་མཚམས་སྦྱོར་བ་དོན་དུ་གཉེར་བ་ལ་བསམ་ནས་ཉོན་མོངས་མི་སྤོང་བར་བཤད་དེ། མདོར་ན་དེའི་འབྲས་བུ་དང་འདྲ་བའི་སྲིད་པ་མི་སྤོང་བ་ལ་དེ་མི་སྤོང་བར་བཏགས་པ་ཙམ་མོ། །དེ་ལྟ་མ་ཡིན་ན་མ་རིག་པའི་བག་ལ་ཉལ་མ་ལུས་པར་སྤངས་ནས་འདོད་སྲེད་ཀྱི་བག་ལ་ཉལ་མ་སྤངས་བ་འགལ་ཏེ། རྒྱུ་ལོག་ན་འབྲས་བུ་ལྡོག་པའི་ཕྱིར་རོ། །ཉི་སྣང་ལས་ཀྱང༌། །ཡོངས་སུ་འཛིན་པའི་ཤེས་རབ་དང་སྙིང་རྗེ་དག་གིས་གོ་རིམ་བཞིན་དུ་བྱང་ཆུབ་སེམས་དཔའ་མ་བཅིང་མ་གྲོལ་བར་བྱ་བས་ན་འདི་ནི་གནས་ཉིད་དུ་གསུངས་པ་ཡིན་ཏེ། བྱང་ཆུབ་སེམས་དཔའི་སྙིང་རྗེ་ནི། །སྲིད་པ་དགའ་བར་བྱེད་པ་སྟེ། །ཞེས་སྙིང་རྗེས་བྱང་
སེམས་རྣམས་སྲིད་པ་ལས་མི་གྲོལ་བར་བྱེད་པར་གསུངས་པས་སྙིང་རྗེ་ཉིད་སྲིད་པར་སྐྱེ་བའི་རྒྱུ་ཡིན་ཏེ། རིན་ཆེན་ཕྲེང་བ་ལས། འོན་ཀྱང་དེ་ནི་སྙིང་རྗེ་ཡིས། བྱང་ཆུབ་བར་དུ་སྲིད་མཚམས་སྦྱོར། །ཞེས་པ་ལྟར་རོ། །གཞན་ཡང་བྱང་སེམས་ཀྱིས་ཐབས་ཤེས་ཀྱིས་ཉོན་མོངས་ལ་དབང་དུ་བྱས་པས་ཉེས་པ་མི་སྐྱེད་ཅིང་ལམ་སྒྲུབ་པའི་གྲོགས་སུ་ཡང་འགྱུར་བས་ཉན་ཐོས་ལྟར་མཐའ་གཅིག་ཏུ་མི་མཐུན་པར་བཟུང་ནས་ཉོན་མོངས་མི་སྤང་བ་ཡང་ཡིན་ནོ། །དེ་ལྟར་ན་ས་ཐོབ་ཀྱི་སྐྱེ་བ་ལེན་པའི་རྒྱུ་བཤད་པ་འདི་ནི་་མདོ་དང་འཕགས་པ་ཀླ་སྒྲུབ། འཕགས་པ་ཐོགས་མེད། འཕགས་གྲོལ། སློབ་དཔོན་རྣམས་ཀྱི་དགོངས་པ་གཅིག་ཏུ་དྲིལ་བའི་མདོ་འགྲེལ་གྱི་དགོངས་པ་སྟེ། བྱང་སེམས་སྙིང་རྗེས་ཞི་ལ་མི་གནས་པའི་གནད་མཐར་ཐུག་པའོ། །གསུམ་པ་བྱེད་ལས་ཀྱི་ཁྱད་པར་ནི། སེམས་ཅན་འཁོར་དུ་མ་བསྡུས་པ་སྡུད་པ་དང༌། བསྡུས་པ་སྨིན་པ་དང༌། སྨིན་པ་གྲོལ་བར་བྱེད་པའོ། །གཉིས་པ་ཡན་ལག་ཅན་གྱི་ལམ་དངོས་ལ་གསུམ། ཉན་ཐོས་དང་རང་རྒྱལ་དང༌། བྱང་སེམས་ཀྱི་ལམ་མོ། །དང་པོ་ཉན་ཐོས་ཀྱི་ལམ་ལ་གཉིས། ཤེས་པར་བྱ་བའི་ལམ་དང༌། དེ་ཤེས་པར་བྱེད་པའི་ཚུལ་ལོ། །དང་པོ་ཤེས་བྱ་ལམ་ལ་གཉིས། །ཀུན་ཉོན་དང༌། རྣམ་བྱང་གི་བདེན་པ་གཉིས་ཀྱི་རྣམ་པའོ། །དང་པོ་ལ་གཉིས། །སོ་སོ་བ་དང་ཐུན་
མོང་གི་རྣམ་པའོ། །དང་པོ་བདེན་པ་གཉིས་སོ་སོའི་རྣམ་པ་ལ་གཉིས། སྡུག་བསྔལ་དང༌། ཀུན་འབྱུང་གི་རྣམ་པའོ། །དང་པོ་སྡུག་བསྔལ་གྱི་རྣམ་པ་ནི། སྐྱེ་ཞིང་འཇིག་པས་མི་རྟག་པ་དང༌། ཟག་པ་དང་བཅས་ཤིང་འཕགས་པ་རྣམས་ལ་མི་འདོད་པ་ལྟར་སྣང་བས་སྡུག་བསྔལ་བ་དང༌། དོན་གཞན་གྱི་བདག་གིས་སྟོང་པས་བདག་མེད་པ་དང༌། ངོ་བོར་གྱུར་པས་བདག་མེད་པའི་ཞི་བ་དང་བཞིའོ། །གཉིས་པ་ཀུན་འབྱུང་གི་རྣམ་པ་ནི། །སྡུག་བསྔལ་གྱི་རྩ་བའི་རྒྱུ་ཡིན་པས་ནད་ལྟ་བུ་དང༌། སྡུག་བསྔལ་གྱི་ཕུང་པོ་ཀུན་འབྱུང་བས་འབྲས་ལྟ་བུ་དང༌། སྡུག་བསྔལ་དྲག་པོ་འཕྲལ་དུ་སྐྱེ་བས་ཟུག་རྔུ་ལྟ་བུ་དང༌། སྡུག་བསྔལ་བཏུད་མར་འབྱུང་བས་སྡིག་པ་ལྟ་བུའི་རྣམ་པ་བཞི་རྣམས་སོ། །གཉིས་པ་སྡུག་ཀུན་གཉིས་ཐུན་མོང་གི་རྣམ་པ་ནི། ཕྱིར་རྒོལ་བས་ཕ་རོལ་དང༌། འཇིག་པའི་ཆོས་ཅན་ཡིན་པས་འཇིག་པའི་ཆོས་ཅན་དང༌། རང་གི་ངོ་བོ་རང་དུ་མི་གནས་པས་གཡོ་བ་དང༌། སྐབས་སུ་བབས་པ་ངོ་སྐལ་གྱི་གཉེན་པོས་འཇིག་པས་རབ་ཏུ་འཇིག་པའི་རྣམ་པ་དང༌། འདི་ཕྱི་གཉིས་སུ་གནོད་པའི་གནས་སུ་གྱུར་པས་འཇིགས་པ་དང༌། སྲིན་པོ་ལ་སོགས་པ་སེམས་ཡོད་ཀྱི་ཉེར་འཚེའི་གནས་སུ་གྱུར་པས་འགོ་ནད་ལྟ་བུ་དང༌། འབྱུང་བ་འཁྲུགས་པ་དང་ཐོག་ལ་སོགས་པ་སེམས་
མེད་ཀྱི་གནོད་གནས་ཡིན་པས་ཉེ་བར་འཚེ་བའི་རྣམ་པ་དང་བདུན་ལས། །དང་པོ་གཉིས་ཡིད་འབྱུང་བ་གཉིས། དེ་ནས་གཉིས་འདོད་ཆགས་དང་བྲལ་བ་དང༌། ཕྱི་མ་གསུམ་འགོག་པའི་རྣམ་པའོ། །གཉིས་པ་རྣམ་བྱང་ཕྱོགས་ཀྱི་རྣམ་པ་ལ། འགོག་པ་དང༌། ལམ་གྱི་རྣམ་པའོ། །དང་པོ་འགོག་བདེན་གྱི་རྣམ་པ་ནི། བདག་འཛིན་གྱི་ཉོན་མོངས་སམ་སྡུག་བསྔལ་མེད་པས་བདག་མེད་པ་དང༌། སྡུག་བསྔལ་ཉོན་མོངས་ཞི་བས་ཞི་བ་དང༌། གྱ་ནོམ་པའི་བདག་ཉིད་བདེ་གཙང་གི་ངོ་བོ་ཡིན་པས་སམ་མི་གཙང་བས་དབེན་པས་དབེན་པའི་རྣམ་པ་དང༌། ངེས་པར་འབྱུང་བ་རྟག་ཕན་གྱི་མཚན་ཉིད་བདག་གི་བ་དང་བྲལ་བས་སྟོང་པ་དང༌། འདུས་བྱས་ཀྱི་མཚན་མ་དང་བྲལ་བས་མཚན་མ་མེད་པ་དང༌། ཁམས་གསུམ་ལ་སྨོན་པའི་ཟད་པས་སྨོན་པ་མེད་པ་དང༌། མ་འོངས་པའི་སྐྱེ་འགྱུར་གྱི་ལས་མངོན་པར་འདུ་མི་བྱེད་པས་མངོན་པར་འདུ་བྱེད་པ་མེད་པའི་རྣམ་པ་སྟེ་བདུན་ནོ། །གཉིས་པ་ལམ་བདེན་གྱི་རྣམ་པ་ནི། ཐར་བར་ཕྱིན་པར་བྱེད་པས་ལམ་དང༌། ཉོན་མོངས་ཀྱི་གཉེན་པོ་བྱེད་པས་རིག་པ་དང༌། སེམས་ཕྱིན་ཅི་མ་ལོག་པར་སྒྲུབ་པའི་སྒྲུབ་པ་དང༌། བདག་ཏུ་མངོན་པར་མ་ཞེན་པས་མྱང་འདས་རྟག་གནས་སུ་འགྲོ་བས་ངེས་པར་འབྱིན་པ་དང་བཞིའོ། །གཉིས་པ་ཤེས་པར་བྱེད་ཚུལ་ནི། སྡུག་ཀུན་སོ་སོའི་རྣམ་པ་བརྒྱད། ཐུན་མོང་བ་རེ་རེར་བདུན་རེ་སྟེ་བཅུ་བཞི།
འགོག་པའི་བདུན་ལམ་གྱི་བཞི་དད་རྣམ་པ་སོ་གསུམ་ཡོད་པ་རྣམས་རྒྱལ་བའི་སྲས་པོ་བྱང་ཆུབ་སེམས་དཔའ་རྣམས་ཀྱིས། སྦྱོར་བའི་དུས་སུ་སེམས་བསྐྱེད། མཇུག་ཏུ་བསྔོ་བ། དངོས་གཞིའི་དུས་སུ་དེ་དག་གི་ངོ་བོ་ཉིད་ཅིར་ཡང་མི་དམིགས་པར་རྟོགས་པའི་ཁྱད་པར་གསུམ་ལྡན་གྱི་སྒོ་ནས་ཤེས་པར་བྱ་བའོ། །འདིའི་སྐབས་སུ་མི་རྟག་སོགས་སུ་ཡིད་ལ་བྱེད་པ་ནི་ཉན་ཐོས་ཀྱི་ལམ་སྟེ་ཤེས་པར་བྱ་རྒྱུའོ། །ཚུལ་འདི་ནི་རང་རྒྱལ་གྱི་ལམ་གྱི་སྐབས་སུ་ཡང་ཤེས་པར་བྱའོ། །བདེན་བཞིའི་རྣམ་པ་རྣམས་མི་དམིགས་པར་ཡིད་ལ་བྱེད་པ་ནི་ལམ་ཤེས་ཀྱི་ལམ་སྟེ་ཤེས་པར་བྱེད་པའི་སྒོའམ་ཐབས་སོ། །ཤེས་པར་བྱེད་པ་པོ་ནི་བྱང་སེམས་སོ། །གཉིས་པ་རང་རྒྱལ་གྱི་ལམ་ལ་བདུན། རིགས་དང༌། ལམ་དང༌། ཡང་དག་པར་འགྲུབ་པ་དང༌། ཚོགས་བསོག་པ་དང༌། གནས་པ་དང༌། རྒྱུ་བ་དང༌། སྒྲ་བཤད་པའོ། །དང་པོ་རིགས་ནི་ཁྱད་པར་གསུམ་དང་ལྡན་པ་སྟེ། རང་བཞིན་གྱིས་ཉོན་མོངས་པ་ཤེས་ཆུང་བ་སྟེ། དེས་ན་དེའི་སེམས་འདུ་འཛི་ལ་མི་དགའ་ཞིང་གཅིག་པུ་ལ་དགའ་བའོ། །གཉིས་པ་ནི། སྙིང་རྗེ་ཤས་ཆུང་བ་སྟེ། དེས་ན་དེའི་སེམས་ཆོས་སྟོན་པ་དང་སེམས་ཅན་གྱི་དོན་བྱ་བ་ལ་མི་འཇུག་གིས་སེམས་ལས་ཆུང་ངུར་གནས་སོ། །གསུམ་པ་ནི། དབང་པོ་འབྲིང་དུ་གྱུར་ཅིང་ང་རྒྱལ་སྤྱོད་པ་ཅན་ཏེ། དེས་ན་སློབ་དཔོན་
མེད་ཅིང་འགྲན་ཟླ་མེད་པར་བྱང་ཆུབ་འདོད་པའོ། །གཅིག་པུ་ལ་དགའ་བ་འདི་ཚོགས་སྤྱོད་ལ་དོར་རོ། །གཉིས་པ་ལམ་ལ་སློབ་ཚུལ་ནི། ལམ་གསུམ་ལས། ལམ་དང་པོ་ནི། རང་སངས་རྒྱས་ཀྱི་རིགས་ལ་གནས་ནས་བསྐལ་པ་བརྒྱར་སངས་རྒྱས་འབྱུང་བ་མཉེས་པར་བྱས་ཏེ་རང་བྱང་ཆུབ་ཏུ་རྒྱུད་སྨིན་པར་བྱེད་ཅིང་ཕྱིས་རང་གི་བྱང་ཆུབ་ཐོབ་པར་བྱ་བའི་ཕྱིར། མཁས་པར་བྱ་བའི་དངོས་པོ་དྲུག་ལ་མཁས་པར་བྱེད་པ་སྟེ། དྲུག་ནི། ཕུང་པོ། ཁམས། སྐྱེ་མཆེད། རྟེན་འབྲེལ། གནས་དང་གནས་མ་ཡིན་པ། བདེན་པ་རྣམས་ལ་མཁས་པའོ། །འདི་ནི་བསེ་རུའི་ལམ་མོ། །འདི་ལ་ཁ་ཅིག་ཉན་ཐོས་ཀྱི་སྡེ་སྣོད་ལ་དམིགས་ནས་བསྐལ་པ་བརྒྱའི་བར་དུ་ཐོས་བསམ་བྱས་ཤིང་ད་དུང་སྐྱེ་བ་ལེན་པར་ཤེས་པ་ན་སྔར་གྱི་ལམ་སྦྱངས་ནས་འཆི་འཕོ་ཀར། སངས་རྒྱས་དང་ཉན་ཐོས་མེད་པའི་ཞིང་དུ་སྐྱེ་བ་དང༌། དེར་ཡང་གཞན་ལ་མ་ལྟོས་བར་རང་གིས་ཐོབ་པའི་ཤེས་རབ་ཀྱིས་ལམ་བགྲོད་པ་དང༌། བྱང་ཆུབ་ཐོབ་པ་ན་ཡང་གདུལ་བྱ་ལ་ངག་གིས་མིན་པར་ལུས་ཀྱིས་སྙིང་བརྩེ་བར་བྱེད་པར་གྱུར་ཅིག །ཅེས་སྨོན་ལམ་གསུམ་འདེབས་ཤིང་ཤི་འཕོས་ནས་ཞིང་སྟོང་པར་གླིང་གསུམ་གྱི་སྐྱེས་པ་དམངས་རིགས་མ་ཡིན་པ་གཅིག་ཏུ་སྐྱེས་ཏེ། ཁྱིམ་ནས་ཁྱིམ་མེད་པར་རང་བྱུང་གི་རབ་ཏུ་བྱུང་ཞིང་བསྙེན་པར་རྫོགས་ནས་དུར་ཁྲོད་དུ་ཕྱིན་ཏེ། རུས་པ་འདི་ཅི་ལས་བྱུང་བསམ་པས་མ་
རིག་པ་ནས་རྒ་ཤིའི་བར་རྟེན་འབྲེལ་ལུགས་འབྱུང་བཟློག་རྟོགས་པའི་དོན་བསམ་གཏན་བཞི་པའི་དངོས་གཞི་ལ་བརྟེན་ནས་བསྒོམ་པས་ལམ་ཕྱི་མ་བཞི་ཚེ་གཅིག་ལ་མངོན་དུ་བྱེད་དོ། །ཞེས་འཆད་དོ། །ལམ་གཉིས་པ་ནི། སངས་རྒྱས་འབྱུང་བ་མཉེས་པར་བྱེད་པ་དང༌། སྐྱེས་བུ་དམ་པ་ལ་བརྟེན་པ་དང༌། དམ་པའི་ཆོས་ཉན་པ་དང༌། ཚུལ་བཞིན་ཡིད་ལ་བྱེད་པ་ལ་བརྟེན་ནས་སྦྱོར་ལམ་དང་པོ་གསུམ་སྐྱེད་པར་བྱེད་ནས། ཕྱིས་ཆོས་མངོན་པར་རྟོགས་པར་བྱ་བའི་ཕྱིར་དངོས་པོ་དྲུག་ལ་མཁས་པར་བྱེད་པའོ། །ལམ་གསུམ་པ་ནི། སྔར་དང་འདྲ་བ་ལས་འབྲས་བུ་དང་པོ་གཉིས་གང་རུང་མངོན་དུ་བྱེད་པའོ། །འདི་གཉིས་ལ་བོད་རྣམས་ཚོགས་སྤྱོད་ཆེ་ཆུང་གི་ཐ་སྙད་བྱེད་དོ། །གསུམ་པ་འབྲས་བུ་གྲུབ་ཚུལ་ནི། དེ་གསུམ་ཀས་ཀྱང་མཐར་སངས་རྒྱས་མི་འབྱུང་བ་ན་སློབ་དཔོན་མེད་པར་བྱང་ཕྱོགས་སོ་བདུན་བསྒོམས་ནས་ཉོན་མོངས་པ་ཐམས་ཅད་སྤང་བའི་དགྲ་བཅོམ་པའི་བར་དུ་ཐོབ་པར་བྱེད་དོ། །དེ་ལྟར་གསུམ་པོ་འདི་ཡང་སྲིད་པ་ཐ་མའི་ཚེ་གཅིག་ལ་ལམ་མང་བ་དང༌། འབྲིང་དང༌། ཉུང་བ་བསྐྱེད་ནུས་པའི་སྒོ་ནས་འདི་དག་གི་ཁྱད་པར་བསྟན་ཏེ་བསེ་རུ་ལྟ་བུས་ཀྱང༌། ཚེ་གཅིག་ལ་ལམ་ལྷག་མ་བཞི་སྐྱེད་ཀྱིས་སྟན་གཅིག་ལ་བསྐྱེད་པར་ཀུན་བཏུས་པ་མི་འདོད་དོ། །མཛོད་པ་ནི། སྟོན་དང་བསེ་རུ་བྱང་ཆུབ་པ། །བསམ་གཏན་མཐའ་རྟེན་
གཅིག་ལ་ཀུན། །དེ་ཡི་སྔོན་དུ་ཐར་ཆ་མཐུན། །ཞེས་སྲིད་པ་ཐ་མ་པའི་ཚེ། མཐོང་ལམ་གྱི་སྔོན་དུ་སྲིད་རྩེའི་ཉེར་བསྡོགས་ཐོབ་ནས་ཅི་ཡང་མན་ཆད་ལ་ཆགས་པ་དང་བྲལ་ཞིང༌། བསམ་གཏན་གྱི་མཐའ་བཞི་པ་ལ་བརྟེན་ནས་ལམ་ལྷག་མ་བཞི་སྟན་གཅིག་ལ་མངོན་དུ་བྱེད་ཅིང་དེའི་ཚེ་མཐོང་སྤང་རྣམས་དང༌། སྲིད་རྩེའི་སྒོམ་སྤང་དགུ་ཙམ་ཞིག་སྤོང་བར་བཤད་དོ། །འདིའི་ལྟར་ན་ཆགས་བྲལ་སྔོན་སོང་ཡིན་ཞིང་ཕྱིར་མི་འོང་ཞུགས་གནས་ཀྱང་འོང་ངོ༌། །གཞན་ཡང་བྱང་ས་ལས། རང་རྒྱལ་བ་ནི་ཉན་ཐོས་ཇི་ལྟ་བ་དེ་ཁོ་ན་ལྟར་རིག་པར་བྱའོ། །ཞེས་བཤད་པས། ལམ་གྱི་རང་བཞིན་མཚུངས་པའི་ཕྱིར་ཞུགས་གནས་བརྒྱད་ཀ་རྩིར་རུང་ངོ༌། །བཞི་པ་ཚོགས་གསོགས་པ་ནི། དྲིན་ལན་བསབ་པ་ལས། རང་སངས་རྒྱས་རྣམས་ནི་བསྐལ་པ་ཆེན་པོ་བརྒྱས་ཚར་ཕྱིན་པར་འགྱུར་རོ། །ཞེས་སྤྱིར་གསུངས་པས་གསུམ་ཀ་འདྲ་བར་བསྐལ་ཆེན་བརྒྱར་ཚོགས་གསོག་གོ། །དེ་གསུམ་ལས་ཕྱི་མ་གཉིས་ཉན་ཐོས་ཀྱི་རིགས་ཅན་མ་ངེས་པ་འགའ་ཞིག་རང་རྒྱལ་དུ་སོང་བ་ཡིན་པར་མཛོད་འགྲེལ་ལས་བཤད་དོ། ལྔ་བ་གནས་པ་ལ་ཐུགས་དང་ལུས་ཀྱི་གནས་པ་གཉིས་ལས་དང་པོ་ནི། ཆོས་ཟབ་མོ་ལ་མོས་པ་དང༌། རྟེན་འབྲེལ་ཟབ་མོ་རྟོགས་པ་ལྷུར་ལེན་པ་དང༌། རྣམ་ཐར་སྒོ་གསུམ་ཡིད་ལ་བྱེད་ཅིང་གནས་པ་
ནི་གསུམ་ཀ་ལ་འདྲའོ། །གཉིས་པ་ལུས་ཀྱི་གནས་པ་ནི། བསེ་རུ་ལྟར་སྤྱོད་པ་ནི། གཅིག་པུར་གནས་ལ། ལྷག་མ་གཉིས་ཚོགས་དང་གནས་པར་འགྱུར་རོ། །དྲུག་པ་རྒྱུ་བ་ནི། དེ་དག་ཐམས་ཅད་ཀྱང་གྲོང་ངམ་གྲོང་རྡལ་གང་དུ་བརྟེན་ཅིང་གནས་ཀྱང་རུང་སྟེ། ལུས་ཤིན་ཏུ་བསྲུང་བ་དང༌། དབང་པོ་རྣམས་བསྡམས་པ་དང༌། དྲན་པ་ལ་ཤིན་ཏུ་གནས་པས་གྲོང་ལ་སོགས་པར་བསོད་སྙོམས་ལ་འཇུག་སྟེ། དམན་པ་རྣམས་ལ་བརྩེ་བར་བྱེད་པ་ན་ཡང་ལུས་ཀྱིས་ཡིན་གྱི། ངག་གིས་ནི་མ་ཡིན་ཏེ་དེ་དག་ཀྱང་ལུས་ཀྱིས་ཆོས་སྟོན་གྱི་ངག་གིས་མི་སྟོན་པའི་ཕྱིར་དང༌། ཞེ་འགྲས་པ་བཟློག་པའི་ཕྱིར་རྫུ་འཕྲུལ་དུ་མ་སྟོན་པར་མཛད་དོ། །བདུན་པ་སྒྲ་བཤད་པ་ནི། མཛོད་འགྲེལ་ལས། ལུང་མེད་པར་བདག་གཅིག་པུའི་ཕྱིར་སངས་རྒྱས་པས་རང་སངས་རྒྱས་ཏེ་ཞེས་དང༌། བྱེ་བྲག་དང་པོའི་སྒྲ་བཤད། ཇི་ལྟར་བསེ་རུ་དག་གཉིས་པ་མེད་པ་དེ་བཞིན་དུ་དེ་དག་ཀྱང་ཁྱིམ་པ་དང༌། རབ་ཏུ་བྱུང་བ་རྣམས་དང༌། རང་སངས་རྒྱས་གཞན་དག་དང་མི་འདྲེ་བར་གནས་པས་ན་བསེ་རུ་ལྟ་བུ་རྣམས་ཞེས་བྱའོ། །ཞེས་པ་ལྟར་རོ། །གསུམ་པ་བྱང་སེམས་ཀྱི་ལམ་ཤེས་ལ་གཉིས། མཐོང་ལམ་དང༌། སྒོམ་ལམ་མོ། །དང་པོ་མཐོང་ལམ་ལ་གཉིས། མཐོང་ལམ་སྐྱེ་བའི་རྟེན། བརྟེན་པ་མཐོང་བའི་ལམ་མོ། །དང་
པོ་རྟེན་ལ་གཉིས། ལུས་རྟེན་དང༌། སེམས་རྟེན་ནོ། །དང་པོ་ལུས་རྟེན་ནི། སྒྲ་མི་སྙན་པ་མ་གཏོགས་པའི་མི་དང་འདོད་ལྷའི་རྟེན་ལ་སྐྱེ་སྟེ། ངན་སོང་དང་སྒྲ་མི་སྙན་པ་རྣམས་ནི་རྣམ་སྨིན་གྱི་སྒྲིབ་པ་ཅན་ཡིན་ལ། །ཁམས་གོང་མ་ན་སྐྱེ་བ་མེད་ཅིང༌། མི་སྐྱེ་བར་ཡང་བདེན་པ་རྟོགས་པར་བྱེད་མི་ནུས་སོ། ཞེས་བསྡུ་བ་དང་མཛོད་ལས་བཤད་དོ། །གཉིས་པ་སེམས་རྟེན་ནི། བསམ་གཏན་ས་དྲུག་གང་ཡང་རུང་བ་སྟེ་གཟུགས་མེད་རྣམས་ནི་ལྷག་མཐོང་ཤས་ཆུང་བས་མི་བརྟེན་ནོ། །གཉིས་པ་བརྟེན་པ་མཐོང་ལམ་ལ། སྐད་ཅིག་མ་དུར་བཤད་པ། མཐོང་སྤང་སྤོང་ཚུལ་བསྟན་པ། སྐད་ཅིག་མ་དུར་སྐྱེ་བ་བཤད་པའོ། །དང་པོ་སྐད་ཅིག་མ་དུར་བཤད་པ་ནི། སྡེ་བ་རྣམས་ལ་གྲངས་མང་ཉུང་འདོད་ཚུལ་དུ་མ་བཤད་ཀྱང༌། གྲགས་ཆེ་བ་ལ་མཛོད་དུ། དེ་ལ་སྐད་ཅིག་བཅོ་ལྔ་ནི། །མ་མཐོང་མཐོང་ཕྱིར་མཐོང་བའི་ལམ། །ཞེས་མཐོང་ལམ་སྐད་ཅིག་བཅོ་ལྔ་དང་ལམ་རྗེས་ཤེས་སྒོམ་ལམ་དུ་བཞེད་དོ། །ཡུམ་གྱི་རྒྱན་འདི་དང་ཀུན་བཏུས་ལ་སོགས་པར་སྐད་ཅིག་བཅུ་དྲུག་ཏུ་བཤད་དོ། །གཉིས་པ་མཐོང་སྤང་སྤོང་ཚུལ་ནི། མཛོད་དུ་ཆོས་བཟོད་བཞི་འདོད་པའི་མཐོང་སྤང་སྤོང་བའི་བར་ཆད་མེད་ལམ་དང༌། ཆོས་ཤེས་བཞི་དེའི་རྣམ་གྲོལ་ལམ་དང༌། རྗེས་བཟོད་བཞི་ཁམས་གོང་གི་མཐོང་སྤང་སྤོང་བའི་བར་ཆད་མེད་ལམ་དང༌།
རྗེས་ཤེས་བཞི་དེའི་རྣམ་གྲོལ་ལམ་དུ་བཤད་དོ། །ཀུན་བཏུས་ཀྱི་ལུགས་ཀྱིས་སྡུག་བསྔལ་ཆོས་བཟོད་ཀྱིས་ཁམས་གསུམ་ཀའི་སྡུག་བསྔལ་མཐོང་སྤང་སྤོང་ཞིང༌། སྡུག་བསྔལ་ལ་ཆོས་ཤེས་ཀྱིས་རྣམ་གྲོལ་ལམ་མངོན་དུ་བྱེད་ལ། སྡུག་བསྔལ་ལ་རྗེས་བཟོད་ཀྱིས་སྡུག་བསྔལ་ཆོས་བཟོད་ཆོས་ཤེས་གཉིས་ལ་དམིགས་ནས་འདི་ནི་འཕགས་པའི་ཆོས་རྣམས་ཀྱི་རྒྱུའོ་ཞེས་འཛིན་ལ། །སྡུག་བསྔལ་རྗེས་ཤེས་ཀྱིས་རྗེས་བཟོད་ལ་དམིགས་ནས་སྔར་ལྟར་འཛིན་པའོ། །ལྷག་མ་གསུམ་ཡང་དེ་དང་འདྲའོ། །དེ་ལྟར་ན་ཡེ་ཤེས་དེ་དག་གི་ཡུལ་ནི་ཆོས་བཟོད་ཆོས་ཤེས་ཀྱིས་བདེན་པའི་ཆོས་ཉིད་ལ་དམིགས་པས་གཟུང་བ་དང༌། རྗེས་བཟོད་རྗེས་ཤེས་ཀྱིས་ཡུལ་ཅན་ཡེ་ཤེས་ལ་དམིགས་པས་འཛིན་པའི་ཡུལ་ཅན་ཡིན་ལ། སྐད་ཅིག་གི་ཚད་ནི་ཇི་ཙམ་གྱིས་རང་ཡུལ་རྟོགས་པ་རྫོགས་པའི་བར་ཏེ། བྱ་རྫོགས་ཀྱི་ཡིན་གྱི་དུས་མཐའི་སྐད་ཅིག་ནི་མ་ཡིན་ཏེ། དེ་ནི་ཐ་སྙད་དུ་མི་རུང་བའི་ཕྱིར་རོ། །ཞེས་བཞེད་དེ་སློབ་དཔོན་སེང་གེ་བཟང་པོ་སོགས་མཁས་པ་ཕལ་མོ་ཆེ་ལུགས་ཕྱི་མ་འདིའི་རྗེས་སུ་འབྲང་ངོ༌། །གསུམ་པ་སྐད་ཅིག་མ་དུར་སྐྱེ་བ་བཤད་པ་ལ་གསུམ། འདོད་པ་དགོད། འཐད་ཕྱོགས་བསྟན་་ལུང་ནས་གསུངས་ཚུལ་ལོ། །དང་པོ་འདོད་པ་དགོད་པ་ལ་གཉིས་ལས། ལུགས་དང་པོ་ནི། འབྲས་བུ་མངོན་རྟོགས་ལ་ལྟོས་
ནས་མཐོང་ལམ་སྐད་ཅིག་མ་གཅིག་ཡིན་ནས། སོ་སོར་རྟོག་པའི་མངོན་རྟོགས་ལ་ལྟོས་ན་སྐད་ཅིག་མ་བཅུ་དྲུག་གོ་ཞེས་ཟེར་རོ། །དེ་ལ་དང་པོའི་དོན་ནི་བདེན་བཞི་ལ་རིམ་པ་ལྟར་ཤེས་པ་དང༌། སྤོང་བ་དང༌། མངོན་དུ་དང༌། སྒོམ་པར་བྱེད་པ་ནི་མཐོང་ལམ་གྱི་བྱ་བའི་ལས་ཡིན་པས་འབྲས་བུ་ཡིན་ལ། དེའི་དབང་དུ་བྱས་ན་སྐད་ཅིག་གཅིག་ཡིན་ཏེ། སྡུག་བསྔལ་མཐོང་བའི་ཚེ་སྡུག་བསྔལ་མཐོང་སྤང་སྤོང་ལ། དེ་ཀུན་འབྱུང་ཡིན་པས་ཀུན་འབྱུང་ཡང་སྤོང་ངོ༌། །དེ་ཡང་སྤངས་བ་འགོག་པ་ཡིན་པས་འགོག་པ་ཡང་མངོན་དུ་བྱེད་དོ། །དེ་ཡང་ལམ་སྒོམ་པ་མེད་ན་མེད་པས་དེ་དག་དུས་གཅིག་གོ། །གཉིས་པའི་དོན་ནི། དེ་ལྟར་གཅིག་ཡིན་ཀྱང་བདེན་པ་རེ་རེ་ལ་སྒྲོ་འདོགས་ཀྱི་རྣམ་པ་མི་འདྲ་བ་བཅད་ནས་རྗེས་སུ་ངེས་པ་སྐྱེ་བའི་རིམ་པ་ལ་ལྟོས་ནས་བཅུ་དྲུག་ཏུ་བཞག་པའོ། ཞེས་པའོ། །དེ་ལྟར་ན་བདེན་བཞི་ལ་ཤེས་སྤོང་ལ་སོགས་པའི་བྱ་བ་བྱེད་ཚུལ་གྱི་སྒོ་ནས་རིམ་པ་མེད་ཀྱང༌། ངེས་པ་འདྲེན་ཚུལ་གྱི་སྒོ་ནས་བཅུ་དྲུག་རིམ་ཅན་དུ་འབྱུང་ལ། འདིའི་ལྟར་ན་མཐོང་ལམ་ལ་ཞུགས་གནས་ཀྱི་རྣམ་བཞག་རྣམས་ཀྱང་རུང་བ་ཡིན་ནོ། །ལུགས་གཉིས་པ་ནི། །སོ་སོར་རྟོག་པའི་མངོན་རྟོགས་ལ་ཡང་སྐད་ཅིག་གཅིག་ཡིན་ཏེ། ཆོས་ཐམས་ཅད་དངོས་པོ་མེད་པའོ། །ཞེས་བསྒོམས་པས་སྒོམ་པ་མཐར་སོན་པ་ན། དོན་གྱི་རང་གི་ངོ་བོ་གཅིག །བདག་ཉིད་མངོན་སུམ་
ཡིན་པ་ལ། །ཚད་མ་རྣམས་ཀྱིས་བརྟག་བྱ་གང༌། །མ་མཐོང་ཆ་གཞན་ཅི་ཞིག་ཡོད། །ཅེས་པའི་ཚུལ་གྱིས་བདེན་པ་བཞི་ཀའི་དེ་ཁོ་ན་ཉིད་ཀྱི་ཡུལ་ཅན་ཟག་མེད་ཀྱི་ཡེ་ཤེས་སྐྱེ་བས་སླར་ཡང་མ་མཐོང་པ་མཐོང་བར་བྱ་བ་མེད་པའི་ཕྱིར་རོ། །སྤང་བྱ་སྤོང་ཚུལ་ཡང་འཇིག་ལྟ་དང་ཆགས་སོགས་ཀྱི་ཉོན་མོངས་དངོས་པོར་མངོན་པར་ཞེན་པས་ཀུན་ནས་བསླང་ལ། དེ་ལས་གྲོལ་བ་ནི་ཞེན་པ་ལྟར་མེད་པར་མཐོང་བ་ལས་ཡིན་པའི་ཕྱིར། དེ་ལ་ཡང་རིམ་པ་མེད་དོ། །གཉིས་པ་འཐད་ཕྱོགས་འགོད་པ་ནི། ལུགས་ཕྱི་མ་མི་འཐད་དེ། དེ་ལྟར་ན་སྐད་ཅིག་མ་གཅིག་ལ་མཐོང་ལམ་གྱི་རྟོགས་བྱའི་རྣམ་པ་ཐམས་ཅད་རྫོགས་པས་རྣམ་པ་ལྷག་མའི་སྒོ་ནས་མཐོང་ལམ་སྒོམ་པ་མེད་པའི་ཕྱིར། མཐོང་ལམ་ལ་ཞུགས་གནས་ཀྱི་རྣམ་བཞག་ཇི་ལྟར་རུང༌། བདེན་བཞིའི་དེ་ཉིད་མཐོང་བ་ཙམ་གྱིས་བཟློག་ཕྱོགས་སུ་སྒྲོ་འདོགས་བར་མི་བྱེད་ན་སོ་སོར་རྟོག་པའི་མངོན་རྟོགས་ལ་སྐད་ཅིག་གཅིག་ཏུ་འགྱུར་ཡང༌། གང་གི་ཚེ་འཁྲུལ་པའི་རྒྱུ་འགའ་ཞིག་ལས། བཟློག་ཕྱོགས་སུ་སྒྲོ་འདོགས་པའི་རྣམ་པ་གཞན་དག་ཡོད་པའི་ཕྱིར། དེ་དྲུང་ནས་དབྱུང་བའི་དོན་དུ་རྣམ་པ་གཞན་དག་གིས། །སྒོམ་པ་གཞན་ཡང་ཡོད་པའི་ཕྱིར། །ཞུགས་གནས་ཀྱི་རྣམ་བཞག་ཀྱང་འཐད་པ་ཡིན་ནོ། །དེས་ན་རྣམ་པར་ཤེས་པས་
བདེན་བཞིའི་དེ་ཁོ་ན་ཉིད་ཀྱི་རྣམ་པ་ཐམས་ཅད་བཟུང་ཡང༌། ཆ་གང་ལ་གོམ་པ་གསལ་བ་ལ་སོགས་པའི་མཐུས་སྒྲོ་བཏགས་པའི་རྣམ་པ་སེལ་ནུས་པ་དེ་ཉིད་དེའི་གེགས་སུ་གྱུར་བའི་སྒྲིབ་པ་སེལ་བས་དེ་ལ་ཚད་མ་ཡིན་གྱི་ཆ་གཞན་ལ་མ་ཡིན་ཏེ། སྔོན་པོ་དང་སྐད་ཅིག་མ་མཐོང་བ་ལ་ཁྱད་མེད་ཀྱང་སྔོ་མིན་དུ་སྒྲོ་འདོགས་སེལ་ནུས་ཀྱི་རྟག་འཛིན་སེལ་མི་ནུས་པ་བཞིན་ནོ། །མཐོང་ཡང་ངེས་པ་མི་འདྲེན་ན་འཕགས་པ་དང་སོ་སྐྱེ་ལ་ཁྱད་པར་ཅི་ཞིག་ཡོད་ཅེས་ཀྱང་བརྗོད་པར་མི་བྱ་སྟེ། རྣམ་པ་ཅི་ཙམ་ཞིག་གསལ་བས་དེ་དག་གིས་ཤེས་པ་འཁྲུལ་པའི་རྒྱུ་དང་གཏན་བྲལ་བ་དེས་དེ་དག་ཁྱད་པར་དུ་འཕགས་པའི་ཕྱིར་རོ། །འདོད་པ་དགོད་པ་དང༌། དེ་འཐད་མི་འཐད་དཔྱད་པ་འདི་དག་རྒྱན་སྣང་ལས་འབྱུང་བ་ལྟར་ཏེ། འདི་ལྟར་ན་བདེན་བཞིའི་དེ་ཁོ་ན་ཉིད་ལ་ཆ་མེད་པས་མཐོང་བའི་ཚེ། མཐའ་དག་མཐོང་ཡང་མཐོང་བ་ལ་ངེས་པ་འདྲེན་པ་མ་ཁྱབ་པའི་ཕྱིར། སྒྲོ་འདོགས་བསལ་ཞིང་ངེས་པ་བསྐྱེད་པའི་ཕྱིར་དུ། སྐད་ཅིག་མ་བཅུ་དྲུག་གིས་མཐོང་ལམ་སྒོམ་པར་བཞེད་པས་མཉམ་གཞག་ལ་བཟོད་ཤེས་བཅུ་དྲུག་རིམ་ཅན་དུ་སྐྱེ་ཡང༌། ཡུལ་དེ་བཞིན་ཉིད་རྟོགས་ཚུལ་མི་མཐུན་པ་མེད་པས་རྒྱུན་གཅིག་ཡིན་པས་སྐད་ཅིག་གཅིག་དང༌། རྟོགས་ཚུལ་མི་འདྲ་བ་བཤད་པ་བཅུ་དྲུག་ནི་རྗེས་ཐོབ་ཀྱི་ངེས་པ་འདྲེན་ཚུལ་ལ་བཞག་གོ། །གསུམ་པ་ལུང་ནས་བཤད་པ་ལ་གཉིས་
ལས། དབུ་མ་ནས་བཤད་པ་ནི་རིག་པ་དྲུག་ཅུ་པར། །ཆོས་ཤེས་པ་ཡི་མཇུག་ཐོག་ཏུ། །འདི་ལ་བྱེ་བྲག་ཡོད་ན་འདི། །དངོས་པོ་ཤིན་ཏུ་ཕྲ་བ་ཡང༌། །གང་གིས་སྐྱེ་བ་རྣམ་བརྟགས་པ། །རྣམ་པར་མི་མཁས་དེ་ཡིས་ནི། །རྐྱེན་ལས་བྱུང་བའི་དོན་མ་མཐོང༌། །ཞེས་པ་རྩ་འགྲེལ་གྱི་དོན། རྟེན་འབྲེལ་གྱི་ཆོས་ལ་སྐྱེ་འགག་མེད་པར་ཤེས་པས་སྡུག་བསྔལ་དང༌། ཀུན་འབྱུང་དང་ལམ་གསུམ་གྱི་རང་བཞིན་ཡང་སྐྱེ་འགག་མེད་པར་རྟོགས་ལ། རང་བཞིན་དེ་ཡང་འགོག་པའི་རང་བཞིན་ཡིན་པས་བདེན་པ་བཞིའི་རང་བཞིན་ཅིག་ཆར་རྟོགས་ཀྱིས། །ཆོས་ཤེས་ཀྱི་མཇུག་ཏུ་རྟོགས་པའི་རྣམ་པ་མི་འདྲ་བའི་ཚུལ་གྱིས་རིམ་ཅན་དུ་རྟོགས་པ་མིན་ནོ། །དེའི་ཕྱིར་མངོན་རྟོགས་གཅིག་ཏུ་ཟད་དོ། །འོན་ཀྱང་སྐད་ཅིག་བཅོ་ལྔའམ་བཅུ་དྲུག་ཏུ་བཞག་པ་ནི་སྤྲོས་པ་ལ་དགའ་བ་རྣམས་ལ་ཕན་གདག་པའི་ཕྱིར་བཞག་སྟེ། བདེན་བཞིའི་རང་བཞིན་ལ་མི་སྐྲག་པ་ཆོས་བཟོད། །ཚུལ་བཞིན་དུ་རིག་པས་ཆོས་ཤེས། རྗེས་ཤེས་ཀྱི་ཚེ་ཡང་དེ་ལྟར་མི་སྐྲག་ཅིང་རིག་པའི་ནུས་པ་དང་ལྡན་པས་རྗེས་བཟོད་དང་རྗེས་ཤེས་སོ་ཞེས་བཞེད་དོ། །བསྡུ་བ་ལས་ནི། བསྟན་པ་གནས་པ་རྒྱས་པ་དང་སྤྲོས་པ་དང་བཅས་པའི་རྣམ་བཞག་དང༌། དོན་དམ་པ་རྣམ་པར་བཞག་པ་སོ་སོ་རང་རིག་སྤྲོས་པ་མེད་པའོ།
དེ་ལ་རྣམ་པར་བཞག་པ་དང་པོའི་དབང་དུ་བྱས་ནས། ཆོས་ཤེས་ཀྱི་ཕྱོགས་མཐུན་ཆོས་བཟོད་བཞི་དང༌། རྗེས་ཤེས་ཀྱི་ཕྱོགས་མཐུན་རྗེས་བཟོད་བཞི་སྟེ་བརྒྱད་དང༌། ཞི་གནས་ཀྱི་སེམས་གཅིག་སྟེ་དགུས་ཞེས་འབྱུང་ཡང་ཤེས་པ་ཡོད་པས་བཅུ་དྲུག་གི་རྣམ་བཞག་དང༌། རྣམ་བཞག་གཉིས་པའི་དབང་དུ་བྱས་ན་དེ་བཞིན་ཉིད་ཀྱི་ཡུལ་ཅན་གྱི་སེམས་གཅིག་གིས་རྫོགས་པར་བཤད་ཅིང༌། དེ་ཡང་དང་པོ་བསྟན་པ་གནས་པའི་ཕྱིར་གདུལ་བྱའི་ངོར་བཤད་པ་སྤྲོས་བཅས་དང༌། གཉིས་པ་ནི་རྣལ་འབྱོར་པའི་རྒྱུད་ལ་སྐྱེ་བའི་ཚུལ་ངེས་དོན་སྤྲོས་མེད་ཀྱི་རྣམ་བཞག་ཏུ་མཛད་ཅིང༌། ཀུན་བཏུས་འགྲེལ་པ་ལས་ཀྱང་བཅུ་དྲུག་ཏུ་བཤད་པ་རྣམ་བཞག་ཙམ་དུ་མཛད་དོ། །དེ་ལྟར་ན་རེ་ཞིག་ཕྱི་མའི་བཞེད་པ་སྔར་བཤད་པའི་སློབ་དཔོན་གྱི་དགོངས་པ་དང་གཅིག་ཏུ་བྱས་ནས་ཁས་བླང་ན་རེ་ཞིག་ལ་བསྐྱང་བདེའོ། །གཉིས་པ་སྒོམ་ལམ་ལ་གཉིས། སྒོམ་ལམ་གྱི་བྱེད་པ་དང༌། བྱེད་པ་ཅན་གྱི་སྒོམ་ལམ་མོ། །དང་པོ་སྒོམ་ལམ་བྱེད་པ་ནི་རྣམ་པ་དྲུག་སྟེ། ཡོངས་སུ་དུལ་བ་དང་ང་རྒྱལ་མ་མཆིས་པས་ཀུན་ནས་ཞི་བ་དང༌། དེ་ཉིད་ཁྱད་ཞུགས་པར་ཐོས་པས་ཐམས་ཅད་ལ་འདུད་པ་དང༌། བདག་དང་གཞན་གྱི་ཉོན་མོངས་པའི་མཚོན་ཆ་བཅོམ་པས་ཉོན་མོངས་ལས་རྒྱལ་བ་དང༌། དེ་ལ་ལ་ལ་ཞིག་གིས་དུག་གཏོར་རམ། བྱད་བྱས་སམ། མེའི་འོབས་སུ་གཏོར་རམ། །མཚོན་གྱིས་
བཏབ་བམ། དུག་བླུད་དམ། ཆུར་བོར་ཡང་རུང་སྟེ་དེ་དག་གིས་གནོད་པར་མི་འགྱུར་བས་གནོད་པས་རྫི་བ་མེད་པ་དང༌། བླ་མེད་རྫོགས་བྱང་ཐོབ་ནས་སེམས་ཅན་ཐམས་ཅད་ཀྱི་སེམས་ལ་རྣམ་པར་ལྟ་བ་བྱང་ཆུབ་དང༌། གང་དུ་གནས་པའི་སའི་ཕྱོགས་དེ་སེམས་ཅན་ཐམས་ཅད་ཀྱི་མཆོད་རྟེན་དུ་འགྱུར་བར་བྱས་པ ་རྟེན་མཆོད་དང་དྲུག་གོ། །འདི་སྒོམ་ལམ་གྱི་སྔོན་དུ་བསྟན་པ་ནི། བརྗོད་བྱ་ཉུང་བ་དང༌། བྲོད་པ་བསྐྱེད་ནས་སྒོམ་ལམ་ལ་གཞུག་པའི་ཕྱིར་རོ། །གཉིས་པ་བྱེད་པ་ཅན་གྱི་སྒོམ་ལམ་ལ་གཉིས། ཟག་བཅས་དང་ཟག་མེད་དོ། །དེ་གཉིས་ཀྱི་ཁྱད་པར་ནི། གཉིས་སྣང་གི་རྟོག་པ་དང་བཅས་པའི་རྗེས་ཐོབ་དང༌། དེ་མེད་པའི་མཉམ་གཞག་ལ་བཞེད་དོ། །དང་པོ་ཟག་བཅས་སྒོམ་ལམ་ལ་གསུམ། ཟག་བཅས་སྒོམ་ལམ་གྱི་དབྱེ་བ། ཕྱེ་བ་སོ་སོའི་རང་བཞིན། བྱེད་ལས་ཀྱི་སྒོ་ནས་དོན་བསྡུ་བའོ། །དང་པོ་དབྱེ་བ་ལ་དབྱེ་བ་དངོས་དང་ས་མཚམས་བསྟན་པའོ། །དང་པོ་ལ་དབྱེ་བ་དངོས་ནི། ཟག་བཅས་སྒོམ་ལམ་ལ་དབྱེ་ན་གསུམ་སྟེ། མོས་པ། བསྔོ་བ། རྗེས་སུ་ཡི་རང་བ་ཡིད་ལ་བྱེད་པ་གསུམ་མོ། །དེ་ལྟར་འབྱེད་པའི་རྒྱུ་མཚན་ནི། དགེ་རྩ་གསོག་པ་དང༌། མི་ཟད་པ་དང༌། འཕེལ་བར་བྱེད་པ་ཡིན་ནོ། །ཤེར་འབྱུང་གིས་སྦྱོར་དངོས་རྗེས་
གསུམ་གྱི་དབྱེ་བར་འདོད་དོ། །འདི་གསུམ་དངོས་པོ་ཐ་དད་དེ། འཛིན་སྟངས་ཐ་དད་པས་ཕྱེ་བའི་ཕྱིར་རོ། །གཉིས་པ་ས་མཚམས་ནི། མོས་པ་རྣམ་པ་གསུམ་ནི། ས་བདུན་པའི་བར་དུ་ཉོན་ཡིད་འཇུག་པས་བདག་ཏུ་ང་རྒྱལ་བའི་ས་བོན་མ་ཟད་པས་རང་དོན་མོས་པ་དང༌། བརྒྱད་པར་རང་དོན་དུ་ཞི་བ་ལ་གནས་པ་ན་སླར་རྫོགས་པའི་སངས་རྒྱས་རྣམས་ཀྱིས་གཞན་དོན་དུ་བསླངས་ནས་རང་གཞན་གཉིས་ཀའི་དོན་དང༌། བཅུ་པར་རྗེས་ཐོབ་གཞན་དོན་གྱི་མཛད་པ་སངས་རྒྱས་དང་མཚུངས་པས་གཞན་དོན་མོས་པའོ། །བསྔོ་བ་དང་ཡི་རང་གཉིས་ནི་ས་དགུ་ཀ་ལ་བཞག་གོ། །གཉིས་པ་ཕྱེ་བ་སོ་སོའི་རང་བཞིན་ལ་གསུམ། མོས་པ། བསྔོ་བ། ཡི་རང་ངོ༌། །དང་པོ་མོས་པ་ལ་གཉིས། དངོས་དང་ཕན་ཡོན་ནོ། །དང་པོ་མོས་པ་དངོས་ལ་བཞི། མོས་པའི་ཡུལ། མོས་པའི་ངོ་བོ། མོས་པའི་རྒྱུ། མོས་པའི་བྱེད་ལས་སོ། །དང་པོ་མོས་ཡུལ་ནི། །རྒྱན་སྣང་ལས་གཞུང་ལམ་འབྲས་བུ་ཤེར་ཕྱིན་གསུམ་ཀ་ལ་བཤད་ཅིང༌། དག་ལྡན་ལས། གཞུང་གི་ཡུམ་འདི་ཀློག་བྱེད་པ་དང༌། མེ་ཏོག་སོགས་ཀྱིས་མཆོད་པ་ལ་མོས་པས་དེ་མོས་ཡུལ་དུ་འཆད་དོ། །གཉིས་པ་ངོ་བོ་ལ་སྤྱིའི་ངོ་བོ་ནི། ཚིགས་གསལ་ལས། ངེས་པར་བྱ་བའི་དངོས་པོ་ལ་ངེས་པར་འཛིན་པའོ། །ཞེས་ཀུན་བཏུས་ལས་སེམས་བྱུང་མོས་པ་བཤད་པ་དང་གཅིག་ཏུ་ངོས་བཟུང་ཞིང༌། དག་ལྡན་ལས། མོས་
པ་ནི་དད་པ་དང་འདུན་པ་སྟེ་ཡིད་ཆེས་པ་དང་འདོད་པའི་མཚན་ཉིད་དོ། །ཞེས་ཡིད་ཆེས་ཀྱི་དད་པ་དང༌། ཡུལ་དེ་འདོད་པ་ལ་བཤད་དོ། །བྱེ་བྲག་གི་ངོ་བོ་ནི། ཉི་སྣང་ལས། རང་གི་དོན་གྱི་མོས་པ་ནི་གང་གིས་རང་གི་དོན་ཉིད་སྒྲུབ་པར་བྱེད་ཅིང༌། གཞན་གྱི་དོན་ཡང་ཆེད་དུ་བྱ་བའི་རང་བཞིན་ཅན་གྱི་བྱེད་པའོ། །རང་དང་གཞན་གྱི་དོན་ནི་གང་གིས་གཉིས་ཀའི་དོན་སྒྲུབ་པའོ། །གཞན་གྱི་དོན་ནི་གཞན་ཁོ་ནའི་དོན་དུ་འགྱུར་བ་སྟེ། ཞེས་བསམ་པ་གཞན་དོན་དང་མ་བྲལ་ཡང་སྦྱོར་བའི་ཁྱད་པར་དང༌། གཉིས་པ་ལ་ནི་སྦྱོར་བ་བར་ཆད་དང་བཅས་པ་དང༌། གསུམ་པ་ལ་ནི་སྦྱོར་བ་བར་ཆད་མེད་པ་ཡིན་ནོ་ཞེས་སྦྱོར་བ་རྒྱུན་ལྡན་དུ་འཇུག་མི་འཇུག་གི་ཁྱད་པར་གསུངས་སོ། །གསུམ་པ་མོས་པའི་རྒྱུ་ནི། ལུང་རིགས་རྣམ་དག་གོ། །བཞི་པ་བྱེད་ལས་ནི། སྔ་མ་ལྟར་ན་གྲུབ་མཐའ་ལ་ཐེ་ཚོམ་བཟློག་པ་ཡིན་ལ། ཕྱི་མ་ལྟར་ན་ཡིད་མི་ཆེས་པ་དང༌། མི་འདོད་པ་བཟློག་ནས་ཡུམ་ལ་ངེས་ཤེས་དང་དོན་གཉེར་ཆེན་པོར་འགྱུར་བའོ། །གཉིས་པ་མོས་པའི་ཕན་ཡོན་ལ་གཉིས། ངོ་བོ་དང་དབྱེ་བའོ། །དང་པོ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་མོས་བསྒོམ་མཁན་གྱི་ཡོན་ཏན་དོན་གནས་མ་ནོར་བ་ཇི་ལྟ་བ་བཞིན་དུ་རྟོགས་པའི་ཆ་དང༌། དེ་ལྟར་ངེས་ནས་བརྗོད་པའི་མཚན་ཉིད་གཅམ་བུ་སྟེ་ངག་སྙན་པོའི་ངོ་བསྟོད་ཀྱི་ངོ་བོ་མ་ཡིན་པའོ། །གཉིས་
པ་རྩ་བའི་དབྱེ་བ་གསུམ་སྟེ། རང་དོན་མོས་པའི་སྐབས་སུ་བསྟོད་པ། གཉིས་དོན་མོས་པའི་སྐབས་སུ་བཀུར་བ། གཞན་དོན་མོས་པའི་སྐབས་སུ་བསྔགས་པའོ། །དེ་གསུམ་ནི། སྙིང་པོ་མཆོག་ཏུ། དེ་ལ་ཡོན་ཏན་བརྗོད་པ་ཆུང་ངུ་དང༌། འབྲིང་དང༌། ཆེན་པོས་དབྱེ་ནས་བསྟོད་པ་དང༌། བཀུར་བ་དང༌། བསྔགས་པ་ཡིན་ནོ། །ཞེས་སོ། །གཉིས་པ་བསྔོ་བ་སྒོམ་ལམ་ལ་གསུམ། ཁྱད་པར་་བྱེད་བ་་ངོ་བོའོ། དང་པོ་ཁྱད་པར་ནི། བྱང་སེམས་ཀྱི་དགེ་རྩ་སེམས་ཅན་ཀུན་དང་ཐུན་མོང་དུ་བྱས་ནས་བླ་མེད་བྱང་ཆུབ་ཏུ་མི་དམིགས་པའི་ཚུལ་གྱིས་བསྔོ་བ་སྟེ་སེམས་ཅན་ཐམས་ཅད་ཀྱི་དགེ་བ་དང་ཉན་རང་གི་དགེ་བ་ལས་རབ་ཏུ་གྱུར་པའོ། །གཉིས་པ་བྱེད་པ་ནི། སེམས་ཅན་རྣམས་ལ་ཐེག་གསུམ་གྱིས་ངེས་པར་འབྱུང་བའི་ལམ་སྟོན་པའི་རྒྱུར་གྱུར་པའོ། །གསུམ་པ་ངོ་བོ་ནི། རྒྱན་ལས། །བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་པ་ལྟར་དགེ་རྩ་བྱང་ཆུབ་ཏུ་སྟོབས་པར་བྱེད་པའི་སེམས་པ་དང༌། །མི་ཟད་པར་འདོད་པའི་འདུན་པ་རྣམས་ཅི་རིག་པ་སྟེ། རང་བཞིན་མེད་རྟོགས་ཀྱི་ཤེས་རབ་ཀྱང་དགོས་སོ། །གསུམ་པ་ཡི་རང་སྒོམ་ལམ་ལ་གཉིས། གང་ལ་ཡི་རང་ན། དེ་བཞིན་གཤེགས་པ་རྣམས་སེམས་བསྐྱེད་ནས་སངས་རྒྱས་ཀྱི་བར་དང༌། དེ་ནས་མྱ་ངན་འདས་ཀྱི་དང༌། དེ་ནས་དམ་པའི་ཆོས་ནུབ་པར་གྱུར་པའི་བར་གྱི་དགེ་བ་དང་
སེམས་ཅན་རྣམས་ཐེག་གསུམ་གྱིས་སྨིན་པར་བྱས་པ་དང༌། སློབ་མི་སློབ་ལ་སོགས་པ་རང་དང་གཞན་གྱི་འཇིག་རྟེན་ལས་འདས་མ་འདས་ཀྱི་དགེ་བ་ཐམས་ཅད་དོ། །ཚུལ་ཇི་ལྟར་ཡི་རང་ན། ཀུན་རྫོབ་ཏུ་ཐབས་མཁས་ཀྱིས་སྒྱུ་མ་ལྟ་བུར་དམིགས་ནས་དང༌། དོན་དམ་པར་ཤེས་རབ་ཀྱིས་ཅིར་ཡང་མི་དམིགས་པར་རྟོགས་པ་ཉིད་ཀྱིས་སོ། །གསུམ་པ་བྱེད་ལས་ཀྱི་སྒོ་ནས་དོན་བསྡུ་བ་ནི། ཟག་བཅས་སྒོམ་ལམ་གསུམ་ཡོད་པ་དེའི་ནང་ནས་མོས་པ་ཡིད་ལ་བྱེད་པས་ནི། བསོད་ནམས་དུ་མ་མངོན་པར་འདུ་བྱེད་པ་སྟེ། མདོ་ལས། བསམ་མི་ཁྱབ་ལ་དད་རྣམས་ཀྱི། །རྣམ་པར་སྨིན་པའང་བསམ་མི་ཁྱབ། །ཅེས་པ་ལྟར་ཡུལ་བླ་ན་མེད་པ་ལ་ཡིད་ཆེས་པའི་དད་པའོ། །འདུ་བྱེད་པའི་དཔེ་ནི། གསེར་གྱི་འབྱུང་ཁུང་དག་ནས་གསེར་གྱི་གར་བུ་འབྱུང་བ་བཞིན་དུའོ། །བསྔོ་བ་ཡིད་ལ་བྱེད་པས་ནི་མོས་པས་བསྐྲུན་པའི་དགེ་བ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་སྟེ་རྒྱུར་བྱེད་དེ། ཤེས་རབ་དང་སྙིང་རྗེས་དགེ་རྩ་རྣམས་རྫོགས་བྱང་དུ་སྟོབ་པའོ། །རྒྱུར་སྒྱུར་བའི་དཔེ་ནི། གསེར་མགར་གྱིས་གསེར་སྒྲོམ་སྐྱེས་བུའི་རྣ་རྒྱན་སོགས་སུ་སྒྱུར་བ་བཞིན་དུའོ། །རྗེས་སུ་ཡི་རང་བ་ཡིད་ལ་བྱེད་པས་ནི། ཡི་རང་སྒོམ་པ་པོ་རང་དང་དགེ་བ་སྒྲུབ་པ་པོ་གཞན་གྱི་བསོད་ནམས་བྱ་བ་མཉམ་པ་ཉིད་འཐོབ་སྟེ། ཕྲག་དོག་ཟད་པའི་སྒོ་ནས་གཞན་གྱིས་
བྱས་པ་ལ་རང་གིས་བྱས་པ་ལྟར་གྱི་དགའ་བ་སྒོམ་པས་སོ། །དེ་ཡང་བློ་མཉམ་ན་མཉམ་པོ་དང༌། མི་མཉམ་ན་ཡང་དེ་ལྟར་འཐོབ་ཅེས་འཆད་དོ། །འདིར་བསྔོ་བ་གོང་དང༌། སྡུད་པར་ཡི་རང་གོང་དུ་བསྟན་པ་ནི། བསྔོས་པའི་དགེ་བ་ཡི་རང་གིས་སྤེལ་བ་དང༌། ཡི་རང་གི་དགེ་བ་བསྔོ་བ་གཉིས་ཕན་ཚུན་མཚོན་པར་འཆད་དོ། གཉིས་པ་ཟག་མེད་སྒོམ་ལམ་ལ་གཉིས། སྒྲུབ་པ་སྒོམ་ལམ་དང༌། རྣམ་དག་སྒོམ་ལམ་མོ། །འདི་གཉིས་ཀྱི་ཁྱད་ནི། །མཉམ་གཞག་ཟག་མེད་གཅིག་ཉིད་ཡུལ་རྟོགས་ཚུལ་གྱི་སྒོ་ནས་ཐོབ་བྱ་འགྲུབ་པར་བྱེད་པ་དང༌། སྤང་བྱ་འཇོམས་ཚུལ་གྱི་སྒོ་ནས་དྲི་མ་སེལ་བར་བྱེད་པ་གཉིས་ཀྱིས་ལྡོག་པ་ནས་བསྟན་པས་འདི་གཉིས་དངོས་པོ་ཐ་དད་པར་མི་བསམ་མོ། །དང་པོ་སྒྲུབ་པ་སྒོམ་ལམ་ལ་གཉིས། གང་གིས་སྒྲུབ་བྱེད་ཀྱི་རང་བཞིན་དང༌། གང་བསྒྲུབ་བྱ་ལ་ལྟོས་པའི་ནུས་པའོ། །དང་པོ་ནི། ངོ་བོའི་ཁྱད་པར། ཆོས་ཐམས་ཅད་ལ་ཕྱིན་ཅི་མ་ལོག་པའི་སྤྲོས་བྲལ་མངོན་སུམ་དུ་མཐོང་བ་ཁྱད་དུ་འཕགས་པའི་ཁྱད་བར་དམུས་ལོ་དད་མིགས་བུ་མེད་པ་དུ་མ་ཡོད་ཀྱང་གྲོང་དུ་འཇུག་མི་ནུས་པ་ལྟར། འདིས་མ་ཟིན་ན་ཕར་ཕྱིན་གཞན་ནམ་ཟག་བཅས་ཀྱིས་སངས་རྒྱས་ཐོབ་མི་ནུས་པས་འདིས་ཕར་ཕྱིན་གཞན་ཐམས་ཅད་ཟིལ་གྱིས་གནོན་པ། །རྣམ་པའི་ཁྱད་པར་ཀུན་ནས་ཉོན་མོངས་པ་དང་རྣམ་བྱང་གི་ཆོས་ཐམས་ཅད་མཉམ་པ་ཉིད་དུ་སྐྱེ་འཇིག་དང་དམིགས་པ་མེད་པར་རྟོགས་ནས་སྒྲུབ་པ་གསུམ་མོ། །གཉིས་པ་བསྒྲུབ་བྱ་ལ་ལྟོས་པའི་ནུས་པ་ནི། །གནས་སྐབས་རྣལ་འབྱོར་པའི་རྒྱུད་ལ་ལམ་གྱི་ཡོན་ཏན་ཐམས་
ཅད་མཚན་མར་མི་དམིགས་པའི་ཚུལ་གྱིས་སྐྱེད་པ་དང༌། མཐར་ཐུག་ཐོབ་བྱའི་དོན་འབྲས་བུ་ཆེན་པོ་སངས་རྒྱས་ཉིད་ཐོབ་པར་བྱེད་པའོ། །གཉིས་པ་རྣམ་དག་སྒོམ་ལམ་ལ་གཉིས། རྣམ་དག་གི་རྒྱུ་དང༌། རྣམ་དག་དངོས་སོ། །དང་པོ་རྒྱུ་ལ་ཡང་གཉིས། སྐྱེ་བའི་རྒྱུ་དང་མི་སྐྱེ་བའི་རྒྱུའོ། །དང་པོ་སྐྱེ་བའི་རྒྱུ་ནི་གསུམ་སྟེ། སངས་རྒྱས་གྲངས་མེད་པ་ཡུན་རིང་པོར་བསྙེན་བཀུར་བའི་སྒོ་ནས་མཉེས་པར་བྱས་པ་དང༌། སྦྱིན་སོགས་ཕར་ཕྱིན་རྣམས་རྫོགས་པར་བྱེད་པ་དང༌། ཕྱིན་དྲུག་སྒྲུབ་པའི་ཚེ་མི་དམིགས་སྤྲོས་བྲལ་གྱི་ཞི་གནས་སྒོམ་པ་ལ་མཁས་པ་དང་གསུམ་མོ། །གཉིས་པ་མི་སྐྱེ་བའི་རྒྱུ་ནི་བཞི་སྟེ། སྔོན་དགེ་རྩ་མ་བསགས་པས་བདུད་ཀྱིས་གནོད་པ་བྱས་པ་དང༌། ཐེག་ཆེན་གྱི་རིགས་མ་སྦྱངས་པས་ཆོས་ཟབ་མོ་སྤྲོས་བྲལ་ལ་མི་མོས་པ་དང༌། ཆོས་བདག་མེད་པའི་དོན་ལ་མ་གོམས་པས་ཕུང་སོགས་དངོས་པོར་འཛིན་པ་དང༌། དགེ་བའི་བཤེས་གཉེན་ལ་འདྲིས་པར་མ་བྱས་པས་སྡིག་གྲོགས་ཀྱི་དབང་དུ་སོང་བའོ། །གཉིས་པ་རྣམ་དག་དངོས་ལ། རྣམ་དག་སྤྱིར་བསྟན་པ་དང༌། བྱེ་བྲག་ཏུ་བཤད་པ་གཉིས། དང་པོ་ནི་མདོ་ལས། རབ་འབྱོར་གཞན་ཡང་གཟུགས་རྣམ་པར་དག་པ་དེ་ནི་འབྲས་བུ་རྣམ་པར་དག་པ་ཉིད་དོ། །འབྲས་བུ་རྣམ་པར་དག་པ་གང་ཡིན་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ། ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་
པ་དེ་ནི་གཟུགས་རྣམ་པར་དག་པ་སྟེ། དེ་ལྟར་ན་གཟུགས་རྣམ་པར་དག་པ་དང༌། འབྲས་བུ་རྣམ་པར་དག་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་གང་ཡིན་པ་འདི་ལ་གཉིས་སུ་མེད་ཅིང་གཉིས་སུ་བྱར་མེད་དེ་ཐ་མི་དད་ཅིང་གཅད་དུ་མེད་པའོ། །ཞེས་གསུངས་ཏེ། འདི་ལ་གསུམ། ཆོས་ཅན་དག་གཞི་གསུམ་གྱི་ངོ་བོ། །བསྒྲུབ་བྱ་དག་པ་གསུམ་གཅིག་ཡིན་པ། སྒྲུབ་བྱེད་གཉིས་མེད་སོགས་བཞིར་ཕྱེ་བའི་དོན་བཤད་པའོ། །དང་པོ་ཆོས་ཅན་དག་གཞི་གསུམ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ནི་སྒོམ་པའི་ལམ་མོ། །དེའི་འབྲས་བུ་ནི་བར་ཆད་མེད་ལམ་གྱིས་འབྲས་བུ་རྣམ་གྲོལ་ལམ་མོ། །གཟུགས་ལ་སོགས་པ་ནི་བསྒོམ་པའི་ལམ་གྱི་དམིགས་པའམ་ཡུལ་ལོ། །གཉིས་པ་དེ་གསུམ་གྱི་དག་པ་གཅིག་ཡིན་ཚུལ་ནི། །ཡུལ་ལ་ཞེན་པ་སྐྱེ་བ་དེ་སྲིད་དུ་མ་དག་པར་འཇོག་ལ་གང་གི་ཚེ་གཉེན་པོས་ཞེན་པ་སྤངས་པ་དེའི་ཚེ་དག་བྱའི་དྲི་མ་གཅིག་ལས་མེད་པས་ཡུལ་ཡུལ་ཅན་གཉིས་ཀ་ཡང་དྲི་མ་དེ་མི་སྐྱེ་བའི་དག་པ་ཡིན་མིན་དུ་ཁྱད་པར་མེད་པའོ། །གསུམ་པ་སྒྲུབ་བྱེད་གཉིས་མེད་སོགས་བཞི་ནི། གཉིས་མེད་ནི་གཟུང་འཛིན་གཉིས་སུ་མེད་པའོ། །གཉིས་སུ་བྱར་མེད་པ་ནི་ལྡེམ་པོར་དགོངས་བས་གཉིས་སུ་བྱར་མི་ནུས་པ་སྟེ་བློས་ཀྱང་གཟུང་འཛིན་གཉིས་སུ་བྱར་མི་ནུས་པའོ། །དབྱེར་མེད་པའམ་ཐ་མི་དད་པ་ནི་རང་བཞིན་
མི་འདྲ་བ་དུ་མ་མེད་པའོ། །གཅད་དུ་མེད་པ་ནི་ཡན་ལག་གམ་ཆ་ཤས་དུ་མ་མེད་པའོ། །ཡང་ན་སྔ་མ་གཉིས་ཀྱིས་བསྟན་ནས་ཕྱི་མ་གཉིས་ཀྱིས་བཤད་པའོ། །གཉིས་པ་རྣམ་དག་བྱེ་བྲག་ཏུ་བཤད་པ་ལ་གཉིས། ལམ་གྱི་དབྱེ་བ་དངོས་དང༌། མཐར་ཐུག་ལམ་གྱི་ཁྱད་པར་རོ། །དང་པོ་དབྱེ་བ་དངོས་ནི་བཞི་སྟེ། ཉོན་མོངས་པའི་སྒྲིབ་པ་ཉམས་པ་ཉན་ཐོས་ཀྱི་དག་པ་དང༌། ཤེས་སྒྲིབ་ཀྱི་ཕྱོགས་གཅིག་གཟུང་རྟོག་ཉམས་པ་རང་རྒྱལ་གྱི་དག་པ་དང༌། དེ་གཉིས་དང་འཛིན་རྟོག་སྟེ་ལམ་གསུམ་གྱི་སྒྲིབ་པ་དག་པ་བྱང་སེམས་ཀྱི་དག་པ་དང༌། སྒྲིབ་པའི་རྣམ་པ་ཀུན་གྱིས་དག་པ་སངས་རྒྱས་ཀྱི་དག་པ་སྟེ་ཤིན་ཏུ་བའམ་ཕུལ་དུ་བྱུང་བའི་དག་པའོ། །གཉིས་པ་མཐར་ཐུག་ལམ་གྱི་ཁྱད་པར་ནི། ཉན་རང་སངས་རྒྱས་གསུམ་ཡང་རང་རང་གྱི་ལམ་མཐར༌།ཐུག་པར་མཚུངས་པ་ཡིན་ན་དེ་ལས་སངས་རྒྱས་ཀྱི་རྣམ་དག་རྣམ་ཀུན་ཤིན་ཏུ་བ་དང༌། ཉན་རང་གི་རྣམ་དག་ཉི་ཚེ་བར་བཤད་པ་དེའི་རྒྱུ་མཚན་ཅི་ཡིན་ཞེ་ན། དེ་ནི་ལམ་གྱི་ཁྱད་པར་གྱིས་ཡིན་ཏེ། ས་དགུ་ལ་བརྟེན་པའི་མི་མཐུན་ཕྱོགས་སྒོམ་སྤང་དགུའི་གཉེན་པོར་ཐེག་ཆེན་གྱི་སྒོམ་ལམ་དགུ་ནི་སྒོམ་སྤང་གི་དྲི་མ་མ་ལུས་པ་དག་པར་བྱེད་པའི་རྒྱུ་ཡིན་པའི་ཕྱིར་སངས་རྒྱས་ཀྱི་རྣམ་དག་ཤིན་ཏུ་བ་ཡིན་ཏེ། རྒྱུ་དེ་དྲི་མ་མཐའ་དག་དག་བྱེད་ཡིན་ན། འབྲས་བུ་དེ་དྲི་མ་མ་ལུས་པ་ལས་གྲོལ་དགོས་པས་སོ། །སྤང་བྱ་དེའི་གཉེན་པོ་
ཉན་རང་གི་སྒོམ་ལམ་ཆུང་འབྲིང་དགུ་ནི་རྣམ་པ་ཐམས་ཅད་པའི་ཅིག་ཤོས་ཉོན་སྒྲིབ་ཙམ་དང༌། དེ་དང་གཟུང་རྟོག་ཙམ་གྱི་དྲི་མ་ཕྱོགས་རེ་བ་རྣམ་པར་དག་བྱེད་ཀྱི་རྒྱུ་ཡིན་པའི་ཕྱིར་ཉན་རང་གི་རྣམ་དག་ཉི་ཚེ་བ་ཡིན་ཏེ་རྒྱུ་དེ་དྲི་མ་ཉི་ཚེ་བའི་གཉེན་པོ་ཡིན་ན་དེས་ཐོབ་པའི་འབྲས་བུ་ཡང་དྲི་མ་ཕྱོགས་རེ་ཙམ་ལས་གྲོལ་བ་ཡིན་པས་སོ། །འདིའི་སྐབས་སུ་སྤང་བྱ་དང་གཉེན་པོ་གཉིས་ཀའི་རྟེན་ལས་དགུ་སྟེ། དེ་ཡང་སྤང་བྱའི་རྟེན་ནི་ཁམས་གསུམ་གྱི་ས་དགུ་ཡིན་ལ། གཉེན་པོའི་རྟེན་ལ་མི་འདྲ་བ་གཉིས་ཏེ། མངོན་པ་ལས་ནི། སྲིད་རྩེ་ཆེས་མི་གསལ་བ་དང༌། འདོད་པ་ཆེས་མ་ཞི་བ་ཡིན་པས་དེ་གཉིས་ལ་ཟག་མེད་མི་རྟེན་ཏེ་བསམ་གཏན་ས་དྲུག་གཟུགས་མེད་དང་པོ་གསུམ་དང་དགུ་ཟག་མེད་ཀྱི་རྟེན་དུ་འདོད་པ་དང༌། གཞན་དག་དེ་ནི་ཉན་ཐོས་ཐབས་ལ་མི་མཁས་པའི་དབང་དུ་བྱས་པ་ཡིན་གྱིས་བྱང་སེམས་ནི་ཐབས་ལ་མཁས་པས་འདོད་པ་དང་སྲིད་རྩེ་ལ་ཡང་ཟག་མེད་བརྟེན་པས་འདོད་པ་སོགས་ས་དགུའོ། །ཞེས་གསུངས་སོ། །གང་ལྟར་ཡང་དེ་ནི་སྒོམ་ལམ་གྱི་སེམས་རྟེན་ཡིན་ལ། ལུས་རྟེན་ནི་མ་སྐྱེས་པ་སྐྱེ་བའི་རྟེན་ལ་འདོད་པའི་ལྷ་མི་དགོས་ལ། སྐྱེས་ཟིན་གནས་པའི་རྟེན་ལ་བྱང་སེམས་འཕགས་པ་གཟུགས་མེད་དུ་མི་སྐྱེ་བས་འདོད་གཟུགས་ཀྱི་རྟེན་དང་ཉན་ཐོས་ལ་ནི་ཁམས་གསུམ་ཀའི་རྟེན་ཅན་ནོ། །འོན་ཀྱང་འདིར་བཤད་པའི་ས་དགུ་ནི་སྤང་བྱ་སྤོང་བའི་རྟེན་ལ་བཤད་ན་འགྲིག་གོ། །ཞེན་
མེད་ཐེག་གསུམ་ལམ་བཟང་མཉན་བསམ་བསྒོམ། །ཞེན་མེད་ཐེག་གསུམ་ལམ་བཟང་འགྲོ་ཀུན་ལ། །བསྟན་ནས་བྱང་ཆུབ་གསུམ་ལ་ལེགས་བཀོད་པ། །རྒྱལ་སྲས་ལག་ལེན་ཡིན་ཞེས་འདིར་བཤད་དོ། །ལམ་ཐམས་ཅད་ཤེས་པ་ཉིད་ཀྱི་སྤྱི་དོན་བཤད་པའི་སྐབས་སྟེ་གཉིས་པའོ།། །།གསུམ་པ་སྤང་བྱ་གཞི་ཤེས་ཀྱི་ཡན་ལག་རྒྱས་པར་བཤད་པ་ལ་དྲུག །གཞི་ཤེས་ཀྱི་རང་བཞིན། །ཉེ་རིང་དུ་འཇོག་པའི་རྒྱུ་མཚན། སྤང་བྱ་དང་གཉེན་པོའི་རབ་དབྱེ། ཇི་ལྟར་ཉམས་སུ་ལེན་པའི་ཚུལ། །དེ་ལྟར་ཉམས་སུ་བླངས་པའི་འབྲས་བུ། མཁྱེན་པ་གསུམ་གྱི་མཇུག་བསྡུ་བའོ། །དང་པོ་གཞི་ཤེས་ཀྱི་རང་བཞིན་ལ་གཉིས། རྗེས་འགྲོའི་སྒོ་ནས་བསྟན་པ་ཐེག་ཆེན་གཞི་ཤེས་དང༌། ལྡོག་པའི་སྒོ་ནས་བསྟན་པ་ཐེག་དམན་གཞི་ཤེས་སོ། །དང་པོ་ཐེག་ཆེན་གཞི་ཤེས་ནི། སྲིད་པ་རང་བཞིན་མེད་རྟོགས་ཀྱི་ཤེས་རབ་ཀྱིས་དེར་མཐའ་གཅིག་ཏུ་གནས་པའི་ཉེས་དམིགས་མཐོང་བ་དང༌། སེམས་ཅན་མ་ལུས་པ་ལ་དམིགས་པའི་སྙིང་རྗེས་གཞན་དོན་བྱེད་པ་དང༌། ཆོས་རྣམས་མཉམ་པ་ཉིད་དུ་རྟོགས་པས། ཡང་དག་པའི་ཡུམ་ལ་ཉེ་བའི་གཞི་ཤེས་སོ། །གཉིས་པ་ལྡོག་པ་ཐེག་དམན་གྱི་གཞི་ཤེས་ནི། གཞན་དོན་བྱེད་པའི་སྙིང་བརྩེ་བ་དང༌། རང་བཞིན་མེད་རྟོགས་ཀྱི་ཤེས་རབ་དང་བྲལ་ཞིང༌། དུས་གསུམ་མཉམ་ཉིད་དུ་ཤེས་པ་
མེད་པས་ཡང་དག་པའི་ཡུམ་དང་རིང་བར་གྱུར་པའི་གཞི་ཤེས་སོ། །གཉིས་པ་ཉེ་རིང་དུ་འཇོག་པའི་རྒྱུ་མཚན་ནི། དེ་ལྟར་དུས་གསུམ་མཉམ་པ་ཉིད་དུ་རྟོགས་པ་ཡོད་མེད་ཀྱིས་ཡུམ་ལ་ཉེ་རིང་དུ་འཇོག་པ་མི་འཐད་པར་ཐལ་ཉན་རང་ལ་ཡང་གཞི་རྟེན་འབྲེལ་གྱི་དོན་རྟོགས་པ་ཡོད་པ་ཡིན་ལ། རྟེན་འབྲེལ་དེ་ཡང་སྟོང་ཉིད་ཀྱི་རང་བཞིན་དུ་ཐེག་ཆེན་གྱི་གཞུང་ལས་བསྟན་པའི་ཕྱིར། རྟེན་འབྲེལ་རྟོགས་ན་སྤྲོས་བྲལ་ལམ་མཉམ་ཉིད་རྟོགས་པར་གྲུབ་བོ་ཞེ་ན། ཡུལ་རྟེན་འབྲེལ་གྱི་རང་བཞིན་དེ་ཉིད་སྟོང་ཉིད་ཡིན་པ་བདེན་ཀྱང༌། བློས་དེ་ལྟར་རྟོགས་མ་རྟོགས་ཀྱི་ཁྱད་ཡོད་དེ། ཉན་རང་རྣམས་ཕྱིའི་རྐྱེན་ཆོས་ཐམས་ཅད་ངོ་བོ་ཉིད་མེད་པར་སྟོན་པའི་དགེ་བའི་བཤེས་གྲོགས་དང༌། ནང་གི་རྐྱེན་ཐབས་ལ་མཁས་པ་དང་བྲལ་བས་གཟུགས་སོགས་རྟེན་འབྲེལ་གྱི་ཆོས་ལ་བདེན་པར་ཞེན་པས་ཆོས་རྣམས་མཉམ་པ་ཉིད་དུ་རྟོགས་པ་མེད་ལ། བྱང་སེམས་རྣམས་ནི། ཕྱིའི་རྐྱེན་ཐེག་ཆེན་དགེ་བའི་བཤེས་གཉེན་ཡང་དག་པར་མགུ་བན་བྱས་པའི་མན་ངག་ཕྱིན་ཅི་མ་ལོག་པ་དང་ལྡན་ཞིང༌། ནང་གི་རྐྱེན་ཀུན་རྫོབ་དང་དོན་དམ་པའི་བདེན་པ་གཉིས་ལ་བརྟེན་པའི་ཐོས་བསམ་སྒོམ་པའི་ཐབས་ལ་མཁས་པ་དང༌། ལྡན་པས་ཆོས་རྣམས་མཉམ་པ་ཉིད་དུ་རྟོགས་པའི་ཤེས་རབ་དང་ལྡན་པ་ཡིན་ནོ། །འདིའི་སྐབས་སུ་ཉན་རང་གིས་ཆོས་ཀྱི་བདག་མེད་རྟོགས་མ་རྟོགས་བཤད་པ་ལ་གཉིས། མདོ་དག་ནས་ཇི་ལྟར་གསུངས་པའི་ཚུལ་དང༌། །
བསྟན་བཅོས་རྣམས་ནས་ཇི་ལྟར་བཀྲལ་པའོ། །དང་པོ་ལ་གཉིས་ལས། ཆོས་ཀྱི་བདག་མེད་མ་རྟོགས་པའི་ཚུལ་ནི། མྱང་འདས་དཔལ་ཕྲེང༌། དགོངས་པ་ངེས་འགྲེལ་ལ་སོགས་པ་དུ་མ་ཞིག་ལས་གསུངས་ཏེ་འདི་ནི་གྲགས་ཆེ་བས་ཁུངས་སུ་མ་བྲིས་སོ། །གཉིས་པ་ཆོས་རང་བཞིན་མེད་པར་རྟོགས་པར་གསུངས་པ་ནི། ས་བཅུ་པ་ལས། ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན་རྒྱལ་པོའི་རིགས་སུ་སྐྱེས་པའི་རྒྱལ་པོའི་བུ་མཚན་དང་ལྡན་པ་ནི། སྐྱེས་པ་ཙམ་གྱིས་རྒྱལ་པོའི་བྱིན་གྱིས་བློན་པོའི་ཚོགས་ཐམས་ཅད་ཟིལ་གྱིས་གནོན་གྱི་རང་གི་བློའི་སྟོབས་ཀྱིས་རྣམ་པར་དཔྱད་པས་ནི་མ་ཡིན་ནོ། །ནམ་དེ་ནར་སོན་པར་གྱུར་པ་དེའི་ཚེ་རང་གི་བློའི་སྟོབས་སྐྱེད་པས་བློན་པོའི་བྱ་བ་ཐམས་ཅད་ལས་ནི་ཤིན་ཏུ་འདས་པ་ཡིན་ནོ། །ཀྱེ་རྒྱལ་བའི་སྲས་དག་དེ་བཞིན་དུ་བྱང་ཆུབ་སེམས་དཔའ་ཡང་སེམས་བསྐྱེད་མ་ཐག་ཏུ་ལྷག་པའི་བསམ་པའི་ཆེ་བ་ཉིད་ཀྱིས་ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་གྱི། རང་གི་བློའི་སྟོབས་ཀྱིས་རྣམ་པར་དཔྱད་པས་ནི་མ་ཡིན་ནོ། །བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་རང་གི་ཡུལ་ཤེས་པའི་ཆེ་བ་ལ་གནས་པས་ཉན་ཐོས་དང་རང་སངས་རྒྱས་ཀྱི་བྱ་བ་ཐམས་ཅད་ལས་ཤིན་ཏུ་འདས་པ་ཡིན་ནོ། །ཞེས་དང༌། ཡུམ་ལས་ཀྱང་ཉན་ཐོས་ཀྱི་ས་ལ་བསླབ་པར་འདོད་པས་ཀྱང་ཡུམ་ལ་བསླབ་
པར་བྱའོ་ཞེས་སོགས་གསུངས་པས་སོ། །དེ་ལ་དང་པོ་ནི་ས་བདུན་པ་མ་ཐོབ་བར་དུ་རྟོགས་པས་ཉན་རང་རྣམས་ཟིལ་གྱིས་གནོན་མི་ནུས་པར་གསུངས་པས་ཉན་རང་ལ་རང་བཞིན་མེད་རྟོགས་ཡོད་དེ། གཞན་དུ་ན་དེས་ཅིའི་ཕྱིར་མི་གནོན། གཉིས་པས་ཀྱང་ཉན་རང་ལ་ཆོས་རང་བཞིན་མེད་རྟོགས་ཡོད་པར་བསྟན་ཏེ། ཡུམ་ཉིད་ཉན་རང་གི་བྱང་ཆུབ་ཀྱི་རྒྱུར་གསུངས་ཤིང༌། རྟག་མི་རྟག་བདག་ཡོད་མེད་གང་དུ་ཞེན་ཀྱང༌། ཡུམ་ལ་མི་སྤྱོད་པར་གསུངས་པས་སོ། །ཡུམ་ལས་ཉན་རང་གི་ཤེས་རབ་ཀྱིས་བྱང་སེམས་ཀྱི་ཤེས་རབ་ཉིན་གཅིག་བསྒོམས་པའི་ཆར་ཡང་མི་འགྲོ་བ་སོགས་གསུངས་པས་ཀྱང་མི་གནོད་དེ་དེའི་རྒྱུ་མཚན་དུ་སེམས་བསྐྱེད་ཀྱི་ཁྱད་པར་བསྟན་གྱི་ཤེས་རབ་ཀྱི་ཁྱད་པར་མ་བསྟན་པས་སོ། །ཉན་ཐོས་ལ་བསྟན་པའི་མདོ་ལས་ཀྱང༌། གཟུགས་ནི་དབུ་བ་རྡོས་པ་འདྲ། །ཚོར་བ་ཆུ་ཡི་ཆུ་བུར་བཞིན། །འདུ་ཤེས་སྨིག་རྒྱུ་ལྟ་བུ་སྟེ། །འདུ་བྱེད་རྣམས་ནི་ཆུ་ཤིང་བཞིན། །རྣམ་པར་ཤེས་པ་སྒྱུ་མ་ལྟར། །ཉི་མའི་གཉེན་གྱིས་བཀའ་སྩལ་ཏོ། །ཞེས་ཉན་ཐོས་ཀྱིས་ཉོ་ན་སྒྲིབ་སྤང་བའི་ཕྱིར་དུ་བསྟན་ཏོ། །གཉིས་པ་ལ་གཉིས། མདོ་དང་པོ་དང༌། གཉིས་པའི་རྗེས་འབྲང་ངོ༌། །དང་པོ་ནི། མདོ་སྡེ་རྒྱན་ལས། ཆེར་འོས་སེམས་བསྐྱེད་སྤངས་པའི་སྐྱེ་བོ་དག །གཞན་དོན་སེམས་དང་དེ་ཡི་ཐབས་རྙེད་དང༌། །དགོངས་ཆེན་དོན་དང་དེ་ཉིད་མཆོག་མཐོང་བའི། །བདེ་བ་དེ་སྤངས་ཞི་བར་
འགྲོ་བར་འགྱུར། །ཞེས་ཐེག་ཆེན་སེམས་བསྐྱེད་སྤངས་པ་ལ་དེ་ཉིད་མཆོག་ཆོས་ཀྱི་བདག་མེད་མཐོང་བའི་བདེ་བ་དང་བྲལ་བར་གསུངས་ཤིང༌། བྱམས་ཆོས་གཞན་ལས་ཀྱང་སྒྲས་ཟིན་ཚོད་ལ་རང་རྒྱལ་ལ་ཁྱད་པར་ཙམ་མ་གཏོགས་པ་ཉན་རང་གིས་ཆོས་ཀྱི་བདག་མེད་རྟོགས་པར་བཤད་པ་མེད་དོ། །དེའི་རྗེས་སུ་འབྲངས་ནས་ཐོགས་མེད་སྐུ་མཆེད་དང༌། བློ་གྲོས་བརྟན་པ་ལ་སོགས་པའི་གཞུང་ན་ཡང་ཆོས་ཀྱི་བདག་མེད་ཉན་རང་གིས་རྟོགས་པར་བཤད་པ་མི་སྣང་ངོ༌། །དབུ་མ་པའི་སློབ་དཔོན་ལ་ཡང༌། སློབ་དཔོན་ཆེན་པོ་ལེགས་ལྡན་འབྱེད་དང༌། ཞི་འཚོ་དཔོན་སློབ་དང༌། འཕགས་སེང་རྗེས་འབྲང་དང་བཅས་པའི་ཕར་ཕྱིན་པ་རྣམས་ཀྱིས་ཉན་རང་གིས་ཆོས་ཀྱི་བདག་མེད་མ་རྟོགས་པར་གསུངས་ཏེ། ཕྱོགས་འདི་ལ་ནི། རྒྱ་བོད་ཀྱི་མཁས་པ་ཤིན་ཏུ་མང་ངོ༌། །ཡུམ་གྱི་རྒྱན་འདི་ལས་ཉན་རང་གི་སྦྱོར་ལམ་གྱི་སྐབས་སུ་ཆོས་ཀྱི་བདག་མེད་ཀྱི་རྣམ་པ་ཅན་གསུངས་པ་ལྟར་སྣང་ཡང་སྤྱིའི་ཁོག་ལ་མི་འགྲིག་གོ། །གཉིས་པ་ལ་གསུམ། སློབ་དཔོན་གྱི་ལུང་དགོད། ལུང་གི་དོན་བཤད། དེ་ལ་རྩོད་པ་སྤང་པའོ། །དང་པོ་ནི། རིག་པ་དྲུག་ཅུ་པ་ལས། དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་མི་བཟད་འབྱུང༌། །ལྟ་བ་མ་རུང་ཡོངས་སུ་འཛིན། །དེ་ལས་འབྱུང་བའི་རྩོད་པར་འགྱུར། །དེ་ནི་ལྟ་བ་ཀུན་གྱི་རྒྱུ། །དེ་
མེད་ཉོན་མོངས་མི་སྐྱེ་སྟེ། །དེ་བས་དེ་ནི་ཡོངས་ཤེས་ན། །ལྟ་དང་ཉོན་མོངས་ཡོངས་སུ་འབྱང༌། །གང་གིས་དེ་ཤེས་འགྱུར་ཞེ་ན། །རྟེན་ཅིང་འབྲེལ་འབྱུང་མཐོང་བ་སྟེ། །བརྟེན་ནས་སྐྱེ་བ་མ་སྐྱེས་ཞེས། །ཡང་དག་མཁྱེན་པའི་མཆོག་གིས་གསུངས། །ཞེས་དང༌། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་འགལ་མེ་ཡི། །འཁོར་ལོ་ལྟ་བུ་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །དེ་ནི་རང་གཞན་གཉིས་ཀ་དང༌། །དུས་གསུམ་ཉིད་དུ་མ་མཐོང་ཕྱིར། །ངར་འཛིན་པ་ནི་ཟད་པར་འགྱུར། །དེ་ནས་ལས་དང་སྐྱེ་བ་ཡང༌། །ཞེས་སོ། །གཉིས་པ་ལུང་གི་དོན་བཤད་པ་ནི། དེ་ཡང་ལུང་སྔ་མས་དངོས་པོར་ཞེན་པ་ཡོད་ན་ཆགས་སོགས་རྣམས་འཇུག་པ་དང༌། དེ་མེད་ན་དེ་དག་བཟློག་པར་གསུངས། ཕྱི་མས་དངོས་པོར་ཞེན་པ་ཡོད་ན་ངར་འཛིན་འཇིག་ལྟ་ཡོད་ལ། ཉོན་མོངས་དེ་ལས་དེས་བསླང་བའི་ལས་དང༌། དེ་གཉིས་ལས་སྲིད་པར་སྐྱེ་བའི་རྗེས་འགྲོ་དང༌། དེ་དག་བདག་གཞན་དང་དུས་གསུམ་གྱི་ངོ་བོར་མ་གྲུབ་པར་མཐོང་བས་ངར་འཛིན་སོགས་དེ་དག་ལྡོག་པར་གསུངས་པས་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་བསྟན་ཏེ།
ཉན་རང་དགྲ་བཅོམ་ལ་འཇིག་ལྟ་དང༌། ཆགས་སྡང་སོགས་མ་ལུས་པར་སྤངས་པ་དང༌། ལས་ཉོན་གྱི་དབང་གིས་མི་སྐྱེ་བ་བཞེད་པའི་ཕྱིར། །རིན་ཆེན་ཕྲེང་བ་ལས་གསུངས་པ་བྱང་སེམས་ཀྱི་དབང་དུ་བྱས་པར་ཡང་འཆད་མི་ནུས་ཏེ། དེ་ལས་སྔར་ལྟར་གསུངས་ཤིང༌། ལེན་པ་མེད་པ་མྱ་ངན་ལས་འདའ་བ་བསྟན་པའི་མཐར། དེ་ལྟར་བྱང་ཆུབ་སེམས་དཔས་ཀྱང༌། །མཐོང་ནས་བྱང་ཆུབ་ངེས་པར་འདོད། །ཅེས་སོ། །དེ་དག་གི་རྗེས་སུ་འབྲང་ནས་དཔལ་ལྡན་ཟླ་གྲགས། ཛ་ཡ་ཨཱ་ནནྟ། སློབ་དཔོན་ཞི་བ་ལྷ། ཤེར་འབྱུང༌། དགེ་བའི་ལྷ། བི་མ་མི་ཏྲ་རྣམས་ཉན་རང་ལ་ཆོས་རང་བཞིན་མེད་རྟོགས་ཡོད་པར་བཞེད་དོ། །གསུམ་པ་དེ་ལ་རྩོད་པ་སྤང་བ་ནི། །འདིར་མདོ་དང་བྱམས་པས་ཉན་རང་གིས་ཆོས་བདག་མེད་པ་མ་རྟོགས་པར་གསུང་པ་དེ་ཇི་ལྟར་དྲང་ཞེ་ན། །འོ་ན་ལུང་གཞན་ལས། ཁུར་ཁྱེར་བ་ཡི་གང་ཟག་ཡོད། །རྟག་གམ་མི་རྟག་བརྗོད་མི་བྱ། །ཞེས་བརྗོད་དུ་མེད་པའི་གང་ཟག་ཡོད་པར་གསུངས་པ་ཡང་ཇི་ལྟར་དྲང༌། དེ་ནི་བདག་ཏུ་ལྟ་བ་ལ་མངོན་པར་ཞེན་པ་རྣམས་དྲང་བར་བྱ་བའི་ཕྱིར་གསུངས་པའི་དགོངས་པ་ཅན་ནོ་ཞེ་ན། །འོ་ན་རང་བཞིན་མེད་པར་བསྟན་པ་ལ་སྐྲག་པའི་དོན་སྨྲ་བ་ལ་སོགས་པ་རྣམས་དྲང་བའི་དོན་དུ་རེ་ཞིག་མི་རྟག་སོགས་གང་ཟག་གི་བདག་མེད་ཀྱིས་གྲོལ་བར་གསུངས་སོ། །
དེ་ལྟར་ན་ཉན་རང་ལ་མི་རྟག་སོགས་ཀྱི་ལམ་རྣམ་པར་བཞག་ནས་ཆོས་ཀྱི་བདག་མེད་མ་རྟོགས་པར་བསྟན་པའི་དགོངས་གཞི་ནི་ཆོས་ཀྱི་བདག་མེད་རྫོགས་པར་སྒོམ་པ་མེད་པའོ། །དགོས་པ་ནི་སྨྲས་ཟིན་ཏོ། །དངོས་ལ་གནོད་བྱེད་ནི། གལ་ཏེ་ཆོས་སུ་ཞེན་པ་དང་བཅས་པའི་མི་རྟག་སོགས་བཅུ་དྲུག་ལས་དེ་དག་ལ་ལམ་གཞན་མེད་ན། དེ་དག་གི་ཉོན་མོངས་པ་རྩད་ནས་སྤང་པ་དང་འཕགས་པ་མཚན་ཉིད་པར་ཁས་བླང་དུ་མི་རུང་སྟེ། ལམ་དང་ཉོན་མོངས་གཉིས་ཀ་དམིགས་ཡུལ་ཕུང་པོའི་ཆོས་གཅིག་ལ་དམིགས་ནས་དེའི་གནས་ལུགས་ལ་ལོག་པར་ཞུགས་པར་མཚུངས་པ་དང༌། བདེན་བཞིའི་རང་བཞིན་ལས་བློ་གོལ་བའི་ཕྱིར་བདེན་པ་ཅི་ལྟ་བ་བཞིན་དུ་མཐོང་བ་མིན་པའི་ཕྱིར་རོ། །གཞན་ཡང་ཆགས་སོགས་ཉོན་མོངས་ནི་ཕུང་པོ་ལ་བདེན་འཛིན་གྱི་རྒྱུ་ཅན་ཡིན་ལ། དེ་དག་གིས་ཕུང་པོ་ལ་ཐམས་ཅད་དུ་བདེན་པར་འཛིན་ན་རྒྱུ་མ་ལོག་པས་འབྲས་བུ་མ་ལུས་པ་ཇི་ལྟར་ལྡོག །ཉན་རང་ལ་ཆོས་ཀྱི་བདག་མེད་རྟོགས་པ་ཡོད་ན་ཐེག་ཆེན་དང་ཁྱད་མེད་དུ་འགྱུར་རོ་ཞེ་ན། རིན་ཆེན་ཕྲེང་བ་ལས། ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང༌། །སྤྱོད་པ་ཡོངས་བསྔོ་མ་བཤད་པས། བྱང་ཆུབ་སེམས་དཔར་ག་ལ་འགྱུར། །ཞེས་ལན་མཛད་ཅིང༌། ཆོས་ཀྱི་བདག་མེད་རྫོགས་པར་སྒོམ་པ་ཡང་མེད་དོ། །ཞེས་བཤད་དོ། །ཁྱད་པར་འདི་དག་ཤེས་ན་ཉན་རང་ལ་འཕགས་པ་མཚན་ཉིད་པ་འོང་མི་འོང་གི་དྭོགས་
པ་ཡང་ལྡོག་པར་འགྱུར་རོ། །གཞན་ཡང་འདི་དག་གི་མཉམས་གཞག་ན་མི་རྟག་སོགས་སུ་བདེན་ནོ་སྙམ་པའི་རྟོག་པ་མངོན་གྱུར་མེད་དེ། །རྣལ་འབྱོར་མངོན་སུམ་ཡིན་པས་སྒྲ་རྟོག་དང་བྲལ་བའི་ཕྱིར་ཏེ་ཚད་མའི་མདོར། རྣལ་འབྱོར་རྣམས་ཀྱི་བླ་མས་བསྟན། །མ་འདྲེས་པ་ཡི་དོན་ཙམ་མཐོང༌། །ཞེས་རྣལ་འབྱོར་མངོན་སུམ་གྱིས་བདེན་བཞིའི་ཆོས་རྣམས་མིང་དང་མ་འདྲེས་པར་ཡུལ་དུ་བྱེད་པར་གསུངས་པ་དང༌། ཀུན་བཏུས་ལས་ཀྱང༌། འཇིག་རྟེན་ལས་འདས་པའི་ཤེས་པས་བདེན་པའི་རྣམ་པ་ལ་འཇུག་པ་ན་མི་རྟག་པའི་དོན་མཐོང་གི་མི་རྟག་པ་ཉིད་དོ་ཞེས་བྱ་བར་ནི་མ་ཡིན་ནོ། །མི་རྟག་པ་ཉིད་ལ་ཇི་ལྟ་བ་དེ་བཞིན་དུ་རྣམ་པ་ལྷག་མ་རྣམས་ལ་ཡང་དེ་བཞིན་ནོ། །ཞེས་སོ། །གསུམ་པ་སྤང་བྱ་དང་གཉེན་པོའི་རབ་དབྱེ་ལ་གསུམ། གཞི་ལམ་དང༌། སྤྱོད་པ་དང༌། འབྲས་བུ་ལ་མཚན་འཛིན་གྱི་སྤང་གཉེན་ནོ། །དང་པོ་ལ་ཡང་སྤང་བྱ་དང་གཉེན་པོ་གཉིས། །དང་པོ་སྤང་བྱ་ནི། །གཞི་གཟུགས་ལ་སོགས་པ་ཕུང་པོའི་ཆོས་རྣམས་དང༌། དུས་གསུམ་དུ་གཏོགས་པའི་ཆོས་ལ་མཚན་མར་འདུ་ཤེས་པ་དང༌། ལམ་སྦྱིན་པ་ནས་རྣམ་མཁྱེན་གྱི་བར་གྱི་ཆོས་རྣམས་ལ་མཚན་མར་འདུ་ཤེས་པའོ། །གཉིས་པ་གཉེན་པོ་ནི། བྱང་ཆེན་ཐབས་མཁས་པས་ཡུམ་ལ་སྤྱོད་པའི་ཚེ་གཟུགས་ལ་གཟུགས་ཞེས་བྱ་བར་འདུ་ཤེས་པ་མེད་དོ། །ཞེས་དང༌། འདས་པའི་ཆོས་རྣམས་ལ་
འདས་པའི་ཆོས་རྣམས་ཞེས་བྱ་བར་འདུ་ཤེས་པ་མེད་དོ། །ཞེས་དང༌། བྱང་ཆེན་ཐབས་ལ་མཁས་པས་ཡུམ་ལ་སྤྱོད་པའི་ཚེ་འདི་སྙམ་དུ་བདག་གིས་སྦྱིན་པ་ཞིག་བྱིན། འདི་ལ་སྦྱིན་པ་བྱིན། སྦྱིན་པ་འདི་ལྟ་བུ་ཞིག་སྦྱིན་ནོ་ཞེའམ། ཞེས་པ་ནས་བདག་གིས་སངས་རྒྱས་ཀྱི་ཞིང་ཡོངས་སུ་དག་པར་བྱའོ་ཞེའམ། །བདག་གིས་སེམས་ཅན་ཡོངས་སུ་སྨིན་པར་བྱའོ་ཞེའམ། །བདག་གིས་འདི་རྣམ་མཁྱེན་ཐོབ་པར་བྱའོ་སྙམ་དུ་སེམས་པ་མེད་དེ་ཞེས་པ་སྟེ་སྤང་བྱ་གསུམ་དང་གྲངས་བཞིན་ནོ། །གཉིས་པ་སྤྱོད་པའི་སྤང་གཉེན་ལ་ཡང་གཉིས་ལས་དང་པོ་སྤང་བྱ་ནི། །སྔོ་བར་བྱེད་པའི་སེམས་དང་བསྔོ་བྱའི་དགེ་བ་ལ་མཚན་མར་ཞེན་ནས་བྱང་ཆུབ་ཏུ་བསྔོ་བའི་མཚན་བཅས་ཀྱི་སྤྱོད་པ་ཡིན་ཏེ་བྱང་ཆེན་བྱང་སེམས་སུ་འདུ་ཤེས་པ་དང༌། སྦྱིན་པར་འདུ་ཤེས་པ་དང༌། ཞེས་པ་ནས། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དུ་འདུ་ཤེས་པ་དང༌། སངས་རྒྱས་བཅོམ་ལྡན་འདས་སུ་འདུ་ཤེས་པ་དང༌། སངས་རྒྱས་ལ་བསྐྱེད་པའི་དགེ་རྩ་གང་དག་ཏུ་འདུ་ཤེས་ནས། དགེ་རྩ་དེ་དག་མངོན་པར་བསྡུས་ཏེ་གཅིག་ཏུ་བསྡོམས་ཤིང་གཞལ་ནས་བླ་མེད་རྫོགས་བྱང་དུ་སྔོ་བར་བྱེད་པ་འདི། ཀཽ་ཤི་ཀ་བྱང་ཆེན་རྣམས་ཀྱི་ཆགས་པ་སྟེ་ཞེས་སོ། །གཉིས་པ་གཉེན་པོ་ནི། ཇི་ལྟར་བྱང་ཚེ་བདག་ནི་སྦྱིན་པ་སྦྱིན་པའོ། །ཞེས་པ་ནས་བདག་ནི་སངས་རྒྱས་ཀྱི་ཆོས་མ་འདྲེས་པ་སྒོམ་མོ། །བདག་ནི་བྱང་ཆུབ་ལ་སྤྱད་པ་སྤྱོད་
དོ་ཞེས་བྱ་བར་རྣམ་པར་རྟོག་པར་མི་འགྱུར་བ་དེ་ལྟར་བྱང་ཆེན་གྱིས་གཞན་ལ་ཡང་དག་པར་བསྟན་པར་བྱ། ལེན་དུ་གཞུག་པར་བྱ། གཟེང་བསྟོད་པར་བྱ། ཡང་དག་པར་རབ་ཏུ་དགའ་བར་བྱ་སྟེ། ཞེས་སོ། །གསུམ་པ་འབྲས་བུ་ལ། མཚན་འཛིན་གྱི་སྤང་གཉེན་གཉིས་ཀྱི་དང་པོ་ནི། དེ་བཞིན་གཤེགས་པ་ལ་མཚན་མར་བྱས་ནས་ལུས་ཀྱིས་ཕྱག་འཚལ་བ་དང༌། ངག་གིས་བསྟོད་པ་སོགས་བྱང་སེམས་ལམ་གྱི་མི་མཐུན་ཕྱོགས་རྣམས་སོ། །དེ་དག་གཉེན་པོ་ཡིན་པས་དེར་འགལ་ཞེ་ན། དེ་དག་ལས་སྒྲིབ་སོགས་འགའ་ཞིག་གི་གཉེན་པོ་ཡིན་ཀྱང་ཆགས་པ་ཕྲ་མོའི་ངོ་བོ་ཡིན་པས་རྣམ་པ་ཐམས་ཅད་དུ་གཉེན་པོ་མིན་ནོ། །གཉིས་པ་གཉེན་པོ་ནི། ཆོས་རྣམས་རང་བཞིན་མེད་པར་རང་བཞིན་གཅིག་པར་ཤེས་པས་ཆགས་པ་སྤོང་བ་སྟེ། དེ་ནི་འདི་ལྟར་ཆོས་ཀྱི་རང་བཞིན་གཉིས་མ་ཡིན་ཏེ། རབ་འབྱོར་ཆོས་ཀྱི་རང་བཞིན་གཅིག་ཏུ་ཟད་དོ། །ཆོས་ཀྱི་རང་བཞིན་གང་ཡིན་པ་རང་བཞིན་མ་ཡིན་ནོ། །གང་རང་བཞིན་མ་ཡིན་པ་དེ་ནི་རང་བཞིན་ནོ། ། གང་རང་བཞིན་ཡིན་པ་དེ་ནི་འདུས་མ་བྱས ་པའོ། །རབ་འབྱོར་དེ་ལྟར་ན་བྱང་ཆེན་གྱིས་ཆོས་ཀྱི་རང་བཞིན་གཅིག་པུ་རང་བཞིན་མ་ཡིན་པ་མངོན་པར་འདུས་མ་བྱས་པ་ཤེས་ཤིང་མཐོང་ན་ཆགས་པའི་མཐའ་ཐམས་ཅད་ཡོངས་སུ་སྤོང་བ་ཡིན་ནོ། །ཞེས་སོ། །བཞི་པ་ཇི་ལྟར་ཉམས་སུ་ལེན་པའི་ཚུལ་ལ་གཉིས། སྦྱོར་བའི་ངོ་
བོ་དང་རྣམ་པའོ། །དང་པོ་སྦྱོར་བའི་ངོ་བོ་ལ་གཉིས། དངོས་བསྟན་སེམས་དཔའི་རྣལ་འབྱོར་དང༌། ཤུགས་བསྟན་ཉན་རང་གི་སྦྱོར་བའོ། །དང་པོ་དངོས་བསྟན་སེམས་དཔའི་རྣལ་འབྱོར་ནི། །སྤྱིར་སྦྱོར་བའི་ལམ་ཞེས་པ་ཡུལ་དེ་དང་དེ་ལ་མི་དམིགས་པར་སྦྱོར་བའི་རྣལ་འབྱོར་ཙམ་ལ་ཟེར་གྱི་ལམ་ལྔའི་ཡ་གྱལ་ནི་མ་ཡིན་ནོ། །དེས་ན་གཞི་ཤེས་ཀྱི་སྦྱོར་བ་འདི་ནི་ལྟ་སྒོམ་སྤྱོད་འབྲས་ཡུལ་ཡུལ་ཅན་དང་བཅས་པ་ལ་མཚན་མར་འཛིན་པའི་གཉེན་པོར་སྒོམ་པ་ཡིན་པས་ཇི་སྲིད་མཚན་མ་དེ་དག་སྐྱེ་བ་དེ་སྲིད་དུ་བསྒོམ་དགོས་པས་ཚོགས་ལམ་ནས་ས་བཅུ་པའི་བར་ལ་བཞག་གོ། །དེ་ལྟ་བུའི་གཞི་ཤེས་ཀྱི་སྦྱོར་བ་དེ་ཡང་རྣམ་པ་བཅུ་སྟེ། བྱང་ཚེ་གལ་ཏེ་གཟུགས་ལ་མི་སྤྱོད་ན་ཡུམ་ལ་སྤྱོད་དེ་ཞེས་གཟུགས་སོགས་ཀྱི་སྦྱོར་བ་དང༌། གཟུགས་རྟག་ཅེས་བྱ་བའམ་མི་རྟག་ཅེས་བྱ་བར་མི་སྤྱོད་ན་ཡུམ་ལ་སྤྱོད་པའོ། །ཞེས་མི་རྟག་ལ་སོགས་པའི་སྦྱོར་བ་དང༌། བྱང་ཚེ་གཟུགས་ཡོངས་སུ་མ་རྫོགས་པ་དང་རྫོགས་པའོ། །ཞེས་བྱ་བ་སོགས་རྫོགས་མ་རྫོགས་ཀྱི་སྦྱོར་བ་དང༌། བྱང་ཚེ་གཟུགས་ཆགས་པ་དང་བཅས་པ་དང་མ་ཆགས་པའོ། །ཞེས་ཆགས་མེད་ཀྱི་སྦྱོར་བ་དང༌། ཡུམ་ཟབ་མོ་འདི་བསྟན་ཀྱང་མི་འགྲིབ་མ་བསྟན་ཀྱང་མི་འགྲིབ་བསྟན་ཀྱང་མི་འཕེལ་མ་བསྟན་ཀྱང་མི་འཕེལ་ལོ། །ཞེས་མི་འགྱུར་བའི་སྦྱོར་བ་དང༌། ཆོས་རྣམས་ཀྱི་ཆོས་ཉིད་གང་ཡིན་པ་དེ་ནི་བསྟན་ཀྱང་དེ་བཞིན་མ་
བསྟན་ཀྱང་དེ་བཞིན་ནོ། །ཞེས་བྱེད་པ་པོ་མེད་པའི་སྦྱོར་བ་དང༌། གང་གིས་སེམས་ཅན་རྣམས་ཀྱི་སླད་དུ་གོ་ཆ་བགོས་པ་དེ་དག་ནི་ནམ་མཁའ་ཡོངས་སུ་དགྲོལ་བར་འཚལ་བའོ་ཞེས་དང༌། སེམས་ཅན་རྣམས་ཀྱི་དོན་དུ་གོ་ཆ་འཚལ་བ་དེ་དག་ནི་ནམ་མཁའ་བར་སྣང་ལ་འདེགས་པར་འཚལ་བའོ། །ཞེས་དང༌། བྱང་ཆེན་གང་སེམས་ཅན་རྣམས་ཀྱི་སླད་དུ་བླ་མེད་རྫོགས་བྱང་དུ་འཚལ་བ་དེ་དག་ནི་བརྩོན་འགྲུས་ཆེན་པོ་ཐོབ་པའོ། །ཞེས་བྱ་དཀའ་བ་གསུམ་གྱི་སྦྱོར་བ་དང༌། དེ་ནས་དགེ་སློང་གཞན་ཞིག་གིས་འདི་སྙམ་དུ་གྱུར་ཏེ། གང་ལ་ཆོས་གང་ཡང་སྐྱེ་བའམ་འགག་པ་མེད་ལ་ཚུལ་ཁྲིམས་ཀྱི་ཕུང་པོར་གདགས་སུ་ཡོད་ཅེས་པ་ནས། ཆོས་ཀྱི་འཁོར་ལོ་བསྐོར་བ་གདགས་སུ་ཡོད་པའི་བཅོམ་ལྡན་འདས་མ་ལ་ཕྱག་འཚལ་ལོ། །ཞེས་འབྲས་བུ་ཡོད་པའི་སྦྱོར་བ་དང༌། རིགས་ཀྱི་བུའམ་རིགས་ཀྱི་བུ་མོ་ཇི་སྐད་བསྟན་པའི་ཡུམ་ལ་གནས་ན་དེ་ཉིད་དེའི་བསྲུང་བ་དང་སྐྱབས་པ་དང་སྦ་བར་འགྱུར་རོ། །ཞེས་གཞན་ལ་རག་མ་ལས་པའི་སྦྱོར་བ་དང༌། བྱང་ཆེན་ཡུམ་ལ་སྤྱོད་པ་ནི་ཇི་ཙམ་གྱིས་རྨི་ལམ་སྒྱུ་མ་སྨིག་རྒྱུ་སྒྲ་བརྙན་གཟུགས་བརྙན་དྲི་ཟའི་གྲོང་ཁྱེར་དང་སྤྲུལ་པ་ལྟ་བུར་ཆོས་ཐམས་ཅད་ཤེས་པར་འགྱུར་རམ། །ཞེས་རབ་འབྱོར་ལ་བརྒྱ་བྱིན་གྱིས་དྲིས་པའི་ལན་དུ་བདུན་པོ་དེ་ལ་རློམ་པ་བཞི་མེད་ན་དེ་ལྟར་ཤེས་སོ། །འདིའི་
སྐབས་སུ། གཟུགས་སོགས་རྫོགས་མ་རྫོགས་ཀྱི་དོན་ནི། རྒྱན་སྣང་ལས། མཚན་ཉིད་ཀྱིས་སྟོང་པའི་ཕྱིར་བཏགས་པའི་གཟུགས་ནི་ཡོངས་སུ་མ་རྫོགས་པའོ། །ཡོན་ཏན་གྱི་ཚོགས་དང་ལྡན་པའི་ཕྱིར་ཆོས་ཉིད་ཀྱི་གཟུགས་ནི་རབ་ཏུ་རྫོགས་པའོ། །ཞེས་པའི་དོན་གང་ལ་དམིགས་ན་ཡོན་ཏན་སྐྱེ་བ་དང་མི་སྐྱེ་བའི་ཕྱིར་ཡོན་ཏན་གྱི་རྟེན་དུ་རྫོགས་མ་རྫོགས་ལ་འཆད་ཀྱང་མཚན་ཉིད་ཀྱིས་སྟོང་པ་ལ་མ་རྫོགས་པའི་རྒྱུ་མཚན་དུ་གསུངས་པས་དགོངས་པ་མིན་ནོ། །འོ་ན་གང་ཞེ་ན། བཏགས་པའི་གཟུགས་ནི་རྟོག་པས་གཟུགས་སུ་སྒྲོ་བཏགས་པ་ཙམ་ཡིན་པས་མཚན་ཉིད་དམ་ངོ་བོ་ཉིད་ཀྱིས་མ་གྲུབ་པའི་ཕྱིར་དོན་ལ་མེད་པའོ། །ཆོས་ཉིད་ཀྱི་གཟུགས་ནི་གཟུགས་ཀྱི་རང་བཞིན་རྟོག་པས་བཏགས་པས་སྟོང་པ་ཉིད་ཡིན་ཏེ། དེ་ནི་རང་བཞིན་གྱིས་དག་པའི་ཡོན་ཏན་དབྱེར་མེད་པར་གནས་པའི་ཕྱིར་ཚང་བའམ་དོན་ལ་གནས་པ་ཞེས་བྱའོ། །བྱ་དཀའ་གསུམ་ནི་རིམ་པ་ལྟར། རྣམ་མཁྱེན་ཆེད་དུ་བྱ་དཀའ་བ་དང༌། ལམ་ཤེས་རྒྱུད་ལ་སྐྱེད་དཀའ་བ་དང༌། གཞི་ཤེས་གཞན་ལ་བསྟན་དཀའ་བ་ཡིན་ལ། སྦྱོར་བའི་དུས་སུ་བྱ་དཀའ་བ་གསུམ་པོ་དེ་ཡུལ་དུ་བྱས་ནས་དེ་གསུམ་ཐོབ་བྱ་ཐོབ་བྱེད་སོགས་མེད་པ་ནམ་མཁའ་ལྟར་ཤེས་པ་ཡིན་གྱི་བྱ་དཀའ་གསུམ་ཉིད་སྦྱོར་བ་མིན་ནོ། །ཤེས་བྱེད་སྣང་བ་རྣམ་བདུན་གྱི་སྐབས་སུ་བཞི་རེ་སྟེ། དེ་ཡང་གང་ལ་སྣང་ནས་སེམས་དཔའི་རྗེས་ཐོབ་
ལའོ། །གང་སྣང་ན་ཕྱི་ནང་གི་དངོས་པོ་འདིའོ། །ཇི་ལྟར་ན། རྨི་ལམ་ལྟ་བུའོ། །རྒྱུ་མཚན་ནི། བག་ཆགས་ཀྱི་གཉིད་ཀྱིས་རྣམ་ཤེས་དེ་དང་དེར་ཡོངས་སུ་འགྱུར་བར་སྣང་བའོ། །ཁྱད་པར་བཞི་འོག་མ་རྣམས་ལ་ཡང་སྦྱར་ནས། མ་རིག་པའི་སྔགས་དང་སྨན་མཉམ་དུ་ཚོགས་པ་ལས་བྱུང་བས་སྒྱུ་མ་དང༌། བདེན་པར་སྣང་ཡང་མེད་པའི་ཕྱིར་འགལ་བར་སྣང་བས་སྨིག་རྒྱུ་དང༌། རྐྱེན་ལ་རག་ལས་ཏེ་སྣང་བས་སྒྲ་བརྙན་དང༌། ཤེས་བྱའི་ཚུལ་གཟུགས་བརྙན་འཇོག་བྱེད་ལྟ་བུའི་ནང་གི་བག་ཆགས་ཀྱིས་ཇི་ལྟར་འཕངས་པ་ལས་མི་འདའ་བར་སྣང་བས་མིག་ཡོར་དང༌། འདི་ལ་མདོར་གཟུགས་བརྙན་དང༌། རྒྱན་སྣང་ལ་མིག་ཡོར་ཞེས་གསུངས་ལ། གནོད་འཇོམས་ཆུང་བར་རབ་རིབ་ཅན་ལ་སྐྲ་ཤད་འཛགས་པར་སྣང་བ་དང་ཁ་ཅིག་འགལ་མེ་མྱུར་དུ་བསྐོར་བ་སོགས་ལ་འཆད་དོ། །གནས་པར་བྱ་བའི་རྟེན་མེད་པ་རང་སྣང་བས་དྲི་ཟའི་གྲོང་ཁྱེར་དང༌། ལུས་ངག་གི་བྱེད་པ་དེ་ཁོ་ནར་རྒྱུ་དང་བྲལ་བར་སྣང་བས་སྤྲུལ་པ་དང་བདུན་ནོ། །བདུན་པོ་འདིའི་སྒོ་ནས་བྱང་སེམས་ཀྱིས་ཆོས་ཐམས་ཅད་འདི་དག་དང་མཚུངས་པར་ཤེས་པར་བྱེད་པས་ཤེས་བྱེད་སྣང་བ་བདུན་ཞེས་བྱའོ། །དེ་ཡང་རྗེས་ཐོབ་ཏུ་ཆོས་ཐམས་ཅད་སྒྱུ་མ་ལྟ་བུར་ཤེས་པར་བྱ་ཞིང༌། སྒྱུ་མ་ལྟ་བུ་དེ་ལ་ཡང་ཞེན་པ་ཡོད་ན་རློམ་མེད་བཞིའི་སྒོ་ནས་དགག་དགོས་སོ། །སྦྱོར་བ་བཅུ་པོ་འདི་ཡང་
མངོན་ཞེན་རེ་རེ་དོར་ནས་གོང་ནས་གོང་དུ་འཕེལ་བར་ཤེར་འབྱུང་བཞེད་ཀྱང་དོན་དུ་ཡུལ་གྱི་སྒོ་ནས་དབྱེ་བ་ཙམ་ཡིན་པས་ངོ་བོ་ཞེན་མེད་དུ་གཅིག་གོ། །གཉིས་པ་ཤུགས་བསྟན་ཉན་རང་གི་སྦྱོར་བ་ནི། སྔར་ཇི་ལྟར་ཞེ་ན་སྤྱོད་བཀག་ནས་སྒོམ་མོ་ཞེས་པ་དེ་ལས་བཟློག་ནས་ཞེན་པ་དང་བཅས་ཏེ་སྒོམ་པའོ། །གཉིས་པ་སྦྱོར་བ་དེའི་རྣམ་པ་ནི། ཡུལ་དང་ཡུལ་ཅན་མཉམ་པ་ཉིད་དུ་རྟོགས་པའི་སྒོ་ནས་སྦྱོར་བ་དེ་རྣམས་སྒོམ་སྟེ། གཞན་ཡང་བྱང་ཚེ་གཟུགས་རློམ་སེམས་སུ་མི་བྱེད། གཟུགས་ཀྱིས་རློམ་སེམས་སུ་མི་བྱེད། གཟུགས་བདག་གི་ཞེས་རློམ་སེམས་སུ་མི་བྱེད། གཟུགས་ལ་རློམ་སེམས་སུ་མི་བྱེད་ཅེས་རྣམ་མཁྱེན་གྱི་བར་ལ་དེ་ལྟར་གསུངས་སོ། །དེ་ལ་གཟུགས་དོན་དམ་པར་མ་གྲུབ་པ་འདི་གཟུགས་སོ་ཞེས་དང༌། གཟུགས་འདིས་དངོས་པོ་འདི་ལྟ་བུ་ཞིག་སྒྲུབ་བོ་ཞེས་དང༌། གཟུགས་ལ་ཕན་གནོད་འདི་ལྟ་བུ་ཞིག་བྱ་ཞེས་མི་རློམ་པར་གནོད་འཇོམས་ཆུང་བར་བཤད་ལ། གསུམ་པ་ལ་ཆེ་བར་རྗེ་ཁོལ་གྱི་དངོས་པོར་མི་རློམ་པར་བཤད། སློབ་དཔོན་གྱི་དང་པོ་གཟུགས་སོགས་ཀྱི་ངོ་བོ་ལ་ཞེན་པ་དང༌། གཉིས་པ་ཐ་སྙད་ཀྱི་རྒྱུ་མཚན་ལ་ཞེན་པ་དང༌། གསུམ་པ་དབྱེ་བའི་སྤྲོས་པ་ལ་ཞེན་པ་དང༌། བཞི་པ་ངེས་འབྱེད་སོགས་ཀྱིས་རྟོགས་པ་ལ་ཞེན་པ་ལ་གསུངས་སོ། །ལྔ་པ་དེ་ལྟར་ཉམས་སུ་བླང་པའི་འབྲས་བུ་ནི་མཐོང་ལམ་སྟེ། འདི་ལ་མཐོང་ལམ་དངོས་བཤད་པ་དང་སྒོམ་ལམ་མི་འཆད་པའི་རྒྱུ་མཚན་གཉིས། །དང་པོ་མཐོང་ལམ་དངོས་ལ་གཉིས། དངོས་བསྟན་བྱང་སེམས་ཀྱི་མཐོང་ལམ་དང༌།
ཤུགས་བསྟན་ཉན་རང་གི་མཐོང་ལམ་མོ། །དང་པོ་དངོས་བསྟན་བྱང་སེམས་ཀྱི་མཐོང་ལམ་ནི། །རྟག་པ་དང་མི་རྟག་པ་དང༌། བདེ་བ་དང་སྡུག་བསྔལ་བ་དང༌། སྟོང་པ་དང་མི་སྟོང་པ་དང༌། བདག་དང་བདག་མེད་པ་ལ་སོགས་བདེན་བཞིའི་རྣམ་པ་བཅུ་དྲུག་བཟློག་ཟླ་དང་བཅས་པའི་སྒྲོ་འདོགས་སོ་གཉིས་དང་བྲལ་བའི་སྒོ་ནས་བདེན་པ་བཞིའི་ཆོས་ཉིད་མངོན་སུམ་དུ་མཐོང་བའོ། །གཉིས་པ་ཤུགས་བསྟན་ཉན་རང་གི་མཐོང་ལམ་ནི། དངོས་བསྟན་བྱང་སེམས་ཀྱི་མཐོང་ལམ་རྗེས་འགྲོའི་སྒོ་ནས་བསྟན་པ་སྒྲོ་འདོགས་སོ་གཉིས་དང་བྲལ་བ་དེ་ལས་བཟློག་པ་མི་རྟག་པ་ལ་སོགས་པ་རྣམ་པ་བཅུ་དྲུག་དག་ཏུ་ཞེན་ནས་བསྒོམ་པའོ། །གཉིས་པ་སྒོམ་ལམ་མི་འཆད་པའི་རྒྱུ་མཚན་ནི། ཉི་སྣང་ལས། ཡང་ཅིའི་དོན་གྱིས་ལམ་ཤེས་པ་ཉིད་བཞིན་ཐམས་ཅད་ཤེས་པ་ཉིད་ལ་སྒོམ་པའི་ལམ་ལོག་ཤིག་པ་མེད་པ་ཅི་ཞེ་ན། ཉན་ཐོས་དང་རང་སངས་རྒྱས་ཀྱི་ཕུན་སུམ་ཚོགས་པ་ནི་བྱང་ཆུབ་སེམས་དཔས་ཤེས་པ་དང་མཐོང་བས་བལྟས་ནས་འདའ་འོ་ཞེས་གསུངས་པས་ན་འདི་ནི་གཞན་གཙོ་བོར་བྱེད་པའི་ཕྱིར་རོ། །ཞེས་སོགས་གསུངས་སོ། །དེ་ཡང་ཉན་ཐོས་དང་རང་སངས་རྒྱས་ལ་སོགས་པས་ཇི་ལྟར་རྟོགས་པའི་རྟོགས་པ་དེ་ནི་བྱང་ཆུབ་སེམས་དཔས་ཤེས་པར་བྱ་བ་ཙམ་ཡིན་གྱིས་ཡང་ནས་ཡང་དུ་གོམས་འདྲིས་སུ་བྱ་བ་ནི་མ་ཡིན་པས་ཉན་རང་གི་གཞི་ཤེས་དེ་ལ་བྱང་ཆུབ་
སེམས་དཔས་ཇི་ལྟར་བསྒོམ་པར་བྱ་བའི་སྒོམ་ལམ་ནི་མ་བསྟན་ཏོ། །འོ་ན་ཉན་རང་རྣམས་ཀྱིས་རང་ཉིད་ཀྱིས་གང་མཐོང་བའི་དོན་དེ་ལ་གོམས་པར་བྱ་བའི་ཉན་རང་གི་སྒོམ་ལམ་ཉིད་ཅིའི་ཕྱིར་མི་སྟོན་ཞེ་ན། དེ་ནི་མ་བསྟན་ཀྱང་ཤེས་པར་སླ་བ་ཡིན་ཏེ་བྱང་ཆུབ་སེམས་དཔས་གཞན་ལ་ཉན་རང་གི་ལམ་སྟོན་པའི་སྐབས་སུ་ནི། ཇི་ལྟར་མཐོང་བའི་དོན་དེ་ཉིད་གོམས་པར་བྱེད་པ་སྒོམ་ལམ་མོ་ཞེས་བསྟན་པས་ཆོག་ལ་རང་གིས་ནི་དེ་མི་སྒོམ་པའི་ཕྱིར་རོ། །དྲུག་པ་མཁྱེན་པ་གསུམ་གྱི་མཇུག་བསྡུ་བ་ནི། རབ་འབྱོར་ཡུམ་འདི་ནི་ཆོས་གང་ཡང་ཐོབ་པར་བྱེད་པ་མ་ཡིན་མི་ཐོབ་པར་བྱེད་པ་མ་ཡིན། དེ་བཞིན་དུ་སྦྱར་ནས། སྟོན་པར་བྱེད་པ་མ་ཡིན། །མི་སྟོན་པར་བྱེད་པ་་སྟེར་བར་འཕྲོག་པར་་ཆད་པར་རྟག་པར་་དོན་གཅིག་བར་དོན་སྣ་ཚོགས་པར་་འོང་བར་འགྲོ་བར་་ཀུན་ནས་ཉོན་མོངས་པར་རྣམ་པར་བྱང་བར་་འགྲིབ་པར་འཕེལ་བར་བྱེད་པ་མ་ཡིན། འདས་པར་མ་ཡིན། མ་འོངས་པར་མ་ཡིན། ད་ལྟར་བྱུང་བར་བྱེད་པ་མ་ཡིན་ཞེས་གཞི་ཤེས་ཀྱི་མཇུག་སྡུད་གསུངས་སོ། །རབ་འབྱོར་ཡང་ཡུམ་འདི་ནི་འདོད་པའི་ཁམས་ལས་ཤིན་ཏུ་འདའ་བར་བྱེད་བ་མ་ཡིན་གནས་པར་བྱེད་པ་མ་ཡིན། དེ་བཞིན་དུ་ཁམས་གཞན་གཉིས་ལ་དང༌། སྦྱིན་པའི་ཕར་ཕྱིན་སྟེར་བར་བྱེད་པ་མ་ཡིན་སེར་སྣ་འཕྲོག་པར་བྱེད་པ་མ་ཡིན། ཞེས་པ་ནས་རྣམ་མཁྱེན་ཉིད་སྟེར་བར་བྱེད་པའམ་འཕྲོག་
པར་བྱེད་པ་མ་ཡིན། ཞེས་ལམ་ཤེས་ཀྱི་མཇུག་སྡུད་གསུངས་སོ། །རབ་འབྱོར་ཡུམ་འདི་ནི་སངས་རྒྱས་ཀྱི་ཆོས་རྣམས་སྟེར་བར་བྱེད་པའམ། །འཕྲོག་པར་བྱེད་པ་མ་ཡིན། དེ་བཞིན་དུ་སོ་སོ་སྐྱེ་བོའི་ཆོས་རྣམས་དང༌། ཉན་རང་གི་ཆོས་རྣམས་དང༌། འདུས་བྱས་འདུས་མ་བྱས་ཀྱི་ཆོས་རྣམས་ལ་སྦྱར་ནས་དེའི་འཐད་པར་དེ་བཞིན་གཤེགས་པ་བྱུང་རུང་མ་བྱུང་རུང་ཆོས་ཉིད་དེ་གནས་པ་དང་དེ་བཞིན་གཤེགས་པས་ཐུགས་སུ་ཆུད་ནས་གཞན་ལ་སྟོན་པ་ལ་སོགས་པར་གསུངས་པས་རྣམ་མཁྱེན་གྱི་མཇུག་སྡུད་གསུངས་སོ། །དེ་ཡང་སྐབས་གསུམ་པ་གཞི་ཤེས་ཀྱི་སྐབས་འདིར་ཇི་ལྟར་གསུངས་པ་དེ་ཐམས་ཅད་ཀྱང་གཞི་ཕུང་པོ་ཁམས་དང་སྐྱེ་མཆེད་ཀྱི་ཆོས་ཐམས་ཅད་ལ་ཐོབ་པ་དང་མ་ཐོབ། །སྟེར་བ་དང་འཕྲོག་པ་ལ་སོགས་གཉིས་བཅས་ཀྱི་ཆོས་ལ་ཞེན་པ་དང་བཅས་པའི་སྒོ་ནས་བླང་དོར་དུ་བྱ་བའི་ཕྱིར་ནི་བསྟན་པ་མ་ཡིན་ཏེ་མཐའ་གང་རུང་འཛིན་པའི་རྣམ་པར་རྟོག་པ་བཀག་ནས་ཞེན་པའི་སྤྲོས་པ་གཙོད་པའི་དོན་དུ་གསུངས་པ་ཡིན་ནོ་ཞེས་དང༌། སྐབས་གཉིས་པ་ལམ་ཤེས་ཀྱི་སྐབས་སུ་བསྟན་པ་དེ་དག་ཀྱང་སྲིད་པ་འཁོར་བས་བསྡུས་པའི་ཆོས་རྣམས་སྤང་བྱ་མི་མཐུན་པའི་ཕྱོགས་དང༌། རྣམ་པར་བྱང་བ་མྱང་འདས་ཀྱིས་བསྡུས་པའི་ཆོས་རྣམས་གཉེན་པོ་བླང་བར་བྱ་བའི་ཕྱོགས་སུ་བལྟས་ནས་འཁོར་འདས་ལ་བླང་དོར་དུ་བྱ་བའི་ཆེད་དུ་བསྟན་པ་
མ་ཡིན་ཏེ་སྲིད་ཞི་མཉམ་པ་ཉིད་དུ་རྟོགས་པའི་སྒོ་ནས་བླང་དོར་གྱི་ཞེན་པ་གཅོད་པའི་དོན་དུ་བསྟན་པ་ཡིན་ནོ་ཞེས་དང༌། སྐབས་དང་པོ་རྣམ་མཁྱེན་གྱི་སྐབས་སུ་ཇི་ལྟར་བསྟན་པ་རྣམས་ཀྱང༌། སྤང་བྱའི་རང་བཞིན་བདེན་པར་གྲུབ་པ་ཞིག་སྤངས། ཐོབ་བྱའི་རང་བཞིན་བདེན་པར་གྲུབ་པ་ཞིག་ཐོབ། །ཆོས་ཐམས་ཅད་ཀྱི་རང་བཞིན་བདེན་པར་གྲུབ་པ་ཞིག་མཁྱེན་ནས་འཆད་པའི་རྣམ་མཁྱེན་བསྟན་པ་ནི་མ་ཡིན་ཏེ། འཁོར་འདས་ལ་སྤང་བླང་དུ་འཛིན་པའི་སྤྲོས་པ་ཐམས་ཅད་ཉེ་བར་ཞི་བ་ནི་ཆོས་ཐམས་ཅད་ཀྱི་ཆོས་ཉིད་ཡེ་ནས་གནས་པ་ཉིད་ཐུགས་སུ་ཆུད་ནས་སྒྲོ་སྐུར་དང་བྲལ་བར་སྟོན་པ་ཉིད་རྣམ་མཁྱེན་ཡིན་ནོ་ཞེས་ཐོབ་བྱ་ཐོབ་བྱེད་ཀྱི་ཞེན་པ་གཅོད་པའི་དོན་དུ་བསྟན་པ་ཡིན་ཞེས་མཁྱེན་གསུམ་ཇི་ལྟར་བསྟན་པ་དང་བསྟན་པའི་དགོས་པ་བརྗོད་པའི་སྒོ་ནས་མཇུག་བསྡུས་པ་ཡིན་ནོ། །འདིར་འགྲེལ་པ་རྣམས་སུ་མཁྱེན་གསུམ་རྫོགས་པར་བསྟན་པ་ཞེས་པའི་དོན་ནི་མཁྱེན་གསུམ་གྱི་སྐབས་སུ་བསྟན་པའི་དོན་ཐམས་ཅད་འདིར་ཚང་བར་སྟོན་ཞེས་པའི་དོན་མ་ཡིན་གྱི་མཁྱེན་གསུམ་གྱི་བཤད་པ་རྫོགས་ཟིན་པར་སྟོན་པའོ། །དེ་ཡང་མཁྱེན་གསུམ་ལ་མཇུག་སྡུད་མཛད་ནས་མངོན་རྟོགས་གཞན་ལྔ་ལ་མི་གསུངས་པ་ནི། མཁྱེན་གསུམ་གྱིས་མངོན་རྟོགས་བརྒྱད་ཀྱི་དོན་མཐའ་དག་སྡུད་པར་བྱེད་པ་ཉིད་ཀྱིས་གཙོ་བོ་ཡིན་པའི་ཕྱིར་དང༌། དེ་རྒྱས་པར་བཤད་ཟིན་པས་གཞན་རྣམས་ཀྱང་དོན་གྱིས་བཤད་ཟིན་
པའི་ཕྱིར་རོ། །ཞེན་བཅས་གཉེན་པོ་ཡིན་ཀྱང་སྤང་བྱ་སྟེ། །ཞེན་མེད་རྟོགས་པའི་དངོས་ན་བླང་དོར་མེད། །ཞེན་དང་མ་ཞེན་ཁྱད་པར་འདི་ལྟར་ཞེས། །རྒྱལ་སྲས་རྣམས་ཀྱི་སྤང་བླང་འདིར་བཤད་དོ། །གཞི་ཐམས་ཅད་ཤེས་པ་ཉིད་ཀྱི་སྐབས་ཏེ་གསུམ་པའི་སྤྱི་དོན་བཤད་ཟིན་ཏོ།། །།གཉིས་པ་འཇུག་པ་སྦྱོར་བ་བཞིའི་ཡན་ལག་རྒྱས་པར་བཤད་པ་ལ་གཉིས། དབང་དུ་བྱ་བ་དང༌། བརྟན་པ་རྒྱུ་འབྲས་ཀྱི་ཡན་ལག་རྒྱས་པར་བཤད་པའོ། །དང་པོ་ལ་གཉིས། དབང་དུ་བྱེད་པའི་རྒྱུ་རྣམ་ཀུན་དང༌། དབང་དུ་བྱ་བའི་འབྲས་བུ་རྩེ་མོའི་ཡན་ལག་རྒྱས་པར་བཤད་པའོ། །དང་པོ་དབང་དུ་བྱེད་པའི་རྒྱུ་རྣམ་ཀུན་བཤད་པ་ལ་གཉིས། སྦྱོར་བ་ཁྱད་པར་ཅན་རྒྱུད་ལ་བསྐྱེད་པ་དང༌། སྦྱོར་བ་ཁྱད་པར་ཅན་རྒྱུད་ལ་སྐྱེས་པའི་སྒོམ་རིམ་མོ། །དང་པོ་སྦྱོར་བ་ཁྱད་པར་ཅན་རྒྱུད་ལ་བསྐྱེད་པ་ལ་བཞི། སྦྱར་ས་རྣམ་པ། སྦྱོར་བ་པོ་གང་ཟག །སྦྱོར་བ་རང་གི་ངོ་བོ། །སྦྱོར་བའི་སྔོན་འགྲོའི་ཆོས་སོ། །དང་པོ་སྦྱར་ས་རྣམ་པ་བཤད་པ་ལ་སྤྱི་དང་ཡན་ལག་གི་དོན་གཉིས། དང་པོ་སྤྱིའི་དོན་ལ་བཞི། རྣམ་པའི་ངོས་འཛིན། མདོ་ནས་གསུངས་ཚུལ། །བསྟན་བཅོས་སུ་བསྡུས་ཚུལ། ཇི་ལྟར་སྒོམ་ཚུལ་ལོ། །དང་པོ་རྣམ་པའི་ངོས་འཛིན་ནི། ཀུན་ནས་ཉོན་མོངས་པ་དང་རྣམ་བྱང་གི་ཆོས་ཀྱི་ཁྱད་པར་རམ་གསལ་བའི་དབྱེ་བ་རྣམས་སོ། །དེ་ལ་ཡང་རྟོགས་བྱ་བདེན་བཞི་དང་
རྟོག་པ་པོ་མཁྱེན་གསུམ་ལ་ཡོད་པའི་ཆོས་ཀྱི་ཁྱད་པར་གཉིས་ཏེ་ལས་དང་བྱེད་པའི་རྣམ་པའོ། །དེ་གཉིས་ལ་དོན་རྣམ་དང་ཤེས་རྣམ་ཀྱི་ཐ་སྙད་ཀྱང་མཛད་དོ། །གཉིས་པ་མདོ་ནས་གསུངས་ཚུལ་ནི། །མདོ་ལས། ཡུམ་འདི་ནི་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ནམ་མཁའ་མེད་པའི་ཕྱིར་རོ། །ཞེས་པ་ནས། ཡུམ་འདི་ནི་སངས་རྒྱས་ཀྱི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བ་ཉིད་ཀྱི་ཕྱིར་རོ། །ཞེས་པའི་བར་དུ་རབ་འབྱོར་གྱིས་དམ་བཅའ་རྣམས་བཞག་ནས་དེ་བཞིན་གཤེགས་པས་དེའི་འཐད་པ་རྣམས་བཀའ་སྩལ་ཏོ། །གསུམ་པ་བསྟན་བཅོས་སུ་བསྡུས་ཚུལ་ནི། མདོ་དེ་དག་ལ། རྗེ་བཙུན་གྱིས། མེད་པའི་རྣམ་པ་ནས་བཟུང་སྟེ། །ཞེས་སོགས་ཀྱིས་འདི་ནས་འདིའི་བར་གྱིས་གཞི་ཤེས་དང་ལམ་ཤེས་དང་རྣམ་མཁྱེན་གྱི་རྣམ་པ་བསྟན་ཏོ་ཞེས་ས་གཅོད་མཛད་དོ། །དེ་ཡང་མཁྱེན་པ་དང་པོ་གཉིས་ལ་བདེན་པ་བཞི་ཀ་དང་ཐ་མལ་ལ་ལམ་བདེན་གྱི་རྣམ་པ་ཉི་ཚེ་གསུངས་ཏེ། ལམ་བདེན་ཉི་ཚེ་བཤད་པའི་རྒྱུ་མཚན་དང་དེའི་རྣམ་པ་རྣམས་རྣམ་མཁྱེན་གྱི་དོན་རྣམ་དང་ཤེས་པའི་རྣམ་པ་གང་ཡིན་པ་ནི་སྐབས་དེ་ཉིད་དུ་འཆད་པར་འགྱུར་རོ། །བཞི་པ་ཇི་ལྟར་སྒོམ་ཚུལ་ནི། སྔ་མ་ངག་ཤེས་རྣམ་བརྒྱ་དོན་གསུམ་གྱིས་དོན་རྣམས་བརྒྱ་དོན་གསུམ་ལ་སྒྲོ་
འདོགས་བཅད་ནས་བསྒོམ་པར་བྱ་བ་ཡིན་པས་དོན་རྣམ་ཉིད་བསྒོམ་བྱའོ་ཞེས་འཆད་དོ། །འོན་ཀྱང་གཞུང་ནས་སྦྱོར་བས་རྣམ་པ་སྒོམ་པར་གསུང་པ་ནི་གཙོ་བོར་ཤེས་རྣམ་ཉིད་སྒོམ་པར་སྣང་སྟེ། ཡུལ་ཅན་མཁྱེན་གསུམ་གྱི་ཡེ་ཤེས་ཀྱི་བྱེ་བྲག་གིས་ཡུལ་བདེན་བཞིའི་ཆོས་ཀྱི་ཁྱད་པར་ཚུལ་འདི་ལྟར་རྟོགས་པའི་དམིགས་རྣམ་ཅན་གྱི་ལམ་རྣམས་མི་གནས་པའི་སྦྱོར་བ་དང་མི་སྦྱོར་བའི་སྦྱོར་བ་གཉིས་ཀྱིས་ཐབས་ཤེས་ཟུང་འབྲེལ་དུ་སྐྱེད་པར་བྱེད་པ་ཉིད་སྦྱོར་བས་རྣམ་པ་སྒོམ་པའི་དོན་ཡིན་པས་སོ། །དེ་ལ་ཡང་སངས་རྒྱས་ཀྱི་ས་འབའ་ཞིག་དང༌། ཉན་རང་གི་རྒྱུད་ལ་ཡོད་པ་རྣམས་ལ་ནི་དེ་དང་རིགས་མཚུངས་པའི་ལམ་དེ་དང་དེ་དག་སྐྱེད་པ་ལ་དེ་སྒོམ་པ་དང༌། བསྐྱེད་པར་བཏགས་ཏེ། དཔེར་ན་བྱང་སེམས་ཀྱིས་ཉན་རང་གི་ལམ་སྐྱེད་པར་གསུངས་པ་བཞིན་ནོ། །དེས་ན་སྐབས་འདིར་རྣམ་པ་རྣམས་ཐེག་པ་ཆེ་ཆུང་དང་སངས་རྒྱས་དང་བྱང་སེམས་ཀྱི་རྟེན་ཐ་དད་པའམ། །ཡུལ་ལམ་ཡུལ་ཅན་གང་གི་སྒོ་ནས་བསྟན་ཀྱང་བྱང་སེམས་ཀྱི་རྒྱུད་ལ་བསྐྱེད་བྱའི་གཞི་ལམ་རྣམ་གསུམ་སྐྱེ་མེད་དུ་རྟོགས་པའི་ཡེ་ཤེས་ཀྱི་ཁྱད་པར་ཞིག་གི་དམིགས་རྣམ་མཚོན་པར་བཞེད་ནས་མཁྱེན་གསུམ་གྱི་ཡེ་ཤེས་ཀྱི་བྱེ་བྲག་རྣམས་ཀྱི་དམིགས་པ་དང་རྣམ་པ་འདི་དང་འདི་ལྟ་བུའོ་ཞེས་གསུངས་པ་ཡིན་ནོ། །བསྐྱེད་བྱའི་དམིགས་རྣམ་ཤེས་པ་ན་སྦྱོར་བས་སྔར་ལྟར་རྒྱུད་ལ་སྐྱེད་པ་ལ་
དགོངས་ནས་རྣམ་པ་ཡུལ་དུ་གསུངས་སོ། །དེ་ལྟར་ན་བདག་མེད་པ་དང་སྙིང་རྗེ་སྒོམ་ཞེས་པ་ལྟར་ཡུལ་སྒོམ་པ་དང་ཡུལ་ཅན་དེའི་བདག་ཉིད་དུ་བློ་གོམས་པར་བྱེད་པ་གཉིས་ལས་འདིར་ཕྱི་མ་གཙོ་བོར་བཟུང་ངོ༌། །གཉིས་པ་ཡན་ལག་གི་དོན་ལ་གསུམ། གཞི་ཤེས་དང༌། ལམ་ཤེས་དང༌། རྣམ་མཁྱེན་གྱི་རྣམ་པ་རྒྱས་པར་བཤད་པའོ། །དང་པོ་གཞི་ཤེས་ཀྱི་རྣམ་པ་ལ་ཡང་གཉིས། །བདེན་པ་དང་པོ་གསུམ་དང༌། ལམ་གྱི་བདེན་པའི་རྣམ་པའོ། །དང་པོ་སྡུག་བསྔལ་ཀུན་འབྱུང་འགོག་པ་གསུམ་གྱི་རྣམ་པ་བཅུ་གཉིས་ནི། མེད་པའི་རྣམ་པ་སོགས་ཐ་སྙད་བཅུ་གཉིས་ཀྱིས་གསུངས་ཏེ། རིམ་པ་ལྟར། རྟག་པ་མེད་པ་དང༌། ཐ་སྙད་དུ་སྡུག་བསྔལ་སྐྱེ་ཡང་དེ་ཁོ་ནར་མི་སྐྱེ་བའམ་སྐད་ཅིག་གཅིག་ལས་ལྷག་པར་མི་སྐྱེ་བ་དང༌། བྱེད་པ་པོའི་བདག་གིས་དབེན་པ་དང༌། བདག་མེད་པས་བདག་ཏུ་རྟོགས་པའི་སྐྱོན་གྱིས་མི་བརྫི་བ་དང་བཞི་ནི་སྡུག་བདེན་གྱིའོ། །ཐ་སྙད་དུ་མིང་གཟུགས་སྐྱེད་པའི་རྒྱུ་ཡིན་ཀྱང་དེ་ཁོ་ནར་དེ་སྐྱེད་པའི་གནས་མེད་པ་དང༌། ཐ་སྙད་དུ་འགྲོ་འོང་གི་བྱ་བ་དང་ལྡན་ཀྱང་དེ་ཁོ་ནར་དེ་གཉིས་མེད་པས་ནམ་མཁའ་དང་མཚུངས་པ་དང༌། ཐ་སྙད་དུ་ནང་གི་བརྗོད་པ་རྟོག་དཔྱོད་ཡོད་ཀྱང་དེ་ཁོ་ནར་དེ་འབྲས་བུ་དང་བཅས་པ་བརྗོད་དུ་མེད་པ་དང༌། ཐ་སྙད་དུ་མིང་བཞིའི་ནང་ཚན་ཚོར་བ་ལས་སྐྱེས་པའི་ཡང་སྲིད་ཀྱི་རྐྱེན་སྲེད་པ་ཡོད་ཀྱང་དེ་ཁོ་ནར་མིང་མེད་པ་
དང་བཞི་ནི་ཀུན་འབྱུང་གིའོ། །ཤེས་རབ་ཀྱི་ལུས་ཀྱིས་མངོན་དུ་བྱ་བ་ཡིན་གྱིས་རྒྱུད་གཅིག་ནས་གཅིག་ཏུ་སོང་ནས་ཐོབ་པར་བྱ་བའི་འགྲོ་བ་མེད་པ་དང་གཟོད་མ་ནས་ཉེ་བར་ཞི་བས་མི་འཕྲོག་པ་སྟེ་བློས་ཡོངས་དཔྱོད་ཀྱི་ཡུལ་དུ་གཟུང་དུ་མེད་པ་དང༌། ཆོས་ཀྱི་དབྱིངས་ཀྱི་རང་བཞིན་ཡིན་པས་མི་ཟད་པ་དང༌། གཅིག་དང་དུ་མའི་སྐྱེད་བྱེད་ཀྱི་སྐྱེ་བའི་རྒྱུ་མེད་པས་སྐྱེ་བ་མེད་པ་དང་བཞི་ནི་འགོག་པའི་འོ། །གཉིས་པ་ལམ་བདེན་གྱི་རྣམ་པ་ལ། རྟེན་ལམ་དང༌། བརྟེན་པ་རྣམ་པའི་རབ་དབྱེ་གཉིས། དང་པོ་ལ་ལམ་གྱི་རབ་དབྱེ་དངོས་དང་མཐའ་དཔྱད་པ་གཉིས་སོ། །དང་པོ་ལམ་གྱི་རབ་དབྱེ་ནི། རྣམ་པ་གསུམ་སྟེ། ཉོན་སྒྲིབ་ཀྱི་གཉེན་པོ་ཐེག་དམན་གྱི་ཟག་མེད་ལམ་གཅིག་དང༌། ཤེས་སྒྲིབ་ཀྱི་གཉེན་པོར་སྒོམ་ལམ་ཟག་བཅས་དང༌། མཐོང་ལམ་ཟག་མེད་གཉིས་སོ། །འདིའི་ཤེས་སྒྲིབ་ཀྱི་གཉེན་པོ་ནི་རང་རྒྱལ་གྱི་གཟུང་རྟོག་གི་གཉེན་པོ་ཡིན་ནོ། །གཉིས་པ་མཐའ་དཔྱད་པ་ལ་བཞི་ལས། དང་པོ་སྔ་མ་བཞི་ཉོན་སྒྲིབ་དང་ལྷག་མ་བཅུ་གཅིག་ཤེས་སྒྲིབ་ཀྱི་གཉེན་པོར་འཇོག་པའི་རྒྱུ་མཚན་ནི། དང་པོ་བཞི་གང་ཟག་གི་བདག་མེད་ཀྱི་རྣམ་པ་ཅན་དུ་སྣང་ཞིང་གང་ཟག་གི་བདག་འཛིན་ཉོན་སྒྲིབ་ཀྱི་རྒྱུ་ཡིན་པ་དང༌། དེ་བཞི་ལམ་རིག་པ་སོགས་ཡིན་ཞིང་མི་རྟག་སོགས་བཅུ་དྲུག་ཉོན་སྒྲིབ་ཀྱི་གཉེན་པོར་ཕྱེ་བའི་ཕྱིར་དང་པོ་བཞི་ཉོན་སྒྲིབ་
ཀྱི་གཉེན་པོའོ། །ལྷག་མ་རྣམས་ཀྱང་སྒྲིབ་པའི་གཉེན་པོར་ནི་བསྟན་དགོས་ལ་ཉོན་སྒྲིབ་བསྟན་ཟིན་པས་འོས་མེད་ཀྱི་རིག་པའོ། །གཉིས་པ་ཤེས་སྒྲིབ་ཀྱི་གཉེན་པོ་ལ་དང་པོ་ལྔ་ཟག་བཅས་དང་ཐ་མ་དྲུག་ཟག་མེད་དུ་འཇོག་པ་ནི། །དང་པོ་ལྔས་ཡུལ་མེད་བཞིན་སྣང་བའི་རྗེས་ཐོབ་མཚོན་ལ། ཕྱི་མ་དྲུག་གིས་སྣང་བ་མེད་པའི་མཉམ་གཞག་མཚོན་པས་དེར་བཞག་གོ། །གསུམ་པ་ཟག་བཅས་སྒོམ་ལམ་དང་ཟག་མེད་མཐོང་ལམ་ལ་འཇོག་པ་ནི། མཐོང་ལམ་མཉམ་གཞག་པར་མ་ཆད་དུ་དང༌། སྒོམ་ལམ་དུས་རིང་བས་རྗེས་ཐོབ་མངོན་གྱུར་དང་སྤེལ་ནས་སྐྱེ་བས་སོ། །བཞི་པ་ཉོན་སྒྲིབ་ཀྱི་གཉེན་པོ་ལམ་ཕྱེ་བར་ཤེས་སྒྲིབ་ཀྱི་གཉེན་པོ་ལ་ཕྱེ་བ་ནི་དེ་གཉིས་སྤང་དཀའ་སླ་ཡོད་པས་སོ། །གཉིས་པ་བརྟེན་པ་རྣམ་པའི་རབ་དབྱེ་ལ་གསུམ། བཞི་དང༌། ལྔ་དང༌། དྲུག་ཏུ་དབྱེ་བའོ། །དང་པོ་ལམ་གསུམ་ཡོད་པ་དེའི་ནང་ནས་ལམ་དང་པོ་ཟག་མེད་ཀྱི་རྣམ་པ་སྟོན་པ་ནི། བྱེད་པ་པོའི་གང་ཟག་མེད་པར་རྟོགས་པས་དེར་འཛིན་པའི་གཉེན་པོ་བྱེད་པ་དང༌། ཤེས་པ་པོའི་གང་ཟག་མེད་པར་རྟོགས་པས་དེར་འཛིན་པའི་གཉེན་པོ་བྱེད་པ་དང༌། ཐ་སྙད་དུ་དམན་པའི་ས་དོར་ནས་ཁྱད་པར་དུ་འཕགས་པའི་གནས་སྐབས་ལེན་པའི་སྒོ་ནས་འཕོ་བ་ཡོད་ཀྱང་དེ་ཁོ་ནར་འཕོ་བ་མེད་པ་དང༌། ཐ་སྙད་དུ་ཉོན་མོངས་བཏུལ་ནས་མྱང་འདས་སུ་འགྲོ་ཡང༌། དེ་ཁོ་ནར་འདུལ་བ་མེད་པ་དང་
བཞི་ནི་རིམ་པ་ལྟར་ལམ་སོགས་བཞིའོ། །གཉིས་པ་ལམ་གཉིས་པ་ཟག་བཅས་ལ་ཡོད་པའི་རྣམ་པ་ལྔ་ནི། ཕྱིའི་གཟུང་བ་རྨི་ལམ་ལྟར་ཡུལ་དུ་སྣང་ཡང་བདེན་པའི་ངོ་བོ་ཉིད་མེད་པ་དང༌། སྒྲ་བརྙན་ཏེ་བྲག་ཆ་ལྟར་བདེན་པའི་རྒྱུ་ལས་མ་སྐྱེས་པ་དང༌། མིག་ཡོར་ཏེ་གཟུགས་བརྙན་ནམ་ཟླ་བ་གཉིས་སྣང་ལྟར་རྣམ་པ་ཙམ་མ་འགགས་པ་དང༌། སྨིག་རྒྱུའི་ཆུ་ལྟར་གཟོད་མ་ནས་སྤྲོས་པ་ཉེ་བར་ཞི་བ་དང༌། སྒྱུ་མའི་རྟ་གླང་ལྟར་རང་བཞིན་གྱིས་རྣམ་པར་དག་པ་རྣམས་སོ། །དེ་དག་གིས་གཉེན་པོ་བྱེད་ཚུལ་ནི་གཟུང་བ་རྨི་ལམ་ལྟར་རྟོགས་པ་ལ་སོགས་པ་རེ་རེ་བསྒོམ་པས་ཀྱང་དེ་ལ་བདེན་འཛིན་ཐམས་ཅད་སྤོང་བར་ནུས་པའོ། །གསུམ་པ་ལམ་གསུམ་པ་ཟག་མེད་ལ་ཡོད་པའི་རྣམ་པ་ནི། ཕྱིའི་གཟུང་བ་དོར་བྱ་ཀུན་ནས་ཉོན་མོངས་པའི་དངོས་པོར་མེད་པ་དང༌། དེ་བླང་བྱ་རྣམ་པར་བྱང་བའི་དངོས་པོར་མེད་པ་དང༌། དེའི་རང་བཞིན་གོས་པ་མེད་པ་འོད་གསལ་བ་དང༌། དེ་གཟུགས་སྒྲ་ལ་སོགས་པའི་དབྱེ་བའི་སྤྲོས་པ་མེད་པ་དང༌། དེ་རང་བཞིན་གྱིས་སྟོང་པར་རྟོགས་པའི་རྟོགས་པ་ལ་རློམ་པ་སྟེ་རློམ་པར་བྱར་མེད་པ་དང༌། དེ་རང་བཞིན་གྱིས་སྟོང་པའི་སྟོང་ཉིད་མི་གཡོ་བ་སྟེ། སྲིད་པ་ཇི་སྲིད་ཀྱི་བར་དུ་གནས་པར་རྟོགས་པའི་རྣམ་པའོ། །དེ་དག་ཀྱང་རྣམ་པར་རྟོག་པ་ཤེས་སྒྲིབ་དྲུག་གི་གཉེན་པོའོ། །དྲུག་གང་ཞེ་
ན། ཕྱིའི་གཟུང་པ་ལ་ཀུན་ནས་ཉོན་མོངས་པ་དོར་བྱར་རྟོག་པའི་ཤེས་སྒྲིབ་དང༌། དེ་བཞིན་དུ་སྦྱར་ནས། རྣམ་པར་བྱང་བ་བླང་བྱ་དང༌། དེའི་རང་བཞིན་ལ་ཉོན་མོངས་པའི་བག་ཆགས་ཀྱིས་གོས་པའི་དྲི་མ་ཅན་དང༌། དེ་ལ་གཟུགས་ནས་རེག་བྱའི་བར་གྱི་སྤྲོས་པའི་དབྱེ་བ་དང་ལྡན་པ་དང༌། དེ་ངོ་བོས་སྟོང་པར་རྟོགས་པས་རང་གི་རྟོགས་པ་ལ་གཟུང་བ་བདེན་པ་སྔར་ཡོད་ཕྱིས་མེད་པར་རྟོགས་པ་དང༌། དེ་ངོ་བོས་སྟོང་པའི་རང་བཞིན་ལ་རེ་ཞིག་སྟོང་ཡང་ཕྱིས་དེ་ལོག་ནས་མི་སྟོང་པར་འཛིན་པས་ཡོངས་སུ་ཉམས་པ་རྣམ་པར་རྟོག་པའོ། །གཉིས་པ་ལམ་ཤེས་ཀྱི་རྣམ་པ་ལ་བཞི། ཀུན་འབྱུང་སྤང་གཉེན་གྱི་སྒོ་ནས་བསྟན་པ་དང་ལམ་བདེན་དམ་བཅའ་དང་འཐད་པ་དང༌། སྡུག་བདེན་རང་སྤྱིའི་མཚན་ཉིད་དང༌། འགོག་བདེན་སྟོང་ཉིད་ཀྱི་སྒོ་ནས་བསྟན་པའོ། །དང་པོ་ཀུན་འབྱུང་སྤང་གཉེན་གྱི་སྒོ་ནས་འཆད་པ་ནི། འདི་ལྟར་ཡུལ་ལ་རྒྱབ་ཀྱིས་ཕྱོགས་པའི་འདོད་ཆགས་དང་བྲལ་བའི་ལམ་ཤེས་ཀྱི་རྣམ་པ་ནི་ཡུལ་ལ་ལྟ་བ་སོགས་སུ་བྱེད་འདོད་པའི་འདུན་པའི་གཉེན་པོ་དང༌། ཡུལ་ལ་མངོན་པར་ཞེན་པས་མི་གནས་པའི་རྣམ་པ་ནི་ཡུལ་འདོད་པ་སྔོན་དུ་འགྲོ་བ་ཅན་གྱི་མངོན་པར་ཞེན་པ་འདོད་ཆགས་ཀྱི་གཉེན་པོའོ། །འདི་གཉིས་ཀྱང་འདུན་པ་རྒྱུ་དང་འདོད་ཆགས་འབྲས་བུ་ཡིན་པས་གཅིག་དང་བྲལ་ན་གཅིག་དང་འབྲལ་བ་ཙམ་རྒྱུ་མཚན་དུ་བྱས་ནས་སྤང་གཉེན་དུ་སྦྱར་བའོ། །མཚན་མ་དང་ཉེས་
པ་ཉེ་བར་ཞི་བའི་རྣམ་པ་ནི་མ་འོངས་པའི་ལྷ་མིའི་ལུས་རྟེན་ལ་མངོན་པར་དགའ་བའི་སྲིད་པའི་གཉེན་པོ་སྟེ། སྤང་བྱ་དེ་གསུམ་ནི་ཀུན་འབྱུང་གི་ངོ་བོའི་རྣམ་པ་རྒྱུ་གང་ཡིན་པ་དེའོ། །འདོད་ཆགས་ལ་སོགས་པ་གསུམ་མེད་པའི་རྣམ་པ་ནི། །འདོད་ཆགས་སོགས་གསུམ་གྱི་གཉེན་པོ་སྟེ་སྤང་བྱ་དེ་གསུམ་ནི་ཀུན་འབྱུང་གི་རྣམ་པ་ཀུན་འབྱུང་གང་ཡིན་པ་དེའོ། །ཉོན་མོངས་ཀྱི་རྒྱུ་ཚུལ་མིན་ཡིད་བྱེད་དང་བྲལ་བས་ཉོན་མོངས་མེད་པའི་རྣམ་པ་ནི་གཙང་བདེ་སོགས་སུ་ཀུན་ཏུ་རྟོག་པའི་གཉེན་པོ་སྟེ། སྤང་བྱ་དེ་ནི་ཀུན་འབྱུང་གི་རྣམ་པ་རབ་སྐྱེའོ། །སེམས་ཅན་ནམ་བདག་མེད་པར་ཤེས་པའི་རྣམ་པ་ནི། །སེམས་ཅན་དུ་མངོན་པར་ཞེན་པ་འཇིག་ལྟའི་གཉེན་པོ་སྟེ། སྤང་བྱ་དེ་ནི་ཀུན་འབྱུང་གི་ངོ་བོའི་རྣམ་པ་རྐྱེན་གང་ཡིན་པ་དེ་ཡིན་ནོ། །དེ་ལྟར་ཀུན་འབྱུང་གི་རྣམ་པ་དངོས་མ་བསྟན་པར་གཉེན་པོ་གསུངས་པ་ནི་ཀུན་འབྱུང་དེ་སྤང་བྱར་བསྟན་པའི་ཕྱིར་རོ། །གཉིས་པ་ལམ་བདེན་གྱི་རྣམ་པ་ནི། ཚད་མེད་པས་ནི། སེམས་ཅན་ཐམས་ཅད་ལ་གོ་སྐབས་འབྱེད་པའི་ཐེག་ཆེན་ལམ་གྱི་ངོ་བོ་བསྟན་ལ། མཐའ་གཉིས་དང་མ་འབྲེལ་བས་ནི། དེས་ཇི་ལྟར་སེམས་ཅན་ཐམས་ཅད་ལ་གོ་སྐབས་འབྱེད་པའི་རྒྱུ་མཚན་བསྟན་ཏེ། སྲིད་ཞིའི་མཐའ་གཉིས་སུ་འཛིན་པ་དང་བྲལ་བའི་སྒོ་ནས་གཞན་གྱི་དོན་བྱེད་པས་སོ། །དེ་ཡང་སྲིད་ཞི་གང་རུང་ལ་
ཞེན་ན་ཚད་མེད་པའི་དོན་བྱེད་པ་མི་འབྱུང་བས་སོ། །ཐ་མི་དད་པ་ནི། ཆོས་ཐམས་ཅད་ཆོས་ཀྱི་དབྱིངས་སུ་ཐ་མི་དད་པར་མ་ལུས་པར་རྟོགས་པའི་རིགས་པ་གང་ཡིན་པའི་ངོ་བོ་བསྟན་ལ། མཆོག་ཏུ་འཛིན་པ་མེད་པས་ནི། ཐེག་ཆེན་གྱི་རིགས་པ་དེ་ཇི་ལྟར་མ་ལུས་པ་རྟོགས་པ་ཡིན་པའི་རྒྱུ་མཚན་བསྟན་ཏེ། ཉན་རང་གི་ས་ཙམ་གྱིས་ཆོག་མི་ཤེས་པར་ཐེག་ཆེན་གྱི་ཡོན་ཏན་མཐའ་དག་སྒྲུབ་པས་སོ། །དེ་ཡང་ཉན་རང་གི་ས་ལ་མཆོག་ཏུ་བཟུང་ན་ཕྱོགས་གཅིག་པའི་རིགས་པར་འགྱུར་བས་སོ། །རྣམ་པར་མི་རྟོག་པས་ནི་བདག་གཉིས་སུ་མི་རྟོག་པར་ཡུལ་རྟོགས་པར་བྱེད་པའི་སྒྲུབ་པ་གང་ཡིན་པའི་ངོ་བོ་བསྟན་ལ། །གཞལ་དུ་མེད་པས་ནི་ཐེག་ཆེན་སྒྲུབ་པ་དེ་ཇི་ལྟར་མི་རྟོག་པ་ཡིན་པའི་རྒྱུ་མཚན་བསྟན་ཏེ། ཐོབ་ཟིན་ཉམས་པ་ལ་དམན་པ་དང༌། མ་ཐོབ་པ་ཐོབ་པ་ལ་གྱ་ནོམ་པར་འཛིན་པའི་རྟོག་པ་དང་བྲལ་བ་སྔོན་དུ་བཏང་ནས་ཆོས་ཉིད་ལ་ཤེས་བྱའི་ཡུལ་དུ་མི་འཛིན་པས་སོ། །ཆགས་པ་མེད་པའི་རྣམ་པས་ནི། ཆོས་ཐམས་ཅད་ལ་ནམ་མཁའ་ལྟར་ཆགས་པ་དང་བྲལ་བའི་ངེས་པར་འབྱིན་པའི་ངོ་བོ་བསྟན་ལ། །དེ་ལ་འཐད་པ་མ་གསུངས་པ་ནི་གདུལ་བྱ་ཉེ་བའི་བསམ་པ་ལ་ལྟོས་པའོ། །དེ་ལྟར་ན་མདོར་ལམ་བདེན་དམ་བཅའ་དང་རྒྱུ་མཚན་གཉིས་གཉིས་ཀྱི་སྒོ་ནས་ཁྱད་པར་དུ་གྱུར་པར་གསུངས་པ་ནི་ལམ་རྒྱུད་ལ་བརྟེན་པའི་
ཕྱིར་རོ། །གསུམ་པ་སྡུག་བདེན་གྱི་རྣམ་པ་ནི། སྐྱེ་འཇིག་གི་ངོ་བོར་གནས་པས་མི་རྟག་པ་དང༌། འདུ་བྱེད་ཀྱི་སྡུག་བསྔལ་གྱིས་ཁྱབ་པས་སྡུག་བསྔལ་བ་དང༌། རྟེན་པར་བྱེད་པའི་བདག་དང་འབྲེལ་བ་མེད་པས་སྟོང་པ་དང༌། རང་ཉིད་བདག་མ་ཡིན་པས་བདག་མེད་པ་དང༌། གྲངས་ལྔ་པ་དེ་ཁོ་ནར་ཆོས་ཐམས་ཅད་མངོན་པར་མ་གྲུབ་པས་མཚན་ཉིད་དམ་རང་བཞིན་མེད་པའི་རྣམ་པའི་ངོ་བོ་ཉིད་རྣམས་ཏེ་དེ་ལྟར་ན་ལྔའོ། །སྔ་མ་བཞི་རང་རང་གི་ངོ་བོ་དང་ཐ་མ་ནི་བཞི་གའི་ངོ་བོ་ཡིན་ཞིང་ཐམས་ཅད་ལ་ཁྱབ་པས་རང་དང་སྤྱི་མཚན་ནོ། །སྡུག་བདེན་རང་སྤྱིའི་མཚན་ཉིད་ཀྱིས་བསྟན་པ་ནི་སྡུག་བསྔལ་ཤེས་བྱ་ཡིན་པའི་ཕྱིར་རོ། །བཞི་པ་འགོག་བདེན་གྱི་རྣམ་པ་ནི། ནང་སྟོང་པ་ཉིད་ཀྱི་རྣམ་པ་ནས་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་རྣམ་པའི་བར་བཅུ་དྲུག་གསུངས་པའོ། །ཇི་ལྟར་དེས་འགོག་པའི་རྣམ་པ་བསྟན་ཞེ་ན། འདི་ལ་ལྔ། དངོས་བཏགས་པ། བྱེད་པ་པོ། །ཡུལ་དུ་འཁྲུལ་བ། ངོ་བོ་ཉིད། འགོག་པའོ། །དང་པོ་ནི་ནང་དང་ཕྱི་དང་གཉིས་ཀའི་སྟོང་པ་ཉིད་ཀྱི་རྣམ་པ་གསུམ་གྱིས་ནི་འགོག་བདེན་གྱི་ངོ་བོའི་རྣམ་པ་འགོག་པའི་ངོ་བོ་ཉིད་བསྟན་ཏེ། དེ་ནི་མིག་སོགས་ནང་དང༌། །གཟུགས་སོགས་ཕྱི་དང༌། དབང་པོའི་རྟེན་ནང་ཕྱི་གཉིས་ཀའི་ཟག་བཅས་ཀྱི་དངོས་པོ་རྣམས་འགགས་པས་རབ་ཏུ་ཕྱེ་བའི་ཕྱིར་རོ། །གཉིས་པ་ནི་སྟོང་པ་ཉིད་སྟོང་པ་ཉིད་ཀྱི་རྣམ་པ་ནས་དོར་བ་མེད་པ་སྟོང་པ་ཉིད་
ཀྱི་རྣམ་པའི་བར་བརྒྱད་ཀྱིས་ནི་འགོག་བདེན་གྱི་ངོ་བོའི་རྣམ་པ་བཞི་བའི་རྣམ་པའི་ངོ་བོ་ཉིད་བསྟན་ཏེ། དེ་ནི་སྟོང་ཉིད་དུ་ལྟ་བའི་གཉེན་པོ་དང་དབྱིབས་སུ་བཀོད་པ་ཙམ་གྱི་སྣོད་ཀྱི་འཇིག་རྟེན་དང༌། དོན་དམ་པར་མ་གྲུབ་པའི་ཕྱོགས་དོན་དམ་པ་དང༌། འདུས་མ་བྱས་ཀྱི་མཚན་ཉིད་ལ་ལྟོས་པ་ཙམ་གྱི་འདུས་བྱས་དང༌། དེ་ལས་བཟློག་པའི་འདུས་མ་བྱས་དང༌། མཐར་འཇོག་བྱེད་ཀྱི་དབུས་མ་གྲུབ་པས་རྟག་པ་དང་ཆད་པའི་མཐའ་མེད་པ་དང༌། ཐོག་མཐའ་མེད་པ་དང་འདྲ་བར་དབུས་ཀྱང་ཆོས་ཉིད་ལྟར་གྱུར་པའི་འཁོར་བ་ཐོག་མ་དང་ཐ་མ་མེད་པ་དང༌། གཟིང་དང་འདྲ་བར་འབྲས་བུའི་ཚེ་སྤང་བར་བྱ་བ་ཡིན་པའི་ཕྱིར་ལམ་དུས་སུ་དོར་བ་མེད་པའི་ཆོས་ཕྱོགས་མཐུན་ཏེ། དེ་བརྒྱད་ལ་སྒྲོ་བཏགས་པའི་བདག་ཉིད་ཅན་གྱི་མངོན་པར་ཞེན་པ་བརྒྱད་ཞི་བའི་ཕྱིར་རོ། །སྔ་མ་ལ་དངོས་པོ་དང་འདི་ལ་བཏགས་པ་འགོག་པ་ཞེས་གསུངས་པའི་དོན་ཡང༌། སྔ་མར་ཡུལ་ཟག་བཅས་ཀྱི་སྡུག་བསྔལ་དང་འདིར་ཡུལ་ལ་ཡུལ་ཅན་གྱི་སྒྲོ་བཏགས་པའི་ཞེན་པ་འགོག་པའི་དོན་ཡིན་ནོ། །གསུམ་པ་ནི་རང་བཞིན་སྟོང་པ་ཉིད་ཀྱི་རྣམ་པས་ནི་འགོག་བདེན་གྱི་ངོ་བོའི་རྣམ་པ་གྱ་ནོམ་པ་གང་ཡིན་པ་དེ་བསྟན་ཏེ་དེ་ནི་མུ་སྟེགས་སོགས་གཞན་གྱི་ཀུན་བཏགས་པའི་གཙོ་བོ་དང་དབང་ཕྱུག་ལ་སོགས་པའི་བྱེད་པ་པོ་དགག་པ་སྟེ་དེ་ངག་གིས་མ་བྱས་པར་རང་བཞིན་གྱིས་སྐྱོན་དང་བྲལ་བའི་དག་པ་ཡིན་པས་སོ།
བཞི་པ་ནི་ཆོས་ཐམས་ཅད་དང་རང་གི་མཚན་ཉིད་མི་དམིགས་པ་སྟོང་པ་ཉིད་ཀྱི་རྣམ་པ་གསུམ་གྱིས་ནི་འགོག་བདེན་གྱི་ངོ་བོའི་རྣམ་པ་ཇི་ལྟར་ངེས་པར་འབྱུང་བའི་རྣམ་པ་བསྟན་ཏེ་དེ་ནི་བཏགས་པ་ཙམ་དུ་དང༌། མཚན་ཉིད་དུ་དང༌། དུས་སུ་འཁྲུལ་པ་གསུམ་དགག་པའོ། །གསུམ་ནི་ཆོས་ཐམས་ཅད་དང་གཟུགས་སུ་རུང་བ་སོགས་དང༌། འདས་སོགས་ལ་ཡུལ་དུ་འཁྲུལ་པའི་བདག་ཉིད་དོ། །ངེས་འབྱུང་གིས་ཐོབ་བྱ་ཡིན་པའི་ཕྱིར་ཇི་ལྟར་ངེས་འབྱུང་གིས་འཁྲུལ་པ་གསུམ་བསལ་ནས་དེ་ཇི་ལྟར་འཐོབ་ཚུལ་བསྟན་ཏོ། །ལྔ་པ་ནི་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་རྣམ་པ་གཅིག་གིས་ནི་འགོག་བདེན་གྱི་ངོ་བོའི་རྣམ་པ་གང་ངེས་པར་འབྱུང་བའི་རྣམ་པ་བསྟན་ཏེ། དེ་ནི་དངོས་པོ་དངོས་མེད་དང་རང་གཞན་གྱི་ངོ་བོ་ཉིད་བཞི་དགག་པའོ། །འདིར་གང་ངེས་འབྱུང་གིས་ནི་ཐོབ་བྱའི་ངོ་བོར་བདེན་པ་བཀག་སྟེ། ངོ་བོ་བཞི་མེད་པར་བསྟན་པས་སོ། །དེ་ལྟར་འགོག་བདེན་སྒྲིབ་པ་འགགས་པས་བསྟན་པ་ནི་མངོན་དུ་བྱ་རྒྱུར་བསྟན་པའི་ཕྱིར་རོ། །གསུམ་པ་རྣམ་མཁྱེན་གྱི་རྣམ་པ་ལ་མདོར་བསྟན་པ་དང༌། རྒྱས་པར་བཤད་པ་གཉིས། དང་པོ་མདོར་བསྟན་པ་ལ་ཡང༌། མདོར་བསྟན་དངོས་དང་རྣམ་མཁྱེན་གྱི་རྣམ་པ་ལ་གསུམ་དུ་དབྱེ་བའི་རྒྱུ་མཚན་གཉིས། དང་པོ་མདོར་བསྟན་དངོས་ནི། །རྣམ་མཁྱེན་གྱི་རྣམ་པ་དེ་ལ་ཡང་
དབྱེ་ན་ཀུན་མཁྱེན་རྣམ་པ་གསུམ་གྱི་སྒོ་ནས་དབྱེ་བས། ཉན་ཐོས་ལ་ཡོད་པའི་རྣམ་པ་སོ་བདུན་དང༌། བྱང་སེམས་ལ་ཡོད་པའི་སོ་བཞི་དང༌། སངས་རྒྱས་རྣམས་ལ་ཡོད་པའི་རྣམ་པ་སོ་དགུ། །དེ་དག་བསྡོམས་པས་བརྒྱ་རྩ་བཅུའོ། །གཉིས་པ་རྣམ་མཁྱེན་གྱི་རྣམ་པ་ལ་མཁྱེན་གསུམ་དུ་ཕྱེ་བའི་རྒྱུ་མཚན་ནི། ཁ་ཅིག་རྣམ་མཁྱེན་གྱི་འཕགས་པའི་གང་ཟག་ཐམས་ཅད་ཀྱི་ཡོན་ཏན་ཡར་ལྡན་དུ་བསྡུས་པས་ན། ཉན་ཐོས་དང་བྱང་སེམས་ཀྱི་རྒྱུད་ལ་སྐྱེས་པའི་སོ་བདུན་དང་སོ་བཞི་དང་རྗེས་མཐུན་པ་རྣམ་མཁྱེན་ལ་ཡོད་པ་དེ་དག་ལ་དེ་དག་གིས་མིང་གིས་བཏགས་ནས་བསྟན་པ་ཙམ་ཡིན་ཏེ་ལམ་གྱི་བདེན་པའི་རྗེས་མཐུན་པར་ཞེས་གསུངས་པའི་ཕྱིར་ཞེས་བཞེད། ཁ་ཅིག་ཐེག་པ་ཐམས་ཅད་ནི་སངས་རྒྱས་ཀྱི་རྒྱུ་ཡིན་པའི་ཕྱིར་རྣམ་པ་ཐམས་ཅད་མཁྱེན་པའི་རྒྱུའི་རྣམ་པར་བཞག་གི། དངོས་སུ་ན་ཐམས་ཅད་ཤེས་པ་དང་ལམ་ཤེས་པའི་རྣམ་པར་གོང་དུ་དྲངས་ཏེ་བརྩིའོ་ཞེས་ཟེར་རོ། །འོན་ཀྱང་རང་ལུགས་ནི། སོ་བདུན་དང་སོ་བཞིའི་རྣམ་པ་འདི་དག་རྣམ་མཁྱེན་གྱི་ཤེས་རྣམ་དང་རྒྱུའི་རྣམ་པ་གཉིས་ཀར་མི་བཞེད་དེ་རྣམ་མཁྱེན་གྱི་ཡུལ་དོན་རྣམ་དུ་བཞེད་དོ། །དེ་ཡང་རྣམ་མཁྱེན་ནི་ཡུལ་གཞི་ལམ་རྣམ་གསུམ་དང་ཡུལ་ཅན་མཁྱེན་གསུམ་ལ་བརྟེན་པའི་རྣམ་པ་མ་ལུས་པའི་ཡུལ་ཅན་ཡིན་པས་འདིའི་རྣམ་པ་སྟོན་པ་ན་གཞི་ཤེས་དང་ལམ་ཤེས་གཉིས་ཀྱི་རྣམ་པ་ཡང་སྟོན་དགོས་ལ། སྔར་མཚན་
ཉིད་ཀྱི་སྒོ་ནས་བསྟན་པས་འདིར་ནི་དེ་གཉིས་མཚན་གཞིའི་སྒོ་ནས་བསྟན་ཏོ། །སྔར་གྱི་ཉེར་བདུན་དང་སོ་དྲུག་གི་དོན་རྣམ་དེ་གཉིས་རྟོགས་པར་བྱེད་པ་པོ་ནི་འདིའི་སོ་བདུན་དང་སོ་བཞི་ཡིན་པའི་ཕྱིར། །ཡུལ་ཅན་འདི་དག་དམིགས་པར་བཤད་པ་ན་དེ་དག་གི་ཡུལ་བདེན་བཞི་ཡང་འདིའི་དམིགས་པར་འགྱུར་ཏེ། ལམ་དེའི་དམིགས་ཡུལ་དང་རྣམ་པ་འདི་ལྟ་བུའོ་ཞེས་མ་བཟུང་བར་དེ་ཤེས་པར་བྱེད་མི་ནུས་པས་སོ། །དོན་གྱི་དབང་འདི་གཟིགས་ནས་བསྟན་བཅོས་སུ་དངོས་སུ་ལམ་བདེན་ལ་བརྟེན་པའི་རྣམ་པ་ཉི་ཚེ་བཤད་དོ། །སྔར་བཤད་པ་དང་ཟློས་པར་ཡང་མི་འགྱུར་ཏེ། སྔར་ནི་དེ་གཉིས་རང་རང་གི་རྟོགས་བྱ་བསྟན་ལ་འདིར་ནི་རྣམ་མཁྱེན་གྱི་རྟོགས་བྱར་བསྟན་པས་སོ། །དེས་ན་ལམ་གྱི་བདེན་པའི་རྗེས་མཐུན་པ་ཞེས་པ་ཡང་ཡིན་པ་ལ་བྱེད་ཀྱི་བཏགས་པ་ལ་བྱེད་ན་མི་འཐད་དེ། ལམ་གསུམ་ག་ལ་འབྱུང་བས་སོ་དགུ་ལ་ཡང་ཐལ་བར་འགྱུར་རོ། །གཉིས་པ་རྒྱས་པར་བཤད་པ་ལ་གསུམ། །གཞི་ཤེས་དང༌། ལམ་ཤེས་དང༌། རྣམ་མཁྱེན་རྣམས་རྒྱས་པར་བཤད་པའོ། །དང་པོ་གཞི་ཤེས་ཀྱི་རྣམ་པ་རྒྱས་པར་བཤད་པ་ལ་གཉིས། སྤྱི་དང་ཡན་ལག་གི་དོན་ནོ། །དང་པོ་སྤྱིའི་དོན་ལ་གསུམ། ལམ་གང་དུ་སྒོམ་པ། རྫས་བཏགས་ཀྱི་ཁྱད་པར། སྒྲ་བཤད་པའོ། །དང་པོ་ལམ་གང་དུ་སྒོམ་པ་ནི། སྤྱིར་
ཐེག་ཆེན་གྱི་གཞུང་རྣམས་ལས། ཚོགས་ལམ་ན་སྡེ་ཚན་དང་པོ་གསུམ་དང༌། དྲོད་རྩེ་ནས་དབང་པོ། བཟོད་མཆོག་ན་སྟོབས། མཐོང་ལམ་ན་བྱང་ཆུབ་ཡན་ལག་དང༌། སྒོམ་ལམ་ན་ལམ་གྱི་ཡན་ལག་སྒོམ་པར་གསུངས་ལ། ཕྱི་མ་གཉིས་ནི་གཙོ་བོ་གཙོ་ཆེ་བ་ཡིན་གྱིས་མཐོང་ལམ་ན་ཡང་ལམ་གྱི་ཡན་ལག་ཡོད་དོ། །མཛོད་ལས་ནི། ཚོགས་ལམ་ན་དྲན་ཉེ། སྦྱོར་ལམ་ན་ཡང་དག་སྤོང་བ་ནས་སྟོབས་ཀྱི་བར་བཞི། སྒོམ་ལམ་ནི་མཐོང་ལམ་ལས་བྱང་ཆུབ་ལ་ཉེ་བའི་ཕྱིར་དེ་ལ་བྱང་ལག་འཇིག་རྟེན་ན་ལམ་ནི་འགྲོ་བས་ཕྱེ་ལ་མཐོང་ལམ་ནི་སྒོམ་ལམ་ལས་ཆེས་མྱུར་བར་འགྲོ་བས་དེ་ལ་ལམ་གྱི་ཡན་ལག་གོ་ཞེས་འཆད་ལ་གོ་རིམ་འདི་ནི་བྱེ་སྨྲའི་འདོད་པ་ཡིན་པས་སློབ་དཔོན་དབྱིག་གཉེན་གྱིས་ཀྱང་རང་འགྲེལ་དུ་བཀག་གོ། །ཁ་ཅིག་བཞེད་པ་སྔ་ཕྱི་འདི་གཉིས་བྱང་སེམས་དང་ཉན་ཐོས་སོ་སོའི་ཇི་ལྟར་སྒོམ་ཚུལ་དུ་འཆད་པ་ནི། འཕགས་པ་རྣམས་ཀྱི་རྒྱུད་ལ་མངོན་རྟོགས་སྐྱེ་ཚུལ་དང༌། གྲུབ་མཐའ་སྨྲ་བའི་སྒྲོ་བཏགས་མ་ཕྱེད་པ་སྟེ། བྱེ་བྲག་སྨྲ་བས་ཀྱང་འཕགས་པའི་གང་ཟག་ཐམས་ཅད་ཀྱི་དབང་དུ་བྱས་ནས་དེ་ལྟར་བཞག་ལ་ཐེག་ཆེན་ལས་ཀྱང་སྤྱིའི་དབང་དུ་བྱས་པའི་ཕྱིར་རོ། །དེས་ན་བྱེ་སྨྲའི་གྲུབ་མཐའ་ནས་བཤད་ཚད་ཉན་རང་ལ་དེ་ལྟར་འོང་བའི་ངེས་པ་ག་ལ་ཡོད་དེ། གཞན་དུ་ན་ཉན་རང་གི་བློ་ལ་རང་རིག་མེད་པ་དང༌། དེ་ལ་
ཀུན་གཞི་མི་སྲིད་པ་དང་དེའི་ཕུང་སོགས་དོན་དམ་པར་མི་སྟོང་པར་ཡང་འདོད་དགོས་ཏེ་མཐའ་ཡས་སོ། །གཉིས་པ་རྫས་བཏགས་ཀྱི་ཁྱད་པར་ནི། མཛོད་ལས། མིང་གི་སྒོ་ནས་རྫས་སུ་བཅུ། །དད་དང་བརྩོན་འགྲུས་དྲན་པ་དང༌། །ཤེས་རབ་ཏིང་འཛིན་བཏང་སྙོམ་དགའ། །རྟོག་དང་ཚུལ་ཁྲིམས་ཤིན་ཏུ་སྦྱངས། །ཞེས་ངག་ལས་མཐའ་འཚོ་བ་གསུམ་གཅིག་ཏུ་བསྡུས་ནས་རྫས་བཅུར་བཤད་དོ། །རང་འགྲེལ་ལས། བྱེ་བྲག་ཏུ་སྨྲ་བ་རྣམས་ཀྱི་ལྟར་ན་ལུས་དང་ངག་གི་ལས་དག་ཐ་དད་ཅིང་རིགས་མི་མཐུན་པའི་ཕྱིར་ཚུལ་ཁྲིམས་ཀྱི་ཡན་ལག་རྣམས་རྫས་གཉིས་ཡིན་པས་རྫས་བཅུ་གཅིག་ཡིན་ནོ། །ཞེས་ཀྱང་འབྱུང་ངོ༌། །གསུམ་པ་སྒྲ་བཤད་པ་ནི། མཛོད་ལས། ཟད་དང་མི་སྐྱེ་ཤེས་པ་ནི། །བྱང་ཆུབ་དེ་དང་མཐུན་ཉིད་ཕྱིར། །སུམ་ཅུ་རྩ་བདུན་དེ་ཕྱོགས་མཐུན། །ཞེས་པ་ལྟར་རོ། །གཉིས་པ་ཡན་ལག་གི་དོན་ལ་བདུན། དངོས་པོ་ལ་རྟོག་པ་དང༌། རྩོལ་བ་ལས་བྱུང་བ་དང༌། ཏིང་ངེ་འཛིན་སྦྱོང་བ་དང༌། མངོན་པར་རྟོགས་པར་སྦྱོར་བ་དང༌། མངོན་པར་རྟོགས་པ་དང་འབྲེལ་བ་དང༌། མངོན་པར་རྟོགས་པ་དང་རྣམ་དག་ངེས་པར་འབྱིན་པའི་ལམ་མོ། །སྡེ་ཚན་བདུན་གྱི་དང་པོར་ལུས་སོགས་ཀྱི་དངོས་པོ་སྟེ་ཡུལ་ལ་ཡོངས་སུ་རྟོག་པའི་ལམ་འཆད་དེ། དེ་ཡང་དྲན་པ་ཉེ་བར་བཞག་
པའི་རྣམ་པ་བཞིའོ། །འོ་ན་ཡུལ་གང་ལ། ཚུལ་ཇི་ལྟ་བུས། ངོ་བོ་གང་གིས། དགོས་པ་གང་གི་ཕྱིར་རྟོག་ཅེ་ན། དང་པོ་ཡུལ་ནི། ལུས་ནས་ཆོས་ཀྱི་བར་རོ། །དེ་ལ་ལུས་ནི་གསུམ་ལས། ནང་གི་ལུས་ནི་ནང་གི་དབང་པོ་གཟུགས་ཅན་ལྔའོ། །གནོད་འཇོམས་ཆེ་བ་དང་དབང་པོ་དྲུག་ལ་བྱས་པ་ཀུན་བཏུས་དང་མི་མཐུན་ནོ། །ཕྱིའི་ལུས་ནི་དབང་པོའི་རྟེན་མ་ཡིན་པའི་གཟུགས་སྒྲ་སོགས་ཡུལ་ལྔའོ། །ཕྱི་ནང་གཉིས་ཀའི་ལུས་ནི་དབང་པོའི་རྟེན་བྱེད་པའི་ཕྱིའི་སྐྱེ་མཆེད་གཟུགས་ཅན་དང་གཞན་རྒྱུད་ཀྱི་དབང་པོ་ལྔའོ། །ཚོར་བ་ནི་བདེ་སྡུག་བཏང་སྙོམས་སོ། །སེམས་ནི་རྣམ་པར་ཤེས་པའི་ཕུང་པོའོ། །ཆོས་ནི་ཚོར་བ་མ་གཏོགས་པའི་སེམས་བྱུང་དང༌། ལྡན་མིན་དང༌། འདུས་མ་བྱས་སོ། །ཐ་མ་གསུམ་གྱི་ནང་ལ་སོགས་པ་ནི་རིམ་པ་ལྟར་ལུས་གསུམ་པོ་དེ་ལ་བརྟེན་པའམ། །དེ་གསུམ་ལ་དམིགས་ནས་བྱུང་བའོ། །དེ་བཞི་ཡང་རིམ་པ་ལྟར་བྱིས་པ་རྣམས་ཀྱིས་བདག་གི་རྟེན་དུ་དང༌། བདག་གི་ལོངས་སྤྱོད་ཀྱི་གཞི་དང༌། བདག་གི་ངོ་བོར་དང༌། བདག་ཀུན་བྱང་དུ་འགྱུར་བའི་གཞིར་རྟོགས་པའི་ཡུལ་ལོ། །གཉིས་པ་ཚུལ་ཇི་ལྟར་རྟོག་པ་ནི། ལུས་སོགས་བཞི་ལ་རང་སྤྱིའི་མཚན་ཉིད་གཉིས་ཀྱིས་སྒོ་ནས་ཡོངས་སུ་བརྟགས་པའོ། །དེ་ཡང་སྤྱིའི་མཚན་ཉིད་ནི། འདུས་བྱས་རྣམས་མི་རྟག་པ་དང༌། ཟག་པ་དང་བཅས་པ་རྣམས་སྡུག་
བསྔལ་བ་དང༌། ཆོས་ཐམས་ཅད་སྟོང་པ་དང་བདག་མེད་པ་ཉིད་དོ་ཞེས་པ་དང༌། རང་མཚན་ནི། ལུས་འབྱུང་བ་དང༌། འབྱུང་གྱུར་གྱི་དང༌། ཚོར་བ་མྱོང་པའི་དང༌། སེམས་དམིགས་བྱེད་ཀྱི་དང༌། ཆོས་ལ་ནི་སེམས་བྱུང་ལ་སོགས་རང་རང་གི་ངོ་བོ་གང་ཡིན་པ་སྟེ་དེར་ལྟ་བ་ལ་བཤད་དོ། །གཞན་ཡང་རྣམ་རྟོག་གི་གཟུགས་བརྙན་རོ་བམ་པ་དང༌། འབུས་གཞིག་པ་སོགས་སུ་ཡིད་ལ་སྣང་བ་དང༌། རང་བཞིན་གྱི་ལུས་མ་ཤི་བའི་རང་གི་ལུས་ལ་དེ་ལྟ་བུའི་ཆོས་ཅན་དེ་ལྟ་བུའི་རང་བཞིན་ཅན་མཚན་ཉིད་དེ་ལས་མ་འདས་པའོ། །ཞེས་མི་གཙང་བར་མཉམ་པ་ཉིད་དུ་ལྟ་བ་སྟེ། ཚིག་གསུམ་ནི་འདས་མ་འོང་དང་ད་ལྟར་གྱི་ལུས་གསུམ་ལ་སྦྱོར་རོ། །ཚོར་བ་རྣམས་སྡུག་བསྔལ་བ་དང༌། སེམས་རྣམས་རྟེན་དང་དམིགས་པ་ཐ་དད་ལས་གཞན་དང་གཞན་དུ་སྐྱེ་བས་མི་རྟག་པ་དང༌། ཆོས་རྣམས་བདག་དང་བྲལ་བའི་ཀུན་བྱང་ཙམ་མོ་ཞེས་སྒོམ་པའོ། །དེ་ནི་ཐུན་མོང་གི་སྒོམ་ཡིན་ལ། །ཐུན་མོང་མ་ཡིན་པ་ནི་ཁྱད་པར་གསུམ་སྟེ། དམིགས་པ་དང༌། ཡིད་བྱེད་དང༌། འཐོབ་པའོ། །དང་པོ་ནི། ཉན་རང་རྣམས་རང་གི་ལུས་སོགས་ཁོ་ན་དང༌། བྱང་སེམས་རྣམས་རང་གཞན་གཉིས་ཀའི་དེ་ལ་དམིགས་པའོ། །གཉིས་པ་ནི། ཉན་རང་རྣམས་མི་རྟག་སོགས་སུ་ཡིད་ལ་བྱེད་ལ། བྱང་སེམས་རྣམས་ཆོས་ཀྱི་མཚན་མ་
དེར་མི་དམིགས་པར་སྒོམ་པའོ། །གསུམ་པ་ནི། ཉན་རང་རྣམས་ཟག་བཅས་ཀྱི་ལུས་སོགས་དང་བྲལ་བ་ཁོ་ནའི་ཕྱིར་སྒོམ་ལ། བྱང་སེམས་རྣམས་དེ་དང་འབྲལ་མི་འབྲལ་གཉིས་ཀའི་ཕྱིར་མིན་གྱི་མི་གནས་པའི་མྱང་འདས་སྒྲུབ་པའི་ཕྱིར་རོ། །གསུམ་པ་ངོ་བོ་ནི། ཤེས་རབ་དང་དྲན་པའོ་ཞེས་པ་ལྟར་ལུས་སོགས་ཀྱི་རང་སྤྱིའི་སོ་སོར་ཕྱེ་བའི་ཤེས་རབ་དང་ཕྱེ་བ་ལྟར་མ་བརྗེད་པར་འཛིན་པའི་དྲན་པའོ། །བཞི་པ་དགོས་པ་ནི། བདེན་པ་བཞི་ཤེས་སྤོང་མངོན་དུ་བྱེད་སྒོམ་པ་ལ་འཇུག་པར་བྱ་བའི་ཕྱིར་དུ་སྒོམ་སྟེ། འདི་ལྟར་ལུས་དྲན་ཉེས་ཟག་བཅས་ཀྱི་ལུས་གནས་ངན་ལེན་གྱི་སྡུག་བསྔལ་གྱི་ངོ་བོར་ཤེས་པ་དང༌། ཚོར་བ་དྲན་ཉེས་ཚོར་བ་བདེ་སྡུག་ནི་མི་འབྲལ་བ་དང༌། འབྲལ་བར་སྲེད་པའི་རྒྱུ་ཡིན་པར་འབྲས་བུའི་སྒོ་ནས་རྟོགས་ལ་སྲེད་པ་ཡང་ཀུན་འབྱུང་གི་གཙོ་བོ་ཡིན་པས་དེ་སྤོང་བར་བྱེད་པ་དང༌། སེམས་དྲན་ཉེས་བདག་ཏུ་འཛིན་པའི་གཞི་སེམས་ལ་མི་རྟག་སོགས་སུ་དཔྱད་པས་དེར་ཞེན་པ་ལྡོག་ལ། དེས་ན་བདག་ཆད་པར་དོགས་པ་མེད་པས་འགོག་པ་མངོན་དུ་བྱ་བ་ལ་མི་སྐྲག་པ་དང༌། ཆོས་དྲན་ཉེས་ཀུན་ཉོན་གྱི་ཆོས་ཐམས་ཅད་མི་མཐུན་པ་དང༌། རྣམ་བྱང་གི་ཆོས་རྣམས་དེའི་གཉེན་པོར་ཤེས་པ་ན་དེ་ཉིད་ཉེར་འཚེ་ལྡོག་པའི་ཐབས་སུ་ཤེས་ནས་སྐྱེད་པར་བྱེད་པའི་ཚུལ་དེས་བདེན་བཞི་ལ་འཇུག་སྟེ། དབུས་མཐའ་ལས། གནས་ངན་ལེན་ཕྱིར་སྲེད་རྒྱུའི་ཕྱིར། །གཞི་
ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བས། །དྲན་པ་ཉེ་བར་བཞག་པ་སྒོམ། །ཞེས་དང༌། གཞན་ཡང་གཙང་བདེ་རྟག་བདག་ཏུ་འཛིན་པའི་ཕྱིན་ཅི་ལོག་བཞི་སྤོང་བ་དང༌། ཟག་བཅས་ཀྱི་ལུས་སོགས་བཞི་ལ་ཞེན་པ་གཅོད་པ་དང༌། དེ་བཞི་དང་བྲལ་བ་འཐོབ་པའི་ཕྱིར་རོ། །ཅིའི་ཕྱིར་བཞི་པོ་དེ་ལ་དྲན་ཉེ་བྱ་ཞེ་ན། །བྱེ་སྨྲ་རྣམས་ཤིང་གཤགས་པ་ཁྱེའུས་འཛིན་པ་ལྟར་དྲན་པས་དམིགས་རྣམ་མ་བརྗེད་པའི་སྟོབས་ཀྱིས་ཤེས་རབ་ཡུལ་ལ་འཇོག་པས་སོ། །ཞེས་འདོད་ཀྱང༌། སློབ་དཔོན་གྱིས་ཤེས་རབ་ཀྱིས་དངོས་པོར་དམིགས་ཡུལ་སོ་སོར་ཕྱེ་བ་དེའི་རྗེས་སུ་དྲན་པས་དེ་འཛིན་པས་ཤེས་རབ་ཀྱི་ཡུལ་ལ་དྲན་པ་ཉེ་བར་བཞག་པས་ནའོ། །ཞེས་གསུངས་པ་ཉིད་ལེགས་སོ། །གཉིས་པ་རྩོལ་བ་ལས་བྱུང་བའི་ལམ་ནི། །ལུས་སོགས་ཀྱི་དངོས་པོ་ལ་རང་སྤྱིའི་སྒོ་ནས་བརྟགས་ཏེ་ཞུགས་པ་ལ་སྤང་གཉེན་ལ་འདོར་ལེན་བྱེད་པའི་བརྩོན་འགྲུས་འབྱུང་བས་ལམ་དེ་ལ་ཡང་དག་པར་སྤོང་བ་བཞིའོ། །དེ་ལ་ཡང་སྔར་ལྟར། དང་པོ་ཡུལ་གང་ལ་དམིགས་ནས་སྤོང་བ་ནི། དགེ་བ་རྣམ་བྱང་དང༌། །མི་དགེ་བ་ཀུན་ཉོན་སྐྱེས་པ་དང་མ་སྐྱེས་པ་བཞིའོ། །གཉིས་པ་ཚུལ་ཇི་ལྟར་སྤོང་བ་ནི། ཀུན་ཉོན་སྐྱེས་པ་དག་རྒྱུན་མཐུད་དུ་མི་འཇུག་པའི་སྒོ་ནས་ཡང་དག་པར་སྤོང་བ་
དང༌། དེ་སྔར་རྒྱུད་ལ་མ་སྐྱེས་པ་དག་མི་སྐྱེད་པ་དང༌། རྣམ་བྱང་སྐྱེས་པ་དག་འཕེལ་བར་བྱེད་པ་དང༌། དེ་སྔར་རྒྱུད་ལ་མ་སྐྱེས་པ་དག་སྐྱེད་པ་སྟེ་བཞི་པ་དེའི་རྒྱུར་གྱུར་པའི་བརྩོན་འགྲུས་རྩོམ་པའོ། །དེ་ཡང་མདོ་ལས། །འདུན་པ་བསྐྱེད་དོ། འབད་དོ། བརྩོན་འགྲུས་རྩོམ་མོ། །སེམས་རབ་ཏུ་འཛིན་ཏོ། རབ་ཏུ་འཇོག་གོ། །ཞེས་བཞི་པོ་དེ་རེ་རེ་ལ་སྦྱར་ནས་གསུངས་སོ། །མདོ་འདིས་བརྩོན་འགྲུས་སྒོམ་པ་གནས་དང་བཅས་པ་བསྟན་ཏེ། འདི་ལྟར་འདུན་པ་ནི་གནས་ཏེ། དེ་ནི་བརྩོན་འགྲུས་ཀྱི་སྔོན་དུ་འགྲོ་བས་སོ། །འབད་པ་ནི་ཞི་གནས་དང༌། རབ་ཏུ་འཛིན་པ་དང༌། བཏང་སྙོམས་ཀྱི་མཚན་མ་ཡིད་ལ་བྱེད་པ་སྟེ། དེ་གསུམ་གྱིས་མཚན་མ་ཡིད་ལ་བྱེད་པས་གཉེན་པོ་སྐྱོན་མེད་སྒོམ་པའི་དུས་སོ། །དེ་ཡང་ལྷག་མཐོང་ཤས་ཆེ་ཞིང་ཞི་གནས་ཤས་ཆུང་བ་ནི་རླུང་གི་ནང་གི་མར་མེ་བཞིན་དུ་སེམས་རབ་ཏུ་གཡོ་བས་དེ་ཁོ་ན་ཉིད་གསལ་བར་མི་མཐོང་བས་དེའི་ཚེ་ཞི་གནས་ཀྱི་མཚན་མ་ཡིད་ལ་བྱེད་པའོ། །སྔ་མ་ལས་བཟློག་པའི་ཚེ་གཉིད་ལོག་པ་བཞིན་དུ་དེ་ཁོ་ན་ཉིད་གསལ་བར་མི་མཐོང་བས་དེའི་ཚེ་རབ་ཏུ་འཛིན་པའི་མཚན་མ་ཡིད་ལ་བྱེད་དོ། །གང་གི་ཞི་ལྷག་གཉིས་ཆ་མཉམ་དུ་རང་གི་ངང་གིས་འཇུག་པ་དེའི་ཚེ་བཏང་སྙོམས་ཀྱི་མཚན་མ་ཡིད་ལ་བྱེད་པ་སྟེ་འདི་ནི་འབད་པའོ། །བརྩོན་འགྲུས་རྩོམ་པ་ནི་བྱིང་རྒོད་སེལ་བའི་
དོན་དུ་སྟེ་དེའི་འོག་ཏུ་རབ་འཛིན་སོགས་སྨོས་པས་སོ། །དེ་ཡང་ནང་དུ་བྱིང་བ་ན་སངས་རྒྱས་ཀྱི་སྐུ་གཟུགས་སོགས་ཡིད་ལ་བྱེད་པས་སེམས་གཟེངས་བསྟོད་པའི་སེམས་རབ་ཏུ་འཛིན་པ་དང༌། ཕྱི་རོལ་དུ་རྒོད་པ་ན་འཁོར་བ་ལས་ཡིད་འབྱུང་བའི་དངོས་པོ་ཡིད་ལ་བྱེད་པའི་སེམས་རབ་ཏུ་འཇོག་པ་གཉིས་ཀྱིས་བྱིང་རྒོད་སེལ་ལོ། །གསུམ་པ་ངོ་བོ་ནི་བརྩོན་འགྲུས་སོ། །བཞི་པ་དགོས་པ་གང་གི་དོན་དུ་སྤོང་བ་ནི། །དང་པོ་གཉིས་ཀྱིས་མི་མཐུན་ཕྱོགས་མ་ལུས་པར་ཉམས་པ་དང༌། ཐ་མ་གཉིས་ཀྱིས་གཉེན་པོའི་ཕྱོགས་མ་ལུས་པ་འཕེལ་བ་ཐོབ་པའོ། །བཞི་པོ་དེ་ལ་ཅིའི་ཕྱིར་ཡང་དག་སྤོང་བ་ཞེས་བྱ་ཞེ་ན། སྤང་བྱ་སྐྱེས་མ་སྐྱེས་གཉིས་སྤོང་བས་ཕྱོགས་གཅིག་གི་མིང་གིས་བཏགས་པའམ། །ཡང་ན་མཛོད་འགྲེལ་ལས། ཅིའི་ཕྱིར་བརྩོན་འགྲུས་ལ་ཡང་དག་པར་འཇོག་པར་བཤད་ཅེ་ན། དེས་ལུས་དང་ངག་དང་ཡིད་ཡང་དག་པར་རབ་ཏུ་འཇོག་པའི་ཕྱིར་རོ། ཞེས་པ་ལྟར་རོ། །གསུམ་པ་ཏིང་ངེ་འཛིན་ཡོངས་སུ་སྦྱོང་བའི་ལམ་ནི། །སྤང་གཉེན་ལ་འདོར་ལེན་བྱེད་པའི་བརྩོན་འགྲུས་དང་ལྡན་པ་ནི་ཏིང་ངེ་འཛིན་གྱིས་སེམས་ལས་སུ་རུང་བ་སྟེ། ལམ་དེ་ལ་རྫུ་འཕྲུལ་གྱི་རྐང་པ་བཞིའོ། །འདི་ལ་ཡང་སྔར་ལྟར་བཞི་ལས། །དང་པོ་ཡུལ་གང་ལ་དམིགས་ནས་སེམས་ཡོངས་སུ་སྦྱོང་ན། ལུས་གཅིག་ལ་དུ་མ་དང༌། དུ་མ་ལ་གཅིག་ཏུ་བྱ་
བ་ལ་སོགས་པའི་རྫུ་འཕྲུལ་གྱི་བྱ་བའོ། །གཉིས་པ་ཚུལ་ཇི་ལྟར་སེམས་ཡོངས་སུ་སྦྱོང་ན། དབུས་མཐའ་ལས། ཉེས་པ་ལྔ་སྤོང་འདུ་བྱེད་བརྒྱད། །བརྟེན་པའི་རྒྱུ་ལས་བྱུང་བའོ། །ཞེས་པ་ལྟར་སྤོང་བའི་འདུ་བྱེད་བརྒྱད་སྒོམ་པ་སྟེ། བརྒྱད་ནི། འདུན་པ། རྩོལ་བ། དད་པ། ཤིན་ཏུ་སྦྱངས་པ། དྲན་པ། ཤེས་བཞིན། སེམས་པ་་བཏང་སྙོམས་ཏེ་སྤོང་བའི་ཕྱིར་མངོན་པར་འདུ་བྱེད་པས་ན་དེ་སྐད་དོ། །དེ་དང་ལྡན་པ་ནི་རྒྱུར་རོ། །དེ་ལ་དང་པོ་བཞི་ནི། མངོན་པར་འདོད་པ་དང༌། བརྩོན་འགྲུས་དང༌། མངོན་པར་ཡིད་ཆེས་པ་དང༌། ལུས་སེམས་ལས་སུ་རུང་བའོ། །དེ་ཡང་རིམ་པ་ལྟར་རྟེན་དང་བརྟེན་པ་དང༌། རྒྱུ་དང་འབྲས་བུར་བཞག་སྟེ། མངོན་པར་འདོད་པ་ནི་རྩོལ་བའི་སྔོན་དུ་འགྲོ་བས་དེའི་རྟེན་དང༌། དེའི་ཕྱིར་རྩོལ་བ་ནི་བརྟེན་པའོ། །རྟེན་འདུན་པའི་རྒྱུ་ནི་དད་པ་སྟེ། རྒྱུ་འབྲས་ལ་ཡིད་ཆེས་པའི་དད་པ་ཡོད་ན་མཉམ་པར་འཇོག་པའི་བྱ་བ་འདོད་པས་སོ། །བརྟེན་པ་རྩོལ་བའི་འབྲས་བུ་ནི་ཤིན་སྦྱངས་ཏེ། བརྩོན་འགྲུས་བརྩམས་པས་ལུས་སེམས་ལས་རུང་གི་ཤིན་སྦྱངས་སྐྱེ་བས་སོ། །འདི་དག་གང་སྤོང་བའི་ཕྱིར་འདུ་བྱེད་ཅེ་ན། སྤང་བྱ་ལྔ་སྟེ། དབུས་མཐའ་ལས། ལེ་ལོ་དང་ནི་གདམས་ངག་རྣམས། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །འདི་དག་ཉེས་པ་ལྔར་འདོད་དོ། །ཞེས་པ་ལྟར་བྱིང་
རྒོད་གཉིས་གཅིག་ཏུ་བྱས་པས་ལྔའོ། །དེ་ཡང་དང་པོ་ནི་སྦྱོར་བའི་དང༌། གཉིས་པ་ནི་སྦྱོར་བར་བྱེད་པའི་དང༌། གསུམ་པ་ནི་མཉམ་པར་བཞག་པའི་དང༌། བཞི་པ་ནི་བྱིང་རྒོད་བྱུང་བའི་དང༌། ལྔ་པ་ནི་བྱིང་རྒོད་ཞི་བའི་དུས་སུ་སྐྱོན་ཡིན་ཏེ། རིམ་པ་ལྟར་སྦྱོར་བར་མི་བྱེད་པ་དང༌། སེམས་མཉམ་པར་འཇོག་པར་མི་འགྱུར་བ་དང༌། སེམས་ལས་སུ་རུང་བར་མི་འགྱུར་བ་དང༌། དགོས་པའི་ཚེ་བྱིང་རྒོད་ཀྱི་གཉེན་པོ་ཡིད་ལ་མི་བྱེད་པ་དང༌། མི་དགོས་པའི་ཚེ་ཡིད་ལ་བྱེད་པས་སོ། །དེ་དག་ཇི་ལྟར་སྤོང་བའི་ཚུལ་ནི། དང་པོ་བཞི་ནི་ལེ་ལོའི་གཉེན་པོ་སྟེ། དེ་ཡང་བརྩོན་འགྲུས་ཡིན་ཡང་རྒྱུ་འབྲས་དང་བཅས་པའི་དབང་དུ་བྱས་པའོ། །ཕྱི་མ་བཞི་ནི་དབུས་མཐའ་ལས། །དམིགས་པ་བརྗེད་པར་མ་གྱུར་དང༌། །བྱིང་དང་རྒོད་པ་རྟོགས་པ་དང༌། །དེ་སྤོང་མངོན་པར་འདུ་བྱེད་དང༌། །ཞི་ཚེ་རྣལ་དུ་འཇོག་པའོ། །ཞེས་པ་ལྟར་ཡིན་པས་སྤང་བྱ་ཕྱི་མ་བཞི་སྤོང་བའོ། །གསུམ་པ་ངོ་བོ་གང་གིས་སེམས་ཡོངས་སུ་སྦྱོང་བ་ལ་གཉིས་ལས། སྤྱིའི་ངོ་བོ་ནི། །ཏིང་ངེ་འཛིན་ཏོ། །དེ་ཡང་སྡེ་ཚན་དང་པོ་གསུམ་ལ་ཤེས་རབ་དང༌། བརྩོན་འགྲུས་དང༌། ཏིང་ངེ་འཛིན་དུ་བཤད་པ་ནི་གཙོ་བོ་སྨོས་པ་ཡིན་པར་མཛོད་ལས་སོ། །བྱེ་བྲག་གི་ངོ་བོ་ནི། དགེ་བ་ལ་འདུན་པ་དྲག་པོའི་གུས་སྦྱོར་དང༌། བརྩོན་འགྲུས་རྒྱུན་ལྡན་གྱི་རྟག་སྦྱོར་དང༌། སྔོན་
ཏིང་ངེ་འཛིན་བསྒོམས་པའི་སེམས་ཀྱི་ས་བོན་རྒྱས་པ་དང༌། གཞན་གྱི་གདམས་ངག་ལས་དཔྱོད་པ་ལ་བརྟེན་ནས་སེམས་རྩེ་གཅིག་བར་གནས་པའི་ཏིང་ངེ་འཛིན་ནོ། །བཞི་པ་དགོས་པ་གང་གི་ཕྱིར་སྦྱང་བ་ནི་རྫུ་འཕྲུལ་སོགས་གང་དང་གང་མངོན་དུ་བྱ་འདོད་པ་དེ་ལ་ཡིད་གཏད་པས་མངོན་དུ་འགྱུར་བའོ། །བཞི་པོ་དེ་ལ་ཅིའི་ཕྱིར་རྫུ་འཕྲུལ་གྱི་རྐང་པ་ཞེས་བྱ་ཞེ་ན་མཛོད་འགྲེལ་ལས། ཅིའི་ཕྱིར་ཏིང་ངེ་འཛིན་ལ་རྫུ་འཕྲུལ་གྱི་རྐང་པ་ཞེས་བཤད་ཅེ་ན། དེ་ནི་ཡོན་ཏན་ཐམས་ཅད་འབྱོར་བའི་རྟེན་ཡིན་པའི་ཕྱིར་རོ། །ཞེས་གསུངས་ལ། གནོད་འཇོམས་ཆེ་བར། རྫུ་འཕྲུལ་འཇིག་རྟེན་ལས་འདས་པའི་ལམ་ལ་བྱས་ནས་དེའི་གཞི་དང་གནས་ཡིན་པའི་ཕྱིར་རྐང་པ་ཞེས་འདོད་དོ། །བཞི་པ་མངོན་པར་རྟོགས་པའི་སྦྱོར་བའི་ལམ་ནི། འདུན་པ་སོགས་བརྒྱད་ཀྱིས་སེམས་ཡོངས་སུ་སྦྱོང་བ་བྱས་པ་ལ་བདེན་པ་མངོན་པར་རྟོགས་བྱེད་དྲོ་བ་དང་རྩེ་མོའི་སྦྱོར་བ་འབྱུང་བའོ། །ལམ་དེ་ལ་དབང་པོ་ལྔའོ། །འདི་ལ་ཡང་བཞི་ལས། དང་པོ་ཡུལ་ནི་བདེན་བཞི་སྟེ། །འདི་དག་འཕགས་ལམ་གྱི་སྦྱོར་བས་བསྡུས་པས་བདེན་པའི་རྣམ་པ་ཅན་ཡིན་པས་སོ། །གཉིས་པ་ཇི་ལྟར་སྒོམ་པ་ནི། སྔ་མ་སྔ་མ་རྣམས་རྒྱུར་ཡོད་པ་ལ་བརྟེན་ནས་ཕྱི་མ་ཕྱི་མ་རྣམས་འཇུག་པའོ། །གསུམ་པ་ངོ་བོ་ནི། དད་པའི་དབང་པོ་ནས་ཤེས་རབ་ཀྱི་དབང་པོའི་བར་ཏེ། །རིམ་
པ་ལྟར་བདེན་བཞི་ལ་མངོན་པར་ཡིད་ཆེས་པ་དང༌། དེ་རྟོགས་པར་བྱ་བ་ལ་སྤྲོ་བ་དང༌། དེའི་དབང་དུ་བྱས་པའི་དམིགས་རྣམ་མི་བརྗེད་པ་དང༌། དེའི་དོན་ལ་སེམས་རྩེ་གཅིག་པའི་ཆ་དང༌། དེ་དག་སོ་སོར་རབ་ཏུ་རྣམ་པར་འབྱེད་པའོ། །འདི་དག་ལམ་གྱི་གནས་སྐབས་གང་ལ་ཡིན་ཞེ་ན་དྲོ་བ་དང༌། རྩེ་མོའི་སྐབས་ནའོ། །བཞི་པ་འབྲས་བུ་ནི། །མཐོང་ལམ་མྱུར་དུ་ཐོབ་པ་དང་སྦྱོར་ལམ་བཞི་འགྲུབ་པའོ། །ལྔ་པོ་དེ་ལ་ཅིའི་ཕྱིར་དབང་པོ་ཞེས་བྱ་ཞེ་ན། རྒྱན་སྣང་ལས། འཕགས་པའི་ལམ་འགྲུབ་པའི་བདག་པོར་གྱུར་པས་ཞེས་སོ། །ལྔ་པ་མངོན་པར་རྟོགས་པ་དང་འབྲེལ་བའི་ལམ་ནི་དྲོད་རྩེའི་ངོ་བོ་དབང་པོ་ལྔ་ཐོབ་པ་ལ། བཟོད་མཆོག་གི་ངོ་བོ་སྟོབས་ལྔ་འབྱུང་བས་སོ། །འདིའི་དམིགས་པ་དང་སྒོམ་ཚུལ་ནི་དབང་པོ་དང་འདྲ་ཞིང༌། ངོ་བོ་ནི་དད་པའི་སྟོབས་ནས་ཤེས་རབ་ཀྱི་སྟོབས་ཀྱི་བར་ཡིན་ལ། དབང་པོ་དང་འདི་གཉིས་ཀྱི་ཁྱད་པར་ནི་མཛོད་འགྲེལ་ལས། ཅིའི་ཕྱིར་དབང་པོ་རྣམས་ཁོ་ན་ཡང་སྟོབས་སུ་བཤད་ཅེ་ན། ཆུང་ངུ་དང་ཆེན་པོའི་བྱེ་བྲག་གིས་བརྫིབ་དང་བརྫི་བ་མེད་པའི་ཕྱིར་རོ། །ཞེས་དང༌། འགྲེལ་ཆེན་ལས། མ་དད་པ་ལ་སོགས་པ་མི་མཐུན་པའི་ཕྱོགས་དང་དད་པ་ལ་སོགས་པ་གཉེན་པོ་འདྲེས་པར་འབྱུང་བ་ནི་དབང་པོ་ཞེས་བྱའོ། །མི་མཐུན་པའི་ཕྱོགས་ཀྱི་མ་འདྲེས་པར་གཉེན་
པོ་འབའ་ཞིག་འབྱུང་བ་ནི་སྟོབས་ཞེས་བྱའོ། །ཞེས་པ་ལྟར་རོ། །འབྲས་བུ་ནི་སྦྱོར་ལམ་ཕྱི་མ་གཉིས་དང་མཐོང་ལམ་འགྲུབ་པའོ། །ལམ་སྔ་ཕྱི་འདི་གཉིས་ལ་མངོན་རྟོགས་དང་སྦྱོར་བ་དང་འབྲེལ་བར་གསུངས་པ་ནི་གཉིས་ཀ་ཡང་གཉིས་ཀ་ཡིན་མོད་ཀྱིས། འོན་ཀྱང་བདེན་པ་མངོན་རྟོགས་མཐོང་ལམ་ལ་རིང་བར་སྦྱོར་བ་དང་ཉེ་བར་འབྲེལ་པ་ལ་དགོངས་སོ། །དྲུག་པ་མངོན་པར་རྟོགས་པའི་ལམ་ནི། དེ་ལྟར་མངོན་རྟོགས་ལ་སྦྱོར་བ་དང་འབྲེལ་བའི་ལམ་གྱི་ངོ་བོ་སྦྱོར་ལམ་བཞི་ཐོབ་པ་ལ་ནི་མངོན་པར་རྟོགས་པའི་ལམ་བདེན་པ་གསར་དུ་མཐོང་བའི་ལམ་འབྱུང་བས་ལམ་དེ་ལ་ནི། བྱང་ཆུབ་ཡན་ལག་གི་རྣམ་པ་བདུན་ནོ། །འདིའི་དམིགས་པ་དང༌། སྒོམ་ཚུལ་དང༌། ངོ་བོ་དང༌། ཡན་ལག་ཏུ་འགྱུར་ཚུལ་དང༌། འབྲས་བུ་རྣམས་གང་ཞེ་ན། དང་པོ་དམིགས་པ་ནི། བདེན་བཞིའི་དེ་ཁོ་ནའོ། །གཉིས་པ་སྒོམ་ཚུལ་ནི། དྲན་པ་ཡང་དག་བྱང་ཆུབ་ཀྱི་ལན་ལག་གིས། སྡུག་བསྔལ་ལ་དམིགས་ནས་དེས་དབེན་པ་ཚོལ་ཞིང་གནས། ཀུན་འབྱུང་ལ་དམིགས་ནས་དེའི་འདོད་ཆགས་དང་བྲལ་བ་ཚོལ་ཞིང་གནས། སྡུག་བསྔལ་འགོག་པ་ལ་དམིགས་ནས་དེ་མངོན་དུ་བྱེད་པ་ཚོལ་ཞིང་གནས། སྡུག་བསྔལ་འགོག་པར་འགྲོ་བ་བསྒྲུབ་པའི་སྒོ་ནས་སྡུག་བསྔལ་སྤོང་བར་འགྱུར་བ་ལ་དམིགས་ནས་དེའི་སྒོམ་པ་ཚོལ་བ་སྟེ་ལྷག་མ་དྲུག་
ལའང་དེ་ལྟར་རོ། །གསུམ་པ་ངོ་བོ་ནི། གང་གི་སྟོབས་ཀྱིས་ཡན་ལག་གཞན་རྣམས་དམིགས་རྣམ་ལས་མི་གཡོངས་པར་བྱེད་པ་གནས་ཀྱི་ཡན་ལག་དྲན་པ་ཡང་དག་བྱང་ཆུབ་ཀྱི་ཡན་ལག་དང་ཡང་དག་བྱང་ཆུབ་ཀྱི་ཡན་ལག་གི་རྣམ་པ་ཞེས་འོག་མ་རྣམས་ལ་ཡང་སྦྱར་རོ། །རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ཡིན་པས་རང་བཞིན་གྱི་ཡན་ལག་ཆོས་རབ་ཏུ་རྣམ་པར་འབྱེད་པ་དང༌། སོ་སྐྱེའི་ས་ལས་རིང་དུ་འདའ་བར་བྱས་པས་ངེས་པར་འབྱུང་བའི་ཡན་ལག་བརྩོན་འགྲུས་དང༌། ལུས་སེམས་ལ་ཕན་འདོགས་པས་ཕན་ཡོན་གྱི་ཡན་ལག་དགའ་བ་དང༌། ཉོན་མོངས་མེད་པའི་གཞི་དང༌། དེ་མེད་པའི་གནས་དང༌། དེ་མེད་པའི་ངོ་བོ་ཡིན་པའི་ཕྱིར་ཉོན་མོངས་པ་མེད་པའི་ཡན་ལག་ནི་ཤིན་ཏུ་སྦྱངས་པ་དང༌། ཏིང་ངེ་འཛིན་དང༌། བཏང་སྙོམས་ཏེ། དེ་ཡང་དང་པོས་ནི་ལུས་སེམས་ལས་སུ་རུང་བར་བྱས་པས་ལུས་སེམས་ལས་སུ་མི་རུང་བའི་གནས་ངན་ལེན་སྤངས་པ་དང༌། གཉིས་པས་ནི་མཉམ་པར་གཞག་སྟོབས་ཀྱིས་ཡང་དག་པའི་ཤེས་རབ་བསྐྱེད་དེ་ཉོན་མོངས་རྣམས་སྤོང་བ་དང༌། གསུམ་པས་ནི་སེམས་ཉོན་མོངས་དང་མཐུན་པར་གནས་པའི་མི་མཉམ་པ་དང༌། རྣལ་དུ་མི་འདུག་པ་དང༌། རྩོལ་བ་དང་བཅས་པའི་ཉོན་མོངས་པའི་གཉེན་པོ་བྱེད་པས་སོ། །གཞི་དང་གནས་
ཀྱི་ཁྱད་པར་ནི་བྱ་བའི་གཞི་དང་བྱེད་པའོ། །དེ་ལྟར་ཡང་དབུས་མཐའ་ལས། རང་བཞིན་ཡན་ལག་གནས་ཡན་ལག །གསུམ་པ་ངེས་འབྱུང་ཡན་ལག་སྟེ། །བཞི་པ་ཕན་ཡོན་ཡན་ལག་ཡིན། །རྣམ་གསུམ་ཉོན་མོངས་མེད་ཡན་ལག །འདི་ལ་གཞི་དང་གནས་དང་ནི། །ངོ་བོ་ཉིད་དུ་བསྟན་པ་ཡིན། །ཞེས་སོ། །བཞི་པ་ཡན་ལག་ཏུ་འགྱུར་ཚུལ་ནི། དབུས་མཐའི་འགྲེལ་བཤད་ལས། །མངོན་པར་རྫོགས་པར་བྱང་ཆུབ་པ་ནི་རྣམ་པར་མི་རྟོག་པའི་ཡེ་ཤེས་སོ། །དེ་ལ་དྲན་པ་ལ་སོགས་པ་བདུན་ནི་བྱང་ཆུབ་དང་མཐུན་པའི་ཕྱིར་དེའི་ཡན་ལག་རྣམས་སོ། །ཆོས་རབ་ཏུ་རྣམ་པར་འབྱེད་པ་ནི་རྟོགས་པའི་བདག་ཉིད་ཡིན་པས་ན་བྱང་ཆུབ་སྟེ་དེ་དག་གི་གྲོགས་སུ་གྱུར་པས་ན་ཡན་ལག་གོ། །ཞེས་སོ། །ལྔ་པ་འབྲས་བུ་ནི། མཐོང་སྤང་མ་ལུས་པར་སྤངས་བའོ། །བདུན་པ་རྣམ་དག་ངེས་འབྱིན་གྱི་ལམ་ནི། བདེན་པ་མངོན་སུམ་དུ་མཐོང་བའི་མངོན་རྟོགས་ཀྱི་ལམ་ཐོབ་པ་ལ་སྒོམ་ལམ་གྱི་ངོ་བོ་རྣམ་དག་ངེས་འབྱིན་གྱི་ལམ་འབྱུང་བ་སྟེ། ལམ་དེ་ལ་འཕགས་པའི་ལམ་ཡན་ལག་བརྒྱད་དོ། །འདི་དག་དམིགས་པ་དང་སྒོམ་ཚུལ་ནི་སྔར་བཞིན་ནོ། །ངོ་བོ་ནི་མཐོང་ལམ་དུ་ཆོས་དང་གང་ཟག་གི་བདག་མེད་ཇི་ལྟར་རྟོགས་པ་དེ་སྒོམ་ལམ་དུ་བདག་གིས་འདི་ལྟར་རྟོགས་སོ་ཞེས་སྔར་གྱི་ལྟ་བའི་རྗེས་སུ་འཇུག་པ་ཡང་དག་པའི་ལྟ་བ་ཡང་དག་
འཕགས་པའི་ལམ་ཡན་ལག་གི་རྣམ་པ་དང༌། ཡང་དག་པའི་འཕགས་པའི་ཞེས་སོགས་ལྷག་མ་ལ་ཡང་སྦྱར་རོ། །འདི་སྤྱིར་རྗེས་ཐོབ་འཇིག་རྟེན་པ་དེས་མཐོང་ལམ་མཉམ་གཞག་གི་དུས་ཀྱི་རྟོགས་པ་ཡོངས་སུ་གཅོད་པ་ཡིན་པས་སྒོམ་ལམ་ལ་བཞག་དགོས་ཀྱང༌། མཐོང་ལམ་ལ་གཞག་པའི་སྐབས་མཐོང་ལམ་མཉམ་གཞག་ཏུ་ཡང་དག་པའི་ལྟ་བ་དངོས་མ་སྐྱེས་ཀྱང་དེ་སྐྱེད་པའི་ནུས་པ་མཐུ་ལྡན་ཐོབ་པ་ལ་དེ་ཐོབ་པར་བཞག་གོ། །ཡང་དག་པར་ལྟ་བས་རྟོགས་པའི་རྟོགས་པ་དེའི་རྣམ་བཞག་ཡོངས་སུ་གཅོད་པ་དང༌། རྣམ་པར་བཞག་པའི་མདོ་སྡེ་ལ་སོགས་པ་གསུང་རབ་ཀྱི་དོན་ལ་འཇུག་པའི་ཡང་དག་པའི་རྟོགས་པ་དང༌། རྫུན་དུ་སྨྲ་བ་སོགས་ངག་གི་ལས་རྣམ་པར་དག་པའི་ཡང་དག་པའི་ངག་དང༌། སྲོག་གཅོད་པ་སོགས་ལུས་ཀྱི་ལས་རྣམ་པར་དག་པའི་ལས་ཀྱི་མཐའ་དང༌། ཚུལ་འཆོས་པ་ལ་སོགས་པ་ལུས་ངག་གཉིས་ཀའི་ལས་རྣམ་པར་དག་པའི་ཡང་དག་པའི་འཚོ་བ་སྟེ། འདིར་ཡང་རྟོགས་པ་དང་ངག་གཉིས་ལ་དབུས་མཐའི་འགྲེལ་ཊཱིཀ་ཏུ། མཐོང་ལམ་དང་སྦྱར་ན་མཉམ་གཞག་ཏུ་དེ་འབྱུང་བའི་མཐུ་རྙེད་པ་ལ་བྱ་བར་གསུངས་སོ། །ཡུན་རིང་པོར་མི་སྐྱོ་བར་ཤེས་སྒྲིབ་བམ་སྒོམ་སྤང་གི་གཉེན་པོར་སྒོམ་པའི་ཡང་དག་པའི་རྩོལ་བ་དང༌། ཞི་གནས་དང་རབ་ཏུ་འཛིན་པ་དང་བཏང་སྙོམས་ཀྱི་
རྒྱུ་མཚན་རྣམས་མ་བརྗེད་པས་བྱིང་རྒོད་མེད་པའི་ཕྱིར་ཞི་ལྷག་གི་ལམ་མངོན་དུ་བྱ་བའི་སྒྲིབ་པའི་གཉེན་པོར་སྒོམ་པའི་ཡང་དག་པའི་དྲན་པ་དང༌། མངོན་ཤེས་སོགས་ཡོན་ཏན་ཁྱད་པར་ཅན་སྒྲུབ་པ་ལ་གེགས་བྱེད་པའི་སྒྲིབ་པའི་གཉེན་པོར་སྒོམ་པའི་ཡང་དག་པའི་ཏིང་ངེ་འཛིན་ཏེ། རྒྱན་ལས། དེ་ཡི་འོག་ཏུ་ཇི་ལྟ་བུར། །རྟོགས་པའི་རྗེས་སུ་འཇུག་པ་སྐྱེ། །རྣམ་བཞག་ཇི་བཞིན་རྟོགས་པ་དང༌། །རྣམ་པར་བཞག་ལ་འཇུག་པ་དང༌། །ལས་གསུམ་རྣམ་པར་དག་པ་དང༌། །ཤེས་བྱ་དག་དང་ལམ་དང་ནི། །ཡོན་ཏན་ཁྱད་པར་ཅན་གྱིས་ནི། །སྒྲིབ་པའི་གཉེན་པོར་སྒོམ་པའོ། །ཞེས་སོ། །འདིར་ལས་གསུམ་རྣམ་པར་དག་པ་ཞེས་ངག་ལས་མཐའ་འཚོ་བ་གསུམ་ལུས་ངག་གི་ལས་སྨད་པ་དང་བྲལ་བའི་ལུས་ངག་གི་ལས་ལ་བཞེད་ལ། དེ་གཉིས་ཀྱང་བྱེ་སྨྲས་གཟུགས་ཅན་མཚན་ཉིད་པར་འདོད་པ་ལ་སངས་རྒྱས་གཉིས་པས་མཛོད་འགྲེལ་དང་ལས་གྲུབ་པའི་རབ་ཏུ་བྱེད་པར་བཀག་ནས་སེམས་པ་ལ་བཞག་པས་འདི་དག་ཤེས་པ་ལ་བྱའི་བེམ་པོ་ལ་ནི་མི་བྱའོ། །འབྲས་བུ་ནི་སྒོམ་སྤང་སྤངས་པའོ། །ཡན་ལག་བརྒྱད་པོ་དེ་དག་ཀྱང་ཡན་ལག་བཞིར་འགྱུར་ཏེ། ལྟ་བ་ནི་མཉམ་གཞག་གི་རྟོགས་པ་ཡོངས་སུ་གཅོད་པའི་ཡན་ལག་དང༌། རྟོགས་པས་ཀུན་ནས་བསླངས་ནས་ངག་གིས་གོ་བར་བྱེད་པས་དེ་ནི་གོ་བར་བྱེད་པའི་
ཡན་ལག་དང༌། ངག་གིས་བསྙད་པ་དང༌། འབེལ་བའི་གཏམ་གྱིས་ལྟ་བ་རྣམ་དག་ཏུ་དང༌། ལས་ཀྱི་མཐས་བྱ་བ་མ་ཡིན་པ་མི་བྱེད་པས་ཚུལ་ཁྲིམས་རྣམ་དག་ཏུ་དང༌། འཚོ་བས་ཆོས་གོས་སོགས་ཇི་ལྟར་སྣང་བ་ལ་ལོངས་སྤྱོད་པས་ཡོ་བྱད་བསྙུང་བ་ལ་ཡིད་ཆེས་པས་དེ་གསུམ་གཞན་ཡིད་ཆེས་པར་བྱེད་པའི་ཡན་ལག་གོ། །རྩོལ་བས་སྒོམ་སྤང་གི་ཉོན་མོངས་དང་དྲན་པས་ཉེ་ཉོན་གྱི་བྱིང་རྒོད་དང༌། ཏིང་ངེ་འཛིན་གྱི་མངོན་ཤེས་སོགས་ཡོན་ཏན་ཁྱད་པར་ཅན་བསྒྲུབ་པའི་དབང་གིས་མི་མཐུན་ཕྱོགས་ཀྱི་གཉེན་པོ་བྱེད་པས་དེ་གསུམ་གཉེན་པོའི་ཡན་ལག་སྟེ། དབུས་མཐའ་ལས། ཡོངས་སུ་གཅོད་དང་གོ་བྱེད་དང༌། །རྣམ་གསུམ་གཞན་ཡིད་ཆེས་པར་བྱེད། །མི་མཐུན་ཕྱོགས་ཀྱི་གཉེན་པོར་ནི། །ལམ་གྱི་ཡན་ལག་དེ་བརྒྱད་དེ། །ལྟ་དང་ཚུལ་ཁྲིམས་ཡོ་བྱད་བསྙུང་གཞན་ལ་རྣམ་པར་རིག་བྱེད་འདོད། །ཉོན་མོངས་ཉེ་བའི་ཉོན་མོངས་དང༌། །མི་མཐུན་ཕྱོགས་ཀྱི་གཉེན་པོའོ། །ཞེས་སོ། །གཉིས་པ་ལམ་ཤེས་ཀྱི་རྣམ་པ་སྟོན་པ་ལ་དྲུག །གཉེན་པོ་དང༌། སྤྲུལ་པ་དང༌། མཐོང་ཆོས་ལ་བདེར་གནས་དང༌། འཇིག་རྟེན་ལས་འདས་པ་དང༌། སྤོང་བ་དང༌། སངས་རྒྱས་ཀྱི་ལམ་མོ། །དང་པོ་གཉེན་པོའི་ལམ་ལ་རྣམ་ཐར་སྒོ་གསུམ་གྱི་རྣམ་པ་གསུམ་མོ། །དེ་ཡང་
སྤྱིར་རྣམ་ཐར་སྒོ་གསུམ་ལ་འཇོག་ཚུལ་དུ་མ་ཞིག་ཡོད་ཀྱང་ཀུན་བཏུས་ལྟར་ན། སྡུག་བདེན་གྱི་རྣམ་པའི་སྟོང་བ་དང་བདག་མེད་པ་གཉིས་ནི་དོན་གཞན་དང་བདག་གི་ངོ་བོས་སྟོང་པར་རྟོགས་པས་སྟོང་པ་ཉིད་དང༌། འགོག་ལམ་གྱི་རྣམ་པ་བརྒྱད་ནི་མཚན་མའི་རྣམ་རྟོག་དང་བྲལ་བའམ་འབྲལ་བྱེད་མེད་པས་མཚན་མ་མེད་པ་དང༌། སྡུག་བདེན་གྱི་མི་རྟག་སྡུག་བསྔལ་གཉིས་དང༌། ཀུན་འབྱུང་གི་རྣམ་པ་བཞི་ནི་ཡིད་འབྱུང་བའི་གཞིར་རྟོག་པས་སྨོན་པ་མེད་པའོ། །དེ་གསུམ་ཡང་རིམ་པ་ལྟར། བདག་དང་བདག་གིར་ལྟ་བས་ཞེན་པ་དང༌། འཇིག་ལྟ་དེའི་འབྲས་བུ་མཚན་མའི་རྣམ་རྟོག་དང༌། ཁམས་གསུམ་ལ་སྨོན་པ་སྟེ་སྲེད་པ་དང་གསུམ་གྱི་གཉེན་པོ་བྱེད་པས་ན་གཉེན་པོའི་ལམ་མོ། །དེ་ཡང་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ཞེས་བྱེ་བྲག་མེད་པར་གསུངས་པ་ནི་ཐོས་བསམ་སྒོམ་གསུམ་ལས་བྱུང་བ་སྤྱིར་བསྟན་པ་ཡིན་ལ། དེ་དག་ཏིང་ངེ་འཛིན་གྱི་སྒྲས་གསུངས་པ་ནི་སྒོམ་བྱུང་འཇིག་རྟེན་པ་དང་འཇིག་རྟེན་ལས་འདས་པ་གཉིས་ཀ་དང༌། དེ་དག་རྣམ་པར་ཐར་པའི་སྒོའི་སྒྲར་གསུངས་པ་ནི་སྒོམ་བྱུང་འཇིག་རྟེན་ལས་འདས་པའོ། །གཉིས་པ་སྤྲུལ་པའི་ལམ་རྣམ་པར་ཐར་པ་གསུམ་སྟེ། གཟུགས་ཅན་གཟུགས་ལ་ལྟ་བ་དང༌། གཟུགས་ཅན་མ་ཡིན་པ་གཟུགས་ལ་ལྟ་བ་དང༌། སྡུག་པའི་རྣམ་པར་ཐར་པའོ། །དང་པོ་གཟུགས་ཅན་གཟུགས་
ལ་ལྟ་བའི་རྣམ་ཐར་ལ་དྲུག །རྟེན་གང་གིས། ས་གང་ལ་བརྟེན་ནས་ཡུལ་གང་ལ་ཚུལ་ཇི་ལྟར་ངེས་ཚིག་དགོས་པ་གང་གི་ཕྱིར་ལྟ་བའོ། །དང་པོ་རྟེན་ནི་ཐེག་ཆེན་ཡིན་ན་ཚོགས་ལམ་ཆེན་པོ་ཡན་ཆད་དང༌། ཐེག་དམན་གྱི་ཕྱིར་མི་འོང་ལུས་མངོན་བྱེད་དང༌། དགྲ་བཅོམ་གཉིས་ཀའི་ཆ་ལས་རྣམ་གྲོལ་གྱིས་སོ། །དེ་ཡང་མཛོད་ལས། རྣམ་ཐར་དང་པོ་གསུམ་མིའི་རྟེན་ལ་སྐྱེ་བར་གསུངས་ཤིང་སའི་དངོས་གཞིར་འདོད་པའི་རྟེན་ལ་སྐྱེ་བར་གསུངས་མོད། །འོན་ཀྱང་བྱང་སེམས་ཀྱིས་གཟུགས་དང་འདོད་ལྷའི་རྟེན་ལ་སྒོམ་ནུས་སམ་སྙམ་མོ། །གཉིས་པ་ས་གང་ལ་བརྟེན་པ་ནི། མཛོད་ལས། རྣམ་ཐར་དང་པོ་འདི་གཉིས་འདོད་པ་དང་བསམ་གཏན་དང་པོ་གཉིས་ཀྱི་ཁ་དོག་གི་འདོད་ཆགས་ཀྱི་གཉེན་པོར་རིམ་བཞིན་བསྒོམ་པ་ཡིན་པས་བསམ་གཏན་དང་པོ་གཉིས་ལ་བརྟེན་པར་འདོད་ཀྱང༌། དེའི་ལུགས་ཀྱིས་འདི་གཉིས་མི་སྡུག་པར་སྒོམ་པར་འདོད་པས་དེ་འདིར་མི་གཟུང་ངོ༌། །དེས་ན་འདིར་ནི་ཀུན་བཏུས་ལས་གསུངས་པ་ལྟར་བསམ་གཏན་བཞི་པའི་དངོས་གཞི་རབ་མཐའ་ལ་བརྟེན་ནོ། །གསུམ་པ་ཡུལ་གང་ལ་ལྟ་བ་ནི། ཕྱི་རོལ་གྱི་གཟུགས་ཆུང་ངུ་ཁ་དོག་བཟང་བ་དང་ཁ་དོག་ངན་པ་དང༌། ངན་པ་དང་བཟང་པོ་རྣམས་དང་ཆེན་པོ་ལ་དེ་བཞིན་དུ་སྦྱར་བ་རྣམས་ལའོ། །དེ་ལ་ཁ་དོག་བཟང་པོ་ནི་མཛེས་པར་
སྣང་བའོ། །ངན་པ་ནི་དེ་ལས་བཟློག་པའོ། །ངན་པ་ནི་སྒྲ་ནས་རེག་བྱའི་བར་ཡིད་དུ་མི་འོང་བའོ། །བཟང་བ་ནི་དེ་ལས་བཟློག་པའོ། །ཆུང་ངུ་ནི་སེམས་ཅན་དང་ལོངས་སྤྱོད་ཀྱི་གཟུགས་སོ། །ཆེན་པོ་ནི་ཁྱིམ་དང་གནས་ཁང་ངོ༌། །བཞི་པ་ཇི་ལྟར་ལྟ་བའི་ཚུལ་ནི། །ནད་ལྟ་བ་པོ་རང་ལ་གཟུགས་ཅན་ཡིན་པར་འདུ་ཤེས་ནས་ཆེ་ཆུང་བཟང་ངན་རྣམས་ལ་དེ་ལས་ཆེ་བའམ་ཆུང་བ་སོགས་སུ་མཐའ་གཅིག་ཏུ་མ་ངེས་པར་ལྟ་བའོ། །འདི་ལྟར་ལྟ་བའི་ཡུལ་ནི་བཟང་ངན་གང་ཡིན་ཀྱང་རང་ཉིད་དེ་ལ་ཆགས་པ་དང་བྲལ་བ་ཞིག་དགོས་ལ་ཆགས་པ་དང་བྲལ་ཡང་ཇི་ལྟར་འདོད་པའི་མོས་པའི་དབང་མ་ཐོབ་པས་དེ་ཐོབ་པར་འདོད་ནས་སོ། །འདིའི་སྐབས་སུ་རང་ལ་གཟུགས་ཀྱི་འདུ་ཤེས་བཞག་དགོས་པས་མ་བྲལ་ན་དེ་སླ་ལ། གལ་ཏེ་གཟུགས་མེད་ཐོབ་པས་བྲལ་ཡང་མངོན་དུ་མི་བྱེད་པར་གཟུགས་ཀྱི་འདུ་ཤེས་བཞག་དགོས་སོ། །ལྔ་པ་ངེས་ཚིག་ནི། །རང་ལ་གཟུགས་ཀྱི་འདུ་ཤེས་བཞག་པའི་ཕྱིར་རོ། །དྲུག་པ་དགོས་པ་གང་གི་ཕྱིར་ལྟ་བ་ནི། །ཕྱི་རོལ་གྱི་དངོས་པོ་ཇི་ལྟར་འདོད་འདོད་དུ་སྤྲུལ་པའི་སྒྲིབ་པ་སྟེ་དེ་ལ་གེགས་བྱེད་པའི་གཉེན་པོར་རོ། །འདི་ནི་མཚོན་པ་ཙམ་སྟེ། གཞན་ཡང་ཟད་པར་དང༌། ཟིལ་གནོན་དང༌། འཕགས་པའི་རྫུ་འཕྲུལ་དང༌། ཉོན་མོངས་པ་མེད་པ་དང༌། སྨོན་ནས་ཤེས་པ་དང༌། སོ་སོ་ཡང་དག་པར་རིག་པ་སོགས་སྒྲུབ་པའི་ཕྱིར་ཡིན་པར་
ས་སྡེ་ལས་བཤད་དོ། །གཉིས་པ་གཟུགས་མེད་གཟུགས་ལ་ལྟ་བའི་རྣམ་ཐར་ནི། གཞན་ཐམས་ཅད་སྔར་དང་འདྲ་ལ། རྟེན་གྱི་ཁྱད་པར་རྣམ་ཐར་དང་པོ་ཐོབ་པའོ། །ལྟ་བའི་ཚུལ་ནི་རང་ལ་གཟུགས་ཅན་མ་ཡིན་པ་ནམ་མཁའི་མིང་བཞིར་འདུ་ཤེས་ནས་ལྟའོ། །འདིའི་སྐབས་སུ་གཟུགས་མེད་ཐོབ་ན་སླ་ལ་མ་ཐོབ་ཀྱང་གཟུགས་ཅན་མ་ཡིན་པའི་འདུ་ཤེས་བཞག་དགོས་སོ། །གཟུགས་མེད་ཐོབ་ཀྱང་གཟུགས་མེད་ཀྱི་བློ་ཙམ་འཇོག་གི་སྙོམས་འཇུག་དངོས་མི་སྐྱེད་པར་སའི་དངོས་གཞི་ལས་གསུངས་སོ། །དེས་ན་གཞུང་ཁ་ཅིག་ལས་འདི་གཉིས་ཀྱི་རྟེན་བསམ་གཟུགས་གང་རུང་དུ་གསུངས་པ་ནི་གཟུགས་མེད་ཐོབ་པས་ཀྱང་སྒོམ་པ་ཡོད་པ་ཙམ་ལ་དགོངས་ཀྱི་གཟུགས་མེད་ཀྱི་དངོས་གཞི་ལ་གཟུགས་ཡུལ་དུ་མི་བྱེད་པ་དུ་མ་ཞིག་གསུངས་པས་གཟུགས་མེད་ལ་མི་བརྟེན་ནོ། །ངེས་ཚིག་ནི། རང་ལ་གཟུགས་ཀྱི་འདུ་ཤེས་རྣམ་པར་བཤིག་པའི་ཕྱིར་རོ། །འདི་གཉིས་རང་ལ་གཟུགས་ཀྱི་འདུ་ཤེས་འཇོག་མི་འཇོག་གི་དོན་ནི། སྤྲུལ་པ་བྱེད་པའི་ཚེ་སྤྲུལ་པ་པོ་སྣང་བ་དང་མི་སྣང་བ་གཉིས་ཀྱི་ཕྱིར་རོ། །གསུམ་པ་སྡུག་པའི་རྣམ་ཐར་ལ་བཞི་ལས། དང་པོ་གང་ཟག་ནི་སྔར་ལྟར་ལས་ཁྱད་པར་རྣམ་ཐར་དང་པོ་གཉིས་ཐོབ་པའོ། །ས་ནི་བསམ་གཏན་བཞི་པ་ལ་བརྟེན་ནོ། །དགོས་པ་ནི། གཟུགས་སྡུག་
པ་ལ་སྤྲུལ་འདོད་པ་དང༌། མི་སྡུག་པ་སྤྲུལ་མི་འདོད་པའི་བློ་སྐྱེ་བ་དེའི་གཉེན་པོར་རོ། །ཚུལ་ཇི་ལྟར་ན་ཕན་ཚུན་ལྟོས་པ་དང༌། ཕན་ཚུན་རྗེས་སུ་འབྲེལ་བ་དང༌། ཕན་ཚུན་རོ་གཅིག་པའི་འདུ་ཤེས་གསུམ་ལ་བརྟེན་ནས་སོ། །དེ་ལ་དང་པོ་ནི། གསེར་དངུལ་ཟངས་གསུམ་གྱི་བུམ་པ་ལྟ་བུ་གཟུགས་སྡུག་མི་སྡུག་བར་མ་གསུམ་ལ་དངུལ་བུམ་དེ་ཟངས་བུམ་ལ་ལྟོས་ཏེ་སྡུག་གསེར་བུམ་ལ་ལྟོས་ཏེ་མི་སྡུག་པར་བསྒོམ་པས་ལྟོས་མེད་དུ་སྡུག་མི་སྡུག་གི་ཞེན་པ་ལྡོག་གོ། །གཉིས་པ་ནི་གསེར་བུམ་ལ་ལྟོས་ཏེ་མི་སྡུག་པ་དང༌། ཟངས་བུམ་ལ་ལྟོས་ཏེ་སྡུག་པ་གཉིས་དངུལ་བུམ་གཅིག་ལ་རྗེས་སུ་འབྲེལ་བར་བསྒོམ་པས་སྡུག་མི་སྡུག་ཐ་དད་དུ་ཞེན་པ་ལྡོག་གོ། །གསུམ་པ་ནི། སྔ་མ་གཉིས་ལྟར་བསྒོམ་པས་སྡུག་མི་སྡུག་ཐམས་ཅད་ལ་མཐའ་གཅིག་ཏུ་སོ་སོར་འཛིན་པ་མེད་པར་ཐམས་ཅད་ཀྱང་སྡུག་པའམ་སྤྲུལ་འདོད་པའི་རྣམ་པར་རོ་གཅིག་པའི་འདུ་ཤེས་ཐོབ་སྟེ་འདི་ནི་གྲུབ་པའི་དུས་སོ། །ཅིའི་ཕྱིར་སྤྲུལ་པའི་ལམ་ལ་རྣམ་ཐར་གསུམ་བཞག་ཅེ་ན། ཆེ་ཆུང་དང་བཟང་ངན་ལ་ངེས་མེད་དུ་མ་བལྟས་ན་དེ་ལས་གཞན་དུ་སྤྲུལ་མི་ནུས་པས་དེའི་ཕྱིར་དང་པོ་གཉིས་དང༌། དེ་དག་ལ་ངེས་མེད་ཀྱི་མོས་པ་ཐོབ་ཀྱང་སྡུག་མི་སྡུག་མཐའ་གཅིག་ཏུ་འཛིན་པ་མ་བཟློག་ན་མི་སྡུག་པ་སྤྲུལ་མི་འདོད་ལ་དེ་མ་སྤྲུལ་ན་སྤྲུལ་བ་མི་རྫོགས་པས་དེའི་ཕྱིར་དུ་གསུམ་བ་བསྒོམ་དགོས་སོ། །གསུམ་པ་
གང་ལ་སྙོམས་པར་ཞུགས་ན་མཐོང་ཆོས་ཚེ་འདི་ལ་བདེ་བར་གནས་པ་སྟེ་ལུས་སེམས་ལ་ཕན་འདོགས་པའི་ལམ་ལ་ལྔའོ། །དེ་དག་ཀྱང་གང་ཞེ་ན། དང་པོ་ཐར་པ་མྱང་འདས་དང་ཀུན་དཀྲིས་མངོན་གྱུར་བ་བྲལ་བར་མཐུན་པར་གནས་པའི་ལམ་ལ་གཟུགས་མེད་པའི་སྙོམས་འཇུག་གི་དངོས་གཞི་བཞི་ཡོད་དེ། དེ་ནི་གཟུགས་མེད་པའི་རྣམ་པར་ཐར་པ་ཡིན་ལ། དེ་ཡང་གཟུགས་མེད་ཀྱི་ས་ལ་རོ་མྱང་བའི་སྲེད་པ་ཐག་བསྲིངས་ནས་དེ་དང་མི་འགྲེ་བར་བྱ་བའི་ཕྱིར་དུ་སྒོམ་པའོ། །གཉིས་པ་ཆགས་སོགས་ཉོན་མོངས་སམ་སེམས་སེམས་བྱུང་ཉེ་བར་ཞི་བར་གནས་པའི་ལམ་གྱི་རང་བཞིན་ལ་དགག་བྱའི་གཙོ་བོ་ཡིན་པས་འདུ་ཤེས་དང་ཚོར་བ་འགོག་པའི་རྣམ་པར་ཐར་པ་གཅིག་ཡོད་ལ། དེ་ནི་འདུ་ཤེས་ཚོར་འགོག་གི་སྒྲིབ་པ་ལས་གྲོལ་བའི་ཕྱིར་མངོན་དུ་བྱེད་དོ། །གཟུགས་མེད་བཞི་དང་འགོག་པའི་སྙོམས་འཇུག་དང་རྣམ་ཐར་གྱི་ཁྱད་པར་ནི། ལུས་ཀྱི་འབྱུང་བ་ཆེན་པོའམ་སེམས་སེམས་བྱུང་དམིགས་པ་ལ་ཆ་མཉམ་བྱེད་པས་སྙོམས་འཇུག་དང༌། རང་སའི་ཀུན་དཀྲིས་ལས་ཐར་ཞིང་དེ་དང་མི་འདྲེ་བའི་ཆ་ནས་རྣམ་ཐར་དུ་འཇོག་གོ། །མཛོད་པ་ནི་རྣམ་ཐར་གྱི་དོན་ས་འོག་མ་ལས་རྒྱབ་ཀྱིས་ཕྱོགས་པ་ཡིན་པས་ཉེར་བསྡོགས་ཀྱི་བར་ཆད་མེད་ལམ་རྣམས་རྣམ་ཐར་མིན་ལ། རྣམ་གྲོལ་ལམ་རྣམས་ཡིན་ཞེས་ཉེར་བསྡོགས་
ལ་ཡང་འདོད་དོ། །དེ་ལྟར་ན་དང་པོ་གསུམ་གཞན་དོན་གྱི་ཆེད་དུ་འབྱུང་བ་དང༌། དེ་ནས་ལྔ་ནི་གཞན་དོན་གྱི་ཆེད་དུ་བྱ་བ་ཅན་རང་གི་མཐོང་བའི་དོན་ལ་བདེར་གནས་ཀྱི་དབང་དུ་བྱས་པའི་རྣམ་ཐར་ཏེ་བརྒྱད་དོ། །བཞི་པ་འཇིག་རྟེན་ལས་འདས་པའི་ལམ་ལ་དགུའོ། །དེ་ཡང་བསམ་གཟུགས་བརྒྱད་འགོག་སྙོམས་དང་དགུའོ། །འདི་དག་ཀྱང་ལམ་ཤེས་ལ་བརྟེན་པའི་རྣམ་པ་ཡིན་པས་བྱང་སེམས་ཀྱི་རྒྱུད་ཀྱི་དེ་དག་ལ་གཟུང་ངོ། །འདི་དག་ལ་འདས་ལམ་དུ་འཇོག་པ་ནི། སྲིད་རྩེ་ལ་ཟག་མེད་མེད་པར་མངོན་པ་བ་རྣམས་འདོད་ཀྱང༌། ཐེག་ཆེན་ལ་ཡོད་པ་བཞེད་པས་བསམ་གཟུགས་བརྒྱད་ཀྱི་ཟག་མེད་ཀྱི་ཆ་རྣམས་འདས་ལམ་གྱི་ངོ་བོ་ཡིན་པས་དེར་འཇོག་ལ། འགོག་པ་ནི་འདས་ལམ་གྱིས་ངེས་པར་ཐོབ་དགོས་བས་སོ། །འདིར་འགོག་སྙོམས་ཀྱི་མཐའ་བཅད་པ་ལ་བདུན། གང་ཟག་གང་གིས་དང༌། སེམས་གང་ལ་བརྟེན་ནས་དང༌། ཡིད་ལ་བྱེད་པ་གང་གིས་དང༌། དགག་བྱ་གང་འགོག་པ་དང༌། ངོ་བོ་དང༌། དུས་དང༌། ཁམས་གང་དུ་སྙོམས་པར་འཇུག་པའོ། །དང་པོ་གང་ཟག་གང་གིས་སྙོམས་པར་འཇུག་པ་ནི། ཐེག་དམན་ལྟར་ན། བསྡུ་བ་ལས། དེ་ལ་ནི་སློབ་པ་ཕྱིར་མི་འོང་བ་ལུས་ཀྱིས་མངོན་དུ་བྱེད་པ་དང༌། མི་སློབ་པ་གཉིས་ཀའི་ཆ་ལས་རྣམ་པར་གྲོལ་བ་ཡང་སྙོམས་པར་འཇུག་གོ། །ཞེས་པ་ལྟར་ཡིན་ལ་
ཐེག་ཆེན་ནི་མཐོང་ལམ་ནས་འཇུག་ནུས་སོ། །སོ་སྐྱེ་དང་རྒྱུན་ཞུགས་ཕྱིར་འོང་ཤེས་རབ་ཀྱི་ཆ་ལས་རྣམ་གྲོལ་རྣམས་ཀྱིས་འཇུག་མི་ནུས་སྟེ། འདི་ལ་འཇུག་པ་ལ་ཉོན་ཡིད་དགག་དགོས་ཤིང་སྲིད་རྩེའི་སེམས་ཐོབ་དགོས་ན། དང་པོ་ལ་དང་པོ་མེད་ལ་ལྷག་མ་རྣམས་ལ་ཕྱི་མ་མེད་པས་སོ། །ས་བཅུ་པ་ལས་བྱང་ཆུབ་སེམས་དཔའ་ས་དྲུག་པ་ཡན་ཆད་དུ་འགོག་པ་ལ་སྙོམས་པར་འཇུག་པར་གསུངས་པ་ནི། །སྤྲོས་པ་ཐམས་ཅད་དང་བྲལ་བའི་དབྱིངས་ལ་འགོག་པར་བཞེད་པས་མིང་མཚུངས་ཀྱང་དོན་མི་འདྲའོ། །གཉིས་པ་སེམས་གང་ལ་བརྟེན་པ་ནི། སྲིད་རྩེའི་སེམས་དེ་ཤིན་ཏུ་ཕྲ་བས་དེ་ལ་བརྟེན་ནས་སེམས་སེམས་བྱུང་གི་རྒྱུ་བ་དགག་སླ་བས་དེ་ལ་བརྟེན་པར་མངོན་པ་བ་རྣམས་འདོད་དོ། །འོན་ཀྱང་ཡུམ་གྱི་མདོར་ས་དགུག་ལ་བརྟེན་པར་བཤད་པས་སྔ་མ་ནི་རྩོམ་པ་དང་པོའི་ཚེ་ལ་འདོད་དགོས་སོ། །གསུམ་པ་ཡིད་ལ་བྱེད་པ་ནི། ཚོར་འདུ་སོགས་ཀྱི་རྒྱུ་བ་རགས་པ་མི་དབེན་པར་མཐོང་ནས་དེས་ཞི་བར་གནས་པའི་འདུ་ཤེས་སྔོན་དུ་བཏང་བའི་ཡིད་ལ་བྱེད་པས་སོ། །བྱང་སེམས་ནི་གཞན་དོན་དུ་ཏིང་ངེ་འཛིན་གྱི་རྩལ་སྦྱར་བར་བྱ་བའི་ཕྱིར་དུའོ། །བཞི་པ་དགག་བྱ་གང་འགོག་པ་ནི། ཚོགས་དྲུག་དང་ཉོན་ཡིད་དེ་བདུན་འཁོར་དང་བཅས་པ་འགོག་སྟེ་འདི་ལ་ཉོན་ཡིད་མ་བཀག་ན་འདུ་ཤེས་མེད་པའི་
སྙོམས་འཇུག་དང་འདི་གཉིས་ལ་ཞི་མ་ཞིའི་ཁྱད་པར་མེད་པས་སོ། །དེ་ཡང་འདོད་ཁམས་སུ་ཡིན་གྱི་གཟུགས་ཁམས་ན་སྣ་ལྕེའི་རྣམ་ཤེས་དང་གཟུགས་མེད་ན་ཚོགས་ལྔ་མེད་པས་རིམ་པ་ལྟར་ལྔ་དང་གཉིས་འགོག་གོ །ཉན་ཐོས་ཀྱིས་ཚོགས་དྲུག་ལས་མི་འགོག་གསུངས་པ་ནི་ཉན་ཐོས་ཀྱི་གཞུང་ལས་ཚོགས་དྲུག་ལས་མ་བཤད་པས་དེ་ཙམ་ཞིག་འགོག་པར་བཤད་པ་ཡིན་ལ་དོན་དུ་ཉོན་ཡིད་ཀྱང་འགོག་པར་བསྡུ་བ་ལས་བཤད་དོ། །གནས་སྐབས་དེར་ཡང་ཀུན་གཞི་ཡོད་པས་སེམས་ལྡན་ཡིན་ནོ། །ལྔ་པ་ངོ་བོ་ནི། དོན་སྨྲ་དང་ཐེག་ཆེན་པ་གཉིས་ཀས་ཀྱང་ལྡན་མིན་འདུ་བྱེད་དུ་འདོད་དོ། །འོན་ཀྱང་བྱེ་སྨྲས་རྫས་སུ་གྲུབ་པར་འདོད་ལ་མདོ་སྡེ་པ་ཡན་ཆད་ཀྱིས་བཏགས་ཡོད་དུ་འདོད་དོ། །ཁ་ཅིག་ན་རེ། འདི་ལྡན་མིན་དུ་བཤད་པ་ནི་ཉན་ཐོས་སྡེ་བ་དང་སྒོ་བསྟུན་པ་ཡིན་གྱི་ཐེག་ཆེན་རང་ལུགས་ལ་ཏིང་ངེ་འཛིན་ཁྱད་པར་ཅན་དུ་འདོད་དེ། སའི་སྙིང་པོ་འཁོར་ལོ་བཅུ་པ་ལས། བྱང་སེམས་རྣམས་འགོག་པའི་ཏིང་ངེ་འཛིན་ལ་གནས་ནས་འདུ་ཤེས་གསུམ་དང་ཚོར་བ་གསུམ་ཡོངས་སུ་གཅོད་དེ་ཞེས་སོགས་གསུངས་པ་དང༌། ཡུམ་གྱི་མདོ་ལས་ཀྱང་ཐོད་རྒལ་གྱི་ཏིང་ངེ་འཛིན་དུ་བཤད་པ་དང༌། སྙོམས་འཇུག་ཏུ་གསུངས་པ་དང་རྟོགས་པ་ཡེ་ཤེས་ཀྱི་ཆོས་སྐུར་བཤད་པའི་ཕྱིར་རོ། །དེས་ན་འདི་ཐེག་ཆེན་འཕགས་པའི་མི་རྟོག་ཡེ་ཤེས་ཡིན་ཟེར་རོ། །དེ་ཡང་འཕགས་པ་ཐོགས་མེད་སྐུ་མཆེད་ནི། འདིའི་ངོ་བོ་ཤེས་པ་ཡིན་པ་ལྟ་ཞོག །བྱེ་སྨྲའི་བཙུན་པ་དབྱིག་བཤེས་ཀྱིས་
འདིའི་སྐབས་སུ་ཡིད་ཤེས་མི་གསལ་བ་ཡོད་པར་འདོད་པ་ཡང༌། ཡིད་ཤེས་ཡོད་ན་རེག་པ་དང་ཚོར་བ་སོགས་སྐྱེ་བར་གསུངས་པའི་ལུང་ལ་བརྟེན་ནས་བཀགས་ཤིང༌། ཉན་ཐོས་སྡེ་པ་ལ་ཀུན་གཞི་ཡོད་པར་སྒྲུབ་པའི་ཚེ་ཡང༌། འགོག་སྙོམས་ལ་ཞུགས་པའི་ཚེ་ཚོགས་དྲུག་མེད་པས་ཀུན་གཞི་མེད་ན་ཤི་བ་དང་འདྲ་བར་འགྱུར་བ་སོགས་གསུངས་པས་སྐུ་མཆེད་ཀྱི་གཞུང་ལས་ནི་འགོག་སྙོམས་ཀྱི་སྐབས་སུ་ཀུན་གཞིས་སེམས་ཡོད་དུ་གསུངས་ཀྱི་ཤེས་པ་གཞན་གྱིས་སེམས་ཡོད་དུ་གསུང་བ་མེད་ལ། དེ་དང་མི་མཐུན་པར་བཀྲལ་བའི་ཐེག་ཆེན་གྱི་གཞུང་ལུགས་ཆེན་པོ་གཞན་ཡང་མེད་པས་རང་སྟོབས་ཀྱིས་མདོ་དང་བྱམས་པའི་དགོངས་པ་འཆད་མི་ནུས་པས་འགོག་སྙོམས་རྣམ་པར་མི་རྟོག་པའི་ཏིང་ངེ་འཛིན་དུ་བཀྲལ་བ་འདི་མི་འཐད་པར་མངོན་ནོ། །གཞན་ཡང་འདི་མི་རྟོག་པའི་ཏིང་ངེ་འཛིན་ཡིན་ན་ཡིད་ཤེས་ཡིན་དགོས་ལ། དེ་ལྟར་ན་སུམ་ཅུ་པ་ལས། ཡིད་ཀྱི་རྣམ་ཤེས་འབྱུང་བ་ནི། །རྟག་ཏུའོ་ཞེས་འབྱུང་དུས་སྤྱིར་བཏང་ནས། འདུ་ཤེས་མེད་པ་དང༌། སྙོམས་པར་འཇུག་པ་རྣམ་གཉིས་དང༌། །སེམས་མེད་གཉིད་དང་བརྒྱལ་མ་གཏོགས། །ཞེས་གནས་སྐབས་དེ་ལྔར་མི་འབྱུང་བར་དམིགས་ཀྱིས་བཀར་ནས་བཤད་པས་མི་འཐད་དོ། །དེས་ན་ལམ་གྱི་སྟོབས་ཀྱིས་ཐོབ་པ་དང་
སངས་རྒྱས་ཀྱིས་ཀྱང་དེ་མངོན་དུ་བྱེད་པའི་ནུས་པ་ཡོད་པ་ལ་དགོངས་ནས་ཡེ་ཤེས་ཆོས་སྐུར་བཤད་ཀྱི་འདིའི་རྫས་ཤིག་སངས་རྒྱས་ཀྱི་རྒྱུད་ལ་སྐྱེད་པ་ནི་མ་ཡིན་ནོ། །སངས་རྒྱས་ཀྱི་ས་འདི་ལ་འཇུག་པར་གསུངས་པ་ནི་ནུས་པ་ཐོབ་པ་ལ་དགོངས་སོ། །ཐོད་རྒལ་དུ་བཤད་པས་ཀྱང་མི་གནོད་དེ། །མཉམ་པར་མ་བཞག་པའི་སེམས་བཞིན་ནོ། །སྙོམས་འཇུག་ཏུ་གསུངས་པའི་དགོངས་པ་ནི། འདིའི་འཇུག་སེམས་དེ་སྙོམས་འཇུག་ཡིན་པས་སམ་ཡང་ན་འདིས་ལུས་ཀྱི་འབྱུང་བ་ཆེན་པོ་རྣམས་ཆ་སྙོམས་པར་འཇོག་པ་ལ་དགོངས་སོ། །དེ་ཡང་ཚོགས་བདུན་མ་བཀག་པའི་སྔོན་དུ་མེད་ལ་བཀག་པ་ན་ཡང་ཡོད་པས་འདུས་བྱས་ཀྱི་ཐ་སྙད་བྱས་སོ། །དྲུག་པ་དུས་ཅི་ཙམ་སྙོམས་པར་འཇུག་པ་ནི། ཁ་ཅིག་བྱང་སེམས་རྣམས་ཞག་བདུན་ལས་སྙོམས་པར་མི་འཇུག་སྟེ་གཞན་དོན་དོར་བར་འགྱུར་བའི་ཕྱིར་རོ་ཞེས་འདོད་པ་ལ། སྙོམས་པར་འཇུག་པ་ཡང་གཞན་དོན་ཡིན་པས་མི་འཐད་དོ་ཞེས་གསུངས་སོ། །བདུན་པ་ཁམས་གང་དུ་སྙོམས་པར་འཇུག་པ་ནི། མཛོད་དུ་དང་པོ་མིའི་རྟེན་ལ་བསྐྱེད་ནས་ཕྱིས་གཟུགས་སུ་བསྐྱེད་པར་བཤད་པ་ལྟར་བསྡུ་བར་ཡང་བཤད་ལ། འོན་ཀྱང་ཀུན་གཞི་ཁས་མ་བླངས་ན་རྣམ་བཞག་དེ་དགོས་པ་དང༌། ཀུན་གཞི་ཁས་བླངས་ན་ཁམས་གསུམ་གར་མངོན་དུ་བྱེད་པར་བཤད་དེ་དགག་
གཞི་ཡོད་མེད་ཀྱི་ཁྱད་པར་རོ། །ལྔ་པ་སྤོང་བའི་ལམ་ལ་ཆོས་བཟོད་ཀྱི་བར་ཆད་མེད་པའི་ལམ་གྱི་རྣམ་པ་བདེན་པ་བཞིའི་ཡུལ་ཅན་དུ་བསྡུས་པ་མཐོང་སྤང་གི་ཉོན་མོངས་པ་དང་མི་ལྡན་པའི་མཚན་ཉིད་ཆོས་བཟོད་བཞིའོ། །འདི་ཆོས་ཤེས་རྒྱུན་མཐའ་ལ་བཤད་ཀྱང་མཐོང་ལམ་དུ་བཞེད་པ་འཕགས་སེང་གི་དགོངས་པའོ། །དྲུག་པ་སངས་རྒྱས་ཉིད་ཀྱི་ལམ་སྟེ། དེ་ཁོ་ནར་བགྲོད་པའི་ལམ་ལ་སེར་སྣ་ནས་ཤེས་འཆལ་གྱི་བར་དྲུག་དང༌། ཐབས་དང་སྨོན་ལམ་མ་ཡིན་པ་གཉིས་དང༌། སྟོབས་ཆུང་བ་དང་མི་ཤེས་པ་གཉིས་ཏེ་མི་མཐུན་ཕྱོགས་བཅུ་མི་སྤྱོད་པའི་སྦྱིན་པ་སོགས་ཕར་ཕྱིན་བཅུའོ། །གལ་ཏེ་སོ་བདུན་བྱང་སེམས་ཀྱིས་ཀྱང་སྒོམ་ལ། རྣམ་ཐར་སྒོ་གསུམ་ནས་སྤོང་ལམ་གྱི་བར་རྣམས་ཉན་ཐོས་ལ་ཡང་ཡོད་ན་ཅིའི་ཕྱིར་དེ་གཉིས་གང་ཟག་ཉན་ཐོས་དང་བྱང་སེམས་ལ་ཡོད་པ་དང༌། མཁྱེན་པ་གཞི་ཤེས་དང་ལམ་ཤེས་གཉིས་ཀྱི་རྣམ་པར་བཤད་ཅེ་ན་སོ་བདུན་ཉན་ཐོས་དང་སོ་བཞི་བྱང་སེམས་ལ་གཙོ་ཆེ་བས་བཤད་དོ། །ཇི་ལྟར་ན་ཉན་ཐོས་ཀྱི་ཐུན་མོང་མ་ཡིན་པའི་བཞེད་དོན་ནི། །ཉོན་མོངས་ལས་གྲོལ་བའི་མྱང་འདས་ཙམ་ཞིག་ཡིན་ལ། དེ་བསྒྲུབ་པ་ལ་ནི་སོ་བདུན་མེད་མི་རུང་གི་ཡན་ལག་ཡིན་ཏེ། སོ་བདུན་འདི་ལ་ཆོས་ཀྱི་བདག་མེད་རྟོགས་པ་ཡོད་
ཀྱང་གཙོ་བོར་གང་ཟག་གི་བདག་མེད་པའི་དམིགས་རྣམ་རྫོགས་པ་ཅན་དུ་གསུངས་ལ་ཉོན་མོངས་པ་རྣམས་ཀྱང་གང་ཟག་གི་བདག་ཏུ་ལྟ་བ་ལས་བྱུང་བས་སོ། །རྣམ་ཐར་བརྒྱད་དང་སྙོམས་འཇུག་དགུ་དང་ཕར་ཕྱིན་བཅུ་ནི་ཤེས་སྒྲིབ་གྱི་གཉེན་པོར་སྒོམ་ལ། བྱང་སེམས་ཀྱི་བཞེད་པ་མཐར་ཐུག་པ་ཡང་ཤེས་སྒྲིབ་སྤངས་པའི་ཀུན་མཁྱེན་ཡིན་པས་སོ། །ཡང་ན་སོ་བདུན་གྱི་ལྡོག་པ་ནས་ཆོས་ཀྱི་བདག་མེད་རྟོགས་པར་མི་འཇོག་ལ། དེས་ན་བདག་མེད་རྟོགས་པ་ཐུན་མོང་མ་ཡིན་པའི་ལམ་གཞན་གྱིས་ཟིན་པའི་མཐུས་ཡིན་པས་སོ་བདུན་ནི་གང་ཟག་གི་བདག་མེད་ཀྱི་དམིགས་རྣམ་ཅན་ཡིན་པས་གཞི་ཤེས་ཀྱི་རྣམ་པ་དང༌། སོ་བཞིའི་སྐབས་སུ་ལམ་དང་པོ་དང་ལྔ་པ་གཉིས་ཉོན་སྒྲིབ་ཀྱི་གཉེན་པོ་དང༌། ལྷག་མ་རྣམས་ལས་རྣམ་ཐར་སྙོམས་འཇུག་ཐེག་དམན་དང་ཐུན་མོང་པའི་ཤེས་སྒྲིབ་དང༌། ཕར་ཕྱིན་བཅུ་ཐུན་མོང་མ་ཡིན་པའི་ཤེས་སྒྲིབ་ཀྱི་གཉེན་པོ་སྟེ། མདོར་ན་སྒྲིབ་གཉིས་མ་ལུས་པའི་གཉེན་པོའི་རྣམ་པ་བསྟན་པས་འདི་བྱང་སེམས་ཀྱི་ལམ་ཤེས་ཀྱི་རྣམ་པར་བཞག་གོ། །ཞེས་བྱའོ། །གསུམ་པ་སངས་རྒྱས་ཉིད་ཀྱི་ཐུན་མོང་མ་ཡིན་པའི་རྣམ་པ་རྣམས་བཤད་པ་ལ་བཞི། ཡོན་ཏན་གྱི་རབ་དབྱེ། དེ་དག་གི་རང་བཞིན། དེ་གང་གི་ཡིན་པ་དང༌། དེ་གང་གི་ཆེད་དུ་ཡིན་པའོ། །དང་པོ་ཡོན་ཏན་གྱི་རབ་དབྱེ་ལ་བཞི་ལས།
དང་པོ་ནི་སྟོབས་ཀྱི་རྣམ་པ་བཅུའོ། །དེ་གང་ན། སྦྱིན་པས་ལོངས་སྤྱོད་ཆེན་པོ་ནི་གནས་དབུལ་བ་ནི་གནས་མ་ཡིན་པ་དང༌། སེར་སྣས་དེ་ལས་བཟློག་པ་དང༌། འཆལ་ཁྲིམས་ཀྱིས་ངན་འགྲོར་སྐྱེ་བ་གནས་བདེ་འགྲོར་སྐྱེ་བ་གནས་མ་ཡིན་པ་དང༌། ཚུལ་ཁྲིམས་ཀྱིས་དེ་ལས་བཟློག་པ་དང༌། གནོད་སེམས་ཀྱིས་གཟུགས་མི་སྡུག་པར་འགྱུར་བ་ནི་གནས་དང༌། སྡུག་པ་ནི་གནས་མ་ཡིན་པ་དང༌། བཟོད་པས་དེ་ལས་བཟློག་པ་ལ་སོགས་པ་མཁྱེན་པ་གནས་དང་གནས་མིན་མཁྱེན་པའི་སྟོབས། དགེ་སྡིག་གི་ལས་རྣམས་འབྱེད་པའི་ལས་དང༌། ཀུན་སློང་དང་ལས་དེའི་རྣམ་པར་སྨིན་པ་དམན་པ་དང་ཁྱད་པར་བ་རྣམས་མཁྱེན་པ་ལས་ཀྱི་རྣམ་པར་སྨིན་པ་མཁྱེན་པའི་སྟོབས། འདོད་ཆགས་ལ་གནས་ཤིང་ཞེ་སྡང་ལ་མོས་པ་དང༌། དེ་ལས་བཟློག་པ་དང༌། ཉན་ཐོས་རང་རྒྱལ་སོགས་སུ་མོས་པའམ་འདོད་པ་སྣ་ཚོགས་མཁྱེན་པ་མོས་པ་སྣ་ཚོགས་མཁྱེན་པའི་སྟོབས། མིག་གི་ཁམས་ལ་སོགས་པ་བཅོ་བརྒྱད་དང་སའི་ཁམས་ལ་སོགས་པ་ཁམས་དྲུག་ལ་སོགས་པ་འཇིག་རྟེན་གྱི་ཁམས་དུ་མ་མཁྱེན་པ་ཁམས་སྣ་ཚོགས་མཁྱེན་པའི་སྟོབས། དད་པ་ལ་སོགས་པའི་དབང་པོ་རྣོ་བ་དང༌། རྟུལ་པོ་དང༌། འབྲིང་པོ་དང༌། མེད་པ་ལ་སོགས་པ་མཁྱེན་པ་དབང་པོ་
མཆོག་དང་མཆོག་མ་ཡིན་པ་མཁྱེན་པའི་སྟོབས། སྲིད་ཞི་ཐམས་ཅད་དུ་འགྲོ་བའི་ལམ་ཡང་དག་པ་ཉིད་དུ་ངེས་པ་དང་མ་ངེས་པ་རྣམས་དང་མཐུན་པའི་ལམ་དང་ལོག་པ་ཉིད་དུ་ངེས་པའི་ལམ་རྣམས་མཁྱེན་པ་ཀུན་ཏུ་འགྲོ་བའི་ལམ་མཁྱེན་པའི་སྟོབས། བསམ་གཏན་བཞི་རྣམ་ཐར་བརྒྱད་རྟོག་བཅས་སོགས་ཀྱི་ཏིང་ངེ་འཛིན་གསུམ་གཟུགས་མེད་བཞི་མཐར་གནས་དགུའི་རོ་མྱང་བའི་ཀུན་ནས་ཉོན་མོངས་དང༌། །དེ་མི་དམིགས་པའི་རྣམ་པར་བྱང་བ་སེངྒེ་རྣམ་པར་བསྒྱིང་པའམ། ཐོད་རྒལ་དུ་འཇུག་པ་དང་ལྡང་བ་སོགས་མཁྱེན་པ་བསམ་གཏན་དང་རྣམ་ཐར་མཁྱེན་པའི་སྟོབས། བདག་གཞན་གྱི་སྔོན་གྱི་སྐྱེ་གནས་དུ་མ་རྗེས་སུ་དྲན་པ་སྔོན་གནས་རྗེས་དྲན་མཁྱེན་པའི་སྟོབས་དང༌། ལྷའི་མིག་གིས་སེམས་ཅན་རྣམས་ཀྱི་ད་ལྟར་དང་མ་འོངས་པའི་འཆི་འཕོ་བ་དང་སྐྱེ་བ་མཁྱེན་པ་འཆི་འཕོ་དང་སྐྱེ་བ་མཁྱེན་པའི་སྟོབས། །ཉན་ཐོས་ནས་སངས་རྒྱས་ཀྱི་བར་དུ་ཕྱོགས་གཅིག་དང་མཐའ་དག་གི་ཟག་པ་ཟད་པ་མཁྱེན་པའི་སྟོབས་ཀྱི་རྣམ་པའོ། །དེ་དག་ཀྱང་མི་མཐུན་ཕྱོགས་ཐམས་ཅད་ལས་རྒྱལ་ཞིང་དེ་དག་གིས་མི་བརྫི་བས་སྟོབས་སོ། །གཉིས་པ་ནི། །མི་འཇིགས་པའི་རྣམ་པ་བཞིའོ། །འདི་ལ་བཞི་ལས། དང་པོ་རྟོགས་པ་ཕུན་ཚོགས་སུ་དམ་བཅའ་བ་ལ་མི་འཇིགས་པ་ནི། མདོ་ལས། ཀྱེ་མ་བདག་གིས་ཆོས་
འདི་དག་མངོན་པར་རྫོགས་པར་སངས་རྒྱས་སོ་ཞེས་དམ་བཅས་ན་འདིར་ང་ལ་ཆོས་འདི་རྣམས་སངས་མ་རྒྱས་སོ། །ཞེས་བྱ་བར་དགེ་སྦྱོར་ངམ། །བྲམ་ཟེའམ། །ལྷ་འམ། བདུད་དམ་ཚངས་པའམ། གཞན་སུ་ཡང་རུང་བས་འཇིག་རྟེན་ན་ཆོས་དང་ལྡན་པར་རྒོལ་བར་འགྱུར་བདེ་ལྟ་བུའི་རྒྱུ་ཡང་དག་པར་རྗེས་སུ་མི་མཐོང་སྟེ། འདིར་རྒྱུ་དེ་དག་ཡང་དག་པར་རྗེས་སུ་མ་མཐོང་བས་བདག་བདེ་བ་ཐོབ་པ་དང༌། བག་ཚ་བ་མེད་པ་ཐོབ་པ་དང༌། མི་འཇིགས་པ་ཐོབ་པས་གནས་ཏེ། ཁྱུ་མཆོག་རླབས་པོ་ཆེའི་གནས་སུ་དམ་བཅའོ། །འཁོར་གྱི་ནང་དུ་སེང་གེའི་སྒྲ་བསྒྲག་གོ། །ཚངས་པའི་འཁོར་ལོ་འཇིག་རྟེན་ན་དགེ་སྦྱོང་ངམ། །བྲམ་ཟེའམ། ལྷའམ། བདུད་དམ། ཚངས་པའམ། གཞན་སུ་ཡང་རུང་བས་ཆོས་དང་ལྡན་པར་འཇིག་རྟེན་དུ་བསྐོར་མི་ནུས་པ་བདག་གིས་རབ་ཏུ་བསྐོར་བར་བྱ། ཞེས་གསུངས་སོ། །གཉིས་པ་སྤངས་པ་ཕུན་ཚོགས་ལ་མི་འཇིགས་པ་ནི། ཀྱེ་མ་བདག་ཟག་པ་ཟད་དོ་ཞེས་དམ་བཅས་ན་དེ་ལ་ཟག་པ་འདི་རྣམས་ཡོངས་སུ་ཟད་པར་མ་གྱུར་ཏེ་ཞེས་བདག་ལ་དགེ་སྦྱོང་སོགས་སོ། །གསུམ་པ་བར་དུ་གཅོད་པའི་ཆོས་ལ་མི་འཇིགས་པ་ནི། གང་ངས་བར་ཆད་ཀྱི་ཆོས་སུ་བསྟན་པ་དེ་དག་བརྟེན་ན་བར་ཆད་ཀྱི་ཆོས་སུ་མི་འགྱུར་བ་དེ་ལྟ་བུའི་
གནས་དེ་མེད་དེ་འདིར་ང་ལ་དགེ་སྦྱོང་སོགས་སོ། །བཞི་པ་ངེས་པར་འབྱུང་བའི་ལམ་ལ་མི་འཇིགས་པ་ནི། ངས་འཕགས་པ་ངེས་པར་འབྱིན་པའི་ལམ་དེ་བྱེད་པའི་སྡུག་བསྔལ་ཡང་དག་པར་ཟད་པའི་དོན་དུ་ངེས་པར་འབྱིན་པ་བསྟན་པ་གང་ཡིན་པ་དེ་བསྒྲུབ་ན་སྡུག་བསྔལ་ཡང་དག་པར་ཟད་པའི་དོན་དུ་ངེས་པར་འབྱིན་པར་མི་འགྱུར་བ་དེ་ལྟ་བུའི་གནས་མེད་དེ། །འདིར་ང་ལ་དེ་ཡང་དག་པར་བསྒྲུབ་ཀྱང༌། སྡུག་བསྔལ་ཡང་དག་པར་ཟད་པར་མི་འགྱུར་རོ་ཞེས་བྱ་བར་དགེ་སྦྱོང་སོགས་སོ། །དེ་ལ་དགེ་སྦྱོང་དང་བྲམ་ཟེ་ནི་ཤེས་རབ་ཀྱིས་རློམ་པའོ། །ལྷ་དང་བདུད་ནི་ལྷའི་མིག་དང་ཕ་རོལ་གྱི་སེམས་ཤེས་པ་སོགས་ཀྱིས་ཕུན་སུམ་ཚོགས་པའོ། །ཚངས་པ་ནི་མཐུ་དང་རྫུ་འཕྲུལ་ཆེ་བའོ། །དེའི་ཕྱིར་དེ་དག་རློམ་པ་ཆེ་བས་སྨོས་སོ། །ལུས་ཀྱི་སྤུ་ཟིད་བྱེད་པ་དང༌། བག་འཁུམ་པ་སོགས་མེད་པའི་བདེ་བ་ཐོབ་པའི་མཐུས་ཅང་ཤེས་ཁྱུ་མཆོག་གི་གནས་སུ་དམ་འཆའ་སྟེ། སྐུའི་ཕྲིན་ལས་དག་བས་སོ། །གསུང་ལ་ཞུམ་པ་དང་དམན་པ་སོགས་མེད་པའི་བག་ཚ་བ་མེད་པ་ཐོབ་པའི་མཐུས་སེང་གེ་བཞིན་དུ་སྒྲོག་སྟེ། གསུང་གི་ཕྲིན་ལས་དག་པས་སོ། །ཐུགས་ལ་དོགས་པ་དང་ཞུམ་པ་སོགས་མེད་པའི་མི་འཇིགས་པ་ཐོབ་པའི་མཐུས་ཚངས་པ་བཞིན་དུ་འཁོར་ལོ་བསྐོར་ཏེ་ཐུགས་ཀྱི་ཕྲིན་ལས་དག་པས་སོ། །ཡང་ན་ཚངས་
པ་ནི་ཐམས་ཅད་ལས་འཕགས་པས་དེ་བཞིན་གཤེགས་པའོ། །གསུམ་པ་ནི་སོ་སོ་ཡང་དག་པར་རིག་པའི་རྣམ་པ་བཞིའོ། །དེ་གང་ན་གསུང་རབ་ཡན་ལག་བཅུ་གཉིས་སམ། །འོད་དཀར་ཅན་དང་རི་བོང་ཅན་ཞེས་སོགས་རྗོད་བྱེད་ཀྱི་མིང་གི་རྣམ་གྲངས་ཀྱི་ཡུལ་ལ་རོ་མྱང་བའི་ཆགས་པ་དང་ཤེས་སྒྲིབ་ཀྱི་ཐོགས་པ་མི་མངའ་བར་འཇུག་པ་ནི། ཆོས་སོ་སོ་ཡང་དག་པར་རིག་པའི་རྣམ་པ་དང༌། ཡན་ལག་བཅུ་གཉིས་ཀྱི་བརྗོད་བྱའམ་ཆོས་རྣམས་ཀྱི་རང་དང་སྤྱིའི་མཚན་ཉིད་ཀྱི་ཡུལ་ལ་སྔར་བཞིན་དོན་དང༌། འགྲོ་བ་དྲུག་ཏུ་གཏོགས་པའི་སྐད་དམ་ཡུལ་སོ་སོའི་སྐད་ཀྱི་ཡུལ་ལ་སྔར་བཞིན་ནི། །ངེས་པའི་ཚིག་སོགས་དང༌། །གཞན་ལ་བསྟན་པའི་ཕྱིར་ཆོས་ལ་སོགས་པ་གསུམ་མངོན་དུ་གྱུར་པའམ། །ཆོས་རྣམས་ཀྱི་རྫས་ཡོད་བཏགས་ཡོད་སོགས་ཀྱི་ངོ་བོ་དང་རྣམ་པའི་རབ་ཏུ་དབྱེ་བའི་ཡུལ་ལ་སྔར་བཞིན་ནི་སྤོབས་པ་སོགས་སོ། །དེ་བཞི་ཡང་ཡུལ་བཞི་ལ་ཆགས་ཐོགས་མེད་པའི་ཕྱིར་སོ་སོ་ཡང་དག་པར་རིག་པའོ། །བཞི་པ་ནི། སངས་རྒྱས་ཀྱི་ཡོན་ཏན་གྱི་ཆོས་གཞན་དང་མ་འདྲེས་པ་བཅོ་བརྒྱད་དོ། །དེ་ལ་ཡང་སྤྱོད་པས་བསྡུས་པ་དྲུག །རྟོགས་པས་བསྡུས་པ་དྲུག །ཕྲིན་ལསྐྱིས་བསྡུས་པ་གསུམ། ཡེ་ཤེས་ཀྱིས་བསྡུས་པ་གསུམ་མོ། །དེ་ལ་དང་པོ་ནི། ཐེག་
དམན་དགྲ་བཅོམ་རྣམས་ལ་འཆད་པར་འགྱུར་བའི་སྐྱོན་དྲུག་སྲིད་མོད་ཀྱང་དེ་བཞིན་གཤེགས་པ་ལ་ནི། གླང་པོ་ཆེ་དང་བ་གླང་དང་ཁྱི་གཏུམ་པོ་སོགས་ཀྱི་གནོད་པ་འབྱུང་བ་དང༌། སྦྲུལ་ནག་པོ་རྐང་པས་རྫི་བ་སོགས་ཀྱི་འཁྲུལ་བ་མི་མངའ་བས་ལུས་ཀྱི་ལས་དག་པ་དང༌། ལམ་སྟོར་ནས་ཅ་ཅོའི་སྒྲ་འབྱིན་པ་དང་བག་ཆགས་ཀྱི་དབང་གིས་རྟ་གད་ཆེན་པོ་འབྱིན་པ་སོགས་ཀྱི་ཅ་ཅོ་མི་མངའ་བས་ངག་གི་ལས་དག་པ་དང༌། བརྗེད་ནས་བྱ་བ་ཤོར་བ་དང་དུས་ལས་ཡོལ་བའི་དྲན་པ་ཉམས་པ་མི་མངའ་བ་དང༌། སྙོམས་པར་ཞུགས་རུང་མ་ཞུགས་རུང་དུས་ཐམས་ཅད་དུ་ཐུགས་མཉམ་པར་མ་བཞག་པ་མི་མངའ་བ་དང༌། སྲིད་པ་དང་མྱང་འདས་ལ་མི་མཐུན་པ་དང༌། མཐུན་པར་འཛིན་པའི་སྒོ་ནས་ཐ་དད་པ་ཉིད་ཀྱི་འདུ་ཤེས་མི་མངའ་བ་དང༌། སེམས་ཅན་འདུལ་བའི་དུས་ལ་སོགས་པ་སོ་སོར་མ་བརྟགས་པར་དེའི་དོན་ཡལ་བར་འདོར་བའི་བཏང་སྙོམས་མི་མངའ་བའི་རྣམ་པ་སྟེ་བཞི་ནི་ཡིད་ཀྱི་ལས་དག་པ་སྟེ་དེ་ལྟར་དྲུག་གོ། །གཉིས་པ་ནི། དེ་བཞིན་གཤེགས་པ་རྣམས་ནི་དུས་ཐམས་ཅད་དུ་སེམས་ཅན་གྱི་དོན་མཛད་པ་དང༌། བྱམས་པ་དང་ཐུགས་རྗེ་ཆེན་པོ་ལ་སོགས་པའི་ཆོས་ལ་རྒྱུན་མི་འཆད་བར་འདོད་པ་འབྱུང་བས་འདུན་པ་ཉམས་པ་མི་མངའ་བ་དང༌། སེམས་ཅན་རེ་རེའི་ཕྱིར་ཡང་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་པར་དེའི་གནས་
སུ་གཤེགས་བའི་བརྩོན་འགྲུས་ཉམས་པ་མི་མངའ་བ་དང༌། སངས་རྒྱས་ནས་དུས་གསུམ་གྱི་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང༌། དེ་འདུལ་བའི་ཐབས་ལ་སོགས་པ་དྲན་པའི་ལམ་དུ་བཞག་པས་ཕྱིས་དེ་ལ་བསམ་མི་དགོས་པའི་དྲན་པ་ཉམས་པ་མི་མངའ་བ་དང༌། ཆོས་ཐམས་ཅད་ཀྱི་དེ་བཞིན་ཉིད་ལ་མཉམ་པར་འཇོག་པའི་ཏིང་ངེ་འཛིན་ཉམས་པ་མི་མངའ་བ་དང༌། སེམས་ཅན་གྱི་སེམས་ཀྱི་སྤྱོད་པ་དང་ཆོས་སྟོན་པ་མཁྱེན་པ་མི་ཟད་པས་ཤེས་རབ་ཉམས་པ་མེད་པ་དང༌། འཁོར་བ་ཇི་སྲིད་ཀྱི་བར་དུ་སེམས་ཅན་གྱི་དོན་མཛད་པ་ལ་མི་ཟད་པའི་རྣམ་པར་གྲོལ་པ་ཉམས་པ་མི་མངའ་བའི་རྣམ་པ་སྟེ་དེ་ལྟར་དྲུག་གོ། །དེ་དྲུག་ལས་འདུན་པ་ནི་རྟེན་པར་བ་བཞི་དབང་པོ་ཐ་མ་འབྲས་བུ་ཡིན་ལ་དེ་དྲུག་ལ་ཐེག་དམན་ལ་ཐོབ་ནས་ཉམས་པ་མེད་ཀྱང༌། མ་ཐོབ་པའི་ཉམས་པ་ཡོད་ལ་དེ་བཞིན་གཤེགས་པ་ལ་གཉིས་ཀ་མེད་དོ། །གསུམ་པ་ནི་འོད་འགྱེད་པ་དང༌། གོམ་པ་འདོར་བ། སྤྱན་འབྱེད་པ་སོགས་ཀྱིས་སེམས་ཅན་འདུལ་བའི་སྐུའི་ཕྲིན་ལས་སེམས་ཅན་གྱི་བསམ་པ་དང་བག་ལ་ཉལ་དང་མཐུན་པར་འདོམས་པའི་གསུང་གི་ཕྲིན་ལས། བག་ཆགས་མ་ལུས་པ་སྤངས་ཤིང་བྱམས་པ་ཆེན་པོ་དང་ལྡན་པའི་ཐུགས་ཀྱི་ཕྲིན་ལས་རྣམས་ཡེ་ཤེས་སྔར་བྱུང་གི་རྒྱུ་ལས་བྱུང་བས་ཡེ་ཤེས་སྔོན་དུ་འགྲོ་ཞིང་ཡེ་ཤེས་དང་ལྷན་ཅིག་ཏུ་རྒྱུ་བས་ཡེ་ཤེས་ཀྱི་རྗེས་སུ་
འབྲང་བའི་རྣམ་པ་སྟེ་གསུམ་མོ། །བཞི་པ་ནི། འདས་པ་དང་མ་འོངས་པ་དང་ད་ལྟར་བྱུང་བའི་དུས་གསུམ་གྱི་ཤེས་བྱ་ཐམས་ཅད་ལ་བཞེད་པ་ཙམ་གྱིས་མཁྱེན་པས་མ་ཆགས་ཤིང༌། ཐམས་ཅད་མཁྱེན་བས་མ་ཐོགས་པའི་ཡེ་ཤེས་ཀྱི་རྣམ་པ་སྟེ་གསུམ་མོ། །གཉིས་པ་དེ་དག་གི་རང་བཞིན་ནི། །སངས་རྒྱས་འབྱུང་བ་རྣམས་གདུལ་བྱའི་ཁྱད་པར་གྱིས་ཐེག་པ་གསུམ་དང་གཅིག་སྟོན་པ་ཙམ་མ་གཏོགས་པ་དེ་བཞིན་ཉིད་མི་སྟོན་པ་མི་སྲིད་པས་སངས་རྒྱས་ཐམས་ཅད་ཀྱི་བཤད་པའི་དེ་བཞིན་ཉིད་དྲི་མ་མ་ལུས་པ་དག་པའི་མྱ་ངན་ལས་འདས་པའོ། །གསུམ་པ་དེ་དག་ གང་གིས་ཡིན་པ་ནི། །འདུས་བྱས ་འདུས་མ་བྱས་ཀྱི་ཆོས་ཐམས་ཅད་ལ་མངའ་སྒྱུར་བ་ནི་རང་བྱུང་གི་མཐུས་ཏེ་རང་བྱུང་ནི་རང་བྱུང་གི་ཡེ་ཤེས་སོ། །རང་བྱུང་ཡང་གཉིས་ཏེ། ཆོས་ཀྱི་དབྱིངས་དང༌། སྲིད་པ་ཐ་མ་པས་ཤེས་བྱ་ཐམས་ཅད་མངོན་དུ་བྱས་པའི་ཡེ་ཤེས་སོ། །དང་པོའི་དབང་དུ་མཛད་ནས་སྡོང་བོ་བཀོད་པ་ལས། འཇིག་རྟེན་ཁམས་རྣམས་ལ་ལ་དག །བསམ་གྱི་མི་ཁྱབ་ཚིག་གྱུར་ཀྱང༌། །ནམ་མཁའ་འཇིག་པར་འགྱུར་བ་མེད། །རང་བྱུང་ཡེ་ཤེས་དེ་བཞིན་ནོ། །ཞེས་པ་ལྟ་བུའོ། །གཉིས་པ་ནི། །བྱང་སེམས་དུས་རིང་མོར་དགེ་བའི་བཤེས་གཉེན་གྱི་གདམས་ངག་གོམ་པར་བྱས་པས་སློབ་དཔོན་ལ་མ་ལྟོས་པར་རང་བྱུང་སྟེ། ཇི་སྐད་དུ། ཉེར་འགྲོ་ང་ནི་སངས་རྒྱས་ཏེ། །ང་ལ་སློབ་དཔོན་སུ་ཡང་མེད། །ཅེས་
པ་ལྟ་བུའོ། །དེ་ལ་དང་པོ་ནི་སངས་རྒྱས་ཐམས་ཅད་ཀྱིས་བཤད་པའི་དེ་བཞིན་ཉིད་ཡིན་པས་འདིར་གཉིས་པ་བཟུང་ངོ༌། །བཞི་པ་གང་གི་ཆེད་དུ་ཡིན་པ་ནི། ཇི་ལྟ་ཇི་སྙེད་ཀྱི་རྣམ་པ་ཀུན་ཡང་དག་པར་རྟོགས་པའི་སངས་རྒྱས་ཉིད་ཀྱི་རྣམ་པ་སྟེ་གསུམ་མོ། །དེ་ཡང་དེ་བཞིན་ཉིད་ལ་དམིགས་ཏེ་རྣམ་མཁྱེན་གྱི་ཡེ་ཤེས་ཐོབ་པ་ན་དངོས་པོ་རྣམས་ལ་དབང་སྒྱུར་བའི་མཐུ་དང་ལྡན་པའི་སྒོ་ནས་རང་བྱུང་དུ་དང༌། ཤེས་བྱ་སྣ་ཚོགས་མ་འདྲེས་པར་མཁྱེན་པའི་སྒོ་ནས་སངས་རྒྱས་སུ་བཞག་སྟེ་ཁྱད་པར་འདི་ལས་མེད་དོ། །དེ་ལྟར་ན་ཡོན་ཏན་སོ་དྲུག་གི་རང་བཞིན་གང་ཡིན་པ་དེ་བཞིན་ཉིད་དང༌། ཡོན་ཏན་གྱི་ཚོགས་དེ་ལ་མངའ་བསྒྱུར་བའམ་དེ་དག་གང་ཟག་གང་གི་ཡིན་པ་རང་བྱུང་དང༌། དེ་གང་གི་ཆེད་དུ་ཡིན་པ་ཐ་མ་སྟེ་དེ་ལྟར་རྣམ་པ་གསུམ་མོ། །གཉིས་པ་སྦྱོར་བ་པོ་གང་ཟག་ལ་བཞི། །ཉན་པ་དང༌། ལེན་པ་དང༌། འཛིན་པ་དང༌། ཚུལ་བཞིན་དུ་ཡིད་ལ་བྱེད་པའོ། །དང་པོ་ཉན་པའི་སྣོད་ནི་ཁྱད་པར་གསུམ་ལྡན་ཏེ། ཡུམ་འདི་རིགས་ཀྱི་བུའམ་རིགས་ཀྱི་བུ་མོ་གང་དག་གི་རྣ་ལམ་དུ་གྲགས་པར་གྱུར་པ་དེ་དག་ཀྱང་སྔོན་གྱི་རྒྱལ་བ་ལ་བྱ་བ་ བྱས་པའོ། །གང་གི་རྣ་ལམ་དུ་གྲགས་པར་གྱུར་པ ་དེ་དག་ཀྱང་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པའོ། །དེ་བཞིན་དུ་སྦྱར་ནས་དགེ་བའི་བཤེས་གཉེན་གྱིས་ཡོངས་སུ་བཟུང་བ་
ཡིན་ནོ་ཞེས་སོ། །གཉིས་པ་ལེན་པའི་སྣོད་ནི། །སངས་རྒྱས་མང་པོ་ལ་བསྙེན་བཀུར་བ་ནི་ཚིག་བློ་ལ་ལེན་པའི་སྣོད་དེ། བཟུང་བཅང་བཀླག་ཀུན་ཆུབ་པར་བྱས་ནས་ཀྱང་དེ་ཁོ་ན་ཉིད་དུ་སྒྲུབ་པར་བྱེད་པ་འབྱུང་བར་འགྱུར་ཏེ། དེ་དག་ནི་སངས་རྒྱས་མང་པོ་ལ་བསྙེན་བཀུར་བྱས་པའོ། །གསུམ་པ་འཛིན་པའི་སྣོད་ནི། སངས་རྒྱས་རྣམས་ལ་བསྙེན་བཀུར་ནས་ཐེ་ཚོམ་གྱི་དོན་ཀུན་དྲི་བ་ནི་དོན་འཛིན་པའི་སྣོད་དེ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དྲིས་ཡོངས་སུ་ཞུས་བསྟེན་ཅིང་བསྙེན་བཀུར་བའོ། །བཞི་པ་ཚུལ་བཞིན་དུ་ཡིད་ལ་བྱེད་པའི་སྣོད་ནི། །སངས་རྒྱས་སོགས་ཀྱི་དྲུང་དུ་བསྟེན་ནས་སྦྱིན་སོགས་ཕར་ཕྱིན་ལ་སྤྱོད་པ་ནི། མཚན་ཉིད་ཚུལ་བཞིན་ཡིད་ལ་བྱེད་པའི་སྣོད་དེ། སྔོན་གྱི་སངས་རྒྱས་བྱེ་བ་མང་པོ་ལས་སྦྱིན་པ་ནས་བསམ་གཏན་གྱི་ཕར་ཕྱིན་གྱི་བར་ལ་སྤྱད་པའོ། །དེ་དག་གིས་སངས་རྒྱས་མང་པོ་ལས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པའོ། །ཞེས་སོ། །གསུམ་པ་སྦྱོར་བ་རང་གི་ངོ་བོ་ལ་གཉིས། སྦྱོར་བ་སྐྱེད་ཚུལ་དང༌། སྐྱེས་བའི་སྦྱོར་བའོ། །དང་པོ་ནི་རྣམ་ཀུན་གྱི་སྦྱོར་བ་དེ་སྐྱེད་ཚུལ་གྱི་དབང་དུ་བྱས་ན་ལྔའོ། །དེ་ཡང་ཡུལ་གཟུགས་སོགས་ལ་ཞེན་ནས་གནས་བྱར་མི་བདེན་པར་རྟོགས་པ་ནི་མི་གནས་པའི་སྦྱོར་བ་དང༌། གཟུགས་སོགས་དེ་དག་ལ་ཞེན་ནས་མི་སྦྱོར་བ་ཉིད་ཡང་དག་པའི་
དོན་ལ་སྦྱོར་བ་ཡིན་པ་མི་སྦྱོར་བའི་སྦྱོར་བའོ། །དེ་གཉིས་ཡུལ་དང་ཡུལ་ཅན་ལ་ཞེན་པ་འགོག་པས་གནས་པ་དང་རྣལ་འབྱོར་བཀག་པ་ཞེས་བྱའོ། །རྣམ་གྲངས་སུ་གཟུགས་སོགས་སྦྱར་བྱའི་གནས་སུ་མེད་པ་དང་དེ་ལྟར་རྟོགས་པ་ཉིད་ཐ་སྙད་དུ་སྦྱོར་བ་ཡིན་པར་རྟོགས་པ་ཡང་མདོའི་དོན་ནོ། །དེ་ལྟར་ཡུལ་དང་ཡུལ་ཅན་དུ་མ་ཞེན་པར་བྱས་ཏེ་སྐྱེ་མེད་གསུམ་བསྒོམ་ན་ཟབ་པ་སོགས་གསུམ་རྟོགས་པའི་སྦྱོར་བ་རྣམས་སྐྱེའོ། །ཟབ་པ་སོགས་གསུམ་ནི། །གཞི་ཐ་སྙད་དུ་རྟེན་ཡིན་ཀྱང་དོན་དམ་པར་གནས་བྱར་མེད་པས་ཟབ་པ་དང༌། ལམ་དྲི་མ་དང་བཅས་ཀྱང་རང་བཞིན་གྱིས་དག་པས་གཏིང་དཔག་དཀའ་བ་དང༌། དེ་གཉིས་ཀྱི་རྣམ་པ་རྣམས་མཐའ་དམིགས་སུ་མེད་པས་ཚད་མེད་པ་གསུམ་མོ། དེ་གསུམ་རྟོགས་ཚུལ་ནི། རྒྱན་སྣང་ལས། གང་གི་ཚེ་གཟུགས་ལ་སོགས་པ་ཟབ་བོ་སྙམ་དུ་མངོན་པར་མ་ཞེན་པའི་ཚུལ་གྱིས་དེ་ཁོ་ན་ཉིད་དུ་མི་གནས་པ་དེའི་ཚེ་ཕྱིན་ཅི་མ་ལོག་པ་ཡིན་པའི་ཕྱིར་དེ་ལ་ཟབ་པའི་སྦྱོར་བ་ཐོབ་པར་འགྱུར་རོ། །ཡང་གང་གི་ཚེ་ཟབ་པོ་སྙམ་དུ་ཡང་རྣལ་འབྱོར་དུ་མི་བྱེད་པ་དེའི་ཚེ་གཟུགས་ལ་སོགས་པ་ཟབ་པ་ཞེས་བྱ་བར་ཡང་མི་གནས་ཏེ། དེ་ལྟར་གནས་པ་དང་རྣལ་འབྱོར་བཀག་པས་ཟབ་མོའི་སྦྱོར་བའི་དོན་ཕྱིན་ཅི་མ་ལོག་པ་བསྟན་པ་ཡིན་ནོ། །དེ་བཞིན་དུ་གཏིང་དཔག་དཀའ་བ་དང་ཚད་མེད་པའི་སྦྱོར་བའི་
དོན་ཀྱང་འདིའི་རྗེས་སུ་འབྲང་ནས་བརྗོད་པར་བྱའོ། །ཞེས་སོ། །དེ་ཡང་གཞི་ཕུང་པོ་ཁམས་དང་སྐྱེ་མཆེད་ཀྱི་ཆོས་རྣམས་ཀུན་རྫོབ་ཏུ་འཆིང་གྲོལ་ལ་སོགས་པའི་རྟེན་ཡིན་ཀྱང་དོན་དམ་དུ་རང་བཞིན་བདེན་པར་གྲུབ་པ་མེད་པས་ན་ཟབ་པ་ཡིན་ལ། དེ་ལྟར་ཟབ་པར་རྟོགས་པ་དེའི་ཚེ་ཡུལ་བདེན་ཞེན་དང་བཅས་པའི་བློས་གནས་བྱར་མ་མཐོང་ནས་ཡུལ་ལ་བདེན་ཞེན་མེད་པ་ནི་གནས་པ་བཀག་པ་ཞེས་མི་གནས་པའི་སྦྱོར་བ་དང༌། ཡང་དེ་ལྟར་ཡུལ་ཟབ་པའི་རང་བཞིན་གནས་བྱར་མ་གྲུབ་པ་དེའི་ཚེ་ཡུལ་ཅན་བློའི་ངོས་ནས་ཀྱང་ཟབ་བོ་སྙམ་དུ་ཡང་རྣལ་འབྱོར་དུ་མི་བྱེད་དེ་ཡུལ་གང་དུ་ཡང་མ་གྲུབ་པ་ལ་བློས་ཅིར་ཡང་མི་འཛིན་པ་ནི་རྣལ་འབྱོར་བཀག་པ་ཞེས་མི་སྦྱོར་བའི་སྦྱོར་བ་ཡིན་ཏེ། ཚུལ་དེ་ལྟར་ཡུལ་དང་ཡུལ་ཅན་གཉིས་ཀའི་ངོས་ནས་ཞེན་པ་མེད་པ་ནི་གཞི་ཤེས་ཀྱི་ཟབ་པའི་སྦྱོར་བ་ཡིན་ལ་ལྷག་མ་གཉིས་ཀྱང་དེ་ལྟར་རོ། །གཉིས་པ་སྐྱེས་པའི་སྦྱོར་བ་ནི། །ཐབས་དེས་བསྐྱེད་པའི་སྦྱོར་བ་ནི་བཅོ་ལྔའོ། །དེ་ཡང་ཚེག་ཆེན་པོས་ཐོབ་པ་དང་བདེ་བླག་ཏུ་ཐོབ་པ་གཉིས་ལས་དང་པོ་ནི། གང་ཟག་ལས་དང་པོ་པ་དབང་བརྟུལ་ཟབ་པ་དང་གཏིང་དཔག་དཀའ་བ་ཚད་མེད་པའི་གནས་ལ་སྐྲག་པ་དང་དངངས་བ་སོགས་སྐྱེ་བ་སྟེ། དེས་ནི་ཚེགས་ཆེན་པོས་ཡུན་རིང་མོ་ནས་རྟོགས་པར་བྱེད་དོ། །གཉིས་པ་བདེ་བླག་ཏུ་ཐོབ་པ་ནི། སྐྱེ་མེད་གསུམ་ལ་མི་དངངས་མི་སྐྲག་པའི་
དབང་པོ་རྣོན་པོ་མ་ཞེན་པ་གཉིས་ཀྱི་སྒོ་ནས་ཡུལ་གསུམ་བདེ་བླག་ཏུ་རྟོགས་པ་སྟེ། འདི་ལ་དེ་བཞིན་གཤེགས་པ་གསུམ་ལས་མི་འདའ་བར་ལུང་བསྟན་པ་འཐོབ་པ་ཡུམ་གྱི་རྟོགས་པ་རང་ལ་བྱུང་བ་དེ་འཛིན་པ་སོགས་ཀྱིས་ཕྱིར་མི་ལྡོག་པར་བྱེད་པ། རྣམ་མཁྱེན་གྱི་བར་ཆད་ཀྱི་ཆོས་ལས་ངེས་པར་འབྱུང་བ། ཡུམ་འཛིན་པ་སོགས་ཀྱིས་ལུང་བསྟན་པ་དང་ཉེ་བར་བར་མ་ཆད་པ། རྫོགས་པའི་བྱང་ཆུབ་དང་ཉེ་བ། རྫོགས་བྱང་དུ་མྱུར་དུ་བྱང་ཆུབ་པ། སྐྱེ་བོ་ལ་ཕན་བདེའི་ཕྱིར་དུ་ཆོས་འཁོར་བསྐོར་ཞིང་བསྐུལ་བས་གཞན་དོན། །ཆོས་རྣམས་ཀྱི་ཡིན་ཚུལ་འཕེལ་འགྲིབ་མེད་པར་མཐོང་བ། ཆོས་དཀར་པོའི་ལས་དང་ཆོས་མིན་ནག་པོའི་ལས་ལ་སོགས་པ་ཡང་དག་པར་མི་མཐོང་བ། གཟུགས་སོགས་ལ་བསམ་གྱིས་མི་ཁྱབ་པར་མི་མཐོང་མི་རློམ་པ། གཟུགས་སོགས་དང་དེའི་མཚན་མ་དང༌། དེའི་ངོ་བོར་མི་ཞེན་པ་རྣམ་པར་མི་རྟོག་པ། རྒྱུན་ཞུགས་སོགས་བཞི་རང་བྱང་ཆུབ་རྫོགས་པའི་སངས་རྒྱས་ཏེ་འབྲས་བུ་རིན་པོ་ཆེ་དྲུག་གཞན་ལ་སྦྱིན་པ། གནས་ངན་ལེན་ཕྲ་མོ་དག་པར་བྱེད་པ། ཡུམ་རིན་པོ་ཆེ་འདྲི་བ་དང་ཉན་པ་སོགས་ཞག་ནས་ལོའི་བར་དུ་ས་མཚམས་བཅད་དེ་བརྩོན་པ་མི་གཏོང་བ་ས་མཚམས་ཀྱི་སྦྱོར་བའོ། །ཕྱི་མ་འདི་ནི་སྦྱོར་བ་བཅུ་བཞིའི་རྒྱུའོ། །འདི་དག་གི་ས་མཚམས་ཀྱང་ལུང་བསྟན་པ་ཚོགས་ལམ་
དང་དྲོད། དེ་ནས་རིམ་བཞིན་སྦྱོར་ལམ་གསུམ། མཐོང་ལམ་རྣམས་ལ་རེ་རེ། མ་དག་ས་བདུན་དུ་གཅིག །བརྒྱད་པར་ལྔ། དགུ་པ་དང་བཅུ་པར་རེ་རེའོ། །ས་མཚམས་ཀྱི་སྦྱོར་བ་ནི་ཚོགས་ལམ་ནས་ས་བདུན་པའི་བར་ཏེ་བརྒྱད་པ་ཡན་ཆད་ས་མཚམས་ཀྱིས་ཕྱེ་ནས་བརྩོན་པ་མེད་དོ། །བཞི་པ་སྦྱོར་བའི་སྔོན་འགྲོའི་ཆོས་ལ་བཞི། འཐོབ་བྱ་ཡོན་ཏན། དོར་བྱ་སྐྱོན། ཤེས་བྱ་མཚན་ཉིད། རྒྱུད་ལ་བརྟེན་བྱ་ཐར་བ་ཆ་མཐུན་ནོ། །དང་པོ་ཐོབ་བྱ་ཡོན་ཏན་ནི། དེ་ལྟར་ཕྱིན་ཅི་མ་ལོག་པའི་སྦྱོར་བ་ལ་དགའ་ཞིང་ཉམས་སུ་ལེན་པའི་གང་ཟག་རྣམས་ལ་ཕན་ཡོན་གྱི་རྣམ་པ་མང་པོ་འབྱུང་བའི་རྒྱུ་མཚན་བཅུ་བཞི་ཡོད་པ་ལ་བརྟེན་ནས་ཕན་ཡོན་བཅུ་བཞི་འཐོབ་སྟེ་རིམ་པ་ལྟར། སྦྱོར་བ་སྒོམ་པ་པོའི་གང་ཟག་ལ་བར་དུ་གཅོད་པའི་བདུད་ཀྱི་མཐུ་ཉམས་པར་བྱ་བའི་ཕྱིར་སངས་རྒྱས་རྣམས་ཀྱིས་བྱིན་གྱིས་བརླབས་པས་བདུད་ཀྱི་མཐུ་བཅོམ་པ་དང༌། །སྦྱོར་བའི་ནུས་པ་བསྐྱེད་པའི་དོན་དུ་དེ་བཞིན་གཤེགས་པས་ཐུགས་ཀྱིས་དེ་ལ་དགོངས་པར་མཛད་པས་གནས་སྐབས་ཐམས་ཅད་དུ་དེ་བཞིན་གཤེགས་པས་དགོངས་ཤིང་མཁྱེན་པ་དང༌། སྦྱོར་བ་ཁྱད་པར་དུ་འགྲོ་བའི་ཕྱིར་དེ་བཞིན་གཤེགས་པས་སྤྱན་རྣམ་མཁྱེན་ཀྱི་ཡེ་ཤེས་ཀྱིས་གཟིགས་པས་སངས་རྒྱས་རྣམས་ཀྱིས་མངོན་སུམ་དུ་མཛད་པ་དང༌། དོན་དེ་དག་གི་ཕྱིར་དེ་བཞིན་གཤེགས་པ་དང་ཉེ་བར་གྱུར་པས་ཡང་དག་པར་རྫོགས་
པའི་བྱང་ཆུབ་ཐོབ་པ་དང་ཉེ་བར་གྱུར་པ་དང༌། ཡུམ་བྲིས་ཏེ་བཅངས་ཤིང་མཆོད་པའི་ཕན་ཡོན་ཆེན་པོ་དང་ལྡན་པས། སངས་རྒྱས་དང་མི་འབྲལ་བའི་དོན་ཆེན་པོ་དང༌། བདེ་འགྲོར་སྐྱེ་བའི་ཕན་ཡོན་ཆེན་པོ་དང༌། འཚང་རྒྱ་བའི་འབྲས་བུ་ཆེ་བ་དང༌། མྱ་ངན་ལས་འདས་རྗེས་སུ་ཡང་གཞན་དོན་ལ་འཇུག་པའི་རྣམ་པར་སྨིན་པ་ཆེ་བ་འཐོབ་པ་དང༌། །དེ་བཞིན་གཤེགས་པའི་བྱ་བ་བྱེད་པས་པ་ར་ཏ་ནི་སོགས་ཡུམ་དར་བའི་གནས་སུ་ཡུམ་འདྲི་བ་སོགས་བྱེད་པ་དང༌། སྒྲིབ་གཉིས་ཀྱི་གཉེན་པོའི་ཆོས་ཡོངས་སུ་རྫོགས་པས་ཕྱིན་དྲུག་སོགས་ཟག་པ་མེད་པའི་ཡོན་ཏན་ཐམས་ཅད་ཡོངས་སུ་རྫོགས་པ་དང༌། དེ་བཞིན་གཤེགས་པ་རྣམས་ལས་རྣམ་མཁྱེན་གྱི་གཏམ་བརྗོད་པ་རྙེད་པས་ཚེ་འཕོས་ནས་ཀྱང་རྫོགས་བྱང་ལས་བརྩམ་པའི་གཏམ་སྐྱེ་མེད་སྨྲ་བ་དང༌། དེ་བཞིན་གཤེགས་པས་གྲོགས་དང་མགོན་མཛད་པས་བདུད་དང་བདུད་ཀྱི་རིས་ཀྱིས་རྫོགས་བྱང་ལས་མི་ཕྱེད་པ་དང༌། འཇིག་རྟེན་ལས་འདས་པའི་ཆོས་ཚོལ་བའི་དགའ་བ། སྐྱབས་གསུམ་ལ་བརྟེན་པའི་དང་བ། དགེ་བ་ལ་སེམས་འཇུག་པའི་མགུ་པ་རྒྱ་ཆེན་པོ་བསྐྱེད་པས། དགེ་བའི་རྩ་བ་ཉན་རང་དང༌། ཐུན་མོང་མ་ཡིན་པའི་འཁོར་གསུམ་རྣམ་དག་གི་སྦྱིན་སོགས་སྐྱེ་བ་དང༌། སྦྱོར་བ་སྒོམ་མཁན་དེས་དམ་བཅས་པའི་ཚིག་དེ་བཞིན་གཤེགས་པ་རྣམས་ཀྱི་སྤྱན་སྔར་སྲོག་ཆགས་
མང་པོ་བྱང་ཆུབ་ལ་འགོད་པར་བྱའོ་ཞེས་ཁས་བླངས་བ་ལ་བསམ་པ་དག་པར་མཁྱེན་ནས་རྗེས་སུ་ཡི་རང་བར་མཛད་པས་སེམས་ཅན་གྱི་དོན་བྱེད་པར་དམ་བཅས་པའི་དོན་ཇི་ལྟ་བ་བཞིན་དུ་དེ་དངོས་སུ་སྒྲུབ་པ་དང༌། ཆོས་ཟབ་མོ་དང་རྒྱ་ཆེ་བ་མངོན་པར་འདོད་ཅིང་ལྷག་པར་མོས་པས་རྣམ་སྨིན་གྱི་འབྲས་བུ་རྒྱ་ཆེན་པོ་སངས་རྒྱ་བ་ཉིད་ཡོངས་སུ་འཛིན་པ་དང༌། སེམས་ཅན་གྱི་དོན་བྱེད་པའི་ནུས་པ་ཁྱད་པར་བ་ཐོབ་པས་ཕྱི་ནང་གི་བདོག་པ་འབྲས་བཅས་སྟེར་བའི་སྒོ་ནས་སེམས་ཅན་གྱི་དོན་སྒྲུབ་པ་དང༌། ཤེར་ཕྱིན་ཚང་བར་རྙེད་པའི་སྔོན་གྱི་དགེ་རྩ་ཕྱིན་དྲུག་ལ་བརྩོན་པ་མི་འདོར་བས་ཚེ་བརྗེས་ཀྱང་ཡུམ་ངེས་པར་འཐོབ་པ་རྣམས་སོ། །དེ་ལ་ཡུལ་པར་ཏ་ནི་ནི་ཁ་ཅིག་རྒྱ་གར་གྱི་ཡུལ་དབུས་དང༌། ཁ་ཅིག་ཤར་ཕྱོགས་དང་བྱང་ཕྱོགས་རྒྱ་ཡུལ་སོགས་ལ་འཆད་དོ། །འདིའི་སྐབས་སུ་མདོ་ལས་ལྔ་བརྒྱ་ཐ་མ་ལ་ཞེས་གསུངས་པའི་དོན་ཞི་བ་འཚོའི་བཞེད་པ་ལ་བསྟན་པ་ལྔ་བརྒྱ་ཕྲག་བཅུར་གནས་པའི་ཕྱེད་སྔ་མ་ཡར་འཕེལ་དང་ཕྱེད་ཕྱི་མ་མར་འགྲིབ་ཡིན་པས་འགྲིབ་པའི་ཕྱོགས་ལྔ་བརྒྱ་ཕྲག་ལྔ་ལ་ལྔ་བརྒྱ་ཐ་མར་བཞེད། ཁ་ཅིག་ལྔ་བརྒྱ་ཕྲག་བཅུ་ཡོད་པའི་ཐ་མ་རྟགས་ཙམ་འཛིན་པ་ལ་བཞེད་དོ། །ཡོན་ཏན་འདི་དག་གི་ས་མཚམས་ནི་གཙོ་བོར་དྲོད་ནས་འཐོབ་བོ། །གཉིས་པ་དོར་བྱ་སྐྱོན་ལ། སྐྱོན་དངོས་དང་དེ་སེལ་བྱེད་གཉེན་པོ་གཉིས། དང་པོ་སྐྱོན་ལ་བཞི་བཅུ་རྩ་དྲུག་
སྟེ། དེ་ཡང་སྦྱོར་བ་མ་སྐྱེས་ལ་སྐྱེད་པ་ལ་འགལ་རྐྱེན་ཉེ་བར་གནས་པ་ཉེར་གསུམ་དང༌། མཐུན་རྐྱེན་མ་ཚང་བ་ཉེར་གསུམ་སྟེ་དེ་ལྟར་ནའོ། །དང་པོ་འགལ་རྐྱེན་ཉེ་བར་གནས་པ་ལ་རང་དང་གཞན་ལ་བརྟེན་པ་གཉིས། དང་པོ་འགལ་རྐྱེན་རང་ལ་བརྟེན་པ་ལ་ཡང་གསུམ། དོན་ཡོངས་སུ་ཤེས་པ་དང༌། སྒོ་གསུམ་གྱི་བྱ་བ་དང༌། །ཐེག་ཆེན་ལ་འཇུག་པའི་བར་གཅོད་དོ། །དང་པོ་ནི་སྦྱོར་བ་སྒོམ་པའི་དུས་སུ་ཞེས་ཐམས་ཅད་ཀྱི་གོང་དུ་སྦྱར་རོ། །ཚེགས་ཆེན་པོས་ཡུན་རིང་མོ་ནས་ཡུམ་ཤེས་པ་འཐོབ་ཅིང་དེས་སྐྱོ་བ་དང༌། སྔོན་དང་ཕྱི་མཐའ་མ་བརྟགས་པར་ཡུམ་ཤེས་པའི་སྤོབས་པ་ཧ་ཅང་མྱུར་བ་སྐྱེ་སྟེ་དེས་རློམ་པ་དང་གཉིས་སོ། །གཉིས་པ་སྒོ་གསུམ་གྱི་བྱ་བ་ནི། ཡུམ་འདྲི་བ་ལ་སོགས་པའི་དུས་སུ་ལུས་རྣམ་པར་འགྱུར་བའི་གླལ་བ་ཧ་ཧ་ཞེས་དགོད་པ་ལུས་སམ་ལུས་དང་འབྲེལ་བས་གཞན་ལ་ཀུ་རེ་བྱེད་པའི་ལུས་ཀྱི་གནས་ངན་ལེན་དང༌། གཉེན་བཤེས་སོགས་ལ་སེམས་རྣམ་པར་གཡེང་བ་བདག་གཞན་ལ་བརྟེན་ནས་དགའ་བར་བྱ་བའི་ཡུལ་ལ་ཕན་ཚུན་ཆགས་པ་ཡུམ་འདིའི་རོ་མི་མྱོང་ངོ་ཞེས་སྟན་ལས་ལངས་ནས་གུད་དུ་འགྲོ་བའི་སེམས་ཀྱི་གནས་ངན་ལེན་ཏེ་དེས་གཡེང་བ་དང༌། རིགས་པ་མ་ཡིན་པ་ལུས་ཀྱི་གསུམ་གྱིས་སྐྱེད་པའི་ཁ་ཏོན་བྱེད་པ་དང་འཆད་པ་དང༌། རིགས་པ་མ་ཡིན་པ་སེམས་ཀྱི་གསུམ་
གྱིས་སྐྱེད་པའི་འཛིན་པ་ནས་ཡིད་ལ་བྱེད་པའི་བར་ཏེ་ལུས་ཀྱི་གནས་ངན་ལེན་དང༌། སེམས་ཀྱི་གནས་ངན་ལེན་དང༌། རིགས་པ་མ་ཡིན་པའི་ངག་གིས་བསྐྱེད་པའི་ཁ་ཏོན་བྱེད་པ་ལ་སོགས་པ་གསུམ་མོ། །གསུམ་པ་ཐེག་ཆེན་ལ་འཇུག་པའི་བར་གཅོད་ལ་གཉིས། དང་པོ་ཐེག་ཆེན་ལས་ཉམས་པའི་རྒྱུ་བདུན་ནི། །བྱང་སེམས་ཀྱི་སྐྱོན་མེད་པར་མ་ཞུགས་ན་ལུང་མི་སྟོན་པས་ལུང་མི་བསྟན་པ་ན། བདག་ལུང་མ་བསྟན་ཏོ། གང་དུ་སྐྱེས་པའི་གྲོང་ལ་སོགས་པ་མ་བརྗོད་དོ་སྙམ་པ་ཡུམ་ལས་ཕྱིར་ཕྱོགས་པའི་རྒྱུ་མཚན་འཛིན་པ་དང༌། འོག་མ་དྲུག་གིས་ཡུམ་དོར་ནས་དམན་པའི་སྡེ་སྣོད་ལ་འཇུག་པ་ལ་ཁྱད་པར་མེད་པ་ལ་ལྡོག་པའི་སྒོ་ནས་ཐ་དད་དུ་བཞག་པ་ཙམ་མོ། །ཤིང་གི་རྩ་བ་དོར་ནས་ཡལ་ག་ཚོལ་ན་དོན་མི་འགྲུབ་པ་ལྟར་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་གྱི་རྒྱུ་རྩ་བ་ལྟ་བུ་ཡུམ་པོར་ནས་ཡལ་ག་སོགས་ལྟ་བུའི་དམན་པའི་སྡེ་སྣོད་ལ་འཇུག་པ་ནི་རྣམ་མཁྱེན་གྱི་རྒྱུ་ལ་མངོན་པར་ཞེན་པ་ཉམས་པ་དང༌། བཟང་མང་འོང་བའི་ཇོ་བོ་ལ་མི་སློད་བར་ངན་ཉུང་འོང་བའི་ལས་མི་ལ་སློང་བའི་ཁྱི་བཞིན་དེ་བཞིན་གཤེགས་པའི་ཆོས་ཐམས་ཅད་ཀྱི་རྩ་བ་ཡུམ་བོར་ནས་དམན་སྡེ་ལ་འཇུག་པ་ནི་གྱ་ནོམ་པའི་རོ་འབྲས་བུ་མཆོག་གི་བདེ་བ་མྱང་བ་ལས་ཉམས་པ་སྟེ་སྔ་མ་རྒྱུ་དང་འདི་འབྲས་བུ་ལས་ཉམས་པའི་ལྡོག་པ་ནས་སོ། །གླང་པོ་རྙེད་ནས་དེའི་
མཚན་ཉིད་ཤེས་པར་མི་བྱེད་པར་དེའི་རྗེས་ལས་དེའི་མཚན་ཉིད་ཚོལ་པ་ལྟར་ཡུམ་ལས་ཐེག་ཆེན་མི་འཛིན་པར་དམན་སྡེ་ལས་འཛིན་པ་ནི། དེ་ལས་དེ་རྙེད་པ་མི་སྲིད་པས། རྣམ་པ་ཐམས་ཅད་དུ་ཐེག་ཆེན་ཀུན་ཏུ་འཛིན་པ་ལས་ཉམས་ཏེ་རྒྱུ་འབྲས་གཉིས་ཀ་ལས་ཉམས་པའི་ལྡོག་པ་ནས་སོ། །ནོར་བུ་འདོད་པ་འགའ་ཞིག་རྒྱ་མཚོ་མཐོང་ནས་དེ་རྨིག་རྗེས་ཀྱི་ཆུ་དང་སྙོམས་པ་ན་དེས་ཚིམ་ནས་རྒྱ་མཚོར་མ་ཞུགས་པས་ཆེད་དུ་བྱ་བ་ནོར་བུ་མ་ཐོབ་པ་བཞིན་དུ། ཡུམ་དང་དམན་སྡེ་སྙོམས་པ་ན་དེས་ཚིམ་སྟེ་ཡུམ་ལ་མ་ཞུགས་པས་འདོད་པའི་དོན་རྣམ་མཁྱེན་ཐོབ་པ་མི་སྲིད་པས་རྟག་ཏུ་ཆེད་དུ་བྱ་བ་ཉམས་པ་དང༌། འདི་ཡན་བཅུ་ཚན་དང་པོའོ། །ཉི་ཟླའི་དཀྱིལ་འཁོར་གྱི་ཚད་ཀྱིས་རྣམ་པར་རྒྱལ་བའི་ཁང་བཟང་གི་ཚད་དང་མཉམ་པའི་ཁང་བཟང་བྱེད་འདོད་པའི་ཤིང་བཟོ་མཁན་བཞིན་དུ་རྒྱུ་དང་འབྲས་བུ་འབྲེལ་བ་ཉམས་པ་དང༌། ཁམས་ཀྱི་རྒྱལ་ཕྲན་མཐོང་ན་འཁོར་ལོས་སྐྱུར་ཡང་འདི་ལྟ་བུའོ་ཞེས་སྙམ་པ་དང༌། ཞག་དྲུག་ཅུ་པའི་འབྲས་ཆན་རྙེད་ནས་ཁ་ཟས་རོ་བརྒྱ་པ་འདོར་བ་དང༌། ནོར་བུ་རིན་ཐང་མེད་པ་རྙེད་ནས་ནོར་བུ་རིན་ཆུང་བ་དང་སྙོམས་པ་བཞིན་དུ་ཡུམ་བོར་ནས་དམན་སྡེ་ལས་རྣམ་མཁྱེན་ཚོལ་བ་ནི་གོང་ན་མེད་པ་ཆོས་ལོངས་སྤྲུལ་གསུམ་ལས་ཉམས་པའོ། །ཉམས་པ་དྲུག་ལས་དང་པོ་
གཉིས་ནི་ཐོག་དམན་གྱི་འབྲས་བུ་དོན་དུ་གཉེར་བ་ཡིན་ལ། དེ་ནས་གཅིག་དང་གསུམ་གྱིས་རིམ་པ་ལྟར་ཐེག་ཆེན་རྣམ་མཁྱེན་དོན་དུ་གཉེར་ཡང་དེ་དག་ཡུམ་འདིའི་དོན་དང༌། དེ་ཁོ་ན་དེའི་རྒྱུར་མ་ཤེས་པ་ཡིན་པས། རྒྱུ་འབྲས་སྔ་མ་གཉིས་དང་འོག་གི་རྒྱུ་འབྲས་ལས་ཉམས་པ་མི་ཟློས་པ་ནི་མདོའི་དོན་ནོ། །གཉིས་པ་ཐེག་ཆེན་ལས་གཡེང་བའི་རྒྱུ་བརྒྱད་ནི། །གཟུགས་སྒྲ་ལ་སོགས་པའི་ཡུལ་རྣམ་པ་མང་པོ་ལ་ཞེན་ནས་རྣམ་པར་རྟོག་པའི་སྤོབས་པ་དུ་མ་འབྱུང་བ་དང་པོ་དང༌། ཡི་གེ་འདྲི་བ་ཉིད་ལ་ཡུམ་དུ་མངོན་པར་ཞེན་པ་གཉིས་པ་དང༌། དངོས་པོ་མེད་པ་ཙམ་ལ་ཡུམ་དུ་མངོན་པར་ཞེན་པ་གསུམ་པ་དང༌། ཡི་གེ་བྲིས་ཟིན་པ་ཙམ་ལ་ཡུམ་དུ་ཞེན་པ་བཞི་པ་དང༌། ཡི་གེ་མེད་པ་ཁོ་ན་ལ་ཡུམ་དུ་ཞེན་པ་ལྔ་པ་དང༌། ཉམས་དགའ་ལ་སོགས་པ་ཡུལ་དང་ཁྱིམ་གཅིག་པ་གྲོང༌། བཟོའི་བྱེ་བྲག་བཅོ་བརྒྱད་ཡོད་པའི་གྲོང་ཁྱེར། ཚོང་པ་མང་པོ་ཡོད་པའི་གྲོང་བརྡལ། མི་རིགས་བཞི་གནས་པའི་ཕྱོགས་ལྗོངས་ལ་སོགས་པ་རྣམས་ཡིད་ལ་བྱེད་པ་དྲུག་པ་དང༌། རིན་པོ་ཆེ་ཐོབ་པ་སོགས་ཀྱི་རྙེད་པ་དང༌། དཔལ་གྱི་དར་དཔྱང་བཅིང་བ་སོགས་ཀྱི་བཀུར་སྟི་དང༌། ཚིགས་སུ་བཅད་པ་སྟེ་སྙན་པའི་རོ་མྱོང་བ་ནི་བདུན་པ་དང༌། སངས་རྒྱས་ཐོབ་པའི་ཐབས་མ་ཡིན་པ་བདུད་ཀྱིས་བསྟན་པའི་སྡེ་སྣོད་ལས་ཐབས་ལ་མཁས་པ་
ཚོལ་བ་ནི་བརྒྱད་པའོ། །འདི་ཡན་ཆད་བཅུ་ཚན་གཉིས་སོ། །གཉིས་པ་འགལ་རྐྱེན་གཞན་ལ་བརྟེན་པ་ནི། བདུད་དགེ་སློང་གི་ཆ་བྱད་དུ་འོང་ནས་ངེད་ཀྱི་མདོ་སྡེར་ཇི་ལྟར་འགྱུར་བ་དེ་ཡུམ་ཡིན་གྱི་རྒྱས་འབྲིང་བསྡུས་པ་སོགས་ཡུམ་མ་ཡིན་ནོ་ཞེས་ཆོས་དང་གང་ཟག་གི་བར་དུ་དབྱེ་ན་བཅུག་ནས་འབྱེད་པའི་སྦྱོར་བ་དང༌། ཡུམ་ལྟར་སྣང་བའི་མདོ་སྡེ་སྟོན་པའི་བཅོས་མ་ཉེ་བར་སྒྲུབ་པ་དང༌། བདུད་ཀྱིས་རང་ཉིད་སངས་རྒྱས་སུ་སྤྲུལ་ནས་དེ་ལ་འདོད་པ་སྐྱེད་དུ་བཅུག་པས་དད་པ་དང་འདོད་པའི་ཡུལ་ཇི་ལྟ་བ་བཞིན་མ་ཡིན་པ་ལ་དད་པ་དང་དགའ་བ་སྐྱེད་པ་སྟེ་གསུམ་མོ། །གཉིས་པ་མཐུན་རྐྱེན་མ་ཚང་བ་ལ་གཉིས། རང་གཞན་གཉིས་ཀ་དང༌། རང་ཁོ་ན་ལ་བརྟེན་པའོ། །དང་པོ་རང་གཞན་གཉིས་ཀ་ལ་བརྟེན་པ་ལ་གཉིས། སྔ་མ་ཉན་པ་པོ་དང༌། སྔ་མ་འཆད་པ་པོ་དང་འབྲེལ་བའོ། །དང་པོ་སྔ་མ་ཉན་པ་པོ་དང་འབྲེལ་བ་ནི། ཉན་པ་པོ་ཡུམ་འདྲི་བ་སོགས་ལ་འདུན་པ་ཆེ་ལ་འཆད་པ་པོ་སྙོམ་ལས་ལེ་ལོ་ཆེ་བ་ཉིད་ཀྱིས་ཚོགས་པའི་ཆོས་སྤྱོད་ལས་ཉམས་པ་དང༌། དེ་བཞིན་དུ་སྦྱར་ནས། ཡུལ་འདིར་ཉན་འདོད་ལ་ཡུལ་གཞན་དུ་འཆད་འདོད་པ་དང༌། ཆོས་གོས་སོགས་ལ་འདོད་ཆེན་ཆུང་ཞིང་ཆག་ཤེས་པ་དང་དེ་ལས་བཟློག་པ་འདོད་ཆེན་ཆུང་བ་མ་ཡིན་པ་དང༌། བསོད་སྙོམས་པ་ལ་སོགས་པ་སྦྱངས་བའི་ཡོན་ཏན་
བཅུ་གཉིས་དང་ལྡན་པ་དང་དེ་དང་མི་ལྡན་པ་དང༌། དགེ་ཞིང་འདུན་པའི་ཆོས་ཅན་ཉིད་ཀྱིས་ཡུམ་འདྲི་བ་སོགས་འདོད་པ་དང་དེ་ལ་མི་དད་ཅིང་དགེ་བ་མ་ཡིན་པའི་ཆོས་ཅན་ཉིད་ཀྱིས་ཡུམ་འདྲི་བ་སོགས་མི་འདོད་པ་དང༌། ཡོ་བྱད་གཞན་ལ་གཏོང་བ་དང་དེ་ལ་སེར་སྣ་བྱེད་པས་དང༌། ཆོས་གོས་སོགས་འཆད་པ་པོ་ལ་སྦྱིན་འདོད་པ་དང་དེས་མི་ལེན་པས་དང་ཆོས་ཀྱི་མགོ་སྨོས་པས་གོ་ཞིང་ཚིག་ལྷུར་མི་ལེན་པ་དང་རྣམ་པར་སྤྲོས་པས་གོ་ཞིང་ཚིག་ལྷུར་ལེན་པ་དང༌། མདོ་ལ་སོགས་པའི་གསུང་རབ་བཅུ་གཉིས་ཀྱི་ཆོས་མངོན་ཤེས་པ་དང་དེ་དག་མངོན་པར་མི་ཤེས་པ་དང༌། སྦྱིན་སོགས་ཕྱིན་དྲུག་དང་ལྡན་ཞིང་དེ་ལ་སློབ་པར་འདོད་པ་དང་དེ་ལས་བཟློག་པས་མི་ལྡན་པས་ཚོགས་པས་ཆོས་སྤྱོད་ལས་ཉམས་པའོ། །བཅུ་ཚན་གསུམ་པའོ། །ཉན་པོ་སྔ་མ་དང་འཆད་པ་པོ་ཕྱི་མ་སྔར་ལྟར་སྦྱར་ནས། ཕར་ཕྱིན་གྱི་ཐབས་ལ་མཁས་ཤིང་ཐབས་མཁས་དེ་དོན་དུ་གཉེར་བ་དང་དེ་ལས་བཟློག་པའི་ཐབས་མ་ཡིན་པ་ལ་མཁས་པ་དང༌། ཚིག་དོན་མི་བརྗེད་པའི་གཟུངས་ཐོབ་པ་དང༌། དེ་མ་ཐོབ་པ་དང༌། ཡུམ་ཡི་གེར་འདྲི་བ་ནས་ཚུལ་བཞིན་ཡིད་ལ་བྱེད་པའི་བར་དུ་འདོད་པ་དང་དེའི་བར་དུ་མི་འདོད་པ་དང༌། འདོད་པའི་འདུན་པས་མཚོན་པའི་གནོད་སེམས་དང་གཉིད་རྨུགས་དང་རྒོད་འགྱོད་ཐེ་ཚོམ་གྱི་སྒྲིབ་པ་ལྔ་དང་བྲལ་བ་དང་དེ་ལྔ་དང་མ་བྲལ་བ་བཞིའོ། །གཉིས་པ་སྔ་མ་འཆད་པ་པོ་
དང་འབྲེལ་བ་ནི། །གཅིག་པུ་སྟེ་དབེན་པ་དང་འཁོར་གྱི་འདུ་འཛི་ལ་མངོན་པར་དགའ་བ་ཉིད་ཀྱིས་དང༌། ཉན་པ་པོ་འཆད་པ་པོའི་རྗེས་སུ་འབྲང་བར་འདོད་བཞིན་དུ་དེས་གོ་སྐབས་མི་འབྱེད་པ་དང་ཉན་པ་པོ་ཕྱི་བཞིན་རྗེས་སུ་འབྲང་འདོད་པ་དང༌། ཟང་ཟིང་ཅུང་ཟད་ཙམ་གྱི་ཕྱིར་ཆོས་སྟོན་འདོད་པ་དང་དེ་སྦྱིན་པར་མི་འདོད་པ་དང༌། གང་ན་སྲོག་གི་བར་ཆད་དུ་འགྱུར་བའི་ཕྱོགས་སུ་འགྲོ་བར་འདོད་པ་དང༌། དེར་འགྲོ་བར་མི་འདོད་པའོ། །འདི་ཡན་བརྒྱད་ཀྱི་སྟེང་དུ་འཆད་པར་འགྱུར་བའི་རང་ཁོ་ན་ལ་བརྟེན་པ་གཉིས་བསྣན་པས་བཅུ་ཚན་བཞི་པའོ། །མུ་གེ་སོགས་ཡོད་པའི་ཕྱོགས་སུ་འགྲོ་འདོད་པ་དང་མི་འདོད་པ་དང༌། ཆོམ་རྐུན་པ་སོགས་ཀྱིས་གཙེས་པའི་ཕྱོགས་སུ་འགྲོ་འདོད་པ་དང་དེར་འགྲོ་མི་འདོད་པ་དང༌། འཆད་པ་པོ་གཙོ་བོར་མཛའ་བོ་སོགས་ཀྱི་ཁྱིམ་དུ་ལྟ་བས་ཉན་པ་པོ་ཡིད་མི་བདེ་བའོ། །དེ་ལྟ་བུའི་ཚོགས་པའི་ཆོས་སྤྱོད་ལས་ཉམས་པ་ནི་དཔོན་སློབ་གཉིས་ཀ་ལ་སྔོན་དུ་རང་གི་འདོད་པ་དེ་དང་དེ་གཅིག་གཅིག་ལ་གཙོ་བོར་མཐུན་ན་ཆོས་སྤྱོད་བྱ་ལ་གཞན་དུ་ན་མི་བྱའོ་སྙམ་ནས་མ་མཐུན་པས་སྐྱོན་དུ་འགྱུར་གྱི་དེ་ལྟར་མིན་ན་དཔོན་སློབ་ལོ་རྒན་གཞོན་གྱིས་ཀྱང་སྐྱོན་དུ་ཧ་ཅང་ཐལ་ལོ། །སྔ་མ་ཉན་པ་པོ་དང་སྔ་མ་འཆད་པ་པོ་ལ་སྦྱར་བ་ཡང་མཚོན་པ་ཙམ་ཡིན་གྱིས་དེ་ལས་བཟློག་ན་ཡང་སྐྱོན་དུ་འགྱུར་རོ། །གཉིས་པ་རང་ཁོ་ན་
ལ་བརྟེན་པ་ནི། ངན་སོང་གསུམ་གྱི་བཀྲེས་པ་ལ་སོགས་པའི་སྡུག་བསྔལ་བརྗོད་ན་གཞན་དོན་དུ་ངན་སོང་གི་འགྲོ་བར་འགྲོ་བ་ལ་མི་མོས་ཤིང་སྐྱོ་བ་དང༌། ལྷ་རྣམས་དང་ཞི་བ་ཙམ་གྱི་བསྔགས་པ་བརྗོད་ན་བདེ་འགྲོར་འགྲོ་བ་དང་རྒྱུན་ཞུགས་སོགས་མངོན་དུ་བྱེད་པའི་རང་དོན་ལ་ཡིད་བདེ་བ་སྐྱེ་བ་སྟེ་སྦྱོར་བ་སྒོམ་པ་པོ་རང་ཁོ་ན་ལ་བརྟེན་པ་གཉིས་སོ། །གཉིས་པ་སེལ་བྱེད་གཉེན་པོ་ནི། ནོར་བུ་རིན་པོ་ཆེ་ལ་དགྲ་མང་པའི་དཔེས། སྦྱོར་བ་སྒོམ་པ་པོ་ལ་བར་ཆད་མང་ཡང་ཕྱོགས་བཅུའི་སངས་རྒྱས་དང་བྱང་སེམས་ཀྱིས་རྟག་ཏུ་དགོངས་པར་མཛད་ནས་སྲུང་བ་སོགས་བྱེད་པས་སྦྱོར་བ་ལས་མི་ཉམས་པར་འགྱུར་ཏེ། ཇི་ལྟར་བུ་མང་པོ་ཡོད་པའི་མ་ན་བར་གྱུར་ན་དེ་ཐམས་ཅད་ཀྱིས་དེ་ལ་རིམ་གྲོ་སྒྲུབ་པ་ལྟར་རོ། །སྡུད་པ་ལས་ཀྱང༌། རྒྱུ་རྣམ་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་དོན་ཡང་མི་གཏོང་དང༌། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་སོ། །གསུམ་པ་ཤེས་བྱ་མཚན་ཉིད་ལ་བཞི། མཚན་མཚོན་གྱི་རྣམ་བཞག །མཚན་ཉིད་ཤེས་པ་སྔོན་དུ་འགྲོ་ཚུལ། དེའི་ས་མཚམས་བསྟན་པ། མཚན་ཉིད་ལས་འཕྲོས་པའི་དོན་ནོ། །དང་པོ་མཚན་མཚོན་གྱི་རྣམ་བཞག་ལ་གཉིས། སྤྱིའི་རྣམ་བཞག་དང༌། ཁྱད་པར་གྱི་མཚོན་ཚུལ་
ལོ། །དང་པོ་སྤྱིའི་རྣམ་བཞག་ནི། སྤྱིར་མཚན་ཉིད་ལ་མི་འདྲ་བ་དུ་མ་ཞིག་གསུངས་ཀྱང༌། འདིར་ཤེས་ཁྱད་བྱེད་པ་ངོ་བོ་ཉིད་ཀྱི་མཚན་ཉིད་ཅེས་གསུངས་པ་ནི་ཤེས་པ་ནས་ངོ་བོ་ཉིད་ཀྱི་བར་རང་རང་ལ་ལྟོས་ན་དེ་དག་གི་རང་བཞིན་དང་རང་གི་མཚན་ཉིད་དུ་ཡང་འགྱུར་མོད་འོན་ཀྱང་འདིར་ནི་བཞི་པོ་འདི་སྦྱོར་བའི་མཚན་ཉིད་དུ་བཤད་དགོས་པས་དེ་ལ་ལྟོས་ནས་མཚན་ཉིད་ཐ་མ་འདི་རང་བཞིན་ཡིན་ལ་ཁྱད་པར་ནི་ཕལ་ཆེར་དོན་གཞན་ལྡན་པ་དང༌། ཤེས་བྱེད་གཉིས་ནི་འབྲས་བུས་རྒྱུ་མཚོན་པ་སྟེ། དེ་ཡང་བྱ་རོག་གིས་ཁང་བཟང་མཚོན་པ་ལྟར་དེའི་སྒོ་ནས་ཤེས་པར་བྱས་པ་ཙམ་མོ། །འབྲས་བུས་རྒྱུ་མཚོན་པ་འདིའི་དོན་ཡིན་པར་ཡང་གངས་ཅན་གྱི་ཤིང་རྟ་ཆེན་པོ་བཞེད་དེ་རྩ་འགྲེལ་གྱི་དགོངས་པའོ། །ལོ་ཙཱ་བ་ཆེན་པོ་ཁ་ཅིག་མཚན་གཞི་དང་མཚོན་བྱ་ཁྱད་པར་མེད་ལ་སྐད་དོད་ཡང་གཅིག་པས་དེ་རྣམས་སོ་སོར་བྱས་ནས་བོད་རྣམས་འཆད་པ་མི་འཐད་གསུངས་པ་ནི་གཞུང་ལུགས་ཆེན་པོ་རྣམས་སུ་དེ་ཁོ་ན་བཞིན་འབྱུང་བས་མཚོན་བྱ་སྦྱོར་བའི་ཆོས་ཅན་ལ་མཚན་གཞིའི་ཐ་སྙད་མ་སྦྱར་ན་ལེགས་སོ། །གཉིས་པ་ཁྱད་པར་གྱི་མཚོན་ཚུལ་ལ་གཉིས། བྱེད་སྒྲུབ་དང་ལས་སྒྲུབ་གྱི་དོན། ཐུན་མོང་མ་ཡིན་པའི་མཚོན་ཚུལ་ལོ། །དང་པོ་ནི་དཔེར་ན་འཚེད་པ་ཞེས་པས་གང་འཚེད་པ་དང་གང་གིས་འཚེད་པའི་བྱ་བྱེད་དང་འབྲེལ་བའི་ཚིག་ཡིན་པས།
དེ་གཉིས་སུ་དྲང་དུ་རུང་བ་བཞིན་དུ། མཚན་ཉིད་ཅེས་པ་ཡང་གང་གིས་མཚོན་པ་དང་གང་མཚོན་པའི་བྱ་བྱེད་གཉིས་ཀ་དང་འབྲེལ་བ་ལ་དགོངས་ནས་རྗེ་བཙུན་གྱིས་དང་པོ་གསུམ་གང་གིས་མཚོན་བྱེད་དང༌། ཐ་མ་གང་མཚོན་བྱ་རུ་མཛད་དོ། །བྱེད་པ་དང་བྱ་བ་དེ་གཉིས་ལ་སློབ་དཔོན་གྱིས་བྱེད་སྒྲུབ་དང་ལས་སྒྲུབ་ཀྱི་ཐ་སྙད་མཛད་དོ། །དེས་ན་རྟགས་དང་བསྒྲུབ་བྱ་ལྟ་བུ་ཤེས་བྱེད་དང་ཤེས་བྱ། སྟྭ་རེ་དང་ཤིང་ལྟ་བུ་གཅོད་བྱེད་དང་གཅད་བྱ། ཡུལ་ཅན་དང་ཡུལ་ལྟ་བུ་རིག་བྱེད་དང་རིག་བྱ་སོགས་ལ་བྱེད་སྒྲུབ་དང་ལས་སྒྲུབ་ཏུ་སྦྱར་བ་ཤིན་ཏུ་མང་ངོ༌། །གཉིས་པ་ཐུན་མོང་མ་ཡིན་པའི་མཚོན་ཚུལ་ནི། ཅིའི་ཕྱིར་མཚན་ཉིད་དང་པོ་གསུམ་ལ་བྱེད་སྒྲུབ་ཅེས་བྱ་ཞེ་ན། གསུམ་པོ་འདིས་སྦྱོར་བ་རྣམས་མཚོན་པར་བྱེད་པས་སོ། །ཇི་ལྟར་ན། མཚོན་བྱེད་ཤེས་བྱེད་གཉིས་ཀྱིས་ནི་རིམ་པ་ལྟར་མཁྱེན་གསུམ་གྱི་སྦྱོར་བའི་སྟེང་གི་རང་དོན་མཁྱེན་གསུམ་གྱི་རྟོགས་པ་དང༌། གཞན་དོན་ཕྲིན་ལས་སྐྱེད་པའི་ནུས་པ་གཉིས་མཚོན་པར་བྱེད་པས་ནུས་པ་དེ་གཉིས་མཚན་གཞིའམ་མཚོན་བྱ། མཚོན་ཚུལ་ནི། ཞིང་ལ་སྟོན་ཐོག་ཕུན་སུམ་ཚོགས་པ་སྐྱེ་བར་མཐོང་ན་དེ་ལ་དེ་སྐྱེད་པའི་ནུས་པ་ཡོད་པར་ཤེས་པ་ལྟར། མཁྱེན་གསུམ་གྱི་རྟོགས་པ་དང་གཞན་དོན་བྱེད་པའི་བྱེད་པ་ཁྱད་པར་བ་རྣམས་སྦྱོར་བ་ལས་འབྱུང་བར་མཐོང་བ་ན་སྦྱོར་བ་ལ་དེ་དག་སྐྱེད་བའི་ནུས་པ་
ཡོད་པར་དཔོག་གོ། །དེ་གཉིས་ཀྱིས་ནི་སྤྱིར་ནུས་པ་ཡོད་པར་མཚོན་པས་མི་ལྡན་རྣམ་གཅོད་དུ་མཚོན་ལ། དེ་ཉན་རང་གི་སྦྱོར་བ་ལ་ཡང་ཡོད་དམ་སྙམ་པ་ལ་ཁྱད་མཚན་གྱིས་དེ་ཁོ་ན་ལ་ཡོད་ཀྱིས་གཞན་ལ་མེད་པར་གོ་བར་བྱས་པས་གཞན་ལྡན་རྣམ་གཅོད་དུ་མཚོན་ནོ། །ཅིའི་ཕྱིར་ཐ་མ་ལ་ལས་སྒྲུབ་ཅེས་བྱ་ཅེ་ན། འདི་ནི་མཁྱེན་གསུམ་སྦྱོར་བའི་ངོ་བོ་ཡིན་པས་སྔ་མ་གསུམ་གྱིས་མཚོན་པར་བྱ་བ་ཡིན་པས་སོ། །ནུས་པ་མཚོན་བྱ་མ་ཡིན་ནམ་ཇི་ལྟར་སྦྱོར་བ་མཚོན་བྱ་ཡིན་ཞེ་ན། དེ་གཉིས་དངོས་པོ་ཐ་མི་དད་པས་སྐྱོན་མེད་དེ། འདི་དག་རྣམ་པར་བཞག་འཇོག་གི་མཚན་མཚོན་མཚན་ཉིད་པ་མ་ཡིན་པས་སོ། །འདི་མཚོན་བྱ་ཡིན་ན་ཇི་ལྟར་མཚན་ཉིད་དུ་རུང་ཞེ་ན་མཚན་ཉིད་ཀྱི་སྒྲ་བྱ་བྱེད་གཉིས་ཀ་དང་འབྲེལ་བར་མ་སྨྲས་སམ། །ཡང་ངོ་བོ་ཉིད་བཅུ་དྲུག་གིས་མཁྱེན་གསུམ་སྦྱོར་བའི་ངོ་བོ་ཤེས་པར་བྱེད་པས་མཚོན་བྱེད་ཀྱང་ཡིན་ནོ། །འོ་ན་བྱེད་སྒྲུབ་མ་ཡིན་ནམ་ཞེ་ན་ཉེས་པ་མེད་དེ། སྦྱོར་བ་མཚོན་པར་བྱེད་ཀྱང་དོན་ཐ་དད་པའི་སྒོ་ནས་མི་མཚོན་པས་བྱེད་སྒྲུབ་དུ་མ་བཞག་ལ་སྔ་མ་གསུམ་ཅི་རིགས་པར་དེ་ལས་དོན་ཐ་དད་པས་བྱེད་སྒྲུབ་ཏུ་བཞག་གོ། །འོ་ན་དེ་དག་མཚན་གཞི་དང་དངོས་པོ་ཐ་དད་པས་མཚན་མཚོན་དུ་མི་རུང་སྟེ། གཞན་དུ་ན་བུམ་པ་ཡང་བ་ལང་གི་མཚན་ཉིད་དུ་ཧ་ཅང་ཐལ་ཞེ་ན། རང་
བཞིན་ཐ་དད་ཀྱང་དེ་དག་གི་སྒོ་ནས་ཤེས་པར་བྱས་པ་ལ་དེས་མཚོན་ནོ་ཞེས་མཚན་ཉིད་དུ་བཏགས་པ་ཙམ་ཡིན་པས་རྣམ་པར་བཞག་འཇོག་གི་མཚན་ཉིད་མ་ཡིན་ནོ། །ཞེས་བཤད་ཟིན་ཏོ། །གཉིས་པ་མཚན་ཉིད་ཤེས་པ་སྔོན་དུ་འགྲོ་ཚུལ་ནི། ཐེག་ཆེན་གྱི་རིགས་ཅན་གཅིག་ངེས་པར་བླ་མེད་བྱང་ཆུབ་དོན་དུ་གཉེར་བ་ན་དེའི་རྒྱུ་ཡུམ་གྱི་རྣལ་འབྱོར་ལ་འཇུག་ལ་དེའི་ཚེ་དེ་ལ་རྟོགས་པ་མཐར་ཐུག་སྐྱེད་པའི་ནུས་པ་ཡོད་མེད་དཔྱོད་དགོས་པས་དེ་ལ་ཤེས་མཚན་དང༌། དེ་ལ་ཡང་གཞན་དོན་མཐར་ཐུག་སྐྱེད་པའི་ནུས་པ་མི་སྣང་ན་རྟོགས་པ་ཙམ་ཐེག་ཆེན་གྱི་དོན་དུ་གཉེར་བྱའི་གཙོ་བོ་མ་ཡིན་པས་དེ་ཤེས་པ་ལ་བྱེད་མཚན་དང༌། ནུས་པ་དེ་གཉིས་ཉན་རང་གི་ལམ་ལ་ཡང་ཡོད་ན་དཀའ་བ་དུ་མ་སྤྱད་དགོས་པའི་ཐེག་ཆེན་ལམ་ལ་འཇུག་པ་ལྡོག་པས་དེ་མེད་པར་ཤེས་པ་ལ་ཁྱད་མཚན་དང༌། སྦྱོར་བ་དེ་རང་གི་ངོ་བོ་སྤང་རྟོགས་ཅི་ལྟ་བུ་དང་ལྡན་པ་ཤེས་པར་བྱེད་པ་ལ་མཚན་ཉིད་ཐ་མ་བསྟན་དགོས་པས་མཚན་ཉིད་ཅེས་པ་སྦྱོར་བ་སྦོམ་པའི་སྔོན་དུ་འགྲོ་བའི་ཚུལ་དེ་ཡིན་ནོ། །འདིས་མཚན་ཉིད་གཏན་ལ་ཕབ་པའི་གྲངས་ངེས་པ་དང་དགོས་པ་ཡང་བསྟན་ནོ། །གསུམ་པ་ནི། ཚོགས་ལམ་ནས་ས་བཅུ་པའི་བར་དུ་བཞག་སྟེ། སྦྱོར་བ་སྒོམ་རེས་ཀྱིས་འདི་སྔོན་དུ་བཏང་ནས་སྒོམ་པས་སོ། །བཞི་པ་མཚན་ཉིད་ལས་འཕྲོས་པའི་དོན་ལ།
གཞི་ཤེས་ཀྱི་ཤེས་མཚན་གྱི་སྐབས་སུ་སེམས་གཡོ་བ་དང༌། བཀྲམ་པ་སོགས་ཀྱི་མཐའ་དཔྱད་པ་ལ་བཞི། ལྟ་བའི་ངོ་བོ། སེམས་བཞི་དགག་སྒྲུབ་གཉིས་དང་སྦྱོར་ཚུལ། གང་ཟག་གང་གི་ཡིན་པ། སྒྲ་བཤད་པའོ། །དང་པོ་ནི་སྔོན་གྱི་མཐའ་ལ་བརྟེན་པ་བཞི། ཕྱི་མའི་མཐའ་ལ་བརྟེན་པ་བཞི། མྱ་ངན་ལས་འདས་པ་ལ་བརྟེན་པ་བཞི་སྟེ་བཅུ་གཉིས་དང༌། །ལུས་སྲོག་གཅིག་ཏུ་ལྟ་བ་དང༌། དེ་གཉིས་ཐ་དད་དུ་ལྟ་བ་སྟེ་བཅུ་བཞིའོ། །དེ་ལ་དང་པོ་ནི་བདག་དང་འཇིག་རྟེན་རྟག་མི་རྟག་གཉིས་ཀ་གཉིས་མ་ཡིན་དུ་ལྟ་བ་སྟེ་དེས་ནི་དེ་གཉིས་དང་པོ་ནས་མི་འགྱུར་བར་ཡོད་པ་དང༌། ཕྱིས་གློ་བུར་དུ་བྱུང་བ་དང་དེ་གཉིས་ཀ་དང་གཉིས་མིན་དུ་འཛིན་པས་སྔོན་མཐའ་ལ་བརྟེན་པའོ། །གཉིས་པ་ནི་བདག་དང་འཇིག་རྟེན་མཐའ་དང་ལྡན་མི་ལྡན་གཉིས་ཀ་གཉིས་མིན་དུ་ལྟ་བ་སྟེ། དེས་ནི་དེ་གཉིས་ཕྱིས་ཀྱི་ཚེ་མཐའ་དང་ལྡན་མི་ལྡན་སོགས་སུ་འཛིན་པས་ཕྱི་མཐའ་ལ་བརྟེན་པའོ། །གསུམ་པ་ནི་དེ་བཞིན་གཤེགས་པ་གྲོངས་ནས་འབྱུང་མི་འབྱུང་གཉིས་ཀ་གཉིས་མིན་དུ་ལྟ་བ་སྟེ། དེས་ནི་བདག་གི་རང་བཞིན་གྱི་སེམས་ཅན་ཤི་ནས་འབྱུང་མི་འབྱུང་སོགས་སུ་འཛིན་པས་མྱང་འདས་ལ་བརྟེན་པའོ། །འདི་དག་གི་བདག་དང་འཇིག་རྟེན་ཞེས་པའི་བདག་ནི་གང་ཟག་གི་བདག་དང་འཇིག་རྟེན་ནི་དེས་
ལོངས་སྤྱད་པའི་གཞི་ལ་བསམ་པའོ། །དེ་བཞིན་གཤེགས་པ་ནི་རྒྱན་སྣང་དང་གནོད་འཇོམས་ཆུང་བར་གསུངས་པ་ལྟར་བདག་གི་ངོ་བོའི་སེམས་ཅན་ལ་བྱའི་གྲོལ་བའི་བདག་ལ་ བྱས་ན་རྒྱང་ཕེན་ལ་མི་འགྲིག་གོ། །བཞི་པ་ནི་ལུས་གང ་ཡིན་པ་སྲོག་གོ། །ཞེས་དང༌། སྲོག་ཀྱང་གཞན་ལ་ལུས་ཀྱང་གཞན་ནོ་ཞེས་འཛིན་པའོ། །ཡང་སའི་དངོས་གཞིར་གང་ལ་ལ་སྲོག་དེ་ལུས་ཡིན་ནོ་ཞེས་ལྟ་བ་དེ་ནི་བདག་གཟུགས་ཅན་དུ་ལྟའོ། །སྲོག་ཀྱང་གཞན་ལ་ལུས་ཀྱང་གཞན་ནོ་ཞེས་ལྟ་བ་གང་ཡིན་པ་དེ་ནི་གཟུགས་ཅན་མ་ཡིན་པར་ལྟའོ་ཞེས་པ་ལྟར་རོ། །གཉིས་པ་སེམས་བཞི་པོ་དེ་དགག་སྒྲུབ་གཉིས་སུ་སྦྱོར་ཚུལ་ནི་ཉི་སྣང་ལས་རང་གི་ཡུལ་ལ་སེམས་འཇུག་པ་གང་ཡིན་པ་དེ་ནི་གཡོ་བ་ཞེས་བྱའོ། །ཞེས་སོགས་གསུངས་པ་ལྟར། དང་པོ་གསུམ་གཡོ་བ་དང༌། གསུམ་པ་གསུམ་དང་བཅུ་གསུམ་པ་ནི་སོགས་ཁོང་ནས་བཀྲམས་པ་བཏོན་ནས་དེ་དང༌། གཉིས་པ་གསུམ་ནི་འདུ་བ་དང༌། བཞི་པ་གསུམ་དང་བཅུ་བཞི་པ་ནི་བཙུམ་པ་ལ་སྦྱར་ཏེ། བཅུ་བཞི་པ་ནི་ལུས་ཀྱང་སྲོག་མ་ཡིན་ལ་སྲོག་ཀྱང་ལུས་མ་ཡིན་ནོ། །ཞེས་གཉིས་ཀ་འགོག་པས་སོ། །དེ་ཡང་དང་པོ་གཉིས་ནི་བྱ་བ་མི་འགོག་པར་རང་ཡུལ་ལ་སེམས་འཇུག་པས་སྒྲུབ་པ་དང༌། ཕྱི་མ་གཉིས་ནི་བྱ་བ་བཀག་སྟེ་ཡུལ་ལ་མི་འཇུག་པས་དགག་པའོ། །གསུམ་པ་ལ་དགག་
སྒྲུབ་ཀྱི་ལྟ་བ་གཉིས་ཀ་ཡོད་ཅིང་བཞི་པས་དགག་སྒྲུབ་གཉིས་ཀ་བཀག་ཀྱང༌། སྒྲུབ་པ་དང་དགག་པར་བཞག་སྟེ་བྱ་བ་ཡོད་པ་དང་མེད་པས་སོ། །དག་ལྡན་ལས་ནི། འཕྲོ་བ་ནི་སྒྲུབ་པ་སྟེ་ཡོད་ཅེས་པའོ། །འདུ་བ་ནི་དགག་པ་སྟེ་མེད་ཅེས་པའོ། །བཀྲམ་པ་ནི་ཡོད་ཀྱང་ཡོད་ལ་མེད་ཀྱང་མེད་ཅེས་པའོ། །བཙུམ་པ་ནི་གཉིས་ཀ་བཀག་པ་སྟེ་ཡོད་པ་ཡང་མ་ཡིན་མེད་པ་ཡང་མ་ཡིན་ཞེས་པའོ། །དེ་བཞིན་དུ་རྟག་པ་དང་མི་རྟག་པ་སོགས་ལ་ཡང་རིག་པར་བྱའོ། །ཞེས་གསུངས་སོ། །གསུམ་པ་གང་ཟག་གང་གི་ཡིན་པ་ནི། གྲངས་ཅན་ཤི་བ་ན་མི་མངོན་པའི་ཚུལ་དུ་ཡོད་པར་འདོད་པས་གྲོངས་ནས་འབྱུང་ངོ་ཞེས་ཕྱེ་བ་ལ་རྟོག་པ་དེ་དག་གིའོ། །རྒྱང་ཕེན་སོགས་ཀྱིས་ཤི་བ་ན་བདག་ཐམས་ཅད་ནས་ཐམས་ཅད་དུ་རྗེས་སུ་མི་འགྲོ་བར་འཇིག་པར་འདོད་པས་གྲོངས་ནས་མི་འབྱུང་ངོ་ཞེས་བཙུམ་པ་ལ་རྟོག་པ་དེ་དག་གིའོ། །གཅེར་བུ་པས་གནས་སྐབས་ཅན་ལ་གནས་སྐབས་ཐ་དད་དུ་འདོད་པས་གྲོངས་ནས་འབྱུང་བ་དང་མི་འབྱུང་ངོ་ཞེས་ཕྱེ་བཙུམ་གཉིས་ཀ་ལ་རྟོག་པ་དེ་དག་གིའོ། །གང་ཟག་ཏུ་སྨྲ་བས་བདག་ཕུང་པོ་ལས་དེ་ཉིད་དང་གཞན་དུ་བརྗོད་དུ་མེད་པར་འདོད་པས་གྲོངས་ནས་འབྱུང་བ་ཡང་མ་ཡིན་མི་འབྱུང་བ་ཡང་མ་ཡིན་ནོ་ཞེས་ཕྱེ་བཙུམ་གཉིས་ཀ་བཀག་པ་ལ་རྟོག་པ་ནི་དེ་དག་གིའོ། །དེ་བཞིན་དུ་རྟག་པ་སོགས་ལ་སྦྱར་བར་བྱ་སྟེ་འདི་ནི་
སློབ་དཔོན་གྱི་དགོངས་པའོ། །དོན་དེ་ལ་ཁ་ཅིག་མདོ་ལས་མཐའ་ལྡན་སྔར་བཤད་ཀྱང་གྲངས་ཅན་དང་རྒྱང་ཕེན་གཉིས་ལ་དེ་བཟློག་ན་འགྲིག་གོ་ཞེས་འཆད་པ་ནི། །དེ་ལྟ་ན་དགག་སྒྲུབ་གོ་བཟློག་པར་འགྱུར་བས་མི་འཐད་པའི་ཕྱིར། ནམ་བཤད་རིག་པར། མཐའ་ནི་ཟད་དང་མཇུག་ཆ་དང༌། །ཉེ་དང་ཕྱོགས་དང་སྨད་པ་ལའོ། །ཞེས་པ་ལྟར་མཐའི་དོན་ཚེ་ཕྱི་མའི་ཕུང་པོའི་ཆ་ལ་བྱས་ནས་ཚེ་འདིའི་རྣམ་ཤེས་ཕྱི་མར་འཇུག་པའི་ཆ་ལྡན་པ་ལ་བཤད་ཅིང་མཐའ་དང་མི་ལྡན་པ་དེ་ལས་བཟློག་ན་ཆེས་འགྲིག་གོ། །དེ་ཡང་ཕྱེ་བ་དང་བཙུམ་པ་ནི་སྒྲུབ་པ་དང་དགག་པ་རྐྱང་པའི་རྣམ་པ་ཅན་གཡོ་བ་དང་འདུ་བ་གཉིས་ཡིན་ལ། གཉིས་ཀ་སྒྲུབ་པ་དང་གཉིས་ཀ་འགོག་པ་གཉིས་ནི་བཀྲམ་པ་དང་བཙུམ་པའོ། །ཐ་མ་གཉིས་གང་ཟག་གང་ཡིན་མི་གསལ་ཡང་བྱེ་བྲག་པ་བདག་གཟུགས་ཅན་དང་གྲངས་ཅན་ཤེས་པར་འདོད་པ་བློ་བརྟན་གྱིས་བཤད་པས་དེ་གཉིས་ལ་སྦྱར་རོ། །བཞི་པ་སྒྲ་བཤད་ནི། བཅུ་བཞི་པོ་དེ་ལ་ཅིའི་ཕྱིར་ལུང་མ་བསྟན་ཞེས་བྱ་ཞེ་ན། འདི་དག་དེ་བཞིན་གཤེགས་པ་ལ་དྲིས་པ་ན། ཐམས་ཅད་བདག་ལས་བརྩམས་ཏེ་དྲིས་པས་གཞི་མེད་པ་ལ་ཁྱད་པར་དཔྱད་དུ་མེད་པར་དགོངས་ནས་ལན་ལུང་དུ་མ་བསྟན་པས་ལུང་མ་བསྟན་ནོ། །འོ་ན་དེ་ལྟ་བུའི་བདག་མེད་ཅེས་ཅིའི་ཕྱིར་མ་གསུངས་ཞེ་ན། དེ་དག་བདག་མེད་པ་བསྟན་པའི་སྣོད་དུ་མ་
གྱུར་པས་དེ་ལྟར་མ་གསུངས་སོ། །ཡང་ཁྱད་མཚན་གྱི་སྐབས་སུ་མཐོང་ལམ་ལས་གཞན་གཉིས་མ་སྨོས་པ་ནི། མཐོང་ལམ་དེ་སྦྱོར་ལམ་གྱི་འབྲས་བུ་དང་སྒོམ་ལམ་གྱི་རྒྱུ་ཡིན་པས་དེ་ལ་བཤད་ན་གཞན་གཉིས་ལ་ཡང་གོ་སྟེ། རྒྱུ་ལ་ཁྱད་པར་མེད་ན་འབྲས་བུའི་ཁྱད་པར་རྒྱུ་མེད་དུ་འགྱུར་ཞིང༌། རྒྱུ་ལ་ཁྱད་པར་ཡོད་ཀྱང་འབྲས་བུ་ལ་ཁྱད་པར་མེད་ན་རྒྱུའི་དེ་དོན་མེད་པར་འགྱུར་བསོ། །བཞི་པ་རྒྱུད་ལ་བརྟེན་བྱ་ཐར་པ་ཆ་མཐུན་ལ་གསུམ། གང་ལ་སྐྱེ་བའི་རྟེན། བརྟེན་པ་ལམ་གྱི་ངོ་བོ། རྟགས་དང་སྒྲ་དོན་ནོ། །དང་པོ་རྟེན་ལ་གཉིས་ལས་དང་པོ་ལུས་རྟེན་ནི། །མཛོད་འགྲེལ་ལས། མི་རྣམས་ཀྱི་ནང་ཁོ་ནར་སྐྱེ་སྟེ། ངན་སོང་ན་ཤེས་རབ་དང༌། སྒྲ་མི་སྙན་དང་ལྷ་ལ་སྐྱོ་པ་མེད་པས་དེ་དག་ལ་མི་སྐྱེ་བར་བཤད་པ་ནི་བྱེ་སྨྲའི་འདོད་པ་ཡིན་ལ། ཐེག་ཆེན་པ་ནི། ཇི་སྐད་དུ། དེ་ཚེ་ལྷ་མི་སྟོང་ཕྲག་བརྒྱ། །བྱང་ཆུབ་ཏུ་ནི་སེམས་བསྐྱེད་དོ། །ཞེས་དང༌། ཀླུ་ཉི་ཁྲི་ཆིག་སྟོང་གིས་ཐེག་ཆེན་དུ་སེམས་བསྐྱེད་པར་གསུངས་པ་དང༌། གཟུགས་ཀྱི་ལྷའི་བུ་རྣམས་ཀྱང་དེ་བཞིན་གཤེགས་པའི་འོད་ཀྱིས་ལམ་ཤེས་སྐྱེ་བའི་སྣོད་ལྡན་དུ་བྱས་པར་གསུངས་པས་འདོད་ཁམས་པ་དང་མི་ཁོ་ནའི་ངེས་པ་མེད་དོ། །གཉིས་པ་སེམས་རྟེན་ནི། འདི་ལ་སྒོམ་བྱུང་མཚན་ཉིད་པ་ཡོད་པར་ཀུན་བཏུས་ནས་བཤད་པ་ལྟར་ན་བསམ་གཏན་གྱི་
སེམས་ལ་ཡང་བརྟེན་ལ་མཛོད་ནས་སྒོམ་བྱུང་མེད་པར་བཤད་པ་ལྟར་ན་འདོད་པ་ཉིད་ལ་བརྟེན་ནོ། །མངོན་པ་ནས་དེ་ལྟར་ཡིན་ཀྱང༌། ཐེག་ཆེན་ལྟར་ན་ཚོགས་ལམ་ཆེན་པོ་ལྟ་བུ་བསམ་གཏན་བཞི་པའི་དངོས་གཞི་ལ་ཕལ་ཆེར་བརྟེན་ཏེ་དེ་ནི་གདམས་ངག་ཏུ་བརྗོད་ཟིན་ཏོ། །གཉིས་པ་བརྟེན་པ་ལམ་གྱི་ངོ་བོ་ནི། མཛོད་ལས་སྒོ་གསུམ་གའི་ལས་དང་ཐོས་བསམ་ཉིད་དུ་བཤད་ལ། ཀུན་བཏུས་ལས། སྒོམ་བྱུང་བ་ཡོད་པ་དང༌། གཉེན་པོ་བདེན་པ་མངོན་རྟོགས་དང་སྤང་བྱ་དངོས་སུ་སྤང་བའི་སྣོད་དུ་རུང་བ་ཞིག་ལ་བཤད་དོ། །གསུམ་པ་ལ། ཚོགས་ལམ་སྤྱི་ཙམ་གྱི་རྟགས་ནི་མཛོད་འགྲེལ་ལས། གང་འཁོར་བའི་ཉེས་དམིགས་དང༌། བདག་མེད་པ་དང༌། མྱ་ངན་ལས་འདས་པའི་ཡོན་ཏན་བརྗོད་པའི་གཏམ་ཐོས་ན་སྤུ་ཟིང་ཞེས་བྱེད་པ་དང༌། མཚིམ་དཀྲུག་ཅེས་བྱེད་པ་དེ་ལ་ནི་ཐར་པའི་ཆ་དང་མཐུན་པའི་དགེ་བའི་རྩ་བ་ཡོད་པར་ཤེས་པར་བྱ་སྟེ་དབྱར་མྱུ་གུ་སྐྱེས་པ་ལས་གཡུལ་གྱི་གསེབ་ན་ས་བོན་ཡོད་པར་ཤེས་པ་བཞིན་ནོ། །ཞེས་སོ། །དེས་ན་ངེས་འབྱུང་གི་བསམ་པས་བསླང་བའི་དགེ་རྩ་སྣ་རེ་ཙམ་རྒྱུད་ལ་སྐྱེས་ན་ཡང་ཚོགས་གྱི་ལམ་ཕྱོགས་རེ་ཐོབ་པ་ཡིན་ནོ། །ཚོགས་ལམ་ཁྱད་པར་ཅན་གྱི་རྟགས་ནི་ཉི་སྣང་ལས། གང་གི་དེ་མཚོན་པར་བྱེད་པ་ཐར་པའི་ཆ་དང་མཐུན་པ་འདིའི་རྟགས་ནི་རྣམ་པ་གསུམ་སྟེ། སེམས་མི་ཞུམ་པ་མི་དངངས་
བའི་མཚན་ཉིད་དང༌། མི་འགོང་བ་མི་སྐྲག་པའི་མཚན་ཉིད་དང༌། ཡིད་ལ་འགྱོད་པ་མེད་པ་སྐྲག་པར་མི་འགྱུར་བའི་མཚན་ཉིད་ནི་ཞེས་ཟབ་དོན་ལ་མི་སྐྲག་པ་སོགས་གསུངས་སོ། །ཅིའི་ཕྱིར་ཐར་པའི་ཆ་དང་མཐུན་པ་ཞེས་བྱ་ཞེ་ན། ཉི་སྣང་ལས། འདིར་ཐར་པ་ནི་བྲལ་བའི་ཁྱད་པར་ཡིན་ལ་དེའི་ཆ་ལ་ཕན་པས་ན་ཐར་པའི་ཆ་དང་མཐུན་པ་ཡིན་ནོ། །ཞེས་གསུངས་ལ། ཚིག་གསལ་ལས། མི་ཁོམས་པ་བརྒྱད་སོགས་སུ་འཕེན་བྱེད་ཀྱི་ལས་ཉོན་ཆེས་རགས་པ་དང་བྲལ་བའི་དྲོད་སོགས་ནི་ཐར་པར་འཆད་དོ། །གཉིས་པ་སྦྱོར་བ་ཁྱད་པར་ཅན་རྒྱུད་ལ་སྐྱེས་པའི་སྒོམ་ལ་གསུམ། སྦྱོར་བ་ཁྱད་པར་ཅན་སྐྱེས་པའི་དུས། སྐྱེས་པའི་རྟེན་གྱི་གང་ཟག །གང་ཟག་དེའི་སྒོམ་རིམ་མོ། །དང་པོ་ལ་གཉིས། དངོས་དང༌། ཟློས་པ་སྤངས་པའོ། །དང་པོ་སྦྱོར་བ་ཁྱད་པར་ཅན་སྐྱེ་བའི་དུས་ནི། ངེས་པར་འབྱེད་པའི་ཆ་དང་མཐུན་པ་རྣམ་པ་བཞིའོ། །དེ་ཡང་མཉམ་གཞག་གི་རྟོགས་པ་གཙོ་བོར་བྱས་པ་ནི་སྔར་རྣམ་མཁྱེན་གྱི་སྐབས་སུ་བསྟན་ཟིན་ལ། རྗེས་ཐོབ་ཏུ་གཞན་ལ་ཕན་འདོགས་པའི་སྦྱོར་བ་གཙོ་བོར་བྱས་པ་ནི་རྣམ་ཀུན་གྱི་སྐབས་སུ་འདིར་གསུངས་པ་ལྟར་ཏེ་གཞུང་ལས་ཤེས་པར་བྱའོ། །གཉིས་པ་ཟློས་པ་སྤང་བ་ནི། མངོན་རྟོགས་དང་པོ་དྲུག་པོར་དངོས་ཤུགས་ཅི་རིགས་པར་སྦྱོར་མཐོང་སྒོམ་གསུམ་བསྟན་པ་
རྣམས་ཟློས་ཏེ་བརྗོད་བྱ་ཁྱད་མེད་ཡང་ཡང་བསྟན་པས་ཤེ་ན། འདིའི་ལན་སློབ་དཔོན་སེངྒེ་བཟང་པོའི་གཞུང་ལས་འབྱུང་བ་ནི། སྐབས་དང་པོ་གསུམ་དུ་ལམ་གསུམ་གྱི་སྒྲས་གསུངས་པའི་མངོན་རྟོགས་གསུམ་ནི་སྒྲ་ཇི་བཞིན་པ་ཡིན་ཡང༌། གཙོ་བོར་རྣམ་པ་དང༌། ལམ་དང་གཞི་ཐམས་ཅད་སྐྱེ་བ་མེད་པར་དོན་སྤྱིའི་ཚུལ་དུ་རྟོགས་པའི་སྦྱོར་ལམ་དང༌། མངོན་སུམ་དུ་གསར་དུ་རྟོགས་པའི་མཐོང་ལམ་དང༌། མཐོང་བ་གོམས་པར་བྱས་ཏེ་སྒོམ་པའི་སྒོམ་ལམ་སྟེ། རྟོགས་བྱ་གཞི་ལམ་རྣམ་པ་གསུམ་ལ་ལྟོས་པའི་ལམ་གསུམ་ཡིན་པས་མི་ཟློས་སོ། །སྦྱོར་བ་དང་པོ་གསུམ་དུ་ལམ་གསུམ་གྱི་སྒྲས་གསུངས་པའི་མངོན་རྟོགས་གསུམ་ནི་སྒྲས་ཟིན་པ་ལྟར་གྱི་མཚན་ཉིད་པ་མ་ཡིན་པས་མི་ཟློས་སོ། །དེ་ཡང་གདགས་གཞི་ས་བརྒྱད་པ་དགུ་པ་བཅུ་པ་གསུམ་ལ་དབང་བརྟུལ་སོགས་ཀྱི་སྒོ་ནས་ཆུང་འབྲིང་ཆེན་པོ་གསུམ་གསུམ་དུ་བྱས་པ་རྣམས་ལ་གདགས་ཆོས་ལམ་གསུམ་ཆ་ནི་གསུམ་གྱི་སྒྲས་བཏགས་པ་ཡིན་ནོ། །དེས་ན་དག་པ་ས་གསུམ་རྣམ་ཀུན་སོགས་མཚན་ཉིད་པ་ཡིན་ཞིང་སྒྲས་ཟིན་ཚོད་ཀྱི་ལམ་གསུམ་བཏགས་པ་པའོ། །དེའི་ཕྱིར་སྦྱོར་བ་གསུམ་ལ་ཁྱད་ཅན་ཡིན་མིན་གཉིས་ལས་ཁྱད་པར་ཅན་དག་ས་གསུམ་ནས་བཞག་པས་དང་པོར་ཐོབ་པའི་ས་མཚམས་ཀྱང་དེ་ཡིན་ནོ། །འདོགས་པའི་རྒྱུ་མཚན་ནི་ས་རེ་རེ་ལ་ཆུང་འབྲིང་ཆེ་གསུམ་ཡོད་པ་དང་
ལམ་གསུམ་མཚུངས་པས་བཏགས་ལ་བཏགས་པའི་དགོས་པ་ནི་བརྒྱད་པ་ཡན་འབད་རྩོལ་ཞི་བའི་ས་ཡིན་པས་ལམ་རིམ་ལྡན་དུ་སྐྱེད་པ་མེད་དམ་སྙམ་པའི་དོགས་པ་གཅོད་ཅིང་རིམ་གྱིས་སྐྱེ་བར་བསྟན་པའི་ཕྱིར་བཏགས་པ་ཡིན་ནོ། །དེ་ལྟར་མིན་ན་རྩེ་མོའི་སྦྱོར་ལམ་གྱི་བཟོད་པའི་སྐབས་སུ་བྱང་སེམས་ཀྱི་སྐྱོན་མེད་པ་ལ་གནས་པར་བཤད་པ་དང༌། དྲོད་ཀྱི་སྐབས་སུ་བག་ལ་ཉལ་ཀུན་འཇོམས་པ་དང༌། ངེས་བརྟན་ལ་མཁྱེན་གསུམ་གྱི་ཆོས་རྫོགས་པར་བཤད་པས་དེ་དག་སྦྱོར་ལམ་མཚན་ཉིད་པར་མི་རུང་ཞིང་ལམ་གྱི་སྒྲས་བསྟན་པ་དེ་དག་ཐམས་ཅད་ལམ་གསུམ་མཚན་ཉིད་པ་ཡིན་ན་ཟློས་པ་སྤང་མི་ནུས་ཤིང་དེ་དག་བཏགས་པ་བ་ཡིན་པས་ཟློས་པ་མེད་དོ་ཞེས་བཤད། དེ་ལ་ཁ་ཅིག་སློབ་དཔོན་གྱི་རང་གཞུང་མ་ཡིན་པར་བཞེད་ཀྱང༌། འགྲེལ་ཆུང་དུ་རང་གི་བཞེད་པ་ཉིད་འགོད་པ་དང༌། དེའི་འགྲེལ་བཤད་གཉིས་དང་བསྡུས་དོན་ལས་ཀྱང་རང་གཞུང་དུ་བཀྲལ་གྱི་གཞན་ལུགས་སུ་མ་བསྟན་པ་སོགས་ཀྱིས་རང་གཞུང་ཡིན་པར་གསལ་ལོ། །འོན་ཀྱང་འདིའི་སྐབས་སུ་བདག་ཉིད་ཆེན་པོ་སོགས་བོད་ཀྱི་མཁས་པ་རྣམས་ཀྱིས་སྦྱོར་བ་གསུམ་གྱི་མངོན་རྟོགས་རྣམས་ལམ་གསུམ་དངོས་ཡིན་པ་ལ་གནོད་བྱེད་མེད་དེ། །བྱང་སེམས་ཀྱི་སྐྱོན་མེད་པ་ལ་གནས་པ་དང་མི་སྐྱེ་བའི་ཆོས་ལ་བཟོད་པ་ཐོབ་པར་
གསུངས་པ་སོགས་རྒྱུ་ཙམ་ལ་གནས་པ་དང༌། དེ་དག་རྗེས་མཐུན་པ་ཡིན་པ་ལ་དགོངས་པའི་ཕྱིར་ཏེ། གཞན་དུ་ན་རྣམ་མཁྱེན་གྱི་ཡེ་ཤེས་སྐྱེད་པར་བཤད་པ་ཡང་དངོས་ཡིན་ནས་བརྒྱད་པའི་སྐད་ཅིག་གཉིས་པར་སངས་རྒྱས་པར་འགྱུར་ལ་བརྒྱུད་ནས་ཡིན་ན་སྔ་མ་ལ་ཡང་མཚུངས་སོ། །རྗེ་བཙུན་གྱིས་མཁྱེན་གསུམ་ཡུལ་དང་སྦྱོར་བཞི་རྒྱུར་བཤད་པས་མཁྱེན་གསུམ་ས་བདུན་པ་ཕྱིན་ཆད་སོགས་དང༌། སྦྱོར་བ་རྣམས་ས་བརྒྱད་པ་ཡན་ཆད་སོགས་སུ་ཁ་ཕྲལ་ནས་འཆད་པ་བསྟན་བཅོས་ཀྱི་དགོངས་པ་མ་ཡིན་ནོ་ཞེས་གསུངས་པ་རྣམས་ལ་ཤིན་ཏུ་ལན་གདབ་དཀའ་བ་དང༌། མངོན་རྟོགས་དྲུག་གི་ལམ་རྣམས་ལ་ནི་མཚན་ཉིད་པ་ཡིན་མིན་མ་བྱས་ཀྱང༌། མཁྱེན་གསུམ་དུ་གསུངས་པ་ཐོས་བསམ་གྱི་ཡུལ་དང༌། སྦྱོར་བ་གསུམ་དུ་གསུངས་པ་རྣམས་ཉམས་ལེན་གྱི་སྒོ་ནས་དང༌། དང་པོའི་ལམ་རྣམས་ཀྱང་རིམ་པ་ལྟར་ཐོབ་བྱ་དང་བསྐྱེད་བྱ་དང་སྤང་བྱའི་མཁྱེན་གསུམ་མཚོན་པའི་ཆེད་དང༌། ཕྱི་མའི་ལམ་རྣམས་ནི་དབང་ཐོབ་པའི་དོན་དུ་དང༌། ཐོབ་པའི་ཚུལ་གྱིས་དང༌། སླར་ཡང་འདྲེས་པར་བྱེད་པ་གསུམ་གྱི་ཁྱད་པར་ཡོད་དོ་ཞེས་སྤྱི་དང་སོ་སོའི་ཟློས་པ་སྤངས་པས་ཆོག་པའི་ཕྱིར་ཕྱོགས་འདི་ལ་ནི་འཕགས་པའི་རྗེས་སུ་འབྲང་ན་འཐད་དོ། །གཉིས་པ་སྦྱོར་བ་ཁྱད་པར་ཅན་རྒྱུད་ལ་སྐྱེས་པའི་རྟེན་གྱི་གང་ཟག་ལ་ལྔ། །ཕྱིར་མི་
ལྡོག་པའི་གང་ཟག །ཕྱིར་མི་ལྡོག་པའི་དོན། ཕྱིར་མི་ལྡོག་པའི་རྟགས། རྟགས་ལས་ཕྱིར་མི་ལྡོག་ཏུ་མཚོན་ཚུལ། རྟགས་ལས་འཕྲོས་པའི་དོན་འགའ་ཞིག་བཤད་པའོ། །དང་པོ་ཕྱིར་མི་ལྡོག་པའི་གང་ཟག་ནི། མདོ་ལས་སྤྱིར་བྱང་སེམས་ཙམ་ལས་མ་གསུངས་ཀྱང༌། རྗེ་བཙུན་གྱིས་དེའི་དགོངས་པ་སྦྱོར་ལམ་པ་ནས་སྒོམ་ལམ་པ་ཕྱིན་ལ་བཟུང་ངོ༌། །ཚོགས་ལམ་པ་ནི་སྤྱིར་ཐར་ཆའི་མདོར་ཉན་རང་གི་སར་མ་སྨས་མ་ཉམས་པར་རྫོགས་བྱང་དུ་འཚང་རྒྱ་བར་གསུངས་པ་དང༌། གསེར་ལྟ་བུའི་སེམས་བསྐྱེད་ཀྱང་དེ་ན་ཡོད་པས་ཕྱིར་མི་ལྡོག་ཡོད་ཀྱང་དེ་ཐོབ་པའི་རྟགས་མེད་པས་མ་བཞག་གོ། །འོ་ན་ལམ་གསུམ་ལ་གནས་པ་རྣམས་ལ་དབང་པོའི་ཁྱད་པར་འབྱེད་དམ་མི་འབྱེད་ཅེ་ན། མདོ་དང་བསྟན་བཅོས་ཆེན་པོ་ཕལ་མོ་ཆེར་ས་བརྒྱད་པ་ནས་རྣམ་པ་ཐམས་ཅད་དུ་ཕྱིར་མི་ལྡོག་པར་གསུངས་པས་སོ་སྐྱེའི་ས་ལ་ཕྱིར་མི་ལྡོག་གི་རྟགས་ཐོབ་པ་ལ་དབང་རྣོན་དགོས་ཏེ། གལ་ཏེ་ས་དེར་འབྲིང་རྟུལ་གཉིས་ཀྱིས་ཀྱང་ཐོབ་ན་ས་བརྒྱད་པ་ལ་སྔར་བཤད་པ་དེ་མི་རིགས་པས་སོ། །དེའི་ཕྱིར་མ་དག་པ་ས་བདུན་དུ་ཡང་དབང་རྟུལ་གྱིས་རྟགས་མ་ཐོབ་པར་བཞག་གོ། །རྟགས་མ་ཐོབ་ཀྱང་ས་ཐོབ་ནས་ཐེག་དམན་དུ་ལྟུང་བ་ནི་མི་སྲིད་དེ། ཐེག་ཆེན་འཕགས་པ་དོན་དམ་སེམས་བསྐྱེད་ལས་ཉམས་མི་
སྲིད་པས་སོ། །འོ་ན་ས་བརྒྱད་པ་དང་མཚུངས་ཤེ་ན། ཉེས་པ་མེད་དེ། བརྒྱད་པ་མན་ཆད་དུ་ངར་འཛིན་མ་ཟད་ལ་དེ་ཡོད་པ་དེ་སྲིད་དུ་རང་ལ་གཅེས་འཛིན་གྱི་བློ་འཇུག་པས་རང་དོན་ལ་གཞོལ་བའི་རྐྱེན་ཙམ་ཉེ་བར་གནས་ལ་བརྒྱད་པ་ནས་དེ་མེད་པས་སོ། །གཉིས་པ་ཕྱིར་མི་ལྡོག་པའི་དོན་ནི། རྫོགས་པའི་བྱང་ཆུབ་ལས་མི་ལྡོག །ཅེས་གསུངས་པས། སངས་རྒྱས་ཐོབ་པར་བྱེད་པ་ལས་མི་ལྡོག་པ་ནི་གང་ལས་མི་ལྡོག་པའི་དོན་ནོ། །དེ་ཡང་ཐེག་པ་གསུམ་གྱི་གང་ཟག་ཐམས་ཅད་མཐར་འཚང་རྒྱ་བས་དེ་ཙམ་ནི་མ་ཡིན་གྱི་བར་མ་ཆད་དུ་ཐོབ་པར་བྱེད་པའོ། །དེས་ན་གནས་སྐབས་སུ་ཡང་སྲིད་པ་དང་ཞི་བའི་མཐར་མི་ལྡོག་པར་ངེས་པའོ། །གསུམ་པ་ཕྱིར་མི་ལྡོག་པའི་རྟགས་ནི། གཟུགས་ལ་སོགས་ལས་ལྡོག་པ་ལ་སོགས་པའི་རྟགས་ཉི་ཤུ་དང་བཅུ་དྲུག་དང་བརྒྱད་རྣམས་སོ། །དེ་ཡང་གཟུགས་ནས་རྣམ་མཁྱེན་གྱི་བར་ངོ་བོ་ཉིད་མེད་པར་རྟོགས་པས་དེ་དག་ལ་བདེན་ཞེན་ལྡོག་པའི་ཤེས་རབ་ཀྱིས་མཚོན་པའི་སྙིང་རྗེ་ཆེན་པོ་སྟེ་ཐབས་ཤེས་རྒྱུན་ཤིན་ཏུ་བརྟན་པ་གཉིས་ནི་རྟགས་ཀྱི་གཙོ་བོ་ཡིན་ལ་གཞན་རྣམས་ཆ་ཙམ་དུ་རིགས་པར་བྱའོ། །བཞི་པ་རྟགས་ལས་ཕྱིར་མི་ལྡོག་ཏུ་མཚོན་ཚུལ་ནི། རྟགས་དེ་དང་དེ་རྗེས་ཐོབ་ཏུ་ལྡན་པར་མཐོང་བ་ལས་བར་མ་ཆད་དུ་བླ་མེད་བྱང་ཆུབ་འབྱུང་ངེས་པར་དཔོག་པ་སྟེ། མྱུ་གུའི་
རྒྱུ་ཚོགས་གྲངས་ཚང་བ་མཐོང་བ་ན་དེ་ལས་མྱུ་གུ་འབྱུང་རུང་དུ་ངེས་པ་ལྟར། ཕྱིར་མི་ལྡོག་པའི་གང་ཟག་གིས་ཀྱང་རང་རྒྱུད་ལ་སྔར་བཤད་པའི་རྟགས་ཀྱི་གཙོ་བོ་དེའམ། །དེ་དང་འབྲེལ་བའི་རྟགས་གཞན་ལྡན་པར་མཐོང་བ་ན། །ད་ནི་བདག་གིས་བླ་མེད་བྱང་ཆུབ་ཐེག་པ་གཞན་གྱིས་བར་མ་ཆད་དུ་ཐོབ་པར་ངེས་སོ་སྙམ་པའི་བློ་སྐྱེ་བ་དང༌། གང་ཟག་གཞན་གྱིས་ཀྱང་མདོ་ནས་བཤད་པའི་ལུས་ངག་གི་ཀུན་སྤྱོད་རྣམས་དང་ལྡན་ཞིང་དེ་ཡང་རིང་དུ་འདྲིས་ཀྱང་སྤྱོད་ལམ་བརྟག་ཐུབ་པར་མཐོང་བ་ན། དེ་ལས་ཕ་རོལ་པོ་དེ་ཕྱིར་མི་ལྡོག་པར་ལུང་ལ་བརྟེན་ནས་དཔོགས་པ་ཙམ་ལ་དེའི་ངོར་རྟགས་སུ་བཤད་ཀྱིས། འདི་དག་ལ་ཚུལ་གསུམ་ཚད་མས་ངེས་པའི་རྟགས་ཀྱི་རྣམ་བཞག་ནི་བྱར་མི་རུང་སྟེ། གཞན་རྒྱུད་ཇི་ལྟ་བ་བཞིན་མཁྱེན་པའི་རྣལ་འབྱོར་པ་ལ་ནི་རྟགས་ཀྱིས་བསྒྲུབས་པ་ལ་དགོས་པ་མེད་ལ། རྟོགས་པ་དམའ་བདག་གིས་ནི་ལུས་ངག་གི་ཐ་སྙད་ཙམ་ཞིག་ལས་དཔོག་ན་འཁྲུལ་ཞིང༌། ཐ་སྙད་ཁྱད་པར་ཅན་ཕྱིར་མི་ལྡོག་གི་རྟོགས་པ་ལ་མི་འཁྲུལ་པ་ནི་མ་ངེས་ཏེ། ཕྱིར་མི་ལྡོག་གི་ནང་གི་རྟོགས་པ་ནི་གང་ཟག་དེ་ལ་ཤིན་ཏུ་ལྐོག་ཏུ་གྱུར་པས་སོ། །ལྔ་པ་རྟགས་ལས་འཕྲོས་པའི་དོན་བཤད་པ་ལ། སྦྱོར་ལམ་པའི་མཐོང་ལམ་པའི། སྒོམ་ལམ་པའི་རྟགས་ལས་འཕྲོས་པ་
གསུམ་མོ། །དང་པོ་དྲོད་ཀྱི་སྐབས་སུ་སྒྲིབ་པ་ལྔ་དང་མི་འགྲོགས་ཞེས་པའི་སྒྲིབ་པ་ལྔ་ནི། ཚུལ་ཕུང་གི་བར་གཅོད་འདོད་པའི་ཡོན་ཏན་ལ་སྲེད་པའི་འདུན་པ་དང་གཞན་ལ་ཞེ་སྡང་བའི་གནོད་སེམས་ཀྱི་སྒྲིབ་པ་གཉིས། ཤེས་རབ་ཀྱི་ཕུང་པོའི་བར་གཅོད་སེམས་ཡུལ་ལ་སྡུད་པའི་གཉིད་དང༌། སེམས་ལས་སུ་མི་རུང་བར་བྱེད་པའི་རྨུགས་པའི་སྒྲིབ་པ་སྟེ་གཅིག་དང༌། ཏིང་ངེ་འཛིན་གྱི་ཕུང་པོའི་བར་གཅོད་ཡུལ་སྡུག་པ་ལ་མ་ཞི་བ་རྒོད་པ་དང་ཡིད་ལ་གཅགས་པའི་རྣམ་པར་སྣང་བའི་འགྱོད་པའི་སྒྲིབ་པ་སྟེ་གཅིག་དང༌། བདེན་པ་ལ་ཐེ་ཚོམ་ཟ་བའི་སྒྲིབ་པ་སྟེ། སྒྲིབ་པ་ལྔ་པོ་འདི་དག་ནི་འདོད་ཁམས་ན་ཡོད་ཅིང་གཉིད་རྨུགས་དང་རྒོད་འགྱོད་གཉིས་གཉིས་ཡོད་ཀྱང་གཅིག་ཏུ་བྱས་པའི་རྒྱུ་མཚན་ནི། མི་མཐུན་པའམ། གཉེན་པོ་དང༌། ཟས་དང༌། བྱ་བ་རྣམས་གཅིག་ཡིན་པས་དེ་ལྟར་བཤད་དེ། །དང་པོ་གཉིས་ཀྱི་གཉེན་པོ་ནི་སྣང་བའི་འདུ་ཤེས་སོ། །ཟས་ནི་ལྔ་སྟེ། བརྙའ་བ་དང༌། མི་དགའ་བ་བྱ་རྨྱངས་ཁ་ཟས་ཀྱི་དྲོད་མི་ཟིན་པ། སེམས་ཞུམ་པའོ། །བྱ་བ་ནི་གཉིས་ཀས་ཀྱང་སེམས་ནང་དུ་ཞུམ་པར་བྱེད་པའོ། །ཕྱི་མ་གཉིས་ཀྱི་གཉེན་པོ་ནི་ཞི་གནས་སོ། །ཟས་ནི་བཞི་སྟེ་ཉེ་དུའི་ཡུལ་གྱི་མི་འཆི་བའི་རྣམ་རྟོག་དང༌། སྔོན་རྩེས་པ་དགོད་པ་དགའ་མགུར་སྤྱད་པ་རྣམས་དྲན་པའོ། །བྱ་བ་ནི་གཉིས་
ཀས་ཀྱང་སེམས་མ་ཞི་བར་བྱེད་པའོ། །དེ་སྐད་དུ་ཡང༌། འདོད་ན་སྒྲིབ་རྣམས་མི་མཐུན་དང༌། །ཟས་དང་བྱ་བ་གཅིག་པའི་ཕྱིར། །གཉིས་གཅིག་ཕུང་པོ་གནོད་བྱེད་དང༌། །ཐེ་ཚོམ་ཕྱིར་ན་ལྔ་ཉིད་དོ། །ཞེས་སོ། །གཉིས་པ་མཐོང་ལམ་པའི་རྟགས་ལས་འཕྲོས་པ་ལ་གསུམ། དང་པོ་ཡང་དག་པའི་འཚོ་བའི་བཟློག་ཟླ་ལོག་འཚོ་ལྔ་ནི། རིན་ཆེན་ཕྲེང་བ་ལས། ཚུལ་འཆོས་རྙེད་དང་བཀུར་སྟིའི་ཕྱིར། །དབང་པོ་སྡོམ་་པར་བྱེད་པ་སྟེ། །ཁ་གསག་རྙེད་དང་བཀུར་སྟིའི་ཕྱིར། །ཚིག་འཇམ་སྔར་ནི་སྨྲ་བའོ། །གཞོག་སློང་དེ་ནི་ཐོབ་བྱའི་ཕྱིར། །གཞན་གྱི་རྫས་ལ་བསྔགས་བྱེད་པའོ། །ཐོབ་ཀྱིས་འཇལ་བ་རྙེད་པའི་ཕྱིར། །མངོན་སུམ་གཞན་ལ་སྨོད་བྱེད་པའོ། །རྙེད་པས་རྙེད་པ་རྣམས་འདོད་པ། །སྔར་ཐོབ་པ་ལ་བསྔགས་བྱེད་པའོ། །ཞེས་པ་ལྟར་རོ། །གཉིས་པ་འགོག་བདེན་གྱི་རྣམ་པའི་སྐབས་སུ་དགག་བྱ་དབང་པོའི་མཐའ་དཔྱད་པ་ལ་གཉིས། དགག་བྱའི་ངོ་བོ། ཁམས་གང་དུ་འགོག་ཚུལ་ལོ། །དང་པོ་དགག་བྱའི་ངོ་བོ་ལ་བཞི། དབང་པོ། དབང་རྟེན། དབང་ཡུལ་་བདག་ཏུ་ཞེན་པའོ། །དང་པོ་དབང་པོ་ལ་གསུམ། སོ་སོའི་ངོ་བོ་གྲངས་ངེས་པའི་རྒྱུ། །ཐ་མ་གསུམ་གྱིས་མཚམས་སོ། །དང་པོ་སོ་སོའི་ངོ་བོ་ནི། དབང་པོ་ཉེར་གཉིས་ལས། མིག་ནས་ཡིད་ཀྱི་བར་དྲུག་
ནི་ཡུལ་ལྔ་སོ་སོ་དང་ཡུལ་དྲུག་བསྡོམས་པ་ལ་དམིགས་པ་དང༌། ཕོ་མོ་གཉིས་ནི་དེ་གཉིས་ཀྱི་ངོ་བོ་དང་ཁྱད་པར་དང༌། སྲོག་གིས་ནི་སྐྱེས་ནས་མ་ཤིའི་བར་དུ་ཕུང་པོ་རིས་མཐུན་གནས་པ་དང༌། ཚོང་བ་བདེ་བ་ཡིད་བདེ་སྡུག་བསྔལ་ཡིད་མི་བདེ་བཏང་སྙོམས་ཏེ་ལྔ་ནི། དང་པོ་གཉིས་ལས་འདོད་ཆགས་དང༌། དེ་ནས་གཉིས་ལས་ཞེ་སྡང་དང༌། ཐ་མ་ལས་མ་རིག་པ་འབྱུང་བས་ཀུན་ཉོན་དང༌། དད་པ་ནས་ཤེས་རབ་ཀྱི་བར་རྣམ་པ་ལྔས་འཇིག་རྟེན་པའི་རྣམ་བྱང་དང༌། ཐ་མ་གསུམ་ནི་ཕྱི་མ་གཉིས་དང་ལྷག་མེད་ཀྱི་མྱང་འདས་ཐོབ་པ་དང༌། མཐོང་སྤང་དང་སྒོམ་སྤང་སྤོང་བ་དང༌། མཐོང་ཆོས་ལ་བདེར་གནས་ལ་དབང་བྱེད་པའི་དོན་གྱིས་དབང་པོར་བཞག་གོ། །དེ་ལ་ཡང་དང་པོ་བཅུ་བཞི་ལ་ཀུན་ཉོན་དང་ཐ་མ་བརྒྱད་ལ་རྣམ་བྱང་གི་དབང་པོ་ཞེས་བྱའོ། །འོན་ཀྱང་ངེས་པ་ནི་མེད་དེ། གཞན་དུ་ན་ཡིད་དང་ཚོར་བ་གསུམ་ལ་འདས་ལམ་མེད་པར་ཐལ་ལོ། །དད་སོགས་ལྔ་ལ་ཡང་ཕལ་ཆེ་བས་འཇིག་རྟེན་པར་བཤད་ཀྱིས་མ་ངེས་པའི་རྒྱུ་མཚན་ནི་སྔར་ལྟར་རོ། །དེ་དག་ལས་དྲུག་ནི་བཏགས་པ་བ་དང༌། ལྷག་མ་ནི་རྫས་སུ་ཡོད་དེ། ཕོ་མོའི་གཉིས་ལུས་དབང་གི་ཆ་དང༌། སྲོག་ཕུང་པོའི་རྒྱུན་གྱི་གནས་སྐབས་དང༌། ཐ་མ་གསུམ་དད་སོགས་ཀྱི་ཆ་ལ་བཏགས་པས་རྫས་གུད་པ་མེད་དོ། །གཉིས་པ་གྲངས་ངེས་པའི་རྒྱུ་ནི།
འཁོར་བར་འཇུག་པ་པོའི་རྟེན་དང༌། དེ་གསར་དུ་སྐྱེ་བ་དང༌། གནས་པ་དང༌། བདེ་སྡུག་གི་འབྲས་བུ་ཉེ་བར་ལོངས་སྤྱོད་པའི་དབང་དུ་བྱས་ནས་དྲུག་དང་གཉིས་དང་གཅིག་དང་ལྔ་བཞག་ལ། མྱང་འདས་སུ་ཡང་དེ་ལྟར་བཞིའི་དབང་དུ་བྱས་ནས་ལྔ་དང་གཅིག་དང་གཅིག་དང་གཅིག་ཏུ་ངེས་སོ། །གསུམ་པ་ཐ་མ་གསུམ་གྱི་ས་མཚམས་ནི་མཛོད་ལྟར་ན། མཐོང་ལམ་གྱི་དད་སོགས་ལྔ་བདེ་བ་ཡིད་བདེ་བཏང་སྙོམས་ཡིད་དང་དགུ་ཟག་མེད་དུ་སྐྱེས་པ་ལ་མི་ཤེས་པ་ཀུན་ཤེས་པའམ། ཀུན་ཤེས་བྱེད་པའི་དབང་པོ་དང༌། དེ་བཞིན་དུ་སྒོམ་ལམ་ལ་ཀུན་ཤེས་པའི་དབང་པོ། མི་སློབ་ལམ་དུ་ཀུན་ཤེས་ལྡན་པའི་དབང་པོའམ། ཀུན་ཤེས་བསྲུང་བའི་དབང་པོའོ། །དེ་ཡང་གསུམ་ཀ་འདས་ལམ་ལ་བཞག་ཅིང་ཟག་མེད་ཁོ་ནར་འཆད་དེ་ཉི་སྣང་ཡང་དེ་ལྟར་རོ། །ཀུན་བཏུས་ལྟར་ན་དང་པོ་སྦྱོར་ལམ་དང་མཐོང་ལམ་གྱི་སྐད་ཅིག་བཅོ་ལྔ་དང༌། གཉིས་པ་བཅུ་དྲུག་པ་ནས་བཟུང་སློབ་ལམ་ཐམས་ཅད་དང༌། གསུམ་པ་མི་སློབ་པའི་ལམ་ལ་བཞག་གོ། །འདི་གཉིས་ཀྱང་མཛོད་པ་སྐད་ཅིག་མ་བཅོ་ལྔ་མཐོང་ལམ་དང༌། བཅུ་དྲུག་པ་སྒོམ་ལམ་དུ་འདོད་པས་དང་པོའི་མཚམས་སྦྱོར་ལམ་ནས་བཟུང་མ་བཟུང་མ་གཏོགས་འདྲའོ། །ཀུན་བཏུས་འགྲེལ་བར་དང་པོ་གཉིས་ཀྱི་གདགས་གཞི་ལ་ཡིད་མི་བདེ་བ་ཡང་བགྲང་
ངོ༌། །ཉི་ཁྲི་ལས། སློབ་པའི་གང་ཟག་མངོན་པར་རྟོགས་པར་མ་གྱུར་བའི་དད་སོགས་དང་པོ་དང༌། སློབ་པའི་གང་ཟག་ཀུན་ཤེས་པ་དང་ལྡན་པ་རྣམས་ཀྱི་དད་སོགས་གཉིས་པ་དང༌། མི་སློབ་པའི་གང་ཟག་དགྲ་བཅོམ་པ་དང༌། རང་སངས་རྒྱས་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པ་རྣམས་ཀྱི་དང་སོགས་གསུམ་པར་བཤད་ཅིང༌། དེའི་དོན་དང་པོ་ཉན་ཐོས་ཀྱི་རྒྱུན་ཞུགས་ཞུགས་པ་དང་བྱང་སེམས་མོས་སྤྱོད་པ། གཉིས་པ་ནི་རྒྱུན་ཞུགས་འབྲས་གནས་དང༌། བྱང་སེམས་ས་དང་པོ་ཡན་ཆད། གསུམ་པ་ནི་ཉན་རང་དགྲ་བཅོམ་པ་དང༌། ས་བཅུ་པ་དང༌། དེ་བཞིན་གཤེགས་པ་ལ་གནོད་འཇོམས་ཀྱིས་བཤད། བསྡུ་བ་ལས་ནི་དང་པོ་སྦྱོར་ལམ། གཉིས་པ་མཐོང་སྒོམ། གསུམ་པ་མི་སློབ་ལམ་དུ་བཤད་དོ། །འོན་ཀྱང་དང་པོ་ལ་ཟག་བཅས་དང་ཟག་མེད་གཉིས་ཀ་ཡོད་པར་བཤད་པས་སྦྱོར་ལམ་ནས་བཞག་ཀྱང་སྐད་ཅིག་བཅོ་ལྔའི་བར་ལ་བྱའོ། །ཐེག་ཆེན་གྱི་དབང་དུ་བྱས་ན་དང་པོ་མོས་སྤྱོད། གཉིས་པ་ས་བཅུ། གསུམ་པ་དེ་བཞིན་གཤེགས་པ་ལ་མངའ་བར་ཡང་དེ་ལས་བཤད་དོ། །གཉིས་པ་དབང་རྟེན་ནི། འབྱུང་བ་བཞི་དང་འབྱུང་གྱུར་གྱི་གཟུགས་སོགས་དབང་པོ་དང་ཐ་མི་དད་དུ་འཇུག་པ་རྣམས་སོ། །གསུམ་པ་དབང་ཡུལ་ནི་ཡུལ་དྲུག་གོ། །བཞི་པ་བདག་ཏུ་ཞེན་པ་ནི།
བདག་འཛིན་དང༌། དེའི་འཁོར་བདག་གི་བར་འཛིན་པ་སྟེ་འདི་གཉིས་གཅིག་ཏུ་མཛད་དོ། །འདི་གཉིས་ལ་རྒྱལ་བློན་དུ་གསུངས་པ་ནི་བདག་དང་བདག་གི་བ་ལ་དབང་སྒྱུར་བྱེད་དང༌། སྒྱུར་ས་རུ་རྟོག་པ་ཡོད་པ་ལ་དགོངས་སོ། །གཉིས་པ་གང་དུ་འགོག་ཚུལ་ནི་འདོད་པ་ན་དགག་བྱ་ཀུན་ཉོན་གྱི་དབང་པོ་བཅུ་བཞི་ཡོད་ལ། གཟུགས་ན་དེ་ལས་ཕོ་མོའི་དང་སྡུག་བསྔལ་དང་ཡིད་མི་བདེ་བ་མེད་པས་བཅུ་དང༌། གཟུགས་མེད་ན་དེ་ལས་གཟུགས་ཅན་ལྔ་དང་བདེ་བ་ཡིད་བདེ་རྣམས་དོར་ནས་སྲོག་ཡིད་བཏང་སྙོམས་རྣམས་ཡོད་པས་དེ་དག་འགོག་གོ། །དབང་རྟེན་དང་དབང་ཡུལ་ལ་འདོད་པ་ན་ཐམས་ཅད་ཡོད་ལ་གཟུགས་ན་དྲི་རོ་གཉིས་དོར་བ་དང༌། གཟུགས་མེད་ན་དབང་ཡུལ་ལ་ཆོས་གཅིག་པུ་དང༌། དབང་རྟེན་ནི། མཛོད་ལས། །དེར་ནི་རིས་དང་སྲོག་ལ་ཡང༌། །སེམས་ཀྱི་རྒྱུན་ནི་བརྟེན་པ་ཡིན། །ཞེས་རིགས་མཐུན་དང་སྲོག་རྣམས་འགོག་པར་འགྲེལ་ཆེན་གཉིས་དང་རྣམ་འགྲེལ་ལས་སོ། །འོན་ཀྱང་འདི་གཉིས་ལ་བརྟེན་པ་ནི་བྱེ་སྨྲའི་འདོད་པ་ཡིན་པས་མཛོད་འགྲེལ་དུ་བཀག་གོ། །བདག་དང་བདག་གི་བ་ཡང་ཁམས་གསུམ་ཆར་ན་ཡོད་དོ། །ཁ་ཅིག་ཡུལ་མི་འགོག་པར་ཡུལ་ཅན་ལ་ཞེན་བཙམ་འགོག་པར་འདོད་ཀྱང༌། བདག་དང་བདག་གི་བ་ལ་ནི་ཞེན་པ་ཡིན་ལ། །ལྷག་མ་ལ་ནི་
ཞེན་པ་དང་ཟག་བཅས་ཀྱི་དབང་སོགས་ཀྱི་ངོ་བོ་གཉིས་ཀ་འགོག་སྟེ་འགྲེལ་པ་རྣམས་སུ་ཡང་དབང་སོགས་འགོག་པར་གསུངས་པ་དང༌། མཐོང་ལམ་ཐོབ་པ་ན་ངན་སོང་བའི་ཕུང་ཁམས་སྐྱེ་མཆེད་ཐམས་ཅད་སྤངས་པར་གསུངས་པས་སོ། །གསུམ་པ་རྟགས་སུ་འགྲོ་རྒྱུ་མཉམ་གཞག་དང་རྗེས་ཐོབ་གང་ཡིན་ཞེ་ན། གཟུང་འཛིན་དུ་སྣང་ཡང་དེར་མངོན་པར་མ་ཞེན་པའི་རྣམ་པ་ཅན་ཡིན་པས་དག་པ། མཉམ་གཞག་ལས་ལངས་རྗེས་ཀྱི་སེམས་ཀྱིས་བསྡུས་པས་འཇིག་རྟེན་པ། མཉམ་གཞག་རང་དང་དམིགས་རྣམ་རྗེས་སུ་མཐུན་པའི་འབྲས་བུ་གང་ཟག་གཞན་གྱི་རྟོགས་པའི་ཡུལ་དུ་གྱུར་པའི་ལུས་ངག་གི་ཐ་སྙད་བཅུ་དྲུག་པོའོ། །འོ་ན་དེ་འདྲའི་སྐད་ཅིག་བཅུ་དྲུག་ཅེས་མཉམ་གཞག་གི་ཡེ་ཤེས་ཉིད་རྟགས་སུ་བཤད་པ་འགལ་ཞེ་ན། སྐྱོན་མེད་དེ། བཟོད་པ་དང་ཤེས་པས་བསྡུས་པའི་སྐད་ཅིག་མ་བཅུ་དྲུག་པོ་འདི་རྣམས་ཡང་དག་པར་རྫོགས་པར་ཐོབ་པ་ན། གཟུགས་ལ་སོགས་པའི་འདུ་ཤེས་ལྡོག་པ་དང་ཆོས་ཀྱི་དོན་དུ་སྲོག་གཏོང་བའི་བར་གྱི་རྗེས་ཐོབ་ཀྱི་ཐ་སྙད་བསྐྱེད་པའི་ཕྱིར་ན་འབྲས་བུ་ལ་རྒྱུ་མིང་གིས་བཏགས་པའོ། །དེ་ལྟར་རྗེས་ཀྱི་ཀུན་སྤྱོད་བཅུ་དྲུག་ལ་མཉམ་གཞག་གི་ཡེ་ཤེས་བཅུ་དྲུག་གིས་མིང་གིས་བཏགས་ནས་རྟགས་སུ་བཤད་པའི་ཆོས་གསུམ་ལས། འདོགས་པའི་རྒྱུ་མཚན་ནི་འདྲ་འབྲེལ་གཉིས་
ལས། འབྲེལ་པ་རྒྱུ་མཚན་དུ་བྱས་པ་སྟེ། མཉམ་གཞག་གི་འབྲས་བུ་ཡིན་པས་སོ། །བཏགས་པའི་དགོས་པ་ནི། །རྣལ་འབྱོར་པ་འཕགས་པ་རྣམས་ཀྱི་ལུས་ངག་གི་ཐ་སྙད་ནི་རྣམ་པ་ཐམས་ཅད་དུ་མཉམ་གཞག་གི་རྟོགས་པ་དང་མཐུན་པ་ཁོ་ན་ཡིན་ནོ་ཞེས་ཤེས་པར་བྱ་བའི་ཕྱིར་རོ། །དེ་གཉིས་རྗེས་སུ་མཐུན་པར་ངེས་སམ་ཞེ་ན། དཔུང་བཟང་གིས་ཞུས་པ་ལས། གང་གི་རང་བཞིན་ཆགས་སྡང་དང་བྲལ་ཡང༌། །ཆགས་སེམས་ཅན་ལ་ཆགས་པ་ལྟར་སྟོན་དང༌། །གདུག་པ་འདུལ་ཕྱིར་ཁྲོ་ལ་ཁྲོར་སྟོན་པ། །བྱང་ཆུབ་མཆོག་གནས་དེ་ལ་ཕྱག་འཚལ་ལོ། །ཞེས་པ་ལྟར་ཆགས་སྡང་ཅན་གྱི་སེམས་ཅན་འགའ་ཞིག་འདུལ་བའི་དགོས་དབང་ངམ་ཆེད་དུ་མི་མཐུན་པར་སྟོན་པ་མ་གཏོགས་པ་གཞན་ཐམས་ཅད་དུ་ངེས་སོ། །དངོས་ལ་གནོད་བྱེད་ནི། །རྗེས་ཐོབ་ལ་ཡེ་ཤེས་བཅུ་དྲུག་གི་མིང་གིས་ཉེ་བར་བཏགས་ནས་རྗེས་ཐོབ་རྟགས་སུ་བཤད་པ་དེ་ལྟར་མ་ཡིན་པར་སྒྲ་ཇི་བཞིན་པའི་མཉམ་གཞག་དངོས་རྟགས་སུ་བཤད་པ་ཡིན་ན། །མཐོང་ལམ་པའི་མཉམ་གཞག་གང་ཟག་གཞན་ངོར་མཐོང་ལམ་པ་ཕྱིར་མི་ལྡོག་ཏུ་ཡིད་ཆེས་པར་བྱེད་པའི་རྟགས་མ་ཡིན་པར་ཐལ། །མཐོང་ལམ་པའི་མཉམ་གཞག་དངོས་ཡིན་པས་སོ། །ཁྱབ་པ་ཡོད་དེ། རྣལ་འབྱོར་པ་འཕགས་པའི་རྒྱུད་ཀྱི་ཤེས་བཟོད་ཀྱི་སྐད་ཅིག་མ་རྣམས་
རྣལ་འབྱོར་བ་སོ་སོ་རང་གིས་རིག་གིས་གཞན་གྱིས་མི་རིག་པས་སོ། །གསུམ་པ་སྒོམ་ལམ་པའི་རྟགས་ལས་འཕྲོས་པ་ནི། སྒོམ་ལམ་པ་ཕྱིར་མི་ལྡོག་གི་རྟགས་ནི་ཟབ་མོའི་ཆོས་ཉིད་རྣམ་པ་བརྒྱད་དེ། །དེ་དག་ནི་དོན་ལ་མི་འགལ་ཡང་མངོན་ཞེན་ཅན་གྱི་ངོ་བོར་སྐྱེ་བ་སོགས་དེ་དག་ཕན་ཚུན་འགལ་བས་དོན་སྒྲུབ་པ་སྟེ་འགལ་བ་འདུས་པ་ལྟར་སྣང་བས་ཟབ་པ་ཉིད་ཡིན་ལ། བརྒྱད་མཉམ་གཞག་ཏུ་རྟོགས་པ་དང་རྗེས་སུ་མཐུན་པའི་རྗེས་ཀྱི་ཐ་སྙད་ནི། སྒོམ་ལམ་པ་ཕྱིར་མི་ལྡོག་གི་རྟགས་ཡིན་ཏེ། མཐོང་ལམ་པ་ལ་བཤད་པ་ལྟར་རོ། །སྒོམ་ལམ་པ་ས་དེ་དག་མི་འགལ་བར་རྟོགས་པ་ཅི་ཞེ་ན། མཐར་འཛིན་ཅན་གྱིས་བསམ་གྱིས་མི་ཁྱབ་པའི་རྣམ་པར་ཐར་པ་ཐོབ་པའི་སྒོ་ནས་རྟོགས་པ་ཡིན་ནོ། །གསུམ་པ་གང་ཟག་དེའི་སྒོམ་རིམ་ལ་གསུམ། བརྟེན་པ་སངས་རྒྱས་ཐོབ་པར་བྱེད་པ། རྟེན་ཞིང་གཉིས་དག་པར་བྱེད་པ། སངས་རྒྱས་ཀྱི་ཞིང་དེར་དོན་འཛད་པའི་རྒྱུའོ། །དང་པོ་བརྟེན་པ་སངས་རྒྱས་ཐོབ་པར་བྱེད་པ་སྲིད་ཞི་མཉམ་ཉིད་ཀྱི་སྦྱོར་བ་ནི། འཁོར་བ་མི་མཐུན་པ་དང་རྣམ་པར་བྱང་བ་གཉེན་པོའི་ཕྱོགས་གཉིས་སྣང་བརྙན་ནམ་གཟུགས་བརྙན་ཙམ་གྱི་ངོ་བོར་བསྒོམ་པས་སྣང་ཡང་རང་བཞིན་མེད་པ་རྨི་ལམ་དང་འདྲ་བ་ཉིད་དུ་རྟོགས་པའི་ཕྱིར་འཁོར་འདས་དག་ལ་བླང་དོར་ཐ་དད་པ་ཉིད་དུ་རྣམ་པར་མི་རྟོག་པས་ན་སྲིད་ཞི་མཉམ་པ་ཉིད་དེ། །དབུ་
མའི་རྩ་བ་ལས། མྱ་ངན་འདས་མཐའ་གང་ཡིན་པ། །དེ་ནི་འཁོར་བའི་མཐའ་ཡིན་ཏེ། །དེ་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །ཞེས་སོ། །གཉིས་པ་རྟེན་ཞིང་གཉིས་དག་པར་བྱེད་པ་ཞིང་དག་སྦྱོར་ནི། རང་ཉིད་སངས་རྒྱས་བའི་སེམས་ཅན་གྱི་འཇིག་རྟེན་དག་པར་སྒྲུབ་པ་དང་དེ་བཞིན་དུ་སྣོད་ཀྱི་འཇིག་རྟེན་ཚེར་མ་སོགས་ཀྱིས་མ་དག་པ་ལ་དེར་དག་པར་སྒྲུབ་པའི་སངས་རྒྱས་ཞིང་དག་པ་གཉིས་ཏེ། འཇིག་རྟེན་དགོན་པའི་ལམ་དང་མུ་གེ་ནད་བཅས་པར། །མཐོང་ནས་སྐྲག་པ་མེད་ཅིང་དེ་ནས་གོ་གྱོན་ཏེ། །ཕྱི་མའི་མུ་མཐར་རྟག་ཏུ་བརྩོན་ཞིང་རབ་ཤེས་ནས། །ཡོངས་སུ་སྐྱོ་བའི་ཡིད་ནི་རྡུལ་ཙམ་སྐྱེད་མི་བྱེད། །ཅེས་ཏེ་དགོན་པ་ནི་ཆུ་དང་མུ་གེའི་དགོན་པའོ། །གསུམ་པ་སངས་རྒྱས་ཀྱི་ཞིང་དེར་དོན་མཛད་པའི་རྒྱུ་ཐབས་ལ་མཁས་པའི་སྦྱོར་བ་ལ་གསུམ། །སྦྱོར་བའི་ཡུལ། །ཡུལ་ཅན་སྦྱོར་བའི་ངོ་བོ། སོ་སོའི་དབྱེ་བའོ། །དང་པོ་སྦྱོར་བའི་ཡུལ་ནི། །ཉི་སྣང་དང་ལེ་བརྒྱད་མར་རྣམ་ཐར་གསུམ་དང༌། བྱང་ཕྱོགས་སྡེ་ཚན་བདུན་ཏེ་བཅུ་དང༌། ལེ་མང་དུ་མཐར་གནས་དགུ་དང་སྟོབས་དང་མ་འདྲེས་སོགས་ཡུལ་དུ་གསུངས་སོ། །གཉིས་པ་ཡུལ་ཅན་སྦྱོར་བའི་ངོ་བོ་ནི། །གང་གི་ཚེ་བྱང་ཆེན་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ལ་སོ་
སོར་རྟོག་པ་ན་མངོན་དུ་བྱའོ་སྙམ་དུ་རྣམ་པར་རྟོག་པར་མི་བྱེད་ཅིང༌། མངོན་དུ་བྱ་བ་ཡིན་ནོ་སྙམ་དུ་རྟོག་པར་མི་བྱེད་ཀྱི་ཡོངས་སུ་འདྲིས་པར་བྱའོ་སྙམ་དུ་སོ་སོར་རྟོག་སྟེ། ཞེས་སོ། །དོན་ནི་ཤེས་རབ་ཀྱིས་ཆོས་ཐམས་ཅད་ལ་འདྲིས་པར་བྱེད་ཀྱང༌། སྙིང་རྗེས་དེ་དག་གི་འབྲས་བུ་རང་དོན་མངོན་དུ་མི་བྱེད་པས་མཐའ་གཉིས་ལ་མི་གནས་པའི་ཉམས་ལེན་སྔར་བཤད་པ་ཡུལ་དུ་ཡོད་པ་ཅན་གྱི་སྦྱོར་བ་སྟེ། །མཉམ་པར་མ་བཞག་སེམས་ཅན་ཁམས་ལ་སྙིང་རྗེ་འཇུག །བར་སྐབས་དེར་ཡང་སངས་རྒྱས་ཆོས་ལས་ཡོངས་མི་ཉམས། །ཞེས་སོ། །གསུམ་པ་སོ་སོའི་དབྱེ་བ་ནི། ཐབས་ལ་མཁས་པའི་སྦྱོར་བ་རྣམ་པ་བཅུ་ཡོད་དོ། །དེ་གང་ནི། །བདུད་བཞི་དང་ས་གཉིས་ཀྱི་དགྲ་ལས་འདས་པའི་ཐབས་མཁས་ནི། སྦྱོར་བའི་བར་ཆད་ཀྱི་ཆོས་ལས་ཡང་དག་པར་བརྒལ་བ་སྟེ། །དེ་བཞིན་དེ་ཚེ་བྱང་ཆུབ་སེམས་དཔའ་མཁས་པ་ཡང༌། །སེམས་ཅན་ཁམས་རྣམས་ཀུན་ཏུ་སྙིང་རྗེ་ཆེ་སྐྱེད་ཅིང༌། །བདུད་བཞི་དག་དང་ས་གཉིས་ལས་ཀྱང་རབ་འདས་ནས། །ཏིང་འཛིན་མཆོག་ལ་གནས་ཤིང་བྱང་ཆུབ་རེག་མི་བྱེད། །ཅེས་སྐྱེས་བུ་སྒྱུ་རྩལ་མ་ལུས་པ་ལ་བྱང་བ་ཞིག་འབྲོག་དགོན་པར་ཆས་པ་ན། ཕས་ཀྱི་རྒོལ་བ་ཐམས་ཅད་ལས་འདའ་བའི་དཔེས་གསུངས་སོ། །ཉི་སྣང་ལས། བྱང་སེམས་བདག་ཉིད་
ཀྱིས་བཟུང་བའི་སེམས་ཅན་རྣམས་བར་ཆད་ལས་འདའ་བར་བྱེད་པ་ལ་གསུངས་སོ། །འདིར་བདུད་བཞིའི་མཐའ་ཅུང་ཟད་དཔྱད་ན། ངོ་བོ་ངོས་བཟུང་བ། བཞིར་འཇོག་པའི་རྒྱུ་མཚན་གང་ནས་འཇོག་པའི་ཚུལ་གསུམ་གྱིས་རིག་པར་བྱའོ། །དང་པོ་ངོ་བོ་ངོས་བཟུང་བ་ནི། ཉན་ས་ལས། དེ་ལ་ཕུང་པོའི་བདུད་ནི་ཉེ་བར་ལེན་པའི་ཕུང་པོ་ལྔའོ། །ཉོན་མོངས་པའི་བདུད་ནི་ཁམས་གསུམ་ན་སྤྱོད་པའི་ཉོན་མོངས་པ་རྣམས་སོ། །འཆི་བའི་བདུད་ནི་སེམས་ཅན་གྱི་རིས་དེ་དང་དེ་དག་ནས་འཆི་བའི་དུས་བྱེད་པ་གང་ཡིན་པའོ། །ལྷའི་བུའི་བདུད་ནི་ཕུང་པོ་དང་ཉོན་མོངས་པ་དང་འཆི་བདག་གི་བདུད་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་ཕྱོགས་ལ་རབ་ཏུ་བརྩོན་པ་དེ་ལ་བར་ཆད་བྱ་བ་དང་རྣམ་པར་གཡེང་བར་བྱ་བའི་ཕྱིར་འདོད་པའི་ཁམས་སུ་སྐྱེས་པའི་ལྷའི་བུ་དབང་ཕྱུག་ཐོབ་པ་དག་ཉེ་བར་འོང་བ་གང་ཡིན་པ་སྟེ། དེ་ནི་ལྷའི་བུའི་བདུད་ཅེས་བྱའོ། །ཞེས་པ་ལྟར་རོ། །གཉིས་པ་བཞིར་འཇོག་པའི་རྒྱུ་མཚན་ནི། ཅིའི་ཕྱིར་བདུད་བཞིར་བཞག་ཅེ་ན། འཆི་བའི་དབང་དུ་བྱས་ནས་དེ་བཞིར་བཞག་སྟེ། དེ་ཡང་གང་དུ། གང་གིས་འཆི་བ། འཆི་བའི་ངོ་བོ། འཆི་བ་ལས་མི་འདའ་བར་བྱེད་པ་སྟེ། ཕུང་པོ་ལྔ་སྐྱེས་ཤིང་འབྱུང་བ་དག་ཏུ་དང༌། ཉོན་
མོངས་ཀྱིས་སྐྱེ་བ་ཕྱི་མར་སྐྱེ་བ་ལེན་ཞིང་སྐྱེས་ནས་འཆི་བ་དང༌། སེམས་ཅན་རྣམས་ཀྱི་འཚོ་བའི་དབང་པོ་འགག་པ་དང༌། འཆི་བ་ལས་འདའ་བའི་ཕྱིར་བརྩོན་པ་ལ་གཏན་འདའ་མི་ནུས་པར་བྱེད་པའམ་དུས་རིང་བོས་འདའ་བར་བྱེད་པའོ། །གསུམ་པ་གང་ནས་འཇོག་པའི་ཚུལ་ནི། ཉོན་མོངས་པའི་བདུད་ས་བརྒྱད་པ་ནས་མེད་ལ། འཆི་བའི་བདུད་ལ་ལས་ཉོན་གྱི་དབང་གིས་འཆི་བ་ས་དང་པོ་ནས་མེད་ཀྱང་ཡིད་ལུས་ཀྱི་འཆི་འཕོ་བ་སངས་རྒྱས་མ་ཐོབ་བར་དུ་མི་ལྡོག་པས་འཆི་བའི་བདུད་དང་ཕུང་པོའི་བདུད་སངས་རྒྱས་མ་ཐོབ་བར་དུ་དང༌། ལྷའི་བུའི་བདུད་ཀྱང་དེ་གསུམ་ལས་འདའ་བ་ལ་བར་ཆད་བྱེད་པས་ཇི་སྲིད་དེ་གསུམ་འཇུག་པ་དེ་སྲིད་དུ་ཡོད་དོ། །རྒྱུད་བླར་ཡང༌། འཆི་མེད་ཞི་བའི་གནས་ཐོབ་ལ། །འཆི་བདུད་རྒྱུ་བ་མེད་པའི་ཕྱིར། །ཞེས་ཐུབ་པའི་ཆོས་སྐུ་རྟག་པའི་སྒྲུབ་བྱེད་དུ་གསུངས་སོ། །འདི་དག་གི་བག་ལ་ཉལ་ནི་བྱང་ཆུབ་ཐོབ་པ་དང་མཉམ་དུ་ཅིག་ཆར་དུ་བཅོམ་པར་ཤེས་པར་བྱའོ། །གནོད་འཇོམས་ཆེ་བར། འདོད་པའི་ཟག་པ་སྤངས་པས་ལྷའི་བུའི་བདུད་ཆོམས་སོ། །སྲིད་པའི་ཟག་པ་སྤངས་པས་འཆི་བའི་བདུད་ཆོམས་སོ། །མ་རིག་པའི་ཟག་པ་སྤངས་པས་ཉོན་མོངས་པའི་བདུད་ཆོམས་སོ། །ལྟ་བའི་ཟག་པ་སྤངས་པས་ཕུང་པོའི་བདུད་ཆོམས་ཏེ་བདུད་བཞི་ལས་
རྒྱལ་བ་ཟག་པ་ཟད་པ་ཞེས་འབྱུང་བ་ནི་གཞན་རྣམས་དང་མི་མཐུན་ནོ། །འདིར་སྦྱོར་བ་ལ་བདུད་བཞི་བཅོམ་པར་བཤད་པ་ནི་རགས་པ་དང་ཕྱོགས་རེ་ལ་དགོངས་སོ། །མི་གནས་པར་གནས་པའི་ཐབས་མཁས་ནི། ཆོས་ཐམས་ཅད་མཉམ་པ་ཉིད་དུ་རྣམ་པར་བསྒོམ་པས་འཁོར་འདས་ཀྱི་མཐའ་ལ་མ་ཞེན་པའི་ཚུལ་གྱིས་གནས་པ་སྟེ། །བར་སྣང་འཕུར་བའི་བྱ་ལ་གནས་ཡོད་མ་ཡིན་ཏེ། །དེ་ན་གནས་པ་མ་ཡིན་ས་ལ་ལྷུང་མི་འགྱུར། །དེ་ལྟར་བྱང་ཆུབ་སེམས་དཔའ་རྣམ་ཐར་སྒོར་སྤྱོད་པ། །མྱ་ངན་འདས་ལ་མི་རེག་མཚན་མར་སྤྱོད་མ་ཡིན། །ཞེས་སོ། །གདུལ་བྱ་གཞན་གྱི་དོན་སྔོན་གྱི་སྨོན་ལམ་ཇི་ལྟར་བཏབ་པའི་ཤུགས་ཀྱིས་འཕངས་པ་ལྟར་བྱེད་པ་ནི། སྨོན་ལམ་གྲུབ་པ་སྟེ། རྣམ་པ་ཐམས་ཅད་དུ་གཞན་གྱི་དོན་ལ་གོ་ཆ་བགོས་ནས་དགེ་རྩ་མ་རྫོགས་པར་ཡང་དག་མཐའ་མངོན་དུ་མི་བྱེད་པ་སྟེ། དཔེར་ན་འཕོང་བསླབ་སྐྱེས་བུས་གནམ་དུ་མདའ་འཕང་སྟེ། །མདའ་གཞན་དག་གིས་ཕྱི་བཞིན་བརྒྱུད་མར་ལྟོང་བཏེག་ནས། །སྔ་མའི་མདའ་དེ་ས་ལ་ལྟུང་བའི་སྐབས་མི་འབྱེད། །མི་དེ་འདོད་ན་མདའ་དེ་ས་ལ་ལྟུང་བར་འགྱུར། །དེ་ལྟར་ཤེས་རབ་ཕ་རོལ་ཕྱིན་པ་མཆོག་སྤྱོད་པ། །ཤེས་རབ་ཐབས་སྟོབས་རྫུ་འཕྲུལ་གྱིས་ནི་རྣམ་སྤྱོད་པ། །དེ་དག་དགེ་བའི་རྩ་བ་ཇི་སྲིད་མ་རྫོགས་པ། །དེ་སྲིད་སྟོང་
ཉིད་དམ་པ་དེ་ནི་ཐོབ་མི་བྱེད། །ཅེས་སོ། །ཉན་རང་དང་ཐུན་མོང་མ་ཡིན་པ་ནི། སེམས་ཅན་ཐམས་ཅད་བློས་མ་བཏང་བའི་མཐུས་ཡང་དག་མཐའ་མངོན་དུ་མི་བྱེད་པའི་དཀའ་སྤྱད་ཐམས་ཅད་ཤིན་ཏུ་གོམས་པ་སྟེ། ཇི་སྲིད་དུ་རྣམ་མཁྱེན་དེ་ཉིད་མ་ཐོབ་ཀྱི་བར་དུ་བར་མ་དོར་ཡང་དག་པའི་མཐའ་མངོན་དུ་མི་བྱེད་པར་རིག་པར་བྱའོ། །ཞེས་སོ། །ཆོས་ཐམས་ཅད་ལ་འཛིན་པ་མེད་པ་མ་ཆགས་པ་ནི། །བསམ་གཏན་དང་ཕྱོགས་མཐུན་སོགས་ཀྱི་ཆོས་དཀར་པོ་རྣམས་ལ་རྣམ་པར་དག་ཅིང་རོ་མྱང་བ་མེད་པ་སྟེ། བྱང་ཆེན་དེའི་ཚེ་བྱང་ཆུབ་ཀྱི་ཕྱོགས་ཀྱི་ཆོས་རྣམས་དང་ལྡན་པ་ཡིན་ཏེ་བླ་མེད་རྫོགས་བྱང་དུ་སངས་རྒྱས་ཀྱི་བར་དུ་ཡོངས་སུ་ཉམས་པར་མི་འགྱུར་ཏེ། ཞེས་སོ། །མི་དམིགས་པ་ནི། །རྣམ་པར་ཐར་པའི་སྒོ་སྟོང་པ་ཉིད་རྫོགས་པར་སྒོམ་པ་ཉིད་ཀྱིས་སེམས་ཅན་གྱི་བདག་དང་ཆོས་སུ་དམིགས་པ་སྤོང་བ་སྟེ། སེམས་ཅན་འདི་དག་ནི་ཡུན་རིང་པོ་ནས་ཕྱིན་ཅི་ལོག་བཞི་ལ་སྤྱོད་སྤྱོད་པ་རྟག་པར་འདུ་ཤེས་པ་དང༌། བདེ་བར་འདུ་ཤེས་པ་དང༌། བདག་ཏུ་འདུ་ཤེས་པ་དང༌། སྡུག་པར་འདུ་ཤེས་པ་ལ་སྤྱོད་སྤྱོད་པ་ཡིན་གྱིས་དེ་དག་གི་ཕྱིར་བྱང་ཆུབ་ཏུ་སྤྱད་པར་བྱའོ། །ཞེས་སོ། །མཚན་མ་ཟད་པ་ནི། རྣམ་པར་ཐར་པའི་སྒོ་མཚན་མ་མེད་པ་རྫོགས་པར་སྒོམ་པ་ཉིད་ཀྱིས་སེམས་ཅན་གྱི་གཟུགས་ནས་རྣམ་མཁྱེན་གྱི་བར་ལ་མཚན་མར་འཛིན་པ་སྤོང་བར་གནས་པ་སྟེ། སེམས་
ཅན་འདི་དག་ནི་ཡུན་རིང་པོ་ནས་མཚན་མ་ལ་སྤྱོད་སྤྱོད་པ་སྟེ་སོགས་ནས་སེམས་ཅན་དེ་རྣམས་ཀྱི་ཉེས་པ་དེ་དག་མེད་པར་བྱའོ་སྙམ་སྟེ། ཞེས་སོ། །སྨོན་ལམ་ཟད་པའམ་དེ་མེད་པ་ནི། རྣམ་པར་ཐར་བའི་སྒོ་སྨོན་པ་མེད་པ་རྫོགས་པར་སྒོམ་པ་ཉིད་ཀྱིས་སེམས་ཅན་རྣམས་ཀྱི་གཟུགས་ནས་རྣམ་མཁྱེན་གྱི་བར་ལ་སྲེད་པའི་དགའ་བ་སྤོང་བར་གནས་པ་སྟེ། སེམས་ཅན་འདི་དག་ནི་ཡུན་རིང་པོ་ནས་སྨོན་ལམ་ལ་སྤྱོད་སྤྱོད་པ་སྟེ། འདི་ལྟར་བརྒྱ་བྱིན་དང༌། ཚངས་པ་དང༌། འཇིག་རྟེན་སྐྱོང་བ་དང༌། འཁོར་ལོས་སྒྱུར་བ་ལ་མངོན་པར་དགའོ་སོགས་ནས། །ཅི་ནས་སེམས་ཅན་རྣམས་ཀྱི་སྨོན་ལམ་གྱི་ཉེས་པ་དེ་དག་མེད་པར་འགྱུར་བ་དེ་ལྟར་ཆོས་བསྟན་པར་བྱའོ་སྙམ་སྟེ། ཞེས་སོ། །སྔར་བཤད་པའི་ཕྱིར་མི་ལྡོག་པ་དེའི་རྟགས་སམ་དེ་མཚོན་པར་བྱེད་པ་ནི། སྟོང་ཉིད་དང་ཡང་དག་མཐའ་གང་རྟོགས་པས་འབྲས་བུ་ལྔ་མངོན་དུ་བྱེད་པའམ་དེ་གཉིས་ཇི་ལྟར་ན་མངོན་དུ་མི་བྱེད་པ་ཡིན། ཇི་ལྟར་ན་མཚན་མེད་ནས་དངོས་པོ་མེད་པའི་བར་མངོན་དུ་མི་བྱེད་པར་ཡུམ་སྒོམ་ཞེས་བྱང་སེམས་གཞན་ལ་བྱང་སེམས་གཞན་གྱིས་དྲི་བ་སྔོན་དུ་བཏང་བ་ན། དེའི་ལན་ཕྱིར་མི་ལྡོག་གི་ཆོས་ཡིད་ལ་བྱ་དགོས་པར་བརྗོད་པ་ལ་མཁས་པ་སྟེ་འདི་སྐད་དུ་ཁྱེད་ཀྱིས་སྟོང་པ་ཉིད་ཁོ་ན་ཡིད་ལ་བྱ། དེ་བཞིན་དུ་སྦྱར་ནས། མཚན་མེད་སྨོན་མེད་མངོན་
པར་འདུ་བྱ་བ་མེད་པ་སྐྱེ་བ་མེད་པ། འགག་བ་མེད་པ། ཁྱེད་ཀྱིས་དངོས་པོ་མེད་པ་ཡིད་ལ་བྱ་སྟེ། །སེམས་ཅན་ཐམས་ཅད་ཀྱང་ཡོངས་སུ་མི་གཏང་བར་བྱའོ། །ཞེས་ལུང་སྟོན་པར་བྱེད་ན་རབ་འབྱོར་བྱང་ཆེན་དེ་དག་གིས་བྱང་ཆེན་འདི་ནི་སངས་རྒྱས་བཅོམ་ལྡན་འདས་དེ་དག་གིས་བླ་མེད་རྫོགས་བྱང་དུ་ལུང་བསྟན་པ་ཡིན་ནོ། །ཞེས་རིག་པར་བྱའོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ཕྱིར་མི་ལྡོག་པའི་བྱང་ཆེན་གྱིས་ཡོངས་སུ་འདྲིས་པར་བྱ་བ་དེ་བརྗོད་དོ། །དེ་ལུང་སྟོན་ཏོ། དེ་རབ་ཏུ་འབྱེད་དོ། །ཞེས་དང༌། ཁྱེད་ཀྱི་སྟོང་ཉིད་སོགས་དང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལ་ཡོངས་སུ་འདྲིས་པར་མི་བྱ་སྟེ་སེམས་ཅན་ཐམས་ཅད་ལ་ཀུན་ཏུ་དམིགས་པར་ཡང་མི་བྱའོ། །ཞེས་ལུང་སྟོན་ན་ལུང་མ་བསྟན་པར་རིགས་པར་བྱའོ། །ཞེས་སོ། །ཚད་མེད་པ་ནི་བྱང་ཆེན་གྱིས་ཐབས་མཁས་ཀྱི་ཡུལ་ཐམས་ཅད་ཤེས་པ་ཉིད་ཀྱིས་ཏེ། །འདི་ལྟར་བྱང་ཆེན་གང་ཕྱིར་མི་ལྡོག་པའི་ཡེ་ཤེས་ཀྱི་སར་ལུང་བསྟན་པ་དེ་དག་ནི། རྣམ་པ་དེ་བཞིན་དུ་ལན་ལྡོན་ཏེ་གང་རྣམ་པ་དེ་ལྟར་ལན་ལྡོན་པ་དེ་དག་ནི་དགེ་བའི་རྩ་བ་འབར་བ་སྐྱེད་པར་རིག་པར་བྱའོ། །ཞེས་སོ། །དེ་ལྟར་ཐབས་མཁས་པ་བཅུ་པོ་དེ་ཉམས་སུ་བླང་བའི་ཚུལ་ནི་འཕགས་པའི་བཞེད་པ་སྔར་ལྟར་ལས། འགྲེལ་ཆུང་དང་ཤེར་སྒྲོན་དུ་ཐབས་མཁས་བཅུ་ཉིད་ཡུལ་དུ་བྱས་ནས། དེ་ལ་སེམས་
ཅན་འདུལ་བའི་ཕྱིར་མངོན་དུ་བྱ་བའི་དུས་དང་དུས་མ་ཡིན་པར་ཤེས་པ་ལ་བཞེད་དོ། །སྦྱོར་བ་འདི་གསུམ་ཕྱིར་མི་ལྡོག་གི་རྟེན་གྱིས་སྒོམ་པ་གཞུང་གི་རིམ་པ་ལས་འཐོབ་པས་སྦྱོར་བ་འདི་གསུམ་སྦྱོར་ལམ་ནས་བཞག་གོ། །དེ་ཡང་གཙོ་བོའི་དབང་དུ་བྱས་ཀྱིས་ཞིབ་ཏུ་དཔྱད་ན་ཚོགས་ལམ་ནས་ཀྱང་བཞག་དགོས་ཏེ། འདི་གསུམ་ནི། ཆོས་རྣམས་སྤྲོས་བྲལ་དུ་སྒོམ་པ་དང༌། ཞིང་དག་པར་བྱེད་པ་དང༌། སེམས་ཅན་སྨིན་པར་བྱེད་པ་གསུམ་ཡིན་ལ་དེ་གསུམ་མི་བྱེད་ན་བྱང་སེམས་མ་ཡིན་པར་འགྱུར་བས་སོ། །གལ་ཏེ་ཐབས་མཁས་ཀྱི་སྦྱོར་བ་སོ་སྐྱེ་ལ་མེད་དེ། །ཡོད་ན་སྦྱོར་བ་དང་པོ་ཡོད་དགོས་པ་ལ། དེ་མེད་དེ་བདུད་བཞི་བཅོམ་པ་མེད་པས་ཤེ་ན། ཐབས་མཁས་ནི་དུས་དང་དུས་མ་ཡིན་པ་ཤེས་པའི་ཡིན་པས་དེ་སོ་སྐྱེ་ལ་ཡོད་ལ་བདུད་བཞི་བཅོམ་པ་མེད་ན་ཐབས་མཁས་མེད་པས་ཀྱང་མ་ཁྱབ་སྟེ། རྣམ་མཁྱེན་མེད་ཀྱང་མངོན་རྟོགས་བརྒྱད་གང་རུང་མེད་པ་མིན་པ་བཞིན་ནོ། །ཡུལ་ལ་མ་ཞེན་ཤེས་བྱའི་དེ་ཉིད་ཤེས། །བློ་ལ་མ་ཞེན་མཁྱེན་གསུམ་རྟོགས་རིགས་བསྐྱེད། །ཐབས་ཤེས་ཟུང་འབྲེལ་སྲིད་ཞིའི་མཐར་མི་ལྟུང༌། །རྒྱལ་སྲས་རྣམས་ཀྱི་ཉམས་ལེན་འདིར་བཤད་དོ། །རྣམ་ཀུན་མངོན་པར་རྫོགས་པར་རྟོགས་པའི་སྤྱི་དོན་གྱི་སྐབས་ཏེ་བཞི་པའོ།
གཉིས་པ་དབང་དུ་བྱ་བའི་འབྲས་བུ་རྩེ་སྦྱོར་གྱི་ཡན་ལག་རྒྱས་པར་བཤད་པ་ལ་བཞི། སྦྱོར་ལམ། མཐོང་ལམ། སྒོམ་ལམ། བར་ཆད་མེད་པའི་རྩེ་མོའོ། །དང་པོ་སྦྱོར་ལམ་རྩེ་མོ་ལ་བཞི་དྲོད། །རྩེ་མོ། །བཟོད་པ། ཆོས་མཆོག་གི་རྩེ་མོའོ། །དང་པོ་དྲོད་ཀྱི་རྩེ་མོ་ནི། །སྦྱོར་ལམ་རྩེ་མོ་ཐོབ་པའི་རྟགས་རྣམ་པ་བཅུ་གཉིས་ཀྱིས་མཚོན་ནས་གསུངས་སོ། །དེ་ཡང་རྨི་ལམ་དུ་འབྱུང་བའི་རྟགས་དྲུག། རྨི་ལམ་དང་སད་པ་གཉིས་ཀའི་གནས་སྐབས་སུ་འབྱུང་བའི་རྟགས་གཉིས། སད་པའི་སྐབས་སུ་འབྱུང་བའི་རྟགས་བཞིའོ། །རྨི་ལམ་གྱི་རྟགས་དྲུག་ལ་ཡང་ཐབས་ཤེས་ཀྱི་རྣལ་འབྱོར་ལ་གོམས་པའི་རྟགས་ཀྱི་གཙོ་བོ་གཉིས། སྐྱབས་དང་དེའི་མཐུ་ལ་གོམས་པ་བརྟན་པའི་རྟགས་གཉིས། རྨི་ལམ་ལ་རྨི་ལམ་དུ་ཤེས་པའི་རྟགས་གཅིག །རང་གི་ཞིང་དག་པར་བྱེད་པའི་རྟགས་གཅིག་ཡོད་པ་ལས། དང་པོ་གཉིས་ནི་ཆོས་ཐམས་ཅད་རྨི་ལམ་ལྟ་བུར་ལྟ་བ་དང་ཉན་རང་གི་ས་དང་ཁམས་གསུམ་ལ་དགའ་བའི་སེམས་མི་བསྐྱེད་པའོ། །གཉིས་པ་གཉིས་ནི། དེ་བཞིན་གཤེགས་པ་ཆོས་སྟོན་པ་དང་རྫུ་འཕྲུལ་ཀྱི་ཆོ་འཕྲུལ་སྟོན་པ་མཐོང་བའོ། །གསུམ་པ་ནི། རྨི་ལམ་ན་འཇིགས་སྐྲགས་སོགས་མཐོང་བའི་རྐྱེན་གྱིས་རྨི་ལམ་དུ་ཤེས་ཤིང་སད་པའི་འོག་ཏུ་ཡང་ཁམས་གསུམ་རྨི་ལམ་ལྟར་སྟོན་པའི་
སེམས་སྐྱེ་བའོ། །བཞི་པ་ནི་ངན་སོང་གི་འགྲོ་བ་མཐོང་བའི་རྐྱེན་གྱིས་རང་ཉིད་སངས་རྒྱས་པའི་ཞིང་དུ་ངན་སོང་སྤོང་བར་རྗེས་སུ་དྲན་པའོ། །རྨི་ལམ་དང་སད་པ་གཉིས་ཀའི་གནས་སྐབས་སུ་འབྱུང་བའི་རྟགས་ནི། བདེན་པའི་ཚིག་གིས་སྨོན་ལམ་བརྗོད་པས་གྲོང་ལ་སོགས་པ་མེས་ཚིག་པ་ཞི་བར་བྱེད་པ་དང༌། སེམས་ཅན་གཞན་མི་མ་ཡིན་པས་བཟུང་བ་གཏོང་བ་གཉིས་སོ། །འདི་གཉིས་སེམས་ཅན་ཡིན་མིན་གྱི་གནོད་པ་ཞི་བར་བྱེད་པ་སྟེ་མཐུའི་དབང་དུ་བྱས་པའི་རྟགས་གཉིས་སོ། །འདིའི་སྐབས་སུ་ཕྱིར་མི་ལྡོག་ཡིན་ལ་མེ་ཞི་བ་དང༌། ཕྱིར་མི་ལྡོག་མ་ཡིན་ལ་མེ་ཡང་མ་ཞི་བ་དང༌། ཕྱིར་མི་ལྡོག་ཡིན་ཀྱང་ཆོས་སྤོང་གི་ལས་ཀྱི་ལྷག་མ་མྱོང་བས་མེ་མ་ལུས་པ་མ་ཞི་བ་དང༌། ཕྱིར་མི་ལྡོག་མིན་ཀྱང་བདུད་ཀྱི་མཐུས་མེ་ཞི་ནས་དེས་རློམ་པ་སྐྱེ་བ་སྟེ་མུ་བཞི་ཡོད་ལ་ཕྱི་མ་ཡང་དེ་དང་འདྲའོ། །སད་པའི་གནས་སྐབས་ཀྱི་རྟགས་བཞི་ནི། བདུད་དང་སྡིག་གྲོགས་ཟིལ་གྱིས་གནོན་པའི་ཕྱི་ནང་གི་དགེ་བཤེས་བརྟེན་པ་དང༌། དགེ་རྩ་རྫོགས་པར་འདོད་པས་རྣམ་པ་ཐམས་ཅད་དུ་ཤེར་ཕྱིན་ལ་སློབ་པ་དང༌། ཀུན་བྱང་གི་ཆོས་ཐམས་ཅད་དབེན་པར་ལྟ་བས་དེ་ལ་ཆགས་པ་མེད་པ་དང༌། གཟུགས་སོགས་ལ་མི་སྤྱོད་པའི་ཚུལ་གྱིས་ཤེར་ཕྱིན་ལ་སྤྱད་པས་སངས་རྒྱས་ཀྱི་བྱང་ཆུབ་དང་
ཉི་བའོ། །འདི་བཞི་ནི་ལམ་ལ་སློབ་པའི་རྒྱུ་དང༌། བསླབ་པའི་ཡུལ་དང༌། སློབ་ཚུལ། བསླབ་པའི་ཕན་ཡོན་གྱི་དབང་དུ་བྱས་པའི་རྟགས་སོ། །གཉིས་པ་རྩེ་མོའི་རྩེ་མོ་ནི་བསོད་ནམས་རྣམ་པར་འཕེལ་བའི་ཚུལ་གྱིས་མཚོན་ནས་གསུངས་སོ། །དེ་ཡང་ཕྱི་གཙོ་བོར་གྱུར་པའི་བསོད་ནམས་བརྒྱད་དང༌། ནང་གཙོ་བོར་གྱུར་པའི་བསོད་ནམས་བརྒྱད་དོ། །འཛམ་གླིང་སོགས་སྟོང་གསུམ་གྱི་སེམས་ཅན་གྱི་གྲངས་དང་མཉམ་པའི་སངས་རྒྱས་ལ་མཆོད་ཅིང་དགེ་རྩ་བསྔོས་པ་ལས་ཀྱང་རྩེ་མོ་བས་ཡུམ་དོན་ཡིད་ལ་བྱེད་ཅིང་གཞན་ལ་སྟོན་པ་བསོད་ནམས་འཕེལ་བ་དང༌། ཉིན་མཚན་ཀུན་ཏུ་ཤེར་ཕྱིན་ཡིད་ལ་བྱེད་པ་མི་འབྲལ་བ་དང༌། ཆོས་སྤྲོས་བྲལ་ལ་མི་སྐྲག་པའི་བཟོད་པ་ཐོབ་པ་དང༌། བྱང་ཆུབ་རྒྱུ་འབྲས་ཀྱི་ཆོས་རྣམས་མི་དམིགས་པར་རྟོགས་པ་དང༌། འཛམ་གླིང་གི་སེམས་ཅན་དགེ་བཅུ་སྙོམས་འཇུག་ཚད་མེད་ཐོབ་པ་ལས་ཀྱང་བསོད་ནམས་འཕགས་པའི་ཡུམ་དོན་ལ་སྤྱོད་པ་དང༌། ལྷའི་རིས་ཐམས་ཅད་དུ་ལྷ་ལ་སོགས་པའི་དོན་གྱི་ཕྱིར་འགྲོ་ཞིང་ལྷ་རྣམས་བསྲུང་བའི་ཕྱིར་འོང་བ་དང༌། རྣམ་མཁྱེན་ཡིད་བྱེད་དང་མི་འབྲལ་བས་བདུད་ཐམས་ཅད་ཟིལ་གྱིས་གནོན་པ་དང༌། བྱང་སེམས་གཞན་ལ་སྟོན་པ་སངས་རྒྱས་དང་མཚུངས་པར་གུས་པ་དང་བརྒྱད་ནི་ཕྱི་གཙོ་བོར་གྱུར་པའོ། །བསམ་གཟུགས་
ལ་སྙོམས་པར་འཇུག་ཀྱང་དེའི་དབང་གིས་མི་སྐྱེ་བ་དང༌། ཉན་རང་གི་རིགས་འཇིག་པའི་སྒོ་ནས་སངས་རྒྱས་ཀྱི་རིགས་ཁྱད་པར་ཅན་དུ་གྱུར་པ་དང༌། སངས་རྒྱས་འཐོབ་པའི་རྒྱུ་སེམས་བསྐྱེད་ལ་སོགས་པའི་ནུས་པ་ལྷག་པར་གྱུར་པ་དང༌། འདི་གཉིས་རིགས་གཉིས་ཀྱི་ནུས་པ་ལྷག་པར་གྱུར་པའོ། །ཡང་ན་རིགས་ཅན་དང་རིགས་ཀྱིས་སོ། །ཕྱིན་དྲུག་གི་མི་མཐུན་ཕྱོགས་ཀྱི་སེམས་ཞི་བར་བྱེད་པ་དང༌། གཟུགས་ནས་རྣམ་མཁྱེན་གྱི་བར་ལ་ཞེན་པ་མེད་པ་དང༌། །ཡུམ་དུ་ཕར་ཕྱིན་ཀུན་བསྡུས་པར་ཤེས་ནས་དེ་ལ་སློབ་པ་དང༌། བསླབ་པ་ཕུན་སུམ་ཚོགས་པ་ཐམས་ཅད་ཐོབ་པ་དང༌། གཟུང་བ་ལ་སོགས་པའི་ལྟ་བ་དང་བྲལ་བས་རྫོགས་བྱང་ལ་ཐག་ཉེ་བ་དང་བརྒྱད་ནི་ནང་གཙོ་བོར་གྱུར་པའོ། །གསུམ་པ་བཟོད་པའི་རྩེ་མོ་ནི། རྩེ་མོས་སྤེལ་བའི་རྟོགས་པ་རང་དབང་དུ་གྱུར་ཅིང་བརྟན་པ་ཐོབ་པའི་ཚུལ་གྱིས་མཚོན་ནས་གསུངས་སོ། །འདི་ལ་རང་དོན་རྟོགས་པ་བརྟན་པ་དང༌། གཞན་དོན་སྙིང་རྗེ་བརྟན་པ་གཉིས། དང་པོ་ནི། ཐམས་ཅད་མཁྱེན་པ་ཉིད་གསུམ་གྱི་སྐབས་སུ་བཤད་པའི་ཆོས་སེམས་བསྐྱེད་ནས་བཟུང་སྟེ་མཐའ་གཉིས་དང་བྲལ་བའི་མཐོང་ལམ་གྱི་བར་སུམ་ཅུ་པོ་ལས་ཅི་རིགས་པ་ལ་རྟོགས་པ་བརྟན་པ་ཐོབ་པ་དང༌། གཉིས་པ་ནི། དེའི་ཚེ་རང་དོན་ཞི་བར་མི་ལྟུང་བའི་ཆེད་དུ་ཐབས་ལ་མཁས་
པའི་སྟོབས་ཀྱིས་སྙིང་རྗེ་ཆེན་པོ་མངོན་དུ་བྱེད་ཅིང་སེམས་ཅན་གྱི་དོན་ཡོངས་སུ་མི་གཏོང་བའོ། །བཞི་པ་ཆོས་མཆོག་གི་རྩེ་མོ་ནི། ངེས་བརྟན་གྱིས་བརྟན་པར་བྱས་པའི་རྟོགས་པ་ལས་གཞན་དུ་མི་གཡེང་བའི་སེམས་ཀུན་ཏུ་གནས་པས་མཚོན་ནས་གསུངས་སོ། །དེ་ཡང༌། མི་ལྡོག་བྱང་ཆུབ་མཆོག་ལ་རབ་ཏུ་ཞུགས་པ་ཡི། །སེམས་བསྐྱེད་པ་ལ་བསམ་པ་ཐག་པས་ཡི་རང་བ། །སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང༌། །རྗེས་སུ་ཡི་རང་དགེ་བ་དེ་ནི་དེ་ལྟ་མིན། །ཞེས་གསུངས་ཏེ། གླིང་བཞི་ལ་སོགས་སྟོང་གསུམ་སའི་དཀྱིལ་འཁོར་སྲང་ལ་གཞལ་བ་དང༌། ཆུ་ཐིགས་སྐྲ་རྩེས་བླང་བ་དཔེར་མཛད་ནས་དེའི་ཚད་གཟུང་རུང་གི། བྱང་སེམས་བཞིའི་ཕྱིན་དྲུག་ལ་སྤྱོད་པའི་དགེ་རྩ་ལ་ཏིང་ངེ་འཛིན་རྩེ་གཅིག་ཏུ་ཡི་རང་བའི་བསོད་ནམས་དང་ཡེ་ཤེས་ཀྱི་ཚོགས་ཚད་བཟུང་བར་མི་ནུས་སོ་ཞེས་གསུངས་སོ། །བྱང་སེམས་བཞི་ནི། ཐེག་པ་ལ་དང་པོར་ཞུགས་པ། སྤྱོད་པ་ལ་ཞུགས་པ། ཕྱིར་མི་ལྡོག་པ། སྐྱེ་བ་གཅིག་གིས་ཐོགས་པའི་བྱང་སེམས་བཞི་ཡིན་ལ། དེ་བཞི་ཡང༌། རྣམ་རྟོག་བཞིའི་གཉེན་པོ་མཐོང་སྒོམ་གྱི་རྟོགས་པ་བཞི་ལ་གནས་པ་དང༌། སྦྱོར་རྩེ་བཞི་དང༌། མོས་སྤྱོད་མ་དག་པ་ས་བདུན་དག་པ་ས་གསུམ་ས་བཅུ་པ་ལ་འདོད་པའི་ལུགས་གསུམ་བཤད་པ་ལས་སྔ་མ་
འཕགས་པ་དང༌། ཕྱི་མ་སློབ་དཔོན་གྱི་བཞེད་པའོ། །དེ་ལྟར་སྦྱོར་རྩེ་བཞི་པོ་འདི་ཡང༌། དང་པོ་ཐོབ། བར་དུ་འཕེལ་ཞིང་རང་དབང་དུ་གྱུར། ཐ་མར་དམིགས་པ་ལས་མི་གཡེང་བར་གནས་པའོ། །གཉིས་པ་མཐོང་ལམ་རྩེ་མོ་ལ་གཉིས། སྤང་བྱ་དང་གཉེན་པོའོ། །དང་པོ་སྤང་བྱ་ལ་གཟུང་རྟོག་དང༌། འཛིན་རྟོག་གཉིས། དང་པོ་གཟུང་རྟོག་ལ་གཉིས། རྟོགས་པ་དང༌། གཉེན་པོའོ། དང་པོ་རྟོག་པ་ལ་བཞི། རྟོག་པའི་ངོ་བོ། མི་མཐུན་ཕྱོགས་སུ་བསྟན་པ། དབྱེ་བ་་འཁྲུལ་པར་སྒྲུབ་པའོ། །དང་པོ་རྟོགས་པའི་ངོ་བོ་ལ་གཉིས་ལས། བྱང་སེམས་ཀྱི་འཇུག་ཡུལ་མཚན་མར་མི་དམིགས་པ་དང༌། དེའི་ལྡོག་ཡུལ་མཚན་མར་དམིགས་པའི་ངོ་བོ་ཉིད། རིམ་པ་ལྟར་ངོ་བོ་ཉིད་སོགས་དང་སྲིད་ཞིར་ལྟུང་བ་སོགས་དག་ལའོ། །རྣམ་པ་ནི་བྱང་སེམས་དང་སངས་རྒྱས་ཀྱི་ཆོས་ལེན་པར་འདོད་པས་བླང་བྱའི་གཟུང་བའོ། །ཞེས་ཞེན་པ་དང༌། ཉན་ཐོས་དང་རང་རྒྱལ་གྱི་ཆོས་འདོར་བར་འདོད་པའི་སྒོ་ནས་དོར་བྱའི་གཟུང་བའོ། །ཞེས་ཞེན་པ་ནི། རིམ་པ་ལྟར་འཇུག་པ་དང་ལྡོག་པའི་གཟུང་བར་རྣམ་པར་རྟོག་པ་གཉིས་སོ། །གཉིས་པ་མི་མཐུན་ཕྱོགས་སུ་བསྟན་པ་ནི། དེ་གཉིས་མཐོང་རྩེའི་མི་མཐུན་ཕྱོགས་སུ་གྱུར་པ་ཡིན་ཏེ། སྤང་བྱ་ཡིན་པས་སོ། །དཔེར་ན་མཐོང་སྤང་ཉོན་
མོངས་པ་དང་འདྲ་བར་རོ། །གསུམ་པ་དབྱེ་བ་ནི། རྟོག་པ་དེ་གཉིས་པོ་རེ་རེ་ལ་དགུ་རེ་ཡོད་དེ་ཡུལ་དགུ་ཡོད་པའི་དབྱེ་བས་སོ། །བཞི་པ་འཁྲུལ་པར་སྒྲུབ་པ་ནི། དགུ་གཉིས་བཅོ་བརྒྱད་ཡོད་པ་ནི་ཡུལ་ཇི་ལྟ་བ་བཞིན་མ་ཡིན་པར་འཛིན་པའི་རང་གི་ངོ་བོ་དག་ཏུ་ཤེས་པར་བྱ་སྟེ། རང་གི་ཡུལ་ཕྱིན་ཅི་ལོག་ཏུ་སྣང་བའི་ཕྱིར། དྷ་དུ་ར་ཟོས་པའི་རྒྱུས་ནམ་མཁའ་ལ་གསེར་གྱི་ཁབ་ལེན་པ་ལ་འཇུག་པ་ལྟར་ཞེ་ན་ཡུལ་གྱི་དངོས་པོ་དང་མ་འབྲེལ་བར་འཇུག་པ་སྟེ་ཞེན་པ་ལྟར་ཡུལ་མི་གནས་པ་ཉིད་ཀྱིས་སོ། །གཉིས་པ་གཉེན་པོ་ནི་དགུ་རེ་སྟེ། དང་པོ་འཇུག་པ་གཟུང་རྟོག་གི་གཉེན་པོ་དགུ་ནི། དང་པོ་ཡུམ་ནས་རྣམ་མཁྱེན་བར་དབེན་པར་རྟོག་པ་ངོ་བོ་ཉིད་རྟོག་གི་གཉེན་པོ་དང༌། གཉིས་པ་ནམ་མཁའ་འགའ་ཞིག་ལ་ཉེ་རིང་དུ་མི་སེམས་པ་ལྟར་རྣམ་མཁྱེན་དང་ས་གཉིས་ལ་ཉེ་རིང་དུ་མི་སེམས་པ་ནི་རིགས་ལ་རྟོགས་པའི་གཉེན་པོ་དང༌། གསུམ་པ། སྒྱུ་མའི་སྐྱེས་བུ་སྒྱུ་མ་མཁན་དང་ལྟད་མོ་ལ་ཉེ་རིང་དུ་མི་སེམས་པ་ལྟར་ལམ་དམན་མཆོག་ལ་ཉེ་རིང་དུ་མི་སེམས་པ་ནི་ལམ་ཡང་དག་པར་འགྲུབ་པ་ལ་རྟོག་པའི་གཉེན་པོ་དང༌། བཞི་པ། གཟུགས་བརྙན་རང་གང་གིས་འབྱུང་བ་དང་དེ་མིན་པ་གཉིས་ལ་ཉེ་རིང་དུ་མི་སེམས་པ་ལྟར་ལམ་གཉིས་ཀྱི་དམིགས་ཡུལ་ལ་ཉེ་རིང་དུ་མི་རྟོག་པ་ནི་དམིགས་པ་མ་འཁྲུལ་བར་རྟོག་པའི་
གཉེན་པོ་དང༌། ལྔ་པ་དེ་བཞིན་གཤེགས་པ་ལ་སྡུག་མི་སྡུག་གི་བློ་མེད་པ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྡུག་མི་སྡུག་གཉིས་སུ་མེད་པར་རྟོག་པ་ནི་སྤང་གཉེན་ལ་རྟོག་པའི་གཉེན་པོ་དང༌། དྲུག་པ། དེ་བཞིན་གཤེགས་པ་རྟོག་པ་ཐམས་ཅད་སྤངས་པ་ལྟར་བྱང་སེམས་ཀྱིས་ཀྱང་སྤངས་པ་ནི་རང་གི་རྟོགས་པ་ལ་རྟོག་པའི་གཉེན་པོ་དང༌། བདུན་པ་དེ་བཞིན་གཤེགས་པའི་སྤྲུལ་པ་རྫོགས་བྱང་དང་རྣམ་མཁྱེན་ལ་ཉེ་རིང་དུ་མི་འཛིན་པ་ལྟར་བདག་གཞན་གཉིས་སུ་མི་འཛིན་པ་ནི་གཞན་དོན་བྱེད་པ་པོ་ལ་རྟོག་པའི་གཉེན་པོའོ། །བརྒྱད་པ་དེ་བཞིན་གཤེགས་པ་སྤྲུལ་པ་མི་རྟོག་བཞིན་དུ་སེམས་ཅན་གྱི་དོན་སྒྲུབ་པ་ལྟར་ཡུམ་ཡང་དེ་ལྟར་བྱེད་པ་ནི་གཞན་དོན་གྱི་བྱ་བ་ལ་རྟོག་པའི་གཉེན་པོའོ། །དགུ་ པ་་འཁྲུལ་འཁོར་མཁན་གྱིས་བྱས་པའི་བུང་མེད་ཀྱི་གཟུགས་དེ་རང་གང ་གི་སླད་དུ་ བྱས་པ་ལ་མི་རྟོག་པ་ལྟར་ཡུམ་ཡང་གང ་གི་སླད་དུ་བསྒོམ་པའི་ཐོབ་བྱ་ལ་མི་རྟོག་པ་ནི་འབྲས་བུ་ལ་རྟོག་པའི་གཉེན་པོའོ། །གཉིས་པ་ལྡོག་པ་གཟུང་རྟོག་གི་གཉེན་པོ་དགུ་ནི། དང་པོ་ཉི་ཟླས་གླིང་བཞིར་ལས་བྱེད་པ་དང་འཁོར་སྒྱུར་གྱི་རིགས་རིན་པོ་ཆེ་སྣ་བདུན་གྱིས་དབང་སྒྱུར་བའི་དཔེས་རིམ་པ་ལྟར། །ཤེས་རབ་དང་སྙིང་རྗེ་དང་མ་བྲལ་བའི་སྦྱིན་སོགས་ལྡས་མཐའ་གཉིས་སུ་
མི་ལྟུང་བ་དང་ཐོབ་བྱ་ལ་དབང་སྒྱུར་བར་གསུངས་པ་རྟོགས་པ་དམན་པའི་ཟློག་ཕྱོགས་དང༌། གཉིས་པ་ཁྱིམ་ཐབས་ཀྱིས་མ་བསྲུངས་བ་དང་བསྲུངས་བའི་བུད་མེད་ལ་འཕྱོ་ན་མས་གླགས་རྙེད་མི་རྙེད་ཀྱི་དཔེས་དྲུག་པ་དང་བྲལ་མ་བྲལ་གྱིས་ལྔ་པོ་ཡང་བདུད་ཀྱིས་ཚུགས་མི་ཚུགས་སུ་གསུངས་པ་ནི་ཕྱི་ནང་གི་ཡོངས་འཛིན་ཡོད་མེད་ཀྱི་ཁྱད་དང༌། གསུམ་པ་གོ་མཚོན་ཚང་བ་དགྲས་མི་ཐུབ་ཅིང་འཇོམས་པའི་དཔེས་དྲུག་པ་མ་བྲལ་བའི་ལྔ་པོ་བདུད་ཀྱིས་མི་ཚུགས་ཤིང་མི་མཐུན་ཕྱོགས་ཐམས་ཅད་འཇོམས་པ་ནི་ལམ་གྱི་རྣམ་པ་མ་ཚང་བའི་བཟློག་ཟླ་དང༌། བཞི་པ་འཁོར་སྒྱུར་ལ་མཁར་གྱི་རྒྱལ་པོས་བསྙེན་བཀུར་བའི་ཕྱིར་འོང་བའི་དཔེས་དྲུག་པ་དང་མ་བྲལ་བའི་ལྔ་ཡང་རྣམ་མཁྱེན་དུ་འོང་བ་ནི་རྟོགས་པ་ལ་རང་དབང་མ་ཐོབ་པར་གཞན་རྐྱེན་གྱིས་འགྲོ་བ་ལས་བཟློག་པའོ། །ལྔ་པ་གང་གཱས་ཆུ་ཀླུང་ཕྲ་མོ་རྣམས་དྲངས་ཏེ་རྒྱ་མཚོར་འགྲོ་བའི་དཔེས་དྲུག་པའི་མཐུས་ལྔ་ཡང་རྣམ་མཁྱེན་དུ་འདོད་པ་ནི་ཆེད་དུ་བྱ་བ་ལོག་པའི་བཟློག་ཟླའོ། །དྲུག་པ་ལག་པ་གཡས་གཡོན་གྱིས་བྱ་བ་བྱེད་མི་བྱེད་ཀྱི་དཔེས་དྲུག་པ་དང་ལྔ་པོ་ཡང་དེ་ལྟར་གསུངས་པ་ནི་ལམ་ཉེ་ཚེ་བ་དང་ཡོངས་སུ་རྫོགས་པའི་ཁྱད་པར་དང༌། བདུན་པ་ཆུ་ཀླུང་ཆེ་ཆུང་གི་ཆུ་ཐམས་ཅད་རྒྱ་མཚོར་ཕྱིན་པ་ན་རོ་གཅིག་ཏུ་འགྱུར་བའི་དཔེས་དྲུག་པས་ཟིན་པའི་ལྔ་ཡང་རྣམ་པ་ཐམས་ཅད་མཁྱེན་
པར་ཕྱིན་པ་ན་ཐམས་ཅད་མཁྱེན་པར་རོ་གཅིག་པར་གསུངས་པ་ནི་འབྲས་བུ་སྣ་ཚོགས་པ་ལས་བཟློག་པ་དང༌། བརྒྱད་པ་འཁོར་ལོ་རིན་པོ་ཆེས་དཔུང་འགྲོ་ཞིང་གནས་པར་བྱེད་པའི་དཔེས་དྲུག་པས་ལྔ་པོ་རྣམ་མཁྱེན་དུ་འགྲོ་ཞིང་གནས་པར་བྱེད་པར་གསུངས་པ་ནི་གནས་འཇུག་ལ་རྨོངས་པའི་གཉེན་པོ་དང༌། དགུ་པ་འཁོར་སྒྱུར་གྱི་རིན་པོ་ཆེ་སྣ་བདུན་དཔུང་གི་མདུན་དུ་འགྲོ་པ་ལྟར་དྲུག་པ་ལྔ་པོའི་མདུན་དུ་འགྲོ་ཞིང་ལྔ་ནི་དྲུག་པའི་རྗེས་སུ་འབྲང་པར་གསུངས་པ་ནི་རང་འབྲས་ཀྱི་རྗེས་ལ་གཞན་དུ་འགྲོ་བའི་ཟློག་ཕྱོགས་སོ། །གཉིས་པ་འཛིན་རྟོག་ལ་རྟོག་པ་དང་གཉེན་པོ་གཉིས། །དང་པོ་རྟོག་པ་ལ་དངོས་དང་དེ་ལ་རྩོད་པ་སྤང་པ་གཉིས། དང་པོ་རྟོག་པ་དངོས་ལ་བཞི། རྟོག་པའི་ངོ་བོ། སྤང་བྱར་བསྟན་པ། དབྱེ་བ་འཁྲུལ་པར་སྒྲུབ་པའོ། །དང་པོ་རྟོག་པའི་ངོ་བོ་ནི། སོ་སོའི་སྐྱེ་བོ་ལ་ནི་སྐྱེས་བུ་དེར་གདགས་པའི་གཞི་རྫས་སུ་ཡོད་པའི་རྟེན་ཅན་གྱི་འཛིན་པ་དང༌། འཕགས་པའི་གང་ཟག་ལ་ནི་སྐྱེས་བུ་དེར་གདགས་པའི་གཞི་བཏགས་པར་ཡོད་པའི་རྟེན་ཅན་གྱི་འཛིན་པ་དག་ཡོད་པས་འཛིན་པར་རྣམ་པར་རྟོག་པ་རྫས་འཛིན་དང་བཏགས་འཛིན་གཉིས་སོ། །གཉིས་པ་སྤང་བྱར་བསྟན་པ་དང༌། གསུམ་པ་ནི་སྔར་ལྟར་རོ། །བཞི་པ་འཁྲུལ་
བར་སྒྲུབ་པ་ནི། འཛིན་རྟོག་དགུ་ཚན་གཉིས་སུ་ཡོད་པ་ནི་རང་ཡུལ་ཕྱིན་ཅི་ལོག་ཏུ་སྣང་བའི་ཕྱིར་རྟོག་པ་དེ་དག་ཡུལ་བདེན་པ་འཛིན་པའི་ངོ་བོས་དབེན་པ་རྫུན་པ་འཛིན་པའི་ངོ་བོ་ཡིན་ནོ། །རྟགས་གྲུབ་སྟེ་རྟོག་པ་དེ་དག་གི་ཡུལ་དངོས་པོར་གྱུར་པ་གཟུང་བའི་དོན་དེ་དག་ཇི་ལྟར་གཟུང་བ་དེ་བཞིན་དུ་གཟུང་བའི་ངོ་བོར་ཡོད་པ་མ་ཡིན་པའི་ཕྱིར་རོ། །གཉིས་པ་དེ་ལ་རྩོད་པ་སྤང་བ་ལ་གསུམ། རྩོད་པ་ལན་ལན་ལ་རྩོད་སྤང་ངོ། །དང་པོ་རྩོད་པ་ནི། སོ་སྐྱེའི་འཛིན་པ་ལ་རྫས་རྟོག་གིས་མ་ཁྱབ་སྟེ། དེ་ལ་ཡང་ཆོས་ཐམས་ཅད་བདག་མེད་པར་རྟོག་པ་ཡོད་པས་སེམས་ཅན་གྱི་རྫས་མེད་པར་རྟོག་པ་ཡང་ཡོད་ལ། འཕགས་པའི་འཛིན་པ་ལ་བཏགས་འཛིན་གྱིས་མ་ཁྱབ་སྟེ། དེ་ལ་ཡང་ང་ཞེས་འབྱུང་བས་ངར་འཛིན་ཡོད་པས་སོ། །ཞེས་པའོ། །གཉིས་པ་དེའི་ལན་ནི། །སོ་སྐྱེའི་ཆོས་ཐམས་ཅད་བདག་མེད་དུ་ཤེས་པ་ནི་མོས་པ་ཡིད་བྱེད་ཀྱིས་བདག་བཏགས་པ་ཙམ་དུ་རྟོག་པ་ཡིན་ལ། བཏགས་འཛིན་འཕགས་པ་ལ་བཤད་པ་ནི་དེ་ཁོ་ན་ཉིད་ཡིད་བྱེད་ཀྱིས་བདག་བཏགས་པ་ཙམ་དུ་རྟོག་པ་ལ་འདོད་པ་དང༌། འཕགས་པས་ང་དེའི་ཚེ་ཞེས་སོགས་ཀྱི་ཚིག་ནི་གཞན་གྱི་ཁོང་དུ་ཆུད་པའི་ཐབས་སུ་བསྟན་པ་ཐ་སྙད་པ་ཡིན་གྱི། ངར་འཛིན་པ་མཚན་ཉིད་པ་ཡོད་པ་མིན་པས་རྩོད་པ་དེ་དག་ལ་སྙིང་པོ་མེད་དོ། །འོ་ན་འཕགས་པས་སྦྱོར་
ལམ་པའི་རྒྱུད་ལ་སྐྱེས་བུ་བཏགས་འཛིན་གྱི་རྟོག་པ་དང་འདིར་ཡང་མཐོང་སྤང་ལ་རྟོག་པ་དེ་བཤད་པ་མི་འཐད་ཅིང་སྒོམ་སྤང་ལ་རྫས་འཛིན་རྟོག་པ་མི་འདོད་པར་འགྱུར་ཏེ། འཛིན་རྟོག་དང་པོ་སོ་སྐྱེ་དང་གཉིས་པ་འཕགས་པ་ཁོ་ན་ལ་ཡོད་པས་ཤེ་ན། བཏགས་འཛིན་ལ་ཡིད་བྱེད་གཉིས་ཀྱི་སྒོ་ནས་གཉིས་སུ་མཛད་པས། སོ་སྐྱེ་དང་མཐོང་སྤང་ལ་རྟོག་པ་ཕྱི་མ་ཡོད་པར་བཤད་པ་ནི་མོས་པ་ཡིད་བྱེད་ཀྱི་དབང་དུ་བྱས་ལ། རྩ་བར་འཕགས་པ་ལ་གསུངས་པའི་དགོངས་པ་ནི་དེ་ཁོ་ན་ཉིད་ཡིད་བྱེད་ལ་དགོངས་སོ། །སྒོམ་སྤང་ལ་ནི་རྫས་འཛིན་གྱི་ཐ་སྙད་མ་མཛད་དོ། །ཤནྟི་པས་ནི་འདི་གཉིས་ཡོད་པ་ངེས་པ་ཅན་དུ་མཛད་དེ་བཏགས་འཛིན་རྟོག་པ་ཉན་རང་དང་རྫས་འཛིན་རྟོག་པ་སོ་སྐྱེ་ལ་ཡོད་པར་བཤད་དོ། །གསུམ་པ་ལན་ལ་རྩོད་སྤང་ནི། གལ་ཏེ་འདིར་འཛིན་རྟོག་སེམས་ཅན་དུ་རྟོག་པར་བཤད་ པ་འདི་གང་ཟག་དང༌། ཆོས་གཉིས་ཀྱི་དབང་དུ་བྱས ་པའི་གང་ཟག་ཡིན་ནམ། །འོན་ཏེ་གང་ཟག་ཏུ་གདགས་པའི་གཞི་སེམས་རྒྱུད་ཀྱིས་ཟིན་པའི་ཆོས་ཙམ་ལ་འདོད། །དང་པོ་ལྟར་ན་ཡུལ་ཅན་གྱི་རྟོག་པ་དེ་ཉོན་སྒྲིབ་ཡིན་པས་ཉན་རང་གིས་ཀྱང་སྤོང་བར་འགྱུར་ན་དེ་ཡང་མི་འཐད་དེ། བྱང་སེམས་ལམ་གྱི་ཐུན་མོང་མིན་པའི་སྤང་བྱ་ཡིན་པ་དང༌། འདི་གཉིས་སྤོང་ན་གཟུང་རྟོག་གཉིས་
ཀྱང་སྤོང་ནུས་པས། གཟུང་འཛིན་གྱི་རྟོག་པ་བཞི་ཀ་ཉན་རང་གིས་སྤོང་ནུས་པས་ཧ་ཅང་ཐལ་ལོ། །གཉིས་པ་ལྟར་ན། གཞུང་ལས་སེམས་ཅན་དང་གང་ཟག་ཏུ་རྟོག་པར་བཤད་པ་དང༌། ཉི་སྣང་གི་རྩོད་ལན་ལ་ངར་འཛིན་ཡོད་མེད་ཀྱིས་རྫས་འཛིན་ཡོད་མེད་དུ་བཤད་པ་མི་འཐད་ཅེ་ན། སྤྱིར་འཛིན་རྟོག་ལ་གང་ཟག་དང་ཆོས་ཙམ་ལ་འཛིན་པ་པོར་ཞེན་པ་གཉིས་ཡོད་ཅིང་གཉིས་ཀ་ཡང་བྱང་སེམས་ཀྱིས་སྤང་དགོས་པའི་ཕྱིར་གཉིས་ཀའི་རྣམ་བཞག་ཁས་བླང་དགོས་སོ། །དེས་ན་སྐྱེ་འཕགས་གཉིས་ཀས་གང་ཟག་གི་བདག་མེད་རྟོགས་ཀྱང་མངོན་དུ་གྱུར་མ་གྱུར་ཡོད་པས་དེ་གཉིས་ཀྱི་འཛིན་པ་ལ་རྫས་བཏགས་ཀྱི་འཛིན་པར་འཇོག་པ་ལྟར་ཆོས་བདག་མེད་པར་མངོན་སུམ་དུ་རྟོགས་མ་རྟོགས་ཀྱི་ཁྱད་པར་གྱིས་ཀྱང་སྐྱེ་འཕགས་ཀྱི་འཛིན་པ་ལ་ཆོས་ཙམ་ལ་རྫས་དང་བཏགས་པའི་ལོངས་སྤྱོད་པ་པོར་འཛིན་པའི་ཤེས་སྒྲིབ་ཀྱི་འཛིན་པ་གཉིས་ཀྱང་ཤེས་པར་བྱའོ། །དེ་ལྟར་སྐྱེ་འཕགས་ཀྱི་འཛིན་པ་ལ་རྫས་བཏགས་ཀྱི་འཛིན་པ་གཉིས་སུ་བྱས་པ་ཡང་གཙོ་ཆེ་བས་ཡིན་ཏེ། གཞན་དུ་ན་ས་བདུན་པའི་བར་དུ་ཉོན་ཡིད་མཚན་ཉིད་པ་མི་འཇུག་པར་འགྱུར་ཏེ། ངར་འཛིན་མཚན་ཉིད་པ་ལ་རྫས་འཛིན་གྱིས་ཁྱབ་པས་སོ། །རིགས་པ་འདིས་ཆོས་ཀྱི་དབང་དུ་བྱས་པའི་འཛིན་པ་གཉིས་ཀྱི་ཡོད་པ་ཡང་ཤེས་པར་བྱའོ། །གཉིས་པ་གཉེན་
པོ་ནི་རྫས་འཛིན་དང་བཏགས་འཛིན་གྱི་གཉེན་པོ་གཉིས། དང་པོ་རྫས་འཛིན་གྱི་གཉེན་པོ་ལ་དགུ་སྟེ། དང་པོ་ཡུམ་གྱིས་གཟུགས་སོགས་མི་འཛིན་མི་འདོར་བ་སྐྱོན་ཡོན་འཛིན་འདོར་གྱི་གཉེན་པོ་དང༌། གཉིས་པ་གཟུགས་སོགས་ཡིད་ལ་མི་བྱེད་པས་དགེ་རྩ་འཕེལ་ཕྱིན་དྲུག་རྫོགས་རྣམ་མཁྱེན་ཐོབ་སྟེ་སངས་རྒྱས་ཀྱི་རྒྱུ་ཡིན་པའི་ཕྱིར་ཞེས་པ་བདེན་པ་ཡིད་བྱེད་ཀྱི་གཉེན་པོ་དང༌། གསུམ་པ་ཡིད་ལ་བྱེད་མི་བྱེད་གཉིས་ཀ་ཁམས་གསུམ་གྱི་རྒྱུ་ཡིན་མིན་དུ་གསུངས་པ་ཁམས་གསུམ་དང་འབྲེལ་པའི་སྤང་གཉེན་གཉིས་ཀ་དང༌། བཞི་པ་ཡིད་ལ་མི་བྱེད་པར་སྤྱོད་པ་ཆོས་ཐམས་ཅད་ལ་མི་གནས་པ་ཉིད་ཞེན་ནས་གནས་པའི་གཉེན་པོ་དང༌། ལྔ་པ་དེའི་འཐད་པར་ཆགས་པར་བྱ་བ་མེད་པས་མངོན་པར་ཆགས་པ་མེད་པ་མངོན་ཞེན་གྱི་གཉེན་པོ་དང༌། དྲུག་པ་ཆགས་པ་མེད་པ་ཉིད་དུ་ཡིད་ལ་བྱེད་པ་དང་དེ་བཞིན་གཤེགས་པས་ཆོས་ཐམས་ཅད་མ་བཟུང་བ་ཉིད་དུ་སངས་རྒྱས་ནས་བཤད་དོ་སྙམ་ནའང་ཡུམ་ལས་རིང་ཞིང་ཉམས་པ་ཡིན་ཏེ། དེས་ཆོས་གང་ཡང་སངས་རྒྱས་པའམ་བསྟན་ཅིང་བཏགས་པ་མེད་པ་ཆོས་ཀྱི་དངོས་པོ་བཏགས་པར་འཛིན་པའི་གཉེན་པོ་དང༌། བདུན་པ་མ་བཟུང་བ་ཉིད་དུ་ཆགས་པ་ཡང་ཡུམ་དང་བྲལ་བ་ཡིན་པར་བསྟན་པ་ནི་དེ་ནི་མངོན་པར་ཆགས་པས་མ་བརྗོད་པར་གསུངས་པ་ཕྱིན་དྲུག་ལ་ཆགས་པའི་གཉེན་པོ་
དང༌། བརྒྱད་པ་ཕར་ཕྱིན་སོགས་གཉེན་པོ་རྣམས་དེ་དག་དང་མ་བྲལ་བས་གཉེན་པོ་དང་དེའི་དམིགས་པ་མཉམ་པ་གཉེན་པོར་འཛིན་པའི་གཉེན་པོ་དང༌། དགུ་པ་འཁོར་སྒྱུར་གྱི་དཔུང་ཚོགས་རྣམས་དེ་གར་འདོད་པར་འགྲོ་བའི་དཔེས་ལྔ་པོ་ཡུམ་གྱི་རྗེས་སུ་འབྲང་ནས་རྣམ་མཁྱེན་དུ་འགྲོ་བར་གསུངས་པ་ནི་ཇི་ལྟར་འདོད་བཞིན་འགྲོ་ཉམས་ཀྱི་གཉེན་པོའོ། །གཉིས་པ་བཏགས་འཛིན་རྟོག་པའི་གཉེན་པོ་དགུ་ནི། དང་པོ་ཁ་ལོ་སྒྱུར་བ་རྟ་ཟུང་བཞི་པའི་ཤིང་རྟ་ལ་ཞོན་ཞིང་ལམ་མཉམ་པ་ནས་འགྲོ་བའི་དཔེས་ཡུམ་གྱི་ལྔ་པོའི་ཁ་ལོ་སྒྱུར་ཞིང་ཆེད་དུ་བྱ་བ་དང་མཐུན་པའི་ལམ་མཉམ་པ་ནས་འགྲོ་བ་ནི་ཆེད་བཞིན་མི་འབྱུང་བའི་གཉེན་པོ་དང༌། གཉིས་པ་བྱང་སེམས་དང་ཉན་རང་གི་ལམ་རྣམ་མཁྱེན་གྱི་ལམ་ཡིན་མིན་དུ་གསུང་བ་ལམ་ལ་ལམ་མིན་དུ་འཛིན་པའི་གཉེན་པོ་དང༌། གསུམ་པ་ཡུམ་གྱིས་ཆོས་གང་ཡང་མི་སྐྱེ་མི་འགོག་པ་སྐྱེ་འགག་གི་གཉེན་པོ་དང༌། བཞི་པ་གཟུགས་སོགས་ཀྱི་ཆོས་ཐམས་ཅད་ལ་ལྡན་མི་ལྡན་དུ་མི་རྟོག་པར་ཡུམ་ལ་བརྩོན་པ་དངོས་པོ་ལྡན་མི་ལྡན་གྱི་གཉེན་པོ་དང༌། ལྔ་པ་གཟུགས་སོགས་ལ་གནས་པར་བྱའོ་ཞེས་བརྩོན་པར་མི་བྱ་བ་གནས་རྟོག་གི་གཉེན་པོ་དང༌། དྲུག་པ་ཨ་མྲའི་འབྲས་བུ་ཟ་འདོད་པས་དེའི་ས་བོན་ཆུད་མི་ཟ་བར་བྱ་བའི་དཔེས་སངས་རྒྱས་ཀྱི་རིགས་ཕྱིན་དྲུག་ལ་བསླབ་ཅིང་དེས་སེམས་ཅན་རྗེས་སུ་
བཟུང་བ་རིགས་འཇིག་པའི་གཉེན་པོ་དང༌། བདུན་མ་གཞན་གྱི་དྲིང་མི་འཇོག་པ་ཞིང་སྦྱང་བ་སྙིང་པོ་བྱང་ཆུབ་ལ་འདུག་པ་ཆོས་འཁོར་བསྐོར་འདོད་པས་ཕྱིན་དྲུག་ལ་བསླབ་པ་དོན་གཉེར་མེད་རྟོག་གི་གཉེན་པོ་དང༌། བརྒྱད་པ་དེའི་འཐད་པར་རྒྱ་མཚོ་རིན་པོ་ཆེ་ཐམས་ཅད་ཀྱི་རྒྱུ་ཡིན་པའི་དཔེས་ཡུམ་འཕགས་པ་ཐམས་ཅད་ཀྱི་རྟོགས་པའི་རྒྱུ་ཡིན་པར་གསུངས་པ་རྒྱུ་མེད་ཀྱི་གཉེན་པོ་དང༌། དགུ་པ་འཕོང་གི་སློབ་དཔོན་ལག་ཚོད་དང་འཚམས་པའི་གཞུ་ཐོག་པ་དགྲས་མི་ཐུབ་པའི་དཔེས་ཡུམ་ལ་སྤྱོད་པ་བདུད་སོགས་ཀྱིས་མི་ཐུབ་པར་གསུངས་པ་ཕྱིར་རྒོལ་བ་དམིགས་རྟོག་གི་གཉེན་པོའོ། །དེ་ལྟར་བཤད་པ་འདི་དག་ཀྱང་སྤྱིར་མདོ་ལས་གཉེན་པོའི་ཤུགས་ཀྱིས་སྤང་བྱ་བསྟན་པ་དང༌། བསྟན་བཅོས་སུ་སྤང་བྱའི་ཤུགས་ཀྱིས་གཉེན་པོ་བསྟན་པར་གསུངས་པའི་མདོ་ནས་བཤད་པའི་གཉེན་པོ་རྣམས་ཡིན་ཏེ་འདི་དག་ལ་ཕལ་ཆེར་བསྟན་བཅོས་ནས་སྤང་བྱའི་འཛིན་སྟངས་བསྟན་པ་དེ་དག་གི་ཡུལ་གྱི་བཟློག་ཕྱོགས་ཙམ་ཡིན་པས་གཉེན་པོ་དངོས་མ་ཡིན་ཞིང་དོན་དུ་འདི་གཉིས་གང་ལ་རྟོག་ཀྱང་སྤང་བྱ་ཡིན་ནོ། །གཉིས་པ་གཉེན་པོ་མཐོང་ལམ་ལ་གཉིས། ཞར་བྱུང་དང་དཀྱུས་མའོ། །དང་པོ་ཞར་ལས་བྱུང་བ་ལ་གཉིས། མཐོང་རྩེའི་གྲོགས། དེའི་འབྲས་བུའོ། །དང་པོ་མཐོང་ལམ་རྩེ་མོ་དེ་གྲོགས་གང་དང་བཅས་ནས་འབྲས་བུ་བྱང་
ཆུབ་ཆེན་པོ་དེ་བསྐྱེད་པ་མཐོང་རྩེའི་གྲོགས་ལ་གཉིས། གཞན་གྱི་རྒྱུད་སྦྱོང་བ་དང༌། རང་གི་རྒྱུད་སྦྱོང་བའོ། །དང་པོ་གཞན་གྱི་རྒྱུད་སྦྱོང་བ་ལ་འབྲས་བུ་རྟོགས་པའི་ཆོས་དང་རྒྱུ་ལུང་གི་ཆོས་ལ་འགོད་པ་གཉིས། །དང་པོ་ནི་མཐོང་ལམ་སོགས་ཀྱི་རྟོག་པ་བསྐྱེད་དེ་ལུང་སྟོན་པའི་སྒོ་ནས་བྱང་ཆུབ་ལ་འགོད་པའོ། །གཉིས་པ་ནི་བྱང་ཆུབ་དེའི་རྒྱུ་ཡུམ་དོན་སྤྲོས་པ་དང་བྲལ་བའི་ཆོས་སྟོན་པའོ། །གཉིས་པ་རང་གི་རྒྱུད་སྦྱོང་བ་ནི། སྟོང་གསུམ་གྱི་སེམས་ཅན་དགྲ་བཅོམ་པའི་བར་ལ་བཀོད་པ་ལས་ཀྱང་བསོད་ནམས་ཆེས་མང་བའི་མཚན་ཉིད་ཅན་མཐོང་ལམ་གྱི་ཡུམ་མཉམ་གཞག་ཏུ་སྒོམ་ཞིང་རྗེས་ཐོབ་ཏུ་གཞན་ལ་སྟོན་པའོ། །གཉིས་པ་མཐོང་ལམ་གྱི་འབྲས་བུ་བྱང་ཆུབ་ཆེན་པོ་ལ་གཉིས། དོན་ལ་གནས་པའི་བྱང་ཆེན་བསྟན། རྟོག་པས་བཏགས་པའི་བྱང་ཆེན་དགག་པའོ། །དང་པོ་ལ་རྟགས་དགོད་པ་དང༌། ཕྱོགས་ཆོས་སྒྲུབ་པ་གཉིས། དང་པོ་ནི་དྲི་མ་རྣམས་ཟད་པ་དང་མི་སྐྱེ་བར་ཤེས་པའི་ཐེག་ཆེན་གྱི་ཤེས་པ་གཉིས་ནི། བྱང་ཆུབ་ཆེན་པོ་ཡིན་ཏེ། དྲི་མ་རྣམས་གདོད་ནས་འགག་པ་དང་སྐྱེ་བ་མེད་པར་རྟོགས་པའི་ཡེ་ཤེས་མཐར་ཕྱིན་པ་ཡིན་པའི་ཕྱིར། གཉིས་པ་ཕྱོགས་ཆོས་སྒྲུབ་བ་ལ་ལུང་གིས་སྒྲུབ་བ་དང༌། རིགས་པས་སྒྲུབ་པ་གཉིས། དང་པོ་ལུང་གིས་སྒྲུབ་པ་ནི། དྲི་མ་རྣམས་གདོད་ནས་སྐྱེ་འགག་མེད་པ་ཡིན་ཏེ། དོན་
དམ་པར་ཆོས་དབྱིངས་སྤྲོས་བྲལ་གྱི་ངོ་བོ་ཉིད་ཡིན་པའི་ཕྱིར། ནམ་མཁའ་ལ་སྐྱེ་འགག་མེད་པ་བཞིན། རྟགས་གྲུབ་སྟེ་དབུས་མཐའ་ལས། ཆོས་ཀྱི་དབྱིངས་ནི་མ་གཏོགས་པ། །འདི་ལྟར་ཆོས་ཡོད་མ་ཡིན་ཏེ། །ཞེས་སོ། །གཉིས་པ་རིགས་པས་སྒྲུབ་པ་ནི། དྲི་མ་རྣམས་གདོད་ནས་སྐྱེ་འགག་མེད་པ་ཡིན་ཏེ། དོན་དམ་པར་བདེན་པའི་དངོས་པོ་མེད་པའི་ཕྱིར་ནམ་མཁའི་པད་མ་བཞིན། འདིའི་རྟགས་སྒྲུབ་པ་ལ་བཞི། ངོ་བོ་ལ་དཔྱོད་པ་གཅིག་དང་དུ་བྲལ། རྒྱུ་ལ་དཔྱོད་པ་རྡོ་རྗེའི་གཟེག་མ། འབྲས་བུ་ལ་དཔྱོད་པ་མུ་བཞི་སྐྱེ་འགོག །རྟེན་འབྲེལ་གྱི་གཏན་ཚིག་གོ། །དང་པོ་གཅིག་དང་དུ་བྲལ་ནི། དོན་དམ་པར་གཅིག་དང་དུ་མ་དང་བྲལ་བ་ནི་རང་བཞིན་མེད་པས་ཁྱབ། དཔེར་ན་གཟུགས་བརྙན་བཞིན་དངོས་པོ་འདི་དག་ཀྱང་གཅིག་དང་དུ་མ་དང་བྲལ་བའོ། །ཞེས་བྱ་བ་ནི་ཁྱབ་བྱེད་མ་དམིགས་པ་སྟེ། དབུ་མའི་རྒྱན་ལས། བདག་དང་གཞན་སྨྲའི་དངོས་འདི་དག །ཡང་དག་ཏུ་ན་གཅིག་པ་དང༌། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་སོ། །གཉིས་པ་རྡོ་རྗེ་གཟེག་མ་ནི། གང་དོན་དམ་པར་བདག་དང་གཞན་དང་གཉིས་ཀ་དང་རྒྱུ་མེད་ལས་མི་སྐྱེ་བ་ལ་སྐྱེ་བ་བདེན་པ་མེད་པས་ཁྱབ། །དཔེར་ན་རི་བོང་གི་རྭ་བཞིན། དངོས་པོ་འདི་དག་ཀྱང་དོན་
དམ་པར་བདག་དང་གཞན་དང་གཉིས་ཀ་དང་རྒྱུ་མེད་ལས་སྐྱེ་བ་དང་བྲལ་ལོ། ཞེས་བྱ་བ་ནི་ཁྱབ་བྱེད་མ་དམིགས་པ་སྟེ་དབུ་མའི་རྩ་བ་ལས། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་སོ། །དེ་ཡང་བདག་ལས་མི་སྐྱེ་སྟེ། དེ་ཉིད་ལས། རྒྱུ་དང་འབྲས་བུ་གཅིག་ཡིན་ན། །བྱེད་པ་པོ་དང་ལས་གཅིག་འགྱུར། །ཞེས་པ་ལྟར་ཕ་དང་བུ་དང་མེ་དང་དུ་བ་དང༌། ས་བོན་དང་མྱུ་གུ་སོགས་གཅིག་ཏུ་ཐལ་བས་སོ། །དོན་དམ་པར་གཞན་ལས་མི་སྐྱེ་སྟེ། དེ་ཉིད་ལས། །རྒྱུ་དང་འབྲས་བུ་གཞན་ཉིད་ན། །རྒྱུ་དང་རྒྱུ་མིན་མཚུངས་པར་འགྱུར། །ཞེས་པ་ལྟར། ས་བོན་མྱུ་གུའི་རྒྱུར་འདོད་པ་བཞིན་རྡོ་སོལ་ཡང་དེའི་རྒྱུར་ཧ་ཅང་ཐལ་ཏེ། གཞན་ཙམ་དུ་ཁྱད་པར་མེད་ཅིང་གཞན་ཁྱད་པར་ཅན་དཔྱད་ན་མི་འགྲུབ་པས་བསྒྲུབ་བྱ་དང་མཚུངས་པས་སོ། །གཉིས་ཀ་ལས་མི་སྐྱེ་སྟེ་རེ་རེ་ལ་བརྗོད་པའི་སྐྱོན་དུ་འགྱུར་ཞིང་དེ་གཉིས་འགལ་བས་དེ་ཡིན་པ་མི་སྲིད་པས་སོ། །རྒྱུ་མེད་པ་ལས་ཀྱང་མི་སྐྱེ་སྟེ། བྱ་རོག་ལ་ཡང་རྨ་བྱའི་མདོངས་བཀྲ་བ་དང༌། མེ་ལ་ཡང་ཆུའི་རང་བཞིན་གྲང་བ་སོགས་དམིགས་པར་ཧ་ཅང་ཐལ་ལ། ཡང་ན་རྨ་བྱ་ལ་ཡང་དེའི་མདོངས་
མེད་པ་དང༌། ཆུ་ལ་ཡང་གྲང་བ་དམིགས་པར་མི་འགྱུར་ཏེ། རྒྱུ་མེད་དུ་འབྱུང་ན་ཡུལ་དུས་ཐམས་ཅད་དུ་ཡོད་པའམ་གཏན་མེད་དགོས་པས་སོ། །གསུམ་པ་མུ་བཞི་སྐྱེ་འགོག་ནི། གང་དོན་དམ་པར་ཡོད་པ་དང་མེད་པ་དང་གཉིས་ཀ་དང་གཉིས་མིན་མི་སྐྱེ་ན་འབྲས་བུ་བདེན་པ་མི་སྐྱེ་བས་ཁྱབ་སྟེ། དཔེར་ན་མོ་གཤམ་གྱི་བུ་བཞིན། དངོས་པོ་འདི་དག་ཀྱང་དོན་དམ་པར་ཡོད་མེད་གཉིས་ཀ་གཉིས་མིན་གང་ཡང་མི་སྐྱེའོ། །ཞེས་བྱ་སྟེ། སྟོང་ཉིད་བདུན་ཅུ་པ་ལས། ཡོད་པ་ཡོད་ཕྱིར་སྐྱེ་མ་ཡིན། །མེད་པ་མེད་ཕྱིར་སྐྱེ་མ་ཡིན། །ཆོས་མི་མཐུན་ཕྱིར་ཡོད་མེད་མིན། །སྐྱེ་བ་མེད་ཕྱིར་གནས་འགག་མེད། །ཅེས་ཏེ་འདིས་ནི་སྦྱོར་བ་དེའི་ཕྱོགས་ཆོས་རྣམས་ཀྱང་བསྒྲུབ་བོ། །བཞི་པ་རྟེན་འབྲེལ་གྱི་གཏན་ཚིགས་ནི། གང་རྟེན་འབྲེལ་ཡིན་པ་དེ་དོན་དམ་པར་རང་བཞིན་མེད་དེ། །དཔེར་ན་སྒྱུ་མ་བཞིན། མདོ་ལས། གང་རྣམས་རྟེན་ཅིང་འབྲེལ་བར་འབྱུང༌། །དེ་རྣམས་རང་བཞིན་ཅུང་ཟད་མེད། །ཅེས་སོ། །གཉིས་པ་རྟོག་པས་བཏགས་པའི་བྱང་ཆེན་དགག་པ་ལ་གཉིས། དངོས་པོར་སྨྲ་བའི་ལུགས་དགག། སྟོང་བར་སྨྲ་བའི་ལུགས་གཞག་པའོ། །དང་པོ་ལ་གཉིས། ཁྱབ་བྱེད་མ་དམིགས་པ་དང༌། ཁས་བླང་ནང་འགལ་གྱིས་དགག་པའོ། །དང་པོ་ཁྱབ་བྱེད་མ་དམིགས་པ་ནི། །དངོས་
པོར་སྨྲ་བ་དག་གིས་སྐྱེས་ཟིན་གྱི་དྲི་མ་ལམ་གྱིས་ཟད་པར་བྱས་པ་ལ་དྲི་མ་དེ་དག་བདག་གི་རྒྱུད་ལ་ཟད་དོ་སྙམ་དུ་ཤེས་པ་ནི་ཟད་པ་ཤེས་པ་དང༌། སྐྱེ་འགྱུར་གྱི་དྲི་མ་ལམ་གྱིས་མི་སྐྱེ་བར་བྱས་པ་ལ་ཕྱིན་ཆད་བདག་གི་རྒྱུད་ལ་དྲི་མ་མི་སྐྱེའོ་སྙམ་པའི་ཤེས་པ་ནི་མི་སྐྱེ་ཤེས་པ་ཡིན་པར་འདོད་ཅིང་དྲི་མ་དེ་གཉིས་ཀྱང་བདེན་པའི་ངོ་བོར་འདོད་ལ་བྱང་ཆུབ་ཀྱང་ཟད་པ་དང་མི་སྐྱེ་བ་ཤེས་པའི་ཡེ་ཤེས་དེ་ལྟ་བུ་འདོད་དོ། །དེ་ལྟར་དེ་དག་གིས་འདོད་པའི་ཤེས་པ་དེ་གཉིས་ནི་བྱང་ཆུབ་ཆེན་པོར་མི་རུང་སྟེ། དྲི་མ་རྣམས་དོན་དམ་པར་ཟད་སྐྱེ་མེད་པར་ལུང་རིགས་ཀྱིས་གྲུབ་པ་དེའི་ཕྱིར་རོ། །གཉིས་པ་ཁས་བླང་ནང་འགལ་གྱིས་དགག་པ་ལ། །ཁས་བླང་འགལ་བའི་རྒྱུ་མཚན་དང༌། ཁས་བླང་འགལ་བ་དངོས་སོ། །དང་པོ་ལ་གཉིས། དབུ་མ་པས་སྒྲིབ་པ་རྫོགས་པར་སྤང་ནུས་པ་དང༌། དངོས་སྨྲ་བའི་ལྟ་བས་སྤང་མི་ནུས་པའི་རྒྱུ་མཚན་ནོ། །དང་པོ་དབུ་མ་པ་རྣམས་ནི་རྣལ་འབྱོར་གྱི་ས་བཞི་ལ་བརྟེན་ནས་ཆོས་ཐམས་ཅད་སྤྲོས་བྲལ་དེ་བཞིན་ཉིད་ཀྱི་རང་བཞིན་དུ་རྟོགས་ནས་བདེན་ཞེན་ཤེས་བྱའི་སྒྲིབ་པ་མ་ལུས་པ་སྤང་ནུས་པ་ཡིན་ནོ། །དེ་ལ་རྣལ་འབྱོར་གྱིས་བཞི་ནི། དང་པོ་ཕྱི་ནང་གི་མུ་སྟེགས་པ་རྣམས་ནི་བདག་རྟག་པ་སྐྱེ་འཇིག་གིས་སྟོང་པར་འདོད་པ་ཡིན་ལ། གང་ཀུན་རྫོབ་ཏུ་ཡང་སྐྱེ་བ་དང་འཇིག་པས་སྟོང་པ་ནི་རྟག་པ་དང་བདག་གི་དངོས་པོར་མེད་དེ་རི་བོང་གི་
རྭ་བཞིན་ཞེས་གང་ཟག་གི་བདག་མེད་པར་གཏན་ལ་ཕབ་ནས་བདག་ལྟ་ལྷན་སྐྱེས་ཀྱི་དམིགས་ཡུལ་དེ་ལ་དམིགས་ཏེ་རྣམ་བཅད་ལ་བདག་མེད་དང༌། ཡོངས་གཅོད་ལ་ཆོས་ཙམ་མོ་སྙམ་དུ་བསྒོམ་པས་བདག་ཏུ་ཞེན་པ་བཟློག་པ་ནི་བདག་མེད་ལ་དམིགས་པ་རྣལ་འབྱོར་པའོ། །གཉིས་པ་ནི། གང་ལྷན་ཅིག་དམིགས་པ་ངེས་པ་ནི་རྫས་ཐ་དད་མིན་པས་ཁྱབ། །བདེ་བ་དང་དེ་མྱོང་བའི་རིག་པ་བཞིན། སྔོ་སྣང་དང་དེ་འཛིན་ཀྱང་ལྷན་ཅིག་དམིགས་པའི་རྟགས་ལས་དོན་དུ་སྣང་བ་དེ་སྣང་མཁན་གྱི་བློ་ལས་ཕྱི་རོལ་དུ་མེད་པར་གཏན་ལ་ཕབས་ནས། ཡུལ་དུ་སྣང་བ་འདི་ཡོངས་གཅོད་ལ་ནང་གི་སེམས་ཙམ་པ་དང༌། རྣམ་བཅད་ལ་ཕྱི་རོལ་གྱི་དོན་མེད་དོ་ཞེས་བསྒོམ་པས་ཕྱི་དོན་གྱི་མངོན་ཞེན་སྤོང་ངོ༌། །གསུམ་པ་ནི། གཟུང་བ་མེད་ན་འཛིན་པ་ཡང་མེད་དེ་དེ་གཉིས་ཕན་ཚུན་ལྟོས་པའི་ཕྱིར་རོ་ཞེས་གཏན་ལ་ཕབས་ནས་གཟུང་འཛིན་གཉིས་མེད་དོ་སྙམ་དུ་བསྒོམ་པས་འཛིན་པ་ཙམ་དུ་ཞེན་པ་དེ་ཡང་བསལ་ཏེ། གཉིས་མེད་ཀྱི་ཡེ་ཤེས་ཙམ་ལ་ཞེན་པ་ནི་མ་སྤངས་པའོ། །བཞི་པ་ནི། །གང་རྟེན་ཅིང་འབྲེལ་བར་འབྱུང་བ་ཡིན་པ་ལ་བདེན་པའི་ངོ་བོ་ཉིད་མེད་པས་ཁྱབ། དཔེར་ན་སྒྱུ་མའི་རྟ་གླང་གི་སྣང་བ་བཞིན། གཉིས་མེད་ཀྱི་རང་རིག་དེ་ཡང་རྟེན་འབྲེལ་ཡིན་ནོ། །ཞེས་གཏན་
ལ་ཕབས་ནས་ཆོས་ཐམས་ཅད་སྤྲོས་བྲལ་དུ་བསྒོམ་པས་གཟུང་འཛིན་དང་རང་རིག་ལ་ཞེན་པའི་ཤེས་སྒྲིབ་མ་ལུས་པ་སྤང་ངོ༌། །དེས་ན་དབུ་མའི་ལམ་གྱིས་སྒྲིབ་གཉིས་རྫོགས་པར་སྤོང་བ་ཡིན་ནོ། །གཉིས་མ་དངོས་སྨྲ་བའི་ལྟ་བས་སྤང་མི་ནུས་པའི་རྒྱུ་མཚན་ནི། དེ་དག་གིས་གཟུང་འཛིན་དང་རང་རིག་དེ་དག་བདེན་པར་འདོད་པས། དེ་ལྟ་ན་དྲི་མ་དེ་དག་ལ་གཉེན་པོས་གནོད་པ་ཅུང་ཟད་ཀྱང་མི་བྱེད་པར་འགྱུར་ཏེ་དྲི་མ་དེ་དོན་དམ་དུ་ཡོད་པར་འགྱུར་བའི་ཕྱིར། དེ་ཡང་དོན་སྨྲ་གཉིས་ཀྱིས་སེམས་སེམས་བྱུང་གི་དྲི་མ་དང༌། རྣམ་རིག་པས་དེ་དག་གཞན་དབང་བདེན་པ་བར་འདོད་པས་དོན་དམ་དུ་གྲུབ་པར་འདོད་དོ། །གཉིས་པ་ཁས་བླང་འགལ་བ་དངོས་ནི། དེས་ན་བཅོམ་ལྡན་འདས་ཀྱིས་ཤེས་སྒྲིབ་རྣམ་པ་ཐམས་ཅད་དུ་སྤངས་པར་འདོད་པ་དང༌། གཟུང་འཛིན་དང་རང་རིག་གི་ཆོས་རྣམས་དོན་དམ་པར་ཡོད་པར་ཁས་ལེན་པ་ནི་ཁས་བླང་འགལ་བ་ཡིན་ནོ། །གཉིས་པ་སྟོང་པར་སྨྲ་བའི་ལུགས་བཞག་པ་ནི། རྟེན་འབྲེལ་གྱི་ཆོས་ཉིད་འདི་ལ། དང་པོ་ནས་ཡོད་མ་མྱོང་བས་བདག་གཉིས་བསལ་བར་བྱ་བ་མེད་ལ། ཐོག་མ་དང་ཐ་མ་མེད་པས་བདག་མེད་གཉིས་བཞག་བའམ་བསྣན་པར་བྱ་བ་ཅུང་ཟད་ཀྱང་མེད་དེ། དེ་ལྟར་བདག་ཡོད་མེད་ཀྱི་བསལ་བཞག་དང་བྲལ་བའི་ཆོས་ཉིད་ཡང་དག་པ་ལ་སྒྲོ་སྐུར་དང་བྲལ་བར་ཕྱིན་ཅི་མ་ལོག་པར་ཡང་དག་
པར་བལྟས་པས། ཡང་དག་པའི་དོན་བདག་མེད་གཉིས་མཐོང་ན་རིམ་པ་ལྟར་ཉོན་སྒྲིབ་དང་ཤེས་སྒྲིབ་ལས་རྣམ་པར་གྲོལ་བར་འགྱུར་རོ། །གཉིས་པ་དཀྱུས་མའི་དོན་མཐོང་ལམ་དངོས་བཤད་པ་ལ། དངོས་དང་ཇི་ལྟར་སྒོམ་ཚུལ་ལོ། །དང་པོ་མཐོང་ལམ་དངོས་ལ་ནི། དངོས་དང་དེའི་བྱེད་པ་གཉིས། དང་པོ་ནི། ཕ་རོལ་ཏུ་ཕྱིན་པ་དྲུག་པོ་རེ་རེ་ཡང་ཕན་ཚུན་དྲུག་དྲུག་བསྡུས་པ་གང་ཡིན་པ་སྐད་ཅིག་མ་གཅིག་པའི་བཟོད་པས་བསྡུས་པ་གང་ཡིན་པ་དེ་མཐོང་ལམ་ཡིན་ནོ། །དེ་ཡང་སྐབས་གཞན་དུ་མཐོང་ལམ་སྐད་ཅིག་བཅུ་དྲུག་ཏུ་བཤད་ནས་འདིར་སྐད་ཅིག་གཅིག་དང་དེ་ཡང་བཟོད་པར་བཤད་པ་ནི་མི་འགལ་ཏེ། བཅུ་དྲུག་ཏུ་བཤད་པ་རྗེས་ཀྱི་ངེས་པ་འདྲེན་ཚུལ་དང༌། གཅིག་ཏུ་བཤད་པ་མཉམ་གཞག་ན་བདེན་བཞིའི་རང་བཞིན་མཐོང་བ་ལ་ཁྱད་པར་མེད་པར་དགོངས་ཤིང༌། བཟོད་པ་སྤང་གཉེན་དངོས་ཡིན་ཞིང་མཐོང་ལམ་འདི་ཡང་རྟོག་པའི་གཉེན་པོར་སྟོན་པའི་སྐབས་ཡིན་པའི་ཕྱིར་རོ། །འདིའི་སྐབས་ཀྱི་ཕྱིན་དྲུག་ཀྱང་ཁ་ཅིག་འདི་རྗེས་ཐོབ་ཡིན་པས་དེས་མཚོན་ནས་མཐོང་རྩེ་བསྟན་པར་བཞེད་ཀྱང་ཕྱིན་དྲུག་སྤྲོས་པ་མི་དམིགས་པའི་རྣམ་པ་ཅན་ཡིན་པས་ངོ་བོར་བྱས་ཆོག་གོ། །གཉིས་པ་དེའི་བྱེད་པ་ནི། དེ་ལྟར་མཐོང་ལམ་རྩེ་མོ་དེ་རྫོགས་པའི་ཚེ། སྔར་བཤད་པའི་མཐོང་སྤང་
སུམ་ཅུ་རྩ་དྲུག་ལ་ཁམས་གསུམ་གྱིས་བསྡུས་པའི་མཐོང་སྤང་གི་རྟོག་པ་མངོན་གྱུར་བརྒྱ་དང་རྩ་བརྒྱད་ས་བོན་དང་བཅས་པ་སྤང་བར་འགྱུར་རོ། །དེ་ཡང་སྤྱིར་མངོན་གྱུར་སྤང་བས་བག་ལ་ཉལ་སྤང་བས་མ་ཁྱབ་ཀྱང་འདིར་འདས་ལམ་གྱི་སྤོང་པའི་སྐབས་ཡིན་པས་སྐྱོན་མེད་དོ། །སྤོང་ཚུལ་ནི་འདི་དག་དངོས་པོ་ལ་མངོན་པར་ཞེན་པའི་བློས་ཀུན་ནས་བསླང་བ་ཡིན་པས་དེའི་གཉེན་པོར་དངོས་པོ་ཐམས་ཅད་རང་བཞིན་མེད་པར་རྟོགས་ཏེ་གོམས་པར་བྱས་པས་རྒྱུ་དེ་བཟློག་པ་ན་རྟོག་པ་དེ་དག་རང་གི་དང་གིས་ལྡོག་པར་འགྱུར་རོ། །སྒོམ་སྤང་གི་རྟོག་པ་ལ་ཡང་སྤང་ཚུལ་འདི་ལྟར་རོ། །དེས་ན་རྟོག་པ་རྣམས་གསལ་བའི་དབྱེ་བ་ནི་མཐའ་ཡས་ཀྱང་འདི་དག་གི་རྩ་བ་བདེན་འཛིན་ཡིན་པས། དེའི་གཉེན་པོར་བདེན་མེད་རྟོགས་པ་ཉིད་སྒོམ་པ་ནི་གནད་ཀྱི་དོན་ནོ། །གཉིས་པ་དེ་ཇི་ལྟར་སྒོམ་ཚུལ་ནི། མཉམ་གཞག་ཏུ་སེངྒེ་རྣམ་པར་བསྒྱིངས་པའི་ཏིང་ངེ་འཛིན་ལ་སྙོམ་པར་འཇུག་ཅིང༌། དེའི་རྗེས་ཐོབ་ཏུ་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ལུགས་འབྱུང་དང་ལུགས་ཟློག་ལ་རྟོགས་པར་བྱེད་དེ། དེ་ལ་མཉམ་གཞག་སེངྒེ་རྣམ་བསྒྱིངས་ནི། འཕགས་སེང་གི་བཞེད་པ་ལྟར་ན། དྲུག་ཚན་དྲུག་གི་མཐོང་རྩེ་ཉིད་ཡིན་ལ། དག་ལྡན་ལྟར་ན། འོག་ཏུ་ཐོད་རྒལ་གྱི་སྦྱོར་བ་ལ་བཤད་པའི་སེངྒེ་རྣམ་བསྒྱིངས་དེ་ཡིན་པར་འཆད་དོ། །འདིར་
རྗེས་ཐོབ་རྟེན་འབྲེལ་ལ་རྟོག་པའི་སྐབས་སུ་རྟེན་འབྲེལ་གྱི་མཐའ་ཅུང་ཟད་དཔྱད་པ་ལ་བརྒྱད། སྤྱིའི་མཚན་ཉིད། སོ་སོའི་དབྱེ་བསྡུ། རྐྱེན་དུ་འབྱུང་ཚུལ། རང་རང་གི་བྱེད་ལས། ཚེ་དུ་ལ་རྫོགས་པ། ས་མཚུངས་པའི་རྣམ་བཞག །ཇི་ལྟར་སྒོམ་པའི་ཚུལ། དེ་ལྟར་བསྒོམས་པའི་ཕན་ཡོན་ནོ། །དང་པོ་སྤྱིའི་མཚན་ཉིད་ནི། རྣམ་པར་འབྱེད་པའི་མདོ་ལས། འདི་ཡོད་པས་འདི་འབྱུང༌། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་ཅེས་སོགས་བཀའ་སྩལ་པས་དོན་རིམ་པ་ལྟར། དང་པོ་ནི་ཕྱི་ནང་གི་དངོས་པོ་རྣམས་སྐྱེ་བ་ན་སུས་ཀྱང་བློ་སྔོན་དུ་བཏང་ནས་མ་བྱས་པར་སྤྱིར་རྒྱུ་རྐྱེན་ཡོད་ན་འབྲས་བུ་དེ་འབྱུང་བ་དང༌། གཉིས་པ་ནི་རྒྱུ་ཡོད་ཀྱང་རྐྱེན་རྟག་པ་ལས་མི་སྐྱེའི་མི་རྟག་པ་ལས་སྐྱེ་བའོ། །གསུམ་པ་ནི་རྐྱེན་ལས་སྐྱེ་ཞིང་མི་རྟག་ཀྱང་རྒྱུ་ཐམས་ཅད་ལས་འབྲས་བུ་ཐམས་ཅད་མི་འབྱུང་གི་རང་རང་གི་སྐྱེད་པའི་ནུས་པ་དང་ལྡན་པའི་རྗེས་སུ་མཐུན་པའི་རྒྱུ་ལས་སྐྱེ་བའོ། །འདིས་ནི་རྒྱུད་དུ་གཏོགས་མ་གཏོགས་གཉིས་ཀའི་རྟེན་འབྲེལ་ལས་བརྩམས་ནས་ཁྱད་པར་གསུམ་ལྡན་དུ་བསྟན་ཏོ། །དེ་ཡང་ཀུན་བཏུས་ལས། གཡོ་བ་མེད་པའི་རྐྱེན་ལས་བྱུང་བ་དང༌། མི་རྟག་པའི་རྐྱེན་ལས་བྱུང་བ་དང༌། ནུས་པའི་རྐྱེན་ལས་
བྱུང་བའི་ཕྱིར་རོ་ཞེས་སོ། །གཉིས་པ་སོ་སོའི་དབྱེ་བསྡུ་ལ། དབྱེ་བ་དང་བསྡུ་བའོ། །དང་པོ་དབྱེ་བ་ནི། མ་རིག་པ་ནས་རྒ་ཤིའི་བར་བཅུ་གཉིས་ཏེ། དེ་ཡང་ནང་གི་རྟེན་འབྲེལ་ལས་བརྩམ་པའོ། །འདི་དག་གི་རང་བཞིན་ནི། སྤྱིར་མ་རིག་པ་ལ་ཉོན་མོངས་ཅན་ཡིན་མིན་གཉིས་ཡོད་ཀྱང༌། གཉིས་པ་ནི་དགྲ་བཅོམ་པ་རྣམས་ལ་ཡང་མངོན་གྱུར་དུ་ལྡན་པས་སྲིད་པར་སྐྱེ་བ་ལེན་པའི་རྩ་བར་མི་འཐད་པས་དང་པོ་ཡིན་ལ། འདི་ལ་ཡང་ལས་རྒྱུ་འབྲས་དང་དེ་ཁོ་ན་ཉིད་ཀྱི་དོན་ལ་རྨོངས་པ་གཉིས་ཏེ། དེ་ཡང་འདུ་བྱེད་གསུམ་ཀུན་ནས་སློང་བའི་རྒྱུར་གྱུར་པའོ། །འདིས་འདུ་བྱེད་ཇི་ལྟར་ཀུན་ཏུ་སློང་བ་ནི། རྟེན་འབྲེལ་ཙམ་གྱི་ཕུང་པོ་འདིའི་རང་བཞིན་མ་ཤེས་པས་རྨོངས་པ་ན་བདག་ཏུ་འཛིན་ལ་དེ་ལས་ཀྱང་བདག་ལ་ཆགས་པར་འགྱུར་བས། གང་གི་ཚེ་བདག་ལ་ལྷག་པར་ཆགས་པ་དེའི་ཚེ་བདག་ལ་བདེ་བར་འདོད་ཅིང་སྡུག་བསྔལ་བར་མི་འདོད་དོ། །དེ་ལ་ཡང་བདག་ཚེ་འདི་ཙམ་ལ་བདེ་བར་འདོད་པས་ནི། མི་དགེ་བ་ལ་འཇུག་པས་ངན་འགྲོའི་རྒྱུ་བསོད་ནམས་མ་ཡིན་པ་དང༌། ཚེ་ཕྱི་མ་ལ་བདེ་བར་འདོད་པས་ནི། དགེ་བ་བཅུ་ལ་འཇུག་པས་ལྷ་མིའི་རྒྱུ་བསོད་ནམས་དང༌། བདེ་སྡུག་གི་འགྱུར་བའི་སྡུག་བསྔལ་དང་བྲལ་བ་གཙོ་བོར་བཏང་སྙོམས་ཀྱི་བདེ་བ་ལ་སྲེད་པས་ནི། བསམ་གཏན་དང་གཟུགས་མེད་ལ་འཇུག་པས་ཁམས་གོང་མའི་རྒྱུ་མི་གཡོ་
བའི་ལས་མངོན་པར་འདུ་བྱེད་དེ། དེ་ལྟར་ན་ལས་གསུམ་མངོན་པར་འདུ་བྱེད་པའི་རྩ་བ་ནི་མ་རིག་པའོ། །དེ་ལྟར་མ་རིག་པ་གང་གིས་ལས་གང་སློང་བ་ནི། ཀུན་བཏུས་ལས། རྨོངས་པ་ནི་གཉིས་ཏེ། འབྲས་བུ་རྣམ་པར་སྨིན་པ་ལ་རྨོངས་པ་དང༌། དེ་ཁོ་ནའི་དོན་ལ་རྨོངས་པའོ། །འབྲས་བུ་རྣམ་པར་སྨིན་པ་ལ་རྨོངས་པ་ལས་ནི་མི་དགེ་བའི་འདུ་བྱེད་རྣམས་འབྱུང་ངོ༌། དེ་ཁོ་ནའི་དོན་ལ་རྨོངས་པ་ལས་ནི་བསོད་ནམས་དང་མི་གཡོ་བའི་འདུ་བྱེད་རྣམས་སོ། །ཞེས་སོ། །དེ་ལྟར་གསུངས་པ་ཡང་དུས་ཀྱི་ཀུན་སློང་ལ་དགོངས་ཀྱི་རྒྱུའི་ཀུན་སློང་ནི་དེ་ཁོ་ན་ཉིད་ལ་རྨོངས་པ་གཅིག་པུ་སྟེ་སྔར་བཤད་པ་ལྟར་རོ། །དེའི་ཕྱིར་ཡན་ལག་བཅུ་གཉིས་ཀྱི་དང་པོ་ཡང་དེ་ཁོ་ནའོ། །འདི་ཡང་སྲིད་འཕེན་བྱེད་ཡིན་ཞིང་བདེན་པ་མཐོང་བ་ལ་འཕེན་བྱེད་མེད་པར་རྟེན་འབྲེལ་མདོ་འགྲེལ་ལས་གསུངས་པས་ཐོང་སྤང་གི་མ་རིག་པར་དོན་གསང་བཞེད་དོ། །འོན་ཀྱང་འཐད་པར་མི་སྣང་སྟེ། མཐོང་སྤང་ནི་གྲུབ་མཐས་བློ་བསྒྱུར་བ་ལས་བྱུང་བའི་ཀུན་བརྟགས་ལ་ཐོགས་མེད་ཀྱིས་བཤད་ལ་བྱ་དང་རི་དྭགས་སོགས་གྲུབ་མཐས་བློ་ཡེ་མ་བསླད་དེས་ཀྱང་མ་རིག་པས་བསླད་པའི་ལས་གསོག་པ་དང༌། མ་རིག་པ་འདི་ནི་སྲིད་པའི་ཉེས་པ་རྣམས་ཀྱི་རྩ་བ་ཡིན་ལ། དེ་ཡང་ཐོགས་མེད་སྐུ་མཆེད་ཀྱིས་ཉོན་ཡིད་འཁོར་གྱི་མ་རིག་པ་ཉིད་ལ་བཞེད་པའི་ཕྱིར་རོ། །དེས་ན་
སྒོམ་སྤང་ཏུ་རིགས་སོ། །འོ་ན་འཕགས་པ་ལ་འཕེན་བྱེད་ཀྱི་མ་རིག་པ་ཡོད་པར་ཐལ། ཉོན་ཡིད་ཡོད་པའི་ཕྱིར་ཞེ་ན། འཕེན་བྱེད་ཀྱི་མ་རིག་པ་ཉོན་ཡིད་ཀྱི་འཁོར་ཡིན་པར་འདོད་ཀྱི། དེ་ལ་སྔ་མས་ཁྱབ་པར་མ་སྨྲས་ན་ཅིའི་ཕྱིར་ཀླན་ཀར་འགྱུར། གལ་ཏེ་སྒོམ་སྤང་ཡིན་པས་འཕགས་པ་ལ་ཡོད་དོ་ཞེ་ན། སྒོམ་སྤང་ཡིན་ཀྱང་འཕགས་པ་ལ་མེད་པ་ནི་དུ་མ་ཞིག་བཤད་དེ། དཔེར་ན་ཡུལ་ལ་དམིགས་པའི་ཞེ་སྡང་དྲག་པོ་བཞིན་ནོ། །གཉིས་པ་འདུ་བྱེད་ནི། མ་རིག་པས་བསླང་བའི་ལས་ཏེ། འདི་ལ་གསུམ་མོ། །གསུམ་པ་རྣམ་ཤེས་ནི། ལས་དེས་བསླང་བའི་སེམས་རྒྱུད་དེ། འདི་ལ་ཡང་ལས་བསགས་དུས་ཀྱི་དེ་རྒྱུ་དུས་དང་སྐྱེ་གནས་སུ་ཉིད་མཚམས་སྦྱར་བ་དེ་འབྲས་དུས་ཀྱི་རྣམ་ཤེས་སོ། །དེ་ཡང་ཀུན་གཞི་བཞེད་པ་རྣམས་ཀྱི་ལུགས་ཀྱིས་དེ་ཡིན་ལ། དེ་ལས་གཞན་པ་རྣམས་ལྟར་ན་ཡིད་ཤེས་སོ། །བཞི་པ་མིང་གཟུགས་ནི། ཚོར་སོགས་བཞིའི་མིང་དང༌། ནུར་ནུར་པོ་སོགས་ཀྱི་གཟུགས་སོ། །ལྔ་པ་སྐྱེ་མཆེད་ནི། །མིང་གཟུགས་འཕེལ་བས་མིག་ནས་ཡིད་ཀྱི་བར་རྫོགས་པ་སྟེ་མིང་གཟུགས་ཀྱི་ཚེ་དབང་པོ་དང་པོ་བཞི་མེད་དོ། །དྲུག་པ་རེག་པ་ནི། ཡུལ་དབང་རྣམ་ཤེས་གསུམ་འདུས་པ་ལས་བྱུང་བ་ཡུལ་ཡིད་དུ་འོང་བ་སོགས་གསུམ་གཅོད་པ་སྟེ་རྟེན་གྱི་སྒོ་ནས་དྲུག་གོ། །བདུན་པ་ཚོར་བ་ནི། རེག་པས་ཡུལ་གསུམ་
བཅད་པ་ལས་སིམ་གདུང་སོགས་ཀྱི་ངོ་བོར་སྐྱེས་པའི་མྱོང་བ་སྟེ་སྔར་ལྟར་དྲུག་གོ། །བརྒྱད་པ་སྲེད་པ་ནི། ཚོར་བ་གསུམ་ཉམས་སུ་མྱོང་བའི་རྐྱེན་ཅན་གྱི་སྲེད་པ་སྟེ། །སྡུག་བསྔལ་གྱིས་གཟིར་བ་ན་བདེ་བ་ལ་འདུན་པ་འདོད་སྲེད། བསམ་གཏན་དང་པོ་གསུམ་ན་བདེ་བ་དང་བཞི་པ་ན་བཏང་སྙོམས་ལ་འདུན་པ་གཟུགས་སྲེད། གཟུགས་མེད་བཞིན་བཏང་སྙོམས་ལ་འདུན་པ་གཟུགས་མེད་ཀྱི་སྲེད་པ་གསུམ་མོ། །དགུ་པ་ལེན་པ་ནི། སྲེད་པ་དེ་ཉིད་ཤས་ཆེར་འཕེལ་བའོ། །དེ་ཡང་ཡུལ་གྱི་སྒོ་ནས་བཞི་སྟེ། དེ་ལ་འདོད་པ་ཉེ་བར་ལེན་པ་ནི། འདོད་ཡོན་ལྔ་དང༌། ལྟ་བ་ཉེ་བར་ལེན་པ་ནི་ལྟ་ངན་རེ་གཉིས་དང༌། ཚུལ་ཞུགས་ཉེ་བར་ལེན་པ་ནི། འཆལ་ཁྲིམས་སྤོང་བ་དང༌། ཁྱི་དང་བ་ལང་སོགས་ཀྱི་བརྟུལ་ཞུགས་དང༌། བདག་སྨྲ་ཡོད་པས་བདག་སྨྲ་སྟེ་ལུས་སམ་འདིས་བདག་གོ་ཞེས་སྨྲ་བ་དག་སྨྲ་སྟེ་བདག་ལྟ་དང༌། ངའོ་སྙམ་པའི་ང་རྒྱལ་ལ་འདུན་ཞིང་ཆགས་པའོ། །བཅུ་པ་སྲིད་པ་ནི། ལེན་པའི་མཐུས་ཡང་སྲིད་ཀྱི་སྐྱེ་བ་འགྲུབ་ནུས་སུ་རྟས་པར་བྱས་པའི་ལས་སོ། །འདི་ལ་འགྲོ་བ་དྲུག་དང་བར་དོ་ལས་ཀྱི་སྲིད་པ་དང་བདུན་བཤད་ཀྱང་དང་པོ་དྲུག་ཞར་བྱུང་ཙམ་མོ། །བཅུ་གཅིག་པ་སྐྱེ་བ་ནི། ལས་དེའི་མཐུས་སྐྱེ་གནས་སུ་ཉིང་མཚམས་སྦྱར་བའི་ཕུང་པོ་ལྔ་སྟེ་སྐྱེ་གནས་བཞིར་དབྱེའོ། །བཅུ་གཉིས་པ་རྒ་ཤི་ནི། སྐྱེས་བ་ནས་
བཟུང་སྟེ་ན་ཚོད་གཞན་དུ་འགྱུར་བ་དང༌། རིས་མཐུན་འདོར་བ་སྟེ་ལུས་འགྱུར་བ་སོགས་དང་དུས་དུས་མིན་དུ་འཆི་བར་དབྱེའོ། །རྒ་ཤི་གཉིས་གཅིག་ཏུ་བཞག་པ་ནི། རྒ་བ་མེད་པར་འཆི་བ་འབྱུང་བས་ཡན་ལག་རིམ་ཅན་དུ་མ་ངེས་པའི་རྒྱུ་མཚན་གྱིས་ཡིན་ལ། མྱ་ངན་དང་སྨྲེ་སྔགས་འདོན་པ། སྡུག་བསྔལ་བ་ཡིད་མི་བདེ་བ། འཁྲུགས་པ་རྣམས་ཀྱང་གོ་རིམ་མ་ངེས་ཤིང་འགའ་ཞིག་ཡིད་བདེ་བཞིན་དུ་འཆི་བས་ཡན་ལག་ཏུ་མ་བཞག་ཅིང་ཞར་བྱུང་དུ་གསུངས་པ་ནི། གཞན་ལ་ཉེས་དམིགས་བསྟན་ནས་སྐྱོ་བ་བསྐྱེད་པའི་ཆེད་དོ། །གཉིས་པ་བསྡུ་བ་ལ་གཉིས། ཡན་ལག་མདོར་བསྡུ་བ་དང༌། ཀུན་ནས་ཉོན་མོངས་པར་བསྡུ་བའོ། །དང་པོ་ཡན་ལག་མདོར་བསྡུས་ན་འཕེན་བྱེད་དང༌། འཕང་བ་དང༌། མངོར་པར་འགྲུབ་བྱེད་དང༌། མངོན་པར་འགྲུབ་པའི་ཡན་ལག་སྟེ་བཞིའོ། །དེ་ལ་དང་པོ་ནི། ཡན་ལག་དང་པོ་གསུམ་སྟེ་གང་གིས་ན་མ་རིག་པའི་རྐྱེན་ཅན་གྱི་འདུ་བྱེད་ཀྱིས་སོ། །ཇི་ལྟར་ན་རྣམ་ཤས་ལ་ལས་ཀྱི་བག་ཆགས་བགོས་པའི་ཚུལ་གྱིས་སོ། །གཉིས་པ་འཕང་བ་ནི། གང་འཕང་ན་མིང་གཟུགས་ནས་ཚོར་བའི་བར་བཞིའོ། །གསུམ་པ་འགྲུབ་བྱེད་ནི། ཡན་ལག་གསུམ་སྟེ། གང་གིས་ན་སྲེད་པའི་རྐྱེན་ཅན་གྱི་ལན་པས་སོ། །ཇི་ལྟར་ན་རྣམ་ཤེས་ལ་ལས་ཀྱི་བག་ཆགས་ཡོད་པ་རྣམས་སྲིད་པར་
བྱས་པའི་ཚུལ་གྱིས་སོ། །བཞི་པ་ནི་གང ་མངོན་པར་འགྲུབ་ན་སྐྱེ་བ་དང་རྒ་ཤིའོ། །འདི་དག་ཀྱང་སྐྱེ་བ་ལེན་པའི་རྒྱུ་འབྲས་སྐོར་གཅིག་ལ་སྦྱར་ན། འཕེན་བྱེད་མ་རིག་པས་ཀུན་ནས་བསླང་བའི་ལས་དེ་ཉིད་སྲེད་ལེན་གྱིས་གསོས་བཏབ་ནས་མིང་གཟུགས་སོགས་འགྲུབ་རུང་བྱས་པ་ནི་སྲིད་པ་ཡིན་ལ། ཕྱི་མ་ལ་འབྲས་དུས་ཀྱི་རྣམ་ཤེས་སྐྱེས་པ་ནི་སྐྱེ་བ་དང༌། མིང་གཟུགས་ནས་ཚོར་བའི་བར་དུ་འགྱུར་བ་ནི་རྒ་ཤི་ཡིན་ཏེ་སྔར་འཕངས་པ་དེ་ཉིད་གྲུབ་པའི་སྐབས་སོ། །འདི་ནི་སློབ་དཔོན་ཐོགས་མེད་ཀྱིས་སེམས་ཅན་བྱེ་བྲག་པའི་སྐྱེ་བ་ལེན་ཚུལ་སྟོན་པ་ན། སྲེད་སོགས་མིང་གཟུགས་ཀྱི་གོང་དུ་དྲངས་ནས་མདོའི་དགོངས་པ་བླང་བའི་དོན་ལྟར་ཡིན་ལ་མདོ་ནས་ཡན་ལག་བཅུ་གཉིས་སྔ་མ་ལས་ཕྱི་མ་འཇུག་པར་བསྟན་པ་ནི། སྤྱི་ཙམ་ནས་འཁོར་བར་འཇུག་པ་ན་སྔོན་གྱི་མ་རིག་པས་ལས་བསགས་པ་ལས་མིང་གཟུགས་ལ་སོགས་པའི་ལུས་གྲུབ་ཅིང་དེ་ལས་ཡང་སྲེད་སོགས་ཀྱི་ལས་ཉོན་སྐྱེས་ནས་ཡང་སྲིད་པར་སྐྱེ་བ་སོགས་སུ་འགྱུར་བར་བསྟན་གྱི། སེམས་ཅན་བྱེ་བྲག་པ་གཅིག་གི་མ་རིག་པ་ནས་རྒ་ཤིའི་བར་གྱི་སྐྱེ་བ་ལེན་ཚུལ་ལ་དགོངས་པ་མིན་ནོ། །གཉིས་པ་ཀུན་ནས་ཉོན་མོངས་པར་བསྡུ་བ་ནི། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་བདུན་
ནི་སྡུག་བསྔལ་ཡིན། །ཞེས་དབུ་མ་རྟེན་འབྲེལ་སྙིང་པོ་ལས་བཤད་པ་བཞིན་ནོ། །གསུམ་པ་རྐྱེན་དུ་འགྱུར་ཚུལ་ནི། ཀུན་བཏུས་ལས། ཡན་ལག་སྔ་མ་རྣམས་ཀྱིས་ཕྱི་མ་ལ་ཅི་རིགས་པར་རྐྱེན་བཞི་བྱེད་པར་གསུངས་ཏེ། དེ་ཡང་རིག་པས་རིག་པ་ལ་རྐྱེན་བཞི་དང༌། རིག་པས་གཟུགས་ཅན་ལ་བདག་རྐྱེན་གཅིག་པུ་དང༌། གཟུགས་ཅན་གྱིས་རིག་པ་ལ་དེ་དང་དམིགས་རྐྱེན་གཉིས་དང༌། གཟུགས་ཅན་གྱིས་གཟུགས་ཅན་ལ་རྒྱུ་དང་བདག་རྐྱེན་གཉིས་བྱེད་དོ། །དང་པོ་ལ་མ་རིག་པས་འདུ་བྱེད་སེམས་པའི་རྐྱེན་བྱེད་ཚུལ་ལ་མཚོན་ན་མ་རིག་པའི་བག་ཆགས་ལས་འདུ་བྱེད་སྐྱེ་བ་དང༌། དེའི་འཕེན་པའི་ཐུགས་ཀྱིས་དེ་རྒྱུན་ཆགས་པར་འཇུག་པ་དང༌། རྨོངས་དུས་ན་མཆོག་མ་ཡིན་པ་ལ་དེར་ཡིད་ལ་བྱེད་པར་དམིགས་པ་འཇུག་པ་དང༌། དེའི་དབང་གི་དེ་དང་མཚུངས་ལྡན་དུ་འབྱུང་བ་རྣམས་དམིགས་པ་ལ་ཕྱིན་ཅི་ལོག་ཏུ་བྱེད་པས། རིམ་པ་ལྟར་རྒྱུའི་ནས་བདག་རྐྱེན་གྱི་བར་བྱེད་དེ་གཞན་ལ་ཡང་དེ་ལྟར་སྦྱར་རོ། །ཐེག་བསྡུས་ལས། བདག་རྐྱེན་གཅིག་པུ་བྱེད་པར་གསུངས་པ་དང་མི་འགལ་ཏེ། དེ་ནི་ངེས་པ་ལ་དགོངས་ལ་ཀུན་བཏུས་ཀྱི་སྲིད་པ་ལ་དགོངས་པས་སོ། །ས་ལས་རྒྱུ་རྐྱེན་མ་གཏོགས་པ་གསུམ་བྱེད་པར་གསུངས་པ་དང་ཡང་མི་འགལ་ཏེ། དེ་ནི་དོན་དམ་པའི་རྒྱུ་རྐྱེན་ཀུན་གཞི་ཉིད་ཡིན་པ་ལ་དགོངས་ལ། ཀུན་
བཏུས་ལས། ཐ་སྙད་པའི་རྒྱུ་རྐྱེན་གྱི་དབང་དུ་མཛད་པས་སོ། །བཞི་པ་བྱེད་ལས་ལ་འདྲ་བའི་བྱེད་ལས་དང༌། མི་འདྲ་བའི་བྱེད་ལས་གཉིས་ལས། དང་པོ་འདྲ་བའི་བྱེད་ལས་ནི། སྔ་མ་སྔ་མས་ཕྱི་མ་ཕྱི་མ་སྐྱེད་པའོ། །གཉིས་པ་མི་འདྲ་བའི་བྱེད་ལས་ནི། དབུས་མཐའ་ལས། སྒྲིབ་པའི་ཕྱིར་དང་འདེབས་པའི་ཕྱིར། །འཁྲིད་པའི་ཕྱིར་དང་ཀུན་འཛིན་ཕྱིར། །རྫོགས་བྱེད་ཕྱིར་དང་གསུམ་གཅོད་ཕྱིར། །ཉེ་བར་སྤྱོད་ཕྱིར་སྡུད་པའི་ཕྱིར། །སྦྱོར་བའི་ཕྱིར་དང་མངོན་དུའི་ཕྱིར། །བུ་ཁ་ཕྱིར་ནི་འགྲོ་ཉོན་མོངས། །ཞེས་གསུངས་ཏེ། ཐ་མ་གཉིས་སྐྱེ་བའི་རྒྱུར་བསྡུས་ནས་གཅིག་དང༌། གཞན་རྣམས་རེ་རེ་ཞིང་སྦྱར་རོ། །ལྔ་པ་ཚེ་དུ་ལ་རྫོགས་པ་ནི། སྤྱིར་སྐྱེ་གནས་བཞི་ལས་རྫུས་སྐྱེས་ནི། དབང་པོ་དང་ཡན་ལག་ཉིད་ལག་རྣམས་སྐྱེ་ན་ཡང་ཅིག་ཆར་འགྲུབ་ཅིང༌། འཆི་བ་ན་ཡང་དབང་པོ་རྣམས་ཅིག་ཆར་འགགས་ལ། གཞན་གསུམ་ནི་གཉིས་ཀ་ཡང་རིམ་གྱིས་སོ། །དེས་ན་མིང་གཟུགས་སོགས་རིམ་གྱིས་གྲུབ་པ་རྫུས་སྐྱེས་ལ་དོར་རོ། །འདོད་གཟུགས་ན་ནི་ཡན་ལག་བཅུ་གཉིས་ཚང་བར་ཡོད་དོ། །གཟུགས་ན་འདུ་བྱེད་རྙིང་པ་དང་དེངས་བའི་རྒ་བ་ཡོད་ཅིང་གཞན་ཡང་ཡོད་པས་སོ། །གཟུགས་མེད་ན་ཡན་ལག་བཞི་པའི་ཕྱེད་དང༌། ལྔ་པའི་སྐྱེ་མཆེད་ལྔ་མེད་ལ་གཞན་ཡོད་དུ་རུང་ངོ༌།
དེ་ལ་མྱུར་ན་ཚེ་གཉིས་ལ་བཅུ་གཉིས་རྫོགས་སྲིད་དེ། དཔེར་ན་འདོད་པའི་མི་ཞིག་འདོད་ལྷར་སྐྱེ་བའི་ལས་མ་རིག་པའི་སྟོབས་ཀྱིས་རྣམ་ཤེས་ལ་བསགས་ནས་འཆི་ཁ་ཚུན་ལ་སྲེད་ལེན་གྱིས་གསོས་པས་སྲིད་པ་ལས་ནུས་ལྡན་དུ་བྱས་ན་ཚེ་དེ་ལ་དྲུག་དང༌། ཕྱི་མ་ལ་འབྲས་དུས་ཀྱི་རྣམ་ཤེས་དང་བཅས་པའི་ཡན་ལག་བདུན་འགྲུབ་པས་སོ། །བར་དོའི་ཚེ་ཟུར་དུ་མ་བརྩིས་སོ། །བུ་ལ་ཡང་ཚེ་གསུམ་ལས་རིང་བར་མི་སྲེད་དེ། འཕེན་བྱེད་གསུམ་ཚེ་གཅིག་དང༌། འགྲུབ་བྱེད་གསུམ་ཡང་གཅིག་ལ་ཚང་བར་འོང་ཞིང་དེ་དང་སྐྱེ་རྒ་གཉིས་བར་མ་ཆད་དུ་འོང་ལ་འཕེན་བྱེད་དང་འགྲུབ་བྱེད་ཀྱི་བར་དུ་ཚེ་དུ་མས་ཆོད་པ་སྲིད་པས་སོ། །དེའི་ཕྱིར་རིང་བའི་ཚེས་ངེས་ཤེ་ན། །འཕེན་འགྲུབ་ཀྱི་བར་དུ་ཚེ་དུ་མས་ཆོད་ཀྱང་རྟེན་འབྲེལ་གཞན་གྱི་ཚེ་ཡིན་པས་ཉེས་པ་མེད་དོ། །དྲུག་པ་ས་མཚུངས་པའི་རྣམ་བཞག་ནི། རྒྱུ་འབྲས་ཡན་ལག་འདི་དག་ས་གཅིག་པའམ་ཐ་དད་པ་གང་ཞེ་ན། གཉིས་ཀ་མ་ངེས་སོ། །འདི་ཇི་ལྟར་ཞེ་ན། ས་རི་གསུམ་སྟེ་འཆི་ས་སྐྱེ་ས་དེ་ལས་གཞན་པའི་སའོ། །དེ་ལ་ས་འོག་མའི་རྟེན་ལ་ནི་ས་དེ་དང་གོང་སར་སྐྱེ་བའི་ལས་གསོགས་པ་ཡོད་ལ་གོང་མའི་རྟེན་ལ་འོག་མར་སྐྱེ་བའི་ལས་གསོགས་པ་མེད་དོ། །རང་སའི་རྟེན་ལ་ས་དེར་སྐྱེ་བའི་ལས་གསོགས་པ་ཡང་ཡོད་དེ། ཡན་ལག་དང་པོ་དང་རྒྱུ་དུས་ཀྱི་རྣམ་ཤེས་ནི་ལས་གང་དུ་བསགས་པའི་ས་དེར་གཏོགས་ཏེ། མ་རིག་
པ་ནི་ཉོན་ཡིད་ཀྱི་འཁོར་དང་རྣམ་ཤེས་ཀུན་གཞི་ཡིན་ལ་རྟེན་དེའི་རྣམ་ཤེས་དེ་གཉིས་ཀྱང་ས་དེ་པ་ཡིན་པས་སོ། །གལ་ཏེ་འདོད་པ་ལ་ཆགས་བྲལ་གྱི་བྱིས་པ་ཁམས་གོང་དུ་སྐྱེ་བའི་ལས་གསོགས་པ་ན་འདོད་པའི་ཉོན་མོངས་མེད་པས་དེའི་མ་རིག་པ་འདོད་པར་མི་གཏོགས་ཤེ་ན། །འདི་ལ་མཛོད་པ་རྣམས་དེའི་རྒྱུད་ལ་གོང་མའི་ཉོན་མོངས་ཡོད་པས་དེས་ཀུན་ནས་བསླང་བའི་ལས་གསོགས་པ་ན་འདོད་ཀྱང་འདིར་ནི་ཉོན་ཡིད་ཁས་ལེན་ལ་དེ་བྱིས་ལམ་གྱིས་གཞོམ་མི་ནུས་ཤིང་འདོད་པར་གཏོགས་པས་སྐྱོན་མེད་དོ། །གལ་ཏེ་ས་གཞན་གྱི་མ་རིག་པས་ས་གཞན་གྱི་ལས་ཀུན་ནས་སློང་ན་གོང་སའི་རྟེན་ལ་འོག་སར་སྐྱེ་བའི་ལས་ཅི་སྟེ་མི་སོག་ཅེ་ན། རྟེན་དེ་ལ་འོག་མར་སྐྱེ་བའི་ཉོན་མོངས་ཐམས་ཅད་མེད་པ་དང༌། ས་ཐ་དད་ཀྱི་ས་བཅད་པའི་རྟེན་ཁྱད་པར་ཅན་ཐོབ་པས་འོག་སའི་དམན་ལས་གསོགས་པ་ལ་མི་གུས་པས་སོ། །འདུ་བྱེད་ནི་སྐྱེ་སར་གཏོགས་ཏེ་ས་གཞན་གྱི་ལས་ཀྱིས་ས་གཞན་གྱི་ཕུང་པོ་འཕེན་མི་ནུས་པས་སོ། །འབྲས་དུས་ཀྱི་རྣམ་ཤེས་དང་བཅས་པ་བདུན་ཡང་སྐྱེ་ས་ཁོ་ནར་གཏོགས་སོ། །སྲེད་ལེན་ལ་དོན་གསལ་ལས་སྐྱེ་སར་གཏོགས་པར་བཤད་ཀྱང༌། འོག་ས་ནས་གོང་སར་སྐྱེ་བ་ལ་ས་གོང་མའི་ཉོན་མོངས་མངོན་དུ་རྒྱུ་ཡོད་པས་རིགས་སུ་ཆུག་ཀྱང༌། གོང་སའི་སྐྱེ་སྲིད་ཀྱི་རྟེན་ལ་འོག་སའི་ཉོན་མོངས་མངོན་དུ་གྱུར་ཡོད་པ་ཆོས་མངོན་པར་
སྤྱི་ལུགས་དང་མི་མཐུན་ཞིང་རིགས་པས་མི་འཐོབ་པས་གོང་མ་ནས་འོག་མར་སྐྱེ་བ་མི་འགྲིག་གོ། །འོན་ཀྱང་སྲིད་པ་ནི་ཁམས་གོང་མ་ནས་འདོད་པའི་བདེ་འགྲོ་ངན་འགྲོ་གཉིས་ཀར་སྐྱེ་ཡང་སྐྱེ་སར་གཏོགས་སོ། །ངན་འགྲོར་སྐྱེ་བ་ལ་ནི་དེའི་ཚེ་མི་དགེ་བའི་བག་ལ་ཉལ་ཙམ་མོ། །གལ་ཏེ་བདེན་པ་མཐོང་བ་ལ་འཕེན་པ་མེད་ན་ཕྱིར་མི་འོང་སྤེལ་མ་སྒོམ་པ་དེས་གནས་གཙང་མར་སྐྱེ་བ་མི་རིགས་ཏེ། དེར་སྐྱེ་བ་ལ་བསམ་གཏན་ཟག་མེད་སྐྱེད་དགོས་ལ་སོ་སྐྱེའི་དུས་སུ་ཟག་མེད་མ་ཐོབ་ཅིང་འཕགས་པའི་ཚེ་ལས་མི་བསགས་པའི་ཕྱིར་ཞེ་ན། དེ་ལ་འབྲས་བུ་ཆེར་སྐྱེ་བའི་ལས་ཐོག་མེད་ནས་ཡོད་ལ། དེ་སྤེལ་མས་གནས་གཙང་དུ་སྐྱེ་བའི་རྒྱུར་བསྒྱུར་བས་ཉེས་པ་མེད་ཅེས་དོན་གསུང་ལས་འཆད་པ་ལྟར་ཁས་བླང་ལ། འཕགས་པ་ཆགས་བཅས་གཉིས་འདོད་པར་སྐྱེ་བ་ལ་ཡང་ལས་བསགས་པ་ནི་སོ་སྐྱེའི་དུས་ཡིན་པར་རིག་པར་བྱའོ། །མཛོད་པ་ལྟར་ན་ས་དེ་དང་དེར་སྐྱེ་བའི་ཉོན་མོངས་མ་སྤངས་ན་འཕགས་པས་ཀྱང་དེས་ཀུན་ནས་བསླང་བའི་ལས་འཕེན་པར་འདོད་པ་འདྲའོ། །བདུན་པ་ཇི་ལྟར་སྒོམ་པའི་ཚུལ་ནི། ལུགས་འབྱུང་ངང་ལུགས་ཟློག་སྒོམ་པའོ། །དེ་གཉིས་གང་ན། མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་དང་སོགས་པས། སྐྱེ་བའི་རྐྱེན་གྱི་རྒ་ཤི་དང༌། མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་འབྱུང་བ་ལ་སོ་སོར་རྟོག་
ཅིང་འདི་ལྟར་སྡུག་བསྔལ་གྱི་ཕུང་པོ་འབའ་ཞིག་པོ་འདི་འབྱུང་ངོ་ཞེས་རྟོག་པ་དང༌། སྐྱེ་བ་འགགས་པས་རྒ་ཤི་འགག་སོགས་ནས་མ་རིག་པ་འགགས་པས་འདུ་བྱེད་འགག་གོ་ཞེས་པའི་བར་ལ་སོ་སོར་རྟོག་ཅིང་དེ་ལྟར་ན་སྡུག་བསྔལ་གྱི་ཕུང་པོ་འབའ་ཞིག་པ་འདི་འགག་གོ་ཞེས་རྟོག་པ་གཉིས་སོ། །འདི་གཉིས་ནི་ཀུན་ཉོན་གྱི་ལུགས་མཐུན་དང་རྣམ་བྱང་གི་ལུགས་བཟློག་གཉིས་ཡིན་ལ་དེ་གཉིས་ཀྱིས་མཚོན་ནས་རྣམ་བྱང་གི་ལུགས་མཐུན་དང་ཀུན་ཉོན་གྱི་ལུགས་བཟློག་ཀྱང་ཤེས་པར་བྱའོ། །ཅིའི་ཕྱིར་ལུགས་བཟློག་དང་ལུགས་མཐུན་ཡིན་ཞེ་ན། དང་པོར་སྐྱེ་བ་ཕྱིས་དང༌། ཕྱིས་སྐྱེ་བ་དང་པོར་དང་དེ་ལས་བཟློག་ནས་དཔྱད་པས་སོ། །དེ་ལྟར་ཀུན་ཉོན་དང་རྣམ་བྱང་གི་ལུགས་འབྱུང་ལྡོག་བཞི་བཞག་པ་ནི་བདེན་པའི་ཚུལ་བསྟན་པའི་དབང་དུ་བྱས་པ་ཡིན་ཏེ། སྐྱེ་རྒ་གཉིས་ལས་ཉོན་གྱི་རྣམ་སྨིན་མཐར་ཐུག་པ་ཡིན་པས་སྡུག་བདེན་ཡིན་པའི་ཕྱིར། །རྒ་ཤི་ནས་འབྱུང་བ་དང་དེ་འགག་པར་རྟོག་པ་ནི་སྡུག་བདེན་དང་དེ་འགག་པའི་འགོག་བདེན་ལ་མཁས་པར་བྱ་བའི་ཕྱིར་ཡིན་ལ། མ་རིག་པ་ནས་འབྱུང་བ་དང་དེ་ནས་འགོག་པར་རྟོག་པ་ནི་ཀུན་འབྱུང་དང་ལམ་ལ་མཁས་པའི་ཕྱིར་ཡིན་ཏེ། །མ་རིག་པ་དང་འདུ་བྱེད་གཉིས་ནི་ཀུན་འབྱུང་བདེན་པ་ཡིན་ལ། དེ་འགོག་བྱེད་ནི་ལ་མ་ཡིན་པའི་ཕྱིར་རོ། །བརྒྱད་པ་དེ་
ལྟར་བསྒོམ་པའི་ཕན་ཡོན་ནི། །འཁོར་བར་འཇུག་ལྡོག་ལ་མཁས་ཤིང་དེ་ལ་འདོར་ལེན་བྱས་པས་ལེན་པ་མེད་པར་མྱ་ངན་ལས་འདའ་བའོ། །དེ་ལྟ་བུའི་ཡན་ལག་བཅུ་གཉིས་ནི་སྐྱེ་འགག་གི་རྫས་སུ་གྲུབ་པའི་བདག་ཉིད་དུ་དངོས་སྨྲ་བ་རྣམས་འདོད་ལ། འདིའི་ངང་ཚུལ་སྤྲོས་པའི་མཐའ་བརྒྱད་ཀྱིས་དབེན་པར་འཕགས་མཆོག་ཀླུ་སྒྲུབ་ཡབ་སྲས་ཀྱི་གཞུང་ལས་འོང་བ་ཡིན་ནོ། །གསུམ་པ་སྒོམ་ལམ་རྩེ་མོ་བཤད་པ་ལ་གསུམ། །རྟེན་སྒོམ་ལམ། སྤང་བྱ་རྣམ་རྟོག །བརྟེན་པ་ཡོན་ཏན་ནོ། །དང་པོ་རྟེན་སྒོམ་ལམ་ལ། དངོས་དང་རྩོད་སྤང་གཉིས། དང་པོ་ལ། སྦྱོར་བ་སེངྒེ་རྣམ་བསྒྱིང་དང༌། དངོས་གཞི་ཐོད་རྒལ་གྱི་ཏིང་འཛིན་གཉིས། དང་པོ་སེངྒེ་རྣམ་བསྒྱིང་ནི། །སྙོམས་འཇུག་དགུ་ལ་ལུགས་མཐུན་དུ་ཡར་སོང་ཞིང་ལུགས་མི་མཐུན་དུ་མར་འོང་བའི་སེངྒེ་རྣམ་བསྒྱིང་ཕྲུགས་གཉིས་སོ། །འདི་ལ་འགོག་པ་ལ་ཞུགས་ཐེབ་གཅིག་ལས་མེད་པས་གནས་བཅུ་བདུན་ནོ། །གཉིས་པ་དངོས་གཞི་ལ་སོང་བ་དང་འོང་བ་གཉིས། དང་པོ་ལ་འགོག་པ་དང་མ་སྤེལ་བ་དང་སྤེལ་བའོ། །དང་པོ་ནི་བསམ་གཏན་དང་པོ་ནས་འགོག་བའི་བར་མཐར་ཆགས་སུ་འགྲོ་བ་སྟེ་འདི་ལ་གནས་དགུའོ། །གཉིས་པ་འགོག་པ་དང་སྤེལ་བ་ནི། སྙོམས་འཇུག་བརྒྱད་དང་འགོག་པ་བརྒྱད་སྤེལ་ནས་ལུགས་མཐུན་དུ་འགྲོ་ཞིང༌། སྲིད་རྩེ་དང་སྤེལ་བའི་
འགོག་པ་ལས་ལངས་ནས་སླར་ཡང་སྲིད་རྩེ་དང༌། དེ་ལས་ལངས་ནས་འདོད་སེམས་ལ་གནས་པ་སྟེ་འདི་ལ་གནས་བཅོ་བརྒྱད་ཡོད་དོ། །འདི་ནི་ཁྲི་བརྒྱད་སྟོང་པ་ལྟར་ཡིན་ལ། ལེ་བརྒྱད་མ་ལྟར་ན་མཐའི་འགོག་པ་ནས་སྲིད་རྩེར་ནུད་པ་མེད་པར་འདོད་སེམས་ལ་གནས་པས་གནས་བཅུ་བདུན་ནོ། །གཉིས་པ་འོང་བ་ནི་སྙོམས་འཇུག་དགུ་དང་འདོད་སེམས་དགུ་སྤེལ་ནས་ལུགས་མི་མཐུན་དུ་འགྲོ་བའི་ཐོད་རྒལ་ཏེ་འདི་ལ་གནས་བཅོ་བརྒྱད་དོ། །འདིར་འགོག་པ་དང་འདོད་སེམས་གཉིས་ལ་སྤེལ་བ་ནི་ཞི་བ་དང་མ་ཞི་བའི་མཐར་ཐུག་ཡིན་པས་འདི་གཉིས་དང་སྤེལ་ནུས་ན་གཞན་དང་སྤེལ་སླ་བ་ལ་དགོངས་སོ། །གཉིས་པ་དེ་ལ་རྩོད་པ་སྤང་བ་ནི། །མཛོད་ལས། བསམ་གཏན་དང་གཟུགས་མེད་ཀྱི་ས་བརྒྱད་ལ་ཟག་བཅས་བརྒྱད་ཟག་མེད་བདུན་ཏེ་གཉིས་སུ་བྱས་ནས་དེ་གཉིས་ལ་སོ་སོར་ལུགས་མཐུན་ལུགས་མི་མཐུན་ལ་མཐར་ཆགས་སུ་འགྲོ་འོང་བྱེད་པ་གཉིས་ནི་རིང་སྦྱོར་དང༌། དེ་ནས་སྲིད་རྩེ་དོར་བའི་ཟག་བཅས་བདུན་དང་ཟག་མེད་བདུན་ལ་སོ་སོར་རེ་རེ་བར་དུ་བོར་བའི་སོང་འོང་གཉིས་ནི་ཉེ་སྦྱོར་རོ། །དེ་ནས་ཟག་བཅས་བསམ་གཏན་དང་པོ་ནས། ཟག་མེད་གསུམ་པ་དང༌། དེ་ནས་ཟག་བཅས་ནམ་མཁའ་དང༌། དེ་ནས་ཟག་མེད་ཅི་ཡང་དུ་སོང་བ་དང་
རྣམ་པ་དེ་ལྟ་བུའི་སླར་འོང་བ་ནི་ཟག་པ་ཡོད་མེད་རིས་མི་མཐུན་སྤེལ་ནས་གསུམ་པར་འགྲོ་བ་དངོས་གཞི་སྟེ། གླིང་གསུམ་གྱི་སྐྱེས་པ་དང་བུད་མེད་ཀྱི་རྟེན་ཅན་གྱི་དགྲ་བཅོམ་པ་འཇུག་པར་བྱ་བ་དེ་ལྟ་བུ་ལ་ཐོད་རྒལ་དུ་བཤད་པ་ཡིན་ན་འདིར་དེ་དང་མི་མཚུངས་པར་བཤད་པ་འདི་ནི་མི་འཐད་དོ་ཞེ་ན་དེ་དང་འདི་གཉིས་ཐོད་རྒལ་གྱི་མིང་མཚུངས་ཀྱང༌། དོན་མི་འདྲ་བས་སྐྱོན་མེད་པ་ཡིན་ནོ། །གཉིས་པ་སྤང་བྱ་རྟོག་པ་ལ་གཉིས། གཟུང་རྟོག་དང༌། འཛིན་རྟོག་གོ། །དང་པོ་གཟུང་རྟོག་ལ་གཉིས། འཇུག་པ་གཟུང་རྟོག་དང༌། ལྡོག་པ་གཟུང་རྟོག་གོ། །དང་པོ་ལ་དགུ་ལས་མདོ་རྒྱས་གཉིས་ནི། དེ་བཞིན་གཤེགས་པས་ཆོས་དེ་དག་མདོ་དང་རྒྱས་པར་བསྟན་ན་དེ་ལ་བྱང་ཆེན་བླ་མེད་རྫོགས་བྱང་དུ་མངོན་པར་རྫོགས་པར་འཚང་རྒྱ་བར་འཚལ་བས་ཕ་རོལ་ཏུ་ཕྱིན་པ་དྲུག་པོ་འདི་དག་མདོ་དང་རྒྱས་པར་ཀུན་ཆུབ་པར་བགྱིའོ། །ཞེས་སོ། སངས་རྒྱས་ཀྱིས་བསྟངས་བ་ནི། འཇིག་རྟེན་གྱི་ཁམས་གྲངས་མེད་པ་དག་ན་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཤིང༌། འཚོ་སྐྱོང་བ་དང་ཆོས་སྟོན་པ་དེ་དག་ཀྱང་བྱང་ཆེན་ཡུམ་ལ་སྤྱོད་པ་དེ་དག་ལ་དགོངས་པར་མཛོད་དོ། །ཞེས་སོ། །སངས་རྒྱས་ཀྱི་བསྟངས་པ་ནི། རྒྱན་སྣང་རྟོག་དཀའ་རྣམ་འགྲེལ་རྣམས་སུ་སངས་རྒྱས་ཀྱི་མགོན་དང་བཅས་པ་ཞེས་བསྒྱུར་བ་དང་དོན་གཅིག་གོ། །དུས་གསུམ་གྱི་ཡོན་ཏན་
ནི། བྱང་ཆེན་གང་དེ་ལྟར་བསྟན་པའི་ཡུམ་ལ་གནས་པ་འདི་ནི་ཕྱིར་མི་ལྡོག་པར་རིག་པར་བྱའོ། །ཞེས་སྦྱོར་ལམ་དང༌། ཡུམ་མངོན་པར་སྒྲུབ་པ་དང༌། ཞེས་མཐོང་ལམ་དང༌། ཡུམ་སྒོམ་པར་བྱེད་པ་སྟེ་དེ་ལ་ཕན་ཡོན་འདི་དག་ཡོད་པར་རིག་པར་བྱའོ། །ཞེས་སྒོམ་ལམ་གྱི་ཡོན་ཏན་གསུངས་སོ། །ལེགས་ལམ་གསུམ་ནི། གཟུགས་ཞི་བ་དང༌། གཟུགས་རག་ལས་པ་དང༌། གཟུགས་གསོགས་དང་གཟུགས་སྙིང་པོ་མེད་པས་ཡུམ་ལ་སྤྱད་པར་བྱའོ། །ཞེས་སོ། །ཡུལ་ལ་ཕྱིན་ཅི་ལོག་གི་དངོས་པོ་འགོག་པས་ཞི་བ་དང༌། རྐྱེན་དབང་ཡིན་པས་ཡ་མ་བརླ་དང༌། རང་བཞིན་སྟོང་པས་གསོག །དཔྱད་མི་བཟོད་པས་སྙིང་པོ་མེད་པའོ། །འདི་ནི་སྦྱོར་ལམ་མོ། ནམ་མཁའ་ལྟར་སྟོང་ཉིད་རྟོགས་ཏེ་ཡུམ་ལ་མངོན་པར་སྒྲུབ་པ་ཉིད་ཀྱིས་ཏེ་ནམ་མཁའ་སྟོང་པ་ཉིད་མངོན་པར་སྒྲུབ་པར་བྱའོ་ཞེས་མཐོང་ལམ། རང་བཞིན་མཐོང་བསྒོམ་པར་བྱེད་པ་ཉིད་ཀྱིས་ཏེ། ནམ་མཁའ་སྟོང་པ་ཉིད་དུ་སྒོམ་པས་ཡུམ་ལ་བསྒོམ་པར་བྱའོ། །ཞེས་སྒོམ་ལམ་མོ། །འདིའི་སྐབས་སུ་རྩ་བ་ལས་སངས་རྒྱས་ཀྱིས་བསྟངས་བས་མ་བཟུང་བ་ཞེས་དང༌། དུས་གསུམ་ཡོན་ཏན་མེད་པ་ཞེས་གསུངས་ལ། ཉི་སྣང་དང་ལེ་བརྒྱད་མང་མདོ་རྒྱས་མི་ཤེས་པ་དང༌། སངས་རྒྱས་ཀྱིས་བསྟངས་པ་མེད་པ་དང༌། ལམ་
གསུམ་གྱི་ཡོན་ཏན་མེད་པ་དང༌། དེ་གསུམ་མི་ཤེས་པའི་རྟོག་པ་ཞེས་བཤད་དོ། །དེ་ལྟར་ན་མདོ་ནས་གསུངས་པ་རྣམས་འདི་དག་གི་གཉེན་པོའོ། །དུས་གསུམ་ཡོན་ཏན་མེད་པ་ཡང་སློབ་དཔོན་གྱིས་འདས་པ་སྦྱོར་ལམ། ད་ལྟ་བ་མཐོང་ལམ། མ་འོངས་སྒོམ་ལམ་ལ་སྦྱར་ནས། འདས་པ་འགག་པ་དང༌། མ་འོངས་མ་སྐྱེས་པ་དང༌། ད་ལྟ་བ་སྐྱེ་བ་མེད་པ་དུས་གསུམ་ཡོན་ཏན་མེད་པར་བཤད་ལ་ཉི་སྣང་ལས། སྤྱིར་སྦྱོར་མཐོང་སྒོམ་གསུམ་གྱི་དུས་ལ་མཛད་ནས་འདས་སོགས་དང་མ་སྦྱོར་རོ། སངས་རྒྱས་ཀྱིས་མ་བསྟངས་བ་དང་དུས་གསུམ་ཡོན་ཏན་མེད་པ་འཇུག་ཡུལ་དུ་མི་རུང་བས་དེ་གསུམ་ལས་ཟློག་པའོ། །ཞེས་འབུམ་པ་གསུངས་སོ། །གཉིས་པ་ལྡོག་པ་གཟུང་རྟོག་ནི། མདོ་ལས་གཉེན་པོ་ཟློག་ཕྱོགས་དགུ་བསྟན་པའི་སྒོ་ནས་གསུངས་ཏེ། དེ་ཡང་ཡུམ་ལ་ཡུན་རིང་པོ་ཇི་སྲིད་ཅིག་ཏུ་སྤྱད་ན་ཡུམ་ལ་སྤྱད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། སེམས་དང་པོ་བསྐྱེད་པ་ནས་ཉེ་བར་བཟུང་ནས། ཞེས་སེམས་མི་སྐྱེ་བའི་གཉེན་པོ་དང༌། སྙིང་པོ་བྱང་ཆུབ་ལ་འདུག་གི་བར་དུ་ཡུམ་ལ་སྤྱད་པར་བྱའོ་ཞེས་བྱང་ཆུབ་སྙིང་པོ་ཡིད་ལ་མི་བྱེད་པའི་གཉེན་པོ་དང༌། ཡིད་ལ་བྱ་བ་གཞན་གྱི་གོ་སྐབས་མི་དབྱེ་བས་ཡུམ་ལ་སྤྱད་པར་བྱའོ་ཞེས་ཉན་རང་ཡིད་བྱེད་གཉིས་ཀྱི་གཉེན་པོ་དང༌། རྣམ་མཁྱེན་ཡིད་ལ་
བྱ་བ་མི་འདོར་བས་ཇི་ལྟར་སེམས་དང་སེམས་ལས་བྱུང་བའི་ཆོས་རྣམས་མི་འཇུག་པ་དེ་ལྟར་ཡུམ་ལ་སྤྱད་པར་བྱའོ། །ཞེས་པ་རྫོགས་བྱང་ཡིད་ལ་མི་བྱེད་པའི་གཉེན་པོ་དང༌། སྒོམ་པར་བྱེད་པས་རྣམ་མཁྱེན་ཐོབ་བམ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་ནི་མ་ཡིན་ནོ། །ཞེས་སྒོམ་པའི་གཉེན་པོ་དང༌། འོ་ན་ཅི་ལགས་མ་བསྒོམ་པས་རྣམ་མཁྱེན་ཐོབ་བམ། བཀའ་སྩལ་པ། དེ་ནི་མ་ཡིན་ནོ། །ཞེས་བསྒོམ་པ་མེད་པའི་གཉེན་པོ་དང༌། འོ་ན་ཅི་ལགས་བསྒོམས་ཀྱང་བསྒོམས་ལ་མ་བསྒོམས་ཀྱང་མ་བསྒོམས་པས་རྣམ་མཁྱེན་ཐོབ་བམ། བཅོམ་ལྡན་འདས་ཀྱིས་བཀའ་སྩལ་པ། དེ་ནི་མ་ཡིན་ནོ། །ཞེས་བསྒོམ་མ་བསྒོམ་ལས་བཟློག་པའི་གཉེན་པོ་དང༌། འོ་ན་ཐམས་ཅད་མཁྱེན་པ་ཉིད་ཇི་ལྟར་ཐོབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་ཉིད་ཇི་ལྟ་བ་བཞིན་ནོ། །ཞེས་ཇི་བཞིན་དོན་མིན་གྱི་གཉེན་པོ་དང་དགུའོ། །གཉིས་པ་འཛིན་རྟོག་ལ་གཉིས། རྫས་འཛིན་དང་བཏགས་འཛིན་རྟོག་པའོ། །དང་པོ་རྫས་འཛིན་དགུ་ནི། མདོ་ལས་སྔར་ལྟར་གཉེན་པོའི་སྒོ་ནས་གསུངས་ཏེ། བདག་གམ་སེམས་ཅན་ནམ་སྲོག་གམ་གང་ཟག་མི་དམིགས་ན་ཇི་ལྟར་བདག་གི་ཁམས་དང་སེམས་
ཅན་གྱི་ཁམས་དང་གང་ཟག་གི་ཁམས་གདགས་པར་བྱ། ཞེས་སེམས་ཅན་བཏགས་རྟོག་གི་གཉེན་པོ་དང༌། བྱང་ཆེན་ཡུམ་ལ་སྤྱོད་པས་གཟུགས་ལ་བསླབ་པར་མི་བགྱི་སོགས་ཀྱི་ཆོས་བཏགས་རྟོག་གི་གཉེན་པོ་དང༌། ཆོས་རྣམས་རང་གི་མཚན་ཉིད་ཀྱིས་སྟོང་པར་མཐོང་བས་མངོན་པར་འདུ་བྱ་བ་མེད་པ་ལ་བསླབ་པར་བྱའོ། །ཞེས་སྟོང་མིན་གྱི་གཉེན་པོ་དང༌། བྱང་ཚེ་དམིགས་པ་ལ་མི་ཆགས་མི་དམིགས་པ་ལ་མི་ཆགས་པ་ལགས་ན། ཞེས་ཆགས་པའི་གཉེན་པོ་དང༌། བླ་མེད་རྫོགས་བྱང་གི་བར་དུ་ཆོས་རྣམས་རབ་ཏུ་དབྱེ་བར་མི་བྱའོ། །ཞེས་རབ་འབྱེད་ཀྱི་གཉེན་པོ་དང༌། གང་གི་ཕྱིར་ཡང་བྱང་ཆེན་ཡུམ་ལ་མི་སྤྱོད་དོ། །ཞེས་དངོས་པོར་བྱེད་པའི་གཉེན་པོ་དང༌། འོ་ན་ཇི་ལྟར་ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པ་དང༌། ཐེག་པ་ཆེན་པོ་དང་ཐེག་པ་གསུམ་པོ་འདི་དག་རྣམ་པར་དགོད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་མ་བྱས་མངོན་པར་འདུས་མ་ བྱས་པའི་ཆོས་རྣམས་ལ་ནི་རྣམ་པར་དགོད་པ་གང ་ཡང་དམིགས་སུ་མེད་དོ། །ཞེས་པ་ཐེག་གསུམ་དུ་རྟོག་པའི་གཉེན་པོ་དང༌། དེ་བཞིན་གཤེགས་པ་དང་དེའི་སྤྲུལ་པ་ལ་ཡོན་བསྟབ་པ་ནི་དེ་ལྟར་དོན་ཆེ་ཞིང་དེ་ལྟར་ངོ་མཚར་ཆེའོ་ཞེས་ཡོན་མ་དག་པའི་གཉེན་པོ་དང༌། འདི་ནི་ཡུམ་མོ་འདི་ནི་ཡུམ་གྱི་ཆོས་ཉིད་དོ་ཞེས་
རྣམ་པར་དཀྲུག་པར་མི་བྱའོ། །ཞེས་སྤྱོད་པ་རྣམ་འཁྲུག་གི་གཉེན་པོའོ། །གཉིས་པ་བཏགས་འཛིན་དགུ་ནི། མདོ་ལས། རབ་འབྱོར་ཐམས་ཅད་ཤེས་པ་ཉིད་ནི་ཉན་ཐོས་དང་རང་སངས་རྒྱས་རྣམས་ཀྱི་ཡིན་ནོ། །ལམ་ཤེས་པ་ཉིད་ནི་བྱང་ཆུབ་སེམས་དཔའ་རྣམས་ཀྱི་ཡིན་ནོ། །རྣམ་པ་ཐམས་ཅད་མཁྱེན་པ་ཉིད་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡིན་ནོ། །ཞེས་སོགས་ཀྱི་ཀུན་མཁྱེན་གསུམ་ལ་སྒྲིབ་པའི་གཉེན་པོ་དང༌། ཡུམ་འདིས་ཆོས་ཐམས་ཅད་ཀྱི་མཆོག་གི་ཚུལ་ཕྱེད་དེ་ཆོས་དེ་དག་འཁོར་བ་མ་དམིགས་པས་དེའི་ཕྱིར་ཡུམ་ཞེས་བྱའོ། །ཞེས་ཞི་ལམ་ལ་རྨོངས་པའི་གཉེན་པོ་དང༌། ཡུམ་འདི་ནི་ཆོས་གང་གིས་ཀྱང་ལྡན་པའམ་མི་ལྡན་པའམ་བསྟན་དུ་ཡོད་པའམ་བསྟན་དུ་མེད་པའམ། ཐོགས་པ་དང་བཅས་པའམ་ཐོགས་པ་མེད་པ་མ་ཡིན་ཞེས་དེ་བཞིན་ཉིད་སོགས་ལ་རྨོངས་པའི་གཉེན་པོ་དང༌། ཡུམ་འདི་ནི་བདུད་དང་བདུད་ཀྱི་རིས་ཀྱི་ལྷ་རྣམས་དང་གང་ཟག་ཉན་ཐོས་དང་རང་སངས་རྒྱས་ཀྱི་ཐེག་པ་ནས་མུ་སྟེགས་ཅན་གཞན་གྱི་བར་དང་སྡིག་པའི་གྲོགས་པོ་རྣམས་ཀྱིས་མི་ཆོད་མི་འཕྲོག་པའོ། །ཞེས་མི་མཉམ་པར་རྨོངས་པའི་གཉེན་པོ་དང༌། བྱང་ཆེན་ཡུམ་ཟབ་མོ་འདིའི་དོན་ལ་དཔྱད་པས་མི་རྟག་པའི་དོན་ལ་སྤྱད་པར་བྱའོ། །དེ་བཞིན་དུ་སྡུག་བསྔལ་དང་
བདག་མེད་དང་སྡུག་བསྔལ་ཤེས་པའི་དོན་ལ་སྤྱད་པར་བྱའོ་ཞེས་བདེན་པ་ལ་རྨོངས་པའི་གཉེན་པོ་དང༌། འདོད་ཆགས་དང་ཞེ་སྡང་དང་གཏི་མུག་བདག་གི་དོན་ཞེའམ་དོན་མ་ཡིན་ཞེས་དཔྱད་པར་མི་བྱའོ། །ཞེས་ཉོན་མོངས་ལ་རྨོངས་པའི་གཉེན་པོ་དང༌། གཉིས་སུ་མ་མཆིས་པའི་ཆོས་ཐོབ་པར་བགྱིད་དམ། བཅོམ་ལྡན་འདས་ཀྱིས་བཀའ་སྩལ་པ། མ་ཡིན་ནོ། །ཞེས་གཉིས་མེད་ལ་རྨོངས་པའི་གཉེན་པོ་དང་དགུའོ། །འདིའི་སྐབས་སུ་ཉི་སྣང་དང་ལེ་བརྒྱད་མར་ཀུན་རྨོངས་རྟོག་པའི་ངོ་བོར་བཞེད་ལ་འགྲེལ་པ་ཆེ་ཆུང་གཉིས་སུ་ཀུན་རྨོངས་རྟོག་པའི་ཡུལ་དུ་བཞེད་དོ། །རྟོག་པ་བཞི་པོ་འདི་དག་གི་འཛིན་སྟངས་དང་གཉེན་པོས་སྤོང་ཚུལ་རྣམས་ནི་མཐོང་སྤང་དང་འདྲའོ། །གསུམ་པ་བརྟེན་པ་སྒོམ་ལམ་གྱི་ཡོན་ཏན་ནི། དཔེར་ན་སྐྱེས་བུ་ལ་ལ་ཞིག་ལྗང་བུ་སྐྱེད་པར་འདོད་པ་ལ་སྐྱེས་བུ་དེས་ལྗང་བུ་དེའི་རྩ་བ་མ་དམིགས་ཡལ་ག་དང༌། སྡོང་པོ་དང་ལོ་མ་དང་མེ་ཏོག་དང་འབྲས་བུ་མ་དམིགས་པར་ལྗང་བུ་དེའི་སྡོང་བུ་སྐྱེད་དེ་དུས་དུས་སུ་ཆུས་བྲན་ཞིང་དེའི་སྡོང་བུ་རིམ་གྱིས་ཡལ་ག་ཕུན་སུམ་ཚོགས་པར་གྱུར། དེ་བཞིན་དུ་ལོ་མ་མེ་ཏོག་འབྲས་བུ་ཕུན་སུམ་ཚོགས་པར་གྱུར་ནས་དེ་ལྗང་བུ་དེའི་ལོ་མ་མེ་ཏོག་འབྲས་བུ་ལ་སྤྱོད་པ་དེ་བཞིན་དུ་བྱང་ཆེན་རྣམས་ཀྱང་སེམས་ཅན་རྣམས་ཀྱི་ཕྱིར་བླ་མེད་རྫོགས་བྱང་དུ་ཡང་དག་པར་འཇུག་སྟེ་དེ་དག་རིམ་གྱིས་ཕར་ཕྱིན་དྲུག་ལ་སྤྱོད་ཅིང་རྣམ་མཁྱེན་ཐོབ་པར་བྱེད་དེ། དེ་དག་ལོ་མ་དང་མེ་ཏོག་དང་འབྲས་བུ་ལྟར་སེམས་ཅན་ཐམས་ཅད་ཉེ་བར་འཚོ་བར་འགྱུར་རོ། །ཞེས་སོ། །དེ་ཡང་ལོ་མ་ནི་སེམས་ཅན་ངན་སོང་ལས་འདྲེན་པ་དང༌། མེ་ཏོག་
ནི་ལྷ་མིར་སྐྱེ་བ་དང༌། འབྲས་བུ་ནི་འབྲས་བུ་ལྔ་དང་རྣམ་མཁྱེན་ཐོབ་པར་མདོ་ལས་གསུངས་སོ། །འདིའི་སྐབས་སུ་རྩ་བར། །འབྲས་བུ་མཆོག་གིས་སྤ་བ་ཡི། ཞེས་པའི་དོན་ཡང་ཉི་སྣང་ལས་ཤིང་ལྗོན་པ་གཞན་གྱིས་སྤྱད་བྱའི་འབྲས་བུའི་ཁུར་གྱིས་ནོན་པ་ལྟར་བྱང་སེམས་དེ་སེམས་ཅན་རྣམས་ཀྱི་ཉེར་འཚེའི་རྒྱུ་འབྲས་བུ་ལྔ་གཞན་ལ་སྟེར་བའི་མཐུས་སྤ་བ་ལ་གསུངས་སོ། །དེ་ལྟར་རྟེན་སྒོམ་ལམ་དང༌། རྣམ་རྟོག་སྤོང་བ་དང་ཡོན་ཏན་རྟེན་པའི་སྒོམ་ལམ་གསུམ་ལས་དང་པོ་གཉིས་སྒོམ་ལམ་དགུག་དང་ཕྱི་མ་འདི་ས་བཅུ་པ་ལ་བཞག་གོ། །བཞི་པ་བར་ཆད་མེད་པའི་རྩེ་མོ་ལ་གསུམ། བར་ཆད་མེད་རྩེའི་ངོ་བོ། །རྒྱུ་སྤང་བྱའོ། །དང་པོ་ངོ་བོ་ནི། ཐེག་དམན་གྱི་དགྲ་བཅོམ་ཞུགས་པ་ལྟ་བུ་རྣམ་པ་ཐམས་ཅད་མཁྱེན་པ་ཉིད་དང་ལམ་གཞན་གྱིས་བར་མ་ཆོད་ཅིང་བསོད་ནམས་ཀྱི་སྟོབས་དེ་བཞིན་གཤེགས་པ་དང་མཉམ་པ་བྱང་ཆུབ་སེམས་དཔའ་ས་བཅུ་པའི་ཏིང་ངེ་འཛིན་ནོ། །གཉིས་པ་རྒྱུ་ནི། རབ་འབྱོར་རྣམ་མཁྱེན་ཉིད་ཀྱི་དམིགས་པ་ནི་དངོས་པོ་མེད་པ་བདག་པོ་ནི་དྲན་པ་རྣམ་པ་ནི་ཞི་བ། མཚན་ཉིད་ནི་མཚན་ཉིད་མེད་པ་ཡིན་ཏེ་ཞེས་སོ། །མདོ་ཚིག་ཕྱི་མ་འདིས་ཞི་བ་ལ་རྣམ་པར་བཤད་པ་གཉེན་པོས་གསར་དུ་བཞག་པ་ཡིན་ནམ་སྙམ་པ་བཟློག་ནས་གདོད་མ་ནས་ཞི་བར་བསྟན་པའི་ཕྱིར་ཡིན་ཞེས་ཉི་སྣང་བ་ལས་གསུངས་
སོ། །དེ་ལྟར་ཉི་སྣང་དང་ལེ་བརྒྱད་མ་དག་ལྡན་རྣམས་སུ་རྣམ་མཁྱེན་དང༌། འགྲེལ་པ་ཆེ་ཆུང་གཉིས་དང་སྙིང་མཆོག་སོགས་སུ་བར་རྩེའི་དམིགས་པ་སོགས་ཡིན་པར་གསུངས་པ་ནི་མི་འགལ་ཏེ། དེ་གཉིས་ཀ་ཡང་དམིགས་རྣམ་རྗེས་སུ་མཐུན་པས་ཕན་ཚུན་མཚོན་པའི་ཆེད་དོ། །འདིར་དམིགས་རྣམ་དང་བདག་རྐྱེན་བཤད་པའི་རྒྱུ་མཚན་ནི་གོང་དུ་བར་རྩེ་རྣམ་མཁྱེན་གྱི་བར་ཆད་མེད་པའི་རྒྱུར་བཤད་པ་ན་དེའི་དེ་མ་ཐག་རྐྱེན་དུ་བཤད་པ་དེ་ལས་འཕྲོས་ནས་དེའི་དམིགས་རྐྱེན་སོགས་ཀྱང་བསྟན་པ་སྟེ། འདིས་ནི་རྣམ་མཁྱེན་གྱི་མཐུན་རྐྱེན་ཚང་བ་དང་ལོག་རྟོག་གིས་ནི་བར་རྩེའི་སྐབས་སུ་འགལ་རྐྱེན་ཐམས་ཅད་དང་བྲལ་བར་བསྟན་པས་བར་རྩེ་རྣམ་མཁྱེན་གྱི་བར་ཆད་མེད་པའི་རྒྱུ་ཉིད་དུ་སྒྲུབ་པའི་ཕྱིར་ཡིན་ནོ། །གསུམ་པ་སྤང་བྱ་ལ་གཉིས། དངོས་ཀྱི་དོན་དང༌། དེས་ཟབ་པར་འཕངས་པའོ། །དང་པོ་དངོས་ཀྱི་དོན་ལ་གསུམ། །བསལ་བྱ་རྣམ་རྟོག །སེལ་བྱེད་ཀྱི་ལན། བསལ་ནས་ཏིང་ངེ་འཛིན་སྐྱེ་ཚུལ་ལོ། །དང་པོ་བསལ་བྱ་རྣམ་རྟོག་ལ་བཞི། ཡུལ་གང་ལ་རྟོག་པ། ཚུལ་ཇི་ལྟར་རྟོག་པ། །དེ་ལྟར་རྟོག་པའི་རྒྱུ་མཚན། ལོག་པར་རྟོག་མཁན་གྱི་གང་ཟག་གོ། །དང་པོ་གང་ལ་རྟོག་པ་ནི་སྔར་བཤད་པའི་བར་རྩེའི་དམིགས་པ་དང་རྣམ་པ་ལའོ། །གཉིས་པ་ཚུལ་ཇི་ལྟར་རྟོག་པ་ནི། དེ་དག་མི་འཐད་དོ། །ཞེས་
སེམས་པ་སྟེ་ངོ་བོ་ནི་ཐེ་ཚོམ་མོ། །འོ་ན་ལོག་ཤེས་སུ་འགལ་སྙམ་ན། གཞན་གྱི་ཁས་བླང་འགལ་བས་མི་འཐད་སྙམ་པ་ཙམ་མ་གཏོགས་པ་རང་གིས་མཐའ་གཅིག་ཏུ་མ་ངེས་པ་ཉིད་ཀྱིས་ན་ཐེ་ཚོམ་སྟེ་ལྟོས་པ་ཐ་དད་ལ་ལྟོས་ནས་བློ་གཉིས་སུ་འགྱུར་རོ། །ཡང་ན་ཚད་མའི་སྟོབས་ཀྱིས་ངེས་པ་མ་རྙེད་པས་ཕུག་ཐེ་ཚོམ་ལས་མི་འདའ་བ་ལ་དགོངས་སོ། །གསུམ་པ་ནི་བདེན་གཉིས་འགལ་བར་འཛིན་པའི་ཚུལ་གྱིས་སོ། །དེ་ཡང་ཡུལ་མེད་པས་དམིགས་པ་མི་འཐད་པ་དང༌། རྟོགས་བྱ་མེད་པས་རྟོགས་ཚུལ་མི་འཐད་པ་དང༌། ཤེས་བྱ་མེད་པས་ཀུན་མཁྱེན་མི་འཐད་པ་དང༌། དབྱེ་བ་མེད་པས་བདེན་གཉིས་མི་འཐད་པ་དང༌། འཁོར་གསུམ་མེད་པས་སྦྱིན་སོགས་མི་འཐད་པ་དང༌། རྟོགས་བྱ་མེད་པས་སངས་རྒྱས་མི་འཐད་པ་དང༌། འགོག་ལམ་མེད་པས་ཆོས་མི་འཐད་པ་དང༌། འཕེལ་འགྲིབ་མེད་པས་དགེ་འདུན་མི་འཐད་པ་དང༌། འཁོར་གསུམ་ལ་མི་དམིགས་པས་ཐབས་མཁས་མི་འཐད་པ་དང༌། ཡོད་མེད་དུ་མི་རྟོག་པས་ཐུབ་པའི་རྟོག་པ་མི་འཐད་པ་དང༌། རྟག་སོགས་མེད་པས་ཕྱིན་ཅི་ལོག་གི་རྟོག་པ་མི་འཐད་པ་དང༌། འབྲས་བུ་མངོན་དུ་མི་བྱེད་པས་བྱང་སེམས་ཀྱི་ལམ་གསུམ་སྒོམ་པ་མི་འཐད་པ་དང༌། བླང་བྱ་མེད་པས་གཉེན་པོ་མི་འཐད་པ་དང༌། དོར་བྱ་མེད་པས་མི་མཐུན་ཕྱོགས་
མི་འཐད་པ་དང༌། མཚན་གཞི་མེད་པས་མཚན་ཉིད་མི་འཐད་པ་དང༌། བསྒོམ་བྱ་མེད་པས་སྒོམ་པ་མི་འཐད་དོ་ཞེས་འཛིན་པའོ། །བཞི་པ་ལོག་པར་རྟོག་མཁན་ནི། བྱང་ཆུབ་སེམས་དཔའི་ཐབས་ལ་མཁས་པ་བདེན་གཉིས་སུ་ཡོད་མེད་མི་འགལ་བའི་ཚུལ་མི་ཤེས་པའི་སྒོ་ནས་རྩོད་པ་རབ་ཏུ་སྨྲ་བའི་སྐྱེ་བོ་ཐམས་ཅད་ཀྱིས་ལོག་པར་རྟོག་གོ། །འདིའི་སྐབས་སུ་བདེན་གཉིས་ཀྱི་མཐའ་ཅུང་ཟད་དཔྱད་པ་ལ་གཉིས། བདེན་གཉིས་གཏན་ལ་དབབ་དགོས་པ་དང༌། གཏན་ལ་དབབ་བྱ་བདེན་གཉིས་ཀྱི་རང་བཞིན་ནོ། །དང་པོ་ནི་རྒྱལ་བ་རྣམས་ཀྱིས་ཇི་སྙེད་ཅིག་གསུངས་པ་དེ་ཐམས་ཅད་ནི་བདེན་གཉིས་ལས་བརྩམས་པ་འབའ་ཞིག་ཡིན་ཏེ། ཡབ་སྲས་མཇལ་བ་ལས། འཇིག་རྟེན་མཁྱེན་པས་གཞན་ལས་མ་གསན་པར། །བདེན་པ་འདི་གཉིས་ཉིད་ཀྱིས་སྟོན་པར་མཛད། །གང་ཞིག་ཀུན་རྫོབ་དེ་བཞིན་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །ཞེས་དང༌། དབུ་མའི་རྩ་བ་ལས་ཀྱང༌། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པའོ། །ཞེས་དང༌། བདེན་གཉིས་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་
རོལ་འགྲོ་བར་འགྱུར། །ཞེས་དང༌། དབུ་མ་སྙིང་པོར། །ཡང་དག་ཀུན་རྫོབ་རྣམས་ཀྱི་སྐས། །མེད་པར་དོན་དམ་ཁང་ཆེན་གྱི། །སྟེང་དུ་འཛེག་པར་འགྱུར་བ་ནི། །མཁས་ལ་རུང་བ་མ་ཡིན་ནོ། །ཞེས་སོ། །དེས་ན་རྟོག་པ་དང་ལྡན་པ་རྣམས་ཀྱིས་འདི་གཉིས་ནི་བསམ་པར་བྱ་བ་ཁོ་ནའོ། །གཉིས་པ་གཏན་ལ་དབབ་བྱ་བདེན་གཉིས་ཀྱི་རང་བཞིན་ལ་གཉིས། བདེན་གཉིས་སྤྱིར་དང༌། སོ་སོར་བསྟན་པའོ། །དང་པོ་སྤྱིར་བསྟན་པ་ནི། བདེན་གཉིས་ལ་རང་གི་ངོ་བོས་བྱས་པའི་དབྱེ་བ་ནི་མེད་དེ། གཞན་དུ་ན་ངོ་བོ་གཅིག་ཏུ་གྲུབ་ན་དོན་དམ་པ་ཡང་རྟོགས་པས་ཀུན་ནས་བཏགས་པའི་བཅོས་མ་ཙམ་དུ་དང༌། དོན་དམ་པ་བཞིན་དུ་ཀུན་རྫོབ་ཀྱང་བློས་མ་བརྟགས་པའི་གཤིས་མ་བཅོས་པར་འགྱུར་བ་དང༌། ལུས་ཅན་ཐམས་ཅད་ཀྱང་དོན་དམ་པ་རྟོགས་པའི་ཕྱིར་འབད་མེད་དུ་གྲོལ་བར་འགྱུར་རོ། །དེ་ལྟར་ཡང་དབུ་མའི་རྩ་བ་ལས། རང་བཞིན་བྱས་པ་ཅན་ཞེས་བྱར། །ཇི་ལྟ་བུར་ན་རུང་བར་འགྱུར། །རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་དང༌། འཕགས་པ་དེ་ཁོ་ན་ཉིད་བསྟན་པའི་ཏིང་ངེ་འཛིན་ལས། ཀུན་རྫོབ་དེ་ལ་དོན་དམ་དུ་སྨྲ་བ། །དེ་དག་ནོར་བའི་བློ་ལྡན་ཤེས་པར་བྱ། །ཞེས་དང༌། ཏིང་འཛིན་རྒྱལ་པོ་ལས། མིག་དང་རྣ་བ་སྣ་ཡང་ཚད་མ་མིན། །ལྕེ་
དང་ལུས་དང་ཡིད་ཀྱང་ཚད་མ་མིན། །གལ་ཏེ་དབང་པོ་འདི་དག་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །ཞེས་སོ། །ངོ་བོ་ཐ་དད་དུ་གྲུབ་ན་སྣང་མུན་བཞིན་ཀུན་རྫོབ་ཀྱི་རང་བཞིན་དོན་དམ་མ་ཡིན་པ་དང༌། ཐག་པ་སྦྲུལ་དུ་འཁྲུལ་བས་སྐྲག་བ་ལ་གླང་པོ་མེད་བར་མཐོང་བ་གཉེན་པོར་འདོད་པ་ལྟར་དོན་དམ་རྟོགས་པས་ཀུན་རྫོབ་ལ་ཞེན་པའི་དྲི་མ་མི་སེལ་བར་ཐལ་བ་སོགས་མཐའ་ཡས་སོ། །རྒྱལ་བའི་ཡུམ་ལས་ཀྱང༌། འཇིག་རྟེན་གྱི་ཀུན་རྫོབ་ཀྱང་གཞན་ལ་དོན་དམ་པ་ཡང་གཞན་ཞེས་བྱ་བ་ནི་མེད་ཀྱི་ཞེ་ས་དང༌། ཀུན་བྱང་གི་འདྲེས་རྣམས་སུ་ཆོས་དེ་དག་དེ་བཞིན་ཉིད་དེ་དག་ལས་གཞན་ན་དེ་བཞིན་ཉིད་མེད་པར་ལན་ཅིག་མ་ཡིན་པར་བཀའ་སྩལ་པ་རྣམས་སོ། །གལ་ཏེ་གཅིག་ཐ་དད་དུ་མ་གྲུབ་ན་བདེན་གཉིས་མེད་པར་ཐལ་ཞེ་ན། བདེན་གཉིས་ཀྱི་ངོ་བོ་གཅིག་ཐ་དད་དུ་མ་གྲུབ་པ་ནི་འདོད་པ་ཡིན་ནོ། །འོན་ཀྱང་གཅིག་པ་བཀག་པའི་ཐ་དད་པ་ཙམ་དུ་འདོད་དེ་དངོས་པོ་དང་དངོས་མེད་བཞིན་ནོ། །བདེན་གཉིས་ཀྱི་རྣམ་བཞག་ཐ་དད་པར་མི་བྱེད་པ་ལ་ནི་ཁྱབ་པ་མེད་དེ། སྤྲོས་བྲལ་གྱི་རྣམ་པ་ལ་དོན་དམ་དུ་བཏགས་ནས་རྣམ་བཞག་བྱེད་དེ། རྟོག་པའི་སྣང་བ་དང་བརྟག་པར་བྱ་བའི་དོན་གཉིས་གཅིག་ཏུ་བསྲེས་ནས་རང་མཚན་ལ་བརྡའ་བྱེད་པ་བཞིན་ནོ། །མདོ་ལས་ཀྱང༌། ཡི་གེ་མེད་པའི་ཆོས་རྣམས་ལ། །ཉན་པ་གང་དང་སྟོན་པ་གང༌། །འགྱུར་བ་མེད་ལ་སྒྲོ་བཏགས་ནས། །
དེ་ཉིད་ཉན་ཅིང་སྟོན་པར་འདོད། །ཅེས་སོ། །གཞན་ཡང་ལུང་ལས་ནི། བདེན་གཉིས་གཅིག་ཐ་དད་གང་ཡང་མ་ཡིན་པར་དུ་མ་ཞིག་གསུངས་པས་ལུང་གི་གནོད་པ་ནི་མེད་ལ། ངོ་བོ་གཅིག་ཐ་དད་པ་གཉིས་ཀ་ལ་རིག་པས་གནོད་པས་བདེན་པ་གཉིས་ཀ་ངོ་བོས་གྲུབ་པར་འདོད་པ་ཁྱེད་ཁོ་ན་ལ་ཁྱེད་རང་གིས་བཀོད་པའི་སྐྱོན་དེར་འགྱུར་རོ། །དེས་ན་ངོ་བོ་གཅིག་ལ་ལྡོག་པ་ཐ་དད་པའོ། །ཞེས་ཟེར་བ་ཡང་མི་འཐད་ཅིང༌། སེམས་འགྲེལ་ལས། བྱས་པ་དང་ནི་མི་རྟག་བཞིན། །མེད་ན་མི་འབྱུང་ངེས་ཕྱིར་རོ། །སྟོང་པ་ཉིད་ཀྱང་ཀུན་རྫོབ་སྟེ། །ཀུན་རྫོབ་ཀྱང་ནི་སྟོང་པར་བཤད། །ཅེས་པ་ཡང་དེའི་ཁུངས་མ་ཡིན་ཏེ་དེས་བདེན་པ་གཅིག་མེད་པར་ཅིག་ཤོས་མེད་པའི་དཔེར་བྱས་མི་རྟག་བླངས་པས་འདི་ཡང་དེ་ཉིད་དང་གཞན་དུ་མེད་པའི་རིག་པའོ། །དེ་ལྟར་ན་བདག་ལེགས་སུ་འདོད་པ་དག་གིས་ནི་དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་བཅོམ་ལྡན་འདས་ཉིད་ཀྱིས་སྨད་པའི་གཅིག་ཐ་དད་ཀྱི་ལྟར་ན་དོར་བར་བྱའོ། །འོ་ན་བདེན་པ་གཉིས་སུ་ཇི་ལྟར་འབྱེད་ན་སྐྱེ་འགག་ཀུན་བྱང་དགག་སྒྲུབ་སོགས་མཚན་ཉིད་མི་འདྲ་བ་དུ་མར་བློ་ལ་སྣང་ཞིང་ཐ་
སྙད་པའི་བློ་ངོ་དེར་རིག་པའི་གནོད་པ་མེད་པའི་ཆ་ཇི་སྙེད་པ་ནི་ཀུན་རྫོབ་ཀྱི་བདེན་པ་ཡིན་ལ། ཀུན་རྫོབ་དེ་ཉིད་དཔྱད་ན་སྣང་མི་སྣང་སྐྱེ་མི་སྐྱེ་བདག་ཡོད་མེད་ལ་སོགས་པའི་སྤྲོས་པའི་དྲྭ་བ་མ་ལུས་པས་དབེན་པ་ལ་དོན་དམ་པ་ཞེས་གཞན་ཡང་དག་པའི་ལམ་ལ་དཀྲི་བའི་ཕྱིར་དུ་དགོས་པའི་དབང་གིས་ཁས་བླངས་བ་ཙམ་སྟེ། སྤྲོས་བྲལ་ཞེས་པའང་གཞན་ངོར་མིང་བཏགས་པ་ཙམ་ཡིན་གྱིས་སྤྲོས་བྲལ་གྱི་ཆོས་ཤིག་གྲུབ་བར་འདོད་པ་ནི་མ་ཡིན་ནོ། །དེ་ལྟར་ཡང་བདེན་གཉིས་ལས། ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་ཅིག་ཤོས་ཡིན། །ཞེས་དང༌། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །འདི་ལྟར་བསྙད་པ་ན་དོན་དམ་དེ་རྟེན་འབྲེལ་སྒྱུ་མ་ལྟ་བུ་འདི་ཉིད་མ་ཡིན་ཞིང་འདི་ལས་གཞན་དུ་ཡང་མེད་ན་འོ་ན་དེ་ཅི་ཞིག་ཡིན། དེས་ན་འདི་ལ་ནི་བློ་རྩེ་གཏད་སོ་མེད་པས་ཆད་པའི་ལྟ་བ་མི་བཟད་པའོ་སྙམ་པ་ནི་ཤིན་ཏུ་བདེན་ཏེ། ཐོག་མ་མེད་པ་ནས་སྤང་བླང་དང་དགག་སྒྲུབ་ཀྱི་མཐར་འཛིན་གྱི་ལྟ་བ་ལ་ཤིན་ཏུ་གོམས་པར་བྱས་པའི་བག་ཆགས་རྟས་པས་རྟོག་པས་མཐའ་གཅིག་ཏུ་འདིའོ་ཞེས་གཟུང་དུ་མ་རྙེད་པ་ན་སྟོང་པ་ཉིད་འཛིན་པ་མཐའ་དག་ཟློག་བྱེད་ལ་མི་མོས་པ་དང་སྐྲག་པ་སྐྱེ་བ་ནི་ཆོས་ཉིད་ཡིན་པས་སོ། །དེས་ན་བློ་དང་ལྡན་པ་རྣམས་ཀྱིས་ཀུན་རྫོབ་པའི་རྟེན་འབྲེལ་སྣང་དུས་རང་
བཞིན་མེད་པ་སྒྱུ་མ་ལྟ་བུ་དེའི་ངོར་མེད་དོ་ཞེས་སྐུར་པ་མི་གདབ་ཅིང༌། དོན་དམ་པ་སྤྲོས་པ་ཡིན་ནོ་ཅོག་དང་བྲལ་བ་ལ་ཡོད་དོ་རྟག་གོ་ཞེས་སྒྲོ་མི་འདོགས་པའི་མཐའ་གྲལ་གྱེ་ཚུལ་ལ་བསླབ་པར་རིགས་སོ། །གཉིས་པ་སོ་སོར་བསྟན་པ་ནི། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་ཀུན་རྫོབ་ལ་ཡང་ལོག་གཉིས་སུ་བྱེད་དོ། །དོན་དམ་ལ་ཡང་སྤྲོས་པ་མཐའ་དག་དང་བྲལ་བ་རྣམ་གྲངས་མ་ཡིན་པ་དང༌། སྤྲོས་པ་ཕྱོགས་རེ་བ་བཀག་པ་རྣམ་གྲངས་པའི་དོན་དམ་གཉིས་ས་བྱེད་དེ། དེ་ཉིད་ལས། སྐྱེ་བ་ལ་སོགས་བཀག་པ་ཡང༌། །ཡང་དག་པ་དང་མཐུན་པའི་ཕྱིར། །དོན་དམ་ཡིན་པར་ཁོ་བོ་འདོད། །ཅེས་སོ། །འདི་ནི་གཅིག་དུ་བྲལ་ལ་སོགས་ཀྱི་རྟགས་ལ་བརྟེན་པའི་རྗེས་དང་ག་གི་ཡུལ་རྣམས་ལ་བྱེད་པས་རྟོག་པའི་བཟོ་ལས་མ་འདས་པའི་ཕྱིར་དོན་དམ་བཏགས་པ་བའོ། །ཡང་ན་འཕགས་ཆེན་རྣམས་ཀྱི་རྗེས་ཐོབ་ཀྱི་སྣང་བ་ལ་ཡང་དག་དང༌། ཉན་ངང་དང་ཚུར་མཐོང་གི་རང་སྣང་ལ་ལོག་པའི་ཀུན་རྫོབ་ཅེས་བྱ་སྟེ་གཟུང་འཛིན་དུ་སྣང་ལ། སྣང་བ་ལྟར་དུ་ཞེན་པ་མེད་པ་དང༌། ཡོད་པའི་ཕྱིར་ཞེས་བྱས་ན་སློབ་དཔོན་གྱི་བཞེད་པར་འགྱུར་རོ། །དེ་ལྟར་ཆེ་
ལོང་ཙམ་འདི་ནི་སློབ་དཔོན་སེང་བཟང་ལ་སོགས་པའི་རང་རྒྱུད་པ་རྣམས་ཀྱི་བཞེད་པ་ལྟར་བཀོད་ཅིང་དེ་ཡང་རྒྱས་པ་དང་ཐལ་འགྱུར་བའི་རྣམ་བཞག་ནི་རེ་ཞིག་མ་བྲིས་ཏེ་ཚིག་མང་དུ་དོགས་པས་སོ། །གཉིས་པ་སེལ་བྱེད་ལན་ནི། །སྤྱིར་དོན་དམ་སྒོ་ཅན་གྱི་ཀླན་ཀ་དང༌། ཀུན་རྫོབ་སྒོ་ཅན་གྱི་ཀླན་ཀ་གཉིས་ལ་ཐལ་རྟགས་རིགས་མཐུན་མི་མཐུན་གཉིས་གཉིས་ཡོད་པས་བཞིར་ངེས་སོ། །དེ་ལ་རིགས་མཐུན་ནི། །ཀུན་རྫོབ་རྟགས་སུ་བཀོད་ནས་ཀུན་རྫོབ་དང༌། དོན་དམ་རྟགས་སུ་བཀོད་ནས་དོན་དམ་དུ་ཐལ་བ་འཕེན་པའོ། །རིགས་མི་མཐུན་ནི་ཀུན་རྫོབ་རྟགས་སུ་བཀོད་ནས་དོན་དམ་དང༌། དོན་དམ་རྟགས་སུ་བཀོད་ནས་ཀུན་རྫོབ་ཏུ་ཐལ་བ་འཕེན་པའོ། །འོན་ཀྱང་གཉིས་སུ་འདུ་སྟེ་ཀུན་རྫོབ་རྟགས་སུ་བཀོད་པ་གཉིས་ཀུན་རྫོབ་དང༌། དོན་དམ་རྟགས་སུ་བཀོད་པ་གཉིས་དོན་དམ་སྒོ་ཅན་ཡིན་པས་སོ། །དེས་ན་དགུ་པ་བཅུ་པ་བཅུ་གཉིས་པ་གསུམ་ནི་ཀུན་རྫོབ་ཀྱི་རིགས་མཐུན་ཡིན་ལ་གཞན་རྣམས་དོན་དམ་དང་ཀུན་རྫོབ་ཀྱི་རིགས་མི་མཐུན་གཉིས་ཀ་སྟེ་ཐལ་བའི་རྗེས་འགྲོ་དང་ལྡོག་པ་གཉིས་དང་རིམ་བཞིན་ནོ། །དོན་དམ་གྱི་རིགས་མཐུན་ནི་མི་ཟིན་ནོ། །དེ་ལ་ཀུན་རྫོབ་དང་དོན་དམ་སྒོ་ཅན་གྱི་རིགས་མི་མཐུན་གཉིས་ལ་ཀུན་རྫོབ་སྒོ་ཅན་ལ་དོན་དམ་དང༌། དོན་དམ་སྒོ་ཅན་ལ་ཀུན་རྫོབ་ཀྱི་ལན་གདབ་དགོས་ལ་རིགས་མཐུན་གཉིས་
ལ་ནི་ཀུན་རྫོབ་ལ་ཀུན་རྫོབ་དང༌། དོན་དམ་ལ་དོན་དམ་གྱི་ལན་གདབ་དགོས་སོ། །དེ་ཡང་དཔེར་ན་དོན་དམ་སྒོ་ཅན་གྱི་ཀླན་ཀ་བར་རྩེའི་དམིགས་པ་ཆོས་ཅན་ཀུན་རྫོབ་ཏུ་ཡང་མི་འཐད་པར་ཐལ། །དོན་དམ་པར་ཡུལ་མེད་པའི་ཕྱིར། །ཞེས་པ་ལ་དེ་འཐད་པར་ཐལ། ཀུན་རྫོབ་ཏུ་ཡུལ་ཡོད་པའི་ཕྱིར། །ཞེས་པ་དང༌། ཀུན་རྫོབ་སྒོ་ཅན་གྱི་ཀླན་ཀ་སྔ་མ་ལས་བཟློག་ནས། དོན་དམ་པར་ཡུལ་མེད་པ་མི་འཐད་པ་ཐལ། ཀུན་རྫོབ་ཏུ་བར་རྩེའི་དམིགས་པ་འཐད་པའི་ཕྱིར་ཞེས་པ་ལ་དེ་འཐད་པར་ཐལ། །དོན་དམ་དུ་དམིགས་པ་ཡོད་པ་མི་འཐད་པའི་ཕྱིར་ཞེས་སོགས་ལན་འདེབས་པ་ཡིན་ལ། ཀུན་རྫོབ་སྒོ་ཅན་གསུམ་ལ་ནི། འཁོར་གསུམ་དུ་མི་དམིགས་པ་དེ་ཉིད་ཐབས་མཁས་ཡིན་པ་དང༌། ཡོད་མེད་དང་བྲལ་བར་མཁྱེན་པ་དེ་ཉིད་ཐུབ་པའི་རྟོགས་པ་ཡིན་གྱི་ཡོད་མེད་དུ་རྟོག་པ་མིན་ནོ། །ཞེས་པ་དང༌། བྱང་ཆུབ་སེམས་དཔས་ལམ་གསུམ་སྒོམ་པ་དེའི་རིགས་ཅན་གཞན་རྗེས་སུ་འཛིན་པའི་ཕྱིར་ཡིན་གྱིས་རང་དོན་མིན་པས་སྐྱོན་མེད་དོ། །ཞེས་ལན་འདེབས་པ་ཡིན་ནོ། །གསུམ་པ་བསལ་ནས་ཏིང་འཛིན་བསྐྱེད་ཚུལ་ནི། བྱང་ཆུབ་སེམས་དཔའ་གཞན་དོན་དུ་རྫོགས་པའི་བྱང་ཆུབ་དོན་དུ་གཉེར་བ་རྣམས་ཀྱིས། བདེན་པ་གཉིས་ལ་འགལ་བར་འཛིན་པའི་ལོག་རྟོག་ཐམས་
ཅད་ཚོགས་ལམ་ནས་བཟུང་སྟེ་ཡང་དང་ཡང་དུ་བསལ་བའི་སྒོ་ནས་བར་རྩེའི་དམིགས་རྣམ་གྱི་དོན་ལ་མ་རྟོགས་ལོག་རྟོག་ཐེ་ཚོམ་གསུམ་དང་བྲལ་བའི་ཚད་མའི་ངེས་པ་ཡང་དག་པར་སྐྱེས་ནས་བར་ཆད་མེད་པའི་ཏིང་ངེ་འཛིན་བསྐྱེད་པར་བྱའོ། །གཉིས་པ་དེ་ཉིད་ཀྱིས་ཟབ་པར་འཕངས་པ་ནི། དེ་ལྟ་བུའི་དམིགས་རྣམ་གྱི་ཚུལ་དེ་ལ་ཀླན་ཀ་བརྒྱུད་མར་འབྱུང་བར་གསུངས་པ་ནི་དམིགས་རྣམ་འདིའི་སྐྱོན་བརྗོད་པ་མ་ཡིན་ཏེ་རྟོགས་དཀའ་བའི་རྒྱུ་མཚན་གྱིས་རྩོད་པ་འདི་དག་བྱུང་ངོ་ཞེས་དེའི་ཟབ་པ་ཉིད་ཟུར་གྱིས་བསྙད་པར་བྱའོ་སྙམ་དུ་རྗེ་བཙུན་གྱི་ཐུགས་ལ་དགོངས་ནས་གསུངས་པ་ཡིན་ནོ། །ཞེན་མེད་སོ་སྐྱེའི་རྟོགས་ཐོབ་འཕེལ་བརྟན་གནས། །ཞེན་མེད་འཕགས་པའི་ལམ་དུ་སྤང་རྟོགས་རྫོགས། །ཞེན་མེད་ལམ་མཐར་བྱས་ནས་བདེན་གཉིས་གཟིགས། །རྒྱལ་སྲས་རྣམས་ཀྱི་རྟོགས་པ་འདི་བཤད་དོ། །རྩེ་མོའི་མངོན་པར་རྟོགས་པའི་སྐབས་སྟེ་ལྔ་པའི་སྤྱི་དོན་ནོ། །གཉིས་པ་བརྟན་པ་རྒྱུ་འབྲས་ཀྱི་ཡན་ལག་རྒྱས་པར་བཤད་པ་ལ་གཉིས། བརྟན་པའི་རྒྱུ་མཐར་གྱིས་པ་དང༌། བརྟན་པའི་འབྲས་བུ་སྐད་ཅིག་མའི་ཡན་ལག་རྒྱས་པར་བཤད་པའོ། །དང་པོ་བརྟན་པའི་རྒྱུ་མཐར་གྱིས་པའི་ཡན་ལག་རྒྱས་པར་བཤད་པ་ལ་གསུམ། ལམ་མཐར་གྱིས་པ་དང༌། ལམ་ཁྱད་པར་དུ་བྱེད་པའི་མཐར་གྱིས་པ་དང༌། ལམ་དག་བྱེད་ཀྱི་མཐར་
གྱིས་པའོ། །དང་པོ་ལམ་གྱི་མཐར་གྱིས་པ་ནི། བྱང་ཆེན་སྦྱིན་པའི་མཐར་གྱིས་པའི་བྱ་བ་རབ་ཏུ་འདོགས། མཐར་གྱིས་པའི་བསླབ་པ་དང༌། མཐར་གྱིས་པའི་སྒྲུབ་པ་རབ་ཏུ་འདོགས་ཏེ་དེ་ཐམས་ཅད་ཀྱང་དམིགས་སུ་མེད་དོ། །དེ་ཅིའི་ཕྱིར་ཞེ་ན། དེ་ནི་འདི་ལ་དེ་ལྟར་ངོ་བོ་ཉིད་མེད་དོ། །ཞེས་གཞན་ལྔ་ལ་ཡང་དེ་ཁོ་ན་ལྟར་སྦྱར་ནས་ཕྱིན་དྲུག་ལ་རང་ཉིད་གནས་ནས་གཞན་དེ་ལ་འགོད་པར་གསུངས་སོ། །དེ་ཡང་རྒྱལ་སྲས་རྣམས་ཀྱི་ས་བཅུ་ཡོངས་སུ་རྫོགས་པ་ལ་ཕར་ཕྱིན་བཅུ་དགོས་པ་མིན་ནམ། ཅིའི་ཕྱིར་ཕྱིན་དྲུག་ཅེས་སྨོས་ཤེ་ན། ལྷག་མ་བཞི་ཤེར་ཕྱིན་གྱི་ནང་དུ་འདུས་བས་སྐྱོན་མེད་དོ། །འདུས་ཚུལ་ནི། རྒྱན་སྣང་ལས། མཉམ་གཞག་ཤེར་ཕྱིན་དངོས་རྗེས་ཐོབ་ཀྱི་བཞི་དེས་དྲངས་པའི་ཤེར་ཕྱིན་དུ་བཞེད། ཚིག་གསལ་ལས་ནི། །སྦྱིན་སོགས་བསྔོ་བའི་མཐུས་མི་ཟད་པར་བྱེད་པ་ཐབས། སྦྱིན་སོགས་དམན་ཞིང་ཉུང་ཡང་ཁྱད་པར་ཅན་དུ་སྤྲུལ་པ་སྟོབས། །དགེ་རྩ་ཆུང་ཡང་ཁྱད་དུ་མི་གསོད་པར་བློས་བསྡོམས་ཏེ་སྨོན་ལམ་འདེབས་པ་སྨོན་ལམ། །སྨོན་པའི་འབྲས་བུ་ཡིད་འོང་སྣ་ཚོགས་ལ་སྤྱོད་པ་ན་དེ་ཚོགས་གཉིས་ཀྱི་འབྲས་བུར་འདོད་ཀྱི་རྒྱུ་མེད་དང་མི་མཐུན་པའི་རྒྱུ་ལས་བྱུང་བར་མི་འདོད་པ་ཡེ་ཤེས་ཡིན་ཏེ། དེ་བཞི་ཡང་ཤེས་རབ་ཁྱད་པར་ཅན་གྱིས་བསྒྲུབས་བས་ཤེར་ཕྱིན་དུ་
འདུ་བར་བཞེད། སློབ་དཔོན་ཡེ་ཤེས་ཞབས་ནི། ཡི་རངས་སོགས་ཀྱིས་ཕྱིན་དྲུག་ཡོངས་སུ་རྫོགས་པར་བྱེད་པ་ཐབས། དེ་དག་རྫོགས་བྱང་དུ་བསྔོ་བ་སྨོན་ལམ། རང་རང་གི་མི་མཐུན་ཕྱོགས་ཟིལ་གྱིས་གནོན་པ་སྟོབས། ཐམས་ཅད་དུ་རྣམ་པ་ལ་མཁས་པ་ནི་ཡེ་ཤེས་ཡིན་པས་ཕར་ཕྱིན་རེ་རེའི་ནང་དུ་བཞི་ཀ་འདུ་བར་བཞེད་དོ། །གཉིས་པ་ལམ་ཁྱད་པར་དུ་བྱེད་པའི་མཐར་གྱིས་པ་ནི། །སངས་རྒྱས་ཆོས་དགེ་འདུན་ཚུལ་ཁྲིམས་གཏོང་བ་ལྷ་རྗེས་སུ་དྲན་པའི་མཐར་གྱིས་པ་དྲུག་སྟེ་སྔར་ལྟར་རོ། །འདིར་སངས་རྒྱས་རྗེས་སུ་དྲན་པ་ལ་དེ་བཞིན་གཤེགས་པ་ལ་གཟུགས་སོགས་སུ་དང་མཚན་དཔེ་སོགས་སུ་དང༌། ཟག་མེད་ཀྱི་ཕུང་པོ་ལྔར་དང༌། སྟོབས་སོགས་སུ་དང༌། རྟེན་འབྲེལ་དུ་ཡིད་ལ་མི་བྱེད་པའི་སངས་རྒྱས་རྗེས་སུ་དྲན་པ་རྣམ་པ་ལྔ་ཉི་སྣང་དང་ལེ་བརྒྱད་མར་གསུངས་ཏེ། །དང་པོ་ཚོགས་ལམ་དང་ལྷག་མ་བཞི་སྦྱོར་ལམ་བཞི་དང༌། དེ་ནས་དྲན་ཉེ་སོགས་བྱང་ཕྱོགས་རྫོགས་པར་གསུངས་པས། མཐོང་ལམ་དང་རྣམ་མཁྱེན་གྱི་ཡེ་ཤེས་ཀྱི་བར་རྫོགས་པར་གསུངས་པའི་བར་གྱིས་སྒོམ་ལམ་བསྟན་པར་ཉི་སྣང་ལས་གསུངས་སོ། །འགྲེལ་བ་ཆེ་ཆུང་གཉིས་སུ། །དྲན་ཉེ་ནས་སྟོབས་ལྔའི་བར་གྱིས་སྦྱོར་ལམ་དུ་དང༌། བྱང་ཆུབ་ཡན་ལག་གིས་མཐོང་ལམ་དུ་དང༌། འཕགས་ལམ་གྱིས་སྒོམ་ལམ་དུ་རྗེས་སུ་དྲན་པར་གསུངས་ཤིང༌། དེ་ཡང་
མདོ་ལས་གསུངས་པའི་མཐར་གྱིས་བྱ་བ། མཐར་གྱིས་བསླབ་པ། མཐར་གྱིས་བསྒྲུབ་པ་གསུམ་གྱི་ས་སྦྱོར་མཐོང་སྒོམ་གསུམ་བསྟན་པར་དགོས་སོ། །ཆོས་རྗེས་སུ་དྲན་པའི་སྐབས་སུ་དགེ་མི་དགེ་ལུང་མ་བསྟན་གྱི་ཆོས་རྗེས་སུ་དྲན་པར་གསུངས་པ་ནི། དེ་གསུམ་ཆོས་དཀོན་མཆོག་མིན་ཀྱང་ཆོས་དཀོན་མཆོག་ཡིད་ལ་བྱེད་པ་ན་འདུས་བྱས་མ་བྱས་དང་ཟག་པ་དང་བཅས་མ་བཅས་ཀྱི་ཆོས་སུ་གྲགས་པ་རྣམས་ཞར་ལ་ཡིད་ལ་བྱེད་པའོ། །དགེ་འདུན་རྗེས་སུ་དྲན་པ་ནི་ཐེག་པ་ཆེ་ཆུང་གཉིས་ཀའི་དགེ་འདུན་རྣམས་ཀྱི་ཐུན་མོང་བ་དང༌། ཐུན་མོང་མ་ཡིན་པའི་ཡོན་ཏན་དྲན་པའོ། །སྦྱིན་པ་དང་ཚུལ་ཁྲིམས་རྗེས་སུ་དྲན་པ་ནི་དེ་དག་ཕན་ཡོན་དྲན་པ་ཡིན་ལ་སྔར་གྱི་དེ་ཉམས་ལེན་གྱི་ལྡོག་པ་ནས་བསྟན་པས་མི་ཟློས་སོ། །དེ་ཡང་ཚུལ་ཁྲིམས་ནི་འགྱོད་པ་མེད་པས་རྒྱུད་བསིལ་བར་བྱེད་པ་དང༌། མཐོ་རིས་ཀྱི་ལམ་དང༌། ཇི་ལྟར་སྨོན་པའི་འབྲས་བུ་འགྲུབ་པ་དང༌། འགྱོད་པ་མེད་པས་ཏིང་ངེ་འཛིན་སྐྱེད་པ་དང༌། ལྷ་དང་མིའི་ཡོན་སྦྱོང་བའོ། །གཏོང་བ་ནི་མཛའ་བཤེས་འཕེལ་བ་དང༌། ཚེ་རབས་རྣམས་སུ་བདེ་བའི་རྒྱུ་དང་ཕ་མ་དང་བླ་མ་ལ་མཆོད་པའི་ཡན་ལག་གོ་ཞེས་དྲན་པར་ཚིག་གསལ་ལས་གསུངས་ཤིང༌། ལྷ་རྗེས་སུ་དྲན་པ་ཡང༌། རྒྱལ་ཆེན་རིགས་བཞི་སོགས་ཀྱི་ལྷ་ཕལ་པ་ནི། འདི་དག་ཡིད་དུ་
འོང་བའི་ལས་ཁྱད་པར་ཅན་ལས་གྲུབ་པོ་སྙམ་པ་དང༌། འཇིག་རྟེན་དབང་ཕྱུག་དང་རྗེ་བཙུན་སྒྲོལ་མ་སོགས་ཀྱི་ཡོན་ཏན་དྲན་པའོ། །ཞེས་ཚིག་གསལ་ལས་བཤད་ཅིང༌། འཕགས་པ་དང་སློབ་དཔོན་གྱིས་ལྷར་སྐྱེས་པའི་འཕགས་པ་རྣམས་ལས་གཞན་མ་གསུངས་སོ། །གསུམ་བ་ལམ་དག་བྱེད་ཀྱི་མཐར་གྱིས་པ་ནི། གཟུགས་སོགས་ཀྱི་ཆོས་རྣམས་བདེན་པའི་དངོས་པོ་མེད་པའི་ངོ་བོ་ཉིད་དུ་ངེས་པ་རྙེད་པའི་ཚུལ་གྱིས་ཁོང་དུ་ཆུད་པར་བྱ་བའོ། །དེ་ལྟར་བཅུ་གསུམ་པོ་འདི་ནི་མཐར་གྱིས་བར་མ་ཟད་ཐེག་ཆེན་གྱི་ལམ་ཐམས་ཅད་ལ་དགོངས་ཤིང༌། མཐར་གྱིས་པའི་སྐབས་སུ་ཡང༌། རང་རྒྱུད་ལ་སྔན་ཆད་སྐྱེས་པ་དང་མ་སྐྱེས་པའི་མངོན་རྟོགས་རྣམས་རིམ་གྱིས་ཡིད་ལ་བྱེད་པའི་དུས་སུ་དེ་དག་ཐམས་ཅད་ཀྱང་ཕ་རོལ་ཏུ་ཕྱིན་པ་དྲུག་ལྡན་དུ་སྒྲུབ་པ་དང༌། རྟེན་དཀོན་མཆོག་གསུམ་ལ་བརྟེན་པ་དང༌། ཚུལ་ཁྲིམས་དང་གཏོང་བའི་ཕན་ཡོན་དྲན་པ་དང་འབྲེལ་བ་དང༌། ལྷ་ཐམས་ཅད་དབང་པོར་དྲན་པ་དང༌། དེ་ཐམས་ཅད་ཀྱང་འཁོར་གསུམ་དུ་མི་རྟོག་པའི་དངོས་མེད་ངོ་བོ་ཉིད་དུ་ཤེས་པས་ཞེན་པ་གཅོད་པའི་ཚུལ་གྱིས་ཉམས་ལེན་གཅིག་ལ་བཅུ་གསུམ་པོ་ཚང་བར་ཉམས་སུ་ལེན་པ་ཡིན་ནོ། །ཞེན་མེད་ལམ་མཆོག་གཅིག་ལ་ལམ་ཀུན་འདུས། །ཞེན་མེད་ཉམས་ལེན་གཅིག་གིས་ཚོགས་གཉིས་རྫོགས། །ཞེན་མེད་
ཡོན་ཏན་ཀུན་སྡུད་དམ་པའི་ལམ། །རྒྱལ་སྲས་རྣམས་ཀྱི་ཐབས་མཁས་འདིར་བཤད་དོ། །མཐར་གྱིས་སྦྱོར་བའི་སྐབས་ཏེ་དྲུག་པའི་སྤྱི་དོན་ནོ། །གཉིས་པ་བརྟན་པའི་འབྲས་བུ་སྐད་ཅིག་མའི་སྦྱོར་བ་བཤད་པ་ལ་གཉིས། ཡོན་ཏན་མངོན་དུ་བྱེད་པ་དང༌། ཡུལ་གྱི་རང་བཞིན་རྟོགས་ཚུལ་གྱི་དབང་དུ་བྱས་པའི་སྐད་ཅིག་མའོ། །དང་པོ་ཡོན་ཏན་མངོན་དུ་བྱེད་ཚུལ་གྱི་དབང་དུ་བྱས་པའི་སྐད་ཅིག་མ་ལ་ཡང་གཉིས། རྣམ་སྨིན་མ་ཡིན་པ་དང༌། རྣམ་སྨིན་གྱི་སྐད་ཅིག་མའོ། །དང་པོ་རྣམ་སྨིན་མ་ཡིན་པའི་སྐད་ཅིག་མའི་སྐབས་སུ་རྣམ་སྨིན་མ་ཡིན་པ་དང་ཡིན་པའི་དོན་ལ་བཞེད་པ་མི་འདྲ་བ་མང་ཡང་དོན་དུ། སྐད་ཅིག་མ་འདི་དག་ལྡོག་པ་ཐ་དད་པ་ཙམ་ཡིན་པས་ཡུལ་ཅན་ལ་རྣམ་སྨིན་ཡིན་མིན་མི་རུང་བས་ཡུལ་ལ་བྱ་ཞིང༌། དེ་ཡང་གཅིག་གི་ཡུལ་གཉིས་ཀའི་ཡང་ཡུལ་ཡིན་པའི་ཕྱིར་མདོ་བསྟན་བཅོས་ནས་བསྟན་ཚོད་ཀྱི་ཡུལ་ལ་རྣམ་སྨིན་མ་ཡིན་པ་དང་རྣམ་སྨིན་གཉིས་སུ་དབྱེ་སྟེ། དང་པོའི་ཡུལ་ནི་རང་གི་རྒྱུད་ལ་ནུས་པ་མཐར་ཐུག་མ་སྨིན་པ་དང༌། ཕྱི་མ་ནི་རང་གི་རྒྱུད་ལ་ནུས་པ་མཐར་ཐུག་སྐྱེས་པའི་གནས་སྐབས་ཀྱི་དབང་དུ་བྱས་ནས་བཞག་གོ། །དེ་ཡང་བྱང་ཆེན་ཡུམ་ལ་དེ་ལྟར་སྤྱོད་པ་ནི་སེམས་བསྐྱེད་པ་གཅིག་གིས་ཕར་ཕྱིན་དྲུག་ཡོངས་སུ་རྫོགས་པར་བྱེད་དོ་ཞེས་མ་འདྲེས་
པ་དང་མཚན་དཔེའི་བར་ལ་གསུངས་ཏེ། སེམས་བསྐྱེད་གཅིག་ནི་སྐད་ཅིག་སྦྱོར་ཡིན་ནོ། །འདི་ནི་སྦྱིན་པ་ལ་སོགས་པའི་ངོ་བོར་གྱུར་པའི་ཡེ་ཤེས་དམིགས་པར་བྱ་བའི་སྐད་ཅིག་མ་གཅིག་གི་ཡུལ་དུ་བྱས་པས་སྦྱིན་སོགས་ནས་དཔེ་བྱད་བརྒྱད་ཅུའི་བར་གྱི་ཟག་མེད་ཀྱི་ཆོས་རྣམས་སྐད་ཅིག་མ་གཅིག་གི་ཡུལ་དུ་བསྡུས་པའི་སྦྱོར་བ་ཡིན་ཏེ་སྦྱིན་སོགས་ཀྱི་ཆོས་རྣམས་གཅིག་ཡུལ་དུ་བྱས་པ་ན་གཞན་ཡུལ་དུ་བྱེད་མི་ནུས་པའི་དངོས་པོ་སོ་སོར་འཛིན་པའི་ཕྱིན་ཅི་ལོག་དང་བྲལ་བའི་ཕྱིར་རོ། །གཉིས་པ་རྣམ་སྨིན་གྱི་སྐད་ཅིག་མ་ནི། སྐད་ཅིག་མ་གཅིག་ཁོ་ན་ལ་རང་རྒྱུད་ལ་རྣམ་པར་སྨིན་པའི་གནས་སྐབས་སུ་གྱུར་པའི་ཟག་པ་མེད་པའི་ཆོས་རྣམས་རྟོགས་པའི་ཡེ་ཤེས་ཡིན་ཏེ། །དེ་བྱང་སེམས་ཀྱི་ལམ་རྣམ་པར་སྨིན་པའི་ཆོས་ཅན་ལ་གནས་པས་ཕར་ཕྱིན་དྲུག་པོ་ཡོངས་སུ་རྫོགས་པ་དང་སྟོང་པ་ཉིད་ཐམས་ཅད་བྱང་ཆུབ་ཕྱོགས་ཀྱི་ཆོས་སོ་འདུན་ཡོངས་སུ་རྫོགས་པ་དང༌། ཞེས་སོ། །གཉིས་པ་ཡུལ་རྟོགས་ཚུལ་གྱི་དབང་དུ་བྱས་པའི་སྐད་ཅིག་མ་ལ་གཉིས། མཚན་ཉིད་མེད་པ་དང༌། གཉིས་སུ་མེད་པའི་སྐད་ཅིག་མའོ། །དང་པོ་མཚན་ཉིད་མེད་པའི་སྐད་ཅིག་མ་ནི། །དུས་སྐད་ཅིག་མ་གཅིག་ཁོ་ནས། ཆོས་ཐམས་ཅད་ནི་བདེན་པའི་མཚན་ཉིད་མེད་པའོ། །ཞེས་ཀུན་བྱང་གི་ངོ་བོའི་ཆོས་རྣམས་དོན་དམ་པར་མཚན་ཉིད་མེད་པ་ཉིད་དུ་ཤེས་པའོ། །བྱང་ཚེ་
རྨི་ལམ་ལྟ་བུའི་ཉེ་བར་ལེན་པའི་ཕུང་པོ་ལྔ་ལ་གནས་ཤིང་སྦྱིན་པ་ཡོངས་སུ་གཏོང་ངོ༌། །ཚུལ་ཁྲིམས་སྲུང་ངོ༌། །བཟོད་པ་སྒོམ་མོ། །བརྩོན་འགྲུས་རྩོམ་མོ། །ཏིང་ངེ་འཛིན་སྒོམ་མོ། །ཤེས་རབ་སྒོམ་མོ་ཞེས་སོ། །གཉིས་པ་གཉིས་སུ་མེད་པའི་སྐད་ཅིག་མ་ནི། །གང་གི་ཚེ་སད་པའི་དུས་སུ་གཟུང་འཛིན་ཐ་དད་པའི་ཚུལ་དུ་རྨི་ལམ་ལ་གཟུང་བ་དང་རྨི་ལམ་མཐོང་བ་ལ་འཛིན་པར་མི་མཐོང་བ་དེའི་ཚེ་ཆོས་ཐམས་ཅད་ཀྱང་རྨི་ལམ་གྱི་གཟུང་འཛིན་ཐ་དད་མེད་པ་དེ་ལྟ་བུའི་ཆོས་ཡིན་ནོ་ཞེས་ཆོས་རྣམས་ཀྱི་དེ་ཁོ་ན་ཉིད་གཟུང་འཛིན་གཉིས་སུ་མེད་པ་སྐད་ཅིག་གཅིག་ཁོ་ནས་རྟོགས་པ་སྟེ། བྱང་ཚེ་རྨི་ལམ་མི་མཐོང༌། རྨི་ལམ་མཐོང་བ་མི་མཐོང་ངོ༌། །ཞེས་སོ། །དེ་ལྟར་སྐད་ཅིག་མ་བཞི་པོ་འདི་དག་ཀྱང་རྒྱུན་མཐའི་ཡེ་ཤེས་གཅིག་གི་སྐད་ཅིག་མའི་གཟིགས་ཚུལ་ལ་ལྡོག་པས་ཕྱེ་བ་ཙམ་ཡིན་གྱི་ངོ་བོ་ཐ་དད་པ་ནི་མེད་དོ། །ཞེན་མེད་ལམ་མཐར་བྱས་པའི་སྐད་ཅིག་ལ། །ཞེན་མེད་ལམ་གྱི་ཆོས་ཀུན་མངོན་བྱེད་ཅིང༌། །ཞེན་མེད་ཤེས་བྱའི་ཆོས་ཀྱི་དེ་ཉིད་མཐོང༌། །རྒྱལ་སྲས་ལམ་གྱི་མཐར་ཐུག་འདིར་བཤད་དོ། །སྐད་ཅིག་མའི་སྐབས་ཏེ་སྐབས་བདུན་པའི་སྤྱི་དོན་ནོ།། །།གསུམ་པ་ཞུགས་འབྲས་ཆོས་སྐུའི་ཡན་ལག་རྒྱས་པར་བཤད་པ་ལ་གཉིས། །
སྤྱི་དང་ཡན་ལག་གི་དོན་ནོ། །དང་པོ་སྤྱིའི་དོན་ལ་གཉིས། །བྱེད་པ་པོ་སྐུ་དང་བྱ་བ་ཕྲིན་ལས་ཀྱི་རང་བཞིན་ནོ། །དང་པོ་སྐུ་ལ་གཉིས། སྐུའི་གྲངས། ངོ་བོའོ། །དང་པོ་སྐུའི་གྲངས་ལ་བཞི། གཉིས་སུ་དང༌། གསུམ་དུ་དང་ལྔར་དང༌། བཞིར་དབྱེ་བའོ། །དང་པོ་ནི་རིན་ཞེན་ཕྲེང་བར། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་དང༌། རིག་པ་དྲུག་ཅུ་པར། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་ནི་ཐོབ་པར་ཤོག །ཅེས་ཆོས་སྐུ་དང་གཟུགས་སྐུ་དམ་པ་གཉིས་སུ་བསྡུས་སོ། །དེ་བཞིན་དུ་རྒྱུད་བླ་མར་ཡང༌། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །ཞེས་ངོ་བོ་ཉིད་ལ་རང་དོན་དོན་དམ་པའི་སྐུ་དང༌། ལོངས་སྤྲུལ་གཉིས་ལ་གཞན་དོན་ཀུན་རྫོབ་ཀྱི་སྐུར་བསྟན་ཏོ། །གཉིས་པ་གསུམ་དུ་བཞག་པ་ནི། མདོ་སྡེའི་རྒྱན་ལས། སྐུ་གསུམ་དག་གིས་སངས་རྒྱས་ཀྱི། །སྐུ་བསྡུས་པར་ནི་ཤེས་བྱ་སྟེ། །སྐུ་གསུམ་དག་གིས་རང་གཞན་གྱི། །དོན་འདི་རྟེན་དང་བཅས་པར་བསྟན། །ཞེས་ལོངས་སྐུ་རང་དོན་དང༌། སྤྲུལ་སྐུ་གཞན་
དོན་ནོ། །ངོ་བོ་ཉིད་དེ་གཉིས་ཀྱི་རྟེན་དུ་གསུངས་པ་དང༌། རྒྱུད་བླར་ཡང༌། དེ་དབྱེ་ཟབ་དང་རྒྱ་ཆེ་དང༌། །བདག་ཉིད་ཆེན་པོའི་ཡོན་ཏན་གྱིས། །ཆོས་ཀྱི་རབ་ཕྱེ་རང་བཞིན་ལ། །སོགས་པའི་སྐུ་གསུམ་དག་གིས་འཇུག །ཅེས་དང༌། འཕགས་པ་ཀླུས། །ཆོས་ལོངས་སྤྲུལ་པའི་སྐུ་གསུམ་དུ་བསྡུས་ནས་སྐུ་གསུམ་ལ་བསྟོད་པ་སོགས་སོ། །གསུམ་པ་ལྔར་དབྱེ་བ་ནི། །ཚིག་གསལ་ལས། ལོངས་སྐུ་ལ་ས་བཅུ་པའི་བྱང་སེམས་འབའ་ཞིག་ལ་སྣང་བ་ཇི་སྐད་བཤད་པའི་ཡེ་ཤེས་རྣམས་ཀྱི་གཞིར་གྱུར་པ་ལོངས་སྐུ་ཆེན་པོ་དང་ས་དང་པོ་ལ་སོགས་པ་ལ་གནས་པ་ལ་སྣང་བ་སྤྲུལ་པའི་སྐུ་ལ་ལོངས་སྐུར་བཏགས་པ་དང་གཉིས་སུ་ཕྱེ་བའམ། །ཡང་ན་སྤྲུལ་སྐུ་ལ་རྣམ་པར་སྨིན་པ་དང༌། རྣམ་པར་སྨིན་པ་མ་ཡིན་པའི་དབྱེ་བས་སྐུ་ལྔར་འབྱེད་པར་བཤད། རྟོགས་དཀར་ཡང་སྤྲུལ་སྐུ་ལ་གཉིས་སུ་དབྱེ་བའི་སྐུ་ལྔ་བཤད། སློབ་དཔོན་འཇམ་དཔལ་གྲགས་པས། ངོ་བོ་ཉིད་སྐུ་དང་ཆོས་སྐུ་དང་ཡེ་ཤེས་ཀྱི་སྐུ་སྟེ་གསུམ་དང་གཟུགས་སྐུ་གཉིས་བཅས་ལྔར་བཞེད། །སློབ་དཔོན་སྒེག་པའི་རྡོ་རྗེས་ངོ་བོ་ཉིད་དང་ལོངས་སྤྱོད་རྫོགས་པ་དང༌། རྣམ་པར་སྨིན་པ་དང༌། སྤྲུལ་པ་དང་ཆོས་ཀྱི་སྐུ་ལྔར་བཞེད་དོ། །བཞི་པ་སྐུ་བཞིར་དབྱེ་བ་ནི། སློབ་དཔོན་སེང་གེ་བཟང་པོའི་རྒྱན་སྣང་དང༌།
འགྲེལ་ཆུང་གཉིས་དང༌། དེའི་རྗེས་སུ་འབྲང་བ་རྣམས་ཀྱི་བཞེད་པ་སྟེ་འཆད་པར་འགྱུར་རོ། །གཉིས་པ་སྐུའི་ངོ་བོ་ལ་གཉིས། སྐུ་དང་ཡེ་ཤེས་སོ། །དང་པོ་སྐུ་ལ་བཞི། །ངོ་བོ་ཉིད་ཡེ་ཤེས་ལོངས་སྤྱོད་རྫོགས་པ་སྤྲུལ་པའི་སྐུའོ། །དང་པོ་ངོ་བོ་ཉིད་སྐུ་ནི། །སྐྱེ་འཇིག་གནས་གསུམ་དང་བྲལ་བས་འདུས་མ་བྱས་པ་དང༌། ཡོན་ཏན་གྱི་ཆོས་དང་དབྱེར་མེད་པས་དབྱེར་མེད་པ་དང༌། གཟུང་འཛིན་གཉིས་མེད་པས་མཐའ་གཉིས་སྤངས་པ་དང༌། ཉོན་མོངས་ཤེས་བྱ་སྙོམས་འཇུག་གི་སྒྲིབ་པ་གསུམ་ལས་གྲོལ་བས་གློ་བུར་གྱི་དྲི་མ་དང་བྲལ་བ་དང༌། རང་བཞིན་གྱིས་དག་པས་དྲི་མ་མེད་པ་དང༌། །རྟོག་པའི་ཡུལ་མིན་པས་རྣམ་པར་རྟོག་མེད་དང༌། སངས་རྒྱས་ཀྱི་ཡུལ་ཡིན་པས་རྣལ་འབྱོར་གྱི་ཡུལ་ཡིན་པ་སྟེ་ཕྱི་མ་གསུམ་འོད་གསལ་བའི་མཚན་ཉིད་དུ་བསྡུས་ནས་མཚན་ཉིད་ལྔ་དང༌། རྒྱ་ཆེ་བའི་ཕྱིར་གཞལ་དུ་མེད་པ་དང༌། བགྲང་བ་ལས་འདས་པའི་ཕྱིར་གྲངས་མེད་པ་དང༌། རྟོག་གའི་ཡུལ་མིན་པའི་ཕྱིར་བསམ་དུ་མེད་པ་དང༌། སངས་རྒྱས་ཁོ་ན་ལ་ཡོད་པས་འབའ་ཞིག་པ་དང༌། བག་ཆགས་མ་ལུས་པ་སྤངས་པས་དག་པའི་མཐར་ཐུག་པའི་ཡོན་ཏན་ལྔ་དང་ལྡན་པར་རྒྱུད་བླ་མ་ལས་བཤད་དོ། །ཡོན་ཏན་ཕྱི་མ་འདི་གཉིས་དང༌། མཚན་ཉིད་གསུམ་པས་ནི། འདི་སློབ་ལམ་དང་ལམ་མ་ཞུགས་ལ་ཡོད་པ་ཡང་བཀག་གོ། །སྐུ་འདི་ནི་སེམས་
གྱི་རང་བཞིན་དེ་ཉིད་ལམ་སྒོམ་སྟོབས་ཀྱིས་གནས་མ་ལུས་པ་གྱུར་པའི་བདག་ཉིད་དུ་ལན་ཅིག་མ་ཡིན་པར་བཀའ་སྩལ་པས་ན། འདི་དེ་བཞིན་ཉིད་མ་ཡིན་པའི་འདུས་མ་ བྱས་གཞན་ཞིག་ཏུ་འདོད་པ་ནི་དབུ་སེམས་གང ་དང་ཡང་མི་མཐུན་ནོ། །གལ་ཏེ་དེ་བཞིན་ཉིད་དུ་འདོད་ན་དེ་གདོད་མ་ནས་ཀྱང་ཡོད་དགོས་པས་གཞི་དུས་སུ་ངོ་བོ་ཉིད་སྐུ་ཡོད་པར་འགྱུར་ཞེ་ན། །ཉེས་པ་དེ་ནི་དེ་བཞིན་ཉིད་མ་ཡིན་པའི་འདུས་མ་བྱས་ལའང་མཚུངས་ཏེ། དེ་བཞིན་ཉིད་གཞི་དུས་ནས་ཀྱང་མི་འདོད་ན་འདུས་མ་བྱས་མ་ཡིན་པར་ཐལ་བ་འདི་ཙམ་དུ་ཟད་པས་སོ། །གཉིས་པ་ཡེ་ཤེས་ཆོས་སྐུ་ནི། སངས་རྒྱས་ཀྱི་སའི་ཟག་མེད་ཀྱི་སེམས་དང་སེམས་བྱུང་གཞུང་ནས་འཆད་པར་འགྱུར་བ་རྣམས་ཏེ་གཟུགས་སྐུ་གཉིས་ཀྱི་བདག་རྐྱེན་ནོ། །གསུམ་པ་ལོངས་སྤྱོད་རྫོགས་སྐུ་ནི། །ཁྱད་པར་ལྔ་དང་ལྡན་པ་སྟེ། སྐུ་སྟོན་པ་དང་གསུམ་བརྗོད་པ་དང༌། །ཐུགས་མཛད་པ་རྒྱུན་མི་འཆད་པ་དང༌། དེ་དག་ལ་ཀུན་ཏུ་རྟོག་པའི་འདུ་བྱེད་མེད་པ་དང༌། དུ་མར་སྟོན་ཀྱང་དེ་ལྟར་མེད་པ་སྟེ། རྒྱུད་བུར། །བརྗོད་སྟོན་མཛད་རྒྱུན་མི་འཆད་དང༌། །མངོན་པར་འདུ་བྱེད་མེད་པ་དང༌། །དེ་ཡི་ངོ་བོར་མིན་སྟོན་ལ། །འདིར་ནི་སྣ་ཚོགས་རྣམ་ལྔར་བརྗོད། །ཇི་ལྟར་ཚོན་ནི་སྣ་ཚོགས་ཀྱིས། །ནོར་བུ་དེ་དངོས་མིན་སྣང་ལྟར། །དེ་བཞིན་འགྲོ་རྐྱེན་སྣ་ཚོགས་
པས། །ཁྱབ་བདག་དེ་དངོས་མིན་པར་སྣང༌། །ཞེས་སོ། །འདི་ལ་ངེས་པ་ལྔ་ལྡན་དུ་སྨྲ་བ་ལ་ནི་དོན་བསྡུས་སྒྲོན་མེར། ངེས་པ་བཞི་སྟེ་འཁོར་དང་ནི། །གནས་དང་སྟོན་པ་ཆོས་སུ་སྟེ། །ཞེས་པ་ཙམ་ལས་མ་མཐོང་ལ་འདིས་ནི་ཁུངས་མི་ཐུབ་ཅིང་དེར་མ་ཟད་ཐེག་བསྡུས་ལྟར་ན་དེ་ལ་གནོད་པ་ཡང་སྣང་བས་དཔྱད་པར་བྱའོ། །བཞི་པ་སྤྲུལ་སྐུ་ནི། །སེམས་ཅན་སྲིད་པ་ལས་སྐྱེ་བ་བསྐྱེད་ནས་མྱང་འདས་ལ་འདུན་པར་བྱེད་པ་དང༌། ཐེག་དམན་དུ་ཞུགས་པ་བཟློག་ནས་ཐེག་ཆེན་གྱིས་སྨིན་པར་བྱེད་པ་དང༌། བྱང་ཆུབ་མཆོག་ཏུ་ལུང་སྟོན་པས་རྣམ་གྲོལ་ཐོབ་པར་བརྗོད་པ་སྟེ། འབྲས་བུ་གསུམ་གྱི་རྒྱུ་བྱེད་ཅིང་ལོངས་སྐུའི་དབང་གིས་བྱུང་བའོ། །གཉིས་པ་ཡེ་ཤེས་ལ་གསུམ། ཡེ་ཤེས་ཀྱི་ངོ་བོ་་དེའི་རྒྱུ་་དེ་སྐུར་བསྟན་པའོ། །དང་པོ་ཡེ་ཤེས་ཀྱི་ངོ་བོ་ནི། འཕགས་པ་སངས་རྒྱས་ཀྱི་ས་ལས། །ཤིན་ཏུ་འདུས། སངས་རྒྱས་ཀྱི་ས་ནི་རྣམ་པ་ལྔས་བསྡུས་ཏེ་ལྔ་གང་ཞེ་ན། ཆོས་ཀྱི་དབྱིངས་རྣམ་པར་དག་པ་དང༌། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོག་པའི་ཡེ་ཤེས་དང༌། བྱ་བ་ནན་ཏན་གྱི་ཡེ་ཤེས་ཡིན་ནོ། །ཞེས་སོ། །དེ་ལ་དང་པོ་ནི། །ངོ་བོ་ཉིད་ཀྱི་སྐུ་ཡིན་ལ། ཕྱི་མ་བཞི་ནི། མདོ་སྡེ་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་
པ་ཉིད་དང་སོ་སོར་རྟོག །བྱ་བ་སྒྲུབ་པ་ཁོ་ནའོ། །ཞེས་དང་པོ་མི་གཡོ་ཞིང་གཞན་གསུམ་གྱི་རྟེན་དང༌། ཕྱི་མ་གསུམ་གཡོ་བ་དང་དེ་ལ་བརྟེན་པའོ། །དེ་ལ་དང་པོ་ནི། ཁྱད་པར་ལྔ་དང་ལྡན་པ་སྟེ། དད་དང་ང་ཡིར་འཛིན་པ་དང་གཟུང་བ་དང་འཛིན་པ་མེད་པའི་ཕྱིར་དའི་བ་མེད་པ་དང༌། ཤར་ལ་སོགས་པའི་ཡུལ་གྱི་སྒོ་ནས་རིས་ཡོངས་སུ་མ་ཆད་པ་དང༌། དུས་ཀྱི་སྒོ་ནས་རྟག་ཏུ་ལྡན་པ་དང༌། རྟག་ཏུ་སྒྲིབ་པ་དང་བྲལ་བས་ཤེས་བྱ་ཐམས་ཅད་ལ་མ་རྨོངས་པ་དང༌། རྣམ་པ་མེད་པས་ཡུལ་དེ་དག་ལ་མངོན་དུ་ཕྱོགས་པ་ཡང་མ་ཡིན་པ་སྟེ། རྒྱན་ལས། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་པ། རྟག་ཏུ་དེ་ལ་མངོན་ཕྱོགས་མིན། །ཞེས་སོ། །ཁྱད་པར་ཕྱི་མའི་དོན་ནི་རྣམ་པས་བར་མ་ཆོད་པར་ཡུལ་མཁྱེན་ཞེས་སམ། །ཡང་ན་འཛིན་སྟངས་ཀྱི་རྣམ་པ་རིས་སུ་ཆད་པ་མེད་པས་ཡུལ་ལ་རིས་སུ་ཆད་པའི་སྒོ་ནས་ཕྱོགས་པ་ཡང་མ་ཡིན། །ཞེས་པའོ། །འདིའི་སྒྲ་དོན་ཡང༌། དེ་ཉིད་ལས། ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་རོ། །ཞེས་འདི་ལ་ཡེ་ཤེས་ཀྱི་གཟུགས་བརྙན་འབྱུང་བས་མེ་ལོང་ཡེ་ཤེས་སུ་བཤད་
དོ། །འདི་ལོངས་སྐུར་བཤད་པ་ནི་དེའི་རྒྱུ་ཡིན་པ་ལ་ངོ་བོ་ཉིད་མེད་པས་བཤད་དོ། །གཉིས་པ་མཉམ་ཉིད་ཡེ་ཤེས་ནི། བྱང་སེམས་ཀྱི་དུས་སུ་བདག་གཞན་མཉམ་བར་བསྒོམ་པས་གཟུགས་བརྙན་ལྟ་བུའི་འགྲོ་བ་རྣམས་གང་ཟག་དང་ཆོས་ལ་བདག་མེད་པར་མཉམ་པར་རྟོགས་ནས་མི་གནས་པའི་མྱང་འདས་ལ་ཞུགས་པ་བྱམས་སྙིང་རྗེ་གཉིས་དང་མཚུངས་ལྡན་ཏེ། སྒོམ་པ་དག་པ་སེམས་ཅན་ལ། །མཉམ་པ་ཉིད་ཀྱི་ཡེ་ཤེས་འདོད། །མི་གནས་ཞི་བར་ཞུགས་པ་ནི། །མཉམ་ཉིད་ཡེ་ཤེས་ཡིན་པར་འདོད། །དུས་རྣམས་ཀུན་ཏུ་བྱམས་པ་དང༌། །ཐུགས་རྗེ་ཆེན་པོ་དག་དང་ལྡན། །ཞེས་སོ། །གསུམ་པ་སོ་སོར་རྟོག་པ་ནི། །རྟོག་པ་མེད་བཞིན་དུ་ཤེས་བྱ་ཐམས་ཅད་ལ་ཐོགས་པ་མེད་པར་སོ་སོར་རྟོག་པར་མཛད་ཅིང་ཏིང་ངེ་འཛིན་དང་གཟུངས་ཀྱི་སྒོ་རྣམས་ཀྱི་འབྱུང་གནས་སུ་གྱུར་པ་སྟེ། དེ་ཉིད་ལས། སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །ཞེས་སོ། །བཞི་པ་བྱ་བ་གྲུབ་པ་ནི། །འཇིག་རྟེན་གྱི་ཁམས་ཐམས་ཅད་དུ་སྣ་ཚོགས་སྤྲུལ་པས་སེམས་ཅན་གྱི་དོན་སྒྲུབ་པ་སྟེ། དེ་ཉིད་ལས། བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་ཏུ་སྣ་ཚོགས་ཤིང༌། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་དོན་ཀུན་སྒྲུབ་པའོ། །
ཞེས་སོ། །གཉིས་པ་ཡེ་ཤེས་དེ་དག་གི་རྒྱུ་ནི། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་སྟོན་ཕྱིར་དང༌། །བྱ་བ་སྒྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང༌། ཞེས་པ་སྟེ། འཛིན་པ་ནི། ཐོས་པར་བྱེད་པའི་ཆོས་རྣམས་དང༌། སེམས་མཉམ་པ་ནི་བདག་གཞན་མཉམ་པ་ཉིད་དུ་སྒོམ་པའོ། །གསུམ་པ་དེ་སྐུར་བསྟན་པ་ནི། འདི་དག་སྐུ་སོ་སོ་ལ་སྦྱར་བའི་ལུགས་མ་འདྲ་བ་སློབ་དཔོན་ཙནྡྲ་གོ་མཱིས་གསུངས་པ་སོགས་ཡོད་ཀྱང༌། འདིར་ནི་ཡེ་ཤེས་བཞི་ཡེ་ཤེས་ཀྱི་སྐུར་བྱས་ནས་གཟུགས་སྐུ་གཉིས་དེའི་བདག་རྐྱེན་ལས་བྱུང་བའི་སྐུར་བྱའོ། །ཡང་ན་གཟུགས་སྐུ་གཉིས་ཡེ་ཤེས་བཏགས་པ་བར་ཡང་བཤད་དོ། །གཉིས་པ་བྱ་བ་ཕྲིན་ལས་ཀྱི་རང་བཞིན་ནི། ཕྲིན་ལས་ཞེས་པ་ནི་སངས་རྒྱས་ཀྱི་བྱ་བ་ཡིན་ལ། བྱ་བ་དེ་ཉིད་ཀྱང་བྱེད་པ་པོ་ལ་ཡོད་པ་དང་གདུལ་བྱ་ལ་ཡོད་པའི་ཐར་ལམ་སོགས་ནི་བྱ་བ་ཡུལ་ལ་ཡོད་པའི་ཕྲིན་ལས་ཡིན་ནོ། །དེའི་ཕྱིར་སངས་རྒྱས་ཀྱིས་གདུལ་བྱ་ལམ་དང་ལམ་གྱི་རྟེན་ལ་འགོད་པ་ནི་གཉིས་ཀ་ལ་ཡོད་ལ། བཀོད་པའི་ཆ་ནི་གདུལ་བྱ་ལ་ཡོད་དེ། དཔེར་ན་སྐྱེས་བུས་ཤིང་གཤགས་པའི་རྩོལ་བ་ནི་སྐྱེས་བུ་ལ་ཡོད་ཅིང་ཤིང་དུམ་བུར་གཤགས་པའི་ཆ་ཡུལ་ལ་ཡོད་པ་བཞིན་ནོ། །སྔ་མ་འདི་ཐུགས་ལ་བཞག་ནས་དག་ལྡན་ལས་ཇི་ལྟར་ན་མཛད་པ་
ཆོས་ཀྱི་སྐུ་ཡིན་ཞེ་ན། མཛད་པ་དང་མཛད་པོ་ཐ་མི་དད་པའི་ཕྱིར་རོ། །ཞེས་གསུངས་སོ། །འདི་དང་འཕགས་སེང་གཉིས་འགལ་བར་བཟུང་ནས་བྱ་བ་ཡུལ་ལ་ཡོད་པའི་ཕྲིན་ལས་ལ་བཞེད་པར་འཆད་ཀྱང་འདི་ལ་འགལ་བ་མེད་དོ། །འོ་ན་གདུལ་བྱ་ལམ་གྱི་རྟེན་ནས་མྱང་འདས་ཀྱི་བར་ལ་བཀོད་པའི་བར་ཉེར་བདུན་ལ་ཕྲིན་ལས་སུ་གསུངས་པ་ཅི་ཞེ་ན། བཀོད་པའི་ཆ་དང་འགོད་པའི་ཐབས་སངས་རྒྱས་ཀྱི་བྱ་བ་ཉེར་བདུན་ལ་ཡིན་པས་ཀླན་ཀར་མི་འགྱུར་རོ། །དེ་ལྟར་བྱས་ན་སྐུ་དང་གསུང་དང་ཐུགས་ཀྱི་ཕྲིན་ལས་རྣམས་ཡེ་ཤེས་སྔོན་དུ་འགྲོ་ཞིང་ཞེས་གསུངས་པ་ཡང་ལེགས་པར་དྲངས་པར་འགྱུར་རོ། །གཉིས་པ་ཡན་ལག་གི་དོན་ལ་གཉིས། སྐུ་དང༌། མཛད་པའོ། །དང་པོ་སྐུ་ལ་བཞི། ངོ་བོ་ཉིད་དང༌། ཡེ་ཤེས་དང༌། ལོངས་སྤྱོད་རྫོགས་པ་དང༌། སྤྲུལ་པའི་སྐུའོ། །དང་པོ་ངོ་བོ་ཉིད་སྐུ་ལ་བཞི། དོན་དངོས་དང༌། ངེས་པའི་ཚིག །འཐོབ་པའི་ཚུལ། ཆོས་ཅན་གསུམ་དང་ཐ་དད་ཡིན་མིན་ནོ། །དང་པོ་དོན་དངོས་ནི། འཆད་འགྱུར་ཟག་མེད་ཀྱི་དྲན་པ་ཉེར་བཞག་ལ་སོགས་པ་ཡེ་ཤེས་ཀྱི་བདག་ཉིད་སྒྲིབ་གཉིས་ཀྱི་དྲི་མ་གློ་བུར་བ་ཐམས་ཅད་དག་ཅིང་རང་བཞིན་གྱིས་ཀྱང་དག་པ་ཉིད་ཡིན་པའི་ཡེ་ཤེས་དེ་དག་གི་རང་གི་ངོ་བོ་ཉིད་སྐྱེ་མེད་སྤྲོས་པ་དང་བྲལ་བ་ནི་ངོ་བོ་ཉིད་སྐུའོ། །ཟག་མེད་ཡིན་པའི་རྒྱུ་མཚན་ནི། འཇིག་རྟེན་ལས་འདས་
པའི་ཆོས་ཀྱི་དབྱིངས་ཏེ་གཉིས་སུ་མེད་པའི་ཡེ་ཤེས་སྒྱུ་མ་ལྟ་བུའི་བདག་ཉིད་ཡིན་པས་སོ། །གཉིས་པ་ངེས་ཚིག་ནི། རྒྱུ་རྐྱེན་གྱིས་གསར་དུ་བཅོས་མ་མ་ཡིན་པའི་དོན་ཏེ་དབུ་མའི་རྩ་བ་ལས། རང་བཞིན་དག་ནི་བཅོས་མིན་དང༌། །གཞན་ལ་ལྟོས་པ་མེད་པ་ཡིན། །ཞེས་སོ། །གསུམ་པ་འཐོབ་ཚུལ་ནི། བྱང་སེམས་ཀྱིས། །འཇིག་རྟེན་ལས་འདས་པའི་ལམ་གྱིས་སྤྲོས་པ་འགའ་ཡང་མ་གཟིགས་པའི་ཚུལ་གྱིས་རྟོགས་པའི་སྒོ་ནས་གཉིས་སུ་མེད་པའི་ཡེ་ཤེས་ཀྱིས་སྤྲོས་པ་མཐའ་དག་བྲལ་བར་རྟོགས་པ་ཙམ་གྱིས་ཐོབ་པ་ཡིན་ཏེ་གསར་དུ་བྱས་པའམ་བྱེད་པ་ནི་མ་ཡིན་ནོ། །བཞི་པ་ཆོས་ཅན་གསུམ་དང་ཐ་དད་ཡིན་མིན་ནི། སྐུ་ལྷག་མ་གསུམ་པོ་ནི་ངོ་བོ་ཉིད་ཀྱི་སྐུ་དེ་དང་ཐ་མི་དད་ཀྱང་ཐ་སྙད་དུ་ཐ་དད་པར་རྣམ་པར་བཞག་གོ། །ཐ་དད་དུ་འཇོག་པའི་དགོས་པ་ནི། སྐུ་ལྷག་མ་གསུམ་པོ་རིམ་པ་ལྟར། །སངས་རྒྱས་དང་བྱང་སེམས་ས་ཆེན་པོ་ལ་བཞུགས་པ་དང༌། ཉན་ཐོས་དང་མ་ངེས་པ་འབྲས་བུ་གང་ལ་ཡང་མ་ཞུགས་པའི་སོ་སྐྱེ་ལས་དག་པ་རྣམས་ཀྱི་སྤྱོད་ཡུལ་དུ་རྣམ་པར་བཞག་པ་ཡིན་ནོ། །ཞེས་བསྟན་པའི་ཕྱིར་དུའོ། །དེ་ལྟར་སྤྱོད་ཡུལ་གསུམ་དུ་འཇོག་པའི་རྒྱུ་མཚན་ནི། ཡང་དག་པའི་ཀུན་རྫོབ་ཏུ་སྣང་བ་དེ་ཉིད་དོན་དམ་པར་ཆོས་ཉིད་སྤྲོས་བྲལ་གྱི་ངོ་བོ་ལ་རང་རང་གི་མོས་པ་ཇི་ལྟ་བས་ཐ་དད་པ་གསུམ་
དུ་རབ་ཏུ་ཕྱེ་བའོ། །འདིའི་ཡང་དག་ཀུན་རྫོབ་ནི་འཇིག་རྟེན་ལས་འདས་པའི་རྗེས་ཐོབ་ཀྱི་སྣང་བ་ཡིན་ནོ། །གཉིས་པ་ཡེ་ཤེས་ཀྱི་སྐུ་ལ་གསུམ། ཡེ་ཤེས་ཐ་དད་པའི་སྐུར་བསྟན། །ཐ་མི་དད་བར་འདོད་པ་དགག །ཐ་དད་པ་ལ་རྩོད་པ་སྤང་བའོ། །དང་པོ་ཡེ་ཤེས་ཐ་དད་པའི་སྐུར་བསྟན་པ་ལ་གཉིས། ཡོན་ཏན་སོ་སོར་བསྟན་པ་དང༌། བསྡོམས་ཏེ་སྐུར་བཞག་པའོ། །དང་པོ་ཡོན་ཏན་སོ་སོར་བསྟན་པ་ནི་བྱང་ཕྱོགས་ནས་རྣམ་མཁྱེན་གྱི་བར་བརྒྱ་ཞེ་བཞི་དང༌། མཐའི་དང་གིས་བསྡུས་པའི་མཁྱེན་པ་གཉིས་དང་བཅས་བརྒྱ་ཞེ་དྲུག་གོ། །འདི་དག་ཀྱང་རྒྱུད་དབང་བཙན་པར་བྱས་ན་ཐམས་ཅད་ཀྱང་ཐུབ་པའི་ཐུན་མོང་མ་ཡིན་པའི་ཡོན་ཏན་ཡིན་ལ། མཚན་ཉིད་དབང་བཙན་པར་བྱས་ན་ཕྱོགས་མཐུན་ནས་སོ་སོ་རིག་བཞི་ཐེག་དམན་དང༌། ཡོངས་དག་དང་དབང་བཅུ་སེམས་དཔའ་དང་ཐུན་མོང་བ་དང༌། ལྷག་མ་སངས་རྒྱས་ཀྱི་ཐུན་མོང་མ་ཡིན་པའི་ཡོན་ཏན་ནོ། །དེ་ལ་སྡེ་ཚན་ཉེར་གཅིག་ལས། །བྱང་ཕྱོགས་སོགས་བཞི་ནི་སྔར་རྣམ་ཀུན་དང་ཀུན་མཁྱེན་དུ་བཤད་པ་ལྟར་གཟུང་ཞིང༌། མཐར་གྱིས་གནས་པ་ནི་སྔར་རྒྱུད་ལ་སྐྱེད་མ་མྱོང་བའི་ཚེ་འདི་དགུ་ལ་མཐར་ཆགས་སུ་འཇུག་དགོས་པས་སོ། །སྡེ་ཚན་ལྔ་པ་ཟད་པར་ལ་དགུ། ངོ་བོ་དབྱེ་བ་རྟེན་སྦྱོང་ཚུལ་མཚན་མ་དེ་ཡིད་ལ་བྱེད་ཚུལ། བྱེད་ལས།
སྐྱེ་མཆེད་གཞན་ལ་ཟད་པར་མི་འཇོག་པའི་རྒྱུ་མཚན། ངེས་ཚིག་གོ། །དང་པོ་ངོ་བོ་ནི། ཀུན་བཏུས་སུ་ཤེས་རབ་དང་ཏིང་ངེ་འཛིན་གཉིས་ལ་བཤད་ལ། མཛོད་ལས་དང་པོ་བརྒྱད་མ་ཆགས་པའི་དགེ་བ་དང༌། ཐ་མ་གཉིས་ནི་གཟུགས་མེད་དང་པོ་གཉིས་ཀྱི་དངོས་གཞི་དག་པ་བ་ལ་བཤད་དོ། །གཉིས་པ་དབྱེ་བ་ནི་ཟད་པར། ས་དང་ཆུ་དང་མེ་དང་རླུང་དང་སྔོན་པོ་དང་སེར་པོ་དང་དམར་པོ་དང་དཀར་པོ་དང་ནམ་མཁའ་དང་རྣམ་པར་ཤེས་པ་སྟེ་བཅུའོ། །དེ་ལ་ཟད་པར་རླུང་གི་དམིགས་པ་ནི་གཟུགས་དང་རེག་བྱའི་སྐྱེ་མཆེད་གཉིས་ཀར་འགྱུར་ལ། གཞན་ཟད་པར་གཟུགས་ཅན་བདུན་གྱི་དམིགས་པ་ནི་གཟུགས་ཀྱི་སྐྱེ་མཆེད་དུ་མཛོད་འགྲེལ་དང༌། ཐ་མ་གཉིས་ཀྱི་དམིགས་པ་ནི་རང་སའི་མིང་བཞི་ཡིན་པར་དེ་རྩ་འགྲེལ་གཉིས་ལས་སོ། །གསུམ་བརྟེན་ནི། །མཛོད་ལྟར་ན། དང་པོ་བརྒྱད་བསམ་གཏན་བཞི་པ་དང༌། ཐ་མ་གཉིས་གཟུགས་མེད་དང་པོ་གཉིས་ལ་བརྟེན་ཞེས་པ་ལྟར་མངོན་པ་གོང་མ་པ་ཡང་འདོད་དགོས་ལ། ཉི་སྣང་ལས་བསམ་གཏན་བཞི་ཀ་ལ་བརྟེན་པར་གསུངས་སོ། །བཞི་པ་སྦྱོང་ཚུལ་ལ་གཉིས། སྔར་སྦྱང་བ་བྱས་པས་འགྲུབ་ཚུལ་དང༌། མ་བྱས་པས་སྦྱོང་ཚུལ་ལོ། །དང་པོ་ནི། སྔར་གོམས་པར་བྱས་པས་སོ་སོའི་དམིགས་པ་ཅུང་
ཟད་མཐོང་བ་ཙམ་ལས་དེ་དང་དེའི་ཏིང་ངེ་འཛིན་གསལ་བར་འགྱུར་ཏེ། འདི་ལྟར་ཆུ་ཀླུང་སོགས་སུ་ཆུ་དང༌། དེ་བཞིན་དུ་ནགས་ཀྱི་མེ་འབར་ཞིང་དུ་བ་འཐུལ་བ་དང༌། རླུང་གིས་བསྐྱོད་པའི་འོད་མ་དང་འཁྲི་ཤིང་གི་ལོ་མ་ལ་སོགས་པ་རྣམས་ལ་རླུང་འདི་ནི་གནས་འདིར་རབ་ཏུ་རྒྱུ་བ་ཡིན་ནོ་ཞེས་ཀུན་ཏུ་ལྟ་བ་ཙམ་དང༌། མེ་ཏོག་ནོར་བུ་གོས་ལ་སོགས་པ་སྔོན་པོ་བཏིང་བ་དང༌། དེ་དག་ཉིད་སེར་པོ་དང་དམར་པོ་དང་དཀར་པོར་གྱུར་པ་དང༌། མཚན་མོ་སྟེངས་དངུལ་ཟླ་བའི་དཀྱིལ་འཁོར་སོགས་དང༌། སྐར་ཁུང་ནང་ངམ་ཤིང་གི་ལོ་མའི་གསེབ་ནས་ཟླ་བ་དང་ཉི་འོད་བྱུང་ནས་ས་གཞི་ལ་སྐྱེད་པའི་འོད་ཀྱི་ཐིག་ལེ་ལ་ལྟ་བ་དང༌། སྐར་ཁུང་དང་རྩིག་པའི་བུ་ག་མཐོང་བ་ཙམ་གྱིས་ཟད་པར་ཆུ་ལ་སོགས་པའི་ཏིང་ངེ་འཛིན་སྐྱེ་བར་འགྱུར་རོ། །གཉིས་པ་སྔར་མ་སྦྱངས་པས་སྦྱོང་ཚུལ་ལ་གཉིས། དམིགས་པ་རྟེན་དུ་བྱེད་པ་དང༌། དེ་ལ་ཡིད་གཏོད་པའི་ཚུལ་ལོ། །དང་པོ་དམིགས་པ་རྟེན་དུ་བྱེད་པ་ནི། སྔོ་སོགས་ཀྱི་ཁ་ཏོག་གི་དབྱེ་བ་དང་བྲལ་བའི་ཆུ་དྲི་མ་མེད་པ་ནམ་མཁའ་ནས་འབབ་པ་ཆུ་ཚགས་ལས་འཛགས་པ་རྣམས་ཀྱིས་ལྷུང་བཟེད་སོགས་ཀྱི་སྣོད་གང་རུང་བཀང་བ་དང༌། སྣུམ་ཞིང་སྙིང་པོ་དང་བཅས་པའི་ཤིང་དུམ་བུར་གཏུབ་ནས་ཤིང་དྲུང་ངམ་མགྲོན་ཁང་ཡང་རུང་སྟེ། རྗེས་སུ་མཐུན་པའི་གནས་སུ་སྤུངས་ཏེ་མཐའ་
རྩིག་པས་བསྐོར་བ་ལ་མཐོ་ གང་སོར་བཞི་ཙམ་གྱི་བུ་ག་བྱས་པ ་སྦར་ནས་འོག་ཏུ་ཤིང་དང༌། སྟེང་དུ་དུ་བ་དང༌། དབུས་སུ་མེ་འབར་བར་ བྱས་པ་དང༌། ཡན་ལག་གི་ཕྱོགས་གང ་དུ་རླུང་གིས་རེག་པར་འགྱུར་བའི་སྐར་ཁུང་དང་རྩིག་པའི་བུ་ག་ཡོད་དམ་མེད་ན་དེ་ལྟར་བྱས་པ་དང༌། རས་སྔོན་པོ་རྔ་བོ་ཆེའི་མཐིལ་ལྟར་བརྒྱངས་པ་ལ་ནི། ལ་ཀང་ས་དང་པ་ལ་ཤ་སྔོན་པོ་དང༌། མིག་སྨན་སྔོན་པོ་སོགས་གང་ཡང་རུང་བའི་ཚོན་གྱིས་འཕོ་བ་དང་མི་འཕོ་བའི་དཀྱིལ་འཁོར་བྱས་ནས་དེའི་མཐའ་ཁ་དོག་མི་མཐུན་པས་བཅད་པ་དང༌། སེར་པོ་དང་དམར་པོ་དང་དཀར་པོ་ལ་སོགས་པ་ལ་ཡང་དེ་བཞིན་ནོ། །བུམ་ནང་དུ་མར་མེ་སྤར་ཏེ་ཁ་བཅད་ཅིང་བུ་ག་ཧ་ཅང་མི་ཆེ་བ་བཏོད་ནས་དེའི་འོད་ཀྱིས་རྩིག་ངོས་ལ་སྐྱེད་པའི་སྣང་བའི་དཀྱིལ་འཁོར་ཡུན་རིང་དུ་གནས་པ་དང༌། རྩིག་པ་རེ་ལྡེ་སྣམ་བུ་གང་རུང་གིས་གཡོགས་པའི་གནས་སུ་མཐོ་ གང་སོར་བཞི་ཙམ་གྱི་བུ་ག་བཏོད་པ་མཐོང་བའི་ཡུལ་དུ་བྱས ་པ་རྣམས་ཟད་པར་ཆུ་ལ་སོགས་པའི་དམིགས་རྟེན་ནོ། །གཉིས་པ་དེ་ལ་ཡིད་གཏོད་པའི་ཚུལ་ནི། །དམིགས་པ་དེ་དག་མཐོང་བའི་གནས་ཡིད་དང་མཐུན་པར་སྟན་བདེ་བ་ལ་འདུག་ནས། ས་ས་་ཆུ་ཆུ་་ཞེས་སོགས་བཅུ་པོའི་མིང་ཙམ་ལ་དམིགས་ནས་ཡང་དང་ཡང་གོམས་པར་བྱེད་པའོ། །ལྔ་པ་མཚན་མ་ལ་གཉིས། མ་གྲུབ་
པའི་རྟགས་འཛིན་པའི་མཚན་མ་དང༌། གྲུབ་པའི་རྟགས་སྣང་བའི་མཚན་མ་འཆར་ཚུལ་ལོ། །དང་པོ་ནི་སྦུ་བ་དང་ཆུ་བུར་འདྲེས་པའི་ཆུ་གཡོ་བའི་རྣམ་པ་ཅན་དང༌། མེ་ཆད་ཅིང་ཆད་ཅིང་ལྟུང་བ་དང་འགལ་དུ་མ་དང་སོལ་བ་དང་ཐལ་བ་རྣམས་ལ་ཅུང་ཟད་གནས་པ་དང༌། འོ་མ་བསྐོལ་བ་ཕོག་མ་ཐག་པའི་རླངས་པ་འཐུལ་བ་ལྟར་གནས་པ་དང༌། མེ་ཏོག་གེ་སར་དང་སྡོང་བུ་མེད་པ་ལྟ་བུ་སྟེ་དེ་ཡང་ཀེ་སར་སྡོང་བུ་འདབ་མ་རྣམས་མི་མཐུན་པ་ལས་བྱས་པ་ལྟ་བུ་ཡིན་ལ། །སེར་པོ་སོགས་གསུམ་ལ་ཡང་དེ་ལྟར་དང༌། སའམ་རྩིག་པར་སྐྱེས་པའི་འོད་ཀྱི་དཀྱིལ་འཁོར་དང་འདྲ་བར་དངོས་པོ་འགའ་ཞིག་ཁོ་ན་ལ་གསལ་བ་དང༌། རྩིག་པ་ལ་སོགས་བའི་བུ་ག་ལྟར་སྣང་བ་ལ་བློས་བསྐྱེད་ཀྱང་མི་འཕེལ་བར་སྣང་བ་རྣམས་ནི་ཆུ་ལ་སོགས་པ་དགུའི་མ་གྲུབ་པའི་མཚན་མའོ། །དེ་དག་ཀྱང་སྔར་སྦྱང་བ་བྱས་མ་བྱས་གཉིས་ཀ་ལ་འབྱུང་ལ། འོན་ཀྱང་གོམས་པར་བྱས་ཟིན་ལ་ནི་སྐྱོན་མིན་པར་ཉི་སྣང་ལས་གསུངས་སོ། །གཉིས་པ་གྲུབ་པའི་རྟགས་ནི། ནམ་མཁའ་ལ་གནས་པའི་ནོར་བུའི་རླུང་ཡབ་དང་ནོར་བུའི་རང་བཞིན་གྱི་མེ་ལོང་གི་དཀྱིལ་འཁོར་ལྟར་མི་གཡོ་བའི་རྣམ་པ་ཅན་དུ་སྣང་བ་དང༌། ནམ་མཁའ་ལ་གནས་པའི་ལཱ་བ་དམར་པོ་ཟླུམ་པོ་དང༌། གསེར་གྱི་རླུང་ཡབ་དང༌། དེའི་ཀ་བ་ལྟ་བུར་སྣང་བ་དང༌། འདུག་པ་ལྟར་མི་གཡོ་བར་གནས་པར་མཐོང་བ་དང༌། དམིགས་
རྟེན་ཟད་པར་གྱི་དཀྱིལ་འཁོར་ལས་འཕགས་ནས་ནོར་བུའི་རླུང་ཡབ་ལྟ་བུ་སྣང་བ་སྟེ་གཞན་གསུམ་ལ་ཡང་དེ་ལྟར་དང༌། སྣང་བའི་ཚོགས་སྡུག་པོ་རབ་ཏུ་དང་བ་དང་འདྲ་བར་ཐམས་ཅད་ལ་གསལ་བ་དང༌། ནམ་མཁའི་དཀྱིལ་འཁོར་ལྟ་བུར་གྱུར་ནས་གནས་ཤིང༌། བློས་བསྐྱེད་ན་ནི་འཕེལ་བར་སྣང་བ་རྣམས་ཟད་པར་ཆུ་ལ་སོགས་པ་དགུའི་གྲུབ་པའི་མཚན་མའོ། །ས་ལ་སྔར་སྦྱངས་པས་འགྲུབ་ཚུལ་དང༌། མ་སྤངས་པས་སྦྱོང་བའི་དམིགས་རྟེན་དང་གྲབ་མ་གྲབ་ཀྱི་མཚན་མ་མ་གསུངས་པའི་རྒྱུ་མཚན་ནི་ཇི་ལྟ་བ་བཞིན་མི་ཤེས་པར་སྣང་ངོ༌། །དྲུག་པ་དེ་ཡིད་ལ་བྱེད་ཚུལ་ནི། ད་ལྟར་མཆན་མ་དེ་དག་བྱུང་བའི་ཆ་ཁ་དོག་ལ་སོ་སོར་རྟོག་པ་དང༌། མཚན་མ་ཡིད་ལ་བྱེད་པ་སྤངས་ཏེ་དེ་དང་དེའི་མིང་ཙམ་ལ་གསལ་བར་དམིགས་ནས་བསྒོམ་པར་བྱའོ། །བདུན་པ་བྱེད་ལས་ནི། གཅིག་ཏུ་གྱུར་ནས་མང་པོར་འགྱུར་བ་དང༌། ནམ་མཁའ་འམ་ཆུ་ལ་སར་སྤྲུལ་ནས་རྐང་པས་འགྲོ་བ་སོགས་བྱེད་པ་དང༌། ས་ལ་བྱིའུ་འཛུལ་བྱེད་ཅིང་སྟེང་དུ་འབྱུང་བ་དང༌། ཆུའི་ཆར་འབེབས་པ་དང༌། ས་དང་རི་སོགས་ལ་ཆུ་བོ་དང་རྒྱ་མཚོར་སྤྲུལ་པ་དང༌། དུ་བ་འཐུལ་ཞིང་མེ་འབར་བ་དང༌། མེ་འདག་གི་ཆར་འབེབས་པ་དང་གང་འདོད་པ་དེ་སྲེག་པ་དང༌། མྱ་ངན་ལས་འདའ་བ་ན་མེས་ལུས་སྲེག་པ་དང༌།
ལྷའི་མིག་གིས་ཡུལ་སྣང་བར་བྱེད་པ་དང༌། རླུང་ལྟར་མགྱོག་པར་འགྲོ་ཞིང་རླུང་གི་ཆར་འབེབས་པ་སོགས་དང༌། གཟུགས་སྔོན་པོར་སྤྲུལ་ཞིང་མུན་པར་བྱེད་པ་སོགས་དང༌། སེར་པོར་སྤྲུལ་ཞིང་གསེར་དུ་འགྱུར་བར་བྱེད་པ་སོགས་དང༌། གཟུགས་དམར་པོར་སྤྲུལ་པ་སོགས་དང༌། གཟུགས་དཀར་པོར་སྤྲུལ་ཞིང་རྨུགས་གཉིད་རིང་དུ་བྱེད་མུན་པ་འཇིག་པར་བྱེད། ལྷའི་མིག་གི་ཡུལ་སྣང་བར་བྱེད་པ་དང༌། གཟུགས་གསལ་བར་སྤྲུལ་ཞིང་གཉིད་རྨུགས་རིང་དུ་བྱེད་པ་དང༌། ལྷའི་མིག་གི་ཡུལ་སྣང་བར་བྱེད་པ་སོགས་དང༌། སྒྲིབ་པ་རྣམས་འབྱེད་ཅིང་ས་དང་པོ་རེ་བོ་སོགས་ཀྱི་ནང་ནམ་མཁར་སྤྲུལ་ནས་སྤྱོད་ལམ་བྱེད་པ་དང༌། རྩིག་པ་སོགས་ལ་ཐད་ཀར་འགྲོ་བ་རྣམས་ཟད་པར་ཆུ་ལ་སོགས་པའི་བྱེད་ལས་སོ། །སའི་དངོས་གཞི་ལས་གསེར་ལ་སོགས་པ་གང་མོས་མོས་སུ་ཟད་པར་གྱིས་བསྒྱུར་བ་རྣམས་དེ་ཁོ་ན་བཞིན་དུ་འགྱུར་ཞིང་གསེར་ལ་སོགས་པས་ཀྱང་དེའི་བྱ་བ་བྱེད་ནུས་པར་བཤད་དོ། །བརྒྱད་པ་སྐྱེ་མཆེད་གཞན་ལ་ཟད་པར་མ་བཞག་པའི་རྒྱུ་མཚན་ནི། གལ་ཏེ་གཟུགས་དང་རེག་བྱ་ལ་ཟད་པར་བཞག་ནས་སྐྱེ་མཆེད་གཟུགས་ཅན་གཞན་བརྒྱད་ལ་མི་འཇོག་པ་ཅི་ཞེ་ན། །གཟུགས་རེག་གཉིས་སུ་ནི་བདག་གཞན་གཉིས་ཀ་དང༌། གཟུགས་ཅན་གྱི་སེམས་ཅན་གྱི་ཁམས་ཐམས་ཅད་ཡོད་པ་དང༌། དབང་པོ་ལྔ་ནི་གཞན་རྒྱུད་ལ་མེད་པ་དང༌།
དྲི་རོ་གཉིས་ཀྱང་གཟུགས་ཁམས་ན་མེད་པས་མ་བཞག་གོ། །ཞེས་པ་ནི་སའི་དངོས་གཞིའི་དགོངས་པའོ། །སྒྲ་ལ་མི་འཇོག་པ་ནི་རྒྱུན་མེད་པས་ཟེར་རོ། །གཟུགས་མེད་པ་ན་ནི་ནམ་མཁའ་ཐམས་ཅད་དུ་འགྲོ་བ་དང༌། རྣམ་ཤེས་ཀྱང་ཡུལ་ཟད་པར་གྱི་ཡུལ་ཅན་ཡིན་པས་ཟད་པར་བཞག་ལ། གཟུགས་ཅན་བརྒྱད་ཀྱིས་གཟུགས་ཁམས་ཕྱིན་ཆད་ལ་ཟད་པར་བྱེད་པར་སའི་དངོས་གཞི་ལས་སོ། །དེ་ལྟར་ན་གཟུགས་མེད་ཕྱི་མ་གཉིས་ལ་མི་བཞག་སྟེ་གསུམ་པས་ནི་དམིགས་པ་གཅོད་པ་སྟེ་བཞི་པས་ནི་སེམས་ནང་དུ་བསྡུས་པས་མི་གསལ་བས་སོ། །གཟུགས་ཅན་གྱིས་ཟད་པར་ལ་རྒྱུ་གཟུགས་ཀྱི་ཟད་པར་བཞི་བཞག་པ་ནི་འབྱུང་བ་མེད་པར་འབྱུང་འགྱུར་སྔོན་པོ་སོགས་ཀྱི་ཡུལ་ལ་ཁྱབ་པར་བྱེད་མི་ནུས་པས་ཡིན་ནོ། །ཞེས་ཀུན་བཏུས་ལས་སོ། །དགུ་པ་ངེས་ཚིག་ནི། །རྒྱུན་མི་འཆད་པར་ཁྱབ་པར་སྤྲོ་བས་ན་ཟད་པར་གྱི་སྐྱེ་མཆེད་དོ། །ཞེས་པ་ལྟར་རོ། །ཚུལ་འདི་ལྟར་ཟད་པར་འཆད་པ་ནི་ཉི་སྣང་གི་དགོངས་པའོ། །སྡེ་ཚན་དྲུག་པ་ནི། ཟིལ་གྱིས་གནོན་པའི་སྐྱེ་མཆེད་ནི་དབྱེ་གཞིའོ། །དབྱེ་གྲངས་ནི་རྣམ་པ་བརྒྱད་དེ་དེ་ཡང་དབྱིབས་དང༌། ཁ་དོག་ཟིལ་གྱིས་གནོན་པ་རྣམ་པ་བཞི་བཞི་སྟེ་དེ་ལྟར་ནའོ། །དེ་ལ་དང་པོ་བཞི་ནི་ནང་རྣལ་འབྱོར་པ་རང་ལ་གཟུགས་
ཅན་དུ་འདུ་ཤེས་པའི་སྒོ་ནས་ཕྱི་རོལ་གྱི་གཟུགས་ཆུང་ངུ་ཁ་དོག་བཟང་པོ་དང་ངན་པ་རྣམས་ལ་ལྟ་ཞིང་དེ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང་དེ་ལྟར་འདུ་ཤེས་པར་གྱུར་བ་ཞེས་བྱ་བ་ནི་དང་པོའོ། །ཆུང་ངུའི་གནས་སུ་ཆེན་པོ་སྦྱར་ནས་གཞན་དེ་ཇི་ལྟ་བ་བཞིན་དུ་སྦྱར་བ་ནི་གཉིས་པའོ། །ནང་རྣལ་འབྱོར་པ་རང་ལ་གཟུགས་མེད་པར་འདུ་ཤེས་པའི་སྒོ་ནས་ཞེས་སྦྱར་ནས་ཆེ་ཆུང་གཉིས་རེ་རེར་བྱས་པ་ནི་ཕྱི་མ་གཉིས་སོ། །དེ་ལ་ཆུང་ངུ་ནི་སེམས་ཅན་གྱི་གཟུགས་ཡིན་ལ་དེའི་བཟང་ངན་ནི་ལྷ་མི་ལ་བྱ་ཞིང༌། ཆེན་པོ་ནི་ཁང་པ་གཞལ་མེད་ཁང་རི་ལ་སོགས་པ་སྟེ་དེའི་ཁ་དོག་མཛེས་མི་མཛེས་ནི་ཡིད་དུ་འོང་མི་འོང་ལ་བྱའོ། །ཟིལ་གྱིས་མནན་ནས་ཞེས་བྱ་བ་ནི་དབང་བསྒྱུར་ནས་སོ། །ཤེས་པ་ནི་ཞི་གནས་དང༌། མཐོང་བ་ནི་ལྷག་མཐོང་དང༌། དེ་ལྟར་འདུ་ཤེས་པ་ནི། ཟིལ་གྱིས་ནོན་ནམ་མ་ནོན་ཡང་རུང་མངོན་པའི་ང་རྒྱལ་མེད་པའོ། །གཉིས་ཚན་དེ་གཉིས་ནི་རིམ་པ་ལྟར་རྣམ་ཐར་དང་པོ་གཉིས་སྦྱང་བའི་མཐུ་ལས་བྱུང་བའོ། །ཕྱི་མ་བཞི་ནི་སྔར་ལྟར་གཟུགས་ཆེ་ཆུང་ལ་ལྟ་བ་ན་གཟུགས་ཅན་ཡིན་མིན་གཉིས་ཀྱི་འདུ་ཤེས་མི་བྱེད་པར། གཟུགས་མེད་པར་འདུ་ཤེས་པ་དག་ཁོ་ནས་སྔོན་པོ་དང་དཀར་པོ་དག་ཟིལ་གྱིས་མནན་ནས་ཤེས་ཟིལ་གྱིས་མནན་ནས་མཐོང༌། དེ་ལྟར་འདུ་ཤེས་པར་གྱུར་པ་ཞེས་རེ་རེའི་མཐར་སྦྱར་བ་བཞིའོ། །འདི་ཡང་མདོ་ལས། ནང་གཟུགས་མེད་པར་
འདུ་ཤེས་པས་ཕྱི་རོལ་གཟུགས་སྔོན་པོ་ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ་རྣམས་ལ་ལྟ་སྟེ། དཔེར་ན་ཟར་མའི་མེ་ཏོག་གམ་ཡུལ་ཝཱ་ར་ཎཱ་སིའི་རས་ཕུན་སུམ་ཚོགས་པ་སྔོན་པོ་སོགས་འབྱུང་བ་དེ་བཞིན་དུ་ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་སྔོན་པོ་སོགས་འབྱུང་བ་རྣམས་ལ་ལྟ་ཞིང་དེ་དག་ཟིལ་གྱིས་མནན་ནས་ཤེས་སོགས་སྔར་ལྟར་གསུངས་ཤིང༌། དེ་བཞིན་དུ་སེར་པོ་དོང་ཁ་དང༌། དམར་པོ་བན་དྷཱ་ཛཱི་ཀའི་མེ་ཏོག་དང༌། དཀར་པོ་སྐར་མ་པ་སངས་དང་སྦྱར་ནས་གསུངས་སོ། །དེ་ཡང་ནང་གཟུགས་ནས་པ་ལྟ་སྟེའི་བར་མདོར་བསྟན་དང་ལྷག་མ་རྒྱས་བཤད་དོ། །དེ་ཡང་དེ་བཞིན་དུ་ཡན་དཔེ་དང་ཕྱིན་ཆད་དོན་ནོ། །དེ་ལ་སྔོན་པོ་ནི་མདོར་བསྟན་ནོ། །ཁ་དོག་སྔོན་པོ་ནི་ལྷན་སྐྱེས་སོ། །སྔོན་པོ་ལྟ་བུར་སྟོན་པ་ནི་སྦྱར་བྱུང་ངོ༌། །འོད་སྔོན་པོ་འབྱུང་བ་ནི་དེ་གཉིས་ཀ་ལ་འོད་གསལ་པོ་འབྱུང་བ་སྟེ་ཐུན་མོང་ངོ༌། །མེ་ཏོག་ནི་ལྷན་སྐྱེས་དང༌། རས་སྦྱར་བྱུང་གི་དཔེའོ། །དེས་ན་ཚིག་བཞིའི་ཐོག་མཐའ་གཉིས་མེ་ཏོག་ནང་རས་གཉིས་ཀའིའོ། །བར་པ་གཉིས་ནི་དེ་གཉིས་སོ་སོའི་འོ། །གཞན་གསུམ་ལའང་དེ་བཞིན་རིགས་པར་བྱ་སྟེ་འདི་ནི་སྡུག་པའི་རྣམ་ཐར་གྱི་མཐའ་ལས་བྱུང་བའོ། །གནོད་འཇོམས་ཆུང་བར་གཟུགས་ཅན་དང་དེ་མ་ཡིན་པར་འདུ་ཤེས་
ནས་ཆུང་ངུ་དང་ཆེན་པོ་ལ་བལྟ་བ་སྟེ་གཉིས་དང༌། སྔོ་སོགས་ལ་བལྟ་བ་བཞི་སྟེ་དྲུག །ནམ་མཁའ་རྣམ་ཤེས་ཟིལ་གྱིས་གནོན་པ་གཉིས་ཏེ་བརྒྱད་དུ་བྱེད་པ་ནི་ཁྲི་བརྒྱད་སྟོང་པ་དང་མཐུན་ནོ། །བདུན་པ་ཉོན་མོངས་པ་མེད་པའི་ཏིང་ངེ་འཛིན་ནི། བསམ་གཏན་ལ་བརྟེན་ནས་ཕ་རོལ་གྱི་རྒྱུད་དུ་གཏོགས་པའི་ཉོན་མོངས་པའི་དགྲའི་རྒྱུན་དྲུང་འབྱིན་པའི་ཏིང་ངེ་འཛིན་དང་ཤེས་རབ་བོ། །བརྒྱད་པ་སྨོན་ནས་མཁྱེན་པ་ནི། །མཚན་མའི་བློ་ཐམས་ཅད་དང་བྲལ་ཞིང་མངོན་ཞེན་གྱི་ཆགས་པ་བཅོམ་པ་གདུལ་བྱའི་ཐེ་ཚོམ་སེལ་བར་མཛད་པའི་སྨོན་ལམ་གྲུབ་པས་འཁོར་བ་དང་མྱང་འདས་ཅི་སྲིད་དུ་གནས་པ་དེ་སྲིད་ཀྱི་གནས་སྐབས་སུ་ཡུལ་ལ་འཇུག་པའི་ཏིང་ངེ་འཛིན་དང་ཤེས་རབ་བོ། །སྔ་མ་དང་འདི་གཉིས་ཀའི་ངོ་བོ་ཞི་ལྷག་གོ། །དགུ་པ་དང་བཅུ་པ་ནི་སྔར་རྣམ་མཁྱེན་དང་རྣམ་ཀུན་ཏུ་བཤད་པ་ལྟར་རོ། །བཅུ་གཅིག་པ་ཡོངས་སུ་དག་པ་བཞི་ནི། །བསམ་གཏན་ལ་བརྟེན་ནས་ལུས་འདོར་ལེན་ལ་དབང་ཐོབ་པའི་རྟེན་དང༌། མེད་པ་སྤྲུལ་ཡོད་པ་སྒྱུར་བ་ལ་དབང་ཐོབ་པས་དམིགས་པ་དང༌། སྐད་ཅིག་རེ་རེ་ལ་ཏིང་ངེ་འཛིན་གྲངས་མེད་པར་འཇུག་པའི་ཐུགས་དང༌། གཟུངས་ཀྱི་སྒོ་དཔག་ཏུ་མེད་པ་ལ་དབང་འབྱོར་པ་ཡེ་ཤེས་ཏེ་ཡོངས་སུ་དག་པ་ཞེས་རེ་རེའི་མཐར་སྦྱར་བའི་ངོ་བོ་ནི་ཞི་ལྷག་གོ། །བཅུ་གཉིས་པ་དབང་ལ་ནི་རྣམ་པ་བཅུ་སྟེ་ཚེའི་འདུ་བྱེད་འདོར་བ་
ཇི་ལྟར་འདོད་པ་བཞིན་བྱེད་པས་བསྡུས་པའི་ཚེ་ལ་དབང་བ་དང༌། ཇི་ལྟར་འདོད་པ་བཞིན་སེམས་ཏིང་ངེ་འཛིན་ལ་འཇུག་པས་བསྡུས་པའི་སེམས་ལ་དབང་བ་དང༌། བསམ་པ་ཇི་ལྟ་བ་བཞིན་དུ་ཡོ་བྱད་ཉེ་བར་གནས་པར་བྱེད་པས་བསྡུས་པའི་ཡོ་བྱད་ལ་དབང་བ་གསུམ་ནི་སྦྱིན་འབྲས་ཏེ། ལོངས་སྤྱོད་བྱིན་པས་ཚེའི་རྒྱུར་གྱུར་པ་དང༌། དེ་བཞིན་གཤེགས་པས་སེམས་ཅན་གྱི་བསམ་པ་བཞིན་དུ་རྗེས་སུ་འཇུག་པ་དང་བསམ་པ་བཞིན་དུ་ཡོ་བྱད་བྱིན་པས་སོ། །ལུས་ངག་གི་ལས་ཇི་ལྟར་འདོད་པ་བཞིན་དུ་སྒྱུར་བས་བསྡུས་པའི་ལས་ལ་དབང་བ་དང༌། འགྲོ་བ་གང་དུ་ཇི་ལྟར་འདོད་པ་བཞིན་སྐྱེ་བས་བསྡུས་པའི་སྐྱེ་བ་ལ་དབང་བ་ནི་ཚུལ་འབྲས་ཏེ། སེམས་ཅན་རྣམས་ལུས་ངག་གི་ལས་སྐྱོན་མེད་པ་ལ་བསམ་པ་བཞིན་དུ་བསྐུལ་བ་དང་ཚུལ་ལྡན་གྱིས་སྨོན་ལམ་འགྲུབ་པས་སོ། །ས་སོགས་གསེར་གྱི་དངོས་པོར་ཇི་ལྟར་མོས་བཞིན་སྒྱུར་བས་བསྡུས་པའི་མོས་པ་ལ་དབང་བ་ནི་བཟོད་འབྲས་ཏེ་སེམས་ཅན་གྱི་མོས་པའི་རྗེས་སུ་ཞུགས་པའི་ཕྱིར་རོ། །ཇི་ལྟར་མོས་པ་བཞིན་འགྲུབ་པས་བསྡུས་པའི་སྨོན་ལམ་ལ་དབང་བ་ནི་བརྩོན་འབྲས་ཏེ་སྔོན་སེམས་ཅན་གྱི་དོན་དུ་བརྩོན་པ་མ་བཏང་བས་སོ། །མངོན་ཤེས་ཀྱིས་བསྡུས་པའི་རྫུ་འཕྲུལ་ལ་དབང་བ་ནི་བསམ་འབྲས་ཏེ་སྔོན་སེམས་ཅན་གྱི་
དགོས་པ་ཇི་ལྟ་བ་བཞིན་མཉམ་པར་གཞག་པས་སོ། །ཇི་ལྟར་འདོད་པ་བཞིན་ཡེ་ཤེས་མངོན་དུ་བྱེད་པའི་ཡེ་ཤེས་ལ་དབང་བ་དང༌། གསུང་རབ་ཡན་ལག་བཅུ་གཉིས་ཇི་ལྟར་འདོད་པ་བཞིན་སྟོན་ནུས་པས་བསྡུས་པའི་ཆོས་ལ་དབང་བ་གཉིས་ནི་ཡུམ་འབྲས་ཏེ། སྔོན་སེམས་ཅན་གྱི་འདོད་པ་བཞིན་དུ་ཡེ་ཤེས་མངོན་དུ་བྱེད་པ་དང༌། འདོད་པ་དང་མཐུན་པར་མདོ་སོགས་ལ་སྦྱར་བས་སོ། །བཅུ་གསུམ་པ་དང་བཅུ་བཞི་པ་ནི་སྔར་རྣམ་ཀུན་ཏུ་བཤད་པ་ལྟར་རོ། །བཅོ་ལྔ་པ་བསྲུང་བ་མེད་པ་རྣམ་པ་གསུམ་ནི། དེ་བཞིན་གཤེགས་པའི་སྐུ་གསུང་ཐུགས་ཀྱི་སྤྱོད་པ་ཉེས་སྤྱོད་མཐའ་དག་གིས་ཡོངས་སུ་དག་པ་སྟེ། དེའི་ཕྱིར་དེ་བཞིན་གཤེགས་པ་ལ་ཕྱིན་ཅི་ལོག་གི་ཀུན་སྤྱོད་ངན་པ་གང་ཟག་གཞན་གྱིས་ཡོངས་སུ་ཤེས་ཀྱིས་དོགས་པས་བསྙེངས་པའམ་འཇིགས་པས་གསང་བར་བྱའོ་སྙམ་པའི་དགོངས་པ་མི་མངའ་བའོ། །བཅུ་དྲུག་པ་དྲན་ཉེ་རྣམ་པ་གསུམ་ནི། ཆོས་སྟོན་པ་ཁ་ཅིག་གུས་པས་ཉན་འདོད་ཅིང་རྣ་བ་གཏོང་ལ་ཀུན་ཤེས་པའི་སེམས་ཉེ་བར་འཇོག་པ་ལ་རྗེས་སུ་ཆགས་པ་དང༌། དེ་ལས་བཟློག་པ་ལ་ཁོང་ཁྲོ་བ་དང༌། ཁ་ཅིག་སྔ་མ་དང་ཁ་ཅིག་ཕྱི་མ་ལྟར་གཉིས་ཀ་ལ་ཆགས་སྡང་གཉིས་ཀས་དབེན་པ་ཁོ་ནར་བཏང་སྙོམས་སུ་དྲན་པ་དང་ལྡན་པར་གནས་སོ་ཞེས་བྱ་བའོ། །བཅུ་བདུན་པ་བསྙེལ་བ་མི་མངའ་བའི་ཆོས་ཉིད་ནི། སེམས་ཅན་གྱི་དོན་མཛད་དགོས་པ་
ན་དེའི་དུས་ལས་མི་འདའ་བའི་མཚན་ཉིད་དོ། །བཅོ་བརྒྱད་པ་བག་ཆགས་ཡང་དག་བཅོམ་པ་ནི། ཉོན་མོངས་པ་དང་ཤེས་བྱའི་སྒྲིབ་པའི་བག་ལ་ཉལ་གྱི་ངོ་བོའི་ས་བོན་སྤངས་པས་ཉོན་མོངས་སྤངས་ཀྱང་མ་སྤངས་པ་ལྟར་ཀུན་ཏུ་སྤྱོད་པ་ཟད་པའོ། །བཅུ་དགུ་པ་སྐྱེ་འགྲོ་ལ་ཐུགས་རྗེ་ཆེན་པོ་ཉིད་ནི། ཉིན་མཚན་ལན་དྲུག་ཏུ་སུ་ནི་དགེ་རྩ་སྨིན། སུ་ནི་དེ་ལས་བཟློག །སུ་ནི་མངོན་མཐོའི་སྣོད། །སུ་ནི་ངེས་ལེགས་ཀྱི་སྣོད་ཅེས་སོགས་སོ་སོར་རྟོག་པས་སྐྱེ་འགྲོ་མཐའ་དག་ལ་ཕན་པའི་བསམ་པ་ཉིད་དོ། །ཉི་ཤུ་པ་ནི་རྣམ་ཀུན་ཏུ་བསྟན་པ་ལྟར་རོ། །ཉེར་གཅིག་པ་མཁྱེན་པའི་སྡེ་ཚན་ནི་རྣམ་མཁྱེན་དང་རྩ་བའི་དང་ཞེས་པའི་སྒྲས་བསྡུས་པ་ལམ་ཤེས་དང་གཞི་ཤེས་སྔར་བཤད་པ་དེ་དག་ཀྱང་འདིའི་ཡོན་ཏན་ཡིན་ནོ། །གཉིས་པ་བསྡོམས་ཏེ་སྐུར་བཞག་པ་ནི། བྱང་ཕྱོགས་ལ་སོགས་པ་སློབ་ལམ་གྱི་སེམས་སེམས་བྱུང་གནས་ཡོངས་སུ་གྱུར་པས་མཐར་ཕྱིན་པའི་ལམ་དུ་གྱུར་པ་གཟུང་འཛིན་གྱི་སྤྲོས་པ་མེད་པའི་ཡེ་ཤེས་ཀྱི་བདག་ཉིད་ཐམས་ཅད་ཀྱང་སྐུ་ཐ་དད་པར་ཡེ་ཤེས་ཆོས་ཀྱི་སྐུར་མངོན་པར་བརྗོད་པར་བྱ་བ་ཡིན་ནོ། །ཞེས་བྱ་བ་ནི་སྣང་མཛད་ལ་སོགས་པ་ཁ་ཅིག་གི་ཡིན་ལ་སློབ་དཔོན་ཡང་དེའི་རྗེས་སུ་འབྲང་ངོ༌། །གཉིས་པ་ཐ་མི་དད་པར་འདོད་པ་དགག་པ་ལ་གཉིས། །འདོད་པ་བརྗོད་
པ་དང་དེ་དགག་པའོ། །དང་པོ་འདོད་པ་བརྗོད་པ་ནི། སྐུ་བཞིར་འདོད་པ་ལས་གཞན་སྐུ་གསུམ་དུ་འདོད་པ་དག་གིས་ཀྱང༌། སངས་རྒྱས་ཀྱི་ས་ན་ཟག་པ་མེད་པའི་སེམས་དང་སེམས་བྱུང་གི་ཆོས་རྣམས་ཀྱང་སྒྲ་ཇི་བཞིན་དུ་ཁས་ལེན་པར་བྱེད་ཅིང༌། དེ་དག་གི་རང་བཞིན་སྐྱེ་བ་མེད་པ་ཉིད་ངོ་བོ་ཉིད་སྐུར་བཞེད་དོ། །འོན་ཀྱང་གཞུང་འཆད་པའི་ཚེ་ནི། །ངོ་བོ་ཉིད་ཀྱི་སྐུ་ཟག་མེད་ཀྱི་ཆོས་གང་དག་གི་རང་བཞིན་ཡིན་པའི་ཟག་མེད་ཀྱི་ཆོས་དེ་དག་གང་ཡིན་ཞེ་ན་དེའི་ལན་བྱང་ཆུབ་ཕྱོགས་མཐུན་སོགས་ཀྱིས་འཆད་ཅིང་དེ་ལྟར་གཞུང་སྔ་ཕྱི་གཉིས་སྦྲེལ་ནས་དེ་དག་གི་རང་བཞིན་སྐྱེ་བ་མེད་པ་སྔར་བཤད་པ་དེ་ཉིད་ཆོས་ཀྱི་སྐུ་ཡིན་ནོ་ཞེས་འཆད་དོ། །ཆོས་ཀྱི་སྐུ་ཆོས་ཅན་དེ་དག་གི་རང་བཞིན་ཡིན་ན་ཆོས་ཉིད་ཀྱི་སྐུ་ཞེས་བརྗོད་དགོས་ཀྱི་ཆོས་ཀྱི་སྐུ་ཞེས་པ་མི་འཐད་དོ་ཞེ་ན། དེ་ནི་དོན་དུ་་ཏྭ་ཀཱ་ཡ་ཞེས་ཆོས་ཉིད་ཀྱི་སྐུ་ཡིན་ཀྱང༌། སྡེབ་སྦྱོར་གྱི་དབང་གིས་ངོ་བོའི་རྐྱེན་ཕྱིས་ནས་་ཀཱ་ཡ་ཞེས་རྩ་བར་བསྟན་ཏོ། །ཞེས་བཞེད་དོ། །གཉིས་པ་དེ་དགག་པ་ནི། ཆོས་སྐུ་དང་ངོ་བོ་ཉིད་སྐུ་གཅིག་ཏུ་འདོད་པ་དེ་དག་གི་ལྟར་ན། །སངས་རྒྱས་ཀྱི་སར་གདོན་མི་ཟ་བར་ཁས་བླང་དགོས་ཤིང་རང་ཉིད་ཀྱིས་ཀྱང་ཁས་བླང་བའི་རྣལ་འབྱོར་པའི་ཀུན་རྫོབ་རྗེས་ཐོབ་ཏུ་གཟུགས་སྐུ་གཉིས་སྣང་བའི་སྒོ་ནས་གདུལ་བྱ་ལ་ཆོས་སྟོན་པ་སོགས་ཀྱི་བྱེད་ལས་ཅན། དྲི་བཅས་
གནས་ཡོངས་སུ་གྱུར་ནས་དྲི་མ་མཐའ་དག་དང་བྲལ་བ་གཟུང་འཛིན་གཉིས་སུ་མེད་པའི་སེམས་དང་སེམས་བྱུང་དེ་དག་མེད་པར་ཐལ་ཏེ་སྐུ་གསུམ་པོ་གང་དུ་ཡང་མ་འདུས་པའི་ཕྱིར་རོ། །གལ་ཏེ་དེ་དག་ནི་ཆོས་ཅན་དང་ཆོས་ཉིད་དབྱེར་མེད་པའི་ཚུལ་གྱིས་ངོ་བོ་ཉིད་སྐུ་ཉིད་དུ་འདུ་བས་མི་གནོད་དོ་ཞེ་ན། དེ་ལྟར་ན་ལོངས་སྐུ་དང་སྤྲུལ་སྐུ་ཡང་དེ་ལྟར་འགྱུར་བས་སྐུ་གཅིག་ཁོ་ནར་ངེས་པར་འགྱུར་རོ། །དེ་ནི་མ་ཡིན་ཏེ་གསུང་རབ་རྣམས་ལས་སྐུ་གསུམ་དུ་བརྗོད་པའི་ཕྱིར། ལོངས་སྤྲུལ་དེ་དག་རྣལ་འབྱོར་པའི་ཀུན་རྫོབ་ཏུ་སྐུ་ལོག་པར་བཞག་ཅེ་ན། འོ་ན་གཉིས་སུ་མེད་པའི་ཡེ་ཤེས་ཀྱི་སྐུ་ཡང་ལོངས་སྤྲུལ་བཞིན་དུ་སྐུ་ལོགས་སུ་བཞག་དགོས་པར་འགྱུར་ཏེ་གསུང་རབ་ལས་སྐུ་བཞིར་ཡང་བརྗོད་པའི་ཕྱིར་རོ། །གལ་ཏེ་གཉིས་སུ་མེད་པའི་ཡེ་ཤེས་ཉིད་གཟུགས་སྐུ་གཉིས་ཀྱིས་བསྡུས་པར་སྨྲ་ན་ཡང་མི་འཐད་དེ། སེམས་སེམས་བྱུང་དེ་དག་ནི་ཐུབ་པའི་རང་སྣང་ལ་བཞག་དགོས་ལ་སྐུ་དེ་གཉིས་ནི་གཞན་སྣང་འབའ་ཞིག་ཡིན་པས་སོ། །གསུམ་པ་ཐ་དད་དུ་འདོད་པ་ལ་རྩོད་སྤང་ནི། གལ་ཏེ་སྐུ་བཞི་ཡིན་ན་མདོར་བསྟན་དུ་ངོ་བོ་ཉིད་སྐུའི་མཇུག་ཐོག་ཏུ་ཆོས་སྐུ་ཞེས་འབྱུང་དགོས་ན་དེ་མི་འབྱུང་བས་སྐུ་གསུམ་ཉིད་འཐད་དོ་ཞེ་ན། དེ་ནི་དགོས་པ་ཁྱད་པར་ཅན་གསུམ་གྱི་ཕྱིར་སྐུ་གསུམ་གྱི་
མཇུག་ཐོག་ཏུ་ཆོས་སྐུ་གསུངས་པ་ཡིན་པས་ཉེས་པ་མེད་དོ། །དགོས་པ་གསུམ་ནི། གཞན་དོན་སྒྲུབ་པའི་ཕྱིར་དུ་སངས་རྒྱས་ཀྱི་སར་ངེས་པར་ཁས་བླང་དགོས་པའི་ཟག་མེད་ཀྱི་སེམས་དང་སེམས་བྱུང་རྣམས་སྐུ་གཞན་གསུམ་དུ་མི་འདུ་ཞིང་ཆོས་སྐུར་བསྡུ་དགོས་སོ་ཞེས་བསྟན་པ་དང༌། རྒྱན་གྱི་ཚིག་ལེའུར་བྱས་པ་ལ་སྡེབ་སྦྱོར་ཉམས་པ་སྤངས་པ་དང༌། ཡེ་ཤེས་ཆོས་སྐུ་ཁོ་ན་དང༌། མཛད་པ་གཉིས་བྱ་བ་དང་བྱེད་པོར་སྦྱར་བར་བྱ་བའི་ཕྱིར་རོ། །དེ་ལྟར་སྐུ་བཞིར་བཞེད་པའི་དགག་བཞག་སྤངས་གསུམ་གྱི་བཤད་སྲོལ་འདི་དག་ནི་སློབ་དཔོན་སེང་གེ་བཟང་པོའི་དགོངས་པ་ཡིན་ནོ། །འཕགས་པ་དང་པ་ནི་སྐུ་གསུམ་ཁོ་ནར་བཞེད་དོ། །གསུམ་པ་ལོངས་སྤྱོད་རྫོགས་སྐུ་ལ་གཉིས། རང་བཞིན་མདོར་བསྟན་ཡོན་ཏན་རྒྱས་པར་བཤད་པའོ། །དང་པོ་རང་བཞིན་མདོར་བསྟན་པ་ནི། མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུའི་བདག་ཉིད་ཅན་གྱི་སངས་རྒྱས་ཀྱི་གཟུགས་ཀྱི་སྐུ་འདི་ནི་ཐེག་ཆེན་གྱི་ཆོས་ལ་ཉེ་བར་ལོངས་སྤྱོད་པའི་ཕྱིར་ཐུབ་པ་སངས་རྒྱས་བཅོམ་ལྡན་འདས་ཀྱི་ལོངས་སྤྱོད་རྫོགས་པའི་སྐུ་ཡིན་ཏེ། རབ་འབྱོར་གཞན་ཡང་ཡུམ་འདི་ལ་བསླབས་ཤིང་ཆོས་དེ་དག་ཐམས་ཅད་ཐོབ་ནས་བླ་མེད་རྫོགས་བྱང་དུ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་ནས་ཐམས་
ཅད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་དཔེ་བྱད་བཟང་པོ་བརྒྱད་ཅུས་བརྒྱན་པ། བྱང་ཆེན་རྣམས་ལ་ཐེག་པ་མཆོག་གི་ལོངས་སྤྱོད་བླ་ན་མེད་པའི་དགའ་བ་དང་བདེ་བ་དང་ཚིམ་པ་དང་རབ་ཏུ་དགའ་བ་སྟོན་པར་མཛད་པར་འགྱུར་རོ། །ཞེས་སོ། །མཚན་དཔེ་དེ་དག་སྤྲུལ་སྐུ་ལ་ཡང་ཡོད་མོད་ཀྱི་རྣམ་སྨིན་གྱི་འབྲས་བུ་དངོས་ནི་ལོངས་སྐུའི་ཡིན་ལ་སྤྲུལ་སྐུ་ནི་དེའི་བདག་འབྲས་ཙམ་སྟེ་འདི་ནི་ལོངས་སྐུའི་ཡང་གཟུགས་བརྙན་དུ་གསུངས་པས་སོ། །གཞན་ཡང་རིན་ཆེན་ཕྲེང་བ་ལས། །འཁོར་ལོས་སྒྱུར་བ་ཐམས་ཅད་ལ། །འདི་དག་ཡོད་པར་འདོད་མོད་ཀྱིས། །དག་དང་མཛེས་དང་གསལ་བ་ནི། །སངས་རྒྱས་རྣམས་ཀྱི་ཆར་མི་ཕོད། །ཅེས་སོ། །ལོངས་སྐུ་གང་ལ་སྣང་བའི་བྱང་སེམས་ནི་གཞུང་ཁ་ཅིག་ལས་ས་བཅུ་པ་ཁོ་ན་ལ་བཤད་ཀྱང༌། སློབ་དཔོན་སེང་བཟང་དང་དཔལ་ལྡན་ཟླ་གྲགས་སོགས་ཀྱི་བཞེད་པ་ལྟར་ས་བཅུ་ག་ལ་གནས་པའོ། །གཉིས་པ་ཡོན་ཏན་རྒྱས་པར་བཤད་པ་ལ་གཉིས། མཚན་དཔེའི་ཁྱད་པར་དང༌། མཚན་དཔེ་དངོས་སོ། །དང་པོ་མི་སྐྱེས་བུ་ཆེན་པོར་མཚོན་པར་བྱེད་པས་མཚན་དང༌། གཞན་རྒྱུད་ལ་གོ་བར་བྱེད་པས་དཔེ་བྱད་དེ། དེའི་
དོན་ཡང་ཕ་རོལ་ལ་སྐུའི་མཛེས་བསྐྱེད་པའོ། །གཞན་ཡང་མཚན་རྣམས་གཙོ་བོ་ཡིན་པས་རེ་རེ་ཡང་ཕྱིན་དྲུག་གི་རྒྱུ་ལས་བྱུང་བར་བསྟན་ཏེ། སྨིན་མཚམས་ཀྱི་མཛོད་སྤུ་ཁ་དོག་དཀར་བ་དང༌། གཡས་སུ་འཁྱིལ་བ་དང༌། སྤ་ཞིང་ཟིལ་གྱིས་མི་གནོན་པ་དང༌། རིང་བར་གནས་པ་དང༌། ཤིན་ཏུ་འཁྱིལ་ཞིང་ལེགས་པར་གནས་པ་དང༌། འོད་མཐའ་ཡས་པས་ཁྱབ་པ་རྣམས་རིམ་པ་ལྟར་དེ་དྲུག་གི་འབྲས་བུར་གསུངས་ཏེ། རྒྱས་པར་ནི་བསྐལ་བ་བཟང་པོ་ལས་སོ། །དཔེ་བྱད་རྣམས་ནི་འཁོར་ཡིན་པས་དེ་ལྟར་མ་བསྟན་ཏེ་གཙོ་བོ་བསྡུས་པས་སོ། །གཙོ་འཁོར་དུ་ཇི་ལྟར་གནས་ན། སོར་མོ་དང་སེན་མོའི་དཔེ་བྱད་དྲུག་ནི་ཕྱག་སོར་རིང་བའི་འཁོར་རོ། །དབུ་རྒྱས་པ་དང་དབུ་སྐྲ་དྲུག་སྟེ་བདུན་ནི་གཙུག་ཏོར་དང་སྤུ་གཡས་སུ་འཁྱིལ་བ་དང་སྤུ་གྱེན་དུ་ཕྱོགས་པའི་ཡིན་ནོ། །དཔྲལ་བ་གཉིས་དང་ཤངས་ཀྱི་གཉིས་ཏེ་བཞི་ནི་མཛོད་སྤུ་ཡིའོ། །སྨིན་མ་བཞི་དང་སྤྱན་གྱི་བཞི་རྫི་མ་དང་དགུ་ནི་སྤྱན་མཐོན་མཐིང་དང་རྫི་མ་བའི་རྫི་མ་ལྟ་བུའི་འོ། །སྙན་གྱི་གཉིས་ནི་འགྲམ་པ་སེང་གེ་འདྲ་བའི་ཡིན་ནོ། །ཞལ་གྱི་གཉིས་དང་ལྗགས་ཀྱི་གསུམ་དང་གསུང་གི་གཉིས་དང་མཆེ་བའི་ལྔ་སྟེ་བཅུ་གཉིས་ནི་ལྗགས་ཡངས་པ་དང༌། ཚངས་དབྱངས་དང༌། ཚེམས་ཀྱི་མཚན་བཞི་དང༌། རོ་བྲོ་བའི་མཆོག་མཁྱེན་པའི་སྟེ་ཇི་ལྟར་རིགས་པར་སྦྱར་རོ། །
རྩའི་གཉིས་དང་ལོང་བུ་མི་མངོན་པ་སྐུ་གཞོན་མདོག་ཅན་ཕྱག་འཇམ་པ་ཕྱག་རེས་ཀྱི་གསུམ་སྟེ་བརྒྱད་ནི་ཕྱག་ཞབས་འཇམ་ཞིང་གཞོན་ཤ་ཆགས་པ་དང་བྱིན་པ་ཨེ་ན་ཡའི་འདྲ་བ་དང་ཞབས་ལོང་མི་མངོན་པའི་ཡིན་ནོ། །ཞབས་མཉམ་ནི་རུས་སྦལ་གྱི་ཞབས་ཀྱིའོ། །གཤེགས་སྟབས་བདུན་དང་གོམ་སྙོམས་དང་བརྒྱད་ནི་སོར་མོ་དྲ་བས་འབྲེལ་བ་དང་རྟིང་པ་ཡངས་པ་གཉིས་ཀྱིའོ། །སྐུ་འཁྲིལ་བག་ཆགས་པ་ནས་དག་པའི་བར་དྲུག་དང་ཁོ་ལག་ཡངས་པ་དང་སྐུ་མ་ཞུམ་པ་དང་གྲིམ་པའི་བར་གསུམ་དང༌། ཡན་ལག་རྣམ་འབྱེས་དང་དཀུ་ཟླུམ་པ་ནས་ཕྱལ་ཕྱང་ངེ་བའི་བར་བཞི་དང་ཀུན་ནས་ལྟ་ན་སྡུག་པ་དང་སྨེ་བ་མེད་པའི་བར་གསུམ་དང་མཚན་ཡོངས་སུ་རྫོགས་པ་དང་བཅུ་དགུ་ནི་སྐུ་ཆེ་ཞིང་དྲང་བ་བདུན་མ་ཐོབ་བགས་པ་སྲབ་པ་གསེར་མདོག་འདྲ་བ་དཔུང་མགོ་ཟླུམ་པ། ཐལ་གོང་རྒྱས་པ་རོ་སྟོད་སེང་གེ་འདྲ་བ་ཤིང་ནྱ་གྲོ་དྷ་ལྟར་ཆུ་ཞེང་གབ་པ་ཡིའོ། །ལྟེ་བའི་གཉིས་ནི་གསར་གནས་སྦུབས་སུ་ནུབ་པའི་འོ། །ཕྱག་རིང་རྒྱས་པ་ནི་ཕྱག་རིང་མཛེས་པའི་འོ། །དཔལ་བེའུ་བཀྲ་ཤིས་ཉ་གཡུང་དྲུང་འཁྱིལ་པ་སོགས་ནི་འཁོར་ལོའི་མཚན་དང་དྲ་བས་འབྲེལ་བའི་འཁོར་རོ། །གཉིས་པ་མཚན་དཔེ་དངོས་ལ་གཉིས། མཚན་དང་དཔེ་བྱད་དོ། །དང་པོ་མཚན་ནི་སུམ་ཅུ་རྩ་གཉིས་ཏེ། བླ་མ་སྐྱེལ་བ་དང༌། བསུ་
བ་དང་ཆོས་མཉན་པ་ལ་བསྟོད་པ་གཙུག་ལག་ཁང་དང་མཆོད་རྟེན་ལ་མེ་ཏོག་ཕྲེང་བ་དང་བཤོས་འབུལ་བ། གཡོག་འཁོར་སྦྱིན་པས་ཕྱག་དང་ཞབས་འཁོར་ལོའི་མཚན་དང་ལྡན་པ་དང༌། སྡོམ་པ་ཡང་དག་པར་བླང་བ་བརྟན་པ་སྟེ་ལུང་རྟོགས་ཀྱི་ཆོས་ལ་གནས་པའི་དམ་བཅའ་བརྟན་པས་རུས་སྦལ་བཞིན་དུ་ཞབས་མཐིལ་ས་ལ་མཉམ་པར་འཇོག་པ་དང༌། བསྡུ་པའི་དངོས་པོ་བཞི་བརྟན་པའི་ཕྱག་དང་ཞབས་ཀྱི་སོར་མོ་ངང་པའི་རྒྱལ་པོ་ལྟ་བུར་དྲ་བར་འབྲེལ་བ་དང༌། འདི་ལ་སོར་ཚིགས་དང་པོ་ནས་བརྩམ་པའི་སོར་མོའི་བར་ལ་སེང་སེང་པོ་མེད་ལ་སོར་གདུབ་ལ་སོགས་པའི་རྒྱན་ཡང་གཞུག་རུང་བ་ཞེས་དགོངས་རྒྱན་ལས་སོ། །བཟའ་བ་དང་བཅའ་བ་དང་བཏུང་བ་དང་བལྡག་པ་གྱ་ནོམས་པ་བྱིན་པས་ཕྱག་དང་ཞབས་འཇམ་ཞིང་གཞོན་ཤ་ཆགས་པ་དང༌། བཟའ་བཅའ་བལྡག་པ་སོགས་ཤིན་ཏུ་གྱ་ནོམས་པ་བྱིན་པས་ཕྱག་དང་ཞབས་དང་ཐལ་གོང་དང་ལྟག་པའི་ཕྱོགས་མཐོ་བའི་ཕྱིར་བདུན་མཐོ་བ་དང༌། འདི་ནི་ཕྱག་ཞབས་ཀྱི་རྒྱབ་བཞི་ཕྲག་གོང་གཉིས་ལྟག་པ་རྣམས་ཤས་ཁེངས་པ་ལ་དགོངས་རྒྱན་ལས་སོ། །གསད་པར་བྱ་བ་ལས་ཐར་བར་བྱས་པས་སོར་མོ་རིང་བ་ཉིད་དང༌། འཚོ་བ་ལ་ཕན་བཏགས་པ་སྟེ་སེམས་ཅན་གྱི་སྲོག་བསྲུང་བ་ལས་རྟིང་པ་ཡངས་པ་ཉིད་དང༌། རྟིང་པ་ཡངས་བ་ནི་ཞབས་མཐིལ་གྱི་བཞི་ཆ་ཕྱིར་འཕགས་པ་ལ་ཐུབ་དགོངས་ལས་
སོ། །ཉི་སྣང་དང་རྣམ་འགྲེལ་ལས་རྟིང་བ་རིང་བ་ཞེས་སོ། །སྲོག་གཅོད་པ་སྤངས་པ་ཉིད་ཀྱིས་སྐུ་ཁྲུ་བདུན་ཙམ་དུ་འཕགས་པས་ཆེ་ཞིང་དྲང་བ་དང༌། དགེ་བའི་ཆོས་ཡང་དག་པར་བླངས་པས་བུས་མོའི་ལྷ་ང་དང་ཞབས་ལོང་མི་མངོན་པའོ། །དགེ་བ་ཡང་དག་པར་བླང་བ་སྤེལ་བས་སྐུའི་སྤུ་རེ་རེ་ནས་གྱེན་དུ་ཕྱོགས་པ་སྟེ་བཅུ་ཚན་དང་པོའོ། །གསོ་བ་རིག་པ་དང་བཟོ་རིག་སོགས་ལ་གུས་པས་བྱིན་པ་རི་དྭགས་ཨེ་ན་ཡའི་ལྟ་བུ་དང༌། རི་དྭགས་ཤ་ར་ཎ་དང་ཨེ་ན་ཡའི་བྱིན་པ་ལྟ་བུ་ནི་ཡོངས་སུ་མ་ཉམས་རིམ་པར་འཚམས་ལ་རྒྱས་ཤིང་ཟླུམ་པའོ། །ཨེ་ན་ཡ་ནི་བསེ་ཁ་སྒོ་ལ་ཚིག་གསལ་གྱིས་སོ། །རང་ལ་བདོག་པའི་ནོར་སློང་བ་ན་སློང་བ་པོའི་སྐྱེ་བོ་ཕྱིར་མ་སྤངས་པས་ཕྱག་རིང་ཞིང་མཛེས་པ་ཉིད་དང༌། ཕྱག་རིང་བ་ནི་བརླ་དྲང་པོར་བཞག་སྟེ་མ་བཏུད་ཀྱང་ཕྱག་གིས་པུས་མོའི་ལྷ་ངར་སླེབ་པའོ། །སྐྱེ་བོ་ཐམས་ཅད་ཚངས་པར་སྤྱོད་པ་ཡང་དག་པར་ལེན་དུ་འཇུག་པ་དང༌། གསང་བའི་གསང་ཚིག་བསྲུངས་པས་གླང་པོ་ཆེ་དང༌། །ཅང་ཤེས་ལྟར་འདོམས་ཀྱི་སྦ་བ་སྦུབས་སུ་ནུབ་པ་དང༌། གདིང་བ་དང་དགབ་པ་དང་གོས་གྱ་ནོམས་པ་བྱིན་པས་མདོག་གསེར་འདྲ་བ་དང༌། གསེར་འདྲ་ནི་ཤིན་ཏུ་དག་པའི་གསེར་ལྟར་གསལ་བ་ལ་བྱའི་སེར་བ་ལ་མི་བྱའོ། །ཁང་བཟང་ལ་སོགས་པ་དམ་པ་བྱིན་པས་གསེར་དངུལ་ཤིན་ཏུ་སྦྱངས་པ་ལྟར་བགས་པ་འཇམ་ཞིང་སྙོམས་ལ་རྡུལ་
གྱིས་མ་གོས་པའོ། །འདུ་འཛི་དང་རྣམ་གཡེངས་སྤངས་པས་བ་སྤུའི་ཁུང་བུ་རེ་རེར་སྦུ་གཉིས་གཉིས་མེད་པར་རེ་རེ་བ་གཡས་ཕྱོགས་སུ་འཁྱིལ་བའོ། །སྐྱེ་བོ་མཁན་སློབ་ཕ་མ་སློབ་དཔོན་བླ་མ་སྟེ་གོང་མ་ཐམས་ཅད་བསྙེན་བཀུར་གྱི་གནས་ཇི་ལྟ་བ་བཞིན་དུ་བཀོད་ཅིང་རིམ་གྲོ་བསྒྲུབ་པས་ཞལ་མཛོད་སྤུས་བརྒྱན་པ་སྟེ། དེ་ཡང་སྨིན་མཚམས་བར་ཐིག་ལེའི་གནས་ན། འཇམ་པ་དཀར་བ་མཉེན་པ་དྲང་ན་ཁྲུ་གང་དང་གཉིས་དང་གསུམ་ལ་སོགས་པའི་ཚད་འབྱུང་བ་བཏང་ན་གཡས་སུ་འཁྱིལ་པ་རྩེ་མོ་གྱེན་དུ་ཕྱོགས་པ་སྐྱུ་རུ་རའི་འབྲུའི་ཚད་ཙམ་པ་དངུལ་འབུར་གྱི་རྣམ་པའོ། །ཞེས་དགོངས་རྒྱན་ལས་སོ། །རྣམ་པ་ཐམས་ཅད་དུ་ཁ་དྲག་གི་ཚིག་གིས་ཁྱད་དུ་མ་བསད་པས་རོ་སྟོད་སེང་གེ་དང་འདྲ་བ་སྟེ་རོ་སྟོང་འཕེལ་ཀར་ཆེ་བའོ། །སྙན་པར་སྨྲ་བ་དང་ལེགས་པར་སྨྲ་བའི་རྗེས་སུ་མཐུན་པ་སྟེ་རྗེས་སུ་བསླབ་པས། དཔུང་མགོ་ཤིན་ཏུ་ཟླུམ་པ་དང༌། དཔུང་མགོ་ཟླུམ་པ་ནི་གསེར་གྱི་བུམ་པའི་མགྲིན་པ་བཞིན་དུ་ཡོངས་སུ་ཟླུམ་ཞིང་མགྲིན་པ་ལེགས་པར་འབྲེལ་བ་རྩའི་དྲ་བ་མི་མངོན་པ་ལ་ཐུབ་དགོངས་ལས་སོ། །སྨན་དང་སྨན་པ་དང་ནད་ལ་ཕན་པའི་ཟས་ལ་སོགས་པ་བྱིན་པས་ཐལ་གོང་རྒྱས་པ་དང་འདི་ནི་དཔུང་མགོ་བ་ན་ཚུན་གྱི་བར་རྒྱས་པ་ལ་དགོངས་རྒྱན་དང་ཐལ་གོང་ཕྲད་ལ་དག་ལྡན་ལས་ཏེ། མདོར་ན་གསེར་གྱི་གཏན་པ་ཕྱིས་པ་
ལྟར་བྲང་མི་མཉམ་པ་མེད་པ་སྟེ་བཅུ་ཚན་གཉིས་པའོ། །སྐྱེ་བོ་ནད་པའི་གཡོག་བྱས་པས་རོ་བྲོ་བའི་མཆོག་མཁྱེན་པ་སྟེ་རོ་མི་ཞིམ་པ་ལ་ཡང་རོ་མཆོག་བྲོ་བར་མཁྱེན་པ་སྟེ་རླུང་མཁྲིས་བད་ཀན་གྱིས་ལྗགས་མ་ཉམས་པར་རོ་བྲོ་བ་སོ་སོར་མྱང་བ་དང་མཐུན་པའི་རྣམ་ཤེས་སྐྱེ་བའོ། །ནགས་ཚལ་དང་ཀུན་དགའ་ར་བ་ལ་སོགས་པ་བྱེད་པ་ཡང་དག་པར་ལེན་དུ་བཅུག་པས་ཤིང་ནྱ་གྲོ་དྷ་ལྟར་ཆུ་ཞེང་གབ་པ་སྟེ། འདོམ་གྱི་ཕན་ཚུན་གྱི་རྩེ་མོ་ནས་གཞལ་བ་ཇི་ཙམ་པ་ཞབས་ནས་སྤྱི་བོའི་བར་ལའང་དེ་ཙམ་པའོ། །གཙུག་ལག་ཁང་དང་འདུག་གནས་སོགས་བྱིན་པས་དབུ་གཙུག་ཏོར་དང་ལྡན་པ་ཉིད་དང༌། །གཙུག་ཏོར་ནི་ཟླུམ་ཞིང་ཀུན་ནས་མཉམ་པ་གཡས་སུ་འཁྱིལ་པའོ། །ཡུན་རིང་པོ་ནས་འཇམ་པོ་དང་སྙན་ལ་མཉེན་པར་གསུངས་པས་ལྗགས་རིང་བ་དང༌། འདི་སྙན་གྱི་བུག་པ་དང་དཔྲལ་བའི་སྐྲ་མཚམས་ཀྱི་བར་ལྗགས་ཀྱིས་རེག་པ་ལ་དགོངས་རྒྱན་ལས་སོ། །འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ལ་དམ་པའི་ཆོས་གོ་བར་བྱས་པས་ཚངས་པའི་དབྱངས་དང༌། ཚངས་དབྱངས་ནི། དབྱིག་གི་སྙིང་པོ་དང་བ་ཀ་ལ་པིང་ཀའི་གསུང་མངའ་བས་ན་ཡོངས་སུ་ཤེས་ཤིང་རྣམ་པར་ཤེས་པར་འགྱུར་བ་དང༌། མཉན་ན་དགའ་ཞིང་མི་མཐུན་པ་མེད་པ་དང༌། ཟབ་ཅིང་དབྱངས་ཤིན་ཏུ་འབྱུང་བ་དང༌། གཏང་མི་བྲ་ཞིང་
རྣ་བ་སྙན་པ་དང༌། མ་འཁྲུགས་ཤིང་གསལ་བའི་ཡན་ལག་ལྔ་དང་ལྡན་པའོ། །ཚིག་ཀྱལ་པ་སྤངས་ཤིང་དུས་སུ་སྨྲ་བས་འགྲམ་པ་མེ་ལོང་གི་དཀྱིལ་འཁོར་ལྟར་མཐའ་ཟླུམ་ལ་རྒྱས་ཤིང་ལྟ་ན་སྡུག་པས་འགྲམ་པ་སེང་གེ་འདྲ་བ་དང༌། སྐྱེ་བོ་ཐམས་ཅད་མི་བརྙས་ཤིང་བཀུར་བས་ཚེམས་དཀར་བ་ཉིད་དང༌། ལོག་འཚེ་མེད་པའི་འཚོ་བ་རྣམ་པར་དག་པས་ཚེམས་མཉམ་པ་ཉིད་དང༌། མཉམ་པ་ནི་མཐོ་དམན་མེད་པའོ། །བདེན་པའི་ཚིག་ཀུན་དུ་སྤྱོད་པས་ཚེམས་བར་མཚམས་མེད་པས་ཐགས་བཟང་བ་དང༌། ཕྲ་མའི་ཚིག་སྤངས་པས་མི་ཕལ་པ་ལྟར་ཉེར་བརྒྱད་དངོས་གཉིས་མ་ཡིན་པར་ཡན་མན་ལ་ཉི་ཤུ་ཉི་ཤུ་ཡོད་པས་བཞི་བཅུ་མངའ་བ་སྟེ་བཅུ་ཚན་གསུམ་པའོ། །སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་བལྟས་པས་སྤྱན་དཀར་ནག་གི་ཆ་མ་འདྲེས་ཤིང་ཤིན་ཏུ་དག་པས་དམར་པོ་ར་རི་དང་མ་འབྲེལ་བས་སྤྱན་མཐོན་མཐིང་ངོ། །སྤྱན་ཟླུམ་པའི་དབུས་སྣུམ་ཞིང་གནག་པ་དང༌། ནག་པོ་ཟླུམ་པོའི་ལོག་གཉིས་དཀར་བ་དང༌། རྫི་མ་གནས་པའི་གོ་སྐབས་སྣུམ་ལ་མཐིང་གར་འདུག་པ་དང༌། མཐའ་གཉིས་ཤིང་བི་སྦ་ལའི་ཤུན་པ་ལྟར་དམར་བ་དང༌། རྫི་མ་དང་སྤྱན་གྱི་བར་གསེར་གྱི་ཁ་དོག་གོ་ཞེས་པ་འདི་ལྟར་ལྔ་ཡོད་ཀྱང་སྤྱན་གྱི་དཀྱིལ་འཁོར་གཙོ་བོ་ཉིད་ཀྱི་ཕྱིར་སྤྱན་མཐོན་མཐིང་ངོ། །ཞེས་གསུངས་སོ་ཞེས་དགོངས་
རྒྱན་ལས་སོ། །ཁྲོ་བ་དང་ཆགས་པ་དང་རྨོངས་པ་མེད་པར་བལྟས་པས་སྟེང་འོག་གི་རྫི་མ་རྣམས་ལེགས་པར་གཞོལ་ཞིང་མ་འདྲེས་པར་གནས་པས་རྫི་མ་བའི་རྫི་མ་ལྟ་བུ་ཉིད་དོ། །བ་མཆོག་ནི་བའམ་གླང་པོ་ཡང་ན་ཁྱུ་མཆོག་ལ་བྱ་བར་དག་ལྡན་ལས་དང༌། བེའུ་གཞོན་ནུའི་ལྟ་བུར་སྙིང་པོ་མཆོག་དང་དགོངས་རྒྱན་ལས་སོ། །གཉིས་པ་དཔེ་བྱད་བརྒྱད་ཅུ་ལ་བཅུ་ཚན་བརྒྱད་ལས་དང་པོ་ནི་འདུ་བྱེད་ཐམས་ཅད་ལ་འདོད་ཆགས་དང་བྲལ་བས་སེན་མོ་ཟངས་ཀྱི་མདོག་ལྟ་བུ་ཉིད་དང༌། སེམས་ཅན་ཐམས་ཅད་ལ་ཕན་པའི་ལྷག་པོའི་བསམ་པ་ཉིད་ཀྱིས་སེན་མོ་མདོག་སྣུམ་པ་ཉིད་དང༌། རྒྱལ་རིགས་ལ་སོགས་པ་རིགས་ཀྱི་མཆོག་ལས་སྐྱེས་པས་ཤང་ཤོང་མེད་པའི་སེན་མོ་མཐོ་བ་ཉིད་དང༌། ཚུལ་ཁ་ན་མ་ཐོ་བ་མེད་པ་ཉིད་ཀྱིས་སོར་མོ་རྣམས་ཟླུམ་པ་ཉིད་དང༌། དགེ་བའི་རྩ་བ་བསགས་པ་ཉིད་ཀྱིས་སོར་མོ་རྣམས་རྒྱས་པ་ཉིད་དང༌། དགེ་རྩ་རིམ་གྱིས་བསགས་པས་ཡང་དག་པར་མཐར་གྱིས་ཞུགས་པ་ཉིད་ཀྱིས་སོར་མོ་རྣམས་བྱིན་གྱིས་ཕྲ་བ་ཉིད་དང༌། ལུས་དང་ངག་དང་ཡིད་ཀྱི་ལས་དང་འཚོ་བ་རབ་ཏུ་བསྲུང་བ་ཉིད་ཀྱིས་རྩ་མི་མངོན་པ་དང༌། ཉོན་མོངས་པའི་མདུང་བ་གྲོལ་བ་ཉིད་གྱིས་རྩ་མདུད་མེད་པ་ཉིད་དང༌། ཤིན་ཏུ་སྦས་པའི་གསང་བའི་གནས་ཟབ་མོ་རྟོགས་པའི་བློ་གྲོས་ཅན་ཉིད་ཀྱིས་ལོང་བུ་མི་མངོན་
བ་དང༌། འདིའི་ལོང་བུ་ནི་ཆུང་ངུ་དང་མཚན་གྱི་ནི་ཆེ་བའོ། །ཁ་ཅིག་མཚན་གྱི་ཕྱིའི་དང་འདི་ནི་ནང་གི་ལོང་བུའོ་ཞེས་འདོད་དོ་ཞེས་ཚིག་གསལ་ལས་སོ། །བགྲོད་དཀའ་བའི་གནས་ཐམས་ཅད་ལས་སྐྱེ་བོ་སྒྲོལ་བར་མཛད་པ་ཉིད་ཀྱིས་ཞགས་རིང་ཐུང་མེད་པས་མི་མཉམ་པ་མེད་པའོ། །བཅུ་ཚན་གཉིས་པ་ནི། མི་ཟིལ་གྱིས་གནོན་པ་ལ་མཁས་པ་ཉིད་ཀྱིས་སེང་གེའི་སྟབས་སུ་གཤེགས་པ་ཉིད་དང༌། ཀླུ་ཟིལ་གྱིས་གནོན་པ་ལ་མཁས་པ་ཉིད་ཀྱིས་གླང་པོ་ཆེའི་སྟབས་སུ་གཤེགས་པ་ཉིད་དང༌། ནམ་མཁའ་ལ་གཤེགས་པར་མཁས་པ་ཉིད་ཀྱིས་ངང་པའི་སྟབས་སུ་གཤེགས་པ་ཉིད་དང༌། སྐྱེས་བུ་ཁྱུ་མཆོག་ཏུ་མཁས་པ་ཉིད་ཀྱིས་ཁྱུ་མཆོག་གི་སྟབས་སུ་གཤེགས་པ་ཉིད་དང༌། སྟབས་གཤེགས་འདི་བཞི་ལ་མདོ་དང་ཉི་སྣང་རྣམ་འགྲེལ་དུ། མིའི་སེང་གེ་དང༌། མིའི་གླང་པོ་ཆེ་དང༌། ངང་པའི་རྒྱལ་པོ་ལྟར་དང༌། མིའི་ཁྱུ་མཆོག་ཡིན་པས་དེ་དང་དེའི་སྟབས་སུ་གཤེགས་ཞེས་གསུངས་ལ། སློབ་དཔོན་གྱིས་དང་པོ་འདི་གཉིས་མི་དང་ཀླུ་ཟིལ་གྱིས་གནོན་པ་ལ་མཁས་པ་ཉིད་ཀྱིས་ཞེས་གསུངས་པ་ནི། སེམས་ཅན་གྱི་ལས་ཀྱི་ཁྱད་པར་བསམ་གྱིས་མི་ཁྱབ་པས་མདོ་གཞན་ཞིག་ནས་སྟབས་དེ་གཉིས་ཀྱིས་གཤེགས་པས་འགྲོ་བ་དེ་གཉིས་ཟིལ་གྱིས་གནོན་པར་གསུངས་པ་ཞིག་གི་རྗེས་སུ་འབྲང་བར་གསལ་ལོ། །སྐོར་ཕྱོགས་ཀྱི་
ལམ་དང་མཐུན་པར་གཤེགས་པ་ཉིད་ཀྱིས་གཡས་ཕྱོགས་སུ་ལྡོག་ཅིང་གཤེགས་པ་ཉིད་དང༌། མཛེས་པར་མཁས་པ་ལྟ་ན་སྡུག་པ་ཉིད་ཀྱིས་མཛེས་པར་གཤེགས་པ་ཉིད་དང༌། །རྟག་ཏུ་སེམས་གྱ་གྱུ་བ་མི་མངའ་བ་ཉིད་ཀྱིས་མི་གཡོ་བར་གཤེགས་པ་ཉིད་དང༌། ཡོན་ཏན་ཡང་དག་པར་བརྗོད་པར་མཛད་པས་སྐུའི་འགྱིང་ལེགས་པའི་འཁྲིལ་བག་ཆགས་པ་དང༌། སྡིག་པའི་ཆོས་དང་མ་འབག་པས་སྐུ་བྱི་དོར་བྱས་པ་ལྟ་བུ་ཉིད་དང༌། གདུལ་བྱ་དང་འཚམས་པའི་ཆོས་སྟོན་པར་མཛད་པ་ཉིད་ཀྱིས་རིང་ཐུང་དང་སྦོམ་ཕྲ་སོགས་རིམ་པར་འཚམས་པའོ། །བཅུ་ཚན་གསུམ་པ་ནི། སྐུ་དང་གསུང་དང་ཐུགས་ཀྱི་ཀུན་སྤྱོད་གཙང་བའི་ཕྱིར་སྐུ་རྣམ་པར་དག་ཅིང་གཙང་བ་ཉིད་དང༌། ཐུགས་ཐུགས་རྗེ་ཅན་གྱི་ཕྱིར་སྐུ་འཇམ་པ་དང༌། ཐུགས་རྣམ་པར་དག་པའི་ཕྱིར་སྐུ་རྣམ་པར་དག་པ་ཉིད་དང༌། དྲི་མ་འཇོམས་པར་བྱེད་པའི་ཆོས་འདུལ་བ་ཡོངས་སུ་རྫོགས་པས་ཆ་ཤས་རྫོགས་པའི་མཚན་རྫོགས་པ་ཉིད་དང༌། ཡངས་ཤིང་མཛེས་པའི་ཡོན་ཏན་རྫོགས་པའི་ཕྱིར་སྐུའི་ཁྱོན་ཆེ་བས་ཁོ་ལག་ཡངས་ཤིང་ཁྱད་པར་བཟང་བ་དང༌། ཐམས་ཅད་ལ་ཐུགས་སྙོམས་པའི་ཕྱིར་གོམ་པ་ཆེ་ཆུང་སྙོམས་པ་དང༌། རྣམ་པར་དག་པའི་ཆོས་སྟོན་པའི་ཕྱིར་སྤྱན་རྣམ་པར་དག་པ་ཉིད་དང༌། ཆོས་གོ་སླ་བར་སྟོན་པ་ཉིད་ཀྱི་ཕྱིར་སྐུ་ཤིན་ཏུ་གཞོན་ཤ་ཅན་ཉིད་དང༌། ཐུགས་རྟག་
ཏུ་མ་ཞུམ་པའི་ཕྱིར་སྐུ་ཤ་ཞུམ་པ་མེད་པ་དང༌། དགེ་བའི་རྩ་བ་ཡང་དག་པར་འཕགས་པའི་ཕྱིར་སྐུ་ཤ་རྒྱས་པ་ཉིད་དོ། །བཅུ་ཚན་བཞི་པ་ནི། །ཡང་སྲིད་པ་ཟད་པ་ཉིད་ཀྱིས་སྐུའི་ཤ་མི་སློད་པས་ཤིན་ཏུ་གྲིམ་པ་དང༌། རྟེན་ཅིང་འབྲེལ་བར་འབྱུང་བ་ཤིན་ཏུ་རྣམ་པར་ཕྱེ་བ་སྟོན་པར་མཛད་པ་ཉིད་ཀྱིས་ཡན་ལག་དང་སོར་ཚིགས་སོགས་ཀྱི་ཉིད་ལག་རྣམ་པར་འབྱེས་པ་སྟེ་ལྷུ་ཚིགས་རེང་ཐུང་སོགས་ཀྱི་ཆ་ཕྱེད་བ་དང༌། ཚིག་གི་དོན་ཤིན་ཏུ་རྣམ་པར་དག་པ་སྟོན་པས་གཟིགས་པ་རབ་རིབ་མེད་ཅིང་རྣམ་པར་དག་པ་ཉིད་དང༌། ཚུལ་ཁྲིམས་ཕུན་ཚོགས་ཀྱི་སློབ་མ་དང་ལྡན་པས་དགུ་ཟླུམ་པ་དང་འདི་ལ་མདོ་ནས་ཕྱལ་ཟླུམ་ཕྱལ་ཕྱང་བ་དང་ལྡན་པ། ཕྱལ་མ་ཞོམ་པ་ཞེས་གསུངས་ཀྱང་བསྟན་བཅོས་དང་འགྲེལ་བ་རྣམས་ལས་དཀུ་ལ་སྦྱར་བས་དཀུ་ནི་རྐེད་སྐབས་མཚམས་ལ་བྱས་ནས་དེ་ཟླུམ་པ་སོགས་ལ་བཤད་དོ། །འཁོར་བའི་སྐྱོན་གྱིས་མ་གོས་པ་ཉིད་ཀྱིས་དགུ་སྐབས་ཕྱེད་པ་ཉིད་དང༌། ང་རྒྱལ་གྱི་འགྱིང་བག་བཅོམ་པ་ཉིད་ཀྱིས་དཀུ་མ་རྙོངས་པ་ཉིད་དང༌། ཆོས་སྟོན་པ་ཟད་ཅིང་གཏུགས་པ་མེད་པ་ཉིད་ཀྱིས་ཕྱལ་ཕྱམ་མེ་བ་སྟེ་ལྟེ་བ་མཐོ་དམན་མེད་པ་དང༌། ཆོས་ཟབ་མོ་རྟོགས་པ་ཉིད་ཀྱིས་ལྟེ་བ་གཏིང་ཟབ་པ་དང༌། རང་དང་མཐུན་པར་གདམས་ངག་འཛིན་པའི་སློབ་མ་མངའ་བ་ཉིད་ཀྱིས་ལྟེ་བའི་རི་མོ་གཡས་ཕྱོགས་སུ་འཁྱིལ་བ་ཉིད་དང༌། སྤྱོད་ལམ་
ཀུན་ནས་མཛེས་པའི་འཁོར་མངའ་བས་ཀུན་ནས་ལྟ་ན་སྡུག་པའོ། །བཅུ་ཚན་ལྔ་པ་ནི། ཐུགས་གཙང་བ་ཉིད་ཀྱིས་ཀུན་ཏུ་སྤྱོད་པ་གཙང་བ་ཉིད་དང༌། དུས་མིན་དུ་གདུལ་བྱ་འདུལ་བའམ། ཡང་ན་ནག་པོའི་ཆོས་སྟོན་པ་དང་བྲལ་བ་ཉིད་ཀྱིས་སྐུ་ལ་སྨེ་བ་དང་གནག་བག་མེད་པ་ཉིད་དང༌། ལུས་ལ་སོགས་པ་ཟོ་མདོག་བདེ་བ་འཐོབ་པའི་ཆོས་སྟོན་པར་མཛད་པ་ཉིད་ཀྱིས་ཕྱག་ཤིང་བལ་ལྟར་ཤིན་ཏུ་འཇམ་པ་ཉིད་དང༌། རང་གི་སྐྱེ་བོ་དང་གཞན་གྱི་སྐྱེ་བོ་སྙོམས་པར་བྱས་པས་ཕྱག་གི་རི་མོ་མདངས་ཡོད་པ་ཉིད་དང༌། ཆོས་ཟབ་མོ་རྟོགས་པ་ལ་གནས་པས་ཕྱག་གི་རི་མོ་ཟབ་པ་དང༌། ཡང་དང་ཡང་ཆོས་སྟོན་པ་ཉིད་ཀྱིས་ཕྱག་གི་རི་མོ་རིང་བ་དང༌། ཤིན་ཏུ་རླབས་ཆེ་བ་མ་ཡིན་པའི་བསླབ་པ་མང་པོའི་གཞི་འཆའ་བ་ཉིད་ཀྱིས་ཞལ་ཧ་ཅང་མི་རིང་བ་དང༌། འཇིག་རྟེན་ཐམས་ཅད་གཟུགས་བརྙན་འདྲ་བར་རྟོགས་པ་ཉིད་ཀྱིས་མཆུ་བིམ་པ་ལྟར་དམར་བ་ཉིད་དང༌། འདི་ལ་མདོ་དང་ཉི་སྣང་ལས་ཞལ་ལ་གཟུགས་ཀྱི་གཟུགས་བརྙན་སྣང་བ་དང་ཞེས་པ་དང་མཐུན་པར་དག་ལྡན་ལས་ཞལ་ལ་གཟུགས་བརྙན་སྣང་བ་དང་ཞེས་འདོན་ནོ། །ཚིག་འཇམ་པོས་འདུལ་བ་ཉིད་ཀྱིས་ལྗགས་མཉེན་པ་ཉིད་དང༌། རིགས་པའམ་འཐད་པའི་ཡོན་ཏན་མང་བ་ཉིད་ཀྱིས་ལྗགས་སྲབ་པ་ཉིད་དོ། །བཅུ་ཚན་དྲུག་
པ་ནི། བྱིས་པའི་སྐྱེ་བོ་ཆགས་པ་ཅན་གཏིང་དཔག་དཀའ་བའི་ཆོས་ཀྱིས་འདུལ་བས་ལྗགས་དམར་བ་ཉིད་དང༌། བསྙེངས་པ་ཐམས་ཅད་མི་མངའ་བ་ཉིད་ཀྱིས་འབྲུག་གི་སྒྲ་དང་ལྡན་པ་ཉིད་དང༌། སྙན་པ་དང་མཉེན་ལ་འཇམ་པར་སྨྲ་བའི་སློབ་མ་མངའ་བས་གསུང་སྙན་ཞིང་མཉེན་ལ་འཇམ་པ་དང༌། ཆགས་པ་ཁོང་ཁྲོ་ང་རྒྱལ་མ་རིག་པ་ལྟ་བ་ཐེ་ཚོམ་མཆོག་འཛིན་ཕྲག་དོག་སེར་སྣ་སྟེ་སྲིད་པའི་ཀུན་སྦྱོར་དགུ་སྤངས་པས་མཆེ་བ་ཟླུམ་པ་དང༌། སྐྱེ་བོ་གདུལ་དཀའ་བ་འདུལ་བ་ཉིད་ཀྱིས་མཆེ་བ་རྣོ་བ་དང༌། ཆོས་དཀར་པོས་འདུལ་བས་མཆེ་བ་དཀར་བ་དང༌། སེམས་ཅན་ལ་ཉེ་རིང་དུ་འཛིན་པ་ཟད་པའི་ས་ལ་གནས་པ་ཉིད་ཀྱིས་མཆེ་བ་མཉམ་པ་ཉིད་དང༌། མཐར་གྱིས་མངོན་པར་རྟོགས་པ་ཡང་དག་པར་རབ་ཏུ་སྟོན་པར་མཛད་པ་ཉིད་ཀྱིས་མཆེ་བ་བྱིན་གྱིས་ཕྲ་བ་ཉིད་དང༌། ཤེས་རབ་མཆོག་ལ་གནས་པའི་ཉིད་ཀྱིས་ཤངས་མཐོ་བ་ཉིད་དང༌། གདུལ་བྱ་གཙང་ལ་ཡིད་ཆེས་པའི་གནས་ཉིད་ཀྱིས་ཤངས་གཙང་བ་ཉིད་དོ། །བཅུ་ཚན་བདུན་པ་ནི། སངས་རྒྱས་ཀྱི་ཆོས་ཤིན་ཏུ་རྒྱ་ཆེ་བ་དང་ལྡན་པས་སྤྱན་ཡངས་པ་ཉིད་དང༌། སེམས་ཅན་གྱི་ཚོགས་དྲངས་པ་ཉིད་ཀྱིས་རྫི་མ་སྟུག་པ་ཉིད་དང༌། ལྷ་ལྷ་མིན་དང་མིའི་འགྲོ་བ་གཞོན་ནུ་མ་མིག་དཀར་ནག་འབྱེས་ཤིང་པད་འདབ་རིངས་པ་ལྟ་བུ་དང་ལྡན་པ་མཆོག་རྣམས་མགུ་བ་སྟེ་དེ་དག་གིས་
བསྟོད་པས་སྤྱན་དཀར་ནག་འབྱེས་ཤིང་པདྨའི་འདབ་མ་རིང་བ་ལྟ་བུ་ཉིད་དང༌། མ་འོངས་པ་ན་ཅིར་འགྱུར་ལྟ་བའི་རྟག་ཏུ་ཕྱི་རྗེས་སུ་གཟིགས་པ་ཉིད་ཀྱིས་སྨིན་ཚུགས་རིང་བ་ཉིད་དང༌། འཇམ་པོས་ཆོས་ཀྱིས་འདུལ་བ་ལ་མཁས་པས་སྨིན་མ་འཇམ་པ་དང༌། ཐུགས་ཀྱི་རྒྱུད་དགེ་བས་བརླན་པ་ཉིད་ཀྱིས་སྨིན་མ་སྣུམ་པ་ཉིད་དང༌། སྐྱོན་ཀུན་ཏུ་གཟིགས་པ་ཉིད་ཀྱིས་སྨིན་མའི་སྦུ་མཉམ་པ་ཉིད་དང༌། མཆོག་ཏུ་གནོད་པའི་ཉོན་མོངས་པ་བཟློག་པར་མཛད་པ་ཉིད་ཀྱིས་ཕྱག་རིང་ཞིང་རྒྱས་པ་དང༌། མི་མཉམ་པའི་ཆགས་པ་ལ་སོགས་པའི་གཡུལ་ལས་རྣམ་པར་རྒྱལ་བ་ཉིད་ཀྱིས་སྙན་མཉམ་པ་ཉིད་དང༌། སེམས་ཅན་ཐམས་ཅད་ཀྱི་རྒྱུད་མ་ཉམས་པར་མཛད་པ་ཉིད་ཀྱིས་སྙན་གྱི་དབང་པོ་མ་ཉམས་པ་ཉིད་དོ། །བཅུ་ཚན་བརྒྱད་པ་ནི། །ལྟ་བས་བྱས་པ་དྲུག་ཅུ་རྩ་གཉིས་ཀྱིས་གཞན་དུ་མི་འགྱུར་བ་ཉིད་ཀྱིས་དཔྲལ་བ་ལེགས་པར་འབྱེས་པ་དང་དཔྲལ་བ་འབྱེས་པ་ནི་སྐྲ་མཚམས་ལེགས་པར་དོད་པའོ། །རྒོལ་བར་སྨྲ་བ་ཐམས་ཅད་འཇོམས་པར་མཛད་པ་ཉིད་ཀྱིས་དཔྲལ་བ་དབྱེས་ཆེ་བ་སྟེ་དཔྲལ་བའི་ཁྱོན་ཆེ་བ་དང༌། སྨོན་ལམ་གྱི་མཆོག་ཡོངས་སུ་རྫོགས་པ་ཉིད་ཀྱིས་དབུ་ཤིན་ཏུ་རྒྱས་པ་ཉིད་དང༌། དབུ་རྒྱས་པ་ནི་གདུགས་ལྟར་གྱུར་པའོ། །ཡུལ་ལ་དགའ་བའི་སྲེད་པ་བཟློག་
པར་མཛད་པ་ཉིད་ཀྱིས་དབུ་སྐྲ་བུང་བ་ལྟར་གནག་པ་ཉིད་དང༌། མཐོང་བ་དང་སྒོམ་པས་སྤང་བར་བྱ་བའི་བག་ལ་ཉལ་སྤངས་པའི་ཕྱིར་དབུ་སྐྲ་སྡུག་པ་ཉིད་དང༌། བློ་འཇམ་པོ་རྟོག་མེད་ཀྱིས་བསྟན་པའི་སྙིང་པོ་ཤེས་པས་དབུ་སྐྲ་འཇམ་པ་ཉིད་དང༌། ཐུགས་འདོད་ཆགས་ལ་སོགས་པས་མ་འཁྲུགས་པ་ཉིད་ཀྱིས་དབུ་སྐྲ་མ་འཛིང་བ་ཉིད་དང༌། རྟག་ཏུ་ཚིག་མི་རྩུབ་པ་ཉིད་ཀྱིས་དབུ་སྐྲ་མི་བཤོར་བ་སྟེ་གྱེན་དུ་མ་བརྫེས་པ་དང༌། བྱང་ཆུབ་ཀྱི་ཡན་ལག་གིས་མེ་ཏོག་བཀྲམ་པ་ཉིད་ཀྱིས་དབུ་སྐྲ་དྲི་ཞིམ་པ་དང༌། རྣམ་པ་ཐམས་ཅད་དུ་མཛེས་པར་གྱུར་པ་ཉིད་ཀྱིས་ཕྱག་དང་ཞབས་དཔལ་གྱི་བེའུ་དང་བཀྲ་ཤིས་དང་གཡུང་དྲུང་འཁྱིལ་པས་བརྒྱན་པ་སྟེ་དེ་དག་གི་རི་མོ་ཡོད་པའོ། །དེ་ལྟར་བཤད་པའི་སྔ་མ་ཕལ་མོ་ཆེ་ནང་གི་ཡོན་ཏན་དང་ཕྱི་མ་རྣམས་དེ་གསལ་བར་བྱེད་པའི་ཕྱིའི་ཡོན་ཏན་དང་ཁ་ཅིག་རྒྱུ་འབྲས་སུའང་སྦྱར་རོ། །མཚན་དཔེ་དེ་རྣམས་ཀྱི་འགྲུབ་ཚུལ་རིན་ཆེན་ཕྲེང་བ་ལས། རང་སངས་རྒྱས་ལས་ཀུན་འབྱུང་དང༌། །སློབ་དང་མི་སློབ་ལས་འབྱུང་དང༌། །འཇིག་རྟེན་མ་ལུས་ཀུན་བསོད་ནམས། །འཇིག་རྟེན་བཞིན་དུ་དཔག་མེད་གང༌། །དེ་བཅུར་བསྒྲེས་པར་གྱུར་པ་ཡིས། །བ་སྤུའི་བུ་ག་གཅིག་འགྲུབ་སྟེ། །སངས་རྒྱས་བ་སྤུའི་བུ་ག་ནི། །ཐམས་ཅད་དེ་དང་འདྲ་བར་འབྱུང༌། །བ་སྤུའི་བུ་ག་ཐམས་ཅད་ནི། །སྐྱེད་པར་བྱེད་པའི་བསོད་ནམས་
གང༌། །དེ་དག་བརྒྱར་ནི་བསྒྱུར་བ་ཡིས། །དཔེ་བྱད་བཟང་པོ་གཅིག་ཏུ་བཞེད། །བསོད་ནམས་དེ་སྙེད་དེ་སྙེད་ཀྱིས། །རྒྱལ་པོ་དཔེ་བྱད་བཟང་པོ་ནི། །རེ་རེ་མཐར་ཕྱིན་དེ་ལྟ་བུ། །བརྒྱད་ཅུའི་བར་དུ་འབྱུང་བར་འགྱུར། །དཔེ་བྱད་བཟང་པོ་བརྒྱད་ཅུ་དག །འགྲུབ་པའི་བསོད་ནམས་ཚོགས་གང་ཡིན། །དེ་དག་བརྒྱར་ནི་བསྒྱུར་བ་ཡིས། །སྐྱེས་བུ་ཆེན་པོའི་མཚན་གཅིག་གོ། །མཚན་ནི་སུམ་ཅུ་འགྲུབ་པའི་རྒྱུ། །བསོད་ནམས་རྒྱ་ཆེན་གང་ཡིན་པ། །དེ་དག་སྟོང་དུ་བསྒྱུར་བ་ཡིས། །ཟླ་བ་ཉ་འདྲའི་མཛོད་སྤུའོ། །མཛོད་སྤུ་ཡི་ནི་བསོད་ནམས་དེ། །སྟོང་ཕྲག་བརྒྱ་ནི་བསྡོམ་པ་ཡིས། །སྤྱི་གཙུག་ལྟར་ནི་མི་སྣང་བ། །སྐྱོབ་པའི་གཙུག་ཏོར་སྐྱེད་པར་བྱེད། །གཙུག་ཏོར་བསོད་ནམས་བྱེ་བ་ནི། །གྲངས་མེད་རྒྱ་ཆེན་བཅུ་པོ་དག །སངས་རྒྱས་གསུང་གི་སྒྲ་དབྱངས་ནི། །ཡན་ལག་དྲུག་ཅུ་སྐྱེད་པའི་མཆོག །ཅེས་སོ། །བཞི་པ་སྤྲུལ་པའི་སྐུ་ནི། མདོ་སྡེ་རྒྱན་ལས། །བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པར་རྟག་སྟོན་པ། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་པ་ལྟར་བྱང་ཆུབ་མཆོག་གི་སྤྲུལ་པ་་ཐུབ་པ་དང༌། བཟོ་སྤྲུལ་པ་རབ་དགའ་འདུལ་བའི་དོན་དུ་དྲི་ཟར་སྤྲུལ་པ་ལྟ་བུ་ལ་སོགས་པའི་གཟུགས་གང་གིས་འཁོར་བ་ཇི་སྲིད་གནས་
ཀྱི་བར་དུ་འཇིག་རྟེན་གྱི་ཁམས་ཐམས་ཅད་དུ་སེམས་ཅན་དག་མ་དག་རྣམས་ཀྱི་འདོད་པའི་དོན་མངོན་པར་མཐོ་བ་དང་ངེས་པར་ལེགས་པའི་གོ་འཕང་ཉེ་རིང་མེད་པར་མཉམ་པ་ཉིད་དུ་མཛད་པའི་སྐུ་དེ་ནི། སངས་རྒྱས་བཅོམ་ལྡན་འདས་ཀྱི་སྤྲུལ་པའི་སྐུ་ཡིན་ཏེ། རབ་འབྱོར་གཞན་ཡང་ཡུམ་འདི་ལ་སློབ་པ་ནི། ཆོས་དེ་དག་རྟོགས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་པ་མཐའ་མེད་པར་དུས་ཐམས་ཅད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྤྲུལ་པ་སྣ་ཚོགས་ཀྱི་སྤྲིན་གྱིས་སེམས་ཅན་ཐམས་ཅད་ཀྱི་དོན་མཛད་པ་དེ་ལྟར་བྱང་ཆེན་གྱིས་ཡུམ་ལ་བསླབ་པར་བྱའོ། །ཞེས་སོ། །གཉིས་པ་བྱ་བ་ཕྲིན་ལས་ལ་གསུམ། ལམ་གྱི་རྟེན་དང༌། ལམ་དང༌། ལམ་གྱི་འབྲས་བུ་ལ་འགོད་པའོ། །དང་པོ་ལམ་གྱི་རྟེན་ལ་འགོད་པ་ནི། །འགྲོ་རྣམས་ཞི་བའི་ལས་ལ་འགོད་པ་སྟེ། དེ་ཡང་ངན་འགྲོ་ལ་ནི༌།རྫུ་འཕྲུལ་བསྟན་ནས་མོས་པའི་ཚེ་ཆོས་བསྟན་པས་སྐྱེ་གནས་དེ་དག་ལས་ཐར་བར་བྱས་ནས་ལྷ་མིའི་རྟེན་ལ་འགོད་ཅིང༌། བདེ་འགྲོ་ལ་ནི་འདོད་ལྷ་ཡུལ་ལ་སྲེད་པས་མྱོས་པ་ལ་གཞལ་ཡས་ཁང་མེ་འབར་བར་སྣང་བར་བྱས་ནས་འདུ་བྱེད་མི་རྟག་སོགས་སུ་སྟོན་པ་དང༌། ཁམས་གོང་གི་ལྷ་ཚངས་པའི་ལྟ་
བས་བཅིངས་པ་རྣམས་ལ་ཆོས་རྣམས་སྟོང་པ་རབ་སྟན་པས་ལྟ་ངན་དང་བྲལ་བར་བྱེད་པ་དང༌། མི་རྣམས་སྐྱབས་སུ་འགྲོ་བ་དང༌། བསླབ་གཞི་བཟུང་བ་ལ་སྦྱར་ནས་རྒྱུད་སྣོད་རུང་དུ་བྱེད་པའོ། །གཉིས་པ་ལམ་ལ་འགོད་པ་ལ་བཞི། ཚོགས་ལམ་སྦྱོར་ལམ་མཐོང་ལམ་སྒོམ་ལམ་ལ་འགོད་པའོ། །དང་པོ་ཚོགས་ལམ་ལ་འགོད་པ་ལ་ལྔ་ལས། །དང་པོ་སྦྱིན་དང་སྙན་སྨྲ་དོན་སྤྱོད་དོན་མཐུན་པའི་བསྡུ་རྣམ་བཞི་ནི། སློབ་དཔོན་རྟ་དབྱངས་ཀྱིས་ཀུན་རྫོབ་བྱང་ཆུབ་ཀྱི་སེམས་སྒོམ་པའི་རིམ་པ་ལས། སྦྱིན་པའི་གཡབ་མོས་ལེགས་བོས་ནས། །སྙན་པར་སྨྲ་བའི་གཏམ་བྱས་ཏེ། །དོན་སྤྱོད་པ་ཡིས་བག་ཕབ་ནས། །དོན་མཐུན་གྲོས་ཆེན་ངེས་པར་གདབ། ཅེས་དང༌། མདོ་སྡེ་རྒྱན་ལས། དང་པོས་སྣོད་འགྱུར་དང་པོ་སྟེ། །གཉིས་པ་ཡིས་ནི་མོས་པར་བྱེད། །གསུམ་པ་ཡིས་ནི་སྒྲུབ་པ་སྟེ། །བཞི་པས་རྣམ་པར་སྦྱོང་བའོ། །ཞེས་སོ། །གཉིས་པས་ནི་ཀུན་ཉོན་དང་རྣམ་བྱང་གི་ཆོས་ལ་ཐོས་བསམ་གྱི་སྒོ་ནས་བླང་དོར་དུ་རྟོགས་པ་ལ་འགོད་པའོ། །གསུམ་པ་ནི་སེམས་ཅན་རྣམས་ཀྱི་དོན་བྱམས་སོགས་ཚད་མེད་པ་སྒྲུབ་པ་ལ་འགོད་པའོ། །བཞི་པ་ནི་གཙོ་བོར་རང་དོན་ཕ་རོལ་དུ་ཕྱིན་པ་དྲུག་ལ་འགོད་པའོ། །ལྔ་པ་ནི་གཉིས་ཀའི་དོན་སངས་རྒྱས་སུ་བགྲོད་
པའི་ལམ་དགེ་བ་བཅུ་ལ་འགོད་པའོ། །གཉིས་པ་སྦྱོར་ལམ་ལ་འགོད་པ་ནི། འཇིག་རྟེན་པའི་སྒོམ་བྱུང་གི་གཙོ་བོར་གྱུར་ནས་ཆོས་ཐམས་ཅད་རང་བཞིན་གྱིས་སྟོང་པ་ཉིད་རྟོགས་ཤིང་གོམས་པ་ལ་འགོད་པའོ། །གསུམ་པ་མཐོང་ལམ་ལ་འགོད་པ་ནི། གཟུང་འཛིན་གཉིས་ཟད་པའི་ཆོས་ཉིད་ཀུན་ཏུ་འགྲོ་བའི་དོན་རྟོགས་པའི་ས་དང་པོ་ལ་འགོད་པའོ། །བཞི་པ་སྒོམ་ལམ་ལ་འགོད་པ་ལ་དྲུག །ས་ལྔ་པའི་བར་དྲུག་པ་བདུན་པ་བརྒྱད་པ་དགུ་པ་བཅུ་པ་ལ་འགོད་པའོ། །དང་པོ་ནི་ཆོས་ཐམས་ཅད་བརྡའ་ཙམ་དུ་རྟོགས་པའི་ས་གཉིས་པ་ནས་ལྔ་པའི་བར་ལ་འགོད་པའོ། །གཉིས་པ་ནི་གཟུང་འཛིན་གཉིས་ཀྱི་རྣམ་པར་ཆོས་རྣམས་དམིགས་སུ་མེད་པ་ས་དྲུག་པ་ལ་འགོད་པའོ། །གསུམ་པ་ནི་ལུས་ཅན་གྱི་རྒྱུད་སྒྲིབ་པ་སྤང་རུང་དང་གཉེན་པོ་སྐྱེ་རུང་དུ་ཡོངས་སུ་སྨིན་པར་བྱེད་པ་ས་བདུན་པ་ལ་འགོད་པའོ། །བཞི་པ་བརྒྱད་པ་ལ་འགོད་པ་ལ་གཉིས། རྟོགས་པ་དང༌། སྤང་བའོ། །དང་པོ་ནི་ཉན་རང་དུ་མི་ལྟུང་བར་ངེས་པའི་བྱང་སེམས་ཀྱི་ལམ་མོ། །གཉིས་པ་ནི་ཆོས་རྣམས་ལ་གཟུང་འཛིན་དུ་མངོན་པར་ཞེན་པ་བཟློག་པའོ། །ལྔ་པ་ནི་བྱང་ཆུབ་མ་ཐོབ་ཀྱང་དེ་ཐོབ་པ་དང་འདྲ་བའི་སྤྲུལ་སྐུའི་མཛད་པ་ནུས་པའི་ས་དགུ་པ་ལ་འགོད་པའོ། །དྲུག་པ་ས་བཅུ་པ་ལ་འགོད་པ་ལ་གསུམ། བཅུ་པ་ཐོབ་མ་ཐག་
པ་དང༌། སྐྱེ་པ་གཅིག་གིས་ཐོགས་པ་དང༌། སྲིད་པ་ཐ་མ་ལ་འགོད་པའོ། །དང་པོ་ནི་རང་ཉིད་འཚང་རྒྱ་བའི་སྣོད་བཅུད་ཀྱི་ཞིང་དག་པའོ། །ས་བཅུ་པ་ཐོབ་མ་ཐག་ཏུ་དབང་བསྐུར་བས་ཞིང་དག་པར་འགྱུར་བ་ལ་གཉིས། སྣང་བས་ཕྲིན་ལས་བསྒྲུབ་པ་དང༌། མཆོད་པས་དབང་བསྐུར་ཐོབ་པའོ། །དང་པོ་སྣང་བས་ཕྲིན་ལས་སྒྲུབ་པ་ལ་སྣོད་དང༌། བཅུད་དག་པའི་སྣང་བ། ཕྲིན་ལས་སྒྲུབ་པ་གསུམ་ལས། དང་པོ་སྣོད་དག་པའི་སྣང་བ་ནི། ས་བཅུ་པ་ཐོབ་མ་ཐག་གི་ཚེ་ཏིང་ངེ་འཛིན་ཐམས་ཅད་མཁྱེན་པའི་ཡེ་ཤེས་དང་ཁྱད་མེད་པར་དབང་བསྐུར་བ་དང་ལྡན་པ་ཞེས་བྱ་བ་ཐོབ་མ་ཐག་ཏུ་སྟོང་གསུམ་འབུམ་ཕྲག་བཅུའི་རྒྱ་དང་ལྡན་པའི་པདྨ་རིན་པོ་ཆེ་དུ་མས་སྤྲས་པའི་གདན་དང༌། དེའི་འཁོར་དང་སྟོང་གསུམ་འབུམ་ཕྲག་བཅུའི་རྡུལ་གྱི་གྲངས་དང་མཉམ་པའི་པད་མས་གང་བར་སྣང་བའོ། །གཉིས་པ་བཅུད་དག་པའི་སྣང་བ་ནི། རང་ཉིད་གདན་དེ་ལ་འཚམ་ཞིང་རྐྱེན་དུ་འབབ་པར་འདུག་ལ་འཁོར་གྱི་པད་མ་ལ་ས་དགུ་པ་མན་ཆད་ཀྱི་བྱང་སེམས་བཞུགས་པས་བསྐོར་ཏེ་གང་བར་སྣང་བའོ། །གསུམ་པ་ཕྲིན་ལས་སྒྲུབ་པ་ནི། བྱང་སེམས་དེའི་ཞབས་མཐིལ་གཉིས་དང༌། པུས་མོའི་ལྷང་གཉིས་དང་ལྟེ་བ་དང་རྩིབས་ལོགས་གཉིས་ཕྱག་མཐིལ་གཉིས་ལས་འོད་ཟེར་གྲངས་མེད་པ་འབུམ་ཕྲག་བཅུ་བཅུ་སྤྲོས་པས། རིམ་པ་བཞིན་
ཕྱོགས་བཅུའི་ཡི་དྭགས་དང་དམྱལ་བ་དང་དུད་འགྲོ་དང་མི་དང་ལྷ་དང་ལྷ་མ་ཡིན་གྱི་གནས་ཐམས་ཅད་སྣང་བར་བྱས་ནས༔དུ་ཁ་རྣམས་ཞི་བར་བྱེད་དོ། །ཕྲག་པ་གཉིས་དང༌། རྒྱབ་མགུལ་གཉིས་དང༌། ཞལ་ནས་འོད་ཟེར་གྲངས་མེད་པ་འབུམ་ཕྲག་བཅུ་བཅུ་སྤྲོས་པས་རིམ་པ་བཞིན་ཕྱོགས་བཅུའི་ཉན་ཐོས་དང་རང་རྒྱལ་དང༌། སེམས་དང་པོ་བསྐྱེད་པ་ནས་ས་དགུ་པའི་བར་གྱི་གནས་གསུམ་པོ་རྣམས་སྣང་བར་བྱས་ཤིང༌། ཆོས་སྣང་བའི་སྒོ་དང༌། ཞི་བའི་ཏིང་ངེ་འཛིན་གྱི་སྒོའི་ཚུལ་དང་ཤེས་རབ་དང་ཐབས་མཁས་པའི་ཚུལ་ཡང་ཉེ་བར་སྒྲུབ་པོ། །གཉིས་པ་མཆོད་པས་དབང་བསྐུར་བ་ལ་གཉིས། མཆོད་པ་དང༌། དབང་བསྐུར་བའོ། །དང་པོ་མཆོད་པ་ནི། བྱང་སེམས་དེའི་མཛོད་སྤུ་ནས་འོད་ཟེར་གྲངས་མེད་པ་འབུམ་ཕྲག་བཅུ་སྤྲོས་པས་ཕྱོགས་བཅུའི་བདུད་ཐམས་ཅད་ཟིལ་གྱིས་མནན་ཏེ་དབང་བསྐུར་ཐོབ་པའི་བྱང་སེམས་རྣམས་སྣང་བར་བྱས་ནས་དེ་དག་གི་ལུས་སུ་ནུབ་པར་བྱེད་དོ། །སྤྱི་གཙུག་ནས་འོད་ཟེར་གྲངས་མེད་པ་སྟོང་ཆེན་འབུམ་ཕྲག་བཅུའི་རྡུལ་དང་མཉམ་པ་འཕྲོས་ནས་ཕྱོགས་བཅུའི་དེ་བཞིན་གཤེགས་པའི་དཀྱིལ་འཁོར་ཐམས་ཅད་སྣང་བར་བྱས། འཇིག་རྟེན་ལན་བཅུ་བསྐོར་ནས་སྟེང་གི་ནམ་མཁའ་ལ་འོད་ཟེར་གྱི་དྲ་བའི་དཀྱིལ་འཁོར་དུ་བྱས་ཏེ། དེ་བཞིན་གཤེགས་པ་མཆོད། སེམས་ཅན་གྱི་དོན་བྱས་ནས་དེ་བཞིན་
གཤེགས་པ་རྣམས་ཀྱི་ཞབས་མཐིལ་དུ་ནུབ་པར་བྱེད་དོ། །གཉིས་པ་དབང་བསྐུར་བ་ནི། རྒྱལ་བ་སྲས་བཅས་དེ་དག་གིས་ཀྱང་བྱང་སེམས་དེ་དབང་བསྐུར་བའི་དུས་ལ་བབས་པར་གཟིགས་ནས། ཕྱོགས་བཅུ་ནས་ས་དགུ་པ་མན་ཆད་ཀྱི་བྱང་སེམས་མཐའ་ཡས་པ་འོངས་ཏེ། བྱང་སེམས་དེ་ལ་ལྟ་ཞིང་མཆོད་དེ་ཏིང་ངེ་འཛིན་སྟོང་ཕྲག་བཅུ་བཅུ་ལ་སྙོམས་པར་འཇུག་གོ། །བྱང་སེམས་དབང་བསྐུར་བ་ཐོབ་པ་རྣམས་ཀྱི་དཔལ་བེའུ་དང༌། རྡོ་རྗེ་དང་བཀྲ་ཤིས་ལས་་བདུད་ཀྱི་དགྲ་ལས་རྣམ་པར་རྒྱལ་བ་ཞེས་བྱ་བའི་འོད་ཟེར་འཁོར་འོད་ཟེར་གྲངས་མེད་པ་འབུམ་ཕྲག་བཅུ་དང་བཅས་པ་བྱུང་སྟེ་ཕྱོགས་བཅུ་སྣང་བར་བྱས། ཆོ་འཕྲུལ་མུ་མེད་པར་བསྟན་ཏེ། བྱང་སེམས་དེའི་དཔལ་བེའུ་དང་རྡོ་རྗེ་དང༌། བཀྲ་ཤིས་སུ་ནུབ་པས་མཐུ་སྟོབས་ལྷག་པར་འཕེལ་ལོ། །དེ་བཞིན་གཤེགས་པ་རྣམས་ཀྱི་མཛོད་སྤུ་ནས་ཐམས་ཅད་མཁྱེན་པའི་མངོན་ཤེས་དང་ལྡན་པ་ཞེས་བྱ་བའི་འོད་ཟེར་གཅིག་འཁོར་འོད་ཟེར་གྲངས་མེད་པ་འབུམ་ཕྲག་དང་བཅས་པ་ཕྱུང་སྟེ་ཕྱོགས་བཅུ་ཐམས་ཅད་སྣང་བར་བྱས། འཇིག་རྟེན་ལན་བཅུ་བསྐོར་ནས་ངན་སོང་ཞི་ཞིང་བདུད་ཟིལ་གྱིས་མནན་ནས་བྱང་སེམས་དེའི་སྤྱི་བོར་ནུབ་ལ་འཁོར་གྱི་འོད་ཟེར་རྣམས་ནི་འཁོར་རྣམས་ཀྱི་སྤྱི་བོར་ནུབ་བོ། །འོད་ཟེར་དེ་དག་གིས་ཕོག་མ་ཐག་ཏུ་
བྱང་སེམས་དེ་དག་གིས་སྔོན་མ་ཐོབ་པའི་ཏིང་ངེ་འཛིན་སྟོང་ཕྲག་བཅུ་བཅུ་འཐོབ་ཅིང་འོད་ཟེར་དེ་དག་ཀྱང་བྱང་སེམས་དེའི་མགོ་ལ་དུས་གཅིག་ཏུ་འབབ་པར་འགྱུར་རོ། །གཉིས་པ་སྐྱེ་བ་གཅིག་གིས་ཐོགས་པ་ལ་གསུམ་ལས། དང་པོ་སྐྱེ་བ་ཕྱི་མ་དེ་ཉིད་ལ་ཞིང་འདིར་དུས་འདིའི་ཚེ་སངས་རྒྱས་འདི་ཞེས་བྱ་བར་འགྱུར་བར་ངེས་པའི་ནུས་པ་ལ་འགོད་པ་དང༌། གཉིས་པ་ཕྱོགས་བཅུ་ཀུན་གྱི་སེམས་ཅན་གྱི་དོན་ཚད་མེད་པ་སྒྲུབ་པ་ལ་འགོད་པ་དང༌། གསུམ་པ་འཇིག་རྟེན་ཐམས་ཅད་དུ་དེ་བཞིན་གཤེགས་པའི་དྲུང་དུ་ཉེ་བར་འགྲོ་ཞིང་སངས་རྒྱས་བརྟེན་པ་དང༌། དེ་ལ་ཆོས་ཉན་པ་དང་བསྙེན་བཀུར་བའི་ཡོན་ཏན་ལ་འགོད་པའོ། །གསུམ་པ་སྲིད་པ་ཐ་མ་པ་ལ་བཞི། ནུས་པ་རྟོགས་པ་སྤངས་པ་དག་པའི་རྒྱུ་ཚོགས་སོ། །དང་པོ་ནུས་པ་ལ་གཉིས། བྱང་ཆེན་གྱི་ཚོགས་མཐའ་དག་སྐྱེད་པའི་བྱང་ཆུབ་ཀྱི་ཡན་ལག་ལ་འགོད་པ་དང༌། རྒྱུ་ཚོགས་གཉིས་ཀྱི་ལས་ཀྱི་འབྲས་བུ་རྫོགས་བྱང་དངོས་སུ་འབྱིན་པའི་ལས་འབྲས་ཀྱི་འབྲེལ་པ་ཆུད་མི་ཟ་བ་ལ་འགོད་པའོ། །གཉིས་པ་རྟོགས་པའི་གཉིས་ནི། བདེན་བཞི་མཐོང་བའི་ཇི་སྙེད་པ་རྟོགས་པ་ལ་འགོད་པ་དང༌། འདུས་བྱས་འཁོར་བ་དང་འདུས་མ་བྱས་མྱང་འདས་ལ་བླང་དོར་ཐ་དད་དུ་ཡོངས་སུ་མི་འཛིན་པར་མཉམ་པ་ཉིད་དུ་མཐོང་བའི་ཇི་ལྟ་བ་རྟོགས་པ་ལ་འགོད་པའོ། །གསུམ་པ་སྤངས་པའི་གཉིས་ནི།
གཙང་བདེ་རྟག་བདག་ཏུ་ཞེན་པའི་ཕྱིན་ཅི་ལོག་བཞི་སྤངས་པ་ལ་འགོད་པ་དང༌། ཕྱིན་ཅི་ལོག་དེའི་གཞི་སྒྲོ་བཏགས་པ་ཙམ་མ་གཏོགས་པར་དོན་ལ་མེད་པའི་ཚུལ་དུ་རྟོགས་པའོ། །བཞི་པ་དག་པའི་རྒྱུ་ཚོགས་ཀྱི་གཉིས་ནི། སྲིད་མཐའི་སྐབས་ཀྱི་སངས་རྒྱས་ཀྱི་རྒྱུ་ཚོགས་དྲི་མས་རྣམ་པར་བྱང་བ་ལ་འགོད་པ་དང༌། རྣམ་པར་བྱང་བའི་ཡོན་ཏན་དེ་དག་སངས་རྒྱས་ཀྱི་རྒྱུའི་ཚོགས་པར་གནས་པ་ལ་འགོད་པའོ། །གསུམ་པ་འབྲས་བུ་ལ་འགོད་པ་ནི། མི་གནས་པའི་མྱང་འདས་དེ་བཞིན་གཤེགས་པ་ཉིད་ལ་འགོད་པའོ། །དེ་ལྟར་ཉི་ཤུ་རྩ་བདུན་ནི་ཆོས་ཀྱི་སྐུའི་མཛད་པ་ཡིན་ཏེ། ཆོས་སྐུ་རྒྱུན་མི་འཆད་པ་བཞིན་དུ། ཆོས་སྐུ་འདིའི་ཕྲིན་ལས་ཉི་ཤུ་རྩ་བདུན་ཡང་འཁོར་བ་ཇི་སྲིད་པར་ལྷུན་གྲུབ་རྒྱུན་མི་འཆད་དུ་འཇུག་པ་ཡིན་ནོ། །ཞེན་མེད་དབྱིངས་ཀྱི་ངང་དུ་ཡོན་ཏན་རྫོགས། །ཞེན་མེད་གཟུགས་སྐུའི་སྣང་བ་འགྲོ་ལ་འཆར། །ཞེན་མེད་ཕྲིན་ལས་ནམ་མཁའི་མཐའ་ཁྱབ་པ། །རྒྱལ་སྲས་ལམ་གྱི་འབྲས་བུ་འདིར་བཤད་དོ། །ཆོས་ཀྱི་སྐུའི་སྐབས་ཏེ་བརྒྱད་པའི་སྤྱི་དོན་ནོ། །གཉིས་པ་བར་མ་ལ་དད་པ་ལ་དྲུག་ཅུ་ཕྱེ་བ་ནི། མངོན་རྟོགས་དྲུག་གི་དང་པོར་བཤད་པའི་རྣམ་མཁྱེན་ལ་སོགས་པ་གསུམ་ནི་མཁྱེན་གསུམ་གྱི་མཚན་ཉིད་ཡིན་ཏེ། ཆོས་སུམ་ཅུས་མངོན་པར་མཚོན་པར་བྱ་བའི་གནས་ཡིན་པས་
སོ། །འདི་ནི་མཚན་ཉིད་ཀྱི་སྒྲས་བྱ་བྱེད་གཉིས་ཀ་འཛིན་པས་བྱ་བའི་དབང་དུ་བྱས་པའོ། །རྣམ་ཀུན་མངོན་རྫོགས་རྟོགས་པ་ནི་མཁྱེན་གསུམ་གྱི་སྦྱོར་བ་ཡིན་ཏེ། སྐྱེ་མེད་གསུམ་ཤེས་པའི་མཁྱེན་གསུམ་ལ་དབང་དུ་བྱ་བའི་ཕྱིར་ཐམས་ཅད་མཁྱེན་པ་ཉིད་གསུམ་སྒོམ་པ་ལ་སྦྱོར་བས་སོ། །རྩེ་མོའི་མངོན་པར་རྟོགས་པ་ནི་མཁྱེན་གསུམ་རབ་ཀྱི་གནས་སྐབས་ཡིན་ཏེ། མཁྱེན་གསུམ་ལ་ཤིན་ཏུ་གོམས་པས་ཕུལ་དུ་བྱུང་བས་འགྲོ་བའི་ཕྱིར་རོ། །མཐར་གྱིས་མངོན་པར་རྟོགས་པ་ནི། མཁྱེན་གསུམ་གྱི་གོ་རིམ་གྱི་གནས་སྐབས་ཡིན་ཏེ། མཁྱེན་གསུམ་གྱི་རྟོགས་པའི་དངོས་པོ་ངེས་པར་བྱ་བའི་ཕྱིར་སོ་སོ་བ་དང་མཐའ་དག་ཏུ་རྣམ་པར་བསྒོམ་པའི་དོན་མ་ཉམས་པར་རྒྱུན་ལྡན་དུ་སྐྱོང་བར་བྱེད་པས་སོ། །འདིའི་སོ་སོ་བ་དང་མཐའ་དག་པའི་དོན་ནི། མཁྱེན་གསུམ་མངོན་རྟོགས་གསུམ་དུ་བསྡུས་པ་ནི་བསྡུས་པའམ་མཐའ་མཁྱེན་གསུམ་དག་པ་དང༌། རྣམ་ཀུན་སོགས་སེམས་བསྐྱེད་སོགས་རེ་རེའི་སྒོ་ནས་རྒྱས་པར་བཤད་པའི་ལམ་རྣམས་ནི་སོ་སོ་བའོ། །སྐད་ཅིག་མ་གཅིག་གིས་མངོན་པར་རྫོགས་པར་བྱང་ཆུབ་པ་ནི། མཁྱེན་གསུམ་གྱི་མཐའ་ཐུག་པའི་གནས་སྐབས་ཡིན་ཏེ་སློབ་པའི་སྐབས་སུ་དེ་ལས་ཁྱད་པར་དུ་འགྲོར་མེད་པས་སོ། །ཆོས་ཀྱི་སྐུ་མཛད་པ་དང་བཅས་པ་ནི་མཁྱེན་གསུམ་གྱི་རྣམ་སྨིན་མཐར་ཐུག་པ་ཡིན་ཏེ། མཁྱེན་གསུམ་དེའི་འབྲས་བུ་མཐར་ཐུག་
ཡིན་པས་སོ། །འདིའི་མཁྱེན་གསུམ་ནི་སྐྱེ་མེད་གསུམ་མཁྱེན་པའི་བྱང་སེམས་ཀྱི་རྣལ་འབྱོར་ལ་བྱའོ། །དེ་ལྟ་ན་མཚན་ཉིད་ནས་རྣམ་སྨིན་གྱི་བར་རྣམ་པ་དྲུག་སྟེ་ཚིག་དོན་ནི་སྔ་མ་བརྒྱད་དུ་ཕྱེ་བའི་སྐབས་ཁོ་ན་བཞིན་དུ་བཤད་པར་བྱ་བ་ཡིན་ནོ། །གསུམ་པ་བསྡུས་པ་ལ་དད་པ་ལ་མངོན་རྟོགས་གསུམ་དུ་དབྱེ་བ་ནི། དང་པོར་བཤད་པའི་རྣམ་མཁྱེན་སོགས་གསུམ་ནི་བྱང་སེམས་ཀྱི་སྦྱོར་བའི་འཇུག་པར་བྱ་བའི་ཡུལ་དང་རྒྱུ་གཞི་མཐུན་པ་སྟེ་དེ་ཡང་མཁྱེན་གསུམ་གཏན་ལ་ཕབས་པ་ལས་ཆོས་སྐུ་འཐོབ་པ་ཙམ་ལ་བྱའོ། །དག་ལྡན་ལས་ཀྱང་ཡུལ་དང་རྒྱུ་གཞི་མཐུན་པར་བཤད་དོ། །འོན་ཀྱང་འགྱུར་འདི་མི་ལེགས་པས་རྒྱན་སྣང་གི་འགྱུར་ལྟར་རྒྱུ་དང་སྦྱོར་བ་གཞི་མཐུན་དུ་མཛད་པ་ལྟར་རིགས་སོ། །ཡུལ་དེ་ལ་ཚུལ་ཇི་ལྟར་རབ་ཏུ་སྦྱོར་ཞེ་ན། དེའི་འོག་ཏུ་བཤད་པའི་རྣམ་ཀུན་སོགས་བཞི་ནི་སྦྱོར་བའོ། །སྦྱོར་བ་དེ་ལྟ་བུ་དང་ལྡན་པའི་རྒྱུ་མཁྱེན་གསུམ་དེའི་འབྲས་བུ་ཅི་ཞིག་ཡིན་ཞེ་ན། དེའི་འོག་ཏུ་ཆོས་སྐུ་ཕྲིན་ལས་དང་བཅས་པ་ནི་འབྲས་བུ་ཡིན་པས་རྒྱལ་བའི་ཡུམ་གསུམ་གྱི་དོན་བསྡུས་པ་གསུམ་སྟེ་ཚིག་དོན་ནི་སྔ་མ་ཁོ་ན་བཞིན་དུ་བཤད་པར་བྱ་བ་ཡིན་ནོ། །གལ་ཏེ་མངོན་རྟོགས་བསྡུ་ཚུལ་གསུམ་ག་ལ་ཚིག་དོན་བརྒྱད་ཀྱི་སྐབས་སུ་བཤད་པ་བཞིན་དུ་བཤད་དགོས་ན་དབང་པོ་གསུམ་གྱི་ཁྱད་པར་ཕྱེ་བ་དོན་མེད་ཅེ་ན། །
འདི་གསུམ་གྱི་ཁྱད་པར་ལ་བདག་ཉིད་ཆེན་པོས་བརྒྱད་དུ་བཤད་པ་མངོན་རྟོགས་རང་རང་གི་མཚན་ཉིད་དང༌། དྲུག་ཏུ་བཞག་པ་དེ་དག་གི་གོ་རིམ་ངེས་པ་དང༌། གསུམ་དུ་བཞག་པ་གྲངས་ངེས་དང་ཟློས་པའི་སྐྱོན་སྤོང་གཙོ་བོར་བྱས་ནས་བསྟན་པའོ་ཞེས་གསུངས་བར་ཞིང་གཡོ་བ་འཆད་དེ་བསྟན་བཅོས་ཀྱི་དགོངས་པ་མཐར་ཐུག་པའོ། །དེས་ན་དངོས་པོ་སོ་སོའི་མཚན་ཉིད་ངེས་པར་འབྱེད་པ་ན་ཚིག་ལྷུར་ལེན་དགོས་ལ། དེ་དག་གི་གོ་རིམ་ངེས་པ་གཙོ་བོར་བྱེད་པ་ན་ཚིག་དེ་ཙམ་དུ་མི་རྒྱས་པ་དང༌། ཡུལ་དང་རྒྱུ་འབྲས་གསུམ་དུ་བསྡུས་ནས་གྲངས་ངེས་དང་ཟློས་སྤོང་གཙོ་བོར་བྱེད་པ་ན་ཚིག་བསྡུས་པ་ཙམ་ཡོད་པ་སྟེ། མདོར་ན་ཚིག་དོན་རེ་རེ་ནས་འཆད་པ་ན་ཁྱད་པར་མེད་ཀྱང་མངོན་རྟོགས་སྤྱིའི་ངོ་བོ་ཤེས་པར་བྱེད་པ་ལ་རྒྱས་བསྡུས་ཡོད་པའོ། །གསུམ་པ་གང་གིས་བསྒྱུར་བའི་འགྱུར་བྱང་བཤད་པ་ནི། བསྟན་བཅོས་མངོན་པར་རྟོགས་པའི་རྒྱན་རྩ་བ་དང་འགྲེལ་ཆུང་དོན་གསལ་གཉིས་ཀ་ཡང་སྔ་འགྱུར་གྱི་དུས་སུ། རྒྱ་གར་གྱི་པཎྜི་ཏ་བིདྱཱ་ཀ་ར་པྲ་བྷཱ་དང༌། ལོ་ཙ་བ་སྐལ་བ་དཔལ་བརྩེགས་ཀྱི་བསྒྱུར་ཞིང༌། ཕྱིས་སུ་པཎྜི་ཏ་གོ་མཱི་འཆི་མེད་དང༌། ལོ་ཙཱ་བ་བློ་ལྡན་ཤེས་རབ་ཀྱིས་བསྒྱུར་བ་སོགས་ཀྱིས་ལེགས་པར་གཏན་ལ་ཕབས་ནས། གངས་ཅན་གྱི་ལྗོངས་སུ་རྒྱལ་བ་སྲས་བཅས་
ཀྱི་ལམ་གཅིག་པུ་འདི་ཕྱོགས་དུས་ཐམས་ཅད་དུ་ཡར་ངོའི་ཟླ་བ་ལྟར་རྒྱས་པར་མཛད་དོ།