༈ བཅུ་བཞི་པ་སོ་རག་པ།
༈ བཅུ་བཞི་པ་སོ་རག་པ་ནི། དེའང་སོ་རག་སེང་གེ་འབུམ་པ་སྐུ་འཁྲུངས་ཡུལ་རྫ་རྒྱུད་མོ་ཐོང་ཐང་རུས་འབྲོང་པ། ཡབ་ཨ་མཆོད་ཁྲ་མོ། ཡུམ་ཉ་སྒྲོན། རྟོགས་ལྡན་གཞོན་ནུ་འབྱུང་གནས་ལས་གདམས་པའི་ཕུ་ཐག་བཅད། གྲུབ་པ་ཐོབ། མི་མ་ཡིན་མང་པོས་ཆོས་ཞུས། བླ་མས་ཁྱོད་ཀྱི་གདུལ་བྱ་ཆམ་གྱི་མགུལ་ན་ཡོད་གསུངས་པས་དེར་བྱོན་ནས་ལྕགས་ཕོ་འབྲུག་ལ་སོ་རག་གི་དགོན་བཏབ། ལྷ་ཁང་དང་བཀའ་བསྟན་འགྱུར་བཞེངས། ལོ་གསུམ་ནས་དགེ་འདུན་སུམ་བརྒྱ་དང་རས་པ་ལྔ་བཅུ་ཙམ་བྱུང༌། ལྷ་འདྲེ་མང་པོ་དམ་ལ་བཏགས། སློབ་མ་སོ་རག་མཁར་པ་ཚུལ་ཁྲིམས་འབྱུང་གནས་ཀྱི་གདན་ས་མཛད། དེ་རྗེས་སུ་སོ་རག་ཕུག་པ་ཚུལ་ཁྲིམས་གྱིས་གདན་ས་བསྐྱངས། དེ་ནས་སོ་རག་བྱ་བྲལ་བ་སྟེ་ཤིན་ཏུ་དར་རྒྱས་ཆེ་བར་བྱུང་ཞིིང་ཕྱིས་སུ་ཡུལ་འབྲོག་དགོན་གཉིས་བྱུང་སྟེ་ཡུལ་དགོན་གྱི་བླ་མ་ནི་ཡང་དབེན་མཁན་ཆེན་དུ་གྲགས་པ་འདི་ཡིན་ལ་དེ་དག་སོ་རག་པའི་སྐབས་སོ། །