བསྙེན་ཡིག་རྡོ་རྗེ་འབར་བ།

རིག་འཛིན་ཆོས་རྒྱལ་གླིང་པའི་ཐོས་གྲོལ་བསྙེན་ཡིག་རྡོ་རྗེ་འབར་བ་ཞེས་བྱ་བ།

ན་མོ་གུ་རུ་བིདྱ་དྷ་ར་ཡེ། བདེན་པ་རང་བྱུང་འགྲན་གྱི་ཟླ་མེད་པ། །དགའ་བཞི་བདེ་གར་སྔགས་ཀྱི་བསྟན་པ་འཛིན། །ཟབ་གཏེར་སྒོ་འབྱེད་ཆོས་རྒྱལ་གླིང་པར་འདུད། །གདམས་པ་སེམས་ལ་དབང་མཆོག་བསྐུར་དུ་གསོལ། །དེ་ཡང་བསྙེན་མཚམས་ཞེས་པ་གསང་སྔགས་ཀྱི་བསྐྱེད་རྫོགས་བཟླས་གསུམ་ཉམས་སུ་ལེན་པ་པོ་རང་ཉིད་དང་པོ་མཚན་ལྡན་གྱི་བླ་མ་བསྟེན་ཏེ། ཐུན་མོང་དང་ཐུན་མིན་གྱི་སྔོན་འགྲོའི་སྦྱང་པ་མཐར་ཕྱིན་ནས། གཟོད་སྨིན་བྱེད་ཀྱི་དབང་དང་གྲོལ་བྱེད་བསྐྱེད་རྫོགས་ཀྱི་གདམས་ཁྲིད་མཐར་ཆགས་སུ་ཐོབ་པར་བྱ་དགོས་པའི་ཕྱག་ལེན་མ་འཁྲུགས་པར་ཉམས་སུ་ལེན་པའི་ཚེ། རྒྱལ་བའི་ཞབས་ཀྱིས་བཅགས་པའམ་དབེན་གནས་ཡིད་དང་མཐུན་པར། དུས་ཚེས་གཟའ་སྐར་བཟང་པོ་ལ་དབུ་བཟུང་། གསེར་སྐྱེམས་སྡེ་བརྒྱད་བསང་མཆོད་དང་། རང་གཞུང་གི་སྐྱབས་སེམས་ནས་དཀར་གཏོར་མཆོད། བགེགས་བསྐྲད་བསྲུང་འཁོར་གྱི་རྗེས་ལ། སྒོ་དྲུང་དུ་ཕྱིན་ནས་ཐོ་དཀར་པོ་བརྩིགས་པ་ལ་རྒྱལ་ཆེན་གྱི་སྔགས་བྱང་བཙུགས། མཆོད་གཏོར་བཤམས། རཾ་ཡཾ་ཁཾ་ༀ་ཨཱཿཧཱུྃ། ༀ་སྭཱ་བྷ་ཝས་སྦྱངས། སྟོང་པའི་ངང་ལས་རྒྱལ་པོ་ཆེན་པོ་བཞི་འཁོར་དང་བཅས་པ་གསལ་བར་གྱུར། བཛྲ་ས་མཱ་ཛ༔ ཛ་ཧཱུྃ་བཾ་ཧོ༔ མ་ཧཱ་ར་ཛ་ཨརྒྷཾ་སོགས་ནས། ཤབྟའི་བར་གྱིས་མཆོད། ན་མཿསརྦ་ཏ་ཐཱ་ག་ཏ་བྷྱོ་སོགས་ནས། བྷ་ལིན་ཏ་སྭཱ་ཧཱས་གཏོར་མ་འབུལ། དྲི་ཟ་གྲུལ་བུམ་ཀླུ་དབང་དང་། །གནོད་སྦྱིན་སྡེ་དཔོན་རྒྱལ་ཆེན་བཞི། །བཙུན་མོ་སྲས་དང་བློན་པོ་བཅས། །མཆོད་ཅིང་བསྟོད་ཏེ་ཕྱག་ཀྱང་འཚལ། །ཕྱོགས་བཞིའི་བགེགས་ཀྱིི་མཚམས་ཆོད་ཅིག །ༀ་དྷྲི་ཏ་རཥྚ་ཡ་སྭཱ་ཧཱ། ༀ་བུ་རཱུ་ཌྷ་ཀཱ་ཡ་སྭཱ་ཧཱ། ༀ་བུ་རཱུ་པཀྵ་ཡེ་སྭཱ་ཧཱ། ༀ་བཻ་ཤྲ་བ་ཎཱ་ཡེ་སྭཱ་ཧཱ། ཏིཥྛ་བཛྲ། ཟབ་ཅིང་རྒྱ་ཆེན་གཟིགས་པ་པོ། །སོགས་དང་། བཀྲ་ཤིས་ཤོག །མཆོད་སྦྱིན་གཏོར་མ་འདི་བཞེས་ལ། །སོགས་ཀྱིས་གཏོར་མ་འབུལ། རྫོགས་པའི་བྱང་ཆུབ་སྒྲུབ་པ་ལ། །སོགས་ནས། མཛད་དུ་གསོལ། ཞེས་བརྗོད་ལ་བསྲུང་འཁོར་བསྟན་པོར་བསྒོམས། མཚམས་གཡོག་སོགས་གཏུག་དགོས་ཡོད་པའང་བསྲུང་འཁོར་དུ་ཚུད་པར་འདུས། ཉེ་བར་མ་འདུས་ན་རྡོ་དཀར་ལ་མིང་བྲིས་པ་བཞག་ལ་དེ་དང་དེར་མོས། དེ་ལས་གཞན་དང་ངག་རིང་བཅད་བྱ། ཕར་མཐོང་ཚུར་མཐོང་དང་བཅའ་ལག་གཏོང་ལེན་མི་བྱ། སྐྲ་སེན་མི་འབྲེག་ཅིང་། གདན་གྱི་དྲོད་མ་ཡལ་བ། ལུས་ཚུགས་བསྲང་བ་སོགས་གསང་བ་སྤྱི་ལྟར་བྱ་སྟེ། རང་གི་མལ་སའི་འོག་ཏུ་གཡུང་དྲུང་དཀར་པོ་གཡས་འཁོར་བྲིས་པའི་སྟེང་སྟན་བདེ་བ་ལ་འདུག་ནས། དེ་ཉིན་ལས་བྱང་མི་འདོན་པར། རང་ཉིད་སྐད་ཅིག་གིས་རྡོ་རྗེ་སེམས་དཔའ་གསལ་ལ། བོ་དྷི་ཙིཏྟ་བརྒྱ་རྩ་ཙམ་བཟླ། དེ་ནས་ཞག་འགའ་ལ་སྔོན་འགྲོ་བློ་ལྡོག་རྣམ་བཞི་དང་། སྐྱབས་སེམས། ཡིག་བརྒྱ། མཎྜལ། བླ་མའི་རྣལ་འབྱོར་གསོལ་འདེབས་བཅས་སེམས་རྒྱུད་ལ་འདྲིས་ངེས་ཀྱི་ཐུན་བཞི་རེ་བཅད། འདིས་རང་རྒྱུད་འབྱོངས་ཤིང་བར་ཆད་མི་འཇུག་པ་དང་། བྱིན་རླབས་ཀྱི་ཚན་ཁ་ཆེ་བ་སོགས་ཀྱིས་ཕྱག་ལེན་མཛད་པ་གནད་ཤིན་ཏུ་ཆེ་བ་ཡིན་ནོ། །རང་གི་མདུན་ཕྱོགས་སུ་ཞི་ཁྲོའི་ཐང་ཀ་བཤམས་ཤིང་། སྒྲུབ་གཏོར་མར་ཟན་ལས་བྱས་པས་གཡས་སྨན། གཡོན་རཀྟ། མདུན་དུ་རྣམ་ལྔ། ཆད་བརྟན་རྒྱུན་བཞག་དང་། མར་མེ་རྒྱུན་བཞག་གཅིག གཞན་ཡང་ཚོགས་རྫས་རྡོར་དྲིལ་སོགས་ཡོ་བྱད་ཚང་བར་བྱ། སེམས་ལ་ངེས་འབྱུང་དང་དད་པ་དྲག་ཏུ་བསྐྱེད་ལ། འཇིག་རྟེན་ཆོས་བརྒྱད་མགོ་སྙོམ། བདག་གིས་ད་རེས་བསྙེན་མཚམས་མ་གྲོལ་བར་དུ་རྐྱེན་དབང་མི་གཏོང་ངོ་། །ན་ན་ཡང་ན་གོ་ཆོད། ཤི་ན་ཡང་ཤི་གོ་ཆོད། སྔར་གྱི་མི་ལུས་ཐོབ་པར་ཕལ་ཆེར་དོན་མེད་དུ་སོང་བ་ལ། ད་ལྟ་ཡི་དམ་གྱི་ལྷ་འདི་ལྟ་བུ་བསྒྲུབ་ཏུ་ཡོད་པ་ནི་བདག་སྐལ་བ་རེ་བཟང་སྙམ་པའི་མོས་གུས་ཀྱིས་འབད་རྩོལ་བྱ་བའི་ཞེ་བཅད་ཆེན་པོ་བྱས་པས། བར་ཆད་མི་འབྱུང་ཞིང་དངོས་གྲུབ་མྱུར་དུ་ཐོབ་པའི་དགོས་པ་ཡོད། དེ་ལྟར་ཞེ་བཅད་དམ་བཅའ་མི་ནུས་པར་བློ་སྟོབས་ཆུང་ངུས། འགལ་རྐྱེན་འདྲ་བྱུང་ན་མཚམས་འདྲལ་བསམ་པ་ལ་ནི་བར་ཆད་འབྱུང་ངེས་པས། དང་པོ་ནས་ཕོ་ཚོད་བློ་སྟོབས་ཆེར་བསྐྱེད་པ་ནི་ཐེག་ཆེན་ཀུན་ལ་མེད་དུ་མི་རུང་བའོ། །དེ་ཡན་ཆད་ཀྱིས་སྦྱོར་བ་སྔོན་དུ་འགྲོ་བའི་ཆོས་སོང་། །

དངོས་གཞི་ལ་འཇུག་ཚེ། ཕྱི་ཐུན་ནས་མགོ་བརྩམས། སྔོན་འགྲོ་ཆོས་སྤྱོད། དཀར་བགེགས་གཏོར་མ་གཏོང་བ་ནས། ཉིན་ཞག་རེ་ལ་ཐུན་བཞི་རེ་གཏོང་ཚུལ་གྱི་འདོན་འགྲིགས་ཡོངས་གྲགས་ལྟར་ཁྲིགས་སུ་འཛུད་པ་སྟེ། ཕྱིར་ཉིན་ནས་དཀར་གཏོར་འདོན་མི་དགོས། བགེགས་གཏོར་ཡོད་ན་སྔ་ཐུན་སྐབས་སུ་གཏོང་། མེད་ཀྱང་ཆོག ཕྱིར་ཆོ་ག་འདི་ནི་གཞི་ལྷུན་གྱིས་གྲུབ་པའི་དཀྱིལ་འཁོར་བཞུགས་ཚུལ་ཨ་ཏི་རྫོགས་པ་ཆེན་པོའི་རྒྱུད་སྡེ་ནས་གསུངས་པའི་དོན་ལ་གནས་ཏེ། བཀའ་རྫོགས་པ་ཆེན་པོ་བླ་མ་ཀུན་འདུས་ཀྱི་ཆ་ལག་ཐོས་ཆོག་ལྟ་བ་རང་གྲོལ་ཞེས་པའི་མཚན་དོན་དང་གཞུང་ཚིག་གིས་གསལ་བས། ཕྱི་དཀྱིལ་ཙམ་མ་ཡིན་པར། ནང་ལུས་སེམས་ཀྱི་དཀྱིལ་འཁོར་ཀུན་བཏགས་ལ་ཡོངས་གྲུབ་ཀྱིས་རྒྱས་འདེབས་བྱེད་པ་སྟེ། རྟོག་པ་རགས་པའི་ངོར་སྤྱན་འདྲེན་སོགས་བརྡ་ཙམ་བསྟན་པར་ཟད་དོ། །དེ་ཡང་ཐོར་ཐུན་ལ་གཏི་མུག་གཉིད་དཀྲོགས་འདོན་གྱིན་བཞེངས་ཏེ། རླུང་རོ་བསལ། ངག་བྱིན་རླབས་བྱ། སྔོན་འགྲོ། དེང་སང་ལངས་མ་ཐག་ཏུ་རྔ་མི་བརྡུང་། མི་ཚུགས་པ་ལྟར་ན། རྒྱུན་གྱི་སྔོན་འགྲོ་དང་། ཡི་དམ་ལ་རྔ་བླངས་རྗེས། འདི་ནས་འཇུག ཡང་ན་ཙིཏྟ་རང་གྲོལ་གྱི་བཀའ་བསྒོ་ནས་བཤགས་པའི་བར་རྔ་ཆོག་བྱ། ནམ་ལངས་བསྙེན་པའི་མཆོད་བསྟོད་ལ་རྔ་བརྡུང་། མཆན། མདུན་གྱི་ནམ་མཁར་པད་ཉི་སོགས་དང་། སྐྱབས་སེམས་ཆོས་སྐུ་ནམ་མཁའ་ལྟ་བུ་ནས་གཞུང་རྐྱང་དེད་ཀྱིས་བསྙེན་པ་སྟོང་ཕྲག་ལྔ་ལས་མི་ཉུང་བའི་མཐར། ལྷག་ཆད་བསྐང་ཞིང་མཆོད་བསྟོད་དངོས་གྲུབ་བླང་པ་ནས་བཀྲ་ཤིས་བསྡུ་རིམ་བར་བྱས་ལ་ཐུན་གྲོལ། ཐུན་མཚམས་ཀྱིི་ཆོས་སྤྱོད་གང་འོས་བྱ། སྔ་ཐུན་ལ་ཚིག་བདུན་གསོལ་འདེབས་དང་། ལས་བྱང་ལ་གསོལ་འདེབས་དབང་བཞི་ལེན་པ་སྦྱར་ལ། བསྙེན་པ་ཅི་འགྲུབ་ཀྱི་ཐུན་བསྡུ་རིམ་སྔར་ལྟར་གྱིས་གྲོལ། ལྟུང་བཤགས་སོགས་ཆོས་སྤྱོད་བྱ། ཕྱི་ཐུན་ལ་ལས་བྱང་རྐྱང་དེད་ཀྱི་ཐུན་མཐར་ཚོགས་མཆོད་གཞུང་རྐྱང་ཙམ་རེ་བྱ། བསྐུལ། ཆད་བསྟན་མི་དགོས། གཏེར་སྲུང་གཏོར་བསྔོ་སོགས་བྱ། སྲོད་ཐུན་ལ་གཞུང་རྐྱང་དེད་ཀྱི་ཐུན་མཐར་རྫོགས་རིམ་གཉུག་བསྲིང་ལ་བསྔོ་སྨོན་གཟབ། ཉལ་བའི་ཚེའང་བསྲུང་འཁོར་དང་དམ་བཅའ་མི་བརྗེད་པར། ཀུན་བཟང་བླ་མ་སྙིང་དབུས་སུ་འོད་གསལ་བ་ལ་རྣལ་དུ་འབྱོར་བཞིན་པ་ལས་གཞན་དུ་མ་ཡེངས་བར་གཉིད་དུ་འགྲོ་བར་བྱ། ནང་པར་སད་མ་ཐག་ཀུན་བཟང་བླ་མ་དྲན་བཞིན་དུ་བཞེངས་ཚུལ་སྔར་བཞིན་ནོ། །ཡང་མཚན་ཐུན་སྐབས་འདོན་ཆ་མང་བ་མི་བདེ་ན། ཀུན་བཟང་རིགས་ལྔའི་གསོལ་འདེབས་དང་། སྐྱབས་སེམས་མཐར་ཏིང་འཛིན་རྣམ་གསུམ་ནས། རང་ཉིད་སེམས་དང་དབྱེར་མེད་བསྒོམ༔ བར། དེ་ནས་རང་ལུས་རྒྱལ་བའི་དཀྱིལ་འཁོར་དུ། ཙིཏྟ་སྨུག་པོའི་འོད་ཀློང་དབུས། །རྡོ་རྗེ་འབར་བའི་ལྟོ་བ་རུ། །རྒྱུ་ཡི་ཡི་གེ་སྐྱེ་མེད་ཨཿ སྙིང་པོ་སྔགས་ཀྱིས་གཡས་བསྐོར་ཏུ། །མི་ཆད་བར་མ་ཆད་དུ་འཁོར། །དེ་ལས་འོད་ཟེར་འཕྲོས་པ་ཡིས། །རྒྱལ་བ་མཉེས་པའི་མཆོད་པ་འབུལ། །བདག་གཞན་ཐུན་མོང་དོན་བྱས་ནས། །མཆོག་གི་དངོས་གྲུབ་ཐོབ་པར་བསྒོམས། །ཞེས་པས་བསྙེན་མཐར། ལྷག་ཆད་བསྐང་ལ། ཨརྒྷ་སོགས་ཀྱིས་མཆོད། རྟོག་བྲལ་གྱུར་པས་བསྟོད། དངོས་གྲུབ་བཤགས་པ་སོགས་སྔར་བཞིན་གྱིས་ཐུན་གྲོལ། ནམ་ཡང་སྔ་ཞོག་ལ་བགྲང་ཕྲེང་བྱིན་བརླབ་རེ་བྱ་སྟེ། རང་གི་ལག་གཡོན་ཉི་མ། གཡས་ཟླ་བར་བསམ་པའི་བར་དུ། ཕྲེང་བ་དམ་པ་རིགས་བརྒྱར་བསྒོམ་ལ་ཐལ་མོ་སྤྱི་བོར་སྦྱར། ངག་ནས་ཨཱ་ལི་ཀཱ་ལི་ཚར་གསུམ་དང་། ༀ་རུ་ཙཱི་རཱ་མ་ཎི་པྲ་ཝརྟ་ཡ་ཧཱུྃ་ཕཊ༔ ཞེས་ལན་བདུན་དང་། ཡེ་དྷར་ལན་གསུམ་བཟླས་པས། ལྷ་འོད་དུ་ཞུ་ནས་ཕྲེང་བ་ལ་ཐིམ་པའི་རྐྱེན་གྱིས། མདོ་འཛིན་སུམ་བརྩེགས་ༀ་ཨཱཿཧཱུྃ་དུ་གྱུར། ཕྲེང་ལྡོག་རྣམས་ཨཱ་ལི་ཀཱ་ལིར་གྱུར་ནས་སྔགས་སྒྲ་གྲགས་པར་བསམ། དེས་ནི་བཟླས་པ་བྱེ་བ་གྲངས་མེད་དུ་འགྱུར་རོ། །བསྙེན་པའི་ཚད་ནི། རབ་མཚན་མའི་བསྙེན་པ་ཞེས་དངོས་གྲུབ་ཀྱི་རྟགས་མཐོང་བ། འབྲིང་དུས་ཀྱི་བསྙེན་པ་ཞེས་ཟླ་བ་དྲུག་ལས་མི་ཐུང་བ། ཐ་མ་གྲངས་ཀྱི་བསྙེན་པ་ཞེས་སྔགས་རིང་ཐུང་འབྲུ་བཅོ་ལྔ་ཚུན་ཆད་ལ་འབྲུ་འབུམ་བསྒྲངས་པ་ལས་རུང་སྟེ། དེའང་དུས་ཀྱི་དབང་གིས་བཞི་འགྱུར་དགོས་གསུངས། གཞུང་ཚད་བཞི་འགྱུར་ལས་རུང་དུ་བཞེད་པའང་སྣང་སྟེ། སྤྱིར་ཞི་དྲག་སོ་སོར་ཕྱེས་ནས་གཙོ་འཁོར་གྱི་རིམ་པ་ལྟར་བསྙེན་གྲངས་བྱ་ཚུལ་སྣང་མོད། འདིར་ཡོངས་སུ་གྲགས་པ་ཞི་དྲག་སྟབས་གཅིག་ཏུ་བསྙེན་པ་དང་། སྒྲུབ་པ་དང་། ལས་སྦྱོར་གསུམ་ལས། བསྙེན་པ་ནི། ཧཱུྃ་བཛྲ་ཙིཏྟ་ཨ༔ ཛྙཱ་ན་ས་མནྟ་བྷ་ཏྲ་ༀ༔ ཞེས་པ་འབུམ་ཕྲག་དྲུག་བཟླ་སྟེ། ཡབ་ཀྱི་འབྲུ་འབུམ་གྱིས་ཆོག་པར་གསུངས། འདིའི་ཚེ་ནའང་ཐུན་གྲོལ་ཁར་སྒྲུབ་སྔགས་དང་ལས་སྔགས་གདགས། དེ་ནས་སྒྲུབ་སྔགས་ཞི་དྲག་སྤྱི་དྲིལ་བྷོ་དྷི་རུ་ལུ་འབུམ་ཕྲག་བཅུ་བཟླ་བའི་ཚེའང་བསྙེན་སྔགས་དང་ལས་སྔགས་ཅུང་ཟད་རེ་བཟླ། ལས་སྦྱོར་ཤམ་བུ་ཅན་ༀ་ཨཱཿཧཱུྃ་ཧྲཱི༔ སོགས་རྒྱས་པ་དང་། ༀ་བྷོ་དྷི༴ ༀ་ཧཱུྃ་སྭཱ་ཨཾ་སོགས་འབྲིང་པོ་གཉིས་རེས་མོས་གང་བདེའི་ཚུལ་ཏུ་བཟླས་པ་ཁྲི་ཕྲག་གཅིག་སྟེ་བཏགས་གྲོལ་ཚར་རེ་གདགས། དེ་ལྟར་བསྙེན་པ་ཟླ་བ་གཅིག སྒྲུབ་པ་ཟླ་གཉིས། ལས་སྦྱོར་ཞག་བཅུ་སྟེ། ཞག་བརྒྱ་ནི་གྲངས་བསྙེན་ཉུང་མཐའོ། །སྤྱིར་གཞི་བསྙེན་ཞེས་པ་ཡི་དམ་གང་རུང་གི་བསྙེན་པ་བྱེ་ཆེན་ལས་མི་ཉུང་བ་ཚད་དུ་འཁྱོལ་བ་ཞིག་ཡོད་ཕྱིན་ཆད། གཤིན་དོན་དང་། དབང་བསྐུར་སོགས་ལས་ལ་རུང་བའི་བསྙེན་པ་དགོས་གལ་བྱུང་ན་ཟླ་མཚམས་སོགས་ཡུན་ཐུང་གྲངས་ཉུང་རུང་གི གཞི་བསྙེན་མེད་ན་དང་པོ་ནས་ཉུང་ངུར་བསྙེན་པས་མི་འོང་གསུངས།

༈ དེ་ལྟར་འདོན་འགྲིགས་དང་མཐུན་པར་དམིགས་པའི་རིམ་པ་ནི། དང་པོ་ཚོགས་ཤིང་བཛྲ་ས་མན་ཛས་སད་པར་བྱས་པའི་སྐྱབས་ཡུལ་གྱི་ལྷ་ལ་བདག་སོགས་འགྲོ་ཀུན་ཞེས་སྐྱེས་བུ་ཆེན་པོའི་བློས་སྐྱབས་སུ་འགྲོ་ཞིང་། སེམས་བསྐྱེད་ཀྱི་དཔང་པོར་དམིགས་ལ་ཐུགས་རྗེས་བསྐུལ་ཏེ་དམ་བཅའ་བཟུང་། ཚོགས་གསོག་ཡན་ལག་བདུན་པའི་མཐར། སྙིང་པོ་བརྗོད་པ་ཙམ་གྱིས་ཚོགས་ཞིང་རྣམས་རང་ལ་བསྟིམ་པས་དབང་དང་བྱིན་རླབས་ཐོབ་པར་བསམ། དེའི་རྐྱེན་གྱིས་རང་ཉིད་སྐད་ཅིག་གིས་གསང་བའི་བདག་པོ་རྡོ་རྗེ་ཧེ་རུ་ཀའི་སྐུར་གྱུར་ཏེ། དྲང་དོན་དུ་འདྲེ་བགེགས་ལ་རྡོ་རྗེའི་ཚིག་གིས་བཀའ་བསྒོས་ནས་ཕྱིར་བཏང་ལ། ཁྲོ་མཚོན་མེའི་ཚྭ་ཚྭས་ཕ་མཐར་བསྐྲད་པར་བསམ། ངེས་དོན་དུ་མ་རྟོགས་བདག་ཏུ་འཛིན་པའི་འདྲེ་གང་། ཨ་ཏིའི་ཚིག་གི་སྒོ་ནས་རང་ས་ཀ་དག་གི་ངང་དུ་དེངས་པས་བགེགས་ཞེས་བྱ་བའི་མིང་ཡང་མེད་པར་བསམ་ལ། རང་ཉིད་ཡི་དམ་ལྷའི་ཏིང་ངེ་འཛིན་དང་མི་འབྲལ་བ་ནི་གསང་བའི་མཚམས་གཅོད་ཡིན། ཡེ་ཤེས་དང་དམ་ཚིག་གི་ཁྲོ་བོ་ཁྲོ་མོ་མང་པོས་བསྲུང་བར་བསྒོམ་པ་ནི་ནང་མཚམས། སྟེང་ཐམས་ཅད་རྡོ་རྗེའི་གུར་དང་བླ་བྲེ། འོག་ཐམས་ཅད་རྡོ་རྗེ་རྒྱ་གྲམ་གྱི་ས་གཞི། ཕྱོགས་མཚམས་ཐམས་ཅད་དུ། རྡོ་རྗེ། འཁོར་ལོ། རལ་གྲི། རྒྱ་གྲམ། ཕུར་པ། ཐོ་བ་རྣམས་ཀྱིས་རྩིག་པ་རིམ་པ་དྲུག་གི་མཐར། ཡེ་ཤེས་ཀྱི་མེ་ཁ་དོག་སྣ་ལྔ་འུ་རུ་རུ་འབར་བས། འདྲེ་བགེགས་ཉུལ་བར་མ་ཟད་རླུང་ཡང་རྒྱུ་བར་མི་འགྱུར་བའི་སྲུང་གུར་བརྟན་པོར་བསྒོམས་པ་ཕྱི་མཚམས་ཏེ། འདི་ནི་མཚམས་སྒོ་མ་གྲོལ་བར་དུ་ཐུན་མཚམས་རྣམས་སུའང་བསྒོམས་པས་བར་ཆད་ཀྱིས་མི་ཚུགས་སོ། །བྱིན་འབེབས་ཀྱི་ཚེ། བསྒྲུབ་པའི་གུར་ཁང་དེར་བདག་དང་སྒྲུབ་རྫས་རྣམས་ལ་རྒྱལ་བའི་བྱིན་རླབས་ཕེབས་པས། དབང་བྱིན་རླབས་གཟི་བརྗིད་དང་ལྡན་པར་གྱུར། དེའི་མཐུས་དངོས་སུ་བཤམས་པའི་མཆོད་རྫས་རྣམས་ཀྱང་མ་ཚང་བ་མེད་པ་ཟག་མེད་ཀྱི་མཆོད་སྤྲིན་དུ་གྱུར་པར་བསམ་བཞིན་དུ་ཚིག་ཀྱང་བརྗོད། བརྡ་ཕྱག་ནི། བདེ་གཤེགས་སྙིང་པོ་དོན་གྱི་ལྷ་ཚོགས་ཡེ་ནས་རང་ལ་ཡོད་ཀྱང་མ་མཇལ་བ། དེང་དབང་དང་དམ་ཚིག་གིས་སྒོ་ཕྱེས་ནས་མཇལ་སྙམ་པའི་གུས་སྤྲོ་དང་། སྔར་མ་རྟོགས་པ་ལ་བཤགས་པ་བརྡ་ཙམ་བྱས་པའོ། །དེ་རྣམས་ཀྱིས་སྔོན་འགྲོ་གྲུབ་ནས། དངོས་གཞི་ཏིང་འཛིན་རྣམ་གསུམ་སྐབས་བློ་ཕབ་སྟེ། སྔར་རང་ལ་བླ་མས་ངོ་སྤྲད་པའི་རྫོགས་པ་ཆེན་པོ་ཀ་དག་གི་ལྟ་དོན་ལྷུན་གྲུབ་ནང་གསལ་སྐུ་གསུམ་གྱི་བདག་ཉིད་ཅན། སངས་རྒྱས་ཀྱིས་མ་མཛད། སེམས་ཅན་གྱིས་མ་བསླད་པ། དེ་བཞིན་ཉིད་ཀྱི་ཏིང་ངེ་འཛིན་ལ་ཡུན་དུ་མཉམ་པར་བཞག དེ་ནི་བསྐྱེད་རྫོགས་ཀྱི་སྐབས་ཐམས་ཅད་དུ་མི་འགྱུར་བར་ཡོད་དགོས་པས་ན་དགོངས་པ་མི་འགྱུར་བའི་གཟེར་ཞེས་བྱ་སྟེ། འདིའི་ངང་ནས་གཞལ་ཡས་ཁང་ལྷ་དང་བཅས་པ་བསྐྱེད་ཚད་ཞུ་བདེ་སྟོང་ཉིད་ཀྱི་རང་བཞིན་ཅན་ཏེ། མཐར་བསྡུ་རིམ་གྱིས་རྫོགས་པའི་སྐབས་སུའང་འདི་ག་རྗེན་པར་གྱུར་པ་ལས་གཞན་མིན་པས། དག་རྫོགས་ཀྱི་ཡེ་ཤེས་ལམ་དུ་བྱེད་པ་འདིའི་སྨིན་བྱེད་དུ་གསུངས། འདི་དང་བྲལ་ན་བསྐྱེད་བཟླས་ཀྱི་གོ་མི་ཆོད་པས། དང་པོར་ཡོབ་ཙམ་བྱས་པས་ཆོག་པར་མི་སེམས་སོ། །དགོས་པ་ནི་དེ་ཏིང་གིས་འཆི་སྲིད་ཆོས་སྐུར་སྦྱོང་། ཀུན་སྣང་གིས་བར་སྲིད་ལོངས་སྐུར་སྦྱོང་། རྒྱུ་ཏིང་གིས་སྐྱེ་སྲིད་སྤྲུལ་སྐུར་སྦྱོང་པ་སྟེ། ༀ་དང་ཨཱཿདང་སོགས་ཚིག་གིས་རིམ་པར་གསལ་གདབ་ཅིང་། སྟོང་ཆེན་དེའི་ནང་གདངས་མ་རྟོགས་པའི་སེམས་ཅན་ལ་ཁྱབ་པར། དམིགས་མེད་ཀྱི་སྙིང་རྗེ་རྩོལ་བ་མེད་པར་རྣམ་པ་ཀུན་ཏུ་སྣང་བའི་ཏིང་ངེ་འཛིན་བསྒོམ་ལ། དེས་འཕངས་པའི་ཕྱིར་གདངས་སུ་ཤར་བ་ནི། རང་སེམས་ཐ་མལ་གྱི་ཤེས་པ་རྟེན་སྐུ་ལུས་དང་བཅས་པའི་ངོ་བོ་རྒྱུའི་ཡི་གེ་ཨཿམཐིང་ག་ཤིན་ཏུ་གསལ་བ་ཞིག་བར་སྣང་དུ་ལེང་ངེར་བསྒོམ་པ་རྒྱུའི་ཏིང་ངེ་འཛིན་ཏེ་ནུས་པ་ཆེར་འབར་ནས་རིམ་གྱིས་ཨཿདེ་ལས་ཨེ་ཡཾ་སོགས་ཆད་དེ། འབྱུང་བ་རིམ་བརྩེགས་ཀྱི་གཞལ་ཡས་ཁང་མཚན་ཉིད་ཚང་བར་བསྒོམ་པ་ནི་གཞུང་དོན་དེ། ལུས་གཞལ་མེད་ཁང་དང་སེམས་ལྷ་ཚོགས་སུ་གནས་ཚུལ་ལོ། །དེའི་དབུས་སུ་པད་ཉི་ཟླ་བའི་ཁྲི་ལ་ཨཿདེ་ཉིད་ཡོངས་སུ་གྱུར་པ་ལས། བདག་ཉིད་རྡོ་རྗེ་སེམས་དཔའ་གསལ་བའི་སྙིང་ཁར་ཞི་བའི་ལྷ་ཚོགས། དུང་ཁང་དུ་ཁྲག་འཐུང་ལྷ་ཚོགས་རྣམས། རྩ་གནས་ལུས་ལ་ཡེ་ནས་ཁྱབ་ཅིང་གནས་ཚུལ་དང་མཐུན་པར་ལས་བྱང་ཆེ་བ་ལྟར་བསྒོམ་ན། འོག་གི་བཟླས་དམིགས་དང་ཡང་འབྱོར་ཆེ་བས། རང་བཞིན་དག་པའི་རྩ་ཡི་དཀྱིལ་འཁོར་ལ་ཞི་བའི་གཙོ་བོ་ཀུན་བཟང་ཡབ་ཡུམ་གྱི་མདུན་དུ། གཙོ་བོ་གཉིས་པ་རྣམ་སྣང་གིས་བརྒྱན་པ་ནི། རྒྱུད་ལས། འཆད་པའི་སྐྱེས་བུ་མདུན་ན་བཞུགས། །ཞེས་གསུངས་པ་དང་། འདིར་ཡང་། ཙིཏྟ་སྙིང་གི་དབུས་ཕྱོགས་ཀུན་བཟང་མདུན༔ སྐད་ཅིག་དྲན་རྫོགས་རྣམ་པར་སྣང་མཛད་དཀར༔ ཞེས་པའི་དོན་ཏེ་གཙོ་བོ་གཉིས་ཀའི་ཞལ་ཐལ་ལེ་བའམ་ཤར་ཕྱོགས། རིགས་བཞིའི་ཞལ་གཙོ་བོ་ལ་ཀྱུ། སྒོ་བའི་རིགས་ཞལ་ཕྱིར་གཟིགས་པ་སྟེ། རང་སེམས་གཙོ་བོའི་རོལ་པ། ཅི་ཤར་རྟོག་པ་ཞི་ཁྲོའི་ལྷ༔ ཞེས་པ་སྐུ་གསུམ་ཆོ་གར། རང་རིག་གཙོ་ལ་རང་མདངས་འཁོར༔ ཞེས་དང་། དགོངས་པ་རང་གྲོལ་དུ། ལྷ་ཉིད་ཀུན་ཀྱང་རང་སྣང་ལ༔ ཞེས་དགོངས་པ་མཐུན་ནོ། །མདུན་བུམ་གཉིས་ཀ་མི་དགོས། བདག་བསྐྱེད་ལྷ་ཚོགས་ཡོངས་རྫོགས་གསལ་བ་དམ་ཚིག་པ་དང་། རྟོག་ཅན་གྱི་ངོར་ཡེ་ཤེས་པ་སྤྱན་འདྲེན་བརྡ་ཙམ་གྱིས་སད་པར་བྱེད་ཚེ། སྲོག་ཡིག་གི་འོད་ཟེར་དང་སྙིང་པོ་བརྗོད་པ་ཙམ་གྱིས་མདུན་མཁར་བྱོན་པ་ཉིད། རང་ལུས་ཕུང་ཁམས་དག་པའི་དཀྱིལ་འཁོར་དུ༔ བཞུགས་གསོལ་གྱི་ཚིག་གིས་དམ་ཡེ་གཉིས་མེད་དུ་བསྟིམ་སྟེ། བཟང་ངན་མེད་པ་ལ་ཕྱག་འཚལ་བའི་ཆོ་འཕྲུལ་དྲན་ཙམ་ལས་དམིགས་རྣམ་མི་དགོས་གསུངས། དེ་དང་དེ་དག་གི་སྒོ་ནས་ལྷ་ཐམས་ཅད་བློ་ངོའི་རི་མོ་ཙམ་མ་ཡིན་པར། ལྷ་དངོས་བྱོན་པ་ལྟར་བྱིན་རླབས་ཡེ་ཤེས་ཀྱི་ཕུང་པོར་བསམ་སྟེ། འདོད་སྣམ་ལ་གནས་པ་དང་རང་ལས་སྤྲུལ་པའི་མཆོད་ལྷ་རྣམས་ཀྱིས། ཕྱི་མཆོད་དང་ནང་མཆོད་ཕུལ་བ་རྣམས་ལྷ་ཚོགས་ཀྱི་དབང་པོ་སོ་སོར་ཐིམ། གསང་མཆོད་དང་སྨན་རཀ་གཏོར་མ་རྣམས་ལྗགས་ལ་ཕུལ་བས། དགྱེས་པར་བཞེས་ཏེ་ཤིན་ཏུ་མཉེས་པས་དབང་བཞིའི་དམ་ཚིག་བསྐང་བར་བསམ་ཞིང་། བསྐལ་བ་མ་སྟོང་གི་བར་དུ་མཆོད་པའི་རྒྱུན་མི་ཆད་པར་བསམ་མོ། །

བསྟོད་པ་ལ། ཆོས་སྐུར་དགོངས་བསྟོད་ནི། བསམ་དུ་མེད་པའི༴ ལོངས་སྐུར་རྫོགས་བསྟོད་ནི། ཆོས་སྐུ་ནམ་མཁའ༴ སྤྲུལ་སྐུར་རྟགས་བསྟོད་ནི༴ ཞི་བས་མི་འདུལ༴ ཆོས་སྐྱོང་ལ་ལས་བསྟོད་ནི། ལས་སུ་སངས་རྒྱས༴ བསྟོད་པར་བྱས་པས་དགྱེས་པའི་བྱིན་རླབས་གཟི་བྱིན་འབར་བར་བསམ། གསོལ་བ་འདེབས་པས་ཐུགས་རྗེའི་རྒྱུན་མ་ཆད་པར་བསམ་ཞེས་གསུངས།

༈ དེ་ནས་བསྙེན་པ་ལ་བསྙེན་སྒྲུབ་ཡན་ལག་བཞིའམ། བསྙེན་སྒྲུབ་ལས་གསུམ་གྱི་དང་པོ་བསྙེན་པ་ནི་བཟླས་རྐྱང་ཙམ་མ་ཡིན་པར། སེམས་ཉིད་ལྷ་ཁོ་ནར་བསྙེན་པའམ་བསྟེན་པ་ཡིན་པས། སྔགས་མ་བཟླས་གོང་དུ་ལུས་སེམས་ཕབ་ནས་འདུག་སྟེ། སྔར་བསྒོམས་པའི་བསྲུང་འཁོར་གཞལ་ཡས་ཁང་ལྷ་ཚོགས་དང་བཅས་པར་གསལ་ཏེ། ཞི་བ་རྣམས་ཞི་བའི་ཚུལ་དགུ་དང་རྒྱན་ཆས་བཅུ་ གསུམ་གྱིས་སྤྲས་པ། ཁྲོ་བོ་རྣམས་གར་གྱི་ཉམས་དགུ་དང་དུར་ཁྲོད་ཆས་བརྒྱད ་ཀྱིས་བརྒྱན་པ། སྣང་ཆ་ནས་སྤྱན་གྱི་དཀར་ནག་ཚུན་ཆད་མ་འདྲེས་ཡོངས་རྫོགས་སུ་གསལ། སྟོང་ཆ་ནས་དངོས་མཚན་དུ་གྲུབ་པ་རྡུལ་ཙམ་མེད་པ་འཇའ་འོད་ཀྱི་སྐུ་ལ་ཡེ་ཤེས་ཀྱི་ཐུགས་དང་ལྡན་པ། སྟོང་པའི་རང་བཞིན་གཟུགས་བརྙན་ལྟར་བཀྲ་དཔུང་ངེ་བསྒོམས་པས་ངེས་ཤེས་འདྲོང་བ་ལ། ཏིང་ངེ་འཛིན་ལྷ་ཡི་གཟེར་ཞེས་བྱ་སྟེ། དང་པོ་གཙོ་བོ་ཙམ་ལ་སེམས་འཛིན། དེ་ཟིན་ནས་རིམ་པར་ལྷ་ཚོགས་ཐམས་ཅད་སེམས་ལ་འཆར་བདེ་མོ་གསལ་བརྟན་གྱི་ཚད་བརྒྱད་དུ་བསྟན་པ་ལྟར་བྱང་ཞིང་གོམས་སུ་འཇུག་པ་ལ་རྣམ་པ་གསལ་བ་ཟེར། གསལ་བའི་སྐུ་མདོག་ཕྱག་མཚན་ལ་སོགས་པ་ཐམས་ཅད་དོན་མེད་མ་ཡིན་པར། རྣམ་པར་བྱང་བའི་ཆོས་རྣམས་ཀྱི་བརྡ་དང་རྟགས་སུ་ཤར་བ་ཁོ་ནར་ལྟ་སྟེ། ཕུང་པོ་ལྔ་དག་པས་རྒྱལ་བ་རིགས་ལྔ་སོགས་དང་། ཞལ་གཅིག་པ་ནི་ཆོས་སྐུ་ཐིག་ལེ་ཉག་གཅིག་གི་བརྡའ། ཞལ་གསུམ་པནི་སྐུ་གསུམ་གྱི་རྟགས་ལ་སོགས་པ་དྲན་པར་བྱ་སྟེ། ཆོས་སྐུ་ཐབས་དང་ཆོ་འཕྲུལ་དཔག་ཏུ་མེད༔ ཅེས་པའི་དོན་ཡིན་པར་ལྟ་བ་ལ་རྣམ་དག་དྲན་པ་ཟེར། རྣམ་དག་དེའང་གཞན་ཞིག་མ་ཡིན་པར་རང་གི་སེམས་ཉིད་ཡེ་ནས་ལྷར་གནས་པས་ན། བདག་ཉིད་ཡེ་ནས་རྡོ་རྗེ་སེམས་དཔའ་སྟེ༔ སྐུ་གསུམ་ལྷུན་གྲུབ་རྫོགས་པའི་ང་རྒྱལ་གྱིས༔ ཞེས་ཡེ་ནས་ཡིན་པ་ལ་ཡིན་པའི་ཚུལ་གྱིས་གསལ་འདེབས་བྱེད་པ་ཡིན་གྱི། མ་གྲུབ་པ་ལ་ཀུན་བཏགས་ཀྱིས་གྲུབ་པར་རློམ་པ་མིན་པས། ཐེ་ཚོམ་མེད་པར་ང་རང་ལྷ་ཡིན་ནོ་སྙམ་དུ་བསྒོམ་པ་ལ་ང་རྒྱལ་བརྟན་པ་ཟེར། དེ་ལྟར་གསལ་དག་བརྟན་གསུམ་གོམས་པའི་དགོས་པ། འཁྲུལ་སྣང་ནི་ལྷར་རྣམ་པ་གསལ་བས་སྦྱོང་། དངོས་མཚན་དུ་རྟོག་པ་ནི་རྣམ་དག་དྲན་པས་སྦྱོང་། ང་རུ་ཞེན་པ་ནི་ང་རྒྱལ་བརྟན་པས་སྦྱོང་བ་སྟེ། ཕྱོགས་མཐུན་གྱི་སྒོ་ནས་ལམ་དུ་བྱེད་པ་ན་ཡུལ་གསུམ་གྱད་དུ་གྱུར་པ་ཡིན། དེས་ན་ཐ་མལ་སེམས་ཀྱིས་གནད་དུ་བསྒྱུར༔ གཟུགས་སྟོང་ཐམས་ཅད་ཀུན་བཟང་སྐུ༔ གྲགས་སྟོང་ཐམས་ཅད་ཀུན་བཟང་གསུང་༔ དྲན་རྟོག་ཐམས་ཅད་ཀུན་བཟང་ཐུགས༔ ཞེས་ཁྱེར་སོ་གསུམ་དང་མ་བྲལ་བའི་ངང་ནས་འཛབ་ལ་འཇུག་པར་བྱ་སྟེ།

༈ བཟླས་དམིགས་ནི། བདག་ཉིད་རྡོ་རྗེ་སེམས་དཔའ་ཡི༔ ཐུགས་ཀར་ཙིཏྟ་༴ ཞེས་སོགས་ཀྱི་དོན་བསྡེབས་ན། བདག་ཉིད་རྡོ་རྗེ་སེམས་དཔའ་ཤེལ་གྱི་མདོག༔ ཞལ་གཅིག་ཕྱག་གཉིས་ལོངས་སྤྱོད་རྫོགས་པར་བརྒྱན༔ ཐུགས་ཀར་ཙིཏྟ་རྩ་ཀ་ཏི། ཤེལ་གྱི་སྦུག་ཅན། གཞལ་ཡས་སུ༔ ཉག་གཅིག་ཐིག་ལེ་བླ་མ་ཀུན་ཏུ་བཟང་༔ སྟོང་པའི་འོད་ཀྱི་རིག་མ་ཡབ་ལ་འཁྲིལ༔ ཡེ་ཤེས་ལྔ་ལྡན་བཅོམ་ལྡན་ཞི་ཁྲོའི་ཚོགས༔ ཐམས་ཅད་ཡེ་ཤེས་སུ་གསལ་ལ། གཙོ་བོ་ཡབ་ཡུམ་གཉིས་སུ་མེད་པའི་ཐུགས། ཙིཏྟ་སྨུག་པོ་འོད་ཀློང་དབུས༔ པད་ཟླའི་གདན་ལ་རྡོ་རྗེ་སྔོན་པོ་རྩེ་ལྔ་པ་ཚོན་གང་འོད་འབར་བའི་ལྟོ་བ་རུ། ཟླ་གདན་སྲན་མ་ཕྱེད་པ་ཙམ་ལ། རྒྱུ་ཡི་ཡི་གེ་སྐྱེ་མེད་ཨ༔ མཐིང་ག་སྤུ་ཡིས་བྲིས་པ་ཙམ་གསལ་བ་ལས་འོད་ཟེར་འཕྲོས། རྒྱལ་བ་རྣམས་ཀྱི་ཐུགས་བརྒྱུད་བསྐུལ་ནས་ཨཿལ་ཐིམ་པས་བྱིན་རླབས་ཤིན་ཏུ་འབར་བར་བསྒོམ་པའི་ཏིང་ངེ་འཛིན་ཡུན་བསྲིང་བ་བསྙེན་པ། ཨཿདེའི་མཐར་མདུན་ནས་བརྩམས་ཏེ་སྔགས་ངོ་ཕྱིར་བསྟན་གཡོན་བསྐོར་ཏུ། ཧཱུྃ་བཛྲ་ཙིཏྟ་ཨ༔ ཛྙཱ་ན་ས་མནྟ་བྷ་ཏྲ་ༀ༔ ཞེས་གཟབ་ཡིག་མཐིང་ཀའི་སྔགས་ཕྲེང་གཅིག་བཀོད། དེ་བཞིན་དུ་གཙོ་བོ་གཉིས་པ་རྣམ་སྣང་ཡབ་ཡུམ་གཉིས་སུ་མེད་པའི་ཐུགས་ཀར་པད་ཟླར་རྡོ་རྗེའི་ལྟོ་བར་ཟླ་གདན་ལ་ༀཿམཱུཾ་གྱི་མཐར། ཨཱོཾ་ཛི་ན་ཛིཀ༔ མཱུཾ་དྷ་དུ་ཤྭ་རི་སྟྭཾ༔ སྔགས་ཕྲེང་དཀར་པོ། རྡོར་སེམས་ཡབ་ཡུམ་གྱི་ཐུགས་ཀར་ཧཱུྃཿལཱཾ། རིན་འབྱུང་ཡབ་ཡུམ་ལ་སྭཱཿམཱཾ། སྣང་མཐའ་ཡབ་ཡུམ་ལ་ཨཱཾ་པཱཾ། དོན་གྲུབ་ཡབ་ཡུམ་ལ་ཧཱ་ཏཱཾ༔ རང་སྔགས་རང་མདོག་གིས་བསྐོར་བ། འཁོར་ཞི་བ་རྣམས་ཀྱིས་ཐུགས་ཀར་ཟླ་གདན་ལ། རང་རང་གི་ས་བོན་རང་སྔགས་ཀྱིས་བསྐོར་བ་དང་། ཁྲོ་ཚོགས་ཡབ་ཡུམ་གཉིས་སུ་མེད་པའི་ཐུགས་ཀར་ཉི་གདན་ལ་ས་བོན་སྒྲིལ་མའི་མཐར་ཡབ་ཡུམ་གཉིས་ཀའི་རང་སྔགས་དང་། མ་ཚོགས་སོ་སོར་རང་སྔགས་རྐྱང་པ་སྟེ། མཐར་གྱི་སྒོ་མ་སྦྲུལ་གདོང་མའི་ཐུགས་ཀར་བྷྱོཿལྗང་ལ་ༀ་བཛྲ་ལཾ་པོ་ཏ་ར་མ་བྷྱོཿས་བསྐོར་བའི་བར། སྔགས་ཕྲེང་རྣམས་ཤིན་ཏུ་ཕྲ་བ། རང་རང་རྒྱུ་ཡི་ས་བོན་ཡིག་འབྲུ་ལ༔ སྙིང་པོ་སྔགས་འབྲས་རྡོ་རྗེ་ལུག་རྒྱུད་ཀྱིས༔ བསྐོར་བ་ཟླ་བ་སྐར་ཕྲེང་ལྟར་གསལ་ཅི་ཐེབས་དང་ཿ ཁྱད་པར་གཙོ་སྔགས་ལ་དམིགས་པ་གཅུར་ནས༔ ཧཱུྃ་བཛྲ་ཙིཏྟ་ཨ༔ ཛྙཱ་ན་ས་མནྟ་བྷ་ཏྲ་ༀ༔ ཞེས་པ་ཡིད་བཟླས། འགོག་བཟླས། ཤུབ་བུར་བཟླས་པ་སོགས་གང་མོས། མི་ཚིག་གིས་བར་མ་བཅད་པར་བཟླས་པའི་སྟོབས་ཀྱིས། སྔགས་ཕྲེང་བྱིན་རླབས་ནུས་པ་ཆེར་འབར་བས་གདན་ལས་ཅུང་ཟད་འཕར་ཏེ་ཕྱི་ནས་བལྟས་ན་འདོན་ཆོག་པ་ལྟར་རང་སྒྲ་དང་བཅས་པ་བར་མ་ཆད་པར། གཡས་སུ་འཁོར་ཞིང་གསལ་འཚེར་གཟི་བརྗིད་བསྒོམ་པ་ནི་ཉེ་བསྙེན། དེ་ལས་གཞན་དུ་མ་ཡེངས་པར་ཉམས་ལེན་ཐུན་དུ་བཅད་པ་ལ། བཟླས་པ་སྔགས་ཀྱི་གཟེར་ཞེས་བྱ་སྟེ་སྔགས་ཀྱི་མཐུ་བསྐྱེད་པའོ། །ནམ་ཡང་བཟླས་པ་ཕྲེང་སྐོར་རེ་སོང་ནས་ལྷའི་གསལ་འདེབས་བློ་གཞུར་བ་རེ་དང་། བླ་མ་ལ་མོས་གུས། སེམས་ཅན་ལ་སྙིང་རྗེ་དུང་ངེ་བ་རེ་མ་བརྗེད་པར་གཅུར་ནས་བྱས་པས། ཇི་ཞིག་ན་རྩོལ་མེད་རང་ཤུགས་སུ་འཆར་བར་འགྱུར་གསུངས། ཐུན་འཇོག་ཁར་འོད་ཟེར་འཕྲོ་འདུ་དྲན་ཙམ་རེ་ལས་མང་པོ་མི་དགོས། ཡེངས་ཤོར་ན་དམིགས་རིམ་དུམ་ཆོད་བྱ་སྟེ། རེས་ལྷ་རེ་རེ་ནས་གསལ། རེས་མཉམ་པར་འཇོག རེས་ལྷ་ཡོངས་རྫོགས་ལྷང་ངེར་གསལ། དེ་ལྟ་བུས་བསྙེན་གྲངས་དྲུག་འབུམ་མཆོད་བསྟོད་དང་བཅས་པ་ཐེམས་ནས། སྒྲུབ་པའི་ཚེ། གཙོ་བོ་ཀུན་བཟང་གི་ཐུགས་ཀར་ཨཿཡི་མཐར་ཧཱུྃ་བཛྲ་ཙིཏྟ་ཨ༔ ཛྙཱ་ན་ས་མནྟ་བྷ་ཏྲ་ༀ༔ ༀ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་པའི་སྔགས་ཕྲེང་མཐིང་ག་ཕྱི་ནང་རིམ་པ་སུམ་བསྐོར་དུ་བཀོད་དེ། གཙོ་འཁོར་ཐམས་ཅད་ཀྱི་ཐུགས་ཀར་རང་རང་གི་སྙིང་པོ་སྔར་བཞིན་ནུས་ལྡན་དུ་འཁོར་ཞིང་བཟླ་བར་བསྒོམས་ལ། དཔེར་ན་རྣམ་སྣང་ཡབ་ཡུམ་གྱི་ཞལ་ནས་ༀ་ཛི་ན་ཛིཀ྄ མཱུཾ་དྷ་ཏུ་ཤྭ་རི་སྟཾ། ཞེས་སྒྲོག ཀོ་རི་མས། ༀ་བཛྲ་ཀོ་རི་ཧཱ༔ སྒྲོགས་པ་ལྟར་རང་རང་གི་སྲོག་སྙིང་རང་རང་གིས་བཟླ་བར་བསྒོམ་པ་ཡིན། མཆན། བྷོ་དྷི་དང་རུ་ལུ་ཁོ་ན་བཟླ། སྐབས་སྐབས་སུ་སྔགས་ཕྲེང་ལས་རྒྱལ་པོའི་ཕོ་ཉ་ལྟར་འོད་ཟེར་འཕྲོས་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ། ཡི་དམ་རྩ་བ་གསུམ་གྱི་ལྷ་ཚོགས་ལ་ཕོག མཆོད་པ་འབུལ། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་རྣམས་ཚུར་འདུས་ནས་སྔགས་ཕྲེང་ལ་ཐིམ་པས། རྟོགས་པ་ཁྱད་པར་ཅན་རྒྱུད་ལ་སྐྱེས་ནས་མཆོག་གི་དངོས་གྲུབ་ཆོས་སྐུ་ཐོབ་པར་བསམ་ལ་བཟླ་བ་སྒྲུབ་པ། ཡང་སྐབས་སུ་སྔགས་ལས་འོད་ཟེར་འཕྲོས། ཕྱི་སྣོད་ཀྱི་འཇིག་རྟེན་ལ་ཕོག་པས་དག་པའི་གཞལ་ཡས་ཁང་དུ་གྱུར། ནང་བཅུད་ཀྱི་སེསམ་ཅན་ཐམས་ཅད་ལ་ཕོག་པས། ལས་ཉོན་སྡིག་སྒྲིབ་ཐམས་ཅད་སྐད་ཅིག་གིས་དག་ནས། སེམས་ཅན་ རེ་རེ་བཞིན་དམ་པ་རིགས་བརྒྱ་རེ་མཆན། ཐམས་ཅད་ཀྱང་རྒྱལ་བ་ཞི་ཁྲོའི་ལྷ་ཚོགས་ཀྱི་སྐུ་ཤ་སྟག་ཏུ་གྱུར་ཏེ། ཞལ་ནས་སྔགས་ཀྱི་སྒྲ་བུང་བ་ཚང་ཞིག་པ་ལྟར་དི་རི་རི་སྒྲོག་པར་བསམ་ལ་བཟླ། འོད་ཟེར་དེས་ལམ་གྱི་གདུག་པ་ཅན་ཐམས་ཅད་ཚར་བཅད་ནས། ཚུར་འདུས་སྔགས་ལ་ཐིམ་པས་རང་གི་ཉམས་ཆག་རྟོག་སྒྲིབ་དག་ནས་གཞན་དོན་གཟུགས་སྐུའི་རྟེན་འབྲེལ་འགྲིགས། སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་འཁོར་ལོར་གྱུར་པར་བསམ་ལ་བཟླ་བ་སྒྲུབ་ཆེན་ཏེ། མ་ཡེངས་དྲན་པ་འཕྲོ་འདུས་ངང་ལ་ཞོག༔ ཅེས་རེས་འགའ་ལྷ་དང་སྔགས་ཕྲེང་ལ་དམིགས་པ་གཏད་ནས་བཟླ། རེས་འགའ་འོད་ཟེར་སྤྲོ་བསྡུ་བསྐྱར་ནས་བཟླ་སྟེ། དེ་ཐམས་ཅད་ཀྱི་ཚེ་ན་ལྟ་དོན་ལས་གཞན་ཨ་འཐས་སུ་མ་ཡེངས་པ་ལ་དགོངས་པ་མི་འགྱུར་བའི་གཟེར་ཞེས་བྱའོ། །སྒྲུབ་སྔགས་མཆོད་དང་བཅས་པ་གྲངས་ཐེམས་ནས། ལས་སྦྱོར་ཤམ་བུ་ཅན་བཟླ་བའི་སྐབས། གཙོ་བོ་ཡབ་ཀྱི་ཐུགས་ཀར་སྔར་ལྟར་བྷོ་དྷི་དང་རུ་ལུའི་སྔགས་ཕྲེང་འཁོར་བཞིན་པར་ༀ་ལས་ༀ་ཆད་པ་སོགས་སྔགས་འབྲུ་རང་རང་ལས་གཉིས་པ་རེ་ཐ་ར་ར་ཆད་པའི་སྔགས་ཕྲེང་ལུ་གུ་རྒྱུད་དུ་ཡབ་ཀྱི་ཞལ་ནས་ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད། མཁའ་གསང་ནས་ཐུགས་ཀའི་སྲོག་ཡིག་ཨཿལ་ཐིམ་པ། མགལ་མེའི་འཁོར་ལོ་ལྟར་ཧྲི་ལི་ལི་འཁོར་བ་ལས་འོད་ཟེར་འཕྲོས། འཁོར་གྱི་ལྷ་རྣམས་ལ་ཕོག་པས་བདེ་བ་ཆེན་པོས་དགྱེས་པ་བསྐྱེད་ཅིང་གཟི་བྱིན་ལྷག་པར་འབར་ཏེ། ལྷ་ཚོགས་ཐམས་ཅད་ཀྱིས་སྔགས་སྒྲ་དི་རི་རི་བཟླས་པར་བསམ་ལ། རང་གིས་ཀྱང་སྔགས་སྒྲ་དག་པར་བཟླས་པའི་ནུས་པས། ལྷ་ཚོགས་ཐམས་ཅད་ཀྱི་སྔགས་ཕྲེང་ལས་འོད་ཟེར་ཁ་དོག་ལྔ་ལྡན་མཆོད་པའི་སྤྲིན་ཕུང་ཅན་ཡར་འཕྲོས། རྩ་གསུམ་རྒྱལ་བ་རབ་འབྱམས་མཆོད་པས་མཉེས་ནས། སྐུ་གསུང་ཐུགས་ཀྱི་དངོས་གྲུབ་ༀ་ཨཱཿཧཱུྃ་གི་རྣམ་པ་འོད་ཟེར་དང་བཅས་པ་རང་ལ་ཐིམ་པས། སྤྲོས་བཅས་བུམ་དབང་། གཏུམ་པོ་གསང་དབང་། ཤེས་རབ་ཡེ་ཤེས། རིག་པ་རྩལ་དབང་རྣམས་ཐོབ་པར་བསམ་ལ་བཟླ། ཡང་འོད་ཟེར་མར་འཕྲོས། སྣོད་བཅུད་མ་དག་པ་ཐམས་ཅད་སྦྱངས་ནས་དག་པ་རབ་འབྱམས་སུ་གྱུར་པར་བསམ་ལ་བཟླ། ཡང་འོད་ཟེར་དཀར་པོས་ཞི་བའི་ཕྲིན་ལས་སྒྲུབ། སེར་པོས་རྒྱས་པའི་ཕྲིན་ལས་སྒྲུབ། དམར་པོས་དབང་གི་ཕྲིན་ལས་སྒྲུབ། ལྗང་གུས་དྲག་པོས་ཕྲིན་ལས་སྒྲུབ། མཐིང་གས་མཆོག་གི་ཕྲིན་ལས་ཏེ་དམིགས་ཡུལ་གཙོས་པའི་འགྲོ་ཀུན་རྒྱལ་བ་ཞི་ཁྲོའི་གོ་འཕང་ལ་འགོད་པར་བསམ་ནས་བཟླའོ། །འདིར་བཏགས་གྲོལ་ཆེ་བའང་ཚར་རེ་བཀླག་སྟེ་ཕན་ཡོན་ལ་ངེས་ཤེས་བསྐྱེད། འདི་དག་ལ་འཕྲོ་འདུ་ཕྲིན་ལས་ཀྱི་གཟེར་ཞེས་བྱ་སྟེ། སྐུ་གསུང་ཐུགས་ཕྲིན་ལས་དང་བཅས་པའི་གཟེར་གྱིས། ལུས་ངག་ཡིད་གསུམ་བྱ་བ་དང་བཅས་པ་ལ་ཐེབས་པར་བྱ་བ་ནི་གནད་ཆེ་བར་གསུངས། དེ་ལྟར་ལྷ་སྔགས་ཐམས་ཅད་ཨ་འཐས་སུ་མ་སོང་བར། དགོངས་པ་མ་བཅོས་ལྷུག་པར་ལྷོད། ཅེས་པ་ནི་འཇའ་སྤྲིན་འཁྲིགས་བཞིན་དུ་ནམ་མཁའ་མ་འགྱུར་བ་ལྟ་བུའོ། །ཐུན་མཐའ་རྣམས་སུ་རིགས་དྲུག་གནས་འགྱུར་གྱི་ལྷ་རྣམས་རྟེན་དང་བཅས་པ་དཀྱིལ་འཁོར་པ་ལ་བསྡུས་ནས། ཆད་ལྷག་སྐོང་བའི་ཨཱ་ལི་ཀཱ་ལི་ཡིག་བརྒྱ་རྟེན་སྙིང་ལན་གསུམ་རེ་དང་། དངོས་གྲུབ་འདོད་པའི་གསོལ་བ་གདབ། མཆོད་བསྟོད་དང་དངོས་གྲུབ་བླང་བ་དམིགས་རྣམས་སྦྲག བཤགས་པས་ཆོ་ག་ཉམས་པ་སོར་ཆུད་པར་བསམ།

བསྡུ་རིམ་ནི། གཞལ་ཡས་ཁང་འོད་དུ་ཞུ་ནས། འཁོར་གྱི་ལྷ་རྣམས་ལ་ཐིམ། ལྷ་རྣམས་ཀྱང་གཙོ་བོ་ལ་ཐིམ། གཙོ་བོ་ཐུགས་སྲོག་ཨཿལ་ཐིམ། ཨཿཆོས་ཉིད་ཀྱི་དབྱིངས་སུ་ཐིམ་པས། སྟོང་ཉིད་དམིགས་མེད་ཀྱི་ངང་དུ་ལྷན་ནེར་བཞག གནས་ཡུན་རིང་ཐུང་རང་ཉམས་དང་བསྟུན་ལ། མི་གནས་པའི་ཚེ་རྟོག་པ་ཤར་བ་དེ་ག་རང་ཉིད་ཡི་དམ་གྱི་ལྷ་རྡོ་རྗེ་སེམས་དཔའ་གཟི་བརྗིད་དང་ལྡན་པར་བསམ་ལ། སྲུང་གུར་གསལ་ཡང་གདབ་བྱ། དགེ་རྩས་འགྲོ་ཀུན་ཀ་དག་ནང་དབྱིངས་བུམ་སྐུར་བརྫུས་སྟབས་སུ་སྨིན་པའི་བསྔོ་སྨོན་གྱིས་རྒྱས་གདབ། མཁའ་དབྱིངས་ནས་ལྷུན་གྲུབ་ལམ་སྣང་གིས་བསྡུས་པའི་ཤེས་བརྗོད་ཀྱི་མེ་ཏོག་འབེབས་པར་བསམ། དེ་ནས་ཀྱང་སྤྱོད་ལམ་ཐམས་ཅད་བླ་མ་ཀུན་བཟང་ཞི་ཁྲོའི་སྐུ་གསུང་ཐུགས་སུ་ལམ་དུ་འཁྱེར་བ་ལ་རྗེས་ཐོབ་ཟེར་ཏེ། ཐུན་ནང་གི་ཏིང་ངེ་འཛིན་དེའི་རྗེས་ལས་ཐོབ་པའི་ཤེས་པ་ཡིན་པའི་ཕྱིར་རོ། །བསྒོམ་དོན་གྱི་ངད་དང་བྲལ་བའི་འཁྲུལ་རྟོག་ཁ་ཡན་ལ་རྗེས་ཐོབ་ཀྱི་མིང་མི་ཐོགས་པས་དྲན་ཤེས་གཟབ་བོ། །ནམ་བསྙེན་སྒྲུབ་ལས་གསུམ་གྲུབ་པའི་ཕྱི་ཐུན་ནས་མཆོད་གཏོར་དང་ཚོགས་མཆོད་རྒྱས་པར་གཏོང་། ཕྱིར་ནངས་ཐོར་ཐུན་ནས་མཆོད་གཏོར་རྒྱ་ཆེར་བཤམས་ལ་ལས་བྱང་གི་བཟླས་དམིགས་ཀྱི་སྐབས་སུ་སྒྲུབ་གཏོར་ལྷར་གསལ་བ་ལ། འོད་ཟེར་འཕྲོ་འདུས་དངོས་གྲུབ་བསྡུ་ཞིང་བསྟིམ་བཞིན། སྤྱིར་འཛབ་ལ་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཨཱཿཧཱུྃ་ཧྲཱིཿབཏགས་ལ་བཟླས། གཏེར་སྲུང་གཏོར་བསྔོ་དང་། ཚོགས་མཆོད། རྒྱུན་བཞག་གི་ཆད་བརྟན་གཏོར་སྐྱོང་བྱ། དེ་དག་གི་ཕྱག་ལེན་དང་དམིགས་རིམ་གཞན་ནས་ཤེས། དེ་ནས་སྒྲུབ་གཏོར་ལྷ་ཚོགས་ལ་མཆོད་བསྟོད། ཡིག་བརྒྱ་མང་དུ་བརྗོད་ལ་བཤགས་པ་བྱ། ཀུན་བཟང་རིགས་ལྔ་རྡོ་རྗེ་འཆང་སོགས་ཀྱིས་གསོལ་བ་དྲག་ཏུ་གདབ། རྒྱུན་བཞག་གི་མར་མེ་དང་། སྒྲུབ་གཏོར། བདུད་རྩི་སྨན་ཐོད་བཅས་སྤྱི་བོར་བླང་ལ། ལྷ་ཚོགས་རྣམས་ཀྱི་སྤྱི་བོ་ནས་ༀ་འཕྲོས། རང་གི་སྤྱི་བོར་ཐིམ་པས་སྤྲོས་བཅས་བུམ་པའི་དངོས་གྲུབ་ཐོབ། མགྲིན་པ་ནས་ཨཱཿའཕྲོས། རང་གི་མགྲིན་པར་ཐིམ་པས་གཏུམ་མོ་མེ་དྲོད་ཀྱི་དངོས་གྲུབ་ཐོབ། ཐུགས་ཀ་ནས་ཧཱུྃ་འཕྲོས། རང་གི་སྙིང་ཀར་ཐིམ་པས་ཤེས་རབ་ཡེ་ཤེས་ཀྱི་དངོས་གྲུབ་ཐོབ། གནས་གསུམ་ནས་ༀཨཱཿཧཱུྃཿཧྲཱིཿའཕྲོས་པས་ཧྲཱིཿགཅིག་ཏུ་གྱུར། ཧྲཱིཿརང་གི་རིག་པ་ལ་ཐིམ་པས། རིག་པ་རྩལ་དབང་ཡོངས་རྫོགས་མཆོག་གི་དངོས་གྲུབ་ཐོབ་པར་བསམས། ཐུན་མོང་གི་དངོས་གྲུབ་ཐོབ་པར་བསམས། ཐུན་མོང་གི་དངོས་གྲུབ་རྣམས་བཀྲ་ཤིས་པའི་རྫས་ཀྱི་རྣམ་པར་ཐོབ་པར་བསམས་ལ། ༀཨཱཿཧཱུྃ༔ བླ་མ་ཀུན་བཟང་ཡབ་ཡུམ་དང་༔ བདེ་གཤེགས་རྒྱལ་བའི་ཚོགས་དང་བཅས༔ རྒྱལ་བའི་དཀྱིལ་འཁོར་གཉེན་པོ་རུ༔ ད་ལྟ་རྣལ་འབྱོར་བདག་ཅག་གིས༔ གདུང་བ་དྲག་པོའི་ཡིད་ཀྱིས་ཀྱང་༔ རྟག་པར་བསྐུལ་ཡང་མི་ཞུ་སྟེ༔ དེ་རིང་དངོས་གྲུབ་གནད་ནས་བསྐུལ༔ སྒྲུབ་པའི་ཞག་གྲངས་ཐེམས་ལགས་ཀྱི༔ ཆོ་ག་ལྷག་ཆད་མེད་པར་རྫོགས༔ སྙིང་པོ་སྔགས་ཀྱིས་གནད་བསྐུལ་འགྲུབ༔ བྱིན་རླབས་རྒྱུན་མི་ཆད་པར་ཉེ༔ ཡིད་འཛིན་རྟོག་སྒྲིབ་ཀ་ནས་དག༔ བསམ་གཏན་ཆེན་པོ་ས་གནོན་དུ༔ ཀུན་བཟང་ཁྱེད་དང་དབྱེར་མེད་གྲོལ༔ ད་ལྟ་རྗེས་སུ་ཡི་རང་བར༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ རྒྱལ་བའི་ཐུགས་རྗེས་དགོངས་ནས་ཀྱང་༔ དངོས་གྲུབ་འབྱུང་བའི་དུས་ལ་བབ༔ བྱིན་ཆེན་དབབ་པའི་དུས་ལ་བབ༔ དབང་བཞི་བསྐུར་བའི་དུས་ལ་བབ༔ ཡིད་འཛིན་གྲོལ་བའི་དུས་ལ་བབ༔ ཉོན་མོངས་ཟློག་པའི་དུས་ལ་བབ༔ རྟོགས་གྲོལ་གསལ་བའི་དུས་ལ་བབ༔ འཁྲུལ་པ་དག་པའི་དུས་ལ་བབ༔ བར་ཆད་སྲུང་བའི་དུས་ལ་བབ༔ རྐྱེན་ངན་ཟློག་པའི་དུས་ལ་བབ༔ སྦྱོར་ངན་ཟློག་པའི་དུས་ལ་བབ༔ ལྟས་ངན་ཟློག་པའི་དུས་ལ་བབ༔ བྱད་ཁ་ཟློག་པའི་དུས་ལ་བབ༔ ད་ལྟ་དུས་ལ་བབ་པར་བསྐུལ༔ ཐུན་མོང་དངོས་གྲུབ་ཐོབ་པ་དང་༔ མཆོག་གི་དངོས་གྲུབ་ད་ལྟར་སྩོལ༔ བྱིན་རླབས་ཆུ་རྒྱུན་འབེབས་པ་ལ༔ རྒྱུན་ཆད་མེད་པ་ད་ལྟར་སྩོལ༔ དབང་གི་ཆུ་རྒྱུན་བབ་པ་ལ༔ མཆོག་གི་དབང་བཞི་ད་ལྟར་སྩོལ༔ ཡིད་འཛིན་རྟོག་སྒྲིབ་གྲོལ་བ་ལ༔ ཉམས་དབྱངས་ཆུ་རྒྱུན་ད་ལྟར་སྩོལ༔ མི་མཐུན་སྦྱོར་ངན་ཟློག་པ་ལ༔ བར་ཆད་རིགས་སོགས་ད་ལྟར་ཟློག༔ གང་བསམ་འགྲུབ་པའི་ཞི་ཁྲོའི་ལྷ༔ མི་འགྱུར་སྐུ་ཡི་དངོས་གྲུབ་སྩོལ༔ མི་འགགས་གསུང་གི་དངོས་གྲུབ་སྩོལ༔ མི་འཁྲུལ་ཐུགས་ཀྱི་དངོས་གྲུབ་སྩོལ༔ མི་ཟད་ཡོན་ཏན་དངོས་གྲུབ་སྩོལ༔ ཚད་མེད་ཕྲིན་ལས་དངོས་གྲུབ་སྩོལ༔ དུས་ལས་མ་འདའ་དངོས་གྲུབ་སྩོལ༔ རྟག་ཏུ་མི་ཟད་གཏེར་ལ་སྤྱོད༔ ༀ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷར་ཏུ་རུ་ལུ་རུ་ལུ༔ གུ་རུ་དྷེ་ཝ་ཌཱཀྐི་ནི་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཨཱཿ ཞེས་པས་གནས་གསུམ་དུ་གཏུགས་ཏེ་རྫས་ལ་རོལ་པས་བདེ་ཆེན་གྱི་ཡེ་ཤེས་འབར་བར་བསམ། དེ་ནས་ཨརྒྷཾ་སོགས་ཀྱིས་མཆོད། ཐིག་ལེ་ཉག་གཅིག་གིས་བསྟོད། ཁ་སྐོང་ཞི་བའི་སྦྱིན་སྲེག་གྲངས་ཀྱང་བསྙེན་པའི་གྲངས་ཀྱི་བཅུ་ཆ་དགོས་གསུངས་པ། དེ་ཉིན་དང་ཕྱི་ཉིན་ནས་བྱ། རྗེས་ཆོག་བསྡུ་རིམ་བསྔོ་སྨོན་ཤིས་བརྗོད་རྒྱས་པར་བྱ། དེ་ནས་ཀྱང་ཞག་ཤས་ལ་ཕྱི་རོལ་དུ་རྒྱུ་འགྲུལ་མི་བྱ་བར། ནང་དུ་ཐུན་མ་ཆག་ཙམ་རེ་གུ་ཡངས་སུ་སྤྱོད། གང་ཚེ་རྒྱལ་ཐོའི་མདུན་དུ་དཀར་གཏོར་གསེར་སྐྱེམས་བཤམས་ལ། རཾ་ཡཾ་ཁཾ། ༀཨཱཿཧཱུྃ༔ ན་མཿསརྦ་ཏ་ཐཱ་ག་ཏ་བྷྱོ་སོགས་ནས་བྷ་ལིན་ཏ་སྭཱ་ཧཱ། བཛྲ་ཨརྒྷཾ་སོགས་ནས་ཤབྟའི་བར་གྱིས་མཆོད། ཀྱེ་སྔོན་ནས་ཐུགས་བསྐྱེད་བསྟན་དང་འགྲོ་བའི་མགོན། །བསྟན་སྲུང་རྒྱལ་ཆེན་སྡེ་བཞི་འཁོར་དང་བཅས། །སྔར་བྱས་ལས་ཀྱི་གཏང་རག་མཆོད་གཏོར་བཞེས། །རྣམ་དག་རང་བཞིན་ཀློང་དུ་བཛྲ་མུཿ ཞེས་རང་གནས་སུ་གཤེགས་པར་བསམ་ལ། སྐུ་གསུམ་བླ་མ་རྣམས་ཀྱི་བཀྲ་ཤིས་ཤོག །ཅེས་སོགས་ཤེས་པར་བརྗོད་ནས་ཐོ་བྱང་བསྡུ། དེ་ནས་ཕྱི་རོལ་གྱེན་དུ་ཅུང་ཟད་འགྲོ་ཞིང་མིག་ཉི་མ་ལ་བལྟ་བ་རྟེན་འབྲེལ་ཡིན་གསུངས། དང་པོར་དམ་ཚིག་གཅིག་པའི་གྲོགས་དང་འཕྲད་པར་བྱ་ཞིང་། སྔར་དུས་མི་འདྲ་བའི་རྗེས་ཐོབ་རྒྱུན་སྐྱོང་དང་། ཕྱིས་ཀྱང་བསྒྲུབ་འདུན་གྱི་བག་ཆགས་བཞག་པས་གྲུབ་པའོ། །སྨྲས་པ། འོད་སྟོང་ལྡན་པའི་མཁས་མང་མཐོ་དྲགས་པས། །དམུན་པོའི་ཁུང་བུར་གསལ་བྱེད་ཐབས་ཆག་ཚེ། །སྲིན་བུ་མེ་ཁྱེར་རང་སྔུན་རང་གསལ་ཙམ། །འདི་ལ་ལྷ་དང་བླ་མས་སྙིང་རྗེ་འཚལ། །ཇི་སྐད་བཤད་པའི་རིམ་པ་དང་། ཞུ་དག་ཆོག་པའི་ཉམས་ལེན་ནི། །རང་གི་རྔོ་མི་ཐོགས་བཞིན་དུ། །དཔེ་ཐོག་བྲོ་བརྡུང་བྱས་པ་བཤགས། །རྣམ་དག་ཆོས་ལ་དད་པའི་ཉེར་ལེན་གྱིས། །རྣམ་དཀར་ཕྲ་མོ་བརྩམས་པའི་བསིལ་ཟེར་གང་། །རྣམ་རྟོག་ལས་ཀྱིས་སྤྲུལ་པའི་ལུས་ཅན་ཀུན། །རྣམ་མཁྱེན་ཡང་སངས་རྒྱས་པའི་རྒྱུར་གྱུར་ཅིག །

ཅེས་པ་འདི་ནི་བསྙེན་སྒྲུབ་རྣལ་དུ་འབྱོར་བ་རྣམས་ལ་མ་ཡིན་ཏེ། དབང་གི་དམ་ཚིག་བསྙེན་འདོད་ཅན་རང་དོན་ཉི་ཚེ་དང་། འདི་ཉིད་སྒྲུབ་འདུན་ཡོད་པའི་མཆེད་གྲོགས་གསར་བུ་དང་སློབ་ཕྲུག་འགའ་ལའང་སྨན་པར་ཤེས་ནས། གཏེར་ཆེན་རང་གི་ཆོས་གཞུང་ལྷའི་གནྡྷེ་ལ་གཞི་བྱས། བསྙེན་ཡིག་གཞན་ནས་ཟུར་བརྒྱན། རྩ་བའི་དགོངས་པ་གུང་བསྡེབས་ཏེ། ཆ་ཚང་བར་འབྲི་བ་པོ་བྱམས་འབྱོར་རྨོངས་རྒན་སཱུཀྟ་སྟེ། ཕྱོགས་ཐམས་ཅད་དུ་དགེ་ཞིང་བཀྲ་ཤིས་པར་གྱུར་ཅིག། །།

༈ ཙིཏྟ་རང་གྲོལ་གྱིས་ཏིང་འཛིན་རྣམ་གསུམ་སྟོང་ཐུན། ༀ་ཆོས་སྐུ་དང་། ཨཱཿལོངས་སྐུ་དང་། ཧཱུྃ་སྤྲུལ་སྐུ་སྟེ། དེ་ལའང་ཕྱིའི་སྐུ་གསུམ་དང་། ནང་གི་སྐུ་གསུམ་དང་། གསང་བའི་སྐུ་གསུམ་དུ་དབྱེ་བ་དང་། རྒྱུད་གསང་བ་འདུས་པ་ལས། བསྐྱེད་པ་ལ་སོགས་དམ་ཚིག་དག །རྡོ་རྗེ་མི་བྱེད་གསུམ་བསྒོམ་པས། །ཞེས་དང་། བདེ་གཤེགས་འདུས་པའི་རྒྱུད་ལས། རིགས་བརྒྱ་རིགས་ལྔ་རིགས་གཅིག་རྣམས། །གསང་ཆེན་རིགས་གཅིག་འདི་ལ་འདུས། །སྙིང་པོ་ཡི་གེ་འབྲུ་གསུམ་གྱིས། །སྐུ་གསུང་ཐུགས་ཀྱི་དངོས་གྲུབ་ཐོབ། །ཅེས་སོགས་གསུངས་ཏེ། འདིར་ཐེག་རྩེ་རྫོགས་པ་ཆེན་པོའི་ལུགས་ལ་གཞི་གནས་སྐུ་གསུམ་གྱི་སྙིང་པོ་འབྲུ་གསུམ་ནི་ཨ་ཏི་རང་བྱུང་གི་ཚིག་བརྗོད་མེད་བརྗོད་པ་ཆེན་པོ་སྟེ། འདས་རྗེས་ལས། རིག་པ་སྐུ་གསུམ་དངོས་ཡིན་ཕྱིར། །སྐུ་གསུམ་ཡི་གེ་གསུམ་དུ་ཤར། །ཞེས་དང་། སྔ་མ་ལས། འབྲུ་གསུམ་རྒྱུ་བ་དང་བཅས་པ། །རྡོ་རྗེ་སེམས་དཔའི་སྐུ་གསུང་ཐུགས། །རང་བཞིན་ཉིད་དུ་ཡེ་ནས་གནས། །འཁོར་འདས་མ་ལུས་ཀུན་གྱི་སྲོག །གཅིག་ཏུ་གནས་པ་ཁོ་ན་སྟེ། །ཞེས་སོ། །དེའང་ནང་གསལ་ཕྲ་བའི་ཡེ་ཤེས་སུམ་ལྡན་ཞེས་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་ཀུན་ཁྱབ་སྤྲུལ་སྐུ་སྟེ། རིག་པ་སྐུ་གསུམ་གྱི་བདག་ཉིད་ཀ་ནས་དག་པའི་གནས་ལུགས་ཆོས་ཀྱི་སྐུ་ནི། འཁོར་འདས་ཀྱི་ཆོས་ཐམས་ཅད་ཡེ་ནས་སྟོང་པའི་རང་བཞིན་ཡིན་པ་ལ་ཡིན་པའི་ཚུལ་གྱིས་བཞག་པའོ། །བཞག་ཚུལ་ཡང་བདེ་གསལ་མི་རྟོག་ཤེས་ཉམས་ཅན་མ་ཡིན་པར། ནང་གསལ་སྐུ་གསུམ་གྱི་བདག་ཉིད་ཅན་ཏེ། བདེ་བ་སྤྲུལ་སྐུའི་ཏིང་ངེ་འཛིན། གསལ་བ་ལོངས་སྐུའི་ཏིང་ངེ་འཛིན། མི་རྟོག་པ་ཆོས་སྐུའི་ཏིང་ངེ་འཛིན་བསྒོམ་པ་ནི། ཡང་གསང་བླ་མེད་འདིར་སྟོང་པ་ཀ་དག་མི་གཙོ་ལྷུན་གྲུབ་གཙོ་བའི་ཕྱིར། གཞན་དུ་ཤུ་ནྱ་ཏས་སྟོང་པ་ཙམ་དང་མི་འདྲ་བའི་དེ་བཞིན་ཉིད་ཀྱི་ཏིང་ངེ་འཛིན་ཁྱད་པར་བའོ། །དེ་ཏིང་སྨྲ་བསམ་བརྗོད་དུ་མེད་པ་དེའི་རང་མདངས་གསལ་བའི་ཆ་ལོངས་སྐུ་ནི། རྣམ་པ་ཀུན་ཏུ་སྣང་ལ་བཟང་པོ་མཆོག་དང་ལྡན་པ་སྙིང་རྗེའི་ངང་ཚུལ་ཅན་རང་བཞིན་ལྷུན་གྲུབ་ཏུ་ཤར་བའི་ཚེ་ན་ཡང་། འཆར་གཞི་བློ་ནས་འདས་པའི་ཆོས་སྐུའི་ངང་ལས་གཞན་དུ་མི་འགྱུར་བ་དེ་ནི་དམིགས་པ་མེད་པའི་སྙིང་རྗེ། འགྲོ་ལའམ་སེམས་ཅན་ལ་དམིགས་པའི་སྙིང་རྗེ། ཐེག་པའམ་ཆོས་ལ་དམིགས་པའི་སྙིང་རྗེ་སྟེ་ཆོས་ཁམས་བདེ་གཤེགས་སྙིང་པོས་རང་ཆས་སུ་ཁྱབ་ཡོད་ནའང་རང་ངོ་མ་རྟོགས་པ་ལ། ཀུན་སྣང་གི་ཏིང་ངེ་འཛིན་བསྒོམ་པའོ། །སྙིང་རྗེ་དེའི་གདངས་རྩལ་མ་འགགས་པ་ཐུགས་རྗེ་ཕྱི་གསལ་སྤྲུལ་པའི་སྐུ་ནི། བདག་གི་སེམས་ཉིད་ཐ་མལ་གྱི་ཤེས་པའམ་ད་ལྟའི་རིག་པ་རང་གི་སྐུའམ་རྡོ་རྗེའི་ལུས་ཡེ་ཤེས་ཀྱི་རྩ་ཡིིག་རྙིང་གཞན་ན་བདག་ཉིད་ཐ་མལ་རང་གི་སེམས་ཞེས་སྣང་ན་སེམས་ཉིད་ཨ་མཐིང་ག་སོགས་སྤྱི་འགྲོའོ། །འཁོར་ཅན་གྱི་ངོ་བོ་ཡི་གེ་ཨ་མཐིང་གསལ་གྱི་རྣམ་པར་བསྒོམ་པ་ནི་རྒྱུའི་ཏིང་འཛིན་ནོ། །བསྐྱེད་བཟླས་ཐམས་ཅད་སྐུ་གསུམ་གྱི་ཏིང་ངེ་འཛིན་འདིའི་ངང་ལས་ཤར། འདིའི་ངང་ལ་གནས། འདིའི་ངང་དུ་ཐིམ་པས་རྩལ་སྦྱང་པ་ནི་སྐུ་གསུམ་འབྲས་བུ་རྫོགས་པ་ཆེན་པོ་ཆོས་སྐུ་སྨིན་པར་བྱེད་པའོ།། །།