༈ རྩ་བའི་ལྔ་པ་བརྒྱུད་འཛིན་གྱི་བཀའ་བབས་རིགས་དབོན་བྱང་ཆུབ་གཞོན་ནུ།

༈ རྩ་བའི་ལྔ་པ་བརྒྱུད་འཛིན་གྱི་བཀའ་བབས་རིགས་དབོན་བྱང་ཆུབ་གཞོན་ནུ་ནི། འཁྲུངས་ཡུལ་ཀྱེ་ལ་ཁ། ཡབ་ཀྱེ་ལ་སངས་མགོན་ལ་སྲས་གཉིས་ཡོད་པའི་ཆེ་བ་སངས་རྒྱས་དཔལ་དང༌། ཆུང་བ་བྱང་ཆུབ་གཞོན་ནུ་སྟེ། རབ་བྱུང་བཞི་པའི་༼སྤྱི་ལོ་༡༢༥༤ལ་༽ཤིང་སྟག་ལ་སྐུ་འཁྲུངས། ལུས་མེད་རྡེ་རྗེའི་མདུན་དུ་རབ་ཏུ་བྱུང༌། མཚན་བྱང་ཆུབ་གཞོན་ནུར་གསོལ། འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་རྣམས་ལ་གསན་བཞེས་རྒྱ་ཆེར་མཛད། ཁྱད་པར་ཟབ་ལམ་ནཱ་རོ་ཆོས་དྲུག །བསྲེ་འཕོ་གནད་ཀྱི་མཚམས་སྦྱོར། གྲོལ་ལམ་ཕྱག་རྒྱ་ཆེན་པོ་ལ་ཉམས་ལེན་རྩེ་གཅིག་ཏུ་མཛད་པས་ཉམས་རྟོགས་ཡོན་ཏན་མཐའ་ཡས། གསེར་གདུང་ཆེན་མོའི་གཡོན་ངོས་སུ་གདུང་འབུམ་དང༌། ལྷ་ཁང་འབུམ་ཆུང་བྱ་བ་སུམ་བརྩེགས་ཅན། ཐུབ་པའི་གསེར་སྐུ་ཆེན་མོ་སོགས་སྐུ་གསུང་ཐུགས་ཀྱི་རྟེན་མཆོད་བསམ་ལས་འདས་པ་བཞེངས། དེ་ནས་མགོ་རུའི་ཡེབ་ཏི་ཕུག་ཏུ་སྙིང་པོའི་རྣལ་འབྱོར་ལ་ཐུགས་གཞོལ་ནས་སྒྲུབ་པ་རྩེ་གཅིག་ཏུ་མཛད་པ་ལས། དུས་རེས་ཤིག་གི་ཚེ་ལྷ་ཆེན་ཚུལ་ཁྲིམས་སེང་གེས་གཙོར་མཛད་རས་ཚང་སྒོམ་སྡེའི་མི་སྣ་ཆེ་བ་རྣམས་དང༌། སྐུ་འཁོར་ཚང་མ་དེར་ཕེབས་ནས་བླ་མ་རིན་པོ་ཆེ་ཉིད་ནང་སོ་ཆེན་མོའི་ཁྲིར་ཕེབས་ནས་བསྟན་དགོན་གྱི་འཛིན་སྐྱོང་སྤེལ་གསུམ་ཆོས་སྲིད་ཟུང་འབྲེལ་གྱི་ཕྱག་བཞེས་མ་ཉམས་པའི་མཛད་བཟང་རྒྱུན་འཁྱོང་གི་ཞུ་བ་ནན་ཆེར་ཕུལ་བས། དེར་ལྷ་ཆེན་པོ་ཉིད་ཀྱི་བཀའ་མི་གཅོག་པའི་ཕྱིར་དེ་ལྟར་བྱ་གསུངས་ནས་ཕྱིར་གདན་སར་ཕེབས། གནས་དྲུག་ལྷ་མིའི་བསུ་བ་དཔེ་མེད་དང་བསྙེན་བཀུར་གྱིས་ནང་སོ་ཆེན་མོའི་གཙུག་རྒྱན་དུ་མངའ་གསོལ། དེ་ནས་གདན་ས་མཛད་ཅིང་གྲྭ་པ་བསྐྱངས་ནས་སྨིན་གྲོལ་གྱི་ཆོས་འཁོར་བསྐོར། གནས་དྲུག་པའི་མངའ་འབངས་བྱམས་བརྩེའི་སྐྱོང་བ་སོགས་རྒྱལ་བའི་སྲས་ཀྱི་མཛད་པ་ཇི་བཞིན་པ་ཁོ་ནར་སློབ་རུང༌། འགའ་ཞིག་དྲེགས་པས་སྙེམས་ཞིང་ཕྲག་དོག་པའི་རྣམ་འགྱུར་བྱུང་བར་བརྟེན། མ་ཀི་དིལ་འབུལ་གྱི་མགོ་རུ་ཚངས་མང་གསར་པ་ཞིག་བྱ་དགོས་གསུངས་ནས་གཟིམས་ཁང་གསར་པ་མཛད་དེ་ལྷ་ཁང་དང་བྲང་ཁང་སོགས་བཀོད་པ་བསམ་ལས་འདས་པ་བསྐྲུན། གོང་དུ་ནང་སོ་གོང་དུ་ནང་ཆེན་མོ་ལྷ་ཁང་གི་ཚུལ་དུ་བཞུགས་སུ་གསོལ་ཞིང༌། འགྲོ་དོན་བསམ་མི་ཁྱབ་པར་མཛད། མཐར་དགུང་ལོ་བདུན་ཅུ་ཆུ་ཕག་ས་ཟླའི་ཚེས་བཞི་ལ་གཤེགས། འཇའ་འོད་མེ་ཏོག་གི་ཆར་ཀུན་གྱི་མཐོང་སྣང་དུ་གྱུར། དེ་ནས་ཕྱོགས་ཀྱི་བླ་མ་མི་དཔོན་ལྷ་སྡེ་མི་སྡེ་ཀུན་ལ་སྐུ་ཡི་འདབས་ཆེན་པོ་བཏང་བས་ཀུན་རྔམས་ཁེངས་པར་གྱུར་ཅིང་གདུང་ཞུགས་ལ་ཕུལ་ཚེ་ལྷ་མི་ཀུན་གྱིས་མཆོད་པ་བླ་ན་མེད་པས་མདུན་བརྡར་ཏེ་ངོ་མཚར་བའི་གནས་སུ་གྱུར། གདུང་དང་རིང་བསྲེལ་གྲངས་ལས་འདས་པ་བྱུང་ཞིང་སློབ་ཚོགས་ཀྱང་མང་དུ་མཆིས་པ་ལས་གཙོ་ཆེ་བ་རིགས་དབོན་གྲགས་བྱང་བ་དང་གྲགས་ཚུལ་བ་གཉིས་སྟོང་ནག་རས་པ་བློ་གྲོས་རྡོ་རྗེ་སོགས་བྱོན་པའོ། །དེ་ཡང་ནང་ཆེན་ནང་གི་རྟེན་མཆོད་ཕུན་སུམ་ཚོགས་པ་རྣམས་ལས། ལུས་མེད་རྡོ་རྗེའི་བཞུགས་ཁྲི་ཕྱག་རྔ་གསང་བ་ལྷ་འབོད། ཚོགས་བདག་གི་སྐུ་རྟེན་དང་སྤྱན་གཟིགས་སྣ་ཚོགས་དང༌། དུང་དཀར་མོ་རྒྱང་གྲགས། ཟངས་བཀྲ་ཤིས་ཁ་གྲོ་སོགས། གཙོ་ཆེ་བ་རྣམས་དེར་བཞུགས་ཤིང༌། དེ་འཕྲོས་རྟེན་གསུམ་མཆོད་རྫས་རྣམས་ལས་ཉུང་ཤས་ཚངས་མང་གསར་པར་སྤོས་ནས་བཞུགས་པར་འདུག །

༈ རྟེན་འབྲེལ་བཀའ་བབས་བྱང་ཆུབ་མགོན་པོ་ནི། གདུང་འབེ་ཡིན་ཞིང་སྐུ་ཆུང་ངུ་ནས་རས་དཀར་བ་ལས་རབ་ཏུ་བྱུང༌། མཚན་བྱང་ཆུབ་མགོན་པོར་གསོལ། མང་སྒོམ་རས་པའི་ཉེ་གནས་མཛད་ཅིང་རས་གུར་གཉིས་ལས་ཆོས་མང་དུ་གསན། ཕྱིས་གསང་བ་ལུས་མེད་རྡོ་རྗེ་ལས་གདམས་པ་ཕྱི་ནང་གསང་གསུམ་ཐམས་ཅད་རྫོགས་པར་ཞུས་ཤིང་ཁྱད་པར་ཚོགས་བདག་གི་སྒྲུབ་སྐོར་མ་ལུས་གསན་ནས་ཤར་གླིང་ཆེ་མོར་བཞུགས་ཤིང༌། ཕྱིས་བྱང་ཆུབ་གཞོན་ནུ་ཚངས་མང་གསར་པར་བཞུགས་པའི་སྐབས་བྱང་ཆུབ་མགོན་ནང་སོ་ཆེན་མོ་མཆོད་ཁང་གི་ཚུལ་དུ་ཡོད་པ་ལ་དཀོར་གཉེར་མཛད་པར་གདའ། འདི་ཡན་ཆད་དུ་རས་ཚང་སྒོམ་སྡེ་ཞེས་ཕྱོགས་གཅིག་ཏུ་གྲགས་ཀྱང༌། བྱང་ཆུབ་གཞོན་ནུ་གཤེགས་རྗེས་སུ། བྱང་ཆུབ་མགོན་པོའི་རུས་དབོན་ཡོན་ཏན་དཔལ་ཞེས་པ་ཉིད་ས་སྐྱའི་གདན་སར་བྱོན་ཏེ། ནང་སོ་ཆེན་མོའི་བསྟན་བདག་ཆོག་པའི་བཀའ་ལུང་གོང་དུ་ཞུས་པ་ལས། སྔོན་ནས་དགེ་བའི་བཤེས་གཉེན་བྱང་ཆུབ་མགོན་པོ་ཉིད་བཞུགས་པར་མཛད་པའི་དབོན་གྱི་ཕྱིར་ད་ཡང་བཞུགས་འཚལ་གསུངས་པའི་བཀའ་ལུང་གནང་ནས་འཛིན་པ་ལ་དེ་ཕྱིན་སྒོམ་སྡེ་ནང་ཡ་གཉིས་སུ་གྲགས་པར་གྱུར་པ་ཡིན་ནོ།།

༈ རྩ་བའི་གཉིས་པ་ཆོས་སྲིད་ཟུང་འབྲེལ་སྒོ་གྱི་ནས་རྒྱས་པར་བཤད་པ་ལ་གསུམ། ཧོར་གྱི་རྒྱལ་པོའི་སྤྱན་སྔ་རས་པ་དཀར་པོ་ལ་གནས་དྲུག་ཁྲི་སྐོར་བཅུ་གཉིས་ཕུལ་ཞིང་ཆོས་སྲིད་བསྐྱང་ཚུལ། དེ་ཡ་གཉིས་སུ་གྱུར་སྐབས་ཀྱིས་སྒོམ་སྡེ་ཚངས་གསར་པའི་ལོ་རྒྱུས་རྒྱས་པར་བཤད་པ་དང༌། སྒོམ་སྡེ་ནང་ཆེན་པའི་ལོ་རྒྱུས་རྒྱས་པར་བཤད་པའོ། །དང་པོ་ནི། དེའང་རྗེ་འགྲོ་བའི་མགོན་པོ་ཏི་ཤྲཱི་རས་ཆེན་གྱི་ཐུགས་སྲས་གཅིག་པུ་སྤྱན་སྔ་རས་པ་དཀར་པོ་ཞེས་བྱང་སྐྱོ་ལྡག་ན་སེར་གྱི་གོང་བ་ཆགས་་གིས་བཅག་ནས་བཞུགས་པའི་སྐབས། ས་ཧོར་མཆོད་ཡོན་འབྲེལ། ཧོར་ཁྲིམས་བོད་ལ་འཇག་དུས། ཧོར་སེ་ཆེན་རྒྱལ་པོའི་རྒྱལ་བུ་གཽ་པེ་ལ་ཞེས་པས་མདོ་སྨད་དུ་དམག་དྲངས་ནས་བྱོན་པ་ལ། ཆོས་རྗེ་རས་པ་དཔོན་སློབ་མཇལ་དུ་བྱོན་ནས་མཇལ་དར་སྤྱན་གཟིགས་རྒྱ་ཆེར་ཕུལ་ཏེ། འགྲོ་མགོན་ཏི་ཤྲཱི་སངས་རྒྱས་རས་ཆེན་གྱི་སྐུ་འབུམ་ཆེན་མོའི་རྩར་འདིར་གཙུག་ལག་ཁང་བཞེངས་པའི་བཀའ་ལུང་གནང་བར་ཞུས་པའི་སྐབས། ཆོས་རྗེ་རས་པ་དཀར་པོ་ལ་ཤིན་ཏུ་དད་པར་གྱུར་ཏེ། རྒྱལ་པོས་སྤྱི་བོར་བཀུར་ནས་ལྷ་ཆོས་ཀྱི་བླ་མ་དང༌། གུ་ཡི་གུང་པ་སྒོམ་པ་ཨའུ་མི་ཆོས་ཀྱི་དཔོན་དུ་བསྐོས། དེའི་དུས་སུ་གནས་དྲུག་ཁྲི་སྐོར་དུ་གྲགས་པ་ཆབ་འབངས་ཀྱི་ལྷ་སྡེར་ཕུལ། དེར་གནས་བཞི་དྲུག་ལ་རེ་རེར་ཁྲི་སྡེ་གཉིས་རེ་སྡོམ་ཁྲི་སྐོར་བཅུ་གཉིས་ཡོད་པར་གྲགས། གཙུག་ལག་ཁང་བཞེངས་པའི་བཀའ་ལུང་དང། ཁྲོ་ཐམ་ཆེན་མོ་གོས་དར་གསེར་དངུལ་སོགས་ཀྱི་མཐོང་གཟིགས་བླ་ན་མེད་པར་མཛད། དེ་ནས་གཙུག་ལག་ཁང་ཕོ་བྲང་ནང་སོ་ཆེན་མོ་གོང་སྨོས་བཞིན་རྒྱ་ཆེར་བཞེངས། དེ་ལས་གུང་སྒོམ་པ་ཨའུནི་རས་དཀར་བ་ལས་གདམས་པ་ཐམས་ཅད་གསན། གནས་དྲུག་ཁྲི་སྐོར་གྱི་ལས་ཀ་བཟུང༌། རྒྱལ་སྲིད་ཀྱི་མཛད་པ་རྒྱ་ཆེ། དྲུག་ཅུ་ཐམ་པ་ལ་གཤེགས། དེ་སྐབས་ལྷ་ནང་ཚུལ་གསུམ་བྱ་བར་གྲགས་པ་ནང་པ་ནི་རས་དཀར་བ་དང་ལུས་མེད་རྡོ་རྗེ་ཡབ་སྲས་ཡིན་ལ། ལྷ་པ་ནི་ཤཱཀྱ་རྒྱལ་བ་རུས་སུམ་པ་མགྲོན་རྡོག་རས་དཀར་བའི་མདུན་ནས་རབ་ཏུ་བྱུང༌། གདམས་པ་ཐམས་ཅད་གསན། ལྷ་ཁང་ཆེན་མོའི་ལྟག་ཏུ་ཁང་པ་ནང་སར་བ་བྱ་བ་བྱས་ཤིང་ལྷ་ཁང་གི་བདག་རྐྱེན་མཛད་པས་མིང་ནང་སོ་གསར་པ་ཟེར་ཞིང་ནང་སར་བར་གྲགས། ཚུལ་པ་ནི་ཤེས་རབ་དཀོན་མཆོག་སྟེ། རུས་མང་རྗེ་ཆུང་ངུ་ནས་རས་དཀར་བའི་མདུན་ནས་རབ་ཏུ་བྱུང་ཞིང་མཚན་ཤེས་རབ་དཀོན་མཆོག །མེ་རག་སྒང་གི་མལ་དུ་ཚུལ་ཁང་ནང་ཆུང་བར་གྲགས། དེར་གུ་ཡི་གུང་པ་སྒོམ་པ་ཨའུ་འདས་རྗེས་སུ། གོང་དུ་བྱོན་ནས་ཤེས་རབ་དཀོན་མཆོག་ལ་གསེར་ཡིག་ཤལ་མོའི་ལས་ཀ་དང༌། ཤཱཀྱ་རྒྱལ་བ་ལ་དངུལ་ཡིག་སྒོར་མོའི་ལས་ཀ་བླངས་ནས་རྒྱལ་ཁྲིམས་ཀྱི་ཞབས་ཏོག་མཛད། ཤེས་རབ་དཀོན་མཆོག་གིས་གསེར་འབུམ་དང་མཆོད་རྟེན་བཞེངས། ཤཱཀྱ་རྒྱལ་བས་ཇོ་བོ་གཡུ་མདོང་དང་དངུལ་འབུམ་སོགས་བཞེངས། ཚུལ་པའིདབོན་བརྒྱུད་ལ་ནང་ཆུང་བའི་གསེར་ཡིག་པ་རྣམས་བྱུང་ཞིང་ལྷ་པའི་དབོན་བརྒྱུད་ལ་ནང་སར་པའི་དངུལ་ཡིག་པ་རྣམས་བྱུང་བ་ཡིན་ནོ། དཔལ་རྡོར་ཤེས་རབ་ཡེ་ཤེས་ནི། རས་པ་དཀར་པོའི་མདུན་ནས་རབ་ཏུ་བྱུང༌། གདམས་པ་ཀུན་ཐུགས་སུ་ཆུད་པར་མཛད། རྫུ་འཕྲུལ་ཡོན་ཏན་ལ་མངའ་བརྙེས། ཙོང་ཀ་མེ་ཉག་ཡུལ་དང་ཧོར་གྱི་ཡུལ་དུ་བྱོན། རྒྱལ་པོའི་བླ་མཆོད་མཛད་ཅིང་འགྲོ་དོན་རྒྱ་ཆེར་འཕེལ། རས་དཀར་བའི་གདུང་འབུམ་ལ་གསེར་གསོལ་བ་དང༌། དེའི་མདུན་དུ་མཆོད་རྫས་ཀྱི་བྱེ་བྲག་ཁྱད་མཚར་མང་དུ་ཕུལ་བ་དང༌། གསང་བ་ལུས་མེད་རྡོ་རྗེའི་མདུན་དང་སྐུ་འབུམ་དགོན་དུ་འབུལ་སྐྱེལ་ཆེན་པོ་མཛད་ཅིང༌། སྒོམ་སྡེའི་དར་མོ་ཆེ་ཞེས་པའི་རྣམ་བཞག་ཡང་དེའི་དུས་ནས་བྱུང་བར་གྲགས། རྟགས་ངོ་མཚར་བཅས་སྐུ་གཤེགས། ཞང་སྒོམ་རས་པ་ནི་སྨར་པ་ཤེས་རབ་ཡེ་ཤེས་ཀྱི་སློབ་མ་ཡིན་ཅིང་སྨར་ཤོད་དགོན་ནས་རྫུ་འཕྲུལ་གྱིས་བྱོན་ཏེ་སྐུ་འབུམ་དུ་ཉི་མ་མ་ཤར་གོང་ཕེབས་པར་མཛད། རས་པ་དཀར་པོའི་དྲུང་ནས་ཆོས་དྲུག་ཕྱག་ཆེན་ལ་སོགས་ཁྲིད་རྣམས་གསན་ཅིང༌། ཏི་ཤྲཱི་ནས་བརྒྱུད་པའི་ཆོས་སྐོར་རྣམས་རྫོགས་པར་ཞུས་ཏེ་རྩ་བའི་བླ་མར་འཛིན་པ་བྱུང་ངོ། འདི་དག་གི་སྐབས་སུ་གདན་ས་སྐུ་འབུམ་དུ་བླ་མ་དགེ་བའི་བཤེས་གཉེན་དགེ་འདུན་པ་ཁྲི་ཕྲག་ལས་མི་ཉུང་ཞིང་ཕྱོགས་ཀྱི་མི་སྣ་སྐྱེ་བོ་ཕོ་མོའི་འདུ་བ་བསམ་གྱིས་མི་ཁྱབ་པའི་ཆོས་སྲིད་དང་ཆབ་སྲིད་ཆེར་རྒྱས་པའང་མདོ་ཁམས་སྒང་འདིར་འདི་ལས་ལྷག་པ་མ་བྱུང་ཞིང་དཔལ་ལྡན་འབའ་རོམ་པའི་བསྟན་པའི་རྩ་ལག་ཆེན་པོ་རྨད་དུ་བྱུང་བ་ཞིག་སྟེ་འདི་སྐབས་ཀྱི་མཚན་ལ་རས་ཚང་སྒོམ་སྡེ་ཞེས་ཡོངས་སུ་གྲགས་ཤིང་གྲུབ་པ་ཉིད་དོ། །དེར་མ་ཟད་རྩ་བའི་གདན་ས་བྱང་འབའ་རོམ་རི་བོ་ཆེར་དཔལ་དར་མ་དབང་ཕྱུག་ཀྱི་དབོན་བརྒྱུད་ཁྲི་འཛིན་རག་རིམ་བྱོན་ཚུལ་ནི། ཐོག་མར་དབོན་རྒན་རྒྱལ་བ་གྲགས་པས་འབའ་རོམ་གྱི་གདན་ས་མཛད། གཅུང་ཤེས་རབ་དབང་ཕྱུག་གིས་རྩི་ཀོ་མཛོ་དགོན་གྱི་གདན་ས་བསྐྱངས། དེ་ཡི་རྗེས་སུ་དབོན་བརྒྱུད་ཁྲི་འཛིན་བྱང་ཆུབ་རྒྱལ་མཚན། གཞོན་ནུ་ཤེས་རབ་ཆོས་དབང་ཕྱུག སེང་གེ་དཔལ། རིན་ཆེན་རྒྱལ་མཚན། ནམ་མཁའ་རྒྱལ་མཚན། དེ་རྗེས་དབོན་བརྒྱུད་གཉིས་སུ་གྱེས་པའི་གཅིག་ནི་ཚུལ་ཁྲིམས་རྒྱལ་མཚན། རིན་ཆེན་རྒྱལ་པོ༌། ཀུན་དགའ་དཔལ། གཅིག་ནི་ཆོས་ཀྱི་བློ་གྲོས། ཚུལ་ཁྲིམས་རྒྱ་མཚོ། ཤཱཀྱ་དཔལ་ཏེ་ཀ་དྲུག་དང་ཀ་བཞི་རུ་གྲགས་པ་རྣམས་བྱུང་ཞིང་དེ་དག་གིས་འབའ་རོམ་པ་དངོས་ཀྱི་གདན་ས་ཡར་མར་གཉིས་བསྐྱངས་བར་མཛད་དོ། །དེས་ནི་གནས་དྲུག་ཁྲི་སྐོརགྱི་ཆོས་སྲིད་ཀྱི་བྱུང་བ་མདོར་བསྟན་པའོ། ། ༈ གཉིས་པ་སྒོམ་སྡེ་ཚང་གསར་པའི་ལོ་རྒྱུས་རྒྱས་པར་བཤད་པ་ལ་གཉིས། གདན་ས་སྐུ་འབུམ་རྩར་བསྟན་པ་བསྐྱང་ཞིང་ཆོས་སྲིད་རྒྱས་ཚུལ་དང༌། གྲྭ་ནང་དུ་མཁར་པོ་ཆེར་འཕོས་ནས་ཆོས་དང་ཆབ་སྲིད་ཇི་ལྟར་བྱུང་ཚུལ་་ལོ། །དང་པོ་ནི། ལུས་མེད་རྡོ་རྗེའི་རིགས་དབོན་བྱང་ཆུབ་གཞོན་ནུའི་མཆེད་ཀྱེ་ལ་སངས་རྒྱས་དཔལ་གྱི་སྙིང་སྟོད་དུ་ཀཱེ་ཉི་མཁར་དཀར་སེར་གྱི་གཞིས་ཀ་བཏབ། ཆོས་དང་ཆབ་སྲིད་འཇིག་རྟེན་གྱི་མངའ་ཐང་རྨད་དུ་བྱུང༌། དེ་ལ་སྲས་བཞི་ཡོད་པའི་ཆེ་བ་དབོན་གྲགས་པ་བྱང་ཆུབ་བྱང་ཆུབ་གཞོན་ནུ་ལས་རབ་ཏུ་བྱུང་གདམས་པ་ཐམས་ཅད་གསན་གདན་ས་སྐུ་འབུམ་དུ་ཚངས་མང་གསར་བའི་ཁྲིར་ཕེབས་ཏེ་བསྟན་པའི་རྒྱལ་མཚན་འཛིན་པར་མཛད། དེ་འོག་དགེ་བཤེས་གྲགས་པ་ཚུལ་ཁྲིམས་ཡང་སྐུ་འབུམ་དུ་བཞུགས། དེ་འོག་ནམ་མེ་དངཨ་རིན་གཉིས་ཀྱིས་རྫོང་དཀར་སེར་གྱི་བདག་པོ་མཛད་ནས་མངའ་འབངས་བྱམས་པས་བསྐྱངས། ནམ་མེའི་སྲས་བཞི་ལས་བརྩོན་འགྲུས་རྒྱལ་མཚན་ནི། སྤྱན་སྔ་གྲགས་བཟང་ལས་རབ་ཏུ་བྱུང༌། མདོ་སྔགས་ཀྱི་ཆོས་རྣམས་གསན་གདན་ས་སྐུ་འབུམ་གྱི་ཁྲི་འཛིན་མཛད། དགེ་བཤེས་ཡོན་ཏན་བློ་གྲོས་སྐུ་འབུམ་དུ་བཞུགས། ཨ་འབུམ་ཨ་རིན་གཉིས་སྙིང་སྟོད་དུ་མཛད་ཁྱབ་རྒྱས། ཨ་རིན་ལ་སྲས་གཉིས་ཀྱི་ཆེ་བ་བཀྲ་ཤིས་རྒྱལ་མཚན་ཉིད་བརྩོན་འགྲུས་རྒྱལ་མཚན་ལས་རབ་ཏུ་བྱུང༌། ཡབ་མེས་ཀྱིས་གདམས་སྐོར་ཐུགས་སུ་ཆུད་པར་མཛད། ཚངས་གསར་པའི་གདན་ས་མཛད། སྲས་བླ་མ་སྐྱབས་ཀྱིས་སྙིང་སྟོད་ཀྱི་སྲིད་དབང་འཛིན། བླ་མ་སྐྱབས་ཀྱི་སྲས་གསུམ་ལས་བསོད་ནམས་རིན་ཆེན་དང༌། བསོད་ནམས་རྒྱལ་མཚན་སྐུ་མཆེད་གཉིས་བཀྲ་ཤིས་རྒྱལ་མཚན་ལས་རབ་ཏུ་བྱུང༌། ཆོས་དང་གདམས་པ་བུམ་པ་གང་བྱོའི་ཚུལ་དུ་གསན། གཉིས་ཀས་ཚངས་གསར་པའི་གདན་ས་མཛད། ཆོས་ཀྱི་གྲགས་པས་སྲིད་འཛིན་གྱི་མཛད་བཟང་རྒྱས། ཆོས་གྲགས་ཀྱི་སྲས་གཉིས་ལས་བསོད་ནམས་བློ་གྲོས་བསོད་ནམས་རིན་ཆེན་ལས་རབ་ཏུ་བྱུང༌། འབའ་རོམ་བརྒྱུད་པའི་ཆོས་དང་གདམས་ཟབ་ཐམས་ཅད་ཞུས། ཚངས་གསར་པའི་ཁྲི་འཛིན་མཛད། གཅུང་བསོད་ནམས་པས་སྙིང་སྟོད་དུ་ཆབ་སྲིད་དང་མངའ་འབངས་བསྐྱངས། སྐུ་མཆེད་འདི་གཉིས་ཀྱི་རྒྱལ་དབང་ཀརྨ་པ་དེ་བཞིན་གཤེགས་པ་རྒྱ་ནག་ནས་ཡར་ཕེབས་སྐབས། གདན་ས་སྐུ་འབུམ་དུ་སྤྱན་དྲངས་དངོས་པོའི་མཆོད་སྤྲིན་བསམ་མི་ཁྱབ་པ་ཕུལ། ཆོས་དང་གདམས་པས་སྨིན་པར་མཛད། བསོད་ནམས་ཀྱི་སྲས་བཞི་ལས་བསོད་ནམས་བཟང་པོ། བསོད་རིན་པ་གཉིས། བསོད་བློ་ལས་རབ་ཏུ་བྱུང༌། མདོ་སྔགས་ཀྱི་ཆོས་ཚུལ་རྒྱ་མཚོ་ལྟ་བུ་ལ་མངའ་བརྙེས། ཡབ་མེས་ཀྱི་ཀརྨ་པ་དེ་བཞིན་གཤེགས་པ་སྐུ་འབུམ་དུ་སྤྱན་དྲངས་སྐབས། བསོད་ནམས་བཟང་པོ་ལ་ཀན་ཏིང་གོ་ཤཱིའི་ལས་ཀ་གསེར་ཐམ་ཆེན་མོ་དང༌། དུང་དཀར་མོ་རྒྱང་གྲགས། བླ་བྲེ་ནམ་མཁའ་ཀུན་ཁྱབ། ཟངས་བཀྲ་ཤིས་ཁ་གྲོ་སོགས་དངོས་པོའི་གནང་སྦྱིན་རྒྱ་ཆེན་པོ་སྩལ། ཁུ་དབོན་གཉིས་ཆར་གདམས་ཁྲིད་ཟབ་མོའི་རྗེས་འཛིན་མཛད། བསྟན་དགོན་གྱི་མཛད་པ་དར་རྒྱས་འགྲན་ཟླ་བྲལ་བ་བྱུང༌། བསོད་ནམས་ཀྱི་སྲས་གསུམ་པ་ལྷ་དཔལ་ཐར་གྱི་ཁྱུང་མོ་བླངས་པས་བུ་གསུམ་བྱུང་བ་དང༌། སྲས་བཞི་པ་ཨ་འབུམ་གྱིས་གསེར་གཟའ་ཁབ་ཏུ་བཞེས་པར་བུ་གསུམ་དང༌། སྲས་གཞན་པ་རྡོ་བཅང་པ་ཞེས་པ་གཅིག་བྱུང་ཞིང༌། དེའི་སྐབས་སུ་མ་གཉིས་བུ་དྲུག་ཟེར་བའི་རྩོད་གླེང་བྱུང་བས་ལྷ་དཔལ་བུ་བརྒྱུད་སྐུ་འབུམ་དུ་སྤོས་ཤིང་དེ་ནས་རིམ་པར་རྫ་ཉིན་དུ་ཡོད་པའི་ཚངས་གསར་པ་རྣམས་ཡིན་ཞིང༌། ཨ་འབུམ་གྱི་སྲས་ནང་པ་རྡོ་བཅང་བ་ནི་ཆུང་ངུ་ནས་རྡོ་ཟན་ལྟར་བཅང་བའི་རྫུ་འཕྲུལ་མངའ་བ་དང༌། གསེར་གཟའི་བུ་སྤྱན་སྔ་ཆོས་སྐྱོང་དཔལ་ལྡན་གཉིས་ཀརྨ་པ་ཆོས་གྲགས་རྒྱ་མཚོས་རྗེས་སུ་བཟུང་ཞིང་གདམས་པ་ཕོག །གཽ་ཤྲཱི་བསོད་ནམས་བཟང་པོ་ལས་རབ་ཏུ་བྱུང༌། འབའ་རོམ་པའི་ཆོས་སྐོར་མ་ལུས་པ་གསན་བསམ་མཛད། ཆོས་སྐྱོང་དཔལ་ལྡན་ལ་གཽ་ཤྲཱིི་ལས་ཀ་ཕེབས། གསེར་བཟའི་སྲས་ཨ་ཞལ་ལམ་བསོད་ནམས་སྟོབས་ལྡན། ཉེར་རྐེའམ་བཀྲ་ཤིས་རྒྱ་མཚོ་ཞེས་སྐུ་མཆེད་འདི་གཉིས་ཀྱིས་སྙིང་ཐང་དུ་མཁར་སྔོན་གྱིས་གཞིས་ཀ་བཏབ། དེའང་གཏེར་སྟོན་རཏྣ་གླིང་པའི་གཏེར་ལུང་ལས། ཁམས་ཀྱི་སྤྱི་འབྱམས་ཞེས་བྱ་དེར༔ ཆོས་དབྱིངས་རྡོ་རྗེའི་སྐུ་རིང་ལ༔ གཏེར་སྟོན་མི་འགྱུར་རྡོ་རྗེ་འབྱོན༔ གནས་མཆོག་དེ་ཡི་གཏེར་རྣམས་འདོན༔ ཁམས་ཀྱི་གཏེར་ཁ་བརྒྱ་ལ་དབང༔ གནས་མཆོག་དེ་ཡི་གཡས་ཕྱོགས་ན༔ ཐང་ཆེན་མཎྜལ་ཕུལ་བ་འདྲ༔ དབུས་སུ་རི་རྒྱལ་ལྷུན་པོ་ནི༔ དུང་དཀར་གཡས་སུ་འཁྱིལ་འདྲ་ཡོད༔ རྒྱ་གར་བྱ་རྒོད་སྤུང་དང་འདྲ༔ པདྨ་ང་ཡིས་གནས་མཆོག་ཡིན༔ ང་ཡི་སྤྲུལ་པ་དཔག་མེད་ནི༔ གནས་མཆོག་དེ་རུ་རྒྱུན་མི་འཆད༔ རྡོ་རྗེ་ཞེས་བྱའི་སྐྱེས་བུ་འབྱོན༔ ཆོས་ཁྲིམས་རྒྱ་ཁྲིམས་བསྟན་པ་སྐྱོངས༔ གཞན་ཡང་སྤྲུལ་པ་དཔག་མེད་འབྱོན༔ དཔུང་སྨེ་ཅན་གྱི་ཧོར་དམག་བཟློག༔ པདྨ་རྒྱལ་པོ་ང་ཡི་ནི༔ སྤྲུལ་པ་བསམ་མི་ཁྱབ་པས་ནི༔ གནས་མཆོག་དེ་རུ་ཆོས་འཁོར་བསྐོར༔ དེ་ན་སྐྱེས་བུ་ནམ་མཁའམ༔ བདེ་གཤེགས་རྒྱ་མཚོ་ཞེས་བྱ་བ༔ པདྨ་རྒྱལ་པོ་ང་ཡི་ནི༔ སྐྱེས་བུ་དེ་ནི་བྱིན་གྱིས་བརླབས༔ ཆོས་ཁྲིམས་རྒྱལ་ཁྲིམས་གཉིས་ཀྱི་བསྟན་པ་བསྲུང་༔ ཞེས་ལུང་བསྟན་པ་བཞིན་ཕྱག་ན་རྡོ་རྗེའི་སྤྲུལ་པར་གྲགས་པ་ཉེར་རྐེ་ཉིད་ཀྱི་སྟོབས་ཤུགས་ཀྱིས་ཤར་མེ་ཉག་རིང་མོ། ལྷོ་ཨ་རིགས་ཁག་བཅུ། ནུབ་རྒྱ་ཆེན་བཅོ་བརྒྱད། བྱང་གསེར་ཁོག་ཚོ་བདུན་ཞེས་པ་མངའ་ཞབས་སུ་བསྡུས། འབངས་རྣམས་བྱམས་བརྩེས་སྐྱོངས། སྒ་ནས་གསེར་ཁྲལ་སྡུད། གསེར་གྱི་བཀའ་འགྱུར་བཞེངས༌། སླར་ཡང་མདོ་མང་བཞེངས། ཀརྨ་པ་རང་བྱུང་མཚོ་སྐྱེས་རྡོ་རྗེ་སྤྱན་དྲངས། ཆིབས་ཆེན་དམར་གྭས་གཙོས་པས་ཁྲི་རྭ་ཅན་གྱི་འབུལ་བ་ཟླ་མེད་པ་ཕུལ། སྒར་ཆེན་འཛམ་གླིང་རྒྱན་གྱི་གཟིམས་གུར་གནམ་སྔོན་སླེབ་མའི་རྒྱ་ཁྱོན་ཏེ་ཕོ་བྲང་སྐྱ་ལེབ་མ་ཞེས་པ་ཀ་བ་བརྒྱ་དང་བརྒྱད་ཀྱི་མལ་མཛད། ཉེར་ཞལ་གཉིས་ཀྱི་སྐུ་རིང་ལ་ཞེས་པའི་ཆོས་སྲིད་མངའ་ཐང་དཔེ་ཟླ་མེད་པ་བྱུང༌། ནང་པ་རྡོ་བཅང་པ་ཉིད་ཀརྨ་པའི་ཕྱག་ཕྱིར་འབྲང། ཕྱག་མཛོད་ཆེན་མོ་མཛད། རྩེ་ལྷ་སྒང་སོགས་སུ་བཞུགས། ཕྱིས་ཞལ་ངོ་རྣམས་ཀྱི་མནབས་ཁྲབ་ཟུར་དུ་མཛད་པས་ཁྲབ་དཀར་ཡིད་བཞིན་ནོར་བུ་སོགས་དེ་དུས་བྱུང༌། ཀརྨ་པས་འཇིག་རྟེན་གྱི་རྫོངས་དང་བཅས་གདན་སར་བསྐོས། ཉེར་རྐེ་ལ་སྲས་གསུམ་བྱུང་བའི་ཆེ་བ་བསོད་ནམས་དོན་འགྲུབ་རྡོ་བཅང་བ་སངས་རྒྱས་དབང་ཕྱུག་ལས་རབ་ཏུ་བྱུང༌། ཡབ་མེས་ཀྱི་གདམས་སྐོར་མ་ལུས་པ་གསན། ཞྭ་དམར་བཞི་པའི་སློབ་མ་བཀའ་བཅུ་པ་བདེ་ལེགས་རྒྱ་མཚོ་ལས་མདོ་རྒྱུད་རྒྱ་མཚོ་ལྟ་བུ་གསན་བསམ་ཕུལ་དུ་སོན་པར་མཛད། འབྲིང་བ་ནམ་མཁའ་རྒྱལ་མཚན་གྱིས་རྒྱལ་སྲིད་མ་ཉམས་པར་དར་རྒྱས་མཛད། ཆུང་བ་ལྷ་རྒོད་རྒྱལ་ནི། རཏྣ་གླིང་པའི་གཏེར་ལུང་ལས། བེར་ནག་ཅན་གྱི་སྤྲུལ་པ་ཞིག༔ ལྷ་རྒོད་ཞེས་བྱས་དམག་ཚོགས་ཐམས་ཅད་བཟློག༔ ཅེས་མགོན་པོའི་སྤྲུལ་པར་གྲགས་ཤིང་ཆོས་སྲིད་ལ་ཐོ་འཚམས་པ་ཐམས་ཅད་ཚར་བཅད། འདི་གསུམ་གྱི་ཀརྨ་པ་མི་བསྐྱོད་རྡོ་རྗེ་སྤྱན་དྲངས་ཤིང་དངོས་པོའི་བསྙེན་བཀུར་མཐའ་ཀླས་པ་ཕུལ། བསོད་ནམས་དོན་གྲུབ་ལ་གོ་ཤྲཱི་ལས་ཀ་བཅས་གདན་སརབསྐོས། ནམ་མཁའ་རྒྱལ་མཚན་གྱི་སྲས་མང་དུ་ཡོད་པར་གྲགས་ཤིང་གཙོ་ཆེ་བ་བཀྲ་ཤིས་དོན་འགྲུབ་ནི་བསོད་ནམས་དོན་འགྲུབ་ལས་རབ་ཏུ་བྱུང་ཞིང་འབའ་རོམ་གྱི་གདམས་སྐོར་ཐུགས་སུ་ཆུད་པར་མཛད། བཀྲ་ཤིས་རྣམ་རྒྱལ་གྱིས་སྙིང་ཐང་དུ་ཆོས་སྲིད་བསྐྱངས། འདི་རྣམ་པས་འཇིག་རྟེན་དབང་པོ་དགུ་པ་སྙིང་ཐང་དུ་སྤྱན་དྲངས། བསུ་བ་སེར་སྦྲེང་སྔོ་སྦྲེང་སོགས་བཀོད་པ་བླ་ལྷག་དུ་མཛད། ཡོད་དགུ་ཅོག་གི་འབུལ་བ་ཕུལ་ཞིང་རྗེས་སུ་བཟུང༌། །བཀྲ་ཤིས་དོན་འགྲུབ་ལ་གོ་ཤྲཱི་འཇའ་ས་ཕེབས་ཏེ་གདན་སར་བསྐོས། བཀྲ་ཤིས་རྣམ་རྒྱལ་ལ་སྲས་གཉིས་ཡོད་པའི་ཆེ་བ་བསོད་ནམས་རྒྱ་མཚོ་བཀྲ་ཤིས་དོན་འགྲུབ་ལ་རབ་ཏུ་བྱུང་ཞིང་གདམས་པ་ཕོག །མཚན་གོ་ཤྲཱི་བསོད་ནམས་རྒྱ་མཚོ་ཞེས་སྐུ་འབུམ་གྱི་ཁྲི་འཛིན་མཛད། སྲས་གཉིས་པ་བསོད་ནམས་འཕེན་དར་ཞེས་པ་སྲིད་འཛིན་མཛད་པའི་སྲས་རྡོོ་རྗེ་འབུམ་དང༌། ཀརྨ་ཆོས་རྒྱལ་གཉིས་ལས། ཀརྨ་ཆོས་རྒྱལ་བསོད་ནམས་རྒྱ་མཚོས་རྗེས་སུ་བཟུང་ཞིང་ཡབ་ཆོས་རྫོགས་པར་མཛད། རྡོ་རྗེ་འབུམ་གྱིས་སྙིང་ཐང་དུ་སྲིད་འཛིན་མཛད་རུང་འདི་སྐབས་བེ་རུ་ཕྱི་ནང་གི་ལྐོག་གཡོ་ངན་འཕྲུལ་གྱིས་སྨད་ཀྱི་བེ་རུའི་མི་ལོག་གིས་མདོ་སྨད་ཕལ་ཆེར་བཅོམ་ནས་ངན་སྟོབས་ཆེར་རྒྱས་པའི་དབང་གིས་དམག་འཁྲུགས་མཐའ་འཁྱོལ་བ་མ་བྱུང་བས། ལྕི་ལ་གོང་ཞེས་པར་རྒྱལ་ས་འཕོས་པར་མཛད། དེ་ཡན་ནི་གདན་ས་སྐུ་འབུམ་དང་སྙིང་ཐང་དུ་ཆོས་སྲིད་ཟུང་འབྲེལ་་དུ་བསྐྱངས་ཚུལ་ལོ། །གཉིས་པ་ནི། དེའང་ལྕི་ལ་གོང་དུ་རྫོང་མཁར་པོ་ཆེར་གྲགས་པ་བརྩེགས་ནས་ཚངས་གསར་གྲྭ་ནང་ཞེས་པར་ཆོས་སྲིད་བྱུང་ཚུལ་མདོར་བསྡུས་ནི། རྡོ་རྗེ་འབུམ་གྱི་སྲས། ལྷ་སྲུང༌། བདེ་མཆོག། ཀྱཻ་རྡོར། དགེ་བཤེས་བཞི་དེ་ལས་ལྷ་སྲུང་ནི། སྔགས་རིགས་འཛིན་པའི་ཚུལ་མཛད་ཅིང༌། ཀྱཻ་རྡོར་ནི་ཀརྨ་ཆོས་རྒྱལ་ལས་རབ་ཏུ་བྱུང༌། ཀརྨ་བསྟན་སྐྱོང་ཞེས་མཚན་གསོལ། གཉིས་ཀས་མདོ་སྔགས་ཀྱི་ཆོས་མ་ལུས་པ་ལ་གསན་སྦྱངས་མཛད། ཁྱད་པར་ཡབ་མེས་ཀྱི་བདེ་མགོན་ལྷ་གསུམ་ལ་རྩེ་གཅིག་ཏུ་བསྙེན་བསྒྲུབ་ལ་ཐུགས་བསྒྲིལ། ལྷག་པར་ལྷ་སྲུང་གིས་རྔམ་རྩ་དང་ཟམ་སོའི་བྲག་དང༌། ལྕི་རཱ་ཛ་རྫོང་དང་ཇོ་མོ་གཡུ་སྒྲོན་སོགས་སུ་རི་འགྲིམ་མཛད། ཝ་རྫོང་བྲག་ལ་ཕར་འཕུར་ཚུར་འཕུར་མཛད་དེ། དགེ་བསྙེན་བར་བློན་དམ་ལ་བཏགས། བྲག་ལ་སྐུ་རྗེས་དང་ཞབས་རྗེས་བཞག །སྐུ་ཚེའི་སྨད་ལ་གཡག་གི་མགོ་ཞེས་པར་རྫོང་བརྩེགས་ཏེ་དཔལ་མགོན་པོའི་བསྒྲུབ་པ་ལ་རྩེ་གཅིག་ཏུ་ཐུགས་དམ་མཛད་ནས་གྲུབ་རྟགས་མངོན་དུ་གྱུར། བསྟན་དགྲ་བེ་རུ་མཐའ་དམག་ནུས་མཐུས་ཚར་བཅད། མཐར་རྫོང་གཡག་གི་མགོར་སྒོ་བཅད་མཛད་ནས་བཞུགས་པའི་དགུང་ལོ་གྱ་བདུན་རབ་ལོ་བཅུ་གཅིག་ཆུ་སྟག་ལ་འཇའ་ལུས་འགྲུབ། དེ་ཉིད་དུ་འོག་མིན་རྣམ་སྣང་མཛད་ཀྱི་དུར་ཁྲོད་དུ་ལས་མགོན་དབུ་སྨུག་གི་སྐུར་བཞེངས་པ་གནམ་ཆོས་མི་འགྱུར་རྡོ་རྗེ་ལ་གནས་གཏེར་གྱི་སྒོ་ནས་སྒྲུབ་ཐབས་ལས་ཚོགས་བཅས་འདས་རྗེས་སུ་བབས། ཀརྨ་བསྟན་སྐྱོང་གིས་ཇོ་མོ་གཡུ་སྒྲོན་སོགས་སུ་རི་ཁྲོད་རྩེ་གཅིག་ཏུ་མཛད་ཚངས་གསར་པའི་འབྲོག་སྒར་དུ་སྔགས་སྡེ་ཡང་མཛད། གྲུབ་པ་བརྙེས། དགེ་བཤེས་པ་ཉིད་དབུས་སུ་ཕེབས་ལྔ་པ་རིན་པོ་ཆེ་ལ་གཙུག་ཕུད་ཕུལ། མཚན་བློ་བཟང་རྒྱལ་མཚན་དུ་གསོལ། གདན་ས་འབྲས་སྤུང་དུ་ཆོས་ཞུགས་མཛད། སོག་རྒྱལ་ལ་ཨུ་ཇིང་ཐེ་ཇིའི་འཇའ་ས་དང༌། ཆོ་ལོ་དཀར་སེར་གྱི་ཐམ་ཀ་ཐོབ། ལྔ་པ་རིན་པོ་ཆེའི་མདུན་ནས་ཤེ་བམ་ཉི་ཁྱབ་མ་ཕེབས། སླར་རང་རྫོང་མཁར་པོ་ཆེར་གཏན་ཆགས་སུ་བཞུགས། ཆོས་སྲིད་ཆབ་སྲིད་ཀྱི་མཛད་ཁྱབ་འདི་པ་ཆེ་བར་བྱུང༌། ལྷ་སྲུང་གི་སྲས་གཉིས་བྱུང་བའི་ལྷ་འབུམ་ནི། འབྲོག་སྒར་ལྕི་ཉིན་སྟོད་དུ་མཛད། ཁུ་བོ་བླ་མ་བསྟན་སྐྱོང་ལས་གདམས་པ་ཐུགས་ཆུད་མཛད་ནས་སྡེ་སྲིད་ཀྱང་བསྐྱངས། རྡོ་རྗེ་དབང་ཕྱུག་གིས་རྫོང་མཁར་པོ་ཆེའི་ཆོས་སྲིད་ཀྱི་ཁྲི་འཛིན་བཛད། མངའ་ཐང་ཡང་དཔེ་མེད་པ་བྱུང༌། དེ་ལ་སྲས་གཉིས་ཀྱི་ཀརྨ་མཁར་ཆེའི་རྫོང་འཛིན་མཛད། ཀརྨ་ཚངས་དབྱངས། ཀརྨ་བསྟན་སྐྱོང་ཁུ་དབོན་གཉིས་ཀྱིས་ཀརྨ་པ་ཆོས་དབྱིངས་རྡོ་རྗེ་དང༌། དྲུང་སི་ཏུ་པ་སོགས་མཇལ། དངོས་འབུལ་རྒྱ་ཆེར་མཛད། ཆོས་དང་ཆབ་སྲིད་ཟུང་འབྲེལ་དུ་བསྐྱངས། དེ་ནས་ཚངས་གསར་ཀརྨའི་སྲས་ཀརྨ་ངག་དབང་དར་རྒྱས་དང༌། རིན་ཆེན་ལྷུན་གྲུབ་གཉིས་ལྕི་སྲིབ་སྟོད་མདོ་ཐང་ཁར་གཏན་ཆགས་ཤིང༌། རྫོང་མཁར་པོ་ཆེར་བློ་བཟང་རྒྱལ་མཚན་གྱི་སྤྲུལ་སྐུ་ཁྲི་བཞག་བྱས་པས་སྲིད་ཁྲི་འཛིན་པ་སྟེ། མཚན་བློ་བཟང་བསྟན་འཛིན་དབང་ཕྱུག་ཏུ་གྲགས། ཚངས་གསར་རིན་ཆེན་ལྷུན་གྲུབ་ནི། ཁུ་བོ་བླ་མ་ཀརྨ་ཚངས་དབྱངས་ལས་འབའ་རོམ་ལས་བརྒྱུད་པའིཆོས་ཡོད་དགུ་ཅོག་དང་ཕྱག་ལེན་རྣམས་མ་ཉམས་པར་སློབ་པར་མཛད། ཤོར་ཕུ་བླ་མ་ཀརྨ་དཔལ་འབྱོར་ལས་མ་མགོན་གཉིས་ཀྱི་རྒྱུད་དང་གདམས་སྐོར་བེ་བུམ་རྣམས་ཞུས་ཏེ་ཐུགས་ཉམས་སུ་བཞེས། མོ་ཁད་ལྷ་རྩེ་དང༌། བྱང་གཉན་གྱི་མགུར་རྣམས་སུ་རི་འགྲིམ་དང་རྗེས་སུ་འཇོ་ར་མཁར་དཀར་ཞེས་པའི་དགོན་བཏབ། ཁམས་ཀུན་དགའ་བསྟན་འཛིན་གཡེར་ཆེན་སྒར་དུ་མཇལ། གུ་རུའི་དུས་སྟོན་ཚེས་བཅུ་ཆེན་མོའི་བཀའ་བབ་ཏུ་དབུགས་དབྱུང༌། དེ་ནས་བརྩམས་བྱང་ཁམས་སྟོད་དུ་ཚེས་བཅུའི་གར་འཆམ་སྒོ་ནས་འགྲོ་རྣམས་སྨིན་གྲོལ་ལ་བཀོད། དགེ་རྒྱལ་དུ་ཡོལ་གཉེན་གྱི་བྱིས་དང༌། ལྕི་སྟོད་གོ་ཝེ་བྱིས་གཉིས་འཛུག་པའི་སྐབས་ཆུ་ཕར་ཚུར་གྱི་བྲག་ཁར་བྱིས་ཐག་གི་འགྱིང་ཕུར་བཙུག་པ་སོགས་རྫུ་འཕྲུལ་བསམ་མི་ཁྱབ་པ་མཛད། མཐར་མཁར་དཀར་དུ་དགུང་གྲངས་རེ་གཉིས་པ་མེ་ལུག་ལ་སྐུ་གཤེགས། ཀརྨ་ངང་དར་གྱིས་ལྷ་གཟིགས་བཟའ་ཆོས་འཛོམས་ཁབ་ཏུ་བཞེས་པའི་སྲས་བསོད་ནམས་སྟོབས་རྒྱལ། ངག་དབང་ཕྲིན་ལས། ངག་དབང་རྣམ་རྒྱལ། བསོད་ནམས་ཡེ་ཤེས། ལྕམ་སྲིང་བསམ་ལུ་རྣམས་འཁྲུངས། ངག་དབང་ཕྲིན་ལས། ངག་དབང་རྣམ་རྒྱལ། བསོད་ནམས་ཡེ་ཤེས་སྐུ་མཆེད་འདི་གསུམ་ལ་སྲས་ནོར་བུ་རྩེ་གསུམ་དུ་གྲགས་ཤིང༌། ཀརྨ་པ་ཡེ་ཤེས་རྡོ་རྗེ་ལ་རབ་ཏུ་བྱུང༌། གསང་སྔགས་གསར་རྙིང་གི་ཆོས་སྐོར་མ་ལུས་པ་གསན་ཏེ་ཐུགས་སྲས་དམ་པ་རྣམས་སུ་གྱུར། ཁོ་བོ་བླ་མ་རིན་ཆེན་ལྷུན་གྲུབ་ནས་འབའ་རོམ་པའི་ཆོས་སྐོར་དང་ཡབ་མེས་ཀྱི་ཆོས་སྐོར་མཐའ་དག་ཐུགས་སུ་ཆུད་པར་མཛད། ངག་དབང་ཕྲིན་ལས་ཀྱི་བླ་ཁྱབ་དགོན་བྱང་ཆུབ་ཆོས་གླིང་བཏབ། ངག་དབང་རྣམ་རྒྱལ་གྱིས་དཔལ་ཁའི་བདེ་མོ་བཀྲ་ཤིས་ཆོས་གླིང་དང༌། བསོད་ནམས་ཡེ་ཤེས་ཀྱིས་གནམ་དགོན་ཐུབ་བསྟན་རྣམ་དག་གླིང་བཏབ། སོ་སོའི་བསྟན་དགོན་གྱི་འཛིན་སྐྱོང་སྤེལ་གསུམ་དང༌། གྲུབ་པའི་གོ་འཕང་མངོན་དུ་མཛད། ཁྱད་པར་བསོད་ནམས་ཡེ་ཤེས་ནི་ལས་མགོན་གྱི་སྤྲུལ་པར་གྲགས་ཤིང་ཞྭ་དམར་པའི་སྐུ་རྐྱེན་བསལ། དེ་ནས་འདི་གསུམ་གྱི་སྤྲུལ་བརྒྱུད་རིམ་པར་བྱོན་པ་ཡིན། དབོན་བསོད་ནམས་སྟོབས་རྒྱལ་གྱིིས་ལྕི་སྲིབ་ཀྱི་སྲིད་འཛིན་མཛད་པའི་སྲས་བསོད་ནམས་རྒྱལ་བ། དོན་འགྲུབ་རྒྱལ་བ་གཉིས་བྱོན་པ་ཡིན། ལྕམ་མོ་བསམ་ལུ་ནི་ནང་ཆེན་དཀོན་མཆོག་རྒྱལ་པོའི་ཆུན་མར་བྱོན་པ་ལགས། དེ་ནས་ངག་སྤྲུལ་གཉིས་པ་ཨ་མགོན་མཁྱེན་རབ་དབང་ཕྱུག། རྣམ་རྒྱལ་གཉིས་པ་ཚངས་གསརཀརྨ་བསྟན་འཛིན། བསོད་ཡེས་གཉིས་པ་སེར་རྩ་ཀརྨ་ཚུལ་ཁྲིམས་མཐར་ཕྱིན་ཏེ། འདི་གསུམ་ཀརྨ་པ་བྱང་ཆུབ་རྡོ་རྗེའི་རྗེས་སུ་བཟུང་ཤིང་སྒྲུབ་བརྒྱུད་ཀརྨ་ཀཾ་ཚང་གི་ཆོས་སྐོར་དང༌། མདོ་སྔགས་ཀྱི་ཆོས་ཚུལ་རྣམས་ཞུས། དབོན་གུ་རུ་དྷརྨ་ཙཀྲ་ལས། འབའ་རོམ་པའི་གདམས་སྐོར་རྣམས་ཕལ་ཆེར་གསན། མདོ་ཁམས་དཔལ་སྤུངས་སུ་སི་ཏུ་ཆོས་ཀྱི་འབྱུང་གནས་ཀྱི་ཞབས་པད་རྩེ་གཅིག་ཏུ་བསྙེན་ནས་ཆོས་ཀྱི་བདུད་རྩི་ཟབ་མོས་ཐུགས་ཚིམ་པར་བཞེས། སོ་སོའི་གདན་ས་བསྐྱངས་ནས་མཛད་ཕྲིན་རྒྱས། དཔོན་བསོད་ནམས་རྒྱལ་བ་འགྲམ་ཁར་གཏན་ཆགས་པར་མཛད་པའི་སྲས་ཀརྨ་དོན་གྲུབ། བསོད་ཡེས་གསུམ་པ་ཀརྨ་ཡེ་ཤེས་སྙིང་པོ་རིན་ཆེན་དབང་རྒྱལ། བསྟན་པ་རྣམ་རྒྱལ་ཡེ་ཤེས་དབང་ཕྱུག་རྣམས་བྱོན། དོན་གྲུབ་རྒྱལ་བ་མདོ་ཐང་ཁར་བཞུགས་པར་སྲས་མ་བྱུང་བར་ཡེ་ཤེས་དབང་ཕྱུག་ཡར་བྱོན་ནས་བཞུགས། ཀརྨ་དོན་གྲུབ་གྱི་སྲས་ཟུར་པ་ཁྲི་རྒྱལ་ཞེས་པ་རྫ་ལྷུག་ཏུ་ཟུར་བཞུགས་མཛད། གོང་དུ་སྨོས་པའི་ཚངས་གསར་མཁར་པོའི་ཆེའི་ཁྲི་འཛིན་བློ་་བཟང་བསྟན་དབང་གི་སྤྲུལ་སྐུ་ཧ་ར་ཚང་དུ་འཁྲུངས་པ་མཁར་ཆེན་སྤྲུལ་སྐུར་གྲགས་ཤིང་ཁྲི་བསྐོས་མཛད། ཚངས་གསར་ལྷ་འབུམ་གྱིས་ལྕི་ཉིན་སྟོད་ར་རུག་མདར་སྦྲ་མཁར་མཛད་པའི་སྲས་ཚངས་གསར་ཀརྨ་ཞེས་པ་བྱུང༌། འདི་སྐབས་ལྕི་སྟོད་སྨད་གཉིས་སུ་གྱེས་པའི་སྡེ་ཁག་ལ་ཚངས་གསར་ཡུལ་འབྲོག་གཉིས་ཟེར། ཀརྨའི་སྲས་གཞུང་དུ་ཡོད་པ་ཚངས་གསར་དུང་རྒྱལ་ཡིན་ལ། ཟུར་པ་ཞིག་ཡོད་པ་དོན་གྲུབ་སྟེ། ཟུར་སྡེ་ཕྱེ་ནས་རྫ་གྲབ་མདར་བཞུགས་ཤིང་སྲས་མེད་པའི་འཕྲོས་ལ་སྡེ་རོ་མ་ཞེས་པ་བྱུང༌། མདོར་བསྡུས་ན་ལྕི་ཉིན་ཤོག་གསུམ་མར་གྲགས། དུང་རྒྱལ་གྱི་སྲས་རྣམ་རྒྱལ་རྡོ་རྗེ་དང་ཕུན་དབང་གཉིས། དེ་སྲས་དཔོན་ཨོར་ཆོས་དང་བླ་ཆུང་པད་འགྲོ་རྣམས་སོ། །ལྕི་སྲིབ་ལའང་དོན་གྲུབ་རྒྱལ་བ་མདོ་ཐང་ལ་བཞུགས་པ་དང༌། བསོད་ནམས་རྒྱལ་བ་འགྲམ་ཁར་བཞུགས་པ་སྟེ་གཉིས། བསོད་ནམས་རྒྱལ་བའི་སྲས་ཀརྨ་དོན་གྲུབ་ཀྱི་སྲས་ཟུར་པ་ཚངས་གསར་ཁྲི་རྒྱལ་ཞེས་རྫ་ལྷུག་ཏུ་བཞུགས་པ་ལྕི་སྲིབ་སྟོད་སྨད་བར་གྱི་སྡེ་ཁག་སྟེ། མདོར་ན་ལྕི་ཉིན་སྲིབ་གཉིས་ལ་ཚངས་གསར་ཁག་ལྔ་ཤོག་དྲུག་ཏུ་གྲགས་པ་ཕྱིས་སུ་བྱུང་ཞིང་ས་མི་ཆུད་མཚམས་ཡང་སྨད་ནས་སྒམ་ལ་སྦྲུལ་མཁར། སྐད་རྒྱལ་ནེ་བྲོ་རྐེས་རྒྱལ་སེ་ཕོམ། ཡོག་རྒྱལ། བྲེ་གུ་ལ་བཙས་ནག་པོ། ཀ་མདའ་ཁྲ་མོ། གོ་ཝེ་རི་དམར། སྟག་ལུང་ལ་བཙས་དཀར་པོ་བཅས། བླ་དགོན་རྣམས་གོང་མ་རྒྱ་སོགས་གཞུང་གསུམ་གྱི་སྐུ་རིམ་པ་དང༌། དཔོན་རབས་རྣམས་གོང་མ་སེ་ཆེན་གན་གྱི་དུས་ནས་བརྩམས། ཡོན་མིང་ཆིང་ཤུན་གྱི་དུས་རྒྱལ་པོ་དང་ཁྲི་དཔོན་སྒེར་བཙན་རང་དབང་ཅན་ཡིན་པར་གདའ།

༈ དེ་ནས་བླ་རབས་བྱོན་པའི་ཚུལ་ནི། བསོད་ཡེས་གསུམ་པ་ཀརྨ་ཡེ་ཤེས་སྙིང་པོས་ཀརྨ་པ་བཅུ་གསུམ་བདུད་འདུལ་རྡོ་རྗེ་བསྙེན། ངག་ཕྲིན་གཉིས་པ་ལས་ཡབ་ཆོས་སྐོར་གསན། གནམ་དགོན་གྱི་གདན་ས་མཛད། ངག་ཕྲིན་གསུམ་པ་སྐྱིལ་ཚ་བ་ཀརྨ་ཆོས་དབྱིངས་རང་གྲོལ་ལམ། ཡེ་ཤེས་རོལ་པ་རྩལ་དང་རྣམ་རྒྱལ་སྐུ་ཕྲེང་གསུམ་པ་གཉིས་སི་ཏུ་པདྨ་ཉིན་བྱེད་ཀྱི་ཞལ་དཀྱིལ་བསྙེན། དཔལ་སྤུངས་སྒྲུབ་ཁང་དུ་བཞུགས༌། མཁས་གྲུབ་རྨད་དུ་བྱུང་ནས་གདན་ས་རྣམས་བསྐྱངས། རྣམ་རྒྱལ་སྐུ་ཕྲེང་བཞི་པ་ཨ་མྱེ་ལ་འཁྲུངས་པ་ཉིད་གདན་སར་ཕེབས་ཤིང་འཛིན་སྐྱོང་སྤེལ་བ་སོགས་མཛད་དེ་སྐུ་གཤེགས། རྣམ་རྒྱལ་སྤྲུལ་སྐུ་ལྔ་པ་སངས་རྒྱས་གྲགས་པ་ཉིད་བདེ་མོ་དགོན་གྱི་གདན་ས་ཞབས་པད་རྡོ་རྗེའི་ཁྲིར་ད་ལྟའང་འགོད་བཞིན་པའོ། །

༈ གཞན་ཡང་ལྕི་རཱ་ཛ་རྫོང་དུ་སྔོན་དཔལ་རྒྭ་ལོ་དེར་བཞུགས་སྒྲུབ་པ་མཐའ་ཕྱིན། ས་ཆེན་ཀུན་སྙིང་གི་གདུང་འབུམ་བཞེངས་མཛད། སྐུ་ཡང་དེར་གཤེགས་པས་རྒྭ་ལོའི་གདུང་འབུམ་ཡང་དེར་བཞུགས། ཕྱིས་སུ་ཚངས་གསར་བླ་མ་རྣམས་ཀྱིས་སྒྲུབ་གནས་མཛད་པས་ཚངས་གསར་རྫོང་མགོ་ཚང་ཞེས་དགོན་གནས་གཅིག་ཡིན། ཚངས་གསར་ཀརྨ་བསྟན་སྐྱོང་གི་གུར་སྒར་ཕུབ་པར་ཕྱིས་འབྲོག་པ་ཚང་གི་བླ་བརྒྱུད་རྣམས་ཀྱི་གདན་ས་མཛད་པས་ཚངས་གསར་ལྷ་ལམ་དགོན་དང༌། སྔགས་བརྒྱུད་དར་རྒྱས་རྒྱ་མཚོ་དཔལ་སྤུངས་སྒྲུབ་བླར་ཕེབས་ནས་ཡར་བྱོན། ཝ་རྫོང་པད་སྤུངས་སར་དགོན་མཛད། དབོན་སྤུག་ཆུང་ཞེས་པས་ཤུལ་འཛིན། སྔགས་སྤྲུལ་ངག་དབང་གྲགས་པ་སོགས་བྱོན་ཞིང་དགོན་པའི་མིང་ཚངས་གསར་ཆོས་གླིང་དགོན་ཞེས་པ་དང༌། གནམ་དགོན་གྱི་དགོན་ལག་རཀྵའི་མངོན་སྤྲུལ་ཀརྨ་ལུང་རིགས་རྣམ་རྒྱལ་གྱིས་རྟ་ཡུམ་གནས་སུ་སྨིན་གྲོལ་དགོན་ཞེས་པ་བཏབ་དར་རྒྱས་ཅུང་ཟད་བྱུང་ཞིང་ །དབོན་བླ་མ་ཀརྨ་བཤད་སྒྲུབ་ཀྱིས་འཛིན་སྐྱོང་མཛད་པ་སྟེ་དེ་རྣམས་གྲངས་སུ་འདྲེན་པ་ཡིན་ནོ། །ལྕི་ཉིན་ཡུལ་པ་མཁར་ཆེའི་བསྟན་བདག་ཧ་ར་བླ་མས་གདན་ས་མ་འཁྱོལ་ནས་རྟེན་གསུམ་གཙོ་ཆེ་ནང་ཆེན་དུ་འཁྱུགས་ཤིང་ཕལ་མོ་ཆེ་འཐོར་ཟགས་སུ་བྱུང་བར་གྱུར། གསེར་དངུལ་གྱི་བཀའ་འགྱུར་ནི་འབྲོག་པའི་དགོན་ལྷ་ལམ་དགོན་དུ་ཡར་ཉར་ཚགས་བྱས་པར་འདུག །འཕྲོས་ཡུལ་པའི་རྫོང་ཞིག་ཅིང་སྡེ་དུད་ཀྱི་མགོ་འཛིན་མ་ངེས་པ་འགའ་ཤས་ཡང་བྱུང་བར་སྣང་ངོ། བསོད་ཡེས་སྐུ་ཕྲེང་བཞི་པ་ཀརྨ་བསོད་ནམས་ཆོས་འཕེལ་ལམ། འཆི་མེད་རྡོ་རྗེ་དང༌། ངག་ཕྲིན་བཞི་པ་བསམ་གཏན་རྒྱ་མཚོ། གཏེར་སྲས་སྤྲུལ་སྐུ། གསང་སྔགས་རྣམས་སྐུ་མཆེད་དེ། འདི་རྣམས་ཚངས་གསར་འབྲོག་པ་དཔོན་ཨོ་རྒྱན་ཆོས་འཕེལ་གྱི་སྲས་ཡིན་ལ་ཡུམ་དཀོན་མཆོག་དཔལ་སྒྲོན་ཞེས་གཏེར་ཆེན་མཆོག་གླིང་སྲས་མོ་སྟེ། འདི་རྣམས་ངག་ཕྲེང་གསུམ་པའི་དབོན་བླ་མ་ཆོས་དབང་དང༌། སྤམ་ཚངས་གསར་བླ་མ་ཨ་ཡུ་དེ་ཝ། གཅོད་བླ་བསོད་ནམས་རྒྱལ་མཚན་སོགས་ལས་འབའ་རོམ་དང་ཡབ་མེས་ཀྱི་ཆོས་སྐོར་ཚང་མ་གསན། ཀརྨ་པ་ཐེག་མཆོག་རྡོ་རྗེ་དང་མཇལ། གདམས་ཁྲིད་དབང་བསྐུར་ཡང་ནོད། གདན་སར་བཞུགས་པ་དང་རི་ཁྲོད་བརྟེན་པ་རེས་མོས་མཛད། ཕྱིས་བསམ་གཏན་རྒྱ་མཚོ་རྒྱལ་དབང་མཁའ་ཁྱབ་རྡོ་རྗེའི་དབུ་བླར་བྱོན། གཏེར་གསར་ཡོངས་རྫོགས་དབང་བསྐུར་ཕུལ། འཆི་མེད་རྡོ་རྗེ་འབྲུག་པ་རིན་པོ་ཆེ་ཐམས་ཅད་མཁྱེན་པའི་དབུ་བླ་མཛད། གསར་རྙིང་ཆོས་སྐོར་མང་དུ་ཕུལ། ནང་ཆེན་སྟོད་དུ་རྒྱལ་བཀའི་ལུང་སྤེལ། དབོན་བརྒྱུད་ཐུགས་སྲས་པདྨ་འཇིགས་མེད། ཀརྨ་ཨོ་རྒྱན།་་་་་་་་་ཆོས་དབང་སྤྲུལ་སྐུ། བསོད་རྒྱམ་སྤྲུལ་སྐུ།་་་་་་་་་་་བསྟན་འཛིན་རྡོ་རྗེ་སོགས་བྱོན། དབོན་པདྨ་འཇིགས་མེད། སྲས་འགྱུར་མེད་རྡོ་རྗེ་ཞེས་པ་ད་ལྟ་འདིའོ། ། ༈ ལྕི་སྲིབ་མདོ་ཐང་དཔོན་བརྒྱུད་ཡེ་ཤེས་དབང་ཕྱུག་སྲས་དོན་གྲུབ་ཕུན་ཚོགས། དེ་སྲས་ཀརྨ་དབང་རྒྱལ། ཨོ་རྒྱན་རྣམ་རྒྱལ། ཨོ་རྒྱན་དར་རྒྱས་གསུམ། དེ་སྲས་ད་ལྟ་བླ་མ་དབུ་སྨུག་ཞེས་པ་འདི་དག་གོ། །རྫ་ལྷུག་དཔོན་ཁྲི་རྒྱལ་སྲས་མགོན་པོ་སྟོབས་རྒྱལ་ཀརྨ་བཟང་གཉིས། དེ་སྲས་བླ་མ་བསྟན་འཛིན་ཆོས་དར། དེ་སྲས་འགའ་ཡོད་པ་མི་སྣང་ཞིང༌། ཀརྨ་བཟང་སྲས་ཟུར་པ་འདུལ་བ། དེ་སྲས་ཨོ་རྒྱན་ཉི་མ་འདི་དག་དང༌། །འགྲམ་དཔོན་བསྟན་འཛིན་རྣམ་རྒྱལ་དང་རིན་ཆེན་དབང་རྒྱལ་ཟུང་གི་སྲས་མགོན་པོ་བསྟན་གྲགས་སྤྲུལ་སྐུ། བསྟན་དབང་སྤྲུལ་སྐུ་གཉིས། དེ་གཉིས་སྔགས་འཆང་དུ་བཞུགས་པའི་སྲས་ཀུན་ཁྱབ་ཡེ་ཤེས་སོགས་འགའ་བཞུགས་པའོ། །དེ་ལྟར་ཕོ་བྲང་ནང་སོ་ཆེན་མོའི་ཁྲིར་ཕེབས་པའི་གསང་བ་ལུས་མེད་རྡོ་རྗེ་ནས་བདག་ཅག་གི་དཔལ་མགོན་བླ་མ་འཆི་མེད་གྲུབ་པའི་རྡོ་རྗེ་ཡན་བླ་བརྒྱུད་དང་དབོན་བརྒྱུད་བར་མ་ཆད་པར་བྱོན་པ་ཐམས་ཅད་ཀྱང་རྡོ་རྗེའི་རིག་པ་འཛིན་པ་ཁོ་ན་སྒྲུབ་བརྒྱུད་འབའ་རོམ་པའི་ལྷ་ཆོས་མི་ཆོས་ཡ་བྲལ་དུ་མ་སོང་བའི་གྲུབ་པའི་ཕྲེང་བ་ཤ་སྟག་གོ། །

༈ གསུམ་པ་ནང་ཆེན་པའི་གདུང་བརྒྱུད་དང་གདན་སར་བཞུགས་པའི་རིམ་པ་རྒྱས་པར་བཤད་པ་ལ་གཉིས། གདན་ས་སྐུ་འབུམ་དུ་ཆོས་སྲིད་རྒྱས་ཚུལ་དང༌། ཅུང་ཟད་འཕོ་འཆུག་བྱུང་ཚུལ་སྐོར་རྣམས་སོ། །དང་པོ་ནི། ནང་ཆེན་པའི་གདུང་བརྒྱུད་དང་གདན་སར་བཞུགས་པའི་རིམ་པ་ལ། ཡོན་ཏན་དཔལ་གྱི་སྣག་དབོན་སྤྱན་སྔ་ཆོས་ཀྱི་རྒྱལ་མཚན་ཏེ། གདུང་ནི་མིའུ་རུས་དྲུག་གི་ནང་ནས་ཨ་ལྕགས་འབྲུ། འབྲུ་ལ་ཆེ་དྲུག་དང་ལྡངས་དྲུག །ཡ་མེད་གཉིས་དང་བརྒྱད་ཀྱིས་ཁྱད་པར་དུ་འཕགས་པ་ཡིན། དེ་ལྟ་བུའི་འབྲུ་བཙན་པོ་དེས་ཏྲེ་རབ་ཁ་མི་ཡི་གནས་གཞི་ཟེར་བ་དེ་བཟུང་བ་ཡིན། དེའང་ཏྲེ་ལ་ཉིན་མོ་དང་སྲིབ་མོ། རྩེ་བ་དང་ཤོད་པ། སྟོང་པ་དང་མེད་པ། ཚོང་འདུས་མཎྜལ་སྟེང་དང་བདུན་ཡོད། འབྲུ་རྗེ་དེ་ལ་ལས་ཀ་ཐོབ་པའི་མི་གསུམ་ཡོད་དོ། ཐང་ཆེན་ཨ་འབར་བྱ་བས་ཁྲི་སྐོར་བཅུ་གཉིས་དཔོན་པོ་བྱས། དཀར་ཆུང་ཉི་མ་བྱ་བས་སྡང་དགྲ་ཆམས་ལ་ཕབ། ཀྱེ་ཧུ་འཁོར་ལོ་བཟང་པོས་རྒྱ་ནག་རྒྱལ་པོའི་ནང་བློན་བྱས། འཁོར་ལོ་བཟང་པོའི་བུ་ནོར་བུ་བཟང་པོ། དེའི་བུ་གཞོན་ནུ་བཟང་པོ། དེའི་བུ་ལྷན་པ། དེའི་བུ་སྤྲོས་མཆོག །དེའི་བུ་ལྷ་མཆོག །དེའི་བུ་ཡུལ་པ། དེའི་བུ་བཙུན་པ། དེའི་བུ་དགུ་ཡོད་པ་དེའང༌། གཅེས་དང་ཡག་དང་མཛེས་དང་གསུམ། ལོད་པོ་ཀླུ་བཙན་གཉན་པ་དྲུག །ཨ་ཆེན་བེ་ཡམ་སྡེ་བ་དགུ། དེ་ལས་མཛེས་པའི་བུ་རྩང་ཀུན་དེའི་བུ་ཁྱབ་པ། དེའི་བུ་ཡུལ་སྲུང༌། དེའི་བུ་དྲག་པོ། དེའི་བུ་ཐོག་འཕེན། དེའི་བུ་ཀརྨ་དྲག། དེའི་བུ་སྤྲིན་ཕྱུག། དེའི་བུ་ཐང་པོ། དེའི་བུ་བརྟན་པ། དེའི་བུ་འབབ་པ། དེའི་བུ་ཏིང་ཆེན། དེའི་བུ་ཀརྨ་མཛེས། དེའི་བུ་སེང་གེ་གྲགས༌། དེའི་བུ་དམག་དཔོན་འོད་ཟེར། དེའི་བུ་ཨ་མྱེ་མགོན་ཡག། དེའི་བུ་གསེར་གཡུ་ངང་གྲགས། དེའི་བུ་ལེགས་པ་དབང་ཕྱུག། དེའི་བུ་བློ་གྲོས་འོད་ཟེར། དེའི་བུ་དྲག་པོའི་གོ་ཅན། དེའི་བུ་རྨ་བྱ་མཛེས་པ། དེའི་བུ་ཞི་བ། དེའི་བུ་མ་ལྷ། དེའི་བུ་མངའ་བདག །དེའི་བུ་རྗེ་བོ། དེའི་བུ་ཆོས་འཕགས། དེའི་བུ་མདོ་མང༌། དེའི་བུ་སྡེ་ལྔ། དེ་ལ་བུ་བཞི་ཡོད་པ་ནི། ཨ་སྟག༌། སེང་འཕེན། འབྲུག་སྲས། རྒོད་པོ་འབར། ཨ་སྟག་གི་བུ་ཐང་ཆེན་བསོད་རྒྱལ། དེའི་བུ་ཤེར་འོད། དེའི་བུ་ལ་འབར། སེང་གེ་འཕེན་གྱི་བུ་ཁྲི་དཔོན་ལ་གྲགས། དེའི་བུ་བཙན་པོ། དེའི་བུ་སྐར་ཆུང་ཉི་མ། འབྲུག་སྲས་བུ་ཀྱེ་ཧུས་སངས་རྒྱས་དབང་ཕྱུག །དེའི་བུ་ཡོན་འབྱུང༌། དེའི་བུ་དཔོན་དཀར་དང་འཁོར་ལོ་བཟང་པོ་གཉིས། རྒོད་པོ་འབར་གེི་བུ་དོན་ཡོད་ཚུལ་ཁྲིམས་འོད་ཟེར། དེའི་བུ་ལྕག་ལ་ཡག །དེའི་བུ་ཞབས་དཀར་པོ་དང་དར་མ་གཉིས། ཞབས་དཀར་པོའི་བུ་དགེ་མཐོན། དེའི་བུ་ཁྲི་དར་སེང་གེ། དེས་གླིང་ཟ་ཨ་རྡོར་མ་བླང་བ་ལ། ཏྲེ་བོ་ཨ་ཀླུ་ཨ་ཀླུས་ཆེན་ཆུ་གཉིས་བཞག་པའི་ཆེན་མ་མཛོ་རོག་བཟའི་བུ་རྡོ་རྗེ་འཕགས་དང་རྡོ་རྗེ་བསྟན་གཉིས་ཀྲེ་རབ་ཁ་ན་བཞུགས། ཆུན་མ་འབེ་བཟའ་དཀར་མོ་ཁབ་ཏུ་བཞེས་པ་ལ་སྐུ་མཆེད་བདུན་བྱུང་བའི་ཆེ་བ་ས་སྐྱ་དཔོན་ལེགས་བྱ་ཡུལ་བ་ཨ་ཡུལ་བ་ཏྲེ་བོ་ཆོས་རྒྱལ་མཚན་ཚོང་དཔོན་ཁམ་ཐར་བཀྲ་ཤིས་དཔལ་བྱང་རྒྱལ་བའོ། །དེ་ལས་ཆོས་རྒྱལ་མཚན་ནི་བྱང་ཆུབ་མགོན་པོའི་དྲུང་དུ་རབ་ཏུ་བྱུང༌། མཚན་ཆོས་ཀྱི་རྒྱལ་མཚན་དུ་གསོལ། འབའ་རོམ་ནས་བརྒྱུད་པ་ཐམས་ཅད་གསན། འདི་དུས་ཧོར་གྱི་རྒྱལ་པོ་ཐོ་གན་ཐི་མུར་གྱིས་ཧོར་དང་རྒྱ་ནག་གཉིས་ཀའི་རྒྱལ་པོ་མཛད་དུས། ཏྲེ་བོ་ཆོས་ཀྱི་རྒྱལ་མཚན་ནང་ཆེན་ནང་གི་གདན་ས་ལ་བཞུགས་པའི་འཇའ་ས་བླང་བ་ཡིན། དེ་ནས་ཅི་མ་འགོར་བར། གོང་མ་རྒྱལ་པོ་ཡབ་སྲས་ཧོར་ཡུལ་དུ་བྲོས་ཤིང་རྒྱ་ནག་རྒྱལ་པོ་ཐའི་བུའི་རང་གི་རྒྱལ་ས་བླང་ནས་རྒྱལ་པོ་མཛད་པར་འདུག་མཆན། ས་སྐྱ་ནས་ནང་ཆེན་ནང་གི་ཁྲི་ལ་ཆོས་རྒྱལ་མཚན་བཞུགས་དགོས་གསུངས་པའི་བཀའ་ཤོག་ཇ་འདྲེན་དང་ཁྱེད་རས་ཚང་སྒོམ་སྡེ་དང་རབ་ཁ་བ་གཉིས་ལ་གཏོག་པའི་ལྷ་ཁང་དགོན་པ་བུ་སློབ་ཡོན་བདག་འཁོར་ཁ་སྡེ་རིས་རྣམས་ཀྱི་ངེས་རྒྱུར། སྤྱན་སྔ་ཆོས་ཀྱི་རྒྱལ་མཚན་གོང་གི་འཇའ་ས་དང་བཀའ་ཤོག་རིམ་པའི་ལུང་བཞིན་དུ། ནང་ཆེན་ནང་གི་ཁྲི་ལ་བཞུགས་རྒྱུ་ཡིན་པས། འདི་པས་དབང་བའི་ལྷ་ཁང་དང་དགོན་པར་འཚེར་མ་འབབ་ཞེས་པ་ལ་སོགས་པའི་བཀའ་ཤོག་བྱུང་སྟེ། ལྕགས་ཕོ་བྱི་བའི་ལོ་ལ་ཆོས་རྒྱལ་མཚན་ནང་ཆེན་ནང་གི་ཁྲི་ལ་བཞུགས་ཏྲེ་རབ་ཁ་ཡན་གྱི་ཁྲལ་འུ་ལག་སྐུ་འབུམ་དགོན་དུ་སྡུད། འཁོར་འབངས་ཐམས་ཅད་བྱམས་པས་སྐྱོང༌། ཆོས་སྲིད་ཐམས་ཅད་ནམ་མཁའ་དང་མཉམ། དཔོན་ཨ་ཡུལ་གྱིས་རྒྱལ་སྲིད་ཀྱི་མཛད་པ་རྒྱ་ཆེ། སྲས་ཀུན་དགའ་འབུམ་དང་ནམ་མཁའ་རྒྱལ་མཚན་གཉིས། ནམ་མཁའ་རྒྱལ་མཚན་ཆོས་ཀྱི་རྒྱལ་མཚན་མདུན་ནས་རབ་ཏུ་བྱུང་ཞིང་གདམས་པ་ཐམས་ཅད་གསན་ནས་གདན་ས་མཛད། ཀུན་དགའ་འབུམ་གྱི་སྲས་སེང་གེ་དཔལ། མགོ་པ་ཡོན་ཏན་རྒྱ་མཚོ། སྤྱན་སྔ་དཔལ་ལྡན་རྒྱ་མཚོ། བསམ་འགྲུབ་རྒྱ་འཚོ་དང་བཞི། འདི་དུས་ཀརྨ་པ་དེ་བཞིན་གཤེགས་པ་རྒྱ་ནག་ནས་ཡར་ཕེབས། སྐུ་འབུམ་དགོན་དུ་སྤྱན་དྲངས། དགེ་འདུན་པ་སྟོང་ཕྲག་གཉིས་གསུམ་ཙམ་གྱི་བསུ་བ་དང་བཅས་ཏེ་ནང་སོ་ཆེན་མོར་ཕེབས། བླ་དབྱེ་ཆེན་མོར་ནང་ཡ་གཉིས་དང་འདུས་པའི་ཚོགས་ལ་སེམས་ཁྲིད་ཀྱི་ཆོས་འཆད། འཇིག་རྟེན་དངོས་པོ་བགྲང་གིས་མི་ནུས་ཙམ་ཕུལ། བསམ་འགྲུབ་རྒྱ་མཚོ་རབ་ཏུ་བྱུང༌། ཀརྨ་ཀུན་དགའ་དཔལ་བཟང་པོའི་མཚན་དང༌། གསེར་གྱི་ཐམ་ཁ་ཆེན་པོའི་ཐམ་ཁའི་ཁ་རིས་ལ། ཀྭན་ཏིང་ཙིང་ཀྱའི་ཤིན་ཧུའི་ཤེ་གཽ་ཝེ་ཤྲཱི། བོད་སྐད་དུ་བཀྲོལ་ན། སྤྱི་བོ་ནས་དབང་བསྐུར་བ་ཆེན་པོ་རྒྱལ་ཁམས་ཀྱི་བླ་མ་ཆོས་ཁྲིམས་འཆའ་བའི་རྒྱལ་པོ་ཞེས་སོ། གསེར་ཐམ་འདི་གོང་ནས་ཀརྨ་པས་མི་ཆེན་བཅུ་གསུམ་གྱི་ལས་ཀ་བསྣམས་པ་ལས་གཉིས་ནང་ཡ་གཉིས་དང༌། གཞན་རྣམས་འབྲི་གདན་སོགས་ལ་གནང་བ་ཡིན་ཏེ། འབྲི་གུང་པ་ལ་གནང་བའི་ཐམ་ཁའི་ཁ་རིས་ལ། ཆེན་ཀྱའུ་ཧྭ་ཝང། བོད་སྐད་དུ་བསྟན་པ་སྤེལ་བའི་རྒྱལ་པོ་ཞེས་དང༌། གདན་ས་མཐིལ་དུ་གནང་བའི་ཐམ་ཁའི་ཁ་རིས་ལ། ཆེན་ཧུ་ཝང། བོད་སྐད་དུ་སྤྲུལ་པ་སྤེལ་བའི་རྒྱལ་པོ་ཞེས་དང༌། གོང་མ་ཆེན་པོའི་ཏའི་མིང་རྒྱལ་པོས། ཀརྨ་པ་ལ། ལུགས་གཉིས་ཀྱི་བདག་པོ་བླ་མ། གཞུའུ་ལའི་ཏའི་བའུ་ཧྭ་ཝང༌། བོད་སྐད་དུ། ཁྱེད་ཡིན་པས། བོད་ཀྱི་བསྐོ་འཇའ་ཐམས་ཅད་ཁྱེད་ཤེས་སུ་ཆུག །ཅེས་སོགས་གཞན་གྱི་བསྐོ་འཇའ་ལས་ཁྱད་པར་འཕགས་ཤིང་ཆེ་བ་ཡིན། མཆན། ལས་ཀ་དང༌། གོས་ཆེན་དེང་ཕོན་ལས་གྲུབ་པའི་བླ་བྲེས། སྟག་མགོ་ནོར་བུ་གསུམ་པ་སོགས་འཇིག་རྟེན་གྱི་གནང་བ་རྒྱ་ཆེན་པོ་དང་བཅས་ཏེ་གདན་སར་བསྐོས། ལུགས་གཉིས་ཀྱི་བཀའ་ཁྲིམས་བཟུང་བའི་གོ་གནས་གནང་ནས༌། སངས་རྒྱས་ཀྱི་བསྟན་པའི་ཞབས་འདེགས་རླབས་པོ་ཆེ་དགོས་པ་དང་ཡར་ཕྱིན་གཅིག་གིས་གཅིག་ལ་འཚེ་བ་མི་བྱེད་པའི་བཀའ་ཁྱབ་གནང་ལྷ་ཁང་དང་དགོན་པའི་འཛིན་སྐྱོང་དཔེ་མེད་མཛད། གསེར་གྱི་བཀའ་བསྟན་འགྱུར་བཞེངས། ངོ་མཚར་བའི་ལྟས་དང་བཅས་ཏེ་གཤེགས། སེང་གེ་དཔལ་གྱི་སྲས་གྲགས་པ་རྒྱལ་མཚན་དེའི་སྲས་ཀྱི་རྣམ་གྲངས་ལ། ཞང་ལྷ། ཀུན་དགའ་རྒྱ་མཚོ། ཆོས་དཔལ་བཟང་པོ། འོད་ཟེར་བཟང་པོ་དང་བཞི། ཆོས་དཔལ་བཟང་པོ་ཀུན་དགའ་དཔལ་བཟང་པོའི་དྲུང་དུ་རབ་ཏུ་བྱུང༌། སྔར་སྲོལ་གྱི་གདམས་པ་ཐམས་ཅད་རྫོགས་པར་གསན་གདན་ས་མཛད། ཞང་ལྷའི་སྲས། གཅོད་པ་རྒྱལ། གྲགས་པ། སངས་རྒྱས་གྲགས་པ་གསུམ། སངས་རྒྱས་གྲགས་པ་ཆོས་དཔལ་བཟང་པོ་ལས་རབ་ཏུ་བྱུང༌། འབའ་རོམ་ནས་བརྒྱུད་པའི་ཡབ་མེས་ཀྱི་གདམས་པ་ཐམས་ཅད་གསན། སྟག་ལུང་དུ་བྱོན། ངག་དབང་གྲགས་པ་དང་མཇལ། གདམས་པ་སྤྱི་དང་ཁྱད་པར་མགོན་པོ་ཕྱག་བཞི་པའི་སྐོར་མ་ལུས་པ་གསན། ལོ་བཅུ་གཉིས་སུ་བཞུགས། ཕུང་བྱེད་ནོར་བུ་གཟི་འབར། ཡ་གསུམ་སྟོད་མའི་རྫོང་དང་བཅས་གདན་སར་བསྐོས། སྒྲུབ་པ་དང་ཉམས་ལེན་གཙོར་མཛད། གཅོད་པ་རྒྱལ་གྱི་སྲས་གོ་ཤྲཱི་ཆོས་དཔལ་གྲགས་པ་དང༌། ཆོས་སྐྱོང་སྐྱབས་གཉིས། འདི་གཉིས་ཀྱིས། ཀརྨ་པ་ཆོས་གྲགས་རྒྱ་མཚོ་དཔལ་གཞུང་དུ་སྤྱན་དྲངས། ཁྲི་རྭ་ཅན་གྱི་འབུལ་བ་བྱས། དབང་ཁྲིད་རྫོགས་པར་གནང༌། གོ་ཤྲཱི་ལས་ཀ་དང་ཤེལ་ཐམ་ཟང་ཟིང་གི་གནང་སྦྱིན་བཅས་གདན་སར་བསྐོས།་་་་གོ་ཤྲཱི། ཆོས་དཔལ་གྲགས་པ་དང༌། ཚངས་གསར་རྡོ་བཅང་བ་་རྣམ་གཉིས་དཔེ་མེད་ཐུགས་མཐུན་པོ་བྱུང་ཅིང་སྒོམ་སྡེ་སྐུ་མཆེད་ཅེས་སྒར་ཆེན་དུ་ཟློ་བར་བྱུང༌། མཆན། ཆོས་སྐྱོང་སྐྱབས་ཀྱི་་་་ཁ་ངག་ལ། བེ་རི་ཆུང་ཤེས་ཀྱི་ཕ་མེས་བེ་རི་སེང་གེ་མི་ལོག་སྨད་ནས་དགེ་ལྡན་པ་འཁྲུགས་ནས་འདི་པའི་སྐུ་རིང་ལ་སྐུ་འབུམ་དགོན་དུ་ཕྱིན། བཀའ་ཁྱབ་བཟང་པོ་མཛད་ནས་རེ་འཛིའི་ས་གནང༌། ཁོ་རང་ཚོ་དེར་བསྡད་པ་ལ་སྐྱིད་པོ་བྱུང་སྟེ། ཁ་བཤད་ལ། ཞྭ་སེར་ཅན་གྱི་སྤྱུག་པ་ཡིན། བེར་སེང་ཅན་གྱི་བཀའ་དྲིན་ཡིན། ཟློ་བ་བྱུང་ཟེར། བེ་རིའང་ནང་ཆེན་པའི་བློན་པོ་དྲག་ཤོས་ཡིན། མཆན། སྲས་དཀར་བཟའ་ལ་འཁྲུངས་པ་ནི། ནམ་མཁའ་བཟང་པོ། ཆོས་སྐྱོང་བཟང་པོ། བསོད་ནམས་བཟང་པོ། བཀྲ་ཤིས་བཟང་པོ་དང་བཞི། ནམ་མཁའ་བཟང་པོ་ཡ་གསུམ་སྟོད་མའི་རྒྱལ་པོ་མཛད། ཆབ་སྲིད་མངའ་ཐང་ཆེར་རྒྱས། སྒོམ་སྡེ་ཡ་གསུམ་སྟོད་མར་གྲགས། གཏན་ཆགས་ས་སྟག་ལུང་ཕོ་མདོའི་ཡ་གསུམ་ཐང་ཡིན། ས་ཡི་ཆོད་མཚམས་ཡང་སྟོད་ནས་བྱང་ནམ་མཚོའི་སྲིབ་ཆེན་སྒེར། སྨད་ནས་ཤག་གི་སྦང་ངུ་ཟམ་ཁ་ཡིན། ནམ་མཁའ་བཟང་པོའི་སྲས་སེང་གེ་རྒྱལ་མཚན། སངས་རྒྱས་རྒྱལ་མཚན་གཉིས། དེ་ལས་སེང་གེ་རྒྱལ་མཚན་གྱིས་མངའ་འབངས་ཆོས་བཞིན་དུ་བསྐྱངས། སྒོམ་སྡེ་སྟོད་མ་སྲིད་འགྲན་ཟླ་བྲལ་བར་བྱུང༌། གོང་གི་བཀྲ་ཤིས་བཟང་པོའི་སྲས་་་་་ཧོར་མོས་སྲས་་་་་་་་གུར་མགོན་དང༌། རིན་མགོན་གཉིས། རིན་མགོན་གོ་ཤྲཱི་ཆོས་དཔལ་གྲགས་པ་ལས་རབ་བྱུང་མཛད༌། བརྒྱུད་པའི་གདམ་པ་མ་ལུས་གསན་བཞེས་མཛད། ནང་སོ་ཆེན་མོའི་ཁྲིར་བཞུགས་གུར་མགོན་གྱིས་སྐུ་འབུམ་དུ་སྡེ་སྲིད་བསྐྱངས། སྐུ་མཆེད་འདི་གཉིས་ཀྱི་རྒྱལ་དབང་བྱང་ཆུབ་རྡོ་རྗེ་སྤྱན་དྲངས། འབུལ་བ་དཔག་མེད་ཕུལ། གུར་མགོན་སྲས་གཉིས་ལས་བསོད་ནམས་དཔལ་ལྡན་ལ་གཽ་ཤྲཱིའི་ལས་ཀ་གནང། ཆོས་ཁྲིར་མངའ་གསོལ། ཀུན་དགའ་གྲགས་པའི་སྲས། ཀུན་དགའ་རྒྱལ་པོ༌། བསོད་ནམས་རྣམ་རྒྱལ༌། བསོད་ནམས་ཚེ་རིང་དང་གསུམ། བསོད་ནམས་རྣམ་རྒྱལ་ཞྭ་དམར་ཆོས་ཀྱི་དབང་ཕྱུག་གིས་རྗེས་སུ་བཟུང༌། ཀྭན་ཏིང་གོ་ཤྲཱིའི་ལས་ཀ་གནང་ཆོས་ཁྲིར་འཁོད། ཀུན་དགའ་རྒྱལ་པོའི་ཐུགས་དམ་ལ་གསེར་དངུལ་གྱི་འབུམ་རྒྱས་འབྲིང་བསྡུས་གསུམ་བཞེངས། དེ་སྲས་བློ་གྲོས་རྒྱལ་པོ་དང༌། ངོམ་བཟའ་མར་རབ་ལོ༼༡༠༽ས་ཕག་ལ་འཁྲུངས། གོ་ཤྲཱི་ཀརྨ་རབ་བརྟན་གཉིས་བྱོན།་་་་་་་་་ཆུ་ཡོས་ལ་འཁྲུངས། བློ་གྲོས་རྒྱལ་པོས་དགོན་གསར་འཛུག་བཅུ་གསུམ་ཙམ་གྱི་སྦྱིན་བདག་དང་མངའ་ཞབས་རྣམས་དགེ་བཅུའི་ཁྲིམས་ལ་བཀོད། འབྲི་གུང་ཞབས་དྲུང་སྤྱན་དྲངས། འབུལ་བ་དཔག་མེད་དང་དབང་ལུང་མང་དུ་ཞུས། ཐ་དད་ཀྱི་དགེ་འདུན་རྣམས་ལ་བསྙེན་བཀུར་དང་མཛོད་དང་བང་བ་ཐམས་ཅད་ཕྱོགས་མེད་དུ་འགྱེད། དབུས་སུ་ཕེབས་ཏེ་རྒྱལ་དབང་ཀརྨ་པ་ཆོས་དབྱིངས་རྡོ་རྗེ་ཡབ་སྲས་དང་ཇོ་ཤཱཀ་རྣམ་གཉིས་སོགས་ལྷ་བླ་མ་ཐམས་ཅད་མཇལ། རྗེ་བཙུན་ཆོས་ཀྱི་རྒྱལ་མཚན་ལ་ཆོས་འབྲེལ་ཞུས། སོ་ལྔ་དྲུག་ལ་གནམ་དུ་གཤེགས། ཀརྨ་རབ་བརྟན་ནི། འོག་མིན་ཀརྨ་ན་སི་ཏུ་ཆོས་ཀྱི་རྒྱལ་མཚན་དགེ་ལེགས་དཔལ་བཟང་པོའི་ཞབས་དྲུང་དུ་ཕེབས། མཆོད་པའི་ཡོ་བྱད་བསམ་གྱིས་མི་ཁྱབ་པ་ཕུལ། གོའི་ཤྲཱིའི་ལས་ཀ་དང་དབང་ཁྲིད་མང་དུ་གནང༌། རྒྱལ་སར་བཏོན། མཚན་ཡང་ཀེན་དེང་གུའི་ཤྲཱི་ཀརྨ་རབ་བརྟན་ལྷུན་གྲུབ་དཔལ་བཟང་པོ་ཞེས་དང༌། དངོས་པོ་གནང་སྦྱིན་རྒྱ་ཆེན་བསྩལ། བསྟན་པ་སྤྱི་དང༌། སྒོས་དྭགས་བརྒྱུད་ཀྱི་བསྟན་པ་སྤེལ་དགོས་པའི་བཀོད་ཁྱབ་དུ་མ་གནང༌། དེའི་དུས་སུ་གཏེར་སྟོན་འཇའ་ཚོན་སྙིང་པོའི་ལུང་བསྟན་ཨ་མའི་ལྐོགས་ཡིག་ལས། སྣང་ཞིག་ཞེས་པའི་སྟག་འཕྲུ་ཅན་དང་ནི༔ ཞང་བློན་ཁྲ་མོའི་སྤྲུལ་པ་བེ་ཞེས་དོན་ཡོད་གཉིས༔ ཡོན་མཆོད་སྡེབས་ནས་སངས་རྒྱས་བསྟན་པ་གཤིག །ཅེས་བདུད་ལུང་ནག་པོ་ཐེམ་མེད་ནས་བསྟན་པའི་སྨར་ཁམས་ནས། བེ་རུ་སྨད་མའི་བུ་བེ་རུ་དོན་ཡོད་དུ་གྲགས་པ་དང༌། བོན་རྙིང་མའི་བླ་མ་སྣང་ཞིག་ཟླ་བ་རྒྱལ་མཚན་ཞེས་པ་གཉིས་མཆོད་ཡོན་ཟུང་འབྲེལ་བྱས་ནས་ནང་བསྡེབས་ཏེ་ཆབ་མདོ། བྲག་ཡབ། སྡེ་དགེ་སོགས་མདོ་ཁམས་ཀྱི་ཡུལ་ལྗོངས་ཕལ་ཆེར་རྡོ་སྒྱོགས་ཀྱི་འཕྲུལ་འཁོར་བཅས་ནས་མངའ་འོག་ཏུ་བཙུད་པ་དང་ཡུལ་ནས་བཏོན། སྣང་ཞིག་བོན་པོའི་ངག་ལ་ཉན་ནས་སྤྱིར་སངས་རྒྱས་ཀྱི་བསྟན་པ་དང༌། དགོས་སུ་དགེ་ལྡན་པར་སྡང་ཚབ་ཆེ་བར་བྱས་ཤིང༌། བླ་དགེ་སུམ་བརྒྱ་ཟིན་པ་ཙམ་བཀྲོངས། བོད་ཁམས་ཡོངས་རྫོགས་བོན་རྙིང་མར་བསྒྱུར་རྒྱུའི་རེ་བ་བྱས་རྐྱེན་རེ་ཞིག་ཁམས་ཕྱོགས་ཀྱི་ཁྲིམས་སྲིད་ཉམས་ཏེ། སྡེ་ཤོག་རེ་ལ་དཔོན་ཕྲན་རེ། ལུང་ཆུང་རེ་ལ་ཚོ་རྒན་རེ། རི་འབུར་རེ་ལ་རྫོང་ཆུང་རེ། སྡེ་ལ་དཔོན་མེད། དཔོན་ལ་ཁྲིམས་མེད། ཚོ་ཆེན་གྱི་ཚོ་ཆུང་ཟ། ཤེད་ཡོད་ཀྱི་ཤེད་མེད་བརྡུང༌། རྫིའུས་ཁ་ཆེམ་འཇོག །ཆུ་ལེན་གྱི་དགྲ་ཆས་སྤྲད་དགོས་གྱུར་པའི་སྐབས། སྐུ་འབུམ་དགོན་དུ་བེ་རུའི་དམག་སླེབས། ཡུན་རིང་འཁྲུགས་ཤིང་མཐའ་མ་འཁྱོལ་བས་ས་བཙན་བཟུང་དགོས་བྱུང་སྐབས། སྔོན་གྱི་དུས་བླ་མ་འབའ་རོམ་པའི་ཡོན་བདག་ཙི་གླུ་མཁར་བ་ལ་བེ་རུའི་མི་ལོག་བྱུང་སྐབས། ཏི་ཤྲཱི་རས་པ་འཁྲུགས་པ་བཟླུམ་ལ་བྱོན་ནས་འཁྲུགས་པ་ཟླུམ། དེར་མ་འོངས་པ་ན་སྐོར་ཞིག་བེ་རུ་སླེབས་ཡོང་བས་ད་ལྟ་བཞིན་འཐབས་པས་མི་ཐུབ་པས་ཆུ་གསུམ་འདུས་པའི་མདོ་རུ་བྲོས། ཞེས་ལུང་བསྟན་པ་བཞིན་ལྕི་གསང་རྫོང་མགོར་སྒར་བཏབ། ཉིད་ཀྱང་སྟོད་ཕྱོགས་སུ་བྱོན་ཏེ་ལྷ་ལྡན་ཇོ་བོ་རིན་པོ་ཆེ་མཇལ། གཞན་ཡང་དབུས་ཕྱོགས་ཀྱི་རྟེན་བླ་མ་མང་དུ་མཇལ་ཞིང་བཞུགས། སླར་ཡང་རབ་ལོ་བཅུ་གཅིག་ཡོས་ཟླ་བ་ལྔ་པའི་ནང་བེ་རུའི་ཐོག་དཔུང་ཚོགས་རྣམས་བཏེགས་སྐབས། འབྲུག་མདོ་ཁམས་པའི་ཕྱག་མཛོད་གོ་འཇོ་གཉེར་རྒོད་མ་དང་བཀའ་བསྒྲོས་ཏེ་སོག་དམག་གི་སྣ་དྲངས། བེ་རུ་རྒྱལ་པོ་དམག་དཔོན་མི་བརྒྱ་རྟ་བརྒྱ་དང་བཅས་པ་ཡུ་མེད་དུ་བཏང་ཞིང༌། བསྟན་འཛིན་ཆོས་རྒྱལ་གྱིས་ནང་ཆེན་གནས་དྲུག་ཁྲི་སྐོར་གྱི་ས་སྡེ་སྔར་བཞག་སོར་གནས་དགོས་པའི་ཤེ་བམ་གནང་ཆ་དཔག་མེད་མཛད། སྐད་རིགས་མི་གཅིག་པའི་སྡེ་མང་པོ་མངའ་འོག་ཏུ་བསྡུས། ཆོས་སྲིད་ནམ་མཁའ་དང་མཉམས། འདི་ལྟར་གསུངས་ཏེ། སྔར་དྲུང་པ་སི་ཏུ་རིན་པོ་ཆེས། དཔོན་འདི་ལ་ཧུར་པོ་ཧུར་པོ་ཡོང་བའི་རིགས་སུ་འདུག་ཞེས་གསུངས་མྱོང་བ། བདག་གིས་དེང་སང་སྡིག་པ་འདི་ལྟ་བུ་བྱེད་པ་དེ་དགོངས་པ་རེད། ཞེས་གསུངས་པ་ཐོས་ལ་ཐུགས་དམ་ལ་མདོ་སྐལ་གཉིས་བཞེངས། ལུགས་གཉིས་ཀྱི་མཛད་པ་ནང་ཆེན་པའི་བླ་རབས་དང་རྒྱལ་རབས་ལ་འདི་སྟོབས་ཆེ་བར་གྲགས། དགུང་ལོ་ཞེ་ལྔ་ལ་གནམ་དུ་གཤེགས། དེའི་སྲས་བཀྲ་ཤིས་དར་མ་བསྟན་སྲུང་སྟེ། འཇིག་རྟེན་པའི་བྱ་བ་ཆེད་དུ་མི་བསྒྲུབ་དགེ་བའི་ཐུགས་དང་ལྡན། བློ་གྲོས་རྒྱལ་པོའི་སྲས་ནོར་བུ་སྟེ་དེའང་སྲིད་ཁྲི་འཛིན་པ་ནི། ཡབ་གཤེགས་དུས་དགུང་གྲངས་དགུ་སོན་པ་ཙམ་ཡིན་པས་ནང་ཆེན་ཨ་ཉོག་རྒྱལ་པོར་གྲགས། འདི་དུས་རྒྱལ་བ་ལྔ་པ་ཆེན་པོ་དང༌། སོག་རྒྱལ་གུ་ཤྲཱི་ཧན་མཆོད་ཡོན་གྱིས་བོད་དབང་བསྒྱུར་སྐབས་ཡིན་སྟབས། དབུས་སུ་མཇལ་བཅར་ཞུས་པའི་ཐོག་བདག་རྐྱེན་ལེགས་པོ་གནང་ཞིང༌། བློ་བཟང་དབང་གྲགས་ཞེས་པའི་མཚན་དང༌། བྱང་ཕྱོགས་དབང་བསྒྱུར་རྒྱལ་པོའི་སྐུ་ཞབས་ཞེས་པའི་ཆོ་ལོ་སྩལ། ཕོ་བྲང་པོ་ཏ་ལ་གསར་བཞེངས་ལ་སྲི་ཞུ་བསྟབ། རིས་མེད་ཀྱི་བསྟན་འཛིན་མཆོག་རྣམས་ལས་ཆོས་ཀྱི་བདུད་རྩི་བཞེས། ཁྱད་པར་འབྲི་གུང་པ་ལྷོ་དཀོན་མཆོག་ཕྲིན་ལས་རྣམ་རྒྱལ་དབུ་བླར་སྤྱན་དྲངས། མཚན་མི་དབང་རིན་ཆེན་རྣམ་རྒྱལ་དུ་གསོལ། ལྷོ་མི་གཡེལ་ཕུག་གི་གདན་ས་བཞེངས། གནམ་ཆོས་མི་འགྱུར་རྡོ་རྗེ། ཀརྨ་ཆགས་མེད་ལྷན་དུ་གསང་རྫོང་ནོར་བུ་ལྷ་རྩེརགདན་དྲངས་ཤིང་གཙུག་ཏུ་བཀུར། རིས་མེད་ཀྱི་བསྟན་དགོན་འཛིན་སྐྱོང་སྤེལ་བ་དང༌། མངའ་འབངས་བྱམས་བརྩེའི་བསྐྱངས་བ་སོགས། མདོར་ན་ཆོས་རྒྱལ་འདི་ཉིད་ལུགས་གཉིས་ཀྱི་མཛད་ཁྱབ་ཆེ་བར་མངོན། མཐར་དགུང་གྲངས་ཞེ་བདུན་ལ་སྐུ་གཤེགས་ཤིང་རྟེན་སྐུ་དང་རིང་བསྲེལ་ཚེམས་ལ་དུང་དཀར་སོགས་བྱོན། ཆོས་རྒྱལ་དེ་གཉིས་ཀྱིས་བེར་བཟའ་ཁབ་ཏུ་བཞེས་པའི་སྲས་དཀོན་མཆོག་རྒྱལ་པོ་ཞེས། ཆུང་ནས་ཐུགས་སྒམ་ཞིང་ལུགས་གཉིས་ཀྱི་སྤྱོད་བཟང་ཡ་རབ་དྲ་མའི་ཕུལ་དུ་སོན། ལང་ཚོ་དར་ལ་བབ་ནས་དཔའ་རྩལ་སྟོབས་ཤུགས་འགྲན་ཟླ་བྲལ་བར་གྱུར། དེའི་བཙུན་མོ་གཉིས་བླངས་པའི་ཆེན་མ་གསེར་བཟའ་ལ་སྲས་གཉིས་ཡོད་པའི་ཆེ་བ་ཚེ་དབང་ཕྲིན་ལས་མཐར་ཕྱིན། ཆུང་དཔལ་ལྡེའུ་བཙན་ཞེས་པ་དང༌། ཆུན་མ་ཚངས་གསར་ཀརྨ་ངང་དར་གྱི་སྲས་མོ་བསམ་ལུ་ཁབ་ཏུ་བཞེས་པའི་སྲས་རྡོ་རྗེ་ཚེ་དབང་དང་སྲས་མོ་གཅིག་འཁྲུངས། དེའི་དུས་སུ་རྒྱས་དམ་མེ་ཉག་ཟེར་བའི་སྡང་དགྲ་འདུལ་ཕྱིར་སོག་རྒྱལ་པོ་ཧན་གྱི་སྲས། བ་དུར་ཐ་ཇིས་གཙོས་བོད་སོག་གི་དམག་མདོ་སྨད་ཕྱོགས་སུ་བྱོན་གདོང༌། དཀོན་མཆོག་རྒྱལ་དང་སྡོམ་པ་འབུམ་ཚ། ཤེ་ཁེ་ནག་འཛི་སོགས་ཀྱི་གཙོས་དམག་དཔུང་བཅས་ཆས་ཏེ། བསྟན་དགྲ་ངོ་མ་ནང་ཆེན་དམག་གིས་བཏུལ་བའི་བདག་རྐྱེན་དུ་གཞུང་ས་རྩེ་ཤོད་བྱང་ཕྱོགས་རྒྱལ་པོར་བཅས་པས་བཀའ་རྟེན་འཇའ་ས་སྔར་ལས་ཁྱད་འཕགས་གནང་བ་བཅས་སྙན་གྲགས་ཤིན་ཏུ་རྒྱས། འོན་ཀྱང་གསང་རྫོང་དུ་མེ་དགྲའི་གནོད་པར་བརྟེན་སྐུ་ངོས་རྣམས་དང་ལས་ཟོག་རྟེན་གསུམ་ཤེ་བམ་སོགས་འགང་ཆེན་རིགས་ཁ་ཤས་ལས། རྫོང་དང་རྒྱུ་ནོར་ཐམས་ཅད་ཞུགས་ཀྱིས་ཟིན། མེ་ཡི་མ་གོས་པ་ཐུབ་པ་མེ་ཐུབ་མ། ཏྲེ་བོའི་ཁྲི་དམར། ཕྱག་རྔ་གསང་བ་ལྷ་འབོད། རྗེ་བཙུན་མི་ལའི་མགུར་འབུམ། གསེར་ཟའི་ཇོ་འཁོར་རྣམས་ལོ་རབས་ལྔ་བཅུ་པའི་སྐབས་སུའང་དངོས་སུ་མཇལ་རྒྱུ་ཡོད། དེ་ནས་རེ་ཞིག་སྦྲ་གུར་ལ་བསྟན་ནས་ཕྱིས་གཡེར་ཆེན་སྒར་དུ་གཏན་ཆགས་པས་ནང་ཆེན་སྒར་ཞེས་ཐོགས། དཀོན་མཆོག་རྒྱལ་པོའི་སྲས་ཚེ་དབང་མཐར་ཕྱིན། ཨོ་རོད་རྒྱལ་པོའི་སྲས་བསྟན་འཛིན་དྭའི་ཆིང་ཁོང་གི་མདུན་སར་ཕེབས། ཨུ་ཇིང་ཐེ་ཇི་ཆོ་ལོ་དང་འཇའ་ས་ཤེ་བམ་སྩལ་ནས་མདོ་སྟོད་ཡུལ་ཁམས་སྤྱིའི་རྗེ་བོར་ལུང་བབས། དེ་རྗེས་ལྷ་ལྡན་གཙོས་དབུས་ཕྱོགས་ཀྱི་རྟེན་མཇལ་བར་བྱོན། སྐྱབས་མགོན་སྐལ་བཟང་རྒྱ་མཚོ་དང༌། མི་དབང་བསོད་ནམས་སྟོབས་རྒྱལ། བཀའ་མདའ་རྩིས་དྲུང་སོགས་མཇལ། དངོས་པོའི་འབུལ་ནོད་གྱ་ནོམ་པ་བགྱིས། བློ་བཟང་དཔལ་འབར་གྱི་ཆོ་ལོ་དང་བཅས། ཤེལ་བམ་སྔ་ཕྱི་ལེ་ཚན་རྣམས་ཀྱི་རྒྱབ་གནོན་གནང༌། ཁམས་པ་ངག་དབང་ཀུན་དགའ་བསྟན་འཛིན་གྱིས་རྗེས་སུ་བཟུང་ཞིང་ཡང་ཟབ་ཚེས་བཅུའི་སྒྲུབ་ཆེན་གྱི་ཡོན་བདག་གཞི་ལེན་གྱི་གཡེར་ཆེན་སྒར་དང༌། རྫ་བ་རུ་བ་སྒར་སོགས་ལ་འཛུགས་པའི་མཐུན་སྦྱོར་མཛད་ཅིང༌། རྗེ་བླ་མས་རཏྣའི་གཏེར་བྱོན་གུ་རུའི་སྐུ་ཚབ། མཚན་བརྒྱད་ཞལ་ཐང་བརྒྱད་གུ་རུའི་རྣམ་ཐར་ཐང་སྐུ་དགུ་མནབ་བེར་སོགས་བསྩལ་ནས། མ་འོངས་པར་ཚེས་བཅུ་འཛུགས་པའི་ལུང་བསྟན་གནང༌། མཆེད་ཟླ་ཆུང་བ་རྡོ་རྗེ་ཚེ་དབང་སྲུང༌། རྒྱལ་རབས་བཅོ་བརྒྱད་ཀྱི་དུས་སུ་མཆིལ་སྐེ་ལ་སྒར་ས་བཏབ། གུ་རུས་དེ་སྐབས། བོད་ཡུལ་ཧོར་གྱི་དབང་དུ་བྱེད༔ ཅེས་ལུང་བསྟན་པ་ལྟར། སྔ་མ་སོག་པོས་བོད་ཀྱི་བདག་པོ་བྱས་པ་དང་ཧོར་དང་སོག་པོ་དོན་མཚུངས་པས། ལྷག་པར་སོག་མན་ཇུའི་རིགས་ཀྱི་རྒྱལ་པོ་ཤུན་རྩིས་རྒྱ་ནག་དང་སོགས་པོ་ཁ་ཇུ་ར་དུ་ཀར་སོགས། ཧོར་ཁ་ཐོ་གོར་གྱིས་མཚན་སོག་པོའི་ཡུལ་གླིང་ཐམས་ཅད་མངའ་འོག་ཏུ་བཙུད་ནས་ལོ་དགུ་ཙམ་ལོན་པ་ན། རང་ཅག་བོད་ཡུལ་པ་གསན་ཏེ། ཤུན་ཙིའི་སྲས་གཡུང་ཏྲིང་ཁྲི་ལོ་གཉིས་ཐོག་ཏུ་ཡུ་ནན་ཐི་ཐུའི་དམག་དང་མི་སྡེ་སྤྱི་ཁྱབ་ཀྱི་དཔོན་པོ། ཧོ་ཏཱ་ལོ་ཡན་དམག་ཁྲི་ཕྲག་བཅས་བཏང་ནས། སོག་པོའི་སྡེ་བོད་ཁམས་ཀྱི་སྐྱེ་བོ་སེམས་ཆུང་ལ་བསམ་པ་བཟང་བ་ཐམས་ཅད་མངའ་འོག་ཏུ་བསྡུས། སྙིང་དགྲ་ལ་ཞེ་ངན་པ་རྣམས་ཁྲིམས་ལ་སྦྱོར་གསུངས་པའི་ལུང་བབས་པས། ཟུར་ཆག་ཏུ་མཐིང་གདུག་དཱ་ལོ་ཡན་ཞེས་པ་ ་་་་རབ་ལོ་བཅུ་གཉིས་ནང༌། འབྲུག་ལོར་ཆབ་མདོར་བྱོན་ནས་མདོ་ཁམས་སྒང་དྲུག་གི་དགོན་ཚང་སྒེར་བཙན་ཐམས་ཅད་དེར་བསྡུས། ནང་ཆེན་རྒྱལ་པོ་རྡོ་རྗེ་ཚེ་དབང་ཤོག་གསུངས་པའི་ཀོ་ཀི་སླེབས་ཀྱང་ཟླ་བ་གསུམ་རིངས་མ་སོང༌། དེ་ནས་ཨ་ཤག་རྡོར་མགོན་དྲུང་འཁོར་མང་ཙམ་བཅས་བཏང་ནས། ཁོས་ལོ་རྒྱུས་ཀྱི་སྙན་སྒྲོན་ཞུས་ཤིང༌། རྒྱ་དཔོན་ནས་གཞན་དང་མི་འདྲ་བའི་གཟིགས་སྐྱོང་ཀྱིས་ཆིང་ཧུའི་མཚན་གསོལ་ཞིང༌། སྔོན་ཆོད་ལས་མ་གཡོས་པའི་ས་སྡེ་སོ་སོར་གནས་ཆོག་རྒྱུ་དང༌། བཀའ་རྟེན་ཤེ་བམ། དྭངས་ཤེལ་གྱི་ཏོག་བཅས་གནང༌། མངའ་འོག་གི་ཤོག་ཆེན་བཅོ་བརྒྱད། ཤོག་ཕྲན་བཅོ་ལྔ་གྲགས་པའི་དཔོན་པོ་རྣམས་ལ་བེ་ཧུ་དང་བེ་ཅང་གི་ཆོ་ལོ་ཏོག་དཀར་སེར་ཁེར་ཁེམ། སོ་སོའི་འཆང་རྒྱུ་ཁྲིམས་ཡིག་གོང་སྔོན་སྤར་མ་རེ་བཙལ་དཔྱ་ཁྲལ་སྔར་སོག་པོ་ལ་དགོས་པའི་རྟ་ནོར་ལུག་གསུམ་གྱི་མི་གྲངས་བཅས་མཚོ་སྔོན་པོའི་ཁ་ནས་འོང་བའི་སོག་སྡེ་ཆོས་འཁོར། རྡོ་རག་ཇུ་མུར་བ་ཡན་སོགས་མགོ་བཏགས། སོག་རུ་མའང་སྔར་བཞིན་གནས་དགོས་པའི་རྒྱབ་གནོན་བཙལ། དེར་མ་ཟད་དེམ་ཆུ་ཉེར་ལྔ། ཨ་ཁྲོ་ཚོ་བདུན། རྒྱ་སྡེ་ཁག་གསུམ། ཨ་རིག་བཅས་ཀྱི་སྤྱི་དཔོན་ལ་གང་བསྐོ་ཁྱོད་བོད་ཀྱི་དཔོན་པོ་རྣམས་གྲོས་གྱིས་གསུངས་པར། དཔོན་ཆེན་རྣམས་ཀྱི་སོ་སོ་ནས་འདུག་མོས་ཆེ་ཡང༌། ཨ་ཤག་རྡོར་མགོན་གྱིས་སྤྱི་རྗེ་ཉི་མའི་གོང་ཁེབས་ཀྱི་ཤེ་བམ་འཇའ་ས་དྲིལ་བསྒྲགས་བྱས་པས་སུས་ཀྱང་བྱ་ཐབས་བྲལ་ཞིང་མངའ་འོག་ཏུ་ཆུད། དེ་དག་གི་མིང་རག་ཙམ་སྨོས་ན། གྲཱའུ་མེར་རྒན་ཐཱ་ཇེ་བེ་ཧུ་ཅང༌། དགེ་རྒྱལ་སྨད་མ་བེ་ཧུ་ཅང༌། རོང་པོ་བེ་ཧུ་ཅང༌། རག་ཤུལ་བེ་ཧུ་ཅང་ཏེ་དཔོན་ཆེན་ཁག་བཞི། ཟུར་མང་བེ་ཧུ་ཅང༌། ར་སྡ་བེ་ཧུ་ཅང༌། བུ་ཆེན་བེ་ཧུ་ཅང༌། ཁྲི་འདུ་བེ་ཧུ་ཅང༌། ཞེའུ་བེ་ཧུ་ཅང༌། ཉ་མཚོ་བེ་ཧུ་ཅང༌། གུ་ཚ་བེ་ཧུ་ཅང༌། སུ་རུག་བེ་ཧུ་ཅང༌། འབྲོང་སྟོད་བེ་ཧུ་ཅང༌། འབྲོང་སྨད་བེ་ཧུ་ཅང༌། དགེ་རྒྱལ་སྟོད་མ་བེ་ཧུ་ཅང༌། བར་མ་བེ་ཧུ་ཅང༌། ཡག་ར་བེ་ཧུ་ཅང༌། བེ་རུ་ཆུང་ཤུལ་བེ་ཧུ་ཅང༌། ཡུལ་ཤོས་བེ་ཧུ་ཅང༌། ཆུ་ལེན་ཏོལ་ཏོའི་བེ་ཅང༌། དུམ་པ་བེ་ཅང༌། གྲྭའུ་ནན་ཤལ་བེ་ཅང༌། ཧར་ཤུལ་བེ་ཅང༌། རྒྱལ་བཟང་བེ་ཅང༌། དགེ་འདུས་བེ་ཅང་སོགས་དེམ་ཆུ་ཉེར་ལྔ། ཨ་འཁྲོ་བེ་ཧུ་ཅང༌། ཨ་ཡུང་བེ་ཅང༌། ཨ་ཤག་བེ་ཅང༌། རླེས་ཡུ་བེ་ཅང༌། ཡེ་རྒྱལ་བེ་ཅང༌། ལྷ་རྩེ་བེ་ཅང༌། བསྟན་པ་བེ་ཅང་བཅས་ཨ་འཁྲོ་ཚོ་བདུན། མོང་གོ་ཇིན་བེ་ཧུ་ཅང༌། ཡང་ཤར་བེ་ཧུ། ཁང་ན་བེ་ཅང་བཅས་རྒྱ་སྡེ་ཁག་གསུམ། ཁྱོན་སྡོམ་ཚོ་པ་སུམ་ཅུ་སོ་ལྔ་ཞེས་གྲགས། སྔར་ཡང་ཤར་ཁ་ན་གཅིག་ཏུ་བགྲངས་ཤིང༌། ཨ་རིག་བརྩིས་པའི་རྒྱ་སྡེ་ཁག་གསུམ་ཟེར་སྐད་ལ། ཕྱིས་ཨ་རིག་ཟི་ལིང་གི་ཉེ་སར་ཡོད་ཅིང་ས་ཐག་རིང་བས་བདག་མ་ཐོབ་ཀྱང༌། ཁོང་ཚོས་ངེད་ནང་ཆེན་རྡོ་རྗེ་ཚེ་དབང་གི་མངའ་འོག་ཡིན་ཟེར་སྐད་ཐོས་སོ། །དེའང་ཉི་ཤུ་རྩ་ལྔའི་ཤོག་ནས་ལབ་དང་སྐྱོ་བྲག་གོང་མའི་སྐུ་རིམ་དགོན་ཡིན་པས་བརྩི་རྒྱུ་མེད་པ་དང༌། ཤོག་ཆེན་བཅོ་བརྒྱད་ཀྱི་བེ་ཧུ་ཁག་བཞི་དང༌། བེ་ཅང་ཉེར་ལྔའི་གྲྭར་ཚངས་གསར་དང༌། རྟ་རྣ་བ་གཉིས་བརྩི་རྒྱུ་མེད་པ་ཆིང་ཇ་གོ་ཆེ་ཚྭོ་དཱ་ལོ་ཡན་ནས་བཅད་པ་རེད། ས་མུ་ཆོད་མཚམས་ནི་ཉེར་ལྔའི་ས་མཚམས་ཤར་ནས་འདན་ཁྲ་བོ་ལ། ལྷོ་ནས་ཇོ་ལ་བརྩས་ནག་པོ། ནུབ་ནས་སོག་ཕ་ཝང་གཡང་འཛོམ། བྱང་ནས་མཚོ་སྔོན་པོ་ཚུན་ཡིན། རི་ཆེ་ནང་ཆེན་ས་མཚམས་འཛི་གཡག་ནག་འཕྲང༌། དཔག་ཤོད་ས་མཚམས་ལྕགས་ཟམ་ཁ། རག་ཤུལ་ནང་ཆེན་ས་མཚམས་རྩི་ཆུ། ཟུར་མང་ནང་ཆེན་ས་མཚམས་རྡོ་དགོན། དགེ་རྒྱས་ཆུ་མིག་མར་ཁུ་བཅས་ཡིན། སྤྱིར་མི་དབང་རྡོ་རྗེ་ཚེ་དབང་འདི་ཉིད་སྨྲ་བ་ཉུང་ཞིང་བརྗིད་ཆེ་བ། ཐུགས་ཟབ་བརླིངས་གཏིང་མི་དཔོག་པར་བཞུགས། མཛད་ཚུལ་ལའང་ཁྱམས་གཤིས་བྲིས་མཁན་བརྒྱ་ནས་བཀའ་འགྱུར་དངུལ་བྲིས་དང་བསྟན་འགྱུར། མཁས་གྲུབ་བླ་མ་མང་པོའི་གསུངས་སོགས་པོ་སྟི་འབུམ་ཕྲག་ལྷག་ཙམ་བཞེངས། གཅེན་པོ་ཐའི་ཇིའི་གསེར་སྡོང༌། ཙན་དན་གྱི་གུ་རུ་མཚན་བརྒྱད། རྩ་བའི་བླ་མ་ལྷོ་རིན་པོ་ཆེའི་འཁྲུངས་རབས། གསེར་ཟངས་གནས་བརྟན་བཅུ་དྲུག །ཚེ་དཔག་སྣང་བརྙན་བརྒྱ་ཕྲག །བདེ་གཤེགས་སོ་ལྔ་སོགས་རྟེན་བཞེངས་མཐའ་ཡས། གོང་མའི་ཕྲིན་ལས་པ་ཟི་ལིང་རྡོ་རྒན་ཨམྦྷན་ནས་ཡང་བསྐྱར་དུ་ནང་ཆེན་ཆིང་ཧུ་རྡོ་རྗེ་ཚེ་དབང་ཞེས་བོད་སྐྱོང་མདོ་ཁམས་ཆོལ་ཁའི་རྗེ་བོར་དྲིལ་བསྒྲགས་མཛད་པས་སྟོབས་དཔལ་ཆེར་རྒྱས། དེའི་བཙུན་མོ་གདོང་བཟའཆེ་ཆུང་གཉིས་བསུས་པར་སྲས་གསུམ་བྱུང་བར་གྲགས། སྲས་ཆེ་བ་དཀོན་མཆོག་དཔལ་འབྱོར་ཚེ་བརྟན་ཞེས་དགུང་ལོ་བཅུ་དྲུག་ནས་ཁྲིམས་སྲིད་འཛིན། ཤར་ཕྱོགས་གོང་མ་ཆེན་པོའི་ལུང་གི་ཆིང་ཧུ་དཀོན་མཆོག་དཔལ་འབྱོར་ཝང་ཚེ་བརྟན་ཞེས་པའི་མཚན་དང་ཤེས་འཕྲུ་བཅས་གནང་ཞིང་བཀུར་བཟོས་མཐོ་བར་བསྔགས། སྒམ་པོ་པ་བཟང་པོ་རྡོ་རྗེ། འབྲུག་པ་མི་ཕམ་ཕྲིན་ལས་ཤིང་རྟ་རྣམས་སྤྱན་དྲངས་ཤིང་བསྙེན་བཀུར་དཔེ་མེད་མཛད། ཡུལ་སྡེ་བྱམས་པས་སྐྱོང་བ་སོགས་ལུགས་གཉིས་དགེ་བར་བསྐྱང༌། དེ་སྲས་རག་བཟའ་ལ་སྲས་གསུམ་བྱུང་བའི་ཆེ་བ་དོན་གྲུབ་ཚེ་བརྟན་དགུང་གྲངས་བཅུ་གསུམ་དུ་ཟི་ལིང་ཨཾ་བྷན་མཇལ་དུ་བྱོན། ཆིང་ཧུ་དོན་གྲུབ་ཚེ་བརྟན་ཞེས་ཏོག་ཁེར་གམ་སྩལ། རྒྱ་དང་གོརྵ་འཁྲུགས་སྐབས་གོང་མའི་ལས་དོན་རྒྱ་ཆེར་འགྲུབ། དེའི་སྲས་དགེ་རྒྱལ་བེ་རིའི་དཔོན་མོ་ལ་འཁྲུངས་པ་བསོད་ནམས་ཆོས་འཕེལ་ཞེས་ཆུང་ནས་ཆོས་ལ་ཐུགས་གཞོལ། དབུས་སུ་རྒྱལ་བ་ལུང་རྟོགས་རྒྱ་མཚོ་མཇལ། འཇའ་ས་ཤེ་བམ་བསྩལ་ཅིང་སྣེ་ལེན་བཟང་པོ་མཛད། གོང་མའི་ཕྱིང་སང་ཇ་གོ་ཆེ་ནང་སྒར་དུ་བྱོན་ཏེ་ཏོག་ཁེལ་གམ་བཅས་གོ་གནས་ཕུལ། མངའ་འབངས་དགེ་བཅུའི་ཁྲིམས་ལ་བཀོད། དེའི་སྲས་གྲྭའུ་དཔོན་མོར་འཁྲུངས་པ་མི་དབང་དཀོན་མཆོག་ལྷ་རྒྱལ་ཞེས་ཐུགས་རྗེ་ཆེན་པོའི་སྤྲུལ་པར་གྲགས་ཤིང་ཡིག་དྲུག་དུང་ཕྱུར་ལྔ་སོགས་བཟླས་པ་གྲངས་མང་ཐེམས། རྒྱལ་ཁམས་རི་རྒྱ་ཀླུང་རྒྱ་བསྡམས། ཞི་དྲག་གི་སྒོ་ནས་བདེ་འཇག་མཛད། འདིའི་གཅེན་པོ་འཁྲུལ་ཞིག་མཆོག་སྤྲུལ་དང༌། གཅུང་ཨ་ལྡེའུ་སྤྲུལ་པ་ཆོས་རྒྱལ་དོན་འགྲུབ་ལྷ་རྒྱལ་བཅས་བྱོན་ཞིང་ཚེས་བཅུ་དགོན་དབུ་ཡི་མཆོད་གནས་སུ་གྱུར། འདིའི་རྒྱ་རབས་གོང་མ་རྣམས་ཀྱི་དུས་དབུ་བླ་ཁག་བཞི་ཞེས་བྱུང་བའང༌། ལྷོ་དཀོན་མཆོག་ཕྲིན་ལས་རྣམ་རྒྱལ། མགར་བསྟན་འཛིན་ཕུན་ཚོགས། འཁྲུལ་ཞིག་ཕྲིན་ལས་རྒྱ་མཚོ། བྱམས་མེ་ཀརྨ་བསམ་གཏན་བཅས་ལ་དགོན་སྡེ་རེ་བྱུང་བའི་སྐྱེ་ཕྲེང་རིམ་བྱོན་དབུ་བླར་ཕེབས་ཤིང༌། སླར་འདི་ཉིད་ཀྱི་དབུ་བླར་གྲུབ་དབང་ཚོགས་གཉིས་རིན་པོ་ཆེ་བྱོན། འདི་པའི་སྐུ་ཚེའི་སྟོད་ཆར་རྫ་དཀར་མོ་སྙིང་ཐང་སུ་ཆིང་ཇར་གོ་ཆེ་ཏྭ་དྭ་ལོ་ཡན། ཙང་ཡན་ཚོ་དྭ་ཡན། སྲི་ཀོ་ཡན། བློ་བཟང་ལོ་ཙཱ་བཅས་བབས་ནས། དེམ་ཆི་ཉེར་ལྔ། ཨ་ཁྲོ་ཚོ་བདུན། རྒྱ་སྡེ་ཁག་གསུམ་བཅས་ཚོ་ཁག་སོ་ལྔ། ནང་ཆེན་ཆིང་ཧུ་བེ་ཧུ་བཅས་ཆོལ་སྒར་བསྡུས་ནས་ཚོགས་འདུ་ཞིབ་རྒྱས་སུ་གནང༌། དེ་ལྟའི་མི་དབང་དཀོན་མཆོག་ལྷ་རྒྱལ་གྱི་སྲས་གུ་ཚའི་དཔོན་མོར་འཁྲུངས་པ་ཆིང་ཧུ་དབང་དྲག་ཚེ་རིང་ལྷ་རྒྱལ་དུ་འབོད་པ་བྱོན། འདི་པའི་སྐུ་ཚེ་རིལ་པོར་ཆོས་ལ་ནན་ཏན་མཛད་ནས་བཞུགས་པ་ལས། སྐུ་ཚེའི་སྨད་ལ་སྒོམ་སྡེ་ཉམས་སད་པའི་ཚོད་དཔག་ཀྱིས་དེབ་ཅི་ཉེར་ལྔའི་ས་ཁུལ་ལེན་རྩིས་ཀྱིས་བོད་གཞུང་གིས་དྲག་པོའི་དཔུང་འཇུག་རབ་རྒྱལ་ཆུ་སྤྲེལ་ལོར་བྱས་ཏེ་སྐྱེ་རྒུ་མདོ་བར་བཀབ་ཀྱང༌། སླར་ཟི་དམག་བསྐུལ་རྐྱེན་བོད་དམག་ཕམ་ཉེས་གྱུར་ནས་སླར་ལོག །རྒྱལ་པོ་འདི་ཉིད་བཞུགས་ཚུལ་མཁས་པས་གནོད་སྐྱོན་མ་བྱུང་བ་ཞེས་ཐུགས་སྒམ་པའི་ཚད་དུ་སོན། ཐུགས་སྙིང་རྗེ་ཆེ་བས་ཆུ་བྱ་ངང་པ་སོགས་ཀྱིས་ཁྲིམས་ཞུས་བྱུང་བར་གྲགས། སྐུ་མཆེད་གྲུབ་དབང་ཚོགས་གཉིས་མཁས་བཙུན་བཟང་པོའི་རྣམ་ཐར་འཛིན་ཞིང་ཚེས་བཅུ་དགོན་དུ་གཙུག་ལག་གསར་བསྐྲུན་མཛད། རྒྱལ་པོ་འདིའི་སྲས་ར་ཟླ་གཟར་བཀྲ་ཤིས་ཚེ་དབང་རྡོ་རྗེ་རབ་ཚེས་ལྕགས་ཕག་ལོར་སྐུ་འཁྲུངས། མཆེད་ཚངས་དབྱངས་མཆོག་སྤྲུལ། ལྷོ་ཆགས་མེད། ལྕམ་སྲིང་རྣམ་སྲས་དབང་མོ་རྣམས་བྱུང་ཉིད་སྐུ་ཆུང་ངུ་ནས་འཇམ་དབྱངས་བསྙེན་པ་དུང་ཕྱུར་གསུམ་འགྲུབ། བཙུན་མོ་སྡེ་དགེའི་སྲས་མོ་གཡུ་སྒྲོན་གྱིས་སྒྲོལ་མ་ཉེར་གཅིག་གིས་རྟེན་བརྟེན་པ་བཞེངས། སྲས་སྐུ་མཆེད་གསུམ། ལྕམ་སྲིང་གཉིས་བྱོན། ཡབ་རྒྱལ་རྒན་རབ་རྒྱལ་ས་སྤྲེལ་ལ་གཤེགས། འཕྲོས་ཡུམ་སྲས་རྣམས་ཞལ་འཛོམ་དགེ་བར་བཞུགས་སོ། །

༈ སྤྱི་དོན་གསུམ་པ་དོན་བརྒྱུད་བྱེ་བྲག་དུ་གྱུར་པའི་གསེར་ཕྲེང་གིས་ཟུར་བརྒྱན་ནས་བཤད་པ་ལ་རི་དགོན་བཅོ་བརྒྱད་དུ་གྲགས་པ་ལས། དང་པོ་ཉིན་དགོན་པ་ནི། དེའང་གསང་བ་ལུས་མེད་རྡོ་རྗེའི་སློབ་ཆེན་དབང་དང་རབ་གནས་ཀྱི་བཀའ་བབས་རྒྱལ་སྲས་ལྷ་པ་ཚུལ་ཁྲིམས་སེང་གེ་ནི། སྐུ་འཁྲུངས་ཡུལ་ཟླ་བརྒྱུད་ཀྱེ་ཡེ་རུས་ཆེན་སྨུག་པོ་གདོང༌། གདོང་ལ་རིགས་བཞི་ལས་འཛོད་དུ་ཉ་ཡག །ཡབ་རྡོ་རྗེ་རྒྱལ་པོའི་སྲས་སུ་འཁྲུངས། སྤྱན་སྔ་ལུས་མེད་རྡོ་རྗེ་ཀྱེ་ལ་ཁར་ཕེབས་སྐབས་མཇལ་བས། ལྷ་རྗེ་ཁྱོད་ཐུགས་རབ་ཆེ་བས་ང་ཡི་ཆགས་ཕྱི་བ་གྱིས་གསུངས་པས་དད་པ་སྐྱེས། རིན་པོ་ཆེའི་དབུ་མཛད་མཁན་སློབ་གྲངས་ཚང་བའི་དབུས་་རབ་བྱུང་བསྙེན་པར་རྫོགས། མཚན་ཚུལ་ཁྲིམས་སེང་གེ་དགྱེས་རྡོར་གྱི་དབང་ཞུས་སྐབས་གསང་མཚན་བདེ་བའི་རྡོ་རྗེར་གསོལ། སངས་རྒྱས་རས་ཆེན་ནས་བརྒྱུད་པའི་ཆོས་དྲུག་ཕྱག་ཆེན་རྣམས་ཉམས་འོག་ཏུ་ཆུད་པར་མཛད། དབུས་སུ་བྱོན་ནས་རྔོག་དང་ཤངས་པའི་བཀའ་བརྒྱུད་རྣམས་ལ་གཏུག་ཅིང་རྒྱུད་སྡེ་ནི་གུ་ཆོས་དྲུག་སོགས་གསན། རྟོགས་ལྡན་རྣལ་འབྱོར་རས་ཆུང་སོགས་དབུས་གཙང་བླ་མ་རྣམས་ལས་སྦྱོར་དྲུག་ལམ་འབྲས་རྫོགས་ཆེན་རྣམས་ཞུས་ནས་ཉམས་རྟོགས་དཔེ་མེད་པ་འཁྲུངས། སྐུ་འབུམ་དུ་ཕྱི་རྟེན་ཇོ་སྐུ། ནང་རྟེན་གསེར་འབུམ་ལྷ་ལུང་འབུམ་ཆུངསོགས་བཞེངས་པའི་བདག་རྐྱེན་མཛད། ལྷ་བྲིས་སྐབས་ཡེ་ཤེས་མཁའ་འགྲོས་མཚལ་ཕུལ། དབོན་བྱང་གཞོན་པ་ནང་སོ་ཆེན་མོའི་ཁྲི་བཀོད་མཛད། གྲུབ་ཐོབ་གླིང་རས་པའི་སྤྲུལ་པར་གྲགས། ཉིན་དགོན། ཀིལ་སྣ། རྡོ་གོང༌། ཡེ་གང༌། སྟག་རྩེ། མངྒའི་ཕུག་ལྷ་བཟང༌། ཀོ་མཛོ་བྲག་སོགས་ལ་རི་འགྲིམས་མཛད། འབྲི་ཟླ་བར་གྱི་འགྲོ་རྣམས་སྨིན་གྲོལ་ལ་བཀོད། བདུན་ཅུ་དོན་བདུན་ལ་ཉིན་དགོན་དུ་སྐུ་གཤེགས་གདུང་རིང་བསྲེལ་གྱི་ཕུང་པོར་གྱུར། སློབ་མ་དབོན་ཚུལ་ཡེ་བ། ཚུལ་བྱང་བ་བྱ་བྲལ་ཡེ་ཤེས་གྲགས། གྲུབ་ཐོབ་སྔོན་པོ་རས་པ་ཐུགས་རྗེ་སྐྱབས་སོགས་མང་པོ་བྱོན། གདན་ས་བ་ནི་བྱ་བྲལ་ཡེ་ཤེས་གྲགས་ཡིན། ཚུལ་བྱང་བ་ཡང་དེར་བཞུགས་ཤིང་གདན་ས་མཛད། དེ་རྗེས་ཧོར་བླ་མ་སོགས་རིམ་པར་བྱོན་རྗེས་ཤོར་ཕུ་དང་ཉ་ཡག་གཉིས་སྤོ་ལན་མཛད་པར་སྣང༌། ཤོར་སྟོད་ཀ་ཡེ་ཁར་ཉ་ཡག་ཡུལ་དགོན་བཏབ་ཅིང་ཤོར་ཕུ་ཉིན་དགོན་དུ་གཏན་ཆགས་པར་གདའ། གང་ལྟར་ཉ་ཡག་དགོན་དུ་བསྟན་དགོན་འཛིན་སྐྱོང་ཆད་མེད་བྱོན་ཀྱང་གསལ་ཆ་མ་འཚལ་རུང༌། ཕྱིས་སུ་འཇམ་སྤྲུལ་ཉི་སྤྲུལ་ཞེས་པ་བྱུང་ཞིང་ཆོས་ལུགས་ས་སྐྱ་པར་འགྱུར་བ་མ་གཏོགས་ཡུལ་འབྲོག་གཉིས་སུ་དགོན་པ་ད་ལྟ་བར་ཡོད་པ་སྟེ་ཉིན་དགོན་པའི་སྐབས་སོ། །