རབ་གནས་ཀྱི་བཀྲ་ཤིས་སྟ་གོན་གྱི་ཆོ་ག
༈ རབ་གནས་ཀྱི་བཀྲ་ཤིས་སྟ་གོན་གྱི་ཆོ་ག་བཞུགས། །སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །སྐུ་གསུང་ཐུགས་ཀྱི་རྟེན་དག་ལ། །རབ་ཏུ་གནས་པར་བྱེད་པ་འདི། །ཐེག་ཆེན་གསང་སྔགས་ནང་ནས་ནི། །ཕྲིན་ལས་དཀའ་ཤོས་ཡིན་ཞེས་གསུངས། །གཟབ་ལ་ཞལ་གདམས་འདི་ལྟར་བྱ། །མཆོད་རྟེན་ཚད་དང་ལྡན་པ་ལ། །ག་པུར་ལ་སོགས་དྲི་བྱུགས་ལ། །ཉི་མ་དག་ལ་ལེགས་པར་སྐམ། །ཟངས་ཞབས་གནོད་སྦྱིན་ཡི་གེ་རུ། བྲིས་ལ་ལེགས་པར་བརྐོ་བར་བྱ། །མཆོད་རྣམས་སྣ་ཚོགས་གཏིང་བ་རུ། སརྦ་བིད་སོགས་རྟེན་འབྲེལ་གཞུག རིང་བསྲེལ་ལ་སོགས་དྲིར་བཅས་ཏེ། །དར་ཟབ་དག་གིས་དྲིལ་བར་བྱ། །གྲུབ་ནས་དེ་བཞིན་བྱང་ཆུབ་སེམས། །ཉན་ཐོས་རང་རྒྱལ་ལྷ་མོ་དང༌། །འཇིག་རྟེན་པ་ཡི་གཟུགས་དག་དང༌། །གསང་སྔགས་ཕར་ཕྱིན་མདོ་སྡེ་དང༌། །མཆོད་རྟེན་ལྷ་ཆུང་ལེགས་པར་གཞུག །འཁོར་ལོ་དབུ་ཞབས་མ་ལོག་པར། །ཕོ་ཡི་གཡས་ལ་མོ་ཡི་གཡོན། །ལེགས་པར་གཞུག་ཅེས་དེ་སྐད་གསུངས། །དར་དང་ཐིག་ལེའི་དྲི་དག་དང༌། །སྐུ་ཁྲུས་དྲི་དང་མེ་ཏོག་དང༌། །གསོལ་བ་འདེབས་པའི་གནས་རྣམས་ནི། །རང་གི་གཡས་ཕྱོགས་དག་ཏུ་བཞག །གཞི་སོགས་རྟེན་འབྲེལ་བཟླས་པ་ཞུ། །གཏོར་མ་གཉིས་ཀྱང་བཤམ་པར་བྱ། །ཐོག་མར་མགོན་པོ་ལྕམ་དྲལ་ལ། །ཕུལ་ལ་གསོལ་བ་གདབ་པར་བྱ། །གཉིས་པ་གནོད་བྱེད་བྱིན་ནས་ནི། །རབ་ཏུ་གནས་པར་བྱེད་པ་ལ། །བར་དུ་གཅོད་པར་བྱེད་པ་རྣམས། །རང་རང་གནས་སུ་སོངས་ཞེས་བསྒོ། །བྱང་ཆུབ་སེམས་ཀྱིས་འཕང་ནས་སུ། །ཡི་དམ་ལྷ་ཡི་ང་རྒྱལ་བྱ། །སྐུ་གསུང་ཐུགས་ཀྱིས་བྱིན་རླབས་ནས། །སྒྱུ་མ་ལྟ་བུའི་མོས་པ་བྱ། །མེ་ཏོག་སྙིམ་པར་བླངས་ནས་ནི། །གསོལ་བ་ལན་གསུམ་གདབ་པར་བྱ། །རང་བཞིན་གནས་ནས་སངས་རྒྱས་དང༌། །བྱང་ཆུབ་སེམས་དཔའ་དཔག་མེད་པ། །བྱོན་ནས་རང་གི་རིགས་ལ་ཐིམ། །དེ་ལྟར་བསམ་ཞེས་བླ་མས་གསུངས། །དེ་བས་གཟུགས་ཀྱི་སྟེང་དག་ཏུ། །ཨ་ལས་ཟླ་བའི་དཀྱིལ་འཁོར་བསམ། །སྟེང་དུ་རྟེན་འབྲེལ་མིང་དབྱེར་མེད། །འོད་དང་བཅས་པ་བསམ་པར་བྱ། །དེ་ལས་འོད་འཕྲོས་འོད་ཟེར་གྱི། །གནས་ནས་བཅོམ་ལྡན་རྡོ་རྗེ་ཆོས། །སྐུ་མདོག་དཀར་སེར་ཕྱག་གཡས་ནས། །པདྨ་དཀར་པོ་མགུལ་དང་བཅས། །གཡོན་ན་པདྨ་ཁ་བྱེ་བ། །བསྣམས་པ་ནམ་མཁར་སྤྱན་དྲངས་ལ། །མཆོད་པ་ཕུལ་ཞིང་གསོལ་བ་བཏབ། །ཡི་གེ་བཞི་ཡིས་སྤྱན་དྲངས་ལ། །རྟེན་འབྲེལ་ཐ་མི་དད་པ་ཡི། །གཟུངས་ཀྱི་ཡིག་འབྲུར་གྱུར་པར་བསམ། །ཕ་རོལ་ཕྱིན་པའི་སྟེང་དུ་ཡང༌། །ཟླ་བ་ལ་སོགས་སྔོན་དང་མཐུན། །འོད་ཀྱི་ཡུམ་ཆེན་སྐུ་མདོག་སེར། །སྤྱན་དྲངས་མཆོད་འབུལ་གསོལ་བ་འདེབས། །ཡི་གེ་བཞི་སོགས་སྔ་མ་བཞིན། །ཕ་རོལ་ཕྱིན་པའི་ཡིག་འབྲུར་བསམ། །མདོ་སྟེང་དུ་ཡང་གོང་མ་སྟེ། །འོད་ཀྱིས་སྣང་བ་མཐའ་ཡས་ནི། །སྐུ་མདོག་དམར་པོ་སྤྱན་དྲངས་ལ། །མཆོད་སོགས་སྔ་མ་བཞིན་དུ་བྱ། །མདོ་སྡེའི་ཡིག་འབྲུ་དག་ཏུ་བསམ། །ལྷ་ཆུང་སོ་སོའི་ཐུགས་ཀ་རུ། །སྒོམ་ཐབས་ཡོད་དེ་མི་འགྲུབ་པས། །རང་གི་ཐུགས་ཀའི་འོད་ཟེར་གྱིས། །རང་བཞིན་གནས་ནས་སངས་རྒྱས་དང༌། །བྱང་ཆུབ་སེམས་དཔའ་དཔག་མེད་དག །སྤྱན་དྲངས་ལྷ་ཆུང་དག་ལ་བསྟིམ། །དེ་ཡིས་སྤྲིན་ལ་སྤྲིན་བཞིན་བསམ། །དེ་ནས་འཁོར་ལོའི་སྟེང་དུ་པྃ་དམར་སེར་གཅིག་བསམ། པྃ་ཞུ་བ་ལས་པདྨ་འདབ་མ་བརྒྱད་པ་གཅིག་ཏུ་བསམ། དེའི་ལྟེ་བ་ལ་ཛཾ་བྷ་ལ་བསམ། འདབ་མའི་ཟླ་བའི་སྟེང་དུ་སོ་སོའི་སྔགས་བསམ་མོ། །སྔགས་དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ལ་ཕོག ལས་དང་ཉོན་མོངས་པའི་སྒྲིབ་པ་སྦྱངས་ནས། ཛམ་བྷ་ལ་ལ་སོགས་པའི་ཕོ་དགུ་བསམ། དེ་ཡི་ཐུགས་ཀར་ཨ་ལས་ཟླ་བའི་སྟེང་དུ་སོ་སོའི་སྔགས་བསམ། དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་ཡེ་ཤེས་ཀྱི་ཛཾ་བྷ་ལ་ལ་སོགས་པ་ཕོ་དགུ་སྤྱན་དྲངས་ལ་མདུན་གྱི་ནམ་མཁའ་ལ་བཞུགས། བགེགས་ཀྱི་རྟོག་པ་ཡོད་ན་ཨོཾ་བཛྲ་ཡཀྵ་ཧཱུྃ་ཕཊ྄། ཞེས་པས་བགེགས་བསྐྲད། མཆོད་པ་འབུལ། གསོལ་བ་གདབ། ཡི་གེ་བཞིས་སྤྱན་དྲངས་ལ། སོ་སོའི་ལྷ་རྣམས་ལ་ཐིམ་པར་བསམ། དེ་ཉིད་ཀྱང་ཡིག་འབྲུར་གྱུར་པར་བསམ་རུང༌། དེ་ཡི་བཟླས་པ་གྲུབ་ཚད་བྱ། །མོ་ཡི་འཁོར་ལོའི་སྟེང་དག་ཏུ། །པྃ་སོགས་པདྨ་དག་དང་མཚུངས། །སེམས་ཅན་རྣམས་ཀྱི་སྡིག་སྒྲིབ་སྦྱངས། །བྷ་སུ་དྷཱ་ར་ལ་སོགས་པའི། །ཇོ་མོར་བསྒྱུར་ཞིང་སྤྱན་དྲངས་ལ། །སོ་སོའི་སྔགས་ཐིམ་ཇོ་མོར་གྱུར། ཐུགས་ཀར་ཨཱཿསོགས་སྟེང་དག་ཏུ། །སོ་སོའི་སྔགས་ལས་འོད་འཕྲོས་པས། །རང་བཞིན་གྱི་གནས་ནས་ཡེ་ཤེས་སེམས་དཔའ་སྤྱན་དྲངས་གྱུར། །ནམ་མཁར་དམིགས་ལ་མཆོད་པ་འབུལ། །གསོལ་བ་གདབ་ཅིང་བགེགས་བསྐྲད་བྱ། །ཡི་གེ་བཞི་སོགས་གོང་དང་འདྲ། །མཆོད་རྟེན་ལྷ་ཆུང་ཁྱད་དག་ཏུ། །བཞུགས་ཚད་ཀུན་ལ་བཟླས་པ་ཞུ། །རང་གིས་དྲི་སྤོས་མེ་ཏོག་ལ། །དམིགས་ལ་རྟེན་འབྲེལ་སྐུ་གསུང་ཐུགས། །མང་ཉུང་བརྒྱ་རྩ་བརྒྱད་བཟླས་སོ། །ཛཾ་བྷ་ལ་ཡི་བཟླས་པ་བྱ། །དེ་ཡི་སྔགས་ནི་འདི་ལྟ་སྟེ། ཨོཾ་ཛཾ་བྷ་ལ་ཛ་ལེན་དྲ་ཡེ་བདག་གི་བ་སུ་པུཥྚིཾ་ཀུ་རུ་སྭཱ་ཧཱ། བགེགས་བསྐྲད་གུ་གུལ་བསྲེག་པར་བྱ། །མེ་ཏོག་གཡས་བསྐོར་དག་ཏུ་གཏོར། །ཆོས་ཀྱི་སྐུ་ཉིད་ཐིམ་པར་བསམ། །དྲི་ཡང་དེ་བཞིན་བྱ་བ་ཉིད། །དེ་ནས་མེ་ལོང་གཟུགས་བརྙན་ལ། །སྤྲུལ་སྐུ་དངོས་སུ་བསམ་ནས་ནི། །སྐུ་ཁྲུས་དག་ཀྱང་གསོལ་བར་བྱ། །རང་ཉིད་ཇོ་མོར་ཀྲོང་བསྐྱེད་ཀྱིས། །ཐུགས་ཀར་ཨ་ལས་ཟླ་བའི་སྟེང་དུ། རྃ་ཡིག་ལས་བྱུང་འོད་ཟེར་གྱིས། །བུདྡྷ་སངས་རྒྱས་བྱང་སེམས་དཔག་མེད་པ། །སྤྱན་དྲངས་མཆོད་རྟེན་ནང་སོར་བཞུགས། །རྟེན་འབྲེལ་ཕར་ཕྱིན་བཟོད་པར་བཀའ། །གཙུག་ཏོར་རྣམ་རྒྱལ་ལ་སོགས་པ། །རིམ་པ་བཞིན་དུ་གཞུག་པར་བྱ། །སྐུ་འབག་ལ་སོགས་ལྷ་ཆུང་རྣམས། །རིམ་པ་བཞིན་དུ་གཞུག་པར་བྱ། །ཕར་ཕྱིན་མདོ་སྡེ་འདུལ་བ་དག །རིམ་པ་བཞིན་དུ་གཞུག་པར་བྱ། །ཕར་ཕྱིན་མདོ་སྡེ་འདུལ་བ་རྣམས། །དར་དམར་དག་གིས་ལེགས་པར་དགབ། །དེ་ནས་ཕོ་ཡི་འཁོར་ལོ་དེ། །ལག་པ་གཡོན་པའི་སྟེང་བཞག་ནས། །སྦྲང་རྩི་ཞུན་མར་ཀ་ར་ཡི། །ལ་དུ་བྱས་ལ་སྲིན་ལག་གིས། །ཡིག་འབྲུ་མངོན་ལ་ཐིག་ལེ་བྱ། །གཞན་ཡང་ཁྱད་པར་བྱུགས་པར་བྱ། །མོ་ཡི་འཁོར་ལོ་དེ་དང་མཚུངས། །དབུ་སོགས་སྤྲད་ལ་མདུན་དུ་བཞག །ཤར་ཕྱོགས་གཟེར་ནི་བཏམ་པར་བྱ། །གཞན་དག་ལེགས་པར་སྡོམ་དུ་གཞུག །བྱི་དོར་བྱས་ལ་གྲལ་དུ་བཞུགས། །ཞབས་སྡོམ་ཀྱི་ཆོ་ག་ལེགས་པར་སྦྱར་བ་རྫོགས་སོ། །