དོན་མཆོག་བདུན་གྱི་ཁྲིད་ཀྱི་རིམ་པ།
ན་མོ་གུ་རུ། འཇིག་རྟེན་གསུམ་གྱི་མགོན་པོ་བླ་མ་རིན་པོ་ཆེའི་ཐུགས་ཀྱི་དགོངས་པ་ཞལ་གྱི་བདུད་རྩི། དོན་མཆོག་ཏུ་གྱུར་པ་གཅིག་གི་ཁྲིད་གསུངས་པ་ནི། དང་པོར་སེམས་བསྐྱེད་པ་ཡིན་གསུངས་སོ། །བདག་ཅག་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ཐར་པ་དང་ཐམས་ཅད་མཁྱེན་པ་ལ་བར་དུ་གཅོད་པར་བྱེད་པའི་མི་མཐུན་པའི་ཕྱོགས་སྒྲུབ་པར་བྱེད་པ་ཐམས་ཅད་ཀྱིས་གཙོར་བྱས་པའི་མ་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན། སྡུག་བསྔལ་ཐམས་ཅད་དང་བྲལ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རིན་པོ་ཆེ་ཐོབ་པར་བྱ། དེའི་ཕྱིར་དུ་ད་ནས་བཟུང་སྟེ་སངས་མ་རྒྱས་ཀྱི་བར་དུ། བདག་གི་ལུས་ངག་ཡིད་གསུམ་དགེ་བ་ལ་བཀོལ་ནམ་མ་ཤིའི་བར་དུ་ལུས་ངག་ཡིད་གསུམ་དགེ་བ་ལ་བཀོལ། དུས་དེ་རིང་ནས་བཟུང་ནས་ཉི་མ་སང་ཙམ་ཚུན་ཆད་དུ་ལུས་ངག་ཡིད་གསུམ་དགེ་བ་ལ་བཀོལ་སྙམ་ནས། དོན་མཆོག་ཏུ་གྱུར་པ་བདུན་པོའི་དོན་སྒོམ་པར་བྱེད་པ་ཡིན་གསུངས། དེ་ཡང་དང་པོ་གནས་མཆོག་གང་ཟག་ལུས་གནད་དོན་གསུམ་པའི་དོན་བསྒོམ་པ་ན། རྩ་བའི་བླ་མ་སྤྱི་བོར་བསྒོམས་ལ་མོས་གུས་བྱ། ལུས་ཡི་དམ་དུ་བསྒོམ། ལུས་ཀྱིས་ཆོས་ལྔའམ་དྲུག་དང་ལྡན་པར་བྱ་གསུངས། དེའི་ནང་ནས་སྤྱན་ནི་ཁྲོ་བོའི་སྤྱན་དང་སེམས་དཔའི་སྤྱན་ལྟ་བུ་མ་ཡིན་པའི་བག་ཙམ་ཁྲོ་བའི་ཚུལ་དུ་ཐད་ཀར་གཟིགས་པ་ཡིན་གསུངས། ཉལ་བའི་དུས་སུ་གཡས་འོག་ཏུ་ཕབ་ནས་འོག་སྒོ་བག་ཙམ་འཐེན་ནས་ཉལ་ན། རླུང་ནང་དུ་ཟིན་པ། རྨི་ལམ་དང་འོད་གསལ་ཟིན་པ་ཡིན་གསུངས། འགྲོ་བའི་དུས་སུ་གཉུག་མའི་ངང་ལས་མི་ཡེངས་པར་བྱ། ངང་པའི་འགྲོས་སྟབས་ལྟ་བུར་འགྲོ་བ་ཡིན་གསུངས། སྤྱིར་ལུས་ཀྱི་གནད་འདི་ལ་རྣམ་པ་ཐམས་ཅད་དུ་གནས་ལ་གཞན་གྱི་གོ་སྐབས་མེད་དོ་གསུངས། ད་ནི་བདེར་གཤེགས་བཀའ་བརྒྱུད་བླ་མའི་བྱིན་རླབས་དོན་དེའི་ཁྲིད་ཡིན་གསུངས། དེ་ཡང་སེམས་བསྐྱེད་དང་བླ་མ་སྤྱི་བོར་བསྒོམས་ནས། མོས་གུས་བྱེད་པ་དང༌། ཡི་དམ་ལྷ་སྔར་དང་འདྲ་བ་ལས་རང་གི་སྤྱི་བོ་ན། རྩ་བའི་བླ་མ་དྲུག་པ་རྡོ་རྗེ་འཆང་ཆེན་མན་ཆད་བཞུགས་པར་བསམ། དེ་ཐམས་ཅད་མི་དགྱེས་པ་མེད་པ་ཤིན་ཏུ་དགྱེས་པ་འཛུམ་པའི་མདངས་དང་ལྡན་པས། བདག་ལ་བྱིན་གྱིས་བརླབས་པ་ལྟ་བུར་བཞུགས་པ་ལ་མོས་གུས་སེང་སེང་བསྒོམ་མོ། །རྗེས་ལ་ཕྱག་རྒྱ་ཆེན་པོ་བསྒོམ་ཞིང་མྱོང་བར་བྱའོ། །ད་ནི་སྣ་ཚོགས་ཁ་བསྒྱུར་རིན་ཆེན་སེམས་བསྐྱེད་དོན་བྱ་བའི་ཁྲིད་ནི། དེ་ཡང་བདག་ཡུལ་གང་ན་གནས་པའི་ཡུལ་བདག་ཆེན་པོ་དེས་གཙོར་བྱས་པའི་ནམ་མཁའ་དང་མཉམ་པའི་སེམས་ཅན་ཐམས་ཅད། བླ་ན་མེད་པའི་བྱང་ཆུབ་རིན་པོ་ཆེ་ཐོབ་པར་བྱ་སྙམ་དུ་བསམ། ཁྱད་པར་དུ་ཡང་བདག་ལ་སྡང་བ་དང་གནོད་པ་སྐྱེལ་བ་ཡོད་ན། བདེ་སྐྱིད་ཕུན་སུམ་ཚོགས་པ་དང་ལྡན། དུག་ལྔ་དུག་གསུམ་གྱིས་བསྐྱེད་པའི་སྡིག་སྒྲིབ་དག་པར་བྱ་སྙམ་དུ་བསམ། བླ་ན་མེད་པའི་བྱང་ཆུབ་ཐོབ་པར་བྱ་སྙམ་དུ་བསམ། རྗེས་ཕྱག་རྒྱ་ཆེན་པོ་བསྒོམ་ཞིང་མྱོང་བར་བྱའོ། །འདིའི་སྐབས་སུ་སེམས་བསྐྱེད་ཀྱི་གནད་མང་དུ་གསུངས་པར་གདའ། ད་ནི་སྨིན་པར་བྱེད་པ་དང་གྲོལ་བར་བྱེད་པའི་ལམ་གཉིས་སྡེབས་ནས་བསྒོམ་པ་ཡིན་གསུངས། དང་པོ་དབང་བླངས་ནས་བསྐྱེད་པའི་རིམ་པ་བསྒོམ་པ་ནི། རང་གི་མདུན་གྱི་ཐད་ཀ་ན་རྩ་བའི་བླ་མ་གདན་སེང་གེའི་ཁྲི་སྣ་ཚོགས། པདྨའི་གདན་སྟེང་ན་བཞུགས་པ། དེ་ཡང་རབ་ཏུ་བྱུང་བའི་ཆ་བྱད་མ་ཡིན་པ་རྣལ་འབྱོར་པའི་ཆ་བྱད་སྐུ་གཅེར་བུ་ལ་རུས་པའི་རྒྱན་ཆ་རྣམ་པ་ལྔས་བརྒྱན་པར་བསྒོམ། ཡུམ་ཡང་རྡོ་རྗེ་ཕག་མོ་རུས་པའི་རྒྱན་སྣ་ཚོགས་ཀྱིས་བརྒྱན་པ། ཡུམ་དང་གཉིས་སུ་མེད་པའི་ཚུལ་དུ་བཞུགས་པར་བསྒོམས་ལ། བདག་ལ་བུམ་པའི་དབང་ཞུ་སྙམ་པའི་གསོལ་བ་གདབ་པ་དང༌། བླ་མའི་སྨིན་མཚམས་ནས་འོད་ཟེར་དཀར་པོ་བྱུང་ནས། རང་གི་སྨིན་མཚམས་སུ་ཕོག་པ་དང༌། རང་གི་ལུས་སྒྲིབ་སངས་ཀྱིས་དག་ནས། ལུས་ཀྱི་ནང་ཡང་འོད་ཀྱིས་དཀར་ལྟེམ་ལྟེམ་གང་བར་བསམ། ལུས་ཕྱི་ནང་མེད་པ་གང་བར་བསྒོམ་མོ། །བུམ་པའི་དབང་གི་དོན་བསྐྱེད་པའི་རིམ་པ་བསྒོམ་པ་ནི། ལུས་ཡི་དམ་གྱི་ལྷར་བསྒོམས་ལ་དབུགས་འཁོར་རེ་ལ་གསལ་བ་གསལ་བར་བསྒོམ་མོ། །ལྷ་མ་ཡིན་པ་གཞན་གོ་སྐབས་མེད་པར་བསྒོམ་གསུངས། གསང་དབང་བླང་བར་བྱ་གསང་བའི་དབང་དང་མཚན་བཅས་རྫོགས་རིམ་བསྒོམ་པ་ནི། དང་པོ་གསང་བའི་དབང་བླང་བར་བྱ། དེ་ནས་མདུན་ཐད་ན་རང་གི་རྩ་བའི་བླ་མ་གདན་སེང་གེའི་ཁྲི་སྣ་ཚོགས་པདྨའི་གདན་སྟེང་དུ་བཞུགས་པ། དེ་ཡང་ཡུམ་གྱི་རྒྱན་སྔར་དང་འདྲ་བ་ལས། བདག་གིས་གསང་བའི་དབང་ཞུ་སྙམ་གསོལ་བ་བཏབ་པ་དང་ཡབ་ཡུམ་སྦྱོར་མཚམས་ནས་རྡོ་རྗེ་དང་པདྨའི་མཚམས་ནས། བྱང་ཆུབ་ཀྱི་སེམས་དཀར་དམར་གཉིས་རང་གི་ལྕེས་བླངས་ནས་མགྲིན་པ་ལོངས་སྤྱོད་ཀྱི་འཁོར་ལོར་སླེབས་པ་དང༌། ངག་གི་སྒྲིབ་པ་སངས་ཀྱིས་དག་ནས་ལུས་སྤྱི་གཙུག་མན་ཆད་དང་རྐང་པའི་མཐིལ་ཡན་ཆད་བདེ་བས་ཁྱབ་ནས་བདེ་ཕྲིལ་ཕྲིལ་འདུག་པར་བསམ། གསང་བའི་དབང་གི་དོན་མཚན་བཅས་ཀྱི་རྫོགས་རིམ་ལྔ་ཡོད་པ་ལས། དང་པོ་གཏུམ་མོ་བསྒོམ་པ་ནི། ལྟེ་བ་མན་ཆད་རྩ་གསུམ་འདུས་མདོ་ན། ཁྲག་གི་གཏུམ་མོ་དམར་ཧྲིལ་ཧྲིལ་འདུག་པ་གཅིག་བསམ་ནས། སྟེང་རླུང་བཟུང་ནས་འོག་རླུང་འཐེན་པ་དང༌། སྣ་བུག་གཉིས་ཀྱི་རླུང་དེ་རེ་རེ་རོ་རྐྱང་གཉིས་ཀྱི་ནང་ནས་མར་སོང་ནས། མས་ཡར་མགར་བའི་སྦུད་པ་བརྒྱབ་པ་བཞིན་དུ་བུས་པས། གཏུམ་མོ་དེ་བུ་རམ་གྱི་དབུ་བའམ་རྒྱ་སྐག་བསྲེགས་པ་ལྟར་ཅིལ་ཅིལ་ཁོལ་བར་བསམ་ཞིང་རླུང་བཟུང༌། རྗེས་ལ་ཕྱག་རྒྱ་ཆེན་པོ་བསྒོམ་ཞིང་མྱོང་བར་བྱའོ། །དབང་གསུམ་པ་བླང་བ་དང་དབང་གསུམ་པའི་དོན་བསྒོམ་པའོ། །དེ་ཡང་སེམས་བསྐྱེད་པ་ནི། བདག་གི་རྒྱུད་ལ་འདོད་ཆགས་ཟག་པ་ཟུག་རྔུས་གདུང་བ་ཐམས་ཅད་བདག་གི་ཟག་པ་མེད་པའི་བདེ་བ་མྱོང་བར་བྱའོ། །གཞན་ཡང་སེམས་ཅན་གང་དང་གང་ཉོན་མོངས་པའི་ཟག་པ་ཟུག་རྔུས་གདུང་པ་ཐམས་ཅད་བདག་གིས་ཟག་པ་མེད་པའི་བདེ་བ་མྱོང་བར་བྱའོ་སྙམ་དུ་སེམས་བསྐྱེད་ལ། རང་གི་རྩ་བའི་བླ་མ་གདན་སེང་གེ་དང་སྣ་ཚོགས་པདྨ་དང་ཉི་མའི་གདན་སྟེང་ན་བཞུགས་པ། རྣལ་འབྱོར་པའི་ཆ་བྱད་སྐུ་གཅེར་བུ་ལ་རུས་རྒྱན་གོང་དང་འདྲ་བ་ལས། ཡབ་ཡུམ་དང་གཉིས་སུ་མེད་པར་བསྒོམ། རང་ཉིད་ཀྱང་རྣལ་འབྱོར་པའི་ཆ་བྱད་ཡིད་ཀྱིས་རིག་མ་སྐུ་མདོག་དམར་མོ་གཟུགས་སྡུག་པ་གཅིག་དང་སྙོམ་འཇུག་བྱས་པར་བསམ་པ་དང༌། བླ་མའི་ཐུགས་ཀ་ནས་འོད་ཟེར་ཁ་དོག་རྣམ་པ་ལྔ་སྤྲོས་ནས། རང་གི་ཐུགས་ཀར་ཐིམ་པ་དང༌། ཉོན་མོངས་པ་དུག་ལྔ་དུག་གསུམ་གྱིས་བསགས་པའི་སྡིག་པ་དང་སྒྲིབ་པ་ཐམས་ཅད་སངས་ཀྱིས་དག་པར་བསམ། འོད་ཟེར་དེས་བསྐུལ་ནས་ཡིད་ཀྱི་རིག་མ་དང་སྙོམས་འཇུག་བྱས་ལྷན་ཅིག་སྐྱེས་པའི་ཡེ་ཤེས་བདེ་སྟོང་ཕྲིལ་ཕྲིལ་དུ་འདུག་པར་བསྒོམ་མོ། །དོན་ཉམས་སུ་ལེན་པ་ནི། ཡིད་ཀྱི་རིག་མ་དང་སྙོམ་འཇུག་བྱས་པས་ལྷན་ཅིག་སྐྱེས་པའི་ཡེ་ཤེས་བདེ་སྟོང་བསྒོམ་པའོ། །དེ་ནས་འོག་རླུང་འཐེན་སྟེང་རླུང་མནན་པ་དང༌། ཐིག་ལེ་རྒྱང་གིས་སྤྱི་བོར་ཧཾ་མགོ་མཐུར་དུ་ལྟ་བ་ལ་བསྐྱལ་བར་བསམ་མོ། །རྗེས་ལ་བདག་གི་ཟག་པ་མེད་པའི་བདེ་བ་མྱོང་བ་བཞིན་དུ། སེམས་ཅན་གང་འདོད་ཆགས་ཟག་པ་ཟུག་རྔུས་གདུང་བའི་རླུང་ལ་ཟག་པ་མེད་པའི་བདེ་བ་མྱོང་བར་གྱུར་ཅིག་པའི་བསྔོ་བ་བྱའོ། །དབང་བཞི་བླང་བ་དང་དབང་བཞིའི་དོན་སྒོམ་པ་ནི། དང་པོ་སེམས་བསྐྱེད་ནས་རང་གི་རྩ་བའི་བླ་མ་མདུན་ཐད་ན་བཞུགས་པར་བསམ་ཞིང༌། དབང་བཞི་ཞུ་སྙམ་དུ་གསོལ་བ་བཏབ་པ་དང༌། བླ་མའི་སྐུ་གསུང་ཐུགས་རང་གི་ལུས་ངག་ཡིད་གསུམ་ལ་ཐིམ་ནས་ལུས་ངག་ཡིད་གསུམ་གྱི་སྡིག་སྒྲིབ་དག་ནས། མ་རིག་པའི་དྲི་མ་དྲུང་ཕྱུང་ཞིང༌། ལུས་ངག་ཡིད་གསུམ་དུ་འཛིན་པའི་རྩོལ་བ་དོར་ནས། ཆོས་ཐམས་ཅད་སྤྲོས་པའི་མཐའ་ཐམས་ཅད་དང་བྲལ་ནས། ནམ་མཁའ་རྣམ་པར་དག་པ་ལྟ་བུར་ཕྱམས་ཀྱིས་ཞོག་གསུངས། དོན་སྒོམ་པ་ནི། ཆོས་ཐམས་ཅད་ཅིར་ཡང་མི་དམིགས་པ་མཉམ་བཞག་ནམ་མཁའ་ལྟ་བུར་བསྒོམ། རྗེས་ལུས་ངག་ཡིད་གསུམ་ཟུང་འཇུག་ཏུ་བསྒོམ་པར་བྱའོ། །དེ་ནས་ཡང་རྨི་ལམ་བཟུང་བ་ཡིན་གསུངས། དེ་ཡང་སེམས་བསྐྱེད་དང་ཡི་དམ་བསྒོམ་པ་གོང་དང་འདྲ་བ་ཡིན། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་མ་བཞིའི་དབུས་ན། རྩ་བའི་བླ་མ་དང་དྲུག་པ་རྡོ་རྗེ་འཆང་ཆེན་མན་ཆད་ཚངས་བུག་ལ་གཏུག་གེ་བཞུགས་པར་བསྒོམས་ནས། རྨི་ལམ་ཟིན་པའི་གསོལ་བ་གདབ། དེ་ནས་རིམ་གྱིས་རྩ་བའི་བླ་མ་ལ་ཐམས་ཅད་ཐིམ་པར་བསམ་ནས། རྩ་བའི་བླ་མ་དེ་དར་ཅིག་གསལ་བར་བསྒོམ། དེ་ཡང་དེར་ཐིམ་པའི་རྗེས་སུ་འོད་ཀྱི་གོང་བུ་ཁ་དོག་ཕྱོགས་གཅིག་ཏུ་མ་གྲུབ་པ་སྲན་མའི་རྡོག་པོ་ཙམ་གཅིག་བསམ། དེ་ལས་འོད་ཟེར་འཕྲོས་པའམ་འཇའ་ཚོན་ལྟ་བུ་ཚངས་བུག་ལ་ཏུག་གེ གདུགས་ཕུབ་པ་ལྟ་བུ་ཀྱི་ལི་ལི་ཡོད་པར་བསྒོམ། ཉིན་པར་ཡང་དེ་ལ་དམིགས་ལ་དབང་པོའི་ཡུལ་དུ་གྱུར་པ་ཐམས་ཅད་འདི་རྨི་ལམ་ཡིན་ཨང་སྙམ་པའི་འདུན་པ་འབའ་ཞིག་བྱ་གསུངས། དེ་ནས་ཡང་འོད་གསལ་ལ་བཟུང་བ་ཡིན། དེ་ཡང་སེམས་བསྐྱེད་དང་བླ་མ་བསྒོམས་ནས། འོད་གསལ་ཟིན་པའི་གསོལ་བ་བཏབ་ནས། རང་གི་ལུས་ཡི་དམ་དུ་བསྒོམས་ནས། སྙིང་པདྨ་འདབ་བཞིའི་དབུས་ནས་ཐིག་ལེ་དཀར་ལ་འཚེར་ལ་སྣུམ་པ་སྲན་མའི་རྡོག་པོ་ཙམ་གཅིག་ཡོད་པར་བསྒོམ། ཐིག་ལེ་དེ་ཡང་ཉི་མའི་དཀྱིལ་འཁོར་ལྟ་བུ་འོད་དང་ལྡན་པ་དེ། ཇེ་ཆེར་ཇེ་ཆེར་གྱུར་ནས་ལུས་ཀྱི་བོང་དང་མཉམ་པར་བསམ། དེ་ཡང་རིམ་གྱིས་པདྨའི་སྟེང་དུ་ཐིག་ལེ་ཡུངས་ཀར་གྱི་རྡོག་པོ་ཙམ་གཅིག་ཏུ་བསྒོམས་ནས། དེ་ལ་ཤེས་པ་གཏད་ལ་ཉལ་ན་འོད་གསལ་ཟིན་པ་ཡིན་གསུངས། མ་ཟིན་ན་ལངས་ན་བླ་མ་ལ་གསོལ་བར་གདབ་ནས། ཐིག་ལེ་དེ་ལ་ཤེས་པ་གཏད་ན་འོད་གསལ་ཟིན་པ་ཡིན་གསུངས། ད་ནི་འཕོ་བ་ཡིན། དེ་ཡང་གནས་ཁང་བདེ་བར་བསྡད་ལ་ལུས་བཅོས་ནས་སེམས་བསྐྱེད་དང༌། བླ་མ་བསྒོམས་ནས་མོས་གུས་བྱེད་པ་སྔར་དང་འདྲ་བ་ལས། རང་ཡི་དམ་དུ་བསྒོམས་ཞིང་སྤྱི་བོར་ཡི་དམ་གང་རུང་བསྒོམ། དེ་ནས་ལྟེ་བ་མན་ཆད་རྩ་གསུམ་འདུས་མདོ་ན་ཧཱུྃ་སྔོན་པོ་གཅིག་བསྒོམས་ནས། སྟེང་རླུང་མནན་པ་ནི་མ་ཡིན་པའི་རང་བབས་སྒྱུ་མའི་ཁུག་པ་རེ་བཟུང༌། འོག་སྒོ་བག་ཙམ་འཐེན་པ་དང་ཧཱུྃ་དང་རྣམ་པར་ཤེས་པ་གཉིས་སྒལ་ཚིགས་ཉི་ཤུ་རྩ་བདུན་གྱི་སྟེང་དུ་རྩེར་གྱིས་ཐོན་པར་བསམ། དེ་བཞིན་དུ་རླུང་ཁུག་རེ་རེ་ནས་སྤྱི་བོའི་ཡི་དམ་ལྷ་འི་ཐུགས་ཀ་ནས་འོད་ཐག་གཅིག་ནར་གྱིས་བྱུང་ནས། ཚངས་བུག་གི་རླུང་དང་རྣམ་པར་ཤེས་པ་ལ་ཟུག་ནས་ཧཱུྃ་དང་རྣམ་པར་ཤེས་པ་འོད་ཐག་གིས་ན་ར་ར་ཁྱེར་ནས་ཡི་དམ་ལྷའི་ཐུགས་ཀར་ཐིམ་ནས། དར་གཅིག་ལ་དབུགས་འཁོར་གཅིག་ལ་ཡུན་རིང་བར་བསྒོམ། ཡང་ཡི་དམ་ལྷའི་ཐུགས་ཀ་ནས་ཧཱུྃ་དང་རྣམ་པར་ཤེས་པ་འོག་ཐག་གི་སྣེ་མོ་ལ་ན་ར་ར་བབས་ནས་ཚངས་བུག་ཏུ་སླེབ། དེ་བཞིན་དུ་ཡར་འཇོག་པས་ཀྱང༌། མྱུར་བར་ལྟེ་བ་མན་ཆད་རྩ་གསུམ་འདུས་མདོར་སླེབས་པ་དང༌། འོག་ཐག་མི་དམིགས་པར་ཚངས་བུག་ཧཾ་གིས་བཅད། སྤྱི་བོའི་ཡི་དམ་འོག་མིན་དུ་གཤེགས་ནས། ཧཱུྃ་ལ་ཤེས་པ་དར་གཅིག་བསྒོམ། ཕྱག་རྒྱ་ཆེན་པོ་བསྒོམ་ཞིང་ཉམས་སུ་མྱོང་བར་བྱའོ་གསུངས། བར་དོ་སྒོམ་པ་ནི། དེ་ཡང་གནས་ཁམས་བདེ་ཞིང་མཐོ་བའི་ཤར་དང་ནུབ་ནས་གཤའ་རྩེའམ་སྐར་ཁུང་ཡོད་པའི་གནས་དེར། སྔ་དྲོ་ནས་ཤར་དུ་ཁ་བལྟས་ནས། མདུན་གྱི་སྐར་ཁུང་ཉི་མའི་འོད་ཟེར་རྒྱག་པའི་ཐད་དུ་མེ་ལོང་བཏགས་ནས་དེའི་ནང་དུ་རང་གི་བཞིན་ཤར་སྣང་ལ་རང་བཞིན་མེད་པ་དེ་ལ་བལྟས་ནས་འདི་ངའི་ལུས་སུ་སྣང་ཤི་བ་ཡིན་པར་སྣང་ཨང་སྙམ་དུ་བསམ། ཕྱི་དྲོ་ཡང་ཁ་ནུབ་ཏུ་བལྟས་ནས་དེ་ལྟར་བསྒོམ། ལུས་ཡི་དམ་ལྷར་གསལ་བར་བསྒོམ་པ་དང༌། ཕྱག་རྒྱ་ཆེན་པོ་བསྒོམ་ཞིང་མྱོང་བར་བྱའོ། ༈ །ད་ནི་ཕྱག་རྒྱ་ཆེན་པོ་ལྷུན་གྲུབ་ལམ་ཡིན། དེ་ཡང་སེམས་བསྐྱེད་པ་དང༌། བླ་མ་བསྒོམས་ནས་མོས་གུས་བྱེད་པ་དང༌། ཡི་དམ་བསྒོམ་པ་གོང་དང་འདྲ་བ་ལས། རང་སེམས་དངོས་པོ་གཤིས་ཀྱི་གནས་ལུགས་འདི། ཕྱག་རྒྱ་ཆེན་པོར་ལྷུན་གྱིས་གྲུབ་པ་ཡིན། ཕྱག་རྒྱ་ཆེན་པོ་བསྒོམ་ཞིང་མ་ཡིན་པ་གཞན་གྱི་གོ་སྐབས་མེད་པར་བསྒོམ་གསུངས། རང་སེམས་སངས་རྒྱས་སུ་རྟོགས་ཙ་ན། ཕྱག་རྒྱ་ཆེན་པོ་མ་ཡིན་པ་གཞན་མེད། སེམས་བསྐྱེད་དང་བླ་མ་དང་ཡི་དམ་གྱི་ལྷ་བསྒོམ་པ་དང༌། མཚན་བཅས་ཐམས་ཅད་སེམས་མ་ཡིན་པ་གཞན་མེད། སེམས་ཕྱག་རྒྱ་ཆེན་པོ་ཡིན་གསུངས། བསྔོ་བ་བྱ་གསུངས། རྫོགས་སོ། །དོན་མཆོག་བདུན་པའི་ཁྲིད་ཀྱི་རིམ་པ་ཏི་ཤྲི་རས་པས་མཛད་པའོ།།