ས་སྐྱ་པ་ལ་གདམས་པ་ཡོངས་ཀྱི་དག་པ་སོགས།

ན་མོ་གུ་རུ། ཡོངས་ཀྱི་དག་པ་དགེ་བའི་བཤེས་གཉེན་པ་ཆེན་པོ་ས་སྐྱ་པའི་སྤྱན་སྔར་ཞུ་བ། ཐུགས་དམ་དང་གཞན་དོན་འཕེལ་ཞིང་སྐུ་ཁམས་བདེ་བར་བཞུགས་མཆིས། དེ་ལ་སེམས་པ་དགའ་སླད་དོན་ལ། དགེ་བའི་བཤེས་གཉེན་པས། བཅོམ་ལྡས་འདས་དཔལ་འཁོར་ལོ་བདེ་མཆོག་གི་སྐུ་དང༌། སྨན་བཟང་དྲུག་དང་འབུལ་བ་རྒྱ་ཆེན་པོ་བསྐུར་ནས་བྱུང༌། དེ་ཤིན་ཏུ་ཕྱག་བྱེད་བཟང༌། དཔེར་ན་རྒྱ་མཚོ་ཆེན་པོ་ཆུས་མི་ངོམས་པ་ལྟར། དགེ་བའི་བཤེས་གཉེན་པ་ཆོས་ཀྱི་བདག་པོ་ཡིན་ཡང༌། ཆོས་ཚིག་གཅིག་གཉིས་བསྐུར་གསུངས་པ་ཡིན། གསུང་མི་གཅོག་པས་རང་ལ་ཉམས་མྱོང་དང་རྟོགས་པ་ནི་མེད་དེ། བླ་མའི་གསུང་ཉམས་སུ་བླངས་པས་མྱོང་བའི་ཚིག་ཡ་ཟུང་ཞིག་སྙན་དུ་འབུལ་བ་ལགས། དེ་ལ་གཏུམ་མོའི་ཉམས་མྱོང་ཇི་ལྟར་སྐྱེས་པ་ཞིག་བསྐུར་གསུངས་པ་ལ། བླ་མ་རིན་པོ་ཆེ་ནཱ་རོ་པས། དངོས་པོའི་གནས་ཐབས་ལམ་དང་ནི། །འབྲས་བུ་སྐྱེ་བའི་རིམ་པའོ། །ཞེས་གསུངས་པ་ལས། དང་པོ་ལ་ལུས་སེམས་གཉིས། ལུས་དངོས་པོའི་གནས་ཐབས་མའི་མངལ་དུ་ཞུགས་ནས། ཞག་བདུན་ཕྲག་བཞི་ནས་རྩ་མདུད་ཆགས། དེ་ཕྱི་ན་རྩ་སྟོང་ཕྲག་བདུན་ཅུ་རྩ་གཉིས། བསྡུ་ན་རྩ་གསུམ་འཁོར་ལོ་བཞི་ཡི་བདག་ཉིད་ཅན་དུ་གསུངས། ལུས་སྤྱི་ཡང་རྩ་ཐམས་ཅད་ཡི་གེའི་གཟུགས་སུ་ཆགས་པ་ཡིན་ནོ། །སེམས་དངོས་པོའི་གནས་ཐབས། རིག་པ་དང་སྟོང་པ་དབྱེར་མེད་དུ་ལུས་ལ་གནས། ཁྱད་པར་དུ་དུས་ཐམས་ཅད་དུ་ལྟེ་བ་ན་ཨ་ལ་གནས། གཉིད་འཐུག་པོའི་དུས་སུ་སྙིང་གའི་ཧཱུྃ་ལ་གནས། རྨི་ལམ་གྱི་དུས་སུ་མགྲིན་པའི་ཨོཾ་ལ་གནས། འཁྲིགས་པ་སྤྱོད་པའི་དུས་སུ་སྤྱི་བོའི་ཧཾ་ལ་གནས། དེ་ལྟར་ཡང་ལུས་གནས་ལུས་ལས་མ་སྐྱེས་པའོ། །ཞེས་གསུངས་པས། ལམ་གྱི་གནས་ཐབས་གནད་ལྔས་ཉམས་སུ་བླང་བ་ནི། དུས་ཀྱི་གནད་ནམ་མ་ལངས་པ་ཕན་ཕུན་དང༌། མུན་རག་རུག་དང༌། ཉི་མའི་གུང༌། ནམ་གྱི་གུང་སྤང་ལ་དུས་ཐམས་ཅད་དུ་བསྒོམ། ལུས་ཀྱི་གནད་ལུས་ལྔའམ་དྲུག །ཡུལ་གྱི་གནད་ལྟེ་བ། རླུང་གི་གནད་སྦྱོར་བ་བཞི་ལྡན་དུ་བྱས། ཤེས་པའི་གནད་དང་པོ་མ་ལས་ཐོབ་པའི་ཁྲག་གི་གཏུམ་མོའོ། །དེ་ནས་ཨ་ཐུང༌། དེ་ནས་གཏུམ་མོའི་མེ། དེ་ནས་ཐིག་ལེ་འབར་འཛག །དེ་ནས་ཐིག་ལེ་ཉ་གང་བ། དེ་དག་ནི་མཚན་བཅས་ཀྱི་དམིགས་པའོ། །དེ་ནས་རླུང་ཕྱག་རྒྱ་ཆེན་པོ་ལ་བསླབ། འབྲས་བུ་སྐྱེ་བའི་རིམ་པ་ནི། རྟགས་ལྔ་དང་ཕན་ཡོན་བརྒྱད་དང༌། གཞན་ཡང་རྩ་དང་ཡི་གེ་གར་གནས་པར་རླུང་སེམས་འདུས་ན་ཡོན་ཏན་འདི་འབྱུང་དང་འདི་མི་འབྱུང་བྱ་བ་མེད་པའོ། །མཐར་ཐུག་ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེ་ངེས་གང་རྒྱུན་མི་འཆད་དང་འགོང་པ་མེད། །ཅེས་པས། འབྲས་བུ་ཡན་ལག་བདུན་ལྡན་ནོ། །བདག་གིས་ཉམས་སུ་བླངས་པ་ལ། ལུས་ཀྱི་གནད་དང༌། རླུང་གི་སྦྱོར་བ་དང༌། སེམས་ཀྱི་དམིགས་པ་གསུམ། དེ་གསུམ་ལུས་ཀྱི་འཕྲུལ་འཁོར་དམ་པར་བྱས། ཁྱད་པར་དུ་འོག་སྒོ་འཐེན་ནས་འཕྲུལ་འཁོར་བཅས་ནས། བདེ་དྲོད་སྐྱེ་མྱུར་བ་དང༌། ཐིག་ལེ་ཕྲ་མོ་མི་ཉམས། ཐིག་ལེ་གྱེན་དུ་འདྲོང་པར་འདུག རླུང་འཛིན་པ་དང༌། ཐིག་ལེ་འཕེལ་བ་དང་བརྟན་པར་མ་བྱས་ན། ཡོན་ཏན་མི་སྐྱེ་བར་སྣང༌། བདེ་བ་དང་གསལ་བ་ཡང༌། ཐིག་ལེ་བརྟན་པ་ལས་འབྱུང་བར་འདུག སེམས་ཀྱི་རྟོག་པ་དྭངས་པ་ཡང་ཐིག་ལེ་བརྟན་པ་ལས་འབྱུང་བས། རླུང་གི་སྦྱོར་བ་འདི་གལ་ཆེ་བར་གདའ། རླུང་རྔུབ་པ་དང་འཛིན་པ་མ་ཡག་ན་སྐྱོན་ཐམས་ཅད་དེ་ལས་འབྱུང༌། རླུང་འཛིན་ཤེས་པ་གལ་ཆེ་བར་གདའ། རླུང་བསྡུས་ནས་འཛིན་པའི་རང་བཞིན་ཡིན་ཡང༌། འོག་རླུང་འཐེན་ན་རྒྱུ་ཞབས་རྒལ་པ་ལ་ཅར་གྱིས་བྱས་ནས་མཉམ་བཞག་གི་ཕྱག་རྒྱས་རྩ་གསུམ་གྱི་མདུད་པ་ཡར་ལོན་པར་བྱ། མ་ལོན་ཡར་རྩ་གནོན་པར་བྱས་ཏེ་རླུང་ཤེད་ཀྱིས་མནན་དྲངས་ནང་དུ་ཀུངས་ཀྱིས་བྱས་ཕོ་བ་དང་ལྟེ་བ་གཉིས་ཕྱིར་འབུད་ཀྱིས་བྱས་ནས་རླུང་བཟུང་བས་ཡུན་རིང་བར་ཐུབ་པ་དང༌། རླུང་དབུ་མར་ཚུད་པའི་རྟགས་འོང་བར་འདུག ལུས་ཀྱི་འཕྲུལ་འཁོར་དང་རླུང་གི་སྦྱོར་བ་གཉིས་གནད་དུ་ཕོག་ན། སེམས་ཀྱིས་དམིགས་པ་ཡང་མ་གསལ་ན་མི་ལྟོ་སྟེ། འོ་ན་ཡང་མདའ་འཕེན་པ་ལ་དམིགས་པ་དང་འདྲ་བས་དམིགས་པ་གསལ་བར་བསྒོམ། དེ་གསུམ་འཛོམས་ན་རླུང་སྒོ་གང་འདོད་ལ་དྲོངས་པ་དང༌། རྩ་གནས་སུ་ཡི་གེ་གང་གནས་པའི་སར་རླུང་སེམས་འདུས་པའི་རྟགས་ཇི་ལྟ་བ་བཞིན་དུ་ཐོན་པ་ནི་དུ་མ་བྱུང་སྟེ། རླུང་བཟུང་ནས་ཐིག་ལེ་བརྟན་ནས་བདེ་གསལ་མི་རྟོག་པ་གསུམ་གྱི་ཉམས་ཀྱང་རྩ་གནས་གང་དུ་གཏད་ནས་རླུང་བཟུང་ན། གང་ལྟར་འདོད་པའི་རྟེན་འབྲེལ་འགྲིགས་ནས། ཇི་ལྟར་འདོད་པ་བཞིན་དུ་འབྱུང་བར་འདུག ཕྱི་ཡི་ཕྲིན་ལས་འདོད་པ་དེ་ཕྱི་ནང་རྟེན་འབྲེལ་མཐུན་པར་འབྱུང་བ་དང༌། སེམས་རིག་པ་འདི་ཡང་ལྷང་ལ་ཕྱུང་ནས། ཁོ་རང་གི་ངོ་བོ་དེ་ཡང་ཇི་ལྟ་བ་བཞིན་དུ་མཐོང་བའི་རྟོགས་པ་སྐྱེ་བར་གདའ། མ་ཡེངས་ན་ཆོས་ཐམས་ཅད་སེམས་ཡིན། ཕྱི་ཡི་ཡུལ་མེད་བྱས་ཀྱང་སྣང་བ་དང་འདྲེས་ནས་ཇི་ལྟར་རང་སྣང་སེམས་འདི་གཅིག་པུ་ཡིན་པར་མྱོང་བ་དེ་དཀའ་བར་གདའ་བས། རྟོག་པ་དང་སྣང་བ་དང་ལུས་དང་གསུམ་གྱི་རྒྱ་འདི་ཡང་རིག་པ་དྭངས་ཤིང་རླུང་སེམས་གཉིས་ལ་དབང་ཐོབ་ན་དེས་ཆོག་གམ་སྙམ། དེས་ན་རླུང་གི་སྦྱོར་བ་འདི་གལ་ཆེ། རླུང་སྐྱོན་དང་གེགས་ཅི་བྱུང་ཡང་དེ་རང་ལ་ལྷག་པར་ཤེས་པ་འབྲུ་ཚུགས་སུ་གཏད་ཅིང་རླུང་དྲག་ཏུ་བཟུང་ན། གཉེན་པོ་གཞན་སྒོམ་མི་དགོས། ཕྱག་རྒྱ་ཆེན་པོ་སྒོམ་པ་ལ་རླུང་བསྒོམ་མི་དགོས་ཟེར་ཡང་སེམས་ཀྱི་རྟ་རླུང་ཡིན། རང་སེམས་རྣམ་པར་དག་པ་ལ་དྲི་མ་སྦྱང་བྱ་དང་སྦྱོང་བྱེད་གང་ཡང་མེད་ཟེར་བ་སྣང་སྟེ། རླུང་སེམས་རྟེན་འབྲེལ་འགྲིགས་ན་རིག་པ་དྭངས་པར་སྣང༌། རིག་པ་དྭངས་པ་འདི་ལས་ཆོས་ཀྱི་སྐུ་བྱ་བ་ལོགས་ན་མེད། རྩ་དང་ཡི་གེ་རླུང་འདི་ཚེ་རྟེན་འབྲེལ་འགྲིག་ན་ཕྲིན་ལས་དང་ཡོན་ཏན་དང༌། གཟུགས་སྐུ་ལ་སོགས་པ་འདི་རང་ལས་ལོགས་ན་མི་གདའ། ས་སྐྱ་པ་ལ་གདམས་པ། ༧ ཏི་ཤྲི་རས་པས་བཀོད་པ་རྫོགས་སོ། །དགེའོ།།