ཡོན་ཏན་རྒྱལ་ལ་གདམས་པ།

བླ་མ་རིན་པོ་ཆེ་ལ་ཕྱག་འཚལ་ལོ། །སྤྱིར་སངས་རྒྱས་ཀྱི་བསྟན་པ་དར་དུས་སུ། །མི་ལུས་རིན་པོ་ཆེ་ནི་ཐོབ། དལ་བ་དང་འབྱོར་བ་ཕུན་སུམ་ཚོགས་པ་དང་ལྡན། ཡང་དག་པའི་བླ་མ་དང་ནི་མཇལ། ཐེག་ཆེན་ཆོས་དང་འཕྲད་དུ་དེར། སྐྱེ་བ་གཏན་གྱི་སོ་ནམ་གཤའ་མ་ཞིག་བྱེད་དགོས། དེ་ལ་དང་པོ་འཁོར་བ་མཐའ་དག་ལས་ཡིད་འབྱུང་དགོས། ངན་སོང་གསུམ་གྱི་སྡུག་བསྔལ་ལ་འཇིགས་ཀྱང༌། ལྷ་དང་མིའི་བདེ་བ་མི་སྤོང་ན། མཐོ་རིས་ཐོབ་ཀྱང་འཁོར་བ་དུཿཁའི་གཏན་ཞིང་ཡིན། དེས་ན་འཁོར་བ་འདི་ལས་ཡིད་འབྱུང་བ་གལ་ཆེ། ཉན་ཐོས་དང་རང་སངས་རྒྱས་ཀྱིས། བྱང་ཆུབ་དང་བྱང་ཆུབ་ཆེན་པོ་མི་འཐོབ་པས། བྱང་ཆུབ་མཆོག་ཏུ་སེམས་བསྐྱེད་དགོས། བྱང་ཆུབ་ཀྱི་སེམས་ཀྱིས་ཟིན་ན། ཅི་བྱས་ཐམས་ཅད་ཐེག་པ་ཆེན་པོའི་ལམ་ཡིན། བྱང་ཆུབ་ཀྱི་སེམས་ཞེས་བྱ་བ་ནི། སྟོང་པ་སྙིང་རྗེ་དབྱེར་མེད་ལ་བཞེད་པ་ལས། ཀྱཻའི་རྡོ་རྗེ་ལས་ཀྱང༌། སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་དེ་ལ་བརྗོད། །ཅེས་གསུངས། བྱམས་པ་དང་སྙིང་རྗེ་རྐྱང་པས་ཀྱང་རྒྱལ་ཆེན་རིགས་བཞིའི་ལྷ་ལས་མི་འདའ། བྱང་ཆུབ་སེམས་ནི་དྲི་མས་མ་གོས་པ་ཡིན་ཏེ། དྲི་མས་མ་གོས་བྱང་ཆུབ་སེམས། །དག་ཅིང་གསལ་བ་ཡེ་ཤེས་ཡིན། །ཅེས་པ་དང༌། གཞན་ཡང་ཉོན་མོངས་བྱང་ཞིང་ཡེ་ཤེས་ཆུབ། །ཅེས་པ་དང༌། སྒྲིབ་པ་སྤངས་ཤིང་བློ་རྒྱས་ཕྱིར། །ཞེས་གསུངས་པས། དྲི་མ་ནི་ཉོན་མོངས་པ་དང་ཤེས་བྱའི་སྒྲིབ་པ་ལ་སོགས་པ་མང་ཞིག་གསུངས་ན་ཡང༌། འདོད་ཆགས་སྐྱེས་ན་བྱམས་པ་སྒོམ་པ་གནས་ལོག་ཡིན། །ཞེ་སྡང་ཡོད་ན་སྙིང་རྗེ་སྒོམ་པ་རྫུན་དང་འདྲ། །གཏི་མུག་ཡོད་ན་སྟོང་པ་སྒོམ་པ་རྒྱུ་གཞན་ཡིན། །ང་རྒྱལ་ཡོད་ན་མཉམ་ཉིད་སྒོམ་པ་ཕྱོགས་རིས་ཡིན། །ཕྲག་དོག་ཡོད་ན་བདག་གཞན་བརྗེ་བ་ཀུ་རེ་ཡིན། །ཟག་མེད་བདེ་ཆེན་ཡེ་ཤེས་ལ། །འདོད་ཆགས་དགེ་བར་འགྱུར་བའི་གནས་མ་མཆིས། །གསལ་སྟོང་ཡེ་ཤེས་ཆེན་པོ་ལ། །ཞེ་སྡང་དགེ་བར་འགྱུར་བའི་གོ་སྐབས་མེད། །ཆོས་ཉིད་སྟོང་པའི་ཡེ་ཤེས་ལ། །གཏི་མུག་དགེ་བར་འགྱུར་བའི་རྒྱུ་མེད་ཕྱིར། །མཉམ་ཉིད་ཡེ་ཤེས་ཆེན་པོ་ལ། །ང་རྒྱལ་དགེ་བར་འགྱུར་བ་ཡོང་མི་སྲིད། །རྩོལ་མེད་ཡེ་ཤེས་ཆེན་པོ་ལ། །ཕྲག་དོག་དགེ་བར་འགྱུར་བ་ག་ལ་སྲིད། །ཆོས་སྐུ་ཡེ་ནས་དག་པའི་རང་བཞིན་ལ། །ཉོན་མོངས་དྲི་མ་ཡོད་པ་སུ་ཡིས་བརྗོད། །གཏི་མུག་སོལ་ནག་བརྡར་བ་ལ། །དགེ་བ་དཀར་པོ་འབྱུང་བ་ག་ལ་སྲིད། །དག་སྣང་གཟུགས་སྐུར་ཤར་བ་ལ། །འཁྲུལ་པའི་གཟུགས་བརྙན་ག་ལ་སྲིད། །དེ་བཞིན་ཆོས་སྐུའི་རྩ་བ་མ་འཆུགས་ན། །ལོ་མ་འབྲས་བུ་ཐམས་ཅད་སྨན་ཆེན་ཡིན། །གལ་ཏེ་རྩ་བ་འཆུག་གྱུར་ན། །ལོ་མ་འབྲས་བུ་དུག་ཆེན་ཡིན། །ཉོན་མོངས་ཡེ་ཤེས་སུ་འདོད་པ་དེ། །བདག་གཞན་ཕུང་བའི་དུག་ཆེན་ཡིན། །སེམས་ཉིད་ཡེ་ནས་དག་པ་ལ། །ལོ་འབྲས་སྐུ་གསུམ་ཐོབ་པ་དེ། །བདག་གཞན་གཉིས་ཀྱི་བདེ་སྐྱིད་ཡིན། །བུ་བདེ་སྐྱིད་བཞེད་ན་དེ་ལྟར་མཛོད། །ཕྱི་སྣང་བ་སྣ་ཚོགས་དཀར་དམར་འདི། །ཆོས་ཉིད་སྟོན་པའི་བླ་མ་ཡིན། །ནང་སེམས་ཉིད་སྤྲོས་དང་བྲལ་བ་འདི། །ཆོས་སྐུ་སྟོན་པའི་བླ་མ་ཡིན། །གསང་བ་བདེ་སྟོང་ཉམས་མྱོང་འདི། །ཞེན་པ་གཅོད་པའི་བླ་མ་ཡིན། བུ་བླ་མ་བསྟེན་ན་དེ་ལྟར་བསྟེན། །ཐེ་ཚོམ་ཡིད་གཉིས་མི་བྱ་ཞིང༌། ཅི་གསུངས་ཚད་མར་འཛིན་པ་དང༌། །བཀའ་གཅོག་ཁྱད་གསོད་མི་བྱེད་ན། ཅི་བསམ་འགྲུབ་པའི་གདམས་ངག་ཡིན། །བུ་གདམས་ངག་བཞེད་ན་དེ་ལྟར་མཛོད། རིགས་དྲུག་སེམས་ཅན་ཐམས་ཅད་ལ། །མཐོ་དམན་མེད་པར་བྱམས་པ་སྒོམས། ཐད་དུ་བབས་པའི་གདུལ་བྱ་ལ། །ཚིག་གི་མགོ་བསྐོར་མ་བྱེད་པར། སྙན་བརྒྱུད་ཀྱི་གདམས་ངག་གནད་དུ་བསྣུན། །སེམས་སྟོང་པ་ཉིད་ལ་སྤར་ཟིན་གྱིས། ཟག་མེད་བདེ་བའི་ཉམས་མྱོང་སྐྱེད། །མཆོག་ཐུན་མོང་གཉིས་ཀྱི་དངོས་གྲུབ་འབྱུང༌། བུ་གཞན་དོན་མཛད་ན་དེ་ལྟར་མཛོད། །འཇིག་རྟེན་ཆོས་བརྒྱད་གཏན་སྤངས་ནས། ལྷ་ཆོས་དང་མི་ཆོས་མི་བསྲེ་བར། །བཀའ་དང་བསྟན་བཅོས་མན་ངག་གི །དགོངས་པ་དང་དགོངས་མིན་བྱེ་བྲག་ལ། །སྐྲ་དང་ཨོག་ཚོམ་མི་བསྲེ་བར། །མ་འདྲེས་ཡོངས་རྫོགས་མཁས་པ་ཡིན། །བུ་མཁས་པ་བཞེད་ན་དེ་ལྟར་མཛོད། །བཀའ་དང་བསྟན་བཅོས་མ་ལུས་པ། །ཐོས་ཀྱང་རང་སེམས་རྟོགས་ལས་མེད། །རང་སེམས་རྟོགས་ན་ཐམས་ཅད་མཁྱེན། །ཕ་རོལ་ཕྱིན་པའི་མདོ་ལས་ཀྱང༌། །གཟུགས་ཤེས་ཐམས་ཅད་མཁྱེན་ཉིད་གསུངས། །བུ་ཐོས་པ་བཞེད་ན་དེ་ལྟར་མཛོད། །སྣང་སྲིད་འཁོར་འདས་ཆོས་རྣམས་ཀུན། །རང་སེམས་མིན་པ་གཅིག་ཀྱང་མེད། །བུ་རྟོགས་པ་བཞེད་ན་དེ་ལྟར་མཛོད། ཡུལ་དང་ཡུལ་ཅན་ཆོས་རྣམས་ཀུན། །གཉུག་མ་མིན་པ་གཅིག་ཀྱང་མེད། །བུ་སྒོམ་པ་བཞེད་ན་དེ་ལྟར་མཛོད། །ཐ་དད་འདུ་ཤེས་བླང་དོར་རྣམས། །གཉིས་མེད་ཆེན་པོར་རོ་གཅིག་པས། །བུ་སྤྱོད་པ་བཞེད་ན་དེ་ལྟར་མཛོད། །རང་སེམས་ཆོས་སྐུ་མངོན་གྱུར་ལ། །ཉེར་ལེན་རྒྱུ་རྐྱེན་ཚོགས་པ་དེ། །གཟུགས་སྐུས་གཞན་དོན་བྱེད་པ་ཡིན། །བུ་འབྲས་བུ་བཞེད་ན་དེ་ལྟར་མཛོད། །ཡོན་ཏན་རྒྱལ་ཞེས་གྲགས་པ་ཡི། །དགེ་བཤེས་ཆེན་པོ་ཁྱོད་ཉིད་དེ། །སྐྱེ་ས་མཐོ་ཞིང་རིགས་རྒྱུད་བཟང༌། །ཤེས་རབ་ཆེ་ཞིང་མང་དུ་ཐོས། །ཚིག་ཐ་སྙད་ཀྱི་སྒྲོ་འདོགས་ཆོད་ན་ཡང༌། །དོན་སྙན་བརྒྱུད་ཀྱི་གདུང་བ་མ་ཆོད་པས། །བདག་ཉིད་སྤྲང་བན་རས་པ་ལ། །ལྷན་སྐྱེས་སྦྱངས་པའི་ཤེས་རབ་མེད། །ཚིག་སྡེབ་སྦྱོར་མཁས་པ་མ་མཆིས་ཀྱང༌། །ཁྱེད་པས་གདམས་པ་ཞུས་པ་དེ། །ཚིགས་བཅད་ལྷུག་གཉིས་སུ་བསྡེབས་པ་འདི། །དོན་སེམས་ལ་ཡོད་པ་ཁ་རུ་ཕྱུང༌། །ཆོས་དངོས་མེད་སྟོང་པ་ཡི་གེར་བཀོད། །སྣང་བ་སྣ་ཚོགས་གཅིག་ཏུ་བསྡུས། །སྟོང་པ་ཉིད་ལ་སྤར་ཟིན་བྱས། །དོན་ཕག་ན་ཡོད་པ་མངོན་དུ་ཕྱུང༌། །རང་རིག་ཡེ་ཤེས་རྩལ་གྱིས་བསྟན། །བུ་ཉམས་སུ་ལོངས་ཤིག་དད་པ་ཅན། །ད་དུས་སེམས་ཅན་ལོག་རྟོག་ཆེ། །དོན་ལ་མི་རྟོག་ཚིག་ལ་རྟོག །གཉེན་པོས་མཐོང་ན་སྡིག་པ་སོགས། །རང་ཉིད་སེམས་ལ་བཅང་བར་བྱ། །ཕན་པར་གྱུར་ན་ཀུན་ལ་ལྟོས། །བླ་མ་ཡོན་རྒྱལ་ལ་གདམས་པ། ཏི་ཤྲི་རས་པས་བཀོད་པ་རྫོགས་སོ། །དགེའོ།།