མཐའ་དྲུག་དང་ཚུལ་བཞིའི་བཤད་པ།

༈ མཐའ་དྲུག་དང་ཚུལ་བཞིའི་བཤད་པ་བཞུགས་སོ། ན་མོ་གུ་རུ། དེ་ལ་མཐའ་དྲུག་དང་ཚུལ་བཞིའི་ཁྱད་པར་ནི། དེའི་ཚིག་གཅིག་གིས་དོན་གཉིས་སམ་རེ་རེ་ལས་མི་སྟོན་ན་ནི་མཐའ་དྲུག་པ་ཡིན་ལ། དོན་བཞིའམ་གསུམ་སྟོན་པ་ནི་ཚུལ་བཞི་པའོ། །མཐའ་ནི་འགལ་བའམ་མི་མཐུན་པ་སྟོན་པས་ན་མཐའ་སྟེ། སོར་མོའི་རྩེ་མོའམ། དབུགས་གུའི་རྩེ་མོ་ལྟ་བུའོ། །དེ་ཡང་དྲང་དོན་ངེས་དོན་གཉིས་ནི་དོན་མཐའ་ལ་བརྟེན་ཏེ་མི་མཐུན་པའོ། །དགོངས་བཤད་དགོངས་མིན་གཉིས་ནི་ཚིག་མཐའ་ལ་བརྟེན་པའོ། །སྒྲ་ཇི་བཞིན་དང་ཇི་བཞིན་མ་ཡིན་པ་གཉིས་ནི་གཉི་ག་ཕལ་ཆེར་མཐའ་ལ་བརྟེན་པའོ། །དེ་ལ་དྲང་དོན་ངེས་དོན་གཉིས་ནི་དེའི་ཚིག་གཅིག་གིས་སྐལ་པ་ངན་པའི་སེམས་ཅན་མི་ཟབ་པ་བསྐྱེད་རིམ་དང༌། སྐལ་པ་བཟང་པོ་རིན་པོ་ཆེ་ལྟ་བུའི་གང་ཟག་ལ་ཟབ་མོའི་རྫོགས་རིམ་སྟོན་པའོ། །དགོངས་བཤད་ནི་དབང་པོ་རྣོན་པོའི་གང་ཟག་ལ་འོད་གསལ་དང་ཟུང་འཇུག་གི་དོན་སྟོན་པ་ལ་དོན་དེ་དང་འགལ་བའི་ཚིག་གིས་སྟོན་པའོ། །དགོངས་པ་མ་ཡིན་པ་ནི་མཆོག་འདོད་པའི་དབང་པོ་རྣོན་པོ་ལ་དོན་དང་མཐུན་པའི་ཚིག་གིས་གཙོ་ཆེར་རྫོགས་རིམ་སྟོན་པའོ། །སྒྲ་ཇི་བཞིན་པ་ནི་འཇིག་རྟེན་ནམ་བསྟན་བཅོས་ལ་གྲགས་པའི་ཚིག་གིས་གཙོ་ཆེར་བསྐྱེད་རིམ་སྟོན་པའོ། །ཇི་བཞིན་མ་ཡིན་པ་ནི་འཇིག་རྟེན་པ་ལ་མ་གྲགས་པ་དེ་བཞིན་གཤེགས་པའམ་མཁའ་འགྲོ་མས་བརྡའ་བྱས་པའོ། །དེ་ལྟར་དྲུག་པོ་ནི་རྡོ་རྗེའི་ཚིག་གཅིག་གིས་དོན་རེ་རེ་ལས་གཞན་དུ་མི་འགྱུར་བའོ། །རྒྱན་བཞི་པ་ཚུལ་བཞིའི་བཤད་པ་ནི། རྡོ་རྗེའི་ཚིག་གཅིག་གིས་དོན་བཞིའམ་གསུམ་སྟོན་ནུས་པ་སྟེ། དེ་ལ་ཡི་གེའི་དོན་ནི་སྒྲ་ཡི་སྟོབས་ཀྱིས་ཡི་གེའི་འབྲུ་མནན་ནས་བཤད་པའོ། །སྤྱིའི་དོན་ནི་ཐུན་མོང་དུ་བཤད་པ་སྟེ་དེ་ཡང་གཉིས་སོ། །མདོ་སྡེ་པ་ལ་སོགས་པ་དང་ཐུན་མོང་གི་མདོ་སོགས་སྤྱི་སྟེ། ཐུན་མོང་གི་ཆོས་གཅིག་བཤད་པའོ། །བསྐྱེད་རིམ་གྱི་ཐུན་མོང་གི་ཆོས་གཅིག་བཤད་པ་ནི་བསྐྱེད་རིམ་པའི་སྤྱིའོ། །སྦས་པ་གསུམ་ལས་སེམས་གསུམ་གྱིས་ནི་སེམས་གསུམ་དངོས་དང་དེ་དང་འབྲེལ་བ་ཡང་སྟོན། འདོད་ཆགས་ཆོས་ཀྱི་སྦས་པ་ནི་ཕྱག་རྒྱ་དང་སྙོམས་འཇུག་སྟོན། ཀུན་རྫོབ་ཀྱི་ནི་ཀུན་རྫོབ་དངོས་དེ་དང་འབྲེལ་བའི་ཆོས་ཀྱང་སྟོན་ཏོ། །དེ་རྣམས་སྦས་པར་འཇོག་པ་ནི། སྙིང་པོ་ཡོད་པ་སྦས་པ་སྟེ། སྤྱིའི་དོན་མ་ཡིན་པ་ན་སེམས་ཀྱི་དོན་སྙིང་པོ་ཡིན་པ་དེ་སྟོན་པས་སྦས་པ་སྟེ། དེ་གསུམ་ཆར་ཡང་སེམས་ཅན་གྱི་དོན་ཡིན་པས་སྦས་པའོ། །མཐར་ཐུག་པ་གཉིས་ནི་འོད་གསལ་དངོས་པོའི་མཐར་ཐུག་སྟོན་ལ་ཟུང་འཇུག་ལམ་གྱི་མཐར་ཐུག་པའོ། །ཡང་ན་འོད་གསལ་ནི་ཕ་རོལ་ཏུ་ཕྱིན་པའི་ལམ་མཐར་ཐུག་ལ། ཟུང་འཇུག་སྔགས་ཀྱི་མཐར་ཐུག་ལ་ཡང་ཟུང་འཇུག་དངོས་དང་དེ་དང་འབྲེལ་བའི་ཆོས་ཀྱང་སྟོན་ནོ། །དེ་ལྟར་བཤད་ཚུལ་བཅུ་པོས་དོན་ལ་གཅིག་པ་སྟོན་པ་ཡོད་ཀྱང༌། འོན་ཀྱང་རྗོད་བྱེད་མི་འདྲ་བ་སྟོན་པས་མཐའ་དྲུག་ཚུལ་བཞི་མི་འདྲ་བ་འབྱུང་སྟེ། དཔེར་ན་བུམ་པ་གཅིག་པུ་ལ་རྗོད་བྱེད་བུམ་པ་དང་ཀ་ལ་ཤ་ལ་སོགས་པ་མི་འདྲ་བ་དུ་མ་ཡོད་པ་བཞིན་ནོ། །གང་ཟག་གི་མཚན་ཉིད་ལ་ཨུད་པ་ལ་ལྟ་བུའི་མཚན་ཉིད་ནི་གསུམ་སྟེ། ཐོས་པ་མང་བ་དང༌། ཐོས་པའི་དུས་སུ་ཟིན་པ་དང༌། ཐོས་པའི་རྗེས་ཚིག་དོན་གཉིས་ཀ་བརྗེད་ནས་འགྲོ་བའོ། །པད་དཀར་ལྟ་བུ་ལ་གསུམ་སྟེ། ཐོས་པ་ཆེ་བ་དང༌། ཐོས་པའི་དུས་སུ་ཟིན་པ་དང༌། གཞན་ལ་སྟོན་པར་མི་ནུས་པའོ། །དེ་ལ་པདྨ་དམར་པོ་ལྟ་བུ་ལ་བཞི་སྟེ། དད་པ་ཆེ་བ་དང༌། སྙིང་རྗེ་ཆེ་བ་དང༌། ཐོས་པ་མང་བ་དང༌། ཐོས་པའི་དོན་བརྗོད་པའོ། །ཙན་དན་ལྟ་བུ་ལ་ལྔ་སྟེ། ཐོས་པ་ཉུང་བ་དང༌། ང་རྒྱལ་ཆེ་བ་དང༌། དོན་གྱི་རྩ་བ་མེད་པ་དང༌། ཚིག་གི་སྤྲོས་པ་མང་བ་དང༌། གཞན་གྱིས་བཟུང་བར་མི་ནུས་པའོ། །རིན་པོ་ཆེ་ལྟ་བུ་ལ་བདུན་ཏེ། ཚུལ་ཁྲིམས་དག་པ་དང༌། མཁས་པ་དང༌། སྒྲིན་པ་དང༌། ཤེས་རབ་ཆེ་བ་དང༌། རྒྱུན་མི་འགྱུར་བ་དང༌། སྙིང་རྗེ་ཆེ་བ་དང༌། ཐོས་པ་མང་བ་དང༌། གཞན་ལ་ལེགས་པར་སྟོན་པའོ། །ངེས་ཚིག་ནི་ཨུཏྤལ་ལ་སོགས་པ་དང་འདྲ་བའི་ཕྱིར་ཨུཏྤལ་ལྟ་བུ་ལ་སོགས་པའོ། །ཉན་འཆད་སྒོམ་པ་གསུམ་དུ་རུང་མི་རུང་བརྟགས་པ་ནི། ཨུཏ་པ་ལ་དང་པདྨ་དམར་པོ་ལྟ་བུ་ནི་ཉན་པ་པོར་རུང་སྟེ། ཐོས་པའི་དོན་བརྗེད་ཀྱང་སེམས་ལ་བག་ཆགས་བཞག་པས་ཕྱིས་འབྲས་བུ་འབྱུང་བའི་ཕྱིར་རོ། །འཆད་པ་པོ་དང་སྒོམ་པ་པོར་གནས་སྐབས་དེ་ལྟར་མི་རུང་སྟེ། ཚིག་དང་དོན་བརྗོད་པས་ད་ལྟ་ཉིད་དུ་བསྟན་རྒྱུ་དང་སྒོམ་རྒྱུ་མེད་པའི་ཕྱིར་རོ། །པད་དཀར་དང་ཙན་དན་ལྟ་བུ་གཉིས་ནི། ཉན་པ་དང་སྒྲུབ་པ་པོར་རུང་ལ། འཆད་པ་པོར་མི་རུང་སྟེ། ཚིག་གི་ཡོན་ཏན་མེད་པ་དང༌། གཞན་གྱིས་བཟུང་བར་མི་ནུས་པའི་ཕྱིར་རོ། །རིན་པོ་ཆེ་ལྟ་བུ་ནི་ཐམས་ཅད་དུ་རུང་ངོ༌། །སྒྲུབ་པ་པོའི་དབང་པོའི་བྱེ་བྲག་གི་དབྱེ་བ་རྣམ་པར་བཤད་པའོ།།