ཕྱི་ནང་གི་གྲུབ་མཐའ་དབྱེ་ཚུལ་ས་བོན་བསྡུས་པ།
ཕྱི་ནང་གི་གྲུབ་མཐའ་དབྱེ་ཚུལ་ས་བོན་བསྡུས་པ་བཞུགས་སོ། །
ཐམས་ཅད་མཁྱེན་པ་ལ་ཕྱག་འཚལ་ལོ། །དེ་ཡང་གྲུབ་པའི་མཐའ་ཐམས་ཅད་ཀྱི་དབྱེ་བ་མདོར་བསྟན་པ་ནི། དབྱེ་གཞི་རང་བཞིན་གྱིས་རྒྱས་པར་དགོད་པ་ལ། དབྱེ་བ་འཇིག་རྟེན་དང་འཇིག་རྟེན་ལས་འདས་པ་གཉིས་ཏེ། དང་པོ་སོར་བཞག་ལྷ་མིའི་ཐེག་པ་ནི། མི་ཡི་ཐེག་པ་མི་ཆོས་གཙང་མ་བཅུ་དྲུག་སྤྱོད་དེ་མཐོ་རིས་དོན་དུ་གཉེར་བའོ། །ལྷ་ཡི་ཐེག་པ་ནི་དགེ་བ་བཅུ་ལ་བླང་དོར་བྱེད་པའོ། །གཉིས་པ་ནི་གསོ་སྦྱོང་ལ་གནས་པར་བྱེད་པའོ། །ཕྱི་རོལ་མུ་སྟེགས་བྱེད་ལ། སྤྱིར་འཇིག་ཚོགས་ལ་ལྟ་བ་སུམ་བརྒྱ་དང་དྲུག་ཅུར་དབྱེ་ནའང༌།
དེ་ཡང་བསྡུ་ན་འཇིག་ཚོགས་ཀྱི་རི་ཉི་ཤུའོ། །དེ་ཡང་བསྡུ་ན། རྟག་ལྟ་ཆད་ལྟ་གཉིས་སོ། །རྟག་པར་ལྟ་བ་ནི། མུ་སྟེགས་གྲངས་ཅན་པ་ཡིན་ཏེ་མུ་སྟེགས་ པ་ཐམས་ཅད་ཀྱི་རྩ་བའམ་སྤྱི་བའོ། །དེས་ནི་རྡུལ་མུན་སྙིང་སྟོབས་གསུམ 
་ལམ་དུ་བྱེད་ཅིང༌། དེ་དག་ཆ་མཉམ་པའི་ངོ་བོ་བདག་ཅེས་བྱ་བ། དཀར་བ་སྣུམ་པ། འདྲིལ་བ། ཆེ་བ་མཐེ་བོང་ཆུང་བ་ཡུང་འབྲུ་ཙམ་སེམས་ཅན་ཐམས་ཅད་ཀྱི་སྙིང་ནང་དུ་གཞིག་ཅིང་གཞོམ་དུ་མེད་པར་གནས་པར་འདོད་དོ། །ཕྱི་མ་གྲོལ་བའི་ཚེའང་དེ་མཐོ་རིས་ཀྱི་སྟེང་ན་གདུག་དཀར་པོ་ཀུན་ནས་བསྐོར་བ་ཐར་པ་མདོག་དབྱིབས་
ཅན་དུ་འདུག་པའོ། །གཉིས་པ་ཆད་པར་ལྟ་བ་ལ་གཉིས། རྒྱུ་ཆད་པར་ལྟ་བ་དང༌། འབྲས་བུ་ཆད་པར་ལྟ་བའོ། །དང་པོ་རྒྱུ་ཆད་པར་ལྟ་བ་ནི། སྔར་གྱི་སེམས་ད་ལྟའི་འདི་མ་ཡིན་ཏེ། རྒྱུ་འབྱུང་བ་བཞི་ལ་རང་བཞིན་གྱི་གནས་པའི་སེམས་ཡོད་དོ། །དེ་ཉིད་འབྱུང་བ་རང་རང་གི་རྒྱ་ཡིས་འཐིབ་ནས་མི་མངོན་ལ་རྐྱེན་དྲོད་དང་གཤེར་སོགས་དང་འཕྲད་ཚེ་དེ་དག་གི་སེམས་དེ་ལངས་ནས་སེམས་དུ་གྲུབ་པ་ཡིན་ཏེ། རྒྱུ་མཚན་ས་ལ་ལྕི་ཤིང་དང་ཆུ་ལ་འགྲོ་བ་དང་སྒྲ་མེ་ལ་འབར་བ་རླུང་ལ་གཡོ་བ་སོགས་སེམས་ཡིན་ནོ་ཟེར་རོ། །གཉིས་པ་འབྲས་བུ་ཆད་པར་སྨྲ་བ་ནི། ཚེ་སྔ་མ་མེད་པར་མ་ཟད་འབྱུང་བ་བཞི་པོ་དེ་ལ་རྒྱུ་སྐྱེད་པའི་སེམས་ཡང་མེད་དེ་རང་རང་གི་ངོ་བོའི་འབྱུང་བར་འདོད་དོ། །ཚེར་མ་རྣོ་བ། ཉི་མ་ཤར་ནས་འབྱུང་བ། ཆུ་ཐུར་དུ་འབབས་པ། སྲན་མ་ཟླུམ་པ། རྨ་བྱའི་སྒྲོ་མདོག་ལེགས་པ། རྒྱལ་པོའི་བུ་མེ་ལྟ་ན་སྡུག་པ་རྣམས་སུས་ཀྱང་བྱེད་མཁན་མེད་པར་ངོ་བོ་ཉིད་ཀྱིས་བྱུང་བ་ཟེར་རོ། །གཉིས་པ་འཇིག་རྟེན་ལས་འདས་པའི་ཐེག་པ་ལ་གཉིས་སྟེ། ཐེག་དམན་ཉན་རང་དང༌། ཐེག་ཆེན་གཉིས་སོ། །ཐེག་དམན་ལ་གཉིས་ཏེ། ཉན་ཐོས་དང༌། རང་རྒྱལ་ལོ། །ཉན་ཐོས་ལ་གཉིས། །བྱེ་བྲག་སྨྲ་བ་དང༌། མདོ་སྡེ་པའོ། །དང་པོ་བྱེ་བྲག་སྨྲ་བ་ནི། སྟོན་པ་མྱ་ངན་ལས་འདས་པའི་འོག་ཏུ། དགྲ་བཅོམ་པ་ཉེ་
སྦས་སོགས་བདུན་བརྒྱས་མངོན་པ་བྱེ་བྲག་བཤད་མཛོད་ཆེན་མོ་ཞེས་བྱ་བའི་བསྟན་བཅོས་བརྩམས་ནས་དེའི་རྗེས་སུ་འཇུག་པ་རྣམས་སོ། །མདོ་སྡེ་པ་ནི། སངས་རྒྱས་ཀྱིས་གསུངས་པའི་མདོ་ཁོ་ན་ལས་བསྟན་བཅོས་ལ་ཚད་མར་མི་འཛིན་པས་མདོ་སྡེ་པ་ཞེས་གྲགས་སོ། །དེ་ལ་བྱེ་བྲག་སྨྲ་བའི་འདོད་པ་ནི། ཀུན་རྫོབ་དང་དོན་དམ་གཉིས་ཀྱི་རྣམ་བཞག །དཔེར་ན་གཡག་རྔ་དང་ནེའུ་སེང་ལྟར་ཤེས་པའི་རྒྱུན་ཚོགས་པ་ལ་ཀུན་རྫོབ་དང་དོན་དམ་པར་རྡུལ་ཕྲན་ཆ་ལྡན་པ་སིལ་བུར་དང་བུམ་ཆུ་ལྟ་བུར་འདོད། །ཤེས་པའི་རྒྱུན་ཀུན་རྫོབ་ད་ལྟའི་སྐད་ཅིག་མ་དོན་དམ་དུ་འདོད་དེ་འདིའི་བདག་མེད་གཉིས་ཀྱི་གང་ཟག་གི་བདག་མེད་རྟོགས་ཀྱང༌། ཆོས་ཀྱི་བདག་མེད་མ་རྟོགས་སོ། །འཇུག་སྒོ་ནི་བདེན་
པ་བཞི་ལ་འཇུག་ལྡོག་བྱེད་ཅིང༌། ཁམས་གསུམ ་གྱི་མཐོང་བ་དང༌། སྒོམ་པའི་སྤང་བྱ་བཞི་བརྒྱ་དང་བཅུ་བཞི་སྤང་ནས། ཟད་པར་བརྒྱད་དང་མི་སྐྱེ་བའི་ཡེ་ཤེས་དམ་པ་མངོན་ཏུ་བྱས་ནས་གྲོལ་བར་འདོད་དོ། །གཉིས་པ་ཉན་ཐོས་མདོ་སྡེ་བ་ནི། གང་ཟག་གི་བདག་མེད་བྱེ་བྲག་སྨྲ་བ་ལྟར་འདོད་ལ་ཆོས་བདག་ཆ་བཅས་རྡུལ་ཕྲན་ཤེས་བྱའི་གཞི་ལྔའི་ཆོས་ཉིད་རྟོགས་པས་བྱེ་སྨྲ་ལས་འཕགས་སོ། །དེའི་ཀྱང་བདེན་བཞི་ལ་འཇུག་ལྡོག་བྱེད་ཅིང༌། ཉོན་མོངས་ཕྲ་བ་དང་རགས་པ་
བརྒྱད་བཅུ་རྩ་བརྒྱད་སྤངས་ཏེ་ཡེ་ཤེས་དམ་པ་རྟོགས་པར་འདོད་དོ། །གཉིས་ཀས་ཚོགས་སྦྱོར་མཐོང་བསྒོམ་མི་སློབ་པའི་ལམ་ལྔ་ལ་འབད་རྩོལ་བྱེད་ཅིང༌། དུག་ གསུམ་རང་རང་གི་གཉེན་པོ། །འདོད་ཆགས་ལ་མི་གཙང་བའི་རྫས་བརྒྱད་ཀེང་རུས། ཞེ་སྡང་ལ་བྱམས་པ ། གཏི་མུག་ལ་རྟེན་འབྲེལ་བཅུ་གཉིས་རྣམས་བསྒོམས་པའོ། །འབྲས་བུ་དགྲ་བཅོམ་སོགས་འབྲས་བུ་བཞི་ལ་ནང་གསེས་ཞུགས་གནས་བརྒྱད་དེ་སྐྱེས་བུ་ཆེན་པོའི་རིམ་པ་བརྒྱད་ཐོབ་པར་བྱེད་པའོ། །གཉིས་པ་ཐེག་དམན་རང་སངས་རྒྱས་ལ་གཉིས་ཏེ། བསེ་རུ་ལྟ་བུ་དང༌། ནེ་ཚོ་ལྟ་བུའོ། །ངེས་ཚིག་ནི། རང་ཉིད་གཅིག་པུ་སངས་རྒྱས་པར་འདོད་དོ། །དང་པོ་བསེ་རུ་ལྟ་བུ་ནི། རང་ཉིད་གཅིག་པུ་གནས་པའི་ཕྱིར་བསེ་རུ་ཞེས་བཏག་སྟེ། དེ་དག་གིས་བདེན་བཞིས་བསྡུས་པའི་ཆོས་ཐམས་ཅད་རྟེན་འབྲེལ་བཅུ་གཉིས་མ་རིག་ པ་ནས་རྒ་ཤིའི་བར་ལུགས་འབྱུང་དུ་བསྒོམས་ཏེ། ཁམས་གསུམ ་གྱི་ཉོན་མོངས་ཕྲ་རགས་སམ་ཕྲ་རྒྱས་ཐམས་ཅད་སྤོང་བར་འདོད་པའོ། །རྟེན་འབྲེལ་བཅུ་གཉིས་ལུགས་འབྱུང་དུ་བསྒོམ་ཚུལ་མ་རིག་པ་ལས་འདུ་བྱེད་འདུ་བྱེད་ལས་རྣམ་ཤེས་སོགས་ནས་རྒ་ཤིའི་བར་རོ། །ལྟ་བ་ནི་གང་ཟག་གི་བདག་མེད་སྟེང་དུ་ཆོས་ཀྱི་བདག་མེད་ཀྱི་ཕྱེད་གཟུང་བའི་ཡུལ་རྡུལ་ཕྲན་ཆ་བཅས་དང་ཆ་མེད་གཉིས་ཀ་མེད་པར་གཟུང་བ་ལྟར་ངོ་བོ་མེད་ཅིང་
མ་སྐྱེས་པ་རྟོགས་པའོ། །གཉིས་པ་ནི་ཚོ་ལྟ་བུ་ནི་མང་པོ་དུས་གཅིག་ཏུ་ཁྱུས་ལྡང་བའོ། །དེས་ཀྱང་བདེན་བཞིའི་བསྡུས་པའི་ཆོས་ཐམས་ཅད་རྟེན་འབྲེལ་བཅུ་གཉིས་ལུགས་ལྡོག་ཏུ་བསྒོམ་ཞིང་དུར་ཁྲོད་དུ་སོང་ནས་རོ་འདི་ཅི་ལས་བྱུང་ཤི་བ་ལས་བྱུང་རྒ་བ་ལས་བྱུང་སོགས་མ་རིག་པ་ལ་ཐུག་གི་བར་དུ་བརྟགས་ཏེ་བསྒོམས་པས་བདག་མེད་སྔར་ལྟར་ཕྱེད་གཉིས་པོ་རྟོགས་ནས་ལམ་ལྔ་བསྒོམ་པས་ཟད་དང་མི་སྐྱེ་བའི་བྱང་ཆུབ་མངོན་ཏུ་བྱེད་དོ། །གཉིས་ཀའི་ལུགས་ཀྱི་བརྡའི་ཆོས་ཙམ་མ་གཏོགས་ཆོས་མངོན་ཏུ་གསུང་བ་མེད་དོ། །གཉིས་པ་ཐེག་པ་ཆེན་པོ་ནི་ཉན་རང་ལས་ཅིའི་ཁྱད་པར་འཕགས་ན་གཞན་ཕན་བྱང་ཆུབ་ཀྱི་སེམས་ཀྱིས་འཕགས་ཏེ། དེ་ལའང༌། སེམས་ཙམ་རྣམ་བདེན་པ་དང་རྣམ་རྫུན་པ་གཉིས་ཡོད་དོ། །རྣམ་བདེན་པས་ནི། དོན་དུ་སྣང་བ་ནང་གི་ཤེས་པ་ཕྱིར་ཤར་བ་ཙམ་འདོད་དོ། །དེ་ལ་དབྱེ་ན་རྣམ་གྲངས་དེ་ཉིད་ལ་ཤེས་པའི་གྲངས་དེ་སྙེད་དུ་འདོད་པ་དང༌། རྣམ་པ་དང་ཤེས་པ་སྒོང་ང་པགས་པ་ལྟར་འདོད་པ་དང༌། རྣམ་པ་དང་ཤེས་པ་གཉིས་སྣ་ཚོགས་གཉིས་མེད་དུ་འདོད་ པ་དང་གསུམ ་ལས། དང་པོ་སྒྲ་ཐོས་པའི་དུས་ན་སྒྲ་འཛིན་གྱི་ཤེས་པ་གཅིག་པ་སྐྱེ་ཡིས་གཟུགས་ལ་སོགས་པ་འཛིན་པའི་ཤེས་པ་མི་སྐྱེ་བར་འགྱུར། ཡུལ་གང་ལ་འཇུག་པའི་ཤེས་པ་དེ་ལས་གཞན་མི་སྐྱེ་བའི་ཕྱིར་རྣམ་གྲངས་ཇི་སྙེད་པའི་ཤེས་པར་འདོད་དོ། །གཉིས་པ་སྒོང་ང་བཀས་པ་ལྟར་འདོད་པ་ནི་རྣམ་པ་དང་ཤེས་པ་ཡུལ་ཡུལ་
ཅན་སེམས་གཅིག་ལ་ཤར་བར་འདོད་དོ། ། གསུམ་པ ་སྣ་ཚོགས་གཉིས་མེད་དུ་ཕྱིས་ཡུལ་གྱི་རྣམ་པ་སྣ་ཚོགས་སུ་སྣང་ཡང་ནང་འཛིན་བྱེད་ཀྱི་ཤེས་པ་གཅིག་གིས་ཤེས་ཏེ། མཁའ་སྒོ་སྐར་བཞི་ཡོད་པའི་ནང་གི་སྤྲེའུའི་རིབ་རིབ་ལྟ་བའི་ཚེ། སྤྲེའུ་གཅིག་དེ་ལ་མང་པོ་སྣང་བ་ལྟར་སྒོ་ལྔ་ཤེས་པ་གཅིག་གིས་ཡུལ་རིག་པར་འདོད་དོ། །གཉིས་པ་རྣམ་རྫུན་པ་ནི་ཕྱི་དོན་གྱི་རྣམ་པར་ཤེས་པ་འཁྲུལ་པར་སྣང་བའི་བག་ཆགས་རྫུན་པ་ཡིན་གྱི་དེ་འཇལ་བྱེད་ཀྱི་ཤེས་པ་ཡང་རྫུན་པས་ན་གཞལ་བྱའི་ཡུལ་དང་ཤེས་པ་གཉིས་ཀ་འཁྲུལ་སྣང་རྫུན་པའི་རང་བཞིན་ཙམ་དུ་འདོད་དོ། །འདི་ལ་དབྱེ་ན་དྲི་བཅས་དྲི་མེད་པ་གཉིས་ཡོད་དོ། །གཉིས་པ་དབུ་མ་པ་ལ་གཉིས་ཏེ། རང་རྒྱུད་པ་ཐལ་འགྱུར་པའོ། །དང་པོ་རང་རྒྱུད་པས་ནི་འདི་ལྟར་སྣ་ཚོགས་སུ་སྣང་བའི་རྣམ་པ་འཇལ་བྱེད་མེད་པར་གསར་སྣང་མ་ཟད། དོན་དམ་པ་སོ་སོ་རང་རིག་པའི་ཡེ་ཤེས་དེ་ཡང་རང་བཞིན་གྱི་ངོ་བོ་ཉིད་མེད་པའོ། །ཞེས་འདོད་དོ། །འདི་ལ་དབྱེ་ན་སྒྱུ་མ་དོན་དམ་དུ་འདོད་པ་དང༌། རབ་ཏུ་མི་གནས་པ་གཉིས་ལས། །དང་པོ་ནི་ཡུལ་ཡུལ་ཅན་དུ་གྲུབ་ལ། མ་གྲུབ་པའི་རིག་པའི་ཡེ་ཤེས་སྨྲ་བསམ་བརྗོད་མེད་ཙམ་ཞིག་དོན་དམ་པར་སྒྱུ་མའི་ཚུལ་དུ་ཡོད་དོ། །བསྒོམས་པའི་ཡོན་ཏན་གྱིས་ལམ་དང༌། མཐར་ཕྱིན་པའི་འབྲས་བུ་སངས་རྒྱས་ཀྱི་ཡེ་ཤེས་སྒྱུ་མ་ལྟ་བུས་སེམས་ཅན་གྱི་དོན་བྱེད་དོ། །ཡུམ་པར་མ་ལས། ཆོས་ཐམས་ཅད་སྒྱུ་མ་ལྟ་བུ་རྨི་ལམ་ལྟ་བུ་མྱ་ངན་ལས་འདས་པ་ཡང་སྒྱུ་མ་དང་རྨི་ལམ་ལྟ་བུ་མྱ་ངན་
ལས་འདས་པ་ལས་ཆེས་ལྷག་པའི་ཆོས་ཞིག་ཡོད་ན། །དེ་ཡང་རྨི་ལམ་ལྟ་བུ་སྒྱུ་མ་ལྟ་བུའོ། །ཞེས་གསུངས་པའི་ཕྱིར་རོ་ཞེས་སོ། །འདི་ལ་རང་རྒྱུད་འོག་མ་ཞེས་ཟེར་རོ། །གཉིས་པ་རབ་ཏུ་མི་གནས་པ་ནི། དོན་དམ་སྒྱུ་མ་ལྟ་བུ་ཡང་མི་གནས་པ་སྟེ་ཡུལ་དང་རྣམ་པ་མེད་པའི། དེ་མེད་པའི་མྱོང་བ་སོ་སོ་རང་རིག་ཀྱང་མེད་པས་མོ་གཤམ་གྱི་བུ་མེད་པ་ལ་དེ་འཇལ་བྱེད་ཀྱི་ཤེས་པ་བཞིན་ནོ། །ཡུམ་བར་མ་ལས། དོན་དམ་པ་ནི་འཕོ་བ་ཡང་མེད། མྱང་འདས་ཡང་མེད། སྟོང་ཉིད་ཀྱང་མེད་དེ་ཚིག་བླ་དག་ཙམ་ལགས་སོ། །ཞེས་འདོད་དོ། །གཉིས་པ་དབུ་མ་ཐལ་འགྱུར་བ་ནི། །དེ་ལྟར་དོན་དམ་པ་མ་གྲུབ་པ་དང༌། ཀུན་རྫོབ་ཏུ་སྣང་བ་ཙམ་སྒྱུ་མ་གྲུབ་པ་ལ་སོགས་པ་བཀག་ནས། ཡོད་མེད་ཀྱི་མཐའ་ལས་འདས་པའི་རང་བཞིན་ཁས་ལེན་ཐམས་ཅད་དང་བྲལ་བར་འདོད་དོ། །གལ་ཏེ་ངས་གང་དམ་བཅའ་ཡོད། །དེ་ཚེ་ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན་ཞེས་སོ། །ཐེག་ཆེན་གསང་སྔགས་ནི་རྒྱུའི་ཐེག་ པ་ལས་ཁྱད་པར་ཅིའི་འཕགས་སྙམ་ན། ཚུལ་གསུམ ་སྒྲོན་མེད་ལས། དོན་གཅིག་ན་ཡང་མ་རྨོངས་དང༌། ཐབས་མང་དཀའ་བ་མེད་པ་དང༌། དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་སོ། །སྔགས་ཞེས་པའི་རྒྱུ་མཚན་ནི་ཉོན་མོངས་པ་ལས་སྐྱོབ་པའི་ཐབས་མཆོག་ཏུ་བསྔགས་པའི་ཕྱིར་སྔགས་སོ། །འདི་ལ་དབྱེ་ན་
རྒྱུད་སྡེ་བཞི་འམ་དྲུག་སོགས་ཡོད་དེ། རྒྱུད་ཞེས་པའི་རྒྱུ་མཚན་ནི། རང་རྒྱུད་ཀྱི་དེ་ཁོ་ན་ཉིད་ཀྱི་དབྱིངས་ཀྱི་འོད་གསལ་འཇལ་བར་བྱེད་པའི་ཕྱིར་རྒྱུད་ཅེས་བྱའོ། །རྒྱུད་སྡེ་བཞི་ནི། བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་མེད་རྒྱུད་དང་བཞིའོ། །དང་པོ་གསུམ་ནི། རྒྱུད་སྡེ་འོག་མ་ གསུམ། ཞེས་ཕྱིའི་རྒྱུད་དོ། །བཞི་པ ་ནི་རྒྱུད་སྡེ་གོང་མ་སྟེ་ནང་གི་རྒྱུད་དོ། །རྒྱུད་སྡེ་གོང་མ་ནང་རྒྱུད་དེ་ལ་ཕ་རྒྱུད་དང༌། མ་རྒྱུད། གཉིས་མེད་དུ་ཕྱེ་བས་རྒྱུད་སྡེ་དྲུག་གོ །དེ་ལ་དང་པོ་བྱ་རྒྱུད་ནི། ཕྱིའི་བྱ་བ་གཙང་སྦྲ་ལ་སོགས་པ་སྤྱོད་པའི་ཕྱིར་བྱ་རྒྱུད་དོ། །སྤྱོད་རྒྱུད་ནི་ཕྱིའི་བྱ་བ་བྱ་རྒྱུད་དང་མཚུངས་ཞིང་ནང་གི་ཏིང་འཛིན་རྣལ་འབྱོར་རྒྱུད་དང་མཚུངས་པས་གཉིས་ཀའི་རྒྱུད་དམ་སྤྱོད་རྒྱུད་དོ། །རྣལ་འབྱོར་རྒྱུད་ནི། ནང་གི་ཏིང་ངེ་འཛིན་གཙོ་བོར་བྱེད་པའི་ཕྱིར་རྣལ་འབྱོར་རྒྱུད་ཅེས་བྱའོ། །རྣལ་འབྱོར་བླ་མེད་ནི། རྒྱུད་སྡེ་འོག་མ་ གསུམ་ལས་ཁྱད་པར་ཅིའི་ཕྱིར་འཕགས་ཞེ་ན། ཤ་ལྔ་བདུད་རྩི་ལྔ་ལ་སོགས་གཙང་སྨྲེའི་རྟོག་པ ་ཐམས་ཅད་བྲལ་ཞིང༌། བདེན་པ་དབྱེར་མེད་ལྷུན་གྲུབ་དག་མཉམ་ཆེན་པོར་ལ་ཟླ་བའོ། །དབྱེ་ན་བསྐྱེད་ པ་མ་ཧཱ་ཡོ་ག །ལུང་ཨ་ནུ་ཡོ་ག །གཉིས་མེད་ཨ་ཏི་ཡོ་ག་གསུམ ་མོ། །འདི་ཡང་དཔལ་སྤྲུལ་རིན་པོ་ཆེའི་གསུངས་པའོ། །